Tun cawta vi lawta
1 Hay tun cawta yoboyna aya, yoboyna ay hiɗi Lawna. Yoboyna kayni mi Lawna kaw. 2 Nam ay hay tun cawta hiɗi Lawna. 3 Slen kaf liy hiɗi namu, jar slen ma liyna kaf, va mara ma liy bay nam mayɗi. 4 Hay namu irita aya, irita ay kayni mi haraŋa vi sumuna may. 5 Haraŋa ka wile hay jufunda, may jufunda vumɗi. 6 San ay kep gumi mi Lawna, semda valamu Yohana. 7 Nam maawa ki sa ma di-goyna nala, kay li di-goyta kay haraŋa, kay sumun kaf ma fi co hay vida kuɗumu. 8 Nam may mi haraŋaɗi, may nam maawa kay li di-goyta kay haraŋa. 9 Nam kayn mi haraŋ ma gasina, ma li haraŋ kay san gigekaw hay li ma nam ma kay nagata. 10 Nam ay hay nagata, nagata liy kayni hiɗi namu, may nagata may wumɗi, 11 Nam maawa tam sa falamna, may sa falamna min tapamɗi. 12 May tam nisi kaf sa tapamna, tam nisi sa vi hay semda valamu, nam vulsi donota kay nisi ma muɗ goy gurona vi Lawna. 13 Nisi sa saŋ vuɗsiɗi, vuɗ kuɗ minda vi sliw-tuwnaɗi, vuɗ kuɗ minda vi saɗi kaw, may kuɗ minda vi Lawna. 14 Yoboyn muɗi goy sliw-tuwna, nam musi jaraya, hobay hiɗi slugota, hiɗi gasita kaw, numa ɗuw gajijita valamu kaw, ŋray ca ki gajijita vi goor ma vuɗi kepna, ma may vi bumna pa nala. 15 Yohana di goy kalamu, siwela di'e: Zawn ma nan di kalam ala: Nam ma min ma bugolanu, nam maawa jewan nanu, kay nam ay jewan nanu. 16 Kay hay hobta vamu, nay kaf fi slugota kay slugota. 17 Kay gatta vula'ay kayni mi Musus, may slugota hiɗi gasita maawa kuɗ Yesu Kristu. 18 Sa bay wi Lawn tuwa noŋo, Lawna (goora) ma vuɗi kepna, ma ka hay slaw bulumu, nam muɗum goy a nay wumu.
LOPNA VI YESU MA GOY HAY HARAŊA
Di-goyta vi Yohana ma Baptismana
19 Ɗuwgi di-goyta vi Yohana, hay li ma sa Yudiyana cuk muliyan-sa-ɗifinna hiɗi sa Levitna sunu hay Yerusalem pa kay jobom ala: 20 Naŋ kayn mi gige? Nam di goy haraŋ bay puw-vunda ala: Nan kayni mi Kristuɗi. 21 Nisi jobom lo: Mi mige? Naŋu mi Eliyas su? Nam di'e: nan may mi namɗi. Naŋ mi sa ma jobta-Lawna su? Nam hot dita: A'a! 22 Nisi dum mara lo ala: Naŋ kayn mi gige? A numa ma hot dita tam sa cukma'ay sunna. Naŋ kay tuwaŋu naŋ di kay tuwaŋ ala naŋ mi gige? 23 Nam di'e: Nan kayni mi del sana ma siwel hay fulda: Moɗgi hagata vi Bum-Sumun goy ɗiger. 24 Sum sa cukiyay sunna nisi si sa Farisena. 25 Nisi jobomu dumu: La naŋ may mi Kristuɗi, mi Eliyasɗi, mi jobta-Lawnaɗi kaw, naŋ li baptisma kay mige? Yohana hotsi dita: 26 Nanu nan li baptisma hiɗi niyna; may jargiya, sa mara ka'a ma nigi wumɗi, nam ma ma bugolan nanu. 27 Nan nagay kay but zew ma kay tuguruna valam goy noŋɗi. 28 Slen kayni li hay Betaniya, goy bugol niy-lumna Yordan, liyn ma Yohana li baptisma hayna. 29 Hay buurta ka'ta, nam wi Yesu ka tuɗay talamu, nam di'e: Ɗuwgi goor ɦu-dimina vi Lawna ma yaw sulukŋa vi sa nagat goyna. 30 Kayni mi nam ma nan di goy kalam ala: Nam ma min ma bugolanu, nam maawa jewan nanu, kay nam ay jewan nanu. 31 Nan kaw, nan wumay jewɗi, may a ɗekem goy haraŋ kir Israyel, kay na'ta nan maawa li baptisma hiɗi niyna. 32 Yohana li di-goyta di'e: Nan wi Ŋusta siray kulo dukalawn pa ki gukka nala, na' mus kalamu kaw. 33 Nanu, nan wum jewɗi, may nam ma ganay kay li baptisma hiɗi niyna dan ala: Nam ma naŋ wi Ŋusta siray gaa kalamu, mus kalamu kaw, kayn mi nam ma li baptisma hiɗi Ŋusta-Peldetta. 34 Nan wi'e, li di-goyta kaw ala nam kayni mi goora vi Lawna.
Sa hatayna sa tap kuɗ Yesu jewna
35 Hay buurta ka'ta lo, Yohana ka colay zaw, hiɗi sa hatayna valam kuɗum ma'. 36 Nam ɗuw Yesu ka tuɗa, nam di'e: Ɗuwgi goor ɦu-dimina vi Lawna. 37 Hay li ma sa hatayna sa ma'na hum lawta kayni, nisi tap kuɗ Yesu kaw. 38 Yesu muɗ iramu, hay li ma nam wi ala nisi tapay kuɗumu, nam ka disiya: Nigi gar mige? Nisi dumu: Rabbi, kayni min di ala: Bum-hatta, liyna vaŋ ma buura ka gal arige? 39 Nam disiya: Nigiyaya, nigi ma wi'e. Nisi kaliya, wi liyn ma buura valam kaw; nisi busa kuɗum hay fat na'ta. Kayni hay leer ma goboy doogona. 40 Andre, ɓasum Simon Peter, nam kayni mi kep jar sa ma'na, sa hum dita hay vun Yohana pana, sa tap kuɗ Yesu kawna. 41 Nam fi ɓasulumna Simon Peter, ka dum ala: Numa fi Mesiyas ayawa. kayni min di ala Kristu. 42 Nam maram tam Yesu, Yesu ɗuwumu di'e: Naŋ Simon goora vi Yonas, nisi ma yaŋ Kefas, kayn min di ala Peter. 43 Hay buurta ka'ta, nam min kal Galileya, nam fi Filip. Yesu dum ala: Tapaŋay kuɗanu. 44 Filip kayni sa ma Betsayda, hay hoyok-ziyna vi Andre hiɗi Peter. 45 Lo Filip fi Nataniyel ka dum ala: Numa fi nam ma Gatta vi Musus hiɗi sa jobta-Lawna law goy kalamna ayawa, Yesu ma Nasaretna, goora vi Yosef. 46 Nataniyel hotom dita: Va ma ŋaana as may goy hay Nasaret pa su? 47 Filip dumu: Naŋaya, ɗuwaŋ hiɗi iraŋu. Hay li ma Yesu wi Nataniyel ka tuɗay talamu, nam di kalamu: Ɗuwgi sa ma Israyel ma gasina, ma ɗutta may hayamɗina. 48 Nataniyel ka dumu: Naŋ wan ay arige? Yesu hotom dita: Hay li ma naŋ ka musi kuɗ gu-gumna, jew Filip yaŋu, nan waŋaya. 49 Nataniyel hot diti talamu: Rabbi, naŋ mi goora vi Lawna. naŋ kayni mi mulla vi Israyel. 50 Yesu hotom dita: Kay nan daŋ ala nan waŋay kuɗ gu-gumna, kay na'ta naŋ vi'e; naŋ ma wi slen ma ŋulona ma suw kayni! 51 Nan digi gasita, nigi ma wi wuralawna goy maliya, sunda-wuralawna vi Lawna jik kulo'o, hot jik gaa'a kaw, kay goora vi sana.
Yuldeta vi slita hay Kana
1 Buur ɦidi bugolda kayni, yuldeta vi dabayna li hay Kana hay Galileya. Sum Yesu ay ɗawn dam' lay. 2 Yesu hiɗi sa hatayna valamu fi yita kay lak hay yuldeta vi slita na'ta kaw. 3 Hay li ma vin kiɗasiyawa, sum Yesu ka dumu: Vin may kisiɗi. 4 Yesu da'a: Cata, va ma jarag hiɗi nanu mi mige? Liyna vanu bay co tuwa'a. 5 Sulum ka di tam sa sunda ala: Ligi slen kaf ma nam digi kalamna. 6 Hay li namna doway-hiɗiyna karkiya ka lak, ma lakay kay poora vi sa yudiyana, ma ŋaɓta ma' lebo ɦidi ka haya. 7 Yesu disiya: Hobgi dowayn lakŋi hiɗi niyna. Nisi hobom kulo vunam pulus' pulus' kaf. 8 Yesu ka disi ala: Wulin kayni calgit yo, nargit tam mul-yuldeta. Nisi tuɗum kaw. 9 Sa ma kot tina jugo niyna ma muɗi goy vinna: Nam wi liyna ma vinna kayni may hayam panaɗi, may sa sunda sa go niyn ayna wi kayni goy haraŋ; 10 Nam yi juf-cata dumu: San gigekaw ci vin ma ŋaana jewe, sumun ɦoy hiɗi vinna, bugolda nam ci ma may ir ŋaaɗina, may naŋ ŋom vin ma ŋaanawa ta-ta wulini? 11 Kayni ti ɗekka ta jewta ta Yesu la' hay Kana hay Galileya, nam ɗek goy kay gajijita valamu, nala kaw sa hatayna valamu vi hayamu. 12 Bugol kayni nam kali gaa hay Kapernawum, hiɗi sulumu, hiɗi ɓosiyomna, hiɗi sa hatayna valamu kaw, nisi lakay ɗawni ir buur neeɗa ɦawa.
Yesu digiɗ sa gus slena goy hay Tempella
13 Paskata vi sa Yudiyana coowa goboyo, nala Yesu kali kulo hay Yerusalem. 14 Nam fi sum sa gus luwayn goyna, sa gus fok-dimin goyna hiɗi sa gus gukayn goyna kaw lakay hay Tempella, hiɗi sa muɗ gurjuta kaw. 15 Nam kot tilek-zigewna, nisi kaf nam digiɗsi goy hay Tempella, nam mun fok-dimina hiɗi luwayna, nam das gurjuta vi sa muɗna goyo, ɦo tablena gaa'a kaw. 16 Tam sa gus gukayn goyna nam di ala: Nigi yawam goy tan pa, nigi ma li ziyda vi bunu goy ziy ma tererenɗi. 17 Sa hatayna valamu humsi gisi kay ɗota ta ala ciwerta kay ziyna vaŋu tiyofanawa. 18 Sa yudiyana sli ditiya dumu: Ɗekka mige ma naŋ li tuma'a kay li slen ki kayn nala? 19 Yesu hotsi dita: ɦogi Tempella zawni gaa'a, may hay buur ɦidi nan ma inim kulo'o. 20 Sa yudiyana di'e: A in Tempella zawni kulo'o, numa'a li busata dok-fiɗi yam karkiya, may naŋu, hay buur ɦidi de, naŋ as inim kulo'o? 21 Dolay nam ka law kayni kay Tempella vi tuwamu. 22 Hay li ma nam day kulo jar sa mitina pa dayna, sa hatayna valamu humsi gisi ala nam di nala, nisi vi hay Ɗota, vi hay dita ta Yesu da'ta kaw. 23 Hay li ma Yesu ka hay Yerusalem, hay yuldeta vi Paskata, sumuna ŋolo vi hay semda valamu, hay li ma nisi wi ɗekka ma nam lumna, 24 may Yesu kay tuwamu tun varta valam kisiɗi, kay nam wisi kafe, 25 kay nam gar a sa ma lum di-goyta kay sa mara'aɗi, kay nam kay tuwamu wi va ma ka hay sana.
Kaslana vi Yesu hiɗi Nikodemus
1 May san kep jar sum sa Farisena yum Nikodemus; 2 Nam ma tam Yesu hay henjeta dumu: Rabbi, numa wi ala naŋ mi sa ma hatta ma ŋolla, ma may vi Lawni pa; sa as kay li ɗekka ma naŋ lumna kaynɗi, la Lawna may hiɗi namɗina. 3 Yesu hotom dita: Nan daŋ gasita: La san bay vuɗ wuliya, nam as kay wi mulda-Lawnɗi. 4 Nikodemus dum ala, sana as vuɗ wuliya hay li ma nam muɗi maari nanige? Nam as hot hay sulumu kay vuɗ sem mara ma' lo su? 5 Yesu hotom dita: Nan daŋ gasita: La sana vuɗ goy hay niyna hiɗi Ŋustaɗi, nam as kal kalaf hay mulda vi Lawnɗi. 6 Va ma vuɗi goy hay sliwna, nam mi sliwna, va ma vuɗi goy hay Ŋusta, nam mi Ŋusta may. 7 Dita ta nan daŋgi ala, nigi ma vuɗ wuliya, naŋ ma muɗ ɦiyiŋ' kaɗi. 8 Simeɗna biw hay liyn marige ma nam mina, naŋ humum biwna valamu, may naŋ wi liyn ma nam may hayam panɗi, liyn ma nam kal hayna naŋ wumɗi kaw. Nam li ŋray ca tam sa ma vuɗi hay Ŋusta ki kayn nala. 9 Nikodemus hot sli dita dumu: Kayni fi li nanige? 10 Yesu hotom dita: Naŋ mi sa ma hatta ma ŋolla vi Israyel, naŋ as wi kaynɗi su? 11 Nan daŋ gasita, nay dum mi va ma nay wumu, lo nay as li di-goyta kay va ma nay wum wina lay. May nigi vi di-goyta vuma'ɗi. 12 La nigi vi dita vanu hay li ma nan digi kay slen ma ka kay nagat tanɗi, la nan min digi kay slen ma kulon kaw, nigi ma vum ɗawn vitige? 13 Sa ma jik kulo wuralawn mayɗi, may mi nam ma jikay wuralawn pana, goora vi sana ma ka hay wuralawna. 14 Ki Musus gaɓ guyn kulo hay fulda nala, kay na'ta la linigekaw goora vi sana ma gaɓis kulo kay gu-ma-grakŋa. 15 Kay gigekaw ma vi hay namu fi irita vatɗita. 16 Kay nala Lawna min sa nagatnawa, nam vul goora valamu ma vuɗi kepna, kay gigekaw ma vi hay namu ba goyɗi, may fi irita ta vatɗita. 17 Kay Lawna gi goora valamu hay nagata, kay ka kitata kay sa nagatnɗi, may kay sa nagatna ma fi su'da hay namu. 18 Sa ma vi hayamu kitata ma vumɗi, may nam ma viɗi kitata vumawa, kay nam may vi hay sem goora vi Lawna ma vuɗi kepnaɗi. 19 Ɗuwgi kitat tani, Haraŋa maawa hay nagata, may sumuna min jufunda suw haraŋa, kay lopna visiya ay joo'o. 20 Kay gigekaw ma li joota ka gaw tam haraŋa, ma goy tam haraŋɗi kaw, kay lopna valamu ma fi gat-vundaɗi. 21 May nam ma li gasita ma goy hay haraŋa, a lopna valamu ma ɗek goy kalam ala nam liyawa hay Lawna.
Di-goyta ta wulita vi Yohana ma Baptismana
22 Bugol kayni Yesu hiɗi sa hatayna valamu tuɗ hay nagata vi Yuda, nam musi hiɗi nisi ɗawni, li baptisma kaw. 23 Yohana kaw ka li baptisma hay Enon, goboy hiɗi Salim, kay liyna ma niyna ay hay ŋolo; sumuna tuɗ ɗawni kaf, fi baptisma kaw. 24 Kay hay liy namna Yohana bay gi daŋgay tuwa. 25 May, sa hatayna vi Yohana ci-wayt fok kulo jarsiya hiɗi sa ma Yudiya kep kay lawta vi poora. 26 Nisi ma tam Yohana ka dumu: Rabbi, sa ma naŋ ay hiɗi namu goy bugol niy-lumna Yordan ma naŋ li di-goyt kalamna, ɗuwaŋu nam ka li baptisma, sumun kaf ka ma talamu. 27 Yohana hot dita: Sana as fum kayni mi va ma vulumti ay hay wuralawni pa. 28 Nigi kay tuwgiya, nigi fi di goy kanu a nan di'e: Nanu, nan may mi Kristuɗi, may nan mi sana ma ganay sun vokomu. 29 Sana ma ka hiɗi cata, nam mi juf-cata; may bana jufna ma col humum delemu, hob hiɗi firita ŋolo kuɗ della vi juf-cata; nala firita van wulini hobawa kulo'o. 30 Nam ma ɦur kulo ŋolo, nan ma hot gaa goor may. 31 Nam ma may kulo pana ka kulo kay kafe; nam ma hay nagata, nam ka hay nagata; nam law nala kay nam ka hay nagata. May sa ma may kulo wuralawn pana, nam ka kulo kay kafe. 32 Nam li di-goyta kayni kay slen ma nam wumina hiɗi ma nam humumina kaw, may sa kep kaw ma vi di-goyta valamu mayɗi. 33 Sa ma vi kuɗ di-goyta valamu nam ɗek goy ala Lawn mi gasita; 34 kay sa ma Lawna gumi sunu nam dum mi yoboyna vi Lawna, kay Lawna vul Ŋusta ŋol suwa. 35 Bumna min Goora, nam vulum slen kaf hay ɓalamu. 36 Nam ma vi hay goora, fi irita ta vatɗita; may sa ma tun vida valam hay gooraɗi, nam fi wi iritaɗi, ɦiyda vi Lawna ma bur kalamu may.
Cata ta Samariyata
1 Hay li ma Bum-Sumun wi ala sa Farisen humi ala Yesu fi sa hatayna ŋolo suw Yohana, li baptisma ŋol suwa kaw, 2 May Yesu kay tuwamu may li baptismaɗi, may lum kayni si sa hatayna valamu. 3 Nam hin Yudiya hot hay Galileya lo. 4 Ŋaat kayni la litigekaw nam ma jik hay Samariya. 5 Nam co hay hoyok-ziyn kep ma ka hay Samariya yum ala Sikar, goboy hiɗi sinena ma Yakub vulum mi goora valam Yosef. 6 Hay ɗawni kaata vi Yakub aya. Hay rogoyta valamu Yesu ay makaya, nam mus gaa kel kaata may. 7 Cata Samariyata kep ma kay go niyna. Yesu da'a: Vulan niy ma ci'e. 8 Kay sa hatayna valamu kali hay hoyok-ziyna kay gus sle ma tina. 9 Cata Samariyata dumu: Naŋ sa ma Yudiyana naŋ joban nan cata Samariyata kay vulaŋ niy ma cina kay mige? -- Kay sa Yudiyana jarsi may tap hiɗi sa Samariyanɗi. -- 10 Yesu hota' dita: Lali nak wi vulda vi Lawna, lali nak wi sa ma dag ala vulan niy ma ci'en zawni, Jobom kay niy ma cin ɗawn ti nak kay tuwagu, nala nam ɗawn ma vulag niy ma irina. 11 Na' dumu: Bum-Sumuna, va may kaŋ a naŋ go niy hiɗi namɗi, lo kaata zul ŋolo, niy namna ma irina naŋ fumay ɗawni arige? 12 Buy Yakub ma vulma kaatiya, nam kay tuwamu, gurona valamu hiɗi farayna valam kaw ci niyna haya'a, naŋ kayn ŋol suwum su? 13 Yesu hota' dita: Gigekaw ma ci kuɗ niyn tani laat ma lum lo; 14 May nam ma min ci niyna ma nan vulumtina, laat ma lum noŋ loɗi, niyn ma nan vulumtin ɗawni, ma muɗ hayam mi liyn ma niyn law haya, ma jaŋay goyo ta-ta tam irita ta vatɗita. 15 Cata ka dumu: Bum-Sumuna, vulan niy namna, a laata ma lan loɗi, a nan hotay tan go niy loɗi ge! 16 Nam da'a: Tuɗag yag jufagiya, nak hotay tani. 17 Cat hot dita: Jufan mayɗi. Yesu da'a: Nak di ala jufag mayɗi kayn hay liyamu. 18 Kay nak yaw jufayn vasl, ma nak ka kuɗum wulinna kaw nam may mi jufagɗi. Hay kayni nak di gasita. 19 Cata ka dumu: Bum-Sumuna, nan wi ala naŋ mi sa ma jobta-Lawna. 20 Sumayma'a girif kulo kay hiɗiyta zawni, may nigiya, nigi di ala liyn ma girif hayna ka kulo Yerusalem. 21 Yesu da'a: Cata, vag yoboyna vanu, liyn ma ma'a, hay li ma nigi ma girif bumna kulo kay hiɗiyta zawni loɗi, hay Yerusalemɗi kaw. 22 Nigi girifim mi va ma nigi may wumɗi; may numa'a, numa girifim mi va ma numa wumu, kay su'da may goy vi Yudiyana pa. 23 May liyna ma ma'a -- liy namna ka wulini kaw -- hay li ma sa girif gasina ma girif Bumna hay Ŋusta hiɗi gasita kaw; kay Bumna garsi kayn si sa girifim ki kayn nana. 24 Lawna mi Ŋusta, nisi sa girifimu, la linigekaw nisi ma girifimu hay Ŋusta hiɗi gasita kaw. 25 Cata ka dumu: Nan wi ala Mesiyas ka ma'a, nam ma yum Kristu, hay li ma nam maawana, nam ma di slen goy tay kafe. 26 Yesu da'a: Nan ma ka law hiɗi naku, nan mi namu. 27 Hay na'ta kayni sa hatayna valamu ma'a, nisi fum kus Yoboyn hiɗi cata ta Samariyata, nisi muɗ ɦuyum'. Nir na'ta kepe, sa mal vunam kulo'o di ala: Naŋ jobom mi gige? Lebo: Naŋ law hiɗi na' kayn kay mige? May noŋɗi. 28 Cat hin genda va'a, kali hoyok-ziyna, ka di tam sumun ala: 29 Nigiyaya, ɗuwgi sana kep ma dan kay slena ma nan lum kafna; nam as lin mi Kristu ɗisu? 30 Nisi cukay goyo hay hoyok-ziyna, tuɗ talamu kaw. 31 Hay na'ta sa hatayna valamu siɗawamu di'e: Rabbi, taŋu. 32 May nam disiya: Nan ka ti tina ma nigi wumɗina. 33 Nala sa hatayna ka di jar-tuwsiya: Sa mara maram va ma ti'e su? 34 Yesu ka disiya: Tina vanu kayni kay li minda vi nam ma ganina, a vat lopna valamu kaw. 35 Nigi may di ala til mayɗi fiɗi feɗna ma li'e ɗi su? Ɗuwgiya, nan ka digiya, poŋgi irgi kulo'o, ɗuwgi sinena ka muɗi haɓi a feɗa. 36 Wulini pa sa ma feɗna fi wurakŋa, tok vuɗna vi irita ta vatɗita. Kay sa ma was-jafna hiɗi sa ma feɗna fi firi kuɗ tuwsiya. 37 Kay hay kayni, sle ma diyna nam gasiya: Kep was jafna gaa'a, hena li feɗna may. 38 Nan cukgiyawa kay feɗ va ma nigi li lop kalamɗi, segena li lopnawa, nigi cuk kayni cuki hay ɦawa. 39 Sum sa Samariyana ŋolo sa hay hoyok-ziyn kayni vi hay Yesu kuɗ yoboyna vi cata, hay li ma na' li di-goyt ala: Nam dan kay slen ma nan lumna kaf. 40 Lo hay li ma sa Samariyana maawa talamu, nisi siɗawam kay nam ma mus hiɗi nisiya; nam mus ɗawni ir buur ma'. 41 Sumuna ŋolo suw asa lo vi kuɗ yoboyna valamu. 42 Nisi tun caw di tam cata: Numa'a vi kayni kuɗ dita vagɗi; kay numa'a humum kay tuwma'a, numa wi'e kaw ala zawni mi sa ma su'da vi sa nagatna gasi.
Yerta-goyta vi goora vi sojena ma li lop vo vi mulla
43 Bugol buur ma' vatawa, Yesu kali ɗawn pa tuɗ Galileya; 44 Kay Yesu kay tuwamu di goy ala sa ma jobta-Lawna fi suburta hay nagata valamɗi. 45 May hay li ma nam co Galileya, sa Galileyana vum hiɗi firita, kay nisi wi slen kaf ma nam lumay hay Yerusalem hay buura vi yuldeta. Kay nisi kaw ay hay yuldeta. 46 Nam hot hay Kana hay Galileya lo, liyna ma nam muɗ niyna goy vinna. Hay Kapernawum sojen kep ma li lop vo vi mulla goora valam ka moyo. 47 Nam hum ala Yesu may hay yudiya pa maawa hay Galileya, nam tuɗ talamu, siɗawamu kay nam jikay gaa'a kay muɗ goora valam goy ŋaa'a, nam ma ay goboy vun mitta. 48 Yesu dumu: ɗekka hiɗi gul-yalda lali nigi wum wiyɗina, nigi lak ɗawn hay bay-vida! 49 Sojena ma li lop vo vi mulla dumu: Bum-Sumuna, jikaŋay gaa'a jew goora van mita. 50 Yesu dumu: Tuɗaŋu. goora vaŋ ka iriya. San kayni vi kuɗ yoboy ma Yesu dumna, nam kali kaw. 51 Hay li ma nam ka jikay gaa'a, sa sunda valamu ŋafam iramaya dum ala goora valam ka iriya. 52 Nam jobsi ala goora valam muɗ marya kayni hay leer marige? Nisi dumu: Kamata hay leer ma siɗiyana, tuwam ma gum kuna hinimu. 53 Bumna wi goy haraŋ ala kayni hay leer ma Yesu dum ala goora vaŋ ka iriyana. Nam vi'e, nam hiɗi ziyna valam kaf kaw. 54 Kayni ti ɗekka ta Yesu la' sem ma'ta hay li ma nam may Yudiya pa co Galileya.
Yer-goyta vi sa ma moy ma Betestana. Pi-lawta vi sa yudiyana kay Yesu hiɗi hot-dita valamu
1 Bugol kayni yuldeta vi sa yudiyan li'e, nala Yesu kali kulo Yerusalem. 2 May hay Yerusalem, goboy tam vun-ziyna vi fok-dimina, goor-goloŋ kep aya, ma yum Betesta hay vun Hebrena, diɓira ka ŋuyi talam vasl. 3 Gaa kuɗ diɓir namna sa moyna ka dakay ŋolo: Sa dukina, sa dirlayna, sa hurɓulina kaw, kay zam ɦiwirta-kulota vi niyna. 4 Kay hay fattiɗeŋ kep, sunda-wuralawna jikay gaa'a hay goor-goloŋŋa, ɦiwir niyna kulo'o. Sa ma jikay gaa'a jewe hay li ma niyna ɦiwir kulo dena, nam fi muɗ goy ŋaa'a, la talam mi moy mige kaw. 5 Sa kep ay waŋ', nam musi hiɗi moyna ir busat dok-ɦidi yam glafandi. 6 Yesu wum gaa buri waŋ', nam wi kaw ala nam ay tan waŋŋi musi ŋolo. Yesu dum ala: Naŋ min muɗ goy ŋaa'a su? 7 Sa ma moyna hotom dita: Bum-Sumuna, sa ma as kay gan hay goor-goloŋga hay li ma niyna ɦiwir kulo'o mayɗi, hay li ma nan tuɗa, sa mara jik gaa jewanu. 8 Yesu dumu: Fokaŋ kulo'o, slaŋ va ma buura vaŋu, tuɗaŋ maŋu. 9 Wulini wulini sana muɗi goy ŋaa'a; nam sli va ma buura valamu, kali malamu. 10 Fat na'ta kayni mi buur ma sabatna. Sa Yudiyana ka di tam sa ma muɗi goy ŋaana ala: Vaydi mi buur ma sabatna, hagat may kaŋ kay ziy va ma buura vaŋɗi. 11 Nam hot dita, sa ma muɗan goy ŋaana dan ala: Slaŋ va ma buura vaŋu, tuɗaŋ maŋu. 12 Nisi jobom ala: Sa ma daŋ ala naŋ slumu tuɗaŋun mi gige? 13 May sa ma muɗi goy ŋaana wi ala san kayn nalaɗi; kay hay liy namna kayni sumuna ay ŋolo, Yesu ba jarsiya. 14 Bugol kayni Yesu fum hay Tempella ka dumu: Ɗuwaŋu naŋ muɗi goy ŋaa'a, naŋ ma li suluk loɗi, kay va ma joo'o suw kayni ma li taŋɗi. 15 San kayni kali tam sa yudiyana kay disi ala muɗum goy ŋaa'a dolay kayni mi Yesu. 16 Kay na'ta kayni sa yudiyana gar Yesu bik-bik', kay nam li slen kayni hay sabatna. 17 May nam hotsi dita: Bunu ka li lopo ta-ta wulini, nala kaw nan li lopo. 18 Kuɗ kayni sa yudiyana garam ŋolo suw jewe kay nisi min cum goyo, may kay ta ala nam raw gatta vi sabatna goyota tutaɗi, may kay nam di ala Lawna mi bulumu, lo ala nam ŋra tuwam kal-kal' hiɗi Lawna. 19 Yesu hotsi dita: Nan digi gasita: Goora as li va kay tuwam ma ɗeŋɗi, may mi va ma nam wi bumna li'e; slen kaf ma bumna li'e, goora lum mi va namna kaw. 20 Kay bumna min goora, nam ɗekem lop ma ŋulona ma suw kay slen kaf ma nam li'e, nam ma ɗekem lop ma nulona ma suw kayni, kay nigi ma lak jiɓer ɦuyum'. 21 Kay ki bumna day sa mitin kulo'o, muɗsi iriya kaw, goora vi san kaw as muɗ iriya gigekaw ma nam mina. 22 Lo bumna may ka kitata kay saɗi, may nam vul kitatawa kaf mi goora, 23 Kay sumun kaf ma vul suburta mi goora ki nisi vul suburta mi bumna nala kaw. Sa ma vul suburta mi gooraɗi, may vul suburta mi Bumna ma guminaɗi kaw. 24 Nan digi gasita, sa ma hum yoboyna vanu, vi hay nam ma ganina kaw, nam fi irita ta vatɗitawa, nam ma co hay kitatɗi kaw, may nam rawawa goy hay mitta pa kal hay irita. 25 Nan digi gasita, liyn ka co'o -- ka wulini kaw -- liyna ma sa mitina fi hum del Goora vi Lawna; nisi kaf sa humumna ma lak iriya. 26 Kay ki irita ka hay Bumna kay tuwamu, nala kaw nam vul irita hay Goora kay tuwamu. 27 Nam vulum donota kay ka kitata, kay nam mi goora vi sana. 28 Muɗgi ɦuyum' kay kaynɗi; kay liyna ma co'o, liyna ma sumuna sa hay zulla kaf ma humum delemu. 29 Nisi sa li ŋaatawa ma kali goyo hay dayta-kulota vi irita, may nisi sa li joota hay dayta-kulota vi kitata. 30 Nanu, nan as li va kay tuwan ma ɗeŋɗi: Kuɗ va ma nan huma, nan ka kitata; ka-kitata vanu na' ɗigere, kay nan gar kay li minda vanɗi, may minda vi nam ma ganina. 31 La nan li di-goyta kay tuwan ma ɗeŋŋa, di-goyta van may gasiɗi. 32 Sa mara li di-goyta kanu, nan wi kaw ala di-goyta ma nam li kanu kayni gasiya. 33 Nigi cuk sumun ay tam Yohana, nam li di-goytawa kay gasita. 34 Di-goyta ta nan fa' kan nanu, na' may vi sa paɗi, nan di ki kayn nala kay nigi ma fi suɗ goyo. 35 Yohana ay kayn mi fitilla ma ŋala, wile kaw, may nigi li firitawa kuɗ haraŋa valamu ir leer kep ɦawa. 36 Nanu, nan ka hiɗi di-goyta ta ŋolo suw di-goyta vi Yohana; kay lopna ma bumna vulanawa kay hobom vunam kulo'o, lop namna ma nan lumna li di-goyta kan kaw ala Bumna ganiyawa. 37 Bumna ma ganina, li di-goyta kanu kaw. Nigi hayɗin humum delem ka noŋɗi, wum iram noŋɗi kaw, 38 nala yoboyna valam may mus haygiɗi, kay nigi min vi hay nam ma guminɗi. 39 Nigi ka fek ɗota, kay nigi var ala nigi ma fi irita ta vatɗita haya'a: Na' kayni ta ka di goy kanta. 40 Nigi min ma tanu kay fi irita ta vatɗitaɗi! 41 Nan min fi suburta ta may tam sumun paɗi. . . 42 May nan wigiya: Minda vi Lawna may haygiɗi. 43 Nan maawa hay semda vi bunu, nigi may vanɗi; may la sa mara'a ma hay semda valam kay tuwamu, nigi ma vi kuɗumu! 44 Nigi sa fi suburta vigi kuɗ tuwgi jar-tuwgiya, may suburta ta may vi Lawna ma kepna pata nigi gara'ɗi, nala nigi as vi ɗawn nanige? 45 Nigi ma var ala, nan ma tun lawta kigiya vok Bumnaɗi. Nam ma min tun lawt kigina, mi Musus ma nigi zam kuɗ cubta-sle'ta hayamu. 46 La nigi vaawa hay Musus, nigi ma vi hayanu kaw, kay nam ɗo kayn kan nanu. 47 May la nigi vi kuɗ ɗona valamɗi, nigi as vi kuɗ yoboyna vanu nanige?
Mu'da vi funa ma ŋol dak-dakŋa
1 Bugol kayni Yesu kali goy gal hena vi niy-lumna vi Galileya ma yum Tiberiyad. 2 Tok ŋolla tapay kuɗumu, kay nisi wi ɗekka ma nam lumay kat sa moyna. 3 Yesu jik kulo kay hiɗiyta, ɗawni nam musi gaa'a hiɗi sa hatayna valamu. 4 May yuldeta vi Paskata vi sa yudiyana ay goboyo. 5 Yesu poŋ iram kulo na kayni, nam wi tokŋa vi vok ŋolla ka tuɗay talamu, nam ka di tam Filip: Nay ma gus fun ay arige a sumun kayni ma fi a ti'e? 6 May nam di kayni kay wakamu, kay nam wi va ma nam ma lumna. 7 Filip hotom dita: La funa ir deniye kis-ma' kaw, as ɓuraw kisi a sa fi ne' ne' kafɗi. 8 Sa mara kep jar sa hatayna valamu, Andre, ɓasum Simon Peter dumu: 9 Goor ma joriyona ka tani ma fu-orgena ka hay ɓalam vasl, kuluf ma' lay, may kay vok ŋol ma ɦini-ɦinin tani, nam asam kisin mige? 10 Yesu di'e: Molgi sumun gaa'a. Hay liy namna usna ay ŋolo. Nisi lakay gaa'a, ŋaɓta visi ir sumun birim vasl. 11 Yesu yaw funa, gi bol kalamu, ɓurawam goy tam sa ay molay gaana; nam li nala kaw hiɗi kulufna, ta-ta nisi fi pet ma nisi mina. 12 Hay li ma nisi hobawa, nam di tam sa hatayna valamu: Cawam ma ray goyna yawam kulo'o, kay va ma ba goyɗi. 13 Wulini nisi yawam kulo'o, nisi hob tikisina doogo yam ma' hiɗi caw fu-orgena, ma ray goy kuɗ sumuna, hay li ma nisi ti tina. 14 Vok ɗekka ma Yesu lumna kayni, sumuna di'e: Gasi nam zawni mi jobta-Lawna ma min ma kay nagata. 15 Hay li ma Yesu wi ala nisi min tunum mulu, nam puw goyo, kali lo kulo kay hiɗiyta, nam valam kep.
Yesu tuɗ kulo kay niyna
16 Hay li ma vulatita coowa, sa hatayna valamu jik gaa ta-ta deŋel niy-lum ŋolla. 17 Nisi jik hay lumda kay kal ta-ta kulo gal hena vi niy-lum ŋolla hay Kapernawum. Wulini liyn liy jufunu, may Yesu bay ma tisi tuwa. 18 Simeɗ ŋolla biwa, billa li ŋol suw asa. 19 Hay li ma nisi gi voksiya ir stade dok-ma' yam vasl lebo dok-ɦidi, nisi wi Yesu ka tuɗay kay niy-lumna; hay li ma nam hebay goboy tam lumda, nisi muɗi nari. 20 May Yesu disiya: Kayni mi nanu, ligi narɗi! 21 Nisi min jikimay kulo kuɗsiya hay lumda, ɗuw na kayni lumda gaɓ kulo deŋel hay liy ma nisi na hayn cis' may.
Funa vi irita
22 Hay buurta ka'ta, vokŋa ma hinay goy gal hena vi niy-lumna, ɗuw kayni lumna mara kalis ɗawn paɗi, may lumda kep na kay', nisi may wi Yesu jik kulo haya' hiɗi sa hatayna valamɗi, may nisi kali visiya. 23 May lum hena may Tiberiyad pa goboy hiɗi liyn ma nisi ti fun hayna, bugol Bum-Sumuna gi bol kalam gina. 24 Hay li ma sumun wi ala Yesu hiɗi sa hatayna valam kaw say ɗawnɗi, nisi jik hay lumna, kali Kapernawum kay gar Yesu. 25 Nisi fum kulo gal niy-lum ŋolla dumu: Rabbi, naŋ may gal tan kayn lancitige? 26 Yesu hot dita: Nan digi gasita, nigi garanu, may kay nigi wi ɗekkaɗi, may kay ta ala nigi ti funa hobay kaw. 27 Ligi lop kay tin ma ba goynaɗi, may kay tina ma mus ta-ta kay irita ta vatɗita, nam ma goora vi sana ma vulgiya, kay nam kayni ma Bumna -- Lawna -- tun soona valam kalamna. 28 Nisi dumu: Numa ma lum mi mige a li lopna vi Lawna? 29 Yesu hot dita: Lopna vi Lawn kayni kay nigi vi hay nam ma nam gumina. 30 Ɗekka mige ma naŋ ma li'e kay numa ma wa'a, vi hayaŋ kaw? Naŋ lum mi lop mige? 31 Sumayma ti manna hay fulda, ki ɗo'ay nala: Nam vulsi tina ma may wuralawn pana a ti'e. 32 Yesu disiya: Nan digi gasita, funa ma may wuralawni pana vulgitin mi Mususɗi, may funa ma gasina ma may wuralawni pana vulgit mi Bunu; 33 kay funa vi Lawna, nam kayn ma may kulo wuralawni pana, ma vul irita mi sum sa nagatna. 34 Nisi di talamu: Bum-Sumuna, naŋ vulma fun kayni dok-doko. 35 Yesu disi ala: Nan mi fun ma irina. Nam ma min ma tanu, mayt ma cum loɗi, nam ma vi hayanu, laat ma lum loɗi kaw. 36 May nan digiya, nigi wanawa, nir na'ta kep nigi min viɗi. 37 Nisi kaf sa Bumna vulanta, nisi ma tanu, nam ma ma katanu, nan ma gum goy noŋɗi; 38 Kay nan may kulo wuralawni pa, kay li minda vanɗi, may kay li minda vi nam ma ganina. 39 Awa, minda vi nam ma ganin ka kayn ala: Nisi kaf sa nam vulantina, nan ma ba mara kuɗsiɗi, may kay nan ma daysi kulo'o hay buur ma cawna. 40 Minda vi Bun kayn ala: San gigekaw ma ɗuw goora, vi hayamu kaw, nam ma fi irita ta vatɗita; nan ma dayam kulo'o hay buur ma cawna kaw. 41 Hay na'ta kayni sa Yudiyana ŋurnay kuɗumu, kay nam di'e: Nanu, nan mi funa ma may kulo wuralawni pana. 42 Nisi di'e: Nam zawn may mi Yesu di su? Goora vi Yosef ɗi su? Ma bulum hiɗi sulum nay wisi yawn ɗi su? Nam as di ala: Nan jikay kulo wuralawni pa ir nanige? 43 Yesu hotsi dita: Nigi may ŋurnay jar-tuwgiɗi. 44 Sa as ma katanu bay bumna ma ganina maramayɗi, nan min dayam kulo'o hay buur ma cawna may. 45 Ɗota ɗoy hay sa jobta-Lawna ala: Nisi kaf Lawna ma hatsiya. Gigekaw ma hum vun Bumnawa, vi hatta valamu kaw ma tanu. 46 Sa ma wi Bumna mayɗi, may mi nam ma may vi Lawni pana; namu nam wi Bumniyawa. 47 Nan digi gasita, sa ma vi'e nam ma fi irita ta vatɗita. 48 Nanu, nan mi funa vi irita. 49 Sumaygi ti manna hay fulda, nisi mitiya. 50 Tani mi funa ma jikay wuralawni pana, kay gigekaw ma fi tumu, nam ma mitɗi. 51 Nanu, nan kayni mi fun ma irina ma may kulo wuralawni pa. La sa ti kuɗ fun kayni, nam ma mus iriya ta-ta hay vatɗita, kay funa ma nan vulum kayni, nam mi sliw-tuwanu kay irita vi sa nagatna. 52 Hay na'ta sa yudiyana ci wayt jar-tuwsiya di'e: Nam as vulay sliw-tuwamu a ti'e ir nanige? 53 Yesu disiya: Nan digi gasita, la nigi ti sliw-tuwna vi goora vi sanaɗi, ci busuwamɗi kaw, irita may haygi noŋɗi. 54 Nam ma ti sliw-tuwanu, can busuwan kaw, nam ma fi irita ta vatɗita, nan ma dayam kulo'o hay buur ma cawna kaw. 55 Kay sliw-tuwan kayni mi va ma tina gasi, busuwan kaw mi va ma cina gasi. 56 Sa ma ti sliw-tuwanu, ci busuwanu kaw, mus hayanu, nan mus hayamu kaw. 57 Ki Bumna ma irina ganiyawa, nan kaw ka iriya hay Bumna, nala kaw sa ma tan tuwan nanu, ma mus iri kuɗan nanu. 58 Funa ma jikay wuralawni pana ka tani. Nam may ŋray ki ma sumaygi tumaya, nisi mit kawna naɗi. Sa ma ti fun namna nam ma mus iriya ta-ta hay vatɗita. 59 Kayni mi slen ma Yesu dumu hay li ma nam ka hatsi hay sinagogayna, hay Kapernawum. 60 Hay li ma nisi hum kayni, ŋolo jar sa hatayna valamu di'e: Yoboyna ma ɗeŋŋa kayni sa ma as kay humum mi gige? 61 Yesu wi hay tuwam ala sa hatayna valamu ka ŋurnay jar-tuwsiya kuɗ lawt kayni, nam disi ala: Lawta kayni muɗi kigiya mi va ma dab sem su? 62 May la nigi wi goora vi sanawa kal kulo'o hay liy ma nam ay jew pana klasige! 63 Vul irita kayni ti Ŋusta. Sliw-tuwna nam mi va ɦawa. Yoboyna ma nan dum tigiya kayni mi Ŋusta hiɗi irita kaw. 64 May sara ka jargi yaw, nisi may viyɗi. Kay hay tun cawta pa Yesu wi nisi sa viɗina hiɗi nam ma min di newt kalamna kaw. 65 Nam di'e: Kuɗ kayni nan digi ala, sana as ma tanɗi, la Bumna vulum a li nalaɗina. 66 Hay liy namna pa, sa hatayna valam segen ŋolo tun caw hot goy bugolsiya, nisi min tuɗ hiɗi nam loɗi. 67 Yesu ka law tam sa doogo yam ma'na ala: Nigiya, nigi min tu'ɗi may su? 68 Simon Peter hot dit talamu di'e: Bum-Sumuna, numa ma tuɗ tam gige? Yoboyna vi irita ta vatɗita ka kaŋu. 69 Numa vi'e, wi kaw ala naŋ mi Kristu, ma Peldetna vi Lawna. 70 Yesu hotsi dita: Nigi sa doogo yam ma'na, vilekgi goy mi nanɗi su? May kep jargiya mi Matna! 71 Nam law kayn kay Yudas goora vi Simon Iskariyot, kay nam mi sa ma min di newt kalamna, nam kep jar sa doogo yam ma'na.
Bay-vida vi ɓosiyom Yesuna
1 Bugol kayni, Yesu ka poy hay Galileya, nam min poy hay Yudiya loɗi, kay sa yudiyana gar kay cum goyo. 2 May, yuldeta vi sa yudiyana, yuldeta vi guɗukŋa ka co goboyo. 3 Ɓosiyomna dumu: Tuɗaŋis tan pa, kalaŋ hay Yudiya. Kay sa hatayna vaŋu as ɗuw lopna ma naŋ ka lumna. 4 Kay sana as li va goy ŋayayɗi, la nam min ala sumuna wum goy haraŋi. La naŋ ka li slen kayni, ɗekaŋ tuwaŋ goy kir sumuna. 5 Kay ɓosiyomna kaw vi hayamɗi. 6 Yesu disi ala: Liyna van bay co tuwa, may liyna vigiya ka dok-doko. 7 Sa nagatna as ka gawt kigiɗi, may nisi ka gawt kanu, kay nan di goy kisiya kay lopna visi kayn joo'o. 8 Nigiya, tuɗgi kulo hay yuldeta. Nanu, nan may tuɗ kulo hay yuldet kaynɗi, kay liyna van bay co tuwa. 9 Hay li ma Yesu di lawta kayni tisi dina, nam hinis malam hay Galileya.
Yesu ka hay Yerusalem hay yuldeta vi guɗukŋa
10 Hay li ma ɓosiyomna kali kulo hay yuldeta kalla, nam kay tuwamu kaw kali kulo lay, nam vul tuwam goy haraŋɗi, may ki ŋayay nala. 11 Hay na'ta sa Yudiyana garam hay yuldeta, di'e: Nam ka arige? 12 Jar sum sa dakayna ŋurnayta ka li kalamu: Sa hena di ala: Nam mi sa ma ŋaana, segena di'e: Hay! Nam ka viy sumun goyo. 13 Nir na'ta kep sa di va goy kalam haraŋɗi, kay nisi li nar kay sa yudiyana. 14 Hay li ma yuldeta ka li'e, Yesu kali kulo hay Tempella, nam hata. 15 Sa yudiyana muɗi ɦuyum' di'e: nam wi ɗot kayn ir nanige, kay nam may hata'ɗi? 16 Yesu di tisiya: Hatta van kayni may van paɗi, may na' may vi nam ma ganina. 17 La sa min li minda valamu, nam ma wi hatta vanu, la na' may vi Lawna lebo nan law kayni kay tuwan ma ɗeŋŋa su. 18 Sa ma di kay tuwam ma ɗeŋŋa nam gar kay subur tuwamu; may nam ma gar suburta vi nam ma gumina nam gasiya, bay-ɗigerta may hayamɗi kaw. 19 Musus may vulgi gattaɗi su? May sa kep jargiya kaw ma li kuɗ gatta mayɗi. nigi gar kay can goyo kay mige? 20 Sumuna hotom dita: Naŋ zawn ful kaŋu. Sa ma gar kay caŋ goyn mi gige? 21 Yesu hotsi dita: Nan li lopna kep ma nigi kaf muɗi ɦuyum' kuɗumu. 22 Musus vulgi ka-gosayta -- may kay na' may vi Musus paɗi, may vi sumaygi pa -- Nala nigi ka san gosaya hay sabatna. 23 La sana fi ka-gosayta hay sabatna, kay kus gatta vi Mususɗi, nigi muɗ ɦiy katanu kay nan muɗ san noŋo goy ŋaa'a hay sabatna kay mige? 24 Ka kitat kuɗ va ma nigi wum goy jiyamnaɗi, may kaagi kitata kuɗ ɗigerta. 25 Sum sara sa hay Yerusalem di'e: Zawni mi nam ma nisi garam kay cum goyna ɗisu? 26 Nam ka colay kus yoboyn goy haraŋi, nisi di va talam noŋɗi kaw! Sa ŋulona wum goy haraŋ ala zawn mi nam Kristu lay su? 27 Kay nam ma zawnina numa wi liyn ma nam may hay pana, may hay li ma Kristu ma ɗawni, sa as wi liyn ma nam ka haynaɗi. 28 Hay li ma nam ka hat hay Tempella, nam siwela di'e: Nigi wanu, wi liyna ma nan may hay pana kaw! Kay nan maawa kay tuwan ɗeŋɗi, may nam ma ganina nam gasiya, nigi wumɗi may. 29 Nanu, nan wumu, kay nan may goy hay namu, ganay kayni mi namu kaw. 30 Nisi gar kay vumu, may ɓam sa kep kaw tun talamɗi, kay liyna valam bay co tuwa. 31 Sumuna ŋolo jar tokŋa vi hayamu, nisi di'e: Hay li ma Kristu namna kayn maawana, nam ma li ɗekka ŋol suw ma nam lumna zawni su? 32 Sa Farisena hum sumuna ka ŋurnay kalamu. Nala muliyan ŋulo sa-ɗifinna hiɗi sa Farisena cuk sa sunda kay vumu. 33 Yesu disiya: Nan ka hiɗi nigiya ir liyn neeɗa ɦawa; bugolda nan ma tuɗ tam nam ma ganina. 34 Hay liy namna ɗawn nigi ma garanu, may nigi ma fanɗi, liyn ma nan ma mus haya, nigi as co hayɗi kaw. 35 Sa Yudiyana di jar-tuwsiya: Nam ma tuɗ arige, a nay as fumɗi kayni? Nam min kal goy tam sa Yudiyana sa meray goy jar sa Grekŋa kay hat sa Grekŋa su? 36 Yoboyna ma nam dum ala: Nigi ma garanu, may nigi ma fanɗi, liy ma nan ma mus hayna, nigi as co hayɗi kaw, kayni min ɗek mige? 37 Wulini hay buur ma cawna, buurta ŋolda hay yuldeta, Yesu col kulo'o siwela di'e: La laat ka li sa'a, nam ma ma tanu kay ci'e. 38 Nam ma vi hay nanu, goy hayam pa, niyna ma irina ma ɓatna ma jaŋay goyo, ki ɗota di nala. 39 May nam di kayni kay Ŋusta ta nisi sa min vi hayamna ma fa'ta; kay Ŋusta bay vuli tuwa, kuɗ ta ala Yesu bay fi gajijit tuwa. 40 Sumuna sa jar tokŋa, hay li ma nisi hum kayni, nisi di'e: Nam zawni mi sa ma jobta-Lawna gasiya. 41 Segena di'e: Zawn mi Kristu. Segena lo di'e: Litige! Kristu may goy hay Galileya pa su? 42 Ɗota di ala Kristu nam ma ɗawn hay jafna vi David, hay hoyok-ziyna Betlehem, liyna ma David ay hayna ɗisu? 43 Nala ɓurawta co jar sumuna kuɗumu. 44 Sum sara jarsiya min vumu, may sa ma tun ɓalam talam mayɗi. 45 Sa sunda hotay tam muliyan ŋulo sa-ɗifinna hiɗi sa Farisena ka disi ala: Nigi may maramayɗi kay mige? 46 Sa sunda hotsi dita: Sa mara ma law ki san zawni nala mayɗi. 47 Sa Farisena ka di tisi ala: Nigi kaw ɗuti goy lay su? 48 Sa mara ma jar sa ŋulona lebo jar sa Farisena ma vi hayam ka su? 49 May sum nisi sa wi gattaɗin tani, nisi si sa beɗay goyna! 50 Nikodemus, nam ma may tam Yesu jewe, nam kep ma ay jarsiya, disiya: 51 Gatta vay jun sana, jew sa bay hum lawta valamu, jew nam bay di va ma nam lumna kaw su? 52 Nisi hotom dita: Naŋ kaw, naŋ mi sa ma Galileyan lay su? Fekaŋ ŋaa'a, naŋ ma wi ala sa ma jobta-Lawna may goy Galileya paɗi.
Cata ta bulota
53 Nisi mera, gigekaw hay ziyna valamu valamu.
1 May Yesu kali gal hiɗiyt Olive. 2 Hay grawt culum, nam kali hay Tempella lo, sumun kaf ma talamu, nam mus gaa'a, tun caw hatsiya. 3 Sa wi-ɗota hiɗi sa Farisena mar cat kep ta nisi fa'ay hay zlata-bulota, 4 nisi cola' goy jarsi zaw, tun caw di tam Yesu ala: Bum-hatta, cat zawni numa fa'ay hay zlata-bulota, 5 Musus hay Gatta valamu vulma hagata ala cata ta ki kayn nala ga' hiɗi goorhoyona:g May naŋ di mige? 6 Nisi di slen kayni kay nemem a pi lawta kalamu. May Yesu heray gaa'a, tun caw ɗo hiɗi cita-ɓalamu gaa kay nagata. 7 Hay li ma nisi ka so tuwsi kuɗum hiɗi jobta lo lo, nam colay kulo'o di tisiya: Sa ma jargi ma li suluk noŋɗina sli goorhoyona, nam ga' jewe. 8 Nam heray gaa'a lo, tun caw ɗo gaa kay nagata. 9 Hay li ma nisi hum kayni, hay li ma tap-wida visiya pi lawt kisiya, nisi zlet tuwsi goy kep kep, tun caw tam sa liy maara ta-ta tam sa cawna. Yesu hin valam kep, hiɗi cata ta ay colay jarsita. 10 Wulini Yesu colay kulo'o di ta'a: Cata, nisi sa pi lawt kagŋa ka arige? Sa may ka kitata kagɗi su? 11 Na' hot dita: Sa mayɗi, Bum-Sumuna. Yesu da'a: Nan kaw, nan ka kitat kagɗi, tuɗag magu, li suluk loɗi.
Yesu ɗek goy kay lopna valamu tam sa dakay vokomna
12 Yesu kus yoboyn tisi lo di'e: Nanu mi haraŋa vi nagata; sa ma tap kuɗanu, nam ma poy hay jufundaɗi, may nam ma fi haraŋa vi irita. 13 Kay na'ta sa Farisena dumu: Naŋ li di-goyta kayn kay tuwaŋ ma ɗeŋŋa, nala di-goyta vaŋu tay gasiɗi. 14 Yesu hotsi dita: La nan li di-goyta kay tuwan ma ɗeŋŋa kaw, di-goyta van kayni gasiya. Kay nan wi liyn ma nan may pana, liyn ma nan tuɗ haya nan wumu kaw. May nigiya, nigi wi liyn ma nan may panɗi, liyn ma nan tuɗ hayna kaw nigi wumɗi. 15 Nigiya, nigi ka kitata kuɗ sliwna, nanu nan ka kitata kay saɗi. 16 May la nan ka kitat kaw, kitata van ka' kayn kuɗ gasita va'a, kay nan may van kepɗi, may Bumna ma ganina ka hiɗi nanu. 17 Kay hay Gatta vigiya ɗot ɗoy ala di-goyta vi sumun ma' na' gasiya. 18 Nanu, nan li di-goyta kay tuwan ma ɗeŋŋa, nala Bumna ma ganina li di-goyta kanu kaw. 19 Kay na'ta nisi dumu: Buŋu ka arige? Yesu hot dita: Nigi may wan nanɗi, nigi wi Bunɗi kaw, la nigi wanawa, nigi ma wi Bunu may. 20 Yesu di yoboyn namna kayni nam colay goboy tam timgil ma cuk gurjut hayna. Hay li ma nam ka hat hay Tempella, sa vumɗi kaw, kay liyna valam bay co tuwa. 21 Yesu disi lo ala: Nan ma kal goyo, nigi ma garanu kaw, may nigi ma mit hay sulukŋa vigiya; liyn ma nan ma kal hayn ɗawni nigi as coys hayamɗi. 22 Sa Yudiyana di'e: Nam min ci tuwam goy kay tuwamu su? Kay nam di ala liyn ma nan ma kal hayna ɗawni nigi as coys hayɗi? 23 Nam di tisiya: Nigi ka gaa tani, may nanu, nan may kulo pa. Nigiya si sum sa nagat tanna, may nanu, nan may mi sa ma nagat tanɗi. 24 Kuɗ na'ta nan digi ala nigi ma mit hay sulukŋa vigiya, la nigi bay vi ala nan mi nanu, nigi ma mit hay sulukŋa vigiya. 25 Nisi dumu: Naŋ mi gige? Yesu disiya: Nan as digi ɗawn kay mige? Kayni mi va ma nan digiyawa kalam hay jew pa. 26 Slen ŋol ka kanu kay di tigiya, kay ka kitat kigiya kaw. May nam ma ganina nam gasiya, va ma nan humumay talam pana, nan dum tam sa nagatna may. 27 Nisi may wi goy haraŋ ala nam law tisi kayn kay Bumnaɗi. 28 Yesu disiya: Hay li ma nigi gaɓ goora vi sanawa kulo'ona, hay na'ta nigi ma wi ala nan mi nanu, nan may li va kay tuwan ma ɗeŋɗi, may nan dum mi va ma Bumna hatanay a di'e. 29 Nam ma ganina ka hiɗi nanu; nam hinan goy van kepɗi, kay dok-dok nan lum mi va ma kiram ŋaana. 30 Hay li ma nam di slen kayni dina, sumuna ŋolo vi hayamu. 31 Nala Yesu ka di tam sa Yudiyana sa vi hayamna ala: La nigi lak hay yoboyna vanu, nigi kayni si sa hatayna van gasi; 32 Nigi ma wi gasita, gasita na'ta ma butgi goyo. 33 Nisi hotom dita: Numa kayni si jafna vi Abraham, numa may li gorvo vok saɗi; nala naŋ di ala numa ma fi butta-goyta kayn ir nanige? 34 Yesu hot dita disiya: Nan digi gasita, gigekaw ma li suluku, nam mi gorvona vi sulukŋa. 35 Kay gorvona fi mus hay ziyna ta-ta hay vatɗitɗi, may goora fi mus haya ta-ta hay vatɗita. 36 La goora vulgi butta-goyta, nigi ma but goy gasi. 37 Nan wi goy haraŋ ala nigiya si jafna vi Abraham; may nigi ka gar kay can goyo, kay yoboyna vanu may fi liyn ma musta haygiɗi. 38 Nanu, nan di va ma nan wumay vi bunu, may nigiya, nigi lum mi slen ma nigi humumay vun bugiya. 39 Nisi hotom dita: Buma'a kayni mi Abraham, Yesu disiya: la nigi si gurona vi Abraham, ligi lopna vi Abraham. 40 Wulini nan digi gasita ta nan huma'ay vi Lawni pata, may nigi gar kay can goyo. Van kayni Abraham may lumɗi. 41 Nigi lum kayni mi lopna vi bugiya. Nisi dumu: Numa vuɗi misewɗi, buma kep kayn mi Lawna. 42 Yesu disiya: La Lawn kayn mi bugiya, nigi kaw ma minanu, kay nan kali goyo, may goy kayn tam Lawni pa, nan ma kay tuwan ma ɗeŋŋaɗi, may ganay mi namu. 43 Nigi may hum caw lawta vanɗi kay mige? Kayni kuɗ ta ala nigi min hum yoboyna vanɗi. 44 Bugi kayni mi Matna. Nigi min hoba' kulo kayni ti darta vi bugiya. Matna nam ci mati hay cawa'ta tunita pa, nam col kay gasitɗi kaw, kay gasita tay hayamɗi. Hay li ma nam ka sini, dita valam may valam kay tuwam ma ɗeŋŋa, kay nam ka sini, nam mi bum-sinda kaw. 45 May nanu, kay nan digi gasita, nigi min vi hayanɗi may. 46 Sa jargiya ma as pi lawt kan ala nan li suluk mara goor ne' kaw mi gige? La nan digi gasita, nigi min viɗi kay mige? 47 Sana vi Lawna nam humum mi yoboyna vi Lawna, nigi may humɗi kay nigi may vi Lawnɗi. 48 Sa yudiyana hotom dita: Numa di kaŋ ala naŋ mi sa ma Samariyana, ful ka kaŋu kaw kayni hay liyamɗi su? 49 Yesu hot dita: Ful may kanɗi, nan slum kulo kayn mi yam bunu may nigi ɗuwan bisi. 50 Nanu nan may gar gajijita vanɗi, nam ma gar gajijita van ka'a, ma ka kitat kawna. 51 Nan digi gasita, la san ŋom yoboyna vanu, nam ma wi mittaɗi ta-ta hay vatɗita. 52 Sa Yudiyana dumu: Wulini numa waawa ala ful ka kaŋu. Abraham mitiya, sa jobta-Lawna lay. May naŋ di'e: La sa ŋom yoboyna vanu, nam ma jugo mittaɗi! 53 Naŋ kayn ŋol suw buma Abraham ma mitin su? Sa Jobta-Lawna kaw mitiya, may naŋ ɗuw tuwaŋ kayn ala naŋ mi gige? 54 Yesu hot dita: La nan vul suburta mi tuwanu, suburta van kayn waa'a. Suburan kayn mi Bunu, nam ma nigi di kalam ala nam mi bugiyana. 55 Nigi may wumɗi may nanu nan wumu. La nan di ala nan wumɗi, nan muɗi mi sa ma sinda kigi nigi nala. May nan wumu, nala nan ŋom yoboyna valamu. 56 Abraham bugiya hobay hiɗi firita hay varta kay wi buurta vanu. Nam wa'a, li firi kaw. 57 Sa yudiyana dumu: Nan bay li busat dok-vasl tuwa, may nan wi Abraham aya? 58 Yesu disiya: nan digi gasita: Jew vu'da vi Abraham nan aya. 59 Kay na'ta nisi yaw goorhoyona kay gum hiɗi namu; may Yesu ŋay tuwamu, kali goy jiya, hin Tempella.
Yer-goyta vi sa ma vuɗi dukina
1 Hay li ma Yesu ka tuɗ vokomu, nam wi san kep ma vuɗi dukiya. 2 Sa hatayna valamu jobomu: Rabbi, ma li suluk kayn gige? San zawni lebo sumiyam su? Kay nam vuɗi dukiya! 3 Yesu hot dita: Nam li sulukɗi, sumiyamɗi kaw, may van kayni li nala kay lopna vi Lawna fi ɗek goy kalam haraŋi. 4 La linige kaw nay as li lopna vi nam ma ganina, hay li ma nay ka hay falayta tuwa, henjeta ma ma'a hay li ma sa as li lopɗi. 5 Hay li ma nan ka hay nagata, nanu mi haraŋa vi nagata. 6 Bugol nam di kayni dina, nam tuf nenen gaa kay nagata, hiliɓ nagan hiɗi nenena. Bugolda nam set naga namna kulo ir sa ma dukina. 7 Nam dum ala: Tuɗaŋu, muzaŋ tuwaŋ hay goor-goloŋga vi Silowe -- kayn min di ala giya. Nam kaliya muz tuwamu, hay li ma nam hotaya, nam muɗi wi cetet'. 8 Sugoliyomna hiɗi sa wum jewna kaw ala nam mi sa ma ay siɗaw hay hagata, nisi di'e: Nam zawni mi sa ma ay musi goy gal hagata kay siɗawna ɗisu? 9 Sum sara di'e: Mi namu. Segen di'e: A'a, nam zawn slum sliy ɦawa. Nam kay tuwam di'e: Kayni mi nanu. 10 Nisi dumu: Iraŋ mal goy kayn maltige? 11 Nam hot dita: Sa ma yum ala Yesu hiliɓ nagana, nam setem iranu, dan ala: Tuɗaŋ muzaŋ hay Silowe. Nan kaliya, muz tuwanu, nan fi wida may. 12 Nisi dumu: Sa namna ka arige? Nam hot dita: Nan may wiɗi. 13 Nisi mar sa ma dukina ay tam sa Farisena. 14 May fatta ta Yesu hiliɓ nagana, malam iram goyo kaw kayni hay buur ma sabatna. 15 Sa Farisena sli lawtiya kay jobom ala iram mal goy kayni maltige. Nam disiya, nam hiliɓ nagana, setem iranu, nan muz goyo, bugolda nan muɗ wi'e. 16 Sum sara jar sa Farisena di'e: San kayni may vi Lawna paɗi, kay nam may li kuɗ gatta vi sabatnaɗi. Segena di'e: Sa ma sulukŋa as kay li ɗekka ki kayn nala ir nanige? 17 Kuɗ kayni ɓurawta coowa jarsiya. Nisi di tam sa ma dukina lo: Naŋu naŋ di mige kalamu, kay nam malaŋ iraŋawa goyo? Nam hot dita: Nam kayni mi sa ma jobta-Lawna. 18 Sa Yudiyan may vi ala san kayni ay dukiya, iram mal kayn maliyaɗi, nala nisi yi sumiyam aya. 19 Nisi tun caw jobsi ala: Zawn mi goora vigi ma nigi di kalam ala nam vuɗi dukiyan su? Wulin nam ka wi kayn ir nanige? 20 Sumiyam hot dita: Numa wi ala zawn mi goora vuma'a, nam vuɗi dukiya kaw; 21 may wulini nam wi kayn witige kla numa may wi van kaynɗi. Lebo sa ma malam iram goyn mi gigekaw numa wi kaynɗi. Nam wulam vatiya, nigi jobomu, nam as di lawta valam kay tuwamu. 22 Sumiyam di nala kay nisi li nar kay sa yudiyana, kay sa yudiyana col lawta ala: La sa di goy ala Yesu kayni mi Kristu, nam ma fi gita-goyta hay sinagogayna pa. 23 Kay na'ta sumiyam di ala: namu wulam vatiya, nala nigi ma jobomu. 24 Sa Farisena yi sa ma vuɗi dukina hay sem ma ma'na lo dumu: Vulaŋ suburta mi Lawna; may numa hayɗin wi ala san kayni mi sa ma suluku. 25 Nam hot dita: La nam suluku, nan may wi kaynɗi, va ma nan wum kep kayn ala: Jewe nan ay dukiya, may wulini nan ka wi'e. 26 Nisi dumu: Nam lum taŋ mi mige? Nam malaŋ iraŋ maltige? 27 Nam hot dit tisiya: Nan digi vatawa, may nigi min hum kaynɗi, nigi min humum lo kay mige? Nigi min muɗ goy sa hatayna valam kaw su? 28 Nisi ŋulumu di'e: Sa ma hatayna valam kayni mi naŋu. Numa kayni si sa hatayna vi Musus. 29 Numa wi'e Lawna law tam Musus, may namu, numa wi liyn ma nam may hayam panɗi. 30 Sa namna hotsi dita: Kayni mi va ma muɗ ɦuyum yo, nigi wi liyn ma nam may hay panɗi, nir na'ta kep nam malan iranawa goyo. 31 Nay wi kaw ala Lawna may hum sa ma sulukŋaɗi, may nam humum kayni mi sa ma hot yalam gaa kuɗumu, li minda valamu kaw. 32 Hay jew ɓa-ɓa pa, sa bay hum ala sa as mal ir sa ma dukin goyo tuwa. 33 La san kayni may vi Lawna paɗi, nam as li va noŋɗi. 34 Nisi hotom dita: Naŋ kay tuwaŋu vuɗi yuluk' hay sulukŋa, wulini muɗi hatma kayni mi naŋ yo disu! Nisi gum goy jiya. 35 Hay na'ta kayni Yesu hum ala nisi gum goy jiya. Nam fumu dumu: Naŋ vaawa hay goora vi Lawna su? 36 Nam hot dit ala: Bum-Sumuna, nam ma nan vi hayamna kayni nam gige? 37 Yesu dumu: Naŋ wumawa, nam ma ka daŋu kayni mi namu. 38 Nam ka dumu: Nan vi'e Bum-Sumuna, nam girif gaa vokomu kaw. 39 Bugolda Yesu di'e: Nan maawa hay nagata kay ka kitata, kay nisi sa wiɗi as muɗ wi'e, nisi sa wi'e ma muɗ dukiya kaw. 40 Sa Farisena sa lakay hiɗi namna hum yoboyna kayni, nisi dumu: Numa kaw duki lay su? 41 Yesu hotsi dita: Lali nigi ay dukiya, sulukŋa vigi mayɗi. May wulini nigi di'e: Numa ka wi'e. Kay na'ta sulukŋa vigi ka dok-doko.
Sa ma ŋomda ma gasina
1 Nan digi gasita, sa ma kal kalafi hay ciŋana vi fok-dimina, la nam jik hay vunam paɗi, may goy hay liy mara'a, nam kayni mi kulla, mi coŋcoloŋŋa kaw. 2 May sa ma kal kalafi hay vun-ciŋana, nam mi ŋomda vi fok-dimina. 3 Sa ma ŋom vun-ciŋana as malam vunna goyo, fok-dimina humum delemu, nam yi fok-dimina valamu hiɗi selemu selemu, cukum goy jiya kaw. 4 Hay li ma nam cuk fok-dimina valamawa goy jiy cukŋa, nam tun goy vokomu, fok-dimina tuɗ kuɗumu kaw, kay nam wum delemu. 5 Nam as tap kuɗ sa maraɗi, nam ma mer kalamu, kay nam may hum del sum segenɗi. 6 Yesu disi law ma buri gaana, may nisi hum caw sle ma nam dum tisinɗi. 7 Yesu disi lo: Nan digi gasita: Nanu mi vun-ciŋana vi fok-dimina. 8 Nisi kaf sa co jewanu nisi si kuliyana, si sa coŋcoloŋŋa kaw, fok-dimina may humsi delsiɗi. 9 Nanu, nan mi vun-ciŋana; la sa jik hayanu kal kalafi, nam ma fi su'da; nam ma kal kalafi, ma kal goy jiya, ma fi liyn ma tina kaw. 10 Sa ma kulla ma kayn kay kula, kay ci mati, kay ɓulak slena kaw; may nanu nan maawa kay fok-dimina ma fi irita, nam ma fa' ŋol suw asa. 11 Nanu nan mi ŋomda ma gasina, ŋomda ma gasina vul irita valam goyo kay fok-dimina. 12 May sa ma ŋom kay fi wurakŋa, nam may mi ŋomdaɗi, fok-dimina may valamɗi, hay li ma nam wi keŋŋa ka ma'a, nam hin fokŋa, pira kaw, keŋŋa vi fokŋa, merem goyo kaw. 13 Kay nam mi sa ma li lop kay wurakŋa, nam var kay fok-diminaɗi. Nanu mi ŋomda ma ŋaana. 14 Nan wi fok-dimina vanu, fok-dimina vanu wanu kaw. 15 Ki Bumna wanu, nan wi Bumna kaw; nala nan vul irita vanu goy kay fok-dimina. 16 Fok-dimina van hena ka'a, nam may kalaf hay ciŋana zawnɗi; fok-dimi namna kayni nan maramaya; nam kaw ma muɗ human delanu, kay nam ma muɗ mi farana kep, sa ma ŋomda kepe kaw. 17 Bumna minanu, kay nan hin irita van goyo, kay nan ma sla'a lo. 18 Sa mara as sla' goy kanɗi, may nan vula' kayn kay tuwan ma ɗeŋŋa, donota van ka'a kay vula' goyo, donota van ka'a kay hot sla'a kaw, nan fi hagat kayni tam buni pa. 19 Sa Yudiyana vunsi hot ɓuraw lo kuɗ yoboyn kayni. 20 Segen ŋolo jarsiya di'e: Ful ka kalamu, nam guruɗi goyo, nigi humum kayn kay mige? 21 Segen di'e: Yoboyna valam kayni may mi yoboyna vi sa ma ful kalamnaɗi, fulla as mal ir sa ma dukina goy su?
Yuldeta vi mal vun-ziyna
22 Sumuna li yuldeta vi mal vun-ziyna hay Yerusalem, kayni hay cayda. 23 Yesu poy hay Tempella kuɗ diɓira vi Salomon. 24 Sa yudiyana ŋuyum cusl' dumu: Naŋ min hinma lak hay bay-wida nala ta-ta lancitige? La naŋu mi Kristu, duma'ay goy haraŋi. 25 Yesu hotsi dita: Nan digiyawa, nigi min viɗi, lopna ma nan ka lum hay semda vi Bunu ka li di-goyta kanu. 26 May nigi min viɗi, kay nigi say si fok-dimina vanɗi. 27 Fok-dimina vanu human delanu, nan kaw nan wumu, nam tap kuɗanu kaw. 28 Nan vulum irita ta vatɗita; nam ma ba goy loɗi, sa as hulotom goy hay ɓan paɗi. 29 Bunu ma vulum manu, nam ŋol suw kafe, lo sa as hulotom goy hay ɓam Bun paɗi kaw. 30 Nan hiɗi Bumna numa ka tuɗoŋ kep. 31 Sa Yudiyana yaw goorhoyona lo kay gumu. 32 Yesu hot dit tisi ala: Nan ɗekgi lopna ma ŋulona ma ŋaana ma may vi buni pana, lopna ma nigi gan hiɗi goorhoyon kalamna kayni mi marige? 33 Sa Yudiyana hotom dita: Numa gaŋ hiɗi goorhoyon kayn may kay lop ma ŋaaɗi, may kay ŋulda, kay naŋ mi sa'a, may naŋ ŋra tuwaŋ hiɗi Lawna. 34 Yesu hot dit tisiya: Ɗota ta di ala: Nan di'e: Nigiya si lawayna,i kayni may ɗoy hay Gatta vigiɗi su? 35 La nisi sa yoboyna vi Lawna may goy tisina ɗota yisi ala lawayna, nala ɗota as ɦas goyɗi. 36 Tam nam ma Bumna lum goy peldete, gumawa kaw gaa kay nagata, nigi di'e: Naŋ ŋul Lawna! Kay nan di ala nan kayni mi goora vi Lawna. 37 La nan li lopna vi Bunɗi, nigi vi hayanɗi. 38 May la nan lumu, la nigi may vi hayanɗi kaw, vigi hay lopna kayni, a nigi fi wi ala Bumna ka hay nanu, nan hay Bumna kaw. 39 Nisi gar kay vum lo, nam kal kisiya may. 40 Yesu tuɗ lo goy bugol niy-lumna Yordan, hay liy ma Yohana li baptisma haya, mus haya kaw. 41 Sumun ŋolo co talamu, nisi di'e: Yohana may li ɗekka kep kawɗi, may slen kaf ma Yohana di kay san kayni nam gasiya. 42 Hay liy namna sumun ŋolo vi hayamu.
Dayta-kulota vi Lasarus
1 San kepe ay moyo, Lasarus ma hay Betaniya, hoyok-ziyna vi Mariya hiɗi ɓasu'ta Marta. 2 Kayni ti Mariya ta set tuw Bum-Sumuna hiɗi mula, ɦasam selem hiɗi ɗuŋusa'a kaw,j ɓasu'na Lasarus li moyo. 3 Ɓosiyom-tuwsina gi sunay tam Yesu dumu: Bum-Sumuna, nam ma naŋ minimna ka moyo. 4 Hay li ma Yesu hum kayni, nam di'e: moy namna kayni may tam mittaɗi, may kay gajijita vi Lawna, kay Goora vi Lawna ma fi gajijit kuɗ moy namna kayni. 5 May Yesu min Marta hiɗi ɓasu'ta, hiɗi Lasarus kaw. 6 Hay li ma nam hum ala nam ay moyo, nam mus hay liyn ma nam ay hayna ir buur ma' lo. 7 Bugolda nam di tam sa hatayna: Nay hotay hay Yudiya lo. 8 Sa hatayna dumu: Rabbi, goboy tani sa yudiyana min gaŋ hiɗi goorhoyona, may naŋ min hot hay liy namna lo kayn ir nanige? 9 Yesu hotsi dita: Leera ka doogo yam ma' hay fatta kep disu? La sana ka tuɗ hay falayta, dugumna as kay cumɗi, kay nam wi haraŋa vi nagata; 10 May la sana tuɗ hay henjeta, dugumna as cumu kay haraŋa may hayamɗi. 11 Bugol yoboyna kayni nam di'e: Banayna lasarus kali sene, may nan min tuɗ kay zliyim kulo'o. 12 Sa hatayna dumu: Bum-Sumuna, la nam kali sene, nam ma suɗ goyo. 13 Yesu law kayn kay mitta, may nisi var ala nam di kayni kay senda ɦawata. 14 Kay na'ta Yesu di goy tisiya: Lasarus mitiya. 15 Hayan firiya kigiya kay nan ay ɗawaynɗi, kay nigi ma vi'e. Nala nay tuɗay talamu. 16 Kuɗ dit kayni, Tomas ma yum Didimus di tam nuriyom sa hatayna ala: Nay kaw tuɗay kay mit hiɗi namu. 17 Hay cota valamu, Yesu fi kayn ala Lasarus liy buur fiɗi gaa hay zulda. 18 May Betaniya ka goboy tam Yerusalem, jarsi li ki stade doogo yam vasl nala. 19 Sa Yudiyana ŋolo ma tam Marta hiɗi Mariya kay teŋsi irsi kay mitta vi ɓasusina. 20 Hay li ma Marta hum ala Yesu ka tuɗaya, na' tuɗ ŋafam iramu, may Mariya musay ma' goy vo'o. 21 Marta di tam Yesu: Bum-Sumuna, lali naŋ ay tani, ɓasunna fi mitɗi. 22 May wulini nan wi ala va mige kaw ma naŋ jobom tam Lawna nam as vulaŋga. 23 Yesu da'a: Ɓasukŋa ma day kulo'o. 24 Marta di'e; Nan wi ala nam ma day kulo'o hay dayta-kulota hay buur ma cawna. 25 Yesu da'a: Nanu mi dayta-kulota, mi irita kaw. Nam ma vi hay nanu ma mus iriya, la nam mit kaw; 26 La gigekaw ma mus iri hay nanu, vi hay nanu kaw, nam ma mit noŋɗi, nak vi nala su? 27 Na' dumu: Awa, Bum-Sumuna, nan wi ala naŋ mi Kristu, goora vi Lawna, nam ma min ma kay nagata. 28 Hay li ma na' di kayni dina, na' kali goyo, yi basu'ta Mariya goy ŋayaya da'a: Bum-hatta ka tani, nam ka yagu. 29 Hay li ma Mariya hum na kayni, na' fokay kulo gosoyo, kal talamu; 30 Kay Yesu bay kali hay hoyok-ziyn tuwa, may nam ka kayni hay liyn ma Marta tuɗ ŋafam iram hayna tuwa. 31 Sa Yudiyana sa lakay kat Mariya kay teŋa' ira'a, ɗuwa' kayni na' fok kulo koloy wit' kal goy jiya kaw, nisi yaw kuɗa'a, hay varta ala na' tuɗ kayn goy vun zulda kay tiya. 32 Hay li ma Mariya co hay liyn ma Yesu ka hayna, ira' cuk kalam kayni, na' girif gaa selemu dumu: Bum-Sumuna, lali naŋ ays tani, ɓasunna as mitɗi. 33 Hay li ma Yesu wi ala na' ka tiya, sa Yudiyana sa tuɗis kuɗa' kaw ka tiya, nam viy goy diwiŋ hay Ŋusta valamu, yor tuwamu kaw. 34 Nam di'e: Nigi burum arige? Nisi hotom dita: Bum-Sumuna, naŋaya, ɗuwaŋga. 35 Yesu tiya. 36 Sa yudiyana di'e: Ɗuwgiya, nam minimu natige! 37 Sum sara jarsiya tun caw di'e: Nam mal ir sa ma dukin goyo, nam nagay kay tel san kayni kay mitɗi kaw disu? 38 Yesu tiy hayam kalaf ŋolo lo, nam kali vun zul na'ta ta jugoɗay kay hiɗiyna, ta vuna' duki hiɗi hiɗiyna kaw. 39 Yesu di'e: Poŋgi hiɗiyna goyo. Marta ɓasum sa ma mitina dumu: Bum-Sumuna, tuwam muɗi hisa, kay nam buri fiɗi. 40 Yesu da'a: Nan dag ala la nak vi'e, nak ma wi gajijita vi Lawna ɗisu? 41 Wulini nisi poŋ hiɗiyn goyo. Yesu muɗ iram kulo'o di'e: Bunu, nan gaŋ deɓe kay naŋ humanawa. 42 Kay nanu nan wi'e naŋ ka human dok-dok, may nan di nala kay tokŋa vi sumuna sa lakay tani, kay nisi ma vi ala ganay kayn mi naŋu. 43 Hay li ma nam di kayni dina, nam siwel hiɗi delem kulo'o ala: Lasarus, kalaŋay goyo! 44 Sa ma mitina kal ay goyo, selem hiɗi balam juni hiɗi sligar-jerayna ma junum hiɗi namna, hiɗi sligar ma ɗutum hiɗi namna kaw. Yesu di'e: Butum goyo, hinim tuɗa.
Vokŋa vi sa ɗiger-lawta col dita kay ci Yesu goyo
45 Sa Yudiyana ŋol sa ma tam Mariya, sa wi va ma nam lumna vi hayamu. 46 May segena jarsiya kali goy tam sa Farisena, disi kay sle ma Yesu lumna. 47 Muliyan ŋulo sa-ɗifinna hiɗi sa Farisena yi dakŋa vi sa ɗiger-lawta di'e: Nay ma lum mi mige? Kay san kayni ka li ɗekka ŋolo! 48 La nay hinim li nala, sumun kaf ma vi hayamu. Sa Romena ma co yawaya, sli liyn ma peldetna vaya hiɗi nagata vaya kaw. 49 San kep jarsiya, Kayfas, ma ay mul ŋol ma-ɗifinna hay busat na'ta disiya: Nigi may hum va noŋ ne'di; 50 A sa ma kepna mit kay sumun kaf, kay jaf-sumun kaf ma ba goyɗi kayni ŋaa'a kigiya, nigi may wi naɗi su? 51 May nam di kayni kay tuwamɗi, nam di nala kay nam ay mul ŋol ma-ɗifinna hay busat na'ta, nam di vun-jobta kay Yesu ma mit kay sa nagatna. 52 May kay sum sa nagatna ɦawaɗi, may lo kay tap gurona vi Lawna sa meray goyna kulo hay tuwna kepe kaw. 53 Tun caw hay buur namna pa, nisi co lawta ala nisi min cum goyo. 54 Kay na'ta Yesu muɗ poy goy haraŋ jar sa Yudiyan loɗi; may nam kali ɗawn pa, tuɗ hay nagata ta ka goboy hiɗi fulda, hay hoyok-ziyna ma yum ala Efrayim, nam musi hiɗi sa hatayna valam ɗawni. 55 Paskata vi sa Yudiyana ay goboyo, sumun ŋolo tuɗ kulo Yerusalem jew Paskata kay por tuwsiya. 56 Nisi gar Yesu, hay li ma nisi ka hay Tempella, nisi ka di jar-tuwsi ala: Nigi var mige? Nam as co hay yuldetɗi su? 57 May muliyan ŋulo sa-ɗifinna hiɗi sa Farisena vul hagat ala: la sa wumawa hay liya deni, nam di goy kalamu, kay nisi min vumu.
Yesu hay Betaniya
1 Buur karkiya jew Paskata, Yesu ma hay Betaniya, liyn ma Lasarus ma nam dayam kulo hay mitta pa ka hayna. 2 Ɗawni, nisi kotom tina, Marta ay sunsiya, may Lasarus ka musi jar nisi sa lakay ti hiɗi namu. 3 Mariya sli urdina vi nardl ma gus lop ŋolo ir livre kep, na' ɦokom gay Yesu, na' ɦasam selem kaw hiɗi ɗuŋusa'a; hay liy namna ziyna hob hiɗi hisna vi urdina. 4 May Yudas Iskariyot, kep jar sa hatayna, nam ma min di newt kalamna ka di'e: 5 Mula kayni may gusum goy ir deniye kis-hiɗi kay vulum mi sa hawnaɗi kay mige? 6 Nam law na kayni may ala dikam ka tum kay sa hawnaɗi, may kay nam kayni mi sa ma kulla, nala slen kaf ma nisi ka cukum hay birimna nam ka yawamu. 7 May Yesu di'e: Hina' ŋay urdina kayni kay buura vi pita vanu. 8 Sa hawna ka hiɗi nigi dok-dok, may nanu nan may hiɗi nigi dok-dokɗi. 9 Sum sa Yudiyan ŋolo hum ala nam ay ɗawni, nisi ma'a, may kuɗ Yesu tutaɗi, may kay ɗuw Lasarus ma nam dayam kulo jar sa mitin pana kaw. 10 Muliyan ŋulo sa-ɗifinna ŋra vunsi kay ci Yesu goyo kaw. 11 Kay sa yudiyana ŋolo tun caw hinsiya, vi kuɗ Yesu kay ɗekka ma nam lum tam Lasarus.
Kalta vi Yesu kulo hay Yerusalem
12 Hay buurta ka'ta, sumuna ŋolo sa may hay yuldeta hum ala Yesu ka kali hay Yerusalem; 13 nisi yaw boŋŋa vi gomona, kali goyo kay ŋafam iramu, nisi siwela di'e: hosanna, bolda ka kay nam ma ka ma'a hay semda vi Bum-Sumuna, mulla vi Israyel. 14 Yesu vi goor-kurota ɓe ka'a, ki ɗo'ay nala: 15 Nak li narɗi goota vi Siyon; Ɗuwagu mulla vag ka ma'a, ɓey kay goor-kurota. 16 Sa hatayna valam may hum caw slen kayni tuwaɗi, may hay li ma nam fi gajijita fina, humsi gisi ala slen ɗoy kayn kalamu, liy kalamu kaw. 17 Sumuna sa ay hiɗi Yesu hay li ma nam day Lasarus kulo jar sa mitin pana li di-goyta kalamu kaw. 18 Kuɗ na'ta sumun patay kay ŋafam iramu, kay nisi humi ala li ɗekka kayni mi namu. 19 Sa Farisena ka law jar-tuwsi ala: Nigi waawa ala nigi as fi va loɗi ɗisu? Ɗuwgi tige, sumuna kaf kali kuɗumu.
Sa Grekŋa min ɗuw Yesu, Yesu di goy kay mitta valamu
20 Sum sa Grekŋa sara'a ay jar sum sa co kulo hay Yerusalem kay girif Lawna, hay buura vi yuldeta. 21 Nisi ter tuwsi kulo tam Filip ma Betsayda hay Galileyana, nisi jobom ala: Bum-Sumuna, numa min wi Yesu. 22 Filip tuɗ di lawt kayni mi Andre. Bugolda Andre hiɗi Filip co di lawt kayni mi Yesu. 23 Yesu hotsi dita: Liyn coowa kay goora vi sana ma fi gajijita. 24 Nan digi gasita, la jaf-alkamarena may wasay gaa kay nagatɗi, la nam mitɗi kaw, nam hin ɗawn valam tuɗoŋ na kep, may la nam mitawa, nam as li jafna ŋolo. 25 Sa ma min irita valamu, nam ma ba'a, may sa ma ka gawt kay irita valamu gaa kay nagat tani, nam ma ŋoma'a ta-ta hay irita vatɗita. 26 La sa sunanu, nam tap kuɗanu, liyn ma nan ka haya, sunda vanu ma mus haya kaw. La sa sunanu, Bumna ma vulum suburta. 27 Wulini ciwta vanu ka yor ŋolo. Nan ma di mige? Bunu, suɗan goy hay leer namna zawni suɗge. . . May kay na'ta kayni nan maawa hay leer namna zawni. 28 Bunu, vulaŋ suburta mi semda vaŋu! Bugol kayni del may kulo wuralawni pa di'e: Nan vulaŋ suburtawa, nan ma vulaŋ suburta mara lo. 29 Sum sa ay tokay hay liy namna, sa hum del kawna tun caw di ala bay kayn mi Lawna, segena di'e: sunda-wuralawna lawawa hiɗi namu. 30 Yesu sli ditiya di'e: Della kayni may law kan nanɗi, may kigi nigiya. 31 Wulin kayn mi kitata ma kay sa nagat tani, wulini mulla vi sa nagat tanna ma gumis goy jiya. 32 May nanu, hay li ma nan gaɓawa kulo kay nagata, nan ma mar varta vi sumuni kaf tanu. 33 Nam di nala kay dek kay ir mitta ta nam ma mit hiɗi na'ta. 34 Sumuna hotom dita: Numa humay hay Gatta kayn ala Kristu mus ta-ta hay vatɗita; naŋ as di ala ŋaata kayn goora vi sana gaɓis kulo'o ir nanige? Goora vi sana mi gige? 35 Yesu disiya: Haraŋa ka jargi tuwa ir liyn neeɗa ɦawa, kay na'ta poygiya hay li ma nigi ka hay haraŋa, kay jufunda ma nig kigiɗi, sa ma tuɗ hay jufunda wi liyn ma nam tuɗ haynaɗi. 36 Hay liyn ma haraŋa ka tigiya, vigi hayamu, kay nigi ma muɗ goy si gurona vi haraŋa. Hay li ma Yesu di slen kayni dina, nam kali goyo, ŋay tuwamu.
Bay-vida vi sumuna
37 hiɗi ɗekka ma Yesu lum tisin kayn kaf, nisi min vi hayamɗi, 38 Kay yoboyna ma Esaya sa ma jobta-Lawna dumna vunam ma hob kulo'o, ma di ala: Bum-Sumuna, sa ma vi kuɗ yoboyna ma numa'a kusum goyna mi gige? Lo ɓam Bum-Sumuna ɗek goy haraŋ kayn tam gige? 39 Kuɗ na'ta kayni nisi as viɗi, kay Esaya di lo: 40 Nam duk ir sumuna, Tunsi diksi toŋoroŋo kaw, Kay nisi ma wi hiɗi irsiɗi, Humumɗi kaw, kay a nisi hamɗi, A nisi fi yerta-goytaɗi kaw. 41 Kayni mi sle ma Esaya dumu, lawam kaw hay li ma nam wi gajijita valamu. 42 Kuɗ kayni jar sa ŋulona kaw, sum segena ŋolo vi hay namu; may kuɗ sa Farisena, nisi li di-goyta visiɗi, kay nisi ma cuksis goy hay sinagogayna visi paɗi. 43 Kay nisi min suburta vi sumuna suw suburta vi Lawna. 44 May Yesu siwela ala: Sa ma vi hayanu, nam vi kayni hayan nan ɗi, may hay nam ma ganina; 45 Sa ma ɗuwan ŋaa'a, nam ɗuwum ŋaa kayn mi nam ma ganina. 46 Nanu mi haraŋa, nan maawa hay nagata kay gigekaw ma vi hay nanu ma mus hay jufundaɗi. 47 La sa hum yoboyna vanu, may la nam ŋomomɗi, ka kitat kalam ɗawn mi nanɗi, kay nan maawa kay ka kitat kay sa nagatnaɗi, may kay suɗ sa nagatna goyo. 48 Sa ma noyan goyo vi yoboyna vanɗi kaw, sa ma ka kitat kalam ka'a, kayni mi yoboyna ma nan dumna, mi namu ma ka kitata kalamu hay buur ma cawna. 49 Kay yoboy namna nan dum kay tuwan ɗeŋɗi; may Bumna ma ganina, nam kay tuwam gatan kay slen ma nan dumu, kay slen ma nan as lawamna kaw. 50 Nan wi'e kay vun-ma-gatna valam kayn ti irita vatɗita, nala va ma nan lawamu, nan lawam ki Bumna danay nala.
DITA VI YESU TA CAWTA HIƊI SA HATAYNA VALAMU
Yesu muz sem sa hatayna valamu
1 Jew yuldeta vi Paskata, Yesu wi ala leera valam coowa a nam kalis goy hay nagat tan pa raw tam bulumu, nam ma min sa falayna sa ays hay nagata, nam minsiya ta-ta hay dabta vi liyna. 2 Hay li ma nisi ka ti'e: May hay liy namna kayni Matna gi varta hay dik Yudas, goora vi Simon, kay vulum goyo, 3 Yesu ma wi ala Bumna hinim slenawa kaf hay ɓalamu, ma wi ala nam may vi lawna pa, nam hot ɗawni tam Lawna kawna, 4 nam fokay kulo'o kat tablena pa, fok sligara valam goyo, yaw sligar ma fiyok letetna, junum furamu. 5 Bugolda nam ɦok niyna gaa hay ŋarakŋa, tun caw muz sem sa hatayna valamu, ɦassi sesi goy kaw hiɗi sligar ma letetna ma juni furamna. 6 Nam co tam Simon Peter ma ka dum ala: Naŋ Bum-Sumuna, naŋ musan sen mi naŋu su? 7 Yesu hotom dita: Va ma nan lumna zawni naŋ as humum cawam wulinɗi, may naŋ ma humum cawam bugolda. 8 Peter dumu: A'a, la linigekaw muzan sen mi naŋ hayɗi, Yesu hotom dita: La nan musaŋ seŋɗi, galla vaŋ may hiɗi nan noŋɗi. 9 Simon Peter dumu: Bum-Sumuna, muzan sen valamɗi, may ɓanu hiɗi yanu kaw. 10 Yesu hotom dita: Sa ma muz tuwamawa goyona, nam as muz tuwam mara loɗi, may muzum mi selemu, may tuwam kaf bay-liwisi; nala nigi ka bay liwisi, may nigi kafɗi. 11 Kay nam wi nam ma di newta kalamna; kay na'ta nam di'e: Nigi kaf may peldetɗi. 12 Hay li ma nam muzsi sesi muzna, yaw sligara valamu cukum talam cana kaw, nam mus gaa kat tablena lo ka disiya: va ma nan lum tigin kayni nigi humum cawamawa su? 13 Nigi yan ala Bum-hatta hiɗi Bum-Sumuna, nigi di kayn hay liyamu kaw, kay nanu mi namu. 14 May la nan mi Bum-hatta hiɗi Bum-Sumuna, muzgi segiyawa, nala nigi kaw ma muz segi jar-tuwgiya tuwgiya; 15 kay nan li ɗekkawa tigiya, a nigi ma li ki nan laawa tigiya nala kaw. 16 Nan digi gasita, sa ma gorvona may ŋol suw mulamnaɗi, sa ma sunda kaw ŋol suw sa ma gumi sunnaɗi. 17 La nigi wi slen kayni, sle'ta kigiya, kay la nigi li kuɗumu. 18 Nan may di slen kayni kigi nigi kafɗi; nan wi nisi sa nan vileksi goyna. May a vun-ɗota ma hob kulo'o, ɗota ta ala: Nam ma ka ti fun hiɗi nanu sli dubukam kulo katanu. 19 Tun caw wulin pa, nan digi kay slen ma min co'o, jew lita valamu, kay hay liyn ma nam coowa, nigi ma vi ala nan mi namu. 20 Nan digi gasita: Sa ma vi nam ma nan guminawa, nam vantin mi nanu, nam ma van nanu, vi nam ma ganina kaw.
Yesu di ala Yudas ma di newta kalamu, Peter ma puw vunam kalamu kaw
21 Hay li ma Yesu di nala dina, nam yor tuwamu hay Ŋusta valamu li di-goyta ala: Nan digi gasita, sa mara jargi kep ma di newt kanu. 22 Sa hatayna valamu ɗuw ir tuwsiya, nisi job jar-tuwsiya kay sana ma nam ka law kalamna. 23 Sa kep jar sa hatayna, nam ma Yesu minimna, ay musi gaa tam tablena goboy hiɗi Yesu. 24 Simon Peter lum iram mirik' dum ala: Daŋaya, naŋ law kayn kay gige? 25 Sa ma hatayn namna gah dig Yesu ka dum ala: Bum-Sumuna, nam mi gige? 26 Yesu hotom dita: Namu ma nan jiyob fu ma jutina, vulumti ɗawni mi namu. Nam jiyob fu ma jutina, vulum mi Yudas, goora vi Simon Iskariyot. 27 Bugol Yudas fi fu ma jutina fina, Satan kal hayamu. Yesu dumu: Va ma naŋ min lumna laŋgi gosoyo. 28 May sa kep ma musi kat tablena ma hum ala kay mige nam dumay nala mayɗi. 29 Kay ki birimna ka hay ɓam Yudas, segena var ala Yesu ka dum kayn ala: Gusaŋ slen ma nay min lum hay yuldetna, lebo, vulaŋ va goy mi sa hawna neeɗa. 30 Yudas vi fu ma jiyobina, kali goy wit' de, liyn liy henje'e. 31 Hay li ma Yudas kali goy kalla, Yesu di'e: Wulin kayni goora vi sana fi suburtawa, Lawna fi suburtawa hayamu kaw. 32 La Lawna fi suburtawa hayamu, Lawna ma vulum suburta hay tuwam ma ɗeŋŋa kaw, nam ma vulum gajijita gosoyo. 33 Nigi gurosgurayna, nan ka hiɗi nigiya ir tuwa neeɗa. Nigi ma garanu, may ki nan di tam sa yudiyana nala: Liyn ma nan tuɗ hayna nigi as co hayamɗi, tigi nigi nala kaw, nan digi wulini. 34 Nan vulgi vun-ma-gatna ma wuliya: Mingi jar-tuwgiya tuwgiya; ki nan mingiyawa nala, nigi kaw mingi jar-tuwgiya tuwgiya. 35 Kay hiɗi kayni sumun kaf ma wi ala nigi si sa hatayna vanu, la minda vigi ka jar tuwgiya tuwgiya. 36 Simon Peter dumu: Bum-Sumuna, naŋ min tuɗ arige? Yesu hotom dita: Liyn ma nan tuɗ hayamna ɗawni, naŋ ma tuɗis kuɗan wulinɗi, may naŋ ma tuɗis kuɗan hay vokka. 37 Peter dumu: Bum-Sumuna, nan as tuɗis kuɗaŋ wulinɗi kay mige? Nan ma hin irita van goy kaŋu. 38 Yesu hotom dita: Naŋ as hin irita vaŋ goy kanu su? Nan daŋ gasita, jew a slek gulokŋ hela, naŋ ma puw vunaŋ kanu sem ɦidi ala naŋ wanɗi.
Yesu vul teŋ-irta
1 Hingi dikgi li narɗi, vigi hay Lawna, vigi hay nanu kaw. 2 Hay ziyna vi Bunu liyn ma musta ka ŋolo. Lali may naɗi, nan digiyawa goy jewe; kay nan min tuɗa kay kot liyn kigiya. 3 May la nan tuɗa kay kot liyn kigiya, nan ma hotiya kay yawgi kuɗanu, kay hay liy ma nan ka'a, nigi kaw ma lak hiɗi nanu. 4 Nala, liyn ma nan min tuɗ haya, nigi as wi haga na'ta kaw. 5 Tomas dumu: Bum-Sumuna, numa wi liyn ma naŋ ma tuɗ haynaɗi, nala numa as wi haga na'ta ɗawn nanige? 6 Yesu dumu: Nanu mi hagata, mi gasita, mi irita kaw. Bay nanu sa fi ma tam Bunɗi. 7 La nigi wan nanawa, nigi ma wi Bunu kaw. Tun caw wulin pa, nigi wumu, nigi wumawa kaw. 8 Filip dumu: Bum-Sumuna, Ɗekma kay Bumna, kay kayni asma'a. 9 Yesu dumu: Nan musawa hiɗi nigi ir liyn ŋolo, may naŋ bay wan goy gasi tuwa Filip! Sa ma wanawa, wi Bumnawa kaw. Naŋ as di lo ala ɗekma kay Bumna kayni ir nanige? 10 Naŋ may wi ala nan ka hay Bumna, Bumna hay nanu kaw ɗisu? Yoboyna ma nan dum tigin kayni nam may van kay tuwan ma ɗeŋŋaɗi, may li lop namna kayni mi Bumna ma ka hayanu. 11 Vigi ala nan ka hay Bumna, Bumna ka hay nanu kaw. La naɗi kaw, vigiya kuɗ lop namna kay tuwam kayni. 12 Nan digi gasita, sa ma vi hay nanu, nam ma li lop ma nan lumna, nam ma li lop ma ŋulo ma suw kayni kaw, kay nan min tuɗ tam Bunu; 13 mige kaw ma nigi jobom hay semda vanu, nan ma lumu, kay Bumna ma fi suburta hay Goora. 14 La nigi job va hay semda vanu, nan ma vulgita.
Deŋga vi Ŋusta-Peldetta
15 La nigi minanu, nigi ŋom vun-ma-gatna vanu hay dikgiya may, 16 nan kaw, nan ma siɗaw Bumna, nam ma vulgi sa ma ɗob-lawta ma min mus hiɗi nigiya ta-ta hay vatɗita, 17 kayni Ŋusta vi gasita, ta sa nagatna as fa'ɗi, kay nisi ɗuwa'ɗi, wa'ɗi kaw; may nigiya, nigi wa'a kay na' ka musi goboy tigiya, na' ma mus haygiya kaw. 18 Nan ma hingi goy kuyuɗi, nan ma ma tigiya. 19 Liyn hini mus tuwa neeɗa, sa nagatna ma wan noŋ loɗi, may nigiya, nigi ma wanu, kay nanu, nan ka iriya, nigi kaw ma mus iriya. 20 Hay buur namna nigi ma wi ala nan ka hay Bunu, nigi ka hay nanu, nan haygi nigiya kaw. 21 Sa ma vi vun-ma-gatna vanu, ŋomom hay dikam kaw, kayn mi nam ma minanna. Sa ma minanu, Bunu ma minimu, nan kaw ma minimu, nan ma vul tuwan goy kiramu kaw. 22 Yudas -- may Iskariyotɗi -- dumu: Bum-Sumuna, naŋ ɗek tuwaŋ goy kirma numa tuta, may ɗek tuwaŋ goy kir sa nagatnaɗi kay mige? 23 Yesu hotom dita: La sa minanu, ŋom yoboyna van hay dikam kaw, nala Bunu ma minimu, numa ma tuɗ talamu, kot liy ma musta vuma vo valamu kaw. 24 Sa ma minanɗi, nam may ŋom yoboyna van hay dikamɗi kaw. Yoboyna ma nigi humumna kayni may mi yoboyna vanɗi, may mi yoboyna vi Bumna ma ganina. 25 Slen kayni nan dumawa tigiya hay li ma nan ka musi hiɗi nigiya. 26 May sa ma ɗob-lawta, Ŋusta-Peldetta ta Bumna min ga'ay hay semda vanu, kayni ti na'a ta min hatgi slen kaf, na' ma gigi humgi kaw kay slen ma nan dum tigina. 27 Nan hin toyta tigiya, nan vulgi toytawa. Nanu nan vulgi toyta ki sa nagatna vula' naɗi. Hingi dikgi yorɗi, ligi narɗi kaw. 28 Nigi humawa kay nan di tigi ala: Nan tuɗ goyo, bugolda nan ma hotay tigiya. La nigi minanu, nigi ma firiya kuɗ ta ala nan tuɗ tam Bumna, kay Bumna nam ŋol suwan nanu. 29 Nan digi slen kaynawa wulini jew a nam co'o, kay ta ala hay li ma nan coowana, nigi ma vi'e. 30 Nan ma law hiɗi nigiya loɗi, kay mul ma kay nagatna ka co'o. Va valam may hayan ne'ɗi. 31 May kay sa nagatna as wi goy ala nan min Bumna, nan li kuɗ va ma Bumna gatanawa kaw. Yawgi kulo'o, tuɗays goy tan pa.
Gu gulda-guldana hiɗi ɓalamu
1 Nanu, nan mi gu gulda-gulda ma gasina, Bunu mi Bum sine gulda-guldana. 2 Ɓam guna pet ma ka hay nanu, ma may vuɗ vuɗ-gunaɗi, nam kaam goyo, ɓam-guna kaf ma vuɗ vuɗ-guna, nam sletem tuwamu kay nam fi vuɗ vuɗ-guna suwa. 3 Wulini nigi ka pasiyaki kay yoboyna ma nan kusum tigiya. 4 Lakgi hay nanu, ki nan ka hay nigi nala. Ki ɓam guna fi vuɗ vuɗ-guna kay tuwam ɗeŋɗi, la nam may tapay tam gunɗi. Nala nigi kaw, la nigi lak hayanɗi, nigi as li vaɗi. 5 Nanu, nan mi gu gulda-guldana; nigiya mi ɓam-guna. Sa ma mus hay nanu, ki nan hay namu nala kaw, nam vuɗ vuɗ-gun ŋolo, kay bay nanu, nigi as li va noŋ ne'ɗi. 6 La sa mus hay nanɗi, ma gumis goyo ki ɓam-guna nala, nam ma so goyo kaw; bugolda sumun tokomu, cukum hay kuta, nam ŋal goyo kaw. 7 La nigi lak hay nanu, yoboyna van mus haygiya kaw, jobgi va mige kaf ma nigi mina, van namna ma vulis tigiya kaw. 8 Bunu fi gajijita kuɗ slen kayni, a nigi ma vuɗ vuɗ-gun ŋolo, nala nigi ma muɗ goy sa hatayna vanu. 9 ki Bumna minanawa, nan mingiyawa kaw. Lakgi hay minda vanu. 10 La nigi ŋom vun-ma-gatna vanu, nigi ma lak hay minda vanu, ki nan ŋom vun-ma-gatna vi Bunawa, musawa hay minda valamu kaw nala. 11 Slen kayni nan dumawa tigiya, kay firita vanu ma mus haygiya, kay firita vigiya ma hob kulo'o kaw. 12 Kayni mi vun-ma-gatna vanu: Mingi jar-tuwgiya tuwgiya, ki nan mingiyawa nala. 13 Minda ta ŋol suw minda ta san vul irita valam goy kay ɓosiyomna kayni tayɗi. 14 Nigi si ɓosiyonna, la nigi li slen ma nan gatgi kalamna. 15 Nan yigi ala sa gorvona loɗi, kay gorvona wi va ma mulamna lumnaɗi. Nan yigiyawa ala boniyonna, kay slen kaf ma nan humumay vun Bun pana, nan dumawa goy tigiya. 16 Nigi may vilekan nan goyɗi, may nanu, nan vilekgi goyo, tungiyawa kaw, kay nigi ma tuɗ goyo, kay nigi ma vuɗ vuɗ-guna, kay vuɗna vigiya ma mus ta-ta, a va mige kaw ma nigi jobom tam Bumna hay semda vanu, nam ma vulgita. 17 Va ma nan gatgi kalamna kayni, kay nigi ma min tuwgiya jar-tuwgiya.
Sa nagatna ka gaw kat Yesu hiɗi sa hatayna valamu
18 La sa nagatna ka gawt kigiya, wigi goy ala nisi ka gawt kan nan jewgi nigiya. 19 Lali nigi ay vi nagata, nagat ma minim ɗawni mi va ma ay ir va'na; may wulin nigi may vi nagat loɗi, kay nan vilekgi goy jar sa nagatna pa, kuɗ kayni sa nagatna ka gaw kigiya. 20 Humgi ma gigi kay yoboyna ma nan dum tigiya: Gorvona nam ŋol suw mulamnaɗi. La nisi lan lasi, nisi ma ligi lasi kaw; la nisi ŋom yoboyna vanu, nisi ma ŋom yoboyna vigi kaw. 21 May slen kayni kaf nisi ma lum tigiya kuɗ semda vanu, kay nisi may wi nam ma ganinaɗi. 22 La nan ma miy tisiɗi, la nan disi diyɗi, sulukŋa visi mayɗi. May wulin kayni nisi as ɗob sem-lawta kay sulukŋa visiɗi. 23 Sa ma ka gaw kanu, nam ka gaw kay Bunu kaw. 24 Lopna ma sa mara lum tuwaɗin kayni, la nan lum liy jarsiɗi, sulukŋa visi mayɗi. Wulini nisi wumawa, may nisi ka gawt kanu, kay Bunu kaw. 25 May kayni li'e kay yoboyna ma ɗoy hay gatta vunam hob kulo'o, ma ala: Nigi ka gawt kanu bay lawta. 26 Sa ma ɗob-lawta, ma nan ma gumi tigi tam Bumni pana, Ŋusta vi gasita ta may vi Bumni pa, hay li ma na' maawa tigiya, na' ma li di-goyta kanu, 27 nigi kaw, nigi ma li di-goyta, kay nigi ka hiɗi nanu hay tun cawt pa.
1 Nan digi slen kaynawa, kay va fi dabgi segiɗi. 2 Nisi ma cukgi goy hay sinagogayna pa; lo, liyn ma co'o hay li ma gigekaw ma cigi goyo, ma var ala nam girifim kayn mi Lawna. 3 Slen kayn nisi ma lumu, kay nisi may wi Bumnaɗi, may wan nanɗi kaw. 4 Nan di slen kaynawa tigiya, kay hay liy ma liyn maawa, humgi ma gigi kay nan digiyawa nala. May slen kayni nan digitawa goy jew paɗi, kay nan ka hiɗi nigiya.
Lopna vi Ŋusta-Peldetta
5 Wulin kayni, nan tuɗ tam nam ma ganina, sa jargiya ma joban ala naŋ na arige mayɗi. 6 May kay nan di slen kayni tigiya, kay na'ta yorta hobgi dikgiyawa. 7 May nan digi gasita: Ŋaa'a kigiya kay nan kal goyo, kay la nan kal goyɗi, sa ma ɗob-lawta as ma tigiɗi kaw, may la nan kal goyo, nan ma gigitiya. 8 Hay li ma nam maawana, nam ma mun varta vi sa nagatna kay sulukŋa, kay ɗigerta hiɗi kitata kaw: 9 Kay sulukŋa, kay nisi vi hayanɗi; 10 Kay ɗigerta, kay ta ala nan tuɗ tam Bumna, nigi ma wan loɗi; 11 Kay kitata: Kay ta ala mulla ma kay nagat tanna kitata vumawa. 12 Slen ŋolo ka kanu kay dum tigiya, may nigi as humum wulinɗi. 13 Hay li ma Ŋusta vi gasita maawa, na' ma ɗigergi hay gasita pet; kay yoboyna may ta' na' kay tuwa' ma ɗeŋŋaɗi, may na' ma dum goy tigi kayn mi sle ma na' humumiya hiɗi slen ma min ma vokayna kaw. 14 Na'a ma vulan suburta, kay na' ma yaw hay slena vanu, li di-goyta tigiya. 15 Slena vi Bumna kaf nam fanna; kay na'ta nan di'e, na' ma yaw hay slena vanu kay li di-goyta tigiya.
Yesu ja jaram goy hiɗi sa hatayna valamu
16 Hini ir liyn neeɗa ɦawa, nigi ma wan loɗi; bugol liyn neeɗa ɦawa kaw, nigi ma wanu lo, kay nan tuɗ tam Bunu. 17 Nala sum sara jar sa hatayna valamu di jar-tuwsiya: Va ma nam dayt ala hini mus ir liyn neeɗa ɦawa, nigi ma wan loɗi, hini mus ir liyn neeɗa lo kaw nigi ma wanu, lo nan tuɗ tam Bunu. Va ma nam dayt nala kayni mi mige? 18 Nisi ka di lo: Va ma nam dum ala hini mus ir liyn neeɗa. . . kayn mi mige? Kay nay wi va ma nam di kalamnaɗi. 19 Yesu wi ala nisi min jobomu, nala nam di tisiya: Nigi ka job tuwgi jar-tuwgi kay va ma nan di tigi ala: Mus neeɗa nigi ma wan loɗi, bugol liyn neeɗa lo kaw nigi ma wanu. 20 Nan digi gasita: Nigi ma tiya, yor tuwgiya kaw, may sa nagatna ma firiya: Nigi ma yor tuwgiya, may yorta vigi ma muɗ goy firita. 21 Hay li ma cata ka puka, na' yor tuwa'a, kay liyna va' hebiya; may hay li ma na' puk goorawa, huma' may ga' kay tuw-tita va' loɗi, kay firita kay san vuɗawa gaa kay nagata. 22 Nigi nala kaw, nigi wulin ka hiɗi yorta, may nan ma wigiya lo, dikgi ma li firiya, sa mara'a as sli firita vigi goyɗi. 23 Hay buur namna ɗawni, nigi ma joban kay va loɗi, nan digi gasita, slen pet ma nigi siɗawam tam Bumna, nam ma vulgita hay semda vanu. 24 Ta-ta wulini, nigi may siɗaw va hay semda van ne'ɗi. Siɗawgiya, nigi ma fi'e; a firita vigi ma hob kulo'o. 25 Slen kayni nan dumawa tigiya hay law ma nir-niramna, liyn ma ma'a ma nan ma lawgi hay law ma nir-niramna loɗi, may nan ma digi goy haraŋi kay Bumna. 26 Hay buur namna ɗawni, nigi ma job kay semda vanu, may nan as digi ala nan ma siɗaw Lawna kigiyaɗi, 27 kay Bumna kay tuwam mingiya, kay nigi minanawa, nigi vi kaw ala nan may goy vi Bumna pa. 28 Nan kali goy tam Bumni pa, nan maawa hay nagata; wulini nan min hin nagata, nan min tuɗ tam Bumna kaw. 29 Sa hatayna valam dumu: Ɗuwaŋu, wulin kayni naŋ di goy haraŋ cetet', naŋ may law hay law ma nir-niramna noŋ ne'ɗi. 30 Wulin kayni, numa wi ala naŋ wi slen kafe, naŋ may min ala sa jobaŋ loɗi; kay na'ta numa vi ala naŋ may vi Lawni pa. 31 Yesu hotsi dita: Nigi vaawa wulini su? 32 Ɗuwgiya, liyn ma ma'a, may wulini kaw, liyn ma nigi ma mer goy kep kep gige hay galla valamu valamu, liyn ma nigi ma hinan goy van kep kaw; may nan may van kepɗi, kay Bumna ka hiɗi nanu. 33 Slen kayni nan di tigiyawa kay nigi ma fi toyta hay nanu. Nigi ma fi lasta hay nagata, may teŋgi irgiya, nanu, nan kolawa kay nagata.
Siɗawta kay tapta-kepta vi sa viyna
1 Hay li ma Yesu di slen kayni dina, nam muɗ iram kulo wuralawna di'e: Bunu, leera coya, laŋ goora van goy gajijiya, kay goora vaŋ ma fi vulaŋ suburta kaw, 2 ki naŋ vulum donotawa kay sliwna kaf, kay nam ma muɗ vul irita vatɗita mi nisi kaf sa naŋ vulumtawa. 3 Kayni ti irita ta vatɗita, a nisi ma waŋu, naŋ kep mi Lawn ma gasina, hiɗi nam ma naŋ gumina, Yesu Kristu. 4 Nan suburaŋ seŋawa gaa kay nagata, lopna ma naŋ vulanta kay lumu, nan vatamawa kaw. 5 Wulin kayni, naŋ Bunu, cukan hiɗi gajijita vok iraŋu, vulan gajijita na'ta ta nan ay hiɗi na'a kataŋ jew tun cawta vi nagata. 6 Nan ɗekaŋ seŋ goy tam sumuna sa naŋ vulanti gaa kay nagatna. Nisi ay sa faŋŋa, naŋ vulanti manu; nisi vaawa kuɗ yoboyna vaŋu kaw. 7 Wulini kaw, nisi wi goy ala slen mige kaf ma naŋ vulanawa, nam may vaŋay pa. 8 Kay yoboyna ma naŋ vulantina, nan vulsitawa; nisi vumawa kaw; nisi wi goy gasi ala nan may goy taŋ pa, nisi vi kaw ala naŋ ganiya. 9 Nan wulin siɗawaŋ kayn kisiya. Nan siɗaw kay sa nagatnɗi, may kay nisi sa naŋ vulanti manu, kay nisi sa si faŋŋa. 10 -- Slena van kaf nam mi ma faŋŋa, slena vaŋ kaw nam vanu -- nala nan fi gajijit kayn kuɗumu. 11 Nan may hay nagat loɗi; nisi ka hay nagata, may nan tuɗ taŋu. Naŋ Bun ma peldetna, naŋ ma ŋomsi hay semda vaŋ ŋomge! Nisi sa naŋ vulanti manu, a nisi ma tap kep ki nay ka kep nala. 12 Hay li ma nan ay hiɗi nisiya, sumuna sa naŋ vulantina, nan ŋomsi hay semda vaŋu. Nan ŋomsi ŋaa'a, sa kep jarsi ma ba goy mayɗi, may kep mi goora vi ba-goyta, kay vun yoboyna hay ɗota ma hob kulo'o. 13 Wulin kayni, nan ka hotis kataŋu, may nan law zawni hay nagata, kay firita vanu ma hobsi haysi hob'. 14 Nan vulsi yoboyna vaŋawa, sa nagatna ka gawt kisiya, kay nisi say vi nagata loɗi, ki nan may vi nagatɗi nala kaw. 15 Nan siɗawaŋu kay naŋ yawsi goy hay nagat paɗi, may kay naŋ ma ŋomsi kay ma joona. 16 Nisi say vi nagatɗi, ki nan may vi nagatɗi nala. 17 Lisi goy peldete hay gasita: Yoboyna vaŋu mi gasita. 18 Ki naŋ ganiyawa hay nagata, nan cuksiyawa kaw hay nagata. 19 Nanu, nan li tuwan goy peldete kisiya, kay nisi kaw ma li goy peldete hay gasita. 20 Nan siɗawaŋ kayn kisi nisi tutaɗi, may lo kay nisi sa min vi hay nanu kuɗ yoboyna visiya, 21 kay nisi kaf ma tap kep; ki naŋ bunu, naŋ ka hay nanu nala, nan hay naŋu kaw, kay nisi ma tap kep kaw hay naya, kay sa nagatna ma wi ala naŋ ganiyawa. 22 Nanu, nan vulsi gajijita ta naŋ vulanawa, kay nisi ma tap kepe ki nay ka kep nala kaw. 23 -- Nan hay nisiya, naŋ hay nanu may -- kay nisi ma tap tuɗoŋ kep, kay sa nagatna ma wi ala naŋ ganiyawa, naŋ minsiya kaw, ki naŋ minanawa nala. 24 Bunu, nan min ala liyn ma nan ka haya, nisi sa naŋ vulantina lak hiɗi nanu kaw, kay nisi ma ɗuw gajijita vanu, na' ta naŋ vulanawa, kay naŋ minanay jew sem nagata bay tun gaa tuwa. 25 Bun ma ɗigera, sa nagatna may waŋɗi; may nan waŋaya, nala kaw nisi sa lakŋi wi goy haraŋ ala naŋ ganiyawa. 26 Nan di goy tisiya kay semda vaŋu, nan min disi goy ka' lo, kay minda ta naŋ minan hiɗi na'ta ma mus haysiya, nan haysiya kaw.
MITTA HIƊI DAYTA-KULOTA VI YESU
Nisi vi Yesu
1 Hay li ma Yesu di na dina, nam kali goyo hiɗi sa hatayna, kay tuɗ goy gal hena vi niy-lum ma riŋŋa vi Sedron, hay li ma jardeŋŋa ka haya, nam hiɗi sa hatayna valamu, nisi cuk hayamu. 2 Yudas, ma di newt kalamna, wi liyn namna, kay Yesu hiɗi sa hatayna valamu fi tuwsi hay liy namna dok-dok. 3 Yudas yaw vokŋa vi sojena hiɗi sa sunda vi muliyan ŋulo sa-ɗifinna, hiɗi sa sunda vi sa Farisen kuɗumu, hiɗi torsena, ku ma doyna, hiɗi sle-ma-duura hay ɓisiya kaw. 4 Kay Yesu wi slen kaf ma min ma kalamna, nam tuɗ kirsiya disiya: Nigi garam gige? 5 Nisi hotom dita: Yesu ma Nasaretna. Nam disiya: Zawn mi nanu. Yudas, nam ma di newt kalamna, ka colay hiɗi nisi zaw lay. 6 Hay li ma Yesu disi ala: Zawn mi nanu, nisi hot goy bugolsiya, yak gaa'a kaw. 7 Nam jobsi mara lo: Nigi garam gige? Nisi di'e: Yesu ma Nasaretna. 8 Yesu hot dita: Nan digi ala zawn mi nanu, la nigi garanti kayn mi nanu, nisi sa lakŋa nigi hinsi tuɗa. 9 Kayni kay hob vun yoboyna ma nam dumna kulo'o: Sa naŋ vulantina nan may ba mara goy kuɗsi kepɗi. 10 Simon Peter ma kew-gaferaŋ ka hay ɓalamu, patam goyo, cal hum sa ma sunda vi mul ŋol ma-ɗifinna, kaam humam ta jufta goyo. Sa ma sunda kayni selem ala Malkus. 11 Yesu di tam Peter: Hot kew-gaferaŋa vaŋ hay sitaara. Kaway-ma-cina ma bun vulanawa, nan ma cumɗi su?
Yesu ka vok Anas hiɗi Kayfas, Peter puw vunam kay Yesu
12 Vokŋa vi sojena hiɗi kapiten ŋolla visiya hiɗi sa sunda vi sa Yudiyana vi Yesu, junumu kaw. 13 Jewe nisi tuɗum tam Anas; kay nam ay mi kuno Kayfas ma ay mul ŋol ma-ɗifinna hay busat na'ta. 14 Kayfas kayni mi nam ma gat sa Yudiyana ala: Ŋaa'a kay san kep mit kay sum sa noŋ tana. 15 May, Simon Peter, hiɗi sa ma hatayna mara kep, tapay kuɗ Yesu. Mul ŋol ma-ɗifinna wi sa ma hatayn namna, nam zum vutoŋ hiɗi Yesu hay wur-daŋŋa vi mul ŋol ma-ɗifinna; 16 may Peter colay goy jiya, goboy tam vun-galana. Sa ma hatayna ma hena ma mul ŋol ma-ɗifinna wumna, kali goy jiya, di goota ta ŋom vun-galana, hin Peter kali vo'o. 17 Nala goota ta sunda, ta ŋom vun-galana di tam Peter: Naŋ kaw, naŋ may jar sa hatayna vi san zawnɗi su? Nam di'e: May nanɗi. 18 Sa sunda hiɗi sa ŋomda ŋal kuna hay ganuna, kay liyn liy sleɗe, nisi kaf lakay vun kuna kay hol tuwsiya. Peter kaw colay vun kuna hiɗi nisiya kay hol tuwamu kaw. 19 Mul ŋol ma-ɗifinna ka job Yesu kay sa hatayna valamu, kay hatta valamu kaw. 20 Yesu hotom dita: Nan di goy haraŋ tam sumun kaf; nan hat hay sinagogayna hiɗi Tempella dok-dok, liyn ma sum sa yudiyana kaf ka tok tuwsi haya, nan di yoboyn mara goy ŋayayɗi kaw. 21 Naŋ joban kay mige? Jobaŋ nisi sa humaniya kay slen ma nan lawamay tisiya; nisi wi sle ma nan dum tisina goy ŋaa'a. 22 Hay li ma nam di kayni dina, sa kep jar sa sunda sa lakayn kayni, ci Yesu geliyamu di'e: Naŋ hot dita mi mul ŋol ma-ɗifinna ki kayn nala su? 23 Yesu hotom dita: La nan di joo'o, daŋ goy kay joota van hawtige! May la nan di hay liyamu, naŋ can kay mige? 24 Nala kaw Anas jokom juni jun' mi Kayfas, mul ŋol ma-ɗifinna. 25 May Simon Peter colay malam hol tuwam zaw. Nisi dumu: Naŋ kaw, naŋ kayn kep jar sa hatayna valamɗi su? Nam puw vunamu di'e: May mi nanɗi. 26 Sa ma sunda kep jar sa sunda vi mul ŋol ma-ɗifinna, goor-bum nam ma Peter kaam humam goyna, di'e: Nan may waŋay hiɗi nam hay jardeŋɗi su? 27 Peter puw vunam lo, wulini wulini slek-gulokŋ hela.
Yesu vok Pilatus
28 Nisi vi Yesu vo vi Kayfas pa, tuɗum hay Pretoriyum, hay graw culum. May nisi kay tuwsi cuk kalaf hay Pretoriyumɗi, kay ŋom tuwsi pasiyak a nisi fi ti Paskata. 29 Pilatus kali goy jiya, tuɗ ŋafsi irsiya di'e: Lawta ta nigi min pa' kay san zawni ti law mige? 30 Nisi hotom dita: Lali nam mi sa ma jooɗi, numa as vulum goy taŋɗi. 31 Pilatus disiya: Nigi kay tuwgi vigita, kaam kitata kalamu kuɗ gatta vigiya. Sa yudiyana dumu: Hagata vuli tuma'a kay ci sa goy matɗi. 32 Kayn li'e kay vun yoboyna vi Yesu ma nam dumna hob kulo'o, kay ɗek kay ir mitta ta nam ma mit hiɗi na'ta. 33 Pilatus hot vo hay Pretoriyumna, yi Yesu dumu: Naŋ mi mulla vi sa Yudiyana su? 34 Yesu hot dita: Van kayni naŋ dumawa kay tuwaŋu, lebo sum sara daŋ kaw su? 35 Pilatus hot dita: Nanu, nan mi sa ma Yudiyan su? Sumuna vaŋu hiɗi muliyan ŋulo sa-ɗifinna vulaŋ goy hay ɓanu; va ma naŋ lumna mi mige? 36 Yesu hot dita: Mulda van tay vi nagat tanɗi. Lali mulda van vi nagat tani, sa sunda vanu duriyawa kanu, kay nan fi vulis goy hay ɓam sa Yudiyanɗi kaw; may wulini mulda van may gaa tanɗi. 37 Pilatus dumu: Yo! Naŋ dolay mi mulu? Yesu hot dita: Naŋ daawa, nan mi mulla. Nan vuɗi kay kayni, nan maawa kay nagata kay kayni kaw: Kay di goy kay gasita. Gigekaw ma ka hay gasita human delanu kaw. 38 Pilatus dumu: Gasita kayni mi mige? Hay li ma nam di kayni dina, nam kali goy jiya lo, tuɗ tam sa Yudiyana disiya: Nanu, nan fi lawta ne' kalamu kay junumɗi kaw. 39 May ki hay data vigiya dok-doko, nan ka gigi sa kep kep hay yuldeta vi Paskata, nigi min ala nan gigi mulla vi Yudiyan kayn su? 40 Nisi hot siwel mara lo ala: A'a, nam ma zawnɗi, may Barabas. Barabas ay kayni mi sa ma coŋcoloŋŋa.
1 Hay na'ta Pilatus vi Yesu watamu. 2 Sojena ci bogoray ma zigiyna, tunumti kalamu, cukum sligar purpel talamu kaw; 3 Bugolda nisi ma talamu di'e: Gaŋ deɓe, mulla vi Yudiyana! Nisi cum geliyamu kaw. 4 Pilatus kali goy jiy mara lo, di tam sa Yudiyana: Ɗuwgiya, nan min margitay goy jiya, kay nigi ma wi ala nan fi law ne' kalam kay junumɗi kaw. 5 Yesu kali goy jiya hiɗi bogoray ma zigiyna tuni kalamu, hiɗi sligar-purpel cuki talamu kaw. Pilatus disiya: San kay kigini! 6 Hay li ma muliyan ŋulo sa-ɗifinna hiɗi sa sunda wumu, nisi siwela di'e: Ɓalam kat gu-ma-grakŋa! Ɓalam kat gu-ma-grakŋa! Pilatus disiya: Nigi kay tuwgi vigita, ɓalgit kat gu-ma-grakŋa kay tuwgiya; kay nanu, nan fi lawta kalamu kay junumɗi. 7 Sa yudiyana hotom dita: Gatta vuma ka'a, kuɗ gatta kayni, nam fi mitta, kay nam li tuwam goora vi Lawna. 8 Hay li ma Pilatus hum lawta kayni, nam hob hiɗi narta ŋol suwa. 9 Nam hot kalaf hay Pretoriyum lo, di tam Yesu: Naŋ ay arige pa? May Yesu hotom dita noŋɗi. Pilatus hot dumu: 10 Naŋ hot dit tanɗi su? Naŋ may wi ala donota ka hay ɓanu kay gaŋu, donota ka hay ɓanu kay ɓalaŋ kat gu-ma-grakŋa kaw disu? 11 Yesu hotom dita: Donota vaŋ may kan noŋ ne'ɗi, la na' vuli taŋu kulo paɗi. Kuɗ na'ta kayni nam ma vulan goy hay ɓaŋu, suluk ŋolla ka tuni kalamu. 12 Tun caw hay liy namna pa, Pilatus gar hagata kay gumu. May sa Yudiyana siweliya di'e: La naŋ gumawa, naŋ may mi bana Cesar loɗi. Kay gigekaw ma li tuwam mul kay tuwam ɗeŋe, nam fok kulo kay Cesar. 13 Hay li ma Pilatus hum lawt kayni, nam vi Yesu goy jiya, nam mus kay zlamda-kitata, hay liy ma yum ala: Hiɗiy beɗayna, ma yum hay vun Hebren ala Gabbata. 14 May kayni buur ta kot slena vi Paskat hayta, goboy hay leer ma karkiyana. Nam di tam sa Yudiyana: Mulla vigi kayni! 15 May nisi ciriy digi-digi' di'e: Cum goyo! Cum goyo! Ɓalam kat gu-ma-grakŋa! Pilatus disiya: Mulla vigi ɓalam kat gu-ma-grakŋ mi nan su? Muliyan ŋulo sa-ɗifinna hot dita: Mulla vuma kep kayn mi Cesar. 16 Nala, nam vulum goy tisiya kay ɓalam kat gu-ma-grakŋa. Nisi vumu kal hiɗi namu kaw.
Yesu ɓalay kat gu-ma-grakŋa
17 Yesu ziy gu-ma-grakŋa valamu, tuɗ hay liyn ma yum ala zok-ta'ara, ma diy hiɗi vun Hebren ala: Golgata. 18 Kayni mi liyn ma nisi ɓalam kat gu-ma-grakŋa hayna, hiɗi sum sara ma' kaw, kep galam hena, hena galam hena, Yesu jarsi waŋ may. 19 Pilatus kot ɗota, tuna' kulo kay gu-ma-grakŋa. Nam ɗom ki kayn nala: YESU MA NASARETNA, MULLA VI YUDIYANA. 20 Sum sa Yudiyana ŋolo jaŋ ɗot kayni, kay liy ma nisi ɓal Yesu hayna ay goboy hiɗi hoyok-ziyn ma ŋolla: Nala ɗota ay hay vun Hebrena, hay vun Lateŋŋa hiɗi vun Grekŋa. 21 muliyan ŋulo sa-ɗifinna di tam Pilatus: Naŋ may ɗo ala mulla vi Yudiyanaɗi, may nam di'e: namu mi mulla vi Yudiyana. 22 Pilatus hotsi dita: Va ma nan ɗoya, nan ɗoya. 23 Sojena, hay li ma nisi ɓal Yesu kat gu-ma-grakŋawa, nisi yaw sligara valamu, ɓurawam iram fiɗi kay sojen fiɗi lay. Nisi yaw sligar-tuwna valamu, ma sira may talamɗina, mi sligar ma kepna, ciliy kulo kalam pa ta-ta gaa selem dab'. Nisi di jar-tuwsiya: 24 Nay hawam goyɗi, may ŋaɓayta kuɗ ɦayta kay sa gige kla ma fumu. Kay vun ɗota ma hob kulo'o: Nisi ɓuraw sligara vanu, Sligar-tuwna vanu nisi ŋaɓam kuɗ ɦayta. Kayni mi slen ma sojena lumu. 25 Goboy tam gu-ma-grakŋa vi Yesu, sulumu, ɓasum sulumta, Mariya cata vi Klewpas hiɗi Mariya Madelen ay lakay lak'. 26 Hay li ma Yesu wi sulumu colay goboy hiɗi sa ma hatayna ma nam minimna, nam di tam sulumu: Cata, zawni mi goora vagu. 27 Bugol kayni nam di tam sa ma hatayna: Zawni ti suŋu. Hay leer namna de', sa ma hatayna joka' vo valamu. 28 Bugol kayni Yesu ma wi ala slen kaf asawa, kay vun ɗota hob kulo'o: nam di'e: laat canu. 29 Hay li namna kayni, doway kep ay hobay hiɗi vinegre galsi zaw. Nisi jiyob sligar ma ɗutina hay vinegrena, junum vun vi hisopna, vulumti kulo vunamu. 30 Hay li ma Yesu jugo vinegren jugona, nam di'e: Slen kaf hobawa kulo'o. Bugolda nam her yalam gaa'a, sukam kal goyo. 31 Kayni hay buur ma kotta, a hin tuwna kulo kay gu-ma-grakŋa hay buur sabatnaɗi -- kay sabatna namna kayni mi buur ma ŋolo -- Sa Yudiyana job tam Pilatus kay kus gay sa ɓalay kay gu-ma-grakŋa, yawsi gaa'a kaw. 32 Sojena ma'a kus gay sa ma jewna, bugolda kus gay ma hena ma ɓalay kat gu-ma-grakŋa hiɗi namu. 33 Co tam Yesu kayn nisi fum miti vatiya, nala nisi may kusum gayamɗi; 34 may sa kep jar sa sojena jikim hay galamu hiɗi kawayna, koloy na kay', niyna hiɗi busuwna jaŋay goyo. 35 Nam ma wumu li di-goytawa kalamu, di-goyta valamu gasiya; nalamu nam wi ala nam di gasiya, kay nigi kaw ma vi'e. 36 Van kayni coowa nala kay vun-ɗota fi hob kulo'o: Zokom kep kaw ma kusɗi. 37 Ɗota ka di lo ala: Nisi ma ɗuw tam nam ma nisi jikimna.
Pita vi Yesu
38 Bugol kayni Yosef ma Arimatena, sa ma hatayna vi Yesu, may goy ŋayaya, kay nam li nar kay sa yudiyana, nam job Pilatus kay vulum hagata kay sli tuw Yesu. Pilatus vulum hagata. Nam co'o sli tuwna kaw. 39 Nikodemus ma'a kaw, nam ma hay liyn ma jewna ma talamu hay henjeta, nam mar miir, rigasay hiɗi alowes ir livre goboy kis. 40 Nisi sli tuw Yesu, ɗutum hiɗi sligara, hiɗi aromatna, kuɗ data vi pita vi sa Yudiyana. 41 Hay li numa nam ay ɓalay kat gu-ma-grakŋa kayni, jardeŋ mara ay goboy hiɗi namu, hay jardeŋŋa, zulda kep wuliya ta nisi bay bur sa haya' tuwa. 42 Kay nisi ka hay kotta vi sa Yudiyana, lo kay ta ala zulda ay goboyo, nisi bur Yesu gaa hay zul na'ta.
Dayta-kulota vi Yesu Kristu
1 Hay buurta jewta vi lumuna, Mariya Madelen kal vun zulda graw culum, liyn ka jufun tuwa, na' wi hiɗiyt poŋay goy vun zulda. 2 Na' jaŋay tam Simon Peter hiɗi ma hatayna ma Yesu minimna, na' disiya: Nisi sli Bum-Sumunawa goy hay zulda pa, numa wi liyn ma nisi burum haynaɗi. 3 Peter hiɗi ma hatayna ma hena kali kay tuɗ vun zulda. 4 Nisi ma' pet yaway jaŋi. May ma hatayna ma hena jaŋ koloy suw Peter, nam co vun zulda jewe kaw; 5 Nam her gaa'a, wi sligara lakay lak', may nam kal hay zuldaɗi. 6 Simon Peter ma ay bugolomu coowa. Nam kal hay zulda, wi sligar ma beɗayna lakay lak', 7 Sligar ma lakay kulo kay yam Yesuna may tapay hiɗi sligar ma beɗaynaɗi, may ɗuti ɗut, tuni goy hay liy mara valam ta'. 8 May hay na'ta ma hatayna ma co jew vun zulda, kal gaa'a kaw, nam wi'e vi kaw. 9 Kay ɗota ta di ala Yesu ma day kulo'o jar sa mitin pa, nisi may huma' cawa'ɗi. 10 Nala sa hatayna hotay vo'o. 11 May Mariya colay goy jiya, goboy hiɗi zulda, na' ka tiya. Hay li ma na' colay zaw tiya, na' her gaa kay ɗuw hay zulda, 12 na' wi sa sunda-wuralawna ma', cuki hiɗi sligar ma haɓi, lakay hay liyn ma tuw Yesu ay buri hayna, kep kulo yalamu, kep gaa gayamu may. 13 Nisi da'a: Cata, nak tiy kay mige? Na' hotsi dita: Kay nisi sli tuw Bum-Sumuna van goyo, nan wi liyn ma nisi burum haynɗi kaw. 14 Hay li ma na' di kayn dina, na' hot bugola'a, na' wi Yesu colay zaw; may na' wi goy ala zawn mi Yesuɗi. 15 Yesu da'a: Cata, nak tiy kay mige? Nak gar gige? Hay varta va' kayn ala ay zawn mi sa ma kot jardeŋŋa, na' dumu: Sam-ŋolla, la slum tuwam goy mi naŋu, danay kay liyn ma naŋ burum hayna, kay nan min slumu. 16 Yesu da'a: Mariya! Na' muɗ ira' talamu, dum hay vun Hebren ala: Rabbuni! Kayn min di'e: Bum-hatta. 17 Yesu da'a: Nak may jon tuwanɗi, kay nan bay kal kulo tam bun tuwa. May tuɗag tam bosiyonna, nak disi ala nan tuɗ kulo tam Bunu hiɗi bugiya, tam Lawna vanu hiɗi Lawna vigiya. 18 Mariya Madelen ma tam sa hatayna disi ala: Na' wi Bum-Sumuna, nam di slen kayni ta'a kaw.
Yesu vul tuwam kir sa hatayna valamu
19 Hay vulatita vi buur na'ta, kayni ti buurta jewta vi lumuna, vun-ziyna vi liyna ma sa hatayna lakay hayna ay kulo dukiya, kay narta kuɗ sa Yudiyana; Yesu ma'a, colay jarsiya di tisi ala: Sle'ta mus hiɗi nigi musge! 20 Hay li ma nam di nala dina, nam ɗeksi ɓalamu hiɗi hoyokamu. Sa hatayna li firi ŋolo hay li ma nisi wi Bum-Sumuna. 21 Yesu disi mara lo ala: Sle'ta mus hiɗi nigi musge! Ki Bumna ganiyawa, nan kaw nan cukgiyawa. 22 Bugol dit kayni, nam gi suk kisiya di'e: Vigi Ŋusta-Peldetta. 23 Nisi sa nigi vulsi gidawa kay sulukŋa visiya, sulukŋa visi ma ɦas goyo, nisi sa nigi vulsi gida kay sulukŋa visiɗina, sulukŋa visi ɦas goyɗi may. 24 Hay li ma Yesu con kayni, Tomas ma yum Didimus, ma kep jar sa doogo yam ma'na mayɗi. 25 Sa hatayna sa hena dum ala: Numa wi Bum-Sumun aya. May nam disiya: La nan wi huɗukŋa vi oslna hay ɓalamɗi, la nan tun cita-ɓan hay baŋal oslnaɗi, la nan tun ɓan hay hoyokamɗi kaw, nan as vi noŋɗi. 26 Buur glafandi bugol kayni, sa hatayna vi Yesu lakay kalaf hay ziyda lo, Tomas ay hiɗi nisiya kaw. Vun-ziyda ay duki duk', may Yesu ma'a. Nam col jarsiya, disi ala: Sle'ta mus hiɗi nigi musge! 27 Bugolda nam di tam Tomas ala: Tomas, meɗaŋ cita-ɓaŋay tani, ɗuwaŋ ɓanu, meɗaŋ ɓaŋaya, tuna' hoyokanu; naŋ mus bay viɗi, may vaŋu! 28 Tomas hotom dita: Bum-Sumuna vanu hiɗi Lawna vanu! 29 Yesu di talam ala: Kay naŋ wanawa, naŋ vaawa. Sle'ta ka kay nisi sa may wi hiɗi irsiɗi, may nir na'ta kep nisi vi'e. 30 Ɗekka hena ŋolo Yesu lum kir sa hatayna valamu, may nam may ɗoy gaa hay ɗerwelda kaynɗi. 31 May slen kayni ɗoy ɗo kay nigi ma vi ala Yesu kayni mi Kristu, goora vi Lawna, hay li ma nigi vaawa, nigi fi irita hay semda valamu.
Yesu vul tuwam goy kir sa hatayna valamu kel niy-lum ŋolla vi Tiberiyad
1 Bugol kayni Yesu vul tuwam lo kir sa hatayna valamu kel niy-lum ma ŋolla vi Tiberiyad. Nam vul tuwam kirsi kayni ki kayn nala. 2 Simon Peter, Tomas ma yum Didimus, Nataniyel ma hay Kana hay Galileya, gurona vi Sebedew, sa hatayna valam sara ma' lay tokay kuɗ tuwsi ɗawni. 3 Simon Peter di tisiya: Nan kal ciwa. Nisi dumu: Numa kaw, numa tuɗis kuɗaŋu. Nisi kali goyo, jik hay lumna kaw; hay henjet na'ta kayni nisi may vi vaɗi. 4 Hay li ma liyn foowa goyo, Yesu ka colay kulo deŋel zaw, may sa hatayna may wi ala colay zawni mi Yesuɗi. 5 Yesu disi ala: Gurona, va ma ti may kigi ne'ɗi su? Nisi hotom dita: Va mayɗi. 6 Nam disiya: Cukgi dena hay gal ma jufna vi lumda, nigi ma fi kaw. Nisi cukumu; may donota visi kay yawam kulo'o may loɗi, kay kulufna hobay hayam ŋolo. 7 Nala sa ma hatayna ma Yesu minimna di tam Peter: Nam kayni mi Bum-Sumuna! Hay li ma Simon Peter wi ala zawni mi Bum-Sumuna, nam cuk sligara valam talamu, kay nam ay goy nala'a, nam gi tuwam goloŋ hay niy-lum ŋolla kuf', 8 Sa hatayna sa hena ka sor lumda, nisi tan dena ma hobay hiɗi kulufna kuɗsiya kaw, kay nisi ay goy goy gine hiɗi deŋella ir goloŋ goboy kis-ma'. 9 Hay li ma nisi jik kulo ɗeŋe, nisi wi ganuna tuni ta', kuluf buri vunamu hiɗi funa kaw. 10 Yesu disiya: Nargi kuluf ma nigi vumin aya. 11 Simon Peter jik kulo hay lumda, tan dena ma hobay hiɗi kulufna ma ŋulona kis kalam dok-vasl yam ɦidi kulo ɗeŋe. Kuluf vi hay dena ŋolo, nir na'ta kep ir dena haw goyɗi. 12 Yesu disiya: Nigiyay tigiya. Sa ma hatay mara kep ma mal vunam kulo jobom ala naŋ mi gige mayɗi. Kay nisi wi ala nam mi Bum-Sumuna. 13 Yesu ma'a, sli funa, vulsita, nam li hiɗi kulufna nala kaw. 14 Kayni hay sem ma ɦidina ma Yesu vul tuwam kir sa hatayna valamu, tun caway tam dayta valamu kulo jar sa mitina pa. 15 Hay li ma nisi vat hiɗi tina vatna, Yesu di tam Simon Peter: Simon, goora vi Yonas, naŋ minan suw sa lakŋa su? Nam hotom dita: Awa, Bum-Sumuna, naŋ wi ala nan minaŋu. Yesu dumu: Kotaŋ tuw guro fok-dimina vanu! 16 Nam dum sem ma'ta lo: Simon, goora vi Yonas, naŋ minan su? Peter hotom dita: Awa, Bum-Sumuna, naŋ wi ala nan minaŋu. Yesu dumu: Ŋomaŋ fok-dimina vanu. 17 Nam dum sem ɦidita lo: Simon, goora vi Yonas, naŋ minan su? Peter yor tuwamu kay nam dum sem ɦidita: Naŋ minan su? Nam hotom dita: Bum-Sumuna, naŋ wi slen kaf, naŋ wi kaw ala nan minaŋu. Yesu dumu: Kotaŋ tuw fok-dimina vanu. 18 Nan daŋ gasita, hay li ma naŋ ay joriyo tuwa, naŋ jun sligara vaŋ kay tuwaŋu, tuɗ arige hay liy ma naŋ mina kaw; may hay li ma naŋ muɗawa maari, naŋ ma meɗ ɓaŋ goyo, sa mara ma junaŋga, lo ma tuɗaŋ hay liy ma naŋ minɗin kaw. 19 Nam di kayni kay ɗek ala nanige Peter ma vul suburta mi Lawna hay mitta valamu. Hay li ma nam di kayni dina, nam dumu: Tapaŋay kuɗanu. 20 Peter ci porlay bugolomu, nam wi sa ma hatayna ma Yesu minimna tapay kuɗsiya, nam ma hay tina vi funa, gah dig Yesu di kaw ala: Bum-Sumuna, nam ma di newt kaŋ kayn nam gige? 21 Hay li ma Peter wumu, nam di tam Yesu: Nam ma kilan naŋ ma li talam mi mige? 22 Yesu dumu: La nan minawa ala nam mus iriya ta-ta nan hotaya, law vaŋ hay su? 23 Naŋu, tapaŋay kuɗanu. Kuɗ kayni, labara dusi goy jar sa ɓosiyosina ala ma hatayna namna mitɗi. May Yesu law kayn ala nam ma mitɗi naɗi, may nam di'e: La nan minawa ala nam mus iriya ta-ta nan hotaya, law vaŋ hay su? 24 Li di-goyta kay slen namna, ɗom kaw kayni mi ma hatayn namna. Numa wi kaw ala di-goyta valam gasiya. 25 Yesu li slen hena ŋolo ŋolo, lali ɗom ɗoy kayn kalam kep kepe, nan fi var ala nagat kay tuwa' kaw as ziy ɗerwel namna ma ɗoyn kaynɗi.