Obolo


/1 Ina me lek na, me inigban; ini iko na inyi ibot ejit kinyi ikup me ugwem.
Okaan-ene Jisos onenito urok inyi ema ibe, Ene ge oninana isi iwop mfut me
uko kan.
Mgbo ikigwo mfut cha ifiaak, usini ororon me eden oniin.
Ebi ene ejajak me ukot iraka, ebi ke ofut enenitok otutuuk imeen isana.
Usini mfut cha ororon me ijon ewuuk.
Mgbo itibibe isibi, ikwakwaan isana mije kpunu mun me irak ijon ya.
Usini mfut ororon me ijon ere ukpak okupbe.
Ukpak melek mfut cha egbagbaan itibi isibi.
Ukpak cha otitibi ikana ichit nsek otu mfut cha.
Ikachieek ibe itibi ijaan, me ito ata mfut.
Ire, usini mfut cha ororon me ata ijon, me itibi isibi, me ito ogbogbo mfut
owawa, efit mgbo, igak echi esabe iwop.
Itutumu ikeyi isana, inenibe ema, Ibot urok ya ire ikeyi: Mfut ya ire iko
Awaji.
Echi ororon me eden oniin ire ebi inono iko ya, ire, Yok onunu initeen iko ya
isana me ejit kiban, inyi ema ekakot ichieek, me iboko unyana.
Mfut echi ororon me ijon ewuuk ire ebi iboboko iko ya itap me unwoon mgbo ema
enobe.
Ire, iko ya ikatibi ugwun-ijon me emen kiban.
Ema echieek me lek iko ya sontiik mgbo.
Ire, mgbo ntomkpo onube, ema ewawaka iron.
Mfut echi ororon me ijon ukpak ikeke inyi ebi inono iko ya, me iboko itap.
Ire, ike mgbo okije, uyorolek linyon, me ulok inu uboon, me ubelejit eyi
linyon onenikana ichit iko ya, me iro inyi mfut kan ikakiput ikan, me irene
kubok ge.
Ire, mfut echi ororon me ata ijon ikeke inyi ebi inono iko ya, me iboko itap
me ata ejit, me itet ikaan, me igban uton me lek, me ikat ejit ikeke inye
mege ire mgbo itobe mfut.
Okaan-ene Jisos onenitumu inyi ema ibe, Me atiko, nkitumu inyi enyi ibe, ene
geelek onono iko na, me ichieek me lek ogwu oraria emi inu, ene ya ikaan
ugwem ikakaange itata.
Kpebetip si omo oyerebet geege.
Ire, omo isaba inana me mkpa inin me ugwem.

/2 Isiki lek kinyi me isi Awaji, me iboko iko kan eyi itapbe enyi me emen
ejit.
Mije, iko ya obokot inyana enyi isibi.