1

1 Me ibebene, sabum enirom linyọn̄ Ikọ ya òwa. Ikọ ya melek Awaji ekup. Ikọ ya me lek kan̄ ìre Awaji. 2 Ikọ ya melek Awaji ekup bene me ibebene. 3 Sa me ubọk kan̄ ke Awaji orom otutuuk inu geelek eyi îrombe. Kpunu inu geege erombe eyi ikanan̄age me ubọk kan̄. 4 Îre me emen Ikọ ya ke ugwem okup. Ugwem keya ore inu òkinyi ebilene utoon̄. 5 Utoon̄ ya onenitoon̄ me emen udun, ire, udun ìkakọt ìniin̄ utoon̄ ya. 6 Awaji îria ogwu ikwaan̄ ge, ekigwen Jọn, inu, 7 ibe inikeke ata-ikọ inyi utoon̄ ya, inyi otutuuk ene esa me lek kan̄ echieek me lek utoon̄ ya. 8 Ìkare Jọn me lek kan̄ ore utoon̄ ya. Ire, ọmọ ìnu inenisa ebi ene ijeen̄ utoon̄ ya sa me lek ikọ kan̄. 9 Atata utoon̄ eyi òkinyi ene geelek utoon̄, ore ogwu òkinu me linyọn̄. 10 Ikọ ya înu me linyọn̄. Ire, ebi linyọn̄ kpekọt iriọọn̄ ogwu ọmọ orebe, ubọk geelek îrebe ibe ke nan̄a me ubọk kan̄ ke erom linyọn̄. 11 Ọmọ ìnu me lek ebi kan̄, ire, ebi kan̄ kpebọkọ ọmọ itap. 12 Ire, ebi geelek ìbọbọkọ ọmọ itap, mè ichieek me lek kan̄, ebiba ke înyi unye, inyi ekana bọn Awaji. 13 Ema kpere bọn Awaji inan̄a me mman eyi ebilene. Kpere si bọn igọọk me nkeek mè ulọk eyi olom mè nwa. Ire, Awaji me lek kan̄ ore Nte kiban̄. 14 Ikọ ya onenikana ebilene, mè ijot me nsan mè atikọ, mè iniluk me etete kiji sọnja mgbọ. Eji emumun̄ umin kan̄ mè uja kan̄ eyi ọmọ okaan̄be inan̄a me ubọk Nte kan̄, (kubọk ọkpọkpọ Gwun̄ ge ogwu Ute okaan̄be). 15 Jọn onenikitumu inu òfolek Ikọ ya ikana, mè ikilook ebi ene ibe, “Ogwugwu ore ene ya ogwu nkitumu ikọ ibak ibe ke ogwu òbonu me udun̄ n̄a îmin igak emi enenen, mije, ọmọ ìdadasi ikup sabum eniman emi.” 16 Inan̄a me lek ojot ojot nsan eyi Ikọ ya okaan̄be, eji otutuuk mîbọkọ ugbana owuwa mgbọ. 17 Awaji ìnyi ebilene Ikan inan̄a me ubọk kè Mosis, ire, nsan mè atikọ ìje me ubọk kè Jisọs Karais. 18 Kpunu ene geege òrarak imun̄ Awaji. Ire, ọkpọkpọ Gwun̄ ge yi ogwu òrere Awaji, ogwu òkup me agba lek ogwu Ute, ọmọ onirọ inyi ebilene eriọọn̄ ogwu Awaji orebe. 19 Me ike mgbọ ya, ebi ibot ebi Ju ìkup me Jeruselem eneniria usini ebi ngwugwa mè ebi otoko kè Libai ibe esi edo Jọn ibe mè ogwugwu ìre ekene ye? 20 Mgbọ ife cha enube, Jọn ìkanwunween̄ otu. Ìkpọkpọ itumu inyi ema ibe ke ìkare ọmọ ore Karais ya, (òrere ogwu Awaji otoon̄be ubọk me ibot ya.) 21 Ife cha enenido ọmọ ibe, “Owu ìre ekene-ni? Ìre owu ìre Ilaija?” Jọn ofọfọọk ibe, “Iin̄-iin̄, emi ǹkare Ilaija.” Ema eyayaka ido ọmọ ibe, “Ìre owu ore ogwu Nriran ya ogwu ekikpọ chieen̄ inunu kan̄?” Jọn ofọfọọk ema ibe, “Iin̄-iin̄, emi ǹkare ogwu Nriran ya.” 22 Ife cha enenido Jọn ibe, “Ìre owu ìre ekene ni? Tumu nyi eji, inyi eji ekaan̄ ifọọk eji mêsabe ijet ebi ìraria eji inu me lek kwun̄. Keke ke okaan̄ itutumu òfo me lek ogwu owu orebe?” 23 Jọn onenisa ikọ Asaya ogwu nriran otumube me ukot ikaan̄ ifọọk ema ibe, “Emi nre ida ene ge ya òkitaan̄ ukpo me emen èwê ibe, ‘Ìrọ inyi oniin̄ Okumugwem ikeke itat.’ ” 24 Usini me lek ebi eriabe inu cha, ìrere ebi Farisi enenido Jọn ibe, 25 “Ìre owu òjeje ikigwook ene mun̄, ire owu òkare ogwu Awaji otoon̄be ubọk me ibot ya, òkare Ilaija, òkarere si ogwu Nriran ya?” 26 Jọn ofọfọọk ema ibe, “Emi me lek n̄a ǹkisa mun̄ ikike igwook ene mun̄. Ire, îkaan̄ enerieen̄ ge òkup me etete kinyi, ogwu enyi ekariọọn̄ge. 27 Ene ya ore ogwu òbonu me udun̄ n̄a. Emi me lek n̄a ǹkagbe ogwu òbotọn̄ọ olik ikpukot ene ya.” 28 Jọn ìkup me Betani, me usaba agan̄ Jọdan ikigwook ebi ene mun̄ mgbọ ife cha enube inikido ọmọ ikọ cha. 29 Me òfit iwele kan̄, Jọn omumun̄ Jisọs okije inu, mè ibe, “Ìkpọ Gwun̄ Arọọn̄ Awaji ogwu òkiben nrọ-nlọ ebi linyọn̄ isan̄a! 30 Ogwugwu ore ogwu nkitumu ikọ ibak ibe ke ogwu òbonu me udun̄ n̄a îmin igak emi enenen, mije, ene ya ìdadasi ikup sabum eniman emi. 31 Sabum mgbọ keyi, emi me lek n̄a ǹkariọọn̄ ọmọ. Ire, emi ǹnu inikisa mun̄ ikike igwook ene mun̄, inyi ebi Ijeren esa me ikeya eriọọn̄ ogwu ene yi orebe.” 32 Jọn onenikikpa ibe, “Emi mmun̄ ike Ekwukwu Awaji onan̄abe me inyọn̄ iwulu kubọk ekerekwukwu inisọọk me lek ogwu enerieen̄ ya. 33 Emi kpamariọọn̄ ogwu ene ya orebe, ire ìkare ogwu òraria emi inu ibe emi ǹnensa mun̄ ikike ǹgwook ene mun̄ otumube inyi emi ibe, ene geelek mmun̄be Ekwukwu Awaji onan̄abe me inyọn̄ iwulu inisọọk me lek, ke ene ya ore ogwu òbonisa Ekwukwu Mbuban igwook ene mun̄. 34 Mgbọ keyi, emi nra isa chieen̄ n̄a imun̄, mè ikeke ata-ikọ ibe ke ogwugwu ore Gwun̄ Awaji.” 35 Me òfit-iwele kan̄, Jọn okpọkpọk isi ere ya, ọmọ mè ebi udun̄ kan̄ ene iba. 36 Mgbọ îmun̄be Jisọs okije iraka, itutumu ibe, “Ìkpọ, Gwun̄ Arọọn̄ Awaji ire ogwu!” 37 Mgbọ ebi udun̄ kan̄ iba cha enọbe ikọ ya Jọn otumube, ema enanan̄a ije igọọk Jisọs. 38 Jisọs oneniraan̄ chieen̄ ikpọ udun̄, mè imun̄ ebirieen̄ iba cha ekigọọk ọmọ, mè ido ema ibe, “Ìre keke ke enyi ekiweek?” Ema eneniyaka ido ọmọ ibe, “Rabai (eyi òsisibi Ogwu Ijejeen̄), ìre owu òkiluk me ere owa?” 39 Jisọs ofọfọọk ema ibe “Ìna ke enyi mêmun̄.” Mgbọ ya, ofuk mgbọ îraka ini eyi agan̄ ikakwun̄. Ema enenigọọk ọmọ ije, mè isi imun̄ ere îlukbe, mè igọọk ọmọ ikup ifit egwe usen ya. 40 Ene ge me lek ebi ene iba cha ìnọnọ ikọ Jọn otumube, mè inan̄a igọọk Jisọs ìre Anduru, ngwan̄ kè Saimọn Pita. 41 Anduru onenidasi isi iweek Saimọn ogwu ngwan̄, mè itumu inyi ibe, “Eji mîra imun̄ ogwu Mesaya (eyi òsisibi ogwu Awaji otoon̄be ubọk me ibot) ya.” 42 Inenisa Saimọn ogwu ngwan̄ ijet Jisọs. Jisọs okpọkpọ Saimọn sìì, mè itumu inyi ọmọ ibe, “Owu ìre Saimọn, gwun̄ kè Jọn. Ire, bene me mgbọ keyi, mêkigwen owu Kefas (eyi òsisibi Pita).” 43 Me òfit-iwele kan̄, Jisọs onenisi agan̄ Galili, mè imun̄ Filip, mè igwen ibe, “Na, nagọọk emi.” 44 Filip ìre ogwu Betisaida, ama ebi Anduru mè Pita. 45 Filip omumun̄ Natanien, mè ikpa inyi ibe, “Eji mîra imun̄ ene ya ogwu Mosis ogebe inu òfolek me emen ikpa Ikan, ogwu otutuuk ebi nriran egebe si inu òfolek. Ene ya ìre Jisọs ogwu Najeret, gwun̄ kè Josefu.” 46 Natanien ododo Filip ibe, “Òbe ìre Najeret? Ìre ata inu ge môkọt inan̄a me Najeret isibi?” Filip ofọfọọk ibe, “Na, nakpọ!” 47 Mgbọ Jisọs omun̄be Natanien okije inu, itutumu ibe, “Ene yi ìre atalek ogwu Ijeren, ogwu kpunube ofiaan̄ geege me emen.” 48 Natanien onọnọ, mè ido Jisọs ibe, “Òjeje iriọọn̄ emi?” Jisọs ofọfọọk ibe, “Mmun̄ owu mgbọ okupbe me irak uti figi ya, sabum Filip onigwen owu.” 49 Natanien obebe ọmọ, “Ogwu Ijejeen̄, owu ore Gwun̄ Awaji ya me atikọ! Owu ore Ogwu Ubọọn̄ ebi Ijeren!” 50 Jisọs onenibe ọmọ, “Ìre mije ntumube ibe ke mmun̄ owu me irak uti figi ya ke ochieek? Owu mômun̄ inu òmimin igak ikeya. 51 Me atikọ, ǹkitumu inyi enyi ibe ke enyi mêmun̄ emen inyọn̄ ochilibe ibook, mè imun̄ ebi osat Awaji ekinene, mè ikikwala isibi me inyọn̄ Gwun̄ Ebilene.”

2

1 Mgbọ egwe iba orakabe, enenito ijọk ido nwa me ama Kena eyi òkup me agan̄ Galili. Nga kè Jisọs îgọọk isi ere ya. 2 Mîgwen si Jisọs mè ebi udun̄ kan̄ ibe egọọk enu ijọk ya. 3 Mgbọ miin̄ ogakbe ene ita me ere ijọk ya, nga kè Jisọs onenitumu inyi Jisọs ibe ke ebi ichen cha kpeyaka ikaan̄ miin̄ ebenwọ. 4 Jisọs obebe ogwu uga, “Ogwu enenwaan̄, ìre eyi owa ogbaan̄ owu melek n̄a me lek? Juuk emi tele ke mgbọ n̄a ìkakem-nu.” 5 Ogwu uga otutumu inyi ebi ìkisi ikwaan̄ me ere ya ibe, “Inu geelek îtumube ibe enyi erọ, ìrọ.” 6 Îkaan̄ ugọn̄ ewuuk gweregwen òkup me ere ya, echi ekisa itap mun̄ igwọk lek igọọk me lek ọrọmijọn̄ ebi Ju. Usini me etete ugọn̄ cha îkinin̄ akọp iko mun̄ jeeta, usini okinin̄ efit iko mun̄ mè akọp iba. 7 Jisọs onenitumu inyi ebi ikwaan̄ cha ibe, “Ìtap mudim ìjot ugọn̄ chi.” Ema etatap mudim ijot otu otutuuk ugọn̄ cha. (Mudim ya okakana miin̄, ire, ene geege ìkariọọn̄.) 8 Jisọs onenibe ema, “Ìchibi mudim me ugọn̄ cha ìsa ìjet ogwu ibot ijọk ya.” Ema echichibi mudim ya isa ijet ene ya. 9 Ogwu ibot ijọk ya obọbọkọ mudim ya erọbe mè ikana miin̄ ituun̄ igban̄. Ìkariọọn̄ ere miin̄ ya onan̄abe inu. Ire, ebi ikwaan̄ cha ebi ìchichibi mudim ya mîriọọn̄ ere înan̄abe. Ogwu ibot ijọk ya onenigwen ogwu òdo nwa ya ida ibọkọ, 10 mè itumu inyi ibe, “Otutuuk ene ekidasi isan̄a ata miin̄ isibi inyi ebi ene enwọ. Isinwọ miin̄ iwa enenen, mîra inisan̄a echi ikanwọnge isibi. Ire, eyi kwun̄, òyaka ìnitet ata miin̄ ikaan̄ mege inire mgbọ keyi.” 11 Inu ukechieen̄ keyi, eyi Jisọs orọbe me Kena eyi òkup me Galili, ore adasi inu ukechieen̄ îrọbe. Ebi ene esasa me lek inu yi iriọọn̄ umin kan̄ mè uja kan̄. Ebi udun̄ kan̄ echechieek me lek kan̄. 12 Mgbọ ijọk ya otabe, Jisọs mè ogwu uga mè ebi ngwan̄ kan̄ ebirieen̄ mè ebi udun̄ kan̄ enanan̄a ifo Kapanọm isi ikup sọntiik usen inen mè inen. 13 Mgbọ ijọk Iraraka ogbetbe, Jisọs onanan̄a isi Jeruselem. 14 Mgbọ îjebe isi Uwu Mbuban me Jeruselem, imumun̄ ebi ene ekinyam erie mbuuk, mè arọọn̄, mè ekerekwukwu, mè imun̄ si usini ene ekweekbe me lek owuwa ikasi ikinwene ikpoko. 15 Imọmọnọ olik isa irọ njijan̄, mè isa ilap ema otutuuk melek arọọn̄ kiban̄, mè erie mbuuk kiban̄ isibi, mè iyiyala ikpoko ebi ìkinwene ikpoko, mè ibene otutuuk ikasi kiban̄ itọp ikana ichit, 16 mè itumu inyi ebi ìkinyam ekerekwukwu ibe, “Ìgwat lek ìkpulu otutuuk unọn kinyi chi ìsibi me ere yi! Ikayaka ìsa uwu Nte n̄a ìrọ oyet ewe!” 17 Mgbọ ebi udun̄ kan̄ emun̄be inu yi, ema enenikeek ibe ke mîge me Ikpa Mbuban ibe, “Ulọk nkaan̄be me lek Uwu kwun̄ ìkiyok emi me ejit kubọk ukan̄.” 18 Ebi ibot ebi Ju enenido Jisọs ibe, “Ìre kpasi inu ukechieen̄ ke owu môkọt irọ isa ijeen̄ eji ibe ke owu okaan̄ unye isasa ikirọ otutuuk inu chi?” 19 Jisọs ofọfọọk ema ibe, “Ìgbugbọ Uwu Mbuban yi ìto me ijọn̄. Emi mâsa egwe ita gaalek iyaka inama ibene ikeke.” 20 Ebi Ju cha efọfọọk ọmọ ibe, “Ìre uwu yi esabe akọp acha ini mè gweregwen inama ke obe ke owu môsa usen ita gaalek inama isan̄a?” 21 Ire, Uwu Mbuban eyi Jisọs okitumu ikọ ya ibak ìre akpalek kan̄. 22 Mgbọ Jisọs okwube, mè ijomo me mkpa ke ebi udun̄ kan̄ enikeek ikọ ya îtumube. Mgbọ ya si ke ema enichieek inu egebe me emen Ikpa Mbuban, mè ichieek si otutuuk ikọ Jisọs otumube inyi ema. 23 Me ike mgbọ ijọk ya Jisọs okupbe me Jeruselem, owuwa ene emumun̄ owuwa uyeke uyeke inu îkirọ, mè itoon̄ ejit me lek kan̄. 24 Ire, Jisọs me lek kan̄ ìkatoon̄ ejit me lek kiban̄, mije, îriọọn̄ inu òkup ebilene me ejit. 25 Ìkakup me uyọt ibe ene geege inikpa inu ebilene erebe inyi ọmọ, mije, ọmọ me lek kan̄ îriọọn̄ inu geelek òkup ebilene me ejit isan̄a kpai.

3

1 Îkaan̄ ogwu enerieen̄ ge, ogwu Farisi, ekigwen Nikodimọs. Ọmọ ìre ogwu Oru ebi Ju. 2 Usen ge, ogwu enerieen̄ yi osisi lek kè Jisọs me eririeen̄, mè itumu inyi ibe, “Ogwu Ijejeen̄, eji mîriọọn̄ ibe ke owu ìre ogwu ijejeen̄ ogwu Awaji oriabe inu, mije, kpunu ene geege òbokọt ikirọ inu ukechieen̄ chi owu okirọ, ire Awaji ìkakeke ìnyi ene ya.” 3 Jisọs onenifọọk ọmọ ibe, “Ǹkitumu atikọ inyi owu, kpunu ene geege òbokọt imun̄ mkpulu eyi Awaji îtata mè ekpọkpọk ene ya iman.” 4 Nikodimọs onenido Jisọs ibe, “Ìre ebejeje ikpọk ene iman me mgbọ ene okanbe isan̄a? Me atikọ, ene ìkpokọt ikpọk inin̄ owot ogwu uga, mè ogwu uga ikpọk ọmọ iman òso mgbọ iba.” 5 Jisọs oyayaka ifọọk ọmọ ibe, “Ǹkitumu atikọ inyi owu ibe, ire kpekpọk ene iman inan̄a me mun̄ mè Ekwukwu Mbuban, ene ya ìkpokọt inin̄ mkpulu eyi Awaji. 6 Kpọ, ogwu emanbe me anam akpalek ìkaan̄ anam akpalek. Ogwu emanbe me Ekwukwu Mbuban îkaan̄ Ekwukwu Mbuban me emen kan̄. 7 Eya orọ, kachieek ibe ike owu chieen̄ ibe ke ǹtumu inyi owu ibe ke mêkpọkpọk enyi iman. 8 Efet isikiwut, ìkiwut ifo agan̄ geelek òneneme ọmọ. Owu môkọt inọ ida kan̄, ire, owu òkporiọọn̄ ere înan̄abe inu, mè ere îkiwut ifo. Ikeya si ke îkup me lek ebi emanbe me Ekwukwu Mbuban.” 9 Nikodimọs oyayaka ido ọmọ ibe, “Ìre inu yi ìbojeje irọ?” 10 Jisọs onenibe ọmọ, “Ke owu ìre ogwu ijejeen̄ me etete ebi Ijeren? Ìre keke orọ òkakọt ìgobo inu chi ìtet? 11 Me atikọ, ǹkitumu inyi owu ibe ke eji ekitumu ikọ òfolek inu eji eriọọn̄be inyi enyi, mè ikikpa si inu eji esabe chieen̄ kiji imun̄ ijeen̄ enyi. Ire, enyi kpechieek ikọ kiji geege. 12 Mgbọ ntumube ikọ òfolek inu òkirọ me linyọn̄ keyi inyi enyi, enyi kpekọt ichieek. Ire nnitumu ikọ òfolek emen inyọn̄ inyi enyi, ìre enyi ebejeje ikọt ichieek? 13 Kpunu ene geege òrarak inene ifo emen inyọn̄, ilọ me lek Gwun̄ Ebilene, ogwu ònanan̄a me emen inyọn̄ inu. 14 Ike Mosis obenebe ijijunu, esabe ekwe irom, me otu ọfọkọ ifo inyọn̄ me emen èwê, ikeya si ke mêbene emi Gwun̄ Ebilene, ifo inyọn̄, 15 inyi ene geelek òchechieek me lek n̄a ikaan̄ ugwem ikakaan̄ge itata. 16 “Mije Awaji îmun̄ ebi linyọn̄ me chieen̄ enenen, mè inyi ọkpọkpọ Gwun̄ ge kan̄, inyi ene geelek òchechieek me lek Gwun̄ ya ikachep, ire, ikaan̄ ugwem ikakaan̄ge itata. 17 Awaji ìkaria Gwun̄ kan̄ ìnu me linyọn̄ ibe initip ebi linyọn̄ oyerebet. Ire, ìria inu, inyi ọmọ inan̄a me lek Gwun̄ ya inyan̄a ebi linyọn̄. 18 Ene geelek òchechieek me lek Gwun̄ ya, kpetip ene ya oyerebet. Ire, ene geelek ikachieekge me lek Gwun̄ ya, mîwuuk lek itip ene ya oyerebet isan̄a, mije îjitbe ichechieek me lek ọkpọkpọ Gwun̄ ge Awaji oriabe inu. 19 Inu esabe ifieek oyerebet ya ìre, ke Utoon̄ înu me linyọn̄, ire, ebilene ema udun igak utoon̄, mije, otutuuk irọrọ kiban̄ ìre ijo ijo. 20 Ene geelek òkirọ ijo inu ìkichacha utoon̄ ya. Ìkakichieek inunu me lek utoon̄ ya, mije, ìkitet ukpook ibe ke utoon̄ ya mônikpọk mbum ijo irọrọ kan̄. 21 Ire, ogwu geelek òkirọ atikọ îkibele ejit inunu me lek utoon̄ ya, inyi ebi ene esa me lek utoon̄ ya ekemọọn̄ ibe ke inu geelek ọmọ orọbe ìre inu Awaji okiweek.” 22 Mgbọ Jisọs otumube ikọ isan̄a melek kè Nikodimọs, ọmọ mè ebi udun̄ kan̄ eneninan̄a me Jeruselem ije isi agan̄ Judia, mè ikup me ere ya sọnja mgbọ ikigwook ene mun̄. 23 Me ike mgbọ ya, Jọn ìkup me ama ekigwen Ayenọn me agba lek ama ge ekigwen Salim ikigwook ene mun̄, mije, mun̄ îwa me ere ya. Ebi ene si ekpọkpọ ikisibi inu iniweek igwogwook mun̄. 24 (Inu yi îrọ iraka sabum enitet Jọn itap me mkpọn.) 25 Usini ebi udun̄ kè Jọn ògwook mun̄ enenibene ikigọọk ogwu Ju ge iwut ifan̄a me lek ọrọmijọn̄ igwọgwọk lek eyi ebi Ju ekirọ. 26 Ebi udun̄ kè Jọn cha enenisa ikọ ya inu me lek kè Jọn, mè initumu inyi ibe, “Ogwu Ijejeen̄, ene ya ogwu ochichinibe me usaba okwaan̄ Jọdan, mè ikpa inu òfolek kan̄ inyi ebi ene me ere ya, ene ya òkigwook si ebi ene mun̄. Otutuuk ene mêkigbuku igọọk.” 27 Jọn ofọfọọk ema ibe, “Kpunu inu geege ene geege obokọt ikaan̄, îtata mè ìre Awaji onyi ene ya. 28 Enyi me lek kinyi mînọ mgbọ nkitumu ibe ke emi ǹkare Karais ya, ire, ke emi ìre ogwu Awaji oriabe inu ibe idasi inu ininen̄e oniin̄ isun̄ iban Karais ya. 29 Ìkpọ si, ogwu òdo nwa ore ogwukaan̄ nwa. Unene òkitap ubọk inyi ogwu òdo nwa me mgbọ ijọk ido-nwa ìkigban̄ utọn̄ me lek ida ogwu unene kan̄, òrere ogwu òdo nwa ya. Isinọ ida ogwu unene, unwọọn̄ îra ijot ejit kan̄. Mgbọ keyi, îre òjelek unwọọn̄ ya ke emi nkaan̄. Mgbọ keyi ke unwọọn̄ n̄a ya ojot ikem. 30 Eya orọ, ogwu enerieen̄ ya môkpọkpọ ikimin, mè ikitaan̄ etip, ire, emi m̀bakigegele isiki. 31 “Ogwu ònan̄a me emen inyọn̄ inu obene igak otutuuk ene. Ogwu ònan̄a me linyọn̄ ìre ogwu linyọn̄, mè ikitumu si ikọ kubọk ogwu linyọn̄. Eya orọ, ogwu ònan̄a me emen inyọn̄ inu omin igak otutuuk ene. 32 Ogwu ònan̄a me emen inyọn̄ îkpa inu geelek ọmọ osabe chieen̄ kan̄ imun̄, mè isa utọn̄ kan̄ inọ, inyi ebilene. Ire, kpunu ogwu òchechieek ikọ kan̄. 33 Ire, ene geelek òchechieek ikọ kan̄ îsa me lek ikọ ya irọ inye ibe ke Awaji ìre ogwu atikọ. 34 Mije, ogwu Awaji oriabe inu ìkitumu ikọ Awaji. Ogwugwa si ke Awaji onyi Ekwukwu kan̄ ojot ojot. 35 Awaji Ute îmun̄ ogwu Gwun̄ me chieen̄ enenen, mè ikana otutuuk inu geelek itap ogwu Gwun̄ ya me ubọk isan̄a. 36 Ene geelek òchechieek me lek Gwun̄ ya îkaan̄ ugwem ikakaan̄ge itata, ire, ene geelek òjijit Gwun̄ ya ìkpokaan̄ ugwem ya, mije, unaan̄-ejit Awaji òwa me ibot ene ya.”

4

1 Ebi Farisi eneninọ ibe ke ebi ìkigọọk Jisọs me udun̄ mè ebi ìkisi lek kan̄ ibe igwook ema mun̄ mîwa enenen igak ebi ìkisi lek kè Jọn. 2 Me atikọ, ìkare Jisọs me lek kan̄ okigwook ebi ife cha mun̄, îre ebi udun̄ kan̄ ekigwook ife cha mun̄. 3 Mgbọ Okaan̄-ene Jisọs onọbe ikọ ya ebi ene ekitumu ibak ọmọ, inanan̄a me agan̄ Judia igwu ikom ifo agan̄ Galili. 4 Oniin̄ ema ejebe ìre oniin̄ ekije itibi agan̄ Sameria. 5 Ema enenije ire ama ge me Sameria ekigwen Saika, me agba lek ijọn̄ Jekọp ochebe inyi Josefu ogwu gwun̄. 6 Udọn̄ mun̄ kè Jekọp me ere ya okupbe. Jisọs onenisi isiki ikweek me otu udọn̄ mudim ya, mije, lek kan̄ îwọ enenen ubọk îjebe ujọn̄ọ ije ya. Îre ejit ikarek ke ema eje inire otu udọn̄ mun̄ ya. 7 Ogwu enenwaan̄ Sameria ge ojeje inu me otu mudim ya ibonichibi mun̄. Jisọs obebeek ogwu enenwaan̄ ya ibe, “Soso, che sọnja mudim nyi emi ǹnwọ.” 8 (Me ike mgbọ ya, ebi udun̄ kan̄ mînin̄ emen ama isi ilep inorie.) 9 Ogwu enenwaan̄ ya ofọfọọk ọmọ ibe, “Owu ìre ogwu Ju, emi ìre enenwaan̄ Sameria. Owu òjeje inibeek emi mudim?” (Ìtumu ikọ ya mije ebi Ju mè ebi Sameria kpekigbaan̄ inu irọ.) 10 Jisọs ofọfọọk ogwu enenwaan̄ ya ibe, “Ire owu moriọọn̄ uche Awaji ochebe inyi ebilene, mè iriọọn̄ si ogwu òkibeek owu mudim yi, kè owu òbeek emi mudim eyi òkinyi ene ugwem, mè emi nnyi owu si.” 11 Ogwu enenwaan̄ ya onenibe ọmọ, “Ogwu Nte, owu òkakaan̄ inu geege obosa ichibi mun̄. Udọn̄ mun̄ yi si îdọk enenen. Ìre mun̄ òkinyi ene ugwem yi ìbonan̄a owu me owa? 12 Ìre owu omin igak Jekọp nte kiji ogwu òrọrọkọ udọn̄ mun̄ yi inyi eji, mè ichibi si mudim me emen inwọ, ọmọ mè bọn kan̄, mè arọọn̄ kan̄, mè erie mbuuk kan̄ otutuuk?” 13 Jisọs ofọfọọk ọmọ ibe, “Ebek môkpọk irak ogwu geelek ònwọnwọ mun̄ ònan̄a me emen udọn̄ yi. 14 Ire, mege ire mgbọ ikakaan̄ge itata, ebek ìkpoyaka irak ene geelek ònwọnwọ mun̄ eyi emi nkinyi. Me atikọ, mun̄ mânyibe ene ya môkana ogbuuruk me emen ene ya, eyi mun̄ ugwem okigbuk isibi me emen, mè inyi ene ya ugwem eyi ikakaan̄ge itata.” 15 Ogwu enenwaan̄ ya onenibe ọmọ, “Ogwu Nte, nyi emi mun̄ ya ǹnwọ, inyi ebek ikayaka ìrak emi, mè nkayaka ìkinu ere yi ìnichibi mun̄.” 16 Jisọs obebe ogwu enenwaan̄ ya, “Fo, mè si gwen nlom kwun̄ sa gwu kom na.” 17 Ogwu enenwaan̄ ya otutumu inyi Jisọs ibe ke ọmọ ìkakaan̄ olom. Jisọs obebe ọmọ, “Owu otumu atikọ ibe ke òkakaan̄ olom. 18 Mije, olom go ire echa okaan̄be. Ogwu okibat mgbọ keyi si ìkare nlom kwun̄. Eya orọ, ikọ otumube mgbọ yi ìre atalek atikọ.” 19 Ogwu enenwaan̄ ya otutumu inyi Jisọs ibe, “Ogwu Nte, mgbọ keyi, emi mmun̄ ibe ke owu ìre ogwu nriran. 20 Ebi nte nte kiji ekitọbọ ebum inyi Awaji me inyọn̄ ogoon̄ keyi, ire, enyi ebi Ju eyaka inibe ke ìre Jeruselem ore ere otutuuk ene ebekitọbọ ebum inyi Awaji.” 21 Jisọs onenitumu inyi ogwu enenwaan̄ ya ibe, “Ogwu enenwaan̄, ǹkitumu atikọ inyi owu, mgbọ òkinu mgbọ ebi ene kpebeyaka ikitọbọ ebum inyi Ogwu Nte me inyọn̄ ogoon̄ keyi, mè ìyaka ire me Jeruselem. 22 Enyi ebi Sameria kperiọọn̄ inu enyi ekitọbọ ebum inyi. Ire, eji ebi Ju mîriọọn̄ ogwu eji ekitọbọ ebum inyi, mije, unyan̄a ìbonan̄a me etete kiji ebi Ju ire otutuuk ene lek. 23 Ire, mgbọ òkinu, mgbọ ya si îrere isan̄a, mgbọ ata ebi ìkitọbọ ebum inyi Ogwu Nte, ebekitọbọ ebum inyi ọmọ me ekwukwu mè atikọ. Mije, îre ebi ìkup ikeya ke Ogwu Nte okiweek. 24 Awaji ìre ekwukwu. Eya orọ, ebi ìkitọbọ ebum inyi ọmọ ebekitọbọ ebum inyi ọmọ me ekwukwu mè atikọ.” 25 Ogwu enenwaan̄ ya otutumu inyi Jisọs ibe, “Nriọọn̄ ibe ke ogwu Mesaya (òrere Karais) mônu. Isinu, mônikpa inu geelek iwele inyi eji.” 26 Jisọs otutumu inyi ogwu enenwaan̄ ya ibe, “Emi ogwu òkitumu ikọ melek kwun̄ mgbọ yi, emi nre ene ya.” 27 Mgbọ yaage, ebi udun̄ kan̄ enanan̄a me emen ama ere ema esibe isi ilep inorie ika inu. Îke ema chieen̄ inenimun̄ Jisọs okikpa ikọ melek ogwu enenwaan̄ ya. Ire, kpunu ene geege me etete kiban̄ òkọkọt ido ogwu enenwaan̄ ya ibe, “Òkiweek keke?” Kpunu si ogwu òkọkọt ido Jisọs ibe, “Òjeje ikigọọk ogwu enenwaan̄ ya ikpa ikọ?” 28 Ogwu enenwaan̄ ya otetele ugọn̄ mudim kan̄, mè igwu ikom ilibi inin̄ emen ama, mè isi ikitumu inyi ebi ene ibe, 29 “Ìna, ìnikpọ ogwu òkpakpa otutuuk inu geelek nrọbe me ugwem n̄a inyi emi. Ene yi ìkpolọlọ irere Karais ya!” 30 Ebi ene egbugbuku inan̄a me emen ama ya isibi inikpọ ogwu ene ya. 31 Mgbọ ogwu enenwaan̄ ya onan̄abe inin̄ emen ama ya, ebi udun̄ kè Jisọs ekekiriaak Jisọs ibe, “Ogwu Ijejeen̄, soso, narie inorie ma!” 32 Jisọs ofọfọọk ema ibe, “Nkaan̄ inorie mbarie eyi enyi kperiọọn̄ inu geege òfolek.” 33 Ebi udun̄ kan̄ ekekidido lek kiban̄ ibe mè ìre îkaan̄ ogwu osasa inorie ijet ogwugwu me udun̄ kiban̄ mọnọ? 34 Jisọs onenitumu inyi ema ibe, “Inorie n̄a ìre irọrọ nkeek Awaji ogwu òraria emi inu, mè irọrọ ikwaan̄ înyibe emi isan̄a. 35 Enyi ekito urọk ibe, ire mfut ìkaso onyan̄ ini, kpekirọkọ. Ire, ǹkitumu inyi enyi ibe, ìbene chieen̄ ìkpọ emen uko. Inu geelek îren̄e isan̄a, mè ikikup ikpọ irọrọkọ. 36 Mgbọ yi, ogwu òkirọkọ inu me uko òkibọkọ mkpukpe kan̄, mè ikirọkọ mfut eyi ugwem ikakaan̄ge itata. Sa me ikeyi, ogwu òwowop mè ogwu òrọrọkọ mêgbaan̄ ibele ejit. 37 Ikeyi ke urọk eyi ekito ibe ke ene ge owop, sa ofifi ene orọkọ, osa ìrọ iso. 38 Mije, ǹria enyi ibe enyi esi erọkọ mfut me uko eyi enyi kpesi ikwaan̄ geege me emen. Îre ebi ofifi ife esi otutuuk unye ikwaan̄ cha, enyi enenisi irọkọ mfut eyi unye ikwaan̄ ife cha esibe.” 39 Owuwa ebi Sameria ìnan̄a me ama ya echechieek me lek kè Jisọs, mije ata-ikọ ogwu enenwaan̄ ya otumube ibe ke Jisọs îkpa otutuuk inu geelek ọmọ orọbe me ugwem kan̄ inyi ọmọ. 40 Mgbọ ebi Sameria cha enube inimun̄ Jisọs, ema ebebeek ọmọ ibe igọọk ema ikup. Jisọs ogọgọọk ema ikup egwe iba. 41 Mgbọ ebi ama ya enọbe ikọ Jisọs okitumu, owuwa kiban̄ echechieek si me lek kan̄ igbaalek ebi ìchechieek me adasi mgbọ ya. 42 Ema ekekitumu inyi ogwu enenwaan̄ ya ibe, “Ìkayaka ìre mije ikọ owu otumube inyi eji gaalek ke eji echieek me lek kè Jisọs. Mgbọ yi, eji mîsa utọn̄ kiji gaalek inọ ikọ îtumube, mè iriọọn̄ ibe, me atikọ, ke ene yi ore Ogwu Unyan̄a ya òboninyan̄a otutuuk ebi linyọn̄.” 43 Mgbọ egwe iba cha orakabe, Jisọs onanan̄a me Saika ya ije isi agan̄ Galili. 44 (Jisọs me lek kan̄ îra iwuuk lek itumu ibe ke ogwu nriran ìkakikaan̄ umin me ama kan̄.) 45 Mgbọ Jisọs orebe Galili, ebi agan̄ ya ebọbọkọ ọmọ itap, mije, mgbọ ema esibe ijọk Iraraka me Jeruselem, ema mîgọọk imun̄ si otutuuk inu îrọbe me ere ya. 46 Jisọs oyayaka ikpọk ije isi Kena, me Galili, ama ere îrọbe inyi mudim ikana miin̄. Ogwu ibot ikwaan̄ ge òwa si me ama ya ogwu lek ogwu gwun̄ ikanyege. Gwun̄ ya ìkup me Kapanọm. 47 Mgbọ ogwu ibot ikwaan̄ ya onọbe ibe ke Jisọs înan̄a me Judia inu me Galili, ineninan̄a ije isi lek kan̄, mè ibeek ibe inu inigwa gwun̄ kan̄ ya òfafiak ire lek îbokwukwu. 48 Jisọs otutumu inyi ọmọ ibe, “Enyi kpekichieek me lek n̄a, îtata enyi emumun̄ uyeke uyeke inu ijejeen̄, mè inu ukechieen̄.” 49 Ogwu ibot ikwaan̄ ya obebe ọmọ, “Ogwu Nte, nye lek na mgbọ keyi gwun̄ ya ikatọbọge nu.” 50 Jisọs otutumu inyi ogwu ibot ikwaan̄ ya ibe, “Je fo, ke gwun̄ kwun̄ môgat ugwem.” Ogwu enerieen̄ ya ochechieek ikọ ya Jisọs otumube, mè igwu ikom ifo. 51 Mgbọ îkije me oniin̄, ebi usun̄ kan̄ elilibi inikweek ọmọ, mè ikpa inyi ibe ke lek gwun̄ kan̄ înye; ke ọmọ me ugwem. 52 Ogwu enerieen̄ ya ododo ibe mè ìre ike mgbọ owa ke lek gwun̄ ya obene inye? Ema efọfọọk ibe ke ìre mgbọ òfuk-mgbọ osulube ge eyi ejit ikarek iyakwut òraraka ke ukan̄ òbabak gwun̄ ya me lek otele. 53 Nte gwun̄ ya onenisi ikeek ibe ke ìre ike mgbọ ya ke Jisọs otumu inyi ọmọ ibe ke gwun̄ kan̄ môgat ugwem. Mije keya, ọmọ mè otutuuk ebi uwu kan̄ echechieek me lek kè Jisọs. 54 Eyi ore òso uyeke inu iba eyi Jisọs orọbe. Ìrọ inu yi mgbọ înan̄abe me Judia ika inu me Galili.

5

1 Sọnja mgbọ iraraka, Jisọs oneninan̄a me Galili ije isi Jeruselem igọọk isi ijọk mfaka ebi Ju. 2 Me Jeruselem, îkaan̄ udọn̄ mun̄ ge òkukup me agba lek otunchit eyi ekigwen Otunchit Arọọn̄. Ekigwen udọn̄ mun̄ ya Betisaida me usem ebi Iburu. Mîsa ewuuk inama ogwe go ikana udọn̄ mun̄ ya. 3 Owuwa ebi ìkifiak esese chieen̄ orukan̄ mîkinu otu udọn̄ mun̄ ya inililam ikana me emen ogwe cha, bene me ebi ǹnàan̄, mè ebi akọọk, re lek ebi ngọm otutuuk, [ikikup ikpọ mgbọ mun̄ ya môbubukube. 4 Me mgbọ me mgbọ, ogwu osat Okumugwem îkinu inibubuku mun̄ ya. Mgbọ ogwu osat isinibubuku mun̄ ya, ogwu geelek òdadasi inin̄ emen mun̄ ya, Awaji îra igwa orukan̄ geelek òkifiak ene ya isan̄a.] 5 Ene ge me lek ebi ìkup me otu mun̄ ya îkup me ijọn̄ orukan̄ akọp acha ita me jeeta. 6 Mgbọ Jisọs omun̄be ogwu enerieen̄ ya olaakbe me ere ya, mè inọ ibe ke orukan̄ ya îfiak ọmọ ijọn̄ọ mgbọ, inenido ene ya ibe, “Ìre oweek ibe lek kwun̄ inye?” 7 Ogwu enerieen̄ ya ofọfọọk Jisọs ibe, “Ogwu Nte, ǹkakaan̄ ene geege òtatap ubọk inyi emi, mè ǹkọt ǹnin̄ emen mun̄ yi mgbọ geelek ogwu osat Okumugwem obubukube mun̄. Ìkire sabum mbare emen mun̄ ya, ofifi ene îra idasi inin̄ me isi n̄a.” 8 Jisọs onenibe ọmọ, “Nan̄a keke, kat ufo kwun̄, mè je fo.” 9 Mgbọ yaage, lek ogwu orukan̄ ya onyenye, inanan̄a ikeke, mè ikat ufo kan̄, mè ije ifo. Inu ya ìrọ me Usen Mbuban. 10 Eya orọ, ebi ibot ebi Ju etutumu inyi ogwu enerieen̄ ya ibe, “Chereyi ìre Usen Mbuban, Ikan îgban owu ibeben ufo kwun̄ me Usen Mbuban.” 11 Ogwu enerieen̄ ya ofọfọọk ema ibe ke ogwu ògwagwa ọmọ obe mè ọmọ ikat ufo kan̄, mè ije ifo. 12 Ife cha enenido ọmọ ibe, “Ìre ekene ire ene ya òtutumu ibe owu òkat ufo kwun̄, mè òben òsa òje òfo?” 13 Ogwu egwabe ya ìkakọt ìriọọn̄ ogwu ògwagwa ọmọ, mije, Jisọs îkwala inin̄ etete ogbogbo ebi ene me ere ya, mè ilọ ọmọ chieen̄. 14 Ire, sọnja mgbọ iraraka, Jisọs onenisi imun̄ ogwu enerieen̄ ya me oyet egep Uwu Mbuban, mè itumu inyi ọmọ ibe, “Kpọ, lek kwun̄ înye mgbọ keyi. Kayaka ìrọ ijo inu ofifi, inyi inu òfefieek igak ikeya ikarọ owu.” 15 Ogwu enerieen̄ ya onanan̄a me ere Uwu Mbuban ya isibi, mè isi itumu inyi ebi ibot ebi Ju cha, ibe ke ìre Jisọs ogwa ọmọ. 16 Mije Jisọs orọbe owuwa inu chi me Usen Mbuban, ebi ibot ebi Ju ebebene ikisisaak ọmọ. 17 Jisọs onenitumu inyi ema ibe, “Mege inire cherekeyi, Nte n̄a ìkisisi ikwaan̄ kan̄ mgbọ geelek. Ikeya si, emi m̀bakisisi ikwaan̄ eyi n̄a mgbọ geelek.” 18 Mije ikọ yi Jisọs otumube, ebi Ju erọriọọn̄ itap efuuk igak adasi mgbọ ikiweek ike ebesa itet ọmọ ikpan̄, mije, îchaka ikan Usen Mbuban. Ògagak otutuuk, ìkigwen Awaji Nte kan̄, mè isa me ikeya ibene lek kan̄ isun̄ ikike melek Awaji. 19 Jisọs ofọfọọk ema ibe, “Ǹkitumu atikọ inyi enyi ibe ke Gwun̄ ìkpokọt irọ inu geege me ibot kan̄. Inu îmun̄be ogwu ute okirọ, eya gaalek ke ìborọ, mije, inu geelek Ute okirọ, eya si ke ogwu Gwun̄ okirọ. 20 Mije, Ute îmun̄ ogwu Gwun̄ me chieen̄, mè ijeen̄ ogwu Gwun̄ otutuuk inu îkirọ. Me atikọ, môke enyi chieen̄ imumun̄ ibe ke Ute môjeen̄ ogwu Gwun̄ inu ògagak echichi enyi ekimun̄. 21 Mije, kubọk Ute okijomo ebi ìkwukwu, mè ikinyi ema ugwem, ikeya si ke ogwu Gwun̄ okinyi ene geelek òneneme ọmọ ugwem. 22 Ògak ge, Ute ìkakisibi oyerebet me ibot ene geege. Ire, îkana otutuuk oyerebet geelek itap me ubọk ogwu Gwun̄, 23 inyi otutuuk ene ekenyi ogwu Gwun̄ umin kubọk ekinyi ogwu Ute umin. Ene geelek ikaminge ogwu Gwun̄, ìkamin si ogwu Ute ogwu òraria ogwu Gwun̄ ya inu. 24 “Me atikọ, ǹkitumu inyi enyi ibe, ene geelek ònọnọ ikọ n̄a, mè ichieek me lek ogwu òraria emi inu, ene ya îkaan̄ ugwem ikakaan̄ge itata. Kpebetip si ọmọ oyerebet geege. Ire, ọmọ îsaba inan̄a me mkpa inin̄ me ugwem. 25 Me atikọ, ǹkitumu si inyi enyi ibe ke mgbọ òkinu me isi, mgbọ ya îrere isan̄a, mgbọ ebi ìkwukwu mênọbe ida Gwun̄ Awaji. Ebi geelek ìnọnọ mêgat ugwem. 26 Mije, ike Awaji Ute me lek kan̄ orebe ogbuuruk ere ugwem okinan̄a isibi, ikeya si ke îrọ inyi ogwu Gwun̄ ire si ogbuuruk ere ugwem okinan̄a isibi. 27 Awaji Ute înyi si ogwu Gwun̄ unye ibe ikisibi ene oyerebet me ibot, mije, ogwu Gwun̄ ya ìre Gwun̄ Ebilene. 28 “Ikachieek ibe ikọ chi ike enyi chieen̄, mije, mgbọ òkinu me isi, mgbọ otutuuk ebi ìkwukwu mênọbe ida n̄a, 29 mè inan̄a me udọn̄ ufuun̄ kiban̄ ijomo. Ebi ata irọrọ mêjomo me mkpa inin̄ me ugwem ikakaan̄ge itata. Ire, ebi ijo irọrọ mêjomo me mkpa, mè inibọkọ itip-oyerebet. 30 Me lek n̄a gaalek, emi m̀kpakọt irọ inu geege. Ire, ǹkifieek oyerebet inyi ebi ene ubọk Nte n̄a otumube ibe emi m̀fieek. Ifieek-oyerebet n̄a si ìre unen, mije, ìkare inu òneme emi ke nkirọ. Îre inu ogwu òraria emi inu oweekbe ke nkirọ.” 31 “Ire emi nkeke ata-ikọ inyi lek n̄a, ikọ n̄a ìkpokeke. 32 Ire, îkaan̄ ofifi ene òkekeke ata-ikọ inyi emi. Nriọọn̄ ibe ke ikọ ogwu ene ya otumube me ibot n̄a ìre atikọ. 33 Ene ya ìre Jọn, ogwu enyi eriabe bọn ikwaan̄ kinyi isi lek. Jọn îtumu si ikọ òfolek atikọ ya inyi enyi. 34 Ìkare kubọk ǹkichachiaan̄ ubọk iweek ata-ikọ ebilene. Ire, ǹkitumu ikọ ibak ata-ikọ kè Jọn, inyi enyi esa me lek keya echieek, mè enwọnọ itip-oyerebet Awaji. 35 Mgbọ Jọn okupbe melek kinyi, ìkup kubọk mkpukan̄ òkilomo, mè ikinyi utoon̄. Sọntiik mgbidim mgbọ ya, enyi mîchieek me lek ikọ kan̄, mè ibele ejit me lek utoon̄ înyibe enyi. 36 “Ofifi si, nkaan̄ ata-ikọ ge eyi òlolobo igak ata-ikọ kè Jọn. Ata-ikọ ya ìre ikwaan̄ ukechieen̄ echi Nte n̄a onyibe emi unye ibe emi ǹrọ, echi nkirọ si ifo isi mgbọ yi. Îre ikwaan̄ chi okijeen̄ ibe, me atikọ, ke ìre Nte n̄a oria emi inu. 37 Nte n̄a ogwu òraria emi inu si îkeke ata-ikọ òfolek n̄a inyi enyi. Ire, enyi kperarak inọ ida Nte n̄a, enyi kpemumun̄ si ọmọ isi mè isi. 38 Kpunu si Ikọ kè Nte n̄a me emen kinyi, mije, enyi kpechieek me lek ogwu Gwun̄ ogwu îriabe inu. 39 Enyi ekigwuun̄ chieen̄ ikween̄ inu egebe me Ikpa Mbuban, mije, enyi ekikeek ibe ke enyi mêkaan̄ ugwem ikakaan̄ge itata inan̄a me emen ikọ cha egebe. Me atikọ, ǹkitumu inyi enyi ibe ke otutuuk inu egebe me Ikpa Mbuban ìkitumu ikọ òfolek n̄a. 40 Ire, enyi mîkikween̄ Ikpa Mbuban isan̄a, mè ijit si inunu me lek n̄a inikaan̄ ugwem ikakaan̄ge itata. 41 “Emi ǹkakiweek itọn̄ ebilene. 42 Ire, nriọọn̄ òjelek ife enyi erebe. Nriọọn̄ si ibe ke enyi kpema Awaji me ejit kinyi. 43 Ìkpọ, emi ǹnu me erieen̄ kè Nte n̄a. Ire, enyi ejijit emi. Ire, ire ofifi ene inu me erieen̄ eyi lek kan̄ gaalek, enyi mêbọkọ ene ya itap. 44 Enyi ebejeje ichieek me lek n̄a, ire enyi ikima ibe ebilene eketọn̄ enyi mgbọ geelek, me ere enyi kpekirọ inu geege òborọ inyi Awaji, ogwu ọmọ gaalek orebe Awaji, ikitọn̄ enyi? 45 “Ikakeek ibe ke ìre emi mbafieek enyi ikọ me isi kè Nte n̄a. Îre Ikan kè Mosis ogwu enyi etoon̄be ejit me lek ya obofieek enyi ikọ me isi kè Nte n̄a. 46 Ire ibe enyi mîchieek me lek inu Mosis ogebe, kè enyi echieek si me lek n̄a, mije, îre inu òfo me lek n̄a ke Mosis oge. 47 Ire, ike enyi kpechechieek me lek inu Mosis ogebe, ìre enyi ebejeje inichieek me lek ikọ nkitumu inyi enyi?”

6

1 Mgbọ eya orakabe, Jisọs onenisaba okwaan̄ oyô Galili (eyi ekigwen si okwaan̄ oyô Taiberias). 2 Ogbogbo ebi ene egọgọọk si ọmọ isaba okwaan̄ ya, mije owuwa uyeke inu ema emun̄be Jisọs orọbe mgbọ îgwabe ebi orukan̄. 3 Jisọs onenije inene agba ogoon̄ ge isi isiki ikweek, ọmọ mè ebi udun̄ kan̄. 4 Mgbọ ya îgbet mgbọ ebi Ju ekirọ mfaka ijọk Iraraka. 5 Mgbọ Jisọs onibene chieen̄ imun̄ ogbogbo ebi ene cha ekigbuku inu me lek kan̄, inenigwen Filip ido ibe, “Ìre owa ke eji ebekọt ilep inorie òboso ife chi?” 6 Jisọs ìdo ikọ ya isasa itọ Filip ikpọ, mije, ọmọ me lek kan̄ îwuuk lek irọriọọn̄ inu îborọ. 7 Filip onenifọọk ibe, “Ìrere esa efit dinari iba (òrere ikpoko onyan̄ ogwu ikwaan̄ ge oborie onyan̄ jeeta) ilep fituru, ìkposo eyi ife chi geelek ebesasa ilaka ubọk me otu.” 8 Ofifi ene me lek ebi udun̄ kan̄, òrere Anduru, ngwan̄ kè Saimọn Pita, onenitumu inyi Jisọs ibe, 9 “Îkaan̄ gwun̄ enerieen̄ ge me ere yi òkakaan̄ asabọn owut fituru go esabe akpa balì irọ, mè asabọn ufuk irin̄ iba. Eya ìboje ire owa me lek ife chi ìwawa ikeyi?” 10 Jisọs onenibe ema esi etumu enyi ife cha ibe esiki ekweek. Ife cha esisiki ikweek me inyọn̄ mbubet òjojot me ere ya. Me etete ife cha, ebirieen̄ gaalek ìre obop ene go. 11 Jisọs onenibọkọ fituru cha, mè inyi Awaji itọn̄, mè isa inyi ibe esi eche enyi ife cha ìsisiki ikweek me ere ya, mè enyi ene geelek ike îweekbe. Ubọk yaage ge si ke îbọkọ ufuk irin̄ iba cha si, mè inyi Awaji itọn̄, mè isa inyi ibe esi eche enyi ife cha. 12 Mgbọ otutuuk kiban̄ eriebe inorie ya ijot, Jisọs onenibe ebi udun̄ kan̄ eje ekana eteen̄ ọkpọkọ fituru echi etakabe isik, mè ekachieek ibe ọkpọkọ geege ichep. 13 Ebi udun̄ kan̄ eteteen̄ ọkpọkọ fituru balì cha ife cha etakabe isik, ijojot akọp mè okwun iba. 14 Mgbọ ife cha emun̄be inu ukechieen̄ ya Jisọs orọbe, ema ebebene ikitumu ibe, “Me atikọ, ene yi ore ogwu Nriran ya ogwu òbonu me linyọn̄.” 15 Jisọs orọriọọn̄ ibe ke ife cha mênitet ọmọ me unye isa irọ ubọọn̄, mè ichak lek ida ibọkọ ifo inyọn̄ ogoon̄ isi ikup, ọmọ gaalek. 16 Me agan̄ ikakwun̄ usen ya, ebi udun̄ kè Jisọs enenije isibi atasuk, 17 mè isi inin̄ uji ge ikọp isaba okwaan̄ oyô ya ibesi Kapanọm, ema gaalek. Jisọs kpunu melek kiban̄. Egwe onenifit ema me okwaan̄ ya. 18 Efet okekiwut unye unye, mè itap ogbururu me okwaan̄ oyô ya. 19 Mgbọ ema ekọpbe inu òbet lek ewuuk ije go mè ìre gweregwen inin̄ emen okwaan̄ oyô ya, ema ebebene chieen̄ imun̄ Jisọs okije ukot ukot me isi mun̄ itap me lek uji kiban̄. Ukpook otetet ema enenen. 20 Ire, Jisọs obebe ema, “Ikatet ukpook, ke emi ke îre.” 21 Ema etetele mè ọmọ isaba inin̄ uji. Ikafiin̄ mgbọ, ema ekọkọp itoon̄ me atasuk ere ema ebesi. 22 Me òfit-iwele kan̄, ogbogbo ebi ene ìkup me atasuk agan̄ Jisọs mè ebi udun̄ kan̄ enan̄abe ya eweweek iriọọn̄ ibe ke ìre uji ge gaalek okup me atasuk ya mgbọ ebi udun̄ kè Jisọs ekọpbe inan̄a; ke Jisọs ìkagọọk ema ìnin̄ uji ya. 23 Ìkafiin̄ mgbọ, usini uji ònan̄a me ama ekigwen Taiberias onenikọp itoon̄ me agba lek ere ife cha ekupbe irie inorie ya mgbọ Okaan̄-ene ogbanabe isan̄a. 24 Mgbọ ogbogbo ebi ene cha eniweek iriọọn̄ ibe ke Jisọs ìkayaka ìkup me ere ya; ke ebi udun̄ kan̄ si kpunu, ema eneninin̄ emen uji cha, mè ikọp isaba isi Kapanọm isi iweek Jisọs. 25 Mgbọ ife cha eweekbe Jisọs imun̄ me usaba agan̄ okwaan̄ oyô ya, ema edodo ọmọ ibe, “Ogwu Ijejeen̄, ìre kpasi mgbọ ke osaba inire agan̄ keyi?” 26 Jisọs ofọfọọk ema ibe, “Me atikọ, ìkare mije inu ukechieen̄ nrọbe cha ke enyi ekiweek emi, îre mije inorie ya enyi eriebe, mè irie ijot, ke enyi enikiweek emi. 27 Ikakpan̄ lek kinyi ìnyi ikwaan̄ mije inorie echi òkifafiat. Ìkisi ikwaan̄ ìweek inorie eyi môfukbe, mè inyi ene ugwem ikakaan̄ge itata, eyi emi Gwun̄ Ebilene mânyibe enyi. Mije, Awaji Ute ìnyi emi unye nkisa irọ ikwaan̄ ukechieen̄ chi, inyi ebi ene esa me ikeya eriọọn̄ ibe ke ọmọ îbọkọ emi itap.” 28 Ema enenido Jisọs ibe, “Ìre keke ke eji eberọ, inyi eji ekọt erọ inu Awaji okiweek?” 29 Jisọs ofọfọọk ema ibe, “Inu Awaji okiweek ìre ene ichechieek me lek ogwu Awaji oriabe inu.” 30 Ife cha enenido ọmọ ibe, “Ire ikeya, ìre kpasi inu ukechieen̄ ke oborọ ijeen̄ eji, inyi eji emun̄, mè echieek me lek kwun̄? Rọ-nu, inyi eji emun̄. 31 Mije, ebi nte nte kiji mîrie inorie ònan̄a me emen inyọn̄, eyi ekigwen mana, me emen èwê, kubọk egebe me Ikpa Mbuban ibe ke Awaji ìsa inorie ònan̄a me emen inyọn̄ ikpukpo ebi ene.” 32 Jisọs onenifọọk ema ibe, “Me atikọ, ìkare Mosis onyi ebi nte nte kinyi inorie ònan̄a me emen inyọn̄ ya. Îre Nte n̄a okinyi enyi atata inorie eyi ònan̄a me emen inyọn̄. 33 Mije, inorie eyi Awaji onyibe ebilene ìre ogwu ònanan̄a me emen inyọn̄ inu, mè inikinyi ebi linyọn̄ ugwem eyi ikakaan̄ge itata.” 34 Ema enenibe ọmọ, “Ogwu Nte, bene me mgbọ keyi fo isi, kinyi eji inorie yi usen geelek.” 35 Jisọs onenitumu inyi ema ibe, “Emi nre inorie eyi òkinyi ene ugwem. Ene geelek ònunu me lek n̄a ìkpoyaka iran̄ ọfiọọn̄. Ene geelek òchechieek me lek n̄a, ebek ìkpoyaka irak. 36 Ire, ubọk mwuukbe lek itumu inyi enyi, enyi mîsa chieen̄ kinyi imun̄ emi, ire, enyi kpechieek me lek n̄a. 37 Otutuuk ebi geelek Nte n̄a onyibe emi mênu me lek n̄a. Ene geelek ònunu me lek n̄a, emi m̀kpalap isan̄a. 38 Mije, ǹkanan̄a me emen inyọn̄ ìnu inenirọ nkeek n̄a, ǹnu inenirọ nkeek ogwu òraria emi inu. 39 Nkeek Awaji ogwu òraria emi inu ìre, mè emi nkafiin̄ ene geege me lek otutuuk ebi ọmọ onyibe emi. Ire, mè emi ǹjomo ema me mkpa me mgburudun̄ Usen ya. 40 Ofifi si, nkeek kè Nte n̄a ìre ke ene geelek òtotoon̄ emi ogwu Gwun̄ ejit me lek, mè ichieek me lek n̄a môkaan̄ ugwem ikakaan̄ge itata. Emi mâjomo si ene ya me mkpa me mgburudun̄ Usen ya.” 41 Mije Jisọs otumube ibe ke ọmọ ore inorie eyi ònan̄a me emen inyọn̄, ebi Ju ebebene ikinunuun̄, 42 mè ikibe, “Ìre ìkare Jisọs gwun̄ kè Josefu ire ogwu? Eji mîriọọn̄ ogwu ute mè ogwu uga ijaan̄. Ìjeje iyaka initumu ibe ke ọmọ ìnan̄a me emen inyọn̄ inu?” 43 Jisọs onenibe ema, “Ikayaka inunuun̄ me etete kinyi. 44 Kpunu ene geege òbokọkọt inu me lek n̄a, îtata mè Nte n̄a ogwu òraria emi inu ìtataba ene ya inu me lek n̄a. Ene geelek ònunu me lek n̄a, mâjomo ene ya me mkpa me mgburudun̄ Usen ya. 45 Mîge si me emen ikpa ebi Nriran ibe ke Awaji me lek kan̄ obokijeen̄ ema inu. Eya orọ, ogwu òkigban̄ ikọ me otu kè Nte n̄a, mè ikikween̄ inu inan̄a me ubọk kè Nte n̄a, ogwugwa okinu me lek n̄a. 46 Me atikọ, kpunu ene geege òrarak imun̄ Nte n̄a. Îre ogwu ònan̄a me lek Ogwu Nte gaalek omun̄ Ogwu Nte. 47 Ǹkitumu atikọ inyi enyi ibe ke ene geelek ogwu òchechieek me lek n̄a îkaan̄ ugwem ikakaan̄ge itata. 48 Emi nre inorie eyi òkinyi ene ugwem. 49 Ebi nte nte kinyi mîrie mana me emen èwê. Ire, ema mîkwaan̄ si. 50 Mgbọ yi, ìkpọ, inorie eyi ònan̄a me emen inyọn̄ ire eyi. Ikaan̄ ogwu irie inorie keyi, ene ya ìkpoyaka ikwu. 51 Emi nre inorie ya òkinyi ene ugwem, eyi ònan̄a me emen inyọn̄. Ire ene irie inorie yi, ene ya môluk ugwem ire mgbọ ikakaan̄ge itata. Inorie yi ìre akpalek n̄a eyi mâsabe inyi me ibot ugwem ebi linyọn̄.” 52 Ebi Ju enanaan̄ ejit enenen, mè ibene ikiwut ifan̄a me lek kiban̄ ibe, “Ìre ene yi ìbojeje isa akpalek kan̄ inyi eji etaka?” 53 Jisọs otutumu inyi ema ibe, “Ǹkitumu atikọ inyi enyi ibe, ire enyi kpetaka akpalek Gwun̄ Ebilene, mè inwọ eje kan̄, enyi kpebekaan̄ ugwem me emen kinyi kubọk ge. 54 Ene geelek òtataka akpalek n̄a, mè inwọ eje n̄a, ene ya okaan̄ ugwem ikakaan̄ge itata. Emi mâjomo si ene ya me mkpa me mgburudun̄ Usen ya. 55 Mije, akpalek n̄a ìre ata inorie, eje n̄a si ìre ata inu inwọnwọ. 56 Ene geelek òtataka akpalek n̄a, mè inwọ eje n̄a, ene ya môkup me emen n̄a, emi si nkukup me emen ene ya. 57 Ubọk Nte n̄a ogwu òkup me ugwem oriabe emi inu, emi si nluluk ugwem mije kè Nte n̄a, ikeya si, ene geelek òtataka akpalek n̄a môluk ugwem mije n̄a. 58 Akpalek n̄a yi ore inorie ya eyi ònan̄a me emen inyọn̄. Ebi nte nte kinyi mîrie mana, mè ikwaan̄ isan̄a. Ire, ene geelek òrerie inorie keyi môluk ugwem ire mgbọ ikakaan̄ge itata.” 59 Jisọs ìtumu ikọ yi mgbọ îkijeen̄ inu me uwu ntitiin̄ ebi Ju òkup me Kapanọm. 60 Mgbọ owuwa me lek ebi ìkigọọk Jisọs me udun̄ enọbe ikọ ya, ema etutumu ibe, “Eyi ìre uyọt uyọt ijejeen̄. Ìre ekene obokọt ibọkọ itap?” 61 Jisọs orọriọọn̄ ibe ke ebi udun̄ kan̄ mêkinunuun̄ mije ijejeen̄ ya, mè ido ema ibe, “Ìre ijejeen̄ yi înaan̄ enyi ejit? 62 Ire ikeya, mgbọ enyi mêmun̄be emi Gwun̄ Ebilene nkinan̄a me ijọn̄ inene ifo emen inyọn̄ ere nkupbe me adasi mgbọ, enyi eberọrọ? 63 Îre Ekwukwu Awaji okinyi ene ugwem. Akpalek ikike ìkakup me lek inu geege. Ikọ chi ntumube inyi enyi okinyi ene Ekwukwu melek ugwem. 64 Ire, owuwa ene me etete kinyi kpechieek me lek n̄a.” Bene me ibebene, Jisọs îriọọn̄ ebi ekachieekge me lek kan̄, mè iriọọn̄, si ogwu òboleke ọmọ inyi ekpan̄, me etete ebi udun̄ kan̄. 65 Inenitumu inyi ema ibe, “Îre mije keyi ke ntumu inyi enyi ibe ke kpunu ene geege òbokọt inu me lek n̄a, îtata mè Nte n̄a ìtataba ene ya inu me lek n̄a.” 66 Bene me mgbọ yi, owuwa ebi udun̄ kan̄ egwugwu ikom ifon. Kpeyaka igọọk ọmọ ije ofifi. 67 Jisọs onenido akọp mè ene iba ebi Otuchieen̄ kan̄ ibe, “Ìre enyi mêgọọk ilibi itele emi si?” 68 Saimọn Pita ofọfọọk ọmọ ibe, “Okaan̄-ene, ìre ekene ke eji ebegọọk? Îre owu okaan̄ ikọ òkinyi ene ugwem ikakaan̄ge itata. 69 Eji mîchieek me lek kwun̄, mè iriọọn̄ ibe ke owu ore Ogwu Mbuban ya ònan̄a me lek Awaji inu.” 70 Jisọs ofọfọọk ema ibe, “Emi me lek n̄a ngobo enyi akọp mè ene iba. Ire, ene ge me lek kinyi ìre Yọk!” 71 Jisọs ìtumu ikọ ya ikpọ isi kè Judas gwun̄ kè Saimọn Isikariọt, òrere ene ge me lek akọp mè ene iba ebi Otuchieen̄ kan̄. Ọmọ yi ore ogwu òleleke Jisọs inyi ekpan̄ me mgburudun̄ mgbọ.

7

1 Mgbọ eyi orakabe, Jisọs onenikijijen̄e ikana me agan̄ Galili. Ìkaweek isisi agan̄ Judia mije ebi ibot ebi Ju ìkup me agan̄ ya ekiweek isasan̄a ugwem kan̄. 2 Me mgbọ ijọk Uwu Nlak ogbetbe, 3 ebi ngwan̄ kè Jisọs enenitumu inyi Jisọs ibe, “Yaka nan̄a me ere keyi gọọk je-nu si Judia, inyi ebi udun̄ kwun̄ ìkup me agan̄ keya eyaka egọọk emun̄ inu ukechieen̄ chi okirọ. 4 Mije, ene geelek òkiweek ibe ebi ene eriọọn̄ ogwu ọmọ orebe ìkakirọ inu me nlelet. Eya orọ, mgbọ owu owuwuuk lek ikirọ inu ukechieen̄ chi, san̄a lek kwun̄ sibi jeen̄ otutuuk ebi linyọn̄.” 5 Ebi ngwan̄ kè Jisọs etumu ikọ yi, mije, ema me lek kiban̄ kpechieek me lek kè Jisọs. 6 Eya orọ, Jisọs otutumu inyi ema ibe, “Mgbọ Awaji osun̄be inyi emi ìkakem-nu. Eyi kinyi, mgbọ geelek ìre ata mgbọ. 7 Ebi linyọn̄ kpebekọt icha enyi. Ire, ema mîcha emi, mije nkitumu inyi ema ibe ke irọrọ kiban̄ îfieek. 8 Enyi ìgọọk ìje ìsi ijọk ya, ke emi m̀kpasi, mije, mgbọ n̄a ìkakem-nu.” 9 Itutumu ikọ yi isan̄a, ibabia me Galili, ìkagọọk isi Judia. 10 Ire, mgbọ ebi ngwan̄ kan̄ enan̄abe isi ijọk ya, Jisọs me lek kan̄ onwenween̄ lek inan̄a igọọk isi ijọk ya me Jeruselem me nlelet, ìkasan̄a lek kan̄ ìsibi me isi ene. 11 Sabum înirere Jeruselem, ebi ibot ebi Ju mîbebene ikiweek ọmọ, mè ikidido ibe, “Ìre ene yi ìkup me ere owa mọnọ?” 12 Ukpatu òfolek kan̄ okekikana me etete urum ebi ene ìnunu ijọk ya. Usini ene ebe ke ìre ata ene, sa usini ebe iin̄-iin̄, ke ìre ogwu ofiaan̄. 13 Ire, kpunu ene geege òkọkọt itumu ikọ ibak ọmọ me isi ene, mije, ema ekifieek owot me lek ebi ibot ebi Ju. 14 Mgbọ otu ifuk usen ijọk ya ojebe inire ikike iba, Jisọs onunu me oyet egep Uwu Mbuban me Jeruselem, mè ibene ikijeen̄ inu. 15 Ijejeen̄ kan̄ okeke ebi ibot ebi Ju chieen̄ enenen. Ema ekekido ibe, “Ìre ene yi ìjeje iriọọn̄ inu ikeyi me ere ìkasisi ìkween̄ inu geege?” 16 Jisọs ofọfọọk ema ibe, “Ijejeen̄ eyi nkijeen̄ ìkanan̄a me unye n̄a, ìnan̄a me ubọk Awaji ogwu òraria emi inu. 17 Ire, ogwu iweek irọrọ nkeek eyi Awaji, ene ya môriọọn̄ mè ìre inu nkijeen̄ ìnan̄a me ubọk Awaji, mè ìre me unye n̄a gaalek. 18 Mije, ogwu geelek òkitumu ikọ me unye eyi kan̄ ìkiweek umin inyi lek kan̄. Ire, ogwu geelek òkiweek ibe ebi ene esa umin enyi ogwu òraria ọmọ inu, ene ya ore ogwu òkitumu atikọ, kpunu ofiaan̄ geege me emen ene ya. 19 Ìre Mosis ìkafat ìnyi enyi Ikan? Ire, kpunu ene geege me lek kinyi òkisun̄ Ikan cha. Ìre keke orọ enyi ekiweek ikpakpan̄ emi?” 20 Ife cha efọfọọk ọmọ ibe, “Ijo erumun̄ òwa me ibot kwun̄! Ìre ekene okiweek ikpakpan̄ owu?” 21 Jisọs otutumu inyi ema ibe, “Ikwaan̄ ukechieen̄ ge gaalek nrọbe me etete kinyi me Usen Mbuban oke otutuuk kinyi chieen̄. 22 Enyi mîkifieek bọn kinyi afi me Usen Mbuban igọọk me lek Ikan Mosis onyibe enyi. (Ire, me atikọ, ọrọmijọn̄ yi ìnan̄a me ubọk ebi nte nte kinyi me ukot ikaan̄, ìkanan̄a me ubọk kè Mosis melek kan̄.) 23 Ire enyi ikifieek bọn kinyi afi me Usen Mbuban, inyi enyi ekafiat Ikan Mosis onyibe enyi òfolek ifefieek afi, ìre keke orọ enyi ekinaan̄ ejit me lek n̄a mije nrọbe inyi otutuuk lek ene inye me Usen Mbuban? 24 Ikayaka ìkisa inu chieen̄ kinyi okimun̄ gaalek ìfieek oyerebet ìnyi ene. Ìkisibi unen oyerebet ìgọọk me lek atikọ.” 25 Me ike mgbọ ya, usini ebi Jeruselem ebebene ikidido lek kiban̄ ibe, “Ìre ìkafat ìre ene yi ke ebi ibot ebi Ju ekiweek ikpakpan̄? 26 Ìkpọ-ma, ke ọmọ ire ogwu òkitumu ikọ inyi ebi ene me eden̄ ama, kpunu ogwu òkọkọt isan̄a amọn inyi. Ìre ebi ibot ebi Ju mîra iweek iriọọn̄ ibe ke ene yi ore Karais ya me atikọ mọnọ? 27 Mgbọ Karais ya mônube, kpunu ogwu òboriọọn̄ ere înan̄abe. Ire ogwugwu, eji mîriọọn̄ ere înan̄abe.” 28 Jisọs okukup me emen Uwu Mbuban ya ere îkijeen̄ ebi ene inu, mè itaan̄ ukpo itumu ibe, “Iin̄, enyi mîriọọn̄ emi, mè iriọọn̄ si ere nnan̄abe. Ire, ǹkanu me ere yi me unye eyi lek n̄a, eraria emi inu. Ogwu òraria emi inu ore ogwu atikọ. Ire, enyi kperiọọn̄ ọmọ. 29 Emi nriọọn̄ ogwu òraria emi inu, mije, ǹnan̄a me lek kan̄ inu. Îre ọmọ oria emi inu.” 30 Mgbọ ebi ibot ebi Ju cha enọbe ikọ Jisọs otumube, ema eweweek itetet ọmọ me ubọk unye isi ikpan̄. Ire, kpunu ogwu òkọkọt ije isi itet ọmọ, mije, mgbọ mkpa kan̄ ìkakem. 31 Ire, owuwa ene me etete urum ene cha echechieek me lek kan̄, mè ikibe, “Ire ogwu Mesaya ya inu, ìre môrọ uyeke uyeke inu ijejeen̄ igak echi ene yi orọbe?” 32 Mgbọ ebi Farisi enọbe ubọk owuwa ene ekitumu ata ikọ ikeyi ibak Jisọs, ema melek ebi ibot ngwugwa eraria ebi ìkibem Uwu Mbuban ibe esi etet Jisọs me ubọk unye esa enu inyi ekpan̄. 33 Mgbọ ebi ife cha enube, Jisọs otutumu ibe, “Emi m̀bagọọk enyi ikup sọnja mgbọ, mè iyaka ifo igọọk ogwu òraria emi inu. 34 Mgbọ keya, enyi mêweek emi, ire, enyi kpebekọt iweek emi imun̄. Ere mbakup, enyi kpebekọt inu.” 35 Ebi ibot ebi Ju ekekitumu me lek kiban̄ ibe, “Ìre ere owa ke ogwu enerieen̄ yi obosi eyi eji kpebekọt iweek ọmọ imun̄? Ìre ìbosi igọọk ebi kiji ebi ìluk me ido ebi Giris ikup, mè ikijeen̄ ebi Giris cha inu mọnọ? 36 Eyi îtumube ibe ke eji mêweek ọmọ, ire, ke eji kpebekọt iweek ọmọ imun̄, mè ibe si ke ere ọmọ obokup, ke eji kpebekọt inu, ìre ikọ kechi ìsibi keke ni?” 37 Me òta usen ijọk ya, eyi òrere usen òmimin ichit me lek ijọk Uwu Nlak ya, Jisọs onanan̄a ikeke, mè ikitaan̄ ukpo itumu inyi ebi ene ibe, “Ene geelek ebek orakbe, inu me lek n̄a ininwọ mudim. 38 Ene geelek òchechieek me lek n̄a, ogbuuruk eyi mun̄ òkinyi ene ugwem môkinan̄a me ibot ejit ene ya ikigbuk isibi, kubọk egebe me emen Ikpa Mbuban.” 39 Jisọs ìtumu ikọ ya ibak Ekwukwu Awaji ogwu ebi geelek ìchechieek me lek kan̄ mêbọkọbe. Mege inire ike mgbọ Jisọs okitumu ikọ ya, Awaji ìkanyi-nu ebi ìchechieek me lek kan̄ Ekwukwu Mbuban, mije, Awaji ìkabene-nu Jisọs ìfo inyọn̄ ìsi ìtap me irek umin mè uja. 40 Mgbọ ebi ife cha enọbe ikọ ya Jisọs otumube, usini me lek ebi urum ene cha ekekitumu ibe, “Me atikọ, ogwu enerieen̄ yi ore ogwu Nriran ya ogwu òbonunu.” 41 Usini me lek kiban̄ ebebe, “Îre ọmọ ore Karais ya!” Ire, usini kiban̄ ekekido ibe mè ìre Karais ìbojeje inan̄a me Galili; 42 ke Ikpa Mbuban ìtumu ibe ke Karais ya ìbonan̄a isibi me owot iman kè Debit me Betelehem, ama ere emanbe Debit. 43 Sa me ikeya, ifan̄a oninin̄ me etete ife cha mije kè Jisọs. 44 Usini ene eweweek itetet ọmọ me ubọk unye isi ikpan̄. Ire, kpunu ogwu òjeje inin̄ ọmọ lek isi itet. 45 Mgbọ ebi ìkibem Uwu Mbuban cha egwube ikom ika, ebi ibot ngwugwa mè ebi Farisi enenido ema ibe, “Ìre keke orọ enyi kpetet ogwu enerieen̄ ya isa inu?” 46 Ema efọfọọk ibe, “Eji kperarak imun̄ ene geege òtutumu ikọ kubọk ogwu enerieen̄ ya okitumu.” 47 Ebi Farisi cha edodo ebi mbem cha ibe, “Ìre ene ya îfiaan̄ enyi si itap ebot? 48 Ìre îkaan̄ ene ge me etete ebi ibot ebi Ju, mè ìyaka ire eji ebi Farisi ogwu enyi eweekbe imun̄ ibe ke îchieek me lek ogwu enerieen̄ yi? 49 Me atikọ, kpunu ebi ibot ebi Ju geege ìchechieek me lek ene yi. Iin̄-iin̄, îre urum ebi ikike chi ekariọọn̄ge inu geege me emen Ikan kè Mosis gaalek echieek me lek ene yi. Unaan̄-ejit Awaji me ibot ife chi okupbe.” 50 Ogwu Farisi ge ekigwen Nikodimọs, ogwu òsisi lek kè Jisọs me eririeen̄ ya, onenido ebi ibot cha melek kan̄ ekupbe me ere ya ibe, 51 “Ìre înen me Ikan kiji ibe eji etip ene oyerebet me mgbọ eji kpenọnọ ikọ otu ene ya, mè iweek iriọọn̄ inu ene ya okirọ?” 52 Ema efọfọọk Nikodimọs ibe, “Ìre owu si ònan̄a me agan̄ Galili? Ire òkariọọn̄, kpọk si kween̄ inu egebe me Ikpa Mbuban jaan̄ lek, ke owu môweek imun̄ ibe ke kpunu ere geege egebe ibe ke îkaan̄ ogwu Nriran òbonan̄a me Galili isibi.” [ 53 Eya iraraka, otutuuk ene ekpọkpọk iyat me ere ya, ogwu ikup, ofo uwu kan̄.

8

1 Jisọs onenije isi inyọn̄ ogoon̄ Olifu. 2 Me òfit-iwele kan̄, inanan̄a me ere ya ikpọk ije isi oyet egep Uwu Mbuban, ogbogbo ebi ene enenikeke ikana ọmọ okop okop. Isisiki ikweek, mè ibene ikijeen̄ ema inu me ere ya. 3 Usini ebi ìjeen̄ Ikan mè ebi Farisi enenisa ogwu enenwaan̄ ge etetbe mgbọ îsibe ugan inu me isi ebi ìtititiin̄ me ere ya, 4 mè initumu inyi Jisọs ibe, “Ogwu Ijejeen̄, kpọ, etetet ogwu enenwaan̄ yi melek ofifi enerieen̄ ikarege ogwu olom me inyọn̄ mkpilaak. 5 Me emen Ikan kè Mosis, ege ibe mè esa ewuuk etọbọ ogwu enenwaan̄ geelek etetbe ikeya ekpan̄. Mgbọ keyi, òmọmọ nkeek kwun̄?” 6 Ema edo ikọ ya isasa ileke Jisọs ikọ me otu, inyi ema ekaan̄ inu mêsabe ifieek ọmọ ikọ. Ire, Jisọs okakana isi ikwuun̄, mè ikisa otubọk ikige inu me ijọn̄. 7 Ubọk ema ekpọkpọ ikido ọmọ ikọ ya efuuk efuuk, Jisọs onenibene isi me ijọn̄, mè itumu inyi ema ibe, “Ikaan̄ ogwu, me lek kinyi, ikarọge ijo inu me ugwem kan̄, ene ya idasi imọnọ ewuuk itọbọ-nu ogwu enenwaan̄ yi.” 8 Itutumu ikọ ya isan̄a, ikpọkpọk igele ikwuun̄, mè ikige inu me ijọn̄. 9 Mgbọ ema enọbe ikọ ya, lek kiban̄ owọwọ. Ema ebebene ikikpọk iyat me ge me ge, bene me lek ebi ugane si re lek ebi nsabọn. Ikeya ke ema otutuuk eyat itele Jisọs. Ogwu enenwaan̄ ya okpọkpọ ikeke si me ere ya. 10 Jisọs onenibene isi me ijọn̄, mè ido ogwu enenwaan̄ ya ibe, “Ogwu enenwaan̄, sa ebi ife cha ye? Ìre ìkakaan̄ ogwu òtitip owu oyerebet mkpa?” 11 Ogwu enenwaan̄ ya ofọfọọk ibe, “Iin̄-iin̄, Ogwu Nte, kpunu ene geege òtitip emi oyerebet.” Jisọs otutumu inyi ọmọ ibe, “Înwọn, emi si ǹkatip owu oyerebet. Je fo. Bene me mgbọ keyi fo isi, kayaka ìluk ijo ugwem.”] 12 Jisọs onenikpọk itumu ikọ inyi ebi ene, mè ibe ema, “Emi nre utoon̄ eyi linyọn̄. Ene geelek ògọgọọk emi ìkpokitutun ikana me emen udun, môkaan̄ utoon̄ eyi òkinyi ene ugwem.” 13 Ebi Farisi ìkup me ere ya enenibe ọmọ, “Kpọ-ma, owu oyaka ikikeke ata-ikọ inyi lek kwun̄ gaalek. Eya orọ, ata-ikọ kwun̄ ìkasibi inu geege.” 14 Jisọs otutumu inyi ema ibe, “Ìrere emi me lek n̄a nkikeke ata-ikọ inyi lek n̄a, ata-ikọ n̄a ìre atikọ, mije, emi nriọọn̄ ere nnan̄abe inu, mè iriọọn̄ si ere mbasi. Ire, enyi kperiọọn̄ ere nnan̄abe, kperọriọọn̄ si ere mbasi. 15 Eyi kinyi, enyi ekisa ifuk ibot ebilene ifieek oyerebet inyi ene. Ire, emi ǹkafieek oyerebet ìnyi ene geege. 16 Ire, ire mfieek oyerebet inyi ene, ifieek-oyerebet n̄a ìre unen, mije, ìkare emi gaalek nkeke. Nte n̄a ogwu òraria emi inu melek n̄a ekeke. 17 Me emen Ikan kinyi, ege ibe, ire ene iba ikeke ata-ikọ me ibot inu ge, ke inu ya ìre atikọ. 18 Ubọk geelek nkikeke ata-ikọ inyi lek n̄a, nkaan̄ ofifi ogwu ata-ikọ. Ogwu ata-ikọ ya ìre Nte n̄a ogwu òraria emi inu.” 19 Ema enenido Jisọs ibe, “Nte kwun̄ ya ìkup me owa?” Jisọs ofọfọọk ema ibe, “Enyi kperiọọn̄ ogwu nrebe, enyi kperiọọn̄ si Nte n̄a. Ire enyi meriọọn̄ emi, kè enyi eriọọn̄ si Nte n̄a.” 20 Jisọs ìtumu otutuuk ikọ chi inyi ife cha mgbọ îkijeen̄ ema inu me emen oyet egep Uwu Mbuban, me agan̄ ere ebi ene ekisi ito inyinyi kiban̄. Ire, kpunu ogwu òkọkọt itet ọmọ me unye ubọk isi ikpan̄, mije, mgbọ mkpa kan̄ ìkakem. 21 Jisọs okpọkpọk itumu inyi ife cha ibe, “Mâninan̄a me etete kinyi. Nsinan̄a, enyi mêweek emi igak, mè ikwaan̄ ita me emen ijo kinyi. Ere mbasi, enyi kpebekọt inu.” 22 Ebi ibot ebi Ju ekekibe, “Ìre ìbokpakpan̄ lek kan̄ mọnọ? Ìre eya orọ îkitumu ibe, ere ọmọ obosi, ke eji kpebekọt inu?” 23 Jisọs ofọfọọk ema ibe, “Enyi enan̄a me linyọn̄ keyi. Ire, emi ǹnan̄a me emen inyọn̄ inu. Enyi ìre ebi linyọn̄ keyi. Ire, emi ǹkare ogwu linyọn̄ keyi. 24 Iin̄, ntumu inyi enyi ibe ke enyi mêkwaan̄ me emen ijo kinyi. Ire enyi kpechieek ibe ke Emi ìre ogwu Nrebe, enyi mêkwaan̄ me emen ijo kinyi me atikọ.” 25 Ema enenido Jisọs ibe, “Owu òtele ìre ekene-ni?” Jisọs ofọfọọk ibe, “Mwuuk lek ikitumu ogwu nrebe inyi enyi bene me ibebene. 26 Mgbọ yi, îkaan̄ owuwa inu mâkọtbe itumu òfolek kinyi, mè isa itip enyi oyerebet. Ire, ikọ nnọbe me otu ogwu òraria emi inu gaalek ke nkitumu inyi ebi linyọn̄, mije, ogwu òraria emi inu ìre ogwu atikọ.” 27 Ife cha kpekọt itet ibot ibe ke Jisọs ìkitumu ikọ ya ibak ogwu Ute ogwu òkup me emen inyọn̄. 28 Jisọs onenitumu inyi ema ibe, “Mgbọ enyi isibene emi Gwun̄ Ebilene ifo inyọn̄, mgbọ ya, enyi mêriọọn̄ ibe ke Emi ìre ogwu Nrebe, mè iriọọn̄ si ibe ke ǹkasa me unye eyi n̄a ìrọ inu geege. Ire, ke ìre inu Nte n̄a ojeen̄be emi gaalek ke ǹkitumu. 29 Ogwu òraria emi inu melek n̄a ekup, ìkakitele emi mgbọ geege, mije, inu òkibele ọmọ ejit ke nkirọ mgbọ geelek.” 30 Mgbọ Jisọs okitumu ikọ ya, owuwa ebi ìkukup ikigban̄, echechieek me lek kan̄. 31 Jisọs onenitumu inyi ebi Ju cha ìchechieek ikọ kan̄ ibe, “Ire enyi ikirọ inu nkijeen̄ enyi, enyi mêre ebi ìkigọọk emi me udun̄ me atikọ. 32 Mgbọ ya, enyi mêriọọn̄ atikọ ya, atikọ ya si môsan̄a enyi isibi me usun̄.” 33 Ema enenifọọk Jisọs ibe, “Eji ìre bọn owot iman kè Ebereham, eji kperarak ire usun̄ inyi ene geege. Owu òjeje itumu ibe ke eji mêsibi me usun̄?” 34 Jisọs ofọfọọk ema ibe, “Ǹkitumu atikọ inyi enyi ibe, ene geelek òkirọ ijo inu ìre usun̄ inyi ijo inu. 35 Ogwu usun̄ ìkakiluk ìbia me uwu ogwu ute-uwu. Îre gwun̄ ogwukaan̄ uwu okiluk ibia me uwu ogwu ute ire mgbọ geelek. 36 Eya orọ, ire Gwun̄ Awaji isan̄a enyi isibi me usun̄, enyi mîsibi me usun̄ me atikọ. 37 Emi nriọọn̄ ibe ke enyi ìre bọn owot iman kè Ebereham. Ire, enyi ekiweek ikpakpan̄ emi, mije, enyi kpebọkọ ikọ n̄a itap me emen kinyi. 38 Emi ǹkitumu inu mmun̄be me ere Nte n̄a okupbe inyi enyi. Eyi kinyi, inu geelek nte kinyi otumube inyi enyi, eya ke enyi ekirọ.” 39 Ema efọfọọk Jisọs ibe, “Ebereham ore nte kiji!” Jisọs otutumu inyi ema ibe, “Ire enyi mere bọn kè Ebereham, me atikọ, kè enyi èkerọ ikwaan̄ Ebereham orọbe. 40 Ire, enyi ekiweek ikpakpan̄ emi ogwu ǹtutumu atikọ nnọbe me otu Awaji inyi enyi. Ebereham ìkarọ òjelek inu òkup ikeyi. 41 Inu geelek nte kinyi okirọ, eya ke enyi ekirọ.” Ife cha etutumu inyi Jisọs ibe, “Eji kpere bọn ugan, Awaji gaalek me lek kan̄ ore Nte kiji.” 42 Jisọs otutumu inyi ema ibe, “Ire Awaji more Nte kinyi me atikọ, kè enyi èmun̄ emi me chieen̄, mije, emi ǹnan̄a me lek Awaji inu me ere keyi. Ǹkanu me unye eyi n̄a gaalek, îre Awaji oria emi inu. 43 Ìre keke orọ enyi kpekikọt igobo ikọ n̄a itet? Îre nan̄a me lek enyi kpekọt inọ ikọ nkitumu, mije, enyi kpeweweek si inọnọ. 44 Enyi ìre bọn kè nte kinyi ogwu òrere Yọk. Nkeek Yọk, ogwu òrere nte kinyi ya si ke enyi ekiweek irọrọ. Yọk ìre ogwu òkpan̄ ene, mè ogwu afa bene me ibebene. Ìkakikeke ìnyi atikọ, mije, kpunu atikọ geege me emen kan̄. Mgbọ geelek îkikan̄ ataak, mgbọ ya ke îkirọ inu òtatat me ugwem kan̄, mije, ọmọ ìre ogwu ataak. Otutuuk ataak mè ofiaan̄ geelek, îre Yọk osan̄a isibi. 45 Ire, mije nkitumu atikọ inyi enyi, enyi kpechieek me lek n̄a. 46 Ǹdo enyi nu, ìre ekene me lek kinyi obokọt ijeen̄ ibe ke îkaan̄ ijo inu nrọbe? Ire nkitumu atikọ inyi enyi, ìre keke orọ enyi kpechieek me lek n̄a? 47 Ogwu òrere gwun̄ Awaji okinọ ikọ Awaji okitumu. Inu òrọrọ enyi kpekikọt inọ ikọ Awaji ìre ke enyi kpere bọn Awaji.” 48 Ebi ibot ebi Ju enenifọọk Jisọs ibe, “Me atikọ, îriọọn̄ ubọk itat ubọk eji etumube ibe ke owu ìre ogwu Sameria; ke ijo erumun̄ òwa me ibot kwun̄.” 49 Jisọs ofọfọọk ema ibe, “Kpunu ijo erumun̄ geege me ibot n̄a. Nte n̄a ke nkinyi umin. Ire, enyi ekekikpọ emi chieen̄ isiki. 50 Ìkare emi nkiweek umin inyi lek n̄a. Ire, îkaan̄ ogwu òkiweek ibe ebi ene ekemin emi. Îre ene ya obofieek oyerebet. 51 Me atikọ, ǹkitumu inyi enyi ibe ke ogwu geelek òkirọ ikọ n̄a ìkpoyaka ikwu mege ire mgbọ ikakaan̄ge itata.” 52 Ebi ibot ebi Ju cha inọnọ ikọ yi Jisọs otumube, ema ebebe ọmọ, “Mgbọ keyi ke eji eriọọn̄ ibe ke ijo erumun̄ me ibot kwun̄ me atikọ. Mije, Ebereham mè ogbogbo ebi nriran mîkwaan̄ ita. Owu onenikitumu ibe ke ene geelek òkirọ ikọ kwun̄ ìkpoyaka ikwu. 53 Ìre owu omin igak nte kiji Ebereham ogwu òkwukwu? Sa ìre owu omin igak otutuuk ebi nriran ebi ìkwakwaan̄ ita? Na-nu, ìre òkikeek ibe ke owu ìre ekene mọnọ?” 54 Jisọs ofọfọọk ema ibe, “Ire emi gaalek nkimin lek n̄a, umin keya ìkasibi inu geege. Ire, Nte n̄a ogwu enyi ekitumu ibe ìre Awaji kinyi ya, ọmọ okimin emi. 55 Ubọk geelek enyi kperiọọn̄ Awaji kinyi ya, emi nriọọn̄ ọmọ. Ire ntumu ibe ke ǹkariọọn̄ ọmọ, nkana ogwu ataak kubọk enyi erebe. Me atikọ, emi nriọọn̄ ọmọ, mè ikirọ si ikọ kan̄. 56 Nte kinyi Ebereham îbele ejit mgbọ Awaji otumube inyi ibe ke ogwugwu mômun̄ usen inunu n̄a. Ọmọ îkup imun̄ si usen ya, mè ibele ejit.” 57 Ebi ibot ebi Ju cha ebebe ọmọ, “Owu òkasoso-nu akọp acha go, ke owu okitumu ibe ke owu osa chieen̄ kwun̄ imun̄ Ebereham?” 58 Jisọs otutumu inyi ema ibe, “Me atikọ, sabum enimaman nte kinyi Ebereham, Emi òwa!” 59 Mije ikọ ya Jisọs otumube, ema eteteen̄ ọkpọkọ ewuuk ibesa itọbọ Jisọs ikpan̄. Ire, Jisọs olelet, mè inween̄ lek inan̄a me oyet egep Uwu Mbuban ya ije isibi.

9

1 Mgbọ Jisọs okije me oniin̄, imumun̄ ogwu enerieen̄ ge òrere ǹnàan̄ bene me imaman kan̄. 2 Ebi udun̄ kan̄ enenido ọmọ ibe, “Ogwu Ijejeen̄, ìre ijo inu kè ekene orọ emanbe ogwu enerieen̄ yi ǹnàan̄? Ìre ijo inu eyi kan̄ gaalek orọ? Sa ìre ijo inu eyi ogwu ute mè ogwu uga?” 3 Jisọs ofọfọọk ema ibe, “Ìkare mije ijo inu ogwu enerieen̄ yi orọbe, ìkare si mije ijo inu ogwu ute mè ogwu uga erọbe orọ mè eman ogwu enerieen̄ ya ǹnàan̄. Ire, eman ogwu enerieen̄ yi ǹnàan̄, inyi ebi ene emun̄ ikwaan̄ ukechieen̄ eyi Awaji oborọ me emen ogwu enerieen̄ yi. 4 Eya orọ, mgbọ keyi îrebe ikarek, îkup me uyọt ibe emi melek kinyi esi ikwaan̄ enyi ogwu òraria emi inu. Mije, eririeen̄ òkinu mgbọ ene geege ìkpoyaka ikọt isi ikwaan̄. 5 Mgbọ keyi nkupbe me linyọn̄, emi nre utoon̄ linyọn̄.” 6 Jisọs itutumu ikọ ya isan̄a, ichocho ataak igwook me ijọn̄, mè ifuku ataak ya melek ntitaak, inyi ikup ibat ibat, mè ikọbọ isa ichiọọk ogwu enerieen̄ ya me chieen̄, 7 mè itumu inyi ibe, “Je si gwọk isi kwun̄ me emen udọn̄ mun̄ ekigwen Sailowam” (eyi òsisibi “Eraria”). Ogwu enerieen̄ ya ojeje isi igwọk isi me emen udọn̄ mun̄ ya. Chieen̄ kan̄ obobolo. Ibebene ikimọọn̄ inu, mè igwu ikom ifo. 8 Ebi melek kan̄ elukbe me ere ge, mè ebi ìrarak imun̄ ọmọ okikweek me agba oniin̄ ibeek inu ebebe, “Ìre ìkafat ìre ogwu enerieen̄ òkikup me agba oniin̄ ikibeek inu ya ore ogwu?” 9 Usini ene ebebe ke ìre ọmọ. Usini ene ebebe ke ìkare ọmọ; ke ogwugwu ìbebet lek kan̄. Ire, ogwu enerieen̄ ya okekitumu ibe ke ọmọ ore ene ya. 10 Ebi ife cha enenido ọmọ ibe, “Ìre chieen̄ kwun̄ ìjeje ichili, mè owu òkomọọn̄ inu?” 11 Ogwu enerieen̄ ya ofọfọọk ibe, “Enerieen̄ ge ekigwen Jisọs ocho ataak igwook me ijọn̄, mè ifuku ntitaak melek ataak ya, mè ikọbọ ichiọọk emi me chieen̄, mè ibe emi ǹje ǹsi ǹgwọk isi me udọn̄ mun̄ Sailowam. Nsisi igwọk isi, mè ibene ikimọọn̄ inu mgbọ yaage.” 12 Ife cha enenido ọmọ ibe, “Enerieen̄ ya ìkup me owa?” Ifọfọọk ibe ke ọmọ ìkariọọn̄ ere îkupbe. 13 Ebi ene enenisa ogwu ǹnàan̄ Jisọs ogwabe ya inu me isi ebi Farisi. 14 Usen Jisọs ofukube ntitaak isa igwa chieen̄ ogwu ǹnàan̄ ya ìre Usen Mbuban. 15 Ebi Farisi cha enenikido ogwu enerieen̄ ya ibe ikpa-nu ubọk îsabe ibene ikimọọn̄ inu. Ogwu enerieen̄ ya onenikpa inyi ema ibe ke ogwu enerieen̄ ya ìkọkọbọ ntitaak ichiọọk ọmọ me chieen̄, ọmọ osisi igwọk isi, mè ibene ikimọọn̄ inu. 16 Usini ebi Farisi cha ebebe, “Ire ikeya, ogwu òrọrọ inu ya ìkanan̄a me lek Awaji, mije, ìkasun̄ ikan Usen Mbuban.” Ire, usini kiban̄ ekekido ibe, “Ìre ogwu ijo ìbojeje ikọt irọ ikpele inu ukechieen̄ òkup ikeyi?” Sa me ikeyi, wọlọwọlọ oninin̄ me etete kiban̄. Ema echeche lek irek iba. 17 Ebi Farisi cha enenido ogwu enerieen̄ ya ibe, “Ke chieen̄ kwun̄ ke ene ya ochili. Ìre keke ke owu okeek òfolek ene ya?” Ogwu enerieen̄ ya ofọfọọk ibe, “Ene ya ìre ogwu nriran.” 18 Ebi ibot ebi Ju chi kpekọt ichieek si ibe ke îkaan̄ mgbọ ogwu enerieen̄ ya orebe ǹnàan̄, mè iyaka inibene ikimọọn̄ inu. Eya orọ, ema eraria ikwaan̄ igwen ogwu ute mè ogwu uga. 19 Mgbọ ogwu ute mè ogwu uga enube, ebi ibot ebi Ju cha enenido ema ibe, “Ìre gwun̄ kinyi ire eyi? Ìre ogwugwu ke enyi ebe ke eman ǹnàan̄? Ìre ìjeje iyaka inikimọọn̄ inu mgbọ keyi?” 20 Ife cha efọfọọk ema ibe, “Eji mîriọọn̄ ibe ke gwun̄ enerieen̄ yi ìre gwun̄ kiji, mè iriọọn̄ si ibe ke eman ọmọ ǹnàan̄. 21 Ire, eji kperiọọn̄ ike îsabe ibene ikimọọn̄ inu. Eji kperiọọn̄ si ogwu òrọrọ inyi chieen̄ kan̄ ichili. Enyi me lek kinyi, ìdo ọmọ ma, mije, îmin iso ogwu òbokọt itumu iko ibot kan̄.” 22 Ogwu ute mè ogwu uga ya etumu ikọ ya, mije, ema ekifieek owot me lek ebi ibot ebi Ju. Mije ebi ibot ebi Ju mîwuuk lek itumu ifieek ibe, ene geelek òtutumu isibi ibe ke Jisọs ore Karais ya, ke ebelalap ene ya isibi me uwu ntitiin̄ kiban̄. 23 Ukpook ya orọ mè nte ogwu enerieen̄ ya mè nga ogwu enerieen̄ ya etumu ibe ke gwun̄ kiban̄ îmin inin̄ ene, mè ebi ibot ebi Ju cha edo ọmọ ikọ me otu kan̄ gaalek. 24 Ebi Ju enenikpọk igwen ogwu enerieen̄ ya òso mgbọ iba, mè itumu inyi ibe, “Tumu atikọ, mè nyi Awaji itọn̄. Mije, eji mîriọọn̄ ibe ke enerieen̄ yi, ogwu otumube ibe ke ìre ọmọ ogwa owu, ìre ogwu ijo.” 25 Ogwu enerieen̄ ya ofọfọọk ibe, “Emi ǹkariọọn̄ mè ene ya ìre ijo ene, mè ìkare. Ire, inu ge gaalek nriọọn̄be ìre: Me adasi mgbọ, emi ìre ogwu ǹnàan̄. Ire, me mgbọ keyi, emi gwa ǹkimọọn̄ inu!” 26 Ema enenido ọmọ ibe, “Ìre keke ke îrọ owu me lek? Ìre ìjeje ichili owu chieen̄?” 27 Ogwu enerieen̄ ya ofọfọọk ibe, “Mwuuk lek ikpa inyi enyi, enyi kpeweek igbagban̄. Keke orọ enyi eweekbe ikpọkpọk inọ òso mgbọ iba? Ìre enyi si ekiweek igọgọọk ikana ebi udun̄ ene ya?” 28 Ebi ibot ebi Ju cha ebebene ikitumu ikọ unyechieen̄ inyi ogwu enerieen̄ ya, mè ibe ọmọ, “Owu ore ogwu udun̄ kan̄. Eyi kiji, eji ìre ebi udun̄ kè Mosis. 29 Eji mîriọọn̄ ibe ke Awaji îtumu ikọ inyi Mosis. Ire ogwu enerieen̄ yi, eji kperiọọn̄ ere înan̄abe inu.” 30 Ogwu enerieen̄ ya ofọfọọk ibe, “Lei, ikayaka ìtumu-ma. Ìre ene ogwu òchichili emi chieen̄ ke enyi ekibe ke enyi kperiọọn̄ ere înan̄abe inu? 31 Eji otutuuk mîriọọn̄ ibe ke Awaji ìkakigban̄ utọn̄ me lek uriaak ebi ijo ife; ke ìkigban̄ utọn̄ me lek uriaak ebi ìkimin ọmọ, mè ikirọ inu ọmọ okiweek. 32 Karake inyọn̄ obenebe, ìre ekene orak inọ ibe ke îkaan̄ ogwu òrarak irọ inyi chieen̄ ogwu emanbe ǹnàan̄ ichili? 33 Ire ogwu enerieen̄ yi kpomonan̄a me lek Awaji inu, kpomokọt irọ inu geege.” 34 Ebi ibot ebi Ju cha egagana inyi ogwu enerieen̄ ya ibe, “Ìre owu, ene ogwu òlọlọ ijọn̄ bene me karake emanbe owu oyaka ibonikijeen̄ eji inu?” Ema elalap ogwu enerieen̄ ya isibi me emen uwu ntitiin̄ kiban̄. 35 Jisọs oneninọ ibe ke ebi ibot ebi Ju mîlap ogwu enerieen̄ ya isibi me uwu ntitiin̄ kiban̄. Mgbọ îmun̄be ogwu enerieen̄ ya, inenido ọmọ ibe, “Ìre ochieek me lek Gwun̄ Ebilene?” 36 Ogwu enerieen̄ ya otutumu inyi Jisọs ibe, “Ogwu Nte, ìre ekene ore ene ya? Tumu nyi emi, inyi ǹchieek me lek.” 37 Jisọs ofọfọọk ogwu enerieen̄ ya ibe, “Owu omun̄ ene ya mgbọ keyi. Me atikọ, îre ene ya okitumu ikọ melek kwun̄ mgbọ yi.” 38 Ene ya otutumu inyi Jisọs ibe, “Ogwukaan̄ n̄a, nchieek me lek kwun̄.” Ikọ ya òkitata ene ya me otu, itọtọbọ ibot inyi Jisọs. 39 Jisọs onenitumu ibe, “Emi ǹnu me linyọn̄ keyi inenikpọk mbum inu ebilene ekirọ, inyi, ebi ǹnàan̄ esa me ikeya emọọn̄ inu, mè ebi ìkimọọn̄ inu eyaka ekana enin̄ ǹnàan̄.” 40 Usini ebi Farisi ebi ìkukup me ere ya, mè inọ ikọ ya Jisọs otumube, enenido ọmọ ibe, “Ìre òbebe? Ìre eji mîgọọk inin̄ ǹnàan̄ si?” 41 Jisọs ofọfọọk ema ibe, “Mebe enyi ìre ebi ǹnàan̄, ene geege kpomotip enyi oyerebet ijo inu. Ire, mije enyi ekitumu ibe ke enyi mîkaan̄ chieen̄ isasa imọọn̄ inu, itip-oyerebet ijo inu îbia me ibot kinyi.”

10

1 Jisọs onenitumu inyi ema ibe, “Me atikọ, ogwu ibonin̄ ere ekisun̄ arọọn̄, mè itele otunchit, mè isi isaba ikana me ere ikarege oniin̄ inin̄, ene ya ìre inọ, mè ire si ogwu òkibọkọ ene inu me unye. 2 Ire, ogwu òjeje me otunchit inin̄ emen ere îkisun̄ arọọn̄ kan̄, ene ya ore ogwu òkikpukpo arọọn̄ cha me atikọ. 3 Ene ya si ke ogwu òkibem ere ya okichili otunchit ya inyi, arọọn̄ cha mîra ikigban̄ utọn̄ me ida kan̄. Ọmọ îra ikigwen arọọn̄ kan̄ cha me erieen̄ me erieen̄, mè ikisa ema ije isibi. 4 Ọmọ isisan̄a otutuuk arọọn̄ kan̄ cha isibi, îra ikije me isi kiban̄, ema mîra ikije igọọk ọmọ me udun̄, mije, ema mîriọọn̄ ida kan̄. 5 Ema kpebegọọk ofifi ene. Kpan̄asi ikeya, ema ebelilibi inan̄a, mije, ema kperiọọn̄ ida ofifi ene ya.” 6 Jisọs ìtumu ikọ yi me urọk. Ire, ife cha kpekọt igobo ikọ îkitumu inyi ema itet. 7 Eya orọ, Jisọs okpọkpọk itumu inyi ema ibe, “Me atikọ, emi nre otunchit ere ekisun̄ arọọn̄ ya. 8 Ebi geelek ìdadasi inu me isi n̄a ìre ebi inọ mè ebi ìkibọkọ ene inu me unye. Eya orọ si arọọn̄ cha kpegban̄ utọn̄ me ida kiban̄. 9 Emi nre otunchit ya. Ogwu geelek òjeje me lek n̄a inin̄, mênyan̄a ene ya isibi. Ene ya môkije inin̄ ere ya, mè ikije isibi, mè ikaan̄ inu geelek òkukup ọmọ me uyọt. 10 Ogwu inọ isinu, ìkibum inin̄ uwu, mè ochiin̄ inu, mè òkpan̄ ene, mè ojijaka inu ogwook. Ire, emi ǹnu, inyi ebi ene enan̄a me lek n̄a ekaan̄ ugwem, mè ekaan̄ ejot egak. 11 “Emi nre ata ogwu òkpukpo arọọn̄. Ata ogwu òkpukpo arọọn̄ îbem lek ikwukwu mije arọọn̄ kan̄. 12 Ire, ogwu egwegwen me ọkọ ibe inikpukpo arọọn̄, ìkire isimun̄ egbe okinu ibonikpan̄ arọọn̄ cha, îra ilibi itele arọọn̄ cha, mije, ìkare ọmọ okaan̄ arọọn̄ cha. Egbe ya îra inu inikpan̄ usini arọọn̄ cha, mè iyiyala echi òsisik. 13 Ene ya ìlibi inan̄a mije egwegwen ọmọ me ọkọ. Eya orọ si, arọọn̄ cha ìkakup ọmọ me uyọt. 14 “Emi nre ata ogwu òkpukpo arọọn̄. Emi nriọọn̄ arọọn̄ n̄a, arọọn̄ n̄a si orọriọọn̄ emi. 15 Ike Nte n̄a oriọọn̄be emi, emi nrọriọọn̄ si Nte n̄a, ikeya si ke nriọọn̄ arọọn̄ n̄a, mè ibem lek ikwukwu mkpa mije arọọn̄ n̄a. 16 Nkaan̄ si ofifi owuwa arọọn̄ echi ikakupge me etete urum arọọn̄ kechi, mâtitiin̄ echa si igbaalek. Ema si mêgban̄ utọn̄ me ida n̄a. Mgbọ ya, inu òboyaka inikup ìbore urum arọọn̄ ge mè ogwu òkpukpo arọọn̄ ge. 17 Inu òrọrọ Nte n̄a ima emi ìre ke emi mbem lek iyayaka ugwem n̄a ito, mè ikpọk imọnọ si me mgburudun̄ mgbọ. 18 Kpebesasan̄a ugwem n̄a me unye, îre emi gaalek mbasa me nkeek n̄a iyaka ugwem n̄a ito. Mije, nkaan̄ unye ikakana ugwem n̄a ito, mè ikaan̄ si unye ikpọkpọk imọnọ ugwem ya. Îre Nte n̄a onyi emi unye ibe emi ǹrọ ikeya.” 19 Ikọ ya Jisọs otumube okpọkpọk itap wọlọwọlọ me etete ebi ibot ebi Ju. Ema echeche lek kiban̄ irek iba. 20 Owuwa kiban̄ ekekitumu ibe, “Ijo erumun̄ me ibot ene yi. Eya okirama ọmọ iraak. Ikayaka ìgban̄ ikọ îkitumu.” 21 Ire, usini me lek kiban̄ ekekitumu ibe, “Ikọ îkitumu ìkare ikọ ogwu ijo erumun̄ okupbe me ibot okitumu. Ìre ijo erumun̄ môkọt irọ inyi ogwu ǹnàan̄ imọọn̄ inu?” 22 Inenire mgbọ ebi Ju ekirie ijọk Igwọgwọk Uwu Mbuban, me Jeruselem. Mgbọ ya ìre mgbọ utọọk. 23 Usen ge me emen ijọk ya, Jisọs onenije isi emen ọfọ ge me Uwu Mbuban ekigwen ọfọ kè Sọlọmọn. 24 Ebi ibot ebi Ju egbagban ikana ọmọ okop okop, me ikido ọmọ ibe, “Ìre owu òbolet eji inu me lek isi ire mgbọ owa? Ire owu ore Karais ya, tumu isi ge nyi eji, inyi ibook eji chieen̄.” 25 Jisọs ofọfọọk ema ibe, “Mwuuk lek itumu inyi enyi. Ire, enyi kpechieek. Inu ukechieen̄ echi nkisa me erieen̄ kè Nte n̄a irọ okitumu ogwu nrebe isibi. 26 Ire, enyi kpechieek, mije, enyi kpekup me otu ifuk urum arọọn̄ n̄a. 27 Arọọn̄ n̄a îkigban̄ utọn̄ me ida n̄a. Emi nriọọn̄ arọọn̄ n̄a, arọọn̄ n̄a okekigọọk emi me udun̄, 28 emi nkekinyi ema ugwem ikakaan̄ge itata. Ema si kpebechep, mije, kpunu ogwu òbokọt ibọkọ ema isan̄a emi me ubọk. 29 Nte n̄a ogwu òsasa ema inyi emi omin ichit. Eya orọ, kpunu ogwu òbokọt ibọkọ ema isan̄a me ubọk kè Nte n̄a ogwu òkibem ema. 30 Mije, emi mè Nte n̄a ìre ge.” 31 Mgbọ ebi ibot ebi Ju cha enọbe ikọ ya, ema ekpọkpọk iteen̄ ewuuk ibesa itọbọ ọmọ ikpan̄. 32 Ire, Jisọs otutumu inyi ema ibe, “Nsa unye kè Nte n̄a irọ owuwa ikpele ikwaan̄ ukechieen̄ me etete kinyi. Ìre mije eyi owa me lek otutuuk inu cha nrọbe ke enyi ekiweek isasa ewuuk itọbọ emi ikpan̄?” 33 Ife cha efọfọọk ọmọ ibe, “Ìkare mije inu cha geege. Owu otumu mbuban ikọ. Mije, owu, ebilene ikike, okitumu ibe ke owu ìre Awaji.” 34 Jisọs ofọfọọk ema ibe, “Ìre kpege me emen ikpa Ikan kinyi ibe ke Awaji me lek kan̄ îtumu inyi ebilene ibe ke ọmọ ìbe ke enyi ekup kubọk Awaji? 35 Otutuuk ene mîriọọn̄ ibe ke inu egebe me Ikpa Mbuban ìre atikọ ire mgbọ geelek. Eya orọ, ire Awaji itumu ibe ke ebilene ikike ebi ọmọ oriabe etip kan̄ ijet ekup kubọk Awaji, 36 sa emi ogwu Ogwu Nte ogobobe isibi isun̄ inyi lek kan̄, mè isan̄a iria inu me linyọn̄ ya ye? Ìre enyi ejeje ibe ke emi ntumu mbuban ikọ, mije ntumube ibe ke emi ìre Gwun̄ Awaji? 37 Ire ìkare inu Nte n̄a okirọ ke nkirọ, ikachieek me lek n̄a. 38 Ire, ire enyi imun̄ ibe ke ìre inu Nte n̄a okirọ ke emi nkirọ, ubọk geelek enyi kpechieek me lek n̄a, ìchieek me lek ata-ikọ eyi inu ukechieen̄ cha, inyi enyi ekọt ekween̄, mè egobo etet ibe ke Nte n̄a òwa me emen n̄a okupbe, emi si nkukup me emen kè Nte n̄a.” 39 Mije ikọ keyi Jisọs otumube, ife cha ekpọkpọk iweek itetet ọmọ ikpan̄. Ire, ifọfiọọk isibi me ubọk kiban̄, mè inwọnọ. 40 Jisọs oneninan̄a me ere ya igwu ikom isaba okwaan̄ Jọdan isi ikup me ere Jọn ògwook mun̄ okupbe ikigwook ene mun̄ mgbọ îbenebe ikwaan̄ kan̄. 41 Mgbọ Jisọs okupbe me ere ya, owuwa ene enunu me lek kan̄, mè ikitumu ibe, “Me atikọ, ubọk geelek Jọn ìkarọ inu ukechieen̄ geege, otutuuk inu îtumube ibak ogwu enerieen̄ yi ìre atikọ.” 42 Owuwa ebi ìnunu me ere ya echechieek me lek kan̄.

11

1 Me ike mgbọ ya, ogwu enerieen̄ ge, ogwu Betani, ekigwen Lajọrọs, onenifiak orukan̄ enenen. Ogwu enerieen̄ yi îkaan̄ ngwan̄ ebibaan̄ iba ekigwen Meri mè Mata. 2 Meri ngwan̄ kè Lajọrọs ogwu lek ikanyege yi ore ogwu òsasa aran̄ utop olu iken Okaan̄-ene Jisọs me ukot, mè isa ijeek ibot kan̄ ituku. 3 Ebi ngwan̄ enenwaan̄ iba chi, eneniria etip ijet Jisọs ibe, “Okaan̄-ene, lek ogwu unene kwun̄ ya omabe ìkanye.” 4 Mgbọ Jisọs obọkọbe etip ya, itutumu ibe, “Orukan̄ yi ìkare eyi mkpa, ìborọ inyi ebi ene emun̄ unye Awaji, mè enyi emi Gwun̄ Awaji itọn̄.” 5 Jisọs îma ngwan̄ ita chi, ìrere Mata mè Meri mè Lajọrọs, enenen. 6 Ire, mgbọ îbọkọbe etip orukan̄ kè Lajọrọs, ìkaran lek, mè ìlibi ìsi Betani. Ire, ibabia me ere îkupbe ya egwe iba itoon̄ me inyọn̄. 7 Mgbọ egwe iba cha orakabe, inenitumu inyi ebi udun̄ kan̄ ibe, “Eji enegwu ekom esi Judia.” 8 Ire, ebi udun̄ kan̄ ebebe, “Ogwu Ijejeen̄, ke usen inen keyi ke ebi ibot ebi Ju eweek itetet owu ikpan̄ me Judia. Owu òjeje iboyaka igwu ikom isi ere ya mgbọ keyi?” 9 Jisọs ofọfọọk ema ibe, “Utoon̄ egwe ìkikup akọp mè mbubak mgbọ iba me usen. Ogwu geelek òkije ije me ejit ikarek ìkakitọbọ ukot me lek inu geege, mije, ìkisa utoon̄ egwe eyi linyọn̄ keyi imọọn̄ inu. 10 Îre ogwu òkije ije me eririeen̄ okitọbọ ukot me lek inu, mije, kpunu utoon̄ îkisa imọọn̄ inu.” 11 Mgbọ îtumube ikọ ya isan̄a, inenitumu inyi ebi udun̄ kan̄ ibe, “Lajọrọs ogwu unene kiji îlaak. Ire, mânisi ere ya isi itimi ọmọ me ilaak.” 12 Ebi udun̄ kan̄ ebebe ọmọ, “Okaan̄-ene, ire Lajọrọs ìkilalaak, lek kan̄ mônye.” 13 Ikọ ya Jisọs otumube ìsibi ibe ke Lajọrọs îkwu. Ire, ebi udun̄ kan̄ ekeek ibe ke Jisọs ìbe ke Lajọrọs ìkilaak ata ilaak ikike. 14 Eya orọ, Jisọs onenitumu ibook ema chieen̄ ibe, “Lajọrọs îkwu. 15 Ire, mije kinyi, emi mbele ejit ibe ke ǹkakup me ere ya mgbọ îkwube. Eyi môrọ inyi enyi echieek melek n̄a. Mgbọ yi, eji eneje esi ere îkupbe.” 16 Mgbọ ya, Tọmọs ogwu ekigwen Didimọs (eyi òsisibi bọn iba egbaan̄be iman mgbọ ge) onenitumu inyi ebi melek kan̄ ibe, “Ìna mè eji egọọk Okaan̄-ene eje. Ire iyaka isibi mkpa, eji egọọk ọmọ èkwu.” 17 Mgbọ ema ejebe isi ire Betani, Jisọs oneniweek iriọọn̄ ibe ke mîra ifufuun̄ Lajọrọs karake egwe ini òraraka. 18 Nan̄a me Betani si re Jeruselem ìkajọn̄ọ ere ìso ewuuk ije iba. 19 Eya orọ, owuwa ebi Ju mînan̄a me Jeruselem inu Betani inigọọk ikat Mata mè Meri ejit, mije ngwan̄ kiban̄ enerieen̄ òkwukwu. 20 Mgbọ Mata onọbe ibe ke Jisọs òkinu, inanan̄a ije isibi isi ikweek ọmọ me oniin̄. Ire, Meri obabia me uwu. 21 Mgbọ Mata ochichinibe Jisọs, ibebe ọmọ, “Okaan̄-ene, mebe owu môkup, ngwan̄ n̄a kpomokwu. 22 Ire, nriọọn̄ ibe, ìrere mgbọ keyi ngwan̄ n̄a okwube iraka, inu geelek owu obeekbe me ubọk Awaji, ke Awaji ìborọrọ inyi owu.” 23 Jisọs obebe ọmọ, “Ngwan̄ kwun̄ môjomo me mkpa.” 24 Mata ofọfọọk ibe, “Iin̄, nriọọn̄ ibe ke ngwan̄ n̄a môjomo me mkpa me mgburudun̄ Usen ya.” 25 Jisọs otutumu inyi ọmọ ibe, “Emi nre ijojomo me mkpa, mè ire si ugwem. Ene geelek òchechieek me lek n̄a, ìrere ene ya ìkwukwu, môgat ugwem. 26 Ofifi si, ene geelek òkup me ugwem mè ichieek me lek n̄a, ene ya ìkpoyaka ikwu.” Itutumu ikeya isan̄a, idodo Mata ibe, “Ìre owu ochieek me lek ikọ yi?” 27 Mata ofọfọọk ọmọ ibe, “Iin̄, Okaan̄-ene, nchieek ibe ke owu ore Karais ya, òrere Gwun̄ Awaji, ogwu ekikpọ chieen̄ ibe ìbonu me linyọn̄.” 28 Ikọ yi itata Mata me otu, igwugwu ikom ifo uwu, mè isi igwen Meri ogwu ngwan̄ ida ibọkọ, mè itumu inyi ibe, “Ogwu Ijejeen̄ înu, mè ido emi ibe sa owu ye?” 29 Mgbọ Meri onọbe ikọ ya, igwagwat lek inan̄a ikeke jîp, mè ilibi isibi igọọk Jisọs me oniin̄. 30 Me ike mgbọ ya, Jisọs ìkaninin̄ emen ama ya nu, ìkup si me ere ya Mata ochichinibe ọmọ. 31 Mgbọ ebi ìkup me uwu ito ya ikikat Meri ejit emun̄be ike Meri onan̄abe ikeke jîp, mè isibi oyet, ema ekikeek ibe ke ìbosi ito ito me ere efuun̄be Lajọrọs. Eya orọ, ema enanan̄a isibi igọọk ọmọ me udun̄. 32 Mgbọ Meri orebe ere Jisọs okupbe, mè imun̄ ọmọ, ibeben lek kan̄ isulu me ijọn̄ me ukot kan̄, mè ibe ọmọ, “Okaan̄-ene, mebe owu môkup, ngwan̄ n̄a enerieen̄ kpomokwu.” 33 Mgbọ Jisọs omun̄be ubọk Meri okito ito, mè imun̄ si ubọk ebi Ju ebi melek Meri enube cha ekigọọk ito ito, îsisik ọmọ lek enenen. 34 Inenido ema ibe, “Ìre ere owa ke enyi efuun̄ ogwu enerieen̄ ya?” Ema efọfọọk ọmọ ibe, “Okaan̄-ene, na si kpọ.” 35 Jisọs ototo ito. 36 Ebi Ju ìkekeke me ere ya ebebe, “Jei, ene yi îmun̄ Lajọrọs me chieen̄ me atikọ.” 37 Usini ife cha ekekitumu ibe, “Kè ene yi ogwu òrọrọ mè ogwu ǹnàan̄ imọọn̄ inu okọt orọ si inyi Lajọrọs ikakwu.” 38 Mkpa kè Lajọrọs okpọkpọk isisik Jisọs lek enenen, ijeje isi ere efuun̄be Lajọrọs. Îre udọn̄ lek orioon̄ ke efuun̄ Lajọrọs me emen, mè isa ikpele ewuuk ichit otu. 39 Jisọs oneninyi ida ibe ekpukpọt ewuuk ya esan̄a me otu udọn̄ ya. Ire, Mata ngwan̄ kè Lajọrọs ogwu òkwukwu ya obebe, “Okaan̄-ene, olu nkwukwu ene ya môdun̄u enenen, mije, usen ini ire eya îkupbe me emen udọn̄ ufuun̄.” 40 Jisọs otutumu inyi Mata ibe, “Ìre ǹkatumu ìnyi owu ibe ire ochieek me lek n̄a, ke owu mômun̄ umin mè uja eyi Awaji?” 41 Ikeya ke ema enikpukpọt ewuuk ya isan̄a me otu udọn̄ ufuun̄ ya. Jisọs obebene chieen̄ ikpọ inyọn̄, mè ibe, “Nte n̄a, ntọn̄ owu, mije, owu onọ emi ida. 42 Nriọọn̄ ibe ke owu òkekinọ emi ida mgbọ geelek. Ire, ǹkitumu ikọ kechi mije ife chi ìkekeke me ere yi, inyi ema echieek ibe ke îre owu oria emi inu.” 43 Jisọs itutumu ikọ ya isan̄a, itataan̄ ukpo itumu ibe, “Lajọrọs, sibi na!” 44 Mgbọ yaage, Lajọrọs ogwu òkwukwu ya onanan̄a me udọn̄ ufuun̄ ya isibi inu inikeke, melek ekwut okuket esabe ikat ọmọ me lek, bene me ibot re ubọk mè ukot, mè eyi esabe ichit ọmọ isi. Jisọs oneninyi ife cha ida ibe, “Ìtọn̄ọ ekwut-ufuun̄ cha isan̄a me lek, inyi ije ifo.” 45 Owuwa me lek ebi Ju ebi ìgọgọọk Meri inu me ere ya, mè imun̄ inu ya Jisọs orọbe, echechieek me lek kan̄. 46 Ire, usini kiban̄ egwugwu ikom ifo, mè iben inu ya Jisọs orọbe isi ikpa inyi ebi Farisi. 47 Mgbọ ebi Farisi mè ebi ibot ngwugwa enọbe inu ya òrọrọ, ema egwegwen ntitiin̄ ebi Oru ebi Ju. Mgbọ ema etitiin̄be, ema ekekido lek kiban̄ ibe, “Mgbọ keyi, ìre keke ke eji ekirọ? Ene yi ìkpọkpọ ikirọ owuwa owuwa inu ukechieen̄ ifo isi. 48 Ire eji ikpọkpọ iriaan̄ ere ikeyi, mè itele ibe ikirọ inu chi ifo isi, otutuuk ebi kiji mêkana igọọk ọmọ. Sa me ikeyi, ebi Rom mênenigbugbọ Uwu Mbuban kiji, mè ijijaka ido kiji.” 49 Ene ge me etete kiban̄ ekigwen Keyefas, ogwu òrere ogwu ibot ebi ibot ngwugwa ebi Ju me acha ya onanan̄a ikeke, mè itumu inyi ema ibe, “Enyi kperiọọn̄ inu geege. 50 Ìre enyi kperiọọn̄ ibe ke mônwọn me lek kinyi ire ene ge ikwu me ibot otutuuk ene, igak otutuuk ido ichechep?” 51 Keyefas ìkakpọkpọ ìkeek ikọ ya ìtumu. Ubọk ọmọ orebe ogwu ibot ngwugwa me acha ya, îre nriran ke îben ibe ke Jisọs môkwu mkpa me ibot otutuuk ido ebi Ju. 52 Ìkare me ibot ebi Ju gaalek ke Jisọs obokwu. Ìbokwu si me ibot otutuuk bọn Awaji geelek ìluk me ere geelek me linyọn̄, inyi egbaan̄ ema etitiin̄, mè ema enekana ere otoko ge. 53 Mije ikọ ya Keyefas ogwu ibot ngwugwa otumube, ebi ibot ebi Ju ebebene me usen ya ikitọt ubọk ema ebesa itet Jisọs ikpan̄. 54 Eya orọ, Jisọs ìkayaka ìkọt ìkijijen̄e me etete ebi Ju. Kpan̄asi ikeya, ikpekpebe lek ifo agan̄ emen èwê isi ikup me ama ekigwen Iferem, ọmọ me ebi udun̄ kan̄. 55 Mgbọ mfaka ebi Ju, òrere ijọk Iraraka ogbetbe, owuwa ebi ene enanan̄a me agan̄ geelek, me ata mgbọ, inu me Jeruselem, inyi ema enekaan̄ irek egwọk lek sabum ijọk ya ònobene. 56 Ema enenikisa chieen̄ ikpọ ikana ikiweek Jisọs. Mgbọ ema erebe oyet egep Uwu Mbuban, ema ekekidido lek kiban̄ ibe, “Ìre ene yi môkat ejit inu ijọk yi mọnọ? Ìre enyi ekekeek?” 57 Ire, sabum mgbọ ya, ebi ibot ngwugwa mè ebi Farisi mînyi ida ibe ene geelek òmumun̄ Jisọs me ere geelek, inu inilook ema, inyi ema esi etet ogwugwu.

12

1 Mgbọ îsikbe egwe gweregwen gaalek me lek ijọk Iraraka ya, Jisọs onenire Betani, ama ere Lajọrọs ogwu Jisọs ojomobe me mkpa, olukbe. 2 Ema enenitem inorie ijọk inyi Jisọs me usen ya. Mata ore ogwu òkibeben inorie ijet ebi ichen me lek ikasi. Lajọrọs ogọgọọk ebi ichen cha ikweek me lek ikasi ya ikirie inorie. 3 Meri oneniben ojot ojot iko aran̄ unye otu ewe ge òkidun̄u olu utop utop, isa inibum igwook Jisọs mè ukot, mè isa ijeek ibot kan̄ ituku aran̄ ya me ukot kè Jisọs. Esa inwan̄ ònan̄a me lek uti ekigwen nâdì irọ aran̄ ya, kpewọlọ ofifi inu geege me lek. Olu aran̄ ya okpọkpọk ichit emen uwu ya. 4 Ire, Judas Isikariọt, ene ge me lek ebi udun̄ kè Jisọs, ogwu ònenileke Jisọs inyi ekpan̄ me mgburudun̄ onenibe, 5 “Sa ichep keyi ye? Ìre kpemekọt inyam aran̄ yi, mè isa ikpoko ònan̄a me lek iche inyi ebi ugbọọn̄? Otu ifuk ikpoko esabe ilep aran̄ ya ìre efit dinari ita (òrere ikpoko mêkọtbe isa ikpe mkpukpe ogwu ikwaan̄ ge otutuuk acha ge.)” 6 Judas ìkatumu ikọ ya mije ebi ugbọọn̄, ìtumu ikọ ya mije ọmọ ìre ogwu inọ. Ubọk ọmọ orebe ogwu òkisun̄ akpa ikpoko ebi udun̄ kè Jisọs, îkinween̄ lek itap ubọk me emen akpa ya imọnọ ikpoko isa irọ inu eyi akpalek kan̄. 7 Jisọs onenitumu inyi ọmọ ibe, “Juuk ogwu enenwaan̄ ya tele, ke îtat ubọk îsun̄be aran̄ yi iban mgbọ mkpa n̄a. 8 Ebi ugbọọn̄ melek kinyi ekikup mgbọ geelek. Ire, emi m̀kpakup melek kinyi mgbọ geelek.” 9 Mgbọ ema ekupbe me uwu ya, ogbogbo ebi Ju eweweek iriọọn̄ ibe ke Jisọs òwa me ere ya, mè igbuku inu me ere ya ibenikpọ Jisọs melek Lajọrọs ogwu Jisọs ojomobe me mkpa. 10 Mije keya, ebi ibot ngwugwa etọtọt ibe ke mêkpan̄ si Lajọrọs igbaalek. 11 Mije, îre sa me lek kan̄ ke owuwa ebi Ju etele ebi ibot kiban̄, mè ikana igọọk isi ichieek me lek kè Jisọs. 12 Me òfit iwele kan̄ mgbọ ogbogbo ebi Ju ebi ìnanan̄a inu mije ijọk Iraraka ya enọbe ibe ke Jisọs òkinu me Jeruselem, 13 ema eteteen̄ nlak ikaan̄ me ubọk, mè igbuku inin̄ oniin̄ isi ichichini ọmọ, mè ibene ikitaan̄ ukpo unwọọn̄ ibe, “Osana! Awaji igbana ogwu ònunu me erieen̄ Okumugwem, Awaji igbana ogwu Ubọọn̄ ebi Ijeren!” 14 Jisọs onenimun̄ gwun̄ inyinya akpan ge, mè inene inyọn̄ isiki ikweek, kubọk egebe me Ikpa Mbuban ibe, 15 “Enyi ebi Sayọn, ikatet ukpook. Ìkpọ, ogwu ubọọn̄ kinyi òkinu, ìkilibi me inyọn̄ gwun̄ inyinya akpan inu.” 16 Me mgbọ inu chi okimọnọ irek, ebi udun̄ kè Jisọs kpekọt iriọọn̄ inu îsibibe. Ire, mgbọ Jisọs okwube iraka, mè ijomo me mkpa, mè inene ifo emen inyọn̄, mgbọ ya ke ema enigobo itet ibe ke mîwuuk lek ige otutuuk inu cha ibak Jisọs me emen Ikpa Mbuban, mè igobo itet si ibe ke ebilene mîrọ ọmọ otutuuk inu cha iso, kubọk egebe me emen Ikpa Mbuban. 17 Ebi melek kan̄ ekupbe me Betani ya ekekikpa ikana ere geelek ibe ke Jisọs îgwen Lajọrọs isibi me udọn̄ ufuun̄, mè ijomo ọmọ me mkpa. 18 Mije ukpatu ya ema enọbe, owuwa ene enanan̄a isibi igọọk isi ichichini Jisọs. 19 Mgbọ ebi Farisi emun̄be ubọk ebi ene ekigbuku igọọk Jisọs, usini me lek kiban̄ ekekibe ema, “Ìre enyi erariaan̄ ere? Ìkpọ ubọk otutuuk ebi linyọn̄ ekanabe igọọk ene yi!” 20 Îkaan̄ usini ebi Giris ìgọgọọk inu Jeruselem inenitọbọ ebum inyi Awaji me emen ijọk ya. 21 Ife chi enunu me lek kè Filip ogwu ònan̄a me Betisaida, me agan̄ Galili, mè ibe ọmọ, “Dee, eji ekiweek imumun̄ Jisọs.” 22 Filip osisi itumu inyi Anduru. Anduru melek kan̄ enenigbaan̄ ije isi itumu inyi Jisọs ibe, “Îkaan̄ ebi Giris ìkiweek imumun̄ owu.” 23 Jisọs ofọfọọk ema ibe, “Îkem mgbọ ebi ene ebenyi Gwun̄ Ebilene umin. 24 Me atikọ, ǹkitumu inyi enyi ibe, ire kpetap nkwukwuuk akpa me ijọn̄, mè ikwu, ìkibia si me lek nkwukwuuk ge ya gaalek. Ire, isitap nkwukwuuk akpa me ijọn̄, mè ikwu, îra itibi isibi, mè òto owuwa akpa. 25 Ikeya si, ene geelek òkibọọk ugwem kan̄ me linyọn̄ keyi ìkpofuk ugwem. Ire, ene geelek ikasage ugwem kan̄ ìgwen inu geege me linyọn̄ keyi, ene ya môkaan̄ ugwem kan̄ ire mgbọ ikakaan̄ge itata. 26 Ogwu iweek isisi ikwaan̄ inyi emi, ene ya inu inigọọk emi. Ere geelek mbakup ke ene ya si obokup. Ikeya si, ene geelek òsisi ikwaan̄ inyi emi môkaan̄ umin inan̄a me ubọk kè Nte n̄a. 27 “Mgbọ yi, ejit îsisik emi, ǹkariọọn̄ inu mbatumu. Ìre mâbe Nte n̄a inyan̄a emi isibi me emen ufialek òbonu inyi emi mgbọ keyi mọnọ? Iin̄-iin̄, m̀kpatumu, mije, îre bak me lek ufialek òbonu mgbọ keyi ke emi nnu linyọn̄. 28 Ute, jeen̄ ebilene umin kwun̄.” Ikọ ya itata ọmọ me otu, ida ge onanan̄a me isinyọn̄ ikitumu ibe, “Nra ijeen̄ ebilene umin n̄a. Mâyaka ikpọk ijeen̄ si igbaalek!” 29 Usini ebi ìkeke me ere ya, mè inọ ida ya ebebe ke isinyọn̄ osan̄a amọn. Usini kiban̄ ebebe ke îre ogwu osat ge otumu ikọ inyi Jisọs. 30 Ire, Jisọs onenitumu inyi ema ibe, “Ida ya ìtumu ikọ mije kinyi, ìkare mije n̄a. 31 Mgbọ keyi ore mgbọ ebesibi oyerebet me ibot ebi linyọn̄ keyi. Mgbọ keyi, Awaji môlap ogwu òkikpulu linyọn̄ keyi isan̄a me irek kan̄. 32 Ire emi, mgbọ ebi ene isibene emi ifo inyọn̄ isan̄a me ijọn̄, mâtaba otutuuk ebilene inu me lek n̄a.” 33 Jisọs ìtumu ikọ yi isasa ijeen̄ òjelek mkpa ọmọ obokwu. 34 Ebi urum ene cha etutumu inyi ọmọ ibe, “Eji mînọ inan̄a me Ikpa Mbuban ibe ke Karais ìkpokwu. Owu òjeje ibe ke mêbene Gwun̄ Ebilene ifo inyọn̄? Ire ikeya, ìre ekene ore Gwun̄ Ebilene yi?” 35 Jisọs onenitumu inyi ema ibe, “Utoon̄ ya môgọọk enyi ikup sọnja inyi isi. Eya orọ, ìkije ije mgbọ enyi ekaan̄be utoon̄ ya, sabum udun ònokana òchit enyi. Mije, ogwu òkije me emen udun ìkakiriọọn̄ agan̄ îkije isi. 36 Mgbọ utoon̄ yi okupbe me etete kinyi, ìchieek me lek utoon̄ ya, inyi enyi ekana bọn eyi utoon̄.” Jisọs itutumu ikọ ya isan̄a, ijeje inan̄a me etete ife cha, mè isi ilet inan̄a me chieen̄ kiban̄. 37 Ebi ibot ebi Ju kpechieek si me lek kè Jisọs, ubọk geelek Jisọs orọbe owuwa inu ukechieen̄ chi me isi kiban̄. 38 Eyi îrọ iso ikọ Asaya ogwu nriran otumube ibe, “Okumugwem, ekene ochieek me lek etip eji elookbe? Sa ìre ekene ke Okumugwem ochili unye kan̄ ijeen̄?” 39 Ema kpekọt ichieek si me lek kè Jisọs, kubọk Asaya otumube me ofifi ere ibe, 40 “Awaji îchit ema chieen̄, mè irọ inyi ejit kiban̄ inye, inyi ema ekakọt ìsa chieen̄ kiban̄ ìmọọn̄ inu, mè ekakọt si ìsa ejit kiban̄ ìgobo inu ìtet, mè ìtet ibot, mè ìgwu ìkom ìnu, inyi ọmọ igwa ema.” 41 Asaya ìtumu ikọ ya, mije, îmun̄ umin mè uja kè Jisọs, mè isa me ikeya itumu ikọ ya ibak ọmọ. 42 Ubọk geelek si, owuwa ebi ibot ebi Ju mîchieek me lek kan̄ me mgbọ ya. Ire, kpekọt itumu isibi me isi ebi ene ibe ke ema mîchieek me lek kè Jisọs, mije ukpook ibe ke ebi Farisi mêlap ema isibi me uwu ntitiin̄ kiban̄, 43 mije, ema mîma ibe ebi ene etọn̄ ema igak eyi Awaji obotọn̄ ema. 44 Jisọs onenitaan̄ ukpo itumu ibe, “Ogwu geelek òchechieek me lek n̄a, ìkachieek me lek n̄a gaalek. Ire, ene ya ìchieek si me lek ogwu òraria emi inu. 45 Ogwu imun̄ emi, îmun̄ si ogwu òraria emi inu. 46 Eyi emi nnube linyọn̄, ǹnu kubọk utoon̄, inyi ene geelek òchechieek me lek n̄a ikayaka ìkup me emen udun. 47 “Ire, ene geelek ònọnọ ikọ n̄a, mè ijit irọrọ, emi m̀kpasibi ene ya oyerebet me ibot. Mije, emi ǹkanu inenisibi oyerebet me ibot ebi linyọn̄. Kpan̄asi ikeya, ǹnu ineninyan̄a ebi linyọn̄ isibi me emen ijo inu. 48 “Ire, îkaan̄ ogwu òbosibi oyerebet me ibot ene geelek òjijit emi, mè ijit si ikọ n̄a. Îre ikọ n̄a ya eyi nkitumu obotip ene ya oyerebet me mgburudun̄ Usen ya. 49 Me atikọ, ǹkakpọkpọ ìkeek ikọ me ejit n̄a ìkitumu. Îre Nte n̄a ogwu òraria emi inu okijeen̄ emi ikọ mbatumu, mè ike mbasa itumu. 50 Nriọọn̄ ibe ke ikọ chi Nte n̄a okijeen̄ emi okisa ene isi itap me ugwem ikakaan̄ge itata. Eya orọ, kpunu ikọ geege emi nkitumu inyi enyi, eyi ikarege ikọ Nte n̄a obe emi ǹtumu.”

13

1 Sabum înire usen ijọk Iraraka, Jisọs îriọọn̄ ibe ke îkem mgbọ ọmọ obotele linyọn̄ keyi, mè ifo igọọk ogwu Ute. Bene me ibebene, ọmọ îma ebi ìchechieek me lek kan̄ me linyọn̄ enenen. Eya orọ, me mgbọ keyi, inenichili otutuuk imumechieen̄ kan̄ ijeen̄ ema. 2 Me otu ikakwun̄ usen ya, ema enenigbaan̄ ikweek ikirie inorie. Sabum mgbọ ya, Yọk îwuuk lek itap me ejit kè Judas Isikariọt, gwun̄ kè Saimọn, ibe ileke Jisọs inyi ekpan̄. 3 Jisọs îriọọn̄ ibe ke Nte kan̄ îkana otutuuk inu itap ọmọ me ubọk, mè iriọọn̄ si ibe ke ọmọ ìnan̄a me lek Awaji inu; ke ọmọ ìboyayaka ifo si igọọk Awaji. 4 Eya orọ, inanan̄a ikeke me lek ikasi inorie ya, mè iwọọk ọfọnti inyọn̄ kan̄ isan̄a, mè imọnọ ekwut ikpo itobo me ebon. 5 Itotobo ekwut ya me ebon isan̄a, ibeben mun̄ itọkọ igwook me emen okwa, mè ibene ikigwọk ebi udun̄ kan̄ ukot, mè ikitet utọn̄ ekwut ikpo ya isa ikituku mun̄ isan̄a me ukot kiban̄. 6 Mgbọ îrebe lek kè Saimọn Pita, Saimọn Pita ododo ọmọ ibe, “Okaan̄-ene, ìre owu obonigwọk emi ukot?” 7 Jisọs ofọfọọk ọmọ ibe, “Owu òkariọọn̄-nu inu nkirọ me mgbọ keyi. Ire, mgbọ isikem, owu môriọọn̄.” 8 Pita obebe ọmọ, “Iin̄-iin̄, owu òkpogwọk emi ukot.” Jisọs obebe ọmọ, “Îtata ǹgwọgwọk owu ukot, owu melek n̄a kpebeyaka igbaan̄ inu irọ.” 9 Saimọn Pita obebe ọmọ, “Okaan̄-ene, ire ikeya, ìkare ukot n̄a gaalek ke obogwọk, gwọk ubọk n̄a mè ibot n̄a gbaalek si.” 10 Jisọs ofọfọọk ọmọ ibe, “Ogwu isiken mun̄ isan̄a, îre ukot gaalek ogbe ibe egwọk, mije, otutuuk lek ene ya ìtatana ikup. Ire enyi, enyi etatana ikup. Ubọk geelek, ìkare otutuuk kinyi etana.” 11 Jisọs îriọọn̄ ogwu òboleke ọmọ inyi ekpan̄. Eya orọ îtumube ibe ke ìkare otutuuk kiban̄ etana. 12 Mgbọ îgwọkbe ukot ebi udun̄ kan̄ cha isan̄a, inenimọnọ ọfọnti inyọn̄ kan̄ ya itap, mè isi isiki ikweek me irek kan̄, mè inido ema ibe, “Ìre enyi mîtet ibot me lek inu ya nrọbe inyi enyi? 13 Ike enyi ekigwen emi Ogwu Ijejeen̄ melek Okaan̄-ene, enyi mîgwen itat, mije, ogwu nrebe ire eya. 14 Ire emi Ogwu Ijejeen̄ kinyi mè Okaan̄ kinyi nnigwọk enyi ukot, îgbe ibe ge ikigwọk ge ukot me etete kinyi. 15 Sa me ikeyi, emi nra ijeen̄ enyi inu ikween̄-inu, inyi enyi ekerọ ike emi nrọbe inyi enyi. 16 Me atikọ, ogwu usun̄ ìkakimin ìgak ogwu ute-uwu. Ikeya si, gwun̄ ikwaan̄ ìkakimin ìgak ogwu òraria ọmọ ikwaan̄. 17 Mgbọ keyi enyi eriọọn̄be inu chi, Awaji môgbana enyi, ire enyi ikirọ inu chi. 18 “Ìkare otutuuk kinyi ke ikọ n̄a cha okup inyi. Nriọọn̄ ebi ngobobe. Ire, inu egebe me emen Ikpa Mbuban môrọ iso ike egebe ibe, ‘Ogwu òkigọọk emi igbaan̄ irie inorie îkana ogwu ochicha inyi emi.’ 19 Ǹkikpa inu yi inyi enyi me mgbọ keyi inu yi ikarọge-nu, inyi, ikaan̄ mgbọ inu yi isimọnọ irek, enyi mêsa me ikeya ichieek ibe ke Emi ìre ogwu Nrebe. 20 Me atikọ, ene geelek òbọbọkọ ogwu nriabe inu itap, ìbọkọ emi itap. Ene geelek òbọbọkọ emi itap, ìbọkọ ogwu òraria emi inu itap.” 21 Mgbọ Jisọs otumube ikọ ya isan̄a, ekwukwu kan̄ osisisik enenen. Itutumu inyi ema ibe, “Me atikọ, ene ge me lek kinyi môleke emi inyi ekpan̄.” 22 Ebi udun̄ kan̄ ebebene ikiriraan̄ chieen̄ ikana, ge ikpọ ge, ge okpọ ge, mije, ema kperiọọn̄ ogwu Jisọs okitumu ikọ ya ibak. 23 Ene ge me lek ebi udun̄ kan̄ cha, ogwu Jisọs omun̄be me chieen̄, ìkweek irek me agba lek kè Jisọs me lek ikasi ya. 24 Saimọn Pita onenisa ubọk itọ inyi ogwu enerieen̄ ya ibe ido-nu Jisọs ogwu îkitumu ikọ ya ibak. 25 Ogwu enerieen̄ ya oyayaka lek ibieen̄ me lek kè Jisọs, me ido ọmọ ibe, “Okaan̄-ene, ìre ekene ke ìre?” 26 Jisọs ofọfọọk ibe, “Nsijiin̄ ọkpọkọ fituru me emen efeek usun̄, ogwu mâsabe inyi ore ene ya.” Inenijiin̄ ọkpọkọ fituru ya me emen efeek usun̄, mè isa inyi Judas Isikariọt gwun̄ kè Saimọn. 27 Mgbọ yaage Judas obọkọbe fituru ya, Setan oninin̄ emen kan̄. Jisọs otutumu inyi ọmọ ibe, “Inu ya oborọ, gwat lek rọ.” 28 Ire, kpunu ene geege me lek ebi ìkwekweek me lek ikasi ya òkọkọt iriọọn̄ inu òrọrọ Jisọs otumube ikọ ya inyi Judas. 29 Ubọk Judas orebe ogwu òkisun̄ ikpoko kiban̄, usini kiban̄ ekikeek ibe ke Jisọs ìtumu inyi Judas ibe isi ilep inu ema mêsabe igbaalek irie ijọk ya. Usini ene ekikeek ibe ke ìbe isi iche ikpoko inyi ebi ugbọọn̄. 30 Mgbọ yaage Judas obọkọbe fituru ya, inanan̄a me uwu ya isibi. Mgbọ ya, egwe îfit. 31 Mgbọ Judas onan̄abe isibi, Jisọs otutumu inyi ebi udun̄ kan̄ ibe, “Mgbọ yi, ebilene mêmun̄ umin Gwun̄ Ebilene, mè inan̄a me lek kan̄ imun̄ si umin eyi Awaji. 32 Ebi ene isimun̄ umin eyi Awaji inan̄a me lek Gwun̄ Ebilene, Awaji me lek kan̄ môchili umin eyi Gwun̄ Ebilene ijeen̄ ebilene me ikafiatge mgbọ. 33 “Bọn n̄a, m̀bagọọk enyi ikup sọnja mgbọ gaalek. Ike ntumube inyi ebi ibot ebi Ju, ikeya si ke nkitumu inyi enyi mgbọ keyi. Enyi mêweek emi, ire, ere mbasi ikup, enyi kpebekọt inu. 34 “Mgbọ keyi, ǹkinyi enyi aya ikan. Ìmun̄ lek kinyi me chieen̄. Ike mmun̄be enyi me chieen̄, enyi si, ìmun̄ lek kinyi me chieen̄. 35 Ire enyi imun̄ lek kinyi me chieen̄, otutuuk ene mêsa me ikeyi iriọọn̄ ibe ke enyi ìre ebi udun̄ n̄a me atikọ.” 36 Saimọn Pita onenido Jisọs ibe, “Okaan̄-ene, ìre ere owa ke obosi?” Jisọs ofọfọọk ibe, “Ere mbasi, enyi kpebekọt igọọk emi isi mgbọ keyi. Ire, mgbọ isikem, enyi mênu.” 37 Pita okpọkpọk ido Jisọs ibe, “Okaan̄-ene, ìre keke orọ emi m̀kpakọtbe igọọk owu ije mgbọ keyi? Mbem lek ikwukwu mkpa mije kwun̄.” 38 Jisọs obebe Pita, “Ìre obem lek me atikọ ikwukwu mkpa mije n̄a? Me atikọ, ǹkitumu inyi owu ibe, sabum unọn obosan̄a amọn me eririeen̄ yi, owu môjit emi mgbọ ita.”

14

1 Jisọs onenitumu inyi ebi udun̄ kan̄ ibe, “Ikachieek ibe ejit isisaak enyi. Ìtoon̄ ejit me lek Awaji, mè ìtoon̄ ejit me lek n̄a si. 2 Owuwa agwut òwa me uwu nte n̄a. Ire kpomore ikeya, kè emi ntumu nnyi enyi. Mgbọ yi, mânisi ere ya isi inen̄e irek isun̄ iban enyi. 3 Ire nsi inen̄e irek isun̄ inyi enyi isan̄a, mâgwu ikom inu inikpulu enyi, inyi enyi enegọọk emi ekup me ere mbakup. 4 Enyi mîriọọn̄ oniin̄ ekisa isi ere ya mbasi.” 5 Tọmọs onenibe ọmọ, “Okaan̄-ene, eji kperiọọn̄ ere owu obosi. Ìre eji ebejeje iriọọn̄ oniin̄ ya?” 6 Jisọs ofọfọọk ema ibe, “Emi nre oniin̄, mè atikọ, mè ugwem. Kpunu ene geege òbokọt inu me lek Nte n̄a, îtata ìjeje itibi me lek n̄a. 7 Ire enyi meriọọn̄ emi me atikọ, kè enyi eriọọn̄ Nte n̄a si. Bene me mgbọ keyi, enyi mîriọọn̄ Nte n̄a, mè imun̄ si Nte n̄a.” 8 Filip onenibe ọmọ, “Okaan̄-ene, jeen̄ eji Ogwu Nte, inyi eji emun̄, mè ijot eji owot.” 9 Jisọs ofọfọọk ibe, “Filip, ìre owu òkariọọn̄ emi si karake emi melek kinyi ekupbe mege inire chereyi? Ene geelek òmumun̄ emi îmun̄ si Nte n̄a. Ìre keke orọ enyi enibe emi ǹjeen̄ enyi Nte n̄a? 10 Ìre owu òkachieek ibe ke emi ǹkup me emen kè Nte n̄a; ke Nte n̄a ìkup si me emen n̄a? Ikọ chi nkitumu, ìkanan̄a me unye eyi n̄a gaalek. Îre Nte n̄a ogwu òkup me emen n̄a okirọ ikwaan̄ kan̄ sa me lek n̄a. 11 Eya orọ, ìchieek ikọ nkitumu ibe ke ǹkup me emen kè Nte n̄a; ke Nte n̄a ìkup si me emen n̄a. Ire enyi kpechieek mije ikọ otu n̄a gaalek, ìchieek mije ikwaan̄ ukechieen̄ chi enyi ekimun̄. 12 Me atikọ, ǹkitumu inyi enyi ibe ke ene geelek òchechieek me lek n̄a, môrọ inu chi nkirọ, mè irọ igak echi nkirọ, mije, emi mânifo igọọk Nte n̄a. 13 Inu geelek enyi mêbeekbe me erieen̄ n̄a, mârọ inyi enyi, inyi ebi ene ekenyi Nte n̄a umin sa me lek inu emi ogwu Gwun̄ nrọbe. 14 Ire enyi ibeek inu geelek me erieen̄ n̄a, emi mârọ inyi enyi. 15 Ire enyi ima emi, enyi mêkisun̄ ikan nnyibe enyi. 16 “Mâbeek Nte n̄a ibe iria ofifi ogwu ukarajit ijet enyi inyi inigọọk enyi ikup ire mgbọ ikakaan̄ge itata. 17 Ogwu Nteme yi ìre Ekwukwu Awaji, ogwu òkijeen̄ ene atikọ. Ebi linyọn̄ kpebekọt ibọkọ Ogwu Nteme yi itap, mije, ema kpebemun̄ ọmọ, kpeberọriọọn̄ si ọmọ. Ire, enyi mêriọọn̄ ọmọ, mije, ọmọ ìbokup melek kinyi, mè iluk si me emen kinyi. 18 Emi m̀kpatele enyi kubọk bọn ìnan uga mè ute, mâgwu ikom inu me lek kinyi. 19 Sọnja mgbọ isiraka, ebi linyọn̄ kpebeyaka imun̄ emi ofifi. Ire, enyi mêmun̄ emi. Mije emi nkupbe me ugwem, enyi si mêkup me ugwem. 20 Me usen ya, mgbọ Ekwukwu Awaji mônube, enyi mêriọọn̄ ibe ke emi ǹkup me emen kè Nte n̄a, enyi ekukup me emen n̄a, emi nkukup si me emen kinyi. 21 Ogwu geelek òbọbọkọ ikọ n̄a itap, mè ikirọ ikọ cha, ogwugwa ore ogwu òmumun̄ emi me chieen̄. Ogwu geelek òmumun̄ emi me chieen̄, Nte n̄a mômun̄ ene ya me chieen̄. Emi si mâmun̄ ene ya me chieen̄, mè isa lek n̄a ijeen̄ ene ya.” 22 Judas (ìkare Judas Isikariọt) onenido Jisọs ibe, “Okaan̄-ene, ìre keke orọ obosa lek kwun̄ ijeen̄ eji gaalek, mè itele ebi linyọn̄?” 23 Jisọs ofọfọọk ibe, “Ogwu ima emi, ene ya môkirọ ikọ n̄a. Nte n̄a môma ene ya. Emi melek Nte n̄a si mênu inigọọk ene ya iluk ibia. 24 Ogwu ikamage emi, ene ya ìkporọ ikọ n̄a. Ikọ chi enyi ekinọ emi nkitumu, ìkare emi me lek n̄a nkitumu, îre ikọ Nte n̄a ogwu òraria emi inu obe emi ǹtumu ke nkitumu. 25 Ntumu ikọ chi otutuuk inyi enyi me mgbọ keyi emi melek kinyi ekupbe. 26 “Ire, Ogwu Nteme, òrere Ekwukwu Mbuban ogwu Nte n̄a môriabe inu me erieen̄ n̄a, môjeen̄ enyi otutuuk inu, mè ikeek si enyi otutuuk inu ntumube inyi enyi. 27 Esuuk ke ntele ibe ikup melek kinyi. Esuuk n̄a ke nnyi enyi, ìkare òjelek esuuk eyi ebi linyọn̄ ekinyi ke emi nnyi enyi. Ikasisaak ejit kinyi, ikatet si ukpook. 28 “Enyi mîra inọ emi ntumube inyi enyi ibe ke mâninan̄a itele enyi. Ire, mâyaka igwu ikom inu me lek kinyi. Ire enyi imun̄ emi me chieen̄, enyi mêbele ejit ibe ke emi mânifo igọọk Nte n̄a, mije, Nte n̄a îmin igak emi. 29 Nra itumu inu chi inyi enyi me mgbọ keyi ema kperọrọ-nu, inyi mgbọ ema isinirọ iso, enyi mênichieek ikọ n̄a. 30 Mgbọ keyi, m̀kpayaka itumu owuwa ikọ melek kinyi, mije, ogwu òkikpulu linyọn̄ keyi òkinu. Ogwu òkikpulu linyọn̄ yi ìkakaan̄ unye me lek n̄a kubọk ge. 31 Ire, ǹkiweek ibe ebi linyọn̄ eriọọn̄ ibe ke emi mma Nte n̄a, mè ikirọ otutuuk inu geelek ike Nte n̄a obe emi ǹrọ. Mgbọ yi, ìnan̄a ìkeke mè eji eneje enan̄a me ere keyi.”

15

1 Jisọs onenitumu inyi ebi udun̄ kan̄ ibe, “Emi nre atata olik gerep, Nte n̄a ore ogwu òkikpọ chieen̄ me lek uko gerep ya. 2 Agọọk geelek òkup me lek n̄a, mè ìkato mfut, Nte n̄a îra ikisọp ifiin̄. Ire, agọọk geelek òtoto mfut, Nte n̄a îra ikikpaan̄ lek ijaan̄, inyi ikito owuwa mfut. 3 Ire enyi, enyi mîtana isan̄a sa me lek ikọ ntumube inyi enyi. 4 Ìkup me emen n̄a, ke emi mâkup si me emen kinyi. Ike agọọk geege ìkpokọt ito mfut me lek kan̄ gaalek îtata ìkukup me lek olik gerep ya, ikeya si, enyi kpebekọt ito mfut geege me lek kinyi, îtata enyi ekukup me emen n̄a. 5 Emi nre olik gerep ya, sa enyi ere otu agọọk. Ire ene ikup me emen n̄a, emi nkukup me emen ene ya, ene ya môto owuwa mfut. Isan̄a me lek n̄a, enyi kpebekọt irọ inu geege. 6 Ene geelek ikakupge me emen n̄a, ene ya ìkup kubọk otu agọọk efieekbe itọp ifiin̄, ikukup ichiaak. Òjelek otu agọọk òchachiaak ikeya, ekikpukpulu itap me ukan̄, mè iwọp itaka iriọk. 7 Ire enyi ikup me emen n̄a, mè ikọ n̄a ikup me emen kinyi, ìbeek inu geelek òkup enyi me uyọt, ke mêrọ inyi enyi. 8 Ire enyi ito owuwa mfut, ebi ene mêmun̄ ibe ke enyi ìre ebi udun̄ n̄a, mè isa me ikeya inyi Nte n̄a umin. 9 “Ike Nte n̄a omun̄be emi me chieen̄, ikeya si ke emi mmun̄ enyi me chieen̄. Eya orọ, ìkup me emen imumechieen̄ n̄a. 10 Ire enyi ikirọ ikọ n̄a, enyi mêkup me emen imumechieen̄ n̄a, kubọk emi nrọbe ikọ kè Nte n̄a, mè ikup me emen imumechieen̄ kè Nte n̄a. 11 Ǹkitumu ikọ yi inyi enyi, inyi unwọọn̄ nkaan̄be ikup me emen kinyi, kubọk îkupbe me emen n̄a, mè unwọọn̄ kinyi ijot. 12 Ikan nnyibe enyi ìre ikeyi: Ìmun̄ lek kinyi me chieen̄, kubọk emi mmun̄be enyi me chieen̄. 13 Imumechieen̄ òmimin ichit, eyi ene môkọtbe ikaan̄ me lek ebi unene kan̄ ìre ene ya isasa lek kan̄ inyi ibe ekpan̄ mije ebi unene kan̄. Kpunu ofifi imumechieen̄ òmimin igak ikeya. 14 Ire enyi ikirọ ikọ n̄a, enyi ìre ebi unene n̄a. 15 Mgbọ keyi, ǹkayaka ìgwen enyi ebi usun̄, mije, ogwu usun̄ ìkakiriọọn̄ inu ogwu nte uwu kan̄ okirọ. Kpan̄asi ikeya, ǹkigwen enyi ebi unene n̄a, mije, mkpa inu geelek nkween̄be me ubọk kè Nte n̄a inyi enyi. 16 Ìkare enyi egobo emi. Îre emi ngobo enyi, ibe enyi esi erọ ata ikwaan̄ eyi òbofufuk. Enyi isirọ ikeya, Nte n̄a mônyi enyi inu geelek enyi ebeekbe me erieen̄ n̄a. 17 Eya orọ, ikan nnyibe enyi ìre ikeyi: Ìmun̄ lek kinyi me chieen̄. 18 “Ire ebi linyọn̄ icha enyi, ikawuuk ibe ke ebi linyọn̄ mîdasi icha emi. 19 Mebe enyi ìre ebi linyọn̄, kè ebi linyọn̄ èma enyi kubọk ebi kiban̄. Ire, enyi kpere ebi linyọn̄, mije, ǹgogobo enyi isibi me linyọn̄. Îre eya orọ mè ebi linyọn̄ echa enyi. 20 Ikawuuk ikọ ntumube inyi enyi ibe ke ogwu usun̄ ìkakimin ìgak ogwu ute-uwu. Ire ebi linyọn̄ itutuku emi, mêtutuku enyi si. Ire ema ibọkọ inu njeen̄be ema itap, mêbọkọ si eyi enyi mêjeen̄be ema itap. 21 Ebi linyọn̄ eberọ enyi otutuuk inu chi bak me lek enyi erebe ebi eyi n̄a, mije, ema cha kperiọọn̄ Awaji ogwu òraria emi inu. 22 Mebe emi ǹkanu ìnitumu ikọ ìnyi ema, kpemetip ema oyerebet mije ijo inu. Ire, mgbọ keyi nnube initumu ikọ inyi ema, kpunu inu ema ebesa ikwek lek kiban̄, ire ema ikirọ ijo inu ifo isi. 23 Ogwu icha emi, îcha si Nte n̄a. 24 Mebe ǹkarọ ikwaan̄ ukechieen̄ echi ene geege ikarakge ìrọ me etete kiban̄, kpemetip ema oyerebet mije ijo inu. Ire, mgbọ keyi, ubọk geelek otutuuk kiban̄ esabe chieen̄ imun̄ ikwaan̄ ukechieen̄ nrọbe, ema mîcha emi, mè icha si Nte n̄a igbaalek. 25 Ire, otutuuk inu chi ìkirọ iso inu egebe me ikpa Ikan kiban̄ ibe, ‘Ema mîcha emi me nkarọge ijo inu geege.’ 26 “Ire, Ogwu Nteme ya òrere Ekwukwu òkijeen̄ ene atikọ, ogwu mâriabe inan̄a me agba lek kè Nte n̄a ijet enyi mônu. Isinu, môrọ inyi enyi eriọọn̄ ogwu emi nrebe. 27 Ire, enyi me lek kinyi si, mêtumu ogwu emi nrebe isibi inyi ebi ene, mije, enyi mîgọọk emi ikup bene me ibebene.”

16

1 “Ǹkitumu otutuuk ikọ chi inyi enyi, inyi enyi ekanan̄a ìrọn̄. 2 Mije, ebi ibot ebi Ju mêlap enyi isibi me uwu ntitiin̄ kiban̄. Me atikọ, mgbọ òkinu mgbọ ebi ene mêkpan̄be enyi, mè ikeek ibe ke ata ikwaan̄ ire eya ema ekirọ inyi Awaji. 3 Ema eberọ enyi inu chi, mije, ema kperiọọn̄ Nte n̄a, kperiọọn̄ emi si. 4 Nra itumu inu chi inyi enyi, inyi, mgbọ inu chi isinirọ iso, enyi mêkeek ibe ke emi mwuuk lek itaba enyi ubọk me utọn̄. Ǹkatumu ikọ chi ìnyi enyi bene me ibebene, mije, emi melek kinyi ekup. 5 “Mgbọ keyi, mânigwu ikom ifo igọọk ogwu òraria emi inu. Ire, kpunu ene geege me lek kinyi òdodo emi ibe ìre emi m̀basi owa? 6 Kpan̄asi ikeya, enyi ekifieek ejit mije ikọ chi ntumube inyi enyi. 7 Ire, ǹkitumu atikọ inyi enyi, ifofo n̄a ìbosa nnwọn ijet enyi. Mije, ire ǹkanan̄a ìfo, Ogwu Nteme ya ìkponu inigọọk enyi ikup. Ire, ire nnan̄a ifo, mâria ọmọ ijet enyi. 8 Isinu, mônirọ inyi ebi linyọn̄ eriọọn̄ inu òfolek ijo inu, mè ata irọrọ, mè oyerebet eyi Awaji obosibi me ibot ebilene. 9 Òfo me lek ijo inu, môrọ inyi ebi linyọn̄ eriọọn̄ ibe ke ema mîrọ ijo inu, mije ema ekachieekge me lek n̄a. 10 Òfo me lek ata irọrọ, môrọ inyi ebi linyọn̄ eriọọn̄ ibe ke emi ìre ogwu ata irọrọ sa me lek ifofo eyi mbafo igọọk Nte n̄a me ere enyi kpebeyaka imun̄ emi ofifi. 11 Òfo me lek oyerebet, môrọ inyi ebi linyọn̄ eriọọn̄ ibe ke Awaji môsibi oyerebet me ibot kiban̄, mije, Awaji îwuuk lek itip ogwu òkikpulu linyọn̄ keyi oyerebet. 12 “Îkaan̄ owuwa inu matumube inyi enyi. Ire, enyi kpebekọt igobo otutuuk itet me mgbọ keyi. 13 Mgbọ Ekwukwu òkijeen̄ ene atikọ ya isinu, môjeen̄ enyi otutuuk atikọ. Ìkpotumu ikọ eyi ibot kan̄. Îre ikọ înọbe ke ìbotumu. Môtumu si inu òborọ me mgbọ òkup me isi inyi enyi. 14 Môrọ si inyi ebi ene enyi emi Gwun̄ Awaji umin, mije, inu geelek ìbonichili ijeen̄ enyi ìbonan̄a me ubọk n̄a. 15 Otutuuk inu geelek Nte n̄a okaan̄be ìre echi n̄a. Eya orọ ntumube ibe ke inu geelek Ekwukwu òkijeen̄ ene atikọ ya obochili ijeen̄ enyi ìre inu ònan̄a me ubọk n̄a. 16 “Sọnja mgbọ isiraka, enyi kpebeyaka imun̄ emi. Ire, sọnja mgbọ isiyaka iniraka, enyi mêyaka imun̄ emi.” 17 Usini ebi udun̄ kan̄ ekekidido lek kiban̄ ibe, “Ìre kpasi ikọ ke îkitumu ikeyi ibe, ‘Sọnja mgbọ enyi kpebeyaka imun̄ emi ofifi. Sọnja mgbọ isiyaka iniraka, enyi mêyaka imun̄ emi, mije, m̀basi lek Nte n̄a’?” 18 Ema ekpọkpọ ikidido lek kiban̄ ibe, “Ìre sọnja mgbọ ya îtumube ìsibi keke? Ikọ cha îkitumu, eji kpekọt igobo itet.” 19 Jisọs orọriọọn̄ ibe ke ema ekiweek idodo ọmọ ikọ òfo me lek ikọ ya, mè inido ema ibe, “Ìre enyi ekido lek kinyi ikọ òfolek ikọ ya ntumube ibe, ‘Sọnja mgbọ, enyi kpebeyaka imun̄ emi, sọnja mgbọ si isiyaka iniraka, enyi mêyaka imun̄ emi’? 20 Me atikọ, ǹkitumu inyi enyi ibe, mgbọ enyi ebekito ito, mè ikifieek ejit, îre mgbọ keya ke ebi linyọn̄ ebekinwọọn̄ unwọọn̄. Enyi mêkup me ufieejit, ire, ufieejit kinyi môkana unwọọn̄. 21 Ìkup kubọk enenwaan̄ òboman gwun̄. Ogwu enenwaan̄ ya ìkifieek owot ufiak uman, mije, mgbọ kan̄ îkem. Ire, isiman gwun̄ ya ito, îra iwuuk otutuuk ujat cha mije unwọọn̄ ibe ke ọmọ îman aya gwun̄ isibi me linyọn̄. 22 Ikeya si ke îkup me lek kinyi. Mgbọ keyi ìre mgbọ ufieejit inyi enyi. Ire, mâyaka ikpọk imun̄ enyi. Mgbọ ya, enyi mênwọọn̄ unwọọn̄, kpunu ene geege òbobọkọ enyi unwọọn̄ kinyi. 23 Me usen ya si, enyi kpebeyaka ido emi inu geege. Me atikọ, ǹkitumu inyi enyi ibe, inu geelek enyi mêbeekbe me erieen̄ n̄a, Nte n̄a môrọ inyi enyi. 24 Mege inire mgbọ keyi, enyi kpebeek emi inu geege me erieen̄ n̄a. Ìbeek, ke mênyi enyi, inyi unwọọn̄ kinyi ijot. 25 “Mgbọ keyi, ǹkitumu ikọ me urọk inyi enyi. Ire, mgbọ òkinu mgbọ m̀kpayaka ikitumu ikọ me urọk inyi enyi. Mgbọ ya, m̀bakitutumu ikọ òfolek kè Nte n̄a ichili ibook isi ge inyi enyi. 26 Me Usen ya, îre enyi me lek kinyi ebebeek Nte n̄a inu me erieen̄ n̄a, ìkare emi mbabeek inu me ibot kinyi. 27 Iin̄, Nte n̄a îmun̄ enyi me chieen̄ enenen, mije enyi emun̄be emi Gwun̄ Awaji me chieen̄, mè ichieek si ibe ke emi ǹnan̄a me agba lek Awaji inu. 28 Emi ǹnan̄a me agba lek Nte n̄a inu me linyọn̄. Mgbọ keyi, mâniyaka igwu ikom inan̄a me linyọn̄ ifo igọọk Nte n̄a.” 29 Ebi udun̄ kan̄ enenitumu inyi ọmọ ibe, “Mgbọ keyi, înwọn eji me lek, mije, obene ikitumu ikọ ichili, òkayaka ìtumu ikọ geege me urọk. 30 Mgbọ keyi, eji mîmun̄ ibe ke owu oriọọn̄ inu geelek, mè iriọọn̄ si otutuuk idodo geelek ebi ene ekaan̄be me emen ejit kiban̄. Eya orọ, eji mîchieek ibe ke owu ònan̄a me agba lek Awaji inu me atikọ.” 31 Jisọs obebe ema, “Ìre enyi mîtolek inichieek mgbọ keyi? 32 Ire, mgbọ òkinu, mgbọ ya îra irere isan̄a, mgbọ mêyiyalabe enyi, ogwu ikup ofo uwu kan̄. Mgbọ ya, enyi mêyat itele emi. Ire, emi m̀kpakup emi gaalek, mije, Nte n̄a môkup melek n̄a. 33 “Eya orọ, ǹkitumu ikọ chi inyi enyi, inyi enyi ekup melek n̄a, mè ekaan̄ esuuk, mije, enyi mêmun̄ ufialek me linyọn̄ keyi. Ire, ìkat ejit, mije, emi nra itim ikpan̄ linyọn̄.”

17

1 Mgbọ Jisọs otumube ikọ cha isan̄a, ibebene chieen̄ ikpọ inyọn̄, mè iriaak uriaak ibe: “Nte n̄a, mgbọ ya îkem. Nyi Gwun̄ kwun̄ umin, inyi emi, Gwun̄ kwun̄, ǹnyi owu umin si. 2 Mije, owu onyi emi unye me lek otutuuk ebilene, inyi ǹkennyi otutuuk ebi geelek owu onyibe emi ugwem ikakaan̄ge itata. 3 Mgbọ yi, otutuuk oniin̄ òkukup isasa ikaan̄ ugwem ikakaan̄ge itata ìre irọriọọn̄ owu ogwu ọmọ gaalek orebe Awaji me atikọ, mè irọriọọn̄ si emi Jisọs Karais ogwu owu oriabe inu me linyọn̄. 4 Nrọ otutuuk ikwaan̄ onyibe emi iso, mè isa me ikeya inyi owu umin me linyọn̄. 5 Eya orọ, mgbọ yi, Ute, nyi emi irek umin me agba lek kwun̄, inyi m̀kpọk ǹkaan̄ umin ya eyi nkaan̄be melek kwun̄ sabum enirom linyọn̄. 6 “Nra irọ inyi ebi owu ogobobe isibi me linyọn̄ isa inyi emi eriọọn̄ ogwu owu orebe. Me okpatu, îre owu okaan̄ ema, mè inisa ema ikana itap emi me ubọk. Ema mîsiki ibot inyi ikọ kwun̄. 7 Mgbọ yi, ema mîriọọn̄ ibe ke otutuuk inu owu okanabe itap emi me ubọk ìnan̄a me ubọk kwun̄. 8 Mije, nlook ema etip owu olookbe emi, ema ebọbọkọ itap. Ema mîriọọn̄ ibe, me atikọ, ke emi ǹnan̄a me lek kwun̄ inu, mè ichieek si ibe ke ìre owu oria emi inu me linyọn̄. 9 Eya orọ, ǹkiriaak uriaak me ibot ebi n̄a ebi owu okanabe itap emi me ubọk, mije, îre owu okaan̄ ema. Ǹkariaak uriaak me ibot ebi linyọn̄. 10 Otutuuk inu geelek nkaan̄be ìre echi kwun̄. Otutuuk inu geelek owu okaan̄be ìre echi n̄a si. Umin n̄a mè uja n̄a îsibi utoon̄ sa me lek kiban̄. 11 Emi m̀kpayaka ikup me linyọn̄ ifiin̄ igak ikeya, mânika igọọk owu. Ire, ebi owu onyibe emi chi mêkup me linyọn̄. Eya orọ, Ute Mbuban, bem ema me unye eyi erieen̄ kwun̄, òrere erieen̄ eyi owu onyibe emi, inyi ema ere ge, kubọk emi melek kwun̄ erebe ge. 12 Mgbọ nkupbe melek kiban̄, nsa unye eyi erieen̄ ya owu onyibe emi ibem ema, mè isun̄ ema me utelelek. Eya orọ, kpunu ene geege ònanan̄a me lek kiban̄ ichep, îtata ogwu edọmọbe isan̄a ibe ke ìbochechep, kubọk egebe me emen Ikpa Mbuban. 13 “Mgbọ keyi, emi mânika igọọk owu. Ire, ǹkitumu ikọ chi mgbọ keyi nkupbe me linyọn̄, inyi ebi n̄a chi ekaan̄ unwọọn̄ n̄a ojot ojot me emen kiban̄. 14 Nnyi ema ikọ kwun̄. Eya orọ, ebi linyọn̄ mîcha ema, mije, ema kpere ebi linyọn̄, kubọk emi si nkarege ogwu linyọn̄. 15 Ǹkabeek ibe owu òkpulu ema òsan̄a me linyọn̄. Ire, ǹkibeek ibe owu òchit ema, inyi ogwu ijo ikachak ema ubọk me lek. 16 Ike nkarege ogwu linyọn̄, ema si kpere ebi linyọn̄. 17 Eya orọ, sa atikọ kwun̄ sun̄ ema esese nyi lek kwun̄, mije, ikọ kwun̄ ìre atikọ. 18 Ike owu oriabe emi inu me linyọn̄, ikeya si ke emi nria ema itap me linyọn̄. 19 Mije kiban̄, emi nsun̄ lek n̄a esese, inyi ema esun̄ si lek kiban̄ esese enyi owu me atikọ. 20 “Ire, ǹkariaak uriaak mije ebi udun̄ n̄a gaalek. Ǹkiriaak si mije otutuuk ebi mêchieekbe me lek n̄a inan̄a me lek ata etip eyi ebi udun̄ n̄a chi mêlookbe. 21 Nte n̄a, ǹkibeek ibe owu òrọ inyi otutuuk ebi ìchechieek melek n̄a me linyọn̄ ere ge, kubọk owu okupbe me emen n̄a, emi si nkukup me emen kwun̄. Rọ si inyi ema ekup me emen kiji, inyi ebi linyọn̄ esa me ikeya echieek ibe ke ìre owu oria emi inu me linyọn̄. 22 Umin ya eyi owu onyibe emi, nsa inyi ema si, inyi ema ere ge, kubọk owu melek n̄a erebe ge. 23 Ike owu okupbe me emen n̄a, emi si mâkup me emen kiban̄. Rọ inyi ema otutuuk ekana ere ge kpoi, inyi ebi linyọn̄ eriọọn̄ ibe ke owu oria emi inu; ke owu omun̄ ema me chieen̄, kubọk owu omun̄be emi me chieen̄. 24 “Ute, ǹkiweek ibe otutuuk ebi owu onyibe emi egọọk emi ekup me ere mbakup, mè ekemun̄ umin n̄a eyi owu onyibe emi, mije owu omun̄be emi me chieen̄ sabum enirom linyọn̄. 25 “Ute ogwu ata irọrọ, ubọk geelek ebi linyọn̄ ekariọọn̄ge owu, emi nriọọn̄ owu. Ebi linyọn̄ mîriọọn̄ si ibe ke ìre owu oria emi inu me linyọn̄. 26 Nra irọ inyi ebi linyọn̄ eriọọn̄ ogwu owu orebe, mâkirọ si ikeya ifo isi, inyi imumechieen̄ owu okaan̄be me lek n̄a ikup me emen kiban̄, inyi emi ǹsa me ikeya ǹkup si me emen kiban̄.”

18

1 Mgbọ Jisọs oriaakbe uriaak ya isan̄a, ọmọ mè ebi udun̄ kan̄ enanan̄a me ere ya ije isaba iteke ekigwen Kidọrọn, isi inin̄ emen uko ge ewopbe uti olifu me emen me usaba agan̄ ya. 2 Judas ogwu òleleke Jisọs inyi ekpan̄ îriọọn̄ si ere ya, mije, Jisọs mè ebi udun̄ kan̄ mîwuuk lek ikisi ere ya isi isiki efuuk. 3 Mgbọ Jisọs mè ebi udun̄ kan̄ ekupbe me ere ya, Judas osasa urum ebi akọn̄ mè usini ebi ìkibem Uwu Mbuban, ebi ebi ibot ngwugwa mè ebi Farisi eriabe ibe enetet Jisọs, igbaalek ije inu me ere ya. Otutuuk ife cha mîkaan̄ ukan̄ nlak, mè mkpukan̄, mè nroon̄ akọn̄ me ubọk isa inu. 4 Jisọs orọriọọn̄ otutuuk inu òbosibi inyi ọmọ mgbọ ya, mè inan̄a me etete ebi melek kan̄ isibi ije isi ikweek ife cha, mè ido ema ibe, “Ìre ekene ke enyi ekiweek?” 5 Ema efọfọọk ibe ke ema ekiweek Jisọs ogwu Najeret. Jisọs obebe ema, “Emi ire ene ya.” Judas ogwu òboleke Jisọs inyi ekpan̄ òwa si melek ife cha okekebe. 6 Mgbọ Jisọs otumube inyi ema ibe “Emi ire ene ya,” ema eririki, mè itọp lek inyi udun̄, mè irirọn̄ọ me ijọn̄ọ. 7 Jisọs okpọkpọk ido ema ibe, “Ìre ekene ke enyi ekiweek?” Ema efọfọọk ibe ke ema ekiweek Jisọs ogwu Najeret. 8 Jisọs ofọfọọk ema ibe, “Ntumu inyi enyi ibe ke emi nre ene ya. Ire emi ke enyi ekiweek, ìtet emi, mè ìtele ebi melek n̄a chi, mè efon.” 9 Ikọ yi onenirọ iso ikọ Jisọs otumube inyi ogwu Ute ibe, “Otutuuk ebi owu onyibe emi, kpunu ene geege ògagak emi ichep.” 10 Mgbọ ya, Saimọn Pita owọwọọk oge etim kan̄ isibi, mè ikep gwun̄ uwu ogwu ibot ebi ibot ngwugwa utọn̄ agan̄ ulom ifieek. Erieen̄ ogwu enerieen̄ ya ìre Malikọs. 11 Jisọs ogagana inyi Pita ibe, “Ben oge etim kwun̄ tap me emen ogan. Ìre òkaweek ibe emi ǹnwọ inu ònan̄a me emen ekpen̄ ufialek eyi Nte n̄a obe emi ǹnwọ?” 12 Ebi akọn̄ cha melek ogwu ibot kiban̄, mè ebi ìkibem Uwu Mbuban etetet Jisọs ibọp, 13 mè isa ọmọ idasi inu me isi kè Anas ogwu nte nwa kè Keyefas ogwu ibot ngwugwa me acha ya. 14 Keyefas yi ore ogwu òtutumu inyi ebi Ju ibe ke mônwọn ibe ene ge ikwu mkpa me ibot otutuuk ene. 15 Saimọn Pita mè ofifi ogwu udun̄ kè Jisọs ekekije igọọk Jisọs me udun̄. Mije ogwu ibot ebi ibot ngwugwa oriọọn̄be ogwu udun̄ kè Jisọs keyilọ ya isi, etetele inyi ogwugwa ije iraka inin̄ emen oyet egep ya igọọk Jisọs. 16 Ire, Pita okekeke me otunchit me oyet. Ogwu udun̄ kè Jisọs ogwu ogwu ibot ngwugwa oriọọn̄be isi ya onenisi itumu ikọ melek gwun̄ enenwaan̄ òkibem otunchit ya, mè isa Pita iraka inin̄ emen oyet egep ya. 17 Ogwu enenwaan̄ òkibem otunchit ya onenitumu inyi Pita ibe, “Me atikọ, owu ìre ene ge me lek ebi udun̄ ene yi.” Pita ofọfọọk ibe, “Emi ǹkare!” 18 Ebi ìkisi ikwaan̄ me oyet egep ya, mè ebi ìkibem ere mîsọk ukan̄ me oyet egep ya, mije utọọk, mè ikeke ikana ukan̄ ya ikigwele. Pita ogọgọọk ema ikeke me ere ya ikigwele ukan̄ ya. 19 Otutuuk mgbọ ya, ogwu ibot ebi ibot ngwugwa okekido Jisọs ikọ òfolek ebi udun̄ kan̄ mè ijejeen̄ kan̄. 20 Jisọs ofọfọọk ibe, “Emi ǹkatumu ikọ geege me nlet. Ikọ geelek ntumube, îre me isi ogbogbo ene ke ntumu. Njeen̄ inu me uwu ntitiin̄ me uwu ntitiin̄, mè ijeen̄ si inu me Uwu Mbuban ere otutuuk ebi Ju enikititiin̄. 21 Ìre keke orọ okido emi ikọ? Gwen ebi ìnọnọ ikọ ntumube do. Mije, ìkakaan̄ ogwu me lek kiban̄ ikariọọn̄ge inu ntumube.” 22 Jisọs itutumu ikeya, ene ge me lek ebi ìkibem Uwu Mbuban, ogwu òkeke iriaak me ere ya otatap ọmọ ada me isi, mè igana inyi ọmọ ibe, “Ìre ikeya ke okitumu ikọ inyi ogwu ibot ebi ibot ngwugwa?” 23 Jisọs otutumu inyi ogwu ene ya ibe, “Ire ntumu ikọ ilọ, îgbe ibe owu òsan̄a amọn me lek. Ire, ire ntumu atikọ, ìre keke orọ mè owu òsulu emi?” 24 Anas oneniria Jisọs ikeya, melek olik cha esabe ibọp ọmọ, ijet Keyefas ogwu ibot ebi ibot ngwugwa. 25 Mgbọ Saimọn Pita okekebe me ere ya ikigọọk igwele ukan̄, usini ebi ìkup me ere ya enenido ọmọ ibe, “Ìre owu òkafat ìre ene ge me etete ebi udun̄ kè Jisọs?” Pita okakan̄ ibe, “Ìkare emi!” 26 Ene ge me lek bọn uwu ogwu ibot ebi ibot ngwugwa ya òrere ulọk melek ogwu Pita ofieekbe utọn̄ ya onenido Pita ibe, “Ìre ìkafat ìre owu melek kè Jisọs ke mmun̄ me emen uko olifu ya?” 27 Pita okpọkpọk ikan̄, mè ibe, “Iin̄-iin̄, ìkare emi!” Mgbọ yaage ikọ ya otabe Pita me otu, unọn obebene isan̄a amọn. 28 Me agan̄ egwe, ebi ife cha enenisa Jisọs inan̄a me uwu kè Keyefas isi uwu kè Pailet, ogwu ibot mkpulu ebi Rom etobe ibe ikikpulu agan̄ ya. Mije ogwu ibot ya ikarege ogwu Ju, otutuuk ebi Ju ìgọgọọk isi ere ya kpenin̄ uwu ya. Mije, ininin̄ uwu ya môchaka ema mbuban me lek, mè irọ inyi ema ekakọt ìgọọk ìrie ijọk Iraraka ya. 29 Eya orọ Pailet me lek kan̄ onanan̄a me uwu isibi inu inikweek ema me oyet, mè ido ema ibe, “Ìre kpasi ikan ke ene yi orọn̄?” 30 Ema efọfọọk ibe, “Ire ene yi ìkare ijo ene, eji kpemesa inu me isi kwun̄.” 31 Pailet otutumu inyi ema ibe, “Enyi me lek kinyi ìsa ọmọ ìfo ìsi ìsibi oyerebet me ibot ìgọọk me lek ikan kinyi.” Ema efọfọọk ibe ke ema kpekaan̄ unye ifefieek oyerebet mkpa inyi ene. 32 Inu yi ìrọ ikeya, inyi ikọ Jisọs otumube ibak òjelek mkpa ọmọ obokwu irọ iso. 33 Pailet ogwugwu ikom inin̄ uwu, mè inigwen Jisọs ido ibe, “Ìre owu ore ogwu ubọọn̄ ebi Ju ya?” 34 Jisọs ododo Pailet ibe, “Ìre idodo ya ìnan̄a me ekiket kwun̄, sa ìre òkitumu inu onọbe me otu ebi ofifi ife?” 35 Pailet otutumu inyi Jisọs ibe, “Ìre emi ìre ogwu Ju? Îre ebi kinyi mè ebi ibot ngwugwa kinyi esa owu inu me isi n̄a. Ìre keke ke orọ ilọ?” 36 Jisọs ofọfọọk Pailet ibe, “Me atikọ, ogboon̄ ubọọn̄ n̄a ìkare eyi linyọn̄ keyi. Ire mkpulu n̄a more eyi linyọn̄ keyi, kè ebi ikwaan̄ n̄a etim akọn̄, inyi ebi Ju ekakọt ìtet emi. Ire, mkpulu n̄a ìkare eyi linyọn̄ keyi.” 37 Pailet obebe Jisọs, “Ire ikeya, owu ìre ubọọn̄ ma!” Jisọs ofọfọọk ibe, “Owu otumu itat ibebe ke emi ìre ubọọn̄. Inu òrọrọ emanbe emi inu me linyọn̄ keyi ìre inenitumu atikọ ichili ibook inyi ebilene. Eya orọ, ene geelek òrere ogwu atikọ okigban̄ utọn̄ me lek ikọ n̄a.” 38 Pailet ododo Jisọs ibe, “Ìre keke ire atikọ?” Idodo ikọ ya isan̄a, inanan̄a isibi isi itumu inyi ebi Ju cha ibe, “Ǹkamun̄ inu geege eyi ene yi orọbe ilọ. 39 Ire, îre ọrọmijọn̄ kinyi ibe emi ǹkensan̄a ogwu mkpọn ge ǹsibi me uwu mkpọn ǹnyi enyi me mgbọ ijọk Iraraka geelek. Mgbọ keyi, ìre môneme enyi ibe emi ǹsan̄a ‘ogwu ubọọn̄ ebi Ju’ ǹnyi enyi?” 40 Ema etataan̄ ukpo itumu ibe, “Kasan̄a ogwa! San̄a Barabas sibi nyi eji!” Barabas yi ìre ogwu ògọgọọk itap wọlọwọlọ me ama.

19

1 Pailet onenisa Jisọs inyi ebi akọn̄ ibe esulu me njijan̄. 2 Ebi akọn̄ cha enenisa ukpak ilọk okpibot ubọọn̄, mè isa ikwuun̄ ọmọ me ibot, mè itap ọmọ ujọn̄ọ ọfọnti irio irio eyi ebi ubọọn̄ ekitap. 3 Mgbọ ema ebalabe ọmọ ikeya isan̄a, ema ekekije isi ikitọp ọmọ amọn ibe, “Ogwu ubọọn̄ ebi Ju, eji mînyi owu amọn!” Isitumu ikeya, mîra ikitap ọmọ ada me isi. 4 Pailet okpọkpọk isibi inu initumu inyi ebi Ju ibe, “Ìkpọ, mâsan̄a ene yi isibi inyi enyi, inyi enyi eriọọn̄ ibe ke ǹkamun̄ ikan geege îrọn̄be eyi masabe itip ọmọ oyerebet.” 5 Jisọs oneninan̄a isibi, melek okpibot ubọọn̄ ya esabe ukpak ilọk me ibot, mè ọfọnti ebi ubọọn̄ ya me lek. Mgbọ ya, Pailet otutumu inyi ebi Ju ibe, “Kpọ ene ya ire ogwu!” 6 Mgbọ yaage ebi ibot ngwugwa mè ebi ìkibem Uwu Mbuban emun̄be Jisọs, ema ekekitaan̄ ukpo ibe, “Gon ọmọ kpan̄! Gon kpan̄ me uti nkwurieen̄!” Ire, Pailet ofọfọọk ema ibe, “Enyi me lek kinyi ìsa ọmọ ìsi ìgon ìkpan̄. Emi ǹkamun̄ ikan geege îrọn̄be.” 7 Ebi Ju ekekitumu inyi Pailet ibe, “Eji mîkaan̄ ikan. Igọọk me lek ikan kiji, ene yi ìre ogwu ebekpakpan̄, mije, ìkigwen lek kan̄ Gwun̄ Awaji.” 8 Mgbọ Pailet onọbe ikọ ya, ukpook orọriọọn̄ itet ọmọ. 9 Isasa Jisọs igwu ikom inin̄ uwu, mè isi ido ibe, “Ìre ònan̄a me owa?” Ire, Jisọs ìkafọọk ọmọ inu geege. 10 Pailet ododo ọmọ ibe, “Ìre owu òkpotumu inu geege inyi emi? Ìre òkariọọn̄ ibe ke nkaan̄ unye itetele owu, inyi owu òfo, mè ikaan̄ si unye igogon owu me uti nkwurieen̄?” 11 Jisọs ofọfọọk ọmọ ibe, “Owu kpomokọt ikaan̄ unye geege me lek n̄a ire ìkare Awaji onyi owu unye. Eya orọ, nrọ-nlọ eyi ebi ìsasa emi ijet owu omin igak eyi kwun̄.” 12 Mgbọ Pailet onọbe ikọ ya Jisọs otumube, ibebene ikiweek ike ìbosa irọ mè etele Jisọs inyi ifo. Ire, ebi Ju ekekitaan̄ ukpo itumu inyi Pailet ibe, “Ire otele mè ene yi ifo, owu òkare unene ogwu Sisa. Mije, ene geelek òbebe ke ọmọ ìre ubọọn̄, ìre ogwu ochicha inyi ogwu Sisa.” 13 Mgbọ Pailet onọbe ikọ ya ebi Ju etumube, isasan̄a Jisọs isibi, mè inisiki ikweek me inyọn̄ ogbọọn̄ oyerebet kan̄, me ere ekigwen Gabata me usem Iburu (eyi òsisibi Ogboon̄ Ewuuk). 14 Inu ya ìrọ me òfo ejit ikarek me usen Ibem-lek, òboniwele Usen Mbuban me emen nde ijọk Iraraka. Pailet okukup me ere ya itumu inyi ebi Ju ibe, “Kpọ ogwu ubọọn̄ kinyi ire ogwu!” 15 Ire, ebi Ju cha ekekitaan̄ ukpo ibe, “Ìtet ìsa ìje! Ìtet ìje! Ìgon ìkpan̄ me uti nkwurieen̄!” Pailet onenido ema ibe, “Ìre ǹgon ogwu ubọọn̄ kinyi m̀kpan̄ me uti nkwurieen̄?” Ebi ibot ngwugwa efọfọọk ibe, “Eji kpekaan̄ ofifi ubọọn̄ geege ilọ me lek ogwu Sisa.” 16 Itata kan̄, Pailet okakana Jisọs itap ema me ubọk inyi esa esi egon ekpan̄. 17 mè ibene uti nkwurieen̄ ebesa igon ọmọ itoon̄ ọmọ ibe ibeme, mè isa ọmọ ije inan̄a isi ere ekigwen Gọligọta me usem Iburu (eyi òsisibi Ere Ngigọ Ibot Ene). 18 Me ere ya ke ema enigon Jisọs me inyọn̄ uti nkwurieen̄ ya. Îkaan̄ si ene iba egonbe me ere ya melek kan̄, ene ge me agan̄ ulom kan̄, ene ge me agan̄ ujit kan̄, mè igon ọmọ me etete. 19 Pailet onenige ulook inyi egon me inyọn̄ uti nkwurieen̄ ya. Inu îgebe ya ìre, JISỌS OGWU NAJERET, OGWU UBỌỌN̄ EBI JU. 20 Ere egonbe Jisọs îgbet ere me lek ama. Ulook ya si, ege me usem Iburu, mè usem ebi Rom òrere Latin, mè ige si me usem ebi Giris. Eya orọ, owuwa ebi Ju mîmun̄ ulook ya, mè ifuk. 21 Ebi ibot ngwugwa ebi Ju enenisi lek kè Pailet, mè isi itumu inyi ibe, “Ìkanwọn ubọk ogebe, ‘Ogwu ubọọn̄ ebi Ju.’ Kpan̄asi ikeya, ge ibe ke ene yi ìbe ke ọmọ ìre ogwu ubọọn̄ ebi Ju.” 22 Pailet ofọfọọk ema ibe, “Inu ngebe, nge isan̄a.” 23 Mgbọ ebi akọn̄ cha egonbe Jisọs isan̄a, ema eneniteen̄ ọfọnti kan̄ iche irek ini inyi lek kiban̄, ene ge irek ge. Inenisik ọfọnti irak kan̄. Ọfọnti irak ya, elọlọk bene me inyọn̄ re ijọn̄, kpunu ere geege egbabe ichim me lek. 24 Ema enenitọt ibe mè ema ekagwak ọfọnti ya, mè ema eneroon̄ nriroon̄ esa eriọọn̄ ogwu ebesa inyi. Inu ya ìrọ ikeya isasa irọ iso inu egebe me Ikpa Mbuban ibe, “Mîkpulu ọfọnti n̄a iche inyi lek kiban̄, mè iroon̄ nriroon̄ mije ọfọnti irak n̄a.” Inu ya egebe me Ikpa Mbuban ke ebi akọn̄ cha erọ si iso. 25 Meri nga kè Jisọs, mè ogwu ngwan̄ enenwaan̄, mè Meri nwa kè Kilopas, mè Meri ogwu Magidala òwa me agba lek uti nkwurieen̄ ya egonbe Jisọs me inyọn̄. 26 Mgbọ Jisọs oraan̄be chieen̄ imun̄ ogwu uga, mè imun̄ si ogwu udun̄ kan̄ ogwu îmun̄be me chieen̄ ekekebe me ere ya, itutumu inyi ogwu uga ibe, “Uga, kpọ gwun̄ kwun̄ enerieen̄ ire ogwa,” 27 mè itumu inyi ogwu udun̄ kan̄ ya ibe, “Kpọ nga kwun̄ ire ogwa.” Bene me mgbọ ya, ogwu udun̄ kè Jisọs ya osasa nga kè Jisọs ifo uwu kan̄, inyi inigọọk ọmọ ikup. 28 Sọnja mgbọ iraraka, Jisọs imumun̄ ibe ke ọmọ îra irọ otutuuk ikwaan̄ kan̄ isan̄a, inenitumu ibe, “Ebek îrak emi.” Ikọ ya onenirọ iso inu egebe me Ikpa Mbuban. 29 Ema enenimọnọ ise ijiin̄ me emen miin̄ òkitop njijin njijin eyi etapbe me emen ugọn̄ ge iyik me ere ya, mè iniben ise ya mè miin̄ me lek inwaan̄ me otu uti haisop, mè ibene ifo inyọn̄ isa itap ọmọ me otu. 30 Mgbọ Jisọs ofipbe miin̄ ya isan̄a, itutumu ibe, “Îta.” Ikọ ya itata me otu, ikakana ibot isiki, mè itọbọ. 31 Inu ya ìrọ me usen Ibem-lek, eyi òfit iwele kan̄ obonire Usen Mbuban òsisibi esese mije mfaka ijọk Iraraka ya. Me ọrọmijọn̄ ebi Ju, nkwukwu ene ìkakijeen̄ me inyọn̄ uti nkwurieen̄ me Usen Mbuban. Eya orọ, ebi ibot ebi Ju enenisi ibeek Pailet ibe inyi ida mè efaan̄ ukot ebi ene ita egonbe me uti nkwurieen̄ cha, inyi egwat lek ekwaan̄, inyi esan̄a ema esa esi efuun̄. 32 Pailet onyinyi ida, ebi akọn̄ enunu me lek ebi egonbe igbaalek kè Jisọs cha, mè ifaan̄ ukot ogwu adasi, mè ifaan̄ si echi ogwu òso iba. 33 Mgbọ ema enube me lek kè Jisọs, mè imun̄ ibe ke îkwu isan̄a, ema kpefaan̄ ukot kan̄. 34 Ogwu akọn̄ ge me etete kiban̄ osasa otunwa ichim Jisọs me agba nkan̄. Mgbọ yaage, eje mè mun̄ ogbọgbọọk isibi. 35 Ogwu òkukup isa chieen̄ kan̄ imun̄ otutuuk inu cha òrọrọ ore ogwu ògege inu cha ọmọ omun̄be inyi enyi, inyi enyi esa me lek ikọ kan̄ echieek. Ikọ ene ya okitumu ìre atikọ. Ọmọ îriọọn̄ si ibe ke ọmọ ìkitumu atikọ. 36 Inu chi òmọmọnọ irek îrọ iso inu egebe me Ikpa Mbuban ibe, “Kpunu ukwuuk geege efan̄abe me lek kan̄.” 37 Mîge si me ofifi ere me Ikpa Mbuban ibe, “Ebi ene mêbene chieen̄ ikpọ ogwu ema esabe otunwa ichim.” 38 Sọnja mgbọ iraraka, ogwu enerieen̄ ge ekigwen Josefu, ogwu ònan̄a me ama ekigwen Arimatia, onenisi ibeek Pailet ibe itele inyi ọmọ iben nkwukwu kè Jisọs isi ifuun̄. Josefu yi ìre ene ge me lek ebi udun̄ kè Jisọs. Ire, ìkasan̄a lek kan̄ ìsibi kubọk ogwu òchechieek me lek kè Jisọs, mije ukpook ebi Ju. Mgbọ Josefu obọkọbe unye me ubọk kè Pailet, inenisi ijene nkwukwu kè Jisọs isibi me inyọn̄ uti nkwurieen̄. 39 Nikodimọs, ogwu òsisi lek kè Jisọs me eririeen̄ ya, îgọọk Josefu ije ije ya. Nikodimọs onenisa ugwun̄ esabe ikpọk uti mâa mè alò igbaan̄ igwa, eyi ekisa irọ inyi nkwukwu ene ikajọ, ikaan̄ me ubọk inu. Ugwun̄ ya îsabe inu îlobo ikup kubọk akpa uchi ilile iba. 40 Mgbọ ebirieen̄ iba chi esan̄abe nkwukwu kè Jisọs isibi ijọn̄, ema enenisa ekwut okuket ikat ikana otutuuk lek, mè ikigwook ugwun̄ cha igbaalek igọọk me ubọk ebi Ju ekisa ifuun̄ ene. 41 Uko ge òwa me agba lek ere egonbe Jisọs ikpan̄. Me emen uko ya, ayaya udọn̄ ufuun̄ ge erọkọbe me lek ewuuk òwa si eyi kperarak ifuun̄ ene geege me emen. 42 Eya orọ, ubọk usen ya orebe usen ekibem lek iban Usen Mbuban, ema ebeben nkwukwu kè Jisọs isi ifuun̄ me emen udọn̄ ya, mije, îgbetbe me ere ya.

20

1 Me agan̄ egwe, me usen Awaji, sabum egwe onitoon̄, Meri ogwu Magidala onenije isi udọn̄ ere efuun̄be Jisọs. Mgbọ îrebe ere ya, imumun̄ ibe ke mîkpukpọt ewuuk esabe ichit otu udọn̄ ufuun̄ ya isan̄a. 2 Igwugwu ikom mgbọ yaage, mè ilibi ekot ekot isi ilook Saimọn Pita melek ogwu udun̄ kè Jisọs ya, ogwu Jisọs omun̄be me chieen̄, ibe, “Ìkpọ, ebi ene mîniben nkwukwu Okaan̄-ene isan̄a me emen udọn̄ ufuun̄. Eji kperiọọn̄ ere ebenbe isi isun̄.” 3 Pita mè ogwu udun̄ keyilọ ya enanan̄a ilibi isi udọn̄ ufuun̄ ya isi ikpọ. 4 Mgbọ ema ekilibi, ogwu udun̄ keyilọ ya olilibi iraka Pita, mè idasi isi ire udọn̄ ufuun̄ ya, 5 mè igele ikwuun̄ ikitaak chieen̄ ikpọ emen udọn̄ ya, mè imun̄ ekwut okuket cha esabe ikat Jisọs ifuun̄ olaakbe ikeya me emen udọn̄ ya. Ire, ọmọ me lek kan̄ ìkanin̄ emen udọn̄ ya. 6 Saimọn Pita onenire mgburudun̄, mè iraka inin̄ emen udọn̄ ya, mè imun̄ si ekwut okuket cha olaakbe, 7 mè imun̄ si eyi esabe ikat ọmọ me ibot okatbe ikup esese me agan̄ ge, ọmọ gaalek. 8 Ogwu udun̄ keyilọ ya, ogwu òdadasi inire otu udọn̄ ufuun̄ ya, onenigọọk inin̄ emen udọn̄ ya, mè imun̄ otutuuk inu cha, mè ichieek ibe ke Jisọs îjomo me mkpa. 9 Mege inire mgbọ ya, ebi udun̄ kè Jisọs kpekọt igobo itet inu egebe me Ikpa Mbuban ibe ke Jisọs môjomo me mkpa. 10 Ebi udun̄ kè Jisọs iba cha enenigwu ikom ifo uwu kiban̄. 11 Ire, Meri ogwu Magidala okpọkpọk isi ere ya, mè ikeke me otu udọn̄ ya ikito ito. Mgbọ îkito ito ya, inenikwuun̄ isi, mè itaak chieen̄ ikpọ emen udọn̄ ya, 12 mè imun̄ ebi osat Awaji iba, etapbe ọfọnti okuket, mè isiki ikweek me ere mgbọ emaan̄be nkwukwu kè Jisọs, ogwu ge okweek me agan̄ ibot, ogwugwulọ okweek me agan̄ ukot. 13 Ebi osat cha enenido Meri ibe, “Ogwu enenwaan̄, ìre keke orọ okito ito ikeyi?” Meri ofọfọọk ema ibe ke ebi ife ge mîniben nkwukwu Okaan̄ kan̄ isan̄a me udọn̄ ufuun̄ yi; ke ọmọ ìkariọọn̄ ere ebenbe isi isun̄. 14 Ikọ ya me otu kan̄, iraraan̄ chieen̄ me udun̄, mè imun̄ Jisọs okekebe me ere ya. Ire, ìkariọọn̄ ibe ke ìre Jisọs. 15 Jisọs ododo ọmọ ibe, “Ogwu enenwaan̄, ìre keke orọ okito ito? Ìre ekene ke okiweek?” Ubọk ere ya orebe emen uko, Meri ìkikeek ibe ke Jisọs ìre ogwu òkisi ikwaan̄ me uko ya. Eya orọ, idodo ọmọ ibe, “Ogwu nte, ire owu oben nkwukwu kan̄ isan̄a, soso, sa emi si jeen̄ ere osun̄be, inyi ǹsi m̀ben.” 16 Jisọs onenigwen ọmọ “Meri!” Meri oririki, mè igwu ikom, mè ilibi igọọk Jisọs, mè itaan̄ ukpo igwen ọmọ me usem Iburu, “Rabonai!”, (eyi òsisibi Ogwu Ijejeen̄). 17 Jisọs obebe Meri, “Kakpọkpọ ìgọbọ emi ìkaan̄, mije, ǹkasi-nu lek Nte n̄a. Kpan̄asi ikeya, fo si look ebi ngwan̄ n̄a ibe ke emi gwa ǹkisi lek Nte n̄a, mè Nte kinyi, òrere Awaji n̄a, mè Awaji kinyi.” 18 Meri ogwu Magidala ya onenisa etip isi ilook ebi udun̄ kè Jisọs kechilọ ibe ke ọmọ îmun̄ Okaan̄-ene, mè ikpa si inu îtumube melek kan̄ inyi ema. 19 Me ikakwun̄ usen ya, òrere usen Awaji, otutuuk ebi udun̄ kan̄ etititiin̄ me uwu, me igon otutuuk isotu, mije ukpook ebi ibot ebi Ju. Jisọs okpọkpọ ikana isibi, mè ikeke me etete kiban̄, mè ibe ema, “Esuuk ikup inyi enyi!” 20 Mgbọ îtumube ikọ ya isan̄a inyi ema, inenijeen̄ ema ubọk kan̄ ere egonbe itibi, mè agba nkan̄ kan̄ ere echimbe itibi. Mgbọ ebi udun̄ kan̄ emun̄be Okaan̄-ene, ejit obebele ema enenen. 21 Jisọs okpọkpọk itumu inyi ema ibe, “Esuuk ikup inyi enyi! Ike Nte n̄a oriabe emi inu, ikeya si ke emi nkiria enyi isibi mgbọ keyi.” 22 Ikọ keya itata ọmọ me otu, ichocho efuuk igwook ema me lek, mè ibe ema, “Ìbọkọ Ekwukwu Mbuban. 23 Ene geelek enyi etelebe ijo kan̄ inyi, Awaji môtele si ijo ene ya inyi ene ya. Ene geelek enyi ekatelege ijo kan̄ ìnyi, Awaji ìkpotele si ijo ene ya inyi ene ya.” 24 Tọmọs ogwu ekigwen Didimọs, ene ge me lek ebi akọp mè ebi otuchieen̄ iba kè Jisọs, kpunu me ere ya mgbọ Jisọs osibibe me isi ebi otuchieen̄ kan̄. 25 Mgbọ ebi udun̄ kan̄ ekpabe inyi Tọmọs ibe ke ema mîmun̄ Okaan̄-ene, Tọmọs obebe, “Îtata m̀mumun̄ akpat omimin cha me ubọk kan̄, mè itap otubọk n̄a me ere ya, mè itap ubọk n̄a me akpat unan eyi òkup ọmọ me agba nkan̄ ya, m̀kpachieek ibe ke enyi ekitumu atikọ.” 26 Mgbọ nde ge orakabe, ebi udun̄ kan̄ ekpọkpọk ititiin̄ iso isi me uwu ya, Tọmọs melek kiban̄. Egogon si otutuuk isotu. Jisọs okakana isibi mè etete kiban̄, mè ibe ema, “Esuuk ikup inyi enyi!” 27 Inenitumu inyi Tọmọs ibe, “Kpọ ubọk n̄a ire eyi. Sa otubọk kwun̄ na tap me ere keyi, mè nyana ubọk kwun̄ tap si me agba nkan̄ n̄a, mè kayaka ìkaan̄ ejit iba. Chieek!” 28 Tọmọs otutumu inyi Jisọs ibe, “Ogwukaan̄ n̄a mè Awaji n̄a!” 29 Jisọs onenibe ọmọ, “Ke otolek inichieek mgbọ keyi osabe chieen̄ kwun̄ imun̄ emi? Ire, ugbana môkup inyi ebi ìchechieek me ekasasage chieen̄ ìmun̄.” 30 Jisọs îrọ si ofifi owuwa uyeke inu ijejeen̄ echi ekagege me emen ikpa yi. 31 Ire, echi egebe me emen ikpa yi, ege, inyi enyi esa me lek kechi echieek ibe ke Jisọs ore Karais ya, òrere Gwun̄ Awaji, mè esa me lek ichechieek ya ekaan̄ ugwem ikakaan̄ge itata inan̄a me lek erieen̄ kan̄.

21

1 Mgbọ usen inen mè inen orakabe, Jisọs okpọkpọk isibi me isi ebi udun̄ kan̄ me agba okwaan̄ oyô Taiberias. Ikeyi ke inu ya orọ: 2 Me ike mgbọ ya, Saimọn Pita, mè Tọmọs ogwu ekigwen Didimọs, mè Natanien ogwu Kena eyi òkup me Galili, mè bọn ebirieen̄ iba kè Jebidi, mè ofifi ene iba ebi udun̄ kè Jisọs egbaan̄ ikup me ere ge. 3 Pita onenitumu inyi ema ibe ke ọmọ mônisi njin. Ema ebebe, “Ire ikeya, eji mêgọọk owu isi.” Ema eninin̄ uji ikọp isibi okwaan̄ isi mbọm. Ire, eririeen̄ usen ya, ema kpetet kubọk ufuk irin̄ ge. 4 Me otu ewelegwe, Jisọs onenikeke me agba okwaan̄ oyô ya. Ire, ebi udun̄ kan̄ cha kperiọọn̄ ibe ke ìre ọmọ okeke me ere ya. 5 Jisọs onenibọn̄ọ ema ido ibe, “Ebi une n̄a, ìre enyi mîtet irin̄?” Ema efọfọọk ibe, “Iin̄-iin̄, eji kpetet kubọk ge.” 6 Jisọs onenibe ema, “Ìtọp njin me agan̄ ubọk ulom kinyi, ke enyi mêtet irin̄.” Ema ebeben njin itọp me agan̄ ulom ya. Mgbọ ema ebenebe njin ya ikitaba, irin̄ îwa me emen njin ya enenen, mè isa ulobo kan̄ ikeme njin ya. Ema kpekọt itaba njin ya itap me uji. 7 Ogwu udun̄ kè Jisọs ge ya, ogwu Jisọs omun̄be me chieen̄, otutumu inyi Pita ibe, “Kpọ, Okaan̄-ene ke ìre!” Mgbọ yaage Pita onọbe ogwu melek kan̄ otumube ibe ke ene ya ìre Okaan̄-ene, igwagwat lek imọnọ ọfọnti inyọn̄ îwọọkbe isun̄ itobo me ebon, mè iwulu irọn̄ me mun̄, mè igwọk igọọk Jisọs. 8 Ebi udun̄ kan̄ kechilọ ekọkọp me uji, mè ikitaba njin ya emen mun̄ emen mun̄ inire otu ijọn̄, mije, ere ema ekupbe itọp njin ya ìkajọn̄ọ ere me otu ijọn̄, ìkup kubọk akọp ejit go mè ọkpọkọ gaalek. 9 Mgbọ ema enube inire ijọn̄, ema enenimun̄ mbubuuk ukan̄ okigeen̄ me ere ya, mè imun̄ irin̄ ekiwọwọp me emen ukan̄ ya, mè imun̄ si fituru inen mè inen me ere ya. 10 Jisọs onenibe ema, “Ìsa usini irin̄ enyi etetbe ìna.” 11 Saimọn Pita owuwulu inin̄ emen uji, mè isi itaba njin, melek irin̄ me lek, itoon̄ me ijọn̄. Irin̄ îwa ijot lek njin ya gboi. Otutuuk efit irin̄ ile mè akọp go mè ita okup me emen njin ya. Ire, kubọk chieen̄ njin ge ìkagbeme me lek. 12 Jisọs ogwegwen ema ibe, “Ìna ìnirie inorie ewelegwe!” Kpunu ene geege òkọkọt ido ọmọ ibe, “Ìre owu ìre ekene?” Mije, ema mîriọọn̄ ibe ke ìre Okaan̄-ene. 13 Jisọs onunu, mè inimọnọ fituru cha iche inyi ema, mè inyi ema irin̄ cha si igbaalek. Ema etataka. 14 Eyi ore òso mgbọ ita Jisọs osibibe me isi ebi udun̄ kan̄ karake îjomobe me mkpa. 15 Mgbọ ema eriebe inorie ya isan̄a, Jisọs onenigwen Saimọn Pita ido ibe, “Saimọn, gwun̄ kè Jọn, ìre omun̄ emi me chieen̄, me atikọ, igak otutuuk inu chi geelek?” Pita ofọfọọk ọmọ ibe, “Iin̄, Okaan̄-ene, owu oriọọn̄ ibe ke mmun̄ owu me chieen̄.” Jisọs otutumu inyi ibe, “Ire ikeya, kpukpo arọọn̄ n̄a.” 16 Jisọs okpọkpọk ido Pita ibe, “Saimọn, gwun̄ kè Jọn, ìre omun̄ emi me chieen̄ me atikọ?” Pita okpọkpọk ifọọk si ibe, “Iin̄, Okaan̄-ene, owu oriọọn̄ ibe ke mmun̄ owu me chieen̄.” Jisọs otutumu inyi Pita ibe, “Kpukpo arọọn̄ n̄a.” 17 Jisọs okpọkpọk ido si Pita òso mgbọ ita ibe, “Saimọn, gwun̄ kè Jọn, ìre omun̄ emi me chieen̄?” Idodo ya Jisọs odobe Pita òso mgbọ ita ibe, “Ìre omun̄ emi me chieen̄,” ofefieek Pita me lek enenen. Ifọfọọk Jisọs ibe, “Okaan̄-ene, owu oriọọn̄ inu geelek. Owu orioon̄ si ibe ke mmun̄ owu me chieen̄.” Jisọs otutumu si inyi Pita ibe, “Kpukpo arọọn̄ n̄a. 18 Me atikọ, mgbọ owu okupbe ijija, owu gaalek okitobo fanti kwun̄, mè ikinen̄e lek kwun̄ isun̄, mè ikije isi ere geelek òneneme owu. Ire, osikan, owu môbene ubọk kwun̄, inyi ofifi ene itobo owu olik me ebon, mè isa owu ije isi ere owu okaweekge isisi.” 19 Jisọs ìtumu ikọ ya isasa ijeen̄ òjelek mkpa Pita obokwu, eyi òbonyi Awaji umin. Itutumu ikọ chi isan̄a, inenitumu inyi Pita ibe, “Gọọk emi!” 20 Pita oraraan̄ chieen̄ me udun̄, mè imun̄ ogwu udun̄ kè Jisọs ya ogwu Jisọs omun̄be me chieen̄ okije igọọk ema. (Ogwugwu ore ogwu òyayaka lek ibieen̄ me lek kè Jisọs me lek ikasi mgbọ ema ekupbe ikirie inorie, mè ido Jisọs ibe, “Okaan̄-ene, ìre ekene ire ogwu òboleke owu inyi ekpan̄?”) 21 Mgbọ Pita omun̄be ogwu enerieen̄ yi okigọọk ema, Pita ododo Jisọs ibe, “Okaan̄-ene, sa ogwugwu ye?” 22 Jisọs ofọfọọk ibe, “Ire mweek ibe mè ene ya ikup me ugwem mege ire mgbọ mâgwube ikom inu, ìre eyi owa ogbaan̄ owu me lek? M̀be owu, gọọk emi!” 23 Mije keyi, ukpatu obebene ikitaan̄ ikana me etete ebi ìchechieek me lek kè Jisọs ibe ke ogwu udun̄ kè Jisọs yi ìkpokwu. Ire, Jisọs me lek kan̄ ìkatumu ibe ke ene ya ìkpokwu. Ire, ikọ îtumube ìre, “Ire mweek ibe ene ya ikup me ugwem mege ire mgbọ mâgwube ikom inu, ìre eyi owa ogbaan̄ owu me lek?” 24 Ogwu udun̄ kè Jisọs yi ogwu ekitumu ikọ yi ibak ore ogwu òkpakpa otutuuk inu chi, mè ige si itap me ikpa. Otutuuk kiji mîriọọn̄ ibe ke inu chi îkpabe ìre atikọ. 25 Jisọs îrọ si owuwa inu echi ekagege me emen ikpa yi. Ire ibe ege otutuuk cha etap me ikpa, emi ǹkakeek ibe ke otutuuk linyọn̄ môkọt ita otutuuk ikpa echi mêgebe inu cha itap.