Lijwi lya mwonyo
1 Akulivanga kwakele Lijwi, co Lijwi lyakele amo na Njambi, co Lijwi lyapwile Njambi. 2 Tunde akulivanga, Lijwi lyakele amo na Njambi. 3 Ali ikeye Njambi watangele vyuma vyoshe, co kukwesi cuma civatangele kujeneka ikeye cai. 4 Lijwi likelyo lyapwile nsina ya mwonyo, co mwonyo ou ukewo wanenele ceke kuli vanu. 5 Ceke citwila mu lisusulungu, co lisusulungu kulyasele kucitundisa embwe. 6 Njambi watumine muluwa wendi, lizina lyendi Yowano, 7 ikeye wezile nakuleka vanu a vyuma vya ceke, ngeci voshe vazive lijwi nakukulaela. 8 Ikeye kapwile ceke embwe, oloni wezile nakwambulula a vyuma vya ceke. 9 Eci cikeco capwile ceke ca vushunga, ceke cije cilinakwija mu kaye nakutwila ali vanu voshe. 10 Lijwi lyakele mu kaye. Co nameme Njambi watangele kaye ali ikeye, oloni kaye kukamuzivukile. 11 Ikeye wezile ku lifuti lyendi, oloni vanu vendi kuvamutambwile. 12 Oloni kuli voshe vaje vamutambwile nakukulaela kuli ikeye, wavanene moko yakupwa vana va Njambi. 13 Vakevo kuvapwile vana va Njambi ku cisemwa ca ano asi embwe, cisemwa cakusemuka ku munalume, oloni Njambi vavenya ikeye wapwile ishavo. 14 Co Lijwi lyemukile munu, lyashulile na kutetela navushunga, co lyakele akati ketu. Twamwene vumpau vwendi, vumpau vuje vwaatambwile akupwa mwana umolika wa Ishe. 15 Yowano wambulwile vya ali ikeye. Co watambekele ngwendi, “Ou ikeye uje injamilekele ngwange, ‘Alinakwija munima yange, oloni ikeye napu wakama kutuvakana yange, omwo ikeye wakeleko akulivanga omo yange kanda njisemuke.’ ” 16 Co akushula na kutetela kwendi watuvezikisile tuvoshe, watwanene vivezikiso kuwezelela a vivezikiso vikwavo. 17 Omwo Njambi waanene Lishiko lyendi ali Mosesa, oloni kutetela na vushunga vinaija ali Yesu Kilistu. 18 Naumo wai wamona Njambi, kuvanga Mwana uje umolika, wakulifwa mumo na Njambi, uje ali ku mati ya Ishe, ikeye namusholola.
Vukaleo vwa Yowano Muka-kumbwitika
19 Co vaka-kushwana va vaYunda mu Yelusalema vatumine vamo vaka-kukombelela na vaLevi * kuli Yowano ngeci vakamwihule ngwavo, “Yove iyajo?” 20 Yowano kavyanene kuvakumbulula embwe, oloni wendekele mwamuvwa kuli vakevo ngwendi, “Kesi yange Wakuvwavesa.” 21 Co vamwihwile ngwavo, “Indi yove iyajo? Yove Elinja ndi?” Oloni Yowano wavakumbulwile ngwendi, “Embwe, kesi yange!” Co vamwihwile lalo ngwavo, “Indi yove Muka-kwimanena ndi?” Oloni Yowano wavakumbulwile ngwendi, “Embwe, kesi yange.” 22 Asinoni vamwihwile ngwavo, “Indi yove iyajo? Tuleke ngeci tukaleke vaje vanatutumine kuli yove. Ulitumbula ngwove yove iya?” 23 Ikeye wavakumbulwile nakuvatumbwila majwi a Isaya muka-kwimanena ngwendi, “ Yange ‘Lijwi lya umo atambeka mu mambo ngwendi, sheveni mu ngila ya Shukulu Kalunga ngeci akwitilemo!’ ” 24 Miluwa vaje vavatumine vaFaliseo 25 asinoni vehwile Yowano ngwavo, “Nga kesi yove Wakuvwavesa, nambe Elinja, nambe Muka-kwimanena, omwo vika ulinakumbatizila?” 26 Yowano wavakumbulwile ngwendi, “Yange njilinakumbwitika mu mema, oloni akati keni anemana umo uje kumuzivuka. 27 Ikeye alinakwija munima yange, oloni yange kunjafwililile nameme kuzitula miva ya a vin̄aku vyendi.” 28 Vyoshe evi vyalingiwile mu Mbetaniya, mu ngangela ya Ndonga ya Yondau, kuje kwakele nakumbatizila Yowano.
Muna Manga wa Njambi
29 Alikaki Yowano wamwene Yesu alinakwija kuli ikeye, co wendekele ngwendi, “Kengeni, Muna Manga wa Njambi, uje muka-kutundisa vuvi vwa vaka-kaye! 30 Ou ikeye vene uje njendekele ngwange, ‘Munima yange mwija munu umo, oloni nanjituvakana, omwo ikeye wakeleko simbu kanda yange njisemuke.’ 31 Yange kunjamuzivukile ngwange ikeye, oloni njezile nakumbwitika mu mema mukumusholola ku vanu va Isalele.” 32 Co Yowano wambulwile vukaleo ovu ngwendi, “Njamwene Munzinzime Wakujela washulukile mwilu ngwe katela, co wakele ali ikeye. 33 Yange kunjamuzivukile ngwange ikeye, oloni Njambi, uje wanjitumine ngeci njimbwitike mu mema, ikeye wendekele kuli yange ngwendi, ‘Ukamona Munzinzime akashuluka nakukala ali munalume umo, ikeye akambwitika na Munzinzime Wakujela.’ 34 Co Yowano wendekele ngwendi, ‘Yange njamumwene, co njimileka ngwange ou ikeye Muna Njambi.’ ”
Vandongisi va Yesu vakulivanga
35 Alikaki Yowano wemanene lalo kuje na vandongisi vendi vavali, 36 co omo wamwene Yesu alinakwija kuje, co wendekele ngwendi, “Kengeni, Muna Manga wa Njambi!” 37 Vandongisi vaje vavali vamuzivile omo wendekele majwi awa, co vakavele Yesu. 38 Yesu watengulukile nakukenga kunima, co wavamwene valinakumukava, co wavehwile ngwendi, “Vika mushaka?” Co vamukumbulwile ngwavo, “Lambi, wakala kuli?” (Lijwi eli lilumbunuka ngwalyo “Mulongisi.”) 39 Ikeye wavakumbulwile ngwendi, “Ijeni mukamone.” (Omwo yapwile simbu ya cingwezi.) Ngecivene, vaile amo nendi vakamwene kuje kwakele, co vakele amo nendi litangwa lije lyoshe. 40 Umo wa vaje vavali wapwile Anduleo, ndolome ya Simoni Petulu. 41 Aje vene Anduleo wawanene ndolome yendi Simoni, co wamulekele ngwendi, “Tunawana Wakuvwavesa.” (Lijwi eli lilumbunuka ngwalyo “Kilistu.”) 42 Asinoni Anduleo watwalele Simoni kuli Yesu. Yesu wamukengele, co wendekele nendi ngwendi, “Lizina lyove yove Simoni muna Yowano, oloni vakakutumbula Kefase.” (Eli linalifu mumolika na Petulu, co lilumbunuka ngwalyo “Limanya.”)
Yesu asana Filipu na Natanele
43 Alikaki Yesu wayongwele kuya ku Ngalileya. Co wawanene Filipu, co wendekele kuli ikeye ngwendi, “Njikave!” 44 (Filipu watundile ku Mbetesainda, ku nganda kuvakele va Anduleo na Petulu.) 45 Filipu wawanene Natanele, co wamulekele ngwendi, “Tunawana uje yasonekele Mosesa mu livulu lya Lishiko, uje lalo ivasonekele vaka-kwimanena. Ikeye Yesu muna Yosefa, wa ku Nazaleta.” 46 Co Natanele wamwihwile ngwendi, “Kuma ku Nazaleta kwasa kutunda cuma cacivwa ndi?” Filipu wamukumbulwile ngwendi, “Ija ukamone.” 47 Omo Yesu wamwene Natanele alinakwija kuli ikeye, co wendekele vyendi ngwendi, “Ou ikeye kaIsalele wa vushunga, muli ikeye kumwesi makuli!” 48 Natanele wamwihwile ngwendi, “Unanjizivuka vati?” Yesu wamukumbulwile ngwendi, “Njakumwene mwisi ya muti wa mukuyu simbu kanda Filipu akusane.” 49 Natanele wamukumbulwile ngwendi, “Mulongisi, yove unapu u Muna Njambi! Yove Mwene wa Isalele!” 50 Yesu wamukumbulwile ngwendi, “Unatava omwo njinakuleke ngwange njakumwene mwisi ya muti wa mukuyu ndi? Ukamona vyuma vyakama kutuvakana evi!” 51 Co Yesu wendekele kuli vakevo ngwendi, “Mwa vushunga njimileka ngwange, mukamona lilu linashokoloka, co na tungelo va Njambi valonda nakushuluka ali Muna Munu.”
Ciwano ca vulo ku Kana
1 A litangwa lya mucitatu kwakele ciwano mu nganda ya Kana mu Ngalileya. Co vaina ya Yesu vakele kuje, 2 co Yesu amo na vandongisi vendi navo lalo vavalanyele ku ciwano cije. 3 Omo vinyu vyahwile, vaina ya Yesu vendekele kuli ikeye ngwavo, “Vinyu vinahu.” 4 Co Yesu wamukumbulwile ngwendi, “Ove munakazi kuwapandele kunjileka vije njinapandele kulinga. Simbu yange kanda yete.” 5 Vaina ya Yesu valekele vaje vangamba ngwavo, “Lingeni vyoshe vyamileka.” 6 VaYunda vakele na mashiko a vilongesa vyavo vya a kujwela, co a cuma eci kuje kwakele vinjava vya mamanya vyakutekwila mema vitanu na imo, vyoshe vyapwile vyakama imo na imo yasele kukala na mema akweta ku malita 100 . 7 Yesu walekele vaje vangamba ngwendi, “Shuliseni evi vinjava na mema.” Co vavishulisile vyoshe vwaa, 8 co wavalekele ngwendi, “Ololo tekuleni mema ngeci muwatwale kuli mukulunu wa ciwano.” Ngecivene, vamutwalelele mema, 9 aje a simbu ije atengulukile kupwa vinyu, co waamakelele. Ikeye kazivukile kuje kuvyatundile vinyu (oloni, vaje vangamba vatekwile aje mema vazivukile), ngecivene, wasanene vavenya vulo, 10 co wendekele kuli ikeye ngwendi, “Vanu voshe vakalivanga kwana vinyu vyavivwa, co omo oni vaje vavanalanya vananu manene, asinoni aana vije vyavishamu. Oloni yove watulikile vinyu vyavivwa kweta ku simbu ino!” 11 Yesu walingile eci cizivukiso cakulivanga ku Kana mu Ngalileya, kuje kwasholwele vumpau vwendi, co vandongisi vendi vamukulaelele. 12 Munima ya vyuma evi, Yesu na vaina, na vandolome vendi, na vandongisi vendi vaile ku Kapenauma, co vakele kuje matangwa amandondo lika.
Yesu aya ku Njuyo ya Shukulu Kalunga
13 Yapwile simbu ya Ciwano ca Pasovala, ngecivene, Yesu waile ku Yelusalema. 14 Mu Njuvo ya Shukulu Kalunga wawanene vanu vakele nakulandeselamo vingombe, na vimanga, na mayembe, co lalo na vaka-kulandakana vimbongo vatumbamene ku vimesa vyavo. 15 Ngecivene, woshele likote lya twonzi washekelele anja tusituvoshe, amo na vimanga, na vingombe voshe vaje vakele mu Njuvo ya Shukulu Kalunga, co wafulumikile vimesa vya vaje vakele nakulandakana vimbongo, co washandwele vimbongo vyavo, 16 co walekele vaje vakele nakulandeselamo mayembe ngwendi, “Vatuwiseni anja! Kesi mupwise Njuvo ya Tate mutambela wakulandesela!” 17 Vandongisi vendi vanukile ngeci visoneka vyendekele ngwavyo, “Yove Njambi, cizemo cange ku Njuvo yove, cilinakushukuma muli yange ngwe tuhya.” 18 VaYunda vamwihwile ngwavo, “Cikomokeso mukajo ciwulinga utumwese ngeci uli na moko yakulinga ngeci?” 19 Yesu wavakumbulwile ngwendi, “Siwuleni eyi Njuvo ya Shukulu Kalunga, co njikaitungulula lalo a matangwa atatu.” 20 Vamwihwile ngwavo, “Kuma yove wasa kuyitungulula lalo a matangwa atatu ndi? Eyi Njuvo ya Shukulu Kalunga vaitungile myaka makumi awana na myaka itanu na umo!” 21 Oloni Njuvo ya Shukulu Kalunga ije yatumbwile Yesu yapwile muvila wendi. 22 Ngecivene, omo wasangukile ku vatsi, vandongisi vendi vanukile ngwavo kuma vikevyo vije vyavalekele, co vakulaelele visoneka na majwi aje endekele Yesu.
Yesu azivuka cifwa ca vunu
23 Omo Yesu wakele mu Yelusalema a simbu ya Ciwano ca Pasovala, vavangi vakulaelele kuli ikeye akumona vizivukiso vije vyalingile. 24 Oloni Yesu vavenya kavakulaelele, omwo wazivukile cifwa ca vanu voshe. 25 Omo kashakele munu umo amuleke vukaleo vwa vanu, omwo wazivukile vije vyakele mu vimbunge vyavo.
Yesu na Nikondemo
1 Kwakele ntwama umo wa vaYunda lizina lyendi Nikondemo, wapwile wa mu munga ya vaFaliseo. 2 Munalume ou waile kuli Yesu vutsiki, co wendekele kuli ikeye ngwendi, “Mulongisi, twazivuka ngwetu yove u mulongisi wakutunda kuli Njambi. Omwo naumo wai asa kulinga vizivukiso viwulinakulinga kuvanga Njambi akale amo nendi.” 3 Yesu wamukumbulwile ngwendi, “Mwa vushunga njikuleka ngwange, naumo wai asa kumona Vumwene vwa Njambi kuvanga asemuke luvali.” 4 Nikondemo wendekele kuli ikeye ngwendi, “Vatijo munu asa kusemuka luvali nga nakuluvala laja? Asa kukovela lalo mwimo lya vaina ngeci asemuke lalo simbu yamucivali ndi?” 5 Yesu wamumbulwile ngwendi, “Mwa vushunga njikuleka ngwange, naumo wai asa kukovela mu Vumwene vwa Njambi kuvanga asemuke ku mema na ku Munzinzime Wakujela. 6 Munu akatambula cifwa cendi ca vunu ku visemi vendi, oloni Munzinzime Wakujela ikeye amulingisa ngeci asemuke ku Munzinzime. 7 Kesi ukomoke omo njikuleka ngwange unapande kusemuka luvali. 8 Lihunzi lihuwa kwoshe kulishaka, wasa kuziva cililimo calyo, oloni kuwasa kuzivuka kuje kulitunda nambe kuje kuliya. Ngecivene, mukemwo mucinapu navoshe vaje vanasemuka ku Munzinzime Wakujela.” 9 Nikondemo wehwile ngwendi, “Eci cilingiwa vatijo?” 10 Yesu wamukumbulwile ngwendi, “Yove u mulongisi wakama mu Isalele, kuma kuuzivuka eci ndi? 11 Mwa vushunga njikuleka ngwange, twendeka vije vituzivuka, co twambulula vukaleo vwa vije vitunamono, oloni yeni ku mutambula muzimbu wetu. 12 Kumunjikulaela omo njimileka vyuma vya ano a kaye, co vatijo munjikulaela omo njimileka vyuma vya mwilu? 13 Naumo wai nai mwilu kuvanga Muna Munu lika uje wezile kutunda mwilu.” 14 Co ngwe Mosesa washukikile linyoka wa vunengu a manda mu mambo, ngecivene, mucifwa cimo vakashukika Muna Munu, 15 ngeci woshe akulaela kuli ikeye akale na mwonyo wa myaka yoshe. 16 Omwo Njambi wazemene vaka-kaye manene ngeci waanene Munendi umolika, ngeci woshe akulaela kuli ikeye kesi anyonge, oloni akale na mwonyo wa myaka yoshe. 17 Omwo Njambi katumine Munendi ano a kaye nakuhisa vaka-kaye embwe, oloni apwe Muyoyesi wavo. 18 Uje akulaela kuli Mwana kuvakamuhisa embwe, oloni uje kakulaelele vanamuhisa laja, omwo kakulaelele kuli Muna Njambi umolika. 19 Co omu mukemwo mucikapanga cihiso, ceke cinaija ano a kaye, oloni vanu vazema lisusulungu kutuvakana ceke, omwo vilinga vyavo vyapwa vyavivi. 20 Omwo munu woshe alinga vyuma vyavivi azinda ceke kasa kwija ku ceke, omwo kashaka vilinga vyendi vyavivi ngeci visholoke. 21 Oloni woshe uje muka-kulinga vushunga aija ku ceke ngeci ceke cisholole vipangi vyendi vyanalingi mukwononoka kuli Njambi.
Yesu na Yowano
22 Munima yevi, Yesu na vandongisi vendi vaile ku lifuti lya Yundeya, kuje kwakakele navo ka simbu nakumbwitika vanu. 23 Yowano lalo wakele nakumbwitika mu Aenone kuyehi na Salime, omwo kwakele mema amangi. Co vanu vakele nakuya kuli ikeye, co wavambwitikile. 24 (Omwo a simbu eyi Yowano te kanda vamwake mu kamenga.) 25 Vamo vandongisi va Yowano vakele nakulinga vimata na kaYunda umo a futisi yakujwela. 26 Ngecivene, vaile kuli Yowano, co vamulekele ngwavo, “Mulongisi, wanuka munalume uje wakele nove mu ngangela ya Yondau uje iwalingilile vukaleo? Kenga, alinakumbwitika, co vanu voshe valinakuya kuli ikeye!” 27 Yowano wavakumbulwile ngwendi, “Naumo wai atambula cuma kuvanga vanamwanaco kuli Njambi. 28 Yeni mu vakaleo vange ngeci muje njendekele ngwange, ‘Kesi yange Wakuvwavesa, oloni vananjitumu kulutwe lwendi.’ 29 Uje ali na shombolwa ikeye vavenya vulo, oloni musamba wa vavenya vulo, uje nemana nakumutolilila, avwaelela omo aziva lijwi lya vavenya vulo. Ngecivene, mukemwo mukunapu kuvwaelela kwange. 30 Ikeye napande kupwa wakama, oloni yange njipande kupwa wamundondo.”
Uje atunda mwilu
31 Uje atunda mwilu nahyana voshe. Uje atunda ano asi nakundama ku vya asi nakusimutwiya vin̄anda vya ano asi, oloni uje atunda mwilu ali akamwa ya vyoshe. 32 Alinakusimutwiya vije vyanamono, co na vije vyanazivi, oloni naumo wai atambula muzimbu wendi. 33 Oloni woshe atambula muzimbu wendi amwesa ngeci Njambi wapwa muka-vushunga. 34 Omwo woshe uje yanatumu Njambi endeka majwi a Njambi, omwo Njambi namwana Munzinzime Wakujela muvungi. 35 Ishe wazema Mwana, co naaka vyuma vyoshe mu mavoko endi. 36 Woshe akulaela kuli Mwana ali na mwonyo wa myaka yoshe, woshe avyana Mwana kakala na mwonyo, oloni vukalu vukala ali ikeye.
Yesu na munakazi wa ku Samaliya
1 VaFaliseo vazivile ngeci Yesu alinakuwana nakumbwitika vandongisi vavangi kutuvakana Yowano. 2 (Kesi Yesu wavambwitikile embwe, oloni vandongisi vendi vacilingile.) 3 Ngecivene, omo Yesu wazivile vije vivendekele, watundile ku Yundeya welukile ku Ngalileya, 4 mu vungenzi vwendi vwakuya kuje wetile mu Samaliya. 5 Ngecivene, mu Samaliya wetele ku nganda ivatumbwile Sikale, muyehi na lihya lije lyanene Yakomba kuli munendi Yosefa. 6 Lisima lya Yakomba lyakele kuje, co Yesu watumbamene kuyehi na lisima omwo wajukile manene kwenda. Simbu yapwile akati ka mutwe. 7 Munakazi umo kaSamaliya wezile nakutekula mema, co Yesu wendekele kuli ikeye ngwendi, “Njaneko mema njinwe.” 8 (Omwo vandongisi vendi vaile mu nganda nakulanda vyakulya.) 9 Munakazi wamukumbulwile ngwendi, “Yove u kaYunda, co yange nji kaSamaliya, ngecivene, vatijo unjilomba mema ngeci unwe?” (VaYunda kuvesi kupangesa vinganja na malonga vije vivakapangesa vaka-Samaliya.) 10 Yesu wamukumbulwile ngwendi, “Nga wazivukile vwana vwa Njambi, co nou akulomba mema akunwa, nga unamulombo, co nga nakwana mema a mwonyo.” 11 Co munakazi wendekele ngwendi, “Shukulu, kuwesi na cuma cakutekwisa mema, lisima lyalova. Kulijo ukawana mema a mwonyo? 12 Kuma yove unatuvakana kukulwila yetu Yakomba uje watwanene lisima eli ndi? Ikeye wanwilemo na vana vendi, na vimuna vendi voshe.” 13 Yesu wamukumbulwile, ngwendi, “Woshe anwa ku mema awa akaziva lalo lihwila, 14 oloni woshe anwa ku mema anjikamwana kakazivi lalo lihwila embwe. Mema aje anjikamwana akapwa lisima lya kavwelu-vwelu muli ikeye lije likamwana mema a mwonyo nakumwana mwonyo wa myaka yoshe.” 15 Munakazi wendekele kuli ikeye ngwendi, “Mwene, njaneko owo mema! Ngeci kesi njikazive lalo lihwila, nambe kunjikaija-ija lalo kuno nakutekula mema.” 16 Yesu wendekele kuli ikeye ngwendi, “Ya ukasane munalume wove, co wiluke kuno.” 17 Munakazi wamukumbulwile ngwendi, “Kunjesi na munalume.” Yesu wamukumbulwile ngwendi, “Unendeka mwa vushunga omo unendeka ngwove kuwesi na munalume. 18 Omwo unashomboka ku vanalume vatanu, co ou munalume uli nendi ololo kesi munalume wove. Unanjileke mwa vushunga.” 19 Munakazi wendekele kuli ikeye ngwendi. “Mwene, njinazivuka ngwange yove u muka-kwimanena. 20 Vakukulwila vange vaSamaliya valemesele Njambi a munkinda ou, oloni yeni vaYunda mukendeka ngweni tunapande kulemesela Njambi ku Yelusalema lika.” 21 Yesu wendekele kuli ikeye ngwendi, “Ove munakazi njikulaele, simbu ilinakwija omo vanu kuvakalemesela Tate a munkinda ou nambe mu Yelusalema. 22 Yeni vaSamaliya kumuzivuka uje imulemesa, oloni yetu vaYunda tuzivuka uje itulemesa, omwo kwamena kwatunda kuli vaYunda. 23 Oloni simbu ilinakwija, co inete laja, omo a nzili ya Munzinzime wa Njambi vanu vakalemesa Tate ngwe muje mwafwa, vakamulemesa mu vushunga ngwe muje mwashaka. 24 Njambi ikeye Munzinzime, co vaje vamulemesa, vanapande kumulemesa mu munzinzime na mu vushunga.” 25 Munakazi wendekele kuli ikeye ngwendi, “Njazivuka ngwange Wakuvwavesa alinakwija, co omo naija, akatuleka vyuma vyoshe.” 26 Yesu wamukumbulwile ngwendi, “Yange vene ikeye, uje alinakwendeka nove.” 27 Aje vene vandongisi va Yesu vezile, co valikomokelele manene akuwana Yesu alinakwendeka na munakazi. Oloni naumo wai wehwile uje munakazi ngwendi, “Vika ushaka?” Nambe kwihula Yesu ngwavo, “Omwo vika ulinakwendeka nendi?” 28 Asinoni uje munakazi wasezele njava yendi yakutekwila mema, welukile ku nganda, wakalekele vanu kuje ngwendi, 29 “Ijeni mukamone munalume uje nanjileka vyuma vyoshe vinjalingile. Kesi ikeye Wakuvwavesa ndi?” 30 Ngecivene, vatundile mu nganda vaile kuli Yesu. 31 A simbu ije vene vandongisi valombele Yesu ngwavo, “Mulongisi, lya vyakulya!” 32 Oloni ikeye wavakumbulwile ngwendi, “Njili na vyakulya vije kumuzivuka.” 33 Ngecivene, vandongisi vashangumukile kulihozola akati kavo ngwavo, “Kuli munu umo namwana vyakulya ndi?” 34 Yesu wendekele kuli vakevo ngwendi, “Vyakulya vyange vinapu kwononoka cizango ca uje wanjitumine nakumanesa vipangi vyanjanene ngeci njivilinge. 35 Kuma kumwesi kwendeka ngweni, ‘Kwasala vingonde viwana, co simbu ya kuteja yeta.’ Oloni njimileka ngwange, kengeni mu mahya, vimbuto vinahi laja ngeci vaviteje! 36 Uje ateja valinakumufweta, co alinakukungulula vimbuto vya mwonyo wa myaka yoshe, ngecivene, muka-kukuna na muka-kuteja voshe vakavwaelela amolika. 37 N̄anda eyi yapwa ya vushunga ngwayo, ‘Umo akuna, mukwavo ateja.’ 38 Njinamitumu kuteja vimbuto mu lihya muje kumwapangele, veka vapangelemo, co yeni munawanenamo vimo a vipangi vyavo.” 39 VaSamaliya vavangi va mu nganda ije vakulaelele kuli Yesu omwo uje munakazi wendekele ngwendi, “Nanjileka vyuma vyoshe vinjalingile.” 40 Ngecivene, omo vaSamaliya vezile kuli ikeye, vamulombele ngeci akale navo, co Yesu wakele kuje matangwa avali. 41 Co vavangi vakulaelele kuli ikeye omwo majwi endi, 42 co valekele uje munakazi ngwavo, “Ololo tunakulaela, kesi omwo lijwi lyove, oloni omwo twalizivila yetu vavenya, co twazivuka ngwetu mwa vushunga ikeye Muyoyesi wa vaka-kaye.”
Yesu akangwisa muna mukulunu wa vaLoma
43 Omo Yesu wakele kuje matangwa avali, co watundileko waile ku Ngalileya. 44 Omwo ikeye vavenya wendekele ngwendi, “Muka-kwimanena naumo wai ivasingimika mu lifuti lyendi.” 45 Ngecivene, omo wetele mu Ngalileya, vanu kuje vamutambwile mwamuvwa, omwo vaile ku Ciwano ca Pasovala mu Yelusalema, co vakamwene vyuma vyoshe vije vyalingile ku ciwano. 46 Asinoni Yesu welukile ku Kana mu Ngalileya, kuje watengulwile mema kupwa vinyu. Co kuje kwakele mukulunu wa vaka-kushwana wakele na munendi wa munalume wakele nakuvinja mu Kapenauma. 47 Omo wazivile ngeci Yesu natundu ku Yundeya naija ku Ngalileya, waile kuli ikeye nakumulomba ngeci aije ku Kapenauma nakukangwisa munendi, uje washakele kutsa. 48 Yesu wendekele kuli ikeye ngwendi, “Naumo wai akati keni akakulaela kuvanga amone vizivukiso na vikomokeso.” 49 Uje mukulunu wendekele kuli ikeye ngwendi, “Mwene tuye mumo simbu kanda munange atse.” 50 Yesu wendekele kuli ikeye ngwendi, “Ya, munove enduka!” Uje munalume wakulaelele majwi a Yesu, co waile. 51 Omo wakele nakuya kwimbo waliwanene na vangamba vendi akati vamulekele ngwavo, “Munove nenduka!” 52 Ngecivene, wavehwile simbu muka munendi wendukile, co vamukumbulwile ngwavo, “Izau akati ka mutwe, lisika-sika lyamutundile.” 53 Asinoni ishe wanukile ngeci ikeyo simbu ije Yesu wamulekele ngwendi, “Munove enduka.” Ngecivene, ikeye amo na naanga yendi voshe vakulaelele. 54 Eci cikeco cizivukiso camucivali cije calingile Yesu omo watundile ku Yundeya kwija ku Ngalileya.
Yesu akangwisa muka-kalepa ku lishali
1 Munima yevi, Yesu waile ku Yelusalema ku ciwano cikwavo ca vaYunda. 2 Kuje ku Yelusalema kuyehi na Cikolo ca Vimanga kwakele lishali lyakele na mambalanda atanu, mu ndaka ya ciHevelu valitumbwile ngwavo Mbetezasa. 3 Mbunga yakama ya vaka-mishongo valalele muje mu mambalanda, tupuputwa, na vilema, na vaka-kalepa. Vavandamenene mema atupuke, 4 omwo kangelo ka Mwene a simbu na simbu washulukile muje mu lishali nakutupwisa mema. Woshe muka-kuvinja alivangamo, enduka ku mushongo wendi. 5 Kwakele munalume umo kuje wavinjile myaka makumi atatu na myaka itanu na itatu. 6 Yesu wamumwene nalala kuje, co wazivukile ngwendi uje munalume washwile laja kuvinja, ngecivene, wamwihwile ngwendi, “Ushaka kukanguka ndi?” 7 Uje munalume muka-kuvinja wamukumbulwile ngwendi, “Shukulu, kunjesi na munu wakunjikovelesa mu lishali omo mema atupuka, omo njeseka ngwange njikovelemo, weka lalo alivangamo.” 8 Co Yesu wendekele kuli ikeye ngwendi, “Katuka, ambata linala lyove, co enda.” 9 Vwasi-vwasi uje munalume wakangukile, wambatele linala lyendi, washangumukile kwenda. Lyapwile Litangwa Lyakuhwima omo vyuma evi vyalingiwile, 10 ngecivene, vaka-kushwana va vaYunda valekele uje munalume wakangukile ngwavo, “Lino linapu Litangwa Lyakuhwima, co eci cinapu kulwisa Lishiko lyetu omo unambata linala lyove.” 11 Wavakumbulwile ngwendi, “Munu uje nanjikangwisa ikeye nanjileka ngwendi njambate linala lyange, co njende.” 12 Co vamwihwile lalo ngwavo, “Munu iyajo ou nakulekele kulinga ngeci?” 13 Oloni uje munalume wakangukile kazivukile Yesu, omwo kwakele mbunga yakama ku mwela kuje, co Yesu wavombolokele. 14 Omo kwetile kasimbu, Yesu wamuwanene ali mu Njuvo ya Shukulu Kalunga, co wendekele kuli ikeye ngwendi, “Tolilila, ololo unakanguka, kesi ukalinge lalo vuvi kutewa cuma ceka cacivi manene cikakuwana.” 15 Asinoni uje munalume waile nakuleka vaka-kushwana va vaYunda ngwendi uje namukangwisile ikeye Yesu. 16 Co vashangumukile kupakesa Yesu, omwo wakangwisile munu ou a Litangwa Lyakuhwima. 17 Oloni Yesu wavakumbulwile ngwendi, “Tate alinakupanga simbu yoshe, co nange lalo njinapande kupanga.” 18 Vyendeka evi vyalingisile manene vaka-kushwana va vaYunda ngeci vamutsiye, omwo kesi lika wapokwele lishiko lya a Litangwa Lyakuhwima embwe, oloni wendekele lalo ngwendi Njambi ikeye Ishe, co mu ngila eyi walipwisile mumo na Njambi.
Moko ya Muna Njambi
19 Ngecivene, Yesu wavakumbulwile ngwendi, “Mwa vushunga njimileka ngwange, Mwana kasa kupanga cuma cimo endi lika, akalingi lika vije amona Ishe alinga. Omwo vije vyalinga Ishe, vikevyo lalo vyalinga Mwana. 20 Omwo Ishe azema Mwana, co amumwesa vyoshe vije vyalinga. Co amumwesa vyuma vyakama ngeci avilinge, co muvavoshe mukalikomokela. 21 Ngwe omo Ishe akasangula vatsi nakuvana mwonyo, ngecivene, mu ngila eyi lalo Mwana akana mwonyo kuli vaje ashaka. 22 Nambe Ishe kesi kusompa munu. Oloni naana Mwana moko yakusompa, 23 ngeci voshe vasingimike Mwana ngwe muvakasingimika Ishe. Uje kasingimika Mwana kasingimika Ishe uje wamutumine. 24 “Mwa vushunga njimileka ngwange, woshe aziva majwi ange, co akulaela kuli uje wanjitumine, ali na mwonyo wa myaka yoshe. Kuvakamusompo embwe, oloni natundu ku kutsa nakovela ku mwonyo. 25 Mwa vushunga njimileka ngwange, simbu ilinakwija, co inete laja, omo vatsi vakaziva lijwi lya Muna Njambi, co voshe vaje valiziva vakayoya. 26 Omwo ngwe Tate wapwa nsina ya mwonyo, ngecivene, mu ngila eyi vene napwisa lalo Mwana nsina ya mwonyo. 27 Co naana Mwana moko yakusompa, omwo napu Muna Munu. 28 Kesi mukomoke a cuma eci, omwo simbu ilinakwija omo vatsi voshe vakaziva lijwi lyendi, 29 co vakatuuka mu vimbumbo vyavo, vaje voshe valingile mwamuvwa vakasangukila ku mwonyo, co vaje valingile mwamuvi vakasangukila ku cihiso.
Vukaleo vwa ali Yesu
30 “Kunjasa kulinga cuma cimo na moko yange vavenya, Njikasompa lika muje mwanjileka Njambi, ngecivene, kusompa kwange kunapu kwa vushunga, omwo kunjesi kulinga vije vinjishaka embwe, oloni kuvanga vije lika vyashaka uje wanjitumine. 31 “Nga njilyambulwila yange vavenya vukaleo vwange, vukaleo vwange kesi vwa vushunga. 32 Oloni kwali weka akwambulula vukaleo vwange, co njazivuka ngwange vukaleo vuje alinakwambulula ali yange vunapu vwa vushunga. 33 Mwatumine miluwa veni kuli Yowano, co wavalekele vushunga. 34 Kesi ngwe vukaleo vunjitambula vwakutunda ku munu embwe, oloni njilinakwendeka lika evi ngeci mwovoke. 35 Yowano wapwile ngwe ndeya, washukumine nakutwa ceke, co mwavwaelelele kasimbu lika mu ceke cendi. 36 Oloni yange njili na vukaleo vwakutuvakana vukaleo vuje vwambulwile Yowano, omwo evi vinjilinga, vinapu vipangi vije vyanjanene Tate ngeci njivilinge, evi vilinakwendeka ali yange mukumwesa ngeci Tate wanjitumine. 37 Co Tate, uje wanjitumine, alinakwendeka vukaleo ali yange. Kanda muzive lijwi lyendi, nameme kumona cihanga cendi, 38 co kumwesi kunyunga majwi endi mu vimbunge vyeni, omwo kumwakulaelele kuli uje yatumine. 39 Mulinakulilongesa Visoneka, omwo muyongola ngweni mu vikevyo muwanamo mwonyo wa myaka yoshe. Co visoneka evi vyambulula vukaleo vwange! 40 Oloni kumushaka kwija kuli yange ngeci mukale na mwonyo. 41 “Kunjishaka ngeci vanu vanjishangale embwe. 42 Oloni njizivuka cifwa ceni, njizivuka ngeci kumwesi na cizemo ca Njambi mu vimbunge vyeni. 43 Njinaija mu lizina lya Tate, oloni yeni kumwanjitambwile, nga weka aija mu lizina lyendi, mukamutambula. 44 Mwashaka ngeci vamishangazale, oloni kumushaka Njambi ngeci amishangazale, cooni mwasa kunjikulaela vatijo? 45 Kesi muyongole ngweni njikamivangeya kuli Tate embwe. Mosesa vene uje imunakulaela ikeye akamivangeya. 46 Nga mwa vushunga mwakulaelele kuli Mosesa, nga munakulaela lalo kuli yange, omwo wasonekele vyange. 47 Oloni omwo kumwakulaelele vije vyasonekele, vatijo mukulaela vije vinjendeka?”
Yesu alisa vanalume vakupwa 5,000
1 Munima ya vyuma evi, Yesu wajavukile Lishali lya Ngalileya (nambe Lishali lya Timbelyase, lizina lyalyo likwavo). 2 Co mbunga yakama vamukavele, omwo vamwene vizivukiso vyendi vyakukangwisa vaka-kuvinja. 3 Yesu walamatele a munkinda, co watumbamene amo na vandongisi vendi. 4 Simbu ya Ciwano ca Pasovala yakele muyehi. 5 Yesu wandwile mesho endi, co wamwene mbunga yakama valinakwija kuli ikeye, ngecivene, wehwile Filipu ngwendi, “Kulijo twasa kulanda vyakulya ngeci tulise vanu voshe ava?” 6 (Wendekele evi mukweseka Filipu, omo wazivukile vije vyalinga.) 7 Filipu wamukumbulwile ngwendi, “Vimbongo vya siliva vyakupwa 200 kuvyasa kupwisamo kulanda makende ngeci munu na munu atambule nameme kalikende kakandondo.” 8 Umo wa vandongisi vendi, Anduleo, ndolome ya Simoni Petulu, wendekele ngwendi, 9 “Kwali umo mwanike ali na mikasha itanu ya makende a vunga vwa mbale ya maumwa na visi vavali. Oloni kuvyasa kupwamo kuli vanu voshe ava.” 10 Yesu wavalekele ngwendi, “Lekeni vanu vatumbame asi.” (Kuje kwakele mwila waungi manene.) Ngecivene, vanu voshe vatumbamene asi, vapwile vanalume 5,000. 11 Yesu watambwile ije mikasha ya makende, co wakandelelele kuli Njambi, co wapangezelele vanu vaje vatumbamene kuje asi. Ngecivene, walingile cuma cimo na ku visi lalo, co voshe valile vakutile. 12 Co omo voshe vakutile, Yesu wendekele kuli vandongisi vendi ngwendi, “Kungululeni evi vimbazuvwila vinasalao, kesi tuviiseo nameme twatundondo.” 13 Ngecivene, vavikungulwile vyoshe, co vashulisile mitonga likumi na ivali na vimbazuvwila vya mikasha ya makende itanu ya vungululu vwa mbale ya maumwa vije vivasezele vaje vanu valile. 14 Omo vanu vakele kuje vamwene cikomokeso eci calingile Yesu, vendekele ngwavo, “Mwa vushunga ou ikeye Muka-kwimanena uje naija ano a kaye!” 15 Yesu wazivukile ngeci vashakele kumukwata ngeci vamupwise mwene yavo, ngecivene, waile ku malundu endi lika.
Yesu enda akamwa ya mema
16 Omo litangwa lyatokele, vandongisi va Yesu vaile ku lishali, 17 vakovelele mu vwato, co vajavukilile musambwa ya lishali nakuya ku Kapenauma. Yapwile simbu ya vutsiki, coYesu simbu kanda acete kuli vakevo. 18 A simbu ije lihunzi lyahuwile mu lishali nakukatula mankimba. 19 Omo vandongisi vajavwile kanunda ka makilomita atanu nambe atanu na imo omo vamwene Yesu alinakwenda akamwa ya mema alinakwija kuyehi na vwato, co vazivile lyova. 20 Oloni Yesu wavalekele ngwendi, “Kesi muzive lyova, yange!” 21 Asinoni vatavele kumukovelesa mu vwato, co vwasi-vwasi vwato vwetele ku nunda ku mutambela kuje vakele nakuya.
Vanu vashakezeka Yesu
22 Alikaki mbunga vaje vasalele musambwa ya lishali vamwene ngeci kukwakele vwato vweka kuvanga vumolika. Co vazivukile ngeci Yesu kakovelele mu vwato amo na vandongisi vendi, oloni vandongisi vendi vaile avo lika. 23 Ngecivene, mato eka aje atundile ku Timbelyase, ezile ku cikuma ca kuyehi na mutambela kuje kwakele mbunga ya vaje valile makende omo Mwene wakandelelele kuli Njambi. 24 Ngecivene, omo mbunga ije vamwene ngeci Yesu na vandongisi vendi vaiko kuje, vakovelele mu mato aje, co vaile ku Kapenauma nakumushakezeka.
Yesu ikeye Likende lya Mwonyo
25 Omo vanu vawanene Yesu musambwa ya lishali, vendekele kuli ikeye ngwavo, “Mulongisi, unetele kuno simbu ika?” 26 Yesu wavakumbulwile ngwendi, “Mwa vushunga njimileka ngwange, munanjishakezeka kesi omwo mwamwene vizivukiso vyange embwe, oloni omwo mwalile makende nakukuta. 27 Kesi mupangele vyakulya vije vikavola, oloni pangeleni vyakulya vya mwonyo wa myaka yoshe. Evi vikevyo vyakulya vije vyakamyana Muna Munu, omwo Njambi, Ishe, namwaka cimweso cakumutava.” 28 Asinoni vamwihwile ngwavo, “Vikajo twasa kulinga ngeci tulinge vije vyashaka Njambi?” 29 Yesu wavakumbulwile ngwendi, “Vyashaka Njambi ngeci muvilinge vinapu kukulaela kuli uje yatumine.” 30 Ngecivene, vamukumbulwile ngwavo, “Cizivukiso muka ulinga ngeci tucimone, co tukukulaele? Vipangi mukajo ukalinga? 31 Vakukulwila vetu valile maana* mu mambo, ngwe muvinendeka visoneka ngwavyo, ‘Wavanene makende akutunda mwilu ngeci valye.’ ” 32 Yesu wendekele kuli vakevo ngwendi, “Mwa vushunga njimileka ngwange, Mosesa kamyanene makende akutunda kwilu, Tate ikeye amyana likende lya vushunga lyakutunda kwilu. 33 Omwo likende lije lyaana Njambi linapu uje atunda mwilu, co ana mwonyo kuli vaka-kaye.” 34 Vamwihwile ngwavo, “Mwene, twane eli likende simbu yoshe.” 35 Yesu wavalekele ngwendi, “Yange likende lya mwonyo. Uje aija kuli yange kakakala lalo na njala, co uje akulaela kuli yange kakazivi lalo lihwila. 36 Oloni njamilekele ngwange munanjimono oloni kumwasa kunjikulaela. 37 Woshe uje yananjana Tate aija kuli yange. Co woshe uje aija kuli yange kunjikamusheke, 38 omwo njatundile mwilu kesi kulinga cizango cange embwe, oloni kulinga cizango ca uje wanjitumine. 39 Co cizango ca uje wanjitumine cinapu kunyunga voshe vaje vananjana ngeci voshe njikavasangwile ku mwonyo a litangwa lyakukotoka. 40 Omwo eci cikeco cizango ca Tate ngeci voshe vaje vamona Mwana nakukulaela kuli ikeye vakale na mwonyo wa myaka yoshe. Co njikavasangwila ku mwonyo a litangwa lyakukotoka.” 41 VaYunda vashangumukile kungunguta, omwo wendekele ngwendi, “Yange likende lije lyatundile mwilu.” 42 Ngecivene, vendekele ngwavo, “Ou munalume kesi ikeye Yesu muna Yosefa ndi? Tuzivuka ishe na vaina. Vatijo ololo endeka ngwendi watundile mwilu?” 43 Yesu wavakumbulwile ngwendi, “Kesi mungungute akati keni. 44 Naumo wai aija kuli yange kuvanga Tate uje wanjitumine amunene kuli yange, co njikamusangwila ku mwonyo a litangwa lyakukotoka. 45 Vaka-kwimanena vasonekele ngwavo, ‘Voshe Njambi akavalongesa.’ Woshe aziva Tate nakulilongesa kuli ikeye aija kuli yange. 46 Eci kucalumbunukile ngeci umo wamona Tate, kuvanga lika uje watunda kuli Njambi ikeye wamona Tate. 47 Mwa vushunga njimileka ngwange, uje akulaela ali na mwonyo wa myaka yoshe. 48 Yange likende lya mwonyo. 49 Vakukulwila veni valile maana mu mambo, oloni vatsile. 50 Oloni likende lije litunda mwilu linapu ngeci woshe uje alyako kakatsi embwe. 51 Yange likende lya mwonyo lije lyatundile mwilu. Nga munu alya ku likende eli, akayoya ku myaka yoshe. Co likende lije linjikamwana linapu muvila wange, uje unjana ngeci vaka-kaye vayoye.” 52 Eci cashangumwine vimata vya vikalu akati kavo. Vehwile ngwavo, “Vatijo munalume ou asa kutwana muvila wendi ngeci tuulye?” 53 Ngecivene,Yesu wendekele kuli vakevo ngwendi, “Mwa vushunga njimileka ngwange, nga kumuli muvila wa Muna Munu nakunwa maninga endi, kumukakala na mwonyo. 54 Woshe alya muvila wange nakunwa maninga ange ali na mwonyo wa myaka yoshe, co njikamusangwila ku mwonyo a litangwa lyakukotoka. 55 Omwo muvila wange ukewo vyakulya vya vushunga, maninga ange akewo vyakunwa vya vushunga. 56 Woshe alya muvila wange nakunwa maninga ange akala muli nange, co yange njikala muli ikeye. 57 Tate wakuyoya ikeye wanjitumine, omwo ikeye ngeci yange njilinakuyoya lalo. Mu cifwa cimolika uje anjilya akayoya omwo yange. 58 Eli likelyo likende lije lyatundile mwilu, kesi ngwe likende lije valile vakukulwila veni, co vatsile embwe. Uje alya likende eli akayoya myaka yoshe.” 59 Yesu wendekele evi omo wakele nakulongesa mu sinangonge mu Kapenauma.
Majwi a mwonyo wa myaka yoshe
60 Vandongisi vendi vavangi omo vazivile evi vendekele ngwavo, “Vilongesa evi vinapu vyavikalu. Iyajo asa kuvitolilila?” 61 Oloni Yesu wazivukile ngeci vandongisi vendi vakele nakungunguta omwo lijwi eli, ngecivene, wendekele kuli vakevo ngwendi, “Cuma eci cimilingisa ngeci mulikele ndi? 62 Asinoni vatijo nga mumona Muna Munu eluka ku mutambela kuje kwakele laja? 63 Munzinzme wa Wakujela wa Njambi ikeye akaana mwonyo, kesi nzili ya munu. Majwi awa njinendeka kuli yeni akewo a Munzinzime, co anena mwonyo. 64 Oloni akati keni ali vamo kanda vakulaele.” (Omwo Yesu wazivukile tunde akulivanga vaje kuvakakulaela na uje akamwenda vungungu.) 65 Co wendekele lalo ngwendi, “Omu mukemwo njamilekele ngwange naumo wai aija kuli yange kuvanga Tate amutave.” 66 Omwo a cuma eci, vandongisi va Yesu vavangi velukile munima kuvashakele kuya lalo nendi. 67 Ngecivene, Yesu wehwile vaje vandongisi likumi na vavali ngwendi, “Vati yenico? Mushaka lalo kwiluka ndi?” 68 Simoni Petulu wamukumbulwile ngwendi, “Mwene, tuya kuli iyajo lalo? Yove uli na majwi aje aana mwonyo wa myaka yoshe. 69 Co tunakulaela nakuzivuka ngwetu yove Wakujela uje watunda kuli Njambi.” 70 Yesu wakumbulwile ngwendi, “Kuma kunjamyangwile yeni likumi na vavali ndi? Oloni umo weni napu liyavola!” 71 Ikeye watumbwile Yundasa, muna Simoni Isikalyote. Omwo Yundasa, nameme wapwile umo wa vaje likumi na vavali, ikeye akamwenda vungungu.
Yesu na vandolome vendi
1 Munima ya vyuma evi, Yesu wendanganene mu Ngalileya, kashakele kwendangana mu Yundeya, kuje vantwama va vaYunda vashakele kumutsiya. 2 Simbu ya Ciwano ca Mapapela yakele muyehi, 3 ngecivene, vandolome va Yesu vendekele kuli ikeye ngwavo, “Tunda kuno uye ku Yundeya, ngeci vandongisi vove vakamone vikomokeso vije ulinakulinga. 4 Omwo naumo wai ashweka vije vyalinga nga ashaka kutsimana. Nga ulinakulinga vyuma evi, lisholole ku vanu mu kaye koshe ngeci vakuzivuke!” 5 (Omwo nameme vandolome vendi kuvamukulaelele.) 6 Yesu wendekele kuli vakevo ngwendi, “Simbu yange kanda icete. Oloni kuli yeni simbu yoshe inapu yaivwa. 7 Vaka-kaye kuvasa kumizinda, oloni vazinda yange, omwo njilinakuvaleka ngwange vingila vyavo vinapu vyavivi. 8 Yeni ku ciwano. Yange kunjiiko, omwo simbu yange kanda icete.” 9 Ngecivene, wendekele majwi awa, ikeye wasalele mu Ngalileya.
Yesu ku Ciwano ca Mapapela
10 Oloni omo vandolome vendi vanai laja ku ciwano, asinoni Yesu lalo waile, kaile citona-mesho, oloni waile mu vushweke. 11 Vamyata va vaYunda vakele nakumushakezeka ku ciwano. Co vehwile ngwavo, “Ali kulijo?” 12 Co kuje kwakele kungunguta ali ikeye mu mbunga ije, vamo vanu vendekele ngwavo, “Napu munu wamuvwa.” Co veka lalo ngwavo, “Embwe, alinakutangula vanu.” 13 Oloni naumo wai wendekele ali ikeye citona-mesho, omwo vakele na lyova lya vantwama va vaYunda. 14 Ciwano cakele kuyehi nakuhwa omo Yesu waile ku Njuvo ya Shukulu Kalunga nakushangumuka kulongesa. 15 Vantwama va vaYunda valikomokelele manene, co vendekele ngwavo, “Munu ou nazivuka vati vyuma vyavingi omwo ikeye kalilongesele sikola?” 16 Ngecivene, Yesu wakumbulwile ngwendi, “Evi njilinakulongesa kesi vyange embwe, oloni vitunda kuli Njambi, uje wanjitumine. 17 Woshe ashaka kulinga vije vyashaka Njambi akazivuka nga evi njilinakulongesa vitunda kuli Njambi nambe nga njilinakwendeka na moko yange. 18 Uje endeka na moko yendi vavenya ashaka kuwana kasingimiko kendi ikeye vavenya. Oloni uje ashaka kasingimiko ka uje wamutumine napu munu wa vushunga, co muli ikeye kumwesi makuli. 19 Kuma kesi Mosesa wamyanene Lishiko ndi? Oloni na umo wai akati keni ononoka Lishiko eli. Omwo vikajo mushaka kunjitsiya?” 20 Mbunga vamukumbulwile ngwavo, “Muli yove muli munzinzime wakujwala! Iyajo ashaka kukutsiya?” 21 Yesu wavakumbulwile ngwendi, “Njalingile cikomokeso cimo, co yeni voshe mwalikomokelele. 22 Mosesa wamishikile kutuula vana veni (nameme vene kesi Mosesa embwe, oloni vakukulwila veni vakevo vacishangumukile), co mukatuula mwanike wa munalume a Litangwa Lyakuhwima. 23 Nga mutuula mwanike wa munalume a Litangwa Lyakuhwima ngecivene, kesi mupokole Lishiko, omwo vikajo munaluvala nange omo njinakangwisa munu a Litangwa Lyakuhwima? 24 Kesi musompele vulemu, oloni sompeni mu vushunga.”
Ou ikeye Wakuvwavesa ndi?
25 Vamo vanu va mu Yelusalema vendekele ngwavo, “Ou kesi ikeye munalume uje ivashaka kutsiya vakulunu ndi? 26 Co kengeni! Alinakwendeka citona-mesho ku mbunga ya vanu, co nacimo cai civendeka kuli ikeye! Kuma vazivuka ngwavo ikeye Wakuvwavesa ndi? 27 Oloni omo Wakuvwavesa aija, naumo wai akazivuka kuje kwatunda. Co yetu tuvoshe tuzivuka kwatunda ou munalume.” 28 Ngecivene, omo Yesu wakele nakulongesa mu Njuvo ya Shukulu Kalunga, wendekele na lijwi lyakama ngwendi, “Munjizivuka mwamuvwa ndi? Co muzivuka noku kunjatunda ndi? Kunjezile na moko yange vavenya embwe. Uje wanjitumine, wapwa muka-vushunga. Kumumuzivuka, 29 oloni yange njimuzivuka, omwo njatunda kuli ikeye, co ikeye wanjitumine.” 30 Ngecivene, vashakele kumukwata, oloni naumo wai wakambekele livoko ali ikeye, omwo simbu yendi te kanda yete. 31 Oloni vanu vavangi vamuje mu mbunga vamukulaelele, vendekele ngwavo, “Omo Wakuvwavesa akaija, kuma akalinga vizivukiso vyavingi kutuvakana evi vyalinakulinga ou munalume ndi?” Vaka-kunyunga vavatuma vakakwate Yesu 32 VaFaliseo vazivile mbunga ije vakele nakungunguta ali Yesu a vyuma evi, ngecivene, vakevo na vakulunu va vaka-kukombelela vatumine vamo vaka-kunyunga ngeci vakakwate Yesu. 33 Yesu wendekele ngwendi, “Njikakala neni kasimbu kakandondo lika, co asinoni njikaya kuli uje wanjitumine. 34 Mukanjishakezeka oloni kumukanjiwana, omwo kumwasa kuya kuje kunjikakala.” 35 Vakulunu va vaYunda valyendekesele akati kavo ngwavo, “Kulijo ashaka kuya ngeci tujeneke kumuwana? Akaya ku vinganda vya vaNgiliki kuje kuvanashandokela vanu vetu nakukalongesa vaNgiliki ndi? 36 Alinakwendeka ngwendi tukamushakezeka oloni kutukamuwana, co lalo kutwasa kuya kuje kwakakala. Alinakulumbununa vika?”
Vindonga vya mema a mwonyo
37 Alitangwa lyakumaneselela likelyo litangwa lyakama lya ciwano, Yesu wemanene, co wendekele na lijwi lyakama ngwendi, “Woshe ali na lihwila aije kuli yange anwe. 38 Ngwe muje muvyendeka visoneka ngwavyo, ‘Woshe akulaela kuli yange, mu mbunge yendi mukatuuka vindonga vya mema a mwonyo.’ ” 39 Yesu wendekele evi ali Munzinzime Wakujela uje uvakatambula vaje vanakulaela kuli ikeye. A simbu ije Munzinzime Wakujela te kanda vacimutambule, omwo Yesu te kanda asanguke ku vumpau.
Kulyangunuka akati ka vanu
40 Omo vanu vamo mu mbunga vazivile vije vyendekele vendekele ngwavo, “Munalume ou ikeye mwa vushunga vene Muka-kwimanena!” 41 Veka vendekele ngwavo, “Ou ikeye Wakuvwavesa!” Oloni veka lalo ngwavo, “Wakuvwavesa kasa kutunda ku Ngalileya! 42 Visoneka vyendeka ngwavyo Wakuvwavesa akapwa mutekulwila wa Ndaviti, co akasemukila mu Mbetelehema, mu nganda mwakele Ndaviti.” 43 Ngecivene, akele kulyangunuka akati ka mbunga ije omwo ali Yesu. 44 Vamo vashakele kumukwata, oloni naumo wai wakambekele livoko ali ikeye.
Kujeneka kukulaela kwa vaka-kushwana va vaYunda
45 Omo vaka-kunyunga velukile, vakulunu va vaka-kukombelela na vaFaliseo vavehwile ngwavo, “Omwo vika kumwezile nendi?” 46 Vaka-kunyunga vakumbulwile ngwavo, “Naumo wai asa kwendeka ngweuje munalume!” 47 VaFaliseo vavehwile ngwavo, “Neni lalo namikwisa ndi? 48 Kuma kuli umo wa vaka-kushwana nambe umo kaFaliseo wakulaela kuli ikeye ndi? 49 Oloni mbunga eyi kuvazivuka Lishiko lya Mosesa, ngecivene, vanasingiwa kuli Njambi!” 50 Umo kaFaliseo wakele kuje Nikondemo, munalume uje waile mukumona Yesu akulivanga. Wendekele kuli vakwavo ngwendi, 51 “Ngwe ku Lishiko lyetu kutwasa kuhisa munu omo kanda tucizive vyendi nakuwana cuma muka canalingi.” 52 Vakevo vamukumbulwile ngwavo, “Mwamuvwa, kuma nove lalo utunda ku Ngalileya ndi? Lava mu Visoneka, co uwana ngeci naumo wai muka-kwimanena akatunda ku Ngalileya.” 53 (Asinoni munu na munu waile kwimbo lyavo.)
Munakazi ivakwatele alinga vupangala
1 Oloni Yesu waile ku Munkinda wa Oliveta. 2 Alikaki mutondo-tondo waile ku Njuvo ya Shukulu Kalunga. Mbunga yoshe vamuzengelekele, co watumbamene asi, washangumukile kuvalongesa. 3 Valongisi va majwi a Lishiko na vaFaliseo vanenele munakazi uje vakwatele alinakulinga vupangala, co vamwimikile akati kavo voshe. 4 Vendekele kuli Yesu ngwavo, “Mulongisi, ou munakazi vanamukwata alinakulinga vupangala. 5 Mu Lishiko lyetu Mosesa washikile ngeci munakazi wa cifwa cangacije vanapande kumutsiya na mamanya. Yove, co wendeka vati?” 6 Vendekele ngeci mukweseka Yesu, ngeci vamuwanene kashwilo. Oloni Yesu wakulamene nakusoneka asi na mulavo wendi. 7 Omo vemanene kuje nakumwihula, Yesu wandukile wendekele kuli vakevo ngwendi, “Umo wa ali yeni uje kanda alinge vuvi alivange kumwasha limanya.” 8 Co wakulamene lalo nakusoneka asi. 9 Oloni omo vazivile ngeci, voshe vaile, umo na umo, kushangumukila kuli vakulunu. Co Yesu wasalele endi lika, na uje munakazi anga nemana lwii kuje. 10 Yesu wandukile wendekele kuli ikeye ngwendi, “Ove munakazi, vali kulijo? Kuma naumo wai nasalao mukukuhisa ndi?” 11 Wamukumbulwile ngwendi, “Naumo wai, Mwene.” Yesu wendekele ngwendi, “Mwamuvwa, nange lalo kunjasa kukuhisa. Ya, oloni kesi ukalinge lalo vuvi.”
Yesu ikeye Ceke ca Vaka-kaye
12 Yesu wendekele lalo kuli vaFaliseo ngwendi, “Yange ceke ca vaka-kaye. Woshe anjikava akakala na ceke ca mwonyo, co kakende lalo mu lisusulungu.” 13 VaFaliseo vendekele kuli ikeye ngwavo, “Ulinakulilingila yove vavenya vukaleo, oloni vukaleo vwove kesi vwa vushunga embwe.” 14 Yesu wavakumbulwile ngwendi, “Embwe, nameme nga njendeka vukaleo vwange, oloni vunapu vwa vushunga, omwo njazivuka kuje kunjatundile na kuje kunjiya. Oloni yeni kumuzivuka kuje kunjatundile nambe kuje kunjiya. 15 Yeni mukasompo vyuma mu ngila ya vunu, yange kunjesi kusompa munu. 16 Oloni nameme nga njisompa, kusompa kwange kunapu kwa vushunga, omwo kunjesi ange lika embwe, oloni Tate uje wanjitumine ali nange. 17 Mu Lishiko lyeni vanasoneka ngwavo vukaleo vwa vanu vavali vunapu vwa vushunga. 18 Yange njambulula vukaleo vwange, co Tate uje wanjitumine ambulula vukaleo vwange lalo.” 19 Vamwihwile ngwavo, “Isho ali kulijo?” Yesu wavakumbulwile ngwendi, “Yeni kumunjizivuka nambe kuzivuka Tate. Nga mwanjizivukile, nga mwazivuka na Tate lalo.” 20 Yesu wendekele vyoshe evi omo wakele nakulongesa mu Njuvo ya Shukulu Kalunga, mu mulili muje mwakele vikasa vyakulambwila milambu. Oloni naumo wai wamukwatele, omwo simbu yendi te kanda icete.
Kumwasa kuya oku kunjiya
21 Yesu wendekele lalo kuli vakevo ngwendi, “Njilinakuya, co mukanjishakezeka, oloni mukatsa mu vivi vyeni. Kumwasa kuya kuje kunjiya.” 22 Ngecivene, vaka-kushwana va vaYunda vendekele ngwavo, “Nendeka ngwendi kutwasa kuya kuje kwaya. Eci cinalumbunuka ngeci akalitsiya ndi?” 23 Yesu wavakumbulwile ngwendi, “Yeni mu vaka-kaye, oloni yange njitunda kwilu. Yeni mwatunda muno mu kaye, oloni yange kunjatundile muno mu kaye. 24 Mukemwo njamilekele ngwange mukatsa mu vivi vyeni. Omwo mukatsa mu vivi vyeni nga kumukulaela ngweni ‘Yange Ou Njapwa Munjapwa.’ ” 25 Vamwihwile ngwavo, “Yove iyajo?” Yesu wakumbulwile ngwendi, “Muje vene munjamilekele tunde akulivanga. 26 Njili na vyavingi vyakwendeka ali yeni, vyavingi vyakumisompa navyo. Oloni uje wanjitumine ikeye muka-vushunga, co vyuma vije vinjazivile kuli ikeye vikevyo lika njendeka kuli vaka-kaye.” 27 Kuvazivisisile ngeci Yesu wakele nakuvaleka vya ali Ishe. 28 Ngecivene, Yesu wendekele kuli vakevo ngwendi, “Omo mukajundula Muna Munu, asinoni mukazivuka ngweni ‘Yange Ou Njapwa Munjapwa’, asinoni mukazivuka ngeci kunjasa kulinga cuma cimo na nzili yange vavenya, oloni njendeka lika vije vyanjilongesele Tate. 29 Co uje wanjitumine ali amo nange, kanjisezele ange lika embwe, omwo simbu yoshe njikalingi vije vimuvwaelelesa.” 30 Vavangi vaje vazivile Yesu alinakwendeka vyuma evi vakulaelele kuli ikeye.
Vanu vakupatuka na vandungo
31 Ngecivene, Yesu wendekele kuli vaje vamukulaelele ngwendi, “Nga mwononoka vilongesa vyange, mwa vushunga munapu mu vandongisi vange, 32 co mukazivuka vushunga, co vushunga vukamipatula.” 33 Vamukumbulwile ngwavo, “Yetu tu vatekulwila va Avilahama, kanda tupwe tu vindungo va munu umo embwe. Vika ulumbununa akwendeka ngwove, ‘Vakamipatula’?” 34 Yesu wendekele kuli vakevo ngwendi, “Mwa vushunga njimileka ngwange, munu woshe alinga vuvi napu ndungo ya vuvi. 35 Ndungo kakundamene ku naanga ya munu simbu yoshe, oloni mwana ikeye wakundamako simbu yoshe. 36 Ngecivene, nga Mwana amipatula, mwa vushunga mukapwa vaka-kupatuka. 37 Njizivuka ngwange mwapwa mu vatekulwila va Avilahama. Oloni mushaka kunjitsiya, omwo kumutambula vilongesa vyange. 38 Njendeka vije vyananjimwesa Tate, oloni yeni mulinga vije vyanamileka ishweni.” 39 Vamukumbulwile ngwavo, “Avilahama ikeye Tatetu.” Yesu wakumbulwile ngwendi, “Nga mwa vushunga mwapwile mu vana va Avilahama, nga neni lalo mulinakulinga vipangi vije vyalingile Avilahama. 40 Oloni cuma cimolika cinjinalingi cinapu kumileka vushunga vunjazivile kuli Tate, oloni yeni mushaka kunjitsiya. Avilahama kalingile cuma ngwe eci embwe! 41 Yeni mulinakulinga vije vyalingile ishweni.” Vakumbulwile ngwavo, “Njambi lika ikeye Tatetu, yetu tu vana vendi va vushunga.” 42 Yesu wendekele kuli vakevo ngwendi, “Nga mwa vushunga Njambi wapwa Ishweni, ngwe mwanjizeme, omwo yange njatundile kuli Njambi, ololo njili kuno. Kunjezile na nzili yange vavenya, oloni ikeye wanjitumine. 43 Omwo vikajo kumuzivisisa vije njendeka? Kumushaka kutolilila ku majwi ange. 44 Yeni muli na ishweni, Liyavola, co mushaka kukava mashungu a ishweni. Tunde akulivanga ikeye wapwile muka-kutsiya, co kapwile muka-vushunga embwe, omwo muli ikeye kumwakele vushunga. Omo endeka makuli, endeka muje mwafwila, omwo wapwa muka-makuli, co ikeye ishe ya makuli. 45 Oloni yange njendeka vushunga, mukemwo kumwesi nakunjikulaela. 46 Iyajo akati keni anjihisa a vuvi? Nga njendeka vushunga, omwo vika kumunjikulaela? 47 Uje atunda kuli Njambi atolilila ku majwi a Njambi. Yeni kumwatundile kuli Njambi embwe, co mukemwo kumutolililako.”
Yesu na Avilahama
48 Vehwile Yesu ngwavo, “Kuma kutwatombwele omo twendekele ngwetu u muka-Samaliya, co muli yove lalo muli munzinzime wakujwala?” 49 Yesu wakumbulwile ngwendi, “Muli yange kumwesi munzinzime wakujwala embwe, yange njilinakusingimika Tate, oloni yeni mulinakunjishaula. 50 Oloni yange kunjishaka kulyana kasingimiko embwe. Kwali umo ashaka, co ikeye akapwa lyaako. 51 Mwa vushunga njimileka ngwange, woshe ononoka vilongesa vyange kakatsi.” 52 Va Yesu vendekele kuli ikeye ngwavo, “Mwa vushunga ololo tunamono ngeci muli yove muli munzinzime wakujwala! Avilahama watsa, na vaka-kwimanena vatsa, co yove wendeka ngwove woshe ononoka vilongesa vyove kakatsi. 53 Tatetu Avilahama watsa, kuma wasa kulipwisa wakama kutuvakana Avilahama ndi? Co vaka-kwimanena lalo vatsa. Yove unayongola ngwove yove iya?” 54 Yesu wakumbulwile ngwendi, “Nga njilisingimika yange vavenya, kasingimiko kange kapwa kangoco. Uje anjisingimika ikeye Tate, uje imutumbula ngweni Njambi yeni. 55 Oloni yeni kumwamuzivukile, yange njimuzivuka. Nga njendeka ngwange kunjimuzivuka, co njipwa nji muka-makuli ngwe yeni. Oloni yange njimuzivuka, co njinonoka lijwi lyendi. 56 Ishweni Avilahama wajolelele ngeci amone litangwa lyakwija kwange, walimwene, co wajolelele.” 57 VaYunda vendekele kuli ikeye ngwavo, “Yove kuwesi na myaka makumi atanu, co wamumona Avilahama ndi?” 58 Yesu wakumbulwile ngwendi, “Mwa vushunga njimileka ngwange, simbu kanda Avilahama asemuke, ‘Yange Ou.’ ” 59 Ngecivene, vanonele mamanya ngeci vamwashe, oloni Yesu walavukile, co watundile mu Njuvo ya Shukulu Kalunga.
Yesu akangwisa munalume wasemukile kapuputwa
1 Omo Yesu wetile, wamwene munalume uje wasemukile kapuputwa. 2 Co vandongisi vendi vamwihwile ngwavo, “Mulongisi, iya walingile vuvi ngeci asemuke kapuputwa? Ikeye nambe visemi vendi?” 3 Yesu wavakumbulwile ngwendi, “Kesi ikeye walingile vuvi nameme visemi vendi kuvalingile vuvi embwe. Oloni napu kapuputwa ngeci nzili ya Njambi isholoke muli ikeye. 4 Tunapande kupanga vipangi vya uje wanjitumine omo kucili mutanya, vutsiki vulinakwija omo naumo wai asa kupanga. 5 Omo njili ano a kaye njinapu ceke ca vaka-kaye.” 6 Omo wamanesele kwendeka ngeci, Yesu wajekwilile mate asi, co watikile mate na livu, wakwitile livu a mesho a kapuputwa 7 co wamulekele ngwendi, “Ya ukajwele ku mesho ove ku Lishali lya Siloame.” (Kulumbununa ngwavo, “Vanamutumu.”) Ngecivene, waile wakajwelele ku mesho, co welukile alinakumona. 8 Vandambo vendi na vaje vamumwene laja alinakulomba vwana vehwile ngwavo, “Ou kesi ikeye uje munalume watumbamene nakulomba vwana ndi?” 9 Vamo vendekele ngwavo, “Ikeye vene,” oloni veka ngwavo, “Kesi ikeye embwe, nalifu nendi lika.” Ngecivene, ikeye vavenya wendekele ngwendi, “Yange vene.” 10 Vamwihwile ngwavo, “Mesho ove anatono vati?” 11 Wakumbulwile ngwendi, “Munalume uje ivatumbula ngwavo Yesu natikile livu nakunjikwita a mesho, co wanjilekele ngwendi njiye ku Siloame, co njikajwele ku mesho. Ngecivene, njaile nakujwela, co njamwene.” 12 Vamwihwile ngwavo, “Ali kulijo ikeye?” Wakumbulwile ngwendi, “Kunjizivuka.”
VaFaliseo valowelela akukangwisa oku
13 Asinoni vatwalele uje munalume wapwile kapuputwa akulivanga kuli vaFaliseo. 14 Litangwa lije lyatikile Yesu livu nakutonesa mesho endi lyapwile Litangwa Lyakuhwima. 15 VaFaliseo vamwihwile lalo vati ikeye wasele kumona. Co wavalekele ngwendi, “Ikeye wakwitile livu a mesho ange, co njajwelele ku mesho, co ololo njilinakumona.” 16 VaFaliseo vamo vendekele ngwavo, “Munu ou nalingi eci katundile kuli Njambi, omwo kononokele Litangwa Lyakuhwima.” Oloni vamo ngwavo, “Muka-vuvi asa kulinga vati vizivukiso ngeci evi?” Co valipangele akati kavo. 17 Ngecivene, vaFaliseo vehwile lalo uje munalume ngwavo, “Umutumbula vatijo omo natonesa mesho ove?” Wakumbulwile ngwendi, “Napu muka-kwimanena.” 18 Vakulunu va vaYunda kuvakulaelele ngwavo wapwile kapuputwa, co natono, noo vasanene visemi vendi. 19 Co vavehwile ngwavo, “Ou muneni ndi? Munendeka ngweni wasemukile kapuputwa, natono vati?” 20 Visemi vendi vakumbulwile ngwavo, “Tuzivuka ngwetu munetu, co tuzivuka ngwetu wasemukile kapuputwa. 21 Oloni kutuzivuka mwanatonena, nameme lalo kutuzivuka ou namutonesa. Mwihuleni ikeye vavenya nakolo, co amikumbulula!” 22 Visemi vendi vendekele ngeci omwo vazivile lyova lya vakulunu va vaYunda, vaje valizivasanene laja ngeci nga umo endeka ngwendi Kilistu ikeye Wakuvwavesa, co vamusheka mu sinangonge. 23 Mukemwo visemi vendi vendekele ngwavo, “Nakolo, mwihuleni ikeye vavenya!” 24 Ngecivene, vasanene uje munalume wapwile kapuputwa lwamucivali vamwihwile ngwavo, “Kulaesa ku mesho a Njambi ngeci wendeka vushunga! Tunazivuka ngwetu munalume ou nakutonesa napu muka-vuvi.” 25 Wakumbulwile ngwendi, “Kunjizivuka nga ikeye muka-vuvi nambe embwe. Cuma cimo lika cinjizivuka ngwange, nameme njapwile kapuputwa, co ololo njitona.” 26 Vamwihwile ngwavo, “Vika nalingile nove? Vatijo natonesele mesho ove?” 27 Wavakumbulwile ngwendi, “Njamileke laja, oloni kumwanjitolililile. Omwo vikajo mushaka lalo kuziva lwamucivali? Mushaka kupwa vandongisi vendi ndi?” 28 Co vamushawile ngwavo, “Yove u ndongisi yendi, oloni yetu tu vandongisi va Mosesa. 29 Tuzivuka ngeci Njambi wendekele na Mosesa, oloni munu ou kutuzivuka noku kwatunda!” 30 Munalume wavakumbulwile ngwendi, “Eci cinapu cuma cakukomokesa! Kumuzivuka oku kwatunda, oloni nanjitonesa! 31 Tuzivuka ngwetu Njambi kesi kutolilila ku vaka-vuvi, oloni akatolilila lika kuli vaje vamusingimika nakulinga vije vyashaka ngeci vavilinge. 32 Tunde akutanga kwa kaye kanda tuzive umo ngwavo natonesa mesho a munu wasemukile kapuputwa. 33 Nga munu ou katundile kuli Njambi, kasa kulinga cuma cimo.” 34 Vakumbulwile ngwavo, “Yove wasemukile nakukulelela mu vuvi, co ushaka kutulongesa ndi?” Co vamushekele mu sinangonge.
Vupuputwa vwa mu munzinzime
35 Omo Yesu wazivile vije vyalingiwile, co wawanene uje munalume wamwihwile ngwendi, “Unakulaela kuli Muna Munu ndi?” 36 Uje munalume wakumbulwile ngwendi, “Njileke, ikeye iyajo, mwene, ngeci njikulaele kuli ikeye!” 37 Yesu wendekele kuli ikeye ngwendi, “Unamumono laja, co ikeye ou alinakwendeka nove ololo.” 38 Uje munalume wendekele ngwendi, “Mukemwo vene Mwene, njinakulaela!” Co watsikamene a mavuli ku mesho a Yesu. 39 Yesu wendekele ngwendi, “Omwo njinaija ano a kaye mukusompa, ngecivene, tupuputwa vase kumona, co vaje valinakumona vapwe tupuputwa.” 40 VaFaliseo vamo vaje vakele nendi omo vazivile vije vyendekele, co vendekele kuli ikeye ngwavo, “Kuma utumbula lalo yetu ngwove tutupuputwa ndi?” 41 Yesu wakumbulwile ngwendi, “Nga mwapwile mutupuputwa, nga kumwesi na mulonga, oloni omwo mwendeka ngweni mumona, eci cilumbununa ngeci anga mucili na mulonga.”
Cisimo ca kanyungi
1 “Mwa vushunga njimileka ngwange, nga munu kakovelela ku cikolo ca limba, oloni alondela kweka, uje munu napu mwizi na lipwepwe. 2 Oloni munu uje akovelela ku cikolo, ikeye kanyungi ka vimanga. 3 Muka-kunyunga ku cikolo amushokolwela, co vimanga vaziva lijwi lyendi omo avasana mazina avo, co avatwamenena anja. 4 Omo navatuula anja, atwama kulutwe lwavo, co vimanga vamukava munima, omwo vazivuka lijwi lyendi. 5 Kuvakavangeya munu weka embwe, oloni vakamutewa, omwo kuvazivuka lijwi lyendi.” 6 Yesu wavatelelele cisimo eci, oloni kuvazivisisile vije vyendekele.
Yesu ikeye Kanyungi Wamuvwa
7 Ngecivene, Yesu wendekele lalo ngwendi, “Mwa vushunga njimileka ngwange, yange cikolo ca vimanga. 8 Voshe veka vaje valivangele kulutwe lwange vapwa vezi na mapwepwe, oloni vimanga kuvavatolililile. 9 Yange cikolo. Woshe akovela muli yange akovoka, co akakovela nakutuuka, co akawana kwakulila. 10 Mwizi akaija nakwiva lika nakutsiya nakunyongesa. Njinaija ngeci mukale na mwonyo, mwonyo waungi. 11 “Yange kanyungi wamuvwa, kanyungi wamuvwa ali na cizango cakutsila vimanga. 12 Uje muka-kunyungila fweto, ikeye kesi kanyungi, co vimanga kesi vendi, amona kangunga alinakwija, co aseza vimanga nakutewa, co kangunga akwata vimanga nakuvashandola. 13 Muka-kunyungila fweto atewa omwo akapangela fweto, co kazeme vimanga. 14 Yange kanyungi wamuvwa, njizivuka vimanga vange, co na vimanga vange vanjizivuka. 15 Ngwe amo Tate anjizivuka, co nange lalo njizivuka Tate, mu ngila imo vene njizivuka vimanga vange navo lalo vanjizivuka. Co njitula mwonyo wange omwo vimanga vange. 16 Co kuvali lalo vimanga veka vaje vanapu vange vakevo kesi va mu limba lino. Njinapande kuvanena lalo, vakaziva lijwi lyange, ngecivene, vakapwa vutanga vumo na kanyungi lalo umo. 17 “Omwo Tate anjizema njili na cizango cakwecela mwonyo wange, ngeci njiwutambule lalo. 18 Naumo wai atundisa mwonyo wange. Oloni njilinakuwana mu cizango cange. Njili na moko yakuwecela, co njili na moko yakuutambula. Evi vikevyo vyanjishikile Tate ngeci njivilinge.” 19 Kwakele lalo kulyangunuka akati ka vanu omwo majwi awa. 20 Vamo vavo vavangi vendekele ngwavo, “Ali na munzinzime wakujwala! Co nazaluka! Omwo vikajo mulinakumutolilila?” 21 Oloni veka ngwavo, “Munu alina munzinzime wakujwala kasa kwendeka ngeci! Munzinzime wakujwala wasa kutonesa vati mesho a tupuputwa?”
Yesu vamuvyana
22 Yapwile simbu ya cisika, co vanu valisambele Ciwano Cakukundika * Njuvo ya Shukulu Kalunga mu Yelusalema. 23 Yesu wakele nakwenda mu Mbalanda ya Solomoni mu Njuvo ya Shukulu Kalunga, 24 ngecivene, vanu vakungulukilile kuli ikeye vamwihwile ngwavo, “Visimbu vingai ukatuseza na citanga? Tuleke vushunga, yove Wakuvwavesa ndi?” 25 Yesu wakumbulwile ngwendi, “Njamilekele laja, oloni yeni kumwanjikulaelele. Vyuma evi vinjilinga mu lizina lya Tate vikevyo vimwesa vukaleo vwange, 26 oloni kumukulaela, omwo kesi mu vimanga vange. 27 Vimanga vange vaziva lijwi lyange, co nange njivazivuka, co vanjikava. 28 Njivana mwonyo wa myaka yoshe, co kuvakatsi embwe. Co naumo wai akavacakununa mu livoko lyange. 29 Vije vyananjana Tate vinatuvakana vyuma vyoshe, co naumo wai akavacakununa mu livoko lya Tate. 30 Tate nange twapwa umolika.” 31 Vanu vanonele lalo mamanya ngeci vamwashe. 32 Yesu wendekele kuli vakevo ngwendi, “Njinamimwesa vipangi vyavingi vyavivwa vije vyanjanene Tate ngeci njivilinge, co a vyuma evi vili vimo vimunjashela mamanya?” 33 VaYunda vamukumbulwile ngwavo, “Kutukwashela mamanya a vipangi vyavivwa, oloni omo unashaula Njambi! Yove u munu, oloni ulinakulipwisa u Njambi!” 34 Yesu wakumbulwile ngwendi, “Mu Lishiko lyeni vanasoneka ngwavo Njambi wendekele ngwendi, ‘Munapu mu vinjambi.’ 35 Tunazivuka ngeci visoneka vinendeka vushunga ku myaka yoshe, co Njambi watumbwile vaje vanu vinjambi, vanu vaje vaanene majwi endi. 36 Ngeci mwange ni, Tate wanjangwile nakunjituma ano a kaye. Vatijo mwendeka ngweni njilinakushaula Njambi omwo njendekele ngwange nji Muna Njambi? 37 Kesi munjikulaele nga kunjesi nakulinga vipangi vya Tate. 38 Oloni nga njilinakuvilinga, nameme kumunjikulaela, oloni munapandele kukulaela vipangi vyange, co muzivuke ngweni Tate ali muli yange, co nange lalo njili muli Tate.” 39 Vashakele lalo kumukwata, oloni ikeye walavukile watundile mu mavoko avo. 40 Yesu watundile kuje waile lalo musambwa ya Ndonga ya Yondau kuje kwakele nakumbatizila Yowano, co wakele kuje. 41 Co vanu vavangi vezile kuli ikeye, co vendekele ngwavo, “Yowano kalingile vizivukiso, oloni vyuma vyoshe vyendekele ali munu ou vinapu vya vushunga.” 42 Co vanu vavangi kuje vakulaelele kuli ikeye.
Kutsa kwa Lazalu
1 Kwakele munalume umo lizina lyendi Lazalu, wa ku Mbetaniya, wakele nakuvinja. Mbetaniya yapwile nganda muje mwakele Maliya na ndokazi yendi Mata. 2 (Ou Maliya ikeye uje wavwavesele mendi a Mwene na mazi akunika lwengo lwaluvwa, co wasikumwineko na vin̄ambu vyendi, ikeye vene wakele na ndolome yendi Lazalu uje wavinjile.) 3 Ngecivene, vandokazi va Lazalu vatumine lijwi kuli Yesu ngwavo, “Mwene, uje musamba wove iwazema alinakuvinja.” 4 Oloni omo Yesu wazivile evi, wendekele ngwendi, “Kuvinja oku kukumutwala ku kutsa embwe, eci cinalingiwa lika ngeci cisholole vumpau vwa Njambi, ngecivene, inapu ngila ije Muna Njambi akatambwilamo vumpau.” 5 Yesu wazemene Mata na ndokazi yendi Maliya na Lazalu. 6 Oloni omo watambwile muzimbu ngwavo Lazalu avinja, weshwalele wakele kuje matangwa avali. 7 Asinoni wendekele kuli vandongisi vendi ngwendi, “Twilukeni ku Yundeya.” 8 Vandongisi vendi vakumbulwile ngwavo, “Mulongisi, ololo vene vanu kuje vashakele kukwasha mamanya, co uyongola kwilukilako lalo ndi?” 9 Yesu wendekele ngwendi, “Litangwa lyakala na maola likumi na avali indi kesi ngoco? Ngecivene, woshe enda mu mutanya katanuka, omwo amona ceke ca ano a kaye. 10 Oloni nga enda vutsiki, atanuka, omwo kesi na ceke.” 11 Yesu wendekele evi, co lalo wavalekele ngwendi,“Musamba wetu Lazalu nalala tulo, oloni njilinakuyako ngeci njikamwindule.” 12 Vandongisi vendi vakumbulwile ngwavo, “Mwene nga nalala tulo, enduka.” 13 Yesu watumbwile tulo twa kutsa, oloni vakevo vayongwele ngwe natumbula tulo twakulala. 14 Ngecivene, Yesu wavalekele vushunga ngwendi, “Lazalu natsi, 15 oloni omwo yeni njinavwaelela omwo kunjakeleko, ngecivene, mukulaele. Oloni tuyeni kuli ikeye.” 16 Tomasi, (uje vatumbwile Muna Mpasa) wendekele kuli vandongisi vakwavo ngwendi, “Tuyeni amo na Mulongisi ngeci tukatse amo nendi!”
Yesu ikeye Cisangukilo na Mwonyo
17 Omo Yesu wetele kuje, wawanene Lazalu vanamutsindi laja kuneti matangwa awana. 18 Mbetaniya kuyatuvakanene makilomita atatu kutunda ku Yelusalema, 19 co vaYunda vavangi vezile nakumona Mata na Maliya nakuvazembeleka a kutsa kwa ndolome yavo. 20 Omo Mata wazivile ngeci Yesu alinakwija, waile nakumushesha, oloni Maliya wasalele mu njuvo. 21 Mata wendekele kuli Yesu ngwendi, “Mwene, nga unakele kuno, ndolome yange nga katsile! 22 Oloni njazivuka ngeci nambe ololo Njambi akakwana coshe ciwulomba kuli ikeye.” 23 Yesu wamulekele ngwendi, “Ndolome yove akasanguka lalo.” 24 Mata wakumbulwile ngwendi, “Njazivuka ngwange akasanguka a litangwa lyakukotoka.” 25 Yesu wendekele kuli ikeye ngwendi, “Yange cisangukilo na mwonyo. Woshe akulaela kuli yange nambe natsi, oloni akayoya, 26 co woshe alinakuyoya uje akulaela kuli yange kakatsi embwe. Yove unakulaela eci ndi?” 27 Wakumbulwile ngwendi, “Eyo Mwene, njinakulaela ngeci yove u Wakuvwavesa, Muna Njambi, uje akaija ano a kaye.”
Yesu alila
28 Omo Mata wendekele evi, welukile nakusana ndokazi yendi Maliya mu vushweke. Wamulekele ngwendi, “Mulongisi naija, co alinakukusana.” 29 Co omo Maliya wazivile ngeci, wakatukile vwasi watuukile nakumushesha. 30 (Yesu te kanda acete mwimbo, oloni wakele kuje kwaliwanene na Mata.) 31 Omo vanu vaje vakele amo na Maliya mu njuvo nakumuzembeleka vamukavele omo vamumwene akatuka vwasi nakutuuka anja. Vayongwele ngwavo amo alinakuya ku mbumbo nakulililako. 32 Asinoni Maliya wetele kuje kwakele Yesu, co aje vene omo wamumwene, wawililile ku mendi endi wendekele ngwendi, “Mwene, nga unakele kuno, ndolome yange nga katsile!” 33 Omo Yesu wamumwene alinakulila, co wamwene vanu vaje vezile amo nendi vakele lalo nakulila, co wakele manene na vusiwa mu mbunge yendi. 34 Wavehwile ngwendi, “Kuli kumunamutsindi?” Co vakumbulwile ngwavo, “Mwene, ija umone.” 35 Yesu walilile. 36 Vanu vendekele ngwavo, “Kengeni muje mwamuzemene!” 37 Oloni vamo vavo vendekele ngwavo, “Ou kesi ikeye uje watonesele mesho a uje kapuputwa indi? Kuma kapandele kwamena Lazalu ngeci kesi atse ndi?”
Yesu asangula Lazalu
38 Yesu wakele na vusiwa manene mu mbunge yendi, co waile ku mbumbo ije yapwile yakucokola mu limanya, co ku cikolo vaakeleko limanya. 39 Yesu washikile ngwendi, “Tundiseni limanya ku cikolo ca mbumbo!” Mata ndokazi ya mutsi wakumbulwile ngwendi, “Mwene, a simbu ino alinakunika, omwo kuneti matangwa awana tunde atwamutsindilile!” 40 Yesu wendekele kuli ikeye ngwendi, “Kuma kunjakulekele ngwange nga ukulaela ukamona vumpau vwa Njambi ndi?” 41 Ngecivene, vatundisileko limanya. Co Yesu wakengele kwilu wendekele ngwendi, “Tate, njikukandelela, omwo ukanjizivi. 42 Njinazivuka ngwange simbu yoshe ukanjizivi, oloni njendeka eci omwo mbunga eyi inemana kuno, vakulaele ngeci yove wanjitumine.” 43 Omo wamanesele kwendeka evi, watambekele na lijwi lyakama ngwendi, “Lazalu, tuukamo!” 44 Watuukilemo, mendi endi na mavoko vyapwile vyakukuta na vinanga vije vivamuzengelele, na ku mesho endi vazengeleko lilesu. Co Yesu wavalekele ngwendi, “Muzitulenivyo ngeci aye.”
Vutumbe vwakutsiya Yesu
45 Vanu vavangi vaje vezile kuli Maliya vamwene vije vyalingile Yesu, co vakulaelele kuli ikeye. 46 Oloni vamo vavo velukile kuli vaFaliseo vavalekele vije vyalingile Yesu. 47 Ngecivene, vaFaliseo na vakulunu va vaka-kukombelela valiwanene na vaka-Munga, co vendekele ngwavo, “Tulinga vati? Omwo kengeni vizivukiso vyoshe vyalinakulinga ou munalume! 48 Nga tumwecelela ngoco, voshe vakamukulaela, co vakulunu va vaLoma vakanyongesa Njuvo yetu ya Shukulu Kalunga na muyati wetu woshe!” 49 Oloni umo wavo Kayafase, uje wapwile Muka-kukombelela Wakama mwaka uje, wendekele ngwendi, “Yeni na cimo cai muzivuka! 50 Kuma kumuzivuka ngweni mwamuvwa munu umo kutsila vanu, co kutuvakana kunyongesa muyati woshe ndi?” 51 Mwa vushunga vene, kendekele eci mu cizango cendi embwe, omwo ikeye akupwa Muka-kukombelela Wakama mwaka uje, wambulwile vuka-kwimanena ngeci Yesu ikeye akatsila vaYunda, 52 co kesi vakevo lika embwe, oloni akungulwile amo vanu va Njambi mu muvila umo vaje vanashandokela kweka. 53 Ngecivene, tunde a litangwa lije vakulunu va vaYunda vatumbile vutumbe vwakutsiya Yesu. 54 Ngecivene, Yesu kendele citona-mesho mu Yunda, oloni watundileko waile ku mutambela weka kuyehi na mambo, ku nganda vatumbwile ngwavo Efalime. Co wakele kuje amo na vandongisi vendi. 55 Simbu ya Ciwano ca Pasovala yakele muyehi, co vanu vavangi vatundile ku mitambela yavo valamatele kuya ku Yelusalema mukulijelesa omo simbu ya ciwano kanda yete. 56 Vashakezekele Yesu, co omo vakungulukilile mu Njuvo ya Shukulu Kalunga, valihozwele akati kavo ngwavo, “Muyongola vati? Mwa vushunga vene kuma kaija kuno ku ciwano ndi?” 57 Vakulunu va vaka-kukombelela na vaFaliseo vashikile ngwavo nga umo wazivukile kuje kwakele Yesu, napandele kwambulula ngeci vakamukwate.
Vavwavesa Yesu ku Mbetaniya
1 Kwalitulile matangwa atanu na limo simbu kanda Ciwano ca Pasovala cete, Yesu waile ku Mbetaniya, kwimbo lya Lazalu, me uje yasangwile Yesu ku vatsi. 2 Vamuvwaeselele kulya kwa cingwezi, Mata ikeye wapangele vyakulya, co Lazalu wapwile umo wa vaje vatumbamene ku mesa na Yesu. 3 Maliya wambatele mazi a ndando yakama akunika lwengo lwaluvwa avalingile na vyuma vya seo, wavwavesele mendi a Yesu, nakuwasikumuna na vin̄ambu vyendi. Co njuvo yoshe yashulile na lwengo lwaluvwa. 4 Oloni umo wa vandongisi va Yesu, Yundasa Isikalyote, uje akamwenda vungungu, wendekele ngwendi, 5 “Omwo vika kuvalandesele awa mazi na vimbongo vya siliva vyakupwa 300 nakuvipangezela kuli tuutu?” 6 Ikeye wendekele ngeci, kesi ngwe omwo wazemene tuutu embwe, oloni omwo wapwile mwizi. Ikeye wanyungile cipau ca vimbongo, co wakele nakwiva-iva vije vyakelemo. 7 Oloni Yesu wendekele ngwendi, “Mweceleni! Eci canalingi cinenika a litangwa lyakunjitsinda. 8 Tuutu muli navo simbu yoshe, oloni yange kunjikakala neni simbu yoshe embwe.”
Vutumbe vwakutsiya Lazalu
9 Omo vanu vavangi vazivile ngeci Yesu ali mu Mbetaniya, ngecivene, vaileko, kesi ngwe omwo ali Yesu lika embwe oloni vakamone Lazalu lalo, uje yasangwile Yesu ku vatsi. 10 Ngecivene, vakulunu va vaka-kukombelela vatumbile matumbe akutsiya Lazalu lalo, 11 omwo ya Lazalu vaYunda vavangi vavasezele nakukulaela kuli Yesu.
Yesu akovela na vumpau mu Yelusalema
12 Alikaki mbunga yakama ya vaje vaile ku Ciwano ca Pasovala vazivile ngwavo Yesu alinakwija ku Yelusalema. 13 Ngecivene, vatetele minango ya mashakavale vaile nakuliwana nendi, vatambekele ngwavo, “Shangazaleni Njambi! Njambi amuvezikise ou aija mu lizina lya Mwene! Njambi avezikise Mwene ya Isalele!” 14 Co Yesu wawanene muna cimulu walondeleo, ngwe muje muvyendeka visoneka ngwavyo, 15 “Kesi uzive lyova, nganda ya Siyone! Kenga, mwene yove alinakwija, nalondo a muna cimulu.” 16 Vandongisi vendi kuvazivisisile vyuma evi akulivanga, oloni omo Yesu wakovelele mu vumpau, asinoni vanukile ngeci visoneka vije vyendekele ali ikeye, co vyalingiwile kuli ikeye. 17 Vanu vaje vakele na Yesu omo wasanene Lazalu kutunda mu mbumbo nakumusangula ku vatsi vambulwile vukaleo. 18 Evi vikevyo vyanenesele mbunga ngeci valiwane nendi, omwo vazivile ngeci nalingi cikomokeso eci. 19 VaFaliseo valyendekesele akati kavo ngwavo, “Kengeni, matumbe etu kuwesi nakuya kulutwe embwe! Kengeni, kaye koshe valinakumukava!” VaNgiliki vamo vashakezeka Yesu 20 VaNgiliki vamo vakele akati ka vaje vaile ku Yelusalema nakulemesa a simbu ya ciwano. 21 Ngecivene, vaile kuli Filipu (watundile ku Mbetesainda mu Ngalileya), vendekele ngwavo, “Mwene, tushaka kumona Yesu.” 22 Filipu waile walekele Anduleo, co muvuvali vwavo vaile nakuleka Yesu. 23 Co Yesu wavakumbulwile ngwendi, “Simbu inete omwo Muna Munu atambule vumpau. 24 Mwa vushunga njimileka ngwange, kuvanga nona ya tiliku iwile mu livu na kutsa. Nga itsa, asinoni ima vinona vyavingi. 25 Woshe uje azema mwonyo wendi auzimbalesa, co woshe uje azinda mwonyo wendi mu kaye kano nautulikila ku mwonyo wa myaka yoshe. 26 Woshe uje ashaka kunjipangela napande kunjikava, co kuje kunjikakala, kukekwo lalo kwakala ngamba yange. Co Tate akasingimika woshe uje anjipangela.
Yesu endeka a kutsa kwendi
27 “Ololo mbunge yange ilinakuyanda, co njendeka vika? Njendeke ngwange, ‘Tate, njamene ku simbu eyi ndi’? Oloni evi vikevyo vinjezilile, ngeci njiite mu simbu eyi ya tuyando. 28 Tate, shangazala lizina lyove!” Asinoni lijwi lyatundile mwilu ngwalyo, “Njinalishangazala laja, co njikalishangazala lalo.” 29 Ije mbunga yemanene kuje vazivile lijwi, co vamo vavo vendekele ngwavo cililimo, vakwavo vendekele ngwavo,“Kangelo nendeka nendi!” 30 Oloni Yesu wendekele kuli vakevo ngwendi, “Lijwi eli kulyezile omwo yange embwe, oloni omwo yeni. 31 Ololo simbu yakusompa inaija kuli vaka-kaye, ololo muka-kushwana kano kaye vakamusheka. 32 Co omo vakanjijundula kunjitundisa ano asi, njikakokela vanu voshe kuli yange.” 33 (Akwendeka ngeci watumbwile kutsa kuje akatsa.) 34 Ije mbunga vakumbulwile ngwavo, “Lishiko lyetu lituleka ngeci Wakuvwavesa akayoya myaka yoshe. Vatijo yove wendeka ngwove Muna Munu vanapande kumujundula? Iyajo ou Muna Munu?” 35 Yesu wakumbulwile ngwendi, “Ceke cikakala akati keni kasimbu lika kakandondo. Endeni omo muli na ceke, ngeci lisusulungu kesi likamifwike, omwo uje enda mu lisusulungu kazivuka kuje alinakuya. 36 Omo muli na ceke kulaeleni mu ceke, ngeci mupwe vanu va ceke.”
Kujeneka kukulaela kwa vanu
Omo Yesu wamanesele kwendeka evi, waile wavandele kwendi lika. 37 Nameme walingile vizivukiso vyavingi ku mesho avo, oloni kuvakulaelele kuli ikeye, 38 ngeci lijwi lyendekele Isaya muka-kwimanena lipwe lya vushunga ngwalyo, “Mwene, iyajo wakulaelele muzimbu twambulwile? Co iya namono nzili ya Shukulu Kalunga mu vyuma evi?” 39 Ngecivene, kuvasele kukulaela, omwo Isaya wendekele lalo ngwendi, 40 “Njambi nazivalesa mesho avo, co nakaluwisa vimbunge vyavo, ngeci mesho avo kesi amone, Co kesi vazivisise, kutewa vatengulukila kuli yange, co yange njikavakangwisa.” 41 Isaya wendekele vyuma evi omwo wamwene vumpau vwa Yesu nakumwambulula. 42 Nameme ngoco, vaka-kushwana vavangi va vaYunda vakulaelele kuli Yesu, oloni omwo lyova lya vaFaliseo, kuvasele kuvyendeka citona-mesho, ngecivene, kutewa vavasheka mu sinangonge. 43 Omwo vazemene kuvashangazala ku vanu, kutuvakana kushangazala kwakutunda kuli Njambi.
Majwi a Yesu akavasompa
44 Co Yesu watambekele ngwendi, “Woshe akulaela kuli yange kakulaela kuli yange lika embwe oloni akulaela lalo kuli uje wanjitumine. 45 Co woshe namono yange namono lalo uje wanjitumine. 46 Yange njinaija ano a kaye kupwa ceke, ngeci woshe akulaela kuli yange kesi akale mu lisusulungu. 47 Woshe aziva muzimbu wange, co kawononoka, yange kunjikamusompo, omwo kunjezile mukusompa vaka-kaye embwe, oloni mukuvovola. 48 Woshe anjivyana, co katambula majwi ange, kwali umo uje akamusompa. Majwi aje njinendeka akewo akapwa lyaako lyendi a litangwa lyakukotoka! 49 Omwo eci cinapu ca vushunga, omwo kunjendekele na nzili yange vavenya embwe, oloni Tate uje wanjitumine nanjishiki vije vinjendeka na vije vinjambulula. 50 Co njazivuka ngeci lishiko lyendi linena mwonyo wa myaka yoshe. Ngecivene, evi vinjendeka, vikevyo vyanjilekele Tate ngeci njivyendeke.”
Yesu ajwelesa mendi a vandongisi vendi
1 Simbu litangwa lya Ciwano ca Pasovala kanda lyete, Yesu wazivukile ngeci simbu yendi inete yakutunda muno mu kaye nakuya kuli Ishe. Ikeye wazemene vaje vakele muno mu kaye vaje vapwile vendi, co wavazemene na akukotoka. 2 Co Yesu na vandongisi vendi vakele kukulya kwa cingwezi. Omo Liyavola te naaka laja muli Yundasa, muna Simoni Isikalyote, viyongola vyakwenda Yesu vungungu. 3 Yesu wazivukile ngeci Ishe namwana nzili yoshe, co wazivukile ngeci watunda kuli Njambi, co alinakuya kuli Njambi. 4 Ngecivene, Yesu wakatukile ku mesa, washulwile cikoveyo cendi ca akamwa, co walikutile litwai mu mbunda yendi. 5 Asinoni wetilile mema mu lilonga, co washangumukile kujwelesa mendi a vandongisi vendi, co wasikumwineko na litwai lije lyakutile mu mbunda yendi. 6 Yesu wezile kuli Simoni Petulu, co Petulu wendekele kuli ikeye ngwendi, “Mwene, kuma ujwelesa ku mendi ange ndi?” 7 Yesu wamukumbulwile ngwendi, “Yove kuuzivisisa cuma eci cinjilinakulinga ololo, oloni kulutwe ukacizivisisa.” 8 Petulu wendekele na nzili ngwendi, “Kuujwelesa ku mendi ange embwe!” Yesu wakumbulwile ngwendi, “Nga kunjijwelesa ku mendi ove, kuwasa kupwa lalo ndongisi yange.” 9 Simoni Petulu wakumbulwile ngwendi, “Mwene, kesi ujwelese lika ku mendi ange embwe! Oloni jwelesa ku mavoko ange na ku mutwe wange lalo!” 10 Yesu wakumbulwile ngwendi, “Woshe uje najwele kapandele kujwela lalo, kuvanga ku mendi endi lika. Yeni muvavoshe munajele, kuvanga umolika.” 11 (Omwo Yesu wazivukile uje akamwenda vungungu, mukemwo wendekele ngwendi, “Yeni muvavoshe munajele, kuvanga umolika.”) 12 Omo Yesu wamanesele kujwelesa ku mendi avo, co wazalele cikoveyo cendi ca akamwa, co watumbamene lalo ku mesa. Wavehwile ngwendi, “Mwazivisisa eci cinjinalingi kuli yeni ndi? 13 Munjitumbula ngweni Mulongisi na Mwene, co mucinapande vene kunjitumbula ngacije, omwo omu mukemwo vene munjapwa. 14 Nga yange Mwene yeni na Mulongisi weni, njinamijwelesa ku mendi eni. Neni lalo munapande kulijwelesa ku mendi eni umo na mukwavo. 15 Omwo njinamimwesa cimweso ngeci neni mulinge ngwe munjinalingi yange kuli yeni. 16 Mwa vushunga njimileka ngwange, ndungo naumo wai natuvakana shukulu yendi, nameme muluwa naumo wai natuvakana uje wamutumine. 17 Nga mwazivuka vyuma evi, mukavezika nga mukavilinga! 18 “Kunjesi nakwendeka yeni voshe embwe, njinazivuka vaje njinaangula. Oloni visoneka vipwe vya vushunga omo vyendekele ngwavyo, ‘Munu uje walile vyakulya nange nemuka citozi cange.’ 19 Njamilekela cimweja simbu kanda cuma eci cilingiwe, ngecivene, omo cilingiwa, mukakulaela ngweni, ‘Yange Ou Njapwa Munjapwa.’ 20 Mwa vushunga njimileka ngwange, woshe uje atambula uje njinatumu, atambula yange lalo, co woshe uje atambula yange atambula uje wanjitumine.”
Yesu endeka ali uje akamwenda vungungu
21 Omo Yesu wamanesele kwendeka evi, mbunge yendi yazeyele manene, co wendekele citona-mesho ngwendi, “Mwa vushunga njimileka ngwange, umo weni akanjenda vungungu.” 22 Vandongisi vendi valikengele-kengele umo na mukwavo, valikomokelele manene kuvazivukile uje yatumbwile. 23 Umo wa vandongisi vendi, uje yazemene Yesu, watumbamene ku nyonga ya Yesu. 24 Ngecivene, Simoni Petulu wamunyateyeye ngwendi, “Mwihule alinakutumbula iya.” 25 Ngecivene, uje ndongisi washwenyele kuyehi-yehi na Yesu wamwihwile ngwendi, “Mwene, iyajo?” 26 Yesu wakumbulwile ngwendi, “Uje injikana likende lije linjikatanta ikeye vene.” Ngecivene, wanonele likende, walitantele, co walyanene kuli Yundasa, muna Simoni Isikalyote. 27 Aje vene omo Yundasa watambwile lije likende, Satana wakovelele muli ikeye. Yesu wendekele kuli ikeye ngwendi, “Evi unapande kulinga, vilinge vwasi!” 28 Naumo wai wa vaje vatumbamene ku mesa wazivisisile omwo vika Yesu wendekele evi kuli ikeye. 29 Omo Yundasa wapwile muka-kunyunga cipau ca vimbongo, vamo vandongisi vayongwele ngwavo Yesu namuleka ngeci aye nakulanda vije vashakele vya ku ciwano, nambe amo namuleka ngeci aane vyuma vimo kuli vaka-kuutwa. 30 Ngecivene, omo Yundasa watambwile lije likende, aje vene watuukile anja. Co yapwile simbu ya vutsiki.
Lishiko lyaliha
31 Omo Yundasa watuukile anja, Yesu wendekele ngwendi, “Ololo vumpau vwa Muna Munu vavusholola, co muli ikeye vumpau vwa Njambi vavusholola. 32 Co nga vumpau vwa Njambi vavusholola muli ikeye, asinoni Njambi akasholola vumpau vwa Muna Munu muli ikeye, co akalinga eci a simbu imolika. 33 Vana vange vavandondo, oloni kunjikakala neni simbu yakama. Mukanjishakezeka, oloni njimileka ololo ngwe muje njalekele vaka-kushwana va vaYunda ngwange, ‘Kumwasa kuya kuje kunjilinakuya.’ 34 Co njimyana lishiko lyaliha ngwange, lizemene umo na mukwavo. Ngwe yange munjinamizeme, ngecivene, munapande kulizema umo na mukwavo. 35 Nga mulizema umo na mukwavo, asinoni voshe vakazivuka ngeci mu vandongisi vange.”
Yesu endeka ngeci Petulu akamuvyana
36 Simoni Petulu wehwile Yesu ngwendi, “Mwene, uya kulijo?” Yesu wakumbulwile ngwendi, “Kuje kunjilinakuya kuwasa kunjikava, oloni ukanjikava kulutwe.” 37 Petulu wehwile ngwendi, “Mwene, omwo vika kunjasa kukukava ololo? Njinalivwaesela cimweja kutsa amo nove!” 38 Yesu wakumbulwile ngwendi, “Kuma mwa vushunga unalivwaesela cimweja kutsa amo nange ndi? Mwa vushunga njikuleka ngwange, simbu ndemba kanda atambeke ukanjivyana visimbu vitatu ngwove kuunjizivuka.”
Yesu ikeye Ngila yakuya kuli Tate
1 Yesu wavalekele ngwendi, “Kesi mulishoshomwene mu vimbunge vyweni. Kulaeleni kuli Njambi, co kulaeleni kuli yange lalo. 2 Mu njuvo ya Tate mwakala milili yaingi, nga yaimo, nga njinamileka. Co njilinakuya mukumivwaesela kwakukala. 3 Co omo njinayi nakumivwaesela kwakukala, njikeluka lalo nakumizila ngecivene, mukakale kuje kunjikakala yange. 4 Co munazivuka ngila iya kuje kunjilinakuya.” 5 Tomasi wendekele kuli ikeye ngwendi, “Mwene, kutuzivuka oku ulinakuya, ngecivene, vatijo tuzivuka ngila yakweta kuje?” 6 Yesu wamukumbulwile ngwendi, “Yange ngila, na vushunga, na mwonyo, naumo wai aya kuli Tate oloni kuvanga ali yange. 7 Nga munanjizivuka, nga munazivuka na Tate lalo, co kushangumuka ololo kutwala kulutwe, munamuzivuka, co munamumono.” 8 Filipu wendekele kuli ikeye ngwendi, “Mwene, tumwese Isho, mukemwo mu tushaka yetu voshe.” 9 Yesu wakumbulwile ngwendi, “Njinakala neni muvavoshe simbu yakama, oloni kuwanjizivukile, Filipu? Woshe uje nanjimono namono Tate. Omwo vikajo wendeka ngwove, ‘Tumwese Isho’? 10 Kuma kuukulaela Filipi ngeci yange njili muli Tate, co Tate ali muli yange ndi?” Yesu wendekele kuli vandongisi vendi ngwendi, “Majwi awa njinendeka kuli yeni kuwapwile a mu mbunge yange embwe. Tate wakala muli yange akapanga vipangi vyendi. 11 Njikulaeleni omo njendeka ngwange njili muli Tate, co Tate ali muli yange. Nga kesi ngoco, kulaeleni omwo vyuma vije njilinakulinga. 12 Mwa vushunga njimileka ngwange, woshe uje akulaela kuli yange akalinga vipangi vije vinjilinga, eyo, akalinga vipangi vyakama kutuvakana evi, omwo njilinakuya kuli Tate. 13 Co njikalinga cuma coshe-icoshe cije cimukalomba mu lizina lyange, ngeci vumpau vwa Tate vukasholoke ali Mwana. 14 Nga mulomba cuma cimo mu lizina lyange, njikacilinga.
Cikulaeso ca Munzinzime Wakujela
15 “Nga munjizema, mukononoka mashiko ange. 16 Co njikalomba kuli Tate, co akamyana Mukwasi weka, uje akakala neni ku myaka yoshe. 17 Ikeye Munzinzime wa vushunga, uje asholola vushunga vwa Njambi. Vaka-kaye kuvasa kumutambula, omwo kuvasa kumumona nambe kumuzivuka. Oloni yeni mumuzivuka, omwo wakala neni, co ali muli yeni. 18 “Omo njiya kunjikamiseza enilika ngwe visiwa embwe, njikaija kuli yeni. 19 Oloni mu kasimbu kakandondo lika, co vaka-kaye kuvakanjimono, oloni yeni mukanjimona, omwo njilinakuyoya, neni lalo mukayoya. 20 Omo litangwa lije likaija, mukazivuka ngeci yange njili muli Tate neni muli yange, ngwe omo yange njili muli yeni. 21 “Woshe uje atambula mashiko ange nakuwononoka ikeye uje anjizema. Co Tate akazema woshe uje anjizema, nange lalo njikamuzema nakulisholola kuli ikeye.” 22 Yundasa (kesi Yundasa Isikalyote embwe) wehwile ngwendi, “Mwene, omwo vika ukalisholwela kuli yetu, co kuukalisholola kuli vaka-kaye?” 23 Yesu wamukumbulwile ngwendi, “Woshe anjizema ononoke vilongesa vyange. Co Tate akamuzema, co tukaija nakukala muli ikeye. 24 Woshe uje kanjizeme kononoka vilongesa vyange. Co vilongesa vije vimunazivi kesi vyange oloni vitunda kuli Tate uje wanjitumine. 25 “Njanamileke vyuma evi simbu njicili neni. 26 Oloni Mukwasi, ikeye Munzinzime Wakujela, uje yakatuma Tate mu lizina lyange, akamilongesa vyuma vyoshe nakumyanukisa vyuma vyoshe vije vinjinamileka. 27 “Kwoloka njimisezela, kwoloka kwange njilinakumyana. Kesi ngwe muvakana muje vaka-kaye. Kesi mulishoshomwene mu vimbunge vyeni, nameme kesi muzive lyova. 28 Mwanjizivile munjendekele kuli yeni ngwange, ‘Njilinakumiseza, oloni njikaija kuli yeni.’ Nga mwanjizema, nga mwavwaelela omwo njilinakuya kuli Tate, omwo Tate wapwa wakama kutuvakana yange. 29 Co njamileka evi ololo omo simbu kanda vyuma evi vilingiwe, ngecivene, omo vikalingiwa, mukakulaele. 30 Kunjesi na kwendeka neni vyavingi ololo, omwo muka-kushwana wa ano a kaye alinakwija. Kesi na nzili ali yange, 31 oloni njilinakulinga ngwe mwanjishikile, ngecivene, vaka-kaye vazivuke ngeci yange njazema Tate. “Katukeni, tuyeni tutunde ku mutambela uno.
Yesu ikeye Mukolovozi wa Vushuka vwa Vinyu wa Vushunga
1 “Yange mukolovozi wa vushunga wa vushuka vwa vinyu, co Tate ikeye ndimi. 2 Ikeye ateta munango woshe uli muli yange uje kuwimi vushuka, co munango woshe wima vushuka awunonga ngeci wime vushuka vwavungi. 3 Yeni munajele laja alijwi lije njendekele kuli yeni. 4 Kaleni muli yange, co nange njikakala muli yeni. Ngwe munango kuwasa kwima vushuka awolika, kuvanga lika nga ukala a mukolovozi. Mu ngila eyi vene neni kumwasa kwima vushuka kuvanga mukale muli yange. 5 “Yange mukolovozi wa vinyu, yeni munapu minango. Woshe akala muli yange, co nange njikala muli ikeye, ikeye akaima vushuka vwavungi, omwo mweni lika kumwasa kulinga cuma nacimo cai. 6 Woshe kakala muli yange vakamumbila kuti ngwe munango, co akauma cau, co minango yangacije vaikungiya nakuyumbila mu liko, co yenya. 7 Nga mukala muli yange na majwi ange akala muli yeni, cuma coshe cimulomba mukacitambula. 8 Vumpau vwa Tate vusholoka nga mwima vushuka vwavungi, co mu ngila eyi vene mupwa vandongisi vange. 9 Ngwe omo Tate wanjizema ngecivene, nange njamizema, kaleni mu cizemo cange. 10 Nga mwononoka mashiko ange, mukakala mu cizemo cange, ngwe omo njononoka mashiko a Tate, co njili mu cizemo cendi. 11 “Njamileka vyuma evi ngeci kuvwaelela kwange kukale muli yeni, co kuvwaelela kweni kupwe kwamutunu. 12 Eli likelyo lishiko lyange, ngeci lizemeni umo na mukwavo, ngwe omo njamizema. 13 Cizemo cakama manene kutuvakana eci munu asa kukala naco ali vavusamba vendi cikeco kutula mwonyo wendi ali vakevo. 14 Yeni munapu vasamba vange nga mulinga evi njimishika. 15 Kunjimitumbula lalo vangamba embwe, omwo ngamba kazivuka vije vyalinga shukulu yendi. Oloni njimitumbula vasamba, omwo njamileka vyuma vyoshe vije vinjavizivile kuli Tate. 16 Kesi yeni mwanjangwile embwe, oloni yange njamyangwile nakumituma ngeci muye nakwima vushuka vwavungi, vushuka vuje vwa ku myaka yoshe. Ngecivene, cuma coshe mukalomba kuli Tate mu lizina lyange ikeye akamyanaco. 17 Eli likelyo lishiko lyange, lizemeni umo na mukwavo.
Cizindo ca vaka-kaye
18 “Nga vaka-kaye vamizinda, zivukeni ngeci mukemwo muvanjizindile yange akulivanga. 19 Nga mwapwile vaka-kaye, asinoni nga vaka-kaye vamizema ngwe mu vavo. Oloni omwo njamyangwile akati ka vaka-kaye, co kumwakundamene ku vaka-kaye, ngecivene, mukemwo vaka-kaye vamizindi. 20 Anukeni muje njamilekele ngwange, ‘Ngamba naumo wai natuvakana shukulu yendi.’ Nga yange vanjiyandesa, neni lalo vakamiyandesa, nga vononoka vilongesa vyange, co vakononoka vilongesa vyeni lalo. 21 Oloni vakalinga vyuma vyoshe evi kuli yeni omwo yeni mwapwa muvange, omwo kuvazivuka uje wanjitumine. 22 Nga kunjezile nakwendeka kuli vakevo ngwe kuvakele na mulonga wa vuvi, oloni kuvasa kulyola malambi a vuvi vwavo. 23 Woshe anjizinda yange azinda Tate lalo. 24 Nga kunjalingile vyuma vije naumo wai wavilingile akati kavo, kuvesi na vuvi, oloni vanamono vije njalingile, co vatuzinda nange na Tate. 25 Oloni evi vyapandele kulingiwa ngeci vije vivasonekele mu Lishiko vipwe vyavushunga ngwavo, ‘Vanjizindile ngoco, nakashwilo kai.’ 26 “Oloni omo Mukwasi akaija, ikeye Munzinzime, uje akasholola vushunga vwa ali Njambi, akaija kutunda kuli Tate. Njikamutuma kuli yeni kutunda kuli Tate, co akendeka vukaleo vwange. 27 Co neni lalo mukapwa vakaleo vange, omwo munakala amo nange tunde akulivanga.
1 “Njinamileka vyuma evi, ngeci kesi mukecele kukulaela kweni. 2 Vakamisheka mu masinangonge, mwa vushunga simbu ikaija omo woshe uje akamitsiya akayongola ngeci akulinga cuma eci alinakupangela Njambi. 3 Co vanu vakalinga vyuma evi kuli yeni omwo kuvazivukile Tate nambe yange. 4 Oloni njamileka vyuma evi, ngeci omo simbu yavo iketa yakulinga vyuma evi, mukanuke ngeci njamilekevyo.
Vipangi vya Munzinzime Wakujela
“Kunjamilekele vyuma evi akulivanga, omwo njakele amo neni. 5 Oloni ololo njilinakuya kuli uje wanjitumine, oloni naumo wai weni anjihula kuje njilinakuya. 6 Oloni omwo njinamileka vyuma evi, vimbunge vyeni vili na vusiwa. 7 Oloni mwa vushunga njimileka ngwange, mwamuvwa kuli yeni ngeci yange njiye, omwo nga kunjii, Mukwasi kakaija kuli yeni. Oloni nga njiya, co njikamutuma kuli yeni. 8 Co omo akaija, akavayesa vaka-kaye a vuvi, na a vushunga, na a cihiso ca Njambi. 9 Akavavayesa a vuvi omwo kuvakulaelele kuli yange, 10 akavavayesa a vushunga omwo njilinakuya kuli Tate, co yeni kumukanjimono lalo, 11 nakuvavayesa a cihiso omwo muka-kushwana wa ano a kaye vanamuhisa laja. 12 “Njili na vyavingi vyakumileka, oloni vimilemena manene. 13 Omo Munzinzime akaija, uje akasholola vushunga vwa Njambi, akamitwamenena mu vushunga vwoshe. Omwo kakendeka mu nzili yendi embwe, oloni akendeka vije aziva nakumileka vyuma vikaija kulutwe. 14 Akanjana vumpau, omwo akaziva vije vinjikendeka nakuvyambulula kuli yeni. 15 Vyoshe vyali navyo Tate vinapu vyange, ngecivene, mukemwo njinendeka ngwange Munzinzime akambata vije vinjimuleka nakuvyambulula kuli yeni.
Vusiwa nakuvwaelela
16 “Mu kasimbu kakandondo lika kumukanjimono lalo, co mu kasimbu kakandondo lalo mukanjimona.” 17 Vamo vandongisi vendi valihozwele akati kavo ngwavo, “Eci cilumbunuka vika? Atuleka ngwendi mu kasimbu kakandondo lika kutukamumono lalo, co lalo mu kasimbu kakandondo tukamumona, co lalo endeka ngwendi, ‘Omwo njiya kuli Tate.’ 18 Vendekele ngwavo aka ‘Kasimbu kakandondo lika’ kanalumbunuka vika? Kutuzivuka evi alinakwendeka!” 19 Yesu wazivukile ngeci vashakele kumwihula, ngecivene, wendekele kuli vakevo ngwendi, “Njinendekele ngwange, ‘Mu kasimbu kakandondo lika kumukanjimono lalo, co mu kasimbu kakandondo lalo mukanjimona.’ Evi vikevyo mulinakulihozola akati keni ndi? 20 Mwa vushunga njimileka ngwange, mukalila nakusikoka manene, oloni vaka-kaye vakajolela, mukakala na vusiwa, oloni vusiwa vweni vukatenguluka kupwa kujolela. 21 Omo munakazi ashaka kukita mwana, ali na vusiwa, omwo simbu yendi yakuyanda inete, oloni omo mwana asemuka, evala tuyando twendi, omwo navwaelela ngeci mbututu nasemuka ano a kaye. 22 Ngecivene, omu mukemwo mucinapu neni, ololo muli na vusiwa, oloni njikamimona lalo, co vimbunge vyeni vikashula nakujolela, kujolela kuje naumo wai akacitundisa muli yeni. 23 “Omo litangwa lije likaija, kumukanjilombo cuma cimo. Mwa vushunga njimileka ngwange, nga mukalomba cuma coshe kuli Tate mu lizina lyange akamyanaco. 24 Tunde aje nakweta ku lelo kanda mulombe cuma cimo mu lizina lyange, lombeni, co mukatambula, ngeci kuvwaelela kweni kukapwemo.
Kuhyana kaye
25 “Njinendeka neni na visimo mukumileka vyuma evi. Oloni simbu ikaija omo kunjikendeka lalo neni na visimo, oloni njikendeka vya Tate kuli yeni na majwi aje amuzivisisa. 26 Omo litangwa lije likaija, mukamulomba mu lizina lyange, oloni kunjendeka ngwange njikamilombelela kuli Tate embwe, 27 omwo Tate ikeye vavenya wamizema. Wamizema omwo mwazema yange nakukulaela ngeci yange njatundile kuli Njambi. 28 Njatundile kuli Tate, co njezile ano a kaye, co ololo njilinakutunda ano a kaye njilinakuya kuli Tate.” 29 Asinoni vandongisi vendi vendekele kuli ikeye ngwavo, “Ololo unendeka vije vituzivisisa, kuwendekele lalo na visimo. 30 Twazivuka ngeci yove uzivuka vyuma vyoshe, co naumo wai napande akwihule vihula. Eci citulingisa ngeci tukulaele ngwetu yove watundile kuli Njambi.” 31 Yesu wavakumbulwile ngwendi, “Ololo mwakulaela ndi? 32 Simbu ilinakwija, co inete laja, omo yeni voshe mukashandoka, munu na munu akaya kwimbo lyendi, co njikasala ange lika. Oloni kunjikasala ange lika embwe, omwo Tate ali amo nange. 33 Njamileka vyuma evi ngeci mukale mu kwoloka akukala muli yange. Vaka-kaye vakamiyandesa. Oloni simpeni! Njinafungulula vaka-kaye!”
Yesu alombelela vandongisi vendi
1 Omo Yesu wamanesele kwendeka vyuma evi, wandwile mesho endi kwilu wendekele ngwendi, “Tate, simbu inete. Ana vumpau kuli Munove, ngeci Munove aane vumpau kuli yove. 2 Omwo wamwanene moko yakushwana vanu voshe, ngeci aane mwonyo wa myaka yoshe kuli vaje voshe vawamwanene. 3 Co mwonyo wa myaka yoshe ukewo ou, ngeci vakuzivuke yove Njambi umolika wa vushunga, co nakuzivuka Yesu Kilistu, uje iwatumine. 4 Njinasholola vumpau vwove ano asi, co njinamanesa vipangi vije viwanjanene ngeci njivilinge. 5 Ove Tate! Njane vumpau ku mesho ove ololo, vumpau vuje njakele navwo amo nove simbu kanda utange kaye. 6 “Njinasholola lizina lyove kuli vanu vaje vawanjanene kutunda akati ka vaka-kaye. Vapwile vove, co wanjanenevo. Vanononoka lijwi lyove, 7 co ololo vanazivuka ngeci vyuma vyoshe viwanjanene vyatunda kuli yove. 8 Omwo njavanene muzimbu uje uwanjanene, co vanautambula, co vanazivuka ngeci mwa vushunga yange njatundile kuli yove, co vanakulaela ngeci yove wanjitumine. 9 “Njilinakuvalombelela. Kunjilombelela vaka-kaye oloni njilombelela vaje vawanjanene, omwo vapwa vove. 10 Vyoshe njilinavyo vyapwa vyove, co vyoshe ulinavyo vyapwa vyange, co vumpau vwange vulinakusholoka muli vakevo. 11 Co ololo njilinakwija kuli yove, kunjesi ano a kaye lalo, oloni vakevo vali ano a kaye. Ove Tate wakujela! Vanyunge mu kwoloka na nzili ya lizina lyove, lizina lije liwanjanene, ngeci vapwe umo ngwe yove nange twapwa umo. 12 Simbu njakele navo, njavanyungile mu kwoloka na nzili ya lizina lyove, lizina lije liwanjanene. Njavanyungile mu kwoloka, naumo wai wavo wazimbalele, kuvanga lika munalume uje ivatumbwilile kunyonga, ngeci visoneka vipwe vya vushunga. 13 Oloni ololo njilinakwija kuli yove, co njilinakwendeka vyuma evi ano a kaye ngeci kuvwaelela kwange kukale mu vimbunge vyavo. 14 Njavanene muzimbu wove, co vaka-kaye vavazindile, omwo vakevo kesi vaka-kaye, ngwe omo yange kesi nji muka-kaye. 15 Kunjikulombo ngeci uvatundise ano a kaye embwe, oloni njikulomba ngwange uvanyunge kuli Citozi. 16 Ngwe omo yange kesi nji muka-kaye, vakevo kesi vaka-kaye. 17 Vakundike kuli yove vavenya mu vushunga, lijwi lyove lyapwa vushunga. 18 Njavatumine ano a kaye, ngwe omo yove wanjitumine ano a kaye. 19 Co omo ali vakevo njilikundika yange vavenya kuli yove, ngeci na vakevo lalo valikundike mu vushunga kuli yove. 20 “Kunjilombelela lika vakevo, oloni naveka lalo vaje vakulaela kuli yange omwo vukaleo vwavo. 21 Njivalombelela ngeci voshe vapwe umo. Ove Tate! Vakale muli yetu, ngwe omo yove wakala muli yange nange muli yove. Vapwe umo, ngecivene, vaka-kaye vakakulaele ngwavo kuma yove wanjitumine. 22 Njavanene vumpau ngwevuje vuwanjanene, ngecivene, vapwe umo, ngwe yove nange twapwa umo, 23 yange muli vakevo nove muli yange, ngeci vapwe vamutunu, ngeci vaka-kaye vazivuke ngwavo kuma yove wanjitumine, co uvazema ngwe omo wanjizema. 24 “Ove Tate! Unavana kuli yange, co njishaka vakale nange kuje kunjili, ngeci vakamone vumpau vwange, vumpau vuje vuwanjanene, omwo wanjizemene simbu kanda vatange kaye. 25 Yove Tate wa vushunga! Vaka-kaye kuvakuzivuka, oloni yange njikuzivuka, co ava vazivuka ngeci yove wanjitumine. 26 Njasholwele lizina lyove kuli vakevo, co anga njikalisholola, ngeci cizemo cije wanjizema naco cikale muli vakevo, co nange njikale muli vakevo.”
Yesu vamukwata
1 Omo Yesu wamanesele kulombela, waile amo na vandongisi vendi vajavukilile musambwa ya Muna Ndonga Kindelone. Mu mutambela uje mwakele lihya, co Yesu na vandongisi vendi vakovelelemo. 2 Yundasa uje wamwendele vungungu, wazivukile lalo ku mwela uje, omwo visimbu vyavingi Yesu wakele nakuliwanena kuje na vandongisi vendi. 3 Ngecivene, Yundasa waile ku citungu cije, waile amo na mashwalale va vaLoma na vamo vaka-kunyunga Njuvo ya Shukulu Kalunga vaje vavatumine kuli vakulunu va vaka-kukombelela amo na vaFaliseo, vakele na vitwa vezile na vindeya na mitetango ya tuhya. 4 OmoYesu wazivukile vyoshe vije vikalingiwa kuli ikeye, ngecivene, washwenyele kulutwe lwavo wavehwile ngwendi, “Iyajo mulinakushakezeka?” 5 Vakumbulwile ngwavo, “Yesu wa ku Nazaleta.” Yesu wendekele ngwendi, “Yange vene.” Yundasa, uje wamwendele vungungu wemanene amo navo. 6 Omo Yesu wendekele kuli vakevo ngwendi, “Yange vene,” velukile vuseta-nima, co vawililile asi. 7 Yesu wavehwile lalo ngwendi, “Iyajo mulinakushakezeka?” Co vendekele ngwavo, “Yesu wa ku Nazaleta.” 8 Yesu wakumbulwile ngwendi, “Njamilekele laja ngwange yange vene. Ngecivene, nga mulinakushakezeka yange, eceleni ava vaye.” 9 (Wendekele evi ngeci vije vyendekele vipwe vya vushunga ngwendi, “Tate, voshe vaje vawanjaanene naumo wai injinazimbalesao.”) 10 Asinoni Simoni Petulu wakele na mukwale, co waushomwene nakuteta litwi lyaku cilyo lya ndungo ya Muka-kukombelela Wakama. Lizina lya uje ndungo ikeye Maleka. 11 Yesu wendekele kuli Petulu ngwendi, “Shomeka mukwale wove mu cindalo cawo! Kuma uyongola ngwove kunjasa kunwa nganja eyi ya kayando yananjana Tate ndi?”
Yesu vamutwala kuli Anase
12 Ngecivene, mashwalale va vaLoma na mukulunu wavo muka-kushika na vaka-kushwana va vaYunda vakwatele Yesu, co vamukutile, 13 akulivanga vamutwalele kuli Anase akulivanga. Anase wapwile ishemweno ya Kayafase, uje wapwile Muka-kukombelela Wakama ku mwaka uje. 14 Ikeye Kayafase uje wanangwile vaka-kushwana va vaYunda ngwendi mwamuvwa munu umo kutsila vanu voshe.
Petulu avyana Yesu
15 Simoni Petulu na ndongisi mukwavo vakavele Yesu. Uje Muka-kukombelela Wakama wazivukile uje ndongisi mukwavo, ngecivene, uje ndongisi mukwavo wakovelele amo na Yesu mukati ka cipango ca njuvo ya Muka-kukombelela Wakama, 16 Omo Petulu wemanene anja ku cikolo. Co uje ndongisi mukwavo uje yazivukile Muka-kukombelela Wakama watuukile anja, wendekele kuli uje mumbanda wanyungile ku cikolo, co wakovelesele Petulu mukati. 17 Uje mumbanda wakele ku cikolo wehwile Petulu ngwendi, “Yove lalo kuwapwile umo wa vandongisi va munalume ou ndi?” Petulu wakumbulwile ngwendi, “Embwe, Kesi yange.” 18 Kwakele lisika, co vangamba na vaka-kunyunga vavwekele tuhya. Vemanene nakuzengeleka ku liko nakwota. Na Petulu lalo waileko wemanene nakwota amo navo.
Muka-kukombelela Wakama ehula Yesu
19 Muka-kukombelela Wakama wehwile Yesu vya vandongisi vendi na a vilongesa vyendi. 20 Yesu wakumbulwile ngwendi, “Visimbu vyoshe njakele nakwendeka citona-mesho ku vanu voshe, vilongesa vyange vyoshe njavilongeselele mu masinangonge na mu Njuvo ya Shukulu Kalunga, kuje vakele nakukungulukila vanu voshe. Kunjendekele cuma cimo mu vushweke. 21 Omo vikajo unjihwila? Ihula vanu vaje vatolililile kuli yange. Vehule vije vinjavalekele, vazivuka vinjendekele.” 22 Omo Yesu wendekele ngacije, umo wa vaka-kunyunga wemanene kuje wapupile Yesu mbanda wendekele ngwendi, “Yove ukumbulula Muka-kukombelela Wakama ngacije ndi?” 23 Yesu wamukumbulwile ngwendi, “Nga njinendeka mwamuvi, leka vanu voshe vali kuno ngeci vazive. Oloni nga njinendeka mwamuvwa, cooni vikajo unanjipupila?” 24 Asinoni Anase watumine Yesu kuli Kayafase Muka-kukombelela Wakama oku anga vanamukutila.
Petulu avyana Yesu lalo
25 Petulu wemanene kuje vene nakwota tuhya. Ngecivene, vakwavo vendekele kuli ikeye ngwavo, “Yove lalo kuwapwile umo wa vandongisi va munalume ou ndi?” Oloni Petulu wavyanene ngwendi, “Embwe, kesi yange.” 26 Umo ngamba wa Muka-kukombelela Wakama, kavushoko ka uje munalume yavatwile Petulu litwi, wehwile ngwendi, “Kuma kunjakumwene amo nendi mu lihya ndi?” 27 Petulu wendekele lalo ngwendi, “Embwe.” Aje vene ndemba watambekele.
Yesu vamutwala kuli Pilato
28 Mutondo-tondo vatundisile Yesu ku njuvo ya Kayafase vamutwalele ku lipela lya nguvulu. Vamyata va vaYunda kuvakovelele mukati ka lipela, omwo kuvashakele kulijwalesa, ngeci vakase kulya Ciwano ca Pasovala. 29 Ngecivene, Pilato watuukile anja waile kuli vakevo wavehwile ngwendi, “Mulonga muka munamuwana nawo ou munalume?” 30 Vamukumbulwile ngwavo, “Nga munalume ou kakele na mulonga nga kutwamunenele kuli yove.” 31 Pilato wendekele kuli vakevo ngwendi, “Yeni nendi yeni vavenya mukamusompe ngwe ku lishiko lyeni.” Vakumbulwile ngwavo, “Kucitava yetu kutsiya munu.” 32 (Eci calingiwile ngwe majwi aje endekele Yesu akutumbula kutsa kuje akatsa apwe a vushunga.) 33 Pilato wakovelele lalo mu lipela wasanene Yesu wamwihwile ngwendi, “Yove mwene wa vaYunda ndi?” 34 Yesu wakumbulwile ngwendi, “Cihula eci citunda kuli yove vavenya nambe veka vanakuleka vyange?” 35 Pilato wakumbulwile ngwendi, “Unayongola ngwove yange nji kaYunda ndi? Vanu vove na vakulunu va vaka-kukombelela vakevo vanakunena kuli yange. Unalingi vika?” 36 Yesu wakumbulwile ngwendi, “Vumwene vwange kesi vwa ano a kaye embwe, nga vumwene vwange vwapwile vwa ano a kaye, nga vandongisi vange vanalu kutewa vanjana kuli vaka-kushwana va vaYunda. Oloni vumwene vwange kesi vwa ano a kaye!” 37 Pilato wamwihwile ngwendi, “Ngecivene, kuma yove unapu u mwene ndi?” Yesu wakumbulwile ngwendi, “Omo vene muunendeka ngwove nji mwene. A cuma eci vene njasemukile nakwija ano a kaye kwambulula vushunga. Woshe nakundama ku vushunga atolilila majwi ange.” 38 Co Pilato wehwile ngwendi, “Vushunga vukevwo vuka?”
Yesu vamusompela kutsa
Asinoni Pilato watuukile lalo anja kuli vanu wendekele kuli vakevo ngwendi, “Kunjawanene cuma cakumwanena mulonga. 39 Oloni ngwe ku cilika ceni, a simbu ya Ciwano ca Pasovala njikecela cinzinda umo. Mushaka njimyecelele mwene wa vaYunda ndi?” 40 Vamukumbulwile nakutambeka manene ngwavo, “Embwe, kesi ikeye! Tushaka Mbalambasa!” (Mbalambasa wapwile lipwepwe.)
1 Asinoni Pilato watambwile Yesu, co wamupupile makote. 2 Co mashwalale vavindile cilongo ca mambimbo vacakele ku mutwe wendi, co vamuzikile cikoveyo cacilaja cakuvenga, 3 vezile kuli ikeye vendekele ngwavo, “A vulye Mwene wa vaYunda!” Co vashwenyele kuli ikeye vamupupile vimbanda. 4 Pilato watuukile lalo anja wendekele ku mbunga ngwendi, “Kengeni, njimutuwisa anja kuli yeni ngeci muzivuke ngweni kunjawanene mulonga wakumuhisa nawo.” 5 Ngecivene, Yesu watuukile anja, wazalele cilongo ca mambimbo na cikoveyo cacilaja cakuvenga. Pilato wendekele kuli vakevo ngwendi, “Kengeni! Munu ou!” 6 Omo vakulunu va vaka-kukombelela na vaka-kunyunga Njuvo ya Shukulu kalunga vamumwene, vatambekele ngwavo, “Mushukike a cilindakano! Mushukike a cilindakano!” Pilato wendekele kuli vakevo ngwendi, “Mwambateni mukamushukike a cilindakano. Omo kunjawanene mulonga wakumuhisa nawo wai.” 7 Mbunga vamukumbulwile ngwavo, “Tuli na lishiko lije lyendeka ngeci napande vene kutsa, omwo nalipwisa ikeye vavenya Muna Njambi.” 8 Omo Pilato wazivile lijwi eli, co wazivile manene lyova. 9 Wakovelele lalo mu lipela, co wehwile Yesu ngwendi, “Utunda kulijo?” Oloni Yesu kamukumbulwile. 10 Pilato wendekele kuli ikeye ngwendi, “Kuma shove kwendeka nange ndi? Anuka ngeci ngwove yange njili na moko yakukwecela ngoco, co lalo njili na moko yakukushukika a cilindakano.” 11 Yesu wakumbulwile ngwendi, “Yove uli na moko ali yange omwo Njambi nakwanayo. Ngecivene, munalume ou nanjinena kuli yove ali na mulonga wa vuvi vwakutuvakana.” 12 Omo Pilato wazivile evi, wakele na cizango cakwecela Yesu. Oloni mbunga vatambekele ngwavo, “Nga umwecela, kesi u musamba wa Sezale! Woshe alipwisa ikeye vavenya mwene napu citozi ca Sezale!” 13 Omo Pilato wazivile majwi awa, watuwisile Yesu anja, co watumbamene a citumbamo cakusompela mu mwela uvatumbwile ngwavo, “Mutambela Wakujala na Mamanya.” (Mu ciHevelu ngwavo, “Ngambata.”) 14 Yapwile simbu ya kuyehi nakuteuka kwa litangwa omo kanda litangwa lyete lya Ciwano ca Pasovala. Pilato wendekele kuli vanu ngwendi, “Mwene yeni ou!” 15 Vatambekele ngwavo, “Mutsiye! Mutsiye! Mushukike a cilindakano!” Pilato wavehwile ngwendi, “Kuma mushaka njishukike mwene yeni a cilindakano ndi?” Vakulunu va vaka-kukombelela vakumbulwile ngwavo, “Kutwesi na mwene weka lalo wai kuvanga Sezale!” 16 Asinoni Pilato wavanene Yesu ngeci vamushukike a cilindakano.
Yesu vamushukika a cilindakano
Ngecivene, vatambwile Yesu. 17 Yesu watuukile anja oku nambata cilindakano cendi vavenya, co vezile ku “Mutambela wa Cikola,” ngwe muvautumbwile. (Mu ciHevelu vautumbula ngwavo, “Ngolongota.”) 18 Kuje vakamushukikile a cilindakano, co vashukikile lalo vanalume vavali, umo kusambwa imo mukwavo kusambwa ikwavo, co Yesu wakele mukati kavo. 19 Pilato wasonekele majwi a livaya walyakele a cilindakano. Wasonekeleo ngwendi, “Ou ikeye Yesu wa ku Nazaleta, Mwene wa vaYunda.” 20 Vanu vavangi valavele majwi awa, omwo ku mutambela kuje vashukikilile Yesu kwapwile kuyehi na nganda. Co majwi aje vaasonekele mu ciHevelu, na mu ciLatini, na mu ciNgiliki. 21 Vakulunu va vaka-kukombelela vendekele kuli Pilato ngwavo, “Kesi usonekeo ngwove, ‘Mwene wa vaYunda,’ oloni soneka ngwove, ‘Munalume ou wendekele ngwendi, Nji Mwene wa vaYunda.’ ” 22 Pilato wakumbulwile ngwendi, “Eci njasoneka njacisoneka laja kunau.” 23 Omo mashwalale vamanesele kushukika Yesu a cilindakano, vambatele vuzalo vwendi vavupangele muwana, lishwalale umo na umo wambateleo cimo. Oloni vambatele lalo cikoveyo cendi cacilaja, vacitongele na mutongo umolika wa nanga, kucakele na mitongo yaingi capwile camuzinguluke. 24 Mashwalale valyendekesele umo na mukwavo ngwavo, “Kesi tucitavule, oloni tuteni n̄ela tumone iya acambata.” Eci cilingiwe ngeci visoneka vipwe vya vushunga omo vyendekele ngwavyo, “Vanalipangezela vuzalo vwange akati kavo, co vatele n̄ela a cikoveyo cange cacilaja.” Co omu mukemwo muvalingile mashwalale. 25 Vemanene kuyehi na cilindakano ca Yesu vapwile vaina, na ndokazi ya vaina, na Maliya munakazi wa Kolopase, na Maliya Mangandalena. 26 Yesu wamwene vaina na uje ndongisi yazemene manene vanemana kuje, ngecivene, wendekele kuli vaina ngwendi, “Ove munakazi kenga munove ou.” 27 Asinoni wendekele lalo kuli uje ndongisi ngwendi, “Kenga vanyoko ava.” Co kutunda a simbu ije uje ndongisi wamutwalele ku njuvo yendi.
Kutsa kwa Yesu
28 Omo Yesu wazivukile ngeci ololo vyuma vyoshe vinahu, co mukushulisa visoneka ngeci vipwe vya vushunga wendekele ngwendi, “Njili na lihwila.” 29 Kuje kwakele lilonga lyakushula na vinyu vyakulula,co vajavekele mupelo mu vinyu, vawakele ku munango wa hisope *, co vaujundwile nakuwaka ku kanwa kendi. 30 Omo Yesu wanwile vije vinyu wendekele ngwendi, “Kunau!” Co watepwile mutwe wendi wecelele munzinzime wendi.
Yesu vamutiva likunga ku vimati
31 Asinoni vaka-kushwana va vaYunda vehwile Pilato ngeci avatavese kupokola mendi a vaje vanalume vaje vavashukikile, co nakushukula mivila yavo a vilindakano. Valombele ngeci omwo lyapwile litangwa Lyamucitanu, co kuvashakele ngeci mivila ikale a vilindakano a Litangwa Lyakuhwima, omwo alikaki lyapwile Litangwa Lyakuhwima lyakujela. 32 Ngecivene, mashwalale vaile, co vapokwele mendi a munalume uje wakulivanga na mendi amukwavo uje wamucivali, vaje vavashukikile amo na Yesu. 33 Oloni omo vetele kuli Yesu, vamumwene natsi laja, ngecivene, kuvapokwele mendi endi. 34 Umo wa vaje mashwalale, wativile Yesu likunga ku vimati, co aje vene maninga na mema vyetikile. 35 (Uje wamwene evi muvyalingiwile wavyambulwile, ngecivene, neni lalo mukulaele. Vije vyendekele vinapu vya vushunga, co nazivuka ngeci endeka vushunga.) 36 Omwo evi vyalingiwile ngeci visoneka vipwe vya vushunga omo vyendeka ngwavyo, “Vitsiya vyendi nacimo cai cikapokokako.” 37 Co lalo visoneka vikwavo vije vyendeka ngwavyo, “Vanu vakakenga uje ivativile likunga.”
Yesu vamutsinda
38 Munima ya vyuma evi, Yosefa wa ku Alamatiya, walombele Pilato ngeci akambate muvila wa Yesu. (Yosefa wapwile ndongisi ya Yesu, oloni wacilingile mu vushweke, omwo wazivile lyova lya vaka-kushwana va vaYunda.) Pilato wamulekele ngeci asa kwambata muvila wa Yesu, ngecivene, Yosefa waile, co wambatele muvila wa Yesu. 39 Nikondemo, uje akulivanga waile kuli Yesu vutsiki, waile amo na Yosefa, wambatele makilo akupwa 30 a n̄undu, yakukumbasana na miila na malimangango. 40 Vaje vanalume vavali vambatele muvila wa Yesu vauzengelele a vinanga vya linyu amo na n̄undu ngwe ku cilika ca vaYunda omo vavwaesa muvila ngeci vautsinde. 41 Ku mutambela kuje kuvashukikilile Yesu, kwakele lihya, co muje mu lihya mwakele mbumbo yaiha muje kanda vatsindemo munu. 42 Ngecivene, omwo litangwa lije lyakele kuyehi na Litangwa Lyakuhwima, co omwo ije mbumbo yakele kuyehi, valangekelemo muvila wa Yesu.
Mbumbo yamupulungwa
1 A mungulungengu a litangwa lya Calumingo, Maliya Mangandalena waile ku mbumbo, co wamwene limanya vanalitundisa ku mbumbo. 2 Ngecivene, washatukilile kuli Simoni Petulu na ndongisi mukwavo uje yazemene Yesu, co wavalekele ngwendi, “Mwene vanamutundisa mu mbumbo, co kutuzivuka oku vanamwaka!” 3 Asinoni Petulu na uje ndongisi mukwavo vaile ku mbumbo. 4 Voshe vavali vashatukile, oloni uje ndongisi mukwavo washatukile manene kutuvakana Petulu, co wetele ku mbumbo akulivanga. 5 Co wakulamene nakushumbila mu mbumbo, co wamwene vinanga vya linyu, oloni kakovelelemo. 6 Asinoni Simoni Petulu wamukavele munima, wetele, co wakovelele mu mbumbo. Wamwene vinanga vya linyu vili asi avyolika 7 co na nanga ije yakele ku mutwe wa Yesu. Kuyakele amo na vinanga vya linyu oloni yakuzenga ayolika. 8 Asinoni ndongisi mukwavo, uje walivangele kweta ku mbumbo, nendi lalo wakovelelemo, co wamwene, co wakulaelele. 9 (Omwo nameme ngoco kuvazivisisile visoneka vije vyendekele ngwavyo napande kusanguka ku vatsi.) 10 Asinoni vaje vandongisi velukile kwimbo.
Yesu alisholola kuli Maliya Mangandalena
11 Oloni Maliya wemanene ku mbumbo nakulila. Co omo wakele nakulila, wakulamene nakukenga mu mbumbo 12 co wamwene tungelo vavali vanazala vuzalo vwakutoka, vanatumbama kuje kwakele muvila wa Yesu, umo ku mitwe mukwavo ku mendi. 13 Vamwihwile ngwavo, “Munakazi, vika ulinakulilila?” Wavakumbulwile ngwendi, “Vanambata Mwene yange, co kunjizivuka oku vanamwaka!” 14 Asinoni omo wendekele evi watengulukile nakukenga kunima wamwene Yesu nemana, oloni kazivukile ngeci ikeye Yesu. 15 Yesu wamwihwile ngwendi, “Ove munakazi, vika ulinakulilila? Iyajo ushakezeka?” Maliya wayongwele ngwendi amo ndimi, ngecivene, wendekele kuli ikeye ngwendi, “Mwene, nga yove unamwambata njileke oku unamwaka, co njiyeko njikamwambate.” 16 Yesu wendekele kuli ikeye ngwendi, “Maliya!” Maliya watengulukile, co wendekele nendi mu ciHevelu ngwendi, “Lamboni!” (Kulumbununa ngwavo, “Mulongisi.”) 17 Yesu wamulekele ngwendi, “Kesi unjikwate, omwo kanda njilonde kwilu kuli Tate. Oloni ya kuli vasamba vange ukavaleke ngwove njilinakwiluka kuli Tate ikeye Ishavo, kuli Njambi yange ikeye Njambi yavo.” 18 Ngecivene, Maliya Mangandalena waile nakuleka vandongisi ngwendi Njinamono Mwene, co wavalekele vije vyamulekele Yesu.
Yesu alisholola kuli vandongisi vendi
19 Ku cingwezi cije vene ca litangwa Lyakulivanga ku Calumingo, vandongisi valikungulwile amolika mu njuvo muje mapito apwile akupata, omwo vakele na lyova lya vaka-kushwana va vaYunda. Asinoni Yesu wezile, co wemanene akati kavo wendekele kuli vakevo ngwendi, “Kwoloka kukale neni.” 20 Omo wamanesele kwendeka evi, wavamwesele mu mavoko endi na ku vimati vyendi. Asinoni vandongisi vavwaelelele omo vamwene Mwene. 21 Yesu wendekele lalo kuli vakevo ngwendi, “Kwoloka kukale neni. Ngwe omo Tate wanjitumine, ngecivene, nange lalo njimituma.” 22 Co omo wamanesele kwendeka evi, asinoni wahwimininine ali vakevo wendekele ngwendi, “Tambuleni Munzinzime Wakujela. 23 Nga mukasambesa vuvi vwa vanu, vakavasambesavwo, nga kumukavasambesa, kuvakavasambesavwo.”
Yesu na Tomasi
24 Umo wa vaje vandongisi likumi na vavali, Tomasi (uje vatumbwile Muna mpasa), kakeleko omo Yesu wezile. 25 Ngecivene, vandongisi vakwavo vamulekele ngwavo, “Tunamono Mwene!” Oloni Tomasi wendekele kuli vakevo ngwendi, “Kunjikulaela kuvanga njinamono viveve vya vimbambo mu mavoko endi, co nakukovelesa mulavo wange mu vije viveve nakukwata ku vimati vyendi.” 26 Omo kwetile matangwa atanu na atatu vandongisi vakele lalo mu njuvo, co Tomasi wakele amo navo. Vapatele mapito, oloni Yesu wezile wemanene akati kavo wendekele ngwendi, “Kwoloka kukale neni.” 27 Asinoni wendekele kuli Tomasi ngwendi, “Aka mulavo wove omu, co kenga ku mavoko ange, co olola livoko lyove ngeci ukwate ku vimati vyange. Kesi ulinge vimata, oloni kulaela lika!” 28 Tomasi wamukumbulwile ngwendi, “Mwene yange na Njambi yange!” 29 Yesu wendekele kuli ikeye ngwendi, “Unakulaela omwo unanjimono ndi? Vanavezika vaje vanakulaela nambe kuvanjimwene!”
Vutumbe vwa livulu eli
30 Yesu walingile vizivukiso vyavingi vyeka na vyeka ku mesho a vandongisi vendi vije kuvasonekele mu livulu eli. 31 Oloni evi vanavisoneka ngeci mukulaele ngweni Yesu ikeye Wakuvwavesa, Muna Njambi, co akukulaela kuli ikeye mukale na mwonyo.
Yesu alisholola kuli vandongisi vatanu na vavali
1 Munima yevi, Yesu walisholwele lalo kuli vandongisi vendi ku Lishali lya Timbelyase. Co omu mukemwo muvyalingiwile. 2 Simoni Petulu na Tomasi, uje vatumbwile “Muna mpasa,” na Natanele (uje watundile ku Kana mu Ngalileya), na vana va Zembendeo na vandongisi veka vavali va Yesu vakele amo. 3 Simoni Petulu wendekele kuli vakwavo ngwendi, “Njiya nakuta visi.” Vakwavo vamulekele ngwavo, “Netu tuya nove.” Ngecivene, vaile mu vwato, oloni vutsiki vwoshe vuje naumo isi ivakwatele wai. 4 A mungulungengu, Yesu wemanene kumukulo wa lishali, oloni vandongisi kuvazivukile ngeci uje ikeye Yesu. 5 Asinoni wendekele kuli vakevo ngwendi, “Eni vakwenje, munakwatako visi ndi?” Vakumbulwile ngwavo, “Embwe, naumo isi tunakwata wai.” 6 Wendekele kuli vakevo ngwendi, “Teni linimbwa lyeni ku mutambela wacilyo ca vwato, co mukwata visi.” Ngecivene, vatele linimbwa, co kuvasele kukoka lalo linimbwa, omwo atsile visi vavangi. 7 Ndongisi uje yazemene Yesu wendekele kuli Petulu ngwendi, “Ou ikeye Mwene!” Omo Simoni wazavile ngeci ikeye Mwene, wazalele cikoveyo cendi(omwo washulwile vuzalo vwendi), co watumbukilile mu lishali. 8 Oloni vandongisi vakwavo vezile mu cikuma mu vwato, vakele nakukoka linimbwa lyakushula lya visi. Omwo kuvakele kulyala na nunda, oloni yapwile nunda ya mamita 100 . 9 Omo vetele ku nunda, vamwene manungu alinakwenyuka, co akele visi na likende. 10 Asinoni Yesu wendekele kuli vakevo ngwendi, “Neneni visi vamo vamunakwata.” 11 Ngecivene, Simoni Petulu wakovelele mu vwato, co wakokelele linimbwa ku nunda lyakushula na visi vakama, vapwile 153, co nameme vapwile visi vavangi, anga linimbwa kulyatavukile. 12 Yesu wendekele kuli vakevo ngwendi, “Ijeni mulyaule.” Naumo wai wa vaje vandongisi wasele kumwihula ngwendi, “Yove iyajo?” Omwo vazivukile ngwavo ikeye Mwene. 13 Ngecivene, Yesu wezile, wanonele likende wavanene, co walingile ngeci lalo na ku visi. 14 Eyi yapwile simbu yamucitatu yalisholwele Yesu kuli vandongisi vendi omo nakusanguka ku vatsi.
Yesu na Petulu
15 Omo vanalyaula laja, Yesu wendekele kuli Simoni Petulu ngwendi, “Simoni muna Yowano, wanjizema kutuvakana ava ndi?” Petulu wakumbulwile ngwendi, “Eyo Mwene, uzivuka ngeci njakuzema.” Yesu wendekele kuli ikeye ngwendi, “Nyunga vana va vimanga vange.” 16 Yesu wendekele simbu yamucivali ngwendi, “Simoni muna Yowano, wanjizema ndi?” Petulu wakumbulwile ngwendi, “Eyo Mwene, uzivuka ngeci njakuzema.” Yesu wendekele kuli ikeye ngwendi, “Nyunga vimanga vange.” 17 Yesu wendekele simbu yamucitatu ngwendi, “Simoni muna Yowano, wanjizema ndi?” Petulu wakele na vusiwa omwo Yesu wamwihwile simbu yamucitatu ngwendi, “Wanjizema ndi?” Co Petulu wendekele kuli ikeye ngwendi, “Mwene yove uzivuka vyuma vyoshe, uzivuka ngeci njakuzema!” Yesu wendekele kuli ikeye ngwendi, “Nyunga vimanga vange. 18 Mwa vushunga njikuleka ngwange, omo wapwile mukwenje, walivwaesele nakuya kwoshe kuwashakele, oloni omo unakuluvala, ukolola mavoko ove, co weka akakukuta nakukutwala kuje kuwashakele kuya.” 19 (Akwendeka evi, Yesu watumbwile kutsa kuje kwakatsa Petulu nakunena vumpau kuli Njambi.) Co Yesu wendekele kuli ikeye ngwendi, “Njikave!”
Yesu na uje ndongisi mukwavo
20 Petulu watengulukile wakengele munima yendi wamwene ndongisi mukwavo, uje yazemene Yesu, uje wajendamenene ali Yesu a simbu yakulya, co wamwihwile ngwendi, “Mwene, iyajo akakwenda vungungu?” 21 Omo Petulu wamumwene, wehwile Yesu ngwendi, “Mwene, vatico ali ou munu?” 22 Yesu wamukumbulwile ngwendi, “Nga njishaka ngwange ayoye noo njikaija, eci cinapu vatijo kuli yove? Yove njikave lika!” 23 Ngecivene, muzimbu washandokelele akati ka vaka-kukava Yesu ngeci ndongisi ou kakatsi embwe. Oloni Yesu kendekele ngwendi kakatsi, oloni wendekele ngwendi, “Nga njishaka ngwange ayoye noo njikaija, eci cinapu vatijo kuli yove?” 24 Ikeye vene ndongisi uje wambulwile vyuma evi, uje lalo wasonekele evi, co tunazivuka ngwetu vije vyendekele vinapu vya vushunga.
Mamaneselelo
25 Oloni kuvili vyuma vyeka vyavingi vije vyalingile Yesu. Nga vavisonekele vyoshe cimo na cimo, njiyongola ngwange nga kaye koshe kuvasele kuwana mwela wakutulikila mavulu oshe aje vanasoneka.