1

1 Kimite ŋolyontet kuceke towunot. Kipontokey ŋolyontet Yiyintet, ŋolyontet kunye Yiyintet. 2 Kipontokey ŋolyontet Yiyintet kuceke towunot. 3 Kicitany tukuk tokol kupunte wule mite neto, puryo kiy mpo akenke nye mite koret nye kipuryo kot citany kupunune wule mite neto. 4 Kinyorta tukuk tokol soponto wule mite neto, kwek soponto lakweyetap piko, soponto nyenyi kunye kisut lakweyet kuco wule mite piko. 5 Lucini lakweyet menonet, oŋnku puryo komuce menonet kenyis kot komis lakweyet. 6 Kiyok Yiyintet kiyokintenyi, citake nye cekure Yowana, 7 nye kico cokwek muncururwet nye kiporci piko lakweyet, sukuŋet kulim piko tokol lokoywek oŋnkuyen kupunte wule mite neto. 8 Kipuryo ku neto nye lakweyet, ntene kico cokupor ŋalek ce nöme lakweyet. 9 Lakweyet nyitenyi nyepo manta nye coni koret oŋnkukweny piko tokol. 10 Kunyo kimite neto koret, kitany Yiyintet koret kupunte wule mite neto, oŋnkurok kipuryo kot kunket koret kule neto ku ŋo. 11 Kico neto korenyi ntene kutay pikyi matoroc kuŋerekyi. 12 Ntene kuŋerekyi kutoroc piko alake oŋnkuyen ŋalekyi. Yoto kukoci neto picoto kamukeywek kwek lekokap Yiyintet. 13 Ntene kipuryo kot kwek cek lekokap Yiyintet om aret kuyu wulo ceyitoyi piko, nto om corokyinot nyepo piko, ntene Yiyintet nkit kunye Papamwa. 14 Kuweckey ŋolyontet kwek ci oŋnkopurune wule ce mite. Kicekäs acek woyinto nyenyi nye ponto poypoyet nyewo oko ŋalek cepo manta. Woyinto nyitenyi kunye kinyor neto kuyu weritap Papa nye akenke pate. 15 Kiŋalale Yowana ŋalek ce nöme neto kumwoy kule, "Oŋyi cito nyo kyoŋolole ani omwowu ŋalek ce nöme neto kule, cito nye coni om letumwani kunye nyewo kupëlo, omnye kimite neto om towunot kutompo kot otuku ani." 16 Om poypoyenyi nyewo koromun kunye kucenyoru acek tokol kupeyok ce caŋ cerupkey kuceke ake okoy ake. 17 Kikon Yiyintet ntarastinek kupunune wule mite Moses, ntene kico poypoyenyi oko ŋalek ce po manta kopunune wule mite Yesu Kristo. 18 Puryo ci mpo akenke nye kikäs Yiyintet, Ntene Werit akenke pate, nye kerkey oko Yiyintet oŋnkopurune komostap Papa kunye kiporwec acek Yiyintet. 19 Ŋalek cu ce kimwoy Yowana ye kiyoku Yutayek om Yerusalem tisik oko lefik kwokutepe neto kule, "Nyi kuŋo?" 20 Kipuryo kot kutay Yowana mowekyi cekto. Ntene kitorci kumwoci kule, "Puryo kot oyiku ani Ŋapanet." 21 Kutepe cek Yowana kule, "Kunyo yiku nyi ŋo? Yiku nyi Eriya?" Kumwoci Yowana cekto kule, "Puryo kot kwani nyo!" Kutepe cek neto kule, "Yiku nyi workoyontet?" Kuwec Yowana kule, "Puryo kot kwani nyo." 22 Kumwoy cek kule "Mwowec acek ŋolyontet nye wocemwocini piko co kweyokwec. Kurekey nyi kule oyiku ŋo?" 23 Kuwekyi Yowana kumwoci cek kule, "Oyiku ani polotetap cito nye pole kitela kule, 'Asat kurotakey aret nye wete Mokoryontet!' " Kimwowu workoyontet Isaya ŋalecutecu. 24 Yoto piko co kiyoku Farasayek. 25 Kutepe cek Yowana kule, "Ye puryo kot yiku nyi ŋapanet, oŋnkupuryo kot yiku Eriya nto workoyontet, kunyo omne sepotisonisyi nyi?" 26 Kuwekyi Yowana kumwoci kule, "Opotisonisye ani peko, ntene mite citake nye keyoŋe kwenumwakwek nye puryo kot oŋnketi. 27 Cito nyoto coni om letumwani kunye puryo kot oyeme ani kot atyac porokap kweyonikyi." 28 Kikwiyokisye ŋalecutecu tokol Pesaniya om oyinetap Yortan pitonin wule kipotisonisye Yowana. 29 Ntowo kuyekune, kukäs Yowana Yesu kuconi wule mite neto, yoto kumwoy kule, "Akäs pa, keciryetap Yiyintet nye numu miyotyetap Koret! 30 Cito nyitenyi nyo kwoŋolole yo kwomwowu kule, 'Coni om letumwani cito nyewo kupëlo, omnye kimite neto om towunot kutompo kot otoku ani.' 31 Kipuryo kot oŋnket kule neto ku ŋo. Ntene kyaco ani copotisonisye peko sukuŋet aparte cinket neto om Israel." 32 Ŋalek cu kuce kitor Yowana kumwoy kule, "Kyakäs ani Muyet Nyetilil kurekune torot kuconi ŋony kuyu swarar oŋnkopure metinyi. 33 Oŋnkurok yoto kipuryo kot oŋnket ani neto. Ntene Yiyintet nyo kiyokwo copotisonisye peko nye kimwowo kule, 'Cito nyo kekäs kurekyi Muyet Nyetilil oŋkopure metinyi kunye cito nyoto nye potisonisye Muyet Nyetilil.' " 34 Kumwoy Yowana kule, "Kwakäs ani neto kunyo omwowok kule neto kunye Weritap Yiyintet." 35 Ntowo kuyekune kimite Yowana wuloto yec kupontokey konomikyi oyeny. 36 Yoto kukäs Yowana kuweti Yesu kupunte ye kilekite cekto, kumwoy kule, "Akäs pa oŋyi keciryetap Yiyintet." 37 Yoto kulim konomikyi cokey oyenku kumwowu neto ŋalecato, kupa kupetakey Yesu. 38 Kuweckey Yesu kukäs let, nteye katoköse kurupe cek neto kutepe kule, "Ocenye ne akwek?" Kuwec kumwoy kule, "Rapi! Poru kaynana kule 'Konetintet' Minye nyi ono?" 39 Kumwoci Yesu cek kule, "Akwakäs." Yoto kupa cekto oko neto okoy wokukäs wule minye; oŋnkupur cek tokol pesyonoto kwimen, kikipunto sawet yoto taman nyepo kosoleny. 40 Cito akenke om picoto oyeny nye kilim ŋalekap Yowana oŋnkuwo kunäm Yesu ku Antereya mutakwametitap Simon Petero. 41 Yoto pakenke kunyor Antereya mutakwam Simon oŋnkumwoci kule, "Kacenyoru Kristo." (Poru kaynana kule Ŋapanet.) 42 Kukwer Antereya Simon okoy wule mite Yesu. Kukäs Yesu Petero oŋnkumwoy kule, "Yiku nyi so Simon weritap Yowana, kunyo mosicekureniŋ kayneŋuŋ Kefa (nye poru kaynana kule Petero, nto Kitawet.) " 43 Ntowo kuyekune kumäc Yesu kule awo Kalilaya, yoto kunyor Filipo kumwoci nyo kule, "Nama cepetekey ani." 44 Filipo ku cito nye kipo Pesasayita moŋet nye kiminye Antereya oko Petero. 45 Yoto kunyor Filipo Nasanael oŋnkumwoci kule, "Kacenyoru acek neto cito nyo kisil Moses ŋalek ce nöme neto. Yesu nyitenyi weritap Yosep nye cone Nasaret." 46 Kutep Nasanael kumwoy kule, "Muce ra kotokune kitake nye topon Nasaret?" Kuwekyi Filipo kumwoci neto kule, "Co cekäs pa." 47 Nteye kotoköse Yesu Nasanael kuconi wule mite neto, kuŋalal ŋalek ce nöme neto kumwoy kule, "Käs pa oŋyi Isroloyintet sikwo nye moponto lelis!" 48 Kutepe Nasanael Yesu kule, "Kenketeno ani ne nyi," kuwekyi Yesu kumwoci kule, "Kwakäsiŋ yo kwemite mokoyontet ŋony kutompo kot kukuriŋ nyi Filipo." 49 Kuwekyi Nasanael kumwoci Yesu kule, "Konetintet; yiku nyi Weritap Yiyintet. Yiku kinko nyepo Israel!" 50 Kumwoy Yesu kule, "Keyen nyi so omnye komwowuŋ kule, kwakäsiŋ ye kwemite mokoyontet ŋony? Mesekäs cewoyec ce pële coto." 51 Oŋnkumwoci kule, "Komwowok ŋalek cepo manta kule mosakäs kuyatakay wulin po torot oŋnkokäs malaykanikap Yiyintet ce loŋntoy oŋnkureku kurekyini Weritap cito!"

2

1 Nto om letutap pesyosyek oyeny, kimite sakwetap komütisyet nye kimite Kana om koretap Kalilaya. Kimite kametitap Yesu wuloto. 2 Kikicekur Yesu oko konomikyi kupa sakwet. 3 Nteyu kowo ceye Finyonik tokol kupok, kumwoci kamet Yesu kule, "Kororci piko Finyonik." 4 Kuwekyi Yesu kumwoci kule, "Cepyos! Mokeno ne kutompo kot kupunto pesyosyekwani!" 5 Kumwoci Kametitap Yesu mutworik kule, "Aŋnkayiy kiy ake tokol nye komwowok." 6 Kimite yoto terenik cepo peko cepo rwontok ce kiyite lö, kuyu wule yunto ntarastinekap tinitap Yutayek om kowunet. Kimuce kunyiy teret akenke om coto peko cepo litanik pokol akenke. 7 Kumwoci Yesu mutworik kule, "Anyit peko terenicu." Yoto kunyit cek kunyiy peko kule pak. 8 Kumwoci Yesu cek kule, "Oromu yawut peko oŋnkusutyi cito nyo poytoy sakwet." Yoto kusutyi cek neto. 9 Kucemcem cito nye poytoy sakwet peko ce kaweckey kwek Finyonik, nye kipuryo kot kunkete wule kukwone ntene kunkete mutworik ce koromu wule kokwone. Yoto kukur cicoto cito nye kemütisyi, 10 oŋnkumwoci kule, "Nyosyi piko tokol kukoci piko Finyonik ce toponec nteye koyesyo piko kot kuyem kukon om letut Finyonik ce toytoy, ntene kunyo kekonor nyi Finyonik ce toponec okoy kunyi!" 11 Kinyosyo Yesu kwiye ŋolyontoni po kakitat Kana om koretap Kalilaya. Kupor neto woyinnyi om wuloto, yoto kuyen konomikyi ŋalekyi. 12 Nto om letutap ŋalecato, kunomen Yesu oko kamet oko mpo mutakwam oko konomikyi kuwo okoy Kapernaum, wokopur wuloto pesyos ce ŋeri. 13 Kikirik yoto kupunto sakwetap Yutayek nyepo Keytayet. Kuwo Yesu yoto kulaŋnta Yerusalem. 14 Wokunyorta Kotap Yiyintet orit piko ce kimite kepur ce kyolyoy tuka oko swororok oko piko co wöle pesanik ce kepur cekto yepo mesanikwa. 15 Yoto kwiy Yesu porok kwek kipoket oŋnkukwet tokol kupete kotap Yiyintet, kecirek oko tuka, oŋnkumil mesanikap piko co wölisyi oŋnkuseret pesanikwa. 16 Kumwoci neto piko co kolyoy swororok kule, "Osut tukucu kupete yu. Monte ceyiy Kotap Papamwani kwek matepo!" 17 Yoto kusot konomik kule mwowu silutekap Yiyintet kule, "Ayi Yiyintet ŋerekwekwani ce cöme koŋuŋ kuce loytos kuyo mata." 18 Kuwekyikey Yutayek neto oŋnkutepe kule, "Kiy ne nyepo kakitat nye muci nye yiy sukuŋet porwec acek kule ponte kamukeywek ce yiye tukucu?" 19 Kuwekyi Yesu kumwoci cekto kule, "Oturpup pa akwek koyi po Yiyintet, mosatec ani kuyo om pesyosyek somok pate." 20 Kutepe cek neto kule, "Metece nyi pesyos somok pate kuyo koyi kicetece kenyisyek artam oko lö?" 21 Ntene kotap Yiyintet nye kiŋolole Yesu ku porto nyenyi nkit. 22 Nteyu kowo ciŋet neto kotutune met, kusot kusow konomikyi kule kimwoy neto ŋalecutecu, kuyen cekto ŋalek cepo silutekap Yiyintet oko ŋolyontet nye kimwoy Yesu. 23 Nteye kimite Yesu Yerusalem ye ki pesyetap sakwetap Keytayet kuyen piko ce caŋ ŋalekyi yu kowo kukäs tukuk cepo kakitat ce kikwiye neto. 24 Ntene kipuryo kot kukenekey Yesu cekto, omnye kinkete neto topon wule yunto piko tokol. 25 Kipuryo kot komöce neto citake nye komwoci wule yunto piko omnye kinkete tokol ce mite mukuleywekwa.

3

1 Kimite citake nye cekure Nikontemo nye ki poytoyintet nyepo Yutayek, nye kipo neto luket nyepo Farasayek. 2 Kuco pesyet ake komoy wule mite Yesu oŋnkucokumwoci kule, "Konetintet, cinket acek kule yiku nyi konetintet nye cone wule mite Yiyintet, omnye puryo ci nye muce kot kwiy tukuk cepo kakitat cu yiye nyi, tos pate ye pontokey cicoto Yiyintet." 3 Kuwekyi Yesu kumwoci neto kule, "Komwowuŋ ani nyi ŋalek cepo manta kule, ye tompo kot ceyi cito aret oyeny kupuryo kot kuköse cito nyoto poytoyisyetap Yiyintet!" 4 Kutepe Nikontemo neto kule, "Muce kulene cito nye kiwoyit ceyi aret yec oyeny? Muce pa kowut yec moyetap kamet oŋnkyeyi aret oyeny?" 5 Kuwekyi Yesu kumwoci kule, "Komwowuŋ ani nyi ŋalek cepo manta kule, puryo ci nye muce kowut poytoyisyetap Yiyintet ye tompo kot ceyi cito nyoto om peko oko Muyet Nyetilil. 6 Yiye porto porto, kuyi Muyet Nyetilil Muyet Nyetilil. 7 Mente kot akite omnye komwowuŋ kule misyini ceyiyok aret oyeny. 8 Wuse yomet kutokyinikey wule möce, lime nyi karumnta ntene puryo kot nketi wule cone nto wule weti. Kuyunyoto wule yunto om wule mite cito nye koceyi om Muyet Nyetilil." 9 Kutepe Nikontemo neto kule, "Muce ŋalecu kwiyokis kulene?" 10 Kuwekyi Yesu kumwoci kule, "Yiku nyi konetintet nyewo nyepo Israel oŋnkurok kupuryo kot nketi ŋalecu? 11 Komwowuŋ ani ŋalek cepo manta kule, ceŋololi acek ŋalek ce cinketi oŋnkyemwowu ŋalek ce kicekäs oŋnkurok yec kupuryo ci mpo akenke om akwek nye möce kule oyen ŋalekyacek. 12 Puryo kot oyeni akwek ŋalekwani ye komwowok ŋalek nöme ŋalek cepo koroni, kunyo omuci akwek kulene kot oyen kenyis ŋalekwani ye komwowok ŋalek ce nöme wulin po torot? 13 Kunyo puryo ci mpo akenke nye kilaŋnta kuwo torot tos pate Weritap cito nyo kireku kucone torot!" 14 Kuyu wulo kinomncini Moses erenet parak om kitela, kunyo mosicenomnci parak weritap cito kuyunyoto, 15 sukuŋet kunyor soponto nye mopoku ci tokol nye kacäm koyen neto. 16 Omnye kicäm Yiyintet koret koromun okoy kukon Werinyi akenke pate sukuŋet mente kot kupot ci tokol nye kacäm koyen neto, ntene kule sukunyor soponto nye mopuku. 17 Omnye kipuryo kot kuyok Yiyintet Werinyi cokwek kontiyintetap koret, ntene kiyok cokwek kosopintetap koret kupunte wule mite neto. 18 Ci ake tokol nye keyen Werit, kunye puryo kot cemutyini cicoto musankut, nto ci ake tokol nye katay meyen kukocemutyi keny cicoto musankut omnye katay meyen Weritap Yiyintet nye akenke pate. 19 Musankut kunyi kule, kico lakweyet koret ntene kucäm piko menonet kupël lakweyet, omnye yiye cek tukuk ce miyotec. 20 Senkere ci tokol nye yiye ŋalek miyotec lakweyet omnye puryo kot kucöme kule aparte kutok ŋalek ce miyotec ce yiye neto. 21 Ntene ci tokol nye yiye ŋalek cepo manta ce toponec kuconi cicoto wule mite lakweyet sukuŋet kupor lakweyet kule kikwiy neto yisyenyi om koyweyisyet nye yweye Yiyintet. 22 Nto om letutap ŋalecutecu, kuwo Yesu oko konomikyi okoy koretap Yuteya, wokopur wuloto oko cekto kuwany pesyos oŋnkupotisonis. 23 Kimite yoto Yowana kupotisonisyi om Ayinon ye kilekite Salem, omnye kimite peko ce caŋ wuloto. Kipeti piko wule mite neto, kunyo kipotisone neto cekto, 24 omnye kitompo yoto kot cekerta Yowana mopusi. 25 Kucec konomik alake cepo Yowana kutintentyin oko Yutoyintet ake om ŋalek ce nöme kowunetapkey nyepo tinit. 26 Yoto kupa cek wule mite Yowana oŋnkumwoci kule, "Konetintet tesoti nyi cito nyo kwopontekey akwek tukway om oyinetap Yortan pitonin, cito nyo kiŋolole nyi? Mite yawut neto kupotisonisyi, kunyo peti piko tokol wule mite neto!" 27 Kuwekyi Yowana kumwoci cek kule, "Puryo ci nye muce kiy kenyis, tos pate okoy ye kokukoci Yiyintet cicoto. 28 Kunyo oyiku akwek muncururwanikwani ce oŋnketi kule kyomwowu kule, 'Puryo kot oyiku ani Ŋapanet, ntene kiciyokwani cantoci neto.' 29 Cito nye kemütis kunye citap korket, kuyoŋntos tapan coronutekap cito nyo kemütisyi sukulimntoy kuŋerekyini koromun kutitap cito nyo kemütisyi ye kaŋalal. 30 Kunyo kapok yawut ŋerekwekwani; misyini kuner neto aŋnkacucukte ani." 31 Cito nyo cone wulin po torot kunye nyewo kupël piko tokol, nto cito nyo cone koret kunye po cito nyoto koret oŋnkuŋolole ŋalek ce nöme koret. Cito nyo cone torot kunye nyewo nyepo tukuk tokol. 32 Mwowu neto kupor ŋalek ce kikäs oŋnkulim, ntene puryo ci nye cöme lokoywekyi. 33 Ci tokol nye kacäm kuyen lokoywekyi kunye kakuwalkey kule Yiyintet kunye po manta. 34 Neto cito nyo kiyok Yiyintet kunye ŋolole ŋalek cepo Yiyintet, omnye kikoci Yiyintet neto Muyenyi Nyetilil nye yeme. 35 Cöme Papa werinyi, kunyo kikoci tukuk tokol kopurune yewuniyekap Werinyi. 36 Ci ake tokol nye katay macäm kuyen werit kupuryo kot kunyoru cicoto soponto ntene kopurtoy pate nerekwekap Yiyintet cepo kenyis.

4

1 Yoto kulim Farasayek kule kokocut Yesu piko oŋnkumite kupotisone konomik ce caŋ kupël Yowana. 2 (Ntene ŋalek cepo manta kucu kule kipuryo kot kupotisone neto pic, ntene konomikyi pate ce kipotisonisyi.) 3 Ntowo kulim Yesu ŋalek ce kicemwowu, kunomene Yuteya kuketitakey kuwo Samariya. 4 Nteye kimite kuweti poninekyi om wuloto, kuwo kupunte koretap Samariyek. 5 Kuco Yesu okoy kupun moŋetap Samariya nye cekure Sikari nye kilekite mparet nyo kikocini Yakopo werinyi Yosep. 6 Kimite wuloto mwenetap peko nye cekure pekap Yakopo. Omnye kikicas Yesu om poninekyi, yoto kopur yepo mwenetap peko tapan. Kimite yoto sawet karik kupunto pet kwen. 7 Yoto kuco korket ake nyepo samariyek cokuram peko. Kumwoci Yesu kule, "Kono peko aye." 8 (Kikipa konomikyi yoto wule po moŋet wokwolis omik.) 9 Kuwekyi korketap Samariyek kumwoci Yesu kule, "Yiku nyi Yutoyintet, oyiku ani cepsamariyantet, kunyo muci nyi kulene somo kule kono peko aye, omnye puryo kot kuyemntoy tukuk ce kyomisye Yutayek oko Samariyek." 10 Kuwekyi Yesu kumwoci kule, "Nto yunye kukwenket nyi kokotutyetap Yiyintet, oŋnkinket kule ŋo cici somiŋ nyi kule, 'Kono peko aye,' nto kenyi nye kesome neto kukoniŋ peko ce ponto soponto." 11 Kumwoy korkonoto kule, "Nyewo, nteyu meponte nyi teret, kunyi kiwo oyinet ŋony koromun, menyorte nyi ono peko ce ponto soponto, 12 Yiku nyi nyewo kupël kukonyacek Yakopo nye kikonec acek pecu ce kiye neto oko lekokyi oko tuka ceci pekap oyinoni?" 13 Kuwekyi Yesu kumwoci neto kule, "Mosukwam melelya ci ake tokol nye kaye pecu. 14 Ntene komo kwome melelya mpo kisic ci ake tokol nye kaye peko ce mokoci ani. Omnye mosokoci ani neto peko cepo soponto ce kosune wule mite neto nyepo soponto nye mopoku." 15 Kumwoy korkonoto kule, "Mokoryontet kono mpo ani pecoto! Sukuŋet komo kwomo melelya mpo kisic, nto komoconi yec mpo wuli caram peko." 16 Kuwekyi Yesu kumwoci kule, "Nomen iwo wekur santeŋuŋ oŋnkiketukey okoy yuteyu." 17 Kuwekyi korkonoto kumwoci kule, "Moponte ani saniya." Kuwekyi Yesu kumwoci neto kule, "Poye manta mwowu kule, 'Moponte saniya!' 18 Omnye kikomütiŋ nyi sanik mutu, nto cito nye pontekey nyi yawut kunye puryo kot ku santeŋuŋ nyepo manta. Kunyo kemwowu ŋalek cepo manta." 19 Kumwoy korkonoto kule, "Mokoryontet, kakäs kule yiku nyi workoyo. 20 Kisoye mpo kukonyacek Yiyintet om tulwoni, ntene omwowu akwek Yutayek kule, 'Yerusalem pate ku wule misyini cesoye Yiyintet!' " 21 Kumwoci Yesu kule, "Cepyosyani, yen ŋalekwani, mosukupunto pesyosyek ce puryo kot kusoye piko Yiyintet Papa om tulwoni nto mpo om Yerusalem. 22 Puryo oŋnketi akwek Samariyak cito nye osoye, cinket acek Yutayek cito nye cesoye, omnye cone kosopotet wule mite Yutatek. 23 Ntene mosukupunto pesyet, kunyo mite yawut yuteyu nye toku piko cepo manta ce soye Yiyintet om Muyet oko om ŋalek cepo manta. Piko cesoye kuyunyoto kuce möce Papa cekto. 24 Yiyintet kunye Muyet nye moponto porto, nto piko ce soye neto kuce möce kusoye om Muyet oko ŋalek cepo manta." 25 Kumwoci korkonoto Yesu kule, "Oŋnket ani kule mosukuco Kristo nye poru kaynana kule Ŋapanet. Ye kaco neto mosukuco oŋnkumwowec acek ŋalek tokol." 26 Kuwekyi Yesu kumwoci neto kule, "Ani nyoto nyi oŋololuŋ nyi." 27 Yoto pakenke kupun konomikyi. Kukite cek koromun kwokunyor kuŋolole neto oko korkonoto. Ntene kipuryo mpo akenke om cek nye kitep kule, "Möce ne nyi?" Nto mpo kutep yec kule, "Omne seŋololyi korkoni." 28 Yoto kupakakta korkonoto terenyi nyepo peko oŋnkuwo okoy moŋet wokumwoci piko kule. 29 "Akwa kwakäs citake nye komwowo ani ŋalek tokol ce kyayiy ikye keny! Puryo kot ku Ŋapanet ne nyitenyi?" 30 Yoto kunomen piko om moŋet kupa wule mite Yesu. 31 Kimite yoto konomik kusoysoye Yesu kumwoci kule, "Konetintet, yomisye!" 32 Ntene kuwekyi Yesu kumwoci cek kule, "Oponte omik ce oyome ce monket akwek!" 33 Yoto kucec konomik kutepekey kwicek nkit kumwoy kule, "Kokosutyi so citake omik?" 34 Kumwoci Yesu cek kule, "Omikwani ku kule ayiy cömisyetap neto nyo kiyokwo ani aŋnkayiy awaŋnte yisyenyi nye kikono. 35 Puryo kot omwowu akwek ne kule, 'Koŋet orok amwanu kupunto pesyosyekap kisisyet!' Komwowok ani kule, akäs pa mparenik koruryo yawut omik kunyo kopunto kisisyet! 36 Kunyo mite yawut cikocini musyaret cito nyo kisisyi oŋnkoruruce omik kupa wule mite soponto nye mopoku, sukuŋet kuŋereke wanak cito nyo kikolsyi oko cito nyo rurukisyi. 37 Kunyo po manta ŋolyontoni mwowu kule, 'Kolsyi cito ake, kukisis cito ake.' 38 Koyoktok ani ape wokisisye omik om mparosyek wule kipuryo kot oyoyisye akwek, kitantane piko alake wuloto, kunyo mosonyoru akwek latik cepo yisyet nye kikwiy cekto." 39 Kuyen Samariyek ce caŋ cepo moŋonoto ŋalekap Yesu, omnye kumwoy korkonoto kule, "Komwowo ani ŋalek tokol ce kyayiy ikye keny." 40 Yoto ntowo kukwa Samariyek okoy ye kimite Yesu, kusom cekto neto kopur oko cekto. Kopur Yesu wuloto kuwany pesyos oyeny. 41 Kutosyikey yec piko alake ce caŋ kuyen om ŋalekyi ce kimwoy. 42 Kumwoci piko korkonoto kule, "Kociyen acek yawut, ntene nye puryo kot ku om ŋalek co kwemwowu nyi, ntene omnye kucelim acek nkit ŋalekyi, kunyo kucinket kule neto kunye kosopintet nyepo manta nyepo koret kumukul." 43 Nteyu kowo kopur Yesu wuloto kuwany pesyosyek oyeny, kunomen kuwo okoy Kalilaya. 44 Omnye kikimwoy Yesu nkit kule, "Puryo kot ciyweye workoyo om korenyi." 45 Ntowo kupun Yesu Kalilaya, kutoroc kuŋerekyi piko cepo wuloto neto omnye kikikäs cekto tukuk tokol ce kikwiy Yesu om Yerusalem ye kipesyet nyepo sakwetap Keytayet, omnye kikipa mpecek sakwet. 46 Yoto kuwo Yesu kuketitakey okoy Kana nyepo Kalilaya wulo kiwece peko kwek Finyonik. Kimite wuloto poytoyintet ake nyewo nye kimnyone werinyi om Kapernaum. 47 Ntowo kulim cicoto kule kucone Yesu Yuteya kuco Kalilaya, kuwo wule mite oŋnkusom kule kowo Kapernaum wokusop werinyi nye kikirik kume. 48 Kumwoci Yesu neto kule, "Puryo ci mpo akenke nye muce kot koyen mpo kisic okoy ye kakäs tukuk cewoyec cepo kakitat." 49 Kuwec cicoto kumwoy kule, "Mokoryontet kany cipe kutompo kot kume lekwemwani." 50 Kumwoci Yesu neto kule, "Nomen iwo mokusop weriŋuŋ!" Kuyen cicoto ŋalekap Yesu, kunomen kuwo. 51 Nteye kimite neto kuweti om aran kutuye mutworikyi ce kimwoci neto kule, "Mokusop weriŋuŋ!" 52 Kutepe cicoto cek kule kukoykoyitu werinyi kumite sawet kutya? Kumwoy cek kule, "Kumite sawet tisap nyepo pet omutun ye kusope kwostoy yeset neto." 53 Yoto kusot kwan okoy kunket kule kumite sawet kuteyoto ye kumwocini Yesu neto kule, "Musokusop weriŋuŋ." Yoto kuyen neto oko piko cepo kanyi tokol. 54 Kunyo ŋolyontet nyitenyi kunye po oyeny nyepo kakitat nye kikwiy Yesu letut yu kowo kucone Yuteya kuco Kalilaya.

5

1 Nto om letutap ŋalecutecu, yoto kupunto pesyet nyepo sakwetap Yutayek nyepo tini. Kulaŋnta Yesu kuwo Yerusalem. 2 Kimite wuloto om yepo kurketap Kecirek tolilet nye cekure om ŋelyeptap Puraniyek "Petisata," nye kiponto tekewunek mut. 3 Kimite yoto piko ce caŋ ce mnyontos ce koruy tekewunecoto, ce kikoryo oko ce kimwolyos oko ce kinäm mokonkisyek. (Kimite picoto kukonye kule kuwaskey peko. 4 Omnye kirekyini om pesyosyek alak malayketap Mokoryontet tolilonoto oŋnkuwas peko, nto cito nye mnyone nye konyosyo kowut orit ye kacewas peko kusope porto ake tokol nye kiponto.) 5 Kimite yoto citake nye kimnyan kuwany kenyisyek sosom ok sisit. 6 Kukäs Yesu cicoto kumite yoto omnye kinkete kule kimnyan cicoto kuwany kenyisyek ce caŋ. Yoto kumwoci kule, "Möce nyi kule osop?" 7 Kuwekyi cicoto kimnyone kumwoci kule, "Mokoryontet, moponte ani ci om yu nye muce kowuteno tolilet ye kawaskey peko, ye omite ani osyeme kule owut orit kukokunyosyo citake." 8 Kumwoci Yesu neto kule, "Ŋet yony, oŋnkinäm kwiririŋuŋ oŋnkiwesetote." 9 Yoto pakenke kusop cicoto, kunäm, kwiririnyi oŋnkuwesetot. Kikwiyokis ŋalecato ye kipesyetap Sapat. 10 Yoto kumwoci Yutayek cicoto kicisope kule, "Pesyetap Sapat pesyoni kunyo puryo kot kucöme ntarastinekyo kot torate kwiririŋuŋ." 11 Kuwekyi cicoto kumwoci cek kule, "Komwowo ani cito nyo kesopo kule, 'Näm kwiririŋuŋ oŋnkiwesetote.' " 12 Kutepe cek kule, "Ŋo cici komwowuŋ kule, Näm kwiririŋuŋ oŋnkiwesetote?" 13 Ntene kipuryo kot konket cicoto kicisope kule ŋo nyoto, omnye kikiwete Yesu yoto oko omnye kimite yoto luket nyepo piko ce caŋ. 14 Nto om letut kunyor Yesu cicoto kumite kotap Yiyintet kumwoci kule, "Käs pa kwesop so yawut! Kunyo mente tayiy miyotyonik ye möce kule simesuci yec miyotyet nye pëlisyi." 15 Yoto kuwo cicoto oŋnkuwo kumwoci Yutayek kule Yesu nye kwesope neto. 16 Om ŋalecato, kucec Yutayek kutaŋany Yesu omnye kikwiyis kusopis ye pesyet Sapat. 17 Kuwekyi Yesu kumwoci cek kule, "Yiyisyi Papamwani okokoy, kunyo omite mpo ani oyiyisyi." 18 Kutosyi ŋalecutecu Yutayek swamet kumäc kule cepakäc Yesu kume, nye kipuryo kot ku kule omnye kikwiri ntarastinekap Sapat, ntene oko omnye kimwoy kule Yiyintet kunye Papanyi, kuweckey neto kuyoyeckey oko Yiyintet. 19 Kuwekyi Yesu kumwoci cek kule, "Komwowok ani akwek ŋalek cepo manta kule, puryo kot kwiye Werit kiy nye nyenyi nkit, yiye pate kito nye köse neto kwiye Papanyi. Kito nye yiye Papa kunye yiye mpo Werit kiyoto. 20 Omnye cöme Papa Werit oŋnkuporcini tukuk ce yiye neto. Mosukuporci mpo kwiy tukuk ce woyec kupël cutecu, Sukuŋet akite akwek tokol. 21 Kuyu wulo soptoy Papa piko kotutune met kusopco kunyor soponto, kuyunyoto mosukusop Werit kututune met piko co kikwey neto. 22 Puryo kot kumutyini Papa nkit ci musanku, ntene kikoci neto Werit kamukeywek tokol cepo musankunek, 23 sukuŋet kuywey piko tokol Werit kuyu wulo yweye cek Papa. Ci tokol nye puryo kot kuyweye Werit, kupuryo kot kuyweye cito nyoto Papa nyo kiyoku Werit. 24 "Kumwowok ani akwek ŋalek cepo manta kule, ci tokol nye kalim ŋalekwani oŋnkucäm kuyen neto nyo kiyokwani, kuponto cito nyoto soponto nye mopoku. Puryo kot cemutyini cito nyoto musankut, ntene kopunte met kuwo wule mite soponto. 25 "Komwowok ani akwek ŋalek cepo manta kule, kwoni pesyosyek, kunyo kopun yawut yuteyu ye mosukilim piko ce kipok kutit nyepo Weritap Yiyintet, mosukusopsco piko ce kalim ŋalekyi. 26 Omnye kuyu wulo cone soponto wule mite Papa nkit, kuyunyoto kikoci Papa Werit kwek nye ponto soponto. 27 Kunyo kikoci Papa Werit kamukeywek ce mute musankunek. Omnye Weritap cito neto. 28 Monte cikite ŋalecu omnye mite kuconi pesyet ye mosokulim piko ce kipok ce mite mwenonik kursyenyi. 29 Yoto kuŋetyo cek kuloŋune mwenonikwa. Mosiŋet kotutune met piko co kikwiye tukuk ce toponec oŋnkyikoci kusopco, ciŋet kotutune met piko co kikwiye tukuk ce miyotec oŋnkyewosontyi kulot musankut." 30 "Puryo kot oyiye ani kiy tokol om kamukeywekwani nkit, omute pate musankut kuyu wulo kimwowo Yiyintet, kunyo po manta wule omutitoy musankut, omnye puryo kot osyeme kule ayiy kuyu wule omoktoy, ntene kuyu wulo moktoy neto nyo kiyokwo ani. 31 "Ye koporkey kule omwowu ce cikwani nkit, kupuryo kot kupo manta ŋalek ce omwowu ani. 32 Ntene mite citake nye poru kumwoy ŋalek ce nömo ani om kaynemwani. Kunyo oŋnket kule po manta ŋalek ce mwowu neto ce nömo ani. 33 Kyoyokte akwek kiyokik kupa wule mite Yowana, kunyo kiŋalal neto kupor ŋalek cepo manta. 34 Puryo kot omöce ani kule misyini oponte cito muncururwet nye nkete ŋalecu. Komwowok ani ŋalecu pate kule sukuŋet osopce akwek. 35 Kikerkey Yowana oko tarit nye loye kukweny kulakwayit. Kunyo kyomuc akwek oŋerekyi lakweyinto nyenyi om pesyos ce ŋeri. 36 Ntene oponte muncururwanik cikwani cewoyec ce porto ce pële cepo Yowana. Muncururwanik cutecu ku yisyonutek ce kikono Papamwani kule ayiy. Porto yisyonocutecu kule Papamwani kunye kiyokwani. 37 Kunyo Papa nyo kiyokwani kunye ŋololtowo. Tompo kot olim akwek kutinyi mpo kisic oŋnkutompo kot okäs mpo kisic wule yunto tokoyta nyenyi. 38 Kunyo puryo kot kumitowune ŋalekyi mukuleywekwok orit, omnye puryo kot oyen akwek cito nyo kiyoku neto. 39 Osumoni ocenye silutekap Yiyintet omnye osoti kule mocenyorte orit wuloto soponto nye mopoku, oŋnkurok yec ŋalecato kuce poru ŋalek ce nömo ani. 40 Kunyo puryo kot ocöme akwek kule cekwa wule omite ani sukuŋet onyoru soponto. 41 "Puryo kot acenye ani kule amöce onyoru kakastayet om wule mite piko. 42 Ntene oŋnketok akwek, kule moponte cömisyet nye oyeni Yiyintet om mukuleywekwok orit. 43 Kyaconte kamukeywek cepo Papamwani, ntene puryo kot oŋerekyo ani akwek, kunyo ye kaco citake om kamukeywekyi nkit, mosoŋerekyi akwek cicoto. 44 Omuci akwek kulene kot oyen, ye omöce kule cikostoykey akwek kwakwek nkit, ntene oŋnkupuryo kot osyeme kule cenyoru kakastayet nye cone wule mite Yiyintet nye akenke pate? 45 Kunyo monte cisot kule mosowosontyok ani akwek om wule mite Papa. Moses kunye mosukuwosontyok. Moses nyoto kunyo omite akwek okenekey neto. 46 Nto yunye kikyoyen akwek ŋalekap Moses kupoyit manta, nto kwocömo mpo ani, omnye kisil neto ŋalek ce nöme ani. 47 Ntene omnye puryo kot oyeni akwek ŋalek ce kisil neto, kunyo omuci akwek kulene kot ocäm ŋalekwani?"

6

1 Nto om letutap ŋalecutecu, kunomen Yesu kuwo kway tampayayetap Kalilaya (Nye cekure yec tampayayetap Tiperia) 2 Yoto kurup luket nyepo piko ce caŋ neto, omnye kikikäs yisyonutek cepo kakitat ye kisope piko ce kimnyontos. 3 Kulany Yesu tulwet parak oŋnkopur ŋony oko konomikyi. 4 Kikirik yoto sakwetap Keytayet nyepo Yutayek. 5 Ntowo kukäsakäskta Yesu, yoto kukäs neto luket nyepo piko ce caŋ ce kitosyinikey kukwoni wule mite neto. Yoto kumwoci neto Filipo kule, "Mokyale ano omik ce mokwam picu tecu tokol?" 6 (Kuwekyi Yesu kuyunyoto kusyem Filipo, ntene kinkete kito nye mokwiy.) 7 Kuwekyi Filipo kumwoci neto kule, "Ye sukwomis picu kunyor ci kisic kisic pate, kumöce mukatinek ce kakyale silinkinek ce keytye pokolwokik amwan." 8 Kumwoci Antereya mutakwametitap Simon Petero nye akenke om konomikyi neto kule, 9 "Mite yu wero nye miniŋ nye ponto mukatinek mut cepo nkanuk oko purpurunek oyeny ntene yeme ne coto om picu tecu tokol?" 10 Kumwoci Yesu cek kule, "Ayiyte piko kopur ŋony," (kimite yoto suswek ce caŋ). Yoto kopur ŋony piko tokol, kipuntoy piko tokol moronik ce kirice elifunek mut. 11 Kunäm Yesu mukatinekey, oŋnkusomnci kukasta Yiyintet, oŋnkupcici piko ce kokopur ŋony, kwiy mpo purpurunek kuyunyoto. Kwomis piko tokol okoy kupiyoŋis. 12 Nteyu kowo kupiyoŋis piko tokol, kumwoci Yesu konomikyi kule, oruruc omik ce koŋet, monte ce pakakte mpo kisic. 13 Yoto koruruc cek omik mukatinek cepo nkanuk co kome piko kuleleku okoy kunyit kisok taman ok oyeny. 14 Ntowo kukäs piko om wuloto tukuk cepo kakitat ce kokwiy Yesu, kumwoy kule, "Workoyontet nyitenyi manta nyo kumöce sukuco koret!" 15 Konket Yesu kule karik kunäme cekto neto swama oŋnkukoci woyinto kwek kinko. Yoto kuweckey Yesu yec kulaŋnta kuwo lakam kwine nkit. 16 Ntowo kupunto kosoleny kurekto konomikyi kupa okoy tampayayet, 17 oŋnkulany rapet kupa kway tampayayet kutokyikey Kapernaum. Kikikwimen kutuyit koret yoto ntene kitompo kot kuco Yesu wule mite cekto. 18 Kikicec kuwus yomet nyewo nyepo swama nye kiwose peko. 19 Nteyu kowo kukwany konomik rapet okoy kuwany koyinto nyepo kilomitanik mut nto lö, yoto kukäs cek Yesu nye kityikonu peko parak kuconi ye kimite rapet, kumuyo koromun. 20 Kumwoci Yesu cek kule, "Ani nyo, monte cemuye!" 21 Kumac cek kule cenäm neto kulany rapet, ntene yoto pakenke kupunto rapet koret tapan wule kitokyinikey cekto. 22 Ntowo kuyec koret om pesyet nyepo oyeny, kukäs luket nyepo piko ce caŋ ce kiŋetune tampayayet pitonin kule rapet akenke pate nye kikicepokokyi yoto, yoto konket cek kule kopuryo kot kulany Yesu rapet kuwetokey konomikyi, ntene konomik kwicek nkit pate ce kupa kupuryo neto. 23 Kukwene raposyek alake Tiperia okoy kurik tampayayet tapan om yo kisomncine Mokoryontet mukatinek kupeyok. 24 Nteye kotoköse luket nyepo piko ce caŋ kule puryo kot kumite Yesu wuloto nto mpo konomikyi, Yoto kulany cek raposyek oŋnkupa Kapernaum wokuceŋat Yesu. 25 Ntowo kunyor piko Yesu kumite tampayayet pitonin, kumwoci kule, "Konetintet, kweconi nyi oyu wuli?" 26 Kuwekyi Yesu kumwoci cek kule, "Kumwowok ani akwek ŋalek cepo manta kule, puryo kot oceŋoto omnye kyokäs tukuk cepo kakitat cepo swamemwani, ntene oceŋoto omnye kyoyam mukatinekye okoy opiyonkye tokol. 27 Monte kyiyisye kule cenyoru omit ce wurtos, ntene oyiyisye sonyoru omik cepo okokoy cepo soponto nye mopoku. Mosukukonok Weritap cito omicoto, omnye kikokoci Yiyintet Papa neto pelutyet nyepo kamukeywek." 28 Yoto kutepe cek kumwoci neto kule, "Mokyiy acek ne ye sukuŋet kyiy yisyonutek ce toponec cepo Yiyintet?" 29 Kuwekyi Yesu kumwoci cek kule, "Yisyet nye möce kule ayiy akwek kunyi kule, oyen akwek cito nyo kiyoku neto." 30 Kuwekyi cek kumwoci Yesu kule, "Kunyo pelutyet nye yune nyepo swamet nye meyiy nyi sukuŋet cekäs acek oŋnkyiyen ŋalekuk! Meyiy kiy ne? 31 Kikwam mpo kukonyacek omik ce cekure Mana ye kimite koretap kitela, kuyu wulo mwoytoy silutekap Yiyintet kule, 'Kikoci neto cekto kwam mukatyantet nye cone torot.' " 32 Kumwoy Yesu kule, "Komwowok ani akwek ŋalek cepo manta kule, kipuryo kot kukonok akwek Moses mukatyantet nye cone torot, ntene papamwani nye konok akwek mukatyantet nyepo manta nye cone torot. 33 Omnye mukatyantet nye konu Yiyintet ku cito nye kirekune torot oŋnkukoci soponto piko cepo koret tokol." 34 Kusom cek neto kule, "Mokoryontet, konec mpo acek okokoy mukatyantanato po soponto." 35 Kumwoci Yesu cek kule, "Oyiku ani mukatyantet nyepo soponto, puryo kot kwome rupet ci tokol nye kaco wule omite ani, oŋnkupuryo kot kwome melelya mpo kisic ci tokol keyeno ani. 36 Kunyo kwomwowok kule kwakäsa ani akwek, ntene puryo kot oyeni. 37 Mosukuco wule amite ani ci tokol nye kakono Papamwani, puryo kot okwete ani mpo kisic ci tokol nye kaco wule amite. 38 Omnye kyaco ani arekune torot kule cayiy ce möce Neto nyo kiyokwo, ntene puryo kot ku kule ayiy ce amöce nkit. 39 Yisyet nye mokyani neto nyo kiyokwani kunyi kule, puryo kot opoti ani ci ake tokol om piko co kikono neto. Ntene misyini aŋet kotutune met kusopco tokol om pesyet nyepo letut. 40 Omnye kito nye möce Papamwani kunyi kule, mosukunyor soponto nye mopoku piko tokol ce kakäs cekto Werit oŋnkuyen ŋalekyi. Kunyo mosaŋet kotutune met kusopco picoto om pesyet nyepo letut." 41 Yoto kucec Yutayek koŋunyŋunyis om wule mite Yesu omnye kumwoy kule, "Oyiku ani mukatyantet nye cone torot." 42 Kumwoy cek yoto kule, "Puryo kot ku Yesu cicitenyi Weritap Yosep, ce cinket kwan oko kamet? Muce kulene kumwoy kule, kyocone arekune torot?" 43 Kuwekyi Yesu kumwoci cek kule, "Ayaste monte ciŋunyŋuny akwek kukwek nkit, 44 puryo ci nye muce kot kuco wule amite ani okoy ye kokwer Papamwani nyo kiyokwani cicoto kuco wule amite, mosaŋet ani kotutune met cicoto om pesyet nyepo letut. 45 Kisil workoyik kule, 'Mosukuŋet Yiyintet piko tokol.' Ci tokol nye kolimnci Papa oŋnkunetkey ŋalek kukwane wule mite neto, kuconi cicoto wule amite ani. 46 Puryo kot kuporu ŋalecu kule kikäs ci tokol Papa. Neto nkit pate nyo kicone wule mite Yiyintet kunye kikäs Papa. 47 "Komwowok ani akwek ŋalek cepo manta kule, ci nye kocömis kuyen kuponto nyoto soponto nye mopoku. 48 Oyiku ani mukatyantet nyepo soponto. 49 Kikwam mpo kukomwoŋ mukatyantet nye cekure Mana om koretap kitela, kunyo kipok cekto. 50 Ntene ye kam ci ake tokol mukatyantet nye cone torot kupuryo kot kume cicoto. 51 Oyiku ani mukatyantet nye sopot nye cone torot. Ye kakwam citake tokol mukatyantani mosukusop kenyis okoy kenyis. Nto Mukatyantet nye mokoci ani neto kupormwani nye mokonu sukuŋet kusop piko cepo koret tokol." 52 Yoto kusut ŋalecutecu tintenotet nyewo koromun om wule mite Yutayek nkit. Kutep cek kumwoy kule, "Muce cici kulene kukonec acek kyam pornyi?" 53 Kumwoci Yesu cek kule, "Komwowok ani akwek ŋalek cepo manta kule, ye puryo kot ayam akwek portap Weritap cito, oŋnkoye korotikyi kupuryo kot oponte soponto om akwek orit. 54 Ci ake tokol nye kam pormwani oŋnkuye korotikwani kunye ponto cito nyoto soponto nye mopoku. Masaŋet ani kotutune met cicoto om pesyet nyepo letut. 55 Omnye pormwani kunye omik cepo manta, nto korotikwani kuce yesyet cepo manta. 56 Ci ake tokol nye kam pormwani oŋnkuye korotikwani kumitowune cicoto wule omite ani, oŋnkomitowune ani wule mite neto. 57 Kiyokwani Papa nye sopot, kunyo onyoru ani soponto kucone wule mite neto, kuyunyoto om wule mite ci ake tokol nye kama ani, musukunyor cicoto soponto kucone wule amite ani. 58 Kunyo mukatyantet nyitenyi nye cone torot kunye puryo kukerkey oko mukatyantet nyo kikwome mpo kukomwoŋ oŋnkupok cekto. Mosukusop kenyis okoy kenyis ci tokol nye kam mukatyantani." 59 Kimwowu Yesu ŋalecutecu ye kimite kunetisyi om kotapkok om Kapernaum. 60 Ntowo kulim konomikyi alake ce caŋ ŋalecutecu, kumwoy kule, "Wuy koromun ŋolyontoni, ŋo nye muce kulim ŋal ceyuco?" 61 Yoto kunket Yesu nkit kule ŋunyŋunye konomikyi om ŋolyontoni. Kumwoci neto cek kule, "Kemuyok akwek ŋolyontoni? 62 Kunyo kucäm ne nyun ye kokäs akwek Weritap cito kuloŋntoy wule kimitowune kunyo? 63 Muyet Nyetilil kunye konu soponto, kunyo puryo kot kopunto porto latik mpo kisic. Ŋalek co komwowok ani kuce Muyet oko soponto. 64 Oŋnkurok kupuryo kot kuyene piko alake om akwek." (Omnye kinkete Yesu kuceke tayta kule piko oŋnkuco om cekto ce puryo kot kucömis oŋnku cito oŋnkono nye musukuŋomnto neto.) 65 Yoto kutosyikey kumwoy kule, "Kuyu nyitenyi somwowok ani akwek kule, puryo ci nye muce kot kuco wule amite okoy pate ye kokukoci Papa cicoto kwiy kuyunyoto." 66 Kuceke yoto kukweykey konomikyi ce caŋ kutay nye komo kupesetoti yec oko Yesu. 67 Yoto kumwoci Yesu kiyokik taman ok oyeny kule, "Omöce mpo akwek kule, cepecikey?" 68 Kuwekyi Simon Petero kumwoci neto kule, "Mokoryontet, mocipe acek wule mite ŋo? Ponte nyi ŋalek ce konu soponto nye mopoku, 69 kunyi kociyen oŋnkyinket acek kule yiku nyi Nyetilil nye cone wule mite Yiyintet." 70 Kuwekyi Yesu kumwoci cek kule, "Kipuryo kot akweyak ani akwek cu oyiku taman ok oyeny? Oŋnkurok akenke om akwek kunye Setani nyewo nyepo oyik." 71 Kiŋolole Yesu yoto Yuta weritap Simon Isikaryoti, omnye nka kot ki akenke Yuta om konomik taman ok oyeny, ntene neto kunye kiwo kuŋomnto Yesu.

7

1 Nto om letutap ŋalecutecu, kuwesetote Yesu Kalilaya, nye kipuryo kot kumöce kule owesotote Yuteya omnye kimite Yutayek cepo woloto kucenye kule cepakäc neto. 2 Kikirik yoto pesyetap sakwet nyepo Yutayek nye cekure sakwetap kisarinek. 3 Yoto kumwoci mpo mutakwam Yesu kule, "Ŋete wuli oŋnkiwo Yuteya, sukuŋet kukäs konomikuk yisyet nye yiye nyi. 4 Omnye puryo ci nye muce kuwuŋat yisyenyi nye yiye ye möce kule soyeku konketon. Ye yiye nyi ŋalecutecu kupoyit manta, kumöce kule partekey konketiŋ piko tokol." 5 Kipuryo kot kuyen mpo mutakwam ŋalekyi. 6 Kumwoci Yesu cek kule, "Tompo kot kupunto pesyemwani nye topon. Ntene oponte pesyosyek ce caŋ ce toponec. 7 Puryo kot komuce koret kot kusenkerak akwek, ntene senkero ani, omnye omwocini ani okokoy kule miyotec yisyonutekyi. 8 Ape akwek sakwet, ntene moweti ani sakwani, omnye tompo kot kupunto pesyemwani nye topon." 9 Kumwoci neto cekto ŋalecato onŋkopur kuŋutune Kalilaya. 10 Nteyu kowo kupa mpo mutakwam sakwet, kuwo mpene Yesu nye kiwuŋotikey nye moköse ci. 11 Kuceny Yutayek neto om sakwet, kutepe kule, "Mite ono neto?" 12 Kimite yoto comset nyewo koromun om wule mite luket nyepo piko om ŋalek ce nöme neto, kumwowu piko alake kule, "Topon cito nyin!" Kumwowu alake kule, "Puryo, pepere kumose piko." 13 Ntene puryo ci nye kiŋalale kutok omnye kiyweye piko Yutayek. 14 Nteyu kowo kupunto kwenutap pesyosyek cepo sakwet, kuwo Yesu kotap Yiyintet orit oŋnkucec kunetis. 15 Yoto kukite Yutayek koromun kumwoy kule, "Muce kulene cici kunket ŋalek ce caŋ oŋnkurok yec kupuryo kot ku ci nye sumanat." 16 Kuwekyi Yesu kumwoci cek kule, "Puryo kot kucikwani ŋalekyu oneti, ntene kwone wule mite Yiyintet nyo kiyokwo ani. 17 Ye kecäm ci ake tokol kule ayiy ŋalek ce möce Yiyintet kunye mosukunket cito nyoto kule po manta ŋalek ce oneti ani, nto oŋololi ŋalek cepo kamukeywekwani nkit. 18 Ci nye ŋolole ŋalek cepo kamukeywekyi nkit, kunye syeme cito nyo kule onyoru woyinto nye nyenyi nkit; nto cito nyo cenye woyinto nyepo neto nyo kiyoku ani kunye nyepo manta cito nyo, oŋnkupuryo kot kuponto ŋolyo nyepo mwiynan. 19 Kikonok akwek Moses ntarastinek nto puryo? Ntene puryo mpo akenke om akwek nye yweye ntarastinek. Omne yu osyeme akwek kule cepakäc ani?" 20 Kuwekyi luket nyepo piko kumwoci neto kule, "Ponte nyi oyinot! Ŋo nye syeme kule apakäciŋ nyi?" 21 Kuwekyi Yesu kumwoci cek kule, "Kyayiy ani ŋolyo akenke nyewo koromun ye ki sapat, okite akwek tokol yoto koromun ŋolyontonoto. 22 Kikonok akwek Moses ntarastit nyepo wonset nka kot kipuryo kot kicece neto ntene mpo kukomwoŋ ce kicece, kunyo owonsi akwek ye Sapat. 23 Nteye cewone cito ye Sapat sukuŋet mente kyiri ntarastinekap Moses. Kunyo omne sonyerco ani akwek omnye kyosop portap cito kunyol topon ye kipesyetap Sapat? 24 Ayaste monte cemute musankut ye kokäs wule yunto tonto wulo po saŋ, ntene omute musankunek cepo manta." 25 Kumwoy piko alake cepo Yerusalem kule, "Puryo kot ku cicitenyi nyo cesyeme kule cepakäc? 26 Akäs pa! Oŋyi mite kuŋolole nye mowunyekey oŋnkurok kupuryo kot kumwocini cekto ŋolyo! Konket so poytoyikyacek kupoyit manta kule Ŋapanet neto. 27 Kunyo cinket acek tokol wule cone cici, ntene puryo ci nye muce kunket ye kaco Ŋapanet kule mokucone ono." 28 Nteye kimite Yesu kunetisyi om kotap Yiyintet kuŋalal kupol om kutit nyewo kumwoy kule, "Oŋnketo ani akwek manta? Oŋnket pa wule acone? Ntene kipuryo kot aco om kamukeywekwani nkit. Neto nyo kiyokwo kunye nyepo manta. 29 Ntene oŋnketi ani neto; omnye acone wule mite neto, oŋnku neto kunye kiyokwo ani." 30 Yoto kusyem cek kule cenäm Yesu, ntene puryo ci nye kimuc kot kunäm omnye kitompo kot kupunto pesyenyi. 31 Ntene kuyen ŋalekyi piko ce caŋ ce kimite luket nyepo piko, kumwoy cek kule, "Ye kaco Ŋapanet muce kwiy tukuk cepo kakitat kupël cu kukwiy cici?" 32 Yoto kulim Farasayek kucomoti luket nyepo piko ŋalek ce nöme Yesu. Kuyokto yoto tisik cewoyec oko Farasayek sikarek wokunäm Yesu. 33 Kumwoy Yesu kule, "Mosopur ani oko akwek kuloyit kuminiŋ nto kopok onomen awo wule mite neto nyo kiyokwo ani. 34 Mosacenya ani akwek, ntene puryo kot onyorwo, omnye puryo opeti akwek kot opunte wule oweti ani." 35 Kuŋalal Yutayek kwicek nkit kumwoy kule, "Karik kuwo cici ono wule mocenyoru acek? Möce so kule sawo moŋosyekap lamek wule kiwuci kupuntyi Yutayek wokumiŋis oŋnkunet Kirikik om wuloto? 36 Poru ne ŋolyontoni komwoy kule, mosocenya ani akwek, ntene monyorwo, oŋnku puryo kot opeti akwek kot opunte wule oweti ani." 37 Kipesyet nyepo letut nyepo sakwet kunye kipesyet nyoto nyewo koromun. Kuyo Yesu pesyonoto oŋnkuŋalal kupol om kutit nyewo kumwoy kule, "Ye ponto ci ake tokol melelya kumisyini kuco wule omite ani co kuyesyo. 38 Kuyu wulo mwowu silutekap Yiyintet kule, 'Mosukosune peko cepo soponto mukuleytap ci ake tokol nye keyeno ani.' " 39 Kimwoy Yesu kuyunyoto ŋalek ce nöme Muyet Nyetilil nye kikirik wokunyor piko ce keyen ŋalekyi. Kitompo kot cekon yoto Muyet Nyetilil omnye kitompo kot ciŋet Yesu kotutune met kunyor woyinto. 40 Ntowo kulim piko ce caŋ om kwenutap piko ŋalecutecu kimwoy Yesu, kumwoy kule, "Workoyontet nyitenyi manta!" 41 Kumwoy alake kule, "Ŋapanet nyitenyi!" Ntene kumwoy piko alake kule, "Puryo kot komuce kucone Ŋapanet Kalilaya!" 42 Mwowu silutekap Yiyintet kule, "Ŋapanet kunye keseniyantetap Tauti, kunyo mosiceyici neto Peselekem moŋet nyepo Tauti." 43 Yoto kupciykey luket nyepo piko om ŋalek ce nöme Yesu. 44 Yoto kumäc piko alak kule cenäm ntene puryo ci mpo akenke nye kimuc kunäm neto. 45 Kuketitakey sikarek kupa wule mite cewoyec oko Farasayek. Kutepe cek sikarek kule, "Omne yu mnokweru kuco yu?" 46 Kuwekyi sikarek kumwoci cek kule, "Puryo ci kenyis nye kiŋalal kuyu wule ŋololyoy cici!" 47 Kutepe Farasayek cek kule, "Kukuperperak neto kumasak so mpo akwek? 48 Kwokäs akwek pa akenke om kantoyik nto mpo Farasayek nye yene ŋalekyi? 49 Lukoni kunye luket nyepo piko co menket ntarastinekap Moses, kunyo kicup Yiyintet cekto!" 50 Akenke om cekto ku Nikontemo nyo kikinyosyo kuwo wokukäs Yesu. Kutepe nyo cekto kule. 51 "Cömwec acek pa ntarastinek cemutyi cito musanku kutompo kot celimnci ŋalekyi oŋnkyinket ŋolyontet nye kulel." 52 Kuwekyi cek kumwoci neto kule, "Yiku mpenyi so citap Kalilaya? Suman pa silutekap Yiyintet, mesenket kule puryo workoyo kenyis nye muce kucone koretap Kalilaya."

8

1 Yoto kunomen ci ake tokol kuwo kanyi. Ntene kuwo Yesu okoy tulwetap ketik ce cekure Seituninek. 2 Ntowo kuyec kororn kuketitakey Yesu yec kowo okoy kotap Yiyintet. Koruruckey luket nyepo piko ce caŋ komut neto. Yoto kopur ŋony oŋnkucec kunet cekto. 3 Kukwer konetikap ntarastinek oko Farasayek korket ake nye kicenäm kusekweyene oŋnkukoci kuyoŋe taytap piko tokol. 4 Kumwoci cek Yesu kule, "Konetintet, kucenäm korkoni kumite kusekweyene. 5 Om ntarastinekyacek, kikon Moses kule cewire rwontok korko nye yunyi kume. Kunyo mwowu ne nyi yawut?" 6 Kimwoy cek kuyunyoto kule celotu neto sukuŋet cenyoru ŋolyontet nye kocewosontyine. Ntene kuyim Yesu kukäs ŋony oŋnkusile mornenyi ŋony. 7 Nteyu kimite cek keyoŋ kutepe teputek, kuculkey Yesu oŋnkumwoci cek kule, "Ci ake tokol om akwek nye tompo kot kwiy miyotyo, kunyosyo nyoto kuwire neto rwantet?" 8 Oŋnkuyim yec kusil ŋony 9 Nteye kotolime cek ŋalecato, kupete akenke akenke, kunyosyo piko ceyec kunyo, okoy wokuŋet Yesu nkit oko korkonoto nye kimite kukeyoŋe yoto. 10 Kuculkey Yesu oŋnkumwoci kule. "Cepyosyani, onto cekto? Puryo ci mpo akenke nye koŋet nye mokumutuŋ musankut?" 11 Kuwekyi korkonoto kumwoci kule, "Mokoryontet, puryo ci." Kumwoy Yesu kule, "Kunyo mpo ani puryo omutuŋ musanku, wecikey ntene mente towayiy yec miyotyo." 12 Kuŋololyi Yesu yec kumwoci cekto kule, "Oyiku ani lakweyet nyepo koret. Ci ake tokol nye karupa ani, mosukunyor lakweyet nyepo soponto nye komo kuwesetote menonet mpo kisic." 13 Kumwoci Farasayek neto kule, "Kemwowu nyi nyun yawut ŋalek ce cekuk nkit, kunyo puryo kot kupo manta ŋalekuk ce mwowu." 14 Kuwekyi Yesu kumwoci cek kule, "Puryo kot kuyunyo, nka kot omwowu ani ŋalek ce cikwani nkit ntene kupo ŋalekwani manta, omnye oŋnketi wule kyocone oko wule oweti, ntene puryo kot oŋnket akwek wule kyocone nto mpo wule oweti ani. 15 Omüte akwek pate musanku om kasoteywek cepo pic, ntene puryo koto omutyini ani ci ake tokol musanku. 16 Ntene nka kot mpo ye kamüt ani musanku, kupoyitu ŋalek cikwani manta, omnye puryo kot omite ani kwani nkit, mitowune Papamwani nye kiyokwo wule amite ani. 17 Kicesil ntarastinek kwakwek kule ye kocömncin piko muncururwanik kosik oyeny kupoyitu manta ŋalekwa ce komwoy. 18 Kunyo oporu ani ŋalek ce cikwani nkit, kuporu mpo yec Papamwani nyo kiyokwo ŋalekwani. 19 Kutepe cek Yesu kule, Mite Papaŋuŋ ono?" Kuwekyi Yesu kumwoci kule, "Puryo kot oŋnketo ani akwek oŋnkupuryo mpo kot oŋnketi Papamwani. Nto kwonketo ani akwek nto kwonketi Papamwani." 20 Kimwowu Yesu ŋalecutecu tokol ye kimite kunetisyi om kotap Yiyintet om yepo koto nye citore sontukunek pesanik cepo kokotutek. Kipuryo ci nye kinäm neto om yoto, omnye kipuryo kot kwitita pesyenyi. 21 Kumwoci Yesu cek yec kule, "Mosowecikey ani, kunyo mosoceŋata ani akwek, ntene mosopoku oponte miyotyemwoŋ. Puryo kot omuci akwek kot ape wule oweti ani." 22 Kumwoy Yutayek kule, "Poru ŋalecu so kule, mosukuketkey neto nkit kume, omnye komwoy kule, 'Puryo kot okwoni akwek wule oweti ani' " 23 Kuwekyi Yesu kumwoci cek kule, "Okwone akwek koret wuli po ŋony, ntene acone ani torot. Opoye akwek koroni, ntene mopoye ani koroni. 24 Kuyu nyitenyi omne somwowok ani akwek kule, mosopoku oponte miyotyemwoŋ, kunyo mosopoku om miyotyemwoŋ ye puryo kot oyen akwek kule, 'AYUYE ANI NYI' " 25 Kutepe cek Yesu kule, "Nyi ku ŋo?" Kuwekyi Yesu kumwoci cek kule, "Kyomwowok ani kuceke keny. 26 Mite ŋalek ce caŋ ce nömok akwek ce misyini omwowok oŋnkamüt musankut. Po manta neto nyo kiyokwo ani, kunyo omwocini koret ŋalek ce kyalim kukwane wule mite neto." 27 Kipuryo kot kusow cek kunket ŋalek ce kimwocini neto cekto ce nöme Papa. 28 Kumwoci Yesu cek kule, "Ye konömnci akwek parak Weritap cito, yoto ye mosonket kule, 'AYUYE ANI NYI'; oŋnku yoto ye mosonket kule puryo kot oyiye ani kiy om kamukeywekwani nkit, ntene omwowu pate ŋalek ce kikoneta ani Papa. 29 Kunyo mitowune Neto nyo kiyokwo wule amite ani, puryo kwasta kwani nkit. Omnye oyiye ani pesyosyek tokol ŋalek ce ŋerece neto." 30 Kuyen piko ce caŋ ce kilim kumwowu Yesu ŋalecutecu. 31 Yoto kumwoci Yesu Yutayek ce kacäm ŋalekyi kule, "Mosoyiku akwek konomikwani cepo manta ye koyen konetisyemwani, 32 kunyo mosonket ŋalek cepo manta, mosukutyacak ŋalek cepo manta." 33 Kuwekyi cek kumwoci nto kule, "Ciku acek kesenisyekap Apram, tompo kot ciku acek kenyis mutwor cepo citake tokol, kunyo poru ne ŋalecu mwowu nyi kule, 'Mosicityacak?' " 34 Kuwekyi Yesu kumwoci cek kule, "Komwowok ani akwek ŋalek cepo manta kule, ci tokol ye yiye miyotyo kunye mutworintetap miyotyet nyoto. 35 Puryo kot kupoytoy mutworintonoto kayato okokoy, ntene poyitu werit kayato okokoy. 36 Omnye ye muce Werit kutyacak, kumuce kutyacak akwek kupoyit manta. 37 Oŋnket kule oyiku akwek kesenisyekap Apram, oŋnkurok yec osyeme kule cepakäca ani, omnye puryo kot ocöme ŋalekwani. 38 Oŋololi ŋalek ce kikoporwo Papamwani, ntene oyiye akwek ŋalek ce kimwowok papamwoŋ." 39 Kuwekyi cek kumwoci Yesu kule, "Apram kunye Papanyacek." Kuwekyi Yesu kumwoci cek kule, "Nto yunye oyiku akwek lekokap Apram cepo manta nto oyiye yisyet nye kerkey nye kikwiy neto. 40 Ntene omwowok ani okokoy ŋalek cepo manta ce kyalim kukwane wule mite Yiyintet, oŋnkurok omöce akwek kule cepakäca. Kipuryo kot kwiy Apram ŋolyo nye yunyi! 41 Oyiye akwek ŋalek ce kikwiy mpo papamwoŋ." Kuwekyi cekto neto kule, "Puryo kot ciku acek pantayek. Ceponte acek Papanyo akenke nyoto ku Yiyintet nkit." 42 Kuwekyi Yesu kumwoci cek kule, "Nto yunye Papamwakwek Yiyintet kupoyit manta, nto ocömo, omnye acone wule mite Yiyintet kunyo mite yawut yu. Omnye kipuryo kot aco om kamukeywekwani nkit, ntene kiyokwo ani Yiyintet. 43 Omne sumosowu akwek oŋnket ŋalek ce omwowu ani? Omnye puryo kot omuytoy oŋnkolimnte lokoywekwani. 44 Oyiku akwek lekokap papamwoŋ Setani nyewo nyepo oyik, kunyo omöce kule cerup corokyinotet nyepo papamwoŋ nyoto. Kiporin neto kuceke keny. Puryo kot kucöme neto kenyis ŋalek cepo komosta nyepo manta, omnye puryo kot kuponto ŋalek cepo manta. Ye kaŋalal, kumwowu pate ŋalek cepo mwiynan ce nöme neto nkit, omnye mwiynonin oŋnkukwanitap mwiynanet tokol. 45 Ntene oŋololi ani omwowu ŋalek cepo manta, kunyo puryo kot oyeni akwek ŋalekwani. 46 Ŋo om akwek nye muce kumwoy kutor kule oponte ani miyotyo? Omne sotay akwek moyen ŋalekwani ye komwowu ŋalek cepo manta? 47 Ci nye cone wule mite Yiyintet kunye limntoy nyoto ŋalekap Yiyintet. Omnye puryo kot okwone akwek wule mite Yiyintet. Kunyo puryo kot olimntoy." 48 Kuwekyi Yutayek kumwoci Yesu kule, "Puryo kot cepoye acek ne manta cemwowu kule, yiku nyi Samariyoyin; oŋnkiponte oyinot!" 49 Kuwec Yesu kumwoy kule, "Puryo, kot oponte ani oyinot, ntene oyweyi Papamwani, ntene puryo kot oyweyo akwek. 50 Puryo kot acenye ani woyinto nye nyimwani nkit. Mite ake nye cenye woyinmwani nye mute musankut kucämnta ani. 51 Komwowok ani akwek ŋalek cepo manta kule, puryo kot kume kenyis citake tokol nye kacäm kuyen lokoywekwani." 52 Kumwoci Yutayek neto kule, "Kocinket acek yawut kupoyit manta kule ponte nyi oyinot! 53 Kime Apram, oŋnkupok workoyik, kunyi mwowu nyi yec kule, 'Puryo kot kume kenyis citake tokol nye kacäm kuyen lokoywekwani.' Yiku nyi so nyewo kupël papanyacek Apram? Soti nyi kule oyiku ŋo?" 54 Kuwekyi Yesu kumwoci cek kule, "Ye kosutkey owoyitkey ani nkit, kupuryo kot kuponto woyinmwani latik, Papamwani nye kono woyinto, nyoto kunyo okure akwek Yiyintenyo, 55 oŋnkurok yec kutompo kot oŋnket akwek neto, oŋnketi ani neto. Ye kotepe kot omwowu ani kule puryo oŋnket ani neto, mosoyeku mwiyn kuyu akwek. Kunyo oŋnket ani oŋnkoyweyi ŋolyontenyi. 56 Kiŋerec papamwoŋ Apram kule mosakäs pesyemwani, kunyo kikäs oŋnkuŋerec." 57 Kumwoci Yutayek neto kule, "Tompo mpo kot punte nyi kenyisyek konom, kunyo kikäs nyi pa Apram?" 58 Kuwekyi Yesu kumwoci cek kule, "Komwowok ani akwek ŋalek cepo manta kule, kutompo kot ceyi Apram oyuye ani nyi." 59 Yoto kukwey cek rwontok kule cewire neto, ntene kuwunynkey Yesu oŋnkunomen kuwete kotap Yiyintet

9

1 Nteye kimite Yesu kutile kukäs citake nye kiceyi kukorat. 2 Kutepe konomikyi neto kule, "Konetintet, ŋo nyepo miyotyet, cici nkit nto piko ce kiye sukuŋet ceyi kukorat?" 3 Kuwec Yesu kumwoy kule, "Puryo kot kunömekey koratenyi oko miyotyenyi nto miyotyetap piko ce kiye. Kikor neto sukuŋet ciyiyisye cipor swametap Yiyintet. 4 Misyini cetosyikey acek ceyiy yisyonutekap neto nyo kiyokwo ani ye tokupet koret, mosukuco menonet nye puryo kot komuce ci ake tokol kot kwiy yisyo. 5 Ye tomite koret, oyiku ani lakweyetap koret." 6 Nteyu kowo kuŋalal Yesu ŋalecato kuŋutyi ŋony oŋnkutankware teŋek ŋulek oŋnkunyinye konyekap cicoto. 7 Oŋnkumwoci kule, "Iwo wewune konyekuk tolilet Siloam" (nye poru kaynani kule, "Kiciyokto.") Yoto kuwo cicoto wokowunnkey oŋnkuketkey kuco nye kakästa. 8 Yoto kutepe latosyekyi oko piko ce kikäs neto ikye kusomsi kumwoy kule, "Puryo kot ku cicitenyi nyo kwepure ŋony sukusomsi?" 9 Kumwoy piko alake kule, "Cito nyitenyi." Ntene kumwoy cicoto nkit kule, "Ani nyoto." 10 Kutepe cek kumwoci neto kule, "Kuŋoŋokis kusopco konyekuk kulene?" 11 Kuwekyi cicoto kumwoci cek kule, "Kutankware teŋek ŋulek cico cekure Yesu oŋnkonyinye konyekwani oŋnkumwowo kule, 'Iwo wewune konyekuk toliletap Siloam' Yoto awo ani, nteyu kowo awunekey akäste pakenke." 12 Kutepe cek kule, "Ono cicoto?" Kuwekyi cicoto kumwoci cek kule, "Puryo kot oŋnket." 13 Yoto kukwer cek cicoto kikorat okoy wule mite Farasayek. 14 Kipesyetap Sapat pesyet nye kitonkwore Yesu teŋek ŋulek oŋnkuŋany kusopco konyekap cicoto. 15 Yoto kutepe yec Farasayek cicoto kule kuŋoŋokis kusopo konyekuk kulene? Kumwoci neto cek kule, "Kwenyinye neto sakatyet konyekwani oŋnkowunnkey ani, kunyo oköstoy yawut." 16 Kumwoy Farasayek alake kule, "Puryo kucone cici kukwiye kuyunyi wule mite Yiyintet, omnye puryo kot kuyweye ntarastinekap Sapat." Ntene kumwoy alake kule, "Muce kulene cito nye ponto miyotyet kwiy tukuk cepo kakitat ceyucu?" Yoto kutoytocin cek kwicek nkit kupciwunekey oyeny. 17 Kutepe Farasayek yec cicoto kule, "Kemwowu nyi kule kuŋany cico kusopco konyekuk, kunyo mwowu nyi kule, ci ne, cicitenyi?" Kuwec cicoto kumwoy kule, "Workoyo." 18 Ntene kutoyis Farasayek meyen kule kikorat cicoto nye puryo kuköstoy. Okoy kukur cek kwan oko kamet, 19 oŋnkutepe kule, "Werimwakwek so nyitenyi? Omwowu akwek so kule kiceyi kukorat? Kunyo omne sukuköstoy yawut?" 20 Kuwec cek kumwoy kule, "Cinket acek kule werinyacek nyitenyi, oŋnkyinket kule kiceyi kukorat. 21 Ntene puryo kot cinket omne sukuŋet kukästa yawut, oŋnkupuryo mpo kot cinket cito nye kuŋonye kusopco konyekyi. Atepe akwek neto nkit; omnye ci nye kuwoyit nye muce kuŋalal kuwec nkit!" 22 Kimwoy kuyunyoto omnye kiyweye cek Yutayek, omnye kikicömncin Yutayek kunyo kule ye kacäm citake tokol kule Yesu kunye Ŋapanet, mosicekerekta cicoto nye komo kuweti kotapkok. 23 Sukuŋet kumwoy kwan oko komet kule, "Atepe akwek neto nkit, omnye ci nye kiwoyit." 24 Kukur cek cicoto kiceyi kukorat aret nyepo oyeny oŋnkumwoci kule, "Walkey pa nyi om taytap Yiyintet kule momwowu ŋalek cepo manta! Cinket acek kule ponto cico miyotyet." 25 Kuwec cicoto kumwoy kule, "Puryo kot oŋnket ani kule ponto cico miyotyo nto moponto, oŋnket pate ŋolyo akenke kule kyoyiku ani ikye korat, kunyo oköstoy yawut." 26 Kutepe cek cicoto kule, "Kukwiŋ ne nyi neto? Kiŋany kusopco konyekukyi kulene?" 27 Kuwekyi cicoto kumwoci cekto kule, "Kumwowok ani itwe, ntene puryo kot alim akwek. Omne somac kule celim yec, toskoy omöce mpo akwek kule ciku konomikyi?" 28 Kucup cek cicoto oŋnkumwoci kule, "Yiku nyi konomintetap cicoto. Ciku acek konomikap Moses. 29 Cinket acek kule kiŋololyi Yiyintet Moses, kunyo mocinket wule cone cico!" 30 Kuwekyi cicoto kumwoci cek kule, "Ŋolyo nyi nye cikite! Puryo kot oŋnketi akwek wule kicone cico! Ntene kuŋany konyekwani! 31 Cinket kule, puryo kot kulimncini Yiyintet piko ce ponto miyotyet; ntene muce kulimnci pate piko co yweye neto oŋnkwiye ŋalek ce möce neto kule kwiy. 32 Ntene kuceke kicitany koret tompo kot celim kenyis kule kiŋany citake konyekap cito nye kiceyi kukorat. 33 Nto yunye kupuryo kot kucone cici wule mite Yiyintet, nto kupuryo kot komuce kwiy ŋolyo." 34 Kuwekyi cek kumwoci cicoto kule, "Mpenyi nyi kiceyitiŋ miyotyet, kunyi syeme kule anetec acek?" Yoto kukwete cek cicoto kotapkok. 35 Kulim Yesu kule kukwet cek cicoto. Ntene kunyor neto cicoto kutepe kule, "Yeni nyi ŋalekap Weritap cito?" 36 Kuwec cicoto kumwoy kule, "Mokoryontet, mwowo ŋo cicoto saŋet oyen ani ŋalekyi!" 37 Kumwoci Yesu neto kule, "Kwekäs nyi neto, kunyo neto nyitenyi ŋololuŋ nyi yawut." 38 Kumwoy cicoto kule, "Mokoryontet, koyen ani!" Oŋnkukutuŋe taytap Yesu. 39 Kumwoy Yesu kule, "Kyaco ani koroni camüt musankut kule sukuŋet kukästa piko ce kikoryo oŋnkucömis piko co köstoy." 40 Kulim Farasayek alake ce kimite yoto kumwowu Yesu ŋalecato, kutepe cek neto kule, "Soti nyi so kule kicekorye mpo acek?" 41 Kuwekyi Yesu kumwoci cek kule, "Nto kwoyiku akwek koryotin, nto puryo kot oyiku lelotin, ntene omnye omwowu kule, 'Ceköstoy acek.' Koporkey kule toyiku akwek lelotin."

10

1 Komwowok ani akwek ŋalek cepo manta kule, "Cito nye puryo kot kupunte kurket ye weti kotap kecirek, ntene kulaŋnta kupunte wulyo ake, kunye corin cito nyoto. 2 Nto cito nye punte kurket kunye mesewontet nyepo kecirek nyoto. 3 Kuyotyini cito nyo ripe kurket mesewontet. Mosukulim kecirek kutinyi ye kokur kaynokap kecirekyi, oŋnkuntoci kukwer kupa saŋ. 4 Nteye kokwer ceci tokol kukwa saŋ; kuwo kuntoci om tay, yoto kurup kecirek neto omnye nkete kutinyi. 5 Puryo kot komuce kurup citake pate nye to, muce kumwey omnye menkete kutit nyepo cito nyoto." 6 Kumwoci Yesu cekto tyonkoconitenyi ntene kipuryo kot kunket ŋalek ce kimwocini neto cekto. 7 Kumwoci Yesu cek yec kule, "Komwowok ani akwek ŋalek cepo manta kule, oyiku ani kurket nyepo kecirek. 8 Piko alak tokol ce kikwa kunyosyeno ani kuce kicorik oŋnkumwoŋot, ntene kipuryo kot kulimnci kecirek cekto. 9 Oyiku ani kurket, ci ake tokol nye kaco cokupurune wule omite ani mosukusop, mosukuco orit oŋnkumiŋnto saŋ oŋŋkunyor suswek. 10 Coni corintet corsyet pate oŋnkupakäc, oŋnkwaranta. Kyaco ani kule sukuŋet kunyor piko soponto nye yeme topon. 11 "Oyiku ani mesewontet nye topon, cöme mesewontet nye topon kule okoyte soponnyi kumeci kecirek. 12 Cito nye pokosin kunye puryo kot ku mesewontet oŋnkupuryo kot kuceci kecirek, pokoktoy nyo kecirek oŋnkumwey ye kakäs suyontet, yoto kusar suyontet oŋnkuseret cut alak. 13 Mweye cito nye pokosin nyepo musyara omnye puryo kot kusote kecirek. 14 Oyiku ani Mesewontet nye topon, oŋnket kecirek ce cikwani oŋnkunketo kecirekwani, 15 kuyu wule oŋnketi ani Papamwani oŋnkunketo Papa. Kunyo oyiku ani yiytat okoyte soponmwani omeci kecirek. 16 Oponte mpo kecirek alak ce puryo kot kumite yeceyi, misyini okweru mpecek coto, mosukulim mpecek kutimwani kukwa kwek yeceyta akenke nyepo mesewontet akenke. 17 "Cömo ani Papa, omnye oyiku yiytat okoyte saponmwani sukuŋet ceketwo yec. 18 Puryo ci nye muce kot konomuneno soponmwani, ntene okoytoy om cömisyemwani nkit. Oponte kamukeywek okoyite, oŋnkoponte kamukeywek ce oketune kuketkey. Kiyitenyi nye kimwowo ani Papamwani kule ayiy." 19 Yoto kupciykey yec Yutayek om ŋalecutecu. 20 Kumwowu ce caŋ om cek kule, "Ponto nyi oyinot! Kipun met nyi! Omne solimnci akwek ŋalekyi?" 21 Ntene kumwoy piko alake kule, "Puryo kot kuŋolole kuyunyi cito nye ponto oyinot! Muce oyinoto cekwol yitik kuŋany konyekap piko ce kikoryo?" 22 Yoto kupunto pesyet nye kyome sakwet nye citilile kotap Yiyintet om Yerusalem. Kikaytit koret pesyosyecoto. 23 Nteye kimite Yesu kuwesetote tekewutap Solomon om kotap Yiyintet. 24 Yoto korurukyikey Yutayek komut neto oŋnkutepe kule, "Ŋomwec acek nyi okoy oyu? Mwowec ŋalek kutok cepo manta, yiku nyi Ŋapanet?" 25 Kuwekyi Yesu kumwoci cek kule, "Kwomwowok ani, ntene puryo kot oyen akwek ŋalekwani. Yisyonutek ce oyiye om kamukeywekap Papamwani kuce ŋolole kuporto ani. 26 Ntene puryo kot oyeni akwek omnye puryo kot oyiku akwek kecirekwani. 27 Lime kecirekwani kutit nyimwani, oŋnket ani cekto, kunyo nomoto ani cekto. 28 Okocini soponto nye mopoku, puryo kot kupoku mpo kisic, oŋnkupuryo mpo ci nye muce kot kusar kukwane yewuniyekwani. 29 Ce kikono ani Papa kuce cewoyec kupël tukuk tokol, oŋnkupuryo citake tokol nye muce kot kusar kunum kukwane wule mite Papa. 30 Oyiku ani oko Papa akenke." 31 Yoto kukwey yec Yutayek rwontok kule cewire neto. 32 Kumwoci Yesu cek kule, "Kyoporwok ani yisyonutek ce caŋ ce toponec ce kikono Papa ayiy; oŋnkono om coto nye omöce akwek kule cewirco ani?" 33 Kuwekyi Yutayek kumwoci kule, "Puryo kot ce möce acek kule ceweriŋ nyi om yisyo ake tokol nye topon, ntene om nyilsyet nye nyile nyi Yiyintet! Ntene oko omnye yiku nyi ci pate, oŋnkurok yec sutkey nkit kule oyiku Yiyintet!" 34 Kuwekyi Yesu kumwoci cek kule, "Puryo kot cesil ne om ntarastinekwakwek nkit kule, kimwoy Yiyintet kule, 'Oyiku akwek Yiyinwek!' 35 Cinket kule po manta okokoy ŋalek ce mwowu silutekap Yiyintet; kure Yiyintet piko co kicikoci lokoywekyi kule, 'Yiyinwek.' 36 Nto ani kunyo kikweya Yiyintet oŋnkuyokwo aco koret. Kunyo omuci akwek kulene omwowu kule, 'Nyile nyi Yiyintet,' Omnye komwowu kule, Oyiku Weritap Yiyintet? 37 Kunyo monte ciyen yisyemwani ye puryo kot oyiye yisyet nyepo Papamwani. 38 Ntene ye oyiyisyi ani, nka mpo ye mnoyen akwek ŋalekwani, kuroke oyen yisyonutekwani sukuŋet oŋnket okokoy kule mitowune Papa wule omite ani oŋnkomitowune ani wule mite Papa." 39 Yoto kusyem cek yec kule cenäm Yesu, ntene kuwecikey kuciwit. 40 Kuwo Yesu kway yec oyinetap Yortan okoy kupunto yo kipotisonisye Yowana kunyo, oŋnkuwo kopurune wuloto. 41 Kukwa piko ce caŋ wule mite neto oŋnkwokumwoy kule, "Kipuryo kot kwiy Yowana yisyonut nyepo kakitat, ntene po manta ŋalek tokol ce kimwoy ce nöme cici." 42 Kuyen piko ce caŋ ŋälekyi om wuloto.

11

1 Kumnyan citake nye cekure Lasaro nye kiminye Pesaniya. Pesaniya kunye moŋet wule kiminye Mariyam oko cekwam Marisa. 2 (Mariyam nyitenyi kunyo kuŋope mwayta kerenkokap Mokoryontet oŋnkopuke putekyi. Kunyo kimnyone mutakwam Lasaro.) 3 Kuyokto mpo cekwam ŋolyontet kuwo wule mite Yesu kumwoci kule, "Mokoryontet, mnyone corweŋuŋ nyo cöme nyi" 4 Ntowo kulim Yesu ŋalecato, kumwoy kule, "Puryo kot kusutu porto nyepo Lasaro met, kwiyakay sukuŋet kupor woyintap Yiyintet, oŋnkyilaŋnta Weritap cito kupunte met." 5 Kicöme Yesu Marisa oko cekwam Mariyam oko Lasaro. 6 Nteyu kowo kulim Yesu kule mnyone Lasaro; kopur wule kimite kuwany pesyosyek alak oyeny. 7 Nto om letut kumwoci neto konomik kule, "Akany ceketitekey cipe Yuteya." 8 Kuwekyi konomik kumwoci neto kule, "Konetintet, kumöce Yutayek oyin lekito kule cewireniŋ rwontok kunyi yiytoykey yec kule aketitekey wuloto?" 9 Kuwekyi Yesu cek kule, "Puryo kot kuponto ne pesyet akenke sawanik taman ok oyeny? Kunyo puryo kot cinoce cito ye wesetoti ye pet, omnye köse neto lakweyet nyepo koroni. 10 Ntene mosicinoc cito ye kowesetot ye komoy, omnye puryo kot kuponto lakweyet." 11 Kumwoy Yesu ŋalecato oŋnkutosyi kumwoy kule, "Koru corwenyo Lasaro, ntene mosowo ani waŋet neto." 12 Kuwekyi konomik kumwoci kule, "Mokoryontet, ye koru neto, mosukusop." 13 Ntene kimwowu Yesu kuporu kule, kume Lasaro, kusote cek kule toskoy ŋolole rwonto nyepo kwak. 14 Kuporci Yesu kumwoci cekto kule, "Kume Lasaro, 15 ntene oyiku ani ŋerekat om wule omite akwek omnye kupuryo kot opontekey ani neto sukuŋet oyen akwek. Kunyo akany cipe." 16 Yoto kumwoci Tomas (nye soromin) konomik cut kule, "Akany cipe mpo acek tokol oko konetintet sukuŋet wocepoku tokol oko neto!" 17 Ntowo kupunto Yesu, wokunyor kucemuy Lasaro nye kukuwany mwenet pesyosyek amwan. 18 Kilekite Pesaniya Yerusalem nye kikeytye kilomitanik somok. 19 Kikwa yoto Yutayek ce caŋ kwokuŋololyi Marisa oko Mariyam om metap mutakwam Lasaro. 20 Ntowo kulim Marisa kule mite Yesu kuconi, kuwo kutorokta aran, ntene kopurcikey Mariyam ko. 21 Kumwoci Marisa Yesu kule, "Mokoryontet, nto kwemite nyi wuli, nto puryo kot kume yeyamwani! 22 Ntene oŋnket ani mpo yawut kule, muce Yiyintet kukoniŋ kiy ake tokol nye kesom nyi neto." 23 Kumwoci Yesu neto kule, "Mosiciŋet yeyaŋuŋ kotutune met." 24 Kuwec Marisa kumwoy kule, "Oŋnketi kule mosukotutune met om pesyet nyepo letut." 25 Kumwoci Yesu neto kule, "Oyiku ani kotutunetap met oko soponto. Mosukusop ci ake tokol nye yene ŋalekwani oŋnkuyen nka kot kame. 26 Nto ci ake tokol nye sopot nye keyeno ani kupuryo kot kume kenyis okoy kenyis. Kunyo yeni nyi ŋalecu?" 27 Kuwekyi Marisa kumwoci Yesu kule, "Mokoryontet, oyeni ani kule, yiku nyi Ŋapanet Weritap Yiyintet, nyo mosukuco koret." 28 Nto om letut yu kowo kumwoy Marisa ŋalecato, kuwo kuketitakey wokukur cekwam Marisa oŋnkuŋololyi kucomnci kule, "Kaco yu Konetintet, kunyo tepiŋ nyi." 29 Ntowo kulim Mariyam, kuŋet lakwar kusartakey kuwo wule mite Yesu. 30 Kitompo yoto kot kupun Yesu kayata, ntene kitokumite yo kituytos oko Marisa. 31 Yoto ntowo kukäs Yutayek ce kiŋololyini Mariyam om ko kule kaŋet kusartakey kuwo saŋ. Kupa mpecek kurup let, kusote kule toskoy kowo wokurire yepo mwenet. 32 Ntowo kuwo Mariyam okoy kupunto ye mite Yesu, nteye kotoköse kukutuŋe yepo kerenkokyi oŋnkumwoy kule, "Mokoryontet, nto kwemite nyi wuli, nto puryo kot kume yeyamwani!" 33 Kukäs Yesu neto kurire oko Yutayek ce kimite kurirtos mpecek! Yoto kuloŋ mukuleynyi oŋnkusot koromun. 34 Kutep kule, "Kwomuci akwek ono?" Kuwekyi cek kumwoci kule, "Mokoryontet, co cekäs yeto." 35 Kurir Yesu lokik. 36 Kumwoy Yutayek kule, "Akäs pa wule kucömntoy cito nyin!" 37 Ntene kumwoy alake om picoto kule, "Puryo kot cici ne nyo kiŋonye konyekap cito nye kikorat? Kopuryo kot komuce neto kot kukerekta Lasaro mame?" 38 Kuloŋ yec mukuleytap Yesu kutok oŋnkuwo okoy yepo mwenet nye kepenet nye kimite rwantet nye kaceker kurket. 39 Kumwoy Yesu kule, "Owunukte rwantet!" Kuwec Marisa cekwametitap cito nyo kume kumwoy kule, "Mokoryontet, mosukupoŋ somisyet, omnye kupeni mwenet kuwany pesyosyek amwan!" 40 Kumwoci Yesu neto kule, "Kopuryo kot omwowuŋ ani nyi kule, (ye keyen mesekäs woyinto nyepo Yiyintet?)" 41 Yoto kuwunukto cek rwantet. Kunyal Yesu torot oŋnkumwoy kule, "Okostiŋ ani nyi Papa; omnye limwo. 42 Oŋnketi kule limwo okokoy, ntene komwowu ŋalecu sukukäs picu mite yu, sukuŋet cekto kuyen kule nyi kunye kiyokwo ani." 43 Nteyu kowo kumwoy kuyunyoto, kupol kukurto om kutit nyewo kumwoy kule, "Lasaro! Miŋu co saŋ!" 44 Kumiŋ kuco saŋ cito nye kukume kupontonu sirok co kucemuytoy kurototin yewuniyek oko kerenkok oko siret nyo kicerate komut metit. Kumwoci Yesu cek kule, "Otyokyi sirok, oŋnkayaste kuwo." 45 Yoto kukäs Yutayek ce caŋ ce kikikwa kwokukäs Mariyam ŋalek ce kikwiy Yesu okoy kuyen cek ŋalekyi. 46 Ntene kuweckey alake om cekto kupa wule mite Farasayek oŋnkuwokumwoci ŋalek ce kukwiy Yesu. 47 Kukur tisik cewoyec oko Farasayek kokwet nyewo oŋnkumwoy kule, "Mokyiy kulene? Yiye cici tukuk ce caŋ cepo kakitat! 48 Ye kakyaste kutosyikey kwiye kuyunyi, mosukuyen ci tokol ŋalekyi, kunyo mosukukwa poytoyik cepo Romek kwokwaranta kotap Yiyintet oko piko cepo yemenyo tokol!" 49 Kumwoci Kayafa akenke nye ki tisintet nyewo om kenyinoto cek kule, "Puryo kot oŋnket akwek kiy. 50 Puryo kot osowu akwek kule misyini cepakäc kume cito akenke om wule omite, ye koto kyorontoy piko cepo yemet tokol?" 51 Ntene kipuryo kot kumwoy neto kuyunyoto kwine nkit, ntene omnye neto kunye ki tisintet nyewo om kenyinoto, kunyo kiŋor kule karik cepakäc Yesu kumeci piko cepo yemonoto. 52 Ntene nye kipuryo kot ku kule kumeci piko cepo yemonoto nkit pate, ntene kule sukuŋet koruruc kwek akenke lekokap Yiyintet ce kiseret. 53 Kuceke pesyonoto kwiyita Yutayek rurumut kule cepakäc Yesu kume. 54 Yoto kuwesetot Yesu om Yuteya nye komokuporkey kutok, ntene kunomen kuwo koret nye lekite kitela, om moŋet nye cekure Efrayim wule kiwo kopur oko konomik. 55 Kikirik yoto kupunto sakwet nyepo Yutayek nye cekure Keytayet. Kupete piko koret kupa Yerusalem wokwiy ntasimnyet nye cipukte miyotyet kutompo kot kupunto sakwet. 56 Kimite cek yoto kucenye Yesu. Kururukyikey cekto kotap Yiyintet sukuŋolole kwicek nkit kutepekey kule, "Osoti akwek kulene? Muce pa kuco sakwani, nto puryo?" 57 Kikimwayta Tisik cewoyec oko Farasayek kule ye nkete citake tokol wule mite Yesu kumisyini kumwoy sukuŋet cekto wokanäm.

12

1 Yoto om pesyosyek lö kutompo sakwet nyepo Keytayet, kuwo Yesu okoy Pesaniya wule kiminye Lasaro cito nyo kiŋete neto kotutune met. 2 Kyici Yesu omik om wuloto. Marisa nye kikwiyisyi kupciwu omik, kumite Lasaro kukepur yepo meset kwomisyi oko Yesu. 3 Kunäm Mariyam cupet nye nyitat mwayta nye cekure naratus nye poŋu topon koromun nye kyole pesan ce caŋ oŋnkuroŋnkyi kuŋape kerenkokap Yesu oŋnkupuke putekap metinyi. Kupoŋ mwayta kunäm koto tokol. 4 Kumwoy Yuta akenke om konomikyi nye kiwokuŋomntoy Yesu kule, 5 "Omne mokyalya yikwe mwayi kyale silinkinek pokolwokik lö, oŋnkyikoci pesanik pononik?" 6 Kimwoy Yuta kuyunyoto, ntene kipuryo kot omnye kisote kurire pononik, ntene omnye ki corin, kinomoti neto lolet nye cekonore pesanik. 7 Kumwoy Yesu kule, "Ayaste neto kukonor co koŋet okoy pesyet nye cemuyeno ani. 8 Opontekey akwek oko pononik okokoy, ntene puryo kot opuri ani oko akwek okokoy." 9 Yoto kulim luket nyepo Yutayek ce caŋ kule mite Yesu Pesaniya, kupa wuloto, ntene kipuryo kot komöce kule cekäs Lasaro nyo kiŋet Yesu kotutune met. 10 Yoto kwiyta tisik cewoyec kule cepakäc mpo Lasaro. 11 Omnye neto nye kwesac sukutay Yutayek ce caŋ kantoyikwa oŋnkuyen ŋalek cepo Yesu. 12 Ntowo kuyekune pesyet nyepo oyeny kulim luket nyepo piko ce caŋ ce kikwa sakwetap Keytayet kule mite Yesu kuconi Yerusalem. 13 Yoto kuput cekto sosik oŋnkupa kutorokta kupolot; kumwowu kule, "Akaste Yiyintet! Kukoci Yiyintet kupeyok neto nye coni om kaynetap Mokoryontet! Kukoci Yiyintet kupeyok Kinko nyepo Israel!" 14 Kunyor Yesu sikiryet, yoto kulany kuyu wulo mwoytoy silutekap Yiyintet kule, 15 "Monte cemuye pikap Siyon; Akäs mite kuconi Kinko nyemwoŋ wule omite akwek nye kalany moytap sikiryet." 16 Kipuryo kot kusowu kunyo konomikyi kunket ŋalecu. Ntene om letut yu kowo cilaŋnta Yesu kotutune met, kusot cek kule kimwoy silutekap Yiyintet ŋalecutecu, oko kule kikwici piko neto ŋalek ce yucutecu. 17 Luketap piko ce caŋ co kipontotikey Yesu, oŋnkukäs cekto nkit ye kikure neto Lasaro kucone mwenet oŋnkusop kotutune met; kuce kimwayta ŋalek ce kikwiyokis. 18 Kunyo sukuŋet kupa luket nyepo piko ce caŋ kutorokta Yesu omnye kikilim kule kikwiy neto ŋolyontoni pa kakitat. 19 Yoto kuŋalal Farasayek kwicek nkit kumwoy kule, "Kokäs so? Komo cimuci acek kiy! Akäs pa, karup piko tokol neto!" 20 Kimite Kirikik alake ce kikwontoykey oko piko ce kikwoni Yerusalem kwokusay ye pesyetap sakwet. 21 Kukwa cek ye kimite Filipo nyepo Pesaniya om koretap Kalilaya oŋnkumwoy kule, "Mokoryontet, cemöce acek kule cekäs Yesu." 22 Kuwo Filipo wokumwoci Antereya, yoto kupa tukway wukumwoci Yesu. 23 Kuwekyi Yesu kumwoci cek kule, "Kuponto yawut nyun sawet cilaŋnta Weritap Cito kunyor woyinto nyewo. 24 Komwowok ani akwek ŋalek cepo manta kule, ye puryo kot kosuci ŋony kupuswontet akenke nyepo nkanuk oŋnkume, kweku nyo kopuswontet akenke pate okokoy ntene ye kusuci ŋony kume, mosukuyi kupuswek ce caŋ. 25 Ci ake tokol nye kacäm sopon nyi, kupote cicoto sopon nyi, nto ci ake tokol nye kasenker sopon nyi om koroni mosukurip cicoto sopon nyi oŋnkunyor soponto nye mopoku. 26 Ye möce ci ake tokol kule kuyiwo ani yisyet, kumisyini kurupa ani cicoto, sukuŋet kopurune mutworintemwani wuloto amite ani. Mosukulaŋnta Papa cicoto yiwo ani yisyet. 27 "Kapotpoten yawut mukuleymwani, kunyo momwowu kulene? Momwowu ra kule 'Papa mente kucontyo ani sawet nyitenyi?' Ntene kucoto yec ce kyacontyi ani saŋet opunte sawet nyitenyi po toŋoŋutek. 28 Ayi Papa, koci kulaŋnta kuwoyit kayneŋuŋ!" Yoto kucone kutit torot kumwoy kule, "Kokoci ani kaynemwani Woyinto. Kunyo mosayiy kuyunyoto yec." 29 Kulim luket nyepo piko ce caŋ ce kimite keyoŋ yoto kutit, kumwoy cek kule, "Kotul ilat!" Kumwoy alake kule, "Koŋololyi malayket neto!" 30 Ntene kumwoci Yesu cekto kule, "Kopuryo kot kuŋololwo ani kutina kunömo ani ŋalek, kuŋolole ku nömok akwek. 31 Kopunto yawut pesyet cewosontyi koret; kunyo mosicekwet yawut poytoyintet nyepo koroni. 32 Pesyet nye ye kacilaŋnta ani owete koret awo torot, yoto ye mosoruruc piko tokol kukwa wule amite ani." 33 (Kimwoy neto ŋalecutecu kupor aret wule mosukumeta.) 34 Kuwekyi luket nyepo piko kumwoci Yesu kule, "Mwowec acek ntarastinekyo kule, mosukusop Ŋapanet okokoy nye puryo kot kume, kunyo muci nyi kulene mwowu kule, Mosicilaŋnta Weritap cito kuwo torot? Weritap Cito ku ŋo?" 35 Kuwekyi Yesu kumwoci cek kule, "Mosukupor lakweyet kuminiŋ wule omite akwek, kunyo apesetate ye toponte lakweyet, sukuŋet mente kot kunamäk menonet, omnye puryo kot kunket wule weti ci tokol nye mite menonet. 36 Oyen lakweyet ye topontekey, sukuŋet oyiku piko cepo lakweyet." Nteyu kowo kumwoy Yesu ŋalecato okoy kuwany, kuwo wokuwunynkey mente kot kukäs cek neto. 37 Nka kot kikwiy Yesu ŋalek cepo kakitat kuköse om konyekwa, ntene kipuryo kot kuyen ŋalekyi. 38 Sukuŋet kwitita kupoyit manta ŋalek ce kimwoy workoyontet Isaya kule: "Mokoryontet, ŋo nye kiyen lokoywek ce kicemwowu acek? Ci ŋo nye kiporci Mokoryontet swamenyi?" 39 Kutoyis cekto meyen om ŋalecutecu omnye kikimwoy yec Isaya kule: 40 "Kikokor Yiyintet konyekwa, oŋnkiker kasoteywek cikwa, sukuŋet mente kot kukästa konyekwa kunyo puryo kot kuwecekey kukwa wule amite ani saŋet ani osop cekto." 41 Kimwoy Isaya ŋalecutecu omnye kikikäs woyintap Yesu, kunyo kiŋolole ŋalek ce nöme neto. 42 Kuyen om yoto mpo kantoyikap Yutayek ce caŋ kucäm ŋalek cepo Yesu. Ntene omnye kiyweye Farasayek kipuryo kuŋalale kupor sukuŋet mente kot ceyete cek komo kupeti kotapkok. 43 Omnye kicöme cek kule kukastec piko kusir kakastayet nyepo Yiyintet. 44 Yoto kuŋalal Yesu kukurto om kutit nyewo kumwoy kule, "Ci ake tokol nye kacäm kuyen ŋalekwani kunye puryo kot kukacäma kuyeno ani nkit pate, ntene kukacäm kuyen neto nyo kiyokwo ani. 45 Ci ake tokol nye kakäsa ani, kukäs cicoto Yiyintet nye kiyokwo ani. 46 Kyaco ani koret kuyu lakweyet kule sukuŋet mente kot kopurune menonet ci ake tokol nye kacäma kuyeno ani. 47 Ci ake tokol nye kalim lokoywekwani oŋnkutay meyen, kupuryo kot amutyini musanku. Kipuryo kot aco kule comutyi koret musankut, ntene kyaco kule cosop koret. 48 Ci ake tokol nye katay meyen lokoywekwani, kuponto cito nyo nye mosukusutyi neto musankut. Ŋolyontemwani nye komwowu kunye mosukumutyi cicoto musankut om pesyet nyepo letut! 49 Omnye puryo kot aŋalal ani ŋalek om kamukeywekwani nkit, ntene Papamwani nyo kiyokwo nye kimwowo ŋalek ce maŋalal. 50 Kunyo oŋnket ani kule konu soponto nye mopoku ntarastinekyi, Kunyo ŋalek ce omwowu ani kuce kimwowo Papa kule mwowu."

13

1 Nteye kitompo kot kupunto pesyet nyepo sakwetap Keytayet. Yoto kunket Yesu kule kakwitita pesyenyi nye ŋete koroni kuwo wule mite Papa. Kicöme neto pikyi ce kipontokey om koret, kunyo kicäm cekto koromun okoy pesyet nyepo letut. 2 Nteyu kimite Yesu oko konomikyi kwomisyi omikap kosoleny. Kikikowut yoto Setani nyewo nyepo oyik moyetap Yuta weritap Simon Isikaryoti kule neto nye mosukuŋomnto Yesu. 3 Kinket Yesu yoto kule kakono ani Papa swamet nyepo tukuk tokol. Kinket kule kyacone wule mite Yiyintet kunyo mosowo wule mite Yiyintet. 4 Yoto kuŋete yepo meset ye kyomisye oŋnkurek sirenyi kutore tapan, oŋnkunäm towulet komotyi suwenyi. 5 Kuroŋnkyi peko pesenit oŋnkucec kowun kerenkokap konomik oŋnkupuke towulet nye kamotyi suwenyi. 6 Yoto kupun ye mite Simon Petero. Kumwoci nyo neto kule, "Mokoryontet, möce nyi iwun kerenkokwani?" 7 Kuwekyi Yesu kumwoci neto kule, "Puryo kot nketi nyi kito nye oyiye ani om yawut panta nyi, ntene mesenket om letut!" 8 Kumwoci Petero neto kule, "Puryo muci nyi kot iwun kerenkokwani mpo kisic!" Kuwekyi Yesu kumwoci kule, "Ye puryo kot owun ani kerenkokuk, kemeyiku nyi konomintemwani." 9 Kuwekyi Petero kumwoci kule, "Mokoryontet, kunyo mente owun kerenkokwani pate, wun mpo yewuniyek oko metit!" 10 Kumwoci Yesu neto kule, "Puryo kot kuroke ciwun porto nyepo ci ake tokol nye kakowunkey, omnye tilil, ntene ce möce ciwun kerenkok pate. Oyiku akwek tokol tililec toskoy cito akenke pate." 11 (Omnye kinkete Yesu cito nye wokuŋomntoy neto, sukumwoy kule, "Oyiku akwek tokol tililec toskoy cito akenke pate.") 12 Nteyu kowo kowun Yesu kerenkokwa okoy kuwany, kulac sirenyi oŋnkopur ŋony oŋnkutepe kule, "Konket akwek pa kito nye koyiwok ani? 13 Okuro ani akwek kule konetintet oko kule Mokoryontet. Po manta okuro kuyunyoto, omnye oyiku ani nyoto. 14 Kunyo ye oyiku ani Mokoryontemwoŋ oŋnkoyiku konetintemwoŋ, kunyi kowun ani yawut kerenkokwakwek, misyinok mpo akwek owuntyinikey kerenkokwok. 15 Koporwok kito nye kokäse, sukuŋet ayiy mpo akwek kuyu wulo koyiwok ani. 16 Komwowok ŋalek cepo manta kule, puryo mutworin nyewo kupël Mokoryontenyi, oŋnkupuryo kiyokin nyewo kupël cito nyo keyoku neto. 17 Kunyo ye konket ŋalecu, oponte akwek kupeyoy ye koyiyisye ŋalecutecu! 18 "Puryo kot oŋololwok ani akwek tokol, oŋnketi piko ce kyakwey, ntene misyini kwitita kupoyit manta silutekap Yiyintet ce mwowu kule, 'Cito nye kwome omikwani, kunye kiwekyokey.' 19 Komwowok ani ŋalecu kutompo kot kwiyokis, sukuŋet ye kokwiyokis oyen kule ani nye comwowu. 20 Komwowok ani akwek ŋalek cepo manta kule, ci ake tokol nye katoroc citake tokol nye koyokte ani, kukatoroca mpo ani cicoto, nto ci ake tokol nye katoroca kukatoroc cicoto Yiyintet nyo kiyokwo ani." 21 Nteyu kowo kumwoy Yesu ŋalecu kuŋerec mukuleynyi, oŋnkutor kumwoy kule, "Komwowok ani akwek ŋalek cepo manta kule, mosukuŋomnto ani cito akenke om akwek." 22 Yoto kukäskey konomik kwicek nkit, kukite koromun kule ŋolole Yesu ŋo. 23 Kimite yoto konomintet akenke nye kicöme Yesu kukepur kitiŋntokey. 24 Kuwus Petero konomintonoto oŋnkumwoci kule, "Tepe pa nyi, ŋo cito nyi ŋolole neto." 25 Kuwekyikey konomintonoto Yesu oŋnkutepe kule, "Mokoryontet, ŋo nyoto?" 26 Kuwec Yesu kumwoy kule, "Cito nyo mosokoci ani mukatyantani ye kanonoke nkuyek, kunye cito nyoto." Yoto kunonoke Yesu mukatyantet nkuyek oŋnkukoci Yuta weritap Isikaryoti. 27 Yoto pakenke yu kowo kwam Yuta mukatyantet, kowut Setani moyetap Yuta. Kumwoci Yesu neto kule, "Teyiye ne! Sorci lakwar weyiy kiye möce kule ayiy!" 28 Kipuryo mpo akenke om piko ce kipur meset nye kinket kule komwoci Yesu Yuta ŋolyo ne. 29 Omnye kiripe Yuta lolet nyepo pesanik, kusot konomik alak kule toskoy keyokto Yesu neto wokwal omik ce cemöce om sakwet, nto komwoci kusutyi pesanik pononik. 30 Yoto kunäm Yuta Mukatyantet oŋnkumiŋnto kuwo saŋ, kikikwek yoto komoy. 31 Nto om letut yu kowo kuwo Yuta, kumwoy Yesu kule, "Kociŋoŋ cipor yawut woyinto nyepo Weritap cito, kocipor woyinto, nyepo Yiyintet kupunte wule mite neto. 32 Kunyo ye kociŋoŋ cipor woyinto nyepo Yiyintet kupunte wule mite neto, kunyo Yiyintet nkit nye mosukuŋoŋ kupor woyinto nyepo Weritap cito. Mosukwiy kuyunyoto lakwar. 33 Lekokwani, komo opuri oko akwek kuloyit, mosecenya ani akwek, ntene omwowok ani akwek ŋalek co kyomwocini Yutayek kule, 'Puryo okwoni akwek wule oweti ani.' 34 Kakonok ntarastit nyelel kule, acämnkey akwek nkit, Misyini acämnkey kwakwek nkit kuyu wule ocömok ani. 35 Ye kacämnkey akwek kwakwek nkit, mosukunket ci tokol kule oyiku akwek konomikwani." 36 Kutepe Petero Yesu kule, "Mokoryontet, Mesewo nyi ono?" Kuwec Yesu kumwoy kule, "Puryo kot muci nyi yawut kot rupa wule oweti ani. Ntene meserupa om letut." 37 Kutepe Petero neto kule, "Mokoryontet, omne sumarupiŋ ani nyi yawut? Oyiku ani yiytat omeciŋ." 38 Kuwekyi Yesu kumwoci neto kule, "Yiku nyi ne yiytat manta kule omeco ani? Kumwowuŋ ani nyi ŋalek cepo manta kule, kutompo kot koncur kurkonkit mesetuckey nyi aret somok mwowu kule monketo ani."

14

1 Kumwoci Yesu acek kule, "Monte cemuye oŋnkonyeru om mukuleywekwok, oyen akwek Yiyintet, oŋnkoyeno mpo ani. 2 Mite korik ce caŋ ce mite kotap Papamwani, kunyo kowo woyiytowok otepto, nto yunye kopuryo kot kumite nto komwowok ani akwek. 3 Nteye kowo ani woyiytowok akwek otepto, moseweckey ani nkit oŋnkyokwerok, sukuŋet opurune akwek wule amite ani. 4 Oŋnket akwek aret nye weti wule oweti ani." 5 Kumwoci Tomas neto kule, "Mokoryontet, puryo kot cinket acek wule weti nyi, kunyo cimuci kulene cinket aret nye weti wuloto." 6 Kuwekyi Yesu kumwoci neto kule, "Oyiku aret, oyiku ani nyepo manta, oyiku soponto, puryo ci nye muce kuwo wule mite Papa ye manopunte wule omite ani. 7 Nto yunye kokwonketo ani akwek, nto kwonket mpo Papa, kunyo kuceke yawut kwonketo akwek, kunyo kwakäs mpo neto." 8 Kumwoci Filipo Yesu kule, "Mokoryontet, porwec acek Papa, kito nyo nye ce möce acek pate." 9 Kuwekyi Yesu kule, "Filipo, kwopur ani oko akwek tokol kuloyit oŋnkurok tompo kot nketo ani nyi? Ci ake nye kikäs ani, kukikäs cicoto Papa. Kunyo omne semwowu nyi kule 'Porwec Papa?' 10 Puryo kot ku cikwani nkit cepo kamukeywekweni ŋalek ce omwowok ani. Papa nkit nye mitowune wule amite ani nye yiyisyi yisyenyi. 11 Roke oyen akwek kule omitowune ani wule mite Papa oŋnkumitowune Papa wule amite ani. Nteye puryo kot kuyunyo, kuroke oyen om yisyonutek cu porukey nkit. 12 Komwowok ani akwek ŋalek cepo manta kule, ci ake tokol nye keyeno ani, mosukwiy cicoto yisyonutek cu oyiye ani, mosukwiy mpo yisyonutek ce woyec kupëlis omnye oweti ani wule mite Papa. 13 Mosayiy ani kiy ake tokol nye kosom akwek om kaynemwani, sukuŋet cipor woyinto nyepo Papa kupunte wule mite Werit. 14 Ye kosomo ani akwek kiy ake tokol om kaynemwani; mosayiy kiyoto." 15 "Ye kocäma ani akwek, mosorup aywey ntarastinekwani. 16 Mososom Papa kukonok kokolyoyintet ake, nyoto ku Muyet Nyetilil nyepo manta nye mosukopurune wule omite akwek okokoy. 17 Puryo kot komuce koret kutoroc neto, omnye puryo kot komuce koret kukäs oŋnkonket, ntene oŋnketi omnye purune oŋnkuminye wule omite akwek. 18 "Puryo kot opokoktok ani kwakwek nkit; mosoketukey yec wule omite akwek. 19 Komo kuköse ani koret kuwany poroyinto nye miniŋ, ntene mosakäsa ani akwek, omnye osope, kunyo mosopce mpo akwek. 20 Ye kopunto pesyonoto, mosonket akwek kule omitowune ani wule mite Papa, oŋnkumitowune akwek wule omite ani, kuyu, wulo omitowune ani wule omite akwek. 21 "Ci ake tokol nye kacäm ntarastinekwani oŋnkuywey kurip, kunye nyoto nye cömo ani, mosukucäm Papamwani nyo cömo ani, mosacäm mpo ani nyoto oŋnkoporcikey kunketo." 22 Kumwoci Yuta, (ntene puryo kot ku Isikaryoti kule,) "Mokoryontet, muci kulene porweckey acek nkit, nye puryo kot kule porcikey koret?" 23 Kuwekyi Yesu kumwoci neto kule, "Mosukucäm Papamwani ci ake tokol nye kacäm lokoywekwani, mosicekwa acek oko Papa oŋnkwocemiŋisye cicoto orit. 24 Ci ake tokol nye katay macäma ani, kupuryo kot kuyweye cicoto ŋalekwani, kunyo puryo kot ku cikwani nkit ŋalek co kwalim akwek, ntene kwone wule mite Papa nyo kiyokwo ani. 25 "Komwowok ŋalecu omnye topontekey ani oko akwek. 26 Ntene Kokolyoyintet nyoto ku Muyet Nyetilil; nye mosukukonok akwek Papamwani om Kaynemwani kunye mosukunetak akwek ŋalek tokol, oŋnkusowok oŋnket ŋalek tokol co kyomwowok. 27 "Kopokwok ani kalyet; kakonok kalyet nyimwani nkit. Puryo kot okonu kuyu wulo konuntoy koret, monte cemuye oŋnkonyeru, monte cenyokoritu. 28 Kwalim akwek omwowok ani kule, 'Mosowecikey, ntene oŋnkoketukey wule omite akwek.' Nto kwocömo ani akwek, nto kwoŋereci omnye kowo wule mite Papa, kunyo nyewo neto kupëlo ani. 29 Komwowok ani akwek yawut ŋalecu kutompo kot kwiyokis tokol, sukuŋet ye keyokis kuye oyen. 30 Komomuci toŋololwok ŋalek ce caŋ kuloyit, omnye mite kuconi nyewo nyepo koroni, ntene puryo kot kuponto kamukeywek kupayta ani. 31 Ntene möce kunket koret kule acöme ani Papa, kunyo oyiye kiy ake tokol kuyu wulo kimwowo ani neto, oŋetye cepete yu."

15

1 "Oyiku ani Sapiput nyepo manta, nto Papamwani kunye kapotintet. 2 Neto nye yeptoy saryantet ake tokol nye mite wule mite ani nye puryo kot kwiye omik, oŋnkumutyi sarisyek ce yiye omik sukuŋet kwiy omik alak ce caŋ. 3 Kunyo kicesatak akwek keny otililitu om ŋolyontet nyo kyomwowok ani. 4 Opurune wule amite ani, mosopurune mpo ani wule omite akwek. Ye puryo kot opurune akwek wule amite ani, kupuryo kot oyiye omik, kuyu wulo puryo kot kwiye saryantet omik ye puryo kot kumite wule mite Sapiput. 5 "Oyiku ani Sapiput, oyiku akwek wule po sarisyek, ci ake tokol nye kepurune wule amite ani, oŋnkopurune ani wule mite neto, mosukwiy nyoto omik ce caŋ. Omnye Puryo kot omuci akwek kot ayiy kiy ake tokol ye momite ani. 6 Ci ake tokol ye puryo kopurune wule amite ani, mosicekwetyi nyoto saŋ wokuyam kuyu saryantet nyepo ketit. Ciruruce sarisyecato oŋnkyewirci mata kuloy. 7 Ye kopurune akwek wule amite ani oŋnkopurune ŋalekwani wule omite akwek, oŋnkosom kiy ake tokol nye omöce mosonyoru kiyoto. 8 Kuyunyoto ye sicipor kutok woyinto nyepo Papamwani, kuye kayiy akwek omik ce caŋ. Om aret nye yunyitenyi kuye soyeku akwek konomikwani cepo manta. 9 Ocömok ani akwek kuyu wule cömonto ani Papa; kunyo roko opurte cömisyemwani. 10 Ye karup akwek ntarastinekwani, kuye mosopurte cömisyemwani, kuyu wule kyopurte ani aywey ntarastinek cepo Papa oŋnkopurte cömisyenyi. 11 "Komwowok ŋalecu, sukuŋet kopurune ŋerekwekwani wule omite akwek oŋnkuyitita kuyem ŋerekwekwok. 12 Ntarastimwani nye kakonok kunyi kule; ocömnkey akwek kwakwek nkit kuyu ocömntok ani akwek. 13 Cömisyet nyewo nye pëlisyi nye muce kunyor cito kuye kekoyito cito soponnyi kumeci coronutekyi. 14 Oyiku akwek coronutekwani, ye kayiy ŋalek co komwowok ani. 15 Komokurenok yec mutworik, omnye puryo kot kunket mutworinto yisyet nye yiye mokoryontenyi. Kunyo okurenok yawut coronutekwani, omnye komwowok ŋalek tokol ce kyalim kukwane wule mite Papamwani. 16 Kipuryo kot kwakwek ce kyokweyo ani, ntene ani nye kyakweyak akwek, oŋnkoyoktok kule ape wayiy omik ce caŋ, nto omik coto kuce pure okokoy. Kunyo mosukukonok Papa kiy ake tokol nye kosom akwek neto om kaynemwani. 17 Kunyo komwowok oŋnkolonwok kule, acämnkey akwek kwakwek nkit." 18 "Ye kasenkerak akwek koret kumisyini oŋnket kule kinyosyo kusenkera ani. 19 Nto kwopoye akwek koret nto kucömok akwek koret kuyu pikyi. Ntene kyakweyak ani akwek om koroni, oŋnku puryo kot opoye koret, kunyo senkerok koret. 20 Möce asot ŋalek co kyomwowok ani kule, 'Puryo mutworin nyewo kupël mokoryontenyi.' Ye kikutaŋanya ani cek, mosukutaŋanyak mpo akwek, nteye karup cekto lokoywekwani, mosukurup mpo lokoywek cikwakwek. 21 Ntene mosukwiwok akwek cekto ŋalecutecu tokol omnye oyiku akwek pikwani, omnye puryo kot kunket cekto cito nye kiyokwo ani. 22 Nto kipuryo kot aco ani coŋololyi cek, nto kupuryo koto kupunto lelis. Kunyo puryo kot kuponto yawut wule mokucililya om miyotyonikwa. 23 Ci ake tokol nye toyo ani kutoye cicoto Papamwani. 24 Nto kipuryo kot ayiy ani om wule mite cekto yisyet nye mnakwiy citake tokol kenyis, nto kipuryo kot kuponto cek lelis. Ntene kukäs cekto yisyemwani, kunyo kutaya ani oŋnkutay mpo Papamwani. 25 Misyini kwiyokis ŋalecutecu sukuŋet kwitita kupoyit manta ŋalek ce kicesil om ntarastinekwa kule, 'Kisenkera ani puc pate nye puryo ŋolyo.' 26 "Mosukuco Kokolyoyintet nyoto ku Muyet Nyetilil nyepo manta nye cone wule mite Papa. Mosoyoku ani kucone wule mite Papa mosucokuŋalal kuparta ŋalek ce nömo ani. 27 Kunyo oyiku mpo akwek muncururwanik ce moparta ani; omnye kwopur akwek oko ani kuceke ye kicece.

16

1 "Komwowok ani akwek ŋalecu sukuŋet monte kot omweyi. 2 Mosukukwetak akwek nye komo peti kotapkok, kunyo musukupunto pesyet nye sote ci ake tokol nye kapakäcak akwek kule ayiye yisyetap Yiyintet. 3 Mosukwiwok ŋalecutecu tokol omnye tompo kot kunket cekto Papa nto mpo ani. 4 Ntene komwowok ani akwek ŋalecutecu kule sukuŋet ye kopunto pesyet ye yiwok akwek cekto ŋalecutecu, yoto ye mososot oŋnket kule kyomwowok ani ŋalecu." "Kipuryo kot omwowok ani akwek ŋalecutecu ikye kunyo omnye kito cepontekey akwek. 5 Kunyo amite yawut aweti wule mite neto nyo kiyokwo ani, ntene puryo citake tokol om akwek nye mokutepena kule, 'Weti nyi ono?' 6 Kunyo konyer mukuleywekwok omnye komwowok ani ŋalecu. 7 Ntene omwowok ŋalek cepo manta kule, topon om wule omite akwek ye kawo ani, omnye ye puryo kot awo, kupuryo kot kuconi Kokolyoyintet wule omite akwek. Kunyo ye kawo ani mosuwoyoku neto kuco wule omite akwek. 8 Nteye kaco neto mosukuporci piko cepo koret kule, lelotin cekto om ŋalek ce nöme miyotyonik, oko ŋalek ce nöme cepo manta oko ce nöme musankut nye mute Yiyintet. 9 Lelotin om ŋalek cenöme miyotyonik, omnye puryo kot kuyeno ani, 10 lelotin om ŋalek cepo po manta, omnye mosowo ani wule mite Papa, kunyo komo oköso ani akwek yec. 11 Oŋnkulelotin cekto om ce nöme musankut omnye kucemutyi musankut, poytoyintet nyepo koroni. 12 "Toponte ani ŋalek ce caŋ ce amöce kule omwowok akwek, ntene mosukunyikisyok yawut ye mokesen. 13 Ntene ye kaco Muyet Nyetilil nyepo manta, kuye mosukuntowok om ŋalek tokol cepo manta. Puryo kot kuconi cokuŋalale neto ŋalek ce ceci cepo kamukeywekyi nkit, mosukuŋalale ŋalek ce lime oŋnkumwoy ŋalek ce mosukukwa. 14 Mosukulaŋnta ani kukono woyinto, omnye mosukunäm ŋalekwani oŋnkukonok akwek. 15 Cikwani tukuk tokol ce ponto Papamwani, kuyunyoto somwowok ani akwek kule, mosukunäm Muyet Nyetilil ŋalek ce kokoci ani oŋnkukonok akwek." 16 "Komo oköso ani akwek kuwany poroyinto nye miniŋ, ntene mosokäsa yec om letutap poroyinto nye miniŋ." 17 Kumwoci konomikyi alake konomikyi cut kule, "Poru ne ŋalecu? Omnye komwowec kule, 'Komo oköse ani akwek kuwany poroyinto nye miniŋ, ntene mosokäsa yec om letutap poroyinto nye miniŋ?' Oŋnkumwoy yec kule, 'Omnye mosawo ani wule mite Papa?' " 18 Yoto kutep cek kumwoy kule, "Poru ne ŋolyontoni po kule, 'Poroyinto nye miniŋ?' Puryo kot cinket acek kito nye ŋolole neto." 19 Kunket Yesu kule möce cek kutep ŋolyo. Kumwoci neto cekto kule, "Komwowu ani kule, 'Komo oköso ani akwek kuwany poroyinto nye miniŋ, ntene mosokäsa yec om letutap poroyinto nye miniŋ.' Ŋolyontonitenyi so nyi otepekey akwek nkit? 20 Komwowok ani akwek ŋalek cepo manta kule, mosorirye oŋnkoncoy, ntene mosukuŋerec koret. Mosonerekisye akwek ntene mukuweckey nerekwekwok kwek ŋerekwek. 21 Nerece korko ye karik kucämnkey lekwet, omnye kopunto sawet nye ŋete moyet ntene ye koceyi lekwet, yoto kuyutye toŋoŋutekyi omnye ŋerece kule koceyi lekwet kuco koret. 22 Kuyunyoto om wule omite akwek. Oyiku akwek nerekotin yawut, ntene mosakäsak ani akwek yec om letut. Kunyo musukuŋerec mukuleywekwok yoto, ŋerekwek coto kuce puryo kot komuce ci kot konumunenok akwek. 23 "Ye kopunto pesyonoto komo osomo ani kiy. Komwowok ani akwek ŋalek cepo manta kule, mosukukonok akwek Papa kiy ake tokol nye kosom neto om kaynemwani. 24 Okoy kupunto pesyoni tompo kot osom akwek kitake om kaynemwani. Kunyo osom mosicekonok sukuŋet kuyemak ŋerekwekwok." 25 "Komwowok ani ŋalecu oyiyisye tyonkocok, ntene mosukupunto pesyet nye komo oyiyisye tyonkocok kuyunyi; yoto mosoŋololwok oporwok topon kutok ŋalek ce nöme Papa. 26 Ye kopunto pesyonoto, mosasom akwek neto om kaynemwani, ntene puryo kot omwowu ani kule mososomwok ani Papa. 27 Omnye oyeni akwek Papa nkit. Cömok akwek neto omnye oyeno ani akwek, kunyo kwacäm akwek kule acone ani wule mite Yiyintet. 28 Kyacone ani wule mite Papa saŋet aco koret, kunyo anomeni yawut owete koret awo wule mite Papa." 29 Kumwoci konomik neto kule, "Käs pa, keŋalal yawut poru kutok nye puryo kot yiyisye tyonkocok. 30 Kocinket acek yawut kule nketi nyi tukuk tokol, kunyo puryo kot möce nyi kutepeniŋ citake teputek. Porwec acek ŋalecutecu ciyen kule kicone nyi wule mite Yiyintet." 31 Kuwekyi Yesu kumwoci cek kule, "Koyen akwek so yawut? 32 Ntene mosukupunto pesyet, kunyi kopun yawut yuteyu ye mososeretye kuwo citake tokol kanyi, mosoŋetu ani nkit pate. Ntene puryo kot oŋetu kwani nkit, omnye ce pontekey oko Papa. 33 Komwowok ani ŋalecu kule sukuŋet onyoru akwek kalyet omnye kociyomekey oko ani. Mosukutaŋanyak akwek koret, ntene otitir oyiku nyikon! Kwopël ani koret!"

17

1 Nteyu kowo kuŋalal Yesu ŋalecata okoy kuwany, kunyal torot oŋnkumwoy kule, "Papa, kopunto sawet, ilaŋnte koci Weriŋuŋ woyinto, sukuŋet Werit kulaŋntiŋ nyi. 2 Omnye kikoci nyi neto kupayta tukuk tokol, sukuŋet kukoci neto soponto nye mopoku piko tokol ce kikoci nyi neto. 3 Nto Soponto nye mopoku kunyi kule, kunketiŋ piko tokol, nyi Yiyintet nyepo manta oŋnkunket cek Yesu Kristo nyo kiyoku nyi. 4 Kwoporu ani woyinŋuŋ om koret. Kwawany yisyet nyo kikono ayiy. 5 Ayi Papa! Kono yawut woyinto om tayŋuŋ, woyinto nyoto kunyo kyoponte ani oko nyi kutompo kot citany koret. 6 "Kwapartiŋ ani nyi om wule mite piko co kikono om koret, cekuk picoto, nyi nye kikono ani cekto, kunyo kurip cekto ŋolyonteŋuŋ. 7 Kukunket cekto yawut kule cone wule mite nyi kiy ake tokol nye kikono ani nyi. 8 Omnye kwomwoci lokoywek ce kikono ani nyi, kunyo kunäm cekto ŋalecato oŋnkunket kupoyit manta kule ocone ani wule mite nyi, oŋnkuyen kule nyi nye kiyokwo ani. 9 "Osomncini ani cekto. Ntene puryo kot osomncini koret, osomncini piko co kikono ani nyi, omnye cekuk pico. 10 Cekuk tukuk tokol ce oponte ani oŋnkucikwani tukuk tokol ce ponte nyi, kunyo ciporu woyinmwani kupunte wule mite cekto. 11 Omite yawut aconi wule mite nyi; komo minye ani koret, ntene tokuminye cek koret. Ayi Papa Nyetilil! Rip cekto topon om swametap kayneŋuŋ, kaynet nyoto kunyo kikono ani nyi sukuŋet kwek akenke cekto kuyu wulo ciku acek akenke oko nyi. 12 Kworip cek, kunyo monopot mpo akenke, tos pate cito nyo kicinket kule mosukupot sukuŋet kwitita kupoyit manta silutekap Yiyintet. 13 Kunyo amite ani yawut aconi wule mite nyi. Komwowu ŋalecu om koret sukuŋet kunyor cekto ŋerekwekwani ce kayem mukuleywekwa. 14 Kwomwoci cekto lokoywekuk; kunyo toye koret cekto, omnye puryo kot kupo koret kuyu wulo puryo kot opoye mpo ani koret. 15 Puryo kot osomiŋ kule sut kupete koret, ntene osome kule rip cekto om wule mite Nyo Miyat. 16 Puryo kot kupo cekto koret, kuyu wulo puryo kot opoye ani koret. 17 Wec cek kwek cekuk om aret nyepo manta. Ŋolyonteŋuŋ kunye po manta. 18 Koyokte ani cek kupa koret kuyu wulo kiyokwo ani nyi aco koret. 19 Okonukey ani wule mite nyi om kaynemwacek, sukuŋet mpecek kwek pikuk cepo manta. 20 "Puryo kot osomncini ani cek nkit pate, ntene osomncini mpo piko alake co yeno ani, omnye kalim lokoywek cikwa. 21 Osome kule kuyomekey cek tokol kwek akenke. Ayi Papa! Kante kopurune cekto wule cemitowune acek kuyu wulo mitowune nyi wule omite ani oŋnkomitowune ani wule mite nyi. Kante kwek cek akenke sukuŋet kuyen koret kule nyi nye kiyokwo ani. 22 Kokoci ani cek woyinto nye kerkey oko nyo kikono ani nyi, kule sukuŋet kwek akenke, kuyu wule ciku acek akenke oko nyi. 23 Opurune ani wule mite cek oŋnkipurune nyi wule omite ani, sukuŋet cek kukwilokis kwek akenke, sukuŋet kunket koret kule nyi nye kiyokwo ani oŋnkunket kule cöme nyi cekto kuyu wulo cömnto ani nyi. 24 "Ayi Papa! Kikono ani nyi cek, kunyo amöce kule kopurune cek wule omitowune ani, sukuŋet kukäs woyinmwani, woyinto nyoto kunyo kikono ani nyi, omnye kicäma ani nyi kutompo kot citany koret. 25 Ayi Papa nyepo manta! Puryo kot konketiŋ koret, ntene oŋnketiŋ ani nyi oŋnkunketiŋ picu kule nyi nye kiyokwo ani. 26 Kwoporci kunketiŋ nyi, kunyo mosotosyikey ayiy kuyunyoto sukuŋet kopurune wule mite cekto cömisyet nye ponte nyi om wule omite ani, oŋnkopurune ani wule mite cekto."

18

1 Nteyu kowo kuŋalal Yesu ŋalecutecu okoy kuwany, kunomen oko konomikyi kupa kway roroŋtitap Ketron. Kimite wuloto mparet, yoto kuwo Yesu oko konomikyi okoy mparanato orit. 2 Kinket ŋomntoyintet Yuta mparanato, omnye kituytos Yesu oko konomikyi wuloto om pesyosyek alak ce caŋ. 3 Yoto kuwo Yuta okoy mparanato, kukwer neto luket nyepo sikarek oko piko ce ripe kotap Yiyintet ce kiyoktoy tisik cewoyec oko Farasayek. Kiponto picoto karikap poryet oko nomoryek oko tarinek. 4 Kinket Yesu kiy ake tokol nye mokwiyakäy om wule mite neto; yoto kuco tay oŋnkutepe kule, "Ocenye akwek ŋo?" 5 Kuwekyi cek neto kule, "Cecenye Yesu nyepo Nasaret." Kumwoci Yesu cek kule, "Ani nyoto." Kimite ŋomntoyintet Yuta kukeyo ye mite cek. 6 Ntowo kumwoy Yesu kule, "Ani nyoto," kunata cek kupa let oŋnkuruyi ŋony. 7 Kutepe Yesu cekto yec kule, "Ocenye akwek ŋo?" Kumwoy cek kule, "Cecenye Yesu nyepo Nasaret" 8 Kumwoy Yesu kule, "Komwowok ani akwek kule, Ani nyoto! Kunyo ye ocenye ani akwek, ayaste picu alak kupecikey." 9 (Kimwoy Yesu ŋalecu sukuŋet kwitita kupoyit manta ŋalek ce kikimwoy kule, "Papa, puryo kot kupote mpo akenke om piko tokol co kikono ani nyi.") 10 Kucut Simon Petero rotwetap cok nye kiponto oŋnkuyep kulot yititap tay nyepo mutworintetap Tisintet nyewo. Kicekure kaynetap mutworintono Malko. 11 Kumwoci Yesu Petero kule, "Ketyi rotwetap cok kirarwet, soti nyi kule puryo kot omuci ani opunte toŋoŋutek ce möce Papamwani kule opunte ani?" 12 Kukwa luket nyepo sikarek oko nyewo nyimwa oko sikarek cepo Yutayek, oŋnkunäm cek Yesu oŋnkurat, 13 oŋnkunyosye kukwer wule mite Anas. Anas kunye ki pontetap pikoy nyepo Kayafa nye ki Tisintet nyewo om kenyinoto. 14 Kayafa kunyo kikocini Yutayek ŋomnonet kule topon ye kumeci cito akenke piko tokol. 15 Kurup Simon Petero oko konomintet nyin ake Yesu let. Kinkete topon Tisintet nyewo konomintet nyin ake. Yoto kowo nyo oko Yesu okoy kowut saŋnta nyepo kaytap Tisintet nyewo. 16 Kuyoŋe Petero kayta saŋ om yepo kurket. Yoto kuketitakey konomintet nyo kinkete Tisintet nyewo kuwo saŋ oŋnkuwokuŋololyi cepto nye ripe kurket, oŋnkukwer Petero kuco orit. 17 Kumwoci cepoto kimite kurket Petero kule, "Puryo kot yiku nyi ne konomintetap cici?" Kuwec Petero kumwoy kule, "Puryo kot kwani nyo." 18 Omnye kikaytit koret, yoto kulay mutworik oko sikarek mata nyepo nesek oŋnkuyoŋ komut kuyuye cek mata. Kuwo mpene Petero wo kuyu mata. 19 Kutepe Tisintet nyewo Yesu ŋalek ce nöme konomikyi oko ŋalek ce nöme konetisyenyi. 20 Kowekyi Yesu kumwoci neto kule, "Kwoŋololi ani okokoy oporu kutok om wule mite ci tokol. Kwonetisye ŋalekwani korikapkok oko kotap Yiyintet wule rurukyinikey Yutayek tokol. Monaŋalale ani ŋolyo nye wuŋat mpo kisic. 21 Kunyo omne setepena ani nyi? Tepe pate piko ce kulime ŋalek ce kwomwowu. Nkete ŋalek ce kwomwocini. Tepe kumwowuŋ." 22 Ntowo kumwoy yesu ŋalecato, kusyec sikorintet nye kikiyoŋe ye lekite neto, oŋnkumwoy kule, "Muci nyi kulene ŋololyi Tisintet nyewo kuyunyo?" 23 Kuwekyi Yesu kumwoci neto kule, "Ye komwowu ŋolyo nye lelat, mwoci pa nyi ci tokol nye mite yu lelisoto. Ntene ye opoye manta om ŋalek ce komwowu, omne sesyeca ani nyi?" 24 Yoto Kukoyito Anas cekwer Yesu kuratat kuwo wule mite Kayafa Tisintet nyewo. 25 Kimite Petero yoto kukeyo kutokuyuye mata. Yoto kumwoci piko alake neto kule, "Puryo kot yiku nyi ne konomintetap cici?" Kutuckey Petero kumwoy kule, "Puryo kot kwani nyo." 26 Yoto kuŋalal mutworintet nyepo Tisintet nyewo nye kipo aretap mpo cito nyo koyepe Petero kulot yitit kumwoy kule, "Kopuryo kot akäsiŋ ani nyi ne pontekey cici om mparen?" 27 Kutuckey Petero yec kutoyis, yoto pakenke koncur kurkonkit. 28 Kukwer cek Yesu kuwete kotap Kayafa okoy kaytap kotap Poytoyintet. Kimite yoto kerir koret pate. Kutay Yutayek nkit mewut kaytap Poytoyintet omnye kimöce kule ceripkey mente celelokisye sukuŋet kwam sakwetap Keytayet. 29 Yoto kuco Pilato saŋ kutorok cek oŋnkutepe kule, "Owosontyini akwek cici om ŋolyo ne?" 30 Kuwekyi cek kumwoci neto kule, "Nto yunye kopuryo kot kwiy cici lelis nye miyat nto kopuryo kot cimuci acek kot cekweru kuco wule mite nyi." 31 Kumwoci Pilato cek kule, "Okwer wowosontyi akwek nkit neto kuyu wulo yunto ntarastinekwok." Kuwec Yutayek kumwoci kule, "Puryo kot ce cömwec acek cepakäc ci." 32 (Kikwiyokis ŋalecutecu sukuŋet kwitita kupoyit manta ŋalek ce kikimwoy Yesu ce nöme menyi wule mokumeta) 33 Kuketitakey Pilato kuwo konyi orit oŋnkukur Yesu. Oŋnkutepe kule, "Yiku nyi Kinko nyepo Yutayek?" 34 Kuwekyi Yesu kumwoci kule, "Tepe ŋolyontoni kwinyi nkit nto kumwowuŋ piko alake ŋalek ce nöme ani?" 35 Kuwekyi Pilato kumwoci neto kule, "Soti nyi kule oyiku ani Yutoyin? Pikuk oko tisikwok cewoyec ce kokweruŋ nyi wuli omite ani, kweyiy ne nyi?" 36 Kumwoy Yesu kule, "Puryo kot kupo poytoyisyemwani koroni, nto koyunye kupo poytoyisyemwani koroni, nto kuportos konomikwani kuyeta mente kunäma Yutayek, kunyo puryo kot kupo poytoyisyet nyimwani koroni!" 37 Yoto kutepe Pilato Yesu kule, "Kunyo yiku nyi so Kinko?" Kuwekyi Yesu kumwoci neto kule, "Nyi nye kemwowu kule oyiku ani Kinko, kiceyo ani oŋnkoco koret om ŋolyontonitenyi akenke, saŋet aŋalal ŋalek cepo manta, nto ci ake tokol nyepo manta kunye lime ŋalekwani." 38 Kutep Pilato kumwoy kule, "Ŋalek cepo manta ku kiy ne?" Yoto kuco Pilato saŋ wule mite Yutayek oŋnkumwoci cek kule, "Mananyorte ani cici lelis nye momutyine musanku. 39 Ntene oponte akwek kwak kopurto nye otyokwok ani mopusyontet akenke ye pesyet nyepo sakwetap Keytayet. Omöce akwek kule otyokwok ani kinko nyepo Yutayek?" 40 Kuwekyi cek kupol kumwoy kule, "Puryo kot kunyo, cemöce Parapa!" Parapa kunye cito nye kicorin.

19

1 Yoto kukoyito Pilato Yesu wocepas korokonik. 2 Kutä sikarek kutwet nyepo kotok oŋnkukoci metitap Yesu, oŋnkulokyi cek neto siret nye mur kwarar, 3 oŋnkukwa ye kimite kwokumwoci kule, "Ilaŋnte sop okokoy Kinko nyepo Yutayek!" Oŋnkusyec cek Yesu. 4 Kuco Pilato yec saŋ oŋnkumwoci Yutayek kule, "Akäs pa, mosokweru neto kuco saŋ yu mite akwek sukuŋet akäs akwek kule mananyorta ani neto lelis nye momutyine musanku." 5 Yoto kuco Yesu saŋ kukelac kutwetap kotok oko siret nye mur kwarar. Kumwoci Pilato cek kule, "Akäs pa oŋyi cito!" 6 Nteye kotokäse tisik cewoyec oko sikarek Yesu, kupol cek kumwoy kule, "Owuyite! Owuyite neto owuyitoci murtowontet" Kumwoci Pilato cek kule, "Akwer akwek nkit wowuyite; omnye mananyorte ani neto lelis nye momutyine musanku!" 7 Kuwekyi Yutayek kumwoci Pilato, "Ceponte acek ntarastit, nto wule yunto ntarastinato, kumisyini kume neto omnye sutekey kule oyiku Weritap Yiyintet." 8 Ntowo kulim Pilato kumwowu cek kuyunyoto, kutosyikey kumuy yec koromun. 9 Kuketitakey kuwo kanyi orit oŋnkumwoci Yesu kule, "Cone nyi kor ne!" Ntene kutay Yesu mowekyi ŋolyo. 10 Kumwoci Pilato neto kule, "Meŋololwo ani nyi so? Nketi nyi kule oponte kamukeywek ce omuci atyaktiŋ nyi, oŋnkoponte kamukeywek ce omuci owuyitociŋ murtowntet?" 11 Kuwekyi Yesu kumwoci neto kule, "Ponte nyi pate kamukeywek om wule omite ani omnye kikoniŋ Yiyintet. Kunyo cito nyo kukwerwo ani aco wule mite nyi kunye ponto nyoto miyotyet nyewo kupëlis." 12 Ntowo kulim Pilato ŋalecato, kutosyikey kusyem kule atyakte Yesu, ntene kupol, Yutayek kumwoy kule, "Ye ketyakte nyi neto, kuporkey kule puryo kot yiku nyi corwetap Kinko Nyewo! Kunyo ci ake tokol nye sutekey kule oyiku Kinko Nyewo kunye tintentyini Kinko Nyewo!" 13 Nteye kotolime Pilato ŋalecato, kukwer Yesu kuwo saŋ, oŋnkopure ŋeceretap kokwet nye cemüte musankunek om otepto nye cekure, "Rwantet nye laŋntat." (Nye cekure om ŋelyeptap Puraniyek "Kapasa.") 14 Kimite yoto sawet kakeyte pet kwen nye ntoyekune kwek pesyetap Keytayet. Kumwoci Pilato Yutayek kule, "Akäs pa Kinko nyimwoŋ" 15 Kupol Yutayek kumwoy kule, Apakäc nyo! "Apakäc nyo! Wuyitoci Murtowontet!" Kutepe Pilato cekto kule, "Omöce akwek so kule owuytoci ani murtowontet Kinko nyimwoŋ?" Kuwec tisik cewoyec kumwoy kule, "Kinko nye ceponte acek ku Kinko nyewo pate." 16 Yoto kukoci Pilato cek Yesu wocewuyitoci murtowontet. Yoto kukwer sikarek Yesu, 17 kuwo neto kukonopoti murtowontenyi nkit okoy ye cekure, "Rokyetap Metit." Ye cekure om ŋelyeptap, Puraniyek "Kolokosa." 18 Cewuyitoci neto murtowontet om wuloto oko piko alak oyeny, kopurune ake tapan oko tapan kumite Yesu kwenut. 19 Kusil Pilato ŋalek oŋnkukoci cikemer murtowontet parak nye kisil kule, "Yesu nyepo Nasaret Kinko nyepo Yutayek." 20 Kusuman Yutayek ce caŋ ŋalecato omnye kilekite yepo moŋet yoto kicewuyite Yesu, kunyo kicesil ŋalecato om ŋelyeptap Puraniyek, oko nyepo Romek, oko nyepo Kirikik. 21 Kumwoci tisik cewoyec cepo Yutayek Pilato kule, "Mente osil kule, 'Kinko nyepo Yutayek.' Ntene sil kule 'Kimwoy cici kule oyiku Kinko nyepo Yutayek!' " 22 Kuwekyi Pilato kumwoci cek kule, "Ce kosil ani, kuce kosil." 23 Nto om letut yu kowo kuwuyitoci sikarek Yesu murtowontet, kunäm cek sirokyi oŋnkupeciwune wok amwan, kusut sikorintet akenke akenke, kunäm cekto mpo kansunyi nye kisiret akenke nye puryo wule kicenap cituye ntene nye kicenap kucone met okoy kel. 24 Kurwoc sikarek kwicek nkit kumwocin kule, "Monte cepac, ntene cepirci kirot sicekäs ŋo nye mokusut." Kikwiyokis ŋaleca kuyunyoto sukuŋet kwitita kupoyit manta silutekap Yiyintet ce mwowu kule, "Kipcicin cek sirokwani kwicek nkit, oŋnkuporci kirot siremwani." Yoto kwiy sikarek kuyunyoto. 25 Kimite kukeyoŋe yoto ye kilekit murtowontet mpo kametitap Yesu oko cekwametitap kamet nye cekure Mariyam korketap Kiloypa oko Mariyam nyepo koretap Maktala. 26 Yoto kukäs Yesu kamet oko konomintet nyo kicöme neto kumite kukeyoŋ ye lekite kamet. Kumwoci Yesu kamet kule, "Cepyos, oŋyo weriŋuŋ!" 27 Oŋkumwoci konomintonoto kule, "Oŋyo komet." Kuceke yoto pakenke kukwer konomintonoto kametitap Yesu kuwo kanyi. 28 Kunket Yesu yoto kule kaciwany kiy ake tokol, sukuŋet kwitita kupoyit manta silutekap Yiyintet. Kumwoy Yesu kule, "Kakwama ani melelya!" 29 Kimite kokitore yoto pokulit nye nyitat finyonik ce mintililec. Kowute cek cankut orit oŋnkurutyi ketit nye mwa koromun nye cekure isop oŋnkukoci yepo kutinyi. 30 Kuye Yesu finyonik oŋnkumwoy kule, "Kapok!" Yoto kolulyo metinyi oŋnkume. 31 Yoto kusom Yutayek Pilato kule kucömnci cekto kwiri kerenkokap piko co kocewuyitoy oŋnkurek muswek kukwane murtowonik. Kikwiy cek kuyunyoto omnye kipesyetap müt kunyo kipuryo kot kumöce cek kule kopur muswek murtowonik okoy pesyetap Sapat. Omnye kipesyo nyewo nyetilil koromun pesyetap Sapat nyoto kiconi. 32 Yoto kupa sikarek wokwiri kerenkokap piko ce kicepoköce oko Yesu. Kunyosye nyepo tay ntekere nyepo let. 33 Ntene yu kowo kupun ye mite Yesu kwokunyor kame keny kipuryo kot kwiri cek yoto kerenkokyi. 34 Ntene kupar sikorintet ake Yesu kupare ŋotit karasta, yoto kukwa korotik oko peko. 35 Cito nye kiköse kwiyoktos ŋalecu kunyi ŋolole. Cinket acek kule mwowu neto ŋalek cepo manta oŋnkunket mpene nkit kule oŋololi ŋalek cepo manta sukuŋet oyen mpo akwek. 36 Kikwiyokis ŋalecu sukuŋet kwitita kipoyit manta silutekap Yiyintet ce mwowu kule, "Puryo kot cirye kowenyi mpo akenke." 37 Kumite yec silutekap Yiyintet nye mwowu kule, "Mosakukäs piko cito nyo kipore neto". 38 Nto om letutap ŋalecato. Yoto Yosep nyepo moŋetap Arimaseya, nye kikonomintetap Yesu nye kiwunyekey omnye kiyweye Yutayek. Kusom neto Pilato kukoci portap Yesu. Kucömnci Pilato neto. Yoto kuwo wokusut portap Yesu. 39 Kuco mpene Nikontemo nyo kiweti pesyet ake komoy wule mite Yesu. Kusut neto mwayta nye poŋu topon nye kipo kilonok konom nye kicilinyo oko mwaninek alak ce cekure mira oko alosik. 40 Kunäm picoto kwoyeny portap Yesu kurek oŋnkurate sirok ce cemuytoy oŋnkuyile mwayta, omnye kikwiye Yutayek kuyunyoto ye mocemuy musyontet. 41 Kimite ye kilekite yoto kicepokokyini Yesu mparet nye kimite yoto mwenet nye kitompo kot cemuci ci mpo akenke. 42 Kunyo kipesyet nyoto nye ntoyekune kwek pesyetap Sapat nyepo Yutayek oko omnye kilekite yoto mwenet, kumuci cekto Yesu yoto.

20

1 Nteye ki pesyetap Santey, nye kerir koret pate nye tokutuy, kuwo Mariyam nyepo Maktala wule mite mwenet. Yoto wokukäs kule kocinum rwantet kucone kurket nyepo mwenet. 2 Kunomen yoto kukony mweyek okoy wule mite Simon Petero oko konomintet nyin ake, nyoto kunyo kucöme Yesu neto oŋnkumwoci kule. "Kocinum Mokoryontet kucone mwenet. Kunyo mocinket wule kocitore neto." 3 Kunomen yoto Petero oko konomintet nyin ake kupa okoy wule mite mwenet. 4 Kukony cekto tukway, ntene kukony konomintet nyin ake kusirte Petero okoy wokunyosyo yepo mwenet. 5 Nteyu kowo kuyim kukoyto mwenet, kukäs yoto suket nyo kucerate, ntene kipuryo kot kowut orit. 6 Yoto kupun mpene Petero nye kirupu let, oŋnkoco kowut mwenet orit. Kukäs suket nye mite ŋony, 7 oko tamparit nyo kucerate metitap Yesu nye kipuryo kot kupontokey tukway, ntene kiciriny nye mite yeto nyenyi nkit. 8 Kowut mpene konomintet nyo konyosyi kupunto mwenet, kukäs oŋnkuyen kucämnta. 9 (Kipuryo kot kusow cekto yoto kunket silutekap Yiyintet ce mwowu kule misyini kotutune met neto.) 10 Yoto kunomen konomik kuketitakey kupa ka. 11 Kimite Mariyam kukeyoŋe yepo mwenet saŋ oŋnukurire. Nteye kimite kurire kuyim kukoyito mwenet. 12 Yoto kukäs neto malaykanik oyeny ce kelac sirok ce lelac ce kepur yo kucemucini portap Yesu. Kiyoŋe ake ye kipo metit kuyoŋe ake ye kipo kerenkok. 13 Kutepe malaykanicoto neto kule, "Cepyos! Keririci ne?" Kuwec kumwoy kule, "Kocinum Mokoryontenyu kunyo monketi wule kucitore!" 14 Kuweckey Mariyam yoto kukäs let okoy kukäs Yesu nye keyo, ntene kipuryo kot konket kule Yesu. 15 Kutepe Yesu neto kule, "Cepyos! Keririci ne?" Kisote Mariyam kule cito nye ripe mparet, kumwoci kule, "Nyewo! Ye nyito nye kwenumu osomiŋ porwo ye kwetore saŋet ani wonumu." 16 Kuŋololyi Yesu neto kukur kaynet kule, "Mariyam." Yoto kuwekyikey Mariyam kukäs Yesu oŋnkumwoci om ŋelyeptap Puraniyek kule, "Rapponi!" Nye poru kaynana kule, "Konetintet." 17 Kumwoci Yesu kule, "Mente anäma ani kutompo awo torot wule mite Papa, ntene iwo wule mite mpo yeya mwani wemwoci kule amite ani owete oloŋntoy wule mite Papa mwani oŋnku Papa mwakwek." 18 Yoto kunomen Mariyam nyepo Maktala wokumwoci konomik kule kokäs neto Mokoryontet oŋnkurorci ŋalek ce kokomwoci Yesu neto. 19 Nto om pesyonoto santey komoy, kimite yoto konomik kukokorurukyikey koto orit, oŋnkukerotin kurkotik omnye kimuye poytoyikap Yutayek. Yoto kuco Yesu oŋnkuyoŋe kwenumwacek oŋnkumwoci kule, "Opurte akwek kalyet." 20 Nteyu kowo kumwoci coto, kuporci yewuniyekyi oko karasta nyenyi. Kuŋerec yoto konomik koromun yu kowokukäs cekto Mokoryontet. 21 Kumwoci Yesu yec cekto kule, "Opurte akwek kalyet! Kuyu wolo kiyokwo ani Papa, kunyo oyoktok mpo ani akwek." 22 Nteyu kowo kumwoy ŋalecato, komuŋnkyi neto cekto Muyet Nyetilil, kumwoci kule, "Onyoru Muyet Nyetilil, 23 Ye kokalye akwek piko miyotyonik, mosicikalya. Nteye puryo kot okalye akwek piko miyotyonik kupuryo kot cikolyoy." 24 Kipuryo kot kumite akenke om konomik nye cekure Tomas-Soromin, yo kiconi Yesu. 25 Yoto kumwoci konomik cut alake neto kule, "Kucekäs acek Mokoryontet!" Kumwoci Tomas cekto kule, "Puryo kot oyeni ani mpo kisic okoy ye kakäs momitek cepo musumarisyek om yewuniyekyi oŋnkanäme yewuniyekwani momitecoto oko koroswekyi." 26 Nto letutap pesyosyek sisit. Ye kimite konomik koto orit, kupontokey cekto yoto Tomas. Kukerotin kurkotik. Ntene kuco Yesu oŋnkuyoŋe kwenumwacek, oŋnkumwoy kule, "Opurte akwek kalyet." 27 Kumwoci Yesu yoto Tomas kule, "Sutu pa morneŋuŋ kuco yu, käs yewuniyekwani, mente aŋuny pate, ntene yen cämnte pate." 28 Kuwec Tomas kumwoy kule, "Mokoryontenyu, oŋnku Yiyintenyu!" 29 Kumwoci Yesu neto kule, "Keyen nyi so omnye kekäs ani? Ponto kupeyoy ce keyen kucömis kutompo kot kukäs!" 30 Kwiy Yesu tukuk cepo kakitat alak om taytap konomikyi, coto kuce puryo kot cesil kitapuni. 31 Ntene kicesil cutecu sukuŋet cämnte nyi kule Yesu kunye Ŋapanet, Weritap Yiyintet nto om koyenet om wule mite neto, kuye nyoru soponto om kaynenyi.

21

1 Nto om letutap ŋalecutecu, kuporcikey Yesu nkit yec konomikyi om tampayayetap Tiperia. Kiporcikey neto cekto kuyunyi kule. 2 Kimite yoto kupontokey wanak konomikyi Simon Petero, oko Tomas soromin, oko Nasanael ŋyepo Kana om koretap Kalilaya, oko werikap Sepetayo oko konomikyi alak oyeny. 3 Kumwoci Simon Petero konomik tokol cut alak kule, "Mawo ani wanäm purpurunek." Kumwoci cut neto kule, "Mocepetekey tokol oko nyi." Yoto kupa cek oŋnkuwokulany rapet, ntene kipuryo kot kunäm cek kiy mpo akenke om komowunoto tokol. 4 Nto kerir koret pate, kuyoŋe Yesu tampayayet tapan, nye kipuryo kot konket konomik kule Yesu nyoto. 5 Kumwoci Yesu cek kule, "Lekocu monanäm akwek kiy." Kuwekyi cek kumwoci kule, "Monacenäm kiy." 6 Kumwoci Yesu cekto kule, "Owirci porokwok yewutap tay nyepo rapet mosonäm alak." Yoto kuwirci cek porok peko, ntopere cicutu kocut kot kutiŋ omnye kikinäm purpurunek ce caŋ koromun. 7 Kumwoci konomintet nyo kicöme Yesu Petero kule, "Mokoryontet nyitenyi!" Nteye kotolime Petero kule, koko Mokoryontet nyitenyi kwisunekey sirenyi nyepo saŋ (omnye kikikorek sirokyi oŋnkurontyi peko orit.) 8 Kukwane konomik cut alake rapet okoy kupun tampayayet tapan kocutonu porok ce kanyiy Purpurunek. Kipuryo kot kuloyec cekto kuceke yoto okoy cepunte koret, ntene kupuntoy kakwoyutek pokol akenke. 9 Ntowo kupun cek tampayayet tapan kukäs mata nyepo nesek oko purpurunek ce kacewatan oko mukatinek. 10 Kumwoci Yesu cek kule, "Osutu pa purpurunek alak co kotonöme akwek pantenyi." 11 Kuwo Simon okoy yepo rapet oŋnkucut porok ce kanyiy purpurunek cewoyec okoy kupun tampayayet tapan, kipuntoy Purpurunek tokol pokol akenke oko konom ok somok. Nka kot kicaŋ rupurunek ntene kipuryo kot kuŋetyo porok. 12 Kumwoci Yesu cek kule, "Akwa kwoyomisye." Kipuryo mpo akenke om konomik nye kisyem kutepe neto kule, "Nyi ŋo?" Omnye kinket cek kule Mokoryontet nyitenyi. 13 Kuwo Yesu oŋnkonum mukatyantet oŋnkukoci cek oŋnkukoci mpo Purpurunek kuyunyoto. 14 Kunyo aret nyepo somok nyitenyi kuporcikey Yesu konomik om letut yu kowo ciŋet kotutune met. 15 Nto letut yu kowo kwomis cekto, kumwoci Yesu Petero kule, "Simon weritap Yowana, cömo ani nyi kusir alak cu?" Kuwekyi Petero kumwoci neto kule, "Mokoryontet, yunyoto nyi nye nketi kule ocömiŋ ani." Kumwoci Yesu neto kule, "Rip kecirekwani." 16 Kumwoci Yesu yec Petero kule, "Simon weritap Yowana, cömo ani nyi?" Kuwekyi Petero kumwoci kule, "Mokoryontet yunyoto nyi nye nketi kule ocömiŋ ani nyi." Kumwoci Yesu neto kule, "Rip kecirekwani." 17 Kumwoci Yesu Petero yec nyepo somok kule, "Simon weritap Yowana, cömo ani nyi?" Yoto kunyer Petero omnye katepe Yesu neto nyepo somok kule, "Cömo ani nyi?" Oŋnkumwoci kule, "Mokoryontet nyi nye nketi ŋalek tokol kule ocömiŋ ani nyi." Kumwoci Yesu neto kule, "Rip kecirekwani. 18 Komwowuŋ ani nyi ŋalek cepo manta kule, ye kiyiku nyi lekwa, kirotekey nkit oŋnkunomen iwo wolyo ake tokol wule möce, ntene ye keyositu, meseyite yewuniyekuk oŋnkurateniŋ citake misipit oŋnkukweriŋ wule memöce." 19 (Kimwoy Yesu ŋalecutecu kupor met wule mosukumeta Petero sukuŋet kusut woyinto om wule mite Yiyintet.) Yoto kumwoci Yesu neto kule, "Rupa ani." 20 Kuweckey Petero kukäs let, yoto kukäs konomintet nyin ake nyo kicöme Yesu kumite letunyi. Konomintet nyoto kunyo kutiŋntoykey oko Yesu ye kyomisyi cek komoy oŋnkunyoto kunyo kitepe neto Yesu kule, "Mokoryontet, ŋo nye mosukuŋomntiŋ, nyi?" 21 Nteye kotoköse Petero konomintet nyoto. Kumwoci neto Yesu kule, "Mokoryontet, nto nyi," 22 Kuwekyi Yesu kumwoci neto kule, "Ye omöce ani kule kusop neto, okokoy, kunömiŋ nyi coto? Rupa ani nyi pate." 23 Yoto kutisto ŋolyontono om wule mite konomik kule puryo kot kume konomintonoto. Ntene kipuryo kot kumwoy Yesu kule puryo kot kume neto, kimwoy pate kule, "Ye omöce ani kule kusop, okokoy aweckey ani, kunömiŋ nyi coto?" 24 Konomintonoto kunye neto nyi poru ŋalecu, oŋnku neto nye kisile ŋalecu, kunyo cinket acek neto, kimwoy ŋalek cepo manta. 25 Kunyo mite ŋalek alak ce caŋ ce kikwiy Yesu. Ce nto kocesil ŋolyo ake tokol nye kikwiy, asoti ani kule nto puryo kot komuce koret kukonor kitapunek ce kocesil.