Ɓǝ Faa ciŋ dǝfuu
1 Kǝpel ka Masǝŋ ɓah joŋ fan a ba, Ɓǝ Faa no, Ɓǝ Faa ah a no ne Masǝŋ, Ɓǝ Faa ah ako ye Masǝŋ. 2 Ɓǝ Faa ah a no ne Masǝŋ daga tǝtǝŋ ah sǝ. 3 Masǝŋ joŋ fan daŋ mor ahe, mor kǝsyil fan mai mo joŋ ɓo daŋ ka gak joŋ bai ah koo vaŋno ya. 4 Ɓǝ Faa ah a ne cee pǝzyilli, cee ah a sǝǝ cok nyi zana. 5 Cokfãi ah a sǝǝ pǝ cokfuu, amma cokfuu ka gak nĩi ko ya. 6 Dǝɓ ki no Masǝŋ pee ge, a ɗii ne Yohana. 7 Ge na pa syedowal ka faa ɓǝ tǝ cokfãi, mor ka za daŋ mo laara ɓǝ faa ah ɓe, mo nyiŋra. 8 Ako ye ka cokfãi ne suu ah ya, amma ako ye pa syedowal ma gin faa ɓǝ tǝ cokfãi. 9 Cokfãi matǝ goŋga ye ge ɓo wo sǝrri, tǝ sǝǝ cok tǝ za daŋ. 10 Ɓǝ Faa ah a no wo sǝrri, Masǝŋ joŋ sǝr ɓo mor ahe, amma so sǝr tǝ ko ya. 11 Ge wo zan ahe, amma zan ah zyii nyiŋra ko ya. 12 Amma za mai mo nyiŋra ko daŋ, nyi swah nyi ra ka mo ciŋra wee Masǝŋ. 13 Ciŋra wee Masǝŋ ɓo ka ne fahlii dǝfuu moo joŋ wo sǝr nyeeko moo ciŋ we dǝɓ ki ne ya. Mor Masǝŋ ye Pa ɓǝǝra. 14 Ɓǝ Faa ciŋ dǝfuu ge kaa kǝsyil mana. Ako ye dǝɓ tǝ gboŋgboŋ ne dǝɓ tǝ goŋga, a pǝyǝkki. Ru kwo yǝk We tǝ vaŋno nyẽe Pam mo yii ko ɓo ɓe. 15 Yohana joŋ syedowal tǝl ah ɓyaŋ ɓǝ faa: Ako ye Dǝɓ mai me faa ɓǝ ah Dǝɓ ki no tǝ gin fahfal ɓe, amma a pǝyǝk kal me ɓe. Mor a kǝpel ɓe ɓaaɓe. 16 Fan mai Ɓǝ Faa mo ne daŋ na ɗǝǝ fan ah ta, so tǝ joŋ gboŋgboŋ wo man ga pelle. 17 Masǝŋ nyi ɓǝ lai nyi za ne jol Mosus, amma fahlii gboŋgboŋ ne goŋga ge ne Yesu Kristu. 18 Dǝɓ ma kwan Masǝŋ kǝka, amma We tǝ vaŋno mai ako ye mo Masǝŋ, a no ne Pam daga ɓaaɓe, ako ye ge cuu Masǝŋ Pam nyi na.
Syedowal Yohana ma joŋ baptisma
19 Syedowal mai Yohana mo joŋ a naiko. Ne cok Yahuduen yaŋ Jerusalem mo peera za joŋzahsyiŋ ne Lewitien ge wol ah ka fii ko, amo ye zune, 20 Yohana muŋ ɓǝ ah ya, amma zyii zah ɓǝǝ wat faa: Ame ye ka Kristu ya. 21 So fiira ko: Amo ye zu sye ne? Wala mo Elias ne? Yohana zyii faa: Ame ye ka ko ya. So fiira ko faɗa: Amo ye Profeto Masǝŋ mai ru tǝ byak gin ah ne? Zyii zah ɓǝǝ faa: Ame ye ka ta. 22 So faara nyi ko: Amo ye zu sye kpak ne? Mor ka ru ge faa ɓǝ ah nyi za mai mo peera ru ge, mo faa ɓǝ fẽe tǝ suu ɓo ne? 23 Yohana zyii faa: Ame ye kyaŋ mai mo tǝ ɓyaŋ ɓǝ kǝsyicok faa: We zyeɓ fahlii Dǝɓlii uu pǝsãhe, tǝgbana mai profeto Esaia mo faa. 24 Kǝsyil za mai mo peera ra ge wo Yohana, Farisien no gŋ. 25 So fiira ko: Amo ye ka Kristu ya, mo ye ka Elias ya, mo ka Profeto Masǝŋ ya ta, ko mo so tǝ joŋ baptisma mor fẽene? 26 Yohana zyii zah ɓǝǝ faa: Ame, me tǝ joŋ baptisma nyi we ne bii, amma Dǝɓ ki no kǝsyil ɓiiri, we tǝ ko ya. 27 A no tǝ gin fahfal ɓe, amma me kii nǝn pǝkoŋ ka wǝǝ suu zah sǝɓal ɓal ah ya. 28 Fan mai daŋ joŋ yaŋ Betaania kah el Yordan nǝzakǝŋhaa pǝ cok mai Yohana mo tǝ joŋ baptisma gŋ.
Wepǝsãhm Masǝŋ
29 Tǝ'nan ah Yohana kwo Yesu tǝ gin wol ahe, so faa: We ẽe o, Wepǝsãhm Masǝŋ ma ɓaŋ faɓe' sǝr o. 30 Ako ye Dǝɓ mai me joŋ syedowal tǝl ah me faa Dǝɓ ki no tǝ gin fahfal ɓe, amma a pǝyǝk kal me ɓe. Mor a kǝpel ɓe ɓaaɓe. 31 Me yea tǝ, azu ye ko ne, me tǝ ya, amma me ge tǝ joŋ baptisma ne bii mor ka cuu ko nyi za Israel. 32 Yohana so faa: Me kwo Tǝ'yak ɗǝr gin sǝŋ ge tǝgbana matǝvaa ge kaa tǝl ahe. 33 Ka me ɓah tan zu ye ko ne laŋ ya ba, amma Masǝŋ mai mo pee me ge tǝ joŋ baptisma ne bii faa nyi me: Mo ga kwo Tǝ'yak ɗǝr gin sǝŋ gin kaa tǝ Dǝɓ ki, Dǝɓ ah ako yee ga joŋ baptisma ne Tǝ'yak Matǝdaŋdaŋ. 34 Yohana faa: 'Manna me kwo ɓe, me tǝ faa ɓǝ ah nyi we, ako ye We Masǝŋ.
Za syee mor Yesu ma kǝpel ahe
35 Na tǝ'nanŋhaa ah Yohana so ge pǝ cok ah ne za syee mor ah matǝ gwa kpǝ. 36 Ne cok mo kwo Yesu tǝ pǝ̃ǝ ganne, so faa: We ẽe o, Wepǝsãhm Masǝŋ yo. 37 Za syee mor Yohana matǝ gwa mo laara Yohana mo tǝ faa naiko, so kalra ge mor Yesu. 38 Yesu pak nahnǝn kwo ra tǝ syee mor ahe, so fii ra: We kyeɓ fẽene? Faara nyi ko: Rabbi (tǝgba faa: Pa cuu fanne), mo kaa ɓo kẽne? 39 Zyii zah ɓǝǝ faa: We ge o, ka we ẽe o. So kalra ge ẽera cok mai mo kaako ɓo gŋ. So kaara lil moo ne ki, cok ah a tǝgbana cok com nai. 40 Dǝɓ vaŋno kǝsyil za matǝ gwa mai mo laara ɓǝ faa Yohana mo so kalra ge tǝ syee mor Yesu, a ɗii ne Andreas, naa mah Simon Petar o. 41 Ge lwaa naa mah ah Simon kǝpelle, faa nyi ko: Ru lwaa Mesia kŋ ɓe. (Tǝgba faa: Kristu.) 42 So zaŋ ko ge wo Yesu ne ko. Yesu ẽe ko faa: Amo Simon we Yohana, a ga ɗiira mo ne Kefas. (Tǝgba faa: Tǝsalle.)
Yesu ɗii Filip ne Natanael
43 Na tǝ'nanŋhoo ah Yesu tǝ ga sǝr Galile, zyaŋ ne Filip faa nyi ko: Mo ge syee mor ɓe. 44 Yaŋ Filip a Betsaida mai Andreas ne Petar mo kaara ɓo gŋ. 45 Filip zyaŋ ne Natanael, faa nyi ko: Ru lwaa Dǝɓ mai Mosus mo faa ɓǝ ah pǝ ɗerewol ɓǝ lai tǝkine profetoen daŋ mo faara ɓǝ ah kŋ ɓe, ako Yesu we Yuseɓ ma yaŋ Nazaret. 46 Natanael faa nyi ko: Fan sãh sye gee Nazaret ge ne? Filip zyii faa nyi ko: Mo ge o, ka mo ẽe o. 47 Yesu kwo Natanael tǝ gin wol ah so faa kal ahe: We ẽe o, dǝɓ Israel matǝ goŋga yo, ka vǝrvǝr a. 48 Natanael fii ko: Mo tǝ me gin kẽne? Yesu zyii faa nyi ko: Me kwo mo mor kpuu wuu ka Filip ɓah ɗii mo ya ba. 49 So Natanael faa nyi ko: Pa cuu fanne, amo ye We Masǝŋ, mo Goŋ Israel. 50 Yesu faa nyi ko: Mo nyiŋ ɓǝ ah ɓo mor mai me faa nyi mo, me kwo mo mor kpuu wuu ko ne? Mo ga kwo fan malii ah ra ma kal maiko. 51 So faa faɗa: Ɓǝ mai me tǝ faa nyi we goŋga yo, we ga kwo sǝŋ gbǝrri, angeloi Masǝŋ yeera ga sǝŋ, a so ɗǝrra ge sǝŋ tǝ We Dǝfuu.
Tǝ ɓaŋra ŋwǝǝ yaŋ Kana
1 Fahfal ah ne zah'nan sai ah tǝ ɓaŋra ŋwǝǝ yaŋ Kana sǝr Galile. Mah Yesu ge ɓo gŋ. 2 Ɗiira Yesu ne za syee mor ah gera cok ɓaŋ ŋwǝǝ ah ta. 3 Ne cok ah bii lee kpuu vin mo pee jol ɓǝǝra, mah Yesu faa nyi ko: Bii lee kpuu vin pee jol ɓǝǝ ɓe. 4 Yesu faa nyi ko: Mǝǝ, ɓǝ ɓe saaŋ mo ɗǝne? Cok ɓe ɓah gin a ba. 5 So mah Yesu faa nyi za yeɓɓe: Ɓǝ mai moo ga faako nyi we daŋ we joŋ fan ahe. 6 Pǝ cok ah cii bii tǝsal no gŋ yea, Yahuduen rǝk ra ɓo gŋ mor ka vãh fan ne ko tǝgbana zah fan joŋ ɓǝǝ moo joŋra, cii manyeeki ah a ga daŋ gwa gwa koo sai sai. 7 Yesu faa nyi za yeɓɓe: We bea bii baa cii rai daŋ. So beara baa ne zah ah cyõcyõ. 8 So Yesu faa nyi ra: We bee bii ah biŋ zǝzǝ̃ǝ ge nyi dǝɓlii cok ɓaŋ ŋwǝǝ ne ko. So beera kal ge nyi ne ko. 9 Ne cok dǝɓlii cok ɓaŋ ŋwǝǝ mo laa bii ah mo fer ciŋ bii lee kpuu vin ɓo ge zahe, tǝ cok mai bii ah mo gee gŋ ge ya, amma za yeɓ mai mo beara bii ah tǝra ɓǝǝ ɓe. Dǝɓlii cok ɓaŋ ŋwǝǝ so ɗii pa ɓaŋ ŋwǝǝre, 10 faa nyi ko: Kǝnah za nyi bii lee kpuu vin masãh ah nyi za kǝpelle, mo zwahra gur pǝlli ɓe, a so nyira mai mo ka pǝ'nyahr a fahfal o, amma so ma ɓo mo muŋ bii lee kpuu vin masãh ah mbaŋ mo so pǝ̃ǝ gur ne zǝzǝ̃ǝko. 11 Mor tǝtǝŋ dǝǝbǝǝri ma kǝpel daŋ yo, Yesu joŋ yaŋ Kana sǝr Galile, cuu yǝk ah ge lal gŋ, so za syee mor ah nyiŋra ko. 12 Fahfal ah Yesu so kal ge yaŋ Kapernaum ne mah ah ne wee mam tǝkine za syee mor ahe. Kaara gŋ nje.
Yesu pǝ yaŋ Masǝŋ
13 Ka fĩi Yahuduen gwari o, Yesu ge yaŋ Jerusalem. 14 Ge pǝ yaŋ Masǝŋ, lwaa za tǝ leara fan gŋ ne dǝǝ, pǝsǝ̃ǝre, tǝkine matǝvaawandala, za ma kunra solai haira ɓo zah taabǝl ɓǝǝ ta. 15 Yesu jer bǝrǝǝ ne salle, so nĩi ra pǝ yaŋ Masǝŋ ge lal ne ko ne pǝsǝ̃ǝ ɓǝǝ tǝkine dǝǝ ɓǝǝ daŋ, myah lak za ma kunra solai, so waa taabǝl ɓǝǝ ge sǝŋ ta. 16 Faa nyi za ma leara fan ne matǝvaawandala: We woo fan ɓii zol gin nyee ne ko, we joŋ yaŋ Pa ɓe tǝgbana yaŋ luma ka. 17 So za syee mor ah foora ɓǝ mai Ɗerewol mo faa: Masǝŋ, tǝwon ɓǝ yaŋ ɓo pǝ zahzyil ɓe na wii. 18 So Yahuduen fiira ko: Mo gak joŋ dǝǝbǝǝri fẽe ka cuu nyi ru mo ne swah ka joŋ fan naiko ne? 19 Yesu zyii zah ɓǝǝ faa: We hah yaŋ Masǝŋ mai ge sǝŋ, tǝgǝǝ zah'nan sai me ga vuu mafuu ahe. 20 Yahuduen faara nyi ko: Tǝ vuura yaŋ Masǝŋ mai pǝ jol joŋra syii ɓo gŋ jemma nai tǝtǝl yea. So ma ɓo tǝgǝǝ zah'nan sai to mo ga vuu vǝr ne? 21 Amma yaŋ Masǝŋ mai Yesu mo tǝ faa ɓǝ ah a cuu suu ahe. 22 Ne cok Yesu mo ur gin pǝ wulli, za syee mor ah foora ɓǝ ah mo faa, so nyiŋra ɓǝ mai mo ŋwǝǝ ɓo pǝ Ɗerewol Masǝŋ tǝkine mai Yesu mo faa daŋ.
Yesu tǝ zahzyil dǝfuu daŋ
23 Ne cok Yesu mo yaŋ Jerusalem ne cok fĩi Paska, za pǝlli nyiŋra ko, mor a kwanra dǝǝbǝǝri mai mo tǝ joŋko. 24 Amma Yesu kan lǝŋ ɓǝ ɓǝǝr a, mor tǝ ɓǝ zahzyil dǝfuu ɓo daŋ. 25 'Yah dǝɓ ki mo cuu ɓǝ dǝfuu nyi ko ya, mor ako ne suu ah tǝ ɓǝ ma pǝ zahzyil dǝfuu ɓe.
Yesu ne Nikodemus
1 Dǝɓ ki no a ɗii ne Nikodemus, a kǝsyil Farisien, dǝɓ faadal Yahuduen yo. 2 Ge wo Yesu ne suŋni, faa nyi ko: Pa cuu fanne, ru tǝ ɓe, Masǝŋ ye pee mo ge tǝ cuu fan nyi ru, mor dǝɓ ka gak joŋ dǝǝbǝǝri tǝgbana mai mo tǝ joŋ ya, sai ka Masǝŋ no ne ki. 3 Yesu zyii faa nyi ko: Me tǝ faa nyi mo 'manna, dǝɓ mo byaŋ pǝfuu ya ɓe, ka kwo Goŋ Masǝŋ ya. 4 Nikodemus so fii ko: Dǝɓ mo tam ɓe, a gak byaŋ pǝfuu ɗǝne? A so dan ga ɓǝr mah ah pǝki ka byaŋ zahlǝŋ gwa ne? 5 Yesu zyii zah ah faa: Me tǝ faa nyi mo 'manna, dǝɓ mo byaŋ ne bii ne Tǝ'yak ya ɓe, ka gak dan Goŋ Masǝŋ ya. 6 Dǝɓ mai dǝfuu ye mo byaŋ ka dǝfuu ko yo, dǝɓ mai Tǝ'yak ye mo byaŋ ka tǝ'yak ko yo. 7 Mo kaa gǝriŋ tǝ ɓǝ mai me faa nyi mo doole we byaŋ pǝfuu ko ka. 8 Zyak kuu ga pǝ cok makẽne mo 'yahko ga gŋ daŋ, mo laa cii fan joŋ ahe, amma ur gin kẽne, a ga kẽne, mo tǝ ya. A nai ne dǝɓ mai mo byaŋ ɓo ne Tǝ'yak ta. 9 So Nikodemus faa nyi ko: Fan mai gak joŋ suu ɗǝne? 10 Yesu zyii faa nyi ko: Amo ye pa cuu fan za Israel malii ahe, mo so tǝ fan mai ya ne? 11 Goŋga me tǝ faa nyi mo, aru tǝ faa ɓǝ fan makẽne ru tǝ ɓe, ru tǝ joŋ syedowal tǝ fan makẽne ru kwo ɓe, amma we ka tǝ zyii nyiŋ ɓǝ faa ɓuur a. 12 Ne cok me faa ɓǝ fan ma wo sǝr nyee nyi we, we nyiŋ me ya, me so faa ɓǝ fan ma coksǝŋ nyi we ɓe, we gak nyiŋ ɗǝne? 13 Dǝɓ ma yee ga sǝŋ taa ɗǝ kǝka, sai We Dǝfuu mai mo ɗǝr gin sǝŋ ge sǝŋ to. 14 Tǝgbana Mosus mo ɓaŋ soo ge sǝŋ kǝsyicokki, a ga ɓaŋra We Dǝfuu ga sǝŋ nai ta, 15 mor ka koo zune mo nyiŋ ko daŋ a lwaa cee ma ga lii. 16 Masǝŋ 'yah sǝr naiko: nyi Wel ah matǝ vaŋno ge, mor ka koo zune mo nyiŋ ko daŋ ka ga muŋ ya, amma a yea ne cee ma ga lii. 17 Masǝŋ pee Wel ah ge wo sǝr mor ka ŋgoŋ kiita tǝ za sǝr a, amma mor ka za sǝr mo lwaara ǝ̃ǝ ne ki. 18 Dǝɓ mo nyiŋ Welle, kiita ka tǝ dǝɓ ah ya. Amma dǝɓ mai mo zyii nyiŋ ya ɓe, kiita ŋgoŋ tǝl ah ɓe, mor zyii nyiŋ We Masǝŋ matǝ vaŋno ya. 19 Kiita ah naiko: cokfãi ge wo sǝr ɓe, amma so za 'yahra cokfuu kal cokfãi ɓe, mor a joŋra fan maɓe' ahe. 20 Koo zune moo joŋ fan maɓe' ah daŋ a syiŋ cokfãi syiŋ, ka gin pǝ cokfãi ya, mor a ɗuu gal ka yeɓ ɓe' ah ra mo ge lal caŋryaŋ ka. 21 Amma dǝɓ mai moo joŋ fan goŋga a gin pǝ cokfãi, mor ka za mo kwo yeɓ ah ra moo joŋ ne laa zah Masǝŋ caŋryaŋ.
Yesu ne Yohana
22 Fahfal ah Yesu ne za syee mor ah kalra ge sǝr Yudea, ge nǝn gŋ ŋhaa ne ra, a joŋ baptisma. 23 Yohana laŋ a joŋ baptisma pǝ cok Ainon gwari ne Salim, mor bii gŋ pǝlli, za ginra wol ahe, a joŋ baptisma nyi ra. 24 Mor ne cok ah ka ɓah gbanra Yohana ga daŋgai ya ba. 25 So za ki kǝsyil za syee mor Yohana tǝŋ syera syel ne Yahuduyo tǝ ɓǝ vãh fanne. 26 Kalra ge wo Yohana faara nyi ko: Pa cuu fanne, dǝɓ mai mo yea ne mo kah el Yordan nǝzakǝŋhaa, mai mo faa ɓǝ ah nyi ru kŋ, zǝzǝ̃ǝ a joŋ baptisma, za daŋ taira ge wol ahe. 27 Yohana zyii faa nyi ra: Dǝɓ ka gak lwaa fan a, sai ka Masǝŋ ye nyi ɓo nyi. 28 Awe ne suu ɓii we gak joŋ syedowal tǝ ɓǝ mai me faa ame ye ka Kristu ya, amma Masǝŋ pee me ge ɓo pel ahe. 29 Pa ɓaŋ ŋwǝǝ yee kan mawin ahe, amma bai pa ɓaŋ ŋwǝǝ a uu kah ah a laa ɓǝ faa ahe, a laa kyaŋ faa ɓǝ pa ɓaŋ ŋwǝǝ pǝ'nyahre. Ame laŋ me nai ta, zǝzǝ̃ǝko me laa pǝ'nyah pǝlli. 30 Mǝ ah a ga pelle, ma ɓe me tǝr ga falle.
Dǝɓ mai mo gee sǝŋ ge
31 Dǝɓ mai mo gee sǝŋ ge a tǝtǝl fan daŋ, dǝɓ mai mo ur ɓo wo sǝr nyeeko mǝ sǝr o, a faa ɓǝ fan sǝr ta. Dǝɓ mai mo gee sǝŋ ge a tǝtǝl fan daŋ. 32 Tǝ faa ɓǝ fan mai mo kwo ne mai mo laako. Amma koo dǝɓ vaŋno ka tǝ nyiŋ ɓǝ faa ah ya. 33 Dǝɓ mo nyiŋ ɓǝ faa ah ɓe, a tǝ, Masǝŋ a faa goŋga. 34 Dǝɓ mai Masǝŋ mo pee ge tǝ faa ɓǝ Masǝŋ, mor Masǝŋ nyi Tǝ'yak ah ɓo nyi ko. 35 Pam 'yah Welle, soɓ fan daŋ ɓo jol ahe. 36 Dǝɓ mo nyiŋ Welle, ka a ne cee ma ga lii. Dǝɓ mo zyii laa zah Wel a ɓe, ka ga kwo cee ya, amma kpãh Masǝŋ yea tǝl ahe.
Yesu ne mawin Samariayo
1 Farisien laara Yesu tǝ lwaa za syee mor ahe, a joŋ baptisma tǝ za kal mǝ Yohana ɓe. 2 Amma Yesu ne suu ah ka joŋ baptisma tǝ dǝɓ ya, sai za syee mor ah yee joŋra. 3 Ne cok Yesu mo laa ɓǝ ah naiko, ur gin sǝr Yudea ka pii soo ga sǝr Galile faɗa. 4 So ne gan ah pǝ̃ǝ pǝ sǝr Samaria, 5 ge dai yaŋ ki sǝr Samaria a ɗii ne Sikar, a gwari ne zahsyee sǝr mai Yakuɓ mo nyi wel ah Yuseɓ. 6 Pǝ cok ah lak bii Yakuɓ no gŋ. Yesu gaɓ ɓo tǝ fahlii gwǝǝ ahe, so ge kaa zah lak bii ka com tǝgbana kǝsyitǝtǝlli. 7 Mawin Samariayo ge tǝ bee bii, Yesu faa nyi ko: Mo nyi bii me zwǝ sa. 8 Ka za syee mor ah kalra ge ɓo tǝ lee farel tǝgǝǝ yaŋ. 9 Mawin Samariayo faa nyi Yesu: Amma amo Yahuduyo, joŋ ɗii mo fii bii jol ɓe mawin Samariayo ka zwan ne? (Mor Yahuduen ka taira ki ne Samarien ya.) 10 Yesu zyii faa nyi ko: Mo tǝ kǝnah fan nyi Masǝŋ ɓe ne Dǝɓ mai mo fii bii jol ɓo ka zwan zu ye ne ɓe, amo yee fii kǝnah ko a nyi bii ma ne cee nyi mo. 11 Mawin faa nyi ko: Goŋe, mo ka ne fan bee bii ya, lak bii ah laŋ a pǝɗǝkki. Mo gak lwaa bii ma ne cee sye kẽne? 12 Pa ɓuu lii Yakuɓ ye nyi lak bii nyẽe nyi ru, zwǝ bii ah ne suu ah ne wee ah tǝkine ŋgaɓ fan ah daŋ. Mo lǝŋ mo pǝyǝk kal Yakuɓ ɓe ne? 13 Yesu zyii faa nyi ko: Koo zune mo zwǝ bii mai daŋ koŋ bii so i ko kpǝ. 14 Amma koo zune mo zwǝ bii mai me ga nyi nyi ko, koŋ bii ka fǝ̃ǝ i ko yao syaŋsyaŋ. Mor bii mai me ga nyi nyi ko a ga ciŋ biikyaŋ mai mo wuu cee ma ga lii pǝzyil ahe. 15 Mawin faa nyi ko: Goŋe, mo nyi bii mai nyi me, mor ka koŋ bii mo i me ka, ka me pii soo ge bee bii nyee kao. 16 Yesu faa nyi ko: Mo ge ɗii wor ɓo ge ne ko. 17 Mawin zyii faa nyi ko: Me ka ne wor a. Yesu faa nyi ko: Goŋga ye mo faa ɓo mo ka ne wor a, 18 mor mo kan wǝǝ camcam dappe, dǝɓ mai mo ne ki zǝzǝ̃ǝ laŋ wor ɓo ye ka. Ɓǝ mai mo faa ɓo nyi me goŋga yo. 19 So mawin faa nyi ko: Goŋe, me kwo ɓe, amo ye profeto Masǝŋ. 20 Pa ɓuu lii Samarien a juura pel pǝǝ Masǝŋ tǝwaa maino, amma awe Yahuduen we faa cok juupel pǝǝ Masǝŋ sai a yaŋ Jerusalem. 21 Yesu zyii zah ah faa: Mawinni, mo nyiŋ ɓǝ faa ɓe, cok ah no ginni, we ka ga juupel wo Pa man tǝ waa mai tǝkine yaŋ Jerusalem ya. 22 Awe Samarien, we tǝ fan mai we tǝ juupel wol ah ya, aru Yuhuduen, ru tǝ fan mai ru tǝ juupel wol ah ɓe, mor ǝ̃ǝ gee wo Yahuduen ge. 23 Amma cok ah no ginni, koo zǝzǝ̃ǝ laŋ a no, za ma juura pel ne goŋga a ga juura pel wo Pa man pǝ tǝ'yak ne goŋga, mor Pa man 'yah za mai moo juura pel ne goŋga naiko. 24 Masǝŋ tǝ'yak yo, za mai moo juura pel wol ah sai mo juura pǝ tǝ'yak ne goŋga. 25 Mawin faa nyi ko: Me tǝ ɓe, Mesia mai mo ɗii ne Kristu a no ginni, mo geko ɓe, a ga cuu mor fan daŋ nyi ru. 26 Yesu zyii zah ah faa: Ame ko ye tǝ faa ɓǝ ne moo ko. 27 Ne cok ah za syee mor Yesu mo piira soo mo kwora Yesu mo tǝ faa ɓǝ ne mawin, kaara tǝl ah gǝriŋ. Amma koo dǝɓ vaŋno kǝsyil ɓǝǝ fii ko mo 'yah fẽe jol ah ne, wala mo faa ɓǝ ne ki mor fẽene ya. 28 So mawin soɓ daŋ ah kan ge sǝŋ, kal ge tǝgǝǝ yaŋ faa nyi zana: 29 We ge ẽe dǝɓ mai mo faa ɓǝ fan mai me joŋ daŋ nyi me ɗǝ. Ɗah maki Kristu ye ne? 30 So za pǝ̃ǝra gin yaŋ ah ka ginra wo Yesu. 31 Ne cok ah za syee mor ah tǝ faara nyi ko: Pa cuu fanne, mo re farel ɗao. 32 Amma zyii zah ɓǝǝ faa: Me no ne farel ka renne we tǝ ya. 33 So za syee mor ah fiira ki: Dǝɓ ki ge nyi ko ne farel ɓe ne? 34 Yesu faa nyi ra: Farel ɓe ako ye joŋ 'yah Dǝɓ mai mo pee me ge ka me vǝr yeɓ ahe. 35 We faa: Coŋ fĩi ɓo nai ka gwahl mo ge, amma me faa nyi we, we ẽe 'wah zye ɓe, a 'yah cen o. 36 Pa cen ah a ga lwaa reba, a ga tai tǝbyaŋ ah mor cee ma ga lii. Nai ta, pa ruu ah ne pa cen ah gwa daŋ a ga laara pǝ'nyah zahki. 37 Mor goŋga ye ɓǝ mai moo faara: Dǝɓ ki ruu ruu ahe, dǝɓ ki cen ma cen ahe. 38 Me pee we ka cen fan pǝ 'wah mai we gaɓ ne yeɓ gŋ ya, za ki ye joŋra yeɓ ahe, so we re reba ɓǝǝra. 39 Samarien yaŋ ah pǝlli nyiŋra Yesu mor mawin faa nyi ra: Yesu faa ɓǝ mai me joŋ daŋ nyi me. 40 Ne cok Samarien mo gera wol ahe, so pǝǝra ko ka mo kaa ne ra. So Yesu kaa gŋ zah'nan gwa. 41 Za pǝlli gŋ nyiŋra ko mor ɓǝ faa ahe. 42 So faara nyi mawinni: Zǝzǝ̃ǝko ru nyiŋ ɓo ka mor ɓǝ mai mo faa nyi ru to ya, amma mor aru laŋ ru laa ne sok ɓuuru, ru tǝ ɓe 'manna, pa ǝ̃ǝ za sǝr ye ko.
Yesu laɓ we dǝɓ wo goŋe
43 Fahfal zah'nan gwa ah Yesu ur gin gŋ kal ge sǝr Galile. 44 Mor Yesu faa ne suu ah ka yiira profeto Masǝŋ pǝ sǝr ah ya. 45 Ne cok mo ge dai Galile, za sǝr ah nyiŋra ko pǝlli, mor kwora fan mai mo joŋko ne fĩi Paska yaŋ Jerusalem, mor ara laŋ gera ɓo pǝ fĩi ah ta. 46 So ge yaŋ Kana sǝr Galile faɗa, yaŋ mai mo fer bii kol gŋ ciŋ bii lee kpuu vin. Dǝɓ wo goŋ no yaŋ Kapernaum, wel ah ne syemme. 47 Ne cok mo laa Yesu ur gin sǝr Yudea ge ɓo sǝr Galile, zol kal ge wol ah syea ko ka mo ge laɓko wel ahe, mor a zah wul gwari. 48 So Yesu faa nyi ko: We kwo dǝǝbǝǝri tǝkine fan matǝ gǝriŋ ah ra ya ɓe, we ka nyiŋ ya syaŋsyaŋ. 49 Dǝɓ wo goŋ zyii faa nyi ko: Dǝɓlii, mo ge ne me kǝpel ka we ɓe wǝ ya ba. 50 Yesu faa nyi ko: Mo ge yaŋ ɓo, we ɓo ga laɓɓe. Dǝɓ ah nyiŋ ɓǝ mai Yesu mo faa nyi ko, ur kalle. 51 Ne cok mo ɓaŋ fahlii ɓo tǝ ga yaŋ ahe, za yeɓ ah ge zyaŋra tǝl ah faara nyi ko: We ɓo laɓ ɓe. 52 So fii ra: Wel ah laɓ ne cok com fẽene? Faara nyi ko: Syem tǝtǝl 'wah cee gin wol ah tǝsoo ne cok com vaŋno ma ne lilli. 53 So pah ah foo ɓǝ ahe, tǝ ɓe, cok com mai Yesu mo faa nyi ko we ɓo ga laɓɓe ko yo. Ako ne za yaŋ ah daŋ nyiŋra ɓǝ Yesu. 54 Patǝ gwa dǝǝbǝǝri mai Yesu mo joŋ ne cok mo gee sǝr Yudea ge sǝr Galile yo.
Yesu laɓ dǝɓ ma ne syem zyakke
1 Fahfal ah Yahuduen tǝ joŋra fĩi ɓǝǝra, Yesu kal ge yaŋ Jerusalem. 2 Kah zahfah Pǝsǝ̃ǝ yaŋ Jerusalem bii fahl no gŋ, gbahra jul ɓo zahbii ah dappe, a ɗii cok ah ne zah Yahuduen ne Betesda. 3 Kah zahfah ah ra za syem swahra ɓo gŋ pǝlli: rǝ̃ǝ, lemme, ne syem zyakke. A byakra laŋ bii ahe. 4 Mor comki angelos ɗǝr gin laŋ bii fahl ahe. Dǝɓ syem mai mo ɗǝr ge pǝ bii ah zahnahpel ka bii tǝ laŋ ɓe, a laɓɓe, koo mo syem fẽene ye daŋ. 5 Dǝɓ ki no gŋ kyaŋ ɓo ne syem syii jemma sai tǝtǝl nama. 6 Ne cok Yesu mo kwo ko swǝ ɓo gŋ, tǝ ɓe, a ne syem ah daga ɓaaɓe, so fii ko: Mo 'yah laɓ ah no ne? 7 Dǝɓ syem zyii faa nyi ko: Dǝɓlii, me ka ne dǝɓ ma ɓaŋ me ga pǝ fahl ne ko ne cok bii ah mo tǝ laŋ ya, amma me kyeɓ ka ga gŋ ɓe, dǝɓ ki a kal pel ɓe. 8 Yesu faa nyi ko: Mo ur o, mo ɓaŋ faswul ɓo mo gyo. 9 Ne pel sǝ dǝɓ ah laɓɓe, ur ɓaŋ faswul ah kal syel ne ko. 10 Amma com ah com 'yak yo. Yahuduen faara nyi dǝɓ mai mo laɓ ɓe: Tǝ'nah com 'yak yo, ɓǝ lai man nyi fahlii nyi mo ka mo ɓaŋ faswul ɓo ne ya. 11 Amma zyii faa nyi ra: Dǝɓ mai mo laɓ me ako ye faa nyi me: Mo ɓaŋ faswul ɓo mo gyo. 12 So fiira ko faɗa: Azu ye dǝɓ mai mo faa nyi mo, mo ɓaŋ faswul ɓo syee ne ko sye ne? 13 Amma dǝɓ mai mo laɓɓe, tǝ Dǝɓ ma laɓ ko azu ye ne ya, mor Yesu muŋ nahnǝn ahe, mor za pǝ cok ah pǝpãare. 14 So fahfal ah Yesu lwaa ko yaŋ Masǝŋ faa nyi ko: Zǝzǝ̃ǝko mo ẽe mo laɓ ɓe, mo joŋ faɓe' kao, mor ka ɓǝɓe' ma kal mai mo ge lwaa mo ka. 15 Dǝɓ ah kal ge faa nyi Yahuduen Yesu ye laɓ ko. 16 Mor ah Yahuduen foora mor Yesu, kyeɓra ka in ko pǝ wulli, mor joŋ fan ah ne com 'yakke. 17 Amma Yesu zyii zah ɓǝǝ faa: Pa ɓe tǝ joŋ yeɓ cẽecẽe, ame laŋ me joŋ nai ta. 18 Mor ɓǝ faa ah maiko, Yahuduen so kyeɓra mor ah pǝlli ka in ko pǝ wulli, mor zyak ɓǝ lai com 'yak ɓo to ya, amma mor ɗii Masǝŋ ne Pah ahe, a lii suu ah zahki ne Masǝŋ.
Swah Welle
19 So Yesu zyii faa nyi ra: Me faa nyi we goŋga, Wel ka gak joŋ fan ne swah suu ah ya, sai fan makẽne mo kwo Pam tǝ joŋni. Fan mai Pam mo tǝ joŋ daŋ Wel a joŋ ta. 20 Mor Pam a 'yah Welle, a cuu fan mai mo tǝ joŋko daŋ nyi ko. A ga cuu yeɓ mayǝk ah ra ma kal tǝ mai nyi ko ka joŋ faɗa, we ga kaa tǝl ah gǝriŋ. 21 Tǝgbana Pam moo syem za gin pǝ wul so nyi cee nyi ra, nai ta, Wel ga nyi cee nyi za mai mo 'yahko. 22 Mor Pam ka ŋgoŋ kiita tǝ dǝɓ ya, amma nyi swah daŋ nyi Wel ka ŋgoŋ kiita, 23 mor ka za mo yiira Wel tǝgbana mo tǝ yiira Pamme. Dǝɓ mai mo yii Wel a ɓe, ka yii Pam mai mo pee ko ya ta. 24 Goŋga me faa nyi we, dǝɓ mo laa ɓǝ faa ɓe mo so nyiŋ Dǝɓ mai mo pee me, a yea ne cee ma ga lii, ka ga pǝ kiita ya, amma ka pǝ̃ǝ gin pǝ wul ɓe, a ne cee o. 25 Goŋga me faa nyi we, cok ah no ginni, zǝzǝ̃ǝko laŋ a no, za ma pǝ wul a ga laara kyaŋ We Masǝŋ, za mai mo laara ɓe daŋ a ga yeara ne cee. 26 Tǝgbana Pam mo no ne swah ka nyi cee, nai ta, nyi swah nyi Wel ka mo nyiko cee. 27 Nyi swah nyi Wel ka mo ŋgoŋko kiita, mor ako ye We Dǝfuu. 28 We kaa tǝ ɓǝ ah gǝriŋ ka, mor cok ah no ginni, za ma wul mo pǝ pal daŋ a ga laara kyaŋ ahe. 29 A ga pǝ̃ǝra gin pǝ pal ɓǝǝra, za ma joŋra fan sãh daŋ a ga urra ka lwaa cee, amma za mai mo joŋra faɓe' daŋ a ga urra mor ga pǝ kiita.
Syedowal tǝ Yesu
30 Me ka gak joŋ fan ne zah syak ɓe ya, me ŋgoŋ kiita tǝgbana mai Masǝŋ mo faa nyi me, kiita ɓe a njaŋ, mor me ka tǝ kyeɓ ka joŋ fan mai me 'yah ya, amma me tǝ kyeɓ ka joŋ fan mai Dǝɓ mai mo pee me mo 'yah ɓo. 31 Me tǝ faa ɓǝ tǝ suu ɓe ɓe, ka ɓǝ faa ɓe goŋga ye ka. 32 Amma dǝɓ ki no tǝ joŋ syedowal tǝ ɓe, me tǝ ɓe, ɓǝ mai mo tǝ faako tǝ ɓe goŋga yo. 33 Awe pee zapee ge wo Yohana, so ɓǝ mai mo faako goŋga yo. 34 Me ka tǝ 'yah syedowal zah dǝɓ vaŋno ya, amma me faa nai mor ka we ǝ̃ǝ. 35 Yohana no tǝgbana pitǝrla mai mo kan wii ɓo tǝ sǝǝ cokki, we 'yah ka laa pǝ'nyah ne kaa pǝ cokfãi ah nje to. 36 Amma ame ne syedowal mayǝk kal mai Yohana mo joŋ. Yeɓ mai me tǝ joŋni, Pa ɓe ye nyi me ka joŋni, yeɓ ah ra joŋ syedowal tǝ ɓe, cuu Pa ɓe ye pee me ge. 37 So Pa ɓe mai mo pee me ge, faa ɓǝ tǝ ɓe ta. Amma we laa kyaŋ ah ya syaŋsyaŋ, we kwo ko laŋ ya ta. 38 We gbǝ ɓǝ ah ra pǝ zahzyil ɓiir a, mor we nyiŋ Dǝɓ mai mo peeko ge ya. 39 We fee Ɗerewol Masǝŋ mor we lǝŋ we ga lwaa cee ma ga lii gŋ, amma Ɗerewol ah faa ɓǝ ɓo tǝ ɓe. 40 Amma we zyii ge wo ɓe ka lwaa cee ma ga lii ya. 41 Me ka tǝ kyeɓ ka za mo yiira me ya. 42 Amma me tǝ we ɓe, we ka ne 'yah Masǝŋ pǝ zahzyil ɓiir a. 43 Me ge pǝ tǝɗii Pa ɓe, we ka tǝ zyii nyiŋ me ya. Amma dǝɓ ki mo ge pǝ tǝɗii suu ah ɓe, we nyiŋ ko. 44 We 'yah yǝk kǝsyil zana, we ka kyeɓ yǝk matǝ vaŋno mo gee wo Masǝŋ ge ya. We gak nyiŋ ɓǝ faa ɓe ɗǝne? 45 We lǝŋ sõone me ga ce we pel Pa ɓe ka, amma pa ga cen ɓii no, Mosus yo, mor we uu ɓo tǝ ɓǝ ahe. 46 Kǝnah we nyiŋ ɓǝ Mosus ɓo 'manna ɓe, we nyiŋ me ta, mor Mosus ŋwǝǝ ɓǝ ɓo tǝ ɓe. 47 Amma we zyii nyiŋ ɓǝ mai mo ŋwǝǝko ya ɓe, we gak nyiŋ ɓǝ mai me tǝ faa nyi we ɗǝne?
Yesu nyi farel nyi za ujenere dappe
1 Fahfal ah Yesu kal ge nǝzakǝŋhaa zah mabii Galile (wala mabii Tiberias). 2 Za pǝlli tǝ syeera mor ahe, mor tǝ kwanra dǝǝbǝǝri mai mo tǝ joŋko ne laɓ za ma ne syemme. 3 Yesu yee kal ge tǝ waare, ge kaa gŋ ne za syee mor ahe, 4 ka fĩi Paska Yahuduen gwari. 5 Yesu ɓaŋ nahnǝn ẽe cokki, kwo za pǝlli tǝ ginra wol ahe, faa nyi Filip: Na ga lee farel kẽe ka mo kii za mai daŋ ne? 6 Faa nai mor ka laa ɓǝ mai Filip moo ga zyiiko, mor Yesu tǝ fan mai moo ga joŋko ɓe. 7 Filip zyii zah ah faa: Koo na lee farel ne solai temere gwa laŋ, ka kii ka zune daŋ mo lwaa biŋ biŋ ya. 8 Dǝɓ vaŋno kǝsyil za syee mor ah a ɗii ne Andreas, naa mah Simon Petar o, faa nyi ko: 9 Welaŋ ki no nyee ne tǝwaa alkamaari zahtǝfah dappe ne syiŋ gŋ gwa, amma a joŋ fẽe wo za mapãa mai ne? 10 Yesu faa nyi ra: We joŋ za mo haira ge sǝŋ. (Fãa no pǝ cok ah pǝlli.) So za daŋ haira ge sǝŋ, pãa za wǝǝ ah tǝgbana ujenere dappe. 11 Yesu woo tǝwaa ahe, joŋ osoko nyi Masǝŋ tǝl ahe, so wom nyi za mai mo haira ɓo gŋ, wom syiŋ ah nyi ra nai ta, tǝgbana mo 'yahra. 12 Ne cok za mo rera kǝ̃ǝ o, Yesu faa nyi za syee mor ahe: We woo tǝcoŋ ah mo coŋ ɓo ka fan ki mo ɓeɓ ka. 13 Woora tǝcoŋ zahtǝfah tǝwaa alkamaari mai za mo rera, coŋ baa col jemma tǝtǝl gwa. 14 Ne cok za mo kwora dǝǝbǝǝri mai Yesu mo joŋ, so faara: 'Manna dǝɓ mai ako ye Profeto Masǝŋ mai mo tǝ yah gin wo sǝr kŋ. 15 Yesu tǝ ɓe, tǝ yah gin gbanra ko ne swah ka nyi goŋ nyi, so zol kal ge tǝ waa syak ahe.
Yesu syee tǝ bii
16 Ne cok lil mo joŋ o, za syee mor ah kalra ge zahbii, 17 yeera dah ka ga Kapernaum nǝzakǝŋhaa. Ne cok ah ka cok foo ɓe, so Yesu ɓah gin wo ɓǝǝr a ba. 18 Zyak tǝŋ kuu pǝ'manne, wea bii ge sǝŋ. 19 Ne cok mo ǝǝra dah tǝgbana kilomeetǝr nai koo dappe, kwora Yesu tǝ syee tǝ bii ne ɓalle, ge dai kah dah ɓǝǝ gwari, gal re ra. 20 Yesu faa nyi ra: We ɗuu gal ka, ame yo. 21 Tǝ 'yahra ka ɓaŋ ko ga pǝ dah ne ko, so dah dai zahgee pǝ cok mai mo tǝ gara gŋ ɓe.
Za kyeɓra Yesu
22 Tǝ'nan ah za mai mo fahfal nǝzakǝŋhaa kwora dah maki ah kǝka, sai matǝ vaŋno ye to, so tǝra, Yesu yee dah ne za syee mor ah ya, amma za syee mor ah kalra syak ɓǝǝra. 23 So dah manyeeki ah gera gin fah Tiberias ge, gera gwari kah cok mai Dǝɓlii mo joŋ osoko nyi Masǝŋ tǝ farelle, fahfal ah mo so rera. 24 Ne cok za mo kwora Yesu tǝkine za syee mor ah mo ka gŋ ya, so yeera dah ah kalra ge Kapernaum ka kyeɓra ko gŋ.
Yesu ye farel ma ne cee
25 Ne cok mo ge lwaara Yesu nǝzakǝŋhaa, faara nyi ko: Pa cuu fanne, mo ge nyee nekẽne? 26 Yesu zyii zah ɓǝǝ faa: Goŋga me faa nyi we, we ka tǝ kyeɓ me mor we kwo dǝǝbǝǝri ɓe ra ɓo ya, amma mor we re farel kǝ̃ǝre. 27 We joŋ yeɓ mor farel mai mo tǝ yah vǝr ka, amma we joŋ mor farel mai moo nǝn moo yea ne cee ga lii. Ako ye farel mai We Dǝfuu mo ga nyi nyi we. Mor Masǝŋ Pam kan lamba swah ah ɓo tǝl ahe. 28 So fiira ko: Ru ga joŋ fẽe ka ru lwaa joŋ yeɓ mai Masǝŋ mo 'yah ne? 29 Yesu zyii faa nyi ra: Yeɓ mai Masǝŋ mo 'yah we joŋ: sai we nyiŋ Dǝɓ mai mo peeko ge ɓo. 30 So faara nyi ko: Mo ga joŋ dǝǝbǝǝri fẽe nyi ru ka ru kwo ɓe ru nyiŋ mo ne? Mo ga joŋ fẽene? 31 Pa ɓuu lii rera manna kǝsyicokki, tǝgbana Ɗerewol mo faa: Nyi farel mai mo ɗǝr gin sǝŋ ge nyi ra re. 32 Yesu zyii faa nyi ra: Goŋga me faa nyi we, Mosus ye ka tǝ nyi farel mai mo gee sǝŋ ge nyi we ya, amma Pa ɓe ye tǝ nyi farel matǝ goŋga mo gee sǝŋ ge nyi we. 33 Mor farel mai Masǝŋ mo tǝ nyini, ako ye Dǝɓ mai mo ɗǝr gin sǝŋ ge mo tǝ nyi cee nyi za sǝrri. 34 So faara nyi ko: Dǝɓlii, mo nyi farel ah nyi ru cẽecẽe. 35 Yesu faa nyi ra: Ame farel ma ne cee. Dǝɓ mo ge wo ɓe ɓe, koŋ ka i ko ya syaŋsyaŋ. Dǝɓ mo nyiŋ me ɓe, koŋ bii ka i ko ya syaŋsyaŋ ta. 36 Amma me faa nyi we, we kwo me ɓe we zyii nyiŋ me ya. 37 Za mai Pa ɓe mo nyi ra nyi me daŋ a gera wo ɓe, me ka nĩi koo dǝɓ vaŋno kǝsyil ɓǝǝ ga lal a syaŋsyaŋ. 38 Mor me ɗǝr gin sǝŋ ge ka joŋ 'yah ɓe ya, amma ka joŋ 'yah Dǝɓ mai mo pee me ge. 39 Fan mai Dǝɓ mai mo pee me mo 'yah me joŋ: a 'yah ka koo dǝɓ vaŋno kǝsyil za mai mo nyiko nyi me mo muŋ ka, amma me ge ur ra ne cee ne zah'nan fahfal tǝ lii. 40 Mor fan mai Pa ɓe mo 'yahe: a 'yah koo zune mo kwo Welle mo so nyiŋ ko, a lwaa cee ma ga lii. Me ga ur ra ne zah'nan fahfal tǝ lii. 41 Ne cok Yesu mo faa ame ye farel mai mo ɗǝr gin sǝŋ ge, Yahuduen ɓaŋra kpãh tǝl ahe. 42 So faara: Yesu mai mo we Yuseɓ ye ka ne? Na tǝ pah ah ne mah ah daŋ. So gak faako zǝzǝ̃ǝ ɗii me ɗǝr gin sǝŋ ge ne? 43 Yesu zyii faa nyi ra: We joŋ kpãh kǝsyil ki ka. 44 Koo dǝɓ vaŋno ka ga ge wo ɓe ya, sai Pa ɓe mai mo pee me ge yee 'nahm ko ge, so me ga ur ko ne cee ne zah'nan fahfal tǝ lii. 45 Profetoen ŋwǝǝra ɓǝ mai ɓo pǝ Ɗerewol faa: Masǝŋ ga cuu fan nyi za daŋ. Koo zune mo laa ɓǝ faa Pa ɓe, mo so nyiŋ ɓǝ cuu ahe, a ge wo ɓe. 46 Dǝɓ ma kwan Pa ɓe kǝka, sai ame Dǝɓ mai me gee wo Masǝŋ ge, ame ye kwo Pa ɓe to. 47 Goŋga me faa nyi we, dǝɓ mai mo nyiŋ me ɓe, ka a ne cee ma ga lii. 48 Ame farel ma ne cee. 49 Pa ɓii lii rera manna kǝsyicokki, amma so wukra. 50 Amma farel mai mo ɗǝr gin sǝŋ ge, dǝɓ mai mo re ɓe, ka ga wǝ ya. 51 Ame farel ma ne cee mo ɗǝr gin sǝŋ ge, koo zune mo re farel ah ɓe, a yea ne cee ga lii. Farel mai me ga nyi, suu ɓe yo, me ga nyi suu ɓe mor za sǝrri. 52 So Yahuduen urra ɓǝ kǝsyil ki, so fiira fii faa: Dǝɓ mai ga nyi suu ah nyi na ka na re ɗǝne? 53 Yesu faa nyi ra: Goŋga me faa nyi we, we re suu We Dǝfuu tǝkine zwan syim ah ya ɓe, we ka yea ne cee pǝzyil ɓiir a. 54 Dǝɓ mo re suu ɓe tǝkine zwan syim ɓe, ka a ne cee ma ga lii, me ga ur ko ne cee ne zah'nan fahfal tǝ lii. 55 Mor suu ɓe farel matǝ goŋga yo, syim ɓe fazwan matǝ goŋga ye ta. 56 Dǝɓ mo re suu ɓe tǝkine zwan syim ɓe, ka kaa ɓo pǝzyil ɓe, ame laŋ me kaa ɓo pǝzyil ahe. 57 Pa ɓe mai mo pee me a ne cee, ame ne cee mor ahe, nai ta, dǝɓ mo re me ɓe, a yea ne cee mor ɓe. 58 Farel mai mo ɗǝr gin sǝŋ ge, ka tǝgbana mǝ pa ɓii lii mo rera mo so wukra ya. Dǝɓ mo re farel mai ɓe, a yea ne cee ga lii. 59 Yesu faa ɓǝ mai ne cok mo tǝ cuu fan pǝ yaŋ kee ɓǝ Masǝŋ yaŋ Kapernaum.
Ɓǝ ma ne cee ga lii
60 Ne cok mo laara ɓǝ cuu ahe, za syee mor ah pǝlli soɓra ko, faara: Ɓǝ cuu mai a pǝgaɓɓe, azu yee gak laa ne? 61 Yesu tǝ pǝ suu ahe, za syee mor ah tǝ mgbǝrra ɓǝ tǝ ɓǝ ahe, faa nyi ra: Ɓǝ ah joŋ we ɓo gǝriŋ ne? 62 Ne cok we kwo We Dǝfuu kal ga sǝŋ pǝ cok ah mo gee gŋ kǝpel ge ɓe, we ga faa ɗǝne? 63 Tǝ'yak yee nyi cee, suu ka joŋ fan ki ya, ɓǝ mai me faa nyi we, tǝ'yak ye tǝkine cee. 64 Amma za ki kǝsyil ɓii nyiŋra ya. (Mor Yesu tǝ za mai mo nyiŋra ya daga tǝtǝŋ ahe, tǝkine dǝɓ mai mo tǝ ga joŋ tǝkor ah daŋ.) 65 So faa: Mor ah me faa nyi we, dǝɓ ka gak ge wo ɓe ya, sai ka Masǝŋ ye nyi fahlii ah ɓo nyi. 66 Daga cok ah sǝ, za pǝlli kǝsyil za syee mor ah nǝǝra suu nǝfalle, syeera ne ki yao. 67 So Yesu faa nyi za syee mor ah matǝ jemma tǝl gwa: Awe laŋ we 'yah gao ta ne? 68 Simon Petar zyii faa nyi ko: Dǝɓlii, ru ga wo zune? Amo no ne ɓǝ ma nyi cee ma ga lii. 69 Zǝzǝ̃ǝko ru nyiŋ, ru tǝ ɓe, amo ye Dǝɓ Matǝdaŋdaŋ mo gee wo Masǝŋ ge. 70 Yesu zyii zah ɓǝǝ faa: Me syen we jemma tǝtǝl gwa daŋ ya ne? Dǝɓ vaŋno kǝsyil ɓii dǝɓ Satan o. 71 Tǝ faa ɓǝ Yudas we Simon Iskariot, mor Yudas a kǝsyil za syee mor Yesu matǝ jemma tǝl gwa, ako ye dǝɓ mai mo tǝ yah joŋ tǝkor ahe.
Wee mah Yesu nyiŋra ko ya
1 Fahfal ah Yesu kyãh sǝr Galile to, 'yah kyãh sǝr Yudea ya, mor Yahuduen tǝ kyeɓra ko ka in pǝ wulli. 2 Ne cok ah ka fĩi jul Yahuduen ge ɓo gwari o, 3 so wee mah Yesu faara nyi ko: Mo zol gin nyee mo ge sǝr Yudea, mor ka za syee mor ɓo mo kwora yeɓ ɓo mo tǝ joŋni. 4 Dǝɓ mo 'yah za daŋ mo tǝra ko ɓe, ka joŋ yeɓ pǝ muŋ ya. Mor mo tǝ joŋ yeɓ naiko, mo joŋ ka za sǝr daŋ mo tǝra mo. 5 (Wee mah ah ne suu ɓǝǝ laŋ nyiŋra ko ya.) 6 So Yesu faa nyi ra: Cok ɓe ɓah gin a ba, amma ma ɓii cok ɓii no cẽecẽe. 7 Za sǝr ka gak syiŋra we ya, amma a syiŋra me, mor me tǝ faa nyi ra yeɓ ɓǝǝ mo tǝ joŋra a pǝɓe'. 8 We ge joŋ fĩi ah o, me ka ga pǝ fĩi ah ya, mor cok ɓe ɓah gin a ba. 9 Fahfal mo faa ɓǝ mai vǝrri, so kaa sǝr Galile.
Yesu ge pǝ fĩi julli
10 Amma fahfal wee mah ah mo kalra ge pǝ fĩi, Yesu laŋ ur kal ge gŋ ta, amma ge ne nahnǝn za caŋryaŋ ya, ge pǝ muŋni. 11 Yahuduen kyeɓra ko pǝ fĩi ah faara: A kẽne? 12 Faara ɓǝ tǝl ah ne zah gwǝǝ pǝlli, za ki faara dǝɓ sãh yo, za ki faara dǝɓ sãh ye ka, a zyak zana. 13 Amma pa ma faa ɓǝ ah gin lal caŋryaŋ kǝka, mor a ɗuura gal Yahuduen. 14 Ka zah'nan syee fĩi ah woŋ ɓo zahki o, Yesu dan ge yaŋ Masǝŋ kaa tǝ cuu fan nyi za gŋ. 15 Yahuduen kaara tǝl ah gǝriŋ faara: Dǝɓ mai fee lekol ya ta, joŋ ɗii tǝ fan nai ne? 16 Yesu zyii faa nyi ra: Ɓǝ mai me tǝ cuu ɓǝ ɓe ye ka, amma gee wo Masǝŋ mai mo pee me ge. 17 Dǝɓ mo tǝ 'yah joŋ fan mai Masǝŋ mo 'yah ɓe, a ga tǝ: ɓǝ mai me tǝ cuu gee wo Masǝŋ ge ne? Wala me ye waa tǝ faa ne swah suu ɓe ne? 18 Dǝɓ mo tǝ faa ɓǝ suu ah ɓe, ka tǝ kyeɓ yǝk suu ahe, amma dǝɓ mo tǝ kyeɓ yǝk pa mai mo pee ko ɓe, ka tǝ faa goŋga, ɓǝɓe' ka wol ah ya. 19 Mosus nyi ɓǝ lai nyi we, ka nai ya ne? Amma koo dǝɓ vaŋno kǝsyil ɓii ma syee mor ɓǝ lai ah kǝka. We kyeɓ ka in me pǝ wul mor fẽene? 20 Za zyiira zah ah faa: Fan ye kaa ɓo tǝ ɓo ne? Azu ye tǝ kyeɓ ka in mo pǝ wul sye ne? 21 Yesu zyii faa nyi ra: Me joŋ yeɓ vaŋno to, we daŋ we kaa tǝl ah gǝriŋ. 22 Mor Mosus faa nyi we ka we daakan nyi wee ɓiiri, (amma Mosus ye ka tǝŋ ɓǝ ah ya, ɓǝ ah gee wo pa ɓii lii ma kǝpel ra ge) awe daakan nyi wel ne com 'yakke. 23 Wee daakan nyi wel ne com 'yak we joŋ mor ka we zyak ɓǝ lai Mosus ka, mor fẽe we ɓaŋ kpãh tǝ ɓe mor me laɓ dǝɓ ne com 'yak ne? 24 We tǝ ŋgoŋ kiita ɓe, we ŋgoŋ tǝgbana mai we kwo ne nahnǝn to nai sǝ ka, amma we kyeɓ mor goŋga ah njaŋ ɗǝ.
Kristu ye ko ne?
25 Za ki kǝsyil za ma kaara Jerusalem faara: Dǝɓ mai mo tǝ kyeɓra ko ka in pǝ wul kŋ ye ka ne? 26 We ẽe a faa ɓǝ kǝsyil zana, faara ɓǝ ki nyi ko ya. Wala zaluu man tǝra ɓe, Kristu ye ne? 27 Amma dǝɓ mai na daŋ na tǝ cok ah mo gee gŋ ge ɓe, ne cok Kristu moo ga ge, koo dǝɓ vaŋno ka ga tǝ cok mai mo gee gŋ ge ya. 28 Ne cok Yesu mo tǝ cuu ɓǝ yaŋ Masǝŋ, ɓyaŋ ɓǝ faa: We tǝ me tǝkine cok mai me gee gŋ ɓe sye ka? Amma me ye ka waa ge ne suu ɓe ya, amma Dǝɓ mai mo pee me ge, Dǝɓ tǝ goŋga yo, we tǝ ko ya. 29 Amma me tǝ ko ɓe, me gee wol ah ge, ako ye pee me. 30 So kyeɓra ka gban ko, amma koo dǝɓ vaŋno laŋ nyen jol ge wol ah ya, mor cok ah ɓah gin a ba. 31 Amma za pǝlli kǝsyil za nyiŋra ko, faara: Ne cok Kristu mo ge ɓe, a ga joŋ dǝǝbǝǝri kal mǝ dǝɓ mai mo tǝ joŋ ne?
Peera sooje ka gban Yesu
32 Ne cok Farisien mo laara za tǝ faara ɓǝ tǝ Yesu naiko, zaluu za joŋzahsyiŋ tǝkine Farisien peera sooje ge ka gbanra Yesu. 33 Yesu faa nyi ra: Me ga kaa ne we nje kpǝ faɗa, fahfal ah me pii soo kal ga wo Dǝɓ mai mo pee me ge. 34 We ga kyeɓ me, amma we ka ga lwaa me ya, mor we ka gak ga cok mai me ga yea gŋ ya. 35 Yahuduen fiira ki: Faa na ka lwaa ko ya a 'yah ga kẽne? A 'yah ka ga wo Yahuduen mai mo myahra ɓo kǝsyil za Grek ka cuu ɓǝ nyi za Grek ne? 36 Ɓǝ mai mo faako, we ga kyeɓ me we ka lwaa me ya, pǝ cok mai me gŋ we ka gak gan a, ɓǝ fẽe ye ne?
El bii ma ne cee
37 Com in zah fĩi ah zah'nan malii yo, Yesu uu ɓyaŋ ɓǝ faa: Dǝɓ mo ne koŋ bii ɓe, mo ge wo ɓe ka mo zwǝko. 38 Ɗerewol faa: Dǝɓ mo nyiŋ me ɓe, bii ma ne cee ga ɗuu pǝzyil ah ga lii. 39 Yesu faa ɓǝ mai nai mor ka cuu ɓǝ Tǝ'yak mai za ma nyiŋra ko moo ga lwaara. Mor ne cok ah ka Tǝ'yak ɓah gin a ba, mor ka Yesu ɓah ka lwaa yǝk ah ya ba.
Za woŋra ki tǝ ɓǝ Yesu
40 Za pǝlli kǝsyil za mo laara ɓǝ faa ah naiko faara: 'Manna, dǝɓ mai Profeto Masǝŋ yo. 41 Za ki faara: Kristu yo. Amma za ki faara: Kristu ga gee Galile ge ne? 42 Ɗerewol faa Kristu ga gee morsǝ̃ǝ David ge, a ga byaŋ yaŋ Betlehem pǝ cok mai David mo gŋ. 43 So za woŋra ki tǝ ɓǝ ahe. 44 Za ki kǝsyil ɓǝǝ 'yah ka gbanra ko, amma koo dǝɓ vaŋno nyen jol ge wol ah ya.
Zaluu Yahuduen nyiŋra ya
45 Sooje pii soora ge wo zaluu za joŋzahsyiŋ tǝkine Farisien, zaluu rai fiira sooje: We gbǝ ko ge ne ya mor fẽene? 46 Sooje zyiira faa: Dǝɓ ma faa ɓǝ ne fahlii na dǝɓ mai kǝka syaŋsyaŋ. 47 Farisien so fiira ra: Awe laŋ we ge soɓ ko joŋ tǝgwĩi ne we ta ne? 48 Koo dǝɓ vaŋno kǝsyil zaluu man tǝkine Farisien ma nyiŋ ɓǝ ah no ne? 49 Amma za mai mo tǝra ɓǝ lai Mosus ya, tǝkẽawãk Masǝŋ tǝ ɓǝǝra. 50 Nikodemus a kǝsyil Farisien ta, ako ye dǝɓ mai mo ge wo Yesu ne suŋ kŋ, faa nyi ra: 51 Tǝgbana mo pǝ ɓǝ lai mana, na ka ne fahlii ka ŋgoŋ kiita tǝ dǝɓ kǝpel bai laa ɓǝ faa zah ah tǝkine tan ɓǝ fan mai mo joŋko ya. 52 Zyiira faa nyi ko: Wala amo Galileyo ta ne? Mo kee Ɗerewol mo ẽe gŋ o, koo profeto Masǝŋ ka ga gee Galile ge ya syaŋsyaŋ.
Mawin mai mo gbǝra ko lalle
1 So zune daŋ kal ge fah yaŋ ahe. Amma Yesu zol kal ge tǝ waa Ma Ne Tǝbaakãmme. 2 Tǝ'nan ah ne zah'nan pim pii soo ge yaŋ Masǝŋ. Za daŋ taira ge wol ah gŋ, so kaa tǝ cuu fan nyi ra. 3 Za cuu ɓǝ lai tǝkine Farisien gera wol ah ne mawin mai mo gbǝra cok joŋ ɓǝǝ lalle. Ge kanra ko kǝsyil za pãa daŋ. 4 Faara nyi Yesu: Pa cuu fanne, mawin mai ru gbǝ ko cok joŋ ɓǝǝre. 5 Mosus faa nyi ru pǝ ɓǝ lai ru ɓaa ŋwǝǝ ma joŋra fan ma morãi ne tǝsal pǝ wulli. Amma ma ɓo mo faa ɗǝne? 6 Faara nai mor ka rǝ lwaa gbǝ sol nyi gŋ ka ga cen ko. Amma Yesu ɗǝŋ ge sǝŋ ŋwǝǝ fan tǝ sǝr ne tǝwee jolle. 7 Ne cok mo so tǝ fiira ko ga pel naiko, Yesu ur sǝŋ faa nyi ra: Dǝɓ ma bai faɓe' kǝsyil ɓii ye mo ɓaŋko tǝsal ɓoo ne ko kǝpelle. 8 So ɗǝŋ ge sǝŋ ŋwǝǝ fan tǝ sǝr faɗa. 9 Ne cok mo laara ɓǝ ah naiko, urra mor ki vaŋno vaŋno kalle, za ma tam ah ye urra kal kǝpelle, soɓra Yesu syak ah ne mawin mo uu ɓo pel ah to. 10 So Yesu ur uu sǝŋ faa nyi ko: Mawinni, za cen ɓo kŋ kẽne? Koo dǝɓ vaŋno so ŋgoŋ kiita tǝ ɓo yao ne? 11 Mawin zyii faa nyi ko: Koo dǝɓ vaŋno ŋgoŋ ya Dǝɓlii. Yesu so faa: Ame laŋ me ka ŋgoŋ kiita tǝ ɓo ya ta. Mo gyo, amma mo joŋ faɓe' kao.
Yesu ye cokfãi wo sǝrri
12 So Yesu faa ɓǝ nyi za faɗa: Ame cokfãi wo sǝrri. Dǝɓ mo tǝ syee mor ɓe ɓe, a lwaa cokfãi ma nyi cee, so ka syee pǝ cokfuu ya syaŋsyaŋ. 13 Farisien faara nyi ko: Mo tǝ faa ɓǝ tǝ suu ɓo, ɓǝ mai mo faa ɓo goŋga ye ka. 14 Yesu zyii faa nyi ra: Koo me faa ɓǝ tǝ suu ɓe laŋ, ɓǝ mai me tǝ faa goŋga yo. Mor me tǝ cok mai me gee gŋ ge ɓe, me tǝ cok mai me tǝ ga gŋ ɓe ta. Amma awe, we tǝ cok mai me gee gŋ ge ya, we tǝ mai me tǝ ga gŋ ya ta. 15 We tǝ ŋgoŋ kiita tǝgbana fahlii dǝfuu, ame, me ka ŋgoŋ kiita tǝ dǝɓ ya. 16 Me tǝ ŋgoŋ kiita ɓe, kiita ɓe goŋga, mor me ka tǝ ŋgoŋ syak ɓe ya, amma Pa ɓe mai mo pee me a no ne me. 17 Ŋwǝǝ ɓo pǝ ɓǝ lai ɓii faa: Ne cok za gwa mo faara ɓǝ tǝ fan ge cok vaŋno ɓe, ka ɓǝ fan ah goŋga yo. 18 Me tǝ faa ɓǝ tǝ suu ɓe, Pa ɓe mai mo pee me ge tǝ faa ɓǝ tǝ ɓe ta. 19 So fiira ko: Pa ɓo sye kẽne? Yesu zyii faa nyi ra: We tǝ me ya, we tǝ Pa ɓe ya ta. Kǝnah we tǝ me ɓe, we ga tǝ Pa ɓe ta. 20 Yesu faa ɓǝ mai ne cok mo tǝ cuu fan yaŋ Masǝŋ pǝ cok mai sunduku ma tai lak mo gŋ. Koo dǝɓ vaŋno gbǝ ko ya, mor cok ah ɓah gin a ba.
We ka gak ga cok mai mee ga gŋ ya
21 Yesu faa nyi ra faɗa: Me ga kalle, we ga kyeɓ me, amma we ga wuk pǝ faɓe' ɓiiri, we ka gak ga cok mai me tǝ ga gŋ ya. 22 Yahuduen faara: A ga swǝ̃ǝ suu ah ne? Mor faako cok mai me tǝ ga gŋ we ka gak gan a ko. 23 Yesu zyii faa nyi ra: Awe ur ɓo wo sǝr nyeeko, amma ame gee sǝŋ ge, awe ye mǝ sǝr maiko, amma ame ye ka mǝ sǝr mai ya. 24 Mor ah me faa nyi we, we ga wuk pǝ faɓe' ɓiiri. We nyiŋ me ame ye Dǝɓ mai me no ya ɓe, we ga wuk pǝ faɓe' ɓiiri. 25 Fiira Yesu: Amo ye zune? Yesu zyii faa: Me faa nyi we daga tǝtǝŋ ah ɗǝne? 26 Me no ne ɓǝ pǝlli ka faa nyi we, ka ŋgoŋ kiita laŋ tǝ ɓii ne ko. Amma Dǝɓ mai mo pee me ge, Dǝɓ tǝ goŋga yo, ɓǝ mai me laa wol ah ako me tǝ faa nyi za sǝrri. 27 Tǝra sõone Yesu tǝ faa ɓǝ Pam nyi ra ya. 28 So Yesu faa nyi ra: Ne cok we rao We Dǝfuu ge sǝŋ ɓe, we ga tǝ, ame ye Dǝɓ mai me no. We ga tǝ, me ka joŋ fan syak ɓe ya, amma me tǝ faa ɓǝ mai Pa ɓe mo cuu nyi me. 29 Dǝɓ mai mo pee me a no ne me, soɓ me ɓo ka syak ɓe ya, mor cẽecẽe me tǝ joŋ fan mai mo tǝ 'yahko. 30 Za pǝlli mo laara ɓǝ faa Yesu naiko, so nyiŋra ko.
Za ma ne tǝtǝl ɓǝǝra, tǝkine byakke
31 So Yesu faa nyi Yahuduen mai mo nyiŋra ko ɓo: We tǝ syee mor ɓǝ cuu ɓe ne goŋga ɓe, ka we ye za syee mor ɓe 'manna. 32 We ga tǝ goŋga, goŋga laŋ ga joŋ we yea ne tǝtǝl ɓiiri. 33 Zyiira faa nyi ko: Aru ye morsǝ̃ǝ Abraham, ru joŋ byak nyi dǝɓ taa ɗǝ ya. Mo gak faa nyi ru ɗii we ga yea ne tǝtǝl ɓiiri? 34 Yesu zyii faa nyi ra: Goŋga me faa nyi we, koo zune mo tǝ joŋ faɓe' daŋ ka byak faɓe' yo. 35 Mor byak ka gak kaa yaŋ cẽecẽe ya, amma wel kaa gŋ cẽecẽe. 36 Wel ye mo joŋ we lwaa tǝtǝl ɓii ɓe, ka we ga yea ne tǝtǝl ɓii 'manna 'manna. 37 Me tǝ ɓe, awe ye morsǝ̃ǝ Abraham, amma we tǝ kyeɓ ka in me pǝ wulli, mor we ka tǝ nyiŋ ɓǝ faa ɓe ya. 38 Me tǝ faa ɓǝ mai Pa ɓe mo cuu nyi me, amma awe laŋ we tǝ joŋ fan mai pa ɓii mo faa nyi we. 39 Zyiira faa nyi ko: Pa ɓuu ye Abraham. Yesu faa nyi ra: Kǝnah we ye wee Abraham 'manna ɓe, we joŋ yeɓ mai Abraham mo joŋ ta. 40 Amma zǝzǝ̃ǝko we tǝ kyeɓ ka in me pǝ wulli, ame Dǝɓ mai me faa goŋga mai me laa wo Masǝŋ nyi we. Abraham joŋ nai ya. 41 Awe tǝ joŋ yeɓ mai pa ɓii mo tǝ joŋni. Zyiira faa nyi ko: Aru ye ka wee ɓil lal a, aru ne Pam vaŋno, ako Masǝŋ. 42 Yesu faa nyi ra: Pa ɓii ye Masǝŋ 'manna ɓe, we 'yah kǝnah me ta, mor me gee wo Masǝŋ ge, zǝzǝ̃ǝko ame nyeeko. Me ye ka ge suu ɓe ya, amma ako ye pee me ge. 43 We ka laa mor ɓǝ mai me tǝ faa nyi we ya mor fẽene? Mor we ka tǝ syii sok mor ɓǝ faa ɓe ya. 44 Pa ma ɓii ye Satan, we tǝ 'yah joŋ fan mai pa ɓii mo 'yahe. Pa in wul ye ko daga tǝtǝŋ fanne, uu tǝ goŋga taa ya syaŋsyaŋ, mor goŋga ka wol ah ya. Mo tǝ faa ɓǝ ɓe, a faa tǝgbana kpak ah mo ne ko, a pǝberre, pa ber ye ko. 45 Amma ame, me faa goŋga, we ka tǝ zyii nyiŋ me ya mor ahe. 46 Azu ye kǝsyil ɓii a gak cuu faɓe' mai me joŋ ɓo ne? Me tǝ faa goŋga, we ka tǝ zyii nyiŋ me ya mor fẽene? 47 Dǝɓ mo ye mǝ Masǝŋ ɓe, a laa ɓǝ faa Masǝŋ. Amma we ye ka mǝ Masǝŋ ya, mor ah we ka tǝ zyii laa ɓǝ faa ah ya.
Yesu ne Abraham
48 Yahuduen zyiira faa nyi ko: Ru faa goŋga nyi mo, amo Samariayo, fan kaa ɓo tǝ ɓo ya ne? 49 Yesu zyii faa: Fan kaa tǝ ɓe ya, amma me tǝ yii Pa ɓe, awe, we ka tǝ zyii yii me ya. 50 Me ka tǝ kyeɓ yǝk suu ɓe ya, Dǝɓ ki ye tǝ kyeɓ nyi me, ako ye ga ŋgoŋ kiita ahe. 51 Goŋga me faa nyi we, dǝɓ mo tǝ syee mor ɓǝ mai me faa ɓe, ka ga wǝ ya ŋhaa ga lii. 52 Yahuduen faara nyi ko: Zǝzǝ̃ǝ ru tǝ gur njaŋ fan ye kaa ɓo tǝ ɓo. Abraham wǝ ɓe, profetoen laŋ wukra ɓe, ma ɓo mo so faa: Dǝɓ mo syee mor ɓǝ mai me tǝ faa ɓe, ka ga wǝ ya ŋhaa ga lii. 53 Pa ɓuu Abraham wǝ ɓe, mo lǝŋ mo pǝyǝk kal Abraham ɓe ne? Profetoen laŋ wukra ɓe ta. Amo tǝ lii suu ɓo sye ne zu kpak ne? 54 Yesu zyii faa: Me tǝ faa ɓǝ yii suu ɓe ne ɓe, ka yǝk ɓe a tǝkolle. Dǝɓ mai mo tǝ yii me ako ye Pa ɓe mai we faa ako ye Masǝŋ ɓiiri. 55 Amma we tǝ ko ya syaŋsyaŋ. Ame, me tǝ ko ɓe. Me tǝ faa me tǝ ko ya ɓe, ka me tǝ ga ciŋ pa ber tǝgbana we. Amma me tǝ ko ɓe, me tǝ syee mor ɓǝ faa ahe. 56 Suu 'nyah pa ɓii Abraham ka kwan zah'nan gin ɓe, so kwo zah'nan ahe, laa pǝ'nyahre. 57 So Yahuduen faara nyi ko: Mo joŋ laŋ syii jemma dappe ya ba, mo lwaa Abraham kwo kẽne? 58 Yesu zyii faa nyi ra: Goŋga me faa nyi we, ka Abraham byaŋ ya ba laŋ, me no. 59 Woora tǝsal ka ɓaa ko, amma Yesu rii kǝsyil ɓǝǝ syiksyik, pǝ̃ǝ gin yaŋ Masǝŋ kalle.
Yesu gbǝr nahnǝn dǝɓ ma byaŋ pǝrǝ̃ǝ
1 Yesu tǝ pǝ̃ǝ cok maki ahe, kwo dǝɓ ki, rǝ̃ǝ ye ko daga byaŋ ahe. 2 Za syee mor ah fiira ko: Pa cuu fanne, dǝɓ mai byaŋ pǝrǝ̃ǝ nai mor fẽene? Mor joŋko faɓe' ɓo ne? Wala mor zan ah ye joŋra faɓe' ɓo ne? 3 Yesu zyii faa: Dǝɓ ah rǝ̃ǝ ɓo ka mor joŋ faɓe' ɓo ya, ka laŋ mor zan ah joŋra faɓe' ɓo ya ta, amma byaŋ pǝrǝ̃ǝ nai ka we kwo yeɓ Masǝŋ mo ga joŋ wol ahe. 4 Ne cok com mo no ba, sai na joŋ yeɓ Dǝɓ mai mo pee me ge, suŋ tǝ ginni, koo dǝɓ vaŋno ka gak joŋ yeɓ ne ya. 5 Ame no wo sǝr ba, ame ye cokfãi wo sǝrri. 6 Fahfal Yesu mo faa ɓǝ mai vǝrri, so tǝɓ tǝsǝ̃ǝ ge tǝ sǝrri, sãa vuu ne so rẽa ge nyi rǝ̃ǝ nahnǝnni. 7 So faa nyi ko: Mo ge vãh pǝ bii Siloa. (Tǝgba faa: Pee Ɓe.) Dǝɓ rǝ̃ǝ kal ge vãh ge lalle. Ne cok mo pii soo ge, kal tǝ kwan cok pǝsãhe. 8 Jǝk ah ra tǝkine za mai mo yea tǝ kwanra ko pǝtãa cok syea fan faara: Dǝɓ mai mo yea tǝ kaa syea fan kŋ ka ya ne? 9 Za ki faara: Ako yo. Za ki faara: Ako ye ka, amma jur ko ɓo. Dǝɓ ah zyii ne suu ah faa: Ame yo. 10 So fiira ko: Nahnǝn ɓo gbǝr ɗǝne? 11 Zyii faa nyi ra: Dǝɓ ma ɗii ne Yesu ye sãa vuu rẽa gee me nahnǝnni, so faa nyi me: Mo ge vãh pǝ bii Siloa. Me kal ge gŋ, fahfal me vãhe, me kal tǝ kwan cok sǝ. 12 So fiira ko: Dǝɓ ah kẽne? Zyii faa nyi ra: Me tǝ cok ah ya.
Farisien fiira dǝɓ rǝ̃ǝ
13 Zaŋra dǝɓ mai mo yea rǝ̃ǝ ɓo ge pel Farisien ne ko. 14 Com mai Yesu mo sãa vuu gbǝr nahnǝn dǝɓ ah ne ko com 'yak yo. 15 Farisien so fiira ko faɗa: Mo lwaa kwan cok sye ɗǝne? Zyii faa nyi ra: Rẽa vuu gee me nahnǝnni, me so ge vãh ge lalle, me kal ne kwan cokki. 16 Za ki kǝsyil Farisien faara: Dǝɓ mai mo joŋ fan naiko tǝ Masǝŋ ya, mor ka tǝ syee mor ɓǝ lai com 'yak ya. Amma za ki faara: Dǝɓ faɓe' gak joŋ dǝǝbǝǝri nai ɗǝne? So woŋra ki ne ɓǝ ahe. 17 Farisien so fiira dǝɓ rǝ̃ǝ mai nahnǝn ah mo gbǝr ɓo faɗa: Mo faa ɗah tǝ dǝɓ mai mo gbǝr nahnǝn nyi mo ɗǝne? Zyii faa: Profeto Masǝŋ yo. 18 Yahuduen zyii nyiŋra ɓǝ ah dǝɓ mai mo yea rǝ̃ǝ ye tǝ kwan cok zǝzǝ̃ǝ nyẽe ya, so ɗiira zan ahe, 19 fiira ra faa: We mai we ɓii mai we faa byaŋ pǝrǝ̃ǝ ko ye ne? Joŋ ɗii a kwan cok zǝzǝ̃ǝ ne? 20 Zan ah zyiira faa: Ru tǝ ɓe, we ɓuur o, byaŋ pǝrǝ̃ǝ. 21 Amma a kwan cok zǝzǝ̃ǝ ɗǝne? Ru tǝ fahlii ah ya, ru tǝ dǝɓ mai mo gbǝr nahnǝn nyi ko laŋ ya ta. We fii ko, joŋ dǝɓlii suu ah ɓe, a gak zyii ne zah ahe. 22 Zan ah faara nai mor a ɗuura gal Yahuduen. Mor Yahuduen faara ɓǝ ɓo zahki daŋ, dǝɓ mai mo faa Yesu Kristu yo ɓe, ka nĩira dǝɓ ah pǝ yaŋ kee ɓǝ Masǝŋ ga lalle. 23 Mor ah zan ah faara: We fii ko, joŋ dǝɓlii suu ah ɓe, a gak zyii ne zah ahe. 24 Farisien ɗiira dǝɓ mai mo yea rǝ̃ǝ ɓo ɓal gwa ah faara: Mo faa goŋga ma pel Masǝŋ. Ru tǝ ɓe, dǝɓ mai dǝɓ faɓe' yo. 25 Zyii faa: Dǝɓ faɓe' ye ne? Ko ye ka ne? Me tǝ ya. Amma fan vaŋno me tǝ ɓe, me ye yea rǝ̃ǝ, zǝzǝ̃ǝko me kwan cokki. 26 So fiira ko: Joŋ wo ɓo sye ɗǝne? Gbǝr nahnǝn nyi mo ɗǝne? 27 Zyii faa: Me faa nyi we kǝpel ɓe, amma we zyii laa ɓǝ faa ɓe ya, we so tǝ 'yah ka laa ɓǝ ah kpǝ mor fẽene? Wala we 'yah ka ciŋ za syee mor ah ta ne? 28 Kal ne tǝǝra ko, so faara: Amo, mo ye dǝɓ syee mor ahe, ma ɓuu ru ye za syee mor Mosus. 29 Ru tǝ ɓe, Masǝŋ faa ɓǝ nyi Mosus, amma dǝɓ mai gee kẽe ge ne, ru tǝ ya. 30 Dǝɓ ah zyii faa nyi ra: Ɓǝ ah a gǝriŋ, we tǝ cok gin ah ya, amma so gbǝr nahnǝn nyi me. 31 Na tǝ ɓe, Masǝŋ ka laa zah za faɓe' ya, amma a laa ɓǝ dǝɓ ma ɗuu ko tǝkine syee mor ɓǝ ahe. 32 Na laa sõone dǝɓ ki gbǝr nahnǝn dǝɓ ma byaŋ pǝrǝ̃ǝ taa ɗǝ, na laa ya syaŋsyaŋ. 33 Dǝɓ mai mo gee wo Masǝŋ ge ya ɓe, ka gak joŋ fan ki ya. 34 Zyiira faa nyi ko: Amo pǝ faɓe' daga byaŋ ɓo, mo so tǝ kyeɓ ka cuu fan nyi ru ne? Nĩira ko gin wo ɓǝǝ ge lalle.
Rǝ̃ǝ ma zahzyilli
35 Yesu laa nĩira ko ɓoo ɓo, so zyaŋ ne ki faa nyi ko: Mo nyiŋ We Dǝfuu ne? 36 Dǝɓ ah zyii faa: Dǝɓlii, mo cuu nyi me sa, ako ye zu ka me nyiŋ ko ne? 37 Yesu faa nyi ko: Ako ye mo tǝ kwan ko tǝ faa ɓǝ ne moo ko. 38 Dǝɓ ah so faa: Me nyiŋ ɓe Dǝɓlii. So kea ge sǝŋ pel Yesu. 39 Yesu so faa: Me ge wo sǝr mai ka ŋgoŋ kiita, mor ka za mai mo rǝ̃ǝra ɓo mo kwora cokki, za mai mo tǝ kwanra cokki mo ciŋra rǝ̃ǝ. 40 Za ki kǝsyil Farisien mai mo ne ki mo laara ko faa ɓǝ nai, so fiira ko: Aru laŋ ru ye rǝ̃ǝ ta ne? 41 Yesu zyii faa nyi ra: Awe ye rǝ̃ǝ ɓe, ka we ka ne faɓe' ya. Amma zǝzǝ̃ǝko we faa we kwan cokki, mor ah awe pǝ faɓe' ba.
Ɓǝ kikiŋ pakǝpii ne pǝsǝ̃ǝre
1 Goŋga me faa nyi we, dǝɓ mo dan ge pǝ jol pǝsǝ̃ǝ mo syee zahfah ah ya mo zoo cok ki cam ɓe, ka pah ah nyin o, dǝɓ kaafuu yo. 2 Amma dǝɓ mai mo dan zahfahe, ka pakǝpii pǝsǝ̃ǝ yo. 3 Pa byak zahfah a gbǝr nyi ko, pǝsǝ̃ǝ a laara kyaŋ ahe, a ɗii pǝsǝ̃ǝ ah ra ne tǝɗii ɓǝǝra, a ga lal ne ra. 4 Ne cok mo ɗii ra pǝ̃ǝ ge lal daŋ ɓe, a kal pel ɓǝǝra, pǝsǝ̃ǝ a syeera mor ahe, mor tǝra kyaŋ ah ɓe. 5 Amma ka syeera mor dǝɓ mai mo tǝ ra ya ya, a ɗuura gal ah ɗuu, mor tǝra kyaŋ ah ya. 6 Yesu faa ɓǝ kikiŋ mai nyi ra, amma laara mor ɓǝ faa ah mo tǝ faako nyi ra ya.
Yesu ye pakǝpii sãhe
7 So Yesu faa faɗa: Goŋga me faa nyi we, ame zahfah pǝsǝ̃ǝre. 8 Za mai mo gera kǝpel nyi me daŋ nyin ye ra, za kaafuu ye ra, amma pǝsǝ̃ǝ zyii laa ra ya. 9 Ame zahfahe, koo zune mo tǝ dan ne me ɓe, a ga ǝ̃ǝ, a gak danne, a pǝ̃ǝ ga lalle, a ga lwaa farelle. 10 Nyin ge mor kiŋ fanne, ka in fan pǝ wulli, ka ɓeɓ fanne. Ame, me ge mor ka za mo lwaara cee, a lwaara cee matǝ goŋga ta. 11 Ame pakǝpii sãhe. Pakǝpii sãh a wun mor pǝsǝ̃ǝ ahe. 12 Dǝɓ ma joŋ yeɓ mor lakre, pakǝpii ye ka, mor pǝsǝ̃ǝ ah ye ka. Mo kwo goobam tǝ gin ɓe, a soɓ pǝsǝ̃ǝ myah a ɗuu kalle, goobam gbah pǝsǝ̃ǝ ahe, a myah ra ta. 13 A ɗuu kalle, mor tǝ joŋ yeɓ mor lak to, ka tǝ foo ɓǝ pǝsǝ̃ǝr a. 14 -15 Ame pakǝpii sãhe. Tǝgbana Pa ɓe mo tǝ me ɓo, me tǝ Pa ɓe laŋ ɓo ta, nai ta, me tǝ pǝsǝ̃ǝ ɓe, pǝsǝ̃ǝ ɓe laŋ tǝra me ta. Me ga wǝ mor pǝsǝ̃ǝ ɓe. 16 Pǝsǝ̃ǝ ɓe manyeeki ah no faɗa, ara ka pǝ jol mai ya, me ga kyeɓ ra ge ne ko, a ga laara kyaŋ ɓe, a ga ciŋra ŋgaɓ vaŋno, pakǝpii ga yea vaŋno. 17 Pa ɓe 'yah me, mor me nyi cee ɓe ka me so ɓaŋ faɗa. 18 Dǝɓ ma ɓaŋ cee ɓe kǝka, amma ame ye nyi ne 'yah ɓe. Me ne swah nyi ahe, so me ne swah ka so jin ɓaŋ faɗa. Pa ɓe ye nyi fahlii ah me ka joŋ naiko. 19 Yahuduen so woŋra ki tǝ ɓǝ faa ah kpǝ. 20 Za pǝlli kǝsyil ɓǝǝ faara: Dǝɓ mai fan kaa ɓo tǝl ahe, tǝgwĩi yo, we laa ɓǝ ah mor fẽene? 21 So za ki faara: Dǝɓ mai fan mo kaa ɓo tǝl ah pah ah ka faa ɓǝ nai ya. Dǝɓ mai fan mo kaa ɓo tǝl ah a gak gbǝr nahnǝn rǝ̃ǝ ɗǝne?
Yahuduen zyiira ɓǝ Yesu ya
22 Joŋra fĩi yaŋ Masǝŋ yaŋ Jerusalem ka gwahl o, 23 Yesu tǝ kyãh mor daŋki Salomo zah yaŋ Masǝŋ. 24 Yahuduen taira ge wol ah faara nyi ko: Mo ga soɓ ru nǝn pǝ ɓǝ syel mai nai ga dai kẽne? Amo Kristu ɓe, mo faa nyi ru njaŋ o. 25 Yesu zyii faa nyi ra: Me faa nyi we ɓe, amma we ka tǝ zyii nyiŋ me ya. Yeɓ mai me joŋ ne swah Pa ɓe, yeɓ ah joŋ syedowal tǝ ɓe. 26 Amma we ka tǝ zyii nyiŋ me ya, mor we ye ka pǝsǝ̃ǝ ɓe ya. 27 Pǝsǝ̃ǝ ɓe a laara kyaŋ ɓe, me tǝ ra ɓe, a syeera mor ɓe. 28 Me nyi cee ma ga lii nyi ra, ka ga wukra ya syaŋsyaŋ, dǝɓ ka gak nyiŋ ra jol ɓe ya. 29 Pa ɓe mai mo nyi ra nyi me a pǝyǝk kal fan daŋ. Dǝɓ ka gak nyiŋ ra jol Pa ɓe ya. 30 Pa ɓe ne me, ru vaŋno. 31 Yahuduen woora tǝsal ka ɓaa ko ne faɗa. 32 So Yesu faa nyi ra: Me joŋ yeɓ sãh pel ɓii pǝ tǝɗii Pa ɓe pǝlli, we 'yah ɓaa me ne tǝsal pǝ wul mor yeɓ makẽe kǝsyil ah ne? 33 Yahuduen zyiira faa nyi ko: Ru ka tǝ 'yah ɓaa mo pǝ wul ne tǝsal mor yeɓ masãh ah mo joŋ ɓo ya, amma mor mo tǝ tǝǝ Masǝŋ. Amo ye dǝfuu, mo so tǝ kyeɓ ka joŋ suu ɓo na Masǝŋ. 34 Yesu zyii faa: Ŋwǝǝ ɓo pǝ ɓǝ lai ɓii Masǝŋ faa: Awe masǝŋ. 35 Na tǝ ɓe, ɓǝ mai Ɗerewol mo faa, dǝɓ ka gak cak ɓǝ ah ya. Masǝŋ ɗii ra ne masǝŋ, mor a cuu za mai ɓǝ ah mo tǝ faa wo ɓǝǝra. 36 Pa ɓe ye nǝǝ me, pee me ge wo sǝrri, we so faa me tǝ tǝǝ Masǝŋ, wala mor mai me faa me We Masǝŋ ko ne? 37 Me ka tǝ joŋ yeɓ Pa ɓe ya ɓe, we nyiŋ me ka. 38 Amma me tǝ joŋ ɓe, koo we nyiŋ me ya laŋ, we nyiŋ me mor ɓǝ yeɓ ɓe, mor ka we tǝ lii o, Pa ɓe pǝzyil ɓe, ame pǝzyil Pa ɓe. 39 So kyeɓra ka gban ko faɗa, amma Yesu ǝ̃ǝ jol ɓǝǝ kalle. 40 Yesu so kal ge Yordan nǝzakǝŋhaa faɗa pǝ cok mai Yohana mo tǝŋ joŋ baptisma gŋ kǝpelle, kaa gŋ. 41 Za pǝlli a gara wol ahe, faara: Yohana joŋ dǝǝbǝǝri koo vaŋno ya, amma ɓǝ mai mo faako tǝ dǝɓ mai daŋ goŋga yo. 42 Za pǝlli nyiŋra ko gŋ.
Wul Laazurus
1 Dǝɓ ki no yaŋ Betaania a ɗii ne Laazurus, syem gbǝ ko. Betaania yaŋ mai Maria ne naa mah ah Marta mo kaara ɓo gŋ yo. 2 Maria ah ako ye mai mo sah ɓǝrdi ge wo ɓal Dǝɓlii mo so tah ne rĩi tǝtǝl ahe, naa mah ah ye Laazurus mai mo ne syemme. 3 Wee mah ah maŋwǝǝ rai peera dǝɓ ki ka mo ge faako nyi Yesu: Dǝɓlii, bai ɓo mai mo 'yah ko kŋ ne syemme. 4 Ne cok Yesu mo laa ɓǝ ah so faa: Syem mai syem wul Laazurus ye ka, amma syem ah a mor ka yii yǝk Masǝŋ, ka mo yiira We Masǝŋ tǝ ɓǝ ahe. 5 Yesu a 'yah Marta ne naa mah ah Maria tǝkine Laazurus daŋ. 6 Ne cok mo laa Laazurus ne syemme, so kaa pǝ cok mai mo gŋ zah'nan gwa kpǝ. 7 Fahfal ah so faa nyi za syee mor ahe: Na jin ge sǝr Yudea. 8 Za syee mor ah zyiira faa nyi ko: Dǝɓlii, nǝn pǝlli laŋ ya ba, Yahuduen tǝ kyeɓra ka ɓaa mo ne tǝsal pǝ wulli, mo so tǝ 'yah ka pii soo ga gŋ ŋhaa kpǝ ne? 9 Yesu zyii faa nyi ra: Ne zah'nan ɓe cok com ka gŋ jemma tǝtǝl gwa ya ne? Dǝɓ mo tǝ syee ne com ɓe, ka ɓee tǝ ɓal a, mor cok sǝǝ ɓo tǝ sǝr pǝfãi. 10 Amma dǝɓ mo tǝ syee ne suŋ ɓe, a ɓee tǝ ɓalle, mor ka ne cokfãi ya. 11 Ne cok Yesu mo faa ɓǝ mai nyi ra naiko, fahfal ah so faa: Bai man Laazurus tǝ nǝnǝmmi, amma me ga ka me kpiŋ ko. 12 Za syee mor ah zyiira faa nyi ko: Dǝɓlii, mo tǝ nǝnǝm o ɓe, ka tǝ ga laɓɓe. 13 Yesu tǝ 'yah faa Laazurus wǝ ɓe, amma za syee mor ah lǝŋra tǝ faa ɓǝ nǝm masãh ah 'manna. 14 So Yesu faa nyi ra wat: Laazurus wǝ ɓe. 15 Me laa pǝ'nyah mor me kǝka gŋ ya, ka we nyiŋ, amma na ge wol ah o. 16 So Tomas ma ɗii ne Jurkpiŋ faa nyi za syee mor ahe: Na ge gŋ ne Pa cuu fan ta, mor ka na wuk ne ki daŋ.
Yesu ako ye ur wul tǝkine cee
17 Ne cok Yesu mo ge dai gŋ, lwaa Laazurus joŋ ɓo pǝ pal zah'nan nai ɓe. 18 Yaŋ Betaania a ne Jerusalem gwari tǝgbana kilomeetǝr sai. 19 Yahuduen pǝlli gera wo Marta ne Maria mor ka ciira tǝtǝl ɓǝǝ pǝ cok wul naa ma ɓǝǝra. 20 Ne cok Marta mo laa Yesu tǝ ginni, ur kal ge zyaŋ tǝl ahe, amma ka Maria kaa mǝ ah ɓo yaŋ. 21 Marta faa nyi Yesu: Dǝɓlii, kǝnah mo no nyee ɓe, naa ma ɓe ka wǝ ya. 22 Amma me tǝ ɓe, koo zǝzǝ̃ǝ laŋ, fan makẽne mo fii Masǝŋ mor ah daŋ a ga nyi nyi mo. 23 Yesu faa nyi ko: Naa ma ɓo ga syemme. 24 Marta zyii faa: Me tǝ ɓe, a ga syem ne cok za mai mo pǝ wul moo ga urra ne zah'nan fahfal tǝ lii. 25 Yesu faa nyi ko: Ame ye ur wulli, ame ye cee. Dǝɓ mo nyiŋ me ɓe, koo mo wǝ laŋ, a yea ne cee. 26 Koo zune mo ne cee ba mo nyiŋ me ɓe, ka ga wǝ ya syaŋsyaŋ, mo nyiŋ ɓǝ mai ɓe ne? 27 Marta zyii faa: Oho, me nyiŋ ɓe Dǝɓlii, amo ye Kristu We Masǝŋ mai mo tǝ yah gin wo sǝrri.
Yesu yeyee
28 Fahfal Marta mo faa ɓǝ mai vǝrri, so zol kal ge ɗii naa mah ah Maria faa nyi ko ne zah gwǝǝ 'yaŋ: Pa cuu fan ge ɓo tǝ fii mo. 29 Ne cok Maria mo laa nai, ur gaŋ hǝǝ ka ga wo Yesu. 30 Ka Yesu ɓah ka dan ga tǝgǝǝ yaŋ ya ba, amma a no pǝ cok mai Marta mo ge zyaŋ ne ki gŋ. 31 Ne cok Yahuduen mai mo ɓǝr yaŋ ne Maria mor ka cii tǝtǝl ah pǝ cok wul mo kwora ko ur gaŋ mo pǝ̃ǝ ne hǝǝre, so pǝ̃ǝra kal ge mor ah ta, mor lǝŋra kal ga zah pal ka yeyee gŋ. 32 Ne cok Maria mo ge dai pǝ cok mai Yesu mo gŋ, mo so kwo ko, kea ge sǝŋ mor ɓal ah faa: Dǝɓlii, kǝnah mo no nyee ɓe, naa ma ɓe ka wǝ ya. 33 Yesu mo kwo ko tǝ yeyee, so Yahuduen mai mo gera ne ki tǝ yera yee ta, tǝtǝl 'mĩi ko, so yee syak pǝ zahzyil ahe, 34 so fii ra: We cii ko ɓo kẽne? Zyiira faa nyi ko: Dǝɓlii, mo ge ẽe o. 35 Yesu so kal ne yee. 36 Yahuduen so faara: We ẽe a 'yah ko ɗii ne! 37 Za ki kǝsyil ɓǝǝ faara: Gbǝr nahnǝn nyi rǝ̃ǝ, ka gak syem Laazurus ya ne?
Laazurus syemme
38 Tǝtǝl so 'mĩi Yesu faɗa, ur kal ge zah palle. Pal ah yii yo, tǝsal coo ɓo zah ahe. 39 Yesu faa: We ɓaŋ tǝsal ah ge lalle. Marta naa mah wul faa nyi ko: Dǝɓlii, a fuŋ zǝzǝ̃ǝ pǝsõo o, mor joŋ ɓo pǝ pal zah'nan nai ɓe. 40 Yesu zyii faa nyi ko: Me faa nyi mo, mo nyiŋ ɓe, mo ga kwo yǝk Masǝŋ ya ne? 41 So ɓaŋra tǝsal ah ge lalle. Yesu ɓaŋ nahnǝn ge sǝŋ faa: Me joŋ osoko nyi mo Daddǝ, mor mo laa pǝǝ ɓe. 42 Me tǝ ɓe, mo laa pǝǝ ɓe cẽecẽe no, amma me faa nai mor za mai mo uura ɓo nyeeno, mor ka mo nyiŋra amo ye pee me ge. 43 Fahfal mo faa ɓǝ naiko, so ɓyaŋ ɓǝ faa: Laazurus, mo pǝ̃ǝ o. 44 So wul pǝ̃ǝ gin pǝ pal ge lalle. Ɓal ah ra tǝkine jol ah ra koo ɓo ne zyimmi, koora tǝtǝl ah ɓo ne zyim ta. Yesu faa nyi ra: We wǝǝ ge lal we soɓ mo geko.
Kyeɓra fahlii ka gban Yesu
45 Za pǝlli kǝsyil Yahuduen mai mo gera wo Maria mo kwora fan mai Yesu mo joŋ, nyiŋra ko. 46 Amma za ki kǝsyil ɓǝǝ kalra ge wo Farisien, keera ɓǝ fan mai Yesu mo joŋ nyi ra. 47 Farisien tǝkine zaluu za joŋzahsyiŋ taira za faadal faara: Na ga joŋ ɗǝne? Mor dǝɓ mai tǝ joŋ dǝǝbǝǝri pǝlli. 48 Na soɓ ko tǝ joŋ nai ɓe, za daŋ a ga nyiŋra ko, so za Romamen a gin ɓeɓra yaŋ Masǝŋ man tǝkine za man daŋ. 49 Dǝɓ vaŋno kǝsyil ɓǝǝ a ɗii ne Kayafas, pa joŋzahsyiŋ malii ye syii ahe, faa nyi ra: We tǝ fan ki ya. 50 We foo sõone a pǝsãh wo ɓii ka dǝɓ vaŋno mo wǝ mor zana, ka za ne lii ah daŋ mo vǝr ka ya ne? 51 Faa ɓǝ mai ɓo ka ne 'yah suu ah ya, amma mor ako ye pa joŋzahsyiŋ malii syii ahe, faa ɓǝ ɓo tǝ ɓǝ fan mai mo tǝ ga joŋ pel ɓo: Yesu ga wǝ mor Yahuduen. 52 Ka mor ɓǝǝ to laŋ ya, amma mor ka tai wee Masǝŋ mai mo myahra ɓo daŋ ka joŋ suu vaŋno. 53 Daga com ah zaluu Yahuduen zyeɓra ɓǝ ka in Yesu pǝ wulli. 54 Mor ah Yesu ka kyãh kǝsyil Yahuduen ne nahnǝn ɓǝǝ caŋryaŋ ya, amma zol kal ge cok maki ah mai mo nǝfah kǝsyicokki, yaŋ ma ɗii ne Efraim, kaa gŋ ne za syee mor ahe. 55 Ka fĩi Paska Yahuduen ge gwari ɓe, za pǝlli pǝ sǝr ah kalra ge yaŋ Jerusalem kǝpel fĩi ah mor ka ga vãhra suu ɓǝǝra. 56 Kyeɓra Yesu, so kalra ge pǝ yaŋ Masǝŋ, so fiira ki: We lǝŋ ɗǝne? A ga pǝ fĩi ne? Wala ka gan a ne? 57 Zaluu za joŋzahsyiŋ tǝkine Farisien faara nyi za koo zune mo tǝ cok mai Yesu mo gŋ ɓe, mo ge faako ɓǝ ahe, mor ka mo gbǝra ko.
Maria sah ɓǝrdi ge wo ɓal Yesu
1 Coŋ zah'nan ɓo yea ka fĩi Paska mo joŋ, Yesu ge yaŋ Betaania mai Laazurus mo kaa ɓo gŋ, ako ye dǝɓ mai Yesu mo syem ko pǝ wulli. 2 Joŋra farel nyi Yesu gŋ. Amma Marta ye joŋ yeɓ pǝ cok ren farel ahe. Laazurus no kǝsyil za mai mo haira ɓo zah taabǝl cok ren farel ne Yesu. 3 So Maria ɓaŋ gbel mai ɓǝrdi mo gŋ nǝn raita liitǝr, lee ah pǝyǝkki, mor zyeɓ ɓo ne nardus ma fuŋ 'nyah ahe, ge sah ge wo ɓal Yesu. So sõm nyi ko ne rĩi tǝtǝl ahe, ŋhaa fuŋ ɓǝrdi baa yaŋ kǝrkǝr. 4 Dǝɓ vaŋno kǝsyil za syee mor Yesu, Yudas Iskariot mai mo tǝ yah joŋ tǝkor ah faa: 5 Mor fẽe ɓaŋra ɓǝrdi nyẽe lee solai ne temere sai ka wom lak ah nyi za syak ya ne? 6 Faa nai mor tǝ foo ɓǝ za syak 'manna ya, amma mor nyin ye ko, gbǝ dah rǝk lak ɓo, so a lal kiŋ mai moo taira ga gŋ. 7 Yesu faa: We gaɓ ko ka, we soɓ ko kan ɓǝrdi ah mor zah'nan cii ɓe. 8 Mor za syak no ne we cẽecẽe, amma ame, we ka yah yea ne me cẽecẽe ya.
Kyeɓra ka in Laazurus pǝ wulli
9 Yahuduen pǝlli mo laara Yesu no yaŋ Betaania, so kalra ge gŋ. Gera laŋ mor Yesu to ya, amma gera mor ka ẽe Laazurus mai Yesu mo syem ko ta. 10 So zaluu za joŋzahsyiŋ zyeɓra ɓǝ ka in Laazurus pǝ wulli. 11 Mor Yahuduen pǝlli tǝ soɓra zaluu ɓǝǝra, a nyiŋra Yesu mor ɓǝ Laazurus.
Yesu ge yaŋ Jerusalem
12 Tǝ'nan ah za pǝlli mo gera ɓo ka joŋ fĩi Paska, laara Yesu tǝ gin yaŋ Jerusalem. 13 Ceera goo mǝnǝǝ jol ge zyaŋra tǝl ah ne ŋwaara ɓǝ faara: Osoko Masǝŋ, Masǝŋ mo ẽe Dǝɓ mai mo tǝ gin pǝ tǝɗii Dǝɓlii, Masǝŋ mo ẽe Goŋ Israel. 14 Yesu lwaa korro, so yee kaa tǝl ah tǝgbana Ɗerewol mo faa: 15 Mo ɗuu gal ka, yaŋ Sion. Mo ẽe Goŋ ɓo tǝ ginni, Yee we korro ɓo. 16 Kǝpel ah za syee mor ah tǝra mor ɓǝ ah ya, amma ne cok Yesu mo lwaa yǝk ah o, so foora ɓǝ mai Ɗerewol mo faa tǝl ahe, tǝkine fan mai mo joŋra wol ahe. 17 Za mai mo no ne Yesu ne cok mo syem Laazurus mo ɗii ko pǝ pal pǝ̃ǝ ge lalle, so keera ɓǝ fan mai mo kwora nyi zana. 18 Mor ah za pǝlli ge zyaŋra tǝl ahe, mor laara ɓǝ dǝǝbǝǝri mai mo joŋko. 19 So Farisien faara tǝgǝǝ ki: We kwo ɓe ne? Na ka tǝ yah gak joŋ fan ki yao. Za daŋ tǝ syeera mor ah o.
Za Grek manyeeki ah kyeɓra Yesu
20 Za Grek manyeeki ah no kǝsyil za mai mo gera ɓo yaŋ Jerusalem mor ka juupel ne fĩi ah ta. 21 Gera wo Filip mai yaŋ ah mo Betsaida sǝr Galile, faara nyi ko: Dǝɓlii, ru 'yah ka ẽe Yesu. 22 Filip kal ge faa ɓǝ ah nyi Andreas, so kalra gwa daŋ ge faara ɓǝ ah nyi Yesu. 23 Yesu zyii zah ɓǝǝ faa: Cok mai ka We Dǝfuu mo yea pǝyǝk ge zǝzǝ̃ǝ ɓe. 24 Goŋga me faa nyi we, nah alkamaari mo dan ge mor sǝr ka mo so wǝ ya ɓe, a yea vaŋno sǝ, amma mo wǝ ɓe, a so byaŋ nǝn ah yea pǝlli. 25 Dǝɓ mo tǝ 'yah cee ah ɓe, ka tǝ ga muŋ cee ahe, amma dǝɓ mai mo tǝ syiŋ cee ah wo sǝr mai ɓe, ka tǝ byak cee ah ma ga lii. 26 Dǝɓ mo tǝ 'yah joŋ yeɓ ɓe ɓe, sai mo syeeko mor ɓe, cok mai me gŋ dǝɓ yeɓ ɓe ga yea gŋ ta. Pa ɓe ga yii dǝɓ mai mo tǝ joŋ yeɓ ɓe.
Yesu faa ɓǝ wul suu ahe
27 Zǝzǝ̃ǝko zahzyil ɓe tǝ swaa ɓǝ, me so ga faa ɗǝne? Me ga faa Daddǝ, mo ǝ̃ǝ me pǝ fan mai mo tǝ ga ge ne cok maiko ne? Amma me ge ɓo mor ahe, ka me pǝ̃ǝ pǝ cok bone ahe. 28 Daddǝ, mo yii tǝɗii ɓo. So kyaŋ cii gin sǝŋ ge faa: Me yii tǝɗii ɓe ɓe, me so ga yii pǝfuu faɗa. 29 Za mai mo uura ɓo pǝ cok ah mo laara kyaŋ mo faa ɓǝ ge naiko, faara: Bam ye haŋ ɓo. Za ki faara: Angelos ye faa ɓǝ ɓo ne ki. 30 Yesu faa nyi ra: Kyaŋ mai faa ɓǝ ge ɓo ka mor ɓe ya, amma faa ge ɓo mor ɓiiri. 31 Zǝzǝ̃ǝko cok ŋgoŋ kiita tǝ sǝr mai ge ɓe, a ga nĩira goŋ sǝr mai ga lal o. 32 Mo raora me ge sǝŋ ɓe, me ga tai za daŋ ge wo ɓe. 33 Faa ɓǝ mai nai mor ka cuu ɓǝ wul mai mo tǝ ga wǝko. 34 Za zyiira zah ah faa: Ru laa pǝ ɗerewol ɓǝ lai ɓuu Kristu yea ga lii, so joŋ ɗii mo faa a ga raora We Dǝfuu ga sǝŋ ne? Azu ye We Dǝfuu ah sye ne? 35 Yesu so faa nyi ra: Cokfãi no kǝsyil ɓii zah vaŋno ba faɗa, we syee ne cokfãi ahe, mor ka cokfuu mo ge tǝ ɓii ka. Mor dǝɓ mo tǝ syee ne cokfuu ɓe, ka tan cok mai mo tǝ ga gŋ ya. 36 We nyiŋ cokfãi ah ne cok mo no kǝsyil ɓii ba, mor ka we ciŋ za cokfãi.
Yahuduen nyiŋra ya
Fahfal Yesu mo faa ɓǝ naiko, so zol kal ge muŋ suu ah pǝɗǝkki. 37 Amma koo Yesu mo joŋ dǝǝbǝǝri ɓo ne nahnǝn ɓǝǝ camcam pǝlli nai laŋ, nyiŋra ko ya, 38 mor ka ɓǝ mai profeto Esaia mo faa ɓo mo joŋ: Dǝɓlii, azu nyiŋ ɓǝ faa ɓuu ne? Dǝɓlii cuu swah ah nyi za makẽe sye ne? 39 Ka tǝ gak nyiŋra ya, mor Esaia so faa: 40 Masǝŋ rǝ̃ǝ nahnǝn ɓǝǝ ɓe. Coo fatan tǝtǝl ɓǝǝ ɓe, Mor ka nahnǝn ɓǝǝ mo gak kwo cok ka, Ka tǝtǝl ɓǝǝ mo foo ɓǝ Ka mo lwaara jin ge wo ɓe ka me laɓ ra ka. 41 Esaia faa nai mor kwo yǝk Yesu ɓe, faa ɓǝ ɓo tǝl ahe. 42 Ne cok ah koo kǝsyil zaluu Yahuduen ne suu ɓǝǝ laŋ, za pǝlli gŋ nyiŋra ko. Amma faara ɓǝ ah ge lal a, mor a ɗuura gal Farisien, mor ka mo nĩira ra yaŋ kee ɓǝ Masǝŋ ge lal ka. 43 Mor a 'yahra yǝk ma kǝsyil dǝfuu kal yǝk ma wo Masǝŋ ɓe.
Ɓǝ faa Yesu ye ga ŋgoŋ kiita
44 Yesu ɓyaŋ ɓǝ faa: Dǝɓ mo nyiŋ me ɓe, ka nyiŋ me ɓo ka to ya, amma ka nyiŋ Dǝɓ mai mo pee me ge ɓo ta. 45 Dǝɓ mo kwo me ɓe, ka kwo Dǝɓ mai mo pee me ge ɓe ta. 46 Ame, me ge ɓo wo sǝr tǝgbana cokfãi, mor ka koo zune mo nyiŋ me daŋ mo kaako pǝ cokfuu ka. 47 Dǝɓ mo laa ɓǝ faa ɓe so mo syee mor ɓǝ ah ra ya ɓe, me ye ka tǝ ga ŋgoŋ kiita tǝ dǝɓ ah ya, mor me ge ɓo ka ka ŋgoŋ kiita tǝ za sǝr a, amma me ge ɓo ka ǝ̃ǝ za sǝrri. 48 Dǝɓ mo ɓoo me ge lal mo nyiŋ ɓǝ faa ɓe ya ɓe, ɓǝ mai me cuu ɓo ako ye ga ŋgoŋ kiita tǝ dǝɓ ah ne zah'nan fahfal tǝ lii. 49 Mor me faa ɓǝ ah ɓo ka ne swah suu ɓe ya, amma Pa ɓe mai mo pee me ge ako ye cuu ɓǝ mai ka me faa ne mai ka me cuu daŋ nyi me ne suu ahe. 50 Me tǝ ɓe, ɓǝ faa ah a nyi cee ma ga lii. Mor ah ɓǝ mai me tǝ faani, me faa tǝgbana mai Pa ɓe mo cuu nyi me ka faani.
Yesu vãh ɓal nyi za syee mor ahe
1 Ka fĩi Paska ɓah joŋ ya ba, Yesu tǝ ɓe, cok ah ge ɓo gwari ka soɓ sǝr mai mor ka ga wo Pam o, a 'yah zan ah mai mo no wo sǝr cẽecẽe, a 'yah ra 'manna 'manna. 2 Yesu ne za syee mor ah haira ɓo tǝ ren farelle, Satan zyeɓ ɓǝ ah ɓo ka Yudas we Simon Iskariot mo joŋko tǝkor Yesu. 3 Yesu tǝ ɓe, zye gee wo Masǝŋ ge, zye pii soo ga wo Masǝŋ faɗa, Pam soɓ fan daŋ ɓo jol ahe. 4 Yesu ur gin zah taabǝl cok ren farelle, wǝǝ mbǝro ah ra ge lalle, ɓaŋ zyim saa ge sãhe. 5 So bee bii rǝk ge pǝ tahsah tǝŋ vãh ɓal nyi za syee mor ah ra ne ko, a tah nyi ra ne zyim mai mo saa ɓo sãhe. 6 Ge dai wo Simon Petar, so Petar fii ko: Dǝɓlii, mo ga vãh ɓal nyi me ne? 7 Yesu zyii faa nyi ko: Mo ka tǝ mor fan mai me tǝ joŋ zǝzǝ̃ǝko ya, amma mo ga tǝ ba. 8 Petar faa nyi ko: Mo ka vãh ɓal ɓe ya syaŋsyaŋ. Yesu zyii faa nyi ko: Me vãh ɓal ɓo ya ɓe, ka mo ka tai ki ne me ya. 9 Simon Petar so faa nyi ko: Dǝɓlii, mo vãh ɓal ɓe to ka, amma mo vãh jol tǝkine tǝtǝl nyi me ta. 10 Yesu faa nyi ko: Dǝɓ mo er bii ɓe, ka ne 'yah ka so vãh cok maki ah yao, sai ɓal to, mor suu ah daŋ nǝǝ ɓe. Awe, we nǝǝ ɓe, amma we nǝǝ ɓo ka daŋ ya. 11 Yesu tǝ dǝɓ mai mo tǝ ga joŋ tǝkor ah ɓe, mor ah faa: We nǝǝ ɓo ka daŋ ya. 12 Fahfal Yesu mo vãh ɓal nyi ra vǝrri, so woo mbǝro ah ɓaa ge wo suu, kaa ge cok kal ah zah taabǝl so fii ra: We tǝ mor fan mai me joŋ wo ɓii ɓe ne? 13 We ɗii me ne Pa cuu fan ne Dǝɓlii, we faa goŋga ɓo, ame ko yo. 14 So ame ye me Dǝɓlii ɓii ne Pa cuu fan ɓii ɓe, me vãh ɓal nyi we, awe laŋ we vãh ɓal nyi ki nai ta. 15 Mor me cuu fahlii ah ɓo we ka we joŋ wo ki tǝgbana me joŋ wo ɓii ta. 16 Goŋga me faa nyi we, dǝɓ yeɓ ka yea pǝyǝk kal pah yeɓ ya, dǝɓ pee ka yea pǝyǝk kal pa pee ah ya ta. 17 We tǝ goŋga mai zǝzǝ̃ǝ we so tǝ joŋ ɓǝ ah ta ɓe, we ga laa pǝ'nyahre. 18 Me ka tǝ faa ka ɓii daŋ ya, me tǝ za mai me syen ɓo ɓe. Amma ka ɓǝ mai mo faa ɓo pǝ Ɗerewol mo joŋ ge cok ahe, faa: Dǝɓ mai mo tǝ ren farel ɓe so jin syiŋ me. 19 Me faa nyi we kǝpel zǝzǝ̃ǝko, ka fan ah ɓah joŋ ya ba, mor ka fan ah mo ge tǝ joŋ ɓe, ka we nyiŋ: ame ye Dǝɓ mai me no. 20 Goŋga me faa nyi we, dǝɓ mai mo nyiŋ Dǝɓ pee ɓe, ka nyiŋ me ɓo ta. Dǝɓ mo nyiŋ me ɓe, ka nyiŋ Dǝɓ mai mo pee me ɓo ta.
Yesu faa Yudas ga joŋ tǝkor ahe
21 Fahfal Yesu mo faa ɓǝ mai vǝrri, zahzyil ah yee syak so faa: Goŋga me faa nyi we, dǝɓ vaŋno kǝsyil ɓii a ga joŋ tǝkor ɓe. 22 Za syee mor ah ẽera ki nǝn ki nǝn ki, so tǝra dǝɓ mai Yesu mo tǝ faa ɓǝ ah ya. 23 Dǝɓ vaŋno kǝsyil za syee mor ah mai Yesu moo 'yahko pǝlli kaa ɓo kah Yesu gwari. 24 Simon Petar haɓ ko ne nahnǝn ka mo fiiko Yesu dǝɓ mai mo tǝ faako ɓǝ ah azu ye ne? 25 Dǝɓ syee mor ah so ɗǝŋ ge wo Yesu fii ko: Dǝɓlii, azu ye ne? 26 Yesu zyii faa: Me ga bǝǝ tǝwaa 'naa nãa ne ko, dǝɓ mai me ga nyi nyi ka ako yo. Yesu so bǝǝ tǝwaa 'naa nãa ne ko, so nyi ge Yudas we Simon Iskariot. 27 Fahfal Yudas mo nyiŋ tǝwaa ahe, Satan dan pǝ zahzyil ahe. Yesu faa nyi ko: Fan mai mo tǝ 'yah ka joŋ kŋ mo ge joŋ gwari o. 28 Koo dǝɓ vaŋno kǝsyil za mai mo haira ɓo zah taabǝl tǝ mor ɓǝ ah Yesu tǝ faa nyi ko ɗǝne ya. 29 Za ki lǝŋra Yudas gbǝ dah rǝk lak ɓo, mor ah Yesu tǝ faa nyi ko ka mo ge leako fan mai mo tǝ 'yahra mor ka joŋ fĩi ne ko, wala tǝ fii ko ka mo nyiko fan nyi za syakke. 30 Yudas nyiŋ tǝwaa ahe, so ur pǝ̃ǝ kal sǝ, ka cok foo ɓe.
Ɓǝ lai mafuu ahe
31 Fahfal Yudas mo pǝ̃ǝ kalle, Yesu faa: Zǝzǝ̃ǝko We Dǝfuu lwaa yǝk ɓe, Masǝŋ lwaa yǝk mor ah ɓe ta. 32 Mo kwora yǝk Masǝŋ ɓo mor ah ɓe, Masǝŋ ne suu ah laŋ a ga yii We Dǝfuu, a ga yii ko gwari. 33 Wee ɓe, me no ne we nje ba faɗa, we ga kyeɓ me, amma me faa nyi we zǝzǝ̃ǝko tǝgbana me faa nyi Yahuduen, we ka gak ga cok mai me tǝ ga gŋ ya. 34 Me nyi ɓǝ lai mafuu nyi we: we 'yah ki tǝgbana mai me 'yah we ta. 35 Mor we tǝ 'yah ki ɓe, za daŋ a ga tǝra, awe ye za syee mor ɓe.
Yesu faa Petar ga fofoo tǝ 'minni
36 Simon Petar fii ko: Dǝɓlii, mo ga kẽne? Yesu zyii faa nyi ko: Mo ka gak ga cok mai me tǝ ga gŋ ne me zǝzǝ̃ǝ ya, mo ga fahfal ɓe comki ba. 37 Petar faa nyi ko: Dǝɓlii, me ka gak ga ne mo zǝzǝ̃ǝ ya mor fẽene? Koo mo nǝn wul ye laŋ, me ga wǝ mor ɓo. 38 Yesu zyii faa: Mo ga wǝ mor ɓe 'manna ne? Goŋga me faa nyi mo, watǝcoo ka ɓyaŋ ya mo ga fofoo faa zye tǝ me ya ɓal sai.
Yesu ye fahlii ma ga wo Masǝŋ
1 Yesu faa nyi ra: We swaa ɓǝ ki ka, we nyiŋ Masǝŋ, we nyiŋ me ta. 2 Cok kal no yaŋ Pa ɓe pǝlli, me ga zyeɓ cok kal nyi we gŋ. Kǝnah cok kal mo kǝka ɓe, me ka faa nyi we ya. 3 Fahfal me ge zyeɓ cok kal nyi we ɓe, me pii soo gin woo we ga wo ɓe ne ko, mor ka cok mai me gŋ we ge yea gŋ ta. 4 We tǝ fahlii ga cok mai me tǝ ga gŋ ta. 5 Tomas faa nyi ko: Dǝɓlii, ru ka tǝ cok mai mo tǝ ga gŋ ya, ru gak tǝ fahlii ah ɗǝne? 6 Yesu zyii faa nyi ko: Ame fahlii, ame goŋga, ame cee. Dǝɓ ka gak ga wo Pa ɓe ya, sai ka a ne me. 7 We tǝ kǝnah me ɓe, ka we tǝ Pa ɓe ɓe ta. Daga zǝzǝ̃ǝko we tǝ ko gur ɓe, we kwo ko ɓe. 8 Filip faa nyi ko: Dǝɓlii, mo cuu Pa ɓo nyi ru ka daŋ ɓe. 9 Yesu faa nyi ko: Ame ne we daga ɓaaɓe Filip, mo tǝ me ya ŋhaa zǝzǝ̃ǝ ba? Dǝɓ mo kwo me ɓe, ka kwo Pa ɓe ɓe ta. Mor fẽe mo so faa mo cuu Pa ɓo nyi ru ne? 10 Mo nyiŋ sõone me pǝzyil Pa ɓe, Pa ɓe pǝzyil ɓe ya ne? Ɓǝ mai me tǝ faa nyi we daŋ ɓǝ ɓe ye ka, Pa ɓe mo pǝzyil ɓe ako ye tǝ joŋ yeɓ ahe. 11 Ne cok me tǝ faa me no pǝzyil Pa ɓe, Pa ɓe no pǝzyil ɓe, we nyiŋ ɓǝ ahe. Mo ka nai ya ɓe, ka we nyiŋ mor yeɓ mai me tǝ joŋni. 12 Goŋga me faa nyi we, dǝɓ mo nyiŋ me ɓe, a ga joŋ yeɓ mai daŋ me tǝ joŋni, a ga joŋ pǝ'man kal maiko, mor me tǝ ga wo Pa ɓe. 13 Fan makẽne daŋ we fii pǝ tǝɗii ɓe ɓe, me ga joŋ, mor ka za mo kwora yǝk Pam gin wo Welle. 14 We fii fan pǝ tǝɗii ɓe ɓe, me ga joŋ fan ahe.
Yesu faa zye ga pee Tǝ'yak Matǝdaŋdaŋ ge
15 We tǝ 'yah me ɓe, we ga syee mor ɓǝ lai ɓe. 16 Me ga fii Pa ɓe ka mo peeko Dǝɓ ki ge ka gbah jol ɓiiri: Tǝ'yak Matǝgoŋga yo, mor ka mo kaako ne we galii. 17 Za sǝr ka gak nyiŋra ko ya, mor ka gak kwora ko ya, ka tǝra ko ya ta. Amma awe, we tǝ ko ɓe, mor kaa ɓo ne we, a no pǝzyil ɓiiri. 18 Me ka soɓ we syak ɓii ya, me ga pii soo ge wo ɓii faɗa. 19 Cok coŋ ɓo biŋ nai sye, za sǝr ka ga kwora me yao, amma ma ɓii we ga kwo me. Mor ame ne cee, awe laŋ we ga yea ne cee ta. 20 Zah'nan ah mo ge ɓe, we ga tǝ, me no pǝzyil Pa ɓe, awe pǝzyil ɓe, ame laŋ me pǝzyil ɓiiri. 21 Koo zune mo gbǝ ɓǝ lai ɓe mo so tǝ syee mor ah ta ɓe, ka dǝɓ ah tǝ 'yah me, Pa ɓe 'yah dǝɓ mai mo tǝ 'yah me, ame laŋ me ga 'yah dǝɓ ah ta, me ga cuu suu ɓe nyi ko. 22 Yudas - ma Iskariot ye ka - faa nyi ko: Dǝɓlii, mor fẽe mo ga cuu suu ɓo nyi ru to mo ka cuu nyi za sǝr a ne? 23 Yesu zyii faa nyi ko: Dǝɓ mo tǝ 'yah me ɓe, a syee mor ɓǝ mai me tǝ faa ta, Pa ɓe ga 'yah dǝɓ ahe, Pa ɓe ne me ru ga wo dǝɓ ah ru kaa ne ki. 24 Dǝɓ mo ka tǝ 'yah me ya ɓe, ka syee mor ɓǝ faa ɓe ya. Ɓǝ mai we tǝ laa me tǝ faani, ɓǝ ɓe ye ka, amma ɓǝ ah gee wo Pa ɓe mai mo pee me ge. 25 Me faa ɓǝ mai nyi we ne cok me no ne we ba. 26 Dǝɓ mai mo ga gbah jol ɓii ako ye Tǝ'yak Matǝdaŋdaŋ mai Pa ɓe mo ga pee ge pǝ tǝɗii ɓe, a ga cuu fan daŋ nyi we, a ga joŋ we jin foo ɓǝ mai me faa nyi we daŋ. 27 Me tǝ soɓ jam nyi we, jam ɓe ye me tǝ nyi nyi we, me ka tǝ nyi nyi we tǝgbana za sǝr moo nyira ya. We swaa ɓǝ ki ka, gal mo re we ka ta. 28 We laa me faa nyi we me ga kalle, amma me ga pii soo ge wo ɓii ba. We tǝ 'yah me ɓe, we ga laa pǝ'nyah ne ɓǝ mai me tǝ ga wo Pa ɓe, mor Pa ɓe pǝyǝk kal me ɓe. 29 Zǝzǝ̃ǝko me faa ɓǝ ah nyi we kǝpel ka fan ah joŋ ya ba, mor ka fan ah mo ge tǝ joŋ ɓe, we nyiŋ. 30 Me ka faa ɓǝ ne we pǝlli yao, mor goŋ sǝr mai tǝ ginni. Amma ka ne swah tǝ ɓe ya. 31 Amma mor ka za sǝr mo tǝra: me tǝ 'yah Pa ɓe, me joŋ fan mai mo cuuko nyi me. We ur gin nyee na gyo.
Yesu ye kpuu vin matǝ goŋga
1 Ame kpuu vin matǝ goŋga, Pa ɓe ye pah 'wah ahe. 2 A ga ŋgom jol ah mai mo ka lee ya daŋ ga lalle, a ga zyeɓ jol ah mai moo lee daŋ pǝsãhe, mor ka mo so lee pǝlli. 3 Zǝzǝ̃ǝko we zyeɓ ɓo pǝsãh mor ɓǝ mai me cuu nyi we. 4 We mgbãa ki ne me, ame laŋ me ga mgbãa ne we. Jol kpuu vin ka gak lee syak ah bai mgbãa ki ne kpuu mah ah ya. Nai ne we ta, we mgbãa ki ne me ya ɓe, we ka gak lee syẽm ya. 5 Ame kpuu vin, awe ye jol ah ra. Dǝɓ mo mgbãa ne me, me mgbãa ne ki ta ɓe, a lee syẽm pǝlli. Mor we ka gak fan ki bai ɓe ya. 6 Dǝɓ mo mgbãa ki ne me ya ɓe, a ga cera ko ɓoo ga lal tǝgbana jol kpuu, a yakke, a woora rǝk ga tǝ wii, wii sye ra. 7 We mgbãa me ɓe, ɓǝ faa ɓe yea pǝzyil ɓii ta, we fii fan makẽne we tǝ 'yahe, we ga ɗǝǝ. 8 Fan ma yii yǝk Pa ɓe a naiko: we lee syẽm pǝlli. Ne fahlii mai cuu awe ye za syee mor ɓe. 9 Me 'yah we tǝgbana Pa ɓe mo tǝ 'yah me, we yea ne 'yah ɓe. 10 We tǝ syee mor ɓǝ lai ɓe ɓe, we ga yea ne 'yah ɓe pǝ zahzyil ɓiiri, tǝgbana me tǝ syee mor ɓǝ lai Pa ɓe, ame ne 'yah ah pǝ zahzyil ɓe. 11 Me faa ɓǝ mai nyi we nai mor ka ɓǝ 'nyah ɓe mo yea pǝ zahzyil ɓiiri, ka we laa pǝ'nyah pǝlli. 12 Ɓǝ lai ɓe a naiko: we 'yah ki tǝgbana me tǝ 'yah we ta. 13 'Yah ma kal mai ka dǝɓ mo wǝ mor bai ah ra kǝkao. 14 We tǝ joŋ fan mai me tǝ faa nyi we daŋ ɓe, ka we ye bai ɓe. 15 Me ka ɗii we ne za yeɓ yao, mor dǝɓ yeɓ ka tan fan mai pah yeɓ ah mo tǝ joŋ ya. Me ɗii we ne bai ɓe, mor me cuu fan mai me laa gin wo Pa ɓe daŋ nyi we ɓe. 16 Awe ye ka nǝǝ me ya, amma ame ye syen we, me joŋ we ɓo ka we ge, ka we lee syẽmme, we lee syẽm mai moo nǝnni, ka fan mai we ga fii pǝ tǝɗii ɓe daŋ Pa ɓe ga nyi nyi we. 17 Fan mai me tǝ faa nyi we ka we joŋ: we 'yah ki.
Za sǝr syiŋra Yesu ne zan ahe
18 Za sǝr mo syiŋra we ɓe, we tǝ ɓe, syiŋra me kǝpel nyi we. 19 Kǝnah awe ye mǝ sǝr ɓe, za sǝr ga 'yahra fan ɓǝǝra, amma mor me syen we ɓo gin tǝgǝǝ ɓǝǝra, awe ye ka mǝ sǝr a, za sǝr tǝ syiŋra we mor ahe. 20 We foo ɓǝ mai me faa nyi we kǝpelle: Dǝɓ yeɓ ka kal tǝ pah yeɓ ah ne yǝk ya. Mo cuura bone nyi me ɓe, a ga cuura nyi we ta. Mo nyiŋra ɓǝ faa ɓe ɓe, a ga nyiŋra ɓǝ faa ɓii ta. 21 A ga joŋra fan mai daŋ wo ɓii nai mor ɓǝ ɓe, mor tǝra Dǝɓ mai mo pee me ge ya. 22 Me ge faa kǝnah nyi ra ya ɓe, ɓǝɓe' ka yea tǝtǝl ɓǝǝr a. Amma zǝzǝ̃ǝko ara ka ne cok fofoo tǝ faɓe' ɓǝǝr ao. 23 Dǝɓ mo tǝ syiŋ me ɓe, ka tǝ syiŋ Pa ɓe ta. 24 Kǝnah me joŋ yeɓ makẽne dǝɓ ki mo ka gak joŋ ya kǝsyil ɓǝǝr a ɓe, ka ɓǝɓe' ka yea tǝ ɓǝǝr a. Amma zǝzǝ̃ǝko kwora yeɓ ɓe ɓe, amma so tǝ syiŋra me ne Pa ɓe daŋ. 25 Ɓǝ ah joŋ nai mor ka ɓǝ mai mo ŋwǝǝ ɓo pǝ ɗerewol ɓǝ lai ɓǝǝ mo joŋ: Syiŋra me tǝkol 'wel. 26 Dǝɓ mai mo ga gbah jol ɓii a ga gee wo Pa ɓe ge, Tǝ'yak Matǝgoŋga yo, me ga pee gin wo Pa ɓe ginni, a ga faa ɓǝ tǝ ɓe. 27 Awe laŋ we ga faa ɓǝ tǝ ɓe ta, mor we ne me daga tǝtǝŋ ah sǝ.
1 Me faa ɓǝ mai nyi we mor ka iŋ ɓii mo wuu ka. 2 A ga nĩira we yaŋ kee ɓǝ Masǝŋ ga lalle. Cok ah no ginni, za mai moo ga ikra we pǝ wulli a ga lǝŋra ru tǝ joŋ yeɓ Masǝŋ. 3 A ga joŋra nai mor tǝra Pa ɓe ya, tǝra me ya ta. 4 Amma me faa ɓǝ mai nyi we, ka cok ah mo ge mo tǝ joŋra o ɓe, ka we foo ɓǝ mai me faa nyi we.
Yeɓ Tǝ'yak Matǝdaŋdaŋ
Me faa ɓǝ ah nyi we daga tǝtǝŋ ah sǝ ya, mor me yea kaa ɓo ne we. 5 Amma zǝzǝ̃ǝko me pii soo ga wo Dǝɓ mai mo pee me ge, koo dǝɓ vaŋno kǝsyil ɓii ka fii me mo ga kẽne ya. 6 Amma mor zahzyil ɓii tǝ swaa ɓǝ mor me faa ɓǝ mai ɓo nyi we. 7 Ne daŋ laŋ me tǝ faa goŋga nyi we, me kal ɓe, a wo ɓii pǝsãhe, mor me kal a ɓe, Pa gbah jol ɓii ka ge wo ɓii ya. Amma me kal ɓe, me ga pee ge wo ɓiiri. 8 Mo geko ɓe, a ga gbǝr nahnǝn za sǝr ka mo kwora ɓǝɓe', ka mo kwora ɓǝ tǝ njaŋ, ka mo kwora kiita Masǝŋ. 9 A ga gbǝr nǝn ɓǝǝ ka kwan faɓe', mor nyiŋra me ya. 10 A ga gbǝr ka kwan fan matǝ njaŋ, mor me tǝ ga wo Pa ɓe o, we ka kwo me yao. 11 A ga gbǝr ka kwan kiita Masǝŋ, mor kiita ŋgoŋ tǝ goŋ sǝr mai ɓe. 12 Me no ne ɓǝ pǝlli ka me faa nyi we, amma we ka gak nyiŋ ɓǝ ah zǝzǝ̃ǝ daŋ ya. 13 Tǝ'yak Matǝgoŋga mo ge ɓe, a ga cuu goŋga daŋ nyi we, ka tǝ ga faa ɓǝ ma syak ah ya, amma a ga faa ɓǝ mai mo tǝ laako ne mai mo tǝ ga joŋ pel nyi we. 14 A ga yii me, mor a ga ɓaŋ fan ɓe a cuu nyi we. 15 Fan makẽne Pa ɓe mo ne daŋ ma ɓe yo, mor ah me faa: Tǝ'yak a ga ɓaŋ fan ɓe daŋ a cuu nyi we.
Ɓǝ swaa ga fer ciŋ ɓǝ 'nyahre
16 Cok coŋ ɓo biŋ nai to we ka ga kwo me yao. So fahfal ah nje ɓe, we so ga kwo me kpǝ. 17 Za ki kǝsyil za syee mor ah faara tǝgǝǝ ki: Ɓǝ mai a 'yah faa ɗǝne? Mor a faa nyi na: Cok coŋ ɓo biŋ nai to we ka ga kwo me yao, so fahfal ah nje ɓe, we so ga kwo me kpǝ. So faa: Mor me tǝ ga wo Pa ɓe. 18 So fiira ko: Ɓǝ mai mo tǝ faako, cok coŋ ɓo biŋ, mor ah 'yah faa ɗǝne? Dǝɓ ka tǝ laa mor ɓǝ mai mo tǝ faako ya. 19 Yesu tǝ ɓe, tǝ 'yahra ka fii ko, so faa nyi ra: Me faa nyi we, cok coŋ ɓo biŋ nai to, we ka ga kwo me yao, so fahfal ah nje ɓe, we so ga kwo me kpǝ. We tǝ fii ki tǝ ɓǝ mai me faa nai koi ne? 20 Goŋga me faa nyi we, we ga yeyee, we ga dahgorre, amma za sǝr ga laara pǝ'nyahre. We ga swaa ɓii ɓǝ, amma ɓǝ swaa ɓii ga fer ciŋ ɓǝ 'nyahre. 21 Ne cok mawin mo tǝ yah byaŋ ɓe, a swaa ɓǝ mor zah'nan bone ah ge ɓo wol ahe, amma ne cok mo byaŋ wel ah ge lal ɓe, a yaŋ tǝ bone ahe, a laa pǝ'nyahre, mor byaŋ dǝfuu ge ɓo wo sǝrri. 22 Nai ne we ta, zǝzǝ̃ǝko we tǝ swaa ɓǝ, amma ne cok mee ga kwo we faɗa, zahzyil ɓii ga laa pǝ'nyahre. Dǝɓ mai moo gak nyiŋ ɓǝ 'nyah ah jol ɓii kǝkao. 23 Zah'nan ah mo ge ɓe, we ka fii fan ki zah ɓe yao. Goŋga me faa nyi we, Pa ɓe ga nyi fan mai daŋ we ga fii pǝ tǝɗii ɓe nyi we. 24 Ŋhaa zǝzǝ̃ǝko we ɓah ka fii fan ki pǝ tǝɗii ɓe ya ba, we fii, we ga ɗǝǝ, mor ka we laa pǝ'nyah pǝlli.
Yesu ye kacella tǝ sǝrri
25 Me faa ɓǝ mai daŋ nyi we ne ɓǝ kikiŋ. Amma cok ah no ginni, me ka faa ɓǝ nyi we ne ɓǝ kikiŋ ya, amma me ga faa ɓǝ Pa ɓe nyi we wat. 26 Ne cok zah'nan ah mo ge ɓe, we ga fii fan jol Pa ɓe pǝ tǝɗii ɓe, amma me ka faa nyi we me ga fii fan mor ɓii ya. 27 Mor Pa ɓe ne suu ah a 'yah we. Tǝ 'yah we, mor we tǝ 'yah me, mor we nyiŋ: me gee wo Masǝŋ ge. 28 Me gee wo Pa ɓe ge wo sǝrri, zǝzǝ̃ǝko me ga soɓ sǝr o, me ga wo Pa ɓe o. 29 Za syee mor ah so faara nyi ko: Zǝzǝ̃ǝko mo tǝ faa ɓǝ wat, mo ka tǝ faa ririi ya. 30 Ru tǝ zǝzǝ̃ǝ ɓe, mo tǝ fan ɓo daŋ, mo ka tǝ 'yah ka dǝɓ mo fii mo ya, mor ah ru nyiŋ: mo gee wo Masǝŋ ge. 31 Yesu zyii faa nyi ra: We nyiŋ zǝzǝ̃ǝ ɓe ne? 32 Pǝsãhe, cok ah no ginni, koo zǝzǝ̃ǝ laŋ ge ɓe, we ga myah kal camcam, zune daŋ a ga yaŋ ahe, we ga soɓ me ɓoo syak ɓe, amma me ka syak ɓe ya, mor Pa ɓe no ne me. 33 Me faa ɓǝ mai nyi we, ka we yea jam ne me. Mor we ga laa bone wo sǝrri, amma we rõmme, ame kacella tǝ sǝrri.
Yesu pǝǝ Pam mor za syee mor ahe
1 Fahfal Yesu mo faa ɓǝ mai vǝrri, so ɓaŋ nahnǝn ge sǝŋ faa: Daddǝ, cok ah ge ɓe, mo yii We ɓo, mor ka We ɓo mo yii mo ta. 2 Mor mo nyi swah ɓo nyi ko tǝ dǝfuu daŋ, mor ka mo nyiko cee ma ga lii nyi za mai mo nyi ra nyi ko daŋ. 3 Cee ma ga lii ako ye mai ka mo tǝra mo, amo ye Masǝŋ matǝ goŋga to, tǝkine tan Yesu Kristu mai mo pee ge. 4 Me yii yǝk ɓo wo sǝr ɓe, me vǝr yeɓ mai mo pee me ne ka joŋ ɓe. 5 Zǝzǝ̃ǝko Daddǝ, mo yii me pǝ yǝk tǝgbana mai me yea ne mo ka sǝr ɓah joŋ ya ba. 6 Me cuu tǝɗii ɓo nyi za mai mo syen ra gin kǝsyil za sǝr mo nyi ra ɓo me. Ara ye ma ɓo, mo nyi ra ɓo me, nyiŋra ɓǝ faa ɓo ɓe. 7 Tǝra zǝzǝ̃ǝ ɓe, fan mai mo nyi nyi me daŋ gee wo ɓo ge. 8 Mor me cuu ɓǝ mai mo faa nyi me daŋ nyi ra ɓe, nyiŋra ɓǝ ah ɓe ta, tǝra ɓe, me ge wo ɓo ge 'manna, so nyiŋra: amo ye pee me ge. 9 Me tǝ pǝǝ mo mor ɓǝǝra, me ka pǝǝ mor za sǝr a, amma me pǝǝ mo mor za mai mo nyi ra nyi me, mor ara ye ma ɓo. 10 Fan ɓe daŋ ma ɓo yo, fan ɓo daŋ laŋ ma ɓe yo, mor ka za mo kwora yǝk ɓe wo ɓǝǝra. 11 Zǝzǝ̃ǝko me ka tǝ yah yea wo sǝr ao, me tǝ ga wo ɓo, amma ara no wo sǝr ba. Daddǝ, Dǝɓ Matǝdaŋdaŋ, mo byak za mai mo nyi ra nyi me mor tǝɗii ɓo, mor ka mo yeara vaŋno tǝgbana mo ne me ana vaŋno. 12 Ne cok me yea ne za mai mo nyi ra nyi me, me byak ra, me byak ra pǝ tǝɗii ɓo. Koo dǝɓ vaŋno kǝsyil ɓǝǝ muŋ ya, sai dǝɓ mai mo tǝ yah muŋ to, mor ka ɓǝ mai mo ŋwǝǝ ɓo pǝ Ɗerewol mo joŋ ge cok ahe. 13 Amma zǝzǝ̃ǝko me tǝ ga wo ɓo, me faa nai mor me no wo sǝr ba, mor ka ɓǝ 'nyah ɓe mo yea pǝ zahzyil ɓǝǝ mo laara pǝ'nyah pǝlli. 14 Me cuu ɓǝ faa ɓo nyi ra ɓe, za sǝr syiŋ ra ɓo mor ara ye ka mǝ sǝr a, tǝgbana me, me ye ka mǝ sǝr a ta. 15 Me ka tǝ pǝǝ mo mor ka mo woo ra gin wo sǝr a, amma ka mo byak ra wo Satan. 16 Ara ye ka mǝ sǝr a, tǝgbana me, me ye ka mǝ sǝr a. 17 Mo joŋ ra ka mo yeara za ɓo ne fahlii goŋga, mor ɓǝ faa ɓo goŋga yo. 18 Me pee ra ɓo wo sǝr tǝgbana mo pee me ge wo sǝrri. 19 Me nyi suu ɓe daŋ nyi mo mor ɓǝǝ ka mo ciŋra za ɓo ne goŋga. 20 Me ka tǝ pǝǝ mo mor ɓǝǝ to ya, amma me tǝ pǝǝ mo mor za mai moo ga nyiŋra me mor ɓǝ cuu ɓǝǝ ta. 21 Me pǝǝ mo mor ɓǝǝ ka ara daŋ mo yeara vaŋno. Daddǝ, ka mo yeara vaŋno ne na, tǝgbana mo, mo pǝzyil ɓe, ame laŋ me pǝzyil ɓo, mo yeara vaŋno mor ka za sǝr mo nyiŋra: amo ye pee me ge. 22 Me yii ra pǝyǝk tǝgbana mo yii me ɓe ta, mor ka mo yeara vaŋno, tǝgbana mo ne me na vaŋno. 23 Ame pǝzyil ɓǝǝra, amo pǝzyil ɓe, mor ka mo yeara vaŋno, ka za sǝr mo tǝra amo ye pee me ge, so mo tǝ 'yah ra tǝgbana mo tǝ 'yah me ta. 24 Daddǝ, amo ye nyi ra nyi me, me 'yah pǝ cok mai me tǝ ga yea gŋ, mo ge yeara gŋ ne me ta, mor ka mo ge kwora yǝk mai mo yii me ɓo, mor mo 'yah me ɓo kǝpel ka sǝr ɓah joŋ ya ba. 25 Daddǝ, Dǝɓ Matǝnjaŋ, za sǝr tǝra mo ya, amma ame tǝ mo ɓe, za mai laŋ tǝra ɓe, mo ye pee me ge. 26 Me cuu mo nyi ra ɓe, me so ga cuu mo nyi ra kpǝ, mor ka 'yah mai mo 'yah me, 'yah ah mo yea pǝzyil ɓǝǝ ta. Ame ne suu ɓe laŋ me ga yea pǝzyil ɓǝǝra.
Gbǝra Yesu
1 Fahfal Yesu mo juupel vǝrri, so ur ne za syee mor ah yeera el Kedron kal ge nǝzakǝŋhaa, pǝ cok ah 'wah no gŋ, kal ge pǝ 'wah ah ne za syee mor ahe. 2 Yudas mai mo tǝ joŋ tǝkor ah tǝ cok ah ɓe, mor Yesu a tai gŋ ne za syee mor ah ɓaa. 3 Mor ah Yudas ɗii sooje ne za yeɓ zaluu za joŋzahsyiŋ tǝkine Farisien kal ge gŋ ne ra, gera ne pitǝrla ne paŋwii tǝkine fan salle. 4 Mor Yesu tǝ fan mai mo tǝ ga joŋ wol ah daŋ ɓe, pǝ̃ǝ uu ge lal so fii ra: We kyeɓ zune? 5 Zyiira zah ah faa: Ru tǝ kyeɓ Yesu ma Nazaret. So Yesu faa: Ame ko nyẽeko. Yudas mai mo tǝ joŋ tǝkor ah uu ɓo gŋ ne ra ta. 6 Ne cok Yesu mo faa nyi ra, ame ko nyẽeko, pii soora lea ge sǝŋ nǝfal daŋ. 7 Yesu so fii ra faɗa: We kyeɓ zune? Zyiira faa: Ru tǝ kyeɓ Yesu ma Nazaret. 8 Yesu zyii faa: Me faa nyi we kǝpel ɓe, ame ko nyẽeko, we tǝ kyeɓ me ɓe, we soɓ za marai mo kalra ɗao. 9 Faa ɓǝ mai nai mor ka ɓǝ mai mo faako mo joŋ ge cok ahe, faa: Daddǝ, za mai mo nyi ra nyi me koo dǝɓ vaŋno kǝsyil ɓǝǝ muŋ ya. 10 Simon Petar no ne kafahe jolle, so nǝǝ ce sok ma jokǝsãh nyi dǝɓ yeɓ pa joŋzahsyiŋ ne ɓaŋ ge lal 'nya, dǝɓ ah a ɗii ne Malkus. 11 Yesu faa nyi Petar: Mo maa kafahe ɓo ge pẽere. Mo lǝŋ tahsah bone mai Pa ɓe mo nyi me, me ka zwǝ ya ne?
Gera pel Annas ne Yesu
12 Kul sooje tǝkine kapten ɓǝǝra, ne za yeɓ Yahuduen gbǝra Yesu so baŋra ko. 13 Kalra ge wo Annas ne ki kǝpelle, mor ako ye bǝǝ Kayafas mai mo tǝ joŋ pa joŋzahsyiŋ malii syii ahe. 14 Kayafas ako ye dǝɓ mai mo faa nyi Yahuduen a pǝsãh ka dǝɓ vaŋno mo wǝ mor za pãa daŋ.
Petar fofoo tǝ Yesu
15 Simon Petar ne dǝɓ syee mor ah maki ah kalra ge mor Yesu. Dǝɓ syee mor ah maki ah tǝ pa joŋzahsyiŋ malii ɓe, so dan kal ge zahpiicel pa joŋzahsyiŋ malii mor Yesu. 16 Petar uu mǝ ah zahfah lalle. Dǝɓ syee mor ah mai pa joŋzahsyiŋ malii mo tǝ ko ɓo so pǝ̃ǝ ge lal ge faa ɓǝ ne mǝlaŋ ma byak zahfah ka mo soɓko Petar dan ge zahpiicelle. 17 So mǝlaŋ ma byak zahfah faa nyi Petar: Amo ka kǝsyil za syee mor dǝɓ mai ta ya ne? Petar zyii faa: Ame ka gŋ ya. 18 Za yeɓ tǝkine za ma byakra cokki, cokra wii, yak ah sye ɓo goroo, uura ɓo zah ah tǝ noora, mor cel tǝ wuu pǝlli. Petar ge uu ɓo ne ra tǝ noo ta.
Pa joŋzahsyiŋ malii fii Yesu
19 So pa joŋzahsyiŋ malii fii Yesu tǝ ɓǝ za syee mor ahe, tǝkine ɓǝ cuu ahe. 20 Yesu zyii faa nyi ko: Me faa ɓǝ nyi za daŋ wat, cẽecẽe me faa ɓǝ yaŋ kee ɓǝ Masǝŋ tǝkine yaŋ Masǝŋ pǝ cok mai Yahuduen daŋ moo taira gŋ. Me faa ɓǝ ki pǝ muŋ ɗǝ ya syaŋsyaŋ. 21 Mo so tǝ fii me mor fẽene? Mo 'yah ɓe, mo fii zah ɓǝǝra, me faa nyi ra ɗǝne? 22 Ne cok Yesu mo faa ɓǝ naiko, dǝɓ vaŋno kǝsyil za ma byak cok mo uura ɓo gŋ i Yesu, so faa: Mo zyii zah pa joŋzahsyiŋ malii sye koi ne? 23 Yesu zyii faa: Me faa ɓǝɓe' ɓo gŋ ɓe, mo cuu ɓǝɓe' ah nyi me, amma me faa ɓǝ ɓo pǝsãh ɓe, mo so i me mor fẽene? 24 So Annas pee Yesu ne baŋ ah nai 'wa kal ge nyi Kayafas pa joŋzahsyiŋ malii.
Petar fofoo tǝ Yesu faɗa
25 Ne cok Petar mo uu ɓo zah wii tǝ nooni, za ki so fiira ko: Amo ka kǝsyil za syee mor dǝɓ mai ta ya ne? Petar fofoo faa: Me ka gŋ ya. 26 Dǝɓ vaŋno kǝsyil za yeɓ pa joŋzahsyiŋ malii ako ye zum dǝɓ mai Petar mo ce sok nyi, faa nyi ko: Me kwo mo pǝ 'wah ne ki ya ne? 27 So Petar fofoo faa: Ame ye ka. So watǝcoo ɓyaŋ sǝ ta.
Yesu pel Pilatus
28 Zaŋra Yesu gin yaŋ Kayafas kal ge yaŋ kiita ne ko ne zah'nan pimpim. Yahuduen ne suu ɓǝǝ zyii ka danra ga yaŋ kiita ya, mor a 'yah byakra suu ɓǝǝ ka ru yea daŋdaŋ tǝgbana zahsyiŋ ɓǝǝ ka ren Paska. 29 Pilatus pǝ̃ǝ ge wo ɓǝǝ lal so fii ra: We ge tǝ cen dǝɓ mai tǝ ɓǝ fẽene? 30 So zyiira faa nyi ko: Mo joŋko ɓǝɓe' ɓo ya ɓe, mo tǝ ɓe, ru ka gin ce ko pel ɓo ya. 31 Pilatus faa nyi ra: We ɓaŋ ko ne suu ɓii ka we ŋgoŋ kiita tǝl ah tǝgbana ɓǝ lai ɓiiri. Yahuduen faara nyi ko: Ru ka ne fahlii ŋgoŋ kiita wul tǝ dǝɓ ya. 32 Mor ka ɓǝ mai Yesu mo faa tǝ ɓǝ wul mai mo tǝ ga wǝko mo joŋ ge cok ahe. 33 Pilatus so dan ge yaŋ kiita faɗa, ɗii Yesu ge pel ah fii ko: Amo ye goŋ Yahuduen ne? 34 Yesu zyii faa nyi ko: Fii mai mo ye waa tǝ fii me ne suu ɓo ne? Wala za ki ye ge faara ɓǝ ɓe ɓo mo ne? 35 Pilatus zyii zah ah faa: Ame ye Yahuduyo ne? Za ɓo tǝkine zaluu za joŋzahsyiŋ ɓǝǝ ye ge cera mo pel ɓe, mo joŋ fẽe ɓo ne? 36 Yesu zyii faa: Goŋ ɓe goŋ sǝr mai ye ka, goŋ ɓe mo tǝgbana goŋ sǝr mai kǝnah ɓe, za ɓe ga ruura sal mor ɓe, mor ka me ge jol Yahuduen ka. Amma goŋ ɓe ka nyee ya. 37 Pilatus so fii ko: Ayee, mǝnai mo goŋ ne? Yesu zyii faa: Amo ye faa me goŋe. Ame byaŋ, me ge wo sǝr mor ka faa ɓǝ goŋga, koo zune mo 'yah goŋga ɓe, a laa ɓǝ faa ɓe. 38 Pilatus so fii ko: A fẽe ye goŋga sye ne?
Gbǝra Yesu ne kiita
Ne cok Pilatus mo faa ɓǝ nai vǝrri, so pǝ̃ǝ ge lal wo Yahuduen faa nyi ra: Me lwaa ɓǝ ma nen ŋgoŋ kiita tǝl ah ne wol ah ya. 39 Tǝgbana zahsyiŋ ɓii we ne ko, me wǝǝ dǝɓ ɓii ma daŋgai vaŋno nyi we ne fĩi Paska daŋ. We 'yah me wǝǝ goŋ Yahuduen nyi we ne? 40 Ŋwaara ɓǝ zyii zah ah ne zahki daŋ: Ru 'yah dǝɓ mai ya, ru 'yah Barabas. Barabas dǝɓ kaafuu yo.
1 Pilatus faa nyi sooje ka mo ɓaŋra Yesu loɓ ne bǝrǝǝ. 2 So sooje kaŋra mbǝlaori ne waa maa ge nyi tǝtǝlli, so ɓoora mbǝro syẽ nyi ko. 3 Gera wol ah faara: Masǝŋ mo soɓ tǝ goŋ Yahuduen. So cẽera jol i ne ko. 4 Pilatus so pǝ̃ǝ ge lal wo za faɗa, faa nyi ra: Me ɓaŋ ko pǝ̃ǝ ge lal wo ɓii ne ka cuu nyi we ka we tǝ, me lwaa ɓǝ ma nen ŋgoŋ kiita tǝl ah ne wol ah ya. 5 So Yesu pǝ̃ǝ ge lal ne mbǝlaori waa mo maa ɓo tǝtǝl ne mbǝro syẽ mo ɓoo ɓo daŋ. Pilatus faa nyi ra: Ako nyẽe sye. 6 Ne cok zaluu za joŋzahsyiŋ ne za ma byak cok mo kwora Yesu, ŋwaara ɓǝ zahki daŋ: Ɓaa ko ge wo kpuu, ɓaa ko ge wo kpuu. Pilatus so faa nyi ra: We ɓaŋ ko ge ɓaa wo kpuu ne suu ɓiiri, me lwaa ɓǝ ma nen ŋgoŋ kiita tǝl ah ne wol ah vaŋno ya. 7 Yahuduen zyiira faa nyi ko: Aru no ne ɓǝ lai, tǝgbana ɓǝ ah mo faa ɓo, sai a wǝko, mor tǝ ɗii suu ah ne We Masǝŋ. 8 Ne cok Pilatus mo laa ɓǝ faa ɓǝǝ mai, gal so re ko pǝlli. 9 So dan kal ge yaŋ kiita faɗa, fii Yesu: Mo gee kẽe ge ne? Amma Yesu zyii ɓǝ ki zah ah ya. 10 So Pilatus faa nyi ko: Mo zyii zah ɓe ya ne? Mo tǝ sõone me ne swah ka wǝǝ mo ɓooni, so me ne swah ka ɓaa mo ga wo kpuu ta, mo tǝ ya ne? 11 Yesu zyii faa nyi ko: Mo ka ne swah tǝ ɓe ya, sai ka Masǝŋ ye nyi fahlii ah ɓo mo. Mor ah dǝɓ mai mo gbǝ me gee mo ne ko, joŋ faɓe' kal mo ɓe. 12 Ne cok Pilatus mo laa ɓǝ faa Yesu naiko, kyeɓ ka wǝǝ ko ɓooni. Amma Yahuduen ŋwaara ɓǝ faara: Mo kal wǝǝ dǝɓ mai ɓoo ɓe, ka mo ye ka bai Kaiser ya. Koo zune mo joŋ suu ah na goŋ daŋ ka tǝ kyeɓ ɓǝ ne Kaiser. 13 Ne cok Pilatus mo laa ɓǝ faa ɓǝǝ naiko, so zaŋ Yesu pǝ̃ǝ ge lal ne ko ge kaa tǝ fakal ŋgoŋ kiita pǝ cok mai mo zyeɓra ge ɓo sǝŋ ne tǝsalle. A ɗii ne zah Yahuduen ne Gabbata. 14 Com ah com zyeɓ fan ka joŋ fĩi Paska yo, a tǝgbana com kǝsyitǝtǝlli. Pilatus faa nyi Yahuduen: Goŋ ɓii ko nyẽe sye. 15 Ŋwaara ɓǝ faa: I ko pǝ wulli, i ko pǝ wulli, ɓaa ko ge wo kpuu. Pilatus so fii ra: We 'yah me ɓaa goŋ ɓii ge wo kpuu ne? Zaluu za joŋzahsyiŋ zyiira faa: Ru ka ne goŋ ki ya, sai Kaiser to. 16 So Pilatus soɓ Yesu nyi gee ra jolle ka mo ge ɓaara ge wo kpuu. So ɓaŋra Yesu.
Ɓaara Yesu ge wo kpuu
17 Yesu pǝ̃ǝ ge lal ɓaŋ kpuu ɓaa suu ah kal ge pǝ cok ma ɗii ne Gbel Tǝtǝl ne ko. A ɗii ne zah Yahuduen ne Golgata. 18 Ge ɓaara ko ge tǝ kpuu gŋ, ɓaara za ki gwa ge tǝ kpuu ta, dǝɓ mai kah ah nǝkǝino, dǝɓ mai nǝkǝino, Yesu kǝsyil ɓǝǝra. 19 Pilatus ŋwǝǝ ɓǝ sǝŋ tǝ kpuu ɓaa ah faa: Yesu ma Nazaret goŋ Yahuduen. 20 Yahuduen pǝlli keera ɓǝ ŋwǝǝ ahe, mor cok mai mo ɓaara Yesu ɓo gŋ ka ne yaŋ pǝɗǝk ya. Ŋwǝǝra ɓǝ ah ne zah Yahuduen, zah Romanen ne zah Grek. 21 Zaluu za joŋzahsyiŋ ge faara nyi Pilatus: Mo ŋwǝǝ ne “goŋ Yahuduen” ka, amma mo ŋwǝǝ: “Dǝɓ ah faa azye goŋ Yahuduen”. 22 Pilatus zyii zah ɓǝǝ faa: Fan mai me ŋwǝǝ ɓe ka me ŋwǝǝ ɓe. 23 Fahfal sooje mo ɓaara Yesu ge wo kpuu vǝrri, woora mbǝro ah womra kǝsyil ɓǝǝ nai daŋ, zune daŋ kaa ne vaŋno vaŋno. So ɓaŋra mbǝro sol ah mai zah sãa mo ka wol ah ya, mor kaŋra ɓo daga sǝŋ ŋhaa ge sǝŋ zahki fertǝ daŋ. 24 Faara tǝgǝǝ ki: Na ŋgǝ̃ǝ ka, amma na i cahcah tǝtǝl ahe, mor ka na ẽe ɗah azu ye ga re ne? Ɓǝ ah joŋ tǝgbana mai mo ŋwǝǝ ɓo pǝ Ɗerewol: Womra mbǝro ɓe kǝsyil ɓǝǝra, ira cahcah tǝ mbǝro sol ɓe. Sooje joŋra na ɓǝ ah mo ŋwǝǝ ɓo. 25 Mah Yesu uu ɓo kah kpuu ɓaa Yesu ne naa mam mawinni, Maria mawin Klopas, tǝkine Maria ma Magdala. 26 Yesu kwo mah ah tǝkine dǝɓ syee mor ah mai Yesu moo 'yah ko pǝlli uura ɓo gŋ, so faa nyi mah ahe: Mǝǝ, na ɓo nyẽeno. 27 So faa nyi dǝɓ syee mor ahe: Ma ɓo nyẽeno. Daga cok ahe, dǝɓ syee mor ah zaŋ mah ah kal ge yaŋ ah ne ko.
Wul Yesu
28 Fahfal mai Yesu tǝ ɓe, fan daŋ vǝr ɓe. Mor ka ɓǝ mai mo ŋwǝǝ ɓo pǝ Ɗerewol mo joŋ ge cok ahe, faa: Koŋ bii i me ɓo. 29 Pǝ cok ah daŋ no kan ɓo gŋ ne bii mambǝ̃ǝre, baŋra tãa fan ge zah keesyerre, maara ge pǝ bii mbǝ̃ǝ so gbǝra ge nyi zahe. 30 Ne cok Yesu mo laa bii mbǝ̃ǝ ah ge zahe, so faa: Vǝr daŋ ɓe. So ɗǝŋ tǝtǝl nǝkahe, lee wulli.
Cuŋra kahlaa nyi Yesu ne zǝǝ
31 Com ah com zyeɓ fan mor com 'yak yo, mor tǝ'nan ah ne com 'yak fĩi malii yo. Yahuduen ge fiira Pilatus ka mo hahko ɓal za mai mo ɓaara ra ɓo tǝ kpuu, mo ɗǝrra wul ɓǝǝ ge sǝŋ ta, ka mo yeara tǝ kpuu ne com 'yak ka. 32 Sooje ge hahra ɓal dǝɓ ma kǝpelle, so hahra mǝ patǝ gwa ah ta. 33 Amma ne cok mo ge daira wo Yesu, kwora ko wǝ ɓe, hahra ɓal ah ya. 34 Amma dǝɓ vaŋno kǝsyil sooje ɓaŋ zǝǝ cuŋ kahlaa nyi ne ko, ne cok ah sǝ, zah ah ɗuu syim ne bii gwa daŋ ge lalle. 35 Dǝɓ ma kwan ah faa ɓǝ ahe, ɓǝ faa ah goŋga yo, so tǝ ɓe, zye tǝ faa goŋga, amma ka we nyiŋ ɓǝ faa ahe. 36 Fan mai joŋ ka ɓǝ mai mo ŋwǝǝ ɓo pǝ Ɗerewol mo joŋ ge cok ahe: Koo woiŋ ah vaŋno laŋ hao ya. 37 Ŋwǝǝ ɓo pǝ Ɗerewol pǝ cok maki ah faɗa, faa: A ga kwora Dǝɓ mai mo cuŋra ko ne zǝǝ.
Kanra Yesu ge pǝ palle
38 Fahfal ah Yuseɓ ma yaŋ Arimatea ge fii fahlii jol Pilatus ka ɓaŋ wul Yesu. Yuseɓ dǝɓ syee mor Yesu ye ta. Amma a syee mor ah pǝ muŋni, mor a ɗuu gal Yahuduen. Pilatus nyi fahlii ah nyi, so ge ɓaŋ wul Yesu kal ne ko. 39 Nikodemus mai mo ge wo Yesu ne suŋ kŋ ge ne Yuseɓ ta, ɓaŋ ɓǝrdi mai mo suuki ɓo moo fuŋ pǝ'nyahre, tǝkine ɓǝrdi ma pǝzyil kpuu nǝn kilo jemma dappe. 40 Ɓaŋra wul Yesu, so sãara zyim ge nyi wo suu, sahra ɓǝrdi ge wol ah tǝgbana Yahuduen moo ciira wulli. 41 Pǝ cok mai mo ɓaara Yesu 'wah no gŋ, pǝ 'wah ah pal mafuu ah no gŋ, ciira wul gŋ taa ya ba. 42 Ka tǝ'nan ah com 'yak Yahuduen yo, mor pal ah laŋ a ne yaŋ gwari ta, ge ciira Yesu gŋ.
Yesu ur gin pǝ wulli
1 Ne com damasyi ne zah'nan pim ka cok pǝfuu ba, Maria ma Magdala kal ge zah palle, ge kwo tǝsal coo zah pal gbǝr ge ɓo lalle. 2 So ɗuu kal ge wo Simon Petar tǝkine dǝɓ syee mor Yesu mai Yesu moo 'yah ko pǝlli, faa nyi ra: Ɓaŋra Dǝɓlii gin pǝ pal ɓe, ru tǝ cok mai mo ge kanra ko ɓo gŋ ya. 3 So Simon Petar ne dǝɓ syee mor ah maki ah pǝ̃ǝra ge lal kalra ge zah palle. 4 Ara gwa daŋ ɗuura ge ɗuu, amma dǝɓ syee mor ah maki ah kal Petar ne ɗul ɓe, ge dai zah pal zahnahpelle. 5 Ge ɗǝŋ ẽe cok ge gŋ, kwo zyim kan ɓo, amma dan ge gŋ ya. 6 Simon Petar ɗuu ge dai fahfal ahe, so dan kal ge pǝ palle, ge kwo zyim kan ɓo gŋ. 7 Kwo salabi mai mo koora tǝtǝl Yesu ne ta, amma ka pǝ cok tǝ vaŋno ne zyim ah ya, cẽera kan ge ɓo pǝ cok maki ah cam. 8 So dǝɓ syee mor ah mai mo ge dai zah pal kǝpel kŋ so dan ge gŋ ta, ge kwo, so nyiŋ ɓǝ ahe. 9 Mor ka ɓah tanra mor ɓǝ mai mo ŋwǝǝ ɓo pǝ Ɗerewol faa: Ɗoole Yesu ga ur gin pǝ wulli ya ba. 10 So za syee mor ah pii soora kal ge fah yaŋ ɓǝǝra.
Yesu cuu suu ah nyi Maria ma Magdala
11 Maria uu zah pal ne yee. Ne cok mo tǝ yeyee, so ɗǝŋ ẽe cok ge ɓǝr pal ne ko. 12 Kwo angeloi ge gŋ gwa, ɓaara mbǝro ɓo pǝfãi, vaŋno kaa ɓo pǝ cok tǝtǝl Yesu, maki ah kaa mor ɓal ah sǝŋ pǝ cok mai mo yea sorra wul ah ɓo gŋ. 13 Fiira ko faa: Mawinni, mo yeyee mor fẽene? Zyii faa: Mor ɓaŋra Dǝɓlii ɓe kal ɓo ne ko, me tǝ cok mai mo ge kanra ɓo gŋ ya. 14 Ne cok mo faa ɓǝ nai so cii suu ah kwo Yesu uu ɓo, amma tǝ sõone Yesu ye ya. 15 Yesu faa nyi ko: Mawinni, mo yeyee mor fẽene? Mo kyeɓ zune? Maria lǝŋ pah 'wah yo, so fii ko: Goŋe, amo ye ɓaŋ ko ɓo ne? Ka mo cuu cok mai mo ge kan ɓo gŋ nyi me, me ga ɓaŋ ko. 16 Yesu faa nyi ko: Maria. So Maria cii suu ah zyii zah ah ne zah Yahuduen: Rabboni. (Tǝgba faa: Pa cuu fanne.) 17 Yesu faa nyi ko: Mo juu me ka, mor me ɓah ga sǝŋ wo Pa ɓe ya ba. Amma mo ge wo wee Pa ɓe, mo faa nyi ra me tǝ ga sǝŋ wo Pa ɓe ne Pa ɓiiri, wo Masǝŋ ɓe ne Masǝŋ ɓiiri. 18 So Maria ma Magdala kal ge faa nyi za syee mor ahe: Me kwo Dǝɓlii ɓe, so faa ɓǝ nyi me naiko.
Yesu cuu suu ah nyi za syee mor ahe
19 Amma com damasyi ne lil ah za syee mor ah taira ɓo ɓǝr yaŋ, amma coora zahfah ge ɓo tǝ suu ɓǝǝra, mor a ɗuura gal Yahuduen. So Yesu ge uu kǝsyil ɓǝǝ faa nyi ra: Jam mo yea tǝ ɓiiri. 20 Fahfal mo faa ɓǝ mai so cuu jol ah tǝkine kahlaa ah nyi ra. Ne cok za syee mor ah mo kwora Dǝɓlii naiko, laara pǝ'nyah pǝlli. 21 So Yesu faa nyi ra faɗa: Jam mo yea tǝ ɓiiri. Tǝgbana Pa ɓe mo pee me, me laŋ me pee we nai ta. 22 Fahfal mo faa ɓǝ naiko, so fee tǝ'yak tǝ ɓǝǝ faa: We nyiŋ Tǝ'yak Matǝdaŋdaŋ ko o. 23 Za mai we rwah faɓe' ɓǝǝ ɓe, faɓe' ɓǝǝ ga rwahe, za mai we gbǝ ɓǝɓe' ɓǝǝ tǝ ɓǝǝ ɓe, ɓǝɓe' ga yea tǝ ɓǝǝ ta.
Yesu ne Tomas
24 Dǝɓ vaŋno kǝsyil za syee mor ah a ɗii ne Tomas, tǝɗii ah ye Jurkpiŋ ta. Ne cok Yesu mo ge wo ɓǝǝ ka kǝka gŋ ya. 25 Za syee mor Yesu manyeeki ah faara nyi ko: Ru kwo Dǝɓlii ɓe. Tomas faa nyi ra: Me kwo suŋnwãh guu mai mo jol ah ya, so me maa tǝwee jol ɓe ge pǝ nwãh guu ah tǝkine nwãh ma kahlaa ah daŋ ya ɓe, me ka nyiŋ ya syaŋsyaŋ. 26 Fahfal ah ne zah'nan nama ah za syee mor ah taira ɓo ɓǝr yaŋ faɗa, Tomas no gŋ ne ra ta. Coora zahfah ɓo, amma Yesu ge uu kǝsyil ɓǝǝ faa: Jam mo yea tǝ ɓiiri. 27 So faa nyi Tomas: Mo nyen jol ɓo ge nyeeno, mo ẽe jol ɓe, mo nyen jol ɓo ge nyee mo maa ge kahlaa ɓe, ka mo so kaa bai nyiŋ ɓǝ ɓe kao, amma mo nyiŋ. 28 Tomas zyii faa nyi ko: Dǝɓlii ɓe, Masǝŋ ɓe. 29 Yesu faa nyi ko: Mo nyiŋ ɓo mor mo kwo me ɓe. Amma za mai mo kwora me ya mo so tǝ nyiŋra, a pǝsãhe.
Ɓǝ ma pǝ ɗerewol
30 Yesu joŋ dǝǝbǝǝri nǝn za syee mor ah camcam pǝlli, ŋwǝǝra ɓǝ ah pǝ ɗerewol mai daŋ ya. 31 Amma mai mo ŋwǝǝra ɓo gŋ, ka we nyiŋ Yesu ako ye Kristu We Masǝŋ, mor we nyiŋ nai ɓe, we ga lwaa cee ma ga lii pǝ tǝɗii ahe.
Yesu cuu suu ah nyi za syee mor ah rǝŋ
1 Fahfal ah Yesu so cuu suu ah nyi za syee mor ah zah mabii Tiberias faɗa. Za mai mo cuu suu ah nyi ra ara naiko: 2 Simon Petar, Tomas ma ɗii ne Jurkpiŋ ta, Natanael ma yaŋ Kana sǝr Galile, ne wee Zebedeus tǝkine za syee mor ah manyeeki ah gwa, taira ɓo gŋ. 3 Simon Petar faa nyi ra: Me ga ɓaa jin ɗao. Faara nyi ko: Aru laŋ ru ga ne mo ta. Urra kalle, ge yeera dahe, amma lwaara fan ki ne suŋ moo ya. 4 Ka zah'nan tǝ cee o, Yesu ge uu zahbii, amma za syee mor ah tǝra Yesu ye ya. 5 Yesu fii ra: Weere, we gbǝ syiŋ ɓe ne? Zyiira faa nyi ko: Ru lwaa fan ki ya. 6 Faa nyi ra: We 'nǝǝ jin ge pǝ bii kahlaa dah nǝjokǝsãhe, we ga lwaa. So 'nǝǝra jin ge bii, amma gak ka 'namra jin ah mor bii gin lal a, mor cak syiŋ ɓo pǝlli. 7 Dǝɓ syee mor ah mai Yesu moo 'yah ko pǝlli faa nyi Petar: Dǝɓlii ye nyẽeko. Ne cok Petar mo laa Dǝɓlii yo, so ge ɓaŋ mbǝro ah ɓoo, mor yea ne suu kolle, so lee ge bii. 8 Amma za syee mor ah manyeeki gera ne dahe, ge 'namra jin mai mo cak syiŋ ɓo pǝlli, ara ka ne zahgee pǝɗǝk ya, a nǝn in jol tǝgbana temere vaŋno. 9 Ne cok mo yeera ge lalle, kwora wii cok ɓo gŋ sye yak ɓo, so syiŋ kan ɓo tǝ yakwii ah ne tǝwaa goo daŋ. 10 Yesu faa nyi ra: We nǝǝ syiŋ mai we yea tǝ gban zǝzǝ̃ǝ gee me ne ɗǝ. 11 Simon Petar yee ge pǝ dahe, so 'nam jin ge zahgee ne syiŋ maluu mo ɓǝr ah temere ne jemma dappe tǝtǝl sai daŋ. Koo syiŋ ah mo pǝlli nai laŋ, jin ah ŋgǝ̃ǝ ya. 12 Yesu faa nyi ra: We ge we re o. Koo dǝɓ vaŋno kǝsyil za syee mor ah fiira ko amo ye zune ya, mor tǝra ɓe, Dǝɓlii yo. 13 Yesu syee ge ɓaŋ tǝwaa nyi ra, so ɓaŋ syiŋ ah nyi ra ta. 14 Daga Yesu mo ur gin pǝ wul cuu suu ah ɓo nyi za syee mor ah ɓal sai ah ye maiko.
Yesu ne Petar
15 Fahfal mo rera farel vǝrri, Yesu fii Simon Petar: Simon we Yohana, mo 'yah me kal za marai ɓe ne? Petar zyii faa: Dǝɓlii, mo tǝ ɓe, me tǝ 'yah mo. Yesu faa nyi ko: Mo wol wee pǝsǝ̃ǝ ɓe. 16 So fii ko patǝ gwa ahe: Simon we Yohana, mo 'yah me ne? Simon zyii faa: Dǝɓlii, mo tǝ ɓe, me tǝ 'yah mo. Yesu faa nyi ko: Mo pii pǝsǝ̃ǝ ɓe. 17 So Yesu fii ko patǝ sai ahe: Simon we Yohana, mo 'yah me ne? Petar tǝŋ swaa ɓǝ, mor Yesu fii ko ɓo zahlǝŋ sai: Mo 'yah me ne? Zyii faa nyi ko: Dǝɓlii, mo tǝ fan daŋ, mo tǝ ɓe, me tǝ 'yah mo. Yesu faa nyi ko: Mo pii pǝsǝ̃ǝ ɓe. 18 Goŋga me faa nyi mo, ne cok mo pǝ tǝbanna, mo baŋ haŋ ɓo ne ganda, mo ga pǝ cok makẽne mo 'yah ga gŋ daŋ. Amma zǝzǝ̃ǝko mo tam ɓe, mo ga nyen jol ɓo nyi dǝɓ ki, ako ye ga baŋ ganda ɓo, a zaŋ mo ga pǝ cok mai zahzyil ɓo mo 'yah ga gŋ ya ne ko. 19 Yesu faa ɓǝ mai nai mor ka cuu mor ɓǝ wul mai Petar mo tǝ ga wǝko mor ka yii yǝk Masǝŋ ne ko. So Yesu faa nyi ko: Mo syee mor ɓe.
Yesu ne dǝɓ syee mor ah mai moo 'yah ko pǝlli
20 Petar jin nahnǝn so kwo dǝɓ syee mor ah mai Yesu moo 'yah ko pǝlli tǝ gin fahfal ɓǝǝra, dǝɓ ah ako ye dǝɓ mai mo ɗǝŋ zah fii Yesu ne cok mo haira ɓo zah taabǝl tǝ ren farel faa: Dǝɓlii, azu ye ga joŋ tǝkor ɓo ne kŋ. 21 Ne cok Petar mo kwo ko, so fii Yesu: Dǝɓlii, a fẽe ye ga joŋ dǝɓ ma nyẽe ne? 22 Yesu zyii faa nyi ko: Me 'yah mo yeako ne cee ŋhaa me pii soo ge ɓe, ɓǝ ah saaŋ mo ɗǝne? Mo syee mor ɓe. 23 Mor ah ɓǝ ah myah kǝsyil za syee mor Yesu manyeeki ah faa: Dǝɓ syee mor ah mai ka tǝ ga wǝ ya. Amma Yesu faa nyi Petar sõone ka wǝko ya ye ka, amma faa: Me 'yah mo yeako ne cee ŋhaa me pii soo ge ɓe, ɓǝ ah saaŋ mo ɗǝne? 24 Dǝɓ syee mor ah mai mo kee ɓǝ fan marai mo joŋ, ako so ye ŋwǝǝ ɓǝ ah ta. Na tǝ ɓe, ɓǝ mai mo faako daŋ goŋga yo.
In zah ɓǝ ahe
25 Yesu joŋ yeɓ maki ah ra camcam pǝlli, kǝnah mo ŋwǝǝra ɓǝ yeɓ ah mo joŋ ne patǝtǝl daŋ ɓe, me lǝŋ koo wo sǝr ne lii ah daŋ laŋ, cok rǝk ah ka yea gŋ ya.