1-2 Ye-hɛ-nyrɛ 'mʋ, 'plɩɩ Nyɩsʋa 'mʋ la 'ɛ nɩ dɛ mu nu, nahuon -gbo, -ɔ mɔ Nyɩsʋa a Wintɛ, ɔ nɩ la 'klɔ. 'Ke ɔ nɩ la 'o Nyɩsʋa 'hʋɩn 'mʋ. 'A -gbɛ, ɔ mɔ -wɛ Nyɩsʋa'a nɩ. 3 Nɔ- kɔ 'mʋ Nyɩsʋa naa 'le, 'ɔ nu 'ɛ nɩ dɛ. Ɛ 'de dɛ ꞊de kɔ, Nyɩsʋa bɔ nu, bɔ 'de 'le ꞊nɔ 'mʋ naa. 4 Nahuon a -gbɛ, nɔ-ɔ nahuin 'klɔ yrayrʋ -nyi, -ɔ 'nɩnɩ -wɛ 'le. 'Klɔ yrayrʋ a -gbɛ, nɔ-ɔ nahuin -nyrɛ -nyi. 5 -Nyrɛ a -gbɛ, ɛɛ 'nɩ wlɩn, 'ke 'le gbɩgbɩyrɩ -hɛyri, -ye gbɩgbɩyrɩ 'de 'klɩ kɔ, 'ke bɩ jre -nyrɛ a -gbɛ. 6 Ɛ kɔ la nahuon ꞊de. 'A 'dʋ mɔ Saan Batisɩ. Nɔ- Nyɩsʋa lee la, 7 'ke bɔ ꞊tu -nyrɛ a -gbɛ a -tɩ nahuin ye, nahuin 'mʋ Nyɩsʋa a Wintɛ ꞊wlʋ ye kuo. 8 Saan a -gbɛ, ɔ 'de la -nyrɛ a -gbɛ, kɛɛ, ɔ di la 'le ꞊le, 'ke bɔ ꞊tu la -nyrɛ a -gbɛ a -tɩ. 9 -Nyrɛ a -gbɛ, nɛ- mɔ la -tɛɛ a -nyrɛ, -ɛ di la nɔ 'klɔ ke, -ɛ die nu, nahuin 'bii 'mʋ lɛ yrii. 10 Nahuon a -gbɛ, -ɔ mɔ Nyɩsʋa a Wintɛ, 'ɛ mɔ -tɛɛ, nɔ- kɔ 'mʋ Nyɩsʋa naa 'le, 'ɔ nu 'klɔ, kɛɛ, -tɛ ɔ di la nɔ 'klɔ ke, 'klɔ ke a nahuin 'dio la yrii. 11 Ɔ di la nɔ 'a -gbɛ a dakʋ -wɔn, -ʋ mɔ -Juukʋɛ, kɛɛ, ʋ 'dio la kwa 'ble. 12 Kɛɛ, 'ke 'le ꞊nʋ -hɛyri, nahuin -ye 'blo kwa, 'plɩɩ 'ʋ kuo ꞊wlʋ ye. Nahuin a -gbɛ, -ʋ kuo ꞊wlʋ ye, ɔ -nyi ꞊nʋ 'hru, 'ke bʋ -hɛ Nyɩsʋa a 'yuo. 13 Ʋ 'de Nyɩsʋa a 'yuo -hɛ, -tɛ -tʋnahuon, ɔɔ nu, 'ɔɔ 'a bu a 'yu 'mʋ 'ya. Kɛɛ, Nyɩsʋa a -gbɛ, nɔ-ɔ nɩ, -ɔ -nyi ꞊nʋ 'klɔ yrayrʋ. 14 Nahuon a -gbɛ, -ɔ mɔ Nyɩsʋa a Wintɛ, ɔ -hɛ -tʋnahuon, 'ɔ 'ti la nɔ -a mʋ -gbahlɔn, ꞊a 'ye 'a -tɩ a 'yi'bʋbʋa, -ɛ mɔ -tɩ a 'yi'bʋbʋa ꞊nʋ, Nyɩsʋa -nyi 'a 'Yuu -do. 'Mʋnʋɛlɛ kɔ wɔlɩ a yeyriilɛ, kɔ -tɩ a -tɛɛ, nɩ- 'yii la 'le ꞊nɔ 'mʋ. 15 Nahuon a -gbɛ, nɔ- kɔ -tɩ Saan ꞊tu la 'ke 'o nahuin ye. Kɛ ɔɔ la po: «Nɔ- di 'o 'mʋ ke 'mʋ kʋɛ, kɛɛ, nɔ- nɩ 'o 'mʋ 'lu ye, -ɛ nue, 'plɩɩ ʋ 'mʋ 'mʋ kɔ, ɔ nɩ la 'klɔ.» 16 Nahuon a -gbɛ, ɔ 'cipi 'o, 'ɔɔ -a mʋ ꞊hapʋ-tɔplɩ 'mʋ nu, 'ke 'le -gbʋgbɛkɔ 'kwli 'mʋ. ꞊Hapʋ-tɔplɩ, ɔ nu -a mʋ 'mʋ, ɩ -huo 'dɔ. 17 Nahuon a -gbɛ, nɔ- mɔ -Yusu 'Klɩsʋ. 'Ke 'le Nyɩsʋa a winwlɔn-hɛnyɔ Moise 'mʋ, 'ke Nyɩsʋa naa 'le, 'ɔ -nyi -a mʋ 'a tetei, kɛɛ, 'ke 'le -Yusu 'Klɩsʋ 'mʋ, 'ke ɔ naa 'le, 'ɔ nu -a mʋ ꞊hapʋdɛ 'mʋ, 'ke 'le -gbʋgbɛkɔ 'kwli 'mʋ, 'ɔ tɔɔ -a mʋ -tɩ a -tɛɛ. 18 ꞊Ɔ ꞊de 'de -hlɩn Nyɩsʋa a 'yee. Kɛɛ, 'a 'Yuu -do ꞊nʋ, -ɔ mɔ -wɛ Nyɩsʋa, 'plɩɩ -ɔ nɩ 'o -a nɩ Bu Nyɩsʋa 'hʋɩn 'mʋ, nɔ- tɔɔ -a mʋ Nyɩsʋa a -gbɛ. 19 -Nyrɔwɔ ꞊de 'mʋ, -Juukʋɛ a 'blʋ a nahuin, -ʋ nɩ 'le Jrusrɛdɩɔ 'mʋ, nʋ- le Nyɩsʋa a -cɔhlʋnpinyʋ kɔ Lefipʋ a ꞊tugba a nahuin, 'ke bʋ mu 'le Betanidɩɔ 'mʋ, 'ke bʋ ꞊gba Saan wlɔn, nahuon tio- ɔ 'ya 'mʋ. -Tɛ ʋ nyre 'le Saan -wɔn, ʋ nɔ: «꞊Be -mɔ mɔ Waanyɔ ꞊nʋ, Nyɩsʋa po la lɛ, ɔ di la 'le ya?» 20 -Ye ɔ -hɩhɩʋ klɛ, 'ke 'le -tɛɛkɔ 'kwli 'mʋ, ɔ nɔ: «'Ʋʋn, 'n 'de Waanyɔ a -gbɛ, -ɔ kɔ -tɩ aa ꞊tu.» 21 Kɛ ʋʋ lele po, ʋ nɔ: «꞊Be -mɔ mɔ Nyɩsʋa a winwlɔn-hɛnyɔ Eli'i nɩ?» Ɔ nɔ: «'Ʋʋn, ɛ 'de -wɛ 'mɔ.» -Ye ʋ ꞊gbɔ lele wlɔn, ʋ nɔ: «'A -tɩ, ꞊be -mɔ mɔ Nyɩsʋa a winwlɔn-hɛnyɔ gblaka ꞊nʋ, Moise po la lɛ, Nyɩsʋa di la 'le ya?» -Ye ɔ nɔ: «'Ʋʋn, 'n 'de winwlɔn-hɛnyɔ a -gbɛ.» 22 -Ye ʋ 'kɩɛ ꞊gbɔɔ wlɔn lɛ: «Nahuon tio- -n 'ya 'klɛɛ 'mʋ 'le? -Hɩhɩa -a mʋ klɛ, -ɛ die nu, nahuin -gbo, -ʋ lee -a mʋ, -a 'mʋ 'waa klɛ-hɩhɩalɛ yi, nahuon tio- -n 'ya 'mʋ.» 23 -Ye kɛ ɔɔ po: «Nyɩsʋa a winwlɔn-hɛnyɔ Esai, ɔ 'crɩɛ la nɩ, 'ke 'le Nyɩsʋacrɩɩnɩɛ 'kwli 'mʋ, -ɛ mɔ: Nyɩsʋa nɔ 'nɩ: Nahuon ꞊de, 'ke ɔ di 'le -tɛgbi ꞊nʋ 'ti, nahuin ꞊de 'de 'le 'ti. Nahuon a -gbɛ, 'bɔɔ 'prɛ, ɔ 'mʋ 'le win 'yaa. Kɛ ɔ di nahuin ꞊nʋ ye po, -ʋ dio nʋa ye gbo po: Ba 'sii 'o Kʋkɔnyɔ a 'hru ye, 'plɩɩ Kʋkɔnyɔ a -gbɛ, ɔ 'mʋ 'le di. Ɛ 'we ꞊nɔ ye, 'a nɩ 'klɔ bɔ 'sii 'o ye, -ɛ die nu, a 'mʋ -wɔn -wɛ, 'plɩɩ Kʋkɔnyɔ 'mʋ 'le di -o.» Kɛ Saan, ɔɔ lele leenyʋ a -gbɛ ye po: «Nahuon ꞊nʋ, -ɔ kɔ -tɩ Nyɩsʋa ꞊tu la, 'mɔɔ nɩ.» 24 Leenyʋ ꞊nʋ, -ʋ di 'le Saan -wɔn, 'ke 'le ꞊nʋ -hɛyri Falisi꞊tumu a nahuin nɩ 'le. 25 Kɛ ʋʋ 'klɛɛ po, 'ʋʋ Saan wlɔn ꞊gba, ʋ nɔ: «-N nɔ 'nɩ, -n 'de Waanyɔ ꞊nʋ, Nyɩsʋa plɛ, ɔ di la 'le ya, kɔ, -n 'de Eli, kɔ, -n nɔ 'nɩ, -n 'de -wɛ Nyɩsʋa a winwlɔn-hɛnyɔ ꞊nʋ, -ɔ kɔ -tɩ Moise ꞊tu la. 'A -tɩ, nyɔ- -nyi 'klɛɛ -mʋ 'klɩ, 'ke -bo po nahuin 'nie 'lu lɛ 'le?» 26 -Ye ɔ nɔ: «'Mɛ -ye, 'nie, nɛ- 'nɩɩ nahuin 'lu lɛ po, kɛɛ, 'ke 'le 'a mʋ -hɛyri, nahuon nɩ 'le. Nahuon a -gbɛ, a 'dio a yie. 27 Ti ꞊nʋ -kɔ 'yri 'n di 'o -kʋan 'lu -yra, 'ke nahuon a -gbɛ, ɔ di 'a -kʋan -wlu ꞊tu, kɛ nɔ 'a mʋ -hɛyri. 'Na -gbɛ, 'n 'de nyɔ ꞊de, ꞊bo dio 'mʋ -hɛ, 'ke 'o 'ɛ nɩ -kʋandɛ ꞊de a -ta 'mʋ.» Kɛ Saan po leenyʋ a -gbɛ ye. 28 -Tɔplɩ 'bii a -gbɛ, 'ke 'le 'dɩɔ ꞊nʋ, -ɔ mɔ Betani 'mʋ, 'ke ɩ mue 'le 'lu -wɔn. 'Dɩɔ a -gbɛ, 'ke ɔ nɩ 'le 'nie ꞊nʋ, -ɛ mɔ Sudɛn a 'nike. 'Ke Saan, ɔɔ 'le nahuin 'nie 'lu lɛ po. 29 -Tɛ -nyrɔwɔɔ -do -hi, -ye Saan 'ye -Yusu nɩ, -Yusu a -gbɛ 'ɔɔ 'le ꞊nɔ -wɔn mu. -Ye Saan nɔ: «Ba 'ye kɛ, nahuon -gbo, -ɔɔ 'le di, nɔ- mɔ -cɔhlʋn ꞊nʋ, Nyɩsʋa -ha, -ʋ 'we ꞊nɔ 'blayu ye, ʋʋ Nyɩsʋa pie. -Cɔhlʋn a -gbɛ, nʋ- di 'klɔ ke a nahuin a dɛ 'kuku 'wʋwla. 30 Nɔ- kɔ -tɩ 'n ꞊tu o, -ɛ mɔ: Nahuon di 'o 'mʋ ke 'mʋ kʋɛ, kɛɛ, nɔ- nɩ 'o 'mʋ 'lu ye, -ɛ nue, 'plɩɩ ʋ 'mʋ 'mʋ kɔ, ɔ nɩ la 'klɔ. 31 -Tɛ 'n nyi o ꞊tu, nahuon bɔ di o 'mʋ 'ya, 'n 'dio o yi. Kɛɛ, 'n di 'le ꞊le, 'mʋ nahuin 'nie 'lu lɛ po, -ɛ die nu, nahuon bɔ 'ya, dakʋ, -ʋ mɔ Yisraɛkʋɛ, ʋ 'mue yi.» 32-33 -Ye kɛ Saan, ɔɔ lele po: «Nahuon bɔ di o 'mʋ 'ya, -tɛ 'n 'dio o a yie, -ye Nyɩsʋa ꞊nʋ, -ɔ lee 'mʋ, 'ke ꞊bo di nahuin 'nie 'lu lɛ po, ɔ nɔ: -N di 'ye 'na -Hihiu, ʋ 'mʋ 'o nahuon ꞊de 'lu ꞊tɩɩ, ʋ 'mʋ 'o ꞊nɔ ke 'mʋ nɩ. Nahuon a -gbɛ, nɔ- di nahuin 'na -Hihiu -nyi. -Ye 'ɛ mɔ -tɛɛ, 'n 'ye o Nyɩsʋa a -Hihiu a -gbɛ nɩ, 'ʋ ꞊tɩɩ o 'o nahuon a -gbɛ 'lu, -ɛ 'we ꞊nɔ ye, -tɛ -plija, bɔ 'nɩnɩ ꞊tɩɩ o 'o ꞊nɔ 'lu, ʋ 'mʋ o 'o ꞊nɔ ke 'mʋ nɩ. 34 'N 'ye dɛ a -gbɛ nɩ, nɛ- nue, 'nɩ nyi ꞊tu, -ɛ mɔ, nahuon a -gbɛ, nɔ- mɔ Nyɩsʋa a 'Yu.» 35 -Tɛ -nyrɛ cɛ lɛ, -ye -tɛgbii -do a -gbɛ, 'ke Saan Batisɩ di 'o lele, ɔ kɔ 'a -naagbopʋʋ 'hɔn -ye 'hɛɛn. 36 'Ke ɔ nɩ 'o, -ye ɔ 'ye -Yusu nɩ, 'ɔɔ -hi. -Tɛ ɔ 'yo 'klɛɛ, -ye ɔ nɔ: «Ba 'ye kɛ, nahuon -gbo, -ɔɔ 'le di, nɔ- mɔ -cɔhlʋn ꞊nʋ, Nyɩsʋa -ha, -ʋ 'we ꞊nɔ 'blayu ye, ʋʋ Nyɩsʋa pie.» 37 -Tɩ a -gbɛ, Saan ꞊tu, 'a -naagbopʋʋ 'hɔn -ye, -ʋ nɩ -tuo ke, ʋ 'wɩn nɩ. -Tɛ ʋ 'wɩn 'klɛɛ, -ye ʋ 'ba 'mʋ ye, 'ʋ kʋɛ -Yusu -wɔn. 38 -Ye -Yusu a -gbɛ, ɔ ꞊hɩan -wɔn. Bɔ 'ye 'klɛɛ, -ɛ mɔ, ʋ nyo -wɔn 'nɩ kʋɛ, -ye ɔ nɔ: «꞊Be ɩ kla nɩ, -ɛ kɔ 'mɔ aa -wɔn kʋɛ 'le?» -Ye ʋ ꞊tuo -wɔn, ʋ nɔ: «-Be' -n 'tii ye 'le, Rabi?» -ɛ ꞊hɛn 'nyrɛ Tɔɔnyɔ, 'ke 'le -Juukʋɛ a 'briwin 'kwli 'mʋ. 39 -Ye ɔ nɔ: «Ba kʋɛ 'mʋ -wɔn, a di dɛ 'nɩ 'ye,» 'ʋ kʋɔ -wɔn, -tɛgbi ɔ nɩ 'o, 'ʋ 'yee 'o. Ʋ nyre 'o 'yrʋ-hiilɛ a ti 'yri. 'Ke ʋ nɩ 'o ꞊nɔ 'hʋɩn 'mʋ -nɩnɩ, 'tɔ -wɔn. 40 -Naagbopʋʋ 'hɔn a -gbɛ, -ʋ 'wɔn Saan a -gbɛ a win, 'plɩɩ -ʋ kʋɛ -Yusu -wɔn, ꞊ɔ -ye a 'dʋ mɔ Adre. Adre a -gbɛ, ɔ mɔ Simɔ Piɛlɩ a -dɩayuu nɩ. 41 -Tɛ dɛ a -gbɛ, ɛ -hi, Adre a -gbɛ 'ɔ mu 'le, 'ke 'le 'a -dɩayu Simɔ Piɛlɩ -wɔn, ɔ nɔ: «-A 'ye Waanyɔ ꞊nʋ nɩ, Nyɩsʋa po la lɛ, ɔ di la 'le ya, 'ke 'o 'a dakʋ a waalɛ a -ta 'mʋ,» 42 'ɔ gbɔ 'le -Yusu 'hʋɩn 'mʋ. -Yusu bɔ 'yo 'klɛɛ, -ye ɔ nɔ: «-Mɔ mɔ Simɔ, Saan a 'yu. Kʋɛ 'klɛɛ mɔ gbo, 'bʋʋ -mʋ da, kɛ ʋ di po: Sefasɩ.» Sefasɩdʋ a -gbɛ, nʋ- mɔ Piɛlɩ, -ɛ ꞊hɛn 'nyrɛ 'hɩɔ. 43 -Tɛ -nyrɛ cɛ lɛ, -ye -Yusu pue 'le ꞊le, 'ke bɔ mu 'le Galileblʋgba 'mʋ. -Tɛ ɔɔ mu, -ye ɔ kɔ nahuon ꞊de 'hɛɛn, ʋ ꞊ŋmoo nɩ. Nahuon a -gbɛ, 'a 'dʋ mɔ Filipʋ. -Yusu nɔ: «Kʋɛ 'mʋ -wɔn, ꞊mʋ 'na -naagbopʋyu -hɛ,» 'ɔ kʋɛ ꞊nɔ -wɔn. 44 Filipʋ a -gbɛ, 'ke ɔ kɔ 'le 'dɩɔ ꞊nʋ 'mʋ, -ɔ mɔ Bɛtɩsaida, ɔ kɔ Adre kɔ Piɛlɩ 'hɛɛn. 45 'Plɩɩ dɛ a -gbɛ, ɛ 'mʋ mu -hi, -ye 'ke Filipʋ mu 'le nahuon -ye -wɔn. Nahuon a -gbɛ, 'a 'dʋ mɔ Natanaɛlɩ. -Ye Filipʋ nɔ: «-A 'ye Waanyɔ ꞊nʋ nɩ, -ɔ kɔ -tɩ Moise kɔ Nyɩsʋa a winwlɔn-hɛnyʋ -ye, ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ. Waanyɔ a -gbɛ, 'a 'dʋ mɔ -Yusu. 'A bu, nɔ- mɔ Sosɛfʋ, -ɔ nɩ 'le Nasalɛtɩdɩɔ 'mʋ.» 46 Natanaɛlɩ nɔ: «Nasalɛtɩdɩɔ 'mʋ, ꞊hapʋnahuon ꞊de 'die 'le -wɛ bɔ -hɔn 'le 'mʋ.» Filipʋ nɔ: «Di 'le -ba mu, -na -gbɛ, ꞊muo 'ye.» 47 Bʋ nyo 'klɛɛ yrɛ 'mʋɛɛ, -Yusu bɔ 'yo 'klɛɛ, -ye ɔ nɔ: «Nahuon -gbo, -ɔɔ 'le di, ɔ 'sii 'o ye. Ɔ mɔ -tɛɛ a Yisraɛkʋɛyuu nɩ.» 48 -Ye Natanaɛlɩ nɔ: «-Be' -n nu 'na yiyie 'le?» -Ye ɔ nɔ: «-Tɛ -n nɩ wɛn 'o pepetu ꞊nʋ gbo, ʋʋ figie daa, 'plɩɩ Filipʋ 'mʋ wɛn -mʋ da, 'ke 'n 'yee wɛn 'o -mʋ.» 49 -Ye Natanaɛlɩ nɔ: «Tɔɔnyɔ o, 'ɛ mɔ -tɛɛ, -mɔ mɔ Nyɩsʋa a 'Yuu nɩ, ꞊nɩ mɔ -wɛ Yisraɛkʋɛ a bodɩɔ.» 50 -Ye ɔ nɔ: «꞊Be -tɛ 'n po lɛ, 'n 'ye wɛn -mʋ nɩ, 'ke 'le pepetu gbo, nɛ- kɔ -tɩ ꞊nɩ plɛ, -n kuo 'mʋ ye ꞊wlʋ? Nu gbe, -n di 'ye -tɔplɩ gblakɩ -ye, ɩ 'mʋ 'o dɛ -gbo 'mʋ -hi, -n 'ye kɛ.» 51 -Ye ɔ nɔ lele: «'Nɩɩ 'a mʋ 'nɩ le -tɛɛ, a di yakɔ 'nɩ 'ye, ɔ 'mʋ wlɔn -ki, Nyɩsʋa a lɛleenyʋ 'mʋ 'le ꞊nɔ -wɔn 'mʋ -hɔn, ʋ 'mʋ 'ya, ʋ 'mʋ ꞊tɩ 'ke 'o 'mʋ 'lu ye, -ɔ mɔ -tʋnahuin 'bii a Nahuon.»
1 -Nyrɔwɩɩ 'hɔn bɩ -hi, -ye 'blɩ a 'mʋpʋpa a lɛ'mimre, nɛ-ɛ 'le 'lu -wɔn mue, 'ke 'le Galileblʋgba a 'dɩɔ ꞊nʋ 'mʋ, -ɔ mɔ Kana. 'Ke ʋ da 'le -Yusu a 'dii, 2 'ʋ da -wɛ -Yusu, 'ke 'le 'blɩ'mʋpʋpa a -gbɛ ke. 3 Tii -do a ti 'yri, -ye 'nɩnanɔ, ʋʋ 'na, ɔ -wɛ nɩ. -Ye kɛ -Yusu a 'dii nyo ye po, ɔ nɔ: «Nɔ 'bii, ɔ -wɛ nɩ.» 4 Kɛ -Yusu nyo 'klɛɛ ye po, ɔ nɔ: «'Na 'dii o, -ha 'mʋ mɛ lɛ, ɛ 'de -mɔ, -n 'de ye blɛ -bo le 'mʋ, -kʋan tio- 'n kɔ ꞊bo nu. Ti ꞊nʋ -kɔ 'yri 'n kɔ ꞊bo nuu 'o 'ŋmilɛkadɛ, ɩ 'de wɛn 'o a nyree.» 5 Bɔ po 'klɛɛ lɛ, -ye -tɔplɩwonyʋ, -ʋ nɩ 'o, -Yusu a 'dii, ɔ nyu 'nɩ le, ɔ nɔ: «-Tɩ 'bii -gbo, ɔ di ꞊tu, nɩ- ba nu -o!» 6 Kɛɛ -ye yɩ gblakɩɩ -huonnɔ ꞊de nɩ 'o, ʋ nuu 'hɛ 'mʋ, -ɩ kɔ wlɔn ʋʋ 'le 'nie lɛ po, 'ke 'o bʋɩ a lɛyɩyra a -ta 'mʋ, -ɛ 'we ꞊nɔ ye, -tɛ -Juukʋɛ a teteii 'a -hʋhʋa nu. Yɩ a -gbɛ, 'a yaa -do, ɔɔ gba 'litayrɩɛi a ꞊wlɩɩ ꞊hun. 7 Kɛ -Yusuu -tɔplɩwonyʋ a -gbɛ ye po, ɔ nɔ: «Ba 'yie 'le yɩ ꞊nʋ lɛ, 'ke 'o 'nie -wɔn!» 'ʋ 'yii 'le lɛ -tɛɛ. 8 -Ye ɔ nɔ: «Ba 'pi 'klɛɛ 'a dɛ gbi, ba gbɛ -tɔplɩwonyʋ a nyɩgblaka ye!» 'ʋ gbɛ 'le, 'ɔ ꞊tʋɛ wlɔn. 9 Bɔ ꞊tʋɛ 'klɛɛ wlɔn, -ye ɛ -hɛ nɔ. Ɔ 'de 'o yii, -tɛ nɔ a -gbɛ bɔ -hɔn 'o 'mʋ. -Tɔplɩwonyʋ -mɛ -ye, nʋ- yi. -Ye nyɩgblaka a -gbɛ, ɔ da 'blɩ'mʋpanyɔ nɩ, 10 ɔ nɔ: «'Ɛ nɩ nahuon 'bɔ da lɛ'mimre, ꞊hapʋnɔ, nɔ- ʋʋ po -tɩtɛ. Nahuin 'bʋ 'na 'klɛɛ -tɛɛ, 'plɩɩ nɔ ꞊nʋ, -ɔ 'de -tɛɛ a nɔ, 'ʋ nyo -wɛ po. Kɛɛ, -mɛ -ye, kʋɛ wɛn 'le gbo, ꞊hapʋnɔ, nɔ- -n ꞊tu gbo.» 11 Kɛ'ɛ nɩ, -Yusu nu 'a ye-hɛŋmilɛkadɛ a nunue, 'ke 'le Galileblʋgba a 'dɩɔ ꞊nʋ 'mʋ, -ɔ mɔ Kana. Kɛ ɔ nu, 'ɔ tɔɔ 'a -naagbopʋ 'klɩ ꞊nʋ, Nyɩsʋa -nyi ꞊nɔ. Dɛ a -gbɛ, nɛ- nue, 'a -naagbopʋ a -gbɛ 'ʋ kuo ꞊wlʋ ye. 12 -Tɛ dɛ a -gbɛ, ɛ -hi, -ye ɔ mu 'le Kapɛnaɔdɩɔ 'mʋ, ɔ kɔ 'a 'dii kɔ 'a -dɩayuo, kɔ 'a -naagbopʋ 'hɛɛn -wɛ, -ɛ die nu, ʋ 'mʋ 'le -nyrɔwɩ gbi -hi. 13 Dɛ a -gbɛ, -tɛ ɛ -hi, -ye -Juukʋɛ a lɛ'mimre gblaka, ʋʋ Pakɩ daa, ɛ 'mʋɛɛ ye. Nɛ- nue, -Yusu 'ɔ mu 'le Jrusrɛdɩɔ 'mʋ, ɔ kɔ 'a -naagbopʋ 'hɛɛn. 14 -Tɛ ʋ nyre 'le Nyɩsʋa a 'kagblaka a -yaa 'mʋ, 'ke ɔ yɛ 'o puplonyʋ gbo, 'ʋʋ bro plo, kɔ blablɔ, kɔ -plijɩ 'hɛɛn, 'ke -tʋnahuin 'mui -tɔ, -cɔhlʋn a -tɩ. 'Ke ɔ yɛ -wɛ 'o 'wli'cɩcɩnyʋ gbo, 'ʋʋ pʋpʋwli 'cɩcɩ, 'ʋ nɩ 'le 'waa 'teblei ke 'mʋ gblɛ. 15 -Tɛ -Yusu 'yu, nɛ- mɔ bɔ nu lɔkɔ, bɔ blʋ lɛ 'bii, 'ʋ -hɔn 'le Nyɩsʋa a 'kagblaka a -yaa a -gbɛ 'mʋ, ʋ kɔ 'waa 'wlugba-tɔplɩ a -gbɛ 'hɛɛn, 'plɩɩ, 'wli'cɩcɩnyʋ a 'wli, 'ɔ 'wlɩ gbo, 'ke 'o -tʋtʋ ke, 'ɔ ꞊jri 'waa 'teblei ye gblɛ. 16 -Ye kɛ ɔɔ -plijɩplonyʋ ꞊nʋ ye po: «Ba -ha nɔ -tɔplɩ -gbo! A nɩ nuu 'le 'na Bu Nyɩsʋa a kayu puplokayu 'mʋ!» 17 -Yusu a -naagbopʋ, -ʋ nɩ 'o, -tɩ ꞊nʋ, ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, -ye ɩ bi 'le ꞊nʋ 'mʋ 'kwli. -Tɩ a -gbɛ, nɩ- -gbo: «Nyɩsʋa o, 'n nʋɛ -na kayu 'mʋ nɩ 'dɔ. -Tɛ 'n nu 'a 'mʋnʋɛlɛ, ɛ 'we ꞊nɔ na ye, -ɔɔ wlɩn, 'ke 'le 'mʋ 'mʋ, -ɔɔ 'mʋ lɛ hien.» 18 -Ye -Juukʋɛ a nyɩgblakɩ, -ʋ nɩ -tuo ke, ʋ ꞊gbɔ wlɔn, ʋ nɔ: «Nahuon a gblo tio- -n 'ya 'le, ꞊nɩ nyu lɛ bla? Nu 'ŋmilɛkadɛ, ɛ 'mue -a mʋ tɔɔ, -ɛ mɔ, 'klɩ ꞊nʋ, -ɩ kɔ 'kwli 'mʋ -n nyu 'le lɛ blaa, 'ke ɩ kʋɛ 'le Nyɩsʋa 'mʋ gbo.» 19 -Ye -Yusu ꞊tu -wɔn, ɔ nɔ: «Dɛ 'n di nu, nɛ- -gbo: Ba 'wla Nyɩsʋa a 'kagblaka -gbo, 'n diu lele ye 'mʋ 'nɩ 'ba, 'ke 'le -nyrɔwɩɩ ta 'kwli 'mʋ.» 20 -Ye ʋ nɔ: «꞊Be kayu -gbo, ʋ po, 'ke 'le 'yrɩ a (46 ) -wlɩɩ 'hɔn ꞊tu 'o -huonnɔ 'kwli 'mʋ, nʋ- -n plɛ, -n di ye 'mʋ 'ba, 'ke 'le -nyrɔwɩɩ ta 'kwli 'mʋ?» 21 Kɛɛ -ye Nyɩsʋa a 'kagblaka ꞊nʋ, dɛ ɔ ꞊hɛn 'nyrɛ, ɛ nɛ- mɔ 'a -plahʋɩn. 22 -Tɛ 'dai ti -hi, -tɛ ɔ 'kʋ, ti ꞊nʋ -kɔ 'yri ɔ 'hrɩ 'klɔ, ti a -gbɛ 'yri, 'kee nɩ, ɩ bi 'le 'a -naagbopʋ 'kwli 'mʋ, -ɛ mɔ, 'a -plahʋɩn a -tɩ ɔɔ la ꞊tu, ɛ 'de Nyɩsʋa a 'kagblaka, ɔ 'dio la 'nyrɛ ꞊hɛn. -Ye -tɩ ꞊nʋ, ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, ye-hɛ-nyrɛ 'mʋ, ʋ kui 'klɛɛ ye ꞊wlʋ, ɩ kɔ -tɩ 'bii ꞊nʋ 'hɛɛn, -Yusu ꞊tu la ꞊nʋ ye. 23 Ti ꞊nʋ -kɔ 'yri -Yusu 'kɩɛ nɩɛ 'le lɛ'mimre ꞊nʋ ke, -ɛ mɔ Pakɩ, 'ke 'le Jrusrɛdɩɔ 'mʋ, ɔɔ nu 'ŋmilɛka-tɔplɩ -huohui. Nahuin 'plɔplɔ bʋ 'ye 'ŋmilɛka-tɔplɩ a -gbɛ, ɛ nɛ- nue, 'ʋ pui -tɛɛ, -ɛ mɔ, nɔ- mɔ Waanyɔ ꞊nʋ, Nyɩsʋa po la lɛ, ɔ di la 'le ya. 24 Kɛɛ, -Yusu 'diu ꞊wlʋ ye kuo, -ɛ nue, -tɛ 'waa ꞊wlɩ nɩ 'mʋ, ɔ yie nɩ -tɛɛ. 25 -Yusu 'nɩ -hʋɛ ꞊le, 'ke nahuon ꞊de bɔ lo, -tɛ -tʋnahuin a ꞊wlɩ nɩ 'mʋ, -ɛ nue, 'a -gbɛ, ɔ yi -tɔplɩ 'bii ꞊nʋ nɩ, -ɩ nɩ 'le -tʋnahuin a ꞊wlɩ ke.
1 Ɛ kɔ la nahuon ꞊de. 'A 'dʋ mɔ la Nikodɛmʋ. Ɔ mɔ la Falisi꞊tumu a nahuoon nɩ. Ɔ mɔ -wɛ -Juukʋɛ a ye'mʋnaanyɔ -yee nɩ. 2 'Tɔyrʋwɔ ꞊de 'mʋ, nɔ- mu 'le -Yusu -wɔn, ɔ nɔ: «Tɔɔnyɔ, -a yie nɩ, -ɛ mɔ, Nyɩsʋa, nɔ- lee nɔ -mʋ -a mʋ -hɛyri, ꞊mʋ -a mʋ tɔɔ, -ɛ nue, 'ŋmilɛka-tɔplɩ ꞊nʋ, -nɩɩ nu, ꞊ɔ ꞊de 'de 'le 'a nunue 'le -wɛ, 'bɩa Nyɩsʋa 'bɔ 'de 'o ꞊nɔ -wɔn nɩ.» 3 -Ye -Yusu nɔ: «'Nɩɩ -mʋ 'nɩ le -tɛɛ, nahuon ꞊de 'die 'le -wɛ bɔ pa 'le Nyɩsʋa a 'klɔ yrayrʋ ꞊nʋ 'kwli 'mʋ, 'bɔ 'de kʋɛwɩɩ 'hɔn nu.» 4 -Ye Nikodɛmʋ nɔ: «-Tʋnahuon 'bɔ ku, -be' ɔ -wɛ 'le bɔ nu 'a kʋɛwɩɩ 'hɔn a nunue 'le? Ɛ 'die 'le -wɛ bɔ bi 'le lele 'a 'dii 'kwli 'mʋ, ʋ 'muo lele kɔ.» 5 -Ye ɔ nɔ: «'Nɩɩ -mʋ 'nɩ le -tɛɛ, nahuon 'bɔ nu kʋɛwɔɔ -do, ɔ 'die 'le -wɛ bɔ pa 'le Nyɩsʋa a 'klɔ yrayrʋ ꞊nʋ 'kwli 'mʋ. Kɛɛ, ɛ nye 'nɩ -hʋa, 'ke Nyɩsʋa a -Hihiu bʋ -nyi ꞊nɔ 'klɔ yrayrʋ, 'plɩɩ ɔ 'mʋ 'le Nyɩsʋa a 'klɔ yrayrʋ ꞊nʋ 'kwli 'mʋ pa. 6 -Tʋnahuin, nʋ- nye nu, 'ʋʋ -tʋnahuon yrayrʋ kɔ, kɛɛ, Nyɩsʋa a -Hihiu, nʋ- nye nu, -tʋnahuon 'ɔɔ 'klɔ yrayrʋ kɔ, -ɔ 'nɩnɩ -wɛ 'le. 7 Ɩ nɩ saka 'le -mʋ, 'bɩa 'nɩ po lɛ, a kɔ ba nu kʋɛwɩɩ 'hɔn. 8 -Tɛ pepee 'o -hʋa, 'ke ɛɛ 'o -hii, ꞊nɩɩ 'a -hihiwin 'wɔn, kɛɛ, -tɛgbi bɛɛ 'o 'mʋ -hɔn, kɔ, -tɛgbi bɛɛ 'o muu, -n 'de 'a dɛ ꞊de yi. Kɛ'ɛ nɩ, Nyɩsʋa a -Hihiu nɩ 'mʋ. Nahuon ꞊nʋ, -Hihiu a -gbɛ, ʋ di 'klɔ yrayrʋ -nyi, -n 'dio yi.» 9 -Ye Nikodɛmʋ nɔ: «-Be' ɛ -wɛ 'le bɛ nu 'klɛɛ 'lu a -wɔnmumue 'le?» 10 -Ye ɔ nɔ: «-Mɔ mɔ tɔɔnyɔ gblaka, kɛ nɔ -Juukʋɛ a 'bri, -mɔ 'de -tɔplɩ a -gbɛ yi. 11 Dɛ -gbo, 'n 'ye, ɛ kɔ dɛ -gbo, 'n yi, nɩ- kɔ -tɩ 'nɩɩ ꞊tu. Kɛɛ -ye a 'nɩ pue ꞊le 'mʋ -tɛɛ. 12 -Tɔplɩ -gbo, -ɩɩ 'lu -wɔn mue, kɛ nɔ -tʋtʋ ke, 'bɩa 'nɩɩ 'a -tɩ ꞊tu, a 'nɩ pui ꞊le -tɛɛ. 'A -tɩ, -tɔplɩ ꞊nʋ, -ɩɩ 'lu -wɔn mue, 'ke 'le yakɔ 'mʋ, 'bɩa 'nɩɩ 'a -tɩ ꞊tu, a 'die 'le -wɛ ba pui -wɛ -tɛɛ. 13 -Tʋnahuon ꞊de 'de -hlɩn 'le yakɔ 'mʋ a mue, 'bɛ 'de 'mɔ -gbo, -ɔ mɔ -tʋnahuin 'bii a Nahuon. 'Mɔɔ nɩ, -ɔ -hɔn 'le yakɔ a -gbɛ 'mʋ. 'A -tɩ, 'hru pɛ 'o gbo, 'ke ꞊bo na yakɔ 'mʋ a -tɩ -wɔn lɛ. 14 Bɩ bi 'le -mʋ 'kwli 'mʋ, ti ꞊nʋ -kɔ 'yri Yisraɛkʋɛ nɩ la 'hru wlɔn, 'ke 'le 'pʋhʋɔnblʋgba 'mʋ, ti -hi la a ti 'yri, 'ke Moise 'ba la 'o 'plʋdɛ 'mʋ, 'ɔ nu la hre, 'plɩɩ 'ɔ 'bɛ la tugbɛ. Nɛ- kɔ 'lu ɔ 'ba la 'o hre a -gbɛ gbo, -ɛ die nu, 'ɛ nɩ nahuon, 'bɔ 'wla la 'yii wla, 'bɔ ta la 'le hre a -gbɛ -wɔn lɛ, 'ke 'le ꞊wlʋ a yekuolɛ 'kwli 'mʋ, ɔ 'nɩ ꞊han la 'kʋ. Kɛ'ɛ nɩ, ɛ di 'mʋ -ti, 'ke 'o 'mɔ -gbo -wɔn, -ɔ mɔ -tʋnahuin 'bii a Nahuon. Ʋ di -wɛ 'mʋ gbo 'nɩ 'ba, 'ke 'o tu 'yie 'mʋ, 15 -ɛ die nu, 'ɛ nɩ nahuon, 'bɔ ta 'le 'mʋ -wɔn lɛ, 'ke 'le 'na ꞊wlʋ a yekuolɛ 'kwli 'mʋ, Nyɩsʋa 'muo 'klɔ yrayrʋ -nyi, -ɔ 'nɩnɩ -wɛ 'le. 16 'Ɛ mɔ -tɛɛ, Nyɩsʋa nʋɛ -tʋnahuin 'mʋ nɩ 'dɔ. Nɛ- nue, 'ɔ -ha 'a 'Yuu -do, -ɛ die nu, 'ɛ nɩ nahuon, 'bɔ kuo ꞊wlʋ ye, ɔ 'nɩ ꞊han 'wan, kɛɛ, Nyɩsʋa a -gbɛ, ɔ 'muo 'klɔ yrayrʋ -nyi, -ɔ 'nɩnɩ -wɛ 'le. 17 Nyɩsʋa 'de nɔ 'a 'Yu -tʋtʋ ke lee, 'ke bɔ poo -tʋnahuin -bati lɛ, kɛɛ, 'ke bɔ waa ꞊nʋ, ʋ 'nɩ ꞊han 'wan. 18 Nahuon 'bɔ nɩ 'o, 'bɔ kuo Nyɩsʋa a 'Yu ꞊wlʋ ye, Nyɩsʋa a -bati 'die 'le -wɛ bɩ klɩ ꞊nɔ. Kɛɛ, nahuon 'bɔ nɩ 'o, 'bɔ 'dio ꞊wlʋ ye kuo, -ye Nyɩsʋa a -bati klo nɩ -dodo, -ɛ nue, ɔ 'de Nyɩsʋa a 'Yuu -do a -gbɛ ꞊wlʋ ye kuo. 19 -Tɛ Nyɩsʋaa nahuin a -bati a lɛpupue nu, nɛ- -gbo: ꞊Hapʋkɔ, -nyrɛ, -ɛ mɔ Nyɩsʋa a 'Yu, 'ɛ di nɔ -tʋtʋ ke, kɛɛ, nahuin 'de -nyrɛ a -gbɛ -hʋa. Gbɩgbɩyrɩ, nɩ- ʋʋ -hʋa, -ɛ nue, 'waa nunu-tɔplɩ nyre lɛ 'yi. 20 Nahuon 'bɔ nɩ 'o, 'bɔɔ dɛ 'klan nu, 'a ꞊wlʋ yraa -nyrɛ nɩ. Gbɩgbɩyrɩ -hɛyri, 'ke ɔɔ 'le gbo nɩ, -ɛ nue, ɔɔ pɩ hʋannʋ, 'ke 'a nunu-tɔplɩ -hʋɩn bɩ bi pepe' 'mʋ. 21 Kɛɛ, nahuon 'bɔɔ ꞊hapʋdɛ nu, ɔɔ ye 'mʋɛɛ -nyrɛ, -ɛ die nu, nahuin 'mue 'ye, -ɛ mɔ, 'a nunu-tɔplɩ, ɔɔ nu, Nyɩsʋa nyi 'nɩ -hʋa.» 22 -Tɛ dɛ a -gbɛ, ɛ -hi, -ye -Yusu kɔ 'a -naagbopʋ 'hɛɛn, 'ke ʋ mu 'le Sudeblʋgba 'mʋ. -Tɛgbi a -gbɛ, ɔ -hi 'le ti gbi, 'ɔɔ nahuin 'nie 'lu lɛ po. 23 Saan, ɔɔ -wɛ nahuin 'lu lɛ po 'nie. Ɔ -mɛ -ye, 'ke ɔ nɩ 'le Enɔdɩɔ 'mʋ, 'ke 'le Salimʋdɩɔ 'hʋɩn 'mʋ, -ɛ nue, -tɛgbi a -gbɛ 'nie -huo 'o, nahuin 'ʋʋ 'le ꞊nɔ -wɔn mu, 'ɔ nyu 'nie 'lu lɛ po. 24 Ti a -gbɛ 'yri, ʋ 'dio ꞊jɩ 'mʋ a pue. 25 -Ye 'klɛɛ, Saan a -naagbopʋ -ye, ʋ kɔ -Juukʋɛ a ye'mʋnaanyɔ -ye 'hɛɛn, nʋ-ʋ toto po, 'ke 'o nahuon a bʋɩ a lɛyɩyra a -ta 'mʋ, 26 'ʋ mu 'le Saan 'hʋɩn 'mʋ, ʋ nɔ: «Tɔɔnyɔ, ꞊be ɩ bi 'le -mʋ 'mʋ 'kwli, nahuon ꞊nʋ, -ɔ kɔ -mʋ 'hɛɛn -nɩ o 'le 'nie, -ɛ mɔ Sudɛn a 'nike, -ɔ kɔ -tɩ -n ꞊tu o -a mʋ ye, -ɛ mɔ, nɔ- mɔ Waanyɔ ꞊nʋ, Nyɩsʋa po la lɛ, ɔ di la 'le ya? -Ye 'klɛɛ, nahuon a -gbɛ, ɔɔ -wɛ nahuin 'lu lɛ po 'nie, 'plɩɩ nahuin 'bii, -ʋ di wɛn nɔ -mʋ -wɔn di, 'ke ʋʋ 'le ꞊nɔ -wɔn mu, 'ɔ nyu 'nie 'lu lɛ po.» 27 Saan ꞊tu -wɔn, ɔ nɔ: «Nyɩsʋa, -ɔ nɩ 'le yakɔ 'mʋ, nɔ-ɔ -a mʋ 'ɛ nɩ -kʋandɛ -nyi, -a di nu. 28 'Mɔ Saan, 'na -kʋan, nɔ- mɔ ꞊bo tɔɔ nahuin Waanyɔ a -gbɛ, -ɛ die nu, ʋ 'muo 'le -wɔn mu. 'A nɩ -gbɛ, a yie nɩ, -ɛ mɔ, 'n le o 'a mʋ nɩ, 'n 'de Waanyɔ ꞊nʋ, Nyɩsʋa po la lɛ, ɔ di la 'le ya. 'Mɛ -ye, 'n 'nyɛ 'hru, -ɛ die nu, 'mʋ 'a mʋ le, -ɛ mɔ, Waanyɔ a -gbɛ, ɔɔ 'le 'nɩ di. 29 ꞊Bo pue 'blɩ'mʋpaalɛ a dɛ ye. Nyɩbɛyu ꞊nʋ, -ɔɔ 'blɩ 'mʋ pa, nyrʋgba ꞊nʋ, -ɔ kɔ ꞊nɔ 'hɛɛn 'blɩ 'mʋ pa, nɔ- kʋɔ. Ɛ 'de 'blɩ'mʋpanyɔ a -gbɛ a nɩnatumu, ɔ 'de nyrɔ a -gbɛ kɔ. Kɛɛ, 'ke ɔɔ 'o 'blɩ'mʋpanyɔ 'hʋɩn 'mʋ nɩ, 'ɔ nyo nʋa ye gbo po, kɔ, 'ɔɔ 'manʋ nu, 'bɔɔ 'a win 'wɔn. -Yusu 'we ꞊nɔ 'blɩ'mʋpanyɔ ye, 'mɔ 'we ꞊nɔ 'a nɩnatumu ye, 'a 'manʋ mɔ 'na 'manʋ'ʋ nɩ. Ʋ nʋ- 'yie 'le 'mʋ. Nahuin, ʋ 'we ꞊nɔ 'blɩ'mʋpanyrɔ ye. Nɛ- nue, 'ʋʋ 'le -Yusu -wɔn mu. Ɛ 'de 'mɔ, ʋ 'deɛ bʋ di nɔ 'mʋ -wɔn. 30 Ɛ nɔɔ 'o lɛ, 'ke -Yusu a 'dʋ bʋ 'bʋa, 'mɛ -ye, 'na 'dʋ bʋ ꞊tɩɩ 'le.» 31 'Ke -Yusu -hɔn 'le yakɔ 'mʋ. Nɛ- nue, 'ɔ nɩ 'o nahuin 'bii 'lu ye. -A -mɛ -ye, kɛ -a kɔ nɔ -tʋtʋ ke. Nɛ- nue, ꞊aa -tʋtʋ ke a -tɔplɩ ke 'prɛɛ. Ɔ -mɛ -ye, 'ke ɔ -hɔn 'le yakɔ 'mʋ. 32 -Tɔplɩ ꞊nʋ, ɔ 'ye, kɔ, ɔ 'wɔn, nɩ- kɔ -tɩ ɔɔ -wɔn lɛ na. Kɛɛ -ye nahuin ꞊nʋ, -ʋ kuo ꞊wlʋ ye, ʋ 'de -huo. 33 Kɛɛ, nahuin ꞊nʋ, -ʋ kuo ꞊wlʋ ye, ʋ nyi 'nɩ ꞊tu, -ɛ mɔ, -tɩ 'bii ꞊nʋ, Nyɩsʋaa ꞊tu, ɩ mɔ -tɩ a -tɛɛ nɩ. 34 -Yusu 'Klɩsʋ a -gbɛ, Nyɩsʋa lee nɔ -a mʋ -wɔn, Nyɩsʋa a win, nɩ- ɔɔ -wɔn lɛ na, -ɛ nue, Nyɩsʋa a -gbɛ, ɔ -nyi ꞊nɔ 'a -Hihiu 'bii nɩ. 35 Nyɩsʋa nʋɛ 'a 'Yu a -gbɛ 'mʋ nɩ. Nɛ- nue, 'ɔ -nyi ꞊nɔ -tɔplɩ 'bii, ɔ 'mui win ke kɔɔ. 36 Nahuon 'bɔ nɩ 'o, 'bɔ kuo Nyɩsʋa a 'Yu a -gbɛ ꞊wlʋ ye, -ye ɔ kɔ 'klɔ yrayrʋ, -ɔ 'nɩnɩ -wɛ 'le. Kɛɛ -ye nahuon 'bɔ nɩ 'o, 'bɔ 'dio ꞊wlʋ ye kuo, 'plɩɩ 'bɔ 'nɩnɩ ꞊tuu 'o ꞊nɔ, -ye ɔ 'de 'klɔ yrayrʋ a -gbɛ kɔ, kɛɛ, Nyɩsʋa a yrʋ, nʋ- dio yɛ, -tɛ 'klɔ tɛ ye gbo.
1 Falisi꞊tumu a nahuin, ʋ 'wɩn nɩ, -ɛ mɔ, -Yusu nue nɩ, nahuin 'ʋ nyo -wɔn naa, kɔ, 'ɔ nyu 'nie 'lu lɛ po, 'plɩɩ nahuin a -gbɛ, ʋ -huo nɩ, 'ʋ -hi 'o Saan a nahuin 'mʋ. 2 Kɛɛ, 'ke 'le -tɛɛkɔ 'kwli 'mʋ, -Yusu a -gbɛ, ɔ 'nɩ po ꞊le nahuin 'nie 'lu lɛ, kɛɛ, 'a -naagbopʋʋ nɩ, -ʋʋ nahuin 'nie 'lu lɛ po. 3 -Tɩ ꞊nʋ, nahuin ꞊tu, -tɛ -Yusu 'wɩn, -ye ɔ -hɔn 'le Sudeblʋgba 'mʋ nɩ, ɔ kɔ 'a -naagbopʋ 'hɛɛn, ʋ 'mʋ 'le Galileblʋgba 'mʋ mu. 4 Samaliblʋgba, nɔ- ʋ kɔ bʋ 'bɛ ꞊tɩɔ, 'plɩɩ ʋ 'mʋ 'le Galileblʋgba 'mʋ nyre. 5 -Tɛ ʋʋ 'klɛɛ Samaliblʋgba ꞊tɩɔ 'bɛ, -ye 'ke ʋ nyre 'o 'dɩɔ ꞊de ꞊hlɔn. 'Dɩɔ a -gbɛ, 'a 'dʋ mɔ Sika. 'Ke 'o -tɛgbi a -gbɛ, 'ke -Juukʋɛ a bu gblaka Sakɔbʋ a -ci nɩ 'o, ɔ -nyi la 'a 'yu Sosɛfʋ. 6-8 'Ke 'le -ci a -gbɛ 'kwli 'mʋ, 'ke Sakɔbʋ 'bluu la 'o 'nɩhʋɔ. -Tɛ ʋ nyre 'klɛɛ 'o 'nɩhʋɔ a -gbɛ wien, 'ke -Yusu a -naagbopʋ hio 'o gbo, 'ʋ mu 'le 'dɩɔ 'mʋ, -ɛ die nu, ʋ 'mʋ didi-tɔplɩ -tɔ. -Yusu -mɛ -ye, 'a 'klɩ -wɛ 'le ꞊le, 'ke 'o 'hru ꞊nʋ, ʋʋ na a -ta 'mʋ. Nɛ- nue, 'ɔ nɩ 'o 'nɩhʋɔ a -gbɛ nʋa 'mʋ gbo. Ti a -gbɛ 'yri, 'yrʋ nyra gbo. Ɔ -do bɔ nɩ 'klɛɛ 'o gbo, -ye Samalikʋɛyrɔwlʋ ꞊de, nɔ- di 'nie 'pi wɔn. -Ye kɛ -Yusu nyo ye po, ɔ nɔ: «-Nye 'mʋ 'nie, ꞊bo 'na!» 9 -Ye nyrʋgba a -gbɛ, ɔ ꞊tuo -wɔn, ɔ nɔ: «-Mbe', -mɔ mɔ -Juukʋɛyu, 'plɩɩ ꞊nɩɩ 'mɔ -gbo, -ɔ mɔ Samalikʋɛyrɔwlʋ 'nie -hʋa.» 'Ɛ mɔ -tɛɛ, -Juukʋɛ, ʋ kɔ Samalikʋɛ 'hɛɛn, ʋ nyinyre lɛ. 10 Kɛ -Yusuu 'klɛɛ ꞊nɔ ye po: «'Bɩa ꞊nɩ yi wɛn dɛ ꞊nʋ, Nyɩsʋaa nahuin -nyi, kɔ, ꞊nɩ yi wɛn -wɛ 'mɔ -gbo, -ɔɔ -mʋ 'nie -hʋa, -ye -mɔɔ nɩ, -ɔ di wɛn 'mʋ 'nie -hʋa. 'Mɛ -ye, 'niedʋ ꞊nʋ, -ɛɛ nahuon 'klɔ yrayrʋ -nyi, nɛ- 'n di wɛn -mʋ -nyi.» 11 -Ye nyrʋgba a -gbɛ, ɔ nɔ: «Nyɩbɛyu o, -n 'de 'nie'piidɛ ꞊de kɔ, 'plɩɩ -ye 'hʋɔ -gbo, ɔ hren 'mʋ gbo. -Be' -n -wɛ 'le -bo nu 'nie a -gbɛ a 'pipie 'le? 12 -A nɩ bu gblaka Sakɔbʋ, nɔ- hie -a mʋ 'nɩhʋɔ -gbo lɛ. 'A -gbɛ, ɔ 'na 'a 'nie nɩ, ɔ kɔ 'a 'yuo꞊pli 'hɛɛn, 'a 'wlugba-tɔplɩ 'ɩ 'na -wɛ 'nie a -gbɛ. ꞊Be -n pui -tɛɛ, -mɔ nɩɔ 'o 'lu ye?» 13 -Ye -Yusu nɔ: «Nahuon ꞊nʋ, -ɔ di 'nɩhʋɔ -gbo a 'nie 'na, 'nie'natʋ dio lele 'nɩ nu. 14 Kɛɛ, nahuon 'bɔ nɩ 'o, 'bɔɔ 'niedʋ ꞊nʋ 'na, 'n di ꞊nɔ -nyi, gbegbe, 'nie'natʋ 'deɛ bʋ nuo 'klɛɛ lele. -Ɛ nue, 'niedʋ ꞊nʋ, 'n di ꞊nɔ -nyi, ɛ di ye 'we 'nie ꞊nʋ, -ɛɛ 'le -tʋtʋ gbo 'mʋ -hɔn ti a pɛpɛ, -ɛɛ nahuon a -gbɛ 'klɔ yrayrʋ ꞊nʋ -nyi, -ɔ 'nɩnɩ -wɛ 'le.» 15 -Ye nyrʋgba a -gbɛ, ɔ nɔ: «-Nye 'mʋ 'niedʋ a -gbɛ, -ɛ die nu, 'nie'natʋ 'nɩ ꞊han 'klɛɛ lele 'mʋ nu, kɔ, 'nɩ ꞊han 'klɛɛ lele nɔ 'nɩhʋɔ -gbo wien di, 'nie'pi-tɩ.» 16 -Ye -Yusu nɔ: «Mu -bo da -na tɔ, ɔ kɔ -mʋ 'hɛɛn ba di 'le!» 17 -Ye nyrʋgba nɔ: «'N 'de tɔ kɔ.» -Ye -Yusu nɔ: «'A -tɛɛ, nɛ-ɛ nɩ. -N 'de tɔ kɔ, 18 -ɛ nue, -bo kɔ tɔ, -bo kɔ tɔ, ɛ -wɛ 'klɛɛ 'le tɔnʋʋ ꞊hun, 'plɩɩ -ye, nahuon ꞊nʋ, -ɔ kɔ -mʋ 'hɛɛn- nye 'mʋ na, -tɛ ti nɩ lɛ 'mʋ -gbo, ɔ 'de -na tɔ.» 19 -Ye nyrʋgba ꞊nʋ, ɔ nɔ: «'N nye 'nɩ 'ye, -ɛ mɔ, -mɔ mɔ Nyɩsʋa a winwlɔn-hɛnyɔɔ nɩ. 20 -A mʋ Samalikʋɛ a bunʋ, 'ke 'le dʋgba ꞊nʋ 'lu, 'ke ʋʋ 'le Nyɩsʋa daa, kɛɛ, 'a mʋ -Juukʋɛ, a nɔ 'nɩ, Nyɩsʋa a daalɛɛ -do, nɛ- mɔ Jrusrɛdɩɔ.» 21 -Ye -Yusu nɔ: «Nyrʋgba o, -tɩ -gbo, 'nɩɩ ꞊tu, pui -tɛɛ. Ti di 'o 'nɩ nyre, -ɩ kɔ 'yri a 'nɩnɩ di 'o lele dʋgba ꞊nʋ 'lu -a nɩ Bu Nyɩsʋa daa, kɔ Jrusrɛ 'mʋ. 22 'A mʋ Samalikʋɛ, Nyɩsʋa ꞊nʋ, aa da, a 'dio yi. Kɛɛ, -a mʋ -gbo, -ʋ mɔ -Juukʋɛ, Nyɩsʋa ꞊nʋ, -aa da, -a yio nɩ, -ɛ nue, 'ke Nyɩsʋaa 'le -Juukʋɛ 'mʋ naa, 'ɔɔ nahuin waa. 23-24 Ti di 'o 'nɩ nyre, 'plɩɩ ti a -gbɛ 'ɩ nyre 'o -dodo, -ɩ kɔ 'yri Nyɩsʋa a -Hihiu di 'o nahuin 'klɩ -nyii, 'ke bʋ da -a nɩ Bu Nyɩsʋa, 'ke 'o 'ɛ nɩ -tɛgbi ꞊de, -ʋ mɔ Nyɩsʋa a -Hihiu ꞊nʋ, -ʋʋ -tʋnahuin -tɩ a -tɛɛ tɔɔ. -Tɛ -a nɩ Bu Nyɩsʋaa -hʋa nahuin bʋ nu 'a dɩda, kɛ'ɛ nɩ, ɛ nɩ 'mʋ. Nyɩsʋa mɔ -Hihiu. Nahuin ꞊nʋ, -ʋ nye -hʋa, -bʋ da Nyɩsʋa, 'a -Hihiu kɔ bʋ nɩ 'o ꞊nʋ ke 'mʋ. 'A -Hihiu a -gbɛ, ʋ nye -tʋnahuin 'nɩ tɔɔ, -tɛ Nyɩsʋa a -gbɛ, ɔ nɩ 'mʋ.» 25 -Ye nyrʋgba ꞊nʋ, ɔ nɔ: «'N yie nɩ, -ɛ mɔ, Waanyɔ ꞊nʋ, Nyɩsʋa po la lɛ, ɔ di la -a mʋ ye ya, ɔ kɔ bɔ di 'le. 'Bɔ di 'le, -ye ɔ di -a mʋ -tɔplɩ 'bii klɛ 'nɩ -hɩhɩa.» 26 -Ye -Yusu nɔ: «'Mɔ nɩ gbo mɔ, -ɔ kɔ -mʋ 'hɛɛn- 'prɛ.» 27 Tii -do a ti 'yri, -ye -Yusu a -naagbopʋ -nɩ wɛn, -ʋ mu wɛn 'dɩɔ 'mʋ, ʋ nyre 'o ꞊o. Ɩ saka ꞊nʋ nɩ, -tɛ -Yusu kɔ nyrʋgba 'hɛɛn, ʋʋ toto po. Kɛɛ, 'waa nahuon ꞊de 'de wlɔn ꞊gba, -ɛ mɔ: «-Tɩ tio- -n nyo wlɔn ꞊gba 'le?» kɔ, «-Tɩ tio- ɔ kɔ -mʋ 'hɛɛn, aa ꞊tu 'le?» 28 Nyrʋgba -mɛ -ye, ɔ hie 'o 'a 'nɩya gbo, 'ɔ gba cigbɛi, 'ɔ mu 'dɩɔ 'mʋ, 'ɔ le nahuin, ɔ nɔ: 29 «Ba di 'le, a 'mʋ nahuon ꞊de 'ye. Nɔ- le 'mʋ -tɔplɩ 'bii ꞊nʋ, 'n nu lɛ. ꞊Be ɛ -wɛ 'le bɛ 'ya Waanyɔ ꞊nʋ 'mʋ nɩ, Nyɩsʋa po la lɛ, ɔ di la -a mʋ ye ya?» 30 -Ye nahuin a -gbɛ, ʋ -hɔn 'le 'dɩɔ 'mʋ nɩ, 'ʋ muo 'le 'hʋɩn 'mʋ. 31 -Tɛ nahuin a -gbɛ, ʋ 'de wɛn 'le a die, -ye -Yusu a -naagbopʋ, ʋ nyo lɛ 'nɩ 'batɩ, ʋ nɔ: «Tɔɔnyɔ o, di dɛ 'plɩɩ.» 32 Kɛɛ -ye ɔ nɔ: «'N kɔ dididɛ ꞊de, a 'de yi.» 33 -Ye 'a -naagbopʋ wlɔn lɛ 'nɩ ꞊gbʋgba, ʋ nɔ: «꞊Be ꞊ɔ ꞊de yɔ dididɛ ye -le?» 34 -Ye ɔ nɔ: «'Na dididɛ, nɛ- mɔ ꞊bo nu Nyɩsʋa, -ɔ lee nɔ 'mʋ 'klɔ -gbo ke a kewɛɛnlɛ, ɛ ꞊hɛn 'nyrɛ ꞊bo -yra -kʋan ꞊nʋ 'lu, ɔ -nyi 'mʋ, ꞊bo nu. 35 -A 'brikʋɛ nɔ 'nɩ: ꞊Nɩ 'dɔ ꞊gbla, yakʋɛɛ -hɛn 'bɛ ꞊cɛ, -ye -n nyo 'nɩ 'cɛ. Kɛɛ, 'mɛ -ye, 'nɩɩ 'a mʋ 'nɩ le: Ba 'ba 'yii 'mʋ, ba ta 'le -ci klɛ. ꞊Gbla ꞊hlu nɩ -dodo. Ɔ -wɛ 'le 'cɩcɛ.» (Ɛ 'we ꞊nɔ ye, nahuin -gbo, -ʋ nyo 'le 'hʋɩn 'mʋ di, -ʋ -wɛ -wɔn, 'ke -bʋ kɔ 'klɔ yrayrʋ ꞊nʋ, -ɔ 'nɩnɩ -wɛ 'le, nʋ- kɔ -tɩ ɔɔ ꞊tu.) 36 «-Kʋannunyɔ ꞊nʋ, -ɔɔ ꞊gbla 'cɛ, ɔ kɔ 'a nɩ 'pɛɛlɛ nɩ. 'A -kʋan a -gbɛ, nɔ- nye nu, nahuin 'ʋʋ 'klɔ yrayrʋ ꞊nʋ kɔ, -ɔ 'nɩnɩ -wɛ 'le. -Ye 'klɛɛ, nahuon ꞊nʋ, -ɔɔ ꞊gbla 'dɔ, kɔ nahuon ꞊nʋ, -ɔ nyo 'cɛ, ʋ di 'mʋ lɛ bibi 'yi, ʋ 'mʋ 'manʋ nu. 37 -Talʋdʋ ꞊nʋ, -ʋʋ lɛ po: ꞊Ʋ -yee 'dɔ ꞊gbla, ꞊ʋ -ye 'ʋ nyo 'cɛ, ʋ mɔ -tɩ a -tɛɛ nɩ. 38 'N lee 'le 'a mʋ ke -ci -ye, -ɛ kɔ -kʋan a 'de o nu, kɛɛ, -ɛ kɔ ꞊gbla aa 'klɛɛ 'cɛ. ꞊Ʋ -ye, nʋ- nu o -ci a -gbɛ a -kʋan, a -mɛ -ye, 'aa 'klɛɛ 'a ꞊gbla 'cɛ.» 39 Samalikʋɛ -nɩ wɛn, -ʋ nɩ 'le 'dɩɔ -nɩ wɛn 'mʋ, 'waa nahuin 'plɔplɔ kuo -Yusu ye ꞊wlʋ, -ɛ nue, kɛ nyrʋgba ꞊nʋ, ɔ po ꞊nʋ ye: «Nahuon -gbo, nɔ- le 'mʋ -tɔplɩ 'bii ꞊nʋ, 'n nu lɛ.» 40 Nɛ- kɔ -tɩ, -tɛ Samalikʋɛ a -gbɛ, ʋ nyre 'klɛɛ 'o -Yusu 'hʋɩn 'mʋ, 'ʋ nyo lɛ 'batɩ, 'ke bɔ nɩ 'le ꞊nʋ -wɔn, 'ɛ mɔ -tɛɛ, 'ɔ wɛɛn ke, 'ɔ -hi 'le -nyrɔwɩɩ 'hɔn. 41 Nahuin 'plɔplɔ -ye kuo ꞊wlʋ ye, 'ke 'o -tɩ ꞊nʋ, ɔ ꞊tu a -ta 'mʋ. 42 Kɛ ʋʋ 'klɛɛ nyrʋgba ꞊nʋ ye po, ʋ nɔ: «-Tɛ ti nɩ lɛ 'mʋ -gbo, ɛ 'de -tɩɩ -do -gbo, -n ꞊tu -a mʋ ye a -tɩ, -a 'dio ꞊wlʋ ye kuo, kɛɛ, -a kuo ye ꞊wlʋ, -ɛ nue, -a nɩ -gbɛ, -a 'wɔn 'a win nɩ, kɔ, -a kɔ 'a yiyie, -ɛ mɔ, 'ɛ mɔ -tɛɛ, nɔ- mɔ Waanyɔ ꞊nʋ, -ɔɔ 'klɔ -gbo a nahuin waa.» 43 'Plɩɩ ɔ 'mʋ 'o -nyrɔwɩɩ 'hɔn mu -hi, 'ke 'o -tɛgbi a -gbɛ, -ye 'ke ɔ mu 'le Galileblʋgba 'mʋ. 44 'A -gbɛ, ɔ ꞊tui o nɩ, -ɛ mɔ: «Nyɩsʋa a winwlɔn-hɛnyɔ 'bɔ nɩ 'le 'a 'brikʋɛ -hɛyri, -ye ʋ 'nɩ ꞊tuo ꞊le 'o.» 45 Kɛɛ, Galileblʋgba a nahuin a -gbɛ, ʋ mu o ke lɛ'mimre ꞊nʋ, -ɛ mɔ Pakɩ, 'ke 'le Jrusrɛdɩɔ 'mʋ, 'ʋ 'ye o -tɔplɩ 'bii ꞊nʋ, -Yusu nu o. Nɛ- nue, -tɛ -Yusu nyre 'klɛɛ 'le Galileblʋgba 'mʋ, nahuin 'ʋ 'blo kwa -tɛɛ. 46 -Ye 'ke ɔ mu 'le 'dɩɔ ꞊nʋ 'mʋ, -ɔ mɔ Kana. 'Ke 'le 'dɩɔ a -gbɛ 'mʋ, 'ke ɔ nuu la 'o 'ŋmilɛkadɛ, 'nie 'ɛ -hɛ la -wiin. -Ye 'klɛɛ, ɛ kɔ la nyɩbɛyu ꞊de. Ɔ mɔ 'blʋgba a 'kɩɩn a -kʋannunyɔ gblakaa nɩ, 'ɔ nɩ la 'le Kapɛnaɔdɩɔ 'mʋ, 'ke 'le Galileblʋgba 'mʋ. Ɔ kɔ la 'yu nyɩbɛyu. Nɔ- kɔ 'hʋɩɩn- hren. 47 -Tɛ nyɩgblaka a -gbɛ, ɔ 'wɩn, -ɛ mɔ, 'ke -Yusu -hɔn 'le Sudeblʋgba 'mʋ, 'ɔ mu 'le Galileblʋgba 'mʋ, -ye ɔ -hɔn 'le 'a 'dɩɔ 'mʋ nɩ, 'ɔ mu 'le -Yusu -wɔn, 'ɔ 'bɔtɩɔ lɛ, ɔ nɔ: «Di 'le 'na 'dɩɔ Kapɛnaɔ 'mʋ, ꞊mʋ 'na 'yu a 'kʋɛ -wɔ. Ɔɔ -hʋa bɔ 'kʋ.» 48 -Ye kɛ -Yusuu ꞊nɔ ye po: «Ɛ 'we ꞊nɔ ye, a 'kɩɛ 'die 'le a -wɛɛ ba kuo 'mʋ ꞊wlʋ ye, 'bɩa 'ba 'nɩnɩ 'ye 'ŋmilɛka-tɔplɩ gblakɩ ꞊nʋ, 'nɩɩ nu.» 49 -Ye nyɩgblaka a -gbɛ, ɔ ꞊tuo -wɔn, ɔ nɔ: «Tɔɔnyɔ o, di 'le 'na 'dɩɔ 'mʋ, 'na 'yu 'nɩ ꞊han 'kʋ.» 50 -Ye kɛ -Yusuu ꞊nɔ ye po: «-N -wɛ 'le -bo mu nɩ. -Na 'yu 'kɩɛ die 'klɔ nɩ.» -Tɩ ꞊nʋ, -Yusu ꞊tu ꞊nɔ ye, ɔ kui ye ꞊wlʋ, 'ɔ mu. 51 Ɔ nɩ 'hru wlɔn, 'a -kʋannunyʋ 'ʋ dio ye 'mʋ 'bɛ wɔn, ʋ nɔ: «-Na 'yu nɩ 'klɔ.» 52 -Ye ɔ ꞊gbʋ wlɔn, ɔ nɔ: «Ti tio- kɔ 'yri 'a 'hʋɩn 'kee 'le?» -Ye ʋ nɔ: «-Dina bɔ bi 'tʋ 'le, 'a -haawɔɔ -do bɔ -hi 'tʋ, -ye 'a 'hʋɩn 'kee 'tʋ nɩ.» 53 -Ye ɔ 'ye nɩ, -ɛ mɔ, ti ꞊nʋ -kɔ 'yri -Yusu lee 'tʋ 'o ꞊nɔ, -ɛ mɔ, 'a 'yu 'kɩɛ die 'klɔ nɩ, 'kee nɩ, 'a 'yu a -gbɛ a 'hʋɩn 'kee 'tʋ 'o. -Ye ɔ bi 'le ye, ɔ kɔ 'a kayugbokʋɛ 'hɛɛn, ʋ kuo -Yusu ye ꞊wlʋ. 54 -Yusu bɔ -hɔn 'le Sudeblʋgba 'mʋ, bɔ mu 'le Galileblʋgba 'mʋ, bɔ nu 'ŋmilɛkadɛ, 'a 'wɩɩ 'hɔn a dɛ'ɛ nɩ.
1 'Plɩɩ dɛ a -gbɛ, ɛ 'mʋ mu -hi, -ye -Juukʋɛ, ʋʋ ke mu lɛ'mimre, 'ke 'le Jrusrɛdɩɔ 'mʋ. 'Ke -Yusu mu -wɛ 'le. 2 Paalɛ ꞊de nɩ 'o, -ɛ kɔ 'yri ʋʋ 'o naa, 'ʋʋ 'le Jrusrɛdɩɔ 'mʋ pa. Ʋ nye daa Blablɔ a Paalɛ. 'Ke 'o paalɛ a -gbɛ 'hʋɩn 'mʋ, 'ke 'wlo ꞊de nɩ 'o, nahuin 'blu la. 'Wlo a -gbɛ, 'a 'dʋ mɔ Betesada, 'ke 'le -Juukʋɛwin 'kwli 'mʋ. Nɛ- kɔ nʋa 'mʋ, ʋ poo 'o papʋɛii ꞊hun. 3 'Ke 'le papʋɛi a -gbɛ gbo, 'hʋɩnhrennyʋ 'plɔplɔ pɛ 'le gblɛ, 'yiisuanyʋ, bʋɩklanyʋ, kɔ lɛ-yɩyrɛnyʋ. Ʋ nye 'nɩ -pre, 'ke 'nie bɛ po ꞊tablɔ, 4 -ɛ nue, ɛ kɔ ti, Nyɩsʋa a lɛleenyɔ ꞊de, 'ɔɔ 'le ꞊tɩ, 'ɔ nye ꞊gbɔti, -ɛ die nu, ɛ 'mʋ ꞊tablɔ po. 'Ɛ nɩ ti, Nyɩsʋa a lɛleenyɔ 'bɔ ꞊gbɔtie, 'bɛɛ 'klɛɛ ꞊tablɔ po, ye-hɛhʋɩnhrennyɔ, -ɔ di 'le ꞊tɩ, -tɛ 'a 'kʋɛ bɛ nɩ 'mʋ, ɛ kɔ bɛ -wɛ. 5 Ti a -gbɛ 'yri, ɛ kɔ -wɛ 'hʋɩnhrennyɔ ꞊de, 'ɔ nɩ 'le 'a 'bienʋ -hɛyri. -Tɛ 'a 'hʋɩn -tʋa la 'le hinhren gbo, ɛ -wɛ 'klɛɛ 'le 'yrɩ a (38 ) ꞊wlʋ ꞊tu 'o -pu ꞊tu 'o -yehɛn-yehɛn. 6 -Tɛ -Yusu nyre 'o, -ye ɔ 'ye nahuon a -gbɛ nɩ, -ɔ pɛ gbo. Ɔ yie nɩ, -ɛ mɔ, -tɛ 'a 'hʋɩn -tʋa la 'le hinhren gbo, ɛ -wlɛn gbo. -Ye ɔ ꞊gbɔ wlɔn, ɔ nɔ: «꞊Be -n nye 'nɩ -hʋa, 'ke -na 'kʋɛ bɛ -wɛ?» 7 -Ye 'hʋɩnhrennyɔ nɔ: «Tɔɔnyɔ o, 'n 'de nahuon ꞊de kɔ, -bɔ ꞊tɩɔ 'le 'mʋ 'nie -wɔn, ti ꞊nʋ -kɔ 'yri ɛɛ 'o ꞊tablɔ po. 'Bɩa 'nɩ -hʋa ꞊bo ꞊tɩ wɛn 'le, -ye ꞊ɔ -ye -hi 'mʋ ye.» 8 -Ye kɛ -Yusuu ꞊nɔ ye po, ɔ nɔ: «'Ba ye 'mʋ, -bo 'ba -na 'craka 'mʋ, -bo na!» 9 Tii -do a ti 'yri, -ye 'a 'kʋɛ -wɛ nɩ, 'ɔ 'ba 'a 'craka 'mʋ, 'ɔ -tʋa nɩna gbo. Kɛɛ -ye dɛ a -gbɛ, -Juukʋɛ a -wuwle-nyrɔwɔ 'mʋʋ nɩ, 'ke ɛ mue 'lu -wɔn. 10 -Juukʋɛ a ye'mʋnaanyʋ, ʋ 'ye nahuon a -gbɛ nɩ, -ɔ kɔ 'kʋɛ -wɛ, 'ʋ lo, ʋ nɔ: «Kɛkɛ a -nyrɔwɔ -gbo, ɔ mɔ kɛ -wuwle-nyrɔwɔ'ɔ nɩ. 'A -tɩ, -n 'de ye blɛ -bo 'ble -na 'craka -wuwle-nyrɔwɔ a -gbɛ 'mʋ. Ɛ mɔ -kʋaan nɩ, 'plɩɩ -ye ɩ ꞊ŋa nɩ.» 11 -Ye ɔ nɔ: «Nahuon ꞊nʋ, -ɔ -wɔ 'na 'kʋɛ, nɔ- le 'mʋ, ꞊bo 'ba 'na 'craka 'mʋ, ꞊bo na.» 12 -Ye ʋ nɔ: «Nahuon tio- le -mʋ, -bo 'ba -na 'craka 'mʋ, -bo na?» 13 Nahuon ꞊nʋ, -ɔ kɔ 'kʋɛ -wɛ, ɔ 'de -Yusu yi, -ɛ nue, -Yusu mu nɩ 'tata a ti 'yri, nahuin -huohui ꞊nʋ, -ʋ nɩ 'o a -tɩ. 14 -Tɛ ɛ gba ti gbi, -ye 'ke -Yusu yɔ 'le Nyɩsʋa a 'kagblaka gbo. Kɛ ɔɔ ꞊nɔ ye po, ɔ nɔ: «'Ye kɛ, -na 'kʋɛ -wɛ nɩ. ꞊Nɩ nu 'le 'klɛɛ lele dɛ 'kuku, -ɛ die nu, ꞊sʋɛ a 'yiye ꞊nʋ, -ɛ -hi 'a dɛ -gbo wlɔn, -n 'ye, ɛ 'nɩ ꞊han -mʋ yɛ.» 15 -Ye nahuon a -gbɛ, ɔ mu nɩ, 'ɔ le -Juukʋɛ a ye'mʋnaanyʋ, -ɛ mɔ, -Yusu'u nɩ, -ɔ -wɔ 'a 'kʋɛ. 16 Kʋɛ 'o ti a -gbɛ 'yie 'mʋ gbo, -ye ʋ -tʋa -Yusu a bʋɩ a lɛ꞊mʋmɔ gbo, -ɛ nue, -Yusu -wɔ nahuon a 'kʋɛ, -wuwle-nyrɔwɔ 'mʋ. 17 Kɛɛ -ye -Yusu -hɩhɩʋ klɛ, ɔ nɔ: «'Na Bu, ɔɔ nu -kʋan 'ɛ nɩ ti. 'Na -gbɛ, dɛɛ -do, nɛ-ɛ nɩ.» 18 -Tɛ -Yusu po 'klɛɛ lɛ, -ye -Juukʋɛ a ye'mʋnaanyʋ a -gbɛ, ʋʋ lele lɛ ꞊mɔ 'hru, 'ke bʋ 'lɔ, -ɛ nue, ɔ ꞊tui nɩ, -ɛ mɔ, Nyɩsʋa, nɔ- mɔ 'a Bu, ɛ ꞊hɛn 'nyrɛ, ɔ nɔ 'nɩ, ɔ kɔ Nyɩsʋa 'hɛɛn, ʋ wɛɛn nɩ. Ɛ 'de bɔ 'wla -wuwle-nyrɔwɔ a tetee -do a -tɩ, ʋ 'nɩ ꞊mɔ ꞊le 'a 'lɩla lɛ. 19 -Tɩ ꞊nʋ, -Juukʋɛ a ye'mʋnaanyʋ, ʋʋ -Yusu yɛɛ, 'ɔ nyu klɛ -hɩhɩa, ɔ nɔ: «'Nɩɩ 'a mʋ 'nɩ le -tɛɛ, 'mɔ -gbo, -ɔ mɔ Nyɩsʋa a 'Yu, 'n -do, 'n 'de 'le dɛ ꞊de a nunue 'le -wɛ. Dɛ 'nɩɩ 'ye, 'na Buu nu, ɛ -do a -gbɛ, nɛ- 'nɩɩ nu. -Tɔplɩ 'bii, 'na Buu nu, 'n nyi -wɛ 'nɩ nu. 20 'Ɛ mɔ -tɛɛ, 'na Bu nʋɛ 'mʋ 'mʋ nɩ, 'ɔɔ 'mʋ -tɔplɩ 'bii ꞊nʋ tɔɔ, 'a -gbɛ, ɔɔ nu. Ɔ di lele 'mʋ 'nɩ le, ꞊bo nu 'ŋmilɛka-tɔplɩ -ye, -ɩ -hi 'o 'a dɛ -gbo 'mʋ, 'n nu, -tɛ ti nɩ lɛ 'mʋ -gbo, ɩ 'mʋ 'a mʋ saka. 21 Ɛ 'we ꞊nɔ ye, -tɛ 'na Buu nu, 'ɔɔ 'le nahuin 'kʋkʋnyʋ -hɛyri -ha, 'ɔ nyu 'klɔ -ha, kɛ 'nɩɩ nu, 'nɩɩ nahuin ꞊nʋ 'klɔ yrayrʋ -nyi, 'nɩɩ -hʋa ꞊bo -nyo. 22 'Ya 'o lele 'lu, 'na Bu 'nɩ poo ꞊le nahuon ꞊de -bati lɛ, kɛɛ, ɔ -nyi 'mʋ 'klɩ 'bii nɩ, 'ke ꞊bo poo nahuin -bati lɛ, 23 -ɛ die nu, nahuin 'bii, ʋ 'mʋ 'mʋ 'o ꞊tuu, -ɛ 'we ꞊nɔ ye, -tɛ ʋʋ 'na Bu a 'o꞊tuulɛ nu. Nahuon -gbo, -ɔ 'nɩnɩ ꞊tuu 'o 'mʋ, ɛ 'we -wɛ ꞊nɔ ye, 'na Bu, -ɔ lee nɔ 'mʋ 'klɔ -gbo ke, nɔ- ɔ 'nɩnɩ ꞊tuu 'o. 24 'Nɩɩ 'a mʋ 'nɩ le, nahuon 'bɔ nɩ 'o, 'bɔɔ 'na win nʋa ye gbo po, kɔ, 'bɔ kuo 'na Bu ꞊wlʋ ye, -ɔ lee nɔ 'mʋ -tʋtʋ ke, nahuon a -gbɛ, nɔ- kɔ 'klɔ yrayrʋ ꞊nʋ, -ɔ 'nɩnɩ -wɛ 'le. -Bati 'deɛ bɩ klo, kɛɛ, ɔ -hɔn 'le 'kʋkʋɛ wlɔn 'mʋ nɩ, 'ɔ pa 'le 'klɔ yrayrʋ ꞊nʋ -hɛyri, -ɔ 'nɩnɩ -wɛ 'le. 25 'Nɩɩ 'a mʋ 'nɩ le -tɛɛ, ti di 'o 'nɩ nyre, 'plɩɩ ti a -gbɛ 'ɩ nyre 'o -dodo, -ɩ kɔ 'yri 'kʋkʋnyʋ di 'o 'mɔ -gbo, -ɔ mɔ Nyɩsʋa a 'Yu a win 'wɔɔn, kɔ, nahuin ꞊nʋ, -ʋ di 'na win 'wɔn, ʋ di kɔ 'klɔ yrayrʋ ꞊nʋ, -ɔ 'nɩnɩ -wɛ 'le. 26 'Na Bu kɔ 'klɩ, 'ke bɔ nue, nahuin 'mʋ 'klɔ nɩ. 'Klɩɩ -do a -gbɛ, nɩ- ɔ -nyi 'mʋ, 'ke ꞊bo -nyi nahuin 'klɔ yrayrʋ ꞊nʋ, -ɔ 'nɩnɩ -wɛ 'le, 27 'ɔ -nyi -wɛ 'mɔ -gbo, -ɔ mɔ -tʋnahuin 'bii a Nahuon 'klɩ, 'ke ꞊bo poo nahuin -bati lɛ. 28 Ɛ nɩ saka 'le 'a mʋ, ti di 'o 'nɩ nyre, -ɩ kɔ 'yri nahuin 'bii -gbo, ʋ -ha 'o lɛ, ʋ 'mʋ 'na win 'wɔn. 29 'Bʋ 'wɔn 'na win a -gbɛ, -ye ʋ di 'le 'dɛɛi wlɔn 'mʋ lɛ 'nɩ -hɔn. Nahuin ꞊nʋ, -ʋ nu ꞊hapʋdɛ, ʋ di kɔ 'klɔ yrayrʋ ꞊nʋ, -ɔ 'nɩnɩ -wɛ 'le, kɛɛ, nahuin ꞊nʋ, -ʋ nu dɛ 'klan, -bati diu 'nɩ klɩ. 30 'N -do, 'n 'de 'le dɛ ꞊de a nunue 'le -wɛ, Nyɩsʋa 'bɔ 'de 'mʋ 'a 'klɩ -nyi. 'Bɩa 'nɩɩ nahuon ꞊de a -bati 'bɛ, -tɛ Nyɩsʋa 'na leelɛ nu, kɛ 'nɩɩ 'a nunue nu. 'Nɩɩ po -tɛɛ a -bati, -ɛ nue, Nyɩsʋa, -ɔ lee nɔ 'mʋ -tʋtʋ ke, dɛ ꞊nʋ, ɔɔ -hʋa ꞊bo nu, nɛ- 'nɩɩ nu -tɛɛ. Ɛ 'de dɛ -gbo, 'na -gbɛ, 'nɩɩ -hʋa, 'nɩ nue ꞊le.» 31 Kɛ -Yusuu lele po, ɔ nɔ: «'Bɩa 'n -do, 'nɩ nyi wɛn ꞊tu, nahuon a gblo tio- 'n 'ya 'mʋ, -ye nahuin, ʋ 'deɛ bʋ yrie wɛn, -ɛ mɔ, 'nɩɩ ꞊tu -tɩ a -tɛɛ. 32 Kɛɛ, Nyɩsʋa, nɔ- nyi ꞊tu, nahuon a gblo tio- 'n 'ya 'mʋ, 'plɩɩ 'n yie nɩ, -tɩ ꞊nʋ, ɔɔ ꞊tu, 'ke 'o 'mʋ ke, ɩ mɔ -tɩ a -tɛɛ nɩ. 33 A -mɛ -ye, a tɛ gbo nahuin, 'ke 'le Saan Batisɩ -wɔn, 'ɔ ꞊tui -wɛ 'a mʋ ye, nahuon a gblo tio- 'n 'ya 'mʋ. 34 Ɛ 'die 'nyrɛ ꞊hɛn, -ɛ mɔ, 'nɩɩ lɛ ꞊mɔ nahuon, -ɔ nyi ꞊tu, nahuon a gblo tio- 'n 'ya 'mʋ. Kɛɛ, 'n nye 'nɩ nu, 'ke ba -hie Saan a dɛ 'lu -wɔn lɛ, -ɛ die nu, a 'mue 'mʋ lɛ yrii, -ɛ mɔ, Nyɩsʋa, ɔɔ -hʋa bɔ waa 'a mʋ. 35 Saan a -gbɛ, ɔ 'we la ꞊nɔ 'napɩ ye, -ɛ nye la nu, nahuin 'ʋʋ lɛ yrii. 'Ke 'le ti gbi 'kwli 'mʋ, aa la nu 'manʋ, 'ke 'o dɛ a -gbɛ a -ta 'mʋ. 36 Ɛ kɔ -wɛ -tɔplɩ -ye, 'ɩ nɩ 'o, 'ɩ -hi Saan a pupowin wlɔn. Nɩ- mɔ 'ŋmilɛka-tɔplɩ ꞊nʋ, 'nɩɩ nu, 'ke 'le 'na Bu a 'klɩ 'kwli 'mʋ. 'Ŋmilɛka-tɔplɩ a -gbɛ, ɩ nye nahuin 'nɩ tɔɔ -tɛɛ, -ɛ mɔ, 'na Bu, nɔ- lee nɔ 'mʋ 'klɔ -gbo ke. 37 'Plɩɩ 'na Bu ꞊nʋ, -ɔɔ lee nɔ 'mʋ, ɔ nyi -wɛ 'nɩ ꞊tu, nahuon a gblo tio- 'n 'ya 'mʋ. A 'de -hlɩn 'a win a 'wɛɛn, kɔ, a 'dio -hlɩn -wɛ a 'yee. 38 A 'nɩ ꞊tu ꞊le 'a win gbo, 'ke 'le 'a nɩ ꞊wlɩ ke, -ɛ nue, a 'de 'mʋ ꞊wlʋ ye kuo, 'mɔ -gbo, ɔ lee nɔ 'klɔ -gbo ke. 39 Aa Nyɩsʋacrɩɩnɩɛi 'nɩ 'nyɩ, -ɛ nue, a yie nɩ, -ɛ mɔ, nɩ-ɩ 'a mʋ 'klɔ yrayrʋ ꞊nʋ tɔɔ, -ɔ 'nɩnɩ -wɛ 'le. 'Ɛ mɔ -tɛɛ, Nyɩsʋacrɩɩnɩɛi a -gbɛ, nɩ-ɩ 'na -tɩ ꞊tu. 40 Kɛɛ -ye a 'nɩ -hʋa ꞊le ba di nɔ 'mʋ -wɔn, -ɛ die nu, 'mʋ 'a mʋ 'klɔ yrayrʋ a -gbɛ -nyi. 41 A nɔ 'nɩ, -ɛ mɔ, 'n nye lɛ 'nɩ ꞊mɔ, 'ke nahuin bʋ baa 'mʋ. Kɛɛ, ɛ 'de lɛ 'mʋ nɩ. 42 A -mɛ -ye, a nɩ 'dɔ. 'N yie nɩ, -ɛ mɔ, 'ke 'le 'a nɩ ꞊wlɩ ke, a 'de Nyɩsʋa 'mʋ nʋɛ. 43 'Na Bu lee nɔ 'mʋ 'a mʋ -hɛyri, kɛɛ, a 'nɩ -hʋa ꞊le ba 'ble 'mʋ kwa. Kɛɛ, nahuon 'bɔ di 'le, 'ke 'le 'a -gbɛ a 'klɩ 'kwli 'mʋ, -ye a 'blo kwa. 44 A nʋɛ 'mʋ nɩ, 'ke 'a nɩ 'bienʋ bʋ baa 'a mʋ. Kɛɛ, a 'nɩ ꞊mʋɛ ꞊le lɛ, 'ke Nyɩsʋa ꞊nʋ, -ɔ mɔ Nyɩsʋaa -do, bɔ baa 'a mʋ. 'Bɩa 'ba nɩ lɛ 'mʋ, -ye a 'die 'le -wɛ ba kuo 'mʋ ꞊wlʋ ye. 45 Kɛɛ, a nɩ 'ye 'le, -ɛ mɔ, 'n di 'a mʋ yɛɛ -tɩ, 'ke 'o 'na Bu ye. 'A winwlɔn-hɛnyɔ Moise ꞊nʋ, a kuo ꞊wlʋ ye, nɔ- di 'a mʋ -tɩ yɛɛ. 46 'Bɩa 'bɛ mɔ wɛn -tɛɛ, 'ba kuo wɛn Moise ꞊wlʋ ye, 'na -gbɛ, a di wɛn -wɛ 'mʋ ye kuo ꞊wlʋ, -ɛ nue, Moise, ɔ 'crɩɩ 'na -tɩ nɩ. 47 Kɛɛ, -tɩ ꞊nʋ, ɔ 'crɩɩ, -tɛ a 'di -tɛɛ pue, a 'die -wɛ 'le -wɛ, ba pue 'na win a -tɩ -tɛɛ.»
1 -Tɛ dɛ a -gbɛ, ɛ -hi, -ye -Yusu kɔ 'a -naagbopʋ 'hɛɛn, ʋ ꞊ta nɩ, 'ke 'le Galileblʋgba a 'yru a 'pɩa ꞊nʋ ke. 'Yru a -gbɛ, ʋ nyu -wɛ daa Tibeliadɩ a 'yru; 2 nahuin 'plɔplɔ 'ʋʋ -Yusu -wɔn kʋɛ, -ɛ nue, 'ŋmilɛka-tɔplɩ ꞊nʋ, ɔɔ o nu, 'ɔɔ nahuin a 'kʋɛi -wɔ, ʋ 'yi o nɩ. 3 -Tɛ -Yusu kɔ 'a -naagbopʋ 'hɛɛn, ʋ nyre 'le, -ye 'ke ʋ 'ya 'le dʋgba 'lu, 'ʋ nɩ gbo. 4 Ti ꞊nʋ 'yri, -Juukʋɛ a lɛ'mimre, ʋʋ Pakɩ daa, 'a ti 'mʋɛɛ yrɛ. Nɛ- nue, nahuin 'plɔplɔ 'ʋ nɩ -tuo ke. 5 -Yusu bɔ 'ba 'lu ye 'mʋ, -ye ɔ 'ye nahuin -huohui, 'ʋʋ 'o ꞊nɔ 'hʋɩn 'mʋ di. -Tɛ ɔ 'yu 'klɛɛ, -ye ɔ ꞊gba 'a -naagbopʋyu Filipʋ wlɔn, ɔ nɔ: «-Be' -a di 'klɛɛ dididɛ ye 'yee, -a 'mue -tɔ, nahuin 'bii -gbo, -ʋ di 'le, ʋ 'mʋ dɛ di?» 6 Ɔ ꞊gbɔ wlɔn, -ɛ die nu, ɔ 'mue yi, 'bɩa Filipʋ 'bɔ kuo ꞊wlʋ ye, -ɛ nue, 'plɩɩ ɔ 'muo wlɔn mu ꞊gba, dɛ ɔ di nu, ɔ yie nɩ -dodo. 7 -Ye Filipʋ ꞊tuo -wɔn, ɔ nɔ: «Mɔ ꞊betɩ -ba kɔ wɛn 'wliblɔ, -a 'die 'le -wɛ -ba -tɔ 'flɔɔ, 'ɛ nɩ nahuon bɔ di 'a ꞊tɩɔ 'cicrɛ di.» 8 -Ye -Yusu a -naagbopʋyu Adre, -ɔ mɔ Simɔ Piɛlɩ a -dɩayu, kɛ ɔɔ 'klɛɛ -Yusu ye po, ɔ nɔ: 9 «'Yu nyɩbɛyu ꞊de nɩ mɔ, 'ɔ kɔ 'flɔɔkuii ꞊hun kɔ -hriin 'hɔn. Kɛɛ, ɩ 'die 'le -wɛ bɩ nu dɛ ꞊de, 'ke 'o nahuin -huohui -gbo -wɔn.» 10 -Ye -Yusu nɔ: «Ba le nahuin 'bii -gbo, bʋ nɩ gblɛ.» -Tɛgbi a -gbɛ, -piti 'plɔplɔ nɩ 'o. 'Ke 'le nahuin 'bii ꞊nʋ -hɛyri, nyɩbɛpʋ, -ʋ nɩ -tuo ke, ʋ -wɛ 'le 'milowɩɩ ꞊hun nɩ. 11 -Tɛ ʋ nɩ 'klɛɛ 'o -piti ke gblɛ, -ye -Yusu 'ba 'flɔɔ a -gbɛ 'mʋ nɩ, 'ɔ -nyi Nyɩsʋa 'wio, 'ɔ woo nahuin 'mʋ lɛ, 'ɔ 'ba -wɛ -hrin 'mʋ, 'ɔ wii -wɛ ꞊nʋ 'mʋ lɛ, nahuin 'bii, 'ʋ di 'waa ꞊wlɩ a dɛ, 'ʋ ꞊mra. 12 -Tɛ ʋ ꞊mra 'klɛɛ, -ye kɛ -Yusuu 'a -naagbopʋ ye po: «Ba 'tɛ 'flɔɔ꞊tɩɛ 'bii ꞊nʋ lɛ, -ɛ hie gbo, 'a dɛ ꞊de 'nɩ ꞊han 'wan.» 13 'Flɔɔkuii ꞊hun ꞊nʋ, -Yusu wloo, nahuin di, 'a dɛ, -ɛ hie gbo, nɛ- ʋ 'tɛ lɛ, 'ʋ 'yie 'le -tʋgbɩɩ -pu ꞊tu 'o 'hɔn. 14 'Ŋmilɛkadɛ ꞊nʋ, -Yusu nu, -tɛ nahuin 'ye, -ye ʋ nɔ: «'Ɛ mɔ -tɛɛ, nahuon -gbo, nɔ- mɔ Nyɩsʋa a winwlɔn-hɛnyɔ ꞊nʋ, Nyɩsʋa po la lɛ, -ɔ di la nɔ 'klɔ ke di.» 15 Kɛɛ, -Yusu yrie nɩ, -ɛ mɔ, ʋ dio 'nɩ klɩ, 'ke 'le 'klɩkɔ 'kwli 'mʋ, ɔ 'muo bodɩɔdɛ -nyi. Dɛ a -gbɛ, ɛ 'de -Yusu a kewɛɛnlɛ. Nɛ- nue, 'ɔ hren ꞊nʋ -wɔn, ɔ -do, 'ɔ mu 'le lele dʋgba 'lu. 16 -Wisepepei 'mʋ, -Yusu a -naagbopʋ 'ʋ mu 'le 'yru nʋa 'mʋ. 17 'Tɔɔ 'nɩ -wɔn, -Yusu 'de wɛn 'le ꞊nʋ -hɛyri a mue. Nɛ- nue, 'ʋ 'ya 'le 'blagbe wlɔn, 'ʋʋ bri, 'ʋʋ 'yru ꞊nʋ ꞊ta, 'ʋʋ 'le 'dɩɔ ꞊nʋ 'mʋ mu, -ɔ mɔ Kapɛnaɔ. 18 -Tɛ ʋ nɩ 'klɛɛ 'le 'yru ke, -ye pepe gblaka, ɛɛ 'nɩ -hi, 'yru 'ʋʋ 'dʋɩ gblakɩ po, 19 'ʋ bri -bribri, 'ʋ nu -kilowɩɩ ꞊hun -hoo' -huonnɔ. -Ye tii -do a ti 'yri, ʋ 'ye -Yusu nɩ, 'ɔɔ 'yru ke na, 'ɔɔ 'blagbe ye 'mʋɛɛ. Bʋ 'yo 'klɛɛ, hʋannʋ biu 'le 'kwli 'mʋ. 20 Kɛɛ -ye -Yusu nyu 'nɩ le, ɔ nɔ: «'Mɔɔ nɩ, a nɩ pɩ 'le hʋannʋ!» 21 Ʋʋ -hʋa -Yusu bɔ 'ya 'le ꞊nʋ -wɔn. -Ye tii -do a ti 'yri, -tɛgbi ʋʋ 'le mu, 'blagbe nyre 'o ꞊o, 'ʋ kwlɛ. 22 -Tɛ -nyrɛ cɛ lɛ, nahuin 'plɔplɔ ꞊nʋ, -ʋ hie 'le 'yru a 'pɩa ꞊nʋ ke, -tɛgbii -do ꞊nʋ, -Yusu wloo 'tʋ 'o 'flɔɔ, nahuin a -gbɛ, nʋ-ʋ -Yusu lɛ ꞊mɔ. Ʋ yie nɩ, -ɛ mɔ, 'blagbee -do, nɛ- nɩ 'tʋ 'o 'nʋhʋɔn 'mʋ, 'ʋ yie -wɛ, -ɛ mɔ, -Yusu 'de 'tʋ 'le 'blagbe a -gbɛ wlɔn 'ya. 'A -naagbopʋʋ -do, nʋ- 'ya 'tʋ 'le, 'ʋ mu 'tʋ. 23 'Ke 'le 'dɩɔ ꞊nʋ 'mʋ, -ɔ mɔ Tibeliadɩ, nahuin -ye ya 'le 'blagbei, 'ʋ di 'o -tɛgbi ꞊nʋ, -Yusu -nyii 'tʋ 'o Nyɩsʋa 'wio, 'ɔ wloo 'tʋ 'o 'flɔɔ, 'ʋ dio 'tʋ. 24 -Tɛ nahuin a -gbɛ, ʋ 'ye, -ɛ mɔ, -Yusu kɔ 'a -naagbopʋ 'hɛɛn, 'waa nahuon ꞊de 'de 'o nɩ, ʋ 'ya 'le 'waa 'blagbei wlɔn, 'ʋ mu 'le Kapɛnaɔ 'mʋ, 'ʋ mu -Yusu lɛ ꞊mɔ wɔn. 25 'Ke ʋ yɛ 'le -Yusu 'yru a 'pɩa ꞊nʋ ke gbo, ʋ nɔ: «Tɔɔnyɔ, ti tio- kɔ 'yri -n nyre nɔ 'le?» 26 -Ye -Yusu ꞊tu -wɔn, ɔ nɔ: «'Nɩɩ 'a mʋ 'nɩ le -tɛɛ: 'Ŋmilɛka-tɔplɩ ꞊nʋ, 'nɩɩ nu, Nyɩsʋa, nɔ- -nyi 'mʋ 'klɩ, 'nɩ nyi nu. Kɛɛ, ɛ 'de ba yrii dɛ a -gbɛ 'mʋ lɛ a -tɩ, a 'nɩ ꞊mɔ ꞊le 'mʋ lɛ. Kɛɛ -ye dididɛ, a di 'tʋ, 'a ꞊mra 'tʋ, nɛ- kɔ -tɩ 'aa 'mʋ lɛ ꞊mɔ. 27 A nɩ -hie 'le dididɛɛ -do a -tɩ 'lu -wɔn lɛ, -ɛ 'nɩnɩ -wlɛn 'o, -ɛɛ pɔ, kɛɛ, dididɛ ꞊nʋ, -ɛɛ 'a mʋ 'klɔ yrayrʋ -nyi, -ɔ 'nɩnɩ -wɛ 'le, nɛ- kɔ -tɩ ba -hie 'lu -wɔn lɛ. 'Mɔ -gbo, -ɔ mɔ -tʋnahuin 'bii a Nahuon, 'mɔ di 'a mʋ dididɛ a -gbɛ -nyi, -ɛ nue, 'na Bu Nyɩsʋa, nɔ- lee nɔ 'mʋ 'klɔ -gbo ke, 'ke ꞊bo -nyi 'a mʋ dididɛ a -gbɛ.» 28 -Ye ʋ nɔ: «Dɛ tio- -a di nu 'le, 'plɩɩ Nyɩsʋa 'mʋ -a mʋ ke wɛɛn?» 29 -Ye -Yusu ꞊tu -wɔn, ɔ nɔ: «Dɛ Nyɩsʋaa -hʋa ba nu, nɛ- mɔ ba kuo 'mɔ -gbo ꞊wlʋ ye, ɔ lee nɔ 'klɔ -gbo ke.» 30-31 -Ye ʋ nɔ: «꞊Nɩ nye -hʋa, -ba pue -na pupowin -tɛɛ, -ye -bo nu 'ŋmilɛkadɛ -ye, -ɛ 'we ꞊nɔ 'a dɛ ꞊nʋ ye, Nyɩsʋa a winwlɔn-hɛnyɔ Moise, ɔɔ la nu. 'Ɛ nɩ -nyrɔwɔ, -nyi -a mʋ dididɛ, -a 'mue di, -ɛ 'we ꞊nɔ ye, -tɛ -a nɩ bunʋʋ la nu, ti ꞊nʋ -kɔ 'yri ʋ nɩ la 'le 'pʋhʋɔnblʋgba 'mʋ, 'ʋʋ la dididɛ ꞊nʋ di, ʋʋ manɩ daa, -ɛɛ la 'le yakɔ 'mʋ -hɔn. Dɛɛ -do a -gbɛ, nɛ- ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, -ɛ mɔ: Ɔ -nyi ꞊nʋ didiflɔɔ, -ɔ -hɔn 'le yakɔ 'mʋ.» 32 -Ye -Yusu ꞊tu -wɔn, ɔ nɔ: «'Nɩɩ 'a mʋ 'nɩ le -tɛɛ, -tɛɛ a dididɛ, -ɛ kɔ -tɩ 'n ꞊tu wɛn, ɛ 'de Moise, ɔ 'die 'a mʋ -nyi. Kɛɛ, -tɛɛ a dididɛ, -ɛ -hɔn 'le yakɔ 'mʋ, 'na Bu Nyɩsʋa, nɔ- nye 'a mʋ -nyi. 33 -Tɛɛ a dididɛ, Nyɩsʋaa nahuin -nyi, nɛ- mɔ dididɛdʋ ꞊nʋ, -ɛ -hɔn 'le yakɔ 'mʋ, 'plɩɩ -ɛ di 'klɔ ke a nahuin 'klɔ yrayrʋ -nyi, -ɔ 'nɩnɩ -wɛ 'le.» 34 -Ye ʋ nɔ: «Tɔɔnyɔ, -nyi -a mʋ dididɛdʋ a -gbɛ 'ɛ nɩ ti!» 35 -Ye kɛ ɔɔ 'klɛɛ ꞊nʋ ye po, ɔ nɔ: «'Mɔ 'we ꞊nɔ dididɛdʋ ꞊nʋ ye, -ɛɛ nahuin 'klɔ yrayrʋ -nyi. Nahuon 'bɔ nɩ 'o, 'bɔ kuo 'mʋ ꞊wlʋ ye, 'bɔ -hɛ 'na -naagbopʋyu, ɔ 'we ꞊nɔ nahuon ꞊nʋ ye, kanʋ 'nɩnɩ nu, kɔ 'nie'natʋ 'hɛɛn. 36 'N ꞊tui 'a mʋ ye, -ɛ mɔ, a 'ye 'mʋ nɩ, kɛɛ, a 'de 'mʋ ꞊wlʋ ye kuo. 37 Nahuin 'bii ꞊nʋ, 'na Buu 'mʋ -nyi, ʋ di -hɛ 'na -naagbopʋ. Gbegbe, 'n 'deɛ ꞊bo bla 'waa nahuoon -do ꞊de ke. 38 'N 'de 'le yakɔ 'mʋ -hɔn, 'ke ꞊bo nu 'na -gbɛ a kewɛɛnlɛ, kɛɛ, Nyɩsʋa, -ɔ lee nɔ 'mʋ -tʋtʋ ke, nɔ- kɔ kewɛɛnlɛ 'n kɔ ꞊bo nu. 39 Dɛ Nyɩsʋaa -hʋa, nɛ- mɔ, nahuin 'bii -gbo, ɔ -nyi 'mʋ, 'nɩ 'waan 'le 'a nahuoon -do, kɛɛ, 'lelɛ'bɔɔ-nyrɔwɔ 'mʋ, 'n kɔ ꞊bo -hɩʋ 'le 'kʋkʋnyʋ -hɛyri, 'mu 'klɔ -ha. 40 'Ɛ mɔ -tɛɛ, dɛ 'na Buu -hʋa, nɛ- mɔ, 'ɛ nɩ nahuon 'bɔ nɩ 'o, 'bɔ yrie, -ɛ mɔ, 'mɔ mɔ Nyɩsʋa a 'Yu, kɔ, 'bɔ kuo 'mʋ ꞊wlʋ ye, nahuon a -gbɛ bɔ kɔ 'klɔ yrayrʋ, -ɔ 'nɩnɩ -wɛ 'le, 'plɩɩ 'lelɛ'bɔɔ-nyrɔwɔ 'mʋ, 'n kɔ ꞊bo -hɩɔ 'le 'kʋkʋnyʋ -hɛyri, 'muo 'klɔ -ha.» 41 -Juukʋɛ a nyɩgblakɩ bʋ 'wɔn dɛ a -gbɛ, -ye ʋʋ -Yusu lɛ poo yrʋ, -ɛ nue, ɔ nɔ 'nɩ, nɔ- 'we ꞊nɔ dididɛdʋ ꞊nʋ ye, -ɛ -hɔn 'le yakɔ 'mʋ. 42 Kɛ ʋʋ po: «꞊Be nahuon -gbo, ɔ 'de Sosɛfʋ a 'yu -Yusu? -A yi 'a bu kɔ 'a 'dii 'hɛɛn nɩ. -Be' ɔ -wɛ 'le bɔ nu 'klɛɛ 'a ꞊tutue, -ɛ mɔ, 'ke ɔ -hɔn 'le yakɔ 'mʋ 'le?» 43 -Ye ɔ ꞊tu -wɔn, ɔ nɔ: «Dɛ- kɔ 'mɔ aa yrʋ lɛ poo 'le? 44 Nahuon ꞊de 'die 'le -wɛ bɔ kuo 'mʋ ꞊wlʋ ye, 'ke bɔ -hɛ 'na -naagbopʋyu, 'bɩa 'na Bu, -ɔ lee 'mʋ, 'bɔ 'dio 'le -jri. 'Na -gbɛ -gbo, 'lelɛ'bɔɔ-nyrɔwɔ 'mʋ, 'ɛ nɩ nahuon, -ɔ kuo 'mʋ ꞊wlʋ ye, 'mɔ dio 'le 'kʋkʋnyɔ -hɛyri -ha, 'muo 'klɔ -ha. 45 Nyɩsʋa a winwlɔn-hɛnyʋ 'crɛɛ la nɩ, 'ke 'le Nyɩsʋacrɩɩnɩɛ 'kwli 'mʋ, -ɛ mɔ: Nahuin 'bii, Nyɩsʋa, nɔ- diu tɔɔ. 'Ɛ nɩ nahuon 'bɔ nɩ 'o, 'bɔɔ 'na Bu Nyɩsʋa nʋa ye gbo po, 'plɩɩ 'bɔɔ 'a tɔɔwin kwa 'ble, nɔ- di 'na -naagbopʋyu -hɛ. 46 Ɛ 'de 'nyrɛ ꞊hɛn, -ɛ mɔ, nahuon ꞊de 'ye 'na Bu Nyɩsʋa, 'bɛ 'de 'n -do, -ɔ -hɔn 'le ꞊nɔ -wɔn 'mʋ. 47 'Nɩɩ 'a mʋ 'nɩ le -tɛɛ, nahuon 'bɔ nɩ 'o, 'bɔ kuo 'mʋ ꞊wlʋ ye, nɔ- kɔ 'klɔ yrayrʋ, -ɔ 'nɩnɩ -wɛ 'le. 48 'Mɔ 'we ꞊nɔ dididɛdʋ ꞊nʋ ye, -ɛɛ nahuon 'klɔ yrayrʋ -nyi, -ɔ 'nɩnɩ -wɛ 'le. 49 'A nɩ bunʋ, -ʋ nɩ la 'le 'pʋhʋɔnblʋgba 'mʋ, ꞊betɩ bʋʋ la dididɛdʋ ꞊nʋ di, ʋʋ manɩ daa, -ɛɛ la 'le yakɔ 'mʋ -hɔn, ʋʋ la lɛ 'nɩ 'kʋkʋ. 50 Kɛɛ, -tɛɛ a dididɛ, -ɛɛ 'le yakɔ 'mʋ -hɔn, nahuon ꞊nʋ, -ɔ die di, ɔ 'deɛ bɔ 'kʋ, -ɛ ꞊hɛn 'nyrɛ, ɔ di kɔ 'klɔ yrayrʋ, -ɔ 'nɩnɩ -wɛ 'le. 51 'Mɔ mɔ dididɛdʋ ꞊nʋ, -ɛ -hɔn 'le yakɔ 'mʋ, -ɛɛ nahuin 'klɔ yrayrʋ -nyi, -ɔ 'nɩnɩ -wɛ 'le. 'Ɛ nɩ nahuon, -ɔ di dididɛ a -gbɛ di, 'a 'klɔ yrayrʋ, ɔ di kɔ, ɔ 'die 'le -wɛ bɔ kɔ 'lu-yɩyrɛ. Dididɛ -gbo, 'n di -ha, nɛ- mɔ 'na 'hʋɩn. 'Nɩɩ 'na 'hʋɩn a -gbɛ 'nɩ -ha, -ɛ die nu, 'klɔ ke a nahuin, ʋ 'mʋ 'klɔ yrayrʋ kɔ.» 52 -Juukʋɛ a ye'mʋnaanyʋ, -tɩ ꞊nʋ, -Yusu ꞊tu, ɩ po ꞊nʋ 'mʋ yrʋ, 'ʋʋ wlɔn lɛ ꞊gbʋgba, ʋ nɔ: «-Be' nahuon -gbo, ɔ -wɛ 'le bɔ nu -a mʋ 'a 'hʋɩn a -nyinyie, 'plɩɩ -a 'mui di 'le?» 53 -Ye -Yusu ꞊tu -wɔn, ɔ nɔ: «'Nɩɩ 'a mʋ 'nɩ le -tɛɛ, 'mɔ -gbo, -ɔ mɔ -tʋnahuin 'bii a Nahuon, 'bɩa 'ba 'nɩnɩ di 'na 'hʋɩn, kɔ, 'bɩa 'ba 'nɩnɩ 'na 'na dablo, a 'deɛ ba kɔ 'klɔ yrayrʋ, -ɔ 'nɩnɩ -wɛ 'le gbe. 54 Nahuon 'bɔ nɩ 'o, 'bɔɔ 'na 'hʋɩn di, kɔ, 'bɔɔ 'na dablo 'na, nahuon a -gbɛ, ɔ kɔ 'klɔ yrayrʋ, -ɔ 'nɩnɩ -wɛ 'le, 'plɩɩ 'lelɛ'bɔɔ-nyrɔwɔ 'mʋ, 'n dio 'le 'kʋkʋnyʋ -hɛyri 'nɩ -ha, 'muo 'klɔ -ha. 55 'Na 'hʋɩn mɔ -tɛɛ a dididɛ'ɛ nɩ, 'na dablo, ɔ mɔ -tɛɛ a 'nɩnadɛ'ɛ nɩ. 56 Nahuon -gbo, -ɔɔ 'na 'hʋɩn di, kɔ, -ɔɔ 'na dablo 'na, ɔ kɔ 'mʋ 'hɛɛn, -a -mʋɛ nɩ. 57 'Na Bu ꞊nʋ, -ɔ lee nɔ 'mʋ 'klɔ -gbo ke, nɔ- nye nu, 'plɩɩ nahuin 'ʋ nɩ 'klɔ. Nɔ- nue, 'plɩɩ 'na -gbɛ, 'nɩ nɩ 'klɔ. Kɛ'ɛ nɩ, ɛ -ti 'mʋ, 'ke 'o nahuon ꞊nʋ -wɔn, -ɔɔ 'na 'hʋɩn di. 'Mɔ nye nu, 'plɩɩ nahuon a -gbɛ 'ɔ nɩ 'klɔ. 58 'Mɔ mɔ -tɛɛ a dididɛ, -ɛ -hɔn 'le yakɔ 'mʋ. Ɛ 'de dididɛ ꞊nʋ ye 'we, -ɛɛ la 'le yakɔ 'mʋ -hɔn, ʋʋ manɩ daa, 'a nɩ bunʋʋ la di, 'ke 'le 'pʋhʋɔnblʋgba 'mʋ. ꞊Betɩ bʋʋ la dididɛdʋ a -gbɛ di, ʋʋ la lɛ 'nɩ 'kʋkʋ. Nahuon ꞊nʋ, -ɔ di -tɛɛ a dididɛ ꞊nʋ di, 'n 'ya 'mʋ, ɔ di kɔ 'klɔ yrayrʋ ꞊nʋ, -ɔ 'nɩnɩ -wɛ 'le.» 59 Tɔɔwin 'bii -gbo, -Yusu tɔɔ, 'ke ɔ tʋɩ 'le Nyɩsʋa a kayu ꞊nʋ gbo, -ʋ nɩ 'le Kapɛnaɔdɩɔ 'mʋ. 60 Nahuin ꞊nʋ, -ʋʋ -Yusu -wɔn kʋɛ, 'plɩɩ 'waa 'plɔplɔ, ʋ 'mʋ 'a tɔɔwin ꞊nʋ mu 'wɔn, -ye ʋ nɔ: «Tɔɔwin -gbo, ɩ nɩ ke 'klɩ. Nahuon ꞊de 'die 'le -wɛ bɔ wɩɩn ke.» 61 -Yusu yree nɩ, -ɛ mɔ, nahuin ꞊nʋ, ʋʋ 'mʋ lɛ 'nɩ 'pʋprɛ. Nɛ- nue, 'ɔ nyu le, ɔ nɔ: «꞊Be -tɩ -gbo, 'n ꞊tu, ɩɩ 'a mʋ 'nɩ 'hran? 62 'Mɔ -gbo, -ɔ mɔ -tʋnahuin 'bii a Nahuon, 'bɩa 'ba 'ye 'mʋ, 'nɩɩ yakɔ 'mʋ mu, -tɛgbi ꞊nʋ, 'n -hɔn 'le 'mʋ, -be' a di 'klɛɛ po 'le? 63 Nyɩsʋa a -Hihiuu -do, nʋ-ʋ nahuin 'klɔ yrayrʋ -nyi. -Tʋnahuon a 'klɩ 'de 'le dɛ ꞊de 'le -wɛ. Win -gbo, 'n tɔɔ 'a mʋ, nɩ- nye nu, 'plɩɩ Nyɩsʋa 'ɔɔ 'a mʋ 'a -Hihiu -nyi, 'plɩɩ -Hihiu a -gbɛ, ʋ 'mʋ 'a mʋ 'klɔ yrayrʋ -nyi, -ɔ 'nɩnɩ -wɛ 'le. 64 Kɛɛ, 'ke 'le 'a mʋ -hɛyri, nahuin nɩ 'le, 'ʋ 'de 'mʋ ꞊wlʋ ye kuo.» Kʋɛ la 'le gbo, -Yusu yi nahuin ꞊nʋ nɩ, -ʋ 'dio ꞊wlʋ ye kuo, kɔ, 'ɔ yi nahuon ꞊nʋ, -ɔ dio 'a yraanyʋ kwa po. 65 -Ye kɛ ɔɔ lele po, ɔ nɔ: «Nɛ- nue, 'nɩ le 'a mʋ, -ɛ mɔ, nahuon ꞊de 'die 'le -wɛ bɔ kuo 'mʋ ꞊wlʋ ye, 'ke bɔ -hɛ 'na -naagbopʋyu, 'bɩa Nyɩsʋa 'bɔ 'dio 'le -jri.» 66 Nahuin 'plɔplɔ, -ʋ nyo o -wɔn kʋɛ, kʋɛ 'o ti a -gbɛ 'yie 'mʋ gbo, -ye ʋ 'kee 'a -wɔnkʋkʋɛ nɩ. 67 'A -naagbopʋʋ -pu ꞊tu 'o 'hɔn ꞊nʋ, kɛ -Yusu nyu ye po: «'A nɩ -gbɛ, ꞊be aa -hʋa ba hie -wɛ 'o 'mʋ gbo, ba 'kee 'na -wɔnkʋkʋɛ?» 68 -Ye Simɔ Piɛlɩ ꞊tuo -wɔn, ɔ nɔ: «Kʋkɔnyɔ, nyɔ- kɔ -wɔn -a di 'klɛɛ 'le mu 'le? -N -do, -mɔ kɔ win, -ɩɩ nahuon 'klɔ yrayrʋ -nyi, -ɔ 'nɩnɩ -wɛ 'le. 69 -Tɛ ti nɩ lɛ 'mʋ -gbo, -a kuo -mʋ ye ꞊wlʋ, 'plɩɩ -a yie nɩ, -ɛ mɔ, -mɔ mɔ Nyɩsʋa a 'Yu -Yusu 'Klɩsʋ, ɔ lee nɔ 'klɔ ke.» 70 -Ye -Yusu ꞊tu -wɔn, ɔ nɔ: «'A mʋ -pu ꞊tu 'o 'hɔn -gbo, 'mɔɔ nɩ, -ɔ -ha 'le 'a mʋ du 'mʋ, 'ke a 'mʋ 'na -naagbopʋ -hɛ. Kɛɛ, 'ke 'le 'a mʋ -hɛyri, nahuon nɩ 'le, 'ɔ mɔ 'ku -hʋan.» 71 Judɩa, -ɔ mɔ Simɔ Yisikalio a 'yu, nɔ- ɔ ꞊hɛn 'nyrɛ. Ɔ mɔ -Yusu a -naagbopʋʋ -pu ꞊tu 'o 'hɔn a nahuon -yee nɩ. Kɛɛ, nɔ- di -Yusu 'a yraanyʋ kwa po.
1 Dɛ a -gbɛ, -tɛ ɛ -hi, -ye -Yusu, ɔɔ Galileblʋgba ke 'nɩ na; ɔ 'nɩ -hʋa ꞊le bɔ mu 'le Sudeblʋgba 'mʋ, -ɛ nue, -Juukʋɛ a ye'mʋnaanyʋ, ʋʋ lɛ ꞊mɔ 'a 'lɩla. 2 Ti a -gbɛ 'yri, -Juukʋɛ a lɛ'mimre ꞊nʋ, ʋʋ Papʋɛi a lɛ'mimre daa, 'a ti 'mʋɛɛ yrɛ. 3 Nɛ- nue, -Yusu a -dɩayuo 'ʋ lo, ʋ nɔ: «-Hɔn nɔ Galileblʋgba 'mʋ, -bo mu 'le Sudeblʋgba 'mʋ, -ɛ die nu, -na -naagbopʋ, -ʋ nɩ 'le, ʋ 'mʋ -wɛ 'ŋmilɛka-tɔplɩ ꞊nʋ 'ye, -nɩɩ nu. 4 Nahuon ꞊nʋ, -ɔɔ -hʋa, 'ke nahuin 'bii bʋ yio, ɔ 'nɩ nu ꞊le -tɔplɩ, 'ke 'le -huhlikɔ 'kwli 'mʋ. 'A -tɩ, -tɛ -nɩɩ 'ŋmilɛka-tɔplɩ nu, nui 'ke 'o nahuin 'bii ye, ʋ 'mʋ -mʋ yi.» 5 'A -dɩayuo a -gbɛ, ʋ 'de 'ɛ -mɔ -Yusu ꞊wlʋ ye kuo. 6 -Ye kɛ ɔɔ ꞊nʋ ye po, ɔ nɔ: «Ti 'de wɛn 'o a nyree, 'ke ꞊bo mu 'le. 'Ɛ nɩ ti mɔ ꞊hapʋtii nɩ, 'ke 'o 'a mʋ -wɔn. 7 'Klɔ -gbo ke a nahuin, ʋ 'deɛ bʋ yraa 'a mʋ, kɛɛ, 'mɛ -ye, ʋ yraa 'mʋ nɩ, -ɛ nue, 'n nyi 'nɩ ꞊tu, -ɛ mɔ, 'waa nunu-tɔplɩ nyre lɛ 'yi. 8 A -mɛ -ye, ba mu 'le lɛ'mimre ke. 'Mɛ -ye, 'nɩ mu ꞊le 'le, -ɛ nue, ti 'de wɛn 'o a nyree, 'ke ꞊bo mu 'le.» 9 Kɛ ɔ po ꞊nʋ ye, 'ɔ 'de -ta 'mʋ -hɔn. 'Ke ɔ 'kɩɛ nɩɛ 'le Galileblʋgba 'mʋ. 10 -Tɛ -Yusu a -dɩayuo -nɩ wɛn, ʋ mu 'klɛɛ lɛ'mimre ke, 'ke 'le Jrusrɛdɩɔ 'mʋ, -ye -Yusu a -gbɛ, ɔ mu -wɛ 'le ꞊le, 'ke 'le -huhlikɔ 'kwli 'mʋ, -ɛ die nu, nahuin 'nɩ ꞊hion 'ye. 11 Lɛ'mimre a ti 'yri, -Juukʋɛ a ye'mʋnaanyʋ, ʋ nyo lɛ 'nɩ ꞊mɔ, 'ʋʋ wlɔn lɛ ꞊gbʋgba: «-Be' -Yusu nɩ ye 'le?» 12 'ke 'le nahuin ꞊nʋ -hɛyri, 'ʋʋ 'a -tɩ ꞊tu. ꞊Ʋ -ye nɔ: «Ɔ mɔ ꞊hapʋnahuoon nɩ.» ꞊Ʋ -ye nɔ: «'Ʋʋn, ɔ 'de ꞊hapʋnahuon, ɔɔ kaa nahuin.» 13 Kɛɛ, nahuon ꞊de 'die 'le -wɛ bɔ ꞊tui, 'ke 'o nahuin 'bii ye, 'bɛ 'de bʋ bii yee -do, -ɛ nue, ʋʋ pɩ 'waa ye'mʋnaanyʋ a hʋannʋ. 14 -Tɛ ʋ -wle 'klɛɛ lɛ'mimre 'mʋ gbo, -ye 'ke -Yusu mu 'le Nyɩsʋa a 'kagblaka a -yaa 'mʋ, 'ɔ -tʋa nahuin a tɔɔlɛ gbo. 15 -Tɛ -Juukʋɛ, ʋʋ 'a win 'wɔn, -ye ɩ saka ꞊nʋ nɩ, ʋ nɔ: «Nahuon -gbo, teteitɔɔnyɔ ꞊de 'dio -hlɩn tetei a tʋɛ. -Be' ɔ -wɛ 'le bɔ nu -tɔplɩ 'plɔplɔdʋ -gbo a yiyie 'le?» 16 -Ye kɛ ɔ nyu ye po, ɔ nɔ: «-Tɔplɩ -gbo, 'nɩɩ 'a mʋ tɔɔ, Nyɩsʋa, -ɔ lee nɔ 'mʋ, nɔ-ɔ 'mʋ 'a ꞊tɔ -nyi. Ɛ 'de 'na -gbɛ a ꞊tɔ. 17 Nahuon 'bɔ nɩ 'o, 'bɔɔ -hʋa bɔ nu dɛ ꞊nʋ, -ɛɛ Nyɩsʋa a plɔ blee, -ye ɔ die 'mʋ lɛ 'nɩ yrii, 'bɩa tɔɔlɛ -gbo, 'nɩɩ tɔɔ, 'bɛ 'ya Nyɩsʋa a 'lu a lɛ-hielɛ 'mʋ, -hee' 'bɩa 'nɩɩ tɔɔ, 'ke 'le 'na -gbɛ a 'klɩ 'kwli 'mʋ. 18 Nahuon ꞊nʋ, -ɔɔ tɔɔ, 'ke 'le 'a -gbɛ a 'klɩ 'kwli 'mʋ, ɔ nye 'nɩ -hʋa, 'ke nahuin bʋ bɔɔ. Kɛɛ, nahuon ꞊nʋ, -ɔɔ tɔɔ, 'ke nahuin bʋ baa nahuon ꞊nʋ, -ɔ lee ꞊nɔ, nɔ-ɔ -tɩ a -tɛɛ ꞊tu. Hɩ 'de 'le 'a pupowin -hɛyri nɩ. 19 Moise, ɔ -nye 'a nɩ bunʋ tetei nɩ. Kɛɛ, 'ke 'le 'a mʋ -hɛyri, nahuon ꞊de 'nɩ ꞊tui ꞊le 'o. Dɛ 'klan tio- 'n nu, -ɛ kɔ 'mɔ aa -hʋa ba 'la?» 20 -Ye nahuin ꞊tuo -wɔn, ʋ nɔ: «-Mɔ nyɔ -gbo, 'ku -hʋan nɩ 'o -mʋ ke 'mʋ. Nahuon tio-o -na 'lɩla lɛ ꞊mɔ?» 21 -Ye -Yusu nɔ: «Dɛɛ -do, 'n nu, nɛ- mɔ, 'n -wɔ o nahuon ꞊de a 'kʋɛ -wuwle-nyrɔwɔ 'mʋ. 'Plɩɩ -ye, a 'bii, ɩ saka o 'a mʋ nɩ, 'ke ꞊bo di o dɛ a -gbɛ nu -wuwle-nyrɔwɔ 'mʋ. 22 Kɛɛ, a -mɛ -ye, aa -wɛ nu -kʋan -wuwle-nyrɔwɔ 'mʋ, -ɛ nue, Moise le la 'a nɩ bunʋ nɩ, 'ke ba 'bɛ 'a nɩ 'yuo nyɩbɛpʋ yrɛ, 'yu 'bɔ kɔ -nyrɔwɩɩ -yehɛn-yehɛn. -Ye 'klɛɛ, ꞊betɩ -wuwle-nyrɔwɔ 'mʋ, aa 'a nɩ 'yuo nyɩbɛpʋ yrɛ 'nɩ 'bɛ. 'Ɛ mɔ -tɛɛ, 'a nɩ bunʋ, -ʋ nɩ la 'klɔ, 'plɩɩ Moise 'mʋ la 'klɔ nɩ, nʋ- ꞊tue -wlu, ɛ 'de Moise. 23 -Tɛ aa 'a nɩ 'yuo nyɩbɛpʋ yrɛ 'bɛ -wuwle-nyrɔwɔ 'mʋ, -ɛ die nu, a 'nɩ ꞊han Moise a tete 'wla, ꞊be nahuon -gbo, 'kʋɛɛ nu, -bo -wɔ 'a 'kʋɛ a -gbɛ, ɛ 'de 'o ye'bɩbɛ 'mʋ -hi? -Tɛ 'n -wɔ o nahuon a 'kʋɛ -wuwle-nyrɔwɔ 'mʋ, dɛ- kɔ 'mɔ aa yrʋ lɛ poo 'le? 24 -Tɔplɩɩ -do -gbo, 'a nɩ 'yii 'ye, ɩ nɩ nue 'le, a nɩ yɛɛ 'le nahuon -tɩ. Kɛɛ, 'plɩɩ a 'mʋ -tɩ mu ꞊tu, ba -hie 'lu lɛ -tɛɛ, 'plɩɩ a 'mui ꞊tu.» 25 Jrusrɛ 'mʋ a nahuin -ye, kɛ ʋʋ po: «꞊Be ɛ 'de nahuon -gbo, -ɔ kɔ 'lɩla ʋʋ lɛ ꞊mɔ? 26 Ba 'ye kɛ, nɔ-ɔ 'prɛ, 'ke 'le nahuin 'bii ye, 'plɩɩ -a nɩ ye'mʋnaanyʋ, ʋ 'nɩ puo ꞊le mɛ lɛ. ꞊Be ʋ yrie nɩ, -ɛ mɔ, nɔ- mɔ Waanyɔ ꞊nʋ, Nyɩsʋa po la lɛ, ɔ di la -a mʋ ye ya? 27 Kɛɛ, 'ke 'le 'pɩa -ye ke, Waanyɔ a -gbɛ 'bɔ di 'le, -tɛgbi ɔ -hɔn 'o 'mʋ, nahuon ꞊de 'deɛ bɔ yii 'o. Kɛɛ -ye nahuon -gbo, -tɛgbi ɔ -hɔn 'o 'mʋ, -a yii 'o ꞊o.» 28 Tii -do a -gbɛ 'yri, -Yusuu 'nɩ tɔɔ, 'ke 'le Nyɩsʋa a 'kagblaka a -yaa 'mʋ, 'ɔɔ 'le win 'yaa, ɔ nɔ: «꞊Be sɛyɩ-sɛyɩ, nahuon a gblo tio- 'n 'ya 'mʋ, a yio nɩ? Kɔ, -tɛgbi 'n -hɔn 'o 'mʋ, a yii -wɛ 'o ꞊o? Ɛ 'de 'na -gbɛ a 'klɩ 'kwli 'mʋ, 'n 'de 'le di. Nahuon -ye, nɔ- lee nɔ 'mʋ. Nahuon a -gbɛ, ɔ mɔ ꞊wlʋyekuonyɔ'ɔ nɩ. A -mɛ -ye, a 'dio yi. 29 Kɛɛ, 'mɛ -ye, 'n yio nɩ, -ɛ nue, 'ke 'n -hɔn 'le ꞊nɔ -wɔn 'mʋ, kɔ, nɔ- lee nɔ 'mʋ.» 30 -Tɛ nahuin ꞊nʋ, ʋ 'wɩn, -ye ʋʋ -hʋa bʋ klo, kɛɛ, nahuon ꞊de 'die 'le -wɛ bɔ gbɔ 'o dabʋ 'hʋɩn 'mʋ, -ɛ nue, ti 'de wɛn 'o a nyree, 'ke bʋ klo. 31 Kɛɛ -ye 'ke 'le nahuin ꞊nʋ -hɛyri, 'waa 'plɔplɔ kuo ꞊wlʋ ye. Kɛ ʋʋ po: «-Tado, nahuon -gbo, nɔ- mɔ Waanyɔ ꞊nʋ, Nyɩsʋa po la lɛ, ɔ di la -a mʋ ye ya. ꞊Be ɛ di kɔ nahuon -ye, -ɔ di 'ŋmilɛka-tɔplɩ 'plɔplɔ nu, ɔ 'mʋ 'o nahuon -gbo 'mʋ -hi?» 32 -Ye Falisi꞊tumu a nahuin, ʋ 'wɔn -tɩ ꞊nʋ nɩ, nahuiin 'le gbo ble, ʋʋ ꞊tu, 'ke 'o -Yusu ke. Nɛ- mɔ Nyɩsʋa a -cɔhlʋnpinyʋ gblakɩ kɔ Falisi꞊tumu a nahuin 'hɛɛn, bʋ le 'sɔyuo, 'ke bʋ klɩ -Yusu. 33 -Tɛ -Yusu 'ye dɛ a -gbɛ, -ye kɛ ɔɔ po: «'Ke 'le ti gbi 'kwli 'mʋ, 'n 'kɩɛ die nɔ 'a mʋ -hɛyri nɩ, 'plɩɩ 'mʋ 'le nahuon ꞊nʋ -wɔn mu, -ɔ lee nɔ 'mʋ. 34 A di 'mʋ lɛ 'nɩ ꞊mɔ, kɛɛ, a 'deɛ ba 'ye 'mʋ, -ɛ nue, -tɛgbi ꞊nʋ, 'nɩɩ 'le mu, a 'die 'le -wɛ ba mu 'le.» 35 -Ye -Juukʋɛ, ʋʋ wlɔn lɛ 'nɩ ꞊gbʋgba, ʋ nɔ: «-Be' ɔ di 'klɛɛ ye mue 'le, 'ke -a 'nɩnɩ dio 'ye? ꞊Be 'ke ɔ di 'le -a nɩ 'bienʋ -Juukʋɛ ꞊nʋ -wɔn mu, -ʋ nɩ 'le dakʋ a nahuin -hɛyri, -ʋ 'de -Juukʋɛ, ɔ 'mʋ -wɛ dakʋ a nahuin a -gbɛ tɔɔ? 36 -Tɩ -gbo, ɔ ꞊tu, dɛ tio- ɛ ꞊hɛn 'nyrɛ 'le, -tɛ ɔ plɛ, -ɛ mɔ: A di 'mʋ lɛ 'nɩ ꞊mɔ, kɛɛ, a 'deɛ ba 'ye 'mʋ, -ɛ nue, -tɛgbi ꞊nʋ, 'nɩɩ 'le mu, a 'die 'le -wɛ ba mu 'le.» 37 Lɛ'mimre ꞊nʋ, 'a 'lelɛ'bɔɔ-nyrɔwɔ, nɔ- mɔ -nyrɔwɔ gblaka. -Nyrɔwɔ a -gbɛ 'mʋ, -ye -Yusu 'ba 'mʋ ye, 'ke 'o nahuin -huohui ꞊nʋ ye, 'ɔɔ 'le win 'yaa, ɔ nɔ: «Nahuon 'bɔ nɩ 'o, 'nie'natʋ 'bʋ nyo nu, -ye kɛ bɔ di nɔ 'mʋ -wɔn, ɔ 'mʋ 'na. 38 Nahuon ꞊nʋ, -ɔ kuo 'mʋ ꞊wlʋ ye, ɛ 'we ꞊nɔ ye, 'nɩlu nɩ 'le 'a ꞊wlʋ ke, 'plɩɩ 'niedʋ ꞊nʋ, -ɛɛ -tʋnahuin 'klɔ yrayrʋ -nyi, nɛ- di 'le 'a ꞊wlʋ ke 'mʋ -hɔn. Kɛ'ɛ nɩ, ʋ nu la 'a 'crɩɩlɛ, 'ke 'le Nyɩsʋacrɩɩnɩɛ 'kwli 'mʋ.» 39 Dɛ ꞊nʋ -kɔ -tɩ -Yusu ꞊tu, nɛ- mɔ Nyɩsʋa a -Hihiu ꞊nʋ, Nyɩsʋa di nahuin ꞊nʋ -nyi, -ʋ kuo -Yusu ꞊wlʋ ye. Ti a -gbɛ 'yri, Nyɩsʋa 'de wɛn 'a -Hihiu nahuin a -nyee, -ɛ nue, -Yusu 'de wɛn 'le yrayrɩ a mue, 'ke 'le 'a -tɩ a 'yi'bʋaalɛ 'kwli 'mʋ. 40 Nahuin ꞊nʋ, -tɛ ʋ 'wɔn -Yusu a win, 'waa dɛ -ye, kɛ ʋʋ po: «'Ɛ mɔ -tɛɛ, nahuon -gbo, nɔ- mɔ Nyɩsʋa a winwlɔn-hɛnyɔ ꞊nʋ, ʋ po la lɛ, -ɔ kɔ -bɔ di la 'le.» 41 Kɛ ꞊ʋ -yee po: «Waanyɔ ꞊nʋ, Nyɩsʋa po la lɛ, ɔ di la 'le ya, nɔ-ɔ nɩ.» Kɛ ꞊ʋ -yee po: «Waanyɔ a -gbɛ, ɔ 'deɛ bɔ kɔ 'le Galileblʋgba 'mʋ. 42 Kɛ Nyɩsʋacrɩɩnɩɛɛ po: Waanyɔ a -gbɛ, 'ke ɔ di 'le bodɩɔ Dafidɩ a ꞊tugba -hɛyri kɔ, kɔ, 'ɔ di 'le Betelɛmʋdɩɔ 'mʋ kɔ, -ɔ mɔ Dafidɩ a -gbɛ a 'dɩɔ.» 43 Ɛ 'we ꞊nɔ ye, nahuin ꞊nʋ, ʋ 'bɛ lɛ ꞊tɩɔ, -Yusu a -tɩ. 44 ꞊Ʋ -yee -hʋa bʋ klo, kɛɛ, nahuon ꞊de 'die 'le -wɛ bɔ gbɔ 'o dabʋ 'hʋɩn 'mʋ. 45 -Ye 'sɔyuo -nɩ wɛn, ʋ ꞊hɩan -wɔn, 'ʋ mu 'le Nyɩsʋa a -cɔhlʋnpinyʋ gblakɩ kɔ Falisi꞊tumu a nahuin 'hɛɛn -wɔn. -Ye nyɩgblakɩ a -gbɛ, ʋ ꞊gbʋ wlɔn: «Dɛ- kɔ -Yusu a 'de 'le ya 'le?» 46 -Ye 'sɔyuo a -gbɛ, ʋ ꞊tu -wɔn, ʋ nɔ: «-A 'de -hlɩn nahuon ꞊de a 'yee, -bɔ 'prɛ, -ɛ 'we ꞊nɔ nahuon -gbo ye.» 47 Nɛ- mɔ Falisi꞊tumu a nahuin bʋ ꞊gbʋ wlɔn: «꞊Be 'a nɩ -gbɛ, a wɛɛn -wɛ ke, 'ke nahuon ꞊nʋ bɔ kaa 'a mʋ. 48 -A mʋ Falisi꞊tumu a nahuoon -do ꞊de 'dio ꞊wlʋ ye kuo, 'plɩɩ ɛ 'de -wɛ 'blʋgba a ye'mʋnaanyɔ ꞊de kɔ, -bɔ kuo ꞊wlʋ ye. 49 Kɛɛ, dakʋ a dɛ ꞊nʋ, -ʋ kuo ꞊wlʋ ye, ʋ 'de Moise a tetei yi. 'A -tɩ, Nyɩsʋa a -bati diu 'nɩ klɩ.» 50 Falisi꞊tumu a nahuon ꞊nʋ, -ɔ mɔ Nikodɛmʋ, ɔ nɩ la -wɛ ke -tuo. Nɔ-ɔ nɩ, -ɔ mu la -Yusu 'ye wɔn, ti ꞊de a ti 'yri la. Kɛ ɔɔ 'klɛɛ 'a 'bienʋ ye po, ɔ nɔ: 51 «-A nɩ tetei nɔ 'nɩ: 'Plɩɩ -a 'mʋ nahuon -tɩ yɛɛ, -a kɔ -ba puo nʋa ye gbo. ꞊Ba 'ye, -ɛ mɔ, ɔ nu dɛ 'klan, -ye -bati dio 'nɩ klɩ.» 52 -Ye ʋ ꞊tuo -wɔn, ʋ nɔ: «꞊Be -na -gbɛ, 'ke -n kɔ -wɛ 'le Galileblʋgba 'mʋ? -Hre Nyɩsʋacrɩɩnɩɛi -tɛɛ. -N die 'nɩ 'ye, -ɛ mɔ, Nyɩsʋa a winwlɔn-hɛnyɔ ꞊de 'die 'le -wɛ bɔ kɔ 'le Galileblʋgba 'mʋ.» 53 -Tɛ dɛ a -gbɛ, ɛ -hi, -ye ʋ -gbɛ lɛ. Nahuon 'bɔ nɩ 'o, 'ke ɔ mu 'le 'a kayu gbo.
1 -Ye 'ke -Yusu mu 'le dʋgba ꞊nʋ 'lu, -ɔ kɔ 'lu ti ꞊de nɩ 'le, ʋʋ olifie daa. 2 -Tɛ -nyrɛ cɛ lɛ, -ye ɔ ꞊hɩan -wɔn, 'ɔ mu 'le Nyɩsʋa a 'kagblaka a -yaa 'mʋ, nahuin 'plɔplɔ 'ʋ 'yɩya 'o ꞊nɔ 'hʋɩn 'mʋ gbo, 'ɔ nɩ gbo, 'ɔ -tʋa 'waa tɔɔlɛ gbo. 3 -Tɛ ɔ nɩ 'klɛɛ 'le nahuin a tɔɔlɛ 'kwli 'mʋ, -ye -Juukʋɛ a teteitɔɔnyʋ kɔ Falisi꞊tumu a nahuin 'hɛɛn, nʋ- gba 'o ꞊nɔ nyrʋgba ꞊de 'hʋɩn 'mʋ. Nyrʋgba a -gbɛ, ɔ nɩ 'le -wlawli a nunue 'kwli 'mʋ, 'ʋ klo, 'ʋ yɔ 'le, 'ʋ ꞊tuo 'o nahuin 'bii ye gbo. 4 -Ye ʋʋ 'klɛɛ -Yusu 'nɩ le, ʋ nɔ: «Tɔɔnyɔ, nyrʋgba -gbo, ɔ nɩ 'le -wlawli a nunue 'kwli 'mʋ, ꞊a klo, ꞊a yɔ 'le. 5 'Ɛ mɔ -tɛɛ, Nyɩsʋa a winwlɔn-hɛnyɔ Moise, 'a tete -ye nye -a mʋ 'nɩ tɔɔ, -ɛ mɔ, nyrʋgbapʋ, -ʋʋ dɛ a -gbɛ nu, -ba pu 'hɛ -wɔn lɛ, -ba 'lʋ. -Mɛ -ye, -be' -nɩɩ po 'le?» 6 Ʋ nyi 'nɩ ꞊tu, -ɛ die nu, ʋ 'muo 'mʋ lɛ ꞊tɔ, ʋ 'mue 'ye, 'bɩa 'bɔ di Nyɩsʋa a tete 'wla, -ɛ die nu, ʋ 'muo -tɩ yɛɛ. Kɛɛ -ye -Yusu ꞊tɩtɩ 'mʋ nɩ, 'ɔɔ -jie nu, 'ɔɔ 'o -tʋtʋ ke 'crɩɩ. 7 -Tɛ ʋ 'kɩɛ ꞊gbɔɔ wlɔn lɛ, nɛ- mɔ bɔ 'wɔɔ 'le ke lɛ, ɔ nɔ: «'Ke 'le 'a mʋ -hɛyri, nahuon ꞊nʋ, -ɔ 'de -hlɩn dɛ 'kuku a nue, nɔ- -bɔ 'ya ye-hɛnahuon 'mʋ, -bɔ puo 'hɩɔ -wɔn.» 8 -Ye ɔ ꞊tɩtɩ lele 'mʋ nɩ, 'ɔɔ 'o lele -tʋtʋ ke 'crɩɩ. 9 'Plɩɩ ʋ 'mʋ -Yusu a pupowin a -gbɛ mu 'wɔn, -ye ʋ po -dodo, 'ʋʋ lɛ mumu. Nyɩgblakɩ, nʋ- mɔ ye-hɛnahuin, -ʋ -tʋa lɛmumulɛ gbo. -Ye -Yusu kɔ nyrʋgba a -gbɛ 'hɛɛn, ʋ -do, nʋ- hie 'o, 'ke 'o nahuin ye. Nyrʋgba a -gbɛ, ɔ 'kɩɛ nyrɛɛ 'o ꞊nɔ ye gbo. 10 -Ye ɔ 'wɔɔ 'le lele lɛ ke, ɔ nɔ: «Nyrʋgba o, nahuin -gbo, -ʋʋ wɛn -mʋ -tɩ yɛɛ, -be' ʋ nɩ ye 'le? ꞊Be ꞊ɔ ꞊de 'de 'o hie, -bɔ plɛ, -n nɩ 'mʋ 'kʋkʋɛ?» 11 -Ye ɔ nɔ: «Iin -o, Kʋkɔnyɔ o. 'A nahuon ꞊de 'de 'o hie.» -Ye -Yusu nɔ: «'Na -gbɛ, 'nɩ po ꞊le -wɛ lɛ, -ɛ mɔ, -n nɩ 'mʋ 'kʋkʋɛ. -N -wɛ 'le -bo mu nɩ. Kɛɛ, ꞊nɩ nu 'le 'klɛɛ lele dɛ 'kuku.» 12 Kɛ -Yusu, ɔɔ lele nahuin ꞊nʋ ye po, ɔ nɔ: «'Mɔɔ nɩ, -ɔɔ 'klɔ -gbo a nahuin -nyrɛ -nyi, -ɛ die nu, ʋ 'mʋ -tɩ a -tɛɛ 'mʋ lɛ yrii. Nahuon 'bɔ nɩ 'o, 'bɔ kuo 'mʋ ꞊wlʋ ye, -ye ɔ di -nyrɛdʋ ꞊nʋ 'nɩ kɔ, -ɛɛ nahuon 'klɔ yrayrʋ -nyi. Ɔ 'deɛ bɔ na 'klɛɛ lele gbɩgbɩyrɩ 'mʋ lɛ.» 13 -Ye Falisi꞊tumu a nahuin ꞊tuo -wɔn, ʋ nɔ: «-Na -gbɛ, -mɔɔ -n dɩɔnʋ a -tɩ ꞊tu. 'A -tɩ, -tɩ -nɩɩ ꞊tu, ɩ 'de -tɩ a -tɛɛ.» 14 -Ye -Yusu nɔ: «Mɔ ꞊betɩ 'n -do, ꞊boo 'n dɩɔnʋ a -tɩ ꞊tu, -tɩ 'nɩɩ ꞊tu, ɩ mɔ -tɩ a -tɛɛ nɩ, -ɛ nue, -tɛgbi 'n -hɔn 'o 'mʋ, kɔ, 'n di 'le lele mu, 'n yii 'o ꞊o. Kɛɛ, a -mɛ -ye, a 'de 'o yii. 15 -Tɛ -tʋnahuiin 'waa 'bienʋ -tʋnahuin a -tɩ a yɛɛlɛ nu, kɛ'ɛ nɩ, aa nahuin a -tɩ a yɛɛlɛ nu. 'Mɛ -ye, 'nɩ yɛɛ ꞊le nahuon ꞊de -tɩ. 16 Kɛɛ, 'bɩa 'nɩ kɔ ꞊bo yɛɛ nahuin -tɩ, -ye -tɩ ꞊nʋ, 'nɩɩ ꞊tu, ɩ mɔ -tɩ a -tɛɛ nɩ, -ɛ nue, ɛ 'de 'n -do, 'nɩ yɛɛ ꞊le nahuin -tɩ, kɛɛ, 'na Bu -gbo, -ɔ lee nɔ 'mʋ, ɔ kɔ 'mʋ 'hɛɛn, -a mʋ pɛ. 17 Ʋ 'crɩɛ la nɩ, 'ke 'le Nyɩsʋa a teteicrɩɩnɩɛ 'kwli 'mʋ, -hɛhɩpʋʋ 'hɔn, 'bʋ ꞊tu -tɩɩ -do, -ye -tɩ a -gbɛ, ʋ ꞊tu, ɩ mɔ -tɩ a -tɛɛ nɩ. 18 'Nɩɩ ꞊tu 'n dɩɔnʋ a -tɩ, kɔ, 'na Bu, -ɔ lee nɔ 'mʋ, 'ɔɔ -wɛ 'na -tɩ ꞊tu.» 19 -Ye ʋ ꞊gbɔ wlɔn, ʋ nɔ: «-Be' -na Bu nɩ ye 'le?» -Ye -Yusu nɔ: «Mɔ, a 'de 'mʋ yi, kɔ, 'a 'de -wɛ 'na Bu yi. 'Bɩa 'ba yi wɛn 'mʋ, -ye a di wɛn -wɛ 'na Bu 'nɩ yi.» 20 -Tɛ -Yusu, ɔɔ nahuin -tɔplɩ ꞊nʋ tɔɔ, 'ke ɔ nɩ 'le Nyɩsʋa a 'kagblaka a -yaa 'mʋ gbo, 'ke 'o dokwliye ꞊nʋ 'hʋɩn 'mʋ, -ɛ kɔ wlɔn ʋʋ 'le 'wli lɛ po. Kɛɛ, ꞊ɔ ꞊de 'die 'le -wɛ bɔ klo, -ɛ nue, ti 'de wɛn 'o a nyree, 'ke bʋ klo. 21 -Ye kɛ -Yusuu lele ꞊nʋ ye po: «'N di 'nɩ mu, a 'mʋ 'na 'yiye lɛ ꞊mɔ, kɛɛ, a 'deɛ ba 'ye 'mʋ. A di lɛ 'nɩ 'kʋkʋ, 'ke 'le 'a nɩ dɛ 'kuku -hɛyri. -Tɛgbi 'nɩɩ 'le mu, a 'de 'le mumue -wɛ.» 22 -Ye kɛ -Juukʋɛ a ye'mʋnaanyʋʋ po: «꞊Be ɔ di 'a dɩɔnʋ 'nɩ 'la, -ɛ nue, ɔ nɔ 'nɩ, -tɛgbi ꞊nʋ, ɔɔ 'le mu, -a 'de 'le mumue -wɛ?» 23 -Ye -Yusu nɔ: «'A mʋ mɔ 'klɔ -gbo a nahuiin nɩ. Kɛɛ, 'mɛ -ye, 'n 'de nɔ 'klɔ -gbo ke 'mʋ -hɔn. 'Ke 'n -hɔn 'le yakɔ 'mʋ. 24 'N le 'a mʋ nɩ, -ɛ mɔ, a di lɛ 'nɩ 'kʋkʋ, 'ke 'le 'a nɩ dɛ 'kuku -hɛyri. A kɔ ba kɔ 'a yiyie, -ɛ mɔ, 'mɔ mɔ nahuon ꞊nʋ, 'n plɛ, 'n 'ya 'mʋ. 'Bɩa 'ba 'die -tɛɛ pue, -ye a di lɛ 'nɩ 'kʋkʋ, 'ke 'le 'a nɩ dɛ 'kuku -hɛyri.» 25 -Ye ʋ ꞊gbɔ wlɔn, ʋ nɔ: «Nahuon a gblo tio- -n 'ya 'klɛɛ 'le?» -Ye ɔ nɔ: «꞊Be a nye 'nɩ -hʋa, 'ke ꞊bo ꞊tui lele? 'Mɔ mɔ nahuon ꞊nʋ, -ɔ kɔ -tɩ 'nɩɩ ꞊tu, kʋɛ la 'le gbo. 26 'N kɔ wɛn -tɩ 'plɔplɔ a ꞊tutue, 'ke 'o 'a mʋ ke, kɔ, 'nɩ kɔ wɛn 'hru, 'ke ꞊bo yɛɛ wɛn 'a mʋ -tɩ. Kɛɛ, 'nɩ ꞊tu ꞊le 'klɛɛ -tɩ 'bii. Nahuon ꞊nʋ, -ɔ lee nɔ 'mʋ, -tɩɩ -do ꞊nʋ, 'n 'wɔɔn 'o ꞊nɔ wien, nɩ- 'nɩɩ ꞊tu, 'plɩɩ nahuon a -gbɛ, ɔɔ ꞊tu -tɩ a -tɛɛ.» 27 Ʋ 'nɩ yrii ꞊le 'mʋ lɛ, -ɛ mɔ, 'a Bu a -tɩɩ nɩ, ɔɔ ꞊tu. 28 -Ye kɛ ɔɔ lele ꞊nʋ ye po, ɔ nɔ: «Ti ꞊nʋ -kɔ 'yri 'mɔ -gbo, -ɔ mɔ -tʋnahuin 'bii a Nahuon, a di 'o 'mʋ ye 'mʋ 'baa, 'ke 'o tu 'yie 'mʋ, 'mʋ -tʋtʋ -wɔn hren, a die 'nɩ yrii, -ɛ mɔ, 'mɔ mɔ nahuon ꞊nʋ, 'n plɛ, 'n 'ya 'mʋ. A die -wɛ 'mʋ lɛ 'nɩ yrii, -ɛ mɔ, 'nɩ nu ꞊le dɛ ꞊de, 'ke 'le 'na -gbɛ a 'klɩ 'kwli 'mʋ. -Tɩɩ -do ꞊nʋ, 'na Bu tɔɔ 'mʋ, nɩ- 'nɩɩ ꞊tu. 29 Nahuon ꞊nʋ, -ɔ lee nɔ 'mʋ, 'ke ɔ nɩ 'o 'mʋ 'hʋɩn 'mʋ. Ɔ 'de 'o 'n -do gbo hie, -ɛ nue, 'ɛ nɩ ti, dɛ ꞊nʋ, -ɛɛ 'a plɔ blee, nɛ- 'nɩɩ nu.» 30 -Yusu bɔ po 'klɛɛ lɛ, -ye nahuin 'plɔplɔ kuo ye ꞊wlʋ. 31 -Ye kɛ -Yusuu nahuin ꞊nʋ ye po, -ʋ kuo ꞊wlʋ ye, ɔ nɔ: «'Na tɔɔwin ꞊nʋ, 'ba nyi 'o ꞊tuu, -ye 'a mʋ mɔ 'na -tɛɛ a -naagbopʋʋ nɩ. 32 'Na tɔɔwin a -gbɛ a 'o꞊tuulɛ, ɛ die 'nɩ nu, 'plɩɩ a 'mʋ -tɩ a -tɛɛ yi. -Tɩ a -tɛɛ a -gbɛ, ɩ di 'a mʋ 'nɩ ꞊gbla, 'ke 'le ꞊godɛ ꞊nʋ wlɔn.» 33 -Ye -Juukʋɛ a ye'mʋnaanyʋ, ʋ nɔ: «-A mʋ mɔ Abrahamʋ a 'yuo a 'yuoo nɩ. -A 'de -hlɩn ꞊ɔ ꞊de a ꞊go 'mʋ a 'yɛɛ. Dɛ- kɔ -tɩ ꞊nɩɩ lɛ -a mʋ yrɛ poo, -ɛ mɔ, -tɩ a -tɛɛ di -a mʋ 'nɩ ꞊gbla, 'ke 'le ꞊godɛ ꞊nʋ wlɔn.» 34 -Ye -Yusu nɔ: «'Nɩɩ 'a mʋ 'nɩ le -tɛɛ, 'ɛ nɩ nahuon 'bɔ nɩ 'o, 'bɔɔ dɛ 'kuku nu, -ye ɔ mɔ dɛ 'kuku a ꞊ge'e nɩ. 35 ꞊Ge 'de ye blɛ bɔ 'cipi 'le kayuu -do gbo. Kɛɛ, 'kabu a 'yu, nɔ- 'cipi 'le kayu gbo. 36 'Mɔ -gbo, -ɔ mɔ Nyɩsʋa a 'Yu, 'bɩa 'nɩ ꞊gbla 'a mʋ, -ye 'ɛ mɔ -tɛɛ, a 'deɛ ba 'ya lele ꞊go 'mʋ. 37 'N yie nɩ, -ɛ mɔ, 'a mʋ mɔ Abrahamʋ a 'yuo a 'yuoo nɩ. Kɛɛ, aa lɛ ꞊mɔ 'na 'lɩla, -ɛ nue, a 'nɩ wɛɛn ꞊le 'na tɔɔwin ke. 38 Dɛ ꞊nʋ, 'na Bu tɔɔ 'mʋ, nɛ- 'nɩɩ 'a mʋ le. Kɛɛ, a -mɛ -ye, dɛ ꞊nʋ, 'a nɩ bu le 'a mʋ, nɛ- aa nu.» 39 -Ye ʋ nɔ: «-A nɩ bu, nɔ- mɔ Abrahamʋ.» -Ye -Yusu nɔ: «'Bɩa 'ba 'ya wɛn Abrahamʋ a 'yuo 'mʋ, -ye -tɔplɩ ꞊nʋ, ɔɔ la nu, nɩ- a di wɛn -wɛ nu. 40 Kɛɛ, ꞊betɩ ꞊bo ꞊tu 'a mʋ -tɩ a -tɛɛ ꞊nʋ ye, Nyɩsʋa le 'mʋ, aa lɛ ꞊mɔ 'na 'lɩla. Dɛdʋ a -gbɛ, Abrahamʋ, ɔ 'nɩ nue ꞊le la. 41 Kɛɛ, -tɔplɩɩ -do ꞊nʋ, 'a nɩ bu, ɔɔ nu, nɩ- aa -wɛ nu.» -Ye ʋ nɔ: «-A nɩ 'dii 'de 'lalunyrɔ. -A nɩ buu -do, -a yi, nɔ- mɔ Nyɩsʋa.» 42 -Ye -Yusu nɔ: «'Bɩa Nyɩsʋa 'bɔ 'ya wɛn 'a nɩ Bu 'mʋ, -ye a di wɛn 'mʋ 'mʋ 'nɩ nʋɛ, -ɛ nue, 'ke 'n -hɔn 'le Nyɩsʋa -wɔn 'mʋ. 'N 'de 'le di, 'ke 'le 'na -gbɛ a 'klɩ 'kwli 'mʋ, kɛɛ, nɔ-ɔ nɩ, -ɔ lee nɔ 'mʋ. 43 Dɛ- nue, -tɩ -gbo, 'nɩɩ ꞊tu, 'a 'nɩnɩ yrii 'mʋ lɛ 'le? -Tɩ kɔ -tɩ 'a 'nɩnɩ yrii 'mʋ lɛ, nɛ- mɔ, a 'die 'le -wɛ ba po 'mʋ nʋa ye gbo. 44 'A nɩ bu, nɔ- mɔ Satan, -ɔ mɔ 'kuo -hʋɩn a nyɩgblaka. 'A mʋ mɔ 'a 'yuo꞊pli. -Ye -tɔplɩ ꞊nʋ, -ɩɩ 'a nɩ bu a plɔ blee, nɩ- a nʋɛ 'mʋ ba nu. Kʋɛ la 'le gbo, ɔɔ ꞊ke 'la nahuin. Ɔ yraa -tɩ a -tɛɛ nɩ, -ɛ nue, -tɩ a -tɛɛ 'de 'le 'a ꞊wlʋ ke nɩ. Hɩ a lɛ'dudue, nɛ- mɔ 'a -kʋan, -ɛ nue, ɔ mɔ hɩnyɔ'ɔ nɩ, 'plɩɩ hɩ a gblegblei 'bii, 'ke ɩɩ 'le ꞊nɔ -wɔn 'mʋ -hɔn. 45 Kɛɛ, 'mɛ -ye, 'nɩɩ ꞊tu -tɩ a -tɛɛ. Nɛ- nue, 'a 'de 'mʋ ꞊wlʋ ye kuo. 46 'Ke 'le 'a mʋ -hɛyri, ꞊be ɛ kɔ nahuon, -ɔ -wɛ 'le -bɔ tʋɛ 'mʋ, -ɛ mɔ, 'n nu dɛ 'kuku? Ɛ 'de 'a nahuon ꞊de kɔ. -Tɛ 'nɩɩ -tɩ a -tɛɛ ꞊tu, dɛ- kɔ 'mɔ a 'nɩnɩ pue -tɛɛ 'le? 47 Nahuon ꞊nʋ, -ɔ mɔ Nyɩsʋa a nahuon, ɔɔ Nyɩsʋa a -gbɛ a win ye gbo po nʋa. Kɛɛ, a -mɛ -ye, a 'de Nyɩsʋa a nahuin, nɛ- nue, 'a 'nɩnɩ puo nʋa ye gbo.» 48 -Ye -Juukʋɛ a ye'mʋnaanyʋ ꞊tuo -wɔn, ʋ nɔ: «'A -tɩ, -tɛ -a le wɛn -mʋ, -ɛ mɔ, -n 'de Nyɩsʋa yi, kɔ, 'ku -hʋan nɩ 'o -mʋ ke 'mʋ, -a kɔ wɛn 'o ꞊wɔn.» 49 -Ye -Yusu nɔ: «'Ku -hʋan 'de 'o 'mʋ ke 'mʋ nɩ. Kɛɛ, 'na Bu, nɔ- 'nɩɩ -tɩ a 'yi'bʋaalɛ -nyi. A -mɛ -ye, a blɛ ke, 'ke ba -nye 'mʋ -tɩ a 'yi'bʋaalɛ. 50 'Mɛ -ye, 'nɩ ꞊mʋɛ ꞊le lɛ, 'ke nahuin bʋ -nye 'mʋ -tɩ a 'yi'bʋaalɛ, kɛɛ -ye Nyɩsʋa, nɔ- nye lɛ ꞊mɔ. Nɔ-ɔ nɩ, -ɔ di -bati 'bɛ. 51 'Nɩɩ 'a mʋ 'nɩ le, nahuon 'bɔ nɩ 'o, 'bɔɔ 'o 'na wintɛ 'o ꞊tuu, ɔ 'deɛ bɔ 'kʋ gbe.» 52 -Ye ʋ nɔ: «-A yie 'klɛɛ nɩ, -ɛ mɔ, 'ku -hʋan nɩ 'o -mʋ ke 'mʋ. -A nɩ bu gblaka Abrahamʋ 'kʋ nɩ, Nyɩsʋa a winwlɔn-hɛnyʋ 'ʋ 'kʋ -wɛ. -Mɛ -ye, kɛ -nɩɩ po, nahuon 'bɔ nɩ 'o, 'bɔɔ 'o -na wintɛ 'o ꞊tuu, ɔ 'deɛ bɔ 'kʋ gbe. 53 -A nɩ bu Abrahamʋ, ɔ 'kʋ nɩ. ꞊Be -n pue -tɛɛ, -mɔ nɩɔ 'o 'lu ye? Nyɩsʋa a winwlɔn-hɛnyʋ, ʋ 'kʋ -wɛ nɩ. Nahuon a gblo tio- -nɩɩ 'klɛɛ -n dɩɔnʋ daa 'le?» 54 -Ye -Yusu nɔ: «'Bɩa 'nɩɩ wɛn 'n dɩɔnʋ baa, -ye 'na baalɛ a -gbɛ, ɛ 'deɛ bɛ da wɛn dɛ ꞊de. Nahuon -gbo, -ɔɔ 'mʋ baa, nɔ- mɔ 'na Bu. A nɔ 'nɩ, nɔ- mɔ Nyɩsʋa ꞊nʋ, aa da. 55 Kɛɛ, a 'dio yi. 'Mɛ -ye, 'n yio nɩ. 'Bɩa 'nɩ po wɛn lɛ, 'n 'dio yi, -ye 'n 'ya wɛn hɩnyɔ, -ɛ 'we ꞊nɔ 'a mʋ ye. Kɛɛ, 'n yio nɩ, 'nɩɩ -wɛ 'o 'a win 'o ꞊tuu. 56 'A nɩ bu gblaka Abrahamʋ, ɔ nye la -wɔn lɛ -hie 'lu, -ɛ mɔ, ɔ di la -nyrɔwɔ ꞊nʋ 'nɩ 'ye, -ɔ kɔ 'mʋ ʋ di la 'o 'mʋ kɔɔ. Nɛ- nue, 'ɔɔ la 'manʋ nu. -Tɛ ɔ 'ye la 'klɛɛ -nyrɔwɔ a -gbɛ, -ye ɔɔ la nu 'manʋ 'dɔ.» 57 -Ye ʋ nɔ: «-N 'de 'yrɩ a (50 ) -wlɩɩ 'hɔn ꞊tu 'o -pu a kʋɛ, ꞊nɩɩ lɛ po, -n 'ye Abrahamʋ nɩ.» 58 -Ye -Yusu nɔ: «'Nɩɩ 'a mʋ 'nɩ le, 'plɩɩ ʋ 'mʋ la Abrahamʋ kɔ, 'n nɩ la 'klɔ.» 59 Bɔ po 'klɛɛ lɛ, -ye ʋ 'ba 'mʋ lɛ 'hɛ, 'ke ʋ 'mue ꞊nɔ -wɔn lɛ poo a -tɩ, ʋ 'muo 'la. Kɛɛ -ye -Yusu -hli ꞊nʋ ke 'yi, 'ɔ 'hrɩ 'le Nyɩsʋa a 'kagblaka a -yaa 'mʋ.
1 -Yusu kɔ 'a -naagbopʋ 'hɛɛn, bʋ nɩ 'hru wlɔn, -ye ɔ yɛ 'o gbo nyɩbɛyu ꞊de. Nyɩbɛyu a -gbɛ, kʋɛ la 'le 'a kɔɔlɛ 'yie 'mʋ gbo, 'a 'yii sua nɩ. 2 -Ye 'a -naagbopʋ ꞊gbɔ wlɔn, ʋ nɔ: «Tɔɔnyɔ o, nahuon tio- nu la dɛ 'kuku? ꞊Be nahuon a -gbɛɛ nɩ, -hee' 'a 'dii kɔ 'a bu 'hɛɛn- nɩ, -ʋ nu dɛ 'kuku, -ɛ kɔ -tɩ 'a 'yii 'ɩ sua?» 3 -Yusu ꞊tu -wɔn, ɔ nɔ: «Ɛ 'de 'a -gbɛ a dɛ 'kuku a -tɩ, mɔ, ɛ 'de -wɛ 'a 'dii kɔ 'a bu 'hɛɛn a dɛ 'kuku a -tɩ, 'a 'yii 'de sua. 'A 'yii sua nɩ, -ɛ die nu, nahuin 'mue 'ye, -ɛ mɔ, Nyɩsʋa kɔ 'klɩ, 'ke bɔ nu -kʋan, 'ke 'o ꞊nɔ 'yie 'mʋ. 4 -Tɛ -nyrɛ 'kɩɛ nɩɛ 'le, -a kɔ -ba nu -kʋan ꞊nʋ, Nyɩsʋa, -ɔ lee nɔ 'mʋ, ɔ plɛ -ba nu. 'Tɔɔ mu 'nɩ -wɔn. 'Tɔ 'bɔ -wɔn, nahuon ꞊de 'de 'le -kʋan a nunue -wɛ. 5 -Tɛ 'n 'kɩɛ nɩɛ nɔ 'klɔ ke, 'mɔɔ nɩ, -ɔɔ 'klɔ -gbo ke a nahuin -nyrɛ -nyi. -ɛ die nu, ʋ 'mʋ -tɩ a -tɛɛ 'mʋ lɛ yrii.» 6 'Plɩɩ ɔ 'mʋ la 'klɛɛ mu -yrɛ, -ye ɔ po gbo hɩɔn, 'ɔ nyʋa hɩɔn a -gbɛ -tʋtʋ ke, 'ɔ nuo 'bru 'mʋ, 'ɔ 'bɔ 'mʋ, 'ɔ hruu 'o 'yiisuanyɔ a -gbɛ a 'yii klɛ, 7 ɔ nɔ: «Mu 'le 'wlo ꞊nʋ -wɔn, ʋ 'blu, ʋʋ Siloe daa, ꞊mʋ 'le 'yi ꞊hlɔn lɛ yra.» Siloedʋ a -gbɛ, ɛ ꞊hɛn 'nyrɛ leenyɔ; 'yiisuanyɔ a -gbɛ 'ɔ mu, 'ɔ yra 'yi ꞊hlɔn lɛ. -Tɛ ɔ ꞊hɩan -wɔn, -ye ɔ -tʋa lɛyriilɛ gbo. 8 'A 'bienʋ, kɔ nahuin ꞊nʋ 'hɛɛn, -ʋ nyo o lɛ 'ye, -tɛ ɔɔ o 'wli lɛ -hʋa, -ɛ die nu, ɔ 'mʋ dɛ di, nahuin a -gbɛ, kɛ ʋʋ 'klɛɛ po, 'ʋʋ wlɔn lɛ ꞊gbʋgba: «꞊Be ɛ 'de nahuon -gbo, -ɔɔ o gbo nɩ, -ɔɔ o 'wli lɛ -hʋa?» 9 ꞊Ʋ -ye nɔ: «Nɔ-ɔ nɩ.» ꞊Ʋ -ye nɔ: «'Ʋʋn, ɛ 'de ꞊nɔ, kɛɛ, ɔ 'we ꞊nɔ ꞊nɔ ye.» Kɛɛ, nahuon a -gbɛ, kɛ ɔɔ po, ɔ nɔ: «'Mɔɔ nɩ.» 10 -Ye ʋ nyo 'klɛɛ wlɔn 'nɩ ꞊gba: «-Be' -na 'yii nu kekɩklɛ 'le?» 11 -Ye ɔ nɔ: «Nahuon -gbo, ʋʋ -Yusu daa, nɔ- po hɩɔn gbo, 'ɔ nyʋa hɩɔn a -gbɛ -tʋtʋ ke, 'ɔ nuo 'bru 'mʋ. Nʋ- ɔ hrii 'mʋ 'yi klɛ, 'ɔ le 'mʋ, 'ke ꞊bo mu 'le 'wlo ꞊nʋ -wɔn, ʋʋ Siloe daa, -ɛ die nu, 'mʋ 'yi ꞊hlɔn lɛ yra, 'nɩ mu, 'nɩ yra 'yi ꞊hlɔn lɛ. -Tɛ 'n yra 'klɛɛ 'yi ꞊hlɔn lɛ, -ye 'n -tʋa lɛyriilɛ gbo.» 12 -Ye ʋ ꞊gbɔ wlɔn: «-Be' nahuon a -gbɛ nɩ ye 'le?» -Ye ɔ nɔ: «'N 'de 'a dɛ ꞊de yi.» 13 Nahuon a -gbɛ, -ɔ kɔ 'yii sua o, 'ke ʋ gbɔ 'le Falisi꞊tumu a nahuin ye. 14 'Plɩɩ -ye, -nyrɔwɔ -kɔ 'mʋ -Yusu nu 'bru, 'ɔ kla 'a 'yii ke, -nyrɔwɔ a -gbɛ, ɔ mɔ -wuwle-nyrɔwɔ'ɔ nɩ. 15 Nɛ- nue, Falisi꞊tumu a nahuin 'ʋʋ nahuon a -gbɛ wlɔn ꞊gba: «Dɛ- nue, ꞊nɩɩ lɛ yrii 'le?» -Ye ɔ nɔ: «Ɔ nu 'bru, 'ɔ hruu 'o 'na 'yii klɛ, 'nɩ yra 'yi ꞊hlɔn lɛ. -Tɛ 'n yra 'klɛɛ 'yi ꞊hlɔn lɛ, -ye 'n -tʋa lɛyriilɛ gbo.» 16 -Ye kɛ Falisi꞊tumu a nahuin -yee po: «Nahuon ꞊nʋ, -ɔ mɔ -Yusu, ɔ 'de 'le Nyɩsʋa -wɔn 'mʋ -hɔn, -ɛ nue, ɔ 'nɩ ꞊tuu ꞊le 'o tete ꞊nʋ 'o, -ɛ nyi ꞊tu, -ɛ mɔ, -wuwle-nyrɔwɔ 'mʋ, nahuon nɩ nu 'le -kʋan.» ꞊Ʋ -ye nɔ: «'Bɩa 'bɔ 'ya wɛn -tʋnahuon, -ɔɔ dɛ 'kuku nu, -ye ɔ 'de wɛn 'le 'ŋmilɛka-tɔplɩ -gbo, ɔɔ nu a nunue -wɛ.» Nɛ- nue, 'ʋ 'bɛ ꞊tɩɔ. 17 -Ye nahuon a -gbɛ, -ɔ kɔ 'yii sua o, ʋ nyo lele wlɔn 'nɩ ꞊gba: «Nahuon ꞊nʋ, -ɔ kla -na 'yii ke, -mɛ -ye, -n nɔ 'nɩ, nahuon tio- ɔ 'ya 'le?» -Ye ɔ nɔ: «'Mɛ -ye, 'n nɔ 'nɩ, ɔ mɔ Nyɩsʋa a winwlɔn-hɛnyɔɔ nɩ.» 18 Kɛɛ -ye -Juukʋɛ a ye'mʋnaanyʋ a -gbɛ, -ʋ mɔ Falisi꞊tumu a nahuin, ʋ 'nɩ -hʋɛ ꞊le bʋ pui -tɛɛ, -ɛ mɔ, nahuon a -gbɛ a 'yii sua o nɩ, 'ɔɔ kɛ lɛ yrii. Nɛ- nue, 'ʋ da 'a 'dii kɔ 'a bu 'hɛɛn, 19 'ʋ ꞊gbʋ wlɔn, ʋ nɔ: «꞊Be sɛyɩ-sɛyɩ, nahuon -gbo, 'a nɩ 'yuu nɩ? ꞊Be a nɔ 'nɩ, -tɛ a kʋɔ la, 'a 'yii sua la nɩ? 'Bɛ mɔ -tɛɛ, -ɛ mɔ, 'a 'yii sua la nɩ, dɛ- nue, 'ɔɔ kɛ lɛ yrii 'le?» 20 -Ye 'a 'dii kɔ 'a bu 'hɛɛn, ʋ nɔ: «-A yie nɩ, -ɛ mɔ, -a nɩ 'yuu nɩ. -A yie -wɛ nɩ, -ɛ mɔ, -tɛ -a kʋɔ la, 'a 'yii sua la nɩ. 21 Kɛɛ, dɛ- nue, 'plɩɩ 'ɔɔ lɛ yrii, kɔ, nahuon tio- kla 'a 'yii ke, dɛ a -gbɛ, nɛ- -a 'de yi. 'A -gbɛ, ba ꞊gbɔ wlɔn, -ɛ nue, ɔ 'de 'yu. Ɔ -wɛ 'le bɔ -hɩhɩa 'a mʋ klɛ nɩ.» 22 Kɛ 'a 'dii kɔ 'a bu 'hɛɛn, ʋʋ po, -ɛ nue, ʋʋ pɩ -Juukʋɛ a ye'mʋnaanyʋ a -gbɛ a hʋannʋ. 'Ɛ mɔ -tɛɛ, -Juukʋɛ a ye'mʋnaanyʋ a -gbɛ, ʋ pue 'le ꞊le, -ɛ mɔ, nahuon 'bɔ nɩ 'o, 'bɔ plɛ, -Yusu mɔ Waanyɔ ꞊nʋ, Nyɩsʋa po la lɛ, ɔ di la 'le ya, -ye nahuon a -gbɛ, ɔ 'die 'le -wɛ bɔ pa 'klɛɛ lele Nyɩsʋa a kayu ꞊nʋ gbo. 23 Nɛ- kɔ -tɩ 'a 'dii kɔ 'a bu 'hɛɛn, 'ʋ po lɛ: «Ɔ 'de 'yu. 'A -gbɛ, ba ꞊gbɔ wlɔn.» 24 -Tɛ 'a 'dii kɔ 'a bu 'hɛɛn, ʋ -yrɛ, -ye -Juukʋɛ a ye'mʋnaanyʋ, -ʋ mɔ 'klɛɛ Falisi꞊tumu a nahuin, ʋ dɔ lele nɩ, ʋ nɔ: «Kɛ mɔ Nyɩsʋa ye 'mʋʋ nɩ, -a nɩ mɔ. 'A -tɩ, ꞊tu -tɩ a -tɛɛ, -nyi Nyɩsʋa -tɩ a 'yi'bʋaalɛ. -A -mɛ -ye, -a yie nɩ, -ɛ mɔ, -Yusu a -gbɛ, ɔ mɔ dɛ'kukununyɔ'ɔ nɩ. Ɔ 'de 'le Nyɩsʋa -wɔn 'mʋ -hɔn.» 25 -Ye ɔ ꞊tu -wɔn, ɔ nɔ: «꞊Be ɔ mɔ dɛ'kukununyɔ'ɔ nɩ, -hee' ɔ 'de dɛ'kukununyɔ, 'n 'de 'a dɛ ꞊de yi. 'Mɛ -ye, dɛ -gbo, 'n yi, nɛ- mɔ, 'na 'yii sua la nɩ, kɛɛ, -tɛ ti nɩ lɛ 'mʋ -gbo, 'nɩɩ lɛ 'nɩ yrii.» 26 -Ye ʋ nɔ: «Dɛ tio- ɔ nu -mʋ 'mʋ 'le? -Be' ɔ nu, 'plɩɩ ꞊nɩɩ lɛ yrii 'le?» 27 -Ye ɔ ꞊tu lele -wɔn, ɔ nɔ: «'Be 'n le wɛn 'a mʋ nɩ. Kɛɛ, a 'de 'mʋ nʋa ye gbo po. Dɛ- kɔ -tɩ 'a nye -hʋa, ꞊bo ꞊tui lele 'le? 'N nye 'nɩ 'ye, -ɛ mɔ, aa -hʋa ba -hɛ -wɛ -Yusu a -gbɛ a -naagbopʋ.» 28 Bɔ po 'klɛɛ lɛ, -ye ʋ -tʋa 'a tanɩ a ꞊tutue gbo, ʋ nɔ: «-Mɔɔ nɩ, -ɔ mɔ 'a -naagbopʋyu. -A -mɛ -ye, Nyɩsʋa a winwlɔn-hɛnyɔ Moise, nɔ- kɔ -naagbopʋ -a 'ya 'mʋ. 29 -A yie nɩ, -ɛ mɔ, Moisee nɩ, Nyɩsʋa 'prɛɛ 'le -wɔn. Kɛɛ, -Yusu -mɛ -ye, -tɛ bɔ -hɔn 'o 'mʋ, -a 'de 'o yii.» 30 -Ye ɔ nɔ: «-Yusu -gbo, -ɔ nue, 'nɩɩ lɛ yrii, 'bɩa 'baa lɛ po, -tɛgbi ɔ -hɔn 'o 'mʋ, a 'de 'o yii, -ye dɛ a -gbɛ, ɛ saka 'mʋ nɩ. 31 -A yie nɩ, -ɛ mɔ, nahuon 'bɔ 'ya dɛ'kukununyɔ 'mʋ, 'bɔɔ Nyɩsʋa da, Nyɩsʋa 'nɩ 'wɔn ꞊le 'a win nɩ. Kɛɛ, nahuon 'bɔ nɩ 'o, 'bɔ nyo 'o ꞊tuu, dɛ ꞊nʋ, Nyɩsʋaa -hʋa, 'bɔ nye nu, -ye nahuon a -gbɛ, nɔ- kɔ win Nyɩsʋa, ɔɔ nʋa ye gbo po. 32 Gbegbe, ꞊ɔ ꞊de 'di -hlɩn a 'wɛɛn, -tʋnahuon -gbo, -ɔ kɔ 'yii sua, kʋɛ 'le 'a kɔɔlɛ 'yie 'mʋ gbo, nahuon -ye bɔ die nu, 'yiisuanyɔ a -gbɛ bɔ -tʋa lɛyriilɛ gbo. 33 -Yusu a -gbɛ 'bɔ 'de wɛn 'le Nyɩsʋa -wɔn 'mʋ -hɔn, ɔ 'die wɛn 'le -wɛ, bɔ nu wɛn 'ŋmilɛkadɛdʋ a -gbɛ.» 34 -Tɛ ʋ 'wɔn 'klɛɛ 'a pupowin, -ye ʋ nɔ: «-Mɔ -gbo, kʋɛ 'le -na kɔɔlɛ 'yie 'mʋ gbo, dɛ 'kukuu -do, nɛ- -nɩɩ nu, 'plɩɩ -mɔ plɛ, -ɔɔ -a mʋ tɔɔ,» 'ʋ puo 'le -patʋ 'mʋ. 35 -Ye -Yusu 'wɩn nɩ, -ɛ mɔ, ʋ puo 'le 'mʋ -patʋ. -Tɛ ɔ kɔ ꞊nɔ 'hɛɛn, ʋ ꞊ŋmoo, -ye -Yusu nɔ: «-Tʋnahuin 'bii a Nahuon, -ɔ mɔ Waanyɔ ꞊nʋ, Nyɩsʋa po la lɛ, ɔ di la 'le ya, ꞊be -n kuo ye ꞊wlʋ?» 36 -Ye nahuon ꞊nʋ, -ɔ kɔ 'yii sua o, ɔ nɔ: «Le 'mʋ, nahuon a gblo tio- bɔ 'ya 'mʋ, -ɛ die nu, 'muo ꞊wlʋ ye kuo.» 37 -Ye -Yusu nɔ: «-N 'yo nɩ -dodo. 'Mɔɔ nɩ, -ɔɔ 'klɛɛ 'le -mʋ -wɔn 'prɛɛ.» 38 -Ye ɔ nɔ: «Kʋkɔnyɔ, 'n kuo -mʋ ye ꞊wlʋ,» 'ɔ blɔ kwlɩ ye gbo, 'ke 'o 'a baalɛ a -ta 'mʋ. 39 -Ye -Yusu nɔ: «'N di 'le ꞊le, kɛ nɔ -tʋtʋ ke, -ɛ die nu, 'mue nu, nahuin -gbo, -ʋ kuo Nyɩsʋa ꞊wlʋ ye, kɔ nahuin -gbo, -ʋ 'dio ꞊wlʋ ye kuo, ʋ 'mʋ 'yi 'mʋ lɛ -hʋnhɔn. Ɛ 'we ꞊nɔ ye, nahuin ꞊nʋ, -ʋ kɔ 'yii sua, ʋ di lɛ 'nɩ yrii, kɛɛ, nahuin ꞊nʋ, -ʋ plɛ, -ʋʋ lɛ yrii, 'n die ꞊nʋ 'nɩ tɔɔ, -ɛ mɔ, 'waa 'yii sua nɩ.» 40 Falisi꞊tumu a nahuin -ye ꞊nʋ, -ʋ nɩ 'o, ʋ 'wɔn wintɛ a -gbɛ nɩ. -Ye kɛ ʋʋ 'klɛɛ ꞊nɔ ye po, ʋ nɔ: «꞊Be ɛ ꞊hɛn 'nyrɛ, -a nɩ -gbɛ, -a nɩ 'yii sua -wɛ nɩ 'a?» 41 -Ye -Yusu ꞊tu -wɔn, ɔ nɔ: «'A nɩ 'yii, 'bɩ sua wɛn, -ɛ ꞊hɛn 'nyrɛ, 'ba 'nɩnɩ yrii wɛn Nyɩsʋa a -tɩ 'mʋ lɛ, -ye Nyɩsʋa a -bati 'die wɛn 'le -wɛ bɩ klɩ wɛn 'a mʋ. Kɛɛ, -tɛ aa lɛ po, aa lɛ 'nɩ yrii, -ɛ ꞊hɛn 'nyrɛ, aa Nyɩsʋa a -tɩ 'mʋ lɛ 'nɩ yrii, nɛ- die nu, Nyɩsʋa a -bati 'mʋ 'a mʋ klɩ.»
1 (-Juukʋɛ a ye'mʋnaanyʋ, nʋ- -Yusu 'kɩɛ 'prɛɛ 'le -wɔn.) Kɛ ɔɔ ꞊nʋ ye po: «꞊Bo pue blablɔ a dɛ ye, ɔ kɔ blablɔkɔnyɔ 'hɛɛn, -ɔ mɔ -wɛ blablɔ'yie꞊tunyɔ. 'Nɩɩ 'a mʋ 'nɩ le -tɛɛ, blablɔ ꞊nʋ, -ɔ nɩ 'le -gblo 'mʋ, nahuon 'bɔ nɩ 'o, 'bɔɔ 'le ꞊nɔ -wɔn pa, 'bɔ 'nɩnɩ naa 'o -gblo a -gbɛ a paalɛ 'yri, kɛɛ, 'bɔɔ -gblo 'ya, -ye nahuon a -gbɛ, ɔ mɔ 'yrinyɔ'ɔ nɩ, kɔ -balʋnyɔ 'hɛɛn. 2 Kɛɛ, 'bɔɔ 'o -gblo a -gbɛ a paalɛ 'mʋ naa, -ye ɔ mɔ blablɔ a -gbɛ a kʋkɔnyɔ'ɔ nɩ. 3 -Ye -gblo'yie꞊tunyɔ ꞊nʋ, -ɔ nɩ 'o -gblo a paalɛ 'mʋ, ɔɔ blablɔkɔnyɔ lɛ -ha mɛ, 'ɔɔ 'le 'a blablɔ -wɔn pa. Blablɔkɔnyɔ a -gbɛ, 'bɔɔ 'a blablɔ da, -ye 'a blablɔ nyo ye gbo po nʋa. -Ye blablɔkɔnyɔ, ɔɔ 'ɛ nɩ blablɛ a 'dʋ 'nɩ da, 'plɩɩ 'ɔ nyo 'le -gblo 'mʋ 'hrɔɔ. 4 'Bɔ 'hrɔɔ 'klɛɛ 'a blablɔ 'bii, -ye ɔ nyo 'mʋ naa ye, blablɔ a -gbɛ 'ɔ nyo -wɔn kʋɛ, -ɛ nue, ɔ yi 'a win nɩ. 5 Kɛɛ -ye nahuon 'bɔ nɩ 'o, blablɔ a -gbɛ 'bɔ 'dio yi, -ye ɔ 'deɛ bɔ kʋɛ ꞊nɔ -wɔn, kɛɛ, ɔ di lɛ 'gba ci, -ɛ nue, ɔ 'de 'a win yi.» 6 -Talʋdʋ a -gbɛ, -Yusu po -Juukʋɛ a ye'mʋnaanyʋ a -gbɛ ye, ʋ 'de 'a 'mʋlɛyriilɛ kɔ. 7 -Ye kɛ -Yusuu lele po, ɔ nɔ: «'Nɩɩ 'a mʋ 'nɩ le -tɛɛ, 'mɔ -gbo, 'n 'we ꞊nɔ blablɔ a -gblo a paalɛ ye. 8 Nahuin 'bii ꞊nʋ, -ʋ plɛ, -ʋ mɔ -tɛɛ a blablɔkɔnyʋ, -ʋ -hi, 'plɩɩ 'nɩ di 'le, nahuin a -gbɛ, nʋ- mɔ 'yrinyʋ kɔ -balʋnyʋ 'hɛɛn. Kɛɛ, -tɛɛ a blablɔ 'diu nʋa ye gbo po. 9 'Mɔ mɔ blablɔ a -gblo a paalɛ a -gbɛ. Paalɛ -gbo, 'n 'ya 'mʋ, nahuon ꞊nʋ, -ɔ di 'o naa, nɔ- Nyɩsʋa di waa. Ɔ di 'nɩ pa, ɔ 'mʋ 'hrɩ, ɔ 'mʋ dididɛ 'ye. 10 'Yrinyɔɔ 'le 'nɩ di, ɔ 'mʋ 'na blablɔ, -ɔ mɔ 'na nahuin 'yri, ɔ 'mu lɛ 'lɩla, kɔ, ɔ 'mu gbo -wɔ a -tɩ. 'Mɛ -ye, 'n di 'le ꞊le, -ɛ die nu, 'mʋ nahuin 'klɔ yrayrʋ -nyi, 'mʋ ꞊nʋ ꞊hapʋ-tɩ 'plɔplɔ 'yi ꞊hlɔn lɛ nu. 11 'Mɔ -gbo, 'mɔ mɔ -tɛɛ a blablɔkɔnyɔ, 'nɩ 'ya -wɛ 'a 'yie꞊tunyɔ 'mʋ. -Tɛɛ a blablɔkɔnyɔ, ɔɔ 'a -hʋnhlʋn 'nɩ -ha, 'ke 'o 'a blablɔ a -ta 'mʋ. 12 Kɛɛ, -kʋannunyɔ ꞊nʋ, -ɔ 'de blablɔ a kʋkɔnyɔ, ɔɔ 'yie ꞊tu blablɔ, 'wliyɛ a -tɩ. 'Bɩa nahuon a -gbɛ 'bɔ 'ye -ji, 'bɛɛ 'le di, -ye ɔ hie 'o blablɔ gbo, 'ɔɔ ci lɛ 'gba, -ɛ nue, ɛ 'de ꞊nɔ, ɔ 'de blablɔ a -gbɛ a kʋkɔnyɔ. -Ji 'bɛ nyre 'klɛɛ 'o, -ye ɛ klɩ blablɔ -ye nɩ, 'a dɛ -ye ꞊nʋ, 'ɛ nyo -tɔplɩ 'nyɩ 'mʋ lɛ -gbʋgba. 13 -Kʋannunyɔ 'bɔ 'ye -ji, -ye ɔɔ lɛ 'gba ci, -ɛ nue, 'wliyɛ a -tɩɩ nɩ, 'ɔɔ -kʋan nu. Nɛ- nue, blablɔ a -gbɛ a -tɩ 'ɩ 'nɩnɩ 'yaa ꞊nɔ 'kla -wliye. 14-15 'Mɔ -gbo, 'mɔ mɔ -tɛɛ a blablɔkɔnyɔ. -Tɛ 'na Bu Nyɩsʋa nu, 'ɔ yi 'mʋ, 'na -gbɛ 'nɩ yio, kɛ'ɛ nɩ, 'n nu 'na blablɔ, -ɔ mɔ 'na nahuin a yiyie, 'na nahuin a -gbɛ, 'ʋ yi -wɛ 'mʋ. 'Nɩɩ -ha 'na -hʋnhlʋn, 'ke 'o 'waa -ta 'mʋ. 16 'N kɔ blablɔ -ye, -ɔ 'de nɔ 'bla-gblo -gbo 'kwli 'mʋ nɩ, (ɛ ꞊hɛn 'nyrɛ, 'na nahuin -ye, -ʋ 'de -Juukʋɛ). 'N kɔ ꞊bo naa -wɛ ꞊nʋ, ɔ 'mʋ 'na win 'wɔn, ɔ 'mʋ 'mʋ nʋa ye gbo po, ɔ kɔ 'a 'bienʋ 'hɛɛn, ɔ 'mʋ 'yi 'mʋ lɛ bibi, ɔ 'mʋ 'bla꞊juu -do -hɛ, -ɛ ꞊hɛn 'nyrɛ Nyɩsʋa a dakʋʋ -do, -ʋ kɔ blablɔkɔnyɔɔ -do. 17 'Na Bu Nyɩsʋa nʋɛ 'mʋ 'mʋ nɩ, -ɛ nue, 'n di 'na -hʋnhlʋn 'nɩ -ha, 'mʋ 'kʋ, -ɛ die nu, 'mʋ -tado lele -hʋnhlʋn a -gbɛ 'mʋ 'ba, 'mʋ 'klɔ 'hrɩ. 18 Nahuon ꞊de 'die 'le -wɛ bɔ 'la 'mʋ, 'bɩa 'nɩ 'die ke wɛɛn. 'Na -gbɛ, 'n nye 'nɩ -hʋa, ꞊bo -ha 'na -hʋnhlʋn, 'mʋ 'kʋ. 'N kɔ 'klɩ, 'ke ꞊bo -ha 'na -hʋnhlʋn, 'nɩ kɔ -wɛ 'klɩ, 'ke ꞊bo 'ba lele -hʋnhlʋn a -gbɛ 'mʋ. Nɛ- mɔ dɛ ꞊nʋ, 'na Bu Nyɩsʋa le 'mʋ, ꞊bo nu.» 19 -Tɩ ꞊nʋ -Yusu ꞊tu, ɩ nue, -Juukʋɛ a ye'mʋnaanyʋ, -ʋ nɩ 'o, 'ʋ wo lele. 20 'Waa 'plɔplɔ nɔ: «'Ku -hʋan, nʋ- nɩ 'o ꞊nɔ ke 'mʋ. 'A 'lu -hɔn 'o wlɔn 'hru. A nɩ puo 'le nʋa ye gbo!» 21 ꞊Ʋ -ye nɔ: «Nahuon ꞊nʋ, 'ku -hʋan nɩ 'o ke 'mʋ, ɔ 'die 'le -wɛ bɔ nu lɛ 'pʋprɛ. 'Ku -hʋan 'die 'le -wɛ bʋ nue, 'yiisuanyɔ bɔ yrii lɛ.» 22 -Tɛ 'dai ti -hi, -ye cɛ a ti nyre 'o ꞊o. Ti a -gbɛ 'yri, lɛ'mimre nɩ 'le Jrusrɛ 'mʋ, 'ke 'o Nyɩsʋa a 'kagblaka a -ta 'mʋ. -Nyrɔwɔ ꞊nʋ, ʋ ꞊tu la 'le lele 'kagblaka a -gbɛ Nyɩsʋa kwa 'mʋ gbo, ti -hi la a ti 'yri, nɛ- kɔ lɛ'mreti nyre 'o. 23 'Ke -Yusu nɩ 'le Nyɩsʋa a 'kagblaka a -yaa 'mʋ, 'ɔɔ 'le papʋɛ ꞊nʋ gblɛ -hihie, ʋʋ Salomɔ a papʋɛ daa; 24 -Juukʋɛ a ye'mʋnaanyʋ 'ʋ 'kukue 'o ꞊nɔ 'hʋɩn 'mʋ lɛ. Kɛ ʋʋ ꞊nɔ ye po, ʋ nɔ: «Tii -tie -a di -pre, 'plɩɩ ꞊mʋ -a mʋ le, nahuon a gblo tio- -n 'ya 'mʋ? ꞊Nɩ 'ya Waanyɔ ꞊nʋ 'mʋ, Nyɩsʋa po la lɛ, ɔ di la -a mʋ ye ya, -ye -bo le -a mʋ -dodo.» 25 -Ye -Yusu nɔ: «'N le o 'a mʋ nɩ, kɛɛ, -tɩ -gbo, 'nɩɩ ꞊tu, a 'nɩ pui ꞊le -tɛɛ. 'Ŋmilɛka-tɔplɩ -gbo, 'nɩɩ nu, 'ke 'le Nyɩsʋa a 'dʋ 'kwli 'mʋ, ɩ nyi 'a mʋ 'nɩ tɔɔ, nahuon a gblo tio- 'n 'ya 'mʋ. 26 Kɛɛ, -tɩ -gbo, 'nɩɩ ꞊tu, a 'nɩ pui ꞊le -tɛɛ, -ɛ nue, a 'de 'na nahuin. 27 'Bɩa 'nɩɩ wun po, 'na nahuiin 'mʋ ye gbo po nʋa, -ɛ 'we ꞊nɔ ye, -tɛ blablɔɔ nu, 'ɔɔ 'a kʋkɔnyɔ nʋa ye gbo po, 'nɩ yiu -wɛ, 'ʋʋ 'mʋ -wɔn kʋɛ. 28 'Na nahuin a -gbɛ, 'n nyu -nyi 'klɔ yrayrʋ, -ɔ 'nɩnɩ -wɛ 'le. Gbegbe, ʋ 'deɛ bʋ -wɛ gbo. Nahuon ꞊de 'de 'klɩ kɔ, 'ke bɔ -hɩʋ 'mʋ kwa. 29 'Na Bu Nyɩsʋa, nɔ- -nyu 'mʋ, 'plɩɩ 'a 'klɩ nɩ 'o 'klɩi 'bii ye 'lu. Ɛ 'de nahuon ꞊de kɔ, -bɔ kɔ 'klɩ, -bɔ -ha 'a nahuon ꞊de 'na Bu Nyɩsʋa kwa. 30 'N Bu Nyɩsʋa kɔ 'mʋ 'hɛɛn, -a mʋ mɔ -tʋnahuoon -doo nɩ.» 31 -Tɛ -Juukʋɛ a ye'mʋnaanyʋ -nɩ wɛn, ʋ 'wɔn 'klɛɛ -tɩ ꞊nʋ, ɔ ꞊tu, -ye ʋ 'ba lele 'mʋ lɛ 'hɛ, ʋ 'mue ꞊nɔ -wɔn lɛ po, ʋ 'muo 'la. 32 -Ye kɛ ɔ nyu ye po, ɔ nɔ: «'Ke 'le 'na Bu Nyɩsʋa a 'klɩ 'kwli 'mʋ, 'n nu ꞊hapʋ-tɔplɩ 'plɔplɔ, 'ke 'o 'a mʋ ye. ꞊Hapʋdɛ tio- kɔ -tɩ 'aa -hʋa ba 'la 'mʋ 'le?» 33 -Ye ʋ ꞊tuo -wɔn, ʋ nɔ: «Ɛ 'de -bo nu ꞊hapʋdɛ ꞊de a -tɩ, -ba -hʋa -ba 'la -mʋ, kɛɛ, -aa -hʋa -ba 'la -mʋ, -ɛ nue, -nɩɩ Nyɩsʋa a -tɩ lɛ 'nɩ -haa. -Mɔ -gbo, -ɔ mɔ -tʋnahuon, -mɔ plɛ, -ɔ mɔ -wɛ Nyɩsʋa.» 34 -Ye -Yusu ꞊tu -wɔn, ɔ nɔ: «Ʋ 'crɩɛ la nɩ, 'ke 'le 'a nɩ teteicrɩɩnɩɛ 'kwli 'mʋ, -ɛ mɔ Nyɩsʋacrɩɩnɩɛ: Nyɩsʋa nɔ 'nɩ: 'A mʋ mɔ nyɩsʋapʋʋ nɩ. 35 -Tɩ ꞊nʋ, Nyɩsʋa ꞊tu, 'ke 'le 'a 'crɩɩnɩɛ 'kwli 'mʋ, nahuon ꞊de 'die 'le -wɛ bɔ ꞊tui, -ɛ mɔ, ɩ 'de -tɩ a -tɛɛ. Nahuin ꞊nʋ, ɔ ꞊tu wintɛdʋ a -gbɛ ye, nʋ-ʋ nɩ, ɔɔ nyɩsʋapʋ daa. 36 'Mɛ -ye, Nyɩsʋa po 'mʋ ke 'pɩa, 'ke ꞊bo nu 'a -kʋan. Nɔ- lee -wɛ nɔ 'mʋ 'klɔ -gbo ke. A -mɛ -ye, a nɔ 'nɩ, 'nɩɩ Nyɩsʋa a -tɩ lɛ 'nɩ -haa, -ɛ nue, 'n ꞊tui nɩ, -ɛ mɔ, 'mɔ mɔ Nyɩsʋa a 'Yuu nɩ. 37 'Bɩa -kʋan -gbo, 'nɩɩ nu, 'bɔ 'de Nyɩsʋa a kewɛɛnlɛ, -ye a nɩ kuo 'le 'mʋ ꞊wlʋ ye. 38 Kɛɛ, 'bɩa 'nɩɩ -kʋan -gbo nu, -ɔ mɔ Nyɩsʋa a kewɛɛnlɛ, 'bɩa 'ba 'nɩnɩ -hʋa ba kuo 'mʋ ꞊wlʋ ye, -ye -kʋan a -gbɛ, nɔ- ba kuo ꞊wlʋ ye, -ɛ die nu, a 'mue 'mʋ lɛ yrii -tɛɛ, -ɛ mɔ, 'n Bu kɔ 'mʋ 'hɛɛn, -a mʋ mɔ -tʋnahuoon -doo nɩ.» 39 Bɔ po 'klɛɛ lɛ, -ye -Juukʋɛ a ye'mʋnaanyʋ -nɩ wɛn, ʋʋ lele lɛ ꞊mɔ 'hru, 'ke bʋ klo, kɛɛ, ɔ ꞊ta ꞊nʋ kwa, 'ɔ mu. 40 'Plɩɩ dɛ a -gbɛ, ɛ 'mʋ mu -hi, -ye 'ke ɔ mu 'le lele Sudɛn a 'nike, -tɛgbii -do ꞊nʋ, Saan la 'o nahuin 'nie 'lu lɛ poo, ti -hi la a ti 'yri. 'Ke -Yusu a -gbɛ, ɔ -hi 'le 'dai ti, 41 nahuin 'plɔplɔ 'ʋʋ 'le ꞊nɔ ye mu, ʋ nɔ: «Saan 'de 'ŋmilɛkadɛ ꞊de nu, kɛɛ, -tɩ 'bii ꞊nʋ, ɔ ꞊tu la, 'ke 'o -Yusu a -ta 'mʋ, ɩ mɔ -tɩ a -tɛɛ nɩ.» 42 -Ye 'ke 'o -tuoo -do a -gbɛ ke, nahuin ꞊nʋ, -ʋ nɩ 'o, 'waa 'dai dɛ kuo -Yusu ye ꞊wlʋ.
1 Ɛ kɔ la -Yusu a nɩnatumu ꞊de. 'A 'dʋ mɔ Lasa. 'Ke ɔ nɩ 'le Betanidɩɔ 'mʋ, 'ke 'le Sudeblʋgba 'mʋ, ɔ kɔ 'a -dɩayuo nyrʋyuoo 'hɔn 'hɛɛn, -ʋ kɔ 'dʋɩ mɔ Mari kɔ Matɩ. 2 Mari, nɔ- mɔ nyrʋgba ꞊nʋ, -ɔ 'ba la hʋnhrʋnponyra 'mʋ, -ɔ 'wlɔ la -Yusu bʋɩ lɛ, 'plɩɩ 'ɔ nu la 'a dɩɔnʋ a 'lu-pupui, 'ɔ 'hran -Yusu a bʋɩ lɛ. 'Waa -dɩayu Lasa, nɔ- 'kʋɛ klɩ. 3 -Ye -dɩayuo nyrʋyuo a -gbɛ, ʋ le nahuon, 'ke 'le -Yusu -wɔn, 'ke bɔ lo, -ɛ mɔ: «-Na nɩnatumu Lasa, 'a 'hʋɩɩn 'nɩ hren.» 4 'Plɩɩ -Yusu 'mʋ titie a -gbɛ mu 'wɔn, ɔ nɔ: «Lasa a 'hʋɩn a hinhren, ɛ 'deɛ bɛ 'la ꞊nɔ. Kɛɛ, ɛ die nahuin 'nɩ tɔɔ, -ɛ mɔ, Nyɩsʋa kɔ 'klɩ kɔ -tɩ a 'yi'bʋbʋa. 'Hʋɩn a hinhren a -gbɛ, 'ke Nyɩsʋa di 'o naa, ɔ 'mue nahuin tɔɔ, -ɛ mɔ, 'mɔ -gbo, -ɔ mɔ Nyɩsʋa a 'Yu, 'n kɔ -wɛ -tɩ a 'yi'bʋbʋa.» 5 -Dɩayuoo ta a -gbɛ, Matɩ kɔ Mari kɔ Lasa 'hɛɛn, -Yusu nʋʋ 'mʋ nɩ 'dɔ. 6 ꞊Hapʋkɔ, 'ɔ nʋʋ 'mʋ 'dɔ, kɛɛ, -tɛ ɔ 'wɔn Lasa a 'hʋɩnhren-tɩ, -tɛgbi ꞊nʋ, ɔ nɩ 'o, ɔ -hi 'o lele -nyrɔwɩɩ 'hɔn, 7 'plɩɩ 'ɔ le 'a -naagbopʋ, ɔ nɔ: «-Ba 'ba ye 'mʋ, -ba mu lele Sudeblʋgba 'mʋ!» 8 -Ye 'a -naagbopʋ nɔ: «Tɔɔnyɔ o, -tɛgbi ꞊nʋ, -n plɛ, -ba mu 'le, -tɛ ʋʋ -hʋa bʋ nu o 'hɛ, bʋ 'la o -mʋ, 'a ti 'de wɛn ke gbo a hreen, 'ke -n -hʋa -bo mu 'le lele?» 9 -Ye -Yusu nɔ: «-Nyrɔwɔ kɔ 'a nɩ ti, gbɩgbɩyrɩ kɔ 'a nɩ ti. Nahuon 'bɔɔ -nyrɛ 'mʋ na, 'a bʋɩ 'nɩ bibi ꞊le lɛ, -ɛ nue, ɔɔ nahuon ꞊nʋ 'nɩ 'ye, -ɔɔ 'klɔ -gbo a nahuin -nyrɛ -nyi. 10 Kɛɛ, nahuon 'bɔɔ 'tɔ 'mʋ na, -ye 'a bʋɩɩ lɛ 'nɩ bibi, -ɛ nue, 'ke ɔ nɩ 'le gbɩgbɩyrɩ -hɛyri.» 11 -Ye kɛ ɔɔ lele po, ɔ nɔ: «-A nɩ nɩnatumu, ɔɔ 'nɩ ŋmo, kɛɛ, 'nɩɩ 'nɩ mu, 'muo ŋmla 'mʋ -ha.» 12 -Ye -naagbopʋ ꞊tuo -wɔn, ʋ nɔ: «Kʋkɔnyɔ o, 'bɩa 'bɔɔ ŋmo, -ye ɛ 'we ꞊nɔ ye, 'a 'hʋɩn di 'nɩ 'kee.» 13 Kɛɛ, -tɛ -Yusu plɛ, Lasaa 'nɩ ŋmo, -ye 'kʋkʋɛɛ nɩ, ɔ ꞊hɛn 'nyrɛ. Kɛɛ -ye -naagbopʋ -mɛ -ye, ʋ nɔ 'nɩ, ŋmla a ŋmuŋme a -tɩ -Yusu ꞊tu. 14 -Ye -Yusu 'de 'klɛɛ lele ꞊nʋ -tɩ ꞊de 'yi ke -hli, ɔ nɔ: «Lasa 'kʋ nɩ. 15 'A nɩ -tɩ, 'n kɔ plɔ a bleelɛ, 'ke ꞊bo 'de 'le Lasa 'hʋɩn 'mʋ nɩ, -ɛ nue, dɛ a -gbɛ, ɛ di 'a mʋ 'mʋ 'nɩ -hɛ, 'ke ba kuo 'mʋ ꞊wlʋ ye. 'A -tɩ, -ba mu 'o ꞊nɔ 'hʋɩn 'mʋ.» 16 -Ye Toma, ʋʋ ꞊Yrupoyu daa, kɛ ɔɔ 'a 'bienʋ -naagbopʋ ye po: «-Ba kʋɛ -wɛ -Yusu -wɔn, ɔ kɔ -a mʋ 'hɛɛn, -a 'mʋ 'o -tɛgbii -do 'kʋʋ.» 17 -Tɛ -Yusuu 'le 'dɩɔ ꞊nʋ 'mʋ mu nyre, -ye ɔ 'wɩn nɩ, -ɛ mɔ, -tɛ ʋ -ha o 'o Lasa, ɛ kɔ 'klɛɛ -nyrɔwɩɩ -hɛn. 18 Betanidɩɔ 'mʋɛɛ Jrusrɛdɩɔ ye. 'A -wɔnlɛhinhrenlɛ 'de 'le -kilowɩɩ ta -wɛ. 19 Nɛ- nue, -Juukʋɛ 'plɔplɔ 'ʋ -hɔn 'le Jrusrɛ 'mʋ, 'ʋ di Matɩ kɔ Mari 'hɛɛn yrɛ 'ye wɔn, ʋ 'mu 'le ꞊wlʋ 'kwli 'mʋ gbo ꞊tu, 'waa -dɩayu Lasa a 'kʋkʋ-tɩ. 20 -Tɛ Matɩ 'wɩn, -ɛ mɔ, -Yusuu 'le 'nɩ di, -ye ɔ muo ye 'mʋ 'bɛ wɔn, kɛɛ, Mari -mɛ -ye, 'ke ɔ nɩ 'le kayu gbo. 21 -Tɛ Matɩ nyre 'o -Yusu 'hʋɩn 'mʋ, ɔ nɔ: «Kʋkɔnyɔ o, 'bɩa ꞊nɩ nɩ o nɔ, 'n -dɩayu 'deɛ bɔ 'kʋ o. 22 Kɛɛ, -tɛ ti nɩ lɛ 'mʋ -gbo, 'n yie nɩ, -ɛ mɔ, 'ɛ nɩ dɛ, -n di Nyɩsʋa -hʋa, ɔ die 'nɩ nu.» 23 -Ye -Yusu nɔ: «-Na -dɩayu di 'hrɩ 'klɔ.» 24 -Ye Matɩ nɔ: «Iin, 'n yie nɩ, -ɛ mɔ, 'lelɛ'bɔɔ-nyrɔwɔ 'mʋ, ti ꞊nʋ -kɔ 'yri Nyɩsʋa di 'le nahuin 'kʋkʋnyʋ -hɛyri lɛ -ha, 'kee nɩ, ɔ di 'o 'klɔ 'hrɩɩ.» 25 -Ye -Yusu nɔ: «'Mɔɔ nɩ, -ɔɔ 'le nahuin 'kʋkʋnyʋ -hɛyri lɛ -ha, -ɔ nyu 'klɔ yrayrʋ -nyi, -ɔ 'nɩnɩ -wɛ 'le. Nahuon 'bɔ nɩ 'o, 'bɩa 'bɔ kuo 'mʋ ꞊wlʋ ye, -ye 'n -nyi ꞊nɔ 'klɔ yrayrʋ a -gbɛ. ꞊Betɩ bɔ 'kʋ, ɔ 'kɩɛ kʋɛ 'klɔ a -gbɛ. 26 Nahuon -gbo, -ɔɔ -hʋnhlʋn po, 'bɩa 'bɔ kuo 'mʋ ꞊wlʋ ye, -ye sɛyɩ-sɛyɩ ɔ 'deɛ bɔ 'kʋ gbe. ꞊Be dɛ a -gbɛ, -n pui -tɛɛ?» 27 -Ye ɔ nɔ: «Iin, Kʋkɔnyɔ, 'n pui -tɛɛ, -ɛ mɔ, -mɔ mɔ Waanyɔ ꞊nʋ, Nyɩsʋa po la lɛ, ɔ di la 'a dakʋ ye ya. -Mɔ mɔ Nyɩsʋa a 'Yu, -ɔ di la nɔ 'klɔ -gbo ke di.» 28 Bɔ po 'klɛɛ lɛ, -ye Matɩ mu 'a -dɩayu Mari da wɔn, 'ɔ dɔ ye, ɔ nɔ: «Tɔɔnyɔ di 'le ꞊le, -mɔ ɔɔ da.» 29 'Plɩɩ Mari 'mʋ dɩdawin a -gbɛ mu 'wɔn, -ye tii -do a ti 'yri, ɔ 'ba 'mʋ ye, 'ɔ mu 'le -Yusu 'hʋɩn 'mʋ. 30 -Yusu a -gbɛ, ɔ 'de wɛn 'dɩɔ 'mʋ a 'yɛɛ. -Tɛgbii -do ꞊nʋ, Matɩ yɔ wɛn 'o gbo, 'ke ɔ 'kɩɛ nɩɛ 'o. 31 -Juukʋɛ ꞊nʋ, -ʋ dio 'le ꞊wlʋ 'kwli 'mʋ gbo ꞊tu wɔn, -tɛ ʋ 'ye, -ɛ mɔ, Mari a -gbɛ, ɔ 'kɩka nɩ, 'ɔ 'hrɩ, -ye 'waa -gbɛ, ʋ 'ba 'mʋ lɛ ye, 'ʋ kʋɔ -wɔn. Ʋ -mɛ -ye, ʋ nɔ 'nɩ, 'ke ɔɔ 'le 'dɛɛ ye mu, ɔ 'mʋ we. 32 -Tɛ Mari nyre 'o -tɛgbi, -Yusu nɩ 'o, 'plɩɩ ɔ 'muo mu 'ye, -ye ɔ 'wlɛ kwlɩ, 'ke 'o -Yusu a bʋɩ ꞊hlɔn, ɔ nɔ: «Kʋkɔnyɔ o, 'bɩa ꞊nɩ nɩ o mɔ, 'na -dɩayu 'deɛ bɔ 'kʋ o.» 33 -Yusu nye 'nɩ 'ye, -ɛ mɔ, ɔɔ 'nɩ we, kɔ, nahuin ꞊nʋ, -ʋ kʋɔ -wɔn, 'ʋʋ -wɛ we. Dɛ a -gbɛ, ɛ bʋbla ꞊nʋ gbo 'dɔ, kɔ, 'ɛɛ -wɛ ꞊nɔ wɔlɩ nue, 34 -ye ɔ nɔ: «-Tɛ a -hɩɔ 'o, -be' a puo gbo 'le?» Ʋ nɔ: «Kʋkɔnyɔ, di 'le, ꞊mʋ 'o -tɛgbi a -gbɛ 'yee.» 35 -Ye -Yusu -tʋa wuwe gbo. 36 -Ye nahuin nɔ: «Ba 'ye kɛ, ɔ nʋɔ 'mʋ nɩ 'dɔ.» 37 'Ke 'le nahuiin -do ꞊nʋ -gbahlɔn, kɛ ꞊ʋ -yee po: «'Be nɔ- kla o 'yiisuanyɔ a 'yii ke. Ɔ kɔ bɔ nue wɛn, Lasa 'nɩ ꞊han wɛn 'kʋ.» 38 -Ye -Yusu bʋblɛ lele gbo, 'ɔ mu 'le 'dɛɛ ye. 'Dɛɛ a -gbɛ, ɛ mɔ 'hɩɔ a 'hʋɔɔ nɩ, 'ɔ nɩ 'le dʋgba 'kwli 'mʋ, 'ʋ nu o 'hɩɔ gbɛtɛɛ -ye, 'ʋ kɛ o ye. 39 -Ye -Yusu nɔ: «Ba -ha 'o 'hɩɔ -gbo 'o, ʋ nu, 'ʋ ka 'dɛɛ -gbo ye.» Kɛɛ -ye kɛ Lasa a -dɩayu nyrɔyu Matɩɩ po: «Kʋkɔnyɔ o, ɔ di po 'nʋ, -ɛ nue, ɔ -hi 'le 'dɛɛ wlɔn -nyrɔwɩɩ -hɛn.» 40 -Ye -Yusu ꞊tuo -wɔn, ɔ nɔ: «'N le wɛn -mʋ nɩ, -ɛ mɔ, 'bɩa ꞊nɩ kuo 'mʋ ꞊wlʋ ye, -ye -n di Nyɩsʋa a -tɩ a 'yi'bʋbʋa 'nɩ 'ye.» 41 -Ye ʋ -ha 'o 'hɩɔ a -gbɛ nɩ, -Yusu 'ɔ 'ba 'lu ye 'mʋ, 'ɔɔ 'le yakɔ 'mʋ lɛ ta, ɔ nɔ: «'Na Bu o, 'nɩɩ -mʋ -nyi 'wio, -ɛ nue, -n wɛɛn 'na 'batɩwin ke. 42 'N yie nɩ, -ɛ mɔ, 'ɛ nɩ ti, -nɩɩ 'na 'batɩwin ke 'nɩ wɛɛn. Kɛɛ, -tɩ -gbo, 'n ꞊tu wɛn, 'n ꞊tui nɩ, nahuin -gbo, -ʋ ꞊glaa 'le 'mʋ a -tɩ, -ɛ die nu, ʋ 'mue -tɛɛ pue, -ɛ mɔ, -mɔɔ nɩ, -ɔ lee nɔ 'mʋ 'klɔ -gbo ke.» 43 'Plɩɩ ɔ 'mʋ 'klɛɛ lɛ mu po, -ye ɔ 'yaa 'le win, ɔ nɔ: «Lasa, 'hrɩ 'le 'dɛɛ wlɔn!» 44 Lasa 'ɔ 'hrɩ, 'a bʋɩ kɔ 'a dabʋɩ 'ʋ 'hɩnhɩʋɩn -jisɛi lɛ, 'ʋ mʋa -wɛ 'a 'lu dapɩa lɛ. -Ye -Yusu nɔ: «Ba ꞊wlɔɔ lɛ, kɔ, ba -hɩɔ mɛ lɛ, bɔ na!» 45 'Ke 'le -Juukʋɛ ꞊nʋ -hɛyri, -ʋ di 'le Mari -wɔn, kɔ, -ʋ 'ye dɛ ꞊nʋ, -Yusu nu, 'waa 'plɔplɔ kuo -Yusu ꞊wlʋ ye. 46 Kɛɛ, 'ke 'le ꞊nʋ -hɛyri, ꞊ʋ -ye mu 'le Falisi꞊tumu a nahuin -wɔn, dɛ ꞊nʋ, -Yusu nu, 'ʋ ꞊tui ꞊nʋ ye. 47 -Tɛ ʋ 'wɩn, -ye Nyɩsʋa a -cɔhlʋnpinyʋ gblakɩ, ʋ kɔ Falisi꞊tumu a nahuin a -gbɛ 'hɛɛn, ʋ kɔ 'waa 'bie nyɩgblakɩ 'hɛɛn, 'ʋ da -gboligbo, ʋ nɔ: «-Be' -a di 'klɛɛ nu 'le? -Ɛ nue, nahuon -gbo, ɔɔ nu 'ŋmilɛka-tɔplɩ 'plɔplɔ. 48 'Bɩa ꞊ba -hɩɔ mɛ lɛ, bɔ 'kɩɛ gbɛɛ 'lu -wɔn, nahuin 'bii dio ye kuo ꞊wlʋ, 'plɩɩ Romakʋɛ a nyɩgblakɩ, ʋ 'mʋ 'le di, ʋ 'mʋ -a mʋ gbatɩ klɛ -ha, -a mʋ -gbo, -ʋ mɔ Nyɩsʋa a 'kagblaka -gbo kɔ -a nɩ dakʋ 'bii a nyɩgblakɩ.» 49 'Ke 'le ꞊nʋ -hɛyri, nahuon ꞊nʋ, -ɔ mɔ Kaifʋ, -ɔ mɔ la 'yrʋ ꞊nʋ gbo a -cɔhlʋnpinyʋ a nyɩgblaka, ɔ nɔ: «꞊Be a 'nɩ yrii ꞊le 'mʋ lɛ, 50 ɛ nu -tɛɛ, 'ke nahuoon -do bɔ 'kʋ, 'ke 'o -a nɩ dakʋ 'bii a -ta 'mʋ, 'ɛ -hi 'o -a nɩ dakʋ 'bii a -gbɛ bʋ -wɛ gbo.» 51 Sɛyɩ-sɛyɩ, win ꞊nʋ, ɔ po, ɛ 'de 'a -gbɛ a 'lu a lɛ-hielɛ. Kɛɛ, -tɛ ɔ 'ya 'yrʋ ꞊nʋ a -cɔhlʋnpinyʋ a nyɩgblaka 'mʋ, nɛ- nue, Nyɩsʋa 'ɔ ꞊tu ꞊nɔ win a -gbɛ wlɔn, 'ɔ nyi ꞊tu, -ɛ mɔ, -Yusu di 'nɩ 'kʋ, 'ke 'o -Juukʋɛ a dakʋ 'bii a -ta 'mʋ. 52 Ɛ 'de -Juukʋɛɛ -do a -ta 'mʋ, ɔ 'deɛ bɔ 'kʋ. Kɛɛ, ɔ di 'nɩ 'kʋ, 'ke 'o Nyɩsʋa a 'yuo꞊pli 'bii a -ta 'mʋ, -ʋ 'sɛɛ 'klɔ 'bii -gbo ke gbo, -Yusu a -gbɛ, ɔ 'mu lɛ 'kukue, ʋ 'mʋ dɛɛ -do 'mʋ 'ya. 53 Kʋɛ 'o -nyrɔwɔ a -gbɛ 'yie 'mʋ gbo, -Juukʋɛ a ye'mʋnaanyʋ -yrɩ nɩ, 'ke bʋ 'la -Yusu. 54 Dɛ a -gbɛ a -tɩ -Yusu 'ɔ 'nɩnɩ pa 'klɛɛ lele nahuin -hɛyri, 'ke 'le -Juukʋɛ a 'blʋgba 'mʋ. -Ye ɔ kɔ 'a -naagbopʋ 'hɛɛn, 'ke ʋ mu 'le 'dɩɔ ꞊nʋ 'mʋ, ʋʋ Eflaimʋ daa, 'ʋ -hi 'le 'dai ti. 'Ke 'le Eflaimʋ a -gbɛ ke 'mʋ, -tʋtʋtɩɔ ꞊nʋ, -ɔ nɩ 'le, nahuon ꞊de 'de 'le 'ti. 55 -Juukʋɛ a lɛ'mimre ꞊nʋ, ʋʋ Pakɩ daa, 'a ti 'mʋɛɛ yrɛ. 'Plɩɩ lɛ'mimre a -gbɛ, ɛ 'mʋ 'o nyre, 'blʋgba ꞊nʋ a nahuin 'plɔplɔ mu 'le Jrusrɛ 'mʋ, -ɛ die nu, dɛ ꞊nʋ, ʋ kɔ bʋ nu, 'plɩɩ ʋ 'mʋ 'o ye 'sii, 'ke 'o Nyɩsʋa ye, ʋ 'mue nu, 'plɩɩ ʋ 'mʋ lɛ'mimre a -gbɛ ke mu. 56 Nahuin a -gbɛ, ʋʋ lɛ ꞊mɔ -Yusu. -Tɛ ʋ nɩ 'le Nyɩsʋa a 'kagblaka a -yaa 'mʋ, -ye ʋʋ wlɔn lɛ 'nɩ ꞊gbʋgba, ʋ nɔ: «꞊Be 'a nɩ ꞊wlʋ nɔ 'nɩ, ɔ di lɛ'mimre ke 'nɩ di?» 57 Nyɩsʋa a -cɔhlʋnpinyʋ gblakɩ kɔ Falisi꞊tumu a nahuin 'hɛɛn, ʋ ꞊tui o nɩ, -ɛ mɔ, 'bɩa nahuon ꞊de 'bɔ yii 'o -tɛgbi ꞊nʋ, -Yusu nɩ 'o, -ye bɔ lee ꞊nʋ, -ɛ die nu, ʋ 'muo klɩ.
1 -Nyrɔwɩɩ -huonnɔ hie 'le, 'plɩɩ -Juukʋɛ a lɛ'mimre, -ɛ mɔ Pakɩ, ɛ 'mʋ 'o nyre, 'ke -Yusu mu 'le Betanidɩɔ 'mʋ, ɔ kɔ 'a -naagbopʋ 'hɛɛn. 'Dɩɔ a -gbɛ 'mʋ, 'ke nahuon -gbo, -ɔ mɔ Lasa nɩ 'le. Lasa a -gbɛ, nɔ- -Yusu -ha o 'le 'kʋkʋnyʋ -hɛyri, ɔ -ha o 'klɔ. 'Ke ɔ mu 'le Lasa a -gbɛ -wɔn, ɔ kɔ Lasa a -dɩayuo nyrʋyuoo 'hɔn ꞊nʋ 'hɛɛn, -ʋ mɔ Mari kɔ Matɩ. 2 -Tɛ ɔ nyre 'le, 'ʋ pie ꞊nɔ, Matɩ 'ɔ po 'le -Yusu a dididɛ. Lasa bi 'le ye, ɔ kɔ nahuin -ye, nʋ-ʋ dɛ di, ʋ kɔ -Yusu 'hɛɛn. 3 Bʋʋ 'klɛɛ dɛ di, -ye Mari 'ba 'mʋ -dawinniyrɩɛ. -Dawinni a -gbɛ, ɩɩ po ꞊die 'dɔ. -Tɛ ɔ 'bʋɩ 'mʋ, -ye ɔ plɩɩ -Yusu a bʋɩ lɛ, 'ɔ nu 'a dɩɔnʋ a 'lu-pupui, 'ɔ 'hran -Yusu a bʋɩ lɛ, -dawinni a hʋnhrʋn 'ʋ 'sɛɛ kayu gbo. 4 'Plɩɩ Mari 'mʋ dɛ a -gbɛ mu nu, -ye -Yusu a -naagbopʋyu -ye, -ɔ kɔ 'dʋ mɔ Judɩa Yisikalio, -ɔ di -Yusu 'a yraanyʋ kwa po, kɛ ɔ po: 5 «'Aa. Dɛ- kɔ -dawinni a -gbɛ, ʋ 'de plo? -Dawinni a -gbɛ a 'wliyɛ, ɛ -wɛ 'le bɛ 'ya wɛn -kʋannunyɔɔ -do a 'pɛɛwli nɩ, 'ke 'le yakʋɛɛ -pu 'kwli 'mʋ. 'Bɩa 'bʋ pli wɛn, -ye -a -wɛ 'le -ba -nyi wɛn 'a 'wliyɛ a -gbɛ ꞊sʋɛnyʋ nɩ.» 6 Ɛ 'de bɔ kɔ ꞊sʋɛnyʋ a wɔlɩ a -tɩ, bɔ nu lɛ 'pʋprɛ. Kɛɛ, ɛ 'we ꞊nɔ ye, ɔ mɔ 'yrinyɔ'ɔ nɩ. Nɛ- nue, 'ɔ nu lɛ 'pʋprɛ. 'Ɛ mɔ -tɛɛ, nɔ- mɔ ꞊ke 'waa 'wligbo꞊tunyɔ, 'plɩɩ 'wli a -gbɛ, ɔɔ gblɛ ꞊tu, 'ɔ nyi ꞊ke lɛ 'yri. 7 Kɛɛ -ye -Yusu nɔ: «-Hɩɔ mɛ lɛ! Dɛ ʋ kɔ bʋ nu wɛn ti -kɔ 'yri 'n di wɛn 'o 'kʋʋ, ɔ nue kɛ nɩ -dodo. 8 Ba kɔ 'a yiyie, ꞊sʋɛnyʋ 'kɩɛ die nɔ 'a mʋ -gbahlɔn nɩ. 'Mɛ -ye, ti 'n di nɔ 'a mʋ -gbahlɔn -hi, ɩ 'de 'klɛɛ lele -huo.» 9 Tii -do a -gbɛ 'yri, -Juukʋɛ 'plɔplɔ 'wɩn nɩ, 'ke -Yusu nɩ 'le Betanidɩɔ 'mʋ, 'ʋ mu 'le. Ɛ 'de -Yusu a 'yiye-tɩɩ -do, ʋ 'de 'le mu. Kɛɛ, ʋ mu -wɛ 'le ꞊le, -ɛ die nu, ʋ 'mʋ -wɛ Lasa 'ye, -Yusu -ha o 'le 'kʋkʋnyʋ -hɛyri, ɔ -ha o 'klɔ. 10 -Ye Nyɩsʋa a -cɔhlʋnpinyʋ gblakɩ -yrɩ nɩ, 'ke bʋ 'la -wɛ Lasa, 11 -ɛ nue, nɔ- kɔ -tɩɩ nɩ, -Juukʋɛ 'plɔplɔ 'ʋ kuo -Yusu ꞊wlʋ ye, 'ʋ 'kee nyɩgblakɩ a -gbɛ a -wɔnnaalɛ. 12 -Tɛ -nyrɛ cɛ lɛ, -ye nahuin ꞊nʋ, -ʋ di Pakɩ a lɛ'mimre ke, ʋ 'wɩn nɩ, -ɛ mɔ, -Yusu di 'mʋ di Jrusrɛdɩɔ. 13 -Ye ʋ 'bɛ yuohran, 'ʋ 'blo kwa lɛ, 'ʋ ꞊tɩ 'dɩɔ 'mʋ, 'ʋ mu -Yusu ye 'mʋ 'bɛ wɔn, 'ʋʋ 'le win 'yaa, ʋ nɔ: «-Na 'wio, -mɔ ꞊nʋ, -ɔɔ 'le di, 'ke 'le Kʋkɔnyɔ a 'dʋ 'kwli 'mʋ. Nyɩsʋa bɔ nu -mʋ ꞊hapʋdɛ 'mʋ. Ba 'ye kɛ, Yisraɛkʋɛ a bodɩɔ, nɔ-ɔ 'le di. Ba nɩ -ba bɔɔ.» 14 'Ke 'kasrayu ꞊de nɩ 'o. Nʋ- kɔ ke -Yusu 'ya 'o, -ɛ 'we ꞊nɔ ye, -tɛ Nyɩsʋacrɩɩnɩɛ, ɛɛ la 'a ꞊tutue nu, -ɛ mɔ: 15 «Sion (Jrusrɛ) 'mʋ a nahuin, a nɩ pɩ 'le hʋannʋ. Ba 'ye kɛ, 'a nɩ bodɩɔ, nɔ-ɔ 'le di. Nɔ- nɩ 'o 'kasrayu ke gbo.» 16 -Ye ti a -gbɛ 'yri, -tɔplɩ ꞊nʋ, -Yusu, ɔ kɔ nahuin 'hɛɛn, ʋʋ nu, 'a -naagbopʋ 'nɩ yrii ꞊le 'mʋ lɛ. Kɛɛ, ti ꞊nʋ -kɔ 'yri -Yusu mu 'le yakɔ 'mʋ, 'ke 'le -tɩ a 'yi'bʋaalɛ 'kwli 'mʋ, ɩ bi 'le ꞊nʋ 'mʋ 'kwli, -ɛ mɔ, 'ɛ mɔ -tɛɛ, -tɛ Nyɩsʋacrɩɩnɩɛ, ɛ nu la 'a ꞊tutue, kɛ'ɛ nɩ, nahuin ꞊nʋ, ʋʋ o 'a nunue nu. 17 -Tɛ -Yusu le o Lasa, 'ke bɔ 'hrɩ 'klɔ, bɔ -hɔn 'le 'dɛɛ wlɔn 'mʋ, nahuin 'plɔplɔ 'ye o dɛ a -gbɛ, 'ʋ mu o, 'ʋ le o nahuin -ye dɛ ꞊nʋ, -Yusu nu. 18 Nɛ- nue, nahuin -nɩ wɛn 'ʋ dio 'klɛɛ ye 'mʋ 'bɛ wɔn, -ɛ nue, ʋ 'wɩn o nɩ, -ɛ mɔ, -Yusu nu o 'ŋmilɛkadɛ a -gbɛ nɩ. 19 -Ye Falisi꞊tumu a nahuin ꞊nʋ, -ʋ nɩ 'o, ʋ -mɛ -ye, kɛ ʋʋ yrɛ pupo, ʋ nɔ: «A nye 'nɩ 'ye, nahuon -gbo, ɔ -hi -a mʋ wlɔn. Nahuin 'bii nyo -wɔn 'nɩ kʋɛ.» 20 -Juukʋɛ a lɛ'mimre a -gbɛ a ti 'yri, -tɛ nahuin mu 'le Jrusrɛdɩɔ 'mʋ, 'ke bʋ da Nyɩsʋa, 'ke 'le nahuin a -gbɛ -hɛyri, 'ke Glɛkɩkʋɛ nɩ 'le. 21 Nahuin a -gbɛ, nʋ- mu 'o Filipʋ 'hʋɩn 'mʋ, -ɔ mɔ -Yusu a -naagbopʋyu -ye, -ɔ kɔ 'le Bɛtɩsaidadɩɔ 'mʋ, 'ke 'le Galileblʋgba 'mʋ, ʋ nɔ: «Nyɩbɛyu, -aa -hʋa -ba yi wɛn -Yusu.» 22 -Ye Filipʋ a -gbɛ, ɔ mu nɩ, 'ɔ ꞊tui 'a 'be Adre ye, ʋ 'hɔn a -gbɛ 'ʋ bibi ke, 'ʋ mu, 'ʋ ꞊tui -Yusu ye. 23 -Ye -Yusu nɔ: «Ti nyre 'o ꞊o, -ɩ kɔ 'yri 'mɔ -gbo, -ɔ mɔ -tʋnahuin 'bii a Nahuon, Nyɩsʋa di 'o 'mʋ -tɩ a 'yi'bʋaalɛ -nyee. 24 ꞊Bo pue ꞊gblayɛ a dɛ ye. ꞊Gblayɛ a -gbɛ 'bɛ 'de -tʋtʋ lɛ 'tʋ, ɛ 'nɩ ꞊ga ꞊le nɩ, -ye ɛ 'die 'le -wɛ bɛ po 'hlɛ, kɛɛ, ɛ -do, nɛ- di 'o nɩ. Kɛɛ, 'bɩa 'bɛ 'tʋ -tʋtʋ lɛ, ɛ di 'nɩ ꞊ga, ɛ 'mʋ 'hlɛ po. ꞊Gblayɛ a -gbɛ a ꞊gɩga, ɛ 'we ꞊nɔ 'kʋkʋɛ ye. 'Na -gbɛ, 'n 'we ꞊nɔ ꞊gblayɛ ye. 'N kɔ ꞊bo 'kʋ, 'dai nahuin 'mʋ 'klɔ yrayrʋ kɔ, -ɔ 'nɩnɩ -wɛ 'le. 25 -Ye 'klɛɛ, nahuon 'bɔ nɩ 'o, 'bɔ 'de -wɔn -wɛ, 'ke bɔ 'kʋ, 'na ꞊wlʋ a yekuolɛ a -tɩ, ɔ 'deɛ bɔ kɔ 'klɔ yrayrʋ, -ɔ 'nɩnɩ -wɛ 'le. Kɛɛ, nahuon 'bɔ nɩ 'o, 'bɔ -wɛ -wɔn, 'ke bɔ 'kʋ, -ɛ nue, ɔ mɔ 'na nahuoon nɩ, ɔ di kɔ 'klɔ yrayrʋ, -ɔ 'nɩnɩ -wɛ 'le. 26 'Bɩa nahuon 'bɔɔ -hʋa bɔ nu 'na -kʋan, -ye ɔ blɛ ye bɔ naa 'mʋ -wɔn, -tɛgbi 'nɩɩ 'o muu, ɔ kɔ bɔ muu -wɛ 'o, ꞊betɩ bɔ di 'kʋ. 'Ɛ nɩ nahuon 'bɔ nɩ 'o, 'bɔɔ 'na -kʋan nu, 'na Bu Nyɩsʋa, nɔ- dio -tɩ a 'yi'bʋaalɛ -nyi.» 27 «-Tɛ ti nɩ lɛ 'mʋ -gbo, 'na -hihiu hren 'mʋ -wɔn. -Be' 'n di 'klɛɛ 'na Bu ye po 'le? ꞊Be kɛ ꞊bo po: 'Na Bu Nyɩsʋa o, nue, ꞊sʋɛ'yeti, -ɩ di 'le di, bɩ hren 'mʋ -wɔn. 'Ʋʋn, 'nɩ po ꞊le lɛ, -ɛ nue, ꞊sʋɛ'yeti ꞊nʋ, nɩ- 'mʋ 'le wlɔn naa. Nɛ- kɔ -tɩ 'nɩ di nɔ 'klɔ -gbo ke. 28 Kɛ 'n di po: 'Na Bu o, nue, ꞊mʋ -tɩ a 'yi'bʋaalɛ kɔ.» Bɔ po 'klɛɛ lɛ, -ye Nyɩsʋa a win -hɔn 'le yakɔ 'mʋ, 'ɩɩ lɛ po: «'N nue nɩ -dodo, 'na -tɩ 'ɩ kɔ -tɩ a 'yi'bʋaalɛ, 'plɩɩ 'mue lele nu.» 29 Nahuin ꞊nʋ, -ʋ nɩ 'o, ʋ 'wɔn win a -gbɛ nɩ, ʋ nɔ: «-Tɛɛ nɩ, -ɛ ma.» ꞊Ʋ -ye nɔ: «Nyɩsʋa a lɛleenyɔ -yee nɩ, -ɔ 'prɛ.» 30 Kɛɛ -ye -Yusu nɔ: «Ɛ 'de 'na -tɩ, win ꞊nʋ, ɩ 'de pue, kɛɛ, 'a mʋ kɔ -tɩɩ nɩ. 31 Ti nyre 'o ꞊o, -ɩ kɔ 'yri Nyɩsʋa di 'o 'klɔ -gbo ke a nahuin -bati lɛ poo. -Tɛ ti nɩ lɛ 'mʋ -gbo, Nyɩsʋa di 'klɔ -gbo a nyɩgblaka Satan gbata ke 'nɩ -ha. 32 'Mɛ -ye, ti ꞊nʋ -kɔ 'yri ʋ di 'o 'mʋ ye 'mʋ 'baa, 'ke 'o tu 'yie 'mʋ, 'mʋ -tʋtʋ -wɔn hren, 'n die 'nɩ nu, nahuin 'bii, ʋ 'mʋ 'mʋ ye 'mʋɛɛ.» 33 'Kʋkʋɛdʋ ꞊nʋ, ɔ di 'kʋ, nɛ- ɔ ꞊hɛn 'nyrɛ, 'ɔ nu lɛ 'pʋprɛ. 34 -Ye kɛ nahuin ꞊nʋ, ʋ nyo ye po, ʋ nɔ: «'Ke 'le Nyɩsʋa a teteicrɩɩnɩɛi 'kwli 'mʋ, ʋ 'crɩɛ la nɩ, -ɛ mɔ, Waanyɔ ꞊nʋ, Nyɩsʋa po la lɛ, ɔ di la -a mʋ ye ya, ɔ di hie 'klɔ. Dɛ- kɔ -tɩ, -mɛ -ye, ꞊nɩɩ lɛ po, -ɛ mɔ, ʋ di nahuon ꞊nʋ, -ɔ mɔ -tʋnahuin 'bii Nahuon 'mʋ 'ba ye, 'ke 'o tu 'yie 'mʋ, ɔ 'mʋ -tʋtʋ -wɔn hren? Nahuon tio- mɔ 'klɛɛ -tʋnahuin 'bii a Nahuon a -gbɛ 'le?» 35 -Ye kɛ -Yusuu ꞊nʋ ye po, ɔ nɔ: «Kɛ -nyrɛ 'kɩɛ nɩɛ nɔ 'a mʋ -gbahlɔn, 'ke 'le ti gbi 'kwli 'mʋ. Ba na -nyrɛ a -gbɛ 'mʋ, -tɛ ɛ 'kɩɛ nɩɛ nɔ 'a mʋ -gbahlɔn, -ɛ die nu, gbɩgbɩyrɩ 'nɩ ꞊han 'a mʋ 'mʋ gbo 'ta, -ɛ nue, nahuon ꞊nʋ, -ɔɔ gbɩgbɩyrɩ -hɛyri na, -tɛgbi ɔɔ 'o muu, ɔ 'de 'o yii. 36 'A -tɩ, ba kuo -nyrɛ ꞊nʋ ꞊wlʋ ye, -tɛ ɛ 'kɩɛ nɩɛ nɔ 'a mʋ -gbahlɔn, -ɛ die nu, a 'mʋ nahuin ꞊nʋ 'mʋ 'ya, -ʋʋ -nyrɛ 'mʋ na.» -Tɛ -Yusu -wɔ -tɩ ꞊nʋ a ꞊tutue -wɔn, -ye ɔ hren ꞊nʋ -wɔn, 'ɔ -hlu 'yi ke. 37 ꞊Hapʋkɔ, 'ɔ nu 'ŋmilɛka-tɔplɩ, 'ɩ -huo, kɛɛ, nahuin, ʋ 'dio ꞊wlʋ ye kuo. 38 Dɛ a -gbɛ, ɛ mue -wɔn 'lu, -ɛ die nu, -tɩ ꞊nʋ, Nyɩsʋa a winwlɔn-hɛnyɔ Esai ꞊tu la, ɩ 'mʋ nue. -Tɩ a -gbɛ, Esai ꞊tu la, nɩ- -gbo: «Nyɩsʋa o, -tɩ -gbo, -aa ꞊tu, nahuon tio- pui -tɛɛ? Nahuon tio- yrii -na 'klɩkenɩnɩɛ 'le? Ɛ 'de 'a nahuon ꞊de kɔ.» 39 Esai a -gbɛ, ɔ ꞊tui la -wɛ nɩ, -tɩ kɔ -tɩ 'ʋ 'die 'le -wɛ bʋ kuo -Yusu ꞊wlʋ ye. Kɛ ɔ po: 40 «Nyɩsʋa sua 'waa 'yii nɩ, -ɛ die nu, ʋ 'nɩ ꞊han dɛ lɛ yrii, kɔ, 'ɔ nue, 'waa ꞊wlɩ 'ɩ 'gboklo 'mʋ, -ɛ die nu, ʋ 'nɩ ꞊han -tɩ 'mʋ lɛ yrii. 'Ɛ mɔ -tɛɛ, 'bɩa 'bʋʋ wɛn -tɩ 'mʋ lɛ yrii, ʋ dio wɛn ye 'nɩ 'mʋɛɛ, -ɛ die nu, ɔ 'mu wɛn waa.» 41 Esai a -gbɛ, ɔ ꞊tui la nɩ, -ɛ nue, ɔ 'ye la -Yusu a -tɩ a 'yi'bʋaalɛ nɩ, 'ɔ ꞊tu la -Yusu a -gbɛ a -tɩ. 42 Mɔ ꞊betɩ Esai bɔ nu lɛ 'pʋprɛ, -Juukʋɛ a ye'mʋnaanyʋ 'plɔplɔ, ʋ kuo -wɛ -Yusu ye ꞊wlʋ. Kɛɛ, ʋ 'di ꞊tu, 'ke 'o nahuin ye, -ɛ nue, ʋʋ pɩ Falisi꞊tumu a nahuin a hʋannʋ, 'ke bʋ blʋ lɛ, 'ke 'le Nyɩsʋa a kayuo gbo. 43 Ʋ nye 'nɩ -hʋa, 'ke nahuin bʋ baa ꞊nʋ, 'ɛ -hi 'o 'ke Nyɩsʋa bɔ baa ꞊nʋ. 44 -Ye -Yusuu 'le win 'nɩ 'yaa, kɛ ɔɔ nahuin ye po, ɔ nɔ: «Nahuon 'bɔ nɩ 'o, 'bɔ kuo 'mʋ ꞊wlʋ ye, ɛ 'de 'n -do, ɔ 'de 'mʋ ꞊wlʋ ye kuo, kɛɛ, ɔ kuo -wɛ 'na Bu ye ꞊wlʋ, -ɔ lee nɔ 'mʋ 'klɔ -gbo ke. 45 Nahuon 'bɔɔ 'mʋ 'ye, -ye ɔɔ -wɛ 'na Bu 'nɩ 'ye, -ɔɔ lee nɔ 'mʋ 'klɔ -gbo ke. 46 'N di nɔ 'klɔ -gbo ke nɩ, -ɛ 'we ꞊nɔ -nyrɛ ye, -ɛ die nu, 'ɛ nɩ nahuon 'bɔ nɩ 'o, 'bɔ kuo 'mʋ ꞊wlʋ ye, ɔ 'nɩ ꞊han 'le gbɩgbɩyrɩ -hɛyri nɩ. 47 Nahuon 'bɔɔ 'na wintɛ 'wɔn, 'bɔ 'nɩnɩ ꞊tui 'o, ɛ 'de 'mɔ, 'n 'deɛ ꞊bo puo -bati lɛ, -ɛ nue, 'n di 'le ꞊le, 'ke ꞊bo waa nahuin. 'N 'de 'le di, 'ke ꞊bo puu -bati lɛ. 48 Nahuon 'bɔ nɩ 'o, 'bɔ bla 'mʋ ye, kɔ, 'bɔ 'nɩnɩ po 'mʋ nʋa ye gbo, -ye 'lelɛ'bɔɔ-nyrɔwɔ 'mʋ, -bati dio 'nɩ klɩ, -ɛ nue, ɔ 'de 'na wintɛ nʋa ye gbo po. 49 'Ɛ mɔ -tɛɛ, ɛ 'de 'le 'na 'klɩɩ -do 'kwli 'mʋ, 'n 'de 'le nahuin tɔɔ, kɛɛ, 'na Bu ꞊nʋ, -ɔ lee nɔ 'mʋ 'klɔ ke, nɔ- le 'mʋ -tɩ ꞊nʋ, 'n kɔ ꞊bo tɔɔ. 50 'N yie nɩ, -ɛ mɔ, -tɩ ꞊nʋ, ɔɔ -hʋa ꞊bo tɔɔ nahuin, nɩ- nye nu, nahuin 'ʋʋ 'klɔ yrayrʋ ꞊nʋ kɔ, -ɔ 'nɩnɩ -wɛ 'le. Nɛ- nue, -tɩ ꞊nʋ, 'na Bu le 'mʋ, 'ke ꞊bo tɔɔ nahuin, ɩ -do, nɩ- 'nɩɩ ꞊nʋ tɔɔ.»
1 Ɛ hie 'le -nyrɔwɔɔ -do, 'plɩɩ -Juukʋɛ a lɛ'mimre, -ɛ mɔ Pakɩ, ɛ 'mʋ 'o nyre. -Yusu yie nɩ, -ɛ mɔ, ti nyre 'o ꞊o, 'ke bɔ -hɔn nɔ 'klɔ -gbo ke 'mʋ, bɔ mu 'le 'a Bu Nyɩsʋa -wɔn. Nahuin ꞊nʋ, -ʋ mɔ 'a nahuin, kɛ nɔ 'klɔ -gbo ke, ɔ nʋʋ 'mʋ nɩ ti a pɛpɛ, kɔ, ɔ 'cipi 'o 'waa 'mʋnʋɛlɛ. 2 -Wise, -Yusu kɔ 'a -naagbopʋ 'hɛɛn, 'ke ʋ nɩ 'o dɛdiilɛ 'mʋ. 'Plɩɩ ʋ 'mʋ dɛ mu di, ɛ 'de kayu a 'mʋ-hɛnyɔ kɔ, -bɔ yra 'waa bʋɩ lɛ, -ɛ 'we ꞊nɔ ye, -tɛ -Juukʋɛɛ 'a nunue nu. 'Plɩɩ ʋ 'mʋ dɛ mu di, -ye 'kuo -hʋɩn a nyɩgblaka Satan, ɔ 'prɛɛ 'le Judɩa Yisikalio -wɔn, -ɔ mɔ Simɔ a 'yu, 'ke bɔ po -Yusu 'a yraanyʋ kwa. 3 -Yusu a -gbɛ, ɔ yie nɩ, -ɛ mɔ, Nyɩsʋa -nyi ꞊nɔ 'klɩ, 'ke bɔ kɔɔ -tɔplɩ 'bii win ke, 'ɔ yie -wɛ, -ɛ mɔ, 'ke ɔ -hɔn 'le Nyɩsʋa -wɔn 'mʋ, kɔ, 'ɔ kɔ bɔ ꞊hɩan -wɔn, ɔ 'mʋ 'le ꞊nɔ -wɔn mu. 4 ꞊Hapʋkɔ, 'ɔ yi -tɔplɩ 'bii a -gbɛ, kɛɛ, ɔ 'ba 'mʋ ye, 'ɔ -hɛ 'a 'luyewlawlʋ, 'ɔ 'ba -ploodanʋ 'mʋ, 'ɔ kluu -bubui ke, 5 'ɔ po 'le 'nie 'pɔhlʋ wlɔn, 'ɔ -tʋa 'a -naagbopʋ a bʋɩ a lɛyɩyra gbo. 'Bɔ yra nahuoon -do a bʋɩ lɛ, -ye ɔ nu -ploodanʋ ꞊nʋ, ɔ klɩɩ wɛn -bubui ke, 'ɔ nyo bʋɩ lɛ 'hran. 6 Nɛ- ɔ nu -nunu, 'ɔ nyre 'o Simɔ Piɛlɩ 'hʋɩn 'mʋ. -Tɛ ɔ nyro 'klɛɛ 'o 'hʋɩn 'mʋ, -ye Simɔ Piɛlɩ nɔ: «Kʋkɔnyɔ, ꞊be -mɔɔ 'na bʋɩ lɛ mu yra?» 7 -Ye -Yusu nɔ: «Dɛ -gbo, 'nɩɩ nu, -tɛ ti nɩ lɛ 'mʋ -gbo, ꞊nɩ yrie ꞊le 'mʋ lɛ, kɛɛ, 'ke 'le ye 'mʋ, -n die 'mʋ lɛ 'nɩ yrii.» 8 -Ye Piɛlɩ nɔ: «Gbegbe, -n 'deɛ -bo yra 'na bʋɩ lɛ.» -Ye -Yusu nɔ: «'Bɩa 'nɩ 'de -na bʋɩ -gbo lɛ yra, -n 'deɛ -bo 'ya 'klɛɛ lele 'na nahuon 'mʋ.» 9 -Ye Simɔ Piɛlɩ nɔ: «'Bɩa 'bɛ nɩ lɛ 'mʋ, ɛ nɩ 'ya 'le 'na bʋɩɩ -do 'mʋ, kɛɛ, yra -wɛ 'mʋ kwa lɛ, kɔ, yra -wɛ 'na 'lu lɛ.» 10 -Ye -Yusu nɔ: «Nahuon 'bɔ -plo, 'bɔ na lɛ dɛ gbi, ɔ 'de kɔ bɔ -plo lele, 'bɛ 'de bɔ yra 'a bʋɩ lɛɛ -do, -ɛ nue, ɔ 'wʋ 'le ꞊le 'bii. A -mɛ -ye, a 'wʋ 'le ꞊le. Kɛɛ -ye ɛ 'de a 'bii, a 'de 'le 'wʋ.» Ɛ 'we ꞊nɔ ye, 'waa 'oye'siilɛ, 'ke 'o Nyɩsʋa ye, nɛ- kɔ -tɩ -Yusu ꞊hɛn 'nyrɛ. 11 Ɔ yi nahuon ꞊nʋ nɩ, 'ke 'le ꞊nʋ -gbahlɔn, -ɔ di ꞊nɔ 'a yraanyʋ kwa po. Nɛ- nue, 'ɔ po wɛn lɛ: «Ɛ 'de ʋ 'bii, ʋ 'de 'le 'wʋ.» 12 -Tɛ ɔ -wɔ 'waa bʋɩ a lɛyɩyra -wɔn, -ye ɔ pue lele 'a 'luyewlawlʋ nɩ, 'ɔ nɩ lele gbo, 'ke 'o dɛdi-tuoo -do ꞊nʋ ke, ɔ nɔ: «Dɛ -gbo, 'n nu 'a mʋ 'mʋ, ꞊be dɛ -gbo, ɛ ꞊hɛn 'nyrɛ, a yree 'mʋ lɛ? 13 'Baa 'mʋ da, kɛ aa po: Tɔɔnyɔ kɔ Kʋkɔnyɔ 'hɛɛn. 'Plɩɩ -ye, -tɩ a -tɛɛ aa ꞊tu, -ɛ nue, 'ɛ mɔ -tɛɛ, 'mɔ mɔ Tɔɔnyɔ, kɔ Kʋkɔnyɔ 'hɛɛn. 14 'A -tɩ o, -tɛ 'mɔ -gbo, -ɔ mɔ 'a nɩ Kʋkɔnyɔ kɔ 'a nɩ Tɔɔnyɔ 'hɛɛn, 'n nu, 'nɩ ꞊tɩɔ 'le 'n dɩɔnʋ, 'nɩ yra 'a mʋ bʋɩ lɛ, 'a nɩ -gbɛ, kɛ ba nu, ba ꞊tɩɔ -wɛ 'le 'a nɩ dɩɔnʋ, a 'mʋ -wɛ bʋɩ lɛ yɩyra. 15 'N tʋɛ 'a mʋ nɩ, -ɛ mɔ, 'n ꞊tɩɔ 'le 'n dɩɔnʋ nɩ, 'nɩ -hɛ 'a nɩ 'mʋ-hɛnyɔ, -ɛ die nu, dɛ -gbo, 'n nu 'a mʋ 'mʋ, a 'mue -wɛ 'mʋ nunu. 16 'Nɩɩ 'a mʋ 'nɩ le -tɛɛ, ɛ 'de -kʋannunyɔ ꞊de kɔ, -bɔ di 'o 'a 'masɛ 'lu ye nɩ. Ɛ 'de -wɛ lɛleenyɔ ꞊de kɔ, -bɔ di -wɛ 'o nahuon -gbo, -ɔ lee ꞊nɔ 'lu ye nɩ. 17 'A -tɩ o, a yie 'klɛɛ nɩ. 'Bɩa 'baa lɛ 'a nunue nu, -ye a di kɔ plɔ a bleelɛ. 18 Ɛ 'de a 'bii, 'n 'de 'a mʋ 'nyrɛ ꞊hɛn. Nahuin ꞊nʋ, 'n -ha 'le du 'mʋ, 'ke bʋ 'ya 'na nahuin 'mʋ, 'n yiu nɩ. Kɛɛ, -tɩ ꞊nʋ, ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, ɛ blɛ ye bɩ mue 'lu -wɔn. -Tɩ a -gbɛ, nɩ- -gbo: Nahuon -gbo, -ɔ kɔ 'mʋ 'hɛɛn, -ʋ 'nyra 'le dabʋ dɛdihuoo -do wlɔn, nɔ- -hɛ 'na yraanyɔ. 19 'N nyi 'a mʋ ye 'nɩ ꞊tu -dodo, 'plɩɩ ɛ 'mʋ 'o nyre, -ɛ die nu, ti -kɔ 'yri ɛ di 'o nyre, a 'mʋ 'mʋ ꞊wlʋ ye kuo, -ɛ mɔ, 'mɔ mɔ nahuon -gbo, Nyɩsʋa lee nɔ -tʋtʋ ke. 20 'Nɩɩ 'a mʋ 'nɩ le -tɛɛ, nahuon 'bɔ nɩ 'o, 'bɔ 'ble 'na lɛleenyɔ kwa, ɛ 'we ꞊nɔ ye, 'mɔɔ nɩ, ɔ 'ble kwa. Kɔ, nahuon 'bɔ 'ble 'mʋ kwa, ɛ 'we ꞊nɔ ye, 'na Bu Nyɩsʋa'a nɩ, -ɔ lee 'mʋ, nɔ- ɔ 'ble kwa.» 21 'Plɩɩ -Yusu 'mʋ win a -gbɛ mu po, -ye 'a ꞊wlʋ 'mʋɛ gbo 'dɔ. Kɛ ɔɔ 'a -naagbopʋ ye po, ɔ 'de ꞊nʋ dɛ ꞊de 'yi ke -hli, ɔ nɔ: «'Nɩɩ 'a mʋ 'nɩ le -tɛɛ, nahuon nɩ nɔ 'a mʋ -hɛyri. Nɔ- di 'mʋ 'na yraanyʋ kwa po.» 22 -Ye ʋʋ 'nɩ 'yiye. Nahuon tio- -Yusu ꞊hɛn 'nyrɛ, 'ke 'le ꞊nʋ -hɛyri, ʋ 'dio yi. 23 -Naagbopʋyu -ye nɩ 'o, -Yusu nʋɛ 'mʋ -tɛɛ, nɔ- nɩ 'o -Yusu 'hʋɩn 'mʋ gbo. 24 Nɔ- Simɔ Piɛlɩ nu -jie, ɔ le, bɔ ꞊gba -Yusu wlɔn, nahuon tio- -Yusu ꞊hɛn 'nyrɛ, 25 -naagbopʋyu a -gbɛ 'ɔ 'prɛɛ 'le -Yusu nʋa 'mʋ, 'ɔ ꞊gbɔ wlɔn, ɔ nɔ: «Kʋkɔnyɔ, nahuon tio- -n ꞊hɛn 'nyrɛ 'le?» 26 -Ye -Yusu ꞊tuo -wɔn, ɔ nɔ: «'Flɔɔ꞊tɩɔ -gbo, 'n di 'le 'yanu -wɔn 'nyra, nahuon, 'n dio -nyi, nɔ-ɔ nɩ,» 'ɔ 'ba 'flɔɔ꞊tɩɔ 'mʋ, 'ɔ 'nyrɔ 'le 'yanu -wɔn, 'ɔ -nyo Judɩa, -ɔ mɔ Simɔ Yisikalio a 'yu. 27 'Plɩɩ Judɩa 'mʋ 'flɔɔ꞊tɩɔ a -gbɛ mu di, -ye Satan kʋɔ ke win 'bii. Kɛ -Yusu nyo 'klɛɛ ye po, ɔ nɔ: «Po 'le 'klɩ lɛ, dɛ -n kɔ -bo nu, ꞊mue nu!» 28 Nahuin 'bii, -ʋ nɩ 'o dɛdi-tuoo -do a -gbɛ ke, ꞊ɔ ꞊de 'di 'mʋ lɛ yrii, -tɩ kɔ -tɩ -Yusu 'ɔ nu lɛ 'pʋprɛ. 29 -Tɛ Judɩa 'ya la 'wligbo꞊tunyɔ 'mʋ a -tɩ, ꞊ʋ -ye nɔ 'nɩ, -Yusu lo nɩ, 'ke bɔ mu lɛ'mimre a dididɛ ꞊nʋ -tɔ, ꞊ʋ -ye nɔ 'nɩ, -Yusu lo nɩ, 'ke bɔ -ha 'le 'wli, bɔ -nyi ꞊sʋɛnyʋ. 30 -Tɛ Judɩa -wɔ 'klɛɛ 'flɔɔ꞊tɩɔ a -gbɛ lɛ, -ye tii -do a ti 'yri, ɔ bi 'le 'mʋ -patʋ, 'ke 'le gbɩgbɩyrɩ 'mʋ. 31 -Tɛ Judɩa bi 'klɛɛ 'le -patʋ 'mʋ, -ye kɛ -Yusuu 'a -naagbopʋ ye po, ɔ nɔ: «-Tɛ ti nɩ lɛ 'mʋ -gbo, 'mɔ -gbo, -ɔ mɔ -tʋnahuin 'bii a Nahuon, 'na -tɩ a 'yi'bʋaalɛ di 'mʋ bi pepe'. -Ye 'n die 'nɩ nu, nahuin 'mʋ -wɛ Nyɩsʋa a -tɩ a 'yi'bʋaalɛ 'ye. 32 'Bɩa 'nɩ nu dɛ a -gbɛ, -ye Nyɩsʋa die lele 'nɩ nu, nahuin 'mʋ 'na -tɩ a 'yi'bʋaalɛ 'ye. Ɔ -wɛ lɛ kɛ 'a nunue. Ɔ di 'mʋ -nyi ꞊hapʋgbonɩɩlɛ, 'ke 'le ꞊nɔ 'hʋɩn 'mʋ. 33 'Na 'yuo o, ti ꞊nʋ, 'n 'kɩɛ die 'o 'a mʋ 'hʋɩn 'mʋ -hi, ɩ 'de 'klɛɛ lele -huo. A di 'mʋ lɛ 'nɩ ꞊mɔ. Kɛɛ, -tɩ ꞊nʋ, 'n ꞊tu o -Juukʋɛ a ye'mʋnaanyʋ ye, nɩ- 'nɩɩ -wɛ 'a mʋ ye mu ꞊tu. -Tɩ a -gbɛ, ɩ nɩ- -gbo: -Tɛgbi 'nɩɩ 'le mu, a 'de 'le mumue -wɛ. 34 'Nɩɩ 'a mʋ -nye tetebʋ yrayrʋ. Tetebʋ a -gbɛ, nʋ- -gbo: Ba nʋnʋɛ 'mʋ. -Tɛ 'n nu 'a nɩ 'mʋnʋɛlɛ, kɛ'ɛ nɩ, a kɔ ba nu -wɛ 'mʋnʋnʋɛlɛ. 35 'Bɩa 'ba nʋnʋɛ 'mʋ, -ye nahuin 'bii, ʋ die 'nɩ yrii, -ɛ mɔ, 'a mʋ mɔ 'na -naagbopʋʋ nɩ.» 36 -Ye Simɔ Piɛlɩ ꞊gbɔ wlɔn, ɔ nɔ: «Kʋkɔnyɔ, -be' -nɩɩ ye mue 'le?» -Ye -Yusu ꞊tuo -wɔn, ɔ nɔ: «-Tɛ ti nɩ lɛ 'mʋ -gbo, -tɛgbi 'nɩɩ 'le mu, -n 'de 'le 'na -wɔnkʋkʋɛ -wɛ. Kɛɛ, ti di 'o 'nɩ nyre, -ɩ kɔ 'yri -n di 'o 'mʋ -wɔn kʋɛɛ.» 37 -Ye Piɛlɩ nɔ: «Kʋkɔnyɔ, 'n -wɛ -wɔn, 'ke ꞊bo -ha 'na -hʋnhlʋn, 'ke 'o -na -ta 'mʋ. Dɛ- nue, ꞊nɩ plɛ, -tɛ ti nɩ lɛ 'mʋ -gbo, 'n 'de 'le -na -wɔnkʋkʋɛ -wɛ 'le?» 38 -Ye -Yusu nɔ: «꞊Be 'ɛ mɔ -tɛɛ, -n -wɛ -wɔn, 'ke -bo -ha -na -hʋnhlʋn, 'ke 'o 'na -ta 'mʋ? 'Nɩɩ -mʋ 'nɩ le, 'plɩɩ hapɛ 'mʋ kɛ -nyrɛ mu da, -n di nu 'a ꞊tuuwɩɩ ta, -ɛ mɔ, -n 'de 'mʋ yi.»
1 -Ye kɛ -Yusuu ꞊nʋ ye po, ɔ nɔ: «'A nɩ ꞊wlʋ nɩ bi 'le ꞊hlɔn. Ba kuo Nyɩsʋa ꞊wlʋ ye, a 'mʋ -wɛ 'mʋ ꞊wlʋ ye kuo. 2 Gbonɩɩlɛi -huo 'le 'na Bu -wɔn. 'Nɩɩ 'nɩ mu, 'mʋ 'a nɩ gbonɩɩlɛ -wɔn -wɔ. 'Bɩa 'bɛ 'de wɛn -tɩ a -tɛɛ, 'n 'deɛ ꞊bo ꞊tui wɛn 'a mʋ ye. 3 'Bɩa 'nɩ mu, 'nɩ -wɔ 'a nɩ gbonɩɩlɛ -wɔn, -ye 'n di 'le lele 'nɩ di, 'mʋ 'a mʋ gba, -ɛ die nu, -tɛgbi ꞊nʋ, 'n nɩ 'o, a 'mʋ -wɛ 'o nɩ. 4 A yi 'hru ꞊nʋ nɩ, nahuon di na, -tɛgbi ꞊nʋ, 'n nɩ 'le, ɔ 'mʋ 'le nyre.» 5 -Ye kɛ Toma, ɔɔ ꞊nɔ ye po, ɔ nɔ: «Kʋkɔnyɔ o, -tɛgbi ꞊nʋ, -nɩɩ 'le mu, -a 'de 'le yii. -Be' -a -wɛ 'le -ba nu 'klɛɛ 'a 'hru a yiyie 'le?» 6 -Ye -Yusu ꞊tuo -wɔn, ɔ nɔ: «'Na -gbɛ, 'mɔ mɔ 'hru ꞊nʋ, 'mɔ mɔ -wɛ -tɩ a -tɛɛ, kɔ, 'mɔ mɔ -wɛ 'klɔ yrayrʋ. Ɛ 'de nahuon ꞊de kɔ, -bɔ mu 'le 'n Bu -wɔn, -bɔ 'de 'le 'mʋ naa. 7 'Bɩa 'ba yi 'mʋ, -ye a yi -wɛ 'n Bu nɩ. Kʋɛ 'klɛɛ mɔ gbo, a yio nɩ, 'a 'yo -wɛ.» 8 -Ye Filipʋ nɔ: «Kʋkɔnyɔ o, tɔɔ -a mʋ -na Bu. ꞊Nɩ tʋɔ -a mʋ, -ye -a di kɔ plɔ a bleelɛ.» 9 -Ye -Yusu ꞊tuo lele -wɔn, ɔ nɔ: «Filipʋ o, -tɛ a kɔ 'mʋ 'hɛɛn, -a bibi la 'hʋɩn 'mʋ, ɛ -wlɛn gbo, 'plɩɩ -n 'kɩɛ 'dee 'mʋ a yie. Nahuon 'bɔ 'ye 'mʋ, -ye ɔ 'ye 'na Bu nɩ. Dɛ- kɔ -tɩ ꞊nɩɩ 'klɛɛ lɛ po, ꞊bo tɔɔ 'a mʋ 'na Bu? 10 ꞊Be ꞊nɩ pui ꞊le -tɛɛ, -ɛ mɔ, 'n kɔ 'na Bu 'hɛɛn, -a -mʋɛ nɩ, -a 'we ꞊nɔ nahuoon -do ye? -Tɩ ꞊nʋ, 'nɩɩ a 'bii ye ꞊tu, ɩ 'de 'na -gbɛ a 'lu a lɛ-hielɛ, kɛɛ, 'na Bu a 'lu a lɛ-hielɛ'ɛ nɩ. Nɔ- nɩ 'le 'mʋ ke 'mʋ, 'ɔɔ 'le 'mʋ 'mʋ naa, 'ɔɔ -kʋan nu. 11 -Tɩ -gbo, 'nɩɩ ꞊tu, -ɛ mɔ, 'n kɔ 'na Bu 'hɛɛn, -a -mʋɛ nɩ, -a 'we ꞊nɔ nahuoon -do ye, ba pui -tɛɛ. 'Na pupowin, 'bɩ 'die 'le -wɛ bɩ nue, ba po -tɩ a -gbɛ -tɛɛ, -ye 'na nunu-tɔplɩ, nɩ- -bɩ nue, ba pui -tɛɛ. 12 'Nɩɩ 'a mʋ 'nɩ le, nahuon 'bɔ nɩ 'o, 'bɔ kuo 'mʋ ꞊wlʋ ye, -ye nunu-tɔplɩ -gbo, 'nɩɩ nu, ɔ di -wɛ 'nɩ nu. 'Plɩɩ -ye, nunu-tɔplɩ ꞊nʋ, ɔ di nu, ɩ di 'o 'n nɩnɩ 'mʋ 'nɩ -hi 'dɔ, -ɛ nue, 'ke 'nɩɩ 'le 'na Bu -wɔn mu, -ɛ die nu, ɔ 'mʋ 'na nahuin ꞊nʋ 'klɩ -nyi, 'ke bʋ nu 'a -kʋan. 13 -Tɔplɩ 'bii ꞊nʋ, a di -hʋa, 'ke 'le 'na 'dʋ 'kwli 'mʋ, 'n di 'nɩ nu, -ɛ die nu, 'mɔ -gbo, -ɔ mɔ Nyɩsʋa a 'Yu, 'mʋ nahuin 'na Bu a -tɩ a 'yi'bʋbʋa tɔɔ. 14 'Bɩa 'baa dɛ -hʋa, 'ke 'le 'na 'dʋ 'kwli 'mʋ, 'n die 'nɩ nu.» 15 -Ye kɛ -Yusuu lele 'a -naagbopʋ ye po, ɔ nɔ: «'Bɩa 'ba nʋɛ 'mʋ 'mʋ, a di 'o 'na tetei 'nɩ ꞊tuu. 16 Ti ꞊nʋ -kɔ 'yri 'n di 'le 'n Bu Nyɩsʋa -wɔn mu, 'n dio lɛ 'nɩ 'batɩ, 'ke bɔ ya 'a mʋ nahuon -ye ye, 'ke 'o 'na -ta 'mʋ. Nahuon a -gbɛ, nɔ- mɔ Nyɩsʋa a -Hihiu, -ʋʋ -tɩ a -tɛɛ ꞊tu. Nʋ- di 'a mʋ 'mʋ -hɛ, ʋ 'mʋ 'o 'a mʋ ke 'mʋ nɩ ti a pɛpɛ. 17 'Klɔ ke a nahuin, -ʋ 'de Nyɩsʋa yi, -Hihiu a -gbɛ, ʋ 'deɛ bʋ nɩ 'o ꞊nʋ ke 'mʋ, -ɛ nue, nahuin a -gbɛ, ʋ 'dɩɛ bʋ yruu, 'plɩɩ ʋ 'nɩ ꞊mʋɛ ꞊le lɛ, 'ke bʋ yiu. A -mɛ -ye, a yi Nyɩsʋa a -Hihiu a -gbɛ nɩ, -ɛ nue, Nyɩsʋa a -Hihiu a -gbɛ, 'ke ʋ nɩ 'le 'a mʋ -gbahlɔn, kɔ, ʋ 'mʋ 'o -tado 'a mʋ ke 'mʋ nɩ. 18 'N 'deɛ ꞊bo hie 'o 'a mʋ gbo, ba 'ya -do 'mʋ. Kɛɛ, 'nɩ mu, 'n di 'le lele 'nɩ di, kɛ nɔ 'a mʋ -gbahlɔn. 19 Ti ꞊de 'de 'le hie, 'klɔ ke a nahuin 'mʋ 'na 'yiye 'kee. Kɛɛ, a -mɛ -ye, a di 'mʋ 'nɩ 'ye, -ɛ nue, 'n nɩ 'klɔ, 'a nɩ -gbɛ, 'a di -wɛ 'klɔ nɩ. 20 -Nyrɔwɔ a -gbɛ 'bɔ nyre 'o, -ye a die 'mʋ lɛ 'nɩ yrii, -ɛ mɔ, 'n kɔ 'na Bu 'hɛɛn, -a -mʋɛ nɩ, -a mʋ mɔ -tʋnahuoon -do, kɔ, a kɔ 'mʋ 'hɛɛn, -a -mʋɛ -wɛ nɩ, -a mʋ mɔ -tʋnahuoon -do. 21 Nahuon 'bɔ nɩ 'o, 'bɔ 'ble 'na tetei kwa, kɔ, 'bɔ nyi 'o ꞊tuu, nahuon a -gbɛ, nɔ-ɔ nɩ, -ɔ nʋɛ 'mʋ 'mʋ. Nahuon ꞊nʋ, -ɔ nʋɛ 'mʋ 'mʋ, 'na Bu dio -wɛ 'mʋ 'nɩ nʋɛ. 'Na -gbɛ, 'n dio -wɛ 'mʋ 'nɩ nʋɛ, 'plɩɩ 'mue nu, ɔ 'mʋ 'mʋ yrii.» 22 -Ye Judɩa, kɛɛ, ɛ 'de Judɩa Yisikalio, kɛ ɔɔ ꞊nɔ ye po, ɔ nɔ: «Kʋkɔnyɔ o, -be' -n nu 'klɛɛ, ꞊nɩɩ lɛ po, -ɛ mɔ, ꞊mue nu, -a 'mʋ -mʋ yrii, kɛɛ, -n 'deɛ -bo nue, 'ke 'klɔ ke a nahuin bʋ yrii -mʋ?» 23 -Ye -Yusu ꞊tuo -wɔn, ɔ nɔ: «Nahuon 'bɔ nɩ 'o, 'bɔ nʋɛ 'mʋ 'mʋ, kɔ, -tɩ ꞊nʋ, 'n di ꞊nɔ ye ꞊tu, 'bɔ nyi 'o ꞊tuu, 'n die 'nɩ nu, nahuon a -gbɛ, ɔ 'mʋ 'mʋ yrii. -Ye 'na Bu dio 'mʋ 'nɩ nʋɛ, 'plɩɩ 'na Bu a -gbɛ, ɔ kɔ 'mʋ 'hɛɛn, -a 'mʋ 'le ꞊nɔ -wɔn mu, -a 'muo 'le -wɔn nɩ. 24 Nahuon, 'bɔ nɩ 'o, 'bɔ 'de 'mʋ 'mʋ nʋɛ, ɔ 'nɩ ꞊tuu ꞊le 'o 'na wintɛ nɩ. -Tɩ -gbo, 'nɩɩ 'klɛɛ 'a mʋ ye ꞊tu, aa 'wɔn, ɛ 'de 'na -gbɛgbɛ a wlɔn a win, kɛɛ, 'na Bu Nyɩsʋa, nɔ- le 'mʋ, ꞊bo ꞊tui 'a mʋ ye. 25 -Tɛ 'n 'kɩɛ nɩɛ mɔ 'a mʋ 'hʋɩn 'mʋ, 'n nyi 'a mʋ ye 'nɩ ꞊tu -dodo. 26 'Na Bu Nyɩsʋa, nɔ- di 'a mʋ 'a -Hihiu ye ya, 'ke 'le 'na 'dʋ 'kwli 'mʋ. 'A -Hihiu a -gbɛ, nʋ- di 'a mʋ -tɔplɩ 'bii tɔɔ, kɔ, -tɩ 'bii ꞊nʋ, 'n ꞊tu 'a mʋ ye, ʋ 'mui 'le 'a mʋ 'kwli 'mʋ lɛ po. 27 'N die 'nɩ nu, a 'mʋ plɔ a bleelɛ kɔ. Plɔ a bleelɛdʋ ꞊nʋ, 'n kɔ, nɛ- 'n di 'a mʋ -nyi. Plɔ a bleelɛdʋ ꞊nʋ, 'klɔ ke a nahuin, ʋʋ 'waa 'bienʋ -nyi, ɛ 'de ꞊nɛ, 'nɩ -nye ꞊le 'a mʋ. 'A -tɩ o, a nɩ pɩ 'le hʋannʋ, kɔ, 'a nɩ ꞊wlɩ nɩ bi 'le ꞊hlɔn. 28 A 'wɩn nɩ, -tɛ 'n ꞊tui 'a mʋ ye, -ɛ mɔ: 'Nɩɩ 'klɛɛ 'nɩ mu, kɛɛ, 'n di 'le lele 'nɩ di, kɛ nɔ 'a mʋ -gbahlɔn. 'Bɩa 'ba nʋɛ wɛn 'mʋ 'mʋ, -ye a di wɛn nu 'manʋ, -ɛ nue, 'ke 'nɩɩ 'le 'na Bu -wɔn mu. 'Na Bu, nɔ- nɩ 'o 'mʋ 'lu ye. 29 -Tɔplɩ 'bii -gbo, 'n nyi 'a mʋ ye 'nɩ ꞊tu -dodo, 'plɩɩ ɩ 'mʋ 'lu -wɔn mue. 'Bɩa 'bɩɩ 'lu -wɔn mue, -ye ɩ di 'le 'a mʋ 'mʋ bi 'kwli, a 'mʋ 'mʋ ꞊wlʋ ye kuo. 30 'Dai ti ꞊de 'de 'le hie, 'ke ꞊bo 'prɛɛ 'le 'a mʋ -wɔn, -ɛ nue, 'klɔ -gbo a nyɩgblaka Satan, ɔɔ 'le 'nɩ di. ꞊Hapʋkɔ, 'ɔ 'de 'klɩ kɔ, 'ke 'o 'mʋ ke, 31 kɛɛ, 'klɔ ke a nahuin blɛ ye bʋ yree, -ɛ mɔ, 'n nʋɛ 'n Bu Nyɩsʋa 'mʋ nɩ. Nɛ- nue, dɛ ꞊nʋ, 'n Bu le 'mʋ, ꞊bo nu, 'nɩ die nu. 'A -tɩ o, ba 'ba ye 'mʋ, -a 'mʋ mu.»
1 Kɛ -Yusuu lele 'a -naagbopʋ ye po, ɔ nɔ: «'Mɔ -gbo, 'n 'we ꞊nɔ ꞊hapʋ'dɩdɔtugbɛ ye, 'a mʋ ꞊nʋ, -ʋ mɔ 'na nahuin, 'a 'we ꞊nɔ 'dɩdɔtugbɛ a babʋɩ ye, 'na Bu Nyɩsʋa, nɔ- mɔ tugbɛ a 'dɩdɔnyɔ. 2 'Ɛ nɩ babʋ ꞊de 'bʋ nɩ 'o, 'bʋ 'nɩnɩ tʋ 'yɔ, -ye 'dɩdɔnyɔ a -gbɛ, ɔ nyu 'o 'nɩ 'bɛ, kɔ, 'ɛ nɩ babʋ ꞊de 'bʋ nɩ -wɛ 'o, 'bʋʋ 'yɔ tʋ, ɔ nyu 'le lɛ 'nɩ 'bɛ, -ɛ die nu, ʋ 'mʋ 'o ye 'sii, ʋ 'mʋ lele 'yɔ 'plɔplɔ -ye tʋ. 3 A -mɛ -ye, -tɩ ꞊nʋ, 'n tɔɔ 'a mʋ, ɩ nue nɩ, 'a 'sii 'o ye. 4 Ba 'kɩɛ kʋɛɛ 'le 'mʋ 'mʋ gbo, -ɛ 'we ꞊nɔ ye, -tɛ 'n nu, 'n kɔ 'a mʋ 'hɛɛn, ꞊a -mʋɛ. Babʋ ꞊nʋ, 'bʋ 'de 'le tugbɛ 'mʋ gbo kʋɛ, ʋ 'die 'le -wɛ bʋ tʋ 'yɔ. Kɛ'ɛ nɩ, ɛ -ti 'mʋ, 'ke 'o 'a mʋ -wɔn. 'Bɩa 'ba 'de 'le 'mʋ 'mʋ gbo kʋɛ, a 'die 'le -wɛ ba nu 'na -kʋan. 5 'Mɔ mɔ tugbɛ, 'a mʋ mɔ 'a babʋɩ. Nahuon 'bɔ nɩ 'o, 'bɔ kʋɛ 'le 'mʋ 'mʋ gbo, 'plɩɩ ɔ kɔ 'mʋ 'hɛɛn, ꞊ba -mʋɛ, -ye ɔ 'we ꞊nɔ babʋ ꞊nʋ ye, -ʋʋ 'yɔ 'plɔplɔ tʋ, -ɛ ꞊hɛn 'nyrɛ, nahuon ꞊nʋ, -ɔɔ 'na -kʋan nu -tɛɛ. 'Bɩa 'ba 'de 'le 'mʋ 'mʋ gbo kʋɛ, -ye a 'die 'le -wɛ ba nu dɛ ꞊de. 6 Nahuon 'bɔ nɩ 'o, 'bɔ 'de 'le 'mʋ 'mʋ gbo kʋɛ, -ye Nyɩsʋa dio 'mʋ po 'kwla, -ɛ 'we ꞊nɔ tibabʋɩ ꞊nʋ ye, ʋ 'bɛ 'o lɛ, 'plɩɩ ʋ po 'kwla 'mʋ. 'Bɩ ma, -ye ʋ nye lɛ 'nɩ 'kukue, ʋ 'mui 'tɔ lɛ po. 7 'Bɩa 'ba kʋɛ 'le 'mʋ 'mʋ gbo, kɔ, 'ba 'ble 'na tɔɔwin kwa, 'ke 'le 'a nɩ ꞊wlɩ ke, -ye ba -hʋa Nyɩsʋa 'ɛ nɩ dɛ ꞊de, ɔ die 'a mʋ 'nɩ -nyi. 8 'Bɩa 'ba 'cipi 'o 'na -kʋan a nunue -tɛɛ, -ye a die nahuin 'nɩ tɔɔ, -ɛ mɔ, 'a mʋ mɔ 'na -naagbopʋʋ nɩ. Dɛ a -gbɛ, nɛ- die nu, nahuin, ʋ 'mʋ 'na Bu Nyɩsʋa -tɩ a 'yi'bʋaalɛ -nyi. 9 'N nʋɛ 'a mʋ 'mʋ nɩ, -ɛ 'we ꞊nɔ ye, -tɛ 'na Bu Nyɩsʋa nu, 'ɔ nʋɛ 'mʋ 'mʋ. Ba 'kɩɛ kʋɛɛ 'le 'mʋ 'mʋ gbo, -ɛ die nu, a 'mue yi, -ɛ mɔ, 'n nʋɛ 'a mʋ 'mʋ nɩ. 10 'Bɩa 'baa 'o 'na tetei 'o ꞊tuu, -ye a die 'nɩ yi 'ɛ nɩ ti, -ɛ mɔ, 'n nʋɛ 'a mʋ 'mʋ nɩ, -ɛ 'we ꞊nɔ ye, -tɛ 'n nu, 'nɩ ꞊tuu 'o 'na Bu Nyɩsʋa a tetei 'o, 'nɩ yie 'ɛ nɩ ti, -ɛ mɔ, ɔ nʋɛ 'mʋ 'mʋ nɩ. 11 -Tɩ 'bii -gbo, 'n nyi 'a mʋ ye 'nɩ ꞊tu, -ɛ die nu, -tɛ 'nɩɩ 'manʋ a nunue nu, a 'mʋ -wɛ lɛ nu, kɔ, 'a nɩ 'manʋ a -gbɛ, ʋ 'mʋ 'o ye ꞊cɛɛ. 12 Ba 'ye kɛ, -tɩ ꞊nʋ, 'nɩɩ 'a mʋ ye ꞊tu, nɩ- -gbo: Ba nʋnʋɛ 'mʋ, -ɛ 'we ꞊nɔ ye, -tɛ 'n nu, 'nɩ nʋɛ 'a mʋ 'mʋ. 13 'Mʋnʋɛlɛ gblaka, -ɛ -hi 'o 'mʋnʋɛlɛi 'bii 'mʋ, nɛ- mɔ, nahuon 'bɔ -ha 'a -hʋnhlʋn, 'ke 'o 'a 'bienʋ a waalɛ a -ta 'mʋ. 14 -Tɩ ꞊nʋ, 'nɩɩ 'a mʋ ye ꞊tu, 'ba nyi nu, -ye 'a mʋ mɔ 'na nɩnatumupʋʋ nɩ. 15 'Nɩ daa ꞊le 'klɛɛ lele 'a mʋ -kʋannunyʋ, -ɛ nue, dɛ ꞊nʋ, -kʋannunyɔ a 'masɛ, ɔɔ nu, -kʋannunyɔ a -gbɛ, ɔ 'die yi. 'Nɩɩ 'a mʋ daa 'na nɩnatumupʋ. A yi dɛ a -gbɛ nɩ, -ɛ nue, -tɩ 'bii ꞊nʋ, 'na Bu Nyɩsʋa tɔɔ 'mʋ, 'n tʋɩ -wɛ 'a mʋ nɩ. 16 Ɛ 'de 'a mʋ, a 'de 'le 'mʋ du 'mʋ -ha, 'ke ꞊bo 'ya 'a nɩ Kʋkɔnyɔ 'mʋ. Kɛɛ, 'mɔɔ nɩ, -ɔ -ha 'le 'a mʋ du 'mʋ, 'ke ba kʋɛ 'mʋ -wɔn, 'nɩ le -wɛ 'a mʋ, 'ke ba mu 'na -kʋan nu. -Kʋan ꞊nʋ, a di nu, ɔ 'deɛ bɔ 'ya -gbʋgbɛ 'mʋ. 'Ɛ nɩ dɛ, a di 'na Bu Nyɩsʋa -hʋa, 'ke 'le 'na 'dʋ 'kwli 'mʋ, ɔ die 'a mʋ 'nɩ -nyi. 17 'A -tɩ o, dɛ ꞊nʋ, 'nɩɩ 'a mʋ -hʋa, nɛ- mɔ: Ba nʋnʋɛ 'mʋ!» 18 Kɛ -Yusuu lele po, ɔ nɔ: «'Klɔ ke a nahuin 'bʋ yraa 'a mʋ, ba kɔ 'a yiyie, -ɛ mɔ, 'mɔ mɔ ye-hɛnahuon, ʋ yraa, 'plɩɩ 'ʋ yraa 'a mʋ. 19 'Bɩa 'ba 'ya wɛn 'klɔ ke a nahuin 'mʋ, -ye 'klɔ ke a nahuin, ʋ di wɛn 'a mʋ 'mʋ 'nɩ nʋɛ, -ɛ nue, 'ke a di wɛn 'le ꞊nʋ -hɛyri nɩ. Kɛɛ, ɛ 'de lɛ 'mʋ nɩ. 'Na -gbɛ, 'mɔ -ha 'le 'a mʋ 'klɔ ke a nahuin -hɛyri, 'nɩ po 'a mʋ 'pɩa ke. A 'de 'klɛɛ lele 'le ꞊nʋ -hɛyri nɩ. Nɛ- nue, 'ʋ yraa 'a mʋ. 20 -Tɩ -gbo, 'n ꞊tu o 'a mʋ ye, ɩ nɩ -hri 'le 'a mʋ -wɔn, -ɛ mɔ: -Kʋannunyɔ ꞊de 'de 'o 'a 'masɛ 'lu ye nɩ. Ɛ ꞊hɛn 'nyrɛ, nahuin ꞊nʋ, -ʋ ꞊tue 'mʋ ꞊sʋɛ, ʋ di -wɛ 'a mʋ ꞊tue ꞊sʋɛ. Nahuin ꞊nʋ, -ʋʋ 'o 'na tɔɔwin 'o ꞊tuu, ʋ di -wɛ 'o 'a nɩ tɔɔwin 'o 'nɩ ꞊tuu. 21 ꞊Sʋɛ 'bii ꞊nʋ, ʋ di 'a mʋ ꞊tue, ʋ die 'a mʋ 'nɩ ꞊tue, -ɛ nue, 'a mʋ mɔ 'na -naagbopʋʋ nɩ, 'plɩɩ 'na Bu, -ɔ lee nɔ 'mʋ 'klɔ ke, ʋ 'dio yi. 22 'Bɩa 'nɩ 'de wɛn 'le di, kɔ, 'nɩ 'de wɛn ꞊nʋ Nyɩsʋa a -tɩ ye ꞊tu, Nyɩsʋa 'deɛ bɔ yɛɛ wɛn ꞊nʋ -tɩ, 'ke 'o 'waa dɛ 'kuku ꞊nʋ, ʋ nu a -ta 'mʋ. Kɛɛ, -tɛ 'n di 'klɛɛ 'le, 'n ꞊tu ꞊nʋ Nyɩsʋa a -tɩ ye, 'bɩa 'bʋ 'kɩɛ nue dɛ 'kuku, -ye ʋ 'deɛ bʋ kɔ 'hru, 'ke bʋ ꞊ta 'le Nyɩsʋa kwa 'mʋ. 23 Nahuon -gbo, -ɔ yraa 'mʋ, ɔ yraa -wɛ 'na Bu nɩ. 24 'Bɩa 'nɩ 'de wɛn 'le ꞊nʋ -hɛyri 'ŋmilɛka-tɔplɩ nuu, nahuon ꞊de 'de -hlɩn a nue, -ye Nyɩsʋa 'deɛ bɔ yɛɛ wɛn ꞊nʋ -tɩ, 'ke 'o 'waa dɛ 'kuku ꞊nʋ, ʋ nu a -ta 'mʋ. Kɛɛ 'klɛɛ, ʋ 'ye 'ŋmilɛka-tɔplɩ ꞊nʋ nɩ, 'n nu, 'plɩɩ 'n kɔ 'na Bu 'hɛɛn, 'ʋ yraa -a mʋ. 25 Kɛɛ, -tɔplɩ a -gbɛ, ɩɩ -wɔn mue 'lu, -ɛ die nu, dɛ ꞊nʋ, 'waa bunʋ, ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, ɛ 'mʋ nue. Dɛ a -gbɛ, nɛ- -gbo: ꞊Betɩ ꞊bo 'de dɛ ꞊de nu, ʋ yraa 'mʋ nɩ.» 26 Kɛ -Yusuu lele ꞊nʋ ye po, ɔ nɔ: «Nahuon ꞊nʋ, -ɔ di 'a mʋ 'mʋ -hɛ, ɔ di 'le 'nɩ di. 'Ke ɔ di 'le 'na Bu -wɔn 'mʋ -hɔn. 'Bɩa 'nɩ mu 'le 'na Bu -wɔn, 'n di 'a mʋ nahuon a -gbɛ ye 'nɩ ya. Nahuon a -gbɛ, nɔ- mɔ Nyɩsʋa a -Hihiu. Nʋ- di nahuin -tɩ a -tɛɛ tɔɔ. 'Bɩa 'bʋ di 'le, ʋ di 'nɩ ꞊tu, nahuon a gblo tio- 'n 'ya 'mʋ. 27 A -mɛ -ye, a di -wɛ 'nɩ ꞊tu, nahuon a gblo tio- 'n 'ya 'mʋ, -ɛ nue, kʋɛ la 'le 'na -kʋan a -wlu꞊tuulɛ 'yie 'mʋ gbo, a kɔ 'mʋ 'hɛɛn, -a 'kɩɛ nɩnɩɛ 'hʋɩn 'mʋ.
1 -Tɩ a -gbɛ, 'n nyi 'a mʋ ye 'nɩ ꞊tu, -ɛ die nu, ꞊sʋɛ a 'yiyeti a -gbɛ 'bɩ nyre 'o, a 'nɩ ꞊han 'na ꞊wlʋ a yekuolɛ 'kee. 2 Ʋ di 'a mʋ lɛ 'nɩ bla, 'ke 'le Nyɩsʋa a kayuo gbo. Ti di -wɛ 'o 'nɩ nyre, -ɩ kɔ 'yri nahuin ꞊nʋ, -ʋ di 'a mʋ lɛ 'lɩla, ʋ 'mui ꞊tu, -ɛ mɔ, Nyɩsʋa a -kʋaan nɩ, ʋʋ nu. 3 Kɛ'ɛ nɩ, ʋ di 'a nunue nu, -ɛ nue, ʋ 'de 'na Bu yi, 'ʋ 'de -wɛ 'mʋ yi. 4 Kɛɛ, -tɩ a -gbɛ, 'n nyi 'a mʋ ye 'nɩ ꞊tu, -ɛ die nu, ti ꞊nʋ -kɔ 'yri ʋ di -tɔplɩ a -gbɛ nu, ɩ 'mʋ 'le 'a mʋ 'kwli 'mʋ bi, -ɛ mɔ, 'n ꞊tui 'a mʋ ye nɩ.» «Kʋɛ la 'le gbo, 'n 'de la 'a mʋ -tɩ a -gbɛ le, -ɛ nue, 'ke 'n nɩ la 'le 'a mʋ -gbahlɔn. 5 -Tɛ ti nɩ lɛ 'mʋ -gbo, 'nɩɩ 'nɩ mu, 'ke 'o nahuon ꞊nʋ 'hʋɩn 'mʋ, -ɔ lee nɔ 'mʋ -tʋtʋ ke, 'plɩɩ -ye 'ke 'le 'a mʋ -hɛyri, ꞊ɔ ꞊de 'nɩ ꞊gba ꞊le 'mʋ wlɔn, -ɛ mɔ: -Be' -nɩɩ ye mue 'le? 6 'A nɩ ꞊wlɩ 'mʋɛ gbo, -ɛ nue, 'n le 'a mʋ nɩ, -ɛ mɔ, 'n di 'nɩ mu. 7 Kɛɛ, ba pui -tɛɛ, ɛ nɔɔ 'o lɛ, 'ke 'o 'a mʋ -wɔn, 'ke ꞊bo mu, -ɛ nue, 'bɩa 'nɩ 'de mu, -ye nahuon ꞊nʋ, -ɔ di 'a mʋ 'mʋ -hɛ, -ɔ mɔ Nyɩsʋa a -Hihiu, ɔ 'deɛ bɔ di nɔ 'a mʋ -wɔn. Kɛɛ, 'bɩa 'nɩ mu, 'n dio 'a mʋ ye 'nɩ ya. 8 'Bɩa 'bɔ di 'le, ɔ die 'klɔ ke a nahuin 'nɩ tɔɔ, -ɛ mɔ, ʋʋ nu dɛ 'kuku, 'plɩɩ ɔ 'mʋ -wɛ ꞊nʋ 'hru ꞊nʋ tɔɔ, -ʋ 'sii 'o ye, kɔ -bati ꞊nʋ, Nyɩsʋa di po. 9 Dɛ 'kuku ꞊nʋ, ɔ di nahuin tɔɔ, nɛ- mɔ bʋ 'de 'mʋ ꞊wlʋ ye kuo. 10 Ʋ die 'nɩ 'ye, -ɛ mɔ, 'na 'hru, nʋ- 'sii 'o ye, -ɛ nue, 'ke 'nɩɩ 'le 'na Bu -wɔn mu, 'plɩɩ a 'deɛ ba 'ye 'klɛɛ lele 'mʋ. 11 'Ya 'o lele 'lu, -bati ꞊nʋ, Nyɩsʋa di ꞊nʋ lɛ poo, nɩ- mɔ -bati ꞊nʋ, -ɩ klɩ 'klɔ -gbo a nyɩgblaka, -ɔ mɔ Satan. 12 'N kɔ lele -tɩ 'plɔplɔ ꞊bo ꞊tu wɛn 'a mʋ ye, kɛɛ, -tɛ ti nɩ lɛ 'mʋ -gbo, a 'deɛ ba kɔ 'a 'mʋlɛyriilɛ, -ɛ nue, ɩ -hi 'a nɩ 'lu a lɛ-hielɛ wlɔn. 13 Nyɩsʋa a -Hihiu, -ʋʋ nahuin -tɩ a -tɛɛ ye ꞊tu, 'bʋ di 'le, -ye ʋ die 'nɩ nu, a 'mʋ -tɩ a -tɛɛ 'mʋ lɛ yrii 'bii. -Tɩ ꞊nʋ, ʋ di 'a mʋ ye ꞊tu, ɛ 'de 'a -gbɛgbɛ a wlɔn a win, kɛɛ, -tɩ 'bii ꞊nʋ, ʋ di 'wɔn, nɩ- ʋ di 'a mʋ ye ꞊tu, kɔ, -tɔplɩ ꞊nʋ, -ɩ di -hlɩn 'lu -wɔn mue, nɩ- ʋ di 'a mʋ tɔɔ. 14 Ʋ di nahuin 'na -tɩ a 'yi'bʋaalɛ 'nɩ tɔɔ, -ɛ nue, -tɩ ꞊nʋ, 'n di Nyɩsʋa a -Hihiu ye ꞊tu, nɩ- ʋ di 'wɔn, 'plɩɩ ʋ 'mui 'a mʋ ye ꞊tu. 15 -Tɔplɩ 'bii, 'n Bu kɔ, 'mɔ kʋɩ -wɛ. Nɛ- kɔ -tɩ, 'nɩ ꞊tui, -tɩ ꞊nʋ, 'n di Nyɩsʋa a -Hihiu ye ꞊tu, nɩ- ʋ di 'wɔn, 'plɩɩ ʋ 'mui 'a mʋ ye ꞊tu.» 16 «'Ke 'le ti gbi 'kwli 'mʋ, a 'deɛ ba 'ye 'klɛɛ lele 'mʋ, 'plɩɩ 'ke 'le ti gbi -ye 'kwli 'mʋ, a 'mʋ lele 'mʋ 'ye.» 17 -Ye 'a -naagbopʋ -ye, 'ke 'le 'waa dɩɔnʋ -gbahlɔn, kɛ ʋʋ po, 'ʋʋ wlɔn lɛ ꞊gbʋgba: «Dɛ tio- dɛ a -gbɛ, ɛ ꞊hɛn 'nyrɛ 'le? Kɛ ɔ po -a mʋ ye: 'Ke 'le ti gbi 'kwli 'mʋ, a 'deɛ ba 'ye 'klɛɛ lele 'mʋ, 'plɩɩ 'ke 'le ti gbi -ye 'kwli 'mʋ, a 'mʋ lele 'mʋ 'ye. Dɛ- kɔ -tɩ 'ɔ po -wɛ lɛ, -ɛ mɔ: A 'deɛ ba 'ye 'mʋ, -ɛ nue, 'ke 'nɩɩ 'le 'n Bu -wɔn mu. 18 Ti gbi ꞊nʋ, -ɛ kɔ -tɩ ɔɔ ꞊tu, dɛ tio- ɛ ꞊hɛn 'nyrɛ 'le? -Tɩ ꞊nʋ, ɔɔ ꞊tu, -a 'nɩ yrii ꞊le 'mʋ lɛ.» 19 -Ye -Yusu yree nɩ, -ɛ mɔ, ʋʋ -hʋa bʋ ꞊gbɔ wlɔn. Nɛ- mɔ bɔ lu, ɔ nɔ: «'N le 'a mʋ nɩ, -ɛ mɔ: 'Ke 'le ti gbi 'kwli 'mʋ, a 'deɛ ba 'ye 'klɛɛ lele 'mʋ, 'plɩɩ 'ke 'le ti gbi -ye 'kwli 'mʋ, a 'mʋ lele 'mʋ 'ye. ꞊Be dɛ a -gbɛ, nɛ- kɔ ke aa 'o wlɔn lɛ ꞊gbʋgbaa? 20 'Nɩɩ 'a mʋ 'nɩ le: A di 'nɩ we, kɔ, a 'mʋ wɔlɩ lɛ nu, kɛɛ, 'klɔ ke a nahuin, ʋ di nu 'manʋ. A -mɛ -ye, 'a nɩ ꞊wlɩ di gbo 'nɩ 'mʋɛ, kɛɛ, ti gbi 'bɩ muu 'o ye 'mʋ, -ye a di lele nu 'manʋ. 21 ꞊Bo pue -ŋlanyrɔ a dɛ ye: -Ŋlanyrɔ 'bɔɔ mu -ŋla, -ye 'a ꞊wlʋ 'mʋɛ gbo, 'ke 'o ꞊sʋɛ ꞊nʋ, ɔ di 'ye a -ta 'mʋ. Kɛɛ, 'bɔ -ŋla, -ye 'a ꞊sʋɛ a 'yiye-tɩ ꞊nʋ, ɩ -hri ꞊nɔ -wɔn. -Ye ɔɔ nu 'manʋ, -tɛ 'yu yrayrʋ nu, 'ɔ di nɔ 'klɔ ke. 22 Kɛ'ɛ nɩ, ɛ nɩ -wɛ 'mʋ, 'ke 'o 'a mʋ -wɔn. -Tɛ ti nɩ lɛ 'mʋ -gbo, 'a nɩ ꞊wlɩ 'mʋɛ gbo, ꞊sʋɛ a 'yiye-tɩ. Kɛɛ, 'n kɔ 'a mʋ 'hɛɛn, -a di lele 'nɩ 'yiye. 'Bɩa ꞊ba 'yiye, -ye a di nu 'manʋ, 'plɩɩ nahuon ꞊de 'deɛ bɔ nue, ba 'kee 'manʋ a -gbɛ a nunue. 23 Ti a -gbɛ 'bɩ nyre 'o, -ye a 'deɛ ba ꞊gba 'klɛɛ lele 'mʋ wlɔn, -ɛ nue, a di -tɔplɩ 'bii a -gbɛ 'mʋ lɛ 'nɩ yrii. 'Nɩɩ 'a mʋ 'nɩ le -tɛɛ, -tɔplɩ 'bii ꞊nʋ, a di 'na Bu -hʋa, 'ke 'le 'na 'dʋ 'kwli 'mʋ, ɔ di 'a mʋ 'nɩ -nyi. 24 Kʋɛ la 'le gbo, -bo yɛ ti -gbo ke, a 'de wɛn 'na Bu dɛ ꞊de a -hʋɛ, 'ke 'le 'na 'dʋ 'kwli 'mʋ. 'Bɩa 'baa dɛ -hʋa, -ye ba -hʋɛ 'na Bu. Ɔ die 'a mʋ 'nɩ -nyi, -ɛ die nu, 'a nɩ 'manʋ 'mʋ 'o ye ꞊cɛɛ.» 25 «-Talʋdʋɩ 'kwli 'mʋ, 'n naa 'le, 'nɩ ꞊tu 'a mʋ -tɩ 'bii a -gbɛ ye. Ti di 'o 'nɩ nyre, -ɩ kɔ 'yri 'nɩnɩ di 'le 'a mʋ -wɔn 'prɛɛ, 'ke 'le -talʋdʋɩ 'kwli 'mʋ, kɛɛ, -tɔplɩ ꞊nʋ, -ɩ kʋɛ 'o 'na Bu ke gbo, 'n di 'a mʋ 'mʋ lɛ 'nɩ yrii -tɛɛ. 26 Ti a -gbɛ 'bɩ nyre 'o, a di 'na Bu -hʋa -tɔplɩ, 'ke 'le 'na 'dʋ 'kwli 'mʋ. 'Na -gbɛ, 'n 'deɛ ꞊bo -hʋɔ dɛ ꞊de, 'ke 'o 'a nɩ -ta 'mʋ, 'a nɩ -gbɛ, 'a mʋ die ꞊nɔ -hʋa, 27 -ɛ nue, 'na Bu a -gbɛ, ɔ nʋɛ 'a mʋ 'mʋ nɩ. Ɔ nʋɛ 'a mʋ 'mʋ nɩ, -ɛ nue, a nʋɛ -wɛ 'mʋ 'mʋ nɩ, 'plɩɩ 'a kuo 'mʋ ꞊wlʋ ye, -ɛ mɔ, 'ke 'n -hɔn 'le Nyɩsʋa -wɔn 'mʋ. 28 'Ke 'n -hɔn 'le 'n Bu -wɔn 'mʋ, 'nɩ di nɔ 'klɔ ke. -Tɛ ti nɩ lɛ 'mʋ -gbo, 'nɩɩ nɔ 'klɔ ke 'mʋ 'nɩ -hɔn, 'mʋ 'le 'na Bu -wɔn mu.» 29 -Ye 'a -naagbopʋ ꞊tuo -wɔn, ʋ nɔ: «'Ye kɛ, -tɛ ti nɩ lɛ 'mʋ -gbo, 'bɩa ꞊nɩɩ 'prɛ, ꞊nɩ nu ꞊le -talʋdʋɩ, -ye -a nyi 'mʋ lɛ 'nɩ yrii -tɛɛ. 30 -A yie 'klɛɛ nɩ, -ɛ mɔ, -n yi -tɔplɩ 'bii nɩ. ꞊Betɩ nahuin bʋ 'de -mʋ wlɔn ꞊gba, dɛ ʋ di -mʋ wlɔn ꞊gba, -n yie nɩ -dodo. Nɛ- kɔ -tɩ, ꞊a yie, -ɛ mɔ, 'ke -n -hɔn 'le Nyɩsʋa -wɔn 'mʋ.» 31 -Ye -Yusu ꞊tu -wɔn: «꞊Be a yie 'klɛɛ nɩ, -ɛ mɔ, 'ke 'n -hɔn 'le Nyɩsʋa -wɔn 'mʋ? 32 'A -tɩ 'klɛɛ, ti di 'o 'nɩ nyre, 'plɩɩ ti a -gbɛ 'ɩ nyre 'o -dodo, -ɩ kɔ 'yri a 'bii, a di lɛ -gbɛ, 'ɛ nɩ nahuon 'bɔ nɩ 'o, ɔ 'mʋ 'le 'a kayu gbo mu, a 'mʋ mɔ 'n -do gbo hie. Kɛɛ, 'n 'deɛ ꞊bo 'ya -do 'mʋ, -ɛ nue, kɛ 'n Bu nɩ mɔ 'mʋ 'hʋɩn 'mʋ. 33 'N ꞊tu 'a mʋ -tɩ 'bii a -gbɛ ye nɩ, -ɛ die nu, 'a mʋ ꞊nʋ, -ʋ kɔ 'mʋ 'hɛɛn- -mʋɛ, a 'mʋ kegbowɛɛnlɛ kɔ. Kɛ nɔ 'klɔ -gbo ke, a di 'ye ꞊sʋɛ. Kɛɛ, 'a nɩ ꞊wlɩ nɩ bi 'le ꞊hlɔn, -ɛ nue, 'klɔ -gbo a 'klɩ, 'n -wɩ gbo.»
1 'Plɩɩ -Yusu 'mʋ 'klɛɛ mu -yrɛ, -ye ɔ 'ba 'mʋ ye 'a 'lu, 'ɔ ta 'le yakɔ 'mʋ lɛ, ɔ nɔ: «'Na Bu o, ti nyre 'o ꞊o. 'Mɔ -gbo, -ɔ mɔ -na 'Yu, nue, nahuin, ʋ 'mʋ 'na -tɩ a 'yi'bʋaalɛ 'ye, -ɛ die nu, 'mʋ -wɛ ꞊nʋ -na -tɩ a 'yi'bʋaalɛ tɔɔ. 2 -N -nyi 'mʋ 'klɩ, 'ke 'o nahuin 'bii ke, -ɛ die nu, nahuin 'bii, -n -nyi 'mʋ, 'mʋ ꞊nʋ 'klɔ yrayrʋ -nyi, -ɔ 'nɩnɩ -wɛ 'le. 3 'Klɔ yrayrʋ a -gbɛ, nɔ- mɔ bʋ yi -mʋ, -mɔ ꞊nʋ, -ɔ mɔ -tɛɛ a Nyɩsʋaa -do, kɔ, bʋ yi -wɛ 'mʋ, -ɔ mɔ -Yusu 'Klɩsʋ, -n lee nɔ 'klɔ ke. 4 -Tɛ 'n nɩ nɔ 'klɔ ke, 'n tɔɔ nahuin -na -tɩ a 'yi'bʋaalɛ nɩ. -Kʋan ꞊nʋ, -n -nyi o 'mʋ, ꞊bo nu, 'n -yrɔ 'lu. 5 -Ye 'klɛɛ, 'na Bu o, wɛɛn ke, 'ke ꞊bo 'di 'le lele -mʋ 'hʋɩn 'mʋ, 'mʋ -tɩ a 'yi'bʋaalɛ kɔ. -Nye lele 'mʋ -tɩ a 'yi'bʋaalɛɛ -do ꞊nʋ, 'n kɔ la, ti ꞊nʋ -kɔ 'yri 'n nɩ la 'o -mʋ 'hʋɩn 'mʋ, 'plɩɩ 'klɔ 'mʋ mu nue. 6 Nahuin ꞊nʋ, -ʋ nɩ la 'le 'klɔ 'ka -hɛyri, -n -hɩʋ 'le ꞊le, ꞊nɩ -nyu 'mʋ, 'nɩ nue, nahuin a -gbɛ, 'ʋ yi -mʋ. -Mɔ kɔ nahuin a -gbɛ, ꞊nɩ -hɩʋ 'le, ꞊nɩ -nyu 'mʋ, 'ʋʋ 'o -na wintɛ 'o ꞊tuu. 7 Ʋ yie 'klɛɛ nɩ, -ɛ mɔ, 'ɛ nɩ dɛ, -n -nyi 'mʋ, 'ke ɛ -hɔn 'le -mʋ -wɔn 'mʋ. 8 Win -gbo, -n ꞊tu 'mʋ wlɔn, nɩ- 'n tɔɔ ꞊nʋ, 'ʋ 'bli kwa -tɛɛ. Ʋ yrie nɩ, -ɛ mɔ, 'ke 'n -hɔn 'le -mʋ -wɔn 'mʋ, kɔ, 'ʋ yie -tɛɛ, -ɛ mɔ, -mɔɔ nɩ, -ɔ lee nɔ 'mʋ 'klɔ ke. 9 Nahuin a -gbɛ, nʋ- kɔ -tɩ 'nɩɩ -mʋ da. 'Nɩ da ꞊le -mʋ, 'ke 'o 'klɔ ke a nahuin ꞊nʋ, -ʋ 'de -mʋ yi a -ta 'mʋ. Kɛɛ, nahuin -gbo, -n -nyi 'mʋ, nʋ- kɔ -tɩ 'nɩɩ -mʋ da, -ɛ nue, -mɔ kʋ. 10 'Ɛ nɩ dɛ, 'n kɔ, -mɔ kʋɛ, mɔ, 'ɛ nɩ dɛ, -n kɔ, 'mɔ kʋɛ -wɛ, kɔ, 'ɛ nɩ nahuon, 'n kɔ, -mɔ kʋɔ, mɔ, 'ɛ nɩ nahuon, -n kɔ, 'mɔ kʋɔ -wɛ. Nʋ- nye nu, nahuin 'mʋ 'na -tɩ a 'yi'bʋaalɛ 'ye. 11 Ti ꞊de 'de 'le hie, 'mʋ nɔ 'klɔ -gbo ke 'mʋ -hɔn, 'mʋ 'le -mʋ -wɔn di. Kɛɛ, ʋ -mɛ -ye, kɛ ʋ 'kɩɛ die nɔ 'klɔ -gbo ke nɩ. 'Na Bu Nyɩsʋa, nu 'klɩ ꞊nʋ, -n -nyi 'mʋ, ꞊mu 'yie ꞊tu, -ɛ die nu, ʋ 'mʋ -mʋɛ, -ɛ 'we ꞊nɔ ye, -tɛ -n kɔ 'mʋ 'hɛɛn -a nu, ꞊a -mʋɛ. 12 Ti 'bii -gbo, 'n -hi nɔ ꞊nʋ -hɛyri, 'n nyu o ꞊tu 'yie, 'ke 'le -na 'klɩ ꞊nʋ 'kwli 'mʋ, -n -nyi 'mʋ. 'N ꞊tu 'yie -tɛɛ, 'waa nahuoon -do ꞊de 'ɔ 'de 'wan, 'bɛ 'de nahuoon -do ꞊nʋ, -ɔ kɔ -tɩ ʋ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, -ɛ mɔ, ɔ di 'nɩ 'wan. -Ye -tɩ a -gbɛ, ʋ 'crɩɩ la, ɩ nue nɩ. 13 Kɛɛ, -tɛ ti nɩ lɛ 'mʋ -gbo, 'ke 'nɩɩ 'le -mʋ -wɔn di. -Tɩ 'bii -gbo, 'n nyi ꞊nʋ ye 'nɩ ꞊tu, -tɛ 'n 'kɩɛ nɩɛ nɔ ꞊nʋ -hɛyri, kɛ nɔ 'klɔ -gbo ke, -ɛ die nu, -tɛ 'nɩɩ 'manʋ a nunue nu, ʋ 'mʋ -wɛ lɛ 'manʋ a nunue nu, 'plɩɩ 'manʋ a -gbɛ, ʋ 'mʋ 'o ye ꞊cɛɛ. 14 'N tɔɔ ꞊nʋ -na win nɩ, kɛɛ, 'klɔ ke a nahuin yraa ꞊nʋ nɩ, -ɛ nue, 'na nahuin, ʋ 'de 'klɔ ke a nahuin, -ɛ 'we ꞊nɔ ye, -tɛ 'n nu, 'nɩ 'de 'klɔ ke a nahuon. 15 'Nɩ 'batɩ ꞊le -mʋ lɛ, 'ke -bo -hɩʋ nɔ 'klɔ -gbo ke, kɛɛ, 'nɩɩ -mʋ lɛ 'nɩ 'batɩ, 'ke -bo ꞊tu 'yie, 'ke 'o 'kuo -hʋɩn a nyɩgblaka a -ta 'mʋ, ɔ 'nɩ ꞊hiun lɛ 'tʋ. 16 Ʋ 'de 'klɔ ke a nahuin, -ɛ 'we ꞊nɔ ye, -tɛ 'n nu, 'nɩ 'de 'klɔ ke a nahuon. 17 Tɔɔ ꞊nʋ -tɩ a -tɛɛ, -ɛ die nu, ʋ 'mʋ -na nahuin 'mʋ 'ya 'bii. -Tɩ a -tɛɛ a -gbɛ, nɛ- mɔ -na wintɛ. 18 -Tɛ -n nu, ꞊nɩ lee nɔ 'mʋ 'klɔ -gbo ke, kɛ'ɛ nɩ, 'n nu, 'nɩ lu -wɛ, 'ke bʋ bi 'klɔ -gbo ke, ʋ 'mʋ nahuin -na ꞊hapʋtitie pue. 19 'Nɩɩ 'n dɩɔnʋ 'nɩ -ha 'bii, 'mʋ -mʋ 'n dɩɔnʋ -nyi, 'ke 'o 'waa -ta 'mʋ, -ɛ die nu, 'waa -gbɛ, ʋ 'mʋ -na nahuin 'mʋ 'ya -tɛɛ. 20 'Nɩ da ꞊le -mʋʋ -do, 'ke 'o 'na nahuin -gbo a -ta 'mʋ. Kɛɛ, 'na nahuin -gbo, 'bʋ ꞊tu 'na -tɩ, nahuin -ye 'bʋ kuo -wɛ 'mʋ ꞊wlʋ ye, nʋ- kɔ -tɩ 'nɩɩ -wɛ -mʋ da. 21 'Nɩɩ -mʋ lɛ 'nɩ 'batɩ, 'ke ʋ 'bii bʋ -mʋɛ. 'Na Bu o, -tɛ -n kɔ 'mʋ 'hɛɛn, -a nu, ꞊a 'we ꞊nɔ nahuoon -do ye, nue, ʋ kɔ -a mʋ 'hɛɛn, -ba -mʋɛ -wɛ. Nue, bʋ -mʋɛ, -ɛ die nu, 'klɔ ke a nahuin ꞊nʋ, -ʋ 'de -mʋ yi, ʋ 'mui -tɛɛ pue, -ɛ mɔ, -mɔɔ nɩ, -ɔ lee nɔ 'mʋ 'klɔ ke. 22 -Tɩ a 'yi'bʋaalɛ ꞊nʋ, -n -nyi 'mʋ, 'n -nye ꞊nʋ nɩ, -ɛ die nu, ʋ 'mʋ -mʋɛ, -ɛ 'we ꞊nɔ ye, -tɛ -n kɔ 'mʋ 'hɛɛn, -a nu, ꞊a -mʋɛ, 23 ɛ ꞊hɛn 'nyrɛ, ʋ kɔ 'mʋ 'hɛɛn, -a 'we ꞊nɔ nahuoon -do ye, 'plɩɩ -n kɔ 'mʋ 'hɛɛn, -a 'we ꞊nɔ nahuoon -do ye, -ɛ die nu, ʋ 'mʋ -mʋɛ 'bii, kɔ, 'klɔ ke a nahuin, ʋ 'mue yrii, -ɛ mɔ, -mɔɔ nɩ, -ɔ lee nɔ 'mʋ, 'plɩɩ ʋ 'mue -wɛ yrii, -ɛ mɔ, -n nʋʋ 'mʋ nɩ, -ɛ 'we ꞊nɔ ye, -tɛ -n nu, ꞊nɩ nʋɛ 'mʋ 'mʋ. 24 'Na Bu o, -n -nyu 'mʋ nɩ. 'A -tɩ, 'n nye 'nɩ -hʋa, -tɛgbi 'n di 'o nɩ, ʋ kɔ 'mʋ 'hɛɛn, -ba nɩ -wɛ 'o, -ɛ die nu, ʋ 'mʋ 'na -tɩ a 'yi'bʋaalɛ 'ye. -Tɩ a 'yi'bʋaalɛ a -gbɛ, -n -nye la 'mʋ nɩ, -ɛ nue, 'plɩɩ 'klɔ, ɔ 'mʋ mu nue, -n nʋɛ la 'mʋ 'mʋ nɩ. 25 'Na Bu o, -mɔ ꞊nʋ, -ɔ 'sii 'o ye, nahuin 'plɔplɔ, -ʋ nɩ nɔ 'klɔ ke, ʋ 'de -mʋ yi. Kɛɛ, 'mɛ -ye, 'n yi -mʋ nɩ, kɔ, nahuin ꞊nʋ, -ʋ yie, -ɛ mɔ, -mɔ lee nɔ 'mʋ 'klɔ ke, nahuin a -gbɛ, ʋ yi -wɛ -mʋ nɩ. 26 'N nue nɩ, 'ʋ yi -mʋ, kɔ, 'mue 'lu -wɔn gba, ʋ 'mʋ -mʋ yi -tɛɛ, -ɛ die nu, ʋ 'mʋ 'waa 'bienʋ 'mʋ nʋɛ, -ɛ 'we ꞊nɔ ye, -tɛ -n nu, ꞊nɩ nʋɛ 'mʋ 'mʋ, 'plɩɩ 'n kɔ ꞊nʋ 'hɛɛn, -a 'mʋ nahuoon -do ye 'we.»
1 -Tɛ -Yusu -wɔ 'klɛɛ 'le Nyɩsʋa a -wɔn'prɛɛlɛ -wɔn, -ye ɔ kɔ 'a -naagbopʋ 'hɛɛn, ʋ 'ba 'mʋ ye, 'ʋ ꞊tɩ Jrusrɛdɩɔ 'mʋ. Kɛɛ, Judɩa, -ɔ mɔ -Yusu a -naagbopʋyu -ye, ɔ -do, nɔ- kɔ ꞊nʋ 'hɛɛn- 'de mu. 'Nɩhannʋ ꞊de nɩ 'o, 'a 'dʋ mɔ Sedrɔ. Nʋ- kɔ 'nike 'dɩdɔti a -ci ꞊de nɩ 'o. Nɛ- kɔ ke ʋ mu 'le. 2 Ʋ 'bii, 'ke ʋʋ o 'le lɛ 'ya. Nɛ- nue, Judɩa a -gbɛ 'ɔ yii 'o -tɛgbi a -gbɛ, -ye ɔ kɔ 'hru, 'ke bɔ po -Yusu 'a yraanyʋ kwa. 3 'Ke 'le 'dɩɔ 'mʋ, 'ke Romakʋɛ a tayie nɩ 'le, ɛ kɔ Nyɩsʋa a 'kagblaka a 'yie꞊tunyʋ 'hɛɛn. Nʋ- Judɩa po ye 'mʋ, 'ʋʋ -Yusu mu klɩ, 'ke 'le 'dɩdɔti a -ci a -gbɛ ke. Nahuin a -gbɛ, Nyɩsʋa a -cɔhlʋnpinyʋ gblakɩ kɔ Falisi꞊tumu a nahuin 'hɛɛn, -ʋ mɔ -Juukʋɛ a 'blʋ a nahuin, nʋ- lu, 'plɩɩ 'blʋ a nahuin a -gbɛ, -ʋ luu 'le, ʋ kɔ ꞊nʋ 'hɛɛn, ʋ 'bii, nʋ- mu 'le -tɛgbi a -gbɛ. 'Sɔyuo a -gbɛ, ʋ 'ble kwa lɛ 'napɩi, kɔ -hrɩ kɔ ta-wɔn-tɔplɩ, 'ʋ mu. 4 -Yusu, ɔ yi -tɔplɩ 'bii ꞊nʋ nɩ, -ɩ kɔ -bɩ nue ꞊nɔ. Nɛ- nue, 'ɔ 'yɩya 'o ꞊nʋ ye gbo, ɔ nɔ: «Nyɔ tio- aa lɛ ꞊mɔ 'le?» 5 -Ye ʋ nɔ: «-Aa lɛ ꞊mɔ Nasalɛtɩ 'mʋ a -Yusu.» -Ye ɔ nɔ: «'Mɔ nɩ gbo.» -Ye 'ke Judɩa 'kɩɛ nɩɛ 'le -Yusu a yraanyʋ -hɛyri. 6 -Yusu bɔ po 'klɛɛ lɛ: «'Mɔ nɩ gbo,» -ye tii -do a ti 'yri, ʋ duu ke -duuduu, 'ʋ bi ꞊hlɔn lɛ. 7 -Ye ɔ ꞊gbʋ lele wlɔn, ɔ nɔ: «Nyɔ tio- aa 'klɛɛ lɛ ꞊mɔ 'le?» -Ye ʋ nɔ: «Nasalɛtɩ 'mʋ a -Yusu.» 8 -Ye ɔ nɔ: «'Be 'n le wɛn 'a mʋ nɩ, -ɛ mɔ: 'Mɔ nɩ gbo mɔ. -Tɛ ɛ 'ya 'mɔ 'mʋ o, aa -hʋa ba klɩ o, a nɩ klɩ 'le 'na -naagbopʋ, ba -hɩʋ mɛ lɛ bʋ mu.» -Ye 'sɔyuo, ʋ -ha -Yusu a -naagbopʋ a -gbɛ lɛ mɛ. 9 -Tɛ ɔ po lɛ, -ye dɛ -gbo, ɔ ꞊tu o ti ꞊de 'yri o, ɛ nue kɛ nɩ. Dɛ a -gbɛ, nɛ- -gbo: «'Na Bu Nyɩsʋa o, nahuin, -n nyi 'mʋ, 'n 'de 'a nahuoon -do ꞊de 'wan.» 10 'Ke 'le -Yusu a yraanyʋ -hɛyri, 'ke nahuon ꞊de nɩ 'le. 'A 'dʋ mɔ Malikusɩ. Ɔ mɔ Nyɩsʋa a -cɔhlʋnpinyʋ a nyɩgblaka a -kʋannunyɔɔ nɩ. -Ye Simɔ Piɛlɩ, -ɔ mɔ -Yusu a -naagbopʋyu -ye, -ɔ nɩ 'o -Yusu 'hʋɩn 'mʋ, ɔ nu 'a -hɔtɩplie, 'ɔ 'bɛ 'o Malikusɩ a -gbɛ a diidɛnʋa. 11 -Ye -Yusu nɔ: «Piɛlɩ o, po 'le -na -hɔtɩplie bɔ wlɔn. ꞊Be -n 'di yi, 'ke 'n kɔ ꞊bo -yra ꞊sʋɛ -gbo 'lu, Nyɩsʋaa -hʋa, ꞊bo 'ye?» 12 -Ye tii -do a ti 'yri, nahuin ꞊nʋ, Judɩa gba, kɔ 'waa nyɩgblakɩ 'hɛɛn, ʋ klɩ -Yusu nɩ, 'ʋ mʋɔ, 13 'ʋ gbɔ 'dɩɔ 'mʋ. Ye-hɛnahuon, ʋ gbɔ 'le ye, nɔ- mɔ -cɔhlʋnpinyʋ a nyɩgblaka. Nyɩbɛyu a -gbɛ, 'a 'dʋ mɔ Hanɩ. Nɔ- mɔ Kaifʋ a 'tɔ. Kaifʋ a -gbɛ, nɔ- mɔ 'yrʋ ꞊nʋ gbo -cɔhlʋnpinyʋ 'bii a nyɩgblaka. 14 Kaifʋʋ -do a -gbɛ, nɔ-ɔ nɩ, -ɔ po o -Juukʋɛ ꞊tɔ 'mʋ, 'ke 'o ti ꞊de -hi o a ti 'yri, -ɛ mɔ: «Ɛ nu -tɛɛ, 'ke nahuoon -do bɔ 'kʋ, 'ke 'o -a nɩ dakʋ 'bii a -ta 'mʋ, 'ɛ -hi 'o -a nɩ dakʋ 'bii a -gbɛ, bʋ 'kʋ.» 15 Bʋʋ 'klɛɛ -Yusu gba, -ye Simɔ Piɛlɩ kɔ -Yusu a -naagbopʋyu -ye 'hɛɛn, ʋʋ ꞊nɔ -wɔn 'nɩ kʋɛ. -Naagbopʋyu -ye a -gbɛ, -cɔhlʋnpinyʋ a nyɩgblaka, -ɔ mɔ Hanɩ, ɔ yio nɩ. Nɛ- nue, ɔ kɔ -Yusu 'hɛɛn 'ʋ pa 'o -tɛgbii -do, 'ke 'le nyɩbɛyu a -gbɛ, -ɔ mɔ Hanɩ a -yaa 'mʋ. 16 Kɛɛ, Piɛlɩ -mɛ -ye, 'ke ɔ hree 'o -yaa a -gbɛ a 'maju 'yri. -Naagbopʋyu ꞊nʋ, -cɔhlʋnpinyʋ a nyɩgblaka yi, nɔ- 'prɛɛ 'le 'yu nyrɔyu ꞊nʋ -wɔn, -ɔɔ 'maju 'yie ꞊tu, 'ɔ paa Piɛlɩ. 17 Bɔ pa 'klɛɛ, -ye 'yu nyrɔyu a -gbɛ, ɔ le Piɛlɩ nɩ, ɔ nɔ: «'Be -mɔ mɔ -wɛ -Yusu a -naagbopʋyu -yee nɩ 'a.» -Ye ɔ nɔ: «Gbe, 'n 'diu 'le -hɛyri nɩ.» 18 Cɛ bɛɛ 'klɛɛ ꞊tɩ, -ye -kʋannunyʋ ꞊nʋ, ʋ kɔ Nyɩsʋa a 'kagblaka a 'yie꞊tunyʋ 'hɛɛn, -ʋ nɩ 'o, ʋ 'tie na, 'ʋ nyo 'wɛn. 'Ke Piɛlɩ nɩ -wɛ 'le ꞊nʋ -hɛyri, 'ɔɔ -wɛ na 'wɛn. 19 Ti a -gbɛ 'yri, -ye -cɔhlʋnpinyʋ a nyɩgblaka Hanɩ -nɩ wɛn, ɔ -tʋa -Yusu a tetei a wlɔnlɛ꞊gbʋgba gbo, ɔ nɔ: «Nahuin tio- mɔ -na -naagbopʋ, kɔ, dɛ tio- mɔ -na tɔɔwin 'le?» 20 -Ye ɔ ꞊tuo ꞊wɔn, ɔ nɔ: «Nahuin 'bii yie nɩ, -tɩ 'nɩɩ tɔɔ. 'N 'de -tɩ ꞊de -hli. 'Ɛ nɩ ti, 'ke 'nɩɩ o 'le Nyɩsʋa a kayuo gbo tɔɔ, kɔ Nyɩsʋa a 'kagblaka a -yaa 'mʋ, -tɛ -Juukʋɛ 'bii, ʋʋ 'le 'ya, kɔ 'waa nyɩgblakɩ 'hɛɛn. 21 'A -tɩ, ꞊nɩ ꞊gba 'le 'mʋ wlɔn! ꞊Gba nahuin ꞊nʋ wlɔn, -ʋ nɩ o -tuo ke. Ʋ yi nɩ, -tɩ 'nɩɩ o tɔɔ. 'Waa 'dai dɛ nɩ nɔ -a mʋ -hɛyri.» 22 Bɔ po 'klɛɛ lɛ, -ye Nyɩsʋa a 'kagblaka a 'yie꞊tunyɔ -ye, -ɔ nɩ 'o, nɔ- mɔ bɔ puo 'le 'ŋma nʋa 'mʋ, ɔ nɔ: «꞊Be kɛ -nɩɩ -cɔhlʋnpinyʋ a nyɩgblaka a -wɔn꞊tutue nu?» 23 -Ye -Yusu nɔ: «'Bɩa 'nɩ ꞊tu -tɩ, 'bɩ nyre 'yi lɛ, tʋɛ 'mʋ, kɛɛ, 'bɩa 'nɩ ꞊tu -tɩ, 'bɩ nɔ 'yi lɛ, dɛ- kɔ 'mɔ -nɩɩ bi?» 24 Ti a -gbɛ 'yri, -ye Hanɩ le 'a 'sɔyuo, 'ʋ gbɔ 'le -cɔhlʋnpinyʋ a nyɩgblaka Kaifʋ ye. -Ye 'ke -Yusu 'kɩɛ nɩɛ 'le 'kʋɩ 'mʋ. 25 Ti ꞊nʋ 'yri, -ye 'ke Simɔ Piɛlɩ 'kɩɛ nɩɛ 'le na'wɛnnyʋ -hɛyri, 'ke 'le -yaa 'mʋ. -Ye kɛ nahuon -ye nyo lele ye po, ɔ nɔ: «-Mɔ -gbo, -mɔ mɔ -Yusu a -naagbopʋyu -yee nɩ.» Kɛɛ, -ye ɔ nɔ: «'Mm, 'n 'diu 'le -hɛyri nɩ mɔ.» 26 Kɛɛ, -cɔhlʋnpinyʋ a nyɩgblaka a -kʋannunyɔ ꞊de nɩ -wɛ 'o. Nahuon ꞊nʋ, -ɔ kɔ nʋa Piɛlɩ 'bɛ wɛn 'o, nɔ- kɔ 'dɩayuu nɩ. Nɔ-ɔ -wɛ Piɛlɩ le, ɔ nɔ: «-Mɔ -gbo, -mɔ mɔ -Yusu a -naagbopʋyuu nɩ, -ɛ nue, 'n 'ye wɛn -mʋ nɩ, ɔ kɔ -mʋ 'hɛɛn, 'ke 'le ti gbo.» 27 Kɛɛ -ye Piɛlɩ -ga lele nɩ. Tii -do a ti 'yri, -ye hapɛ da -nyrɛ nɩ. 28 -Tɛ -nyrɛɛ 'klɛɛ lɛ cɛ, -ye -Juukʋɛ -ha 'le -Yusu Kaifʋ a -yaa 'mʋ nɩ, 'ʋ gbɔ 'le Romakʋɛ a -gʋlʋnʋma a 'kagblaka gbo. -Gʋlʋnʋma a -gbɛ, 'a 'dʋ mɔ Pilatɩ. -Juukʋɛ -mɛ -ye, 'waa nahuon ꞊de 'de 'le -yaa 'mʋ pa. Ʋ nɔ 'nɩ, 'bʋ pa 'le -gʋlʋnʋma a -tɛ, -ɔ 'de -Juukʋɛyu, -ye ʋ 'de 'o ye 'sii, 'ke 'o Nyɩsʋa ye. 'A -tɩ, ʋ 'nɩ di ꞊le lɛ'mimre, -ɛ mɔ Pakɩ a dididɛ nɩ. Nɛ- nue, 'ʋ hree 'o -patʋ 'mʋ. 29 Bʋ 'wlɛ 'klɛɛ 'o -patʋ 'mʋ gbo, nɛ- nue, Pilatɩ 'ɔ 'hrɩ 'o, ɔ nɔ: «Ba le 'mʋ, dɛ tio- nahuon -gbo, ɔ nu, -ɛ kɔ -tɩ a nyo yɛɛ.» 30 -Ye ʋ nɔ: «'Bɔ 'de wɛn dɛ'klannunyɔ, -a 'deɛ -ba yɔ wɛn -mʋ ye.» 31 Bʋ po 'klɛɛ lɛ, -ye Pilatɩ nɔ: «Ba gbɔ, ba puo -bati lɛ 'a nɩ -gbɛ. Dɛ a 'ye, ba nue ꞊nɔ 'mʋ, -tɛ 'a nɩ tetei, ɩɩ 'a 'yiye nu!» -Ye ʋ nɔ: «'A mʋ Romakʋɛ, a pue 'mʋ tete, 'ke -a mʋ -Juukʋɛ -a nɩ 'la 'le nahuon. -Aa -hʋa 'ke ba kʋɔ 'o tu 'yie 'mʋ, ɔ 'mʋ 'kʋ.» 32 -Tɛ ʋ po 'klɛɛ lɛ, -ye dɛ -gbo, -Yusu ꞊tu o, 'ke 'o 'a 'kʋkʋɛdʋ a -ta 'mʋ, ti ꞊de -hi o a ti 'yri o, -ye dɛ a -gbɛ, nɛ- kɔ -bɛ mue kɛ 'lu -wɔn. 33 -Ye Pilatɩ pa lele nɩ, 'ɔ le 'a 'sɔyuo, bʋ 'yɩya 'o ꞊nɔ -Yusu ye gbo, ɔ nɔ: «꞊Be -mɔɔ nɩ, -ɔ mɔ -Juukʋɛ a bodɩɔ?» 34 -Ye ɔ nɔ: «꞊Be -tɩ -gbo, -nɩɩ 'mʋ wlɔn ꞊gba, -na -gbɛ, -mɔ -hii 'lu -wɔn lɛ, 'ke 'o 'mʋ -wɔn, -hee' ꞊be nahuin ꞊de le -mʋ?» 35 -Ye Pilatɩ nɔ: «'Mɔ -gbo, 'n 'de -Juukʋɛyu. -Na -gbɛ a dakʋ kɔ -cɔhlʋnpinyʋ gblakɩ 'hɛɛn, nʋ- ya -mʋ 'mʋ ye.» 36 -Ye -Yusu nɔ: «'Na bodɩɔdɛ, ɛ 'de 'klɔ -gbo ke a nahuin a bodɩɔdɛ ye 'we, 'plɩɩ ɛ 'de nahuin, ʋ 'de 'mʋ bodɩɔdɛ -nyi, Nyɩsʋa a -gbɛgbɛ, nɔ- -nye 'mʋ. 'Bɩa 'nɩ 'we wɛn ꞊nɔ 'klɔ -gbo ke a bodɩɔ ye, 'na -naagbopʋ, ʋ kɔ bʋ -wɔn wɛn 'mʋ ke, 'ke 'le 'dɩdɔti gbo, ʋ 'nɩ ꞊han wɛn 'mʋ -Juukʋɛ kwa po.» 37 -Ye Pilatɩ nɔ: «Ɛ 'we ꞊nɔ ye, -mɔ mɔ 'klɛɛ bodɩɔɔ nɩ 'a.» -Ye -Yusu nɔ: «-N nyi wɛn a ꞊tue, 'mɔ mɔ bodɩɔ. Nɛ- nue, 'nɩ -hɔn 'le Nyɩsʋa -wɔn 'mʋ, 'ʋ kɔ 'mʋ, 'mʋ nahuin -tɩ a -tɛɛ tɔɔ. 'A -tɩ, 'bɩa nahuon 'bɔ nʋɛ -tɩ a -tɛɛ 'mʋ, ɔɔ 'mʋ ye gbo po nʋa, 'plɩɩ 'ɔɔ 'na -tɩ -tɛɛ pue.» 38 -Ye Pilatɩ nɔ: «Dɛ- mɔ -tɩ a -tɛɛ 'le?» Bɔ po 'klɛɛ lɛ, -ye ɔ 'hrɩ 'o lele ꞊o, 'ɔ mu 'le -Juukʋɛ ye, ɔ nɔ: «'Mɛ -ye o, 'nɩ 'yee ꞊le 'le ꞊nɔ dɛ 'klan ꞊de 'mʋ, bɔ nu, -bɛ blɛ 'kʋkʋɛ ye. 39 Kɛɛ, ɛ mɔ -a nɩ dɛ'ɛ nɩ, ꞊a nye lɛ nu, 'ke 'o lɛ'mimre ꞊nʋ, -ɛ mɔ Pakɩ a ti 'yri, 'n kɔ ꞊bo tɛ ꞊jɩnyɔɔ -do gbo, aa -hʋa. 'A -tɩ, ꞊be a nye 'nɩ -hʋa, 'ke ꞊bo tɛ wɛn 'a nɩ bodɩɔ gbo?» 40 -Ye tii -do a ti 'yri, -ye ʋʋ lɛ 'nɩ ꞊mʋma: «Gbegbe, ɛ 'de ꞊nɔ, Balabasɩ -aa -hʋa.» 'Plɩɩ -ye Balabasɩ a -gbɛ, ɔ mɔ -balʋnyɔ.
1 -Ye Pilatɩ le 'sɔyuo nɩ, ɔ nɔ: «Ba gbɔ, ba bio lɔkʋɛ!» 'ʋ bio. 2 -Tɛ ʋ -wɔ 'a bibie -wɔn, -ye ʋ hra ꞊nɔ lɛ 'witiklaʋn, 'ʋ ꞊tu ꞊nɔ 'lu, kɔ, 'ʋ puo -wɛ wlawlʋ -jɔhʋn. Wlawlʋdʋ a -gbɛ, bodɩɔpʋʋ -do, nʋ- nyu pue. 3 -Ye ʋ 'yɩya 'o ꞊nɔ 'mʋ gbo 'hʋɩn, 'ʋ nyo 'caa, ʋ nɔ: «-Na 'wio mɔ, -Juukʋɛ a bodɩɔ,» 'ʋ nyo -wɛ 'le 'ŋmɩ nʋɩ 'mʋ lɛ po. 4 -Ye Pilatɩ 'hrɩ 'o lele ꞊o, ɔ nɔ: «'N nyo nɔ 'a mʋ ye 'nɩ ya, kɛ nɔ -patʋ 'mʋ, a 'mue yi, -ɛ mɔ, 'nɩ 'yee ꞊le 'le ꞊nɔ dɛ 'klan ꞊de 'mʋ, bɔ nu, -bɛ blɛ 'kʋkʋɛ ye.» 5 -Ye -Yusu 'hrɩ 'o ꞊o, 'a 'witiklaʋn nɩ 'o ꞊nɔ 'lu, kɔ, 'a wlawlʋ -jɔhʋn 'ʋ nɩ 'le ꞊nɔ 'mʋ. -Ye Pilatɩ nɔ: «'A nɩ nahuon, nɔ- -gbo.» 6 -Tɛ Nyɩsʋa a -cɔhlʋnpinyʋ gblakɩ kɔ Nyɩsʋa a 'kagblaka a 'yie꞊tunyʋ 'hɛɛn, ʋ po 'le -Yusu 'yie 'mʋ, -ye ʋʋ lɛ 'nɩ ꞊mʋma, ʋ nɔ: «Kʋɔ 'o tu 'yie 'mʋ, kʋɔ 'o tu 'yie 'mʋ, ɔ 'mʋ 'kʋ!» -Ye Pilatɩ nɔ: «Ba gbɔ, ba kʋɔ 'o tu 'yie 'mʋ 'a nɩ -gbɛ, -ɛ nue, 'mɛ -ye, 'nɩ 'yee ꞊le 'le ꞊nɔ dɛ 'klan ꞊de 'mʋ, -bɛ blɛ 'kʋkʋɛ ye.» 7 -Ye -Juukʋɛ nɔ: «Pilatɩ, -a kɔ tete. Tete a -gbɛ, ɛ nɔ 'nɩ, nahuon, -ɔ di Nyɩsʋa a 'dʋ -wɔn -ha, ɔ nɩ 'mʋ 'kʋkʋɛ. 'A -tɩ, -tɛ ɔ plɛ, ɔ mɔ Nyɩsʋa a 'Yuu nɩ, ɔ nɩ 'mʋ 'kʋkʋɛ.» 8 -Tɛ Pilatɩ 'wɔn 'klɛɛ -Juukʋɛ a pupowin, -ye 'a hʋannʋ bii ke, 9 'ɔ pa 'le lele 'a 'kagblaka gbo, 'ɔɔ -Yusu wlɔn ꞊gba, ɔ nɔ: «꞊Be Nyɩsʋa -wɔn, -n -hɔn 'le 'mʋ?» Kɛɛ, -Yusu 'de ꞊nɔ dɛ ꞊de klɛ -hɩhɩa. 10 Nɛ- nue, Pilatɩ 'ɔ nyo le, ɔ nɔ: «꞊Be 'mɔ Pilatɩ, 'mɔɔ -mʋ wlɔn ꞊gba, ꞊nɩnɩ -hɩhɩa 'mʋ klɛ? -N 'di yi, -ɛ mɔ, 'mɔ -gbo, -ɔ mɔ 'blʋgba -gbo a -gʋlʋnʋma, 'n kɔ 'klɩ, 'ke ꞊bo tɛ -mʋ gbo, 'nɩ kɔ -wɛ 'klɩ, 'ke ꞊bo kɔɔ 'o -mʋ tu 'yie 'mʋ.» 11 -Ye -Yusu nɔ: «-N 'deɛ -bo kɔ wɛn 'klɩ ꞊de, 'ke 'o 'mʋ ke, 'bɩa Nyɩsʋa 'bɔ 'de wɛn -mʋ 'klɩ -nyi. Nɛ- nue o, nahuon -gbo, -ɔ po 'mʋ -mʋ kwa, ɔ nu dɛ 'klan, 'ɔ -hi 'o -mʋ 'mʋ.» 12 Kʋɛ 'klɛɛ 'o ti ꞊nʋ 'yri gbo, -ye Pilatɩɩ 'o lele ꞊tu 'klɩ, -ɛ die nu, ɔ 'mʋ -Yusu gbo tɛ. -Ye -Juukʋɛɛ 'nɩ ꞊ma, ʋ nɔ: «'Bɩa ꞊nɩ tɛ nahuon ꞊nʋ gbo, -ye -n kɔ Romakʋɛ a 'kɩɩn gblaka 'hɛɛn, a 'de pɛ. Kɔ, 'bɩa nahuon 'bɔɔ 'a dɩɔnʋ bodɩɔ daa, -ye ɔ kɔ 'kɩɩn gblaka a -gbɛ 'hɛɛn, ʋ 'de pɛ.» 13 Pilatɩ bɔ 'wɔn 'klɛɛ -tɩ ꞊nʋ, ʋ ꞊tu, nɛ- mɔ bɔ 'hrɔɔ 'o -Yusu -patʋ 'mʋ, -ye ɔ nɩ gbo, 'ke 'le 'a -batipogbata wlɔn. -Tɛgbi, ɔ nɩ 'o gbo, ʋ po la 'o gblɛ 'hɛ papʋɩ. -Tɛgbi a -gbɛ, ʋ nye daa Gabata, 'ke 'le -Juukʋɛwin 'kwli 'mʋ. 14 Ɛ mɔ Pakɩ a 'wee a 'wɩɩ ꞊hun 'mʋ a -nyrɛgblɩ, 'ke Pilatɩ poo -Yusu -bati lɛ. -Ye Pilatɩ nɔ: «-Juukʋɛ -a, 'a nɩ bodɩɔ, nɔ- -gbo.» 15 -Ye ʋ -tʋa lele lɛ꞊mʋmalɛ gbo, ʋ nɔ: «Bɔ 'kʋ, bɔ 'kʋ, kʋɔ 'o tu 'yie 'mʋ!» -Ye Pilatɩ nɔ: «꞊Be 'a nɩ bodɩɔ, nɔ- ꞊bo kɔɔ 'o tu 'yie 'mʋ?» -Ye -cɔhlʋnpinyʋ gblakɩ nɔ: «-A 'de bodɩɔ ꞊de yi, 'bɩa 'bɛ 'de Romakʋɛ a 'kɩɩn gblaka.» 16 -Ye Pilatɩ le 'a 'sɔyuo nɩ, ɔ nɔ: «Ba gbɔ, ba kʋɔ 'o tu 'yie 'mʋ, ɔ 'mʋ 'kʋ, -tɛ -Juukʋɛ, ʋʋ 'a -hʋhʋa nu!» 'ʋ klo, 'ʋ nyo gba. 17 -Ye ʋ hren -Yusu nɩ, 'ɔ 'ble 'a -gbɛ a tu ꞊nʋ, -ʋ kɔ 'yie 'mʋ ʋ dio 'o kɔɔ, 'ʋ ꞊tɩɔ Jrusrɛdɩɔ 'mʋ. -Tɛgbi a -gbɛ, ʋ gbɔ 'le, 'a 'dʋ mɔ 'Lukla, -ɛ mɔ Gɔlʋgɔta, 'ke 'le -Juukʋɛwin 'kwli 'mʋ. 18 'Ke ʋ kʋɔ 'o tu 'yie 'mʋ. Ʋ kɔɔ -wɛ 'o dɛ'klannunyʋʋ 'hɔn 'waa nɩ ti 'yie 'mʋ, -do 'ke 'le -Yusu a diidɛpɩa ke, -do -ye 'ke 'le 'a kamrapɩa ke. 19 -Ye Pilatɩ le 'a nahuin, 'ʋ 'crɩɩ wintɛ, 'ke 'o 'plaɩn.yɛ ke, 'ʋ 'mʋɛ 'o -Yusu a tu 'lu 'mʋ gbo. Wintɛ a -gbɛ, kɛ ɛɛ po: «Nahuon -gbo, nɔ- mɔ Nasalɛtɩ 'mʋ a -Yusu, -ɔ mɔ -Juukʋɛ a bodɩɔ.» 20 Wintɛ a -gbɛ, 'ke ʋ 'crɛɛ 'le wingbleii ta 'kwli 'mʋ, -ɩ mɔ -Juukʋɛwin, kɔ Romakʋɛwin, kɔ Glɛkɩkʋɛwin. -Tɛgbi ꞊nʋ, ʋ kɔɔ 'o -Yusu tu 'yie 'mʋ, ɛ 'mʋɛɛ 'dɩɔ a -gbɛ ye. Nɛ- kɔ -tɩ, -Juukʋɛ 'plɔplɔ 'ʋʋ 'crɩɩwintɛ a -gbɛ -hre. 21 -Tɛ -Juukʋɛ a -cɔhlʋnpinyʋ gblakɩ -hre wintɛ a -gbɛ, -ye ʋ mu 'le Pilatɩ ye, ʋ nɔ: «Pilatɩ, -n 'deɛ -bo 'crɩɩ wɛn: -Yusu, -ɔ mɔ -Juukʋɛ a bodɩɔ, kɛ -n di wɛn po: Nahuon -gbo, ɔ nɔ 'nɩ, nɔ- mɔ -Juukʋɛ a bodɩɔ.» 22 Kɛɛ, -ye Pilatɩ nɔ: «Dɛ -gbo, 'n 'crɩɩ, 'n 'crɛɛ nɩ. Gbe 'n 'deɛ ꞊bo 'cɩcɩɛ.» 23 -Tɛ 'sɔyuo -wɔ 'klɛɛ -Yusu a kʋkʋɛ -wɔn, 'ke 'o tu 'yie 'mʋ, -ye ʋ 'ba 'a 'hʋɩn'mʋlɛpue-tɔplɩ 'mʋ nɩ, 'ʋ po 'a duii -hɛn, 'ʋ wi, nahuon 'bɔ nɩ 'o, 'a nɩ du. Kɛɛ, -ye wlawlʋʋ -do nɩ 'o, ɛ mɔ danʋʋ -do a wlawlʋ -pɛtu'u nɩ. -Ye ʋ nɔ: 24 «-A nɩ cɩcrʋ 'le lɛ. 'A -ta 'mʋ, -ba po 'bla, nahuon, -ɔ die di, nɔ- diu gba.» Dɛ a -gbɛ, 'sɔyuo nue nɩ. -Ye ɛ 'we ꞊nɔ ye, -tɩ -gbo, Nyɩsʋa a winwlɔn-hɛnyɔ -ye, ɔ 'crɩɩ la, 'ke 'le Nyɩsʋacrɩɩnɩɛ 'kwli 'mʋ, ti ꞊de -hi la a ti 'yri la, -tɩ a -gbɛ, ɩ nue kɛ nɩ. -Tɩ a -gbɛ, nɩ- -gbo: «Ʋ wo 'na 'hʋɩn'mʋlɛpue-tɔplɩ, 'plɩɩ 'ʋ po 'bla, 'na wlawlʋ a -tɩ.» 25 -Tɛ -Yusu nɩ 'o tu 'yie 'mʋ, nyrʋgbapʋʋ -tie, -ʋ nɩɔ 'o ꞊hlɔn, nʋ- kɔ 'dʋɩ nɩ gbo: 'a 'dii, kɔ 'a 'dii a -dɩayu, kɔ Mari -ye, -ɔ mɔ Klopasɩ a nyrɔ, kɔ Mari, -ɔ kɔ 'le Madala 'mʋ. 26 'Ke -naagbopʋyu ꞊nʋ, -Yusu nʋɛ 'mʋ -tɛɛ, ɔ nɩ -wɛ 'o. -Ye -Yusu bɔ 'ye 'klɛɛ 'a 'dii, 'ke 'o ꞊nɔ ꞊hlɔn, 'ke 'o 'a -naagbopʋyu a -gbɛ 'hʋɩn 'mʋ, -ye ɔ nɔ: «'Na 'dii o, -n nɛ 'yu, nɔ- -gbo kɛ.» 27 -Ye ɔ le 'a -naagbopʋyu ꞊nʋ nɩ, ɔ nɔ: «-Mɛ -ye, -n nɛ 'dii, nɔ- -gbo kɛ.» Kʋɛ 'o ti a -gbɛ 'yri gbo, -ye -naagbopʋyu a -gbɛ, ɔ gba -Yusu a 'dii nɩ, 'ke 'le 'a dɩɔnʋ -wɔn. 28 -Tɛ dɛ a -gbɛ, ɛ -hi 'klɛɛ, -ye -Yusu yie nɩ, -ɛ mɔ, 'a -kʋan -yrɛ 'lu, -ye ɔ nɔ: «'Na plɔ ma ye.» Kɛ ɔ po, -ɛ die nu, -tɩ -gbo, -ɩ 'crɛɛ la 'le Nyɩsʋacrɩɩnɩɛ 'kwli 'mʋ, -tɩ a -gbɛ, ɩ 'mʋ kɛ nue. 29 'Ke 'o tu a -gbɛ 'hʋɩn 'mʋ, 'ke 'lipanɔ a 'pɔhlʋwɔ nɩ 'o. Nʋ- kɔ -wɔn 'sɔyuo 'nyra 'le dɛ, -ɛ 'we dakuo ye, 'ʋ mʋɛ 'o tugbayɛ 'yri lɛ, 'ʋ -nyo -Yusu, 'ɔ 'nɔ. 30 -Tɛ ɔ 'nɔ 'klɛɛ, -ye ɔ nɔ: «-Kʋan 'bii -yrɛ 'lu.» -Ye ɔ ꞊tɩɔ 'o 'lu nɩ, 'ɔ mra -hʋnhlʋn. 31 -Ye ti, -ɩ hie 'le, -Juukʋɛ a -wuwle-nyrɔwɔ 'mʋ -wlu ꞊tue, ɩ 'de -huo. -Nyrɔwɔdʋ a -gbɛ, ɔ nɩ 'dɔ, 'ke 'le -nyrɔwɩ 'bii -hɛyri, -ɩ mɔ Pakɩ a 'wee. 'A -ta 'mʋ, ʋ 'die -hʋa, 'ke 'kʋkʋkui bɩ 'kɩɛ nɩɛ 'o ti 'yie 'mʋ -wuwle-nyrɔwɔ a -gbɛ 'mʋ. Nɛ- nue, 'ʋ le Pilatɩ, bɔ le 'a 'sɔyuo, 'ke bʋ nu 'plʋdɛ, bʋ -yɩyra -Yusu kɔ -balʋnyʋʋ 'hɔn ꞊nʋ 'hɛɛn a bʋɩ lɛ, -ɛ die nu, ʋ 'mʋ 'kʋ 'tata, ɛ 'mʋ ꞊nʋ 'hru -nye, ʋ 'mu 'o ti 'yie 'mʋ -ha. 32 'Sɔyuo bʋ nyre 'klɛɛ 'o, -ye ʋ -yɩyra nahuiin 'hɔn ꞊nʋ a bʋɩ lɛ, -ʋ kɔ -Yusu 'hɛɛn ʋ kɔɔ 'o ti 'yie 'mʋ. 33 Bʋ 'yɩya 'o -Yusu 'hʋɩn 'mʋ gbo, -ye ʋ 'ye nɩ, -ɛ mɔ, ɔ 'kʋ nɩ. 'A -tɩ, ʋ 'de 'a bʋɩ lɛ -yɩyra. 34 Kɛɛ -ye 'sɔyuotayu -ye nu 'di, 'ɔ waa 'a ꞊mʋɛi ke. Tii -do a ti 'yri, -ye dablo kɔ 'nie 'hɛɛn, nɩ- -hɔn 'le ꞊nɔ 'mʋ. 35 Nahuon, -ɔ 'ye -tɔplɩ 'bii ꞊nʋ, nɔ-ɔ nɩ, -ɔ nyi -wɔn lɛ na, 'plɩɩ 'a -wɔnlɛnawin, ɩ mɔ -tɩ a -tɛɛ. Ɔ yrii lɛ ti, ɔ ꞊tu -tɩ a -tɛɛ, -ɛ die nu, 'a nɩ -gbɛ, a 'mui -wɛ -tɛɛ pue. 36 -Tɛ 'sɔyuo nu -tɔplɩ a -gbɛ, 'ke 'o -Yusu -wɔn, -ye -tɩ ꞊nʋ, -ɩ 'crɛɛ la 'le Nyɩsʋacrɩɩnɩɛ -ye 'kwli 'mʋ, -tɩ a -gbɛ, ɩ nue kɛ nɩ. -Tɩ a -gbɛ, nɩ- -gbo: «Ʋ 'deɛ bʋ -yra 'a 'klaa -do.» 37 -Ye 'ke 'le Nyɩsʋacrɩɩnɩɛ -ye 'kwli 'mʋ, ʋ 'crɩɩ la 'le lele: «Nahuon -gbo, ʋ waa ke, ʋ dio 'nɩ 'ye.» 38 -Ye -Yusu a -naagbopʋyu ꞊de nɩ 'o. 'A 'dʋ mɔ Sosɛfʋ. 'Ke ɔ kɔ 'le Alimatedɩɔ 'mʋ. Kɛɛ, ɔ 'nɩ le ꞊le nahuon ꞊de, -ɛ mɔ, ɔ mɔ -Yusu a -naagbopʋyuu nɩ, -ɛ nue, ɔɔ pɩ -Juukʋɛ a 'blʋ a nahuin a hʋannʋ. -Yusu bɔ 'kʋ 'klɛɛ, -ye Sosɛfʋ a -gbɛ, nɔ- mu 'le Pilatɩ ye, 'ɔ -hʋa -hala, ɔ 'mʋ 'o -Yusu a 'hʋɩn tu 'yie 'mʋ -ha, ɔ 'muo 'o -ha. -Ye Pilatɩ wɔn nɩ. Pilatɩ bɔ wɔn 'klɛɛ, -ye Sosɛfʋ mu nɩ, 'ɔ -ha 'o -Yusu a 'hʋɩn tu 'yie 'mʋ. 39 Ti a -gbɛ 'yri, -ye Nikodɛmʋ nyre 'o ꞊o. Nikodɛmʋʋ -do a -gbɛ, nɔ- mu la 'le -Yusu -wɔn 'tɔ 'mʋ, ti ꞊de a ti 'yri la; 'ɔ ya 'le hʋnhrʋnpo-tɔplɩ, -ɩ -wɛ 'le -bɩ 'wɛɛ -kilowɩ a (30 ) -wlʋ ꞊tu 'o -pu. Hʋnhrʋnpo-tɔplɩ a -gbɛ a 'dʋɩ mɔ milɩ kɔ alowɛsɩ. 40 -Ye nahuiin 'hɔn -wɛ a -gbɛ, ʋ 'ba -Yusu a 'hʋɩn 'mʋ nɩ, 'ʋ nu hʋnhrʋnpo-tɔplɩ a -gbɛ kɔ -jisɛi 'hɛɛn, 'ʋ 'hɩnhɩʋɩn ꞊nɔ lɛ, -tɛ -Juukʋɛ, ʋʋ 'o 'waa 'kʋkʋkui a 'o-hɩhɩa nu. 41 -Tɛgbi a -gbɛ, ʋ kɔɔ 'o -Yusu tu 'yie 'mʋ, 'dɩdɔti a -ci -ye nɩ 'le. -Ci a -gbɛ 'mʋ, 'hɩɔ gblaka nɩ 'le, 'ɔ hren 'klɔ, 'ɔ 'we ꞊nɔ dʋgba ye. Nɔ- kɔ 'kwli 'mʋ, 'ke ʋ 'bluu la 'le 'dɛɛ, (ti ꞊de a ti 'yri la, -ɛ 'we ꞊nɔ -wlukayu ye). 'Dɛɛ a -gbɛ wlɔn, ʋ 'de -hlɩn 'le 'kʋkʋku a pue. 42 -Ye -Juukʋɛ a -wuwle-nyrɔwɔ gblaka, ɔɔ -wlu mu 'nɩ ꞊tue. Nɔ- kɔ -tɩ 'ʋʋ 'kɩka, 'ʋ po 'le -Yusu a 'hʋɩn 'dɛɛdʋ a -gbɛ wlɔn, -ɛ nue, ɛ 'mʋɛɛ 'o -tɛgbi, -Yusu 'kʋʋ 'o ye.
1 -Juukʋɛ a -wuwle-nyrɔwɔ, -ɔ mɔ 'sɛɛdɩ, bɔ -hi, a 'sɔɔdɩ a -nyrɛgblɩ, gbɩgbɩyrɩ bɩ 'kɩɛ nɩɛ -tʋtʋ klɛ, Mari, -ɔ kɔ 'le Madala 'mʋ, kɔ 'a 'bienʋ -ye 'hɛɛn, -ye ʋ -tuo 'le 'dɛɛ ye nɩ, -ɛ kɔ wlɔn ʋ po 'le -Yusu a 'hʋɩn. -Ye ʋ 'ye nɩ, -ɛ mɔ, 'dɛɛ ꞊nʋ a ꞊ju, -ʋ mɔ 'hɩɔ, ʋ briku lɛ, 'ʋ -hɩʋ 'o 'dɛɛ a -gbɛ wien. 2 Bʋ 'ye 'klɛɛ, -ɛ mɔ, ʋ briku lɛ, -ye Mari 'gba lɛ ci, 'ɔ mu 'le Simɔ Piɛlɩ kɔ -naagbopʋyu -ye ꞊nʋ -wɔn, -Yusu nʋɛ 'mʋ -tɛɛ, ɔ nɔ: «Ʋ -ha 'le -a nɩ Kʋkɔnyɔ -Yusu a 'hʋɩn 'dɛɛ wlɔn nɩ, 'plɩɩ -tɛ ʋ pui 'o gbo, -a 'de 'o yii.» 3 'Tata a ti 'yri, Simɔ Piɛlɩ kɔ -naagbopʋyu -ye ꞊nʋ 'hɛɛn, ʋ 'hrɩ nɩ, 'ʋ gba 'le 'dɛɛ ye cigbɛi. 4 Bʋʋ 'klɛɛ mu, -ye -naagbopʋyu -ye ꞊nʋ, ɔ -hi Piɛlɩ lɛ, 'ɔ nyre 'le 'dɛɛ ye -tɩtɛ. 5 -Ye ɔ ꞊tɩtɩ 'mʋ nɩ, 'ɔ ta 'le 'dɛɛ wlɔn lɛ, 'ɔ 'ye -jisɛi ꞊nʋ, -ɩ pɛ 'o gbo, kɛɛ, ɔ 'de 'le 'dɛɛ wlɔn pa. 6 Simɔ Piɛlɩ -mɛ -ye, bɔ nyre 'o, -ye ɔ pa 'le ꞊le, 'ɔ 'ye -wɛ -jisɛi ꞊nʋ, ʋ 'hɩnhɩʋan -Yusu a 'hʋɩn lɛ, 7 kɔ danʋ ꞊nʋ, ʋ mʋa ꞊nɔ 'lu lɛ. -Jisɛi kɔ danʋ a -gbɛ, ɩ pɛ gbo 'dɔ. Ɛ 'we ꞊nɔ ye, -tɛ ɩ nɩ o 'mʋ, 'ʋ 'hɩnhɩʋɩn o -Yusu lɛ, kɛ ɩ nɩ 'mʋ, 'ɩ pɛ 'o gbo. 8 -Ye -naagbopʋyu ꞊nʋ, -ɔ kɔ -tɩtɛ nyre 'o, ɔ pa -wɛ 'le 'dɛɛ wlɔn nɩ, 'ɔ 'ye, -ɛ mɔ, -Yusu 'de 'le 'dɛɛ wlɔn nɩ. Nɛ- mɔ bɔ pui 'klɛɛ -tɛɛ, -ɛ mɔ, -Yusu -hɔn 'le 'kʋkʋnyʋ -hɛyri 'mʋ nɩ, 'ɔ 'hrɩ 'klɔ, 9 -ɛ nue, kʋɛ la 'le gbo, ʋ 'die 'mʋ lɛ a yree, -tɛ Nyɩsʋa a winwlɔn-hɛnyʋ nu la 'a 'crɩɩlɛ, 'ke 'le Nyɩsʋacrɩɩnɩɛ 'kwli 'mʋ, -ɛ mɔ, -Yusu kɔ bɔ -hɔn 'le 'kʋkʋnyʋ -hɛyri 'mʋ, bɔ 'hrɩ 'klɔ. 10 -Ye -naagbopʋʋ 'hɔn -wɛ a -gbɛ, ʋ ꞊hɩan -wɔn, 'ʋ mu lele Jrusrɛdɩɔ 'mʋ. 11 -Ye Mari -mɛ lele de, 'ɔ nɩ 'o -Yusu a 'dɛɛ nʋa 'mʋ gbo, 'ɔɔ we. Ɔɔ wɛn a wee, 'ɔ ꞊tɩtɩ 'mʋ, 'ɔ ta 'le 'dɛɛ wlɔn lɛ. 12 Bɔɔ 'klɛɛ 'le lɛ ta, -ye ɔ 'ye 'le Nyɩsʋa a lɛleenyʋʋ 'hɔn, 'ʋ po -tɔplɩ pʋɔpʋɩ, 'ʋ nɩ 'o -tɛgbi ꞊nʋ gbo, ʋ pɩa 'o -Yusu a -plahʋɩn gbo, -do -tɛ -Yusu a 'lu ꞊gbɛɛ 'o, -do -ye -tɛ 'a bʋɩ ꞊gbɛɛ 'o. 13 -Ye ʋ nɔ: «Nyrʋgba o, ɩ kla 'klɛɛ nɩ, -ɛ kɔ ꞊hien -nɩɩ we 'le?» -Ye Mari nɔ: «Ʋ -ha nɔ 'na Tɔɔnyɔ nɩ. 'N 'de 'o yii, -tɛ bʋ puo 'o gbo.» 14 Ɔ nɩ 'klɛɛ 'le 'a ꞊tutue kwa 'mʋ, -ye ɔ ꞊hɩan -wɔn. Bɔ ꞊hɩan 'klɛɛ -wɔn, -ye ɔ 'ye -Yusu nɩ, kɛɛ, ɔ 'nɩ yroo ꞊le lɛ. 15 -Ye -Yusu nyo wlɔn 'nɩ ꞊gba, ɔ nɔ: «Nyrʋgba o, dɛ- kɔ ꞊hien -nɩɩ we 'le? Nyɔ- -nɩɩ lɛ ꞊mɔ 'le?» -Ye Mari -mɛ -ye, -tɛ ɔ 'ye -Yusu, 'a ꞊wlʋ ke, ɔ nɔ 'nɩ, 'dɩdɔti a -ci ꞊nʋ, nɔ- kɔ 'yie꞊tunyɔ'ɔ nɩ. 'A -tɩ, -ye ɔ nɔ: «Nyɩbɛyu o, 'bɛ 'ya -mɔ 'mʋ o, ꞊nɩ gbɔ, le 'mʋ, -tɛ -n puo 'o gbo, -ɛ die nu, 'muo bla.» 16 Kɛɛ -ye -Yusu dɔ nɩ, ɔ nɔ: «Mari!» -Ye Mari ꞊hɩan -wɔn, ɔ nɔ: «Rabuni,» -ɛ mɔ Tɔɔnyɔ, 'ke 'le -Juukʋɛwin 'kwli 'mʋ. 17 Kɛɛ -ye -Yusu nɔ: «꞊Nɩ ka 'le 'mʋ ye, -ɛ nue, 'n 'de wɛn 'le 'na Bu -wɔn a mue, 'ke 'le yrayrɩ. Kɛɛ, mu 'le 'na -dɩayuo -wɔn, -ʋ mɔ 'na -naagbopʋ, -bo lu, -ɛ mɔ, 'ke 'nɩɩ 'le 'na Bu -wɔn mu, -ɔ mɔ -wɛ 'a nɩ Bu, 'ke 'le 'na Nyɩsʋa -wɔn, -ɔ mɔ -wɛ 'a nɩ Nyɩsʋa.» 18 -Ye Mari mu -naagbopʋ le wɔn, -ɛ mɔ, ɔ 'ye Tɔɔnyɔ nɩ. Nɔ-ɔ nɩ, -ɔ le ꞊nɔ -tɔplɩ 'bii ꞊nʋ, ɔɔ ꞊nʋ le. 19 -Nyrɔwɔ a -gbɛ 'mʋ, -ɔ mɔ 'sɔɔdɩ a -wise, 'ke -Yusu a -naagbopʋ 'kukue lɛ, 'ke 'le kayu -ye gbo. -Tɛ ʋʋ -Juukʋɛ a 'blʋ a nahuin a hʋannʋ pɩ, nɛ- nue, 'ʋ ꞊gba 'maji 'bii. 'Ke ʋ nɩ 'klɛɛ 'o, -ye tii -do a ti 'yri, 'ke -Yusu 'hrɩɩ 'le ꞊nʋ -hɛyri, ɔ nɔ: «Ba kɔ plɔ a bleelɛ!» 20 Bɔ po 'klɛɛ lɛ, -ye ɔ titie ꞊nʋ 'a kwatɩ kɔ 'a ꞊mʋɛi 'hɛɛn ye. -Naagbopʋ bʋ 'ye Kʋkɔnyɔ -Yusu, -ye ʋʋ nu 'manʋ. 21 -Ye kɛ ɔɔ lele po, ɔ nɔ: «Ba kɔ plɔ a bleelɛ! -Tɛ 'na Bu nu, 'ɔ lee nɔ 'mʋ 'klɔ ke, 'mʋ 'a -tɩ ꞊tu, 'na -gbɛ o, 'nɩɩ 'a mʋ 'nɩ le, ba na 'klɔ ke, ba ꞊tu 'na -tɩ.» 22 -Tɛ dɛ a -gbɛ, ɛ -hi 'klɛɛ, -ye ɔ ꞊hloon ꞊nʋ 'lu pepe, ɔ nɔ: «Nyɩsʋa a -Hihiu bʋ nɩ 'o 'a mʋ ke 'mʋ! 23 Nahuon 'bɔ nɩ 'o, 'ba lo, 'ke 'le Nyɩsʋa a -Hihiu a 'klɩ 'kwli 'mʋ, -ɛ mɔ: -Na dɛ 'kuku 'wʋwlɛ nɩ, 'ɛ mɔ -tɛɛ, 'a dɛ 'kuku 'wʋwlɛ nɩ 'bii. Kɛɛ, nahuon 'bɔ nɩ 'o, 'ba 'dio le, -ɛ mɔ: -Na dɛ 'kuku 'wʋwlɛ nɩ, -ye 'ɛ mɔ -tɛɛ, 'a dɛ 'kuku 'de 'wʋwlɛ.» 24 -Tɛ -Yusu 'hrɩɩ ꞊nʋ ye -tɩtɛ, Toma, -ɔ mɔ -Yusu a -naagbopʋyu -ye ꞊nʋ, ʋʋ ꞊Yrupoyu daa, ɔ 'de 'le 'a 'bienʋ -hɛyri nɩ. 25 -Tɛ 'a 'bienʋ 'yo 'klɛɛ, -ye kɛ ʋʋ ꞊nɔ ye po, ʋ nɔ: «Toma, -a 'ye Kʋkɔnyɔ nɩ.» -Ye ɔ nɔ: «'Bɩa 'nɩ 'de kʋɛkʋɛi ꞊nʋ a ꞊pɩ 'ye, ʋ kɔɔ 'le ꞊nɔ kwa 'mʋ, 'na -jie 'bɛ 'di lɛ 'tʋ, kɔ, 'nɩ 'de 'le 'na dabʋ 'a ꞊mʋɛi ꞊nʋ, ʋ waa ke a 'hʋɔ wlɔn 'nyra, 'n 'deɛ ꞊bo pue -tɛɛ gbe, -ɛ mɔ, Kʋkɔnyɔ 'hrɩ 'klɔ.» 26 'Wee -do bɛ -hi, -ye -Yusu a -naagbopʋ 'kukue lele lɛ. 'Ke Toma nɩ 'klɛɛ 'le ꞊nʋ -hɛyri. -Ye ʋ ꞊gba lele kayu -kɔ gbo ʋ nɩ 'le a 'maji 'bii nɩ. Tii -do a ti 'yri, -ye -Yusu 'hrɩɩ 'le lele ꞊nʋ -hɛyri nɩ, ɔ nɔ: «Ba kɔ plɔ a bleelɛ!» 27 -Ye ɔ nɔ: «Toma, 'yɩya mɔ -na -jie gbo, kɔ, 'ye 'na kwatɩ, 'yɩya -wɛ mɔ -na dabʋ gbo, -bo 'nyra 'le -na -jiomɩ 'na ꞊mʋɛi, ʋ waa o ke a 'hʋɔ wlɔn! 'N 'hrɩ 'klɔ, ꞊nɩ pui 'le lele gblɛ, pui -tɛɛ!» 28 -Ye Toma nɔ: «'Na Kʋkɔnyɔ, kɔ 'na Nyɩsʋa.» -Ye ɔ nɔ: 29 «꞊Be -tɛ -n 'ye 'mʋ, nɔ- kɔ -tɩ ꞊nɩ nye -tɛɛ pue, -ɛ mɔ, 'n 'hrɩ 'klɔ. 'Manʋ 'ke 'o nahuon ꞊nʋ -wɔn, -ɔ 'de 'mʋ 'ye, 'plɩɩ -ɔ pue -tɛɛ, -ɛ mɔ, 'n 'hrɩ 'klɔ, 'plɩɩ -ɔ kuo 'mʋ ꞊wlʋ ye.» 30 -Yusu nu 'ŋmilɛka-tɔplɩ -ye, 'ke 'o 'a -naagbopʋ ye. -Tɔplɩ a -gbɛ, ɩ 'de 'crɛɛ, kɛ nɔ 'crɩɩnɩɛ -gbo 'kwli 'mʋ. 31 Kɛɛ, 'a dɛ -gbo, -ɛ 'crɛɛ, ɛ 'crɛɛ nɩ, -ɛ die nu, a 'mue ꞊wlʋ ye kuo, -ɛ mɔ, -Yusu, nɔ- mɔ Waanyɔ, Nyɩsʋa po la lɛ, ɔ di la 'le ya, ɔ 'mʋ 'a dakʋ waa, kɔ, 'ɔ mɔ Nyɩsʋa a 'Yu. 'Bɩa 'ba pue Waanyɔ a -gbɛ a -tɩ -tɛɛ, 'ba kuo ꞊wlʋ ye, kɔ, 'ba nyo -wɔn kʋɛ, ɔ di 'a mʋ -nye 'klɔ yrayrʋ.
1-2 -Tɛ -tɔplɩ 'bii a -gbɛ, ɩ -hi, -ye -Yusu 'hrɩɩ lele 'a -naagbopʋ ye, 'ke 'le Galileblʋgba a 'yru nʋa 'mʋ. -Yusu a -naagbopʋ ꞊nʋ, -ʋ nɩ 'o, 'waa 'dʋɩ, nɩ- -gbo: Simɔ Piɛlɩ, kɔ Toma, ʋʋ ꞊Yrupoyu daa, kɔ Natanaɛlɩ, -ɔ kɔ 'le Kanadɩɔ 'mʋ, 'ke 'le Galileblʋgba 'mʋ, kɔ Sebede a 'yuoo 'hɔn, kɔ -naagbopʋʋ 'hɔn -ye 'hɛɛn. Nʋ- -Yusu 'hrɩɩ ye. -Tɛ ɔ nu 'waa ye'hrɩɩlɛ, nɛ- -gbo: 3 -Nyrɔwɔ ꞊de 'mʋ, Simɔ Piɛlɩ nɔ: «-A 'bi -a o, 'nɩɩ mu 'nɩ 'pa.» -Ye ʋ nɔ: «-N kɔ -a mʋ 'hɛɛn- mu.» -Ye ʋ 'ba 'mʋ ye, 'ʋ mu 'le 'yru nʋa 'mʋ. 'Ke ʋ 'ya 'le 'blagbe wlɔn, 'ʋ mu 'pa wɔn. Kɛɛ, ʋ 'de -hrin.ee -do 'pa, 'tɔyrʋwɔ 'bii ꞊nʋ 'mʋ. 4 -Nyrɛ bɛ cɛ 'klɛɛ lɛ, -ye ʋ 'ye -Yusu nɩ, 'ke 'o 'yru nʋa 'mʋ, kɛɛ, ʋ 'dio yrii. 5 -Ye ɔ nɔ: «'Hɩanpli -a, ꞊be a 'pa dɛ?» Ʋ nɔ: «Gbe -o, -a 'de dɛ 'ye.» 6 -Ye ɔ nɔ: «Ba po 'le 'a nɩ -tata 'blagbe a diidɛpɩa ke. A di 'ye dɛ,» 'ʋ puo 'le diidɛpɩa ke. Bʋ puo 'klɛɛ 'le, -ye ɔ po 'le -hrin 'plɔplɔ. 'A -tɩ, ʋ 'die 'le -wɛ, 'ke bʋ -hɩɔ 'nie 'mʋ. 7 -Naagbopʋyu ꞊nʋ, -Yusu nʋɛ 'mʋ -tɛɛ, bɔ 'ye 'klɛɛ 'ŋmilɛkadɛ ꞊nʋ, -ye ɔ nɔ: «Simɔ Piɛlɩ, -a nɩ Tɔɔnyɔ'ɔ nɩ.» Tii -do a ti 'yri, -tɛ ɔ 'wɩn 'klɛɛ, -ɛ mɔ, 'waa Tɔɔnyɔ'ɔ nɩ, -ye ɔ pue 'a wlawlʋ nɩ, 'ɔ mʋ gbo, -ɛ nue, ɔ ꞊ga wɛn wlɔn 'hʋɩn, 'plɩɩ 'ɔ bi 'nie 'mʋ, 'ɔ mu 'le -Yusu 'hʋɩn 'mʋ. 8 -Naagbopʋ -ye ꞊nʋ, 'blagbe, nɛ- ʋ gba, 'ʋʋ -wɛ 'le -Yusu ye mu. Bʋʋ 'klɛɛ mu, -ye ʋʋ 'waa -tata -wɔn lɛ -jri 'nie, -hrin a kwaku-tɩ. Ʋ 'de gbogbo -wɔn hren. 9 -Tɛ ʋ kwlɛɛ 'klɛɛ 'blagbe, 'ʋ ꞊tɩ. -Ye ʋ 'ye 'o ꞊nɔ 'hʋɩn 'mʋ wʋnwlɩnna, -hrin pɛ 'o 'lu gblɛ kɔ 'flɔɔ, 'ke 'o ꞊nɔ mamɔ lɛ. 10 -Ye ɔ nɔ: «-Hrin, 'a nɩ -tata po 'le, ba ya 'le 'a dɛ!» 11 Simɔ Piɛlɩ 'ɔ 'ya 'le 'blagbe wlɔn, 'ɔ -jri 'le -tata, 'ɔ puo -tʋtʋ 'mʋ gbo, 'ke 'le ꞊nɔ wlɔn 'ʋ -ha 'le -hrin gblakɩ a (153 ) -wlɩɩ 'nɩpata ꞊tu 'o -pu ꞊tu 'o ta. ꞊Hapʋkɔ, -hrin a -gbɛ 'ɩ -huo, kɛɛ, -tata 'de lɛ cɩcrɛ. 12 -Ye -Yusu nɔ: «Ba 'de, a 'mʋ dɛ di!» Ʋ -hʋa bʋ ꞊gbɔ wlɔn, -ɛ mɔ: «Nyɔ tio- -n 'ya 'klɛɛ 'le?» kɛɛ, ʋ 'die nu, -tʋɩ a -tɩ, -ɛ nue, ʋ yie nɩ, -ɛ mɔ, Kʋkɔnyɔ'ɔ nɩ, 13 'ɔ 'yɩya 'o ꞊nʋ 'hʋɩn 'mʋ gbo, 'ɔ -nyi ꞊nʋ 'flɔɔ, kɔ, 'ɔ -nyi -wɛ ꞊nʋ -hrin. 14 -Tɛ ɔ -hɔn 'le 'kʋkʋnyʋ -hɛyri 'mʋ, 'a gblo a ta a nɔnɔ'ɔ nɩ, 'ke bɔ 'hrɩɩ 'a -naagbopʋ ye. 15 -Tɛ ʋ -wɔ dɛ lɛ, -ye -Yusu -tʋa 'le Simɔ Piɛlɩ a 'le-wɔn'prɛɛlɛ gbo, ɔ nɔ: «Simɔ, Saan a 'yu, ꞊be -n nʋɛ 'mʋ 'mʋ nɩ, 'ɛ -hi 'o nahuin -ye -gbo 'mʋ?» -Ye Piɛlɩ nɔ: «Iin, Kʋkɔnyɔ, -n yie nɩ, -ɛ mɔ, 'n nʋɛ -mʋ 'mʋ nɩ.» -Ye -Yusu nɔ: «Naa 'na -naagbopʋ. -Tɛ blablɔkɔnyɔ, ɔɔ 'a blablɔ a naalɛ nu, kɛ -bo nu 'na -naagbopʋ a naalɛ.» 16 -Ye -Yusu ꞊gbɔ lele wlɔn, ɔ nɔ: «Simɔ, Saan a 'yu, ꞊be -n nʋɛ 'mʋ 'mʋ nɩ?» -Ye ɔ nɔ: «Iin, Kʋkɔnyɔ o, -n yie nɩ, -ɛ mɔ, 'n nʋɛ -mʋ 'mʋ nɩ.» -Ye -Yusu nɔ: «Naa 'na -naagbopʋ!» 17 -Ye -Yusu ꞊gbɔ lele wlɔn: «Simɔ, Saan a 'yu, ꞊be -n nʋɛ 'mʋ 'mʋ nɩ?» -Tɛ -Yusu ꞊gba 'klɛɛ ꞊nɔ dɛ ꞊nʋ wlɔn, gblo a ta a nɔnɔ, -ye Piɛlɩ a ꞊wlʋ 'mʋɛ gbo, -ye ɔ nɔ: «Kʋkɔnyɔ o, -n yi 'ɛ nɩ dɛ nɩ. -N yie nɩ, 'n nʋɛ -mʋ 'mʋ nɩ.» -Ye -Yusu nɔ: «Naa 'na -naagbopʋ! 18 'Nɩɩ -mʋ 'nɩ le -tɛɛ, -tɛ -n 'ya la gblotayu 'mʋ, -tɛ -na ꞊wlʋʋ la 'le 'yee, 'ke -nɩɩ la 'le mu, kɛɛ, ꞊nɩ -wɛ -hlɩn 'yi, -n di -hlɩn 'mʋ lɛ ꞊gblɛ dabʋɩ, ꞊ɔ -ye 'mʋ -hlɩn 'le -mʋ -tɛgbi -ye gba, -tɛ -na ꞊wlʋ 'de 'le nɩ.» 19 Ɛ 'we ꞊nɔ ye, ꞊sʋɛ'kʋkʋɛdʋ ꞊nʋ, Piɛlɩ di 'kʋ, -ɛ di Nyɩsʋa -tɩ a 'yi'bʋaalɛ -nye, nɛ- -Yusu 'muo tɔɔ. Nɛ- kɔ -tɩ, 'ɔ 'prɛɛ dɛ ꞊nʋ ke. Bɔ po 'klɛɛ lɛ, -ye ʋ 'ba 'mʋ ye, ɔ nɔ: «Piɛlɩ, kʋɛ 'mʋ -wɔn!» 20 -Ye Piɛlɩ ꞊hɩan -wɔn. -Tɛ ɔ ꞊hɩan 'klɛɛ -wɔn, -ye ɔ 'ye -naagbopʋyu ꞊nʋ nɩ, -Yusu nʋɛ 'mʋ -tɛɛ, 'ɔ nyu -wɛ -wɔn kʋɛ. -Tɛ -Yusu kɔ 'a -naagbopʋ 'hɛɛn, ʋʋ o 'waa 'lelɛ'bɔɔdididɛ di, -tɛ ɔ 'de o a 'kʋɛ, -naagbopʋyuu -do a -gbɛ, nɔ-ɔ nɩ, -ɔ 'ma o 'o 'a 'lu -Yusu -wliye gbo, 'ɔ ꞊gbɔ o wlɔn, ɔ nɔ: «Kʋkɔnyɔ, nahuon tio-, -ɔ di 'klɛɛ -mʋ -na yraanyʋ kwa po 'le?» 21 -Tɛ Piɛlɩ 'ye 'klɛɛ -naagbopʋyu a -gbɛ, -ye ɔ nɔ: «Kʋkɔnyɔ, ꞊ɔ -ye -gbo 'le? Dɛ tio- di -hlɩn ꞊nɔ nue 'le?» 22 -Ye -Yusu nɔ: «꞊Be 'nɩ nye -hʋa, bɔ hie 'klɔ, ꞊bo 'ya 'le yrayrɩ, ꞊bo ꞊hɩan -wɔn, ꞊bo yɔ mɔ gbo, ꞊be -n kʋɛ 'le -wɔn? -Mɛ -ye o, kʋɛ 'mʋ -wɔn!» 23 -Tɩ ꞊nʋ, -Yusu ꞊tu, ɩ nue, Nyɩsʋa a nahuin 'ʋʋ lɛ po, -naagbopʋyu a -gbɛ, ɔ 'deɛ bɔ 'kʋ. Kɛɛ, 'ke 'le -tɛɛkɔ 'kwli 'mʋ, -Yusu 'de lɛ po, -ɛ mɔ: «Ɔ 'deɛ bɔ 'kʋ,» kɛɛ, ɔ nɔ 'nɩ: «'Bɩa 'nɩ nye -hʋa, bɔ hie 'klɔ, ꞊bo 'ya 'le yrayrɩ, ꞊bo ꞊hɩan -wɔn, ꞊bo yɔ mɔ gbo, ꞊be -n kʋɛ 'le -wɔn?» 24 -Naagbopʋyuu -do a -gbɛ, -ɔ kɔ -tɩ -Yusu ꞊tu, nɔ-ɔ nɩ, -ɔɔ -tɔplɩ -gbo -wɔn lɛ na. Ɔ 'yi nɩ, -ɛ nue, ɔ nɩ la ke -tuo, 'ɔ pui nɔ 'crɩɩnɩɛ -gbo 'kwli 'mʋ. 'Ɛ nɩ nahuon, kɛ nɔ -a mʋ -hɛyri, ɔ yie nɩ, -ɛ mɔ, -tɩ a -tɛɛ nɩ, ɔɔ ꞊tu. 25 -Tɔplɩ -ye, -Yusu nu, ɩ -huo nɩ. 'Bɩa ꞊ba kɔ -ba 'crɩɩ wɛn ɩ 'bii, 'n yie nɩ, 'a 'crɩɩnɩɛi 'deɛ bɩ wɛɛn wɛn nɔ 'klɔ -gbo ke.