1

1 Mu huchaaka hweene, Emboosi yaliwo, handi Emboosi eyo yali nende Nasae, handi Emboosi eyo yali Nasae. 2 Yali mu huchaaka naali alala nende Nasae; 3 ebiindu byoosi byaholebwa nibimubitiramo, handi ataali ohubaao hwae, abulao esiindu syoosi esyaholebwa esiba syaholwa daawe. 4 Mu mweene oyo nimwo omwali obulamu, handi obulamu bweene obwo, nibwo obwali obulafu bw'abandu. 5 Obulafu obwo bwaaduhira mu siirima, nae handi esiirima esyo sisisiiri ohubuyiingira bwabumalawo. 6 Yaliwo omusaacha owatumwa ohutula eyiri Nasae, omweene liita lilaangwa liti Yowaana. 7 Yecha hulw'obuloli, ohweekesa obuloli bw'obulafu, hu bandu boosi banyale ohufuna efukiirira ohubitira mu mweene oyo. 8 Nae omweene oyo haba siyali obulafu obwo daawe, nae yeecha ohweekesa obuloli budiira hu bulafu obwo. 9 Obulafu bw'obwadyeeri bweene obuhosera buli muundu nibwo obwali nibwiicha mu syaalo. 10 Yali ali mu syaalo, handi esyaalo syali syaholebwa ohubitira mu mweene oyo, nae kata katyo, esyaalo haba sisyali syamumanya daawe. 11 Yecha mu daala lyae lyeene, nae abandu bae beene haba sibamwakaanira daawe. 12 Nae abo boosi abamwakaanira, abo abafukiiririra mu liita lyae, yababeeresa obunyala obwohwehola abaana ba Nasae; 13 abo abateebulwa nende amabaanga, kata busa nende obunyala bw'omubiri, kata nende ohudaha hw'omuundu busa, nae hu lw'obunyala bwa Nasae yeng'ene. 14 Mani Emboosi eyo yeecha yehola omuundu, mani yaamenya mw'efwe, niyechula esisa alala nende obwadyeeri; efwe hwamala ohubonaho oluyaali lwae luhoongo muno, koti olwahaba olw'Omwaana mudeerwa wa Simwaana. 15 (Yowaana yatusa obuloli bu mudiiraho, mani yaalira naboola ati, “Wuno niye oyo yindalomalomaho nimboola endi, ‘Oyo ochia ohwiicha enyuma wange, yaahira oluyaali muno, olwohuba oyo yaliwo ese nitabao.’ ”) 16 Handi ohutula mu bwiichufu bwae obwo nibwo fwesi bu hwabeeresebwaho ehabi nende ehabi mbitiirifu. 17 Olwohuba amalako kaberesebwa ohubitira mu Musa; nae esisa alala nende obwadyeeri byabeeresebwa ohubitira mu Yesu Kristo. 18 Abulao omuundu yeesi owabonaho Nasae; ohutusaho Omwaana mudeerwa, oyo oli mu bwihaliro bwa Simwaana, niye owakera yamanyihana. 19 Mani buno nibwo obuloli bu Yowaana yatusa, Abayudaaya nibamutumira abalaamisi nende Abaleefi ohutula e Yerusaalemu ohumuteeba bati, “Ewe niiwe naanu?” 20 Omweene yeyama, haba siyekaana, nae yeyama naboola ati, “Haba si nise Kristo.” 21 Nae bamuteeba bati, “Niiwe naanu mani? Niiwe Elija?” Nae yaboola ati, “Haba siindi oyo.” “Nae oli omunabbi?” Nae yakobolamo ati, “Haba.” 22 Mani nabo beecha bamuteeba bati, “Niiwe wiina? Tuboolere sihuchia ohukobola mu bandu batutumire. Ni siina syeene si welomalomaho?” 23 Yaboola ati, “Ese ndi ekono ely'oyo oli ohuhuumulira mu siparara liti, ‘Kololose engira y'Omwaami,’ koti lu nabbi Yisaaya yaboola.” 24 Bulaanu, abandu abo bali batumwa nende Abafalisaayo. 25 Beecha bamuteeba bati, “Mani lwasiina oli ohubatiisaanga, notaali kata Kristo, oba Elija, oba omunabbi?” 26 Yowaana yabakobolamo ati, “Ese ndi ohubatiisanga nende amaachi; nae aliwo oli mweng'we oyo yimutamanyire, 27 handi oyo oli ohunondaho enyuma wange, yi lusibiro lw'ebiraato byae ese haba sihoyera ohuboolola.” 28 Sino syaholehanira mu Bbetani, engereha wa Yorudaani, yi Yowaana yali nabatiisiraanga. 29 Hu ludaalo luloondaho, Yowaana yeecha yabona Yesu niyeecha nachoomere yali, mani yaboola ati, “Mbao, Ekoondi yere lya Nasae, oyo omalao esibi sy'esyaalo! 30 Wuno niye oyo yindaboolere endi, ‘Enyuma wange yiriyo omuundu oli ohwiicha owuuhira oluyaali, olwohuba oyo yaliwo ese nitabao.’ 31 Ese mweene sindali nindamumanya; hu lwa sino sakira ese ndeecha nimbatisaanga nende amaachi, hu yoole ohubonehera eyiri Yisirayiri.” 32 Mani Yowaana yeecha yatusa obujulisi naboola ati, “Ese ndabona Mwooyo niyeeha koti eguugu ohutula Mukulu, mani lyamudong'aho. 33 Ese mweene haba sindamumanya; nae oyo owanduma ohubatisaanga nende amaachi yamboolera ati, ‘Oyo yolibona Mwooyo namwihaho mani namudoong'aho, wuno niye obatiisa nende Mwooyo Mwolerefu.’ 34 Mani mbweene, mani ndafuna obujulisi endi wuno niye Omwaana wa Nasae.” 35 Handi hu ludaalo lu londaho, Yowaana niyali niyeemere alala nende abeeki bae babiri; 36 yeecha yabona Yesu naali ohukeenda, mani yaboola ati, “Mbao, Ekoondi yere lya Nasae!” 37 Abeki bae abo bawulira bi yali naboola atyo mani baloonda Yesu. 38 Yesu yeecha yakaluhaana, mani yababona nibali ohumuloonda, mani yababoolera ati, “Siina syeene simuli ohukonyaanga?” Nabo bamukobolamo bati, “Rabbi” (amahulundu kaasyo mbwe, Omweekesa) “ni yena bweene yiwamenya?” 39 Nae Yesu yababoolera ati, “Mwiiche mani mubone.” Beecha beecha mani babona yiyali niyamenya; mani baaba nae oludaalo olwo lwoosi, olwohuba chali nichiri esaa ehumi. 40 Mulala hu beene abo owaulira Yowaana niyali naalomaloma, mani yaamuloonda, yali Andereya, mwaanang'ina Simooni Peetero. 41 Yecha yataangira ohubona Simooni, mani yamuboolera ati, “Efwe humalire ohubona Mesaaya” (amahulundu kaasyo mbwe Kristo). 42 Yecha yaamuleeta eyiri Yesu. Nae Yesu niyamutingaala mani yaboola ati, “Hane niiwe Simooni omusyaani wa Yowaana? Mani ochia ohulaangibwa Keefa.” 43 Nibwahya mu chuli, Yesu yahengawo ohuchia e Galilaaya. Mani yeecha yanyoola Filipo mani yamuboolera ati, “Noonde.” 44 Nae bulaanu, Filipo yali niyamenya mu Bbeetasaida, esiko sihuluundu sya Andereya nende Peetero. 45 Filipo yeecha yabukanana nende Nasanayiri, mani yamuboolera ati, “Hwakaanire oyo yi Musa yandiikaho mu Malako handi nende yi banabbi bandiikaho, Yesu Omunasareeti, omusyaani wa Yosefu.” 46 Nae Nasanayiri yeecha yamuboolera ati, “Mani aliwo esiindu silayi syoosi esinyala ohutula mu Nasareti?” Nae Filipo yamuboolera ati, “Ewe yicha obone.” 47 Yesu yeecha yabona Nasanayiri niyeecha yali, mani yamuboolera ati, “Bonaho, Omuyisirayiri mweene nguno, otaliho esidinyu syoosi!” 48 Nae Nasanayiri yeecha yaboolera Yesu ati, “Ewe wumanyire otye?” Nae Yesu yamukobolamo ati, “Ese hubweene kata Filipo nasisiiri ohuhulaanga nobeere nooli mu siiniha sy'omusaala mutuli.” 49 Nasanayiri yamukobolamo ati, “Omweekesa, hane oli Omwaana wa Nasae! Niiwe Omutuki wa Yisirayiri ayakiriire!” 50 Nae Yesu yamukobolamo ati, “Mbwe olwohuba nihuboolere endi, hubweene nooli mu siiniha sy'omusaala kw'enduli, sakira ofukiirira? Ochia ohubona ebiindu bihira bino obulayi.” 51 Handi Yesu yeecha yemeeda ohumuboolera ati, “Huboolera obwadyeeri bweene endi, ochia ohubona Ekulu nilikuulwe, mani ba malaika ba Nasae nibaniina handi nibeeha hu Mwaana w'Omuundu.”

2

1 Hu ludaalo lw'ohudatu, waliwo obweeya bwali e Kaana mu Galilaaya, yi ng'ina Yesu yali. 2 Yesu alala nende abeeki bae bosi bali balaangirwe mu bweeya obwo. 3 Mani efwiini niyahawa, ng'ina Yesu yeecha yamuboolera ati, “Efwiini yibawereho.” 4 Nae Yesu yamuboolera ati, “Maama, onaahole otye? Esiha syaange sitoola.” 5 Ng'ina Yesu yeecha yaboolera abahalaabani abo ati, “Muhole buli syababoolera syoosi.” 6 Nae bulaanu, yaliwo esyoongo ch'amaachi chibabaacha mu makina chisaasaba nichemere awo hulwohweyosa hw'Abayudaaya ohwomusiro, buli yitula nga yinyala ohukiinga amaachi koola egalani amahumi kabiri oba amahumi kadatu. 7 Yesu yeecha yababoolera ati, “Yichuse esyoongo chino nende amaachi.” Mani beecha baachichuusa baachidumbeesera elalira. 8 Yecha yababoolera ati, “Bulaanu dayeho akandi, mani mukayirire omuhulundu w'esidyaalo.” Mani beecha bakayira yali. 9 Nae omuhulundu w'esidyaalo niyaonjaho amaachi ako akali bulaanu kakaluhaane kali efwiini, yeecha yahayaho ohumanya yiyitusiirwe (ohutusaho abahalaabani bali bachiire amaachi ako bali bamanyire), omuhulundu w'esidyaalo yeecha yalaanga omugole musaacha 10 mani yamuboolera ati, “Buli muundu atangiraanga ohukabula efwiini ndayi; mani abandu nibaba nibamalire ohung'wa yibuli muundu adaha omweene, hu bulaanu baleeta efwiini enjalaafu; nae ewe obiihireenge busa efwiini ndayi ohwoola bulaanu buti.” 11 Sino nisyo esyali esilolero syae sichaaka siyaholera e Kaana mu Galilaaya, mani syolesa oluyaali lwae luhoongo; mani abeeki bae beecha bamufukiiriramo muno. 12 Lunyuma lwa bino ohuwa, Yesu yeecha yehirira yaacha e Kaperanaumu, alala nende ng'ina, nende ba mwaanang'ina nende abeeki bae; mani beehala eyo bamala hooyo endaalo enjeraanu. 13 Esidyaalo sya Paasaka ya Abayudaaya syali siri aambi ohwoola, mani Yesu yeecha yaniina yacha e Yerusaalemu. 14 Niyengira mu nyumba ya Nasae, yanyoolamo abandu bali nibakusa eng'oombe ndawu, nende amakoondi, nende amaburuku, nende abafunjisi b'eseende nibali hu mulimo kwaabwe okwo. 15 Mani niyamala ohuluha olubbariki lw'endereechi, yaberusa boosi, alala nende amakoondi nende eng'oombe ndawu chosi, batula mu nyumba ya Nasae; handi yeecha yabbwomoola erwaanyi eseende ch'amatongolo ech'abafunjisi b'eseende, handi yamala yafumamya nende emeesa chaabwe. 16 Mani yeecha yaboolera abakusaanga amaburuku ati, “Mutuse muno ebiindu bino; mutahola enyumba ya Bbaabba ohuba enyumba y'obuhala.” 17 Abeki bae beecha beechulisa bati syali syandiikwa mu byandiiko byolerefu siti, “Ohudaha muno enyumba yao hwahanjitise.” 18 Abayudaaya bulaanu beecha bamuboolera bati, “Oli nende ahalolero siina honyala ohutwekesa ahakera wahola bino.?” 19 Yesu yabakobolamo ati, “Mukwiise enyumba ya Nasae yino, mani mu ndaalo chidatu njia ohuyisiingisa yeeme.” 20 Abayudaaya beecha baboola bati, “Byayira emyaaka amahumi kane nende chisaasaba ohwombaha enyumba ya Nasae yino, nae ewe mani onanyala ohusiingisa mu ndaalo chidatu?” 21 Nae Yesu yali alomaloma hu nyumba ya Nasae eyali niyo omubiri kwae. 22 Mani koti lu yeecha yaasyuhiswa ohutula mu bafu, abeeki bae beecha beechulisa bati yali yamala ohusilomalomaho; mani beecha bafukiirira muno mu byandiikibwa byolerefu nende mu mboosi yi Yesu yali yalomaloma. 23 Nae bulaanu niyali naali mu Yerusaalemu hulw'esidyaalo sya Paasaka, abandu bangi muno beecha bamufukiirira muno mu liita lyae, nibamala ohubona obulolero buyali naahola; 24 nae Yesu haba siyabeesika muno, 25 olwohuba yali namanyire muno buli muundu koti lwafwaana mani siyadaha omuundu wundi ohukerakira akadiira hu muundu yeesi; olwohuba omweene yali yamanya bulai bweene esiri mukati w'omuundu.

3

1 Bulaanu waliwo omusaacha Mufalisaayo olaangwa Nikodema, owali omwimirisi w'Abayudaaya. 2 Omusaacha wuno yeecha yeecha eyiri Yesu mu siro, mani yamuboolera ati, “Rabbi, humanyire huti ewe oli omweekesa otula eyiri Nasae; olwohuba abulao oyo yeesi onyala ohuhola obulolero buno bwohola, ohutusaho Nasae naali nae.” 3 Nae Yesu yamukobolamo ati, “Mubwadyeeri bweene, huboolera endi, ohutusaho oyo yeesi niyeebulwa buyaaha, oyo saanyala hubona Obwaami bwa Nasae.” 4 Nae Nikodema yaboolera Yesu ati, “Omuundu anyala atye ohwibulwa naali omuhulundu? Anyala handi yengira ehabi ly'ohubiri munda yang'ina handi hu yebulwe?” 5 Nae Yesu yakobolamo ati, “Huboolera obwadyeeri bweene endi, omuundu yeesi nateebulwa nende amaachi handi nende Mwooyo, haba saanyala ohwingira mu Bwaami bwa Nasae. 6 Esiindu syoosi esiibulwa nende omubiri siba omubiri, nae esyo esiibulwa nende Mwooyo siba mwooyo. 7 Otesiinduha muno oti huboolere endi, ‘Ohoyeere ohwibulwa buyaaha.’ 8 Omuyaka kuwucha nikuchiira yikudaha, handi owulira busa ohuwuuma hwaakwo, nae haba somanyire yi kutulira, oba yikuchiira; mani nilwo lu biri nende oyo owibulwa nende Mwooyo.” 9 Nae Nikodema yeecha yaboolera Yesu ati, “Sino sinyala sitye ohubaao?” 10 Nae Yesu yamukobolamo ati, “Ewe oli omweekesa wa Yisirayiri, nae haba somanyire sino? 11 Huboolera obwadyeeri endi, efwe hulomaloma bihumanyire, handi hutusa obujulisi obudiira hw'ebyo bihwamala ohubona; nae eng'we haba simufukiirira obujulisi bw'efwe. 12 Mani nikali mbwe ese huboolere ebiindu by'ohusyaalo huno, nae haba sofukiirira, oba onanyala otye ohufukiirira nihuboolera ebiindu by'omu Kulu? 13 Abulao oyo yeesi owamala ohuniina yoola Mukulu, ohutusaho oyo oweeha natula Mukulu, Omwaana w'Omuundu. 14 Handi koti lu Musa yasingisa yeemesa endemo mu siparara, nilwo lu Omwaana w'Omuundu achia ohusiingiswa yemesebwe, 15 hu mbwe oyo yeesi omufukiiriramo anyale ohufuna obulamu butaakama.” 16 Olwohuba Nasae yadaha esyaalo muno mani yawaayo Omwaana wae mudeerwa, hu bulaanu oyo yeesi omufukiiriramo ahaye ohukotao, nae afune obulamu butaakama. 17 Olwohuba Nasae yatuma Omwaana mu syaalo, nataheengera esyaalo omusango, nae mbwe esyaalo sinyale ohuwonisibwa ohumubitiramo. 18 Oyo yeesi omufukiiriramo haba saheengerwa omusango ohumuhira; nae oyo otamufukiirira yamala ohuheengerwa omusango ohumuhira hale, olwohuba oyo haba siyafukiirira mu Mwaana mudeerwa wa Nasae. 19 Mani yino niyo eheenga y'omusango, yiti mbwe obulafu bwamala ohwiicha mu syaalo, nae abandu beecha baadaha esiirima ohuhira obulafu, olwohuba ebiholwa byaabwe byali ebibi. 20 Olwohuba buli muholi we bibi, asyula obulafu, mani saadaha hwiicha eyiri obulafu, olwohuba naahola atyo, ebibi byae biba bicha ohweyerula bibonehane. 21 Nae oyo omuholi w'ebihoyera yeecha eyiri obulafu, hubulaanu sichie sibonehane bulai bweene biti ebiholwa byae ebyo biholeerwe mu Nasae. 22 Lunyuma lwa sino, Yesu nende abeeki bae beecha bacha mu syaalo sye Buyudaaya; yibecha bamenya nabatisaanga. 23 Yowaana yesi yali nabatisaanga naali abundu alaangwa ati, Ayenoni esyali aambi nende Salimu, olwohuba amaachi kaliyo amaangi muno; mani bandu bechaanga nibabatiiswa. 24 Olwohuba Yowaana yali atateebwa mu mboye. 25 Nae bulaanu, ohuyingana hwecha hwabaao akati w'abeeki ba Yowaana nende Omuyudaaya wundi nihudiira hu musiro kw'ohweyosa. 26 Mani beemao beecha eyiri Yowaana mani bamuboolera bati, “Rabbi, oyo owali naawe nooli engereha wa Yorudaani, yiwatusiraho obujulisi, nguno ali ano, ali ohubatisaanga, mani abandu boosi bali ohuchia yali.” 27 Nae Yowaana yakobolamo ati, “Abulao omuundu yeesi onyala ohunyoola esiindu syoosi ohutusaho nasibereeswe ohutula Mukulu. 28 Eng'we beene mwesi munyala mwaandusira obujulisi muti, ndaboola endi, ese siindi Kristo, nae ndatumwa ohumutaangirira ohwiicha. 29 Oyo oba naali nende omugole muhasi, niye oba mweene mugole oyo; Omwiicha w'omugole oyo, oweema mani yaatekeeresa byaboola, asangaala muno nawulira ekono lyae; mani sakira esangaalo lyaange lino limalire ohuba eliichufu. 30 Mani omweene oyo ahoyeere ohuniina nae ese ohwiha.” 31 Oyo owiicha natula akulu ali akulu wa boosi; oyo owa husyaalo achiira hu syaalo, mani eby'esyaalo nibyo byaalomaloma; oyo owiicha natula Mukulu aba ali akulu wa boosi. 32 Oyo atusa obujulisi obwa ebyo biyaba yabona handi biyawulira omweene, nae kata katyo, abulao omuundu yeesi ofukiirira obujulisi bwae obwo; 33 nae oyo ofukiirira obujulisi bwae obwo, abwisaho omuhono kwae ati, Nasae ni ow'obwadyeeri. 34 Olwohuba oyo yi Nasae yatuma atumbula busa emboosi cha Nasae, olwohuba siyehonyeraanga esikero naakaba Mwooyo. 35 Simwaana adaha Omwaana, mani yamudiisa mu mahono kae ebiindu byoosi. 36 Mani oyo ofukiirira mwaana, ali nende obulamu butaakama; nae oyo oteesa oluyaali mu Mwaana haba saachia hubonaho obulamu, ohutusaho mbwe egiili ya Nasae yamala ohumwihalaho.

4

1 Nae bulaanu, Omwaami niyeecha yaamanya ati Abafalisaayo bali bamalire ohuwulira bati Yesu yali ali ohuholaanga, handi nabatiisa abeeki bandi ohuhiraho Yowaana 2 (byahaba mbwe Yesu mweene haba siyabatiisaanga, ohutusaho abeeki bae bong'ene), 3 yeecha yaatula mu Buyudaaya mani yawaawo yacha e Galilaaya. 4 Nae byali bimubaanja ohuba ohuhalakania mu Samaria. 5 Mani sakira yeecha mu siko sihuluundu sya Samaria, esilaangwa siti Sikari, aambi nende omukunda ku Yakobbo yabeeresa omusyaani wae olaangwa Yosefu. 6 Esulo ya Yakobbo yosi yali abweene awo, mani sakira, koti lu Yesu yali najong'ere muno, koti luyali nakeenda olukeendo lwae olwo, yeecha yehala endulo w'esulo eyo. Chali chiri aambi we saa chisaasaba ch'esideete. 7 Omuhasi wundi Musamaria yatula eyo yeecha hu sulo ohwo ohudaya amaachi. Yesu yeecha yamuboolera ati, “Mbeeho amaachi k'ohung'wa.” 8 Olwohuba abeeki bae bali baweereo nibachiire mu siko sihuluundu ohukula ebyohulya. 9 Omuhasi Musamaria oyo yeecha yamuboolera ati, “Sibeere sitye mbwe, Omuyudaaya, yaasaba amaachi k'ohung'wa, ese omuhasi Omusamaria?” Olwohuba Abayudaaya sibali nende sibaholera alala nende Abasamaria. 10 Yesu yamukobolamo ati, “Oba obeere nomanyire esiyaanwa sya Nasae sino, nende oyo ali ohuhubooleraanga ati, ‘Mberese esy'ohung'wa,’ niiwe oba omusabire, mani aba ahuberese amaachi k'obulamu.” 11 Omuhasi oyo yeecha yamuboolera ati, “Omwaami, ewe owuma esiindu sy'ohudayira, handi esulo yino ndeeyi muno; otusa yena amaachi k'obulamu ako? 12 Ewe ohiraho Yakobbo seefwe, owatuberesa esulo yino, handi omweene yaying'waamo, nende abasyaani bae alala nende ebyaayo byae?” 13 Yesu yamuboolera ati, “Buli muundu yeesi ong'wa hu maachi kano, achia ohulumwa obuluwo handi, 14 nae buli muundu ong'wa hu maachi kanja ohumuberesa, haba siyahalumwe obuluwo daawe; olwohuba amaachi kanja ohumuberesa, kacha ohumweholamo omwaalo kuhulukusa okumuba amaachi k'obulamu butaakama.” 15 Nae omuhasi oyo yamuboolera ati, “Omwaami, mberese amaachi kano, mani haye ohulumwa obuluwo oba haye ohwichanga ano ohudaya.” 16 Nae Yesu yamuboolera ati, “Cha, olaange wamwo, mani mwiche ano.” 17 Nae omuhasi oyo yamukobolamo ati, “Haba siindi nende wamwange.” Yesu yamuboolera ati, “Oli owadyeeri noboola oti, ‘Haba siindi nende wamwange’; 18 olwohuba obeere nende abasaacha bataanu, handi kata nende oyo yooli nae bulaanu, haba siwamwo; sino oboolere obwadyeeri.” 19 Nae omuhasi oyo yamuboolera ati, “Omwaami, mbona endi oli omunabbi. 20 Baseefwe benamiraanga Nasae hu lugulu luno; nae oboola oti Yerusaalemu nisyo esifwo sibaandu bohoyeere ohwiinamiramo Nasae.” 21 Yesu yamuboolera ati, “Muhasiiwe, fukiirira bimboola, esiha siicha, si bandu batahenamirengemo Nasae Saabwe hu lugulu luno, oba mu Yerusaalemu. 22 Eng'we mwiinamira bi mutaamanyire; nae efwe, hwiinamira bi humanyire, olwohuba obuwonia butula mu Bayudaaya. 23 Nae esiha siri ohwiicha, handi mbawo syolere, si balaami badyeri bacha ohwiinamira Nasae Saabwe mu mwooyo nende mu bwadyeeri, olwohuba abafwana batyo, nibo ba Nasae Laata adaha bamwiinamire. 24 Nasae Mwooyo niye, handi abo abamwiinamira bahoyeere bamwiinamire mu mwooyo nende mu bwadyeeri.” 25 Nae omuhasi oyo yamuboolera ati, “Manyire endi, Mesaaya ali ohwiicha (oyo owalaangwa mbwe Kristo); nae niyaheeche, achia ohutwekesa ebiindu byoosi.” 26 Nae Yesu yamuboolera ati, “Ese olomaloma naawe, nise oyo.” 27 Mu biha byeene ebyo, abeeki bae nibemao beecha. Bawuka muno ohubona Yesu naali ohulomaloma nende omuhasi, nae abulao owamuteebaho kata ati, “Odaha siina kose lwasiina oli ohulomalomaanga nende omuhasi oyo?” 28 Mani omuhasi oyo yeecha yaleha awo esyoongo yae, mani yacha mu siko sihuluundu, mani yaboolera abandu bamwo ati, 29 “Mwiicha mubone omuundu owumboleere ebyo byoosi bindaholaho. Wuno anyala ohuba naali niye Kristo?” 30 Mani abandu beecha beeyiha nibatula mu siko sihuluundu esyo nibeecha eyiri Yesu. 31 Mu biha ebyo, abeeki bae bamusaba nibaboola bati, “Rabbi (Omweekesa), lyaho mberi.” 32 Nae Yesu yababoolera ati, “Ndi nende ebyohulya bi eng'we mutaamanyireho.” 33 Nae abeeki bae bachaaka ohuteebana abeene-na-beene bati, “Aliwo omuundu wundi omuleteereho ebyohulya?” 34 Nae Yesu yeecha yababoolera ati, “Ebyohulya byaange nibyo ohuhola ebyoyo owanduma byadaha, handi nende ohumaliirisa omulimo kwae. 35 Simubolaanga muti, ‘Chidong'ere emyoosi chine chong'ene ni ekesa lyoola’? Mbaboolera endi mutingaaleho mubone koti lu mikuunda cheengere nichoolere ohukesa. 36 Oyo yeesi okesa aduhana omuheemba, mani yabuusa ebyaamo by'obulamu butaakama, mani omuundu owaanya nende okesa, banyale ohusangaalira alala. 37 Olwohuba olukaado luboola mu bwadyeeri bweene luti, ‘Omuundu wundi ataaka nae owundi niye okesa.’ 38 Ese ndabatuma ohukesa ebyo bimutahalaabanira; abandu bandi nibo abahalaabani, mani eng'we mwingire mu mirimo chaabwe.” 39 Mani Abasamaria bandi ohutula mu siko sihuluundu esyo, beecha bamufukiiriramo ohweema hu buloli bw'omuhasi oyo mbwe, “Yambooleere buli siindu syoosi sindaholaho.” 40 Mani Abasamaria abo nibeecha yi Yesu yali, bamusaba bati adoong'e nabo; mani Yesu yadoong'a nabo endaalo chibiri. 41 Mani Abasamaria bangi muno beecha bamufukiirira ohweema hu mboosi yae. 42 Abandu abo beecha baboolera omuhasi oyo bati, “Sisiri mbwe ni hulwa emboosi chao nicho echikera nihufukiirira, olwohuba abeene humalire ohwewuliirira, mani humanyire huti, mu bwadyeeri bweene, wuno niye Omuwonia w'esyaalo.” 43 Endaalo echo chibiri nichawa, Yesu yeecha yaatula awo yacha e Galilaaya. 44 Olwohuba Yesu mweene yali amalire ohuboola ati, omunabbi siyeswaangamo oluyaali mu syaalo syae. 45 Mani niyeecha e Galilaaya, Abagalilaaya beecha bamwakaanira bulai, koti lubali bamalire ebiindu byoosi bi yali aholere mu Yerusaalemu hu sidyaalo, olwohuba bosi bali nibacha hu sidyaalo. 46 Mani Yesu yeecha yakobola handi mu Kaana esye Galilaaya, yiyali yaholera amaachi kaaba efwiini. Nae e Kaperanaumu yaliyo omuhunuufu yi musyaani wae yali omulwae. 47 Mani niyawulira ati Yesu yali atulire mu Buyudaaya yeechere mu Galilaaya, yeecha yaacha yamwekweeda yeeche ewaye awonie omusyaani wae oyo, olwohuba yali ali aambi ohufwa. 48 Yesu yesi yeecha yamuboolera ati, “Notabona obulolero nende eby'amaya haba sochia hufukiirira daawe.” 49 Nae omuhunuufu oyo yakobola mu Yesu ati, “Omwaami, ewe yicha engo omwaana wange nasisiiri ohufwa.” 50 Nae Yesu yamuboolera ati, “Wao; omusyaani wao achia ohuba omulamu.” Omusaacha oyo yeecha yafukiirira mu mboosi yi Yesu yamuboolera, mani yekobolerayo engo wae. 51 Nae niyali hwawao, abahalaabani bae beecha babukaanana nae mani bamuboolera bati, omusyaani wae oyo yali amalire ohulamuha. 52 Mani yeecha yabateeba esiha syeene si yachaakiramo ohukobolamo obulamu, nabo bamuboolera bati, “Ekulo busa, hu saa ya chitaanu-na-chibiri niwo yi muyaka kwamutuliraho elalira.” 53 Nae simwaana yamanya busa ati, eyo niyo eyali esaa yi Yesu yamubooleraho ati, “Omusyaani wao achia ohuba omulamu”. Mani omweene yesi yafukiirira, nende edaala lyae lyoosi. 54 Sino syali esilolero syohubiri si Yesu yahola niyali naamalire ohutula e Buyudaaya niyeechere e Galilaaya.

5

1 Lunyuma lwabino, yeecha yabaawo esidyaalo sy'Abayudaaya, mani Yesu yeecha yacha e Yerusaalemu. 2 Bulaanu, aliwo mu Yerusaalemu endulo w'esiruwa silaangwa mbwe, Esiruwa sy'Amakoondi, esidiba silaangwa mu Luyibbulaniya mbwe “Beth-zatha,” esiri nende ebigoro bitaanu. 3 Abandu balwaaye babuli mbya koti, abawofu, abalema, abadataala, bakonaanga mu bigoro bino. 4 5 Omusaacha wundi yesi yali awo, owali yahalwala hulwa embaka y'emyaaka amahumi kadatu nende chitaanu-na-chine emilaamba. 6 Mani Yesu niyamubona mani yeecha yaamanya ati, omusaacha oyo yali yahakonaanga awo hulwa embaka ndeeyi muno, yamuboolera ati, “Odaha ohuwonisibwa?” 7 Omusaacha mulwaye oyo yeecha yaakobola mu Yesu ati, “Omwaami, ese mbulaho omuundu yeesi owahangiinga yanyingisa mu sidiba sino amaachi nikamala ohusanguluswa, mani niimba mbwe hunjiamo, omuundu wundi yeecha yandangirira ohwiingiramo.” 8 Nae Yesu yeecha yamuboolera ati, “Siingira, obukule obutalihe bwao, mani okeende.” 9 Mani abweene-na-bweene awo, ni omusaacha oyo owonisibwa, mani yadoola obutalihe bwae mani yakenda. 10 Nae Abayudaaya beecha baboolera omusaacha wali awonisibwe oyo bati, “Sabbaato niyo, haba sofukiirirwa ohukinga obutalihe bwao.” 11 Nae yabakobolamo ati, “Omusaacha wumonisye yambooleere ati, ‘Doola obutalihe bwao mani okeende.’ ” 12 Nabo bamuteeba bati, “Musaacha siina oyo ohuboleere ati, ‘Doola obutalihe bwao, mani okeende’?” 13 Nae bulaanu, omusaacha wali awonisibwe oyo, siyali amumanyire daawe, olwohuba Yesu yali amalire ohwewerawo, koti lu sidiyiiha syali mu sifwo esyo, syali esihongo muno. 14 Lunyuma, Yesu yeecha yamwakaana naali mu nyumba ya Nasae, mani yamuboolera ati, “Obona, oli bulaanu omulamu! Handi otaholaangaho ebibi, wakera esihiramo obubi ohuhukwaaho.” 15 Omusaacha oyo yeecha yawaawo, mani yacha yaboolera Abayudaaya hane yali Yesu owamuwonia. 16 Mani sino nisyo esyeecha syakera Abayudaaya basaandia muno Yesu, olwohuba mbwe yali yahola sino hu ludaalo lwa Sabbaato. 17 Nae Yesu yabakobolamo ati, “Laata yange asiihola emirimo, mani syesi ndi ohuhola emirimo.” 18 Sino nisyo esyakera Abayudaaya bamukiiya muno ohumwiita, olwohuba mbwe siyali nahalaake elako lidiira hu Sabbaato lyong'ene, nae handi yalaanga Nasae ati Simwaana, niyehola ohwaakana nende Nasae. 19 Yesu yeecha yababoolera ati, “Mbaboolera obwadyeeri bweene endi, Omwaana haba saanyala ohuhola esiindu syoosi-syoosi hu lwae omweene, nae esyo syong'ene syabona Simwaana naahola; olwohuba buli syahola, nisyo si Mwaana yesi ahola. 20 Olwohuba Simwaana adaha Omwaana, mani amwekesa byoosi biyaba naahola; handi aliwo emirimo mihuluundu muno chacha ohumweekesa, hu mweemeo muwuke buwuka busa. 21 Olwohuba, koti busa lu Simwaana asyuusa abafu mani yababeeresa obulamu, nilwo lwosi lu Mwaana abeeresa atyo obulamu oyo yeesi yaba nadahisa. 22 Simwaana haba saheengera omusango ohuhira omuundu yeesi, nae yabeeresa Omwaana obuheengi bw'emisaango bwoosi, 23 hu bandu boosi babeerese Omwaana oluyaali, koti busa lu babeeresa Simwaana oluyaali. Oyo yeesi oteesa oluyaali mu Mwaana, haba siyeesa oluyaali mu Simwaana wamutuma. 24 Mbaboolera obwadyeeri bweene endi, oyo owulira emboosi yange mani yafukiirira mw'oyo owanduma, ali nende obulamu butaakama; haba saacha hwoola huhuheengerwa omusango ohumuhira, nae aba amalire ohubita mu hufwa, yolere hu bulamu. 25 “Mbaboolera obwadyeeri endi, esiha sichia ohwoola, handi bona nisyo sino, abafu nibahawulire ekono ly'Omwaana wa Nasae, mani abo abaliwulira bacha obubao abalamu. 26 Olwohuba koti busa lu Simwaana alimo obulamu, mani yabeeresa Omwaana obunyala bw'ohubaamo obulamu mu mweene, 27 handi yamubeeresa obunyala bw'ohuheenga emisango, olwohuba ali Omwaana w'Omuundu. 28 Mutesiinduha sino; olwohuba esiha sichia ohwiicha, mani abo boosi abali mu biriindwa bacha ohuwulira ekono lyae 29 mani batulamo, mani abo abali nibahola ebilai, bacha ohusyuuhirira obulamu, nae abo abahola ebibi, bacha ohusyuuhirira ohuheengerwa emisango ohubahira. 30 “Ese sinyala ohuhola esiindu syoosi-syoosi hulw'obunyala bwaange syeng'ene daawe; koti busa lumbulira, nilwo busa lu heenga emisango; nae eheenga ye misaango yange y'obwadyeeri, olwohuba ese haba singoonya ohuhola busa bi ndaha, nae ohuhola ebyo by'oyo owanduma byadaha. 31 Nikali mbwe ese omweene neese owetusira obujulisi, obuloli bwaange buba si bwadyeeri daawe; 32 nae aliwo owundi otusa obujulisi bundiiraho, mani manyire endi, obuloli bwatusa obundiiraho, bwadyeeri nibwo. 33 Mwatuma bawamwaanda eyiri Yowaana, mani yatusa obujulisi budiira hu bwadyeeri bweene. 34 Sikali mbwe obuloli bundiiraho butula hu bandu busa; nae ese mbaboolera sino hu mweemeo muwonisibwe. 35 Yowaana yali etaara lyaaduha handi elihosa, mani mwanyala ohwehoyeraho budiidi mu bulafu bwae. 36 Nae obuloli bundi nabwo omweene, buhuluundu buhiraho obwa Yowaana; olwohuba emirimo chi Laata yaanyalira ohuhola ohumala, emirimo chiindi ohuhola echeene chino, chindusiraho obujulisi bweene chiti, Laata niye owanduma. 37 Mani Laata wanduma oyo, niye omweene owandusira obujulisi bundiiraho. Simuwuliraangaho kono lyae, oba mwabonaho efwaani yae. 38 Handi simwomiisaangaho emboosi yae mu myooyo cheeng'we olwohuba haba simufukiirira mw'oyo yiyatuma. 39 Mukoonyeresa mu byandiikwa byolerefu, olwohuba mubaasa muti, omwo nimwo omuli obulamu butaakama; nihaandi ni ebyo byeene ebindusira obujulisi bundiiraho; 40 nae muhaya ohunjichaho munyale ohunyoola obulamu. 41 Ese haba sinyoola efuma ohutula eyiri abandu daawe. 42 Nae ese manyire endi eng'we haba simuli nende ohudaha Nasae mu myooyo cheeng'we. 43 Ese ndeecha mu liita lya Laata, nae haba simumbukaanira daawe; nae owundi niyeecha mu liita lyae omweene, oyo niye yimucha ohubukaanira. 44 Munyala mutye ohufukiirira mw'oyo onyoola oluyaali ohutula busa hu waasye, nae haba simukoonya oluyaali lutula eyiri Nasae yeng'ene? 45 Mutabaasa muti neese ochia ohubawabira eyiri Laata; Ni Musa niye oli ohubawabira, oyo yimwaboyaho esuubi ly'eng'we. 46 Nikali mbwe mwafukiirira mu Musa, muba munyala ohufukiirira mw'ese, olwohuba yandiika ebilomaloma hw'ese. 47 Nae nimutafukiirira mu byandiiko byae byolerefu, muba mucha mutye ohufukiirira mu mboosi change?”

6

1 Ebyo nibiweere, Yesu yeecha yasyaabala yacha engereha w'enyaanja ye Galilaaya, oba eyilaangwa yiti enyaanja ya Tibberiasi. 2 Mani esidiyiha sy'abandu esihoongo syeecha syamulondaho, olwohuba bali babweeneho obulolero bu yali aholere hu bandu balwaaye. 3 Yesu yeecha yaniina hu lugulu, mani yehala eyo nende abeeki bae. 4 Nae bulaanu, esidyaalo sihuluundu sy'Abayudaaya sya Paasaka syali syolere. 5 Yesu niyasiingisa emoni chae ati, mani niyabona esidiyiha sy'abandu sihoongo nisiicha yali, yaboolera Filipo ati, “Hunaakule hutye emigaati, hu bandu bano boosi banyale ohulya?” 6 Nae yaboola sino ohumuhema busa, olwohuba omweene yali namanyire syanaahole. 7 Filipo yamukobolamo ati, “Edinaari emia chibiri haba sichinyala ohukula emigaati chiyera buli muundu ohunyoolaho ahadiidi busa.” 8 Mulala hu beeki bae, olaangwa ati Andereya, mwaanang'ina Simooni Peetero, yeecha yamuboolera ati, 9 “Omusyaani wundi ali ano oli nende emigaati chitaanu nende eng'eni chibiri; nae ebyo nibyo siina hu bandu bano boosi?” 10 Yesu yaboola ati, “Muboolere abandu behale aasi.” Nae bulaanu abundu awo waliwo obunyaasi bungi muno; mani abasaacha beehala aasi bali aambi w'elifu chitaanu. 11 Mani Yesu yabukula emigaati echo, mani niyamala ohwebasa, yachikabula abo abali nibehaale aasi; eng'eni chosi yachihola atyo, mani buli muundu yeesi yanyoola biyali nadaha. 12 Mani nibali baliire nibekuute, Yesu yaboolera abeeki bae ati, “Mubuuse ebidonye-donye bidong'ereho, abulewo esiindu syoosi esinyaasiha.” 13 Mani babuusa ebidonye-donye ebyo, mani beechusa ebimweero ehumi-na-bibiri eby'ebidonye-donye ebyatula mu migaati chitaanu, bi bandu balya baleha. 14 Mani abandu nibabona esilolero esyo siyali naaholere, beecha baboola bati, “Wuno niye omunabbi mweene owohwiicha mu syaalo muno!” 15 Nae Yesu niyabona ati bali aambi ohwiicha mani bamubukule nende amaani bamuhole omutuki, yeecha yaatulawo handi yacha hulugulu yeng'ene. 16 Obwiire nibweera, abeeki ba Yesu beecha beeha bacha hu nyaanja, 17 mani beengira mu lyaato, mani bachaaka ohusyaabala nibacha e Kaperanaumu. Bulaanu, esiirima syali sidiire emoni, nae Yesu yaba nasisiiri ohwiicha yibali. 18 Mani enyaanja yeecha yeya, olwohuba omuyaka mungi kwali nikuwucha. 19 Abeki nibali bafukire elyaato aambi wa mayiro kadatu oba kane, beecha babona Yesu nakeenda hu nyaanja nasuda aambi nende elyaato. Beecha batya muno, 20 nae yababoolera ati, “Niye ese; mutatya daawe.” 21 Mani abeeki beecha basangaala muno ohumwiingisa mu lyaato, nae abweene-na-bweene awo, elyaato elyo lyeecha lyoola husikobero sibali nibachaaho. 22 Hu ludaalo luloondaho, abandu bali nibadong'ere engereha w'enyaanja, babona bati, elyaato lala lyong'ene nilyo elyali nilidoong'ereyo, handi bati Yesu haba siyali niyengiire mu lyaato nende abeeki bae, nae abeeki bae bali baweereo bong'ene. 23 Nae kata katyo, amaato kandi, ohutula Tibberia keecha aambi nende esifwo sibaandu baliiramo emigaati Omwaami naamalire ohwebasa Nasae. 24 Mani abandu nibabona bati Yesu saasisiiriwo, kata abeeki bae, abandu beene abo, beecha beengira mu maato ako mani bacha e Kaperanaumu nibakoonya Yesu. 25 Abeki ba Yesu nibamwakaana engereha w'enyaanja, beecha bamuboolera bati, “Rabbi, wolere ano liina?” 26 Nae Yesu yabakobolamo ati, “Mbaboolera obwadyeeri endi, simuli ohungoonya olwohuba mwabona ebilolero, nae olwohuba mwalya emigaati mwekutira elalira. 27 Mutahalabaniraanga ebyohulya ebibiiya busa, nae muhalabanire ebyohulya biyindira ohwoola mu bulamu butaakama, bu Mwaana w'Omuundu achia ohubabeeresa; olwohuba oyo niye yi Nasae Seefwe mweene yataaho ahalolero haye.” 28 Mani beecha bamuboolera bati, “Huhoyeerwe ohuhola siina syeene, huhube nihuhola emirimo cha Nasae?” 29 Yesu yabakobolamo ati, “Omulimo ku Nasae adaha muhole nikwo kuno, ohufukiirira mw'oyo yi yatuma.” 30 Mani beecha bamuboolera bati, “Mani silolero siina syonaahole hwabona mani hwahufukiirira? Mulimo siina kweene kwohola? 31 Ba seefwe balya maanu mu siparara; koti lu syandiikwa siti, ‘Yababeresa emigaati ohutula Mukulu ohulya.’ ” 32 Nae Yesu yamala yababoolera ati, “Mbaboolera obwadyeeri endi, Musa haba siniye owababeeresa emigaati ohutula Mukulu; Laata niye obabeeresa omugaati kw'adyeeri ohutula Mukulu. 33 Olwohuba omugaati kwa Nasae, nikwo okwo okwiiha aasi ohutula Mukulu, mani kwabeeresa esyaalo obulamu.” 34 Nabo beecha bamuboolera bati, “Omwaami, tubereseenge omugaati kuno buli siha.” 35 Nae Yesu yeecha yababoolera ati, “Nise omugaati kw'obulamu; oyo owiicha yindi haba saachia hulumwa enjala, handi oyo owufukiiriramo siyahalumwe obuluwo. 36 Nae mbaboleere endi, eng'we mumbweene, nae musisiiri ohufukiirira. 37 Abo boosi ba Laata yamberesa bacha ohwiicha yindi; nae oyo yeesi owiicha yindi, haba siinjia humusukuna erwaanyi. 38 Olwohuba ese sindeeha aasi ohutula Mukulu ohuhola bi ese mweene bindaha, nae ohuhola bi oyo owanduma byadaha. 39 Mani sino nisyo si oyo owanduma syadaha ati, takosaho esiindu syoosi hu biindu yamberesa byoosi, nae nyale ohusibeeresa obulamu handi hu ludaalo lwakamayo. 40 Olwohuba huno nihwo ohudaha hwa Laata, mbwe buli oyo yeesi obona Omwaana mani yamufukiiriramo, ahoyeere ohufuna obulamu butaakama; handi njia ohumubeeresa obulamu hu ludaalo lwakamayo.” 41 Abayudaaya nabo beecha bamwekanyiisaho, olwohuba yaboola ati, “Nise omugaati kweha aasi ohutula Mukulu.” 42 Beecha baboola bati, “Wuno si niye Yesu, omusyaani wa Yosefu, yi simwaana nende ng'ina bahumanyire busa? Nae yahaboola atye ati, ‘Ndeeha aasi ohutula Mukulu?’ ” 43 Nae Yesu yabakobolamo ati, “Mulehe ohweng'ulung'uunya abeene-na-beene. 44 Abulao omuundu yeesi onyala ohwiicha yindi, ohutusaho nga Laata wanduma amuseenda yaamuleeta yindi; handi njia ohumubeeresa obulamu hu ludaalo lwakamayo. 45 Syandiikwa nende abanabbi siti, ‘Mani boosi-boosi bacha ohwekeswa nende Nasae mweene.’ Oyo yeesi owulira emboosi ya Laata, mani handi yekeswa nende Laata, oyo niye owiicha yindi. 46 Sikali mbwe buli muundu yeesi yabonaho Laata, ohutusaho oyo otula eyiri Nasae; oyo yabonaho Laata. 47 Mbaboolera obwadyeeri endi, oyo yeesi ofukiirira ali nende obulamu butaakama. 48 Nise omugaati kw'obulamu. 49 Baseeng'we balya maanu nibali mu siparara, mani beecha baafwa. 50 Kuno nikwo omugaati kweha aasi ohutula Mukulu, omuundu anyale ohukulyaho mani ahaye ohufwa. 51 Nise omugaati mulamu okweeha aasi ohutula Mukulu; omuundu yeesi olya hu mugaati kuno, achia obubao endaalo choosi; handi omugaati ku njia ohubabeeresa nikwo omubiri kwaange hulw'obulamu bw'esyaalo.” 52 Bulaanu Abayudaaya beecha bachaaka ohuyingana abeene-na-beene nibaboola bati, “Omusaacha wuno anyala atye ohutubeeresa omubiri kwae ohulya?” 53 Mani Yesu yababoolera ati, “Mbaboolera obwadyeeri endi, ohutusaho nimulya omubiri kw'Omwaana w'Omuundu, handi mwang'wa amabaanga kae, haba simuchia hubaamo obulamu; 54 Oyo olya omubiri kwaange, handi yang'wa amabaanga kange, ali nende obulamu butaakama, handi njia ohumubeeresa obulamu handi hu ludaalo lwakamayo. 55 Olwohuba, omubiri kwaange, syohulya syeene, handi amabaanga kange, syohung'wa syeene. 56 Oyo olya omubiri kwaange handi yang'wa amabaanga kange amenya mwese, handi syesi ndamumenyamo. 57 Koti lu Laata mulamu yanduma, handi nduwo hulwa Laata, mani oyo owundya, achia obubao hulwaange. 58 Kuno nikwo omugaati kweha aasi ohutula Mukulu, sikuli koti ku ba seefwe balya mani bafwa; nae oyo olya omugaati kuno yahabewo endaalo choosi.” 59 Yesu yalomalomera sino mu Sinagoogi, niyali niyeekesa e Kaperanaumu. 60 Abeki bae bangi nibawulira sino, baboola bati, “Enomanoma yino ndinyu muno; wiina onyala ohuyitekeeresa?” 61 Nae olwohuba Yesu yali namanyire mu mwooyo kwae ati abeeki bae bali ohusyemulugunyaho, yeecha yababoolera ati, “Sino sibamalamo amaani? 62 Nae nimwahabweene Omwaana w'Omuundu naniina naakobola yiyabechaanga hale? 63 Omwooyo nikwo okubeeresa obulamu, omubiri nakwo kubulaho sikuhola; emboosi chimbalomalomeere chino, nicho omwooyo handi nicho obulamu. 64 Nae aliwo abandi hw'eng'we abatafukiirira.” Olwohuba Yesu yali namanyire muhuchaaka hweene abo abali nibatafukiirira, handi nende oyo owali achia ohumulyaamo olukwe. 65 Mani yeecha yaboola ati, “Sino nisyo esikerere nimbaboolera endi abulao omuundu yeesi onyala ohwiicha yiindi ohutusaho nga Laata mweene amufukiirire.” 66 Ohutula hw'olwo, abangi hu beeki bae beseenda enyuma mani baakama ohukendaanga nae. 67 Nae Yesu yeecha yateeba abeeki bae ehumi-na-babiri ati, “Mwesi mudaha ohundeha?” 68 Simooni Peetero nae yakobolamo ati, “Omwaami, hunaache eyiri wiina? Niiwe oli nende emboosi ch'obulamu butaakama; 69 hwamala ohufukiirira handi humalire ohumanya huti, niiwe Omwolerefu Mweene wa Nasae.” 70 Nae Yesu yabakobolamo ati, “Si nise owabadoola eng'we ehumi-na-babiri? Nae mulala hw'eng'we Sitaani niye!” 71 Yesu yali naalomaloma hu Yuda omusyaani wa Simooni Yisikarioti, olwohuba niye mulala hu ehumi-na-babiri owali achia ohumuhoba.

7

1 Ebyo nibyawa, Yesu yeecha yakenda naabitira mu Galilaaya; siyanyala ohubita mu Buyudaaya, olwohuba Abayudaaya bali bakiiya ohumwiita. 2 Bulaanu, esidyaalo sy'Abayudaaya silaangwa siti, esy'Ebikaali, syali aambi ohwoola. 3 Mani, bamwaanang'ina beecha bamuboolera bati, “Tula ano mani ochie mu Buyudaaya, hu beeki bao banyale ohubona emirimo chooli ohuhola. 4 Olwohuba abulao omuundu odaha amanyihane alafu, ohola emirimo chae mungiso. Noohola ebiindu bino, weyekese eyiri abandu boosi bamanye.” 5 Olwohuba kata bamwaanang'ina bosi haba sibamufukiiriramo. 6 Yesu yeecha yababoolera ati, “Esiha syaange sisisiiri ohwoola, nae esiha syeng'we siriwo buli ludaalo. 7 Abandu sibanyala ohubahaya, nae bamala ohuuhaya olwohuba mbabooleraanga endi ebiholwa byaabwe bibi. 8 Eng'we abeene muche mu sidyaalo; ese haba siinjicha huchia hu sidyaalo sino, olwohuba esiha syaange sisisiiri ohwolera elalira.” 9 Olwaboola atyo, mani Yesu yeecha yadoong'a mu Galilaaya. 10 Bamwaanang'ina nibamala ohuchia hu sidyaalo esyo, Yesu yesi yeecha yaacha mungiso abandu nibatamubona. 11 Abayudaaya bali nibamukiiya hu sidyaalo nibaboola bati, “Omweene ali yena?” 12 Mani waliwo ohwemoonya hungi muno mu bandu. Nae abandu bandi nibaboola bati, “Omuundu wuno mulai niye,” abandi nabo beecha baboola bati, “Bbe, wuno muundu ali ohukosa abandu.” 13 Nae olwohutya Abayundaaya, abulao omuundu yeesi wamulomalomaho alafu. 14 Esidyaalo nisyali aambi ohwoola akati-kaati, Yesu yacha yengira mu nyumba ya Nasae, mani yachaaka ohweekesa. 15 Enjekesa yae yeecha yaasindusa Abayudaaya, mani baboola bati, “Omusaacha wuno yamanya atye ebiindu bino, nae haba siyachaaho mu lyeekero?” 16 Mani Yesu yeecha yabakobolamo ati, “Biinjekesa haba sibitula mwese mweene, nae bitula eyiri oyo owanduma; 17 omuundu yeesi nadaha ohuhola bi Nasae adaha, aba achia ohumanya enjekesa yino niyitula eyiri Nasae oba ndi ohulomaloma hulw'obunyala bwaange omweene. 18 Omuundu yeesi omweene olomaloma hulw'obunyala bwae, aba akoonya ohufuna oluyaali lwae omweene; nae oyo okoonya oluyaali lw'omuundu wamutuma aba ali owadyeeri, handi saalimo bubacha. 19 Musa haba siyababeeresa amalako daawe? Nae abulao kata mulala hw'eng'we owoseresaanga amalako ako. Lwasiina mukiiya ohunjita?” 20 Nae abandu abo bakobolamo bati, “Ewe oliho omusaambwa! Wiina mweene okiiya ohwiita?” 21 Nae Yesu yabakobolamo ati, “Ndaholaho esiholwa silala busa, nae eng'we mweesi mweecha mwasyesinduha. 22 Musa yabeeresa ohuhebwa (sino haba sisitula eyiri Musa, nae situla hu baseefwe), mani muhebaanga abaana basyani hu ludaalo lwa Sabbaato. 23 Omuundu nibamuheba hu ludaalo lwa Sabbaato, baahaya ohulaka elako lya Musa, bulaanu eng'we muunyolereere olwohuba ndaonia omuundu, hu ludaalo lwa Sabbaato? 24 Mutahengaanga omusango ohweema hu biindu biboneha busa, nae muhengeenge omusango ohweema hu bwadyeeri bumuba mumanyire.” 25 Sakira abandu bandi ohutula Yerusaalemu baboola bati, “Omusaacha wuno haba siniye yibali ohukiiya ohwiita? 26 Nae nguno ali ano, alomaloma busa alafu, nae abulao omuundu omuboolaho esiindu syoosi! Sinyala ohuba siti abobunyala bamalire ohumanya obwadyeeri bweene bati wuno niye Kristo? 27 Nae efwe humanyire bulai yi musaacha wuno atula; nae Kristo niyaheeche, abulao omuundu yeesi olimanya yaatula.” 28 Mani Yesu yayaala niyeekesa mu nyumba ya Nasae ati, “Mubaasa muti mumanyire handi mwamanya bulai bweene yindula? Nae ese sindeecha hulwohudaha hwange omweene; oyo owanduma niye obwadyeeri, nae omweene oyo haba simumumanyire. 29 Ese mumanyire, olwohuba ndula yaali, handi niye owanduma.” 30 Mani beecha bamukiiya ohumudiira; nae abulao omuundu yeesi owamugeeng'aho omuhono kae, olwohuba esiha sya syae syali sisisiiri ohwoola. 31 Kata katyo, abandu bangi bamufukiiriramo; nibaboola bati, “Kristo niyaheeche, mani yahahole obulolero bungi obuhira bu musaacha wuno aholere?” 32 Abafalisaayo beecha bawulira esidiyiha esyo nisiri ohumwemoonyaho, mani beecha baholera alala nende abalaamisi bahuluundu batuma Abasirikari ohuchia ohumudiira. 33 Mani Yesu yeecha yaboola ati, “Ese njia ohubaaho nang'we budiidi hooho, mani niimala njia eyiri oyo owanduma; 34 mucha ohungoonya, nae haba simuchia ohunjakaana; olwohuba yindi, simunyala ohwichayo.” 35 Abayudaaya beecha bachaaka ohuboolanira abeene-na-beene bati, “Omusaacha wuno adaha ohuchia yena bweene huhuhaye ohumunyoola? Anyala ohuba nadaha ohuchia mu syaalo sy'Abayonaani yi basyeefwe basalaanira mani asomese Abayonaani? 36 Siina syeene siyekesa naboola ati, ‘Mucha ohungoonya, nae haba simuchia ohunjakaana,’ handi ati, ‘Yindi, simunyala ohwichayo’?” 37 Hu ludaalo lw'esidyaalo lumalirihayo, oludaalo luhuluundu olwo, Yesu yeecha yeema, mani yayaala naboola ati, “Omuundu yeesi olumwa obuluwo, leha yeeche yindi mani ang'we. 38 Oyo yeesi owufukiiriramo, koti ebyandiiko byolerefu lubiboola biti, ‘Emyaalo ch'amaachi k'obulamu chicha ohuhulukusa nichitula mu mwooyo kwae.’ ” 39 Nae bulaanu Yesu yalomaloma sino, niyeekesa Mwooyo, yi abo boosi abamufukiiriramo bahanyoole; olwohuba ohwoola esiha esyo, Mwooyo yali asisiiri ohwiicha, olwohuba Yesu yali asisiiri ohubereswa oluyaali. 40 Nae nibawulira emboosi chino, abandu bandi beecha baboola bati, “Mubwadyeeri bweene, wuno niye omunabbi.” 41 Nae abandi baboola bati, “Wuno niye Kristo.” Nae abandi nabo baboola bati, “Kristo anyala ohutula mu Galilaaya? 42 Ebyandiiko byolerefu sibyaboola biti Kristo achia ohutula mu lwiibulo lwa Daudi, mani atule e Bbetileheemu, olukoongo lu Daudi yali yamenyamo?” 43 Mani ohukabuhanamo hwecha hwaaba mu bandu hu bidiira hu Yesu. 44 Abandu bandi badaha ohudiira Yesu, nae abulao omuundu yeesi owamugeeng'aho omuhono. 45 Mani Abasirikari beecha bakobolayo bacha eyiri abalaamisi bahuluundu nende Abafalisaayo, abecha bababoolera bati, “Lwasiina simumuleetere?” 46 Abasirikari nabo babakobolamo bati, “Abulao omuundu yeesi owalomalomaho bulai koti omusaacha wuno!” 47 Abafalisaayo nabo baabakobolamo bati, “Eng'we mwesi hane mumalire ohukoswa? 48 Aliwo omuundu yeesi hu bahuluundu beefwe oba hu Bafalisaayo omufukiiriremo? 49 Ohutusaho esidiyiha sy'abandu bano, abatamanyire amalako ka Musa, abaholimirwa.” 50 Nae Nikodema, owali yachaaho eyiri Yesu hale, handi owali mulala hu Bafalisaayo, yeecha yababoolera ati. 51 “Mani amalako keefwe kafukiirira ohuheengera omuundu omusango, nasisiiri mberi ohutekeereswa, hu mwamanya ebiindu byaaba naahola?” 52 Nabo bakobolamo bati, “Hane ewe wesi otula e Galilaaya? Konyeresa mu byadiiko byolerefu, mani ochia ohubona oti, abulao omunabbi yeesi olitula mu Galilaaya.” 53 Mani buli muundu yeecha yaakobola engo wae.

8

1 Nae Yesu yeecha yaniina yacha hu lugulu lwa Olibeti. 2 Echuli mu mabweeri-bweeri Yesu yeecha yeecha mu nyumba ya Nasae; mani abandu boosi basuda yali, mani yehala aasi yachaaka ohubeekesa. 3 Mani abandiiki ba malako ka Musa alala nende Abafalisaayo beecha baleeta omuhasi wali adiirirwe naali ohuyirana, mani bamuta akati waabwe 4 mani bamuboolera bati, “Rabbi, omuhasi wuno adiiribwe naali muhuyirana hweene. 5 Nae bulaanu, mu malako, Musa yatulagira ohuhubbaanga amakina omuhasi ofwaana ati. Naawe siina syeene syomuboolaho?” 6 Baboola batyo, ohuhema busa Yesu, hubeemeo banyoole esifune sibanyala ohumutaaho. Nae Yesu yenama aasi, mani yandiika hu loba nende olwala lwae. 7 Mani koti lubali nibasichiiririra ohumuteebaanga, Yesu yeecha yaasingira yeema mani yababoolera ati, “Mulehe oyo yeesi otaliho nende esibi syoosi mweng'we abe otangira ohusukuna ekina hu muhasi wuno.” 8 Handi ehabi liindi, Yesu yeecha yenama aasi, mani yandiika hu loba nende olwala lwae. 9 Nae nibawulira batyo, bachaaka ohuwao, syamulala-mulala, ohuchaakira hu muhuluundu mweene. Mani Yesu yeecha yaalehebwa yadoong'a yeng'ene nende omuhasi oyo niyeemere mu moni wae. 10 Yesu yeecha yatingaala akulu mani yamuboolera ati, “Muhasiiwe, bachiire yena? Abulao omuundu yeesi ohuwabiire omusango kwoosi?” 11 Nae omuhasi oyo yeecha yaboola ati, “Omwaami, abulao kata mulala.” Mani Yesu yeecha yaboola ati, “Mani kata syesi haba saaliwo omusango kwoosi ku huwabira; wewerewo, mani otaholaangaho esibi handi.” 12 Handi Yesu yeecha yabalomalomera naboola ati, “Nise obulafu bw'esyaalo; oyo yeesi owunoonda, haba saachia hukeendera mu siirima, nae achia ohunyoola obulafu bw'obulamu.” 13 Abafalisaayo nabo beecha bamuboolera bati, “Mbao oli ohwetusira obujulisi omweene; mani obujulisi bwao haba sibwadyeeri.” 14 Nae Yesu yakobolamo ati, “Andahaba niindi ohwetusira obujulisi omweene, obujulisi bwaange bwadyeeri, olwohuba ese omweene manyire yindatula handi yindi ohuchia, nae eng'we mukoterwe yi ese ndula handi nende yinja. 15 Eng'we muheenga emisango ohweema hubyomubiri, naange ese haba siheengera omuundu yeesi omusango. 16 Nae abyahaba mbwe ese syesi heenga emisango, eheenga yange y'obwadyeeri, olwohuba si nise syeng'ene oheenga emisango, nae nise omweene, alala nende oyo owanduma. 17 Mu malako keeng'we, syandiikwa siti, obujulisi bw'abandu babiri buba obwadyeeri. 18 Ese ndetusira omweene obujulisi, nae Laata wanduma yesi yandusira obujulisi.” 19 Mani sakira beecha bamuboolera bati, “Nae Latao ali yena?” Nae Yesu yakobolamo ati, “Eng'we simumanyire kata nende Laata yesi simumumanyire; nimuba nimwamanya, muba mwamanya nende Laata yesi.” 20 Emboosi chino nicho chiyalomalomera mu nyumba ya Nasae naali mu siseenge sibabihangamo esende. Nae abulao omuundu wamudiira, olwohuba esiha syae syali sitoola. 21 Handi Yesu yeecha yababoolera ati, “Ese mbwao, mani mucha ohungoonya, mani mufwiire busa mu sibi syeng'we; eyo yinja, eng'we simunyala ohwichayo.” 22 Abayudaaya nabo beecha baboola bati, “Achia ohweyita omweene, koti lwali ohuboolaanga ati, ‘Eyo yinja eng'we haba simunyala ohwichayo’?” 23 Yesu yeecha yababoolera ati, “Eng'we mutula aasi, nae ese ndula akulu; eng'we muli abohusyaalo sino, nae ese haba siindi owohusyaalo sino. 24 Ese mbaboleere endi eng'we mucha ohufwiira busa mu bibi by'eng'we, olwohuba mucha ohufwiira mu bibi by'eng'we nimutafukiirira muti, ese niise oyo mweene.” 25 Nabo bamuboolera busa bati, “Ewe niiwe naanu?” Nae Yesu yababoolera ati, “Kata busa nende bindenaanaanga ohubaboolera ohutula huhuchaaka simubiwulira. 26 Ndi nende emboosi nyiingi muno echohubalomalomaho, nende ebiindu ebiingi muno eby'ohukolola; nae oyo owanduma niye obwadyeeri, mani njaalira esyaalo esyo siimba nimbuliire ohumutulaho.” 27 Nabo haba sibamanya bati, yali nabalomalomeere ebidiira hu Laata. 28 Mani Yesu yeecha yaboola ati, “Nimwahabe nimumalire ohusiingisa akulu Omwaana w'Omuundu, nilwo lumwahamanyire muti ese niise oyo, handi muti, ese haba sihola esiindu syoosi hu lw'obunyala bwaange omweene, nae nomaloma ebyo bi Laata yanjekesa. 29 Handi oyo owanduma ali naange; haba siyandeha syeng'ene daawe, olwohuba buli siha hola ebimusangaasa.” 30 Mani koti luyalomaloma atyo, abandu bangi beecha bamufukiiriramo. 31 Bulaanu, Yesu yeecha yaboolera Abayudaaya abo abali bamufukiiriremo ati, “Nimudiira emboosi change, muba muli abeeki bange b'adyeeri, 32 mani muba mucha ohumanya obwadyeeri, mani obwadyeeri buba bucha ohubaboolola.” 33 Nabo bamukobolamo bati, “Efwe huli abechuhulu ba Yibbulaimu, mani haba sihubechaangaho mu buboye bw'omuundu yeesi. Siba sitye ewe ohuboola oti, ‘Mucha ohuboololwa’?” 34 Nae Yesu yabakobolamo ati, “Mbaboolera obwadyeeri endi, buli muundu yeesi ohola esibi, aba ali omuboye we sibi. 35 Nae omuboye haba saadong'aanga mu nyumba ebiha byoosi daawe; nae Omwaana adoong'a atyo ebiha byoosi. 36 Mani Omwaana nahuboolola, oba ochia ohuba omuboolole mweene. 37 Ese manyire endi muli abechuhulu ba Yibbulaimu; nae muli ohukiiya ohunjita, olwohuba emboosi change haba sichinyala ohwakaana obwihalo mu myooyo cheeng'we. 38 Ese nomaloma hw'ebyo bindabonaho nende Laata, nae eng'we muhola bi mwawulira ohutula hu seeng'we.” 39 Nabo bamukobolamo bati, “Yibbulaimu niye seefwe.” Nae Yesu yababoolera ati, “Nikali mbwe muli abaana ba Yibbulaimu dyeeri, muba muhola bi Yibbulaimu yahola. 40 Nae bulaanu eng'we muli ohukiiya ohunjita, ese omuundu obaboleere obwadyeeri bu ndawulira ohutula hu Laata mweene; sino haba sinisyo si Yibbulaimu yahola. 41 Eng'we muli ohuhola ebyo bi seeng'we yahola.” Nabo beecha bamuboolera bati, “Efwe haba sihwebulirwa mu bucheke; huli busa nende Seefwe mulala yeng'ene, Nasae.” 42 Yesu yeecha yababoolera ati, “Nasae aba naali seeng'we, mwahandahire, olwohuba njaakira handi ndula eyiri Nasae. Haba sindeecha hu lw'ohudaha hwaange omweene, nae niye owanduma. 43 Lwasiina haba simudiisa esyo siindi ohuboola? Siri mbwe, eng'we haba simunyala hwesimiirisa ohuwulira emboosi change. 44 Eng'we muli aba Sitaani seeng'we, mani esichiiririrwa syeng'we nisyo ohuhola bi seeng'we adaha. Omweene oyo yali busa omwiiti hu huchaaka hweene, mani abulao syahola syoosi esichiana nende obwadyeeri, olwohuba abulamu obwadyeeri bwoosi. Mani nabacha, aba alomaloma ohweema hu bulamu bwae, olwohuba ali omubacha handi simwaana bubacha bweene. 45 Nae olwohuba ese mbaboolera obwadyeeri, eng'we haba simufukiirira ebyaange daawe. 46 Wiina mweene hw'eng'we onyala ohumbonamo esibi syoosi? Mani ese nimboola obwadyeeri, lwasiina eng'we haba simufukiirira bi mboola? 47 Oyo yeesi owa Nasae, awulira emboosi cha Nasae; esifune sikera nimutanyala ohuchiwulira, siri mbwe, eng'we haba simuli aba Nasae.” 48 Abayudaaya beecha bakobola mu Yesu bati, “Mani omuundu saaba ali owabweene naboola ati, hane ewe oli Omusamaria handi oliho omusaambwa?” 49 Nae Yesu yakobolamo ati, “Ese haba siindiho omusaambwa daawe; nae ese njisa oluyaali mu Laata busa, nae eng'we munjaalaasa busa. 50 Ni handi ese haba sindekonyera busa omweene oluyaali; aliwo oyo olukoonya, handi niye ochia ohuba omukayi. 51 Mbaboolera obwadyeeri endi, omuundu yeesi nadiira emboosi change, haba saachia hufwa daawe.” 52 Nae Abayudaaya beecha bamuboolera bati, “Bulaanu hwahamanyira elalira huti hane, oliho omusaambwa. Yibbulaimu yafwa, koti busa lu banabbi bosi bahola; nae ewe oboola oti, ‘Omuundu yeesi nadiira emboosi change, mbwe oyo haba saachia hufwa.’ 53 Ewe ohira Yibbulaimu seefwe owafwa? Neende abanabbi bosi bafwa! Ewe naawe welaanga ohuba naanu mweene?” 54 Nae Yesu yakobolamo ati, “Nikali mbwe ese ndeberesa oluyaali omweene, oluyaali lwaange luba luli olwebihaya. Nae Laata niye owumba oluyaali, oyo yimuboolaanga muti niye Nasae weng'we. 55 Nae musisiiri ohumumanya daawe; nae ese mumanyire. Nimba nimboolere endi, haba simumanyire, mba ndi omubacha koti eng'we muli; nae ese mumanyire, handi ndeesa oluyaali mu mboosi chae. 56 Yibbulaimu seeng'we yasangaalira ohubonaho oludaalo lwaange; yalubona mani yasangaala muno.” 57 Abayudaaya nabo beecha bamuboolera bati, “Ewe otoosaho kata emyaaka amahumi kataanu ech'obuhuluundu, mani wabonaho Yibbulaimu?” 58 Nae Yesu yababoolera ati, “Mbaboolera obwadyeeri endi, kata nende Yibbulaimu niyali nateebulwa, Ese ndiwo.” 59 Mani beecha baabukula amakina bachaaka ohumuhuya; nae Yesu yeecha yabekisaho, mani yeecha yaatula erwaanyi w'enyumba ya Nasae.

9

1 Yesu niyali nakeenda nawawo, yeecha yabona omusaacha webulwa naali omuwofu. 2 Mani abeeki bae beecha bamuteeba bati, “Rabbi, naanu mweene owahola esibi hu musaacha wuno yebulwe naali omuwofu, niye omusaacha wuno, kose abebusi bae?” 3 Nae Yesu yabakobolamo ati, “Haba sisyali mbwe ni omusaacha wuno niye owahola esibi, kata haba si beebusi bwae daawe, nae hu mirimo cha Nasae chinyale ohumuboneheramo. 4 Huhoyeere ohuhola emirimo ch'oyo owanduma, nisisisiiri esideete; olwohuba esiro siba sichia ohwiicha, mani abulewo omuundu yeesi onyala ohuholaho omulimo. 5 Nimba nisisiiri mu syaalo muno, ndi obulafu bw'esyaalo.” 6 Mani niyaboola atyo, yeecha yafuucha aasi mani yaniasa eloba nende amate kae, mani yaabaha edosi elyo hu moni ch'omusaacha oyo, 7 namuboolera ati, “Cha, weyose mu diba lya Siloamu” (esyeekesa mbwe Ndatumwa). Mani yeecha yacha mani yeyosa, mani yaakobola naabona. 8 Abandu bali bamenya nae, alala nende abo abali bamubona hale nasisiiri omusabirisi, beecha baboola bati, “Wuno siniye omusaacha wali niyehalaanga mani nasabirisa?” 9 Abandi nabo baboola bati, “Ngandi niye omweene-no-mweene”. Abandi nabo baboolaanga bati, “Haba bbe, afwanana busa nae.” Nae omweene yaboola ati, “Ese nise omusaacha mweene oyo.” 10 Nabo bamuboolera bati, “Mani nae emoni chao chilimbuuswe chitye?” 11 Nae yakobolamo ati, “Omusaacha olaangwa Yesu niye oniasire eloba, mani yaalibaha hu moni change mani yamala yaamboolera ati, ‘Cha hu Siloamu mani weyose’; mani syesi njiire mani ndeyosa mani ndafuna ohubona hwange huno.” 12 Nabo bamuboolera bati, “Ali yena?” Nae yaboola ati, “Ese haba siimanyire yaali.” 13 Beecha baleeta eyiri Abafalisaayo omusaacha wali hale omuwofu. 14 Nae bulaanu lwali oludaalo lwa Sabbaato, Yesu lu yaniasiraho eloba, mani yaamulimbusiraho emoni chae. 15 Handi Abafalisaayo beecha baamuteeba engeri yiyafuniramo ohubona hwae. Nae yababoolera ati, “Omusaacha oyo yabukula edosi, mani yaalibaha hu moni change, mani naachia ndeyosa, mani bulaanu mbano mbona.” 16 Abafalisaayo bandi nabo beecha baboolaanga bati, “Omusaacha wuno haba saanyala ohuba natula eyiri Nasae, olwohuba haba saatya oludaalo lwa Sabbaato.” Nae abandi nabo baboolaanga bati, “Sinyaliha sitye, omuundu omuholi we bibi ohunyala ohuhola obulolero bwakiire ano buti?” Mani beecha bahaya ohuwuliirisania. 17 Mani handi beecha baboolera omusaacha muwofu oyo bati, “Siina syeene syonyala ohulomaloma hu musaacha oyo, koti lwalimbuuse emoni chao?” Nae yeecha yaboola ati, “Munabbi niye.” 18 Abayudaaya nabo haba sibanyala ohufukiirira bati omusaacha oyo yaliho omuwofu, mani bati yanyoola-bunyoola lunyuma ohubona hwae, ohwoola lu beecha balaanga abebusi b'omusaacha wali nanyoolere ohubona hwae, 19 mani baabateeba bati, “Omusyaani wuno yimuboola muti yebulwa niyaofula, mwaana weng'we mweene? Nae siba sitye mbwe bulaanu anyala ohubona?” 20 Nae abebusi bae beecha bakobolamo bati, “Efwe humanyire huti wuno mwaana weefwe mweene, handi huti, yebulwa naali omuwofu; 21 nae ohumanya esikera nanyala ohubona bulaanu, efwe haba sihumanyire daawe, kata handi sihumanyireho nende oyo olimbuuse emoni chae. Mumuteebe omweene; olwohuba omweene muhuluundu niye, mani achia ohwelomalomera omweene.” 22 Abebusi bae baboola batyo, olwohuba bali batiire Abayudaaya, olwohuba Abayudaaya abo bali bamalire ohufukiirisania hale bati, omuundu yeesi naachia ohumutuumbula ati, niye Kristo, aba achia ohwiruswa busa mu Sinagoogi. 23 Ohweema hweesyo, abebusi bae beecha baboola bati, “Omweene muhuluundu, mumuteebe.” 24 Handi mani hulwa ehabi lyohubiri, beecha balaanga omusaacha wali hale omuwofu, mani bamuboolera bati, “Fumiaho Nasae; efwe humanyire huti, omusaacha wuno muholi we bibi.” 25 Nae yakobolamo ati, “Kata naaba naali omuholi we bibi, ese haba siimanyire; nae esiindu silala syong'ene siimanyire siri siti, mbeere hale niindi omuwofu, bulaanu mbona.” 26 Nabo beecha bamuboolera bati, “Siina syeene syahuholere? Alimbuuse atye emoni chao?” 27 Nae yabakobolamo ati, “Ese malire ohubabooleraho hale, nae haba simunyalire hutekeeresa. Lwasiina mudaha ohusiwulira ehabi liindi? Mwesi muli ohudaha ohwehola abeeki bae?” 28 Nabo bulaanu beecha bamunyoholesa, nibaboola bati, “Ewe niiwe omweeki wae, nae efwe huli abeeki ba Musa. 29 Efwe humanyire huti, Nasae yalomaloma tiiri nende Musa, nae ebidiira hu musasacha wuno, efwe haba sihumanyire kata nende yaatula.” 30 Mani omusaacha oyo yeecha yakobolamo ati, “Hu siina syeene, luno lubwa! Eng'we haba simumanyireho nende yaatula, nae alimbuuse emoni chiange. 31 Efwe humanyire huti, Nasae haba sawuliranga abaholi be bibi, nae huti, omuundu yeesi naali owiinamira Nasae mweene, mani yaaba ohola byadaha, niye yi Nasae awulira. 32 Haba sisiwulirwaangaho kata na budiidi ohutula esyaalo nisibaao siti, omuundu yeesi anyalire ohulimbusa emoni ch'omuundu webulwa naali omuwofu. 33 Nikali mbwe omusaacha wuno haba saatula eyiri Nasae, haba saaliwo esiindu syoosi syaba anyala ohuhola.” 34 Nabo bamukobolamo bati, “Ewe naawe owebulirwa busa mu bibi, wesi oli nende syonyala ohutwekesa?” Mani beecha bamusukuna erwaanyi we Sinagoogi. 35 Yesu yeecha yawulira lunyuma ati bamalire ohusukuna omusaacha oyo erwaanyi wa Sinagoogi, mani niyeecha yabukanana nae yaboola ati, “Ewe mani ofukiirira mu Mwaana w'Omuundu?” 36 Nae yakobolamo ati, “Ow'oluyaali, nae oyo niye naanu, mufukiiriremo?” 37 Nae Yesu yamuboolera ati, “Ewe wamala ohumubona, handi niye oyo oli ohulomalomaanga naawe.” 38 Nae yeecha yaboola ati, “Omwaami, ese fukiirira”. Mani yamala yaamwiinamira. 39 Yesu yeecha yaboola ati, “Ese ndeecha mu syaalo muno ohuheenga emisango, hu bulaanu abo abatabona, banyale ohubona, handi hwaabo ababona baofule.” 40 Abafalisaayo bandi bali nibali aambi nae beecha bawulira sino, mani bamuboolera bati, “Oti efwe fwesi huli abawofu, kose?” 41 Nae Yesu yeecha yababoolera ati, “Muba nimuli abawofu, haba simuba muli nende esibi syoosi; nae olwohuba bulaanu muli ohuboola muti ‘Efwe hubona,’ esibi sy'eng'we, sidoong'aawo busa.

10

1 “Mbaboolera obwadyeeri endi, oyo yeesi oteengira mu sidwooli nabitira mu mulyaango, nae yaniina yengirira abundu wandi, omuundu oyo aba ali omwiibi handi omunyaka. 2 Nae oyo owingirira mu mulyaango, niye oba omwaayi mweene w'amakoondi. 3 Oyo niye yi muliindi w'esiruwa yiyekulira; mani amakoondi kamanya ekono lyae, mani yalaanga buli koondi lyae nende eliita lyaalyo, mani yaakemirira nikatula erwaanyi. 4 Mani naaba naamalire ohutusa erwaanyi amakoondi kae, akatangirira mu moni, mani amakoondi kamuloondaho, olwohuba kaba kamanya ekono lyae. 5 Nae haba sikanyala ohuloonda omuteende yeesi, nae kaba kacha ohumwiiruha busa, olwohuba haba sikamanyire ekono ly'Abateende.” 6 Yesu yabahosesera esifwaanani sino, nae nabo haba sibamanya esihuluundu siyali ababooleraanga. 7 Sakira Yesu handi yeecha yababoolera ati, “Mbaboolera obwadyeeri endi, niise omulyaango kw'amakoondi. 8 Abo boosi abacha ohwiicha enyuma wange, beebi handi banyaka busa; nae amakoondi nako, haba sikabatekeeresa. 9 Nise omulyaango; mani omuundu yeesi niyanyiingiriramo, achia ohuwonisibwa, handi achia ohwingiraanga handi natula mani nanyolaanga olwaayiro. 10 Omwiibi yechaanga busa ohwiiba nende ohwiita nende ohunyaasa. Ese ndeecha hu bandu banyale ohunyoola obulamu, mani babe nabwo mubwichufu. 11 Niise omwaayi mulai. Omwaayi mulai, awaayo obulamu bwae hulw'amakoondi. 12 Oyo oba naali busa omupakase, handi otaali omwaayi, otaali omweene makoondi, naabonaho busa esinamiindi nisiicha aleha busa amakoondi mani yeyiruhira; mani esinamiindi siicha syaakakwaaho, mani syakasalaania. 13 Yeyiruhira olwohuba aba ali busa omuhalaabani mani saliindaho amakoondi kata nabudiidi. 14 Nise omwaayi mulai. Ese manyire amakoondi kange, handi amakoondi kange kosi kaamanyire, 15 koti busa lu Laata yaamanyire, handi syeesi ndaamanya Laata; handi mbwayo obulamu bwaange hulw'amakoondi. 16 Handi ndi nende amakoondi kandi, akataali ak'omusidwooli sino. Mani hoyeere ohukaleeta kosi, mani kosi kamanye ekono lyaange. Mani sakira achia ohubaao esidwooli silala nende omwaayi mulala. 17 Mani hulw'esifune sino, sakira Laata yandaha, olwohuba ese ndetusaho obulamu bwaange, hu lunyuma handi nyale ohubwekobosera. 18 Abulao omuundu yeesi onyala ohubuundusaho, nae ese omweene, mbwetusaho, handi ndi nende obunyala bw'ohububukula handi; ndanyoola esilagiro sino ohutula hu Laata.” 19 Handi ohukabuhanamo hwecha hwabao mu Bayudaaya hulw'emboosi chino. 20 Abangi hw'abo baboolaanga bati, “Aliho omusaambwa, mani mulalu niye; lwasiina humutekeeresa?” 21 Nae abandi baboolaanga bati, “Chino haba sin'emboosi ech'omuundu oliho omusaambwa. Omusaambwa kunyala kwalimbusa emoni ch'omuwofu?” 22 Esiha esyo syali esy'esidyaalo sy'ohulabya Enyuumba ya Nasae e Yerusaalemu; 23 yali etoocho, mani Yesu yali nakendaanga mu nyumba ya Nasae, mu siseenge sya Solomooni. 24 Mani sakira Abayudaaya beecha bebuusa bamwebodoohania mani bamuboolera bati, “Ng'ochia ohutuhiindya notulehere mubutamanya? Nikali mbwe ewe niiwe Kristo, tuboolere busa alafu.” 25 Nae Yesu yabakobolamo ati, “Ndamala ohubaboolera, nae haba simufukiiriraanga. Emirimo chino chiindi ohuholaanga mu liita lya Laata, chindusira obujulisi echeene; 26 nae eng'we haba simufukiiriraanga daawe, olwohuba eng'we haba simuli hu makoondi kaange. 27 Amakoondi kange kamanya ekono lyaange, handi syesi ngamanyire, mani kanoonda busa; 28 mani naange ngabeeresa obulamu butaakama, mani haba sikachia humalwao, handi abulao oyo yeesi ochia ohukakwaaho akatuse mu mahono kange. 29 Laata oyo owakamberesa, ahira ebiindu byoosi, handi abulao omuundu yeesi onyala ohubang'uula yabatusa mu muhono kwa Laata. 30 Ese nende Laata huli mulala.” 31 Handi Abayudaaya beecha badoola amakina nibadaha ohumuhuyira. 32 Nae Yesu yabakobolamo ati, “Ese mbekeese emirimo miingi milai muno ohutula eyiri Laata; bulaanu ni mulimo siina kweene kumudaha ohuhubbiraho amakina?” 33 Nae Abayudaaya bamukobolamo bati, “Sihudaha ohuhuhubba amakina hulw'omulimo mulai daawe, nae ni hulw'ohufwoola Nasae; olwohuba ewe oli omuundu busa, nae oli ohwehola ohuba Nasae.” 34 Nae Yesu yabakobolamo ati, “Haba sisyandiikwa mu malako k'eng'we siti, ‘Nasae yaboola ati, eng'we muli banasaye’? 35 Mani Nasae niyabalaanga ati bali banasaye, abo ba mboosi ya Nasae yechera (handi ebyandiiko byolerefu haba sibinyala ohuhalakwa), 36 bulaanu lwasiina muba muboola, hu oyo yi Laata yalabya yaaba omwolerefu mani yamala yaamutuma ohwiicha mu syaalo muti, ‘Ewe oli ohufwoola Nasae,’ olwohuba busa mbwe ese mboolere endi, ‘Ndi Omwaana wa Nasae’? 37 Nikali mbwe ese haba siindi ohuholaanga emirimo cha Laata, mani mutafukiiriramo; 38 nae nikali mbwe ndi ohuchiholaanga, kata nende nimutafukiirira, muhoyeere mani mufukiirire emirimo echo busa, hu munyale ohumanya handi nende ohwomiisa muti, Laata yandimo, handi muti, ese ndi mu Laata.” 39 Handi abo bateemaho ohumudiira, nae omweene yaanyala ohwechimula yaatula mu mahono kaabwe yawaawo. 40 Yesu yeecha handi yaatula awo yawaawo yaambuha Yorudaani yacha mu sifwo si Yowaana yachaakiramo ohubatisaanga, mani yadoong'a ebweene eyo. 41 Handi abandu bandi beecha bamuloondaho beecha yaali; mani baboola bati, “Yowaana haba siyaholaho esilolero syoosi daawe, nae buli siindu si Yowaana yaboolaanga hu muundu wuno syali esyadyeeri syeene.” 42 Mani abandu beeyo bangi beecha bamufukiiriramo.

11

1 Bulaanu, omusaacha olaangwa ati Lasaaro, owali yamenya e Bbetani, olukoongo lu Maria nende Marita mwaanang'ina bali bamenyamo yeecha yalwaala. 2 Maria wuno, niye owabaha Yesu amafuta ak'esing'aari siingi, handi yabalakasa amakulu kae nende efwiiri lyae, handi niye yi mboochong'ene Lasaaro wuno owali omulwaae. 3 Mani bambochong'ene bano bombi, nibo abecha baalakiirisa Yesu nibaboola bati, “Omwaami, oyo yiwaheera alwaala.” 4 Nae Yesu niyawulira atyo, yeecha yaboola ati, “Obulwaae buno haba sibuchia hutuliramo ohufwa; bw'oluyaali lwa Nasae, hu Mwaana wa Nasae anyale ohukinisibwa nahwo.” 5 Nae bulaanu, Yesu yali yaheera muno ba Marita nende Maria mwaanang'ina alala nende Lasaaro. 6 Mani Yesu niyawulira ati Lasaaro mulwaye, yeecha yadoong'a mu sifwo siyalimo esyo hulwa embaka ya endaalo chiindi chibiri. 7 Mani lunyuma lw'esyo, yeecha yaboolera abeeki bae ati, “Mulehe hukobole handi mu Buyudaaya.” 8 Abeki bae nabo beecha bamuboolera bati, “Rabbi, Abayudaaya bali nibakiiya ohuhubba amakina, nae ewe ochaayo?” 9 Nae Yesu yabakobolamo ati, “Esideete sisirimo esaa ehumi nende chibiri da? Omuundu yeesi nakeenda esideete, haba siyegumula, olwohuba aba abona obulafu bw'esyaalo sino. 10 Nae omuundu yeesi nakeenda mu siro, yegumula olwohuba obulafu haba sibuba nibumulimo.” 11 Yesu yalomaloma atyo, mani yamala yababoolera ati, “Lasaaro omwiicha weefwe, akonere endoolo, nae njia ohumusimusa atule mu ndoolo.” 12 Nae abeeki bae beecha bamuboolera bati, “Omwaami, mani naaba naakonere endoolo, aba achia ohusiingira.” 13 Nae bulaanu, Yesu yali naalomaloome hu hufwa hwa Lasaaro, nae abo babaasa bati, yali niyeekesa ati, Lasaaro yali nawuluuhaho busa mu ndoolo. 14 Mani bulaanu Yesu yeecha yababoolera alafu ati, “Lasaaro afwiire; 15 mani hulw'obulayi bw'eng'we, bideekere biyaba mbwe simbeereyo, hu munyale ohufukiirira. Nae mulehe huchie yaali.” 16 Nae Tomasi, owali nalaangwa ati Ehwaana, yeecha yaboolera abeeki basye ati, “Mulehe fwesi huchie, mani hufwiire alala nae.” 17 Nae bulaanu, Yesu niyeecha eyiri Lasaaro, yakaana ati Lasaaro yali naamalire endaalo chine mu ng'ani. 18 Bbetani syali siri aambi nende Yerusaalemu, nisiri aambi wa mayiro kabiri ohukabuhanamo, 19 mani Abayudaaya bangi bali bakeniiye Marita nende Maria ohubagumia emyooyo, ohweema hu hufwa hwa mboocho yaabwe oyo. 20 Nae Marita niyawulira ati Yesu ali hu ngira yeecha, yaasingira yacha yamubukaanira, nae Maria yaba niyehaale bwihala mu nyumba. 21 Marita yeecha yaboolera Yesu ati, “Omwaami, nooba niwabeereo, mboocho yange haba saaba niyahafwiire. 22 Nae kata bulaanu, ese manyire endi, esyo syoosi syochia ohusaba ohutula eyiri Nasae, Nasae aba achia ohuhubeeresa busa.” 23 Nae Yesu yamuboolera ati, “Mboochoo achia ohusyuuha handi.” 24 Nae Marita yeecha yamuboolera ati, “Ese manyire mbwe achia ohusiingira handi mumasyuuha hu ludaalo lw'enjakamo.” 25 Nae Yesu yamuboolera ati, “Ese niise ohusyuuha nende obulamu; oyo yeesi owufukiiriramo, kata nende naafwa, aba handi achia obubao omulamu, 26 handi oyo yeesi oliwo omulamu, handi niyafukiiriramo, haba saaba achia ohufwa. Mani sino osifukiirira?” 27 Nae yamuboolera ati, “Eee, Omwaami; fukiirira endi niiwe Kristo, Omwaana wa Nasae, oyo ochia ohwiicha mu syaalo.” 28 Marita niyamala ohuboola atyo, yacha mani yalaanga Maria mwaanang'ina namumonyesera ati, “Omweekesa nguno ali ano ahulangaanga.” 29 Mani Maria niyawulira atyo, yaluuluha yasingira bwaangu, mani yacha eyiri Yesu. 30 Nae bulaanu, Yesu yali atoola mu lukoongo olwo, nae yali nasisiiri mu sifwo si Marita yali namubukaaniremo. 31 Nae Abayudaaya bali mu nyumba nibali ohugumianga Maria, nibamubona nasiingira bwaangu mani natula erwaanyi, bosi bamuloondaho, nibabaasa bati, yali achia enasiriindwa alirireyo. 32 Mani Maria niyeecha yoola mu sifwo si Yesu yalimo mani yamubona, yacha yaakwa mu makulu kae, namuboolera ati, “Omwaami, nooba nobeere noliwo, mboocho yange haba siyahafwiire.” 33 Mani Yesu niyamubona naali ohulira muno, handi nende Abayudaaya bali nibeechere nae bosi nibali ohulira, yeecha yawulira obuchuuni bungi muno mu mwooyo, mani yaanyoolera muno; 34 mani yeecha yaboola ati, “Yena bweene yimumwaliise?” Bamuboolera bati, “Omwaami, yicha obone.” 35 Yesu mani naalira. 36 Mani Abayudaaya beecha baboola bati, “Boneho koti luyali niyamuheera!” 37 Nae abandi nabo baboolaanga bati, “Mani oyo owaliimbusa emoni ch'omusaacha wali omuwofu, byahamuhayire bitye ohukayirira omusaacha wuno ohufwa?” 38 Mani Yesu nasisiiri nende esibeera, yakenda yoola hu siriindwa; syali esiriindwa koti eng'uungu, mani syekalirwaho ekina. 39 Yesu yeecha yaboola ati, “Mutuseyo ekina elyo.” Marita, owali mboochong'ene omusaacha mufu, yeecha yaboolera Yesu ati, “Omwaami, esiha sino esifundu sichia ohubaao esiingi muno, olwohuba amalire endaalo chine nafwiire.” 40 Nae Yesu yeecha yamuboolera ati, “Haba sihuboolereho endi, nikali mbwe ochia ohufukiirira, ochia ohubona oluyaali lwa Nasae?” 41 Mani beecha batusayo ekina. Mani Yesu yeecha yasingisa akulu emoni chae mani yaboola ati, “Laata, hwebasa muno, olwohuba ewe wambulira ohutula hale. 42 Ese manyire endi ewe wumbuliranga buli siha, nae mboolere endyo hulw'abandu beemere ano, hu banyale ohufukiirira bati niiwe owanduma.” 43 Mani niyali naamalire ohuboola atyo, yeecha yahuumulira mu kono ly'akulu naboola ati, “Lasaaro, tula erwaanyi!” 44 Omusaacha mufu oyo yeecha yaatula erwaanyi, amahono kae alala nende amakulu kae nibiboyeebwe nende esibiro, nae obweeni bwae nibufuuniihwe nende engubo. Yesu yeecha yaboolera abandu bali awo ati, “Mumuboolole, mani mumulehe aweo.” 45 Mani Abayudaaya bangi, abali nibeechere nende Maria mani abali nibabweene bi Yesu yahola, beecha bamufukiiriramo. 46 Nae abandi nabo beecha bacha eyiri Abafalisaayo mani baababoolera bi Yesu yali aholere. 47 Mani abalaamisi bahuluundu alala nende Abafalisaayo beecha balaanga babuusa beehasa esiina, mani baboola bati, “Siina syeene sihuba huhole? Olwohuba omusaacha wuno ali ohuhola obulolero obusaabi. 48 Nihumuleha yachiiririra busa atyo, buli muundu aba achia ohumufukiiriramo, mani Abaroomu baba bacha ohwiicha batuseete batumaleo alala nende ebifwo by'ebiyembeho byeefwe nende esyaalo sy'efwe syoosi.” 49 Nae mulala hu beene abo, olaangwa Kayaafa, owali naahola koti omulaamisi muhuluundu omwaaka okwo, yeecha yababoolera ati, “Abulao esiindu syoosi simumanyireho; 50 haba simumanyireho muti silayi yimuli, omuundu mulala ohufwiira abandu, handi muti esyaalo syoosi haba sisihoyeere ohusihirisibwa.” 51 Haba siyaboola atyo hulwae busa omweene, nae koti luyali omulaamisi muhuluundu omwaaka, yali yatumbula ati Yesu ahoyeere ohufwiirira esyaalo, 52 nae handi haba si hulw'esyaalo syong'ene, nae ohubuusa mu mukaanda mulala abaana ba Nasae abasalaanira ebuteende. 53 Mani sakira ohutula hu ludaalo olwo ohwemeeda mu moni Abayudaaya bahola etekeha y'ohwiitiramo Yesu. 54 Ohweema hw'esyo, Yesu haba siyanyala ohukeenda mu Bayudaaya alafu, nae yatula awo, mani yaacha mu siko silaangwa mbwe Efuraimu, mu syaalo siri aambi nende esiparara; yiyamenya alala nende abeeki bae. 55 Nae bulaanu, esidyaalo sya Paasaka ya Abayudaaya syali siri nduunya, mani abandu bangi bali bachiire e Yerusaalemu ohutula mu byaalo, ohwelabya. 56 Bali bakoonyaanga Yesu nibaboolanira abeene-na-beene ni bemeere mu nyumba ya Nasae bati, “Mubaasa mutye? Muti awundi haba siyaheechaho hu sidyaalo huno?” 57 Nae bulaanu abalaamisi bahuluundu alala nende Abafalisaayo, bali nibamalire ohutusa omunwa bati omuundu yeesi niyahamanyaho yi Yesu ali, ahoyeere abeekese bamanyeho, banyale ohumudiira.

12

1 Endaalo nichali nichidong'ere chisaasaba ohwoola hu sidyaalo sya Paasaka, Yesu yeecha e Bbetani, yi Lasaaro yi Yesu yasyuusa yaatusa mu bafu, yali yamenya. 2 Niyali ebweene eyo, beecha bamudeehera esy'engoloobe; Marita niye owali nahalabaana, nae Lasaaro yali naali mulala hw'abo abali nibehaale hu meesa nende Yesu. 3 Maria yeecha yabukula elatiri ndala ey'amafuta k'ebbeyi hoongo muno, ak'enaasi, mani yaakabahira amakulu ka Yesu, handi yamala yaakabalakasa nende efwiiri lyae; mani enyumba yoosi yeecha yechula esiing'aari sy'amafuta ako. 4 Nae Yuda Yiskarioti, mulala hu beeki ba Yesu, (oyo owali achia ohumuhoba), yeecha yaboola ati, 5 “Lwasiina amafuta kano haba mani sikakusirwemo edinaari emia chidatu mani chakabirwa abamanani?” 6 Yaboola sino, ataali mbwe yali achuunirwa muno abamanani, nae olwohuba yali omwiibi busa, mani koti luyali niye omubiihi w'esanduku ly'eseende, yali niyanaliirira ohubukulaanga nayira buli syabiihwaanga mu bweene omwo. 7 Nae Yesu yeecha yaboola ati, “Mulehe abee, mulehe akalindise oludaalo lw'ohusiihwa hwange. 8 Abamanani muli nabo endaalo choosi, nae haba simuli naange endaalo choosi daawe.” 9 Mani esidiiyiha sihoongo sy'Abayudaaya nisyeecha syamanya siti Yesu yali eyo, beecha beecha yaali, nibateecha hu lwa Yesu yeng'ene, nae bati baboneho busa Lasaaro, yiyali niyasyuusa ohutula mu bafu. 10 Mani hulw'esyo, abalaamisi bahuluundu beecha batekeha ohwiita Lasaaro yesi, 11 olwohuba hulwohusyuhisibwa yesi, Abayudaaya bangi muno bali bacha ohwekabula mani nibafukiirira mu Yesu. 12 Nibwahya muchuli, esidiiyiha sihoongo muno, esyali nisiichire hu sidyaalo esyo, syeecha syawulira siti Yesu yali niyeecha mu Yerusaalemu. 13 Mani hulw'esyo, beecha baabukula amasaga k'emisaala ch'eminaasi, mani nibatula nibacha ohumubukaanira, nibehuuma bati, “Hosaana! Ali nende omukisa oyo owiichira mu liita ly'Omwaami, handi Omutuki wa Yisirayiri!” 14 Mani Yesu yeecha yanyoola esuhiri njere mani niyeecha nayihalaho; koti lusyandiikwa siti, 15 “Otatya daawe, muhaana wa Siyooni; bonaho, omutuki wao mbawo yeecha, niyehaale hu suhuri njere!” 16 Abeki bae nabo haba sibamanya bamanya amahulundu k'esiholwa sino mberi; nae Yesu niyeecha yaberesebwa oluyaali, awo niwo yibechera beechulisa hane sino syosi syali syamwandiikwaho, handi syali syamuholerwa. 17 Esidiyiha syali nae lu yalangira Lasaaro ohutula mu siriindwa mani yaamusyuhisa ohutula mu bafu, beecha bachaaka ohutusa obujulisi bwebyali nibyaholehana. 18 Esifune syakera esidiyiha nisyali nisichiire ohumubukaanira, syali mbwe, bali nibawuliire bati niye owali aholere esyamayia sino. 19 Abafalisaayo nabo bulaanu beecha baboolanira abeene-na-beene bati, “Simuli hubona koti luhutanyala ohuhola esiindu syoosi; boneho, esyaalo syoosi-syoosi simalire ohumulondaho.” 20 Nae bulaanu, mu bandu bali nibachiire ohwiinamira Nasae hu sidyaalo esyo, mwalimo Abayonaani bandi bosi. 21 Mani sakira nibo abeecha eyiri Filipo, owali natula e Bbetisayida mu Galilaaya, mani bamuboolera bati, “Omuhulundu, fwesi hwekoomba ohubonaho Yesu.” 22 Filipo yesi yeecha yaacha yabooleraho Andereya; Mani Andereya yeecha yaacha nende Filipo mani baboolera Yesu batyo. 23 Nae Yesu yabakobolamo ati, “Esiha simalire ohwoola, Omwaana w'Omuundu aberesebwe oluyaali lwae. 24 Mbaboolera obwadyeeri endi, ohutusaho olumwo lw'engaano lukwa lweengira muloba, mani lwamala lwaafwa, ludoong'a busa niluli lwong'ene; nae nilwiicha lwaafwa, lwiicha lwebula ebyaamo biingi muno. 25 Oyo yeesi owedahisa obulamu bwae muno, yeecha yabuhaywa, nae oyo yeesi osyuula obulamu bwae ohuba mu syaalo muno, achia ohubwebiihira abufune mu siha sy'obulamu butaakama. 26 Omuundu yeesi niyahalaabanira, ahoyeere ohunoonda; mani eyo yoosi yimba niindi, niyo eyicha ohuba nende omuhalaabani wange yesi; omuundu yeesi niyahalaabanira, Laata achia ohumuba oluyaali. 27 “Bulaanu buti, omwooyo kwaange kwelalihiriire muno. Mani ndaboole siina syeene? Laata, monie esiha sino? Haba daawe, nae ni hulw'esifune syeene sino sakira njolere hu siha syeene sino. 28 Laata, beeresa mani eliita lyaange oluyaali.” Mani ekono lyeecha lyatula Mukulu liti, “Ese malire ohulibeeresa oluyaali, handi njia ohulimeeda oluyaali.” 29 Esidiyiha syali nisyeemere aambi awo syeecha syaliwulira mani syaboola siti, lyaduuluha-bwaduuluha busa. Abandi nabo baboola bati, “Malaika niye alomalome nae.” 30 Nae Yabakobolamo ati, “Ekono lino liichire hulw'eng'we, nae haba si hulwaange ese. 31 Esiha sino sy'ohuheengera omusango esyaalo sino, bulaanu omwimirisi w'esyaalo sino achia ohusukunwa erwaanyi; 32 mani ese, ninjia ohukiingwa akulu ohutusibwa hu syaalo huno, njia ohwebuusiraho abandu boosi.” 33 Yesu yaboola atyo, ohweekesa efwa yi yali achia ohufwa. 34 Nae esidiyiha syeecha syamukobolamo siti, “Efwe hwawulirira hu malako ka Musa huti, Kristo oyo abaawo olubeerera. Naawe onyala otye ohuboola oti, Omwaana w'Omuundu ohoyeere ohukiingwa akulu? Omwaana w'Omuundu wuno niye naanu mweene?” 35 Nae Yesu yeecha yababoolera ati, “Omulafu busisiiriho nang'we hulw'esiha sidiidi. Mukeende nimusisiiriho nende obulafu, esiirima sihaye ohubakaanira; oyo yeesi okeendera mu siirima haba saamanya yaaba nachiira. 36 Nimusisiiri nende obulafu, mufukiirire mu bulafu, hu mweemeo munyale ohwehola abaana b'obulafu.?” Mani Yesu niyamala ohulomaloma atyo, yawao mani yacha yabekisaho. 37 Kata nende niyali naaholere obulolero obuungi muno mu moni chaabwe, nae haba sibamufukiiriramo daawe; 38 syali mbwe ohwoola lu mboosi chalomalomwa nende nabbi Yisaaya choolerere abweene chiti: “Omwaami, wiine mweene owanyala ohufukiirira bi hwatuumbula, handi ni wiina oyo yi bunyala bw'Omwaami bwabwihulirwa?” 39 Mani sakira sibanyala ohufukiirira daawe. Olwohuba Yisaaya handi yaboola ati, 40 “Yawofusa emoni chaabwe, handi yahadaanga emyooyo chaabwe, hu bahaye ohubona nende emoni waabwe handi ohufuumbulira emyooyo chaabwe, mani banyale ohungaluuhanira beeche mbaonie.” 41 Yisaaya yaboola atyo, olwohuba yali niyabona oluyaali lwae mani yaanyala ohumulomalomaho atyo. 42 Kata katyo, abandu b'obunyala bangi muno, beecha bamufukiiriramo, nae hulw'ohutya Abafalisaayo, haba sibatuumbulaanga batyo, bahaye ohusukunwa erwaanyi wa Sinagoogi: 43 olwohuba abo bali badaha muno ohukinisibwa hw'abandu ohuhira ohukinisibwa hwa Nasae. 44 Mani Yesu yeecha yahumulira akulu mani yaboola ati, “Oyo yeesi owufukiiriramo, haba saaba afukiirira mu ese syeng'ene, nae aba afukiirira mu oyo owanduma. 45 Handi oyo owumbona, aba abona oyo owanduma. 46 Ese ndeecha mu syaalo ohuba obulafu, hu bulaanu oyo yeesi owufukiiriramo, atadoong'a naali mu siirima daawe. 47 Mani omuundu yeesi nawulira enomanoma yange mani yaahaya ohuyiholeraho, ese haba simuheengera omusango daawe; olwohuba ese haba sindeecha ohuheengera esyaalo omusango daawe, nae ndeecha ohuwonia esyaalo. 48 Oyo yeesi owundekaana mani yahaya ohubukaanira enomanoma yange aba yamala ohufuna omuheengi w'emisaango; emboosi cho chiimba nindalomaloma, chiba chicha ohuba omuheengi w'emisaango wae, hu ludaalo lw'enjakamo. 49 Olwohuba ese haba sindalomalomaanga hu lw'obunyala bwaange ese omweene daawe; Laata oyo owanduma omweene yamala ohumbeeresa esilagiro sinomanoma, nende emboosi ch'ohulomaloma. 50 Handi ese manyire endi, esilagiro syae, nisyo obulamu butaakama. Mani esyo siimba ninomanoma, nomaloma koti lu Laata aba yanyimiriire.”

13

1 Nae bulaanu, esiha sy'esidyaalo nisyali nisisiiri ohuchaaka, Yesu niyeecha yaamanya ati, esiha syae esy'ohuwaao atule mu syaalo sino syolere, koti luyali niyadahana muno nende abandu bae abali nibali mu syaalo muno, yachiiririra ohubadaha atyo, ohwolera elalira hu njakamo. 2 Mani nibali bali ohulya esy'engoloobe, Sitaani niyali amalire ohuta mu mwooyo kwa Yuda Yiskarioti, omusyaani wa Simooni, esibaaso sy'ohulya olukwe mu Yesu, 3 nae Yesu niyali naamalire ohwomiisa ati, Laatang'ene yali niyamala ohuta mu mahono kae ebiindu byoosi, handi ati yali niyatula eyiri Nasae, haandi yali naachia eyiri Nasae, 4 yeecha yaasingira yaatula hu sideru syesy'engoloobe esyo, mani yefwaalulamo engubo chae chohumukulu, mani yamala yeboya etawulo. 5 Mani yamala yaachuha amaachi mu lukaraayi, mani yamala yachaaka ohwoosa amakulu k'abeeki, handi nende ohukabalakasira etawulo yiyali niyeboyere. 6 Yecha yoola hu Simooni Peetero; nae Peetero yeecha yamuboolera ati, “Mache Omwaami, ochia ohwoosa amakulu kange?” 7 Nae Yesu yamukobolamo ati, “Esiindu siindi ohuhola, ewe haba sosimanyire bulaanu, nae lunyuma ochia ohusimanya.” 8 Nae Peetero yamuboolera ati, “Ewe haba sochia hunyalaho kata nabudiidi ohwoosa amakulu kange.” Nae Yesu yamukobolamo ati, “Mani ese nitahwoosa, oba haba sooli nende obweyaango naange daawe.” 9 Nae Simooni Peetero yeecha yamuboolera ati, “Omwaami, mani otoosa amakulu kange kong'ene, nae njose nende amahono kange kosi, alala nende omutwe kwaange kwosi!” 10 Yesu yeecha yamuboolera ati, “Oyo yeesi owamala ohweyoka, haba sahoyera ohweyoka daawe, ohutusaho aba ahoyera ohweyosa amakulu kong'ene, nae aba ali omunyirifubuli abundu; nae eng'we muli abayoonjo, nae haba si mweesi alala daawe.” 11 Olwohuba Yesu yali amanyire oyo owali naachia ohumuhoba; esyo nisyo esyakera yeecha yaboola ati, “Eng'we mweesi, haba simuli abayoonjo.” 12 Mani Yesu niyali yahamala ohwoosa amakulu kaabwe, handi niyahamala ohwefwaala engubo chae, nende ohukobola mu sifwo syae, yeecha yababoolera ati, “Mani eng'we mumanyireho esiindu sindahabahola? 13 Munanangaanga muti Omweekesa, handi muti Omwaami; muli abweene, olwohuba nilwo lundi ndyo. 14 Mani nikali mbwe ese, Omwaami handi Omweekesa weng'we, njosere amakulu k'eng'we, mani eng'we mwesi muhoyeere ohwosanaanga amakulu. 15 Olwohuba ese mbabeerese esyohuboneraho, hu eng'we mwesi munyale ohuholaanga koti lumbaholere. 16 Mbaboolera obwadyeeri bweene endi, omuhalaabani, haba siyahahira omuhongo wae; kata wamwaanda yesi, haba siyahahira omutuma daawe. 17 Mani nimuba nimumanyire bino biti, muli nende ehabi nimwahabihola. 18 Nae haba siindi hubaboola endyo mweesi-mweesi; Ese omweene manyire abo bandalobola; siri mbwe ebyandiiko byolerefu bihoyeere ohwosereswa abweene biti, ‘Oyo owalichaanga omugaati kwaange busa, niye handi owufudatiire.’ 19 Mbaboolera endyo esiha sino, nibitoola ohubaao, hu mbwe nibiicha byabaao, muba munamanyira awo muti niise Oyo. 20 Mbaboolera obwadyeeri bweene endi, oyo yeesi obukaanira oyo yeesi yimba nindumire, aba abukaniire ese mweene; handi oyo owumbukaanira, aba abukaanira oyo owanduma.” 21 Yesu niyamala ohulomaloma atyo, yeecha yachuunwa mu mwooyo muno, mani yeecha yatumbula ati, “Mbaboolera obwadyeeri bweene endi, mulala hw'eng'we niye achia ohuhoba.” 22 Abeki beecha batingaalanaho abeene-na-beene, nibakanakana oyo mweene yi Yesu yali naboolereho. 23 Nae mulala hu beeki bae, oyo yi Yesu yali yaheera muno, yali nayeehere mumbafu wae; 24 mani sakira Simooni Peetero yamusakula mani yaboola ati, “Ewe tuboolereho oyo yali ohulomalomaho.” 25 Mani niyali nasiyeehere atyo, mu mbafu wa Yesu, yeecha yamuboolera ati, “Omwaami mbwe niye naanu?” 26 Nae Yesu yakobolamo ati, “Ni oyo yinja ohusidoonga mubeerese.” Mani sakira niyali naamalire ohudoonga esitole esyo, yeecha yasibeeresa Yuda, omusyaani wa Simooni Yiskarioti. 27 Mani lunyuma lw'ohulya esitole esyo, Sitaani yeecha yaamuniina, mani Yesu yamuboolera ati, “Esyo syooli ohuchia ohuhola, sihole bwaangu.” 28 Nae bulaanu, awumawo kata mulala hw'abo abali hu meesa, owali amanyireho esyakera Yesu yamuboolera sino. 29 Abandi babaasa bati, mbwe olwohuba Yuda koti lu yali nende esanduku ly'eseende, Yesu yali namubooleraanga ati, “Cha okule bihudaha hu lw'esidyaalo”; oba bati, ahoyeere ohuchia ohubeeresaho abamanani esiindu sidiidi. 30 Mani sakira, lunyuma lw'ohulya esitole esyo, yasingiraniramo bwaangu ohutula ohuchia erwaanyi; nae syali nisi esiro. 31 Niyali naamalire ohutula erwaanyi, Yesu yeecha yaboola ati, “Esiha sino nisyo si mwaana w'Omuundu achia ohukisibwa muno, handi ni mu mweene oyo nimwo mu Nasae achia ohukinisibwa; 32 mani nikali mbwe Nasae achia ohukunisibwa mu mweene oyo, mani Nasae yesi aba achia ohumukinia nabitira mu mweene, handi amukinie bwaangu muno. 33 Baana bange, kata katyo, njia ohubaaho nang'we esiha esidiidi muno. Mucha ohungoonya; mani koti lundaboolera Abayudaaya, nilwo lwosi lunja ohubaboolera endi, ‘Eyo yinja ohuchia, haba simunyala ohwichayo.’ 34 Elako yaaha njia ohubabeeresa, endi mudahaneenge abeene-na-beene; koti busa syesi lumbadahireenge, endi mwesi mudahaneenge mutyo. 35 Ohweema hu syeene sino, abandu boosi baba bacha ohumanyira elalira bati hane muli abeeki bange, nimuba nimuli nende ohudahana abeene-na-beene.” 36 Nae Simooni Peetero yeecha yaboolera Yesu ati, “Omwaami, ochia ohuchia yena bweene?” Nae Yesu yakobolamo ati, “Eyo yinja ohuchia, ewe haba sonyala ohunondaho bulaanu buti. Nae ochia ohunondaho lunyuma.” 37 Nae Peetero yamuboolera ati, “Omwaami, lwasiina ese haba siinyala ohuhuloondaho bulaanu buti? Ese njia ohuhufwiira bu fwiira haluuhiri.” 38 Yesu yeecha yaboola ati, “Ewe mani ochia ohunyala ohufwiira ese? Huboolera obwadyeeri endi, edaaywa yinaba niyitaholyooha naawe onaba omalire ohundekaana amahabi kadatu amalaamba.

14

1 “Mutaleha emyooyo cheeng'we chanyaasibwa daawe; fukiirire mu Nasae, mufukiirire mw'ese syesi. 2 Mu nyumba ya Laata mulimo ebiseenge biingi; nibitahabeere bityo, mani mba ndahababoleere endi njia ohubatekehera esifwo? 3 Mani ese ninjia, mani ndabatekehera esifwo, handi mba njia ohwiicha mani mbabukule mbaleete yindi, hubulaanu yimba niindi, mwesi munyale ohubaayo. 4 Nae handi mumanyire busa engira yicha eyo yindi ohuchia.” 5 Nae Tomasi yeecha yamuboolera ati, “Omwaami, efwe haba sihumanyire yooli ohuchia; mani hunyala hutye ohumanya engira eyo?” 6 Nae Yesu yeecha yamuboolera ati, “Ese niise engira, handi obwadyeeri, handi obulamu; abulao omuundu yeesi onyala ohwiicha eyiri Nasae, natabitiire hweese. 7 Muba mwamanya ese, muba mwamanya Laata yesi; esiha syeene sino mumumanyire, handi mumalire ohumubonaho.” 8 Nae Filipo yeecha yaboolera Yesu ati, “Omwaami, tweekeseho Laata, huba hunekuta.” 9 Nae Yesu yeecha yamuboolera ati, “Ewe Filipo, ese mbereenge busa naawe hulw'embaka ndeeyi yityo, nae kata haba siwuumanyire daawe? Oyo owamala ohumbona, aba yamala ohubona Laata; nae wahanyala ohuboola otye oti, ‘Tweekese busa Laata’? 10 Ewe hane haba sofukiirira oti ese ndi mu Laata, handi Laata ali mw'ese? Emboosi chino chimbabooleranga, haba sichiboolanga hu lw'obunyala bwaange ese omweene; nae hulw'obunyala bwa Laata, oyo owamenya mw'ese oba naali ohuholaanga emirimo chae busa. 11 Fukiirira echaange oti, ese ndi mu Laata, handi Laata ali mw'ese; ataali awo, mani fukiirira mw'ese hulw'emirimo chino cheene busa. 12 “Mbaboolera obwadyeeri bweene endi, oyo yeesi owufukiiriramo, aba yesi achia ohunyala ohuhola emirimo chino chiindi ohuholaanga; handi kata aba achia ohuholaanga emirimo chihiraho nende echo, olwohuba ese ndi ohuchia eyiri Laata. 13 Esiindu syoosi simuba nimuchia ohusaba hulw'eliita lyaange, mba njia ohusihola, hu bulaanu Laata akinisibirwe mu Mwaana; 14 nikali mbwe musaba esiindu syoosi mu liita lyaange, njia ohusihola. 15 “Nikali mbwe eng'we mundaha, muba mucha ohudiira amalako kange. 16 Mani mba njia ohwekweeda Laata, mani aba achia ohubabeeresa Omukeraki wundi, oba achia ohubechaanga nang'we olubeerera, 17 oyo oli Omwooyo kw'obwadyeeri, oyo yi syaalo sitanyala ohubukaanira, olwohuba haba sisinyala humubona, kata nende ohumumanya daawe; eng'we mumumanyire, olwohuba yamenya naang'we, handi achia ohuba mw'eng'we. 18 “Ese haba siinjia ohubaleha awo endyo busa; nae njia ohwiicha yimuli. 19 Nae kata katyo, hulw'esiha sidiidi muno, handi esyaalo sisichia humbonaho daawe, nae eng'we mucha ohumbona; mani olwohuba ese nduwo omulamu, mwesi mucha ohubaao abalamu. 20 Hu ludaalo olwo, nihwo humucha ohumanyira elalira muti hane ese ndi mu Laata, handi eng'we muli mw'ese, handi ese syesi ndi mw'eng'we. 21 Oyo yeesi odiira amalako kange, mani yakaholeraho, oyo niye oba niyandaha; handi oyo owundaha, aba achia ohudahwa nende Laata, handi syesi mba njia ohumudaha nende ohumubonehera.” 22 Nae Yuda (otaali Yiskarioti) yeecha yaboolera Yesu ati, “Omwaami, siba sitye siti, ewe ochia ohutubonehera, nae haba sobonehera esyaalo?” 23 Nae Yesu yakobolamo ati, “Omuundu yeesi nikali mbwe yandaha, aba achia ohuloonda emboosi change, mani Laata aba achia ohumudaha, mani huba hucha ohwiicha yali, mani humenye nae. 24 Oyo yeesi otaandaha, haba saadiira emboosi change daawe; handi engeraka yange yowulira yino, haba siyaange daawe, nae ya Laata, oyo owanduma. 25 “Mbalomalomeere emboosi chino nisisiiri nang'we. 26 Nae Omukeraki oyo, Omwooyo Mwolerefu, yi Laata achia ohutuma yeecha mu liita lyaange, achia ohubeekesa ebiindu byoosi, nende ohubechulisa ebiindu byoosi bindababooleraanga. 27 Mbaleha mu mireembe; mbabeeresa emireembe change; simbabeeresa emireembe koti lu syaalo siberesaanga daawe. Mutaleha emyooyo cheeng'we chachuunisibwa daawe, kata mutachireha chaatya daawe. 28 Mumbuliire nimbaboolera endi, ‘Ese mbwao, handi njia ohukobola njiche yimuli.’ Nimundahireenge, mani muba musangaalire, olwohuba njia eyiri Laata; olwohuba Laata yaahira muno. 29 Mani mbawo mbaboleere nibitaholehana, mani nibiicha byaholehana, munyale ohufukiirira. 30 Ese haba sisiicha ohulomalomaanga nang'we ebiindu biingi muno, olwohuba omutuki w'esyaalo sino mbawo yeecha. Nae oyo abula nende obunyala hw'ese daawe; 31 nae ese hola koti lu Laata aba yandagiire, hu syaalo syeemeo simanye siti, ese ndaha Laata. Musiingire, mulehe huweeo bwaangu.

15

1 “Ese ndi omutuli kweene, nae Laata niye omulimi. 2 Nabuli saga lyaange litaamaho esyaamo, alitusaho, handi nabuli saga lyaamaho ebyaamo, alihaliirira, hulinyale ohwaamaho ebyaamo biingi. 3 Eng'we mwamala ohulabisibwa nende emboosi chindabalomalomeraanga. 4 Mundoong'emo, syesi njia ohubadoong'amo. Koti busa lu saga litahanyala ohwaama esyaamo syoosi lyong'ene, ohwoola luliba nilidoong'ere hu mutuli kweene, kata mwesi simunyala ohuhola mutyo, nimutandoong'eremo. 5 Ese nise omutuli kweene, eng'we muli busa amasaga kange. Oyo yeesi owundoong'amo, mani syesi ndamudoong'amo, oyo niye onyala ohwaamaho ebyaamo biingi muno, olwohuba ataali ese mweene, eng'we haba sisiriwo esiindu syoosi simunyala ohuhola. 6 Omuundu yeesi natandoong'amo, aba achia ohulakaha-bulakaha koti esaga ly'omusaala mani amala yaalala busa; handi amasaga keecha kabuuswa alala, kasukunwa mu muliro, mani kamala kasaambwa. 7 Nimundoong'amo busa, mani emboosi change chosi cheecha chabahayiramo, musabeenge esiindu syoosi simuba nimwekoomba, mani siba sichia ohubaholerwa sityo. 8 Sino nisyo esikinia Laata, nimwaama ebyaamo biingi muno, handi mutyo nilwo lumuba mucha ohweekesa muti muli abeeki bange. 9 Koti busa lu Laata yali niyandaha, lutyo nilwo syesi lumbadahireenge; mundoong'enge hu hudahana hwaange ohwo. 10 Nimudiira amalako kange, muba mucha ohwebaanda mu hudahana hwange, koti busa lu syesi ndomiisa amalako ka Laata, mani ndadoong'a mu hudahana hwae. 11 Mbalomalomeere ebiindu bino endyo, hu esangaalo lyaange linyale ohubabaamo, handi hu sangaalo ly'eng'we linyale ohuba eliichufu. 12 “Elako lyaange lyeene nilyo lino mbwe, mudahaneenge abeene-na-beene, koti lu syesi mbadahireenge. 13 Abulao omuundu yeesi oli nende ohudahana huhira huno mbwe, omuundu anyala ohufwiira abeecha bae busa. 14 Eng'we muba abeecha bange nimuhola bimba nimbalagiire. 15 Ese haba sisibalaanga busa abahalaabani, olwohuba omuhalaabani haba saamanya bi mweneengo wae byaaba naahola; nae ese mbalaangire abeecha, olwohuba ebyo byoosi bindawulira ohutula hu Laata, ndabeekesa mwabimanya. 16 Eng'we haba sining'we abandoola daawe, nae ese niise owabadoola handi ndabalobola endi muche mwaame ebyaamo, handi endi ebyaamo by'eng'we bihoyeere ohuba ebyomiifu; hu bulaanu, esiindu syoosi simuba nimuchia ohusaba Laata mu liita lyaange, anyale ohusibabeeresa. 17 Mbalagira ohudahanaanga abeene-na-beene. 18 “Esyaalo nisibasyuula, manyeenge busa muti, esyo syamala ohusyuula ese hale nisitoola ohubasyuula. 19 Muba muli abohusyaalo huno, esyaalo sino siba syahabeere sidaha abaasyo; nae olwohuba mbwe eng'we haba simuli abohusyaalo sino, handi ese ndabadoola ohubatusa hu syaalo sino, mani sakira esyaalo syabasyuula. 20 Mwichuliseho emboosi yindababooleraho endi, ‘Omuhalaabani haba saahira omuliindi wae.’ Nibaboneresa ese, mani mwesi bacha ohubaboneresa; nibadiira emboosi change, baba bacha ohudiira echeeng'we chosi. 21 Nae bacha ohubahola bino byoosi hu lwaange, olwohuba abo haba sibamanyire oyo owanduma daawe. 22 Nimba niteecha ndabalomalomera, baba nibataali nende esibi; nae bulaanu haba sibali nende esy'huwosa hulw'ebibi byaabwe. 23 Oyo yeesi owusyuula, aba asyuula nende Laata yesi. 24 Nimba nitabaholeramo emirimo chi muundu yeesi yabaholera hoomo, haba sibahabeere nende esibi; nae bulaanu bamala ohubibona, handi baatusyuula fwembi, ese nende Laata. 25 Sino syali esyohwoseresa abweene emboosi chandiikwa mu malako kaabwe chiti, ‘Baasyuula abula esifune.’ 26 Nae Omukeraki niyaheeche, oyo yinja ohubatumira ohutula eyiri Laata, oyo handi oli Omwooyo w'obwadyeeri, otulira mu Laata, achia ohutusa obujulisi bwaange; 27 handi eng'we mwesi muli abajulisi bange, olwohuba mubeere naange ohutula hu njaako.

16

1 “Mboolere bino byoosi endi mbakayire ohukobola enyuma. 2 Bacha ohubasukuna ohutula mu Sinagoogi enyiingi; sy'adyeeri, esiha sichia ohwoola, si oyo yeesi obeeta achia ohubaasaanga ati ali ohuhalaabanira Nasae. 3 Handi bacha ohuholaanga sino olwohuba kata bataamanya Laata, kata nende ese mweene. 4 Nae ese mbaboleere ebiindu bino, endi mani esiha syaabwe nisyoola, munyale ohwichulisa muti ndamala ohubalomalomaho yi muli. “Ese sindababooleraho ebiindu bino mumengisania, olwohuba ndali sisiiri naang'we alala. 5 Nae ese bulaanu ndi ohuchia eyiri oyo owanduma; nae kata abulao mulala hw'eng'we owundeebaho ati, ‘Ni yena bweene yooli ohuchia?’ 6 Nae olwohuba ese mbaboleere ebiindu bino, emyooyo cheeng'we chimalire ohwiichula ohwelalihirira. 7 Kata katyo ese mbaboolera busa obwadyeeri buno: ni hulw'obulayi bw'eng'we nimbwaao, olwohuba ese nitawaao, Omukeraki oyo haba saaba achia ohwiicha yimuli daawe. 8 Mani naachia ohwiicha, achia ohuhahasa esyaalo, hu bidiira hu sibi nende obuluungifu alala nende eheenga ye misaango: 9 ohweema hu sibi, olwohuba abo haba sibafukiirira mw'ese; 10 ohweema hu bulungifu, olwohuba ese mbano njia eyiri Laata, mani haba simuchia humbonaho handi; 11 ohweema hu heenga y'emisaango, olwohuba omutuki w'esyaalo sino, yamala ohuheengerwa omusango. 12 “Ese sisiiri busa nende ebiindu biingi muno ebyohubaboolera, nae eng'we haba simunyala ohubyesimiirisira bulaanu buti daawe. 13 Mani Omwooyo w'obwadyeeri naachia ohwiicha, achia ohukera mumanye obwadyeeri bwoosi koti lu bwaaka; olwohuba oyo haba saachia ohulomalomaanga hu lw'obunyala bwae omweene, nae buli syaacha ohuwuliraanga nisyo syaacha ohulomalomaanga, nabo achia ohubatuumbuliraanga ebiindu biba nibicha ohubaao. 14 Oyo achia ohunginia, olwohuba achia ohubukulaanga ebyaange naamala abitumbulira eng'we. 15 Ebyo byoosi bi Laata ali nabyo, byaange; mani sakira ese mboolere endi, oyo achia ohubukulaanga ebyaange mani amala abitumbulira eng'we. 16 “Esiha sidiidi muno, nihaba simuchia ohumbonaho; handi esiha sidiidi muno, nihaandi mucha ohumbona.” 17 Abeki bae bandi bachaaka ohuboolanira abeene-na-beene bati, “Siina syeene sino syali ohutubooleraanga efwe ati, ‘Esiha sidiidi muno, nihaba simuchia ohumbonaho, handi ati, esiha sidiidi, nihaandi mucha ohumbona’; handi ati, ‘olwohuba ese njia eyiri Laata’?” 18 Beecha handi baboola bati, “Yekesa siina syeene naboola mbwe ati, ‘esiha sidiidi muno’? Efwe haba sihumanyireho syaaba niyeekesa daawe.” 19 Yesu yamanya busa ati bali nibadaha ohumuteeba omweene; mani yeecha yababoolera ati, “Mbwe sino nisyo simuli ohuteebanaanga abeene-na-beene, simbeere ninjekesa nimboolere endi, ‘Esiha sidiidi muno, nihaandi simuchia ohumbonaho, nihaandi endi esiha sidiidi muno, nimuchia ohumbona’? 20 Mbaboolera obwadyeeri bweene endi, eng'we mucha ohuchereenjesa handi ohwelira, nae esyaalo sichia ohusangaala; eng'we mucha ohwewnamira, nae ohwewunamira hw'eng'we hucha ohwehola esangaalo. 21 Omuhasi naaba naali ohulumwa aba nende ohwewunamira, olwohuba esiha syae siba simalire ohwoola; nae naaba naamalire ohwetusaho omwaana, haba saaba nasichulisa obululuma obwo, hulwa esangaalo mbwe omwaana aba yebuulwe mu syaalo muno. 22 Mani sakira muli abelalihirifu esiha sino, nae ese njia ohubabonaho handi mani emyooyo cheeng'we chisangaale, mani abulao omuundu yeesi ochia ohunyala ohubatusaho esangaalo ly'eng'we elyo. 23 Hu ludaalo olwo, simuchia ohusabaho esiindu syoosi. Mbaboolera obwadyeeri bweene endi, nimuba nimunasabanga Laata esiindu syoosi, aba achia ohubabeeresaanga mu liita lyaange. 24 Abweene ano, eng'we haba simusabaangaho esiindu syoosi mu liita lyaange; sabeenge, mani muba mucha ohunyoola, hu sangaalo ly'eng'we lyemeo libe eliichufu. 25 “Ese mbawo mbalomalomeere bino mu ngaado busa; nae esiha siicha ohwoola, ese handi nitachia ohubalomalomeraanga mu ngaado, nae mbalomalomere tiiri busa ebidiira hu Laata. 26 Hu ludaalo olwo, eng'we mucha ohusabaanga mu liita lyaange; handi ese haba siindi hubabooleraanga endi njia ohubasabiraanga Laata daawe; 27 olwohuba Laata mweene abadaha muno, olwohuba eng'we mwesi mwaandahireenge, handi mwamala ohufukiirira muti ese ndeecha nindula eyiri Laata. 28 Ese ndeecha nindula eyiri Laata, mani ndamala ohwiicha mu syaalo muno; nae handi ese mbano ndi ohuleha esyaalo handi ndi ohuchia eyiri Laata.” 29 Abeki bae beecha baboola bati, “A-ha, mbawo bulaanu oli ohulomaloma tiiri, abulao olukaado lwoosi daawe! 30 Bulaanu mbawo hwahamanya huti hane omanyire ebiindu byoosi, handi huti abulao omuundu yeesi ohoyeere ohuhuteebaho esiindu syoosi daawe; hulwa sino syeene, efwe bulaanu hufukiirira huti hane weecha notula eyiri Nasae mweene.” 31 Yesu yabakobolamo ati, “Muti mani bulaanu mufukiirira? 32 Esiha siri aambi ohwoola, nihane mbawo simalire ohwoola, nimuchia ohusalaana, buli muundu naachia enaango wae, mani mundehe syeng'ene busa; nae haba ese siindi syeng'ene daawe, olwohuba Laata ali naange esiha syoosi. 33 Ese mbaboleere sino, endi mw'ese omweene mulimo emireembe. Mu syaalo mulimo obunyaahani; nae eng'we mugumeenge, olwohuba ese ndamala ohuyiingira esyaalo.”

17

1 Yesu niyamala ohulomaloma emboosi chino, yasingisa obweeni bwae akulu Mukulu mani yaboola ati, “Laata, esiha mbano syahoola; mani fumia Omwaana wao wuno, hu mwaana wao yesi yemewo akinie ewe, 2 ohweema koti ewe wamala ohumubeeresa amaani kahira ak'abandu boosi, ohunyala ohukaba abo boosi bawamubeeresa obulamu butaakama. 3 Nihaandi buno nibwo obulamu butaakama, mbwe bahumanye ewe Nasae w'adyeeri weng'ene, nende Yesu Kristo yi ewe mweene watuma. 4 Ese ndamala ohuhukinia hu syaalo huno, koti lundanyala ohumaliirisa bulai bweene omulimo ku wambeeresa ohukuhola; 5 mani bulaanu buti, Laata, fumia ese muno mu moni wao nende ohukinia hundali nahwo niindi alala naawe esyaalo nisitaloongwa. 6 “Ese ndamala ohutuumbula eliita lyao eyiri abandu bawambeeresa ohutusa mu syaalo; abali bao beene, mani naawe wamala wabamberesa, mani bamala badiira emboosi chao muno. 7 Bulaanu bamalire ohumanya bati buli siindi syoosi siwambeeresa syali situla yooli; 8 olwohuba ese ndamala ohubabeeresa emboosi choosi chiwambeeresa, mani bamala baachakaanira mani bulaanu bamanyire mu bwadyeeri bweene bati, ndeecha nindula yooli; handi bamalire ohufukiirira bati, niiwe owanduma. 9 Ese mbasabira; Haba siindi husabira esyaalo, nae ndi ohusabira abo ba wambeeresa, olwohuba bange nibo; 10 abange boosi nabao, handi abao nabaange, mani ese nginisirwa mu beene abo. 11 Nae bulaanu ese haba sisisiiri mu syaalo daawe, nabo bali mu syaalo muno, nae ese ndi ohwiicha yooli. Laata Mwolerefu, baliindire mu liita lyao, liwambeeresa omweene, beemeo banyale ohuba silala, koti busa lw'efwe huli silala. 12 Nindali nisisiiri ninabo, ndali ndabaliindira alala mu liita lyao, liwali wambeeresa omweene; ndababudaa-buda, mani abulao kata mulala owakota daawe, ohutusaho omwaana w'ohukota oyo yeng'ene, hu byandiiko byolerefu byolerere abweene. 13 Nae bulaanu ese ndi ohwiicha yooli; nae ebiindu bino mbano mbilomalomera mu syaalo muno, endi hu sangaalo lyaange lyemeo liboolereremo mu bwiichufu. 14 Ese malire ohubabeeresa emboosi chao cheene; mani esyaalo syamala ohubasyuula olwohuba haba sibasisiiri abohusyaalo huno daawe, koti busa lu ese mweene taali owohusyaalo huno. 15 Ese haba siindi husaba endi ewe wiiche obatuse mu syaalo muno, nae endi ewe mweene obakayirire ohubatusa mu mahono k'omubi oyo. 16 Abandu bano haba sibali abohusyaalo huno daawe, koti busa syesi lu taali owohusyaalo huno. 17 Balabisirye mu bwadyeeri bweene; olwohuba emboosi chao nicho obwadyeeri bweene. 18 Koti busa ewe weecha wanduma ohwiicha mu syaalo muno, mani syesi mbawo mbatumire bache mu syaalo. 19 Mani hulwaabwe, ese mbawo ndeyosa, hu bosi beemeo beeyose mu bwadyeeri bweene. 20 “Ese haba siindi ohusabira busa bano bong'ene daawe, nae sabira nende abo abafukiiririra mw'ese ohweema hu mboosi chabano, 21 endi abo boosi bahoyeere babe silala; koti busa lu ewe Laata, oli mw'ese, handi ese ndaaba mw'ewe, endi abo bosi banyale ohuba mw'efwe, hu bulaanu esyaalo syeemeo sifukiirire siti ewe niiwe owanduma. 22 Ohukinia hu wabeeresa ese, syesi ndamala ndaababeeresa, hu beemeo banyale ohuba silala koti busa lw'efwe beene huli silala, 23 ese nimbalimo, nae ewe nooli mw'ese, hu beemeo banyale ohwehola esiindu silala simaliirifu, hu bulaanu esyaalo syeemeo simanye siti hane ni ewe mweene owanduma handi wachiiririra ohubadaha koti busa lwobeere niwundaha. 24 Laata, ese ndekoomba endi abo bawambeeresa bosi, banyale ohuba alala naange eyo ninjia ohuba, banyale ohunyoola ohukinisibwa hwange hu wamala ohumbeeresa muhundaha hwao ohwo ohwaliwo hu njaako ye syaalo. 25 Eee, Laata mulungifu, esyaalo sino haba sisyahumanyaho daawe, nae ese ndahumanya hale; handi ewe mweene omanyire busa oti ni neewe omweene owatuma ese. 26 Ese ndakera eliita lyao lyabamanyihanamo, handi njia busa ohukera nilimanyihana lityo, hu hudahana huno huwandahiramo, hunyale ohubabaamo bosi, handi syesi mbabeemo.”

18

1 Yesu niyamala ohulomaloma emboosi chino, yasingira yawaawo nende abeeki bae baacha bahalakania ehoondo lilaangwa liti Kidurooni eyali omukunda ku mweene alala nende abeeki bae beecha baacha bengiramo. 2 Nae bulaanu Yuda, oyo owamuhoba, yesi hane yali niyamanya esifwo esyo; olwohuba Yesu yali yanala buli siha ohubukaananiraanga ebweene eyo buli siha. 3 Mani sakira Yuda, niyeecha yafuna omukanda kw'abamaye alala nende abahuluundu bandi ohutula mu balaamisi bahuluundu alala nende Abafalisaayo, beecha baabalondaho ebweene eyo nibakiingire amataara alala nende ebikeenga byaaduha nende ebilwaaniro. 4 Nae Yesu koti luyali namanyire ebiindu byoosi ebyali bicha ohumukwaaho, yeecha yaasingira yaacha mu moni yi bali bali, mani yababoolera ati, “Ni wiina mweene yimuli ohukoonya?” 5 Nabo bamukobolamo bati, “Yesu Omunasareeti.” Nae Yesu yeecha yababoolera ati, “Nise oyo.” Nae Yuda wamuhoba, yali niyeemere alala nabo. 6 Nae Yesu niyababoolera ati, “Nise oyo,” beseenda enyuma mani bamala baakwa aasi. 7 Handi Yesu yeecha yabateeba ati, “Ni wiina mweene yimuli ohukoonya?” Nabo baboola bati, “Yesu Omunasareeti.” 8 Nae Yesu yakobolamo ati, “Ese mbaboleere endi nise oyo; mani nimuli ohukoonya ese, mulehe abasaacha bano baweeo.” 9 Yesu yaboola atyo, ohwoseresa abweene emboosi chiyali naalomaloomeho naboola ati, “Hwaabo bawambeeresa, haba sindakosaho kata mulala daawe.” 10 Mani sakira Simooni Peetero, koti luyali ali nende olugaanga, yeecha yaalusobolayo, mani yaatema omuwaambe w'omulaamisi muhunuufu, mani yaamumalaho ohutwi hw'omuhono muluungi. Eliita ly'omuyiike oyo lyali mbwe Malukusi. 11 Nae Yesu yeecha yaboolera Peetero ati, “Kalusa olugaanga lwao mu silaalo syalwo; oti ese haba siinjia ohung'wa esikoombe si Laata yambereese?” 12 Mani sakira omukanda kw'abamaye alala nende bakabuteeni baabwe alala nende abahongo b'Abayudaaya beecha baakwa hu Yesu, mani bamala bamuboya. 13 Bataangira ohumuyira eyiri Anasi; olwohuba Anasi oyo yali muhweng'ene Kayaafa, owali naahola koti omulaamisi muhunuufu omwaaka okwo. 14 Yali Kayaafa owali niyakerakira Abayudaaya ati, syali esilai muno omuundu mulala ohufwiira abandu boosi. 15 Nae Simooni Peetero yeecha yaloonda hu Yesu, handi nende omweeki wundi yesi atyo. Koti lu mweeki wuno yali yamanyihana nende omulaamisi muhunuufu, yeecha yengira mu lwanyi lw'omulaamisi muhunuufu oyo alala nende Yesu, 16 nae Peetero yadong'era erwaanyi hu siruwa busa. Mani omweeki wundi wula, owali yamanyihana nende omulaamisi muhunuufu, yeecha yaatula yaacha erwaanyi mani yaalomalomaho nende omuhalaabani muhaana wali naliindire esiruwa, mani yaanyala ohwiingisa Peetero yesi mukati. 17 Omuhalaabani muhaana wali naliindire esiruwa yeecha yaboolera Peetero ati, “Ewe wesi haba sooli mulala hu beeki b'omusaacha wuno?” Nae yaboola ati, “Haba daawe.” 18 Nae bulaanu, abahalaabani alala nende abahongo bali nibabwaanire omuliro kw'amaanda, koti lu mboo yaliho, mani nibeemere nibali ohwebalakasaanga; Peetero yesi yali ali nabo, niyeemere naali ohwebalakasanga. 19 Omulaamisi muhunuufu yeecha yachaaka ohuteeba Yesu ebidiira hu beeki bae alala nende enjekesa yae. 20 Yesu yeecha yamukobolamo ati, “Ese nomalomereenge esyaalo tiiri; Ndamenya ninjekesaanga mu Sinagoogi chikabuhaane, alala nende mu nyumba ya Nasae, yi Bayudaaya boosi bebusiraanga alala; abulao esiindu syoosi sinomanomaanga bweekisi. 21 Nae lwasiina ewe oli ohudeeba otyo? Teeba abo abanyala ohumbuliraanga, bimba nindababooleraanga; bamanyire muno bi ndaboolanga.” 22 Yesu niyamala ohuboola atyo, mulala hu bahoongo owali niyeemere aambi nae yapaama Yesu oluyi naboola ati, “Eyo niyo engeri yokoboleramo mu mulaamisi muhunuufu?” 23 Nae Yesu yamukobolamo ati, “Nikali mbwe ese nomaloome bubi, tusa obujulisi bw'obubi obwo; nae nikali mbwe nomaloome bulai, lwasiina wumbaama otyo?” 24 Bulaanu Anasi yeecha yayira Yesu eyiri Kayaafa owali omulaamisi muhunuufu. 25 Nae bulaanu, Simooni Peetero yali niyeemere busa naali ohwebalakasaanga, beecha bamuboolera bati, “Mani ewe wesi haba sooli mulala hu beeki bae?” Nae yeecha yekaana muno mani yamala yaboola ati, “Haba daawe.” 26 Nae mulala nu bahalaabani b'omulaamisi muhunuufu, owali omunaluya w'omusaacha yi Peetero yatemaho ohutwi yeecha yateeba ati, “Mani ese haba sihubweeneho mu mukuunda kula nooli nae?” 27 Peetero handi yeecha yaasikaana muno; mani abweene-na-bweene awo, ni edaaywa yiholyooha. 28 Bulaanu beecha bayerekesa Yesu ohumutusa mu daala lya Kayaafa ohumuyira mu sipaapi sy'emibayo silaangwa siti “Praetorium”. Bwali echuli mu mabweeri-bweeri. Mani Abayudaaya beene haba sibengiramo, nibatadaha ohuhalaka omusiiro kw'ohwelabya, hu banyale ohulya esidyaalo sya Paasaka. 29 Mani Pilaato yeecha yaatula yacha yibali mani yaboola ati, “Sifune siina syeene simuwabira omusaacha wuno?” 30 Nabo bamukobolamo bati, “Nikali mbwe omusaacha wuno haba simuholi webibi, haba sihuba humuleetere eno.” 31 Nae Pilaato yeecha yababoolera ati, “Eng'we mumubukulu mumuyire mani mumuwosesere mu malako k'eng'we abeene.” Nae Abayudaaya beecha bamuboolera bati, “Haba sisifukiirirwa efwe ohwiita omuundu yeesi.” 32 Sino syali syoseresa abweene emboosi chi Yesu yali nalomaloome ohweekesa efwa yiyali achia ohufwa. 33 Bulaanu, Pilaato yeecha handi mani yengira mu “Praetorium” mani yalaanga Yesu, mani yamuboolera ati, “Mani ewe oli omutuki w'Abayudaaya?” 34 Nae Yesu yakobolamo ati, “Ewe oli ohuboola otyo hulwao busa, kose abandu bandi nibo abahuboleere busa ebindiiraho?” 35 Nae Pilaato yakobolamo ati, “Mani ese ndi Omuyudaaya? Esyaalo syao syeene alala nende abalaamisi bahuluundu nibo abahundeteere ano; mani oholere siina syeene?” 36 Nae Yesu yakobolamo ati, “Obutuki bwaange haba sibw'ohusyaalo huno daawe; obutuki bwaange buba nibuli obw'ohusyaalo huno, abahalaabani bange baba balwaanire, bati haye ohuyirwa mu mahono k'Abayudaaya; nae obutuki bwaange haba sibwohusyaalo huno daawe.” 37 Nae Pilaato yeecha yamuboolera ati, “Oti mani oli omutuki?” Nae Yesu yakobolamo ati, “Ewe oli ohuboola oti ese ndi omutuki. Sino nisyo sindeebulirwa, mani ni hulw'esyeene sino nilwo lundeechera hu syaalo, ohutusa obujulisi budiira hubwadyeeri. Buli muundu yeesi okwiira obwadyeeri, awulira ekono lyaange.” 38 Nae Pilaato yeecha yamuboolera ati, “Obwadyeeri nisyo siina syeene?” Pilaato niyamala ohulomaloma atyo, yeecha yaatula yaacha erwaanyi eyiri Abayudaaya, mani yababoolera ati, “Ese haba siindi humunyoolamo esifune syoosi. 39 Nae eng'we muli nende emiduunga cheeng'we echiboola chiti ese hoyeere ohubalehuuliraanga omusaacha mulala hu sidyaalo sya Paasaka; mani mwahaanganya ndabalehuulira omutuki w'Abayudaaya wuno, kose?” 40 Nabo beecha bayokerera akulu handi bati, “Wuno musaacha haba, nae fwaana Bbarabba!” Nae bulaanu Bbarabba yali omunyaka.

19

1 Bulaanu, Pilaato yeecha yabukula Yesu yamala yaamuyira bamunaale ehoba. 2 Handi abamaye beecha baaluha engata ya amawa, mani bamala bafwaasa hu mutwe, handi bamala bamufwasa mu ngubo ch'obutuki; 3 bachaaka ohwichanga yaali nibaboola bati, “Awo, omutuki w'Abayudaaya, yogaho!” handi nibamala nibamupaama. 4 Handi Pilaato yeecha yaatula erwaanyi, mani yababoolera ati, “Mani mubone, mbawo ndi ohumutusa mbadiise, hu mumanye muti ese haba siinyalire ohumubonaho omusango kwoosi.” 5 Mani Yesu yeecha yaatula erwaanyi, niyefwaalire hu mutwe engata ya amawa alala nende engubo chobutuki. Pilaato yeecha yababoolera ati, “Omusaacha nguyo, mumuboneho!” 6 Mani nae abalaamisi bahuluundu alala nende abahongo nibamubonaho, baayuhira akulu nibaboola bati, “Mumuhomerere, mumuhomere!” Nae Pilaato yeecha yababoolera ati, “Mumubukule abeene mani muche mumuhomerere, olwohuba ese haba simubonaho omusango kwoosi daawe.” 7 Nae Abayudaaya beecha bamukobolamo bati, “Efwe huli nende amalako keefwe, nae mu malako keefwe ako omusaacha oyo ahoyeere ohufwa, olwohuba omweene yehola ohuba Omwaana wa Nasae.” 8 Mani Pilaato niyawulira emboosi chino, yemeeda ohutya muno; 9 handi yaacha yengira mu sipaapi esyo, mani yaboolera Yesu ati, “Ewe otula yena bweene?” Nae Yesu haba siyamukobolamo daawe. 10 Mani Pilaato yeecha yamuboolera ati, “Ewe hane haba sochia hulomaloma naange? Ewe haba somanyire oti ese ndi nende obunyala bw'ohuhulehuula, handi nende obunyala bw'ohuhuhomerera?” 11 Bulaanu Yesu yeecha yamukobolamo ati, “Ewe haba siwahabeere nende obunyala hw'ese nikali mbwe sibwahubeereswa ohutula akulu; mani sakira oyo ohundeteere ali nende esibi sihiramo.” 12 Ohweema hu sino, Pilaato yeecha yakoonya engira yaanyala yalehuuliramo Yesu, nae Abayudaaya bemeeda ohwayuhira akulu nibaboola bati, “Ewe niwichuhana walehuula omusaacha wuno, haba sochia hunyala ohuba omwiicha wa Kaisaali; olwohuba oyo yeesi owelaanga ohuba omutuki aba yeteere muhuyingania Kaisaali.” 13 Handi mani Pilaato niyeecha yawulira emboosi chino, yeecha yatusa Yesu erwaanyi, mani yamala yehala hu sisaala siheengi sy'emisaango, mu sifwo silaangwa siti, Olukirangira, nae mu Luyibbulaniya bati, Gabbata. 14 Nae bulaanu oludaalo olwo lwali Olwohwetekeheraho Paasaka; chali aambi esaa chisaasaba chesideete. Pilaato yeecha yaboolera Abayudaaya ati, “Mbao muboneho omutuki weng'we nguyo!” 15 Nabo bemeeda busa ohwayuhira akulu nibaboola bati, “Mumumaleo, mumumaleo, mumuhomerere busa!” Nae Pilaato yeecha yababoolera ati, “Ese njie homerere omutuki weng'we endye?” Nae abalaamisi bahuluundu beecha bakobolamo bati, “Efwe hubula omutuki wundi ohutusaho Kaisaali.” 16 Mani Pilaato yeecha yabukula Yesu mani yamala yaamudiisa Abayudaaya bache bamuhomerere. 17 Mani beecha baabukula Yesu, mani yamala yaatula erwaanyi omweene nakiingire omusalabba kwae, naacha mu sifwo silaangwa mbwe esifwo sy'esiyaanga, esilaangwa mu Luyibbulaniya siti, Gologoosa. 18 Ebweene eyo niyo yibeecha bamuhomerera, handi alala nae beecha bahomerera abandi babiri, mulala naali hu buli luwaande, nae Yesu naali akati. 19 Pilaato handi yandiika esipaande sy'emboosi mani yaasita emutwe w'omusalabba; chali chisoma chiti, “Yesu Omunasareeti, omutuki w'Abayudaaya.” 20 Abayudaaya bangi banyala ohusomaho esipaande sino, olwohuba esifwo si Yesu yahomererwamo syali aambi nende esiko sihuluundu; handi syali syandiikwa mu Luyibbulaniya, mu Lulatini, nende mu Luyonaani. 21 Nae abalaamisi bahuluundu b'Abayudaaya bulaanu beecha baboolera Pilaato bati, “Otaandiika oti, ‘Omutuki w'Abayudaaya daawe,’ nae oti, ‘Omusaacha wabolaanga ati, ese ndi omutuki w'Abayudaaya.’ ” 22 Nae Pilaato yakobolamo ati, “Esyo siimba ninyandiikire sidoong'a busa sityo.” 23 Mani abamaye nibali nibamalire ohuhomerera Yesu, beecha baabukula ebyefwalo byae alala mani babikabulamo ebituundu bine, buli silala syaaba esy'owamae mulala; alala nende ekaanju lye lyosi. Nae ekaanju lyae lyali libulaho obufumbe bwoosi, nae lyanabwa busa lulala ohutulira elalira akulu ohwolera elalira aasi; 24 Bulaanu beecha bachaaka ohuboolanira abeene-na-beene bati, “Hulehe ohulitandula, nae hulyubbire busa eha, hubone yiriba licha ohuba elyae.” Sino syali sichia ohwoseresa abweene ebyandiiko byolerefu ebyaboola biti, “Bakabanamo ebyefwalo byaange, nae engubo change bachuubbira eha.” 25 Mani abamaye beecha baahola batyo. Nae abali nibeemere aambi nende omusalabba kwa Yesu bali ng'ina, nende mwaanang'ina ng'ina, Maria muha Kulopa, nende Maria Magadaleena. 26 Nae Yesu niyewunja yaabona ng'ina, nende omweeki yiyali adaha muno nibeemere aambi awo, yeecha yaboolera ng'ina ati, “Maama, bona omwaana wao nguyo!” 27 Handi yeecha yaboolera omweeki oyo ati, “Bonaho, maao nguyo!” Mani ohutula esiha syeene esyo, omweeki oyo yeecha yaamubukula mani yaamuyira ohumenya engo wae. 28 Lunyuma lwa bino byoosi ohuwa, Yesu naamalire ohumanya ati ebyae byoosi byali nibimalire ohuwa, yeecha yaboola (ohwoseresa abweene ebyandiiko byolerefu) ati, “Obuluwo buunuma.” 29 Nae bulaanu, ebbakuli y'efwiini yali niyihaliihe awo: mani beecha baabukula esyaangu baasiniha omwo syechula efwiini eyo, bamala basiboya hu lusaga lwa nyalwete-kwaachi, mani bamala bamuta humunwa. 30 Nae Yesu niyamala ohuhoombaho hu fwiini eyo, yeecha yaboola ati, “Ngumalire”; mani yeecha yaguunamia omutwe kwae mani yamala yaakwiisa omwooyo. 31 Mani koti lu lwali oludaalo lwa Ohwetekehera, nibadaha ohukayira emilaambo ohudoong'a nichiri humusalabba hu ludaalo lwa Sabbaato, (olwohuba oludaalo lwa Sabbaato lwali oluhuluundu muno), Abayudaaya beecha baacha baasaba Pilaato afukiirire amakulu kaabwe kahalakwe, hu beemeo banyale ohubamalaho. 32 Mani abamaye beecha mani bachaaka ohuhalakaanga amakulu nibachaakira hu wundi otangira, handi nibaloondyaho owundi yali ahomereerwe nae; 33 nae nibali mbwe hu beecha hu Yesu, beecha baabona bati, yali amalire ohufwa, mani haba sibeecha baafunaka amakulu kae daawe. 34 Nae mulala hu baamaye abo yeecha yaafumita mu mbafu wa Yesu nende efumo, mani abweene awo, amabaanga alala nende amaachi byeecha byedihao. 35 Oyo owasibona niye owatusa obujulisi--obujulisi wae bwadyeeri, handi omweene amanyire ati aboolanga busa obwadyeeri, hu mwesi munyale ohufukiirira. 36 Olwohuba ebiindi bino byoosi byaholehana bityo, hu byandiiko byolerefu byeemeo byoolerere abweene biti, “Abulao kata ekuumba lyae elicha ohuhalakwa daawe.” 37 Handi esyandiiko syolerefu siindi simboola siti, “Abo bacha ohudangaalira hw'oyo owafumitwa.” 38 Lunyuma lwa sino, Yosefu otula mu siko silaangwa siti Arimaseya, owali yesi omweeki wa Yesu bweekisi, olwohutya Abayudaaya, yeecha yaasaba Pilaato amufukiirire abukule ayire omubiri kwa Yesu, mani Pilaato yamufukiirira. 39 Nikodema wali niyeechaho eyiri Yesu esiro hale, yesi yeecha yaleeta amafuta masaase k'ebiindu biwunya esiing'aari siingi ak'obusito buyera elatiri emia enaamba. 40 Beecha baabukula omubiri kwa Yesu, mani bamala baakuboya bulai bweene mu ngubo ch'elaasi alala nende amafuta k'esiing'aari ako, koti lu miduunga ch'Abayudaaya ch'ohusiiha luchiri. 41 Nae bulaanu, musifwo si Yesu yahomererwamo, waliwo omukuunda kundi, mani mu mukuunda okwo, mwalimo eng'ani njiaha, yi muundu yeesi yali atasihibwa hoomo. 42 Mani sakira, ohweema hu buhuluundu bw'oludaalo lw'Ohwetekehera, handi koti eng'ani eyo yali aambi muno awo, beecha basiiha Yesu abweene awo.

20

1 Nae bulaanu, hu ludaalo lutaangira mu juma, Maria Magadaleena yeecha yawuuna hu ng'ani, nibwali nibusisiiri mu siirima, mani yeecha yabona ati, ekina lyaahwo lyali nilitusiibwe hu ng'ani. 2 Mani yeecha yeruha embiro, mani yaacha eyiri Simooni Peetero alala nende omweeki wundi, oyo yi Yesu yadahaanga muno, mani yababoolera ati, “Batusire Omwaami mu ng'ani, mani efwe hukoterwe yibamuteere.” 3 Mani Peetero yeecha yaasingira yaatula nende omweeki wundi wula, mani beemao bachaaka ohuwiiruha nibachiira ena ng'ani. 4 Bombi beecha bachaaka ohwiiruha embiro, nae omweeki wundi wula yeecha yaahira Peetero embiro, mani yeecha yamutangirira ohwoola hu ng'ani; 5 mani niyaguunama ohutingaala mukati, yeecha yaabona engubo ch'elaasi chira nichikwiira awo busa, nae haba siyengira mukati daawe. 6 Mani Simooni Peetero niyeecha, yamuloonda, mani yaacha yengira mu ng'ani; yesi yeecha yaabona engubo ch'elaasi chira nichikwiire awo busa, 7 nae esitaambaya syali siteerwe hu mutwe kwae, sikwali nikuli alala nende engubo ch'elaasi chira daawe, nae syali nisyefumbire nisyekabuule syong'ene mu sifwo syaasyo. 8 Mani bulaanu omweeki wundi wula, owali natangiire ohwoola hu ng'ani, yesi yeecha yengiramo, mani yesi yaabona atyo, mani yeecha yafukiirira; 9 olwohuba bali bataamanya ebyandiiko byolerefu daawe, ebiboola biti, yali achia ohusyuuha ohutula mu bafu. 10 Mani bulaanu, abeeki beecha bekobolerayo mu mako kaabwe. 11 Nae Maria yadoong'a busa niyeemere naliriraanga erwaanyi w'eng'ani, mani koti luyali nasichiirira nende ohulira, yeecha yaguunama ohutingaala mukati w'eng'ani; 12 mani yeecha yabona bamalaika babiri nibafwaalire echa rachaari, nibehaale musifwo si mubiri kwa Yesu kwali kwaliiswe. Mulala naali enamutwe, nae owundi naali enamakulu. 13 Bamalayika abo beecha bamuboolera bati, “Muhasiiwe, lwasiina oli ohuliraanga?” Nae yeecha yababoolera ati, “Olwohuba beechere baatusa muno Omwaami wange, mani ese haba siimanyire yibamwaliise daawe.” 14 Niyalomaloma busa atyo, yeecha mani yakaluuhana enyuma mani yaabona Yesu niyeemere, nae haba siyamanya ati yali naali Yesu daawe. 15 Yesu yeecha yamuboolera ati, “Muhasiiwe, lwasiina oli ohuliraanga? Ni naanu yooli ohukoonya?” Nae niyali namubaasirisa ohuba omulimi busa, yeecha yamuboolera ati, “Omuhulundu, nikali mbwe niiwe omutusire muno, mboolere busa yomuteere, mani njie mutuseyo.” 16 Nae Yesu yamuboolera busa ati, “Ewe Maria.” Bulaanu yeecha yakaluuhana, mani yamuboolera mu Luyibbulaniya ati, “Rab-boni” (esyeekesa siti Omweekesa). 17 Yesu yeecha yamuboolera ati, “Otandiiraho, sisiiri ohuniina eyiri Laata; nae cha busa eyiri ba mwaanaama mani obaboolera oti, ese ndi ohuniina ohuchia eyiri Laata handi Seeng'we, eyiri Nasae wange, handi Nasae w'eng'we.” 18 Maria Magadaleena yeecha yaasingira yaacha mani yaboolera abeeki ati, “Ese mbweeneho Omwaami”; handi yeecha yababoolera ati, niye amuboleere ebiindu bino. 19 Mani engoloobe y'oludaalo olwo, oludaalo lutaangira mu juma, enjiki nichikaalweo yi beeki bali, nibatiire Abayudaaya, Yesu yeecha mani yeema akati waabwe, mani yamala yaboola ati, “Emireembe chibe nang'we.” 20 Niyamala ohuboola atyo, yeecha yabeekesa amahono kae alala nende mu mbafu wae. Bulaanu abeeki bae beecha basangaala muno ohubona Omwaami. 21 Handi Yesu yeecha yababoolera ati, “Emireembe chibe nang'we. Koti busa lu Laata yanduma, nasilala endyo syesi mbatuma.” 22 Niyamala ohuboola atyo, yeecha yabayeereraho, mani yababoolera ati, “Nyoole Omwooyo Mwolerefu. 23 Nimunaleheraangamo ebibi by'omuundu yeesi, baba bacha ohuleherwaangamo; nimunahayaanga ohuleheramo ebibi by'omuundu yeesi, haba sibaba bacha ohuleherwaangamo.” 24 Nae bulaanu Tomasi, mulala hu ehumi-na-babiri, owali alaangwa Ehwaana, haba siyali ali nabo Yesu niyeecha atyo. 25 Mani abeeki beecha bamuboolera busa bati, “Efwe hubweene Omwaami.” Nae yeecha yababoolera ati, “Ese nitabonaho busa amahono kae, ndaabonaho ebinyubu by'emisumaari, mani ndamala ndaata olwaala lwaange luno mu mbala ch'emisumaari omwo, handi ndaamala ndaata omuhono kwaange mu mbafu wae omwo, haba siinjia ohufukiirira daawe.” 26 Lunyuma lw'endaalo chitaanu-na-chine, handi abeeki bae bali mu nyumba, mani Tomasi yesi yali ali nabo alala. Enjiki handi chali nichikaalwe, nae Yesu handi yeecha mani yeema akati waabwe, mani yaboola ati, “Emireembe chibe nang'we.” 27 Niyamala atyo, yeecha bulaanu yaboolera Tomasi ati, “Bukula ote olwaala lwao ano, mani oboneho amahono kange kano; handi omale okolole omuhono kwao, mani omale okugeeng'e mu mbafu wange muno; otabechaanga omuundu obulamo efukiirira daawe, nae bechaanga ofukiirira.” 28 Tomasi yeecha yakobolamo ati, “Ee, Omwaami wange, handi Nasae wange mweene!” 29 Mani Yesu yeecha yamuboolera ati, “Ewe ofukiirira busa olwohuba mbwe wumbweneho? Bali nende ehabi abo abasisiiri ohubonaho, nae bafukiirira busa?” 30 Bulaanu, Yesu yahola obulolero bundi bungi muno mu moni w'abeeki, obutaandiikwa mu sitabo sino; 31 nae bino byandiikwa hu munyale ohufukiirira muti Yesu niye Kristo, Omwaana wa Nasae, handi nimufukiirira, mucha ohunyoola obulamu mu liita lyae.

21

1 Lunyuma lwa bino, Yesu handi yeecha yabonehera abeeki bae hu lwaasi lw'Enyaanja ya Tibberiasi; mani yababonehera mu ngeri yino. 2 Simooni Peetero, Tomasi olaangwa muhwaana, Nasanayiri otula e Kaana esye Galilaaya, abasyaani ba Sebbedaayo, nende abeeki bae bandi babiri, bali nibebuusire alala. 3 Simooni Peetero yeecha yababoolera ati, “Ese ndi ohuchia ohunaaba.” Nabo beecha bamuboolera bati, “Fwesi hucha ohuchia naawe.” Mani batula bacha beengira mu lyaato; nae esiro esyo, haba sibadiisaho esiindu syoosi. 4 Obwiire nibwali buhya busa buti, Yesu yeecha yema hu lwaasi; nae abeeki haba sibamanya bati yali niye Yesu. 5 Yesu yeecha yababoolera ati, “Baana eng'we, mudiisireho eng'eeni yoosi?” Nabo bamukobolamo bati “Haba.” 6 Nae Yesu yababoolera ati, “Musukune olweero olwo hu muhono muluungi kw'elyaato, mucha ohudiisa.” Mani beecha basukuna olweero olwo, mani bulaanu byabahaya ohuluhweesa balwingisa mu lyaato, hu lw'obuungi bw'eng'eeni chibadiisa. 7 Omweeki yi Yesu yali nadaha muno, yeecha yaboolera Peetero ati, “Niye Omwaami!” Nae Simooni Peetero niyawulira ati yali niye Omwaami, yeecha yefwaala engubo chae, olwohuba yali niyefwaluule hulw'emirimo, yaduuma yaakwa mu maachi. 8 Nae abeeki bandi bala beechera mu lyaato, nibahweesa olweero lwichuule eng'eeni, olwohuba haba sibali bali eyale nende olwaasi, nae byali koti emiita emia ndala ohutula hu lwaasi. 9 Niboola hu lwaasi, babona esyoosyo sy'omuliro nisiriho eng'eeni nende omugaati. 10 Mani Yesu yeecha yaboolera ati, “Muleeteho hu ng'eeni chimwahanaaba.” 11 Mani Simooni yeecha yengira mu lyaato mani yahweesa olweero olwo yaaluta hu lwaasi, nilwichuule eng'eeni hoongo, emia ndala nende amahumi kataanu-na-chidatu choosi alala; nae kata nichali enyiingi chityo, olweero haba silwataanduha daawe. 12 Yesu yeecha yababoolera ati, “Mwiicha mani hulye esy'echuli.” Nae bulaanu awuma omweeki yeesi owanyala ohumuteeba ati, “Niiwe naanu?” Bamanya busa bati yali niye Omwaami. 13 Mani Yesu yeecha yabukula omugaati okwo, mani yaakubeeresa abeeki, handi yahola atyo nende eng'eeni. 14 Bulaanu lino lyali ehabi ly'ohudatu Yesu naabonehera abeeki bae lunyuma lw'ohusyuuha mu bafu. 15 Nibali nibamalire ohulya esy'echuli, Yesu yeecha yateeba Simooni Peetero ati, “Simooni, omwaana wa Yowaana, wundaha ohuhira bano?” Nae yamukobolamo ati, “Eee, Omwaami; omanyire oti hudaha.” Yesu yamuboolera ati, “Liisa abaana b'amakoondi kange.” 16 Ehabi ly'ohubiri, Yesu handi yateeba Peetero ati, “Simooni, omwaana wa Yowaana, wundaha?” Nae yamukobolamo ati, “Eee, Omwaami; omanyire oti hudaha.” Yesu yamuboolera ati, “Yaya amakoondi kange.” 17 Yesu yeecha yaamuteeba ehabi ly'ohudatu ati, “Simooni, omwaana wa Yowaana; wundaha?” Peetero yawuka muno olwohuba yali amuteebere ehabi ly'ohudatu ati, “Wundaha?” Mani Peetero yeecha yamuboolera ati, “Omwaami, omanyire buli siindu; omanyire oti hudaha.” Yesu yamuboolera ati, “Liisa amakoondi kange. 18 Huboolera obwadyeeri bweene endi, niwali omuyere, omweene wefwalaanga mani wakendaanga nochia yodaha; nae nokofula, wahakolole amahono kao, mani omuundu wundi ahufwaale mani ahukiinge ahuyire yotahadahire ohuchia.” 19 (Yesu yaboola sino ohweekesa engeri yi Peetero achia ohufwiiramo ohuberesa Nasae oluyaali.) Mani lunyuma lwa sino, Yesu yaboolera Peetero ati, “Noonde.” 20 Peetero niyobba amahemo enyuma, mani yabona omweeki yi Yesu yali yadaha muno nabaloonda, oyo owali nayeehere mu lubafu wa Yesu nibalya esy'engoloobe, handi owali aboolere ati, “Omwaami, wiina mweene ochia ohuhuhoba?” 21 Nae Peetero niyamubona, yaboolera Yesu ati, “Omwaami, omusaacha wuno nae?” 22 Yesu yamuboolera ati, “Nihuli ohudaha hwange mbwe adoong'e ohwoola lundaheeche, ebyo bihudiiraho bitye? Ewe noonde!” 23 Mani enomanoma eyo, yeecha yasalaana buli abundu yiti omweeki wuno haba saachia hufwa, nae Yesu siyamuboolera ati haba saachia hufwa, nae, “Nihuli ohudaha hwange mbwe adoong'e ohwoola lundaheeche, ebyo bihudiiraho bitye?” 24 Wuno niye omweeki oli nende obujulisi hu biindu bino, handi niye owandiikire ebiindu bino; handi humanyire huti, obujulisi bwae bwadyeeri. 25 Nae aliwo yosi ebiindu biindi biingi bi Yesu yahola; buli siindu syoosi hw'ebyo siba nisyaandiikwa, mbaasa endi esyaalo sino syoosi sisyahanyalire ohuyeramo ebitabo biba bicha ohwandiikwa.