Muyang Bible - Gospel of John

Zeŋ 1

1 Wuɗaka Melefit ànjəki ka magraya zlam a ɗek ti Bay nahaŋ àbu àndava. Bay gani nani ti Pakama ge Melefit. Ka gani nani ti naŋ àbu akaba Melefit ka ahar bəlaŋ àndava. Naŋ gani ti Melefit daya. 2 Wuɗaka Melefit ànjəki ka magraya zlam a ɗek ti Pakama nani naŋ àbu akaba Melefit ka ahar bəlaŋ àndava. 3 Melefit àgraya zlam a ɗek ti àna naŋ. Zlam ya ti Melefit àgraya àna naŋ do ni ti àbi. 4 Zlam ya ti Melefit àgraya tay a ni ɗek ti Pakama nani àvi sifa gani ana tay. Sifa gani nani ti aslaɗi məlaŋ ana mis. 5 Maslaɗani gani nani aslaɗay a məlaŋ ziŋ-ziŋeni bu, ay ti nday ya a məlaŋ ziŋ-ziŋeni bu ni tə̀gəskabu naŋ ndo. 6 Zal nahaŋ àra, slimi gayaŋ Zeŋ, Melefit àslərbiyu naŋ ga məhi pakama gayaŋ ana mis. 7 Naŋ zal sedi: àra ti ga magrakia sedi a ka maslaɗani na, ti mis ɗek tə̂fəki ahàr ka Bay ya ti avay sifa ni. 8 Aslaɗay ti naŋ naŋani do: àra ti ga magrakia sedi ka maslaɗani na ciliŋ. 9 Bay ya ti aslaɗay ge jiri ni ti, Pakama ge Melefit ni. Àra a duniya va, naŋ àbu aslaɗi məlaŋ ana mis ɗek. 10 Nahkay Bay nani ti naŋ àbu a duniya bu. Melefit àgraya duniya ti àna naŋ: ay ti ndam ga duniya ni tə̀sərkaba naŋ a ndo. 11 Àra ka haɗ gayaŋ a, ay ti ndam gayaŋ tə̀gəskabu naŋ ndo. 12 Ku tamal nahkay nəŋgu ni mis ndahaŋ tə̀gəskabá naŋ a, tə̀fəkia ahàr a. Nday ya ti tə̀fəkia ahàr a ni ti, àvi divi ana tay ti tîgi bəza ge Melefit. 13 Tìgia bəza ge Melefit a ti akaɗa ge mis ya ti tiwi bəza ni do. Tìgi nahkay ti akaɗa ga zal ya awayay azi huɗ ana wal ni do. Tìgi nahkay ti Melefit àvi sifa mʉweni ana tay tîgi bəza gayaŋ. 14 Nahkay Pakama ge Melefit ni ègia mis a, ànjəhaɗa e kiɗiŋ geli ba. Ere ye ti àgray ni ɗek ti àgray àna sulum ge Melefit, àna jiri daya. Leli màra mìpia naŋ a ti mə̀səra naŋ gəɗakani, naŋ Wur bəlaŋ bəlaŋani ge Melefit. 15 Zeŋ àgrakia sedi a, àɗəm kay kay: «Nə̀ɗəm: “Nu ti nàra enji gayaŋ a, ay naŋ gəɗakani àtam nu, aɗaba wuɗaka tìwi nu ti naŋ àbu àndava.” Pakama gani nani nə̀ɗəmki ti ka naŋ.» 16 Naŋ ti zlam sulumani ɗek afa gayaŋ: nahkay àgri sulum gayaŋ ana leli sak ehimeya. 17 Melefit àvi Divi gayaŋ ana leli ti àna wakita ge Mʉwiz ya àbəki ni. Ay àgri sulum gayaŋ akaba jiri gayaŋ ana leli ti Yezu Krist. 18 Maslaŋa ya èpia Melefit a ti àbi. Ay Wur gayaŋ bəlaŋ bəlaŋani naŋ Melefit, anjəhaɗ afa ga Bəŋani ni, naŋ day kwa ti àɗəfiki Melefit ana leli ti mə̂sər naŋ. 19 Nahkay Zeŋ nakəŋ àgray sedi gayaŋ. A vaɗ nahaŋ gəɗákani ga ndam Zʉde ya a Zerʉzalem ni tə̀slərbiyu mis ge mihindifiŋa ma ke Zeŋ a. Tə̀slərbiyu ti mis ndahaŋ e kiɗiŋ ga ndam maŋgalabakabu mis akaba Melefit ni bu akaba ndam Levi ndahaŋ. Mis ni tàra tìnjia ti tə̀hi: «Nak ti way?» 20 Tàra tìhindifiŋa ma na nahkay ti, Zeŋ nakəŋ èmbirfiŋ ndo, àɗəm vay-vay kè meleher ge mis ɗek: «Nu ti Krist Bay gəɗakani ya amara ni do.» 21 Eslini tìhindifiŋa ma keti, tə̀hi: «Tamal nahkay ti, nak way? Nak Eli aw?» Zeŋ nakəŋ àhəŋgrifəŋ ana tay, àɗəm: «Aha, nu Eli do.» Tə̀hi keti: «Ay nak ti bay mahəŋgaray pakama ge Melefit ya Mʉwiz àɗəm amara ni aw?» Àɗəm: «Aha, nu do.» 22 Eslini tə̀hi: «Tamal nahkay ti, nak way zla aw? Ahàr àɗəm məhəŋgrikaboru ma gani ana ndam ya tə̀slərbiyu leli ni kwa. Kə̀ɗəmki mam ka ahàr gayak mam?» 23 Zeŋ àhəŋgrifəŋ ana tay, àɗəm: «Ahaslani Izayi bay mahəŋgaray pakama ge Melefit àɗəm: “Maslaŋa azlah a huɗ gili bu, dəŋgu gayaŋ ahəndabiyu. Àɗəm: Slamatumikabu divi ana Bay gəɗakani, ahàr àɗəm divi gayaŋ mâla ndəlaɓa.” «Maslaŋa ya ti dəŋgu gayaŋ ahəndabiyu ni ti nu.» 24 E kiɗiŋ ga ndam ya ti tə̀slərbiyu tay a Zerʉzalem ni bu ni ti ndam Feriziyeŋ ndahaŋ tə̀kibu ka tay. 25 Nday nakəŋ tìhindifiŋa ma nahaŋ a keti, tə̀hi ahkado: «Tamal nak Bay gəɗakani ya amara ni do, nak Eli do, nak bay mahəŋgaray pakama ge Melefit ya amara ni do nahəma, kabaray mis ti kamam?» 26 Zeŋ nakəŋ àhəŋgrifəŋ ana tay, àɗəm: «Nu ti nabaray kʉli àna yam; ay maslaŋa nahaŋ naŋ àbu e kiɗiŋ gekʉli bu, kə̀sərum naŋ do. 27 Nu ti nàra enji gayaŋ a: ay nu ti way ga mepicehiaba ezeweɗ ga kimaka gayaŋ a di way?» 28 Zlam nday nani ɗek tàgravu ti a Betani ke ledi ga zalaka Zʉrdeŋ, ka məlaŋ ya ti Zeŋ abaray mis ni. 29 Hajəŋ gani ti Zeŋ nakəŋ èpi Yezu naŋ àbu arəkia. Àra èpia naŋ a ti àɗəm ahkado: «Maslaŋa hini ti Wur Təmbak ge Melefit: agray ti zlam magudarani ge mis ga duniya ni ɗek mə̂ləbi va bi ti naŋ. 30 Nə̀ɗəm: “Nu ti nàra enji gayaŋ a, ay naŋ gəɗakani àtam nu, aɗaba wuɗaka tìwi nu ti naŋ àbu àndava.” Pakama gani nani nə̀ɗəmki ti ka naŋ. 31 Ŋgay naŋ gani ti nə̀sərkaba ndo. Ay nu nàra nàbaray mis àna yam ti ga məɗəfiki naŋ ana ndam jiba ge Izireyel.» 32 Zeŋ nakəŋ àɗəm keti: «Nìpi Məsuf ge Melefit àhərkiaya kwa a huɗ melefit ba akaɗa ga kurkoduk ya ahər na, àrəkia ànjəhaɗki. 33 Ŋgay naŋ gani ti nə̀sərkaba ndo, ay ka ya ti Melefit àslərbiyu nu ga məbaray mis àna yam ni ti àhu ahkado: “Maslaŋa ya ekipi Məsuf goro aməhərkiaya amanjəhaɗki ni ti, naŋ gani Bay ya ti aməbaray mis àna Məsuf Njəlatani ni.” 34 Zlam gani nani àgrava kè eri goro a. Nagrakia sedi a: naŋ ti Wur ge Melefit.» 35 Hajəŋ nahaŋ gani keti Zeŋ naŋ àbu eslini akaba ndam maɗəbay naŋ cʉ. 36 Nday tə̀bu eslini nahkay ti Zeŋ nakəŋ èpi Yezu naŋ àbu asawaɗay. Àra èpia naŋ a nahəma, àɗəm: «Maslaŋa hini ti Wur Təmbak ge Melefit.» 37 Ndam maɗəbay naŋ cʉeni ni tàra tìcia ma gayaŋ na ti tàɗəboru Yezu e meteliŋ vu. 38 Yezu àmbatbiyu ma kələŋ, èpi ti nday tə̀bu taɗəboru naŋ, mək àhi ana tay: «Kəɗəbum mam?» Nday nakəŋ tə̀hi ahkado: «Rabi, kanjəhaɗ ti eley?» (Rabi ti awayay aɗəmvaba «Mʉsi»). 39 Naŋ nakəŋ àhi ana tay ahkado: «Dəguma, akara kipʉm.» Nahkay tòru akaba naŋ, tòru tìpi məlaŋ gayaŋ ya anjəhaɗ ni. Ka sarta gani nani àgray njemdi faɗ ya ga məlakarawa: tə̀pəs akaba Yezu nakəŋ eslini, fat àdəkiviyu a ahay vu ka tay. 40 E kiɗiŋ ge mis cʉeni ya tìci ma ge Zeŋ, tàɗəbay Yezu ni bu ni ti, bəlaŋ gani slimi gayaŋ Andre naŋ wur ga məŋ ga Simu Piyer. 41 Andre nakəŋ àɗəboru wur ga məŋani Simu hʉya. Àra àdia ahàr a ti àhi: «Mə̀dia ahàr ana Misi a.» (Misi ti awayay aɗəmvaba «Krist Bay gəɗakani ya amara ni»). 42 Andre àra àhia ma ana Simu a nahkay ti àzoru naŋ suwwa afa ga Yezu. Yezu àra èpia naŋ a ti àhi: «Nak Simu wur ge Zeŋ: kama kama ti atəzalay kur ti Sifas.» (Sifas ahkay do ni Piyer ti awayay aɗəmvaba «akur.») 43 Hajəŋ tegʉni gani ti Yezu àɗəm asləka akoru ka haɗ Gelili. Naŋ àbu akoru ti àdi ahàr ana Filip mək àhi: «Ɗəbabiyu nu.» 44 Filip ti kəsa gayaŋ Beceyda. Kəsa nani ti kəsa ga ata Andre nday ata Piyer daya. 45 Filip day òru àdi ahàr ana Natanayel mək àhi: «Mə̀dia ahàr a ana Bay ya ti Mʉwiz àɗəmki ma e Divi ge Melefit bu akaba ndam mahəŋgaray pakama ge Melefit tə̀ɗəmki ma na. Bay gani nani ti Yezu, naŋ wur ge Zʉzef, kəsa gayaŋ Nazaret.» 46 Eslini ti Natanayel àhəŋgrifəŋ, àhi: «A Nazaret ti zlam sulumani aŋgətvu nahkay aw?» Filip àhəŋgrifəŋ, àhi: «Ra kîpi àna eri gayak.» 47 Natanayel nakəŋ naŋ àbu arəkia ka Yezu a, Yezu àra èpia naŋ a nahəma, àɗəm: «Naŋ hini ti zal Izireyel eɗeɗiŋ: àgosay mis do ferera.» 48 Natanayel àra ècia ma gayaŋ na ti àhi: «Kə̀sər nu ti ahəmamam?» Yezu àhəŋgrifəŋ, àhi: «Wuɗaka Filip àzalabiyu kur ti, nìpia kur a ka ya ti nak kə̀bu e zʉhweri ga wəruv bu na.» 49 Eslini Natanayel àhi: «Mʉsi, nak ti Wur ge Melefit, nak Bay ga ndam Izireyel!» 50 Yezu àhi ahkado: «Kəfəku ahàr ti aɗaba nə̀huk “Nìpia kur a nak kə̀bu e zʉhweri ga wəruv bu” ni aw? Ekipi zlam gəɗákani ndahaŋ tə̀tam hini mba.» 51 Àɗəm keti: «Nəhi ana kʉli nahəma, ekipʉm huɗ melefit məzləkvabana, akaba məslər ge Melefit təcəloru e melefit vu mək təŋgəkua ka nu, nu Wur ge Mis a.»

Zeŋ 2

1 A vaɗ ya mahkər ti tàgray wuməri ga maday wal a Kana ka haɗ Gelili. Məŋ ga Yezu day naŋ àbu eslini. 2 Tə̀zaloya Yezu akaba ndam maɗəbay naŋ na ka məlaŋ ga wuməri na daya. 3 Nday tə̀bu tagray wuməri nahkay ti zum àra àndavkia ka tay a. Eslini məŋ ga Yezu àhi ana Yezu ahkado: «Zum ni àbi va bi, àndava.» 4 Ay Yezu àhəŋgrifəŋ, àhi: «Mma, nak kəɗəfuki tʉwi goro aw? Sarta gani goro ènjia faŋ ndo.» 5 Eslini məŋ ga Yezu àhi ana nday ya ti tagray tʉwi ni ahkado: «Grum ere ye ti aməhi ana kʉli kə̂grum ni ɗek.» 6 Wərzla ga akur gəɗákani muku tə̀bu eslini. Wərzla nday nani ti ndam Zʉde təcahviyu yam a tay vu, tabaray àna naŋ ka ya ti tawayay tigi njəlatani akaɗa ge divi gatay ya taɗəbay ni. Wərzla ni bəlaŋ gani azum mandaray faɗ. 7 Eslini Yezu àhi ana ndam ya tagray tʉwi ni ahkado: «Cəhumviyu yam a wərzla nday hini vu, ti tə̂rəhvu.» Nahkay nday nakəŋ tə̀cahviyu yam a wərzla ni vu ɓerera ɓerera. 8 Tàra tàgra nahkay ti, Yezu àhi ana tay: «Cəhumaya kə̂zumikaboru ana gəɗakani ga wuməri ni.» Mək tàgray ere ye ti àhi ana tay ni. 9 Gəɗakani ga wuməri ni àra àcaka ti yam ni ègia zum a àndava. Naŋ àsər məlaŋ ya tə̀cahbiyu zum ni do, ay ndam magray tʉwi ni tə̀səra tə̀cahbiyu yam ga wərzla ni. Àra àcaka zum na ti, àzalay bay ya aday wal ni, 10 mək àhi: «Ku way way do ka ya ti agray wuməri ti acəhibiyu zum məcərani ana mis enji. Mis ni etisikabá day kwa ti acəhibiyu ya àcər lala do ni ana tay. Ay nak ti kàgray nahkay ndo, kəvi zum ya acər lala ni ana mis nihi ɗəma mba.» 11 Zlam ga Yezu ya àgray enjenjeni agri ejep ana mis, aɗəfiki zlam ana tay ni ti àgray a Kana ka haɗ Gelili ti nahkay. Gayaŋ ya àgray nahkay ni ti àɗafaki naŋ gəɗakani: ndam maɗəbay naŋ ni tàra tə̀səra naŋ gəɗakani ti tə̀fəki ahàr hʉya. 12 Kələŋ gani Yezu akaba məŋani, bəza ga məŋani akaba ndam maɗəbay naŋ ni tàsləka tòru a Kafarnahum. Tòru tìnjʉa eslina ti tànjəhaɗ vaɗ ɓal ciliŋ. 13 Wuməri ga ndam Zʉde ya təzalay Pak ni àra ènjia wuɗak ti, Yezu akaba ndam maɗəbay naŋ ni tòru a Zerʉzalem. 14 Tòru tìnjʉa ti Yezu àhuriyu a dalaka ga ahay gəɗakani ge Melefit ni vu. Eslini àdi ahàr ana ndam məsəkumoru slasla, təmbəmbak, kurkodúk, akaba ndam mambay siŋgu manjəhaɗani. 15 Àra àdia ahàr ana tay a nahkay ti àzay ezeweɗ, àslapaya kurupu gana, àgaraya tay a dalaka ga ahay ni ba ɗek: àgaraya təmbəmbak akaba slasla gatay na daya. Àboru siŋgu ga ndam mambay siŋgu ni ka haɗ, àhəmbahaɗaba tabəl gana daya. 16 Mək àhi ana ndam məsəkumoru kurkodúk ni ahkado: «Həlumaba zlam ndana ahalay a! Kə̀grum ti ahay ga Bəŋ goro ni egi gosku ba.» 17 Ndam maɗəbay Yezu ni tàra tìpia ere ye ti àgray na ti, tə̀sərki ka pakama ge Melefit ya àbu məbəkiani a Wakita gayaŋ ni bu ni. Pakama gani nihi: «Bay Melefit goro, nawayay ahay gayak dal-dal. Nawayay kwa, do ni nànjəhaɗ koksah.» 18 Eslini gəɗákani ga ndam Zʉde tìhindifiŋa ma kà Yezu a, tə̀hi ahkado: «Kisliki magray mam tata mam? Graya zlam magray ejep a ti mə̂sər Melefit àvuka divi ga magray ere ye ti kàgray ahalay na.» 19 Yezu àhi ana tay ahkado: «Mbeɗʉmkaba ahay gəɗakani ge Melefit hina. Kèmbeɗʉmkaba nahəma, a huɗ ga vaɗ mahkərani ni bu ni ti nələmaba.» 20 Nday nakəŋ tə̀həŋgrifəŋ, tə̀hi: «Wuɗaka tìndeveriŋ mələm ahay hini ti, tə̀zumkia vi a kru kru faɗ mahar muku a. Nak ti kə̀ɗəm kələmaba a huɗ ga vaɗ mahkərani ba ti ahəmamam?» 21 Ay ahay gəɗakani ya Yezu àɗəmki ma ni ti, àɗəmki ka vu gayaŋ gayaŋani. 22 Yezu àra àməta mək àŋgaba e kisim ba ni ti ndam maɗəbay naŋ ni tə̀sərki ka ma nani ya àɗəm ni. Nahkay nday nakəŋ tə̀gəskabu pakama ya àbu məbəkiani a Wakita ge Melefit bu ni akaba ma ga Yezu ya àɗəmbiyu ni. 23 Ka ya ti Yezu naŋ àbu a Zerʉzalem a wuməri ga Pak bu ni ti àgra zlam ya agri ejep ana mis na dal-dal. Mis tàra tìpia ti mis kay e kiɗiŋ gatay bu tə̀fəkia ahàr ka Yezu a, tə̀ɗəm naŋ gəɗakani. 24 Ay Yezu ti ni àfəki ahàr ka tay ndo, aɗaba àsəra tay a ɗek lala. 25 Àwayay ti mis təhiki ma àki ka ku way way do do, aɗaba naŋ àsəra majalay ahàr ge mis a ɗek.

Zeŋ 3

1 Zal nahaŋ àbu slimi gani Nikodem; naŋ zal Feriziyeŋ, naŋ gəɗakani ga ndam Zʉde daya. 2 Ga məlavaɗ a vaɗ nahaŋ nahəma àrəkia ka Yezu a, àhi ahkado: «Mʉsi, mə̀səra Melefit àslərbiyu kur ga macahi zlam ana leli, aɗaba maslaŋa àbi agray zlam magray ejep akaɗa gayak ni bi, si tamal ti Melefit àvia njəɗa gana ana maslaŋa gana kwa.» 3 Yezu àhəŋgrifəŋ, àhi: «Nəhuk nahəma, maslaŋa àbi epi Məgur ge Melefit bi, si tamal tìweya naŋ nahaŋ a keti kwa.» 4 Nikodem nakəŋ èhindifiŋa ma, àhi: «Mis gəɗakani àndava ti tiweya naŋ nahaŋ a keti ti agravu waw? Esliki məŋguyani a huɗ ga məŋani vu mək tiweya naŋ nahaŋ a keti aw?» 5 Yezu àhəŋgrifəŋ, àhi keti: «Nəhuk nahəma, maslaŋa àbi ahuriyu a Məgur ge Melefit vu bi, si tamal tìweya naŋ àna yam a akaba Məsuf Njəlatana kwa. 6 Maslaŋa ya ti mis hihirikeni ewi ni ti naŋ mis ciliŋ. Maslaŋa ya Məsuf Njəlatani ewi ni ti naŋ àbu àna Məsuf Njəlatani. 7 Ma goro ya nə̀huk: “Ahàr àɗəm lekʉlʉm ɗek si tîweya kʉli nahaŋ a keti kwa” ni ti àgruk ejep ba. 8 Ere ye ti nəhukki ma ni ti akaɗa ga aməɗ ya akəzlay ka məlaŋ ya naŋ awayay ni. Kici mahənday gani ciliŋ; kə̀sər məlaŋ ya ècikbiyu ni do, kə̀sər məlaŋ ya akoru ni do daya. Ku way way do Məsuf ge Melefit èwia naŋ a ti naŋ day nahkay.» 9 Eslini Nikodem nakəŋ àhi: «Ere gani nani agravu ti ahəmamam?» 10 Yezu àhi keti: «Nak bay macahi zlam ana ndam Izireyel ti kə̀sər zlam nday nani do aw? 11 Nəhuk nahəma, ere ye ti leli məɗəmki ma ni ti leli mə̀səra àndava. Ere ye ti leli magrakia sedi a ni ti, leli mìpia àndava. Ay lekʉlʉm ti ni kə̀gəsumkabu ma geli ya məhi ana kʉli ni do. 12 Tamal lekʉlʉm kə̀gəsumkabu ma goro ya nəhi ana kʉli àki ka zlam ya agravu ka haɗ ni do ni ti, akəgəsumkabu ma goro ya anəhi ana kʉli àki ka zlam ya agravu e melefit bu ni ti ahəmamam? 13 Maslaŋa ya ti àcəloya e melefit va ti àbi, si nu Wur ge Mis, aɗaba nàsləkabiya eslina. 14 Ahaslani a huɗ gili bu ni ti Mʉwiz àvəɗaya gavaŋ ga evirzegena, àfəki ka ahàr ga təndal, àzoru agavəla. Nu Wur ge Mis day si tə̂zoru nu agavəla nahkay kwa. 15 Nahkay ti ku way way do àfəkua ahàr a ti Melefit avi sifa ya àndav ɗay-ɗay do ni. 16 Nə̀ɗəm nahkay ti aɗaba Melefit àwaya mis ga duniya dal-dal. Nahkay àslərbiyu Wur gayaŋ bəlaŋ bəlaŋani ni, àvi ana tay, ti ku way way do tamal àfəkia ahàr ka Wur na ti èji do, aŋgət sifa ya àndav ɗay-ɗay do ni sawaŋ. 17 Melefit àslərbiyu Wur gayaŋ a duniya vu ti ga məgəs mis ga duniya ni àna seriya do: àslərbiyu naŋ ti ga mahəŋgay mis ga duniya àna naŋ sawaŋ. 18 Maslaŋa ya ti afəki ahàr ka Wur ge Melefit ni ti, Melefit àgəs naŋ àna seriya do. Ay maslaŋa ya àfəki ahàr do ni ti, Melefit àgəsa naŋ àna seriya àndava, aɗaba àfəki ahàr ka Wur ge Melefit bəlaŋ bəlaŋani ni ndo. 19 «Seriya ya Melefit agəs mis àna naŋ ni ti nihi: àslərbiyu Wur gayaŋ a duniya vu ga maslaɗi məlaŋ ana mis, ay mis tàwayay məlaŋ maslaɗani ni ndo, tàwayay manjəhaɗani a məlaŋ ziŋ-ziŋeni bu sawaŋ. Tagray nahkay ti aɗaba tə̀bu tagudar zlam. 20 Ku way way do tamal agudar zlam ti àwayay məlaŋ maslaɗani do; àwayay məhuriyani a huɗ gani vu do daya, aɗaba awayay ti zlam magədavani gayaŋ ni àŋgazlavu ba. 21 Ay maslaŋa ya ti agray jiri ni awayay məhuriyani a məlaŋ maslaɗani ni vu, aɗaba àgray tʉwi gayaŋ àna njəɗa ge Melefit, nahkay awayay ti tʉwi ni mâŋgazlavu.» 22 Yezu akaba ndam ya taɗəbay naŋ ni tàsləka, tòru ka məlaŋ nahaŋ ka haɗ Zʉde. Tòru tìnjʉa eslina ti Yezu ànjəhaɗ akaba tay, naŋ àbu abaray mis. 23 Ka sarta gani nani ti Zeŋ day naŋ àbu abaray mis a Enoŋ kà gəvay ga kəsa Selim. Zeŋ abaray mis eslini ti aɗaba yam àbu dal-dal. Nahkay mis dal-dal tə̀bu tərəkia mək abaray tay. 24 Ka gayaŋ nani abaray mis ni ti, tə̀fiyu naŋ a daŋgay vu faŋ ndo. 25 Eslini mis ya taɗəbay Zeŋ ni ndahaŋ e kiɗiŋ gatay bu tə̀bu tagray gejewi akaba zal Zʉde nahaŋ àki ke divi ga ndam Zʉde ya taɗəbay ti tîgi njəlatani ni. 26 Nahkay nday nakəŋ tə̀rəkioru ke Zeŋ, tə̀hi ahkado: «Mʉsi, bay ya a vaɗ nahaŋ àbu lekʉlʉm ata naŋ ke ledi ge Zʉrdeŋ kàgrakia sedia ni ti, nihi ti naŋ àbu abaray mis, mis ɗek tə̀bu tərəkioru.» 27 Eslini Zeŋ nakəŋ àhi ana tay ahkado: «Maslaŋa ya ti esliki magray tʉwi àna njəɗa gayaŋ gayaŋani ti àbi, si tamal Melefit àvia njəɗa gana kwa. 28 Lekʉlʉm lekʉlʉmeni day kəgrumkua sedi a tata, nə̀ɗəm: “Nu Krist Bay gəɗakani ya amara ni do; Melefit àslərbiyu nu enji gayaŋ ciliŋ.” 29 Nəɗəm nahəma, nu ti akaɗa zləba ga bay ya aday wal ni. Maslaŋa ya ti azay wal ni ti wal ni gayaŋ. Ay zləba gayaŋ ni kà gəvay gayaŋ, eci ma gayaŋ; ècia dəŋgu ga bay ya aday wal na ti amər dal-dal. Nu day nəmər ti nahkay, məmərani gani èslʉva a vu va. 30 Ahàr àɗəm njəɗa gayaŋ mâsagakivu, goro ti ni mə̂guloru. 31 «Bay ya ti àsləkabiya agavəla nahəma, agur mis ɗek. Maslaŋa ya àsləkabiya agavəla do ni ti naŋ ka haɗ, azlapaki day ka zlam ya ka haɗ ni. Bay ya ti àsləkabiya a huɗ melefit ba ni ti agur mis ɗek , 32 agray sedi ga zlam ya èpi akaba èci ni, ay maslaŋa àbi agəskabu pakama gayaŋ ni bi. 33 Ay maslaŋa ya ti àgəskabá pakama gayaŋ a ti aɗəm pakama ge Melefit ti jiri eɗeɗiŋ. 34 Bay ya ti Melefit àslərbiyu naŋ ni ti aɗəm pakama ge Melefit, aɗaba Melefit àvia njəɗa ga Məsuf gayaŋ a ɗek. 35 Bəŋ ga Wur ni awayay Wur gayaŋ ni, àbi zlam ɗek a ahar vu ti mə̂gur. 36 Maslaŋa ya ti afəki ahàr ka Wur ni ti Melefit àvia sifa ya àndav ɗay-ɗay do na àndava. Maslaŋa ya ti àfəki ahàr ka Wur ni do ni ti aməŋgət sifa gani do; Melefit naŋ àbu azumki ɓəruv kekileŋa.»

Zeŋ 4

1 Eslini mis tə̀bu təɗəm Yezu agray ti mis tâɗəbay naŋ akaba abaray mis dal-dal àtama ge Zeŋ na. Yezu àsəra ndam Feriziyeŋ day tìcia ma gana. 2 Ge jiri ti abaray mis ti Yezu Yezuani do; tabaray mis ti ndam ya taɗəbay naŋ ni. 3 Yezu àra àsəra ndam Feriziyeŋ ni tìcia ma gana nahkay ti, àsləka ka haɗ Zʉde a, òru gwar ka haɗ Gelili. 4 Wuɗaka enjiyu e Gelili ti, si asləkaba gwar ka haɗ Samari a kwa. 5 Naŋ àbu akoru ka haɗ Samari ti ènjʉa a kəsa nahaŋ va, təzalay kəsa nani Sikar. Kəsa gani nani ti kà gəvay ga vədaŋ ge Zekʉp ya àvi ana wur gani Zʉzef ni. 6 A vədaŋ nani bu ni ti suwa ge Zekʉp àvu mileni. Yezu àra àmətaɓkaba àna sawaɗay ge divi na, òru ènjʉa ti ànjəhaɗ digʉs kà suwa ni. Ka sarta gani nani ti fat wis. 7 Eslini wal Samari nahaŋ ara acah yam ti àdi ahàr ana Yezu nakəŋ. Naŋ àbu acahaya yam na ti Yezu àhi: «Vu nîsi ti!» 8 Ka sarta nani ti Yezu naŋ bəlaŋ, aɗaba ndam ya taɗəbay naŋ ni tàdəgoru a kəsa vu ga məsəkumbiyu zlam məzumani. 9 Yezu àra àhia ma ana wal na nahkay ti, wal ni àhi ahkado: «Nak zal Zʉde kìhindifua yam a kà nu wal Samari a ti ahəmamam?» Wal ni àɗəm nahkay ti aɗaba ma ga ndam Zʉde àrakaboru akaba ndam Samari do. 10 Yezu àhi: «Tamal ti kə̀səra ere ye ti Melefit avi ana mis na akaba maslaŋa ya ehindifʉka yam na ti, akal kìhindifiŋa yam kà naŋ a sawaŋ. Tamal kìhindia ti akal àvuka yam ya avay sifa na.» 11 Wal ni àhəŋgrifəŋ, àhi ahkado: «Maslaŋa goro ni, zlam macahaya yam a àfuk bi, suwa ni day zileŋ ti, kacahaya yam ya avay sifa na ti eley? 12 Bəŋ ga bəŋ geli Zekʉp àmbribu suwa hini ana leli. Naŋ naŋani èsia yam ga suwa hina, bəza gayaŋ akaba zlam ga gənaw gayaŋ day tìsia. Nahkay ti kə̀hi ana ahàr kàtama Zekʉp àna gəɗakana waw?» 13 Yezu àhəŋgrifəŋ, àhi: «Ku way way do esi yam hini ti, yam amakaɗ naŋ kekileŋa. 14 Ay maslaŋa ya ti esi yam goro ya anəvi ni ti yam amakaɗ naŋ ɗay-ɗay va do. Yam ya ti nu nəvi ni emigi akaɗa gəzəŋ ga yam a vu gayaŋ bu. Gəzəŋ ga yam nani ti aməvi sifa ya àndav ɗay-ɗay do ni.» 15 Nahkay wal nakəŋ àhi ahkado: «Maslaŋa goro ni, vu yam gani nani, ti yam àkaɗ nu va ba, nàra ahalay a ga macah yam va ba daya.» 16 Yezu àhi: «Ru kâzalabiya zal gayak a, nak day kə̂ŋga.» 17 Wal ni àhi: «Zal goro àbi.» Yezu àhi: «Ma gayak ya kə̀ɗəm zal gayak àbi ni ti, ma ge jiri eɗeɗiŋ. 18 Aɗaba kàda zawal a zlam, ay zal ya nak kə̀bu afa gani ni ti zal gayak do. Ma gayak ya kə̀ɗəm ni jiri eɗeɗiŋ.» 19 Wal ni àhi: «Maslaŋa goro ni, nihi ti nə̀səra nak bay mahəŋgaray pakama ge Melefit. 20 Ata bəŋ geli ndam Samari tàzləbay Melefit ka həma hini. Ay lekʉlʉm ndam Zʉde kə̀ɗəmum tâzləbay Melefit ti si a Zerʉzalem kwa.» 21 Yezu àhi: «Wal ni, gəskabá ma goro ya nəhuk na: sarta amara ti, akəzləbum Melefit ti ka həma hini do, a Zerʉzalem do daya. 22 Lekʉlʉm ndam Samari kəzləbum Melefit, ay ti kə̀sərum naŋ eɗeɗiŋ eɗeɗiŋeni do. Leli ndam Zʉde ti ni mazləbay Melefit, mə̀səra naŋ a, aɗaba Melefit àŋgazlivu ana leli ga mahəŋgay mis ɗek àna tʉwi ya àgri ana leli ni. 23 Ay sarta àbu ara: nihi ti sarta gani nani ènjia àndava. Ka gani nani ti ndam ya ti tazləbay Melefit eɗeɗiŋ eɗeɗiŋeni ni ti atazləbay naŋ àna njəɗa ga Məsuf gayaŋ, àna jiri gayaŋ daya. Aɗaba Baba awayay ti mis tâzləbay naŋ ti nahkay. 24 Melefit ti naŋ Məsuf: nahkay ahàr àɗəm ndam ya tazləbay naŋ ni ti tâzləbay naŋ àna njəɗa ga Məsuf gayaŋ akaba àna jiri gayaŋ.» 25 Wal nakəŋ àhi: «Nə̀səra Bay gəɗakani amara, naŋ ya ti təzalay naŋ Krist ni. Eminjia ti, aməɗəfiaba zlam ana leli a ɗek.» 26 Yezu àhəŋgrifəŋ, àhi: «Nu ya ti nəhuk ma nihi ti, nu Krist gani.» 27 Ka ya ti Yezu àra àɗəma ma nana ti, nday ya ti taɗəbay naŋ ni tàsləkabiya a kəsa ni ba. Nday nakəŋ tàra tìpia Yezu a nday tə̀bu təzlapay nday ata wal ni ti àgri ejep ana tay a. Ay maslaŋa ya àhi ana Yezu «Kihindifiŋa mam?» ahkay do ni «Kazlapumki ka mam?» ni ti àbi. 28 Eslini wal ni àmbərbu mandaray gayaŋ ni, àsləka òru a kəsa vu. Òru ènjʉa ti àhi ana mis ahkado: 29 «Nə̀dia ahàr ana maslaŋa nahaŋ a, àhuaya ere ya nàgrabiya na ɗek. Bi naŋ Krist Bay gəɗakani ya amara ni. Dəguma makoru ti kîpʉmbiyu naŋ a.» 30 Mis ga kəsa ni tàra tìcia ma ga wal na ti, tìcikbiyu tə̀rəkia ka Yezu a. 31 Ka sarta ya ti wal ni àdoru a kəsa vu ni ti, ndam ya taɗəbay Yezu ni tə̀bu təhi ana Yezu: «Mʉsi, caka zlam a day.» 32 Ay Yezu àhi ana tay ahkado: «Nu nə̀bu àna zlam məzumani ya lekʉlʉm kə̀sərum do ni.» 33 Ndam ya taɗəbay naŋ ni tàra tìcia ma gayaŋ na ti tə̀zlapay e kiɗiŋ gatay bu tə̀ɗəm ahkado: «Bi maslaŋa àzibiya zlam məzumana zla tək?» 34 Eslini Yezu àhi ana tay: «Zlam məzumani goro ni ti, magray ere ye ti Bay ya àslərbiyu nu awayay ni akaba mendeveriŋ tʉwi gayaŋ ya ti àvu ni. 35 Lekʉlʉm kəɗəmum: “Àvu kiyi faɗ day kwa ti atabaz zlam.” Ay nu ti nəhi ana kʉli: Mənjumoru zlam ya a vədaŋ bu ni lala. Zlam ni tə̀ndəhkabá, èslia mabazana. 36 Maslaŋa ya abaz zlam ni tə̀via endif gayaŋ a àndava, naŋ àbu acakalakabu zlam ga vədaŋ ni. Zlam nday nani ti mis ya ti atəŋgət sifa ya àndav ɗay-ɗay do ni. Nahkay ti bay ya ezligi zlam ni nday ata bay ya ti abaz ni tə̂mərvu ka ahar bəlaŋ. 37 Ma gozogul ge mis ya təɗəm: “Maslaŋa nahaŋ ezligi, maslaŋa nahaŋ ara abaz” ni ti jiri eɗeɗiŋ. 38 Nu ti nə̀sləroru kʉli ga mabaz zlam a vədaŋ bu. Vədaŋ gani nani ti lekʉlʉm kə̀grum tʉwi gani ndo. Lekʉlʉm kabazum ciliŋ, mis ndahaŋ tàmətaɓkiaya ke kʉli a.» 39 Ndam Samari tàra tìcia ma ga wal ya àhi ana tay: «Àhuaya ere ye ti nàgrabiya na ɗek» na ti, mis dal-dal e kiɗiŋ gatay bu tə̀fəki ahàr ka Yezu. 40 Ndam Samari ni tàra tìnjikia ka Yezu a ti tàhəŋgalay naŋ, tə̀hi: «Kam-kam njəhaɗa afa geli a ti!» Nahkay Yezu ànjəhaɗ afa gatay vaɗ cʉ. 41 Eslini tàra tìcia ma ga Yezu Yezuani ya àhi ana tay na ti, mis dal-dal tə̀fəki ahàr àkivu, tə̀tama nday ya ti tə̀fəki ahàr ye enjenjeni na àna kayana. 42 Mək tə̀hi ana wal ni ahkado: «Məfəki ahàr hi ti, azuhva pakama gayak ya kə̀hi ana leli ni ciliŋ do. Mə̀fəki ahàr ti aɗaba leli leleni mìcia pakama gayaŋ ya àɗəm na àna slimi geli gelena. Mə̀səra naŋ Bay ya ti ahəŋgay ndam ga duniya ɗek eɗeɗiŋ ni.» 43 Yezu àra àpəsa vaɗ cʉ eslina ti, àsləka òru e Gelili; 44 àɗəm: «Bay mahəŋgaray pakama ge Melefit ti, mis ga haɗ gayaŋ gayaŋani tə̀həŋgrioru ahàr a haɗ do.» 45 Ay òru ènjʉa e Gelili a ti, ndam Gelili tə̀gəskabá naŋ a, aɗaba nday day tòra ka wuməri a Zerʉzalem a, tìpibiya tʉwi ga Yezu ya àgrabiyu eslini na ɗek palam. 46 Ka ya ti Yezu àbu eslini e Gelili ni ti àŋgoru a Kana. Kana ti kəsa ya ti Yezu àmbatkaba yam a àmbavu zum ni. Eslini maslaŋa nahaŋ àbu, maslaŋa nani ti kəsa gayaŋ Kafarnahum, agri tʉwi ana bay ga haɗ Gelili. Wur gayaŋ àbiyu a magam, èɓesey do. 47 Àra ècia Yezu àsləkabiya e Zʉde a, naŋ àbu e Gelili ti, àrəkia àhi: «Wur goro èɓesey do, awayay amət; kam-kam tokumkaboru, kôru kâhəŋgaraba naŋ a ti!» 48 Yezu àhi: «Tamal lekʉlʉm kìpʉm zlam njəɗa-njəɗani ya təgri ejep ana mis ni ndo ni ti, kə̀fumku ahàr do simiteni.» 49 Eslini bay məgri tʉwi ana bay ni àhi ana Yezu ahkado: «Bay goro, tamal kòru kàhəŋgaraba wur goro na do ni ti, aməmət.» 50 Yezu àhi: «Sləka, wur gayak naŋ àbu lala, àmət do.» Bəŋ ga wur ni àgəskabá pakama ga Yezu na, mək àsləka. 51 Naŋ àbu e divi bu aŋgoru a magam nahəma, tàbakabu ahàr akaba ndam ya tə̀gri tʉwi ni, tə̀hi: «Wur gayak àŋgaba, naŋ àbu lala.» 52 Èhindifiŋa kà tay a, àhi ana tay ahkado: «Àgri ŋgulumani ti àna njemdi ehimey?» Tə̀həŋgrifəŋ, tə̀hi: «Aku àhəlkia ewena àna njemdi biliŋ ya ga məlakarawa.» 53 Àra ècia ma gatay na ti àsər wur ni àŋgaba ti ka sarta ya Yezu àhi «Wur gayak ni àŋgaba, naŋ àbu lala» ni. Eslini naŋ nakəŋ àfəki ahàr ka Yezu; ndam ga huɗ ahay gayaŋ ni tàra tìcia ma gana ti nday day tə̀fəki ahàr ka Yezu. 54 Hini ti zlam magray ejep ga Yezu ya àgray ye cʉ ka haɗ Gelili ka ya ti àsləkabiya ka haɗ Zʉde a ni.

Zeŋ 5

1 Àgra vaɗ a ɓal ti ndam Zʉde tàgray wuməri nahaŋ a Zerʉzalem, nahkay Yezu òru. 2 Eslini a Zerʉzalem ti məlaŋ nahaŋ àvu, yam àvu dizliva. Məlaŋ nani ti slimi gani Becata àna ma Hebri; kà gəvay ga mahay ya təzalay ga təmbəmbak ni, tàgrafəŋaya ahay a zlam ga məvi zʉhweri ana mis ye eslini na. 3 A huɗ ga ahay nday nani bu ni ti ndam ga arməwər tə̀vu kay mandəhaɗani: ndam wuluf, ndam jigwer akaba ndam dəra. Tajəgay ti yam ni mâdaɗay, 4 aɗaba ka sarta ndahaŋ ti məslər ge Melefit ahuriyu a huɗ ga yam ni vu adaɗay yam ni. Eslini maslaŋa ya ahuriyu a yam ni vu enji ni ti ku mam awər naŋ mam nəŋgu ni aŋgaba. 5 Maslaŋa nahaŋ àbu eslini èɓesey do vi kru kru mahkər mahar azlalahkər. 6 Yezu èpia naŋ a naŋ àbu mandəhaɗani, àra àsəra arməwər gayaŋ ni àpəskia ti, àhi: «Kawayay ti kəŋgaba waw?» 7 Maslaŋa ya ti èɓesey do ni àhəŋgrifəŋ, àhi: «Bay goro, maslaŋa goro àbi ga məfiyu nu a yam ni vu ke weceweceni ka ya ti adaɗay ni bi. Ka ga yam ya adaɗay ni wuɗaka nəhuriyu ti maslaŋa nahaŋ embʉkia.» 8 Ay Yezu àhi: «Cikaba, za hətav gayak na, sawaɗay.» 9 Eslini naŋ nakəŋ àŋgaba hʉya, àzay hətav gayaŋ ni, mək asawaɗay. Zlam nani àgravu ti ka fat məpəsabana. 10 Nahkay gəɗákani ga ndam Zʉde tə̀hi ana zal ya ti àŋgaba ni ahkado: «Kani vaɗ məpəsabana ti, kìsliki mazay hətav gayak ni do.» 11 Naŋ nakəŋ àhi ana tay ahkado: «Maslaŋa ya ti àhəŋgaraba nu a ni àhu: “Zay hətav gayak ni, sawaɗay.”» 12 Nday nakəŋ tìhindifiŋa, tə̀hi: «Maslaŋa ya àhuk: “Zay hətav gayak ni, sawaɗay” ni ti way?» 13 Ay maslaŋa ya ti àŋgaba ni àsər way ti àhəŋgaraba naŋ a ni way do, aɗaba Yezu àsləkaba e kiɗiŋ ge mis dal-dalani ni ba. 14 Kələŋ gani Yezu òru àdi ahàr ana maslaŋa ya ti àŋgaba ni a dalaka ga ahay gəɗakani ge Melefit ni bu, mək àhi: «Nihi kə̀ŋgaba nahəma, kàgudar zlam va ba. Nahkay do ni ti, araŋa nahaŋ amagrakukvu àtam nahaŋ ni.» 15 Eslini maslaŋa nakəŋ àsləka, àrəkioru ka gəɗákani ga ndam Zʉde ni, àhi ana tay: «Maslaŋa ya ti àhəŋgaraba nu a ni ti Yezu.» 16 Nahkay gəɗákani ga ndam Zʉde ni tàɗəbafəŋa ma kà Yezu a aɗaba àgray tʉwi nani ti a vaɗ məpəsabana ba. 17 Ay ti Yezu àhi ana tay: «Bəŋ goro àpəsaba do, naŋ àbu agray tʉwi kəlavaɗ; nu day nə̀pəsaba do nə̀bu nagray tʉwi kəlavaɗ.» 18 Naŋ nakəŋ àra àɗəma nahkay ti, gəɗákani ga ndam Zʉde ni àwərikiva ɓəruv ana tay a dal-dal, tawayay takaɗ naŋ. Tawayay takaɗ naŋ ti aɗaba naŋ àbu agray zlam ya təcafəŋa mis ga magrana a vaɗ məpəsabana ba na ciliŋ do, naŋ àbu aɗəm Melefit naŋ bəŋani daya. Àɗəm nahkay ti, àzay ahàr gayaŋ nday kala-kala ata Melefit. 19 Yezu àhi ana tay keti: «Nəhi ana kʉli nahəma, Wur èsliki magray tʉwi ga ahàr gayaŋ gayaŋani do. Agray ti si tʉwi ya ti èpia Bəŋani naŋ àbu agray ni kwa. Tʉwi ga Bəŋ ga Wur ya agray ni ɗek ti Wur gayaŋ ni day agray. 20 Aɗaba Bəŋ ga Wur ni ti awayay Wur gayaŋ, aɗəfiki tʉwi ya ti agray ni ɗek. Aməɗəfiki tʉwi ndahaŋ gəɗákani tə̀tam nday ndani, ti mə̂gri ejep ana kʉli. 21 Bəŋ ga Wur ni naŋ àbu ahəŋgaraba mis ya tə̀məta ni e kisim ba, avi sifa ana tay: Wur gayaŋ ni day avi sifa ana mis akaɗa gayaŋ ya awayay ni. 22 Nahkay day Bəŋ ga Wur ni àgrafəŋa seriya kè mis a do: àvi njəɗa gani ana Wur gayaŋ ni ti mâgrafəŋa seriya kè mis a. 23 Àgray nahkay ti aɗaba awayay ti mis ɗek tə̂həŋgrioru ahàr a haɗ ana Wur gayaŋ ni akaɗa ya ti təhəŋgrioru ahàr ana haɗ ana Bəŋ ga Wur ni. Maslaŋa ya ti àhəŋgrioru ahàr a haɗ ana Wur ni do ni ti àhəŋgrioru ahàr a haɗ ana Bəŋ ga Wur ni do daya, aɗaba Wur ni ti Bəŋani àslərbiyu naŋ. 24 «Nəhi ana kʉli nahəma, maslaŋa ya ti agəskabu pakama goro, afəki ahàr ka Bay ya ti àslərbiyu nu ni, naŋ àbu àna sifa ya àndav ɗay-ɗay do ni. Melefit aməgəs naŋ àna seriya do: kisim aməgri araŋa va do aɗaba naŋ àbu àna sifa ya àndav ɗay-ɗay do ni àndava. 25 Nəhi ana kʉli nahəma, sarta nahaŋ àbu ara wuɗak, ay nihi ti ènjia àndava. Ka gani nani ti ndam ya nday məmətani ni etici dəŋgu ga Wur ge Melefit. Nday ya ti tìcia dəŋgu gayaŋ na ti atəŋgət sifa ya àndav ɗay-ɗay do ni. 26 Aɗaba mam, Bəŋ ga Wur ni avi sifa gayaŋ ana mis; nahkay àvia njəɗa ana Wur gayaŋ na ga məvi sifa gayaŋ ana mis a daya. 27 Àvia njəɗa ana Wur gayaŋ ga magrafəŋa seriya kè mis a, aɗaba Wur gayaŋ ni ti naŋ Wur ge Mis daya. 28 Ma hini ya nə̀ɗəm ni ti àgri ejep ana kʉli ba, aɗaba sarta àbu ara, sarta gani nani eminjia ti mis ya ti tə̀məta, tə̀vu e eviɗ bu ni ɗek etici dəŋgu ga Wur ni. 29 Eticia dəŋgu gayaŋ na ti, atahəraya e eviɗ ni ba. Nday ya ti tàgra zlam sulumana ni ataŋgaya ga məŋgət sifa ya àndav ɗay-ɗay do na, ay nday ya ti tàgudara zlam a ni ataŋgaya ti tə̂gəs tay àna seriya. 30 Nu ti nìsliki məgri zlam àna ahàr goro goroani koksah. Nagrafəŋa seriya kè mis a ti akaɗa ge Melefit ya ahu ni. Seriya goro ya nagray ni seriya ge jiri, aɗaba nàwayay magray ere ye ti ahàr goro awayay ni do. Nagray ti ere ye ti Bay ya ti àslərbiyu nu ni awayay ni sawaŋ.» 31 Yezu àhi ana tay keti: «Tamal nu nuani nagrakia sedi ka ahàr goro a ti, akal jiri do. 32 Ay agrakua sedi a ti maslaŋa nahaŋ: nə̀səra sedi gayaŋ ya agrakua ni ti ge jiri. 33 Lekʉlʉm kə̀slərumkioya mis ke Zeŋ a; tòru tìnjikiya ka naŋ a ti àgrakua sedi a. Sedi gayaŋ ya àgrakua ni ti ge jiri. 34 Nu ti sedi ge mis ya tagrakua ni ti araŋa gani goro do. Nə̀hi ma ge Zeŋ ana kʉli ti aɗaba nawayay kə̂gəsumkabu. Kə̀gəsumkabá ti Melefit ahəŋgay kʉli. 35 Zeŋ ti akaɗa ge ceŋgel ya tèbefta, aslaɗi məlaŋ ana mis ni. Ka sarta nahaŋ ɓal ti kə̀mərumva àna maslaɗani gayaŋ na. 36 Ay nu ti tʉwi goro ya nagray ni agrakua sedi a. Sedi gani nani ti àtam ge Zeŋ ya àgrakua ni. Tʉwi gani nani ti Bəŋ goro àvu ti nâgray; agrakua sedi a, aɗafaki ti Bəŋ goro àslərbiyu nu eɗeɗiŋ ni ti zlam gani nani. 37 Bəŋ goro àslərbiyu nu, naŋ naŋani àna ahàr gayaŋ day agrakua sedi a. Ay lekʉlʉm ti kìcʉm dəŋgu gayaŋ ɗay-ɗay ndo, kìpʉm naŋ e eri vu ɗay-ɗay ndo daya. 38 Kàwayum məgəskabu pakama gayaŋ ti mânjəhaɗivu ana kʉli a ahàr bu do, aɗaba kə̀fumki ahàr ka Bay ya ti Bəŋani àslərbiyu naŋ ni do. 39 Lekʉlʉm kə̀mbrəŋum mejeŋgey Wakita ge Melefit do, aɗaba kə̀humi ana ahàr akəŋgətum sifa ya àndav ɗay-ɗay do ni ti àna naŋ. Ma ga wakita gani nani ti aɗəmku ka nu, 40 ay kàwayum marana afa goro a ti nə̂vi sifa gani nani ana kʉli do. 41 «Nàwayay ti mis hihirikeni âzləbay nu do. 42 Ay nə̀səra kʉli a: nə̀səra lekʉlʉm ti kàwayum Melefit àna huɗ bəlaŋ do. 43 Nu nàra ti Bəŋ goro àslərbiyu nu, ay lekʉlʉm kàwayum məgəskabu nu do. Tamal maslaŋa nahaŋ ara ga ahàr gayaŋ gayaŋana ti, kəgəsumkabu naŋ. 44 Lekʉlʉm kəzləbumvu e kiɗiŋ gekʉli bu, ay Melefit naŋ bəlaŋ mâzləbay kʉli ti kàwayum do. Nahkay ti kislʉmki məfəku ahàr ti ahəmamam? 45 «Ŋgay nu anacalki kʉli ka zlam magudarani kè meleher ga Bəŋ goro ti kə̀humi ana ahàr ba. Lekʉlʉm kəgəsumkabu pakama ge Mʉwiz ya àbəki ni, ay amacalki kʉli ka zlam magudarani ni ti naŋ gani. 46 Tamal kə̀gəsumkabá pakama ge Mʉwiz na eɗeɗiŋ a ti akal kəfumku ahàr, aɗaba ma ge Mʉwiz ya àbəki a wakita gayaŋ ni bu ni ti àɗəmku ka nu. 47 Ay tamal kə̀gəsumkabu ma ge Mʉwiz ya àbəki ni do ni ti, akəgəsumkabu pakama goro ya ti nəhi ana kʉli ni ti ahəmamam?»

Zeŋ 6

1 A vaɗ nahaŋ Yezu òru ke ledi ga dəluv Gelili. Təzalay dəluv gani nani dəluv Tiberiyat daya. 2 Ka ya ti naŋ àbu akoru ni ti mis dal-dal taɗəboru naŋ kələŋ, aɗaba tìpia gayaŋ ya àhəŋgaraba mis ya tèɓesey do na ti àgri ejep ana tay dal-dal. 3 Eslini Yezu akaba ndam maɗəbay naŋ ni tə̀cəliyu a həma vu, tànjəhaɗ. 4 Ka sarta gani nani wuməri ga ndam Zʉde ya təzalay Pak ni ènjia wuɗak. 5 Nday tə̀bu ka ahàr ga həma nahkay ti Yezu àmənjoru mis dal-dal tə̀bu tərəkia. Àra èpia tay a ti àhi ana Filip ahkado: «Mawayay məvi zlam məzumani ana mis nday hini ti, makoru məsəkumibiyu dipeŋ ana tay nihi ti eley?» 6 Yezu àhi nahkay ti, awayay ahəlfəŋa eyʉ a, aɗaba naŋ àsəra ere ye ti ara agray na palam. 7 Filip àhəŋgrifəŋ, àhi: «Ku tamal məsəkumibiyu dipeŋ ana tay ge jik diŋ diŋ cʉ, misi ana tay gʉzit gʉzit nəŋgu ni èsliki ka tay do timey!» 8 Bay maɗəbay naŋ nahaŋ slimi gani Andre, wur ga məŋ ga Simu Piyer, àhi: 9 «Wur nahaŋ nihi dipeŋ ga manjaɓara tə̀fəŋ zlam akaba kilif cʉ, ay ti təvi ana way bəlaŋani way?» 10 Eslini Yezu àhi ana ndam maɗəbay naŋ ni ahkado: «Humi ana mis ni tânjəhaɗa digʉs-gʉs.» Kʉzir àbu eslini dal-dal, nahkay mis ni tànjəhaɗki. Mis zawalani ye eslini ni agray dəbu zlam. 11 Yezu nakəŋ àhəl dipeŋ ni, àgri sʉsi ana Melefit, èsekaba, mək tìdi ana mis ni. Àra àhəla kilif na day àgray nahkay: mis ni ɗek tə̀zuma zlam na, tə̀rəha. 12 Mis nakəŋ tə̀rəhkaba nahkay ti, Yezu àhi ana ndam maɗəbay naŋ ni ahkado: «Həlum məgəjəni gani, kə̀mbrəŋumbu araŋa gani gʉzit ba.» 13 Nahkay tə̀həlaba məgəjəni ge dipeŋ zlamani ya mis tə̀zum na, tə̀rəhvù hətək kru mahar cʉ àna naŋ. 14 Mis ni tàra tìpia zlam ga Yezu ya àgray na ti àgria ejep ana tay a, tə̀ɗəm: «Maslaŋa hini ti bay mahəŋgaray pakama ge Melefit ya tə̀ɗəm amara a duniya va na eɗeɗiŋ.» 15 Eslini Yezu àsəra tara təgəs naŋ ga njəɗa ti mîgi bay gatay. Àra àsəra nahkay ti àsləkafəŋa kà tay a, àcəloru gwar ka məlaŋ nahaŋ naŋ bəlaŋ. 16 Məlakarawa àra ègia, ndam maɗəbay Yezu ni tàhəraya kà gəvay ga dəluv ka sagdala. 17 Eslini tə̀cəliyu a slalah ga yam vu, tawayay takoru ke ledi ga dəluv ni a Kafarnahum. Ka sarta gani nani məlaŋ èɗiza, Yezu àdi ahàr ana tay faŋ ndo. Nday nakəŋ mək tàsləka. 18 Nday tə̀bu takoru nahkay ni ti aməɗ àkəzlabiyu ga njəɗa, àdaɗay dəluv ni. 19 Tàgaroru slalah ga yam gatay ni ezeweɗ kru kru zlam ahkay do ni agray kru kru muku. Eslini tìpioru Yezu naŋ àbu asawaɗakibiyu ka ahàr ga dəluv ni, ahəɗakfəŋbiyu kà gəvay ga slalah ga yam gatay ni. Tàra tìpia naŋ a ti tàgra aŋgwaz a dal-dal. 20 Ay Yezu àhi ana tay: «Aŋgwaz àwər kʉli ba, nu timey.» 21 Yezu nakəŋ àra àhia ana tay a nahkay ti, tə̀hi mə̂cəlaya a slalah ga yam ni va, ay tə̀sərki ti slalah ga yam gatay ni ènjʉa ka məlaŋ ya tawayay takoru na. 22 Hajəŋ gani mis dal-dalani ya ndam maɗəbay Yezu tə̀mbərbu tay ke ledi ga dəluv ni tə̀sərki ti slalah ga yam ya ndam maɗəbay Yezu tàsləka àna naŋ a ni ti bəlaŋ, ndahaŋ tə̀bi. Mis ni tə̀səra Yezu àcəliyu a slalah ga yam nani vu akaba ndam maɗəbay naŋ ni ndo; tə̀səra ndam maɗəbay Yezu ni tàsləka ka ahàr gatay a ciliŋ. 23 Eslini slalah ga yam ndahaŋ tàsləkabiya a Tiberiyat a, tòru ka məlaŋ ya ti Bay geli àgri sʉsi ana Melefit, mis tə̀zum dipeŋ ni. 24 Mis ni tàra tə̀səra Yezu naŋ àbi eslini bi, ndam maɗəbay naŋ ni day tàsləka nahəma, tə̀cəliyu a slalah ga yam ya ti tàsləkabiya a Tiberiyat a ni vu, mək tòru a Kafarnahum, tàɗəboru Yezu. 25 Tòru tìnjʉa ke ledi ga dəluv na ti, tə̀di ahàr ana Yezu nakəŋ mək tə̀hi: «Mʉsi, kàra ahalay hi a ti ananaw?» 26 Yezu àhəŋgarfəŋ, àhi ana tay ahkado: «Nəhi ana kʉli nahəma, kìpʉma tʉwi goro ya nagray, agri ejep ana mis na, ay ti kəɗəbum nu ti aɗaba nani do; kəɗəbum nu ti aɗaba nə̀via dipeŋ ana kʉli a, kə̀rəhuma àna naŋ a palam. 27 Kə̀grum tʉwi ga məŋgət zlam məzumani ya ti ezi ni ba, grum tʉwi ti ga məŋgət zlam məzumani ya avi sifa ana mis, àndav ɗay-ɗay do ni sawaŋ. Zlam məzumani gani nani ti, anəvi ana kʉli ti nu Wur ge Mis ciliŋ, aɗaba Bəŋ goro Melefit àvua divi gana, àɗafaki bay ya ti esliki magrani ti nu gani.» 28 Tàra tìcia ma gayaŋ na ti tìhindifiŋa, tə̀hi: «Ti mâgray tʉwi ge Melefit ya awayay ni ti magray mam?» 29 Yezu àhi ana tay ahkado: «Tʉwi ya ti Melefit awayay kə̂grumi ni ti, awayay kə̂fumki ahàr ka Bay ya ti àslərbiyu ni.» 30 Nday nakəŋ tə̀hi: «Tamal kawayay ti mə̂fəkuk ahàr ti, griaya zlam magray ejep ana leli a, ti mîpi. Kəgriaya mam ana leli a nihi a mam? 31 Ata bəŋ ga bəŋ geli tə̀zumbiya man a huɗ ge gili ba, akaɗa ya ti àbu məbəkiani a Wakita ge Melefit bu ni: “Àvi dipeŋ ya ti àsləkabiya a huɗ melefit ba ni ana tay, tə̀zuma.”» 32 Yezu àhi ana tay: «Nəhi ana kʉli nahəma, bay ya ti àvi dipeŋ ya àsləkabiya a huɗ melefit ba ana kʉli ni ti Mʉwiz do. Avi dipeŋ eɗeɗiŋ eɗeɗiŋeni ya asləkabiya e melefit ba ana kʉli ti Baba. 33 Aɗaba dipeŋ ya Melefit avay nahəma, Bay ya àsləkabiya a huɗ melefit ba, avi sifa ana mis ga duniya ni.» 34 Tàra tìcia ma gayaŋ na ti tə̀hi: «Mʉsi, vi dipeŋ gani nani ana leli kəlavaɗ ti!» 35 Yezu àhi ana tay: «Dipeŋ ya ti avi sifa ana mis ni ti nu. Maslaŋa ya ti ara afa goro a ni ti lʉwir aməwər naŋ ɗay-ɗay do. Maslaŋa ya ti afəku ahàr ni ti yam amakaɗ naŋ ɗay-ɗay do. 36 Ay nə̀hia ana kʉli a àndava: Kìpʉma nu a mək kə̀fumku ahàr do. 37 Ndam ya ti Baba abu tay ni ɗek atara afa goro a. Maslaŋa ya ti ara afa goro a nahəma, anagarakaba naŋ a ɗay-ɗay do. 38 Aɗaba nàsləkabiya e melefit ba ti ga magray ere ye ti nu nawayay ni do. Nàsləkabiya ti ga magray ere ye ti Bay ya ti àslərbiyu nu ni awayay ni. 39 Ere ye ti Bay ya ti àslərbiyu nu ni awayay ni ti nihi: awayay ti ndam ya ti naŋ àbuvu tay a ahar vu ni ku bəlaŋ gatay èjifua ba. Awayay ti ka mandav ga duniya ti nâhəŋgaraba tay e kisim ba. 40 Iy nahkay, ere ye ti Baba awayay ni ti nihi: awayay ti ku way way do èpia Wur ge Melefit a, afəki ahàr ti mə̂ŋgət sifa ya àndav ɗay-ɗay do ni. Ku tamal maslaŋa gani àməta nəŋgu ni, Baba awayay ti ka mandav ga duniya ti nâhəŋgaraba maslaŋa gani nana e kisim ba.» 41 Yezu àra àɗəma ma na nahkay ti, ndam Zʉde tə̀zlapaki e kiɗiŋ gatay bu aɗaba àɗəm naŋ dipeŋ ya àsləkabiya a huɗ melefit ba ni. 42 Tə̀ɗəm ahkado: «Naŋ Yezu wur ge Zʉzef ni do waw? Mə̀səra ata bəŋana ata məŋana ti, àɗəm àsləkabiya a huɗ melefit ba ti ahəmamam?» 43 Eslini Yezu àhi ana tay: «Kàzlapumku e kiɗiŋ gekʉli bu va ba. 44 Maslaŋa àbi esliki marana afa goro a bi, si tamal Baba naŋ ya àslərbiyu nu ni àzəbiya naŋ a kwa. Nahkay ti ka mandav ga duniya ti anahəŋgaraba maslaŋa gani nana e kisim ba. 45 Ndam mahəŋgaray pakama ge Melefit tə̀bəki a wakita gatay bu nahkay hi: “Mis ɗek Melefit amacahi zlam ana tay.” Nahkay ku way way do èciikia ma ga Baba na, àgəskabá zlam ya ti àcahi na ti, ara afa goro a. 46 Ku nə̀ɗəma nahkay nəŋgu ni, maslaŋa ya ti èpia Baba ni ti àbi. Maslaŋa ya èpia Baba Melefit a ni ti si Bay ya ti àsləkabiya afa gana ni kwa. 47 «Nəhi ana kʉli nahəma, maslaŋa ya ti àfəkua ahàr a ni ti naŋ àbu àna sifa ya àndav ɗay-ɗay do ni. 48 Dipeŋ ya ti avi sifa ana mis ni ti nu. 49 Ata bəŋ ga bəŋ gekʉli tə̀zuma man a huɗ gili ba, nihi ti tə̀mət ndo waw? 50 Ay dipeŋ ya asləkabiya a huɗ melefit ba ni ti maslaŋa ya ti àzuma nahəma àmət ɗay-ɗay do. 51 Dipeŋ ya àsləkabiya a huɗ melefit ba, naŋ àbu àna sifa ni ti nu. Maslaŋa ya ti àzuma dipeŋ nana ti àmət ɗay-ɗay do. Dipeŋ ya ti anəvi ni ti aslu ga vu goro. Anavay ti mis ga duniya ɗek tə̂ŋgət sifa àna naŋ.» 52 Ndam Zʉde ni tàra tìcia ma ga Yezu na ti tàləgavakivu, tə̀ɗəm: «Maslaŋa hini àɗəm avi aslu ga vu gayaŋ ana leli mahəpəɗ ti ahəmamam?» 53 Yezu àhi ana tay ahkado: «Nəhi ana kʉli nahəma, tamal kàhəpəɗum aslu ga vu ga Wur ge Mis akaba kìsʉm mimiz ga vu gayaŋ ndo ni ti, sifa aməniviyu ana kʉli bi. 54 Maslaŋa ya ti ahəpəɗ aslu ga vu goro akaba esi mimiz ga vu goro ni ti, naŋ àbu àna sifa ya àndav ɗay-ɗay do ni; ka mandav ga duniya anəhəŋgaraba naŋ e kisim ba. 55 Aɗaba zlam məzumani eɗeɗiŋeni ti aslu ga vu goro, zlam miseni eɗeɗiŋeni ti mimiz ga vu goro. 56 Maslaŋa ya ti ahəpəɗ aslu ga vu goro akaba esi mimiz ga vu goro nahəma, anjəhaɗ akaba nu akaɗa mis bəlaŋ, nu day nanjəhaɗ akaba naŋ akaɗa mis bəlaŋ. 57 Baba àslərbiya nu a; naŋ ti naŋ àbu àna sifa. Nu day nə̀bu àna sifa azuhva naŋ. Nahkay maslaŋa ya ti ahəpəɗ nu ni ti naŋ àbu àna sifa azuhva nu. 58 Dipeŋ ya ti àsləkabiya a huɗ melefit ba ni ti nu gani. Dipeŋ gani nani ti akaɗa ga ata bəŋ ga bəŋ gekʉli ya tə̀zum mək tə̀mət ni do. Dipeŋ gani nani ti maslaŋa ya ti àzuma ni ti, naŋ àbu àna sifa ga kaŋgay-kaŋgayani.» 59 Yezu àɗəm ma hini ti ka ya ti naŋ a Kafarnahum, acahi zlam ana mis a ahay ga mahəŋgalavù Melefit bu ni. 60 Ndam ya taɗəbay Yezu ni tàra tìcia ma gayaŋ na ti, mis kay e kiɗiŋ gatay bu tə̀ɗəm ahkado: «Ma hini zləzlaɗa àsaɓay; way esliki məgəskabani way?» 61 Yezu àra àsəra ndam ya taɗəbay naŋ ni tə̀bu təzlapaki nahkay ti, àhi ana tay ahkado: «Ma goro ya nə̀ɗəm ni awəri ɓəruv ana kʉli aw? 62 Ay tamal ekipʉm nu Wur ge Mis nə̀bu nəcəloru ka məlaŋ ya ti nu nə̀biyu ahaslani ni ti akəɗəmum mam? 63 Avi sifa ana mis ti Məsuf ge Melefit. Aslu ga vu ge mis ni ti ni zlam masakani. Ma goro ya nə̀hi ana kʉli ɗek ni ti Məsuf ge Melefit avi sifa ana kʉli àna naŋ. 64 Ay mis ndahaŋ tə̀bu e kiɗiŋ gekʉli bu tə̀fəku ahàr do.» Yezu àɗəm nahkay ti aɗaba kwa ka mənjəki ge tʉwi gayaŋ àsəra ndam ya tə̀fəki ahàr do akaba maslaŋa ya ti aməsəkumoru naŋ na àndava. 65 Àhi ana tay keti: «Nə̀hi ana kʉli, maslaŋa àbi esliki marana afa goro a bi, si Baba àvia njəɗa gana kwa ti, nahkay.» 66 Kwa ka sarta gani nani ndam ya taɗəbay Yezu ni dal-dal tàsləkafəŋa, tə̀mbrəŋ maɗəbay naŋ. 67 Nahkay Yezu àhi ana ndam maɗəbay naŋ kru mahar cʉeni ni ahkado: «Lekʉlʉm day kawayum məsləkumfuana waw?» 68 Simu Piyer àhəŋgrifəŋ, àhi: «Bay geli, masləkafuka ti makoru afa ga way, way geli nahaŋ àbu way? Pakama gayak ya kəɗəm ni avi sifa ya àndav ɗay-ɗay do ni ana mis. 69 Mə̀bu məfəkuk ahàr, mə̀səra nak ti Bay njəlatani ya Melefit àslərbiyu ni.» 70 Yezu àhi ana tay ahkado: «Lekʉlʉm kru mahar cʉeni ni ti, nu nə̀daba kʉli a do waw? Ay bəlaŋ gekʉli ti araŋa jəbəɗani.» 71 Àɗəm nahkay ti, àɗəmki ka Zʉdas wur ga Simu Iskariyot, naŋ bəlaŋ e kiɗiŋ gatay nday kru mahar cʉeni ni bu; aməsəkumoru naŋ ti naŋ.

Zeŋ 7

1 Yezu àra àɗəma nahkay ti àsawaɗay a kəsa ndahaŋ bu ka haɗ Gelili. Àwayay moroni ka haɗ Zʉde do, aɗaba gəɗákani ga ndam Zʉde tawayay makaɗ naŋ. 2 Ka sarta gani nani wuməri ge mivicey ahay ga ndam Zʉde ni ènjia wuɗak. 3 Nahkay bəza ga məŋ ga Yezu tə̀hi ana Yezu ahkado: «Sləka ahalay a, ru ka haɗ Zʉde, ti ku eslini day ndam ya taɗəbay kur ni tôru tîpi tʉwi gayak ya kagray ni. 4 Aɗaba tamal mis awayay mis tə̂sər naŋ ti, àgray zlam akal-akal do. Tamal kagray tʉwi ni nahkay ti, ŋgazlaya ahàr gayak kè meleher ge mis a ɗek, ti tîpi kur.» 5 Bəza ga məŋani tə̀hi nahkay ti aɗaba nday day tə̀fəki ahàr ndo. 6 Yezu àhi ana tay ahkado: «Sarta gani goro ènjia faŋ ndo. Lekʉlʉm ti sarta gani gekʉli àbi; ku ananaw kədəgum tata. 7 Lekʉlʉm ti mis ga duniya tìzirey kʉli koksah; nu ti tizirey nu aɗaba nə̀bu nəhi ana tay zlam ya ti tagray ni ti zlam magədavani. 8 Lekʉlʉm ti dəgum ka wuməri ni. Nu ti nìnjioru ka wuməri gani nani do, aɗaba sarta gani goro ènjia faŋ ndo.» 9 Yezu nakəŋ àra àhia ma nana ana tay a nahkay ti, ànjəhaɗ ka haɗ Gelili zlam gayaŋ. 10 Bəza ga məŋani tàra tàdəgoru ka wuməri ni ti Yezu nakəŋ day òru. Òru ti àŋgazlivu ana mis ndo, awayay ti tìpi naŋ ba. 11 Mis tə̀cakalava ga magray wuməri na ti, gəɗákani ga ndam Zʉde ni tàɗəbay Yezu, tə̀ɗəm: «Naŋ neley?» 12 Mis dal-dalani ni tə̀bu təzlapaki dal-dal; mis ndahaŋ tə̀ɗəm: «Naŋ mis sulumani.» Mis ndahaŋ ti ni tə̀ɗəm: «Aha, naŋ mis sulumani do, agosay mis sawaŋ.» 13 Ay maslaŋa àbi azlapaki vay-vay bi, aɗaba tagrafəŋa aŋgwaz kà gəɗákani ga ndam Zʉde a. 14 Tàra tècekaba vaɗ ga wuməri na kala-kala ti, Yezu àhuriyu a dalaka ga ahay gəɗakani ge Melefit ni vu mək ànjəki ka macahi zlam ana mis. 15 Pakama gayaŋ ya àɗəm ni àgri ejep ana ndam Zʉde, tə̀ɗəm: «Naŋ hini èjeŋgey ndo ni ti, àsəra zlam a ti ahəmamam?» 16 Eslini Yezu àhi ana tay: «Zlam goro ya ti nəcahi ana kʉli ni ti goro goroani do; ga Bay ya ti àslərbiyu nu ni. 17 Pakama goro ya ti nəɗəm ni ge Melefit tək goro goroani aw ti, tamal maslaŋa awayay agray ere ye ti Melefit awayay ni ti aməsərkaba. 18 Maslaŋa ya ti ahi ma gayaŋ gayaŋani ana mis nahəma, awayay ti mis tâzləbay naŋ. Ay maslaŋa ya ti agray tʉwi ti mis tâzləbay Bay ya ti àslərbiyu naŋ ni ti aɗəm ma ge jiri, àsəkaɗ malfaɗa do simiteni. 19 Mʉwiz àɗəfiki Divi ge Melefit ana kʉli ndo waw? Ay e kiɗiŋ gekʉli bu maslaŋa bəlaŋ àbi agəskabu ma gani bi timey! Kawayum mijiŋ nu ti, nàgudar mam?» 20 Mis dal-dalani ni tə̀hi ahkado: «Araŋa agray kur aw? Way awayay mijiŋ kur way?» 21 Eslini Yezu àhi ana tay: «Nàgra tʉwi a bəlaŋ mək àgria ejep ana kʉli a ɗek. 22 Ku ka fat məpəsabana kikelʉmi kʉɗi ana bəza, aɗaba Mʉwiz àhi ana kʉli kîkelʉm. Ay ànjəki ke mekeli kʉɗi ana bəza ti Mʉwiz do; tə̀njəki enji ti ata bəŋ ga bəŋ gekʉli. 23 Kikelʉmi kʉɗi ana bəza ka fat məpəsabana, kəɗəmum àgudar Divi ge Melefit ya ti Mʉwiz àvi ana kʉli ni do. Nahkay ti nu nàhəŋgaraba mis a jigʉriŋa ka fat məpəsabana ti, kəzumumku ɓəruv ti kamam? 24 Kacalumki nu ka zlam magudarani ti mənjəɗ majalaki ahàr. Kə̀grum nahkay va ba; wuɗaka kəɗəmum ma nahəma, jalumkia ahàr a lala day.» 25 Ndam Zerʉzalem ndahaŋ tə̀ɗəm ahkado: «Hini hi maslaŋa ya ti taɗəbay naŋ, tawayay takaɗ naŋ ni do aw? 26 Mənjumki: naŋ àbu azlapay vay-vay kè meleher ge mis ɗek, day tə̀hi ma ga araŋa do ni. Gəɗákani geli tə̀səra naŋ Krist Bay gəɗakani ya amara ni eɗeɗiŋ a waw? 27 Ay Bay gəɗakani ya amara ni eminjia ti mis atəsər məlaŋ gayaŋ ya ti àsləkabiya ni do. Maslaŋa hini ti leli mə̀səra məlaŋ gayaŋ ya ti àsləkabiya na.» 28 Yezu naŋ àbu acahi zlam ana mis a dalaka ga ahay gəɗakani ge Melefit ni bu, àhi ana tay kay kay, àɗəm: «Kə̀səruma nu a waw? Kə̀səruma məlaŋ ya ti nàsləkabiya na eɗeɗiŋ a waw? Nu nuani nàra àna ahàr goro goroana do. Ay Bay ya ti àslərbiyu nu ni ti naŋ jireni. Lekʉlʉm ti kə̀sərum naŋ do. 29 Nu ti nə̀səra naŋ a, aɗaba nàsləkabiya afa gana; àslərbiyu nu ti naŋ.» 30 Yezu àra àɗəma ma nahkay ti nday nakəŋ tawayay təgəs naŋ. Ay ti maslaŋa èsliki minjifiŋeni do, aɗaba sarta gani gayaŋ ènjia faŋ ndo. 31 E kiɗiŋ ge mis dal-dalani ni bu mis kay tə̀vu, tə̀fəkia ahàr a, tə̀ɗəm ahkado: «Ka ya ti Krist Bay gəɗakani ya amara ni eminjia ni ti, amagray zlam məgri ejep ana mis amatam ga maslaŋa hini ya ti agray ni aw?» 32 Ndam Feriziyeŋ tàra tìcia ma ge mis dal-dalani ya təɗəmki ka Yezu e kiɗiŋ gatay bu na ti, tə̀hi ma gani ana gəɗákani ga ndam maŋgalabakabu mis akaba Melefit ni, mək nday nakəŋ tə̀slərbiyu ndam slewja ga məgəs Yezu. 33 Eslini Yezu àɗəm ahkado: «Ananjəhaɗ akaba kʉli vaɗ kay do; kələŋ gani anaŋgoru afa ga Bay ya ti àslərbiyu nu ni. 34 Akəɗəbum nu, ay ti akədumu ahàr do, aɗaba ekislʉmki moroni ka məlaŋ goro ya ti anoru ni do.» 35 Ndam Zʉde tə̀zlapay e kiɗiŋ gatay bu, tə̀ɗəm ahkado: «Àɗəm amədi ahàr do ni ti, amoru ti eley? Bi amoru afa ga ndam geli ya tanjəhaɗkabu akaba ndam ya ti nday ndam Zʉde do ni, bi amacahi zlam ana ndam ya ti nday ndam Zʉde do ni tək? 36 Ma gayaŋ ya àɗəm: “Akəɗəbum nu, ay ti akədumu ahàr do, aɗaba ekislʉmki moroni ka məlaŋ goro ya ti anoru ni do” ni ti, awayay aɗəm mam?» 37 Ka fat ya ti tindeveriŋ wuməri ni tagray wuməri àtam ga vaɗ nday ndahaŋ ni. Ka fat nani Yezu ècik jik, àhi ana mis ni kay kay, àɗəm: «Tamal maslaŋa yam àkaɗa naŋ a ti, mâra afa goro a, mîsi. 38 Maslaŋa ya ti afəku ahàr ni ti, Melefit àɗəm a Wakita gayaŋ ni bu: “Yam ya avay sifa ni aməŋgəzaya a vu ga maslaŋa gani nani ba akaɗa ga yam ya ti akoru a zalaka vu ni.”» 39 Yezu àɗəm nahkay ti àɗəmki ma ka Məsuf ge Melefit, aɗaba amara məvi ana ndam ya ti təfəki ahàr ni. Ka sarta gani nani ti àvi ana tay faŋ ndo, aɗaba àŋgoru a məlaŋ maslaɗani ge Melefit ni vu faŋ ndo. 40 Mis dal-dalani ni tàra tìcia ma ga Yezu ya àɗəm na ti, mis ndahaŋ e kiɗiŋ gatay bu tə̀ɗəm: «Maslaŋa hini ti bay mahəŋgaray pakama ge Melefit ya ti Mʉwiz àɗəm amara ni eɗeɗiŋ.» 41 Mis ndahaŋ tə̀ɗəm: «Naŋ Krist Bay gəɗakani ya amara ni.» Mis ndahaŋ ti ni tə̀ɗəm: «Ay Krist Bay gəɗakani ya amara ni naŋ mis ga haɗ Gelili aw? 42 Aɗaba Melefit àɗəm a Wakita gayaŋ ni bu Bay gəɗakani ya amara ni ti naŋ wur huɗ ge Devit. Naŋ ti zal Betlehem, naŋ ga kəsa ge Devit.» 43 Nahkay mis dal-dalani ni tìcirvu azuhva Yezu. 44 Eslini mis ndahaŋ e kiɗiŋ gatay bu tə̀ɗəm si tə̂gəs naŋ kwa. Ay ti maslaŋa àbi ènjifiŋ bi. 45 Ndam slewja ni tàra tàsləkabiya ti, gəɗákani ga ndam maŋgalabakabu mis akaba Melefit ni akaba ndam Feriziyeŋ ni tə̀hi ana tay ahkado: «Kə̀gəsumbiyu naŋ ndo ni ti kamam?» 46 Ndam slewja ni tə̀həŋgrifəŋ ana tay, tə̀hi ana tay ahkado: «Maslaŋa ɗay-ɗay àbi aɗəm ma akaɗa gayaŋ ni bi.» 47 Ndam Feriziyeŋ ni tə̀hi ana tay ahkado: «Lekʉlʉm day àgosa kʉli a zla do waw? 48 E kiɗiŋ ga gəɗákani geli bu ahkay do ni e kiɗiŋ ga ndam Feriziyeŋ bu ni ti, maslaŋa àbu àfəkia ahàr ka maslaŋa nana waw? 49 Ndam ya ti təfəki ahàr ka maslaŋa nani ti, nday ya ti tə̀sər Divi ge Melefit ya ti Mʉwiz àbəki ni do ni. Ay nday nani ti Melefit ètikwesla tay a.» 50 Ay Nikodem naŋ ya ti àrəkioru ka Yezu ga məlavaɗ a vaɗ nahaŋ ni, naŋ àkibu ka tay eslini, àhi ana tay ahkado: 51 «E Divi ge Melefit ya Mʉwiz àbiki ana leli ni bu ni ti, mìsliki magrafəŋa seriya kè mis a do, si tamal mìcifiŋa ma akaba mə̀səra ere ye ti àgray na kwa.» 52 Nday nakəŋ tə̀hi ahkado: «Nak day, nak zal Gelili zla tək? Jeŋgey Wakita ge Melefit ni nahəma, akəsər zal Gelili àbi ahəŋgaray pakama ge Melefit bi.» 53 Kələŋ gani ti, mis ya ti eslini ni ku way way do gatay àsləka, òru a magam gayaŋ,

Zeŋ 8

1 Yezu ti ni àcəloru ka həma Oliviye ni. 2 Hajəŋ gani ge dʉeni nahəma, Yezu nakəŋ àŋgoru a dalaka ga ahay gəɗakani ge Melefit ni vu. Òru ènjʉa ti mis ya ti eslini ni ɗek tə̀rəkia. Nahkay naŋ nakəŋ ànjəhaɗ digʉs, acahi zlam ana tay. 3 Naŋ àbu acahi zlam ni ana tay nahkay ti, ndam məsər Wakita ge Melefit akaba ndam Feriziyeŋ tə̀zəbiyu wal nahaŋ, tàfəkaɗ naŋ kè meleher ge mis ni ɗek. Wal nani ti tə̀di ahàr naŋ àbu agray hala. 4 Tàra tàfəkaɗa naŋ a ti tə̀hi ana Yezu ahkado: «Mʉsi, wal hini ti tə̀cəkia naŋ ka magray hala. 5 Mʉwiz àbəki ma gani e Divi ge Melefit bu, àhi ana leli mîzligi wal hala akaɗa hini àna akur, mâkaɗ. Ay nak ti, kəɗəm mam?» 6 Tə̀hi nahkay ti tawayay təhəlfəŋa eyʉ a, ti tâcalki naŋ ka zlam magudarani. Ay Yezu nakəŋ àzəgaɗ ahàr jer mək àbəki zlam ka haɗ àna weleher. 7 Nday nakəŋ tə̀mbrəŋ mihindifiŋa ma na kà Yezu a ndo, nahkay Yezu èzefteba ahàr a mək àhi ana tay ahkado: «Maslaŋa ya ti e kiɗiŋ gekʉli bu àgudar zlam ɗay-ɗay ndo ni ti mîzligi wal ni enji.» 8 Àra àhia ma ana tay a nahkay ti, àzəgaɗ ahàr mək àbəki zlam ka haɗ keti. 9 Tàra tìcia ma ga Yezu ya àhi ana tay na ti tàsləka bəlaŋ àna bəlaŋ. Medewél tàsləka enji a. Nahkay wal ni àgəjəni naŋ bəlaŋ kè meleher ga Yezu ciliŋ. 10 Yezu àra èzefteba ahàr a ti àhi ana wal ni ahkado: «Mis nakəŋ nday eley? Maslaŋa ya ti àɗəm tâkaɗ kur ni ti àbu waw?» 11 Wal ni àhəŋgrifəŋ, àhi ahkado: «Maslaŋa àbi, Bay goro ni.» Mək Yezu àhi: «Nu day ŋgay tâkaɗ kur ti nə̀ɗəm do. Sləka, ay ti kàgudar zlam ɗay-ɗay va ba.» 12 Yezu àhi ana mis ni keti: «Nu ti bay ya ti aslaɗi məlaŋ ana mis ni. Maslaŋa ya ti aɗəbay nu nahəma, anəslaɗi məlaŋ, nahkay Melefit aməvi sifa. Ay maslaŋa ya ti àɗəbay nu do ni ti amanjəhaɗ a məlaŋ ziŋ-ziŋeni bu.» 13 Eslini ndam Feriziyeŋ ndahaŋ tə̀hi ahkado: «Kagrakia sedi a ka ahàr gayak gayakana ti, ma gayak ni ma masakani.» 14 Yezu àhi ana tay ahkado: «Ku nə̀bu nagrakia sedi a ka ahàr goro goroana nəŋgu ni, ma goro ya nəɗəm ni ma ge jiri, ma masakani do. Aɗaba nə̀səra məlaŋ ya nàsləkabiya na akaba məlaŋ ya nakoru na. Ay lekʉlʉm ti kə̀sərum məlaŋ ya nàsləkabiya na akaba məlaŋ ya nakoru ni do. 15 Lekʉlʉm kəɗəmum mis àgudara zlam a ti kajalum ahàr akaɗa ge mis hihirikeni ni. Ay nu nəɗəm mis àgudara zlam a ti nə̀jalay nahkay do. 16 Ku tamal nagrafəŋa seriya kè mis a nəŋgu ni seriya goro ni ge jiri, aɗaba nagray ti nu bəlaŋ do; Baba goro naŋ ya àslərbiyu nu ni naŋ àbu akaba nu. 17 Àbu məbəkiani e Divi ge Melefit ya Mʉwiz àbiki ana kʉli ni bu nahkay hi: “Tamal mis cʉ tagray sedi, tə̀ɗəm ere gani jiri ti, ma gatay ni jiri eɗeɗiŋ.” 18 Nu nagrakia sedi a ka ahàr goro goroana. Baba naŋ ya àslərbiyu nu ni day agrakua sedi a.» 19 Eslini tə̀hi ana Yezu ahkado: «Buk gani naŋ eley?» Yezu nakəŋ àhəŋgrifəŋ ana tay, àhi ana tay ahkado: «Nu tekeɗi kə̀sərum nu nu way do ni ti, kə̀sərum Baba do daya. Tamal kə̀səruma nu a ti amal kə̀səruma Baba daya.» 20 Yezu àɗəm ma hini ti ka ya ti naŋ àbu acahi zlam ana mis a dalaka ga ahay gəɗakani ge Melefit ni bu ni, naŋ kà gəvay ga zlam ya təbiviyu sədaga ana Melefit ni. Ay ti maslaŋa èsliki məgəs naŋ ndo aɗaba sarta gayaŋ ènjiyu faŋ ndo. 21 Yezu àhi ana tay keti: «Nu ti nasləka. Lekʉlʉm akəɗəbum nu, ay ti akəmbrəŋum zlam magudarani gekʉli ni do, nahkay akəmətum zlam gekʉli. Aɗaba kìslʉmki mədəgumani ka məlaŋ ya nakoru ni koksah.» 22 Eslini ndam Zʉde tə̀ɗəm e kiɗiŋ gatay bu ahkado: «Àɗəm “Kìslʉmki mədəgumani ka məlaŋ ya nakoru ni koksah” ni ti, awayay akaɗ ahàr gayaŋ gayaŋani zla tək?» 23 Eslini Yezu nakəŋ àhi ana tay ahkado: «Lekʉlʉm ti mis ya ka haɗ, nu ti mis ya àsləkabiya agavəla ni. Lekʉlʉm ti ndam ga duniya, nu ti nu mis ga duniya do. 24 Nə̀hi ana kʉli akəmbrəŋum zlam magudarani gekʉli do, akəmətum ti azuhva nani. Nahkay ti ahàr àɗəm kəfumku ahàr, kəsərum nu gani, nu nə̀bu. Do ni ti akəmbrəŋum zlam magudarani gekʉli ni do, akəmətum eɗeɗiŋ.» 25 Nahkay nday nakəŋ tə̀hi: «Nak way?» Yezu àhəŋgrifəŋ ana tay, àhi ana tay ahkado: «Kwa ka mənjəki ga zlapay goro ni nə̀hia ana kʉli a, nə̀ɗəm nu gani. 26 Nu nə̀bu àna zlam kay ga məɗəmkiani ke kʉli ga məgəs kʉli àna seriya. Ay ma goro ya nəhi ana ndam ga duniya ni ti, ma ga Bay ya àslərbiyu nu àhu ni ciliŋ. Naŋ ti naŋ jireni.» 27 Yezu àra àhia ma na ana tay a nahkay ti ŋgay àɗəmki ma ka Bəŋani ti, nday tə̀sər ndo. 28 Nahkay Yezu àhi ana tay ahkado: «Ka fat ya ti akəzumoya Wur ge Mis agavəla ti, akəsərum nu ti nu gani, nu nə̀bu. Eslini akəsərum zlam ya ti nagray ni ɗek ti nu nuani nagray ga ahàr goro do. Ma ya ti nəɗəm ni ti ma ga Baba ya àcahu ni ciliŋ. 29 Bay ya ti àslərbiyu nu ni naŋ àbu akaba nu, àmbrəŋ nu ga ahàr goro ndo; aɗaba nu nə̀bu nagray zlam ya ti àɓəlafəŋ ni kəlavaɗ.» 30 Ka ya ti Yezu naŋ àbu aɗəm ma ni nahkay ti, mis dal-dal tə̀fəki ahàr. 31 Eslini Yezu àhi ana ndam Zʉde ya tə̀fəkia ahàr a ni ahkado: «Tamal kə̀gəsumkabá ma goro ya nə̀hi ana kʉli na lala, kə̀mbrəŋum do ni ti, kìgʉma ndam maɗəbay nu eɗeɗiŋ eɗeɗiŋena. 32 Akəsərum jiri, nahkay ti ekigʉm lekʉlʉm eviɗi va do.» 33 Nday nakəŋ tə̀həŋgrifəŋ, tə̀hi: «Leli bəza huɗ ga Abraham. Ɗay-ɗay leli mìgi eviɗi ga maslaŋa ndo ni ti, kə̀ɗəm mara migi leli eviɗi va do ni ti ahəmamam?» 34 Yezu àhi ana tay ahkado: «Nəhi ana kʉli nahəma, maslaŋa ya ti agudar zlam ti naŋ eviɗi ga zlam magudarani. 35 Nə̀ɗəm nahəma, eviɗi ti ɗay-ɗay tacalkivu naŋ ke mis ga huɗ ahay do. Ay wur ga bay ahay ti ku ananaw naŋ wur ga huɗ ahay zlam gayaŋ. 36 Tamal Wur ge Melefit àmbaya kʉli e eviɗi ba ti, kìgʉm lekʉlʉm eviɗi va do eɗeɗiŋ. 37 Nə̀səra lekʉlʉm ti bəza huɗ ga Abraham. Ay ti kawayum kəkaɗum nu, aɗaba kàwayum məgəsumkabu pakama goro do. 38 Nu ti nəɗəm ere ye ti Baba àɗəfuki ni; lekʉli ti ni kəgrum ere ye ti bəŋ gekʉli àhi ana kʉli ni.» 39 Nday nakəŋ tə̀həŋgrifəŋ, tə̀hi: «Bəŋ geli ti Abraham timey.» Eslini Yezu àhi ana tay ahkado: «Tamal lekʉlʉm bəza ga Abraham ti akal kəgrum tʉwi akaɗa ga Abraham ya àgray ni. 40 Nu nə̀bu nəhi ma ge jiri ya Melefit àhu ni ana kʉli, ay nihi ti kawayum kəkaɗum nu sawaŋ. Abraham àgray nahkay ndo timey! 41 Lekʉlʉm ti kəgrum tʉwi akaɗa ga bəŋ gekʉli ya agray ni.» Nday nakəŋ tə̀hi: «Leli ti leli bəza məva do. Melefit naŋ bəlaŋ naŋ Bəŋ geli. Bəŋ geli nahaŋ àbi.» 42 Yezu àhi ana tay ahkado: «Tamal ti Melefit naŋ bəŋ gekʉli eɗeɗiŋ ti amal kawayum nu, aɗaba nàsləkabiya afa gana nàra afa gekʉli a. Nu nàra ti àna ahàr goro goroani do; naŋ àslərbiyu nu. 43 Kìcʉm ma goro ya nəhi ana kʉli ni do ni ti kamam? Kìcʉm do ni ti aɗaba kìslʉmki məbi slimi ana ma goro ya nəhi ana kʉli ni do. 44 Lekʉlʉm bəŋ gekʉli ti Seteni. Kawayum kəgrum ti tʉwi ga bəŋ gekʉli gani ya awayay ni. Kwa ahaslani naŋ àbu abazl mis zlam gayaŋ, ɗay-ɗay àɗəm ma ge jiri ndo, aɗaba jiri gayaŋ àbi. Masəkaɗ malfaɗa ti tʉwi gayaŋ, aɗaba naŋ bay masəkaɗ malfaɗa, naŋ bəŋ gani daya. 45 Ay nu ti nəɗəm ma ge jiri, nahkay ti kàwayum məgəsumkabu ma goro ya nəhi ana kʉli ni do. 46 Way esliki maɗafaya zlam a ti, aɗəm nu nagudar ni way? Ay tamal ma goro ya nəɗəm ni ɗek jiri ti, kàwayum məgəsumkabani do ni ti kamam? 47 Mis ge Melefit ti abi slimi ana ma ge Melefit, ay lekʉlʉm ti lekʉli ndam ge Melefit do. Kàwayum məbumi slimi ana ma gayaŋ do ni ti azuhva nani.» 48 Ndam Zʉde ni tə̀hi ana Yezu ahkado: «Mə̀ɗəm nak zal Samari, seteni ànukviyu a ahàr vu ti, ma geli ni jiri eɗeɗiŋ.» 49 Yezu àhi ana tay: «Seteni ànuviyu bi. Zlam goro ya nagray ni ti ga mazləbay Baba goro sawaŋ. Lekʉlʉm ti ni kanjakum nu, kəbumku mimili. 50 Nu ti ŋgay mis tâzləbay nu kwa ti nə̀ɗəm do. Ay Maslaŋa àbu bəlaŋ awayay ti tâzləbay nu, naŋ gani agray seriya ge jiri daya. 51 Nəhi ana kʉli nahəma, maslaŋa ya ti àgəskabá ma goro na ti aməmət ɗay-ɗay do.» 52 Nahkay ndam Zʉde nakəŋ tə̀hi ahkado: «Nihi ti mə̀səra seteni ànukviyu a ahàr bu eɗeɗiŋ zla! Abraham àməta, ndam məhəŋgri pakama ge Melefit ana mis day tə̀məta, ay nak kə̀ɗəm tamal maslaŋa àgəskabá ma gayak na ti àmət ɗay-ɗay do ni ti ahəmamam? 53 Bəŋ geli Abraham tekeɗi àməta ti, nak kàtam naŋ aw? Ndam məhəŋgri pakama ge Melefit ana mis ni day tə̀məta, ay nak ti kə̀ɗəm nak way?» 54 Yezu àhəŋgrifəŋ ana tay, àhi ana tay ahkado: «Tamal nu nuani nazləbay ahàr goro ti, mazləbavani nani egi zlam masakani. Bay ya ti azləbay nu ni ti Baba naŋ ya ti kə̀ɗəmum naŋ Melefit gekʉli ni. 55 Lekʉlʉm kə̀sərum naŋ do, ay nu ti nə̀səra naŋ a. Tamal nə̀ɗəm nə̀sər naŋ do ni ti, nasəkaɗ malfaɗa akaɗa gekʉli ni. Nu nə̀səra naŋ a, nə̀bu nəgəskabu ma gayaŋ daya. 56 Bəŋ gekʉli Abraham àmərva aɗaba àsəra emipi sarta ga marana goro a. Èpia, mək àmərva àna naŋ a àkiva.» 57 Eslini ndam Zʉde ni tə̀hi ahkado: «Nak kə̀zum vi kru kru zlam ndo ni ti, kə̀ɗəm kìpia Abraham a ti ahəmamam?» 58 Yezu àhi ana tay ahkado: «Nəhi ana kʉli nahəma, kwa ka ya ti tìwi Abraham faŋ ndo nəŋgu ni, nu gani, nu nə̀bu àndava.» 59 Yezu àra àɗəma nahkay ti nday nakəŋ tə̀həl akur ge mizligi naŋ àna naŋ. Ay ti Yezu àɓu e kiɗiŋ ge mis bu mək àsləka a məlaŋ ga ahay gəɗakani ge Melefit ni ba, àhəraya e mite va.

Zeŋ 9

1 Ka ya ti Yezu naŋ àbu akoru e divi bu akaba ndam maɗəbay naŋ ni ti èpi zal wuluf nahaŋ. Maslaŋa gani nani ti tìweya naŋ wulufana. 2 Eslini ndam maɗəbay naŋ ni tə̀hi ahkado: «Mʉsi, maslaŋa hini tìweya naŋ wulufana ti, way àgudar zlam way? Àgudar zlam ti naŋ tək, day ti ata bəbəŋani tàgudar aw?» 3 Yezu àhəŋgrifəŋ ana tay, àhi ana tay ahkado: «Tìweya naŋ wulufana ti azuhva àgudara zlam a ahkay do ni ata bəŋani tàgudara zlam a palam do. Tìwi naŋ nahkay ti, Melefit awayay ti mis tîpi njəɗa gayaŋ àna maslaŋa hini. 4 Nihi məlaŋ maslani ti ahàr àɗəm məgrum tʉwi ga Bay ya àslərbiyu nu ni. Məlavaɗ egi wuɗak, nahkay ti maslaŋa emisliki magray tʉwi ni koksah. 5 Ka ya ti nu nə̀bu a duniya bu mba ni ti nəslaɗi məlaŋ ana mis.» 6 Àra àɗəma nahkay ti ètiferu esliɓ a haɗ, àgraya eliɓisl àna esliɓ gayaŋ na mək àgriki ke eri ana zal wuluf ni. 7 Àhi ana zal wuluf ni ahkado: «Ru kâbaray eri a dəluv Silʉwe ni bu.» Silʉwe ti awayay aɗəmvaba «Məslərani.» Zal wuluf nakəŋ òru àbaray eri ni. Àra àbara eri na ti epi divi, mək àsləka, òru a magam. 8 Ndam mahay gayaŋ akaba ndam ya tə̀bu tipi naŋ ahaslani naŋ àbu ahəŋgalay zlam ni tə̀ɗəm ahkado: «Maslaŋa hini ti naŋ ya ti kəlavaɗ anjəhaɗ digʉsa, ahəŋgalay zlam ni do aw?» 9 Mis ndahaŋ tə̀ɗəm: «Naŋ.» Mis ndahaŋ ti ni tə̀ɗəm: «Naŋ do, tə̀zavu ciliŋ.» Mək naŋ nakəŋ àɗəm: «Nu gani timey!» 10 Eslini nday nakəŋ tə̀hi ahkado: «Kipi divi nahkay ti, mam àgrakukvu mam?» 11 Naŋ nakəŋ àhəŋgrifəŋ ana tay, àhi ana tay ahkado: «Maslaŋa ya ti təzalay naŋ Yezu ni àgraya eliɓisl a, àgruki ke eri mək àhu ahkado: “Ru kâbaray eri a dəluv Silʉwe ni bu.” Nu nakəŋ mək nòru. Nòru nàbara ti nìpi divi hʉya.» 12 Nday nakəŋ tə̀hi: «Maslaŋa gani nani naŋ eley?» Àhi ana tay: «Nə̀sər do.» 13 Tə̀zoru maslaŋa ya ti ahaslani naŋ wulufani ni afa ga ndam Feriziyeŋ. 14 Yezu àgraya eliɓisl a, àgriki ana zal wuluf ni mək àhəlikaba eri na ti ka fat məpəsabana. 15 Tòru tìnjʉa àna naŋ a ti, ndam Feriziyeŋ ni day tìhindifiŋa, tə̀hi: «Nihi kipi divi ti, mam àgrakukvu mam?» Naŋ nakəŋ àhi ana tay ahkado: «Maslaŋa gani nani àgruki eliɓisl ke eri, nàbaray eri mək nìpi divi hʉya.» 16 E kiɗiŋ ga ndam Feriziyeŋ ni bu mis ndahaŋ tə̀ɗəm: «Ku way mâgray ere hini way nəŋgu ni, maslaŋa gani àsləkabiya afa Melefit a do, aɗaba àgra zlam ya ti àɓəlay magrani do na a vaɗ məpəsabana ba.» Mis ndahaŋ ti ni tə̀ɗəm: «Tamal naŋ bay magudar zlam ti, esliki magray zlam ya ti agri ejep ana mis akaɗa hini ni aw?» Nahkay tìcirva e kiɗiŋ gatay ba. 17 Eslini ndam Feriziyeŋ nakəŋ tìhindifiŋa ma kà zal wuluf ya àŋgaba na keti, tə̀hi ahkado: «Nak ti maslaŋa ya ti àhəlukaba eri a ni ti kə̀ɗəm naŋ way?» Naŋ nakəŋ àhi ana tay ahkado: «Naŋ bay mahəŋgaray pakama ge Melefit.» 18 Ay ti gəɗákani ga ndam Zʉde ni ti ŋgay ahaslani naŋ wulufani day ti nihi epi divi ti tàwayay məgəskabani ndo. Nahkay tə̀zalabiyu ata bəŋani 19 ge mihindifiŋa ma kà tay a. Tàra tìnjia ti tə̀hi ana tay ahkado: «Wur gekʉli ya kə̀ɗəmum kìwʉmaya naŋ a wulufana ti naŋ hini eɗeɗiŋ aw? Ay ti mam àgravu nihi ti epi divi ni mam?» 20 Nday nakəŋ tə̀həŋgrifəŋ ana tay, tə̀hi ana tay ahkado: «Mə̀səra hini ti wur geli, ka ya ti mìweya ti naŋ wulufani eɗeɗiŋ. 21 Ay ere ye ti àgravu, epi divi hi ti, mə̀sər do. Maslaŋa ya ti àhəlikaba eri a ni day mə̀sər do. Naŋ wur va do, hindʉmfiŋa kà naŋ naŋana; esliki məhəŋgrifəŋani ana kʉli.» 22 Tə̀ɗəm nahkay ti aɗaba aŋgwaz àwərfəŋa tay kà gəɗákani ga ndam Zʉde na. Aɗaba ndam Zʉde ni ɗek tə̀zlapakabá, tə̀ɗəm maslaŋa ya aɗəm Yezu naŋ Krist ti təcafəŋa naŋ kà mahəŋgalay Melefit akaba tay a ahay ga mahəŋgalavù Melefit ni ba. 23 Ata bəŋani tə̀ɗəm naŋ wur va do, tîhindifiŋa kà naŋ naŋana ti azuhva nani. 24 Ndam Feriziyeŋ ni tə̀zalay maslaŋa ya ti ahaslani naŋ wulufani ni keti. Àra ènjia ti tə̀hi: «Ɗum ma ge jiri kè meleher ge Melefit. Leli ti mə̀səra maslaŋa ya ti kə̀ɗəm àhəlukaba eri a ni ti naŋ bay magudar zlam.» 25 Naŋ nakəŋ àhəŋgrifəŋ ana tay, àhi ana tay ahkado: «Ŋgay naŋ bay magudar zlam ahkay do ni àgudar zlam do ni ti nə̀sər do. Ere ye ti nə̀sər ni ti zlam bəlaŋ: ahaslani ti nu wulufani, ay nihi ti nipi divi.» 26 Nday nakəŋ tìhindifiŋa, tə̀hi: «Àgruk ti mam? Àhəlukaba eri a ti ahəmamam?» 27 Naŋ nakəŋ àhi ana tay ahkado: «Nə̀hia ana kʉli a àndava, kìcʉmuki ndo timey. Ay kawayum nəhi ana kʉli kîcʉm keti ti kamam? Tək lekʉlʉm day kawayum migi ndam maɗəbay naŋ aw?» 28 Àra àɗəma nahkay ti, nday nakəŋ tìndivi naŋ, tə̀ɗəm: «Aɗəbay maslaŋa nani ti nak kwa. Leli ti leli ndam maɗəbay Mʉwiz. 29 Leli ndam maɗəbay Mʉwiz aɗaba mə̀səra Mʉwiz ti Melefit àhia ma gayaŋ ana naŋ a. Ay maslaŋa nani ti mə̀sər məlaŋ gayaŋ ya àsləkabiya na do simiteni.» 30 Naŋ nakəŋ àhi ana tay nahkay hi: «Lekʉlʉm kə̀sərum məlaŋ gayaŋ ya àsləkabiya na do ni ti ahəmamam? Ay àhəlukaba eri a timey! 31 Mə̀səra tamal bay magudar zlam ahəŋgalaləŋ zlam kè Melefit ti Melefit èciiki do. Ay ku way way do tamal ahəŋgalay Melefit àna mahəŋgaroru ahàr a haɗ akaba agray ere ye ti àhi mâgray ni ti, Melefit eciiki. 32 Ɗay-ɗay maslaŋa èci ti maslaŋa nahaŋ àhəlikaba eri ana mis tìweya naŋ a wulufana ndo. 33 Tamal ti maslaŋa nani àsləkabiya afa ge Melefit a do ni ti, amal èsliki magray araŋa koksah.» 34 Nday nakəŋ tə̀həŋgrifəŋ, tə̀hi: «Kwa tìweya kur a nak bay magudar zlam ti kacahi zlam ana leli aw!» Nahkay tàgaraya naŋ e mite va. 35 Yezu àra ècia ndam Feriziyeŋ ni tàgaraya zal ya ahaslani wulufani na e mite va ti àɗəbay naŋ. Àra àdia ahar a ti àhi ahkado: «Kəfəki ahàr ka Wur ge Mis aw?» 36 Àhəŋgrifəŋ, àhi: «Naŋ way, Bay goro ni, ti nə̂fəki ahàr ni?» 37 Yezu àhi: «Bay ya ti kə̀bu kamənjaləŋ, naŋ àbu ahuk ma ni ti naŋ gani.» 38 Naŋ nakəŋ àhi: «Nə̀fukuka ahàr a, Bay goro ni.» Mək àbəhaɗi mirdim grik. 39 Eslini Yezu àɗəm: «Nàra a duniya va ti ga magrafəŋa seriya kè mis a; ti ndam wuluf tîpi divi, nday ya tə̀ɗəm tìpia divi a ni tə̂wuluf.» 40 Ndam Feriziyeŋ ya tə̀bu akaba naŋ eslini ni tàra tìcia ma gayaŋ na ti tə̀hi: «Leli day leli ndam wuluf aw?» 41 Eslini Yezu àhi ana tay ahkado: «Tamal ti kə̀njum lekʉli ndam wuluf ti, amal zlam magudarani gekʉli àbi. Ay nihi ti kə̀ɗəmum kə̀bum kipʉm divi ti zlam magudarani gekʉli àbu.»

Zeŋ 10

1 Yezu àɗəm keti: «Nəhi ana kʉli nahəma, maslaŋa ya ti ahuriyu a gargara ga təmbəmbak vu gwar a mahay do, ahuriyu àna məlaŋ nahaŋ ti, naŋ zal akal, naŋ zal abra. 2 Ay maslaŋa ya ti ahuriyu gwar a mahay ga gargara ni ti naŋ bay majəgay təmbəmbak. 3 Bay majəgay gargara ni azləkiaba mahay ana bay majəgay təmbəmbak na. Àzləkiaba ti bay majəgay təmbəmbak ni azalay təmbəmbak gayaŋ ɗek bəlaŋ bəlaŋ àna slimi gatay. Təmbəmbak ni tìcia dəŋgu gayaŋ a ti tə̀səra, abaya tay e mite va. 4 Ka ya ti àbaya tay a nahəma, adi kama ana tay, mək təmbəmbak ni taɗəboru naŋ kələŋ, aɗaba tə̀səra dəŋgu gayaŋ a. 5 Ay ti ataɗəboru maslaŋa ya ti tə̀sər naŋ do ni do; atacuhwafəŋa, aɗaba tə̀sər dəŋgu ge mis ndahaŋ do.» 6 Yezu àhi ma gozogul hini ana tay, ay ti tìciaba ere ye ti awayay ahiki ana tay na ndo. 7 Yezu àhi ana tay keti: «Nəhi ana kʉli nahəma, mahay ga gargara ga təmbəmbak ni ti nu. 8 Mis ndahaŋ ya tàra, tə̀ɗəm tajəgay təmbəmbak ni ti, nday ɗek ndam akal, ndam abra; ay təmbəmbak ni tìciiki ma ana tay ndo. 9 Mahay ti nu, maslaŋa ya ti ahuriyu gwar a nu bu ni ti araŋa amacay naŋ do, Melefit amahəŋgay naŋ. Nahkay emisliki məhuriyu a gargara vu, mahərana e mite va akaba aməŋgət zlam məzum gayaŋ. 10 Zal akal ara ti ga məhəl zlam àna akal, ga mabazl zlam akaba ge mijiŋ zlam. Ay nu nàra ti, nawayay ti mis tə̂ŋgət sifa ya ti àndav ɗay-ɗay do ni. Sifa gani nani ti nəvi ana tay àtam ya ti tiwi mis àna naŋ ni. 11 «Bay ya ti ajəgay zlam lala ni ti nu. Bay ya ti ajəgay zlam lala ni ti, ku takaɗki naŋ ka təmbəmbak gayaŋ ya ti ajəgay tay ni nəŋgu ni agəskabu, àmbrəŋ tay do. 12 Ay ti maslaŋa ya ajəgi zlam ana mis ti tə̂pəl naŋ ni ti àjəgay zlam lala do, aɗaba tamal èpia kəra gili naŋ àbu ara ti acuhway, ambərbu təmbəmbak ni. Aməmbərba tay a ti, kəra gili ni amabazl ndahaŋ, emidikaba ahàr a ana məgəjəni gana. 13 Maslaŋa ya ti acuhway, ambərbu təmbəmbak ni ti təmbəmbak ni tə̀həli ahàr do, aɗaba naŋ agray ni tʉwi ga siŋgu ciliŋ. 14 Bay ya ti ajəgay zlam lala ni ti nu. Nu nə̀səra təmbəmbak goro a, təmbəmbak goro day tə̀səra nu a 15 akaɗa ga Baba ya àsəra nu a, nu day nə̀səra Baba ni. Nahkay ti nəgəskabu ti tâkaɗki nu ka təmbəmbak goro ya najəgay ni. 16 Təmbəmbak goro ndahaŋ tə̀bu, ay ti tə̀kibu ka ndahaŋ ya a gargara hini bu ni bi. Nday gani nani ti ahàr àɗəm nəhəlbiyu tay daya. Etici dəŋgu goro, etigi ka ahar bəlaŋ akaba ndahaŋ ni, bay majəgay tay day bəlaŋ. 17 Baba awayay nu aɗaba nəgəskabu ti nə̂mət ka mawayay goro, do ni ti maslaŋa èsliki makaɗ nu do. Nə̀məta nəŋgu ni, nisliki maŋgabana tata. 18 Maslaŋa ya ti esliki makaɗ nu ni ti àbi, nəgəskabu nəmət ti ka mawayay goro. Nisliki məmətani ka mawayay goro; nisliki maŋgabana daya. Bəŋ goro àhu gray ti nahkay.» 19 Ndam Zʉde ni tàra tìcia ma ga Yezu ya àɗəm na ti tìcirvu e kiɗiŋ gatay bu keti. 20 Mis ndahaŋ kay e kiɗiŋ gatay bu tə̀bu təɗəm: «Seteni àniviyu a ahàr vu, naŋ zal seteni ti kəbumi slimi ana ma gayaŋ ni ti kamam?» 21 Mis ndahaŋ ni ti ni tə̀ɗəm: «Zal seteni àɗəm ma gayaŋ hini ya aɗəm ni do. Zal seteni ti esliki məzləkikaba eri ana ndam wuluf a waw?» 22 Sarta ga wuməri ga məzləkaba Ahay gəɗakani ge Melefit na ènjʉa, tàgray a Zerʉzalem, sarta gani nani ti ahar kusi. 23 Nahkay Yezu asawaɗay a dalaka ga ahay gəɗakani ge Melefit ni bu, ka məlaŋ ya təzalay Dalahay ga Salomoŋ ni. 24 Ndam Zʉde ni tə̀cakalakivu ka Yezu, tèveliŋi ahàr, tə̀hi ahkado: «Tamal nak Krist eɗeɗiŋ ti, hi ana leli vay-vay kìmbirfəŋ ba, nahkay ti ahàr aməhəli ana leli va do.» 25 Eslini Yezu àhəŋgrifəŋ ana tay, àhi ana tay ahkado: «Nə̀hia ana kʉli a àndava, ay ti kàwayum məgəsumkabu ma gani ndo timey. Tʉwi ya nagray ni ti nagray àna njəɗa ga Baba, nahkay tʉwi gani nani aɗəfiki ana kʉli nu ti nu way. 26 Ay ti kekileŋa lekʉlʉm kàwayum məfumku ahàr do, aɗaba lekʉlʉm kə̀kumkibu ka təmbəmbak goro bi. 27 Təmbəmbak goro ti tici dəŋgu goro, nu day nə̀səra tay a, nday day taɗəbay nu. 28 Nəvi sifa ya àndav ɗay-ɗay do ni ana tay, atəmət do, maslaŋa day emisliki məhəlfua tay a do. 29 Baba Melefit naŋ ya àbu təmbəmbak ni ti naŋ gəɗakani àtam mis ɗek, àtam zlam ɗek. Maslaŋa àbi esliki məhəlfəŋa tay kà Baba bi. 30 Leli ata Baba ti leli bəlaŋani.» 31 Yezu àra àɗəma nahkay ti ndam Zʉde ni tə̀həl akur keti, tawayay mizligi naŋ àna naŋ. 32 Yezu àhi ana tay ahkado: «Nàgra tʉwi sulumana sulumana kay e kiɗiŋ gekʉli ba àna njəɗa ga Baba. Ay kawayum kizligʉm nu àna akur, kakaɗum nu ti àki ke tʉwi weley gani weley?» 33 Eslini ndam Zʉde ni tə̀həŋgrifəŋ, tə̀hi ahkado: «Mawayay mizligi kur àna akur, mawayay makaɗ kur ti, àki ke tʉwi sulumani do. Mizligi kur ti aɗaba kìndivia Melefit a palam; nak mis, ay ti kawayay kazay ahàr gayak akaɗa nak Melefit.» 34 Yezu àhəŋgrifəŋ ana tay, àhi ana tay ahkado: «Àbu məbəkiani a Wakita ge Melefit ni bu, Melefit àɗəm nahkay hi: “Lekʉlʉm ti melefifit.” Àbi məbəkiani nahkay hi bi aw? 35 Maslaŋa àbi esliki məbəzkia zlam ya àbu məbəkiani a Wakita ge Melefit bu na bi. Nahkay nday ya ti Melefit àhi ma gayaŋ ana tay ni ti àzalay tay melefifit eɗeɗiŋ. 36 Ay nu ti Baba àdaba nu a, àslərbiyu nu a duniya vu. Goro ya nə̀ɗəm “Nu Wur ge Melefit” ni ti, ahəmamam kislʉmki məɗəmani nindivi naŋ ni mam? 37 Tamal nagray tʉwi ni ga Baba do ni ti kə̀fumku ahàr ba. 38 Ku nagray tʉwi ga Baba, kə̀fumku ahàr do nəŋgu ni, gəsumkabá tʉwi goro ya nagray na digepa. Nahkay ti akəsərum lala, nu nə̀bu àna njəɗa ga Baba, naŋ day naŋ àbu àna njəɗa goro, nahkay leli ata Baba ti bəlaŋani.» 39 Yezu àra àɗəma ma na nahkay ti, tawayay məgəs naŋ keti, ay ti àtamfəŋa kà tay a. 40 Kələŋ gani Yezu àsləka, àŋgoru ke ledi ge Zʉrdeŋ, ka məlaŋ ge Zeŋ ya àbaray mis ahaslani ni. Naŋ nakəŋ ànjəhaɗ eslini gosku ɓal. 41 Ka ya ti naŋ àbu eslini ni ti mis kay tə̀rəkia, tə̀bu təɗəm: «Zeŋ ti àgray zlam magray ejep ndo; ay ma gayaŋ ya àɗəmki ka maslaŋa hini ni ɗek ti jiri eɗeɗiŋ.» 42 Eslini mis kay tə̀fəkia ahàr ka Yezu a.

Zeŋ 11

1 Zal nahaŋ àbu, slimi gani Lazar, arməwər àzəgaɗiya naŋ a. Kəsa gayaŋ Betani, nday akaba bəza ga məŋani walani ata Mari nday ata Marta. 2 Mari ti nani, Mari ya ti àbəki tersel ka asak ga Bay geli mək àtəmaɗkia àna məhər gayaŋ a ni. Lazar naŋ ya ti èɓesey do ni ti wur ga məŋani. 3 Nahkay bəza ga məŋ ga Lazar nakəŋ tə̀slərkioru mis ka Yezu ti mə̂hi: «Bay geli, zləba gayak Lazar èɓesey do.» 4 Yezu àra ècia ma na nahkay ti àɗəm: «Arməwər ga Lazar ni ti àkaɗ naŋ do. Ay ti mis atəsər njəɗa ge Melefit àna naŋ sawaŋ. Nahkay atazləbay Melefit, atazləbay nu Wur ge Melefit daya.» 5 Lazar akaba bəza ga məŋani ata Mari nday ata Marta ti Yezu awayay tay; 6 ay àra ècia ga Lazar ya èɓesey do na ti òru weceweci ndo, àpəskivu ka ahàr gani vaɗ cʉ. 7 Kələŋ gani àhi ana ndam maɗəbay naŋ ni ahkado: «Nihi ti sarta ènjʉa ga maŋgona e Zʉde a.» 8 Ndam maɗəbay naŋ ni tə̀hi ahkado: «Mʉsi, nihi guhwa hʉya ndam Zʉde ni tawayay tizligi kur àna akur, tawayay takaɗ kur ti, kəŋgoru eslini keti aw?» 9 Yezu àhi ana tay: «Məlafat ti njemdi kru mahar cʉ do aw? Tamal mis asawaɗay ga məlafat ti èji asak do, aɗaba naŋ a məlaŋ maslaɗani bu, epi divi lala. 10 Ay tamal mis asawaɗay ga məlavaɗ ti eji asak, aɗaba naŋ àbi a məlaŋ maslaɗani bu bi, èpi divi lala do.» 11 Yezu àra àhia ma ana tay a nahkay ti àhi ana tay: «Zləba geli Lazar àdiya e ɗʉwir va, ay nakoru nepiɗekababiya naŋ a.» 12 Eslini ndam maɗəbay naŋ ni tə̀hi ahkado: «Bay geli, tamal àdiya e ɗʉwir va ti, amaŋgaba a arməwər gayaŋ ni ba do waw?» 13 Ga Yezu ya àhi ana tay nahkay ti awayay ahi ana tay Lazar àməta. Ay ndam maɗəbay Yezu ni tə̀hi ana ahàr hi ti Yezu àɗəmki ma ti ke ɗʉwir ɗʉwireni eɗeɗiŋ. 14 Nahkay Yezu àhi ana tay vay-vay: «Lazar àməta. 15 Nu nə̀bi ka məlaŋ gani bi ti nə̀bu nəmərvu azuhva kʉli, aɗaba akəfumku ahàr àkivu. Ay nihi ti takomum mədəgumkioru.» 16 Eslini Tumas naŋ ya təzalay naŋ Didim ni àhi ana ndam maɗəbay Yezu ndahaŋ ni ahkado: «Leli day takomum maɗəboru naŋ, ti tôru tâbazla leli akaba naŋ a.» 17 Yezu akaba ndam maɗəbay naŋ ni tìnjʉa a Betani a wuɗak ti, tə̀hi ana tay Lazar àgra vaɗ a faɗ e mindiviŋ ba. 18 Betani ti driŋ driŋ akaba Zerʉzalem kay do, èsli ezeweɗ kru kru mahkər do. 19 Nahkay ndam Zʉde kay tòra eslina ga məgrikabiyu ezekw ana Marta nday ata Mari ga wur ga məŋ gatay ya àməta na. 20 Marta àra ècia Yezu naŋ àbu ènjia wuɗak ti àŋgwivoru a ma vu. Mari ti ni naŋ a magam manjəhaɗani digʉsa. 21 Ata Marta tàra tàbakabá ahàr ata Yezu a ti Marta nakəŋ àhi ahkado: «Tamal nak kə̀ləbu ahalay ti, akal wur ga mma ni àmət ndo. 22 Ay nə̀səra ku nihi day ere ye ti kihindifiŋa kè Melefit a ɗek day Melefit aməvuk.» 23 Yezu àhəŋgrifəŋ, àhi ahkado: «Wur ga muk ni amaŋgaba e kisim ba.» 24 Marta àhi: «Iy, nə̀səra ka fat ga mandav ga duniya mis ataŋgaba e kisim ba ni ti, naŋ day amaŋgaba.» 25 Yezu àhi keti: «Mis taŋgaba e kisim ba, tə̀bu àna sifa ti azuhva nu, aɗaba nu nə̀bu palam. Maslaŋa ya ti àfəkua ahàr a ti ku tamal àməta nəŋgu ni amələbu àna sifa. 26 Maslaŋa ya ti naŋ àbu àna sifa, àfəkua ahàr a ti, amanjəhaɗ ga kaŋgay-kaŋgayani, àmət do. Kə̀hi ana ahàr ma goro hini ya nə̀huk ni ma ge jiri do waw?» 27 Eslini Marta nakəŋ àhi ahkado: «Ma ge jiri, Bay goro ni; nə̀səra nak Krist Bay gəɗakani ya Melefit àslərbiyu a duniya vu ni, nak Wur ge Melefit.» 28 Marta àra àhia ma na nahkay ti àsləka, àŋgoru a magam, mək àzalay wur ga məŋani Mari, àhi ma akal-akal, àhi ahkado: «Mʉsi geli àra, naŋ àbu ehindi kur.» 29 Mari àra ècia ma ga wur ga məŋani ya àhi na ti ècikaba cəkwaɗ, àrəkioru ka Yezu. 30 Ka sarta nani ti Yezu àhuriyu a kəsa ni vu faŋ ndo, kekileŋa naŋ àbu ka məlaŋ ya tàbakabu ahàr nday ata Marta ni mba. 31 Ndam Zʉde ya tə̂vu a ahay bu, tòru eslini ga məgri ezekw ana tay ni tàra tìpia Mari nakəŋ ècikaba cəkwaɗ àhəraya e mite va ti tàɗəbabiyu naŋ. Tàɗəboru naŋ ti, tə̀hi ana ahàr bi akoru kè mindiviŋ, akoru etʉwibiyu eslini. 32 Mari òru ènjʉa ka məlaŋ ga Yezu na, èpia naŋ a ti àbəhaɗi mirdim, àhi ahkado: «Bay goro ni, tamal nak kə̀ləbu ahalay ti, akal wur ga mma ni àmət ndo.» 33 Yezu àra èpia Mari a naŋ àbu etʉwi, ndam Zʉde ya taɗəbabiyu Mari ni day tə̀bu titʉwi ti, àhəlia ahàr a dal-dal, ɓəruv àwəra naŋ a. 34 Mək àhi ana tay ahkado: «Kə̀fumiyu naŋ e mindiviŋ vu eley?» Nday nakəŋ tə̀həŋgrifəŋ, tə̀hi: «Bay geli, ra kara kipibiya məlaŋ gana.» 35 Eslini Yezu ètʉwi. 36 Ndam Zʉde ni tàra tìpia naŋ a naŋ àbu etʉwi ti tə̀ɗəm: «Mənjumki day ti, àwaya naŋ a dal-dal ni.» 37 Ay mis ndahaŋ e kiɗiŋ gatay bu tə̀ɗəm ahkado: «Àhəlikaba eri ana zal wuluf a ti, ti Lazar àmət ba ti èsliki magrani koksah aw?» 38 Eslini ɓəruv àwəra Yezu a keti, mək òru ke mindiviŋ ni. Mindiviŋ nani ti ahuzl, tə̀zləkləŋ ma gani àna belim gəɗakani. 39 Tòru tìnjʉa ti Yezu nakəŋ àhi ana tay ahkado: «Zumləŋa belim na kà ma ge mindiviŋ na.» Eslini Marta wur ga məŋ ga maslaŋa ya ti àmət ni àhi ahkado: «Bay goro, àgra vaɗ a faɗ nihi e mindiviŋ ni ba ni ti èzia àndava timey.» 40 Yezu àhi ahkado: «Nə̀huka àndava: tamal kə̀fəkua ahàr a nahəma ekipi zlam, akəsər Melefit ti naŋ njəɗa-njəɗani, akazləbay naŋ ti, kìci ndo waw?» 41 Nahkay mis ni tə̀zələŋa belim na kà ma ge mindiviŋ na. Eslini Yezu nakəŋ àmənjoru agavəla, àɗəm: «Sʉsi gayak Bəba goro ni, aɗaba kə̀grua ere ye ti nìhindilʉk na. 42 Nu ti nə̀səra nak kə̀bu kəgru ere ye ti nihindilʉk ni ɗek kəlavaɗ. Ay nə̀ɗəm ma hini ti, nawayay ti mis ya tə̀bu ahalay teveliŋ nu ni tîci, ti tə̂sər nak kə̀slərbiyu nu eɗeɗiŋ.» 43 Yezu àra àɗəma ma na nahkay ti àzlah kay kay, àɗəm: «Lazar, həraya e mindiviŋ ni ba.» 44 Nahkay maslaŋa ya ti àmət ni àhəraya, asak mitʉwiɗeni, ahar day mitʉwiɗeni àna gabaga, ahàr gayaŋ makambahani àna azana. Eslini Yezu nakəŋ àhi ana mis ni ahkado: «Picehʉmaba naŋ a, ti mâsawaɗay.» 45 Ndam Zʉde ya tàra afa ga Mari a, tìpi ere ye ti Yezu àgray ni ti, mis ndahaŋ kay e kiɗiŋ gatay bu tə̀fəkia ahàr ka Yezu a. 46 Ay mis ndahaŋ e kiɗiŋ gatay bu tə̀rəkioru ka ndam Feriziyeŋ, tàŋgəhaɗi ere ye ti Yezu àgray ni ana tay. 47 Gəɗákani ga ndam maŋgalabakabu mis akaba Melefit ni akaba ndam Feriziyeŋ ni tàra tìcia ma na ti, tə̀zalakabu gəɗákani ga ndam Zʉde ni ɗek, tə̀ɗəm: «Nihi maslaŋa hini agray zlam magray ejep dal-dal ti, məgrum ahəmamam? 48 Tamal mə̀mbrəŋa naŋ a, naŋ àbu agroru zlam gayaŋ ni nahkay ti, mis ɗek atəfəki ahàr. Nahkay ndam Rom atəmbrəŋ leli do: etembeɗkaba ahay gəɗakani njəlatani geli na, etijiŋ jiba geli ɗek.» 49 Zal nahaŋ àbu, naŋ gəɗakani ga ndam maŋgalabakabu mis akaba Melefit ke vi nani, slimi gayaŋ Kayif. Naŋ nakəŋ àhi ana tay ahkado: «Lekʉlʉm ti kə̀sərum araŋa do simiteni. 50 Ahàr àɗəm mis bəlaŋ amət azuhva ndam jiba geli ɗek, ti ndam jiba geli ni tə̀mət ba. Amət nahkay ti aŋgivu ana kʉli ti kə̀sərum do waw?» 51 Àɗəm nahkay ti pakama gayaŋ gayaŋani do; àhəŋgaraya pakama ge Melefit a, aɗaba Kayif ti gəɗakani ga ndam maŋgalabakabu mis akaba Melefit ke vi nani palam. Pakama ge Melefit ya àhəŋgaraya ni ti nihi: ahàr àɗəm Yezu amət azuhva ndam jiba gayaŋ kwa. 52 Yezu amət ti azuhva ndam jiba gayaŋ ciliŋ do, amət ti ga maŋgasikabu ahàr ana bəza ge Melefit ya medeveni ka haɗ gərgərani ni ɗek. 53 Kwa ka fat nani nday nakəŋ tawayay makaɗ naŋ. 54 Yezu àra ècia ma gana ti, àmbrəŋ masawaɗani e kiɗiŋ ga ndam Zʉde bu hʉya, àsləka òru a kəsa nahaŋ vu. Kəsa nani ti təzalay Efreyim, kà gəvay ge gili. Àra enjʉa ti ànjəhaɗ eslini akaba ndam maɗəbay naŋ ni. 55 Ka sarta gani nani ti Pak, wuməri gəɗakani ga ndam Zʉde ni, ènjia wuɗak. Nahkay ndam Zʉde kay ya a kəsa ndahaŋ bu ni tàsləka, tòru a Zerʉzalem ga məbarani ti tîgi njəlatani day kwa ti tâgray wuməri ni. 56 Mis ni tòru tìnjʉa a Zerʉzalem a ti teheliŋ eri ga Yezu, ay ti tə̀di ahàr ndo. Ka ya ti nday tə̀bu a dalaka ga ahay gəɗakani ge Melefit ni bu nahəma, tə̀zlapay e kiɗiŋ gatay bu, tə̀ɗəm: «Kə̀humi ana ahàr mam? Kə̀humi ana ahàr ti amara ga magray wuməri na waw?» 57 Gəɗákani ga ndam maŋgalabakabu mis akaba Melefit ni akaba ndam Feriziyeŋ ni tawayay təgəs naŋ, nahkay tə̀hi ana mis ahkado: «Ku way way do tamal àsəra məlaŋ ga Yezu ya naŋ àbu na ti mə̂hi ana leli.»

Zeŋ 12

1 Vaɗ àvu muku tara tagray wuməri ga Pak ni ti Yezu òru a Betani a kəsa ga Lazar bu. Lazar ti naŋ ya ti àmət, mək Yezu àhəŋgaraba naŋ e kisim ba ni. 2 Eslini tə̀zalaki Yezu nakəŋ ka zlam məzumani. Òru ènjʉa ti Marta ahəlibiyu zlam məzumani ana tay, Lazar ti ni naŋ àbu azum zlam akaba mis ya tə̀zalay tay ni. 3 Ka ya ti tə̀bu təzum zlam ni ti Mari òru àna tersel ya təzalay nardu ni, njəlatani ge siŋgu kayani, telma ge litir. Àra ènjia àna naŋ a ti àbəki tersel ni ka asak ga Yezu cʉeni mək àtəmaɗkia àna məhər ga ahàr gayaŋ a. Nahkay ahay ni ɗek ezi tersel tersel a. 4 Eslini Zʉdas Iskariyot bəlaŋ ga ndam maɗəbay Yezu, naŋ ya aməsəkumoru Yezu ni, àɗəm ahkado: 5 «Siŋgu ge tersel ni jik diŋ diŋ mahkər ti tə̀səkumoru, tìdi siŋgu gani ana ndam talaga ndo ni ti kamam?» 6 Zʉdas àɗəm nahkay ti aɗaba awayay ndam talaga palam do, àɗəm nahkay ti aɗaba naŋ zal akal. Naŋ bay maŋgah siŋgu, ay ti naŋ àbu adafəŋa siŋgu na akal-akal a. 7 Ay Yezu àra ècia ma ga Zʉdas na ti àhi: «Mbrəŋ wal hini, kə̀həli muru ba. Àgray nahkay ti aɗaba naŋ àbu ajalakioru ahàr ka vaɗ ya ti anəməta, atəfiyu nu e eviɗ vu ni. 8 Ndam talaga zla nahəma, nday tə̀bu akaba kʉli kəlavaɗ. Ay nu zla ti ananjəhaɗ akaba kʉli kəlavaɗ do.» 9 Ndam Zʉde kay tàra tìcia Yezu naŋ a Betani ti tòru eslini. Tòru ti azuhva Yezu ciliŋ do; tòru ti ga moru mipi Lazar naŋ ya ti Yezu àhəŋgaraba naŋ e kisim ba ni daya. 10 Nahkay gəɗákani ga ndam maŋgalabakabu mis akaba Melefit ni tə̀zlapakabá, tə̀ɗəm: «Si mijiŋ Lazar daya kwa.» 11 Tə̀ɗəm nahkay ti aɗaba ndam Zʉde kay tə̀mbrəŋa tay a, tə̀gəskabu ma gatay ni va do, tə̀bu təfəki ahàr ka Yezu azuhva gayaŋ ya àhəŋgaraba Lazar a ni. 12 Hajəŋ gani mis kayani ya tòru a Zerʉzalem ga magray wuməri ga Pak ni tìcia Yezu ènjia a Zerʉzalem a wuɗak. 13 Nahkay nday nakəŋ tàkwahakabaya ahar ga təɓa a ahar va, mək tàhəraya a kəsa ni ba tə̀ŋgwivoru a ma vu. Nday tə̀bu takoru ti tàgray salalay, tàzləbay Yezu, tə̀ɗəm: «Hozana! Bay Melefit mə̂gri sulum gayaŋ ana maslaŋa ya ti ara àna slimi gayaŋ a, naŋ bay ga ndam Izireyel ni!» 14 Eslini Yezu àdi ahàr ana azoŋgu, mək àcəlkiyu katapla. Ere gani àgravu ti akaɗa ya ti àbu məbəkiani a Wakita ge Melefit bu nahkay hi ni: 15 «Ndam Siyoŋ, kə̀grum aŋgwaz ba. Mənjumoru, bay gekʉli naŋ tegi ara, àcəlkivabiya ka wur ga azoŋgu a.» 16 Ka sarta gani nani ti ndam maɗəbay Yezu ni tə̀sərkaba ere ya àgravu na ndo. Ka sarta ya ti Melefit àzoya Yezu a məlaŋ maslaɗani gayaŋ va day kwa ti ma ya ti Melefit àɗəmki a Wakita gayaŋ bu ni àŋgiaya a ahàr ba ana tay a. Nahkay tə̀sər zlam gani nani àgrakiva ka Yezu a akaɗa ya àbu məbəkiani na. 17 Ka fat ya ti Yezu àzalay Lazar, àhi «Həraya e mindiviŋ ba,» àhəŋgaraba naŋ e kisim ba ni ti, mis ya tôru eslini ni ɗek tìpia; nday nakəŋ tàŋgəhaɗi ma gani ana mis ndahaŋ ni. 18 Mis kay tə̀ŋgwivoru a ma vu ana Yezu ti azuhva tìcia gayaŋ ya àgray zlam magray ejep nani na. 19 Eslini ndam Feriziyeŋ ni tə̀zlapay e kiɗiŋ gatay bu, tə̀ɗəm: «Kìslʉmki ka araŋa do ni ti kipʉm do waw? Nihi mis ni ɗek tə̀bu taɗəbay naŋ ci ni.» 20 E kiɗiŋ ge mis ya tòru ga mazləbay Melefit ka sarta ga wuməri ni bu ni ti ndam Gres ndahaŋ day tə̀kibu ka tay. 21 Nday nakəŋ tə̀rəkioru ke Filip naŋ ga kəsa Beceyda ka haɗ Gelili ni. Tə̀hi: «Bay geli, leli mawayay məbakabu ahàr akaba Yezu.» 22 Filip àra ècia ma gatay na ti àrəkioru ka Andre, mək nday cʉeni tə̀rəkioru ka Yezu, tə̀hi ma gani. 23 Yezu àra ècia ma gana ti àhi ana tay ahkado: «Nihi sarta ya Melefit azoru nu Wur ge Mis a məlaŋ maslaɗani gayaŋ bu ni ènjia. 24 Nəhi ana kʉli nahəma, hilfi ga hay tamal àdiyu a haɗ vu ndo, èzi ndo ni ti, naŋ àbu nahkay zlam gayaŋ. Ay tamal èzia day kwa ti eri gani afətaya, aɗək, abay ahàr, ewi bəza kay. 25 Maslaŋa ya ti awayay ajəgur sifa gayaŋ ti àmət ba ni ti emijiŋ; ay maslaŋa ya ti awayay sifa gayaŋ a duniya hini bu do ni ti aməjəgur, amələbu àna sifa ya àndav ɗay-ɗay do ni sawaŋ. 26 Tamal mis awayay məgru tʉwi nahəma, mâɗəbay nu. Ka məlaŋ ya nu nə̀vu ni ti bay məgru tʉwi ni day amələbu eslini. Tamal mis ègia bay məgru tʉwi a ti, Baba amazləbay naŋ.» 27 Yezu àɗəm keti: «Nihi ti məɓəruv àbu atukaba. Nəɗəm hi ti mam? Nə̂ɗəm: “Bəba, nə̀cakay daliya a sarta hini bu ba” zla tək? Nə̀ɗəm nahkay do, aɗaba nàra ti ga macakay daliya a sarta hini bu. 28 Bəba, gray zlam ti mis tâzləbay kur.» Eslini dəŋgu àhəndabiyu a huɗ melefit bu nahkay hi: «Nàgra zlam ya ti mis tâzləbaki nu na àndava, anagray zlam nahaŋ keti ti mis tâzləbaki nu.» 29 Mis ye eslini ni tàra tìcia dəŋgu ya àhəndabiya na ti mis ndahaŋ e kiɗiŋ gatay bu tə̀ɗəm: «Avər àdi aday.» Mis ndahaŋ ti ni tə̀ɗəm: «Məslər ge Melefit àhibiyu ma.» 30 Ay Yezu àhi ana tay ahkado: «Dəŋgu hini ya àhəndabiyu ni ti, àhənday ti azuhva nu do, àhənday ti azuhva kʉli sawaŋ. 31 Nihi ti sarta ga magrafəŋa seriya kè mis ga duniya ènjia, nihi ti tara tagaray bay magədavani ya agur duniya ni. 32 Ay nu ti ka fat ya ti atəzoru nu agavəla nahəma, anazalakaboru mis ɗek afa goro.» 33 Yezu àɗəm nahkay ti awayay aɗafaki ahəmamam amara məmət ni. 34 Eslini mis dal-dalani ni tə̀həŋgrifəŋ, tə̀hi: «Leli mèjeŋga a Wakita ge Melefit ni bu ni ti, Krist Bay gəɗakani ya amara ni ti amələbu ga kaŋgay-kaŋgayani. Ay nak kə̀ɗəm ahàr àɗəm tə̂zoru Wur ge Mis agavəla ti kamam? Wur ge Mis nani ti way?» 35 Yezu àhəŋgrifəŋ ana tay, àhi ana tay ahkado: «Maslaɗani àbu aslaɗi ana kʉli ga hayaŋani. Ka ya ti maslaɗani àbu ti sawaɗumoru; do ni ziŋ-ziŋeni ara adi ahàr ana kʉli. Aɗaba maslaŋa ya ti asawaɗay e ziŋ-ziŋeni bu ni ti àsər məlaŋ ya akoru ni do. 36 Ka ya ti maslaɗani àbu e kiɗiŋ gekʉli bu ni ti, fumki ahàr ka Bay ya ti avi maslaɗani ana kʉli ni. Tamal kəgrum nahkay ti kigʉm ndam maslaɗani.» Yezu àra àɗəma ma nana ti, àsləka, àɓufəŋa kà tay a. 37 Ku tamal Yezu àgra zlam magray ejep a dal-dal kè meleher ge mis dal-dalani na nəŋgu ni, mis ni tàwayay məfəki ahàr ndo. 38 Nahkay pakama ge Melefit ya Izayi àhəŋgri ana mis ni àgrava àndava. Pakama gani nani ti nahkay hi: «Bay goro, ma geli ya ti mə̀ɗəm ni ti, way àgəskabá way? Bay geli àɗəfiaba njəɗa gayaŋ a ti ana way?» 39 Ndam nday nani tə̀fəki ahàr ka Yezu do ni ti, Izayi àɗəmkia ma ka tay a daya. Àɗəm ahkado: 40 «Melefit àwulufa tay a, àgray ti tə̀jalay ahàr sulumani ba. Àgray nahkay ti, awayay ti tìpi divi ba, tə̀sər zlam ba, awayay ti tàmbatkaba majalay ahàr gatay a ba daya. Nahkay Melefit àɗəm: “Tamal tàmbatkaba ti, akal nàhəŋga tay a.”» 41 Izayi àɗəm nahkay ti aɗaba èpia Yezu naŋ àbu a maslaɗani ge Melefit ba àndava. Àra èpia naŋ a nahkay ti àɗəmki ma. 42 Ku tamal nahkay nəŋgu ni mis ndahaŋ e kiɗiŋ ga gəɗákani ga ndam Zʉde bu kay tə̀fəkia ahàr ka Yezu a. Ay ti tə̀hi ma gani ana mis vay-vay ndo, aɗaba aŋgwaz àwərfəŋa tay kà ndam Feriziyeŋ a, tə̀ɗəm bi atəhi ana tay tə̀huriyu a ahay ga mahəŋgalavù Melefit vu va ba. 43 Nahkay nday gani tawayay magray zlam ya ti àɓəlafəŋ kè mis ni àtama ya ti àɓəlafəŋ kè Melefit na sawaŋ. 44 Yezu àɗəm ma kay kay, àɗəm: «Maslaŋa ya ti afəku ahar nahəma, afəki ahàr ti ka nu do; afəki ahàr ka Bay ya ti àslərbiyu nu ni. 45 Maslaŋa ya ti naŋ àbu epi nu ni ti, naŋ àbu epi Bay ya ti àslərbiyu nu ni. 46 Nu nàra a duniya va ti ga maslaɗi məlaŋ ana mis. Nahkay ku way way do afəku ahàr ti ànjəhaɗ e ziŋ-ziŋeni bu va do. 47 Tamal mis ècia ma goro na mək àgəskabu do nahəma, bay ya agrafəŋa seriya ni ti nu do. Aɗaba nu nàra a duniya va ti ga mahəŋgay mis, do ni ti ga magrafəŋa seriya kà tay a do. 48 Maslaŋa ya ti àwayay nu do, àgəskabu pakama goro do ni ti, seriya aməgəs naŋ: ka mandav ga duniya atəgəs naŋ àna seriya ti àna pakama goro ya nə̀ɗəm ni ɗek. 49 Ay ma goro ya nə̀ɗəm ɗek ni ti nu nə̀ɗəm àna ahàr goro goroani do. Pakama goro ya nə̀hi ana mis akaba ya nə̀cahi ana mis ni ti Baba goro àslərbiyu nu ga məhiani ana tay. 50 Iy nə̀səra, pakama ga Baba goro ya àhi ana mis ni ti, tamal tə̀gəskabá ti nday tə̀bu àna sifa ya àndav ɗay-ɗay do ni àndava. Pakama goro ya nə̀ɗəm ni, nə̀ɗəm ti akaɗa ga Baba ya àhu nə̂hi ana mis ni.»

Zeŋ 13

1 Àgəjəni vaɗ bəlaŋ ga mara magray wuməri ga Pak ti, Yezu àsəra sarta gayaŋ ga masləkana a duniya ba ga moroni afa ga Bəŋani ènjia. Yezu àwaya ndam gayaŋ ya taɗəbay naŋ a duniya bu na dal-dal, nahkay ku ka ya ti ara amət ni àmbrəŋ mawayay tay do. 2 Yezu akaba ndam maɗəbay naŋ ni tə̀bu təzum zlam ga məlakarawa. Ka sarta gani nani Seteni àvia majalay ahàr ana Zʉdas wur ga Simu Iskariyot ga məsəkumoru Yezu a àndava. 3 Yezu ti àsəra Melefit àvia njəɗa ga məgur zlam a ɗek. Àsəra naŋ àsləkabiya afa ge Melefit a, amaŋgoru afa gani daya. 4 Àsəra nahkay ti ècikfiŋa kà zlam məzumani na cəkwaɗ, àzakaba mugudi gayaŋ na mək àzay azana nahaŋ, àwəlvu àna naŋ dərkəɗ. 5 Eslini àcahviyu yam e hijiɗ vu, ànjəki ka məbari asak ana ndam maɗəbay naŋ ni mək atəmaɗkia yam na ka asak gatay na àna azana ya àwəlvu àna naŋ na. 6 Àra ènjikia ka Simu Piyer a ga məbari asak na ti, Simu Piyer nakəŋ àhi ahkado: «Nak ti kabaru asak aw, Bay goro!» 7 Eslini Yezu àhəŋgrifəŋ, àhi: «Nihi ti ere ye ti nu nagray ni kə̀sərkaba faŋ do, akəsərkaba ti kama kwa.» 8 Piyer àhi: «Ɗay-ɗay nàwayay ti nak kâbaru asak do.» Yezu àhi: «Tamal nàbaruk ndo ni ti nak mis goro do.» 9 Simu Piyer nakəŋ àhi: «Tamal nahkay ti kàbaru asak ciliŋ ba: baru ahar akaba ahàr daya, Bay goro ni.» 10 Yezu àhi: «Maslaŋa ya àbara ni ti abaray asak ciliŋ do ni ti àbaray vu gayaŋ va do, aɗaba vu gayaŋ ni ɗek ègia njəlatana. Lekʉlʉm ti kìgʉma njəlatana, ay ti lekʉlʉm ɗekeni do.» 11 Yezu àhi ana tay «Lekʉlʉm ɗek njəlata do» ni ti aɗaba àsəra maslaŋa ya ti ara asəkumoru naŋ na àndava. 12 Yezu nakəŋ àra èndeveriŋa məbari asak ana tay a ti, àzay mugudi gayaŋ ni, àfakabu mək àŋga ka məlaŋ ga zlam məzumani na. Eslini àhi ana tay ahkado: «Ere ye ti nə̀gri ana kʉli ni ti kə̀səruma waw? 13 Lekʉlʉm kə̀bum kazalum nu “Mʉsi, Bay geli” ti, nani ti jiri gekʉli, aɗaba nu Mʉsi gekʉli, nu Bay gekʉli eɗeɗiŋ. 14 Ay nu Mʉsi gekʉli, Bay gekʉli ni tekeɗi nàbaria asak ana kʉli a ti, ahàr àɗəm e kiɗiŋ gekʉli bu ni ti maslaŋa nahaŋ mə̂bari asak ana maslaŋa nahaŋ. Njumki kwa kani, kəgrumoru kama kama. 15 Ere ye ti nə̀gri ana kʉli kani ni ti nə̀ɗəfiki divi ana kʉli: grumi ana mis akaɗa goro ya nə̀gri ana kʉli ni. 16 Nəhi ana kʉli nahəma, maslaŋa ya agri tʉwi ana mis ni ti àtam bay ya ti naŋ agri tʉwi ni do. Maslaŋa ya təslər naŋ ni ti àtam bay ya ti àslər naŋ ni do. 17 Nihi kə̀səruma nahkay nahəma, grum tʉwi akaɗa ya nə̀ɗəfiki ana kʉli kani ni. Tamal kəgrum nahkay ti akəmərumvu.» 18 Yezu àhi ana tay keti: «Ma goro ya nə̀ɗəm ni ti nə̀ɗəmki ke kʉli, lekʉlʉm ɗekeni do, aɗaba nə̀səra ndam goro ya nə̀daba tay a na. Àbu məbəkiani a Wakita ge Melefit ni bu nahkay hi: “Maslaŋa ya ti mə̀bu məzumkabu zlam kəlavaɗani ni àmbatuva ahàr va.” Ahàr àɗəm pakama nani agravu kwa. 19 Wuɗaka ere gani ara agravu ti nəhivù ana kʉli. Nə̀hiva ana kʉli a ti, ka ya ti ere gani amagravu ni ti akəsərumki nu gani, nu nə̀bu. 20 Nəhi ana kʉli nahəma, maslaŋa ya ti àgəskabá maslaŋa ya ti nəslər naŋ na ti àgəskabá nu nuana daya. Maslaŋa ya ti àgəskabá nu a ni ti àgəskabá Bay ya ti àslərbiyu nu na daya.» 21 Yezu àra àɗəma ma nahkay ti ɓəruv àtikaba. Àɗəm: «Nəhi ana kʉli nahəma, biliŋ gekʉli aməsəkumoru nu.» 22 Ndam maɗəbay naŋ ni tàra tìcia ma gayaŋ na ti tàmənjavu e eri vu e eri vu, tə̀ɗəm: «Àɗəmki ma hini ti àki ka way?» 23 Eslini bəlaŋ e kiɗiŋ ga ndam maɗəbay Yezu ni bu, naŋ ya ti Yezu awayay naŋ kayani ni, naŋ àbu priɗ kà gəvay ga Yezu. 24 Nahkay Simu Piyer àdaɗi ahàr, awayay ti mîhindifiŋa slimi ga maslaŋa nana kà Yezu a. 25 Naŋ ya ti Yezu awayay naŋ kayani ni àra àsəra ere ye ti Piyer awayay ahi na ti, àzoru ahàr gayaŋ gwar ka məɓəruv ga Yezu mək èhindifiŋa kà Yezu a, àhi: «Maslaŋa gani nani ti way, Bay goro?» 26 Yezu àhəŋgrifəŋ, àhi: «Maslaŋa ya ti anasaya vaŋgwala, anahəndakiaya eli a, anəvi ni ti, nani naŋ gani.» Àra àɗəma nahkay ti àhəndakiaya eli a ka vaŋgwala na mək àvi ana Zʉdas wur ga Simu Iskariyot. 27 Zʉdas nakəŋ àra àza vaŋgwala na ti Seteni àhuriviyu hʉya. Nahkay Yezu àhi: «Tʉwi gayak ya kara kagray ni ti gray weceweci.» 28 E kiɗiŋ gatay ya tə̀zum zlam ni bu ni maslaŋa ya ti àsər Yezu àhi ma gani ana Zʉdas kamam ni ti àbi, si Zʉdas Zʉdasani ciliŋ. 29 Zʉdas ti naŋ bay məgəsi siŋgu ana tay, nahkay ti mis ndahaŋ e kiɗiŋ ga ndam maɗəbay Yezu ni bu tə̀hi ana ahàr bi Yezu àhi ana Zʉdas môru mə̂səkumbiya zlam ga magray wuməri a, ahkay do ni bi àhi môru məvi zlam ana ndam talaga. 30 Ay Zʉdas àra àza vaŋgwala na ti àhəraya e mite va hʉya. Sarta gani nani ti məlavaɗ. 31 Zʉdas nakəŋ àra àsləka ti Yezu àhi ana nday ndahaŋ ni ahkado: «Nu Wur ge Mis nahəma, nihi ti sarta goro ènjia, mis atəsər nu gəɗakani, atazləbay nu. Nahkay azuhva nu ti mis atəsər Melefit day naŋ gəɗakani, atazləbay naŋ. 32Mis atəsər Melefit naŋ gəɗakani atazləbay naŋ nahkay ti, Melefit Melefiteni àna ahàr gayaŋ day ara agray ti mis tə̂sər nu Wur ge Mis ti nu gəɗakani, ara agray ti tâzləbay nu. Ara agray nahkay wuɗak. 33 «Bəza goro ni, nara nəmbərbu kʉli wuɗak, sarta goro àvu kay va bi. Anasləka ti, akəɗəbum məlaŋ goro. Ay ma goro ya nə̀hi ana ndam Zʉde ni ti nəhi ana kʉli daya: Məlaŋ goro ya anoru ni ti lekʉlʉm ekinjʉmiyu koksah. 34 Nihi nahəma nəɗəfiki divi mʉweni ana kʉli, ahàr àɗəm kəgrum kwa. Divi gani nihi: wayumvu. Nawayay kʉli, nahkay ahàr àɗəm lekʉlʉm day wayumvu akaɗa goro ya nàwayay kʉli ni. 35 Tamal kawayumvu nahkay ti, mis ɗek atəsər lekʉlʉm ndam maɗəbay nu.» 36 Eslini Simu Piyer àhi ahkado: «Kara kakoru eley, Bay goro?» Yezu àhəŋgrifəŋ, àhi: «Məlaŋ goro ya nara nakoru ni ti, kìsliki maɗəboru nu nihi koksah. Ay kama kama ti akaɗəboru nu.» 37 Piyer àhi: «Bay goro, ku takaɗ nu azuhva nak nəŋgu ni nəgəskabu. Nahkay ti nìsliki maɗəboru kur nihi koksah ti kamam?» 38 Yezu àhi: «Kə̀ɗəm ku takaɗ kur azuhva nu nəŋgu ni kəgəskabu ti eɗeɗiŋ aw? Nəhuk nahəma: wuɗaka agwazl azlah ti akəɗəm sak mahkər kə̀sər nu do timey!»

Zeŋ 14

1 Yezu àhi ma ana ndam maɗəbay naŋ ni keti, àhi ana tay ahkado: «Araŋa àhəli ahàr ana kʉli ba. Fumki ahàr ke Melefit; fumku ahàr daya. 2 Afa ga Baba goro ti məlaŋ àbiyu kay. Nə̀hia ana kʉli a nakoru nəslamativù məlaŋ ana kʉli. Tamal məlaŋ ni aləbiyu bi ti, akal nə̀hi ana kʉli ndo waw? 3 Ka ya ti anəslamativabiya məlaŋ na ana kʉli a ni ti anaŋga afa gekʉli a, anəhəloru kʉli afa goro, ti lekʉlʉm kânjəhaɗum ka məlaŋ goro ya nanjəhaɗ ni bilegeni. 4 Məlaŋ goro ya nakoru ni ti, lekʉlʉm kə̀səruma divi gana àndava.» 5 Tumas àhi: «Bay goro, məlaŋ ya kakoru ni tekeɗi mə̀sər do ni ti, məsər divi gani ti ahəmamam?» 6 Yezu àhi ahkado: «Divi, jiri, sifa ti nu gani. Maslaŋa àbi akoru afa ga Baba àna divi nahaŋ bi, si àna nu kwa. 7 Tamal kə̀səruma nu a ti akal kəsərum Baba daya. Ay nihi nəŋgu kə̀səruma naŋ a, kìpʉma naŋ a àndava.» 8 Eslini Filip àhi: «Bay goro, ɗəfiki Bəbuk ana leli ti, nahkay èslia geli a hʉya.» 9 Yezu àhi: «Nihi nə̀pəsa akaba kʉli a ti, kə̀sər nu do kekileŋa waw, Filip? Maslaŋa ya èpia nu a ti èpia Baba. Kə̀hu nə̂ɗəfiki Baba ana kʉli ti kamam? 10 Nu nə̀bu akaba Baba akaɗa mis bəlaŋ, Baba day naŋ àbu akaba nu akaɗa mis bəlaŋ ti kə̀gəskabu do aw? Ma goro ya nəhi ana kʉli ni ti nə̀hi ana kʉli àna ahàr goro goroani do. Agray tʉwi ti Baba naŋ ya àbu akaba nu akaɗa mis bəlaŋani ni sawaŋ. Naŋ àbu agray tʉwi ti akaɗa gayaŋ ya awayay ni. 11 Gəsumuki ma goro ya nə̀hi ana kʉli: “Nu nə̀bu akaba Baba akaɗa mis bəlaŋ, Baba day naŋ àbu akaba nu akaɗa mis bəlaŋ” ni. Ay ku tamal kə̀gəsumkabu ma hini ya nə̀hi ana kʉli ni do nəŋgu ni, gəsumkabá ma gana azuhva tʉwi ya nə̀bu nagray na. 12 «Nəhi ana kʉli nahəma, maslaŋa ya ti àfəkua ahàr a ti amagray tʉwi akaɗa goro ya nə̀bu nagray ni. Maslaŋa gani nani amagray tʉwi amatam goro ya nə̀bu nagray ni, aɗaba nə̀bu nasləka nakoru afa ga Baba. 13 Tamal kə̀səruma lekʉlʉm ndam goro mək kihindʉm zlam azuhva nani nahəma, anagray. Anagray nahkay ti aɗaba nawayay ti mis ɗek tâzləbay Baba àna tʉwi goro ya nagray ni. 14 Nahkay tamal kihindʉmfua zlam a aɗaba lekʉlʉm ndam goro ti anagray.» 15 «Tamal kawayum nu ti akəgrum ere ye ti nə̀hi ana kʉli grum ni. 16 Nahkay ti nu anahəŋgalay Baba mək aməsləribiyu Maslaŋa nahaŋ ana kʉli ga məjənaki kʉli, ti mânjəhaɗ akaba kʉli ga kaŋgay-kaŋgayani. 17 Naŋ ti Məsuf Jireni. Ndam ga duniya tìsliki məgəskabu naŋ koksah, aɗaba tìpi naŋ do, tə̀sər naŋ do daya. Ay lekʉlʉm ti kə̀səruma naŋ a àndava, aɗaba naŋ àbu akaba kʉli, aməhuriviyu ana kʉli a vu vu. 18 Anəmbrəŋ kʉli ti kîgʉm bəza kuɗa do: anəŋgəkia ke kʉli a. 19 Sarta àvu gʉzit ti ndam ga duniya etipi nu va do, lekʉlʉm ti ekipʉm nu aɗaba nu nə̀bu àna sifa, lekʉlʉm day akəlumbu àna sifa. 20 Ka fat nani ti akəsərum nu nə̀bu akaba Baba akaɗa mis bəlaŋ, lekʉlʉm akaba nu, nu day akaba kʉli akaɗa mis bəlaŋ. 21 Maslaŋa ya ti ècia ere ye ti nə̀hi ana kʉli grum na, àmbrəŋ do agray ni ti, maslaŋa nani ti awayay nu eɗeɗiŋ. Tamal mis awayay nu ti, Baba goro amawayay naŋ, nu day anawayay naŋ, anaŋgazlivu aməsər nu.» 22 Eslini Zʉd èhindifiŋa ma. (Zʉd ti naŋ nani Zʉdas Iskariyot do.) Àhi: «Bay goro, kə̀ɗəm akaŋgazlivu ana leli ciliŋ, kàŋgazlivu ana ndam ga duniya do ni ti ahəmamam?» 23 Yezu àhəŋgrifəŋ, àhi: «Tamal mis awayay nu nahəma, aməgəskabu ere ye ti nə̀hi ana mis tâgray ni. Nahkay ti Baba goro amawayay naŋ, mək leli ata Baba amara afa ga maslaŋa gani nana, amanjəhaɗkabu akaba naŋ. 24 Ay maslaŋa ya ti àwayay nu do ni ti àgəskabu ere ye ti nə̀hi ana mis tâgray ni do. Ma ya ti nəhi ana kʉli, kə̀bum kicʉm ni ti ma ga ahàr goro goroani do: ma ga Baba, Bay ya àslərbiyu nu ni. 25 Ma hini ti nə̀hia ana kʉli a ka ya ti nu nə̀bu akaba kʉli na. 26 Ay Maslaŋa ya ti Baba aməsləribiyu ana kʉli ga məjənaki kʉli ni ti, aməslərbiyu naŋ ti azuhva nu. Maslaŋa nani ti Məsuf Njəlatani: naŋ gani amacahi zlam ɗek ana kʉli, mək amagray ti kə̂sərumki ka zlam ya nə̀hi ana kʉli ni ɗek. 27 «Ere ye ti nəmbribu ana kʉli ni ti manjəhaɗ sulumani. Anagray ti kânjəhaɗum àna sulumani goro ya nəgri ana kʉli ni. Nəgri sulum gani nani ana kʉli ti akaɗa ga ndam ga duniya ya tagray sulum ni do. Aŋgwaz àwər kʉli ba, araŋa àhəli ahàr ana kʉli ba. 28 Kìcʉma, nə̀hi ana kʉli ahkado: “Nasləka, kələŋ gani anaŋga afa gekʉli a.” Tamal kawayum nu ti, nasləka ti akal kəmərumvu, aɗaba nakoru afa ga Baba. Baba ti àtam nu. 29 Zlam gani ti àgravu faŋ ndo, ay nə̀hi ma gani ana kʉli kwa nihi ti, aɗaba nawayay ti ka ya ti amagravu ni ti kə̂fumku ahàr. 30 Nihi ti nindeveriŋ ma goro ya nəhi ana kʉli ni wuɗak, aɗaba bay magədavani ya agur duniya ni naŋ àbu ara. Maslaŋa gani nani ti èslikʉ do, 31 ay naŋ àbu ara ti, ti ndam ga duniya tə̂sər nu nawayay Baba akaba tə̂sər nagray ere ye ti Baba àhu nâgray ni. Cikʉmaba, məsləkuma ahalay a.»

Zeŋ 15

1 «Məŋ ga zlam eɗeɗiŋeni ti nu gani. Bay ya àjav ni ti Baba. 2 Ndam goro ti akaɗa ahar ga məŋ ga zlam ni. Tamal ahar gani bəlaŋ èwi bəza do ni ti Baba ekelfiŋa. Ay tamal ahar gani ewi bəza ti Baba aslamalay àna məbafəŋana, awayay ti mîwikivu bəza. 3 Ma goro ya nə̀hi ana kʉli ni ti àslamala kʉli a, kìgʉma njəlatana. 4 Lekʉlʉm akaba nu ti mìgʉma akaɗa mis bəlaŋ a; nahkay njəhaɗuma akaba nu a akaɗa goro ya nanjəhaɗ akaba kʉli na. Ahar ga məŋgəhaf ti tamal àfəŋ kà məŋgəhaf ni bi nahəma, ahar gani nani èwi bəza koksah. Lekʉlʉm day tamal kə̀fum kà nu bi nahəma, akəgrumu tʉwi koksah. 5 «Məŋgəhaf ti nu; lekʉlʉm ti ahar gani. Maslaŋa ya ti naŋ àbu akaba nu, nu day nu nə̀bu akaba naŋ nahəma, maslaŋa gani nani agru tʉwi sulumani, naŋ akaɗa ga ahar ga məŋgəhaf ya àfəŋ kà məŋ gani, ewi bəza kay ni. Nə̀ɗəm nahkay ti aɗaba tamal nu nə̀kibu ke kʉli bi ti kìslʉmki magray tʉwi koksah. 6 Tamal mis naŋ àbi akaba nu va bi ti, naŋ akaɗa ahar ga məŋgəhaf ya tèkelfiŋa tìzligoya, ekʉli ni. Ahar ga məŋgəhaf nday nani ti taŋgaskabu təbiyu a aku vu, aku azumaba ni. 7 Tamal lekʉlʉm kə̀bum akaba nu, kə̀bum kəgəsumkabu ma goro nahəma, hindʉm ere ye ti kawayum ni, nahkay Melefit aməvi ana kʉli. 8 Ere ye ti agray ti mis tâzləbaki Baba goro ni ti nihi: grum tʉwi kay akaɗa ga ahar ga məŋgəhaf ya ewi bəza kayani ni, nahkay mis təsər lekʉlʉm ndam maɗəbay nu eɗeɗiŋ. 9 Baba awayay nu, nu day nawayay kʉli akaɗa gayaŋ ya awayay nu ni. Nawayay kʉli nahkay ti, njəhaɗuma akaba nu a. 10 Nu ti nə̀bu nagray ere ye ti Baba àhu gray ni; nahkay awayay nu, nu nanjəhaɗ akaba naŋ. Nahkay day tamal lekʉlʉm kəgrum ere ye ti nə̀hi ana kʉli grum ni ti nawayay kʉli, kanjəhaɗum akaba nu. 11 «Nə̀hi ana kʉli nahkay ti, nawayay ti kə̂mərumvu akaɗa goro ya nəmərvu ni. Nawayay ti kə̂mərumvu dal-dal, ti məmərani gani mîsliva ana kʉli a vu va. 12 Ere ye ti nəhi ana kʉli grum ni ti nihi: Wayumvu akaɗa goro ya nawayay kʉli ni. 13 Tamal mis awayay zləbəba gayaŋ, àgəskabá ti tâkaɗ naŋ azuhva tay a nahəma, maslaŋa nani ti maslaŋa àbi awayay mis àtam gayaŋ ni bi. 14 Tamal lekʉlʉm kəgrum ere ye ti nə̀hi ana kʉli grum ni ti, lekʉlʉm zləbəba goro. 15 Nə̀zalay kʉli ndam məgru tʉwi va do, aɗaba bay magray tʉwi ti àsər ere ye ti bay ya naŋ agri tʉwi agray ni do. Nəzalay kʉli ti zləbəba goro, aɗaba nə̀hia ere ye ti Baba goro àhu na ɗek ana kʉli a. 16 Ŋgay lekʉlʉm kə̀dumaba nu a ti kə̀humi ana ahàr ba. Nu nə̀daba kʉli a sawaŋ. Nə̀daba kʉli a ti ga məgrumu tʉwi nday hini: mara məgru zlam sulumani akaɗa ga ahar ga məŋgəhaf ya ewi bəza sulumani ni. Zlam gani nday nani sulumani ni ti nawayay tìji ba. Nahkay tamal kə̀səruma lekʉlʉm ndam goro mək kihindʉmfiŋa zlam kà Baba azuhva nani nahəma, Baba aməgri ana kʉli. 17 Ere ye ti nəhi ana kʉli grum ni ti nihi: Wayumvu.» 18 «Tamal ndam ga duniya tə̀bu tizirey kʉli ti, səruma tìzirey nu enji gekʉli. 19 Tamal lekʉlʉm ndam ga duniya ti akal ndam ga duniya tawayay kʉli, aɗaba tawayay ndam gatay. Ay lekʉlʉm ti ndam ga duniya do. Nu nə̀daba kʉli a ti nèdekaba kʉli akaba ndam ga duniya; nday gani tizirey kʉli ti azuhva nani. 20 Sərumki ka ma goro ya nə̀hi ana kʉli: “Maslaŋa ya agri tʉwi ana mis ni ti àtam bay ya ti naŋ agri tʉwi ni do” ni. Tamal tə̀grua daliya ti atəgri daliya ana kʉli daya. Tamal tə̀gəsukia ma ti atəgəsiki ma ana kʉli daya. 21 Atəgri zlam nday nani ɗek ana kʉli ti azuhva lekʉlʉm ndam goro, aɗaba tə̀sər Bay ya ti àslərbiyu nu ni do. 22 Tamal nàra ndo, nə̀hi ma ana tay ndo nahəma, akal nday ndam magudar zlam do. Ay ti nàra, nə̀hia ma ana tay a, nahkay nday ndam magudar zlam, atətamfəŋa kà seriya koksah. 23 «Maslaŋa ya ti ezirey nu ni ti maslaŋa gani nani ezirey Baba daya. 24 Tamal nàgray zlam ya mis tàgray ɗay-ɗay do ni e kiɗiŋ gatay bu ndo ni ti, akal nday ndam magudar zlam do. Nihi ti tìpia tʉwi goro ya nàgray na. Ay ku tìpia nəŋgu ni tə̀bu tizirey nu, tə̀bu tizirey Baba daya. 25 Ay agravu nahkay ti, ti pakama ya àbu məbəkiani e Divi gatay bu ni mâgravu. Pakama gani nani ti nihi: “Tìzirey nu masakani, day nə̀gri araŋa ana tay ndo.” 26 «Ay Məsuf ge jiri naŋ ya anəsləribiyu ana kʉli kwa afa ga Baba ni, amara ga məjənaki kʉli a. Amasləkabiya kwa afa ga Baba eminjikia ke kʉli a ti amagrakua sedi a. 27 Lekʉlʉm day akəgrumkua sedi a, aɗaba kwa ka mənjəki ge tʉwi goro lekʉlʉm kə̀bum akaba nu.»

Zeŋ 16

1 «Nə̀hi ma gani ana kʉli ti aɗaba nawayay ti kə̂fumku ahàr, kə̀mbrəŋum ba. 2 Atagaraya kʉli a ahay ga mahəŋgalavù Melefit ba. Ay atəgri ana kʉli nahkay ciliŋ do: sarta nahaŋ amara; ka sarta gani nani ti maslaŋa ya ti amabazl kʉli ni ti aməhi ana ahàr agray ere ye ti Melefit awayay ni. 3 Atagray nahkay ti aɗaba tə̀sər Baba do, tə̀sər nu do daya. 4 Ay nə̀hi ma gani ana kʉli ti, aɗaba sarta gani eminjia ti akəsərumki ka ma gani, nə̀hia ana kʉli a àndava. Ma gani hini nə̀hi ana kʉli ka mənjəki ge tʉwi geli ndo, aɗaba nu nə̀bu akaba kʉli mba.» 5 Yezu àɗəm keti: «Nihi ti nasləka, nakoru afa ga Bay ya ti àslərbiyu nu ni. Ay “Kəkoru eley” ti maslaŋa àbi ehindifua e kiɗiŋ gekʉli ba bi. 6 Ma hini ya nə̀hi ana kʉli ni ti àhəlia ahàr ana kʉli a. 7 Ay ma hini ya nəhi ana kʉli ni ti ma ge jiri: hojo nasləka, aɗaba tamal nàsləka ndo ni ti, maslaŋa ya ti nə̀ɗəm anəsləribiyu ana kʉli ga məjənaki kʉli ni ti amara do. Nahkay anasləka ti akəŋgətum zlam sulumani, aɗaba tamal nasləka ti anəsləribiyu naŋ ana kʉli. 8 Ka ya ti eminjia ni ti aməɗəfiaba zlam ana ndam ga duniya; zlam gani nani ti ndam ga duniya tə̀sərkaba lala do. Ere ye ti aməɗəfiaba ana tay a, awayay ti tə̂sərkaba lala ni ti nihi: zlam magudarani ge mis, jiri ge Melefit, seriya ge Melefit. 9 Àki ka zlam magudarani ti aməɗəfiaba ana tay a nday tə̀bu tagudar zlam, tə̀sər do. Zlam gatay ya tagudar ni ti nihi: tə̀fəku ahàr do. 10 Àki ke jiri ge Melefit ti aməɗəfiaba ana tay a tə̀sər ma gani do. Ere ye ti aɗafaki Melefit naŋ jireni ni ti nihi: nasləka nakoru afa ga Baba, ekipʉm nu e eri vu va do. 11 Àki ka seriya ge Melefit ti aməɗəfiaba ana tay a tə̀sər ma gani do. Ere ye ti aɗəfiki seriya ge Melefit ana tay ni ti nihi: bay magədavani ya agur duniya ni ti Melefit àgəsa naŋ àna seriya àndava. 12 «Zlam àbu kay nawayay nəhikivu ana kʉli, ay ti nə̀hi ana kʉli do, aɗaba kìslʉmki məgəskabani faŋ do. 13 Məsuf ge jiri ni eminjia ti aməɗəfiki divi ge jiri ana kʉli, aməhiaba ma gana ɗek ana kʉli a. Ma ya ti aməhi ana kʉli ni ti ma ga ahàr gayaŋ gayaŋani do; aməhi ana kʉli ti ma ya ti naŋ èci ni ciliŋ. Aməhi ere ye ti amagravu ni ɗek ana kʉli daya. 14 Amaɗafaki ahəmamam nu gəɗakani ni, aɗaba emici ma goro mək aməhi ma gani ana kʉli. 15 Zlam ga Baba ɗek ti goro. Nə̀ɗəm Məsuf ge jiri ni emici ma goro, aməhi ana kʉli ni ti azuhva nani.» 16 Yezu àhi ana tay keti: «Kama gʉzit ti ekipʉm nu do, ay kama gani gʉzit ti ekipʉm nu keti.» 17 Ndam maɗəbay naŋ ni tàra tìcia ma gayaŋ na ti ndahaŋ e kiɗiŋ gatay bu tə̀ɗəm: «Àɗəm: “Kama gʉzit ti ekipʉm nu do, ay kama gani gʉzit ti ekipʉm nu keti” akaba àɗəm: “Nasləka nakoru afa ga Baba” ti, àɗəm nahkay ti ahəmamam?» 18 Tə̀ɗəm: «Ma gayaŋ ya àɗəm “Kama gʉzit” ni ti awayay aɗəmvaba mam? Leli mìciaba ma gana do.» 19 Yezu àra àsəra tawayay tihindifiŋa ma na ti àhi ana tay ahkado: «Ma goro ya nə̀hi ana kʉli: “Kama gʉzit ti ekipʉm nu do, ay kama gani gʉzit ti ekipʉm nu keti” ni ti, kə̀bum kazlapumki e kiɗiŋ gekʉli bu. 20 Nəhi ana kʉli nahəma, lekʉlʉm ti ekitʉwʉm, akandavum kuɗa, ay ndam ga duniya ti ni atəmərvu. Akəgrum daliya, ay daliya gekʉli ni amandav, mək akəmərumvu. 21 «Nazay mazavu gani: akəgrum daliya akaɗa ga wal a huɗ awayay ewi wur ni. Wal ni agray daliya aɗaba sarta gayaŋ ènjia. Emiweya wur na ti àjalaki ahàr ka daliya gayaŋ ya àgray ni va do; amərvu aɗaba èweya mis a duniya va. 22 Nihi ti lekʉlʉm day kə̀bum kəgrum daliya nahkay. Ay enipi kʉli keti: ka sarta gani nani ti akəmərumvu; maslaŋa àbi amacafəŋa kʉli kà məmərvani nana bi. 23 «Ka fat gani nani ti pakama àbi ekihindʉmfua bi. Nəhi ana kʉli nahəma, tamal kə̀səruma lekʉlʉm ndam goro a mək kihindʉmfiŋa zlam kà Baba azuhva nani nahəma, Baba aməvi ana kʉli. 24 Kekileŋa ka ya ti kìhindʉmfiŋa zlam kà Baba ni ti ŋgay lekʉlʉm ndam goro ti kə̀humi faŋ ndo. Hindʉmfiŋa; tamal kìhindʉmfiŋa nahkay ti akəŋgətum mək akəmərumvu dal-dal, araŋa amacafəŋa kʉli kà məmərvana do.» 25 «Nə̀hi ma gani ɗek ana kʉli ti àna ma gozogul. Ay sarta àbu ara ti anəhi ma ana kʉli nahkay va do. Ka sarta gani nani ti anəɗəmki ma ka Baba vay-vay. 26 Ka fat nani ti ekihindʉmfiŋa zlam kà Baba aɗaba lekʉlʉm ndam goro. Ŋgay anahəŋgali naŋ ana kʉli ti nə̀ɗəm do, 27 aɗaba naŋ naŋani àna ahàr gayaŋ awayay kʉli. Awayay kʉli ti aɗaba lekʉlʉm kə̀bum kawayayum nu, kə̀gəsumkabá nàsləkabiya afa gayaŋ a. 28 Eɗeɗiŋ nàsləkabiya afa ga Baba, nàra a duniya va, ay nihi ti nasləka a duniya ba, naŋgoru afa ga Baba.» 29 Eslini ndam maɗəbay naŋ ni tə̀hi ahkado: «Nihi kə̀bu kazlapi ana leli vay-vay, kə̀hi ma gozogul ana leli va do. 30 Nihi ti mə̀səra nak kə̀səra zlam a ɗek, nahkay ahàr àɗəm mihindifʉka ma do, aɗaba kə̀səra ere ye ti mawayay məhuk na àndava. Ègia nahkay ti leli məfəkuk ahàr, mə̀gəskabá kàsləkabiya afa ge Melefit a.» 31 Yezu àhi ana tay: «Nihi ti kəfumku ahàr eɗeɗiŋ aw? 32 Sarta amara, nihi ti ènjia àndava: ka sarta gani nani ti ekidʉmvu kway-kwayay, ku way way do amasləka zlam gayaŋ a; lekʉlʉm ɗek akəmbrumbu nu, nu bəlaŋ ka ahàr goro. Ay ti nu bəlaŋ ka ahàr goro do, aɗaba Baba naŋ àbu akaba nu. 33 Nə̀hi ma gani hini ana kʉli ti, nawayay ti araŋa àhəli ahàr ana kʉli ba, aɗaba lekʉlʉm kə̀bum akaba nu akaɗa mis bəlaŋ. Nihi a duniya bu ni ti atəgri daliya ana kʉli, ay zum njəɗa, aɗaba nu ti nèyefiŋa kà duniya àndava.»

Zeŋ 17

1 Yezu àra àɗəma ma nana nahkay ti àmənjoru e melefit vu, àɗəm: «Bəba goro ni, sarta ènjia. Gray ti mis ɗek tə̂sər Wur gayak ti naŋ gəɗakani; nahkay ti atəsər nak gəɗakani azuhva Wur gayak ni. 2 Kə̀via njəɗa ana Wur gayak ga məgur mis a ɗek, ti mə̂vi sifa ya àndav ɗay-ɗay do ni ana nday ya ti kə̀bi tay a ahar vu ni ɗek. 3 Sifa ya àndav ɗay-ɗay do ni ti nihi: tə̀sər kur, nak bəlaŋ, nak Melefit eɗeɗiŋ eɗeɗiŋeni, tə̀sər Yezu Krist naŋ ya kə̀slərbiyu ni daya. 4 Nàgra tʉwi ya kə̀hu nâgray ka haɗ na ɗek àndava; tʉwi goro gani nani àɗəfikia ana mis a nak gəɗakana. 5 Ahaslani wuɗaka kàgraya məlaŋ a nahəma, nu nə̀bu akaba kur a məlaŋ gəɗakani maslaɗani bu: nihi day həŋguriyu nu a məlaŋ gani nani vu keti ti. 6 Kàdaba mis a duniya ba, kə̀bua tay a ahàr va. Nihi ti nə̀ɗəfikia kur ana tay a, tə̀səra kur a àndava. Ahaslani ti nday a ahar bu afa gayak, ay nihi ti kə̀bua tay a ahar va, mək tə̀gəsukkia ma. 7 Nihi ti tə̀səra zlam ya nu nə̀bu àna naŋ ni ɗek ti nak kə̀bu tay a ahar vu eɗeɗiŋ, 8 aɗaba nə̀hia pakama gayak ya kə̀hu nə̂hi ana tay na ɗek ana tay a. Pakama gayak gani nani ti tə̀gəskabá: tə̀səra nàsləkabiya ti afa gayak, àslərbiyu nu ti nak eɗeɗiŋ. 9 «Nahəŋgali kur ana tay. Nàhəŋgali kur ana mis ga duniya do, nahəŋgali kur ana ndam ya ti kə̀bu tay a ahar vu ni ciliŋ, aɗaba nday ti ndam gayak. 10 Zlam goro ɗek ti gayak, zlam gayak ɗek day goro; nahkay mis tə̀səra nu gəɗakani azuhva nday ya ti kə̀bu tay a ahar vu na. 11 Kama kama ti nu anələbi a duniya bu bi, anasləka anoru afa gayak, ay nday ti atanjəhaɗ a duniya ni bu. Bəba goro ni, nak njəlata; fi ahàr ana tay àna njəɗa gayak. Njəɗa gani nani ti nak kə̀vu. Fi ahàr ana tay ti tîgi akaɗa mis bəlaŋ akaɗa geli ata nak leli mə̀bu bəlaŋani ni. 12 Kə̀vua njəɗa gayak a; nahkay ka ya ti nə̀bu akaba tay ni ti, nə̀fia ahàr ana tay àna njəɗa gani nana. Nə̀bia slimi ana tay a, ku mis bəlaŋ gatay èji ndo, si maslaŋa ya ti ahàr àɗəm ejiji ni kwa. Gayaŋ ya èjiji ni ti, ti pakama ya àbu məbəkiani a Wakita gayak ni bu ni mâgravu. 13 «Nihi ti nasləka nakoru afa gayak. Nu nə̀bu nəhuk ma hini a duniya bu ni ti, nawayay ti nday tə̂mərvu dal-dal azuhva nu, ti məmərani gani mîsliva ana tay a vu va. 14 Nə̀hia pakama gayak a ɗek ana tay a mək tə̀gəskabá. Nahkay ndam ga duniya tə̀bu tizirey tay aɗaba nday ndam ga duniya do, akaɗa goro ya nu mis ga duniya do ni. 15 Nahəŋgalay kur ti ga məhəlaba tay a duniya ba do. Nahəŋgalay kur ti, ti kâhəŋgafəŋa tay kè Seteni a. 16 Nday ti ndam ga duniya do, akaɗa goro ya nu mis ga duniya do ni. 17 Gray ti tîgi ndam gayak njəlatani àna jiri gayak. Jiri gayak ti ma ge jiri ya nə̀hi ana tay ni. 18 Nak kə̀slərbiyu nu a duniya vu, nahkay nu day nəsləroru tay a duniya vu. 19 Nu mis gayak njəlatani, nahkay nday day etigi ndam gayak njəlatani. Tigi ndam gayak njəlatani ti àna pakama gayak jireni ya nə̀hi ana tay ni. 20 «Nàhəŋgali kur ana tay ciliŋ do; nahəŋgali kur ana nday ya ti atəgəskabu pakama gatay ya atəhi ana tay ni, mək atəfəku ahàr ni daya. 21 Bəba goro ni, nawayay ti mis ya təfəku ahàr ni ɗek tîgi akaɗa mis bəlaŋ, akaɗa nak kə̀bu akaba nu, nu day nə̀bu akaba kur akaɗa mis bəlaŋ ni. Nawayay ti nday day tîgi akaba leli akaɗa mis bəlaŋ; nahkay ti ndam ga duniya atəsər nak kə̀slərbiyu nu. 22 Nak kàgray ti mis ɗek tə̂sər nu gəɗakani; nahkay nu day nàgray ti mis tə̂sər ndam ya taɗəbay nu ni nday gəɗákani akaɗa goro ni. Nàgray nahkay ti, nawayay ti tîgi akaɗa mis bəlaŋ akaɗa geli ya leli mə̀bu bəlaŋani ni. 23 Nu ti nə̀bu akaba tay akaɗa mis bəlaŋ; nak day kə̀bu akaba nu akaɗa mis bəlaŋ. Azuhva nani nday day etigi bəlaŋani akaɗa geli ni. Etigia bəlaŋana ti ndam ga duniya atəsər nak kə̀slərbiyu nu, kawayay tay akaɗa gayak ya ti kawayay nu ni. 24 «Bəba goro ni, nawayay ti ndam ya kə̀bu tay a ahar vu ni ti nday day tôru ka məlaŋ goro ya nə̀biyu ni. Nawayay ti tîpi nu, nu gəɗakani azuhva njəɗa gayak ya kə̀vu ni. Kə̀vu njəɗa gani nani ti aɗaba kwa kàgraya məlaŋ a faŋ ndo kàwaya nu a. 25 Bəba goro ni, nak jireni. Ku tamal ndam ga duniya tə̀sər kur do nəŋgu ni, nu nə̀səra kur a; ndam goro day tə̀səra nak kə̀slərbiyu nu. 26 Nə̀ɗəfikia njəɗa gayak ana tay a, anəɗəfikioru ana tay anəmbrəŋ do. Nawayay ti tâwayavu akaɗa gayak ya kawayay nu ni; nahkay ananjəhaɗ akaba tay akaɗa mis bəlaŋ.»

Zeŋ 18

1 Yezu àra àɗəma ma na nahkay ti tàsləka, tòru akaba ndam maɗəbay naŋ ni ke ledi ga zalaka ya təzalay Sedroŋ ni. Eslini ti dini nahaŋ àbu, tə̀huriyu. 2 Ay ti Zʉdas naŋ ya ti ara asəkumoru naŋ ni àsəra məlaŋ gani nana, aɗaba kəlavaɗ ata Yezu tə̀bu təcakalavu akaba ndam maɗəbay naŋ ni eslini. 3 Zʉdas nakəŋ àdi kama ana ndam slewja akaba ana nday ya ti tajəgay ahay gəɗakani ge Melefit ni. Ndam slewja gani nani ti gəɗákani ga ndam maŋgalabakabu mis akaba Melefit ni tə̀cakalavu akaba ndam Feriziyeŋ mək tə̀sləroru tay. Tòru ti àna zlam ahar gatay, tə̀həla ceŋgel akaba vala-vala a ahar va daya. 4 Yezu àsəra ere ye ti amagrakivu na, nahkay nday nakəŋ tòru tìnjʉa wuɗak ti, àŋgwivabiyu ana tay a ma vu mək àhi ana tay ahkado: «Kəɗəbum way?» 5 Tə̀hi ahkado: «Maɗəbay Yezu zal Nazaret ni.» Naŋ nakəŋ àhi ana tay: «Nu gani, nu hi.» Zʉdas naŋ ya ara asəkumoru Yezu ni naŋ àkibu ka tay. 6 Yezu àra àɗəma «Nu gani, nu hi» ti tàŋgoru aləŋ-aləŋ, tə̀dəɗ ka haɗ. 7 Yezu àhi ana tay keti: «Kəɗəbum way?» Tə̀hi ahkado: «Maɗəbay Yezu zal Nazaret ni.» 8 Eslini Yezu àhi ana tay: «Nə̀hia ana kʉli a “Nu gani, nu hi” a timey! Tamal kəɗəbum ti nu nahəma, mbrəŋum ndam goro hini tâsləka.» 9 Àɗəm nahkay ti, ti ma ya ti àhi ana Bəŋani: «Bəba, ndam ya ti kə̀bu tay a ahar vu ni ku mis bəlaŋ gatay èjifua ndo» ni mâgravu. 10 Maslalam àfəŋ ka Simu Piyer; Simu Piyer nakəŋ àraɗaya fətah mək àsi ana bay məgri tʉwi ana gəɗakani ga ndam maŋgalabakabu mis akaba Melefit ni, àsifəŋa slimi ga ahar ga ɗaf a həndaɗ. Bay magray tʉwi nani ti slimi gani Malkus. 11 Ay ti Yezu àhi ana Piyer: «Həŋguriyu maslalam gayak ni a ahay gani vu. Baba àɗəm anəcakay daliya, ay ti kə̀hi ana ahàr nə̀cakay ba waw?» 12 Eslini ndam slewja akaba gəɗakani gatay ni akaba ndam Zʉde ya tajəgay ahay gəɗakani ge Melefit ni tə̀gəs Yezu, tə̀wəlikabu ahar. 13 Tàra tə̀wəlikabá ahar na ti tə̀zoru naŋ afa ga Anna. Anna ti medim ga Kayif. Ka sarta gani nani ti Kayif gəɗakani ga ndam maŋgalabakabu mis akaba Melefit. 14 Maslaŋa ya àhi ana ndam Zʉde: «Hojo mis bəlaŋ mə̂mət azuhva mis ɗek» ni ti, Kayif gani nani. 15 Simu Piyer nday ata maslaŋa nahaŋ ya naŋ day aɗəbay Yezu ni tàɗəboru Yezu. Bay maɗəbay Yezu nani ti gəɗakani ga ndam maŋgalabakabu mis akaba Melefit ni àsəra naŋ a lala. Nahkay tə̀huriyu ka ahar bəlaŋ akaba Yezu a dalaka ga ahay ga gəɗakani ga ndam maŋgalabakabu mis akaba Melefit ni vu. 16 Ay ti Piyer àhuriyu ndo, ècik kà mahay. Eslini bay maɗəbay Yezu ya ti gəɗakani ga ndam maŋgalabakabu mis akaba Melefit àsəra naŋ a lala ni àhərkiaya ka wal ya ajəgay mahay na, àhi ma mək àziyu Piyer a dalaka ga ahay ni vu. 17 Wal ya ti ajəgay mahay ni àhi ana Piyer ahkado: «Nak day bəlaŋ ga ndam maɗəbay maslaŋa nani ni do waw?» Eslini Piyer àhi: «Aha, nu bay maɗəbay naŋ do.» 18 Ndam ya tagray tʉwi eslini ni akaba nday ya ti tajəgay ahay gəɗakani ge Melefit ni aməɗ awər tay, tèbefta aku a tə̀bu tənjafəŋ. Piyer day àrəkivoru ka tay ànjafəŋ bilegeni. 19 Eslini gəɗakani ga ndam maŋgalabakabu mis akaba Melefit ni èhindifiŋa ma kà Yezu a, àhi ahkado: «Ndam maɗəbay kur ti ndamam? Kacahi mam ana mis ni mam?» 20 Yezu àhəŋgrifəŋ, àhi: «Nə̀hia ma ana mis a ɗek vay-vay. Kəlavaɗ nə̀bu nəcahi zlam ana tay a ahay ga mahəŋgalavù Melefit bu akaba a dalaka ga ahay gəɗakani ge Melefit ni bu, ka məlaŋ ya ndam Zʉde ɗek təcakalavu ni. Ma ya ti nə̀ɗəm akal-akal ni ti àbi. 21 Kihindifua ma ti kamam? Hindi ma goro ti afa ga ndam ya ti nə̀hi ma ana tay ni. Nday ti tə̀səra ere ye ti nə̀ɗəm na.» 22 Yezu àra àɗəma nahkay ti bəlaŋ ga ndam ya tajəgay ahay gəɗakani ge Melefit ni àdi barva kəɓa mək àhi: «Təhəŋgrifəŋ kà ma ana gəɗakani ga ndam maŋgalabakabu mis akaba Melefit ti nahkay aw?» 23 Yezu àhəŋgrifəŋ, àhi: «Tamal nàgudara ma ti ɗafaya ma ya ti nàgudar na. Ay tamal ma goro ya nə̀ɗəm ni ma ge jiri ti kə̀du barva ti kamam?» 24 Kələŋ gani Anna àɗəm tə̂zoru naŋ afa ga Kayif gəɗakani ga ndam maŋgalabakabu mis akaba Melefit ni. Nahkay tə̀zoru naŋ ahar məwəlikabani afa ga Kayif nakəŋ. 25 Ka ya ti Simu Piyer naŋ àbu anjafəŋ ka aku ni kekileŋa ni ti tə̀hi ahkado: «Nak day bəlaŋ ga ndam maɗəbay maslaŋa hini do waw?» Ay ti Piyer àɗəm: «Aha, nə̀bi naɗəbay naŋ bi.» 26 Zal nahaŋ naŋ àbu eslini, naŋ bay məgri tʉwi ana gəɗakani ga ndam maŋgalabakabu mis akaba Melefit ni. Maslaŋa gani nani ti Piyer àsifəŋa slimi a ti ana mis ge dini gayaŋ. Maslaŋa nani àhi ana Piyer ahkado: «Nìpi kur kwa enekwiŋ e dini bu ata naŋ ti nak timey.» 27 Ay ti Piyer àɗəm keti: «Aha, nu do.» Eslini agwazl àzlah hʉya. 28 Dʉ àna zʉzʉeni nahəma, ndam Zʉde tàzay Yezu afa ga Kayif, tòru àna naŋ afa ge Pilet bay ga ndam Rom ya agur haɗ Zʉde ni. Ay tòru tìnjʉa àna naŋ a ti ndam Zʉde tàwayay məhuriyani a ahay vu afa ga bay ni ndo. Aɗaba tamal tə̀huriya ti tigi nday njəlata do, tìsliki məzum zlam ga wuməri ga Pak ni do. 29 Nahkay bay Pilet nakəŋ àhərkiaya ka tay e mite va, àhi ana tay ahkado: «Kàbəhaɗumki mirdim ka maslaŋa hini ti àgudar mam?» 30 Tə̀həŋgrifəŋ, tə̀hi: «Tamal ti àgudar zlam ndo ni ti akal mə̀zəbiyu naŋ afa gayak ndo.» 31 Nday nakəŋ tàra tə̀ɗəma nahkay ti Pilet àhi ana tay ahkado: «Zuma naŋ a, lekʉlʉm lekʉlʉmeni grumfəŋa seriya, akaɗa ge seriya gekʉli ya kəgrum na.» Ndam Zʉde ni tə̀həŋgrifəŋ, tə̀hi: «Leli nahəma, seriya ga makaɗ mis ti tə̀vi divi gani ana leli ga magrani ndo.» 32 Tə̀ɗəm nahkay ti, ti ma ga Yezu ya àɗəm amara məmət nahkay ni ti mâgravu. 33 Eslini Pilet àŋgoru a ahay vu, àzalay Yezu, èhindifiŋa ma, àhi: «Nak ti bay ga ndam Zʉde eɗeɗiŋ aw?» 34 Yezu àhəŋgrifəŋ, àhi: «Nak nakani kàjalay tək, day ti mis tə̀huk aw?» 35 Pilet àhi: «Nu zal Zʉde aw? Tə̀zəbiyu kur afa goro ti ndam jiba gayak gayakani akaba gəɗákani gekʉli ga ndam maŋgalabakabu mis akaba Melefit ni do waw? Kàgudar mam?» 36 Yezu àhəŋgrifəŋ, àhi: «Nu bay, ay bay goro ti ga duniya hini do. Tamal bay goro ni ga duniya hini ti, akal ndam goro tàkaɗva akaba ndam ya tə̀gəsi nu ana ndam Zʉde na. Ay ti tàgray nahkay ndo, aɗaba bay goro ni ga duniya hini do.» 37 Pilet àhəŋgrifəŋ, àhi: «Kə̀ɗəm nahkay ti nak bay eɗeɗiŋ aw?» Yezu àhəŋgrifəŋ, àhi: «Nak kə̀ɗəm. Nu ti nàra a duniya va, tìwi nu ti, ti nə̂hi ma ge jiri ana mis. Ku way way do naŋ mis ge jiri ti abi slimi ana ma goro ya nəɗəm ni.» 38 Eslini Pilet àhi ahkado: «Jiri ti məŋ ga mam jikeŋ mam?» Pilet nakəŋ àra àhia ma ana Yezu a nahkay ti àhərkiaya ka ndam Zʉde na e mite va keti. Àhi ana tay ahkado: «Nu ti nə̀di ahàr ana zlam magudarani gayaŋ ndo simiteni. 39 Ay kə̀səruma kilevi a wuməri ga Pak bu ni ti nə̀bu nəfiaya zal daŋgay ana kʉli a bəlaŋ. Nihi ti kawayum nə̂fiaya bay ga ndam Zʉde na ana kʉli a waw?» 40 Nday nakəŋ tàra tìcia ma ge Pilet na ti tə̀zlah kay kay, tə̀ɗəm: «Kàfaya maslaŋa nana ba, faya Barabas a sawaŋ!» Barabas gani nani ti zal abra, àbazla mis a.

Zeŋ 19

1 Eslini Pilet àhi ana ndam slewja gayaŋ tâzay Yezu, tə̂zləɓ naŋ àna kurupu. 2 Tàra tə̀zləɓa naŋ a ti ndam slewja ni tàslapaya adak a hindigil-hindigil mək tə̀fiviyu a ahàr vu akaɗa ga jaku ni. Tə̀fikabu mugudi ndizeni ga bay daya. 3 Tàra tə̀bəkia zlam nday nana nahkay ti tàhəɗakfəŋbiyu, tə̀hi ahkado: «Məgruk sa, bay ga ndam Zʉde!» Nday nakəŋ tàra tə̀hia ma nahkay ti tə̀si barva kəɓa kəɓa. 4 Eslini Pilet àhərkiaya ka ndam Zʉde na e mite va keti, àhi ana tay: «Nihi nahəma, nara nəzibiyu naŋ ana kʉli e mite vu, ti kə̂sərum nə̀ŋgət zlam magudarani gayaŋ ga məwəlki naŋ di ndo.» 5 Mək Yezu nakəŋ àhəraya e mite va àna adak ya ka ahàr na akaba àna mugudi ndizeni ya tə̀fikabu na. Yezu àra àhəraya ti Pilet àhi ana tay: «Maslaŋa nakəŋ naŋ hi.» 6 Gəɗákani ga ndam maŋgalabakabu mis akaba Melefit ni akaba ndam gatay ni tàra tìpia Yezu a ti tə̀zlah kay kay, tə̀ɗəm: «Darfəŋ naŋ kà təndal! Darfəŋ naŋ kà təndal!» Pilet àhi ana tay ahkado: «Lekʉlʉm lekʉlʉmeni zuma naŋ a ti kâdarumfəŋ ka təndal gani. Nu ti nə̀ŋgət zlam magudarani gayaŋ ga məwəlki naŋ di ndo.» 7 Ndam Zʉde ni tə̀həŋgrifəŋ, tə̀hi: «Melefit àvia divi ana leli ndam Zʉde a, ahàr àɗəm tâkaɗ naŋ, aɗaba azay ahàr gayaŋ àɗəm naŋ Wur ge Melefit.» 8 Pilet àra ècia ma gatay na ti àgra aŋgwaz a dal-dal, 9 àŋgwiyu a ahay vu keti, àhi ana Yezu: «Nak kàsləkabiya ti eley?» Ay ti Yezu naŋ te-te, àhəŋgrifəŋ ndo. 10 Pilet àhi: «Kə̀hu ma do? Nisliki məmbrəŋ kur, nisliki madarfəŋ kur kà təndal ti kə̀sər do waw?» 11 Yezu àhəŋgrifəŋ, àhi: «Kìsliki məgru araŋa do, si tamal Melefit àvuka divi gana kwa. Nahkay ti maslaŋa ya ti àgəsukbiyu nu ni àgudara zlam a àtama gayak na.» 12 Yezu àra àɗəma nahkay ti Pilet nakəŋ àɗəbay divi ga məmbrəŋ naŋ. Ay ndam Zʉde ni tə̀zlah, tə̀hi: «Tamal kə̀mbrəŋa maslaŋa hina ti kàɗafakia kàwayay Sezar do, aɗaba ku way way do azay ahàr gayaŋ aɗəm naŋ bay ti maslaŋa gani nani ezirey Sezar.» 13 Pilet nakəŋ àra ècia ma ge mis na ti àzəbiyu Yezu e mite vu mək ànjəhaɗ ka məlaŋ magray seriya ni. Məlaŋ gani nani ti maslamalani lala àna akur, təzalay àna ma Hebri ti «Gabata.» 14 Vaɗ gani nani ti vaɗ ga maslamalakabu zlam ga wuməri ga Pak; fat agray wis wuɗak. Pilet nakəŋ àhi ana ndam Zʉde ni ahkado: «Bay gekʉli nihi.» 15 Nday nakəŋ tàra tìcia nahkay ti tə̀zlah, tə̀ɗəm: «Kaɗa, kaɗa, darfəŋ naŋ kà təndal!» Eslini Pilet àhi ana tay ahkado: «Nâdarfəŋ bay gekʉli ni kà təndal aw?» Gəɗákani ga ndam maŋgalabakabu mis akaba Melefit ni tə̀həŋgrifəŋ, tə̀hi: «Bay geli nahaŋ àbi, si Sezar kwa.» 16 Pilet àra ècia ma na nahkay ti àvi divi ana ndam slewja gayaŋ ga madarfəŋ Yezu kà təndal. Nahkay nday nakəŋ tàzay Yezu, tàsləka àna naŋ a. 17 Ka ya ti tə̀bu takoru ni ti Yezu azay təndal ya ti takoru tadarfəŋ naŋ ni àna ahar gayaŋ gayaŋani. Tàhəraya a kəsa ni ba, tòru ka məlaŋ nahaŋ; məlaŋ gani nani ti təzalay «Məlaŋ ga Aslat ga Ahàr»; àna ma Hebri ti təzalay «Golgota.» 18 Tòru tìnjʉa eslina ti tàdarfəŋ naŋ kà təndal ni. Tàdarfəŋa mis ndahaŋ a cʉ kà təndal ndahaŋ a daya: Yezu ti naŋ e kiɗiŋ gatay bu. 19 Pilet àɗəm tə̂bəki ma ka pələŋgaf, tâdarfəŋiyu kà təndal ga Yezu ni ti mis tîjeŋgey, tə̂sər. Ma gani ya ti tə̀bəki ni nahkay hi: «Yezu, zal Nazaret, Bay ga ndam Zʉde.» 20 Ma gani nani ti tə̀bəki àna ma Hebri, àna ma Rom akaba àna ma Gres. Ndam Zʉde kay tìjeŋga ma gana, aɗaba məlaŋ ya ti tàdarfəŋ Yezu kà təndal ni cifa akaba kəsa. 21 Gəɗákani ga ndam maŋgalabakabu mis akaba Melefit ni tàra tìcia ma gana ti tə̀hi ana Pilet ahkado: «“Naŋ Bay ga ndam Zʉde” ti kə̀bəki ba. Ŋgulum bəki: “Maslaŋa hini àɗəm naŋ Bay ga ndam Zʉde” sawaŋ.» 22 Ay Pilet nakəŋ àhi ana tay ahkado: «Ere ye ti nə̀bəki ni ti mânjəhaɗ nahkay.» 23 Ndam slewja ni tàra tàdarfəŋa Yezu kà təndal na ti, tə̀həl azana gayaŋ ni, tèdekaba məlaŋ faɗ, ku way way do e kiɗiŋ gatay bu àŋgəta bəlaŋ. Tàza endʉwi gayaŋ a daya; endʉwi gani nani ti məɗəməkani àfəŋ bi, tə̀ləmaya zəbalana. 24 Nahkay ndam slewja ni tə̀zlapay e kiɗiŋ gatay bu, tə̀ɗəm: «Mègʉzleh endʉwi hini ba; ŋgulum məgrumki ca-ca ti mə̂sər way azum way.» Ndam slewja ni tàgray nahkay ti, zlam ya àbu məbəkiani a Wakita ge Melefit ni bu ni àgravu. Pakama gani nani ti nihi: «Tèdekaba azana goro na e kiɗiŋ gatay ba, mək tàgrakia ca-ca ke endʉwi goro a.» Ndam slewja ni tàgray akaɗa nani gani eɗeɗiŋ. 25 Kà gəvay ga təndal ya ti tàdarfəŋ Yezu ni ti wál ndahaŋ tə̀bu micikeni. Wál nday nani ti nday hi: məŋ ga Yezu, wur ga məŋ ga məŋani, Mari wal ga Kəlopas akaba Mari ga kəsa Magədala. 26 Bay maɗəbay Yezu ya Yezu awayay naŋ kayani ni naŋ àbu kà gəvay ga məŋ ga Yezu daya. Yezu àra èpia tay a ti àhi ana məŋani ni ahkado: «Mma, wur gayak ti naŋ hini.» 27 Àra àhia ma ana məŋana nahkay ti àhi ana bay maɗəbay naŋ ni ahkado: «Muk ti naŋ hini.» Kwa ka fat nani bay maɗəbay Yezu ni àzoru məŋ ga Yezu ni afa gayaŋ ti mânjəhaɗa afa gayaŋ a. 28 Yezu àsəra àgra tʉwi gayaŋ na ɗek àndava. Àra àsəra nahkay ti àɗəm ahkado: «Yam àkaɗa nu a.» Àɗəm nahkay ti, ti zlam ya àbu məbəkiani a Wakita ge Melefit bu ni mâgravu. 29 Mandaray nahaŋ àbu eslini mafəkaɗani akaba zum cecʉwekeni. Tàra tìci ma ga Yezu na ti tàzay zlam ya esikabu yam akaɗa ga matala ni, tə̀təliyu a zum ni vu, tàɓahki ka aday mək tə̀təlikabiyu kà pakama ana Yezu. 30 Yezu àra àcaka zum cecʉwekeni na ti àɗəm ahkado: «Tʉwi goro ɗek àgrava àndava.» Àra àɗəma nahkay ti àzəgaɗ ahàr gəzak mək àmət. 31 Vaɗ gani nani ti hajəŋ gani vaɗ məpəsabana, nahkay mis tə̀bu təslamalavu. Vaɗ məpəsabana gani nani ti àtama vaɗ məpəsabana ndahaŋ na, nahkay ndam Zʉde tawayay ti kisim ge mis ya ti tàdarfəŋ tay kà təndal ni tànjəhaɗfəŋiyu kà təndal ni a vaɗ məpəsabana ba ba. Nahkay tòru afa ge Pilet, tə̀hi ahàr àɗəm têheɓi asak ana tay ti tə̂mət weceweci, tə̂həlfəŋa tay kà təndal na. 32 Nahkay Pilet àsləroru ndam slewja gayaŋ. Tàra tìnjia ti tèheɓi asak ni ana mis bəlaŋ gani ya tàdarfəŋ naŋ kà təndal akaba Yezu ni, mək tèheɓi ana naŋ ye cʉ ni. 33 Tàra tə̀rəkia ka Yezu a, tawayay teheɓi asak ti tə̀di ahàr naŋ məmətani àndava, nahkay ti tèheɓi asak ni ndo. 34 Ay bəlaŋ e kiɗiŋ ga ndam slewja ni bu àtəhaɗ Yezu àna awasl a jamaŋgay vu gək. Àra àtəhaɗa naŋ a ti mimiz àŋgəzaya hʉya, yam day àŋgəzaya. 35 Àgrakia sedi ka zlam gani nana ti, maslaŋa ya èpia ni. Àgrakia sedi a, pakama gayaŋ ya ti àɗəm ni ti jiri eɗeɗiŋ. Naŋ day àsəra pakama gayaŋ ya àɗəm ni jiri eɗeɗiŋ. Àɗəm nahkay ti awayay ti lekʉlʉm day kə̂gəsumkabu pakama gani, kə̂fumki ahàr ka Yezu. 36 Zlam gani nani àgravu ti, ti zlam ya àbu məbəkiani a Wakita ge Melefit ni bu ni mâgravu. Pakama gani nani ti nihi: «Ku aslat ga vu gayaŋ tekeɗi eteheɓ do.» 37 Àbu məbəkiani a Wakita ge Melefit ni bu nahkay hi keti: «Ndam ya ti tàtəhaɗ mis ni atamənjaləŋ ka maslaŋa ya ti nday tàtəhaɗ ni.» Pakama gani nani day àgrava. 38 Zal nahaŋ àbu slimi gani Zʉzef, naŋ ga kəsa Erimete. Naŋ ti bay maɗəbay Yezu, ay aɗəbay naŋ akal-akal aɗaba aŋgwaz awərfəŋa naŋ kà ndam Zʉde a. Yezu àra àməta ti Zʉzef nakəŋ òru afa ge Pilet, èhindifiŋa divi ga mazay kisim ga Yezu na, mək Pilet àvi divi gani. Nahkay òru àzay kisim ga Yezu ni. 39 Nikodem day òra ka məlaŋ gana. Nikodem ti naŋ ya ti a vaɗ nahaŋ àrəkioru ka Yezu ga məlavaɗ ni. Òru ti, àzay haf mebeɗeni gərgəri cʉ, bəlaŋ gani təzalay mir, nahaŋ ti ni elʉwes, àgray kilʉ kru kru mahkər. Haf gani nani ti mizi gani àɓəlay. 40 Tàra tə̀zaya kisim na ti ata Zʉzef nday ata Nikodem nakəŋ tìtʉɗey àna gabaga; ka ya ti tə̀bu titʉɗey nahəma, təbəki haf ni ke kisim ni hi hi. Wuɗaka ndam Zʉde tili mis ti tagray nahkay day. 41 Kà gəvay ga məlaŋ ya tàdarfəŋ Yezu kà təndal ni ti dini nahaŋ àbu eslini. E dini gani nani bu ni ti mindiviŋ nahaŋ àvu, tìli nihi guhwa tə̀fiyu kisim ga maslaŋa faŋ ndo. 42 Ka fat nani ti ndam Zʉde tə̀bu təslamalavu ga vaɗ məpəsabana, nahkay ata Zʉzef nday ata Nikodem nakəŋ tə̀fiyu Yezu e mindiviŋ nani vu, aɗaba mindiviŋ ni driŋ do.

Zeŋ 20

1 Dʉ ge miledʉ àna zʉzʉeni a vaɗ ye enjenjeni ga gosku nahəma, Mari ga kəsa Magədala òru ke mindiviŋ ni. Òru ènjʉa ti àdi ahàr ana mindiviŋ ni bəŋa, èpi belim ni àləŋ ana mindiviŋ ni bi. 2 Naŋ nakəŋ àra èpia belim ni àləŋ bi nahkay ti àcuhwakibiyu ka Simu Piyer nday ata bay maɗəbay Yezu ya Yezu awayay naŋ kay ni, àhi ana tay ahkado: «Ndamaŋa tə̀zaba Bay geli na e mindiviŋ ni ba, mə̀sər məlaŋ ya tàfəkaɗ ni do.» 3 Ata Piyer nday ata bay maɗəbay Yezu nahaŋ ni tàra tìcia nahkay nahəma, tàsləka tàzay divi ga moroni ke mindiviŋ ni. 4 Nday cʉeni tacuhworu, ay bay maɗəbay Yezu nahaŋ ni àcuhway àtam Piyer, ènjiyu ke mindiviŋ ni enji gayaŋ. 5 Òru ènjʉa ti àndəhaɗ ahàr, àmənjiyu e mindiviŋ ni vu, èpi gabaga ni mabəhaɗani ciliŋ, ay ti àhuriyu ndo. 6 Kələŋ gani Simu Piyer ti ni òru ènjʉa ke mindiviŋ na ti àhuriyu hʉya, èpi gabaga ni mabəhaɗani duca, 7 azana ya ti tìtʉɗi ahàr ana Yezu àna naŋ ni day mifeɗekabani ka məlaŋ nahaŋ, mabəhaɗani akaba gabaga ni do. 8 Eslini bay maɗəbay Yezu nahaŋ ya ènjiyu ke mindiviŋ enji ge Piyer ni àhuriyu bilegeni. Àra àhuriya ti èpi zlam ya ti àgravu ni, àsəra Yezu àŋgaba e kisim ba. 9 Àbu məbəkiani a Wakita ge Melefit bu, ahàr àɗəm Yezu amət mək aŋgaba e kisim ba, ay kekileŋa nday gani tìciaba pakama gana faŋ ndo. 10 Kələŋ gani ndam maɗəbay Yezu nakəŋ tàsləka, tòru a magam. 11 Ka sarta gani nani Mari naŋ àbu kà gəvay ge mindiviŋ ni, etʉwi. Naŋ àbu etʉwi ti àndəhaɗ ahàr, àmənjiyu e mindiviŋ ni vu, 12 èpi məslər ge Melefit cʉ məbakabu azana bəɗ-bəɗani. Nday manjəhaɗani digʉs-gʉs ka məlaŋ ya tàfəkaɗ kisim ga Yezu ni; bəlaŋ manjəhaɗani gwar ka məlaŋ ga ahàr, bəlaŋ gani ti ni gwar ka məlaŋ ga asak. 13 Eslini məslər ni tìhindifiŋa ma, tə̀hi ahkado: «Wal hini, kitʉwi mam?» Wal ni àhəŋgrifəŋ ana tay, àhi ana tay ahkado: «Ndamaŋa tə̀zaba Bay goro e mindiviŋ ba, nə̀sər məlaŋ ya tàfəkaɗ ni do.» 14 Àra àɗəma nahkay ti àmbatbiyu ma kələŋ, èpi Yezu naŋ jika, ay ti ŋgay Yezu ti àsər do. 15 Eslini Yezu àhi: «Wal ni, kitʉwi mam? Kaɗəbay way?» Wal ni àhi ana ahàr maslaŋa ya àhi ma ni ti bay ya agray tʉwi e dini bu ni. Nahkay àhi: «Maslaŋa goro, tamal nak kàzaba naŋ a ti ɗəfuki məlaŋ gani, nakoru nazay.» 16 Yezu àhi: «Mari.» Eslini Mari nakəŋ àmbatkioru ma, àhi àna ma Hebri: «Rabuni.» Awayay aɗəmvaba: «Mʉsi.» 17 Yezu àhi: «Kàcafəŋa nu kà masləkana ba, aɗaba nə̀cəloru afa ga Baba faŋ ndo. Nihi ti ru afa ga bəza ga mmawa ni, hi ana tay ahkado: “Nəcəloru afa ga Baba, naŋ Bəŋ gekʉli daya. Naŋ gani ti Melefit goro, Melefit gekʉli daya.”» 18 Mari ga kəsa Magədala nakəŋ àra ècia ma ga Yezu na ti àrəkioru ka ndam maɗəbay Yezu ni, àhi ana tay ahkado: «Nìpia Bay geli na.» Mək àŋgəhaɗi ma ga Yezu ya àhi ni ana tay. 19 Ka fat ga ladi gani nani ga məlakarawa ti ndam maɗəbay Yezu ni tàŋgasva a ahay ba mək tə̀zləkkabá mahay a, aɗaba aŋgwaz awərfəŋa tay kà ndam Zʉde ndahaŋ na. Nday tə̀bu maŋgasvani nahkay ti Yezu àhurkiviyu ka tay, ècik jik e kiɗiŋ gatay bu, àhi ana tay: «Melefit mâgray ti araŋa àhəli ahàr ana kʉli ba.» 20 Àra àhia ma ana tay a nahkay ti àŋgazli ahar gayaŋ ni akaba jamaŋgay gayaŋ ni ana tay. Nday nakəŋ tàra tìpia Bay geli na ti tə̀mərva dal-dal. 21 Eslini Yezu àhi ana tay: «Melefit mâgray ti araŋa àhəli ahàr ana kʉli ba» keti. Mək àhi ana tay: «Melefit àslərbiyu nu, nahkay nu day nəslər kʉli akaɗa gayaŋ ya àslərbiyu nu ni.» 22 Àra àɗəma nahkay ti èviteki aməɗ gayaŋ ka tay mək àhi ana tay: «Nə̀via Məsuf Njəlatana ana kʉli a: gəsumkabá naŋ a. 23 Ndam ya ti akəmbrəŋumfəŋa zlam magudarani gatay na kà tay a ni ti, Melefit day aməmbərfəŋa kà tay a. Ay ndam ya ti akəmbrəŋumfəŋa zlam magudarani gatay na kà tay a do ni ti, Melefit day aməmbərfəŋa kà tay a do.» 24 Tumas ti naŋ bəlaŋ ga ndam maɗəbay Yezu kru mahar cʉeni ni, təzalay naŋ Didim daya. Ka fat gani nani ya ti Yezu àŋgazlivu ana ndam maɗəbay naŋ ndahaŋ ni ti Tumas naŋ àkibu ka tay bi. 25 Ndam maɗəbay Yezu ndahaŋ ni tə̀hi ahkado: «Mìpia Bay geli na.» Àra ècia ma gatay na ti àhi ana tay ahkado: «Nawayay nipi məlaŋ ga ahar ya tàdar àna masaŋsaŋ ni, nawayay nətəliyu weleher a məlaŋ gani vu. Nawayay nətəliyu ahar a məlaŋ ga jamaŋgay ya tàtəhaɗ àna awasl ni vu. Tamal nàgray nahkay ndo ni ti nə̀gəskabu ma gekʉli ni do.» 26 Gosku sekw ka ahàr gani ndam maɗəbay Yezu ni tə̀bu maŋgasvani a ahay bu keti, mahay məzləkkabani, Tumas day naŋ àkibu ka tay. Yezu àrəkia ka tay a, ècik jik e kiɗiŋ gatay bu, àhi ana tay ahkado: «Melefit mâgray ti araŋa àhəli ahàr ana kʉli ba.» 27 Eslini àhi ana Tumas nakəŋ: «Mənjaki ka ahar goro ni, ti kə̂təliyu weleher gayak ni. Təliyu ahar gayak a jamaŋgay goro ni vu. Mbrəŋ gejewi, fəku ahàr, gəskabá nàŋgaba e kisim ba eɗeɗiŋ a.» 28 Eslini Tumas nakəŋ àhi: «Nak Bay goro, nak Melefit goro.» 29 Yezu àhi: «Nak ti kìpia nu a day kwa ti kəgəskabu nu nàŋgaba e kisim ni ba. Ndam ya ti təgəskabu nàŋgaba e kisim ba, tìpi nu ndo ni ti tə̂mərvu.» 30 Yezu ti àgra zlam magray ejep ndahaŋ a gərgəri kay kè meleher ga ndam maɗəbay naŋ na. Ay ti tə̀bi məbəkiani a wakita hini bu bi. 31 Zlam ya ti nə̀bəki ni ti, nawayay ti kə̂gəsumkabu Yezu ti naŋ Krist, naŋ Wur ge Melefit. Tamal kə̀gəsumkabá ti Melefit aməvi sifa ya àndav ɗay-ɗay do ni ana kʉli aɗaba kə̀bum kəfumki ahàr ka Yezu palam.

Zeŋ 21

1 Àra àgra vaɗ a ɓal ka ahàr gana ti Yezu àŋgazlivu ana ndam maɗəbay naŋ ni keti. Àŋgazlivu ana tay ti kà gəvay ga dəluv Tiberiyat. Zlam gani àgravu ti nahkay hi: 2 ka sarta gani nani ndam maɗəbay Yezu ata Simu Piyer, Tumas naŋ ya təzalay naŋ Didim ni, Natanayel ga kəsa Kana ga haɗ Gelili ni, bəza ge Zebede akaba ndam maɗəbay Yezu ndahaŋ cʉ tə̀bu ka ahar bəlaŋ eslini. 3 Nday tə̀bu eslini ti Simu Piyer àhi ana nday ndahaŋ ni: «Nakoru nəgəsbiyu kilif.» Nday nakəŋ tə̀hi: «Leli day makoru.» Nahkay tòru tə̀cəliyu a slalah ga yam vu, taɗəboru kilif. Tàndəhaɗki hundum ga məgəsani, ay ku kilif bəlaŋ tekeɗi tə̀gəs ndo. 4 Məlaŋ àra àsla ti ndam maɗəbay Yezu nakəŋ tìpi Yezu naŋ àbu jika ka dəŋ-dəŋ, ay ŋgay naŋ ti tə̀sər ndo. 5 Eslini Yezu àhi ana tay ahkado: «Ndam goro ni, zlam məzumani àfəŋ kè kʉli gʉzit aw?» Tə̀hi: «Àbi.» 6 Mək Yezu nakəŋ àhi ana tay: «Təlumiyu zəva gekʉli ni gwar ka ahar ga ɗaf. Nahkay ti akəgəsumaya kilif a.» Nday nakəŋ tàra tə̀təliya ti zəva ni àgəsa kilif a dal-dal. Tawayay tagəjahaya a slalah ga yam ni va, ay ti tìsliki ndo. 7 Eslini bay maɗəbay Yezu ya ti Yezu awayay naŋ kay ni àhi ana Piyer: «Hini ti Bay geli ci ni.» Simu Piyer àra ècia ya tə̀hi «Hini Bay geli» ni ti àfakabiyu endʉwi gayaŋ ya àzakaba ni, mək àdiyu a yam ni vu cizliv. 8 Məlaŋ ya tə̀gəsaya kilif a ni ti driŋ driŋ akaba dəŋ-dəŋ ni do, àgray ezeweɗ bəlaŋ ciliŋ, nahkay ndam maɗəbay Yezu ndahaŋ ni tàra àna slalah ga yam na gwar kà dəŋ-dəŋ na, tagəjahbiyu zəva gatay ya akaba kilif dal-dalani ni. 9 Nday nakəŋ tàra tìnjia ka dəŋ-dəŋ na, tàhəraya a slalah ga yam ni ba ni ti, tìpi aku ŋgulusa, kilif àki baca akaba dipeŋ. 10 Eslini Yezu àhi ana tay: «Dəguma àna kilif ya kə̀gəsumaya na.» 11 Nahkay Simu Piyer àcəliyu a slalah ga yam ni vu keti, àgəjahaya zəva na ka dəŋ-dəŋ a. Tàra tàgəjahaya ti tə̀diviyu ahàr ana kilif gəɗákani diŋ àna kru kru zlam mahar mahkər. Akaba nani ɗek zəva ni àtəɗkaba ndo. 12 Yezu àhi ana tay: «Dəguma kə̂zumum zlam.» Ku maslaŋa bəlaŋ e kiɗiŋ ga ndam maɗəbay naŋ ni bu ŋgay «Nak way?» ti tìsliki məhiani ndo, aɗaba tə̀səra naŋ Bay geli. 13 Eslini Yezu àra àzay dipeŋ ni, àvi ana tay, mək àvikivu kilif ni ana tay. 14 Kwa ga Yezu ya àŋgaba e kisim ba ni ti àŋgazlivu ana ndam maɗəbay naŋ ni sak mahkər àna hini. 15 Tàra tə̀zuma zlam a ti Yezu àhi ana Simu Piyer ahkado: «Simu wur ge Zeŋ, kawayay nu kàtama nday hina waw?» Piyer nakəŋ àhi: «Iy Bay goro, kə̀səra nawayay kur.» Mək Yezu àhi: «Jəgay bəza təmbak goro ni.» 16 Yezu àhi ye cʉ: «Simu wur ge Zeŋ, kawayay nu aw?» Piyer àhi: «Iy Bay goro, kə̀səra nawayay kur.» Mək Yezu àhi: «Hətay təmbəmbak goro ni.» 17 Yezu àhi ya mahkər: «Simu wur ge Zeŋ, kawayay nu aw?» Pakama ga Yezu ya àhi ana Piyer «Kawayay nu aw?» ya mahkər ni ti àhəlia ahàr ana Piyer a, nahkay àhi ana Yezu: «Bay goro ni, kə̀səra zlam a ɗek; kə̀səra nə̀bu nawayay kur.» Eslini Yezu àhi: «Jəgay təmbəmbak goro ni. 18 Nəhuk nahəma, ka ya ti nak wur dagwa ni ti, nak nakani kə̀wəlvu àna maslpara, kòra ka məlaŋ ya ti kàwayay na ɗek. Ay ka ya ti ekigia medewel a ni ti akəhəloru ahar agavəla, maslaŋa nahaŋ aməwəlukvù maslpara gayak ni, mək amazoru kur ka məlaŋ ya nak akawayay moroni do ni.» 19 Yezu àɗəm nahkay ti, awayay aɗafaki ahəmamam Piyer amara məmət, mis atazləbay Melefit azuhva məmət gayaŋ ni. Yezu àra àhia ma nahkay ti àhi: «Ɗəbabiyu nu.» 20 Eslini Piyer àmənjabiyu gwar kələŋ, mək èpi bay maɗəbay Yezu ya ti Yezu awayay naŋ kay ni. Naŋ ti naŋ ya ti a vaɗ ya ti tə̀zum zlam akaba Yezu ni ti àzoru ahàr gayaŋ gwar ka məɓəruv ga Yezu, àhi: «Bay geli, maslaŋa ya ara asəkumoru kur ni ti way?» ni. 21 Piyer àra èpia naŋ a nahkay ti àhi ana Yezu ahkado: «Ay naŋ hini timey, Bay geli?» 22 Yezu àhi: «Tamal nawayay ti mânjəhaɗ duk abivoru ana vaɗ goro ya anaŋga ni ti, ma gani gayak mam? Nak ti ɗəbabiyu nu ciliŋ.» 23 Bəza ga məŋ geli ndahaŋ tàra tìcia ma ga Yezu ya àɗəm na ti, tə̀bu təɗəm e kiɗiŋ gatay bu bay maɗəbay Yezu nani ti aməmət do. Ay ŋgay aməmət do ni ti Yezu àɗəm ndo. Ma gayaŋ ya àɗəm ni ti nahkay hi: «Tamal nawayay ti mânjəhaɗ duk abivoru ana vaɗ goro ya anaŋga ni ti, ma gani gayak mam? Nak ti ɗəbabiyu nu ciliŋ.» 24 Àbəki zlam nday hini ka wakita ti bay maɗəbay Yezu nani; naŋ àbu agray sedi gani daya. Leli day mə̀səra sedi gayaŋ ya agray ni ti sedi ge jiri. 25 Yezu àgra zlam ndahaŋ a kay daya. Tamal təbəki ma gani bəlaŋ àna bəlaŋ ka wakita ti, amal wakita gani dal-dal àsaɓay. Nətamahay məlaŋ ga duniya ni ɗek àhəca ga mabəhaɗvana.