Johannes 1

Ondjovo yaalushe tai ningi omunhu

1 Pehovelo opa li Ondjovo, nOndjovo oya kala puKalunga, nOndjovo ei oya li Kalunga. 2 Oye okwa kala pehovelo puKalunga. 3 Aishe oya shitwa kuye, ndele kape na nande oshinima shimwe sha shitwa, eshi inashi shitwa muye. 4 Muye omwa kala omwenyo, nomwenyo owa kala ouyelele wovanhu. 5 Nouyelele tau minikile momulaulu, nomulaulu inau likwata nao. 6 Opwa li omunhu a tumwa kuKalunga, edina laye Johannes. 7 Ou okwe uya okuhepaulula, a hepaulule ouyelele ou, opo aveshe va itavelifwe kuye. 8 Ndele haye kwa li ouyelele, ndelenee okwe uya a hepaulule ouyelele. 9 Ouyelele ou washili, hau minikile omunhu keshe, wa hangika tau uya mounyuni. 10 Oye okwa kala mounyuni, nounyuni owa shitwa kuye, nounyuni inau mu dimbulukwa. 11 Ye okwe uya kovambulavo, ndele ava vokombulavo inave mu tambula. 12 Ndelenee aveshe ava ve mu tambula, okwe va pa eenghono, va ninge ovana vaKalunga, ava hava itavele edina laye. 13 Ovo inava dalwa mohonde, ile mehalo lombelela, ile mehalo lomulumenhu, ndelenee omuKalunga. 14 Nondjovo ya ninga omunhu. Ye okwa kala mokati ketu, ndele fye twa tala oshinge shaye, oshinge tuu osho shEwifa laxe, okwa yada efilonghenda noshili. 15 Johannes okwe mu hepaulula nokwa ingida, ta ti: “Oye tuu ou nde mu tonga nda tile: ‘ou te uya konima yange, ye okwa li komesho yange, osheshi Ye opo a li, fimbo ame ndiha li po.’ ” 16 Nomouyadi waye ofyeni atusheni twa tambula mo, efilonghenda la wedelwa kefilonghenda. 17 Osheshi omhango ya yandjwa kuMoses; efilonghenda noshili olo la etwa kuJesus Kristus. 18 Kape na ou a mona Kalunga nande; Ewifa olo la kala mekolo laXe, olo le mu holola.

Ehepaululo lotete laJohannes Omushashi

19 Ehepaululo laJohannes oleli, Ovajuda eshi va tuma kuye ovapristeli nOvalevi vomuJerusalem ve mu pule: “Oove lyelye?” 20 Ndele ye okwa hepaulula, ine likala, ndele ta ti: “Ame haame Kristus.” 21 Ndele vo ve mu pula: “Oove lyelye hano? Oove Elia?” Ye okwa tya: “Haame ou.” “Oove omuxunganeki winya?” Ye okwa tya: “Ahowe.” 22 Opo vo va tya kuye: “Oove lyelye hano, tu ka twale enyamukulo kwaava ve tu tuma. Ove mwene oto litile ngahelipi?” 23 Ye okwa tya: “Aame ondaka yomwiingidi mombuwa: ‘Yelakanifileni Omwene ondjila, ngaashi omuxunganeki Jesaja a tile.’ ” 24 Ndele ava va tumwa ovo vomOvafarisai. 25 Ndele vo ove mu pula tava ti kuye: “Oshike hano ho shashele, ove ngeenge ku fi Kristus ile Elia ile omuxunganeki winya?” 26 Opo Johannes e va nyamukula ndele ta ti: “Ohandi shashe nomeva, ndelenee mokati keni omwa kala ofika ou muhe mu shii. 27 Oye tuu ou te uya konima yange, ndele ame inandi wana okuditula omiya deenghaku daye.” 28 Ei ya ningilwa muBetania kombada yaJordan, oko Johannes kwa li ha shashele.

Ehepaululo etivali laJohannes Omushashi

29 Efiku la shikula eli ye ota mono Jesus te uya kuye, ndele ta ti: “Tala, Odjona yaKalunga tai kufa po omatimba ounyuni. 30 Oye tuu ou nde mu tonga nda tile: ‘Konima yange tape uya omulumenhu ou a li komesho yange, osheshi Ye opo a li, fimbo ame ndiha li po.’ 31 Ndele ame nda li ndihe mu shii; ndelenee opo a hololelwe Israel, onghee nde uya okushasha nomeva.” 32 Ndele Johannes okwa hepaulula ta ti: “Onda mona Omhepo ya fa onghuti ya kuluka ya dja meulu, ndele tai kala kombada yaye. 33 Ndele ame nda li ndihe mu shii, ndelenee ou a tuma nge okushasha nomeva, ye okwa lombwela nge: ‘Oye ou to mono Omhepo tai wile kombada yaye, ndele tai kala po, Oye tuu ou ta shashe nOmhepo Iyapuki.’ 34 Ndele ame nde shi mona, ndele handi hepaulula nokutya, Oye Omona waKalunga.”

Ovalongwa votete vaJesus

35 Efiku la shikula Johannes okwa li ko vali ofika pamwe novalongwa vaye vavali. 36 Ndele mokutala Jesus ou ta ende po, ye okwa tya: “Tala, Odjona yaKalunga.” 37 Novalongwa ava vavali ove mu uda eshi ta popi, ndele va shikula Jesus. 38 Ndelenee Jesus okwa punguluka, ndele eshi a mona tave mu shikula, ta ti kuvo: “Otamu kongo shike?” Ovo va tya kuye: “Rabbi,” (tashi ti: omuhongi) “owa kala peni?” 39 Oye okwa tya kuvo: “Ileni mu tale!” Ndele ova ya, ndele va mona apa a kala, ndele vo ova uhala puye efiku olo. Ndele otundi ya li po onhimulongo. 40 Andreas, omumwaina waSimon Petrus, oye umwe waava vavali va li ve shi uda kuJohannes, ndele tave mu shikula. 41 Ye okwa shakena tete namumwaina Simon, ndele ta ti kuye: “Fye otwa mona Messias, otashi ti Kristus.” 42 Ye okwe mu twala kuJesus. Jesus okwe mu tala ndele ta ti: “Oove Simon omona waJohannes; oto ka ifanwa Kefas,” otali ti: Petrus. 43 Nefiku la shikula eli, Jesus okwa fikama a ye kuGalilea; nokwa shakeneka Filippus, ndele ta ti kuye: “Shikule nge!” 44 Filippus okwa li Omubetsaida womoshilando shaAndreas naPetrus. 45 Ndele Filippus okwa hanga Natanael, ndele ta ti kuye: “Fye otwa mona ou a shangwa kuMoses momhango nokovaxunganeki, Jesus womuNasaret, omona waJosef.” 46 Opo Natanael okwa tya kuye: “MuNasaret otamu di tuu ouwa nande owasha?” Filippus okwa tya kuye: “Ila u ka tale!” 47 Opo nee Jesus okwa mona Natanael te uya kuye, ndele e mu tonga ta ti: “Tala, Omuisraeli washili ehe nekoto.” 48 Natanael okwa tya kuye: “Ove ou shii nge peni?” Jesus okwe mu nyamukula ndele ta ti: “Fimbo Filippus ine ku ifana, eshi wa li momukwiyu, onde ku mona.” 49 Natanael okwa tya kuye: “Rabbi, Oove Omona waKalunga, Oove ohamba yaIsrael.” 50 Jesus okwa nyamukula ndele ta ti kuye: “Eshi nde ku lombwela: onde ku mona momukwiyu, onghee wa itavela. Oto ka mona oinima inene i dule ei.” 51 Ndele Oye e mu lombwela: “Oshilishili handi mu lombwele: otamu ka mona eulu la yeuluka, novaengeli vaKalunga tava londo ndele tava londolokele kOmona wOmunhu.”

Johannes 2

Oshikumwifalonga shotete shaJesus

1 Ndele mefiku etitatu opa li pe nehombolo muKana shomuGalilea, naina yaJesus oko a li. 2 NaJesus yo novalongwa vaye ova shivwa kehombolo. 3 Ndele omaviinyu eshi a pwa po, ina yaJesus ta ti kuye: “Vo kave na omaviinyu.” 4 Jesus ta ti kuye: “Omukainhu, ondi na shike naave? Efimbo lange inali fika manga.” 5 Ndele ina ta ti kovayakuli: “Keshe eshi te mu lombwele, shi ningeni.” 6 Ndelenee opa li oitoo ihamano yomamanya yokukwatela omeva, opanghedi yokulikosha kwOvajuda, keshe oshitoo shi fike peelita efele. 7 Ndele Jesus okwa tya kuvo: “Yadifeni oitoo nomeva.” Ndele vo ove i tekela ya yada ndo. 8 Ndele Ye okwe va lombwela: “Pindeni mo, nye mu twalele omuyakuli wovaenda.” Ndele vo ova twala. 9 Ndele omuyakuli wovaenda eshi a lola mo, omeva a shituka omaviinyu, ndele okwa li ehe shii apa a dja. Ndelenee ovapiya ava va tekele omeva, ova li ve shi shii nokutya omuyakuli wovaenda okwa ifana omuhomboli 10 ndele ta ti kuye: “Omunhu keshe tete ota yandje omaviinyu mawa, ndelenee ngeenge va kumwa, opo nee aa mai. Ove wa holeka omaviinyu mawa fiyo opaife.” 11 Oshikumwifalonga eshi shotete Jesus okwe shi ningila muKana shomuGalilea, ndele a holola oshinge shaye; novalongwa ve mu itavela. 12 Konima yaashi okwa ya kuKapernaum, Oye naina, novamwaina ovalumenhu novalongwa vaye, ndele vo inava kala ko omafiku mahapu.

Jesus ta te mo ovalandifi motembeli

13 Ndele Opaasa yOvajuda ya hangika ya fika, ndele Jesus okwa ya ta londo kuJerusalem. 14 Ndele okwa hanga motembeli ava hava landifa eehove needi neenghuti, novakumaani voimaliwa, ve li omutumba. 15 Ndele Ye okwa ninga oshokoto yomapando, ndele okwe va taataa mo aveshe motembeli, pamwe needi neengobe, ndele a tilashi oimaliwa yovakumaani, noitaafula yavo okwe i undulila poshi. 16 Ndele okwa lombwela ovalandifi veenghuti: “Tumbeni po oinima ei. Ongulu yaTate inamu i ninga oshilandelo.” 17 Ndele ovalongwa vaye ova dimbulukwa nokutya, opa shangwa: “Ouladi omolwongulu yoye otau li nge.” 18 Opo nee Ovajuda ve mu nyamukula ndele tava ti: “Oto tu ulikile edidiliko lashike, eshi to longo ngaha?” 19 Jesus okwe va nyamukula ndele ta ti: “Ngumauneni po otembeli ei, ndele handi i tungulula momafiku atatu.” 20 Opo Ovajuda va tya: “Otembeli ei ya tungwa omido omilongo nhee nomido hamano, ndele Ove oto i tungu momafiku atatu?” 21 Ndelenee Ye okwa popya otembeli yolutu laye. 22 Ndele eshi a nyumuka koufi, ovalongwa vaye ova dimbulukwa nokutya, Ye e shi tile, ndele va itavela omishangwa nondjovo ei Jesus e i tile.

Ovashikuli vape

23 Hano Jesus eshi a li muJerusalem momafiku aPaasa, vahapu va itavela edina laye, shaashi va mona omadidiliko Ye e a ninga. 24 Ndelenee Jesus ine litula muvo nelineekelo, osheshi okwa li e va shii aveshe, 25 ndele Ye ina pumbwa ou te mu hepaululile ta popi omunhu, osheshi Oye mwene a shiiva eshi sha kala momunhu.

Johannes 3

Jesus naNikodemus

1 Ndele opa li omulumenhu womOvafarisai, edina laye Nikodemus, omukulunhu wOvajuda. 2 Ye okwe uya kuJesus oufiku ndele ta ti kuye: “Rabbi, otu shi shii, oove omulongi wa dja kuKalunga, osheshi kape na ou ta dulu okuninga oikumwifalonga ei to i ningi, Kalunga ngeenge ke li pamwe naye.” 3 Jesus okwa nyamukula ndele ta ti kuye: “Oshilishili handi ku lombwele: omunhu ngeenge ina dalululwa, ita dulu okumona ouhamba waKalunga.” 4 Nikodemus okwa tya kuye: “Omunhu ta dulu ngahelipi okudalwa omukulunhu? Ita dulu ndishi okushuna medimo laina nokudalwa?” 5 Jesus okwa nyamukula: “Oshilishili handi ku lombwele: omunhu ngeenge ita dalwa komeva nokOmhepo, ita dulu okuya mouhamba waKalunga. 6 Eshi sha dalwa kombelela, osho ombelela, naashi sha dalwa kOmhepo, osho omhepo. 7 Ino kumwa, shaashi nde ku lombwela: mu nokudalululwa. 8 Omhepo otai pepe apa ya hala noshihomo shayo oto shi udu, ndele ove ku shii apa tai di naapa tai i. Hano osho tashi kala nakeshe omunhu, ou a dalwa mOmhepo.” 9 Nikodemus okwa nyamukula ndele ta ti kuye: “Eshi otashi ningwa ngahelipi?” 10 Jesus okwe mu nyamukula ndele ta ti: “Oove omulongi waIsrael, ndele eshi ku shi shii. 11 Oshilishili handi ku lombwele: ohatu popi eshi tu shii, ndele hatu hepaulula eshi twa mona, ndele nye itamu itavele ehepaululo letu. 12 Ngeenge handi mu lombwele ei oikwadu, nye itamu itavele, hano otamu itavele ngahelipi, ngeenge handi mu lombwele ei yomeulu? 13 Ndelenee kape na umwe ou a londa a ya keulu, oye tuu aeke a londoloka keulu, Omona wOmunhu, ou ha kala meulu.” 14 Ndele ngaashi Moses a tulika eyoka pombada mombuwa, nosho yo Omona wOmunhu oku nokutulikwa pombada, 15 opo keshe tuu ou te mu itavele, aha kane, ndele a kale e nomwenyo waalushe. 16 Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe. 17 Osheshi Kalunga ina tuma Omona waye mounyuni a tokole ounyuni, ndelenee ounyuni u xupifwe kuye. 18 Ou te mu itavele, ye ita tokolwa; ndelenee ou ita itavele, ye okwa tokolwa nale, osheshi ye ina itavela edina lOmona Ewifa laKalunga. 19 Ndelenee etokolo oleli: ouyelele we uya mounyuni, ndelenee ovanhu va li ve hole omulaulu komesho youyelele, osheshi oilonga yavo oii. 20 Osheshi keshe ou ta longo owii, ota tondo ouyelele, ndele ite uya pouyelele, oilonga yaye iha hanyenwe. 21 Ndelenee ou ha longo oshili, oye ta holokele pouyelele, oilonga yaye i hololwe, osheshi oya ningilwa muKalunga.

Johannes Omushashi ta hepaulula vali Kristus

22 Ndelenee konima yoinima ei Jesus okwa ya pamwe novalongwa vaye komikunda daJudea, ndele oko a kala navo, ndele ta shashe. 23 NaJohannes yo okwa li ta shashe muAinon, popepi naSelim, osheshi opa li pe nomeva mahapu, novanhu ve uya ndele tava shashwa. 24 Osheshi Johannes okwa li ina tulwa natango modolongo. 25 Ndele opa ningwa eemhata pokati kovalongwa vaJohannes nOvajuda omolweyelifo. 26 Ndele vo ove uya kuJohannes ndele tava ti kuye: “Rabbi, winya a kala naave kombada yaJordan, ou we mu hepaulula tala, Oye ta shashe, naaveshe otava i kuye.” 27 Johannes okwe va nyamukula ta ti: “Omunhu ita dulu okulikufila sha, ngeenge ite shi pewa tashi di meulu. 28 Onye vene eendobwedi dange, ame eshi nda tile: ame haame Kristus, ndelenee nda tumwa oku mu tetekelela. 29 Ou e nomuhombolwa, oye omuhomboli; ndelenee kaume komuhomboli ou e li ofika ndele te mu pwilikine, oye ta hafele shili ondaka yomuhomboli. Ehafo eli lange paife ola wanenena. 30 Oye e nokukula, ame ndi nokuninipala. 31 “Ou ta di kombada, oye wokombada yaaveshe. Ou womedu, oye wopedu ndele ta popi pedu. Ou ta di meulu, oye wokombada yaaveshe. 32 Ndele osho e shi mona naashi e shi uda, ote shi hepaulula; ndelenee kape na ou ta tambula ehepaululo laye. 33 Ou ta tambula ehepaululo laye, ota pameke nokutya, Kalunga Oye omunashili. 34 Osheshi ou a tumwa kuKalunga, oye ta popi eendjovo daKalunga, osheshi Kalunga ita yandje Omhepo ta yeleke. 35 Xe e hole Omona, ndele okwa yandja aishe meke laye. 36 Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.”

Johannes 4

Jesus nomukainhu Omusamaria

1 Hano Omwene eshi a shiiva nokutya, Ovafarisai ova uda kutya, Jesus okwa ninga ovalongwa vahapu, ndele ta shashe e dule Johannes, 2 nande Jesus mwene ina shasha, ndelenee ovalongwa vaye. 3 Ye okwa dja mo muJudea ndele ta shuna kuGalilea. 4 Ndelenee Ye okwa li e nokutokola Samaria. 5 Hano Ye okwe uya koshilando shomuSamaria, edina lasho Sikar, popepi nepya olo Jakob e li pele omona waye Josef. 6 Ndele oko kwa li ofifiya yaJakob. Hano Jesus eshi a li a loloka keengeda, a kala omutumba pofifiya. Ndele opa li otundi onhihamano. 7 Ndele taku di omukainhu Omusamaria, te uya okuteka omeva. Jesus ta ti kuye: “Pe nge ndi nwe mo.” 8 Osheshi ovalongwa vaye va li va ya koshilando va ka lande oikulya. 9 Ndele omukainhu Omusamaria okwa tya kuye: “Oove Omujuda oto indile nge ngahelipi okunwa, aame omukainhu Omusamaria?” Osheshi Ovajuda ihava endafana nOvasamaria. 10 Jesus okwe mu nyamukula ta ti: “Ngeno wa shiiva oshali yaKalunga, nalyelye ou ta ti kwoove: pe nge okunwa, ngeno ove to mu indile, ndele ye te ku pe omeva e nomwenyo.” 11 Omukainhu okwa tya kuye: “Omwene, ove uhe na oshitoo shokuteka mo, ondungu yo oile, omeva oo e nomwenyo ou a kwete, e li peni? 12 Oove omukulunhu mbela u dule tate Jakob, ou e tu pa ondungu ei, ndele ye a nwa mo novana vaye noimuna yaye?” 13 Jesus okwe mu nyamukula ta ti: “Keshe tuu ou ta nu momeva aa, ota fi vali enota, 14 ndelenee ou ta nu momeva aa Ame handi mu pe, ita fi vali enota fiyo alushe; ndelenee omeva aa handi mu pe, otaa ningi muye ofifiya yomeva, aa taa fulukile fiyo omomwenyo waalushe.” 15 Omukainhu ta ti kuye: “Omwene, pe nge omeva oo, ndiha fye vali enota, ndele ndiha pumbwe okuuya okuteka oku.” 16 Jesus ta ti kuye: “Inda u ka ifane omulumenhu woye, ndele ileni oku.” 17 Omukainhu okwa nyamukula ndele ta ti: “Nghi nomulumenhu.” Jesus ta ti kuye: “Heeno, owa tonga sha yuka: ‘nghi na omulumenhu’, 18 osheshi ove wa kala novalumenhu vatano, naau u mu kwete paife, ke fi omulumenhu woye. Eshi we shi tonga oshili.” 19 Omukainhu ta ti kuye: “Omwene, ondi wete, oove omuxunganeki. 20 Ootate vetu va ilikanenene komhunda ei, ndele nye tamu ti muJerusalem mu nonhele yokwiilikanena mo.” 21 Jesus ta ti kuye: “Omukainhu, itavele nge, efimbo tali uya, itamu ilikana Tate komhunda ei ile muJerusalem. 22 Onye tamu ilikana eshi kamu shi shii; ofye ohatu ilikana eshi tu shi shii, osheshi exupifo otali di mOvajuda. 23 Ndelenee efimbo tali uya, ndele opo li li paife, ovailikani vashili tava ilikana Tate momhepo nomoshili; osheshi Tate a hala ava tave mu ilikana va kale va tya ngaha. 24 Kalunga Oye Omhepo, naava tave mu ilikanene ovo ve nokwiilikana momhepo nomoshili.” 25 Omukainhu ta ti kuye: “Ondi shi shii, Messias, ou ta ifanwa Kristus, ote ke uya. Oye ngeenge te uya, ote tu hololele aishe.” 26 Jesus ta ti kuye: “Aame tuu ou, ou ta popi naave.” 27 Opo tuu opo ovalongwa vaye ve uya, ndele va kumwa Oye eshi a popya nomukainhu. Ndelenee nande umwe ina tya: “Oto indile shike?” Ile: “To popi shike naye?” 28 Omukainhu okwa fiya po oshitoo shaye, ndele okwa ya koshilando, ndele a lombwela ovanhu: 29 “Ileni mu tale omulumenhu, ou a lombwela nge aishe nde i ninga. Pamwe Oye Kristus?” 30 Ovo va dja mo moshilando ndele va ya kuye.

Oilya ya pya

31 Ndele fimbo inave uya, ovalongwa vaye ove mu indila ndele tava ti: “Rabbi, lya.” 32 Ndelenee Ye okwa tya kuvo: “Ame ondi neendja okulya, edi muhe shii.” 33 Ndele ovalongwa va tongafana: “Mbela pe na umwe e mu etela oikulya?” 34 Jesus ta ti kuvo: “Oikulya yange ei, Ame ndi longe ehalo laau a tuma nge nondi wanife oshilonga shaye. 35 “Hanye vene tamu ti: ‘ope neehani nhee natango, eteyo fimbo inali fika?’ Taleni, ohandi mu lombwele: yeluleni omesho eni nye mu tale omapya nhumbi a pya okuteywa. 36 Ndele paife omutei ta mono ondjabi, noiimati te i ongelele omwenyo waalushe, opo omukuni a hafe pamwe nomutei. 37 Osheshi moshinima eshi eendjovo edi da ninga doshili: ‘ou ta kunu oku lili naau ta teya oku lili.’ 38 Ame nde mu tuma okuteya apa inamu longa, vamwe ve lili va longa po, ndele nye mwe uya moilonga yavo.”

Ovasamaria va itavela

39 Ndele Ovasamaria vahapu vomoshilando eshi ve mu itavela omolweendjovo domukainhu ou a hepaulula: “Ye okwa lombwela nge aishe nde i ninga.” 40 Opo Ovasamaria eshi ve uya kuye, ove mu indila a menekele puvo. Ndele Ye okwa kala ko omafiku avali. 41 Ndele vahapu ve dule venya va itavela omolweendjovo daye, 42 ova tya komukainhu: “Paife inatu itavela vali omolweendjovo doye, osheshi ofye vene twa uda ndele tu shi shii, Oye shili Omukulili wounyuni.”

Jesus ta i kuGalilea

43 Ndelenee eshi pa pita omafiku avali, Ye okwa dja ko ndele ta i kuGalilea. 44 Osheshi Jesus mwene okwa hepaulula ta ti: “Omuxunganeki ita fimanekwa moshilongo shaye.” 45 Ndelenee eshi e uya kuGalilea, Ovagalilea ove mu tambula, osheshi vo va mona aishe e i ningila muJerusalem moshivilo, osheshi navo yo va ile ko koshivilo.

Omona welenga ta velulwa

46 Ndele Jesus okwe uya vali kuKana shomuGalilea, omo a shitukifile omeva omaviinyu. Ndele muKapernaum omwa li mu nelenga lohamba li nomona ta vele. 47 Lo eshi la uda Jesus a dja kuJudea ndele e uya kuGalilea, ola ya kuye, ndele le mu indila, e uye a velule omona, osheshi okwa li pokufya. 48 Ndele Jesus okwa tya kuye: “Ngeenge itamu mono omadidiliko noikumwifalonga, itamu itavele.” 49 Elenga lohamba ola tya kuye: “Omwene, ila fimbo okaana kange inaka fya.” 50 Jesus okwa tya kulo: “Inda, omumwoye ota kala e nomwenyo.” Omulumenhu okwa itavela ondjovo ei, Jesus e i mu lombwela, ndele okwa ya. 51 Ndele fimbo e li mondjila ta shuna, ovapiya vaye ove mu shakeneka, ndele tava ti kuye: Okaana koye oke nomwenyo. 52 Ndele ye okwa pula efimbo lilipipo ka hovela okutalalelwa. Ovo ve mu nyamukula: “Onghela, potundi onhihamano olwiidi le mu fiya po.” 53 Ndele xe okwa dimbulukwa otundi oyo tuu ei Jesus eshi a tya kuye: “Okaana koye ke nomwenyo.” Ndele ye okwa itavela neumbo laye alishe. 54 Oshikumwifalonga eshi osho oshitivali, Jesus e shi ninga, eshi a dja muJudea ndele te uya kuGalilea.

Johannes 5

Omunaudu womuBetesda ta velulwa

1 Ndele konima yoinima ei opa li oshivilo shOvajuda, ndele Jesus okwa ya kombada kuJerusalem. 2 Ndele muJerusalem, oposhivelo sheedi, omu netale la ifanwa mOshiheberi Betesda, ndele li neenduda nhano dinene. 3 Omudo mwa nangala ongudu inene yovanaudu, ovapofi novavelimbada noingudu, ava va teelela omeva a nyenganyengifwe. 4 Osheshi opomafimbo amwe omweengeli wOmwene okwa londolokela metale, ndele okwa nyenganyengifa omeva. Ndele ou ta i mo tete, omeva eshi a nyenganyengifwa, ota veluka, kukeshe oudu e u kwete. 5 Ndele opa li omunhu omulumenhu, a li ta vele omido omilongo nhatu nahetatu. 6 Hano Jesus eshi e mu mona a nangala, ndele okwa shiiva, a ninga efimbo lile ta vele, okwa tya kuye: “Wa hala okuveluka?” 7 Opo omunaudu okwe mu nyamukula ta ti: “Omwene, ame nghi nomunhu ta twala nge metale, omeva ngeenge taa nyenganyengifwa; ndele fimbo handi i ko, umwe ta piti komesho yange.” 8 Jesus okwa tya kuye: “Fikama, kufa olutala loye u ende.” 9 Ndele divadiva omulumenhu okwa veluka, ndele a kufa olutala laye ndele ta i. Ndelenee efiku olo la li Eshabata. 10 Opo Ovajuda va tya kwaau a veluka: “Oku nEshabata, itashi dulika okuhumbata olutala.” 11 Ye okwe va nyamukula: “Ou a velula nge, ye okwa lombwela nge: ‘kufa olutala loye u ende.’ ” 12 Opo vo ve mu pula: “Omulumenhu ou olyelye, e ku lombwela, ‘kufa olutala loye u ende?’ ” 13 Ndelenee ou a velulwa ine mu shiiva oye olyelye; Jesus a hangika a dja po, osheshi opa li ongudu inene yovanhu. 14 Ndele konima yoinima ei Jesus okwe mu mona motembeli, ndele ta ti kuye: “Tala, ove wa veluka, ino nyona vali, uha hangike kowii umwe u dule winya.” 15 Ndele omulumenhu okwa ya, ndele a hepaululila Ovajuda nokutya, ou e mu velula, Oye Jesus. 16 Ndele Ovajuda va nangela Jesus, osheshi Oye e shi ninga mEshabata. 17 Ndelenee Jesus okwe va nyamukula: “Tate ta longo fiyo opaife, naame yo handi longo.” 18 Onghee hano Ovajuda va hala neenghono oku mu dipaa, osheshi hasheshi ashike eshi a nyona Eshabata, ndelenee okwa tya yo Kalunga Oye Xe, ndele e lininga e fike puKalunga. 19 Ndele Jesus okwe va lombwela ndele ta ti: “Oshilishili handi mu lombwele: Omona iha dulu okuninga nande sha muye mwene, ndelenee oshosho ashike ta mono Xe te shi ningi; osheshi osho Xe te shi ningi, osho Omona te shi ningi yo. 20 Osheshi Xe e hole Omona, ndele te mu ulikile aishe ei Oye mwene te i longo; ndele te ke mu ulikila oilonga inene i dule ei, opo mu kumwe. 21 Osheshi ngaashi Xe ta nyumuna ovafi, ndele te va ningi vali ovanamwenyo, osho tuu nOmona yo ta ningi ovanamwenyo ava a hala. 22 Osheshi Tate ita tokola nande umwe, ndelenee etokolo alishe okwe li yandja kOmona, 23 opo aveshe va fimaneke Omona, ngaashi tava fimaneke Xe. Ou ita fimaneke Omona, oye ita fimaneke Xe ou e mu tuma. 24 “Oshilishili handi mu lombwele: Ou ta udu eendjovo dange, nota itavele ou a tuma nge, oku na omwenyo waalushe, ye ita ka tokolwa, ndelenee ye okwa dja mo mefyo, ndele e uya momwenyo. 25 Oshilishili handi mu lombwele: efimbo tali uya, ndele opo li li paife, ovafi tava udu ondaka yOmona waKalunga, naava tave i udu, otava kala ve nomwenyo. 26 Osheshi ngaashi Xe e nomwenyo muye mwene, osho tuu okwe u pa Omona, Ye a kale yo e nomwenyo muye mwene. 27 Ndele Oye okwe mu pa eenghono dokutokola, osheshi Oye Omona wOmunhu. 28 “Inamu shi kuminwa, osheshi efimbo tali uya, opo aveshe ava va kala meembila otava udu ondaka yaye 29 ndele tava hololoka mo, ava va longa ouwa okunyumukila omwenyo, naava va longa owii, okunyumukila etokolo. 30 “Mwaame mwene ihandi dulu okulonga nande sha. Ongaashi handi udu, osho handi tokola; netokolo lange ola yuka, osheshi Ame ihandi shikula ehalo lange mwene, ndelenee ehalo laau a tuma nge. 31 Ngeenge handi lihepaulula Ame mwene, ehepaululo lange kali shii okulineekelwa. 32 Ope na umwe ta hepaulula nge, ndele ndi shi shii ehepaululo olo ta hepaulula nge, oloshili. 33 Onye mwa tuminwa Johannes, ndele ye okwa hepaulula oshili. 34 Ndelenee Ame itandi tambula ehepaululo komunhu, ndelenee handi popi eshi, nye mu xupifwe. 35 Winya okwa li oshela ya xwama ndele ya minikila, ndelenee nye omwa hala okunyakukwa okafimbo kaxupi mouyelele waye. 36 Ndelenee Ame ondi na ehepaululo linene li dule linya laJohannes; osheshi oilonga ei Tate okwe i pa nge ndi i wanife, oilonga tuu ei handi longo, oyo tuu tai hepaulula nge nokutya, Tate okwa tuma nge. 37 Ndele Tate ou a tuma nge, Ye okwa hepaulula nge. Onye inamu uda ondaka yaye nande, nye inamu mona olupe laye, 38 neendjovo daye kamu di kwete di kale munye; osheshi nye inamu itavela ou a tumwa kuye. 39 Nye tamu konakona momishangwa, osheshi omu shii nye omu na omwenyo waalushe mudo, ndele odo otadi hepaulula nge; 40 ndelenee onye inamu hala okuuya kwaame, mu kale nomwenyo. 41 “Ame ihandi tambula efimano kovanhu; 42 ndelenee ondi mu shii nokutya, ohole yaKalunga kai mo munye. 43 Ame nde uya medina laTate, nye itamu tambula nge. Ngeenge umwe e lili te uya medina laye mwene, oye nee otamu mu tambula. 44 Otamu dulu ngahelipi okwiitavela, onye ava hamu tambulafana omafimanekafano, nefimaneko olo tali di kuKalunga aeke, ihamu li kongo. 45 Inamu tya, Ame handi ke mu popya kuTate; ope na umwe te mu popi, oye Moses, ou mwe mu lineekela. 46 Ndelenee ngeno mwa itavela Moses, ngeno mwa itavela nge yo, osheshi Aame tuu ou nda shangwa kuye. 47 Ndelenee fimbo inamu itavela omishangwa daye, otamu itavele ngahelipi eendjovo dange?”

Johannes 6

Jesus ta kutifa ovalumenhu omayovi atano

1 Konima yoinima ei Jesus okwa ya langhele kwinya yefuta laGalilea nokutya, yefuta laTiberias. 2 Nongudu inene ye mu shikula, osheshi vo ova mona oikumwifalonga inya ye e i ningila movanaudu. 3 Ndele Jesus okwa londa komhunda, ndele oko a kala omutumba pamwe novalongwa vaye. 4 Ndelenee Opaasa, oshivilo shOvajuda osha li popepi. 5 Opo Jesus eshi a yelula omesho aye, okwa mona ongudu inene yovanhu tai uya kuye, okwa tya kuFilippus: “Ohatu ka landa peni omingome okuliwa kwaava?” 6 Ndelenee eshi e shi tonga oku mu yeleka, osheshi Ye mwene okwa li e shi shii, eshi a hala okuninga. 7 Filippus okwe mu nyamukula: “Omingome deedenari omafele avali itadi va wanene, ovo aveshe va pewe nande okapambu kanini.” 8 Opo nee umwe womovalongwa vaye, Andreas, omumwaina waSimon Petrus, okwa tya kuye: 9 “Ope nokamati ke nomingome nhano doilya neeshi mbali, ndelenee edi tadi kwafa shike kwaava ve fike apa.” 10 Ndele Jesus okwa tya: “Lombweleni ovanhu va kale omutumba.” Ndelenee opa li omwiidi muhapu ponhele ei. Ndele ovalumenhu ve fike pomayovi atano va kala omutumba. 11 Ndele Jesus okwa kufa omingome, okwa pandula, ndele okwe di pa ovalongwa, novalongwa ve di tukulila ava va li omutumba; neeshi osho tuu, dihapu, ngaashi va hala. 12 Ndelenee eshi va kuta, Ye okwa tya kovalongwa vaye: “Tooleni oundjaumukile va xupa po, paha hepe sha.” 13 Ndelenee ve va toola, ndele va yadifa oimbale omulongo naivali oundjaumukile vokomingome nhano doilya, va xupa kwaava va lya. 14 Opo ovanhu eshi va mona oshikumwifalonga eshi Jesus e shi ninga, ova tya: “Ou oshili omuxunganeki winya kwa li e nokuuya mounyuni.” 15 Ndele hano Jesus eshi e shi koneka kutya, vo ova hala oku mu kufa noku mu fininika, ve mu ninge ohamba, okwa shuna komhunda, Oye aeke.

Jesus ta ende mefuta

16 Nonguloshi eshi ye uya, ovalongwa vaye va ya kefuta. 17 Ndele eshi va ya mowato, ova yauka efuta nokuyaukila kuKapernaum. Ndele opa laula nale, naJesus ine uya natango kuvo. 18 Ndele efuta ola tukulukifwa neenghono kokupepa kwomhepo idjuu. 19 Ndele eshi va kufa ko oshinano shi fike peekilometa nhano ile hamano, ve wete Jesus ta ende kombada yefuta, ndele ta ehene kowato; ovo va kwatwa koumbada. 20 Ndelenee Ye okwa tya kuvo: “Aame ou, inamu tila.” 21 Ndele vo va hala oku mu tambula mowato, mokafimbo tuu oko owato ya fika kedu linya va li ve nokuya ko.

Omungome womwenyo

22 Mefiku la shikula eli, ovanhu va fyaalele komunghulo winya wefuta va mona kutya kaku nowato ikwao, oyo aike ei ovalongwa va ya nayo, ndele Jesus ina ya mowato pamwe novalongwa vaye, ndelenee ovalongwa aveke va ya. 23 Ndele ope uya eewato dimwe da dja kuTiberias, de uya popepi nonhele ei, apa va lilile omingome, Omwene eshi a tonga epandulo. 24 Hano ovanhu eshi va mona Jesus ehe po, novalongwa vaye yo, navo yo va ya meewato, ndele va ya kuKapernaum, va ka konge Jesus. 25 Ndele eshi ve mu hanga langhele kwinya yefuta, ova tya kuye: “Rabbi, onaini we uya ko oku?” 26 Jesus okwe va nyamukula ta ti: “Oshilishili handi mu lombwele: onye itamu kongo nge, eshi mwa mona oikumwifalonga, ndelenee eshi mwa lile omingome edi ndele omwa kuta. 27 Inamu lilongela eendja edi tadi xulu po, ndelenee eendja edi tadi kala fiyo okomwenyo waalushe, odedi Omona wOmunhu te di mu pe, osheshi Oye tuu ou Xe, Kalunga mwene, e mu tula oshihako shaye.” 28 Ndele vo ova tya kuye: “Fye otu nokuninga shike tu longe oilonga yaKalunga?” 29 Jesus okwe va nyamukula ta ti: “Oshilonga shaKalunga osheshi mu itavele ou a tumwa kuye.” 30 Ndelenee vo ova tya kuye: “Edidiliko lilipipo to li ningi hano, tu li mone, fye tu ku itavele? Oto longo shike? 31 Ootate vetu va lile omanna mombuwa, ngaashi pa shangwa: ‘Ye okwe va pa okulya omungome wokeulu.’ ” 32 Ndele Jesus okwa tya kuvo: “Oshilishili handi mu lombwele: HaMoses e mu pele omungome wokeulu, ndelenee Tate Oye te mu pe omungome woshili tau di keulu. 33 Osheshi omungome waKalunga oo tuu ou tau di keulu ndele tau pe ounyuni omwenyo.” 34 Ndele vo ova tya kuye: “Omwene, tu pa alushe omungome ou.” 35 Ndele Jesus okwa tya kuvo: “Aame omungome womwenyo. Ou te uya kwaame, oye ita fi ondjala, ndele ou ta itavele nge, ita fi vali enota fiyo alushe. 36 “Ndelenee ngaashi Ame nde mu lombwela, onye mwa mona nge, nye inamu itavela. 37 Ashishe eshi Tate te shi pe nge, otashi uya kwaame. Ndele ou te uya kwaame, itandi mu ekeleshi. 38 Osheshi Ame nda dja keulu hakuwanifa ehalo lange mwene, ndelenee ehalo laau a tuma nge. 39 Nehalo laTate ou a tuma nge oleli, ndiha kanife po nande umwe mwaava a pa nge, ndelenee ndi va nyumune efiku laxuuninwa. 40 Osheshi ehalo laTate oleli: Keshe tuu ou ta mono Omona ndele te mu itavele, oye e nomwenyo waalushe; ndele Ame handi mu nyumuna efiku laxuuninwa.” 41 Ndele Ovajuda ve mu ngongotela eshi a tya: “Aame omungome ou wa dja meulu,” 42 ndele va tya: “Ye ke fi Jesus, omona waJosef, naxe naina tu va shii. Ota ti ngahelipi hano: Ame nda dja meulu?” 43 Jesus okwa nyamukula ndele ta ti kuvo: “Inamu ngongotelafana. 44 Kape na ou ta dulu okuuya kwaame okuninga Tate, ou a tuma nge, te mu shili. Ndele handi mu nyumuna efiku laxuuninwa. 45 Movaxunganeki mwa shangwa: ‘Ndele aveshe tava ningi va longwa kuKalunga.’ Keshe tuu ou e liudila kuTate ndele a longwa kuye, oye te uya kwaame. 46 Hakutya umwe ngeno a mona Tate, oye tuu aeke a dja muKalunga, oye a mona Tate. 47 “Oshilishili handi mu lombwele: Ou ta itavele oku na omwenyo waalushe. 48 Aame omungome womwenyo. 49 Ooxo va lile omanna mombuwa, ndele vo va fya. 50 Oo omungome ou tau di meulu, opo keshe omunhu e u lye, ye aha fye. 51 Aame omungome ou u nomwenyo wa dja meulu. Ngeenge umwe ta li omungome ou, oye ta kala e nomwenyo fiyo alushe. Nomungome handi u yandje, oo ombelela yange, ei handi i yandjele ounyuni u mone omwenyo.” 52 Opo Ovajuda va patafana ndele va tya: “Ou ota dulu ngahelipi oku tu pa ombelela yaye tu i lye?” 53 Ndele Jesus okwa tya kuvo: “Oshilishili handi mu lombwele, ngeenge itamu li ombelela yOmona wOmunhu nye itamu nu ohonde yaye, nye kamu na omwenyo munye vene. 54 Ou ta li ombelela yange ye ta nu ohonde yange, oye e nomwenyo waalushe, ndele handi mu nyumuna efiku laxuuninwa. 55 Osheshi ombelela yange oyo eendja dashili nohonde yange oyo oshinuwa shashili. 56 Ou ta li ombelela yange nota nu ohonde yange, oye ta kala mwaame naame muye. 57 Ngaashi Tate ou e nomwenyo, a tuma nge, naame ndi nomwenyo omolwaye, osho tuu ou ta li nge, oye ta kala e nomwenyo omolwange. 58 Omungome oo tuu ou wa dja meulu. Hangaashi ooxo va lile omanna, ndele va fya; ou ta li omungome ou, oye ta kala e nomwenyo fiyo alushe.” 59 Edi okwe di popya eshi a li ta longo ovanhu moshinagoga muKapernaum.

Ovalongwa tava shuna monima

60 Ndele opo nee vahapu vomovalongwa vaye eshi ve shi uda, ova tya: “Eendjovo edi odikukutu, olyelye ta dulu oku di pwilikina?” 61 Ndelenee Jesus eshi a li e shi shii muye mwene nokutya, ovalongwa vaye ve di ngongotela, okwa tya kuvo: “Eshi oshe mu ningifa omwenyo mwii? 62 Ongahelipi hano, ngeenge tamu mono Omona wOmunhu ta londo ta i apa a kala shito? 63 Omhepo oyo tuu tai yandje omwenyo; ombelela kai na eshi tai kwafa. Eendjovo edi nde di mu lombwela, odo omhepo nomwenyo. 64 Ndelenee mokati keni omu na vamwe ihava itavele. Osheshi Jesus okwa li a shiiva pehovelo, oolyelye ava ihava itavele, nalyelye ou te ke mu kengelela.” 65 Ndele Ye okwa tya: “Onghee nde mu lombwela, kape na ou ta dulu okuuya kwaame ngeenge ite shi pewa kuTate.”

Ehepaululo laPetrus

66 Okudja opo vahapu vomovalongwa vaye va shuna monima, vo inava enda vali naye. 67 Opo nee Jesus okwa lombwela ava omulongo navavali: “Nanye yo mwa hala okuya?” 68 Ndele Simon Petrus okwe mu nyamukula ta ti: “Omwene, otu ye kulyelye ngeno? Oove u neendjovo domwenyo waalushe; 69 ndele fye twa itavela ndele tu shi shii, Oove Omuyapuki waKalunga.” 70 Jesus okwe va nyamukula: “Haame nde mu hoolola, nye omulongo navavali? Ndelenee umwe womunye omudiaboli.” 71 Ndelenee eshi okwe shi tonga omolwaJudas omona waSimon Iskariot, osheshi ye okwa li ou te ke mu kengelela, ndele ye a li umwe waava omulongo navavali.

Johannes 7

Jesus moshivilo shomatwali

1 Ndele konima yoinima ei Jesus okwa li ha endaenda muGalilea, osheshi okwa li ina hala okweenda muJudea, shaashi Ovajuda ve mu nangela ve mu dipae. 2 Ndele oshivilo shOvajuda, eshi shomatwali, osha li popepi. 3 Opo ovamwaina ove mu lombwela: “Fikama, u dje po apa, u ye kuJudea, opo ovalongwa voye va mone oilonga ei ho longo, 4 osheshi kape na ou a hala a monike, ta longo sha meholeko. Hano ngeenge to longo oilonga ei, lihololela ounyuni.” 5 Osheshi novamwaina ova li yo inave mu itavela. 6 Opo nee Jesus okwe va lombwela: “Efimbo lange inali fika manga. Ndele efimbo leni opo li li alushe. 7 Ounyuni itau dulu oku mu tonda; Ame otau tondo nge, shaashi handi hepaulula nokutya, oilonga yao oii. 8 Nye indeni koshivilo, Ame itandi i manga koshivilo eshi, osheshi efimbo lange inali fika manga.” 9 Ndele eshi okwe shi va lombwela, ndele ta fyaala muGalilea. 10 Ndele ovamwaina eshi va ya koshivilo, opo Jesus okwa ya ko yo, hamoipafi, ndele omeholeko. 11 Ndele Ovajuda ova li tave mu kongo moshivilo, ndele tava ti: “Ye oku li peni?” 12 Ndele Ye okwa li ta tongwa unene mokati kovanhu, tava ti: “Ye omuwa;” vamwe va tya: “Ahowe, Ye ota pukifa ovanhu.” 13 Ndele kape na ou e mu tonga povanhu, shaashi va tila Ovajuda. 14 Ndele mokati koshivilo Jesus okwa ya kotembeli, ndele ta longo ovanhu. 15 Ndele Ovajuda va kumwa, ndele tava ti: “Ou, omishangwa oku di shii ngahelipi, nande ina longwa?” 16 Jesus okwe va nyamukula ta ti: “Elongo lange kali fi lange, ndele olaau a tuma nge. 17 Ngeenge pe na ou a hala okulonga ehalo laye, ota ka shiiva elongo, ngeenge ola dja muKalunga, ile handi popi mwaame mwene. 18 Ou ta tongo muye mwene, ota kongo efimano laye mwene, ndele ou ta kongo efimano laau e mu tuma, oye omunashili, noipupulu kai mo muye. 19 Moses haye e mu pa omhango hamba, ndele nande umwe mokati keni ite i wanifa. Oshike mwa hala okudipaa nge?” 20 Ndele eengudu dovanhu da nyamukula: “Ove u nondemoni, olyelye a hala oku ku dipaa?” 21 Opo nee Jesus okwe va nyamukula ta ti: “Oshilonga shimwe onde shi longa, ndele nye amushe omwa kumwa. 22 Moses okwe mu pa epito letanda (hakutya, la dja muMoses, ndelenee okooxo) nomEshabata hamu pitifa omunhu etanda. 23 Hano omunhu ngeenge ta pitifwa etanda mEshabata, opo omhango yaMoses iha lundululwe, nye otamu handukilile nge shike, eshi nda velula omunhu aushe mEshabata? 24 Inamu tokola pashipala, tokoleni etokolo la yuka.” 25 Ndelenee vamwe vomuJerusalem va tya: “Ou haye ve mu konga ve mu dipae? 26 Ndele tala, nhumbi ta tongo moipafi yavo, ndele vo itava ti sha kuye. Mbela ovakulunhu ve shi koneka shili kutya, Oye Kristus? 27 Ndelenee ou otu mu shii apa a dja, ndelenee Kristus ngeenge te uya, kape na ou e shii apa a dja.” 28 Ndelenee Jesus okwa popya mokule motembeli omo kwa li ta longo ovanhu, ta ti: “Nye omu shii nge, ndele mu shii apa nda dja. Inandi dja mwaame mwene, ndele ou a tuma nge, Oye omunashili, ndele nye kamu mu shii. 29 Ndelenee Ame ondi mu shii, osheshi onda dja kuye, ndele Ye okwa tuma nge.” 30 Ndele vo va hala ve mu kwate, ndele kapa li nande umwe e mu kuma, osheshi efimbo laye la li inali fika manga. 31 Ndele vahapu vomongudu yovanhu ve mu itavela, ndele tava ti: “Kristus ngeenge te uya ota ka longa oikumwifalonga ihapu e dule ou?” 32 Ndele Ovafarisai va uda ovanhu tave mu popi ngaha nokunongofola, ndele ovapristeli ovakulunhu nOvafarisai va tuma ko ovapiya ve mu kwate. 33 Ndele Jesus okwa tya: “Okafimbo kaxupi natango ondi li punye, opo nee handi i kwaau a tuma nge; 34 Ndele nye otamu ka kala nokukonga nge, ndele itamu mono nge, apa Ame ndi li itamu dulu okuya po.” 35 Ndele Ovajuda va tongafana: “Ou okwa hala okuya peni, eshi itatu mu mono? Ota i mbela kwaava va halakana mokati kOvagreka nokulonga Ovagreka? 36 Eendjovo edi oda tya ngahelipi, eshi ta ti: Otamu kala nokukonga nge, ndele itamu mono nge, apa Ame ndi li, itamu dulu okuya po?”

Jesus ta ifana ava va fya enota

37 Ndele mefiku linene, laxuuninwa loshivilo, Jesus a kala ofika nota ingida mokule ta ti: “Ngeenge pe na ou a fya enota, ne uye kwaame ye a nwe. 38 ‘Oye ou ta itavele nge, ngaashi omishangwa tadi ti, meni laye otamu ka tondoka omilonga domeva e nomwenyo.’ ” 39 Ndele eshi e shi tongela Omhepo tai pewa ava ve mu itavela, osheshi Omhepo Iyapuki kwa li inai uya manga, shaashi Jesus okwa li ina yelulwa natango. 40 Ndele vahapu vomovanhu eshi va uda eendjovo edi, ova tya: “Oshili ou omuxunganeki winya.” 41 Ndele vamwe tava ti: “Ou oKristus,” ndele vamwe vali tava ti: “Kristus ota di tuu kuGalilea? 42 Omushangwa itau ti: Kristus ota di moludalo laDavid nomoshilando shaBetlehem, oku kwa li David?” 43 Ndele mokati kovanhu mwa tukuluka olutandu molwaye. 44 Ndele vamwe vomuvo va hala ve mu kwate; ndele kapa li nande umwe e mu kuma.

Jesus ta popilwa

45 Opo nee ovapiya va shuna kovapristeli ovakulunhu nokOvafarisai. Ndele venya va tya kuvo: “Oshike hano inamu mu eta oku?” 46 Ovapiya va nyamukula: “Kapa li omunhu noshito, a popya ngaashi winya ta popi.” 47 Opo Ovafarisai va tya kuvo: “Nanye yo omwa pukifwa mbela? 48 Ope na tuu mbela nande umwe womovakulunhu e mu itavela, ile umwe womOvafarisai? 49 Ndele ovanhu ava, inava shiiva omhango, ova fingwa.” 50 Opo nee umwe womuvo, Nikodemus, ou a ile kuJesus oufiku, ta ti kuvo: 51 “Omhango yetu otai pe tuu omunhu etimba mbela fimbo ina pwilikinwa, ye a udike eshi a ninga?” 52 Ndele vo ve mu nyamukula tava ti: “Naave yo owomuGalilea, hamba? Konakona u tale, muGalilea ihamu di nande omuxunganeki.” 53 Ndele va ya, keshe tuu keumbo lavo.

Johannes 8

1 Ndele Jesus okwa ya kOmhunda yEemono.

Omunyoni wohombo koshipala shaJesus

2 Ndele ongula inene okwa ya vali motembeli, ndele ovanhu vahapu ve uya kuye. Ndele Ye a kala omutumba ndele te va longo. 3 Ndele ovanongo vomishangwa nOvafarisai ve mu etela omukainhu a kwatwa moluhaelo, ndele tave mu kaleke ofika mokati kavo. 4 Opo nee tava ti kuye: “Omuhongi, omukainhu ou okwa kwatwa e li moluhaelo loovene. 5 Ndele Moses okwe tu lombwela, ava ve li ngaha ove nokudipawa nomamanya. Ove oto ti ngahelipi?” 6 Ndele eshi ve shi tila oku mu shinda, va shiive oku mu popya. Ndele Jesus okwa petama ndele ta shange nomunwe pedu. 7 Ndele eshi va diinina oku mu pula, okwa petuka ndele ta ti kuvo: “Ou womunye ehe netimba, ne mu kupule tete emanya.” 8 Ndele okwa petama vali, ndele ta shange medu. 9 Ndele eshi ve di uda, va pewa oushima komaliudo avo, ndele va ya, umwe naumwe, ovakulunhu fiyo ovava vaxuuninwa. Ndele Jesus okwa kala po aeke nomukainhu ou e li ofika koshipala shaye. 10 Ndele Jesus eshi a petuka, ndele ta ti kuye: “Omukainhu, ovapopi voye ove li peni? Kape na ou e ku tokola?” 11 Ndele ye ta ti: “Ahowe, nande umwe, Omwene.” Ndele Jesus okwe mu lombwela: “Naame yo itandi ku tokola, inda, ndele ino nyona vali.”

Jesus ouyelele wounyuni

12 Ndele Jesus okwe va lombwela vali, ta ti: “Aame ouyelele wounyuni; ou ta shikula nge, ita ende momulaulu, ndele ota kala e nouyelele womwenyo.” 13 Opo nee Ovafarisai tava ti kuye: “Ove oto lihepaulula mwene, elihepaululo loye lihe shii okulineekelwa.” 14 Jesus okwe va nyamukula, ta ti kuvo: “Nande handi lihepaulula, ehepaululo lange oli shii okulineekelwa, osheshi Ame ondi shii apa nda dja, naapa handi i, ndele nye kamu shii apa nda dja naapa handi i. 15 Nye otamu tokola pambelela, Ame ihandi tokola nande oumwe. 16 Ndele ngeenge handi tokola, etokolo lange ola yuka, osheshi Ame haame andike, ndele ofye naTate, ou a tuma nge. 17 Nomomhango yeni omwa shangwa: Ehepaululo lovanhu vavali oloshili. 18 Ame ou handi lihepaulula mwene, naTate ou a tuma nge ota hepaulula nge.” 19 Ndele vo ova tya kuye: “Xo oku li peni?” Jesus okwa nyamukula ta ti: “Kamu shii nge, naTate kamu mu shii; ngeno omu shii nge, ngeno naTate omu mu shii.” 20 Eendjovo edi Jesus okwe di popya poshikefa shoiyandjiwa yotembeli, eshi a longa ovanhu motembeli; ndele kapa li nande omunhu e mu kwata, osheshi efimbo laye la li inali fika manga.

Jesus mafiku ta i

21 Ndele Jesus ta ti vali kuvo: “Ame ohandi di po, ndele nye otamu kongo nge, ndele otamu ka fila momatimba eni. Oku handi i, itamu shiiva okuya ko.” 22 Opo Ovajuda tava ti: “Ote lidipaa mbela, eshi ta ti: ‘Oku handi i, itamu shiiva okuya ko?’ ” 23 Ndele Ye okwe va lombwela: “Nye ovopedu, Ame owopombada, nye ovomounyuni ou, Ame nghi fi womounyuni ou. 24 Onghee nde mu lombwela, otamu ka fila momatimba eni. Osheshi ngeenge itamu itavele nokutya, Aame tuu ou, otamu ka fila momatimba eni.” 25 Opo nee tava ti kuye: “Oove lyelye hano?” Jesus okwa nyamukula ta ti kuvo: “Oye tuu ou nde mu lombwela nokuli pehovelo. 26 Ondi neendjovo dihapu oku mu tongela noku mu tokolela, ndele ou a tuma nge Oye omunashili, naashi nda uda kuye, ohandi shi tongo kounyuni.” 27 Ndele vo ova li vehe udite nokutya, ota popi Xe. 28 Opo nee Jesus ta ti kuvo: “Omona wOmunhu nge mwe mu yelula pombada, opo nee tamu ka dimbulukwa nge nokutya, Aame tuu ou, osho ihandi longo sha mwaame mwene, ndelenee osho Tate e shi longa nge, osho ashike handi shi tongo. 29 Naau a tuma nge oku li pwaame. Ina fiya nge po andike, osheshi ohandi longo ashishe eshi she mu wapalela.” 30 Ye eshi a popya edi, vahapu ve mu itavela.

Ovapika novamangululwa

31 Ndele Jesus okwa lombwela Ovajuda ava ve mu itavela ta ti: “Ngeenge tamu kala meendjovo dange, onye ovalongwa vange shili, 32 ndele tamu ka shiiva oshili, noshili otai mu mangulula.” 33 Opo vo ve mu nyamukula: “Fye oludalo laAbraham, tuhe na apa twa li ovapika vomunhu. Oto ti ngahelipi hano, ‘otamu ka mangululwa?’ ” 34 Jesus okwe va nyamukula: “Oshilishili ohandi mu lombwele: Keshe tuu ou ta longo oulunde, oye omupika woulunde. 35 Ndelenee omupika iha kala alushe meumbo, omona oha kala alushe. 36 Omona ngeenge te mu mangulula, omwa manguluka shili. 37 Ame ondi shi shii nokutya, nye oludalo laAbraham, ndele omwa hala okudipaa nge, shaashi eendjovo dange inadi mona onhele munye. 38 Ame ohandi tongo eshi nde shi mona puTate, nanye yo tamu longo eshi nye mwa mona kuxo.” 39 Ndele vo va nyamukula tava ti: “Abraham oye tate yetu.” Jesus ta ti kuvo: “Ngeno nye ovana vaAbraham, ngeno hamu longo oilonga yaAbraham. 40 Paife mwa hala okudipaa nge, omunhu ou nde mu lombwela oshili, oye e i uda kuKalunga. Abraham ina ninga ngaha. 41 Nye ohamu longo oilonga yaxo yeni.” Vo ova tya kuye: “Fye inatu dalwa moluhaelo, otu na Tate umwe aeke, Kalunga.” 42 Jesus ta ti kuvo: “Ngeno Kalunga oXo yeni, ngeno omu hole nge, osheshi Ame nda dja muKalunga, onde uya nda dja kuye; Ame inandi dja mwaame mwene, ndelenee Ye okwa tuma nge. 43 Oshike inamu uda ko ondaka yange? Osheshi itamu dulu okupwilikina eendjovo dange. 44 Nye omu na xo yeni, Satana, ndele ouhalu waxo yeni mwa hala oku u wanifa. Ye omudipai nghee a dja, ina kala moshili, osheshi muye kamu na oshili. Eshi ta tongo oipupulu, ota tongo eshi shaye mwene, shaashi ye omunaipupulu naxe yayo. 45 Molwaashi Ame ohandi popi oshili, itamu itavele nge. 46 Olyelye mokati keni ta tomhele nge nande etimba limwe? Hano ngeenge handi popi oshili, oshike itamu itavele nge? 47 Ou womuKalunga, oye ta udu eendjovo daKalunga. Nye itamu di udu, osheshi kamu fi vomuKalunga.”

Jesus te lipopile

48 Opo nee Ovajuda va nyamukula tava ti kuye: “Inatu popya mbela da yuka, eshi twa tya, Oove Omusamaria nou na ondemoni?” 49 Jesus ta ti: “Nghi na ondemoni, ohandi fimaneke Tate, ndele nye otamu fifa nge ohoni. 50 Ndele haame handi kongo efimano lange mwene, oku na umwe te li kongo nota tokola. 51 Oshilishili ohandi mu lombwele: Ngeenge ope na ou ta diinine eendjovo dange, ita ka mona efyo fiyo alushe.” 52 Opo Ovajuda ova tya kuye: “Paife otu shi shii nee ou na ondemoni. Abraham okwa fya novaxunganeki, ndele ove to ti: ‘ngeenge pe na ou ta diinine eendjovo dange, ita ka makela efyo fiyo alushe.’ 53 Ove u dule mbela tate Abraham, ou a fya, novaxunganeki va fya, ove oto liningi omushike hano?” 54 Jesus ta ti: “Ame ngeenge handi lifimaneke mwene, efimano lange olongaho, ndelenee ope na Tate ou ta fimaneke nge, Oye tuu tamu ti Oye Kalunga keni. 55 Ndele nye kamu mu shii, Ame ondi mu shii. Ngeno Ame ndi tye kandi mu shii, ngeno Ame omunaipupulu ngaashi nye, ndelenee Ame ondi mu shii ndele ohandi diinine eendjovo daye. 56 Xo yeni Abraham okwa hafela unene okumona efiku lange, ndele okwe li mona ndele ta nyakukwa.” 57 Opo Ovajuda va tya kuye: “Omido doye inadi fika komilongo itano, ndele wa mona Abraham?” 58 Jesus okwa tya kuvo: “Oshili ohandi mu lombwele: Abraham fimbo ina dalwa, Ame opo ndi li.” 59 Opo vo ova toola omamanya ve mu kupule, ndelenee Jesus okwa hondama ndele ta di mo motembeli, ta ende mokati kavo, ta i.

Johannes 9

Omunhu a dalwa omupofi ta twikululwa

1 Ndele mokweenda po kwaye okwa mona omulumenhu a dalwa omupofi. 2 Ndele ovalongwa ve mu pula tava ti: “Rabbi, olyelye a nyona, oye mwene ile ovakulunhu vaye, eshi a dalwa omupofi?” 3 Jesus okwa nyamukula: “Haye a nyona ile ovakulunhu vaye, ndelenee oilonga yaKalunga opo i hololwe muye. 4 Ame ndi nokulonga oilonga yaau a tuma nge, fimbo omutenya; oufiku tau uya, ndele kape na ou ta dulu okulonga. 5 Fimbo ndi li mounyuni, Aame ouyelele wounyuni.” 6 Eshi e shi popya, okwa fiila omate pedu, ndele ta ningi onhata nomate ndele ta vaeke onhata ei pomesho aye. 7 Ndele ta ti kuye: “Inda u ke likoshe metale laSiloa” (otali ti: Omutumwa). Ndele ye okwa ya ko, ndele te likosho, ndele a aluka e wete ko. 8 Ovashiinda naava kwa li have mu mono shito ta ehela, ova tya: “Ou haye tuu ou kwa li ha kala omutumba ta ehela?” 9 Vamwe va tya: “Oye.” Vamwe vali va tya: “Ahowe, oumwe e mu fa.” Ndele ye mwene okwa tya: “Aame tuu ou.” 10 Opo vo va tya kuye: “Omesho oye a twikuluka ngahelipi?” 11 Ye okwa nyamukula ta ti: “Omulumenhu ou ha ifanwa Jesus, okwa pilula onhata, ndele te i vaeke pomesho ange, ndele okwa tya kwaame: Inda ketale laSiloa u likoshe mo; ndele ame nda ya ko ndele handi likosho mo nonda twikuluka.” 12 Ndele vo va tya kuye: “Oku li peni?” Ye okwa tya: “Nghi shii po.” 13 Ndele vo va twala omunhu ou a li nale omupofi kOvafarisai. 14 Ndele efiku olo, Jesus a ninga onhata ndele ta twikulula omesho aye, ola li Eshabata. 15 Ndele Ovafarisai ve mu pula yo nhumbi a twikuluka. Ndele ye okwa tya kuvo: “Okwa tula nge onhata pomesho, ndele handi likosho, ndele ndi wete ko.” 16 Vamwe vomOvafarisai ova tya: “Omulumenhu ou ke fi womuKalunga, osheshi iha yapula Eshabata. Vamwe ova tya? Omunhu omulunde ota dulu ngahelipi okulonga oikumwifalonga i fike apa? Ndele pa holoka olutandu mokati kavo.” 17 Ndele va pula vali omupofi: “Ove oto mu tongo ngahelipi, eshi a twikulula omesho oye?” Ye okwa tya: “Ye omuxunganeki.” 18 Ndele Ovajuda inave mu itavela nokutya, okwa li nale omupofi, ndele a twikuluka, fiyo va ifana ovakulunhu vaau a twikululwa. 19 Ndele ve va pula: “Ou omona weni, ou tamu ti a dalwa omupofi? Ota mono ko hano ngahelipi?” 20 Ovakulunhu vaye va tya: “Otu shi shii ou omona wetu, ndele a dalwa omupofi. 21 Ndelenee eshi a ninga omunamesho katu shi shii, ndele ou a twikulula omesho aye, katu mu shii. Mu puleni, ye omukulunhu, ne lipopile mwene.” 22 Ovakulunhu vaye ova popya ngaha, shaashi va tila Ovajuda. Osheshi Ovajuda ova udafana nokutya, ngeenge ope na ou ta ti: Oye Kristus, ota kondwa mo moshinagoga. 23 Onghee hano ovakulunhu va tya: “Ye omukulunhu, mu puleni.” 24 Opo nee vo va ifanununa omunhu ou a li omupofi, ndele va tya kuye: “Pa Kalunga efimano, otu shi shii omulumenhu winya omulunde.” 25 Ndele ye okwa nyamukula: “Ngeenge ye omulunde kandi shi shii, shimwe ashike ndi shii, onda li omupofi, ndele paife ondi wete ko.” 26 Ndele vo ova tya kuye: “E ku ninga ngahelipi hano, omesho oye okwe a twikulula ngahelipi?” 27 Ye okwe va nyamukula: “Nde shi mu lombwela nale, ndele inamu uda ko? Omwa hala hano mu ude vali shike? Omwa hala mu ninge ovalongwa vaye?” 28 Opo vo ve mu tuka, ndele tava ti: “Oove omulongwa waye, fye ovalongwa vaMoses. 29 Otu shi shii Kalunga okwa popifa Moses, ndele ou, katu mu shii apa a dja.” 30 Omulumenhu ou e va nyamukula ta ti: “Heeno, oshinima tashi kumwifa nge osheshi, eshi muhe shii apa a dja, nande okwa twikulula omesho ange. 31 Ndele tu shi shii Kalunga iha udu ovalunde, ndele ou ha tila Kalunga ndele ta wanifa ehalo laye, ota udika kuye: 32 Okudja kehovelo lounyuni inaku udika omunhu a twikulula omesho omunhu a dalwa omupofi. 33 Ou ngeno ke fi womuKalunga ngeno ke na eshi ta dulu okuninga.” 34 Opo ve mu nyamukula, tava ti kuye: “Ove owa dalwa moulunde woovenevene, ndele wa hala u tu longe.” Opo ve mu undulila pondje.

Jesus te liholola komudalwa omupofi

35 Jesus eshi e shi uda nokutya, ve mu undulila pondje, eshi e mu shakeneka, okwa tya kuye: “Ove ho itavele tuu Omona wOmunhu?” 36 Ye okwa nyamukula ta ti: “Omwene, ye olyelye, ndi mu itavele?” 37 Jesus okwa tya kuye: “Ove we mu mona, naau ta popi naave, Oye tuu ou.” 38 Ndele ye okwa tya kuye: “Omwene, ohandi itavele.” Ndele ta tu eengolo koshipala shaye. 39 Opo Jesus okwa tya: “Ame onde uya mounyuni ou okuninga etokolo. Ava ihava mono ko, va mone ko. Naava hava mono ko, va twike.” 40 Ndele Ovafarisai vamwe, ava va hangika pamwe naye, ove shi uda, ndele tava ti: “Nafye yo ovapofi hamba?” 41 Jesus okwa tya kuvo: “Ngeno nye ovapofi, ngeno kamu netimba; ndele eshi hamu ti: ‘ohatu mono ko,’ etimba leni otali kalelele po.

Johannes 10

Jesus oshivelo shoshuunda sheedi

1 “Oshilishili ohandi mu lombwele: ou ita i moshuunda sheedi ta piti moshivelo, ndele ta piti pamwe pe lili ta pumine mo, oye omulunga nombudi. 2 Ndelenee ou ta i mo ta piti moshivelo, oye omufita weedi. 3 Oye ta yeululwa komukeleli woshivelo needi otadi udu ondaka yaye; nota ifana eedi daye omadina ado, ndele te di pitifa mo. 4 Ndele ngeenge a pitifa mo eedi daye adishe, ote di kwatele komesho, needi tadi mu shikula, osheshi odi shii ondaka yaye. 5 Ndele umwe e lili itadi mu shikula, otadi mu i onhapo, osheshi kadi shii ondaka yavamwe ve lili.” 6 Efaneko eli Jesus okwe li va lombwela; ndele vo va li vehe udite ko eshi e va lombwela oshike. 7 Opo Jesus okwe va lombwela vali: “Oshilishili ohandi mu lombwele: Aame oshivelo sheedi. 8 Aveshe venya va ile komesho yange, ovo ovalunga neembudi, needi inadi va uda. 9 Aame oshivelo. Ngeenge pe na ou ta i mo ta piti mwaame, oye ta xupifwa, ndele ta kala nokuya mo nokudja mo, ndele ta mono oulifilo. 10 Omulunga iha endele oshinima shimwe, okuvaka ashike nokudipaa nokunyonauna. Ame nde uya, vo va kale nomwenyo nouyadi.

Jesus Ye omufita muwa

11 “Aame omufita ou muwa. Omufita ou muwa ota yandjele eedi omwenyo waye. 12 Ndelenee omulongeli wondjabi ou ehe fi omufita, needi dihe fi daye mwene, ota mono embungu tali uya, oye te di fii po ndele ta i onhapo; nembungu tali di kwata noku di halakanifa. 13 Ota i onhapo, osheshi oye omulongeli wondjabi, needi ke na ko na sha nado. 14 Aame omufita ou muwa, eedi dange ondi di shii, needi dange odi shii nge, 15 ngaashi Tate e shii nge, naame onda shiiva Tate. Nomwenyo wange ohandi u yandjele eedi. 16 Ondi na yo eedi dihe fi domoshuunda eshi; naadinya ondi noku di eta mo, ndele tadi udu ondaka yange, ndele tapa ka kala oshuunda shimwe, nomufita umwe. 17 “Onghee Tate e hole nge, eshi handi yandje omwenyo wange, opo ndi u tambule vali. 18 Kape na ou te u kufa nge, ndelenee Aame mwene handi u yandje. Ame ondi neenghono oku u yandja, ndele ondi neenghono oku u tambula vali. Oshipango eshi onde shi pewa kuTate.”

Jesus Omona waKalunga

19 Opo mOvajuda mwa tukuluka olutandu molweendjovo edi. 20 Ndele vahapu vavo va tya: “Ye oku na ondemoni, ndele ta i eenghwengu; oshike tamu mu pwilikinine?” 21 Vamwe va tya: “Eendjovo edi kadi fi daau e neendemoni. Ondemoni otai dulu tuu mbela okupashukifa omesho ovapofi?” 22 Ndele oshivilo shokudimbulukwa eyapulo lotembeli yomuJerusalem osha fika, ndele opa li okufu. 23 Jesus okwa li ta endaenda motembeli molukala laSalomo. 24 Opo Ovajuda ve mu liongalela ndele tava ti kuye: “Fiyo onaini to tu kaleke momalimbililo? Oove ngeenge oKristus, tu lombwela hano odikilila.” 25 Jesus okwe va nyamukula: “Onde shi mu lombwela, ndele nye inamu itavela. Oilonga ei handi i longo medina laTate, otai hepaulula nge. 26 Ndelenee nye itamu itavele, osheshi kamu fi eedi dange. 27 Eedi dange ohadi udu ondaka yange, naame ondi di shii, ndele do otadi shikula nge. 28 Ndele Ame ohandi di pe omwenyo waalushe, ndele do itadi ka kana fiyo alushe, ndele kape na ou te di vakula mo meke lange. 29 Tate ou e di pa nge, oku dule aveshe, ndele kape na ou ta dulu oku di vakula mo meke laTate. 30 Ofye naTate umwe.” 31 Opo tuu opo Ovajuda va toola omamanya ve mu dipae nomamanya. 32 Jesus okwa nyamukula ta ti kuvo: “Ame onde mu ulikila oilonga iwa ihapu ya dja muTate; oshilonga shilipipo mwa hala oku shi dipaela nge nomamanya?” 33 Ovajuda ove mu nyamukula: “Itatu ku dipaa nomamanya molwoshilonga shiwa, ndelenee omolweshekokalunga nashaashi Ove to liningi Kalunga, nande Oove omunhu.” 34 Jesus okwe va nyamukula: “Momhango yeni inamu shangwa: ‘Ame onda tya: onye ookalunga?’ 35 Oye ngeenge ta ifana venya va pewa eendjovo daKalunga, ookalunga, nomishangwa itadi dulu okudimwa po, 36 nena otamu ti ngahelipi kwaau, Xe e mu yapula nokwe mu tuma mounyuni: to sheke, shaashi nda tya: Aame Omona waKalunga? 37 Ngeenge ihandi longo oilonga yaTate, inamu itavela nge. 38 Ndelenee, ngeenge handi i longo, nande itamu itavele nge, itaveleni oilonga ei, opo mu shiive ndele mu ude ko nokutya, Tate oku li mwaame naame ondi li muTate.” 39 Opo vo va hala vali oku mu kwata, ndele Ye okwa dja mo momake avo, ndele ta i. 40 Ndele Ye okwa ya vali langhele kwinya yomulonga Jordan, konhele ei Johannes kwa li ta shashele, ndele okwa kala ko. 41 Ndele vahapu ove uya kuye ndele tava ti: “Johannes ina longa nande oshilongadidiliko, ndele aishe ei Johannes a tongela ou, oyoshili.” 42 Ndele vahapu vaako ve mu itavela.

Johannes 11

Jesus ta nyumuna Lasarus

1 Ndele opa li omulumenhu umwe ta vele, Lasarus womuBetania, momukunda waMaria nomumwaina Marta. 2 Maria oye ou a vaekele Omwene nomaadi, neemhadi e di pushulile neexwiki daye dokomutwe, hano omumwaina, Lasarus, okwa li ta vele. 3 Opo ovamwaina ovakainhu ova tuma kuJesus ondaka ei: “Omwene, tala, ou u mu hole, ota vele.” 4 Hano Jesus eshi e shi uda, okwa tya: “Oudu ou kau fi wokufya, ndelenee owokufimanekifa Kalunga, Omona waKalunga opo a fimanekifwe kuwo.” 5 Ndele Jesus okwa li e hole Marta nomumwaina naLasarus. 6 Ndele eshi e mu uda ta vele, okwa kala ko natango omafiku avali konhele oko a li. 7 Ndele eshi a pita po okwa tya kovalongwa vaye: “Tu shuneni kuJudea.” 8 Ovalongwa ova tya kuye: “Rabbi, Ovajuda hanga ove ku dipaa nomamanya, ndele ove oto i ko vali.” 9 Jesus ta ti: “Omutenya kau na eetundi omulongo nambali? Ou ta ende omutenya ite lipumu, osheshi oku wete ouyelele wounyuni ou. 10 Ndele ou ta ende oufiku oye te lipumu, osheshi ke nouyelele muye.” 11 Oye okwa tonga edi, ndele ta ti kuvo: “Lasarus, kaume ketu okwa kofa, ndelenee Ame ohandi i ko ndi ke mu pendule.” 12 Opo ovalongwa va tya kuye: “Omwene, ngeenge a kofa ota veluka.” 13 Ndele Jesus okwa popya okufya kwaye. Ndele vo ova li ve shii ota popi okukofa kweemhofi detulumuko. 14 Opo Jesus okwe va lombwela sha yuka: “Lasarus okwa fya, 15 ndele Ame onda hafa omolweni, shaashi nda hangika ndihe ko, opo mu itavele. Ndele tu yeni kuye.” 16 Opo Tomas, ou a ifanwa Omukwanambwiyu, okwa tya kovalongwa vakwao: “Nafye yo tu yeni ko tu ka fileni pamwe naye.” 17 Hano Jesus eshi a fika ko, okwa hanga Lasarus a ninga omafiku ane mombila. 18 Ndele Betania osha li popepi naJerusalem, eekilometa nhatu ngeno. 19 NOvajuda vahapu ve uya kuMarta naMaria ve va pendule shaashi va filwa omumwaina. 20 Ndele Marta eshi a uda Jesus te uya, okwe ke mu shakeneka; ndele Maria okwa li omutumba keumbo. 21 Ndele Marta okwa tya kuJesus: “Omwene, ngeno Ove wa li po, ngeno omumwameme ina fya. 22 Ndelenee nopaife ondi shi shii, keshe eshi to indile Kalunga, Kalunga ote shi ku pe.” 23 Jesus ta ti kuye: “Omumwanyoko ota nyumuka.” 24 Marta okwe mu nyamukula: “Ondi shi shii nokutya, ota nyumuka menyumuko mefiku laxuuninwa.” 25 Jesus ta ti kuye: “Aame enyumuko nomwenyo; ou ta itavele nge ota kala nomwenyo, nande na hangike a fya. 26 Ndele keshe tuu ou e nomwenyo, ndele ta itavele nge, ita fi nande fiyo alushe. Oto shi itavele tuu?” 27 Ye okwa tya kuye: “Heeno Omwene, handi itavele nokutya, Oove Kristus, Omona waKalunga, ou e nokuuya mounyuni.” 28 Ndele eshi e di tya, okwa ya ndele ta ifana omumwaina Maria, ndele okwe mu lombwela meholeko: “Omuhongi opo e li apa ndele te ku ifana.” 29 Maria eshi e shi uda, okwa fikama diva ndele ta i kuye. 30 Ndele Jesus okwa li ina fika natango komukunda, ndelenee okwa li konhele apa Marta e mu shakeneka. 31 Opo nee Ovajuda ovo va li pamwe naMaria meumbo tave mu pendula, eshi ve mu mona, a fikama diva ndele ta piti mo, ove mu shikula va li ve shii ta i kombila, a ka lilile ko. 32 Ndele Maria eshi e uya oku kwa li Jesus, ndele te mu mono, okwa twa eengolo keemhadi daye ndele ta ti kuye: “Omwene, ngeno Ove wa li po, ngeno omumwameme ina fya.” 33 Ndele Jesus eshi e mu wete ta lili nOvajuda ava ve uya pamwe naye tava lili, okwa tukuluka momhepo yaye ndele ta kwatwa kolukaka, 34 ndele ta ti: “Omwe mu nangeka peni?” Vo ova tya kuye: “Omwene, ila u ka tale.” 35 Jesus okwa lila. 36 Opo Ovajuda ova tya: “Taleni, nhumbi kwa li e mu hole.” 37 Ndele vamwe vomuvo ova tya: “Oye tuu ou a twikulula omesho omupofi oshike ina dula yo mbela okukelela ou aha fye?” 38 Opo Jesus okwa tukuluka vali momhepo yaye ndele ta i kombila. Ndele oyo ya li ekololo, nemanya le i tuvika. 39 Jesus okwa tya: “Kufeni ko emanya.” Marta, omumwaina wanakufya okwa tya kuye: “Omwene, ye okwa nyika nale, osheshi nena okwa ninga omafiku ane.” 40 Jesus ta ti kuye: “Inandi ku lombwela, ngeenge to itavele, oto mono efimano laKalunga?” 41 Opo vo ova kufa ko emanya. Ndele Jesus okwa lyaamena pombada ndele ta ti: “Tate, ohandi ku pandula, shaashi wa uda nge. 42 Ndele ondi shi shii, Ove ho udu nge alushe; Ndelenee molwovanhu ava va dingilila nge, ohandi popi ngaha, vo va itavele nokutya, Oove wa tuma nge.” 43 Ndele eshi e shi tya, okwa ingida mokule: “Lasarus, dja mo!” 44 Nakufya okwa dja mo, eemhadi nomaoko a mangwa nomalapi, noshipala shaye sha mangwa noshipushulifo shoshinhwi. Jesus okwe va lombwela: “Mu mangululeni, nye mu mu efe a ye.”

Ovapristeli va hala okudipaa Jesus

45 Opo Ovajuda vahapu, ava va li ve uya kuMaria ndele va mona osho Jesus e shi ninga, ove mu itavela. 46 Ndelenee vamwe vomuvo ova ya kOvafarisai, ndele ve va hepaululila eshi Jesus e shi ninga. 47 Ndele opo ovapristeli ovakulunhu nOvafarisai ova shiva oshiongalele shovakulunhu ndele tava ti: “Ohatu ningi ngahelipi, osheshi omulumenhu ou ota ningi oikumwifalonga ihapu? 48 Ngeenge hatu mu efa ngaha, aveshe otave mu itavele, nOvaroma otave uya ndee tave tu kufa oshilongo novanhu yo.” 49 Ndele umwe wavo, Kajafas, ou okwa li omupristeli omukulunhu omudo ou, okwa tya kuvo: “Eendunge deni odongaho, 50 ndele nye inamu diladila, okufya kwomunhu umwe molwovanhu kwe mu wapalela, ku dule okunyonauka po kwoshiwana ashishe.” 51 Ndele eshi ine shi tonga muye mwene, ndele shaashi okwa li omupristeli omukulunhu omudo winya, okwa xunganeka, Jesus oku nokufila oshiwana, 52 ndele hamolwoshiwana eshi ashike, ndele opo a kongolole yo ovana vaKalunga, ava ve li po ve lihana, va ninge vamwe aveke. 53 Ndele kefiku olo tuu olo va pangela oku mu dipaa. 54 Onghee hano Jesus ina enda vali moipafi mokati kOvajuda, ndele okwa ya konhele ya li popepi nombuwa okoshilando sha lukwa Efraim. Ndele oko a kala novalongwa vaye. 55 Ndele Opaasa, oshivilo shOvajuda osha li sha fika, nOvajuda vahapu vomomikunda va ya kuJerusalem ve liyelife, Opaasa fimbo inai dana. 56 Opo ova konga Jesus va pulafana va kala ofika motembeli: “Otamu ti ngahelipi: Ye ote uya tuu koshivilo?” 57 Ndele ovapristeli ovakulunhu nOvafarisai ova yandja ondaka, ngeenge ope na ou e shii apa e li, oku noku shi holola, opo ve mu kwate.

Johannes 12

Jesus ta vaekwa

1 Ndele eshi kwa li natango omafiku ahamano Opaasa fimbo inai fika, Jesus okwe uya kuBetania, oku kwa li Lasarus, ou Jesus e mu nyumuna koufi. 2 Oko nee oko ve mu tulila po, Marta okwa yakula ndele Lasarus okwa li umwe waava va li omutumba koshililo pamwe naye. 3 Ndele Maria okwa kufa omaadi onardelela e na ondilo, etata lolita, ndele ta vaeke eemhadi daJesus, ndele te di pushula neexwiki daye. Nondjuwo aishe ya yada edimba lomaadi. 4 Ndele Judas Iskariot, umwe womovalongwa vaye, ou te ke mu kengelela, okwa tya: 5 “Omaadi aa oshike inaa landifwa po needenari omafele atatu, di pewe ngeno eehepele?” 6 Ndele eshi ine shi tya a yavelela eehepele, ndele osheshi a li omulunga, naashi a li a humbata okakutu koimaliwa, ndele okwa li ha kufa mo eshi tashi tulwa mo. 7 Ndele Jesus okwa tya: “Mu efa, osheshi e a tuvikilila efiku lokupakwa kwange. 8 Osheshi eehepele odi li punye alushe, ndelenee Ame nghi li punye alushe.” 9 Opo nee ongudu inene yOvajuda eshi ye mu uda e li ko, oye uya ko ndele inava ila ko Jesus aeke, ndelenee va tale yo Lasarus, ou a nyumunwa kuJesus koufi. 10 Novapristeli ovakulunhu ova pangela omhangela okudipaa yo naLasarus, 11 osheshi vahapu vomOvajuda ova ya ko molwaye ndele va itavela Jesus.

Jesus ta londo ta i kuJerusalem

12 Ndele mefiku la shikula eli, ongudu inene yovaenda ava ve uya koshivilo, eshi va uda Jesus e li mondjila te uya kuJerusalem, 13 ova fola eembale domilunga nova ya ve ke mu shakeneke, ndele vo va ingida: “Hosianna! Na nangekwe noupuna, ou te uya medina lOmwene, ou ohamba yaIsrael.” 14 Ndele Jesus eshi a mona okambulwena, okwe ka londa, ngaashi pa shangwa: 15 “Ino tila, omona okakadona Sion! Tala, ohamba yoye otai uya ya londa kokambulwena.” 16 Oinima ei ovalongwa vaye ova li vehe i udite ko natango, ndelenee Jesus eshi a yelifwa, ove shi dimbulukwa, eshi sha shangwa Oye ta tongwa, ndele osho ve mu ningila. 17 Ndele eengudu dovanhu odo da li pamwe naye eshi a ifana Lasarus a dje mo mombila, ndele e mu nyumuna, ode mu hepaulula. 18 Onghee nee ongudu yovanhu ya ile oku ke mu shakeneka, shaashi va uda a ningile edidiliko eli. 19 Opo nee Ovafarisai va tongafana: “Nye mu shi wete, kamu na eshi tamu dulu. Taleni, ounyuni aushe tau mu shikula.”

Oiimati yokufya kwaJesus

20 Ndele mokati kaava ve uya koshivilo okwiilikana, omwa li Ovagreka vamwe. 21 Ova ya kuFilippus womuBetsaida shomuGalilea, ove mu indila, va tya: “Omwene, otwa hala okumona Jesus.” 22 Filippus okwa ya ndele te shi lombwele Andreas, Andreas naFilippus ova ka hepaululila Jesus. 23 Ndelenee Jesus okwe va nyamukula ta ti: “Efimbo ola fika, Omona wOmunhu a fimanekifwe. 24 Oshilishili ohandi mu lombwele: Omuma yolulya ngeenge itai wile medu ndele itai file mo, otai likalele aike. Ndele ngeenge tai file mo, otai dala eemuma dihapu. 25 Ou e hole omwenyo waye, ote u kanifa, naau ta tondo omwenyo waye mounyuni ou, oye te u diininine omwenyo waalushe. 26 Ngeenge pe na ou ta kalele nge, na shikule nge; naapa ndi li, omupiya wange oko ta ka kala. Ndele ngeenge pe na ou ta kalele nge, Tate ote mu fimaneke. 27 “Paife omwenyo wange owa tukuluka ndele handi ti ngahelipi? Tate, xupife nge mokafimbo aka. Ndelenee molwaashi nde uya mokafimbo tuu aka. 28 Tate, fimanekifa edina loye.” Ndele meulu omwa dja ondaka: “Ame onde li fimanekifa nale, ndele ohandi li fimanekifa vali.” 29 Opo nee ongudu yovanhu ei ya li po ofika oye shi uda, ndele ya tya: “Odula ya ndunduma.” Vamwe ova tya: “Omweengeli okwa tonga naye.” 30 Jesus okwa nyamukula ta ti: “Ondaka ei inai uya molwange, ndelenee omolweni tuu. 31 Paife ope netokolo lounyuni ou, paife omupangeli wounyuni ou ota ekelwa pondje.” 32 Naame ngeenge handi yelulwa po pedu, aveshe ohandi va shilile kwaame. 33 Ndele eshi okwe shi tya, a holole efyo la tya ngahelipi e nokufya. 34 Opo ongudu yovanhu ye mu nyamukula: “Fye otwe shi uda momhango kutya, Kristus ota ka kala alushe; Ove oto ti ngahelipi hano, Omona wOmunhu oku nokuyelulwa? Omona wOmunhu olyelye?” 35 Ndele Jesus okwa tya kuvo: “Okafimbo kanini natango ouyelele u li mokati keni. Kaleni nokweenda mouyelele fimbo mu nouyelele, muha faukilwe komilaulu. Ou ta ende momilaulu, ke shii oku ta i. 36 Fimbo mu nouyelele, itaveleni ouyelele, opo mu ninge ovana vouyelele.”

Okuhaitavela kwOvajuda

Edi Jesus okwe di tonga, ndele ta di po ndele te va hondama. 37 Ndele nande okwa li ta ningi oikumwifalonga ihapu i fike apa moipafi yavo, inave mu itavela, 38 eendjovo domuxunganeki Jesaja opo di wanifwe, edi a tongele: “Omwene, olyelye a itavela eudifo letu, nokwooko kOmwene okwa hololelwa lyelye?” 39 Onghee va nyengwa okwiitavela, osheshi Jesaja a tile vali: 40 “Omesho avo e a twikifa, nomitima davo e di kukutika, vaha mone ko nomesho avo, ndele vaha ude ko komutima, vo vehe lidilulule, Ame ndihe va velule.” 41 Jesaja okwa popya odo eshi a mona oshinge shaye, ndele te mu tongo. 42 Ndelenee vahapu vomovakulunhu ve mu itavela, ndelenee vo inave shi hepaulula omolwOvafarisai, vaha kondwe mo moshinagoga. 43 Osheshi vo ova li ve hole efimano lovanhu komesho yefimano laKalunga.

Jesus naXe

44 Ndele Jesus okwa tonga mokule ndele ta ti: “Ou ta itavele nge, haame ta itavele, ndelenee oyou a tuma nge. 45 Ou a mona nge, oye a mona ou a tuma nge. 46 Ndele Ame nde uya mounyuni ouyelele, opo keshe ou ta itavele nge, aha kale momilaulu. 47 Nongeenge pe na ou ta udu eendjovo dange, ye ite di diinine, haame handi mu tokola; osheshi ame inandi uya okutokola ounyuni, ndelenee okuxupifa ounyuni. 48 Ou ta dini nge ndele ita tambula eendjovo dange, oye oku na omutokoli waye: eendjovo edi nda popya, odo tadi mu tokola efiku laxuuninwa. 49 Osheshi inandi popya mwaame mwene, ndele Tate ou a tuma nge, Ye okwa pa nge oshipango eshi ndi noku shi popya naashi ndi noku shi tonga. 50 Ame ondi shi shii, oshipango shaye osho omwenyo waalushe. Onghee eshi handi shi tongo, ohandi shi tongo ngaashi Tate a lombwela nge.”

Johannes 13

Okukoshwa kweemhadi

1 Ndelenee oshivilo shaPaasa eshi sha fika, Jesus eshi kwa li e wete efimbo laye lokudja mounyuni ou nokuya kuXe ole uya, hano Oye ngaashi a kala e hole ava vaye va li mounyuni, okwa li e va hole fiyo exulilo. 2 Ndele pouvalelo Satana eshi a tula momutima waJudas Iskariot omona waSimon, e mu kengelele, 3 hano Jesus eshi a li e shi shii kutya, Xe okwe mu pa aishe momake aye, naye a dja muKalunga, ndele ta shuna kuKalunga, 4 okwa fikama po pouvalelo, ndele te lidula oshikutu shaye shokombada, okwa kufa oshifanduke, ndele te limange nasho moshiya. 5 Ndele Ye okwa tila omeva moshiyaxa shokulikoshela, ndele okwa hovela okukosha eemhadi dovalongwa, ndele te di pushula noshifanduke eshi e limanga nasho. 6 Oye okwe uya kuSimon Petrus, ou ta ti kuye: “Omwene, Ove oto kosho eemhadi dange?” 7 Jesus okwe mu nyamukula ta ti: “Eshi handi shi ningi, ku shi shii paife, opo to ke shi shiiva komesho.” 8 Petrus ta ti kuye: “Ku na efiku limwe u koshe eemhadi dange.” Jesus okwe mu nyamukula: “Ngeenge itandi ku kosho, ku na sha mwaame.” 9 Simon Petrus okwa tya kuye: “Omwene, haemhadi dange adike, nomake yo nomutwe.” 10 Jesus te mu lombwele: “Ou a koshwa, ina pumbwa shimwe, okukoshwa kweemhadi adike, ndele a yela nee, omunhu aushe. Onye mwa yela, ndele hanye amushe.” 11 Osheshi Ye okwa li e shii ou te ke mu kengelela, onghee okwa tya: “Hanye amushe mwa yela.” 12 Ndele eshi a kosha eemhadi davo, okwa kufa oshikutu shaye shokombada, okwa kala vali omutumba poshililo, okwe va lombwela: “Omu udite ko tuu eshi nde mu ningila? 13 Nye otamu ifana nge Omuhongi nOmwene, ndele ohamu tongo sha yuka, osheshi Aame tuu ou. 14 Hano Aame Omwene nomuhongi weni fimbo nda kosha eemhadi deni, nanye yo mu nokukoshafana keemhadi; 15 osheshi Ame nde mu pa oshihopaelelwa, nye mu ninge yo ngaashi Ame nde mu ningila. 16 Oshilishili ohandi mu lombwele: Omupiya ke dule omwene waye, nomutumwa ke dule omutumi waye. 17 Eshi ngeenge mu shi shii, onye ovanelao ngeenge tamu shi ningi. 18 “Itandi mu tongo onye amushe, ondi va shii ava nde va hoolola. Ndele eshangelo eli opo li wanifwe: ‘Ou ta li pamwe naame eendja, oye ta yelulile nge oshififinwa shaye.’ 19 Paife ohandi shi mu lombwele fimbo inashi ningwa, opo mu itavele nge, ngeenge tashi ningwa, nokutya, Aame tuu ou. 20 Oshili ohandi mu lombwele: Ou ta tambula ou handi mu tumu, ota tambula nge, ndele ou ta tambula nge, oye ta tambula ou a tuma nge.”

Jesus ta holola omukengeleli waye

21 Ndele Jesus eshi a popya edi, okwa tukuluka momhepo yaye, ndele ta hepaulula, ta ti: “Oshilishili ohandi mu lombwele, umwe womunye ota kengelele nge.” 22 Opo ovalongwa va talafana, va limbililwa kutya olyelye ta popiwa kuye. 23 Naumwe womovalongwa vaye, ou Jesus okwa li e mu hole, e liyaameka konhulo yaJesus fimbo ta li. 24 Simon Petrus okwe mu komonena komutwe ndele ta ti: Mu pula, ou ta tongwa kuye, olyelye. 25 Ndele ou e liyaameka ponhulo yaJesus okwa tya kuye: “Omwene, olyelye ou?” 26 Jesus okwa nyamukula: “Oye ou handi mu pe oshipambu eshi nde shi velela mo.” Ndele Ye okwa velela oshipambu ndele te shi pe Judas yaSimon Iskariot. 27 Nokonima yoshipambu eshi Satana okwa ya mo muye. Ndele Jesus okwe mu lombwela: “Eshi to ningi, shi ninga diva.” 28 Ndele mwaava va li poshililo kamwa li ou e udite ko nokutya, okwe shi mu lombwelela shike. 29 Osheshi vamwe va li ve shii, Judas eshi kwa li e kwete ekutu loimaliwa, Jesus e mu lombwela: Ka lande ei twe i pumbwa moshivilo, ile a ka yandje sha keehepele. 30 Hano winya eshi a tambula oshipambu, okwa ya diva pondje. Ndele pa li oufiku.

Oshipango shohole

31 Ndele eshi a pita pondje, Jesus okwa tya: “Paife Omona wOmunhu okwa fimanekwa naKalunga okwa fimanekifwa muye. 32 Kalunga ngeenge a fimanekifwa muye, opo nee Kalunga ote mu fimanekifa yo muye mwene, ndele ote mu fimanekifa diva. 33 Ovamwange, okafimbo kanini natango ndi li punye. Otamu ka konga nge, ndele ngaashi nde shi lombwelele Ovajuda: Oku Ame handi i, itamu dulu okuya ko, osho handi mu lombwele yo paife. 34 Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. 35 Opo tuu opo aveshe tave mu koneke kutya, nye ovalongwa vange, ngeenge mu holafane.”

Epunduko laPetrus tali xunganekwa

36 Simon Petrus okwe mu lombwela: “Omwene, oto i peni?” Jesus okwe mu nyamukula: “Apa handi i, ito dulu okushikula nge paife, ndelenee komesho oto ka shikula nge.” 37 Petrus okwa tya kuye: “Omwene, oshike itandi dulu oku ku shikula paife? Omwenyo wange ohandi ke u yandja omolwoye.” 38 Jesus okwe mu nyamukula: “Omwenyo oto u yandje molwange? Oshili handi ku lombwele: ekondobolo fimbo inali kwena, ove owe lidimbika nge lutatu.”

Johannes 14

Eendjovo delilekelo laJesus

1 “Omitima deni inadi nyika oluhodi. Itaveleni Kalunga nye mu itavele nge yo. 2 Meumbo laTate omu na eendjuwo dihapu, ndele ngeno kapa li ngaha, ngeno handi mu lombwele, ohandi ke mu longela onhele. 3 Nande ohandi i ndi ke mu longele onhele, ohandi aluka, ndele handi mu ile, nanye yo mu kale apa Ame ndi li. 4 Apa handi i, ondjila omu i shii.” 5 Tomas ta ti kuye: “Omwene, katu shii apa to i, nondjila otu i shii peni?” 6 Jesus okwe mu nyamukula: “Aame ondjila noshili nomwenyo; kape na ou te uya kuTate, ngeenge hamwaame ta pitile. 7 Ngeno mu shii nge ngeno naTate mu mu shii. Kokudja paife onye tamu mu shiiva ndele mwe mu mona.” 8 Filippus ta ti kuye: “Omwene, tu ulikila Xo, opo nee fye twa wana.” 9 Jesus te mu lombwele: “Ame onda li punye efimbo lile, ove ku shii nge, Filippus? Ou a mona nge, oye a mona Tate. Ove oto ti ngahelipi: ‘Tu ulikila Xo?’ 10 Iho itavele kutya, Ame ondi li muTate, naTate oku li mwaame? Eendjovo odo handi mu lombwele, itandi di popi mwaame mwene, ndele Tate ou a kala mwaame, Oye ta longo oilonga. 11 Itaveleni nge nokutya, Ame ndi li muTate, naTate oku li mwaame, ndele ngeenge mwa anya, itaveleni nge omolwoilonga yoovene. 12 “Oshilishili handi mu lombwele: Ou ta itavele nge, naye yo ota longo oilonga ei Ame handi i longo, ndele ta ka longa oilonga inene i dule inya, osheshi ohandi i kuTate. 13 Ndele keshe eshi tamu indile medina lange, ohandi shi ningi, Tate opo a fimanekifwe mOmona. 14 Ngeenge tamu indile sha medina lange, Ame ohandi shi ningi. 15 “Ngeenge omu hole nge, diinineni oipango yange. 16 Naame ohandi indile Tate, ndele Oye te mu pe Omupopili umwe, a kale punye alushelushe, 17 Oye Omhepo yoshili, ei ounyuni itau dulu oku i tambula, osheshi itau i mono ndele itau i shiiva. Ndele nye otamu i shiiva, osheshi opunye tai kala, nomunye i li. 18 “Itandi mu fiye po eefiye, ohandi uya vali kunye. 19 Okafimbo kaxupi, ounyuni itau mono nge vali, ndele nye otamu mono nge, osheshi Ame ondi nomwenyo, nanye yo tamu kala nomwenyo. 20 Efiku olo otamu ke shi shiiva nokutya, Ame ondi li muTate, nanye mwaame, naame munye. 21 “Ou e noipango yange ndele te i diinine, oye tuu ou e hole nge; ndele ou e hole nge, ota kala e holike kuTate, naame yo ondi mu hole, ndele handi mu lihololele.” 22 Judas, hayou Iskariot, okwe mu pula: “Omwene, omolwashike wa hala u tu lihololele, ndele haunyuni ou?” 23 Jesus okwe mu nyamukula ta ti: “Ngeenge ku na ou e hole nge, oye ta diinine eendjovo dange, naTate ota kala e mu hole, ndele fye ohatu uya kuye, ndele hatu diki onhele yokukala muye. 24 Ou ke hole nge, oye ita diinine eendjovo dange, neendjovo odo tamu di pwilikine, kadi fi dange, odaTate, ou a tuma nge. 25 “Eshi onde shi mu lombwela fimbo ndi li punye. 26 Ndelenee Omupopili, Omhepo Iyapuki, Oye Tate te ke i tuma medina lange, otai mu longo ashishe ndele tai mu dimbulukifa ashishe nde shi mu lombwela. 27 “Ombili ohandi i mu fiile, ombili yange ohandi i mu pe. Itandi mu pe ngaashi ounyuni tau yandje. Omitima deni inadi nyika oluhodi, nye inamu tila. 28 Onye mwa uda eshi nde mu lombwela: Ame ohandi i ko, ndele handi uya vali kunye. Ngeno mu hole nge, otamu hafe, shaashi ohandi i kuTate, osheshi Tate oku dule nge. 29 Ndele paife onde shi mu lombwela fimbo inashi ningwa, opo mu itavele, ngeenge tashi ningwa. 30 Itandi popi vali nanye dihapu, osheshi omupangeli wounyuni ou te uya, oye ke na nande sha mwaame. 31 Ndelenee ounyuni ou opo u shiive nokutya, Ame ondi hole Tate, ndele ohandi ningi ngaashi Tate a lombwela nge; fikameni, tu djeni po apa.

Johannes 15

Omuviinyu washili noitai yao

1 “Aame omuviinyu washili, Tate Oye omulongi wepya lomiviinyu. 2 Oshitai keshe shi li mwaame eshi itashi imi, Oye ote shi tete po, nakeshe tuu eshi tashi imi ote shi yeleke, shi ime shili. 3 Onye omwa yela nokuli molweendjovo edi nde di mu lombwela. 4 Kaleni mwaame naame ohandi kala munye. Ngaashi oshitai itashi dulu okwiima musho vene, ngeenge itashi kala momuviinyu, osho nanye yo, ngeenge itamu kala mwaame. 5 “Aame omuviinyu, onye oitai. Ou ta kala mwaame naame muye, oye ta imi shihapu; osheshi ngeenge kamu kwete nge, itamu dulu okulonga sha. 6 Ou ita kala mwaame, oye ota ekelwashi ngaashi oshitai, ndele tashi kukuta; oyo tai ongelwa ndele tai ekelwa momundilo ndele tai pile mo. 7 Ngeenge tamu kala mwaame, neendjovo dange tadi kala munye, indileni keshe tuu eshi mwa hala, ndele tamu shi pewa. 8 Opo tuu opo Tate ta fimanekwa ngeenge tamu imi shihapu, ndele tamu ningi ovalongwa vange. 9 Tate ngaashi a kala e hole nge, osho yo Ame nda kala ndi mu hole; kaleni mohole yange. 10 Ngeenge tamu diinine oipango yange, opo nee tamu kala mohole yange, ngaashi Ame nda diinina oipango yaTate ndele handi kala mohole yaye. 11 Ei onde i mu lombwela, ehafo lange li kale munye, nehafo leni li kale la wanenena. 12 “Oshipango shange osheshi: Mu kale mu holafane, ngaashi Ame nda kala ndi mu hole. 13 Kape na ou e nohole i dule yaau ta yandjele ookaume kaye omwenyo waye. 14 Onye ookaume kange, ngeenge tamu ningi eshi handi shi mu lombwele. 15 Itandi mu ifana ovapiya, osheshi omupiya ke shii eshi omwene waye ta ningi; ndelenee onde mu ifana ookaume, osheshi ashishe eshi nde shi uda muTate, onde shi mu shiivifila. 16 Nye, hanye mwa hoolola nge, Aame nde mu hoolola, nonde mu tula po mu ye ko, nye mu ka ime oiimati, noiimati yeni i kalelele, opo nee keshe tuu eshi tamu shi indile Tate medina lange, Oye te shi mu pe. 17 Eshi handi shi mu lombwele mu kale mu holafane.

Outondwe wounyuni nOmupopili

18 “Ounyuni ngeenge tau mu tondo, kaleni mu shi shii, oo wa tonda nge tete. 19 Ngeno onye vomounyuni, ngeno ounyuni u hole vakwao, ndelenee eshi muhe fi vomounyuni, Ame eshi nde mu hoolola mo mounyuni, onghee ounyuni tau mu tondo. 20 Dimbulukweni eendjovo odo nde di mu lombwela: ‘Omupiya ke dule Omwene waye.’ Ngeenge va taataa nge, otave mu taataa yo. Ngeenge va diinina eendjovo dange, nodeni otave di diinine yo. 21 Ndelenee eshi ashishe tave shi mu ningile omolwedina lange, osheshi vo inava shiiva ou a tuma nge. 22 Ngeno Ame nda li inandi uya, ndele inandi va lombwela, ngeno vo kave nomatimba, ndelenee paife kave na sha shokulipopila oulunde wavo. 23 Ou ta tondo nge, oye ha tondo yo Tate. 24 Ngeno onda li inandi longa mokati kavo oilonga ei, inai longwa komunhu umwe, ngeno kave netimba. Ndelenee paife ove shi mona, ndele ove tu tonda ofye naTate. 25 Ndelenee, ondjovo ei ya shangwa momhango yavo oi nokuwanifwa: ‘Ovo va tonda nge ongaho.’ 26 “Nge Omupopili te uya, Omhepo yashili ou ta di kuTate. Ou handi mu tumu ta di kuTate, Oye ta hepaulula nge. 27 Nanye yo tamu hepaulula, osheshi omwa kala naame okehovelo.

Johannes 16

Ovalongwa tava ka tewatewa

1 “Oinima ei onde i mu lombwela muha ninge omwenyo mwii. 2 Vo otave mu kondo mo meeshinagoga, heeno, omafiku otae uya, keshe ou te mu dipaa, oye e shii ta yandjele Kalunga eyambo. 3 Naashi tave shi mu ningile, osheshi inava shiiva Tate, vo kave shii nge. 4 Ndelenee ei onde i mu lombwela, opo efimbo olo nge tali uya, mu shi dimbulukwe nokutya, Ame onde shi mu lombwela.

Oshilonga shOmhepo Iyapuki

“Eshi inandi shi mu lombwela pehovelo, osheshi Ame nda li punye. 5 Ndele paife ohandi i kwaau a tuma nge, ndele kape na ou womunye ta pula nge: Oto i peni? 6 Ndelenee eshi nde shi mu lombwela, onghee omitima deni tadi yadifwa oluhodi. 7 Ndelenee ohandi mu lombwele oshili: okuya kwange otaku mu kwafa, osheshi ngeenge itandi i ko, Omupopili ite uya kunye, ndele ngeenge handi i ko, ohandi mu tumu kunye. 8 Ndele Oye ngeenge te uya, ounyuni ote u tomhene oulunde nouyuki netokolo: 9 oulunde, osheshi itava itavele nge, 10 ouyuki, osheshi handi i kuTate, nye itamu mono nge vali, 11 netokolo, osheshi omupangeli wounyuni ou a tokolwa. 12 “Ondi noinima ihapu natango oku mu lombwela, ndelenee paife itamu dulu oku i humbata. 13 Ndele winya ngeenge te uya, Omhepo yoshili, Oyo tai mu twala moshili aishe; osheshi itai tongo muyo vene, ndele eshi tai udu, osho tai tongo, naashi tashi uya komesho otai mu hololele. 14 Oyo tai fimanekifa nge, osheshi otai kufwa mwaai yange, ndele tai mu hepaululile. 15 Aishe ei Tate e i kwete, oyange, onghee nda tya: oyo tai kufwa mwaai yange, ndele tai mu hepaululile.

Oluhodi lovalongwa

16 “Ope nokafimbo kaxupi natango, ndele itamu mono nge vali, ndele ope na vali okafimbo kaxupi, ndele tamu mono nge, osheshi Ame handi i kuTate.” 17 Vamwe vomovalongwa vaye ova tongafana: “Oshike hano, eshi ta ti kufye: ‘Okafimbo kaxupi natango, ndele itamu mono nge, ndele ope na vali okafimbo kaxupi ndele tamu mono nge, ndele handi i kuTate?’ 18 Ovo va tya: Okokutya ngahelipi, eshi ta ti: okafimbo kaxupi? Katu udite ko eshi ta ti.” 19 Ndele Jesus eshi a koneka vo va hala oku mu pula, okwa tya kuvo: “Otamu pulafana eshi nda tya: ‘ope nokafimbo kaxupi, ndele itamu mono nge, ndele ope na vali okafimbo kaxupi, ndele tamu mono nge?’ 20 Oshilishili handi mu lombwele: otamu kala nokulila nokunyemata, ndele ounyuni otau hafe. Onye tamu kala nokunyika oluhodi, ndelenee oluhodi leni tali ka shituka ehafo. 21 Omukainhu nge ta dala, oku na oluhodi, osheshi efimbo laye ola fika; ndele eshi a dala okaana, iha dimbulukwa vali oudjuu molwehafo eli, omunhu eshi a dalelwa mounyuni. 22 Nanye yo paife omu noluhodi, ndelenee Ame ohandi mu mono vali, omutima weni otau ka hafa, ndele kape na ou te mu nyeka ehafo leni. 23 “Mefiku olo itamu pula nge sha vali. Oshilishili ohandi mu lombwele: ngeenge tamu indile sha kuTate, Oye ote shi mu pe medina lange. 24 Fiyo onena onye inamu indila sha medina lange. Indileni ndele tamu pewa, ehafo leni li kale la wanenena.

Jesus ta popi eendjovo da fatuka

25 “Oinima ei onde i tonga kunye momafaneko; otape uya efimbo eshi itandi mu lombwele vali momafaneko, ndelenee ohandi mu hepaululile Tate, itandi holeke sha. 26 Mefiku olo otamu indile medina lange, naame itandi ti kunye, ndi mu indilile kuTate, 27 osheshi Tate Oye mwene e mu hole, shaashi nye mu hole nge, ndele tamu itavele, Ame nda dja muKalunga. 28 Ame onda dile kuTate, ndele onde uya mounyuni. Ounyuni ohandi u fii po vali, ndele handi i kuTate.” 29 Ovalongwa vaye va tya kuye: “Tala, paife oto popi wa fatula, ito holeke sha, ito tongo efaneko lasha. 30 Paife otu shi shii, oinima aishe Ove ou i shii, Ove ino pumbwa umwe e ku pule sha. Onghee hatu itavele, Ove wa dja muKalunga.” 31 Jesus okwe va nyamukula: “Paife omwa itavela? 32 Taleni, efimbo otali uya, heeno, ole uya nokuli, onye otamu ka halakanifwa keshe tuu te liyukile, ndele tamu fii nge po andike; ndele Ame kandi li po andike, osheshi Tate oku li naame. 33 Oinima ei onde i mu lombwela, mu kale mu nombili mwaame. Mounyuni omu li mo mu noudjuu, ndelenee kaleni nomwenyo muwa, Ame onda finda ounyuni.”

Johannes 17

Jesus te liilikanene

1 Jesus eshi a popya eendjovo edi okwa lyaamena keulu, ndele ta ti: “Tate, efimbo le uya, fimanekifa omumwoye, omumwoye e ku fimanekife yo; 2 ngaashi Ove we mu pa epangelo lombelela aishe, opo aveshe ava we mu pa, Ye e va pe omwenyo waalushe. 3 Nomwenyo waalushe oo tuu ou, vo ve ku shiive, Oove auke Kalunga kashili, naau we mu tuma, Jesus Kristus. 4 Ame onde ku fimanekifa kombada yedu mokuwanifa oshilonga eshi we shi pele nge, ndi shi longe. 5 Ndele paife Tate, fimanekife nge pwoove mwene nefimano olo, nda li ndi li kwete, eshi nda kala pwoove, ounyuni fimbo inau shitwa.

Jesus ta ilikanene ovayapostoli

6 “Edina loye onde li hololela ovanhu ava we va pa nge mounyuni. Vo va li voye, ndele we va pa nge; vo va diinina eendjovo doye. 7 Paife ove shi shii shili kutya, ashishe eshi wa pa nge, osha dja mwoove. 8 Osheshi eendjovo we di pa nge, onde di va pa, ndele vo ove di tambula, ndele ve shi shii shili kutya, onda dja kwoove ndele va itavela, Oove wa tuma nge. 9 “Ovo ohandi va ilikanene, itandi ilikanene ounyuni ou, ndelenee ovava wa pa nge, osheshi vo ovoye. 10 Nakeshe shange oshoye, naashi shoye oshange, ndele onda fimanekelwa muvo. 11 Ndele Ame nghi li vali mounyuni ou, ndelenee vo omo ve li mounyuni ou, naame handi uya kwoove. Tate omuyapuki, va diininina medina loye, eli wa pa nge, va kale umwe, ngaashi tu li naave. 12 Eshi nda li puvo, onde va diinina medina loye eli wa pa nge, ndele onde va amena; ndele kape na umwe wavo a kanifwa, ndelenee oye ou omona wekano aeke, opo omishangwa di wanifwe. 13 Ndele paife handi uya kwoove neendjovo edi ohandi di tongo mounyuni ou, vo va kale ve nehafo lange la yadelela muvo vene. 14 Ame onde va pa eendjovo doye, nounyuni otau va tondo, osheshi vo kave fi vomounyuni ou, ngaashi Ame ndihe fi womounyuni ou. 15 Itandi indile u va kufe mo mounyuni ou, ndele u va amene kowii. 16 Vo kave fi vomounyuni, ngaashi Ame ndihe fi womounyuni. 17 Va yapulila moshili yoye, eendjovo doye odo oshili. 18 Ngaashi Ove wa tuma nge mounyuni, osho Ame onde va tuma mounyuni. 19 Ndele Ame ohandi liyapula molwavo, vo va yapulilwe moshili.

Jesus ta ilikanene ovaitaveli aveshe

20 “Ndelenee itandi va ilikanene ovo aveke, ndelenee naava yo tava itavele nge omolweendjovo davo. 21 Opo aveshe va kale umwe, ngaashi Ove Tate, u li mwaame naame ndi li mwoove, ndele vo va kale mufye, ounyuni u itavele nokutya, Oove wa tuma nge. 22 Ndele efimano eli wa pa nge onde li va pa, opo va kale umwe ngaashi ofye umwe. 23 Ame muvo naave mwaame, vo va kale umweelela, ounyuni u kale u shi shii, Oove wa tuma nge, ndele Ove u va hole, ngaashi u hole nge. 24 “Tate, onda hala ava wa pa nge, va ka kale apa ndi li, va tale efimano lange eli wa pa nge, osheshi Ove wa kala u hole nge, ounyuni fimbo inau shitwa. 25 Tate omuyapuki, ounyuni inau ku shiiva, ndelenee Ame ondi ku shii, naava va dimbulukwa nokutya, Oove wa tuma nge. 26 Ndelenee Ame nde va shiivifa edina loye, ndele ohandi ke li shiivifa natango, opo ohole ei wa kala u hole nge nayo, i kale muvo naame ndi kale muvo.”

Johannes 18

Judas te uya nongudu

1 Ndele Jesus eshi a tonga eendjovo edi, okwa pita mo pamwe novalongwa vaye, ndele ta tokola okamulonga Kidron, oko kwa li ku nepya lomiti, omo Ye okwa ya novalongwa vaye. 2 Ndele Judas, ou e mu kengelela, okwa shiiva yo onhele ei, osheshi Jesus okwa ongala ko luhapu novalongwa vaye. 3 Opo Judas okwa kufa ongudu yovakwaita novapiya va dja kovapristeli ovakulunhu nokOvafarisai, ndele te uya ko e neenyika neelamba noiti. 4 Ndele Jesus eshi a shiiva oinima aishe tai mu hange, okwa pita mo ndele ta ti kuvo: “Olyelye tamu mu kongo?” 5 Vo ve mu nyamukula: “Jesus Omunasareti.” Jesus okwa tya kuvo: “Aame ou.” NaJudas, ou e mu kengelela, okwa li ofika pamwe navo. 6 Hano Jesus eshi a tya kuvo: “Aame ou,” vo ova shuna shanimanima, ndele va wila poshi. 7 Opo Ye okwe va pula vali: “Olyelye tamu mu kongo?” Vo va tya: “OJesus Omunasareti.” 8 Jesus okwe va nyamukula: “Onde mu lombwela nale nokutya, Aame ou. Hano ngeenge Aame tamu kongo, efeni ava va ye.” 9 Opo pa wanifwe eendjovo edi a tongele: “Inandi kanifa nande umwe waava wa pa nge.” 10 Opo Simon Petrus, ou a li e na eongamukonda, okwe li pweya mo, ndele ta shashe omupiya womupristeli omukulunhu ndele te mu tete okutwi kwaye kwokolulyo. Nedina lomupiya ou ola li Malkus. 11 Opo Jesus okwa tya kuPetrus: “Shunifa eongamukonda loye moshilaleko. Eholo eli Tate a pa nge, inandi li nwa mbela?”

Jesus ta kwatwa

12 Ongudu yovakwaita nomuneyovi wavo novapiya vOvajuda va kwata Jesus, ndele tave mu mange. 13 Ndele tave mu twala tete kuHannas, osheshi oye a li xemweno yaKajafas, ou a li omupristeli omukulunhu momudo winya. 14 Ndelenee Kajafas oye tuu ou a lombwelele Ovajuda: osha wapala omunhu a fye omolwoshiwana.

Petrus te lidimbike

15 Ndele Simon Petrus nomulongwa mukwao ova shikula Jesus. Omulongwa ou kwa li a shiivika komupristeli omukulunhu, ndele okwa ya pamwe naJesus molupale lomupristeli omukulunhu. 16 Ndelenee Petrus okwa li ofika konhu; opo nee omulongwa mukwao ou a li e shiivike komupristeli omukulunhu, okwa pita mo ndele ta popi nomukeleli woshivelo, okakadona, ndele ta eta mo Petrus. 17 Opo nee omukeleli woshivelo, okakadona aka, oka tya kuPetrus: “Ove ku fi mbela umwe wovalongwa vomunhu ou?” Winya okwa tya: “Ahowe.” 18 Ndelenee ovakalele novapiya ova shakala omundilo shaashi okwa li ku na outalala, ndele tava xuxumukwa, naPetrus yo okwa li ofika pamwe navo, ndele ta xuxumukwa.

Jesus koshipala shaHannas

19 Nomupristeli omukulunhu okwa pula Jesus molwovalongwa vaye nomolwelongo laye. 20 Jesus okwe mu nyamukula: “Nda tonga moipafi younyuni. Alushe onda longa ovanhu meeshinagoga nomotembeli, omo hamu ongala Ovajuda aveshe, ndele inandi tonga sha meholeko. 21 Oshike to pula nge? Pula ava va uda eshi nda tonga kuvo; tala; vo ove shi shii osho nde shi tonga.” 22 Ndele Jesus eshi a tonga eendjovo edi, omumati umwe ou a li ko ofika, okwa denga Jesus enghava, ndele ta ti: “Osho to nyamukula ngaho omupristeli omukulunhu?” 23 Jesus okwe mu nyamukula: “Ngeenge onda tonga nai, tomhene nge owii, ndele ngeenge nda tonga nawa, oto dengele nge shike?” 24 Opo Hannas okwe mu tuma, a mangwa, kuKajafas, omupristeli omukulunhu.

Petrus te lidimbike vali Jesus

25 Ndele Simon Petrus okwa li ofika ta xuxumukwa. Opo vo va tya kuye: “Naave ku fi mbela umwe wovalongwa vaye?” Oye okwa anya ndele ta ti: “Ahowe.” 26 Umwe womovapiya vomupristeli omukulunhu, mukwao waawinya Petrus a teta okutwi, ta ti: “Inandi ku mona mepya pamwe naye?” 27 Ndele Petrus okwa anya vali, nekondobolo ola kwena tuu osho.

Jesus koshipala shaPilatus

28 Opo vo va kufa Jesus kuKajafas, ndele tave mu twala kongulu yetokolo. Okwa li ongula inene. Ndele vo inava ya mo mongulu yetokolo vo vehe linyatekife, vo va shiive okulya Opaasa. 29 Opo Pilatus okwa pita mo, ta ti kuvo: “Omulumenhu ou otamu mu hokololifile shike?” 30 Vo va nyamukula ndele tava ti kuye: “Ou ngeno ke fi omukolokoshi, ngeno inatu mu yandja kwoove.” 31 Opo Pilatus ta ti kuvo: “Nye mu kufeni po hano, mu mu tokole pamhango yeni vene.” Ovajuda va tya kuye: “Fye otwa dilikwa okudipaa omunhu?” 32 Opo pa wanifwe ondaka ei, Jesus e i tongele, eshi a holola efyo la tya ngahelipi e nokufya. 33 Ndelenee Pilatus okwa shuna mo vali mongulu yetokolo, ndele ta ifana Jesus, ndele ta ti kuye: “Oove ohamba yOvajuda?” 34 Jesus okwe mu nyamukula: “Eshi owe shi tonga mwoove mwene, ile ovanhu ve shi ku lombwela, tava popi nge?” 35 Pilatus okwe mu nyamukula: “Aame Omujuda? Ovanhu vomoshilongo sheni novapristeli ovakulunhu ovo ve ku yandja kwaame; owa ninga shike?” 36 Jesus okwa nyamukula: “Ouhamba wange kau fi womounyuni ou; ouhamba wange ngeno womounyuni ou, ovapiya vange ngeno va lwa, ndiha yandjwe kOvajuda. Ndelenee paamha ouhamba wange kau fi waamu.” 37 Opo Pilatus okwa tya kuye: “Oove ohamba nokuli?” Jesus okwa nyamukula: “Heeno, ngaashi to ti, Aame ohamba. Onghee nda dalwa nde uya mounyuni ou, ndi hepaulule oshili. Keshe ou womoshili, ye ota udu ondaka yange.” 38 Pilatus ta ti kuye: “Oshili oshike?” Ndele eshi e shi tya, ye okwa pita mo vali, ta i kOvajuda, ndele ta ti kuvo: “Nghi wete nande etimba muye. 39 Ndelenee nye omwe shi ika, ndi mu mangululile omupandekwa umwe poshivilo shaPaasa. Omwa hala hano ndi mu mangululile ohamba yOvajuda?” 40 Ndele vo va ingida tava ti: “Ahowe. Hayou, ndelenee Barabas!” Ndelenee Barabas okwa li omukolokoshi.

Johannes 19

Jesus ta dengwa

1 Opo nee Pilatus okwa kufa Jesus, ndele te mu dengifa neeshokoto. 2 Ovakwaita ova tunga oshidingo shoshitai shomakiya, ndele tave shi mu dike komutwe waye, ndele tave mu dike oshikutu shitilyana. 3 Ndele vo ove uya kuye ndele tava ti: “Kundwa, Oove ohamba yOvajuda!” ndele tave mu denge omanghava. 4 Pilatus a pita mo vali ndele ta ti kuvo: “Ohandi mu eta pondje kunye, mu kale mu shi shii, inandi mona muye etimba lasha.” 5 Ndele Jesus okwa pita mo, a dikwa oshidingo shomakiya, noshikutu shitilyana. Ndele Pilatus ta ti kuvo: “Taleni omunhu.” 6 Ndele ovapristeli ovakulunhu novapiya eshi ve mu mona, ova uyaana tava ti: “Mu valela komushiyakano!” Mu valela komushiyakano! Pilatus okwa tya kuvo: “Mu kufeni nye mu mu valele komushiyakano, osheshi ame nghi wete etimba muye.” 7 Ovajuda ova tya kuye: “Fye otu nomhango ndele omhango otai mu pe etimba lokufya, osheshi ote liningi Ye mwene Omona waKalunga.” 8 Ndele Pilatus eshi a uda eendjovo edi, okwa tila unene. 9 Ndele ta shuna mo vali mongulu yetokolelo ndele ta ti kuJesus: “Ove owa dja peni?” Ndele Jesus ine mu nyamukula nande. 10 Ndele Pilatus ta ti kuye: “Ito popi naame? Ove ku shi shii nokutya, ondi neenghono doku ku valela komushiyakano ndele ondi neenghono doku ku efa.” 11 Jesus okwa nyamukula: “Eenghono dokutokola nge ngeno ku di pelwe da dja kombada, ngeno ku di kwete. Onghee hano ou a yandja nge kwoove, oye e netimba li dule loye.” 12 Onghee hano Pilatus okwa kendabala oku mu efa. Ndele Ovajuda ova ingida tava ti: “Ou ngeenge oto mu efa, ku fi vali kaume komukesari; keshe tuu ou te liningi ohamba, oku na ondubo nomukesari.” 13 Opo nee Pilatus eshi a uda eendjovo edi, okwa twala Jesus pondje, ndele ta kala omutumba koshipundi shetokolo, monhele ei ya lukwa olupale lomamanya, mOshiheberi Gabbata. 14 Ndele efiku olo la li lelilongekidilo loshivilo shaPaasa, opotundi onhihamano. Ye okwa tya kOvajuda: “Taleni ohamba yeni.” 15 Opo nee vo ova ingida: “Na dje po, na dje po, mu valela komushiyakano!” Pilatus okwa tya kuvo: “Nandi valele ohamba yeni komushiyakano?” Ovapristeli ovakulunhu ova nyamukula: “Fye katu na ohamba imwe, omukesari aeke.”

Jesus ta valelwa komushiyakano

16 Opo nee ye okwe mu yandja kuvo, a ka valelwe komushiyakano. Ovo va kufa po Jesus nove mu twala. 17 Ndele Ye okwe lihumbatela mwene omushiyakano, ndele ta di mo, ndele ta i konhele ya lukwa onhele yoshipongolo shomutwe, mOshiheberi otai ifanwa Golgata. 18 Ndele oko ve mu valela komushiyakano, novanhu vavali pamwe naye, umwe okombinga nomukwao okombinga, ndele Jesus pokati. 19 Pilatus okwa shanga oshipalanyolo ndele te shi tulike komushiyakano. Osha shangwa ngaha: “JESUS OMUNASARETI OHAMBA YOVAJUDA.” 20 Ndele oshipalanyolo eshi Ovajuda vahapu ove shi lesha, osheshi onhele ei ya valelwa Jesus komushiyakano oya li popepi noshilando, ndele osha shangwa mOshiheberi, mOshilatina nomOshigreka. 21 Opo ovapristeli ovakulunhu vOvajuda ova tya kuPilatus: “Ino shanga: ‘ohamba yOvajuda,’ ndele u tye, ye okwa tile: ‘Aame ohamba yOvajuda.’ ” 22 Pilatus okwa nyamukula: “Osho nde shi shanga, onde shi shanga nee.” 23 Ndele ovakwaita eshi va valela Jesus komushiyakano, ova kufa ko oikutu yaye ndele tave i tukula oitukulwa ine, keshe omukwaita oshitukulwa shimwe, nombidja yokoshi. Ndele oya li ihe nomuhondjo, oya li ya tungwa aishe mumwe, nghee ya dja pehovelo fiyo okexulilo layo. 24 Onghee nee va tongafana: “Inatu i tauleni, tu i ningileni oshihoololifo nokutya, otai ningi yalyelye.” Omushangwa ou u wanifwe: “Ovo tave litukulile oikutu yange, nomidjalo dange otave di ningile oshihoololifo.” Ovakwaita osho va ninga. 25 Ndele pomushiyakano waJesus opa kala ofika ina nomumwaina waina naMaria omukainhu waKleopas, naMaria Magdalena. 26 Ndele Jesus eshi a mona ina nomulongwa ou a li e holike kuye, ve li ofika opo, okwa tya kuina: “Omukainhu, tala omona woye.” 27 Ndele ta ti komulongwa: “Tala nyoko!” Opefimbo tuu olo omulongwa okwe mu tambula meumbo laye. 28 Ndele konima yoinima ei, Jesus, eshi a shiiva oinima aishe ya wanifwa, omishangwa di wanifwe, okwa tya: “Nda fyenota.” 29 Ndele opa li oshitoo shi yadi omeva malula, ndele vo tava xwekele oshiyavo koshihati shaisopi sha yavekwa momeva aa malula, ndele tave shi tula kokanya kaye. 30 Ndele, Jesus eshi a tambula omeva aa malula, okwa tya: “Sha longwa sha pwa.” Ndele ta nyongameke omutwe waye, ndele ta yandje omwenyo waye. 31 Efiku olo ola li lokulilongekidila Eshabata lOvajuda, oimhu opo iha endjelele komushiyakano efiku lEshabata, osheshi efiku lEshabata olo ola li linene, Ovajuda ova indila Pilatus, omipindi davo di nyanyaulwe, oimhu i kufwe ko. 32 Opo nee ovakwaita ve uya ndele tava nyanyaula omipindi daau wotete nodamukwao ava va valelwa komushiyakano pamwe naye. 33 Ndelenee eshi ve uya kuJesus nove mu wete, a fya nale, inava nyanyaula omakipa aye. 34 Ndelenee umwe wovakwaita okwe mu twa neonga molupati laye, ndele mwa dja diva ohonde nomeva. 35 Ndele omumoni washo ote shi hepaulula nehepaululo laye oloshili, oye e shi shii kutya, ota popi oshili, opo nye yo mu itavele. 36 Osheshi eshi osha ningwa omishangwa di wanifwe: “Ina nyanyaulwa nande ekipa laye limwe.” 37 Nomushangwa umwe tau ti vali: “Vo otava ka tala kwaau ve mu twa.”

Jesus ta pakwa mombila

38 Ndele konima yoinima ei Josef Omuarimatia, ou okwa kala omulongwa waJesus meholeko, osheshi a tila Ovajuda, ye okwa indila Pilatus, a itavelelwe okukufa oshimhu shaJesus. Pilatus okwe mu itavela. Ye okwe uya ndele ta kufa ko oshimhu shaJesus. 39 NaNikodemus yo, ou a ile nale oufiku kuJesus, okwe uya, ndele ta eta oidimba iwa, omirha naaloe, i fike peekilograma omilongo nhatu ngeno. 40 Opo vo ova kufa ko oshimhu shaJesus ndele, tave shi mangele momalapi oliina, mumwe noidimba panghedi yOvajuda yokupaka ovafi. 41 Ndele ponhele ei a valelwa komushiyakano, opa li epya lomiti, nomepya eli omwa li ombila ipe, omo inamu tulwa nande omunhu shito. 42 Hano, omo nee va nangeka Jesus, osheshi la li efiku lelilongekido lOvajuda, nombila ei oya li popepi.

Johannes 20

Ovalongwa tava i kombila

1 Ndele efiku lotete loshivike Maria Magdalena okwe uya kombila ongula inene, fimbo inaku sha, ndele okwa mona kutya emanya ola kufwa ko kombila. 2 Opo ye a lotoka, ndele te uya kuSimon Petrus nokomulongwa mukwao, ou Jesus kwa li e mu hole, ndele ta ti kuvo: “Ovo va kufa mo Omwene mombila, ndele katu shii apa ve mu tula.” 3 Opo nee Petrus nomulongwa ou mukwao ova ya, ndele tave uya kombila. 4 Ndele ova tondokela pamwe ovo aveshe vavali, ndele omulongwa ou mukwao okwa fiya po Petrus, ndele te uya tete kombila. 5 Ndele ye eshi a vandamena mo, okwa mona omalapi oliina a li mo; ndele ye ina ya mo. 6 NaSimon Petrus okwe uya yo, ndele ta i mombila, ndele ta mono omalapi oliina e li mo. 7 Noshipushulifo shoshinhwi sha li komutwe waye, inashi tulwa mumwe nomalapi oliina, ndele oshe likalela ponhele i lili. 8 Opo nee omulongwa mukwao ou e uya tete kombila, okwa ya mo, ndele te shi mono, ndele te shi itavele. 9 Osheshi natango ova li vehe udite ko omishangwa nokutya, Ye e nokunyumuka mo movafi. 10 Ndele ovalongwa ova shuna keumbo lavo.

Jesus te lihololele Maria

11 Ndele Maria okwa li ofika pombila, ndele ta lili. Hano eshi a li ta lili ngaha, okwa vandamena mombila. 12 Ndele okwa mona ovaengeli vavali va djala oikutu itoka, ve li omutumba, umwe okomutwe, nomukwao okeemhadi, apa pa li pa nangala oshimhu shaJesus. 13 Ndele va tya kuye: “Omukainhu, oto lilile shike?” Ye okwa tya kuvo: “Osheshi va kufa mo Omwene wange, ndele nghi shii apa ve mu tula.” 14 Ndele eshi e di tya, okwa punguluka, ndele ta mono Jesus e li ofika opo, ndele ina shiiva nokutya, Oye Jesus. 15 Jesus ta ti kuye: “Omukainhu, oto lilile shike? Olyelye to mu kongo?” Winya okwa li e shii oye omukeleli wepya, ndele ta ti kuye: “Omwene, ngeenge oove we mu kufa mo, lombwele nge apa we mu tula, ndi ke mu tale ko.” 16 Jesus okwa tya kuye: “Maria.” Opo nee ou okwa punguluka ndele ta ti kuye mOshiheberi: “Rabbuni, tashi ti: Omuhongi.” 17 Jesus okwe mu lombwela: “Ino kuma nge, osheshi inandi londa natango kuTate, ndelenee inda kovamwatate u ke va lombwele: Ohandi londo kuTate nokuXo yeni, kuKalunga kange nokuKalunga keni.” 18 Maria Magdalena okwa ya ndele ta hepaululile ovalongwa nokutya, a mona Omwene, naadi a lombwelwa kuye.

Jesus ta holokele ovalongwa vaye

19 Ndele eshi pa ninga onguloshi yefiku lotete loshivike, noivelo eshi ya li ya patwa, omo ovalongwa va li, osheshi va tila Ovajuda, Jesus okwe uya ndele ta kala ofika mokati kavo, ndele ta ti kuvo: “Ombili nai kale nanye.” 20 Ndele eshi e di tya, okwe va ulikila omake aye nolupati laye. Ndele ovalongwa va hafa eshi va mona Omwene. 21 Jesus okwe va lombwela vali: “Ombili nai kale nanye, ngaashi Tate a tuma nge, naame osho handi mu tumu.” 22 Ndele eshi e di tya, okwe va fudila ndele ta ti kuvo: “Tambuleni Omhepo Iyapuki. 23 Ava tamu dimine po omatimba, vo otave a diminwa po, naava tamu efa, va kale nao, vo otava kala nao.” 24 Ndelenee Tomas, umwe waava omulongo navavali, ou a ifanwa Omukwanambwiyu, ina hangika po puvo, Jesus eshi e uya. 25 Opo nee ovalongwa vakwao ove mu hepaululila: “Fye otwa mona Omwene.” Ye ta ti kuvo: “Ngeenge inandi mona oivadi yeendungu momake aye, ndele inandi tula omunwe wange moivadi yeendungu, neke lange molupati laye, itandi itavele.” 26 Ndele pa pita omafiku ahetatu, ovalongwa ova li va ongala vali, naTomas opo a li pamwe navo. Jesus okwe uya oivelo eshi ya hangika ya patwa, ndele ta kala ofika mokati kavo ndele ta ti: “Ombili nai kale nanye.” 27 Ndele okwa lombwela Tomas: “Eta omunwe woye oku, ove u tale omake ange, ove u yelule eke loye, u li twe molupati lange, ndele ove ino kala nakuhaitavela, ndelenee kala omwiitaveli.” 28 Ndele Tomas okwe mu nyamukula, ta ti: “Omwene wange naKalunga kange.” 29 Jesus ta ti kuye: “Osheshi wa mona nge, opo to itavele. Ovanelao ovava hava itavele nande inava mona.” 30 Oilongadidiliko ihapu ikwao Jesus e i ninga moipafi yovalongwa inai shangwa momishangwa edi. 31 Ndele ei oya shangwa, nye mu itavele Jesus Oye Kristus, Omona waKalunga, ndele moku mu itavela mu kale mu na omwenyo medina laye.

Johannes 21

Jesus te lihololele vali ovalongwa

1 Konima yoinima ei Jesus okwe lihololela vali ovalongwa vaye pefuta laTiberias. Ndele okwa holoka ngaha: 2 Simon Petrus naTomas, ou a ifanwa Omukwanambwiyu, naNatanael womuKana shomuGalilea, novana vaSebedeus navakwao vavali vomovalongwa vaye va li pamwe. 3 Opo Simon Petrus okwa tya kuvo: “Ohandi ka yula eeshi.” Ovo ova tya kuye: “Nafye yo ohatu i naave.” Ndele vo ova fikama ndele tava i mowato. Noufiku oo inava kwata sha. 4 Ndele eshi kwa sha, Jesus okwa li ofika komunghulo wefuta. Ndelenee ovalongwa inave mu koneka nokutya, Oye Jesus. 5 Opo Jesus okwe va pula: “Ovamwange, omu na sha shokulya?” Vo ove mu nyamukula: “Ahowe.” 6 Ndele okwe va lombwela: “Oshiyulifo shi ekeleni kolulyo lowato opo tamu mono.” Ndele vo ove shi ekela mo, ndele vo va nyengwa oku shi shila mo, osheshi eeshi oda li mo dihapu. 7 Opo nee omulongwa winya kwa li e holike kuJesus okwa tya kuPetrus: “Oye Omwene.” Hano Petrus eshi a uda, Oye Omwene, okwe lidika ombaikifa yaye, osheshi okwa li olutu kombada, ndele ta nhukile momeva. 8 Ndele ovalongwa ava vakwao ove uya nowato, ndele va shila oshiyulifo shavo shi neeshi, osheshi kava li kokule nomunghulo, oshinano omafele avali shapo. 9 Ndele eshi ve uya kedu, ova mona ko omundilo womakala u li po, neeshi da pakwa po nomungome. 10 Jesus okwe va lombwela: “Eteni oku meeshi edi mwa kwata paife.” 11 Simon Petrus okwa ya mowato nokwa shilila oshiyulifo kedu, shi yadi eeshi dinene efele limwe nomilongo itano neeshi nhatu, ndele nande oda li dihapu di fike apa, oshiyulifo inashi pombauka. 12 Jesus okwe va lombwela: “Ileni mu lye!” Ndele kape na umwe womovalongwa a li e nomukumo oku mu pula: Oove lyelye? Osheshi ova li ve shi shii, Oye Omwene. 13 Ndele Jesus okwa ya ndele a kufa omungome, ndele te u va pe, nosho yo eeshi edi. 14 Hano elihololo eli etitatu nokuli, Jesus e lihololela ovalongwa vaye konima yenyumuko laye lomovafi.

Petrus ta pulwa kuJesus

15 Hano eshi va lya, Jesus okwa tya kuSimon Petrus: “Simon omona waJohannes, u hole nge tuu, u dule ava?” Ye okwa tya kuye: “Heeno, Omwene, Ove u shi shii nokutya, ondi ku hole tuu.” Ye okwa tya kuye: “Lifa eedjona dange.” 16 Ndele okwe mu pula lutivali: “Simon omona waJohannes, ove u hole nge?” Ye okwa tya kuye: “Heeno, Omwene, Ove ou shi shii ondi ku hole.” Ye ta ti kuye: “Lifa eedi dange.” 17 Oye ta ti kuye lutitatu: “Simon omona waJohannes, ou hole nge tuu?” Petrus okwa nyika oluhodi eshi te mu pula olutitatu: “Ove ou hole nge?” Ndele ta ti kuye: “Omwene, oinima aishe ove u i shii, ou shi shii ondi ku hole.” Jesus ta ti kuye: “Lifa eedi dange. 18 Oshilishili ohandi ku lombwele: Fimbo wa li omunyasha, owe lidika mwene, ndele wa ya oku wa hala, ndelenee ngeenge wa kula, opo nee oto yelula omaoko oye, naumwe e lili ote ku dike, ndele te ku twala oku ove ino hala.” 19 Ndelenee eendjovo edi okwe di tonga, a holole efyo eli Petrus e nokufimanekifa nalo Kalunga. Hano eshi e di tonga, okwa tya kuye: “Shikule nge.”

Petrus naJohannes

20 Opo nee Petrus okwa punguluka ndele ta mono omulongwa ou, Jesus a li e mu hole, te mu shikula, oye ou a li e liyaameka ponhulo yaye pouvalelo, ndele a tile: “Omwene, olyelye ou te ku kengelele?” 21 Hano Petrus eshi e mu mona, okwa tya kuJesus: “Omwene, ou ota ningwa shike?” 22 Jesus okwa tya: “Ame ngeenge onda hala a kale po fiyo handi uya, ove ou na shike nasho? Ove shikule nge.” 23 Opo nee ondjovo ei oya tana mokati kovamwatate, nokutya omulongwa ou ita fi; ndele Jesus ka tile kuye: “Ita fi, ndelenee: ngeenge nda hala, a kale po fiyo ohandi uya, ove ou na shike nasho?”

Exulifo levaengeli eli

24 Omulongwa ou oye tuu ta hepaulula oinima ei, ndele e i shanga, notu shi shii ehepaululo laye oloshili. 25 Ndele ope na yo oinima ihapu i lili ei Jesus e i longa, ndele ngeno aishe ya shangwa, ngeno ondi shi shii mounyuni itamu wana omambo oo, e nokushangwa.