Ng'aleek che indou
1 Eng' taunet ko ki mi Ng'olyoot, ak ki mi Ng'olyoot ak Kamuktaindet, ak Ng'olyoot ko ki Kamuktaindet. 2 Ki mi ineendet ak Kamuktaindet eng' taunet. 3 Ki kiyai tuguuk tugul eng' ineendet; ak ma mi kiy agot agenge ne ki piit ama eng' ineendet. Kiy ne ki yaak 4 eng' ineendet ko ki saboondo, ak saboonooto ko ki lapkeiyetap piik, 5 ak iluu lapkeiyet eng' mesundeito; ak ma iterteer `mesundeito lapkeiyonooto. 6 Ki nyo chii ne ki iyook Kamuktaindet, ne ki kiguure Johana. 7 Ki nyo chiichooto koek paoryat, si kobaoryanji lapkeiyet, si kobiit koyan piik tugul amu ineendet. 8 Ki ma ko lapkeiyonooto ineendet, ago ki nyo si kobaoryanji lapkeiyonooto. 9 Ki mi lapkeiyet ne po iman, ne nyoonei ng'wony, ne iluuchin chii tugul. 10 Ki mi ng'wony ineendet, ak ki kiyai ng'wony eng' ineendet, ak ki ma nai `ng'wony ineendet. 11 Ki nyoonji chechiik, ak ki ma taach ineendet `piikyik. 12 Ago tugul che kitaach ineendet, ko ki igoochi kamuget koek lagogap Kamuktaindet, icheek che iyani kainennyi, 13 che ki kisich ama eng' korotiik, anan eng' mageetap poorto, anan eng' mageetap chii, ago eng' Kamuktaindet. 14 Ak ki ek Ng'olyoot poorto ak komeny kwenunnyo (ak ki kigeer toroornatennyi, toroornatet ne uu ne po ne ki kisich ineegei kobunu Kwanda), ko nyiitaat myeeindo ak imanit. 15 Ki paoryanji ineendet `Johana, koititen kole, “Ineendet ni ne ki amwaitoi ale, ‘Ineendet ne isubwo koegu ne po tai eng' anee, amu ki po tai ineendet eng' anee.’ ” 16 Amu ko ki kitaach acheek tugul che po nyiennyi, ak myeeindo eng' myeeindo. 17 Amu ki kigoon ng'atuutyet eng' Musa; konyo myeeindo ak imanit eng' Jeso Kristo. 18 Ma mi chii ne ki keer Kamuktaindet ole kigoi; kigong'ang'wech Kamuktaindet Weeriit ne ki kisich ineegei, ne mi tegetap Kwanda.
Paornateetap Johana Kabatisanindet
19 Ak ni ko paornateetap Johana, ye kingo yook `Yahudik Tisiik ak Lawiik eng' Jerusalem koba koteebe kole, “Ii ng'oo inyee?” 20 Ak ki ng'aany ineendet, ama tiiyo; ki ng'aany kole, “Ma aa Kristo anee.” 21 Ak kiteebe ineendet kole, “Ara ii ng'oo anyun? Ii Elijah?” Ak ki le, “Ma aa ineendet.” “Ii maotyondonooto?” Ak ki wol kole, “Achicha.” 22 Ki leenji anyun ineendet, “Ii ng'oo inyee? Si kobiit kewolji che koiyookwech. Imwae nee agobo inyegei?” 23 Ki le, “Aa kutitap chii ne ititeni eng' surkwen, ‘Olitit ooreetap Kiptaiyat,’ ” ko uu ye ki mwa maotyot Isaiah. 24 Ak icheeget che ki kiyok ko ki po Pharisaik. 25 Ak kiteebe ineendet, koleenji, “Kalya anyun si ibatisanisyei, ngo ma ii Kristo, anan Elijah, anan maotyondonooto?” 26 Kowolji Johana pichooto koleenji, “Abatisanisye peek: ago tononi eng' kwenung'wong' age ne mongen, 27 ineendet ne isubwo, ne ma nyoljino atyach anoogap kweonikyik.” 28 Kiyaogis tuguuchuuto eng' Bethania Jordan komosin, ole ki ibatisanisye Johana.
Komwaitoi Johana kole Jeso ko Kristo
29 Eng' peetuut ne po aeng' kogeer `Johana Jeso konyonjin, ak kole, “Ogeero, Aarwet ne po Kamuktaindet, ne ibei tengektap ng'wony! 30 Ineendet ni ne ki amwa ale, ‘Isubwo chiito ne egu ne tai eng' anee amu ki po tai eng' anee.’ 31 Ak ki ma angen anee ineendet; ago si kobiit kibarta ineendet eng' Israel, ki anyoo anyun amu nooto abatisane peek.” 32 Ak kibaoryan Johana, kole, “Ki ageer Kabuuset ne Tiliil kochoorugei eng' kipsengwet ko uu cheptuget; ak kotebee ineendet. 33 Ak ki ma angen ineendet: ago ineendet ne ki iyookwo abatisane peek, ko ineendet ne kimwaiwo koleenjo, ‘Chiichooto igeere kochorchingei Kabuuset ne Tiliil, ak koteebee ineendet, ko nooto ne ibatisane Kabuuset ne Tiliil.’ 34 Ak ki ageer, ak ki abaoryan ale niito ko Weeriitap Kamuktaindet.”
Kasubik che tai che po Jeso
35 Kogeny eng' peetuut ne ki isubu peetuunooto, ko kitononi Johana, ak aeng' che po kasubikyik; 36 ak ki keerot `ineendet Jeso kowendoti, ak kole, “Ogeero, Aarwet ne po Kamuktaindet!” 37 Ak ki kas chooto aeng' che po kasubikyik kong'alaali ineendet, ak koosup Jeso. 38 Ak kiwelelgei Jeso, ak kogeer icheek kosubu, ak koleenji, “Ocheeng'e nee?” Ak ki leenji ineendet, “Rabbi (ye kiweech keele, Kaneetindet), imenye ano?” 39 Koleenji icheek, “Obwa si ogeer.” Ki pwa anyun kogeer ole menyei, ak ki tebi kobooto ineendet peetuunooto; ki olo po sait taman. 40 Ki Andrea, ne tupcho ak Simion Petero, age eng' chooto aeng' che kigasei kong'alaali Johana, ak ki isup ineendet. 41 Ki sip konyoor Simion ne tupcho, ak koleenji, “Kagenyooru Mesia” (ye kiweech, ko Kristo). 42 Ki imutyi `ineendet Jeso. Ki keer `Jeso ineendet ak kole, “Ii Simion weeriitap Johana. Ta keguurenen Kepa” (ye kiweech, ko Petero).
Keguurei Philipu ak Nathanael
43 Eng' peetuut ne ki isubi ko kimach anyun Jeso kwo Galilaya. Ki nyoor `ineendet Philipu ak koleenji, “Isubwo.” 44 Ki punu Philliph Bethsaida, nganaseet ne po Andrea ak Petero. 45 Ki nyoor `Philipu Nathanael ak koleenji, “Kagenyooru ineendet ne ki sir Musa eng' Ng'atuutyet ak kosir maotik, nooto Jeso ne po Nazareth weeriitap Joseph.” 46 Ak ki leenji `Nathanael ineendet, “Tos imuuchi kobun Nazareth kiy age tugul ne myee?” Koleenji `Philipu ineendet, “Nyoo si igeer.” 47 Kingo keer `Jeso Nathanael konyonei ole mi ineendet, ak komwa agobo ineendet kole, “Ogeero, Yahudyot iman, ne ma tinyei ng'aalseet!” 48 Koleenji `Nathanael ineendet, “Kenaena nee?” Kowolji Jeso koleenji, “Kageerin, ye kemi mogoywet keel, kotom koguurin Philipu.” 49 Kowolji Nathanael kole, “Rabbi, ii Weeriitap Kamuktaindet; ii Laitoryatap Israel!” 50 Kowolji Jeso koleenji, “Iyani amu kamwaun ale, kaagerin ye kemi mogoywet keel? Tatun igeere tuguuk che eecheen che siirei chu.” 51 Ak ki leenji, “Amwaiwok, iman, iman, ale, tatun ogeere kipsengwet koyatoksei, ak kotogostoi malaikaisyek che po Kamuktaindet ak kochoorchigei Weeriitap chii.”
Katunisyet eng' Kana
1 Eng' peetuut ne po somok ko ki mi katunisyet eng' Kana ne po Galilaya; ak ki mi olooto kametap Jeso. 2 Kiga kiguurchi katunisyet Jeso agine kobooto kasubikyik. 3 Ye kingo rar divaik, koleenji `kametap `Jeso ineendet, “Ma kotinyei icheek divaik.” 4 Ak ki leenji `Jeso ineendet, “Chebyosoni, kiting'egei nee ak inyee? Tom koit sainnyu.” 5 Koleenji kamet otwogik, “Kiy age tugul ne kamwaiwok, oyai.” 6 Ak ki mi olooto tereenik lo che eecheen che po peek, che po koik, ko uu piteetap katiliiletap Yahudik; kiyamei age tugul debeisyek muut anan ko lo. 7 Koleenji `Jeso icheek, “Onyiit peek tereenichooto.” Ki inyiit anyun miising'. 8 Ak ki leenji, “Osiilu nguno, ak oipchi pounindetap igoorto.” Ak ki ipchi anyun. 9 Ak ye kingo chamcham pounindetap igoorto peek che kagoek divaik, ama nai ole kabunu (ago ki ingen otwogik che kasiilei peek), koguur pounindonooto sandet, 10 ak koleenji, “Igoitoi chii tugul divaik che myach korook; ak ye kagoee piik miising', kogoon che ma myach: kaigonor divaik che myach agoi nguno.” 11 Taunet niito ne po kaboorunoikyik ne ki yai Jeso eng' Kana ne po Galilaya, ak ki iboortoi toroornatennyi; ak ki iyan ineendet kasubikyik. 12 Kingo pata niito, kochoortagei Kapernaum, kobooto kamet, ak che tupcho, ak kasubikyik: ak kibeni olooto peetuusyek che matya.
Aldaisyet eng' Hekaluut
13 Ak kiga riik paska ne po Yahudik, ak kitogosta Jeso Jerusalem. 14 Ak kinyoor kotebyei eng' Hekaluut che ki aldoi eiik ak keechiirek ak cheptugenik, ak woliigap silingisyek: 15 ak ki yai kipchoritiit ne po rogoonik che ki sach, ak koon tugul komanda eng' Hekaluut, kobooto keechiirek ak eiik; ak koranda silingisyek che po walik, ak kogabui mesosyekwak; 16 ak ki leenji icheeget che ki aldoi cheptugenik, “Oip tuguuchu koba eng' oli; amoyai kootap Abba koek ole kiyae mung'aaret.” 17 Ki ibwaat anyun kasubikyik kole ki kisir keele, “Ama ng'etkonda agobo koong'ung'.” 18 Ki wolji anyun Yahudik koleenji, “Iboorwech kaboorunet ngoro, amu iyae tuguuchu?” 19 Kowolji Jeso koleenji, “Ong'em hekaluni, si ang'eet kogeny eng' peetuusyek somok.” 20 Ki le anyun Yahudik, “Ki kiteech hekaluni eng' kenyiisyek artam ak lo, ak ing'eeti inyee eng' peetuusyek somok?” 21 Ago ki ng'alaali ineendet agobo Hekaluut ne nooto ko poortanyi. 22 Ye kingi ng'eet anyun ineendet komong' eng' che ki pek, kobwaat kasubikyik kole kiga komwa ng'olyoondoniito; ak ki iyan siruutyet, ak ng'olyoot ne ki kamwa Jeso.
Komi `Jeso Jerusalem eng' paska
23 Ye ki mi Jerusalem eng' paska, komi igoorto, koyan piik che chaang', kainennyi, kogeerei kaboorunoikyik che ki yai. 24 Ago ki ma chamdagei Jeso, amu ki ingen piik tugul, 25 ak amu ki ma komage kiy chii ne paoryani agobo chii age; amu ki ingen ineendet kiit ne mi chii oriit.
Nikodemo ak Jeso
1 Ki mi chii ne po Pharisaik, ne ki kiguure Nikodemo, ki pounindet ne po Yahudik: 2 ki nyo chiichooto ole mi ineendet kemoi, ak koleenji, “Rabbi, kingen keele ii kaneetindet ne punu Kamuktaindet: amu ma mi chii ne imuuchi koyai kaboorunoichu iyae inyee, ngo ma mi Kamuktaindet kobooto ineendet.” 3 Kowolji Jeso koleenji, “Amwaun, iman, iman, ale, ngot koma ki sich chii eng' sigeet ne leel, koma koi imuuch kogeer laitornatetap Kamuktaindet.” 4 Koleenji `Nikodemo ineendet, “Kisiktoi ano chii ye kagoosit? Imuuchi kogetyigei moetap kamet kogeny, ak kesich?” 5 Kowolji Jeso koleenji, “Amwaun, iman, iman ale, ngot koma ki sich chii eng' peek ak Kabuuset ne Tiliil, koma koi imuuch komong'ji laitornatetap Kamuktaindet. 6 Ne ki kisich eng' poorto ko poorto; ak ne ki kisich eng' Kabuuset ne Tiliil ko kabuuset. 7 Amekwong' amu kamwaun ale, ‘Kanyool kesichok eng' sigeet ne leel.’ 8 Usyin koristo ole machei, ak igase cheennyi, ago mengen ole punu, anan ole wendi. Ara uu nooto chii age tugul ne kagisich eng' Kabuuset ne Tiliil.” 9 Kowolji Nikodemo koleenji, “Imuuchi kobiitunda ano tuguuchu?” 10 Kowolji Jeso koleenji, “Ii kaneetindetap Israel, ameguitosi tuguuchu? 11 Amwaun, iman, iman, ale kimwae ne kingen, ak kebaoryanjini ne kagegeer; amotaache paornatennyo. 12 Ngamwaiwok tuguuk che po ng'wony, amoyani, omuktoi ano oyan ngamwaiwok tuguuk che po kipsengwet? 13 Ma mi chii ne ki togosta kipsengwet, kobatee ineendet ne ki choorgei eng' kipsengwet, ineendet ko Weeriitap chii ne mi kipsengwet. 14 Ak ko uu ye ki igartaat Musa ereneet eng' surkwen, kigartoti ko uu nooto Weeriitap chii matiny: 15 si konyoor saboondap koigeny eng' ineendet age tugul ne iyani. 16 Amu ki cham Kamuktaindet ng'wony miising', kot kogoito Weeriinnyi ne ki kisich ineegei, si ma lus age tugul ne iyani ineendet, ago si konyoor saboondap koigeny. 17 Amu ki ma iyookyi `Kamuktaindet Weeriit ng'wony korwookyi ng'wony; ago si kesar ng'wony eng' ineendet.” 18 Ma kirwookyin chii ne iyani ineendet: ago ineendet ne ma iyani, ko kagirwookyi, amu ma iyan eng' kainetap Weeriitap Kamuktaindet ne ki kiii ineegei. 19 Ak ni kirwooget, amu ki nyoonji ng'wony lapkeiyet, ak ki cham piik mesundeito kosiir lapkeiyet; amu ki yaach poisyonikwak. 20 Amu wechei lapkeiyet chii tugul ne yaei yaityo, ama nyoonei ineendet ole mi lapkeiyet, si ma ng'ang'agis poisyonikyik. 21 Ago nyoonei ole mi lapkeiyet ineendet ne yaei imanda, si kobiit kibarta poisyonikyik, keele ki kiyai eng' Kamuktaindet.
Komwaei Johana agobo Jeso
22 Kingo pata tuguuchu konyo Jeso ak kasubikyik emet ne kiguure Judea; ak kibeni olooto kobooto icheek, ak kobatisanis. 23 Ak ki ibatisanisyei Johana agine eng' Aenon ne neegitee Salim, amu ki mi peek che chaang' olooto; ak ki pwa piik, ak ki kibatisan. 24 Amu kitom ketoorchi Johana korgoreet. 25 Ki piit anyun teebutyet eng' alak che po kasubigap Johana ak Yahudyot agobo katiliilet. 26 Ak ki pwanji Johana, ak koleenji, “Rabbi, ibatisanisyei ineendet ne ki mi kobooten eng' Jordan komosin, ne ki ibaoryan agobo ineendet, ak pwaanjin ineendet `piik tugul.” 27 Kowol Johana kole, “Ma koi imuuch chii kotaach kiy, ngo ma kigoochi eng' kipsengwet. 28 Ki obaoryanjo okweeget ole ki amwa ale, ‘Ma aa Kristo’, ago oleen ki kiyokwo andoune ineendet. 29 Sandet ineendet ne tinyei murereet: ago paibai miising' chorweetap sandet, ne tononi koepchin iit ineendet, amu kutitap sandet: isuldaat anyun poiboiyoninyu. 30 Nyoljin ineendet koeet ne matiny, ago aming'initu.”
Ineendet ne punu parak
31 Oo ineendet ne punu parak kosiir tugul: ineendet ne po ng'wony ko po ng'wony, ak ng'alaali che po ng'wony: ineendet ne punu kipsengwet ko oo kosiir tugul. 32 Paoryanjin ineendet kiit ne ki kogeer ak ne ki kogas; ama mi chii ne taachei paornatennyi. 33 Ineendet ne kagotaach paornatennyi ko kagonde ng'ooksennyi, kole po iman Kamuktaindet. 34 Amu ng'alaali ng'aleegap Kamuktaindet ineendet ne ki iyoogu Kamuktaindet; amu ma koonu ineendet Kabuuset ne Tiliil eng' karagendoet. 35 Chamei Kwanda Weeriit, ak ki konde tuguuk tugul eunnyi. 36 Tinyei saboondap koigeny ne iyani Weeriit; ama keerei saboondo ne ma kase iit Weeriit, ago tebee nereegegap Kamuktaindet paragunnyi.
Jeso ak kobogoryotap Samaria
1 Ye kingo nai Kiptaiyat kole ki kogas Pharisaik kole ki yaei `Jeso piik koek kasubik ak kobatisani che siirei che ki ibatisan Johana 2 (ago ma Jeso ineendet ne ki ibatisanisyei, ago kasubikyik), 3 kong'eet eng' Judea, kwo kogeny Galilaya. 4 Ak ki kanyool kobun Samaria. 5 Ki it anyun nganaseet ne po Samaria, ne kiguure Sykar, ne neegitee kooret ne ki igoochi Jakobo weeriinnyi Joseph: 6 ak ki mi olooto keriingetap peek ne po Jakobo. Kitebyei anyun Jeso eng' ye neegitee keriingetap peek, amu ng'etatetap pandanyi. Ki olo po sait lo. 7 Ki nyo kobogoryot ne po Samaria kosiil peek: koleenji Jeso, Inaga aee. 8 Amu kigaba kasubikyik nganaseet koal amitwogik. 9 Ki leenji anyun kobogoryot ne po Samaria, Katepto ano si isooma peek che iee, ak inyee ko ii Yahudyot, ak anee ko aa kobogoryotap Samaria? (Amu ma namegei Yahudik ak Samarik.) 10 Kowolji Jeso koleenji, “Nda kengen konunetap Kamuktaindet, ak ineendet ne kalenjin, ‘Inaga peek aee,’ ta kaisoom ineendet, ak ta kagogoonin peegap saboon.” 11 Koleenji kobogoryot, Kiptaiyat, metinye kiit ne isiile, ak loo keriinget: inyoorchini ano anyun peechooto po saboon? 12 Ii oo inyee eng' kwandanyo Jakobo, ne ki koonech keriingoni, ne kiee ineendet ak weeriikyik, ak tuukyik? 13 Kowolji Jeso koleenji, “Age tugul ne eei peechu kota koamei melel kogeny: 14 ago age tugul ne eei peek che agoochini koma koamei melel agoi; ago egu peek che agoochini kondap peek eng' ineendet, che kuutu agoi saboondap koigeny.” 15 Koleenji kobogoryot, Kiptaiyat, inaga peechooto, si ma koama melel, si ma anyoone asiile peek eng' oli loo. 16 Koleenji Jeso kobogoryondonooto, Ui, iguur manong'otyondeng'ung', ak obwa yuto. 17 Kowolji kobogoryot koleenji, “Ma tinyei manong'otyot.” Koleenji Jeso, “Kaimwa komyee ile, ‘Ma tinye manong'otyot’, 18 amu ki otebi ak manong'otaik muut; ak ineendet ne omi tuwai nguno koma manong'otyondeng'ung': kaimwa anyun iman niito.” 19 Koleenji kobogoryot, Kiptaiyat, kaageer ale ii maotyo. 20 Ki saaei kwanisyekyok eng' tulwooni; ak oleen okweek, Jerusalem ole kanyool kosaae piik. 21 Koleenji Jeso, Kobogoryondoni, iyana, nyoonei sait, ye ma kosaae Kwanda eng' tulwooni, anan eng' Jerusalem. 22 Osae ne mongen: kisaae acheek ne kingen: amu punu yetunet Yahudik. 23 Ago nyoonei sait, ak kagoit nguno, ye saaei Kwanda saaik che po iman eng' Kabuuset ne Tiliil ak imanit: amu cheeng'oti Kwanda che uu chooto koek che saaei ineendet. 24 Kamuktaindet ko kabuuset: ak kanyool kosa ineendet eng' kabuuset ak imanit che saaei ineendet. 25 Koleenji kobogoryot, Angen ale nyoonei Mesia (ne keguure Kristo): ye nyo ineendet, komwaiwech tuguuk tugul. 26 Koleenji Jeso, Aa ineendet ne ang'alaalun. 27 Ki pwa anyun kasubikyik; ak ki kwong'yo amu ki ng'alaali ak kobogoryot; ago ma mwachi chii kole, “Icheeng'e nee? Anan, Kalya si ong'alaal ak ineendet?” 28 Ki pagaakta anyun kobogoryot tereennyi po pei, ak kwo nganaseet, ak komwachi piik koleenji, 29 Obwa ogeer chiito ne kamwaiwo tuguuk tugul che ki ayai atkinye kora: tos Kristo niito? 30 Ki mong' anyun eng' nganaseet kobwa ole mi ineendet. 31 Kingo ta kobwanei, kosoom kasubikyik, kole, “Rabbi, amisye.” 32 Ago ki leenji icheek, “Atinye amitwogik che aame che mongen.” 33 Koleenjigei anyun kasubikyik, “Tos kagoipchi chii kiy ne amei?” 34 Koleenji Jeso, “Amitwogikyuk ko ayai mageetap ineendet ne ki iyookwo, ak ageesu poisyennyi. 35 Momwae okweek ole, ‘Ta komi arawek ang'wanu, si koit kesisyet?’ Ogeero, amwaiwok ale, ‘Ong'eet met, ak ogeer mbareenik ole kagoleelagitu, kagoyam keges. 36 Ineendet ne kesei kotaachei melekto, ak koyumi logoek che po saboondap koigeny; si koboiboitu tuwai ne koolei ak ne kesei. 37 Amu po iman mwaoni eng' ni, kolei age, kogesei age. 38 Ki ayooktook oges che ki ma onyalilji: kigonyalilji alage, ak kaonam okweek uuindap poisyennywa.’ ” 39 Ki iyan anyun ineendet Samarik che chaang' che po nganasanooto amu ng'olyootap kobogoryot, ne kibaoryan kole, “Kamwaiwo tuguuk tugul che ki ayai atkinye kora.” 40 Nooto anyun, ye kingo pwanji ineendet `Samarik, kosoom kole kotebi kobooto icheek; ak ki peni olooto peetuusyek aeng'. 41 Ak ki iyan alak che chaang' amu ng'olyoondennyi; 42 ak ki leenji kobogoryot, “Kiyani nguno, ma amu ng'alaaleng'ung': amu kagegasyige; ak kingen iman keele niito ko Yetindetap ng'wony.”
Kosoobi Jeso weeriitap kiboityotap kaplaitoryat
43 Ak kingo pata peetuusyechooto aeng'u kong'eet eng' olooto kwo Galilaya. 44 Amu kibaoryan Jeso ineendet kole, “Ma tinyei maotyondo teegisto eng' emennyi.” 45 Ak kingo nyo anyun Galilaya, kotaach ineendet piigap Galilaya, ko kagogeer tuguuk tugul che ki yai ineendet eng' Jerusalem eng' igoorto: amu kigaba ak icheek igoorto. 46 Ki nyo anyun ineendet kogeny Kana ne po Galilaya, ole kiyae peek koek divaik. Ak ki mi kiboityot age ne po kaplaitoryat, ne ki myani weeriinnyi eng' Kapernaum. 47 Ye kingo kas kole kagomong' Jeso eng' Judea konyo Galilaya, kwo ole mi ineendet, ak ki soom kochoorgei, kosoop weeriinnyi; amu ki neegit kome. 48 Koleenji anyun `Jeso ineendet, Ngot ko mogeer kaboorunoik ak kwang'utik, koma koi oyan matiny. 49 Koleenji kiboityondonooto, Kiptaiyat, chooruge kotom kome lakweennyu. 50 Koleenji `Jeso ineendet, Ui inyee; sabei weeriing'ung'. Koyan anyun chiichooto ng'olyoot ne kamwachi Jeso, ak kwo. 51 Ak ye kita kochoortagei, kotuiyo ak otwogikyik, ak koleenji, Sabei weeriing'ung'. 52 koteebee anyun kole kogaigaitu kotya. Koleenji anyun pichooto ineendet, Kobagaakta eseet ineendet amut sait tisap. 53 Konai anyun kwanda kole ko sainooto ne komwachin Jeso koleenjin, Sabei weeriing'ung': ak ki iyan ineendet ak koonnyi komugul. 54 Nooto kaboorunet ne po aeng' ne ki yai Jeso kobooch ngo mong' eng' Judea konyo Galilaya.
Kosoobi `Jeso chii ne ki mi ye neegit tamboiyot
1 Kingo pata tuguuchu kobiit igoorto ne po Yahudik; ak kotogosta Jeso Jerusalem. 2 Ak miitei Jerusalem tamboiyot, ne kainennyi ko Betesda eng' kutitap Yahudik, ye neegitee ormariichetap keechiirek; ki tinyei keterusyek muut. 3 Ki ruitos eng' olooto piik che chaang' che ki myandos: che koryotiin, che ing'waldos, ak che meiyotiin poorwek, kogeni wasetap peek: 4 amu ki chorchingei malaikaiyat ne po Kiptaiyat tamboiyot peetuusyek alak, kowendi kowasei peek: si kisoop chii age tugul ne sip kochutei ko kawaskei peek, eng' myando age tugul ne ki tinyei. 5 Ak ki mi yooto chiito age, ne kiga komyan kenyiisyek sosom ak sisiit. 6 Ak ye kingo keer Jeso chiichooto koruei, ak konai kole ki uu nooto eng' peetuusyek che chaang', koleenji, “Imache kisaabin?” 7 Kowolji chiito ne myani koleenji, “Kiptaiyat, ma tinye chii, ne indea tamboiyot, ko kawaskei peek: amu ye ta anyoone, kosip kochoortagei age.” 8 Koleenji Jeso anyun, “Ng'eet, ip itogung'ung', ak iwe.” 9 Ak kisop chiichooto koma tyanit, ak koip itogunnyi ak kwo. Ak ki sabato peetuunooto. 10 Ki leenji anyun Yahudik ineendet ne kagisoop, “Peetuutap sabato niito, ma chamdaat eng' ng'atuutik iip itogung'ung'.” 11 Ago ki wolji icheek koleenji, “Kamwaiwo ineendet ne kagosaaba, koleenjo, ‘Ip itogung'ung', ak iwe.’ ” 12 koteebee anyun pichooto ineendet kole, “Ng'oo chiichooto kamwaun kole, ‘Ip itogung'ung' ak iwe?’ ” 13 Ago ki ma nai ineendet ne kagisoobi kole ka ng'oo: amu kiga kwo Jeso, amu ki mi piik che chaang' olooto. 14 Kingo pata nooto konyoorchi Jeso ineendet Hekaluut, ak koleenji, Keero, kagisaabin: amatata iyai tengek, si ma nyoonjin kiit age ne ya ne siirei ni. 15 Ki wo anyun chiichooto, ak komwachi Yahudik kole Jeso ne kagosoop ineendet. 16 Ki us anyun Yahudik Jeso amu ng'olyoondoniito, amu ki yai tuguuchu eng' peetuutap sabato. 17 Ak ki wolji Jeso koleenji, “Poisyei Abba agoi kora, ak aboisyei agane.” 18 Ki cheeng' anyun Yahudik miising' kole kobar ineendet amu niito, amu ki ma pistoe sabato kityo, ago mwaei kole Kamuktaindet Kwandanyi, koyaegei kogergeit ak Kamuktaindet.
Weeriit ak Kwanda
19 Ki wolji anyun Jeso icheek koleenji, “Amwaiwok, iman, iman, ale, ‘Ma yaei kiy Weeriit ineegei, ago ne keerei koyaei Kwanda: amu tuguuk tugul che yaei ineendet, koyaei chooto agine Weeriit ko uu nooto. 20 Amu chamei Kwanda Weeriit, ak koboorchin tuguuk tugul che yaei ineendet: ak ta koboorchin poisyonik che eecheen che siirei chu, si kobiit okwong'ye. 21 Amu ko uu ye ing'eeti Kwanda che ki kobek ak kosoobi, isoobi Weeriit ko uu nooto agine che machei. 22 Amu ma irwookyin Kwanda chii age tugul, ago Ki kogoochi Weeriit kirwooget tugul; 23 si kobiit koteech tugul Weeriit, ko uu ye teechei Kwanda. Ineendet ne ma teechei Weeriit koma teechei Kwanda ne ki iyook ineendet.’ ” 24 “Amwaiwok, iman, iman, ale, Ineendet ne kasei ng'olyoondennyu, ak koyani ineendet ne ki iyookwo, kotinyei saboondap koigeny, ama wendi ole mi kirwooget, ago kagomong' eng' meet komong'ji saboondo. 25 Amwaiwok, iman, iman, ale, Nyoonei sait, ak kagoit, ye kas che ki kobek kutitap Weeriitap Kamuktaindet; ak saptos icheeget che kasei. 26 Amu ko uu ye tinyei Kwanda saboondo ineegei, uu nooto Ki kogoochi Weeriit kotepto saboondo: 27 ak ki igoochi kimnateet koyai kirwooget, amu Weeriitap chii ineendet. 28 Amokwong'ee niito: amu nyoonei sait, ne tuun kasei kutinnyi tugul che mi kereeriisyek, 29 ak komong'; ng'eetyin saboondo che kiyaei ne myee; ak kong'eetyi kirwooget icheeget che kiyaei ne ya.”
Paornateet agobo Jeso
30 Ma muuchi ayai kiy aneege: arwoochi ko uu ye agase, ak po iman kirwoogennyu; amu ma cheeng'e ayai magennyu, ago mageetap ineendet ne ki iyookwo. 31 Ngabaoryanjinigei, koma po iman paornatennyu. 32 Mi age ne paoryanjino; ak angen ale po iman paornateet ne paoryanjino. 33 Ki oyokyi ng'olyoot Johana, ak kibaoryanji imanda. 34 Ago paornateet ne ataache koma punu chii: ago amwae tuguuchu, si kobiit kesorwok. 35 Kitait ineendet ne kilalei kokweng'sei: ak ki ocham oboiboitune lapkeiyennyi eng' peetuusyek che matya. 36 Ago paornateet ne atinye ko oo kosiir ne po Johana: amu poisyonik che ki koono Kwanda agees, chooto che ayae, ko che paoryanjino, kole ki iyookwo Kwanda. 37 Ak kibaoryanjo Kwanda ineendet ne ki iyookwo. Tom ogas kutinnyi ole kinye kora, ak tomo ogeer itoondanyi. 38 Ama tebyei eng' okweek ng'olyoondennyi: amu moyani ineendet ne ki iyoogu Kamuktaindet. 39 Cham osyachi eng' siruutik, amu oleen otinye saboondap koigeny eng' chooto; ago chooto che paoryanjino; 40 ago mochame obwanjo, si kobiit konyooru saboondo. 41 Mataache kalasunet eng' piik. 42 Ago angenok ale motinye chamyetap Kamuktaindet eng' oriing'wong'. 43 Ki anyoo eng' kainetap Abba, ama otaacha: ngo nyo age eng' kainennyi otaache ineendet. 44 Omuuchi eng' nee oyan, che otaagegei kalasunet, amocheeng'e kalasunet ne punu Kamuktaindet ne mi ineegei? 45 Mo leen ang'ang'ndook eng' Kwanda: miitei age ne ng'ang'dook, Musa nooto, ne omang'u. 46 Amu nda ki koyan Musa, ta oyana; amu kisir agobo anee. 47 Ago ngo moyani siruutikyik, omuktoi ano oyan ng'aleekyuk?
Kebaei piik eliphuusyek muut
1 Kingo pata tuguuchu kwo Jeso pitet age ne po araraitap Galilaya, nooto ko araraitap Tiberia. 2 Ak ki isup ineendet tuiyet ne oo, amu ki keer kaboorunoik che ki yachi che myandos. 3 Ak kitogosta Jeso tulweet, kwo kotep ng'wony eng' olooto kobooto kasubikyik. 4 Ak kiga riik paska, igoorto ne po Yahudik. 5 Kingo ng'eet met anyun Jeso, kogeer tuiyet ne oo konyonjin ineendet, koleenji Philipu, Ki ale ano magatiinik si koam pichu? 6 Kimwaei ni kotyeme ineendet: amu ki ingen ineendet kiit ne machei koyai. 7 Kowolji `Philipu ineendet koleenji, “Mayamei icheek magatiinik che po dinarisyek pogol aeng', si konyoor age tugul kitigin.” 8 Koleenji ineendet age ne po kasubikyik, Andrea, ng'eetap kametap Simion Petero, 9 “Mi yu weeriit age, ne tinyei magatiinik muut che po sairi, ak njireenik aeng': ago yamei nee anyun chuuto eng' piik che tee chu?” 10 Ki mwa Jeso kole, “Ochop piik kotep ng'wony.” Ak ki mi susweek che chaang' olooto. Ki ibuur anyun piik; ki olo po eliphuusyek muut murenjoto. 11 Ki nam anyun `Jeso magatiinik; ak kingo kagogoito kongoi, koropchi icheeget che kitebyei ng'wony; ak ko uu nooto ak icheek njireenik che tee che machei. 12 Ak ye kingo piyong'so, koleenji kasubikyik, “Oyum katuganik che kang'et, si ma pet kiy.” 13 Koyum anyun katuganichooto, ak konyiit kereboonik taman ak aeng' katuganichooto po magatiinik muut che po sairi, che kang'etune icheeget che kaamisyei. 14 Ye kingo keer anyun pichooto kaboorunet ne kayai, kole, “Ni maotyot iman ne nyoonjin ng'wony.” 15 Kingo nai Jeso kole neegit kobwa si konam ineendet eng' kimnateet, si koyai ineendet koek laitoryat, kwo kogeny tulweet ineegei.
Kowendote `Jeso peek parak
16 Ak ye kingo ek koskoleny, kochoortagei kasubikyik koba araraita; 17 ak ki laany moingetap peek, kolandae araraita koba Kapernaum. Ak kiga koimenit, ak kitom koit Jeso ole mi icheek. 18 Ak kiwasegei araraita amu kiusei usoonet ne oo. 19 Ye kingo kagoba anyun eng' araraita ole po maelisyek somok anan ko somok ak kebeber, kogeer Jeso kowendoti eng' araraita parak, ak koriikyin moinget: ak ki iyweis. 20 Ago ki leenji icheek, Anee; amoiywei. 21 Kocham anyun kotaach ineendet eng' moinget: ak ne matyaniit, koit moinget emet ole kibendi.
Kocheeng'ei `piik Jeso
22 Kibetuut ne ki isubi nooto kogeer tuiyet ne kitononi eng' araraita pitoniin, kole ma mi moinget age olooto, kobatee agenge, ak ki ma laany Jeso moingonooto kobooto kasubikyik, ago ki pa kasubikyik icheegei 23 (ago ki pwa moingonik alage eng' Tiberia ye neegitee kooret ole ki ame magatiinik ye kingo kagogoito Kiptaiyat kongoi): 24 Ye kingo keer tuiyet anyun kole ma mi Jeso olooto, anan kasubikyik, kolaany icheek moingonik, ak kobwa Kapernaum, kocheeng'onu Jeso.
Magatyatap saboon
25 Ak ye kingo nyoor ineendet eng' pitet age ne po araraita, koleenji, Rabbi, koinyone au oli? 26 Kowolji Jeso icheek koleenji, “Amwaiwok, iman, iman, ale, Ocheeng'a, ma amu koogeer kaboorunoik, ago amu kooam magatiinik ak obiyong'se. 27 Amoboisye agobo amitwogik che pegu, ago oboisye agobo amitwogik che tebyei agoi saboondap koigeny, che koonok Weeriitap chii. Amu kigong'ooch ineendet Kwanda, ne ineendet ko Kamuktaindet.” 28 Ki leenji anyun icheek ineendet, “Ki yai nee, si kobiit keyai poisyonik che po Kamuktaindet?” 29 Kowolji Jeso koleenji, “Ni poisyetap Kamuktaindet, ale oyan ne ki iyoogu ineendet.” 30 Ki leenji icheek ineendet anyun, “Nee kaboorunet ne iyae, si kegeer, ak kiyanin? Iyae nee? 31 Ki am kwanisyekyok mana eng' surkwen; ko uu ye ki kisir keele, ‘Ki igoochi icheek magatyat ne punu kipsengwet koam.’ ” 32 Koleenji anyun `Jeso icheek, “Amwaiwok, iman, iman, ale, ki ma ko Musa ne ki koonok magatyandanooto ki punu kipsengwet; ago koonok Abba magatyat ne po iman ne punu kipsengwet. 33 Amu magatyat ne po Kamuktaindet ko nooto choorugei eng' kipsengwet, ak kogoochi ng'wony saboondo.” 34 Koleenji anyun `icheek ineendet, “Kiptaiyat, koonech magatyandaniito agoi.” 35 Koleenji `Jeso icheek, “Aa magatyat ne po saboon: ineendet ne nyoonjino koma kasei rubeet agoi, ak ineendet ne iyana koma amei melel agoi. 36 Ago kaamwaiwok ale, koogeera, ama oyan. 37 Pwonjino tugul che koono Kwanda; ak ineendet ne nyoonjino koma oone matiny. 38 Amu ki achooruge eng' kipsengwet, ma si ayai magennyu, ago mageetap ineendet ne ki iyookwo. 39 Ak ni mageetap ineendet ne ki iyookwo, ale, eng' tugul che ki koono ineendet, koma petena agot agenge, ago tatun ang'eeti eng' peetuutap let. 40 Amu ni mageetap Abba, ale chii age tugul ne keerei Weeriit, ak koyan ineendet, konyooru saboondap koigeny; ak ang'eeti ineendet eng' peetuutap let.” 41 Ki ing'unyng'ung'so anyun Yahudik, agobo ineendet, amu ki mwa kole, “Aa magatyat ne ki choorgei eng' kipsengwet.” 42 Ak ki le, “Tos ma Jeso niito, weeriitap Joseph, ne kingen kwandanyi ak kamet? Amunee anyun si komwa kole, ‘Ki achooruge eng' kipsengwet?’ ” 43 Kowolji Jeso anyun koleenji, “Among'unyng'ung'se okweegei eng' okweegei. 44 Ma imuuchi chii konyoonjo, ama ichuut Kwanda ne ki iyookwo: ak ang'eeti ineendet eng' peetuutap let. 45 Ki kisir eng' maotik, ak kineeti tugul eng' Kamuktaindet. Age tugul ne kagogas eng' Kwanda, ak kagonetkei, konyonjino. 46 Moleen ki kogeer chii age tugul Kwanda, kobatee ineendet ne ki punu Kamuktaindet, ki kogeer ineendet Kwanda. 47 Amwaiwok, iman, iman, ale, Ineendet ne iyani, kotinyei saboondap koigeny. 48 Aa magatyat ne po saboon. 49 Ki am kwanisyekwok mana eng' surkwen, ak ki pek. 50 Ni magatyat ne choorugei eng' kipsengwet, ne ngo am chii, koma meei. 51 Aa magatyat ne sabei ne ki choorgei eng' kipsengwet: ngo am chii age tugul magatyandani, kosabei koigeny: ee, ak poortanyu ko magatyat ne agoitoi agobo saboondo ne po ng'wony.” 52 Kiboryo anyun Yahudik icheegei, kole, “Imuktoi ano chiichi kogoonech poortanyi keam?” 53 Koleenji Jeso anyun icheek, “Amwaiwok, iman, iman, ale, ngot ko moam poortap Weeriitap chii ak oee korotiikyik, ko mosiche saboondo eng' oriiting'wong'. 54 Ineendet ne amei poortanyu ak koeei korotiikyuk kotinyei saboondap koigeny; ak ang'eeti ineendet eng' peetuutap let. 55 Amu amdit iman poortanyu, ak korotiikyuk ko che kieei iman. 56 Ineendet ne amei poortanyu ak koeei korotiikyuk komenya, ak amenye ineendet. 57 Ko uu ye ki iyookwo Kwanda ne sabei, ak asabe amu Kwanda; uu nooto ineendet ne ama, sabei agine amu anee. 58 Ni magatyandanooto ne ki choorgei eng' kipsengwet: ma ko uu ye ki am kwanisyek ak kobek: ineendet ne amei magatyandani kosabei koigeny.” 59 Ki mwa tuguuchu eng' sinagogit, kota koneetisyei eng' Kapernaum.
Kasubik che tinyei saget
60 Ye kingo kas ni che chaang' eng' kasubikyik, komwa kole, “Uui ng'olyoondoni: imuuchi ng'oo kogas?” 61 Ago ki nai Jeso eng' oriitinnyi kole ing'unyng'ung'jin kasubikyik ng'olyoondoniito. Koleenji icheek, “Tos kagonachak niito? 62 Teptoi ano anyun ngot ko tuun ogeer Weeriitap chii kotogostoi ole ki mi atkinye? 63 Kabuuset ne igoitoi saboondo; ma tilei kiy poorto: ng'aleek che kaamwawok ko kabuuset ak saboondo. 64 Ago miitei alak eng' okweek che ma iyani.” Amu ki nai Jeso kobooch taunet icheeget che ma iyani, ak ineendet ne kimachei kong'wekta ineendet. 65 Ak ki le, “Nooto kamwaiwok, ale, ma koi imuuch chii konyoonjo kobatee ne igoochin Kwanda.” 66 Kobooch yooto kochuchuigei che chaang' che po kasubikyik, amata kobendat ak ineendet. 67 Ki leenji anyun Jeso chooto taman ak aeng', Obendi ak okweek? 68 Kowolji anyun Simion Petero, koleenji, “Kiptaiyat, kibendi ole mi ng'oo? Itinye ng'aleek che po saboondap koigeny. 69 Ak ki kiyan ak kingen keele ii Ne Tiliil ne po Kamuktaindet.” 70 Kowolji Jeso icheek koleenji, “Ki ma alewenok taman ak aeng', ak chesawilyet age eng' okweek?” 71 Kimwaei anyun agobo Judas ne po kap Simion Iskaryot, amu inee ne kimachei kong'wekta ineendet, ne ki agenge eng' taman ak aeng'.
Jeso ak tupchosyekyik
1 Ak kingo pata tuguuchu kowendot Jeso eng' Galilaya: amu ma cham kowendot eng' Judea, amu ki cheeng'ei Yahudik kobar ineendet. 2 Ak kiga riik igoortap Yahudik, igoorto ne po keryosyek. 3 Ki leenji anyun tupchosyekyik, Ui eng' oli, ui agoi Judea, si kogeer kasubiguk ak icheek poisyoniguk che iyae. 4 Amu ma mi chii ne yaei kiy eng' ung'oot, ak kocheeng' kobartagei. Ngiyai tuguuchu, iboorchigei ng'wony. 5 Amu agot tupchosyekyik ak icheek, koma iyan ineendet. 6 Koleenji anyun `Jeso icheek, “Tom koit peetuunnyu; ago mi peetuung'wong' kotugul. 7 Ma imuuchi ng'wony kowechok; ago wecho anee amu abaoryani agobo ng'wony ale yaach poisyonikyik. 8 Otogosyi okweek igoorto. Tom atogosyini anee igoorita, amu tomo kosulda peetuunnyu.” 9 Ak kingo kagomwachi tuguuchuuto, kota kotebi eng' Galilaya.
Koneetisye Jeso eng' Hekaluut
10 Ago ye kingo togosta tupchosyekyik igoorto, kotogosta agine, ago ma ibartaatkei, ago ki wo ko uu ne ung'ootegei. 11 Ki cheeng' anyun Yahudik ineendet eng' igoorto, ak kole, “Mi ano ineendet?” 12 Ak ki mi kang'unyng'unyet ne oo eng' tuiyosyek agobo ineendet: amu ki le alak, Myee chiichi; kole alak, Achicha, ago imaasi tuiyet. 13 Ago ma mwa chii ng'olyoo kotook agobo ineendet amu ki iywei Yahudik. 14 Ago ye kingo kagoit kwenutap igoorto kotogosta Jeso kwo Hekaluut, ak koneetis. 15 Kokwong'yo anyun Yahudik kole, “Kinaita ano chiichi siruutik, ago tomo koneetkei?” 16 Kowolji anyun Jeso koleenji, “Kaneetisyennyu koma nenyu, ago po ineendet ne ki iyookwo. 17 Ngo machei chii age tugul koyai mageennyi, konai kaneetisyoni, ngo po Kamuktaindet, anan ngamwae aneege. 18 Ineendet ne mwaei che chechiik ineegei kocheeng'ei toroornatennyi: ago ne cheeng'ei toroornatetap ne ki iyook ineendet ko po iman, ama mi kiy ne ma po imanda eng' ineendet. 19 Tos ki ma koonok Musa Ng'atuutyet, ago ma mi chii eng' okweek ne yaei Ng'atuutyet? Amu nee si ocheeng'e obara?” 20 Kowol tuiyet, kole, “Itinye oindet: cheeng'ei ng'oo kobarin?” 21 Kowolji Jeso koleenji, “Ki ayai poisyet agenge, ak okwong'ye okweek tugul. 22 Kigoonok Musa kamuratanet amu nooto (ago ma po Musa, po kwanisyek); ak omuratani chii eng' sabato. 23 Ngeyatitoi chii eng' peetuutap sabato, si ma putok Ng'atuutyetap Musa, ko tos onereekyino, amu kaasoop chii komyee eng' peetuutap sabato? 24 Amorwooch ko uu ye ogeere, ago orwooch kirwooget ne po imanda.”
Tos ma Jeso ni?
25 Ki mwa alak eng' chooto po Jerusalem kole, “Ma ineendet ni ne kocheeng'ei icheek kobar? 26 Ak ogeero, mwaitooti kotook, ama mwachi kiy icheek ineendet. Tos ingen pounik komyee kole, niito ko Kristo? 27 Ago kingen ole punu chiichi: ago ye nyo Kristo, koma naei chii ole punu.” 28 Ki ng'alaal anyun Jeso eng' kutit ne oo eng' Hekaluut, koneetisyei, kole, “Ongeno, ak ongen ole abunu; ak kama anyoo aneege, ago po iman ineendet ne ki iyookwo, ne mongen okweek. 29 Angen ineendet; amu abunu ineendet ak ki iyookwo ineendet. 30 Ki cheeng' anyun pichooto konam ineendet: ama nam chii ineendet, amu kitom koit peetuunnyi. 31 Ak ki iyan ineendet che chaang' che po tuiyet; ak ki le, Ye nyo Kristo, ko tos yai kaboorunoik che siirei cho koyaei chiichi?”
Ketyemei kenam Jeso
32 Kigasei Pharisaik kong'unyng'ung'jin tuiyet tuguuchuuto agobo ineendet; ak ki iyook tisiik che eecheen ak Pharisaik kiptainik kobwa konam ineendet. 33 Kole Jeso anyun, Ta ami kobootok ne matya, si awo ole mi ineendet ne ki iyookwo. 34 Tuun ocheeng'a, amonyoorwo: ak ole ami, ko momuuchi obwa. 35 Komwachigei anyun Yahudik kole, “Wendi ano chiichi si ma kinyooru ineendet? Tos wendi ole mi icheeget che ki koiyestoochi Yunanik, si koneet Yunanik? 36 Nee anyun ng'olyoondoni kamwa, kole ocheeng'a, amonyoorwo! Ak ole ami, ko momuuchi obwa?”
Peek che saptos
37 Eng' peetuut ne po let, peetuunooto oo po igoorto, kotonon Jeso ak komwa eng' kutit ne oo, kole, “Ngo amei chii melel, ko ingonyoonjo, ak koe. 38 Ineendet ne iyana, ko uu ye ki komwa siruutyet, kole punu moennyi ainoosyegap peek che sabei. 39 Ago ki mwaei niito agobo Kabuuset ne Tiliil, ne tuun taachei icheek che iyani ineendet: amu ki tom kegon Kabuuset ne Tiliil; amu kitom kitoroor Jeso.”
Kobiitu toiyet
40 Ye kingo kas alak che po tuiyet ng'aleechuuto, kole, “Niito maotyot iman. 41 Kole alak, ‘niito ko Kristo.’ Ago ki le alage, ‘tos punu Kristo Galilaya?’ 42 Ma mwa siruutyet, kole, ‘mang'une Kristo kesweek che po Daudi, ak kobun Bethlehem, nganaseet ole ki mi Daudi?’ ” 43 Ki piit anyun toiyet eng' tuiyet agobo ineendet. 44 Ak kimach alak konam ineendet; ago ma nam chii ineendet.
Rutoito ne po Kiptainik
45 Ki pwa anyun kiptainik ole mi tisiik che eecheen ak Pharisaik; ak koleenji, “Kalya si momutu ineendet?” 46 Kowol kiptainik kole, “Kitom kong'alaali chii ko uu ni.” 47 Kowolji anyun Pharisaik icheek, koleenji, “Kagibeetook ak okweek? 48 Ki koyan ineendet age tugul eng' pounik, anan eng' Pharisaik? 49 Ago chubootiin pichu che ma naei Ng'atuutyet.” 50 Ki leenji Nikodemo (ne kigawo ole mi ineendet atkinye tai, ne ki age eng' icheek), 51 Tos irwookyin chii Ng'atuutyennyo, kotom kegas ng'aleekyik ak kenai kiit ne yaei? 52 Kowolji anyun ineendet koleenji, “Ii po Galilaya aginye? Cheeng', ak igeer amu ma mang'une Galilaya maotyondo.”
Komachei siriik ak Pharisaik kole kelach kobogoryot
53 Ki wo chii tugul anyun koonnyi:
1 Ago ki wo Jeso tulweetap Mseituni. 2 Ak kimus karon konyo Hekaluut, ak ki pwa piik tugul ole mi ineendet; ak ki tep ng'wony, koneet icheek. 3 Ak ki imut siriik ak Pharisaik kobogoryot ne ki kinamji ibeetapkei; ak ye kingo kaginde kwenut, 4 keleenji, “Kaneetindoni, kaginam kobogoryondoni eng' ibeetapkei, kota komi ibeetapkei. 5 Ki ng'atech Musa eng' Ng'atuutyet kole, Kilage koik ne uu niito: ara ileen nee inyee?” 6 Ki mwaei ng'olyoondoniito kotyemei ineendet, si kosich kiit ne kitaame. Ago ki ing'uruuk Jeso, kosir ng'wony eng' mornennyi. 7 Ago ye kingo ta koteepse ineendet, kotonon, ak koleenji, “Ingotoi ne ma tinye tengek eng' okweek kowiir eng' koita.” 8 Ak ki ing'uruuk kogeny kosir ng'wony eng' mornennyi. 9 Ak ye kingo kas icheek ng'olyoondonooto, komanda kobee agenge agenge, kobooch ne oo agoi ne po let: ak ki ng'et Jeso ineegei, ak kobogoryondonooto eng' ole ki mi, kotononi eng' kween. 10 Kotonon Jeso anyun ak koleenji, “Kobogoryondoni, mi ano icheek? Ma igikyin chii?” 11 Ak ki le, “Ma igiikyo chii, Kiptaiyat.” Ak ki leenji Jeso, “Ma kiikyinin agane, ui anyun; kobooch nguno, koma tata iyai tengek.”
Lapkeiyet ne po ng'wony
12 Ki mwachi Jeso anyun icheek kogeny, koleenji, “Aa lapkeiyet ne po ng'wony: ineendet ne isuba ko ma wendoti eng' mesundeito, ago nyooru lapkeiyetap saboondo.” 13 Koleenji anyun `Pharisaik ineendet, “Ibaoryanjinigei; ma po iman paornateng'ung'.” 14 Kowolji Jeso koleenji, “Agot ngabaoryanjinigei, ko po iman paornatennyu; amu angen ole abunu, ak ole awendi; ago mongen ole abunu, anan ole awendi. 15 Orwoochi ko uu mageetap poorto; marwookyini chii anee. 16 Ee, agot ngarwoch, ko po iman kirwoogennyu; amu ma mi aneege, ago kimi ak Kwanda ne ki iyookwo. 17 Ee, ak ki kisir eng' Ng'atuutyeng'wong' keele, po iman paornateetap piik aeng'. 18 Aa ineendet ne abaoryanjinigei, ak paoryanjino Kwanda ne ki iyookwo.” 19 Koleenji anyun icheek ineendet, “Mi ano Kwandang'ung'?” Kowol Jeso kole, “Mongeno, anan Abba. Nda ki konaa, ta ki ongen Abba agine.” 20 Ki mwa ineendet ng'aleechu eng' ole kigonoree silingisyek, ye ki ineetisyei eng' Hekaluut: ak ma nam chii ineendet; amu kitom koit sainnyi.
Kateunoik agobo peetuusyek che pwanei
21 Ki mwachi anyun icheeget kogeny, koleenji, “Awendi, ak tuun ocheeng'a, ak obegu eng' tengektong'wong': ole awendi, ko momuuchi obwa.” 22 Ki le anyun Yahudik, Tos pargei, amu mwaei kole, “Ole awendi, ko momuuchi obwa?” 23 Ak ki leenji, “Oo po oli po ng'wony, aa po parak: oo po ng'wonyuni; ma po anee ng'wonyuni. 24 Nooto kaamwaiwok, ale, obegu eng' tengekwogikwok: amu ngo moyuani ole aa ineendet, obegu eng' tengekwogikwok.” 25 Ki leenji anyun icheek ineendet, “Ii ng'oo?” Koleenji Jeso, “Nooto ki amwaiwok kobooch taunet. 26 Atinye tuguuk che chaang' che amwae ak che arwoochi agobo okweek: ago po iman ineendet ne ki iyookwo; ak amwachini ng'wony tuguuk che ki agas eng' ineendet.” 27 Ago ma iguiyo kole mwachin agobo Kwanda. 28 Ki leenji Jeso anyun, Ye kaouite Weeriitap chii, onai anyun eng' peetuunooto ole aa ineendet, amayae kiy aneege, ago amwae tuguuchu ko uu ye ki ineeta Kwanda. 29 Ak kimi tuwai ak ineendet ne ki iyookwo; ma pagaakta aneege; amu ayae kotugul tuguuchooto chamaksei eng' ineendet. 30 Ak ye kita komwaei tuguuchu, koyan ineendet che chaang'.
Kocheerei `Jeso Yahudik
31 Ki leenji Jeso anyun Yahudichooto kiga koyan ineendet, Ngot otebye okweek eng' ng'olyoondennyu, ko oo kasubikyuk iman; 32 ak onai imanda, ak kotyachak imanda. 33 Kowolji icheek ineendet koleenji, “Ki kesweegap Abraham, ak tomo keegu otwogigap chii age tugul ole kinye kora. Imwaitoi ano anyun ile, ‘Kityaachok?’ ” 34 Kowolji Jeso koleenji, “Amwaiwok, iman, iman, ale, age tugul ne yaei tengek ko otwogindetap tengek. 35 Ak ma tebyei otwogindet eng' koot koigeny; tebyei weeriit koigeny. 36 Ngo tyachak anyun Weeriit, ko otyagotin iman. 37 Angen ale oo kesweegap Abraham; ago ocheeng'e obara, amu ma tinyei ng'olyoondennyu ole tebee eng' okweek. 38 Amwae tuguuk che ki ageer eng' Abba: ak oyae tuguuchooto ki ogas eng' kwandang'wong'.” 39 Kowolji koleenji, “Kwandanyo ko Abraham.” Koleenji Jeso, “Nda ki oo lagogap Abraham, ta ki oyae poisyosyegap Abraham. 40 Ago ngo ocheeng'e obara, chiito ne kamwaiwok ng'aleek che po iman, che ki agas eng' Kamuktaindet: ki ma yai ko uu nooto Abraham. 41 Oyae poisyonik che po kwandang'wong'.” Ki leenji anyun ineendet, “Ki ma kisichech eng' sokseet; ki tinyei Kwanda agenge, nooto ko Kamuktaindet.” 42 Komwachi Jeso icheek koleenji, “Nda ka Kwandang'wong' Kamuktaindet, ta kaochama; amu ki anyoo abunu Kamuktaindet. Ki ma anyoo aneege, ago ki iyookwo ineendet. 43 Amu nee si monai chooto amwae? Amu momuuchi ogas ng'olyoondennyu. 44 Oo po kwandang'wong' chesawilyet, ak ochame oyai magutigap kwandang'wong'. Ki rumiindet kobooch taunet, ama tononi eng' imanit, amu ma mi imanit eng' ineendet. Ye mwaei lembech, komwaei agobo tuguukyik, amu kiplembechwa ineendet ak kwanda ne po nooto. 45 Ago moyana amu amwae imanit. 46 Ng'oo eng' okweek ne igiikyino kole atinye tengek? Ngot amwae imanit, ko amu nee anyun si moyana? 47 Ineendet ne po Kamuktaindet kogasei ng'aleegap Kamuktaindet: nooto anyun mogase okweek, amu mo po Kamuktaindet.”
Jeso ak Abraham
48 Kowolji anyun Yahudik koleenji, “Ma kimwae acheek iman keele, ii Samarindet, ak itinye oindet?” 49 Kowol Jeso kole, “Ma tinyei oindet; ago agonyiti Abba, ak oteweera. 50 Ago ma cheeng'e toroornatennyu: miitei agenge ne cheeng'ei ak korwoochi. 51 Amwaiwok, iman, iman, ale, ngo riip chii ng'olyoondennyu koma keerei meet agoi.” 52 Koleenji anyun Yahudik, “Kingen nguno keele itinye oindet. Ki kome Abraham, ak ki kobek maotik; ak imwae ile, ‘Ngo riip chii ng'olyoondennyu, koma chamchami meet agoi.’ 53 Tos ii oo isiir kwandanyo Abraham, ne ki kome? Ki kobek maotik. Iyaegei iegu ng'oo?” 54 Kowol Jeso kole, “Ngot atoroorige, ko puch toroornatennyu. Kwandanyu ne itoroora; ne omwae ole, ‘Ineendet ko Kamuktaindet neng'wong',’ 55 ak tomo onai ineendet. Ago angen ineendet; ak ngot amwa ale, mangen ineendet, aegu kiplembechwa, ko uu okweek: ago angen ineendet ak ariibe ng'olyoondennyi. 56 Ki paibai kwandang'wong' Abraham kogeer peetuunnyu; ak ki keer, ak kogaskei.” 57 Koleenji Yahudik anyun, “Tom iit kenyiisyek konom, ak ki igeer Abraham?” 58 Koleenji Jeso, “Amwaiwok, iman, iman, ale, Kingo tomo kobiit Abraham, ami.” 59 Ki inem anyun koik komachei kowiire ineendet: ago ki unygei Jeso, ak komanda eng' Hekaluut.
Kosoobi `Jeso chii ne kiga kisich ko koraat
1 Ak ye ki siirtoi, kogeer chiito ne ki koraat kobooch ko kagisich. 2 Ak kiteebe ineendet kasubikyik, koleenji, “Rabbi, ng'oo ne ki yai tengekto, chiichi anan sigiikyik, si kesich ko koraat?” 3 Kowol Jeso kole, “Ki ma yai chiichi tengekto, anan sigiikyik; ago si kobiit kotook poisyosyegap Kamuktaindet eng' ineendet. 4 Kanyool keyai poisyosyegap ineendet ne ki iyookwo, kota ko peet: nyoonei kemout, ye ma komuuchi chii kobois. 5 Ye ta ami, ko aa lapkeiyetap ng'wony.” 6 Ye kingo kagomwa ko uu nooto, kong'utyi ng'ung'unyek, ak kotangwar, ak koilee konyekyik ng'ung'unyechooto, 7 ak koleenji, “Ui iunde eng' tamboiyotap Siloam” (ye kiweech keele, “Kiyookto”). Ki wo anyun, ak koun, ak konyo kogeertoi. 8 Ki mwa anyun piigap kokwet, ak che kiga kogeer ineendet eng' tai kole soomindet, kole, “Tos ma ineendet ni ne ki cham kotebyei ak kosoomsei?” 9 Kole alage, Ineendet: kole alage, Achicha, ago kerge ak ineendet. Kole chiichooto, Aa ineendet. 10 Ki leenji anyun icheek ineendet, Kagiyatita ano konyeguk? 11 Kowol kole, “Katangwar ng'ung'unyek chiito ne keguure Jeso, ak koilee konyekyuk, ak koleenjo, ‘Ui Siloam ak iunde.’ Kaawe anyun ak aun, ak ageerte.” 12 Ak ki leenji, “Mi ano ineendet?” Kole, “Mangen.”
Koteebsen Pharisaik chii ne ki koraat
13 Ki imut icheek chiichooto ki koraat eng' tai, kwo ole mi Pharisaik. 14 Ki sabato peetuunooto ye kitangwari Jeso ng'ung'unyek, si koyate konyegap chiichooto. 15 koteebee anyun Pharisaik kogeny ineendet kole, katepto ano si igeerte? Ak ki leenji, “Kagoiile konyekyuk ng'ung'unyek che katangwar, ak kaaun, ak kaageerte.” 16 Kole alak che po Pharisaik anyun, Ma punu Kamuktaindet chiichi, amu ma riibei sabato. Ago ki le alage, Imuktoi ano chii ne kiptengekyo koyai kaboorunoik che uu chu? Ak ki piit toiyet eng' kwenunnywa. 17 Ki leenji anyun kogeny chiito ne koraat, Imwae nee agobo ineendet, amu kayaat konyeguk? Ak ki le, “Maotyo.” 18 Ma iyan anyun Yahudik agobo ineendet, kole, ko koraat ak kagogeerto. Koguur sigiigap chiichooto kagogeerto, 19 ak koteebe koleenji, “Tos weeriing'wong' ni, ne omwae ole ki kisich ko koraat? Katepto ano si kogeerto nguno?” 20 Kowol sigiikyik kole, “Kingen keele weeriinnyo niito, ak kingen keele ki kisich ko koraat: 21 ago ma kingen ole katepto si kogeerto nguno; ak ma kingen ineendet ne kayaatei konyekyik: oteebe ineendet; kogoeet; ingomwa ineegei.” 22 Ki mwa ng'aleechu sigiikyik, amu ki iywei Yahudik: amu kiga sip kochamyechi Yahudik, kole, ngo ng'aany chii age tugul kole Kristo ineendet, kibeetoi eng' sinagogit. 23 Ki mwa anyun sigiikyik amu nooto kole, “Oteebe, amu kogoeet ineendet. ” 24 Ki kuur anyun ne po aeng' pichooto chiichooto ki koraat, ak koleenji, “Igoochi Kamuktaindet kalasunet: kingen keele kiptengekyo chiichi.” 25 Kowol anyun ineendet kole, “Ngo kiptengekyo chiichooto, ko mangen. Angen kiit agenge, ale, koa koraat, ago ageertoi nguno.” 26 Koleenji anyun icheek ineendet, “Kayaun nee? Kayatita ano konyeguk?” 27 Kowolji icheek koleenji, “Kaamwaiwok, ama ogas, kalya si omach ogas kogeny? Omache oegu ak okweek kasubikyik?” 28 Ak king'emji kuut ineendet kole, “Ii kasubindennyi so? Ago ki kasubigap Musa acheek.” 29 Kingen keele kigong'alaalji `Kamuktaindet Musa: ago ma kingen kole po chiichi. 30 Kowolji chiichooto icheeget koleenji, “Kwang'ut niito anyun, amu mongen ole punu, ago kagoyat konyekyuk. 31 Kingen keele ma kasei Kamuktaindet kiptengeginik: ago ngo lasu chii age tugul Kamuktaindet, ak koyai magennyi, kogasei ineendet. 32 Kobooch ngetoi ng'wony koma ki kas keele ki yaat chii konyegap chiito ne ki kisich ko koraat. 33 Nda ma punu Kamuktaindet chiichi koma koi imuuch koyai kiy.” 34 Kowolji ineendet koleenji, “Ki kisikten iman tengekwogik, ak ineetech?” Ak ki toorta ineendet kwo saang'.
Koneeti Jeso agobo koraatet ne po oriit
35 Ki kas Jeso kole kagetoorta ineendet kwo saang'; ak kingo nyoor ineendet, koleenji, “Tos iyani Weeriitap Kamuktaindet?” 36 Ak ki wol kole, “Ng'oo nooto, Kiptaiyat, si kobiit ayan ineendet?” 37 Koleenji Jeso, Kaigeer ineendet ak ko ineendet ni ng'alaali kobooten. 38 Ak ki le, Kiptaiyat, ayani. Ak kogutung'ji kolas ineendet. 39 Ak ki le Jeso, “Ki anyoo ng'wonyuni amu kirwooget, si kobiit kogeerto che ma keertoi; ak kogoryo che keertoi.” 40 Ki kas tuguuchuuto alak che po Pharisaik che ki mi kobooto ineendet ak koleenji, “Ki koryotin agacheek?” 41 Koleenji Jeso, “Nda oo koryotiin okweek, ta motinye tengek; ago nguno omwae ole, ‘Kigeertoi’ nooto anyun, tebyei tengektong'wong'.”
Mestowot ne myee
1 Amwaiwok, iman, iman, ale, Choriin ak ko rebin ineendet ne ma punei kurgeetap piutap keechiirek, ne laanyei oldo age. 2 Ago mestowotap keechiirek ineendet ne punei kurgeet. 3 Yaatyin ineendet riibindetap kurgeet; ak kasei keechiirek kutinnyi: ak kuurei keechiirekyik eng' kainaikwak, ak kondoe icheek. 4 Ak ye kagomaanda ineendet chechiget tugul koba saang', kondoe, ak koosup keechiirek ineendet: amu ingen kutinnyi. 5 Ak ma chamei koosup toondet, ago mwee: amu ma naei kutusweegap toek. 6 Komwachi Jeso icheek kalewenoni: ago ma iguiyo icheek kole nee tuguuchooto ki kamwachi.
Ormariichetap keechiirek
7 Koleenji anyun Jeso icheek kogeny, Amwaiwok, iman, iman, ale, Aa kurgeetap keechiirek. 8 Choriik ak ko rebiik tugul che ki indounena: ago ma kas keechiirek icheek. 9 Aa kurgeet: ngwo chii age tugul ko ne puna anee, kesaru, ak kwo ko, ak komanda saang', ak konyoor ole kiyage. 10 Nyoonei choriindet si kochoor, ak kobar, ak kong'em kityo: ki anyoo si kobiit konyoor saboondo, ak kotepto saboonooto inne. 11 Aa mestowot ne myee: igoitoi mestowot ne myee saboondanyi agobo keechiirek. 12 Ago ineendet ne otwogin, ne ma mestowot, ne ma chiitap ko po keechiirek, kogeerei konyonei suiyot, ak kobagaakta keechiirek, ak komwei, ak konam anyun suiyot icheek, ak koiyesta. 13 Mweei ineendet ne otwogin amu otwogin koma mage kiy keechiirek. 14 Aa mestowot ne myee. Angen chechuuk ak kongeno chechuuk, 15 ko uu ye ingeno Kwanda, ak angen Kwanda; ak agoitoi saboondanyu agobo keechiirek. 16 Ak atinye keechiirek alak, che ma po piuni: kanyool aget chooto ak icheek, si kogas kutinnyu: ak koek akweet agenge, ak mestowot agenge. 17 Chama anyun Kwanda amu nooto, amu agoitoi saboondanyu, si kobiit anam kogeny. 18 Marebena chii, ago agoitoi aneege. Atinye kimnateet agoito, ak atinye kimnateet anam kogeny. Ki ataach ng'atuutyoni eng' Abba. 19 Ki piit toiyet kogeny eng' Yahudik agobo ng'aleechuuto. 20 Ak ki le che chaang' eng' icheek, Tinyei oindet, ak koamei iywek; kalya si ogas ineendet? 21 Kole alage, Ma po ng'aleechu chii ne tinyei oindet. Tos imuuchi oindet koyaat konyegap chiito ne koraat?
Jeso eng' igoortap katabaanet
22 Ak kimi igoortap katabaanet eng' Jerusalem: ak kibetusyegap kaititindo; 23 ak kiwendot Jeso eng' Hekaluut eng' keterut ne po Solomon. 24 Ki pwa anyun Yahudik koyiem ineendet, koleenji, “Igoonech kigenisye eng' saget kot kotyanit? Ngo ii Kristo, imwaiwech komyee.” 25 Kowolji Jeso koleenji, “Ki amwaiwok, amoyani, poisyosyek che ayae eng' kainetap Abba ko chooto che paoryanjino. 26 Ago moyani, amu mo po keechiirekyuk. 27 Kasei kutinnyu keechiirekyuk, ak angen icheek, ak kosuba. 28 Agoochini icheek saboondap koigeny; ak ma koi lusyo, ama rebena chii icheek eng' eunnyu. 29 Oo Abba, ne ki koono icheek, kosiir tugul; ama mi chii ne imuuchi korep icheek eng' eutap Abba. 30 Anee ak Kwanda, ko ki agenge.” 31 Ki nam anyun Yahudik koik kogeny koleen kolach ineendet. 32 Kowolji Jeso koleenji, “Koaboorwok poisyosyek che chaang' che myach che punu Kwanda; olacha agobo poisyo nee eng' chooto?” 33 Kowolji `Yahudik ineendet koleenji, “Ma kilachin amu poisyet ne myee, ago amu chotisyet; ak amu inyee ne ii chii, iyaegei iegu Kamuktaindet.” 34 Kowolji `Jeso pichooto, koleenji, “Tos ma siraat eng' Ng'atuutyeng'wong' keele, ‘Ki amwa ale, oo kamuktaik?’ 35 Ngo kigoguure ineendet icheek ‘kamuktaik’, icheeget che ki nyoonji ng'olyootap Kamuktaindet (ama imugaksei kebut siruutyet), 36 tos omwae agobo ineendet, ne kiitabaan Kwanda ak koyookto kwo ng'wony, oleenjini, ichotisyei; amu ki ale, ‘Aa Weeriitap Kamuktaindet?’ 37 Ngot koma yai poisyosyegap Kwandanyu, ko matoyana. 38 Ago ngayai, ko agot ngo moyana, oyan poisyosyek: si kobiit onai ak oyan ole mi Kwanda eng' anee, ak anee eng' Kwanda.” 39 Ki cheeng' anyun kogeny konam ineendet: ago kibetito eng' eunekwak. 40 Ak ki wo kogeny Jordan komosin ole ki ibatisanisye Johana eng' tai; ak ki tebi eng' olooto. 41 Ak ki pwanji `che chaang' ineendet; ak kole, “Ki ma yai Johana kaboorunet; ago tuguuk alak tugul che ki mwa Johana agobo chiichi ko po iman.” 42 Ak ki iyan ineendet che chaang' eng' olooto.
Meetap Lazaro
1 Ak kimyan chiito age ne kiguure Lazaro, ne po Bethania, ne po nganaseetap Maria ak chepkamet Marta. 2 Ak ki Maria niito ne ki iil Kiptaiyat eng' mwaita, ak kouuse keelyekyik suumeekyik, ne ki tinyei ng'eetap kamet, Lazaro, ne kimyan. 3 Ki iyookyi chepkametwogichooto ineendet ng'olyoot, koleenji, “Kiptaiyat, keero, myani ineendet ne ichame.” 4 Ago ye kingo kas Jeso nooto kole, “Ma po meet myanooto, ago po toroornatetap Kamuktaindet, ak kilasune Weeriitap Kamuktaindet nooto.” 5 Ak ki chamei Jeso Marta, ak chepkamet, ak Lazaro. 6 Kingo kas anyun kole myani, kota kotebi peetuusyek aeng' eng' ole ki mi. 7 Kingo pata niito anyun, koleenji kasubik, Ongebe Judea kogeny. 8 Koleenji kasubik, “Rabbi, kocheeng'ei Yahudik kolachin eng' koik; ak iwendi oliindo kogeny?” 9 Kowol Jeso kole, “Tos ma mi saisyek tamanu ak aeng' eng' peetuut? Ngo wendot chii peet, koma kinachi, amu keerei lapkeiyetap ng'wonyuni. 10 Ago ngo wendot chii kemoi, kinachi, amu ma mi lapkeiyet eng' ineendet.” 11 Komwa tuguuchu: ak ye ibata koleenji icheek, Inuuchi chorwennyu Lazaro; ago awendi, si ang'eet ineendet eng' rwondo. 12 Koleenji anyun kasubik ineendet, Kiptaiyat, ngot konuuchi, ko kaagaa ta kosabei. 13 Ago kimwaei Jeso agobo meennyi: ak kileen icheek abeere mwaei agobo rwondo ne kiga konuuch. 14 Ki mwachi anyun Jeso icheek komyee, koleenji, “Kogome Lazaro. 15 Ago abaibai agobo okweek amu ki ma ami oliindo, si kobiit oyan; ago ongebe ole mi ineendet.” 16 Koleenji anyun Thomas, ne kiguure Didumo, kasubik chuun alak, “Ongebe ak acheek, si kobiit kebegu ak ineendet.”
Kogaigai `Jeso Martha ak Maria
17 Ye kingo it Jeso anyun, konyoor kole kiga kotebee kererit peetuusyek ang'wan. 18 Ki neegitee Bethania Jerusalem, ki po olo po maelisyek aeng'; 19 ak kigabwonji che chaang' che po Yahudik Marta ak Maria si kogaigai icheek agobo ng'eetap kamet. 20 Kingo kas anyun Marta kole, nyoonei Jeso, kwo kotorookta ineendet; ago kita kotebi Maria eng' ko. 21 Koleenji Marta anyun Jeso, Kiptaiyat, nda ki imi yu, ta ki ma komeei weeriit ne kitupche. 22 Ago angen agot nguno ale, kiit age tugul ne isoome Kamuktaindet, kogoonin Kamuktaindet. 23 Koleenji `Jeso ineendet, Ta kong'eetei ng'eetap kamenng'ung'. 24 Koleenji Marta ineendet, Angen ale ng'eetei eng' ng'eetyeet ne po peetuutap let. 25 Koleenji Jeso, Aa ng'eetyeet, ak saboondo: ineendet ne iyana, agot ngo me, kota kosabei: 26 ak chii age tugul ne sabei ak koyanan koma meei matiny. Tos iyani inyee niito? 27 Koleenji, “Wee Kiptaiyat; kaayan ale ii Kristo, Weeriitap Kamuktaindet, ne nyoonei ng'wony.”
Koriirei Jeso
28 Ak ye kingo kagomwa niito chebooto, kwo, ak koguur Maria, chepkamet, eng' ung'oot, kole, “Miitei yu Kaneetindet; kuurin.” 29 Ak ye kingo kas nooto, kong'eet kochaakta kwo ole mi ineendet. 30 (Ago ki tomo koit Jeso nganasanooto, ago kita komi ole kiga tuiyechi ak Marta.) 31 Ki isup anyun Yahudik chebooto, icheeget che ki mi kobooto ineendet eng' ko kogoigoi, ye kingo keer kong'eet Maria, ak kochaakta komanda saang', koleen wendi kererit koriirei eng' olooto. 32 Ye kingo it anyun Maria ole mi Jeso, ak kogeer ineendet, kobutyi keelyekyik, ak koleenji, “Kiptaiyat, nda ki imi yu, ta ki ma komeei weeriit ne kitupche.” 33 Ye kingo keer Jeso anyun ineendet koriirei, ak koriirtos ak icheek Yahudik che kigabwa kobooto ineendet, kogas king'wan eng' muguleldo, koaragen, 34 ak kole, “Ki onde ano?” Koleenji, “Nyoo, Kiptaiyat, keer.” 35 Koriir Jeso. 36 Kole anyun Yahudik, “Ogeer anyuno ole ki chamdoi ineendet!” 37 Ago ki le alak eng' icheek, “Kiga temenee chiichi, ne kiyatei konyegap chiito ne ki koraat, koger si ma me agine chiichi?”
Kong'eeti `Jeso Lazaro
38 Kogas anyun Jeso king'wan kogeny eng' oriitinnyi konyonei kererit. Ki kebeneet, ak kigegere koita kurgeet. 39 Kole Jeso, “Oiste koita.” Koleenji Marta, chepkametap ineendet ne kime, “Kiptaiyat, kogobul amu kobooch ngo me ko peetuusyek ang'wan.” 40 Koleenji `Jeso ineendet, “Kama amwaun ale, ngiyani, igeere toroornatetap Kamuktaindet?” 41 Koisto anyun koita. Ak ki ing'eet metit Jeso ak kole, “Abba, amwaun kongoi ale kaigasa. 42 Ak kaanai ale igasa eng' ui tugul, ago kaamwa ni amu tuiyoni tononi eng' yuto, si kobiit koyan kole ki iyookwo.” 43 Ak ye kingo kagomwa ko uu nooto, komwa eng' kutit ne oo, kole, “Lazaro, mong'u.” 44 Komong' anyun ineendet ne kiga me, ko ratotiin eunek ak keelyek eng' ngoroik che po kererit; ak kiga kirate togeennyi angeet. Koleenji Jeso pichooto, “Otyach, ak ounde kwo.”
Teteet kebar Jeso
45 Ki iyan anyun ineendet che chaang' che po Yahudik che kigabwa ole mi Maria, ak kogeer tuguuk che kayai Jeso. 46 Ago ki pa alak ole mi Pharisaik, ak komwachi icheek tuguuk che kagoyai Jeso. 47 Ki kuur anyun `tisiik che eecheen ak Pharisaik tuiyetap kirwoogik, ak kole, Ki yai nee? Amu yaei chiichi kaboorunoik che chaang'. 48 Ngot kebagaakte ineendet ko uu ni, koyani `ineendet piik tugul: asi kobwa Romanik korebenech emennyo ak pororyennyo. 49 Ak ki leenji age eng' icheek, ne ineendet ko Caiaphas ne ki tisiindet ne oo kenyinooto, “Mongen okweek kiy age tugul, 50 mongen ole myeeitu eng' okweek ngo mechi piik chiito agenge, si ma pet pororyet komugul.” 51 Ki ma komwaei ineegei nooto, ago ki maoten amu ki tisiindet ne oo kenyinooto kole, ki neegit komechi Jeso pororyet; 52 ma agobo pororyet ineegei, ago si kobiit koyum lagogap Kamuktaindet che yestootin si kobiit koek agenge. 53 Kobooch peetuunooto anyun ak kwo tai, korwoogot agobo ole partoi ineendet. 54 Mata kowendot Jeso anyun eng' ole taagu eng' ole mi Yahudik, ago ki wo eng' olooto kwo emet ne neegitee surkwen, agoi nganaseet ne kiguure Ephraim; ak ki tebi eng' olooto kobooto kasubik. 55 Kiga koriik paska ne po Yahudik: ak ki pa che chaang' eng' emet kotogosta Jerusalem kotom koit paska, koba koanyinygei. 56 Ki cheeng' anyun Jeso, ak koleenjigei, kotonondos eng' Hekaluut, Obwaati nee okweek? Tos oleen ma nyoonei ineendet igoorto? 57 Kiga ng'at tisiik che eecheen ak Pharisaik, kole, ngo nai chii age tugul ole miitei, koboor, si kobiit konam icheek ineendet.
Kiili Jeso eng' Bethania
1 Ak kingo ta komi peetuusyek lo si koit paska konyo Jeso Bethania, ole ki mi Lazaro, ne ki ing'eeti Jeso komong' eng' che ki pek. 2 Kichopchi icheek eng' olooto ineendet amitwogik che po lagat: koboisyechi Marta; ago ki mi Lazaro kobooto icheek che ki amisyei ak ineendet. 3 Ki inem anyun Maria mwaita ne nyamdut ne po ratilit agenge, ne po kamanuutyet ne oo, ak koilee keelyegap Jeso, ak kouuse suumeekyik keelyekyik: ak ki nyi koot nyamdutyet ne po mwaata. 4 Ago ki le Judas Iskaryot, ne ki agenge ne po kasubikyik, ne kimachei kong'wekta ineendet, 5 “Ko amu nee si ma ki aldae mwai dinarisyek pogol somok, si kigoochi kibananook?” 6 Ki mwa ni anyun, ma amu ki riiree kibananook; ago amu ki choriin, ak ki tinyei lolet, ak ki ibei tuguuk che mi oriit. 7 Kole Jeso, “Omete kogonorchi peetuutap tubeennyu. 8 Amu mi kibananook kobootok kotugul; ago ma mi anee ak okweek kotugul.”
Teteet kebar Lazaro
9 Ki nai anyun piik che chaang' che po Yahudik kole mi olooto: ak ki pwa, ma agobo Jeso ineegei, ago si kobiit kogeer Lazaro agine, ne kiga kong'eet ineendet eng' che ki pek. 10 Ago ki irwooch tisiik che eecheen kole kobar Lazaro agine; 11 amu kiitabaangei che chaang' che po Yahudik, koba koyan Jeso amu ineendet.
Taagetap Jeso eng' Jerusalem
12 Ak eng' peetuut ne ki isubi nooto, ye kingo kas tuiyet ne oo ne po piik che kigabwa igoorto, kogas kole nyoonei Jeso Jerusalem. 13 Ki nam anyun mooriik che po sosik, ak koba kotorookta ineendet ak komwa eng' kutit ne oo kole, “Hosanna! Iberuurot ineendet ne nyoonei eng' kainetap Kiptaiyat, nooto Laitoryatap Israel.” 14 Ak ye kingo kagonyoor Jeso moitap sigiryet, kolaany; ko uu ye ki kisir keele: 15 “Meiywei, inyee, ee, cheptap Zion. Keero, nyoonei Laitoryandeng'ung', kobunu moitap sigiryet!” 16 Ki ma iguiyo kasubikyik eng' tai tuguuchuuto: ago kingo kagitoroor Jeso, kobwaat anyun icheek kole ki kisir tuguuchuuto agobo ineendet, ak kiga keyachi ineendet tuguuchuuto. 17 Kibaoryan anyun tuiyet ne ki mi kobooto ineendet ye kiguurei Lazaro komong' eng' kererit, ak ki ing'eet ineendet eng' che ki pek. 18 Ki pa anyun tuiyet amu nooto kotorookta ineendet, amu ki kas kole kiga koyai kaboorunoni. 19 Kimwachigei anyun Pharisaik icheegei kole, “Ogeero, ma oterter eng' kiy: ogeero, kagosup `ineendet piik tugul che po ng'wony.”
Komachei Yunanik kogeer Jeso
20 Ak ki mi Yunanik alage eng' che kigaba kotogosta kosa eng' igoorto. 21 Ki pwa chooto anyun ole mi Philipu, ne po Bethsaida ne po Galilaya, ak koteebe ineendet kole, “Kiptaiyat, kimache kegeer Jeso.” 22 Ki nyo Philipu komwachi Andrea: ak ki pwa Andrea ak Philipu komwachi Jeso. 23 Ak ki wolji Jeso koleenji, “Kait sait, ne kitoroore Weeriitap chii. 24 Amwaiwok, iman, iman, ale, Ngo ma me paiywat ne ibutyin ng'ung'unyek, kotebyei ineegei; ago ngo me, koiyiei che chaang'. 25 Ineendet ne chamei saboondanyi kobeeti; ak ineendet ne wechei saboondanyi eng' ng'wonyuni koriip kot koit saboondap koigeny. 26 Ngo poisyeiwo chii age tugul, ko nyolu kosubota; ak si ole ami, komi olooto agine kiboityondennyu: ngo poisyeiwo chii, koteechei ineendet Kwanda.
Komwaei Jeso agobo meennyi
27 “Nyalili nguno saboondanyu; amwae nee anyun? Tos amwa ale ‘Abba we, sarwo eng' saini?’ Ago ki anyo amu niito si anyoor eng' saini. 28 Abba, itoroor kaineng'ung'.” Ki mong' anyun kutit eng' kipsengwet, kole, “Ki atoroor ak ta atoroori kogeny.” 29 Ki mwa anyun tuiyet ne kitononi eng' olooto kogasei, kole, katul. Kole alak, “Kang'alaalji malaikaiyat.” 30 Kowolji Jeso koleenji, “Kama nyo kutini agobo anee, ago agobo okweek. 31 Kabiit nguno kirwoogetap ng'wonyuni: ak kagitoorta anyun nguno ne oo ne po ng'wony komanda. 32 Ak ye kiuita eng' ng'wony, amutyige piik tugul.” 33 Ago ki mwa ni, koboortoi meet ole meitoi. 34 Ki wolji anyun tuiyet ineendet, koleenji, “Kigegas eng' Ng'atuutik keele tebyei Kristo koigeny. Teptoi ano anyun si imwa ile, kanyool keuito Weeriitap chii? Ng'oo Weerooto po chii?” 35 Koleenji Jeso anyun, “Ta komi lapkeiyet eng' kwenung'wong' eng' peetuusyek che matya. Obendoti ye ta otinye lapkeiyet, si ma namak mesundeito: ak ineendet ne wendoti eng' mesundeito koma naei ole wendi. 36 Ye ta otinye lapkeiyet, oyan lapkeiyet, si kobiit oegu weeriitap lapkeiyet. Ki mwa Jeso tuguuchu, ak kwo koung'egei icheek.”
Terchinetap kayaneet eng' Jeso
37 Ago nga kiga koyai kaboorunoik che chaang' che tee cho eng' tainnywa, koma iyan ineendet. 38 Kiyaak niito si kobiit kosulda ng'olyootap maotyot Isaiah, ne ki mwa, kole, “Kiptaiyat, ki iyan ng'oo ng'aleekyok? Ak kigeng'aang'ji ng'oo eutap Kiptaiyat?” 39 Ma imuuch anyun koyan amu ng'olyoondoniito, amu ki mwa Isaiah kogeny, kole, 40 “Ki kotuch `ineendet konyekwak, ak Ki kogoochi ineendet mugulelwekwak kouegitu; si ma keere konyekwak, anan konai eng' mugulelwekwak, ak koweek, ak asoop icheek. ” 41 Ki mwa tuguuchu Isaiah, amu ki keer toroornatennyi; ak ki ng'alaal agobo ineendet. 42 Ago ki iyan ineendet che chaang' agot eng' pounik; ago ma ng'aany ineendet amu Pharisaik, si ma ki oon icheek eng' sinagogit: 43 amu ki chamei kalasunetap piik kosiir kalasunetap Kamuktaindet.
Kuursetap Jeso agobo kiyan ineendet
44 Ak ki mwa Jeso eng' kutit ne oo, kole, “Ineendet ne iyana, koma iyana anee, ago iyani ineendet ne ki iyookwo. 45 Ak ineendet ne keera kogeerei ineendet ne ki iyookwo. 46 Ki anyoo aegu lapkeiyet eng' ng'wony, si ma kotebyei eng' mesundeito chii age tugul ne iyana. 47 Ak ngo kas chii age tugul ng'aleekyuk, ama riip, ko marwookyini ineendet: amu ki ma anyoo arwookyi ng'wony, ago ki anyoo asaru ng'wony. 48 Ineendet ne eesyoa, ama taachei ng'aleekyuk, kotinyei ne irwookyin: ng'olyoot ne ki amwa, nooto ne irwookyin ineendet eng' peetuutap let. 49 Amu ki ma amwae aneege; ago ki koono Kwanda ne ki iyookwo, ng'atuutyet, ne kanyool amwa, ak ne kanyool aamda. 50 Ak angen ale saboondap koigeny ng'atuutyennyi: tuguuk che amwae anyun, ko ko uu ye ki mwaiwo Kwanda, amwae ko uu nooto.”
Kouni Jeso keelyegap kasubik
1 Ak ye kingo tomo koit igoortap paska, konai Jeso kole kagoit sainnyi ne wendi eng' ng'wony kwo ole mi Kwanda, ko kagocham chechiik che mi ng'wony, kocham anyun agoi peetuutap let. 2 Ak eng' saitap amitwogigap lagat, ko kagonde chesawilyet ng'wektaet muguleldap Judas Iskaryot, ne po kap Simion, 3 ko kagonai Jeso kole kagonde Kwanda tuguuk tugul eunekyik, ak kole ki punu Kamuktaindet, ak wendi ole mi Kamuktaindet, 4 kong'eet eng' amitwogik, ak konde taban ngoroikyik, ak konam angeet ne kiusegei, kogermenegei. 5 Ak koroong'ji peek sanit, ak kotoi koun keelyegap kasubik, ak kouuse anganooto kiga kermenegei. 6 Konyo anyun ole mi Simion Petero. Yeityo koleenji Petero, Kiptaiyat, tos iuni inyee keelyekyuk? 7 Kowolji `Jeso ineendet koleenji, “Kiit ne ayae, ko mengen nguno; ago tatun inae.” 8 Koleenji Petero, Ma koi iun keelyekyuk. Kowolji Jeso koleenji, Ngo maunin, koma kiting'egei kiy. 9 Koleenji Simion Petero ineendet, Kiptaiyat, ma keelyekyuk kityo, ago eunekyuk ak icheek ak metinnyu. 10 Koleenji `Jeso ineendet, “Ineendet ne kagouungei koma komachei kouungei kogeny, kobatee keelyekyik, amu iuunoot inne: ak ouunootin okweek, ago ma okweek tugul.” 11 Amu ki ingen ne kimachei kong'wekta ineendet; ki mwa amu nooto kole, “Ma ouunootin tugul.” 12 Ak ye kingo kagoun anyun keelyekwak, ak konem ngoroikyik, ak kotep ng'wony kogeny, koleenji, “Tos ongen ne kayaiywok? 13 Oguureno Kaneetindet, ak Kiptaiyat: ak omwae komyee; amu aa ineendet. 14 Ngo anee anyun ne aa Kiptaiyat ak Kaneetindet, ne kaun keelyekwok, ko kanyoljok ak okweek ounjige keelyek. 15 Amu kaboorwok, si oyai ak okweek ko uu ne kayaiywok. 16 Amwaiwok, iman, iman, ale, ma oo otwogindet kosiir kiptaiyandannyi; ama oo ineendet ne ki kiyok kosiir ineendet ne ki iyoogu. 17 Ngo nai tuguuchu, ko oboiboi ngo yai. 18 “Ma mwaei agobo okweek tugul: angen che ki alewen: ago si kobiit kosulda siruutyet, ne ki le, Ineendet ne amei magatyandennyu, ko kagong'eet kwaryandennyi koyaiywo ne ya. 19 Kasip amwaiwok kobooch nguno kotom kosulda, si ye isulda, oyan ole aa ineendet. 20 Amwaiwok, iman, iman, ale, Ineendet ne taachei age tugul ne ayoogu ko kataacha; ak ineendet ne taacha ko kataach kineendet ne ki iyookwo.”
Sip komwaei Jeso agobo ng'wektaennyi
21 Kingo kagomwa Jeso ko uu nooto, koimgei eng' muguleldanyi, ak kobaoryan, kole, “Amwaiwok, iman, iman, ale, Ng'wektoo age eng' okweek.” 22 Kogeergei anyun kasubik, ama naei kole, ngo mwaei agobo ng'oo. 23 Ak ki mi meset agenge ne po kasubikyik ne kitiegei tegetap Jeso ne ki chamat eng' Jeso. 24 Kong'wech anyun Simion Petero ineendet, koleenji, “Mwaiwech, tos mwaei ineendet agobo ng'oo?” 25 Koleenji anyun ne kitiegei tegetap Jeso, “Kiptaiyat, ng'oo nooto?” 26 Kowol Jeso anyun kole, “Ineendet ne agoochini kererutyet, ye kaaburburte.” Ak ye kingo kagoburburto kererutyet, kogoochi Judas, ne po kap Simion Iskaryot. 27 Ak kingo kagotaach kererutyet, kochut Setani ineendet. Koleenji `Jeso ineendet anyun, Yai chokyi ne imache iyai. 28 Koma konai chii eng' che ki mi amisyet kole kamwachi ineendet agobo nee. 29 Amu kileen alak eng' icheek kaleenji Jeso, “Ui al tuguuk che kimache eng' igoorto”, amu kiting'oti Judas lolet; anan ko kaleenji kogoochi kiy kibanaok. 30 Kingo kagotaach anyun ineendet kererutyet, komanda sainooto: ak ki kemoi.
Ng'atuutyet ne leel
31 Ye kingo kagomanda saang', komwa Jeso kole, “Kagitoroor nguno Weeriitap chii, ak kagitoroor Kamuktaindet eng' ineendet; 32 ak tuun itoroori `Kamuktaindet ineendet eng' oriitinnyi; ak kotoroori ineendet eng' sainooto. 33 “Lagochu mengech, ta atebye kobootok ne matya. Tuun ocheeng'a: ak ko uu ye ki amwachi Yahudik aleenji, Ole awendi, ko momuuchi obwa; amwaiwok nguno ak okweek ko uu nooto. 34 Agoonok ng'atuutyet ne leel, ale, ochamye; ko uu ye ki achamak, ochamyee ak okweek. 35 Naei piik tugul kole oo kasubikyuk, ngo chamdosi.”
Sip koyastos Petero kole ma eesyoi Jeso
36 Ki leenji anyun Simion Petero, Kiptaiyat, iwendi ano? Kowolji Jeso koleenji, “Ole awendi, ko memuuchi isubwo nguno; ago tatun isubwo.” 37 Koleenji Petero, Kiptaiyat, kalya si ma muuchi asubun agot nguno? Agoitoi saboondanyu agobo inyee. 38 Kowolji Jeso koleenji, “Igoitoi saboondang'ung' agobo anee? Amwaun, iman, iman, ale, kotom koote kipsoiywet, ieesyoa konyil somok.”
Ooreet ne itei ole mi Kwanda
1 Amogoochi mugulelwekwok koiimgei: oyani Kamuktaindet, oyana agane. 2 Miitei kooriik che chaang' eng' kootap Abba; nda ki ma ko uu nooto, ta ki amwaiwok; awendi achobwok kooret. 3 Ak ye awe achobwok kooret, anyoone kogeny amutok; si ole ami omite ak okweek. 4 Ak ole awendi, ongen ooreet. 5 Koleenji Thomas, Kiptaiyat, ma kingen ole iwendi; kinaitoi ano anyun ooreet? 6 Koleenji Jeso, Aa ooreet, ak iman, ak saboondo: ma nyoonjin chii Kwanda, ama eng' anee. 7 Nda ki onaa, ta ki onai Abba agine: ak kaonai ineendet anyun kobooch nguno, ak kaogeer ineendet. 8 Koleenji Philipu, Kiptaiyat, iboorwech Kwanda, si koyamech. 9 Koleenji Jeso, Ki kitebi tugul ak okweek peetuusyek che chaang', ak tomo inaa, Philipu? Ineendet ne ki kogeero ko ki kogeer Kwanda: imwae eng' nee anyun, ile, Iboorwech Kwanda? 10 Tos meyani ile ami eng' Kwanda, ak Kwanda eng' anee? Ng'aleek che amwaiwok koma mwaei aneege: ago Kwanda ne menya ne yaei poisyonikyik. 11 Iyana amu ami eng' Kwanda, ak Kwanda eng' anee: anan oyana agobo poisyonik icheeget. 12 Amwaiwok, iman, iman, ale, Ineendet ne iyana, koyaei agine poisyonik che ayae; ak koyaei poisyonik che eech eng' chuuto; amu awendi ole mi Kwanda. 13 Ak kiit age tugul ne osoome eng' kainennyu, ayae, si kegonyit Kwanda eng' Weeriit. 14 Ngot osoom kiy age tugul eng' kainennyu, ayae kioto.
Kabuuset ne Tiliil
15 Ngot ochama, oriibe ng'atuutikyuk. 16 Ak asoom Kwanda, ak kogoonok kagaigaindet age, si kotebi kobootok koigeny, 17 nooto Kabuuset ne Tiliil ne po imanit, ne ma imuuchi ng'wony kotaach; amu ma keerei ineendet, ama naei ineendet: ago ongen ineendet: amu tebyei kobootok, ak tuun tebyei eng' oriing'wong'. 18 Ma pagaaktook ko uu kibananook: anyonjinok. 19 Ta komi kitigin, si ma kogeero ng'wony; ago ogeera: amu asabe, osaptosi ak okweek. 20 Eng' peetuunooto onai ole ami eng' Abba, ak okweek eng' anee, ak anee eng' okweek. 21 Ineendet ne tinyei ng'atuutikyuk, ak koriibei, ko nooto ne chama: ak ineendet ne chama kochamaat eng' Abba, ak achame ineendet ak ang'aang'jigei ineendet. 22 Koleenji `Judas (ma Iskaryot), Kiptaiyat, kalya si ing'ang'weige, ama ing'aang'jige ng'wony? 23 Kowolji Jeso koleenji, “Ngo chama chii, koriip ng'olyoondennyu: ak kocham Abba ineendet ak kebwonji ineendet, ak kemeny kobooto ineendet. 24 Ineendet ne ma chama ko ma riibei ng'aleekyuk: ak ma nenyu ng'olyoot ne ogase, ago po Kwanda ne ki iyookwo. 25 Kaamwaiwok tuguuchu, kota ami kobootok. 26 Ago ineetook tuguuk tugul Kagaigaindet, Kabuuset ne Tiliil, ne iyoogu Kwanda eng' kainennyu, ak kobwaatwok tugul che kaamwaiwok. 27 Abagakwok kaalyeet; agoonok kalyennyu: ma koonok ko uu ye koonu ng'wony. Among' koiimgei mugulelwekwok, anan koiyweis. 28 Kaogas ko uu ye kaamwaiwok ale, Awendi, ak anyoone ole omi. Ngot ochama, ko oboiboi, amu awendi ole mi Kwanda: amu oo Kwanda eng' anee. 29 Ak kaamwaiwok nguno kotom koyaak, si ye kagoyaak, oyan. 30 Ma ng'alaalwok miising', amu nyoonei ne oo ne po ng'wony: ama tinyei kiy eng' anee; 31 ago si konai ng'wony kole achame Kwanda, ak ko uu ye ki koono Kwanda ng'atuutyet, ayae ko uu nooto. Ong'eetyee, keebe.”
Keetitap sabibuk ak temeenik
1 Aa keetit ne po iman ne po sabibuk, ak semberindet Abba. 2 Tilei temeet age tugul ne mi eng' anee ne ma iyei logoek, ak kotiliili temeet age tugul ne yiei logoek si koi logoek alak. 3 Oo tiliileen nguno amu ng'aleek che kaamwaiwok. 4 Omenya, ak amenyok. Ko uu ye ma imuuchi temeet koi logoek ineegei, ngot koma menyei keetit; ko momuuchi ak okweek, ngot ko momenya. 5 Aa keetitap sabibuk, ko oo mooriik: ineendet ne menya, ak amenye ineendet, ko nooto ne yiei logoek che chaang': amu momuuchi oyai kiy okweegei ngo ma mi anee kobootok. 6 Ngo ma menya chii, kewiirtoi ineendet ko uu temetap keetit, si koyaam; ak koyum piik, ak kowiirchi ma, ak kolalyo. 7 Ngot omenya, ak komenyok ng'aleekyuk, osoom anyun kiy age tugul ne omache, si keyaiywok. 8 Kigonyiti Abba eng' niito, ye oiyie logoek che chaang'; si oegu kasubikyuk. 9 Ko uu ye ki chama Kwanda, ko uu nooto ki achamak agane; otebi eng' chamyennyu. 10 Ngot oriibe ng'atuutikyuk, otebye anyun eng' chamyennyu; ko uu ye ki ariip ng'atuutik che po Abba, ak atebye eng' chamyennyi. 11 Kaamwaiwok tuguuchu, si kotebi eng' okweek poiboiyennyu, si kobiit kosulda poiboiyeng'wong'. 12 Ng'atuutyennyu ni, ale ochamye, ko uu ye ki achamak. 13 Ma tinyei chii chamyet ne siirei ni, ale kogoito chii saboondanyi agobo choronokyik. 14 Oo choronokyuk, ngot oyai tuguuk che ang'atook. 15 Ma aguurenok otwogik; amu ma naei otwogindet kiit ne yaei kiptaiyandennyi: ago kaaguurenok choronok; amu kaang'ang'wok tuguuk tugul che ki agase Abba. 16 Ki ma olewena, ago ki alewenok, ak ki andeak, ale obe ak oii logoek, si kobiit kotebi logoekwok: si kobiit kogoonok Kwanda kiit age tugul ne osoome eng' kainennyu. 17 Ang'atwok tuguuchu, ale ochamye.
Sip koteu Jeso agobo ng'wony
18 Ngo wechok ng'wony, onai ole ki kowecha kotom kowechok. 19 Nda oo po ng'wony, ta chamei ng'wony chechiik: ago amu mo po ng'wony, ago ki alewenok eng' ng'wony, kowechok ng'wony anyun amu nooto. 20 Obwaat ng'olyoot ne ki amwaiwok, Ma siirei otwogindet kiptaiyandennyi. Ngot kogiusa anee, kousok ak okweek; ngot ko ki nam ng'olyoondennyu, konamei neng'wong' agine. 21 Ago yaiywok tuguuchu tugul agobo kainennyu, amu ma nai ineendet ne ki iyookwo. 22 Nda ki ma anyoo ang'alaalji icheek, ta ma tinyei tengek: ago nguno koma tinyei kiit ne ityagegei agobo tengektonywa. 23 Ineendet ne wecho ko kawech Abba agine. 24 Nda ki ma ayai eng' kwenunnywa poisyonik che ki ma yai chiito age, ta ki ma kotinyei tengek: ago nguno ko kagogeerech ak kagowechech anee ak Abba. 25 Ago, si kosulda ng'olyoot ne ki kisir eng' Ng'atuutikwak, keele, Ki kowecha puch. 26 Ago ye kagoit Kagaigaindet, ne tuun ayookwok kobunu Kwanda, Kabuuset ne Tiliil ne po imanit, ne punu Kwanda, konyo kobaoryanjo: 27 ak obaoryani ak okweek, amu ki omi kobooto kobooch taunet.
1 Kaamwaiwok tuguuchu, si ma kinachak. 2 Oonok eng' sinagogisyek. Nyoonei sait, ne ibwaati chii tugul ne parok kole, ayachini Kamuktaindet poisyet. 3 Ak yaei tuguuchu, amu ma nai Kwanda, anan anee. 4 Ago kaamwaiwok tuguuchu, si ye nyo sainnywa, omuuchi obwaat ole ki amwaiwok agobo chuuto. “Ago ki ma amwaiwok tuguuchu eng' taunet, amu ki ami kobootok. 5 Ago kawe nguno ole mi ineendet ne ki iyookwo; ama mi age eng' okweek ne teebena kole, ‘Iwendi ano?’ 6 Amu kaamwaiwok tuguuchu, ko kanyi mugulelwekwok arageneet. 7 Ago amwaiwok ne po iman: myee eng' okweek ngawe: amu ngo mawe, ko manyonjinok Kagaigaindet; ago ngot awe, ayookwok ineendet. 8 Ak ye kagonyo ineendet, kogikyi ng'wony agobo tengekto, ak imanda, ak kirwooget: 9 agobo tengekto, amu ma iyana; 10 agobo imanda, amu awendi ole mi Kwanda, ama ogeero kogeny; 11 agobo kirwooget, amu ki kirwookyi ne oo ne po ng'wonyuni.” 12 “Ta atinye tuguuk che chaang' che kata ta amwaiwok, ago ma omuuchi omuite nguno. 13 Ago ye tuun kagonyo ineendet, Kabuuset ne Tiliil ne po imanit, kondoiywok agoi oit imanda tugul: amu ma mwaei ineegei; ago mwaei tuguuk tugul che kasei: ak kong'ang'wok tuguuk che pwoonei. 14 Itoroora: amu namei chechuuk, ak kong'ang'wok. 15 Chechuuk tuguuk tugul che tinyei Kwanda: nooto kaamwa, ale, namei chechuuk, ak koboorwok.”
Riirek kewalei koek poiboyet
16 “Tomo kitigin, si ma ogeera kogeny; ak mi kitigin kogeny, si ogeero.” 17 Kong'alaaljigei anyun alak eng' kasubikyik kole, “Nee ni kamwaiwech kole, ‘Mi kitigin, si ma ogeera; ak mi kitigin kogeny, si ogeera: ak, Amu awendi ole mi Kwanda?’ ” 18 Kole anyun, “Nee ni kamwa kole, ‘Mi kitigin?’ Ma kingen kiit ne mwaei.” 19 Ki nai Jeso anyun kole, machei koteebe pichooto ineendet, ak ki leenji, “Tos oteebegei okweegei agobo ng'olyoondoni kaamwa ale mi kitigin, si ma ogeera, ak mi kitigin kogeny, si ogeera? 20 Amwaiwok, iman, iman, ale orirtosi ak oteitosi, ago paibai ng'wony: oaragendosi, ago kiweechi arageneng'wong' koek poiboiyet. 21 Arageni tamonet ye machei kosigiis, amu kait sainnyi; ago ye kagosich lakweet, koma kobwaati ng'wanindo kogeny, eng' poiboiyet amu kagesikyi chii ng'wony. 22 Nooto anyun otinye arageneet nguno: ago ta ageerok kogeny, ak poiboi mugulelwekwok, ama rebenok chii poiboiyeng'wong'. 23 Ama oteebena kiy eng' peetuunooto. Amwaiwok, iman, iman, ale, Ngot osoom Kwanda kiy age tugul, kogoonok eng' kainennyu. 24 Tom osoom kiy eng' kainennyu: osoom, si onyooru, si kobiit kosulda poiboiyeng'wong'.”
Kogimiti `Jeso kasubik
25 “Kaamwaiwok tuguuchu eng' kalewenaik: ago nyoonei sait, ye ma ang'alaalwok eng' kalewenaik, ago aboorwok komyee agobo Kwanda. 26 Osoome peetuunooto eng' kainennyu: amamwaiwok, ale ateebee Kwanda kiy agobo okweek; 27 amu chamok ineendet Kwanda, amu ki ochama, ak ki oyan ole ki abunu Kwanda. 28 Ki abunu Kwanda, anyoonji ng'wony: abagaaktoi ng'wony kogeny, ak agetitegei ole mi Kwanda.” 29 Koleenji kasubikyik, “Keero, ing'alaali nguno komyee kotook, ama imwae kalewenet.” 30 Kingen nguno keele ingen tuguuk tugul, ama nyoljin chii koteebenen kiy: kiyani eng' niito keele ki ibunu Kamuktaindet. 31 Kowolji Jeso koleenji, “Oyani nguno? 32 Ogeero, nyoonei sait, ee, kagonyo nguno, ye kiyestook, kwo chii tugul oldanyi, ak obagaakta aneege: ago ma mi aneege, amu mi Kwanda kobooto. 33 Kaamwaiwok tuguuchu, si kobiit onyoorunena kaalyeet. Otinye nyalilda eng' ng'wony! Ago onyiganitu; amu kaaterter ng'wony.”
Saaet ne po Jeso
1 Ki mwa Jeso ng'aleechu; ak konyal kipsengwet, ak kole, “Abba, kagonyo sait; itoroor Weeriing'ung', si kotoroorin Weeriit; 2 ko uu ye ki igoochi ineendet kimnateet koboi piik tugul, si kobiit kogoochi saboondap koigeny tugul che ki igoochi ineendet. 3 Ak ni saboondap koigeny, ale konain Kamuktaindet ne inyeendet inyegei ne po iman, ak Jeso Kristo, ne ki iyoogu. 4 Ki atoroorin eng' ng'wony, amu kaagesu poisyet ne ki igoono ayai. 5 Ak nguno, ee Abba, itoroora eng' inyeendet inyegei eng' toroornatet ne ki atinye kemi tuwai kotom kobiit ng'wony. 6 Ki aboorchi kaineng'ung' piik che ki igoono eng' ng'wony. Ki cheguuk, ak ki igoono; ak ki koriip ng'olyoondeng'ung'. 7 Kagonai nguno kole punun tuguuk tugul che ki igoono; 8 amu ki agoochi icheek ng'aleek che ki igoono ak ki kotaach, ak ki konai iman kole ki abunu ole imi, ak ki koyan kole ki iyookwo. 9 Asaae agobo icheek: ma saae agobo ng'wony, ago agobo icheek che ki igoono; amu cheguuk: 10 ak tuguuk tugul chechuuk ko cheguuk, ak cheguuk ko chechuuk: ak ki itoroora eng' icheek. 11 Ak ma amite ng'wony, ago mi ng'wony chu, ak anyoone ole imi. Abba ne Tiliil, riip eng' kaineng'ung' icheek che ki igoono, si kobiit koek agenge, ko uu acheek. 12 Ki ariip eng' kaineng'ung' icheek che ki igoono, ye kota kemi ak icheek: ki ariip icheek, ama pet agot agenge eng' icheek, kobatee weeriitap luseet; si kobiit kosulda siruutyet. 13 Ak kanyonjin nguno; ak amwae tuguuchu eng' ng'wony, si kobiit kosulda poiboiyennyu eng' icheek. 14 Ki agoochi ng'olyoondeng'ung'; ak kawech ng'wony icheek, amu ma po ng'wony, ko uu ye ma po ng'wony anee. 15 Masaae ale imut icheek eng' ng'wony, ago ale iriip icheek eng' ineendet ne ya. 16 Ma po ng'wony icheek, ko uu ye ma po ng'wony anee. 17 Itiliil icheek eng' imanit: imanit ng'olyoondeng'ung'. 18 Ko uu ye ki iyookwo anyo ng'wony, ko uu nooto kaayookte icheek koba ng'wony. 19 Ak atabaanige agobo icheek si kobiit kitabaan icheek eng' imanit. 20 Amasaae agobo chu kityo, ago asaae agobo icheek che tuun iyana amu ng'olyoonnywa; 21 si kobiit koek icheek tugul agenge; ko uu ye imi inyee Abba, eng' anee, ak anee eng' inyee, si kobiit kotep icheek eng' acheek: si kobiit koyan ng'wony kole ki iyookwo. 22 Ak kaagoochi icheek toroornatet ne ki igoono; si kobiit koek agenge ko uu ye ki agenge acheek; 23 anee eng' icheek, ak inyee eng' anee, si kobiit koek icheek che ititaatiin eng' agenge; si kobiit konai ng'wony kole ki iyookwo, ak ichame icheek, ko uu ye ichama.” 24 Abba, amache ale kotebi kobooto eng' ole ami, icheek che ki igoono; si kobiit kogeer toroornatennyu ne ki igoono; amu ki ichama kotom kelumda ng'wony. 25 “Ee Abba ne po imanda, ki ma kongenin ng'wony, ago ki angenin; ak ki konai chu kole, ki iyookwo. 26 Ki ang'aang'ji icheek kaineng'ung', ak ta ang'aang'jini; si kobiit kotebee icheek chamyet ne ki ichamena, ak anee eng' icheek.”
Kenamei Jeso
1 Ye kingo kagomwa Jeso ng'aleechu, koba ak kasubikyik kolanda eng' kereruut ne kiguure Kedron, ole ki mi mbareet, ole ki wo ineendet, kobooto kasubikyik. 2 Ak ki ingen koronooto Judas agine, ne king'wektoi ineendet: amu ki cham kowendi Jeso yooto kobooto kasubikyik. 3 Ak kingo kagonyoor Judas lugeetap kiplugotinik, ak kiptainik che punu tisiik che eecheen ak Pharisaik, kobwa kotinyei taisyek ak kegenganik ak kariik che po lugeet. 4 Kwo anyun Jeso, ko kagonai tuguuk tugul che pwaanjin ineendet ak koleenji, “Ocheeng'e ng'oo?” 5 Kowolji koleenji, “Jeso ne po Nazareth.” Koleenji Jeso, “Aa ineendet.” Ak ki tononi kobooto icheek Judas agine, ne king'wektoi ineendet. 6 Ye kingo mwachi anyun kole, “Aa ineendet,” kobee patai ak kobutyo. 7 Ki teebe anyun icheek kogeny, kole, “Ocheeng'e ng'oo?” Ak kole, “Jeso ne po Nazareth.” 8 Kowol Jeso, kole, “Kaamwaiwok ale aa ineendet; nooto anyun ngo cheeng'a ounde chu koba.” 9 Si kosulda ng'olyoot ne ki mwa kole, “Ma petena agot agenge eng' chooto ki igoono.” 10 King'us anyun Simion Petero rotwetap chok ne ki tinyei, ak koep otwogindetap tisiindet ne oo, koep iitinnyi ne po tai. Ki kiguure otwogindonooto Malko. 11 Koleenji Jeso anyun Petero, Weekyi rotweet choget: tos maee kigombet ne kagoono Kwanda?
Komi Jeso taitap Annas tisiindet ne oo
12 Konam anyun lugeet ak kiptaiyat ne oo, ak kiptainik che po Yahudik, Jeso ak koraat ineendet, 13 ak komutyi Anas korook; amu ki kabyugoit ne po Caiaphas, ne ki tisiindet ne oo kenyinooto. 14 Caiaphas nooto ne ki iboorchi Yahudik kole, nyolu komechi chiito agenge piik.
Koeesyoi `Petero Jeso
15 Ki isup anyun Simion Petero Jeso, ak age eng' kasubik. Amu ki ingengei tisiindet ne oo ak nooto agenge eng' kasubik, koba koot oriit kobooto Jeso agoi kapkirwoogetap tisiindet ne oo. 16 Kitononi Petero eng' saang' ye neegit kurgeet. Ki manda anyun chiichooto agenge eng' kasubik ne ki ingengei ak tisiindet ne oo, ak kong'alaalji chepto ne kiriibei kurgeet, ki imut Petero konyo ko. 17 Koleenji anyun chepto ne kiriibei kurgeet Petero, Ma ii agenge eng' kasubigap chiichi? Kole, Ma anee. 18 Ak kitonondos eng' yooto otwogik ak kiptainik, che kiga kolaal maat ne po nesek, amu ki kaitit; ak kiyue maat: ak kitononi Petero agine kobooto icheek, koyue maat.
Koteepseen `tisiindet ne oo Jeso
19 Ki teebe anyun tisiindet ne oo Jeso agobo kasubikyik ak kaneetisyennyi. 20 Kowolji Jeso koleenji, “Ki ang'alaalji ng'wony, amauny ng'olyoo; ki aneetisye kotugul eng' sinagogisyek, ak eng' Hekaluut, ole tuiyechin Yahudik tugul; amamwa kiy eng' ung'oot. 21 Amu nee si iteebena? Teebe icheek che ki kas kiit ne ki amwachi icheek; keero, ingen chu tuguuk che ki amwa.” 22 Ak ye kingo kagomwa ko uu niito, korabach Jeso age eng' kiptainik che kitonondos eng' yooto kole, “Iwoljini tisiindet ne oo ko uu nooto?” 23 Kowolji Jeso koleenji, “Ngot ko kaamwa ne ya, ibaoryan agobo nooto ya: ago ngot ko myee, ko amu nee si irabaacha?” 24 Ki iyookto anyun Anas ineendet ko rataat kwo kap Kaiapa, tisiindet ne oo.
Kotiitos `Petero Jeso kogeny
25 Ak kitononi Simion Petero koyue maat. Koleenji anyun icheek ineendet, Ma ii age aginye ne po kasubikyik? Kotiiyo kole, “Ma aa ineendet.” 26 Kole otwogindet age ne po tisiindet ne oo ne kitilyonut ak chiichooto kiebei Petero itinnyi, Koma ageerin eng' mbar omi ak ineendet. 27 Kotiiyo anyun Petero kogeny; ak eng' sainooto koote kipsoiywet.
Komi Jeso taitap Pilato
28 Ki imut Jeso anyun kong'etee kap Kaiapa kwo Praitorium: ak kita ko karon miising'; ak ma pa icheeget Praitorium oriit, si ma ng'woneegitu, ago si kobiit koam paska. 29 Ki manda Pilato anyun kwo ole mi icheek, ak kole, “Nee ng'olyoo ne orwookyine chiichi?” 30 Kowolji koleenji, “Nda koma ko chalwogin chiichi, ta koma kimutu ineendet konyo taing'ung'.” 31 Koleenji Pilato icheek anyun, Onam ineendet okweek, ak orwookyi ko uu ng'atuutyeng'wong'. Koleenji anyun Yahudik, Ma chamdaat eng' acheek kebar chii age tugul: 32 si kobiit kosulda ng'olyootap Jeso, ne ki mwa, kobooru meet ole meitoi ineendet. 33 Ki wo anyun kogeny Pilato Praitorium oriit, ak koguur Jeso, koleenji, “Tos ii Laitoryatap Yahudik?” 34 Kowolji Jeso koleenji, “Imwae ng'olyoondoni inyegei anan komwaun alak agobo anee?” 35 Kowol Pilato kole, “Aa Yahudyot? Kagomutun tainnyu pororyeng'ung' ak tisiik che eecheen. Ki iyai nee?” 36 Kowol Jeso, kole, “Ma po ng'wonyuni laitornatennyu: nda po ng'wonyuni laitornatennyu, ko kata yaei pooryeet kasubikyuk si ma kindea eunegap Yahudik: ago nguno koma po laitornatennyu oli.” 37 Koleenji anyun Pilato ineendet, “Ara, ii laitoryat so?” Kowol Jeso kole, “Imwae ile aa laitoryat. Ki kisicha amu niito, ak ki anyoo ng'wony amu niito, si kobiit abaoryanji imanit. Kasei kutinnyu chii age tugul ne po imanit.” 38 Koleenji Pilato, Nee imanit?
Ketiljin Jeso kirwoogetap meet
Ak ye kingo kagomwa ko uu ni, komanda kogeny ole mi Yahudik, ak koleenji, “Ma anyoorchi anee leluut ineendet. 39 Ago otinye piteet, ole atyakwok age eng' paska: ara omache atyakwok Laitoryatap Yahudik?” 40 Kobolyo anyun kogeny, kole “Ma chiichi, ago Barabbas!” Ago anyun, ki rebindet Barabbas.
1 Ki nam anyun Pilato Jeso, ak kobire kipchoritiit. 2 Ak kita kiplugotinik ngatyet ne po katook, ak konde metit, ak kolaakyi ineendet ngoryeet ne aruus ne piriir; 3 ak kobwa ole mi ineendet kole, “Kigatin, Laitoryatap Yahudik!” Ak korabach ineendet. 4 Ak kimanda Pilato kogeny, ak koleenji icheek, “Ogeero, kamutwak ineendet konyo taing'wong', si onai ole ma anyoorchi anee leluut ineendet.” 5 Komong' Jeso anyun konyo saang', ko kerat metit eng' ngatyetap katook, kolaaganu ngoryonooto aruus ne piriir. Ak koleenji Pilato pichooto, “Ogeer chiichi anyun o!” 6 Ye kingo keer anyun ineendet tisiik che eecheen ak kiptainik, kobolyo, kole, “Igartaat! Igartaat!” Koleenji Pilato, “Omut okweek ineendet ak ogartaat; amu ma anyoorchi leluut.” 7 Kowolji Yahudik koleenji, “Ki tinyei ng'atuutyet, ak kanyool kome amu ng'atuutyonooto, amu ki yaigei koek Weeriitap Kamuktaindet.” 8 Ye kingo kas anyun Pilato mwaonooto, koywei miising'; 9 ak ki wo Praitorium oriit kogeny, ak koleenji Jeso, Ibunu ano? Ago ma wolji `Jeso ineendet. 10 Koleenji Pilato anyun ineendet, “Metwekwa? Mengen ile atinye kimnateet atyachin, ak atinye kimnateet agartatin?” 11 Kowolji Jeso koleenji, “Kama ko tetinye kimnateet iyaiywo kiy, nda kama kigoonin eng' parak; nooto anyun, tinyei ineendet ne koindea euneguk tengekto ne oo kosiir.” 12 Kobooch yooto kocheeng' Pilato kotyach ineendet: ago ki polyo Yahudik, kole, “Ngot ityaach chiichi, koma ii chorweet ne po Caesarea: reenyei Caesarea chii age tugul ne yaegei koek laitoryat.” 13 Ye kingo kas anyun Pilato ng'aleechuuto, komut Jeso komong' saang', ak kotep ng'wony eng' ng'echereetap kirwooget eng' ole kiguure Teteetap Koik, ago kiguure eng' kutitap Yahudik, Gabata. 14 Ki chobetap paska peetuunooto: ak ki olo po sait lo. Ak ki leenji Yahudik, “Ogeero, Laitoryandeng'wong'!” 15 Kobolyo pichooto kole, “Iste ineendet! Iste ineendet! Igartaat ineendet!” Koleenji Pilato anyun icheek, agartaat laitoryandeng'wong'? Kowol tisiik che eecheen, kole, ma kitinye laitorya kobatee Caesarea. 16 Kogoito anyun Pilato ineendet kigartaat.
Kigartati Jeso
Konam anyun icheek Jeso ak komut: 17 ak komanda, koibei ineegei kimurtoiyot, agoi koit ole kiguure Kooretap terta, ne kiguure eng' kutitap Yahudik, Golgota: 18 ole ki igartate icheek ineendet, kobooto aeng' alak, age komosi ak age komosi, ak ki mi Jeso kween. 19 Ak kisir anyun Pilato sireet, ak konde kimurtoiyot. Ki kisir keele, “JESO NE PO NASARET, LAITORYAT NE PO YAHUDIK.” 20 Kosoman anyun Yahudik che chaang' sironiito: amu kineegite nganaseet ole ki kigartate Jeso: ak ki kisir eng' kutitap Yahudik, ak Romanik, ak Yunanik. 21 Koleenji anyun tisiik che eecheen che po Yahudik Pilato, “Amesir ile, Laitoryat ne po Yahudik: ago, ki mwa kole, ‘Aa Laitoryat ne po Yahudik.’ ” 22 Kowol Pilato kole, “Kiit ne kaasir ko kaasir.” 23 Ye kingo kagogartaat anyun kiplugotinik Jeso, konam ngoroikyik, kopchei koek kebeberwek ang'wan, koip asigarindet age tugul kebeberta age; ak ko uu nooto sumet agine: ak ki ma kotinyei sumet ole ki kituiye, ki kinap koek agenge kongeete parak agoi kapkelyen. 24 Koleenjigei anyun icheegei, “Amongegereer, ago ongeseer parbareek, si kenai chiito ne punjin: si kosulda siruutyet ne mwaei kole, Kipchechigei ngoroikyuk, Ak kolotyigei ngoryennyu. Ki yai anyun kiplugotinik tuguuchuuto.” 25 Ago kitonondos eng' ye neegitee kimurtoiyotap Jeso kamet, ak chepkametap kamet, Maria ne po Klopa, ak Maria Magdalene. 26 Ye kingo keer Jeso anyun kamet, ak nooto agenge eng' kasubikyik ne ki chamei Jeso kotonondos eng' yooto, koleenji kamet, “Chebyosoni, keer weeriing'ung'!” 27 Koleenji anyun nooto agenge eng' kasubikyik, “Keer kamenng'ung'!” Ak kobooch sainooto komut ineendet chebyosonooto kwo koonnyi.
Meetap Jeso
28 Kingo pata chooto, ko kagonai Jeso kole kagogeskei tuguuk tugul, si kobiit kosulda siruutyet, komwa kole, “Ama melel.” 29 Kiga kinde yooto tereet ne nyiitaat siki: konyiit anyun sponjit siki ak koyogoochine husop, konde kutinnyi. 30 Ye kingo kagotaach Jeso siki, komwa kole, “Kagogeskei.” Ki abuch anyun metinnyi, ak kogoito saboondanyi.
Ketoore karaasta ne po Jeso
31 Amu ki Chobeet ak ki ma kemakyin muuswek kotebee kimurtoiyot eng' sabato (amu ki oo peetuunooto po sabato), kosoom Yahudik Pilato kole keiri keelyekwak, si kesutei. 32 Kobwa anyun kiplugotinik, ak koiri keelyegap ne po tai, ak ne po age ne kiga kigartaat kobooto ineendet. 33 Ago ye kingo pwa ye mi Jeso, ak kogeer kole kagome, ko mata koiri keelyekyik: 34 ago kitoore ng'otit karaastanyi age eng' kiplugotinik, ak koma tyanit komong' korotiik ak peek. 35 Ak kibaoryan ineendet ne ki keer, ak ko po iman paornatennyi: ak ingen ineendet kole mwaei iman, si kobiit oyan ak okweek. 36 Ki yaak tuguuchu, si kobiit kosulda siruutyet ne ki le, “Ma ki iriei kowennyi.” 37 Ak kogeny mwaei siruutyet age kole, “Tuun keerei icheek ineendet ne kitoorei.”
Tubeetap Jeso
38 Ak kingo pata tuguuchu, kwo Joseph ne po Arimatea, ne ki agenge eng' kasubigap Jeso eng' ung'oot, amu ki iywei Yahudik, kosoom Pilato kole kosut muustap Jeso: ak ki chamji Pilato. Konyo anyun koip poortanyi. 39 Ak ki nyo agine Nikodemo, ne ki nyoonji Jeso kemoi atkinye tai, koibu tuguuk che uu igomoik che ki kiburukto nyamdutik alak, che ki olo po ratilisyek pogol. 40 Kisut anyun muustap Jeso, ak kotaa eng' ngoroik che po katanit kobooto nyamdutik, ko uu piteetap Yahudik ye tubisyei. 41 Ki mi mbareet ole ki kigartate ineendet; ak ki mi mbaranooto kererit ne leel ne kitom ketupchi chii. 42 Ki inde anyun Jeso olooto amu peetuutap chobetap Yahudik, amu ki neegit kererit.
Kererit ne ki ma komi kiy
1 Ki nyo `Maria Magdalene kererit, karon ko kairir emet, eng' peetuut ne po tai ne po wigiit. Kogeer koita ko kageisto eng' kererit. 2 Kolabat kot koit ole mi Simion Petero, ak nooto agenge eng' kasubik, ne ki chamei Jeso ineendet ak koleenji icheek, “Kageip Kiptaiyat eng' kererit, ama kingen ole kaginde.” 3 Koba anyun Petero, ak nin agenge eng' kasubik, kotokyigei kererit. 4 Ki rwai tuwai kibagenge: ak kilabat nin agenge eng' kasubik kondoe Petero, ak kosip koit kererit; 5 ak kingo ng'uruuk kogeer oriit, kogeer ngoroigap katanit ko itootin; ago ma wo oriit. 6 Konyo anyun Simion Petero agine, kosubu ineendet ak kwo kererit oriit; ak kogeer ngoroik che po katanit ko itootin; 7 ago angeet ne ki miitei metinnyi ko ki ma komi, kobooto ngoroik che po katanit, ago ki mamanat ineegei eng' oldo age. 8 Ki wo oriit agine nooto agenge eng' kasubik ne kiga sip koit kererit, ak ki keer ak ki iyan. 9 Amu kitom konai siruutyet ne ki le, ng'eetei kogeny matiny eng' che ki pek. 10 Koba kaa anyun kogeny chooto po kasubik.
Koboorchingei `Jeso Maria Magdalene
11 Ago ki tononi Maria eng' kererit saang', koriirei: ak ye kita koriirei, kong'uruuk koiit kererit; 12 ak ki keer malaikaisyek aeng' che leelach ngoroik kotebyei ng'wony, age eng' ole po metit, ak age eng' ole po keelyek, eng' ole ki mi poortap Jeso. 13 Ak ki leenji, “Kobogoryondoni, kalya si iriir?” Koleenji, “Amu kageip Kiptaiyandennyu, amangen ole kaginde ineendet.” 14 Ak ye kingo kagomwa ko uu nooto, kowelelgei, kogeer Jeso kotononi, ama konai kole Jeso nooto. 15 Koleenji Jeso, Kobogoryondoni, kalya si iriir? Icheeng'e ng'oo? Ki ibwaati koleen ineendet ko riibindetap mbareet, ak koleenji, “Kiptaiyat, ngo keip ineendet, imwaiwo ole kainde, si aip ineendet.” 16 Kotwekyi `Jeso inee kole, “Maria!” Koguskong' ak koleenji eng' kutitap Yahudik, “Rabboni!” Ye kiweech ko, “Kaneetindoni.” 17 Koleenji Jeso, “Ametiinyo; amu tomo atogosyi kap Kwanda; ago ui ole mi tupchosyekyuk, ak ki leenji, ‘Atogosyini kap Abba, ago Abba neng'wong', Kamuktaindennyu ak ko Kamuktaindeng'wong'.’ ” 18 Konyo Maria Magdalene koleenji kasubik, “Kaageer Kiptaiyat”; ak kagomwachi tuguuchu ineendet.
Koboorchingei `Jeso kasubik
19 Ak ki eng' koskoleng'utap peetuunooto po tai ne po wigiit, ye kiga keger kurgotik eng' ole kimi kasubik, amu ki iywei Yahudik, konyo Jeso kotonone kwenunnywa ak koleenji, “Ingotep kaalyeet eng' okweek.” 20 Ak ye kingo kagomwa niito, koboorchi eunekyik ak karaastanyi. Koboiboitu anyun kasubik, ye kingo keer Kiptaiyat. 21 Koleenji Jeso anyun kogeny, “Ingotep kaalyeet eng' okweek: ko uu ye ki iyookwo Kwanda, ayooktook ak okweek ko uu nooto.” 22 Ak ye kingo kagomwa niito, kobusyi, ak koleenji, “Otaach Kabuuset ne Tiliil: 23 piik alak tugul che onyochini kaat tengekwogikwak, kenyochin kaat; ak alak tugul che oesyoi onyochi kaat, keesyoi kenyochi kaat.”
Koboorchingei `Jeso Thomas
24 Ago ki ma komi Thomas ne ki kiguure Didumo, ne ki age eng' taman ak aeng', kobooto icheek ye kinyonei Jeso. 25 Koleenji anyun chuun alage che po kasubik, Kagegeer Kiptaiyat. Ago ki leenji Thomas icheek, Ngot ko mageer eng' eunekyik perutik che po kipchumarisyek, ak ande mornennyu perutigap kipchumarisyek, ak ande eunnyu karaastanyi, ko mayani. 26 Ak kingo pata peetuusyek sisiitu ko ki mi ko kasubikyik kogeny, ak kimi Thomas kobooto icheek. Ki nyo anyun Jeso, ko kerotin kurgotik, ak kotonon eng' kwenunnywa, ak komwa kole, “Ingotep kaalyeet eng' okweek.” 27 Koleenji Thomas, Iyogou morneng'ung', ak igeer eunekyuk; ak iyogou eung'ung' ak inde karaastanyu; si meegu ne ma tinyei kayaneet, ago iyan. 28 Kowolji Thomas koleenji, “Kiptaiyandennyu ak ko Kamuktaindet nenyu!” 29 Koleenji `Jeso ineendet, “Kaiyan amu kaigeera: iberuurotin icheek che iyani ama keer.”
Kiit ne tokyingei logoiywechu ko uu ole keertoi Johana
30 Ki yai Jeso kaboorunoik alak che chaang' eng' taitap kasubik che ma siraatiin eng' bukuini: 31 ago ki kisir chu, si kobiit oyan ole Jeso ko Kristo, Weeriitap Kamuktaindet; ak si kobiit ye oyani onyooru saboondo eng' kainennyi.
Koboorchingei kasubik tisap
1 Kingo pata tuguuchu koboorchigei Jeso kogeny kasubik eng' araraita ne po Tiberia; ki iboorchigei ko uu ni. 2 Ki mi tugul, Simion Petero ak Thomas ne kiguure Didumo, ak Nathanael ne po Kana ne po Galilaya, ak weeriigap Zebedayo, ak aeng' alak che po kasubikyik. 3 Koleenji Simion Petero, Kawe aram njireenik. Koleenji chuun alage, Kibendi agacheek kobooten. Koba anyun ak kolaany moingetap peek: ak ma nam kiy kemounooto. 4 Ago ye kimachei koeech, kotonon Jeso eng' ngeguut: ago ma nai kasubik kole Jeso. 5 Koleenji Jeso anyun, Lagochu, otinye kiy ne oame? Kowolji koleenji, Achicha. 6 Ak ki leenji icheek, Owiirchi regereiywot ne kiname njireenik komostap tai ne po moinget, si onyooru. Kowiirchi anyun, ak mata komuuch kochuut amu chaang'indap njireenik. 7 Komwachi agenge eng' kasubik, nooto ne chamei Jeso, Petero, koleenji, “Kiptaiyat niito!” Ye kingo kas anyun Simion Petero kole Kiptaiyat, kolaach kotit anyun (amu kimi aach ngor) ak kochoorchigei araraita. 8 Ago ki pwa chuun alage che po kasubik kobunu moinget ne ming'in (amu ki ma ko looen eng' ngeguut, ago ki olo po kakwautik che po euut pogol aeng'), kochuutu regereiywondonooto mi njireenik. 9 Nooto anyun, ye kingo it ngeguut, kogeer eng' yooto maat ne po nesek, ak kiwatanat njiryot eng' yooto, ak magatyat. 10 Koleenji Jeso, Oibu njireenik alak chu korame nguno. 11 Kolaany Simion Petero moinget, ak kochuut regereiywot konyo ngeguut, ak ki nyiitaat njireenik che eecheen, pogol agenge ak konom ak somok: ak nganda ki chaang' njireenik miising', ko ki ma kerer regereiywondonooto. 12 Koleenji `Jeso icheek, “Obwa oamisye.” Ma kany age tugul eng' kasubik koteebe kole, “Ii ng'oo?” Amu ki ingen kole ineendet ko Kiptaiyat. 13 Konyo anyun Jeso ak konam magatyat, ak kogoochi, kobooto njireenik ak icheek. 14 Niito ko ne po somok koboorchingei Jeso kasubik, ko kagong'eet ineendet komong' eng' che ki pek.
Jeso ak Petero
15 Ye kingo kagoamis anyun, koleenji `Jeso Simion Petero, “Simion, weeriitap Johana, tos ichama kosiir chu?” Koleenji ineendet, “Ee, Kiptaiyat, ingen ile achamin.” Koleenji, “Pai aarekyuk.” 16 Koleenji kogeny ne po aeng', “Simion, weeriitap Johana, ichama?” Koleenji, “Ee, Kiptaiyat, ingen ile achamin.” Koleenji, “Iyage keechiirekyuk.” 17 Koleenji ne po somok, “Simion, weeriitap Johana, ichama?” Koaragen Petero amu kamwachi ne po somok, koleenji, “Ichama?” Ak koleenji, “Kiptaiyat, ingen tuguuk tugul; ingen ile achamin.” Koleenji `Jeso ineendet, “Pai keechiirekyuk. 18 Amwaun, iman, iman, ale, ye kita ko ii ming'in, ko ki ilaaksechinigei, ak iwendi ole imache; ago ye tuun ioositu, iitoi euneguk, ak kolaakseun age, ak komutin ole memache.” 19 Kimwa niito koboortoi ole teptoi meet ne itorooree Kamuktaindet. Ak ye kingo kagomwa niito, koleenji, “Isubwo.”
Jeso ak kasubindet ne ki chamei
20 Kowelelgei Petero, kogeer kasubindet ne ki chamei Jeso kosubi; ne kitiegei tegetap Jeso eng' amisyetap lagat, ak koleenji, “Kiptaiyat, ng'oo ineendet ne ng'wektoin?” 21 Kingo keer Petero ineendet, koleenji Jeso, Kiptaiyat, lyon chiichi? 22 Koleenji Jeso, Ngot amach kotebi agoi tuun anyo, image nee? Isubwo inyee. 23 Kiyom anyun ng'olyoondoni tupchosyek, kole ma meei chiichooto agenge eng' kasubik: ago ki ma mwachi Jeso ineendet, koleenji, “Ma meei” ago ki leenji, “Ngot amach kotebi agoi tuun anyo, image nee?” 24 Ni anyun ko kasubindet ne paoryanjin tuguuchu, ak ne ki sirei tuguuchuuto ak kingen keele po iman paornatennyi.
Ng'aleek che po let
25 Ak mi kogeny tuguuk alak che chaang' che ki yai Jeso, che, nda kisirei age tugul, aleen ta mayamei ng'wony bukuisyek che kata kisirchin.