Mîs xa. Mîs ge ge ǁgan kai.
1 Tsoatsoas ǃnâs ge mîsa ge hâ i, tsîs ge mîsa Elob tawa ge hâ i, tsîs ge mîsa Elo ge i. 2 Nēs ge tsoatsoas ǃnâ Elob tawa ge hâ i. 3 Hoa xūn ge ǁîsa xu ge ī, tsî ǁîs ose i ge xū-i xare-e ī tama ge hâ i, ī ge-i hoa-i xa. 4 ǁÎs ǃnâb ge ûiba hâ, tsîb ge ûiba khoen di ǃnâ ge i, 5 tsîb ge ǃnâba ǃkhaenab ǃnâ ra ǃnâ, tsîb ge ǃkhaenaba ǃkhā bi tama ge i. 6 Khoe-i ge ge i, Eloba xu ge sîhe-i, Johaneb ti ǀon hâba. 7 ǁÎb ge ǃkhō-ammi nîs ǃoa ge hā, ǃnâb xab nî ǃkhō-amse, hoan nî ǁîba xu ǂgomse. 8 ǃNâ tamab ge ǁîba ge i, xaweb ge ge sîhe, ǃnâb xab nî ǃkhō-amga. 9 Tsî ǁnā ǃnâb ge ama-ai ǃnâ ge i, hoa khoen, nē ǃhūbaib ai ra hâna ra ǃnâǃnâba. 10 ǃHūbaib ǃnâb ge hâ i, tsî ǃhūbaib ge ǁîba xu ge ī, tsî ǃhūbaib ge ǁîba ǀū ge i. 11 ǁÎb din ǃoab ge ge hā, tsîn ge ǁîb dina ǃkhōǃoa bi tama ge i. 12 Xawe ǁîba ge ǃkhōǃoan kōseb ge ǁîna ǀgaiba ge mā, Elob ôa kaisa; ǁnān ǁîb ǀons ǃnâ ra ǂgomna, 13 ǁnān, ǀaoba xus karao, ǁgans di ǂâisa xus karao, aob di ǂâibasensa xus karao ǃnae taman, tsî Eloba xu ǃnae hâna. 14 Tsîs ge mîsa ge ǁgan kai, tsîs ge sada ǃnâ ge ǁan, tsî da ge ǁîs di ǂkhaisiba ge ǃgapa, ǁGûba xu ǀGuiseǃnae hâb di ǂkhaisib ase, ǀkhommi tsî amab tsîkha xa ǀoa hâba.
Johaneb ǁĀǁnâ-aob di ǃkhō-ams xa.
15 Johaneb ge ǁîb xa ǃkhō-am, tsî ǂgai tsî ra mî: Nēb ge a, ǁnāb, ǁîba ta goro mîba: Ti khaoǃgâ ǃgoaxab ge ti aiǃâ ge hâ iba; tita xab ge ǂguro i xui-ao. 16 Tsî ǁîb di ǀoasasiba xu da ge sada hoada ǀkhommi ama ǀkhom-e ge hō. 17 ǂHanub ge Moseb xa māhe xui-ao; xawe ǀkhommi tsî amab tsîkha ge Jesub Xristuba xu ge hā. 18 Khoe-i xare-i ge Eloba tātsē mû tama hâ; ǀguise ǃnae hâ ǀGôab ǁGûb di tîǂams ǃnâ hâb, ǁîb ge Eloba ge ǁguiǃāba da. 19 Tsî nēs ge ǃkhō-ams, Johaneb disa, Jodeǁîn ge Jerusalemsa xu pristergu tsî Leviǁîgu tsîga sî ǃnubai, dî bi gu nîga: Taritsa kha satsa? 20 Ob ge ǁkhoase ǁguiǁnâ tsî ǀoa tama ge i; tsîb ge ǁkhoase ge ǁguiǁnâ: Xristu tama ta ge tita. 21 O gu ge ge dî bi: Taritsa ǁnâi? Eliatsa? Ob ge: ǁÎ tama ta ge, ti ge mî. Kēbo-aotsa ǁnâi satsa? Ob ge: Hî-î! ti ge mî. 22 O gu ge ge mîǀî bi: Taritsa kha ǁnâi? Î ge ǃeream-e mā ǁkhā sige go sîga. Tare-ets ra sats ǂûts xa mî? 23 Ob ge ge mî: Tita ge ǃgaroǃhūb ǃnâ ra aoǁnâb di domta: ǃKhūb di daoba ǂhomi du re. Kēbo-aob Jesajab gere mî khami. 24 Tsî gu ge sîsabega Farisegu di ge i. 25 Tsî gu ge dî bi, tsî ge mîǀî bi: Tare xū-i ǃaromats ǁnâi ra ǁāǁnâ, Xristu tamats ga io, tsî Elia tamats ga io tsî kēbo-ao tamats ga io? 26 Ob ge Johaneba ǃeream gu tsî ge mî: Tita ge ǁgam-i ǀkha ra ǁāǁnâ; xaweb ge sadu ǁaegu mâ, sadu ǂan tamaba, 27 ǁnāb ge a ǁî, ti khaoǃgâ ǃgoaxaba, ǁharora âb di ǃhâurona ta nî xores xawesa ta anu tamaba. 28 Nēn ge Betanis tawa ge ī, Jordanǃāb nauǃani, Johaneb gere ǁāǁnâ ǃkhais tawa. 29 ǀGuitsēb ge Johaneba Jesuba ǁîb ǃoa mûǃgoaxa tsî ge mî: Mû, nēb ge a Elob ǁKhao, ǃhūbaib di ǁoreba ra ūbēba! 30 Nēb ge a ǁnāb, ǁîb xa ta gere mîba: Ti khaoǃgâb ge khoeba ǃgoaxa ti aiǃâ ge hâ iba, tita xab ge ǂguro i amaga. 31 Tsî ta ge ǂan bi tama ge hâ i; xawe Israelab nî ǂhaisabaga ta ge tita ge hā, ǁgam-i ǀkha ra ǁāǁnâse. 32 Tsîb ge Johaneba ǃkhō-am tsî ge mî: Gagaba ta ge ge mû, ǂnabu-i axaseb ge ǀhomma xu ǁgôaxa tsî ǁîb ai a hā ǃkhaisa. 33 Tsî ta ge ǂan bi tama ge hâ i, xawe tita ge sîb ǁgam-i ǀkha ta nî ǁāǁnâse, ǁnāb ge tita ǃoa ge mî: Gagab ǁgôaxa tsî ǁîb ai hâsets ge mûb, ǁnāb ge ǃAnu Gagab ǀkha ra ǁāǁnâba. 34 Tsî ta ge ǁîsa ge mû, tsî ta ge gere ǃkhō-am nēb a Elob Ôa, ti.
ǂGuro ǁkhāǁkhāsabegu Jesub digu xa.
35 ǀGuitsēb ge Johaneba ǁkhawa ge mâ i, ǀgamkha ǁîb ǁkhāǁkhāsabegu dikha ǀkha. 36 Tsî Jesubab ge gaub a hîa mûo, ob ge ge mî: Mû nēb ge Elob ǁKhaoba! 37 Tsî ǀgam ǁkhāǁkhāsabekha ge ǁîb ra ǃhoa ǀgausa ǁnâu, o kha ge Jesuba ge sao. 38 Tsî Jesub ge ǂnan, tsî ǁîkha ra sao bi ǃkhaisa mûo, ob ge ǁîkha ǃoa ge mî: Tare-e kho ra ôa? O kha ge ǁîb ǃoa ge mî: Rabitse (ǁkhāǁkhā-aotse, ti ra ǂnûiǃkhunihe mîs ge nēsa), mapats ǁan hâ? 39 Ob ge ge mîǀî kha: Hā î kho mû. O kha ge sī, tsî mapab ǁan hâ ǃkhaisa ge mû, tsî ǁnā tsēs ai ǁîb tawa ge hâ. Tsîb ge disiǁî nî ī ira ge i. 40 Andreab, Simon Petrub di ǃgâsab ge ǁnā ǀgamkha di ǀgui ge i, nēna Johaneb xa ǁnâu tsî Jesuba ge saokha. 41 ǁÎb ge ǂgurosa Simonni, ǁîb di ǃgâsab ǂûba hō tsî ge mîǀî bi: Mesiaba ge ge go hō. (Xristub ti ra ǂnûiǃkhuniheba). 42 Tsîb ge Jesub tawa ge ūsī bi. Tsî Jesub ge kōǀî bi tsî ge mî: Simon, Jonab ôats ge satsa; Kefab, tits ge nîra ǂgaihe. (ǃHaob ti ra ǂnûiǃkhunihesa). 43 ǀGuitsēb ge Jesuba Galileab ǃoa ge ǃgû ǂgao. Tsî ǁnāǃnubaib ge Filipuba ge hō. Jesub ge ge mîǀî bi: Tita sao! 44 Tsîb ge Filipuba Betsaidas, Andreab tsî Petrub tsîkha ǃās di ge i. 45 Filipub ge Natanaela hō tsî ge mîǀî bi: ǁNāb, Moseb ge ǁîb xa ǂhanub ǃnâ xoab tsî kēbo-aogu on ge ǁîb xa xoaba ge go hō, Jesub, Joseb ôab, Nasareǁîba. 46 Ob ge Natanaela ǁîb ǃoa ge mî: Mâ ǃgâi xū-e kha Nasaretsa xu a ǀkhī ǁkhā? Ob ge Filipuba ge mîǀî bi: Hā î mû! 47 Tsî Jesub ge Natanaeli ǁîb ǃoa ra hāsa a mûo, ob ge ǁîb xa ge mî: Kō, ama-ai Israelǁîb, gāxaǃnâsi-i hâǃnâ tamaba. 48 Ob ge Natanaela ǁîba ge dî: Mapa xuts a ǂan te? Ob ge Jesuba ǃeream tsî ǁîb ǃoa ge mî: Filipub ǂgai tsi tama hîa, ǀnomahais ǃgaots go hâ i ǃnubai ta ge go mû tsi. 49 Ob ge Natanaela ǃeream tsî ge mîǀî bi: Rabitse, sats ge a Elob Ôa, Israeli gao-aots ge satsa! 50 Ob ge Jesuba ǃeream tsî ǁîb ǃoa ge mî: ǀNomahais ǃgao ta go mû tsi, ti ta go mîba tsi ǃkhais ǃaromats ra ǂgom; nēn ǃgâ-ai kai xūnats ge nîra mû. 51 Tsîb ge ǁîb ǃoa ge mî: Amase, amase ta ra mîba go: Nēsisa xu go ge ǀhomma ǁkhowa-amsen hâse nîra mû, tsî Elob di ǀhomǃgāga Khoen Ôab ai ǃapa tsî ra ǁgôaxase.
Jesub ǃgameǁâus ai Kanas tawa.
1 Tsî ǃnonaǁî tsēs ai i ge ǃgameǁâu-e ge dīhe Kanas tawa Galileab ǃnâ; tsîs ge Jesub îsa ǁnāpa ge hâ i. 2 Tsîb ge Jesub ona ǁîb di ǁkhāǁkhāsabegu ǀkha ǃgameǁâus ǃoa ge ǁkhauhe hâ i. 3 Tsî ūn ge hâ i ǂauxûi-i ge toaǀkhā nîo, os ge Jesub îsa ǁîb ǃoa ge mî: ǂAuxûi-en kom ūhâ tamao. 4 Ob ge Jesuba ǁîs ǃoa ge mî: Tare-e ta sas ǀkha ǁae hâ, tarase? Ti iri kom ganupe hā tamao. 5 Os ge ǁgûsa ǃgāgu ǃoa ge mî: Mîba gob ga xū-i hoa-e dī re. 6 Tsî di ge ǁnāpa ǃnani ǁgamxapade ge mâ i, Jodeǁîn ǃanuǃanusens di ǁnaetiba ǃoa, mâs hoas ǀgam tamas ka io ǃnona nî ī emerga ǃkhōǂgā ǁkhāde. 7 Ob ge Jesuba ǁîgu ǃoa ge mî: ǁGamxapade ǁgam-i ǀkha ǀoaǀoa! O gu ge ǁîde ams kōse ge ǀoaǀoa. 8 Ob ge ǁîgu ǃoa ge mî: Nēsi xuri î go ǂûǂhûiǂui-aoba ūsība! O gu ge ge ūsī. 9 Tsî ǂûǂhûiǂui-aob ge ǁgam-i, ǂauxûi kai go-e tsâtsâo, (ǂan tamab go hâ i mapa xu i hâsa; xawe ǃgāgu ǁgam-e go xuri gu ge ge ǂan i), ob ge ǂûǂhûi-aoba dî-amaoba ǂgai, 10 tsî ǁîb ǃoa ge mî: Mâ khoe-i hoa-i ge aibe ǃgâi ǂauxûi-e ra mā, tsî ākhanun kao, o i ge ǁkhoa tama-e ra māhe; xawets kom satsa ǃgâi ǂauxûi-e nēsis kōse go sâuo. 11 Nē tsoatsoas saodi disab ge Jesuba Kanas Galileab dis tawa ge dī, tsîb ge ǁîb ǂkhaisiba ge ǂhaiǂhai. Tsî gu ge ǁkhāǁkhāsabegu âba ǁîb ǃnâ ge ǂgom. 12 Nēs khaoǃgâb ge Kapernaums ǃoa ge ǁgôa, ǁîb ǂûb tsî ǁîb îs tsî ǃgâsagu, tsî ǁkhāǁkhāsabegu âb tsîna, tsî ǀoro tsēde ǁnāpa ge hâ.
Tempeli di ǃanuǃanuhes xa.
13 Tsîb ge Jodeǁîn di Pasxakaitsēsa ǀgū ge i, tsîb ge Jesuba Jerusalems ǃoa ge ǃapa. 14 Tsîb ge tempeli ǃnâ gomagu tsî gūn tsî ǂnabun tsîna ra ǁamaxūgu tsî mariǂharugu-aogu tsîga ǁnāpa ǂnôase ge hō. 15 Ob ge tsurin ǀkha sami-e dībasen, tsî hoaga tempela xu ge doeǁgaǂui, gūn tsî gomagu tsîn ǀkha, tsî mariǂharugu-aogu di marinab ge ge tsoroxū tsî tāgu âgab ge ge ǂhāǃgau; 16 tsîb ge ǂnabuna ra ǁamaxū gu ǃoa ge mî: Nēna nēpa xu ūbē î go tā ti Îb di omma ǁamagu-omse dī. 17 O gu ge ǁkhāǁkhāsabegu âba ge ǂâihō: “Ôasasib sa ommi dib ge tita go hapu” ti xoahe hâ ǃkhais xa. 18 On ge Jodeǁîna ǃeream, tsî ǁîb ǃoa ge mî: Mâ sao-ets ǁnâi sida ra ǁgau, nēnats dī ǁkhā ǃkhaisa? 19 Ob ge Jesuba ǃeream, tsî ǁîn ǃoa ge mî: Nē tempela khôaǁnâ, o ta ge ǃnona tsēdi ǃnâ ǁîba nî omkhâi. 20 On ge Jodeǁîna ge mî: Hakadisiǃnaniǀa kurigu ǃnâb kom nē tempela ge omheo, ots satsa ǃnona tsēdi ǃnâ ǁîba nî omkhâi? 21 Xaweb ge ǁîba ǁnāsa ǁîb soros di tempeli xa ge ǃhoa. 22 ǁŌ hâna xub ge khâi ǃnubai gu ge ǁkhāǁkhāsabegu âba, nēsab ge mîǀî gu ǃkhais xa ge ǂâi, tsî gu ge xoas tsî Jesub ge mîǀî gu mîs tsîra ge ǂgom. 23 Tsî Jerusalems tawab ge Pasxakaitsēs di ǁaeb ai hā, on ge ǂguina ǁîb di ǀons ǃnâ ge ǂgom, dīb gere saoden ge mû amaga. 24 Xaweb ge Jesub ǂûba ǁîn ai ge ǂgomǃgâsen tama hâ i, hoanab ge ǂan i amaga; 25 tsî khoe-i nî nau khoe-i xa ǃkhō-amba bisab ge ǂhâba tama hâ i amaga; ǁî-aitsamab khoe-i ǃnâ hâ-e ge ǂan i xui-ao.
Xristub tsî Nikodemub tsîkha di ǃhoa-ūgus xa.
1 Tsîb ge khoeba ge hâ i, Farisegu dib, Nikodemub ti ǀon hâb, Jodeǁîn di ǂamkhoeba. 2 ǁÎb ge tsuxuba Jesub tawa hā, tsî ǁîb ǃoa ge mî: Rabitse ǂan ge ge a, Eloba xu ge hā ǁkhāǁkhā-aots a ǃkhaisa; khoe-i xare-i kom nē saodi, sats ra dīde a dī ǁoao, Elob ga ǁî-i ǀkha hâ tama io. 3 Ob ge Jesuba ǃeream, tsî ǁîb ǃoa ge mî: Amase, amase ta ra mîba tsi, khoe-i ga ǁkhawa ǃnae tama io, o i ge gaosib Elob diba a mû ǁoa. 4 Ob ge Nikodemuba ǁîb ǃoa ge mî: Mati i kha khoe-e, kaira hâǃâ a ǃnae ǁkhā? Xare i kha ǁkhawa ǁgûs di ǃnāb ǃnâ ǂgâ-oa tsî a ǃnae ǁkhā? 5 Ob ge Jesuba ge ǃeream: Amase, amase ta ra mîba tsi: Khoe-i ga ǁgam-i tsî Gagaba xu ǃnae tama io, o i ge tātsē gaosib Elob dib ǃnâ a ǂgâ ǁoa. 6 ǁGansa xu ǃnae hâ-i ge a ǁgan; tsî Gagaba xu ǃnae hâ-i ge a gaga. 7 Tā buru: ǁKhawa du nî ǃnae, ti ta go mîba tsi ǃkhais ǃaroma. 8 ǂOab ge ǂgaob ra ǃkhai-i hoa-i ai ra ǃgom, tsîts ge ǀōb âba ra ǁnâu, xawets ge a ǀū, mapa xub ra ǀkhī tsî mâǀîb ra ǃgû ǃkhaisa. ǁNās ǁkhās khami i ge Gagaba xu ǃnae hâ-i hoa-e ī. 9 Ob ge Nikodemuba ǃeream, tsî ǁîb ǃoa ge mî: Matin kha ǁnâi nēna a ī ǁkhā? 10 Ob ge Jesuba ǃeream, tsî ǁîb ǃoa ge mî: Israelǁîn di ǁkhāǁkhā-aotsa kha satsa, tsîts nēna ǂan tama hâ? 11 Amase, amase ta ra mîba tsi: Sige ge ǂan ge ana ra ǃhoa tsî mû ge gena ra ǃkhō-am; tsî du ge sige ǃkhō-amsa ǃkhōǃoa tama hâ. 12 ǃHūbaib din xa ta ga mîba du, tsî du ga ǂgom tama io, mati du kha nî ǂgom, ǀhommi din xa ta ga mîba duo? 13 Tsî khoe-i xare-i ge ǀhommi ǃoa ǃapa tama hâ, ǀhomma xu ge ǁgôaxab ǀguib, Khoen Ôab, ǀhommi ǃnâ hâba. 14 Tsî Moseb ge ǃgaroǃhūb ǃnâ ǀaoba ǀgapiǀgapi hâ is ǁkhās khamib ge Khoen Ôaba nîra ǀgapiǀgapihe, 15 hoan ǁîb ǃnâ ra ǂgomn nî ǀamo ûiba ūhâse. 16 ǁNātikōseb ge Eloba ǃhūbaiba ge ǀnam, ob ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tidese, xawen nî ǀamo ûiba ūhâse. 17 Elob kom ǁîb di ôaba ǃhūbaib ai sî tamao, ǃhūbaibab nî ǀgoraǃgâseo, tsîb kom ǃhūbaib nî ǁîba xu sâuhese ge sî bio. 18 ǁÎb ǃnâ kara ǂgom-i ge ǀgoraǃgâhe tide-e; xawe ǂgom tama ka i-i ge ǀnai ǀgoraǃgâhe hâ-e ǀguise ǃnae hâ ǀGôab Elob dib di ǀons ǃnâ i ǂgom tama amaga. 19 Tsî nēs ge ǀgoraǃgâsa, ǃnâb ge ǃhūbaib ai hā, xawen ge khoena ǃkhaenaba ǃnâb xa ǀnam isa, sîsengu ân ge ǂkhaba i xui-ao. 20 ǂKhababa ra dī-i hoa-i kom ǃnâba ra ǁkhan-eo, tsî i kom ǃnâb ǃoa hā tamao, ǁî-i sîsengu xa i ǂgōǀauhe tidese. 21 Xawe amaba ra dī-i ge ǃnâb ǃoa ra hā-e, î gu ga ǁî-i sîsenga ǂhai; Elob ǃnâ gu dīhe hâ xui-ao.
Johaneb ǁĀǁnâ-aob ge ǃaruǀî Jesub xa ra ǃkhō-am.
22 Nēn khaoǃgâb ge Jesuba ǁkhāǁkhāsabegu âb ǀkha Judeaǃhūb tawa ge sī; ǁnāpab ge ǁîgu ǀkha hâ tsî gere ǁāǁnâ. 23 Tsî Johaneb on ge Enons, Salims ǀgūse hâs tawa gere ǁāǁnâ, ǁgamxa ǃkhais ge i amaga. Tsîn ge ǁnāpa sī, tsî ge ǁāǁnâkaisen. 24 Ganupeb ge Johaneba ǃkhō-oms ǃnâ aoǂgāhe tama hâ i xui-ao. 25 Tsî i ge ǂnoagu-e ge ǀkhī Johaneb ǁkhāǁkhāsabegu tsî Jodeǁîn ǁaegu, ǃanuǃanusens xa. 26 On ge Johaneb tawa sī tsî ge mî: Rabitse, ǁnāb, Jordanǃāb nauǃani sats ǀkha go hâ ib, sats go ǁîb xa ǃkhō-ammi, mû, ǁîb ge ra ǁāǁnâ, tsîn ge hoana ǁîb tawa ra sī. 27 Ob ge Johaneba ǃeream tsî ge mî: Khoe-i ge xū-i xare-e a ūbasen ǁoa, ǀhomma xu i ga ǁî-e māhe tama io. 28 Sadu ǂûdu ge ti ǀhûǀguitimî-aodo: Tita ge Xristu tama ta, tsî ǁîb aiǃâ sîhe hâ ta ti ta gere mî ǃkhaisa. 29 ǃGame-aosa ūhâb ge ǃgame-aoba; tsî ǃgame-aob di khoeb mâ tsî ra ǁnâu bib ge ǃgame-aob di dommi xa kaise ra ǃgâiaǂgao. ǁNātib ge nē ǃgâiaǂgaob tiba go ǀoa. 30 ǁÎb ge ǃaruǀîǀgui nî ǀom, xawe tita ge ǃaruǀîǀgui nî ǂkhari. 31 ǀGapiseba xu ra ǁgôaxab ge hoan ǂamai hâba; tsî ǃhūba xu ra ǀkhīb ge a ǃhū, tsî ǃhūb din xa ra ǃhoa. ǀHomma xu ra hāb ge hoan ǂamai hâba. 32 Tsîb ge ra ǃkhō-am, mû tsîb ge ǁnâuna; tsî khoe-i xare-i ge ǃkhō-ams âba ǃkhōǃoa tama hâ. 33 ǃKhō-ams âba kara ǃkhōǃoa-i, ǁnā-i ge ra ǀgaiǀgai, Elob a ama-ai ǃkhaisa. 34 Elob ge sîb ge Elob mîde ra ǃhoa xui-ao; tsîb kom Eloba Gagaba ǀnōsib ǀkha mā tamao. 35 ǁGûb ge ǀGôaba ǀnam hâ tsîb ge hoana ǁîb ǃomǁae ge mā. 36 ǀGôab ǃnâ ra ǂgom-i ge ǀamo ûiba ūhâ-e, xawe ǀgôaba ǁnâuǀnam tama-i ge ûiba mû tide-e, tsîb ge Elob ǁaiba ǁî-i ai ra hâhâ.
Samariaǁî taras xa.
1 Tsî ǃKhūb ge hōǃâo, Farisegu ge ǁnâu ǃkhaisa, Jesub ge Johaneb ǃgâ-ai ǂguina ǁkhāǁkhāsabedī tsî a ǁāǁnâ ǃkhaisa, 2 (Jesub ge aitsama ǁāǁnâ tama, tsî ǁîb ǁkhāǁkhāsabegu ge ǁîsa ge dī), 3 ob ge Judeaba xū tsî ǁkhawa Galileab ǃoa ge ǃgû. 4 Tsîb ge Samariab ǃnâ-ū nî ǃkharu. 5 Ob ge Samariaǁîn di ǃāros Sixar ti ǀon hâs, Jakob ge ǁîb ôab Joseba mā ǃhanab ǀgūse ǁgoes tawa ge sī. 6 Tsîs ge ǁnāpa Jakob di tsausa ge hâ i. Ob ge Jesuba ǃgûs xa ǀhupu hâse tsaus xōǀkhā ge ǂnû; tsî-i ge ǃnaniǁî ir ge i. 7 Os ge Samariaǁî tarasa ge hā, ǁgam-es nî xurise. Ob ge Jesuba ǁîs ǃoa ge mî; Mā te, î ta ā re! 8 Tsî gu ge ǁkhāǁkhāsabegu âba ǃāros ǃoa ge ǃgû hâ i, ǂûna gu nî ǁamase. 9 Os ge Samariaǁî tarasa ǁîb ǃoa ge mî: Matits ǁnâi satsa, Jodeǁîts a hîa, tita Samariaǁî tarata ǁgam-e ra ǂgaoǀkhā? (Jodeǁîn kom Samariaǁîn ǀkha ǁae-ūgu tamao.) 10 Ob ge Jesuba ǃeream tsî ǁîs ǃoa ge mî: Elob hōsas ga ǂano, tsî tarib a ǃkhaisa: Mā te, î ta ā re! ti ra mîǀî siba, os ga ǁîba ǂgaoǀkhā hâ, tsîb ga ûitsama ǁgam-e mā si hâ. 11 Os ge tarasa ǁîb ǃoa ge mî: ǃKhūtse, ǃkhā-ūxū-ets kom ūhâ tamao, tsî tsaus kom a ǃgamo; mapa xuts ǁnâi ûitsama ǁgam-e ūhâ? 12 Abob Jakob, nē tsausa ge mā dab ǃgâ-aits a kai? Tsîn ge ǁîb ǂûb, ǁîb di ôan, tsî ǁîb ǀgoan tsîna ǁîs ǃnâ ge ā. 13 Ob ge Jesuba ǃeream, tsî ǁîs ǃoa ge mî; Nē ǁgam-i xa ra ā-i hoa-i ge ǁkhawa nî ǁgâ-e. 14 Xawe ǁnā ǁgam-i, tita nî ǁî-e mā-i xa kara ā-i hoa-i ge ǀamose ǁgâ tide-e; xaweb ge nî ǁnā ǁgam-i, tita nî ǁî-e mā-i, ǁî-i ǃnâ ǁgamxa ǀau kai, ǀamo ûib kōse ra ôa-e. 15 Os ge tarasa ǁîb ǃoa ge mî: ǃKhūtse, ǁnā ǁgam-i xa mā te, î ta tā ǁgâ, î ta tā nēpa xuri hāsa ǂhâ. 16 Ob ge Jesuba ǁîs ǃoa ge mî: ǃGû î sī sa aoba ǂgai, î hā. 17 Os ge tarasa ǃeream tsî ǁîb ǃoa ge mî: Ao-e ta kom ūhâ tamao. Ob ge Jesuba ge mîǀî si: Aio, ǂhanuses go mî: Ao-e ta ūhâ tama. 18 Koro aogas ge ūhā i, tsî nēsis ūhâb kom sa ao tamabao. Os ge amaba go ǃhoa. 19 Os ge tarasa ǁîb ǃoa ge mî: ǃKhūtse, kēbo-aots a ǃkhaisa ta ge ra mû. 20 Sida îgu ge nē ǃhommi ai gere ǀgoreǀî; o du ge sado, Jerusalems a ǃās, ǁîs tawa nî ǀgoreǀîhesa, ti ra mî. 21 Ob ge Jesuba ǁîs ǃoa ge mî; Tarase, ǂgom te re, iri ge nîra hā, ǁîb ai du ǁGûba nē ǃhommi ais karao, Jerusalems tawas karao ǀgoreǀî tideba. 22 Sadu ge ǀū du a-e ra ǀgoreǀî; xawe da ge sida ǂan tari-e da ra ǀgoreǀîsa; ǃgâiǃōsib Jodeǁîna xu ra hā xui-ao. 23 Xaweb ge ira nîra hā, tsîb ǀnai nēsi hâ, on ge ama-ai ǀgoreǀî-aona ǁGûba Gagab tsî amab tsîkha ǃnâ nîra ǀgoreǀî; ǁGûb nēti ra ǀgoreǀî bina ra ôa xui-ao. 24 Elob ge a Gaga; tsî ǁîba ra ǀgoreǀîn ge Gagab tsî amab tsîkha ǃnâ nî ǀgoreǀî bi. 25 Os ge tarasa ǁîb ǀoa ge mî: ǂAn ta a Mesiab (Xristub ti ra ǂgaiheb) nîra hā ǃkhaisa. ǁÎb ga hāo, ob ge hoana nîra ǂhôa da. 26 Ob ge Jesuba ǁîs ǃoa ge mî: Tita ge ǁî ta sas ǀkha ra ǃhoa ta. 27 ǃNubai gu ge ǁkhāǁkhāsabegu âba hā, tsî ge buru, tara-i ǀkhab ra ǃhoa ǃkhais xa; xaweb ge ǀguib xaweba: Tare-ets ra dî? Tare-ets ra ǁîs ǀkha ǃhoa? ti mîtsâ tama ge i. 28 Os ge tarasa ǁîs di xapasa xū, tsî ǃās ǃoa ǃgû, tsî khoen ǃoa ge mî: 29 Sī î du khoeba mû, dī ta geren hoana go mîba teba, iseb ǀnîsi Xristu tamasa. 30 On ge ǃārosa xu ǂoa, tsî ǁîb tawa ge sī. 31 ǁÎn ra ǂoa hîa gu ge ǁkhāǁkhāsabega ǁîba ǁkhau tsî: Rabitse, ǂû re! ti ge mî. 32 Ob ge ge mîǀî gu: Tita ge ǂû ta ra ǂû-e ūhâ, sago a ǀū-e. 33 O gu ge ǁkhāǁkhāsabega ge mîǀîgu: Khoe-e kha ǂûxū-e go hā-ūba bi? 34 Ob ge Jesuba ǁîgu ǃoa ge mî: Nēs ge ti ǂûsa, sî te geb di ǂâisa ta nî dī, tsî ǁîb di sîsenna ta nî dītoasa. 35 Ganupe haka ǁkhâgu, os nî ǃgaosa hā, ti mî tama du hâ? Mû, tita ra mîba du: ǃGapakhâi, î ǃhanaga kōǀî, ǀnai gu kom go ǃurio, ǃgaohe gu nîse. 36 ǀNaib ge ǃgao raba amǃnâ-e ra hō, tsî ǂûna ǀamo ûib ǃoa ra ǀhaoǀhaobasen, hoakha, tsoro rab tsî ǃgao rab tsîkha nî ǃgâiaǂgaose. 37 Nēs ǃnâ i ge ǁnā ǂkhoamî-e ama: Nēb ge ra tsoro tsî naub ge ra ǃgao. 38 Tita ge sago ge sî, sago sîsen tama hâ-e go nî ǃgaose; naugu ge ǁî-e gere sîsen, o go ge sago ǁîgu di sîsenni ǃnâ ge ǂgâ. 39 Tsî ǂguin ǁnā Samariaǁî ǃāros din ge ǁîb ǃnâ ge ǂgom, taras di mîs ǃaroma: Dī ta geren hoanab go mîba te, ti ra ǃkhō-amsa. 40 Tsî Samariaǁîn ge ǁîb tawa sīo, on ge ge ǀkhoma bi, ǁîn ǀkhab nî hâsa; ob ge ǀgam tsēra ǁnāpa ge hâ. 41 On ge naun ǃgâ-ai ǂguina ǁîb di mîs ǃaroma ge ǂgom, 42 tsî taras ǃoa ge mî: Sa mîs ǀguis ǃaroma da nēsi ǂgom tama hâ, ǁî-aitsama da kom ǁnâu tsî go mûǂano, nēb a amase Xristu ǃkhaisa, ǃhūbaib di ǃGâiǃōdī-aoba.
Gao-aob ǀgôab di ǂuruǂuruhes xa.
43 Tsî ǀgam tsēra khaoǃgâb ge ǁnāpa xu bē, tsî Galileab ǃoa ge ǃgû. 44 Jesub ǂûb ge ǃkhō-am xui-ao, kēbo-ao-i ǁgûxan ǃhūb ǃnâ ǃgôahe tama hâ ǃkhaisa. 45 Tsî Galileab tawab ge sī, on ge Galileaǁîna ge ǃkhōǃoa bi, Jerusalems tawab gere kaitsēs ai dīn hoana ge mûna; ǁîn on ge kaitsēs ai sī hâ i xui-ao. 46 Tsîb ge Jesuba ǁkhawa Kanas Galileab dis tawa ge sī, ǁîs ǃnâb ge ǁgam-e ǂauxûi kaisa. Tsîb ge Kapernaums tawa ǂanǂansa gao-aob ǃgāb, ǁîb di ôab ǀaesen hâba, ge hâ i. 47 Nēb ge ǁnâuo, Jesub ge Judeaba xu Galileab ǃoa hā ǀkhaisa, ob ge ǁîb tawa sī, tsî ge ǀkhoma bi, ǁgôa tsîb nî ǁîb di ôaba ǂgauǂgausa, ǁōǁga raseb ge ǁgoe i xui-ao. 48 Ob ge Jesuba ǁîb ǃoa ge mî: Saodi tsî buruxan tsîna du ga mû tama io, o du ge tātse ǂgom tide. 49 Ob ge gao-aob ǃgāba ǁîb ǃoa ge mî: ǃKhūtse, ǁgôa re, ti ôab ǁō tama hîa. 50 Ob ge Jesuba ge mîǀî bi: ǃGû, sa ôab ge go ûi. Ob ge khoeba Jesub go mîǀî bi mîsa ǂgom, tsî ge ǃgû. 51 Tsî ǀnai ǁgôab ra hîa gu ge ǃgāgu âba ǃoa bi, tsî ǂhôa bi tsî ge mî: Sa ôab ge go ûi. 52 Ob ge ǁîga iri, ǁîb aib go ǃgâise tsâba ge dîǃā; o gu ge ǁîb ǃoa ge mî: ǁAri hûǁî iri ais ge ǁkhaisa go xū bi. 53 Ob ge ǁgûba ge mûǂan, ǁkhā iri a ǃkhaisa, ǁîb aib ge Jesuba ǁîb ǃoa: Sa ôab ge go ûi, ti a mîba. Ob ge ǁîb ǂûb tsî ommi âb hoaragaba ge ǂgom. 54 Nēs ge ǀgamǁî saos, Jesub ge dīsa, Judeaba xub ge Galileab ǃoa hā ǃnubai.
Betesdas di khōsenǁgam-i tawa ge ǁgoe i ǀaesen hâb di ǂgauǂgauhes xa.
1 Nēn khaoǃgâ i ge Jodeǁîn di kaitsē ge i, tsîb ge Jesuba Jerusalems ǃoa ge ǃapa. 2 Tsî i ge Jerusalems ǃnâ Gūdao-ammi tawa khōsenǁgam-e ge hâ i, Hebreǁîgowab ǃnâ Betesda, ti ra ǂgaihe-e, koro hâǃnâ-omga ūhâ-e. 3 ǁÎgu ǃnân ge kaise ǂgui ǀaesen hân, ǂgīn, ǃhoran tsî ǃhom hân tsîna gere ǁgoe, ǁgam-i di gongonhesa gere ǃâuna. 4 ǀHomǃgā-i ge ǃkharaga ǁaegu ai khōsenǁgam-i ai ǁgôaxa tsî ǁgam-e gere gongon xui-ao. ǂGuro ra ǁgam-i di gongonhes khaoǃgâ ǂgâ-i, ǁnā-i ge gere ǂgau, mâ ǀaesenai-i ǀgui-e i ga ūhâ xawe. 5 Tsîb ge ǁnāpa ǂanǂansa khoeba ge hâ i, ǃnonadisiǁkhaisaǀa kuriga ge ǀaesen ǁgoe iba. 6 Tsî Jesub ge ǁîba mûǁgoe, tsî ge ǂan ǀnaib ge ǂomxase ǀaesen ǁgoe i ǃkhaisa, ob ge ǁîb ǃoa ge mî: ǂUru ǂgaots ra? 7 Ob ge ǀaesen hâba ge ǃeream bi: ǃKhūtse, ǁgam-i ra gongonhe ǃnubai nî tita khōsenǁgam-i ǃnâ ǂgā khoe-e ta kom ūhâ tamao; o i kom, tita ǃgûgaru hîa, ǀnî-e ti aiǃâ ra ǁgôao! 8 Ob ge Jesuba ǁîb ǃoa ge mî: Khâi, kharob âtsa ū, î ǃgû! 9 Ob ge khoeba ǁnātimîsi ǂgau, tsî kharob âba ū, tsî ge ǃgû. ǁNāb ge sâtsē ge i. 10 On ge Jodeǁîna ǂgauǂgauhe gob ǃoa ge mî: Sâtsēs kom, kharoba tanisats kom mā-amhe tamao. 11 Ob ge ǁîn ǃoa ge mî: ǂGauǂgau te gob ge: Kharob âtsa ū, î ǃgû, ti go mîǀî te. 12 On ge ge dî bi: Tariba kha ǁnā khoeb, sats ǃoa: Kharob âtsa ū, î ǃgû, ti go mîba? 13 Xaweb ge ǂgauǂgauhe goba, tarib a ǃkhaisa ge ǀū i; Jesub ge ūbēsen amaga; ǁnāpan ge ǂgui khoena hâ i xui-ao. 14 Nēn khaoǃgâb ge Jesuba tempeli ǃnâ hō bi, tsî ǁîb ǃoa ge mî: Kō, ǂuruts go; ǃaruǀî tā ǁore, î-i tā ǁnā-i ǃgâ-ai tsû xū-e hāǂam tsi. 15 Ob ge khoeba ǃgû, tsî Jodeǁîna sī ge ǂhôa, Jesub a ǃkhaisa, ǁîba go ǂgauǂgauba.
Jesub ge ǁîb di Elosis xa ra ǃhoa.
16 ǁNā-amagan ge Jodeǁîna Jesuba ge ǃgôaǃgon, tsî matin nî ǃgam bisa ge ôa-am, sâtsēs aib ge ǁîsa dī xui-ao. 17 Ob ge Jesuba ǁîna ge ǃeream: Ti îb ge nēsis kōse ra sîsen, o ta ge tita ona ra sîsen. 18 ǁNā-amagan ge Jodeǁîna ǁnās ǃgâ-ai, matin nî ǃgam bisa ge ôa-am, sâtsēsab go khôas ǀguis ǃaroma tama i, tsîb ge ǁkhāti Eloba ǁîb Îb ase go ǂgai, tsî ǁî-aitsamab Elob ǀkha ǀguiti-īse go dīsen. 19 Ob ge Jesuba ǃeream, tsî ǁîn ǃoa ge mî: Amase, amase ta ra mîba du: ǀGôab ge ǁîba xu aitsama xū-i xare-e a dī ǁoa, ǁgûb ra dīseb ra mû-i ǀgui-e; ǁîb ra dī-eb ǀgôab ona ra dī xui-ao. 20 ǁGûb ǀgôaba a ǀnam xui-ao, tsîb ge ǁîb ǂûb ra dīn hoana ra ǁgau bi; tsîb ge nēn ǃgâ-ai kai sîsenga nî ǁgau bi, sadu nî burus kōse. 21 ǁGûb ǁō hâna ǂkhaiǂkhai tsî ra ûi-ûis ǁkhās khamib ge ǀgôab ona ǂgaob ra-i hoa-e ra ûi-ûi. 22 ǁGûb ge khoe-i xare-e ǀgoraǃgâs tsîna hî tamaba, tsîb ge ǀgoraǃgâs hoasa ǀgôaba ge mā, 23 hoan nî ǀgôaba ǃgôase, ǁgûban ra ǃgôas ǁkhās khami. ǀGôaba ǃgôa tama-i ge ǁgûb, ǁîba ge sîba ǃgôa tama-e. 24 Amase, amase ta ra mîba du: Ti mîsa ǁnâu tsî tita ge sîb ǃnâ ra ǂgom-i, ǁnā-i ge ǀamo ûiba ūhâ, tsî ǀgoraǃgâs ǃnâ sī tide, xawe i ge ǁōba xu ûib ǃoa nî ǃgâu. 25 Amase, amase ta ra mîba du: Iri ge nîra hā, tsîb ǀnai nēsi hâ, on ge ǁō hâna Elob Ôab di domma nîra ǁnâu; tsî ǁnâu bi ran, ǁnān ge nîra ûi. 26 ǁGûb aitsama ǁîb ǃnâ ûiba ūhâs ǁkhās khamib ge ǁkhāti ǀGôaba ge mā, ûibab nî aitsama ǁîb ǃnâ ūhā ǃkhaisa; 27 tsîb ge ǁîba ǀgaiba ge mā, ǀgoraǃgâsab nî dīse, Khoen Oab a xui-ao. 28 Tā buru ǁîs ǃaroma; iri ge nîra hā xuige, ǁîb ain ǀhobadi ǃnâ hân hoana ǁîb di domma nîra ǁnâuba, 29 tsîn nîra ǀkhī, ǃgâina gere dīna ûib di khâis ǃoa, tsî ǂkhabana gere dîna ǀgoraǃgâs di khâis ǃoa. 30 Tita ge tita ǂû ta xu xū-e a dī ǁoa. ǁNâu ta ra khami ta ra ǀgoraǃgâs ge a ǂhanu, ti ǂâisa ta ôa tama, tsî ta Abob, tita ge sîb di ǂâisa ra ôa xui-ao. 31 Tita xa ta ga aitsama ǃkhō-amo, os ge ti ǃkhō-amsa ama tama hâ. 32 Xaweb ge ǀnîba hâ, tita xa ra ǃkhō-amma; tsî ta ge a ǂan tita xab ra ǃkhō-am ǃkhō-ams a ama ǃkhaisa. 33 Sadu ge Johaneb ǃoa sadu di sîsabega ge sî, tsîb ge amaba ge ǃkhō-am. 34 Xawe ta ge tita khoe-i di ǃkhō-amsa ǃkhōǃoa tama hâ; tsî nēna ta ra mî, ǃgâiǃō kai du nîse. 35 ǁÎb ge khau tsî ra ǃnâ ǃamamǀae ge i; o du ge ǃnubu ǁaeroba ǁîb di ǃnâb ǃnâ ǃgâiǃgâisen ǂgao hâ i. 36 Xawe ta ge tita Johaneb di-i xa kai ǃkhō-am-e ūhâ, ǁnā sîsengu, ǁGûb ge tita māgu, ǀamǀam gu ta nîsa, ǁnā sîsengu, dī ta ra gu kom tita xa ra ǃkhō-amo, ǁGûb ge tita sî ǃkhaisa. 37 Tsî tita ge sî ǁGûb ge ǁkhāti tita xa ge ǃkhō-am; sadu ge tātsē ǁîb di domma ǁnâu tama, tsî ǁîb di ība mû tama hâ. 38 Tsî du ge ǁîb mîsa, sadu ǃnâs nî hâhâse ūhâ tama hâ, ǁîb ge sîba du ǂgom tama hâ amaga. 39 Sadu ge xoas ǃnâ ra ôa, ǁîs ǃnâ du ǀamo ûiba ūhâ, ti du ǂâi hâ xui-ao; tsî ǁîs kom tita xa ra ǃkhō-amsao. 40 Tsî du ge tita ǃoa hā ǂgao tama hâ, ûiba du nî ūhâse. 41 Khoena xu ta ge tita ǃgôa-e ūǃoa tama hâ. 42 Xawe ta ge sado a ǂan, Elob ǀnamma du sadu ǃnâ ūhâ tama hâ ǃkhaisa. 43 Tita ge ti îb di ǀons ǃnâ ge hā, tsî du ge ǃkhōǃoa te tama hâ. ǀKharab ga ǁîb ǀons ǂûs ǃnâ hāo, o du nî ǃkhōǃoa bi. 44 Mati du kha a ǂgom ǁkhā, sadu ǃnâ ǃgôa-e ra ūǃoabagu do, tsî Elob ǀguiba xu hâ ǃgôaba ôa tama do? 45 Tā ǂâi, Abob tawa ta nî sado ǀanaǃgâ ǃkhaisa. ǀGuib ge hâ, sado ra ǀanaǃgâba: Moseb, ǁîb ai du ge mûmâinǃgâba. 46 Moseba du ga ǂgomo, o du ga tita ona ǂgom hâ; ǁîb tita xa xoa hâ amaga. 47 Xawe ǁîb di xoade du ga ǂgom tama io, mati du kha ti mîde nî ǂgom?
Jesub ge koroǀoadisi khoega ra ǂûmā.
1 ǁNās khaoǃgâb ge Jesuba Galileahurirob, Tiberias tawa hâb nauǃani ge ǃgâu. 2 Tsîs ge kai ǂnubisa ǁîba ge sao, ǀaesen hân tawab ra dī saoden ge mû xui-ao. 3 Ob ge Jesuba ǃhommi ai ǃapa, tsî ǁnāpa ǁkhāǁkhāsabegu âb ǀkha ge ǂnû. 4 Tsîb ge Pasxab, Jodeǁîn di kaitsēsa ge ǀgū i. 5 ǃNubaib ge Jesuba ǃgapakhâi tsî ge mû, kai ǂnubis ǁîb ǃoa ra hāsa; ob ge Filipub ǃoa ge mî: Mapa ge nî perena ǁama, nēn nî ǂûga? 6 Tsîb ge nēsa ǃâitsâ bi rase ge mî; ǁîb kom ge ǂan io, tare-eb nî dīsao. 7 Ob ge Filipuba ge ǃeream bi: ǀGamkaidisi denargu di pere-i kom ǁîna ǂâuba tideo, mâ-i hoa-i ân ga ǂkhari ǃâro-e hō xawe o, ti. 8 Ob ge ǁkhāǁkhāsabegu âb di ǀguib, Andreab, Simon Petrub di ǃgâsaba ǁîb ǃoa ge mî: 9 Axarob ge nēpa hâ, koro gerstperes tsî ǀgam ǁaukha tsîna ūhâba, xawe tarena ǁîna nētikō ǂgui ǂnubis ǃnâ? 10 Ob ge Jesuba ge mî: An khoena ǂnû! Tsîs ge ǁnā ǃkhaisa ǀgâxa ge i. ǃNubai gu ge koroǀoadisi nî ī khoega ge ǂnû. 11 Ob ge Jesuba perega ū, tsî gangan, tsî ǁîga ǁkhāǁkhāsabega ge mā, tsî ǁkhāǁkhāsabegu ge ǂnû gona ge mā; ǁnās ǁkhās xase ǁaun tsîn xa, ǂgaon ge hâ is kōse. 12 Tsî ǁân geo, ob ge ǁkhāǁkhāsabegu âb ǃoa ge mî: ǃGau go ǃârona ǀhaoǀhao, î-i tā xū-i xare-e kā. 13 O gu ge ǀhaoǀhao, tsî disiǀgamǀa ǀharudi ǀoaba ǃâron xa ge ǀoaǀoa, ǁnā koro gerstperegu xa gu ge ǂûǃgau hâ in xa. 14 Tsî khoen ge Jesub go dī saosa mûo, on ge ge mî: Nēb ge amase ǁnā kēbo-aob, ǃhūbaib ai nîra hāba. 15 Tsî Jesub ge ǂan io, hā tsîn nî ǃkhō bi ǃkhaisa, gao-aodī bin nîse, ob ge ǁkhawa ǃhommi ǃoa ge ǂgō, ǁîb ǀguiba ǀguri.
Xristub ge hurib ai ra ǃgû.
16 Tsî ǃui-i ge, o gu ge ǁîb di ǁkhāǁkhāsabega hurirob ǁga ge ǁgôa. 17 Tsî ǂgaus ǃnâ ǂgâ tsî gu ge hurirob nauǃani Kapernaums ǃoa ge ǃgâu. Tsî i ge ǀnai ǃkhae ge i, tsîb ge Jesuba ganupe ǁîgu tawa hā tama ge hâ i. 18 Tsîb ge huriroba kai ǂoa-i xa ge khâi, 19 Tsî koro nî ī ǃnani nî ī kilometerde gu ge ǃgâu hâ i ǃnubai gu ge Jesuba, hurirob aib garu, tsî ǂgausab ra ǀgū hîa ge mû; o gu ge ge ǃao. 20 Ob ge ǁîgu ǃoa ge mî: Tita komo, tā ǃao! 21 ǃNubai gu ge ǁîba ǂgaus ǃnâ ge ūǂgâxa ǂgao; os ge ǂgausa ǃhaese garuǀî gu ge i ǃhūb tawa ge sī.
Jesub ge ǁîb ǁgans tsî ǀaob tsîra di ǀgaib xa ra aoǁnâ.
22 Tsî ǀguitsēs ge ǂnubis, hurirob ammi ai mâsa ge mû, ǀnî ǂgau-i ǁnāpa a ǀkhai ǃkhaisa, ǁkhāǁkhāsabegu go hâǃnâ hâ is ǀguis, tsî Jesub go ǁîb di ǁkhāǁkhāsabegu ǀkha ǂgâ tama i, tsî gu go ǀguri ī ǃkhaisa; 23 xawe di ge ǀnî ǂgaude Tiberiasa xu, ǁnā ǃkhais ǁîs tawa gu ge ǃKhūb ra gangan hîa pereǂûs ǀgūse ge hā. 24 Tsî ǂnubis ge mû, Jesub tsî ǁîb di ǁkhāǁkhāsabegu tsîgu ǁnāpa ǀkhai ǃkhaisa, on ge ǁîn ona ǂgaudi ǃnâ ǂgâ tsî Kapernaums tawa ge sī, Jesuba ra ôase. 25 Tsî hurirob nauǃanin ge hō bio, on ge ǁîb ǃoa ge mî: Rabitse, mâ ǁaets go nēpa hā? 26 Ob ge Jesuba ǁîna ǃeream tsî ge mî: Amase, amase ta ra mîba du, saode du ge mûs ǃaroma tama i tsî peren xa ǂû tsî du go ǁâ ǃkhais ǃaroma du ra ôa te. 27 Tā kā ra ǂû-i ǃaroma sîsen, î du ǁnā ǂû-i, ǀamo ûib kōse ra hâhâ-i Khoen Ôab nîra mā du-i ǃaroma sîsen; ǁîbab ǁGûb Eloba ǀgaiǀgai hâ xuige. 28 On ge ǁîb ǃoa ge mî: Tare-e da nî dī, o da Elob di sîsenga nî sîsen? 29 Ob ge Jesuba ǃeream, tsî ǁîn ǃoa ge mî: Nēb ge Elob di sîsenna, ǁîba ge sîb ǃnâ du nî ǂgom ti. 30 On ge ǁîb ǃoa ge mî: Mâ sao-ets kha ra dī, mû tsî da nî satsa ǂgomse? Tare-ets ra sîsen? 31 Sada îgu ge ǃgaroǃhūb ǃnâ manaba gere ǂû, xoamâihe hâ khami: “ǀHomma xub ge ǁîna pere-i xa ge ǂûmā.” 32 Ob ge Jesuba ǁîna ǃoa ge mî: Amase, amase ta ra mîba du: Mose tamab ge ǁnāb, ǀhommi pereba ge sado māba, xaweb ge a ti Î, sado ama-ai ǀhommi pereba ra māba. 33 Nēb ge Elob di pereb, ǀhomma xu ge ǁgôaxab, tsî ǃhūbaiba ûiba ra māba xui-ao. 34 On ge ǁîb ǃoa ge mî: ǃKhūtse hugaǀgui nē pereb xa mā da. 35 Ob ge Jesuba ǁîn ǃoa ge mî; Tita ge ûib di pereta. Tita ǃoa ra hā-i ge tātsē ǃâ tide-e, tsî tita ǃnâ ra ǂgom-i ge tātsē ǁgâ tide-e. 36 Tsî ta ge go mîba du, mû te du ge ǃkhaisa, xawe du ǂgom tama. 37 ǁGûb ra tita mā-i hoa-i ge tita ǃoa ra hā-e; tsî tita ǃoa ra hā-e ta ǂhāǂui tide. 38 ǀHomma xu ta ge ǁgôaxa xui-ao, ti ǂâisa ta nî dīse tama, xawe tita ge sîb di ǂaisa ta nî dīse. 39 Tsî nēs ge tita ge sî ǁGûb di ǂâisa, ǁîb ge tita mān hoan xa ta ǀgui-i xare-e kā kai tide ǃkhaisa, tsî ta nî ǁî-e ǀuni tsēs ai ǂkhaiǂkhai ǃkhaisa. 40 Tsî nēs ge ǂâis tita ge sîb disa, ǀgôaba ra ǃgapaǀî-i, tsî ǁîb ǃnâ ra ǂgom-i hoa-i nî ǀamo ûiba ūhâ ǃkhaisa; tsî ta ge tita ǁî-e nî ǂkhaiǂkhai ǀuni tsēs ai. 41 On ge Jodeǁîna ǁîb ǂama ge ǀara: Tita ge ûib di pereta, ǀhomma xu ge ǁgôaxa ta, tib goro mî ǃkhais ǃaroma. 42 On ge ge mî: Jesub, Joseb ôa tamaba kha nēb, ǁîb ǁgûb tsî ǁgûs tsîra da a ǂanna? Matib ǁnâi: ǀHomma xu ta ge ǁgôaxa, ti ra mî? 43 Ob ge Jesuba ǃeream, tsî ǁîn ǃoa ge mî: Tā sadu ǃnâ ǀara. 44 Khoe-i xare-i ge tita ǁga a hā ǁoa, ǁGûb tita ge sîb ga ǁî-e tita tawa ǂgaihā tama io; tsî ta ge tita ǁî-e nîra ǂkhaiǂkhai ǀuni tsēs ai. 45 Kēbo-aogu ǃnâ xoamâihe hâ: Tsîn ge hoana Elob xa ǁkhāǁkhāhe hâse nî hā. Mâ-i hoa-i, ǁGûb xa ǁnâu tsî ra ǁkhāǁkhāsen-i ge tita ǃoa ra hā. 46 ǁNāti tamas: Khoe-i ga ǁGûba mû hâs, ǁnāb, Eloba xu hâb ǀguib kom ǁGûba ge mûo. 47 Amase, amase ta ra mîba du: ǂGom ra-i hoa-i ge ǀamo ûiba ūhâ. 48 Tita ge ûib di pereta. 49 Sadu îgu ge ǃgaroǃhūb ǃnâ manaba gere ǂû, xawe gu ge ge ǁō. 50 Nēb ge pereb, ǀhomma xu ra ǁgôaxaba, ǁîb xa ga ǂû khoe-i ǁō tidese. 51 Tita ge ûitsama pereta, ǀhomma xu ge ǁgôaxa ta. Nē pereb xa kara ǂû khoe-i ge ǀamosib kōse nîra ûi-e. Tsî pereb, tita nî māb ge ti ǁgans, ǃhūbaib di ûib ǃaroma ta nîra māsa. 52 On ge Jodeǁîna ǂnoagu tsî ge mî: Matib kha nēba sada ǁîb di ǁgansa a ǂûmā ǁkhā? 53 Ob ge Jesuba ǁîn ǃoa ge mî: Amase, amase ta ra mîba du: Khoen Ôab di ǁgansa du ga ǂû tama io, tsî ǁîb ǀaoba du ga ā tama io, o du kom sadu ǃnâ ûi-e ūhâ tamao. 54 Ti ǁgansa ra ǂû-i, tsî ti ǀaoba ra ā-i, ǁnā-i ge ǀamo ûiba ūhâ tsî ta ge ǁî-e nîra ǂkhaiǂkhai ǀuni tsēs ai. 55 Ti ǁgans a ama-ai ǂû, tsî ti ǀaob a ama-ai āxū xui-ao. 56 Ti ǁgansa ra ǂû-i, tsî ti ǀaoba ra ā-i ge tita ǃnâ ra hâ-e, tsî tita ge ǁî-i ǃnâ ra hâ. 57 Ûitsama ǁGûb ge tita sî, tsî ta ǁGûba xu ra ûis ǁkhās khami i ge ǁkhāti tita ra ǂû-e tita xu nîra ûi. 58 Nēb ge pereb, ǀhomma xu ge ǁgôaxaba, sadu îgu ge manaba ǂû tsî gere ǁō khami ī tamaba. Nē pereb xa kara ǂû-i kom ǀamosib kōse nîra ûi-eo. 59 Nēnab ge Kapernaums tawa ge mî, sinagogeb ǃnâ ra ǁkhāǁkhāǃâ.
ǂGuigu Jesub ǁkhāǁkhāsabegu digu ge ǁîba ra ǁnāxū. Petrub di ǁguiǁnâs.
60 Tsî ǂguin ǁîb ǁkhāǁkhāsaben din ge ǁnâuo, on ge ge mî: Ama ǁgonǁgonǂgaosa mî-i ge nē-e; tari-e ǁî-e a ǁnâu ǁkhā? 61 Tsî Jesub ge ǁîb ǃnâ ǂan, ǁîb di ǁkhāǁkhāsaben ǁîs ǃaroma ra ǀara ǃkhaisa, ob ge ǁîn ǃoa ge mî: ǁGonǁgonǂgao dus ra nēsa? 62 Mati i kha nî ī, Khoen Ôaba du ga aibeb ge hâ i ǃkhais ǃoa ra ǃapase mûo? 63 Gagab ge ûi-ûi raba, ǁgans ge harebe tama hâ. Mîdi, sadu ǃoa ta go ǃhoadi ge gaga tsî a ûi. 64 Xawe ǀnîn ge sadu ǃnâ hâ ǂgom tamana. Tsoatsoasa xub kom Jesuba ge ǂan io, mân a ǃkhaisa, ǂgom tidena, tsî mâb a ǃkhaisa ǁîba nî ǀapexūba. 65 Ob ge ge mî: ǁNā-amaga ta ge ge mîba du: Khoe-i xare-i ge tita ǃoa a hā ǁoa, ǁGûba xu i ga ǁnāsa māhe tama io. 66 ǁNā ǁaeba xun ge ǂguin ǁîb ǁkhāǁkhāsaben dina oa, tsî ǃaruǀî ǁîb ǀkha ǃgû tama ge i. 67 Ob ge Jesuba disiǀgamǀagu ǃoa ge mî: Tsî sago ona ra ǃgûbē ǂgao? 68 Ob ge Simon Petruba ǁîba ge ǃeream: ǃKhūtse, tari-i ǃoa ge kha nî ǃgû? Sats kom mîdi ǀamo ûib dide ūhâo. 69 Tsî ge kom sige ǂgom tsî ge mûǂano, Xristu, ûitsama Elob di Ôats a ǃkhaisa. 70 Ob ge Jesuba ǁîga ge ǃeream: Disiǀgamǀase ta kha sago ǃkhōǂuibasen tama hâ? Tsî ǀguib âgo ge a ǁgâua. 71 Tsîb ge ǁîsa Judab, Simonni ôab Iskarioǁîb xa ge mî; ǁîb ge ega ge ǀapexū bi, tsîb ge disiǀgamǀagu di ǀgui ge i.
Jesub ǀaokhoen di ǂgomoǃnâsib xa.
1 Tsîb ge Jesuba nēn khaoǃgâ Galileaba ge ǃgûǃnâ; Judeabab ge ǃgûǃnâ ǂgao tama ge i, Jodeǁîn ge ǃgam bin nîsa gere ôa-am xui-ao. 2 Tsîs ge Jodeǁîn di kaitsēs, ǁhaogu kaitsēs ti ra ǂgaihesa ge ǀgū i. 3 O gu ge ǃgâsagu âba ǁîb ǃoa ge mî: Nēpa xu ǃgû, î Judeab tawa sī în ǁkhāǁkhāsaben âtsa ǁkhāti dīts ra sîsenga mû. 4 Khoe-i xare-i ge xū-e ǂganǃgâsib ǃnâ dī tama, ǂhaisase i nî ǂansa ǃkhaisa ra ôa-amǃâ. Nēnats ga dīo, ǃhūbaiba ǁnâi aitsama ǂhaiǂhaisenba re. 5 ǃGâsagu âb ǂûgu on ge ǁîb ǃnâ ǂgom tama i xui-ao. 6 Ob ge Jesuba ǁîgu ǃoa ge mî: Ti ǁaeb ge ganupe hā tama hâ, xawe sago di ǁaeb ge hugaǀgui nēpa hâ. 7 ǃHūbaib ge sago a ǁkhan ǁoa; xaweb ge tita ra ǁkhan, ǁîb di sîsengu a ǂkhaba, ti ta ǁîb xa ra ǃkhō-am xui-ao. 8 Sago ǁnâi nē kaitsēs ǃoa ǃgû. Tita ge nē kaitsēs ǃoa ganupe ǃgû tide, ti ǁaeb ganupe hā tama hâ xui-ao. 9 Tsî nēna mî tsîb ge Galileab ǃnâ ge hâ.
Jesub ge Jerusalems tawa ǁhaogu kaitsēs ai ra ǁkhāǁkhā. Tare-es ǁaesa ǁîb xa ra ǂâi. Nikodemub ra gowaba bi.
10 Tsî ǃgâsagu âb ge ǃgûbē ǃnubaib ge ǁîb ǂûb ona ge ǃgû, ǂhaisase tama, xawe ǂganǃgâsib ǃnâ. 11 On ge Jodeǁîna ǁîba kaitsēs ai ôa, tsî ge mî: Mapab ǁîba hâ? 12 Tsîs ge ǁîb xa ǀhuikhoms kaisa ǁaes ǃnâ ge hâ i. ǀNîn ge: ǃGâi khoeb komo, ti ge mî. On ge nauna: Hî-i, ǁaesab kom ra ǂgaeǂhapuo, ti ge mî. 13 Xawe i ge khoe-i xare-e ǁîb xa ǁkhoaǂgaose ǃhoatsâ tama ge i, Jodeǁîna ǃao tsî. 14 Tsî ǀnai i ge kaitsēgu ǁaegu i, ǃnubaib ge Jesuba tempeli ǃoa ǃgû, tsî gere ǁkhāǁkhā. 15 On ge Jodeǁîna buru, tsî ge mî: Matib kha nēba xoade a ǂan, ǁkhāǁkhāhe tamab hâ hîa? 16 Ob ge Jesuba ǁîna ǃeream tsî ge mî: ǁKhāǁkhās âtas ge ti tama hâ, xawes ge a tita ge sîb di. 17 Khoe-i ga ǁîb di ǂâisa dī ǂgao-o, o i ge nî hōǃâ, ises nē ǁkhāǁkhāsa Eloba xu hâsa, īse ta aitsama tita xa ra ǃhoasa. 18 Aitsama ǁî-i xa ra ǃhoa-i ge ǁî-i ǃgôab ǂûba ra ôa-e, xawe ǁî-e ge sîb di ǃgôaba ra ôa-i, ǁnā-i ge a ama-ai, tsî ǂhanuoǃnâsi-i xare-i ge ǁî-i ǃnâ hâ tama hâ. 19 Moseba sado ǂhanuba mā tamab hâ? Xawe i ge khoe-i sadu di-i xare-e ǁîba dī tama hâ. Tarexa du kha ǃgam te du nîsa ra ôa-am? 20 Os ge ǁaesa ǃeream, tsî ge mî: ǁGâuabats kom ūhâo. Tari-e ǃgam tsi nîsa ra ôa-am? 21 Ob ge Jesuba ǃeream, tsî ǁîn ǃoa ge mî: ǀGui dī-i ǀgui-e ta ge dī, o du ge hoatsama ǁî-i ǂama buru hâ. 22 Moseb ge ǃgaosa ge mā du; Moseba xus hâo tama, tsîs ǁgûga xus hâ; xawe du ge khoe-e sâtsēs ai ra ǃgao. 23 Tsî khoe-i ga sâtsēs ai ǃgaosa hō, Moseb ǂhanub khôahe tidese, o du tita ǃoagu ǁnâi ra ǁaixa, hoaraga khoe-e ta go sâtsēs ai ǂuruǂurus ǂama? 24 Tā mûs ǃoa ǀgoraǃgâ, î du ǂhanu-ai ǀgoraǃgâ-e ǀgoraǃgâ. 25 On ge ǀnîn Jerusalems dina ge mî: Nē tamaba kha ǁnāb ǃgam bin nîsan ra ôa-amma? 26 Tsî mû, ǂhaisaseb ra ǃhoa, xawen ge xū-i xare-e mîba bi tama hâ. Mûǂan gu go xare sada ǂamkhoega, nēb a amase Xristu ǃkhaisa? 27 Xawe da sada a ǂan, mapa xub nēba hâsa. Tsî Xristub ga hāo, o i kom khoe-i xare-e ǂan tideo, mapa xub hâsao. 28 Ob ge Jesuba tempeli ǃnâ ra ǁkhāǁkhāse ǃgarise ge ǂgaiǂui: Ā, sadu ge tita ǂan hâ, tsî du ge a ǂan, mapa xu ta hâsa: Aitsama ta ge tita xu hā tama hâ, xawe ama-aib ge ǁîb, tita ge sîb, sadu ǂan tama hâba. 29 Xawe ta ge tita a ǂan bi, ǁîba xu ta hâ xui-ao, tsîb ge ǁîba ge sî te. 30 On ge ǃkhō bin nîsa ge ôa-am; xawe khoe-i xare-i ge ǃomma ǁîb tawa ǁgui tama, iri âb ganupe hā tama ge hâ i xui-ao. 31 Tsî ǂguin ǂnubis din ge ǁîb ǃnâ ǂgom tsî ge mî: Xristub ga hāo, xareb kha nēb ra dī saodi xa ǂgui saode nî dī? 32 Tsî Farisegu ge ǁnâu, nēti īnas ra ǂnubisa ǁîb xa ǀhoeǃhoa ǃkhaisa, o gu ge Farisegu tsî ǀgapipristergu tsîga ǃgāga ge sîǂui, ǁîba gu nî ǃkhōse. 33 Ob ge Jesuba ǁîn ǃoa ge mî: Ganupe ǂkhari ǁaero-i ǀgui-e ta ge sadu ǀkha nî hâ, o ta ge tita ge sîb ǃoa nî ǃgû. 34 ǃNubai du ge tita nî ôa, tsî hō te tide; tita hâpa, ǁnāpa du a sī ǁoa xui-ao. 35 On ge Jodeǁîna ǁîn ǁaegu ge mî: Mapab kha nēba nî ǃgû, o da ǁîba hō tide? ǀGaruǀgaruhe hâ Grikeǁînǀî ǃgû tsîb kha nî Grikeǁîna ǁkhāǁkhā? 36 Mâ mîǃnôa-e kha nēb ra mî-e: O du ge tita nî ôa, tsî hō te tide; tsî: Tita hâpa, ǁnāpa du ge a sī ǁoa? 37 Tsî ǀuni tsēs kaitsēdi dis, hoadi xa kais aib ge Jesuba mâ, tsî ǂgai tsî ge mî: Khoe-i ga ǁgâ, a-i tita ǁga hā, î-i ā. 38 Tita ǃnâ ra ǂgom-i, xoas ra mî khami, ǁnā-i di sorosa xu gu ge ûitsama ǁgamǃāga nîra dâu. 39 Tsîb ge nēsa ǁîb ǃnâ ga ǂgomn nîra hō Gagab xa ge mî; ganupeb ge ǃAnu Gagaba hā tama ge hâ i, Jesub ge ganupe ǂkhaiǂkhaihe tama hâ i amaga. 40 On ge ǂguin ǂnubis dina, nē mîsan ge ǁnâuo ge mî: Nēb ge amase ǁnā kēbo-aoba. 41 On ge nauna ge mî: Xristub ge ǁîba. Xawen ge nauna ge mî: Xristuba kha Galileaba xub nî ǀkhī? 42 Xoasa kha mî tamas hâ, Davib di suriba xu, tsî ǃāros Betlehems, Davib ge hâǃnâ isa xub nî Xristuba ǀkhī ǃkhaisa? 43 O i ge ǁhaiǃāgu-e ǂnubis ǁaegu ge hā ǁîb ǃaroma. 44 Tsî ǀnîn ge ǁîba ǃkhō ǂgao ge hâ i; xawe khoe-i xare-i ge ǁîb tawa ǃomma ǁgui tama hâ. 45 Tsî sîsabegu ge ǀgapipristergu tsî Farisegu tsîgu tawa ǁarusīo, o gu ge nēga ǁîgu ǃoa ge mî: Tare xū-i ǃaroma go ūhā bi tama hâ? 46 O gu ge sîsabega ge ǃeream: Tātsē i kom khoe-e nē khoeb khami ǃhoa tama ge hâ io. 47 O gu ge Farisega ge ǃeream: Sago ona kha ǂgaeǂhapuhe hâ? 48 ǂAmkhoegu di ǀgui-e ǁîb ǃnâ ǂgom-i ge, tsî Farisegu di ǀgui-i tsîna? 49 Xawe nē ǂnubis ǂhanuba ǂan tamas ge ǀâxarexūhe hâ. 50 Ob ge Nikodemub, tsuxuba ǁîb tawa ge hāb, ǁîgu di ǀgui ge iba ǁîgu ǃoa ge mî: 51 Sada di ǂhanuba xareb khoe-e ra ǀgoraǃgâ, khoe-i aibe ǁnâuǃgâhe tama, tsî dī-i ra-e ǂanǃāhe tama hâ hîa? 52 O gu ge ǃeream, tsî ǁîb ǃoa ge mî: Sats ona kha a Galileaǁî? Ôaǃnâ î mû, Galileaba xu i kēbo-ao-i xare-e khâi tama hâsa. 53 O i ge mâ-i hoa-e ǁnāti ge ǁaru.
ǃGamekhôa-aos xa.
1 Tsîb ge Jesuba ǀKheraǃhommi ǃoa ge ǃgû. 2 Tsî ǃnauǁgoagab ge ǁkhawa tempeli ǃnâ ge sī, tsî ǂnubis hoas ge ǁîb tawa ge hā. Ob ge ǂnû tsî ǁîna gere ǁkhāǁkhā. 3 Tsî gu ge xoaǂansabegu tsî Farisegu tsîga taras, ǀase ǃgamekhôas ǃnâ go ǃkhōhesa ǁîb tawa ūhā, tsî ǁaegub ǃnâ mâi si, 4 tsî ǁîb ǃoa ge mî: ǁKhāǁkhā-aotse, nē taras ge ǀase ǃgamekhôas ǃnâ go ǃkhōhe. 5 Tsî Moseb ge ǂhanub ǃnâ ge mîmā, nēti īn nî ǀuiǁhomhe ǃkhaisa; satsa ǁnâi, tare-ets ra mî? 6 Tsî gu ge ǁnāsa ge mî, ǃâitsâ bi gu nîse, î gu ga ǁîba ǀhapiǀhapi ǁkhā ti. Ob ge Jesuba ǃgamǃgâ tsî ǀkhunub ǀkha ǃhūb ai ge xoa. 7 Tsî dîhâhâ bi gu geo, ob ge khuisen tsî ǁîgu ǃoa ge mî: Sago xa ga ǁoreoba ab ǂguro ǀuisa ǁîs ai ǂnoa. 8 Tsî ǁkhawa ǃgamǃgâ tsîb ge ǃhūb ai ge xoa. 9 Tsî ǁnāsa gu ge ǁnâu, o gu ge ǁîgu ǂâis ǂûs xa ǃhoadanhe hâse ǀguiǀguibese ge ǂoa, kaiba xu tsoatsoa tsî ǂkhammi kōse. Tsîb ge Jesuba taras, ǁaegub ǃnâ mâs ǀkha ǀguri ge ǃgau. 10 Tsî Jesub ge khuisen tsî ǀnî khoe-e mû tama io, taras ǀguisa, ob ge ǁîs ǃoa ge mî: Mapa gu hâ, tarase, sa ǀanaǃgâ-aoga? Khoe-e kha ǀgoraǃgâ si tama hâ? 11 Os ge ge mî: Khoe-i xare tama-i, ǃKhūtse. ǃNubaib ge Jesuba ǁîs ǃoa ge mî: O ta tita ona ǀgoraǃgâ si tama hâ; ǃgû î ǃaruǀî tā ǁore!
ǂNoagu-aidi Xristub tsî sîsenni âb tsîkha ǂama hâdi xa.
12 Tsî ǁkhawab ge Jesuba ǁîga ǃhoa-ū tsî ge mî: Tita ge ǃhūbaib di ǃnâta; tita ra sao-i, ǁî-i ge ǃkhaenab ǃnâ ǃgû tide, tsî i ge ûib di ǃnâba nî ūhâ. 13 O gu ge Farisega ǁîb ǃoa ge mî: Aitsamats ge sats xa ra ǃkhō-amsen, os kom ǃkhō-ams âtsa ama tamao. 14 Ob ge Jesuba ǃeream tsî ǁîgu ǃoa ge mî: Tsî tita xa ta aitsama ra ǃkhō-amsen, xawes ge ti ǃkhō-amsa a ama; ǂan ta a xui-ao, mapa xu ta ge hā, tsî mâǀî ta ra ǃgûsa; xawe du ge sado ǂan tama hâ, mapa xu ta ge hā tsî mâǀî ta ra ǃgûsa. 15 Sadu ge ǁgans ǃoa ra ǀgoraǃgâ; tita ge khoe-i xare-e ǀgoraǃgâ tama hâ. 16 Tsî ǀgoraǃgâ ta ra xawes ge ti ǀgoraǃgâsa a ama; ǀguri ta hâ tama xui-ao; xawe tita tsî sî te ge ǁGûb tsîkhom komo. 17 Tsî sadu di ǂhanub ǃnâ ǁkhāti xoahe hâ: ǀGam khoekha di ǃkhō-amgus a ama ǃkhaisa. 18 Tita ge aitsama tita xa ra ǃkhō-amsen ta, tsî Abob, tita ge sîb on ge tita xa ra ǃkhō-am. 19 O gu ge ǁîb ǃoa ge mî: Mapab sa Îba hâ? Ob ge Jesuba ge ǃeream: Sadu ge tita kas, ti Îb kasa ǂan tama hâ; tita du ga ǂan io, o du ga ti Îb ona ǂan hâ. 20 Nē mîdeb ge Jesuba ǁuib ǂgaes tawa ge ǃhoa, tempeli ǃnâ ra ǁkhāǁkhāǃâ; tsî khoe-i xare-i ge ǁîba ǃkhō tama, iri âb ge ganupe hâ tama hâ i amaga. 21 Ob ge Jesuba ǁkhawa ǁîn ǃoa ge mî: Tita ge ra ǃgû, o du ge tita nî ôa, xawe du nî ǁoren âdu ǃnâ ǁō; tita ra ǃgûba ǃkhais tawa du a sī ǁoa xui-ao. 22 On ge Jodeǁîna ge mî: Aitsamab kha nî ǃgamsen, ob ra mî: Tita ra ǃgûba ǃkhais tawa du a sī ǁoa? 23 Ob ge ǁîn ǃoa ge mî: Sadu ge ǃnagaba xu hâ, tita ge ǀgapiseba xu hâ; sadu ge nē ǃhūbaiba xu hâ, tita ge nē ǃhūbaiba xu hâ tama hâ. 24 O ta go mîba du, ǁoren âdu ǃnâ du nî ǁō ǃkhaisa; tita a ǁî ǃkhaisa du ga ǂgom tama io, o du kom ǁoren âdu ǃnâ nîra ǁō-o. 25 On ge ǁîb ǃoa ge mî: Taritsa kha satsa? Ob ge Jesuba ǁîn ǃoa ge mî: ǀAse ta goro ǃhoa khami ī ta ge tita. 26 ǂGuin, sadu xa mî tsî ta ga ǀgoraǃgâna ta ūhâ; xawe tita ge sîb ge a ama-ai, tsî ǁîba xu ta ge ǁnâun, ǁnāna ta ǃhūbaiba ra ǃhoa-ū. 27 Xawen ge ǁnâuǃā tama ge i, ǁGûb xab go ǁîna ǃhoa-ū ǃkhaisa. 28 Ob ge Jesuba ǁîn ǃoa ge mî: Khoen Ôaba du nî ǀgapiǀgapi ǃnubai du ge nî mûǂan, ǁî ta a ǃkhaisa; tsî tita xu ta aitsama xū-e dī tamasa, tsî ti Îb ge ǁkhāǁkhā te khami ta ra ǃhoa ǃkhaisa. 29 Tsî tita ge sîb ge tita ǀkha hâ; Abob ge tita ǀguri hâ kai tama hâ, ǃgâiba bi ana ta hugaǀgui ra dī xui-ao. 30 Nēnab ge mî, on ge ǂguina ǁîb ǃnâ ge ǂgom. 31 Tsîb ge Jesuba ǁîb ǃnâ ǂgom hâ Jodeǁîn ǃoa ge mî: Ti mîs ǃnâ du ga hâhâo, o du ge a amase ti ǁkhāǁkhāsabe; 32 tsî du ge amaba nî ǁnâuǃā, tsîb ge amaba sado nî ǃnoraǃnora. 33 On ge ge ǃeream bi: Abrahammi surida komo, tsî da kom tātsē khoe-i di khobo tama ge hâ io; matits ǁnâi: ǃNoraǃnorahe du ge nî, ti ra mî. 34 Ob ge Jesuba ǁîna ǃeream, tsî ge mî: Amase, amase ta ra mîba du, ǁoreba ra dī-i hoa-i ge a ǁoreb di khobo. 35 Khobo-i ge ǀamose oms ǃnâ hâ tama hâ; ǀgôab ge ǀamose ra hâ. 36 ǀGôab ga ǁnâi ǃnoraǃnora duo, o du ge a amase ǃnorasa. 37 Abrahammi suridu a ǃkhaisa ta a ǂan; xawe du ǃgam te du nîsa ra ôa-am, ti mîs sadu ǃnâ ǂgâǃkhai-e ūhâ tama xui-ao. 38 Tita ge ti Îb tawa ta ge mûna ra ǃhoa; tsî du sadu ona sadu îb tawa du ge mûna ra dī. 39 On ge ǃeream, tsî ǁîb ǃoa ge mî: Abrahammi kom sida îo. Ob ge Jesuba ǁîn ǃoa ge mî: Abrahammi ôa du kao, o du ga Abrahammi di sîsenga dī hâ. 40 O du nēsi tita du nî ǃgamsa ra ôa-am, khoeta, Eloba xu ta ge ǁnâu amaba ra ǃhoaba du ta; nēsab ge Abrahamma dī tama hâ. 41 Sadu ge sadu îb di sîsenga ra dī. On ge ǁîb ǃoa ge mî: ǀAiba xu da ǃnae tama hâ. ǀGui ǁGûb ǀguiba da ge ūhâ, Eloba. 42 Ob ge Jesuba ǁîn ǃoa ge mî: Elob ga sadu Îo, o du ga tita ǀnam hâ; Eloba xu ta ge ǂoa tsî hā xui-ao; ti aitsama ta ǂoa tama, xaweb ge ǁîba ge sî te. 43 Tarexa du kha ti mîsa ǁnâuǃā tama hâ? Ti mîsa du a ǁnâu ǁoa amaga. 44 Sadu ge ǁgâuaba ǁgûb ase ūhâ, tsî du ge sadu îb di turagu ǃoa ra dī ǂgao. ǁÎb ge khoen ǃgamao ge i, tsoatsoasa xu, tsîb ge amab ǃnâ mâhō tama ge i; ama-i xare-i ǁîb ǃnâ hâ tama hâ xui-ao. ǂHumibab ra ǃhoa, ob ge ǁîb ǂûb di-e xu ra ǃhoa, ǂhumi-aob a, tsî ǂhumib di ǁgûb a amaga. 45 Xawe tita, amaba ta ra mî amaga du ǂgom te tama. 46 Tari-i âdo tita ǁore-i xa a mîdan ǁkhā? Tsî amaba ta kara mîo, tarexa du ǂgom te tama hâ? 47 Eloba xu hâ-i ge Elob di mîde ra ǁnâu-e; ǁnā-amaga du sado ǁnâu tama. Eloba xu du hâ tama xui-ao. 48 On ge Jodeǁîna ǃeream, tsî ge mîǀî bi: ǃGâise da mî tama hâ, Samariaǁîts a, tsîts ǁgâua-e ūhâ ǃkhaisa? 49 Ob ge Jesuba ge ǃeream: Tita ge ǁgâua-e ūhâ tama, xawe ta ge ti Îba ra ǃgôa, tsî sadu ge tita ra ǀgoe. 50 Tsî tita ge ti ǃgôaba ôa tama hâ; xaweb ge ǀguiba hâ, ǁîba ra ôa tsî ǀgoraǃgâba. 51 Amase, amase ta ra mîba du: Khoe-i ga ti mîsa ǃkhōǀgaipeo, o-i ge ǀamos kōse ǁōba tsâ tide. 52 On ge Jodeǁîna ǁîb ǃoa ge mî: Nēsi da ra mûǂan, ǁgâua-ets ūhâ ǃkhaisa. Abrahammi kom ge ǁō-o, tsî kēbo-aogu on, ots satsa ra mî: Khoe-i ga ti mîsa ǃkhōǀgaipeo, o i ge ǀamos kōse ǁōba tsâ tide, ti. 53 Satsa kha Abob Abrahammi, ǁō geb ǃgâ-ai a kai? Tsî kēbo-aogu on ge ǁō. Tarits asets kha aitsama ra dīsen? 54 Ob ge Jesuba ge ǃeream: Tita ga aitsama ǃgôasen, os ge ti ǃgôasa a ǁau. Xawe ti Îb ge ǁnāb, tita ra ǃgôab, sadu di Elob a, ti du ra mîba. 55 Tsî du ge ǁîba mûǂan tama hâ; xawe ta ge tita ǁîba a ǂan, tsî ǁîba ta ǂan tama ti ta ga mîo, o ta ga ǂhumi-ao, sadu ī khami; xawe ta a ǂan bi, tsî ta ge mîs âba ra ǃkhōǀgaipe. 56 Abrahammi sadu îb ge ǃgâiaǂgao ge hâ i, ti tsēsab nî mûs ǂama; tsîb ge mû si, tsî ge ǃgâiaǂgao. 57 On ge Jodeǁîna ǁîb ǃoa ge mî: Ganupets kom korodisi kurixa tamao, ots kha Abrahamma ge mû? 58 Ob ge Jesuba ǁîn ǃoa ge mî: Amase, amase ta ra mîba du, Abrahammi hâ tama hîa ta ge tita ge hâ i. 59 On ge ǀuide ge ūkhâi, ǁîban nî ǂnoase; xaweb ge Jesuba gaugausen, tsî tempela xu ge ǂoa.
Xristub ge ǂgī hâba sâtsēs ai ra mû kai. Nē buruxa dīs di ôaǃnâhes xa.
1 Tsî ǃgû-īb ra hîab ge ǃnaesa xu a ǂgī khoeba ge mû. 2 O gu ge ǁkhāǁkhāsabegu âba dî bi, tsî ge mî: Rabitse, tari-e ge ǁore, nēba, ǁîb îra, ǂgī hâseb ge ǃnaesa? 3 Ob ge Jesuba ge ǃeream: Nēb kas, ǁîb îra kas ge ǁore tama hâ; xawe i ge ge ī, Elob sîsengu nî ǁîb tawa ǂhaise. 4 Tita ge ǁnāb, tita ge sîb di sîsenga nî sîsen, tsē-i as kōse; tsuxub ge ǃgoaxa, khoe-i xare-i ǁîb ǃnâ a sîsen ǁoaba. 5 ǃHūbaib ai ta hâs kōse ta ge a ǃhūbaib di ǃnâ. 6 Tsî nēna mî tsîb ge ǃhūb ai ǂara, tsî ǂāba ǂgobe, tsî ǀâ ǂgoaba ǂgī hâb di mûra ai ǂkhau, 7 tsî ge mîǀî bi: ǃGûsī î Siloams, (Sîǂuis, ti ra ǂnûiǃkhunihes) di khōsenǁgam-i ǃnâ ǁāsen! Ob ge ǃgûsī tsî ǁāsen tsî mû rase ge hā. 8 On ge ǀgūkhoen, tsî aibeb ge ǂgī i ǃkhaisa ge mûna ge mî: Nēba kha ǀkhope gere ǂnôa tamaba? 9 On ge ǀnîna: ǁÎb komo, ti ge mî. Tsî naun: ǁÎb khami ī. Xaweb ge ǁîb ǂûba: ǁÎ ta kom titao, ti ge mî. 10 On ge ǁîb ǃoa ge mî: Matits kha mûra âtsa go khowabahe? 11 Ob ge ǃeream tsî ge mî: Khoeb, Jesub ti ra ǂgaiheb go ǂgoa-e ǂgobe tsî ǂkhaumû te, tsî mî: ǃGûsī î Siloams di khōsenǁgam-i ǃnâ ǁāsen! Tsî ǃgûsī tsî ta go ǁāseno, o ta ge go mû. 12 On ge ǁîb ǃoa ge mî: Mapab ǁîba hâ? Ob ge: ǀŪ ta a, ti ge mî. 13 On ge ǂgī ge iba Farisegu tawa ge ūsī. 14 Tsî i ge sâtsē ge i, Jesub ge ǀâ ǂgoaba dī tsî ǁîb di mûra khowa ǃnubai. 15 O gu ge Farisega ǁkhawa ǁîba ge dî, matib go mûsa. Ob ge ǁîgu ǃoa ge mî; ǂGoa-eb go ti mûra ai ǂkhau, tsî ta go ǁāsen, o ta ra mû. 16 O gu ge ǀnîgu Farisegu diga ge mî: Nē khoeb ge Eloba xu hâ tama hâ, sâtsēsab khai tama hâ xui-ao. Xawe gu ge nauga ge mî: Mati i khoe-i hîa a ǁore-ao-e nēti ī saode a dī ǁkhā? Tsî i ge ǁhaiǃāgu-e ǁîn ǃnâ ge hā. 17 O gu ge ǁkhawa ǂgī go ib ǃoa ge mî: Satsa ǁnâi, tare xū-ets ǁîb xa ra mî, sa mûrab go khowaba tsi ǃkhais xa? Ob ge: Kēbo-aob komo, ti ge mî. 18 Tsîn ge Jodeǁîna ǂgom tama ge i, ǂgīb go hâ i hîab go mû ǃkhaisa, ǁgûra mû kaihe gob diran ge ǂgais kōse. 19 On ge ǁîra dîǃā tsî ge mî: Nēba saro ôab, ǁnā ǂgī hâse ge ǃnae, ti ro ǁîb xa ra mîba? Matib ǁnâi nēsi ra mû? 20 O ra ge ǁgûra ǃeream tsî ge mî: ǂAnm ge a, nēb a sim di ôa, tsî ǂgī hâseb ge ǃnae ǃkhaisa; 21 xawe matib nēsi ra mû ǃkhaisam a ǀū; tsî tari-i go mûra âba khowaba bi ǃkhaisam sima ǂan tama; kaiǂâub kom hâo, ǁîba dî re, îb ǁîba aitsama ǃhoabasen re. 22 Nēna ra ge ǁîb îra ge ǃhoa, Jodeǁîna ra ge ǃao amaga. ǀNain ge Jodeǁîna ǀgui xui-ao, khoe-i ga ǁîba Xristub ase ǁguiǁnâo, o i nî sinagogeba xu ǂhāǂuihe, ti. 23 ǁNā-amaga ra ge ǁîb îra: ǁÎb kom kaiǂâu hâo, ǁîba dîǃnâ re, ti ge mî. 24 On ge ǀgamǁî ǃnās ai ǂgī go i khoeba ǂgai tsî ǁîb ǃoa ge mî: Eloba ǃgôaba mā; sige ge a ǂan, nē khoeb a ǁore-ao ǃkhaisa. 25 Ob ge ǃeream tsî ge mî: Iseb a ǁore-ao ǃkhaisa ta ge tita a ǀū, ǀgui xū-i ǀgui-e ta ge a ǂan, ǂgī ta go i tsî nēsi ta ra mû ǃkhaisa. 26 O gu ge ǁîb ǃoa ge mî: Tare-eb go dī tsi? Matib go mûra khowaba tsi? 27 Ob ge ge ǃeream gu: ǀNai ta kom go mîba go-o, xawe go kom ǁnâu tamao. Tarexa go kha ǀgam ǃnāra ǁnâu ǂgao hâ? Sago ona ǁnâi ǁîb di ǁkhāǁkhāsabe kai ǂgao hâ? 28 O gu ge ǁîba ǀgoe, tsî ge mî: Sats ge a ǁîb di ǁkhāǁkhāsabe; xawe sige ge a Moseb di ǁkhāǁkhāsabe. 29 Sige ge a ǂan, Elob ge Moseb ǀkha a ǃhoa ǃkhaisa, xawe ge ge nēba a ǀū, mapa xub hâsa. 30 Ob ge khoeba ǃeream, tsî ǁîgu ǃoa ge mî: Ama buruburuxaba te a, sago a ǀū ǃkhaisa, mapa xub hâsa; xaweb ge ti mûra go khowa. 31 O da ge a ǂan, Elob ǁore-aona ǁnâu tama ǃkhaisa, xawe eloǃaoǃgâxa-i tsî ǁîb ǂâisa ra dī-i, ǁnā-eb ra ǁnâu. 32 ǃHūbaib di ǁaeba xu i ge ǁnâusa tama ge hâ i, khoe-i ge ǂgī hâse ge ǃnae i di mûra khowa ǃkhaisa. 33 Nēb ga Eloba xu hâ tama io, ob kom ga xū-e dī ǁoao. 34 O gu ge ǃeream, tsî ǁîb oa ge mî: Hoaragasets ge satsa ǁoreb ǃnâ ge ǃnae, tsîts kha sige ra ǁkhāǁkhā? O gu ge ǁîba ge ǂhāǂui. 35 Tsî Jesub ge ǁnâu, ǂhāǂui bi gu go ǃkhaisa, ob ge hō bib geo, ǁîb ǃoa ge mî: Satsa Elob Ôab ǃnâ ǂgomts ra? 36 Ob ge ge ǃeream: Mâba kha ǃKhūtse, î ta ǁîb ǃnâ ǂgom? 37 Ob ge Jesuba ǁîb ǃoa ge mî: ǁÎbats go mû, tsî sats ǀkha ra ǃhoab kom ǁîbao. 38 Ob ge: ǂGom ta ra, ǃKhūtse, ti mî tsî ge ǀgorelî bi. 39 Ob ge Jesuba ge mî: ǀGoraǃgâ-i ǃoa ta ge ǃhūbaib ai ge hā, mû taman nî mûse, tsî mû ran nî ǂgīse. 40 Tsî ǀnîgu Farisegu digu, ǁîb tawa hâgu ge ǁnâuo, o gu ge ǁîb ǃoa ge mî: Tsî sige ǁkhāti ǂgī hâ? 41 Ob ge Jesuba ǁîgu ǃoa ge mî: ǂGī go ga hâo, o go ga ǁore-e ūhâ tama i hâ; xawe: Mû ge ra, ti go nēsi ra mî amagab ge ǁoreb âgo ra hâ.
ǃGâi ǃûi-aob xa. ǁÎb di gūn xa.
1 Amase, amase ta ra mîba du: Dao-amsa-ū gūn di ǃharas ǃnâ ǂgâ tama-i, tsî nau ǃkhai-e xu ra ǃapaǂgâ-i, ǁnā-i ge ǃnari-ao tsî ǃgamao-e. 2 Xawe dao-amsa xu ra ǂgâ-i, ǁnā-i ge gūn di ǃûi-ao-e. 3 ǁÎbab ge daoǃûi-aoba ra ǁkhowa-amba, tsîn ge gūna ǁîb di domma ra ǁnâu; tsîb ge ǁîb di gūna ǀons ǀkha ra ǂgai, tsî ǁîna ra ǂgaeǂguiǂui. 4 Tsî gūn âbab ga dīǂuio, ob ge ǁîna ra ai-aiba, on ge gūna ǁîba ra sao, dommi âban a ǂan amaga. 5 Xawe ǀkharaban ge sao tide, tsî nî ǁîba xu ǃkhoeni, ǀkharan di domman ǂan tama hâ amaga. 6 Nē ǂkhoamî-eb ge Jesuba ǁîn ǃoa ge mî; xawen ge ǁnâuǃā tama ge i, tare-i a ǃkhaisa, ǁîn ǃoab ge ǃhoa-e. 7 Ob ge Jesuba ǁkhawa ǁîn ǃoa ge mî: Amase, amase ta ra mîba du: Tita ge gūn di dao-amta. 8 Ti aiǃâ ge hān hoan ge a ǃnari-ao, tsî ǃgamao; xawen ge gūna ǁîna ǁnâuǀnam tama ge i. 9 Tita ge dao-amta. Khoe-i ga tita xu ǂgâo, o i ge nîra ǃgâiǃō, tsî i ge ǂoa tsî nîra ǂgâ; tsî ǃû-ai-e nîra hō. 10 ǃNari-ao-i kom ǃnari tsî i nî ǂā, tsî i nî hîǀhuru, ti ī ǂâibasens ǀguis ǀkha ra hāo. Tita ge ge hā, ûib tsî ǃnāǂamsasib tsîkhan nî ūhâse. 11 Tita ge ǃgâi ǃÛi-aota. ǃGâi ǃÛi-aob ge ǁîb di ûiba ǁîb di gūna ra mâiba; 12 xawe ǃgaesab, ǃûi-ao tamab tsî gūn â-i tamab, ge ǂhiras ǃgoaxa ǃkhaisa mû, tsî gūna xū tsî ra ǃkhoeni; os ge ǂhirasa ǁîna ǃkhō, tsî gūna ra ǀgaruǀgaru. 13 Tsîb ge ǃgaesaba ra ǃhū, ǃgaesab a tsî gūnab ǁae-ū tama amaga. 14 Tita ge ǃgâi ǃÛi-aota, tsî ta ge tina a ǂan, tsî ta ge tin xa ra ǂanhe. 15 Titab Aboba a ǂans ǁkhās khami ta tita ona Aboba a ǂan, tsî ta ge ti ûiba gūna ra mâiba. 16 Tsî ta ge ǀnî gūn nē ǃharas di tamana ūhâ; tsî ǁîn ona ta nî ūhā, tsîn ge ti domma nîra ǁnâu, on ge nî ǀgui gū ǀgui ǃûi-aoba ūhâna. 17 ǁNā-amagab ge Aboba tita ǀnam hâ, ti ûiba ta ra ǁguiǁnâ amaga, ǁkhawa ta nî ǁîba ūse. 18 Khoe-i xare-i ge ǁîba tita xu ū tama, xawe ta ge ti aitsama ǁîba ra ǁguiǁnâ. Tita ge ǀgaiba ūhâ, ǁîba ǁguiǁnâsa, tsî ta ge ǀgaiba ūhâ, ǁîba ǁkhawa ūbasensa. Nē mîmāsa ta ge ti Îba xu ge hō. 19 O i ge ǁkhawa ǁhaiǃāgu-e Jodeǁîn ǃnâ ge hā, nē mîdi ǂama. 20 On ge ǂguin ǁîn dina ge mî: ǁGâua-eb ūhâ, ob kom go ǃkhauo; tarexa du ǁîba ra ǁnâu? 21 On ge ǀnîna ge mî: ǁGâuab xa hâǃnâhe-i di mî tamadi kom nēdeo. ǁGâua-e kha ǁkhā i a, ǂgī hân di mûde khowasa?
Īseb a Jesuba Mesia ǃkhaisa.
22 Tsî-i ge Jerusalems ǃnâ tempeli khaihes di kaitsē ge i, tsî i ge sao ge i. 23 Tsîb ge Jesuba tempeli ǃnâ gere ǃgûma, Salomob di ai-ommi ǃnâ. 24 On ge Jodeǁîna ǃnamiǂgā bi, tsî ǁîb ǃoa ge mî: Matikō ǂomxasets sida ra ǀgommaǂâi kai? Xristuts ka satsao, ǁkhoaǂgaose sida mîba re. 25 Ob ge Jesuba ǁîna ge ǃeream: Mîba du ta ge, xawe du ge ǂgom tama i. Sîsengu, ti Îb di ǀons ǃnâ ta ra dīgu, ǁîgu kom tita xa ra ǃkhō-amo. 26 Xawe du ge ǂgom tama hâ, ti gūn di tama du a amaga, mîba du ta ge khami. 27 Ti gūn ge ti domma ra ǁnâu, tsî ta ge tita ǁîna ǂan hâ, tsîn ge ǁîna tita ra sao. 28 Tsî tita ge ǁîna ǀamo ûiba ra mā; tsîn ge tātsēs tsîna kāǁō tide, tsî khoe-i xare-i ge ǁîna ti ǃomma xu tsubuǂui tide. 29 Ti îb, tita ǁîna ge māb ge hoan ǂamai a kai; tsî khoe-i xare-i ge ǁîna ti îb di ǃomma xu a tsubuǂui ǁoa. 30 Tita tsî Abob tsîkhom a ǀgui. 31 On ge Jodeǁîna ǁkhawa ǀuide ge ūkhâi, ǀuiǁhom bin nîse. 32 Ob ge Jesuba ǁîna ge ǃeream: ǂGui ǃgâidīgu ti Îba xu hâga ta ge ǁgau du; mâ dīb ǁnāgu dib ǃaroma du kha ra ǀuiǁhom te? ti. 33 On ge Jodeǁîna ǃeream bi tsî ge mî: ǃGâi dī-i ǃaroma da satsa ǀuiǁhom tama, xawe eloǃkhāǃkhās, tsî khoets a hîats sa-aitsama ra Elodīsen ǃkhais ǃaroma. 34 Ob ge Jesuba ǁîna ge ǃeream: Sadu ǂhanub ǃnâ xoamâihe tama i hâ: Tita ge ge mî, elogo a ǃkhaisa? ti. 35 Tsîb ga ǁnāgu, ǁîgu ǃoas ge mîsa hāga, elogo, ti ǂgaio (tsî xoas ge khôahe ǁoasa), 36 mati du kha Abob ge khai tsî ǃhūbaib ai sî ta ǃoa ra mî: Elobats ra ǃkhāǃkhā, Elob Ôata ge tita, ti ta goro mî amaga? 37 Ti Îb di sîsenga ta ga dī tama io, tā ǂgom te. 38 Xawe ǁîga ta kara dīo, ǁnâi sîsenga ǂgom, tita du ga ǂgom tama i xawe; î du ǂan tsî ǂgom, Abob tita ǃnâ hâ, tsî tita ǁîb ǃnâ hâsa. 39 On ge ǁkhawa ǁîba ge ǃkhō ǁga, xaweb ge ǃomgu âna xu ge bē. 40 Tsîb ge ǁkhawa Jordanǃāb nauǃani, Johaneb ǀguitsē gere ǁāǁnâ ǃkhais tawa sī tsî ǁnāpa ge hâ. 41 Tsî ǂguin ge ǁîb tawa sī tsî ge mî: Johaneb ge sao-i xare-e dī tama hâ; xawe Johaneb nēb xa gere mîn hoan ge a ama. 42 Tsî ǂguin ge ǁnāpa ǁîb ǃnâ ge ǂgom.
Lasarub di ǂkhaiǂkhaihes xa.
1 Tsîb ge ǂanǂansa khoeba ge ǀaeǁgoe hâ i, Lasarub ti ǀon hâb, Betanis dib, Marias tsî ǁîs ǃgâsas Martas tsîra ǃāros diba. 2 Tsîs ge Mariasa ǁnā ge i, ǃKhūba gere ǂkhaus, tsî ǂaira âba ǀûn as ǀkha gere ǀomǀkhāsa; ǁîs di ǃgâsab Lasarub ge ǀaeǁgoe hâ isa. 3 O ra ge ǃgâsara ǁîb ǃoa sî tsî ge mîba kai bi: ǃKhūtse, mû, ǀnamts hâb ge ǀaeǁgoe hâ. 4 Tsî Jesub ge ǁnâu, ob ge ge mî: Nē ǀaesenni ge ǁōb ǃoa hâ tamaba, tsîb ge ǂkhaisib Elob dib ǃoa hâ, Elob Ôab nî ǁîba xu ǂkhaiǂkhaihega. 5 Tsîb ge Jesuba Martas, tsî ǁîs di ǃgâsas tsî Lasarub tsîna ǀnam ge i. 6 Tsî ǁîb ǀaesen hâ ǃkhaisab ge ǁnâu, ob ge ganupe ǀgam tsēra hâb a ǃkhais tawa ge hâ. 7 ǁNās khaoǃgâb ge ǁkhāǁkhāsabegu ǃoa ge mî: A ge ǁkhawa Judeab ǃoa ǃgû. 8 O gu ge ǁkhāǁkhāsabega ǁîb ǃoa ge mî: Rabitse, ǀasen go Jodeǁîna satsa ǀuiǁhom ǂgao hâ i, xawets ǁkhawa ǁnāǀî nî ǃgû? 9 Ob ge Jesuba ge ǃeream: Disiǀgamǀa irga kha tsēs ǃnâ hâ tama hâ? Khoe-i ga tsēa ǃgûo, o-i ge ǃnomsen tide; nē ǃhūbaib di ǃnâba i ra mû amaga. 10 Xawe khoe-i ga tsuxuba ǃgûo, o-i ge ra ǃnomsen, ǃnâ-e-i ǁî-i ǃnâ ūhâ tama amaga. 11 Nēna ǃhoa tsîb ge ǁnās khaoǃgâ ǁîgu ǃoa ge mî: Lasarub sage horesab ge ǁom hâ; o ta ge ra ǃgû, ǁîba ta nî ǂkhaiǂkhaise. 12 O gu ge ǁkhāǁkhāsabegu âba ge mî: ǃKhūtse ǁommi nîs karao, ob ge nî ǂgau. 13 Xaweb ge Jesuba ǁnāsa ǁōb âb xa ge mî; xawe gu ge ǁîga ǂoms di sâb xab ra ǃhoa, ti ge ǂâi hâ i. 14 ǃNubaib ge Jesuba ǃoaǃū ǁîgu ǃoa ge mî: Lasarub ge go ǁō; 15 tsî ta ge sago ǃaroma ra ǃgâiaǂgao, ǁnāpa ta go hâ tama hâ isa, ǂgom ǁkhā go nîse. Xawe a ge ǁîb ǃoa ǃgû! 16 Ob ge Tomab, Didimub ti ra ǂgaiheba, ǁîb di ǀhōsaǁkhāǁkhāsabegu ǃoa ge mî: A ge sage ona ǃgû, î ge ǁîb ǀkha ǁō. 17 Tsî Jesub ge sī, ob ge ǁîba ǀnai haka tsēde ǀhobas ǃnâ ǁgoese ge hō. 18 Tsîs ge Betanisa Jerusalems ǀgūse ge ǁgoe i, ǃnona nî ī kilometergu kōse. 19 Tsî ǂgui Jodeǁîn ge Martas tsî Marias tsîra ǃoa ge hā hâ i, ǃgâsab ǂaman nî ǁîra ǁkhaeǂgaose. 20 Tsî Martas ge Jesub ǃgoaxa ǃkhaisa ǁnâuo, os ge ǁîba ge ǃgûǃoa; xawe Marias ge oms ǃnâ ge ǂnû. 21 ǃNubais ge Martasa Jesub ǃoa ge mî: ǃKhūtse, sats ga nēpa hâ hâo, ob ge ti ǃgâsaba ga ǁō tama hâ i. 22 ǁNāti ī xawe ta a ǂan, Elobats ga satsa ǂgaoǀkhā xū-i hoa-eb nî Eloba mā tsi ǃkhaisa. 23 Ob ge Jesuba ǁîs ǃoa ge mî: Khâi nî ǃgâsab âs ge. 24 Os ge Martasa ǁîb ǃoa ge mî: ǂAn ta a, ǀuni tsēs aib khâis ǃnâ nîra hâ ǃkhaisa. 25 Ob ge Jesuba ǁîsa ge mîǀî: Tita ge Khâita, tsî Ûita. Tita ǃnâ kara ǂgom-i, ǁnā-i ge nîra ûi, ǁō i ka xawe. 26 Tsî ûi tsî tita ǃnâ kara ǂgom-i hoa-i, ǁnā-i ge tātsē ǁō tide. ǂGoms ra nēsa? 27 Os ge ǁîb ǃoa ge mî: Ā, ǃKhūtse ǂgom ta ra, Xristu, Elob Ôats, ǃhūbaib ai nîra hāts a ǃkhaisa. 28 Tsî nēna mî tsîs ge ge ǃgû tsî Marias ǃgâsas âsa ǂgai, tsî ǂganǃgâse ǁîs ǃoa ge mî: ǁKhāǁkhā-aob ge go hā, tsî ra ǂgai si. 29 Tsî ǁîs ge ǁnâuo, os ge ǁnātimîsi khâi tsî Jesub tawa ge sī. 30 Tsîb ge Jesuba ganupe ǃāros ǃnâ ge ǂgâ tama hâ i, tsî Martas ge ǃgûǃoa bi ǃkhais ǂhanis tawa ge hâ i. 31 Tsî Jodeǁîn ǁîs ǀkha oms ǃnâ hân, tsî ǁîsa ra ǁkhaeǂgaon ge mû, Marias ge ǃhaese khâi tsî ǂoa ǃkhaisa, on ge ǁîsa sao tsî: ǀHobas ǃoas kom ra ǃgûo, ǁnāpas nî āse, ti ge mî. 32 Tsî Marias ge Jesub hâ ǃkhai-i tawa sī tsî mû bio, os ge ǂaira âb tawa ǁnāǁgoe, tsî ǁîb ǃoa ge mî: ǃKhūtse, sats ga nēpa hâ io, ob ge ti ǃgâsaba ga ǁō tama hâ i. 33 Tsî Jesub ge ǁîs tsî ǁîs ǀkha go hā Jodeǁîn on ra ā ǃkhaisa mûo, ob ge gagas ǃnâ ǁgonaǂgao tsî ge gongonǃnâhe; 34 ob ge ge mî: Mapa du ǁîba ǁgui hâ? On ge ǁîb ǃoa: ǃKhūtse, hā î mû re! ti ge mî. 35 Tsîb ge Jesuba ge ā. 36 On ge Jodeǁîna ge mî: Kō, matikōseb go ǁîba ǀnam isa! 37 On ge ǀnîn âna ge mî: Okha, nēb ǂgī hâb di mûra go khowaba ǁkhāti dī ǁoab ga i nēb ga ǁō hâ ga tidesa? 38 Ob ge Jesuba ǁkhawa ǁîb ǃnâ ǁgonaǂgao, tsî ǀhobas tawa ge sī. Tsî ǀhobas ge ǁhoab ǃnâ ge hâ i, tsîs ge ǀui-i ǀkha ge ǂganamhe hâ i. 39 Ob ge Jesuba: ǀUisa ūbē! ti ge mî. Os ge Martas ǁō hâb di ǃgâsasa ǁîb ǃoa ge mî: ǀNaib ǀō hâ, ǃKhūtse, hakaǁî tsēs komo. 40 Ob ge Jesuba ǁîs ǃoa ge mî: Mîba si tama ta hâ, ǂgoms kao, os nî ǂkhaisib Elob diba mûsa? 41 On ge ǀuisa ge ūbē, ǁō hâb ge ǁgoe i ǃkhaisa xu. Ob ge Jesuba kōkhâi tsî ge mî: Abotse, gangan tsi ta ra, ǁnâu-am tets go ǃkhais xa. 42 Tsî ta ge a ǂan, hugaǀguits ra ǁnâu-am te ǃkhaisa; xawe mâǂnamipe hâ ǁaes ǃaroma ta ǁîsa ra mî, ǂgomn nîga sats ge sî te ǃkhaisa. 43 Tsî nēna mî tsîb ge ǃgari dommi ǀkha Lasarutse, ǂoaxa! ti ge ǂgai. 44 Ob ge ǁō hâba ge ǂoaxa, ǃomkha tsî ǂaira ai ǀhobas ǃkhaiga ǃgaehe hâse, tsî ais âba aosenǃkhaib ǀkha ǃnanhe hâse. Ob ge Jesuba ǁîn ǃoa ge mî: Xore bi, îb ǃgû!
Farisegu tsî ǀgapipristergu ge ra ôa-am mati gu Jesuba nî ǃgam ǃkhaisa.
45 On ge Marias ǃoa ge hā tsî Jesub go dīna go mû Jodeǁîn di ǂguina ǁîb ǃnâ ge ǂgom. 46 Xawe ǀnîn ân ge Farisegu ǃoa ǃgû, tsî ǁîga Jesub go dīna sī ge mîba. 47 O gu ge ǀgapipristergu tsî Farisegu tsîga ǀapeǀhao-e dī, tsî ge mî: Tare-e ge nî dī? Nē khoeb kom ǂgui saode ra dīo. 48 ǁNāti ge ga ǁîba dī kaio, on ge hoana ǁîb ǃnâ nî ǂgom. O gu ge Romeǁîga hā, tsî nî ǃhūb tsî ǁaes tsîna sage ūǀhana. 49 Ob ge ǀguib âgu, Kajafab, ǁnā kurib ǁkhāb ai ǀgapiprister ge iba ǁîgu ǃoa ge mî: Sago kom xū-e ǂan tamao, 50 tsî go kom ǁkhāti ǂâiǂâisen tamao, ǃgâiba da a ǃkhaisa, ǀgui khoe-i nî ǁaesa ǁōbasa, ǁaes hoas nî kās xa. 51 Tsîb ge ǁnāsa ǁîb ǂûba xu mî tama; xawe ǁkhā kurib aib ge ǀgapiprister i xui-aob ge ge kēbo, Jesub nî ǁaesa ǁōbasa, 52 tsî ǁaesab nî ǁōbas ǀguisa tama, xaweb nî ǁkhāti Elob ôan, ǀgaruǀgaruhe hâna ǀhaoǀhaose. 53 ǁNā tsēs ǁkhāsa xu gu ge ge ǀapeǀape, ǃgam bi gu nîsa. 54 Ob ge Jesuba ǃaruǀî ǁkhoase Jodeǁîn ǃnâ ǃgûma tama ge i; ob ge ǁnāpa xu ǃgaroǃhūb ǀgūse hâ ǃkhais, Efraim ti ǀon hâ ǃās ǃoa ǃgû, tsî ǁnāpa ǁkhāǁkhāsabegu âb ǀkha ge hâ. 55 Tsîb ge Jodeǁîn di Pasxaba ǀgū ge i; tsîn ge ǂguin ǁnā ǃhūb dina Jerusalems ǃoa ge ǃapa Pasxab aiǃâ ǃanuǃanusenn nîse. 56 On ge Jesuba ôa, tsî tempeli ǃnâ mâse gere mîǀîgu: Mati du ǂâi hâ? Hāb nî xare kaitsēs ai? 57 Tsî gu ge ǁkhāti ǀgapipristergu tsî Farisegu tsîga mîmā-e ge ǂoa kai, khoe-i ga ǂan, mapab hâsa, o i ge nî ǂanǂan ǃkhō bi gu nîse, ti.
Xristub ge Marias xa ra ǂkhauhe Betanis tawa.
1 Tsî ǃnani tsēde Pasxakaitsēs aiǃâb ge Jesuba Betanis tawa ge sī, Lasarub, Jesub go ǁō hâna xu ǂkhaiǂkhaib ge hâǃnâ isa. 2 Tsîn ge ǁnāpa ǃuiǂûǁae-e ge dība bi, tsî Martas ge gere ǃoaba, tsî Lasarub ge ǁîb ǀkha tāb tawa ǂnôan di ǀgui ge i. 3 Os ge Mariasa ǃkhare literi ǂkhauǀkhāxū-i, ǃūmû tsî ǃgomǀgausa nardub xa ū, tsî Jesub di ǂaira ǂkhau, tsî ǁîs di ǀûn ǀkha gere ǀomǀkhā; os ge omsa ǃgâihamxūb di ǁamab xa ge ǀoa. 4 Ob ge ǁkhāǁkhāsabegu di ǀguib, Judab Iskarioǁîb, ega ǁîba nî ǀapexūba ge mî: 5 Tare xū-i ǃaromab kha nē ǃgâihamxūba ǃnonakaidisi denargu ama ǁamaxūhe tsî ǀgâsana māhe tama hâ? 6 Tsîb ge ǁîsa ge mî, ǀgâsan xab ra ǂhansens ǃaroma tama, xawe ǃnari-aob ge i, tsî mariǁhōsab ge ūhâ i, tsî ǁîs ǃnâ ra aoǂgāhenab gere ǃnari amaga. 7 Ob ge Jesuba ge mî: ǁNāxū si; tita nîra ǁkhōhe tsēsas ǁîba sâuba hâ xuige. 8 ǀGâsana du hugaǀgui sadu tawa ūhâ; xawe du ge tita hugaǀgui ūhâ tama hâ. 9 Tsîs ge kai ǁaes Jodeǁîn disa ge ǁnâu, ǁnāpab hâsa, on ge ge sī, Jesub ǀguib ǃaroma tama i, tsî Lasarub ǁō hâna xub go ǂkhaiǂkhaiban nî mûse. 10 O gu ge ǀgapipristerga ge ǀapeǀape, Lasarub ona gu nî ǃgam, ti. 11 Jodeǁîn ǂguin ge ǁîb ǃaroma ǃgûsī, tsî Jesub ǃnâ ǂgom amaga.
Xristub di doeǂgâs Jerusalems ǃnâ.
12 ǀGuitsēs ai, kai ǂnubis kaitsēs ǃoa go hās ge ǁnâuo, Jesub Jerusalems ǃoa ǃgoaxa ǃkhaisa, 13 on ge palmhaidi ǂgonaga ū tsî ǁîba nî ǃgûǃoase ge ǂoa, tsî Hosiana, ǀKhaeheb ge hâ, ǃKhūb di ǀons ǃnâ ǃgoaxab, Israeli gao-aoba! ti ge ǂgai. 14 Tsîb ge Jesuba eselro-e hō, tsî ǁî-i ai ge ǂnû; xoamâihe hâ khami: 15 Tā ǃao, Sions ǀgôase! Mû, sa gao-aob ge ǃgoaxa esel-i ǂkhamro-i ai ra ǃgapise, ti. 16 Tsî gu ge ǁkhāǁkhāsabegu âba ǁnāsa aiba ǁnâuǃā tama ge i, xawe ega, Jesub ge ǂkhaiǂkhaihe hâ i ǃnubai gu ge ge ǂâihō, nēs ǁîb xa xoamâihe hâ ǃkhaisa, tsî khoen ge nēsa dība bi ǃkhaisa. 17 Tsî ǂnubis, Lasarubab ge ǀhobasa xu ǂgai tsî ǁō hâna xu ǂkhaiǂkhai ǃnubai ǁîb ǀkha ge hâ is ge ǁîb dīb xa ge ǃkhō-am. 18 ǁNā-amagas ge ǂnubisa ǁkhāti ǁîba ge ǃgûǃoa, nēti-ī sao-eb go dī ǃkhaisan ge ǁnâuo. 19 O gu ge Farisega ǁîgu ǃnâ ge mî: Mû go ra ǁnâi, xū-i xare-e go sîsenǂui tamasa. Mû, ǃhūbaib hoab kom ǁîba ra sao o.
ǀNî Grikeǁîn ge Jesuba ra mû ǂgao. ǁÎb ǁōb di sîsenǂuis xa. ǀHomma xu ge ǀkhī dommi xa. Jesub ge a ǃhūbaib di ǃnâ. Jodeǁîn di ǂgomoǃnâsib xa.
20 Tsîn ge ǀnî Grikeǁîna, ǀgoreǀî nîse kaitsēs ǃoa ge hān ǃnâ ge hâ i. 21 ǁÎn ge Filipub, Betsaidas, Galileab disa xu hâb tawa hā, tsî ǀkhoma bi, tsî: ǃKhūtse, Jesuba da mû ǂgao hâ, ti ge mî. 22 Ob ge Filipuba Andreaba ge sī mîba, tsî Andreab tsî Filipub tsîkha ge Jesuba ge sī mîba. 23 Ob ge Jesuba ǁîna ǃeream, tsî ge mî: Iri ge go hā, ob ge Khoen Ôaba nîra ǂkhaiǂkhaihe. 24 Amase, amase, ta ra mîba du: ǃHoroǃkhomro-i ga ǃhūb ǃnâ ǁnā tsî ǁō tama io, o-i ge ǀguri hâ; xawe ǁō i kao, o-i ge ǀoasase ra ǂûtani. 25 Ûib â-e kara ǀnam-i ge ǁîb xa nî kāhe-e, tsî ûib â-e nē ǃhūbaib ai ga ǁkhan-i ge ǁîba ǀamo ûib ǃnâ nî sâu-e. 26 Khoe-i ga tita ǃoabao, a-i tita sao; tsî tita hâpa, ǁnāpa i ge tita ra ǃoaba-i ona nîra hâ; tsî tita kara ǃoaba-i, ǁnā-eb ge Aboba nîra ǃgôa. 27 Nēsis ge ti ǀomsa ǁgonǁgonǃnâhe hâ. Tsî tare-e ta nî mî? Abotse, nē ira xu ore te! Xawe ǁîs ǃaroma ta ge nē iri ǃnâ go ǂgâ. 28 Abotse, sa ǀonsa ǂkhaiǂkhai! O i ge dom-e ǀhomma xu ge ǀkhī: ǂKhaiǂkhai si ta go, tsî ta ge ǁkhawa nîra ǂkhaiǂkhai si, ti. 29 Os ge ǂnubis ǁnāpa mâ tsî ge ǁnâusa: ǃGuru i kom go-o, ti ge mî. On ge nauna: ǀHomǃgā-i kom ǁîb ǀkha go ǃhoao, ti ge mî. 30 Ob ge Jesuba ǃeream tsî ge mî: Tita ǃaroma tamas, tsî sadu ǃaromas ge a nē dommi go ǃnaesa. 31 Nēsis ge ǀgoraǃgâsa nē ǃhūbaib ǂama ra hā; nēsib ge ǂamsab nē ǃhūbaib diba nîra ǂhāǂuihe. 32 Tsî tita, ǃhūbaiba xu ta ga ǀgapiǀgapiheo, o ta ge hoana Tita ǃoa nîra ǂgae. 33 (Tsîb ge nēsa ge mî, ǁgaub nîse, mâ ǁō ai-eb nîra ǁō ǃkhaisa.) 34 Os ge ǂnubisa ǁîba ge ǃeream: Sida ge ǂhanuba xu ge ǁnâu, Xristub nî ǀamose hâsa; tsî matits ǁnâi satsa: Khoen Ôab ge nîra ǀgapiǀgapihe, ti a mî ǁkhā? Tariba kha ǁnā Khoen Ôaba? ti. 35 Ob ge Jesuba ǁîn ǃoa ge mî: ǂKhari ǁaero-eb ge ǃnâba ganupe sadu ǀkha nî hâ. ǃGûǃnâ bi, ǃnâba du ūhâ hîa, îb ǃkhaenaba sado tā ǃkhō. ǃKhaenab ǃnâ ra ǃgû-i ge a ǀū, mâǀî i ra ǃgû ǃkhaisa. 36 ǃNâba du ūhâ hîa ǃnâb ǃnâ ǂgom re, î du ǃnâb di ôa kai. Nēnab ge Jesuba mî, ǃnubaib ge ǃgûbē tsî ǁîna xu ge gaugausen. 37 Tsî ǁnātikō ǂgui saodeb ge ǁîn aiǃâ gere dī, xawen ge ǁîb ǃnâ ǂgom tama ge i, 38 mîs kēbo-aob Jesajab dis nî ǀoaǀoahese, nēti ra mîsa: “ǃKhūtse, tari-e sige aoǁnâsa ra ǂgom? Tsî tari-eb ǃKhūb di ǁôaba ǂhaiǂhaibahe hâ?” 39 ǁNā-amagan ge ǂgom ǁoa ge i, Jesajab ra ǁkhawa mî xui-ao: 40 “Mûdi ânab ge ǂgī kai, tsî ǂgaob ânab ge karokaro, mûdi ǀkhan mû tidese, tsî ǂgaob ǀkhan ǁnâuǃā tidese, tsîn ǃhobasen tidese, tsî ta ǁîna ǂgauǂgau tidese.” 41 Nēnab ge Jesajaba ge mî, ǁîb ǂkhaisibab ge mû, tsî ǁîb xab gere ǃhoa ǃnubai. 42 Tsî ǁnāti ī xawe gu ge ǁkhāti ǂgui ǂamkhoega ǁîb ǃnâ ge ǂgom; xawe Farisegu ǃaroma gu ge ǁîsa ǁguiǁnâ tama ge i, sinagogeba xu gu ǂhāǂuihe tidega; 43 khoen ǃgôaba gu ge Elob di ǃgôab ǃgâ-ai ǀnam i xui-ao. 44 Tsîb ge Jesuba ǂgai tsî ge mî: Tita ǃnâ ra ǂgom-i ge tita ǃnâ ǂgom tama-e, tsî i ge tita ge sîb ǃnâ ra ǂgom, 45 tsî tita ra mû-i ge tita ge sîba ra mû-e. 46 ǃNâ-i ase ta ge tita ǃhūbaib ai ge hā, mâ-i hoa-i tita ǃnâ ra ǂgom-i ǃkhaenab ǃnâ hâ tidese. 47 Tsî khoe-i ga ti mîde ǁnâu, tsî ǂgom tama i, ǁnā-e ta tita ǀgoraǃgâ tide; ǃhūbaiba ta nî ǀgoraǃgâse ta hā tama, tsî ǃhūbaiba ta nî ǃgâiǃō kaise ta ge hā xui-ao. 48 Tita kara ǃharaxū-i, tsî ti mîde ǃkhōǃoa tama i ge ǀnai ǁî-e ra ǀgoraǃgâ-e ūhâ: Mîs tita gere ǃhoas, ǁîs ge ǁî-e nîra ǀgoraǃgâ ǀuni tsēs ai. 49 Tita ge tita xa aitsama ǃhoa tama hâ; xawe Abob, tita ge sîb, ǁnāb ge mîmā-e ge mā te, tare-e ta nî mî tsî ǃhoa ǃkhaisa. 50 Tsî ta ge a ǂan, ǁîb di mîmās a ǀamo ûi ǃkhaisa. O ta ge ǃhoa ta rana, Abob ge tita mîba khami ra ǃhoa.
Jesub ge ǁkhāǁkhāsabegu di ǂaide ra ǁā.
1 Tsî Pasxakaitsēs aiǃâ, Jesub ge ǂan io, iri âb, ǁîb aib nî nē ǃhūbaiba xu ǁGûb ǃoa ǃgûb go hā ǃkhaisa, ob ge ǁîb din, ǃhūbaib ai hâna, ǁînab ge ǀnam hâ i khami ǀunis kōse ge ǀnam. 2 Tsî ǃuiǂûǁaeb ge hāo, ǀnaib ǁgâuaba Judab, Simonni ôab, Iskarioǁîb di ǂgaob ǃnâ mâ hîa, ǀapexū bib nîsa, 3 tsî Jesub ge ǂan io, hoanab ǁGûba ǁîb di ǃomǁae mā hâ ǃkhaisa, tsî Eloba xub ge ǂoa, tsî Elob ǃoab ra ǃgûsa, 4 ob ge ǃuiǂûsa xu khâi, tsî saran âba ǂgaeǂui, tsî ǃuri ǃkhaiba ū tsî ǁîb ǀkha ge ǃgaesen. 5 ǁNās khaoǃgâb ge ǁgam-e ǃore-i ǃnâ ǂnâ, tsî ǁkhāǁkhāsabegu di ǂaide ge ǁātsoatsoa, tsî ǃuri ǃkhaib, ǁîb ǀkhab ǃgaesen hâb ǀkha ge ǀomǀkhā. 6 Tsî Simon Petrub tawab ge sīo, ob ge ǁnāba ǁîb ǃoa ge mî: ǃKhūtse, satsa kha ǁnâi ti ǂaira nî ǁā? 7 Ob ge Jesuba ǃeream tsî ǁîb ǃoa ge mî: Dī ta ra-ets nēsi a ǀū, xawets ge nēn khaoǃgâ nîra ǂan. 8 Ob ge Petruba ge mîǀî bi: Tātsē, tātsēts ge satsa ti ǂaira ǁā tide. Ob ge Jesuba ǁîba ge ǃeream: ǁĀ tsi tama ta ga io, ots kom tita ǃnâ amǃnâ-e ūhâ tamao ti. 9 Ob ge Simon Petruba ǁîb ǃoa ge mî: ǃKhūtse ti ǂaira ǀguira tama, îts ǃomkha tsî danas ona ǁā. 10 Ob ge Jesuba ǁîb ǃoa ge mî: Khōhe hâ-i kom ǀnî ǁāhesa ǂhâba tamao, ǂaira ǁāhes ǀguis. Hoaragase i kom a ǃanuo. Tsî sago ge ǁkhāti a ǃanu, xawe hoatsama tama. 11 ǁÎba nîra ǀapexūbab ge ǂan i amagab ge: Hoatsama tama go ge a ǃanu, ti ge mî. 12 Tsî ǂaidi âgab ge ǁātoa, tsî saran âbab ge ǂgaeǂgāo, ob ge ǁkhawa tāb tawa ǂnû, tsî ǁîgu ǃoa ge mî: ǂAn go a, tare-e ta goro dība go ǃkhaisa? 13 Sago ge tita: ǁKhāǁkhā-aotse tsî: ǃKhūtse, ti ra ǂgai, tsî go ǁnāsa ǂhanuse ra mî: ǁÎ ta kom titao. 14 Tsî ta ǁnâi tita, sago ǃKhū tsî ǁkhāǁkhā-aota sago ǂaide goro ǁāo, o go ge sago ona surudegu hâ, ǂaide ǁābagusa. 15 Aiǁgau-e ta go mā go, sago on nî dīga, tita goro dība go khami. 16 Amase, amase, ta ra mîba go: ǃGāb ge ǁîb ǀhonkhoeb xa kai tama hâ, tsî sîsabeb ge ǁîba ge sîb xa kai tama hâ. 17 Nēna ǂan tsî go ga ǁîna dīo, o go ge a ǃgâiǃō. 18 Sago hoago xa ta mî tama. ǂAn ta a, mâga ta ǃkhōǂuibasen hâsa; xawes ge nēsa go ī, xoas nî ǀoaǀoahese: “Tita ǀkha ra pereǂûb ge ǃnôas âba tita ǃoagu ge ūkhâi” ti. 19 ǀNai nēsi ta ge ǁîna ra mîba go, ǃnae taman hâ hîa, ǃnaen ka ǃnubai go nî ǂgom ga, tita a ǁî ǃkhaisa. 20 Amase, amase ta ra mîba go: Tita nî sîba kara ǃkhōǃoa-i ge tita ra ǃkhōǃoa-e; tsî tita kara ǃkhōǃoa-i ge tita ge sîba ra ǃkhōǃoa-e.
Jesub ge ra kēbo, Judab nî ǀapexū bisa.
21 Tsî nēnab ge Jesuba mîo, ob ge gagas ǃnâ gongonhe tsî ǃkhō-am tsî ge mî: Amase, amase ta ra mîba go, ǀguib âgo nî tita ǀapexūsa. 22 O gu ge ǁkhāǁkhāsabega ge kōǀîgu tarib xab ra ǁnāsa mî ǃkhaisa, îganǀgē tsî. 23 Tsîb ge ǁkhāǁkhāsabegu âb di ǀguib, tāb tawa ǂnôaba Jesub di ǃâǃnâb tawa ge ǃgâsen hâ i, Jesub ge ǀnam iba. 24 ǁÎbab ge Simon Petruba ge nape, dîb nîse, tarib a ǃkhaisa ǁîb xab goro ǃhoaba. 25 Ob ge ǁîba Jesub di ǁkhaiǂams ǃoa ǂōsen tsî ǁîb ǃoa: ǃKhūtse, tariba a ǁî? ti ge mî. 26 Ob ge Jesuba ge ǃeream. ǁNāb ge ǁîb, ǁîba ta pereǃâro-e ǀobeba tsî nî māba, ti. Ob ge pereǃâro-e ǀobe tsî Judab, Simonni ôab Iskarioǁîba ge mā. 27 Tsî pereǃâro-i khaoǃgâb ge Satanna ǁîb ǃnâ ge ǂgâ. Ob ge Jesuba ge mîǀî bi: Dīts ra-e ǃhaese dī! 28 Tsî ǀguib xaweb, tāb tawa ǂnôagu dib ge ǂan tama ge hâ i, tare xū-i ǃaromab go ǁnāsa ǁîb ǃoa mî ǃkhaisa. 29 ǀNîgu ge ge ǂâi, Judab mariǁhōsa ūhâ amagab ra Jesuba mîǀî bi: Kaitsēs ǃoa ge ǂhâba hâna ǁama, tamas ka io, ǀgâsanab nî xū-e māsa. 30 Tsî pereǃâro-eb ge ūo, ob ge ǁnātimîsi ge ǂoa; tsî i ge tsuxu ge i.
Jesub di ǀuni ǁgaus: ǁÎb di ǂkhaiǂkhaihes tsî Petrub di ǁnās tsîra xab ra ǃhoa. ǀNammi di mîmās xa.
31 Tsî Judab ge ǂoao, ob ge Jesuba ge mî: Nēsib ge Khoen Ôaba ǂkhaiǂkhaihe hâ, tsîb ge Eloba ǁîb ǃnâ ǂkhaiǂkhaihe hâ. 32 Tsî Elob ga ǁîb ǃnâ ǂkhaiǂkhaihe hâo, ob ge ǁkhāti Eloba ǁîba ǁîb ǂûb ǃnâ nîra ǂkhaiǂkhai, tsîb ge ǃhaese nîra ǂkhaiǂkhai bi. 33 ǀGôarogo, ǂkhari ǁaero-i ǀgui-e ta sago ǀkha nî hâ. O go ge tita nî ôa; tsî Jodeǁîn ǃoa ta gere mî khami: “Tita ra ǃgûba du ge a sī ǁoa” ǁnās ǁkhās khami ta ǁkhāti nēsi sago ǃoa ra mî. 34 ǀAsa mîmā-e ta ra mā go: ǀNamgu go nî, ti; tita ge sago ǀnam is ǁkhās khami go nî sago ǀnamgu. 35 Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo. 36 Ob ge Simon Petruba ǁîb ǃoa ge mî: ǃKhūtse, mâǀîts kha ra ǃgû? Ob ge Jesuba ge ǃeream bi: Tita ra ǃgûpats ge nēsi a sao te ǁoa; xawets ge ega nîra sao te. 37 Ob ge Petruba ǁîb ǃoa ge mî: ǃKhūtse, tare xū-i ǃaroma ta kha nēsi a sao tsi ǁoa? Ti ûiba ta kom satsa nî mâibao. 38 Ob ge Jesuba ge ǃeream bi: Sa ûibats kha satsa tita nî mâiba? Amase, amase ta ra mîba tsi: Anib nî ās aiǃâts ge satsa ǃnona ǃnāde nî ǀūxū te.
Jesub di ǀgoramîdi xa ǁîb di ǁkhāǁkhāsabegu ǃoa. Jesub ge ǃAnu Gagaba ra mîmâi.
1 Tsîb ge ǁîb ǁkhāǁkhāsabegu ǃoa ge mî: ǂGaob âgo ab tā ǃhuri. Elob ǃnâ ǂgom, î go ǁkhāti tita ǃnâ ǂgom! 2 Ti Îb di ommi ǃnâ di ge ǂgui ǃnā-omde hâ. ǁNāti tamas ga io, o ta ga mîba go hâ: ǃGûsī ta ra, hâǃkhai-e ta nî ǂhomiba gose. 3 Tsî ǃgû tsî ta nî hâǃkhai-e ǂhomiba go, xawe ta nî ǁkhawa hā, tsî nî sago tita tawa ūsī, î go tita hâpa sago ona hâ. 4 Tsî mâǀî ta ra ǃgû ǃkhaisa go ge a ǂan, tsî daoba go ǁkhāti a ǂan. 5 Ob ge Tomaba ǁîb ǃoa ge mî: ǃKhūtse, ǀū ge ge a, mâǀîts ra ǃgû ǃkhaisa, tsî mati ge kha daoba a ǂan ǁkhā? 6 Ob ge Jesuba ǁîb ǃoa ge mî: Tita ge daota, tsî amata, tsî ûita. Khoe-i xare-i ge Abob tawa a sī ǁoa, tita xu i ga sī tama io. 7 Tita go ga ǂan hâo, o go ga ti Îb ona ǂan hâ. Tsî nēsisa xu go ge ǁîba a ǂan tsî ǁîba go mû. 8 Ob ge Filipuba ǁîb ǃoa ge mî: ǃKhūtse, sa Îba ǁgau ge re, o ge ge a ǂkhî. 9 Ob ge Jesuba ge mîǀî bi: Filiputse, nētikō ǂomxase ta ge sago ǀkha hâ, xawets ǂan te tama hâ? Tita ra mû-i kom ǁGûba ra mû-eo. Matits ǁnâi: Sa Îba ǁgau ge re, ti ra mî? 10 ǂGom tamats hâ, tita Abob ǃnâ hâ ǃkhaisa, tsî Abob tita ǃnâ hâsa? Mîdi, sadu ǃoa ta ra ǃhoade ta kom tita xu ǃhoa tamao; xawe Abob tita ǃnâ ǁan hâb, ǁnāb kom ǁîb di sîsenga ra dīo. 11 ǂGom te re, tita Abob ǃnâ hâ ǃkhaisa, tsî Abob tita ǃnâ hâsa; tsî ǁnā tamas ga io, ǁnâi sîsengu ǂûgu ǃaroma ǂgom te re. 12 Amase, amase ta ra mîba go: Tita ǃnâ kara ǂgom-i, ǁnā-i ge tita ra dī sîsenga ǁkhāti nîra dī, tsî i ge ǁîgu ǃgâ-ai kaiga nîra dī; tita ti Îb ǃoa ra ǃgû xui-ao; 13 tsî ti ǀons ǃnâ go ga ǂgan xū-i hoa-i, ǁî-e ta nî dī, ǁGûb nî ǀGôab ǃnâ ǂkhaiǂkhaihese. 14 Xū-e go ga ti ǀons ǃnâ ǂgano, o ta ge tita ǁî-e nî dī. 15 Tita go ga ǀnamo, o go nî ti mîmāde ǃkhōǀgaipe! 16 O ta ge tita Aboba nî ǂgan, ob ge ǀnî ǁkhaeǂgao-aoba sago nîra mā, ǀamos kōse sago ǀkha nîra hâhâba, 17 Gagab amab dib, ǃhūbaib a ǃkhōǃoa ǁoaba, ǁîbab mû tsî ǂan tama amaga; xawe go ge sago ǂan bi hâ, sago tawab hâ tsîb nî sago ǃnâ hâhâ xui-ao. 18 ǃOaǀgôase ta sago ǃgoro tide; ǁkhawa ta nî sago ǃoa hā. 19 ǂKhari ǁaero-i ǀgui-i, ob ge ǃhūbaiba ǃaruǀî mû te tide; xawe go ge sago tita nîra mû, tita ûi hâ tsî sago on nîra ûi xui-ao. 20 ǁNā tsēs ǁkhās ai go ge nî mûǂan, tita ti Îb ǃnâ, tsî sago tita ǃnâ, tsî tita sago ǃnâ hâ ǃkhaisa. 21 Ti mîmāde ūhâ, tsî kara ǁîde dī-i ge tita ǀnam hâ-e; tsî tita kara ǀnam-i ge ti Îb xa nîra ǀnamhe-e; tsî tita ge ǁî-e ǀnam, tsî nîra ǂhaiǂhaisenba i. 22 Ob ge Judab, Iskarioǁî tamaba, ǁîb ǃoa ge mî: ǃKhūtse, mati i kha ī, ots sige nîra ǂhaiǂhaisenba, tsî ǃhūbaiba ǂhaiǂhaisenba tide? 23 Ob ge Jesuba ǃeream, tsî ǁîb ǃoa ge mî: Khoe-i ga tita ǀnamo, o i ge ti mîsa nî dī, tsî ti Îb ge ǁî-e nî ǀnam, tsî khom sikhoma ǁî-i ǃoa sī tsî nî ǁî-i tawa ǁanǃkhai-e dībasen. 24 Tita ǀnam tama-i, ǁnā-i ge ti mîde dī tama-e tsî mîs, ǁnâu go ras ge ti tamasa, tsîs ge a ǁGûb, tita ge sîb di. 25 Nēna ta sago ǃoa goro ǃhoa, sago tawa ta hâ hîa. 26 Xawe ǁKhaeǂgao-aob, ǃAnu Gagab, Abob ti ǀons ǃnâ nîra sîb, ǁnāb ge hoana nîra ǁkhāǁkhā go, tsîb ge sago nîra ǂâiǂâi, tita gere mîba gon hoan xa. 27 ǂKhîba ta ra ǃgoroba go, ti ǂkhîba ta ra mā go. ǃHūbaib ra mā khami ta tita sago mā tama. Ab ǂgaob âgo tā ǃhuri, îb tā ǃao! 28 Sago go ǁnâu, tita goro mîba gosa: ǃGû ta ra, tsî ta nî ǁkhawa sago tawa hā, ti. Tita go ga ǀnamo, o go ge ga ǃgâiaǂgao: ǁGûb ǃoa ta ra ǃgû, tita goro mî ǃkhais xa; Abob tita ǃgâ-ai a kai xui-ao. 29 Tsî nēsi ta ǁîsa sago go mîba, ǃnae tamas hâ hîa, î go ga ǃnaes kao, ǂgom. 30 ǃAruǀî ta ǂguina sago ǀkha ǃhoa tide. ǂAmsab nē ǃhūbaib dib ǃgoaxa xui-ao, tsîb ge tita ai xū-i xare-e ūhâ tama, 31 xawe ǃhūbaib nî mûǂan, Aboba ta a ǀnamsa tsî Abob ge mîmā te khami ta ra dī ǃkhaisa. Khâi î ge nēpa xu ǃgû!
Xristub ǂauxûiǂûhaib xa. Jesub ge ǃaruǀî ǀgoramîde ǁkhāǁkhāsabegu âb ǃoa ra ǃhoa.
1 Tita ge ama-ai ǂauxûiǂûhaita, tsî ti Îb ge ǃhanasîsen-aoba. 2 Mâ ǂgona-i hoa-i, tita ǃnâ hâ-i, ǂûtani tama-eb ge ra ūbē; tsî mâ-i hoa-i ǂûtani ra-eb ge ra ǃanuǃanu, ǃaruǀîǀgui i nî ǂûtanise. 3 Sago ge ǀnai a ǃanu, sago ǃoa ta gere ǃhoa mîs ǃaroma. 4 Tita ǃnâ hâ, î ta tita sago ǃnâ hâ. ǂGonab ǁîb ǂûba xu a ǂûtani ǁoa khami, ǂauxûiǂûhais ǃnâb ga hâ tama io, ǁnās ǃkhās khami go ge ǁkhāti sago a ǂûtani ǁoa, tita ǃnâ go ga hâ tama io. 5 Tita ge ǂauxûiǂûhaita, sago ge ǂgonago. Tita ǃnâ ra hâ-i tsî tita ǁî-i ǃnâ ra hâ-i ǁnā-i ge kaise ra ǂûtani; tita ose du kom xū-e a dī ǁoao. 6 Tita ǃnâ hâ tama khoe-i, ǁnā-i ge ra aoǂuihe, ǂgona-i xase, tsî i ra ǂnâ; tsîn ge ǀhaoǀhaohe, tsî ǀaes ǃnâ aoǂgāhe tsî ra khauǃkhūhe. 7 Tita ǃnâ go ga hâo, tsî ti mîdi ga sago ǃnâ hâo, o go ge ǂgao go ka-i hoa-e a ǂgan ǁkhā, o i ge nî ība go. 8 Nēs ǃnâb ge ti Îba ǂkhaiǂkhaihe hâ, kaise go ga ǂûtanio, tsî ti ǁkhāǁkhāsabe go kao. 9 ǁGûb tita ǀnam hâ khami ta ge tita ona sago ǀnam hâ. Hâhâ re ti ǀnammi ǃnâ! 10 Ti mîmāde go kara dīo, o go ge ti ǀnammi ǃnā nî hâhâ, tita ti Îb di mîmāde dī tsî ǁîb di ǀnammi ǃnâ ra hâhâ khami. 11 Nēna ta sago ǃoa goro ǃhoa, ti ǃgâiaǂgaob nî sago ǃnâ hâhâse, tsîb nî sago ǃgâiaǂgaoba ǀoase. 12 Nēs ge ti mîmāsa, ǀnamgu go nî, ti, tita ge sago ǀnam hâ i khami. 13 Nē-i ǃgâ-ai kai ǀnam-e i ge khoe-e ūhā tama, khoe-i nî ǁî-i khoen ǃaroma ǁî-i ûiba mā, ti. 14 Sago ge a ti khoe, tita ra mîmā gona go kara dīo. 15 ǃAruǀî ta sago “ǃgāgo” ti ǂgai tide, ǃgā-i a ǀū, ǀhonkhoeb â-i ra dī-e xui-ao. Xawe ta ge sago “khoego” ti ge ǂgai, ti Îba xu ta ge ǁnâun hoana ta ge sago ge ǂanǂan xui-ao. 16 Sago ge tita ǃkhōǂuibasen tama hâ; xawe ta ge tita sago ǃkhōǂuibasen hâ, tsî ta ge ge mâi go, ǃgû tsî go nî ǂûtanise, tsîs nî sago di ǂûsa hâhâse, îb Aboba ti ǀons ǃnâ go ga ǂgan-i hoa-e sago mā. 17 Nēsa ta ra mîmā go, ǀnamgu go nîse. 18 ǃHūbaib ga sago ǁkhano, ǂan, titab ge sago aiǃâ ǁkhan hâ i ǃkhaisa. 19 ǃHūbaiba xu go ga hâo, ob ga ǃhūbaiba ǁîb di-e ǀnam; xawe ǃhūbaiba xu go hâ tama, tsî tita sago ǃhūbaiba xu ǃkhōǂuibasen hâ amagab kom ǃhūbaiba sago ra ǁkhano. 20 ǁNā mîs, tita gere mîba gos xa ǂâiǂâisen: ǃGā-i ǁî-i ǀhonkhoeb xa kai tama ǃkhaisa. Titan ga ǃgôaǃgono, on kom sago ona nî ǃgôaǃgono; ti mîsan ga dī hâo, on kom sago dis ona nî dīo. 21 Tsîn ge nēn hoana sago nîra dī ti ǀons ǃaroma, tita ge sîban ǂan tama amaga. 22 Hā tsî ta ga ǁîn ǃoa ǃhoa tama io, on ga ǁore-i xare-e ūhâ tama i hâ, xawe nēsin kom ǀhapiokaisen-i ǁîn ǁoreb di-e ūhâ tamao. 23 Tita ra ǁkhan-i ge ti Îb ona ra ǁkhan-e. 24 ǁNā sîsenga ta ga ǁîn ǃnâ dī tama i hâo, ǀkhara-i dī tama hâga, on ga ǁore-i xare-e ūhâ tama i hâ; xawe nēsin ge ǁîga ge mû, tsî tita tsî ti Îb tsîkhoma ra ǁkhan. 25 Xawe i ge ra ī, ǁîn di ǂhanub ǃnâ xoahe hâ mîs nî ǀoaǀoahese: “ǀHapi-i osen ge tita ra ǁkhan” ti. 26 ǁKhaeǂgao-aob, tita nî Aboba xu sago sîbab, Gagab amab dib, Aboba xu ra ǂoab ga hāo, ǁnāb ge tita xa nîra ǃkhō-am. 27 Tsî sago on ge nîra ǃkhō-am, tsoatsoasa xu go ge tita ǀkha hâ i xui-ao.
ǀUni ǀgoramîdi Jesub didi. ǁKhaeǂgao-aob xa.
1 Nēna ta ge sago ǃoa gere ǃhoa, ǁgonǁgonǂgaohe go tidega. 2 Sinagogeba xun ge sago nîra ǂhāǂui. Ā, iri, ge nîra hâ, o i ge sago kara ǃgam-i hoa-e Eloba i ǁnās ǀkha ra ǃoaba, ti nî ǂâi. 3 Tsîn ge nēna nîra dī, Abob tsî tita tsîkhoman ǂan tama hâ xui-ao. 4 O ta ge ǁîna sago go mîba, iri ga hā ǃnubai go nî ǁîn xa ǂâiga, mî ta gere ǃkhaisa. Tsî ta ge ǁîna tsoatsoasa xu mîba go tama hâ, sago ǀkha ta ge hâ i xui-ao. 5 Xawe ta ge nēsi ra ǃgû tita ge sîb ǃoa; tsî ǀguib âgo xaweb ge: Mapats ra ǃgû? ti dî te tama hâ. 6 Xawe nēna ta go mîba go amagab ge ǂgaob âgo ǃoab xa go ǀoa. 7 Xawe ta ge amaba ra mîba go: ǃGâiba go a, ǃgû ta ra ǃkhaisa. ǃGû tama ta ga io, ob kom ǁKhaeǂgao-aoba sago ǃoa hā tideo. Xawe ǃgû ta karao, o ta ge ǁîba sago ǃoa nîra sî. 8 Tsî ǁnāb kara hāo, ob ge ǃhūbaiba nîra ǃhoadan ǁoreb xa, tsî ǂhanu-aisib xa, tsî ǀgoraǃgâs xa. 9 ǁNā ǁoreb xa: Tita ǃnân ǂgom tama, ti. 10 Tsî ǁnā ǂhanu-aisib xa: Ti Îb ǃoa ta ra ǃgû, tsî go ǃaruǀî mû te tide, ti. 11 Tsî ǁnā ǀgoraǃgâs xa: Nē ǃhūbaib di ǂamsab ǀgoraǃgâhe hâ, ti. 12 ǂGuin ganupe ta nî mîba gona ta ūhâ, xawe go ge nēsi a tani ǁoa. 13 Xawe ǁnāb, amab di Gagab kara hāo, ob ge ǁîba hoaraga amab ǃnâ nîra ǂgaeǂgui go. ǁÎb ǂûb xab ǃhoa tide xui-ao; xaweb ge ǁnâub rana ǃhoa, tsî ǃgoaxana nîra ǂhôa go. 14 ǁÎb ge tita nîra ǂkhaiǂkhai; tin xa ū tsîb nî sago ǂhôa xui-ao. 15 Abob ūhân hoan ge a ti: ǁNā-amaga ta ge tin xa ū tsîb nî sago ǂhôa, ti go mî. 16 ǂKhari ǁaero-i, o go ge tita mû tide, tsî ǁkhawa ǂkhari ǁaero-i, o go ge tita nîra mû; Abob ǃoa ta ra ǃgû xui-ao. 17 O gu ge ǀnî ǁkhāǁkhāsabegu âba ge mîǀîgu: Tare-e, nēb ra sige mîba-e: ǂKhari ǁaero-i, o go tita mû tide, tsî ǁkhawa ǂkhari ǁaero-i, o go tita nîra mû tsî: Abob ǃoa ta ra ǃgû? 18 O gu ge ge mî: Tare-e kha nē-e: ǂKhari ǁaero-i, tib ra mî-e. Sage ge a ǀū tare-eb ra mîsa. 19 Tsî Jesub ge ǂan, ǁîba gu ra dî ǂgao ǃkhaisa, ob ge ǁîgu ǃoa ge mî: Nēs xa go kha ra dîgu: ǂKhari ǁaero-i, o go tita mû tide, tsî ǁkhawa ǂkhari ǁaero-i, o go tita nîra mû, ti ta goro mî amaga? 20 Amase, amase ta ra mîba go: Sago ge ā tsî nîra ǃgae, xaweb ge ǃhūbaiba nîra ǃgâiaǂgao; sago ge nîra ǃoa, xaweb ge ǃoab âgo nîra ǃgâiaǂgao kaihe. 21 Taras, ǁoras rao, os ge ǃoa-e ūhâ, iri âs go hā xui-ao; xawe ǀgôaro-es ra hō-o, os ge ǃaruǀî ǂōǂōsib xa ǂâi tama hâ, khoe-i go ǃhūbaiba ǃnaeba ǃkhais ǃaromas ra ǃgâiaǂgao xui-ao. 22 Tsî sago ge nēsi ǃoa-e ūhâ; xawe ta ge sago ǁkhawa nîra mû, ob ge ǂgaob âgo nîra ǃgâiaǂgao, tsî khoe-i xare-i ge ǃgâiaǂgaob âgo ūǀhana go tide. 23 Tsî ǁnātsē go ge xū-i xare-e dî te tide. Amase, amase ta ra mîba go: ǁGûba go ga ǂgan xūn hoanab ge sago ti ǀons ǃnâ nîra mā. 24 Nēsis kōse go ge ti ǀons ǃnâ xū-i xare-e ǂgan tama hâ. ǂGan, o go ge nîra ǃkhōǃoa, îb ǃgâiaǂgaob âgo ǀoa. 25 Nēna ta ge ǂkhōdi ǃnâ sago ǃoa goro ǃhoa. Xaweb ge ira nîra hā, o ta ǃaruǀî ǂkhōdi ǃnâ sago ǃoa ǃhoa tide, o ta ǂhauǃnâse Abob xa nîra ǂhôa go. 26 ǁNātsē go ge ti ǀons ǃnâ nîra ǂgan. Tsî ta nî Abob tawa sago ǂganba ǃkhaisa ta mîba go tama. 27 Abob kom aitsama sago ǀnam hâo, sago tita ǀnam hâ, tsî Eloba xu ta ge ǂoa ǃkhaisa go ǂgom hâ amaga. 28 Aboba xu ǂoa, tsî ta ge ǃhūbaib ai ge hā; o ta ge ǁkhawa ǃhūbaiba ǁnāxū, tsî Abob ǃoa ra ǃgû. 29 O gu ge ǁkhāǁkhāsabegu âba ge mî: Kō, nēsits ra ǂhauǃnâse ǃhoa, tsîts ǂkhō-i ǃnâ mî tama. 30 Nēsi ge ge a ǂan, hoanats a ǂan, tsî khoe-i nî dî tsisa ǂhâbasa tama ǃkhaisa. ǁÎ ǃkhaisa xu ge ge ra ǂgom, Eloba xuts ge ǂoa ǃkhaisa. 31 Ob ge Jesuba ge ǃeream gu: ǂGom go ra nēsi? 32 Mû, iri ge nîra hā, tsî ǀnaib ge go hā, o go ge nîra ǀgaruǀgaruhe, mâb hoaba ǁîb di-i ǃoa, tsî go nî tita ǀguri ǃgoro; xawe ta ǀguri hâ tama, Abob kom tita ǀkha hâo. 33 Nēna ta sago ǃoa goro ǃhoa, tita ǃnâ go nî ǂkhîba ūhâse. ǃHūbaib ǃnâ go ǂōǂōsi-e ūhâ; xawe ǃgâiǂâixa re, tita ge ǃhūbaiba ge dan.
Xristub ge ǁîb ǂûba ra ǀgorebasen, tsîb ge ǁkhāti ǁkhāǁkhāsabegu âb tsî ǀhaohâb ona ra ǀgoreba.
1 Nēnab ge Jesuba ǃhoa, tsî mûra âba ǀhommi ǃoa ǃhâkhâi, tsî ge mî: Abotse, iri ge go hā; ǂkhaiǂkhai sa Ôaba, îb sa Ôaba satsa ǂkhaiǂkhai, 2 ǀgai-ets mā bi hâ khami ǁgans hoas ǂama, ǁîbats ge mān hoanab nî ǀamo ûiba māse. 3 Tsî nēb ge ǀamo ûiba, sats ǀguise ama-ai Elots, tsî sats ge sîb Jesub Xristub onan nî ǂan ǃkhaisa. 4 Tita ge satsa ǃhūbaib ai ge ǂkhaiǂkhai, ǁnā sîsenni, dī ta nîsets ge mā teba ta ge dītoas ǀkha. 5 Tsî nēsi ǂkhaiǂkhai te re, Abotse, sats ǂûts tawa, ǁnā ǂkhaisib, ǃhūbaib ge īs aiǃâ ta ge sa tawa ūhâ ib ǀkha. 6 Sa ǀonsa ta ge ǁnā khoena ge ǂhaiǂhaiba, ǃhūbaiba xuts ge mā tena. Sa din ge ǁîna ge i, tsîts ge ǁîna tita ge mā, tsîn ge sa mîsa ge sâu. 7 On ge nēsi mûǂan hâ, titats ge mān hoan satsa xu hâ ǃkhaisa. 8 ǁNā mîdi, sats ge tita māde ta ge ǁîna mā xui-ao; tsîn ge ǁîde ge ǃkhōǃoa, tsîn ge amase ge mûǂan, satsa xu ta ge ǂoa ǃkhaisa, tsîn ge ǂgom hâ, sats ge tita sî ǃkhaisa. 9 Tita ge ǁîna ra ǀgoreba; ǃhūbaiba ta ǀgoreba tama, xawe sats ge tita māna ta ra ǀgoreba, sa din a amaga. 10 Tsî tin hoan ge a sa, tsî san hoan ge a ti; tsî ta ge ǁîn ǃnâ ǂkhaiǂkhaihe hâ. 11 Tsî ta ge tita ǃaruǀî ǃhūbaib ai hâ tama hâ; xawen ge ǁîna ǃhūbaib ai hâ, tsî ta ge tita sa tawa ra sī. ǃAnu Abotse, sa ǀons ǃnâ ǁîna sâu re, titats ge māna, în ǀgui, sakhom a ǀgui khami. 12 ǃHūbaib ai ta ǁîn ǀkha hâ hîa ta ge ǁîna sa ǀons, titats ge mās ǃnâ ge sâu, tsî ta ge ǁîna ge ǃûi, tsî ǀgui-i ân ge kā tama hâ, kāǁōsib di ǀgôab ǀguib, xoas nî ǀoaǀoahese. 13 Tsî nēsi ta sa tawa ra sī, tsî ta nēna ǃhūbaib ai ra ǃhoa, ti ǃgâiaǂgaoban nî ǀoa hâse ǁîn ǃnâ ūhâga. 14 Tita ge ǁîna sa mîsa ge mā, tsî ǃhūbaib ge ǁîna ra ǁkhan, ǃhūbaiba xun hâ tama amaga, tita on ǃhūbaiba xu hâ tama khami. 15 ǃHūbaiba xuts nî ǁîna ūbē, ti ta ǀgore tama, xawe ǂkhababa xuts nî ǁîna sâu, ti ta ra ǀgore. 16 ǃHūbaiba xun ǁîna hâ tama, tita on ǃhūbaiba xu hâ tama khami. 17 ǁÎna ǃanuǃanu amab ǃnâ, sa mîs ge a ama. 18 Titats ge ǃhūbaib ai sî khami ta ge tita ona ǁîna ǃhūbaib ǃoa ra sî. 19 Tsî ǁîn ǃaroma ta ti aitsama ra khaisen, ǁîn on nî ǃanuǃanuhega amab ǃnâ. 20 Tsî ta ǁîn ǀguina ǀgoreba tama, xawe ta ǁkhāti ǁîn di mîsa xu tita ǃnâ nîra ǂgomna ra ǀgoreba, 21 în hoana ǀgui, sats Abots ge ti ǃnâ, tsî tita sa ǃnâ ǀguis ǁkhās khami; în ǁîn ona sakhom ǃnâ ǀgui, ǃhūbaib nî ǂgomga, sats ge tita sî ǃkhaisa. 22 Tsî ta ge ǁîna ǁnā ǂkhaisib, titats ge māba ge mā, în ǀgui, sakhom a ǀgui khami. 23 Tita ǁîn ǃnâ, tsî satsa tita ǃnâ; în dīǀoaǀoahe hâse ǀgui, îb ǃhūbaiba mûǂan, sats tita ge sî ǃkhaisa, tsîts ǁîna ǀnam hâ ǃkhaisa, titats ǀnam hâ khami. 24 Abotse, ǂgao ta ra, tita hâpa, ǁnāpan nî ǁkhāti titats ge māna hâ ǃkhaisa, în ti ǂkhaisiba kō, sats ge mā teba; ǃhūbaib ganupe ǃgaoǃgaohe tama hâ hîats ge tita ǀnam i xui-ao. 25 ǂHanu-ai Abotse, ǃhūbaib ge satsa ǂan tama hâ; xawe ta ge tita a ǂan tsi, tsî nēn on ge a ǂan, sats tita ge sî ǃkhaisa. 26 Tsî ta ge ǁîna sa ǀonsa ge ǂanǂan, tsî nîra ǂanǂan si, îb ǁnā ǀnammi titats ra ǀnamūba ǁîn ǃnâ hâ, î ta tita ǁîn ǃnâ hâ.
Jesub ge ǃhanab ǃnâ ra ǃkhōhe.
1 Nēnab ge Jesuba ǃhoa, ob ge ǁîb di ǁkhāǁkhāsabegu ǀkha ǂoa, tsî ǃārob Kidronni nauǃani ge ǃgâu; ǁnāpab ge ǃhanaba ge hâ i, ǁîb ǃnâb ge Jesuba ge ǂgâ tsî ǁîb di ǁkhāǁkhāsabegu tsîna. 2 Tsî Judab, ǀapexū bi geb ge ǁkhāti ǁnâ ǃkhaisa ǂan ge i, Jesub ge ǁnāpa ǁîb di ǁkhāǁkhāsabegu ǀkha ǁaekorobe gere ǀhû amaga. 3 Ob ge Judaba toroǂnubis tsî ǀgapipristergu tsî Farisegu tsîgu di ǃgāga ū, tsî ǁnāpa ge sī, ǃamamǀaedi tsî lanterndi tsî ǁâtanin tsîn ǀkha. 4 Tsî Jesub ge ǁîb ai nîra hān hoana ǂan io, ob ge ǂoa, tsî ǁîn ǃoa: Tari-e go ra ôa? ti ge mî. 5 O gu ge ge ǃeream bi: Jesub Nasareǁîba ti. Ob ge Jesuba ǁîgu ǃoa: Tita ge ǁî ta, ti ge mî. Tsî Judab ǀapexū bi geb ge ǁkhāti ǁîgu ǀkha ge mâ i. 6 Tsî Jesub ge: Tita ge ǁî ta, ti mîo, o gu ge ǃgâǃgâbē, tsî ǃhūb ai ge ǁnā. 7 Ob ge ǁkhawa ǁîga: Tari-e go ra ôa? ti ge dî. O gu ge ǁîga Jesub Nasareǁîba, ti ge mî. 8 Ob ge Jesuba ge ǃeream: Mîba go ta go, tita a ǁî ǃkhaisa; tita go ga ǁnâi ôao, î gu ǁnâi nēga ǃgû! ti. 9 ǁNā mîs, ǃhoab ges nî ǀoaǀoahese: Titats ge mān xa ta ǀgui-i xare-e kā kai tama hâ, ti. 10 Ob ge Simon Petrub gôaba ūhâba ǂgaeǂui, tsî ǀgapipristeri di ǃgāba ǂnau, tsî ǁîb amǀkhāb ǂgaesa ge ǂnauǁnâ; tsî ǁnā ǃgāb ge Malxub ti ge ǀon hâ i. 11 Ob ge Jesuba Petrub ǃoa ge mî: Gôab âtsa ǂgā ǁhōb ǃnâ! Ā ta tide, Abob ge mā te ǀgabisa?
ǀGapipristeri ge Jesuba ra ǁnâuǃgâ. Petrub ge ra ǀūxū bi.
12 On ge ǂnubis tsî danakhoeb tsî Jodeǁîn di ǃgāgu tsîna Jesuba ǃkhō, tsî ge ǃgae bi, 13 tsî ǁîba ǂguro Annab ǃoa ge ǂgaeǂgui; ǁîb ge Kajafab, ǁnā kurib ai ǀgapiprister ge ib taras di î-i xui-ao. 14 Tsî Kajafab ge ǁnāb Jodeǁîna ge ǀapemāba, ǃgâi i ka ǃkhaisa, ǀgui khoe-i nî ǁaesa ǁōba ǃkhaisa. 15 Tsî Simon Petrub tsî ǀnî ǁkhāǁkhāsabeb tsîkha ge Jesuba ge sao; tsîb ge ǁnâ ǁkhāǁkhāsabeba ǀgapipristeri tawa ge ǂansa i, tsî Jesub ǀkha ǀgapipristeri di ai-ommi ǃnâ ge ǂgâ. 16 Tsî Petrub ge dao-ams ǃauga ge mâ i. Ob ge nau ǁkhāǁkhāsabeb, ǀgapipristeri tawa ǂansa ge iba ǂoa, tsî daos ǃûi-aos ǀkha ǃhoa, tsî Petruba ge ūǂgâxa. 17 Os ge ǃgās, daos ǃûi-aosa Petrub ǃoa ge mî: Sats ona kha nē khoeb ǁkhāǁkhāsabegu di ǀgui tamatsa? Ob ge: ǁÎ tama ta, ti ge mî. 18 Tsî gu ge ǃgāgu tsî sîsenaogu tsîga ge mâ i, ǂnomǀae-e khau tsî, ǃkhai ge i amaga, tsî gere sâ; tsî Petrub ge ǁîgu ǀkha mâ tsî gere sâ. 19 Tsî ǀgapipristeri ge Jesuba ǁkhāǁkhāsabegu âb tsî ǁkhāǁkhās âb xa gere dîǃā. 20 Ob ge Jesuba ge ǃeream: Tita ge ǂhauǃnâse ǃhūbaib ǃoa gere ǃhoa. Tita ge hugaǀgui sinagogeb tsî tempeli, hoa Jodeǁîn ra ǀhûǃnâb ǃnâ gere ǁkhāǁkhā, tsî ǂganǃgâsib ǃnâ ta ge xū-i xare-e ǃhoa tama hâ; 21 tarexats tita ra dîǃā? ǁNâu gena dîǃnâ, tarena ta ge ǁîna ǃhoa-ū ǃkhaisa. Mû, ǁîn ge a ǂan, tarena ta gere ǃhoa ǃkhaisa. 22 Tsî nēnab ra ǃhoa hîab ge ǃgāgu di ǀguib, ǁnāpa mâba Jesuba ǁapu, tsî: ǁNātits kha ǀgapipristera ra ǃeream? ti ge mî. 23 Ob ge Jesuba ge ǃeream: ǂKhabase ta ga ǃhoa hâo, ǁnâi ǂkhabab xa ǃhoadan te, tsî ǃgâise ta ga ǃhoa hâo, tarexats ǁnâi ra ǂnau te? ti. 24 Ob ge Annaba ǁîba ǃgaehe hâse Kajafab ǀgapipristeri ǃoa ge sî. 25 Tsî Simon Petrub ge mâ, tsî gere sâ. On ge ǁîb ǃoa ge mî: Sats ona kha ǁîb ǁkhāǁkhāsabegu di ǀgui tamatsa? Xaweb ge ǀoa tsî: ǁÎ tama ta, ti ge mî. 26 Ob ge ǀgapipristeri ǃgāgu di ǀguib, Petrub go ǂgaesa ǂnauǁnâb di khoexa ge iba ge mî: ǃHanab ǃnâ ǁîb ǀkha mû tsi tama ta hâ? 27 Ob ge Petruba ǁkhawa ge ǂnoa, tsî ǁnātimîsib ge aniba ge ā.
Pilatub aiǃâb ge Jesuba ǁkhāti ra ǁnâuǃgâhe.
28 Tsîn ge Jesuba Kajafaba xu ǂhanuǂhanu-ommi ǃoa ge ǃgû-ū; tsî i ge ǃnauǁgoaga ge i. Tsîn ge ǁîn ǂûna ǂhanuǂhanu-ommi ǃnâ ǂgâ tama ge i, ǀuriǀurisenn tidese, în Pasxaba ǂû ǁkhā, 29 Ob ge Pilatuba ǁîn ǃoa ǂoa, tsî ge mî: Mâ ǀhapiǀhapi-ai-e du kha nē khoeb ǃoagu ra ūhā? 30 O gu ge ǃeream tsî ge mîǀî bi: Nēb ga ǂkhabadī-ao tama io, o da kom ga satsa māǁnâ bi tama i hâo. 31 Ob ge Pilatuba ǁîn ǃoa ge mî: Sado ǁnâi ū bi, î sadu ǂhanub ǃoa ǀgoraǃgâ bi. On ge Jodeǁîna ǁîb ǃoa ge mî; Khoe-e ǃgamsa da kom mā-amhe tamao. 32 (Jesub di mîs, mîb ges nî ǀoase ǁgaub geo, mâ ǁō-ai-eb nîra ǁō ǃkhaisa.) 33 Ob ge Pilatuba ǁkhawa ǂhanuǂhanu-ommi ǃnâ ǂgâ, tsî Jesuba ǂgai, tsî ǁîb ǃoa ge mî: Satsa kha Jodeǁîn di gao-aotsa? 34 Ob ge Jesuba ge ǃeream: Aitsamats ra satsa xu nē-e mî? Nauna go tita xa mîba tsi? ti. 35 Ob ge Pilatuba ge ǃeream Jodeǁîta tita? Sa ǁaes tsî ǀgapipristergu tsîn ge satsa go māǁnâ te. Tare-ets go dī? 36 Ob ge Jesuba ge ǃeream: Ti gaosib ge nē ǃhūbaiba xu hâ tama hâ. Nē ǃhūbaiba xub ga ti gaosiba hâ hâo, o gu ga ti ǃgāga ǃkham hâ, Jodeǁîna ta māǁnâhe tidese; xawe nēsib ge ti gaosiba nēpa xu hâ tama hâ, ti. 37 Ob ge Pilatuba ǁîb ǃoa ge mî: Gao-aotsa kha ǁnâi? Ob ge Jesuba ge ǃeream: Sats ra mî, gao-aota asa. ǁÎs ǃoa ta ge ge ǃnae, tsî ǁîs ǃoa ta ge ǃhūbaib ai ge hā, amaba ta nî ǃkhō-ambase. Amaba xu hâ-i hoa-i ge ti domma ra ǁnâu-e. 38 Ob ge Pilatuba ǁîb ǃoa ge mî: Tare-e kha ama-e? Tsî nēsa mî tsîb ge ǁkhawa Jodeǁîn ǃoa ǂoa, tsî ge mî: Tita ge ǁîb ǃnâ ǀhapixū-e hō tama hâ. 39 Xawe du ge ǁnaeti-e ūhâ, ǀgui-e ta sado Pasxaǁaeb ai nî xūba ǃkhaisa. ǁNâi ǂgao du hâ, Jodeǁîn di gao-aoba ta nî xūba du ǃkhaisa? 40 On ge ǃgarise ǁkhawa ǂgai tsî ge mî: ǁÎb ose, xawe Barababa! Tsî Barabab ge ǃgamao ge i.
Xristub ge ra ǂnauhe. ǁÎb di ǁkhūkrons xa.
1 ǃNubaib ge Pilatuba Jesuba ū, tsî ge ǂnau kai bi. 2 Tsî toro-aogu ge ǁkhūgu xa kron-e ǂgoma, tsî ǁîb danas ai ǂnûi, tsî purpursara-e ana bi, 3 tsî ǁîb tawa ǀgū tsî ge mî: Tawede tsi Jodeǁîn gao-aotse! Tsî gu ge ǁîba gere ǁapu. 4 Ob ge Pilatuba ǁkhawa ǂoa, tsî ǁîn ǃoa ge mî: Mû, sado ta ǁîba ra ūǂoaxaba, mûǂan du nîga, ǀhapi-i xare-e ta ǁîb ǃnâ hō tama ǃkhaisa. 5 Ob ge Jesuba ge ǂoaxa, ǁkhūkrons tsî purpursarab tsîra anahe hâse. Ob ge Pilatuba ǁîn ǃoa: Mû nē khoeba re! ti ge mî. 6 Tsî ǀgapipristergu tsî ǃgāgu tsîgu ge mû bio, o gu ge ǂgai tsî: ǃGâu bi! ǃGâu bi! ti ge mî. Ob ge Pilatuba ǁîgu ǃoa ge mî: Sago ǁnâi ū î ǃgâu bi, tita ǁîb ǃnâ ǀhapi-i xare-e hō tama xuige. 7 On ge Jodeǁîna ge ǃeream bi: Sida ge ǂhanu-e ūhâ tsî sida ǂhanub ǃoab ge ǁōba a anu, ǁîb ge aitsama Elob Ôase dīsen xui-ao. 8 Tsî Pilatub ge nē mîsa ǁnâu, ob ge ǃaruǀîǀgui ge ǃao. 9 Tsî ǁkhawa ǂhanuǂhanu-ommi ǃnâ ǂgâ tsîb ge Jesub ǃoa: Mapa xuts hâ? ti ge mî. Xaweb ge Jesuba ǃeream-i xare-e mā bi tama ge i. 10 Ob ge Pilatuba ǁîb ǃoa ge mî: Tita ǀkhats ǃhoa tama hâ? ǂAn tamats kha ǁnâi hâ, ǁnāxū tsi ta nî, ti ī ǀgaiba ta ūhâsa, tsî ǃgâu tsi ta nî ti ī ǀgaiba ta ūhâsa? 11 Ob ge Jesuba ge ǃeream: ǀGai-i xare-ets ge tita ǂama ūhâ tama ga i hâ, ǀgapiseba xu i ga satsa māhe tama io; ǁnā-amagab ge tita go satsa māǁnâba, sa dib xa kai ǁore-e ūhâ. 12 ǁNā ǁaeba xub ge Pilatuba, matib nî ǁîba ǁnāxūsa gere ôa-am; xawen ge Jodeǁîna ǂgai, tsî ge mî: ǁÎbats ga ǁnāxūo, ots kom Kaesari di khoe tamao, ǁî-aitsama ra gao-aodīsen-i hoa-i ge Kaesara mâǃoa hâ-e xui-ao. 13 Tsî Pilatub ge nē mîde ǁnâuo, ob ge Jesuba ǂgaeǂguiǂui, tsî ǂhanuǂhanuǃnaos ai ge ǂnû, Litostrotos ti ra ǂgaihe ǃkhais ai, tsî Hebreǁîgowab ǃnâ Gabatas ti ra ǂgaihesa. 14 Tsî i ge Pasxab di aiǂhomisen tsē, tsî ǁaupexa ǃnaniǁî ir ge i. Ob ge Jodeǁîn ǃoa ge mî: Mû, nēb ge a sadu gao-ao. 15 Xawen ge: Ūbē, ūbē, î ǃgâu bi! ti gere ǂgai. Ob ge Pilatuba ǁîn ǃoa ge mî: Sadu gao-aoba ta ǁnâi nî ǃgâu? O gu ge ǀgapipristerga ge ǃeream: ǀNî gao-ao-e da ūhâ tama, Kaesari ǀguib, ti. 16 ǃNubaib ge ǁîba ǁîga ge māǁnâ ǃgâuheb nîse. On ge Jesuba ū tsî ge ǃgû-ū bi.
Xristub ge ra ǃgâuhe. ǁÎb di ǀuni mîdi tsî ǁōb tsîn xa.
17 Ob ge aitsama ǃgâuhaib âba tani tsî ge ǂoa, danaǂkhōs ǃās, ti ra ǂgaihe ǃkhais ǃoa, Hebreǁîgowab ǃnâ Golgota ti ra ǂgaihesa. 18 ǁNāpan ge ǁîba ge ǃgâu, tsî nau ǀgamkha ǁîb ǀkha ǃnamkha hoakha ai ǀguib, tsî Jesuba ǁaegub ǃnâ. 19 Tsî Pilatub ge ǁkhāti xoaǂam-e ge xoa, tsî ǁîba ǃgâuhaib ai ge ǂnûi; tsî i ge nēti ge xoahe hâ i: Jesub Nasareǁîb, Jodeǁîn di gao-aob, ti. 20 Nē xoaǂamsan ge ǂgui Jodeǁîna ge khomai, Jesub go ǃgâu-aihe ǃkhais ge ǃāsa xu ǀgū i amaga; tsîs ge Hebreǁî- tsî Romeǁî- tsî Grikeǁîgowagu ǃnâ ge xoasa i. 21 O gu ge Jodeǁîn di ǀgapipristerga Pilatub ǃoa ge mî: Jodeǁîn di gao-aob, ti tā xoa; î Jodeǁîn di gao-aota, tib gere mîb ti xoa re. 22 Ob ge Pilatuba: Xoa ta go-i ge xoa ta go-e, ti ge ǃeream. 23 O gu ge toro-aoga Jesuba gu ge ǃgâuo, saran âba ū, tsî ǁîna haka ǃâse ge dī, mâ toro-aob hoaba ǀgui ǃâsa, tsî ǂamsarab ona. Tsî ǂamsarab ge ǂomdao-o ge i, ǀgapiseba xu ǃnagab kōse ǂgāǃnâguhe hâse. 24 O gu ge ge mîǀîgu: A ge ǁîba tā ǀkhauǃā, î ge ǁîb ai ǂnoagusa ao tarib dib nîsa. Xoas nî ǀoaǀoahese, nēti ra mîsa: “Ti saranan ge ǁîn ǃnâ ge ǀgoragu, tsî ti ǂamsarab ain ge ǂnōgusa ge ao.” Nēsa gu ge toro-aoga ge dī. 25 Tsî di ge Jesub di ǃgâuhaib tawa ǁîb îs, tsî ǁîb îs di ǃgâsas, Marias, Kleofab di taras, tsî Maria Magdalenas tsîde ge mâ i. 26 Tsî Jesub ge ǁgûsa mûo, tsî ǁkhāǁkhāsabeb, ǁîb ge ǀnam iba ǁîs tawa mâse, ob ge ǁgûs ǃoa ge mî: Tarase, mû, nēb ge a sa ôa. 27 ǁNās khaoǃgâb ge ǁkhāǁkhāsabeb ǃoa ge mî: Mû nēs ge a sa î. Ob ge ǁkhāǁkhāsabeba ǁnā ira xu ǁîsa ǁîb tawa ge ū. 28 ǁNās khaoǃgâ, Jesub ge ǂano, hoan go ǀnai dītoahe ǃkhaisa, xoas nî dīǀoaǀoahese, ob ge ge mî: “ǁGâ ta hâ.” 29 Tsî i ge ǀkhuruxûi-i xa ǀoa hâ xapa-e ǁnāpa ge mâ i. O gu ge sponsa ǀkhuruxûib ǀkha ǀoaǀoa, tsî hisob ai ǂgā si, tsî ams âb tawa ge ǀhōǃapa si. 30 Tsî Jesub ge ǀkhuruxûiba ūo, ob ge ge mî: Dītoahe go! Tsî danasa ǃgam tsîb ge gagasa ge mā. 31 On ge Jodeǁîna, sorodi sâtsēsa ǃgâuhaib ai hâǃganu tidese, tsî aiǂhomisentsē-i ge i tsî ǁnā sâtsēs ge kai i amaga Pilatuba ge ǂgan, ǀnūgu âga khôahe tsî gu nî ūǁnâhe ǃkhaisa. 32 O gu ge toro-aoga hā tsî ǂgurob ǀnūkha ge khôa, tsî naub, ǁîb ǀkha ǃgâuhe go hâ ib dikha ona. 33 Xawe Jesub tawa sī tsî gu ge mûo, ǀnaib go ǁō ǃkhaisa, o gu ge ǁîb di ǀnūkha khôa tama ge i. 34 Tsî toro-aogu di ǀguib ge gôab âb ǀkha, ǁîb di ǃnammi ǃnâ ge ǃkhāǂgā, o kha ge ǁnātimîsi ǀaob tsî ǁgammi tsîkha ge ǀkhī. 35 Tsî nēsa ge mûb ge ǁîs xa ra ǃkhō-am, tsî ǃkhō-ams âb ge a ama; tsîb ge a ǂan, amabab ra mî ǃkhaisa, sadu on nî ǂgomse. 36 Nēn ge ǃnae xui-ao, xoas nî ǀoaǀoahese: “ǂKhō-i xare-i âb ge khôahe tide” ti. 37 Tsî ǁkhawa i ge ǀnî xoa-e ra mî: “ǁÎb ǃnân ge ǃkhāǂgāban ge nîra mû.”
Jesub di ǁkhōhes xa.
38 Nēn khaoǃgâb ge Joseb, Arimateas dib, Jesub di ǁkhāǁkhāsabe ge ib, xawe Jodeǁîna ǃaos xa ǂganǃgâse ge hâ iba Pilatuba ge ǂgan, iseb Jesub di sorosa nî ūǁnâ ǃkhaisa. Ob ge Pilatuba ge mā-am. Ob ge sī tsî Jesub di sorosa ge ūǁnâ. 39 Tsîb ge ǁkhāti Nikodemub aibe tsuxuba Jesub tawa ge sība hā, tsî habaguhe hâ miren tsî aukoren tsîna ge ūhā, korodisi litergu nî īs kōse. 40 O kha ge Jesub di sorosa ū, tsî ǃuri ǃkhain tsî ǃgâihamxūn ǀkha ge ǂgā si, Jodeǁîn ǁkhōs di ǁnaetiba ǃoa. 41 Tsî ǃgâu-aiheb ge ǃkhais ǀgūseb ge ǃhanaba ge hâ i, tsî ǃhanab ǃnâ i ge ǀasa ǁao-i tātsē i ge khoe-e ǁguiǃnâhe tama hâ i-e ge hâ i. 42 ǁNāpa kha ge Jesuba ge ǁgui, Jodeǁîn di aiǂhomisentsēs ǃaroma, ǀhobas ge ǀgū i amaga.
Xristub di khâis xa.
1 Tsî ǂguro tsēs wekheb dis ais ge Maria Magdalenasa ǃnauǁgoaga, ganupe a ǃkhae hîa ǀhobas tawa hā, tsî ǀuis ǀhobasa xu gababēhe hâ ǃkhaisa ge mû. 2 Os ge ǃkhoe, tsî Simon Petrub tsî nau ǁkhāǁkhāsabeb, Jesub ǀnam hâb tsîkha tawa sī, tsî ge mî: ǃKhūban ǀhobasa xu ūbē hâ, tsî sise ge a ǀū, mapan go ǁgui bi ǃkhaisa. 3 Ob ge Petrub tsî nau ǁkhāǁkhāsabeb tsîkha ǂoa, tsî ǀhobas ǃoa ge ǃgû. 4 Tsî kha ge ǁî ǀgamkha ge ǀguiǃkhoe, xaweb ge nau ǁkhāǁkhāsabeba Petruba ǃkhoedā tsî ǂgurose ǀhobas tawa ge sī. 5 Tsî ǃgamǃgâb ge, ob ge ǃkhaiga ge mûǁgoe; xaweb ge ǂgâ tama ge i. 6 Ob ge Simon Petruba saohā bi, tsî ǀhobas ǃnâ ǂgâ, tsî ǃkhaiga ge mûǁgoe; 7 tsî aosenǃkhaib, Jesub danas ai go hâ ibab ge nau ǃkhaigu tawa mûǁgoe tama i, tsî ǁîba xamihe hâse ǃkhai-i tawa ǀguri ge mûǁgoe. 8 Ob ge nau ǁkhāǁkhāsabeb, ǂguro sī ge ǀhobas tawab ona ǂgâ, tsî mû tsî ge ǂgom. 9 Xoasa kha ge ganupe ǂan tama hâ i xui-ao, ǁō hâna xub nî khâi ǃkhaisa. 10 O kha ge ǁkhāǁkhāsabekha ge ǁaru.
Xristub ge Maria Magdalenasa ra ǂhai.
11 Tsîs ge Mariasa ǀhobas ǃauga mâ, tsî gere ā. Tsî ās ra hîas ge ǀhobas ǃnâ ǃgamǃgâ, 12 tsî ǀgam ǀhomǃgākha ge mûǂnôa, ǃuri sarana ana hâkha, ǀguiba danas ǀkhāb ai tsî nauba ǂaira ǀkhāb ai, Jesub di soros go ǁgoe i ǃkhais tawa. 13 Tsî kha ge ǁîs ǃoa ge mî: Tarase, tarexas ra ā? Os ge ǁîkha ǃoa ge mî: Ti ǃKhūban go ūbē, tsî ta a ǀū mapan go ǁgui bi ǃkhaisa amaga. 14 Tsî nēna mî tsîs ge ǂnano, os ge Jesuba ge mûmâ, xawes ge Jesub a ǃkhaisa ge ǀū i. 15 Ob ge Jesuba ǁîs ǃoa ge mî: Tarase, tarexas ra ā? Tari-es ra ôa? Os ge ǁîsa ǃhanasîsenaob ti ǂâi tsî ǁîb ǃoa ge mî: ǃGôahesatse sats ga ǁîba tanibē hâo, ǁnâi mîba te re, mapats go ǁgui bisa, î ta ǁîba sī ūbē. 16 Ob ge Jesuba ǁîs ǃoa ge mî: Mariase! Os ge dabasen tsî ǁîb ǃoa Hebreǁîgowab ǃnâ ge mî: Rabunitse! (ǁNās ge ǁkhāǁkhā-aotse ti mîsa.) 17 Ob ge Jesuba ǁîs ǃoa ge mî: Tā tsâǀkhā te, ganupe ta ti Îb ǃoa ǃapa tama hâ xuige. Xawe ǃgûsī ti ǃgâsagu ǃoa, î ǁîga mîba; ǃApa ta ra ti Îb ǃoa, tsî sago Îb ǃoa; ti Elob ǃoa, tsî sago Elob ǃoa. 18 Os ge Maria Magdalenasa ǁkhāǁkhāsabega ge sī ǂhôa, ǃKhūbas go mû, tsî nēnab goro mîba si ǃkhaisa.
Jesub ge ǁkhāǁkhāsabegu âba ra ǂhai. Tomab di ǂgomoǃnâsib xa.
19 Tsî ǃui i geo, ǁnā ǂguro tsēs wekheb dis ai, tsî ǁkhāǁkhāsabegu ǀhû hâ ǃkhais di dao-amdi ge ǂganamhe hâ io, Jodeǁîna ǃaob xa, ob ge Jesuba hā, tsî ǁaegub ǃnâ mâ tsî ge mîǀî gu: ǂKhîba ab sago ǀkha hâ. 20 Tsî nēsa mî tsîb ge ǁîga ǃomkha âb tsî ǃnammi âb tsîkha ge ǁgau. O gu ge ǁkhāǁkhāsabega ge ǃgâiaǂgao, ǃKhūba gu go mûo. 21 Ob ge Jesuba ǁkhawa ǁîgu ǃoa ge mî: ǂKhîba ab sago ǀkha hâ! Abob ge tita sî khami ta tita ǁkhāti sago ra sî. 22 Tsî nēsa mî tsîb ge ǁîgu ai ǃgom tsî ǁîgu ǃoa ge mî: ǃKhōǃoa ǃAnu Gagaba. 23 Khoe-e go kara ǁorena ǀûbao, ǁnā-i ge ǀûbahe hâ-e; tsî khoe-e go kara ǁorena ūhâbao, ǁnā-i ge ūhâbahe hâ-e. 24 Tsîb ge Tomab, disiǀgamǀagu di ǀguib, Didimub ti ra ǂgaiheba ǁîgu ǀkha hâ tama ge hâ i, Jesub ge hā ǃnubai. 25 O gu ge nau ǁkhāǁkhāsabega ǁîb ǃoa ge mî: Sige ge ǃKhūba go mû. Ob ge ǁîgu ǃoa ge mî: ǁÎb di ǃomkha ǃnâ ta ga ǀuridan di saode mû tama io, tsî ǀkhunuba ta ga ǀuridan di saodi ǃnâ ǁgui tama io, tsî ti ǃomma ta ga ǃnammi âb ǃnâ ǁgui tama io, o ta ge tātsē ǂgom tide. 26 Tsî ǁkhaisa tsēde ǁnās khaoǃgâ gu ge ǁkhāǁkhāsabegu âba ǁkhawa oms ǃnâ ge hâ i, tsî Tomaba ǁîgu ǀkha. Ob ge Jesuba, dao-amdi ǂganamhe hâ hîa hā, tsî ǁaegub ǃnâ mâ, tsî ge mî: ǂKhîba ab sago ǀkha hâ! 27 ǁNās khaoǃgâb ge Tomab ǃoa ge mî: Sa ǀkhunuba ūhā, î ti ǃomkha kō, î sa ǃomma ūhā, î ti ǃnammi ǃnâ ǁgui bi; î tā ǂgomoǃnâ, î ǂgom. 28 Ob ge Tomaba ǃeream, tsî ǁîb ǃoa ge mî: Ti ǃKhūtse tsî ti Elotse! 29 Ob ge Jesuba ǁîb ǃoa ge mî: Titats go mû amagats ra ǂgom, Tomatse? ǃGâiǃōn ge hâ ǁnān, mû tama xawe ra ǂgomna. 30 Tsî ǀnî saodi ǂguideb ge Jesuba ǁîb di ǁkhāǁkhāsabegu aiǃâ gere dī, nē ǂkhanis ǃnâ xoahe tama hâde. 31 Xawe di ge nēde xoahe hâ, ǂgom du nîga, Jesub a Xristu, Elob Ôa ǃkhaisa, tsî ǂgomsa xu du ǁîb ǀons ǃnâ ǀamo ûiba nî ūhâga.
Xristub ge hurirob Genesareti tawa ǁîb di ǁkhāǁkhāsabega ra ǂhai. Tare-eb Petrub tsî Johaneb tsîkha xa ra kēbo.
1 Nēn khaoǃgâb ge Jesuba ǁkhawa ǁîb di ǁkhāǁkhāsabega hurirob Tiberias dib tawa ge ǂhai. Tsîb ge nēti ge ǂhaiǂhaisen: 2 ǀHû gu ge hâ i nēga: Simon Petrub, tsî Tomab, Didimub ti ra ǂgaiheb, Natanaeli, Kanas Galileab ǃās dib, Sebedeub ôakha, tsî ǀnî ǀgamkha ǁîb ǁkhāǁkhāsabegu dikha tsîga. 3 Ob ge Simon Petruba: ǁAuǃkhō ǃgû ta ra, ti ǁîgu ǃoa ge mî. O gu ge ǁîb ǃoa ge mî: O ge sige sats ǀkha nî ǃgû. O gu ge ǂoa tsî ǁnātimîsi ǂgaus ǃnâ ǂgâ, tsî ǁnā tsuxub ǃnâ xū-i xare-e ǃkhō tama ge i. 4 Tsî ǀnai i ge ǁgoa hâ i hîab ge Jesuba hurirob ammi tawa ge mâ i; xawe gu ge ǁkhāǁkhāsabega ǀū ge i, Jesub a ǃkhaisa. 5 Ob ge Jesuba ǁîgu ǃoa ge mî: ǀGôago, ǁau-e go ūhâ tama hâ? O gu ge: Hî-î, ti ge ǃeream bi. 6 Ob ge ǁîgu ǃoa ge mî: ǂGaus di amǀkhāb ai ǀûisa aoǂui, o go ge nî hō. Tsî aoǂui si gu geo, o gu ge ǁîsa ǃaruǀî ǂgae ǁoa ge i, ǁaun di ǂguisib xa. 7 Ob ge ǁnā ǁkhāǁkhāsabeb, Jesub ge ǀnam hâ iba, Petrub ǃoa: ǃKhūb komo, ti ge mî. Ob ge Simon Petruba, ǃKhūb a ǃkhaisab go ǁnâuo, ǂamsarab âba ǃgaesen (ǀōǀkhāb ge hâ i xui-ao), tsî hurirob ǃnâ ge aoǁnâsen. 8 Xawe nau ǁkhāǁkhāsabegu ge ǂgaus ǀkha hā tsî ǁaun xa ǀoa hâ ǀûisa hā ge ǂgae, ǃhūba xu gu ge ǃnū tama hâ i xui-ao, ǀgamkaidisi nî ī ǂhâgu kō ǃnūsib ǀguiba. 9 Tsî ǃhūb ai gu ge sīo, o gu ge ǂnomǀae-e ge mûǁgoe tsî ǁauro-i tsî pere-i xa ǁî-i ai. 10 Ob ge Jesuba ǁîgu ǃoa ge mî: ǁNā ǁaun, ǀase go go ǃkhōn xa ūhā re! 11 Ob ge Simon Petruba ǂgâ, tsî ǀûisa ǃhūb ǁga ge ǂgaeǂui kai ǁaun xa ǀoa hâsa, ǀguikaidisi tsî korodisiǃnonaǀan kōse; tsî nētikō ǂguin ge i xawes ge ǀûisa doa tama ge i. 12 Ob ge Jesuba ǁîgu ǃoa ge mî: Hā î go ǁgoaǂû re. Tsî ǁkhāǁkhāsabegu di ǀguib xaweb ge dītsâ tama ge i, ǁîba: Taritsa? ti dîsa, ǃKhūb a ǃkhaisa gu ge ǂan i xui-ao. 13 Ob ge Jesuba hā, tsî pereba ū, tsî ǁîga ge mā, ǁnās ǁkhās khami ǁaun tsîn xa. 14 Nēs ge ǀnai ǃnonaǁî ǃnās, Jesub ǁkhāǁkhāsabegu âba ge ǂhaisa, ǁō hâna xub ge khâis khaoǃgâ. 15 Tsî ǁgoaǂû gu geo, ob ge Jesuba Simon Petrub ǃoa ge mî: Simon, Jonab ôatse, nēgu ǂamaits tita ǀnam hâ? Ob ge ǁîb ǃoa ge mî: Ā, ǃKhūtse, sats ge a ǂan ǀnam tsi ta hâ ǃkhaisa. Ob ge ǁîb ǃoa ge mî: Ti ǁkhaorona ǃûi! 16 Ob ge ǁkhawa ǀgamǁî ǃnās ai ge mî: Simon Jonab ôatse, ǀnam tets a! Ob ge ǁîb ǃoa ge mî: Ā, ǃKhūtse, sats ge a ǂan, ǀnam tsi ta hâ ǃkhaisa. Ob ge ǁîb ǃoa ge mî: Ti gūna ǃûi! 17 Ob ge ǃnonaǁî ǃnās ai ǁîb ǃoa ge mî: Simon, Jonab ôatse, ǀnam tets hâ? Ob ge Petruba ge ǃoa, ǃnonaǁî ǃnās aib go: ǀNam tets hâ? ti mî xui-ao, tsî ǁîb ǃoa ge mî: ǃKhūtse, sats kom hoa xūna a ǂano; ots ge a ǂan, ǀnam tsi ta hâ ǃkhaisa. Ob ge Jesuba ǁîb ǃoa ge mî: Ti gūna ǃûi! 18 Amase, amase ta ra mîba tsi, ǂkhamts ge i ǃnubaits ge sa-aitsama ǃgaesen, tsî ǂgaots raǀî gere ǃgû; xawe kairats kao, ots ge ǃomkha nîra ǀhōǂui, tsî ǀkharab ge ǃgae tsî ǂgao tamats hâǀî nîra ǃgû-ū tsi. 19 Tsîb ge nēsa ge mî, ǁgaub nîga, mâ ǁō-ai-i ǀkhab nî Eloba ǂkhaiǂkhai ǃkhaisa. Tsî ǁîsa mî tsîb ge: Tita sao! ti ge mîǀî bi. 20 Tsî Petrub ge ǂnan, tsî ǁnā ǁkhāǁkhāsabeb, Jesub ǀnam hâb ra sao ǃkhaisa ge mû, ǁnāb, ǃuiǂûs tawa ǁîb di ǁkhaib ai ǃgâsen, tsî: ǃKhūtse, tariba satsa ra ǀapexūba? ti ge mîba. 21 Tsî Petrub ge ǁîba mûo, ob ge Jesub ǃoa ge mî: ǃKhūtse, tsî nēba, matib nî ībahe? 22 Ob ge Jesuba ǁîb ǃoa ge mî: Tita ga ǂgao-o, ǁîb nî hā ta nîs kōse hâsa, tare-ets satsa ǁae hâ? Satsa tita sao! 23 O i ge nē mî-ai-e ǃgâsan ǃnâ ge ǂoa: ǁNā ǁkhāǁkhāsabeb ǁō tide, ti. Tsî Jesub ǁîb ǃoa, ǁōb tide, ti mî tama, xawe: Tita ga ǂgao-o, ǁîb nî hā ta nîs kōse hâsa, tare-ets satsa ǁae hâ? ti ge mî. 24 Nēb ge ǁnā ǁkhāǁkhāsabeb, nēn xa ra ǃkhō-ammi, tsî nēna goro xoaba. Tsî ta ge a ǂan, ǁîb di ǃkhō-ams a ama ǃkhaisa. 25 Tsîn ge ǁkhāti ǀnî xūn ǂguina hâ, Jesub gere dīna, tsî khoe-i ga ǁîna ǀguiǀguibe saogubese xoa ǂgao-o, o ta ra ǂâi, ǃhūbaib ga xoahe nî ǂkhanide ǃkhai-e ūhâba tama hâ ǃkhaisa.