1 Te ñamu Jwali bala. Ɔci Jwali bala i Jwaŋa Tolan, ɔci Jwali a Jwaŋa Tolan. 2 Jwalla neeni bala ñamu i Jwaŋa Tolan. 3 Waak cɔnnɛ ɛkɛ waakɛnda. Gena ne cyɛɛlɔ gɛɛl cɔnnɛ menga bɛɛ. 4 Tɛɛtin bɛɛn te ɛkɛti, ɔci ɛkɛ a mena dɛki ma baano. 5 Ɔci nona miel dyɛgdɛ mena dɛki neeni acaan nona miel mena dɛki buannɛ bɛɛ. 6 Mena ‘uan cuonnɛ Jwaŋa Tolan yenti Yɔhanna. 7 Yɔhanna bɛɛn aŋka mieti ma. Ɛkɛ bɛɛn mieti ma te mena dɛki aŋka ma waakɛnda jyeddi mena dɛkiti te jyeka myennɛ ɛkɛ may. 8 Yɔhanna, ɛkɛ a mena dɛki bɛɛ. Ɛkɛ bɛɛn aŋka mieti ma te mena dɛki. 9 Mena dɛki ma awarɛ neeniyɛ, ɛkɛ a mena dɛki ma waakɛnda, ɔci ɛkɛ bala bɛya ma baanti. 10 Baan warda cɔnnɛ ɛkɛ, ɔci ɛkɛ yeti ne bɛɛni ma baantiyɛ, ɛkɛ ñiyi ma ka gena ɛkɛ neeni bɛɛ. 11 Ɛkɛ bɛɛn iñɔ baanji ban ɛkɛ, yeti ma ɛkɛ kɛkkin te ɛkɛ. 12 Yeti maka buagɔn ɛkɛ ɔci jyeti ɛkɛti te yenti ɛkɛyɛ, ɛkɛ gɔkcin ɛkkɛnti, ɔci ɛkkɛn aŋi kɛɛgin Jwaŋa Tolan. 13 Ɛkkɛn jiedi ma ba jiedi ma baan bɛɛ. Ɛkkɛn jiedi ma ba naŋki maka ‘uay bɛɛ. Ɛkkɛn jiennɛ Jwaŋa Tolan. 14 Ɔci Jwali aŋi mena baano, ɔci ɛkɛ ciyin iki ikin a cyɛɛlɔ. Ɛkɛ yuarŋin ikin ɛkɛ pwanna pwanno. Ɛkɛ pwanna pwani bala ba kacca jiennɛ weegɛn nɔɔti ne cyɛɛlɔ. Jwaŋa Tolan yomɛ pwad pwad ɛkɛti, ɔci yom ɛkɛ gɔki awarɛ. 15 Yɔhanna bala mieti ma te ɛkɛ, ɔci gɔki ne pɛñan agi, “Mena neeni a mena guaŋi ‘ya ka ‘Ɛkɛ bala bɛya ‘ya ŋoyuti, ɔci ɛkɛ a mena tolan te ‘ya, acaan ne ‘ya jiennata mɛy ɔɔn men bɛɛyɛ, ɛkɛ doki bala.’ ” 16 Jwaŋa Tolan yom pwani ‘uonnɛti ikinti, ɔci ikin ‘uottinti ɛkɛ moki. 17 Jyeka buagiti Jwaŋa Tolan agi da ma noŋdiyɛ, oonɛ Muuca. Oŋ yeti yom pwani ɔci jyeka awarɛ bɛɛn te Yaccu Kiṭɔ. 18 Menga Jwaŋa Tolan yuarŋɛ oŋgati bɛɛ. Gena kacca jiennɛ ɛkɛ nɔɔti ne cyɛɛlɔ mena ciyi ñoowi i Weegɛn a ñoowin, gena ɛkɛ ma nɔɔnnɛ te Weegɛn aŋka Weegɛn ŋeeckiti ma neeni. 19 Maka gaciicin ma Icrayiil ɔci ma Laawi cuuñɛ ma Icrayiil te ban Urcaliim, cuuñɛ ɛkkɛn Yɔhannati aŋka ɛkkɛn tootti ɛkɛti agi, “I a menɛ?” 20 Yɔhanna, ɛkɛ poccin menga diennɛ ñin bɛɛ. Ɛkɛ gɔkcin agi ɛkɛ agji Kiṭɔ bɛɛ. 21 Ɔci ma tooccin ɛkɛti gɔkcin agi, “Oŋ i ag menɛ yeti? I a Iliiya?” Ɔci Yɔhanna kɛkcin gɔkcin agi, “A’a.” Ɔci ma gɔkcin ɛkɛti agi, “I a Bɔwa?” Ɔci ɛkɛ kɛkcin gɔkcin agi, “A’a.” 22 Ɔci ma gɔkcin ɛkɛti agi, “Oŋ i a menɛ? Ɔɔn myettɔn aŋka ɔɔn ooddɔn maka ɔɔn cuoñkɔn myettɔn. I gɔk i a menɛ?” 23 Yɔhanna gɔkcin agi, “Bala ba jwalla guaŋŋɛ Icaaya mena bɔwa Jwaŋa Tolan agi, ‘‘Ya a pwan mena yaadan wɔɔŋji agi, dala pɔy Ciɛggɔn ywaŋdɛ nina a tyɛlga.’” 24 Maka cuuñɛ ma Yɔhannati neeniyɛ, ma gɛɛg a ma Pɛriciin. 25 Ɔci ɛkkɛn tooccin Yɔhannati ɔci gɔkcin agi, “Kan i a Kiṭɔ bɛɛ, ɔci kan i a Iliiya bɛɛ, ɔci kan i a bɔwa Jwaŋa Tolan bɛɛ, oŋ i buor ma pietin ogo?” 26 Ɔci Yɔhanna gɔkcin ɛkkɛnti agi, “‘Ya buor ma pietin, yeti mena kwoyɛ ɛkkɛ bala yɔdgi iki ɛkkɛ, 27 ɛkɛ a mena bɛya ‘ya ŋoyuti. ‘Ya baal ba wɛyi ɛkɛ looda ‘ya bora bɛɛ. ‘Ya buanna ɛkɛ ñyɛrcin bɛɛ.” 28 Ɔci naŋka neeni naŋi ma ban Bɛtani kuocɔ Tol Urdun ŋoyɛti nona buoṭi Yɔhanna may. 29 Ɔci ne liidɔ Yaccu bɛɛni, ɔci ne Yɔhanna gɔrni Yaccu baali bɛɛdi ɛkɛtiyɛ, ɛkɛ gɔkcin agi, “Gɔrtɛ, Kalŋ Šɔɔlɛ Jwaŋa Tolan, ɛkɛ nɔji ma baan eedɛ ɔntɔ! 30 Mena neeni a mena guaŋi ‘ya ka ɛkɛ bala bɛya ‘ya ŋoyuti. Ɔci ɛkɛ tolcin te ‘ya, acaan ne ‘ya jiennata mɛy ɔɔn men bɛɛyɛ, ɛkɛ doki bala. 31 Ɔci ɛkɛ ŋeej ‘ya bɛɛ. ‘Ya yeti bɛɛn buor ma te pieg aŋka Yaccu ŋeettiti ma Icrayiil.” 32 Ɔci Yɔhanna mieti ma ɔci gɔkcin agi, “‘Ya gɔrcan Booŋ peewin te ñaalɔ bala ba boom ɔci cooccin ɛkɛti. 33 Ɔci ɛkɛ ŋeej ‘ya bɛɛ. Yeti mena ‘ya cuonna buor ma te piegyɛ, ɛkɛ aŋka gɔkkin ‘yati agi, ‘Mena yuarca i Booŋ peedi ɛkɛti ɔci cootti ɛkɛtiyɛ, gena ɛkɛ a mena buoṭi ma te Boŋ Jwaŋa Tolany.’ 34 Ɔci ‘ya ɛkɛ yuarŋo, ɔci ‘ya ma myetkan ka mena neeni a Kaci Juaŋo.” 35 Ɔci ne liidɔ Yɔhanna bala yɔdi i maka laldɛ ɛkɛ ne yyɛɛwɔ. 36 Ɔci Yaccu bala ati a woon, ɔci Yɔhanna bala gɔṭi Yaccu ne ɛkɛ ati a woony, ɔci ɛkɛ gɔkcin mati agi, “Gɔrtɛ, Kalŋ Šɔɔlɛ Jwaŋa Tolan!” 37 Ɔci maka laldɛ Yɔhanna ne yyɛɛwɔ tieŋŋin jyek ɛkɛ ɔci bootcin Yaccuti. 38 Ɔci Yaccu warɛ yallɛ ɔci gɔrcin ŋoyɛti, ɔci ɛkɛ ma yuarnɛ bala booti ɛkɛti, ɔci ɛkɛ gɔkcin ɛkkɛnti agi, “Ɛkkɛ lieṭɛ waaka?” Ɔci ɛkkɛn gɔkcin ɛkɛti agi, “Rabbi, ba bana ciyi i bɛ?” (Rabbi te tuk Mabaan agi “Mena loṭi may.”) 39 Yaccu gɔkcin ɛkkɛnti agi, “Bɛɛdɛ gɔrtɛ.” Ɔci ɛkkɛn ati ɔci gɔrcin nona ciyi ɛkiy. Oŋ waŋɛ noŋi utti doki. Ɔci ɛkkɛn ati ɔci bala ciyi i Yaccu oŋŋa wannati. 40 Maka tieŋŋin jyek Yɔhanna ɔci bootcin Yaccutiyɛ, mena ne cyɛɛlɔ gɛɛl yenti Andarawuc. Ɛkɛ a mod Butrucn. Yenti Butruc yenta parɛ yenti Cimaan te tuk Ma Icrayiil 41 Andarawuc ati ɔci mod ɛkkɛn Butruc yuarŋɛ. Ɔci ɛkɛ gɔkcin ɛkɛti agi, “Kiṭɔ yuarŋɔn ɔɔn.” (Kiṭɔ te jyek Mabaan a “Mena Muonɛ Juaŋ Boray”.) 42 Ɔci Butruc oonɛ Andarawuc mod ɛkkɛn Yaccuti. Yaccu gɔrcin ɛkɛti ɔci gɔkcin agi, “I a Cimaan kaci Yɔhanna? Ne baaṭi i barti ma a ‘Cipac’.” (Cipac ɔci Butruc ɛkkɛn a cyɛɛlɔ, te jyek Mabaan ma boṭi a ‘Poomo’.) 43 Ɔci ne liidɔ Yaccu buagɔn ooddi ban Jaliil. Ɔci ɛkɛ Pilibuc yuarŋɛ. Ɔci Yaccu gɔkcin ɛkɛti agi, “Bɛɛd, ‘ya boottaŋɔ.” 44 Pilibuc bɛɛn te ban Bɛtceeyida. Bana neeni a ban Andarawucn i Butrucn. 45 Pilibuc Nataanyal yuarŋɛ, ɔci gɔkcin ɛkɛti agi, “Mena kiinɛ Muuca ɔci mena kiiwɛ maka a bɔwan Jwaŋa Tolan yuarŋɔn ɔɔn. Gena Yaccu men ma Najarɛt, kaci Yuocip.” 46 Ɔci Nataanyal gɔkcin ɛkɛti agi, “Hay! Gena pwadan gɛɛl boki bɛya te ban Najarɛtti boki?” Pilibuc gɔkcin ɛkɛti agi, “Bɛɛd, gɔrca.” 47 Ne Yaccu Nataanyal yuartɛ baali bɛɛdi ɛkɛtiyɛ, Yaccu gɔkcin agi, “Gɔrtɛ, gena men ma Icrayiil waanɛ neeni. Labji bala ɛkɛ yomɛti bɛɛ.” 48 Nataanyal gɔkcin ɛkɛti agi, “I ‘ya ŋeeja te aŋɛ?” Yaccu gɔkcin ɛkɛti agi, “Pilibuc ne borni iti men bɛɛyɛ, i yuarŋin ‘ya ŋuami ŋwayɛti doki.” 49 Nataanyal gɔkcin ɛkɛti agi, “Mena loṭi may, i a Kaci Jwaŋa Tolan. I a Ciɛggɔn Tolan ma Icrayiil.” 50 Yaccu gɔkcin ɛkɛti agi, “I jyetti ‘yati te jwalla guaŋi ‘ya ka i yuarŋin ‘ya ŋuami ŋwayɛti nɛ? Naŋka neeni ḍiɛṭ ḍyɛro. Naŋka tɛyan yuara i ne baaṭi.” 51 Ɔci Yaccu gɔkcin ɛkɛti ‘wota agi, “Tieŋŋa, ‘ya gɔkka iti, ne baaṭi ɛkkɛ gɔrtɛ pɔli tukɛ pɔktɛ, ɔci malɛɛkan kaatti ñaalɔ ɔci koodi iñɔ ‘ya Kaci Ma Baanti.”
1 Ɔci ne nink ne yyɛɛwɔ bɛɛki bora te oŋŋa akki ne ḍoogɔyɛ, ma ḍɛɛwwin ban Kɛna ban Jaliilji. Mɛy Yaccun bala aŋan. 2 Ɔci Yaccu borki ma daŋkun i maka laldɛ ɛkɛ agi bɛɛdɔ nonta ḍɛɛki may. 3 Ɔci ne mooy luutkin ḍaakkiti mayɛ, mɛy Yaccun gɔkcin ɛkɛti agi, “Mooy bawwin mati.” 4 Ɔci Yaccu gɔkcin ɛkɛti agi, “Mɛy ɔɔn, i tooc ‘yati a ɔɔn ogo? Oŋ ‘ya bɛɛn men bɛɛ.” 5 Mɛy Yaccun gɔkcin ma kanŋati agi, “Gena guagdɛ ɛkɛyɛ, dala naŋdɛ.” 6 Kuppan pomk bala yɔdi a dɔɔyɔ wilin ne cyɛɛlɔ. Kuppan neeni yuotki ma pyega lɔkki ma Icrayiil ba naŋki ɛkkɛn. (Kuppa ne cyɛɛlɔ eci capiiyan tuggɛn ne ŋaanɔ walla ne dɔɔyɔ.) 7 Yaccu gɔkcin ɛkkɛnti agi, “Kuppan kuomdɛ te piego.” Ɔci kuppan kuomgɛ ma te pieg lɛkɛn bawwin. 8 Ɔci ɛkɛ gɔkcin ɛkkɛnti agi, “Šyebdɛ acca, eektɛ mena gɔṭi oomdin mena tolan.” Ɔci gɛɛg eyi ma ɛkɛti. 9 Ɔci mena tolan neeni dɛccin piego, ɔci pieg waakɛn aagɛ aŋi mooy luutkin doki. Ɔci naŋka neeni ŋeejɛ ɛkɛ bɛɛ, yeti ŋeeckɔn gena maka ṭyepi piego. Ɔci ne ɛkɛ dɛnniyɛ, ɛkɛ borcin mena ḍɛñi ɛɛŋtiy, 10 ɔci gɔkcin ɛkɛti agi, “Oŋkanda ma pyega milin eektan ma ñamu aŋka maattan ma ñamu, ɔci ne ɛkkɛn korkɛn yoŋtiyɛ, ɔci pyega polan ootan ma moki. Yeti i pyega milin dolniyɔ ŋoyɔ aŋka maattan ma ne ŋoyɔ ogo?” 11 Naŋka tɛyan naŋka juannɛ Yaccu ñamu naŋka ñyecki ma ɛkɛyɛ, gena akta ɛkɛ pieg aaŋŋɛyɔ akki mooy luutkin ban Kɛna ban Jaliiljiy. Ɔci maka laldɛ ɛkɛ jyeti ɛkɛti. 12 Ɔci ne naŋka neeni baaniyɛ, Yaccu ati ban Kapɛrnyam. Ɛkɛ ati iki mɛɛgɛn ɔci modgɛn ɔci maka laldɛ ɛkɛ. Ɔci ɛkkɛn bala ciyi aŋan lakun. 13 Ɔci oŋ iid ma Icrayiil cɔɔllin doki. Iid neeni gena Iid Malɛɛka Lien Bɛɛn Goṭi A Gorŋo. Ɔci Yaccu ati ban Urcaliim. 14 Ɔci maka wɛɛṭi dok ɔci kulin ɔci boobg yuarŋɛ ɛkɛ kañ on Juaŋ ona Tolanti, ɔci maka ḍoṭi girin bala ciyi tarabɛɛcan ɛkkɛnti on Juaŋ ona tolan daŋkun. 15 Ɔci Yaccu wyeng naŋŋɛ ba woonti ɔɔn, ɔci maka neeni ŋualnɛ ɛkɛ bora te kañ on Juaŋ ona Tolanti. Ɔci dok ɔci kulin, ɛkkɛn ŋualnɛ bora Yaccu waakɛnda. Ɔci ɛkɛ tarabɛɛcan ḍorki ma girin neeniyɛ, jitkɛn baamnɛ iñɔ. 16 Ɔci ɛkɛ gɔkcin maka wɛɛṭi boobgti agi, “Waka neeni eedɛ bora. Naa ɛkkɛ kañ on Wey ɔɔn naŋdɛ a ona wɛɛrki ma waak bɛɛ!” 17 Maka laldɛ ɛkɛ ñingɛn ñieki te jyeka kiigin agi, “‘Ya waru byerŋa byerŋ te kanŋa On i.” 18 Ɔci ma Icrayiil ne ɛkkɛn gɔrki naŋka neeniyɛ, ɛkkɛn tooccin Yaccuti agi, “Naŋka neeni bɛɛn te aŋɛ? Ɔɔn myettɔn aŋka ɔɔn yomgɔ ñiektɔn naŋka neeni bɛɛn te iti, walla bɛɛn te mengati.” 19 Ɔci Yaccu gɔkcin ɛkkɛnti agi, “Dala ɛkkɛ ona neeni laagdiyɔ ɔci ne ninka ne ḍoogɔ baatiyɛ, ‘ya on ywaŋdiyɔ.” 20 Ɔci ma Icrayiil gɔkcin agi, “Hay! Ona neeni ma cɔti yuong a ma baan ne yyɛɛwɔ ɔci ne dɔɔyɔ wilin ne cyɛɛlɔ (46), ɔci i on ywaŋayɔ lakun nink ne ḍoogɔ doki?” 21 Yeti ne Yaccu gɔŋni a ɔɔnyɛ, ona guaŋŋɛ ɛkɛ wannayɛ, a on waanɛ bɛɛ gena war ɛkɛ guaŋŋɛ a on wanna. 22 Ɔci ne ɛkɛ jɔlni ñaalɔ te koolji tɛɛti mokiyɛ, maka laldɛ Yaccu ñingɛn ñieki te jyeka guaŋŋɛ Yaccu. Ɔci ɛkkɛn jyeti jyeka kiigin ɔci jyeka guaŋŋɛ Yaccu neeni. 23 Ɔci Yaccu bala ban Urcaliim iidti, ɔci iid neeni ma gɔṭi Iid Malɛɛka Lien Bɛɛn Goṭi a Gorŋo. Ɔci maka coŋin ne ɛkkɛn gɔrki naŋka tɛyan naŋŋɛ Yaccu, naŋka ñyecki ma ɛkɛyɛ, ɛkkɛn jyeti ɛkɛti. 24 Yeti Yaccu yomɛ ḍuannɛti ɛkkɛnti bɛɛ, acaan yomg ma baan ŋeejɛ ɛkɛ doki waakɛnda. 25 Ɔci Yaccu buagɔn menga ɛkɛ myettɛ te naŋki ma baan bɛɛ, acaan yomg ma baan ŋeejɛ ɛkɛ doki.
1 ’Wan ma Pɛriciin bala yenti Nikɔdiimac. Ɛkɛ a mena tolan ban ma Icrayiil. 2 ’Wana neeni bɛɛn Yaccuti te weenji ɔci gɔkcin ɛkɛti agi, “Mena loṭi ma, ŋeejɔn ɔɔn i a mena loṭi ma, ɔci i bɛɛni te ñaalɔ Jwaŋa Tolanti. Kan Jwaŋa Tolan baaw mentiyɛ, menga yaakinti ba naŋka naŋŋi i ñyecki ma i neeni bɛɛ.” 3 Yaccu gɔkcin ɛkɛti agi, “Tieŋŋa, ‘ya gɔkka iti, maka jiettan ma oŋkɛn ne yyɛɛwɔ bɛɛyɛ, ɛkkɛn yaakinti cyɛgji Jwaŋa Tolan yuartan bɛɛ.” 4 Nikɔdiimac gɔkcin ɛkɛti agi, “Ma jiettan ma a ɔki ne aŋi donk doki ɔɔn? Wɔtti mɛyyɛn korkɛnti moki aŋka jiettan mɛyyɛn oŋɔ?” 5 Yaccu gɔkcin ɛkɛti agi, “Tieŋŋa, ‘ya gɔkka iti, kan mena jiettan ma te pieg bɛɛyɛ, ɔci jiettan ma te Boŋ Jwaŋa Tolan bɛɛyɛ, ɛkɛ yaakinti ooddi non cyɛgji Jwaŋa Tolan bɛɛ. 6 Mena jiettan mayɛ, ɛkɛ a men baano, yeti mena jieddɛ Boŋ Jwaŋa Tolanyɛ, ɛkɛ a naŋki Boŋ Juaŋo. 7 Naa i podi te jwalla guaŋi ‘ya ka i jietti ma oŋki ne yyɛɛwɔ wanna bɛɛ. 8 Jwami yooŋdi nona ɛkɛ buagi, ɔci i tieŋja gena joon ɛkɛ budan, yeti nona bɛɛnɛ ɛkɛ ŋeej i bɛɛ, ɔci nona ooddi ɛkɛ moki kwoy i. Jyeka neeni bala ba jyek Boŋ Jwaŋa Tolan, ɛkɛ kanŋan a ɔɔn daŋkun maka jyeti Juaŋti waakɛnda.” 9 Nikɔdiimac gɔkcin ɛkɛti agi, “Naŋka neeni bala a ɔki yeti?” 10 Yaccu tooccin ɛkɛti agi, “I a mena loṭi ma Icrayiil ɔci i dɔki jyeka neeni kwoy i? 11 Tieŋŋa, ‘ya gɔkka iti awarɛ, ɔɔn gɔkɔn te jyeka ŋeejɔn ɔɔn, ɔci ɔɔn ma myettɔn te waka yuarŋɔn ɔɔn. Yeti ɛkkɛ yookɛ te jyeka mietɔn ɔɔn neeni. 12 Kan ɛkkɛ myettin te waka ṭɛɛrji iñɔ ɔci ɛkkɛ jyeddɛ bɛɛy, oŋ kan ɛkkɛ myettin te waka ñaalɔ pɔliji ɛkkɛ jyeddɛ a ɔki? 13 Men gɛɛl kaaccin te ñamu pɔliji bɛɛ. Gena mena kooyin te ñaalɔ pɔliji parɛ. Gena ‘ya Kaci Ma Baan ‘ya aŋka kaacca ñaalɔ pɔlijiy. 14 “Ɔci ba naŋka naŋŋɛ Muuca te baaṭiyɛ, ‘ya Kaci Ma Baan ŋaapta ma ñaalɔ ba kaŋa ŋaamnɛ Muuca ñaalɔ wɔɔŋji 15 aŋka maka jyeddi ‘yatiyɛ, ɛkkɛn baltan tɛɛtin baadi bɛɛy. 16 “Jwaŋa Tolan ani ma baan waakɛnda ne pɛñan. Kacca jiennɛ ɛkɛ nɔɔti ne cyɛɛlɔ ‘wonnɛ mako, aŋka maka jyeddi ɛkɛti tuwa oŋgati moki bɛɛ, ɛkkɛn tɛɛtti yuonginda. 17 Kaci cuonnɛ Jwaŋa Tolan noŋi ywobji mati bɛɛ. Ɛkɛ bɛɛn iñɔ aŋka ma yɔɔdɛ ɛkɛ. 18 “Mena jyeddi ɛkɛtiyɛ, ywobji bala ɛkɛti bɛɛ, yeti mena jyeddi ɛkɛti bɛɛyɛ, ywobji bala ɛkɛti doki, acaan ɛkɛ jyeti yenti Kacca jiennɛ Jwaŋa Tolan ne cyɛɛlɔ neeni bɛɛ. 19 Ywobji bɛɛn mati acaan mena dɛki bɛɛn iñɔ baanji, yeti ma ani ɛkɛ bɛɛ. Ma ani nona miel acaan naŋki ɛkkɛn a nɔjjo. 20 Maka noŋi nɔji neeniyɛ, ɛkkɛn buagɔn nona dɛki bɛɛ. Ɔci ɛkkɛn bɛya nona dɛkiti bɛɛ acaan ɛkkɛn buagɔn nɔji ɛkkɛn lɛɛltan bora bɛɛ. 21 Yeti mena noŋi naŋka awarɛyɛ, ɛkɛ aŋka bɛya nona dɛkiti aŋka ma gɔrti naŋki ɛkɛ a naŋki Jwaŋa Tolan.” 22 Ɔci ne naŋka neeni baaniyɛ, Yaccu ati ban Yahuudiya iki maka laldɛ ɛkɛ. Ɔci ɛkɛ bala ciyi aŋan i maka laldɛ ɛkɛ, ɔci ɛkɛ bala buoṭi ma pietin. 23 Ɔci Yɔhanna daŋkun bala buoṭi ma pietin ban Enɔn. Ban Enɔn neeni cualcinti ban Celimti. Ɔci pieg bala coŋɔ aŋan. Ɔci ma bɛɛn Yɔhannati ɔci ɛkkɛn buulnɛ ɛkɛ pietin. 24 (Yɔhanna olji ma ciginji men bɛɛ.) 25 Ɔci maka laldɛ Yɔhanna i mena parɛ men ma Icrayiil, ɛkkɛn bala toyi yɔtin te jyek lɔɔŋ ba ganuun ma Icrayiil. 26 Ɔci ɛkkɛn bɛɛn Yɔhannati ɔci gɔkcin ɛkɛti agi, “mena loṭi may, mena balgi iki i Tol Urdun ŋoyɛti, mena i ma myenni te ɛkɛ wannayɛ, ɛkɛ bala buoṭi ma daŋkun, ɔci ma waakɛnda bala ooddi ɛkɛti.” 27 Ɔci Yɔhanna gɔkcin ɛkkɛnti agi, “Menga balki genga iñɔ wɛnni bɛɛ. Gena Jwaŋa Tolan parɛ ma ‘wonnɛ waaky. 28 Ɛkkɛ tieŋnɛ jyek ‘ya doki ka ‘ya a Kiṭɔ bɛɛ. ‘Ya yeti cuonna Jwaŋa Tolan ñamu ne Yaccu men baawiy. 29 Mena ḍɛñi ɛɛŋyɛ, gena ɛkɛ balki ñooniy. Yeti mug ɛkkɛn bala bora, ɔci ne ɛkɛ tieŋdi pwan mug ɛkkɛnyɛ, ɛkɛ yomɛ ñɔɔna ñɔɔno. Ɔci ba jyeka neeniyɛ, ‘ya daŋkun yomu ñɔɔna ñɔɔn ne tolan. 30 Dala Yaccu tola, ɔci dala ‘ya aŋka ḍyɛrdo.” 31 “Mena bɛya te ñaalɔyɛ, ɛkɛ tolcin te ma waakɛnda. Maka bɛya te iñɔyɛ, ɛkkɛn aŋka a maka iñɔ, ɔci ɛkkɛn gɔki te jyek maka iñɔ. Mena bɛya te pɔlijiyɛ, ɛkɛ tolcin te ma waakɛnda. 32 Ɔci ɛkɛ mieti ma te waka yuarŋɛ ɛkɛ ɔci te jyeka tieŋnɛ ɛkɛ. Yeti menga jyeti jyeka ma myennɛ ɛkɛ neeni bɛɛ. 33 Yeti kan mena jyeddi jyek ɛkɛtiyɛ, ŋeejɛ ɛkɛ jyek Jwaŋa Tolan a jyeka awarɛ. 34 Mena cuonnɛ Jwaŋa Tolanyɛ, ɛkɛ jyek Jwaŋa Tolan daldɛ bɛɛ. Ɛkɛ gɔki ɛkkɛn oŋkanda ɔɔn, acaan Jwaŋa Tolan ‘woñi ɛkɛ te Booŋ pɔɔdɛ a pɔɔd bɛɛ. Ɛkɛ ‘woñi oŋkanda ɔɔn. 35 Weegɛn ani Kaci ɛkɛ ɔci waak waakɛnda ‘wonnɛ ɛkɛ bieŋɛti. 36 Kan mena jyeddi Kacitiyɛ, ɛkɛ ciyi uda yuonginda ɔɔn. Yeti kan mena yookɔn warɛ te jyeni Kacitiyɛ, tɛɛtin bala ɛkɛti bɛɛ. Loñk Jwaŋa Tolan aŋka bala ɛkɛti oŋkanda ɔɔn.”
1 Ma Pɛriciin tieŋŋin agi maka buulda Yaccu coŋgɔ te maka buulda Yɔhannay. 2 (Yeti gena Yaccu buoṭi ma neeni bɛɛ. Gena maka laldɛ ɛkɛ aŋka buoṭi ma neeni.) 3 Ɔci ne Yaccu tieŋni a ɔɔnyɛ, ɛkɛ warɛ uunnɛ te ban Yahuudiya ɔci ati dɔɔki ban Jaliil. 4 Ɔci ban Camɛɛrya bala yomɔ. 5 Ɔci ne ɛkɛ dɛnni ban Camɛɛryayɛ, ɛkɛ ɔŋi baan gɛɛl bala aŋan yenti Caykar. Ɔci bana neeni cualcinti te non Yaakub nona ‘wonnɛ kaci ɛkɛ Yuocip. 6 Ɔci jin Yaakub bala aŋan. Ɔci Yaccu taabbin te woon ɔci cooccin jiin ḍwaŋɛti. Oŋ waŋɛ bala yɔɔd yeccu. 7 Ɔci maka laldɛ Yaccu ati baanji wɛɛṭi oomdin. Ɔci ɛŋ ma Camɛɛrya bɛɛn ṭyepi pieg jiidɔ. Yaccu gɔkcin ɛkɛti agi, “Šyepta pieg ‘ya motca.” 9 Ɔci ɛŋ ma Camɛɛrya gɔkcin Yaccuti agi, “I a men ma Icrayiil ɔci ‘ya a ɛŋ ma Camɛɛrya, ɔci i tooc ‘ya te pieg ogo? Ma Icrayiil yookɔn te ma Camɛɛrya.” 10 Yaccu gɔkcin ɛkɛti agi, “I te waka ‘wondɛ Jwaŋa Tolan ma te ŋeeji i, ɔci moki te mena gɔkkin iti agi, ‘Šyepta pieg ‘ya motca,’ neeni te ŋeeji iyɛ, te toonni ɛkɛti doki, ɔci i te ‘wonni ɛkɛ pyega utki may.” 11 Ɛɛŋ gɔkcin ɛkɛti agi, “Ciɛggɔn, gena ṭyepi i pieg baaw iti, ɔci jiin bey beyo. Ɔci i ecca pyega utki ma neeni te aŋɛ? 12 I tol te yɔr ɔɔn Yaakub, mena ɔɔn ‘wonnɔn jiinɔ? Ɛkɛ moti pyega neeni i kɛɛgin ɛkɛ i dok ɛkɛ.” 13 Yaccu gɔkcin ɛkɛti agi, “Maka moti pyega neeniyɛ, amdɛ yiɛn moki. 14 Yeti kan mena motti pyega ‘woñga ‘yayɛ, ɛkɛ amdɛ yiɛn oŋgati moki bɛɛ. Pyega ‘woñga ‘ya ɛkɛyɛ, da pookɛn. Ɛkkɛn bala ba jiin ne yiŋi ywaggi a ywaggin oŋkanday.” 15 Ɛɛŋ gɔkcin ɛkɛti agi, “Ciɛggɔn, ‘ya ‘wonda pyega wanna aŋka ‘ya amda yiɛn moki bɛɛ, ɔci ‘ya bɛɛd ṭyebba oŋgati moki bɛɛ!” 16 Yaccu gɔkcin ɛkɛti agi, “Ootta ‘war i borka, ɔci ɛkkɛ bɛɛdɛ wɛnni.” 17 Ɛɛŋ kɛkcin gɔkcin agi, “‘War ‘ya baawo.” Yaccu gɔkcin ɛkɛti agi, “Jyek i awarɛ, ‘war i baawo. 18 Te baaṭi, ‘uay i bala ne dɔɔyɔ, ɔci ‘wana bala iti acca neeni a ‘war i bɛɛ. Jyeka guaŋŋi i neeniyɛ, a jyeka awarɛ.” 19 Ɛɛŋ gɔkcin ɛkɛti agi, “Ciɛggɔn, i a bɔwa Jwaŋa Tolan hay! 20 Yɔrg ɔɔn ma Camɛɛrya nona morki ɛkkɛn bala poma neeniti. Yeti ɛkkɛ ma Icrayiil gɔkɛ agi nona morci ma Juaŋ baalɔ ban Urcaliim.” 21 Yaccu gɔkcin ɛkɛti agi, “Ɛɛŋo, dala i jyedda ‘yati. Oŋŋa bɛya ne ŋoyɔ ɛkkɛ mortɛ Weegɛnti wɛnni moki bɛɛ, ɔci walla ma morti Weegɛnti ban Urcaliim moki bɛɛ. 22 Ɛkkɛ ma Camɛɛrya balgɛ moṭɛ mena kwoyɛ ɛkkɛti. Yeti ɔɔn ma Icrayiil balgɔn moṭɔn mena ŋeejɔn ɔɔn. Jyek yɔɔt bɛɛn te ma Icrayiil. 23 Oŋŋa ma morti Weegɛnti te yomgɛn bala bɛya ɔci bala acca doki. Ɔci maka moṭi ɛkɛti a ɔɔnyɛ, Jwaŋa Tolan buagɔn ɛkkɛn. Jwaŋa Tolan a Booŋo, ɔci maka morti ɛkɛti te war tɛɛn Boŋ Jwaŋa Tolan awarɛyɛ, moṭi ɛkɛti te yoma awarɛ.” 25 Ɛɛŋ gɔkcin ɛkɛti agi, “Çeej ‘ya Kiṭɔ bala bɛya. (Ɛkɛ a mena bartan ma a ‘Mena Muonɛ Juaŋ Bora’). Ɔci ne ɛkɛ bɛɛdiyɛ, ɔɔn myettɔn ɛkɛ te waak waakɛnda.” 26 Yaccu gɔkcin ɛkɛti agi, “Gena ‘ya a mena gɔwwi iki i neeni, ‘ya a ɛkɛ.” 27 Ne Yaccu balki gɔɔki i ɛɛŋ menyɛ, maka laldɛ ɛkɛ bɛɛn, ɔci ɛkkɛn korkɛn buayi ne Yaccu balki gɔɔki iki ɛɛŋy. Yeti menga tooccin Yaccuti agi, ‘I buagi gena?’ Walla agi, ‘I gɔwwi iki ɛɛŋ te gena bɛɛ?’ Ɛkkɛn tooccin a ɔɔn bɛɛ. 28 Ɔci ɛɛŋ ḍwan dolnɛyɔ jiin ḍwaŋɛti, ɔci yiŋi baanji ɔci ma myennɛ agi, 29 “Bɛɛdɛ, gɔrtɛ ‘wana ‘ya myenna te naŋka naŋi ‘ya waakɛnday. ‘Wana neeni a Kiṭɔ bɛɛ?” 30 Ɔci ɛkkɛn ati te baanji ɔci ati ne Yaccuti. 31 Ɔci ne ma Camɛɛrya bɛɛki Yaccuti men bɛɛyɛ, maka laldɛ Yaccu gɔkcin ɛkɛti agi, “Mena loṭi may, omja.” 32 Yeti ɛkɛ ṭwokcin ɛkkɛnti agi, “Ama kwoyɛ ɛkkɛ bala ‘yati.” 33 Ɔci maka laldɛ Yaccu bala toyi yɔtin pookɛn agi, “Men gɛɛl ɛkɛ eeŋnɛ amɔ?” 34 Yaccu gɔkcin ɛkkɛnti agi, “‘Ya noŋ ba naŋka ṭagdɛ mena ‘ya cuonna, ɔci ‘ya kanŋa ɛkɛ cwamdo. Naŋka neeni a am ‘ya. 35 Ɛkkɛ gɔkɛ agi, ‘Ne ponka ne ŋaanɔ baatiyɛ, ma ɛṭi poko.’ Yeti ‘ya gɔkka ɛkkɛti, gɔrtɛ ñaalɔ, yelk jitin pok ɛɛwin doki, buagɔn ‘yɛrŋo. 36 Mena ɛṭi pokyɛ, ɛṭi budan bɛɛ. Pok bala ɛkɛti te kanŋa ɛkɛ. Ɔci ba jyek mena ɛṭi neeniyɛ, bala ba jyek mena mieti ma te jyek Jwaŋa Tolan. Ɛkɛ mieti ma budan bɛɛ. Ma jyeddi ɔci ɛkkɛn ciyi yuonginda. Mena dwoki ɔci mena ɛṭiyɛ, ɛkkɛn yomgɛn ñɔya a cyɛɛlɔ yaakkɛn. 37 Jwalla guaktan ma a jwalla awarɛ agi, ‘Mena ne cyɛɛlɔ dwoki ɔci mena parɛ ɛṭi.’ 38 Ɛkkɛ cuuññin ‘ya aŋka ɛkkɛ ɛṭɛ waka kannɛ ɛkkɛ bɛɛy. Gena maka pookɛn noŋi kanŋay, ɔci waak bala ɛkkɛti te kanŋa ɛkkɛn.” 39 Ma Camɛɛrya, maka ciyi ban Caykaryɛ, ɛkkɛn jyeti Yaccuti ne coŋɔn te jyeka guaŋŋɛ ɛɛŋ ɛkkɛnti ne ɛkɛ ma myennɛ agi, “‘Ya myenna ɛkɛ te naŋka naŋi ‘ya waakɛnday.” 40 Ɔci ne ma Camɛɛrya bɛɛki Yaccutiyɛ, ɛkkɛn bala poṭi ɛkɛ warɛ gɔki agi, “Dala i yadi wɛnni cietin iki ɔɔn.” Ɔci ba jwalla guagɛ ɛkkɛn agi ɛkta yeddɔ ban ɛkkɛnyɛ, ɔci ɛkɛ yeddin ba nink ne yyɛɛwɔ. 41 Ɔci maka pookɛn, maka coŋin daŋkun jyeti Yaccuti te jyeka guaŋŋɛ Yaccuy. 42 Ɔci ma gɔkcin ɛɛŋti agi, “Acca ɔɔn jyettɔn ɛkɛti te jyek i paru bɛɛ. Ɔɔn tieŋnɔn te jyetk ɔɔn pookɔ, ɔci ŋeejɔn ɔɔn mena neeni a Mena Yuoci ma baan warda awarɛ.” 43 Ne nink ne yyɛɛwɔ baakiyɛ, ɛkɛ bana neeni dalnɛ ati ban Jaliil. 44 Acaan Yaccu gɔkcin mati agi, “Kan mena a bɔwa bala ban ma ɛkkɛnyɛ, maka ban ɛkkɛn gɔki agi ɛkɛ tolcin bɛɛ.” 45 Ɔci ne ɛkɛ dɛnni ban Jaliiljiyɛ, ma Jaliil yomgɛn ñɔɔna ñɔɔn acaan naŋka naŋŋɛ Yaccu yuarɛ ɛkkɛn ban Urcaliim te oŋ Iid Malɛɛka Lien Bɛɛn Goṭi A Gorŋy, acaan ɛkkɛn ati iidti ban Urcaliim daŋkun. 46 Ɔci Yaccu dɔɔki ban Kɛna ban Jaliilji moki, bana Yaccu pieg aaŋŋɛyɔ akki mooy luutkiny. Ɔci ḍuaŋa ṭɔɔlɛ ḍuaŋa tolanyɛ, kaci ɛkɛ kacca ‘uan warɛ yaayɛ ban Kapɛrnyam. 47 Ɔci ne weegɛn tieŋni Yaccu bɛɛni te ban Yahuudiya bɛɛni atti Jaliiljiyɛ, ɛkɛ ati Yaccuti, ɔci bala poṭi Yaccu warɛ aŋka Yaccu bɛya ban ɛkkɛn aŋka dala kaci ɛkɛ warɛ pwada, acaan kaci amɛ lieno. 48 Ɔci Yaccu gɔkcin ɛkɛti agi, “Kan ɛkkɛ naŋki ‘ya naŋka tɛyan ɔci naŋka ñyecki ma ‘ya yuardɛ bɛɛyɛ, ɛkkɛ jyeddɛ ‘yati boki?” 49 Ḍuaŋa ṭɔɔlɛ gɔkcin ɛkɛti agi, “Ciɛggɔn, bɛɛdi, kaci ‘ya dita tuwa.” 50 Yaccu gɔkcin ɛkɛti agi, “Ɔgdi ootta, gɔrca kaci i mɔkca uda.” Ɔci ‘uan jyeti jwalla guaŋŋɛ Yaccu, ɔci atti. 51 Ɔci ne ɛkɛ baali yomɔyɛ, maka kanŋan ɛkɛti gɛɛg kookcin ɛkɛti yomɔ. Ɔci ɛkɛ myetkɛ ma agi, “Kaci i warɛ pwanni.” 52 Ɛkɛ tooccin ɛkkɛnti agi, “Ɛkɛ warɛ pwani ne oŋ waŋɛ bala a ɔki?” Ɛkkɛn gɔkcin ɛkɛti agi, “Tɛɛnɔ ne oŋ waŋɛ warɛ yallɛ ne ḍyɛṭ ṭɔɔlɛ ɛkɛ warɛ luun doki.” 53 Ɔci ŋeejɛ weegɛn oŋ waŋa gɔkki ma ɛkɛti neeniyɛ, bala ba oŋ waŋa gɔŋni Yaccu ɛkɛti agi, “Ɔgdi ootta Kaci i mɔkca uda.” Ɔci ɛkɛ jyeti Yaccuti, ɔci maka on ɛkɛ moki jyeti Yaccuti waakɛnda. 54 Ɔci ne Yaccu kaci pɔŋniyɔ te waja neeniyɛ, ɔci naŋka tɛyan naŋka ñyecki ma ɛkɛ aŋi ne yyɛɛwɔ. Naŋka tɛyan neeni naŋŋɛ ɛkɛ ban Jaliilji ne ɛkɛ bɛɛni te ban Yahuudiyay.
1 Ɔci ne naŋka neeni baakiyɛ, ɔci iid ma Icrayiil bala, ɔci Yaccu ati Urcaliimji. 2 Ɔci puol bala Urcaliimji Kaañ Tukɛ Kulin taaŋɛti. (Yenti puol te tuk ma Icrayiil ma boṭi a Bɛtcatta.) Ɔci doŋki bala ne dɔɔyɔ puol taaŋɛti. 3 Maka waakɛn yeyin bala niin doŋki jitin a ḍiɛkan bɛɛ. Maka neeni a maka ñingɛn ulan ɔci maka ŋɔṭo, ɔci maka bɔggɛn iwan ɔci maka omgɛn iwan. [Ɛkkɛn bala kɛɛy ne pieg kotti ñaalɔ ba oŋkanday. 4 Acaan a oŋki malɛɛka Juaŋ ooddi iñɔ puolji, ɔci pieg ṭuudiji. Mena warɛ yaayan mena jɔɔtti kaatti a wyeñ puolji ne pieg ṭuudiji malɛɛkayɛ, ɛkɛ doki nina te waja bala ɛkɛtiy.] 5 Ɔci mena ‘uan gɛɛl bala toonnɛ iñɔ warɛ. Yuong ɛkɛ yuonga woociyɛ, a men baan mena parɛ byeŋkɛ ɔci ne dɔɔyɔ wyetkɛn ne ḍoogɔ (38). 6 Ɔci ne Yaccu gɔrni ɛkɛ baali niini iñɔ a ɔɔnyɛ, ɔci ŋeejɛ Yaccu ‘wana neeni warɛ yaayɛ te baaṭi doki, ɔci Yaccu gɔkcin ɛkɛti agi, “I buagi waru pwada?” 7 Mena warɛ yaayan gɔkcin ɛkɛti agi, “Ciɛggɔn, ne pyega ma waakɛn pwatti kotti ñaalɔyɛ, menga bala ‘ya olda pietin aŋka ‘ya waru pwaddɛ bɛɛ. Ne ‘ya buaga ka ‘ya ɔgdiyɛ, mena parɛ bala ñamu doki pietin.” 8 Yaccu gɔkcin ɛkɛti agi, “Jɔŋŋa ñaalɔ aaran lula ɔgdi ootta baanji.” 9 Ɔci ‘uan warɛ pwani ne pɛñan, kwaccin bɛɛ. Ɔci aaran luullɛ, ɔci ɛkɛ bala ati parɛ, ati a woono. Ɔci oŋŋa wanna a Oŋ Cabit. 10 Ɔci ma Icrayiil maka ḍwaŋin gɔkcin mena warɛ pwaniti agi, “Oŋŋa neeni a Oŋ Cabit, ɔci kan i aaran eedi te oŋŋa neeniyɛ, i jyek ganuun bɛɛññiji.” 11 Yeti ɛkɛ gɔkcin ɛkkɛnti agi, “Mena ‘ya waru pwanni neeniyɛ, gɔkkin ‘yati agi ‘ya aaran luljɔ ɔgji ootcɔ baanji.” 12 Ɔci ma tooccin ɛkɛti agi, “A menɛ gɔkkin iti agi i aaran lulji ɔgji ootci baanjiy?” 13 Mena warɛ pwani neeniyɛ, mena ɛkɛ pɔŋnɛ te waja neeniyɛ, kwoyi ɛkɛ acaan Yaccu warɛ uunnɛ ɔntɔ nona parɛti acaan poli ma polla tolan bala. 14 Ɔci ne baaṭi ɛkɛ yuarŋɛ Yaccu on Juaŋ ona tolan. Yaccu gɔkcin ɛkɛti agi, “Gɔrca, i waru pwanni. Naa i moki noŋja naŋka yaayan bɛɛ. Pɛñña bɛya iti ne ŋoyɔyɛ, bɛya a pɛñña ne yaayan iti.” 15 ’Uan ati dɔɔki ma Icrayiilti, ɔci ɛkkɛn myennɛ agi, “Gena Yaccu ‘ya ywaŋŋay.” 16 Ɔci acaan a ɔŋŋiyɛ, ma Icrayiil bala noŋi ywobji Yaccuti acaan Yaccu men ywaŋŋɛ te Oŋ Cabit. 17 Yeti Yaccu gɔkcin ɛkkɛnti agi, “Wey ɔɔn bala kanŋan men, ɔci ‘ya daŋkun baal kanŋ men.” 18 Ɔci ma Icrayiil ne ɛkkɛn tieŋki jyeka guaŋŋɛ Yaccu neeniyɛ, ɛkkɛn buagɔn Yaccu noktan a jitkɛn bɛɛ, acaan gena naŋŋɛ ɛkɛ Oŋ Cabit jyɛnnɛji parɛ neeni bɛɛ, naŋka parɛ bala moki, acaan ɛkɛ boṭi Jwaŋa Tolan agi Weegɛn, ɔci a ɔɔnyɛ, ɛkɛ noŋi ba ɛkɛ yoomki i Jwaŋa Tolan no. 19 Yaccu gɔkcin ɛkkɛnti agi, “Dala ɛkkɛ tieŋdɛ jyeka guagdi ‘ya ɛkkɛti a jyeka awarɛ neeni, ‘ya Kaci yaakati noŋ genga paru budan bɛɛ. ‘Ya gɔr ba waka naŋdɛ Wey ɔɔn, ɔci ‘ya noŋja daŋkun. 20 Acaan Wey ɔɔn ani Kacco, ɔci ‘ya Kaci lɛɛrta te naŋki ɛkɛ waakɛnda, ɔci ɛkɛ Kaci lɛɛrtɛ te naŋka pookɛn daŋkun. Ɔci naŋka ŋoyɔ neeni tɛɛcin te naŋka ñamu, ɔci ɛkkɛ poddɛ. 21 Ɔci bala ba Wey ɔɔn ne ma luoldɛ ñaalɔyɛ, ɔci ɛkkɛn ‘wondɛ ɛkɛ tɛɛtin, ɔci ‘ya Kaci daŋkun kan ‘ya buagayɛ, ‘ya ma ‘woñga tɛɛtin ba yom ‘ya. 22 Wey ɔɔn noŋdi godan ma bɛɛ. Naŋka neeni waakɛndayɛ, ‘wonna ‘ya Kaci ɛkɛ, 23 aŋka ma waakɛnda ani ‘ya Kaci ba ɛkkɛn anki Wey ɔɔn daŋkun ɔɔn. Kan mena ani ‘ya Kaci bɛɛyɛ, ɔci ɛkɛ ani Wey ɔɔn daŋkun bɛɛ. Mena neeniyɛ, a mena ‘ya cuonnay. 24 “Dala ɛkkɛ tieŋdɛ jyeka guagdi ‘ya ɛkkɛti a jyeka awarɛ neeni, mena tieŋdi jyek ‘ya ɔci jyeddi mena ‘ya cuonnatiyɛ, ɛkɛ ciya yuonginda. Ɔci jyek ywobji bɛya ɛkɛti te oŋ godan bɛɛ. Ɛkɛ a mena tuwa moki bɛɛ. Ɛkɛ aŋi mena tɛɛti doki. 25 Awarɛ, oŋ bala bɛya, ɔci bala acca doki, gena oŋŋa maka tuun tieŋti pwan ‘ya Kaci Jwaŋa Tolany, ɔci maka tieŋdiyɛ, ɛkkɛn uda. 26 Acaan ba Wey ɔɔn ne tɛɛti parɛ te tɛɛtin ɛkɛyɛ, ɔci Wey ɔɔn gɔkkin ‘ya Kaciti, ɔci ‘ya Kaci moki tɛɛt ba tɛɛtin Wey ɔɔn. 27 Ɔci Wey ɔɔn ‘ya Kaci ‘wonna jwali aŋka ‘ya noŋja godan acaan ‘ya a Kaci Ma Baano. 28 Naa ɛkkɛ poddɛ te jyeka neeni bɛɛ, acaan ne baaṭi ma waakɛnda maka bala kolk jitin tieŋdi pwan ‘ya, 29 ɔci ne ɛkkɛn tieŋti pwan ‘yayɛ, ɛkkɛn jɔldi ñaalɔ waakɛnda. Ɔci maka naŋki ɛkkɛn pwadinyɛ, ɛkkɛn jɔldi ɔci ciyi tɛɛti moki ɔɔn. Ɔci kan maka naŋki ɛkkɛn yeyinyɛ, ne ɛkkɛn jɔŋti ñaalɔyɛ, ɛkkɛn ḍakti ba jyek godan ɛkkɛn. 30 “‘Ya yaakati noŋ genga te yom ‘ya paru budan bɛɛ. ‘Ya tieŋŋa jiek te ñamu ɔci ‘ya gɔkka, ɔci jyeka guagdi ‘ya a jyeka awarɛ, acaan ‘ya buaga noŋ ba naŋki ‘ya bɛɛ. ‘Ya buaga noŋ ba naŋki Wey ɔɔn mena ‘ya cuonnay. 31 “Kan ‘ya miet ma te jyek war ‘ya paruyɛ, a ɔɔn yɔmjin mati bɛɛ. 32 Yeti gena Mena parɛ mieti ma te war ‘yay, ɔci ŋeej ‘ya jyek ɛkɛ a jyeka awarɛ. 33 “Ɛkkɛ ma cuuññɛ Yɔhannati doki, ɔci ɛkkɛ myennɛ ɛkɛ te jyeka awarɛ. 34 Yeti ‘ya buaga men baan gɛɛl gɔkti ma myettɛ te ‘ya bɛɛ. Yeti ‘ya gɔkkan ɛkkɛti te jyeka neeni aŋka ɛkkɛ yɔɔdin. 35 Yɔhanna ne ɛkɛ baali ɛkkɛtiyɛ, ɛkɛ bala ba dyɛka ne dɛki a dyɛŋiy, ɔci ɛkkɛ yomgɔ ñɔyɔ ne ḍiɛran ṭɔɔlɛ te dyɛŋi ɛkɛ dyɛŋŋa wanna. 36 “‘Ya balka genga, ɛkɛ mieti ma te ‘ya ne pwadan, miti Yɔhanna buannɛ kanŋa ‘ya ‘wonnata Wey ɔɔn aŋka cwamdi ‘yay, kanŋa neeni ma myettɛ ‘ya cuonna Jwaŋa Tolan. Ɔci jyek myetkin neeni aŋka pwatcin te jyek Yɔhanna. 37 Ɔci Wey ɔɔn mena ‘ya cuonna ɛkɛ ma myennɛ te jyek ‘ya daŋkun. Pwan ɛkɛ tieŋnɛ ɛkkɛ oŋgati bɛɛ, ɔci war ɛkɛ yuarŋɛ ɛkkɛ oŋgati bɛɛ. 38 Ɔci jyek ɛkɛ bala niin ɛkkɛ yomgɔti bɛɛ, acaan ɛkkɛ tiekɛ jyek mena ɛkɛ cuonnɛ. 39 Ɛkkɛ lieṭɛ jiek te worgaji acaan ɛkkɛ poŋɛ gɔkɛ agi tɛɛtin baadi bɛɛ neeniyɛ, yuardɛ ɛkkɛ worgaji. Jyeka lildɛ ɛkkɛ neeniyɛ, gena jyeka mietki ma a jyek ‘yay. 40 Ɔci ne ɛkkɛ yookɛ waakɔ te bɛɛn ‘yati, oŋ ɛkkɛ ‘wondin ‘ya tɛɛtin a ɔki? 41 “Pwani ‘ya bɛya te ma baan tuggɛn budan bɛɛ. 42 Yeti ŋeej ‘ya yomg ɛkkɛ ani Jwaŋa Tolan bɛɛ. 43 ’Ya bɛɛn te yenti Wey ɔɔn, ɔci ɛkkɛ jyettɛ ‘yati bɛɛ. Kan mena parɛ bɛya te yenti ɛkɛ budanyɛ, ɛkkɛ jyeddɛ gena ɛkɛti. 44 Ɛkkɛ yaakɛti jyeddɛ a ɔki ne ɛkkɛ buagɛ jieyɛ maka pookɛn, ɔci maka pookɛn jieyi ɛkkɛ, ɔci ɛkkɛ buagɛ jieyɛ Jwaŋa Tolan bɛɛ? 45 “Naa ɛkkɛ poŋdɛ ɛkkɛ tiagdinyɔ ‘ya Wey ɔɔnti bɛɛ. Mena ɛkkɛ tiagdɛ bala. Gena Muuca mena ɛkkɛ jyettɛ ɛkɛtiy. 46 Ɛkkɛ te jyettɛ Muucati awarɛyɛ, ɛkkɛ te jyettɛ ‘yati daŋkun, acaan jyeka kiinɛ ɛkɛ neeniyɛ, kiinɛ ɛkɛ gena jyek ‘ya. 47 Yeti kan ɛkkɛ jyettɛ jyeka kiinɛ ɛkɛ bɛɛyɛ, oŋ ɛkkɛ jyeddɛ jyek ‘ya a ɔki?”
1 Ne naŋka neeni baakiyɛ, Yaccu Galŋ Jaliil jyɛnnɛji, (ɔci galŋ yenta parɛ moki yenti Taybiiryac). 2 Ɔci polla tolan boottin ɛkɛti acaan ɛkkɛn gɔrcin Yaccu bala noŋi naŋka tɛyan naŋka ñyecki ma ɛkɛ ne ɛkɛ baali yɔŋi maka waakɛn yeyiny. 3 Ɔci Yaccu kaaccin ñaalɔ poomti, ɔci cooccin iñɔ aŋan i maka laldɛ ɛkɛ. 4 Ɔci iid ma Icrayiil Iid Malɛɛka Lien Bɛɛn Goṭi A Gorŋ cɔɔllin doki. 5 Ɔci ne Yaccu ñorni polla tolan balki bɛɛti ɛkɛtiyɛ, ɔci ɛkɛ gɔkcin Pilibucti agi, “Ikin wɛrtin oomdin aŋɛ aŋka amtan maka coŋin neeniy?” 6 Ne Yaccu gɔŋni a ɔɔnyɛ, ɛkɛ poci Pilibuc a poccin acaan buagɔn gɔrti yom Pilibuc. Gena naŋdɛ Yaccu ŋeejɛ ɛkɛ doki. 7 Pilibuc gɔkcin agi, “Byedga amtan maka neeni eedi bilk kanŋa mena ne cyɛɛlɔ ponk ne dɔɔyɔ wyetkɛn ne ḍoogɔ, ɔci byedga neeni yɔmdi bɛɛ. Ma dɛtti waakɛnda bɛɛ.” 8 Mod Butrucn bala, yenti Andarawuc. Ɛkɛ a mena bala maka laldɛ Yaccuti daŋkun, ɔci ɛkɛ gɔkcin Yaccuti agi, 9 “Kacca ‘uan gɛɛl bala wɛnni balki byedg ṭɔlgɛn ne dɔɔyɔ, (byedga naŋi ma te poka bartan ma a cayiiray). Ɔci yak ṭɔlgɛnn a ‘yɛggin ne yyɛɛwɔ daŋkun. Yeti waka neeni yɔmdi te maka coŋin neeni bɛɛ.” 10 Yaccu gɔkcin maka laldɛ ɛkɛti agi, “Gɔktɛ mati, dala ma cootti iñɔ.” Ɔci nona neeni luom bala coŋɔ. Ɔci maka ‘uay cooccin iñɔ coŋgin a coŋgin ba a alpn ne dɔɔyɔ (5,000). 11 Ɔci Yaccu byedg luullɛ ɔci gɔkcin Juaŋti agi, “Pwatcin.” Ɔci ɛkɛ byedg wɛɛnnɛ jitin, ɔci ‘wonnɛ maka ciyi iñɔ, ɔci ɛkɛ ma wɛɛnnɛ yaka ‘yɛggin daŋkun ba yomg ɛkkɛn buagɔn. 12 Ne ma korkɛn yooŋkiyɛ, Yaccu gɔkcin maka laldɛ ɛkɛti agi, “Waka tɛɛti limdiyɔ aŋka naa waak ḍakti bɛɛ.” 13 Ɔci oomdin ɛkkɛn tiɛtki neeniyɛ, limiyɔ ma ɔdin kumgin a inyaakkɛn wyetkɛn ne yyɛɛwɔ te waka tɛɛti te byedga ne dɔɔyɔ neeni. 14 Ne ma gɔrki naŋka tɛyan naŋka naŋŋɛ Yaccu a naŋka ñyecki ma ɛkɛ neeniyɛ, ɛkkɛn gɔkcin agi, “Awarɛ, mena neeni a mena guaktan ma a bɔwa Jwaŋa Tolan bala bɛya ṭɛɛrjiy.” 15 Ne Yaccu gɔrni ma noŋki ɛkɛ muktitiyɛ, ɛkɛ ma dalliyɔ, ɔci ɛkɛ ati dɔɔki poomti parɛ. Ɛkkɛn buagɔn Yaccu muktan naŋtan a ḍuaŋa tolan ɛkkɛn. 16 Ne oŋ unniyɛ, maka laldɛ Yaccu kaaccin iñɔ galŋji, 17 ɔci taapcin murkaji, ɔci ɛkkɛn bala ooddi ban Kapɛrnyam. Ɔci ne ḍiɛran ṭɔɔlɛ noon uli doki, ɔci Yaccu bɛɛn ɛkkɛnti men bɛɛ, baaw men. 18 Ɔci pɔɔgi galŋ bɛɛn ñaalɔ te jwamma tolan. 19 Ɔci ma bala gɔɔbi piego, ɔci ɛkkɛn ‘uoccin ñamu bala ba wɔɔkan ne ŋaanɔ, ɔci Yaccu yuarcɛ ɛkkɛn bala bɛya ñaalɔ pieg wyetkɛnti, bɛya ne cwakanti murkati. Ɔci ɛkkɛn buayi ne tolan. 20 Yeti Yaccu gɔkcin ɛkkɛnti agi, “Naa ɛkkɛ buayɛ bɛɛ, gena ‘ya!” 21 Ɔci Yaccu kaacci ɛkkɛn jiju murkaji te yoma ñɔyan, ɔci ne pɛñan murka dɛñjin kwoña ottan ɛkkɛn doki. 22 Ɔci te liidɔ parɛ ne polla tolan maka bala yɔdi galŋ kwoña waayiti gɔrkiyɛ, ŋeeckɔn ɛkkɛn murka parɛ gɛɛl bala bɛɛ, baawo. Murka nɔɔti ne cyɛɛlɔ kaacki maka laldɛ Yaccuy. Çeeckɔn maka yeddin neeni maka laldɛ Yaccu ati pookɛn, Yaccu baaw ɛkkɛnti. 23 Ɔci ne baaṭi murkan pookɛn bɛɛn te ban Taybiiryac, bɛɛn ne cwakanti nona Yaccu gɔŋni agi, “Pwatcin,” nona omki poli ma polla tolan oomdiny. 24 Ne maka coŋin neeni gɔrki Yaccu baawi, ɔci maka laldɛ ɛkɛ baakiyɛ, ɛkkɛn kaaccin murkan jitin ati Kapɛrnyam lieṭi Yaccu. 25 Ɔci ne ɛkkɛn Yaccu yuarkiti galŋ kwoña parɛtiyɛ, ɛkkɛn gɔkcin ɛkɛti agi, “Mena loṭi may, i bɛɛni wɛnni te tua?” 26 Ɔci Yaccu gɔkcin ɛkkɛnti agi, “Awarɛ, naŋka naŋdi ‘yayɛ, gena naŋka ñyecki ma ‘yay, yeti ɛkkɛ lieṭɛ ‘ya te naŋka yuarŋɛ ɛkkɛ ‘yati bɛɛ. Ɛkkɛ lieṭɛ ‘ya te oomdin ammɛ ɛkkɛ korki yooŋkiy. 27 Naa ɛkkɛ kanŋɛ te oomdin baadi bɛɛ. Dala ɛkkɛ kandɛ te oomdin utki mako. Oomdin neeni jada oŋgati bɛɛ. Mena ɛkkɛ ‘wondɛ oomdin neeniyɛ, gena ‘ya Kaci Ma Baano. ‘Ya yaakati acaan yenti Jwaŋa Tolan bala ‘yati.” 28 Ɔci ma tooccin Yaccuti agi, “Ɔɔn noŋdɔn a ɔki aŋka ɔɔn noŋdɔn kanŋa Jwaŋa Tolany?” 29 Ɔci Yaccu gɔkcin ɛkkɛnti agi, “Kanŋa Jwaŋa Tolan neeni, dala ɛkkɛ jyeddɛ ‘yati mena cuonnɛ Jwaŋa Tolany.” 30 Ɔci ma tooccin ɛkɛti agi, “I noŋja naŋka ñyecki ma i a ɔki? Ɔɔn buagɔn gɔrtɔn aŋka ɔɔn jyeddɔn iti. I noŋ a naŋki gena? 31 Yɔrg ɔɔn omi ama yenti manna wɔɔŋji ba kiiji ma worgaji agi, ‘Ɛkkɛn ‘wonnɛ Muuca oomdin te ñaalɔ aŋka ami ɛkkɛn.’” 32 Yaccu gɔkcin ɛkkɛnti agi, “Tieŋdɛ, ‘ya gɔkka ɛkkɛti awarɛ, gena Muuca ɛkkɛn ‘wonnɛ oomdin te ñaalɔ bɛɛ. Gena Wey ɔɔn, ɔci Wey ɔɔn ɛkkɛ ‘wondɛ oomdin awarɛ te pɔliji. 33 Am Jwaŋa Tolan bɛya iñɔ te Jwaŋa Tolanti a Men Baano, ɔci ma baan warda uda te ɛkɛ.” 34 Ɛkkɛn gɔkcin ɛkɛti agi, “Ciɛggɔn, ɔɔn ‘wondɔn ama neeni a ñaccu.” 35 Ɔci Yaccu gɔkcin ɛkkɛnti agi, “‘Ya a ama tɛɛtki may. Kan mena bɛya ‘yatiyɛ, ɛkɛ amdɛ koñ moki bɛɛ, ɔci kan mena jyeddi ‘yatiyɛ, ɛkɛ amdɛ yiɛn oŋgati moki bɛɛ. 36 Yeti ‘ya gɔkkan ɛkkɛti ka ɛkkɛ ‘ya yuarŋata doki, yeti ɛkkɛ jyettɛ ‘yati men bɛɛ. 37 Ɔci maka ‘ya ‘wonnata Wey ɔɔnyɛ, ɛkkɛn bɛya ‘yati waakɛnda, ɔci kan mena bɛya ‘yatiyɛ, ɛkɛ yiɛpca ‘ya ɔntɔ oŋgati bɛɛ. 38 Acaan ‘ya bɛɛn kooyan iñɔ te pɔliji aŋka ‘ya noŋ waka ṭagdi ‘ya bɛɛ. ‘Ya bɛɛn aŋka ‘ya noŋ waka ṭagdɛ Jwaŋa Tolan Mena ‘ya cuonnay. 39 Gena waka ṭagdɛ Mena ‘ya cuonna agi maka ‘ya ‘wonnata ɛkɛyɛ, ɛkɛ buagɔn men gɛɛl yeya te ‘yati bɛɛ. Ɛkɛ buagɔn ‘ya ɛkkɛn luolla ñaalɔ tɛtɔ ne oŋŋa bɛya ookti ne ŋoyɔy. 40 Gena waka ṭagdɛ Wey ɔɔn agi, maka ‘ya Kaci ɛkɛ yuarka ɔci jyeti ‘yatiyɛ, Wey ɔɔn buagɔn ɛkkɛn ciyi uda oŋkanda, ɔci ‘ya ɛkkɛn luolla ñaalɔ ne oŋŋa bɛya ookti ne ŋoyɔy.” 41 Ɔci ma Icrayiil bala woowɔ pookɛn te jwalla guaŋŋɛ Yaccu agi, ɛkɛ agji ama bɛɛnɔ iñɔ te pɔlijiy. 42 Ɛkkɛn gɔkcin agi, “Yaccu neeni a kaci Yuocip bɛɛ? Weegɛn ɔci mɛɛgɛn ŋeecin ikin bɛɛ? A gena acca ɛkɛ gɔki agi ɛkɛ bɛɛnjɛ iñɔ te Juaŋtiy?” 43 Ɔci Yaccu gɔkcin ɛkkɛnti agi, “Naa ɛkkɛ wɛyyɛ pookɔ bɛɛ. 44 Menga yaakinti bɛya ‘yati budan bɛɛ. Gena Wey ɔɔn mena ‘ya cuonna aŋka ma oodɛti ‘yatiy, ɔci ɛkkɛn luolla ‘ya ñaalɔ ne oŋŋa bɛya ookti ne ŋoyɔy. 45 Jyeka kiiwɛ maka a bɔwan Jwaŋa Tolan gɔki agi, ‘Ma waakɛnda laldɛ Jwaŋa Tolan.’ Maka tieŋŋin Wey ɔɔn ɔci lallɛ ɛkɛyɛ, ɛkkɛn aŋka bɛya ‘yati waakɛnda. 46 Menga Jwaŋa Tolan yuarŋɛ oŋgati bɛɛ. ‘Ya mena bɛɛn te ɛkɛti aŋka ɛkɛ yuarŋɛ. 47 Tieŋdɛ, ‘ya gɔkka ɛkkɛti, kan mena jyeddi ‘yatiyɛ, ɛkɛ ciya yuonginda. 48 ’Ya a ama tɛɛtki may. 49 Yɔrg ɛkkɛ omi ama yenti manna wɔɔŋji, ɔci ɛkkɛn tuuni. 50 Yeti ama neeni bɛɛn te pɔliji. Ɛkɛ bɛɛn aŋka kan men gɛɛl omdi ɛkɛyɛ, ɛkɛ tuwa oŋgati moki bɛɛ. 51 ’Ya a ama tɛɛtki ma bɛɛn te pɔliji. Kan menga omdi ama neeniyɛ, ɛkɛ uda oŋkanda baadi bɛɛ. Ɔci ama ‘woñga ‘ya ma baan warda aŋka tɛɛtki mayɛ, gena war ‘ya.” 52 Ɔci ma Icrayiil gɔwwɔ pookɛn agi, “Yeti mena ‘uan neeni ikin ‘wontin war ɛkɛ aŋka amtin a ɔki?” 53 Ɔci Yaccu gɔkcin ɛkkɛnti agi, “Awarɛ kan ɛkkɛ omdɛ war ‘ya Kaci Ma Baan bɛɛyɛ, ɔci kan ɛkkɛ mottɛ yimg ‘ya bɛɛyɛ, ɛkkɛ balgɛ ba ɛkkɛ tɛɛtɛ bɛɛ. 54 Mena omdi war ‘yayɛ, ɔci motti yimg ‘yayɛ, ɛkɛ uda oŋkanda baadi bɛɛ, ɔci ‘ya ɛkɛ luolla ñaalɔ ne oŋŋa bɛya ookti ne ŋoyɔy. 55 War ‘ya a ama awarɛ, ɔci yimg ‘ya a waka maattan ma awarɛ. 56 Ɔci mena omdi war ‘yayɛ, ɔci motti yimg ‘yayɛ, ɛkɛ bala ‘yati ɔci ‘ya da baal ɛkɛti. 57 Wey ɔɔn mena ‘ya cuonnayɛ, ɛkɛ tɛɛti. Ɔci acaan ɛkɛ tɛɛti a ɔɔnyɛ, ‘ya da tɛɛto. Ɔci ba naŋka neeni moki kan mena omdi war ‘yayɛ, ɛkɛ da tɛɛtti daŋkun. 58 Ama neeni a ama bɛɛn te pɔliji. Ɛkɛ bala ba oomdin omki yɔrg ɛkkɛ ɔci tuuki ɛkkɛn wanna bɛɛ. Maka omdi ama bɛɛn te pɔlijiyɛ, ɛkkɛn aŋka ciyi tɛɛti oŋkanda.” 59 Jyeka neeni a jyeka loṭi Yaccu ma ona morki ma Juaŋ ban Kapɛrnyam. 60 Ɔci maka coŋin, maka boottin ɛkɛti gɔkcin agi, “Jwalla neeni tɛy tɛyo. A menɛ yaakinti tieŋdiy?” 61 Yeti ŋeejɛ Yaccu yomɛti maka boottin ɛkɛti bala wooki jyeka neeni. Ɔci ɛkɛ gɔkcin ɛkkɛnti agi, “Jyeka neeni yeyɔ ɛkkɛtɛ? 62 Kan ɛkkɛ gɔrtɛ ‘ya Kaci Ma Baan dɔwwa nona bɛɛna ‘yay, ɛkkɛ oŋ noŋdɛ a ɔki oŋo? 63 Gena Boŋ Juaŋ aŋka tɛɛtki may. Waru yaakinti noŋi genga bɛɛ. Jyeka guaŋi ‘ya ɛkkɛtiyɛ, ɛkkɛn a booŋ ɔci ɛkkɛn a tɛɛtin moki. 64 Yeti magga bala ɛkkɛti wɛnni ɛkkɛn jyeti ‘yati men bɛɛ.” (Maka yookɔn te jyeni Yaccutiyɛ, ŋeejɛ ɛkɛ te ñamu doki. Ɔci mena Yaccu ‘wonnɛ ma byeŋkɛntiyɛ, ŋeejɛ Yaccu daŋkun.) 65 Ɔci Yaccu gɔkcin maka laldɛ ɛkɛti agi, “Te gena neeni aŋka ‘ya gɔŋna ɛkkɛti ka menga yaakinti bɛya ‘yati budan bɛɛ. Kan Wey ɔɔn gɔkti menti bɛɛyɛ, ɛkɛ yaakinti bɛya ‘yati bɛɛ.” 66 Ɔci ne ɛkkɛn tieŋki jyeka neeniyɛ, maka coŋin gɛɛg maka boottin ɛkɛti wɛti doki, ɛkkɛn ati i Yaccu moki bɛɛ. 67 Ɔci Yaccu gɔkcin Maka A Inyaakkɛn Wyetkɛn Ne Yyɛɛwɔ neeniti agi, “Ɛkkɛ da ooddɛ i makɔ?” 68 Ɔci Butruc gɔkcin ɛkɛti agi, “Ciɛggɔn, ɔɔn ooddɔn menɛti? Jyek i a jyeka balki tɛɛtin baadi bɛɛy, 69 ɔci ɔɔn jyettɔn doki ɔci ŋeejɔn ɔɔn i a Kiṭɔ, i a Kaci Jwaŋa Tolan Jwaŋa tɛɛti.” 70 Yaccu gɔkcin ɛkkɛnti agi, “Ɛkkɛ kɛnnin ‘ya bora agɛ Inyaakkɛn Wyetkɛn Ne Yyɛɛwɔy? Ɔci mena ne cyɛɛlɔ yomɛ a Jwaŋa Yaayan baa!” 71 Mena guaŋŋɛ Yaccu neeni gena Yahuuja kaci Cimaan Ickɛɛryuti, ɔci ɛkɛ a mena Yaccu ‘wonnɛ ma byeŋkɛntiy. Ɔci ɛkɛ a mena akki Ma Ne Inyaakkɛn Wyetkɛn Ne Yyɛɛwɔy.
1 Ɔci ne naŋka neeni baaniyɛ, Yaccu ati ḍɔki bonk Jaliilji. Ɛkɛ buagɔn ooddi ḍɔki bonk Yahuudiyaji bɛɛ, acaan ma Icrayiil buagɔn noki ɛkɛ. 2 Ɔci Iid Cieki Ma Te Darin cɔɔllin. Iid neeni ma ciyi te darin ṭɔlgɛn. 3 Ɔci modg Yaccun gɔkcin ɛkɛti agi, “Bana neeni dalja, ɔgdi ootta ban Yahuudiya aŋka maka lala i gɔrti naŋki i. 4 Kan menga buagɔn ŋeettan mayɛ, ɛkɛ noŋi kanŋa lieda boki? Kan i noŋ a ɔɔnyɛ, naŋki i lɛɛrka ma, dala ma waakɛnda gɔrti.” 5 (Modg Yaccun woodgɛn jyeti ɛkɛti bɛɛ.) 6 Yaccu gɔkcin ɛkkɛnti agi, “Oŋ ‘ya men neeni bɛɛ, yeti oŋki waakɛnda pwadɔ ɛkkɛti. 7 Ɛkkɛ yaakɛti noŋdɛ naŋki gɛɛl aŋka ma baan yomgɛn yiegdi ɛkkɛti bɛɛ. Yeti ma yomgɛn yeyɔ ‘yati acaan ‘ya gɔkcan ɛkkɛnti ka naŋki ɛkkɛn yeyɔ. 8 Ɛkkɛ ɔgdɛ ooddɛ iidti pookɔ. ‘Ya ootta iidti men bɛɛ, acaan nink ‘ya men ɛɛṭi.” 9 Ne Yaccu gɔŋni a ɔɔnyɛ, ɛkɛ yeddin ban Jaliil. 10 Yeti ne modg ɛkkɛn atki iidtiyɛ, Yaccu bootcin ŋoyɔ ati parɛ lieda ɔɔn. 11 Ma Icrayiil bala lieṭi ɛkɛ iidti ɔci bala gɔwwɔ toyi yɔtin pookɛn agi, “Ɛkɛ bala aŋɛ?” 12 Ma bala meeyi jiek te Yaccu ne pɛñan. Ma gɛɛg gɔki agi, “Ɛkɛ a mena pwadan,” ɔci gɛɛg kɛki gɔki agi, “A’a, ɛkɛ a mena ma jyɛttɛ ɔntɔ.” 13 Yeti ma buayi ḍuaŋan ma Icrayiil ɔci menga gɔkcin lyɛljin bɛɛ. 14 Ɔci ne iid aŋŋɛ konɛyɛ, Yaccu ati kaaccin on Juaŋ ona tolan loṭi mako. 15 Ɔci ma Icrayiil poni ɔci tooccin agi, “Jyeka kiigin ŋeejɛ ɛkɛ a ɔki? Ɛkɛ lali ma bɛɛ.” 16 Ɔci Yaccu gɔkcin ɛkkɛnti agi, “Jyeka loṭa ‘ya mayɛ, a jyek ‘ya paru bɛɛ, gena jyek mena ‘ya cuonna. 17 Kan menga buagɔn noŋi ba naŋka ṭagdɛ Jwaŋa Tolanyɛ, ŋeeddɛ ɛkɛ parɛ kan lali ‘ya neeni bɛɛn te ‘yati paru? Walla bɛɛn te Jwaŋa Tolantiy? 18 Mena gɔki te tuk ɛkɛ budanyɛ, ɛkɛ buagɔn ma gɔki agi ɛkɛ pwadjɛ. Yeti mena buagɔn ma gɔkti a mena ɛkɛ cuonnɛ pwad pwadyɛ, jyek ɛkɛ aŋka a jyeka awarɛ, ɔci jomi jiek baaw ɛkɛti. 19 “Ɛkkɛ myennɛ Muuca jyek ganuun te baaṭi bɛɛ? Ɔci menga bala ɛkkɛti noŋi ba jyeka guaŋŋɛ Muuca bɛɛ. Ɔci te gena aŋka ɛkkɛ buagɛ ‘ya nogdatɛy?” 20 Ma gɔkcin Yaccuti agi, “Jwaŋa yaayan bala iti. A makɛ bala buagɔn noki iy?” 21 Yaccu gɔkcin ɛkkɛnti agi, “Gena naŋi ‘ya bala ne cyɛɛlɔ, ɔci ɛkkɛ ponnɛ te ɛkɛ. 22 Muuca ɛkkɛ myennɛ jyek ŋwoti mako, ɔci ɛkkɛ myetkɛ yɔrg ɛkkɛ te ñamu daŋkun, Ɔci ɛkkɛ ŋuoddɛ ma te Oŋ Cabit. 23 Pari ɛkkɛ ŋuoddɛ ma te Oŋ Cabit acaan ɛkkɛ buagɛ jyek Muuca jyɛddɛji bɛɛ no, oŋ ɛkkɛ looñɛ ‘yati te oŋŋa ‘ya men ywaŋŋayɔ te Oŋ Cabit ogo? 24 Ne ɛkkɛ gɔṭɛ naŋka yuartɛ ɛkkɛ te woŋgɔ budanyɛ, naa ɛkkɛ gɔkɛ agi naŋki ‘ya yaayi bɛɛ. Kan jiek ŋeejɛ ɛkkɛ waakɛndayɛ, aŋka ɛkkɛ gɔktɛ.” 25 Ɔci maka ban Urcaliim gɛɛg bala toyi yɔtin agi, “Mena neeni a mena liltan ma aŋka noktan ma bɛɛ? 26 Gɔrtɛ, ɛkɛ bala gɔki jiek lyɛli ma ñomgɛnti, ɔci menga noŋi genga ɛkɛti bɛɛ. Maka ḍwaŋin gɔki ɛkɛ a Kiṭɔ boki? 27 A ɔŋŋiyɛ, nona ɛkɛ bɛɛni ŋeecin ikin, yeti ne Kiṭɔ Mena Muonɛ Juaŋ Bora bɛɛdiyɛ, nona ɛkɛ bɛɛdi ŋeeddɛ menga bɛɛ.” 28 Ɔci Yaccu ne ɛkɛ baali loṭi ma on Juaŋ ona tolanyɛ, ɛkɛ tooccin mati gɔkcin agi, “‘Ya ŋeejati ɛkkɛ? Ɔci nona bɛɛna ‘ya ŋeejɛ ɛkkɛ? Yeti ‘ya bɛɛn te wyeñ ‘ya paru budan bɛɛ. Mena ‘ya cuonna a mena awarɛ, ɔci ɛkɛ kwoyɛ ɛkkɛ. 29 Yeti ɛkɛ ŋeej ‘ya acaan ‘ya bɛɛn te ɛkɛti, ɔci ‘ya cuonna ɛkɛ wɛnni.” 30 Te jyeka guaŋŋɛ Yaccu neenitiyɛ, ma buagɔn Yaccu muktan, yeti ɛkɛ muŋŋɛ menga bɛɛ acaan oŋ ɛkɛ men biɛṭi. 31 Yeti te polla tolanti neeniyɛ, ma gɛɛg jyeti ɛkɛti a ḍiɛkan bɛɛ. Ɔci ɛkkɛn gɔkcin agi, “Ne Mena Muonɛ Juaŋ Bora bɛɛdiyɛ, ɛkɛ yaakinti noŋdi naŋka tɛyan ne coŋɔn, naŋka ñyecki ma ba Yaccu ɔɔn boki?” 32 Ɔci ma Pɛriciin ne tieŋki polla tolan balki meeki jyeka neeni te Yaccuyɛ, ɔci gaciicin ḍwaŋin ma Icrayiil ɔci ma Pɛriciin maka bɔlin cuuñɛ aŋka Yaccu muktan. 33 Ɔci Yaccu gɔkcin ɛkkɛnti agi, “‘Ya baltin iki ɛkkɛ ne ḍiɛran ṭɔɔlɛ, ɔci ne baaṭi ‘ya dɔwwa mena ‘ya cuonnati dɔki. 34 Ne baaṭi ɛkkɛ liertɛ ‘ya, ɔci ɛkkɛ ‘ya yuardata bɛɛ. Ɔci nonta oodda ‘ya neeni ɛkkɛ yaaktɛti bɛɛdɛ bɛɛ.” 35 Ɔci ma Icrayiil toyi yɔtin pookɛn agi, “‘Wana neeni ooddi aŋɛ aŋka yuartin ikin bɛɛy? Ɛkɛ buagɔn ooddi ma Icrayiilti maka cyɛnŋin jitin bonk ma Giriik aŋka loṭi ma Giriik? 36 Jyek Yaccu neeni jitkɛn bala a ɔki ne ɛkɛ gɔki agi, ‘Ne baaṭi ɛkkɛ liertɛ ‘ya ɔci ɛkkɛ ‘ya yuardata bɛɛy,’ ɔci ‘Nonta ‘ya oodda ɛkkɛ yaakɛti bɛɛdɛ bɛɛy?’ ” 37 Ɔci oŋŋa tolan ne ŋoyɔ a oŋ iid tolanyɛ, Yaccu jɔŋŋin ñaalɔ te oŋŋa neeni ɔci gɔkcin te pwana tolan agi, “Kan mena amɛ yiɛnyɛ, dala ɛkɛ bɛya ‘yati ɔci motti. 38 Jyeka kiigin gɔki agi, ‘Kan mena jyeddi ‘yatiyɛ, pyega tɛɛtki ma neeni bɛya te ɛkɛ yomɛti oŋkanda ɔɔn.’ ” 39 (Jyeka guaŋŋɛ Yaccu neeni a jyek Boŋ Jwaŋa Tolan. Acaan ba Boŋ Jwaŋa Tolan neeni Yaccu ma myennɛ te Boŋa bɛya ciyi maka jyeddi yomgɛnti. Ne Yaccu ma myennɛ neeniyɛ, Boŋ Juaŋ bɛɛn mati men bɛɛ, acaan Yaccu jɔŋŋin ñaalɔ ɔci ati non pwani ɛkɛ pɔliji men bɛɛ.) 40 Ma tieŋŋin jyeka neeni, ɔci ma gɛɛg gɔkcin agi, “Ɛkɛ a mena bɔwa Jwaŋa Tolan awarɛ.” 41 Maka pookɛn gɔkcin agi, “Ɛkɛ a Kiṭɔ.” Yeti ma gɛɛg kɛki gɔki agi, “Hay! Kiṭɔ bɛya te ban Jaliil boki? 42 Worga gɔki a ‘Kiṭɔ jiettan ma Daawud bɛɛ? Ɔci worga gɔki a ɛkɛ bɛya te ban Bɛtlaham ban Daawudn te baaṭi bɛɛ?’” 43 Ɔci ma kɛɛptin jitin te jyek Yaccu, 44 ɔci ma gɛɛg buagɔn Yaccu muktan, yeti men gɛɛl ati ɛkɛ muŋŋɛ bɛɛ. 45 Ɔci maka bɔlin dɔɔkkin byeŋkɛn budan nona maka cuoñi ɛkkɛnti. Gena gaciicin ḍwaŋin ma Icrayiil ɔci ma Pɛriciin. Ɔci ɛkkɛn tooccin bɔlinti agi, “Ɛkkɛ Yaccu dolnɛyɔ ogo?” 46 Ɔci bɔlin gɔkcin agi, “Men gɛɛl bala gɔki ba ɛkɛ ɔɔn bɛɛ!” 47 Ɔci ma Pɛriciin tooccin ɛkkɛnti agi, “Ɛkkɛ da jyennɛ ɔntɔ jyeka jomgin neeniti daŋkun? 48 Ḍuaŋa tolan gɛɛl jyeti ɛkɛti boki? Walla men ma Pɛriciin gɛɛl jyeti ɛkɛti boki? 49 Yeti polla tolan neeni waka kiigin worgaji kwoyɔn ɛkkɛn, ɔci ɛkkɛn ‘ualdɛ Juaŋ ɔci ywobji ɛkɛ bɛya ɛkkɛn wyetkɛnti.” 50 Nikɔdiimac, mena ati Yaccuti te ñamu bala i ḍuaŋan neeni, ɔci ɛkɛ tooccin ɛkkɛnti agi, 51 “Ba jyek ganuun ikin ma ywobji oltan mengati budan boki? Te ñamu ɛkkɛn gɔrti jieko, kan jyek mena neeni bala a ɔkiy, pwadɔ, walla yeyɔ. Ɔci ma gɔṭi naŋki ɛkɛ moki, kan bala a ɔkiy, pwatcin, walla yaayɛ. Naŋki ganuun ikin bala a ɔɔn bɛɛ?” 52 Ɔci ma Pɛriciin gɔkcin Nikɔdiimacti agi, “I bɛɛni te ban Jaliil daŋkun? Kan i liercayɛ, ŋeejja i bɔwa Jwaŋa Tolan gɛɛl bɛya te ban Jaliil bɛɛ.” 53 Ɔci ma waakɛnda menga da ati baanɛti.
1 Ɔci Yaccu ati Pom Jɛtuunti. 2 Ɔci te liidɔ ḍiɛran Yaccu dɔɔkkin on Juaŋ ona tolan. Ɔci ma waakɛnda bɛɛn ɛkɛti, ɔci Yaccu cooccin iñɔ, ɔci ɛkɛ bala loṭi mako. 3 Maka loṭi worga Juaŋ ɔci ma Pɛriciin eccin ɛɛŋ Yaccuti. Ɛŋa neeni bala noŋi tommo. Ɔci ɛɛŋ owwi ma ḍuacci ma yeccu nona maka coŋin ñomgɛnti. 4 Ɔci ɛkkɛn gɔkcin Yaccuti agi, “Mena loṭi may, ɛŋa neeni mugɛ ma te tommo, 5 ɔci ganuun Muuca gɔki agi, ‘Kan mena noŋdi a ɔɔnyɛ, dala ɛkɛ yeptan ma te gwoyi noktan.’ Oŋ i da gɔk a ɔki te ɛkɛ?” 6 Ne ɛkkɛn gɔkki a ɔɔnyɛ, ɛkkɛn poci Yaccu a poccin. Ɛkkɛn buagɔn Yaccu noŋdi amaam aŋka ɛkkɛn Yaccu muktan. Yeti Yaccu goŋjin iñɔ, ɔci kiejin ṭɛɛrji te bieŋɛ. 7 Ɔci ma ‘wota tooccin ɔɔn, ɔci Yaccu jɔŋŋin ñaalɔ gɔkcin agi, “Mena nɔji ɛkɛ baawyɛ, dala ɛkɛ guonan yiɛptɛ ɛɛŋti ñamu.” 8 Ɔci Yaccu goŋjin moki kiejjin ṭɛɛrji moki. 9 Ne ma tieŋki jyeka guaŋŋɛ Yaccu neeniyɛ, ɛkkɛn kaaccin bora ne cyɛɛlɔ, ne cyɛɛlɔ. Mena tolan jɔɔtcin kaaccin bora ñamu, ɔci maka pookɛn bootcin ɛkɛ ŋoyɛti ne ɛkkɛn ɔɔcki bora waakɛnda ɔɔn. Ɔci Yaccu dolliyɔ parɛ, ɔci ɛɛŋ bala yɔɔd ɛkɛ ñamɛti. 10 Yaccu ñorcin ɛɛŋti ɔci gɔkcin ɛkɛti agi, “Ma ati aŋɛ? I yiɛmmi menga bɛɛ?” 11 Ɛkɛ gɔkcin agi, “A’a, Ciɛggɔn, ‘ya yiɛmma menga bɛɛ.” Ɔci Yaccu gɔkcin agi, “‘Ya daŋkun i yyɛbdin bɛɛ. I ɔgdi ootta, naa noŋja nɔji moki bɛɛ.” 12 Ɔci Yaccu bala gɔwwi i ma moki, ɔci gɔkcin ɛkkɛnti agi, “‘Ya a mena dɛki noono. Kan mena bootti ‘yatiyɛ, ɛkɛ ooddi te nona miel bɛɛ. Ɛkɛ ooddi te nona bɔwan, ɔci tuwa moki bɛɛ.” 13 Ma Pɛriciin gɔkcin ɛkɛti agi, “I miet ma te war i paru, menga bala yɔɔdi iki i bɛɛ, acaan a ɔŋŋiyɛ, jyek i yɔmjin bɛɛ.” 14 Yaccu gɔkcin ɛkkɛnti agi, “Kan ‘ya miet ma te jyek war ‘ya paru budanyɛ, jyek ‘ya a jyeka awarɛ, acaan nona bɛɛna ‘ya ŋeej ‘ya, ɔci nona oodda ‘ya ŋeej ‘ya. Yeti nona bɛɛna ‘ya ɔci nona oodda ‘ya, kwoyɛ ɛkkɛ. 15 Ɛkkɛ jiek oldɛ ma wyetkɛnti te yomg ɛkkɛ ma baan budan, ɔci ‘ya jiek olja menga wyeñɛti bɛɛ. 16 Yeti kan ‘ya gɔkca ka waak pwadɔ walla yeyɔyɛ, jyek ‘ya a jyeka awarɛ, acaan ‘ya baal paru bɛɛ. Wey ɔɔn mena ‘ya cuonna, bala ‘yati oŋkanda. 17 Jyek ganuun ɛkkɛ bala ɛkkɛti, ɔci jiek gɔki agi kan maka ne yyɛɛwɔ gɔki jwalla ne cyɛɛlɔyɛ, a ɔɔn yɔmjin. 18 ’Ya miet ma te war ‘ya, ɔci mena parɛ mieti ma te jyek ‘ya. Gena Wey ɔɔn mena ‘ya cuonna.” 19 Te jyeka neeni ɛkkɛn tooccin Yaccuti agi, “Wey ɛkkɛ bala aŋɛ?” Yaccu gɔkcin agi, “Ɛkkɛ ‘ya ŋeejati bɛɛ, ɔci Wey ɔɔn kwoyɛ ɛkkɛ moki. Te ‘ya ŋeejati ɛkkɛyɛ, te Wey ɔɔn daŋkun ŋeejɛ ɛkkɛ.” 20 Yaccu bala loṭi ma te jyeka neeni kaña on Juaŋ ona tolan nona ḍɔcki ma bilko, yeti ma bɛɛn ɛkɛ mugɛ bɛɛ acaan oŋ ɛkɛ men biɛṭi. 21 Yaccu gɔkcin ɛkkɛnti moki agi, “‘Ya ootta ɔci ɛkkɛ liertɛ ‘ya, ɔci ɛkkɛ tuudɛ nɔji ɛkkɛ ḍɔɔggɔti ɔɔn. Acaan a ɔŋŋiyɛ, nona oodda ‘ya ɛkkɛ yaakɛti bɛɛdɛ bɛɛ.” 22 Ɔci maka ḍwaŋin ma Icrayiil bala toyi yɔtin agi, “Ɛkɛ noki war ɛkɛ parɛ aŋka ɛkɛ gɔki agi ikin yaakinti bɛɛtin nona ootci ɛkɛ bɛɛyɛ?” 23 Ɔci Yaccu gɔkcin ‘wota agi, “Ɛkkɛ agɛ maka iñɔ, ‘ya a mena ñaalɔ. Ɛkkɛ agɛ maka iñɔ ṭɛɛrji ɔci ‘ya a mena ṭɛɛrji bɛɛ. 24 Ɛkkɛ myennin ‘ya ka ɛkkɛ tuudɛ nɔji ɛkkɛ ḍɔɔggɔti ɔɔn. Kan ɛkkɛ tiekɛ gɔkɛ agi ‘‘Ya a Kiṭɔ’ bɛɛyɛ, ɛkkɛ tuudɛ nɔji ɛkkɛ ḍɔɔggɔti.” 25 Ɔci ma tooccin ɛkɛti agi, “I a menɛ?” Yaccu gɔkcin ɛkkɛnti agi, “Pari ɛkkɛ myennin ‘ya te ñamu doki bɛɛ? 26 ’Ya yaakati gɔkka jyeka coŋin te nɔji ɛkkɛ, yeti ‘ya gɔkca bɛɛ. Mena ‘ya cuonna ɛkɛ a mena awarɛ, ɔci ‘ya miet ma waakɛnda te jyeka tieŋŋan ‘ya te ɛkɛtiy.” 27 Jyeka guagdɛ Yaccu neeniyɛ, kwoyɔn ɛkkɛn ne Yaccu baali gɔki jyek Weegɛny. 28 Ɔci Yaccu gɔkcin agi, “Ne ‘ya Kaci Ma Baan ŋaaptata ma ñaalɔyɛ, ɔci ŋeeddɛ ɛkkɛ ‘‘Ya a Kiṭɔ’, ɔci ŋeeddɛ ɛkkɛ daŋkun ‘ya noŋ genga te yom ‘ya paru budan bɛɛ, yeti ‘ya gɔk te jyeka ‘ya laldati Wey ɔɔny. 29 Ɔci mena ‘ya cuonnayɛ, ɛkɛ bala ‘yati. ‘Ya dalna ɛkɛ ɔntɔ bɛɛ, acaan oŋkanda ‘ya noŋ ba naŋka ɛkɛ buagitiy.” 30 Ne Yaccu baali gɔki a ɔɔnyɛ, maka coŋin jyeti ɛkɛti. 31 Maka jyeti Yaccuti neeniyɛ, ma gɛɛg a ma Icrayiil, ɔci Yaccu gɔkcin ɛkkɛnti agi, “Kan ɛkkɛ ciyɛ te jyek ‘ya oŋkandayɛ, ɛkkɛ a maka laldi ‘ya awarɛ, 32 ɔci jyeka awarɛ ŋeeddɛ ɛkkɛ, ɔci ɛkkɛ pɔktɛ ɛkkɛn ḍɔɔggɔti.” 33 Ɛkkɛn gɔkcin Yaccuti agi, “Abrahim a yɔr ɔɔn. Ɔɔn agɔn kɛɛnk magga oŋgati bɛɛ. A gena guaga i ɔɔn pɔktɔnyɔy?” 34 Yaccu gɔkcin ɛkkɛnti agi, “Tieŋdɛ, ‘ya gɔkka ɛkkɛti awarɛ, mena noŋi nɔjiyɛ, ɛkɛ a kɛɛngɔn nɔjjo. 35 Mena kɛɛngɔn ciyi on weegɛn a ñaccu bɛɛ. Gena mena a kaci ɛkɛ aŋka ciyi on weegɛn a ñaccu. 36 Kan ɛkkɛ pɔktɛ Kaciyɛ, ɛkkɛ pɔktɛ ɛkɛ awarɛ. 37 Çeej ‘ya ɛkkɛ agɛ kɛɛgin Abrahim. Yeti ɛkkɛ buagɛ nokkɛ ‘ya acaan jyek ‘ya bala ɛkkɛ yomgɔti bɛɛ. 38 ’Ya gɔk ba naŋka yuarŋ ‘ya te Wey ɔɔnti, yeti ɛkkɛ noŋɛ ba waka tieŋnɛ ɛkkɛ te wey ɛkkɛti.” 39 Ɛkkɛn gɔkcin Yaccuti moki agi, “Abrahim a yɔr ɔɔn.” Yaccu gɔkcin ɛkkɛnti agi, “Te ɛkkɛ agɛ kɛɛgin Abrahimyɛ, te ɛkkɛ noŋɛ ba naŋki Abrahim. 40 ’Ya a mena ɛkkɛ myettɛ te jyeka awarɛ, jyeka tieŋŋan ‘ya te Jwaŋa Tolantiy, yeti ɛkkɛ buagɛ nokki ‘ya. Naŋki Abrahim bala a ɔɔn boki? Hayyɛllɛ! 41 Ɛkkɛ noŋɛ ba naŋki wey ɛkkɛ.” Ma gɔkcin ɛkɛti agi, “Ɔɔn jietkɔn ma te tomi bɛɛ. Wey ɔɔn bala ne cyɛɛlɔ, gena Jwaŋa Tolan.” 42 Yaccu gɔkcin ɛkkɛnti agi, “Te Wey ɛkkɛ agi Jwaŋa Tolanyɛ, te ɛkkɛ anɛ ‘ya acaan ‘ya a war Jwaŋa Tolan, ɔci ‘ya bɛɛn te ɛkɛti. ‘Ya bɛɛn te wyeñ ‘ya budan bɛɛ. ‘Ya cuonna Wey ɔɔn. 43 Te gena yeti jyek ‘ya jitkɛn kwoyɛ ɛkkɛy? Jyek ‘ya jitkɛn kwoyɛ ɛkkɛ acaan ɛkkɛ yookɛ te jyeka loṭa ‘ya may. 44 Ɛkkɛ bɛɛnɛ te wey ɛkkɛ Jwaŋa Yaayanti, ɔci ɛkkɛ buagɛ noŋdɛ ba naŋka ṭagdɛ wey ɛkkɛ. Te ñamu wey ɛkkɛ a mena noki mako. Ɛkɛ yaakinti jyeka pwadin jyeka awarɛ bɛɛ, acaan jyeka awarɛ bala ɛkɛti bɛɛ. Ne ɛkɛ jomi jiekyɛ, ɛkɛ gɔki te tuk ɛkɛ parɛ, acaan ɛkɛ a mena jomi jieko, ɔci jyeka jomgin kooyin iñɔ ṭɛɛrji te tuk ɛkɛ. 45 Yeti ɛkkɛ jyettɛ ‘yati bɛɛ, acaan ‘ya miet ɛkkɛ te jyeka awarɛ. 46 A menɛ bala wɛnni ɛkkɛti yaakinti nɔji ‘ya lɛɛldɛ boray? Kan jyek ‘ya a jyeka awarɛ ɛkkɛ yookɛ te jyeni ‘yati ogo? 47 Kan mena a men Juaŋyɛ, ɛkɛ tyeŋi jyek Juaŋo. Ɛkkɛ agɛ ma Juaŋ bɛɛ, a ɔɔnyɛ, ɛkkɛ tieŋdɛ jyek Juaŋ bɛɛ.” 48 Ma Icrayiil gɔkcin Yaccuti agi, “Hay! Ɔɔn gɔŋnɔn awarɛ, i a mena yaayan, ɔci jwaŋa yaayan bala iti.” 49 Yaccu gɔkcin agi, “Jwaŋa yaayan bala ‘yati bɛɛ. ‘Ya noŋ aŋka ma gɔrti pwani Wey ɔɔn, yeti ɛkkɛ gɔkɛ agi ‘ya yaajjɔ. 50 ’Ya buaga ma gɔkti ‘ya pwadɔ? A’a a jyek ‘ya neeni bɛɛ. Gena jyek mena parɛ, ɔci ɛkɛ gɔrti naŋki ‘ya, ɔci ɛkɛ gɔkti a pwatcin walla yaayɛ. 51 Tieŋdɛ ‘ya gɔkka ɛkkɛti awarɛ, kan menga jyek ‘ya tiidiyɔyɛ, ɛkɛ tuwa oŋgati bɛɛ.” 52 Ma Icrayiil gɔkcin ɛkɛti agi, “Acca ŋeejɔn ɔɔn jwaŋa yaayan bala iti. Abrahim tuuni, ɔci maka a bɔwan Jwaŋa Tolan moki tuuni, ɔci i gɔk mena noŋdi ba jyek i tuwa bɛɛ. 53 I tol te Abrahim yɔr ɔɔn mena tuunyɛ? Ɔci i tol te bɔwan Jwaŋa Tolan maka baaw tuun nɛ? I gɔk i a menɛ?” 54 Ɔci Yaccu gɔkcin ɛkkɛnti agi, “Kan ‘ya gɔk paru agi ‘ya pwadyɛ, a ɔɔn yɔmjin bɛɛ, bala ba jyeka budan. Yeti gena Wey ɔɔn gɔki agi ‘ya pwadjɔy. Ɔci gena ɛkɛ guagdɛ ɛkkɛ a Jwaŋ ɛkkɛy. 55 Yeti Jwaŋa Tolan ŋeejɛ ɛkkɛ bɛɛ, yeti ɛkɛ ŋeej ‘ya. Kan ‘ya gɔkca Jwaŋa Tolan ŋeej ‘ya bɛɛyɛ, ‘ya agdi mena jomi jiek ba ɛkkɛ. Yeti Jwaŋa Tolan ŋeej ‘ya awarɛ, ɔci ‘ya tiec jyek ɛkɛ. 56 Ne wey ɛkkɛ Abrahim baali kɛɛy ‘yayɛ, ɛkɛ yomɛ ñɔɔna ñɔɔn acaan ŋeejɛ ɛkɛ, ɛkɛ gɔrti oŋŋa ‘ya bɛɛday. Ɔci gɔrcin doki, ɔci yomɛ ñɔɔcin.” 57 Ma Icrayiil gɔkcin ɛkɛti agi, “Yuong i men aŋi a ma baan ne yyɛɛwɔ mena parɛ byeŋkɛ (50) bɛɛ. Abrahim boki yuarŋi i?” 58 Yaccu gɔkcin ɛkkɛnti agi, “Tieŋdɛ, ‘ya gɔkka ɛkkɛti awarɛ, ne Abrahim baawi menyɛ, ‘‘Ya a ‘ya,’ doki baalo.” 59 Ma gwoyi luuli buagɔn yebi Yaccu noktan, yeti ɛkɛ warɛ coŋŋɛ ɔci kooyin bora te on Juaŋ ona tolanti lieda ɔɔn.
1 Ɔci Yaccu bala goṭi pɔɔjɔ, ɔci mena ulli gɛɛl yuarnɛ ɛkɛ. Mena neeni a ulli te oŋŋa wona ɛkɛ jiennɛ mɛɛgɛny. 2 Maka laldɛ Yaccu tooccin ɛkɛti agi, “‘Wana neeni ñingɛ ulcin te wona jiennɛ mɛɛgɛn ogo? Te nɔji ɛkɛ, walla te nɔji maka ɛkɛ jietkiy?” 3 Yaccu kɛkcin agi, “A’a, te nɔji ɛkɛ bɛɛ, walla te nɔji maka ɛkɛ jietki bɛɛ, yeti ɛkɛ ñingɛ ulcin aŋka ma gɔrti naŋki Jwaŋa Tolan ɛkɛti. 4 Dala ikin kantin kanŋa mena ‘ya cuonna ne noon men bɔwi ɔŋ. Dita nona miel bɛya, ɔci menga yaakinti noŋdi kanŋa ne nona miel bɛɛdi bɛɛ. 5 ’Ya ne baala iñɔ baanji wɛnni menyɛ, ‘ya a mena dɛki ma baano.” 6 Ne Yaccu gɔŋni a ɔɔnyɛ, ɔci ɛkɛ ñaang ŋuulnɛ ṭɛɛrji ɔci ñaang naŋŋɛ aŋi lommo, ɔci baannɛ mena ñingɛ ulan ñingɛti. 7 Ɔci Yaccu gɔkcin ɛkɛti agi, “Ɔgdi ootta ñingu kuoya Pwol Cilɔɔwamji.” (Pwol Cilɔɔwam te jyek Mabaan yenti “Pwol Mena cuuñɛ May”.) Ɔci ‘uan ati kwoccin ɔci ne ɛkɛ dɔɔŋniyɛ, ɛkɛ yaakinti gwallo. 8 Maka cieki i ɛkɛ baanji, ɔci maka ɛkɛ yuarki ne ɛkɛ ñwoyi waakyɛ, gɔkcin agi, “Mena neeni a mena ciyi iñɔ ñwoyi waak bɛɛ?” 9 Maka pookɛn gɛɛg gɔkcin agi, “Ɛɛ, gena ɛkɛ.” Ɔci maka pookɛn moki gɛɛg gɔki agi, “A’a, yeti bala ba ɛkɛ.” Ɔci ‘uan gɔkcin agi, “Gena ‘ya.” 10 Ɔci ma gɔkcin ɛkɛti agi, “I ñingu pɔŋni a ɔki?” 11 Ɛkɛ gɔkcin agi, “‘uan gɛɛl bala bartan ma a Yaccu, ɛkɛ noŋi lomi, ɔci baannɛ ‘ya ñinguti, ɔci ‘ya myenna agi ‘ya ootcɔ kuoccɔ, ɔci ‘ya ati kwoccan, ɔci ‘ya ñingu pɔkkan.” 12 Ma tooccin ‘uanti agi, “Ɛkɛ bala wɛnɛ?” Ɛkɛ kɛkcin agi, “Çeej ‘ya bɛɛ.” 13 Ɔci mena ñingɛ ulan neeni owwi ma ma Pɛriciinti. 14 Ɔci oŋŋa Yaccu noŋŋi lomi, ɔci men pɔŋnɛ ñingɛti neeniyɛ, oŋŋa neeni a Oŋ Cabit. 15 Ɔci ma Pɛriciin daŋkun tooccin ɛkɛti gɔkcin agi, “I ñingu pɔŋni a ɔki?” Ɔci ɛkɛ gɔkcin ɛkkɛnti agi, “‘Ya ñingu bannɛ men te lommo, ɔci ‘ya ati kwoccan, ɔci ne pɛñan ‘ya yaakati gwallo.” 16 Ma Pɛriciin gɛɛg gɔkcin te Yaccu agi, “‘Wana neeni bɛɛn te Jwaŋa Tolanti bɛɛ. Ɛkɛ ganuun Oŋ Cabit tiiññɛyɔ bɛɛ.” Yeti maka pookɛn gɔkcin agi, “Mena nɔɔdɔn yaakinti naŋka tɛyan naŋka ñyecki ma ɛkɛ a ɔɔn boki?” Ɔci ma kɛɛptin jitin te jyek Yaccu. 17 Ɔci ɛkkɛn gɔkcin mena ñingɛ pɔŋnɛ ɛkɛ neeniti moki agi, “I a mena ñingɛ pɔŋnɛ ɛkɛ. Gɔkca agi ɛkɛ a menɛ?” Ɔci ‘uan gɔkcin agi, “Ɛkɛ a bɔwa Jwaŋa Tolan.” 18 Ma Icrayiil gɔki agi, “I boki ñingu ulcin te baaṭi oŋ pɔkki ma a pɔkkin boki?” Ɛkkɛn tieki ɔɔn ne ɛkkɛn borki maka ɛkɛ jietkiti ɔɔn. 19 Ɔci ma Icrayiil tooccin ɛkkɛnti agi, “Mena neeni a kaci ɛkkɛ kacca guagdɛ ɛkkɛ jiennɛ wona ḍiɛri ñingɛ ulan neenɛ? Kan a ɛkɛyɛ, ɛkɛ yaakinti gwali noon acca a ɔki?” 20 Ɔci maka ɛkɛ jiedi gɔkcin agi, “Çeejɔn ɔɔn gena kaci ɔɔn, ɔci jiennɔn ɔɔn ñingɛ ulcin ɔɔn. 21 Yeti te gwalla ɛkɛ gɔṭi noon acca a ɔkiyɛ, ŋeejɔn ɔɔn bɛɛ, ɔci mena ɛkɛ pɔŋnɛ ñingɛti neeniyɛ, kwoyɔn ɔɔn. Kaci toli doki, ɔci yuong ɛkɛ coŋgin doki, toottɛ ɛkɛti, ɔci ɛkɛ gɔkti te tuk ɛkɛ parɛ.” 22 Maka ɛkɛ jietki gɔki a ɔɔn acaan ɛkkɛn buayi ma Icrayiil acaan ma Icrayiil jiekɛn ñaagɛ ɔci gɔkcin agi, “Kan men gɛɛl gɔɔdi agi Yaccu a Mena Muonɛ Juaŋ Borayɛ, ɛkɛ ŋualtin ikin ɔntɔ te ona morki ma Juaŋti aŋka bɛya morti Juaŋti wɛnni oŋgati moki bɛɛ.” 23 Gena te jyeka neeni aŋka maka ɛkɛ jietki gɔkki agi, “Yuong ɛkɛ coŋgin doki, toottɛ ɛkɛti.” 24 Ɔci ɛkkɛn borcin mena ñingɛ pɔŋnɛti neeni moki, oŋki aŋi ne yyɛɛwɔ doki, ɔci ɛkkɛn gɔkcin ɛkɛti agi, “Dala i gɔkca te yenti Jwaŋa Tolan awarɛ. Yeti ŋeejɔn ɔɔn ‘wana i ñingu pɔŋnɛ neeni a nɔɔdɔn.” 25 Ɔci mena pɔŋnɛ Yaccu ñingɛti neeni gɔkcin agi, “Kan ɛkɛ a mena nɔɔdɔn, kwoy ‘ya. Gena ne cyɛɛlɔ gɛɛl aŋka ŋeej ‘ya. Te ñamu ‘ya ñingu ul ulo, ɔci acca ‘ya yaaŋnati gwali noono.” 26 Ɔci ma gɔkcin ɛkɛti agi, “I naŋŋi ɛkɛ a ɔki? I ñingu pɔŋnɛ ɛkɛ a ɔki?” 27 Ɛkɛ gɔkcin ɛkkɛnti agi, “Ɛkkɛ myennin doki, ɔci ɛkkɛ yookɛ te tieŋŋin jyek ‘ya. Ɛkkɛ moki buagɛ myettin ogo? Ɛkkɛ buagɛ agdɛ maka laldɛ ɛkɛ daŋkun?” 28 Ɔci ɛkɛ ḍaari ɛkkɛn, ɔci ɛkkɛn gɔkcin ɛkɛti agi, “I a mena laldɛ ɛkɛ, yeti ɔɔn a maka laldɛ Muuca. 29 Çeejɔn ɔɔn Jwaŋa Tolan gɔkcin Muucati, yeti ‘wana neeni, nona bɛɛni ɛkɛ ŋeejɔn ɔɔn bɛɛ, kwoyɔn ɔɔn.” 30 ’Uan gɔkcin ɛkkɛnti agi, “‘Ya yomu moni te kwoñi ɛkkɛ te jyeka neeni, nona bɛɛni ɛkɛ kwoyɛ ɛkkɛ, yeti ɛkɛ a mena ‘ya pɔŋna ñinguti. 31 Ɔci ŋeecin ikin Jwaŋa Tolan tieŋdi jyek maka nɔɔtk bɛɛ, yeti kan mena morti Juaŋtiyɛ, ɔci noŋdi ba naŋki ɛkɛyɛ, Jwaŋa Tolan tieŋdi jyek ɛkɛ. 32 Maka jiedi ma ñingɛn ulan gɛɛl pɔkki ma ñingɛti oŋgati boki? 33 ’Wana neeni kan te ɛkɛ bɛɛn te Juaŋti bɛɛy, te ɛkɛ yaakinti noŋi naŋka neeni boki?” 34 Ma gɔkcin ɛkɛti agi, “I a mena nɔɔdɔn, ɔci i lor ɔɔn ogo?” Ɔci ɛkɛ ŋualji ma ɔntɔ te ona morki ma Juaŋtiy. 35 Ɔci Yaccu tieŋŋin ‘wana neeni ŋualji ma ɔntɔ te ona morki ma Juaŋtiy, ɔci ɛkɛ ati lieṭi ɔci ɛkɛ yuarŋɛ, ɔci gɔkcin ɛkɛti agi, “I jyedda Kaci Ma Baantɛ?” 36 Ɛkɛ tooccin Yaccuti agi, “Ciɛggɔn, ɛkɛ a menɛ aŋka ‘ya jyedda ɛkɛtiy?” 37 Ɔci Yaccu gɔkcin ɛkɛti agi, “Ɛkɛ yuarŋi i, ɔci mena gɔwwi iki i neeniyɛ, gena ɛkɛ.” 38 Ɛkɛ gɔkcin agi, “Ciɛggɔn, ‘ya jyedda.” Ɔci ɛkɛ morcin Yaccuti. 39 Yaccu gɔkcin agi, “‘Ya bɛɛn ṭɛɛrji noŋ waak ba naŋki godan. ‘Ya bɛɛn aŋka maka ñingɛn ulan pɔkka ñingɛnti, yeti maka yookɔn te jyeniyɛ, ɛkkɛn wyetkɛn waakɛn uultan ñaalɔ genga yuartan moki bɛɛ.” 40 Ɔci ma Pɛriciin gɛɛg bala cwakanti ɔci tieŋŋin jyeka guagdɛ Yaccu neeni, ɔci ɛkkɛn tooccin Yaccuti agi, “Ɔɔn agɔn maka wyetkɛn a uulgin daŋkun?” 41 Ɔci Yaccu gɔkcin ɛkkɛnti agi, “Kan te ɛkkɛ wyetkɔ a uulginyɛ, te nɔji ɛkkɛ baawo. Yeti acca ɛkkɛ gɔkɛ agi ɛkkɛ wyetkɔ wɔkɔ, ɔci te jwalla neeni nɔji ɛkkɛ niin men ɛkkɛti.”
1 Yaccu gɔkcin ɛkkɛnti agi, “Awarɛ, ‘ya gɔkka ɛkkɛti, maka kaatti kaañji kañ kulin te kaañ tukɛ bɛɛyɛ, ɛkkɛn a maka kwayi maal a kuano, ɔci ɛkkɛn a ɛyyo. 2 Mena kaatti te kaañ tukɛyɛ, ɛkɛ a ḍɛɛnɔn. 3 Mena ciyi kaañ tukɛti neeniyɛ, kan ḍɛɛnɔn bɛɛdiyɛ, ɛkɛ kaañ tukɛ pɔktɛ te mena neeni. Ɔci kulin tieŋdi pwan ɛkɛ, ɔci ɛkɛ boor kulin ɛkɛ te yengɛn, ɔci ɛkɛ kulin cieddɛ bora. 4 Ɔci kan kulin ɛkɛ cieddɛ bora waakɛndayɛ, ɛkɛ wɛɛddi ñamu kulin ñomgɛnti, ɔci kulin bootti ɛkɛ ŋoyɛti, acaan pwan ɛkɛ ŋeecɔn kulin. 5 Kulin bootti mena kuolin ñin ɛkkɛn bɛɛ. Ɛkkɛn yooŋdi ɔntɔ te ɛkɛti, acaan men kwoyɔn ɛkkɛn, ɔci pwan ɛkɛ kuolin ñin ɛkkɛn.” 6 Jwalla a caagɔn neeni guaŋŋɛ Yaccu mati, yeti jwali jiñɛ yuarcɛ ɛkkɛn bɛɛ. 7 Ɔci Yaccu gɔkcin ɛkkɛnti ‘wota agi, “Awarɛ, ‘ya gɔkka ɛkkɛti ka ‘ya a ‘yeŋi tukɛ kulin. 8 Maka bɛɛn te ñamu noŋi waakɛn agi aginti ḍɛɛninyɛ, ɛkkɛn a ɛyi, ɔci ɛkkɛn a maka kwayi maal a kuano, yeti kulin jyeti ɛkkɛnti bɛɛ. 9 ’Ya a ‘yeŋi tukɛ. Kan men gɛɛl bɛya koodi orɔ te ‘yayɛ, ‘ya yuoc ɛkɛ, ɔci ɛkɛ kaatti jiju ɔci koodi bora ɔci luom yuardɛ. 10 Kan mena ɛɛn bɛyayɛ, naŋki ɛkɛ a kali waako, ɔci naŋki ɛkɛ a nooŋi waako, ɔci ɛkɛ noon yaadɛ. ‘Ya bɛɛn aŋka ɛkkɛn tɛɛti te ‘ya, tɛɛtin te ñamu buannɛ tɛɛtin acca neeni. 11 “‘Ya a ḍɛɛnɔn pwadan. Ḍɛɛnɔn pwadanyɛ, buayi lien bɛɛ. 12 Mena cieti kulin te bilkyɛ, ɛkɛ a kulin weegɛn bɛɛ, ɔci ne ɛkɛ gɔrti ɛɛn yuartɛ bɛɛdiyɛ, ɔci ɛkɛ yooŋdi ɔntɔ, kulin daldɛ ɔntɔ. Ɔci ɛɛn kulin mwogdɛ ɔci kulin cyɛndɛ jitin. 13 Ɛkɛ yooŋdi ɔntɔ a ɔɔn acaan ɛkɛ cieti kulin te bilko, ɔci ɛkɛ ani kulin bɛɛ. 14 ’Ya a ḍɛɛnɔn pwadan, ɔci wak ‘ya ŋeej ‘ya ɔci ‘ya ŋeecka ɛkkɛn, 15 bala ba ‘ya ŋeeja Wey ɔɔn ɔci ‘ya Wey ɔɔn ŋeej daŋkun. Ɔci ‘ya tuud te yom ‘ya te kulin. 16 “Ɔci kulin ‘ya kulin pookɛn bala daŋkun. Ɛkkɛn a kulin kaña neeni bɛɛ. ‘Ya ɛkkɛn owwa daŋkun, ɔci ɛkkɛn tieŋdi pwan ‘ya, ɔci ɛkkɛn waakɛnda ciyi kaañji nona ne cyɛɛlɔ, ɔci ɛkkɛn aga wak ‘ya waakɛnda. 17 “Wey ɔɔn ani ‘ya acaan ‘ya tuud te yom ‘ya aŋka jɔŋŋa ñaalɔ dɔki. 18 Menga yaakinti ‘ya nogda bɛɛ. ‘Ya yaakati tuud ba yom ‘ya paru, ɔci ‘ya yaakati jɔŋŋa ñaalɔ paru moki, acaan ‘ya myenna Wey ɔɔn a ɔɔn.” 19 Ɔci ma Icrayiil kɛɛptin jitin moki te jyeka neeni. 20 Maka coŋin gɛɛg gɔki agi, “Jwaŋa yaayan bala ɛkɛti, ɔci ɛkɛ a mena luudɔn. Ɛkkɛ tyeŋɛ jyek ɛkɛ ogo?” 21 Maka pookɛn gɛɛg gɔkcin agi, “Jyeka neeni a jyek mena muŋŋɛ jwaŋa yaayan bɛɛ. Jwaŋa yaayan yaakinti boki ma ñingɛn pɔktɛ?” 22 Ɔci iid bala ban Urcaliim. Iid neeni gena iid on Juaŋ ona tolan 23 Ɔci te wɔɔka wanna noon a wɛɛñi wyeñɛ jwamma luyan. Ɔci Yaccu bala nona on Juaŋ ona tolan warɛti, bala ati jiju daaŋji daŋa naŋŋɛ Cɔlamany. 24 Ɔci ma Icrayiil bɛɛn ḍwoṭṭinti Yaccu warɛti, ɔci gɔkcin ɛkɛti agi, “Ɔɔn yomgɔ mwondi te moottin te i ne tua? Gɔkka kan i a Kiṭɔy. Ɔɔn myettɔn ne pwadan!” 25 Ɔci Yaccu gɔkcin ɛkkɛnti agi, “Ɛkkɛ myennin doki, ɔci ɛkkɛ jyettɛ bɛɛ. Naŋka naŋdi ‘ya te Wey ɔɔnyɛ, naŋka neeni ma myettɛ ‘ya a menɛ. 26 Yeti ɛkkɛ jyettɛ ‘yati bɛɛ. Ɛkkɛ yookɛ acaan ɛkkɛ agɛ kulin ‘ya bɛɛ. 27 Kulin ‘ya tieŋdi jyek ‘ya, ɔci ɛkkɛn ŋeej ‘ya, ɔci ɛkkɛn bootti ‘yati. 28 Ɔci ɛkkɛn ‘woñga ‘ya tɛɛtin ‘ya. Tɛɛtin neeni baadi oŋgati bɛɛ. Ɛkkɛn tuwa oŋgati bɛɛ, ɔci menga yaakinti ɛkkɛn mugdɛ te byeŋ ‘yati bɛɛ. 29 Wey ɔɔn, mena ‘ya ‘wonna kulin neeni, ɛkɛ tolcin te waak waakɛnda. Ɔci menga yaakinti kulin mugdɛ te byeŋ Wey ɔɔnti bɛɛ. 30 ’Ya ɔci Wey ɔɔn, ɔɔn agɔn wara ne cyɛɛlɔ.” 31 Ma Icrayiil gwoyi luuli byeŋkɛnti buagɔn yebi noki Yaccu. 32 Yaccu gɔkcin ɛkkɛnti agi, “Ɛkkɛ lɛɛrnin ‘ya te naŋka naŋi ‘ya coŋin, naŋka pwadin te Wey ɔɔnti, ɔci te naŋka bɛ aŋka ɛkkɛ buagɛ yebbɛ nokkɛ ‘yay?” 33 Ɔci ma Icrayiil gɔkcin ɛkɛti agi, “Ɔɔn yebbɔn i te naŋka pwadan gɛɛl bɛɛ. Ɔɔn yebbɔn nokkɔn i te ḍorin i ḍori Jwaŋa Tolan neeni, acaan i a men baan budan, ɔci i gɔk i a Juaŋo.” 34 Yaccu gɔkcin ɛkkɛnti agi, “ ‘Maka te baaṭi bardɛ Juaŋ a jɔkin.’ Ɔci jyeka neeni bala worga ganuun ɛkkɛti bɛɛ? 35 Ɔci ɛkkɛ yooktɛ te jyeni jyek Jwaŋa Tolan jyeka kiigin neeni acaan jyeka kiigin neeni a jyeka awarɛ. Maka tieŋŋin jyek Jwaŋa Tolan te baaṭi bardɛ Juaŋ a jɔkin. 36 Ɔci acca ɛkkɛ gɔkɛ agi ‘ya ḍorji Jwaŋa Tolan, ne ‘ya baala gɔka ka ‘ya a Kaci Jwaŋa Tolan ogo? Wey ɔɔn ‘ya kɛnna bora, ɔci ‘ya cuonna ɛkɛ iñɔ ṭɛɛrji. 37 Kan ‘ya noŋ naŋki Wey ɔɔn bɛɛyɛ, naa ɛkkɛ jyeddɛ ‘yati bɛɛ. 38 Yeti kan ‘ya noŋ naŋki Wey ɔɔnyɛ, ɔci kan ɛkkɛ yookɛ te jyek ‘ya menyɛ, dala ɛkkɛ jyeddɛ gena naŋki ‘yati. Kan ɛkkɛ noŋdɛ a ɔɔnyɛ, ŋeeddɛ ɛkkɛ ne pwadan Wey ɔɔn bala ‘yati, ɔci ‘ya da baal ɛkɛti.” 39 Ɔci ɛkkɛn poccin buagɔn mwoki Yaccu moki, yeti ɛkkɛn yaakinti bɛɛ. Yaccu ati ɔntɔ te ɛkkɛnti. 40 Ɔci Yaccu ati kuocɔ Tol Urdun ŋoyɛti, ati nona buoṭi Yɔhanna ma te ñamu, ɔci bala ciyi aŋan. 41 Ɔci maka coŋin bɛɛn ɛkɛti, ɔci ɛkkɛn gɔwwɔ yɔtin pookɛn agi, “Yɔhanna noŋi naŋka tɛyan naŋka ñyecki ma gɛɛl bɛɛ, yeti jyeka guagdɛ ɛkɛ waakɛnda te mena neeniyɛ, a jyeka awarɛ.” 42 Ɔci maka coŋin jyeti Yaccuti wɛnan.
1 Ɔci mena ‘uan bala yenti Lajarac. Ɛkɛ warɛ yaayɛ ne pɛñan, ɔci ɛkɛ bala ciyi ban Bɛtani, kowi ɛkkɛn a Moryam ɔci Marta. 2 Lajarac ɛkɛ a mod Moryamn mena eelan pwoŋnɛ Yaccu ciegɛti ɔci puuññɛ te jyeyi ɛkɛy. 3 Ɔci kowwɛn men gɛɛl cuuñɛ Yaccuti ɔci gɔkcin ɛkɛti agi, “Ciɛggɔn, Lajarac mena onga i ɛkɛ warɛ yaayɛ.” 4 Yeti ne Yaccu tieŋni jwalla neeniyɛ, ɛkɛ gɔkcin agi, “Waja neeni bɛɛn ɛkɛti a ɔɔn acaan Juaŋ buagɔn Lajarac tuwa bɛɛ. Yeti waja neeni bɛɛn aŋka ma gɔrti pwani Jwaŋa Tolan, ɔci ma gɔrti pwani ‘ya Kaci Jwaŋa Tolan.” 5 Yaccu ani Marta ɔci kow ɛkkɛn ɔci Lajarac. 6 Ne Yaccu tieŋni a Lajarac warɛ yaayɛyɛ, ɛkɛ yeddin te nona ciyi ɛkɛ aŋan nink ne yyɛɛwɔ men. 7 Ne nink ne yyɛɛwɔ baakiyɛ, ɛkɛ gɔkcin maka laldɛ ɛkɛti agi, “Ikin dɔɔtin ban Yahuudiya moki.” 8 Maka laldɛ Yaccu gɔkcin ɛkɛti agi, “Mena loṭi may, i baal aŋan ne cwakanti, ɔci ma Icrayiil noŋi yebi i, ɔci i noŋ dɔwwa aŋan moki?” 9 Yaccu gɔkcin ɛkkɛnti agi, “Hay! Tieŋdɛ poca! Acca neeniti ɔci oŋkanda ɔɔnyɛ, ‘ya yaakati ciy men ɔɔn. ‘Ya tuud men bɛɛ, acaan ‘ya men gena ‘ya cuonnata Wey ɔɔn aŋka naŋdi neeni cwamjan bɛɛ. ‘Ya ɛkɛ cwamja.” 11 Yaccu gɔkcin a ɔɔn ɛkkɛnti, ɔci ne ḍiɛran ṭɔɔlɛ ‘wota gɔkcin agi, “Mug ikin Lajarac wiccin, ‘ya ootta aŋka ɛkɛ ṭiewa ñaalɔ.” 12 Maka laldɛ ɛkɛ gɔkcin agi, “Ciɛggɔn, kan ɛkɛ wiccinyɛ, pwatcin, ɔci ɛkɛ warɛ tɛya moki.” 13 Ne Yaccu gɔŋni agi Lajarac winnɔyɛ, gena lyen Lajarac, yeti ma tieŋŋin ne pwadan bɛɛ. Ɛkkɛn bala poŋi gɔki agi Lajarac winni agi wardan. 14 Ɔci ne baaṭi Yaccu ɛkkɛn myennɛ ne pwadan agi, “Lajarac tuuni. 15 Ɔci ‘ya yomu ñɔy ñɔy acaan ‘ya baaw ɛkɛti aŋan aŋka ɛkkɛ gɔrtɛ naŋki ‘ya, ɔci ɛkkɛ jyeddɛ ‘yati. Bɛɛdɛ, oottin ɛkɛti acca.” 16 Ɔci Tɔmac (mena bartan ma a Yuongɔn) gɔkcin maka laldɛ Yaccu, maka atki i ɛkɛti agi, “Dala ikin oottin aŋka ikin tuutin iki Yaccu a cyɛɛlɔ.” 17 Ne Yaccu bɛɛni dɛnni borayɛ, ɛkɛ tieŋŋin agi Lajarac bala koolji nink ne ŋaanɔ doki. 18 Ban Bɛtani cualcin te ban Urcaliim, bala ba wɔɔkan ne yyɛɛwɔ, 19 ɔci ma Icrayiil maka coŋin bɛɛn wɔɔwwin ḍieŋŋin Martati ɔci Moryamti aŋka ɛkkɛn yomgɛn pwattɛ. 20 Marta tieŋŋin Yaccu bala bɛya, ɔci ɛkɛ jɔŋŋin ne pɛñan ɔci ati ɔci koogjin i ɛkkɛn yomɔ. Yeti Moryam ɛkɛ yeddin te baanji. 21 Marta gɔkcin Yaccuti agi, “Ciɛggɔn, kan i te baali wɛnniyɛ, te mod ɔɔn tuun bɛɛ. 22 Yeti acca ŋeej ‘ya kan i toocca Jwaŋa Tolanti te gengayɛ, ɛkɛ i ‘wondi.” 23 Yaccu gɔkcin ɛkɛti agi, “Mod ɛkkɛ moki jɔŋdi ñaalɔ.” 24 Marta gɔkcin ɛkɛti agi, “Çeej ‘ya oŋŋa ma jɔŋti ñaalɔ oŋŋa bɛya ookti ne ŋoyɔyɛ, ɔci ɛkɛ da jɔŋdi.” 25 Yaccu gɔkcin ɛkɛti agi, “‘Ya a mena ma luoldɛ ñaalɔ, ɔci ‘ya a mena tɛɛtki mako. Maka jyeddi ‘yatiyɛ, ɛkkɛn ne tuutiyɛ, ɛkkɛn ciyi tɛɛti men. 26 Ɔci maka tɛɛti kan ɛkkɛn jyeddi ‘yatiyɛ, ɛkkɛn tuwa oŋgati moki bɛɛ. I jyetti jyeka neenɛ?” 27 Marta gɔkcin ɛkɛti agi, “Ɛɛ, Ciɛggɔn, ‘ya jyeti doki, i a Kiṭɔ, i a Kaci Jwaŋa Tolan, i a mena guaktan ma bɛya iñɔ ṭɛɛrjiy.” 28 Ne Marta gɔŋni a ɔɔnyɛ, ɛkɛ ati borcin kow ɛkkɛn Moryamti, ɔci gɔkcin ɛkɛti meejjin a meejjin agi, “Mena Loṭi Ma bɛɛn ɔci bala tooci i.” 29 Ne Moryam tieŋni a ɔɔnyɛ, ɛkɛ jɔllin ne pɛñan, ati kookcin Yaccuti, 30 acaan Yaccu dɛññin baanji men bɛɛ. Ɛkɛ bala te yomɔ men nona kookki i Martay. 31 Ne ma Icrayiil maka bala orɔ i Moryam aŋka mwoni ɛkɛ konɛ neeni gɔrki Moryam jɔŋni ne pɛñan, ɔci kaanni borayɛ, ɛkkɛn bala poŋi agi Moryam ati ooddi wiak kool wyeñɛti kɔŋji no. Ɔci ɛkkɛn bootcin ɛkɛti. 32 Ɔci ne Moryam bɛɛni nona Yaccu baali, ɔci ne Yaccu yuarnɛ ɛkɛyɛ, ɛkɛ ḍwoñjin iñɔ Yaccu ñamɛti, ɔci gɔkcin ɛkɛti agi, “I te baali wɛnniyɛ, te mod ɔɔn tuun bɛɛ.” 33 Ne Yaccu gɔrni Moryam wiagi, ɔci ma Icrayiil maka bɛɛn i ɛkɛ wiakki daŋkunyɛ, Yaccu yomɛ yaayɛ ne tolan. 34 Ɔci Yaccu tooccin gɔkcin agi, “Ɛkɛ joŋnɛ wɛnɛ?” Ɛkkɛn gɔkcin Yaccuti agi, “Ciɛggɔn, bɛɛd gɔrca.” 35 Ɔci Yaccu wiakcin. 36 Ɔci ma Icrayiil gɔkcin agi, “Gɔṭṭɛ, gena mena ani Lajarac ne tolan neeni!” 37 Yeti ma gɛɛg gɔkcin agi, “Yaccu mena yaakinti maka ñingɛn ulan pɔktɛ neeniyɛ, te ɛkɛ baali wɛnniyɛ, te Lajarac tuun boki?” 38 Ɔci Yaccu booŋ tonnɛ bora moki, ɔci ɛkɛ ati kool wyeñɛti. Kola neeni a wɔrgɔn poomti, ɔci poom bala kool tukɛti. 39 Yaccu gɔkcin agi, “Poom taandɛ ɔntɔ!” Ɔci Marta, kow mena tuun neeni, gɔkcin ɛkɛti agi, “Ciɛggɔn, ɛkɛ bala koolji nink aŋi ŋaanɔ, ɔci ɛkɛ doki ŋooyin!” 40 Yaccu tooccin ɛkɛti agi, “‘Ya katan gɔkkan iti te ñamu ka i ne jyeddi ‘yatiyɛ, ɔci i gɔrca pwani Jwaŋa Tolan bɛɛ?” 41 Ɔci poom taanji ma ɔntɔ, ɔci Yaccu ñorcin ñaalɔ ɔci gɔkcin agi, “Wey ɔɔn, pwatcin. I doki tieŋni jyek ‘ya. 42 Çeej ‘ya i tieŋŋa jyek ‘ya oŋkanda, yeti ‘ya gɔkkan a ɔŋŋi aŋka maka yɔdgin iki ‘ya neeni tieŋdi, ɔci ɛkkɛn jyeddi ‘ya cuonna i.” 43 Ne ɛkɛ gɔŋni a ɔɔnyɛ, ɔci ɛkɛ yaajjin ne tolan, gɔkcin agi, “Lajarac, kooya bora!” 44 Ɔci mena tuun neeni kooyin bora, ɔci ɛkɛ byeŋkɛ a ḍɛɛggin ɔci ciegɛ a ḍɛɛggin te bworŋin poorki ma maka tuway. Ɔci wyeñɛ a paargɔn te bworŋo. Ɔci Yaccu gɔkcin mati agi, “Bworŋin laaktɛ ɔntɔ, ɔci dala ɛkɛ potti woono!” 45 Ɔci ma Icrayiil maka bɛɛn i Moryam ɔci gɔrcin waka naŋŋɛ Yaccuyɛ, maka coŋin gɛɛg jyeti ɛkɛti. 46 Ɔci maka pookɛn gɛɛg ati ma Pɛriciin myetkɛ te waka naŋŋɛ Yaccuy. 47 Ɔci gaciicin ḍwaŋin ma Icrayiil ɔci ma Pɛriciin, ɛkkɛn wyetkɛn ḍɔɔlɛ nona ne cyɛɛlɔ i maka gɔṭi jieko, ɔci gɔgjin pookɛn agi, “Ikin noŋtin a ɔki? ‘Wana neeni noŋi naŋka coŋin naŋka ñyecki ma ɛkɛ. 48 Kan ikin ɛkɛ daltin noŋi a ɔɔnyɛ, ma waakɛnda jyeddi ɛkɛti, ɔci ma Ḍɔɔm bɛya kɛɛn ikin muktan ɛkkɛn, ɔci on Juaŋ ona tolan neeni lɛktan.” 49 Menga bala ɛkkɛnti yenti Kayapac. Ɛkɛ a gaciic tolan ma Icrayiil te ywonna neeni. Ɔci ɛkɛ gɔkcin ɛkkɛnti agi, “Jyeka neeni ŋeejɛ ɛkkɛ bɛɛ. 50 Ɛkkɛ jiek gwallɛ jitin waakɛnda bɛɛ. Kan mena ne cyɛɛlɔ tuwa te ma waakɛndayɛ, ɔci te naŋka neeni kan ma Icrayiil waakɛnda ḍakti bɛɛyɛ, a ɔɔn pwatcin.” 51 Kayapac gɔkcin jyeka neeni te yom ɛkɛ budan bɛɛ. Te ywonna neeni ɛkɛ a gaciic tolan ma Icrayiil, ɔci ma myennɛ ɛkɛ te naŋka bɛya ne ŋoyɔ agi Yaccu tuwa te kɛɛn ma Icrayiil, 52 ɔci ɛkɛ tuwa te kɛɛn Ma Icrayiil pookɛn bɛɛ, yeti te kɛɛgin Jwaŋa Tolan kɛɛgin cyɛnŋin jitin bala baan warda ḍɔɔldiyɔ Yaccu aga maka ne cyɛɛlɔ. 53 Ɔci te oŋŋa wannati ɔci oŋkanda ɔɔn, ɛkkɛn bala gɔṭi jyek lyen Yaccu, buagɔn ɛkɛ noktan. 54 Ɔci te jyeka neeni Yaccu warɛ liɛlnɛ bora ma Icrayiil ñomgɛnti moki bɛɛ. Ɛkɛ ati ban Iprayim bana ḍiɛran bana wɔɔŋ lɛkɛti, ɔci ɛkɛ bala ciyi aŋan i maka laldɛ ɛkɛ. 55 Ɔci ne Iid Malɛɛka Lien Bɛɛn Goṭi A Gorŋ cɔɔlnɛ dokiyɛ, maka ciyi ɔntɔ ban Urcaliim toŋkɛti, maka coŋin ɔɔccin ban Urcaliim konɛti noŋi naŋki ma Icrayiil te jyek lɔɔŋo. 56 Ɔci maka neeni bala lieṭi Yaccu. Ɛkkɛn bala orɔ on Juaŋ ona tolan bala yɔdi gɔwwɔ pookɛn ɔci toyi yɔtin agi, “I poŋ a ɔki? Yaccu boki bɛya iidtɛ?” 57 Gaciicin ḍwaŋin ma Icrayiil ɔci ma Pɛriciin gɔkcin mati te ñamu doki agi, “Kan men gɛɛl nona ciyi Yaccu ŋeejɛyɛ, dala ɛkɛ bɛya ɔɔn miettɔn aŋka ɔɔn ɛkɛ mugdɔn.”
1 Ɔci ne Iid Malɛɛka Lien Bɛɛn Goṭi A Gorŋ biɛṭi men nink ne dɔɔyɔ wilin ne cyɛɛlɔyɛ, Yaccu bɛɛn ban Bɛtani nona baali Lajarac mena luolnɛ ɛkɛ ñaalɔ te lienti neeni. 2 Ɔci ma bala nɔṭi am aŋan nɔrtan Yaccu, ɔci Marta bala ma eektɛ oomdin, ɔci Lajarac bala omi oomdin i maka pookɛn i Yaccu. 3 Ɔci Moryam eccin eelan wiɛlɛ tɛyan rɔtil tukɛ ne cyɛɛlɔ, ɔci eelan neeni a ñɔɔn jaan gɛɛl yenti nardiin. Ɔci ɛkɛ pwoŋnɛ Yaccu ciegɛti, ɔci Yaccu puuññɛ ciegɛti te jyeyi ɛkɛ. Ɔci on jiñɛ warda ŋooyi milla mili te eelan. 4 Ɔci mena ne cyɛɛlɔ mena bala maka laldɛ Yaccuti, ɛkɛ yenti Yahuuja Ickɛɛryuti (ɛkɛ a kaci Cimaan Ickɛɛryuti), ɔci ɛkɛ a mena Yaccu ‘wonnɛ ma byeŋkɛnti. 5 Ɛkɛ gɔkcin agi, “Te gena yeti i yooki ikin eelan neeni wiɛlnin bora te bilk ne coŋɔn aŋka ‘wontin maka bɔwan neeniy?” 6 Ne Yahuuja gɔŋni a ɔɔn neeni ɛkɛ yomɛ pwatcin maka bɔwanti bɛɛ. Ɛkɛ a ɛɛno. Kuñŋan bilk bala ɛkɛti, ɔci ɛkɛ bala koṭi bilka ḍuatan ma jiju kuñŋanji. 7 Yaccu gɔkcin Yahuujati agi, “Yahuuja, ɛkɛ dalja, hay! Ne ɛkɛ noŋi a ɔɔnyɛ, bala ba ‘ya joŋŋata ɛkɛ a joŋi doki no. 8 Maka bɔwan balgi iki ɛkkɛ yuonginda, ɔci ɛkkɛ yaakɛti noŋdɛ ne pwadan ɛkkɛnti, ɔci ɛkkɛn ‘wondɛ waako. Yeti ‘ya balkin iki ɛkkɛ yuonginda bɛɛ.” 9 Ɔci poli ma Icrayiil polla tolan ne ɛkkɛn tieŋki Yaccu baali aŋanyɛ, ɛkkɛn bɛɛn gɔrti Yaccu. Ɔci ɛkkɛn bɛɛn gɔrti Yaccu parɛ bɛɛ, ɛkkɛn bɛɛn gɔrti Lajarac mena luolnɛ Yaccu ñaalɔ te lienti neeni daŋkun. 10 Ɔci gaciicin ḍwaŋin ma Icrayiil ɛkkɛn ñoowin te jiek waakɛnda, buagɔn Lajarac noktan, 11 acaan ma Icrayiil maka coŋin jyeti Yaccuti doki te gena naŋŋɛ ɛkɛ Lajaracti neeni. 12 Ɔci ne liidɔ polla tolan maka bɛɛn Iid Malɛɛka Lien Bɛɛn Goṭi A Gorŋ tieŋŋin a Yaccu bala bɛya ban Urcaliim. 13 Ɔci ɛkkɛn eccin tuum aamkɛ byeŋkɛnti aŋka noŋdi ɛkɛti ba mena tolan, ɔci ati kookcin Yaccuti ɔci yaajjin agi, “Dala ma jieyi i Juaŋo! I a Kiṭɔ Kaci Daawud! Mena bɛɛn te yenti Jwaŋa Tolan dala Juaŋ noŋdi ne pwadan Ciɛggɔn Tolanti! Gena Ciɛggɔn ma Icrayiil Ciɛggɔn Tolan!” 14 Ɔci Yaccu yɔṭi tɔɔrɔn ṭɔɔlɛ ɔci ɛkɛ taapcin tɔɔrɔnti bala ba jyeka kiijji ma worgaji agi, 15 “Ma Urcaliim, naa ɛkkɛ buayɛ bɛɛ. Ciɛggɔn Tolan ɛkkɛ bala bɛya toobdi te tɔɔrɔn ṭɔɔlɛ.” 16 Te ñamu gena naŋŋɛ Yaccu neeni kwoyɔn maka laldɛ ɛkɛ, yeti ne Yaccu jɔlni ñaalɔ te wara woonɛyɛ, ɔci ɛkkɛn ñingɛn ñieki te jyeka kiijji ma worgaji te naŋka neeni. Ɔci ɛkkɛn ñingɛn ñieki te naŋka naŋi ma Yaccuti neeni. 17 Poli ma polla tolan maka bala i Yaccu oŋŋa ɛkɛ Lajarac luolnɛ ñaalɔ te kooljiyɛ, maka neeni jyek Yaccu dalji bɛɛ. Ɛkkɛn bala ma myettan oŋkanda te naŋka naŋŋɛ Yaccu Lajaracti. 18 Poli ma polla tolan tieŋŋin ɔci ati kookcin Yaccuti. Ɛkkɛn tieŋŋin Yaccu noŋi naŋka ñyecki ma ɛkɛ neeni. 19 Ma Pɛriciin gɔgjin pookɛn agi, “Gɔṭṭɛ, ɛkkɛ yaakɛti noŋdɛ genga boki? Maka baan warda ati bootcin ɛkɛti doki.” 20 Maka bɛɛn moṭi Jwaŋa Tolanti te oŋ iidyɛ, ma gɛɛg a ma Giriik. 21 Ɔci maka neeni bɛɛn Pilibucti. Pilibuc ɛkɛ a men ma Bɛtceeyida ban Jaliilji. Ɔci ma Giriik gɔkcin Pilibucti agi, “Ɔɔn buagɔn gɔrtɔn Yaccu.” 22 Pilibuc ati Andarawuc myennɛ, ɔci ɛkkɛn ati yaakkɛn Yaccu myetki. 23 Ɔci Yaccu gɔkcin ɛkkɛnti agi, “Oŋŋa ma gɔrti pwani ‘ya Kaci Ma Baan cɔɔllin doki. 24 Gɔṭṭɛ, ‘ya gɔkka ɛkkɛti, kan poñi waŋɛ ḍɛmdi ṭɛɛrjiyɛ, ɔci kan ɛkɛ cokkɛ ñin ma piik bɛɛyɛ, ɛkɛ niin parɛ budan. Yeti kan ɛkɛ cokkɛ ñin ma piikyɛ, ɛkɛ yula, ɔci ɛkɛ ñingɛ bɛya ne coŋɔn. 25 Kan mena ñingɛ caŋdɛ te ani war ɛkɛ parɛyɛ, ɛkɛ ḍakti. Mena wierti te war ɛkɛ iñɔ baanji wɛnni te jyek ‘yayɛ, ɛkɛ warɛ tiidɛyɔ acaan te tɛɛtin baadi bɛɛ neeni. 26 Kan menga buagɔn aga kɛɛngɔn ‘yayɛ, dala ɛkɛ bootti ‘yati. Ɔci nona ‘ya baalayɛ, kɛɛngɔn ‘ya bala daŋkun. Kan mena kanŋan ‘yatiyɛ, Wey ɔɔn gɔki a ɛkɛ pwad pwado. 27 “Acca ‘ya yomu yaayɛ ne pɛñan. Ɔci ‘ya gɔkca a ɔki? ‘Ya gɔkca agi, ‘Wey ɔɔn, dala i yuoc ‘ya te oŋŋa neenɛ?’ Yeti gena te naŋka neeni aŋka ‘ya bɛɛna tuuda neeni. 28 Wey ɔɔn, dala i noŋja aŋka ma gɔrti pwani i.” Ɔci pwan bɛɛn te ñaalɔ gɔkcin agi, “‘Ya noŋjan doki aŋka ma gɔrti pwani ‘ya, ɔci ‘ya noŋja a ɔɔn moki.” 29 Ɔci poli ma polla tolan bala yɔdi ne cwakanti, ɔci ɛkkɛn tieŋŋin ɔci gɔkcin agi, “Gena ñaala wiak wanna hay!” Ɔci maka pookɛn gɛɛg gɔki agi, “Gena malɛɛka gɔkcin Yaccutiy.” 30 Yaccu gɔkcin agi, “Pwana neeni bɛɛn te ‘ya bɛɛ, bɛɛn acaan te ɛkkɛ. 31 Ɔci acca godan ṭɛɛrji noŋi bɛya, ɔci Jwaŋa Yaayan ḍuaŋa ṭɛɛrji yiɛpca ‘ya ɔntɔ. 32 Ɔci ne ‘ya ŋaaptata ma ñaalɔyɛ, ɔci ‘ya ma cieññati orati ‘yati waakɛnda.” 33 Ne ɛkɛ gɔŋni a ɔɔnyɛ, ɛkɛ ma myennɛ te jyek lyen ɛkɛ. 34 Polla tolan gɔkcin Yaccuti agi, “Çeejɔn ɔɔn te worga ne Kiṭɔ bɛɛdiyɛ, ɛkɛ ciyi yuonginda. Yeti i gɔk agi ‘ya Kaci Ma Baan ŋaapta ma ñaalɔ. Mena guaga i a Kaci Ma Baan neeni a menɛ?” 35 Yaccu gɔkcin ɛkkɛnti agi, “Mena dɛki balgi iki ɛkkɛ ne ḍyɛṭ ṭɔɔlɛ. Dala ɛkkɛ ooddɛ ne noon bɔwi aŋka ɛkkɛ ḍɛɛmdɛ bɛɛ. Kan mena ooddi te nona mielyɛ, nona ooddɛ ɛkɛ ŋeejɛ bɛɛ. 36 Dala ɛkkɛ jyeddɛ mena dɛkiti ne ɛkɛ balgi iki ɛkkɛ men ɔŋ. A ɔŋŋiyɛ, ɛkkɛ agdɛ kɛɛgin mena dɛkiy.” Ne Yaccu gɔŋni a ɔɔnyɛ, ɔci ɛkɛ luoṭi doki, ɔci warɛ coŋŋɛ te ɛkkɛn. 37 Yaccu noŋi naŋka ñyecki ma ɛkɛ naŋka coŋin ma ñomgɛnti, yeti ma jyeti ɛkɛti bɛɛ. 38 Te naŋka neeniyɛ, bala ba jyeka guaŋŋɛ Icaaya te baaṭi dɛññin bora doki. Icaaya gɔki te baaṭi agi, “Ciɛggɔn, a makɛ jyeti jyeka guaŋŋin ikiny? Ɔci a makɛ gɔrcin war tɛɛn iy?” 39 Ɔci maka yookɔn te Yaccu neeni yaakinti jyeddi ɛkɛti bɛɛ, bala ba jyeka guaŋŋɛ Icaaya agi, 40 “Jwaŋa Tolan ɛkkɛn aammɛ ñingɛnti ɔci wyetkɛn uulnɛ ñaalɔ aŋka naa ɛkkɛn gɔrti ɔci jiek jitkɛn yuartan, ɔci waakɛn yaltan bɛya ‘yati aŋka ɛkkɛn ywaŋdiyɔ ‘ya bɛɛ.” 41 Icaaya gɔkcin a ɔŋŋi acaan ɛkɛ gɔrcin pwani Yaccu, ɔci gɔkcin jiek te ɛkɛ. 42 Ɔci ḍuaŋan ma Icrayiil jyeti Yaccuti ne coŋɔn, yeti ɛkkɛn ma myetkɛ agi, “Ɔɔn jyettɔn Yaccuti bɛɛ.” Ɛkkɛn buayi dita ɛkkɛn ŋualtan ma Pɛriciin bora te ona morki ma Juaŋti. 43 Acaan anna anki ɛkkɛn jyek Juaŋ bala bɛɛ. Ɛkkɛn ani jyek ma baan ne tolan, ɔci buagɔn ma gɔki agi ɛkkɛn aginti maka pwadgɔ. 44 Ɔci Yaccu yaajjin gɔkcin agi, “Kan mena jyeddi ‘yatiyɛ, ɛkɛ jyeddi ‘yati paru bɛɛ, ɛkɛ jyeddi mena ‘ya cuonnati daŋkun. 45 Kan mena ‘ya yuartayɛ, ɛkɛ mena ‘ya cuonna da yuartɛ ɛkɛ. 46 ’Ya bɛɛn iñɔ ṭɛɛrji baal ba mena dɛki, aŋka maka jyeddi ‘yati moki ciyi nona miel bɛɛ. 47 Kan mena tieŋdi jyek ‘ya ɔci jiek bɛɛdɛjiyɛ, gena ‘ya noŋ godan ɛkɛ bɛɛ. Acaan ‘ya bɛɛn noŋ godan bɛɛ. ‘Ya bɛɛn yuoc mako. 48 Yeti mena yookɔn te ‘ya ɔci tieŋdi jyek ‘ya bɛɛyɛ, godan bɛya ɛkɛti. Jyek ‘ya jyeka yookiti ɛkɛ neeniyɛ, bɛya ɛkɛ wyeñɛti te oŋŋa bɛya ookti ne ŋoyɔy. 49 Godan bɛya a ɔɔn acaan ‘ya gɔkkan ɛkkɛti te jyek ‘ya paru budan bɛɛ, yeti ‘ya gɔk ba jyeka ‘ya myennata Wey ɔɔn parɛ mena ‘ya cuonna. 50 Ɔci ŋeej ‘ya jyek ɛkɛ etti tɛɛtin baadi bɛɛ neeni mati. Jyeka guagdi ‘yayɛ, guagdi ‘ya ba jyeka ‘ya myennata Wey ɔɔny.”
1 Ne Iid Malɛɛka Lien Bɛɛn Goṭi A Gorŋ baawi menyɛ, ŋeejɛ Yaccu oŋŋa ɛkɛ ṭɛɛr daldɛ ooddi ñaalɔ Weegɛnti cɔɔllin doki. Yaccu bala ani ma ɛkɛ baan warda ɔɔn ne nink ɛkɛ baaki ɔɔn. 2 Ne ɛkkɛn balki cieki omki oomdinyɛ, Jwaŋa Yaayan jwali labji olnɛ Yahuuja Ickɛɛryuti yomɛti doki. Jwaŋa Yaayan gɔkcin Yahuuja Ickɛɛryuti yomɛti agi, “Yaccu ‘woñga ma byeŋkɛnti.” 3 Ɔci ŋeejɛ Yaccu waak waakɛnda ‘wonnɛ Weegɛn ɛkɛ bieŋɛti. Ɔci ŋeejɛ ɛkɛ ɛkɛ bɛɛn te Jwaŋa Tolanti, ɔci dɔɔdi dɔki Jwaŋa Tolanti. 4 Ɔci Yaccu jɔŋŋin te non oomdinti ɔci bworŋa ḍɔpki ma waakɛn loonɛ bora, ɔci bworŋ paarnɛ tɛyɛti, 5 ɔci pieg pwoŋnɛ ḍwanji, ɔci ɛkɛ bala lɔki maka laldɛ ɛkɛ ciegɛn, ɔci ɛkɛ bala puoci ma ciegɛn te bworŋa paarnɛ ɛkɛ tɛyɛtiy. 6 Ɔci Yaccu bɛɛn Butructi ɔci Butruc kɛkcin ɛkɛti agi, “Ciɛggɔn i ‘ya luagda cieguti boki?” 7 Yaccu gɔkcin ɛkɛti agi, “Butruc, gena naŋdi ‘ya neeni kwoy i, yeti ne baaṭi yuarca i ne pwadan.” 8 Ɔci Butruc gɔkcin ɛkɛti agi, “Hayɛllɛ! ‘Ya buaga cieg ‘ya luaga bɛɛ!” Yaccu gɔkcin ɛkɛti agi, “Kan i luagdin ‘ya bɛɛ, i a men ‘ya bɛɛ.” 9 Ɔci Butruc gɔkcin ɛkɛti agi, “Yeti kan a ɔɔnyɛ, naa ‘ya luagda cieguti pookɛn budan bɛɛ, luagda byeŋkuti ɔci wyeñuti daŋkun!” 10 Yaccu ṭwokcin ɛkɛti agi, “Kan mena warɛ luaŋŋɛ dokiyɛ, dala ɛkɛ ciegɛ aŋka luagdɛ pookɛn, acaan ɛkɛ warɛ a giikin moki bɛɛ. Ɛkɛ warɛ pwad pwad doki. Ɛkkɛ pwadgɛ, yeti ɛkkɛ pwadgɛ waakida bɛɛ.” 11 Mena Yaccu ‘wondɛ ma byeŋkɛnti ŋeejɛ Yaccu doki aŋka ɛkɛ gɔŋni agi, “Ɛkkɛ pwadgɛ waakida bɛɛ wanna.” 12 Ɔci ne ɛkɛ ma luaŋŋɛ ciegɛntiyɛ, bworŋ ɛkɛ luullɛ, ɔci ɛkɛ ati cooccin iñɔ non ɛkɛ, ɔci ɛkɛ tooccin maka laldɛ ɛkɛti gɔkcin agi, “Gena naŋi ‘ya neeni ŋeejɛ ɛkkɛ? 13 Ɛkkɛ boṭɛ ‘ya a mena loṭi may, ɔci ɛkkɛ boṭɛ ‘ya a Ciɛggɔn moki. Ne ɛkkɛ boṭɛ ‘ya a ɔɔnyɛ, a ɔɔn yɔmjin awarɛ, acaan ‘ya baal a ɔɔn. 14 ’Ya a Mena Loṭi ɛkkɛ ɔci a Ciɛggɔn ɛkkɛ. Kan ‘ya lɔk cieg ɛkkɛyɛ, dala ɛkkɛ daŋkun lɔktɛ cieg ɛkkɛ pookɔ daŋkun ba ‘ya ɔɔn. 15 Naŋka naŋi ‘ya neeni a naŋka lɔgdɛ ɛkkɛ aŋka ɛkkɛ noŋdɛ pookɔ ba naŋka naŋi ‘ya ɛkkɛti neeni. 16 Tieŋdɛ, ‘ya gɔkka ɛkkɛti, mena kanŋan a kanŋinyɛ, ɛkɛ tolcin te kanŋa weegɛn bɛɛ. Ɔci mena cuntan mayɛ, ɛkɛ tolcin te mena ɛkɛ cundɛ neeni bɛɛ. 17 Ɔci kan ɛkkɛ naŋka neeni ŋeeddɛyɛ, ɔci ne ɛkkɛ noŋdiyɛ, ɛkkɛ yomgɔ niin ñɔɔna ñɔɔno.” 18 “‘Ya gɔk ɛkkɛ waakida bɛɛ. Maka kɛññan ‘ya bora ŋeej ‘ya. Yeti jyeka kiigin dɛññin bora agi, ‘Mena omin iki ‘ya ama ne cyɛɛlɔ ɛkɛ ‘ya tomna dɔki.’ 19 “Acca neeniti ɔci oŋkanda ɔɔnyɛ, ɛkkɛ myettin ‘ya ne naŋki men dɛndi bora bɛɛy, aŋka naŋka neeni ne bɛɛdiyɛ, ŋeeddɛ ɛkkɛ, ‘‘Ya a Kiṭɔ,’ ɔci ɛkkɛ jyeddɛ ‘yati. 20 Awarɛ, ‘ya gɔkka ɛkkɛti, kan mena buagɔn maka cundi ‘yayɛ, ɔci ɛkɛ daŋkun buagɔn ‘ya. Ɔci maka buagɔn ‘yayɛ, ɔci ɛkkɛn daŋkun buagɔn mena ‘ya cuonna daŋkun.” 21 Ɔci ne Yaccu gɔŋni a ɔɔnyɛ, ɛkɛ yomɛ wiak ɔci gɔkcin agi, “Awarɛ ‘ya gɔkka ɛkkɛti, men gɛɛl bala ɛkkɛti wɛnni, ɛkɛ ‘ya ‘wonda maka yookɔn te ‘ya byeŋkɛnti.” 22 Ɔci maka laldɛ Yaccu bala ñoor yɔtin pookɛn acaan Yaccu jwali caaññɛ a caato. Mena guaŋŋɛ Yaccu neeni ŋeecɔn ɛkkɛn ne pwadan bɛɛ. 23 Maka laldɛ Yaccu menga bala ne cyɛɛlɔ ciyi Yaccu taaŋɛti. Ɛkɛ a mena ani Yaccuy. 24 Ɔci Butruc mena neeni gɔmnɛ bieŋɛ, ɔci gɔkcin ɛkɛti agi, “Dala ɔɔn myettɔn mena guagdɛ ɛkɛ neeni a menɛ?” 25 Ɔci mena ciyi Yaccu taaŋɛti neeniyɛ, tooccin Yaccuti gɔkcin agi, “Ciɛggɔn, a menɛ?” 26 Yaccu ṭwokcin agi, “Ne ‘ya am wɛdda uutta kilkti, ɔci ne ‘wonda mena ‘woñga ‘yayɛ, gena ɛkɛ waanɛ neeni.” Ɔci Yaccu am uunnɛ kilkti ɔci ‘wonnɛ Yahuuja Ickɛɛryuti. 27 Ɔci ne ɛkɛ am ‘wonnɛ Yahuujayɛ, Jwaŋa Yaayan kaaccin Yahuuja yomɛti. Yaccu gɔkcin Yahuujati agi, “Gena naŋa iyɛ, dala naŋa i ne pɛñan acca!” 28 Maka cieki iki ɛkkɛn nona oomdinti neeni jyeka guaŋŋɛ Yaccu Yahuujati neeni jitkɛn ŋeecɔn ɛkkɛn bɛɛ. 29 Ma gɛɛg bala poŋi gɔki agi Yaccu Yahuuja myennɛ aŋka ooddi wɛɛṭi oomdin te iid kaapun, acaan kuñŋan bilk bala ɛkɛti. Ɔci ma gɛɛg bala poŋi gɔki agi Yahuuja ati maka bɔwan eektɛ waagga kaapun no. 30 Ne Yahuuja ‘wonnɛ Yaccu amyɛ, ɔci ɛkɛ kaaccin bora ne pɛñan, ɔci noon uli doki. 31 Ɔci ne ɛkɛ kaanni borayɛ, Yaccu gɔkcin agi, “Acca neeniti ma gɔrti pwani ‘ya Kaci Ma Baano, ɔci te naŋki ‘yayɛ, ma gɔrti pwani Wey ɔɔn daŋkun. 32 Kan ma gɔrti pwani Jwaŋa Tolan te naŋki ‘ya Kaci ɛkɛyɛ, ɔci Jwaŋa Tolan noŋdi daŋkun aŋka ma gɔrti pwani ‘ya Kaci ɛkɛ, ɔci ɛkɛ noŋdi a ɔɔn acca. 33 Kɛɛgin ‘ya, ‘ya baal ɛkkɛti ne ḍyɛṭ ṭɔɔlɛ, ɔci ne cwakanti ɛkkɛ liertɛ ‘ya, ɔci ba jwalla guaŋi ‘ya ma Icrayiiltiyɛ, guagdi ‘ya ɛkkɛti acca, ka nona oodda ‘ya ɛkkɛ yaakɛti bɛɛdɛ bɛɛ. 34 Ɛkkɛ myettin ‘ya te jyeka wonkɛn neeni, dala ɛkkɛ oonnɛ yɔtin pookɔ. Bala ba ‘ya an ɛkkɛyɛ, dala ɛkkɛ oondɛ yɔtin pookɔ. 35 Kan ɛkkɛ oonnɛyɔ pookɔyɛ, ŋeettan ma waakɛnda ɛkkɛ a maka laldin ‘yay.” 36 Butruc gɔkcin ɛkɛti agi, “Ciɛggɔn, i ootta aŋɛ?” Ɔci Yaccu gɔkcin ɛkɛti agi, “Nona oodda ‘yayɛ, i yaakiti bootta ‘yati acca bɛɛ, yeti ne baaṭi i bootta ‘yati.” 37 Ɔci Butruc gɔkcin ɛkɛti agi, “Ciɛggɔn i gɔk ‘ya yaakati bootta iti acca bɛɛ ogo? Kan ‘ya nokta ma te iyɛ, dala ɔga ɔɔn.” 38 Yaccu gɔkcin ɛkɛti agi, “Hay! I Butruc i boki tuud te ‘ya? Tieŋŋa, ‘ya gɔkka iti, te ween jiña neeniyɛ, ne naŋka neeni men baawi ɔci ne tuan wiakti men bɛɛyɛ, i kɛkka te ‘ya oŋki aga ne ḍoogɔ doki.”
1 Ɔci Yaccu gɔkcin moki agi, “Naa ɛkkɛ yomgɔ wiak bɛɛ. Ɛkkɛ jyettɛ Jwaŋa Tolanti, ɔci dala ɛkkɛ jyeddɛ ‘yati daŋkun. 2 On Wey ɔɔn oorg jitkɛn bala coŋɔ. Te baali a ɔɔn bɛɛyɛ, te ‘ya ɛkkɛ myennin ka oorg jitkɛn bala bɛɛ. ‘Ya ootta noŋ nona ciyɛ ɛkkɛy. 3 Ɔci kan ‘ya ootta noŋ nona ciyɛ ɛkkɛyɛ, ‘ya dɔɔkka moki ɛkkɛ eedin ñaaktinti ‘yati aŋka ikin ciyin ñootin nona ne cyɛɛlɔ. 4 Ɔci pɔya oodda ‘ya ŋeejɛ ɛkkɛ.” 5 Tɔmac gɔkcin ɛkɛti agi, “Ciɛggɔn, nona ooddi i kwoyɔn ɔɔn, ɔci pɔya ooddi i ŋeejɔn ɔɔn a ɔki?” 6 Yaccu gɔkcin ɛkɛti agi, “‘Ya a pɔyo, ɔci ‘ya a mena awarɛ, ɔci ‘ya a mena tɛɛtki may. Menga yaakinti bɛya Wey ɔɔnti budan bɛɛ. Gena mena bɛya ‘yati aŋka bɛya Wey ɔɔnti. 7 Ɛkkɛ te ‘ya ŋeejatiyɛ, te Wey ɔɔn da ŋeejɛ ɛkkɛ daŋkun. Ɔci acca ɛkɛ ŋeejɛ ɛkkɛ, ɔci oŋkanda ɔɔn, ɔci ɛkɛ yuarŋɛ ɛkkɛ doki.” 8 Pilibuc gɔkcin ɛkɛti agi, “Ciɛggɔn, ɔɔn lɛɛrtɔn Wey ɛkkɛ ɔɔn gɔrtɔn, ɔci kan a ɔɔnyɛ, yɔmjin doki.” 9 Yaccu gɔkcin agi, “Pilibuc, ikin balkin iki ‘ya wɛnni te baaṭi doki, ɔci i ‘ya ŋiñña men bɛɛ? Mena ‘ya yuarŋayɛ, ɛkɛ Wey ɔɔn yuarŋɛ daŋkun. Te gena yeti i tooci Wey ɔɔny? 10 I jyetti ‘ya baal Wey ɔɔnti, ɔci Wey ɔɔn bala ‘yati bɛɛ? ‘Ya gɔk jyeka neeni te yom ‘ya paru budan bɛɛ. Wey ɔɔn ɛkɛ balgin iki ‘ya oŋkanda. Gena ɛkɛ noŋi naŋka neeni. 11 Dala i jyedda ‘ya baal Wey ɔɔnti ɔci Wey ɔɔn bala ‘yati. Kan i jyetti a ɔɔn bɛɛyɛ, dala i jyedda naŋki ‘yati. 12 Tieŋŋa, ‘ya gɔkka iti awarɛ, mena jyeddi ‘yatiyɛ, ɛkɛ noŋdi ba naŋki ‘ya daŋkun, ɔci naŋki ‘ya bwantan naŋki ɛkɛ, acaan ‘ya ootta Wey ɔɔnti. 13 Kan ɛkkɛ toottɛ Wey ɔɔnti te genga te yenti ‘yayɛ, ɔci ‘ya noŋja aŋka ma gɔrti pwani Wey ɔɔn te naŋki ‘ya Kaci ɛkɛ. 14 Kan ɛkkɛ toottɛ te genga te yenti ‘yayɛ, ɔci ‘ya noŋja. 15 “Kan ɛkkɛ anɛ ‘yayɛ, ɛkkɛ jyek ‘ya tiidiyɔ. 16 Ɔci ‘ya cɔkca Wey ɔɔnti, ɔci ɛkkɛ ‘wondɛ ɛkɛ Mena Ma Magdɛ bɛya ciyi iki ɛkkɛ wɛnni a ñaccu. 17 Gena Boŋa awarɛ. Yeti maka ciyi budan te ‘yayɛ, ɛkkɛn yaakinti ɛkɛ eetan yomgɛnti bɛɛ, acaan ɛkɛ kuoli ñin ɛkkɛn. Ɛkɛ ŋeejɛ ɛkkɛ acaan ɛkɛ ñoowɛ iki ɛkkɛ a cyɛɛlɔ, ɔci ɛkɛ bɛya ciyi ɛkkɛ yomgɔti. 18 “‘Ya ɛkkɛ daldinyɔ pookɔ bɛɛ, ‘ya bɛɛd dɔɔkka ɛkkɛti. 19 Ɔci ne cwakanti maka ciyi budan te ‘yayɛ, ‘ya yuarta ɛkkɛn wɛnni moki bɛɛ, yeti ‘ya yuardata ɛkkɛ moki, ɔci ne ‘ya tɛɛtayɛ, ɔci ɛkkɛ da tɛɛtɛ daŋkun. 20 Ne oŋŋa bɛya wannayɛ, ŋeeddɛ ɛkkɛ ‘ya baal Wey ɔɔnti, ɔci ɛkkɛ da balgɛ ‘yati, ɔci ‘ya da baal ɛkkɛti. 21 “Ɔci mena jyek ‘ya bala ɛkɛti, ɔci jyek ‘ya tiidiyɔyɛ, ɛkɛ ani ‘ya. Ɔci mena ani ‘yayɛ, Wey ɔɔn ani ɛkɛ daŋkun, ɔci ‘ya an ɛkɛ daŋkun, ɔci ‘ya waru lɛɛlla bora ɛkɛti aŋka ɛkɛ gɔrti ‘ya.” 22 Ɔci Yahuuja bala (gena Yahuuja Ickɛɛryuti bɛɛ), ɛkɛ gɔkcin Yaccuti agi, “Ciɛggɔn, i noŋja a ɔki aŋka i yuartiti ɔɔn, ɔci maka ciyi budan te i, i yuartiti bɛɛy?” 23 Yaccu gɔkcin ɛkɛti agi, “Kan menga ani ‘yayɛ, ɛkɛ jyek ‘ya tiidiyɔ, ɔci Wey ɔɔn ani ɛkɛ. Ɔci ɔɔn bɛɛdɔn ciyɔn ñoowɔn iki ɛkɛ a cyɛɛlɔ. 24 Mena ani ‘ya bɛɛyɛ, ɛkɛ jyek ‘ya tiidiyɔ bɛɛ. Jyeka tieŋdɛ ɛkkɛ ‘yati neeniyɛ, a jyek ‘ya bɛɛ, gena jyek Wey ɔɔn mena ‘ya cuonnay. 25 “‘Ya gɔkkan ɛkkɛti te naŋka neeni ne ‘ya baala ɛkkɛti men. 26 Ɔci Mena Ma Magdɛyɛ, ɛkɛ a Boŋ Jwaŋa Tolan, ɔci ɛkɛ cuondɛ Wey ɔɔn te yenti ‘ya, ɔci ɛkɛ ɛkkɛ laldɛ te waak waakɛnda. Ɔci te naŋki Boŋ Juaŋ neeni ɛkkɛ ñingɔ ñiektɛ te jyeka guaŋi ‘ya ɛkkɛti waakɛnda. 27 “Coodi pwani daldiyɔ ‘ya ɛkkɛti. Ɛkkɛ ‘wondin ‘ya coodi pwani ba yom ‘ya, yeti ‘ya ɛkkɛ ‘wondin ba ‘woñgin maka ciyi budan te jyek ‘ya ne ɛkkɛn ‘woñki waak bɛɛ. Naa ɛkkɛ yomgɔ wiak bɛɛ. Naa ɛkkɛ buayɛ bɛɛ. 28 Ɛkkɛ tieŋnɛ jyeka guaŋi ‘ya ɛkkɛti ka ne ‘ya ooddayɛ, ‘ya dɔɔkka ɛkkɛti dɔki. Ɛkkɛ te anɛ ‘yayɛ, ɛkkɛ te yomgɔ ñɔɔna ñɔɔn te jyeka guaŋi ‘ya ɛkkɛti ka ‘ya ootta Wey ɔɔntiy, acaan Wey ɔɔn tolcin te ‘ya. 29 Ɛkkɛ myennin doki te naŋka bɛya ne ŋoyɔ aŋka ne naŋki dɛndi borayɛ, ɛkkɛ jyeddɛ ‘yati. 30 Acca ‘ya gɔwwin iki ɛkkɛ oŋki ne coŋɔn moki bɛɛ. Ciɛggɔn ṭɛɛrji neeni bala bɛya, yeti ɛkɛ yaakinti noŋi genga ‘yati bɛɛ. 31 ’Ya noŋja ba jyeka ‘ya myennata Wey ɔɔn aŋka ŋeettan ma baan warda ‘ya an Wey ɔɔn. “Jɔŋdɛ, ikin oottin te nona neeniti.”
1 “‘Ya a luutkin waanɛ, ɔci Wey ɔɔn, ɛkɛ a mena gɔṭi jango. 2 Ɔci kan kɛn ‘ya gɛɛl jieda ṭɔlgɛ bɛɛyɛ, ɔci ɛkɛ tɔttɛ Weegɛn ɔntɔ. Ɔci jaan kɛna jied ṭɔlgɛyɛ, kɛrkɛ tuomdɛti Weegɛn aŋka jieda ṭɔlgɛ ‘wota. 3 Acca ɛkkɛ pwadgɛ te jyeka guaŋi ‘ya ɛkkɛti. 4 Dala ɛkkɛ ciyin ñoowin iki ‘ya a cyɛɛlɔ, ɔci dala ‘ya baal ciy ɛkkɛti oŋkanda ɔɔn. Jaan kɛnɛ kan bala ɔntɔyɛ, jieda bɛɛ. Kan bala te mɛɛgɛntiyɛ, jieda. Ɔci ba jyek jaan kɛrka neeniyɛ, bala ba ɛkkɛ. Kan ɛkkɛ ciyin iki ‘ya a cyɛɛlɔ bɛɛyɛ, ɛkkɛ balgɛ ba jaan kɛna ṭɔlgɛ baawo. Yeti kan ɛkkɛ balkin iki ‘ya a cyɛɛlɔyɛ, ɛkkɛ balgɛ ba jaan kɛna ciyi mɛɛgɛnti jied ṭɔlgɛy. 5 “‘Ya a jaan warɛ, ɔci ɛkkɛ agɛ jaan kɛrkɛ. Kan men gɛɛl bala ‘yati, ɔci ‘ya da baal ɛkɛtiyɛ, ɛkɛ bala ba jaan kɛna jied ṭɔlgɛ ne coŋɔny. Kan ɛkkɛ ciyɛ budan te ‘yayɛ, ɛkkɛ yaakɛti noŋdɛ genga bɛɛ. 6 Kan mena ciyin iki ‘ya a cyɛɛlɔ bɛɛyɛ, ɛkɛ bala ba jaan kɛna yiɛmnɛ weegɛn ɔntɔ neeni, ɔci ɛkɛ iwa. Ɔci kɛrka neeni eedɛ yiɛptɛ weegɛn maccu, ɔci amdɛ maaño, ɔci baadi doki. 7 Kan ɛkkɛ ciyin iki ‘ya a cyɛɛlɔ, ɔci kan jyek ‘ya bala ɛkkɛtiyɛ, kan ɛkkɛ toottɛ te gengayɛ, ɔci gena neeni bala ɛkkɛti doki. 8 Kan ɛkkɛ jieddɛ ṭɔlgɔ ne coŋɔn ba luutkin ɔɔnyɛ, te naŋka neeni ma gɔrti pwani Wey ɔɔn. Ɔci a ɔɔnyɛ, ɛkkɛ agɛ maka laldi ‘ya awarɛ. 9 “‘Ya an ɛkkɛ bala ba Wey ɔɔn ne ani ‘yay. Dala ɛkkɛ ciyɛ ba anna ana ‘ya ɛkkɛ a ñaccuy. 10 Ɔci kan ɛkkɛ jyek ‘ya tiidiyɔyɛ, ɛkkɛ ciedɛ ba anna ana ‘ya ɛkkɛy. Ɔci kan a ɔŋŋiyɛ, ɔci ɛkkɛ noŋdɛ ba ‘ya moki ne jyek Wey ɔɔn tiiññayɔy, ɔci ‘ya ciy ba anna ani Wey ɔɔn ‘yay. 11 “Ɛkkɛ myennin ‘ya te waka neeni aŋka ɛkkɛ ciedɛ te yoma ñɔyan ba yom ñɔɔn ‘ya, ɔci ɛkkɛ yomgɔ ñɔya ne tolan. 12 Jyek ‘ya ɛkkɛti neeni, dala ɛkkɛ oondiyɔ pookɔ bala ba anna ana ‘ya ɛkkɛy. 13 Kan mena tuwa te mung ɛkkɛnyɛ, anna ani ɛkɛ mung ɛkkɛn buannɛ ani menga bɛɛ. 14 Kan ɛkkɛ noŋɛ jyek ‘ya oŋkandayɛ, ɛkkɛ agɛ mung ‘ya. 15 Acca ɛkkɛ bardin ‘ya a kɛɛnk moki bɛɛ, acaan mena kɛɛngɔn naŋka naŋdɛ weegɛn ŋeejɛ ɛkɛ bɛɛ. Yeti ɛkkɛ myennin ‘ya te naŋki waakɛnda naŋka tieŋŋan ‘ya te Wey ɔɔntiy, ɔci a ɔŋŋiyɛ, ɛkkɛ bardin ‘ya a mung ɔɔn. 16 ’Ya kɛnnata ɛkkɛ bora bɛɛ. Ɛkkɛ aŋka kɛnnin ‘ya bora te mati te yom ‘ya. Ɔci ɛkkɛ ‘wonnin ‘ya jwali aŋka ɛkkɛ ooddɛ jieddɛ ṭɔlgɔ ne coŋɔn, ɔci ṭɔlg ɛkkɛ baadi bɛɛ. Ɔci a ɔɔnyɛ, kan ɛkkɛ toottɛ Wey ɔɔnti te genga te yenti ‘yayɛ, ɔci ɛkkɛ ‘wondɛ ɛkɛ. 17 Jyeka gɔwwan ‘ya ɛkkɛti neeniyɛ, dala ɛkkɛ oondiyɔ pookɔ. 18 “Kan maka ciyi budan te ‘ya, yookɔn te ɛkkɛyɛ, dala ɛkkɛ ñingɔ ñiektɛ acaan ɛkkɛn yookɔn te ‘ya te ñamu. 19 Ɛkkɛ te agɛ maka iñɔ ṭɛɛrji wɛnni neeniyɛ, ɛkkɛn te ani ɛkkɛ, acaan ɛkkɛn ani ma ɛkkɛn pookɛn. Yeti ɛkkɛ agɛ maka iñɔ ṭɛɛrji neeni bɛɛ. Ɛkkɛ kɛnnin ‘ya bora te maka ṭɛra neeniti, aŋka ɛkkɛn yookiti te ɛkkɛ wanna. 20 Dala ɛkkɛ ñingɔ ñiektɛ te jwalla guaŋi ‘ya ɛkkɛti agi, ‘Kɛɛngɔnyɛ, ɛkɛ tolcin te kanŋa weegɛn bɛɛ.’ Ɔci kan ma noŋi ywobji ‘yatiyɛ, ɔci ɛkkɛn da noŋdi ywobji ɛkkɛti daŋkun. Ɔci kan ma tieci jyek ‘ya waakɛn bɛɛyɛ, ɔci ɛkkɛn da jyek ɛkkɛ tiitanyɔ bɛɛ. 21 Ɔci ɛkkɛn noŋdi waka neeni waakɛnda ɛkkɛti te ‘ya, acaan mena ‘ya cuonna kwoyɔn ɛkkɛn. 22 ’Ya te bɛɛna bɛɛyɛ, ɔci ‘ya te gɔŋna genga ɛkkɛnti bɛɛyɛ, te jyek nɔji te bala ɛkkɛnti bɛɛ. Gena ‘ya bɛɛna aŋka jyek nɔji oona ‘ya bora neeni, ɔci ɛkkɛn yaakinti coki nɔji ɛkkɛn moki bɛɛ. 23 Ɔci kan mena yookɔn te ‘yayɛ, ɔci ɛkɛ daŋkun yookɔn te Wey ɔɔn. 24 Naŋka naŋi ‘ya ma ñomgɛnti neeniyɛ, naŋŋɛ menga oŋgati bɛɛ. ‘Ya te noŋŋa a ɔɔn bɛɛyɛ, te jyek nɔji ɛkkɛn baawo. Yeti ‘ya yuarka ɛkkɛn, yeti ɛkkɛn yookɔn te ɔɔn yaakkɔ i Wey ɔɔn. 25 Yeti waka neeni dɛññin bora ba jyek ganuun ɛkkɛn. Worga ɛkkɛn gɔki agi, ‘Ɛkkɛn yookɔn te ‘ya budan.’ 26 “Mena Ma Magdɛ mena cuoñña ‘ya ɛkkɛti te Wey ɔɔntiyɛ, ne ɛkɛ bɛɛdiyɛ, ɛkɛ mieti ma te jyek ‘ya. Ɛkɛ a Boŋa awarɛ, ɔci ɛkɛ a mena bɛya te Wey ɔɔnti. 27 Ɔci ɛkkɛ daŋkun miettɛ ma te jyek ‘ya acaan ɛkkɛ balkin iki ‘ya te ñamu.
1 “‘Ya ɛkkɛ myennin te waka neeni aŋka ɛkkɛ ḍɛɛmdɛ bɛɛ. 2 Ne baaṭi ɛkkɛ ŋualtɛ ma ɔntɔ te oorga morki ma Juaŋti, ɔci ne baaṭi ɛkkɛ noktɛ mako. Ɔci maka noki ɛkkɛ neeniyɛ, poŋi gɔki agi nooŋŋa neeni baali ba kanŋa Jwaŋa Tolan katan. 3 Ɛkkɛn noŋi a ɔɔn acaan ɛkkɛn Wey ɔɔn ŋeecɔn bɛɛ, ɔci ‘ya daŋkun ŋeecka ɛkkɛn bɛɛ. 4 ’Ya ɛkkɛ myennin te naŋka neeni aŋka ne baaṭi ne naŋka neeni dɛndi borayɛ, ɛkkɛ ñingɔ ñiektɛ te jyeka guaŋi ‘ya ɛkkɛti neeni. “‘Ya ɛkkɛ myennin te jyeka neeni wona ikin balkin iki ‘ya aŋka ɛkkɛ poŋdɛ te ɛkkɛn ne naŋka neeni dɛndi boray. 5 Yeti acca ɛkkɛ myennin acaan ‘ya ootta dɔwwa mena ‘ya cuonnati dɔki. Ɔci menga bala ɛkkɛti wɛnni tootti ‘yati agi ‘ya ootcɔ wɛnɛ bɛɛ. 6 Ɛkkɛ yomgɔ yeyɔ te jyeka guaŋi ‘ya ɛkkɛti neeni. 7 Yeti ‘ya gɔk awarɛ, ɔci kan ‘ya oottayɛ, pwad pwad ɛkkɛti. Kan ‘ya ootta bɛɛyɛ, Mena Ma Magdɛ bɛya ɛkkɛti bɛɛ. Yeti ne ‘ya ooddayɛ, Mena Ma Magdɛ cuoñña ‘ya ɛkkɛti. 8 Ɔci ne ɛkɛ bɛɛdiyɛ, ɛkɛ maka ṭɛɛrji wɛnni myettɛ te jyek nɔjjo, ɔci te jyek naŋka pwadin, ɔci te jyek godan daŋkun. 9 Jyek nɔji bala acaan ɛkkɛn jyeti ‘yati bɛɛ. 10 Jyek naŋka pwadin bala acaan ‘ya ootta Wey ɔɔnti ɔci ‘ya yuardata ɛkkɛ moki bɛɛ. 11 Jyek godan bala acaan ḍuaŋa ṭɛɛrji jyek godan ɛkɛ naŋŋɛ Juaŋ doki. 12 “Ɔci ‘ya buaga gɔkka jyeka coŋin jyeka pookɛn ɛkkɛti, yeti ɛkkɛ yaakɛti tieŋdɛ acca bɛɛ. 13 Yeti Boŋa awarɛ ne ɛkɛ bɛɛdiyɛ, ɛkkɛ laldɛ ɛkɛ te jyeka awarɛ waakɛnda. Acaan ɛkɛ gɔkti te yom ɛkɛ parɛ budan bɛɛ. Waka tieŋdɛ ɛkɛyɛ, aŋka ɛkɛ gɔkti, ɔci ɛkkɛ myettɛ ɛkɛ te waka bɛyay. 14 Boŋa awarɛ neeni, ɛkɛ noŋi aŋka ma gɔrti pwani ‘ya bala a ɔki, acaan jyek ‘ya eedɛ ɛkɛ te ‘yati, ɔci ɛkkɛ myettɛ ɛkɛ te jyeka neeni. 15 Waka bala Wey ɔɔnti waakɛndayɛ, a wak ‘ya. Acaan a ɔɔnyɛ, ‘ya gɔkkan ɛkkɛti agi jyek ‘ya eedɛ ɛkɛ te ‘yati, ɔci ɛkkɛ myettɛ ɛkɛ te jyeka neeni. 16 “Ɔci ne ḍiɛran ṭɔɔlɛ ‘ya yuardata ɛkkɛ moki bɛɛ, ɔci ne ḍiɛran ṭɔɔlɛ ‘wota ‘ya yuardata ɛkkɛ dɔki.” 17 Ɔci maka laldɛ Yaccu gɛɛg bala toyi yɔtin pookɛn gɔki agi, “Jiek jitkɛn guaŋŋɛ ɛkɛ ikinti neeni bala a ɔki ne ɛkɛ gɔki agi ne ḍiɛran ṭɔɔlɛ ɛkɛ yuarditi ikin bɛɛ, ɔci ne ḍiɛran ṭɔɔlɛ ‘wota ɛkɛ yuarditi ikin moki, ɔci ɛkɛ ootci Wey ɛkkɛntiy?” 18 Ɔci maka laldɛ Yaccu gɔki agi, “A gena guagdɛ ɛkɛ agi ‘ne ḍiɛran ṭɔɔlɛy?’ Jiek jitkɛn guaŋŋɛ ɛkɛ waakɛnda neeni ŋeecin ikin bɛɛ.” 19 Çeejɛ Yaccu ma buagɔn tootti ɛkɛti, ɔci ɛkɛ gɔkcin ɛkkɛnti agi, “Ɛkkɛ toyyɛ yɔtin pookɔ te jyeka guaŋi ‘ya ɛkkɛti ka ne ḍiɛran ṭɔɔlɛ ‘ya yuardata ɛkkɛ bɛɛ, ɔci moki ne ḍiɛran ṭɔɔlɛ ‘wota ‘ya yuardata ɛkkɛ dɔkiyɛ? 20 Tieŋdɛ, ‘ya gɔkka ɛkkɛti awarɛ, ne baaṭi ɛkkɛ wiaktɛ a joon ne ‘ya noktati may, yeti maka ciyi budan te ‘ya ɛkkɛn aŋka yomgɛn ñɔyɔ. Ɛkkɛ yomgɔ yiegdi, yeti ne baaṭi ɛkkɛ aŋka yomgɔ ñɔɔna ñɔɔn dɔki. 21 Ɔci kan ɛɛŋ amɛ jiediyɛ, ɛkɛ yomɛ yaayɛ te jiedi kacco. Yeti kan ɛkɛ kaci jieddɛ bora dokiyɛ, ɛkɛ ñingɛ wierti te pɛñi kacco. Ɔci ɛkɛ yomɛ ñɔɔna ñɔɔn acaan kaci jiennɛ ɛkɛ bora doki. 22 Ɔci ba jyek ɛŋa neeniyɛ, bala ba jyek ɛkkɛ. Acaan acca ɛkkɛ yomgɔ yiegdi, yeti ne ɛkkɛ yuardin ‘ya mokiyɛ, ɛkkɛ yomgɔ ñɔya a ñɔɔno, ɔci yom ñɔɔn neeni eedɛ menga te ɛkkɛti bɛɛ. 23 “Ɔci te oŋŋa bɛya ookti ne ŋoyɔ ɛkkɛ toottɛ ‘yati te genga moki bɛɛ. Tieŋdɛ, ‘ya gɔkka ɛkkɛti, kan ɛkkɛ toottɛ Wey ɔɔnti te yenti ‘ya te gengayɛ, ɛkkɛ ‘wondɛ ɛkɛ. 24 Ɛkkɛ toonnɛ ɛkɛti te genga te yenti ‘ya men bɛɛ. Dala ɛkkɛ toottɛ oŋkanda, ɔci ɛkkɛ ‘wondɛ ɛkɛ, ɔci ɛkkɛ yomgɔ ñɔɔna ñɔɔno. 25 “‘Ya ɛkkɛ myennin jyeka neeni te jiek jitkɛn bɛɛ, yeti ne baaṭi ɛkkɛ myettin ‘ya a ɔɔn moki bɛɛ. ‘Ya ɛkkɛ myettin te jyek Wey ɔɔn te jiek jitkɛn woodgɛn. 26 Ɔci te oŋŋa bɛya ookti ne ŋoyɔyɛ, ɛkkɛ toottɛ Wey ɔɔnti te yenti ‘ya, ɔci ‘ya toocca te genga Wey ɔɔnti te ɛkkɛ moki bɛɛ. 27 Acaan Wey ɔɔn ɛkɛ ani ɛkkɛ acaan ɛkkɛ anɛ ‘ya, ɔci ɛkkɛ jyettɛ ‘yati doki a 'ya bɛɛn te Wey ɔɔnti. 28 ’Ya bɛɛn te Wey ɔɔnti, ɔci ‘ya bɛɛn ṭɛɛrji, ɔci acca ‘ya ṭɛɛr daldiyɔ, ɔci ‘ya dɔwwa Wey ɔɔnti.” 29 Maka laldɛ Yaccu gɔkcin agi, “Pwatcin! Acca i gɔŋni ne pwadan, i gɔŋni te jiek jitkɛn woodgɛn. 30 Ɔci acca ŋeejɔn ɔɔn waak waakɛnda ŋeej i, ɔci kan menga tootti iti moki bɛɛyɛ, yɔmjin. Te jyeka neeni ŋeejɔn ɔɔn i bɛɛni te Jwaŋa Tolanti.” 31 Yaccu gɔkcin ɛkkɛnti agi, “Hay! Ɛkkɛ gɔkɛ ɛkkɛ jyettɛ ‘yati acca doki? A’a. 32 Oŋ bala bɛya ɔci cɔɔllin doki, oŋŋa ɛkkɛ cyɛndi jitin. Ɔci ɛkkɛ menga da ati baanɛti ɔci menga da ati baanɛti, ɔci ‘ya daldata ɛkkɛ paru. Yeti ‘ya baal paru bɛɛ, ɔɔn balgɔn i Wey ɔɔn. 33 Ɛkkɛ myennin ‘ya te naŋka neeni aŋka ɛkkɛ baltɛ coodi pwani ‘yati. Iñɔ wɛnni ṭɛɛrji taab bala ɛkkɛti, yeti dala ɛkkɛ ciyɛ yomgɔ tɛɛcin, acaan waka iñɔ ṭɛɛrji wɛnni buani ‘ya waakɛnda!”
1 Ne Yaccu gɔŋni a ɔŋŋiyɛ, ɛkɛ ñorcin ñaalɔ ɔci gɔkcin agi, “Wey ɔɔn, oŋ bɛɛn doki, dala i noŋja aŋka ma gɔrti pwani ‘ya Kaci i, aŋka ‘ya Kaci i noŋja aŋka ma gɔrti pwani i. 2 Acaan ‘ya Kaci i ‘wonna i war tɛɛn i, ɔci ‘ya yaakati gɔkca mati iñɔ ṭɛɛrji waakɛnda. Ɔci acaan a ɔɔnyɛ, ‘ya yaakati maka ‘ya ‘wonna i neeni ‘woñga tɛɛtin baadi ywongati bɛɛ neeni. 3 I paru a Jwaŋa Tolan awarɛ. Ɔci kan mena i ŋeejɛyɛ, tɛɛtin i bala ɛkɛti, ɔci tɛɛtin neeni baadi ywongati bɛɛ. ‘Ya Yaccu Kiṭɔ ‘ya a mena cuonni i, ɔci kan mena ‘ya ŋeejayɛ, tɛɛtin bala ɛkɛti, ɔci tɛɛtin neeni baadi ywongati bɛɛ. 4 Kanŋa ‘ya ‘wonna iyɛ, cwamjan ‘ya iñɔ ṭɛɛrji wɛnni doki, ɔci te naŋka neeniyɛ, ma gɔrcin pwani i. 5 Wey ɔɔn, ‘ya ne bɛɛda ñaalɔ aŋan iti accayɛ, dala i noŋja aŋka pwani ‘ya bala moki ba naŋka naŋŋi i te baaṭi wona ṭɛɛr men baawi ne ‘ya baala iti meny. 6 “‘Ya noŋjan aŋka i ŋeeckiti ma neeni. Ɔci maka neeni, ɛkkɛn a maka ‘ya kɛnna i te iñɔ ṭɛɛrji te maka pookɛnti. Ɛkkɛn a ma i, ɔci acca i ‘ya ‘wonna ɛkkɛn, ɔci ɛkkɛn jyek i tiiyɛyɔ. 7 Ɔci acca ŋeecɔn ɛkkɛn waka ‘ya ‘wonna i waakɛnda bɛɛn te iti awarɛ. 8 Acaan ‘ya ɛkkɛn ‘woñgan jyeka ‘ya ‘wonna iy. Ɔci ɛkkɛn jyeti jyeka neeni, ɔci ŋeecɔn ɛkkɛn ‘ya bɛɛn te iti awarɛ, ɔci ɛkkɛn jyeti ‘yati acaan ‘ya cuonna i. 9 “Ɔci ‘ya cɔk te ɛkkɛn. ‘Ya cɔk te maka ciyi budan te ‘ya bɛɛ. ‘Ya cɔk te maka ‘ya ‘wonna i, acaan ɛkkɛn a ma i. 10 Ma ‘ya waakɛnda a ma i, ɔci ma i a ma ‘ya daŋkun. Ɔci ɛkkɛn noŋi ne pwadan aŋka ma gɔrti pwani ‘ya. 11 Ɔci acca ‘ya baldi iñɔ wɛnni ṭɛɛrji moki bɛɛ. Yeti ɛkkɛn bala iñɔ ṭɛɛrji wɛnni men, ɔci ‘ya bɛɛd iti. Wey ɔɔn, Weya pwadan, maka ‘ya ‘wonna i dala i ɛkkɛn tiyayɔ te yenti i, aŋka ɛkkɛn aga maka ne cyɛɛlɔ bala ba ikin a mena ne cyɛɛlɔ. 12 Ne ‘ya balgin iki ɛkkɛn menyɛ, ‘ya ɛkkɛn tiiñiyɔ te yenti i yenta ‘ya ‘wonna iy, ɔci ɛkkɛn gwali ‘ya, ɔci menga ne cyɛɛlɔ gɛɛl yien bɛɛ. Gena mena pɔy bana maañ ḍyɛmmɛji ɛkɛ aŋka yien parɛy. Ɔci a ɔɔnyɛ, jyeka kiigin dɛññin bora doki. 13 Ɔci acca ‘ya bɛɛd iti, ɔci ‘ya gɔkcan waka neeni ne ‘ya baala te iñɔ ṭɛɛrji men, aŋka ma ‘ya ciyi te yoma ñɔyan ba yom ‘ya. 14 ’Ya ɛkkɛn myetkan jyek i. Ɔci maka ciyi budan te ‘ya yookɔn te ɛkkɛn, acaan maka neeni a maka ṭɛɛrji bɛɛ, bala ba ‘ya daŋkun, acaan ‘ya a mena ṭɛɛrji bɛɛ. 15 ’Ya tooc iti aŋka i ɛkkɛn eya bora te ṭɛɛrji bɛɛ, yeti ‘ya tooc iti aŋka i yuoc ɛkkɛn te Mena Yaayan iñɔ wɛnni ṭɛɛrji. 16 Ɛkkɛn bala ba maka ṭɛɛrji ciyi budan te ‘ya neeni bɛɛ. Ɛkkɛn bala ba ‘ya daŋkun. 17 Dala i ɛkkɛn kɛbba bora ḍuacca pookɛn aga ma i maka pwadin te jyeka awarɛ, acaan jyek i a jyeka awarɛ. 18 ’Ya ɛkkɛn cuuñi baan warda bala ba i ‘ya cuonna iñɔ ṭɛɛrji wɛnni. 19 ’Ya waru ‘wonnin i aŋka ɛkkɛn gɔrti ɔci ɛkkɛn waakɛn ‘wonti i moki, ɔci ciya ba ‘ya ɔɔn te jyek i jyeka awarɛ. 20 “‘Ya cɔk te maka neeni pookɛn bɛɛ. ‘Ya cɔk te maka tieŋdi jyek ɛkkɛn ne baaṭi ɔci jyeddi ‘yatiy. 21 ’Ya cɔk te ɛkkɛn waakɛnda aŋka ɛkkɛn waakɛnda aga maka ne cyɛɛlɔ bala ba ikin yaakkɔ akin mena ne cyɛɛlɔ. I a Wey ɔɔn. Dala maka neeni ɛkkɛn iki ikin aktin yoŋŋa ne cyɛɛlɔ. Ɔci a ɔŋŋiyɛ, ŋeettan ma ‘ya cuonna i. 22 Ɔci pwanna ‘ya ‘wonna iyɛ, ‘ya ɛkkɛn ‘woñgan daŋkun, ɔci ɛkkɛn aŋi maka ne cyɛɛlɔ ba ikin akin yoŋŋa ne cyɛɛlɔy. 23 Ɔci a ɔɔnyɛ, ‘ya baal ɛkkɛnti, ɔci i da baal ‘yati, ɔci a ɔɔnyɛ, ɛkkɛn aga maka ne cyɛɛlɔ awarɛ. Ɔci ŋeettan ma waakɛnda ‘ya cuonna i, ɔci i an ɛkkɛn bala ba i ne ani ‘yay. 24 “Wey ɔɔn, ‘ya buaga maka ‘ya ‘wonna i dala ɛkkɛn bɛya nona ‘ya baala aŋka ɛkkɛn gɔrti pwani ‘ya pwanna ‘ya ‘wonna i te anna ani i ‘ya ne ṭɛɛr men baawi neeniy. 25 Wey ɔɔn, Weya pwadan, i ŋeecki maka ciyi budan te ‘ya bɛɛ, yeti i ŋeejin ‘ya, ɔci i ŋeecki maka neeni ‘ya cuonna i. 26 ’Ya ɛkkɛn nɔɔtkan te i doki, ɔci ‘ya ɛkkɛn nɔɔtka ‘wota moki te i, aŋka anna ani i ‘yayɛ, bala ɛkkɛnti, ɔci ‘ya ciy ɛkkɛn yomgɛnti.”
1 Ɔci ne Yaccu gɔŋni jyeka neeniyɛ, ɛkɛ ati i maka laldɛ ɛkɛ. Ɛkkɛn ati Ḍoñi Kidrɔn jyɛdɛji. Jiniina bala aŋan, ɔci ɛkkɛn ati kaaccin jiniinaji. 2 Ɔci Yahuuja Ickɛɛryuti, mena Yaccu ‘wonnɛ ma byeŋkɛntiyɛ, non jiniina ŋeejɛ ɛkɛ, acaan Yaccu ati oŋkanda aŋan i maka laldɛ ɛkɛ. 3 Gaciicin ḍwaŋin ma Icrayiil ɔci ma Pɛriciin Yahuuja Ickɛɛryuti ‘woñgi ackan ɔci bɔlin, ɔci ɛkkɛn ati i Yahuuja aŋan jiniinaji eci dyɛkan ɔci yetin ɔci wak ṭwaŋ byeŋkɛnti. 4 Yaccu naŋka naŋtan ma ɛkɛti neeniyɛ, ŋeejɛ ɛkɛ waakɛnda doki. Ɔci ɛkɛ ati kookcinti mati, ɔci gɔkcin ɛkkɛnti agi, “Ɛkkɛ lieṭɛ menɛ?” 5 Ɛkkɛn gɔkcin ɛkɛti agi, “Ɔɔn lieṭɔn Yaccu men ma Najarɛt.” Yaccu gɔkcin ɛkkɛnti agi, “Gena ‘ya neeni.” Ɔci Yahuuja mena Yaccu ‘wonnɛ ma byeŋkɛnti bala yɔɔd i ɛkkɛn. 6 Ne Yaccu gɔŋni ɛkkɛnti agi, “Gena ‘ya neeniyɛ,” ɛkkɛn dwoṭi te ŋotkɛn ɔci ḍɛɛmdin te doŋko. 7 Ɔci Yaccu tooccin moki agi, “Ɛkkɛ lieṭɛ menɛ?” Ɔci ɛkkɛn gɔkcin agi, “Ɔɔn lieṭɔn Yaccu men ma Najarɛt.” 8 Ɔci Yaccu gɔkcin agi, “Ɛkkɛ myennin ‘ya doki ka gena ‘ya neeni. Kan ɛkkɛ lieṭɛ ‘yayɛ, ‘uaya neeni daldɛ, dala ɛkkɛn ooddi.” 9 (Yaccu ne gɔŋni a ɔɔnyɛ, jwalla guaŋŋɛ ɛkɛ te ñamu dɛññin bora doki. Jwalla guaŋŋɛ ɛkɛ te ñamu agi, “Wey ɔɔn maka ‘ya ‘wonna i menga ne cyɛɛlɔ gɛɛl yien bɛɛ.”) 10 Ɔci Butruc balki byeŋgaaran, ɔci ɛkɛ byeŋgaaran dɔnnɛ bora, ɔci men gɛɛl jyɛmmɛ jyeña byerɔn palnɛ bora. Ɔci mena jyeñɛ palnɛ ɛkɛ bora neeniyɛ, ɛkɛ a mena kanŋan i gaciic tolan ma Icrayiil. Ɔci mena neeni yenti Malkac. 11 Ɔci Yaccu gɔkcin Butructi agi, “Byeŋgaaran olja kuorjɛji! ‘Ya motca kubaaya lien kubaaya ‘ya ‘wonnata Wey ɔɔn bɛɛ?” 12 Ɔci Yaccu mugɛ ackan iki ḍuaŋa ɛkkɛn ɔci bɔlin ma Icrayiil, ɔci ɛkɛ ḍɛɛgi ɛkkɛn byeŋkɛti. 13 Ɔci te ñamu ɛkɛ lwadi eyi ma Anacti. Anac neeni, kaci ɛkɛ a ɛŋ Kayapac. Te ywonna neeni Kayapac a gaciic tolan ma Icrayiil. 14 Kayapac neeni, ɛkɛ a mena ma Icrayiil myennɛ agi kan mena ne cyɛɛlɔ tuwa te nɔji ma baan a ɔɔn yɔmjin. 15 Ɔci Butruc bootcin Yaccu ŋoyɛti. Ɔci mena parɛ daŋkun mena laldɛ Yaccu gɛɛl bootcin Yaccu ŋoyɛti. Ɔci mena parɛ neeni ŋeejɛ gaciic tolan ma Icrayiil, ɔci ɛkkɛn kaaccin orɔ yaakkɛn i Yaccu kañ on gaciic tolan neeni. 16 Yeti Butruc bala yɔɔd te bora on tukɛti. Ɔci mena parɛ mena ŋeejɛ gaciic tolan neeniyɛ, ati gɔkcin ṭɔla kɛɛyi on tukɛ neeniti, ɔci Butruc koonɛ ɛkɛ orɔ. 17 Ɔci ṭɔla kɛɛyi on tukɛ neeni gɔkcin Butructi agi, “I a mena laldɛ ‘wana neeni daŋkun bɛɛ?” Ɔci Butruc gɔkcin agi, “A’a, gena ‘ya bɛɛ.” 18 Maka noŋi kanŋa ɛkkɛn i bɔlin maañ toñgɛ mulŋinti, ɔci ɛkkɛn bala yɔdi maccu ooyi jwami luy luyo. Ɔci Butruc bala yɔɔd i ɛkkɛn maccu ooyi. 19 Ɔci gaciic tolan tooccin Yaccuti te maka laldɛ ɛkɛ, ɔci tooccin ɛkɛti moki te jyeka loṭi ɛkɛ may. 20 Yaccu gɔkcin ɛkɛti agi, “‘Ya baal gɔk jiek ma ñomgɛnti a lyɛlta oŋkanda. ‘Ya baal lor ma oŋkanda oorga morki ma Juaŋti, ɔci on Juaŋ ona tolan, nona bɛɛti ma Icrayiil ḍworki wyetkɛn waakɛnday. ‘Ya jwali gɛɛl coŋiyɔ oŋgati bɛɛ. 21 I tooc ‘yati ogo? Toocca maka tyeŋi jyek ‘ya oŋkanday. Jyeka guagdi ‘ya ŋeecɔn ɛkkɛn.” 22 Ɔci ne ɛkɛ gɔŋni a ɔɔnyɛ, mena a bɔɔlɔn gɛɛl Yaccu monnɛ ñingɛ jitin te bieŋɛ, ɔci gɔkcin agi, “I gɔk a ɔɔn gaciic tolanti ogo?” 23 Ɔci Yaccu gɔkcin ɛkɛti agi, “Kan naŋka naŋi ‘ya yaayan bala, dala lwowwa i bora. Yeti kan naŋka yaayan baawyɛ, ɔci kan jyeka guaŋi ‘ya a jyeka awarɛy, oŋ i ‘ya jyɛbda budan ogo?” 24 Ɔci Anac Yaccu cuuññɛ Kayapacti byeŋkɛ a ḍɛɛggin ɔɔn. Kayapac neeni ɛkɛ a gaciic tolan ma Icrayiil. 25 Ɔci Butruc bala yɔɔd maccu ooyi men, ɔci ma gɔkcin ɛkɛti agi, “I a mena laldɛ ɛkɛ daŋkun bɛɛ?” Ɔci ɛkɛ kɛkcin gɔkcin agi, “Gena ‘ya bɛɛ.” 26 Mena kanŋan i gaciic tolan ma Icrayiil gɛɛl bala. Ɔci men kanŋa mena parɛ gɛɛl ɛkkɛn i mena jyeñɛ palnɛ ɔntɔ Butrucyɛ, ɛkkɛn a kɛɛna ne cyɛɛlɔ. Ɔci mena neeni gɔkcin Butructi agi, “I yuarŋin ‘ya jiniinaji iki Yaccu bɛɛ?” 27 Ɔci Butruc kɛkcin gɔkcin agi, “A’a, gena ‘ya bɛɛ.” Ɔci ɛkɛ ne kɛŋni gɔki a ɔɔnyɛ, ɔci ne pɛñan tuan wiakcin doki. 28 Ɔci Yaccu lwadi ma te on Kayapac eyi lwadi ma ona noŋki ma godan on ḍuaŋa ṭɔɔlɛ yenti Bilaatuc. Ɔci noon aŋi tini wyeñɛ doki. Ɔci ma Icrayiil kaaccin orɔ ona noŋki ma godan bɛɛ, kan ɛkkɛn kaatti orɔ ɛkkɛn yaakinti omdi oomdin te oŋ Iid Malɛɛka Lien Bɛɛn Goṭi A Gorŋ bɛɛ. Naŋka neeni gena naŋki ma Icrayiil neeni. 29 Ɔci Bilaatuc kooyin bora ɛkkɛnti, ɔci tooccin ɛkkɛnti agi, “Ɛkkɛ bɛɛnɛ tɛkɛ jiek mena neeni ɛkɛ noŋi a ɔki?” 30 Ɛkkɛn gɔkcin agi, “Kan ɛkɛ a nɔɔdɔn bɛɛyɛ, ɛkɛ oonɔn ɔɔn iti ogo?” 31 Bilaatuc gɔkcin ɛkkɛnti agi, “Ɛkɛ eedɛ ɛkkɛ. Dala ɛkkɛ noŋdɛ godan ba jyek worga ɛkkɛ pookɔ.” Ɔci ma Icrayiil gɔkcin agi, “A’a, ɔɔn myennɔn akuuma agi naa menga nogdi ma bɛɛ.” 32 Te jyeka neeni jyeka guaŋŋɛ Yaccu te lyen ɛkɛ dɛññin bora. 33 Ɔci Bilaatuc dɔɔkcin orɔ ona noŋki ma godan dɔki borcin Yaccuti, ɔci tooccin gɔkcin ɛkɛti agi, “I a Ciɛggɔn Ma Icrayiil Ciɛggɔn Tolanɛ?” 34 Ɔci Yaccu gɔkcin ɛkɛti agi, “I gɔk te yom i paru? Walla i myetki maka pookɛn?” 35 Bilaatuc gɔkcin agi, “‘Ya a men Ma Icrayiil bɛɛ. Ma ɛkkɛ i ‘woñki ‘ya bieŋuti, ɔci gaciicin ḍwaŋin ma Icrayiil ɛkkɛn ‘ya ‘woñka i bieŋuti daŋkun. I noŋŋi gena?” 36 Yaccu gɔkcin ɛkɛti agi, “‘Ya te aga ḍuaŋa tolan maka iñɔ ṭɛɛrjiyɛ, te ma ‘ya noowɔ i mako. Ɔci te ‘ya ‘wonna menga ma Icrayiil byeŋkɛnti bɛɛ. Yeti cyɛgji ‘ya a cyɛgja iñɔ wɛnni bɛɛ.” 37 Bilaatuc gɔkcin ɛkɛti agi, “I a Ciɛggɔn Tolanɛ?” Yaccu gɔkcin ɛkɛti agi, “I gɔk awarɛ, ‘ya a Ciɛggɔn Tolan. Acaan a ɔɔnyɛ, aŋka ‘ya jietkati ma neeni. Ɔci a ɔŋŋiyɛ, ‘ya bɛɛn ṭɛɛrji ɔci miet ma te jyeka awarɛ. Maka ani jyeka awarɛ ɛkkɛn pwan ‘ya ŋeecɔn waakɛnda.” 38 Bilaatuc tooccin ɛkɛti agi, “A gena a jyeka awarɛy?” Ne ɛkɛ gɔŋni a ɔɔnyɛ, ɛkɛ kaaccin bora ma Icrayiilti moki, ɔci ɛkkɛn myennɛ agi, “Gena yaayan gɛɛl yuarŋ ‘ya ɛkɛti bɛɛ. 39 Yeti naŋki ɛkkɛ bala yuonginda, ɔci ne Iid Malɛɛka Lien Bɛɛn Goṭi A Gorŋ baaliyɛ, mena bala ciginji gɛɛl pɔktɛ doki. Ɛkkɛ buagɛ ‘ya Ciɛggɔn Ma Icrayiil Ciɛggɔn Tolan pɔkka?” 40 Ɔci ɛkkɛn yaajjin ne pɛñan kɛkcin agi, “Mena neeni bɛɛ. Baraabac aŋka pɔkka!” Ɔci Baraabac neeni ɛkɛ a ɛɛno.
1 Ɔci Bilaatuc Yaccu dalnɛ ḍwayi ma. 2 Ɔci kuwi paari ackan naŋi a til ɔci ḍuacci Yaccu wyeñɛti. Ɔci bworŋ cyɛgji bworŋa wiɛlɛ pɛñan a buol ‘yɛɛŋji ɛkkɛn Yaccuti. 3 Ɔci ma ɔga ɛkɛti ɔci gɔkti agi, “Dala i ciy yuonginda, Ciɛggɔn Ma Icrayiil Ciɛggɔn Tolan!” Ɛkkɛn ooddi ɛkɛti gɔ ɛkɛ jyɛpin moki ɔɔn. 4 Ɔci Bilaatuc kaaccin bora ma Icrayiilti moki, ɔci gɔkcin ɛkkɛnti agi, “Gɔṭṭɛ, ‘ya ɛkɛ owwa bora ɛkkɛti aŋka ŋeeddɛ ɛkkɛ gena yaayan gɛɛl yuarŋ ‘ya ɛkɛti bɛɛ.” 5 Ɔci Yaccu kooyin bora ɔci bala ɛŋi tila kuwi neeni wyeñɛti, ɔci bworŋa buolo. Ɔci Bilaatuc gɔkcin mati agi, “Gɔrtɛ ‘wana wanna.” 6 Ɔci ne Yaccu yuarkiti gaciicin ḍwaŋin ma Icrayiilyɛ, ɔci ne yuarkiti bɔlin mokiyɛ, ɛkkɛn yaadan ne tolan ɔci gɔkcin agi, “Dala ɛkɛ ŋaabdɛ, dala ɛkɛ ŋaabdɛ!” Ɔci Bilaatuc gɔkcin ɛkkɛnti agi, “Ɛkɛ eedɛ ɛkkɛ ŋaabdɛ pookɔ. Gena yaayan gɛɛl yuarŋ ‘ya ɛkɛti bɛɛ.” 7 Ma Icrayiil gɔkcin agi, “Jyek ganuun ɔɔn bala, ɔci dala ɛkɛ tuwa ba naŋki jyek ɔɔn neeni acaan ɛkɛ gɔki agi ɛkɛ agji Kaci Jwaŋa Tolan.” 8 Ɔci Bilaatuc ɛkɛ ne tieŋni jyeka neeniyɛ, ɛkɛ buayi ne pɛñan. 9 Ɛkɛ kaaccin orɔ on godan moki, ɔci gɔkcin Yaccuti agi, “I bɛɛni te aŋɛ?” Ɔci Yaccu yeti gɔkcin genga ɛkɛti bɛɛ. 10 Ɔci Bilaatuc tooccin ɛkɛti agi, “I gɔkka ‘yati bɛɛ? Kwoy i, kan ‘ya buaga i pɔktinyɛ, ‘ya yaakati, ɔci kan ‘ya buaga i ŋaaptin ñaalɔyɛ, ‘ya yaakati i ŋaabdin?” 11 Yaccu gɔkcin ɛkɛti agi, “Te Jwaŋa Tolan ñaalɔ kɛŋniyɛ, i te yaakiti noŋ genga ‘yati bɛɛ. Acaan ba naŋka neeni mena ‘ya ‘wonna i bieŋuti neeni, nɔji ɛkɛ tol tol te nɔji i. Nɔji i buannɛ nɔji ɛkɛ.” 12 Ɔci te naŋka neeni Bilaatuc noŋi Yaccu pɔktɛ. Yeti ma Icrayiil yaajjin gɔkcin agi, “Kan i mena neeni pɔktiyɛ, i a mug Kɛɛcarn ḍuaŋa tolan ma Ḍɔɔm moki bɛɛ. Kan menga noŋi aga ba ḍuaŋa tolan te yom ɛkɛ parɛyɛ, ɛkɛ noŋi ba ne ɛkɛ yookiti te jyek Kɛɛcar ḍuaŋa tolany.” 13 Ɔci ne Bilaatuc tieŋni jyeka neeniyɛ, ɔci ɛkɛ Yaccu koonɛ bora ɔci ɛkɛ cooccin te kaakci godan nona yenti Acmɛɛnti, (te tuk ma Icrayiil ma boṭi agi, “Gabbata”). 14 Oŋŋa neeni a Oŋŋa Yɔŋki Ma Wak Iid. Iid neeni bartan ma a Iid Malɛɛka Lien Bɛɛn Goṭi A Gorŋo. Ɔci oŋ waŋɛ noŋi yɔɔtti yeccu. Bilaatuc gɔkcin ma Icrayiilti agi, “Gɔrtɛ ‘wana a ḍuaŋa ɛkkɛ ḍuaŋa tolan wan.” 15 Ɔci ɛkkɛn yaajjin ne tolan gɔkcin agi, “Eedɛ ɔntɔ! Eedɛ ɔntɔ! Çaaptɛ ñaalɔ, Nogdɛ!” Ɔci Bilaatuc tooccin gɔkcin ɛkkɛnti agi, “‘Ya ḍuaŋa ɛkkɛ ḍuaŋa tolan ŋaabdɔ?” Ɔci gaciicin ḍwaŋin ma Icrayiil gɔkcin agi, “Ḍuaŋa ɔɔn ḍuaŋa tolan a cyɛɛlɔ budan. Gena Kɛɛcar ḍuaŋa tolan ma Ḍɔɔm.” 16 Ɔci ma ‘wonnɛ Bilaatuc Yaccu byeŋkɛnti aŋka eetan ŋaaptan ñaalɔ. 17 Ɔci ɛkkɛn Yaccu eyi, ɔci Yaccu bala kɛṭi kakan ŋoopki ma ɛkɛ parɛ, ɔci ɛkkɛn ati bora nona poma yenti “Oon Men Baan Wyeñɛti.” (Te tuk ma Icrayiil poma neeni yenti “Gɔlgata”.) 18 Ɔci Yaccu ŋaapci ma ñaalɔ aŋan poomti, ɛkɛ iki maka ɛyi ne yyɛɛwɔ, mena ne cyɛɛlɔ te byeŋa aamo, ɔci mena ne cyɛɛlɔ te byeŋa byerɔn, Yaccu yuukci yeccu. 19 Ɔci Bilaatuc kiejin jiek ḍuannɛ ɛkɛ ñaalɔ kakanti. Ɔci jyeka neeni gɔki agi, “YACCU MEN NAJARƐT, ƐKƐ A CIƐGGƆN TOLAN CIƐGGƆN MA YAHUUD.” 20 Maka coŋin ma Icrayiil pokcin jwalla neeni acaan nona ŋoopki ma Yaccu ñaalɔ bala baan ŋoyɛti cwakanti aŋan. Ɔci jiek bala te tugga ne ḍoogɔ, gena tuk ma Icrayiil, ɔci tuk ma Ḍɔɔm, ɔci tuk ma Giriik. 21 Gaciicin ḍwaŋin ma Icrayiil gɔkcin Bilaatucti agi, “Naa i te kienni agi ‘Ciɛggɔn Tolan Ciɛggɔn Ma Icrayiil’ bɛɛ. Dala i kiejja jiek agi, ‘Yaccu gɔki agi ɛkɛ agji Ciɛggɔn Tolan Ciɛggɔn Ma Icrayiil’.” 22 Yeti Bilaatuc kɛkcin gɔkcin agi, “Gena kiin ‘yayɛ, kiin ‘ya doki, bawwin.” 23 Ɔci ne ackan ne ŋaanɔ neeni Yaccu ŋaapkitiyɛ, ɛkkɛn bworŋin Yaccu cieñi jitin, ɔci ɛkkɛn waakɛnda mena ne cyɛɛlɔ da eci, mena ne cyɛɛlɔ da eci. Yeti bworŋa beyan pɔya ṭuorkiti ma bala bɛɛ. Ɛkɛ eyi ma a een te ñaalɔ eyi ma ne iñɔ. 24 Ɔci ackan gɔgjin pookɛn agi, “Naa bworŋa neeni jietin jitin bɛɛ. Dala ikin oomtin kɔla. Kan mena ikin amtinyɛ, bworŋ eedɛ ɛkɛ doki te naŋka neeni.” Te naŋka neeni jyeka kiigin dɛññin bora. Worga gɔki agi, “Bworŋin ‘ya cieñi ma jitin ɔci eyi ɛkkɛn, ɔci ɛkkɛn oomjin kɔla te bworŋ ‘ya bworŋa beyan.” 25 Ɔci ba naŋka neeni naŋi ackan Yaccuti doki. Ɔci ma bala yɔdi kakan taaŋɛti ne cwakanti, gena mɛy Yaccun, ɔci kow mɛy Yaccun Moryam ɛŋ Klɔpac, ɔci Moryam Magdalin. 26 Ɔci Yaccu ne gɔrni mɛy ɛkkɛn iki mena laldɛ ɛkɛ mena ani Yaccuyɛ, Yaccu gɔkcin mɛɛgɛnti agi, “Mɛy ɔɔn, gɔrca kaci i mena i gwaldiy.” 27 Ɔci Yaccu gɔkcin mena laldɛ ɛkɛti agi, “Gɔrca mɛy ɛkkɛ.” Ɔci te oŋŋa wannayɛ, mena laldɛ Yaccu mɛy Yaccun eññɛ ɛkɛ ban ɛkkɛn. 28 Ɔci ne jyeka neeni baakiyɛ, ŋeejɛ Yaccu naŋki waakɛnda bawwin doki, ɔci ɛkɛ gɔkcin agi, “‘Ya ama yiɛno.” A ɔŋŋiyɛ, jyeka kiigin dɛññin bora doki. 29 “Ɔci kuura pyega cyɛyan bala yɔɔd aŋan. Ɔci liipa umji ma jaan tukɛti ɔci lakci ma ñaalɔ olji ma Yaccu tukɛti.” 30 Ɔci ne Yaccu ‘woñkiti ma pyega cyɛyan neeni, ɔci ne ɛkɛ dɛnniyɛ, ɔci ɛkɛ gɔkcin agi, “Bawwin doki.” Ɔci ɛkɛ tuuni. 31 Oŋŋa wanna a Oŋŋa Yɔŋki Ma Wak Iid. Ɔci ma Icrayiil buagɔn magga ŋaabi ñaalɔ te Oŋ Cabit bɛɛ, acaan Oŋ Cabit a oŋŋa pwadan ne tolan ma ɛkkɛntiy, ɔci ma Icrayiil ati Bilaatucti tooccin ɛkɛti gɔkcin agi, “Dala ma tɛrkɛn lɛɛktan ma ɔntɔ aŋka ɛkkɛn tuwa lakun ne pɛñan, ɔci ma waakɛn gwottan ma iñɔ.” 32 Ɔci ackan ati mena ŋaapci ma Yaccu taaŋɛti tɛrkɛ lɛɛkci ma ɔntɔ, ɔci ɛkkɛn ati mena Yaccu taaŋŋa parɛti ɔci tɛrkɛ lɛɛkci ɔntɔ daŋkun. 33 Yeti ne ɛkkɛn bɛɛki Yaccutiyɛ, ɛkkɛn gɔrcin Yaccuti, ɔci Yaccu mɔkci tuun doki, ɔci tɛrk ɛkɛ lɛɛkci ɔntɔ bɛɛ. 34 Yeti ackan gɛɛl ne cyɛɛlɔ Yaccu dɔŋŋɛ gwonnɛti te ṭwaŋo. Ɔci ne pɛñan yimg mɔṭṭin ɔci piego. 35 Ɔci ‘ya mena naŋka neeni yuarŋɛ neeniyɛ, ‘ya ma myetkan te naŋka neeni, ɔci jyeka myetkan ‘ya ma neeni a jyeka awarɛ. Ɔci ŋeej ‘ya jyeka myetkan ‘ya ma neeni a jyeka awarɛ. ‘Ya jiek mieddan bora aŋka ɛkkɛ jyeddɛ daŋkun. 36 Te naŋka neeni jyeka kiigin dɛññin bora. Worga gɔki agi, “Oon ɛkɛ gɛɛl lɛgdɛ menga jitin bɛɛ.” 37 Jwalla kiigɔn jwalla parɛ moki gɔki agi, “Ma gɔrti mena dɔɔgi ɛkkɛny.” 38 Ɔci Yuocip, ɛkɛ a men ban Ɛrimatiiya, (ɛkɛ a mena bootcin Yaccuti lieda ɔɔn, acaan ɛkɛ buayi ma Icrayiil te jieko). Ɔci Yuocip neeni ati Bilaatucti, ɔci tooccin ɛkɛti te war Yaccu acaan ɛkɛ buagɔn Yaccu jogdɛ ne pɛñan wona men Oŋ Cabit bɛɛni bɛɛy. Ɛkɛ gɔki agi, “‘Ya buaga war Yaccu eedo.” Ɔci Bilaatuc gɔkcin Yuocipti agi, “Ɔgdi ootta, eya.” Ɔci Yuocip ati, ɔci war Yaccu eññɛ. 39 Ɔci Nikɔdiimac, mena bɛɛn Yaccuti te ñamu te weenji, ɛkɛ ati eccin eelan a ḍuobji ne yyɛɛwɔ ñaaŋŋɛyɔ yaakkɛn ɔci lammiyɔ. Eelan ne cyɛɛlɔ a eelan cyɛyan, ɔci ɛka parɛ yenti aalɔ. Eelan a ḍuobji oonɛ ɛkɛ neeni gena kierki ma waak tuggɛ a miyya ne cyɛɛlɔ (100). 40 Ɔci war Yaccu eyi ma, ɔci cuogi eelan a ḍuobji, ɔci paari ma te bworŋ bala ba naŋka jokki ma Icrayiil maka tuway. 41 Ɔci nona ŋoopki ma Yaccu jiniina bala cualcinti. Ɔci kola wari ma woonɛ bala jiniinaji. Menga jokci ma oŋgati kola neeniti bɛɛ. 42 Oŋŋa neeni a Oŋŋa Yɔŋki Ma Icrayiil Wak Iid. Ɔci kool bala cualcin, ɔci Yaccu olji ma koolji.
1 Ɔci te liidi parɛ te tinnɔ ne Oŋ Cabit noŋi bɛɛdi bora, ɔci ne Oŋ Juaŋ cɔɔlniyɛ, Moryam Magdalin bɛɛn koolji. Ɛkɛ gɔrcin koolo, ɔci kool tukɛ a pɔggɔn doki. Guonan ñiinnɛ menga ɔntɔ doki. 2 Ɔci Moryam yiŋi Butructi ɔci mena laldɛ Yaccu mena parɛ mena ani Yaccu ne tolanti daŋkun. Ɔci Moryam gɔkcin ɛkkɛnti agi, “Ciɛggɔn owwi ma bora te koolji, ɔci nona ɛkɛ eekiti niinkiti ŋeejɔn ɔɔn bɛɛ!” 3 Ɔci Butruc kooyin bora te baanji yaakkɛn i mena parɛ, mena laldɛ Yaccuy. 4 Ɛkkɛn bala yooŋdi koolji yaakkɛn, ɔci mena parɛ neeni, ɛkɛ yiŋi ne pɛñan te Butruc, ɔci ɛkɛ dɛñjin koolji ñamu. 5 Ɔci ɛkɛ ḍwoñjin liercin jiju ɔci gɔrcin bworŋin bala niin pookɛn. Yeti ɛkɛ kaaccin jiju bɛɛ. 6 Ɔci Butruc dɛñjin ne ŋoyɔ daŋkun, ɔci ɛkɛ kaaccin jiju koolji, ɔci gɔrcin bworŋin bala niin iñɔ. 7 Bworŋa bala Yaccu wyeñɛti, ɔci bworŋa poorki ma Yaccu warɛ, ɛkkɛn bala niin nona ne cyɛɛlɔ bɛɛ. Bworŋa ɛkɛ wyeñɛti bala niin te nona parɛ, ɔci ɛkɛ bala niin a mɔggɔn. 8 Ɔci mena dɛñjin ñamu neeni, ɛkɛ kaaccin koolji daŋkun. Ɛkɛ gɔrcin ɔci jyetti. 9 Te ñamu jyeka kiigin kwoyɔn ɛkkɛn ne worga gɔki agi Yaccu jɔldi ñaalɔ mokiy. 10 Ɔci maka laldɛ Yaccu neeniyɛ, dɔɔkkin baanji. 11 Ɔci Moryam Magdalin bala yɔɔd wiak kool tukɛti. Ɔci ne ɛkɛ baali wiagi menyɛ, ɛkɛ ḍwoñjin iñɔ liercin koolji. 12 Ɔci ɛkɛ malɛɛkan ne yyɛɛwɔ yuarŋɛ ɛkɛ koolji. Ɛka ne cyɛɛlɔ bala ciyi nona Yaccu wyeñɛti, ɔci ɛka parɛ bala ciyi nona Yaccu ciegɛti, yeti Yaccu bala bɛɛ. 13 Ɛkkɛn gɔkcin ɛkɛti agi, “Ɛɛŋo, i wiak ogo?” Ɔci Moryam gɔkcin agi, “Ciɛggɔn ‘ya baaw eyi ma ɔntɔ, ɔci nona eekiti niinkiti ma ŋeej ‘ya bɛɛ.” 14 Ɔci ne ɛkɛ gɔŋni a ɔŋŋiyɛ, ɔci ɛkɛ warɛ yallɛ ɔci gɔrcin ŋoyɛti ɔci Yaccu yuarnɛ, yeti ɛkɛ Yaccu ñiññɛ bɛɛ. 15 Ɔci Yaccu gɔkcin ɛkɛti agi, “Ɛɛŋo, i wiak ogo? I lier menɛ?” Moryam bala poŋi gɔki agi gena mena kɛɛyi jiniina neeni, ɔci gɔkcin ɛkɛti agi, “Kan i war Yaccu eññi ɔntɔyɛ, dala i ‘ya myetta nona i ɛkɛ ḍuanni, aŋka ‘ya ootta ɛkɛ eedo.” 16 Ɔci Yaccu gɔkcin ɛkɛti agi, “Moryam.” Ɔci Moryam warɛ yallɛ ɔci gɔkcin ɛkɛti te tuk ma Icrayiil agi, “Rabbi.” (Rabbi te tuk Mabaan agi “Mena loṭi may.”) 17 Yaccu gɔkcin ɛkɛti agi, “Naa topca ‘yati bɛɛ, acaan ‘ya ati ñaalɔ Wey ɔɔnti men bɛɛ. Yeti ɔgdi ootta modg ɔɔn myetka ‘ya ootta ñaalɔ Wey ɔɔnti ɔci Wey ɛkkɛnti, ‘ya ootta Jwaŋ ‘yati ɔci Jwaŋ ɛkkɛnti.” 18 Moryam Magdalin ati maka laldɛ Yaccu myennɛ agi, “‘Ya Yaccu yuarŋo!” Ɔci ɛkkɛn myennɛ daŋkun te jyeka guaŋŋɛ Yaccu ɛkɛti. 19 Ɔci te Oŋ Jwaŋa neeni ne oŋ unniyɛ, maka laldɛ Yaccu wyetkɛn ḍɔɔlɛ orɔ waakɛnda. Ɔci ‘yegin tuggɛn uuli acaan ɛkkɛn buayi ma Icrayiil. Ɔci Yaccu kaaccin ɛkkɛnti orɔ, ɔci yɔɔtcin yeccu ɛkkɛn ñomgɛnti, ɔci gɔkcin agi, “Dala coodi pwani bala ɛkkɛti.” 20 Ɔci ne ɛkɛ gɔŋni a ɔɔnyɛ, ɛkɛ ma lɛɛrnɛ kolk mucmaarin byeŋkɛti ɔci ṭwaŋ tukɛ ɛkɛ gwonnɛti. Maka laldɛ ɛkɛ neeniyɛ, ne ɛkkɛn gɔrki Ciɛggɔn ɛkkɛnyɛ, ɛkkɛn yomgɛn ñɔɔna ñɔɔno. 21 Ɔci Yaccu gɔkcin ɛkkɛnti moki agi, “Dala ɛkkɛ coodɛ te pwanno. ‘Ya ɛkkɛ cundin bala ba ne ‘ya cuonnata Wey ɔɔny.” 22 Ɔci ne ɛkɛ gɔŋni a ɔŋŋiyɛ, ɔci ɛkɛ ma kuonnɛ booŋo, ɔci gɔkcin ɛkkɛnti agi, “Antɛ Boŋ Juaŋo. 23 Kan ɛkkɛ ma bɔɔktɛ te nɔji ɛkkɛnyɛ, ɛkkɛn bɔɔktɛ Juaŋ a warɛ. Ɔci kan ɛkkɛ ma bɔɔktɛ te nɔji ɛkkɛn bɛɛyɛ, ɛkkɛn da bɔɔktɛ Juaŋ bɛɛ.” 24 Tɔmac (mena bartan ma a Yuongɔn) ɛkɛ a Mena akki Ma Inyaakkɛn Wyetkɛn Ne Yyɛɛwɔy. Ɔci ne Yaccu bɛɛni matiyɛ, ɛkɛ baawo. 25 Ɔci maka laldɛ Yaccu maka pookɛn neeni Tɔmac myetki gɔkcin agi, “Ɔɔn Ciɛggɔn yuarŋɔn!” Yeti Tɔmac gɔkcin ɛkkɛnti agi, “Kan ‘ya gɔrca kolk mucmaarin Yaccu byeŋkɛti bɛɛyɛ, ɔci kan ‘ya topca kola Yaccu dɔɔkkiti ma gwonnɛti bɛɛyɛ, ‘ya jyedda bɛɛ.” 26 Ɔci te Oŋ Jwaŋa parɛ moki maka laldɛ Yaccu bala orɔ moki, ɔci Tɔmac bala i ɛkkɛn. Ɔci ‘yegin tuggɛn a uulgin, yeti Yaccu kooyin orɔ yɔɔtcin yeccu ɛkkɛn ñomgɛnti, ɔci gɔkcin ɛkkɛnti agi, “Dala ɛkkɛ coodɛ te pwanno.” 27 Ɔci ɛkɛ gɔkcin Tɔmacti agi, “Bieŋu olja wɛnni, ɔci gɔrca byeŋki ‘ya, ɔci bieŋu olja topca ‘ya gwonnuti. Naa i tiek jiek bɛɛ. Dala i jyedda ‘yati!” 28 Ɔci Tɔmac gɔkcin ɛkɛti agi, “Ciɛggɔn ‘ya! Jwaŋ ‘ya!” 29 Yaccu tooccin ɛkɛti agi, “‘Ya yuarŋa i aŋka i jyetti ‘yati nɛ? Maka jyeddi ‘yati ne ɛkkɛn ‘ya yuarka bɛɛyɛ, ɛkkɛn yomgɛn ñɔɔna ñɔɔn ne ɛkkɛn ‘ya kuolka ñin ɔɔn!” 30 Naŋka tɛyan naŋka naŋŋɛ Yaccu maka laldɛ ɛkɛ ñomgɛnti naŋŋɛ coŋɔ. Naŋka neeni a naŋka ñyecki ma ɛkɛ. Ɔci naŋki ɛkɛ naŋka tɛyan naŋka coŋin naŋka pookɛn gɛɛg bala daŋkun, ɛkkɛn kiiwɛ ma worga neeniti bɛɛ. 31 Yeti jyeka bala kiiwɛ ma worga neenitiyɛ, bala aŋka ɛkkɛ jyeddɛ Yaccu neeni ɛkɛ a Kiṭɔ a Kaci Jwaŋa Tolan. Ɔci kan ɛkkɛ jyeddɛ te yenti ɛkɛ a ɔɔnyɛ, ɔci tɛɛtin bala ɛkkɛti.
1 Ɔci ne naŋka neeni baakiyɛ, Yaccu warɛ lɛɛlnɛ bora moki maka laldɛ ɛkɛti Galŋ Jaliil ḍwaŋɛti. (Ɔci galŋ yenta parɛ moki yenti “Taybiiryac”.) 2 Maka laldɛ Yaccu bala nona ne cyɛɛlɔ. Gena Butruc, ɔci Tɔmac mena bartan ma a Yuongɔn, ɔci Nataanyal mena bɛɛn te ban Kɛna ban Jaliilji, ɔci kɛɛgin Jɛbadi, ɔci maka ‘uay bala ne yyɛɛwɔ moki. 3 Ɔci Butruc gɔkcin ɛkkɛnti agi, “‘Ya ootta wyec yako.” Ɔci ɛkkɛn gɔkcin Butructi agi, “Ikin oottin iki ɔɔn.” Ɔci ɛkkɛn ati ɔci kaaccin murkaji, yeti te ween jiñɛ neeni ɛkkɛn mwoki yeñi gɛɛl ne cyɛɛlɔ bɛɛ. 4 Ɔci ne noon bɔɔniyɛ, Yaccu bala yɔɔd galŋ ḍwaŋɛti, yeti kwoyɔn maka laldɛ ɛkɛ. Ɛkkɛn poŋi agi gena Yaccu yɔɔd wanna bɛɛ. 5 Yaccu gɔkcin ɛkkɛnti agi, “Kɛɛgin ‘ya, yak bala?” Ɛkkɛn gɔkcin agi, “A’a, baawo.” 6 Yaccu gɔkcin ɛkkɛnti moki agi, “Mali yiɛptɛ murka taaŋŋa byerɔn, ɔci ɛkkɛ yɔɔrdɛ acca.” Ɔci ɛkkɛn mali yiɛpcɛ, ɔci ɛkkɛn yaakinti mali ootan bora te pietin moki bɛɛ, acaan yak bala jiju coŋɔ. 7 Mena ani Yaccu gɔkcin Butructi agi, “Gena Ciɛggɔn!” Bworŋin Butruc bala niin ɔntɔ te kanŋa, ɔci ne ɛkɛ tieŋni agi gena Ciɛggɔnyɛ, ɛkɛ bworŋin ‘yɛɛŋnɛ, ɔci kaaccin iñɔ galŋji ati Yaccuti. 8 Ɔci maka laldɛ Yaccu maka pookɛn bɛɛn te murka, bɛɛn wɔɔci mali acaan mali kuumi te yako. Šɛɛr jiñɛ looncin ɛkkɛnti bɛɛ, bala ba mitarn jitkɛn a miyya ne cyɛɛlɔ (100). 9 Ne ɛkkɛn kaacki bora ṭɛɛrjiyɛ, mañ mulŋin yuarɛ ɛkkɛn, ɔci yak bala maccu ɔci byedg bala daŋkun. 10 Yaccu gɔkcin ɛkkɛnti agi, “Yaka muoŋŋɛ ɛkkɛ acca gɛɛg oodɛ.” 11 Ɔci Butruc kaaccin murkaji ɔci mali wuannɛ ɛkɛ bora ṭɛɛrji kuumi te yaka ḍwaŋin a miyya ɔci ma baan ne yyɛɛwɔ mena parɛ byeŋkɛ ɔci ne ḍoogɔ (153). Yeti yaka coŋin neeni mali ɛɛri jitin bɛɛ. 12 Yaccu gɔkcin ɛkkɛnti agi, “Bɛɛdɛ, omdɛ.” Ɔci ma tooccin ɛkɛti agi ɛkɛ a menɛ bɛɛ, acaan ŋeecɔn ɛkkɛn gena ɛkɛ Ciɛggɔn. 13 Ɔci Yaccu bɛɛn ɔci byedg wɛɛnnɛ ma jitkɛn, ɔci ‘wonnɛ ma, ɔci yaka ‘yɛggin daŋkun naŋŋɛ a ɔɔn. 14 Ɔci te oŋŋa Yaccu jɔŋni ñaalɔ te lienti tɛɛti moki, ɔci ne oŋŋa ɛkɛ baali galŋ ḍwaŋɛti ɔɔnyɛ, Yaccu warɛ lɛɛlnɛ bora, oŋki aŋi ne ḍoogɔ doki. 15 Ɔci ne ɛkkɛn omki ne ḍookkiyɛ, Yaccu gɔkcin Butructi agi, “Butruc kaci Yɔhanna, i an ‘ya ne tolan te waka neeni boki?” Ɔci Butruc gɔkcin ɛkɛti agi, “Ɛɛ, Ciɛggɔn, ŋeej i ‘ya an i.” Yaccu gɔkcin ɛkɛti agi, “Kulin ṭɔlgɛn ‘ya oomga tuggɛnti.” 16 Yaccu gɔkcin moki agi, “Butruc kaci Yɔhanna, i an ‘ya?” Butruc gɔkcin ɛkɛti agi, “Ɛɛ, Ciɛggɔn, ŋeej i ‘ya an i.” Yaccu gɔkcin ɛkɛti agi, “Waŋu tiicca kulin ‘yati.” 17 Yaccu gɔkcin ɛkɛti te oŋŋa akki ne ḍoogɔ agi, “Butruc, kaci Yɔhanna, i an ‘ya?” Ɔci Butruc yomɛ yaañi acaan Yaccu tooccin ɛkɛti oŋki ne ḍoogɔ agi, “I an ‘ya?” Ɔci Butruc gɔkcin agi, “Ciɛggɔn, waak waakɛnda ŋeej i, ɔci ŋeej i ‘ya an i.” Yaccu gɔkcin ɛkɛti agi, “Kulin ‘ya oomga tuggɛnti. 18 Tieŋŋa, ‘ya gɔkka iti awarɛ, wonta i men ḍiɛri i ɛɛŋja bworŋin ɔci at te yom i, yeti ne i agdi daanyɛ, i byeŋku miɛtca bora, ɔci mena parɛ i ḍɛgdi, ɔci i eeti ma nona i buagiti bɛɛ.” 19 (Ne Yaccu gɔŋni a ɔɔnyɛ, ɛkɛ Butruc myennɛ lyen ɛkɛ a myetkin. Ɔci te lyen ɛkɛ ma gɔrti pwani Jwaŋa Tolan.) Ne ɛkɛ gɔŋni a ɔɔnyɛ, ɛkɛ gɔkcin Butructi agi, “Bootta ‘yati.” 20 Ɔci Butruc warɛ yallɛ, ɔci mena ani Yaccu yuarnɛ ɛkɛ bala bootti ɛkkɛn ŋotkɛnti. Mena neeni a mena ciyi Yaccu taaŋɛti iidtiy. Ɔci gena ɛkɛ tooci gɔki agi, “Ciɛggɔn, mena i ‘wondi ma byeŋkɛnti a menɛ?” 21 Ɔci Butruc ne mena neeni yuarnɛyɛ, ɛkɛ tooccin Yaccuti agi, “Ciɛggɔn, oŋ mena nɛ?” 22 Yaccu gɔkcin ɛkɛti agi, “Kan ‘ya buaga ɛkɛ ciya wɛnni ne ‘ya bɛɛda ɔɔnyɛ, gena jyek i bɛɛ. Dala i bɛɛd bootta ‘yati.” 23 Ɔci jiek ati modgɛnti waakɛnda, ɛkkɛn poŋi gɔki agi mena laldɛ Yaccu neeni tuudɔ bɛɛ. Yeti Yaccu gɔkcin a ɔɔn bɛɛ. Yaccu gɔkcin agi, “Kan ‘ya buaga ɛkɛ ciya wɛnni ne ‘ya bɛɛda ɔɔnyɛ, gena jyek i bɛɛ.” 24 ’Ya mena laldɛ Yaccuyɛ, gena ‘ya a mena mieti jyeka neeniy. Ɔci jyeka neeni kiin ‘ya. Ɔci ŋeecɔn ikin jyeka neeni a jyeka awarɛ. 25 Naŋka naŋŋɛ Yaccu naŋka coŋin, naŋka pookɛn bala daŋkun. Ɔci kan jyek naŋki Yaccu kiitan ma worganji waakɛndayɛ, baan warda yaakinti worgan eedɛ bɛɛ, noon kuma warda.