1 Mu kwinhama kwa byonabyona Kibono yali ng'aligho era Kibono ng'aba ghalala ni Katonda era Kibono nga ni Katonda. 2 Okuviira irala ku ntoolo Kibono yali ng'aba ghalala ni Katonda. 3 Ebintu byonabyona byatondebwa nga bibita mu oyo era ghazira kintu kyonakyona ekyatondebwa aghazira oyo. 4 Mu oyo nga n'omuli obulamu era obulamu obwo bwaba ekimuliikirira eky'abantu. 5 Ekimuliikirira ekyo kimulika mu nzikiiza, era enzikiiza tekisobola. 6 Ghaaligho omuntu Katonda ye yatuma, ng'ayetebwa Yoanne. 7 Oyo yaidha okukakasa ati ole n'ekimuliikirira, abantu boonaboona baghange okwikiriza. 8 Yoanne oyo ti n'eyali ekimuliikirira ekyo, aye yaidha okukakasa ebigema ku kimuliikirira. 9 Nga kino n'ekimuliikirira kyenekyene, ekyali nga kiri kwidha mu nsi okumuliikirira abantu boonaboona. 10 Kibono yali mu nsi. Era ensi yabita mu oyo okukolebwa, aye ensi tiyamumanha. 11 Yaidha mu babe, aye abantu be beene baaloba okumusangaalira. 12 Aye abo abaamusangaalira era abaamwikiriza yabagha obukumu okufuuka abaana ba Katonda. 13 Baafuuka abaana ba Katonda mu nsambo etali yabuliidho abantu ye bazaalibwamu ey'omubiri. Katonda mwene n'eyabafuula abaana be. 14 Kibono yaafuuka omuntu yaaba mu ife ng'aidhwire ekisa n'amazima. Twabona ekitiisa kye, ekitiisa ng'eky'Omwana wa Lata omulala bedengedenge. 15 Ono Yoanne y'ayogeraku, bw'alanga ati: “Ono ni ye nabakoberangaku bwe nabakoba nti, ‘Anandhiririra ansingira irala obuyinza kuba yabaagho nga nze nkaali na kuzaalibwa.’” 16 Olw'ekisa kye ekitawa, twenatwena atugha emikisa gye emikuzi kamaala. 17 Kuba, nga Katonda bwe yateeka Amateeka ng'abita mu Musa, ekisa n'amazima abibisa mu Yesu Kurisito. 18 Ghazira eyaali aboine ku Katonda. Aye Omwana we omulala bedengedenge aba aghalala n'Ise, n'amwoleka abantu ni bamumanha. 19 Yoanne ati bwe yakakasa Abayudaaya, bwe baatuma Bakabona n'Abalevi okuva e Yerusalemu okumubuuza bati: “Niiwe ani?” 20 Yoanne tiyakibagisa, aye yakyogera nga talumamu ati: “Ti ninze Kurisito.” 21 Baamubuuza bati: “Memale oli ani? Niiwe Eliya?” Yairamu ati: “Busa, ti ninze.” Baayongera okumubuuza bati: “Niiwe Omulanzi ole?” Yairamu ati: “Busa.” 22 Agho baamukoba bati: “Niini tukobere, niiwe ani? Kuba abatutumye tunaabakoba tutya? Weeyogeraku ki?” 23 Yaakozesa ebibono bya Isaia Omulanzi, yaakoba ati: “Ninze eiroboozi ly'oyo alangiriza mu irungu ati, ‘Mutereeze engira ya Musengwa.’ ” 24 Abakwenda bano, baali Bafarisaayo. 25 Agho ni baamukoba bati: “Oba nga ti niiwe Kurisito, oba Eliya, oba Omulanzi ole, memale lwaki obatiza?” 26 Yoanne yaabairamu ati: “Nze mbabatiza n'amaadhi aye mu imwe mulimu oyo ye mutaidhi, 27 anandhiririra era tisaanira naire okusibulula obukoba obw'engaito dhe.” 28 Bino byali Bethania, ng'osomoike omwiga Yorudani, Yoanne ye yali abatiriza. 29 Ku lunaku olwairirira, Yoanne yaabona Yesu ng'aidha y'ali yaakoba ati: “Mubone Entaama Ento eya Katonda etoolagho ebibi eby'ensi! 30 Ono ni ye nabakoberanga, bwe nakoba nti, ‘Ghaligho omuntu ali kwidha oluvainhuma lwange ansingira aghala obukologho, kuba yabaagho ira nga nze nkaali kubaagho.’ 31 Zeena nali timwidhi aye ekyandeeta n'okubatizanga n'amaadhi memale ayolekebwe eri Isiraeli.” 32 Agho Yoanne yaakakasa ati: “Nabona Mwoyo ng'amwikaku ng'oti njiibwa okuva mu igulu era yaamusigalaku. 33 Era nali tiidhi nti n'oyo, aye oyo eyantuma okubatiza n'amaadhi yankoba ati, ‘Y'onaabona nga Mwoyo amwikaku era ng'amusigalaku, anaaba nga n'oyo abatiza ni Mwoyo Mutukuvu.’ 34 Ebyo nabibona era nkakasa nti oyo n'Omwana wa Katonda.” 35 Ku lunaku olwairirira Yoanne yali ayemereire agho n'abeegeresebwa be babiri, kabiri 36 yaabona Yesu ng'atambula. Yaakoba ati: “Mubone Entaama Ento eya Katonda!” 37 Abeegeresebwa be abo ababiri baawulira ekyo baanonereza Yesu. 38 Yesu yaakyuka yaababona nga bali kumunonereza yaababuuza ati: “Muli kwagala ki?” Baamwiramu bati: “Rabbi”, amakulu gaakyo nti Mwegeresa, “otenduka gha?” 39 Yaabakoba ati: “Mwidhe mubone.” Agho dhaali saawa ikumi edh'omusana, kale baaja baabona gh'atenduka era baaba agho naye olunaku olwo. 40 Owundi ku babiri abo abaawulira nga Yoanne ayogera, era ni banonereza Yesu, yali nga ni Anderea muganda wa Simoni Petero. 41 Ono yasooka kubona muganda we Simoni era yaamukoba ati: “Tuboine Messia,” amakulu gaakyo nti Kurisito. 42 Yaatwala Simoni eri Yesu. Yesu bwe yamubona yaamukoba ati: “Niiwe Simoni mutabane wa Yoanne? Oidha kwetebwanga Kefasi,” amakulu gaakyo nti Petero n'olubaale. 43 Ku lunaku olwairirira Yesu yaasalagho okuja e Galilaaya. Yaayagaana Filipo yaamukoba ati: “Nnonereza.” 44 Filipo yali ava mu Bethisaida, ekibuga Anderea ni Petero mwe baali baba. 45 Filipo yaayagaana Nathanaeli yaamukoba ati: “Tuboine oyo Musa ye yaghandiikaku mu kitabo ky'Amateeka, era n'abalanzi ye baaghandiikaku, Yesu ow'e Nazarethi, mutabane wa Yosefu.” 46 Nathanaeli yaamukoba ati: “Ghaligho ekirungi ekighanga okuva e Nazarethi?” Filipo yaamukoba ati: “Idha obone.” 47 Yesu bwe yabona Nathanaeli ng'ali kwidha y'ali, yaamwogeraku ati: “Mubone Omuisiraeli keenekeene aziramu kwesubaayiriza kwonakwona.” 48 Nathanaeli yaamubuuza ati: “Waamanhira gha?” Yesu yaamwiramu ati: “Nkuboine ng'oli mu muti omutiini memale Filipo akwete.” 49 Nathanaeli yairamu ati: “Mwegeresa, niiwe Omwana wa Katonda! Niiwe Kyabazinga wa Isiraeli!” 50 Yesu yaamukoba ati: “Olw'okuba nkukobeire nti nkuboine mu muti omutiini n'okwikiriza? Oidha kubona n'ebisinga kino.” 51 Era yaabakoba ati: “Bwenebwene ka mbakobere, mulibona eigulu nga libwikwike era nga bamalaika ba Katonda abandi baniina, era ng'abandi baika ku Mwana w'Omuntu.”
1 Ku lunaku olwokusatu yaabaayo embaga ey'abagole mu kibuga Kana eky'e Galilaaya. Inhina Yesu yaliyo. 2 Yesu n'Abeegeresebwa be boona baayetebwa era baaliyo. 3 Omwenge ogw'emizabbibu bwe gwawaagho inhina Yesu yaamukoba ati: “Omwenge gw'emizabbibu gubawoireku.” 4 Yesu yaamwiramu ati: “Mukazi iwe, ombeereire ki? Ekiseera kyange kikaali kutuuka.” 5 Aye inhina yaakoba abagheereza ati: “Ky'abakoba kyonakyona kye mube mukole.” 6 Mperaano agho ghaaligho ensugha edh'amaadhi mukaaga edhaakolebwa mu mabaale ng'Abayudaaya dhe bakozesa mu mpisa yaibwe ey'okwetukuza. Era buli ndala nga ejaamu lita nga kikumi. 7 Yesu yaakoba abagheereza ati: “Mwidhuze ensugha edho amaadhi.” Baadhiidhuza ni ku migo. 8 Yaakoba ati: “Mperaano museneku mutwalire omugabuzi omukulu.” Baasena baatwala. 9 Omugabuzi omukulu bwe yakomba ku maadhi nga gafuuse omwenge ogw'emizabbibu, tiyamanha ye guviire, aye abagheereza abaasena amaadhi baamanha. Agho yaayeta omugole omusaadha 10 yaamukoba ati: “Omuntu yeenayeena asooka kugabula omwenge ogw'emizabbibu ogw'endiko, abantu bwe bamala okunhwa ni baghezaamu memale yaabagha dhuule. Aye kabiri iwe omwenge ogw'emizabbibu ogw'endiko gw'otereike okutuusa ni ye buli eno!” 11 Yesu yakolera ekyewuunhio kino ekisooka e Kana mu Galilaaya. Atyo yaayoleka ekitiisa kye era Abeegeresebwa be baamwikiriza. 12 Olumaliira lw'ekyo yaaja e Kaperinaumu n'inhina, ni baganda be n'Abeegeresebwa be, baaba eyo enaku ntono. 13 Ekibinuko eky'Okubitizibwa eky'Abayudaaya nga kiri kumpi okutuuka, Yesu yaaniinaniina e Yerusalemu. 14 Bwe yatuuka mu isinzizo yaayagaanamu abali kutunda ente, entaama n'enjiibwa, n'abafaana empiiya nga batyaime agho bali ku gwaibwe. 15 Yaatoola obugugha yaabukolamu akaswanhu, yaababingamu boonaboona n'entaama n'ente, era yaafundika emeeza edh'abaali bafaana empiiya, n'empiiya dhaibwe yaadhisansa. 16 Yaalagira abaali bali kutunda enjiibwa ati: “Bino mubitoole ghano. Era mulekere okufuula endhu ya Lata wange ekiya!” 17 Agho Abeegeresebwa be baidhukira ebyaghandiikibwa ebikoba biti: “Omwoyo gw'endhu yo guliimalagho.” 18 Agho Abayudaaya baamukoba bati: “Kamanhiso ki k'osobola okukola okutumanhisa ng'oli n'obukumu obukola bino?” 19 Yesu yaabakoba ati: “Mumenhegho eisinzizo lino ndidha kulizimba mu nnaku isatu.” 20 Abayudaaya baamukoba bati: “Kyatwala emyaka amakumi ana na mukaaga (46 ) okuzimba eisinzizo lino! Waakoba oti oghanga okuliizaagho mu nnaku eisatu?” 21 Aye eisinzizo Yesu lye yali ayogeraku n'omubiri gwe. 22 Kale bwe yazuukira mu bafu Abeegeresebwa be baidhukira nga yayogera kino, era baikiriza Ebyaghandiikibwa, ni Yesu bye yakoba. 23 Yesu bwe yali mu Yerusalemu, mu nnaku edh'Ekibinuko eky'Okubitizibwa abantu kamaala baamwikiriza bwe baabona ebyewuunhio bye yakolanga. 24 Aye Yesu nga tabeeyalizaamu, kuba boonaboona yali abaidhi. 25 Kyali tikyetaagisa kubaagho amukobera ebifa ku muntu, kuba yali ng'aidhi ebiri mu myoyo egy'abantu.
1 Ghaaligho omusaadha eyali omukulu mu Bayudaaya ng'ayetebwa Nikodemo era nga wa mu kikunsu ky'Abafarisaayo. 2 Lwali lulala ono yaaja ye Yesu obwire yaamukoba ati: “Mwegeresa, twidhi tuti oli mwegeresa ava ewa Katonda, kuba ghazira aghanga kukola byewuunhio bino by'okola okutoolaku nga Katonda ali naye.” 3 Yesu yaamwiramu ati: “Ka nkukobere bwenebwene, ezira aghanga kubona Bwakyabazinga bwa Katonda okutoolaku ng'azaaliibwa omukuzi ogwokubiri.” 4 Nikodemo yaamubuuza ati: “Omuntu aghanga atya okuzaalibwa omukuzi ogwokubiri bw'aba nga mukulu? Asobola okungira mu nda ya inhina omukuzi ogwokubiri yaazaalibwa?” 5 Yesu yaamwiramu ati: “Bwenebwene ka nkukobere, okutoolaku ng'omuntu azaaliibwa amaadhi ni Mwoyo, taghanga kwingira mu Bwakyabazinga bwa Katonda. 6 Omubiri guzaalibwa mubiri, ate omwoyo gwazaalibwa Mwoyo. 7 Oteewuunhia kye nkukobye nti muli n'okuzaalibwa omukuzi ogwokubiri. 8 Empewo efuuwa yaalaga y'eyenda, waawulira empiriito aye nga toidhi y'eva oba y'eja. Kityo bwekiri ku buli muntu azaalibwa Mwoyo.” 9 Nikodemo yaamukoba ati: “Ebyo bighanga bitya okubaagho?” 10 Yesu yaamwiramu ati: “Waaba mwegeresa mukulu mu Isiraeli waaloba kumanha ekyo? 11 Bwenebwene ka nkukobere, ife twogera kye twidhi era tukakasa kye twabona, aye imwe muloba okwikiriza obudhulizi bwaife. 12 Bwe mbakobera eby'oku nsi timwikiriza, memale bwe nnaabakobera eby'omu igulu lwe munaikiriza? 13 Ghazira yaali aniinieku mu igulu okutoolaku Omwana w'Omuntu eyaika okuva mu igulu.” 14 Kale nga Musa bwe yaghanika omusota mu irungu, mu nsambo n'endala n'Omwana w'Omuntu bw'ali n'okughanikibwa 15 kiisi amwikiriza asobole okuba n'obulamu obutawaagho. 16 Atyo Katonda bwe yagonza abantu ab'oku nsi, yaaghaayo Omwana we omulala bedengedenge kiisi amwikiriza alobe kuzikirira aye afune obulamu obutawaagho. 17 Katonda tiyatuma Mwana we mu nsi kusalira bantu musango, aye abantu babite mu oyo okulokolwa. 18 Oyo amwikiriza tigulimusinga aye oyo atamwikiriza gwamala ira okumusinga, kuba taikiriza Mwana wa Katonda omulala bedengedenge. 19 Guno n'omusango: Ekimuliikirira kyaidha mu nsi, aye abantu baagonza enzikiiza mu kifo ky'okugonza ekimuliikirira olw'okuba ebikolwa byaibwe bibi. 20 Buli akola ebibi akyagha ekimuliikirira, era taidha ya kimuliikirira olw'okutya ati ebikolwa bye bighanga okumanhibwa. 21 Aye akola ekituufu aidha y'ekimuliikirira okwoleka ati mu by'akola agondera Katonda by'amukoba. 22 Ebyo olwawa, Yesu n'Abeegeresebwa be baaja mu kiketezo eky'e Buyudaaya, yaaba eyo nabo okumala entangama ng'abatiza. 23 Yoanne yeena yali abatiriza mu Aenoni okumpi ni Salimu, kuba yaliyo amaadhi kyodo era ng'abantu baidha baabatizibwa. 24 Agho Yoanne baali bakaali kumuta mu ikomera. 25 Abeegeresebwa ba Yoanne abandi baatoolera okutakana n'Omuyudaaya ku mpisa ey'okutukuzibwa. 26 Baidha baakoba Yoanne bati: “Omwegeresa, ole ye wayogeraku, ye mwali naye eruuyi ere ng'osomoike Yorudani, yeena ali eyo abatiza era abantu boonaboona bali kuja y'ali!” 27 Yoanne yaabairamu ati: “Ezira afuna kitone kyonakyona nga tikiviire mu igulu. 28 Imwe beene mundhulira nga nakoba nti, ‘Ti ninze Kurisito, aye natumibwa kumukulembereramu.’ 29 Omugole aba w'oyo amubayiiza. Mukagwa w'oyo abayiiza bw'ayemerera n'awulira eiroboozi ly'oyo abayiiza asangaala. Kale ni eisanhu lyange lituukiriire. 30 Oyo ali n'okweyongera okuja ghaigulu nze ndhike ghansi.” 31 Oyo ava ghaigulu n'asinga abantu boonaboona. Oyo ava ku nsi aba wa ku nsi era ayogera ku bya nsi, aye ava mu igulu, n'asinga boonaboona. 32 Akakasa ebyo bye yabona era bye yawulira, aye ghazira aikiriza by'akoba. 33 Oyo aikiriza by'akoba akakasa nga Katonda wa mazima. 34 Oyo Katonda ye yatuma ayogera ebibono bya Katonda, kuba Katonda tagaba Mwoyo we mu bipimo. 35 Lata w'Omwana amugonza era yata ebintu byonabyona mu buyinza bwe. 36 Oyo aikiriza Mwana ali n'obulamu obutawaagho aye aloba okwikiriza Mwana taja kufuna bulamu, era aja kusigala ng'abonerezebwa Katonda.
1 Abafarisaayo baawulira bati Yesu yali ali kufuna era yaabatiza abeegeresebwa kamaala. 2 (Yesu mwene ti n'eyabatizanga aye Abeegeresebwa be n'abaabatizanga). 3 Bwe yakimanha yaava mu Buyudaaya yairayo e Galilaaya. 4 Yali ng'ali n'okubita mu Samaria. 5 Yaatuuka mu Samaria mu kibuga ekyetebwa Sikaru nga kiri kumpi n'ekibandha Yokobo kye yagha mutabane we Yosefu. 6 Agho n'aghaali ensulo eyali emanhiibwa nga ensulo ya Yokobo. Kale Yesu eyali akooye n'olugendo yaatyama agho ku nsulo. Esaawa dhaali nga mukaaga. 7 Omukazi Omusamaria yaidha okusena amaadhi, Yesu yaamukoba ati: “Mpa ku maadhi nhweku.” 8 Abeegeresebwa be baali bajiire mu kibuga kugula mere. 9 Omukazi Omusamaria yaamukoba ati: “Iwe Omuyudaaya oghanga otya okusaba nze Omusamaria amaadhi okunhwa?” Kuba Abayudaaya tibaabanga na nkolagana yoonayoona n'Abasamaria. 10 Yesu yaamukoba ati: “Nguli oidhi ekirabo Katonda ky'agha, n'omanha n'oyo ali kukusaba amaadhi okunhwa, wandimusabye yaakugha amaadhi agagha obulamu.” 11 Omukazi yaamukoba ati: “Musengwa, memale iwe ozira mpendo ate n'ensulo ndeeyi, amaadhi agagha obulamu waaligafunie gha? 12 Niiwe osinga dhaadha waife Yokobo eyatugha ensulo eno, ate era mwene ye yanhwangamu n'abaana be, n'ebyayo bye?” 13 Yesu yaamukoba ati: “Kiisi anhwa ku maadhi gano endiwo eiramu yaamugema, 14 aye kiisi anhwa ku maadhi ge mmugha, taliirayo kuba ndiwo. Amaadhi ago ge ndimugha, mu oyo galifuuka ensulo ey'amaadhi agagha obulamu era gaamugha obulamu obutawaagho.” 15 Omukazi yaamukoba ati: “Musengwa mpa ku maadhi ago ndobe kubanga ndiwo na kwidhanga kusena gano.” 16 Yesu yaamukoba ati: “Ja oyete balo oidhe naye.” 17 Omukazi yairamu ati: “Nze nzira baze.” Yesu yaamukoba ati: “Oli mutuufu bw'okoba oti ozira balo 18 kuba waakabayira abasaadha bataanu era y'oli naye mperaano ti balo. Ky'okobye kituufu.” 19 Omukazi yaamukoba ati: “Musengwa ombonekera ng'oti oli mulanzi. 20 Badhaadha baife baasinzanga Katonda ku lusozi luno aye imwe mukoba muti Yerusalemu n'ekifo ekiteekwa okusinzibwamu.” 21 Yesu yaamukoba ati: “Mukazi iwe, amazima gali gati, ekiseera kiidha kutuuka Lata abe nga takaasinzibwa ku lusozi luno waire e Yerusalemu. 22 Imwe musinza kye mutaidhi aye ife tusinza kye twidhi, kuba obulokozi buva mu Buyudaaya. 23 Aye ekiseera kiri kwidha era kituuse, abasinza mu nsambo entuufu basinze Lata mu Mwoyo era ni mu mazima, kuba abamusinza mu nsambo ng'oti n'eyo Lata oyo b'asiima. 24 Katonda Mwoyo, era abamusinza bagwaine okumusinza mu Mwoyo ni mu mazima.” 25 Omukazi yaamukoba ati: “Ndidhi nga Messia, ayetebwa Kurisito, aidha kwidha. Era nga bw'aliidha alitukobera ebintu byonabyona.” 26 Yesu yaamukoba ati: “Ninze ali kwogera n'iwe.” 27 Mangu ago Abeegeresebwa be ghe bairira era beewuunhia inho okumubona ng'ali kwogera n'omukazi. Aye ghazira yabuuza mukazi ati: “Oyenda ki?” Oba eyabuuza Yesu ati: “Lwaki oli kwogera n'omukazi?” 28 Agho omukazi yaaleka agho ensugha ye, yaaja mu kibuga yaakoba abantu ati: 29 “Mwidhe mubone omuntu ankobeire byonabyona bye naali nkoze. Ataba nga ni Kurisito?” 30 Agho baava mu kibuga baaja ye Yesu. 31 Mu kiseera n'ekirala ekyo Abeegeresebwa be baali bali kumweghemba bati: “Mwegeresa, lya ku mere!” 32 Aye yaabakoba ati: “Ndi n'emere ey'okulya ye mutaidhi.” 33 Abeegeresebwa be n'okwebuuza bati: “Oba ghaligho amuleeteire emere?” 34 Yesu yaabakoba ati: “Emere yange n'okukola ebyo eyantuma by'ayenda, n'okumala omulimo gwe yampa. 35 Koodhi timuli na nsambo yaimwe mbu, ‘Ebula myezi ena nga tukungula.’ Aye ka mbakobere: Mulingirire ebiri mu musiri mubone bwe bituuse okukungula. 36 Akungula, asasulwa, era yaasoloza ebibala by'obulamu obutawaagho. Olwo ni, asimba n'akungula bombi baasagambira ghalala. 37 Agho ni ensambo eno ntuufu ekoba eti, ‘Owundi asimba owundi yaakungula.’ 38 Nabatuma okukungula bye mutaalima; bandi n'abaalima imwe mwaganhulwa olw'amaani gaibwe.” 39 Abasamaria kamaala ab'omu kibuga ekyo baamwikiriza olw'ebyo omukazi bye yabakobera ati: “Ankobeire byonabyona bye naali nkoze.” 40 Kale Abasamaria bwe baidha y'ali, baamweghemba abe ng'akaaliku nabo, era yaasigala nabo enaku ibiri. 41 Abantu abandi kamaala baamwikiriza olw'ebibono bye. 42 Era baakoba omukazi bati: “Twikiriza ti lwa kuba nga watukobera, aye mperaano twewuliriire beene, era mperaano twidhi ng'ono n'Omulokozi ow'ensi mwenemwene.” 43 Enaku edho eibiri bwe dhaabita Yesu yaavaayo yaaja e Galilaaya. 44 Kuba Yesu mwene yali amaze okukakasa ati: “Omulanzi tateebwamu kinhagansi mu nsi ya waibwe.” 45 Bwe yatuuka e Galilaaya, ab'e Galilaaya baamusangaalira engeri ye baali baboine bye yakolera e Yerusalemu ku Kibinuko eky'Okubitizibwa, kuba boona baaliyo ku kibinuko ekyo. 46 Agho yaatuuka e Kana mu Galilaaya, ye yafuulira amaadhi omwenge ogw'emizabbibu. Ghaaligho omwami eyali ni mutabane we nga mulwaire inho e Kaperinaumu. 47 Bwe yawulira nga Yesu aviire mu Buyudaaya yaidha mu Galilaaya, yaaja y'ali, yaamweghemba aikirire e Kaperinaumu, awonie mutabane we eyali ng'ali kumpi na kufa. 48 Yesu yaamukoba ati: “Okutoolaku nga muboine obumanhiso n'ebyewuunhio timughanga kwikiriza.” 49 Omwami yaamukoba ati: “Musengwa, ikirira ng'omwana akaali kunfaaku.” 50 Yesu yaamukoba ati: “Ja mutabane wo mulamu.” Omusaadha yaikiriza ebibono Yesu bye yamukoba, yaaja. 51 Bwe yali aikirira yaayagaanana n'abagheereza be baamukoba bati: “Mutabane wo mulamu.” 52 Yaababuuza esaawa ye yatandiikiraku okuba obukalamu. Baamukoba bati: “Idho ku saawa musanvu edh'omusana, omusuudha ghe gwamulekeire.” 53 Agho Ise yaamanha nga n'esaawa Yesu ye yamukobereraku ati: “Mutabane wo mulamu.” Oyo n'ab'omu ndhu ye boonaboona baikiriza. 54 Kano n'akaali akamanhiso akokubiri Yesu ke yakola mu Galilaaya ng'amaze okuva mu Buyudaaya.
1 Ebyo olwawa, ghabaagho ekibinuko eky'Abayudaaya, era Yesu yaaniinaniina e Yerusalemu. 2 Mperaano, mu Yerusalemu, agho ku Mulyango gw'Entaama, ogwetebwa Bethizatha mu Luheburayi, ghaaligho ekidiba nga kiriku ebigangu bitaanu. 3 Mu bigangu bino n'omwali olukunkumuli lw'abalwaire aba buli nsambo abatulu, abalema n'abagogomu nga balindirira amaadhi okwetaabuula. 4 Kuba ghaalingagho ebiseera malaika mwe yaikiranga mu kidiba n'ataabuula amaadhi, era nga kiisi asooka okwika mu maadhi nga gamaze okutaabuuka, awona kiisi bulwaire bwonabwona bw'aba ng'alwaire. 5 Ghaligho omuntu mulala eyali alwaliire emyaka amakumi asatu na munaana. 6 Yesu bwe yamubona ng'alambaire, n'amanha ng'abaire mulwaire okumala entangama, kyeyava n'amubuuza ati: “Oyenda okuwonezebwa?” 7 Omulwaire yaamwiramu ati: “Musengwa, nzira muntu andhisa mu kidiba amaadhi ghe gataabuukira ghe ngerezaaku okwikamu ng'owundi ansookamu.” 8 Yesu yaamukoba ati: “Situka, otoole endiri yo otambule.” 9 Mangu ago omusaadha yaawona yaasitula endiri ye yaatambula. Olunaku olwo lwali lwa Sabbato. 10 Abayudaaya baakoba omusaadha eyali yaakawonezebwa bati: “Olwaleero lwa Sabbato era amateeka tigakuganha kutambula ng'ositwire endiri yo.” 11 Aye yaabairamu ati: “Amponiiza n'ankobye okusitula endiri yange ntambule.” 12 Baamubuuza bati: “Omuntu oyo akukobye ati situla endiri yo otambule, naani?” 13 Aye omusaadha eyawonezebwa tiyamanha eyali amuwoniiza, kuba Yesu yali abuze olw'eikuukuubira eryali agho. 14 Ebyo olwawa Yesu yaayagaana ye yawonia mu isinzizo yaamukoba ati: “Bona eno mperaano oli bukalamu, lekera agho okukola ebibi, kuba oghanga okweyagaana nga ekisinga agho obubi kikutuuseeku.” 15 Agho omusaadha yaaja yaakobera Abayudaaya ati ni Yesu eyamuwonia. 16 Agho ni Abayudaaya baakiriga Yesu, kuba yakola kino ku Sabbato. 17 Aye Yesu yaabakoba ati: “Lata wange akaakola, era zeena nkola.” 18 Ekyo Abayudaaya kyabongeramu okwenda okumwita, kuba tiyakoma ku kya kumenha iteeka lya Sabbato kyonka, aye yataaku n'eky'okweta Katonda lata we; nga mu kino yeefuula okuba ng'ayagayaga ni Katonda. 19 Agho Yesu yaabairamu ati: “Ka mbakobere, bwenebwene Omwana tasobola kukola kintu kyonakyona ku lulwe akola ebyo byonka by'abona Lata ng'akola. Kiisi Lata ky'akola n'Omwana ky'akola 20 kuba Lata agonza Omwana era amulaga byonabyona by'akola. Era aidha kumulaga n'ebisinga n'agho mwasaamirire n'okwasaamirira. 21 “Nga Lata bw'azuukiza abafu era n'abagha obulamu, mu nsambo n'endala n'Omwana bw'agha obulamu abo b'ayenda okubugha. 22 Lata tasalira musango muntu yeenayeena. Okusalira omusango omuntu kwonakwona kuli mu buyinza bwa Mwana. 23 Abantu boonaboona bate mu Mwana ekinhagansi nga bwe bata mu Lata ekinhagansi. Kiisi atata mu Mwana kinhagansi, ni Ise eyamutuma tamutaamu kinhagansi. 24 “Bwenebwene mbakobera nti: Kiisi awulira kibono kyange n'aikiriza oyo eyantuma, ali n'obulamu obutawaagho era taja kusalirwa musango, aba amaze okusomoka okuva mu kufa okungira mu bulamu. 25 Bwenebwene mbakobera nti: Ekiseera kiri kwidha era n'okutuuka kyatuuka, abafu mwe bawulirira eiroboozi ery'Omwana wa Katonda, era abo abaliwulira bafuna obulamu. 26 “Kuba nga Lata mwene bw'ali n'obulamu, mu nsambo n'endala n'Omwana yamugha abe n'obulamu. 27 Era yaamugha obukumu obw'okusala emisango, kuba n'Omwana w'Omuntu. 28 Kino kitabaasaamiriza kuba ekiseera kiri kwidha, abali mu magombe boonaboona mwe baliwulirira eiroboozi lye, 29 era ni bavaamu. Abo abaakolanga obulungi balizuukira okufuna obulamu ate abaakolanga obubi balizuukira baasalirwa omusango okubasinga. 30 “Tisobola kukola kintu kyonakyona ku bwange; nsala omusango nga bwempulira aghazira kusaliriza, kuba tinuyirira kukola nga bwe nhenda aye nga Lata eyantuma bw'ayenda. 31 “Bwe neeghaaku obudhulizi mwene, obudhulizi obwo tibuba bwa mazima. 32 Aye ghaligho owundi andhulira era ndidhi ng'obudhulizi bw'agha ku nze bwa mazima. 33 Mwatumira Yoanne abakwenda era yaagha obudhulizi ku mazima. 34 Ti lwa kuba nga neetaaga inho obudhulizi obw'omuntu, ekyo nkikobye musobole okulokolwa. 35 Yoanne yali ng'oti itaala eryaka ni limulisa, aye okumulisa kwe kwabasangaazaaku kaseera buseera. 36 “Aye nze ndi n'obudhulizi obusinga n'obwa Yoanne bw'agha kuba ebintu bye nkola, Lata n'eyabimpa okubikola era bindhulira nga Lata n'eyantuma. 37 Ate era ni Lata mwene eyantuma, oyo yeena andhulira. Imwe timuwulirangaku bw'ayogera, waire okumubona bw'afaanana. 38 N'ekibono kye tikisigala mu myoyo gyaimwe, kuba timwikiriza ye yatuma. 39 “Mwagaaza mu Byaghandiikibwa nga mudhuuba muti mu ebyo mwe munaafunira obulamu obutawaagho, ate nga Ebyaghandiikibwa byene ebyo bindhulira, 40 aye imwe muloba okwidha ye ndi okufuna obulamu. 41 Nze tinoonia kusaakibwa bantu 42 aye ndidhi nga muzira kugonza kwa Katonda mu imwe. 43 Nze naidha mu liina lya Lata wange, aye muloba okunsangaalira owundi bw'aliidha ku bubwe mwene, muja kumusangaalira. 44 Memale katyo mughanga mutya okwikiriza, imwe abagonza okusaakagana ni mutanoonia kusaakibwa oyo Katonda yenka? 45 “Mutadhuuba muti ninze ndibaseegha ye Lata. Aye Musa ye mutaamu eisuubi lyaimwe ni mwenemwene aja okubaseegha; 46 kuba nguli mwaikiriza Musa zeena mwandindhikiriiza, kuba yaghandiika ku nze. 47 Oba nga timwikiriza oyo bye yaghandiika, memale musobola mutya okwikiriza nze bye nkoba?”
1 Ebyo bwe byawa Yesu yaasomoka enhandha Galilaaya, ey'e Tiberia. 2 Eikuukuubira ly'abantu lyamunonereza kuba baali bamaze okubona obumanhiso bwe yakola ku balwaire. 3 Yesu yaaniina ku lusozi yaatyama eyo n'Abeegeresebwa be. 4 Ekibinuko eky'Okubitizibwa kyali kiseese kumpi. 5 Yesu yaja okulinga ati ng'abona eikuukuubira ery'abantu nga bali kwidha y'ali. Yaakoba Filipo ati: “Tunaagula gha emigaati abantu bano balye?” 6 Yakoba atyo kumuleba, kuba mwene yali aidhi kye yali aja okukola. 7 Filipo yaamwiramu ati: “Emigaati egy'edinari ebikumi ebibiri (200 ) tigimala kiisi muntu okulyaku akatono.” 8 Omwegeresebwa wa Yesu owundi ayetebwa Anderea, muganda wa Simoni Petero yaakoba ati: 9 “Ghaligho ghano omwisuka ali n'emigaati etaanu egya sayiri n'ebyenhandha bibiri, aye katyo ebyo bikola ki ku bantu kamaala batyo!” 10 Yesu yaakoba ati: “Mukobe abantu batyame.” Kale olw'okuba ghaaligho obusubi kamaala obusobola okutyamwaku, abantu boonaboona baatyama; abasaadha baali ng'oti enkumi itaanu (5 ,000 ). 11 Yesu yaatoola emigaati yeeyanza Katonda, yaagabira abantu abaali batyaime ku busubi. Mu nsambo n'endala atyo bwe yakola n'ebyenhandha abantu boonaboona baafuna nga bwe baayenda. 12 Bwe baamala okwiguta boonaboona, yaakoba Abeegeresebwa be ati: “Musoloze ebitundu byonabyona ebitaliiriibwa ghabule ekyonoonebwa.” 13 Kale baasoloza, baidhuza ebiibo ikumi na bibiri eby'ebitundu eby'emigaati egya sayiri etaanu ebyalekebwagho, abantu bye bataalya. 14 Abantu bwe baabona akamanhiso ako Yesu ke yakola, baakoba bati: “Bwenebwene ono n'omulanzi Ole ow'okwidha mu nsi!” 15 Yesu yaamanha ati baali bali kumpi okumugema bya ntaka bamufuule Kyabazinga. Yaavaagho kabiri yaaja eyo mu nsozi yenka. 16 Eiguloigulo, Abeegeresebwa be baikirira ku nhandha. 17 Baaniina mu lyato, baasomoka enhandha, baaja e Kaperinaumu. Obwire bwaziba aye nga Yesu akaali kwidha ye bali. 18 Empewo ey'amaani yaidha, enhandha yeefuukuula. 19 Abeegeresebwa be bwe baali bali kukuba enkasi, nga baakajaaku kilomita nga itaanu oba mukaaga, okulinga bati nga babona Yesu ali kutambula ku maadhi aidha y'eryato lyaibwe, era baatya inho. 20 Aye Yesu yaabakoba ati: “Ninze, mutatya.” 21 Agho baasangaalira Yesu okubeeyimbaku mu lyato, era mu kaseera keene ako eryato lyatuuka ku bukalu ghe baali baja. 22 Olunaku olwairirira, eikuukuubira ery'abantu abaali basigaire eruuyi ere ow'enhandha, baabona nga ghaligho eryato irala lyonka. Era baidhukira nga Abeegeresebwa baaja bonka, Yesu tiyali nabo mu lyato nga baja. 23 Ghaabaagho amaato agaava e Tiberia, gaidha okumpi n'ekifo abantu kamaala ghe baaliira emigaati nga Musengwa amaze okweyanza. 24 Mperaano abantu bwe bataabona Yesu waire Abeegeresebwa be, baaniina mu maato ago baaja e Kaperinaumu okumwagala. 25 Abantu bwe baayagaana Yesu ng'ali eruuyi ere ow'enhandha, baamubuuza bati: “Mwegeresa watuuse li eno?” 26 Yesu yaabairamu ati: “Bwenebwene ka mbakobere, muli kundhagala ti lwa kuba mwabona obumanhiso bwe nakola, aye muli kundhagala lwa kuba mwalya emigaati mwalekerera. 27 Mutakolereranga mere ewaagho, aye mukolererenga emere etawaagho, etuusa ku bulamu obutawaagho. Eyo n'emere Omwana w'Omuntu yaalibagha. Kuba oyo Katonda Lata yamutaaku akamanhiso.” 28 Baamubuuza bati: “Tukole ki okukola Katonda by'ayenda tukole?” 29 Yesu yaabairamu ati: “Katonda ky'ayenda mukole n'okwikiriza oyo ye yatuma.” 30 Baamukoba bati: “Kamanhiso ki k'onaakola tubone era tukwikirize? Oja kukola ki? 31 Badhaadha baife baalya mannu mu irungu era nga bwe kyaghandiikibwa kiti, ‘Yabagha omugaati oguva mu igulu baalya.’ ” 32 Yesu yaabakoba ati: “Bwenebwene ka mbakobere, Musa ti n'eyabagha omugaati oguva mu igulu. Lata wange n'agaba omugaati gwene oguva mu igulu 33 kuba omugaati Katonda gw'agaba, n'omuntu oyo ava mu igulu era n'agabira ensi obulamu.” 34 Agho ni baamukoba bati: “Musengwa, tughenga omugaati guno buliidho.” 35 Yaabakoba ati: “Ninze omugaati ogugha obulamu, aidha ye ndi endhala terimuluma, era oyo andhikiriza taliwulira ndiwo. 36 “Aye nga bwe nabakoba, waire mumbona timwikiriza. 37 Buli muntu Lata y'ampa, aliidha ye ndi ate buli aidha ye ndi tija kumubingira ku luya. 38 Kuba naidha okuva mu igulu ti kukola nze kye nhenda, aye oyo eyantuma ky'ayenda. 39 Era kino, eyantuma ky'ayenda: ku be yampa ndobe kufiirwaku waire mulala aye mbazuukize ku lunaku olusembayo. 40 Lata wange ky'ayenda ni kino: buli abona Omwana era n'amwikiriza afune obulamu obutawaagho era mmuzuukize ku lunaku olusembayo.” 41 Abayudaaya baaduuduuma olw'okubakoba ati: “Ninze omugaati oguva mu igulu.” 42 Baakoba bati: “Ono ti ni Yesu, mutabane wa Yosefu? Ise n'inhina tubaidhi. Akoba atya mperaano ati, ‘Naika okuva mu igulu?’ ” 43 Yesu yaabakoba ati: “Muleke kuduuduumira eyo. 44 Ghazira aghanga kwidha ye ndi okutoolaku nga Lata eyantuma n'amutuusiiza ye ndi, era ndimuzuukiza ku lunaku olusembayo. 45 Kyaghandiikibwa mu balanzi kiti, ‘Boonaboona balyegeresebwa Katonda.’ Yeenayeena awulira ebya Lata n'ayega, aidha ye ndi. 46 Tikiri kiti ghaligho eyaali aboine ku Lata okutoolaku oyo ava ye Katonda, oyo n'eyabona ku Lata. 47 Bwenebwene, ka mbakobere aikiriza, ali n'obulamu obutawaagho. 48 “Ninze omugaati ogugha obulamu. 49 Badhaadha baimwe baalya mannu mu irungu era baafa. 50 Guno n'omugaati oguva mu igulu omuntu agulya alobe kufa. 51 Ninze omugaati oguleeta obulamu, ogwava mu igulu. Omuntu yeenayeena bw'alya ku mugaati guno aja kuba mulamu ebyanda n'ebyanda. Omugaati gwe ndighaayo olw'obulamu obw'ensi eno, n'omubiri gwange gwe nja okughaayo ku lw'ensi eno ebe n'obulamu.” 52 Abayudaaya baatakana beene na beene nga bakoba bati: “Ono omusaadha aghanga atya okutugha omubiri gwe ife okugulya?” 53 Agho Yesu n'okubakoba ati: “Bwenebwene ka mbakobere, okutoolaku nga mulya omubiri gw'Omwana w'Omuntu, era ni munhwa n'omusaayi gwe, timughanga kuba na bulamu. 54 Kiisi alya omubiri gwange era n'anhwa omusaayi gwange, ali n'obulamu obutawaagho, era ndimuzuukiza ku lunaku olusembayo. 55 Kuba omubiri gwange mere yeeneyeene ate omusaayi gwange kya kunhwa kyenekyene. 56 Kiisi alya omubiri gwange n'anhwa n'omusaayi gwange, aba mu nze zeena naamubaamu. 57 Nga Lata omulamu bwe yantuma nze ni mba omulamu olw'okuba oyo, mu nsambo n'endala oyo yeenayeena andya aba mulamu lwa kuba nze. 58 Guno ni, n'omugaati oguva mu igulu, ti nga badhaadha baimwe gwe baalya ni bafa. Ole alya ku mugaati guno aja kuba mulamu ebyanda n'ebyanda.” 59 Yayogera bino ng'ali kwegeresa mu sinagoga e Kaperinaumu. 60 Abeegeresebwa be kamaala bwe baawulira ebyo, baakoba bati: “Ekibono kino nga kikalangafu! Naani aghanga okukiwulirisa?” 61 Yesu yaakitegeera mule ng'Abeegeresebwa bwe bali kuduuduuma olwa kino. Agho yaabakoba ati: “Kino kibamazeemu amaani? 62 Memale nguli mubona Omwana w'Omuntu ng'aniinaniina eyo mu kifo ye yabanga? 63 Mwoyo n'agaba obulamu, omubiri ghazira kye guganhula. Ebibono bye mbakobye ni Mwoyo era n'obulamu. 64 Aye abandi ku imwe timwikiriza.” Kuba okuviira irala mu kwinhama Yesu yali aidhi abaali tibaikiriza, n'eyali aja okumulyamu olukwe. 65 Era yaakoba ati: “Kye nava ni mbakoba nti ghazira muntu aghanga kwidha ye ndi okutoolaku nga Lata akimughaire.” 66 Okuva ku olwo Abeegeresebwa be kamaala baira einhuma baalekera okutambula naye. 67 Kale Yesu yaabuuza Eikumi n'Ababiri ati: “Ate imwe, mwena mwandyenze okwirayo?” 68 Simoni Petero yaamwiramu ati: “Musengwa, tunaaja y'ani? Niiwe ali n'ebibono eby'obulamu obutawaagho. 69 Twidhi era twikiriza nga niiwe Omutukuvu wa Katonda.” 70 Yesu yairamu ati: “Ti ninze eyabalonda imwe Eikumi n'Ababiri? Ate owundi ku imwe Sitaani!” 71 Mperaano yali ali kwogera ku Yuda mutabane wa Simoni Isikarioti. Kuba ono, omulala ku Ikumi n'Ababiri, yali n'aja okumulyamu olukwe.
1 Ebyo bwe byawa Yesu yaasigala mu Galilaaya nga tayenda kutambulira mu Buyudaaya, kuba Abayudaaya baali banoonia kumwita. 2 Ekibinuko ky'Abayudaaya eky'Entindi kyali kiri kumpi okutuuka. 3 Baganda be baamukoba bati: “Va ghano oje e Buyudaaya, Abeegeresebwa bo babone ku bino by'okola. 4 Ghazira agisa by'akola bw'aba ng'ayenda okumanhibwa. Kale nga iwe bw'okola ebintu bino, weeyoleke eri ensi ekumanhe.” 5 Ekyo kyali kityo kuba ni baganda be abo, boona tibaamwikiriza. 6 Yesu yaabairamu ati: “Ekiseera kyange kikaali kutuuka, aye imwe ekiseera kyaimwe buliidho kirigho. 7 Ensi tesobola kubakyagha, aye nze enkyagha, kuba mpa obudhulizi ku bikolwa byayo ebibi. 8 Imwe muje ku kibinuko aye nze tiri kuja ku kibinuko ekyo kuba ekiseera kyange kikaali kutuukira irala.” 9 Bwe yamala okubakoba ebyo yaasigala mu Galilaaya. 10 Baganda be nga bamaze okuja ku kibinuko, Yesu yeena yaaja aye tiyaja ng'abantu babona, yeiba bweibe. 11 Abayudaaya baamwagala ku kibinuko era baakoba bati: “Ono ali gha?” 12 Ghaabaagho okuduuduuma kungi mu biyindi eby'abantu nga bamwogeraku. Abandi nga bakoba bati: “Musaadha mukalamu.” Ate abandi bati: “Busa, akiidhamya bwa bantu.” 13 Aye nga ghazira amwogeraku mu lwatu olw'okutya Abayudaaya. 14 Mperaano ekibinuko ghe kituukira ghagati, Yesu yaaja mu isinzizo yaatoolera okwegeresa. 15 Abayudaaya beewuunhia inho baakoba bati: “Omusaadha ono tabangaku amwegeresa! Bino byonabyona yabyega atya?” 16 Yesu yaabairamu ati: “Bye ndhegeresa ti byange aye by'oyo eyantuma. 17 Kiisi aganha okukola oyo by'ayenda, amanha oba nga bye ndhegeresa byange ku bwange oba biva eri Katonda. 18 Ayogera ebibye ku bubwe anoonia kumusaaka, aye ayenda basaake eyamutuma aba mwesigwa era tabaamu buguya bwonabwona. 19 Koodhi Musa tiyabagha Mateeka? Aye ghazira ku imwe agagondera. Lwaki musala amagezi okundhita?” 20 Eikuukuubira ery'abantu lyamwiramu liti: “Oliku omuzimu omubi! Naani ali kusala amagezi okukwita?” 21 Yesu yaabakoba ati: “Nakola ekyewuunhio kirala mwenamwena mwayasaamirira. 22 Olw'okuba Musa yabalagira okukeketanga kiisi mwana mulenzi, ate nga n'okuba tikyava ku Musa aye kyava ku badhaadha, era mukeketa ku lwa Sabbato. 23 Oba nga omuntu aghanga okukeketebwa ku lwa Sabbato obutamenha Mateeka ga Musa, lwaki nze muunhiigira olw'okuwonia omuntu ku lwa Sabbato? 24 Mutasalanga musango nga mujiira ku bya ku ngulu, aye musalenga nga mujiira ku kituufu.” 25 Abandi ku bantu ab'omu Yerusalemu baakoba bati: “Ono ti ye baagala okwita? 26 Mubone, wuule yeetaire mu bwanga ali kwogera era ghaabula kye bamukobaku! Bwenebwene abakulu baghanga okuba nga bakiidhi bati yandiba Kurisito? 27 Aye twidhi bulungi omusaadha ono y'ava, ate nga Kurisito bw'aliidha ghazira alimanha gh'ava.” 28 Agho Yesu bwe yali ng'ali kwegeresa mu isinzizo yaayogerera ghaigulu ati: “Bwenebwene mundidhi era mwidhi ni ye nva? Nze tyaidha ku bwange mwene. Eyantuma yeesigika, aye era imwe timumwidhi. 29 Aye nze mmwidhi kuba y'ali ye nva era n'eyantuma.” 30 Agho baasala amagezi bamugeme aye ghaabula amugemaku kuba ekiseera kye kyali kikaali kutuuka. 31 Abantu kamaala mu baali agho baamwikiriza baakoba bati: “Kurisito bw'aliidha, alikola ebyewuunhio kamaala okusinga omusaadha ono by'akoze?” 32 Abafarisaayo baawulira okuduuduuma mu ikuukuubira ku bigema ku Yesu. Era bano ni Bakabona Abakulu baasindika abakuumi baje bamugeme. 33 Yesu yaakoba ati: “Ndidha kubaaku n'imwe entangama ntonotono memale nje y'oyo eyantuma. 34 Mulindhagala aye timulimbona, nga ghe ndi timughanga kutuukagho.” 35 Abayudaaya beebuuzagania bati: “Ategeka kuja gha ye tutalimubonera? Ategeka kuja mu bale abeetabika n'Abagureki, ayegerese Abagureki? 36 Agho aba ali kukoba ki bw'akoba ati, ‘Mulindhagala aye timulimbona, nga ghe ndi timughanga kutuukagho?’ ” 37 Ku lunaku lw'ekibinuko olusembayo era olusinga bukologho, Yesu yaayemerera yaayogerera ghaigulu ati: “Kiisi ali endiwo aidhe ye nze anhwe. 38 Era ng'Ebyaghandiikibwa bwe bikoba, ‘Kiisi andhikiriza emiiga egy'amaadhi ag'obulamu giriviira mu mwoyo gwe.’ ” 39 Agho Yesu yali ali kwogera ku Mwoyo abamwikiriza ye baali baja okufuna kuba mu kiseera ekyo Mwoyo yali akaali kugabibwa olw'okuba Yesu yali akaali kutuuka mu kitiisa kya Ise. 40 Abantu abandi abaali mu ikuukuubira bwe baawulira ebibono ebyo, baakoba bati: “Bwenebwene ono n'omulanzi.” 41 Abandi baakoba bati: “Ni Kurisito.” Ate abandi baakoba bati: “Aye Kurisito aja kuva Galilaaya? 42 Ebyaghandiikibwa tibikoba biti Kurisito aja kuba ku baidhukulu ba Daudi? Era biti aja kuzaalibwa Bethelehemu ku butaka bwa Daudi.” 43 Kale abantu beeyawulamu ku bigema ku Yesu 44 era abandi baayenda bamugeme aye ghazira yamugemaku. 45 Agho abakuumi bairayo ye Bakabona Abakulu n'Abafarisaayo abaababuuza bati: “Lwaki timumuleese?” 46 Abakuumi babairamu bati: “Tebangayo ku muntu eyaali ayogeire ng'oti n'omusaadha oyo!” 47 Abafarisaayo baabakoba bati: “Mutakoba muti mwena abakiidhaimya? 48 Mwali muwuliireyooku Omuyudaaya omukulu oba Omufarisaayo amwikiriza? 49 Aye ekiyindi eky'abantu kino tikiidhi Mateeka ga Musa kale kiraame!” 50 Aye ku Bafarisaayo ghaabaagho omusaadha nga bamweta Nikodemo. Ono einhuma ere eyaja n'abona Yesu obwire, yaakoba baine ati: 51 “Aye Amateeka gaife tigatuganha kusalira muntu musango okutoolaku nga tumaze okuwulirisa n'okumanha ky'akola.” 52 Baamwiramu bati: “Iwe weena oli wa Galilaaya? Kinoonereze mu byaghandiikibwa, oidha kubona oti e Galilaaya tesobola kuva mulanzi.” 53 Agho buli muntu yairayo ewuwe.
1 Aye Yesu yaaja ku Lusozi olw'Emiti Emyoliva. 2 Olunaku olwairirira yaawuuna mu nkyonkyo yairayo mu isinzizo. Abantu boonaboona beesololeza gh'ali, yaatyama yaabeegeresa. 3 Abanamateeka n'Abafarisaayo baamuleetera omukazi ye baagema ng'ayenda, baamwemereza agho mu maiso gaibwe. 4 Baamukoba bati: “Mwegeresa omukazi ono agemeibwa mu kikolwa kyene eky'obwenzi. 5 Mu Mateeka, Musa yatulagira ati omuntu ng'oti n'oyo ateekwa okukubwa amabaale afe. Mperaano iwe okoba otya?” 6 Baakoba ebyo kumuleba nga benda akobe ekinaamuteesaaku omusango, aye Yesu yaakotaamirira bw'aghandiika ku itaka n'olwala lwe. 7 Bwe beeyongera okumubuuza, yaakotaamulukuka, yaabakoba ati: “Ku imwe azira kibi n'abe asooke okumukuba eibaale.” 8 Agho kabiri yaakotaamirira yaaghandiika ku itaka. 9 Bwe yabakoba atyo baatoolera okuvaagho mulala mulala ng'abakaire n'abatoolereza. Yesu yaasigala agho n'omukazi ng'akaayemereire agho. 10 Bwe yakotaamulukuka yaabuuza ati: “Mukazi iwe, bali gha? Tighabairegho akusalira musango?” 11 Omukazi yairamu ati: “Musengwa, ghazira.” Yesu yairamu ati: “Zeena ni tigukusalire. Golola, aye toirangayo kukola kibi.” 12 Yesu yaayongera yaakoba abantu ati: “Ninze ekimuliikirira eky'ensi kiisi annonereza taja kutambulira ghali nzikiiza era aja kuba n'obutangaavu obuleeta obulamu.” 13 Agho Abafarisaayo baamukoba bati: “Oli kweghaaku mwene obudhulizi, obudhulizi obubwo mwene tibuba bwa mazima.” 14 Yesu yaabairamu ati: “Waire neeghaaku obudhulizi mwene, obudhulizi bwange bwa mazima, kuba nze ndidhi ye nava, era ni ye nja aye imwe timwidhi ye nva, oba ye nja. 15 Musala emisango mu magezi ag'obuntu gonka. Nze ghazira ye nsalira musango. 16 Aye ate ni bwe mba nga ngusaze, okusalagho kwange kuba kutuufu, kuba tiba zenka mu kusalagho okwo Lata eyantuma aba ninze. 17 Ate kyaghandiikibwa ni mu Mateeka gaimwe kiti: Abadhulizi ababiri kasita baisania, obudhulizi bwaibwe buba butuufu. 18 Nze mwene neeghaaku obudhulizi ni Lata eyantuma yeena ampaaku obudhulizi.” 19 Agho baamubuuza bati: “Lata wo ali gha?” Yesu yaabairamu ati: “Nze timundidhi waire Lata wange, kuba nguli mundidhi ni Lata wange mwandibaire mumwidhi.” 20 Yesu yakoba bino byonabyona ng'ali kwegeresa mu isinzizo agho mu kifo aghaateebwanga ebirabo. Era ghazira yamugema kuba ekiseera kye kyali kikaali kutuuka. 21 Yesu kabiri yaakoba ati: “Nze ndidha kuvaagho mulindhagala, era mwafiira mu kibi kyaimwe. Nze ye nja imwe timughanga kujaayo.” 22 Abayudaaya baakoba bati: “Akobye ati titughanga kuja y'aja, aja kweita?” 23 Yesu yaabakoba ati: “Imwe muva ku nsi kuno, nze nva mu igulu. Imwe muli ba nsi eno, nze tiri wa nsi eno. 24 Kye nava ni mbakoba nti mulifiira mu bibi byaimwe kuba bwe mutaikiriza muti ninze, muja kufiira mu bibi byaimwe.” 25 Baamubuuza bati: “Niiwe ani?” Yesu yaabairamu ati: “Kye mbaire mbakoberanga okuviira irala ku ntoolo. 26 Ndi n'ebintu kamaala eby'okuboogeraku era eby'okubasalira omusango aye eyantuma wa mazima, era nkobera ensi ebyo byonka bye mpulira okuva y'ali.” 27 Ti baakitegeera nga yali ali kwogera nabo ku Lata. 28 Agho Yesu yaabakoba ati: “Bwe mulighanika Omwana w'Omuntu, olwo lwe mulimanha nga ninze, era nga ghazira kye nkola ku bwange, aye Lata by'andhegeresa bye nkoba. 29 Eyantuma ali ninze, tiyandeka kuba zenka, kuba buliidho nkola ebyo ebimusangaaza.” 30 Yesu bwe yayogera ebyo, abantu kamaala bamwikiriza. 31 Yesu yaakoba Abayudaaya abaamwikiriza ati: “Bwe mukalangukira ku kibono kyange, ng'olwo muli beegeresebwa bange beenebeene. 32 Mulimanha amazima era amazima galibafuula ab'eidembe.” 33 Baamwiramu bati: “Ife tuli ku lulyo lwa Aburahamu era titubangaku bairu ba muntu yeenayeena. Kale okoba otya oti tulifuulibwa ab'eidembe?” 34 Yesu yaabairamu ati: “Bwenebwene ka mbakobere, kiisi akola kibi, aba mugheereza wa kibi. 35 Omwana aba wa ghaka obulamu bwe bwonabwona, aye omwiru taba wa ghaka obulamu bwe bwonabwona. 36 Kale Omwana bw'alibafuula ab'eidembe muliba ba idembe beenebeene. 37 Ndidhi muli ku lulyo lwa Aburahamu. Aye musala amagezi okundhita olw'okuba timwikiriza kibono kyange. 38 Nze ndhogera ku ebyo Lata by'andaga ate imwe mukola ebyo lata waimwe by'abakoba.” 39 Baamwiramu bati: “Lata waife ni Aburahamu.” Yesu yaabakoba ati: “Nguli bwenebwene mwali baana ba Aburahamu mwandibaire mukola ebyo Aburahamu bye yakolanga. 40 Nze mbakobera ebituufu bye nawulira okuva eri Katonda. Aye mperaano musala magezi ga kundhita. Aburahamu takolangaku kintu ng'oti n'ekyo! 41 Mukola bikolwa bya lata waimwe.” Baamukoba bati: “Ife tituli baghambule, tuli ni lata waife mulala ni Katonda mwene.” 42 Yesu yaabakoba ati: “Nguli Katonda n'eyali Lata waimwe mwandibaire mungonza kuba ewa Katonda ye nava naidha. Tyaidha ku bwange aye mwene n'eyantuma. 43 Lwaki timutegeera bye mbakoba? Lwa kuba timughanga kuwulirisa kibono kyange. 44 Muli ba lata waimwe Sitaani, era mugonza kukola lata waimwe by'ayenda. Oyo okuviira irala ku ntoolo mutemo era tabangaku wa mazima, kuba era azira mazima. Bw'ayogera eky'obuguya aba ali kutuukiriza butuukirize kikula kye, kuba oyo muguya era ise w'obuguya. 45 Aye kuba nze mbakobera ekituufu, timundhikiriza. 46 “Naani ku imwe anumiriza ekibi kye naali nkoze? Oba nga mbakobera ekituufu lwaki timundhikiriza? 47 Ole bw'aba omuntu wa Katonda awulira ebibono bya Katonda, aye imwe timuwulira, kuba timuli bantu ba Katonda.” 48 Abayudaaya baakoba Yesu bati: “Tituli batuufu okukoba tuti oli Musamaria era oliku omuzimu omubi?” 49 Yesu yaabairamu ati: “Nziraku muzimu mubi. Lata wange mmutaamu ekinhagansi aye imwe mumudhuuluusa. 50 Tigezaaku kwenooneza mwene kitiisa, ghaligho akiinooneza era akimpa. 51 Bwenebwene, ka mbakobere yeenayeena akalangukira ku kibono kyange, taja kufa.” 52 Agho Abayudaaya baamukoba bati: “Mperaano tukakaisa tuti oliku omuzimu omubi! Aburahamu yafa n'abalanzi boona baafa, aye iwe okoba oti yeenayeena akalangukira ku kibono ky'omugha talifa. 53 Niiwe osinga lata waife Aburahamu eyafa era n'abalanzi boona baafa? Weeyeta ki?” 54 Yesu yaabairamu ati: “Bwe neetaamu ekitiisa mwene, ekitiisa ekyo tikibaamu muzindo. Lata wange n'antaamu ekitiisa, imwe ye mwogeraku nga Katonda waimwe. 55 Timumumanhangaku aye nze mwidhi. Bwe nkoba nti timwidhi mba muguya ng'oti niimwe aye mmwidhi era ngema by'akoba. 56 Lata waimwe Aburahamu yeesumba okubona ebiseera by'okwidha kwange. Yabibona era yaasangaala.” 57 Agho Abayudaaya baamukoba bati: “Wabonera gha Aburahamu? Okaali na kugheza myaka makumi ataanu (50 ) gya bukulu.” 58 Yesu yaabairamu ati: “Bwenebwene ka mbakobere Aburahamu yali akaali kubaagho, nze nga ndigho.” 59 Agho baalonda amabaale nga benda bagamukube, aye Yesu yeegisa era yaava mu isinzizo.
1 Yesu bwe yali atambula yaabona omusaadha eyazaalibwa nga mutulu. 2 Abeegeresebwa be baamubuuza bati: “Mwegeresa, omusaadha ono okuzaalibwa nga mutulu naani eyayona? Mwene oba bazaire be?” 3 Yesu yaabairamu ati: “Mwene ti n'eyayona waire abazaire be, aye yatuluwala amaani ga Katonda gamweyolekeremu. 4 Tuteekwa okukola eby'oyo eyantuma nga bukaali musana, kuba obwire buli kwidha nga ghazira aghanga kukola. 5 Nga ndi mu nsi muno, ninze ekimuliikirira eky'ensi.” 6 Bwe yamala okwogera ebyo yaafuudha ku itaka, yaakola ekisoodo mu matanta n'enkungu yaakibbaaka ku maiso g'omusaadha. 7 Yaamukoba ati: “Ja onaabe mu maiso mu kidiba ky'e Siloamu.” (Eriina eryo litegeeza, “atumiibwa?”) Kale yaaja, yaanaaba, yaira ng'abona. 8 Ab'oku lulaalo lw'ewaibwe n'abantu abandi abaamubonanga ng'asabiriza, beebuuzagania bati: “Ono ti n'omusaadha eyatyamanga ghale ng'asabiriza?” 9 Abandi baakoba bati: “N'oyo.” Ate abandi baakoba bati: “Busa, ti n'oyo, kumufaanana bufaanane.” Agho omusaadha mwene yaakoba ati: “Ninze.” 10 Kyebaava ni bamubuuza bati: “Kiidha kitya okuba nga buti oghanga okubona?” 11 Yaabairamu ati: “Omusaadha ayetebwa Yesu akoze agho ekisoodo yaakimbaaka ku maiso, era yankoba nje nnaabe mu Siloamu. Kale naaja, naanaaba era naatoolera okubona.” 12 Baamubuuza bati: “Oyo ali luuyi gha?” Yairamu ati: “Tiidhi.” 13 Agho baaleeta ole eyali omutulu eri Abafarisaayo. 14 Olunaku Yesu lwe yakola ekisoodo n'azibula omutulu amaiso lwali lwa Sabbato. 15 Kale Abafarisaayo boona baabuuza omusaadha ensambo ye yazibukamu amaiso. Yaabakoba ati: “Yambbaaka ekisoodo ku maiso, naanaabamu, era mbona.” 16 Abafarisaayo abandi baakoba bati: “Omusaadha oyo ti wa Katonda, kuba tagondera mateeka ga Sabbato.” Aye abandi baakoba bati: “Omuntu omukozi ow'ebibi aghanga atya okukola ebyewuunhio oti ni bino?” 17 Agho kabiri baabuuza omusaadha eyali omutulu bati: “Oyo omwogeraku ki, nga bwe yakuzibwire amaiso?” Yaakoba ati: “Mulanzi.” 18 Aye Abayudaaya baali tibali kwikiriza ng'omusaadha oyo yali mutulu aye buti yaaba ng'abona, okutuusa bwe baayetesa abazaire be. 19 Baababuuza bati: “Ono mutabane waimwe ye muli kukoba muti yazaalibwa nga mutulu, kiidha kitya kiti mperaano abona?” 20 Abazaire be bairamu bati: “Twidhi ng'ono mutabane waife era nga yazaalibwa nga mutulu. 21 Aye kye tutaidhi n'okuba nga mperaano abona, era titwidhi eyamuzibwire maiso. Aye mumubuuze mwene, ti mwana muto aghanga mwene okweyogerera.” 22 Baayogera batyo lwa kutya Abayudaaya, kuba Abayudaaya baali bamaze okusalagho bati omuntu yeenayeena ayatula ati Yesu ni Kurisito wa kubingibwa mu sinagoga. 23 Kyebaava ni bakoba bati: “Mumubuuze mwene, ti mwana muto.” 24 Kabiri baayeta omusaadha eyabanga omutulu baamukoba bati: “Mu ga Katonda yogera ekituufu twidhi ng'omusaadha oyo mukozi wa bibi!” 25 Omusaadha yaabairamu ati: “Oba mukozi wa bibi nze tiidhi. Ekintu kirala kye ndidhi, nti nali mutulu aye mperaano mbona.” 26 Baamubuuza bati: “Kiki kye yakukolaku? Yakuzibula atya amaiso?” 27 Yaabairamu ati: “Mbakobeire nga timwenda kuwulira, mperaano lwaki kabiri mwenda okukiwulira, mwenda mwena kufuuka beegeresebwa be?” 28 Baamuvuma, baamukoba bati: “Niiwe omwegeresebwa w'oyo omusaadha aye ife tuli beegeresebwa ba Musa. 29 Twidhi nga Katonda yayogera ni Musa aye oyo omusaadha titwidhi y'ava.” 30 Omusaadha yaabakoba ati: “E! Kino kinene! Timwidhi y'ava ate nga yanzibwire amaiso! 31 Twidhi tuti Katonda tawulira bakozi ba bibi, aye awulira oyo amutaamu ekinhagansi era akola by'ayenda. 32 Okuviira irala ku kwinhama okw'ensi tikiwulirwangaku nga ghaligho eyazibula amaiso ag'omuntu eyazaalibwa nga mutulu. 33 Nguli omusaadha ono ti wa Katonda, ghazira kye yandighanze kukola.” 34 Agho baamukoba bati: “Wazaalirwa mu bibi era mw'okuliire, obwo weena waatwegeresa?” Baamubingira ku luya. 35 Yesu yaawulira nga bamubinze. Bwe yamubona yaamukoba ati: “Oikiriza Omwana ow'Omuntu?” 36 Omusaadha yaamukoba ati: “Musengwa, naani mmwikirize.” 37 Yesu yaamukoba ati: “Omuboine era n'ali kwogera n'iwe.” 38 Omusaadha yaakoba ati: “Musengwa, ndhikiriza.” Yaasinza Yesu. 39 Era Yesu yaakoba ati: “Ekyandeeta mu nsi n'okusala omusango, abatulu babone ate ababona bafuuke batulu.” 40 Abandi ku Bafarisaayo abaali agho naye, bwe baawulira ekyo baamukoba bati: “Otakoba oti ife tuli batulu?” 41 Yesu yaabairamu ati: “Nguli mwali batulu timwandibaire na kibi kyaimwe aye nga bwe mukoba muti mubona, ekibi kyaimwe kibasigalaku.
1 “Bwenebwene ka mbakobere: Ole atabita mu mulyango ng'angira mu kigo ky'entaama, aye n'aniinira aghandi, oyo aba mwibi era munhazi. 2 Oyo angira ng'abita mu mulyango, n'omwayi w'entaama edho. 3 Oyo omukuumi w'omulyango amwiguliragho. Entaama dhiwulira amamiro ge, ayeta kiisi ntaama ye eriina lyayo, yaadhifulumya. 4 Bw'amala okudhifulumya adhikulembereramu dhaamunonereza, kuba dhiidhi amamiro ge. 5 Oyo ye dhitaidhi ti dhimunonereza, dhimulumuka kuba tidhiidhi mamiro ge.” 6 Yesu yabakobera olufumo luno, aye tibaamanha kiki kye yali ali kutegeeza. 7 Agho Yesu kabiri yaabakoba ati: “Bwenebwene ka mbakobere, ninze omulyango gw'entaama. 8 Boonaboona abansooka okwidha baibi era banhazi, aye entaama ti dhaabawulira. 9 Ninze omulyango, yeenayeena abita mu nze ng'aingira, aliwona yaingira era yaafuluma, era yaafuna n'eby'okulya. 10 Omwibi taidhirira kindi okutoolaku okwiba, okwita n'okuzikiriza. Nze naidha dhibe n'obulamu ate nga bwa mwero. 11 “Ninze omwayi omulungi, omwayi omulungi aghaayo obulamu bwe olw'entaama dhe. 12 Oyo ayayira empeera nga ti n'omwayi mwene ntaama, bw'abona omusege nga gwidha aleka agho entaama yaalumuka, gwadhighalarira dheesasa. 13 Alumuka kuba ayayira mpeera, era tafaayo ku ntaama. 14 Ninze omwayi omulungi. Edhange ndiidhi era dhoona dhindidhi, 15 ng'oti ni Lata bw'andidhi zeena ni mmumanha. Era mpaayo obulamu bwange olw'entaama edho. 16 Ndi n'entaama edhindi, aye nga tidhiri mu kyayo kino. Nteekwa dhoona okudhireeta, dhiriwulira amamiro gange, era dhirifuuka dha mu kyayo kirala n'omwayi mulala. 17 “Kale Lata kyava angonza, kuba mpaayo obulamu bwange memale kabiri mbweirize. 18 Ezira abuntoolaku, ninze mwene mbughaayo ku lwange. Ndi n'obukumu okubughaayo ate kabiri naaba n'obukumu okubweiriza. Ekyo Lata n'eyandagira okukikola.” 19 Kabiri ghaabaagho obutaisania mu Bayudaaya olw'ebibono ebyo. 20 Bangi ku abo baakoba bati: “Aliku omuzimu omubi era mulalu, muwulirisa wa ki?” 21 Aye abandi baakoba bati: “Ebibono bino, ti bya muntu aliku muzimu mubi. Omuzimu gusobola gutya okuzibula amaiso ag'abatulu?” 22 Ekibinuko eky'Okwidhukira Okutukuza Eisinzizo mu Yerusalemu bwe kyatuuka, ebiseera byali bya kiinhogogo. 23 Yesu yali ali kutambula mu isinzizo mu kigangu kya Solomoni. 24 Abayudaaya baidha beesololeza agho okumwezungulula, baamubuuza bati: “Olikomya li okutuwubania? Tukobere amazima niiwe Kurisito?” 25 Yesu yaabairamu ati: “Bye nkola mu liina lya Lata wange bikakasa ekyo. Nabakobera aye timwaikiriza. 26 Imwe timwikiriza kuba timuli ntaama dhange. 27 Entaama dhange dhiwulira amamiro gange, ndiidhi era dhiinonereza. 28 Ndhigha obulamu obutawaagho era tidhirifa. Ghazira muntu yeenayeena asobola kudhinswankulaku. 29 Lata wange eyadhimpa n'asinga byonabyona, era ghazira asobola kudhimuswankulaku. 30 Nze ni Lata tuli muntu mulala.” 31 Agho Abayudaaya kabiri baalonda amabaale bagamukube. 32 Yesu yaabakoba ati: “Mbalaze ebirungi kamaala Lata by'ampa okukola. Ku ebyo kye muli kwenda okunkubira amabaale n'ekiri gha?” 33 Baamwiramu bati: “Tituli kwenda kukukuba mabaale lwa birungi by'okola, aye lwa kuvuma Katonda! Iwe oli muntu aye weefuula Katonda!” 34 Yesu yaabairamu ati: “Kyaghandiikibwa mu Mateeka gaimwe kiti, Katonda yakoba ati, ‘Muli bakatonda.’ 35 Oba nga abo Katonda be yagha ekibono kye yabeeta bakatonda, ate nga Ebyaghandiikibwa tibisobola kudiba, 36 memale mukoba mutya nze Lata ye yatukuza n'antuma mu nsi muti nvumye Katonda kuba nkobye nti ndi Mwana wa Katonda? 37 Oba nga bye nkola ti n'ebyo Lata by'ayenda kale mutandhikiriza. 38 Aye oba nga n'ebyo, ni bwemutandhikiriza nze kasinga mwikirize bye nkola, memale mumanhe era mutegeere nga Lata ali mu nze era zeena ndi mu Lata.” 39 Agho kabiri baayenda bamugeme aye yaabanuuka. 40 Agho Yesu, kabiri yaasomoka omwiga Yorudani yaaja mu kifo Yoanne ye yabatirizanga yaaba eyo. 41 Abantu kamaala baidha y'ali era baakoba bati: “Yoanne tiyakola kyewuunhio kyonakyona aye byonabyona bye yakoba ku musaadha ono byali bituufu.” 42 Era eyo abantu kamaala baamwikiriza.
1 Ghaaligho omusaadha eyalwala nga bamweta Lazaro. Yali mu kibuga Bethania omwabanga Maria ni muganda we Maritha. 2 Maria ono n'eyasiiga ebigere bya Musengwa omuzigo ogwa kawoowo n'abisiimuuza enviiri dhe, era n'eyali mwanhina Lazaro eyali omulwaire. 3 Kale baanhina lazaro oyo baatuma ye Yesu nga bakoba bati: “Musengwa, mukagwa wo mulwaire.” 4 Yesu bwe yakiwulira yaakoba ati: “Obulwaire obwo tibwakumwita, aye bwidhie okuleetera Katonda ekitiisa, era n'Omwana wa Katonda yeena afune ekitiisa.” 5 Yesu yali mukagwa wa Maritha ni muganda we era ni Lazaro. 6 Bwe yawulira ati Lazaro mulwaire yaasigala mu kifo mwe yali enaku edhindi ibiri. 7 Ebyo bwe byawa, yaakoba Abeegeresebwa be ati: “Kabiri tuje mu Buyudaaya.” 8 Abeegeresebwa baamukoba bati: “Mwegeresa, Abayudaaya baali benda kukukuba mabaale era y'oli kwenda okuja kabiri?” 9 Yesu yaabakoba ati: “Olunaku tirubaamu saawa ikumi na ibiri? Omuntu bw'atambula omusana taja nga yeewumya, kuba abona ekimuliikirira eky'ensi eno. 10 Aye bw'atambula obwire aja nga yeewumya kuba azira kimumuliikirira.” 11 Yesu bwe yamala okwogera ebyo yaakoba ati: “Mukagwa waife Lazaro atendwike, aye ndi kuja kumuzuusa.” 12 Abeegeresebwa be baamwiramu bati: “Musengwa oba atendwike, aidha kuwona.” 13 Yesu yayogera ku kufa kwa Lazaro, aye baadhuuba bati ategeeza kutenduka ndoolo. 14 Agho Yesu yaakibakobera busimbalaala ati: “Lazaro afiire. 15 Aye ku lwaimwe nsangaire okuba nti tyaliyo, kibasobozese okwikiriza. Aye mukole tuje y'ali.” 16 Agho Thomasi ayetebwa omulongo n'okukoba Abeegeresebwa baine ati: “Mukole tuje ni Musengwa tufiire ghalala naye!” 17 Yesu bwe yatuuka yayagaana nga Lazaro yaakamala enaku ina mu magombe. 18 Bethania kyali kilomita nga isatu okuva e Yerusalemu. 19 Era Abayudaaya kamaala baali baidhie okubona Maritha ni Maria n'okubasaasira olw'okufiirwa mwanhinaibwe. 20 Maritha bwe yawulira ati Yesu ali kwidha, yaaja okumusangaaza aye Maria yaasigala mu ndhu ng'atyaime. 21 Maritha yaakoba Yesu ati: “Musengwa nguli wali ghano mwanhinaze tiyandifiire! 22 Aye ni mperaano ndidhi nti Katonda aidha kwikiriza kyonakyona ky'onaamusaba.” 23 Yesu yaamukoba ati: “Mwanhoko wa kuzuukira.” 24 Maritha yaamwiramu ati: “Ndidhi nti wa kuzuukira ku lunaku lule olusembayo.” 25 Yesu yaamukoba ati: “Ninze okuzuukira era ninze obulamu. Kiisi aikiriza nze ni bw'afa, aba mulamu 26 era kiisi mulamu andhikiriza taja kufa. Bino obiikiriza?” 27 Yairamu ati: “Yii, Musengwa ndhikiriza nga niiwe Kurisito, Omwana wa Katonda, ow'okwidha mu nsi.” 28 Maritha bwe yamala okwogera ebyo yaaja yaayeta muganda we kawola ati: “Musengwa atuuse era ali kukweta.” 29 Maria bwe yawulira ekyo yaasituka mangu yaaja y'ali. 30 Yesu yali akaali kwingira mu kibuga, ng'akaali mu kifo Maritha ghe yamwagaana. 31 Abantu abaali ni Maria mu ndhu nga baidhie okumusaasira baamunonereza, bwe baabona ng'asitukiramu nga badhuuba bati yali ali kuja ku magombe kugegengera eyo. 32 Maria yaatuuka Yesu ghe yali era olwamubona ati yaakuba amakiryaivu gha bigere bye yaamukoba ati: “Musengwa, nguli wali ghano mwanhinaze tiyandifiire!” 33 Yesu yaamubona ng'ali kugegenga, n'abantu abaali bamunonereza boona nga bali kugegenga yaawulira enaku ku mwoyo era yeinhamira. 34 Yaababuuza ati: “Mwamuziika gha?” Baamukoba bati: “Musengwa, idha obone.” 35 Yesu yaalira. 36 Abantu baakoba bati: “Mubone bw'abaire amugonza!” 37 Aye abandi baakoba bati: “Ono eyazibula omutulu yali taghanga kulobera musaadha ono kufa?” 38 Kabiri Yesu ng'aidhwire okweinhamira yaaja y'amagombe. Gaakolebwa mu ngeri ya mpuku nga ku mulyango gwayo ghaligho eibaale. 39 Yesu yaabakoba ati: “Mutoolegho eibaale!” Maritha mwanhina omufu yairamu ati: “Musengwa, ekiwunha kiidha kuba kinene kuba yaakaba mu magombe enaku ina!” 40 Yesu yaamukoba ati: “Tyakukobeire nti wandiboine ekitiisa kya Katonda nguli oikiriza?” 41 Baatoolagho eibaale. Yesu yaalinga ghaigulu yaakoba ati: “Nsiimye inho Lata kuba ompuliire. 42 Ndidhi nti buliidho ompulira aye ekyo nkikobye lwa bantu abali ghano baikirize nga niiwe wantuma.” 43 Bwe yamala okukoba ebyo yaayetera ghaigulu ati: “Lazaro, fuluma!” 44 Yaafuluma ng'emikono gye n'ebigere bizingirire mu ngoye dhe baamuziikamu, n'ekighero mu maiso. Yesu yaabakoba ati: “Mumusibule.” 45 Bangi ku Bayudaaya abaali baidhie ewa Maria, bwe baabona Yesu bye yakola baamwikiriza. 46 Aye abandi baaja y'Abafarisaayo baabakobera ebyo Yesu bye yakola. 47 Agho Bakabona Abakulu n'Abafarisaayo, beesoloza mu lwekobaano era beebuuzagania bati: “Tukole tutya? Kuba omusaadha ono ali kukola ebyewuunhio kamaala. 48 Bwe tumuleka tutyo abantu boonaboona baidha kumwikiriza, era Abaroma baliidha baazikiriza ekifo kyaife ekitukuvu n'eighanga lyaife.” 49 Aye mulala ku abo, nga bamweta Kayafa, eyali Omukulu wa Bakabona mu mwaka ogwo, yaabakoba ati: “Ghazira kye mwidhi. 50 Timubona ng'ekisinga n'omuntu omulala okufiiririra abantu, mu kifo ky'eighanga lyonalyona okuzikirizibwa?” 51 Aye yali tali kukoba kino ku bubwe, aye okuva bwe yali nga n'Omukulu wa Bakabona mu mwaka ogwo, yali ali kulanga nga Yesu bwe yali aja okufiiririra eighanga eryo. 52 Ate nga tiikufiiririra ighanga kyonka aye n'okusoloza aghalala abantu ba Katonda abaali beeswireswire. 53 Okuva ni ku olwo baatanula lukwe lwa kumwita. 54 Kale ni Yesu yaalekera okweyaliza mu Bayudaaya, aye yaava agho yaaja mu kiketezo ekiri okumpi n'eirungu mu kibuga ekyetebwa Efuraimu, yaaba eyo n'Abeegeresebwa be. 55 Mperaano Ekibinuko eky'Okubitizibwa eky'Abayudaaya kyali kiri kumpi okutuuka. Abantu kamaala baava mu byalo baaja e Yerusalemu okwetukuza ng'Ekibinuko ekyo kikaali kutuuka. 56 Kale baayagala Yesu, era beebuuzagania beene na beene nga beemereire agho mu isinzizo bati: “Mudhuuba mutya? Anaidha ku kibinuko?” 57 Mperaano, Bakabona Abakulu n'Abafarisaayo, baali bamaze okugha ebiragiro bati, bweghabaagho omuntu yeenayeena amanha Yesu gh'ali, aja yaabamanhisa, baaja baamugema.
1 Kale ng'ekaabulayo enaku mukaaga okutuuka ku Kibinuko eky'Okubitizibwa, Yesu yaaja e Bethania, eyabanga Lazaro ye yazuukiza. 2 Eyo baamufumbirayo ekyeigulo era Maritha yaagheereza. Lazaro yaba mulala ku abo abaalya ni Yesu. 3 Maria yaatoola akadoome ak'omuzigo ogw'omughendo ogw'ekika kya narudo yaagusiiga ku bigere bya Yesu, era bwe yamala yaabisiimuuza enviiri dhe. Enhumba yaidhula akawoowo. 4 Agho Yuda Isikarioti owundi ku Beegeresebwa ba Yesu, eyali aja okumulyamu olukwe yaakoba ati: 5 “Lwaki omuzigo guno tigutundiibwamu dinari ebikumi bisatu (300 ) ni dhigheebwa baavu.” 6 Aye yakoba atyo, ti kuba nga yali afaayo inho ku baavu, aye lwa kuba yali mwibi. Ate era ng'omukuumi w'endyanga, yatwalanga empiiya edhaateebwangamu. 7 Aye Yesu yaakoba ati: “Omukazi mumuleke omuzigo agutereke okutuuka ku lunaku olw'okuziikibwa kwange. 8 Abaavu muba nabo buliidho, aye nze ti muba ninze buliidho.” 9 Abayudaaya kamaala baawulira bati Yesu ali Bethania. Baaja nga tibali kuja kubona Yesu yenka, aye n'okubona Lazaro Yesu ye yazuukiza mu bafu. 10 Olwo Bakabona Abakulu baasala olukwe okwita ni Lazaro. 11 Kuba olw'okuba oyo Abayudaaya kamaala baali bali kubavaaku baikiriza Yesu. 12 Ku lunaku olwairirira abantu kamaala abaali baidhie ku kibinuko baawulira nga Yesu ali kwidha mu Yerusalemu. 13 Baagema ensaga edh'emiti eminaazi baaja okumusangaaza, era baaleekaana bati: “Hosanna, wa nkabi oyo aidha mu liina lya Musengwa! Era wa nkabi Kyabazinga wa Isiraeli.” 14 Yesu yaafunayo endogoyi ento yaagityamaku nga bwe kyaghandiikibwa kiti: 15 “Imwe abantu b'e Sioni, mutatya! Mubone, Kyabazinga waimwe ali kwidha ng'atyaime ku ndogoyi ento.” 16 Ebyo Abeegeresebwa tibaabimanhiragho okutuusa nga Yesu amaze okutuuka mu kitiisa kya Ise, memale agho baidhukira ng'Ebyaghandiikibwa byamwogeraku bityo, era ng'ebyo baabimukolera. 17 Abantu abaaba ni Yesu bwe yayeta Lazaro okuva mu magombe n'amuzuukiza baakakasa ebyaligho. 18 Kale eikuukuubira ery'abantu lyaidha okumusangaaza, kuba baawulira nga yakola akamanhiso ako. 19 Agho Abafarisaayo baakoba bati: “Mubone, titukaasobola kuba ensi yoonayoona eri kuja y'ali!” 20 Mperaano, ghaaligho abandi ku Bagureki abaaja ku kibinuko okusinza. 21 Kale abo baaja ye Filipo ow'e Bethisaida mu Galilaaya baamukoba bati: “Isebo, twenda kubona Yesu.” 22 Filipo yaaja yaakobera Anderea era bombi baaja baakobera Yesu. 23 Yesu yaabakoba ati: “Ekiseera kituuse Omwana w'Omuntu agheebwe ekitiisa. 24 Bwenebwene, ka mbakobere: emuuma y'engaano bw'etagwa mu itaka n'efa esigala bedengedenge, aye bw'efa ereeta ebibala kamaala. 25 Oyo yeenayeena agonza obulamu bwe abufiirwa. Aye oyo akyagha obulamu bwe mu nsi muno abusigaza okutuuka mu bulamu obutawaagho. 26 Kiisi ayenda okumpeereza annonerezenga. Ghe mba n'omugheereza wange gh'anaabanga. Era Lata alita oyo yeenayeena ampeereza mu kifo eky'ekitiisa. 27 “Omwoyo gwange mweraliikirivu. Aye ate nkobe ntya? Nkobe nti: Lata mponia ekiseera kino? Aye ekyandeeta n'ekiseera kino okuntuukaku. 28 Lata, ta ekitiisa mu liina lyo!” Agho eiroboozi lyava mu igulu lyakoba liti: “Nalitaamu ekitiisa era kabiri ndidha kulitaamu.” 29 Eikuukuubira ery'abaali beemereire agho bwe lyawulira lyakoba liti: “Lukuba n'oluli kutyabuka.” Abandi baakoba bati: “Malaika n'ayogeire naye.” 30 Yesu yaabakoba ati: “Eiroboozi eryo liidhie ku lwaimwe aye ti ku lwange. 31 Kino n'ekiseera okusalira ensi omusango, mperaano abaire afuga ensi eno aja kubingibwa. 32 Bwe ndighanikibwa okuva ku nsi abantu boonaboona ndibaseesa ye ndi.” 33 Yayogera ebyo ng'ayoleka ensambo ye yali aja okufaamu. 34 Eikuukuubira lyamukoba liti: “Amateeka gatukoba gati Kurisito aja kuba mulamu ebyanda n'ebyanda. Aye iwe otukoba otya oti Omwana w'Omuntu ali n'okughanikibwa? Omwana w'Omuntu ono naani?” 35 Yesu yaabairamu ati: “Ekimuliikirira kiriku mu imwe entangama. Mutambule nga mukaali n'ekimuliikirira, tomanha nzikiiza bw'ebaagaana. Kuba atambula mu nzikiiza tamanha y'aja. 36 Mwikirize ekimuliikirira nga mukaali n'ekimuliikirira memale mufuuke abaana ab'ekimuliikirira.” Yesu bwe yamala okwogera ebyo yavaagho yaaja yaabeegisaaku. 37 Waire yali akoze obumanhiso kamaala nga babona, tibaamwikiriza. 38 Isaia omulanzi kye yakoba kyatuukirira, bwe yakoba ati: “Musengwa, naani eyaikiriza obukwenda bwaife? Naani Musengwa ye yayoleka amaani ge?” 39 Kale nga tibasobola kwikiriza, kuba era Isaia yakoba ati: 40 “Katonda abatuluwaiza, era yaakalangusa emyoyo, balobe kubona na maiso gaibwe, waire kutegeera na myoyo gyaibwe. Ti kulwa nga bagaluka baira ye ndi naabawonia.” 41 Isaia yakoba ebyo lwa kuba yabona ekitiisa kye era yaamwogeraku. 42 Waire ng'abafuzi kamaala baikiriza Yesu, ekyo tibaakyatula olw'okutya Abafarisaayo okubabinga mu sinagoga 43 kuba nga bagonza okusiimibwa abantu okusinga okusiimibwa Katonda. 44 Yesu yaayogerera ghaigulu ati: “Oyo andhikiriza taikiriza nze, aye aikiriza n'oyo eyantuma, 45 oyo ambona, abona oyo eyantuma. 46 Nze naidha mu nsi ng'ekimuliikirira, kiisi andhikiriza alobe kusigala mu nzikiiza. 47 Omuntu yeenayeena awulira ebibono byange n'atabigema tigumusalira, kuba nze tyaidha kusalira nsi musango aye naidha kugirokola. 48 Oyo aloba nze era n'asambaadha ebibono byange, ali n'amusalira omusango. Ebibono bye ndhogera n'ebirimusalira omusango ku lunaku olw'ensembo. 49 Kuba tyayogeranga ku bwange aye Lata eyantuma n'eyampa eby'okwogera n'eby'okukoba. 50 Era ndidhi ng'ekiragiro kye kino kigha obulamu obutawaagho. Kale ni bye ndhogera mbyogera nga Lata bwe yankoba.”
1 Mperaano Ekibinuko eky'Okubitizibwa kyali kiri kumpi okutuuka. Yesu yamanha ng'esaawa ye ey'okuva mu nsi okwirayo ye Ise yoona yali etuuse. Bwe yagonza ababe abaali mu nsi yabagonza okutuukiza irala ku nkomerero. 2 Yesu n'Abeegeresebwa be baali balya ekyeigulo, era Sitaani yali amaze okuta mu mwoyo gwa Yuda Isikarioti mutabane wa Simoni ekidhuubo eky'okulya mu Yesu olukwe. 3 Yesu yali akiidhi nga Lata yata ebintu byonabyona mu buyinza bwe era yali akiidhi nga yava ye Katonda era ng'ali kuja ye Katonda. 4 Kale yaasituka ku kiiwulo yaisa ghale ebivaalo bye yaagema tawulo yaagyesiba mu nkende. 5 Agho yaafuka amaadhi mu benseni, yaatoolera okunaaza Abeegeresebwa be ebigere nga bw'abisiimuula n'etawulo ye yali yeesibye mu nkende. 6 Bwe yatuuka ku Simoni Petero, Petero yaamukoba ati: “Musengwa, oja kunaaza nze bigere?” 7 Yesu yaamwiramu ati: “Mperaano iwe totegeera nze kye ndi kukola aye olikitegeera nga bino bibise.” 8 Petero yairamu ati: “Tikiribaagho iwe okunaaza nze ebigere!” Aye Yesu yaamukoba ati: “Bwe ntakunaaza ng'olwo tokaali mwegeresebwa wange.” 9 Simoni Petero yaamwiramu ati: “Musengwa niini otaannaaza bigere byonka, aye nnaaza n'emikono era n'omutwe!” 10 Aye Yesu yaamukoba ati: “Omuntu yeenayeena bw'aba ng'amaze okunaaba aba yeenayeena atukwire era nga tiyeetaaga kabiri kunaaba, okutoolaku ebigere byonka era imwe mutukula, waire ti mwenamwena.” 11 Yesu yali amaze okumanha aja okumulyamu olukwe, kyeyava n'akoba ati: “Imwe mutukula, waire ti mwenamwena.” 12 Kale bwe yamala okubanaaza ebigere yaatoola ebivaalo bye era yaira ku kiiwulo. Yaababuuza ati: “Kye mbakoze mukitegeera? 13 Mundheta Omwegeresa era Musengwa, era muli batuufu okundheta mutyo kuba era ekyo kye ndi. 14 Kale oba nga nze Musengwa era Omwegeresa waimwe mbanaaziiza ebigere, mwena muli n'okunaazaganianga ebigere. 15 Kuba mbaghaire eky'okuboneraku, mwena mughange okukola nga nze bwe mbakoze. 16 Bwenebwene ka mbakobere: omwiru tasinga Musengwa we, era omutume tasinga oyo amutuma. 17 Bino bwe muba mubiidhi, muli ba nkabi bwe mubikola. 18 “Aye tiri kwogera ku imwe mwenamwena, ndidhi abo be nalonda. Aye Ebyaghandiikibwa biri n'okutuukirira, ebikoba biti, ‘Omuntu mwene alya ku mugaati gwange n'anfuukiire omuzigu.’ 19 Ndi kubakobera bino mperaano nga bikaali kubaagho, lwe biribaagho mukakase muti ninze Oyo. 20 Bwenebwene ka mbakobere: oyo yeenayeena asangaalira ye mba nga ntumye, aba asangaaliire nze. Ate oyo ansangaalira, aba asangaaliire oyo eyantuma.” 21 Yesu bwe yamala okwogera ebyo yaawulira obweraliikirivu mu mwoyo. Agho yaakakasa ati: “Bwenebwene ka mbakobere: ku imwe ghaligho anandyamu olukwe.” 22 Abeegeresebwa be baalingaganaku, nga beewuunhia naani ye yali ali kwogeraku. 23 Omwegeresebwa oyo Yesu ye yagonzanga einho yali atyaime kumpi naye. 24 Simoni Petero yaamusunaku, yaamukoba ati: “Mubuuze, naani y'ali kukoba.” 25 Kale, oyo yaaseeta kumpi ni Yesu yaamubuuza ati: “Musengwa, naani?” 26 Yesu yaamwiramu ati: “N'oyo ye nja okukoleza ekitole kino nkimughe.” Kale bwe yamala okukoza ekitole yaakigha Yuda mutabane wa Simoni Isikarioti. 27 Yuda bwe yamala ati okufuna ekitole ekyo, Sitaani yamungiramu. Yesu yaamukoba ati: “Ky'oja okukola kikole mangu!” 28 Ku baali ku kiiwulo ghazira yamanha lwaki Yesu yamukoba atyo. 29 Abandi baali badhuuba bati engeri Yuda ye yali omugemi w'endyanga, Yesu yali ali kumukoba kuja kugula bye beetaaga ku kibinuko, oba kubaaku ni ky'agha abaavu. 30 Kale Yuda bwe yamala okufuna ekitole ekyo yaafuluma ku luya mangu. Bwali bwire. 31 Yuda bwe yamala okufuluma, Yesu yaakoba ati: “Mperaano Omwana w'Omuntu agheereibwa ekitiisa era mu oyo Katonda agheereibwa ekitiisa. 32 Oba nga ekitiisa kya Katonda kyeyolekeire mu oyo, Katonda aidha kwolesa ekitiisa ky'oyo mu mwene, aghazira kulwa. 33 Baana bange, nkaali n'imwe akaseera katono. Mulindhagala, aye nga bwe nakoba Abayudaaya mwena bwe mbakoba buti, ‘Ye nja timughanga kwidhayo.’ 34 Mbagha ekiragiro ekiyaaka: Mugonzanienga. Nga nze bwe nabagonza, mwena mugonzanienga mutyo. 35 Kiisi muntu bw'agonzanga mwine, ku ekyo abantu boonaboona kwe balimanhira nga muli beegeresebwa bange.” 36 Simoni Petero yaamubuuza ati: “Musengwa olaga gha?” Yesu yaamwiramu ati: “Mperaano toghanga kuunonereza ye ndaga, aye oidha kuunonereza ye bwidha.” 37 Petero yaamukoba ati: “Musengwa lwaki tighanga kukunonereza mperaano? Ndidha kughaayo obulamu bwange ku lulwo!” 38 Yesu yaamwiramu ati: “Onaaghaayo obulamu bwo ku lwange? Bwenebwene ka nkukobere: enkoko teidha kukolyoka ng'okaali kuneegaana emikuzi esatu.”
1 Yesu yaabakoba ati: “Mutabanga beeraliikirivu mu myoyo gyaimwe. Mwikirize Katonda, zeena mundhikirize. 2 Mu ndhu ya Lata wange mulimu ebifo kamaala era ndi kuja kubategekera kifo. Nguli ti bwekiri tyandibakobeire kino. 3 Bwe ndimala okuja n'okubategekera ekifo ndiira naabatwala ye ndi, mwena mwaba ghe ndi. 4 Engira mugiidhi etuuka ye nja.” 5 Thomasi yaamukoba ati: “Musengwa, titwidhi y'olaga memale tughanga tutya okumanha engira etuukayo?” 6 Yesu yaamwiramu ati: “Ninze engira, ninze amazima, era ninze obulamu. Ezira atuuka ye Lata okutoolaku ng'abise mu nze. 7 Nguli nze mundidhi ni Lata wange mwandimumanhie, era okuva ni mperaano mumwidhi era mumuboine.” 8 Filipo yaamukoba ati: “Musengwa, tulage Lata kinaatumala.” 9 Yesu yairamu ati: “Filipo mbaire n'imwe okumala entangama, aye era waaba nga tondidhi? Oyo abona nze aba aboine Lata. Memale okoba otya oti, ‘Tulage Lata?’ 10 Toikiriza nga nze mba mu Lata era ni Lata yaaba mu nze? Ebibono bye mbakoba tibibakoba ku bwange, aye Lata oyo aba mu nze mwene n'akola. 11 Mwikirize kye mbakoba nti: nze mba mu Lata era ni Lata yaaba mu nze. Oba ng'ekyo tikimala mwikirize olw'ebyo bye nkola. 12 Bwenebwene ka mbakobere: andhikiriza alikola bye nkola ate alikola n'ebisinga agho, kuba nze ndi kuja ye Lata. 13 Era kyonakyona kye munaasabanga mu liina lyange ndikikola, ekitiisa kya Lata kyeyolekere mu Mwana. 14 Bwe munaasabanga ekintu kyonakyona mu liina lyange, ndikikola. 15 “Oba nga mungonza, mugemenga ebiragiro byange. 16 Zeena ndisaba Lata, era alibagha Omubeezi owundi atalibavaaku ebyanda n'ebyanda. 17 Ni Mwoyo ow'amazima. Abantu ab'ensi tibasobola kumusangaalira, kuba tibamubona era tibamwidhi. Aye imwe mumwidhi kuba aba n'imwe, era aba mu imwe. 18 “Tiribaleka nga muli baghafu, ndiira ye muli. 19 Esigaire akaseera katono ensi erekere okumbona aye nga imwe mumbona. Olw'okuba nze ndi mulamu, mwena mwidha kubanga balamu. 20 Olunaku olwo bwe lulituuka mulimanha nga mba mu Lata wange, imwe mwaba mu nze, ate nze naaba mu imwe. 21 Oyo aganha ebiragiro byange era n'abigema, aba nga n'oyo angonza. Lata wange agonza oyo angonza, zeena naamugonza, era Lata wange oyo amweyolekeramu.” 22 Yuda, atali Isikarioti, yaamubuuza ati: “Musengwa, olyeyoleka otya ye tuli n'oteeyoleka eri nsi?” 23 Yesu yaamwiramu ati: “Oyo angonza agema ekibono kyange, oyo Lata wange alimugonza era Lata, ninze tulija y'ali twasiisira eyo. 24 Oyo atangonza tagema bibono byange. Ate ng'ekibono kye muwulira ti kyange aye kya Lata eyantuma. 25 “Mbakobeire ebintu bino nga nkaali n'imwe. 26 Aye omubeezi, Mwoyo Mutukuvu, Lata y'alituma mu liina lyange, alibeegeresa ebintu byonabyona, yaabaidhusa byonabyona bye nabakoba. 27 “Mbalekeire emiraala, emiraala gyange gyene gye mbaghaire ate tigibaghaire ng'ensi bw'egigaba. Muteeraliikirira mu myoyo gyaimwe waire okutya. 28 Muwuliire bwe mbakobye nti ndi kuja, aye ndi kwira ye muli. Nguli mubaire mungonza mwandibaire basangaavu olw'okuba ndi kuja ye Lata. Kuba oyo asinga nze. 29 Mbakobeire ebintu bino nga bikaali kubaagho, lwe biribaagho mwikirize. 30 Tiidha kwogera bintu kamaala n'imwe kuba omufuzi ow'ensi eno ali kwidha. Aye nze tanfuga. 31 Aye nkola nga Lata bw'andagira, ensi emanhe nga ngonza Lata. Musituke tuje, tuve ghano.”
1 “Ninze omuzabbibu gwenegwene, ate Lata wange n'omulimi. 2 Kiisi lusaga oluli ku nze olutayama alukutulaku, ate kiisi lusaga olwama aluwoolera lwanhirira male lwayama inho. 3 “Imwe mperaano muli balongoofu olw'ebibono bye mbakoba. 4 Mube mu nze zeena mbe mu imwe nga tibavaamu. Ng'olusaga bwe lutaghanga kwama nga luli lwonka, okutoolaku nga luli ku muzabbibu, mwena timughanga kwama okutoolaku nga muli mu nze. 5 “Ninze omuzabbibu, niimwe ensaga. Oyo aba mu nze zeena ni mmubaamu, ayama inho kuba ghazira kye musobola ghe nzira. 6 Oyo atasigala mu nze asuulibwa ere ng'oti n'olusaga bwe lusuulibwa ere ni lukala ensaga ng'oti n'edho dhisolozebwa dhaasuulibwa mu muliro dhaaya. 7 Bwe muba mu nze n'ebibono byange ni biba mu imwe, musabenga kyonakyona kye mwenda kinaabakolerwanga. 8 Bwe mwama einho muba beegeresebwa bange era mwoleka ekitiisa kya Lata wange. 9 Nga Lata bw'angonza, zeena bwe mbagonza. Mwekalangulire mu mukwano gwange. 10 Bwe muwulira ebiragiro byange mwidha kwekalangulira mu mukwano gwange oti ninze bwe mpulira ebiragiro bya Lata wange ni neekalangulira mu mukwano gwe. 11 “Bino mbibakobeire eisanhu lyange libe mu imwe era eisanhu lyaimwe libe nga lituukiriire. 12 Ekiragiro kyange ni kino: mugonzanienga ng'oti ninze bwe mbagonza. 13 Ghazira ali na kugonza kusinga kw'oyo aghaayo obulamu bwe ku lwa bakagwa be. 14 Bwe mukola bye mbalagira muba bakagwa bange. 15 Tikaabeeta bagheereza, kuba omugheereza tamanha Musengwa we by'akola. Aye mbeeta bakagwa bange, kuba byonabyona bye nawulira okuva ewa Lata wange nabibamanhisa. 16 Ti niimwe abaanonda aye ninze eyabalonda era naabataagho okuja okwama ebibala, ebibala ebitawaagho. Era Lata anaabaghanga kyonakyona kye munaasabanga mu liina lyange. 17 Kino kye mbalagira: mugonzanienga. 18 “Oba nga ensi ebakyagha, muteerabira nga ninze ensi ye yasooka okukyagha. 19 Nguli muli ba nsi, ensi yandibagonziiza ng'abaayo. Aye nabalonda okuva mu nsi era timukaali ba nsi, ensi ky'eva n'ebakyagha. 20 Mwidhukire kye mbakobye: omugheereza tasinga Musengwa we. Oba nga nze bankiriga, mwena balibakiriga; oba nga baawulira ebibono byange, ebyaimwe byona balibiwulira. 21 Aye balibakola bino byonabyona ku lwange, kuba tibaidhi oyo eyantuma. 22 Nguli tyaidha ni ndhogera nabo nguli bazira kibi, aye mperaano bazira kya kwegemya. 23 Akyagha nze, akyagha ni Lata wange yeena. 24 Nguli tyakola byewuunhio nga babona, omuntu owundi by'atakolangaku, nguli bazira kibi. Aye mperaano baabibona, era baatukyagha twembi nze ni Lata wange. 25 Kino kyali kiri n'okubaagho okutuukiriza ekyaghandiikibwa mu Mateeka gaibwe ekikoba kiti: “Bankyayiire busa.” 26 “Aye Omubeezi bw'aliidha ye ndibatumira okuva eri Lata, Mwoyo ow'amazima ava mu Lata, oyo alindhulira. 27 Era mwena mulindhulira kuba mubaire ninze okuviira irala ku ntoolo.
1 “Mbakobeire ebintu bino mulobe kuwaamu maani. 2 Balibabinga mu sinagoga. Ate ekiseera kirituuka oyo abaita lw'alirowooza ati okukola ekyo aba ali kukola mulimo gwa Katonda. 3 Ebintu bino balibikola olw'okuba tibamanhanga Lata waire nze. 4 Aye mbakobeire ebintu bino ekiseera kyabyo kije okutuuka nga mwidhukira nga nabibakoberaku. “Ebintu bino tyabibakobera mu kwinhama kuba nali ndi n'imwe. 5 Aye mperaano ndi kuja y'oyo eyantuma, era ghazira ku imwe ambuuza ati: “Olaga gha?” 6 Era olw'okuba mbakobeire ebintu ebyo, enaku ebaidhwire ku mwoyo. 7 Aye mbakobera amazima: niimwe abaganhulwa bwe nja kuba bwe ntaja Omubeezi taliidha ye muli aye bwe ndija ndimubagheereza. 8 Era bw'aliidha alirumiriza ensi ku bigema ku kibi, ku butuufu era ni ku kusalirwa omusango. 9 Aligirumiriza ku bigema ku kibi, kuba tiyandhikiriza. 10 Aligirumiriza ku bigema ku butuufu, kuba ndi kuja ye Lata era timukairayo kumbona. 11 Aligirumiriza ku bigema ku kusalirwa omusango, kuba afuga ensi eno yamala ira okusalirwa omusango. 12 “Nkaali n'ebintu kamaala eby'okubakobera aye timughanga kubigumira mperaano. 13 Aye oyo bw'aliidha, Mwoyo ow'amazima, alibatuusa ku mazima goonagoona. Talyogera bibye ku bubwe aye by'awulira by'alyogera, era alibakobera eby'okubaagho. 14 Alyoleka ekitiisa kyange kuba alitoola ebyange yaabibakobera. 15 Ebya Lata wange byonabyona byange, kye nviire ni nkoba nti Mwoyo alitoola ebyange yaabibakobera. 16 “Mu ntangama ti ya ghala nga timukambona, ate mu ntangama ntono mulimbona.” 17 Abandi ku Beegeresebwa be baatoolera okwebuuzagania bati: “Kiki kino ky'atukoba, ati, ‘Mu kiseera ekitali kya ghala nga timumbona, ate kabiri mu kiseera kitono mulimbona.’ Era ati, ‘Kuba nja ye Lata.’ 18 Agho baakoba bati, ‘Ategeeza ki bw'akoba ati entangama entono?’ Nga tituli kutegeera ky'akoba!” 19 Yesu yaategeera nga bali kwenda kumubuuza, yaabakoba ati: “Muli kwenda kumanha kino kye mbakobye nti, ‘Mu ntangama ntono muliba nga timukambona, ate kabiri nti, mu ntangama ntono mulimbona?’ 20 Bwenebwene ka mbakobere, mulirira, mwagegenga, aye ensi erisagamba; muliwulira enaku, aye enaku yaimwe erifuuka eisanhu. 21 Omukazi bw'aba ng'aja okuzaala awulira obulumi kuba ekiseera kye kituuse, aye kasita amala okuzaala omwana, aba nga takaidhukira bulumi olw'eisanhu ery'okuzaala omuntu ku nsi. 22 Mperaano mwena muwulira, enaku aye ndidha kabiri kubabona era emyoyo gyaimwe gisagambe. Era okusagamba okwo ghazira muntu yeenayeena alikubatoolaku. 23 Olunaku olwo bwe lulituuka timulimbuuza kintu kyonakyona. Bwenebwene ka mbakobere: Lata alibagha kyonakyona kye mulisaba mu liina lyange. 24 Ni ye buli eno timusabangaku kintu kyonakyona mu liina lyange. Musabe muligheebwa, okusagamba kwaimwe kwatuukirira. 25 “Mbairenga nkozesa ndheso okubakobera ebintu bino aye ekiseera kiidha kutuuka mbe nga tikaayogera n'imwe mu ndheso, aye mbakobere busimbalaala ebigema ku Lata. 26 Ku lunaku olwo mulimusaba mu liina lyange. Era tibakoba nti ndibasabiragho ye Lata. 27 Lata mwene abagonza, kuba mwangonza era mwaikiriza nga nva wa Katonda. 28 Nava ewa Lata naidha mu nsi kabiri ndi kuva mu nsi nja ye Lata.” 29 Abeegeresebwa be baakoba bati: “Mperaano oboneka ni otooleire okwogera obusimbalaala nga tokozeisa ndheso. 30 Mperaano twidhi nga oidhi byonabyona era tikyetaagisa muntu yeenayeena kukubuuza. Kyetuva twikiriza nga ova wa Katonda.” 31 Yesu yaabairamu ati: “Mperaano mwikiriza? 32 Ekiseera kiri kwidha era kituuse musansaanire buli muntu ewuwe mundeke zenka. Ate nga tiri zenka, kuba Lata ali ninze. 33 Bino mbibakobeire mube miraala mu nze. Mu nsi muno mwidha kufuna ebizibu aye mugumenga, nze mpangwire ensi.”
1 Yesu bwe yamala okukoba ebyo, yaalinga ghaigulu yaakoba ati: “Lata, ekiseera kituuse. Yoleka abantu ekitiisa ky'Omwana wo, n'Omwana asobole okubooleka ekitiisa kyo. 2 Wamugha obukumu ku bantu boonaboona aghe obulamu obutawaagho abo boonaboona be wamugha. 3 Era obulamu obutawaagho ni buno: Abantu okukumanha iwe wenka Katonda ow'amazima n'oyo ye watuma, Yesu Kurisito. 4 Ndholeike ekitiisa kyo mu nsi era mmaze okukola ekyo kye wampa okukola. 5 Era mperaano Lata, yoleka ekitiisa kyange mu maiso go, n'ekitiisa kye nali nakyo n'iwe ng'ensi ekaali kubaagho. 6 “Abo be wampa okuva mu nsi nabamanhisa eriina lyo. Baali babo, waabampa era baagema ebibono byo. 7 Mperaano bamanhie nga byonabyona bye wampa byava y'oli. 8 Kuba ebibono bye wampa mbibakobeire era baabisangaalira. Bamanhie bati bwenebwene nava y'oli era baikiriza nga niiwe owantuma. 9 “Abo be ndi kusabira. Tiri kusabira ba nsi, aye ndi kusabira abo be wampa, kuba babo. 10 Abange boonaboona babo era ababo boonaboona bange, era mu abo mwe nfunira ekitiisa. 11 Nze ndi kwidha y'oli, tikaali mu nsi, aye abo bakaali mu nsi. Lata Omutukuvu, abo be wampa bakuumenga ng'okozesa obukumu obw'eriina lyo eryo, babe kitole oti ninze n'iwe bwe tuli. 12 “Bwe nali nga ndi nabo, nali nga mbakuuma nga nkozesa obukumu bw'eriina lyo lye wampa. Nabakuuma era ghazira yaghaba okutoolaku oyo eyali ow'okuzikirira, Ebyaghandiikibwa bisobole okutuukirira. 13 Mperaano ndi kwidha y'oli era bino mbyogeire mu nsi babe n'eisanhu lyange mu myoyo gyaibwe, mu bwidhuvu. 14 Nze nabakoba ekibono ekyo, era ensi yaabakyagha, kuba ti ba nsi ng'oti ninze bwe ntali wa nsi. 15 Tiri kukusaba kubatoola mu nsi aye ndi kukusaba obawonie Omubi. 16 Bano ti ba nsi nga nze bwe ntali wa nsi. 17 Batukuze n'amazima ekibono kyo n'amazima. 18 Mbatuma mu nsi ng'oti niiwe bwe wantuma mu nsi. 19 Nze neeghaayo ku lwaibwe, memale boona beegheeyo mu mazima. 20 “Tiri kusabira bano bonka aye ndi kusabira n'abo boonaboona abandhikiriza olw'ebibono bya bano. 21 Boonaboona babe kitole, nga iwe Lata bw'oba mu nze zeena ni mba mu iwe, boona babe mu ife memale ensi eikirize eti niiwe owantuma. 22 Ekitiisa kye wampa nakibagha memale olwo babe ekitole, nga ife bwe tuli ekitole. 23 Nze mbabeemu weena obe mu nze memale olwo babeere irala ekitole, n'ensi emanhe nga niiwe owantuma era ng'obagonza nga bw'ongonza. 24 Lata, kye neegomba n'okuba n'abo be wampa ghe ndi, babone ekitiisa kyange kye wampa, kuba wangonza nga n'ensi ekaali kutondebwa. 25 Lata Omutukuvu, ensi tekumanhanga aye nze nkwidhi era bano baidhi nga niiwe owantuma. 26 Nabamanhisa eriina lyo era ndidha kwongera okulimanhisa, okugonza kw'ongonza kubabeemu era zeena mbabeemu.”
1 Yesu bwe yamala okwogera ebyo, yaaja n'Abeegeresebwa be, baasomoka akaiga ka Kiduroni. Eyo yaliyo enimiro mwe yangira n'Abeegeresebwa be. 2 Mperaano, Yuda eyamulyamu olukwe yali aidhiyo bukalamu, kuba Yesu n'Abeegeresebwa be baateranga okujaayo emikuzi kamaala. 3 Kale Yuda yaaja mu kifo ekyo n'abaisirukale n'abakuumi abaatumibwa Bakabona Abakulu n'Abafarisaayo. Baaja nga bagemye eby'okulwanisa, amataala n'engada edhiri kwaka. 4 Yesu yamanha byonabyona ebyali bija okumutuukaku, yeesowolayo yaababuuza ati: “Muli kwagala ani?” 5 Baamwiramu bati: “Yesu ow'e Nazarethi.” Yesu yaabairamu ati: “Ninze.” Yuda eyamulyamu olukwe yali ayemereire agho nabo. 6 Yesu bwe yabakoba ati: “Ninze,” beesenda baagwa ghansi. 7 Kabiri yaababuuza ati: “Muli kwagala ani?” Era bairamu bati: “Yesu ow'e Nazarethi.” 8 Yesu yaabakoba ati: “Mbakobeire nti ninze, era oba nga ninze ye muli kwagala bano mubaleke baje.” 9 Ekibono kye yayogera ati: “Ku be wampa ghazira ye nabuza,” kyatuukirira. 10 Agho Simoni Petero eyali n'empiima yaagisowolayo, yaatema omwiru w'Omukulu wa Bakabona yaamukutulaku kutu ow'oku mukono omusaadha. Eriina ery'omwiru oyo nga ni Maluko. 11 Aye Yesu yaakoba Petero ati: “Empiima yo giize mu kiruutu kyayo. Ekikopo Lata ky'ampaire nnaaloba okukinhwa?” 12 Agho abaisirukale, n'omukulu waibwe, n'abakuumi b'Abayudaaya baagema Yesu baamusiba. 13 Baasooka baamutwala ye Anna. Ono n'eyali mukoirume wa Kayafa eyamuzaalira mukazi we, ate Kayafa n'eyali Omukulu wa Bakabona ow'omwaka ogwo. 14 Kayafa oyo n'eyagha Abayudaaya amagezi ati ekisinga n'omuntu omulala okufiiririra abantu boonaboona. 15 Simoni Petero yaanonereza Yesu, era ghaabaagho n'Omwegeresebwa owundi eyanonereza. Ono Omwegeresebwa owundi yali amanhiibwa Omukulu wa Bakabona. Kale yangira ni Yesu mu kisaagaati ky'Omukulu wa Bakabona. 16 Aye Petero yasigala ku luya ku mulyango. Omwegeresebwa ole owundi eyali amanhiibwa yairayo ku mulyango yaayogera n'omugheereza omughala eyali akuuma omulyango, era yaingiza Petero. 17 Omughala eyali akuuma omulyango yaakoba Petero ati: “Iwe toli Mwegeresebwa wa musaadha ole?” Petero yaamwiramu ati: “Busa, tiri.” 18 Ebiseera byali bya kiinhogogo, kale abagheereza n'abakuumi baali bakozeegho omuliro ogw'amanda nga beemereire agho bali kwota. Petero yeena yali ayemereire nabo agho ng'ali kwota. 19 Agho Omukulu wa Bakabona yaabuuza Yesu ebigema ku Beegeresebwa be, ni ku bye yali ng'ayegeresa. 20 Yesu yaamwiramu ati: “Buliidho nayogeranga nga boonaboona babona. Mbairenga nga ndhegereseza mu sinagoga ni mu isinzizo, Abayudaaya boonaboona mwe beesololezanga. Ghazira kye nayogera mu ngiso. 21 Kale lwaki ombuuza? Buuza abo abaawulira bye nabakoba, baidhi bye nakoba.” 22 Yesu bwe yakoba ebyo, omukuumi mulala ku baali beemereire agho yaamukuba oluyi ng'akoba ati: “Otyo bw'oiramu Omukulu wa Bakabona.” 23 Yesu yairamu ati: “Oba nga ghaligho ekibi kye nkobye, numiriza. Aye oba nga ndhogeire kituufu, onkubiire ki?” 24 Agho Anna yaamugheereza ye Kayafa Omukulu wa Bakabona era ng'akaali musibe. 25 Mperaano Simoni Petero yali akaayemereire agho ng'ali kwota omuliro. Baamubuuza bati: “Iwe toli Mwegeresebwa wa musaadha oyo?” Petero yeegaana ati: “Busa, tiri.” 26 Omugheereza owundi ow'Omukulu wa Bakabona nga wa kika n'ole Petero ye yasalaku kutu yaakoba ati: “Tyakuboine naye mu nimiro?” 27 Kabiri Petero yeegaana era agho enkoko yaakolyoka. 28 Obwire nga bwakakya, baatoola Yesu mu ndhu ya Kayafa baamutwala mu kisaagaati ky'omufuzi Omuroma ekyetebwa Puraetorio. Aye beene tibangira mu kisaagaati ekisalirwamu emisango olw'obutenda kwereetaku mbiidhabiidha, basobole okulya ku Kibinuko eky'Okwidhukiriraku Okubitizibwa. 29 Kale Pilato yaafuluma yaaja ku luya ye baali yaababuuza ati: “Omusaadha ono mumulanga ki?” 30 Baamwiramu bati: “Nguli ti mukozi wa bibi titwandimughaireyo y'oli.” 31 Pilato yaabakoba ati: “Mumutwale mumuwozese imwe beene nga mujiira ku mateeka gaimwe.” Abayudaaya baamwiramu bati: “Ife titwikirizibwa kusalira muntu yeenayeena gwa kufa.” 32 Yesu kye yayogera ku kufa kwe kyatuukirira. 33 Agho Pilato yangira kabiri mu kisaagaati yaayeta Yesu yaamubuuza ati: “Niiwe Kyabazinga w'Abayudaaya?” 34 Yesu yaamwiramu ati: “Ekyo okyogeire ku lulwo, oba ghaligho abakukobeire ebinfaaku?” 35 Pilato yaamukoba ati: “Nze ondhese Muyudaaya? Abantu b'eighanga lyo ni Bakabona Abakulu n'abakughaireyo ye ndi okoze ki?” 36 Yesu yaamwiramu ati: “Obwakyabazinga bwange ti bwa mu nsi muno. Nguli obwakyabazinga bwange bubaire bwa mu nsi muno, abasaadha bange baakalwaine naaloba kugheebwayo mu mikono gya Bayudaaya. Aye obwakyabazinga bwange ti bwa mu nsi muno.” 37 Pilato yaamukoba ati: “Ekikoba oli kyabazinga?” Yesu yaamwiramu ati: “Okyogeire, ndi kyabazinga. Kino kye nazaalirwa, era ekyandeeta mu nsi ni kino: okumanhisa amazima. Oyo yeenayeena ow'amazima, awulira eiroboozi lyange.” 38 Pilato yaamukoba ati: “Amazima ni ki?” Pilato bwe yamala okwogera ebyo yaaja ku luya y'Abayudaaya kabiri yaabakoba ati: “Omuntu ono tibona musango gw'aiziiza. 39 Aye nga bwe muli n'empisa ey'okubalekulirayo omusibe mulala buli ku Kibinuko eky'Okubitizibwa, mwandyenze mbalekulire Kyabazinga w'abayudaaya?” 40 Kabiri bairamu nga baasiikana bati: “Ti oyo, aye Barabba.” Barabba ono yali munhazi.
1 Agho Pilato yaatwala Yesu amukube enkoba. 2 Abaisirukale baatoola amawa baagalukamu engule baagamuvaaza ku mutwe era baamuvaaza ekivaalo kya langi ya nakasooma eky'abakungu. 3 Baatoolera okwidhanga bwe bamukoba bati: “Ghangaala, Kyabazinga w'Abayudaaya!” Era bwebamukuba empi. 4 Kabiri Pilato yaafuluma ku luya yaabakoba ati: “Wuuno mmubaleeteire ku luya, mubonere irala nga nze tibona musango gw'aiziiza.” 5 Kale Yesu yaafuluma ku luya ng'avaire engule ey'amawa n'ekivaalo eky'erangi ya nakasooma eky'abakungu. Pilato yaabakoba ati: “Omuntu wuuno!” 6 Bakabona Abakulu n'abakuumi bwe baamubona baayasiikana bati: “Mukomerere ku musalaba! Mukomerere ku musalaba!” Pilato yaabakoba ati: “Imwe mumutwale mumukomerere ku musalaba, kuba nze tibona musango gw'aiziiza.” 7 Abayudaaya baamwiramu bati: “Ife tuli n'eiteeka era olw'eiteeka eryo agwaine okufa kuba yeefuula okuba Omwana wa Katonda.” 8 Pilato bwe yawulira ekibono ekyo yeeyongeraku okutya. 9 Era yangira kabiri mu kisaagaati yaabuuza Yesu ati: “Oli wa gha?” Aye Yesu yaaloba okumwiramu. 10 Pilato yaamukoba ati: “Toyogera ninze? Toidhi nga ndi n'obukumu obukulekula era n'obukumu obukukomerera ku musalaba.” 11 Yesu yaamwiramu ati: “Tiwandibaire na bukumu ku nze nguli tibwakugheebwa Katonda. Kale ampaireyo mu ngalo dho n'ali n'ekibi ekisinga.” 12 Pilato bwe yawulira ekyo yaagezaaku okusala amagezi amulekule. Aye Abayudaaya baayongera okwasiikana bati: “Bw'olekula omusaadha oyo nga toli mukagwa wa Kaisari. Yeenayeena eyeefuula kyabazinga atakania Kaisari.” 13 Agho Pilato bwe yawulira ebibono ebyo yaafulumya Yesu era yaatyama ku kityamo eky'obulamuzi mu kifo ekyetebwa Amabaale Amataanhe, ate mu Luheburayi bakyeta Gabbatha. 14 Lwali lunaku lwa kutegeka Kibinuko eky'Okubitizibwa era esaawa dhaali mukaaga, Pilato yaakoba Abayudaaya ati: “Wuuno kyabazinga waimwe!” 15 Bale baayasiikana bati: “Twala ere! Twala ere! Mukomerere ku musalaba!” Pilato yaabakoba ati: “Mwenda nkomerere kyabazinga waimwe ku musalaba?” Bakabona Abakulu baamwiramu bati: “Ife tuzira kyabazinga, okutoolaku Kaisari.” 16 Kale agho Pilato yaamubagha baje bamukomerere ku musalaba. Agho ni baagema Yesu, baamutwala. 17 Yaabbeeda omusalaba gwe mwene, yaafuluma, yaaja mu kifo ekyetebwa eky'Ekighanga, ate mu Luheburayi nga bakyeta Gologotha. 18 Baamukomerera agho ku musalaba n'abandi babiri ku luuyi ni ku luuyi mwene yaaba ghagati. 19 Pilato yaakola ekighandiiko yaakita ku musalaba nga kikoba kiti: YESU OW'E NAZARETHI, KYABAZINGA W'ABAYUDAAYA. 20 Abayudaaya kamaala baakisomaku kuba ekifo kino kyali kumpi n'ekibuga, ate kyaghandiikibwa mu Luheburayi, ni mu Lulatini, ni mu Lugureki. 21 Bakabona Abakulu baakoba Pilato bati: “Otaghandiika oti, ‘Kyabazinga w'Abayudaaya’, aye ghandiika oti, ‘Ono yeeyeta Kyabazinga w'abayudaaya.’ ” 22 Pilato yaabairamu ati: “Kye mpandiise nkighandiise.” 23 Abaisirukale bwe bamala okukomerera Yesu ku musalaba baatoola ebivaalo bye baabigabaniamu emiteeko ena, kiisi mwisirukale yaafunaku omuteeko. Baatoola n'ekanzu ye eyalukibwa obulukibwe yoonayoona okuva ghaigulu nga muzira lutungo naire. 24 Abaisirukale baakoba bati: “Tutagikanula aye tugikubeku akalulu tubone anaaba mwene yo.” Era baisania. Kino kyabaagho era okutuukiriza Ebyaghandiikibwa ebikoba biti: “Baagabana ebivaalo byange, era baakuba akalulu ku kidhuuba kyange.” Era ekyo abaisirukale kye baakola. 25 Inhina ni muganda wa inhina, Maria muka Kilopa, ni Maria Magadalene baali beemereire agho kumpi n'omusalaba kwe yali. 26 Yesu bwe yabona inhina n'Omwegeresebwa omugonzi nga ayemereire kumpi agho, yaakoba inhina ati: “Mukazi iwe, mutabane wo wuuyo.” 27 Era yaakoba Omwegeresebwa oyo ati: “Inhoko wuuyo.” Era okuva ku olwo Omwegeresebwa oyo yaamutwala eka ewuwe. 28 Ebyo bwe byawa, Yesu ng'akiidhi bukalamu ng'ebintu byonabyona biwoire, era olw'okwenda okutuukiriza Ebyaghandiikibwa yaakoba ati: “Mpulira endiwo.” 29 Agho ghaaligho ekidiita nga kiidhwire omwenge ogw'emizabbibu ogw'endoota, kale bainhika ekyangu mu mwenge ogw'emizabbibu ogwo baakita ku luti olwetebwa hissopu, baakimuta ku munwa. 30 Yesu bwe yamala okugheebwa omwenge ogw'emizabbibu ogwo yaakoba ati: “Biwoire.” Yaakoteka omutwe yaaghaayo omwoyo gwe. 31 Olunaku lwali lwa kwetegeka. Kale olw'okulobera emirambo okusigala ku misalaba ku lunaku lwa Sabbato ate nga Sabbato eyali eidha yali nkologho, Abayudaaya baaja baasaba Pilato, amagulu g'abaakomererwa ku misalaba gamenhebwe batoolebweku. 32 Agho ni abaisirukale baidha baamenha amagulu ag'eyasooka n'ag'owokubiri, abaakomererwa ni Yesu. 33 Aye bwe baatuuka ku Yesu ni babona ng'amaze okufa, baaloba kumumenha magulu. 34 Aye omwisirukale owundi yaatoola eifumo yaalifumita Yesu mu mbavu, era olwamufumita ati ghaavaagho omusaayi n'amaadhi. 35 Oyo eyabona kino n'akikakasa era obudhulizi bwe bwa mazima. Aidhi nga by'ayogera bya mazima weena oikirize. 36 Kuba ebintu bino byabaagho okutuukiriza Ebyaghandiikibwa ebikoba biti: “Talimenhebwa igumba.” 37 Era kabiri ekyaghandiikibwa ekindi kikoba kiti: “Baliringa ku ole ye baafumita.” 38 Ebyo bwe byawa, Yosefu ow'Arimathea, eyali omwegeresebwa wa Yesu ow'omu ngiso, olw'okuba yali atya Abayudaaya, yaaja yaasaba Pilato amuganhe okutoolagho omulambo gwa Yesu, era Pilato yaamuganha. Kale yaaja okugutoolagho. 39 Ni Nikodemo yeena, ole eyaja okubona Yesu obwire, yaaja ni kilo edhighera ng'oti makumi asatu entabule edh'obuwoowo bwa mirra ni alowe. 40 Agho nga batoola mulambo gwa Yesu, nga baguzinga mu ngoye endheru ghalala n'obuwoowo, ng'empisa ey'Abayudaaya mu kuziika bwe yali. 41 Mperaano, agho mu kifo ghe baakomerera Yesu ghaaligho enimiro omwali amagombe amayaaka agaali tigateebwangamuuku mufu yeenayeena. 42 Kale, nga bwe lwali olw'okwetegeka okw'Abayudaaya, ate nga ago amagombe gaali agho kumpi, Yesu baamuta omwo.
1 Mu nkyonkyo, ku lunaku olwiririra Sabbato, era nga n'enzikiiza ekaaliku, Maria Magadalene yaawuuna ku magombe, yaabona ng'eibaale litooleibwagho ku magombe. 2 Kale, yaalumuka yaaja ye Simoni Petero n'ole Omwegeresebwa Yesu ye yagonzanga, yaabakobera ati: “Batoire Musengwa mu magombe era titwidhi ghe bamutaire!” 3 Agho Petero n'Omwegeresebwa ole owundi baasituka baaja ku magombe. 4 Bombi baalumuka aye Omwegeresebwa ole owundi yaalumuka inho okusinga Petero, era yaamwesooka okutuuka ku magombe. 5 Yaakutama, yaalengeza mu magombe, yaabona engoye endheru nga dhiri agho, aye yaaloba kungira. 6 Simoni Petero yaidha ng'amunonereza, yangira mu magombe era yaabona engoye endheru nga dhiri agho, 7 n'ekitambaala ekyali ku mutwe gwa Yesu. Tikyali ghalala na ngoye ndheru aye kyali kizinge kyonka. 8 Agho Omwegeresebwa ole owundi eyasooka Petero okutuuka ku magombe yeena yangira yaabona era yaikiriza. 9 Kuba mu kiseera ekyo baali bakaali kutegeera Byaghandiikibwa ebikoba biti: “Ali n'okuzuukira mu bafu.” 10 Agho Abeegeresebwa bairayo eka. 11 Aye Maria yaayemerera ku luya okw'amagombe ng'ali kulira. Era bwe yali ng'ali kulira yaakutama yaalengeza mu magombe. 12 Yaabona bamalaika babiri nga bavaire ebyeru nga batyaime aghaali ghateereibwa omulambo gwa Yesu, ng'owundi ali emintwetwe ate ng'owundi ali y'ebigere. 13 Baamukoba bati: “Mukazi iwe, olirira ki?” Yaabairamu ati: “Batoiremu Musengwa wange era tiidhi ghe bamutaire.” 14 Bwe yamala okwogera atyo, yaagaluka yaalinga einhuma we, yaabona Yesu ng'ayemereire agho aye tiyamumanha nga ni Yesu. 15 Yesu yaamubuuza ati: “Mukazi iwe, olirira ki? Naani y'oli kwagala?” Maria yaamudhuubiriza okuba omukuumi w'omu nimiro eyo, kale yaamukoba ati: “Isebo, oba nga niiwe omutoiremu nkobera gh'omutaire, ndidha kumutoolagho.” 16 Yesu yaamukoba ati: “Maria.” Agho Maria yaagaluka yaamukoba mu Luheburayi ati: “Rabboni,” ekitegeeza, “Omwegeresa!” 17 Yesu yaamukoba ati: “Otangemaku, kuba nkaali kwirayo ye Lata aye ja ye baganda bange obakobere oti ndi kwirayo ye Lata wange era Lata waibwe, Katonda wange era Katonda waibwe.” 18 Kale Maria Magadalene yaaja yaakobera Abeegeresebwa ati aboine Musengwa. Era yaabakobera obukwenda bwe yamukoba okubakoba. 19 Eigulo ly'olunaku lwene olwo, olwiririra Sabbato, endhigi dhaali nga nsibe Abeegeresebwa ghe baali beesololeiza kuba baali bali kutya Abayudaaya. Yesu yaidha yaabeemereramu ghagati yaabakoba ati: “Emiraala gibe n'imwe.” 20 Bwe yamala okubakoba atyo yaabooleka obwala bwe n'embavu dhe. Abeegeresebwa be baasangaala bwe baabona Musengwa. 21 Kabiri Yesu yaabakoba ati: “Emiraala gibe n'imwe. Nga Lata bwe yantuma zeena mbatuma.” 22 Bwe yamala okubakoba ekyo yaabafuuwaku omuuka yaabakoba ati: “Mufune Mwoyo Mutukuvu. 23 Kiisi ye munaasonighanga, ebibi bye nga bisoniyiibwa. Ate kiisi ye munaalobanga okusonigha, ebibi bye nga tibisoniyiibwa.” 24 Mperaano, owundi ku Ikumi n'Ababiri, Thomasi ayetebwa omulongo, tiyaba nabo Yesu lwe yaidha. 25 Kale baine baamukobera bati: “Tuboine Musengwa.” Aye yaabairamu ati: “Okutoolaku nga mboine ku nkovu mu bwala bwe mwe baafumita emisumaali, era ni ntaaku olwala lwange mu nkovu omwo, era ni ntaaku omukono gwange mu mbavu dhe, tighanga era tija kwikiriza naire.” 26 Bwe ghaabitagho enaku omunaana, kabiri Abeegeresebwa be baali mu ndhu nga ni Thomasi ali nabo era nga n'endhigi ndhigale. Agho Yesu yaidha yaabeemereramu ghagati, yaakoba ati: “Emiraala gibe n'imwe.” 27 Agho yaakoba Thomasi ati: “Ta ghano olwala lwo, era obone engalo dhange ogemeku ghano, era leeta omukono gwo ogute mu mbavu dhange. Leka kuba ataikiriza, aye ikiriza.” 28 Thomasi yaamwiramu ati: “Musengwa wange era Katonda wange!” 29 Yesu yaamukoba ati: “Oikiriiza lwa kuba omboine. Ba nkabi abaikiriza nga tibaboineeku.” 30 Eriyo ebyewuunhio ebindi kamaala Yesu bye yakola ng'Abeegeresebwa be babona ebitaaghandiikibwa mu kitabo kino. 31 Aye bino byaghandiikibwa ku lwaimwe, mwikirize nga Yesu ni Kurisito, Omwana wa Katonda, era olw'okwikiriza okwo, mufune obulamu mu liina lye.
1 Ebyo bwe byawa Yesu yaabonekera kabiri Abeegeresebwa be ku nhandha ey'e Tiberia. Biti bwe byali: 2 Simoni Petero, ni Thomasi ayetebwa omulongo, ni Nathanaeli eyava e Kana mu Galilaaya, ni batabane ba Zebedaayo, n'Abeegeresebwa abandi babiri, baali bali ghalala. 3 Simoni Petero yaabakoba ati: “Nja kuvuba.” Bale baamwiramu bati: “Twena ka tuje n'iwe.” Olwo baaniina mu lyato baaja. Aye obwire obwo ghazira kye baagemya. 4 Bwe bwali bukya Yesu yaayemerera ku mbali okw'enhandha aye baaloba kumumanha bati ni ye. 5 Yesu yaabakoba ati: “Abaana muligho n'eky'okulya?” Bairamu bati: “Busa.” 6 Yaabakoba ati: “Muwolobe akatimba kaimwe ku luuyi olw'omukono omusaadha okw'eryato mwidha kugemya.” Kale baawoloba akatimba aye okukaghaluzaayo okukaiza mu lyato kwabakaya olw'ebyenhandha kamaala bye baagemya. 7 Omwegeresebwa Yesu ye yagonzanga yaakoba Petero ati: “Ni Musengwa.” Petero olwawulira ati ni Musengwa yeesuulaku ekidhuuba, kuba yali madu, yaatuumira mu nhandha. 8 Aye Abeegeresebwa abandi kuba ti baali ghala n'obukalu, mita ng'oti kikumi, baajiira mu lyato okutuuka ku bukalu nga baghaluza akatimba ak'ebyenhandha. 9 Bwe baatuuka ku bukalu baabona omuliro ogw'amanda nga kuliku ebyenhandha n'omugaati. 10 Yesu yaabakoba ati: “Muleete ku byenhandha, bye mwakagemya.” 11 Simoni Petero yaaja yaaghaluliza akatimba ku bukalu nga kaidhwire ebyenhandha ebibba kikumi n'ataanu na bisatu (153 ), aye waire byali kamaala bityo akatimba tikaakanuka. 12 Yesu yaabakoba ati: “Mwidhe mulye.” Ghazira ku Beegeresebwa yakana kumubuuza ati: “Niiwe ani?” Kuba baamanha nga ni Musengwa. 13 Yesu yaidha yatoola omugaati yaagubagha n'ebyenhandha atyo. 14 Guno n'ogwali omukuzi ogwokusatu Yesu okubonekera Abeegeresebwa be ng'amaze okuzuukira mu bafu. 15 Bwe baamala okulya, Yesu yaakoba Simoni Petero ati: “Simoni mutabane wa Yoanne, ongonza okusinga bano?” Petero yaamwiramu ati: “Yii, Musengwa oidhi nga bwe nkugonza.” Yesu yaamukoba ati: “Liisanga entaama dhange ento.” 16 Kabiri Yesu yaamukoba omukuzi ogwokubiri ati: “Simoni mutabane wa Yoanne, ongonza?” Petero yaamwiramu ati: “Yii, Musengwa oidhi nga bwe nkugonza.” Yesu yaamukoba ati: “Yayanga entaama dhange.” 17 Kabiri Yesu yaamubuuza omukuzi ogwokusatu ati: “Simoni mutabane wa Yoanne, ongonza?” Petero yaanakughala olwa Yesu okumubuuza omukuzi ogwokusatu ati: “Ongonza?” Era yaamukoba ati: “Musengwa, oidhi byonabyona, oidhi nga nkugonza.” Yesu yaamukoba ati: “Liisanga entaama dhange. 18 Bwenebwene ka nkukobere: bwe wali omwisuka, weesibanga waaja ye wayendanga aye bw'olikairigha olighanika amakono go, owundi yaakusiba yaakutwala y'otayenda.” 19 Yayogera atyo okwoleka okufa kw'alifa n'ayolesa ekitiisa kya Katonda. Bwe yamala okwogera ebyo, yaamukoba ati: “Nnonereza.” 20 Petero yaagaluka yaabona Omwegeresebwa ole Yesu ye yagonzanga ng'ali kunonereza. Ono n'ole eyaseeta okumpi ni Yesu ku kyeigulo ekyasembayo n'amubuuza ati: “Musengwa, naani aja okukulyamu olukwe?” 21 Petero bwe yamubona yaakoba Yesu ati: “Musengwa, ate ono aliba atya?” 22 Yesu yaamwiramu ati: “Bwe nhenda abeegho okutuusa lwe ndiidha, ofaayo ki? Iwe nnonereza.” 23 Ekibono kino kyasansaanira mu baikiriza ng'abantu bakoba bati Omwegeresebwa oyo ti wa kufa, ate nga Yesu ti yakoba ati ti wa kufa, aye yakoba ati: “Bwe nhenda abeegho okutuusa lwe ndiidha, ofaayo ki?” 24 Ono n'Omwegeresebwa omudhulizi w'ebintu bino era eyabighandiika era twidhi ng'obudhulizi bwe bwa mazima. 25 Era eriyo n'ebintu ebindi kamaala Yesu bye yakola era nguli byonabyona byaghandiikibwa, ndowooza ng'ebitabo ebyandighandiikiibwa tibyandisuze ku nsi kuno.