1 Nà cetáma, Wɛmá de yɔ̀ɔ péépu-dà. Ye Wɛmá de péé-nà Weèdi-dà è yòǹ Weèdi. 2 Mà de péé-nà Weèdi-dà nà cetáma. 3 Weèdi de héè kà mɛmá-dà é pa̰á̰ niìi wɛǹni. Yècḭ́ḭ̀ kɔ́ɔ́ mìì péé-sà wɛnnì kà p'èè pa̰à̰ kà mà kɔ́ɔ́. 4 Ma mɛhɛká-dà fòùmu de péé-ma, k'yèe fòùmu mɛ̀ɛ kɔ̰́nì nìpa wenikú. 5 K'yèe wenikú tìi fa̰ṵ yḭ́ḭ̀pu mɛhɛká, yḭ́ḭ̀pu mɛ̀ɛ pú nɛɛ̀ é kù kɔ̀ù. 6 Kà Weèdi é tɔn-ní nìdo kà p'òò toò Ìsá̰à̰ 7 K'ó tɛ̀ni è yòǹ pṵ́táko è kó caka wenikú wɛmá k'yé teha kà nìpa wɛǹni é n'dań ku hḭ́ǹka n'ɔ̀ɔ̀ de cakú-sa kpɛ́mú. 8 O mɔ́nń de pú yòǹ wenikú, àmá ò de tɛ̀ni è kó caka wenikú wɛmá-dà. 9 Ye kú wenikú-dà de yòǹ wenikú mɔ́nkú, mɛ̀ǹkù tɛ̀ni-kú-ní fòùku mɛhɛká è kó wekàna nìpa wɛǹni. 10 Ye Wɛmá mɛ̀mà de yòǹ-ma nìdo de péé-ma fòùku mɛhɛká. Weèdi pa̰à̰ fòùku nà mɛmá-dà, nà mɛma nìpa pú mà bantà. 11 Kà má tɛ̀ni ma kpɛ́ɛpá pesá, ma kpɛ́ɛpá pú mà tà̰ǹtà. 12 Àmá, kà pàcɔ̰́ é mà tà̰ǹta, è mà dań, kà má pà kɔ̰́ɔ̰́ nɔɔ̀ti kà pá hḭn Weèdi bííhí. 13 Pà pú hḭn Weèdi bííhí é n'yònà nìdo hɔ̰́ hḭmpú é pɛdá bííhí kà hí n'yòǹ o bííhí, àmá Weèdi-dà héè kà pá hḭn ni bííhí. 14 K'yèe Wɛmá hḭn nìdo é de tɛ̀ni è péé ti cɔhàka è káá pa̰á̰suumá sàma, è toó wɛbeèdi. Ti dɛ́hà-á-ma wɛhimú Weèdi kɔ̰́ɔ̰̀-mu ni bínàǹcɔ̰́. 15 Ìsá̰à̰ de wɛdà-á-ma o wɛmá, ò de dedí kpeéma è yɔ̀: N de nɛ wɛì-ko kú wɛmá, n de tonà tḭ́ń wɔ̀ni: Mɛ̀ǹǹ pení-ko-ní n dàhàka n ha̰tà-á-ma, mìì tee-sá, ò de yɔ̀ɔ péépu-dà kà pá nɛɛ́ n pɛdá. 16 O kú pesá-dà pa̰á̰suumá wɛǹni tṵnì-ma-ní ma tɔɔ̀ma è yɛ̀hu-ní, kà ti mà dɛ́ɛ́kú. 17 Weèdi ti kɔ̰́ɔ̰̀-ní ni kpɛ̰́ńdìnùka nà Mɔ̀yísì-dà, àmá ni pa̰á̰suumá nà ni wɛbeèdi, Sèsí-Kídísì-d'èè ti tɛɛ̀-ní. 18 Òcɔ̰́ǹ pú dɛ́hà Weèdi daadí yènì. Àmá ni bínàǹcɔ̰́ mɛ̀ǹǹ yòǹ-ko Weèdi, è péé-ní Báàa pesá-dà nì ti bahìnà. 19 Kà Sùwífùpa kpɛ̰́m̀ma é tɔn-ní nà Sèdìsàdɛ́m̀, dɔ̀hàka yam̀ma nà Dèfítìpa è yɔ̀ pá tɛ̀ni béka Ìsá̰à̰ ò yòǹ-ko. Ǹtɛ ò de pà tɛ̰́ńkáàma: 20 Ò de pú pà sɔ̀nà yècḭ́ḭ̀, àmá ò de pà cakáà-á-ma pópóí è yɔ̀: N pú yòǹ Kídísì. 21 Kà p'óò béka è yɔ̀: Aá yòǹ wodà? A yòǹ Èdíì-dà? K'ó pà tɛ̰́ná è yɔ̀: Ṵ́ṵ̀, n pú yòǹ Èdíì. Kà pà yɔ̀: A yòǹ Weèdi wɛtɛ̰́náko ti ceí-ko-dà? K'ò yɔ̀: Ṵ́ṵ̀. 22 Ye wɔ̀ni kà pà yɔ̀: Aá yòǹ wodà? Ti caka-ní kà tí taá dɛ́há ti kó caka-sá mɛ̀m̀pà ti tɔn-pá-ní. Fɔ̰́ń tonà a yòǹ wodà? 23 K'ó pà tɛ̰́ná è yɔ̀: N kú wɛmá-dà Weèdi wɛtɛ̰́náko Ìsàyíì de wɛdà-ma è yɔ̀: N yòǹ mɛ̀ǹǹ kpákádí-ko-dà càwenkú mɛhɛká è toò: Dɔ̀hà-nà Teó cɔ̀ku. 24 Pà de tɔn-pá-ní Ìsá̰à̰ pesá, pa mɛhɛká Fàdísìpa de péé-ma. 25 Kà p'óò béka è yɔ̀: K'à pú yòǹ Kídísì, yoo Èdíì, yoo Weèdi wɛtɛ̰́náko ti ceí-ko, badà há̰ tee k'à cómù nìpa? 26 Kà Ìsá̰-Bàtísì é pà tɛ̰́ná è yɔ̀: Mmí n nɛ cómù nà nɛ́ɛmá-dà. Àmá, òcɔ̰́ǹ péé-ma nɛ cɔhàkà kà nɛ p'óò yá̰á̰. 27 Ò pení-ma-ní n dàhàka, bá n pú sànà n kó dákádá-ma o nɛ̀ùti nawɔ̰̀ǹci. 28 Mii kú wɛnnì de pa̰kú Bètàníì yɔtí-dà, Sùùtɛ̰́ɛ̰̀ kóńsóìdi tɔɔ̀di Ìsá̰à̰ de cómù-sa nìpa. 29 K'yé weka, kà Ìsá̰à̰ é dɛ́há Sèsíì k'ò pení. K'ò yɔ̀: Ǹtɛ Weèdi hɔ̰ɔ̰̀bíidí mɛ̀nì dèù-di nìku sḭ̀ḭ̀ma. 30 Mɛnń kú wɛmá-dà n de wɛdà-ma è yɔ̀: Nìdo òcɔ̰́ǹ pení n dàhàka è n ha̰tà, mìì tee-sá ò de yɔ̀ɔ péépu-dà kà pá nɛɛ́ é n pɛdá. 31 N mɔ́nń de p'óò yá̰á̰, àmá n tɛ̀ni è cómù nìpa nà nɛ́ɛmá è kpɛ̀i óò bahìna Ìsìdàyɛ́dì nìku-dà. 32 K'ó tṵ́má wɛdá o hḭ́ǹka è yɔ̀: N dɛ́hà kà Weèdi Sèdi-dà é cútá-ní nà hḭ́ǹka è yònà pàǹdɔ̀di é tɛ̀ni cɔ̰mú o hḭ́ǹka. 33 Mmí, n de p'óò yá̰á̰, àmá mɛ̀ǹǹ n tɔn-kó-ní è yɔ̀ n ní n'cómù nìpa nà nɛ́ɛmá n cakáà è yɔ̀: A kó dɛ́há kà Weèdi Sèdi é cútá-ní é tɛ̀ni cɔ̰mú-ko kú hḭ́ǹka, mɛnń-dà kó cóńtá nìpa nà Weèdi Sèdi. 34 N dɛ́hà-sa-dà nà n nɔ̀ǹci è mɛ̀ɛ nɛ cakú è yɔ̀ ò yòǹ Weèdi bíitá-dà. 35 K'yé weka, kà Ìsá̰à̰ é tṵ́má tóní ò wontà péé-sa è nɔɔ̀nà o dapàm̀ma pàdɛ́ɛ́. 36 K'ó dɛ́há Sèsíì k'ò kɛ̰hɛdi, k'ò yɔ̀: Ǹtɛ Weèdi Hɔ̰ɔ̰̀bíidí. 37 Y'oo dapàm̀ma padɛ́ɛ̀ka yeèkaà-ma k'ò yɔ̀ mɛma, kà pá yídá tṵṵ̀na Sèsíì. 38 Kà Sèsíì é fitá-ní é n'hɔ̰́tà p'òò tṵ̀n, k'ó pà béka è yɔ̀: Nɛ pɛnti ba? Kà p'óò tɛ̰́ná è yɔ̀: A hɔ̰́ɔ̰̀ta péé ya Hàdábí? Ye yèdì kpɛ̀i é n'yɔ̀ dakpɛ̰́ǹn-dà. 39 K'ó pà tɛ̰́ná è yɔ̀: Ya̰ní-nà-ní é dɛ́há. Kà pá ka̰há é tɛ̀i dɛ́há o hɔ̰́ɔ̰̀ta, é cá̰ńtá o pesá é dehà weǹtṵ́ṵní. Yè de hɔ̰́tà wɔ̀ni mànàhì kpɛ́ɛmá-dà podì yohokú. 40 Ye nìi pàdɛ́ɛ́ mɛ̀m̀pà de yeèkaà-pa Ìsá̰à̰ wɛmá é tṵṵ̀na Sèsíì, p'oòcɔ̰́ kú yèdi-dà de dɛɛ̀ À̰ǹtìdéè, Sìmɔ́ɔ̀ Píyɛ́ɛ̀ kúcàa. 41 À̰ǹtìdéè de cedí é peèta-nà o kúcàa Sìmɔ́ɔ̀-dà óò caka è yɔ̀: Ti dɛ́hà-á-ma Weèdi ta̰kadáko. Ye yèdì kpɛ̀i é n'yɔ̀ Kídísì-dà. 42 K'óò tanà Sèsíì pesá é tɛ̀i kà Sèsíì óò wáńtá è yɔ̀: A yèdi-dà Sìmɔ́ɔ̀, Ìsá̰à̰ bíitá. Pà kó nà n'yún sá̰mà-ní Sèfásì-dà, mìì kpɛ̀i n'yɔ̀-sa tá̰à̰di. 43 K'yé weka, kà Sèsíì é n'kpɛ̀i taá Kàdìdéè tempáàku mɛhɛká é peèta-nà Fìdípù, óò caka è yɔ̀: N tṵṵ̀na-ní! 44 Fìdípù de yòǹ Bɛ̀tìsàìdáà yɔtí kóoó-dà é n'yònà À̰ǹtìdéè nà Píyɛ́ɛ̀. 45 Ye kú dàhàka, kà Fìdípù é peèta-nà Nàtànàyɛ́dì, óò caka è yɔ̀: Ti dɛ́hà-á-ma Mɔ̀yísì de wɛdà-ko kú wɛmá kpɛ̰́ńdìnùka pɔ̀kàta mɛhɛká, kà Weèdi wɛtɛ̰́nápa mɛ̀ɛ té de wɛdá o wɛmá pa pɔ̀kàhi mɛhɛká. Mɛnń-dà Sèsíì Nàsàdɛ́tì kóoó, Sòsɛ́fù bíitá. 46 Kà Nàtànàyɛ́dì óò béka è yɔ̀: Suusá yècḭ́ḭ̀ kó nɛɛ́-dà é yɛɛ̀ni nà Nàsàdɛ́tì? Kà Fìdípù óò tɛ̰́ná è yɔ̀: Ya̰ní dɛ́há. 47 Kà Sèsíì é dɛ́há kà Nàtànàyɛ́dì pení o pesá, k'ó wɛdá o wɛmá è yɔ̀: Ǹtɛ Ìsìdàyɛ́dì bíitá mɔ́ntá kà nuǹhetí kɔ́ɔ́ ta mɛhɛká. 48 Kà Nàtànàyɛ́dì óò béka è yɔ̀: Ntɛ́ a hḭmà è n yá̰á̰? Kà Sèsíì óò tɛ̰́ná è yɔ̀: M'a dɛ́hà-á-ma k'à kàdi ka̰nka̰mú fɔ̰̀di kà Fìdípù é nɛɛ́ áa yíí. 49 Kà Nàtànàyɛ́dì óò caka è yɔ̀: Dakpɛ̰́ǹn, a yòǹ Weèdi bíitá-dà, Ìsìdàyɛ́dìpa wódo. 50 Kà Sèsíì óò tɛ̰́ná è yɔ̀: M'a cakáà-pu kpɛ́mú è yɔ̀ m'a dɛ́hà ka̰nka̰mú fɔ̰̀di-dà tee k'à dań nkɛ́ɛ̀? A kó dɛ́há-ma niìya̰ sàsa k'yè wɛhi-nà miì. 51 K'ò tṵ́mà yɔ̀: N nɛ cakú bemú-dà, nɛ kó dɛ́há-ma kà hḭ́ǹka é kpetá, kà Weèdi tɔntɔndipá dikù è cúúkú-ní Niìfòùo bíitá hḭ́ǹka.
1 Data̰á̰di daadí, kà pá m'pa̰kú potóóma Kánà yɔtí Kàdìdéè tempáàku mɛhɛká, kà Sèsíì màa yè péé. 2 Kà pà mɛ̀ɛ té yíí Sèsíì n'ɔ̀ɔ dapàm̀ma ye potóóma. 3 K'yé m'pení pení, kà naàma é dóńtá, kà Sèsíì màa óò caka è yɔ̀: Pà koò pú kaá-nà naàma. 4 K'óò tɛ̰́ná è yɔ̀: N màà, fɔ̰́ń-dà kó n caka n kó pa̰á̰-sa? N wɔ̀ni mun pú tɛ̀i. 5 Ye wɔ̀ni, k'òo màa é caka ye potóóma dehèpa è yɔ̀: Pa̰á̰-nà ò kó nɛ caka-sá wɛǹni. 6 È hɔ̰́tà tá̰à̰ka yúùka kàkɔ̀dì péé ye pesá. Ka kú mɛhɛká-dà, Sùwífùpa de hɔ̰́ pa̰á̰-ma nɛ́ɛmá é m'pa̰kú-nà pa wekànamá kákamú. Yúúdi bá mɛ̀nì dɛ̀ɛ̀-di de kó nɛɛ́ ta̰ǹta-á-ma dítídìpa kɔ̀ta kpɛ́ɛmá. 7 Kà Sèsíì é caka ye dehèpa è yɔ̀: Sṵ́ná-nà ye yúùkà nɛ́ɛmá. Kà pá kà sṵ́ná háá nà ka nùka. 8 K'ó pà caka è yɔ̀: Ya̰ntá-nà sá̰mà ye nɛ́ɛ́mà cɛ̰́ma, é taá kɔ̰́ɔ̰́ potóóma dehèpa kpɛ̰́ǹn k'ó dɛmpa. Kà pá mà ya̰ntá é taá ò kɔ̰́ɔ̰́. 9 K'ó dɛmpa ye nɛ́ɛmá é n'hɔ̰́tà mà cèhènà é hḭn naàma. Ò de pú yá̰á̰ ye kú naàma yɛ̀ni-sá-ní, àmá dehèpa mɛ̀m̀pà de yúéí-pa ye nɛ́ɛmá, mɛmpa de yá̰á̰-ma mà yɛ̀ni-sá-ní. K'ó yíí ye podɔɔ̀o, 10 óò caka è yɔ̀: Nìi wɛǹni hɔ̰́ dɛnà é kɔ̰́ɔ̰́ cà̰m̀ma naànaamá-dà. Kà pà nìì tḭ́ń wɔ̀ni è dɛǹ, k'òá nɛɛ́ deèna-ní mɛ̀mà pú naa-má. Kà fɔ̰́ń há̰ hḭ́ná naànaamá háá wɔ̀nì mɛnì! 11 Ye kú pɔ́ńdápa̰á̰mà-dà Sèsíì de pa̰à̰-ma Kánà yɔtí, Kàdìdéè tempáàku mɛhɛká, kà mà yòǹ o yḭdó cecedó. Ò de ò pa̰nà è kó bɛka o wɛhimú sá̰á̰pu-dà, k'òo dapàm̀ma é taàa pa dandaní o hḭ́ǹka. 12 Ye kú dàhàka, k'ó sḭ́ńtá Kàpɛ̀ɛ̀nàúm̀ yɔtí n'ɔ̀ɔ màa, n'ɔ̀ɔ kúcàpa, é pɛ́ɛ́-n'ɔ̀ɔ dapàm̀ma, kà pá tɛ̀i é pa̰á̰ ye pesá daàka cɛ̰́ma. 13 Sùwífùpa kúúdi pà toò-di Núǹdiyɛ̀ɛ̀ma kúúdi-dà de tɔ́sí, kà Sèsíì é póńtá Sèdìsàdɛ́m̀. 14 K'ó tɛ̀i é dúú Weèdi hɔ̰́ɔ̰̀ta mɛhɛká, é dɛ́há nìpa kà pà yɛdí nɛ̀ci, nà hɔ̰̀ci, nà pàǹdɔ̀ka. K'ó múńtá dɛ́há-nà díiceèdapá kà pà kàdi pa tábídìpa pesá. 15 Ye wɔ̀ni k'ó pa̰á̰ dáàfa nà wɛ̰̀ci, é pà bɔ̀hà pa wɛǹni, é pà dèna ye Weèdi hɔ̰́ɔ̰̀ta mɛhɛká, nà pa hɔ̰̀ci nà pa nɛ̀ci. K'ó wé-wétá díiceèdapá tábídìpa, kà pa dící é ya-yahí teǹka. 16 K'ó yídá caka pàǹdɔ̀yɛdàpa è yɔ̀: Tóó-nà miì kú wɛnnì éè dèna. Nɛ dá kpáhìna n Báà hɔ̰́ɔ̰̀ta kààdi. 17 K'òo dapàm̀ma é deǹta-ní wɛmá pà wà̰tà-ma Weèdi pɔ̀kàta mɛhɛká è yɔ̀: Dɔ́kàma n káá-ma a hɔ̰́ɔ̰̀ta hḭ́ǹka-dà n hɔdà. 18 Ye wɔ̀ni, kà Sùwífùpa kpɛ̰́m̀ma óò béka è yɔ̀: Yḭdó wodà a kó pa̰á̰-ma é ti bɛka è yɔ̀, p'àà pɛ̰ḭ-ḭ́-dà nùdi è yɔ̀ á m'pa̰kú a pa̰à̰-sà? 19 Kà Sèsíì é pà tɛ̰́ná è yɔ̀: Pɔ́dá-nà Weèdi hɔ̰́ɔ̰́tà mɛntà, daàa kàta̰a̰ mɛhɛká, n kó tà maá-ma. 20 Kà p'óò tɛ̰́ná è yɔ̀: Beeká púnàhì nà kàkɔ̀ɔ̀-dà pà pa̰à̰-ma é nɛɛ́ madí ye Weedì hɔ̰́ɔ̰́tà mɛntà, kà fɔ̰́ń há̰ kó pa̰á̰ daàa kàta̰a̰ é tà madí? 21 Ò há̰ de wɛì-ta Weèdi hɔ̰́ɔ̰̀ta de héé o wɔ̰̀ǹku-dà. 22 Sèsíì yá̰ńdáma dàhàka, k'òo dapàm̀ma é deǹta-ní è yɔ̀ ò de yè wɛdà-ho. Ye wɔ̀ni, kà pá taàa dandaní pà wà̰tà-sa Weèdi pɔ̀kàta mɛhɛká, nà wɛmá ò de wɛdà-ma. 23 Sèsíì de péé Sèdìsàdɛ́m̀-dà ye Núǹdiyɛ̀ɛ̀ma kúúdi daàka mɛhɛká. Kà nìpa dɔ́ɔ́di é dɛ́há pɔ́ńdápa̰á̰ma ò de pa̰kú-ma, é taàa pa dandaní o hḭ́ǹka. 24 Àmá Sèsíì de pú pà dań, mìì tee-sá ò de yá̰á̰-ma dɛ́dɛ́í pa wɛǹni yòm̀pu. 25 Ò de pú békú p'óò caka yècḭ́ḭ̀ nìpa hḭ́ǹka, mìì tee-sá o mɔ́nń de yá̰á̰-ma mìì péé-sa nìdo yàma mɛhɛká.
1 Dɔɔ̀o òcɔ̰́ǹ-dà de péé Fàdísìpa mɛhɛká è yòǹ Sùwífùpa kpɛ̰́ǹn òcɔ̰́, kà p'òò toò Nìkòdɛ́m̀. 2 K'ó tɛ̀ni Sèsíì pesá yèǹka kàcɔ̰́kà óò caka è yɔ̀: Dakpɛ̰́ǹn, ti yá̰á̰-ma è yɔ̀ Weèdi a tɔn-ní è yɔ̀ á ti biɔhàna, mìì tee-sá, òcɔ̰́ǹ pú kó nɛɛ́ pa̰á̰ yḭḭ́pà a pa̰kú-pà kà pà yon nìpa kà Weèdi p'óò péé-nà. 3 Kà Sèsíì óò tɛ̰́ná è yɔ̀: Wɛbemú-dà m'a cakú-ma, òcɔ̰́ǹ pú kó nɛɛ́ dɛ́há Weèdi wóòti kà pà p'óò pɛdà pààma. 4 Kà Nìkòdɛ́m̀ óò béka è yɔ̀: Ntɛ́ pà kó hḭmà é tṵ́má pɛdá nìdo mɛ̀ǹǹ kpɛ̰́ń-ko? Ò kó nɛɛ́ é tṵ́má tón-ń-dà o màà pɛutí mɛhɛká k'óò pɛdá dɛ́ɛ̀ma? 5 Kà Sèsíì óò tɛ̰́ná è yɔ̀: Wɛbemú-dà m'a cakú-ma, kà pà pú pɛdà nìdo nà nɛ́ɛmá nà Weèdi Sèdi, ò pú kó nɛɛ́ dúú Weèdi wóòti mɛhɛká. 6 Nìdo pɛdà-ko yòǹ nìi-dà, Weèdi Sèdi mɛ̀ɛ pɛdà-ko yòǹ Weèdi Sèdi kóoó-dà. 7 Yè d'áa dii nà m'a cakáà-ma è yɔ̀ nɛ yònà pá nɛ pɛdá pààma-dà. 8 Yakú heu kù kpɛ̀i-ká bɛ́ka-dà. A hɔ̰́ n'you ku nampàta-dà, a há̰ pú yá̰á̰ kù yɛ̀ni-sá-ní yoo kù yòǹ-kà bɛ́ka. Ma cɔ̰́ɔ̰̀di-dà nà nìpa pà pɛdà-pa nà Weèdi Sèdi. 9 Ye wɔ̀ni, kà Nìkòdɛ́m̀ óò béka è yɔ̀: Ntɛ́ ye kú niì kó nɛɛ́ hḭmà é pa̰ná? 10 Kà Sèsíì óò tɛ̰́ná è yɔ̀: Fɔ̰́ń-dà baà yòǹ Weèdi kpɛ̰́ńdìnùka biɔhànakó kpɛ̰́ǹn kà p'àà yá̰á̰ Ìsìdàyɛ́dì nìku mɛhɛká, k'àá pú yá̰á̰ ye kú niiyà̰? 11 Wɛbemú-dà m'a cakú-ma, ti wɛì ti yá̰á̰-sa-dà, è nɛ cakú ti dɛ́hà-sa. Àmá nɛ pú kpɛ̀i é teha ti wɛmá. 12 Kà n nɛ wɛì-nà tenkà mɛnkà kú pa̰á̰ma wɛmá kà nɛ pú n dań, ntɛ́ nɛ kó hḭmà é nà n dań, n kó nɛ wɛɛ́-nà tḭ́ń wɔ̀ni hḭ́ǹka kú pa̰á̰ma wɛmá? 13 Òcɔ̰́ǹ pú dìsi hḭ́ǹka daadí yènì, Niìfòùo bíitá bààsí mɛ̀ǹtà cútà-ta-ní nà hḭ́ǹka. 14 Mɔ̀yísì de kpɛ̰́káà-ma kú bookú máabɛ́ǹti wàfa dɔkú hḭ́ǹka càwenkú mɛhɛká é fà cɔ́á, ma kú bookú-dà pà kó hḭmá Niìfòùo bíitá é tà cɔ́á, 15 k'yé teha kà mɛ̀ǹǹ kú wɛnnì tà dań-ko é dɛ́tá fòùmu mɛ̀mù bá yɔ̀ɔ-pú. 16 Weèdi dɔ́káà fòùku sàma-dà é kɔ̰́ɔ̰́-ní ni bínàǹcɔ̰́, k'yé teha kà mɛ̀ǹǹ nì dań-ko dá sèǹ, àmá k'ó dɛ́tá fòùmu mɛ̀mù bá yɔ̀ɔ-pú. 17 Weèdi pú tɔn-ní ni bíitá fòùku mɛhɛká è yɔ̀ tá kɔ̰́ɔ̰́ yetádi nìku, àmá nì tà tɔn-ní è yɔ̀ tá kù fḭ́hìna-á-ma. 18 Mɛ̀ǹǹ tà dań-ko Weèdi pú k'óò kɔ̰́ɔ̰́ yetádi, àmá mɛ̀ǹǹ pú tà dań-ko Weèdi ò yɔ̀ɔ kɔ̰́ɔ̰́pu-dà yetádi, mìì tee-sá ò pú dań Weèdi bínàǹcɔ̰́. 19 Ǹtɛ ye yetáma yɛɛ̀ni-sá-ní: Wenikú tɛ̀ni fòùku mɛhɛká, kà nìpa é kù yeda, é dɔ́ka yḭ́ḭ̀pu, mìì tee-sá pa pa̰á̰ma pú coó. 20 Mɛ̀ǹǹ kú wɛnnì pa̰kú-ko sḭ̀ḭ̀ma hɔ̰́ n'sɛ̰ɛ̰́-ma wenikú, ò mɛ̀ɛ pú pení ku mɛhɛká mìì tee-sá, ò wani o pa̰á̰kpákpààma kó fodá-ma-dà. 21 Àmá, mɛ̀ǹǹ fòù-ko wɛbeèdi mɛhɛká, ò hɔ̰́ tɛ̀ni-í-ma-ní wenikú mɛhɛká k'yé teha kà pá dɛ́há n'hɔ̰́tà o pa̰á̰ma bòn-nà Weèdi kpɛ̀kaàma. 22 Ye kú dàhàka, kà Sèsíì é tadí Sùdéè tempáàku mɛhɛká n'ɔ̀ɔ dapàm̀ma. K'ó pa̰á̰ daàka cɛ̰́ma ye pesá nà mɛmpá, k'ò cómù nìpa. 23 Kà Ìsá̰à̰ mɛ̀ɛ té péé Ènɔ́ɔ̀, è cómù nìpa è hɛ́dí-nà Sàdím̀ mìì tee-sá nɛ́ɛmá-dà de wɛhi ye pesá kà nìpa kɔ́dì-ní k'ò pà cómù. 24 Yè de hɔ̰́tà pà mun p'óò kpenà. 25 Daadí yènì, kà Ìsá̰à̰ dapàm̀ma pàcɔ̰́ é cetá nɔ̀nɔ̀hicí nà Sùwífù òcɔ̰́ǹ wekànamá kákamú hḭ́ǹka. 26 Kà pá tadí Ìsá̰à̰ pesá é tɛ̀i óò béka è yɔ̀: Dakpɛ̰́ǹn, a káà dèn dɔɔ̀o mɛ̀ǹǹ d'aa péé-nà-ko Sùùtɛ̰́ɛ̰̀ súéhèdi tɔɔ̀di, a de ti cakáà-ko kú wɛmá? Sá̰mà, ò cómù-ú-ma, kà nìpa wɛǹni kɔ́dì o pesá. 27 Kà Ìsá̰à̰ é pà tɛ̰́ná è yɔ̀: Òcɔ̰́ǹ pú kó nɛɛ́ é n'káá yècḭ́ḭ̀ kà Weèdi p'éè n'ɔ̀ɔ̀ kɔ̰́ɔ̰̀. 28 Nɛ mɔ́mpá, nɛ kó nɛɛ́ caka-á-ma pópóí è yɔ̀ n yɔ̀: N pú yòǹ Kídísì, àmá pà n nihìnà-ní, è yɔ̀ ń wɛdá o kpɛ́mú-dà. 29 Nìdo mɛ̀ǹǹ tóńkú-ko poòo-dà héé podɔɔ̀o, podɔɔ̀o dópo há̰ hɔ̰́ n'nɛɛ̀hi o fɔ̰̀di-dà òò besí, k'yè t'óò n'nadi n'ɔ̀ɔ̀ you-má o boòku. Ye kú yaǹnaakù-dà mɛ̀ɛ té n hɔdà dɛ́dɛ́í. 30 Yè békú mɛnń-dà é wɛhika, kà mmí é yakàda. 31 Mɛ̀ǹǹ péé-ko-ní nà hḭ́ǹka, mɛnń-dà wɛhi-nà niìya̰ wɛǹni. Mɛ̀ǹǹ péé-ko teǹka ò yòǹ tenkà kóoó-dà, ò mɛ̀ɛ hɔ̰́ n'wɛì tenkà kpɛ́ɛsá wɛmá-dà. Mɛ̀ǹǹ péé-ko-ní nà hḭ́ǹka, mɛnń-dà wɛhi-nà niìya̰ wɛǹni. 32 Mɛnn cakú ò yèkaà-sa-dà, n'ɔ̀ɔ̀ dɛ́hà-sa-ní Weèdi pesá, òcɔ̰́ǹ há̰ pú bekù ò cakú-sa. 33 Mɛ̀ǹǹ teháà-ko ò cakú-sa, ye yaǹn-dà bantà è yɔ̀ Weèdi cakú wɛbemú. 34 Weèdi tɔn-kó-ní, mɛnń-dà cakú ni wɛmá, mìì tee-sá Weèdi-d'òò sṵ́nà ni Sèdi pɛ́pɛ́í. 35 Báàa dɔ́sí-ma o bíitá é tà kɔ̰́ɔ̰́ nɔɔ̀ti niìya̰ wɛǹni hḭ́ǹka. 36 Mɛ̀ǹǹ dań-ko Weèdi bíitá, ò káá-ma fòùmu mɛ̀mù bá yɔ̀ɔ-pú. Mɛ̀ǹǹ mɛ̀ɛ pú tà you-nà-ko toòka, ò pú kó dɛ́tá ye fòùmù, Weèdi fɔ̰́ɔ̰́di mɛ̀ɛ kó m'péé-ma o hḭ́ǹka.
1 Kà Fàdísìpa é yekà è yɔ̀ nìpa mɛ̀m̀pà tṵ̀nì-pa Sèsíì k'ò pà cómù pa dɔ́ɔ́di ha̰tà Ìsá̰-Bàtísì kpɛ́ɛpá. 2 Wɛbemú hḭ́ǹka, Sèsíì mɔ́nń de pú cómù nìpa, o dapàm̀ma-dà de pà cómù. 3 Sèsíì yèkaà-ma kà pà wɛì mɛma, k'ó yídá Sùdéè tempáàku é tón Kàdìdéè kpɛ́ɛ́kú mɛhɛká. 4 K'ó nɛɛ́ yè ta̰ntá, yè békú ó deèta-á-ma Sàmàdíì tempáàku. 5 K'ó tɛ̀i Sàmàdíì yɔtí tìcɔ̰́tì kà pà tì toò Sìsáà, kà tì hɛ́dí-nà Sàkɔ́pù de pɛ̰ḭ-dí yɛ̀di o bíitá Sòsɛ́fù. 6 Ye pesá-dà Sàkɔ́pù bíńdadá péé-ma. Sèsíì de tɛ̀i ye pesá-dà kà cèmu ò wédà, k'ó kaàdi-ho ye bíńdadá bɛ́ɛ́kú. Yè de hɔ̰́tà wèǹku beé-nà yuùka hḭ́ǹka-dà. 7 Kà Sàmàdíì poòo òcɔ̰́ǹ é tɛ̀ni nɛ́ɛmá yúépu. Kà Sèsíì óò caka è yɔ̀: N pa̰a̰ nɛ́ɛmá ká n yà̰à̰. 8 Yè de hɔ̰́tà o dapàm̀ma tadí yɔtí mɛhɛká-dà è kó dontá-ní dimá. 9 K'yèe Sàmàdíì poòo óò béka è yɔ̀: Ntɛ́ yè hḭmà fɔ̰́ń Sùwífù, k'à n cɔ̀hu nɛ́ɛmá mmí Sàmàdíì kóoó è kó yà̰à̰? (Ò de hḭ́n mɛma, mìì tee-sá Sùwífùpa de pú tɔ́kànì Sàmàdíì kpɛ́ɛpá). 10 Kà Sèsíì óò tɛ̰́ná è yɔ̀: K'à de yá̰á̰ Weèdi pɔ̰n-sá, nà mɛ̀ǹǹ toò-ko: N pa̰a̰ nɛ́ɛmá ká n yà̰à̰, fɔ̰́ń-dà múńtà de kó mà n'ɔ̀ɔ̀ cɔ̀hà é yà̰à̰, k'óa pa̰a̰ nɛ́ɛmá mɛ̀mà kɔ̰́nì-ma fòùmu. 11 K'yèe poòo óò tɛ̰́ná è yɔ̀: Dakpɛ̰́ǹn, a pú káá dɔ̀kɔ̀waǹni, kà bíńdadá tṵ́mà cṵmpu. Ntɛ́ a kó hḭmà é nɛǹta nɛ́ɛmá mɛ̀mà kɔ̰́nì-ma fòùmu? 12 Ti yàdo Sàkɔ́pù-dà ti pɛ̰ḭ ye bíńdadà. O mɔ́nń niì-í-ma ta nɛ́ɛmá, n'ɔ̀ɔ bííhí, n'ɔ̀ɔ nɔtí. A maàhu è tonà a ò wɛhi-nà-á-dà? 13 K'óò tɛ̰́ná è yɔ̀: Nìdo mɛ̀ǹǹ kú wɛnnì kó yà̰à̰-ko ye nɛ́ɛ́mà mɛ̀mà, nɛ́yà̰hakú kó tṵ́má ò cɛ̰ɛ̰́-ma. 14 Àmá mɛ̀ǹǹ kó yà̰à̰-ko nɛ́ɛmá n k'óò kɔ̰́ɔ̰́-ma, nɛ́yà̰hakú koò pú k'óò cɛ̰ɛ̰́ daadí yènì, múńdìkaà nɛ́ɛmá n k'óò kɔ̰́ɔ̰́-ma kó kpáńtá bíńdadá-dà o mɛhɛká, kà fòùmu mɛ̀mù bá yɔ̀ɔ-pú éè n'wudì-ní. 15 K'yèe poòo óò caka è yɔ̀: Dakpɛ̰́ǹn, n pa̰a̰-ní ye kú nɛ́ɛmá k'yé teha kà nɛ́yà̰hakú koò dá n cɛ̰dí, kà n mɛ̀ɛ koò dá n'kɔ́dì-ní miì nɛ́ɛmá yúépu. 16 Kà Sèsíì óò caka è yɔ̀: Taá é yíí-ní a dɔɔ̀o kà nɛ́ tɛ̀ni. 17 K'yèe poòo óò tɛ̰́ná è yɔ̀: N pú káá dɔɔ̀o. Kà Sèsíì óò caka è yɔ̀: A hḭ́n-mà a pú káá dɔù, a naa-á-ma, 18 mìì tee-sá, a kádà daapá pànùm̀-dà. Dɔɔ̀o a péé-nà-kò sá̰mà pú yòǹ a dɔù. Mɔ́ma-dà a cakáà-ma. 19 Ye wɔ̀ni, k'yèe poòo óò caka è yɔ̀: Dakpɛ̰́ǹn, n dɛ́hà é n'hɔ̰́tà a yòǹ Weèdi wɛtɛ̰́náko-dà. 20 Ti yààpa Sàmàdíìpa dɔwáà Weèdi ta̰a̰dì mɛnì kú hḭ́ǹka-dà, àmá nɛ́na Sùwífùpa, kà nɛ yɔ̀ Sèdìsàdɛ́m̀-dà ti yònà é n'dɔń-ma Weèdi. 21 Kà Sèsíì óò tɛ̰́ná è yɔ̀: Teha n wɛmà mɛmà: Wɔ̀ni pení-ma-ní kà nɛ koò pú kó n'dɔń Báàa Weèdi ta̰a̰dì mɛnì kú hḭ́ǹka yoo Sèdìsàdɛ́m̀. 22 Nɛ́na Sàmàdíìpa, nɛ pú yá̰á̰ Weèdi nɛ dɔń-di. Tḭ́ńti Sùwífùpa, ti yá̰á̰-ma Weèdi ti dɔń-di, mìì tee-sá fḭ́hìnamá yɛɛ̀hu-ní Sùwífùpa pesá-dà. 23 Àmá wɔ̀ni pení-ma-ní, nì mɛ̀ɛ yɔ̀ɔ tɛ̀mpú-dà-ní, kà Weèdi Sèdi kó n'tempúnà weèdɔɔ̀pa mɔ́mpá, kà pá n'dɔń Báàa Weèdi yè békú p'óò n'dɔnkúma, mìì tee-sá ye kú weèdɔɔ̀pà kú bookù-dà Weèdi pɛnti-má. 24 Weèdi yòǹ sèdi-dà. Yè békú mɛ̀m̀pà nì dɔń-pa ní nì n'dɔń nà wɛbeèdi-dà nà Weèdi Sèdi. 25 K'yèe poòo óò caka è yɔ̀: N yá̰á̰-ma è yɔ̀ Weèdi ta̰kadáko pà toò-ko Kídísì pení. Ò kó tɛ̀ni tḭ́ń daadí é ti wekàna-á-ma niìi wɛǹni. 26 Kà Sèsíì óò tɛ̰́ná è yɔ̀: Mmí-d'òò héé, mmí mɛ̀ǹǹ a wɛì-kò. 27 Ye wɔ̀ni k'òo dapàm̀ma tɔɔ̀-ní é tɛ̀ni óò dɛ́há k'ò wɛì-nà poòo, k'yé pà dii. Àmá, p'oòcɔ̰́ǹ pú nɛɛ̀ óò béka ò békú-sa kú hḭ́ǹka ye poòo, yoo òò wɛì-nà-sa kú hḭ́ǹka. 28 Ye wɔ̀ni, k'yèe poòo é hédá-ho o cɔ̀ta ye pesá, é tón yɔtí mɛhɛká, é tɛ̀i é caka nìpa è yɔ̀: 29 Ya̰ní-nà-ní é dɛ́há nìdo mɛ̀ǹǹ n cakáà-ko n pa̰à̰-sa wɛǹni. Mɛnn pú kó n'héé Kídísì? 30 Kà pá wiìda-ní ye yɔtí mɛhɛká é tɛ̀ni Sèsíì pesá. 31 Ye wɔ̀ni, è hɔ̰́tà o dapàm̀ma ò sɛ́úkú è tonà: Dakpɛ̰́ǹn, dii yècḭ́ḭ̀! 32 Àmá, k'ó pà tɛ̰́ná è yɔ̀: N káá dipú-dà è kó dii kà nɛ pú mù yá̰á̰. 33 Ye wɔ̀ni, k'òo dapàm̀ma békú pa tɔɔ̀pa è tonà: Òcɔ̰́ǹ dá ò n'tɛɛ̀-ní dipú k'ó dii? 34 K'ó pà tɛ̰́ná è yɔ̀: N dipú héé ń pa̰á̰ mɛ̀ǹǹ tɔn-kó-ní yàma kpɛ̀i-sá-dà, é yɔ̀ɔ tɔmú ò n kɔ̰́ɔ̰̀-pu è yɔ̀ ń mù pa̰ná. 35 Nɛ́na pú tonà yè kaá weèka kànàhì kà dití kó bii? Mmí há̰ nɛ cakú è yɔ̀ nɛ́ yoòda nɛ nɔ̀ǹci é wáńtá yɛ̀ka, ka dití bii-í-ma è sàà kɔ̰ṵpú. 36 Mɛ̀ǹǹ kɔ̰ṵ-kó cemà dɛ́hù o boutí-dà, è tíkànì dití fòùmu mɛ̀mù pú yɔɔ̀hu-pú kpɛ́mú. Ye wɔ̀ni, mɛ̀ǹǹ bɔdì-ko nà mɛ̀ǹǹ kɔ̰ṵ-kó pà péé wɛ̀ɛ̀di nìcɔ̰́ mɛhɛká-dà. 37 Ye kú kpɛ́mú-dà tee kpɛ̰́nwɛmà mɛmà cakú-ma bemú. Mà yɔ̀: Nìdo-dà hɔ̰́ bɔdí kà tɔɔ̀o é kɔ̰ṵ. 38 N nɛ tɔn è yɔ̀ nɛ́ tíkáná dití yɛ̀di nɛ pú deháà-di kú mɛhɛká-dà. Tɔɔ̀pa-dà deháà ni mɛhɛká é wédá, kà nɛ́na yon pa wìku tɔmú. 39 K'yèe yɔtí yam̀ma Sàmàdíìpa, pa dɔ́ɔ́di é taàa pa dandaní Sèsíì hḭ́ǹka, mìì tee-sá ye poòo de pà cakáà è yɔ̀: Ò n cakáà n pa̰à̰-sa wɛǹni-dà. 40 Mɛmá-dà tee kà pà de é tɛ̀ni, óò sɛ́uka è yɔ̀ ó cá̰ńtá é pà m'péé-nà. K'ó teha é cá̰ńtá, é pa̰á̰ daàa kàdɛ́ɛ́. 41 Kà nìpa é tṵ́má taàa pa dandaní o hḭ́ǹka, n'ɔ̀ɔ wɛmá pà de yeèkaà-ma kpɛ́mú, kà pa dɔ́ɔ́di wɛhi sàma. 42 Kà pá caka ye poòo è yɔ̀: Yè koò pú yòǹ a ti cakáà-sa cɔ̰́ɔ̰̀di kpɛ́mú-dà tee kà ti dań, àmá ti yeèkaà-á-ma o mɔ́nń k'ò wɛì, kà tí yá̰dá è yɔ̀ mɔ́ma ò yòǹ fòùku fḭ́hìnakó-dà. 43 Sèsíì pa̰à̰-ma ye pesá daàa kàdɛ́ɛ́, é yídá taá Kàdìdéè, 44 è yá̰á̰ o mɔ́nń de wɛdà-á-ma è yɔ̀: Pà pú cuunì Weèdi wɛtɛ̰́náko o yɔtí mɔ́ntí mɛhɛká. 45 Ò tɛ̀i-má Kàdìdéè, k'yèe tempáàku yam̀ma óò codá sukú. Pa mɔ́mpá mɛ̀ɛ té de taá-ma Núǹdiyɛ̀ɛ̀ma kúúdi Sèdìsàdɛ́m̀, é dɛ́há ò de pa̰à̰-sa wɛǹni ye kúúdi daàka mɛhɛká. 46 K'ó yídá tón Kánà, Kàdìdéè tempáàku mɛhɛká ò de cehènà-sa nɛ́ɛmá kà má hḭn naàma. Yè de hɔ̰́tà wódo nahàku tɔntɔnsào òcɔ̰́ǹ-dà péé Kàpɛ̀ɛ̀nàúm̀ yɔtí k'òo bíitá mɔn. 47 Ò yèkaà-ma è yɔ̀ Sèsíì yíì-ní Sùdéè tempáàku é tɛ̀ni Kàdìdéè kpɛ́ɛ́kú mɛhɛká, k'ó taá óò dɛ́há, óò sɛ́uka è yɔ̀ ó taá Kàpɛ̀ɛ̀nàúm̀ é tɛ̀i é kpekàna o bíitá kà tà mɔ̀dì-nà kṵ́mú. 48 K'óò tɛ̰́ná è yɔ̀: Kà nɛ pú dɛ́hà pɔ́ńdápa̰á̰ma ma bodú bodú nɛ pú kó n'dań nkɛ́ɛ̀? 49 K'yèe wódo nahàku tɔntɔnsào óò tɛ̰́ná è yɔ̀: Dakpɛ̰́ǹn, ya̰ní n hɔ̰́ɔ̰̀ta kà n bíitá é nɛɛ́ kpíí. 50 K'óò tɛ̰́ná è yɔ̀: Tɔɔ̀ta é kòǹ, a bíitá kpekáà-á-ma. K'yèe dɔɔ̀o é taàa dandaní wɛmá Sèsíì d'oò cakáà-ma hḭ́ǹka, é tɔɔ̀ta é kòǹ. 51 Ò de káà sá̰á̰ cɔ̀ku-dà è kṵnti-ní k'òo dehèpa é tɛ̀ni o peètanàpu óò caka è yɔ̀: A bíitá kpekáà-á-ma. 52 K'ó pà béka wɔ̀ni yè de tà tɔ̰káà-di. Kà p'óò tɛ̰́ná è yɔ̀: Wèǹku wɔ̀ni màcɔ̰́ mɛhɛká-dà o mɛ́ti wontà yɔ̀ɔ-má. 53 K'yèe bíitá báàa é cɔ́dí é n'hɔ̰́tà ye kú wɔ̀ni-dà Sèsíì wontà ò cakáà-ma è yɔ̀ o bíitá kpekáà-á-ma. Ye wɔ̀ni, mɛnń n'ɔ̀ɔ hɔ̰́ɔ̰́tàkpɛ́ɛpá wɛǹni kà pá taàa pa dandaní Sèsíì hḭ́ǹka. 54 Pɔ́ńdápa̰á̰ma dɛ́ɛ̀ma Sèsíì de pa̰à̰-ma-dà ye pesà-ní, ò yídà-ma-ní Sùdéè tempáàku é tóní Kàdìdéè kpɛ́ɛ́kú mɛhɛká.
1 Ye kú dàhàka, kà Sùwífùpa é n'ya̰ǹku pa kúúdi nìcɔ̰́nì Sèdìsàdɛ́m̀ mɛhɛká, kà Sèsíì é póńtá ye pesá. 2 Bínhɔɔ̀dí nìcɔ̰́nì-dà pà há̰ de maá-ma Sèdìsàdɛ́m̀ mɛhɛká, kà hà̰ǹhàka kànùm̀ nì yéńtà, kà Hèbùdéèpa nì yún è tonà Bɛ̀tìsàtáà, kà nì hɛ́dí-nà hɔ̰̀ci há̰ńnùdi. 3 Ye hà̰ǹhàka mɛhɛká, kà mɔkàpa dɔ́ɔ́di dɔ-dɔɔ́: Yɔ̀m̀ma, nà mɛ̀m̀pà cèǹtì-pa tàdi, nà hɔ̀ùhi. Pà de ceí nɛ́ɛmá nampàma-dà, 4 è yá̰á̰ Weèdi tɔntɔndikó-dà de hɔ̰́ cútá-ní wɔ̀ni nà wɔ̀ni ye bínhɔɔ̀dí mɛhɛká é tɛ̀ni nampa ye nɛ́ɛmá. Ye wɔ̀ni, kà mɔ̀ǹǹ cedí è cútà-ko ma mɛhɛká ò hɔ̰́ kpeka-á-ma bá k'òo dɔnkú yòm̀pu. 5 Ye pesá è hɔ̰́tà dɔɔ̀o òcɔ̰́ǹ yè péé è mɔn, k'yè yɔ̀ɔ beeká púta̰di nà kànìì. 6 Sèsíì ò dɛ́hà-ma k'ò dɔɔ́, k'ó bantá è yɔ̀ n'ɔ̀ɔ̀ mɔn-má yè yókáà-á-ma sàma. K'óò béka è yɔ̀: A kpɛ̀i é kpeka-a? 7 K'yèe mɔko óò tɛ̰́ná è yɔ̀: Dakpɛ̰́ǹn, n pú káá mɛ̀ǹǹ kó n taàa-kó bínhɔɔ̀dí mɛhɛká nɛ́ɛmá hɔ̰́ nampa tḭ́ń wɔ̀ni. Kà mà nampáà kà n kó dúú, tɔɔ̀o-dà hɔ̰́ n foi é cútá. 8 Kà Sèsíì óò caka è yɔ̀: Yídá tódá a mɛ̀ku é cèn. 9 Ye pesá n'ɛ̀ɛ pesá k'yèe dɔɔ̀o é kpeka. K'ó yídá tódá o mɛ̀ku é cetá cèmu. Ye kú niiyà̰ há̰ de pa̰à̰-ma damuhipàdi daadí tá, 10 kà Sùwífùpa kpɛ̰́m̀ma é caka ye dɔɔ̀o mɛ̀ǹǹ de kpekáà-ko è yɔ̀: Damuhipàdi-dà yenì, ti kpɛ̰́ńdìnùka p'áa pɛ̰ḭ nùdi è yɔ̀ á n'toó a mɛ̀ku. 11 K'ó pà tɛ̰́ná è yɔ̀: Mɛ̀ǹǹ n kpekànà-ko-dà n cakáà è yɔ̀ ń tódá n mɛ̀ku é cèn. 12 Kà p'óò béka è yɔ̀: Wod'àà cakáà è yɔ̀ á tódá a mɛ̀ku é cèn? 13 Há̰kà ye dɔɔ̀o mɛ̀ǹǹ de kpekáà-ko de p'óò yá̰á̰, mìì tee-sá Sèsíì de fée-é-ma-hɔ̰ nìku mɛ̀ǹkù de péé-ku ye pesá ku mɛhɛká. 14 Ye kú dàhàka, kà Sèsíì óò pèta-nà Weèdi hɔ̰́ɔ̰̀ta mùǹku mɛhɛká óò caka è yɔ̀: A dɛ́hà a kpekáà-m'ɛɛ̀, á yentá sḭ̀ḭ̀ma k'yé teha kà niìi tɔɔ̀sa yècḭ́ḭ̀ d'áa tɛ̀ni è ha̰tà miì. 15 K'yèe dɔɔ̀o é ka̰há é tɛ̀i é caka Sùwífùpa kpɛ̰́m̀ma, è yɔ̀ Sèsíì-d'òò kpekànà. 16 Mií-dà de tee kà pà kɔ̰ǹti-nà Sèsíì n'ɔ̀ɔ̀ pa̰à̰-ma ye kú pa̰á̰mà damuhipàdi daadí. 17 Kà Sèsíì é pà tɛ̰́ná è yɔ̀: N Báàa púsí-ma tɔmú háá nà sá̰mà, kà n mɛ̀ɛ té mù púsí. 18 N'ɛ̀ɛ kú wɛmá kpɛ́mú, kà Sùwífùpa kpɛ̰́m̀ma é dɔ̀hà è pɛnti pà kó hḭmpú óò kɔ̀ù. Yè pú yònà ò de pa̰à̰-ma mìì cií-sa damuhipàdi daadí kpɛ́mú cɔ̰́ɔ̰̀di-dà tee kà pà kpɛ̀i óò kɔ̀ù, àmá ò de tṵ́mà tonà Weèdi yòǹ o báàa pɛdáko-dà, è behú-nà ma kú bookú o cɔ̰́ɔ̰̀di Weèdi. 19 Kà Sèsíì é pà caka è yɔ̀: Bemú-dà n nɛ cakú-ma, Weèdi bíitá pú kó nɛɛ́ é pa̰á̰ yècḭ́ḭ̀ nà ta cɔ̰́ɔ̰̀di kú nɔɔ̀ti. Tà dɛ́hà kà ta Báàa pa̰kú-sa mií-dà tà pa̰kú-ma. Báàa pa̰kú-sa wɛǹni, o Bíitá mɛ̀ɛ té pa̰kú-sa-dà. 20 Báàa dɔ́sí-ma o Bíitá, mií-ì tee k'ò tà bɛkú ò pa̰kú-sa wɛǹni. Ò kó tṵ́má tà bɛka-á-ma pa̰á̰ma mɛ̀mà ha̰tà-ma mɛmà-ní kà tá mà pa̰ná, k'yé nɛ dii. 21 K'yé n'yònà Báàa hɔ̰́ yá̰hìna-má kpíípa é pà pa̰a̰ fòùmu, ma kú bookú-dà o Bíitá pɔ̰n-má fòùmu tà mù kpɛ̀i-nà-ko. 22 Báàa pú sídí-nà òcɔ̰́ǹ, àmá o Bíitá-dà ò kɔ̰́ɔ̰̀-ma nɔɔ̀ti wɛǹni è yɔ̀ tá síi-nà nìpa. 23 Ò hḭn mɛma, è kpɛ̀i nìpa wɛǹni-dà é tà n'cùùnì é n'yònà p'òò cùǹkumá. Mɛ̀ǹǹ pú cuunì-ko o Bíitá, ò pú cuunì Báàa-dà mɛ̀ǹǹ tà tɔn-kó-ní. 24 N nɛ cakú bemú-dà, mɛ̀ǹǹ bekù-ko n wɛmá, è dań mɛ̀ǹǹ n tɔn-kó-ní, ye yaǹn káá-ma fòùmu mɛ̀mù bá yɔ̀ɔ-pú. Ò koò kɔ́ɔ́ sídàma mɛhɛká, àmá ò yɛ̀ɛ̀ kṵ́mú mɛhɛká-dà, é dúú fòùmu mɛhɛká. 25 N nɛ cakú bemú-dà, wɔ̀ni-dà pení nì mɛ̀ɛ yɔ̀ɔ tɛ̀mpú-dà-ní, kà kpíípa kó yekà Weèdi bíitá boòku. Mɛ̀m̀pà mɛ̀ɛ kó kù yèkà-pa, kó dɛ́tá-ma fòùmu. 26 K'yé n'yònà Báàa yòǹ-ma fòùmu yudí, ma kú bookú-dà ò kɔ̰́ɔ̰̀-ma o Bíitá kà tà yòǹ fòùmu yudí. 27 Ò mɛ̀ɛ tà kɔ̰́ɔ̰̀-ɔ̰́-ma nɔɔ̀ti è yɔ̀ tá síi-nà nìpa, mìì tee-sá tà yòǹ Niìfòùo bíitá-dà. 28 Yè dá nɛ dii n kó wɛɛ́-sà miì kú hḭ́ǹka: Wɔ̀ni-dà pení kà kpíípa kó yekà ta boòku, 29 é yɛɛ̀ni pa híùka mɛhɛká. Ye wɔ̀ni mɛ̀m̀pà pa̰à̰-pa suumá, kó yá̰ńtá-ma-ní kà pá pà dúùwa fòùmu mɛhɛká, mɛ̀m̀pà pa̰à̰-pa sḭ̀ḭ̀ma, kà pá yá̰ńtá-ní kà pá pà kɔ̰́ɔ̰́ yetádi é yɔ̰́ń pa toòka. 30 Mmí, n pú kó nɛɛ́ é pa̰á̰ yècḭ́ḭ̀ nà n cɔ̰́ɔ̰̀di kú nɔɔ̀ti. N Báàa n hḭ́mpú, mɛma kú bookú-dà n síí-nà-ma nìpa. N sídàma mɛ̀ɛ coó-ma, mìì tee-sá n pú pɛnti é pa̰á̰ n cɔ̰́ɔ̰̀di kú kpɛ̀imá, n kpɛ̀i é pa̰á̰ mɛ̀ǹǹ n tɔn-kó-ní kú kpɛ̀imá-dà. 31 Kà mmí mɔ́nń-dà cakú n yòm̀pu, nɛ kó n'yɔ̀ n cakàma pú yṵhù. 32 Tɔɔ̀o-dà há̰ cakú n yòm̀pu, n mɛ̀ɛ yá̰á̰-ma è yɔ̀ ò cakú-sa n hḭ́ǹka yòǹ mɔ́ma-dà. 33 Nɛ tɔn-ń-ma tɔntɔndipá Ìsá̰-Bàtísì pesá, k'ò mɛ̀ɛ nɛ caka wɛbeèdi n hḭ́ǹka. 34 Mmí n pú békú nìi é caka n yòm̀pu, àmá n wɛì miya̰ è kpɛ̀i Weèdi-dà é nɛ fḭ́hìna sá̰à̰di. 35 Ìsá̰-Bàtísì de yònà ha̰wèta mɛ̀ǹtà cɔ́hí-ta-dà è weni póí, kà nɛ mɛ̀ɛ teha é dii wɛ̀ɛ̀di wɔ̀ni cɛ̰́masí o wenikú mɛhɛká. 36 Mmí, n káá-ma niìya̰ mìì bɛkú-sa n yòm̀pu é ha̰tà-nà Ìsá̰à̰ wɛɛ̀-sa n hḭ́ǹka. Tɔná n Báàa n kɔ̰́ɔ̰̀-na kà n nà pa̰kú, mɛná-dà cakú n yòm̀pu, è tṵ́mà bɛkú è yɔ̀ mɛnń-dà n tɔn-ní. 37 Báàa mɛ̀ǹǹ n tɔn-kó-ní, mɛ̀ɛ té cakú-ma n yòm̀pu. Nɛ mun pú yeèkaà daadí yènì o boòku, nɛ mɛ̀ɛ mun pú dɛ́hà daadí yènì o yìhìka. 38 Nɛ pú púsí o wɛmá nɛ yàma mɛhɛká, ye kú kpɛ́mú-dà tee nɛ pú dań-ma ò tɔn-kó-ní. 39 Nɛ biɔhú-ma Weèdi wɛmá pɔ̀kàta è tà fehú dɛ́dɛ́í, mìì tee-sá nɛ maàhu è tonà mɛntá kú mɛhɛká-dà nɛ kó dɛ́tá-ma fòùmu mɛ̀mù bá yɔ̀ɔ-pú. Ye Weèdi wɛmá pɔ̀kàtà-dà há̰ cakú n yòm̀pu. 40 Nà mɛma, nɛ pú kpɛ̀i é tɛ̀ni n pesá é dɛ́tá fòùmu mɔ́mmú. 41 N pú bɔhàta nìpa cuùumá. 42 Múńdìkaà n nɛ yá̰á̰-ma. N yá̰á̰-ma è yɔ̀ nɛ yàma mɛhɛká nɛ pú dɔ́sí Weèdi. 43 N tɛ̀ni nà n Báàa kú yèdi-dà, nɛ mɛ̀ɛ pú teháà é n codá. Àmá kà tɔɔ̀o òcɔ̰́ǹ há̰ tɛ̀ni n'ɔ̀ɔ mɔ́nń kú yèdi, nɛ k'óò codá-ma. 44 Ntɛ́ nɛ kó hḭmà é nà n dań, nɛ́na mɛ̀m̀pà dɔ́sí-pa nɛ tɔɔ̀pa cuùumá, àá pú pɛnti nɛ kó hḭmpú kà Weèdi mɛ̀nì yòǹ-di ni cɔ̰́ɔ̰̀di, é nɛ n'cuunì? 45 Nɛ há̰ dá m'maàhu è tonà mmí-dà kó wáńtá nɛ pṵ́á̰ n Báàa yìhìka. Mɔ̀yísì nɛ taà-ko kú hḭ́ǹka nɛ dandaní, mɛnń-dà kó wáńtá nɛ pṵ́á̰. 46 Kà nɛ de dań nà mɔ́masí-dà Mɔ̀yísì wà̰haà-sa, è yenì nɛ mɛ̀ɛ té n dań-ma, mìì tee-sá n kú wɛmá-dà ò wà̰haà-ma. 47 N'aá pú dań-mà ò wà̰haà-sa, ntɛ́ nɛ kó hḭmà é n'dań wɛmá n nɛ cakú-ma?
1 Ye kú dàhàka, kà Sèsíì é deèta Kàdìdéè baàdi sóìdi tɔɔ̀di. Ye kú baàdi-dà pà tṵ́mà toò-ma Tìbèdìyádì baàdi. 2 Kà nìku dɔ́ɔ́di ò tṵ̀n, mìì tee-sá kù de dɛ́hù pɔ́ńdápa̰á̰ma ò pa̰kú-ma-dà mɔkàpa hḭ́ǹka è pà kpekànì. 3 Kà Sèsíì é dìsi ta̰à̰di hḭ́ǹka, é tɛ̀i é kaàdi mɛnń n'ɔ̀ɔ dapàm̀ma. 4 Yè de hɔ̰́tà Sùwífùpa kúúdi pà toò-di Núǹdiyɛ̀ɛ̀ma kúúdi-dà tɔ́sí. 5 K'ó wáńtá dɛ́há nìku dɔ́ɔ́di kà kù pení o pesá, k'ó béka Fìdípù è yɔ̀: Ti kó dɛ́tá ya-dà dimá é dontá k'yèe nìkù mɛnkù é dii ku wɛnnì? 6 Ò de békú Fìdípù mɛma è kpɛ̀i dɛ́há ò kó tɛ̰́ńkamá-dà, è yá̰á̰ ò de yɔ̀ɔ yá̰á̰pu-dà ò kó pa̰á̰-sa. 7 Kà Fìdípù óò tɛ̰́ná è yɔ̀: Bá weǹtṵ́ṵká kɔ̀ɔnà dɛ́ɛ́ tɔmú dífa pú kó tɛ̀i ti kó dontá-ma pɛ̰́ɛ̰̀pa sàma, kà bá mɛ̀ǹǹ dɛ̀ɛ̀-ko é dɛ́tá wɛ́ɛ̀sa. 8 K'òo dapàǹn tɔɔ̀o, Sìmɔ́-Píyɛ́ɛ̀ kúcàa, pà toò-ko À̰ǹtìdéè óò caka è yɔ̀: 9 Dapàm̀bíitá tàcɔ̰́tà-dà péé miì è káá Ɔ́sì pɛ̰́ɛ̰̀pa pànùm̀ nà num̀bííhí hìdɛ́ɛ́. Mii há̰ kó nɛɛ́ pa̰á̰ ba niìdɔ́ɔ́dì mɛnì kú tɔɔdì? 10 Kà Sèsíì yɔ̀: Héé-nà k'yèe nìpà é kaàdi pa wɛǹni. Yè de hɔ̰́tà míti-dà péé ye pesá sàma. K'yèe nìpa é kaàdi. Pa mɛhɛká, daapá de yɔ̀ɔ-ɔ́-ma tòhìka kànùm̀ kpɛ́ɛmá. 11 Ye wɔ̀ni, kà Sèsíì é tódá ye pɛ̰́ɛ̰̀pa é sɛda Weèdi, é héé kà pá pà totá ye nìpa mɛ̀m̀pà de kaàdi-pá. K'ó yíí tódá num̀bííhí é hḭn mɛma, é héé kà pá hì totá nìpa pà de kpɛ̀kaàma kú nùdi. 12 Pà dii-má é dɛn pa wɛǹni, k'ó caka o dapàm̀ma è yɔ̀: Tíká-nà mìì sɔ̰́ńtà-sa k'yèècḭ́ḭ̀ dá sèǹ! 13 Kà pá kodá pà de dii ye Ɔ́sì pɛ̰́ɛ̰̀pa pànùm̀ é sɔ̰́ńtá-sa, k'yé sṵ́ná náḿbòhi píì-hìdɛ́ɛ́. 14 Nìpa dɛ́hà-ma pɔ́ńdápa̰á̰ma ò de pa̰à̰-ma, kà pà yɔ̀: Ye dɔɔò mɛnǹ yòǹ mɔ́masí Weèdi wɛtɛ̰́náko mɛ̀ǹǹ yònà é tɛ̀ni-kó-ní fòùku mɛhɛká-dà. 15 Kà Sèsíì é bantá è yɔ̀ pà kpɛ̀i é tɛ̀ni óò tódá óò cɛ̰ɛ̰́ wóòti-dà nà nɔɔ̀ti, k'ó yíí é tṵ́má dìsi ta̰à̰di hḭ́ǹka o cɔ̰́ɔ̰̀di pesá. 16 Kà yohokú é yodá, kà Sèsíì dapàm̀ma é sḭ́ńtá-ní Kàdìdéè baàdi nùdi. 17 Kà pá tɛ̀i é dúú hà̰à̰pu mɛhɛká, è kɛ̰hɛdi Kàpɛ̀ɛ̀nàúm̀ yɔtí, ye baàdi sóìdi tɔɔ̀di. Kà yèǹka é bóka kà Sèsíì mun pú tóní pa pesá. 18 K'yèe baàdi nɛ́ɛmá nampú sàma, mìì tee-sá yakpeèku-dà de heu. 19 Kà pá pa̰á̰ kìdòmɛ́tídìpa pànùm̀ yoo pàkɔ̀dì kpɛ́ɛmá, é dɛ́há Sèsíì k'ò cèǹtì-ní nɛ́ɛmá hḭ́ǹka è tɔ́kàǹta-ní ye hà̰à̰pu, kà wandanfɔ̰̀di é pà cɛ̰dí. 20 Àmá, k'ó pà caka è yɔ̀: Mmí-dà, nɛ dá n'wani. 21 Kà pá n'kpɛ̀i óò tódá ye hà̰à̰pu mɛhɛká, é cemá é n'hɔ̰́tà pa hà̰à̰pu pḭ́ń kóḿbòni tɔɔ̀di pà de kɔ́ɔ́-di. 22 K'yé wentá, kà nìku mɛ̀ǹkù wontà cá̰ńtà-ku ye baàdi sóìdi tɔɔ̀di, é deǹta-ní è yɔ̀ hà̰à̰pu mùcɔ̰́-dà wontà péé ye baàdi nùdi. K'ùá yá̰á̰-ma è yɔ̀ Sèsíì pú wontà pɛ́ɛ̀ é dúú-n'ɔ̀ɔ dapàm̀ma mu mɛhɛká, pà wontà ka̰hà pa cɔ̰́ɔ̰̀di-dà. 23 Kà hà̰à̰na tɔɔ̀na de é yíí-ní nà Tìbèdìyádì yɔtí, é ta̰ntá-ní bɛ̀m̀bɛ̀ni nìcɔ̰́nì, kà nì pú nátà-nà Teó wontà sɛɛ́ɛ̀-sa Weèdi pɛ̰́ɛ̰̀pa kpɛ́mú, kà pá dii. 24 Ye nìku bantà-ma è hɔ̰́tà Sèsíì kɔ́ɔ́ ye pesá, k'òo dapàm̀ma mɛ̀ɛ té yè kɔ́ɔ́, kà kú cemá dúú ye hà̰à̰na mɛhɛká é taá o pɛhàpu Kàpɛ̀ɛ̀nàúm̀. 25 K'yèe nìpa é tɛ̀i dɛ́há Sèsíì baàdi sóìdi tɔɔ̀di, óò béka è yɔ̀: Dakpɛ̰́ǹn, wɔ̀ni m̀mɔ́ńni-dà a ta̰ntà-ma-ní miì? 26 K'ó pà tɛ̰́ná è yɔ̀: N nɛ cakú bemú-dà. Nɛ n pɛnti nɛ wontà diipú kpɛ́mú-dà pɛ̰́ɛ̰̀pa é dɛn, àmá nɛ pú n pɛnti è yɔ̀pu kpɛ́mú nɛ bantà pɔ́ńdápa̰á̰ma n pa̰kú-ma cakú-sa. 27 Nɛ dá n'dehú dimá mɛ̀mà hɔ̰́ cɔ̰ha-má cɔ̰́ɔ̰̀di kpɛ́mú, àmá nɛ́ n'dehú dimá mɛ̀mà pú cɔ̰hú-ma kpɛ́mú è tṵ́mà kɔ̰́nì fòùmu mɛ̀mù bá yɔ̀ɔ-pú. Ye kú dimà, Niìfòùo bíitá-dà kó mà nɛ kɔ̰́ɔ̰́, mɛntá kú hḭ́ǹka-dà mɛ̀ɛ dɛɛ̀ Báàa Weèdi pa̰à̰-ma o nɔɔ̀ti yḭḭ́pa. 28 Kà p'óò béka è yɔ̀: Ntɛ́ ti yònà é hḭmà é pa̰á̰ tɔná Weèdi kpɛ̀i-ná? 29 K'ó pà tɛ̰́ná è yɔ̀: Weèdi kpɛ̀i nɛ́ pa̰á̰-sa-dà héé, nɛ́ n'dań nì tɔn-kó-ní. 30 Ye wɔ̀ni, kà pá tṵ́m'ɔ́ɔ̀ béka è yɔ̀: Pɔ́ńdápa̰á̰ma m̀mɔ́ma-dà a kó nɛɛ́ pa̰á̰-ma k'yé n'yòǹ yḭdó é ti bɛka k'yé teha kà tí n'àà n'dań? Tɔmú m̀mɔ́mu-dà a kó pa̰á̰-ma? 31 Càwenkú mɛhɛká, ti yààpa de dii dimá pà toò-ma-dà màánì é n'yònà pà wà̰tà Weèdi pɔ̀kàta mɛhɛká è hḭ́mpú: Ò pà pɛ̰ḭ dimá mɛ̀mà yɛ̀ni-má-dà-ní nà hḭ́ǹka, kà pá dii. 32 Kà Sèsíì é pà caka è yɔ̀: N nɛ cakú bemú-dà, yè pú yòǹ Mɔ̀yísì-dà de nɛ pɛ̰ḭ dimá mɛ̀mà yɛ̀ni-nà-ma-ní hḭ́ǹka, àmá n Báàa-dà nɛ pɔ̰n dimá mɔ́mmá mɛ̀mà yɛ̀ni-nà-ma-ní hḭ́ǹka. 33 Weèdi dimá-dà héé mɛ̀mà cútà-ma-ní nà hḭ́ǹka, è kɔ̰́nì nìpa fòùmu. 34 Ye wɔ̀ni kà p'óò caka è yɔ̀: Dakpɛ̰́ǹn, kà mɛmá-dà k'á ti m'pɔ̰n daàka wɛǹni ye kú dimà-ní. 35 Kà Sèsíì é pà caka è yɔ̀: Mmí-dà héé dimá mɛ̀mà kɔ̰́nì-ma fòùmu. Mɛ̀ǹǹ kó tɛ̀ni-kó-ní n pesá, kòni koò pú k'óò cɛ̰ɛ̰́ daadí yènì, mɛ̀ǹǹ mɛ̀ɛ n dań-ko nɛ́yà̰hakú koò pú k'óò cɛ̰ɛ̰́ daadí yènì. 36 Àmá n yè nɛ cakáà-á-ma: Nɛ n dɛ́hà-á-ma, nà mɛma nɛ pú teháà é taàa nɛ dandaní n hḭ́ǹka. 37 N Báàa n kɔ̰́nì-pa wɛǹni kó tɛ̀ni-í-ma-ní n pesá. N mɛ̀ɛ pú kó yeda daadí yènì mɛ̀ǹǹ kú wɛǹni kó tɛ̀ni-kó-ní n pesá, 38 mìì tee-sá n pú cútà-ní nà hḭ́ǹka è kó pa̰á̰ n cɔ̰́ɔ̰̀di kú kpɛ̀imá, àmá n cútà-ní è kó pa̰á̰ mɛ̀ǹǹ tɔn-kó-ní kú kpɛ́ɛmá-dà. 39 Ǹtɛ mɛ̀ǹǹ tɔn-kó-ní kpɛ̀i-sá: N pú yònà é féná òcɔ̰́ǹ ò n kɔ̰́ɔ̰̀-pa wɛǹni mɛhɛká, àmá n yònà é pà yá̰hìna-á-ma dadèǹdèni daadí. 40 N Báàa kpɛ̀i-sá-dà héé: Mɛ̀ǹǹ kú wɛnnì dɛ́hà-ko o bíitá, é taàa o dandaní ta hḭ́ǹka, ò kó dɛ́tá-ma fòùmu mɛ̀mù bá yɔ̀ɔ-pú, ká n ò yá̰hìna dadèǹdèni daadí. 41 Kà Sùwífùpa óò n'wṵkapú-nà, n'ɔ̀ɔ̀ de wɛdà-ma kpɛ́mú è yɔ̀ ò yòǹ dimá mɛ̀mà cútà-ma-ní nà hḭ́ǹka. 42 Kà pá m'békú pa tɔɔ̀pa è tonà: Sèsíì dɔ, Sòsɛ́fù bíitá-a? Ti yá̰á̰-dà-ma sukú o báàa n'ɔ̀ɔ màa! Ntɛ́ y'àá hḭmà wɔ̀nì mɛnì k'ò toò ò cútà-ní nà hḭ́ǹka? 43 K'ó pà tɛ̰́ná è yɔ̀: Nɛ dá n'wṵkapú nɛ cɔ̰́ɔ̰̀di pesá! 44 Òcɔ̰́ǹ pú kó nɛɛ́ é tɛ̀ni n pesá kà n Báàa mɛ̀ǹǹ n tɔn-kó-ní p'óò tɛɛ̀-ní n pesá. Mmí mɛ̀ɛkà, n kó wáńtá yá̰hìna-á-ma ye yaǹn dadèǹdèni daadí. 45 Pà wà̰tà Weèdi wɛtɛ̰́nápa pɔ̀kàhi mɛhɛká è yɔ̀: Weèdi-dà kó biɔhàna nìpa wɛǹni. Mɛ̀ǹǹ kú wɛǹni besí-ko Báàa, é ta̰ǹta o biɔhànamá, mɛnń-dà kɔ́dí-ní n pesá. 46 Mii pú kpɛ̀i caka è yɔ̀ òcɔ̰́ǹ dɛ́hà Báàa, ṵ́ṵ̀. Mɛ̀ǹǹ yɛ̀ni-nà-ko-ní Weèdi pesá, mɛnń cɔ̰́ɔ̰̀di-dà dɛ́hà Báàa. 47 N nɛ cakú bemú-dà, mɛ̀ǹǹ n dań-ko, ò káá-ma fòùmu mɛ̀mù bá yɔ̀ɔ-pú. 48 Mmí, n yòǹ dimá mɛ̀mà kɔ̰́nì-ma-dà fòùmu. 49 Nɛ yààpa de dii-í-ma màánì càwenkú mɛhɛká, nà mɛma pà koò pú kadí. 50 Dimá mɛ̀mà cútà-ma-ní nà hḭ́ǹka, mɛmá-dà miì. Kà nìi mà dii ò pú kó kpíí. 51 Mmí-dà héé dimá mɛ̀mà cútà-ma-ní nà hḭ́ǹka è kɔ̰́nì fòùmu. Kà nìi dii ye kú dimà, ò kó n'fòù-ú-ma k'yé n'kɔ́ɔ́ yɔ̀ɔmá. Dimá n kó kɔ̰́ɔ̰́-ma-dà héé n wɔ̰̀ǹku. N mà kɔ̰́nì fòùku-dà è yɔ̀ kú n'fòù. 52 Sùwífùpa yeèkaà-ma mɛma, kà pá cemá cetá è há̰kádí pa cɔhàka, è békú pa tɔɔ̀pa è tonà: Ntɛ́ nìì mɛnǹ kó nɛɛ́ ti kɔ̰́kaà o wɔ̰̀ǹku kà tí dii? 53 Kà Sèsíì é pà caka è yɔ̀: N nɛ cakú bemú-dà, kà nɛ pú dii Niìfòùo bíitá wɔ̰̀ǹku, é nìì-nà ta hḭ̀ma, fòùmu kɔ́ɔ́ nɛ mɛhɛká. 54 Mɛ̀ǹǹ kó dii-kó n wɔ̰̀ǹku, é yà̰à̰ n hḭ̀ma, ye yaǹn kó n'káá-ma fòùmu mɛ̀mù bá yɔ̀ɔ-pú, n mɛ̀ɛ kó wáńtá óò yá̰hìna-á-ma dadèǹdèni daadí. 55 N wɔ̰̀ǹku yòǹ dipú mɔ́mmú-dà, kà n hḭ̀ma yòǹ yà̰à̰sa mɔ́nyá̰. 56 Kà mɛ̀ǹǹ dii-kó n wɔ̰̀ǹku, è nìì n hḭ̀ma, ye yaǹn n múń-nà-á-ma, kà n ò múń-nà. 57 É n'yònà n Báàa mɛ̀ǹǹ n tɔn-kó-ní fòù-ma è tee kà n fòù, mɛ̀ǹǹ kó dii-kó n wɔ̰̀ǹku n mɛ̀ɛ té kó n'tee-é-ma k'ó n'fòù. 58 Dimá mɛ̀mà cútà-ma-ní nà hḭ́ǹka, mɛmá-dà miì. Mà pú yònà nɛ yààpa de dii-má. Pà de mà dii-í-ma, p'oòcɔ̰́ǹ há̰ koò pú kadí. Mɛ̀ǹǹ há̰ kó dii-kó ye dimà mɛmà, ò kó n'fòù-ú-ma k'yé n'kɔ́ɔ́ yɔ̀ɔmá. 59 Sèsíì de wɛdà ye wɛmà-ní, è péé Kàpɛ̀ɛ̀nàúm̀ Weèdi wɛmá biɔhà-nàmɔ̀ni mɛhɛká-dà è biɔhànì. 60 Pà yèkaà-ma k'ó wɛdá mɛma, k'òo dapàm̀ma dɔ́ɔ́di yɔ̀: Wɛmà ò wɛdà-mà mà tà̰hì-í-ma. Wodà kó nɛɛ́ mà teha? 61 Kà Sèsíì é bantá è yɔ̀ ò wɛɛ̀-sa pú teháà o dapàm̀ma, kà pà wṵkapú ye hḭ́ǹka. K'ó pà béka è yɔ̀: Yè nɛ tɔ̰dí-ma? 62 Ntɛ́ y'àá kó nɛ n'yòmù, kà nɛ dɛ́hà Niìfòùo bíitá kà tà dìkìdì è tóńti tà de péé-ka-ní bɛ́ka? 63 Weèdi Sèdi-dà kɔ̰́nì nìpa fòùmu. Nìdo pú kó nɛɛ́ pa̰á̰ miya̰. Wɛmá n nɛ cakáà-ma péé-nà-ní Weèdi Sèdi pesá-dà, mɛmá-dà mɛ̀ɛ kɔ̰́nì fòùmu. 64 Àmá nɛ mɛhɛkà pàcɔ̰́ pú dań. Sèsíì de yá̰á̰-ma nà cetáma-ní mɛ̀m̀pà de pú dań-pa, nà mɛ̀ǹǹ de k'óò yɛda-kó. 65 K'ó tuɛ̀ha è yɔ̀: Ye kú kpɛ́mú-dà tee n nɛ cakáà-ma è yɔ̀, òcɔ̰́ǹ pú kó nɛɛ́ tɛ̀ni n pesá kà n Báàa pú tee. 66 É tódá ye kú wɔ̀ni, k'òo dapàm̀ma dɔ́ɔ́di é kpaàta dàhàka, pà koò p'óò nɔhú-nà. 67 Kà Sèsíì é béka o dapàm̀ma píì-pàdɛ́ɛ́ è yɔ̀: Nɛ́na tá, nɛ mɛ̀ɛ té pú kpɛ̀i é ka̰há? 68 Kà Sìmɔ́-Píyɛ́ɛ̀ óò tɛ̰́ná è yɔ̀: Ti Teù, woò kú peyà-dà ti kó taá-ma? Fɔ̰́ń-dà káá wɛmá mɛ̀mà kɔ̰́nì-ma fòùmu mɛ̀mù bá yɔ̀ɔ-pú. 69 Tḭ́ńti dań-ma è yá̰á̰ è yɔ̀ fɔ̰́ń-dà Weèdi ta̰kadà-ma, áa tɔn-ní. 70 Kà Sèsíì é pà tɛ̰́ná è yɔ̀: Mmí pú nɛ ta̰kadà nɛ píì-pàdɛ́ɛ́ dò? Nà mɛma baàkaà, n'ɔɔ̀cɔ̰́ yòǹ Wɛɛ̀kupá wódo kóoó-dà. 71 Ò de wɛì Sùdásì-dà, Sìmɔ́ɔ̀ Ìsìkàdìyɔ́tì bíitá. Mɛnń-dà de k'óò yɛda, n'ɔ̀ɔ̀ baà de yòǹ-sà o dapàm̀ma píì-pàdɛ́ɛ́, p'oòcɔ̰́.
1 Ye kú dàhàka, kà Sèsíì é cèn Kàdìdéè tempáàku wɛǹni. Ò de pú kpɛ̀i é cèn Sùdéè tempáàku mìì tee-sá, Sùwífùpa wóópa-dà de pɛnti pà kó hḭmpú óò kɔ̀ù. 2 Yè de hɔ̰́tà Sùwífùpa kúúdi pà toò-di fḭ́ḭká kúúdi-dà de hɛ́tà-ní, 3 kà Sèsíì ya̰nhí óò caka è yɔ̀: Yídá bɛ̀m̀bɛ̀nì mɛnì, é taá Sùdéè teǹka mɛhɛká, k'yé teha k'àa dapàm̀ma mɛ̀ɛ té dɛ́há dehèna a pa̰kú-na. 4 Òcɔ̰́ǹ pú hɔ̰́ n'kpɛ̀i p'óò yá̰dá, é m'pa̰kú yècḭ́ḭ̀ è sɔ̀tì sɔ̀tì. A pa̰kú niìi sàsa-dà, hédá kà nìpa wɛǹni áa dɛ́há. 5 Bá Sèsíì ya̰nhí mɛ̀ɛ té de pú káá dandaní o hḭ́ǹka. 6 K'ó pà tɛ̰́ná è yɔ̀: Wɔ̀ni n yònà éè taá-di mun pú tɛ̀ni. Àmá nɛ́na, wɔ̀ka wɛǹni foó-ma. 7 Nìpa pú kó nɛɛ́ nɛ sɛ̰dá, àmá mmí pà n sɛ̰ɛ̰́-ma, mìì tee-sá n cakú è yɔ̀ pa pa̰á̰ma pú coó. 8 Nɛ́na, ka̰há-nà kúúdi. Mmí pú nì kɔ́dí, mìì tee-sá n wɔ̀ni mun pú tɛ̀ni. 9 Ò pà cakáà-ma mɛma é yɔ̀ɔ, é cá̰ńtá Kàdìdéè mɛhɛká. 10 O ya̰nhí ka̰hà-ma ye kúúdi pesá, k'òo mɔ́nń nɛ́údá è mɛ̀ɛ té nì tadí, é tɛ̀i ò pú teháà é bɛka o cɔ̰́ɔ̰̀di nìpa mɛhɛká. 11 Kà Sùwífùpa kpɛ̰́m̀ma ò pɛnti ye kúúdi mɛhɛká è békú pà tɔɔ̀pa è toò: Ò péé ya-dà? 12 Ye nìku mɛhɛká, kà nìpa é tóó nɔ̀nɔ̀hicí sàma o hḭ́ǹka. Kà pàcɔ̰́ tonà: Niìsudó-dà, kà tɔɔ̀pa tonà: Ṵ́ṵ̀, ò yehènì nìpa-dà. 13 P'oòcɔ̰́ǹ há̰ de pú teháà è mà wɛì nìpa wɛǹni yìhìka, mìì tee-sá pa de wani Sùwífùpa kpɛ̰́m̀ma-dà. 14 K'yé m'beé-nà k'yèe kúúdi daàka yàhakú ka̰hà, kà Sèsíì é taá Weèdi hɔ̰́ɔ̰̀ta mɛhɛká é tɛ̀i è biɔhànì. 15 K'yé dii Sùwífùpa kpɛ̰́m̀ma n'ɔ̀ɔ̀ de biɔhànì-ma kú bookú kà pà toò: Ntɛ́ yè hḭmà k'ò yá̰á̰ Weèdi wɛmá pɔ̀kàta mɛma kú bookú è pú tà biɔháà? 16 Kà Sèsíì é pà tɛ̰́ná è yɔ̀: Biɔhànamá n biɔhànì-ma pú péé-nà-ní n pesá, àmá mà péé-nà-ní mɛ̀ǹǹ n tɔn-dí-ní kú pesá-dà. 17 Kà nìi kpɛ̀i é pa̰á̰ Weèdi dɔ́kàma, ye yaǹn kó bantá-ma k'yèe biɔhànamà yòǹ Weèdi kpɛ́ɛmá-dà yoo kà n wɛì n mɔ́nń kú wɛmá-dà. 18 Mɛ̀ǹǹ wɛì-ko n'ɔ̀ɔ cɔ̰́ɔ̰̀di kú yèdi, ye yaǹn pɛnti o mɔ́nń kú wɛkànamá-dà. Mɛ̀ǹǹ há̰ wɛì-ko è kpɛ̀i é wɛkàna mɛ̀ǹǹ ò tɔn-kó-ní kú yèdi, ye yaǹn-dà cakú wɛbeèdi, nuǹhetí mɛ̀ɛ kɔ́ɔ́ o nùdi mɛhɛká. 19 Mɔ̀yísì pú nɛ kɔ̰́ɔ̰̀ kpɛ̰́ńdìnùka dò? N'ɔɔ̀cɔ̰́ǹ há̰ pú kà tṵ̀n-ḭḭ̀! Badà tee kà nɛ pɛnti è kó n kɔ̀ù? 20 K'yèe nìku óò tɛ̰́ná è yɔ̀: Wɛɛ̀ko-dà péé a mɛhɛká! Wodà kpɛ̀i áa kɔ̀ù? 21 K'ó pà tɛ̰́ná è yɔ̀: N pa̰à̰ pɔ́ńdápa̰á̰ma màcɔ̰́-dà, k'yé nɛ dii nɛ wɛǹni! 22 Mɔ̀yísì-dà nɛ kɔ̰́ɔ̰̀ kpɛ̰́ńdìnùdi è yɔ̀ nɛ n'ca̰mù nɛ bíidahí, kà nɛ mɛ̀ɛ té teha é ca̰ntá nìdo bá damuhipàdi daadí. (Mɛnn há̰ de pú cetà ca̰ndáma, àmá nɛ yààpa cecepá-dà mà cetà). 23 Kà nɛ kó nɛɛ́ ca̰ntá bíidatá damuhipàdi daadí è pú n'yetà-nà kpɛ̰́ńdìnùdi Mɔ̀yísì nɛ kɔ̰́ɔ̰̀-di, badà há̰ tee kà fɔ̰́ɔ̰́di nɛ káá n hḭ́ǹka nà n kpekànà-ma nìdo o wɛn-wɛǹni damuhipàdi daadí? 24 Nɛ té dá sída nìpa nɛ mádí kà pà pa̰kú-sa hḭ́ǹka, àmá nɛ té pà sída cóńcodí. 25 Kà Sèdìsàdɛ́m̀ yam̀ma pàcɔ̰́ békú pa cɔ̰́ɔ̰̀di è toò: Dɔɔò mɛnǹ dɔ pà pɛnti é kɔ̀ù-ma? 26 Ǹtoò-nà k'ò wɛì nìku wɛǹni yìhìka bá òcɔ̰́ǹ p'óò wɛì-nà màcɔ̰́mà. Ti wóópà dá m'bantà-á-ma nà mɔ́ma è yɔ̀ ò yòǹ Kídísì? 27 Dɔɔò mɛnǹ há̰kà, ti yá̰á̰-ma ò yɛ̀ni-sá-ní. Àmá Kídísì kó tɛ̀ni tḭ́ń daadí, òcɔ̰́ǹ pú kó n'yá̰á̰ ò yɛ̀ni-sá-ní. 28 Ye wɔ̀ni, è hɔ̰́tà Sèsíì biɔhànì Weèdi hɔ̰́ɔ̰̀ta mɛhɛká. K'ó wɛdá kpeéma è yɔ̀: Nɛ maàhu è tonà nɛ n yá̰á̰-dà dɛ́dɛ́í, è yá̰á̰ nà n yɛɛ̀ni-sá-ní nkɛ́ɛ̀? N pú tɛ̀ni nà n cɔ̰́ɔ̰̀di. Mɛ̀ǹǹ n tɔn-kó-ní yòǹ wɛbemú yaǹn-dà, nɛ mɛ̀ɛ p'óò yá̰á̰. 29 Mmí, n ò yá̰á̰-ma, mìì tee-sá o pesá-dà n yɛɛ̀ni-má-ní. Mɛnń-dà mɛ̀ɛ n tɔn-ní. 30 Ye wɔ̀ni, kà pá n'kpɛ̀i óò cɛ̰dí, àmá òcɔ̰́ǹ há̰ pú nɛɛ̀ é cɔ̰ná nɔ̀ku o hḭ́ǹka, mìì tee-sá o wɔ̀ni de mun pú tɛ̀ni. 31 Ye nìku mɛhɛká, kà nìpa dɔ́ɔ́di é taàa pa dandaní o hḭ́ǹka, è wɛì è tonà: Kídísì kó tɛ̀ni tḭ́ń daadí é pa̰á̰-dà pɔ́ńdápa̰á̰ma kà má ha̰tá-nà mɛnǹ pa̰kú-mà? 32 Kà Fàdísìpa pàcɔ̰́ é yekà nìpa de wɛ́-wɛ́hàta-sá ye nìku mɛhɛká Sèsíì hḭ́ǹka. Ye wɔ̀ni, kà dɔ̀hàka yam̀ma kpɛ̰́m̀ma, nà Fàdísìpa é tɔn sósìpa è yɔ̀ p'óò cɛ̰ɛ̰́-ní. 33 Kà Sèsíì é pà caka è yɔ̀: N káà nɛ péé-nà daàka cɛ̰́ma-dà, ye kú dàhàka n kó tón-ń-ma mɛ̀ǹǹ n tɔn-kó-ní pesá. 34 Nɛ kó n pɛha-á-ma, nɛ bá n dɛ́há, mìì tee-sá nɛ pú kó nɛɛ́ tadí n kó m'péé-sa. 35 Ye wɔ̀ni, kà Sùwífùpa kpɛ̰́m̀ma é m'békú pa tɔɔ̀pa è toò: Ò kɔ́dí ya-dà, kà ti pú kó nɛɛ́ óò dɛ́há? Ò kó taá Sùwífùpa mɛ̀m̀pà ya-yahí-pa Kɛ̀dɛ́kìpa kú teǹka mɛhɛká-dà é tɛ̀i é caka Weèdi wɛmá Kɛ̀dɛ́kìpa? 36 Ò wɛɛ̀-mà wɛmà è yɔ̀: Nɛ kó n pɛha-á-ma nɛ bá n dɛ́há, n mɛ̀ɛ kó m'péé-sa, nɛ pú kó nɛɛ́ yè tadí, mà kpɛ̀i é n'yɔ̀ badà? 37 Ye kúúdi dadèǹdèni daadí-dà, de hɔ̰́ n'yòǹ dasàdi mɔ́nní. Ye daadí, kà Sèsíì é yídá nɛɛ̀hi nìku yìhìka é wɛdá kpeéma è yɔ̀: Kà nɛ́yà̰hakú káá-ko, k'ó ya̰ní n pesá é yà̰à̰. 38 Mɛ̀ǹǹ n dań-ko, nɛ́ɛmá mɛ̀mà kɔ̰́nì-ma fòùmu kó n'wudì-í-ma o mɛhɛká k'yé n'yònà Weèdi wɛmá mà hḭ́mpú. 39 Sèsíì de wɛì Weèdi Sèdi wɛmá-dà, mɛ̀m̀pà de taà-pa dandaní o hḭ́ǹka de kó dɛ́tá-di. Yè de hɔ̰́tà ye wɔ̀ni, Weèdi de mun pú kɔ̰́ɔ̰̀-ní ni Sèdi, mìì tee-sá nì de mun pú dikànà Sèsíì hḭ́ǹka óò wɛkàna. 40 Nìpa mɛ̀m̀pà de péé-pa ye pesá yeèkaà-ma k'ò yɔ̀ mɛma, kà pàcɔ̰́ yɔ̀: Ye dɔɔò mɛnǹ yòǹ Weèdi wɛtɛ̰́náko ti ceí-ko-dà nà bemú. 41 Kà tɔɔ̀pa yɔ̀: Weèdi ta̰kadáko-dà! Kà tɔɔ̀pa tonà: Kídísì há̰ kó nɛɛ́ yɛɛ̀ni-dà-ní nà Kàdìdéè? 42 Weèdi wɛmá pú hḭ́n Kídísì kó n'yòǹ wódo Dàfítì yaàbíidí dò? Mà pú hḭ́n ò kó yɛɛ̀ni-nà-ní Bɛ̀tìdɛ̀ɛ́m̀, Dàfítì yɔtí? 43 Mɛmá-dà, k'yèe nìku é totá nà Sèsíì kpɛ́mú. 44 Pa mɛhɛká, kà pàcɔ̰́ é n'kpɛ̀i óò cɛ̰ɛ̰́, p'oòcɔ̰́ǹ há̰ pú nɛdà é cɔ̰ná o nɔ̀ku o hḭ́ǹka. 45 K'yèe sósìpa é tóní dɔ̀hàka yam̀ma kpɛ̰́m̀ma nà Fàdísìpa pesá, é tɛ̀ni kà pá pà béka è yɔ̀: Badà tee kà nɛ pú cɛ̰ɛ̰́-ní Sèsíì? 46 Kà pá pà tɛ̰́ná è yɔ̀: Òcɔ̰́ǹ mun pú wɛdà daadí yènì è yònà dɔɔò mɛnǹ. 47 Ye wɔ̀ni, kà Fàdísìpa é pà béka è yɔ̀: Nɛ́na, nɛ mɛ̀ɛ té héè k'ó nɛ yehèna-á-ma? 48 Nɛ mun yeèkaà-á-dà daadí yènì kà pà yɔ̀ ti kpɛ̰́ǹn òcɔ̰́ǹ, yoo Fàdísìpa p'oòcɔ̰́ǹ tàà dandaní o hḭ́ǹka? 49 Nìpa mɛ̀m̀pà ò dań-pa yòǹ weǹkɔ̀ucí-dà. Pà pú yá̰á̰ Mɔ̀yísì kpɛ̰́ńdìnùka. 50 Yè de hɔ̰́tà Nìkòdɛ́m̀, k'ò yòǹ ye Fàdísìpa p'oòcɔ̰́, yè péé. Mɛnń-dà de tɛ̀i-ho yèǹka kàcɔ̰́kà é dɛ́há Sèsíì. K'ó pà béka è yɔ̀: 51 Ti kpɛ̰́ńdìnùka ti pɛ̰ḭ-ḭ́-dà nùdi è yɔ̀ tí té kɔ̰́ɔ̰́ nìdo yetádi, è mun p'óò besí é yekà ò pa̰à̰-sa? 52 Kà p'óò tɛ̰́ná è yɔ̀: Fɔ̰́ń, a mɛ̀ɛ té dá n'yòǹ Kàdìdéè kóoó? Fedá Weèdi wɛmá sukú, a kó yá̰dá-ma è yɔ̀ Weèdi wɛtɛ̰́náko òcɔ̰́ǹ pú kó nɛɛ́ yɛɛ̀ni nà Kàdìdéè. 53 Ye kú dàhàka, kà bá mɛ̀ǹǹ dɛ̀ɛ̀-ko é kòǹ o hɔ̰́ɔ̰̀ta.
1 Kà Sèsíì mɛnn é dìsi òdífùna ta̰à̰di hḭ́ǹka. 2 K'yé weka ká̰ńyɛ̰̀ǹfa pìdìpìdì, k'ó tón Weèdi hɔ̰́ɔ̰̀ta mɛhɛká kà nìpa wɛǹni é peèta o pesá. K'ó kaàdi è pà biɔhànì. 3 Kà Weèdi kpɛ̰́ńdìnùka biɔhànapá nà Fàdísìpa óò tɛɛ̀-ní poòo òcɔ̰́ǹ, kà p'òò cɛ̰dí k'ò cɔ̰hú dɔɔdí. Kà pá tɛ̀ni óò nɛ̀hìna-hɔ̰ nìku wɛǹni yìhìka, 4 é caka Sèsíì è yɔ̀: Dakpɛ̰́ǹn, pooò mɛnǹ p'òò cɛ̰ɛ̰́-ní k'ò cɔ̰hú dɔɔdí-dà. 5 Kpɛ̰́ńdìnùka mɛhɛká, Mɔ̀yísì ti kɔ̰́ɔ̰̀ nùdi è yɔ̀ ti té ká̰mu ye kú poopà bookù tá̰à̰ka-dà é pà kɔ̀ù. Fɔ̰́ń tá, a hḭ́n ba ye hḭ́ǹka? 6 Pà de wɛì mɛma è kpɛ̀i óò díhìna wɛmá-dà k'ó yetá, kà pá dɛ́tá o pṵ́ṵ́-sa. Kà Sèsíì é tṵḿ, é n'wa̰à̰hu teǹka n'ɔ̀ɔ há̰ḿbíifá. 7 Pà há̰ de sɔ̰ncí-ma òò békú tá, k'ó yíkàna-ní o cɔ̰́ɔ̰̀di é pà caka è yɔ̀: Nɛ mɛhɛkà, mɛ̀ǹǹ pú pa̰à̰-ko sḭ̀ḭ̀ma n'ɔ̀ɔ̀ péé-ma, k'yèe yaǹn é cedí óò ká̰ńtá tá̰à̰di. 8 Ye wɔ̀ni, k'ó tṵ́má tṵḿ, é n'wa̰à̰hu teǹka. 9 Pà yèkaà-ma mɛma, kà pá n'nɔdì òcɔ̰́ òcɔ̰́ è ka̰hù, é cetá nà kpɛ̰́m̀ma háá é deǹta-nà sìmɔ́m̀ma. K'yé sɔ̰́ńtá Sèsíì cɔ̰́ɔ̰̀di n'ɛ̀ɛ poòo k'ò káà nɛ̀hi pà de ò nɛ̀hìnà-sa. 10 Ye wɔ̀ni, k'ó yíkàna o cɔ̰́ɔ̰̀di é béka ye poòo è yɔ̀: Ntɛ́ ye nìpa? Òcɔ̰́ǹ pú kaá è k'áa kɔ̰́ɔ̰́ yetád'aa? 11 K'yèe poòo óò tɛ̰́ná è yɔ̀: Òcɔ̰́ǹ pú kaá n Teù. Kà Sèsíì óò caka è yɔ̀: Mmí mɛ̀ɛ té p'áa kɔ̰́nì yetádi. Ka̰há, àmá a koò dá pa̰á̰ sḭ̀ḭ̀ma. 12 Kà Sèsíì é tṵ́má caka nìku è yɔ̀: Mmí, n yòǹ wenikú-dà mɛ̀ǹkù tìi-kú nìpa. Kà nìi n tṵ̀n, ò koò pú kó n'centì yḭ́ḭ̀pu mɛhɛká, àmá ò kó m'péé wenikú mɛ̀ǹkù kɔ̰́nì-ku fòùmu mɛhɛká-dà. 13 Kà Fàdísìpa óò caka è yɔ̀: A wɛì a mɔ́nń kú kpɛ́mú-dà. A mɛ̀ɛ wɛì-sà pú yòǹ bemú. 14 K'ó pà tɛ̰́ná è yɔ̀: Bá kà n wɛì-nà n mɔ́nń kú kpɛ́mú-dà, n wɛì-sa há̰ yòǹ bemú-dà, mìì tee-sá n yá̰á̰-ma n yɛɛ̀ni-sá-ní, è yá̰á̰ n kɔ́ɔ́-sa. Nɛ́na mɛ̀ɛkà, nɛ pú yá̰á̰ n yɛɛ̀ni-sá-ní, nɛ mɛ̀ɛ pú yá̰á̰ n kɔ́ɔ́-sa. 15 Nɛ́na, nɛ sídí nìpa sídí-ma kú bookú-dà. Mmí mɛ̀ɛkà, n pú sídí òcɔ̰́ǹ. 16 K'yè mɛ̀ɛ yoò tɛ̀ni kà n kó sída, n sídàma hɔ̰́ n'yòǹ bemú-dà, mìì tee-sá n pú hɔ̰́ n'yòǹ n cɔ̰́ɔ̰̀di ma mɛhɛká. N Báàa mɛ̀ǹǹ n tɔn-kó-ní hɔ̰́ nà n m'péé-nà-á-ma. 17 Nɛ kpɛ̰́ńdìnùka mɛhɛká, pà wà̰tà è yɔ̀: Kà nìi pàdɛ́ɛ́ cakàma yòǹ màcɔ̰́ pà dɛ́hà-sa kú hḭ́ǹka, ye kú cakàmà yòǹ bemú-dà. 18 Mmí, n wɛì n mɔ́nń kú kpɛ́mú-dà, kà n Báàa mɛ̀ǹǹ tɔn-kó-ní mɛ̀ɛ té wɛì n kpɛ́mú. 19 Kà p'óò béka è yɔ̀: A báàa péé ya? K'ó pà tɛ̰́ná è yɔ̀: Nɛ pú n yá̰á̰, nɛ mɛ̀ɛ pú yá̰á̰ n Báàa. Kà nɛ de n yá̰á̰ dɛ́dɛ́í, è yenì nɛ yá̰á̰-ma n Báàa. 20 Sèsíì de cakú ye wɛmà, è péé Weèdi hɔ̰́ɔ̰̀ta mɛhɛká-dà. Ò de péé bɛ̀m̀bɛ̀ni pà de hḭ́nà-di-dà dící taàsá è biɔhànì. Òcɔ̰́ǹ pú teháà óò cɛ̰dí, mìì tee-sá o wɔ̀ni de mun pú tɛ̀ni. 21 Kà Sèsíì é tṵ́má pà caka è yɔ̀: N kɛ̰hɛdi-í-ma, kà nɛ kó n pɛha, àmá nɛ kó kpíí-ma nɛ sḭ̀ḭ̀ma mɛhɛká. Nɛ pú kó nɛɛ́ tadí n kɔ́ɔ́-sa. 22 Ye wɔ̀ni, kà Sùwífùpa é m'békú pa tɔɔ̀pa è toò: Ò kó kɔ̀ù o cɔ̰́ɔ̰̀di-da-à? Ò yɔ̀ ti pú kó nɛɛ́ taá ò kɔ́ɔ́-se-è! 23 K'ó pà caka è yɔ̀: Nɛ́na, nɛ yòǹ teǹka kpɛ́ɛpá-dà, mmí mɛ̀ɛ yòǹ hḭ́ǹka kóoó-dà. Nɛ yòǹ fòùkù mɛnkù kú nìpa-dà, mmí mɛ̀ɛ pú yòǹ fòùkù mɛnkù kú nìdo. 24 Mɛmá-dà tee ká n nɛ caka è yɔ̀ nɛ kó kpíí-ma nɛ sḭ̀ḭ̀ma mɛhɛká. Kà nɛ pú dań è yɔ̀ n yòǹ mɛ̀ǹǹ péé-ko, nɛ kó kpíí-ma nɛ sḭ̀ḭ̀ma mɛhɛká. 25 Kà p'óò béka è yɔ̀: Fɔ̰́ń yòǹ wodà? K'ó pà tɛ̰́ná è yɔ̀: N nɛ cakáà è yɔ̀ n yòǹ-ko nà cetáma-ní. 26 N káá-ma niìya̰ dɔ́ɔ́di è kó nɛɛ́ wɛdá nɛ hḭ́ǹka, é nɛɛ́ nɛ síi-nà, n há̰ pú k'éè wɛdá. Mɛ̀ǹǹ n tɔn-kó-ní yòǹ wɛbemú yaǹn-dà. N mɛ̀ɛ yeèkaà-sa o pesá, mií-dà n cakú-ma nìpa. 27 Pà de pú bantà è yɔ̀ ò pà cakú Báàa hḭ́ńkà kóoó wɛmá-dà. 28 Ye wɔ̀ni, kà Sèsíì é pà caka è yɔ̀: Nɛ kó yohòna tḭ́ń daadí mmí Niìfòùo bíitá hḭ́ǹka, ye daadí-dà nɛ kó bantá-ma è yɔ̀ n yòǹ n nɛ cakáà è yɔ̀ n yòǹ-ko. Nɛ kó bantá-ma è yɔ̀ n pú pa̰kú yècḭ́ḭ̀ nà n cɔ̰́ɔ̰̀di, àmá n cakú n Báàa n biɔhànà-sa-dà sá̰à̰di. 29 Mɛ̀ǹǹ n tɔn-kó-ní n péé-nà-á-ma. Ò pú n hédà n cɔ̰́ɔ̰̀di mìì tee-sá n pa̰kú wɔ̀ka wɛǹni ò kpɛ̀i-sá-dà. 30 Sèsíì de wɛɛ̀-ma mɛma, kà nìpa dɔ́ɔ́di é taàa pa dandaní o hḭ́ǹka. 31 Ye wɔ̀ni, kà Sèsíì é caka Sùwífùpa mɛ̀m̀pà de taà-pa pa dandaní o hḭ́ǹka è yɔ̀: Kà nɛ tṵ̀n n wɛmá hḭ́mpú, nɛ kó n'yòǹ n dapàm̀ma mɔ́mpá-dà. 32 Nɛ kó yá̰dá-ma wɛbeèdi, kà wɛbeèdi é nɛ deèna núǹti mɛhɛká. 33 Kà p'óò tɛ̰́ná è yɔ̀: Ti yòǹ Àbààhám̀ yaàbíiká-dà, ti mɛ̀ɛ pú hḭn òcɔ̰́ǹ kú núm̀ma daadí yènì. Ntɛ́ a kó hḭmà è yɔ̀ ti kó yɛ̀ɛ̀ núǹti mɛhɛká? 34 K'ó pà caka è yɔ̀: Bemú-dà n nɛ cakú-ma, mɛ̀ǹǹ kú wɛnnì pa̰kú-ko sḭ̀ḭ̀ma, ò yòǹ sḭ̀ḭ̀ma núǹn-dà. 35 Núǹn pú hɔ̰́ hḭn o dakpɛ̰́ǹn hɔ̰́ɔ̰́tàkóoó k'yé n'kɔ́ɔ́ yɔ̀ɔmá. Àmá hɔ̰́ɔ̰́tàbíitá-dà hɔ̰́ mà n'yòǹ k'yé n'kɔ́ɔ́ yɔ̀ɔmá. 36 Kà Weèdi bíitá nɛ fḭ́hìnà, nɛ kó n'tee-é-ma nɛ cɔ̰́ɔ̰̀di dɛ́dɛ́í. 37 N yá̰á̰-ma è yɔ̀ nɛ yòǹ Àbààhám̀ yaàbíiká. Àmá nɛ kpɛ̀i é n kɔ̀ù-ú-ma, mìì tee-sá nɛ pú teháà n wɛmá. 38 Mmí, n wɛì n dɛ́hà-sa-dà-ní n Báàa pesá. Nɛ́na mɛ̀ɛkà, nɛ pa̰kú nɛ báàa nɛ cakáà-sa-dà. 39 Kà p'óò tɛ̰́ná è yɔ̀: Àbààhám̀-dà yòǹ ti báàa. K'ó pà caka è yɔ̀: Kà nɛ de yòǹ Àbààhám̀ bííhí-dà, è yenì nɛ pa̰kú ò de pa̰à̰-sa-dà. 40 Mmí, n nɛ cakáà wɛbeèdi n yeèkaà-di-dà-ní Weèdi pesá, nà mɛma kà nɛ pɛnti è kó n kɔ̀ù. Àbààhám̀ pú pa̰à̰ ye kú pa̰á̰mà-ní daadí yènì. 41 Nɛ́na, nɛ pa̰kú nɛ báàa pa̰kú-sa-dà. Kà p'óò tɛ̰́ná è yɔ̀: Ti pú yòǹ makáńdóobíiká. Ti káá Báàa òcɔ̰́-dà, Weèdi-dà mɛ̀ɛ dɛɛ̀. 42 Kà Sèsíì é pà caka è yɔ̀: Kà Weèdi de héé nɛ Báàa nà mɔ́ma, è yenì nɛ n dɔ́sí-ma, mìì tee-sá n yɛɛ̀ni-nà-ní ni pesá-dà. N pú tɛ̀ni nà n cɔ̰́ɔ̰̀di kú tɛ̀mmá-ní, àmá mɛní-dà n tɔn-ní. 43 Badà tee kà nɛ pú kpɛ̀i é yekà n nɛ cakú è tonàpu? Yè yòm̀pu kpɛ́mú-dà nɛ pú kpɛ̀i é besí n wɛmá. 44 Nɛ báàa-dà héé Wɛɛ̀kupá wódo, nɛ mɛ̀ɛ kpɛ̀i é pa̰á̰ nɛ báàa kpɛ̀i-sá-dà. Mɛnn yòǹ niìkɔ̀ùdo-dà nà cetáma-ní. O cììti-dà wɛbeèdi, mìì tee-sá ò nì kɔ́ɔ́ o mɛhɛká. K'ò cakú tḭ́ń wɔ̀ni nuǹhetí, ò cakú o wɛmɔ́ma-dà, mìì tee-sá ò yòǹ nuǹhetí yaǹn-dà. Mɛnń-dà mɛ̀ɛ yòǹ nuǹhetí báàa. 45 Mmí há̰ cakú wɛbeèdi-dà, mɛmá-dà tee kà nɛ yení n wɛmá. 46 Nɛ mɛhɛkà, woò mɔ́ńn-dà kó nɛɛ́ bɛka sḭ̀ḭ̀ma n pa̰à̰-ma? Kà n há̰ cakú wɛbeèdi-dà, badà tee kà nɛ yení n wɛmá? 47 Mɛ̀ǹǹ yòǹ-ko Weèdi kóoó hɔ̰́ m'bekù-ú-ma Weèdi wɛmá. Nɛ́na há̰ pú yòǹ Weèdi kpɛ́ɛpá, mɛmá-dà tee nɛ pú bekù-ma n wɛmá. 48 Kà Sùwífùpa óò caka è yɔ̀: Ti hḭ́n-mà a yòǹ Sàmàdíì tempáàku kóoó-dà, kà wɛɛ̀ko péé a mɛhɛká, ti naa-á-dà fá? 49 K'ó pà tɛ̰́ná è yɔ̀: Wɛɛ̀ko òcɔ̰́ǹ kɔ́ɔ́ n mɛhɛká. N cuunì n Báàa-dà, àmá kà nɛ́na há̰ yení n cuùupú. 50 Mmí pú bɔhàta n cɔ̰́ɔ̰̀di kú wɛhimú, mɛ̀ǹǹ bɔ̀hàta-kó n wɛhimú péé-dà, mɛnń-dà mɛ̀ɛ sídí cóńcodí. 51 Bemú-dà n nɛ cakú-ma. Kà mɛ̀ǹǹ tṵ̀n-kó n wɛmá hḭ́mpú, ò pú kó kpíí daadí yènì. 52 Kà Sùwífùpa óò caka è yɔ̀: Sá̰mà-ní-ì, ti bantà-á-ma dɛ́dɛ́í è yɔ̀ wɛɛ̀ko-dà péé a mɛhɛká. Àbààhám̀ kpíi-í-ma, kà Weèdi wɛtɛ̰́nápa mɛ̀ɛ té kpíí, kà fɔ̰́ń há̰ yɔ̀ kà mɛ̀ǹǹ tṵ̀nà-ko a wɛmá hḭ́mpú, ye yaǹn pú kó kpíí daadí yènì. 53 A maàhu è yɔ̀ a ha̰tà-á-dà ti yàdo Àbààhám̀ mɛ̀ǹǹ kpíi-kó nkɛ́ɛ̀? Weèdi wɛtɛ̰́nápa mɛ̀ɛ té kpíi-í-dà. A tóńkú a cɔ̰́ɔ̰̀di wodà? 54 Kà Sèsíì é pà tɛ̰́ná è yɔ̀: Kà n de wɛkànì n cɔ̰́ɔ̰̀di-dà, n wɛhimú pú kó n'yòǹ yècḭ́ḭ̀. N Báàa-dà há̰ n wɛkànì, nɛ hḭ́n mɛ̀ǹǹ yòǹ-ko nɛ Weèdi, 55 n'aá p'óò yá̰á̰. Mmí, n ò yá̰á̰-ma. Kà n de hḭ́n n p'óò yá̰á̰, n de kó n'yòǹ nuǹhetí yaǹn-dà, é n'yònà nɛ́na. Àmá, n ò yá̰á̰-ma è tṵ̀n o wɛmá. 56 Yè de naa-á-ma dɛ́dɛ́í nɛ yàdo Àbààhám̀, ò de maàhu-má è tonà ò kó dɛ́há-ma n tɛ̀mmá-ní daadí. K'ò mɛ̀ɛ de nì dɛ́há k'yóò naaka sàma. 57 Kà Sùwífùpa óò béka è yɔ̀: Fɔ̰́ń mɛ̀ǹǹ mun pú káá-kò beeká púnùm̀, ntɛ́ a kó hḭmà è yɔ̀ a dɛ́hà Àbààhám̀? 58 K'ó pà tɛ̰́ná è yɔ̀: Bemú-dà n nɛ cakú-ma, kà pá nɛɛ́ pɛdá Àbààhám̀, mmí de péé-ma. 59 Ye wɔ̀ni, kà pá ta̰nka tá̰à̰ka è k'óò ká̰mu. Àmá, k'ó sɔ̀di é yɛ̀dì ye Weèdi hɔ̰́ɔ̰̀ta mɛhɛká.
1 Ye kú dàhàka, kà Sèsíì é n'kɛ̰hɛdi, é dɛ́há cɔ̀ku hḭ́ǹka dɔɔ̀o òcɔ̰́ǹ k'ò yòǹ yɔ̀ǹn nà p'òò pɛdà-ma. 2 K'òo dapàm̀ma óò béka è yɔ̀: Dakpɛ̰́ǹn, baà tee kà pá pɛdá dɔɔò mɛnǹ k'ò yɔ̀n? O mɔ́nń-dà pa̰à̰ sḭ̀ḭ̀ma nkɛ́ɛ̀ o báàpa-dà pa̰à̰ sḭ̀ḭ̀ma k'yóò hḭn-nà mɛma? 3 Kà Sèsíì é pà tɛ̰́ná è yɔ̀: Yè pú yòǹ mɛnń yoo o báàpa-dà pa̰à̰ sḭ̀ḭ̀ma k'yóò hḭn mɛma. O yɔ̀ǹkù-dà kó hédá kà Weèdi é bɛka o hḭ́ǹka ni kpeèti sá̰á̰pu. 4 Yè békú tí pa̰á̰ mɛ̀ǹǹ n tɔn-kó-ní dehèna-dà kà wèǹku kadí. Yèǹka-dà pení k'òòcɔ̰́ǹ koò pú kó nɛɛ́ deha. 5 N káà péé-mà fòùkù mɛhɛkà, n yòǹ wenikú-dà mɛ̀ǹkù tìi-kú nìpa. 6 Ò wɛdà-ma mɛma é yɔ̀ɔ, é tṵ́dá nuǹtɔ̰tí teǹka, é butá tá̰à̰ti, é tódá ye tá̰à̰ti é sɔ̰́hí ye yɔ̀ǹn nɔ̀ǹci, 7 ye wɔ̀ni óò caka è yɔ̀: Taá yudá a yìhìka bínhɔɔ̀dí pà toò-di Sìdòwéè mɛhɛká. (Ye yèdì kpɛ̀i é n'yɔ̀ tɔnkó-dà). K'yèe yɔ̀ǹn é ka̰há, é tɛ̀i yudá o yìhìka, é n'tóńti-ní è dìi pópóí. 8 Ò dentɔɔ̀pa nà mɛ̀m̀pà de ò dɛ́hù-pa k'ò cɔ̀hu, kà pà békú pa tɔɔ̀pa è tonà: Yè pú yòǹ dɔɔ̀o mɛ̀ǹǹ de kaàdi-kó-dà miì è cɔ̀hu? 9 Kà pàcɔ̰́ tonà: Mɛnń-dà. Kà tɔɔ̀pa tonà: Mɛnn dɔ, òò yònà-á-ma. K'yèe dɔɔ̀o mɔ́nń tonà: Mmí-dà n fòùo n fòùo. 10 Kà p'óò béka è yɔ̀: Ntɛ́ yè hḭmà k'àa nɔ̀ǹci é diìda? 11 K'ó tɛ̰́ná è yɔ̀: Nìdo pà toò-ko Sèsíì-dà butà tá̰à̰ti cɛ̰́ma é sɔ̰́hí n nɔ̀ǹci, é n caka è yɔ̀, ń taá yudá Sìdòwéè bínhɔɔ̀dí mɛhɛká. Ká n taá é tɛ̀i é yudá, kà n nɔ̀ǹci é diìda póí. 12 Kà p'óò béka è yɔ̀: Ye nìi péé ya-dà? K'ó tɛ̰́ná è yɔ̀: N pú yá̰á̰ ò péé-sa. 13 Kà pá tanà ye yɔ̀ǹn pà dìhìnà-ko Fàdísìpa pesá. 14 Y'àá de hɔ̰́tà damuhipàdi daadí-dà Sèsíì de butà-ma tá̰à̰ti óò dìhìna. 15 Ye kú kpɛ́mú-dà tee kà Fàdísìpa mɛ̀ɛ té béka ye dɔɔ̀o, yè hḭmpú k'ò yɔ̀ɔ è dìi-nà. K'ó pà caka è yɔ̀: Ò sɔ̰́hí n nɔ̀ǹci-dà tá̰à̰ti cɛ̰́ma, ká n taá é yudá é n'hɔ̰́tà n dìi póí. 16 Kà Fàdísìpa pàcɔ̰́ yɔ̀: Nìi mɛ̀ǹǹ hḭn-kó mɛma pú yòǹ Weèdi kóoó, mìì tee-sá ò pú tṵnà kpɛ̰́ńdìnùka hḭ́mpú damuhipàdi hḭ́ǹka. Àmá kà tɔɔ̀pa tonà: Ntɛ́ niìsḭ̀ǹn kó nɛɛ́ hḭmà é pa̰á̰ pɔ́ńdápa̰á̰mà mɛmà-ní? Mɛmá-dà, kà totáma é pa̰á̰ pa cɔhàka. 17 Kà pá tṵ́má béka ye yɔ̀ǹn pà dìhìnà-ko è yɔ̀: Fɔ̰́ń tá há̰kà, a maàhu è yɔ̀ mɛ̀ǹǹ a dìhìnà-kò yòǹ wodà? K'ó pà tɛ̰́ná è yɔ̀: Ò yòǹ Weèdi wɛtɛ̰́náko-dà. 18 Nà mɛma baàkaà, Sùwífùpa kpɛ̰́m̀ma de pú kpɛ̀i é teha è yɔ̀ ò de yɔ̀n è há̰ dìi sá̰kù. Ye kú kpɛ́mú, kà pá yíí-ní o báàpa. 19 Kà pá tɛ̀ni, kà pá pà béka è yɔ̀: Nɛ bíitá-dà miì? Mɔ́masí-dà nɛ tà pɛdà-ma kà tà yɔ̀n? Ntɛ́ yè hḭmà kà tà dìi sá̰kù? 20 K'yèe báàpa é tɛ̰́ná è yɔ̀: Mɔ́masí-dà ò yòǹ-ma ti bíitá, n'ɔ̀ɔ pɛdáma-dà mɛ̀ɛ dɛɛ̀ k'ò yɔ̀n. 21 Àmá ti pú yá̰á̰ yè hḭmá k'ò dìi sá̰mà-ní, ti mɛ̀ɛ tṵ́mà pú yá̰á̰ mɛ̀ǹǹ ò dìhìnà-ko. Ò béka-nà o mɔ́nń-ḭ́ḭ̀, ò koò pú bíí-ma, ò kó nɛɛ́ nɛ caka-á-dà mìì ò dìi-sá. 22 O báàpa de hḭ́n mɛma, mìì tee-sá pà de wani Sùwífùpa kpɛ̰́m̀ma-dà. Yè de hɔ̰́tà pà yɔ̀ɔ pɛ́ɛ́pu-dà nùdi, è kó bɔhà Weèdi wɛmá biɔhà-nàmɔ̀ni mɛhɛká, mɛ̀ǹǹ kú wɛnnì kó n'yɔ̀-ko, Sèsíì-dà yòǹ Kídísì. 23 Ye kú kpɛ́mú-dà tee k'òo báàpa yɔ̀: Ò koò pú bíí, ò béka-nà o mɔ́nń. 24 Kà Fàdísìpa é yíí-ní dɛ́ɛ̀ma ye dɔɔ̀o mɛ̀ǹǹ de yɔ̀n-kó, óò caka è yɔ̀: Caka bemú Weèdi yìhìka. Tḭ́ńti yá̰á̰ è yɔ̀ ye dɔɔò mɛnǹ yòǹ niìsḭ̀ǹn-dà. 25 K'yèe dɔɔ̀o é pà tɛ̰́ná è yɔ̀: K'ò yòǹ niìsḭ̀ǹn yoo ò pú yòǹ niìsḭ̀ǹn, n pú yá̰á̰. N yá̰á̰-sa sá̰à̰di, n de yòǹ yɔ̀ǹn-dà sá̰mà è dìi póí. 26 Kà p'óò béka è yɔ̀: W'àà pa̰à̰ badà? Ntɛ́ ò hḭmà áa dihìna? 27 K'ó pà tɛ̰́ná è yɔ̀: N mà nɛ cakáà-á-dà-ma, nɛ pú besí-ma. Badà tee kà nɛ kpɛ̀i n tṵ́má mà kódí? Nɛ mɛ̀ɛ té dá n'kpɛ̀i é hḭn o dapàm̀ma? 28 Kà p'óò tèùnà è yɔ̀: Fɔ̰́ń-dà yòǹ o dapàǹn. Tḭ́ńti yòǹ Mɔ̀yísì kú dapàm̀ma-dà. 29 Ti yá̰á̰ è yɔ̀ Weèdi de wɛɛ̀-nà Mɔ̀yísì-dà. Àmá mɛnǹ mɛnn, tḭ́ńti pú yá̰á̰ ò yɛ̀ni-ká-ní bɛ́ka. 30 K'yèe dɔɔ̀o é pà tɛ̰́ná è yɔ̀: Ǹtɛ mìì n dii-s'éè, nɛ́na hḭ́n-sá è yɔ̀ nɛ pú yá̰á̰ ò yɛ̀ni-kà-ní-ì! Mɛnń-dà há̰ n dihìn'ɛ̀! 31 Ti yá̰á̰-dà-ma è yɔ̀ Weèdi pú bekù niìsḭ̀m̀ma, àmá nì hɔ̰́ besí mɛ̀ǹǹ kú wɛnnì nì cùùnì-ko-dà, è pa̰kú ni dɔ́kàma. 32 Nà ti péé-ma, ti mun pú yeèkaà kà pà yɔ̀ òcɔ̰́ǹ dìhìnà yɔ̀ǹn kà p'òò pɛɛ̀-ní k'ò mà yòǹ. 33 K'yèe nìdò de pú yòǹ Weèdi kóoó, ò de pú kó nɛɛ́ pa̰á̰ yècḭ́ḭ̀. 34 Kà p'óò tɛ̰́ná è yɔ̀: Fɔ̰́ń mɛ̀ǹǹ yòǹ-ko sḭ̀ḭ̀ma yaǹn a tàka n'àa yudí nà p'àà pɛdà-ma-ní, fɔ̰́ń-dà kó ti kɔ̰́ɔ̰́ biɔhànamá? Ye wɔ̀ni, kà p'óò bɔ̀hà Weèdi wɛmá biɔhà-nàmɔ̀ni mɛhɛká. 35 Kà Sèsíì é yekà è yɔ̀ p'òò bɔ̀haà, k'ó taá o peètanàpu é tɛ̀i óò béka è yɔ̀: Fɔ̰́ń tá, a dań-dà Niìfòùo bíitá hḭ́ǹka? 36 K'óò tɛ̰́ná è yɔ̀: N caka mɛnn héé-ko n Teù, k'yé teha ká n taàa n dandaní o hḭ́ǹka. 37 Kà Sèsíì óò caka è yɔ̀: A ò dìi-í-ma, mɛnń-d'àà wɛì-nà. 38 Ye wɔ̀ni, k'ò yɔ̀: N dań-ma n Teù, é cemá hìu dúùka o yìhìka. 39 Kà Sèsíì yɔ̀: N tɛ̀ni fòùkù mɛnkù kú mɛhɛká sídàma kpɛ́mú-dà, k'yé teha kà yɔ̀m̀ma é diìda, kà mɛ̀m̀pà dìi-pá é yɔ̀n. 40 Fàdísìpa pàcɔ̰́ mɛ̀m̀pà de péé-pa ye pesá yeèkaà-ma mɛma, kà p'óò béka è yɔ̀: Tḭ́ńti mɛ̀ɛ té yòǹ yɔ̀m̀ma-d'aà? 41 Kà Sèsíì é pà tɛ̰́ná è yɔ̀: Kà nɛ de yòǹ yɔ̀m̀ma-dà, è yenì nɛ kɔ́ɔ́ sḭ̀ḭ̀ma màcɔ̰́mà. Àmá, n'aá toò-mà: Ti dìi-í-ma, ye kú kpɛ́mú-dà tee kà nɛ baà kó m'péé sḭ̀ḭ̀ma mɛhɛká.
1 Kà Sèsíì é tuɛ̀ha è yɔ̀: Bemú-dà n nɛ cakú-ma. Kà nìi pú dúú hɔ̰ɔ̰̀kódedí mɛhɛká nà há̰ńnùdi, àmá k'ò ha̰tà bonkú è dúú, ye yaǹn yòǹ túùdo-dà è tṵ́mà yòǹ nɛnfèùko. 2 Mɛ̀ǹǹ há̰ hɔ̰́ dúú-ko hɔ̰ɔ̰̀kódedí mɛhɛká nà há̰ńnùdi, mɛnń-dà yòǹ hɔ̰ɔ̰̀cɛ̰nto. 3 Mɛ̀ǹǹ ceì-ko hɔ̰ɔ̰̀kódedí hɔ̰́ ò kpetá-ma há̰ńnùdi, kà hɔ̰̀ci té yekà o boòku. Ò hɔ̰́ yíí-ma o hɔ̰̀ci bá mɛ̀ǹfà dɛ̀ɛ̀-fa nà fa yèdi, é cì dèna tapaàdi. 4 Ò cì dènà tḭ́ń wɔ̀ni ci wɛǹni, é n'nihí yìhìka kà cì tṵ̀n, mìì tee-sá cì yá̰á̰-ma o boòku. 5 Cì pú hɔ̰́ tṵṵ̀na cì pú yá̰á̰-ko. Múńdìkaà, k'ò cì yíí, cì hɔ̰́ cocí-ma óò nátá-nà, mìì tee-sá cì pú yá̰á̰ o boòku. 6 Sèsíì de pà cakáà ye kú wɛbemù yohènamà-dà, àmá pà pú bantà ò de kpɛ̀i é n'yɔ̀pu. 7 Kà Sèsíì é tṵ́má pà caka è yɔ̀: Bemú-dà n nɛ cakú-ma, mmí-dà yòǹ hɔ̰ɔ̰̀kódedí há̰ńnùdi. 8 Mɛ̀m̀pà kú wɛnnì cedí tɛ̀ni-pá-ní kà n mun pú tɛ̀ni, yòǹ túùpa-dà è tṵ́mà yòǹ nɛnfèùpa, hɔ̰̀ci mɛ̀ɛ pú pà besí. 9 Mmí, n yòǹ há̰ńnùdi-dà. Kà nìdo yɛɛ̀ nà mmí è dúú, ye yaǹn kó fḭ́tá-ma. Ò kó n'dúù-ú-ma è yɛ̀hu-ní, ò mɛ̀ɛ pú kó mɔ́ńka o dipú. 10 Túùdo hɔ̰́ tɛ̀ni è kpɛ̀i yódá-ma, é kɔ̀ù, é fɛ́úwá sá̰à̰di. Mmí, n tɛ̀ni è kpɛ̀i nìpa-dà é dɛ́tá fòùmu, é mù n'káá sàma. 11 Mmí, n yòǹ hɔ̰ɔ̰̀cɛ̰nto sudó-dà. Hɔ̰ɔ̰̀cɛ̰nsudó hɔ̰́ kɔ̰́ɔ̰́ o fòùmu-dà o hɔ̰̀ci kpɛ́mú. 12 Mɛ̀ǹǹ pú tee-kó hɔ̰̀ci, è há̰ cì cɛ̰nti dící kpɛ́mú, pú yòǹ hɔ̰ɔ̰̀cɛ̰nto. Kà càkomɔɔ̀di pení è kó cì cɛ̰dí, ò hɔ̰́ cì yahí-ma-ho é nàa nɔ̀ka. Ye wɔ̀ni, k'yèe càkomɔɔ̀di té tɛ̀ni dɔdi ci hḭ́ǹka, é cì pidá. 13 Ye kú yanǹ kú bookù hɔ̰́ hḭmpú-dà, mìì tee-sá ò dehú dící kpɛ́mú-dà, hɔ̰̀ci wɛmá p'óò yɛ̰̀ḭ. 14 Mmí, n yòǹ hɔ̰ɔ̰̀cɛ̰nsudó-dà. N yá̰á̰-ma n hɔ̰̀ci, kà n hɔ̰̀ci n yá̰á̰, 15 é n'yònà n Báàa n yá̰káàma, kà n ò yá̰á̰. N mɛ̀ɛ kɔ̰́nì n fòùmu n hɔ̰̀ci kpɛ́mú-dà. 16 N káà káá-ma hɔ̰̀ci tɔɔcí, kà cì mun pú dúú hɔ̰ɔ̰̀kódedì mɛnì kú mɛhɛká. Yè békú n mɛ̀ɛ té cì túha-á-ma-ní, é cì dúù-ní. Cì kó yekà-á-ma n boòku, é múná é hḭn hɔ̰ɔ̰̀kàdo òcɔ̰́, kà hɔ̰ɔ̰̀cɛ̰nto é m'pee òcɔ̰́. 17 N Báàa n dɔ́sí-ma, mìì tee-sá n kó kɔ̰́ɔ̰́ n fòùmu é tṵ́má wáńtá mù tà̰ǹta. 18 Òcɔ̰́ǹ pú mù nà n fèù, àmá n mù kɔ̰́nì nà n yàma-dà. N káá-ma nɔɔ̀ti è kó nɛɛ́ mù kɔ̰́ɔ̰́, è káá nɔɔ̀ti è kó nɛɛ́ mù tà̰ǹta. N Báàa n kɔ̰́ɔ̰̀ nùdi è yɔ̀ n pa̰á̰-sa-dà. 19 Kà totáma é tṵ́má pa̰ná Sùwífùpa cɔhàka n'ɛ̀ɛ kú wɛmà kpɛ́mú. 20 Kà pa sààpa tonà: Wɛɛ̀ko-dà péé o mɛhɛká, ò fikadà-á-ma. Baà tee kà n'ɔɔ̀ besí? 21 Kà tɔɔ̀pa tonà: Wɛɛ̀ko péé-ko kú mɛhɛká pú kó nɛɛ́ wɛdá mɛmà kú bookú. Wɛɛ̀ko kó nɛɛ́-dà é dihìna yɔ̀m̀ma? 22 Yè de hɔ̰́tà sémú wɔ̀ni-dà, kà pà pètà Sèdìsàdɛ́m̀, è yon Weèdi hɔ̰́ɔ̰̀ta wekànamá kúúdi. 23 Kà Sèsíì é n'centì è tóǹ-ní Weèdi hɔ̰́ɔ̰̀ta hà̰ǹhàni mɛhɛká. Ye hà̰ǹhàni pà de nì toò Sàdòmɔ́ɔ̀ hà̰ǹhàni-dà. 24 Kà Sùwífùpa é tɛ̀ni óò yéńtá-ho, è yɔ̀: Háá daadí m̀mɔ́ńni-dà a baà kó ti caka-má wɛbeèdi a hḭ́ǹka? Kà fɔ̰́ń-dà héé Kídísì, k'á ti caka pópóí. 25 Kà Sèsíì é pà tɛ̰́ná è yɔ̀: N mà nɛ yɔ̀ɔ cakàpu-dà, nɛ mɛ̀ɛ pú mà teháà. Dehèna n pa̰kú-na nà Báàa yèdi, mɛná-dà bɛkú n yòǹ-ko. 26 Àmá nɛ́na nɛ pú dań, mìì tee-sá nɛ pú yòǹ n hɔ̰̀ci. 27 N hɔ̰̀ci you-ú-ma n boòku. Mmí, n cì yá̰á̰-ma, kà cì mɛ̀ɛ n tṵ̀n. 28 N cì pɛ̰ḭ fòùmu mɛ̀mù bá yɔ̀ɔ-pú-dà. Cì pú kó kpíí daadí yènì, òcɔ̰́ǹ mɛ̀ɛ pú kó nɛɛ́ cì fèda n nɔ̀ku mɛhɛká. 29 N Báàa mɛ̀ǹǹ cì nà n kɔ̰́ɔ̰̀-ko, ò wɛhi-nà-á-ma niìya̰ wɛǹni, òcɔ̰́ǹ mɛ̀ɛ pú kó nɛɛ́ cì fèda o nɔ̀ku mɛhɛká. 30 Mmí nà n Báàa, ti yòǹ òcɔ̰́-dà. 31 Kà Sùwífùpa é tṵ́má ta̰nka tá̰à̰ka, è k'óò ká̰mu óò kɔ̀ù. 32 K'ó pà caka è yɔ̀: Nɛ dɛ́hà-á-dà dehèsuuná dɔ́ɔ́di n pa̰à̰-na nà n Báàa kpeèti. Ye dehènà, na m̀mɔ́mu kú kpɛ́mú-dà tee kà nɛ kpɛ̀i é n ká̰mu tá̰à̰ka é n kɔ̀ù? 33 Kà Sùwífùpa óò tɛ̰́ná è yɔ̀: Ti pú kpɛ̀i áa ká̰mu tá̰à̰ka áa kɔ̀ù dehèsuumú mùcɔ̰́mù kú kpɛ́mú, àmá ti kpɛ̀i áa ká̰mu tá̰à̰ka mìì tee-sá a teù Weèdi-dà. Fɔ̰́ń a yòǹ nìdo-dà, è há̰ tóńkú a cɔ̰́ɔ̰̀di Weèdi. 34 Kà Sèsíì é pà tɛ̰́ná è yɔ̀: Pà pú wa̰tà nɛ kpɛ̰́ńdìnùka mɛhɛká è yɔ̀ Weèdi yɔ̀: Nɛ yòǹ weèka-dà? 35 T'aá yá̰á̰-dà-ma è yɔ̀ ti pú kó nɛɛ́ é kɔ̀ù Weèdi wɛmá màcɔ̰́mà! Weèdi-dà há̰ de yíí nì de kɔ̰́ɔ̰̀-pa ni wɛmá, è pà yɔ̀ weèka. 36 Mmí há̰kà, Weèdi-dà n ta̰kadà é n tɔn-ní fòùku mɛhɛké-è. Ntɛ́ y'àá kó hḭmà kà nɛ yɔ̀ n teù Weèdi-dà, nà n hḭ́mpú kpɛ́mú n yòǹ Weèdi bíitá? 37 Kà n pú pa̰kú n Báàa dehèna, nɛ dá nà n dań. 38 Kà n há̰ nà pa̰kú-dà, bá kà nɛ pú n dań, kà nɛ́ n'dań o dehèna hḭ́ǹka, k'yé teha kà nɛ́ bantá é n'yá̰á̰ è yɔ̀ Báàa péé n mɛhɛká, kà n péé o mɛhɛká. 39 Kà pá tṵ́má pɛha pà kó hḭmá óò cɛ̰dí, àmá k'ó fḭ́tá. 40 K'ó tón tṵ́màkaà Sùùtɛ̰́ɛ̰̀ kóńsóìdi tɔɔ̀di bɛ́ka, é tɛ̀i é m'péé bɛ̀m̀bɛ̀ni Ìsá̰à̰ de cómù-di nìpa. 41 Kà nìku dɔ́ɔ́di kɔ́dì-ní o pesá, è cakú pa tɔɔ̀pa è tonà: Ìsá̰à̰ pú pa̰à̰ pɔ́ńdápa̰á̰ma màcɔ̰́mà. Àmá, ò de cakáà-sa wɛǹni nìì mɛnǹ kú hḭ́ǹka, yòǹ mɔ́ma-dà. 42 Ye pesá, kà nìku dɔ́ɔ́di é taàa ku dandaní o hḭ́ǹka.
1 Dɔɔ̀o òcɔ̰́ǹ-dà de mɔkáà, è péé Bètàníì yɔtí, k'òo yèdi toò Dàsáà. K'òo potɔ̰ɔ̰̀pa, Màdíì n'ɔ̀ɔ kúkɔ̀ɔ Màátì pɛ́ɛ̀ ò péé-nà. 2 Màdíì há̰ de yòǹ poòo mɛ̀ǹǹ de cóò-ko-dà tùdàdésa Teó tàka hḭ́ǹka, é kà hṵtá n'ɔ̀ɔ yùti. O kú datɔ̰ɔ̰̀ɔ̰-dà de mɔn. 3 Mɛnń n'ɔ̀ɔ kúkɔ̀ɔ, kà pá tɔn nìdo è yɔ̀ ó taá caka Sèsíì è yɔ̀: Ti Teù, a dópo mɔn. 4 Sèsíì yèkaà-ma mɛma, è yɔ̀: Dɔnkù mɛnkù pú kó kònà Dàsáà. Kù kó bɛka nìpa Weèdi wɛhimú sá̰á̰pu-dà, é tṵ́má hédá kà ni bíitá kpɛ́mú é fodá. 5 Sèsíì há̰ de naanà-á-ma Màátì n'ɔ̀ɔ ya̰ǹn Màdíì, nà pa datɔ̰ɔ̰̀ɔ̰ Dàsáà. 6 Ò de yeèkaà-ma kà pà yɔ̀ Dàsáà mɔn, k'ó tṵ́má pa̰á̰ daàka kàdɛ́ɛ́-dà ye bɛ̀m̀bɛ̀ni ò de péé-di. 7 Ye kú dàhàka, k'ó caka o dapàm̀ma è yɔ̀: Tí tón-nà Sùdéè tempáàku mɛhɛká. 8 K'òo dapàm̀ma óò caka è yɔ̀: Dakpɛ̰́ǹn, yè mun pú yókáà nà Sùwífùpa d'aa pɛnti-má ka bɛ́ka è k'áa ká̰mu tá̰à̰ka áa kɔ̀ù, k'àá tṵ́mà kpɛ̀i éè tón? 9 Kà Sèsíì é pà tɛ̰́ná è yɔ̀: Ntoò máàti píta nà tìdɛ́ɛ́-dà péé-ma weǹtṵ́ṵní mɛhɛká? Kà nìdo centì weǹtṵ́ṵní mɛhɛká, ò pú kó téúdá mìì tee-sá wenikú péé k'ò dìi póí. 10 Àmá, kà nìi centì yèǹka, ò hɔ̰́ n'téúhú-ma mìì tee-sá wenikú kɔ́ɔ́. 11 Ò de wɛdà mɛmá-dà é yɔ̀ɔ, é tuɛ̀ha è yɔ̀: Ti dópo Dàsáà dɔɔ́-ma. N kɔ́dí è kó taá ò hèǹta-á-ma. 12 K'òo dapàm̀ma óò caka è yɔ̀: Ti Teù, k'ò dɔɔ́-dà, ò kó kpeka-á-ma. 13 Sèsíì mɛnn de wɛì Dàsáà kṵ́mú wɛmá-dà, àmá k'òo dapàm̀ma mɛmpa tonà ò wɛì nuǹdɔmù mɔ́ḿmù-dà. 14 Mɛmá-dà, k'ó pà caka pópóí è yɔ̀: Dàsáà kpíi-í-ma. 15 Yè n naa-á-ma nà nɛ kpɛ́mú, n'ɛ̀ɛ̀ pa̰à̰-ma kà n kɔ́ɔ́ ye pesá, k'yé teha kà nɛ́ n taàa dandaní. Tí taá-nà o pesá wɔ̀nì mɛnì. 16 Ye wɔ̀ni, kà Tòmáà, pà tṵ́mà toò-ko kpɛ́kàta é caka o tɔɔ̀pa è yɔ̀: Tɔɔ̀ta-nà kà tí taá pɛ́ɛ́ é kpíí-nà ti dakpɛ̰́ǹn. 17 Kà Sèsíì é n'kó ta̰ntá-ho ye pesá, é tɛ̀i è hɔ̰́tà pà dánà Dàsáà k'yè yɔ̀ɔ daàa kànàhì. 18 Bètàníì há̰ de pú nátà-nà Sèdìsàdɛ́m̀, ye ta̰nta̰ǹni dɛumú de pú tɛ̀i kìdòmɛ́tídìpa pàta̰a̰. 19 Ye kú kpɛ́mú-dà tee Sùwífùpa de tɛ̀ni-má-ní sàma, è kó dɔwa Màátì nà Màdíì nà pa datɔ̰ɔ̰̀ɔ̰ kṵ́mú. 20 Màátì yèkaà-ma è yɔ̀ Sèsíì pení, k'ó taá o codápu, kà Màdíì mɛnn é cá̰ńtá è kàdi hɔ̰́ɔ̰̀ta. 21 K'ó tɛ̀i é caka Sèsíì è yɔ̀: N Teù, k'à de yè péé miì, è yenì n datɔ̰ɔ̰̀ɔ̰ pú kpíi. 22 Àmá, n há̰ yá̰á̰-ma è yɔ̀ bá sá̰mà, k'à cɔ̀haà-sa wɛǹni Weèdi, nì k'éè n'àà kɔ̰́ɔ̰́-ma. 23 Kà Sèsíì óò caka è yɔ̀: A datɔ̰ɔ̰̀ɔ̰ kó yá̰ńtá-ma. 24 Kà Màátì óò tɛ̰́ná è yɔ̀: N yá̰á̰-ma è yɔ̀ kpíípa kó yá̰ńtá tḭ́ń daadí, dadèǹdèni daadí, ò kó yá̰ńtá-ma. 25 Kà Sèsíì óò caka è yɔ̀: Mmí, n yòǹ yá̰ńdáma-dà è yòǹ fòùmu. Kà nìi n dań, ò kó n'fòù-ú-ma bá k'ò kpíi. 26 Kà nìi mɛ̀ɛ fòù è n dań, ò pú kó kpíí daadí yènì. A mà teháà-á-dà? 27 K'óò tɛ̰́ná è yɔ̀: À̰à̰ n Teù, n dań-ma è yɔ̀ a yòǹ Kídísì-dà, Weèdi bíitá mɛ̀ǹtà kó tɛ̀ni-tá-ní pemá mɛhɛká. 28 Màátì wɛɛ̀-ma mɛma é yɔ̀ɔ, é ka̰há taá yíí o ya̰ǹn Màdíì, óò wɛ́dá è yɔ̀: Dakpɛ̰́ǹn tɛ̀ni, è kpɛ̀i áa dɛ́há. 29 Màdíì yeèkaà-ma mɛma, é cemá yíí é cocí, é taá o peètanàpu. 30 Yè de hɔ̰́tà Sèsíì mun pú dúú-ní yɔtí mɛhɛká. Ò de káà kaá-ní bɛ̀m̀bɛ̀ni Màátì de ò codà-di-dà. 31 Sùwífùpa mɛ̀m̀pà de péé-pa nà Màdíì hɔ̰́ɔ̰̀ta mɛhɛká òò yɔ́dí ò dɛ́hà-ma k'ó yíí é yɛ̀ɛ̀ feǹ-fem̀ma, kà pà mɛ̀ɛ t'óò tṵ̀na. Pà de tonà ò kɔ́dí híúdi pesá-dà, è kó taá hódí. 32 Ò ta̰ntà tḭ́ń wɔ̀ni Sèsíì péé-sa, óò dɛ́há, é cemá hìu-ho o fɔ̰̀di, óò caka è yɔ̀: N Teù, k'à de yè péé miì, è yenì n datɔ̰ɔ̰̀ɔ̰ pú kpíi. 33 Sèsíì dɛ́hà-ma k'ò hódì, kà Sùwífùpa mɛ̀m̀pà de ò bɛ́hìnà-pa-ní mɛ̀ɛ té hódì, k'yé kɔkapa o yàma dɛ́dɛ́í, kà mà yɔ̀ kɔ̰̀. 34 K'ó pà béka è yɔ̀: N'ɔɔ̀ tàà ya-dà? Kà p'óò tɛ̰́ná è yɔ̀: Dakpɛ̰́ǹn, ya̰ní dɛ́há. 35 Kà Sèsíì é hódí. 36 Kà Sùwífùpa cemà yɔ̀: Cɔ́ɔ́-nà ò d'oò dɔ́sí-ma kú bookú. 37 Kà pa tɔɔ̀pa pàcɔ̰́ yɔ̀: Mɛnń-dà baà dìhìnà yɔ̀ǹn-a̰, ò de pú kó nɛɛ́ é kpaná ò kó kpíí-ma? 38 K'yé tṵ́má kɔkapa Sèsíì yàma dɛ́dɛ́í, k'ó taá ye híúdi pesá. Ye híúdi de yòǹ tá̰à̰di fɔ̰̀ɔ̰kú-dà, kà pá tódá tá̰hàku é hḭḭ̀na ni nùdi. 39 Kà Sèsíì é pà caka è yɔ̀: Hḭḭ̀ta-nà ye tá̰hàkù. Kà Màátì, ye kpíìo potɔ̰ɔ̰̀ɔ̰ óò caka è yɔ̀: N Teù, ò kó n'yɔ̀ɔ toópu-dà nɔ́kú, mìì tee-sá o danàhidí-dà yenì nà p'òò dánà-ma. 40 Kà Sèsíì óò tɛ̰́ná è yɔ̀: Mmí-dà baà a cakáà, è yɔ̀ k'à dań a kó dɛ́há Weèdi wɛhimú sá̰á̰pu-a? 41 Kà pá hḭḭ̀ta ye tá̰hàku. Kà Sèsíì é yoòda o nɔ̀ǹci hḭ́ǹka è yɔ̀: N Báà, m'a sɛdí n'àa pa̰à̰-ma m'a cɔɔ̀haà-sa. 42 Mmí, n yá̰á̰-ma è yɔ̀ a hɔ̰́ pa̰á̰ wɔ̀ka wɛǹni m'a cɔɔ̀hu-sá, àmá n wɛì nìkù mɛ̀ǹkù n yéńtà-kù kpɛ́mú-dà, k'yé teha kà kú n'dań è yɔ̀ fɔ̰́ń-dà n tɔn-ní. 43 Ò wɛdà-ma mɛma é yɔ̀ɔ, ye wɔ̀ni é dedí kpeéma è yɔ̀: Dàsáà, yɛɛ̀ni! 44 K'yèe kpíìo é yɛɛ̀ni, o tàka n'ɔ̀ɔ nɔ̀hi k'yè fḭń fḭń pɛ́ńcí, k'òo yìhìka pɔ̰ṵ́ kùdáapɛ́íta. Kà Sèsíì é pà caka è yɔ̀: Ò fḭntá-nà, óò hédá k'ó ka̰há. 45 Sùwífùpa mɛ̀m̀pà de tɛ̀ni-pá-ní Màdíì hɔ̰́ɔ̰̀ta, dɛ́hà-ma Sèsíì de pa̰à̰-sa, kà pa sààpa é taàa pa dandaní o hḭ́ǹka. 46 Àmá, kà pa tɔɔ̀pa pàcɔ̰́ é taá dɛ́há Fàdísìpa é pà caka ò de pa̰à̰-sa. 47 Ye wɔ̀ni, kà dɔ̀hàka yam̀ma kpɛ̰́m̀ma, nà Fàdísìpa é pehèna pa sídàsàma nìpa, é béka pa cɔ̰́ɔ̰̀di è yɔ̀: Ntɛ́ ti kó hḭmà-dà? Nìì mɛnǹ pa̰kú pɔ́ńdápa̰á̰ma-dà sàma. 48 Kà t'oò hédà k'ò baà sɔ̰ncí, nìpa wɛǹni kó taàa pa dandaní-dà o hḭ́ǹka. Ye wɔ̀ni, Hɔ̀dɔ́m̀ yam̀ma kó tɛ̀ni pɔ́dá-ma ti Weèdi hɔ̰́ɔ̰̀ta, é kɔ̀ù ti bookú. 49 Kà p'oòcɔ̰́, kà p'òò toò Kàyífù, è hɔ̰́tà ò yòǹ dɔ̀hàdi kpɛ̰́ǹn ye kú benní, k'ó pà caka è yɔ̀: Nɛ pú dìi mìì yònà é pa̰á̰-yà? 50 Nɛ pú dìi è yɔ̀, yè kó nɛ n'tɔ̰ṵ-nà-á-dà, nìdo òcɔ̰́ kpíí nìku kpɛ́mú, nà n'aa héé-ma kà pá tɛ̀ni kɔ̀ù nɛ bookú? 51 Ò de pú wɛdà mɛma n'ɔ̀ɔ cɔ̰́ɔ̰̀di kú nɔɔ̀ti. Ò de yòǹ-ma kpɛ́mú dɔ̀hàdi kpɛ̰́ǹn yè kú benní, ye kú kpɛ́mú-dà tee Weèdi de héè-ma k'ó wɛdá è yɔ̀, Sèsíì yònà é kpíí Sùwífùpa bookú kpɛ́mú-dà. 52 Y'àá de pú yòǹ ò kó kpíí Sùwífùpa bookú kpɛ́mú cɔ̰́ɔ̰̀di-dà. Ò de yònà é kpíí, è mɛ̀ɛ té tíká Weèdi bííhí wɛǹni-dà, mɛ̀ǹhì petà petà-hi, kà hí hḭn nìdo òcɔ̰́. 53 É tódá n'ɛ̀ɛ kú daadí-dà, Sùwífùpa kpɛ̰́m̀ma ta̰kadà-ma è yɔ̀ pà kó kɔ̀ù Sèsíì. 54 Ye kú kpɛ́mú-dà tee, Sèsíì de koò pú centì-ma è bɛkú o cɔ̰́ɔ̰̀di Sùwífùpa cɔhàka. K'ó yídá ye pesá, é ka̰há yɔtí pà toò-ti Èfààyím̀, kà tì hɛ́dí-nà càwenkú teǹka, k'ó tɛ̀i é m'péé ye pesá n'ɔ̀ɔ dapàm̀ma. 55 Yè de hɔ̰́tà Sùwífùpa Núǹdiyɛ̀ɛ̀ma kúúdi-dà tɔ́sí, kà pa teǹka nìpa dɔ́ɔ́di pómù Sèdìsàdɛ́m̀ è kó taá wekàna pa cɔ̰́ɔ̰̀di k'yèe kúúdì é nɛɛ́ tɛ̀ni. 56 Ni daadí, kà pá m'pɛnti Sèsíì, è békú pa tɔɔ̀pa Weèdi hɔ̰́ɔ̰̀ta mɛhɛká è tonà: Nɛ maàhu m̀mɔ́ma-dà? Ò pení kúúdì nkɛ́ɛ̀ ò pú pení? 57 Dɔ̀hàka kpɛ̰́m̀ma nà Fàdísìpa há̰ de yɔ̀ɔ cakàpu-dà nìpa, è yɔ̀ kà mɛ̀ǹǹ yá̰á̰-ko ò péé-sa, k'ó ya̰ní pà caka kà p'óò cɛ̰dí.
1 Yè de kaá daàa kàkɔ̀ɔ̀-dà, kà Núǹdiyɛ̀ɛ̀ma kúúdi é nɛɛ́ dii. Kà Sèsíì é taá Bètàníì yɔtí, Dàsáà mɛ̀ǹǹ de kpíi-kó, k'óò yá̰hìna de péé-ti kú mɛhɛká. 2 K'ó tɛ̀i ye pesá kà p'óò béná ca̰ǹdipú, kà Màátì é mù n'ɔ̀ɔ̀ hḭ́ná, kà Dàsáà nà nìpa tɔɔ̀pa é pɛ́ɛ́ óò kàdi-nà, kà pà yon. 3 Kà Màdíì é tódá tùdàdésa díikpecí kpɛ́ɛsá dítídì yàhakú, ye tùdàdésa kà p'èè pa̰à̰-nà tebíisá pà toò-sa nàádì, é cóá Sèsíì tàka hḭ́ǹka, é kà hṵtá n'ɔ̀ɔ yùti. K'yèe tùdàdésa nɔ́kú é ta̰ǹta ye hɔ̰́ɔ̰̀ta ta wɛǹni. 4 K'òo dapàǹn òcɔ̰́, kà p'òò toò Sùdásì Ìsìkàdìyɔ́tì, mɛ̀ǹǹ de k'óò yɛda-kó yɔ̀: 5 Baà pa̰à̰ kà pà pú tódà ye tùdàdésà-ní, éè yɛda weǹtṵ́ṵká kɔ̀ɔnà ta̰a̰ dífa, é fà ti kɔ̰́ɔ̰́ kà tí fà totá pɛ́íhí? 6 Ò de wɛì mɛma, yè pú yòm̀pu kpɛ́mú pɛ́íhí wɛmá-dà d'oò yɛ̰̀ḭ, àmá ò de yòǹ túùdo-dà. Mɛnń-dà de púsí pa dící kɔ́ɔ̀ta, è yóu ye mɛhɛká pà tànì-ci. 7 Àmá kà Sèsíì óò caka è yɔ̀: Ò héé yɔkàma! Ò pa̰à̰ miya̰ n dánáma daadí kpɛ́mú-dà. 8 Pɛ́íhí baà kó nɛ m'péé-nà-á-dà, àmá mmí, n pú kó nɛ m'péé-nà wɔ̀ka wɛǹni. 9 Kà Sùwífùpa dɔ́ɔ́di é yekà è yɔ̀ Sèsíì tɛ̀ni Bètàníì, kà pá tadí è kpɛ̀i tɛ̀i óò dɛ́há é pɛ́ɛ́ dɛ́há-nà Dàsáà ò de yá̰hìnà-ko. 10 Mɛmá-dà, kà dɔ̀hàka yam̀ma kpɛ̰́m̀ma é cemá ta̰kadá nùdi è yɔ̀ pá pɛ́ɛ́ kɔ̀ù-nà Dàsáà, 11 mìì tee-sá Sùwífùpa dɔ́ɔ́di de pà héù-ú-ma nà mɛnn kú nɔɔ̀ti, è kɔ̰́nì pa cɔ̰́ɔ̰̀di Sèsíì. 12 K'yé weka, kà nìpa dɔ́ɔ́di mɛ̀m̀pà de tɛ̀ni-pá-ní Núǹdiyɛ̀ɛ̀ma kúúdi dipú é yekà è yɔ̀ Sèsíì pení Sèdìsàdɛ́m̀. 13 Kà pá bɔdi pṵ́ṵtí, é taá o codápu, é tɛ̀i è dedì kpeéma è tonà:Weèdi yèdi é wɛhika!Weèdi é kóná Ìsìdàyɛ́dì wódomɛ̀ǹǹ pení-ko-ní nà Bateó yèdi. 14 Kà Sèsíì é pɛha sa̰mmùm̀bíidí, é dìsi é kaàdi ni hḭ́ǹka é n'yònà pà de wa̰tà Weèdi wɛmá pɔ̀kàta mɛhɛká è yɔ̀pu. Pà de wa̰tà è yɔ̀: 15 Sìyɔ̰́ɔ̰̀ kpɛ́ɛpá-nà, nɛ dá n'wani!Ǹtɛ kà nɛ wódo pení,è dáá-ní sa̰mmùm̀bíidí. 16 O dapàm̀ma de mun pú bantà ye kú wɔ̀ni ye kú pa̰á̰mà. Àmá, Weèdi yá̰hìnà tḭ́ń daadí Sèsíì óò wɛkàna, ye wɔ̀ni-dà pà dèǹtà-ma è yɔ̀ ye kú niiyà̰ de wa̰à̰haà o kú kpɛ́mú-dà, kà nìpa mɛ̀ɛ pa̰ná mà de hḭ́mpú o hḭ́ǹka. 17 Mɛ̀m̀pà kú wɛnnì de péé-nà-pa Sèsíì ò de yíí tḭ́ń daadí Dàsáà k'ó yá̰ńtá, é yɛɛ̀ni híúdi mɛhɛká, kà pà cakú pà de dɛ́hà-sa. 18 Ye kú kpɛ́mú-dà tee, kà nìku é tɛ̀ni o peètanàpu mìì tee-sá kù de yeèkaà è yɔ̀ ò de pa̰à̰ ye kú pɔ́ńdápa̰á̰mà-dà. 19 Kà Fàdísìpa é caka pa tɔɔ̀pa ye wɔ̀ni è yɔ̀: Nɛ dɛ́hà nkɛ́ɛ̀! Nɛ pú hɔ̰́tà ti hɛ̰káà-á-dà? Nìpa wɛǹni-d'òò tṵ̀n. 20 Mɛ̀m̀pà de tɛ̀ni-pá-ní Sèdìsàdɛ́m̀, è kó duntà Weèdi, kúúdi daadí, pa mɛhɛká kà Kɛ̀dɛ́kìpa péé. 21 Kà pá pàdi Fìdípù Bɛ̀tìsàìdáà yɔtí kóoó, k'yèe yɔtí péé Kàdìdéè tempáàku mɛhɛká, é tɛ̀i óò caka è yɔ̀: Dakpɛ̰́ǹn, ti kpɛ̀i dɛ́há Sèsíì-dà. 22 Kà Fìdípù é taá mà caka À̰ǹtìdéè, ye wɔ̀ni padɛ́ɛ̀di, kà pá taá mà caka Sèsíì. 23 Kà Sèsíì é pà caka è yɔ̀: Niìfòùo bíitá wɛkànamá wɔ̀ni-dà tɛ̀ni sá̰mà. 24 Wɛbemú-dà n nɛ cakú-ma. Kà pà pú bɔdí pɛ̰́ɛ̰̀yɔ̀di teǹka, kà ní yɛɛ̀ni, kà ni bíimá é kpíí, nì baà hɔ̰́ n'yòǹ nìcɔ̰́-dà. Àmá, kà pà nì bɔdí, kà nì yɛ̀ni, kà ni bíimá kpíi, nì hɔ̰́ pɛdá-ma bíimá sàma. 25 Mɛ̀ǹǹ dɔ́sí-ko o fòùmu, ò kó mù féná-ma, àmá mɛ̀ǹǹ pú mù kɛ̀hi-kó yècḭ́ḭ̀ pemà mɛmà kú mɛhɛká, ò kó mù n'káá-ma fòùmu mɛ̀mù bá yɔ̀ɔ-pú mɛhɛká. 26 Kà nìdo kpɛ̀i é deha n kpɛ́mú, k'ó n tṵṵ̀na, k'yé teha n péé-sa kà n deho éè m'péé. Kà nìi dehú n kpɛ́mú, n Báàa k'óò cùu-ú-ma. 27 Kà Sèsíì tṵ́mà yɔ̀: N yàma-dà cɔ̰háà sá̰mà-ní. N kó n'yɔ̀ ba? N Báà, n fḭ́hìna fá̰kápàmà n péé-mà kú mɛhɛkà wɔ̀nì mɛnì nkɛ́ɛ̀? Fɔ́ú! Ye kú kpɛ́mú-dà tee ká n tɛ̀ni teǹka. 28 N kó n'yɔ̀: N Báà, wɛkàna a yèdi-dà. Kà pá yekà ye wɔ̀ni nà hḭ́ǹka-ní Weèdi boòku kà kù tonà: N nì yɔ̀ɔ wɛkànapú-dà, è mɛ̀ɛ kó tṵ́má nì wɛkàna. 29 Nìpa mɛ̀m̀pà de péé-pa ye pesá é yekà ye boòku, kà pa pàcɔ̰́ yɔ̀: Tawóhàdi-dà kɔǹ. Kà tɔɔ̀pa yɔ̀: Weèdi Tɔntɔndikó-dà òò wɛɛ̀-nà. 30 Kà Sèsíì é pà caka è yɔ̀: Yè pú yòǹ n kpɛ́mú-dà nɛ yeèkaà-ma ye bookù, àmá nɛ kpɛ́mú-dà. 31 Wɔ̀ni-dà sá̰mà, kà Weèdi kó sída nìpa. Wɔ̀ni-dà sá̰mà, kà nì kó bɔhà pemà mɛmà kú wódo. 32 Mmí mɛ̀ɛkà, pà kó n yohòna tḭ́ń daadí teǹka hḭ́ǹka, n kó yɔ̰́ń-ma-ní nìpa wɛǹni n pesá. 33 Ò de wɛì mɛma, è kpɛ̀i é pà bɛka kṵ́mú ò kó kpíí-mu kú bookú-dà. 34 K'yèe nìpa óò tɛ̰́ná è yɔ̀: Pà ti cakáà ti kpɛ̰́ńdìnùka pɔ̀kàhi mɛhɛká è yɔ̀, Kídísì baà kó n'fòù-ú-ma k'yé n'kɔ́ɔ́ yɔ̀ɔmá. Baà há̰ tee kà fɔ̰́ń tonà: Yè békú pá dikàna Niìfòùo bíitá-dà kpíidɔkú hḭ́ǹka? Wodà héé ye kú Niìfòùo bíitá? 35 Kà Sèsíì é pà tɛ̰́ná è yɔ̀: Wenikú káà péé nɛ cɔhàka bɛ̀m̀bɛ̀ni cɛ̰́ma-dà. Cèn-nà wenikú káà nɛ péé-nà tḭ́ń wɔ̀ni, k'yé teha kà binìku dá nɛ sɛ́ńtá. Mɛ̀ǹǹ cèǹtì-ko binìku mɛhɛká pú yá̰á̰ ò yòǹ-kà bɛ́kà. 36 Wenikú káà nɛ péé-nà-mà-ní, taàa-nà nɛ dandaní kú hḭ́ǹka k'yé teha kà nɛ́ hḭn wenikú bííhí. Sèsíì wɛdà-ma mɛma é yɔ̀ɔ, é yídá ka̰há é pà nátá-nà, é taá sɔ̀di. 37 Bá nà Sèsíì de pa̰à̰-ma pɔ́ńdápa̰á̰ma dɔ́ɔ́di pa yìhìka, pà de pú dań o hḭ́ǹka. 38 Mɛmá-dà, Weèdi wɛtɛ̰́náko Ìsàyíì de wɛdà-ma wɛmá de pa̰à̰-ma. Ò de yɔ̀:N Teù! Woò mɔ́ńn-dà teháà a wɛmá ti cakáà-ma?Wodà a bahìnà-ma a kpeèti a bɛkáà-ti? 39 Ìsàyíì de tṵ́mà wɛɛ̀-ɛ́-ma mìì tee-sá kà pà pú kó nɛɛ́ é n'dań. Ò de yɔ̀: 40 Weèdi-dà yɔ̀nà pa nɔ̀ǹci,é kpekàna pa toòka,k'yé teha kà pa nɔ̀ǹci dá dɛ́há,kà pa yàma é héé kà pá bantá,é fií-ní ni bɛ́ka,kà ní pà kpekàna. 41 Ìsàyíì de wɛɛ̀ mɛma, mìì tee-sá ò de dɛ́hà Sèsíì wɛhimú-dà, k'yé n'sàà-nà kó wɛdá mɛma o hḭ́ǹka. 42 N'ɔ̀ɔ̀ baà de wɛkáàmà-ní, Sùwífùpa kpɛ̰́m̀ma mɛhɛká, sààpa de taà-á-ma pa dandaní Sèsíì hḭ́ǹka. Há̰kà, nà Fàdísìpa kpɛ́mú, pà de pú mà wɛì pìì-ì, è wani pà kó pà bɔ̀hà-ma Weèdi wɛmá biɔhà-nàmɔ̀ni mɛhɛká. 43 Pà de kpɛ̀i nìpa cóńdàma-dà, é ha̰tá-nà Weèdi kpɛ́ɛmá. 44 Kà Sèsíì é wɛɛ́ kpeéma è yɔ̀: Mɛ̀ǹǹ n dań-ko, pú dań mmí kú cɔ̰́ɔ̰̀di hḭ́ǹka, àmá ò dań nà mɛ̀ǹǹ n tɔn-kó-dà-ní. 45 Mɛ̀ǹǹ n dɛ́hà-ko, dɛ́hà-á-ma mɛ̀ǹǹ n tɔn-kó-ní. 46 Mmí, n tɛ̀ni pemá mɛhɛká è yòǹ wenikú-dà, k'yé teha kà mɛ̀ǹǹ n dań-ko dá m'péé binìku mɛhɛká. 47 Kà nìdo yeèkaà n wɛmá è pú tṵnà mà hḭ́mpú, mmí pú k'óò síi-nà, è yá̰á̰ n pú tɛ̀ni è kó sída nìpa, àmá n tɛ̀ni è kó pà fḭ́hìna-á-ma. 48 Kà mɛ̀ǹǹ n yedáà-ko, è pú teháà n wɛmá, ye yaǹn dɛ́tà ye pesà mìì k'óò síi-nà-sa-dà. Wɛmá n cakáà-ma-dà, kó wáńtá óò síi-nà dadèǹdèni daadí, 49 mìì tee-sá mà pú péé-nà-ní n pesá, àmá n Báàa mɛ̀ǹǹ n tɔn-kó-ní, mɛnń-dà n cakú n yònà é caka-sá nà n yònà é biɔhàna-sá. 50 N mɛ̀ɛ yá̰á̰-ma è yɔ̀ o hɔ̰́ɔ̰wencí nùka kɔ̰́nì fòùmu mɛ̀mù bá yɔ̀ɔ-pú-dà. Ye kú kpɛ́mú-dà tee, n cakú-sà-ní, n yè cakú-ma é n'yònà n Báàa yè nà n cakáà-ma.
1 Núǹdiyɛ̀ɛ̀ma kúúdi-dà de hà̰n. Kà Sèsíì yá̰á̰ è yɔ̀ wɔ̀ni-dà tɛ̀i k'yè békú ó yíí pemà mɛmà kú mɛhɛká, é dìsi o Báàa pesá. Ò de dɔ́sí-ma o dapàm̀ma mɛ̀m̀pà de péé-pa pemá mɛhɛká, è pà dɔ́sí háá k'yé yó ha̰tá-ho. 2 Ye daadí yohokú, mɛnń n'ɔ̀ɔ dapàm̀ma kà pá n'kaàdi è yon, è hɔ̰́tà Wɛɛ̀kupá wódo yɔ̀ɔ taàpú Sùdásì yàma mɛhɛká è yɔ̀ ó yɛda Sèsíì. Ye Sùdásì de yòǹ Sìmɔ́ɔ̀ Ìsìkàdìyɔ́tì bíitá-dà. 3 Sèsíì há̰ de yá̰á̰-ma è yɔ̀ ò péé-nà-ní Weèdi pesá è mɛ̀ɛ tóńti ni pesá, è yá̰á̰ è yɔ̀ o Báàa-dà tàà niìi wɛǹni o nɔ̀hi mɛhɛká. 4 Ye wɔ̀ni, k'ó yíí-ní dipú pesá, é bátá o tókedɛudí, é tódá pɛ́nhṵtáku é cɛ̰́ṵ́wá̰ o kɔɔ̀ka. 5 K'ó pa̰á̰ nɛ́ɛmá caadí mɛhɛká, é cetá è pɔ̀kù o dapàm̀ma tàka, è kà hṵṵkú nà pɛ́nhṵtáku ò de cɛ̰́ṵ́-ku o kɔɔ̀ka. 6 K'ó tɛ̀i Sìmɔ́-Píyɛ́ɛ̀ pesá, k'óò caka è yɔ̀: N Teù, kà fɔ̰́ń é n hɛdá n tàka? 7 Kà Sèsíì óò tɛ̰́ná è yɔ̀: N pa̰kú-sà miì, a pú yá̰á̰ yè kpɛ̀i é n'yɔ̀pu sá̰mà-ní, àmá yè kó m'pení k'á yè bantá-ma. 8 Kà Píyɛ́ɛ̀ óò caka è yɔ̀: Fɔ́ú! N pú cédí k'á hɛdá n tàka. Kà Sèsíì óò tɛ̰́ná è yɔ̀: Kà n pú kà n'àà hɛdà, a pú kó dɛ́tá yècḭ́ḭ̀ n pesá. 9 Kà Sìmɔ́-Píyɛ́ɛ̀ óò caka è yɔ̀: Kà mɛmá-dà n Teù, yè koò pú kó n'yòǹ n tàka cɔ̰́ɔ̰̀di, pɛ́ɛ́ hɛdá n nɔ̀hi nà n yudí. 10 Kà Sèsíì óò caka è yɔ̀: Mɛ̀ǹǹ hɔ̀ɔ-kó, yè koò pú békú ó tṵ́má hɔɔ̀di o wɛǹni ye wɔ̀ni n'ɛ̀ɛ wɔ̀ni, k'yè pú yòǹ ó hɛdá o tàka cɔ̰́ɔ̰̀di mìì tee-sá ò weni-í-ma o wɛǹni. Nɛ́na, nɛ weni-í-dà, àmá nɛ wɛǹni há̰ pú dɛɛ. 11 Ò de yɔ̀ɔ yá̰á̰pu-dà mɛ̀ǹǹ k'óò yɛda-kó, ye kú kpɛ́mú-dà tee k'ò de yɔ̀ pà pú weni pa wɛǹni. 12 Ò pà hɛdà-ma pa tàka é yɔ̀ɔ, é tódá o tókedɛudí é bádí, é tón é kaàdi è kó dii, ye wɔ̀ni é pà béka è yɔ̀: Nɛ bantà-á-dà n nɛ pa̰à̰-sà miì-ní-i? 13 Nɛ n yún Dakpɛ̰́ǹn, è n yún Teó, nɛ naa-á-ma mìì tee-sá n yòm̀pu-dà. 14 Mmí yòǹ-mà Dakpɛ̰́ǹn nà Teó é nɛ hɛdá nɛ tàka, nɛ́na mɛ̀ɛtékà nɛ yònà é kà n'hɛní-ma nɛ tɔɔ̀pa. 15 N nɛ kɔ̰́ɔ̰̀ yohènamá-dà è yɔ̀ nɛ mɛ̀ɛ t'éè m'pa̰kú, é n'yònà n yè nɛ pa̰káàma. 16 Bemú-dà n nɛ cakú-ma, dapàǹn baà pú hɔ̰́ n'wɛhi-nà o dakpɛ̰́ǹn, tɔntɔndikó mɛ̀ɛ pú hɔ̰́ n'wɛhi-nà mɛ̀ǹǹ ò tɔǹ-ko. 17 Nɛ yá̰á̰-dà sá̰mà-ní ye kú pa̰á̰mà-ní. Kà nɛ mà pa̰kú, wɛ̀ɛ̀di-dà kó nɛ m'péé-nà. 18 Yè pú yòǹ nɛ wɛǹni-dà n wɛì-ma. N yá̰á̰-ma n ta̰kadà-pa. Y'àá békú pà wà̰tà-ma wɛmá Weèdi pɔ̀kàta mɛhɛká-dà é pa̰ná. Pà wà̰tà è yɔ̀: Nà mɛ̀ǹǹ ti pɛ́ɛ̀ é dii-kó n dipú-dà hḭn n kà̰à̰tɔ̀o. 19 N dɛnà nɛ cakú sá̰mà-ní ye kú niì-ní k'yè mun pú tɛ̀ni, è kpɛ̀i k'yè wáńtà tɛ̀ni, kà nɛ́ bantá-ma è yɔ̀ n yòǹ mɛ̀ǹǹ péé-ko-dà. 20 Bemú-dà n nɛ cakú-ma. Kà mɛ̀ǹǹ codà-ko n tɔn-kó, mmí-dà ò codà-ma. Kà nìi mɛ̀ɛ n codà, ò codà mɛ̀ǹǹ n tɔn-kó-dà-ní. 21 Sèsíì wɛdà-ma mɛma é yɔ̀ɔ, k'òo yàma é cɔ̰ha dɛ́dɛ́í k'ó wɛɛ́ pópóí è yɔ̀: N nɛ cakú bemú-dà, n'ɔɔ̀cɔ̰́-dà kó n yɛda. 22 K'òo dapàm̀ma é wáń-wáńtá pa tɔɔ̀pa, pà pú bantà ò wɛì-ko. 23 È hɔ̰́tà o dapàm̀ma p'oòcɔ̰́, ò de naanà-ko kaàdi òò pɛ̀ɛ-nà. 24 Kà Sìmɔ́-Píyɛ́ɛ̀ óò dɛ́ńtá, è yɔ̀ ó béka Sèsíì ò wɛì-ko. 25 K'yèe dapàǹn é bíkádá Sèsíì kṵmbɔ̀di hḭ́ǹka, óò béka è yɔ̀: N Teù, woò mɔ́ńn-dà? 26 Kà Sèsíì óò tɛ̰́ná è yɔ̀: N kó hṵ́ṵ́ pɛ̰́ɛ̰̀ wɛ́ɛ̀ku kṵ́ǹti é kɔ̰́ɔ̰́-ko, mɛnń-dà. K'ó tódá ye wɔ̀ni pɛ̰́ɛ̰̀ wɛ́ɛ̀ku, é kù hṵ́ṵ́ kṵ́ǹti, é kɔ̰́ɔ̰́ Sùdásì, Sìmɔ́ɔ̀ Ìsìkàdìyɔ́tì bíitá. 27 Sùdásì tà̰ǹtà-ma ye pɛ̰́ɛ̰̀ wɛ́ɛ̀ku, kà Wɛɛ̀kupá wódo é cemá dúú o mɛhɛká, kà Sèsíì óò caka è yɔ̀: A kpɛ̀i é pa̰á̰-sa, cemá yè pa̰á̰ fem̀ma. 28 Àmá, nà mɛ̀m̀pà pà de pɛ́ɛ̀ kaàdi-pá è yon, p'oòcɔ̰́ǹ de pú bantà mìì de tee-sá k'òò wɛì mɛma. 29 Pa pàcɔ̰́ de maàhu è tonà Sùdásì de púsí-ma pa dící kpɛ́mú-dà tee, Sèsíì de ò cakú-ma è yɔ̀ ó taá dontá-ní yè békú-sa wɛǹni kúúdi kpɛ́mú, yoo ó taá pa̰a̰ pɛ́íhí yècḭ́ḭ̀. 30 Kà Sùdásì é ta̰ǹta ye pɛ̰́ɛ̰̀ wɛ́ɛ̀ku, é cemá yɛ̀ɛ̀ ye wɔ̀ni n'ɛ̀ɛ wɔ̀ni. Yè de hɔ̰́tà yèǹka-dà bókáà. 31 Sùdásì yɛ̀ɛ̀-ma, kà Sèsíì yɔ̀: Sá̰mà-dà Niìfòùo bíitá wɛhimú kó fodá-ma, kà nìpa é dɛ́há nà mɛnta kú pesá, Weèdi kpɛ́mú sá̰á̰pu. 32 Kà Niìfòùo bíitá bɛkáà Weèdi wɛhimú sá̰á̰pu, Weèdi mɔ́nní mɛ̀ɛ té kó bɛka-á-ma ta kpɛ́mú nìpa, nì mɛ̀ɛ pú kó yóka éè pa̰ná. 33 N bííhí-nà, n káà nɛ péé-nà wɔ̀ni cɛ̰́masí-dà. Nɛ kó n pɛha-á-ma é n mɔ́ńka. N cakáà-sa Sùwífùpa tɔɔ̀pa, mií-dà n nɛ cakú-ma sá̰mà-ní. Nɛ pú kó nɛɛ́ taá n kɔ́dí-sa. 34 N nɛ kɔ̰́nì kpɛ̰́ńdìnùdi pàǹni-dà. Nɛ́ n'dɔ́sí nɛ tɔɔ̀pa. É n'yònà n nɛ dɔ́káà-ma kú bookú, nɛ yònà é n'dɔ́sí ma kú bookú-dà nɛ tɔɔ̀pa. 35 Kà nɛ dɔ́sí nɛ tɔɔ̀pa, nìpa wɛǹni kó bantá-ma ye wɔ̀ni è yɔ̀ nɛ yòǹ n dapàm̀ma. 36 Kà Sìmɔ́-Píyɛ́ɛ̀ óò béka è yɔ̀: N Teù, a kɔ́dí ya? Kà Sèsíì óò tɛ̰́ná è yɔ̀: A pú kó nɛɛ́ n tṵṵ̀na n kɔ́dí-sa sá̰mà-ní, àmá yè kó m'péé-ma k'á nɛɛ́ n tṵṵ̀na. 37 Kà Píyɛ́ɛ̀ óò béka è yɔ̀: N Teù, baà tee kà n pú kó nɛɛ́ áa tṵṵ̀na sá̰mà-ní? N kó nɛɛ́ yɛɛ-ɛ́-ma n wɔ̰ǹni a kpɛ́mú. 38 Kà Sèsíì óò tɛ̰́ná è yɔ̀: A sɔ̀do bii-í-dà tenten k'à kó yɛda a wɔ̰ǹni n kpɛ́mú? Bemú-dà m'a cakú-ma, kà kótadá é nɛɛ́ kɔń, a kó nɔ̀hì cɔ̀ku màta̰a̰-dà è yɔ̀ a pú n yá̰á̰.
1 Kà Sèsíì é pà caka è yɔ̀: Nɛ yàma dá buupa. Nɛ́ n'dań Weèdi, è mɛ̀ɛ té nà n dań. 2 Kààka dɔ́ɔ́di péé-ma n Báàa hɔ̰́ɔ̰̀ta mɛhɛká. N kɔ́dí è kó tɛ̀i dɔ̀hà bá nɛ mɛ̀ǹǹ dɛ̀ɛ̀-ko-dà kààdi. K'yè pú yòǹ bemú, è yenì n pú mà nɛ cakáà. 3 Kà n taá è nɛ dɔɔ̀haà-ní kààdi è yɔ̀ɔ, n kó tóní-ma-ní é nɛ tódá é nɛ tanà n pesá, k'yé teha n kó taá m'péé-sa, kà nɛ mɛ̀ɛ t'éè m'péé. 4 Nɛ yá̰á̰-dà n kɔ́dí-sa ye cɔ̀ku. 5 Kà Tòmáà óò béka è yɔ̀: N Teù, ti pú yá̰á̰ a kɔ́dí-yà. Ntɛ́ ti kó hḭmà é n'yá̰á̰ ye cɔ̀ku? 6 Kà Sèsíì óò tɛ̰́ná è yɔ̀: Mmí-dà yòǹ cɔ̀ku, è yòǹ wɛbemú, è yòǹ fòùmu. Òcɔ̰́ǹ pú kó nɛɛ́ é taá Báàa pesá k'ò pú yɛɛ̀ nà mmí. 7 Kà nɛ n yá̰á̰, nɛ mɛ̀ɛ té kó yá̰dá-dà n Báàa. É tódá sá̰mà, n'ɔɔ̀ dɛ́hà-á-ma, òò yá̰á̰. 8 Kà Fìdípù óò caka è yɔ̀: N Teù, ti bɛka a Báàa yè kó ti n'sàà-á-ma. 9 Kà Sèsíì óò tɛ̰́ná è yɔ̀: Nà n nɛ péé-nà tḭ́ń daadì, a mun pú n yá̰á̰-a̰ Fìdípù? Mɛ̀ǹǹ n dɛ́hà-ko, ò dɛ́hà n Báàa-dà. Baà tee k'à yɔ̀ ń nɛ bɛka n Báàa? 10 A pú dań è yɔ̀ n péé n Báàa mɛhɛká-dà, k'ò péé n mɛhɛká? Wɛmà n nɛ cakú-mà pú péé-nà-ní n pesá. N Báàa mɛ̀ǹǹ péé-ko n mɛhɛká-dà pa̰kú o dehèna. 11 Ní n'dań-nà n nɛ hḭ́mpù-ní, è yɔ̀ n péé n Báàa mɛhɛká-dà, k'ò mɛ̀ɛ té péé n mɛhɛká. Bá kà nɛ pú dań mɛma, kà nɛ́ n'dań o dehèna n pa̰à̰-na kú hḭ́ǹka. 12 Bemú-dà n nɛ cakú-ma, mɛ̀ǹǹ n dań-ko mɛ̀ɛ té kó pa̰á̰-ma dehèna n pa̰kú-na. Ò múńtà kó pa̰á̰-na kó n'wɛhi-nà-á-ma n kpɛ́ɛná, mìì tee-sá n kɔ́dí n Báàa pesá. 13 Nɛ kó cɔhà-sa wɛǹni nà n yèdi, n k'éè pa̰á̰-ma k'yé teha kà Bíitá é wɛkàna Báàa yèdi. 14 Kà nɛ cɔɔ̀haà yècḭ́ḭ̀ nà n yèdi, n k'éè pa̰á̰-ma. 15 Kà nɛ n dɔ́sí, nɛ kó tṵṵ̀na-á-ma n hɔ̰́ɔ̰wencí nùka. 16 Mmí, n kó cɔhà-á-ma n Báàa, k'ó nɛ kɔ̰́ɔ̰́-ní Yɔ́dàko tɔɔ̀o, k'ó tɛ̀ni nɛ m'péé-nà wɔ̀ka wɛǹni, é nɛ n'tempúnà. 17 Ye Yɔ́dàko-dà héé Weèdi Sèdi mɛ̀nì toó-di wɛbeèdi. Nìpa mɛ̀m̀pà pú yá̰á̰-pa Weèdi pú kó nɛɛ́ nì tà̰ǹta pa cɔhàka, mìì tee-sá pà pú kó nɛɛ́ nì dɛ́há, pà mɛ̀ɛ pú kó nɛɛ́ nì yá̰dá. Nɛ́na mɛ̀ɛkà, nɛ nì yá̰á̰-ma, mìì tee-sá nì nɛ péé-nà, è mɛ̀ɛ kó tṵ́má m'péé nɛ mɛhɛká. 18 N pú kó nɛ héé nɛ cɔ̰́ɔ̰̀di kà nɛ́ n'yònà kpíibííhí. N tóńti-í-ma-ní nɛ pesá. 19 Wɔ̀ni kaá cɛ̰́ma, kà fòùku kpɛ́ɛpá koò pú kó n dɛ́há. Àmá nɛ́na, nɛ kó n dɛ́há-ma, mìì tee-sá n fòù-ú-ma, kà nɛ mɛ̀ɛ té kó n'fòù. 20 Ye kú daadí, nɛ kó bantá-ma è yɔ̀ mmí, n péé n Báàa mɛhɛká-dà, kà nɛ péé n mɛhɛká, kà n mɛ̀ɛ té péé nɛ mɛhɛká. 21 Mɛ̀ǹǹ púsí-ko n hɔ̰́ɔ̰wencí nùka, è tṵ̀n kà hḭ́mpú, mɛnń-dà n dɔ́sí. Kà mɛ̀ǹǹ n dɔ́sí-ko, n Báàa k'óò n'dɔ́sí-ma. Mmí mɛ̀ɛtékà, n k'óò n'dɔ́sí-ma, óò m'bɛkú n cɔ̰́ɔ̰̀di. 22 Kà Sùúdì, é m'bààsí Sùdásì Ìsìkàdìyɔ́tì, óò béka è yɔ̀: N Teù, baà tee k'à kó ti bɛka a cɔ̰́ɔ̰̀di, àá pú kó bɛka a cɔ̰́ɔ̰̀di fòùku nìpa? 23 Kà Sèsíì óò tɛ̰́ná è yɔ̀: Kà nìdo n dɔ́sí, ò kó m'pa̰kú-ma n wɛmá hḭ́mpú. Ye wɔ̀ni, n Báàa k'óò n'dɔ́sí-ma, mmí nà n Báàa kà tí tɛ̀ni m'péé o fòùmu mɛhɛká. 24 Mɛ̀ǹǹ pú n dɔ́sí-ko, pú hɔ̰́ m'pa̰kú n wɛmá hḭ́mpú. Nɛ you kà n cakú-mà wɛmà, mà pú péé-nà-ní n pesá, mà péé-nà-ní n Báàa mɛ̀ǹǹ n tɔn-kó-ní pesá-dà. 25 N nɛ cakáà miya̰, è káà nɛ péé-nà-á-ma. 26 Àmá, Weèdi Sèdi mɛ̀nì yòǹ-di Yɔ́dàko, n Báàa kó tɔn-dí-ní nà n yèdi, mɛní-dà kó nɛ biɔhàna niìya̰ wɛǹni, é nɛ dehèna n nɛ cakáà-sa wɛǹni. 27 N nɛ hédà wɛ̀ɛ̀di-dà. N wɛ̀ɛ̀di-dà n nɛ pɔ̰n-má. Mmí pú nì nɛ pɔ̰n fòùkù mɛnkù kú nìpa nì pɔ̰nkúma. Nɛ yàma dá buupa, nɛ mɛ̀ɛ dá n'wani. 28 Nɛ yeèkaà-á-dà n nɛ cakáà-ma è yɔ̀: N kɛ̰hɛdi, àmá n tóńti-í-ma-ní nɛ pesá. Kà nɛ de n dɔ́sí, yè de kó nɛ n'naa-á-ma nà nɛ yeèkaà-ma kà n yɔ̀ n kɔ́dí n Báàa pesá, mìì tee-sá ò n wɛhi-nà-á-ma. 29 N nɛ cakáà ye kú niì-ní sá̰mà k'yè mun pú tɛ̀ni, è kpɛ̀i k'yè tɛ̀ni tḭ́ń daadí, kà nɛ́ n'dań-ma. 30 N koò pú kó nɛ wɛɛ́-nà sàma, mìì tee-sá fòùkù mɛnkù kú wódo pení. Ò pú káá kpeèti tìcɔ̰́tì n hḭ́ǹka. 31 Àmá, yè békú fòùkù mɛnkù kú nìpa-dà é bantá è yɔ̀ n dɔ́sí-ma n Báàa, è pa̰kú ò hḭ́n n pa̰á̰-sa. Yíí-nà miì, kà tí ka̰há.
1 Kà Sèsíì é tuɛ̀ha è yɔ̀: Mmí, n yòǹ pɛ́ɛsɔ̰pú mɔ́mmú-dà, kà n Báàa yòǹ mu yaǹn. 2 Dɛ̀ɛkú mɛ̀ǹkù kú wɛnnì n tásí-nà-ku è pú pɛní, ò kó kù cédá-ma. Dɛ̀ɛkú mɛ̀ǹkù kú wɛnnì pɛní-ku, ò hɔ̰́ kù som-ḿ-ma k'yé teha kà kú dɔ̀hà é pɛdá bíiká. 3 Wɛmà n nɛ cakáà-mà, mà nɛ som-ḿ-ma é yɔ̀ɔ. 4 Ní nà n tásí-nà é n'yònà n nɛ tásí-nà-ma kú bookú. É n'yònà dɛ̀ɛkú pú kó nɛɛ́ pɛdá-ma bíiká kà kù pú tásí-nà tepú, ma kú bookú-dà nɛ pú kó nɛɛ́ pɛɛ́-ma bíiká kà nɛ pú n tásí-nà. 5 Mmí, n yòǹ tepú piidí-dà, kà nɛ yòǹ dɛ̀ɛcí. Mɛ̀ǹǹ n tásí-nà-ko kà n ò tásí-nà, ye yaǹn-dà kó pɛdá bíiká sàma, è yá̰á̰ nɛ pú kó nɛɛ́ pa̰á̰ yècḭ́ḭ̀ kà n kɔ́ɔ́. 6 Mɛ̀ǹǹ pú n tásí-nà-ko, pà k'óò wɛ́í tapaàdi-dà é n'yònà pà hɔ̰́ wɛ́í-ma kú bookú dɛ̀ɛkú kà kú kpɛí. Dɛ̀ɛcí mɛ̀ǹcì kpɛí-ci, pà hɔ̰́ cì tíkáná-ma, é cì tɔ̀n ha̰mú kà cí cɔ́dá. 7 Kà nɛ n tásí-nà, kà n wɛmá péé nɛ mɛhɛká, nɛ kó cɔhà-sa, nɛ k'éè dɛ́há-ma. 8 Kà nɛ pɛdà bíiká sàma, n Báàa yèdi kó wɛhika-á-ma, ma kú bookú-dà nɛ kó bɛka-má è yɔ̀ nɛ yòǹ n dapàm̀ma. 9 N nɛ dɔ́káà n Báàa n dɔ́káà-ma kú bookú-dà. Ní m'péé-nà n dɔ́kàma mɛhɛká. 10 Kà nɛ tṵnà n hɔ̰́ɔ̰wencí nùka, nɛ kó m'péé n dɔ́kàma mɛhɛká-dà é n'yònà n tṵnà-ma kú bookú n Báàa hɔ̰́ɔ̰wencí nùka è péé o dɔ́kàma mɛhɛká. 11 N nɛ wɛɛ̀-nà mɛma, è kpɛ̀i n yaǹnaakú-dà é nɛ m'péé-nà, k'yé teha kà nɛ yaǹnaakú é cɛ̰ɛ̰̀na. 12 Ǹtɛ hɔ̰́ɔ̰wencí nùdi n nɛ kɔ̰́nì-di: Nɛ́ n'dɔ́sí nɛ tɔɔ̀pa é n'yònà n nɛ dɔ́sí-ma kú bookú. 13 Dɔ́kàma sàma nìdo kó nɛɛ́ bɛka-má-dà héé ó kɔ̰́ɔ̰́ o fòùmu o dóòpa kpɛ́mú. 14 Kà nɛ pa̰kú n hḭ́mpú, nɛ kó n'yòǹ n dóòpa-dà. 15 N koò pú kó nɛ n'yún dehèpa, mìì tee-sá deho pú hɔ̰́ n'yá̰á̰ o dakpɛ̰́ǹn pa̰kú-sa. N nɛ yún n dóòpa-dà mìì tee-sá, n nɛ bɛkáà-á-dà n Báàa n bɛkáà-sa wɛǹni. 16 Yè pú yòǹ nɛ́na-dà n bàtà, àmá mmí-dà nɛ batà é nɛ tɔn è yɔ̀ nɛ́ taá é pɛɛ́ bíiká mɛ̀ǹkà kó yóka-ká. Kà nɛ hḭn mɛma, n Báàa kó nɛ kɔ̰́ɔ̰́-ma nɛ k'óò cɔ̀hà-sa wɛǹni nà n yèdi. 17 Nùdi n nɛ hḭ́nì-di-dà héé, nɛ́ n'dɔ́sí nɛ tɔɔ̀pa. 18 Kà fòùku nìpa nɛ sɛ̰ɛ̰́, kà nɛ́ n'yá̰á̰ è yɔ̀ pà cedí é sɛ̰dá mmí-dà. 19 Kà nɛ de yòǹ fòùku kpɛ́ɛpá, è yenì fòùkù mɛnkù kú nìpa nɛ dɔ́sí-ma, mìì tee-sá nɛ yòǹ ku kpɛ́ɛpá-dà. Há̰kà, n nɛ batà é nɛ deèna-ní fòùku mɛhɛká, kà nɛ koò pú yòǹ ku kpɛ́ɛpá, mií-ì tee kà kù nɛ sɛ̰ɛ̰́. 20 Nɛ́ deǹta wɛmá n nɛ cakáà-ma è yɔ̀: Dapàǹn òcɔ̰́ǹ pú hɔ̰́ n'wɛhi-nà o dakpɛ̰́ǹn. Kà nìpa n dià náńkú, kà nɛ́ n'yá̰á̰ è yɔ̀ pà mɛ̀ɛ té kó kù nɛ diá-ma. Kà pà tṵ̀nà n wɛmá, pà mɛ̀ɛ té kó tṵṵ̀na-á-ma nɛ kpɛ́ɛmá. 21 P'àá kó nɛ pa̰á̰ mii kú wɛnnì, nà mmí kú yèdi kpɛ́mú-dà, mìì tee-sá pà pú yá̰á̰ mɛ̀ǹǹ n tɔn-kó-ní. 22 Kà n de pú tɛ̀ni pà wɛɛ́-nà, è yenì pà kɔ́ɔ́ sḭ̀ḭ̀ma màcɔ̰́mà. Sá̰mà-ní, pà koò kɔ́ɔ́ kɔḿmà pa sḭ̀ḭ̀ma hḭ́ǹka. 23 Mɛ̀ǹǹ n sɛ̰ɛ̰́-ko, mɛ̀ɛ té sɛ̰ɛ̰́-ma n Báàa. 24 Kà n de pú pa̰à̰ dehèna tɔɔ̀o òcɔ̰́ǹ pú pa̰á̰-na daadí yènì pa cɔhàka, è yenì pà kɔ́ɔ́ sḭ̀ḭ̀ma màcɔ̰́mà. Sá̰mà-ní, pà dɛ́hà-á-ma dehèna n pa̰à̰-na, àá n sɛ̰ɛ̰́ é pɛ́ɛ́ nà n Báàa. 25 Ye kú niì de pa̰à̰ mìì tee-sá pa kpɛ̰́ńdìnùka mɛhɛká, pà wà̰tà wɛmá è yɔ̀: Pà n sɛ̰ɛ̰́ hécí-dà. 26 Yɔ́dàko n kó tɔn-kó-ní nà n Báàa yèdi, ò yòǹ Weèdi Sèdi-dà mɛ̀nì toó-di wɛbeèdi. Ò péé-nà-ní n Báàa pesá-dà. Ò kó tɛ̀ni tḭ́ń daadí, é n'cakú nìpa n yòm̀pu-dà. 27 Nɛ́na mɛ̀ɛtékà, nɛ kó n'cakú-ma nìpa n yòm̀pu, mìì tee-sá nà cetáma-ní, nɛ n m'péé-nà-á-ma.
1 N nɛ cakáà miya̰ è kpɛ̀i nɛ dandaní-dà dá fédí. 2 Pà kó nɛ bɔhà-á-ma Weèdi wɛmá biɔhà-nàmɔ̀ka mɛhɛká. Wɔ̀ni múńtà pení-ma-ní kà mɛ̀m̀pà kú wɛnnì kó nɛ kɔ̀ù-pa kó m'maàhu è tonà pà pa̰kú Weèdi tɔmú-dà ma kú bookú. 3 Pà kó pa̰á̰ miya̰, mìì tee-sá pà pú yá̰á̰ n Báàa, pà mɛ̀ɛ pú yá̰á̰ n mɔ́nń. 4 N há̰ yè nɛ cakáà, è kpɛ̀i k'yèe wɔ̀ni-dà wáńtà tɛ̀ni, kà nɛ́ deǹta è yɔ̀ n de yè nɛ cakáà-ho. N p'éè nɛ cakáà-ní nà cetáma, mìì tee-sá n de pɛ́ɛ̀ nɛ péé-nà-á-ma. 5 Sá̰mà-ní, n kɛ̰hɛdi mɛ̀ǹǹ n tɔn-kó-ní pesá-dà. N'ɔɔ̀cɔ̰́ǹ há̰ pú n békú è tonà: Aá kɔ́dí ya? 6 N há̰ nɛ wɛɛ̀-nà-mà mɛma, ye kú kpɛ́mú-dà tee kà nɛ yàma é cɔ̰ha dɛ́dɛ́í. 7 N mɛ̀ɛ nɛ cakú-sà yòǹ bemú-dà. Kà n ka̰hà, yè kó nɛ n'tɔ̰ṵ-nà-á-ma, mìì tee-sá kà n pú ka̰hà, Yɔ́dàko pú kó tɛ̀ni nɛ pesá. Kà n há̰ ka̰hà, n k'óò nɛ kɔ̰́ɔ̰́-ma-ní. 8 Ò kó tɛ̀ni tḭ́ń daadí, ò kó héé-ma kà fòùku nìpa é bantá mìì yòǹ-sa sḭ̀ḭ̀ma, mìì yòǹ-sa coóma, nà mìì yòǹ-sa Weèdi sídàma. 9 Ò kó héé-ma kà pá bantá mìì yòǹ-sa sḭ̀ḭ̀ma, mìì tee-sá pà pú n dań, 10 é héé kà pá bantá mìì yòǹ-sa coóma, mìì tee-sá n kɛ̰hɛdi Báàa pesá kà nɛ koò pú kó n dɛ́há, 11 é héé kà pá bantá mìì yòǹ-sa sídàma, mìì tee-sá Weèdi yɔ̀ɔ sídáàpu-dà fòùkù mɛnkù kú wódo. 12 N tṵ́mà káá-ma niìya̰ dɔ́ɔ́di è de kó nɛɛ́ éè nɛ caka, àmá nɛ mun pú kó nɛɛ́ éè yèkà sá̰mà-ní. 13 Weèdi Sèdi mɛ̀nì toó-di wɛbeèdi kó tɛ̀ni tḭ́ń daadí, nì kó nɛ túdí-ma wɛbeèdi wɛǹni mɛhɛká. Nì pú kó tɛ̀ni n'wɛì nà ni cɔ̰́ɔ̰̀di kú nɔɔ̀ti, àmá nì kó wɛdá nì yèkaà-sa wɛǹni-dà, é nɛ caka mìì kó tɛ̀ni-sá-ní. 14 Nì kó tɛ̀ni wɛkàna n yèdi-dà, mìì tee-sá nì kó nɛ n'cakú nì yèkaà-ma-dà n pesá. 15 N Báàa káá-sa wɛǹni, yòǹ n kpɛ́ɛsá-dà. Ye kú kpɛ́mú-dà tee, kà n yɔ̀ nì kó tódá nì yèkaà-ma-dà n pesá é mà nɛ caka. 16 Daàka cɛ̰́ma mɛhɛká, nɛ koò pú kó n dɛ́há. Ka kú dàhàka, kà nɛ́ tṵ́má n dɛ́há è yá̰á̰ n kɔ́dí n Báàa pesá-dà. 17 Ye wɔ̀ni, k'òo dapàm̀ma pàcɔ̰́ é m'békú pa tɔɔ̀pa è tonà: Ò yɔ̀, daàka cɛ̰́ma mɛhɛká ti koò pú k'óò dɛ́há, ka kú dàhàka kà tí tṵ́m'ɔ́ɔ̀ dɛ́há, è tṵ́mà yɔ̀, ò kɔ́dí o Báàa pesá-dà. Ye kú wɛmà kpɛ̀i é n'yɔ̀ badà? 18 Kà pà tṵ́mà yɔ̀: Ye daàka cɛ̰́ma ò wɛì-kà kú wɛmà kpɛ̀i é n'yɔ̀ badà? Ti pú yá̰á̰ ò wɛì-sa kú hḭ́ǹka. 19 Kà Sèsíì é bantá è yɔ̀ pà de kpɛ̀i óò béka, k'ó pà caka è yɔ̀: Nɛ békú nɛ tɔɔ̀pa-dè n kpɛ̀i é n'yɔ̀pu n hḭ́n-má è yɔ̀ daàka cɛ̰́ma mɛhɛká, nɛ koò pú kó n dɛ́há, ka kú dàhàka kà nɛ́ tṵ́má n dɛ́hé-è? 20 Mɔ́ma-dà n nɛ cakú-ma. Nɛ kó wáńtá n'hódì-í-ma è híkápú-nà, k'yè naa fòùkù mɛnkù kú nìpa. Nɛ kó wáńtá m'péé yaǹcɔ̰hàma mɛhɛká-dà, àmá nɛ yaǹcɔ̰hàma kó peǹta-á-ma é hḭn yaǹnaakú. 21 Kà poòo kó pɛdá, o yàma hɔ̰́ cɔ̰ha-á-ma, mìì tee-sá o náńkú wɔ̀ni-dà tɛ̀ni. Àmá kà bíitá yɔ̀ɔ dɔɔpú-ní, k'yè té ò naaka, k'ò dúí o náńkú, mìì tee-sá ò pɛdà nìdo fòùku mɛhɛká. 22 Nɛ́na mɛ̀ɛtékà, nɛ yàma cɔ̰háà-á-ma sá̰mà-ní, àmá n kó tṵ́má nɛ dɛ́há-ma, ye wɔ̀ni kà nɛ yàma é naaka. Òcɔ̰́ǹ mɛ̀ɛ koò pú kó nɛ deèda ye kú yaǹnaakú. 23 Ye kú daadí kó tɛ̀ni tḭ́ń daadí, nɛ koò pú kó n béka yècḭ́ḭ̀ kú hḭ́ǹka. Mɔ́ma-dà n nɛ cakú-ma, nɛ kó cɔhà-sa n Báàa nà n yèdi, ò k'éè nɛ kɔ̰́ɔ̰́-ma. 24 Háá sá̰mà, nɛ mun pú cɔɔ̀haà yècḭ́ḭ̀ nà n yèdi. Cɔhà-nà, nɛ kó dɛ́há-ma k'yé teha kà nɛ yaǹnaakú é cɛ̰ɛ̰̀na. 25 N nɛ cakáà mii kú wɛnnì nà wɛbemú yohènamá-dà. Àmá, wɔ̀ni pení-ma-ní, kà n koò pú kó nɛ wɛɛ́-nà ma kú bookú. N kó nɛ wɛɛ́-nà pópóí-dà mìì nɔɔ̀nà-sa n Báàa wɛmá. 26 Ye kú daadí, nɛ té kó cɔhà yècḭ́ḭ̀ n Báàa nà n yèdi-dà. N há̰ pú hḭ́n n k'óò cɔ̀hà nɛ kpɛ́mú, 27 mìì tee-sá, n Báàa mɔ́nń nɛ dɔ́sí-ma. Ò nɛ dɔ́sí è yɔ̀pu kpɛ́mú-dà nɛ n dɔ́sí è dań è yɔ̀ n yɛɛ̀ni-nà-ní o pesá. 28 N yɛɛ̀ni nà n Báàa pesá-dà é tɛ̀ni fòùku mɛhɛká. Sá̰mà-ní, è kó yídá fòùkù é tón n Báàa pesá. 29 Ye wɔ̀ni, k'òo dapàm̀ma óò caka è yɔ̀: Ǹtɛ sá̰mà-ní k'à wɛì pópóí-ì, è koò pú ti wɛì-nà wɛbemú yohènam'ɛ́ɛ̀. 30 Ti yá̰á̰-ma sá̰mà-ní è yɔ̀ a yá̰á̰ niìya̰ wɛǹni. A pú hɔ̰́ n'ceí nìd'áa béka ò màhu-sá kú hḭ́ǹka k'á nɛɛ́ ò tɛ̰́ná. Mɛmá-dà tee ti dań-ma è yɔ̀ a yɛɛ̀ni-nà-ní Weèdi pesá-dà. 31 Kà Sèsíì é pà béka è yɔ̀: Nɛ dań-dà sá̰mà mámáḿ? 32 Wɔ̀ni pení-ma-ní, nì mɛ̀ɛ yɔ̀ɔ tɛ̀mpú-dà-ní, kà nɛ kó wiìda nɛ bɛ́kà bɛ́kà, bá mɛ̀ǹǹ dɛ̀ɛ̀-ko, k'ó kòǹ o hɔ̰́ɔ̰̀ta é n héé n cɔ̰́ɔ̰̀di. N há̰ pú yòǹ n cɔ̰́ɔ̰̀di, mìì tee-sá n Báàa n m'péé-nà-á-ma. 33 N nɛ cakáà miya̰ è kpɛ̀i nɛ́ n'káá wɛ̀ɛ̀di-dà ti múnáma mɛhɛká. Nɛ kó dii náńkú-dà fòùku mɛhɛká, àmá nɛ́ n'káá kṵnnɔ̀ǹci, n nɛdà-á-ma fòùku.
1 Sèsíì wɛdà-ma mɛma é yɔ̀ɔ, é yoòda o nɔ̀ǹci hḭ́ǹka é dɔwa Weèdi è yɔ̀: N Báà, wɔ̀ni-dà tɛ̀ni. Wɛkàna a Bíitá k'yé teha kà tà mɛ̀ɛ t'áa wɛkàna. 2 A tà kɔ̰́ɔ̰̀-ɔ̰́-ma nɔɔ̀ti nìpa wɛǹni hḭ́ǹka, è yɔ̀ tá pa̰a̰ fòùmu mɛ̀mù bá yɔ̀ɔ-pú nìpa a tà kɔ̰́ɔ̰̀-pa wɛǹni. 3 Há̰kà, fòùmu mɛ̀mù bá yɔ̀ɔ-pú-dà héé, p'áa yá̰dá fɔ̰́ń mɛ̀ǹǹ kú cɔ̰́ɔ̰̀di yòǹ-ko Weèdi, é yá̰dá-nà mmí Sèsí-Kídísì a tɔn-kó-ní. 4 N wɛkànà-á-ma a yèdi teǹka hḭ́ǹka, é dehà tɔmú a n kɔ̰́ɔ̰̀-pu è yɔ̀ n mù pa̰ná. 5 Sá̰mà-ní n Báà, tṵ́má n kɔ̰́ɔ̰́ wɛhimú n de káá-pu a pesá kà fòùku mun pú cetà. 6 N héè-é-ma kà nìpa a ta̰kadà-pa-ní fòùku mɛhɛká é pà nà n kɔ̰́ɔ̰́, áa yá̰dá. Pà de yòǹ a kpɛ́ɛpá-dà, k'á pà nà n kɔ̰́ɔ̰́, kà pà mɛ̀ɛ é tṵṵ̀na a wɛmá. 7 Pà yá̰á̰-ma sá̰mà-ní è yɔ̀ a n kɔ̰́ɔ̰̀-sa wɛǹni, yè yɛ̀ni a pesá-dà. 8 N pà cakáà-á-ma wɛmá a hḭ́n n pà caka-má, kà pá mà tà̰ǹta. Pà bantà-á-ma dɛ́dɛ́í è yɔ̀ n péé-nà-ní a pesá-dà, é teha è yɔ̀ fɔ̰́ń-dà n tɔn-ní. 9 Pa kú kpɛ́mú-dà m'a cɔɔ̀hu-má. N pú cɔɔ̀hu fòùkù mɛnkù kú nìpa kpɛ́mú, àmá, n cɔɔ̀hu nìpa a n kɔ̰́ɔ̰̀-pa kú kpɛ́mú-dà, mìì tee-sá pà yòǹ a kpɛ́ɛpá-dà. 10 Mɛ̀m̀pà kú wɛnnì yòǹ-pa n kpɛ́ɛpá, pà yòǹ a kpɛ́ɛpá-dà. Mɛ̀m̀pà kú wɛnnì mɛ̀ɛ yòǹ-pa a kpɛ́ɛpá, pà yòǹ n kpɛ́ɛpá-dà. Pa fòùmu wɛkànì n yèdi-dà. 11 Mmí koò pú kó m'péé fòùku mɛhɛká, n kɔ́dí a pesá-dà. Àmá, mɛmpa káà péé fòùku mɛhɛká-dà. N Báàa wenɔ́, pà púsí nà nɔɔ̀ti a yèdi káá-ti, yèdi a n kɔ̰́ɔ̰̀-di k'yé teha kà pá m'múń, é n'yòǹ òcɔ̰́ é n'yònà mmí nà fɔ̰́ń ti yòǹ-ma òcɔ̰́. 12 N de káà pà péé-nà, è pà púsí-nà a yèdi a n pɛ̰ḭ-dí kú nɔɔ̀ti-dà. N pà púsí-ma bá p'oòcɔ̰́ǹ pú fédi, é m'bààsí mɛ̀ǹǹ de yònà é féé-ko, k'yé teha kà mìì wà̰tà-sa Weèdi pɔ̀kàta mɛhɛká é pa̰ná. 13 Sá̰mà-ní, n kɔ́dí a pesá-dà. N wɛì mɛma kú bookú è káà péé fòùku mɛhɛká, è kpɛ̀i n yaǹnaakú-dà é pà sṵ́ná dɛ́dɛ́í. 14 N pà cakáà a wɛmá-dà, kà fòùkù nìpa pà sɛ̰ɛ̰́, mìì tee-sá pà pú yòǹ fòùku kpɛ́ɛpá é n'yònà n pú yòǹkaàma ku kóoó. 15 N p'áa cɔɔ̀hu è yɔ̀ á pà dèna fòùku mɛhɛká, àmá m'a cɔɔ̀hu è yɔ̀ á pà púsí, kà Kpákpàdo-dà dá pà nɛ̀ǹta. 16 Pà pú yòǹ fòùku kpɛ́ɛpá é n'yònà n pú yòǹkaàma fòùku kóoó. 17 Héé kà pá n'yòǹ a kpɛ́ɛpá nà wɛbeèdi nɔɔ̀ti. A wɛmá-dà mɛ̀ɛ yòǹ wɛbeèdi. 18 É n'yònà a n tɔnkáàma-ní fòùku mɛhɛká, ma kú bookú-dà mmí mɛ̀ɛ té pà tɔnti-má fòùku mɛhɛká. 19 Pa kpɛ́mú-dà tee kà m'áa kɔ̰́ɔ̰́ n cɔ̰́ɔ̰̀di dɛ́dɛ́í, k'yé teha kà pà mɛ̀ɛ t'áa kɔ̰́ɔ̰́ pa cɔ̰́ɔ̰̀di dɛ́dɛ́í. 20 N pú cɔɔ̀hu mɛmpa kú cɔ̰́ɔ̰̀di kpɛ́mú, àmá n cɔɔ̀hu nà mɛ̀m̀pà kó wáńtá taàa-pá-dà pa dandaní n hḭ́ǹka nà wɛmá pà kó caka-má kpɛ́mú. 21 N cɔɔ̀hu è yɔ̀ pa wɛǹni-dà ní n'yòǹ òcɔ̰́. É n'yònà fɔ̰́ń Báàa fòù-ma n mɛhɛká kà n fòù a mɛhɛká, hédá kà pá mɛ̀ɛ té n'yòǹ òcɔ̰́ ti mɛhɛká, k'yé teha kà fòùku nìpa é bantá è yɔ̀ fɔ̰́ń-dà n tɔn-ní. 22 N pà kɔ̰́ɔ̰̀-ɔ̰́-ma wɛhimú a n kɔ̰́ɔ̰̀-pu, kà pà kó n'yòǹ òcɔ̰́ é n'yònà mmí nà fɔ̰́ń ti yòǹ-ma òcɔ̰́. 23 N fòù pa mɛhɛká-dà k'à fòù n mɛhɛká. Ma kú bookú-dà pà kó nɛɛ́ n'yòǹ-ma òcɔ̰́ dɛ́dɛ́í, k'yé teha kà fòùku nìpa é bantá è yɔ̀ a n tɔn-ní, è pà dɔ́sí a n dɔ́káàma. 24 N Báà, fɔ̰́ń-dà pà nà n kɔ̰́ɔ̰̀, n mɛ̀ɛ kpɛ̀i kà n péé-sa kà p'éè m'péé-ma, k'yé teha kà pá dɛ́há n wɛhimú a n kɔ̰́ɔ̰̀-pu. A n dɔ́káà-á-ma kà fòùku é nɛɛ́ cetá. 25 N Báà, fɔ̰́ń mɛ̀ǹǹ coó-ko, fòùku kpɛ́ɛpá p'áa yá̰á̰, àmá mmí aa yá̰á̰-ma, kà n dapàm̀ma yá̰á̰ è yɔ̀ fɔ̰́ń-dà n tɔn-ní. 26 N pà cakáà-á-ma fɔ̰́ń héé-ko, è kó tṵ́má sɔ̰kadá é héé kà p'áa yá̰dá. Mɛma, dɔ́kàma a káá-ma n hḭ́ǹka kó pà m'péé-nà-á-ma, kà n mɔ́nń mɛ̀ɛ té pà m'péé-nà.
1 Sèsíì pa̰à̰-ma ye kú cɔhàmà é yɔ̀ɔ, n'ɔ̀ɔ dapàm̀ma kà pá yíí é deèta Sètìnɔ́ɔ̀ kóndafá sóìdi tɔɔ̀di. Tená yoǹku-dà de péé ye pesá, k'ó tɛ̀i é dúú ku mɛhɛká n'ɔ̀ɔ dapàm̀ma. 2 Sùdásì mɛ̀ǹǹ de k'óò yɛɛ-kó há̰ de yá̰á̰-ma ye bɛ̀m̀bɛ̀nì, mìì tee-sá Sèsíì n'ɔ̀ɔ dapàm̀ma de nì kɔ́dì-í-ma è pèèku. 3 Kà Sùdásì é tɛ̀ni ye tená yɛ̀di mɛhɛká, è nɔɔ̀nà-ní sósìpa dɔ́ɔ́di nà Weèdi hɔ̰́ɔ̰̀ta ceípa, kà dɔ̀hàka yam̀ma kpɛ̰́m̀ma nà Fàdísìpa tɔn-ní mɛmpa. Kà pá tɛ̀ni è toó-ní ha̰pḭ́ḭcí, nà ha̰wèhi, nà ta̰nɛǹti. 4 Sèsíì mɛnn há̰ de yá̰á̰-ma mìì kú wɛnnì k'óò tɛ̀ni-sá-ní tá, k'ó pà tɔ́ká-ho é pà béka è yɔ̀: Wodà nɛ pɛnti-má? 5 Kà p'óò tɛ̰́ná è yɔ̀: Sèsíì Nàsàdɛ́tì kóoó. K'ó pà caka è yɔ̀: Mmí-dà mɛmà. Kà Sùdásì mɛ̀ǹǹ k'óò yɛɛ-kó péé ye nìpa mɛhɛká. 6 Sèsíì pà cakáà-ma è yɔ̀ mɛnń-dà mɛmà, kà pá yɛ́ɛpa é dɔtìna teǹka. 7 K'ó tṵ́má pà béka è yɔ̀: Wodà nɛ pɛnti-má? Kà pà yɔ̀: Sèsíì Nàsàdɛ́tì kóoó. 8 K'ó pà tɛ̰́ná è yɔ̀: N nɛ yɔ̀ɔ cakàpu-dà è yɔ̀ mmí-dà miì. Kà mmí-dà nɛ pɛnti-má, kà nɛ́ héé mɛmpà kà pá ka̰há. 9 Ma kú bookú-dà ò de wɛɛ̀-ma wɛmá de pa̰à̰-ma. Ò de cakáà o Báàa è yɔ̀: N pú fénà òcɔ̰́ǹ a n kɔ̰́ɔ̰̀-pa mɛhɛká. 10 È hɔ̰́tà Sìmɔ́-Píyɛ́ɛ̀ toó seedí, k'ó nì nɔ̀ta-ní é cɔɔ̀da dɔ̀hàdi kpɛ̰́ǹn núndeho, é fiìta-ho o toodí heudí. Ye núndeho yèdi-dà de dɛɛ̀ Màdìkúsì. 11 Kà Sèsíì é caka Píyɛ́ɛ̀ è yɔ̀: Tɛ̰́ná é nɔɔ̀na a seedí ni píìku mɛhɛká. A maàhu è tonà n pú kó dii-í-dà náńkú n Báàa hḭ́n n kó dii-kú? 12 K'yèe sósìpa nà pa dapàǹkpɛ̰́ǹn, nà Weèdi hɔ̰́ɔ̰̀ta ceípa, é cɛ̰ɛ̰́ Sèsíì óò dáká. 13 Kà pá cedí óò tanà Ànásì pesá. Ànásì de yòǹ Kàyífù cɛ̀ko-dà, kà Kàyífù mɛnn yòǹ ye kú benní dɔ̀hàdi kpɛ̰́ǹn. 14 Kàyífù-dà há̰ de kɔ̰́ɔ̰̀ Sùwífùpa kpɛ̰́m̀ma teḿmà mɛmà: Yè tɔ̰ṵ-ṵ́-ma nìi òcɔ̰́ kpíí nìku wɛǹni kpɛ́mú. 15 Sìmɔ́-Píyɛ́ɛ̀ nà Sèsíì dapàǹn tɔɔ̀o òcɔ̰́ǹ, kà pà tṵ̀n Sèsíì. Ye dapàǹn tɔɔ̀o, dɔ̀hàdi kpɛ̰́ǹn de ò yá̰á̰-ma, ye kú kpɛ́mú k'ó pɛ́ɛ́ é dúú-nà Sèsíì o hɔ̰́ɔ̰̀ta mùǹku mɛhɛká. 16 Kà Píyɛ́ɛ̀ mɛnn é cá̰ńtá è nɛ̀hi tapaàdi ye hɔ̰́ɔ̰́tàhá̰ńnùdi. Mɛmá-dà, k'yèe dapàǹn tɔɔ̀o, dɔ̀hàdi kpɛ̰́ǹn yá̰á̰-ko é yɛɛ̀ni é tɛ̀ni wɛɛ́-nà poòo mɛ̀ǹǹ de ceí-ko há̰ńnùdi, é dúùwa Píyɛ́ɛ̀. 17 K'yèe poòo mɛ̀ǹǹ ceí-ko há̰ńnùdi é béka Píyɛ́ɛ̀ è yɔ̀: Fɔ̰́ń mɛ̀ɛtékà, a pú yòǹ ye dɔɔò o dapàm̀ma p'oòcɔ̰́? Kà Píyɛ́ɛ̀ óò tɛ̰́ná è yɔ̀: Áà, n baà pú yòǹ o dapàǹn. 18 Sémú há̰ de péé-ma tá, k'yèe hɔ̰́ɔ̰̀ta núndehèpa nà mɛ̀m̀pà ceí-pa Weèdi hɔ̰́ɔ̰̀ta é pa̰á̰ ha̰mú è kàdi è ha̰dì. Kà Píyɛ́ɛ̀ mɛ̀ɛ té tɛ̀ni è pà kàdi-nà è ha̰dì. 19 Kà dɔ̀hàdi kpɛ̰́ǹn é béka Sèsíì o dapàm̀ma hḭ́ǹka, nà ò biɔhànì-sa hḭ́ǹka. 20 K'óò tɛ̰́ná è yɔ̀: N wɛɛ̀-nà-á-ma nìpa wɛǹni nìku yìhìka. N biɔhànà-á-ma daàka wɛǹni Weèdi wɛmá biɔhà-nàmɔ̀ka mɛhɛká, nà Weèdi hɔ̰́ɔ̰̀ta mɛhɛká Sùwífùpa wɛǹni hɔ̰́ tíká-sa. N pú sɔ̀ɔ é wɛdá yècḭ́ḭ̀. 21 Badà tee k'à n békú? Béka mɛ̀m̀pà n besí-pa n pà cakáà-sa. Mɛmpa yá̰á̰-ma sukú n pà cakáà-sa. 22 Ò wɛɛ̀-ma mɛma, kà mɛ̀m̀pà ceí-pa Weèdi hɔ̰́ɔ̰̀ta p'oòcɔ̰́ mɛ̀ǹǹ d'oò hɛ́dí-nà-ko óò potá weǹfa è yɔ̀: Dɔ̀hàdi kpɛ̰́ǹn-dà a tɛ̰́nì-ma mɛma? 23 K'óò tɛ̰́ná è yɔ̀: Kà n wɛɛ̀-ma kpákpààma, k'á mà nà n caka-ní. Àmá, kà n há̰ wɛɛ̀-sa coó-dà, badà tee k'á n potá? 24 Kà Ànásì é héé k'ó n'káà dásí, k'óò kɔ̰́ɔ̰́-hɔ̰ dɔ̀hàdi kpɛ̰́ǹn Kàyífù. 25 Ye wɔ̀ni, kà Sìmɔ́-Píyɛ́ɛ̀ baà péé ye pesá è ha̰dì ha̰mú. Kà p'óò béka è yɔ̀: Fɔ̰́ń mɛ̀ɛtékà, a pú yòǹ ye dɔɔò o dapàm̀ma p'oòcɔ̰́? Àmá, kà Píyɛ́ɛ̀ é nɔ̀hì è yɔ̀: Á̰à̰, n pú yòǹ o dapàǹn. 26 Kà dɔ̀hàdi kpɛ̰́ǹn núndehèpa p'oòcɔ̰́, k'ò yòǹ Píyɛ́ɛ̀ de fità-ko kú toodí yɛǹn, óò béka è yɔ̀: Fɔ̰́ń dɔ n dɛ́hà-ma-ní tená yoǹku mɛhɛká k'à ò nɔɔ̀nà? 27 Kà Píyɛ́ɛ̀ é tṵ́má nɔ̀hì è yɔ̀ ò p'óò yá̰á̰. Ye pesá n'ɛ̀ɛ pesá, kà kótadá é kɔń. 28 Ye kú dàhàka, ká̰ńyɛ̰̀ǹfa pìdìpìdì, kà pá deèna-ní Sèsíì Kàyífù hɔ̰́ɔ̰̀ta, óò tanà ye tempáàku yìkàǹyìdo nahàku. Àmá, kà Sùwífùpa kpɛ̰́m̀ma é yeda pà kó dúú-ma ku mɛhɛká. Pà de pú kpɛ̀i é pa̰á̰ pa cɔ̰́ɔ̰̀di yɔ̰́káma, é nɛɛ́ dii Núǹdiyɛ̀ɛ̀ma kúúdi dipú. 29 Mɛmá-dà de tee, kà yìkàǹyìdo Pìdátì é yɛɛ̀ni é pà pèta-nà tapaàdi é pà béka è yɔ̀: Nɛ dɛ́hà yetádi m̀mɔ́ńni-dà ye dɔɔò mɛnǹ hḭ́ǹka? 30 Kà p'óò tɛ̰́ná è yɔ̀: K'ò de pú yòǹ niìkpákpàdo, è yenì ti p'óò tɛɛ̀-ní óò tàa a nɔ̀hi mɛhɛká. 31 Kà Pìdátì é pà caka è yɔ̀: Ò tóó-nà nɛ mɔ́mpá óò síi-nà é n'yònà nɛ kpɛ̰́ńdìnùka hḭ́mpú. Kà pà yɔ̀: Nɛ kpɛ̰́ńdìnùka pú ti pɛ̰ḭ foóma è yɔ̀ tí deèna-ní nùdi é kɔ̀ù nìdo. 32 Ma kú bookú-dà Sèsíì de wɛɛ̀-ma wɛmá de pa̰à̰-ma, kṵ́mú ò kó kpíí-pu kú bookú hḭ́ǹka. 33 Kà Pìdátì é tón é dúú o nahàku mɛhɛká, é yíí Sèsíì óò béka è yɔ̀: A yòǹ Sùwífùpa wódo-dà? 34 Kà Sèsíì óò tɛ̰́ná è yɔ̀: A mɔ́nń-dà mà màhaà è mà nà n békú nkɛ́ɛ̀ tɔɔpà-d'àà cakáà miya̰ n hḭ́ǹka? 35 Kà Pìdátì óò tɛ̰́ná è yɔ̀: N yòǹ Sùwífù-dà-à, mmí-á̰a̰? A bookú kpɛ́ɛpá nà dɔ̀hàka yam̀ma kpɛ̰́m̀ma, d'àà tàà n nɔ̀hi mɛhɛká. A pa̰à̰ m̀mɔ́ńya̰-dà? 36 Kà Sèsíì é tɛ̰́ná è yɔ̀: N wóòti pú yòǹ tenkà mɛnkà kú kpɛ́ɛtí. Kà tì de yòǹ tenkà mɛnkà kú kpɛ́ɛtí, è yenì n dehèpa màa-á-ma n kpɛ́mú kà pà pú nà n tàà Sùwífùpa kpɛ̰́m̀ma nɔ̀hi mɛhɛká. Àmá mɛma há̰ dɔ, n wóòti pú yòǹ tenkà mɛnkà kú kpɛ́ɛtí. 37 Ye wɔ̀ni, kà Pìdátì óò béka è yɔ̀: Kà mɛmá-dà, a yòǹ wódo-dà nkɛ́ɛ̀? K'óò tɛ̰́ná è yɔ̀: A mà yɔ̀ɔ wɛdápu, n yòǹ wódo-dà. Pà n pɛdà kà n kó caka nìpa-dà wɛbeèdi. Ye kú kpɛ́mú-dà tee ká n tɛ̀ni fòùku mɛhɛká. Mɛ̀ǹǹ yòǹ-ko wɛbeèdi yaǹn-dà bekù n wɛmá. 38 Kà Pìdátì óò béka è yɔ̀: Pà toò badà wɛbeèdi? Pìdátì wɛɛ̀-ma mɛma é yɔ̀ɔ, é tón yɛ̀dì é taá Sùwífùpa pesá é tɛ̀i pà caka è yɔ̀: Mmí pú dɛ́hà yetádi nìcɔ̰́nì mɛ̀nì sànà-di tí kɔ̀ù dɔɔò mɛnǹ. 39 Àmá, nɛ bookú pa̰á̰ma mɛhɛká, yè békú Núǹdiyɛ̀ɛ̀ma kúúdi wɛǹni n té nɛ wɛ́í kpenáku kùcɔ̰́-dà. Nɛ kpɛ̀i ń nɛ wɛ́í Sùwífùpa wódo? 40 Ye wɔ̀ni, kà pá cemá é kpákada è yɔ̀: Ti pú kpɛ̀i á wɛ́í mɛnn. Ti kpɛ̀i á wɛ́í Bàdàbásì-dà. Ye Bàdàbásì há̰ de yòǹ niìkɔ̀ùdo-dà.
1 Ye wɔ̀ni, kà Pìdátì é kɔ̰́ɔ̰́ nùdi è yɔ̀ pá tódá Sèsíì óò podí dáàfa. 2 Kà sósìpa é dɛ̀i poòma pókàta óò yíná è yɔ̀ wóopókàta-dà, é yíí óò báná tókesàdi hṵɛ̰dí mɔ̀ì. 3 Kà pà t'óò hɛ́tá-ho è yɔ̀: Ǹnadaà Sùwífùpa wódo, è t'óò potá weǹfa. 4 Kà Pìdátì é tṵ́má yɛɛ̀ni tapaàdi é caka ye nìku è yɔ̀: Besí-nà. N kó héé kà p'óò dèna-á-ma-ní miì tapaadì, k'yé teha kà nɛ́ bantá è yɔ̀ n pú dɛ́hà yetádi nìcɔ̰́nì mɛ̀nì sànà-di t'óò kɔ̀ù. 5 Kà Sèsíì é yɛɛ̀ni tapaàdi è yídí poòma pókàta, è bádí tókesàdi hṵɛ̰dí mɔ̀ì. Kà Pìdátì é pà caka è yɔ̀: Ǹtɛ-nà ye nìdo! 6 Dɔ̀hàka kpɛ̰́m̀ma nà mɛ̀m̀pà ceí-pa Weèdi hɔ̰́ɔ̰̀ta ò dɛ́hà tḭ́ń wɔ̀ni, é dedí kpeéma è yɔ̀: Ò kpɛ̰́ḭ́ kpíidɔkú hḭ́ǹka! Ò kpɛ̰́ḭ́ kpíidɔkú hḭ́ǹka! Kà Pìdátì é pà caka è yɔ̀: Ò tóó-nà nɛ mɔ́mpá óò kpɛ̰́ḭ́ kpíidɔkú hḭ́ǹka. Mmí pú dɛ́hà yetádi nìcɔ̰́nì mɛ̀nì sànà-di t'óò kɔ̀ù. 7 Kà Sùwífùpa óò tɛ̰́ná è yɔ̀: Ti káá kpɛ̰́ńdìnùdi-dà, ye kpɛ̰́ńdìnùdi mɛ̀ɛkà, nì békú ó kpíí-ma, mìì tee-sá ò hḭ́n ò yòǹ Weèdi bíitá-dà. 8 Pìdátì yèkaà-ma ye kú wɛmá, kà wandanfɔ̰̀di é dɔ̀hà óò cɛ̰ɛ̰́ dɛ́dɛ́í. 9 K'ó tón o nahàku mɛhɛká é tɛ̀i é béka Sèsíì è yɔ̀: A yɛɛ̀ni-nà-ní ya-dà? Àmá Sèsíì p'óò tɛ̰́nà màcɔ̰́mà. 10 Ye wɔ̀ni, kà Pìdátì óò béka è yɔ̀: Mmí-dà a pú kpɛ̀i é tɛ̰́ná-ma màcɔ̰́mà? A pú yá̰á̰ è yɔ̀ n káá-ma nɔɔ̀ti è kó nɛɛ́ héé kà p'áa wɛ́í-i, è káá nɔɔ̀ti è kó nɛɛ́ héé kà p'áa kpɛ̰́ḭ́ kpíidɔkú hḭ́ǹka? 11 Kà Sèsíì óò tɛ̰́ná è yɔ̀: A pú káá nɔɔ̀ti tìcɔ̰́tì n hḭ́ǹka k'yè pú yòǹ Weèdi a kɔ̰́ɔ̰̀-ti-ní. Mɛmá-dà tee mɛ̀ǹǹ n tàà-ko a nɔ̀hi mɛhɛká kú sḭ̀ḭ̀ma wɛhi-nà-ma a kpɛ́ɛmá. 12 É cɛ̰ɛ̰́-nà ye kú wɔ̀ni, kà Pìdátì é m'pɛnti cɔ̀ci ò kó hḭmpú é wɛ́í Sèsíì. Àmá, kà Sùwífùpa é dedí kpeéma è yɔ̀: Kà wɛ́i dɔɔò mɛnǹ, a pú yòǹ Hɔ̀dɔ́m̀ wóosào dópo. Mɛ̀ǹǹ kú wɛnnì kó n'yɔ̀-ko ò yòǹ wódo, yòǹ Hɔ̀dɔ́m̀ wóosào kà̰à̰tɔ̀o-dà. 13 Pìdátì yèkaà-ma kà pà wɛì mɛma, k'ó deèna-ní Sèsíì tapaàdi, é tɛ̀ni kaàdi sídàko kàtàda, kà tà péé bɛ̀m̀bɛ̀ni nìcɔ̰́nì kà pà nì cèdi nà tá̰à̰ka, kà Hèbùdéèpa nì yún Kàbàtáà. 14 Núǹdiyɛ̀ɛ̀ma kúúdi-dà de hà̰n, è hɔ̰́tà wèǹku beé-nà yuùka hḭ́ǹka, kà Pìdátì é caka Sùwífùpa è yɔ̀: Ǹtɛ-nà nɛ wódo! 15 Kà pá dedí kpeéma è yɔ̀: Ò yònà é kpíí-dà! Ò yònà é kpíí-dà! Ò kpɛ̰́ḭ́ kpíidɔkú hḭ́ǹka. Kà Pìdátì é pà béka è yɔ̀: Ń héé kà pá kpɛ̰́ḭ́ nɛ wódo kpíidɔkú hḭ́ǹka? Kà dɔ̀hàka yam̀ma kpɛ̰́m̀ma é tɛ̰́ná è yɔ̀: Ti pú káá wódo tɔɔ̀o òcɔ̰́ǹ, Hɔ̀dɔ́m̀ wóosào bààsí. 16 Ye wɔ̀ni, kà Pìdátì óò tàa pa nɔ̀hi mɛhɛká, kà pà k'óò kpɛ̰́ḭ́ kpíidɔkú hḭ́ǹka. Kà sósìpa é tóó Sèsíì óò ka̰há-nà. 17 Kà Sèsíì mɔ́nń é toó o kpíidɔkú é yɛ̀dì yɔtí mɛhɛká é ta̰ntá bɛ̀m̀bɛ̀ni pà toò-di Yukókóku, kà Hèbùdéèpa nì yún Kɔ̀ɔ̀kòtáà. 18 Ye pesá-dà pà d'óò kpɛ̰́ḭ́-ma kpíidɔkú hḭ́ǹka. Pà de pɛ́ɛ̀ óò kpɛ̰́ḭ́-nà niìdaapá pàdɛ́ɛ́-dà kpíidɛcí hḭ́ǹka, òcɔ̰́ o heùma, tɔɔ̀o o cà̰ǹkamá kà mɛnn sɛ́sí cɔhàka. 19 Kà Pìdátì é kɔ̰́ɔ̰́ nùdi kà pá wa̰à̰ta wà̰a̰cí dawɛɛtá hḭ́ǹka, é tà dàna kpíidɔkú hḭ́ǹka, kà cì tonà: Sèsíì Nàsàdɛ́tì kóoó, Sùwífùpa wódo. 20 Sùwífùpa dɔ́ɔ́di de kaàn-ń-ma ye wà̰a̰cí, mìì tee-sá pà de kpɛ̰́ḭ́-sa Sèsíì de pú nátà-nà yɔtí. Pà de wa̰à̰haà ye wà̰a̰cí nà hèbùdéèdi-dà, nà dàtɛ̰́ɛ̰̀di, nà kɛ̀dɛ́kìdi. 21 Ye wɔ̀ni, kà Sùwífùpa dɔ̀hàka yam̀ma kpɛ̰́m̀ma é caka Pìdátì è yɔ̀: A dá wa̰à̰ta Sùwífùpa wódo. Àmá á wa̰à̰ta è yɔ̀ mɛnń-dà yɔ̀ ò yòǹ Sùwífùpa wódo. 22 Kà Pìdátì é pà tɛ̰́ná è yɔ̀: N wa̰tà-sa, n yè wà̰tà-á-dà. 23 Sósìpa kpɛ̰́ḭ́-ma Sèsíì kpíidɔkú hḭ́ǹka é yɔ̀ɔ, é tóó o nɛǹti é tì totá cɛ̰má mànàhì bá pa mɛ̀ǹǹ dɛ̀ɛ̀ k'ó tódá màcɔ̰́. Kà pá pɛ́ɛ́ é tóó-nà o tókesàdi kà nì pú yòǹ tókekpáádi, nì de yòǹ tókedɛ̀idí-dà ni wɛn-wɛǹni. 24 K'yèe sósìpa é caka pa tɔɔ̀pa è yɔ̀: Ti dá nì cɛ́tá, àmá tí nì ta̰á̰ tɛ́tɛ́, é dɛ́há mɛ̀ǹǹ kó nì dii-kó. Ma kú bookú-dà Weèdi wɛmà mɛmà de pa̰à̰-ma: Pà totà n nɛǹti é yɔ̀ɔ é ta̰á̰ n tókedɛudí tɛ́tɛ́. Mɛmá-dà ye sósìpa de pa̰à̰-ma. 25 Kà Sèsíì màa, n'ɔ̀ɔ màya̰ǹn, nà Màdíì Kèdòpásì poòo, nà Màdíì Màkìtàdáà kóoó, nɛɛ̀hi è hɛ́dí-nà o kpíidɔkú. 26 K'ó dɛ́há o màa, k'òo dapàǹn ò de dɔ́sí-ko nɛɛ̀hi ò hɛ́dí-nà. K'ó caka o màa è yɔ̀: N màà, ǹtɛ a bíitá. 27 K'ó yíí caka ye dapàǹn è yɔ̀: Ǹtɛ a màa. É cɛ̰ɛ̰́-nà ye kú daadí, k'yèe dapàǹn é tódá Màdíì óò kònà o hɔ̰́ɔ̰̀ta. 28 Ye kú dàhàka, Sèsíì há̰ de yá̰á̰-ma è yɔ̀ niìi wɛǹni cɛ̰nà-á-ma sá̰mà, k'ó wɛdá yè kó hḭmá kà Weèdi wɛmà mɛmà é pa̰ná, k'ò yɔ̀: Nɛ́yà̰hakú-dà n káá. 29 Cɔ̀ta tàcɔ̰́tà-dà há̰ de péé ye pesá, kà dìfɛ̰́ɛ̰̀ naàkpáńkpáǹni tà sṵ́nà. Kà sósìpa é sɛ̰ṵ̀wa̰ cɛbùti ye dìfɛ̰́ɛ̰̀ naàkpáńkpáǹni mɛhɛká, é tì bowá tesá pà toò-sa ìsɔ́pù dɛ̀ɛkú é hɛ́hèna-hɔ̰ o nùdi. 30 Ò nì dɛmpáà-ma é yɔ̀ɔ, è yɔ̀: Niìi wɛǹni cɛ̰nà-á-ma. Ye wɔ̀ni é sḭ́ná o yudí é tɔ̰ɔ̰̀ta. 31 Yè de hɔ̰́tà ye daadì-dà sɛ́sí, k'yè kó wentá damuhipàdi. Sùwífùpa kpɛ̰́m̀ma há̰ de pú kpɛ̀i pà kpɛ̰́ḭ́-pa wɔ̰̀ǹti é n'kaá kpíidɛcí hḭ́ǹka, mìì tee-sá ye kú damuhipàdì de ha̰tà-á-ma tɔɔ̀ka. Ye kú kpɛ́mú, kà pá taá é cɔhà Pìdátì è yɔ̀ ó héé kà pá bɔ́si pà kpɛ̰́ḭ́-pa kpíidɛcí hḭ́ǹka tàka, é nɛɛ́ cúhìna-ní pa wɔ̰̀ǹti. 32 Kà Pìdátì é pà pa̰a̰ nùdi. Ye wɔ̀ni, kà sósìpa é yíí é taá ye nìpa pà de pɛ́ɛ̀ é kpɛ̰́ḭ́-nà-pa Sèsíì kpíidɛcí hḭ́ǹka pesá, é tɛ̀i é bɔ́si cecedó tàka, é yɔ̀ɔ é hḭn mɛma dɛ́ɛ̀do kpɛ́ɛká. 33 Pà ta̰ntà-ma Sèsíì pesá, é n'hɔ̰́tà ò cemà yɔ̀ɔ kpíipú. Ye kú kpɛ́mú-dà tee pà de pú bɔ́si-má o kú tàka. 34 K'yèe sósìpa, p'oòcɔ̰́ é kpɛ̰́ḭ́ Sèsíì pḭ̀ǹdikú kpa̰ǹni é duùta-ho, kà hḭ̀ma nà nɛ́ɛmá é wudí-ní ye pesá n'ɛ̀ɛ pesá. 35 Mɛ̀ǹǹ dɛ́hà-ko ye pa̰á̰mà n'ɔ̀ɔ nɔ̀ǹci, mɛnń-dà mà cakú. O mɔ́nń mɛ̀ɛ yá̰á̰-ma è yɔ̀ ò cakú-sa yòǹ bemú-dà. W'èè cakú è kpɛ̀i nɛ mɛ̀ɛ té yè n'dań-ma. 36 Yè pa̰à̰ mɛma kú bookú, yè kó hḭmpú-dà kà Weèdi wɛmà mɛmà é pa̰ná: Pà pú kó pɔ́dá o kɔ̰́ɔ̰́di nìcɔ̰́nì. 37 Weèdi pɔ̀kàta mɛhɛká, pà tṵ́mà wà̰tà bɛ́ɛ́kú tɔɔkú è yɔ̀: Pà kó wáńtá-ma pà kpɛ̰́ḭ́-ko kpa̰ǹni. 38 Ye kú dàhàka, kà Sòsɛ́fù Àdìmàtéè yɔtí kóoó é tɛ̀ni cɔhà Pìdátì nùdi è kó tódá Sèsíì wɔ̰̀ǹku é taá kù dáná. Ye Sòsɛ́fù de yòǹ Sèsíì dapàǹn-dà sɔ̀sɔ̀ma mɛhɛká, mìì tee-sá ò de wani-í-ma Sùwífùpa kpɛ̰́m̀ma. Kà Pìdátì é teha, k'ó kù tódá é kù ka̰hàna. 39 Kà Nìkòdɛ́m̀ mɛ̀ǹǹ de taá-ko daadí yènì Sèsíì pesá yèǹka, mɛ̀ɛ té tɛ̀ni, è toó-ní tùdàakɔkadáko, kà p'òò pa̰à̰-nà tecí pà toò-ci mìíì nà àdòwɛ́sì. Ye tùdàdésa yṵṵ̀humú de yɔ̀ɔ-ɔ́-ma kìdóòpa púta̰a̰ kpɛ́ɛmá. 40 Padɛ́ɛ̀di, kà pá tódá Sèsíì wɔ̰̀ǹku é kù pa̰á̰ tùdàdésa, é yɔ̀ɔ é kù fḭń pɛ́ńcí é n'yònà Sùwífùpa hɔ̰́ hḭmpú é nɛɛ́ dáná kpíìo. 41 Tená yɛ̀di-dà há̰ de péé bɛ̀m̀bɛ̀ni pà de kpɛ̰́ḭ́-di Sèsíì, ni mɛhɛká kà kpíifɔ̰̀ɔ̰kú pàǹku yè péé, kà pà mun pú kù tàà kpíìo daadí yènì. 42 Ku kú mɛhɛká-dà pà de taà-ma Sèsíì wɔ̰̀ǹku, mìì tee-sá kù de tɔ́sí-nà ye pesá-dà, kà Sùwífùpa damuhipàdi tṵ́mà hà̰n.
1 Yà̰à̰di ká̰ńyɛ̰̀ǹfa pìdìpìdì, kà Màdíì Màkìtàdáà yɔtí kóoó é yɔ́dá é taá ye híúdi pesá. K'ó tɛ̀i è hɔ̰́tà tá̰hàku mɛ̀ǹkù de hḭ̀ḭ-kú ye híúdi nùdi hḭtà. 2 K'ó cocí taá dɛ́há Sìmɔ́-Píyɛ́ɛ̀ nà Sèsíì dapàǹn tɔɔ̀o ò de dɔ́sí-ko, é pà caka è yɔ̀: Pà dèdà ti Teó wɔ̰̀ǹku híúdi mɛhɛká, ti mɛ̀ɛ pú yá̰á̰ pà kù tàà-yà. 3 Píyɛ́ɛ̀ n'ɛ̀ɛ Sèsíì dapàǹn tɔɔ̀o, kà pá yɛɛ̀ni é taá ye híúdi pesá. 4 Padɛ́ɛ̀di, Kà pá n'cokù è kɛ̰hɛdi, k'yèe Sèsíì dapàǹn tɔɔ̀o é ha̰nci Píyɛ́ɛ̀ é ta̰ntá ni pesá. 5 K'ó tɛ̀i boí é dentá ye híúdi mɛhɛká, é dɛ́há pɛ́ńcí kà cì dɔɔ́ teǹka, w'àá pú dúú. 6 Kà Sìmɔ́-Píyɛ́ɛ̀ óò n'tṵ̀n-ní, é tɛ̀ni dúú-ho ye híúdi mɛhɛká, é dɛ́há ye pɛ́ńcí kà cì dɔɔ́ teǹka, 7 nà kùdáapɛ́íta pà de pɔ̰ɔ̰̀-ta o yudí kà tà pɔ̰-pɔ̰ṵ́ è dɔɔ́ ta kú bɛ́kà. 8 Ye wɔ̀ni-dà ye Sèsíì dapàǹn mɛ̀ǹǹ de cedí ta̰ntá-ko-ní híúdi pesá, mɛ̀ɛ té dúú-ma. K'ó dɛ́há mìì de pa̰à̰-sa, é taàa o dandaní è yɔ̀ ò yá̰ńtà. 9 Sèsíì dapàm̀ma de mun pú bantà wɛmá pà wà̰tà-ma Weèdi pɔ̀kàta mɛhɛká è yɔ̀ ò yònà é yá̰ńtá-ma kpíípa mɛhɛká. 10 Ye kú dàhàka, kà pá fitá padɛ́ɛ̀di é kòǹ. 11 Kà Màdíì Màkìtàdáà yɔtí kóoó mɛnn é cá̰ńtá è nɛ̀hi è hɛ́dí-nà ye híúdi è kɔǹ. K'ó n'kɔǹ, é boí é dentá ni mɛhɛká, 12 é dɛ́há Weèdi tɔntɔndipá pàdɛ́ɛ́ kà pà báá nɛmpɛ́íti è kàdi Sèsíì wɔ̰̀ǹku de dɔɔ́-sa. Òcɔ̰́ o yudí de dɔɔ́-sa, tɔɔ̀o o tàka bɛ́ka. 13 Kà p'óò béka è yɔ̀: Pooò fɔ̰́ń, baà tee k'à kɔǹ? K'ó pà tɛ̰́ná è yɔ̀: Pà dèdà n Teó wɔ̰̀ǹku-dà híúdi mɛhɛká, n mɛ̀ɛ pú yá̰á̰ pà kù tàà-yà. 14 Ò wɛɛ̀-ma mɛma é yɔ̀ɔ, é fitá dɛ́há Sèsíì k'ò nɛ̀hi, w'àá p'óò bantà. 15 Kà Sèsíì óò béka è yɔ̀: Pooò fɔ̰́ń, baà tee k'à kɔǹ? A pɛnti wodà? Ye poòo mɛnn de maàhu è tonà mɛ̀ǹǹ púsí-ko-dà ye tená yɛ̀di, ye kú kpɛ́mú-dà tee k'óò caka è yɔ̀: Dakpɛ̰́ǹn, kà fɔ̰́ń-dà tódà o wɔ̰̀ǹku, k'á n caka a kù hḭ́nà-sa ká n taá kù tóó-ní. 16 Kà Sèsíì óò yíí è yɔ̀: Màdíì! K'ó fitá Sèsíì bɛ́ka óò wɛɛ́-nà hèbùdéèdi è yɔ̀: Dàbùníì, mìì kpɛ̀i é n'yɔ̀-sa n Dakpɛ̰́ǹn. 17 Kà Sèsíì óò caka è yɔ̀: Dá n pḭ́ń, mìì tee-sá n mun pú dìsi n Báàa pesá. Àmá, tɔɔ̀ta é taá caka n kúcàpa è yɔ̀: N dikìdì n Báàa bɛ́ka-dà mɛ̀ǹǹ mɛ̀ɛ té yòǹ-ko nɛ Báàa, n Weèdi bɛ́ka mɛ̀nì mɛ̀ɛ té yòǹ-di nɛ Weèdi. 18 Ye wɔ̀ni, k'yèe Màdíì Màkìtàdáà yɔtí kóoó é taá caka Sèsíì dapàm̀ma ye wɛmá è yɔ̀: N dɛ́hà-á-ma ti Teó. K'ó pà caka òò cakáà-sa-ní. 19 Ye yà̰à̰di yohokú è hɔ̰́tà o dapàm̀ma tíkà hɔ̰́ɔ̰̀ta tàcɔ̰́tà kú mɛhɛká kà cɔ̀ka dásí, mìì tee-sá pà de wani Sùwífùpa kpɛ̰́m̀ma-dà. Kà Sèsíì é tɛ̀ni nɛɛ̀hi pa cɔhàka é pà dɔwa è yɔ̀: Wɛ̀ɛ̀di é nɛ m'péé-nà! 20 Ò pà dɔwáà-ma mɛma é yɔ̀ɔ é pà bɛka o nɔ̀hi n'ɔ̀ɔ pḭ̀ǹdikú. K'yé pà naaka dɛ́dɛ́í nà pà dɛ́hà-ma kpɛ́mú Teó. 21 Kà Sèsíì é tṵ́má pà dɔwa è yɔ̀: Wɛ̀ɛ̀di é nɛ m'péé-nà! É n'yònà n Báàa n tɔnkáàma-ní, ma kú bookú-dà n mɛ̀ɛ té nɛ tɔnti-má. 22 Ò wɛɛ̀-ma mɛma é yɔ̀ɔ, é fuùda yamú pa hḭ́ǹka é pà caka è yɔ̀: Ta̰ǹta-nà Weèdi Sèdi! 23 Nɛ kó bútá-pa kú sḭ̀ḭ̀ma dàhàka, Weèdi kó mà pà dèda-á-ma. Kà nɛ mɛ̀ɛ yeéè-pa kú sḭ̀ḭ̀ma dàhàka bútáma, nì pú kó mà pà dèda. 24 Yè de hɔ̰́tà Sèsíì tɔntɔndipá p'oòcɔ̰́, Tòmáà, pà toò-ko kpɛ́kàta de pú péé-nà o tɔɔ̀pa Sèsíì de pà foò tḭ́ń wɔ̀ni. 25 K'òo tɔɔ̀pa óò caka è yɔ̀: Ti dɛ́hà-á-ma ti Teó. K'ó pà tɛ̰́ná è yɔ̀: Kà mmí pú dɛ́hà pɔ̰́ńtìpa bòka o nɔ̀hi é taàa n há̰ḿbíifá ka mɛhɛká, é dɛ́há o pḭ̀ǹdikú bòdi, é taàa n nɔ̀ku ni mɛhɛká, n pú kó n'dań è yɔ̀ ò yá̰ńtà. 26 Kàyeèho òcɔ̰́ kú dàhàka, kà Sèsíì tɔntɔndipá é tṵ́má tíká ye hɔ̰́ɔ̰̀ta mɛhɛká kà Tòmáà yè péé ye kú daadí. Kà Sèsíì é tɛ̀ni nɛɛ̀hi-hɔ̰ pa cɔhàka k'yèe hɔ̰́ɔ̰̀ta cɔ̀ka dá-dásí nà pencí, k'ó pà dɔwa è yɔ̀: Wɛ̀ɛ̀di é nɛ m'péé-nà! 27 Ye kú dàhàka, k'ó caka Tòmáà è yɔ̀: Cɔ́dí n nɔ̀hi. Baá a há̰ḿbíifá hi bòka mɛhɛká. Dɛɛ̀da-ní a nɔ̀ku. Baá n pḭ̀ǹdikú bòdi. A koò dá n'yòǹ dandankɔ́ɔ̀ti yaǹn, ní n'dań. 28 Kà Tòmáà óò tɛ̰́ná è yɔ̀: N Teù, n Weèdi! 29 Kà Sèsíì óò caka è yɔ̀: A n dɛ́hà-pu kpɛ́mú-dà tee k'à dań è yɔ̀ n yá̰ńtè-è? Yé n'nadi mɛ̀m̀pà dań-pa è pú n dɛ́hà! 30 Sèsíì de tṵ́mà pa̰à̰-á̰-ma pɔ́ńdápa̰á̰ma tɔɔ̀ma dɔ́ɔ́di o dapàm̀ma yìhìka, àmá pà pú mà wà̰haà pɔ̀kàtà mɛntà kú mɛhɛká. 31 Wɛmà mɛ̀mà péé-mà ta mɛhɛkà, pà mà wà̰haà è kpɛ̀i nɛ́ bantá-ma è yɔ̀ Sèsíì-dà yòǹ Kídísì, Weèdi bíitá. Kà nɛ taà nɛ dandaní o hḭ́ǹka nɛ kó dɛ́tá-ma fòùmu n'ɔ̀ɔ yèdi.
1 K'yé pa̰á̰ daàka cɛ̰́masí, kà Sèsíì é tṵ́má bɛka o cɔ̰́ɔ̰̀di o dapàm̀ma kà pà péé Tìbèdìyádì yɔtí baàdi nùdi. Ǹtɛ o de pà bɛkáà-á-ma kú bookú o cɔ̰́ɔ̰̀di: 2 Kà Sìmɔ́-Píyɛ́ɛ̀, nà Tòmáà pà tṵ́mà toò-ko kpɛ́kàta, nà Nàtànàyɛ́dì Kánà yɔtí kóoó, k'yèe yɔtí péé Kàdìdéè tempáàku mɛhɛká, nà Sèbèdéè bííhí hìdɛ́ɛ́, nà Sèsíì dapàm̀ma tɔɔ̀pa pàdɛ́ɛ́, pa wɛǹni kà pà pɛ́ɛ̀ è péé. 3 Kà Sìmɔ́-Píyɛ́ɛ̀ é pà caka è yɔ̀: N kɔ́dí mɛ́nápu-dà. Kà p'óò tɛ̰́ná è yɔ̀: Tḭ́ńti mɛ̀ɛtékà, ti k'áa nɛǹta-á-ma. Kà pá yídá taá dìsi hà̰à̰pu é ka̰há, àmá ye yèǹka ka wɛǹni pà pú cɛ̰ɛ̰́ yècḭ́ḭ̀. 4 K'yé n'wekàta-ní, kà Sèsíì é tɛ̀ni nɛɛ̀hi ye baàdi nùdi, àmá o dapàm̀ma pú bantà è yɔ̀ mɛnń-dà. 5 K'ó pà béka è yɔ̀: N bííhí-nà, nɛ pú káá num̀bíitá? Kà p'óò tɛ̰́ná è yɔ̀: Á̰à̰, ti pú káá. 6 K'ó pà caka è yɔ̀: Ká̰ńtá-nà ká̰ńcḭ̀mu nɛ heùma, nɛ kó cɛ̰ɛ̰́-ma. Kà pá mù ká̰ńtá, é cɛ̰ɛ̰́ num̀bííhí sàma mɔ́ma, é hɛ̰ka pà kó mù dèna-má-ní nɛ́ɛmá mɛhɛká. 7 Ye wɔ̀ni, kà Sèsíì dapàǹn ò de dɔ́sí-ko é caka Píyɛ́ɛ̀ è yɔ̀: Ti Teó-dà. Sìmɔ́-Píyɛ́ɛ̀ yèkaà-ma mɛma, é tṵ́má bádí o tókesàdi ò de bátà-di è kó mɛ́ná, ye wɔ̀ni é fékádá cɛɛ̀da nɛ́ɛmá mɛhɛká. 8 K'yèe dapàm̀ma tɔɔ̀pa é tóní n'ɛ̀ɛ hà̰à̰pu baàdi nùdi, è yɔ̰́ǹ-ní ye ká̰ńcḭ̀mu, kà mù sṵ́nà num̀bííhí, mìì tee-sá pà de pú nátà-nà ni nùdi sàma. Ye ta̰nta̰ǹni de yòǹ mɛ́tídìpa kɔ̀ta kpɛ́ɛmá-dà. 9 Kà pá cútá-ní teǹka, é dɛ́há ye pesá pɛ̰́ɛ̰̀, nà ha̰mú kà num̀bíitá cɔ̰mú mu hḭ́ǹka. 10 Kà Sèsíì é pà caka è yɔ̀: Deèe-nà-ní num̀bííhí nɛ cɛ̰ɛ̰́-hi kú mɛhɛká. 11 Kà Sìmɔ́-Píyɛ́ɛ̀ é dìsi ye hà̰à̰pu mɛhɛká é yɔ̰́ń ye ká̰ńcḭ̀mu é mù dèna-ní kpeèdi, kà num̀bíisàhi kɔ̀ta nà púnùm̀ nà hìta̰a̰ péé mu mɛhɛká. Nà mù de sṵ́nà-mà kú bookù, mù de pú cɛ́tà. 12 Kà Sèsíì é pà caka è yɔ̀: Ya̰ní é dii-nà! O dapàm̀ma, p'oòcɔ̰́ǹ de pú cḭnà kṵnnɔ̀ǹfa óò béka mɛnn héé-ko, mìì tee-sá pà de bantà-á-ma è yɔ̀ Teó-dà. 13 Ye wɔ̀ni, k'ó hɛ́tá é tóó pɛ̰́ɛ̰̀ óò pà totá, é yíí tóó num̀bíitá è mɛ̀ɛ té tà pà totá. 14 Ta̰á̰ma-dà de dɛɛ̀ Sèsíì de bɛkú-ma o cɔ̰́ɔ̰̀di o dapàm̀ma, n'ɔ̀ɔ̀ yá̰ńtà-ma-ní kpíípa mɛhɛká. 15 Pà dii-má é yɔ̀ɔ, kà Sèsíì é béka Sìmɔ́-Píyɛ́ɛ̀ è yɔ̀: Sìmɔ́ɔ̀, Ìsá̰à̰ bidà, a n dɔ́sí-dà é ha̰tá-nà tɔɔpà mɛmpà? Kà Píyɛ́ɛ̀ óò tɛ̰́ná è yɔ̀: À̰à̰ n Teù, a yá̰á̰-ma è yɔ̀ m'a dɔ́sí. K'óò caka è yɔ̀: Ní n'wisí n hɔ̰ɔ̰̀bíiká! 16 K'ó tṵ́m'ɔ́ɔ̀ béka dɛ́ɛ̀ma è yɔ̀: Sìmɔ́ɔ̀, Ìsá̰à̰ bidà, a n dɔ́sí-dà? Kà Píyɛ́ɛ̀ óò tɛ̰́ná è yɔ̀: À̰à̰ n Teù, a yá̰á̰-ma è yɔ̀ m'a dɔ́sí. Kà Sèsíì óò caka è yɔ̀: Ní n'wisí n hɔ̰̀ci! 17 K'óò béka ta̰á̰ma è yɔ̀: Sìmɔ́ɔ̀, Ìsá̰à̰ bidà, a n dɔ́sí-dà? Kà Píyɛ́ɛ̀ yàma é cɔ̰ha n'ɔ̀ɔ̀ de tṵ́m'ɔ̀ɔ̀ békú-ma ta̰á̰ma k'òò dɔ́sí. K'óò tɛ̰́ná è yɔ̀: N Teù, a yá̰á̰-ma niìi wɛǹni, è yá̰á̰ è yɔ̀ m'a dɔ́sí. K'óò caka è yɔ̀: Ní n'wisí n hɔ̰̀ci! 18 Bemú-dà m'a cakú-ma, a de yòǹ tḭ́ń wɔ̀ni dapàǹn è té cɛ̰́ṵ́wá̰ a cɔ̰́ɔ̰̀di-dà a nawɔ̰̀ǹfa é taá a kpɛ̀i-ká bɛ́ka. Àmá, a kó kpɛ̰́ń tḭ́ń daadí, a kó yoòda-á-ma a nɔ̀hi kà tɔɔ̀o òcɔ̰́ǹ é fà n'àà cɛ̰́ṵ́wá̰, áa tanà a pú kpɛ̀i-ká bɛ́ka. 19 Ò de wɛɛ̀ mɛma, è kpɛ̀i é bɛka Píyɛ́ɛ̀ kó kpíí-pu kṵ́mú kú bookú-dà é wɛkàna Weèdi yèdi. Ye kú dàhàka, k'ó caka Píyɛ́ɛ̀ è yɔ̀: N tṵṵ̀na! 20 Kà Píyɛ́ɛ̀ é fitá dɛ́há Sèsíì dapàǹn ò de dɔ́sí-ko k'ò tṵ̀n-ní pa dàhàka. Mɛnń-dà de bíkádà o cɔ̰́ɔ̰̀di Sèsíì bɛ́ka pà yon tḭ́ń daadí óò béka è yɔ̀: Ti Teù, woò k'áa yɛda? 21 Píyɛ́ɛ̀ ò dɛ́hà-ma, é béka Sèsíì è yɔ̀: Mɛnǹ mɛnn tá n Teù, baà k'óò tɛ̀ni? 22 K'óò tɛ̰́ná è yɔ̀: Kà n dɔ́sí ó n'fòù háá ká n yó tóní bad'àà dɛ́hà? Fɔ̰́ń, ní nà n tṵ̀n! 23 K'yèe wɛmá é cemá pidá mɛ̀m̀pà de dań-pa Sèsíì cɔhàka, kà pà tonà ye kú dapàǹǹ pú kó kpíí. Sèsíì há̰ de pú hḭ́n: Ò pú kó kpíí. Àmá, ò de yɔ̀: Kà n dɔ́sí ó n'fòù háá ká n yó tóní bad'àà dɛ́hà? 24 Ye dapàǹn mɔ́nń-dà há̰ cakú ye wɛmà, mɛnń-dà mɛ̀ɛ tṵ́mà mà wà̰haà. T'aá yá̰á̰-ma è yɔ̀ ò cakú-sa yòǹ bemú-dà. 25 Sèsíì de tṵ́mà pa̰à̰-á̰-ma niìi tɔɔ̀sa dɔ́ɔ́di. Kà pà de k'éè wà̰hà yècɔ̰́ yècɔ̰́, n maàhaà fòùkù wɛnnì de bá nɛɛ́ é toó ye pɔ̀kàhi.