1 Du ujuni anwooŋ Uţup ado bi wo'a wo, awo du Naşibaţi abot awo Naşibaţi. 2 Anwooŋ Uţup awo na Naşibaţi du ujuni. 3 Naşibaţi aţëpna ţi a aţak iko bŧi; ţi iko bŧi inţakaniiŋ nin kaloŋ kaanţakana bë kaanţëpna ţi a. 4 Ţi ul di di ubida upënnuŋ, kë ubida mënţ uwo bjeehi pa bañaaŋ. 5 Bjeehi bajeehan du bdëm, kë bdëm baanwun ba. 6 Ubi ka ñiinţ aloŋ i Naşibaţi ayiluŋ; katimul kawo Yowan. 7 Abi kaţup uko wi ameeŋ bŧi ţi bjeehi, bañaaŋ bŧi baţëpna ţi a bafiyaar. 8 Mënţ Yowan ţi uleeful awooŋ bjeehi; abi bi ţañ kaţup uko wi ameeŋ ţi bjeehi. 9 Bjeehi mënţ bawooŋ na manjoonan bjeehi bambiiŋ ţi mboş kajeehan bañaaŋ bŧi. 10 Anwooŋ Uţup adobi wo'a wo ţi mboş, kë Naşibaţi abot aţëpna ţi a aţak ma, kë bañaaŋ biki mboş başë wo'a wo baamme'a. 11 Abi ţi katoh ki nul, kë bañaaŋ biki nul başë wo baandi'a. 12 Kë bañaaŋ bŧi banşaaŋ adi'a, afiyaara, aţen baka kë bahinan pwo babuk Naşibaţi. 13 Mënţ ţi pñaak këme ţi ñiinţ na ñaaţ këme ţi uko wi ñiinţ aŋaluŋ wi wi bawoonuŋ babuk Naşibaţi. Naşibaţi ul ţi uleeful adoluŋ kë bawo babukul. 14 Anwooŋ Uţup akak ñaaŋ najën abi afëţ na nja, kë ŋşë win mndëm mi nul, aŧum na bnuura abot aŧum manjoonan. Aşin awululuŋ mndëm mënţ ul anwohaŋ aloolan i abukuŋ ţañ. 15 Yowan aţiiniyaan uko wi nul aji: «Ul i i nji njakuŋ aji: “Ankmbiiŋ ţi kafeţ naan, ajotën kadun ţiki, ji mbi ndo kawo, ado bi wo'a wo.”» 16 Na manjoonan nja bŧi ŋji ŋyeenka yeenk ţi bnuura bŧum banwooŋ ţi a. 17 Ŋyeenkna bgah ţi Moyiŧ, kë bnuura na manjoonan manşë biina ţi Yeŧu Kriŧtu. 18 Nin ñaaŋ aambaaŋ kawina Naşibaţi. Abukul i akaaŋ anwooŋ Naşibaţi, ankabuŋ ţi Aşin, ameeţanuluŋ.
Uko wi Yowan nabatŧaar aţupuŋ ţi bkowul
19 Uko wi Yowan ajakuŋ wii wi, wi baweek biki bayuday banwooŋ Yeruŧalem bayiluŋ baţeŋan Naşibaţi na bañaaŋ baloŋ banjaaŋ balemp du Katoh Kaweek ki Naşibaţi kë baya hepara ñaaŋ i awo i. 20 Aampok pŧeem baka, abi ţup ţup baka ajinţan aji: «Mënţ nji dwooŋ Kriŧtu.» 21 Kë baŧeema aji: «Iwo in keeri? Iwo Eli i?» Kë aji na baka: «Mënwo Eli.» Kë bakak ajaka: «Iwooŋ Naţupar Naşibaţi i?» Kë aji: «A-a.» 22 Kë başë ji na a: «Ţupun keeri ñaaŋ i iwooŋ ŋhilna ŋya ŋţup banyiluŋ un. We wi wi ikţupuŋ ţi iwi?» 23 Kë aŧeem na ŋţup ŋi Iŧayi Naţupar Naşibaţi aji: «Nji, dwooŋ: pdiim pankhuuranuŋ du pndiiş aji: “Nadolan bgah bi Ajugun bawo bŧool.”» 24 Bayili bukuŋ bawo bafariŧay. 25 Bakak ahepar Yowan kak aji: «Kë we ukaaŋ kë ikbatŧaar wi iwooŋ iinwo Kriŧtu, iinwo Eli, iinkak awo Naţupar Naşibaţi?» 26 Kë aŧeem baka aji: «Nji dbatŧaar na meel, kë aloŋ aşë wo ţi pŧoofan i nawooŋ naammee, 27 ankmbiiŋ ţi kafeţ naan, i nji ndooŋ awo mëññoom kaŋup pfënşa işapaat.» 28 Uko mënţ uţëpna du Betani du plut pi bdëk bi Yordan, dul di Yowan akbatŧaaraanuŋ.
Uko wi Yowan Nabatŧaar aţupuŋ ţi Yeŧu
29 Wi unuur ujinţuŋ, Yowan awin Yeŧu kë akbi, kë aşë ji: «Anwooŋ unkaneel wi bţeŋan wi Naşibaţi unkmpënanuŋ pekadu di umundu awi. 30 Uko wi nul wi wi nji kaţiiniyaanuŋ wi njakuŋ: “Ñiinţ ankmbiiŋ ţi kafeţ naan ajotën kadun, ţiki, ji mbi ndo kawo, adobi woha wo.” 31 Nji ţi uleef naan, mëmbi me'a, kë pdola ameeţana ţi bañaaŋ biki Iŧrayel, pakaaŋ kë mbi abatŧar na meel.» 32 Yowan aţup ji ñaaŋ namaar aji: «Dwin Uhaaş wi Naşibaţi kë uwala ţi a awo ji ubalab ufaaŧal abi aţo ţi a. 33 Mëmbi me'a, kë anşaaŋ ayilën aji mbatŧaar na meel aşë jakën aji: “Ñaaŋ i ikwinuŋ Uhaaş wi naan uwala ţi a ubot uţo ţi a, uŋ mënţan akbatŧaaruŋ na Uhaaş wi naan.” 34 Kë nji nşë win abot aţup kë i mënţ awo Abuk Naşibaţi.»
Baţaşar Yeŧu baŧeek
35 Wi unuur ujinţuŋ, Yowan akak awo da na batëb ţi baţaşarul. 36 Awin kë Yeŧu akţëp kë aşë ji: «Anwooŋ unkaneel wi bţeŋan wi Naşibaţi i i.» 37 Baţaşarul batëb bukuŋ baŧiink uko wi ajakuŋ aşë ţaş Yeŧu. 38 Yeŧu akok awin kë bakţaşa aşë ji na baka: «We wi naklaaŋ ba?» Kë baŧeem aji: «Rabi, ţuŋ di di iwooŋ ba?» Rabi dawooŋ najukan. 39 Kë aji na baka: «Nabiin naşë nawin.» Kë baya ame dko di awooŋ, aţo na a unuur mënţ. Ŋwoori ŋbaakër ŋi utaakal ŋakyaaŋ pban wal mënţ. 40 Andre aţa Ŧimoŋ Piyeer awo aloŋ ţi batëb banŧiinkuŋ uko wi Yowan ajakuŋ aşë ţaş Yeŧu. 41 Adun awin Ŧimoŋ naweekul aji na a: «Ŋwin Meşuwa.» Meşuwa dawooŋ Kriŧtu. 42 Añooţa du Yeŧu. Yeŧu ajabana këş aşë ji: «Iwooŋ Ŧimoŋ abuk Yowan, hënkuŋ ido kadu'ana Kefaŧ.» Kefaŧ dawooŋ Piyeer. 43 Wi unuur ujinţuŋ, Yeŧu aţu na pya uŧaak wi Galilay. Aya awin da Filip aji na a: «Ţaşaan!» 44 Filip awo i Betŧayida, ubeeka wi bi Andre na Piyeer. 45 Kë Filip aya awin Natanayel aji na a: «Ŋwin ñaaŋ i Moyiŧ aţiiniyaanuŋ ţi Ulibra wi Bgah, i baţupar Naşibaţi bandukiiŋ bakaaŋ aţiiniyaan! Yeŧu i Naŧaret a, abuk Yoŧef.» 46 Kë Natanayel aşë hepara aji: «Uko uloŋ unuura uhil kapënna du Naŧaret i?» Kë Filip aŧeema aji: «Biini, iwin.» 47 Yeŧu awin kë Natanayel akbi ţi a, aşë ji: «Abuk Iŧrayel na manjoonan akbiiŋ hënk, aamme kalagare.» 48 Natanayel kë aşë hepara aji: «Ţuŋ di imeennuŋ ba?» Kë Yeŧu aŧeema aji: «Ji Filip abi ado kadu'u, wi iwooŋ du bfig uţeeh, dwinu.» 49 Kë Natanayel aşë ji na a: «Rabi, iwo Abuk Naşibaţi, iwo naşih i Iŧrayel.» 50 Kë Yeŧu aŧeema aji: «Ifiyaar ţiki djaku dwinu wi iwooŋ du bko uţeeh. Iluŋ kawin iko indëmuŋ apel yi iwinuŋ nţa.» 51 Wi wi aşaaŋ aji: «Na manjoonan, dţupan, naluŋ kawin baţi bahaabëşa, ŋwanjuŧ ŋabot ŋado kapaya, kawala ţi Abuk Ñiinţ.»
Bniim du Kana
1 Unuur uwajanţën bniim bloŋ bawo du ubeeka wi Kana du Galilay, kë anin Yeŧu awo da. 2 Yeŧu kak awo ţi biki baduuŋ babi bniim, ul na baţaşarul. 3 Poot pabaa, kë anin Yeŧu aşë bi aji na a: «Baankak aka poot.» 4 Kë aşë ji na a: «Abuk ñaaţ, we ukaaŋ kë ikţupën uko waŋ? Unuur wi naan uundobi ban.» 5 Kë anin aşë ji na balemp: «Uko wi akjakaranaŋ, nadolan wa.» 6 Kdunk paaj ki mnlaak kawo da ki bayuday bajaaŋ baţuuna meel mi bajaaŋ badolna bañow. Pdunk paji pado uko ji ŋlitru iñeen-week. 7 Kë Yeŧu aji na balemp: «Naŧumaan idunk yi na meel.» Kë baŧuman ya. 8 Wi babaaŋ kë aşë ji na baka: «Naliikan hënkuŋ nañooţ najañan iko.» Kë baliik añooţ. 9 Ankjañanuŋ añemi, kë uşë wo ubiñu. Aamme dko di uwoonuŋ, kë balemp başë me, bukal banliikuŋ meel. Adu naniim, 10 aji na a: «Ñaaŋ aji dun kawul poot panlilnuŋ, wal wi bañaaŋ bakujuŋ, kë baa pënan panwooŋ paanlil maakan. Iwi, kë işë hank plil te hënkuŋ!» 11 Uko waŋ uwooŋ ujuni wi iko iñoŋarënaan yi Yeŧu ajaaŋ ado bañaaŋ bahilna bame uko wi awooŋ. Ado wa du Kana di Galilay, adiiman mndëm mi nul kë baţaşarul bafiyaara. 12 Wi abaaŋ, aşë ya ubeeka wi Kapernawum, ul, na anin na babuk aşin na baţaşarul, ado da ŋnuur ŋntiinku.
Yeŧu na bawaap du Katoh Kaweek ki Naşibaţi
13 Ufeŧtu wi Mbuur wi bayuday uñogi, kë Yeŧu aşë ya Yeruŧalem. 14 Aţënk du Katoh Kaweek ki Naşibaţi bawaap ŋgit na ŋkaneel na ŋbalab; batorkaar itaka bakak aţoo da. 15 Ajej wal mënţ ital aboman btinŧël aşë dook baka bŧi ţi Katoh ki Naşibaţi bukal na ŋkaneel na ŋgit; afël itaka yi batorkaar abot awat ŋmeeşa ŋi baka. 16 Aji na bawaap ŋbalab: «Napënaan ŋko ŋi ţi. Nawutan kakakan katoh ki Paapa dko dwaapi.» 17 Baţaşarul baleş wal mënţ uko umpiiŧaniiŋ ţi Ulibra wi Naşibaţi: Uŋal uweek wi nkaaŋ pa Katohu ukfiŋnuŋ. 18 Wal mënţ, kë baweek biki bayuday başë ji na a: «Dolan uko uloŋ unkyuujuŋ kë ihilan kado kado uko wi ikdoluŋ hënk.» 19 Kë Yeŧu aŧeem baka aji: «Nafomle Katoh ki Naşibaţi ki, kanaţan ka ţi ŋnuur ŋwajanţ.» 20 Kë başë ji na a: «Bado ŋşubal iñeen ŋbaakër na ŋşubal paaj pa pniw katoh ki mënţ, kë iwi işë ji iniw ka ţi ŋnuur ŋwajanţ?» 21 Kë Yeŧu wal mënţ aşë ţiiniyaan ţiiniyaan uleeful. 22 Kë hënk, wi abiiŋ anaţa ţi pkeţ, baţaşarul baleş kë abi ji haŋ, aşë fiyaar uko umpiiŧuŋ ţi Ulibra wi Naşibaţi na uţup wi Yeŧu abiiŋ aţup. 23 Jibi Yeŧu awooŋ du Yeruŧalem ţi wal wi Ufeŧtu wi Mbuur, bañaaŋ baŧum bafiyaara wi bawinuŋ iko iñoŋarënaan yi akdoluŋ. 24 Kë ul aşë wo aanfiyaar baka, ţiki ame bañaaŋ bŧi, 25 abot awo aannuma ñaaŋ aţupa jibi ñaaŋ awoori ţiki ul ţi bkowul ame uko unwooŋ ţi uhaaş wi ñaaŋ.
Yeŧu na Nikodem
1 Uka ţfa ţi bafariŧay ñiinţ aloŋ i katim kawooŋ Nikodem. Awo ţi baweek biki bayuday. 2 Aya du Yeŧu na uŧejan aji na a: «Najukan, ŋme kë iwo najukan i Naşibaţi ayiluŋ, ţiki nin ñaaŋ aloŋ aanhil pdo iko iñoŋarënaan yi ikdoluŋ woli Naşibaţi aanwo na a.» 3 Kë Yeŧu aşë ŧeema aji: «Na manjoonan dţupu, nin ñaaŋ aanhilan kawin Pşih pi Naşibaţi bë aankak abuka buka.» 4 Kë aşë ji na a: «Hum di di ñaaŋ ahiniiŋ kabuka kak wi adooŋ abi ţaf? Ahinan kakak du kayiŋ ki anin kabuka kak i?» 5 Kë aŧeema aji: «Na manjoonan dţupu, ñaaŋ anwooŋ aankak abuka ţi meel na Uhaaş wi Naşibaţi aanhil kaneej du Pşih pi Naşibaţi. 6 Uleef uji ubuk uleef, kë uhaaş uji ubuk uhaaş. 7 Wutan kañoŋar woli djaku, nawo kabuka kak. 8 Uyook uji ufuuţ dko di uŋali. Iji kŧiink wa ufuuţ bë iinji këme dko di uwoonuŋ këme dko di ukyaaŋ. Kë hënk di uwooŋ kak pa bañaaŋ bambukiiŋ ţi Uhaaş wi Naşibaţi.» 9 Kë Nikodem aşë ji na a: «Hum di di uko mënţ uhiluŋ kadolana?» 10 Kë aŧeema aji: «Hum di ihiluŋ kawo najukan ţi Iŧrayel aşë wo iimme iko yaŋ? 11 Dţupu na manjoonan, ŋji ŋţiiniyaan uko wi ŋmeeŋ kabot kaţup wi ŋwinuŋ, kë an naşë wo naanji nadinan pfiyaar uko wi ŋjakuŋ. 12 Woli naanfiyaar wi nji kaţiiniyaanuŋ iko yi mboş, hum di di nakluŋ kafiyaar woli dluŋ aţiiniyaan iko yi baţi ba? 13 Nin ñaaŋ aloŋ aampaya baţi Abuk Ñiinţ ţañ [anwooŋ du baţi] awaliiŋ. 14 Kë jibi Moyiŧ adeeŋuŋ upula unţak du pndiiş, hënk di Abuk Ñiinţ akdeeŋaniiŋ, 15 ñaaŋ anfiyaaruluŋ ahilna aka ubida wi mnţo. 16 «Naşibaţi aŋal bañaaŋ maakan adoo wul Abukul aloolan ţañ i akaaŋ, ñaaŋ anfiyaaruluŋ awutna kakeţ, aşë ka ubida wi mnţo. 17 Naşibaţi aanyil yil Abukul abi aji na bañaaŋ kë baduknaana awo i pkeţ, ayila yil bañaaŋ baţëpna ţi a babuur. 18 Ñaaŋ anfiyaaruluŋ aankduknaana, anwooŋ aanfiyaara ado bi duknaana duknaana, ţiki aanfiyaar ţi Abuk Naşibaţi aloolan ţañ i akaaŋ. 19 Kë uko wi, ukţuuŋ baji baduknaanaa: bjeehi babi ţi umundu kë bañaaŋ başë magan bdëm apel bjeehi ţiki iko yi bañaaŋ bakdoluŋ iwuţ maakan. 20 Ñaaŋ ankdoluŋ buţaan apok bjeehi; uŋ mënţan aankya du bjeehi, kaţi iko iwuţaan yi adoluŋ iwinana. 21 Kë ñaaŋ anjaaŋ aţaş manjoonan aji ya du bjeehi, kahilna kadiiman kë iko yi akdoluŋ iwoona du Naşibaţi.»
Yeŧu na Yowan Nabatŧaar
22 Wi iko yaŋ iţëpuŋ, Yeŧu aya na baţaşarul du uŧaak wi Yuda, aţo da na baka abatŧaar. 23 Yowan kak awo ţi pbatŧaar du Aenon kañog Ŧalim ţiki meel manŧum da, kë bañaaŋ babot abi'abi ţi a pyeenk batiŧmu. 24 Baandobi wata wal mënţ ukalabuş. 25 Unuur uloŋ kë bţup başë pën ţi baţaşar Yowan na nayuday aloŋ ţi uko wi bañow. 26 Babi ţi Yowan aji na a: «Najukan, ñaaŋ ambiiŋ awo na iwi du plut pi Yordan, i ibiiŋ aţiiniyaan uko wi nul awuŋ du abatŧaar kë bañaaŋ bŧi bakya du a.» 27 Kë Yowan aŧeem baka aji: «Nin ñaaŋ aanhil kayeenk uko uloŋ bë uunwoona du baţi. 28 An ţi uleefan namaar kë nţiini aji: “Mënwo Kriŧtu kë başë yilën ţi kadunul.” 29 Naniim akaaŋ naniima, kë nanoh naniim anwooŋ da aji lilan woli aŧiink pdiim pi naniim. Mnlilan mi, manwooŋ mi ŧaan mandëm maakan keeri. 30 Ul awo kado kadëm, nji nşë ndo kawala. 31 «Anwoonuŋ baţi apel bañaaŋ bŧi; anwooŋ i mboş, awo i mboş abot aji ţup iko yi mboş. Anwoonuŋ baţi [apel bañaaŋ bŧi] 32 aji ţup uko wi awinuŋ akuţ aŧiink kë nin aloŋ aşë wo aanji di pŧiink uţup wi nul. 33 Anfiyaaruŋ uţup wi nul adiiman kë adinan kë uko wi Naşibaţi ajakuŋ uwo manjoonan; 34 Naşibaţi aji wul ñaaŋ i ayiluŋ Uhaaşul kakëşan aşë kaţup uţup wi Naşibaţi. 35 Naşibaţi Aşin aŋal Abukul, akuţ awula iko bŧi. 36 Anfiyaaruŋ Abukul aka ubida wi mnţo; anwooŋ aandi pŧiinka aankka ubida mënţ; udeeb wi Naşibaţi uji uwo ţi a.»
Yeŧu na ñaaţ i uŧaak wi Ŧamariya
1 Bafariŧay baŧiink kë baji baţaşar Yeŧu baŧum adoo pel biki Yowan kë abot aji batŧaar bañaaŋ bampeluŋ biki Yowan akbatŧaaruŋ. 2 Yeŧu ul ţi uleeful aanji batŧaar, baţaşarul bajaaŋ babatŧaar. 3 Wi aŧiinkuŋ uko mënţ, apën du Yuda akak Galilay. 4 Awo i kamuur uŧaak wi Ŧamariya. 5 Kë hënk di ayaaŋ aban du ubeeka uloŋ wi Ŧamariya wi bajaaŋ badu Ŧikar kañog uţeeh wi Yakob abiiŋ aţen Yoŧef abukul. 6 Ţi dko mënţ di di pliik pi Yakob pawooŋ. Yeŧu apoş anoor aşë ya aţo du kañog pliik mënţ. Unuur udiiŋ wal mënţ. 7 Kë ñaaţ aloŋ i Ŧamariya aşë bi pliik. Kë Yeŧu aşë ji na a: «Ţenaan meel ddaan.» 8 Baţaşarul baya wal mënţ ubeeka pla uko ude. 9 Kë ñaaţ aji na a: «Hum di iwi, inwooŋ nayuday ihiluŋ kañehanaan meel, nji nwooŋ i Ŧamariya?» (Bayuday baanji banaakiir na bañaaŋ biki Ŧamariya.) 10 Kë aŧeema aji: «Woli ime lah uko wi Naşibaţi ajaaŋ aţen abot ame ñaaŋ anjakiiŋ iţena adaan, iwi ţi uleefu ikñehanuluŋ aşë ţenu meel manjaaŋ manwul bañaaŋ ubida.» 11 Kë aşë ji na a: «Naweek, iinwo na nin ukoolan uliikni kë pliik pabaa diil maakan. Ţuŋ di di ibaaŋ aliikna meel manjaaŋ manwul bañaaŋ ubida ba? 12 Idëm apel Yakob ateem nja anwuluŋ nja pliik pi i? Ul andaanuŋ ţi pa abot awul babukul na ŋnŧaam ŋi nul kë ŋadaani?» 13 Kë Yeŧu aşë ŧeema aji: «Ñaaŋ andaanuŋ meel mi, udaan ukak aţija; 14 kë ñaaŋ anşaaŋ adaan meel mi nji kaluŋ kawula nin udaan uunkak aţija, meel mi nji kawululuŋ mankak ukumpëş unkwuluŋ ubida wi mnţo.» 15 Kë ñaaţ aşë ji na a: «Naweek, ţenaan meel mënţ, udaan uwutna kakak kaţijën ndoo nwo i pbi pliik ţi.» 16 Kë aji na a: «Yaan idu ayinu işë ikak na a ţi.» 17 Kë aŧeema aji: «Mëniimaa.» Kë Yeŧu aşë ji na a: «Iţup manjoonan wi ijakuŋ iinniimaa, 18 ţiki ibi niima ŋyaaş kañeen, kë i iwoonaanuŋ hënkuŋ aanwo ayinu. Ifaŋ ţi waŋ.» 19 Kë ñaaţ kë aşë ji na a: «Naweek, dwin kë iwo Naţupar Naşibaţi na manjoonan. 20 Bateemun badëman Naşibaţi ţi pnkuŋ pi, kë an bayuday naşë ji du Yeruŧalem di di bañaaŋ bawooŋ i kado kadëmana.» 21 Kë aşë ji na a: «Abuk ñaaţ, fiyaarën, wal uloŋ ubi wi mënţ ţi pnkuŋ pi këme du Yeruŧalem ţañ di bakdooŋ kadëmanaan Naşibaţi Aşin nja. 22 An, naji nadëman uko wi nawooŋ naammee. Un ŋji ŋdëman uko wi ŋmeeŋ ţiki ţi bayuday di di Naşibaţi aţepnuŋ abuuran bañaaŋ. 23 Kë wal uşë bi, wii wi, udo bi ban ban, wi banjaaŋ badëman Naşibaţi Aşin nja bakme'uluŋ na manjoonan kado kadëmana na uhaaş; bukal bawooŋ banjaaŋ badëman Naşibaţi Aşin nja, bukal biki aklaaŋ. 24 Naşibaţi awo uhaaş kë banjaaŋ badëmana bawo i kame'a na manjoonan kadëmana na uhaaş.» 25 Kë ñaaţ aşë ji na a: «Dme kë Ñaaŋ i Naşibaţi adatuŋ, i bajaaŋ bado Kriŧtu abi. Woli aluŋ abi, aţup nja iko bŧi jibi iwoori.» 26 Kë Yeŧu aji na a: «Nji nkaţiiniiŋ na iwi, dwooŋ aŋ mënţ.» 27 Wal wi aţiiniiŋ haŋ kë baţaşarul başë wuj, aşë ñoŋar wi bawinuluŋ kë akţiini na ñaaţ. Kë nin aloŋ ţi baka aşë wo aanhepara uko wi aklaaŋ këme uko wi akţiiniiŋ na ñaaţ. 28 Wal mënţ ñaaţ aduk pdunk pi nul, aya du ubeeka aji na bañaaŋ: 29 «Nabiin nawin ñiinţ aloŋ anţupnuŋ iko yi ndoluŋ bŧi. Woon Kriŧtu a i?» 30 Bapën ţi ubeeka aya du a. 31 Wal mënţ baţaşarul bawo ţi pkooţa aji na a: «Najukan, deeni.» 32 Kë aşë ŧeem baka aji: «Dka pde pi nawooŋ naammee.» 33 Baţaşarul bawo ţi pşal aji me aloŋ aţija ţij uko ude. 34 Kë Yeŧu aşë ji na baka: «Pde pi naan pawooŋ pdo uko wi anyilnuŋ ajaknuŋ ndo na pbaañëş ulempul. 35 Jëm naji naji: “uduka kli kbaakër kakit kaşë kabi” i? Dţupan, nakatan këş naten ŋţeeh, ŋado bi kay kay pa kakit. 36 Kë nakit ado bi jun jun pyeenk baluk bi nul abot akit ŋdeey pa ubida wi mnţo, najaar na nakit bahilna balilan bukal batëb bŧi. 37 Ţi uko mënţ, uko wi bajakuŋ uwo manjoonan: Aloŋ aji jaar, aloŋ kakit. 38 Nji dyilan naya nakit uko wi nawooŋ naanjaari. Baloŋ bado ulemp untamnuŋ, kë an naşë yeenk ulemp wi ujënk wi baka.» 39 Ţi ubeeka wi mënţ bañaaŋ biki Ŧamariya baŧum bafiyaar Yeŧu wi baŧiinkuŋ uko wi ñaaţ aţupuŋ ţi a aji: «Aţupën iko yi ndoluŋ bŧi.» 40 Hënk, wi bañaaŋ babiiŋ du a, bakooţa aji aţo na baka; kë aţo da ŋnuur ŋtëb. 41 Ŋţup ŋi nul ŋado kë bañaaŋ baŧum maakan kak bafiyaara; 42 baji na ñaaţ: «Mënţ uko wi iţupuŋ ţañ ukaaŋ kë ŋfiyaara; un ţi ŋleefun ŋŧiinka abot ame kë ul na manjoonan awooŋ Nabuuran bañaaŋ bŧi.» 43 Wi Yeŧu aţooŋ ŋnuur ŋtëb du Ŧamariya, aşë pën da aya Galilay. 44 Abi ţup aji kë Naţupar Naşibaţi aanji ŧiinkana du uŧaak wi nul. 45 Kë wi aşaaŋ aban du Galilay, bañaaŋ bamëbana bnuura ţiki wi bayaaŋ Ufeŧtu wi Mbuur du Yeruŧalem bawin iko bŧi yi adoluŋ da.
Pjeban pi abuk nalempar naşih
46 Yeŧu akak ubeeka wi Kana du Galilay di abiiŋ akakanaan meel ubiñu. Kë wal mënţ aloŋ ţi balempar naşih baweek aloŋ i abukul amaakuŋ aşë wo du Kapernawum. 47 Wi aŧiinkuŋ kë Yeŧu awoona Yuda aban ţi Galilay, aya du a, akooţa aya ajeban abukul ţiki amaak añogan pkeţ. 48 Kë Yeŧu aşë ji na a: «Woli naanwin mlagre na iko iñoŋarënaan naanji nafiyaarën.» 49 Kë nalempar naşih aşë ji na a: «Naweek, biin ji abuk naan abi akeţ.» 50 Kë aji na a: «Yaani, abuku awo najeb.» Kë ñiinţ afiyaar uko wi Yeŧu ajakuluŋ, aŧool pya katohul. 51 Ahum nwo ţi bgah, kë balemparul başë bi ayit na a aji na a abukul ajebi. 52 Ahepar baka wal wi amatrënuŋ. Kë baji na a: «Takal da, uko ji uwoori uloolan wi pnak wi wi uleef ukakuŋ ajoobëţ na a.» 53 Aşin napoţ aleş kë wal mënţ wi wi Yeŧu ajakuluŋ: «Abuku awo najeb.» Wi wi aşaaŋ afiyaar Yeŧu ul na biki katohul bŧi. 54 Uko waŋ uwooŋ uko uñoŋarënaan utëbanţën wi Yeŧu adoluŋ ţi Galilay. Ado wa wi apënnuŋ Yuda.
Pjeb pi naţakmaan du Beŧtaŧa
1 Wi iko yaŋ iţëpuŋ, ufeŧtu uloŋ wi bayuday uwoo, kë Yeŧu aşë ya Yeruŧalem. 2 Kë du Yeruŧalem ţi kañog «plëman pi ŋkaneel» uşë ka, dko dloŋ dñownaani danwooŋ na irakan kañeen di bajaaŋ bado ţi uţup uhebërë Beŧtaŧa. 3 Ţuŋ irakan mënţ, bamaakal baŧum maakan: bakuul, banknjiinkuŋ, na bambiinkniiŋ, baji bapiinţ da kayoonk meel manşinţar; 4 uwanjuŧ uloŋ wi Ajugun uji ubanle ţuŋ ubi kawala da, meel manşë kaşinţar; anneejuŋ uŧeek wi meel manşinţaruŋ pmaak pi akahaŋ paji pabi jeb jeb. 5 Uka da wal mënţ ñiinţ aloŋ andoli ŋşubal iñeen-ŋwajanţ na bakreŋ ŋi aţakmi. 6 Yeŧu awina kë apiinţ da abot ame kë ujon wi aţakmi aanhinan poş aşë ji na a: «Iŋal kajeb i?» 7 Kë ñiinţ naţakmaan aŧeema aji: «Naweek, mënka nin aloŋ anhiluŋ kaţënkën nwala du dko dñownaani woli meel manşinţar, kë ji mbi ndo kaban, aloŋ aji do bi banën da uŧeek.» 8 Kë aşë ji na a: «Naţiin, jejan iko yi ipiinţnuŋ ipoş.» 9 Ţi dko mënţ, kë ñiinţ abi jeb jeb ajej iko yi apiinţnuŋ apoş. Kë unuur mënţ uşë wo unuur wi pnoorfën wi bayuday. 10 Baweek biki bayuday baji na ñiinţ i babaaŋ ajeban jeban: «Unuur wi pnoorfën uwo nţa, bgah bi nja baneenan ikuŋa.» 11 Kë aŧeem baka aji: «Anjebanaanuŋ ajakën: “Jejan iko yi ipiinţnuŋ ipoş.”» 12 Kë başë hepar aji: «Ñaaŋ ahoŋ ajakiiŋ jejan iko yi ipiinţnuŋ ipoş ba?» 13 Kë i bajebanuŋ aşë wo aamme ñaaŋ mënţan, kë Yeŧu abot aneem ţi pnŧuk. 14 Wi uko waŋ uţëpuŋ, Yeŧu ayit na ñiinţ i ajebanuŋ du Katoh Kaweek ki Naşibaţi aşë ji na a: «Hënkuŋ ijebi, ţañaanuŋ pjuban ji uko untamuŋ apel umbiiŋ adolu umobu.» 15 Ñiinţ aya wal mënţ aţup baweek biki bayuday aji Yeŧu ajebanuluŋ. 16 Kë baweek biki bayuday başë jun phajan Yeŧu, ţiki aji do iko mënţ ţi unuur wi pnoorfën. 17 Kë aşë ji na baka: «Paapa aji lempa lemp ŋnuur bŧi, kë nji kak mbot alemp.» 18 Uko waŋ ukaaŋ kë baweek biki bayuday batamanaara taman ala pfiŋa; baji baji mënţ uko wi bgah baneenanuŋ ţi unuur wi pnoorfën ţañ wi wi ajaaŋ ado, abot aji ji Naşibaţi awooŋ aşin kaliŋan uleeful na Naşibaţi.
Mnhina mi Abuk Naşibaţi
19 Yeŧu akak ayeenk bţup aji na baka: «Na manjoonan dţupan, Abuk Naşibaţi aanhil pdo nin uko uloŋ bdidi'ul bë aanwin Aşin kë ado wa. Uko wi Aşin adoluŋ, Abukul akak aji do wa. 20 Naşibaţi aŋal Abukul abot aji diimana iko yi ajaaŋ ado; aluŋ kadiimana iko indëmuŋ apel yi, inkţuuŋ nañoŋar. 21 Kë jibi Naşibaţi ajaaŋ anaţan bañaaŋ ţi pkeţ kabot kawul baka ubida, hënk kak di di Abukul ajaaŋ awul ñaaŋ i adatuŋ ubida. 22 Hënk kak, Naşibaţi aankwayëş nin ñaaŋ aloŋ, awutar uko mënţ bŧi Abukul, 23 bañaaŋ bŧi bahilna badëman Abukul jibi bajaaŋ badëmana. Ñaaŋ anwooŋ aanji dëman Abukul, aanji dëman Naşibaţi anyiluluŋ. 24 Na manjoonan dţupan, ñaaŋ ankŧiinkuŋ ŋţup ŋi naan abot afiyaar Naşibaţi anyilnuŋ, aka ubida wi mnţo. Ñaaŋ mënţ aankduknaana, apënna du pkeţ abi ţi ubida. 25 «Na manjoonan dţupan, wal ubi, hënkuŋ da, wi banwooŋ du pkeţ bakŧiinkuŋ pdiim pi Abuk Naşibaţi, banknŧiinkuŋ pa abi du a, baka ubida. 26 Jibi Naşibaţi awooŋ anjaaŋ awul ubida, hënk kak di di aţenuŋ Abukul ado kawul ubida. 27 Akak awula mnhina mi pwayëş ţiki awo Abuk Ñiinţ. 28 Nawutan kañoŋar ţi uko mënţ ţiki wal ubi wi banwooŋ du ihër meeţ bakŧiinkuŋ pdiimul. 29 Bandoluŋ bnuura bapën kayeenk ubida, bandoluŋ buţaan başë bapën pa Naşibaţi aji baduknaana awo i pkeţ. 30 Nji ţi uleef naan, mënhil pdo nin uko uloŋ, pwayëş pi naan paji pawo pŧool, ţiki ţi uleef naan, mënji kado uko wi nji nŋaluŋ, dji kawayëş jibi anyilnuŋ ajaknuŋ.»
Uko wi baţupuŋ ţi Yeŧu
31 Yeŧu akak aji: «Woli nji ţañ kaţuparuŋ bkow naan uhinan kawo uunkwo manjoonan ţi an. 32 Kë aloŋ aşë aţup ţi uko wi naan, dme kë uko wi akţupuŋ ţi nji uwo manjoonan. 33 Nayil bañaaŋ du Yowan, kë aţupan uko unwooŋ manjoonan ţi uko wi naan. 34 Kë nşë wo mënuma ñaaŋ aţuparaan, dţup ţup haŋ nahilna nabuur. 35 «Yowan abi wo unkaniya unktëruŋ ajeehan dko, kë nadat ŋwal ŋloŋ pwo ţi bjeehi na mnlilan wi nakŧiinkuŋ uko wi aţupanaŋ. 36 Nji, dka uko unkyuujuŋ uko wi nwooŋ apel wi Yowan aţupanaŋ: iko yi Paapa aţu'ënuŋ pdo, yi nji kadoluŋ, idiiman kë Paapa ayilnuŋ. 37 Kë Paapa anyilnuŋ ul ţi uleeful aţup ţi uko wi naan. Naambaaŋ kaŧiinka pdiimul, këme kame jibi anaami. 38 Kë jibi nawooŋ naanfiyaar i ayiluŋ, nadiiman kë naambaaŋ kamëbanaara uţup wi nul. 39 Naji najuk Ulibra wi Naşibaţi bnuura, ţiki naşal kë ţi wa di di nakkaanuŋ ubida wi mnţo. Kë Ulibra wi Naşibaţi mënţ uţupuŋ uko wi ŧaan. 40 Kë an naşë wo naanŋal pbi ţi nji kakaana ubida. 41 «Mënkyeenkna mndëm ţi bañaaŋ. 42 Dme an, naanŋal Naşibaţi na manjoonan. 43 Dbi ţi katim ki Paapa, kë naanyeenkën; aloŋ abile bdidi'ul, nayeenka. 44 Hum di di nahiluŋ kafiyaarën, an nanjaaŋ nadëman ŋleefan kaşë wo naanji nala mndëm mi Naşibaţi anwooŋ aloolan? 45 Nawutan kaşal kaji dluŋ kakeeşaaran du Paapa. Moyiŧ i nahaţuŋ akkeeşaaranaŋ. 46 Woli nafiyaar lah Moyiŧ, nakak kafiyaarën, ţiki apiiŧ piiŧ uko wi naan. 47 Bë woli naanfiyaar uko wi apiiŧuŋ, hum di di nakfiyaaruŋ uko wi nji kaţupuŋ?»
Pnŧuk pweek pi Yeŧu ade de'anuŋ
1 Wi iko yaŋ iţëpuŋ, Yeŧu amuur bdëk bi Galilay (bul bi bajaaŋ bado kak bdëk bi Tiberiyad). 2 Bañaaŋ baŧum bawo ţi pţaşa wi bawinuŋ iko iñoŋarënaan yi akdoluŋ ţi bamaakal. 3 Aya apaya du pnkuŋ aţo da na baţaşarul. 4 Ufeŧtu wi bayuday wi bajaaŋ bado Ufeŧtu wi Mbuur uñog wal mënţ. 5 Yeŧu akat këş, awin bañaaŋ baŧum kë bakbi du a, aşë ji na Filip: «Ţuŋ di di ŋkyaaŋ kanugna ipoom kawul bañaaŋ biki bŧi bade?» 6 Aţup haŋ katenna Filip, ţiki ul ţi uleeful ame uko wi akdoluŋ. 7 Filip aŧeema aji: «Baluk bi kli bakreŋ baandoo këş pa ñaaŋ andoli ayeenk bnduŋ.» 8 Andre, naţaşarul aloŋ anwooŋ abuk aşin Ŧimoŋ Piyeer aji na a: 9 «Napoţ aloŋ awo ţi na ipoom kañeen na ŋţëb ŋtëb; iko mënţ ikëş uko uloŋ pa bañaaŋ biki bŧi i?» 10 Kë Yeŧu aşë ji na baka: «Nadolan bañaaŋ baţo bnuura.» Pjaagal paŧum ţi dko mënţ, kë bañaaŋ baţoo. Biinţ bawo uko ji iñeen-week ŋyaaş iñeen-kañeen (5000). 11 Yeŧu ajej ipoom, abeeb Naşibaţi aşë faaş ya bañaaŋ abot ado haŋ kak na ŋţëb. Ñaaŋ andoli aji yeenk uko wi akdeeŋ. 12 Wi badeeŋ bŧi ayok, kë aşë ji na baţaşarul: «Naţonkaan iko indukiiŋ, nin uko uloŋ uwut kaŧoka.» 13 Baţonkan iko bŧi indukiiŋ, kë iŧum kkaar iñeen na ktëb. Iko mënţ bŧi ipënna ţi ipoom kañeen yuŋ. 14 Wi bañaaŋ bawinuŋ uko uñoŋarënaan wi adoluŋ, aşë ji: «Na manjoonan i awooŋ Naţupar Naşibaţi anwooŋ i pbi ţi mboş.» 15 Wal mënţ kë Yeŧu aşë yikrën kë baŋal kamoba kadola awo naşih, aşë ţi aya agaag du pnkuŋ.
Yeŧu apoş ţi bdëk
16 Wi utaakal ubanuŋ, baţaşar Yeŧu baya bdëk, 17 bapaya ţi bţeem, aŧool pya du plut du Kapernawum. Unuur udo bi yob yob, kë Yeŧu akak awo aando bi du baka. 18 Baya aban ţuŋ kë ukëk uşë unaţa, kë bdëk baţuunki. 19 Wi bapaatuŋ uko ji ŋkilometër kañeen këme paaj, aşë win Yeŧu kë akpoş ţi meel duuţ abi du bţeem bi bawooŋ, balënk wal mënţ. 20 Kë aşë ji na baka: «Nji a, nawutan kalënk.» 21 Baŋal pdo apaya ţi bţeem, aşë kur aban du pkay.
Yeŧu, pde panjaaŋ pawul ubida
22 Na nfa, pnŧuk pi bañaaŋ panwooŋ du bdëk umbaŋ wundu paleş kë bţeem bloolan bawohaŋ da takal abot ame kë Yeŧu aampaya ţi bţeem na baţaşarul, bukal ţañ bayaaŋ. 23 Kë wal mënţ kak, iţeem iloŋ kë işë bi du dko di bañaaŋ babiiŋ adeena ipoom wi Yeŧu Ajugun abeebuŋ Naşibaţi. 24 Wi bañaaŋ bawinuŋ kë Yeŧu aanwo da, baţaşarul kak kë baanwo da, bapaya ţi iţeem aya praba du Kapernawum. 25 Wi bayaaŋ awina du plut aşë ji na a: «Najukan, lum di di ibanuŋ ţi ba?» 26 Kë Yeŧu aŧeem baka aji: «Na manjoonan dţupan, mënţ pdo na pyikrën iko iñoŋarënaan yi nawinuŋ pakaaŋ kë nakla'ën, nala'ën la ţiki nade ipoom ayok. 27 Nawutan kado kalemp pa pde pankmbaaŋ, nadoon kalemp pa pde panjaaŋ pawul ubida wi mnţo, pi Abuk Ñiinţ akluŋ kawulan. Naşibaţi Aşin adiimanan bnuura kë ul awoona du a.» 28 Wal mënţ kë başë hepara aji: «We wi ŋwooŋ kado kado, kahilna kawo ţi uko wi Naşibaţi aŋaluŋ?» 29 Kë Yeŧu aŧeem baka aji: «Pdo uko wi Naşibaţi aŋaluŋ pawo pfiyaar ñaaŋ i ayiluŋ.» 30 Wi wi başaaŋ aji na a: «Dolan uko unkyuujuŋ kë ŋwo i kafiyaaru. We wi ibaaŋ ado? 31 Bateem nja bade uko wi bajaaŋ bado “Mana” du pndiiş, jibi upiiŧaniiŋ ţi Ulibra wi Naşibaţi aji: “Awul baka kë bade pde panwoonuŋ baţi.”» 32 Kë Yeŧu aşë ŧeem baka aji: «Na manjoonan dţupan, Moyiŧ aanwulan pde panwoonuŋ baţi, Paapa akwulanaŋ pde panwoonuŋ baţi na manjoonan. 33 Pde pi Naşibaţi pawo anwalnaaniiŋ baţi abot awul umundu ubida.» 34 Kë başë ji na a: «Naweek, wulun pde mënţ unuur unwooŋ.» 35 Kë aji na baka: «Nji, dwooŋ pde panjaaŋ pawul ubida. Ñaaŋ ankmbiiŋ ţi nji, nin ubon uunkak ade'a, kë ñaaŋ anfiyaarnuŋ, nin udaan uunkak aţija. 36 Kë nşë ţupan, nawinën aşë wo naanfiyaarën. 37 Kë bañaaŋ bŧi biki Paapa akwulnuŋ baluŋ kabi ţi nji, kë ñaaŋ ankmbiiŋ ţi nji, nin mënkdooka. 38 Mënwalnaana du baţi pa pdo uko unlilnuŋ, dbi bi pdo uko wi anyilnuŋ aŋaluŋ ndo. 39 Kë uko wi anyilnuŋ aŋaluŋ, uwo nwut kaneemandën nin aloŋ ţi biki awulnuŋ, nşë naţan baka ţi pkeţ ţi unuur ubaañşaani. 40 Uko wi Paapa aŋaluŋ wii wi: ñaaŋ andekuŋ këş ţi nji Abukul abot afiyaaraan aka ubida wi mnţo, nşë naţana ţi unuur ubaañşaani.» 41 Wi ajakuŋ haŋ, kë bayuday baloŋ banwooŋ da başë ŋur ŋuran ţiki aji ul awooŋ pde panwoonuŋ baţi. 42 Bawo ţi pţiini aji: «I mënţ, aanwo Yeŧu abuk Yoŧef i? Ŋme aşin na anin bnuura. Hum di ahiniiŋ hënkuŋ kaji awoona baţi ba?» 43 Kë Yeŧu aşë ŧeem baka aji: «Naţañaan pdo kaŋur ŋuran. 44 Nin aloŋ aanhilan pbi ţi nji bë mënţ Paapa anyilnuŋ aţijuluŋ, kë nji nşë luŋ kanaţana ţi unuur ubaañşaani. 45 Naţupar Naşibaţi apiiŧ aji: “Naşibaţi aluŋ kajukan baka bukal bŧi.” Ñaaŋ ankŧiinkuŋ Paapa abot amëban pjukan pi nul, abi du nji. 46 Nin ñaaŋ aambaaŋ kawin Naşibaţi Paapa bë mënţ anwoonuŋ du a; ul ţañ awinuŋ Aşin. 47 Dţupan na manjoonan, ñaaŋ anfiyaarnuŋ aka ubida wi mnţo. 48 Nji dwooŋ pde panjaaŋ pawul ubida. 49 Başinan bade pde pi bajaaŋ bado Mana du pndiiş abaa keţa keţ. 50 Kë pde panwoonuŋ baţi, pi ñaaŋ akdeeŋ kaşë kawo aankkeţ paşë wo pii pi. 51 Nji dwooŋ pde panwooŋ na ubida, panwalnaaniiŋ baţi. Woli ñaaŋ ade pde mënţ, aka ubida wi mnţo. Pde mënţ pawooŋ uleef naan wi nji kaluŋ kawul, umundu ukaana ubida.» 52 Bayuday baloŋ bawo wal mënţ ţi plaţar aji: «Hum di di ahiluŋ kawulun uleeful ŋde?» 53 Kë Yeŧu aşë ji na baka: «Na manjoonan dţupan, woli naande uleef wi Abuk Ñiinţ akuţ awo naandaan pñaakul, naankwo na ubida. 54 Ñaaŋ ankdeeŋ uleef naan kakuţ kadaan pñaak pi naan aka ubida wi mnţo, nşë naţana ţi pkeţ ţi unuur ubaañşaani. 55 Uleef naan uwo pde na manjoonan, kë pñaak pi naan pawo poot na manjoonan. 56 Ñaaŋ ankdeeŋ uleef naan kakuţ kadaan pñaak pi naan amëbandër na nji mbot nwo na a. 57 Paapa anwooŋ ukumpëş wi ubida ayilnuŋ kë mbot akaana ubida ţi a. Hënk di di ñaaŋ ankde'ënuŋ akţëpnuŋ ţi nji kaka ubida. 58 Pde panwoonuŋ baţi pii pi; paanwo ji pi başinan babiiŋ ade abaa keţa keţ. Ñaaŋ ankndeeŋ pde pi aluŋ kaka ubida wi mnţo.» 59 Yeŧu aţup uko waŋ wi akjukanuŋ du katoh kañehanaani du Kapernawum. 60 Baţaşar Yeŧu baŧum, wi baŧiinkuŋ uţup waŋ, aşë ji: «Uţup wi udiţi! Ñaaŋ aanhilan pŧiink wa?» 61 Yeŧu, ame ţi uleeful kë baţaşarul bawo ţi pŋur ŋuran ţi uko wi aţupuŋ aşë ji na baka: «Uko waŋ udolan naţañan pfiyaar i? 62 Kë woli naluŋ awin Abuk Ñiinţ kë akpaya pkak du baţi bi awoonuŋ, nabaa do hum? 63 Uhaaş wi Naşibaţi ujaaŋ uwul ubida, ñaaŋ najën aanwo nin ukoolan. Ŋţup ŋi nji nţupanaŋ ŋado Uhaaş wi Naşibaţi na ubida ŋabi ţi an. 64 Kë uşë ka ţi an bañaaŋ baloŋ banwooŋ baanfiyaarën.» Yeŧu ado bi meha me du ujuni banwooŋ baankfiyaara abot ame ankluŋ kawaapa. 65 Aji na baka kak: «Uko waŋ ukaaŋ kë njakan nin ñaaŋ aanhil kabi du nji bë mënţ Paapa aţenuluŋ uko mënţ.» 66 Ţi wal mënţ kë baţaşar Yeŧu baŧum başë deka kafeţ, baankak aţaşa. 67 Kë aşë ji na baţaşarul iñeen na batëb: «An kak naya kadukën i?» 68 Ŧimoŋ Piyeer aŧeema aji na a: «Ajugun kabaa kaya du in ba? Iwooŋ na ŋţup ŋanjaaŋ ŋawul ubida wi mnţo. 69 Ŋfiyaaru abot ame kë iwi iwooŋ ñaaŋ nayimanaan i Naşibaţi ayiluŋ.» 70 Kë Yeŧu aşë ji na baka: «Mënţ nji ddatanaŋ an baţaşar naan iñeen na batëb i? Kë aloŋ ţi an aşë wo unŧaayi.» 71 Aţiiniyaan wal mënţ Yudaŧ abuk Ŧimoŋ Iŧkariyot, anwooŋ aloŋ ţi baţaşarul iñeen na batëb, aşë luŋ kawaapa.
Yeŧu du Ufeŧtu wi iloona
1 Wi iko yaŋ iţëpuŋ, Yeŧu awo ţi pñaay na uŧaak wi Galilay, aaŋŋal pdo kañaay na uŧaak wi Yuda ţiki bala pfiŋa. 2 Ufeŧtu wi bayuday wi bajaaŋ bado ufeŧtu wi iloona uñog wal mënţ. 3 Kë baţa'ul başë ji na a: «Wutan kaduka ţi, yaan Yuda baţaşaru bahilna kak bawin iko yi ijaaŋ kdo. 4 Ñaaŋ aanji mena woli aŋal iko yi akdoluŋ iwinana. Jibi ikdoluŋ iko yaŋ, pënan iwinana ţi bañaaŋ.» 5 Baţiini haŋ ţiki baanfiyaara. 6 Kë Yeŧu aşë ji na baka: «Wal wi naan uundo bi ban, kë ŋwal bŧi ŋaşë nuura pa an, nado uko wi naŋaluŋ. 7 Bañaaŋ biki umundu baanhilan ppokan, kë nji başë pokën ţiki dji kaţup kaji iko yi bakdoluŋ iwuţi. 8 An, nayaan ufeŧtu, nji mënkya, ţiki wal wi naan uundo bi ban.» 9 Wi ajakuŋ haŋ aşë duka du Galilay. 10 Kë wi baţa'ul bayaaŋ du ufeŧtu, kë aşë naţa aya da bë nin ñaaŋ aammee. 11 Baweek biki bayuday bawo ţi pla'a ţi wal wi ufeŧtu aşë ji: «Awo ţuŋ ba?» 12 Ţi pnŧuk pi bañaaŋ pambiiŋ ufeŧtu bhoopaţër baŧum maakan ţi uko wi nul. Baloŋ baji baji awo ñaaŋ nado bnuura, baloŋ kaji aji fël bañaaŋ. 13 Kë nin aloŋ kakşa aşë wo aanţiiniyaan uko wi nul kë bañaaŋ batee, ţiki baţi baweek biki baka. 14 Bañaaŋ baya ado ban ţi pŧoof pi kanëm ki ufeŧtu, kë Yeŧu aşë ya du Katoh Kaweek ki Naşibaţi awo ţi pjukan. 15 Bayuday bañoŋar aşë hepar aji: «Hum di di ameeŋ iko yi bë aanjuki?» 16 Kë Yeŧu aşë ŧeem baka aji: «Pjukan pi naan paampënna ţi nji, pawoona du anyilnuŋ. 17 Woli ñaaŋ aŋal pdo uko wi Naşibaţi aŋaluŋ, ayikrën me pjukan pi naan pawoona du a, këme uko wi nji kaţupuŋ uwoona ţi nji ţañ. 18 Woli uwoona ţi nji nawin kë dla la mndëm mi uleef naan, kë woli dla mndëm mi anyilnuŋ, kawo ñaaŋ i manjoonan, anwooŋ naŧool. 19 Moyiŧ aanwulan Bgah i? Kë nin aloŋ ţi an aşë wo aanji do uko bŧi wi bajakuŋ. We ukaaŋ kë nakdo na pfiŋën ba?» 20 Kë bañaaŋ başë ŧeema aji: «Iwo na unŧaayi. In aklaaŋ pfiŋu ba?» 21 Kë Yeŧu aŧeem baka aji: «Ddola mlagre mloolan, kë naşë ñoŋar. 22 Moyiŧ aţu'an pwala kaŧëmp kë paşë wo paanwoona du a, pawoona du bateem nja, kë naşë ji nawalan ñaaŋ kaŧëmp ţi unuur wi pnoorfën. 23 Hënkuŋ, naji nawalan ñaaŋ kaŧëmp ţi unuur wi pnoorfën kë uunwo uko wi Bgah bi Moyiŧ baneenanuŋ. Kë hum di di nahilanuŋ kadeebaţëraan ţiki djeban ñaaŋ bŧi ţi unuur wi pnoorfën? 24 Nawutan kado kawayëş jibi nawinaruŋ uko, nadoon kawayëş na manjoonan.»
Yeŧu awoha Kriŧtu i?
25 Wal mënţ bañaaŋ baloŋ biki Yeruŧalem bawo ţi phepar aji: «Mënţ i i baklaaŋ pfiŋ i? 26 Kë aşë wo awi, aţup ţi kadun ki bañaaŋ, baanjaka nin uko uloŋ. Om baweek biki nja başal aji awo Kriŧtu na manjoonan? 27 Kë un ŋşë me dko di ñaaŋ i awoonuŋ; woli Kriŧtu abi, nin aloŋ aankme dko di awoonuŋ.» 28 Kë Yeŧu, anhumuŋ du Katoh Kaweek ki Naşibaţi aşë huuran aji: «Naji name'ën abot ame dko di nwoonuŋ. Nji mëmbi bi bdidi naan, anwooŋ manjoonan ayilnuŋ. Naamme'a, 29 kë nji nşë me'a ţiki dwoona du a, kë ul ayilnuŋ.» 30 Bado na pmoba wal mënţ, kë nin aloŋ aşë wo aambana ban ţiki wal wi nul uundobi ban. 31 Kë ţi bañaaŋ banwooŋ da, baŧum bafiyaar Yeŧu aşë ţiini aji: «Woli Kriŧtu aluŋ abi, adola iko iññoŋarënuŋ impeli yi i akdoluŋ i?» 32 Bafariŧay baŧiink kë bañaaŋ bakŋur ŋuran uko mënţ ţi Yeŧu, kë baţeŋan baweek na bafariŧay başë yil bayeŋ bamoba. 33 Kë Yeŧu aşë ji: «Dwo na an ŋwal ŋntiinku kak, kaşë kakak du anyilnuŋ. 34 Naluŋ kado kala'ën bë naankwinën; kë dko di nji kawooŋ, naankhil pbi da.» 35 Bayuday bahepar ţi pŧoof pi baka aji: «Ţuŋ di di akyaaŋ kë ŋënkwina? Aya du bayiţ nja banwayşëruŋ du banwooŋ baanwo bayuday kaşë kajukan banwooŋ baanwo bayuday i? 36 We wi aŋaluŋ pţup hënk wi ajakuŋ: “Naluŋ kado kala'ën bë naankwinën; kë dko di nji kawooŋ naankhil pbi da.”»
Meel manjaaŋ manwul ubida
37 Ţi unuur ubaañşaani unwooŋ unuur uweek wi ufeŧtu, Yeŧu anaţ aşë huuran aji: «Woli udaan uţij ñaaŋ, abiin ţi nji, ñaaŋ anfiyaarnuŋ, 38 adaanan. Ulibra wi Naşibaţi uji: “Meel mnŧum manjaaŋ manwul ubida manluŋ kado kapënna ţi a ji ukumpëş.”» 39 Yeŧu aţiiniyaan ţiiniyaan wal mënţ Uhaaş wi Naşibaţi wi banfiyaaruluŋ bawooŋ biki kabi kayeenk. Naşibaţi aandobi wul Uhaaşul wal mënţ ţiki aando bi dëman Yeŧu.
Blaţar ţi uko wi Yeŧu
40 Bañaaŋ baloŋ ţi pnŧuk, wi baŧiinkuŋ uko wi Yeŧu ajakuŋ aşë ji: «Na manjoonan ñaaŋ i awooŋ Naţupar Naşibaţi!» 41 Baloŋ baji: «Awo Kriŧtu!» Kë baloŋ bakji: «Kriŧtu awo i kapënna Galilay i? 42 Baampiiŧ ţi Ulibra wi Naşibaţi aji Kriŧtu awo i pntaali pi Dayiţ kapënna Betleyem ubeeka wi Dayiţ i?» 43 Wal mënţ kë bañaaŋ başë wo ţi plaţar ţi uko wi Yeŧu. 44 Baloŋ ţi baka baŋal pmoba, kë nin aloŋ aşë wo aampafa paf kañen. 45 Bayeŋ bakak du baţeŋan baweek na bafariŧay, kë bukuŋ başë hepar baka uko unkayi kë baanţij Yeŧu. 46 Kë baŧeem baka aji: «Nin ñaaŋ aambaaŋ kaţiiniyaara ji a.» 47 Kë bafariŧay başë ji na baka: «Naŋal kaji aguuran an kak? 48 Aloŋ ţi baweek biki nja këme ţi bafariŧay afiyaara i? 49 Kë pnŧuk pi bañaaŋ pankţaşuluŋ paşë wo paamme Bgah bi Moyiŧ, pafëpanaa.» 50 Wal mënţ kë aloŋ ţi bafariŧay i katim kawooŋ Nikodem ambiiŋ aya du Yeŧu aşë ji na baka: 51 «Bgah bi nja badinan baji ñaaŋ aduknaana bë baandun aŧiinka kame uko wi adoluŋ i?» 52 Kë baŧeema aji: «Iwi kak iwo i Galilay i? Tenan bnuura, iwin kë mënţ du Galilay di di Naţupar Naşibaţi akpënnuŋ.» 53 Kë başë ţiiş andoli du katohul.
Yeŧu na ñaaţ anjubanuŋ pjuban pi piinţ
1 Kë Yeŧu aşë ya du Pnkuŋ pi Mnoliwera. 2 Na nfa kub kë aşë kak du Katoh Kaweek ki Naşibaţi, kë bañaaŋ bŧi bakbi'a bi du a. Aţo, aşë jun pjukan baka. 3 Kë bajukan Bgah na bafariŧay başë ţija ñaaţ aloŋ i bamobuŋ kë akpiinţ na ñiinţ anwooŋ aanwo ayinul. Babi anaţana ţi pŧoof pi bañaaŋ, 4 aşë ji na Yeŧu: «Najukan, bamob ñaaţ i kë akpiinţ na ñiinţ anwooŋ aanwo ayinul. 5 Kë Moyiŧ aşë ji na nja ţi Bgah aji baaţ mënţ bawo katap baka mnlaak badoo bakeţ. Kë iwi, we wi işaluŋ ţi uko mënţ?» 6 Baţiini ţiini haŋ kaţaawanaana, kahilna kaka uko wi baktaparuli bţup. Kë Yeŧu aşë juţ apiiŧ ţi mboş na pkoñ. 7 Jibi bakheparaaruluŋ hepar, kë Yeŧu aşë heŧ aji na baka: «Anwooŋ aambaaŋ kajubanaara ţi an, atapana plaak uŧeek.» 8 Wi ajakuŋ haŋ aşë kak ajuţ apiiŧ ţi mboş. 9 Wi bañaaŋ bukuŋ baŧiinkuŋ uţup waŋ bajun abuyëşaana aloolan aloolan, ajunna bantohi. Yeŧu kë aduka aloolan na ñaaţ ţañ, kë anaţ ţi kadunul. 10 Yeŧu aheŧ wal mënţ aşë ji na a: «Banţijiiŋ ţi bawo ţuŋ ba? Nin aloŋ aanji iwo i kakeţ?» 11 Kë aŧeem aji: «Nin aloŋ Naweek.» Kë Yeŧu akak aji na a: «Nji kak, mënkji kë iwo i kakeţ. Yaan na bgahu, işë iţañan pjuban.»
Yeŧu bjeehi bi umundu
12 Yeŧu akak aţiini na bañaaŋ aji na baka: «Nji, dwooŋ bjeehi bi umundu, ñaaŋ ankţaşnuŋ, aankdo kapoş ţi bdëm, aka bjeehi banjaaŋ bawul ubida.» 13 Kë bafariŧay başë ji na a: «Iwi, iji kţupar uleefu, ŋënhinan kadinan kë uko wi ikţupuŋ uwo manjoonan.» 14 Kë Yeŧu aşë ŧeem baka aji: «Woli ddoo ţupar uleef naan, uko wi nji kaţupuŋ ujoonani, nji dme dko di nwoonuŋ abot ame di nji kayaaŋ, kë an naşë wo naamme dko di nwoonuŋ na di nji kayaaŋ. 15 An, naji nawayëş ji bañaaŋ bajën, nji, mënji kawayëş nin ñaaŋ. 16 Kë woli dbi wo i kawayëş, pwayëş pi naan paji pajoonan, ţiki mënţ nji ţañ nji kawayëşuŋ, Paapa anyilnuŋ awo na nji. 17 «Bapiiŧ ţi Ulibra wi Bgah bi nan aji banuma bañaaŋ batëb kadiimanaan kë uko unţupuŋ ujoonani. 18 Nji dţupar uleef naan, kë Paapa anyilnuŋ abot aji ţuparaan.» 19 Bahepara wal mënţ aji: «Şaaş awo ţuŋ ba?» Kë aŧeem baka aji: «Naamme'ën abot awo naamme Paapa! Woli name'ën lah, name kak Paapa.» 20 Yeŧu aţiini haŋ wi akjukanuŋ bañaaŋ du dko di Katoh Kaweek ki Naşibaţi di bajaaŋ bawatna itaka. Kë nin aloŋ aammoba, ţiki wal wi nul uundobi ban. 21 Yeŧu akak aji na baka: «Dya, kë naşë luŋ kado kala'ën, naluŋ kakeţ na ipekadu yi nan. Naanhil pya dko di nji kayaaŋ.» 22 Kë başë ji wal mënţ: «Wom aŋal ŋal kafiŋ uleeful wi ajakuŋ dko di akyaaŋ ŋënhil kaya da.» 23 Kë Yeŧu aşë ji na baka: «An nawo biki mboş, kë nji nşë wo i baţi. Nawo biki umundu wi, nji kë nşë wo mënwo i wa. 24 Uko waŋ ukaaŋ kë nji na an, nakeţ na ipekadu yi nan. Dţupan, woli naanfiyaar kë nji dwooŋ, Anwooŋ, nakeţ na ipekadu yi nan.» 25 Kë başë hepara aji: «Iwo in ba?» Kë aŧeem baka aji: «Dwo ñaaŋ i nji kajakanaŋ undiimaan aji dwoo. 26 Dka iko iŧum yi pţup ţi an inkţuuŋ nji naduknaanaa. Uko wi njaaŋ kaţup bañaaŋ dŧiinkna wa du anyilnuŋ, ul anwooŋ ñaaŋ i manjoonan.» 27 Baanyikrën wal mënţ kë aţiiniyaan ţiiniyaan Aşin. 28 Akak aji na baka: «Woli naluŋ adeeŋ Abuk Ñiinţ, naşë me kë nji dwooŋ anwooŋ abot awo mënji kado nin uko uloŋ bdidi naan, dji kaţup uko wi Paapa ajukanaanuŋ. 29 Kë anyilnuŋ abot awo na nji, aanwutën kë nwo aloolan. Dji kado uko wi aŋaluŋ unuur unjinţi.» 30 Wi Yeŧu akţupuŋ haŋ kë bañaaŋ baŧum başë fiyaara.
Banwooŋ babuk Abraham na manjoonan
31 Yeŧu aji na bayuday banjakuŋ bafiyaara: «Woli namëban uko wi nţupanaŋ bnuura, nawo baţaşar naan na manjoonan. 32 Naluŋ kame manjoonan, manjoonan mënţ mankluŋ kabuuranan.» 33 Kë baŧeema aji: «Ŋwo biki pntaali pi Abraham, kë nin ñaaŋ aambaaŋ kajuuknţënun. Hum di di ihiluŋ kaji ŋluŋ kabuur?» 34 Kë aşë ŧeem baka aji: «Dţupan na manjoonan, ñaaŋ anjaaŋ ado buţaan, pekadu daji dakakana awo nalempar da kabot kajuuknţëna. 35 Nalemp aanji wo ţi katoh te mnţo, abuk ka ajaaŋ awo da te mnţo. 36 Woli Abuk Naşibaţi abuuranan, nabuur na manjoonan. 37 Dme kë nawo biki pntaali pi Abraham, kë naşë la pfiŋën, ţiki ŋţup ŋi naan ŋaanhil pban du iţëban. 38 Dji kaţup uko wi nwinuŋ du Paapa, kë an nakdo uko wi naŧiinknuŋ du aşinan.» 39 Kë başë ŧeema aji: «Abraham awooŋ aşinun.» Kë aji na baka: «Woli nawo lah babuk Abraham, nado kado iko yi ajaaŋ ado. 40 Hënkuŋ kë naşë ŋal pfiŋën nji nwooŋ ñaaŋ ankţupanaŋ manjoonan mi nŧiinknuŋ du Naşibaţi, Abraham aando haŋ. 41 Kë an, naşë ji nado iko yi aşinan akdoluŋ.» Kë baji na a: «Un, aninun aanwo naţuunk, aşinun awoha aloolan: Naşibaţi a.» 42 Kë aŧeem aji: «Woli Naşibaţi awooŋ lah aşinan, naŋalën ţiki dwoona du a abi, mëmbi bi bdidi naan, ul ayilnuŋ. 43 We ukaaŋ kë naanji nate ŋţup ŋi naan ba? Naanhil hil pŧiink uko wi nţupanaŋ. 44 Nawo babuk Unŧaayi Uweek kë iko yi aşinan aŋaluŋ yi yi najaaŋ naŋal kado kado. Du ujuni adobi woha wo nafiŋ bañaaŋ, nin aanji ţup manjoonan, ţiki manjoonan maanwo ţi a. Woli aţilan aji do uko wi awooŋ, ţiki awo naţilan abot awo aşin baţilan. 45 Nji dji kaţupan manjoonan ukaaŋ naanfiyaarën. 46 Ahoŋ ţi an ahilanuŋ hilan kadiiman kë djubani? Kë woli dţup manjoonan, we ukaaŋ kë naanfiyarën ba? 47 Ñaaŋ anwooŋ i Naşibaţi aji ŧiink ŋţup ŋi nul; naanji naŧiink ŋa, ţiki naanwo biki Naşibaţi.» 48 Kë bayuday başë ŧeem Yeŧu aji: «Ŋënfaŋuŋ i, wi ŋjakuŋ aji iwo i uŧaak wi Ŧamariya akuţ aji iwo na unŧaayi i?» 49 Kë aŧeem baka aji: «Mënwo na unŧaayi, dji kadëman Paapa, kë an naşë la pkowandënën. 50 Mënkla mndëm pa uleef naan, aloŋ aklaaŋ ma pa nji, ul akluŋ kayuuj uko wi ñaaŋ andoli awooŋ na manjoonan. 51 Dţupan na manjoonan, woli ñaaŋ amëban uţup wi naan nin aankkeţ.» 52 Kë bayuday başë ji na a: «Ŋyikrën hënkuŋ na manjoonan kë iwo na unŧaayi. Abraham akeţi, kë baţupar Naşibaţi bakak akeţ, kë işë ji: “Woli ñaaŋ amëban uţup wi naan, aankkeţ nin.” 53 Idëm apel Abraham aşin nja ankeţuŋ i na baţupar Naşibaţi bankaaŋ akeţ? Işal aji iwo in ba?» 54 Kë Yeŧu aşë ŧeem baka aji: «Woli ddëman dëman lah bkow naan nji ţi uleef naan, mndëm mi naan maankwo nin ukoolan. Paapa akdëmanaanuŋ, ul i najaaŋ naţiiniyaan kaji awo Naşibaţi inan, 55 aşë wo naamme'a. Nji, kë nşë me'a. Woli dji lah mëmme'a kawo naţilan ji an. Kë nşë me'a abot amëban uţup wi nul. 56 Abraham aşinan alilan maakan wi aşaluŋ kë aluŋ kawin unuur wi naan. Awin wa aşë wo ţi mnlilan.» 57 Kë bayuday başë ji na a wal mënţ: «Iindo ka ka ŋşubal iñeen kañeen aşë ji iwi iwinuŋ Abraham!» 58 Kë aji na baka: «Dţupan na manjoonan, ji Abraham abi ado kawo, nji dwoo.» 59 Bajej wal mënţ mnlaak katapa, kë aşë mena apën ţi Katoh Kaweek ki Naşibaţi.
Pjeb pi nakuul i kabuka
1 Yeŧu awo ţi bgah aşë win ñiinţ aloŋ ambukiiŋ awo nakuul. 2 Kë baţaşarul başë hepara aji: «Najukan, we ukaaŋ kë ñiinţ i abuka awo nakuul ba? In ajubanuŋ ba? Ul a këme bajugul?» 3 Kë Yeŧu aŧeem aji: «Mënţ pjuban pi nul pa këme pi bajugul, uko mënţ uwo wo, iko inuura yi Naşibaţi ajaaŋ ado ihilna iwinana ţi a. 4 Wi unuur uhumuŋ, ŋwo i kado ulemp wi anyilnuŋ, uŧejan ubi wi nin ñaaŋ awooŋ aankhil ulemp. 5 Jibi nhumuŋ ţi umundu, dwo bjeehi bi wa.» 6 Wi Yeŧu ajakuŋ haŋ, aşë tëfjër mboş anag akër ţi këş ki nakuul, 7 aşë ji na a: «Yaan iñowa du dko di meel di badoluŋ du Ŧilowe.» (Ŧilowe dawooŋ nayili.) Kë nakuul ayaa, aya añowa, aşë wugşa, abi kawin win bnuura. 8 Bakinţul na bañaaŋ banjonuŋ kawina kë aji ñehan baji wal mënţ: «Mënţ i ajaaŋ aţo bñehan du i?» 9 Baloŋ baji: «Ul a.» Kë baloŋ baji: «Mënţ ul a, anaama naam.» Ul kë aşë ji: «Nji a.» 10 Kë başë hepara aji: «Ido do hum adoo kak awin ba?» 11 Kë aŧeem aji: «Ñiinţ i bajaaŋ bado Yeŧu añowanuŋ mboş na işuuj akërën ţi këş aşë ji na nji nya nñowa du Ŧilowe, kë nya añowa, aşë bi kawin win.» 12 Kë başë ji na a: «Ñiinţ mënţ awo ţuŋ?» Kë aŧeem aji: «Mëmmee.» 13 Bajej wal mënţ ñiinţ añooţ du bafariŧay. 14 Kë unuur wi Yeŧu aşaaŋ añowan mboş na işuuj ajebanaan nakuul kë uşë wo unuur wi pnoorfën wi bayuday. 15 Uko waŋ ukaaŋ kë bafariŧay bahepar ñiinţ uko wi adoluŋ adoo win hënkuŋ. Kë aŧeem aji: «Akërën mboş ţi këş, kë nya añowa abi kawin win.» 16 Bafariŧay baloŋ kë başë ji: «Ñaaŋ andoluŋ uko wi aanwo i Naşibaţi ţiki aanji ţaş uko wi bgah bajakuŋ ţi uko wi unuur wi pnoorfën.» Kë baloŋ baji: «Hum di di ñaaŋ nado buţaan ahilanuŋ kado iko iñoŋarënaan mënţ.» Baankak aŧiinkar wal mënţ. 17 Wi wi başaaŋ aji kak na nakuul i bajebanuŋ: «Kë iwi, we wi işaluŋ aji awoo, wi adoluŋ kë ikak awin?» Kë aji na baka: «Awo Naţupar Naşibaţi.» 18 Baanfiyaar kë abi wo nakuul aşë win hënkuŋ. Uko waŋ ukaaŋ kë badu bajugul. 19 Bahepar baka aji: «I awo abukan i? Ujoonan kë abuka buka awo nakuul i? Hum di di ahilanuŋ keeri awin?» 20 Kë bajugul baŧeem aji: «Ŋme kë awo abukun, akuţ ame kë abuka buka awo nakuul. 21 Kë jibi adoli ado win hënkuŋ, na anjebanuluŋ, ŋëmmee. Naheparëna, awo naweek, aţupan bdidi'ul.» 22 Bajugul baţiini haŋ ţiki baţi baweek biki baka, banŧiinkaruŋ aji badook ñaaŋ ankjakuŋ kaji Yeŧu awooŋ Kriŧtu, ţi katoh kañehanaani. 23 Uko waŋ ukaaŋ kë bajugul baji: «Awo naweek, naheparëna.» 24 Bafariŧay bakak adu ñiinţ ambiiŋ awo nakuul aji na a: «Dëmaan Naşibaţi, iţup manjoonan! Un, ŋme kë ñiinţ mënţ awo nado buţaan.» 25 Kë aşë ŧeem baka aji: «Mëmme me awo nado buţaan, dmeha uko uloolan: dbi wo nakuul, aşë win hënkuŋ.» 26 Kë başë hepara aji: «We wi adoliiŋ? Hum di di adoluŋ kë ido kak awin?» 27 Kë aŧeem baka aji: «Ddo bi ţupan kë naandi pŧiinkën. We ukaaŋ kë nakak aŋal kaŧiink? Wom nakak aŋal kakak baţaşarul?» 28 Kë başë jun pkara aji: «Iwi iwooŋ naţaşar ñiinţ mënţ; un, ŋwo baţaşar Moyiŧ. 29 Un ŋme kë Naşibaţi aţiini na Moyiŧ; kë i, ŋëmme dko di awoonuŋ.» 30 Kë aŧeem baka aji: «Uko waŋ uñoŋarëni: naamme dko di awoonuŋ, kë aşë dolën kë nkak awin! 31 Ŋme kë Naşibaţi aanji ŧiink bado buţaan, kë woli ñaaŋ aji dëmana abot ado uko wi aŋaluŋ aji ŧiink uŋ mënţan. 32 Nin ñaaŋ aambaaŋ kaŧiinka kë baji ñaaŋ aloŋ ajeban nakuul i kabuka. 33 Woli ñiinţ mënţ aanwo lah i Naşibaţi, aankhil pdo nin uko uloŋ.» 34 Kë bafariŧay başë ji na a: «Ibuka abi wo wo bŧi ţi buţaan aşë ji ijukanun.» Wi wi başaaŋ adooka kë apën ţi katoh kañehanaani. 35 Yeŧu aŧiink kë badooka. Aya awina aşë hepara aji: «Ifiyaar Abuk Ñiinţ i?» 36 Kë aŧeema aji: «Naweek, in awooŋ Abuk Ñiinţ nhilna nfiyaara?» 37 Kë aji na a: «Iwina, ul akţiiniiŋ na iwi hënk.» 38 Wal mënţ kë ñiinţ aşë ji: «Ajugun, dfiyaari» aşë ŋup adëmana. 39 Yeŧu akak aji: «Nji dbi bi ţi mboş pa pwayëş, banwooŋ baankwin bahilna bado kawin, bankwinuŋ bakak bakuul.» 40 Bafariŧay baloŋ banwooŋ na a baŧiink uko wi aţupuŋ aşë hepara aji: «Un kak, ŋwo bakuul i?» 41 Kë aŧeem baka aji: «Woli nawo lah bakuul, baankji naduknaanaa; kë jibi najakuŋ aji nawin, nakeer nhum nduknaana.»
Uhoñ wi Nayafan na batani bi nul
1 Yeŧu akak aţiini aji: «Na manjoonan dţupan, ñaaŋ anwooŋ aaneejna plëman pi kampen aşë lutna umbaŋ uloŋ awo nakiij, nalaŧ. 2 Anneejnuŋ plëman kë aşë wo nayafan i ŋkaneel. 3 Nayeŋ aji haabëşa plëman, ŋkaneel ŋabot kaŧiinka, aji du undoli ţi katim ki wa kapënan bdig. 4 Woli apënan ŋkaneel bŧi ŋanwooŋ ŋi nul, aji jot ŋa kadun, ŋaşë kaţaşa ţiki ŋayikrën pdiim pi nul. 5 Ŋkaneel mënţ ŋaankţaş nin ñaaŋ nampaţi, ŋaji ŋaţëp ţëp kaţi'a ţiki ŋaanyikrën pdiimul.» 6 Yeŧu ahoñ na baka haŋ kë başë wo baamme uko wi aŋaluŋ pţup baka. 7 Wi wi akaaŋ aţiini na baka aji: «Na manjoonan, dţupan nji dwooŋ plëman pi ŋkaneel ŋakţëpnuŋ. 8 Banjotnuŋ kadun bŧi bawo bakiij, na balaŧ, kë ŋkaneel ŋaankŧiink baka. 9 Nji dwo plëman. Woli ñaaŋ aţëpna ţi nji aluŋ kabuur, aluŋ kado kaneej kakak kapën kaşë kaka uko ude. 10 Nakiij abi bi ţañ pa pkiij, kafaal, kabot kaŧok ŧokan. Nji dbi pa bañaaŋ baka ubida, bakak baŧum na wa. 11 «Nji dwo nayafan nanuura, anjaaŋ awul ubida wi nul pa ŋkaneel ŋi ŧul. 12 Ñaaŋ i balukuŋ luk kë abi byafan, anwooŋ aanwo ajug ŋkaneel, awinle uñiiŋ aji ţi kaduk ŋa, uñiiŋ kamob ŋloŋ kawayëş batani. 13 Aji do haŋ ţiki awo ñaaŋ i balukuŋ luk pa abi alemp, aanji ţaaf ŋkaneel. 14 Nji dwo nayafan nanuura, ame ŋkaneel ŋi naan, kë ŋabot ame'ën 15 jibi Paapa ame'ënuŋ kë mbot ame'a. Dwul ubida wi naan pa ŋkaneel ŋi naan. 16 Dka ŋkaneel ŋloŋ ŋanwooŋ ŋaanwo ţi kampen ki. Ŋaŋ mënţ kak dwo i kaţij ŋa, ŋaluŋ kaŧiink pdiim pi naan. Batani başë bawo bloolan, nayafan abot awo aloolan. 17 Paapa aŋalën ţiki dwul ubida wi naan; aşë luŋ kayeenk wa. 18 Nin ñaaŋ aanji yeenkën ubida, nji ţi uleef naan djaaŋ kawul wa. Dka mnhina mi pwul wa, kakuţ kayeenk wa. Uko waŋ wi wi Paapa aţu'ënuŋ pdo.» 19 Ŋţup ŋi Yeŧu aţupuŋ ŋaţu kë bayuday baankak aŧiinkar. 20 Baŧum baji: «Awo na unŧaayi, ayilaa. We ukaaŋ kë nakŧiinka ba?» 21 Kë baloŋ baji: «Ŋţup ŋi ŋaanwo ŋi ñaaŋ anwooŋ na unŧaayi. Kë unŧaayi, uhil kahaabëş bakuul këş i?»
Ñaaŋ i Yeŧu awooŋ na manjoonan
22 Ufeŧtu unjaaŋ uleşan unuur wi Katoh Kaweek ki Naşibaţi kakaaŋ akak ayiman uwo wal mënţ du Yeruŧalem. Uwo ţi wal wi ujonţ. 23 Yeŧu añaay na Katoh Kaweek ki Naşibaţi du dko di bajaaŋ bado Uşaala wi Ŧalomoŋ. 24 Bayuday babi afooya aşë ji na a: «Ibaa do kanooranun te lum ba? Woli iwo Kriŧtu, kţupun bañaaŋ bŧi kame.» 25 Kë Yeŧu aŧeem baka aji: «Dţupan kë naanfiyaarën. Iko yi nji kadoluŋ pa Paapa iyuuj kë dwo a; 26 kë an naşë wo naanfiyaarën ţiki naanwo ŋkaneel ŋi naan. 27 Ŋkaneel ŋi naan ŋaji ŋaŧiink pdiim pi naan; dme ŋa kë ŋabot aji ŋaţaşën. 28 Dwul ŋa ubida wi mnţo, ŋaankkeţ nin kë nin aloŋ aankŧehën ŋa. 29 Paapa anţennuŋ iko mënţ adëm apel iko bŧi. Nin aloŋ aanhil kaŧeh uko uloŋ ţi iñen yi nul. 30 Nji na Paapa ŋwo ñaaŋ aloolan.» 31 Wal mënţ kë bayuday başë kak aţij mnlaak ptapa. 32 Kë aşë ji na baka: «Ddo iko inuura iŧum kë nawini, iko mënţ iwoona du Paapa, kahoŋ ţi ya kakaaŋ kë naŋal ptapën mnlaak ba?» 33 Kë başë ŧeema aji: «Mënţ uko unuura ukaaŋ kë ŋktapu mnlaak, ikar kar Naşibaţi ukaaŋ, iwo ñaaŋ najën ţañ aşë jej bkowu aţu Naşibaţi.» 34 Kë Yeŧu aşë ŧeem baka aji: «Jëm Naşibaţi aji ţi ulibra wi nul: “Dji: Nawo başibaţi?” 35 Ŋme kë ñaaŋ aanhil plaţ uko umpiiŧaniiŋ ţi Ulibra wi Naşibaţi. Kë wi aduuŋ biki uţup wi nul ukţiiniyaanuŋ aji başibaţi, 36 we ukaaŋ kë naji dkar Naşibaţi Paapa wi njakuŋ aji dwo Abukul, nji i adatuŋ ayil ţi umundu. 37 Woli mënkdo iko yi Paapa ajaaŋ ado, nawutan kafiyaarën. 38 Kë woli ddo ya, woli naando fiyaarën, nafiyaaran iko yi njaaŋ kado, nahilna nayikrën uloolan kë Paapa awo ţi nji, kë nji mbot awo ţi Paapa.» 39 Bakak ado na pmob Yeŧu, kë aşë buur baka. 40 Akak aya du plut pi bdëk bi Yordan, du dko di Yowan abiiŋ abatŧaaraan, aţo da. 41 Bañaaŋ baŧum babi du a aji: «Yowan aandiiman nin uko uloŋ uñoŋarënaan, kë uko bŧi wi aţupuŋ ţi ñiinţ i uşë joonan.» 42 Bañaaŋ baŧum bafiyaara ţi dko di awooŋ mënţ.
Pkeţ pi Laŧaar
1 Ubi ka ñiinţ aloŋ ammaakuŋ i katim kawooŋ Laŧaar. Abi wo du ufëţ wi Betani ul na Mariya na Marta baweekul baaţ. 2 Mariya abiiŋ ajeeş ukëra ulil pţëkëñ ţi ihoţ yi Ajugun abot awent ya na uwel wi nul. Laŧaar aţa Mariya mënţ amaakuŋ hënk. 3 Baaţ batëb banţaaruŋ bukuŋ bayil aloŋ du Yeŧu, kë aya ji na a: «Naweek, nanohu i imaganuŋ amaaki.» 4 Wi Yeŧu aŧiinkuŋ uko mënţ aşë ji: «Pmaak pi Laŧaar paankfiŋa, amaak maak bañaaŋ bahilna bawin mndëm mi Naşibaţi, na mi Abukul.» 5 Yeŧu amagan bi Marta, Mariya, na Laŧaar aţa baka. 6 Kë wi aşaaŋ aŧiink pmaak pi Laŧaar, aţo dko di awooŋ ŋnuur ŋtëb kak, 7 abaa ji na baţaşarul: «Najoh ŋkak uŧaak wi Yuda.» 8 Kë başë ŧeema aji: «Najukan, du ŋnuur ŋanţëpuŋ, bayuday baŋal katapu mnlaak kafiŋ, kë işë ŋal pkak da.» 9 Kë aşë ji na baka: «Kapëna nfa te utaakal ŋwoori ŋaanwo iñeen na ŋtëb i? Ankpoşuŋ na pnak aanji hubta ţi uko uloŋ ţiki aji win bjeehi bi umundu wi. 10 Kë anşaaŋ aji poş na uŧejan, aji hubta ţiki bjeehi baanwo ţi a.» 11 Wi Yeŧu aţupuŋ baka uko wuŋ aşë kak aji: «Laŧaar nanohun aŋoyënţi, kë nşë ya kahuma.» 12 Baţaşarul kë baŧeema aji: «Ajugun, jibi akŋoyënţuŋ ŋoyënţ ţañ, akeer ajeb.» 13 Yeŧu aţiiniyaan uko wi pkeţ pi Laŧaar kë başë nuŋ kë aji Laŧaar aŋoyënţ ŋoyënţ. 14 Kë aşë jinţëlëş baka bţup aji na baka «Laŧaar akeţi. 15 Dlilan pa an, wi nwooŋ mëmmaar pkeţ pi nul, nahilna nafiyaarën. Nabiin ŋya du a.» 16 Kë Toma, i bajaaŋ badu kbet, aşë ji na baţaşar Yeŧu bandukiiŋ: «Nabiin kak ŋya, ŋhilna ŋkeţ na najukan i nja.»
Yeŧu awooŋ pnaţa ţi pkeţ
17 Wi Yeŧu abanuŋ, aţënk kë udo bi do ŋnuur ŋbaakër wi bamoyuŋ Laŧaar. 18 Ufëţ wi Betani uunlowiir na Yeruŧalem, uya pban ŋkilometër ŋwajanţ; 19 kë bayuday baŧum başë bi pwin bi Marta na Mariya na puum pi aţa baka kabot katëŋţën baka. 20 Wi Marta aŧiinkuŋ kë Yeŧu añogi, aşë naţa kaya kayit na a, kë Mariya aşë duka aţo du katoh. 21 Marta aji na Yeŧu: «Ajugun, woli iwo lah ţi, aţa naan aankkeţ! 22 Kë nşë me kë ţi dko di ŋwooŋ di hënkuŋ, uko bŧi wi ikñehanuŋ Naşibaţi, awulu wa.» 23 Kë aji na a: «Aţa'u anaţa ţi pkeţ.» 24 Kë akak aji na a: «Dme kë ţi uba umundu, wal wi bañaaŋ bŧi baknaţiiŋ ţi pkeţ, ul kak anaţa ţi pa.» 25 Kë akak aji na a: «Nji dwooŋ pnaţa ţi pkeţ, nji kak dwooŋ ubida. Anfiyaarnuŋ, woli adoo keţ, aluŋ kaka ubida. 26 Kë ñaaŋ ankaaŋ ubida abot afiyaarën nin aankkeţ. Ifiyaar uko waŋ i?» 27 Kë aŧeema aji: «Aa Ajugun, dfiyaar kë iwooŋ Kriŧtu Abuk Naşibaţi, anwooŋ i pbi ţi umundu wi.»
Ŋwooni ŋi Yeŧu
28 Wi Marta aţiiniiŋ haŋ, aşë ya du Mariya i baţaaruŋ ahoopaţa aji: «Najukan abii, adu'u.» 29 Wi Mariya aŧiinkuŋ uko waŋ aşë naţa aŧaran apën aya du Yeŧu. 30 Kë Yeŧu aşë wo aandobi neej du ufëţ ahum du dko di ayitiiraanuŋ na Marta. 31 Wi bambiiŋ awo ţi katoh na Mariya atëŋţëna bawinuluŋ kë aŧaran apën, baţaşa anuŋ kë aya ŋwooni du bhër. 32 Wi Mariya abanuŋ du dko di Yeŧu awooŋ, awina, aşë jot ţi ihoţul aji na a: «Ajugun, woli iwo lah ţi, aţa naan aankkeţ.» 33 Yeŧu awina kë akwooni ul na bañaaŋ bangakandëruŋ na a kë uko mënţ uşë de'a maakan. 34 Ahepar baka dko di bamoyuŋ Laŧaar, kë baji na a: «Ajugun ţaşun, ŋya kayuuju da.» 35 Kë Yeŧu aşë wooni. 36 Bañaaŋ baloŋ kë başë ji: «Natenan jibi aŋaluli.» 37 Baloŋ ţi baka kë başë ji: «Ul anjebanuŋ nakuul, aanhil lah kaneenan Laŧaar akeţ i?»
Pnaţa ţi pkeţ pi Laŧaar
38 Uko mënţ ukak ade Yeŧu maakan kë aşë ya du bhër, bajël jël bhër mënţ ţi pnkuŋ, kë plaak padëŧnuŋ ba. 39 Yeŧu aji: «Napënaan plaak.» Marta naweek Laŧaar kë aşë ji na a: «Ajugun, ajun pţëkëñ, udobi do ŋnuur ŋbaakër ŋi amoynaani.» 40 Kë aŧeema aji: «Mënjaku aji woli ifiyaari kwin mndëm mi Naşibaţi i?» 41 Bapënan plaak, kë Yeŧu aşë kat këş du baţi aji: «Paap, dbeebu wi iŧiinknuŋ. 42 Dme kë ŋnuur bŧi iji kŧiinkën, kë nşë ţiini haŋ pa bañaaŋ banfooynuŋ bahil bafiyaar kë iwi iyilnuŋ.» 43 Wi aţiiniiŋ haŋ aşë huuran maakan aji: «Laŧaar, pënan!» 44 Kë ankeţuŋ apën kë ihoţ na iñen iŧaayana na ilëmënt, kë bkow babooţan na blaañ. Yeŧu aji na baka: «Naŧaayëşana, naşë nawuta aya.» 45 Bayuday baŧum bambiiŋ du uko Mariya abot awin uko wi Yeŧu adoluŋ, bafiyaara. 46 Baloŋ kë başë ya du bafariŧay pţup baka uko wi adoluŋ. 47 Kë Baţeŋan baweek na bafariŧay başë duur du uruha wi baka aşë ji: «We wi ŋbaaŋ ado ba? Ñiinţ i aji do iko iñoŋarënaan iŧum. 48 Woli ŋwuta kë akdo iko yi akdoluŋ yi, bañaaŋ bŧi kafiyaara, baromeŋ babi ŧok dko dyimanaan di nun na uŧaak wi nja.» 49 Aloŋ ţi baka i katim kawooŋ Kayif anwooŋ uşubal mënţ naşih i baţeŋan aji na baka: «Naamme nin uko uloŋ! 50 Naanwin kë uko mënţ uwo unuura pa an i? Ñaaŋ aloolan akeţar bañaaŋ bŧi. Hënk başë bawut pŧok uŧaak bŧi.» 51 Uko wi Kayif akţupuŋ uumpënna ţi a; kë jibi awooŋ uşubal mënţ naşih i baţeŋan, aţup ji Naţupar Naşibaţi kë Yeŧu akeţar bayuday bŧi. 52 Mënţ pa bukal ţañ baka, ma pyitrën babuk Naşibaţi bŧi banwayşëruŋ bawo baloolan. 53 Unuur mënţ wi wi baweek biki bayuday bajunuŋ pla pfiŋ Yeŧu. 54 Ukaaŋ kë aţañan pdo kaya kabi ţi pŧoof pi bayuday. Aya du uŧaak uloŋ uññoguŋ pndiiş du ubeeka wi Efrayim, aţo da na baţaşarul. 55 Ufeŧtu wi Mbuur wi bayuday uñogi kë bañaaŋ baŧum başë woona ŋfëţ ŋi baka abi ţi Yeruŧalem kado bañow ji ufeŧtu ubi uban. 56 Bala Yeŧu, kë wi bawooŋ du Katoh Kaweek ki Naşibaţi andoli aji hepar aŧënţul me aşal kë abi ţi ufeŧtu. 57 Kë baţeŋan baweek na bafariŧay başë ji ñaaŋ awinle Yeŧu awo i kaţup baka bahilna bamoba.
Du Betani
1 Wi Ufeŧtu wi Mbuur udukiiŋ ŋnuur paaj, Yeŧu aban Betani, di Laŧaar i abiiŋ anaţan ţi pkeţ afëţuŋ. 2 Badu da Yeŧu pyoban, Marta awo ţi ulemp, kë Laŧaar ţi uleeful aţo na Yeŧu. 3 Mariya ajej pŧoof pi ulitru wi ukëra uloŋ ulil pţëkëñ untamuŋ maakan, akër ihoţ yi Yeŧu abot awent ya na uwel wi nul. Kë pţëkëñ plil puŋ paniink katoh. 4 Kë Yudaŧ Iŧkariyot, anwooŋ aloŋ ţi baţaşar Yeŧu, ankbiiŋ kawaapa, aşë ji: 5 «We ukaaŋ kë baanjej ukëra utam maakan wi awaap, unwooŋ itaka iŧum, awul ya bajuuk ba?» 6 Aankţiini ţiini haŋ ţiki aŋal bajuuk, aţiini ţiini ţiki awo nakiij. Kë jibi awooŋ nahank itaka yi bi Yeŧu na baţaşarul, aţaal pdo kajej itaka yi baţu'u luŋ phank kalempaşaana. 7 Yeŧu kë aşë ji na a: «Wutana: ado do haŋ pa unuur wi bakluŋ kaţu'ën du bhër. 8 Bajuuk bawo na an ŋnuur bŧi, kë nji kë nşë wo mënkwo na an ŋnuur bŧi.» 9 Wal mënţ bañaaŋ baŧum babi, wi baŧiinkuŋ kë Yeŧu awo da. Baambi ţañ pa pwin Yeŧu, bakak aŋal kawin Laŧaar i anaţanuŋ ţi pkeţ. 10 Kë baţeŋan baweek başë ŧiinkar aji bafiŋ Laŧaar kak, 11 ul akaaŋ kë bayuday baŧum bakak afiyaar Yeŧu aduk baţeŋan baweek.
Uneej wi Yeŧu du Yeruŧalem ji naşih
12 Wi unuur ujinţuŋ, bañaaŋ baŧum maakan bambiiŋ Ufeŧtu wi Mbuur du Yeruŧalem baŧiink kë baji Yeŧu abi ufeŧtu. 13 Bajej ikën yi mnjaak aşë pën abi pkita, ahuuran aji: «Hoŧana! Bnuura nuura ţi ankmbiiŋ ţi katim ki Ajugun, naşih i Iŧrayel .» 14 Yeŧu awin ubuuru umpoţi aşë dapa wa, jibi upiiŧaniiŋ aji: 15 «Nawutan kalënk, an babuk Ŧiyoŋ: Tenan, naşih i nan abi awi, adapa ubuuru umpoţi.» 16 Uko mënţ baţaşarul baanyikrën wa wal mënţ. Kë wal wi mndëm mi Yeŧu mambiiŋ awinana kë başë leş kë iko mënţ bŧi ipiiŧana ţi a ţi Ulibra wi Naşibaţi kë babot adola ya. 17 Bañaaŋ bambiiŋ awo na Yeŧu wi abiiŋ adu Laŧaar du bhër anaţana ţi pkeţ bawo ţi pkakalëş uko wi bawinuŋ. 18 Bañaaŋ baŧum baŧiink uko uñoŋarënaan wi adoluŋ, ukaaŋ kë babi pwina. 19 Bafariŧay bawo ţi phoopaţër wal mënţ aji: «Nawin kë ŋënhilan da nin uko uloŋ: bañaaŋ bŧi bawo ţi pţaşa.»
Bagrek banŋaluŋ pwin Yeŧu
20 Banwooŋ baanwo bayuday baloŋ bawo wal mënţ ţi bambiiŋ pdëman Naşibaţi ţi wal wi Ufeŧtu wi Mnjeeh. 21 Baya du Filip anwooŋ i ubeeka wi Betŧayida du uŧaak wi Galilay aşë ji na a: «Naweek, ŋŋal kawin Yeŧu.» 22 Filip aya aţup Andre, kë bukal batëb baya aţup Yeŧu. 23 Kë Yeŧu aşë ji: «Wal ubani, wi bakluŋ kawin mndëm mi Abuk Ñiinţ. 24 Na manjoonan, dţupan, woli pbuk pi maaj panjotuŋ ţi mboş paankeţi, paţo ploolan; bë woli pakeţi paji pawul mbuk mnŧum. 25 Ñaaŋ anŋaluŋ ubida wi nul awaaŋ wa, kë anwooŋ aankdëman ubida wi nul ţi mboş aluŋ kaka ubida unwooŋ uunkba. 26 Woli ñaaŋ aŋal plemparaan, awo i kaţaşën; hënk, dko di nji kawooŋ, ul kak aluŋ kawo da. Woli ñaaŋ alemparaan, Paapa kadëmana. 27 «Hënkuŋ uhaaş wi naan uţëla ţëlaa, kë we wi nji kajakuŋ? Dwo i kaji na Paapa abuuranaan ţi wal wi i? A-a, uko waŋ ukaaŋ kë mbii. 28 Paap, dolan bañaaŋ bawin kë katimu kadëmi!» Kë pdiim paşë pënna baţi aji: «Ddo bi dëman ka akak aluŋ kadëman ka.» 29 Ţi bañaaŋ baŧum banwooŋ da aŧiink pdiim, baloŋ baji baŧiink kamparantant, kë baloŋ baji uwanjuŧ uţiiniiŋ na Yeŧu. 30 Kë Yeŧu aşë kak aţiini na baka aji: «Mënţ nji dkaaŋ kë pdiim paŋ paŧiinkanaa, an baka. 31 Hënkuŋ wal wi Naşibaţi akyuujuŋ umundu wi kë uduknaanaa ubani, hënkuŋ bawalan Ŧatana, naşih i umundu wi afëla bdig. 32 Kë nji, wal wi nji kadeeŋaniiŋ, dpul bañaaŋ bŧi babi ţi nji.» 33 Yeŧu aţup ţup wal mënţ jibi akbiiŋ kakeţ. 34 Bañaaŋ baŧeema aji: «Ŋjuk ţi Ulibra wi Naşibaţi kë Kriŧtu aţo te mnţo. Hum di di ihilanuŋ kaji Abuk Ñiinţ awo i kadeeŋana? In awooŋ Abuk Ñiinţ ba?» 35 Kë Yeŧu aji na baka: «Bjeehi bahum nwo na an ŋwal ŋntiinku. Nadoon kapoş wi nahumuŋ nwo na bjeehi, kaţi bdëm babi bawunan: Ankpoşuŋ ţi bdëm aanji me dko di akyaaŋ. 36 Wi nahumuŋ nwo na bjeehi, nafiyaarën ba nahilna nawo bañaaŋ biki bjeehi.» Hënk di di Yeŧu aţiiniiŋ aşë ya na bgahul, aya amena baka.
Ppok pfiyaar Yeŧu
37 Yeŧu ado iko iŧum iñoŋarënaan ţi kadun ki bañaaŋ, kë bawoha wo baanfiyaara. 38 Kë hënk di uko wi Iŧayi Naţupar Naşibaţi ajakuŋ udolaniiŋ, aţiini aji: «Ajugun, in afiyaaruŋ uţup wi nun? In i Ajugun adiimanuŋ mnhina mi nul?» 39 Iŧayi akak aţup uko unkayi kë bañaaŋ mënţ baanhil pfiyaar. Aji: 40 «Naşibaţi adëŧ baka këş adënëţan baka ŋhaaş këş ki baka kahilna kawo kaankwin, ŋhaaş ŋi baka ŋawut kayikrën. Hënk baankkak ţi nji njeban baka.» 41 Iŧayi aţup haŋ ţiki awin mndëm mi Yeŧu abot aţiiniyaan uko wi nul. 42 Kë ţi wal mënţ kak baŧum ţi baweek biki bayuday bafiyaar Yeŧu, kë bafariŧay başaaŋ aka kë baanyuuj wa, bawutna kadook baka du katoh kañehanaani. 43 Bahokan pwinana bnuura ţi bañaaŋ apel pwinana bnuura du Naşibaţi. 44 Yeŧu ahuuran aji: «Ñaaŋ anfiyaarnuŋ, mënţ nji ţi uleef naan ţañ i i afiyaaruŋ, afiyaar kak anyilnuŋ. 45 Kë ñaaŋ anwinnuŋ awin anyilnuŋ. 46 Dbi ţi umundu ji bjeehi, ñaaŋ anfiyaarnuŋ awutna kaduka du bdëm. 47 «Woli ñaaŋ aŧiink ŋţup ŋi naan aşë wo aammëban ŋa, mënţ nji kajakuŋ aduknaanaa. Mëmbi bi pwayëş umundu kaji uduknaanaa, dbi bi pbuuran wa. 48 Kë ñaaŋ ampoknuŋ awo aandi pŧiink ŋţup ŋi naan aşë duknaana: ŋţup ŋi nji nţupuŋ ŋaluŋ kadiiman kë aduknaanaa ţi unuur ubaañşaani. 49 Mënţ nji ţi uleef naan dţupuŋ, Paapa anyilnuŋ aţupnuŋ uko wi nwooŋ kaţup na jibi nwooŋ kaţup wa. 50 Dme kë uko wi aţuuŋ pdo uji uñooţ ñaaŋ du ubida wi mnţo. Hënk, uko wi nji kaţiiniyaanuŋ, dji kaţup wa jibi Paapa ajaknuŋ nţiiniyaan wa.»
Yeŧu añow ihoţ yi baţaşarul
1 Ufeŧtu wi Mbuur uñogi, kë Yeŧu ame kë wal wi pduk umundu wi kakak du Naşibaţi Aşin ubani. Kë jibi aŋaluŋ baţaşarul banwooŋ ţi umundu, hënk di aŋalaŋ baka te wal ubaañşaani. 2 Yeŧu na baţaşarul bawo ţi pde kañah, kë Unŧaayi Uweek uşë do bi neej ţi Yudaŧ, abuk Ŧimoŋ Iŧkariyot, kë akten jibi akdoluŋ kadoo kawaap Yeŧu. 3 Yeŧu ame kë Aşin aţu iko bŧi ţi iñen yi nul, abot ame kë awoona du Naşibaţi akuţ akak du a. 4 Wi wi aşaaŋ anaţa, awohëş kamişa, atan blaañ ţi blank, 5 ajej meel aţu ţi ubaaldu aşë jun pñow ihoţ yi baţaşarul awent ya na blaañ bi atanuŋ ţi blank. 6 Abi aban ţi Ŧimoŋ Piyeer, kë uŋ aşë jaka aji: «Ajugun, iwi, kañowën ihoţ?» 7 Kë aŧeema aji: «Uko wi nji kadoluŋ hënk, iimme wa, iluŋ kame wa.» 8 Kë aŧeema aji: «Nin iinkñowën ihoţ!» Kë aji na a: «Woli mëññowu ihoţ, iinkwo ţi banwooŋ biki naan.» 9 Kë aşë ji na a: «Ajugun, kwut kañowën ihoţ ţañ, ñowaan kak iñen na bkow!» 10 Kë aŧeema aji: «Aññowiiŋ aankak anuma kañowa; awo najinţ bŧi. Ihoţ ţañ yi yi awooŋ kañow. An kak nawo bajinţ, aşë wo mënţ an bŧi baka.» 11 Na manjoonan Yeŧu ame ankmbiiŋ kawaapa, ukaaŋ kë aji mënţ bukal bŧi bajinţuŋ. 12 Wi abaaŋ pñow baka ihoţ, akak awohara kamişa aţo aşë ji na baka: «Name uko wi ndolanaŋ hënk i? 13 Naji nadu'ën kaji Najukan kaji Ajugun; nafaŋi, dwo a. 14 Woli nji Ajugan na Najukan dñowan ihoţ, an kak nawo i kado kañowar ihoţ. 15 Ddo do haŋ adiimanaanan, an kak nado kado jibi ndolanaŋ. 16 Na manjoonan, dţupan, nalemp aambaaŋ kapel i aklemparuŋ, kë nayili aampel anyiluluŋ. 17 Name hënkuŋ iko yaŋ, woli nado ya, nawo ţi mnlilan. 18 Mënţ an bŧi biki nji kaţiiniyaanuŋ. Dme biki nji ndatuŋ bnuura, kë uko umpiiŧaniiŋ ţi Ulibra wi Naşibaţi uşë wo i kadolana: Ñaaŋ anţooŋ na nji ade akak aşoorën. 19 «Dţupan hënkuŋ ji uko mënţ ubi udolana, nahilna woli uko mënţ uluŋ adolana name kë nji dwooŋ anwooŋ. 20 Na manjoonan, dţupan, anyeenkuŋ ñaaŋ i nji nyiluŋ, ayeenkën; kë anyeenknuŋ, ayeenk anyilnuŋ.»
Pneej pi Ŧatana ţi Yudaŧ
21 Wi Yeŧu aţiiniiŋ haŋ aba, uşalul uţëla ţëla maakan kë aşë ji: «Dţupan, na manjoonan, aloŋ ţi an aluŋ kawaapën.» 22 Baţaşarul bawo ţi ptenar ţiki baamme ahoŋ ţi baka i i ajakuŋ. 23 Aloŋ ţi baţaşarul, i amaganuŋ aţo akab ţi a. 24 Ŧimoŋ Piyeer ado na kañen aji na a ahepara ñaaŋ mënţ. 25 Kë uŋ ajuţ ţi Yeŧu aşë hepara aji: «Ajugun, in ul a ba?» 26 Kë aŧeem aji: «I nji kawuluŋ kapoom ki nji kaŧoopuŋ ţi poŧ a.» Ajej wal mënţ kapoom aŧoop ţi poŧ awul Yudaŧ, abuk Ŧimoŋ Iŧkariyot. 27 Wi ayeenkuŋ ka, kë Ŧatana aşë neej ţi a. Wi wi Yeŧu aşaaŋ aji na a: «Uko wi iwooŋ i pdo, ŧaraan ido wa.» 28 Kë nin aloŋ ţi banwooŋ da aşë wo aamme uko unkayi kë ajaka haŋ. 29 Jibi Yudaŧ awooŋ anjaaŋ ahank itaka, baŧum başal aji aji ji na a aya anug iko yi banumiiŋ pa ufeŧtu, këme awul bajuuk uko uloŋ. 30 Wi ayeenkuŋ kapoom kuŋ aşë pën; uŧejan uban wal mënţ.
Uko uhalu wi pdo
31 Wi Yudaŧ apënuŋ kë Yeŧu aşë ji: «Hënkuŋ mndëm mi Abuk Ñiinţ manwinana, kë mndëm mi Naşibaţi mankak awinana ţi a. 32 Kë woli mndëm mi Naşibaţi manwinana ţi a, Naşibaţi akak adiiman ul ţi uleeful mndëm mi Abukul, ado uko mënţ hënkuŋ. 33 An babuk naan, dwo na an ŋwal ŋntiinku ţañ. Naluŋ kado kala'ën, kë nşë ţupan uko wi nţupuŋ bayuday bandukiiŋ: naanhil pya dko di nji kayaaŋ. 34 Dţupan uko uhalu wi nawooŋ i kado kado: Naŋaladan, aa, jibi nji nŋalanaŋ, naŋaladan haŋ. 35 Woli naŋaladi, bañaaŋ bŧi bayikrën wal mënţ kë nawo baţaşaraan.» 36 Ŧimoŋ Piyeer aji na a wal mënţ: «Ajugun, iya ţuŋ ba?» Kë aŧeema aji: «Dko di nji kayaaŋ, iinhil kaţaşën da hënkuŋ, iluŋ kabi da.» 37 Kë aşë ji na a: «Ajugun, we ukaaŋ kë mënhil pţaşu da hënkuŋ ba? Woli udoo wo nkeţ pa uko wi nu, nji wi!» 38 Kë aŧeema aji: «Kë iji iluŋ kakeţ pa uko wi naan? Dţupu na manjoonan: Ji uguk udo kahaan nţa, ipok ŋyaaş ŋwajanţ kaji iimme'ën.»
Yeŧu: Bgah banjaaŋ baţij du Aşin
1 Yeŧu akak aji na baţaşarul: «Nawutan kahaajala. Nafiyaarën Naşibaţi nakuţ nafiyaarën. 2 Du katoh ki Paapa, dko dawo da adëm. Dya kabomanan dko da. Woli uunjoonan lah, mënkţupan wa. 3 Kë woli dbi ya abomanan da dko, kaşë kakaran kaţijan nañogën nahilna, dko di nwooŋ, nawo da kak. 4 Kë dko di nji kayaaŋ, name bgah byaani da.» 5 Kë Tooma aşë ji na a: «Naweek, wi ŋwooŋ ŋëmme dko di ikyaaŋ, hum di di ŋkmeeŋ bgah byaani da ba?» 6 Kë Yeŧu aŧeema aji: «Nji, dwooŋ bgah, manjoonan na ubida. Nin ñaaŋ aankya du Naşibaţi Paapa bë aanţëpna ţi nji. 7 Woli name'ën, naluŋ kame Naşibaţi Paapa kak; nado me'a hënkuŋ akuţ awina.» 8 Kë Filip aşë ji na a: «Ajugun, diimanun Naşibaţi Aşin nja, uko mënţ ukëşun.» 9 Kë aji na a: «Filip, djon na an ţi maakan, kë işë wo iimme'ën te hënkuŋ. Ñaaŋ anwinnuŋ, awin Naşibaţi Paapa. Hum di di ihiluŋ kaji: “Diimanun Naşibaţi Aşin nja?” 10 Iinfiyaar kë dwo ţi Paapa, kë abot awo ţi nji i? Ŋţup ŋi nji kaţupuŋ ŋaanwoona ţi nji, Paapa anwooŋ ţi nji akdoluŋ ulemp wi nul. 11 Nafiyaaraan woli dţupan aji: “Dwo ţi Paapa kë Paapa akuţ awo ţi nji.” Këme nafiyaaraan ţiki nawin iko yi nji kadoluŋ. 12 Na manjoonan dţupan, ñaaŋ anfiyaarnuŋ, aluŋ kado kak iko yi nji kadoluŋ. Adoo luŋ kado indëmuŋ apel ya ţiki dya du Paapa. 13 Kë uko wi nakluŋ kañehan ţi katim ki naan, ddo wa. Hënk ţi iko yi Abukul akdoluŋ mndëm mi Naşibaţi Paapa manhilna manwinana. 14 Woli nañehan uko uloŋ ţi katim ki naan, kaluŋ kado wa.»
Kahoŋ ki ubi wi Uhaaş wi Naşibaţi
15 Yeŧu akak aji: «Woli naŋalën, naluŋ kamëban iko yi njakanaŋ nado kado. 16 Nji nşë luŋ ñehan Paapa awulan Naţënkar aloŋ ahilna awo na an te mnţo: 17 aŋ mënţan awooŋ Uhaaş wi Manjoonan wi umundu uwooŋ uunhil pyeenk ţiki uunwin wa abot awo uunyikrën wa. An, name wa ţiki uñogan akuţ aluŋ kawo ţi an. 18 «Mënkdukan bajinţ, dluŋ kabi du an. 19 Uduka ntiinku, umundu uşë uwo uunkak awinën. Kë an naşë luŋ kawinën. Dka ubida, ukaaŋ kë an kak nakluŋ kaka wa. 20 Unuur mënţ, nayikrën kë dwo ţi Paapa, kë an nawo ţi nji, kë nkuţ awo ţi an. 21 Ñaaŋ ammëbanuŋ iko yi njakuŋ abot ado ya, uŋ mënţan aŋalnuŋ. Kë anşaaŋ aŋalën, Paapa aluŋ kaŋala; nji kak mbot nŋala, nşë ndo ame'ën.» 22 Yudaŧ kë aşë ji na a (mënţ Yudaŧ Iŧkariyot akţiiniiŋ ţi): «Naweek, we ukaaŋ kë ikdo un ţañ ŋme'u, kë umundu uşë wo uunkme'u?» 23 Kë Yeŧu aŧeema aji: «Woli ñaaŋ aŋalën, amëban ŋţup ŋi naan, Paapa akak kaŋala, ŋşë bi du a, kakuţ kaţo du a. 24 Ñaaŋ anwooŋ aaŋŋalën, aankmëban ŋţup ŋi naan; kë uţup wi naan uşë wo uunwoona du nji, uwoona du Paapa anyilnuŋ. 25 Dţupan uko wi, wi nhumuŋ na an. 26 Kë Naţënkar, Uhaaş wi Naşibaţi wi akluŋ kayil ţi katim ki naan, uluŋ kajukanan iko bŧi kabot kaleşanan iko yi nţupanaŋ bŧi. 27 Ddukaran bnuura, bnuura bi naan bi bi nji kawulanaŋ. Bnuura bi njaaŋ kawul baanknaam na bi umundu ujaaŋ uwul. Uhaaş wi nan uwutan kahaajala këme kalënk. 28 «Naŧiink uko wi njakanaŋ: dya, dluŋ kakak ţi an. Woli naŋalën, naluŋ kalilan ţi pya pi naan du Paapa, ţiki Paapa adëm apelën. 29 Dţupan uko mënţ hënkuŋ ji ubi udo kaban, nahilna woli ubii nafiyaar. 30 Mënkak aţiini iko iŧum na an, ţiki naşih i umundu wi abi. Aanhilanaan nin uko uloŋ, 31 kë umundu uşë wo i kame kë dŋal Paapa abot aji kado jibi Paapa ajaknuŋ ndo kado. Nanaţiin, nawulan ŋya na bgah bi nja.»
Bko banjaaŋ badolna ubiñu
1 Yeŧu akak aji: «Nji dwooŋ bko bi mbuk manjaaŋ mandolna ubiñu na manjoonan, kë Paapa ajaaŋ alemp ţi uwoorta. 2 Kanah kanwooŋ ţi nji aşë wo kaambuki, aji fal ka, kë kambukuŋ, aji heent ka bnuura kahilna kabuk kak maakan. 3 Uţup wi nji nţupanaŋ udo bi jinţanan jinţan ji kanah ki baheentuŋ. 4 Namëbanaan jibi mmëbananaŋ. Jibi kanah kajaaŋ kawo kaanji kahil pbuk woli kaanwo ţi bko, hënk di di nawooŋ kak naanhilan kawul mbuk woli naammëbanaan. 5 «Nji dwooŋ bko banjaaŋ badolna ubiñu; an kë naşë wo inah. Ñaaŋ ammëbanaanuŋ, kë mbot amëbana, aŋ mënţan aji wul mbuk mnŧum. Nalowënle naankhinan pdo nin uko uloŋ. 6 Woli ñaaŋ aanwo na nji, aji fëlana ji kanah, kaji kakay. Inah iŧënţ kuŋ mënţ baji bajej ya kafël du bdoo, iyik. 7 «Woli namëbanaan abot amëban ŋţup ŋi naan nahil kahepar uko wi naŋaluŋ kaka wa. 8 Woli nawul mbuk mnŧum, nawo baţaşaraan na manjoonan, uko mënţ uyuuj mndëm mi Paapa. 9 «Jibi Paapa aŋalnuŋ, hënk di di nkaaŋ aŋalan. Nadukiin ŋnuur bŧi ţi uŋal wi naan. 10 Woli nado iko yi njakanaŋ nado, nawo ţi uŋal wi naan, jibi nji ndoluŋ iko yi Paapa ajaknuŋ awo ţi uŋal wi nul. 11 Dţupan uko wi, mnlilan mi naan manhilna manwo ţi an, hënk mnlilan mi nan manwo mnweek maakan. 12 Uko wi nji kajakanaŋ nado wii wi: Naŋaladan jibi nji nŋalanaŋ. 13 Uŋal undëmnuŋ uwo pwul ubida wi ñaaŋ pa banohul. 14 Nawo banoh naan woli nado uko wi njakanaŋ nado. 15 «Mënkak ado kadolan balempar naan, nalemp aanji me uko wi ajugul ajaaŋ ado. Kë nşë du'an banoh naan ukaaŋ kë nji kaţupan uko bŧi wi nŧiinknuŋ du Paapa. 16 Mënţ an nadatnuŋ; nji ddatanaŋ abot aţu'an ulemp wi pya pţup Uţup Ulil Unuura kabot kawul mbuk mnŧum, mbuk mënţ mambot manţo. Wal mënţ, uko wi nakluŋ kahepar Paapa ţi katim naan, awulan wa. 17 Uko wi nji kaţu'anaŋ pdo uwo naŋalad.»
Pşoor pi umundu uşooruŋ Yeŧu na baţaşarul
18 Yeŧu akak aji na baţaşarul: «Woli umundu uşooran, nameen kë uşoorën ji ubi udo kaşooran. 19 Woli nawo lah biki umundu, uŋalan ţiki nawo biki wa; kë naşë wo naanwo biki umundu ţiki ddatanaŋ apënan ţi wa, ukaaŋ kë umundu uşooran. 20 Naleşan uko wi mbiiŋ aţupan: “Nalemp aambaaŋ kapela i aklemparuŋ.” Woli bahajanaan, an kak baluŋ kahajanan; woli baŧiink uţup wi naan, bakak kaŧiink uţup wi nan. 21 «Iko mënţ bŧi nji kaţuuŋ badolan ya, ţiki baamme anyilnuŋ. 22 Woli mëmbi lah, awo mënţiini na baka, baankduknaana, kë başë wo hënkuŋ baanka uko uţup ţi pekadu di baka. 23 Ñaaŋ anşoornuŋ akak aşoor Paapa. 24 Woli mëndo lah ţi pŧoof pi baka iko yi nin ñaaŋ awooŋ aambaaŋ kado, baankduknaana; kë hënkuŋ başë win akuţ aşoorun nji na Paapa. 25 Kë hënk di uko umpiiŧaniiŋ ţi Ulibra wi Naşibaţi udolaniiŋ: “Babubara aşoorën.” 26 «Dluŋ kayil Naţënkar aloŋ, anwooŋ Uhaaş wi manjoonan unwoonuŋ du Naşibaţi Paapa. Woli ubii, uluŋ kaţup uko wi umeeŋ ţi nji. 27 An kak, naluŋ kaţup uko wi nameeŋ ţi nji ţiki du ujuni di di nawooŋ na nji.»
1 Yeŧu akak aji: «Dţupan iko yaŋ bŧi nawutna kaţañan pfiyaar. 2 Baluŋ kadookan du itoh iñehanaani; wal uluŋ kaban wi bafiŋan bakdooŋ kaji başal kaji bado do uko wi Naşibaţi aŋaluŋ. 3 «Baluŋ kado iko yaŋ ţiki baamme Paapa abot awo baamme'ën. 4 Kë nşë ţupan uko waŋ nahilna woli wal ubani naleş kë dţupan wa. Mënţupan wa du kaŧeeku ţiki dhum nwo na an.»
Uko wi Uhaaş wi Naşibaţi ukluŋ kado
5 Yeŧu akak aţiini na baka aji: «Kë nşë kak hënkuŋ du anyilnuŋ, kë nin aloŋ ţi an aanheparaan dko di nji kayaaŋ. 6 Dwin bnuura kë uko wi nţupanaŋ ukaaŋ kë najooţan maakan hënk. 7 Kë nşë ţupan manjoonan, uwo bnuura pa an nji nya. Woli mënyaa, Anwooŋ i Kaţënkan aankbi ţi an, nşale ya kayila ţi an. 8 Wi akluŋ kabi, ayuuj kë bañaaŋ biki umundu baneem ţi uko wi pekadu, ţi uko wi pwo naŧool na ţi uko wi pwayëş. 9 Umundu uneem ţi uko wi pekadu ţiki na manjoonan pekadu dawooŋ ppok pfiyaarën; 10 uneem ţi uko wi pŧool ţiki bawin kë dya du Paapa kë naankak awinën; 11 aneem ţi uko wi pwayëş ţiki bawayëş Ŧatana naşih i umundu wi kaji aduknaanaa. 12 «Dka iko iŧum kak yi nwooŋ i pţupan, kë işë wo iinhil kajinţ ţi ikowan hënkuŋ. 13 Woli aluŋ abi, ul anwooŋ Uhaaş wi Manjoonan, aţoŋan kado name manjoonan bŧi. Aankluŋ kaţiiniyaan uleeful, uko wi aŧiinkuŋ ţañ wi wi akdooŋ kaţup kabot kapibanan iko inkluŋ kabi. 14 Ul aluŋ kadëmanaan, aluŋ kayeenk ţi nji uko unwooŋ wi naan kadolan name wa. 15 Uko bŧi wi Paapa akaaŋ uwo wi naan, ukaaŋ kë nji ayeenk ţi uko unwooŋ wi naan kadolan name wa. 16 «Uduka ntiinku naankak awinën, naţole ntiinku nakak kawinën.» 17 Baţaşarul bahoopaţër aji: «We wi akjakuŋ hënk ba wi ajakuŋ uduka ntiinku ŋënkak awina ŋkale ţo ntiinku ŋkak kawina? We ukaaŋ kë abot aji aya du Aşin?» 18 Bawo ţi pţiini aji: «We wi aŋaluŋ pţup wi ajakuŋ “ntiinku”? Ŋënyikrën uţup wi akţupuŋ.» 19 Yeŧu ame kë baŋal kahepara uko wi akţiiniyaanuŋ aşë ji na baka: «Nawo ţi phepar uko wi njakuŋ: “Uduka ntiinku naankak awinën, nakale ţo ntiinku nakak kawinën.” 20 «Na manjoonan dţupan, naluŋ kawooni, kabot kaţëga, bañaaŋ biki umundu başë balilan. Naluŋ kajooţan, kë pjooţan mënţ paşë luŋ kakak mnlilan. 21 Woli ñaaţ aya kabuk, uleef uji ude'a ţiki wal wi mnhaj mi nul ubani; aşale buk aankak aji leş mnhaj, aji lilan uko wi aţijuŋ napoţ ţi umundu. 22 Kë hënk di uwooŋ pa an: najooţan hënkuŋ, kë nşë luŋ kawinan kak naşë nawo na mnlilan ţi ŋhaaş, mnlilan mënţ nin ñaaŋ aloŋ aankhil ppënanan ma. 23 Unuur mënţ, naankheparaan nin uko uloŋ. «Na manjoonan dţupan uko wi nakluŋ kañehan Paapa ţi katim ki naan aluŋ kawulan wa. 24 Te hënkuŋ naanñehan nin uko uloŋ ţi katim ki naan. Nañehaan, naluŋ kayeenk, mnlilan mi nan manşë mandëm maakan. 25 «Dhoñ hoñ aţupnan iko mënţ bŧi. Kë wal uşë bi wi nwooŋ mënkak ado kahoñ, dţupan uko wi Paapa na ŋţup ŋjinţ piş. 26 Unuur mënţ naluŋ kañehan Paapa ţi katim ki naan, kë nşë wo mënkţo kañehandëran a, 27 Naşibaţi Paapa ţi uleeful aŋalan, ţiki naŋalën akuţ afiyaar kë dwoona du a. 28 Dwoona du Paapa abi ţi umundu wi, hënkuŋ dduk umundu wi kaya du Paapa.» 29 Kë baţaşarul başë ji na a: «Iwini, iinkak ahoñ, iţup hënkuŋ na ŋţup ŋjinţ piş! 30 Ŋme hënkuŋ kë ime iko bŧi abot aji këme iko yi ñaaŋ aŋaluŋ pheparu. Uko mënţ ukaaŋ kë ŋfiyaar kë iwoona du Naşibaţi.» 31 Kë Yeŧu aŧeem baka aji: «Nafiyaar hënkuŋ? 32 Kë wal uşë ubi, udo bi ban ban wi nakwayşëruŋ an bŧi, kaji andoli aya na bgahul, nadukën aloolan. Kë nşë wo mënwo aloolan, Paapa awo na nji. 33 Dţupan iko yi, ŋhaaş ŋi nan ŋahilna ŋaţoora wi nawooŋ baloolan na nji. Umundu uluŋ kanooran an, natamaan, dwat wa.»
Yeŧu añehandër baţaşarul
1 Wi Yeŧu aţiiniiŋ haŋ aşë kat këş du baţi aji: «Paap, wal ubani. Diimaan mndëm mi Abuku, ahilna adiiman mndëm mi nu. 2 Iwula mnhina mi aşih bañaaŋ bŧi ahilna awul biki iwululuŋ bŧi ubida wi mnţo. 3 Pka ubida wi mnţo, pawo pme'u iwi inwooŋ Naşibaţi na manjoonan, abot awo aloolan ţañ, na pme'ën nji Yeŧu Kriŧtu i iyiluŋ. 4 Ddiiman mndëm mi nu ţi mboş wi ndoluŋ ulemp bŧi wi iţuunuŋ. 5 Kë hënkuŋ Paap, du dko di iwooŋ, dëmanaan ţi kadunu, wulaan mndëm mi mbiiŋ aka wi nwooŋ na iwi ji umundu ubi udo kapaşana. 6 «Ddo bañaaŋ biki idatuŋ ţi umundu awulën, kë bame'u. Babi wo biki nu kë işë wulën baka; bamëban uţup wi nu. 7 Hënkuŋ bayikrën kë iko bŧi yi iwulnuŋ ipënna du iwi. 8 Dwul baka ŋţup ŋi iwulnuŋ, kë bayeenk ŋa, ayikrën kë dpënna du iwi na manjoonan, afiyaar kë iwi iyilnuŋ. 9 Bukal biki nji kañehandëruŋ. Mënţ umundu wi nji kañehandëruŋ, biki iwulnuŋ baka ţiki bawo biki nu. 10 Uko bŧi unwooŋ wi naan uwo wi nu, jibi uko bŧi unwooŋ wi nu uwooŋ wi naan. Mndëm mi naan manwinana ţi baka. 11 Hënkuŋ dbi du iwi, mënkak awo ţi umundu, kë bukal başë woha wo ţi umundu. Paap iwi inyimanuŋ, mëbaan baka na mnhina mi katimu ki iwulnuŋ bahilna bakak ñaaŋ aloolan jibi nji na iwi ŋwooŋ. 12 Wi nwooŋ na baka dmëban baka ţi katim ki iwulnuŋ abot ayeŋ baka kë nin aloŋ ţi baka aanneemi, woli mënţ anwooŋ i kaneem a. Hënk di uko umpiiŧaniiŋ ţi Ulibra wi Naşibaţi ukdolaniiŋ. 13 Hënkuŋ dbi du iwi, aşë ţup ŋţup ŋi ţi umundu bahilna bawo na mnlilan mnweek maakan mi nwoonaanuŋ. 14 Dwul baka uţup wi nu kë umundu uşë şoor baka, ţiki baanwo biki umundu jibi nwooŋ mënwo i umundu. 15 Mënkñehanu ipënan baka ţi umundu, dñehanu ñehan ido kayeŋ baka, Ajug Buţaan awut kaban baka. 16 Baanwo biki umundu jibi nwooŋ mënwo i umundu. 17 Uţup wi nu uwo manjoonan, keer iţëpna ţi manjoonan ido baka bawulu ikow yi baka. 18 Jibi iyilnuŋ ţi umundu, dyil baka kak ţi umundu. 19 Dwulu bkow naan bŧi pa baka, bukal bahilna baţëpna ţi manjoonan bawulu ikow yi baka. 20 «Mënţ bukal biki nji kañehandëruŋ ţañ, dñehandër kak biki ŋţup ŋi baka ŋakdoluŋ bafiyaarën. 21 Hënk bukal bŧi bahil kawo ji ñaaŋ aloolan. Jibi iwi Paapa iwooŋ ţi nji kë mbot awo ţi iwi, bukal kak bamëbandëran na nja, umundu uhilna ufiyaar kë iyilnuŋ. 22 Dwul baka mndëm mi iwulnuŋ, bahilna bawo ji ñaaŋ aloolan jibi ŋwooŋ ñaaŋ aloolan. 23 Nji dmëbandër na baka, kë iwi imëbandër na nji. Hënk bahil kawo ji ñaaŋ aloolan na manjoonan, umundu ubot ume kë iyilnuŋ abot aŋal baka jibi iŋalnuŋ. 24 Paap, dŋal dko bŧi di nwohaŋ, biki iwulnuŋ bawo da na nji. Hënk bawin mndëm mi naan. Mndëm mënţ iwulën ma ţiki iŋalën ji umundu ubi udo kapaşana. 25 Paap, iwi inwooŋ naŧool, umundu uumme'u, kë nji nşë me'u kë biki babot ayikrën kë iyilnuŋ. 26 Ddo baka kë bame'u abot aluŋ kado bame'u kak, bahilna bado kaŋal jibi iŋalnuŋ, nji ţi uleef naan mbot nwo ţi baka.»
Yeŧu amobanaa
1 Wi Yeŧu abaaŋ pñehan, aya na baţaşarul, kë bamuur katant ki Ŧedroŋ. Uwoorta uloŋ uwo du plut, kë du wa di di ayaaŋ aneej na baţaşarul. 2 Kë Yudaŧ, ankwaapuluŋ aşë me dko mënţ, ţiki Yeŧu ajon kayit da na baţaşarul. 3 Aya du uwoorta mënţ aţij pnŧuk pi bangoli na bayeŋ biki baţeŋan baweek na bafariŧay bawululuŋ; bawo na ŋkaniya na ifiiţi akuţ awo na ikej. 4 Yeŧu, ammeeŋ uko unwooŋ i pdola bŧi, apën aşë hepar baka aji: «In i naklaaŋ ba?» 5 Kë baŧeem aji: «Yeŧu i Naŧaret.» Kë aji na baka: «Nji a» Kë Yudaŧ ankwaapuluŋ aşë naţ na baka. 6 Wi Yeŧu ajakuŋ na baka: «Nji a.» Kë başë kak ufeţ, ajot ţi mboş. 7 Kë akak ahepar baka aji: «Naji in i naklaaŋ ba?» Kë baŧeem aji: «Yeŧu i Naŧaret.» 8 Kë aji na baka: «Djakan aji nji a. Woli nji i naklaaŋ, nawutan biki baya.» 9 Hënk di di uko wi abiiŋ aji na Naşibaţi wi akñehanuluŋ udolaniiŋ: «Mënneemandën nin aloŋ ţi biki iwulnuŋ.» 10 Wal mënţ, kë Ŧimoŋ Piyeer anwooŋ na kakej aşë ŧoot ka, aŧuh nalempar naşih i baţeŋan afala kabaţ kadeenu. Katim ki nalemp mënţ kawo Malkuŧ. 11 Kë Yeŧu aşë ji na Piyeer: «Kakaan kakej ki nu ţi kabeel! Işal aji mënkdaan pnkalame pi Paapa awulnuŋ, panwooŋ pi mnhaj?»
Bañooţ Yeŧu du kadun ki Anaŧ naşih i baţeŋan
12 Wal mënţ kë bangoli na naweek i baka na bayeŋ biki baweek biki bayuday kë başë mob Yeŧu atan. 13 Bañooţa duna du Anaŧ, aşin ahar Kayif. Kayif awooŋ naşih i baţeŋan ţi uşubal mënţ. 14 Ul abiiŋ awul bayuday uşal aji: «Uhokan ñaaŋ aloolan akeţ pa bañaaŋ bŧi.»
Ppok pi Piyeer
15 Ŧimoŋ Piyeer na naţaşar Yeŧu aloŋ bawo ţi pţaş Yeŧu. Naşih i baţeŋan ame naţaşarul anwooŋ na Piyeer. Kë naţaşarul mënţ aşë neej na Yeŧu du blay bi naşih i baţeŋan. 16 Kë Piyeer aşë naţ du bdig añog plëman. Naţaşar Yeŧu i naşih i baţeŋan ameeŋ, apën aţiini na ñaaţ ankyeŋuŋ plëman, ado Piyeer kë aneeji. 17 Ñaaţ nayeŋ plëman aji na Piyeer wal mënţ: «Iwi iinwo kak aloŋ ţi baţaşar ñiinţ i i?» Kë aji na a: «Mënwo a.» 18 Balemp na bayeŋ baŧehan bdoo afooy ba atëma ţiki ujonţ uwoo. Piyeer awo da kak na baka atëma.
Naşih i baţeŋan na Yeŧu
19 Naşih i baţeŋan ahepar Yeŧu ţi uko wi baţaşarul na ţi iko yi akjukanuŋ. 20 Kë Yeŧu aŧeema aji: «Na pnak di di nţiiniiŋ na bañaaŋ bŧi. Djon kajukan du itoh iñehanaani, di bayuday bŧi bajaaŋ bayitna. Mëmbaaŋ kamena uko uloŋ. 21 We ukaaŋ kë ikheparaan ba? Heparan banŧiinkuŋ uko wi njukanuŋ baka; bukal bame uko wi nji nţupuŋ.» 22 Wi aŧeemuŋ haŋ, kë aloŋ ţi bayeŋ annaţuŋ da aşë koba kañen ţi kajeem aji na a: «Hënk di di ikŧeemuŋ Naşih i baţeŋan?» 23 Kë Yeŧu aşë ji na a: «Woli dţup buţaan, kdiiman jibi nţupi buţaan; bë woli dţup bnuura, we ukaaŋ kë ikobën?» 24 Kë Anaŧ aşë do kë bañooţa du Kayif Naşih i baţeŋan. Iñenul itanana wal mënţ. 25 Kë Piyeer aşë wo du blay atëma, baji na a: «Iwi kak, jëm iwo aloŋ ţi baţaşar ñiinţ i i?» Kë apok aji: «A-a, mënwo a.» 26 Wal mënţ, nalempar Naşih i baţeŋan aloŋ, ayiţ i Piyeer abiiŋ afal kabaţ aji na a: «Mënwinu lah du uwoorta na a i?» 27 Kë Piyeer akak apok. Ţi dko mënţ kë uguk uşë haan.
Yeŧu du kadun ki Pilat
28 Bapënna wal mënţ du uko Kayif, ajej Yeŧu ayaanaan du katoh kaweek ki Pilat nanŧuŋa anwooŋ i Rom. Nfa mamban wal mënţ. Kë bayuday başë wo baanneej du katoh, baŋal kawo bajinţ kahilna kade pde pi Ufeŧtu wi Mbuur. 29 Waŋ ukaaŋ kë Pilat apën du bdig abi du baka aşë hepar baka aji: «We wi ñiinţ i adoluŋ ba?» 30 Kë baŧeema aji: «Woli aanwo lah nado buţaan, ŋënkţiju a.» 31 Kë Pilat aji na baka: «Najejana nawayëş bdidi'an jibi bgah bi nan bajakuŋ.» Kë baŧeema aji: «An baromeŋ naandinan ŋji ŋfiŋ ñaaŋ.» 32 Hënk di di uţup wi Yeŧu abiiŋ aţup jibi akkeţari udolaniiŋ. 33 Pilat aneej wal mënţ du katoh aşë du Yeŧu aji na a: «Iwi, iwo naşih i bayuday i?» 34 Kë aŧeema aji: «Iwi ţi uleefu ijakuŋ uko waŋ këme baloŋ baţupuŋ haŋ ţi nji?» 35 Kë aji na a: «Nji, dwo nayuday i? Biki uŧaaku, başih biki baţeŋan baţijiiŋ ţi nji. We wi idoluŋ ba?» 36 Kë aŧeema aji: «Pşih pi naan paanwo pi umundu wi. Woli pawo lah pi umundu wi, balempar naan bagutan kaneenan bayuday pmobën. Kë pşih pi naan paşë wo paanwo pi mboş.» 37 Kë Pilat aşë ji na a: «Ikeer awo naşih?» Kë aŧeema aji: «Ijakuŋ haŋ: dwo naşih. Dbuka abot abi ţi umundu pa pdiiman uko unwooŋ manjoonan. Ñaaŋ anwooŋ i manjoonan aji ŧiink pdiim pi naan.» 38 Pilat aji na a: «We uwooŋ manjoonan?» Wi ajakuŋ haŋ, aşë kak apën aya du bayuday aji na baka: «Mënwin ţi a nin uko uloŋ unkkaaŋ nji aduknaanaa. 39 Kë jibi njaaŋ kawutanan nakalabuş aloŋ ţi wal wi Ufeŧtu wi Mbuur, naŋal nwutanan “Naşih i Bayuday” i?» 40 Kë başë huuran aji: «A-a, mënţ ul a. Barabaaŧ i i ŋŋaluŋ iwutan.» Kë Barabaaŧ mënţ aşë wo nalaŧ naweek.
1 Pilat ajej wal mënţ Yeŧu ado kë bakoba na itinŧël. 2 Bangoli başiir iyiw ado ukël afuuţana, akak ajej kamişa kajeenkal awoharana. 3 Baji babi kañoga kaşë ji na a: «Ŋwulu mboş, iwi naşih i bayuday!» Wi bajakuŋ haŋ, başë koba ţi kaara. 4 Pilat akak apën aji na bayuday: «Natenan, dţija ţi an ţi, kaţupan kë mënwin nin uko uloŋ unkkaaŋ nji aduknaanaa.» 5 Wi Yeŧu apënuŋ awo na iyiw ţi bkow na kamişa kajeenkal, kë aşë ji na baka: «Ñaaŋ mënţ awi.» 6 Wi baţeŋan baweek na bayeŋ biki baka bawinaaruluŋ win aşë huuran aji: «Paŋana ţi kruŧ! Paŋana!» Kë Pilat aji na baka: «An najejana naya napaŋ. Nji mënwin nin uko uloŋ unkkaaŋ nji aduknaanaa.» 7 Kë başë ŧeema aji: «Ŋka bgah, kë ţi bgah mënţ awo i pkeţ ţiki aji awo Abuk Naşibaţi.» 8 Wi Pilat aŧiinkuŋ uko mënţ aşë lënk kak maakan. 9 Aya aneej du katoh aşë hepar Yeŧu aji: «Iwoona ţuŋ ba?» Kë Yeŧu aanŧeema. 10 Pilat aji na a wal mënţ: «Iinŋal pŧeemën? Iimme kë dka mnhina mi pwutanu na mi ppaŋu i?» 11 Kë aŧeema aji: «Woli iinyeenkna lah mnhina mënţ du baţi iinkhinanaan nin uko uloŋ; ukaaŋ kë anţijnuŋ ţi iwi aka pekadu dandëmuŋ apel di nu.» 12 Kë dul di Pilat ajunnuŋ pla jibi akdoli kadoo kawutan Yeŧu. Kë bayuday başë huuran aji: «Woli iwutana, iinwo nanoh Ŧeŧar. Ñaaŋ anjakuŋ aji awo naşih aanwo naşoorad Ŧeŧar naşih najeenkal i?» 13 Wi Pilat aŧiinkuŋ uko waŋ aşë pënan Yeŧu bdig aşë ţo du pţij pi ajaaŋ awayëşaan du dko di bajaaŋ bado «Gabata» ţi uţup uhebërë, uwooŋ blay bi babomanuŋ na mnlaak. 14 Unuur wi bakbomandëruŋ pa Ufeŧtu wi Mbuur wa, ţi mndiiŋ unuur, kë Pilat aşë ji na bayuday: «Naşih i nan awi.» 15 Kë bukal başë huuran aji: «Fiŋana! Fiŋana! Paŋana ţi kruŧ.» Kë Pilat aji na baka: «Kë nwo i kapaŋ naşih i nan?» Kë baţeŋan baweek baŧeema aji: «Ŋkaha naşih aloolan, Ŧeŧar a.» 16 Wal mënţ kë Pilat aşë awutar baka Yeŧu baya bapaŋ. Kë bangoli bajeja ayaanaan.
Pkeţ pi Yeŧu ţi kruŧ
17 Bado Yeŧu kë apën akuŋa kruŧ ul ţi uleeful aya du dko di bajaaŋ bado Golgota na uţup uhebërë uwooŋ kaheem ki bkow. 18 Bapaŋa da na biinţ batëb baloŋ, aloŋ ţi kañen kamayu, aloŋ ţi kadeenu. 19 Pilat ado kë baboman kampiñu kaloŋ apaŋ ţi kruŧ duuţ. Bapiiŧ ţi ka aji: «Yeŧu i Naŧaret naşih i bayuday.» 20 Uko mënţ bayuday baŧum baleyiir wa ţiki dko di bapaŋnuluŋ dañog ubeeka kë uko mënţ ubot apiiŧana ţi uţup uhebërë, uromeŋ na ugrek. 21 Kë baţeŋan baweek başë ya aji na Pilat: «Kpiiŧ kaji naşih i bayuday, piiŧan iji ñiinţ i aji awooŋ naşih i bayuday.» 22 Kë Pilat aŧeem baka aji: «Uko wi mpiiŧuŋ, dpiiŧ wa.» 23 Wi bangoli bapaŋuŋ Yeŧu du kruŧ, bajej imişa yi awohariiŋ ado ifah ibaakër, bangoli baji andoli ayeenk kaloŋ. Kë kamişa kameeţ kaşë wo kaanwo na ulëtna, kaţijna kaţuţ te uţeeh, ukaaŋ kë 24 balaţar aji: «Ŋwut katow ka. Nabiin ŋdo kanuŋ na mnlaak ŋten ankyeenkuŋ ka.» Hënk, kë uko umpiiŧuŋ ţi Ulibra wi Naşibaţi udolanaa, upiiŧana aji: «Bafaaşiir imişa yi naan akuţ ado kanuŋ na mnlaak katen ankjejuŋ kamişa naan.» Uko waŋ wi wi bangoli badoluŋ. 25 Anin Yeŧu na aţa anin, na Mariya ahar Klopaŧ na Mariya i uŧaak wi Magdala banaţ añog kruŧ. 26 Yeŧu awin anin, akak awin naţaşarul i amaganuŋ kë anaţ añog ţi a aşë ji na anin: «Abuk ñaaţ, abuku awuŋ.» 27 Akak aji na naţaşarul: «Naan awuŋ.» Kapënna unuur mënţ kë naţaşarul uŋ aşë jej Mariya du katohul. 28 Wi uko waŋ uţëpuŋ, Yeŧu ame kë uko uba bŧi hënkuŋ aşë ji: «Udaan uţijën.» Hënk di uko umpiiŧaniiŋ ţi Ulibra wi Naşibaţi udolaniiŋ. 29 Pdunk ploŋ pawo da wal mënţ panŧumi poot pŧaakţaan, hënk kë bajej kalëmënt kaloŋ atan ţi pmul aŧoop ţi pa aşë ñoor ţi mntum mi Yeŧu. 30 Wi añemuŋ poot pŧaakţaan puŋ aşë ji: «Uko mënţ ubaa.» Wi wi aşaaŋ ayoont bkow aşë jëmşa. 31 Uwo ţi unuur wi bakbomandëruŋ pa unuur wi pnoorfën wi bayuday; unuur wi pnoorfën mënţ uwo unuur unyimani maakan, kë baweek biki bayuday başë wo baaŋal muum manwo ţi ikruŧ unuur mënţ. Bañehan Pilat aji: «Dolan bakit baka ihoţ baŧarna bakeţ başë bawalan muum!» 32 Bangoli babi añog biinţ biki bapaŋuŋ na Yeŧu, akit ihoţ yi naŧeek, akak akit yi natëbanţën. 33 Wi babanuŋ ţi Yeŧu aşë ţënk kë ado bi keţ, kë hënk di di bawooŋ baankita ihoţ. 34 Kë Nangoli aloŋ aşë ajej bjan alofa ţi kanŧaagan. Ţi dko mënţ, kë pñaak na meel işë pën. 35 Ñaaŋ ankţupanaŋ uko wi awo namaar, kë uko wi akţupuŋ ubot awo manjoonan. Ame kë uko wi akţupuŋ ujoonani, aţup iko yaŋ an kak nahilna nafiyaar. 36 Hënk di uko wi Ulibra wi Naşibaţi ujakuŋ udolaniiŋ, upiiŧ aji: «Nin kamoh kaloŋ ki nul kaankluŋ kakita.» 37 Ukak apiiŧana ţi Ulibra wi Naşibaţi aji: «Baluŋ kado katen ñaaŋ i baluŋanuŋ kanŧaagan.»
Umoy wi Yeŧu
38 Yoŧef i uŧaak wi Arimati awo naţaşar Yeŧu aşë wo aandiiman wa ţiki aţi baweek biki bayuday. Wi Yeŧu akeţuŋ, aya ahepar Pilat me ahil kayeenk puum kaya kamoy. Kë Pilat adinanii. Yoŧef abi ajej puum ayaanaan. 39 Nikodem kak awo na a. Ul abiiŋ aya du Yeŧu na uŧejan. Aţij bko blil pţëkën bi bajaaŋ bamoyna. Bko mënţ bañog ŋkil iñeen ŋwajanţ. 40 Bajej puum aŧaay na ilaañ na bko buŋ jibi bayuday bajaaŋ bado. 41 Du dko di bapaŋuŋ Yeŧu uwoorta uloŋ uwo da, kë bhër bloŋ bhalu banwoyi baambi moynaara ñaaŋ kë bawo da. 42 Uwo ţi unuur wi bayuday bakbomandëruŋ pa unuur wi pnoorfën kë bhër babot awo baanlowi, ukaaŋ kë bamoy Yeŧu da.
Bhër bawo bjinţ
1 Ţi unuur unţaşuŋ unuur wi pnoorfën, bdëm bahumi kë Mariya i ubeeka wi Magdala aşë ya du dko di bhër. Aţënk kë plaak pweek maakan pandëŧnuŋ plëman pi bhër kë papëni. 2 Aţi wal mënţ aya du bi Ŧimoŋ Piyeer na naţaşar Yeŧu undu, i Yeŧu amaganuŋ, aşë ji na baka: «Bapënan Ajugun du bhër, kë ŋëmme dko di baţu'u li.» 3 Kë Piyeer apën na naţaşar Yeŧu undu, kë bakya du dko di bhër. 4 Baţi bŧi batëb; kë naţaşarul undu aşë ŧar apel Piyeer, ajota kadun, abana uŧeek du bhër. 5 Ajuunknaa awin ilaañ yi babiiŋ aŧaayna puum, aşë wo aanneeji. 6 Wal mënţ, kë Ŧimoŋ Piyeer aşë ban; aneej du bhër, aten ilaañ. 7 Akak aten blaañ bambooţanaanuŋ bkow kë babëkan bnuura awo mpaţ. 8 Wi wi naţaşarul undu ambanuŋ uŧeek abaaŋ aneej. Awin akuţ afiyaar. 9 Na manjoonan te wal mënţ baando bi me kë jibi bapiiŧuŋ ţi Ulibra wi Naşibaţi, Yeŧu awo i kanaţa ţi pkeţ. 10 Baţaşarul bakak wal mënţ du katoh ki baka.
Pwinana pi Yeŧu ţi kadun ki Mariya i Magdala
11 Mariya anaţ du kañog bhër du bdig, awooni. Wi akwooniiŋ, aşë juţ aten du bhër meeţ. 12 Awin ŋwanjuŧ ŋtëb ŋanwohi imişa ifaaŧal kë ŋaţo ţi dko di puum pi Yeŧu pabiiŋ abëkan, uloŋ du bkow, uloŋ du ihoţ. 13 Ŋwanjuŧ ŋuŋ ŋaji na a: «Abuk ñaaţ, we wi ikwooniiŋ ba?» Kë aji na ŋa: «Dwooni ţiki bapënan Ajug naan, kë mëmme dko di baţu'u li.» 14 Wi ajakuŋ haŋ aşë kok, awin Yeŧu kë anaţi, kë aşë wo aamme kë ul a. 15 Kë Yeŧu aşë ji na a: «Abuk ñaaţ, we wi ikwooniiŋ ba? In i iklaaŋ ba?» Mariya aji me nalemp i uwoorta a, aşë ji na a: «Naweek, woli iwi iyaaŋ na a, kţupën dko di iţu'uli, dya kajeja.» 16 Kë aji na a: «Mariya!» Kë aşë kok aji na a ţi uţup uhebërë: «Rabuni!» uwooŋ najukan. 17 Kë aji na a: «Kmëbanaan, mëndo bi paya du Paapa. Yaan iwin bayiţ naan iji na baka dpaya du Paapa, anwooŋ kak Aşin baka, du Naşibaţi, anwooŋ kak Naşibaţi i baka.» 18 Kë Mariya i ubeeka wi Magdala aşë ya aji na baţaşar Yeŧu: «Dwin Ajugun.» Kë hënk di di akakalëşuŋ baka uko wi ajakuluŋ.
Yeŧu apën awinana ţi kadun ki baţaşarul
19 Ţi utaakal wi unuur unţaşuŋ unuur wi pnoorfën baţaşar Yeŧu bayit du katoh kaloŋ anigan ilëman bŧi ţiki baţi baweek biki bayuday, kë Yeŧu aşë bi anaţ ţi pŧoof pi baka aji: «Bnuura bawo na an!» 20 Wi ajakuŋ haŋ, aşë diiman baka iñen na kanŧaagan. Baţaşarul balilan maakan wi bawinuŋ Ajugun. 21 Akak aji na baka: «Bnuura bawo na an. Jibi Paapa ayilnuŋ, hënk di di nkaaŋ ayilan.» 22 Wi ajakuŋ haŋ, aşë fuuţ ţi baka aji: «Nayeenkan Uhaaş wi Naşibaţi. 23 Bañaaŋ biki nakmiiruŋ ipekadu, Naşibaţi amiir baka ya; kë biki nawooŋ naankmiir ya, Naşibaţi aankmiir baka ya.» 24 Kë Tooma, aloŋ ţi baţaşar Yeŧu iñeen na batëb i bajaaŋ bado kbet aşë wo aanwo da wi Yeŧu abiiŋ du baka. 25 Kë baţaşar Yeŧu bandukiiŋ başë bi aji na a: «Ŋwin Ajugun!» Kë aşë ji na baka: «Woli mënwin ţi iñen yi nul dko di bapaŋuŋ ireegu, kë woli mënţu pkoñ pi naan ţi da, woli mënţu kañen ţi kanŧaagan ki nul, nin mënkfiyaar.» 26 Wi kanëm kaţëpuŋ, baţaşar Yeŧu bakak ayitiir du meeţ, kë Tooma awo na baka. Ilëman iniigani kë Yeŧu aşë pën, abi anaţ ţi pŧoof pi baka aşë ji: «Bnuura bawo na an.» 27 Wi wi aşaaŋ aji na Tooma: «Iñen yi naan yii yi, ţuun pkoñ ţi; ţuun kañen ţi kanŧaagan ki naan. Wutan katam bkow, fiyaarën.» 28 Kë aşë ji: «Ajugun, Naşibaţi i naan!» 29 Kë aji na a: «Iwinën ukaaŋ kë ifiyaari. Banwooŋ baanwin aşë fiyaar banuurandëni.» 30 Yeŧu akak ado ţi kadun ki baţaşarul iko iñoŋarënaan iŧum inwooŋ iimpiiŧana ţi ulibra wi. 31 Iko impiiŧaniiŋ ţi, ipiiŧana piiŧana, nahilna nafiyaar kë Yeŧu awooŋ Kriŧtu, Abuk Naşibaţi, nakuţ nahilna naka ubida ţi a woli nafiyaari.
Pwinana pi Yeŧu du bdëk bi Tiberiyad
1 Wi uko waŋ uţëpuŋ, Yeŧu akak apën awinana ţi kadun ki baţaşarul du kabaŋ ki bdëk bi Tiberiyad. Hënk di di apënuŋ awinana ţi kadun ki baka. 2 Ŧimoŋ Piyeer, na Tooma i bajaaŋ bado kbet na Natanayel anwooŋ i ubeeka wi Kana du Galilay na babuk Ŧebede na baţaşar Yeŧu baloŋ batëb bawooŋ da. 3 Kë Ŧimoŋ Piyeer aşë ji na baka: «Dya bŧuh.» Kë baji na a: «Ŋbi na iwi.» Bapën, apaya ţi bţeem, kë uŧejan mënţ baammob nin uţëb. 4 Wi nfa mambanuŋ, Yeŧu anaţ du kabaŋ ki bdëk; kë baţaşarul baamme kë ul a. 5 Kë aşë ji na baka: «Babuk naan, namob ŋţëb i?» Kë baŧeema aji: «A-a.» 6 Kë aşë ji na baka: «Nafëlan bridiya ţi kañenan kadeenu, namob.» Bafël bridiya aşë wo baankak ahinan ba ppul ţiki baŧum ŋţëb. 7 Kë naţaşar Yeŧu i amaganuŋ aşë ji na Piyeer: «Ajugun a!» Wi Ŧimoŋ Piyeer aŧiinkuŋ uko waŋ aşë woh imişa yi nul ţiki aanwoharaa, aşë ŧëfa du meel. 8 Baţaşarul bandukiiŋ ţi bţeem bapul bridiya apënan, baanlow pkay, bawo uko ji ŋmetër iñeen-week di pa. 9 Wi bawaliiŋ du pkay, bawin bdoo kë baŧehan da, kë ŋţëb ŋapaf ţi ba duuţ. Kapoom kabëkan da. 10 Kë Yeŧu aşë ji na baka: «Naţijan ŋţëb ŋi nabaaŋ amob mob ŋuŋ.» 11 Wal mënţ kë Ŧimoŋ Piyeer aşë paya ţi bţeem kë bapul bridiya moŋ pkay. Baŧum ŋţëb ŋweek: ŋawo iñeen week na iñeen kañeen na ŋwajanţ (153), kë bridiya başë wo baammara mar. 12 Kë Yeŧu aşë ji na baka: «Nabiin nade.» Nin aloŋ ţi baţaşarul aaññoom kahepara ñaaŋ i awo'i. Bame kë Ajugun a. 13 Wal mënţ abi, ajej kapoom awul baka, aţu na ŋţëb. 14 Waŋ uwooŋ uyaaş uwajanţën wi Yeŧu apënuŋ awinana ţi kadun ki baţaşarul wi anaţiiŋ ţi pkeţ.
Yeŧu na Ŧimoŋ Piyeer
15 Wi badeeŋ aba, kë Yeŧu aşë ji na Ŧimoŋ Piyeer: «Ŧimoŋ abuk Yowan, iŋalën apel biki i?» Kë aŧeema aji: «Ajugun, aa, ime kë dŋalu.» Kë aji na a: «Doon kayeŋ batani bi naan.» 16 Akak ahepara uyaaş utëbanţën aji na a: «Ŧimoŋ abuk Yowan, iŋalën i?» Kë aŧeem aji: «Ajugun, aa, ime kë dŋalu.» Kë aji na a: «Doon kayafan batani bi naan.» 17 Akak ahepara uyaaş uwajanţën aji na a: «Ŧimoŋ abuk Yowan, iŋalën i?» Piyeer ajooţan wal mënţ ţi uko wi akheparuŋ uyaaş uwajanţën me aŋalaara aşë ji na a: «Ajugun, ime iko bŧi, ime bnuura kë dŋalu.» Kë aji na a: «Doon kayeŋ batani bi naan. 18 Na manjoonan dţupu: wi ihojuŋ, iji ktan katëlu bdidi'u, kaya dko di iŋaluŋ. Kë wi ikluŋ kaţaf, iluŋ kadeeŋ iñen, aloŋ atanu katël, añooţu dko di iwooŋ iinŋali.» 19 Aţup ţup haŋ pkeţ pi Piyeer akluŋ kakeţ kadëmanaan Naşibaţi. Wi ajakuŋ haŋ aşë ji na a: «Ţaşaan.» 20 Piyeer akok aşë win naţaşar Yeŧu i amaganuŋ kë akţaş baka; ul awooŋ ambiiŋ ajuţ ţi bjënŧ bi Yeŧu wi bakdeeŋ ahepara ankwaapuluŋ. 21 Piyeer awina aşë ji na Yeŧu: «Ajugun, kë i?» 22 Kë aŧeema: «Woli dŋal aţo te ubi'ën, utenu i? Iwi, ţaşaan.» 23 Banfiyaaruŋ Yeŧu banaţa wal mënţ aţup aji baji naţaşarul mënţ aankkeţ. Kë Yeŧu aşë wo aanji aankkeţ, aji: «Woli dŋal aţo te ubi'ën, utenu i?» 24 Naţaşarul mënţ ţi uleeful amaaruŋ iko mënţ bŧi akuţ apiiŧ ya, kë ŋbot ame kë uko wi aţupuŋ ujoonani. 25 Uka iko iloŋ iŧum kak yi Yeŧu adoluŋ. Woli ñaaŋ aŋal ppiiŧ ya bŧi, dşal aji umundu bŧi uunkkëş pţuuna ŋlibra ŋankpiiŧuŋ.