Gha ta ghena
1 Ma te gha ta pɛtɛa wəshi ne, nahe Ghena ta Shala kenza shɛ. Nahe Ghena kese le Shala ba'a nahe Ghena kese kaShala. 2 Se ta gha ta wəshi ne, nahe Ghena kese le Shala. 3 Nahe Shala kemenete pɛtɛa wəshi le Ghena. Wəsə shɛ kemenete geva keɗema le Ghena we. 4 Mbe Ghena shɛ nza mpi. Mpia shɛ nde se kawaŋe kaŋa mbeli. 5 Kaɓele waŋe hwa ŋkwesle, ama kehərəte ŋkɛ ŋkwesle we. 6 Nahe Shala keghweneke kwete wəndə nya nza sləa ŋkɛ kaZhaŋe. 7 Nahe ŋkɛ kese kala negha fete, kezha nza kande negha fete yitea waŋe, yitea yɛ waŋea shɛ mbeli laka gheŋkɛ. 8 Kenza Zhaŋe kawaŋea shɛ ŋkɛ le ghəa ŋkɛ we, ama nahe ŋkɛ kenza kande negha fete yitea waŋe. 9 Nahe Ghena kese kawaŋe nya kaganda, nya kesawa te hɛɗi ba'a nya kewaŋe mbeli pɛtɛ. 10 Nahe Ghena kese te hɛɗi lema, le Ghena pate hɛɗi Shala. Ama keɗepete ŋkɛ mbeli nyi te hɛɗi we. 11 Nahe Ghena kese kadzehwa hwelefe ta ŋkɛ, ama kekemaneve ŋkɛ hwelefe ta ŋkɛ we. 12 Ama nahe kweci mbeli kekemaneve Ghena bake bake dzeve ba'a keyɛte ŋkɛ. Nahe nde kendeke nda hweŋkwa ke hɛ kanza kaŋwalea Shala. 13 Kezhɛrenji hɛ kaŋwalea Shala laka mimi, laka ɗe ta geva keɗema laka ɗe ta wəndə ŋelɛ we, ama laka Shala. 14 Pa Ghena zhɛrenyɛ kawəndə ba'a nzanyɛ hwa gheɓəmə. Nahe gheɓəmə kenakɛ zləvəa ŋkɛ, zləvə nya kemave Wəzege kwetɛ va Yita. 15 Nahe Zhaŋe keneghate fete yite, ma ke zlapete: «Gheŋkɛ wəndə nya gezete ŋayɛ ghena 'ya te ghəa ŋkɛ, ma 'ya sha gheyɛ: Nahe wəndə nya ketese kwetere wəmbəa ɗa kenza kwele ma ke 'ya, kwa nza ŋkɛ nahe ŋkɛ kenzahwe nza mpelɛa ke 'ya.» 16 Nahe gheɓəmə pɛtɛ kekemave ŋa ɓəmə bela ta mcɛləa zlaɓa ta ŋkɛ, nahe gheɓəmə kemave ŋkɛ kadzeghə kadzeghə. 17 Nahe Shala keghweneke ɓəmə wəshi mahalegə laka Moyize. Ama nahe gheɓəmə kekemave zlaɓa ba'a kaganda laka Yɛsə Kriste. 18 Wəndə shɛ kegha kanakɛ Shala we. Ama nahe Wəzege kwetɛ nya kaShala ba'a nya kenza le Yita kencɛte ɓəmə Shala.
Negha fete ta Zhaŋe Batiste
19 Pa ka Zhəwif nyi mbe Zhɛrəzalɛm ghweneghe nda ka dzeghe Shala ba'a ka Lɛvi ke Zhaŋe, ma ke hɛ 'yɛwete ve: «Wa ŋkɛ na wa?» 20 Kese Zhaŋe kawəfərə va hɛ we. Ama ma ke neghate kwa kema ta pɛtɛa mbeli: «Kenza 'ya kaMɛsi we.» 21 Ma ke hɛ 'yɛwete ve: «Wa ŋkɛ na tsagha wa? Ɛli na na?» Ma ke Zhaŋe: «Ewə, gheŋkɛ 'ya we.» Ma ke hɛ shɛ: «Nde mɛ ŋkwa ta Shala na na?» Ma ke zhɛnete: «Ewə, gheŋkɛ 'ya we.» 22 Tagha gɛ, ma ke hɛ shɛ: «Wa ŋkɛ na ke ghen'yɛ sha geze nda ke mbeli nyi keghweneke n'yɛ tsagha wa? Wa ŋkɛ na pa sha ghəa ŋa wa?» 23 Ma ke Zhaŋe zhɛnete nda ke hɛ: «'Ya ya kawəndə nya kezlape ghena te ɓerama: hi nda mə hweŋkwa tiɗiɗi ke Mahwətə, kala nya gezete Ɛzayi, nde mɛ ŋkwa.» 24 Ka Fariziyɛn ya hwa mbeli nyi ghweneke mbeli sha Zhaŋe. 25 Ma ke hɛ shɛ: «Nda kaɗema na kaMɛsi, kaƐli keɗema kande mɛ ŋkwa ta Shala ne, yitea wa mene nda batɛme na ke mbeli tsagha wa?» 26 Ma ke Zhaŋe zhɛnete nda ke hɛ: «Ma 'ya ne, le yɛmə mene ŋayɛ batɛme 'ya. Ama kwete wəndə nya ɗepema yɛ ya hwa gheyɛ. 27 Kase ŋkɛ kwetere wəmbəa ɗa. Kehi 'ya kanza ya kawəndə nya kepele zewe nyi mbe tsahwa ta ŋkɛ we.» 28 Kwa Bɛtani menete geva wəshi nyi pɛtɛ, pelɛ kema ta hələa Zhəwrdɛŋe, te ŋkwa nya mene nda batɛme Zhaŋe ke mbeli.
Yɛsə ya kazhɛgwəa Shala
29 Ma te hendɛ ta ŋkwa ne, pa Zhaŋe nakɛ Yɛsə kase shɛ, ma ke: «Wa nya Zhɛgwəa Shala nya kekele jaɗafa ta hɛɗi lema nya. 30 Gheŋkɛ ya kawəndə nya gezete ŋayɛ 'ya, ma 'ya: Nahe wəndə nya kese kwetere wəmbəa ɗa kenza kwele ma ke 'ya, kwa nza ŋkɛ nahe ŋkɛ kenzahwe nza mpelɛa ke 'ya. 31 Ma 'ya ne, keɗepete ŋkɛ 'ya we. Ama nahe 'ya kese kezha mene batɛme le yɛmə yitea ncɛ nda ŋkɛ ke ka Israyɛl.» 32 Ma ke Zhaŋe neghate fete zhɛkwa: «Nahe 'ya kenakɛ Sefəa Shala kasawa pelɛ ghweme kala gheɗepe kanza kənə. 33 Ma 'ya ne, keɗepete ŋkɛ 'ya we. Ama ma ke Shala nya keghweneke ɗa kamene batɛme le yɛmə sha 'ya: Katenewe Sefəa Shala na kasawa pelɛ ghweme kanza kənəa kwete wəndə. Gheŋkɛ nde temene nda batɛme ke mbeli le Sefəa Shala. 34 Ma 'ya ne, nahe 'ya kenakɛ wəsəa shɛ ba'a kenza kande negha fete yite: Wəndəa shɛ ya kawəzege ta Shala.»
Ka ghate ta ka təkwə təkwə Yɛsə
35 Ma te hendɛ ta ŋkwa ne, nahe Zhaŋe kenza tagha zhɛkwa le ka təkwə təkwə ŋkɛ bake. 36 Ma kwa nakɛ Yɛsə ŋkɛ kadzeghwa ne, ma ke Zhaŋe: «Wa nya Zhɛgwəa Shala nya gɛ!» 37 Ma kwa fate ghena shɛhɛ ka təkwə təkwə Zhaŋe bake ne, ntəŋə hɛ kwetere wəmbəa Yɛsə. 38 Pa Yɛsə zhɛrete geva, pa nakɛ hɛ katəkwə təkwə ŋkɛ hɛ, ma ke 'yɛwete va hɛ: «Wa yaghweze yɛ wa?» Ma ke hɛ shɛ: «Tema ŋkwa nya nza na te wa, Rabi?» Ma ghena nya mbe Rabi ne, Nde sleke ɗa. 39 Ma ke zhɛnete nda ke hɛ: «Nde mə, katenewe yɛ.» Pa hɛ lə kanakɛ ŋkwa nya nza ŋkɛ te. Pa hɛ keɗaŋemte veci nya ketene yite. Nahe ŋkwa kenza kwa mtsa veci. 40 Nahe Andrɛ, wəza meghekɛ Simon Piyɛre kenza hwa mbeli nyi bake nyi kefate ghena ta Zhaŋe ba'a ketəkwə təkwəte Yɛsə. 41 Pa Andrɛ begeme le wəza meghekɛ Simon, ma ke shɛ: «Nahe n'yɛ kesləyi Mɛsi.» Ma ghena nya mbe Mɛsi ne, Kriste. 42 Pa ŋkɛ begheghe ŋkɛ kalə sha Yɛsə. Dəkwə Yɛsə te Simon, ma ke shɛ: «Gha ya kaSimon, wəzege ta Zhaŋe, Kɛfas tenza sləa ŋa.» Ma ghena nya Kɛfas ne, Keleɓa.
Yɛsə kaheka yɛ Filipe le Natanayɛl
43 Ma te hendɛ ta ŋkwa ne, pa Yɛsə tarete kadzawa Galilɛ. Pa ŋkɛ begeme le Filipe, ma ke shɛ: «Təkwə təkwə ɗa.» 44 Nahe Filipe kenza kande Bɛtesayida, meleme nya se yɛ Andrɛ le Piyɛre mbe. 45 Kwetere wəmbəa ŋkɛ, pa Filipe begeme le Natanayɛl. Ma ke shɛ: «Nahe ghen'yɛ kesləyi wəndə nya gezete Moyize te mbe palepa ta wəsə mahalegə. Nahe ka mɛ ŋkwa kegezete ghena te perə. Gheŋkɛ Yɛsə, wəzege ta Zhozɛf nya kande Nazarɛt.» 46 Ma ke Natanayɛl shɛ: «Wəsə ganyɛ shɛ kasame kwa Nazarɛt na?» Ma ke Filipe shɛ: «Nde, katenewe na.» 47 Ma kwa nakɛ Natanayɛl Yɛsə kase shɛ ne, ma ke te ghəa ŋkɛ: «Wa nya nde Israyɛl nya kaganda, nya ɗema mbəɗəkwə mbe nya gɛ!» 48 Ma ke Natanayɛl shɛ: «Tema ɗepe ɗa na wa?» Ma ke Yɛsə zhɛnete nda: «Nahe 'ya kenakɛ ŋa vəa ŋkwa nya nza na yitea dasekwa, nda teheka ŋa Filipe.» 49 Ma ke Natanayɛl shɛ: «Rabi, gha ya kaWəzege ta Shala, gha ya kameghea ka Israyɛl.» 50 Ma ke Yɛsə shɛ: «Va nya gezete ŋa 'ya nahe 'ya kenakɛ ŋa yitea dasekwa yɛte na na? Katenewe wəshi nyi jama jama ma ke nyi na.» 51 Ma ke ɓiyitsa: «Kaganda ne, ma 'ya sha gheyɛ: katenewe ŋkwa kedzeme ghweme teghwene ba'a ka ghwene ta Shala yɛ kadzeme ba'a kasawa kənəa Wəzege ta za.»
Kwa ghate wəsə meŋele
1 Ma te kwa maheke ta hɛ ne, pa makwa menete kwa Kana, te hɛɗia Galilɛ. Nahe meghekɛa Yɛsə kenza tagha. 2 Nahe mbeli kehekake Yɛsə le mbeli nyi ketəkwə təkwə yitea makwa. 3 Ma kwa kiɗi tɛ ne, ma ke meghekɛ sha Yɛsə: «Nahe tɛ kiɗi va hɛ.» 4 Ma ke Yɛsə shɛ: «Male, wa yaɗe na va 'ya wa? Kenaka vəa ɗa kase we.» 5 Tagha gɛ, ma ke meghekɛa Yɛsə sha ka mene slene: «Mene mə wəsə nya tegeze ŋayɛ ŋkɛ.» 6 Weta ya ŋkwaŋe tagha, nyi beteyi ka Zhəwif kezha zhɛre ghəa nci wɛŋe kala nya gezete wəsə keshi. Wərə yayata weta shɛ kakelete gare litrə gwəmsə. 7 Ma ke Yɛsə sha ka mene slene: «Pɛrekɛ mə weta nyi le yɛmə.» Pa hɛ pɛrekɛ hɛ paca paca. 8 Tagha gɛ, ma ke Yɛsə sha hɛ: «Gəve mə tsetsenya ba'a keleghe nda mə ke wəndə nya te ghəa veghe.» Pa hɛ gəghe nda. 9 Pa wəndə nya te ghəa veghe ndɛamakɛ yɛmə nya kezhɛrete geva katɛ. Keɗepe ŋkwa nya se tɛa shɛ ŋkɛ te we. Deke ka mene slene nyi kegəke yɛmə ka ɗepe. Pa wəndəa shɛ hekakɛ za makwa, 10 ma ke shɛ: «Tɛ nya zeɗe yave mbeli ke mbeli kaba. Vəa ŋkwa nya nza mbeli keghwəyi ghwəyi ve nda nya keɗema zeɗekə mbeli ke mbeli. Ama gha ne, nahe na kesərəakɛ tɛ nya zeɗe pa tsetsenya.» 11 Nya ya kakwa ghate hwa wəsə meŋele nyi menete Yɛsə, kwa Kana te hɛɗia Galilɛ. Tsagha ncɛte zləvəa ŋkɛ Yɛsə, pa ka təkwə təkwə ŋkɛ yɛte ghena ta ŋkɛ. 12 Kwetere wəmbəa ŋkɛ, ntəŋə Yɛsə kadzawa Kapɛrnawəm le meghekɛ, ka menəhɛnyɛ ba'a ka təkwə təkwə ŋkɛ. Pa hɛ hɛakɛ hɛ ɓɛhwɛ kwagha.
Yɛsə mbe ghɛa Shala
13 Nahe gəsəkə Pake kenza takwa takwa, cape Yɛsə kadzeme Zhɛrəzalɛm. 14 Pa ŋkɛ sləyi ka pamte sla, timɛti, yɛ gheɗepe, tsagha ka mbeɗe cɛdɛ mentishɛ te tabelea nci mbe ghɛa Shala. 15 Pa Yɛsə menete kwərəpə le zewe ba'a ŋkamte hɛ shave mbe ghɛa Shala, tsagha timɛtia nci ba'a sla ta nci. Pa ŋkɛ betakɛ cɛdɛa ka mbeɗe cɛdɛ te hɛɗi ba'a tsetsəkwəate tabelea nci te ŋkwa. 16 Ma ke sha ka pamte gheɗepe: «Fəmte mə wəshi nyi teke, zhɛrema ghɛa Yiteyɛ ɗa yɛ kashikwə ma!» 17 Pa mbeli nyi ketəkwə təkwə Yɛsə zəzəte ghena nya kerafete geva mbe Ghena ta Shala, ma ke: «Kala ghwə tetere ɗa ɗe ta ghɛa ŋa.» 18 Ma ke ka Zhəwif 'yɛwe va Yɛsə: «Ncɛte n'yɛ wəsə kencɛ wəsə kezha ɗepe n'yɛ hweŋkwa ya va gha kamene wəshi kala nyi?» 19 Ma ke Yɛsə sha hɛ: «Ŋzlamte mə ghɛa Shala nya, kateŋa ŋkɛ 'ya mbe hɛ mahekene.» 20 Ma ke ka Zhəwif sha Yɛsə: «Va wəfaɗemsə ŋkwaŋeghəmbe menete mbeli kaŋa ghɛ nya, ama gha ne, kateŋa ŋkɛ na mbe hɛ mahekene pa na?» 21 Ma ghɛa Shala nya geze Yɛsə ne, geva ta ŋkɛ. 22 Ma kwa same Yɛsə kwa kwele ne, pa mbeli nyi ketəkwə təkwə zəzəte nahe ŋkɛ kegezete ghena shɛ. Pa hɛ yɛte Ghena ta Shala ba'a ghena nyi gezete Yɛsə.
Nahe Yɛsə keɗepe zəzə ta wəndə ŋelɛ
23 Ma kwa nza Yɛsə pelɛ Zhɛrəzalɛm, hwa gəsəkə Pake ne, kwele kwele mbeli nyi keyɛte ŋkɛ, va nya nakɛ wəshi meŋele nyi menete ŋkɛ hɛ. 24 Ama kevate ghə Yɛsə te hɛ, va nya ɗepe zəzə ta nci ŋkɛ we. 25 Kaɗe ŋkɛ kancɛ nda ghena mbeli te wəndə ŋelɛ we. Kwa nza ŋkɛ ne, nahe ŋkɛ le ghəa ŋkɛ keɗepe zəzə ta wəndə ŋelɛ.
Yɛ Yɛsə le Nikodɛme
1 Ma hwa ka Fariziyɛn ne, kwete wəndə nya nza sləa ŋkɛ kaNikodɛme ya shɛ. Nahe ŋkɛ kenza kawəndə nya te ghəa ka Zhəwif. 2 Hwa'a ŋkɛ sha Yɛsə heviɗi, ma ke shɛ: «Rabi, nahe n'yɛ keɗepe Shala nde ghweneke ŋa kezha teke n'yɛ wəshi, kwa nza ŋkɛ wəndə shɛ kamenete wəshi meŋele kala nyi mene nyi na keɗema Shala le wəndəa shɛ we.» 3 Ma ke Yɛsə shɛ: «Kaganda ne, ma 'ya sha gha: wəndə shɛ kanakɛ Meghea Shala keɗema ŋkɛ kezhɛne kayake geva we.» 4 Ma ke Nikodɛme shɛ: «Tsema nza wəndə kazhɛne kayake geva kehale hale ŋkɛ wa? Wərə ŋkɛ kazhɛneyi geva kwa hwəa meghekɛ ba'a kazhɛne kakwa bake zhigə na?» 5 Ma ke Yɛsə zhɛnete nda: «Kaganda ne, ma 'ya sha gha: Wəndə shɛ kadzembe Meghea Shala keyakema ŋkɛ le yɛmə ba'a Sefəa Shala we. 6 Nahe wəndə nya keyake geva laka wəndə ŋelɛ kenza kawəndə ŋelɛ. Nahe wəndə nya keyake geva laka Sefəa Shala kenza kaŋa Sefəa Shala. 7 Nzama na heɓake va nya gezete 'ya: Nda yɛ kazhɛne kayake geva, 'ya sha gha ma. 8 Kavɛ sefə dzeyi te yayata ŋkwa nya ɗe ŋkɛ. Kafa kwaɗe ta ŋkɛ na, ama keɗepe ŋkwa nya se ŋkɛ te keɗema nya lə ŋkɛ te na we. Tsetse nza ta yayata wəndə nya keyake geva laka Sefəa Shala.» 9 Ma ke Nikodɛme shɛ: «Tsema nza wəsə nya kamenete geva wa?» 10 Ma ke Yɛsə shɛ: «Gha ya kande teke nda wəshi ke mbeli mbe Israyɛl, ama kaɗema na keɗepe wəsə shɛ na? 11 Kaganda ne, ma 'ya sha gha: wəshi nyi ɗepe n'yɛ yageze n'yɛ, wəshi nyi nakɛ n'yɛ le ntsə ta n'yɛ yanza n'yɛ kaka negha fete yitea hɛ. Ama gheyɛ ne, kese yɛ kayɛ negha fete ta n'yɛ we. 12 Ma kwa gezete ŋayɛ ghena 'ya te wəshi nyi te hɛɗi ne, kayɛ yɛ we. Tsema nza yɛ kayɛte ghena nya geze ŋayɛ 'ya te wəshi nyi pelɛ ghweme wa? 13 Wəndə shɛ kegha kadzeme ghweme we, nda Wəzege ta za nya kesawa pelɛ ghweme. 14 Kala nya veyi shishi nya vɛsəte mbeli le mze kwa ghwə ghwə Moyize te sheghwə te ɓerama ne, tsagha teve geva Wəzege ta za mbeli te sheghwə, 15 yitea kemave mpi nya kaghala ghala yayata wəndə nya keyɛte ŋkɛ laka gheŋkɛ. 16 Kwa nza ŋkɛ kwele kwele ɗehwe hɛɗi lema Shala, nda ghweneke Wəzege kwetɛa ŋkɛ ŋkɛ, yitea ɗema yayata wəndə nya keyɛte ŋkɛ kaza, ama kezha kemave mpi nya kaghala ghala ŋkɛ. 17 Keghweneke Wəzege ta ŋkɛ Shala kezha ve nda fete ke mbeli we, ama kezha mbele mbeli laka gheŋkɛ. 18 Ma yayata wəndə nya keyɛte Wəzege ta Shala ne, kateve nda fete mbeli we. Ama wəndə nya keɗema keyɛte ŋkɛ ne, nahe fete kendeke geva, va nya ɗema ŋkɛ keyɛte Wəzege kwetɛa Shala. 19 Wa nya tsetse teve nda geva fete ke mbeli: nahe waŋe kese kadzete hɛɗi, ama nahe mbeli nyi te hɛɗi keɗehwe ŋkwesle za ma ke waŋe, va nya mene wəshi nyi ndiremi ndiremi hɛ. 20 Yayata wəndə nya kemene wəshi nyi ndiremi ndiremi ne, waŋe yawəfəyite ŋkɛ. Kaɗe ŋkɛ kase kadzete waŋe, yagha slene ta ŋkɛ kancɛte geva we. 21 Ma yayata wəndə nya kemene slene ganyɛ ne, kadzete waŋe ŋkɛ. Tsagha ne, kanewe wəshi nyi mene ŋkɛ mbeli dazhɛ dazhɛ, kanewe hawe ta ŋkɛ va Shala mbeli.»
Yɛ Yɛsə le Zhaŋe
22 Kwetere wəmbəa ŋkɛ, ntəŋə yɛ Yɛsə le mbeli nyi ketəkwə təkwə kadzawa hɛɗia Zhəwdɛ. Pa ŋkɛ hɛakɛ hɛ kwagha le hɛ, cape ŋkɛ kamene nda batɛme ke mbeli. 23 Batɛme yamene nda Zhaŋe ke mbeli, mbe Ɛnon, vare meleme ta ka Salim perə, va nya nza ŋkɛ kwele kwele yɛmə te ŋkwa shɛ. Kase mbeli shɛ yitea mene batɛme. 24 Kenaka Zhaŋe kadzawa daŋgayɛ te vecia shɛ we. 25 Ntake kweci ka təkwə təkwə Zhaŋe kaghəpə le kwete nde Zhəwif te ghəa nza wɛŋe kala nya gezete wəsə keshi. 26 Pa hɛ se sha Zhaŋe, ma ke hɛ sha Zhaŋe: «Rabi, mba wəndə nya neghate fete na te pelɛke te kema ta hələa Zhəwrdɛŋe yitea ghəa ŋa tse na? Yawa, wa nya ŋkɛ kamene batɛme, pɛtɛ mbeli kalə shɛ.» 27 Ma ke Zhaŋe sha hɛ: «Wəndə shɛ kakemave wəsə keɗema Shala kendeke nda we. 28 Ma gheyɛ le ghəa ŋayɛ ne, nahe yɛ kenza kaka negha fete, ma 'ya gezete: Ma 'ya ne, Kriste 'ya we. Ama nahe 'ya keghweneke geva mbe kema ta ŋkɛ. 29 Ma wəndə nya nza makwa kaŋa ŋkɛ ne, gheŋkɛ za makwa, ama mcɛnyɛa za makwa, terasle nza ŋkɛ yitea za makwa kafa wəshi nyi geze ŋkɛ. Zlama yazlama ŋkɛ kwa fa ghena ta za makwa ŋkɛ. Tsagha 'ya perə, viɗi zlama ta ɗa tsetsenya. 30 Nahe ŋkɛ kehi kakele, ama 'ya ne, shifə yashifə 'ya.
Wəndə nya kesawa pelɛ ghweme
31 Wəndə nya kesawa pelɛ ghweme ya te ghəa mbeli pɛtɛ. Nahe wəndə nya te hɛɗi kenza kaŋa hɛɗi, kala nza ta wəshi nyi te hɛɗi geze ghena ŋkɛ. Wəndə nya kesawa pelɛ ghweme ya te ghəa mbeli pɛtɛ. 32 Wəshi nyi nakɛ ŋkɛ ba'a nyi fave ŋkɛ yageze ŋkɛ, ama wəndə shɛ kayɛ negha fete ta ŋkɛ we. 33 Nahe yayata wəndə nya keyɛte negha fete ta ŋkɛ keɗepe kaganda yageze Shala. 34 Ghena ta Shala yageze wəndə nya ghweneke Shala, va nya viɗikɛ wənəa ŋkɛ Shala le Sefəa ŋkɛ. 35 Kaɗe Wəzege Yita, nahe ŋkɛ keveyi pɛtɛa wəshi mbe dzeve ta ŋkɛ. 36 Yayata wəndə nya keyɛte Wəzege ne, mpi nya kaghala ghala ya ve. Ama wəndə nya keyɛ nda ma fete ke Wəzege ne, kanakɛ mpi nya kaghala ghala ŋkɛ we, ama katenza hwepe wənəa Shala kənə.»
Yɛsə ba'a male ta ka Samari
1 Pa ka Fariziyɛn fate kageze mbeli tsema tsema nza ka təkwə təkwə kwele kwele ma va Yɛsə ke Zhaŋe ba'a tsema tsema mene Batɛme ŋkɛ za ma ke Zhaŋe. 2 Ndagwara Yɛsə le ghəa ŋkɛ nde mene nda batɛme ke mbeli we, ama ka təkwə təkwə ŋkɛ. 3 Ma kwa fate ghena nya geze mbeli Yɛsə ne, cape ŋkɛ slə mbe Zhəwdɛ kezha zhɛne geva kadzawa Galilɛ. 4 Ama nda ŋkɛ kajive mbe Samari. 5 Hwa'a Yɛsə kwa Samari, mbe meleme nya heka mbeli kaSishar, takwa takwa melemea shɛ yitea wəve nya ndeke nda Zhakob ke wəzege ta ŋkɛ Zhozɛf. 6 Tagha belageji nya late Zhakob. Ma kwa leɓe Yɛsə va dzeghwa ne, pa ntishɛ kazhɛne mpi mɛa belagejia shɛ. Nahe veci kenza talala kwa ghə. 7 Hwa'a kwete male ta ka Samari kagə yɛmə. Ma ke Yɛsə shɛ: «Same ɗa yɛmə.» 8 Nahe mbeli nyi ketəkwə təkwə Yɛsə kedzembe meleme kezha pa wəshi kezeme. 9 Ma ke male ta ka Samaria shɛ sha Yɛsə: «Ashɛ nde Zhəwif na wəka? Tsema 'yɛwe yɛmə va 'ya, 'ya nya kawəzha ta ka Samari wa?» Kwa nza ŋkɛ ne, kantsəɓə ka Zhəwif le ka Samari we. 10 Ma ke Yɛsə shɛ: «Ma ya sha nahe keɗepe wəsə nya ve nda Shala ke mbeli ba'a wəndə nya ke'yɛwe yɛmə va gha ne, nza gha le ghəa ŋa nde te'yɛwe yɛmə ve, kateve ŋa yɛməa mpi ŋkɛ.» 11 Ma ke malea shɛ shɛ: «Nde sleke ŋkwa, wəsə kegə yɛmə same kwa belageji va gha we. Lɛame belagejia shɛ ɓiyitsa, tema tese na le yɛməa mpi wa? 12 Kwele ma na ke shia n'yɛ Zhakob nya kelate n'yɛ belageji nya na? Gheŋkɛ le ghəa ŋkɛ, ŋwalea ŋkɛ ba'a wəshi keseɗa ta ŋkɛ ne, same kwa belageji nya se hɛ kasa yɛmə.» 13 Ma ke Yɛsə shɛ: «Ma yayata wəndə nya kesakɛ yɛmə same kwa belageji nya ne, katezhɛne ndere kazhɛ nda. 14 Ma wəndə nya ketesa yɛmə nya teve nda 'ya ne, mba ndere katezhɛ nda kaghala ghala we. Katenza yɛmə nya teve nda 'ya mbe wənəa ŋkɛ kala ɗasle nya same mpi nya kaghala ghala kwa.» 15 Ma ke malea shɛ shɛ: «Nde sleke ŋkwa, same ɗa yɛməa ŋa shɛ yitea ɗema ndere kazhɛ ɗa ba'a yitea ɗema 'ya kaleɓe ghəa ɗa kase kagə yɛmə teke.» 16 Ma ke Yɛsə: «Kwiɗi hekakɛ za ŋa kase teke.» 17 Ma ke zhɛnete: «Za va 'ya we.» Ma ke Yɛsə: «Kaganda geze na va nya gezete na kaɗema za gha. 18 Va nya nza ŋkɛ mcɛfe wəmeve zhili na. Wəndə nya nza na yite tsetsenya, za ŋa ŋkɛ we. Kaganda ghena ta ŋa deŋwa.» 19 Tagha gɛ, ma ke malea shɛ shɛ: «Nde sleke ŋkwa, ma zəzə 'ya ne, nde mɛ ŋkwa ta Shala na. 20 Pelɛ ghweme nya se ka shihɛ n'yɛ nyi kaka Samari kahawe va Shala, ma pe yɛ gheyɛ ka Zhəwif sha geze: Nda mbe Zhɛrəzalɛm hi mbeli kahawe va Shala.» 21 Ma ke Yɛsə: «Yɛte ghena nya geze ŋa 'ya. Katese və nya ɗema yɛ tehawe va Yita ya pelɛ ghweme nya keɗema mbe Zhɛrəzalɛm. 22 Ma gheyɛ ka Samari ne, keɗepe wəsə nya hawe yɛ ve yɛ we. Ma ghen'yɛ ka Zhəwif ne, nahe n'yɛ keɗepe wəsə nya hawe n'yɛ ve. Kwa nza ŋkɛ shave mbe ka Zhəwif shave mbele. 23 Ama katese və, nahe vəa shɛ kese tsetsenya, nya tehawe mbeli ka hawe fate fate va Yita laka sefəa ŋkɛ ba'a kaganda. Nyi ya kaka hawe va Shala nyi sepa Yita. 24 Nahe Shala kenza kaSefə, vatse hi mbeli nyi kehawe ve kahawe ve laka Sefəa Shala ba'a kaganda.» 25 Ma ke malea shɛ: «Nahe 'ya keɗepe katese Mɛsi nya heka mbeli kaKriste. Ma vəa ŋkwa nya tese ŋkɛ ne, katencɛ ɓəmə pɛtɛa wəshi ŋkɛ.» 26 Ma ke Yɛsə shɛ: «'Ya nya kegeze ŋa ghena nya ya kaMɛsi.» 27 Ma vəa ŋkwa shɛ ne, pa mbeli nyi ketəkwə təkwə Yɛsə zhɛneke geva. Heheɓake hɛ va nya nakɛ ŋkɛ hɛ kageze ghena le male. Ama wəndə shɛ hwa hɛ nya kegeze: «Wa yasepa na ve wa?», keɗema: «Yitea wa mɛ na le ghenta wa?», ke hwa hɛ we. 28 Pa malea shɛ zlenekɛ ghwelepe ta nta tagha, ntəŋə nde kalə kadzembe meleme ta nci. Ma ke sha mbeli: 29 «Nde mə nakɛ mə kwete wəndə nya kegezete ɗa wəshi nyi se 'ya mene pɛtɛ. Mɛsi tenza ŋkɛ.» 30 Təkwəsəmə mbeli shave mbe meleme kalə kanewe Yɛsə. 31 Kwa slənyɛ malea shɛ kadzembe meleme, ma ke mbeli nyi ketəkwə təkwə sha Yɛsə: «Rabi, zeme ɗafa gi!» 32 Ma ke Yɛsə sha hɛ: «Wəsə kezeme nya ɗepema yɛ ya va 'ya.» 33 Ma ke hɛ 'yɛwete kwelɛ ghəa nci: «Kwete wəndə keleke nda wəsə kezeme na?» 34 Ma ke Yɛsə sha hɛ: «Wəsə kezemea ɗa ne, mene kala nya ɗe wəndə nya keghweneke ɗa ba'a keɗaŋe slene nya gezete ɗa ŋkɛ. 35 Ashɛ tene tere wəfaɗe nda tsa ha mbeli pe yɛ sha geze wəka? Ma 'ya ne, ma 'ya sha gheyɛ: Newakɛ mə ŋkwa, kenakɛ ha yɛ keghwele ghwele va nya ɗe tsa ŋkɛ wəka? 36 Nahe wəndə nya ketsa ha kekemave zhɛme ta ŋkɛ, katsene ha ŋkɛ kezha mpi nya kaghala ghala. Tsagha gɛ, kazlama nde tsawete ha ba'a nde tsa ha kanya kwetɛŋe. 37 Kwa nza ŋkɛ ne, kaganda ghena ŋela nya, ma ke: Katsawe ha kwete wəndə, kamene kwete seyi te wəfe. 38 Nahe 'ya keghwenakɛ ŋayɛ katsa ha nya wəzakɛma yɛ, kweci mbeli ka sahwe yaka yitea wəza ta ŋkɛ, ama gheyɛ ka fa deme te slene ta nci.» 39 Kwele kwele mbeli nyi keyɛte Yɛsə hwa ka Samari, kwa nza ŋkɛ ma ke malea shɛ sha hɛ: «Nahe wəndə nya kegezete ɗa pɛtɛa wəshi nyi menete 'ya.» 40 Vatse gɛ, ma kwa se ka Samari sha Yɛsə ne, pa hɛ səkwəve ŋkɛ kanza le hɛ. Tagha gɛ, pa Yɛsə nzanyɛ le hɛ kahɛ bake. 41 Kwele kwele mbeli nyi keyɛte ɓiyitsa kwa fate ghena ta ŋkɛ hɛ. 42 Ma ke hɛ sha malea shɛ: «Tsetsenya ne, keyɛte ŋkɛ ghen'yɛ deke te ghena nya gezete n'yɛ na we, ama nahe ghen'yɛ le ghəa n'yɛ kefate ghena ta ŋkɛ. Nahe ghen'yɛ keɗepe tsetsenya gheŋkɛ ya kaNde mbele mbeli nyi te hɛɗi lema.»
Yɛsə kambe wəzege ta wəndə kwele
43 Kwetere wəmbəa hɛ bake ne, ntəŋə Yɛsə tagha kadzembe Galilɛ. 44 Ma ke Yɛsə le ghəa ŋkɛ gezete: «Kahawe mbeli va nde mɛ ŋkwa te hɛɗia ŋkɛ we.» 45 Ma kwa se ŋkɛ kadzembe Galilɛ ne, pa ka Galilɛ kemaneve ŋkɛ le zlama, va nya nakɛ wəshi meŋele nyi menete ŋkɛ pelɛ Zhɛrəzalɛm te vecia gəsəkə Pake hɛ. Nahe hɛ kese pelɛagha le ghəa nci yitea gəsəkəa shɛ. 46 Pa ŋkɛ zhɛneke geva kadzembe Kana, te hɛɗia Galilɛ, te ŋkwa nya zhɛrete yɛmə ŋkɛ katɛ. Te ŋkwa shɛ kwete wəndəa kwelea meghe, nya nza wəzege ta ŋkɛ shewə kwa Kapɛrnawəm. 47 Ma kwa fate ŋkɛ nahe Yɛsə keshave mbe Zhəwdɛ kadzembe Galilɛ ne, pa ŋkɛ lə kampi nda dzeve kezha dzawa Kapɛrnawəm ŋkɛ kambe wəzege ta ŋkɛ nya takwa takwa kamte. 48 Ma ke Yɛsə shɛ: «Ma gheyɛ, keɗema yɛ kenakɛ wəshi kencɛ wəshi ba'a wəshi meŋele ne, kateyɛ yɛ tɛape we.» 49 Ma ke wəndə kwelea shɛ shɛ: «Nde sleke ŋkwa, təhwə təhwə ŋa 'ya, nde nda temte wəzege ta ɗa.» 50 Ma ke Yɛsə shɛ: «Kwiɗi, nahe wəzege ta ŋa kenza teghweme.» Pa wəndəa shɛ yɛte ghena ta Yɛsə, cape ŋkɛ kwa ŋkwa. 51 Ma mba ŋkɛ kwa ŋkwa kalə sha ghɛa ŋkɛ ne, begeme ŋkɛ le ka mavashia ŋkɛ, ma ke hɛ shɛ: «Nahe wəzege ta ŋa kenza teghweme.» 52 Ma ke sha hɛ: «Tsema və nda mbe ŋkɛ wa?» Ma ke hɛ shɛ: «Mbeɗa verazle veci ke ghə nda mbe.» 53 Nahe yita keɗepe te vəa shɛ gezete nda Yɛsə, ma ke shɛ: «Nahe wəzege ta ŋa kenza teghweme.» Tagha gɛ, pa le mbeli nyi ki ghɛa ŋkɛ yɛte Yɛsə. 54 Nya ya kakwa bake ta wəsə meŋele nya menete Yɛsə, kwa slə ŋkɛ mbe Zhəwdɛ kadzembe Galilɛ.
Yɛsə kambe nde mte mtea geva mbe Zhɛrəzalɛm
1 Kwetere wəmbəa ŋkɛ ne, gəsəkə nya kese te shia nci yamene ka Zhəwif. Pa Yɛsə dzeme Zhɛrəzalɛm. 2 Pelɛagha, takwa yitea mɛ degha ta Timɛti ne, kwete ŋkwa kepɛ nya heka ka Zhəwif kaBɛtesayida le ghena ta nci ya tagha. Gelɛŋka ya mcɛfe mɛa yɛməa shɛ. 3 Kwele kwele ka zereghwe meɓelahe dzeyi mbe gelɛŋka shɛhɛ, ka ghwələa kɛfi, ka gwadarea kɛfi, ka mpə mpəa geva. Gaŋkəɗə ta yɛməa shɛ yaneghe hɛ. 4 Kwa nza ŋkɛ kasawa nde ghwene ta Nde sleke ŋkwa pelɛ ghweme mbe kweci və kadzawa ŋkwa shɛ kezha gaŋkəɗə yɛmə. Ma wəndə nya keghate kadzawa yɛməa shɛ te və nya gaŋkəɗəte geva ŋkɛ ne, kambe ŋkɛ, ya tsemanyɛ zereghwe ta ŋkɛ. 5 Kwete wəndə nya kemenete va mahekenemsə degheseghəmbe te zereghwe ya tagha. 6 Kwa nakɛ wəndəa shɛ Yɛsə meɓelahe ba'a kwa gezete nda mbeli kwele kwele temə zereghwea shɛ te ne, ma ke shɛ: «Kaɗe na kambe na?» 7 Ma ke nde zereghwea shɛ shɛ: «Nde sleke ŋkwa, wəndə shɛ te 'ya kezha ve ɗa hwa yɛmə te vəa nya gaŋkəɗə ŋkɛ we. Ma nda tedzawa 'ya ne, nahe kwete wəndə kekelehwe kema va 'ya.» 8 Ma ke Yɛsə shɛ: «Sate, kelete gezle ta ŋa ba'a dzeghwa.» 9 Te ŋkwa shɛnyɛ, pələsə wəndəa shɛ. Pa kelete gezle ta ŋkɛ, ntake ŋkɛ kadzeghwa. Te veci kezhɛne mpi menete geva ŋkɛ. 10 Ma ke ka Zhəwif sha wəndə nya mbete Yɛsə: «Nahe ŋkwa kenza hwa veci kezhɛne mpi, hweŋkwa va gha kakele gezle ta ŋa we.» 11 Ma ke sha hɛ: «Ma ke wəndə nya kembete ɗa sha 'ya: Kelete gezle ta ŋa ba'a dzeghwa.» 12 Ma ke hɛ 'yɛwete ve: «Wa sləa nyagha wəndə nya kegeze: Kelete gezle ta ŋa ba'a dzeghwa ke wa?» 13 Ama keɗepe wəndə nya kembete ŋkɛ wəndəa shɛ, va nya shavenyɛ Yɛsə hwa mbeli nyi tagha tipə tipə we. 14 Kwetere wəmbəa ŋkɛ, begeme Yɛsə le wəndəa shɛ mbe ghɛa Shala. Ma ke shɛ: «Nahe na kembe tsetsenya. Zhɛnema na kemene jaɗafa yagha kwete wəsə nya ndiremi ma kamenete ŋa geva ma.» 15 Ntəŋə wəndəa shɛ kalə sha ka Zhəwif, ma ke sha hɛ: «Yɛsə nde mbete ɗa.» 16 Tagha gɛ, pa ka Zhəwif ghate ghweze mɛ hwa Yɛsə, va nya mbete ŋkwa ŋkɛ te veci kezhɛne mpi. 17 Ma ke Yɛsə sha hɛ: «Keveci keveci mene slene Yiteyɛ ɗa, tsagha mene slene 'ya perə.» 18 Va ghena nya gezete ŋkɛ kala nya, ntəŋə ka Zhəwif kasepa ntsehwele kepesle Yɛsə. Kenza deke va nya dzawanyɛ wəmbəa wəsə mahalegə te veci kezhɛne mpi we, ama va nya gezete ŋkɛ nahe Shala kenza kaYitenyɛ ba'a va nya yipəte ghəa ŋkɛ le Shala.
Berete ta Wəzege ta Shala
19 Ma ke Yɛsə sha hɛ: «Kaganda ne ma 'ya sha gheyɛ: kamenete kwete wəsə Wəzege le ghəa ŋkɛ we, nda nya nakɛ ŋkɛ kamene Yitenyɛ yamene ŋkɛ. Ma pɛtɛa wəshi nyi mene Yita ne, kamene hɛ Wəzege perə. 20 Kwa nza ŋkɛ kaɗe Wəzege Yita ba'a kancɛ nda pɛtɛ wəshi nyi mene ŋkɛ ŋkɛ. Katencɛ nda kweci ŋkɛ slene za ma ke nyi kamene, hehake tenza yɛ te wəshia shɛhɛ. 21 Kala nya kelakame mbeli Yita same kwa kwele ba'a nya ve nda mpi ke hɛ ne, tsagha temene Wəzege perə, kave nda mpi ŋkɛ ke wəndə nya ɗe ŋkɛ. 22 Kameha ghwə Yita te wəndə we, nahe ŋkɛ kendeke nda berete kemeha ghwə ke Wəzege, 23 yitea hawe mbeli pɛtɛ va Wəzege kala nya hawe hɛ va Yita. Yayata wəndə nya keɗema kahawe va Wəzege ta Shala ne, kahawe ŋkɛ va Yita nya keghweneke ŋkɛ perə we. 24 Kaganda ne, ma 'ya sha gheyɛ: yayata wəndə nya kefa ghena ta ɗa, nya keyɛ wəndə nya keghweneke ɗa ne, mpi nya kaghala ghala ya ve. Kateve nda geva fete we, ama nahe ŋkɛ keshave mbe mte kadzembe mpi. 25 Kaganda ne, ma 'ya sha gheyɛ: katese veci, nahe vəa shɛ kese tsetsenya, nya tefa heka ta Wəzege ta Shala mbeli nyi kempə mpə. Ma mbeli nyi keveyite sleme yitea heka ta ŋkɛ ne, teghweme tenza hɛ. 26 Kala nya nza mpi mbe Yita le ghəa ŋkɛ, tsagha ndeke nda ŋkɛ ke Wəzege kanza mbe perə. 27 Nahe ŋkɛ kendeke nda berete kemeha ghwə ke Wəzege, va nya nza ŋkɛ kaWəzege ta za. 28 Nzama yɛ hehake te wəshi nyi ma, tewəmbəreke katese və nya tefa heka ta ŋkɛ mbelia kwahɛɗi. 29 Katesame mbeli nyi kemenete wəshi ganji kwa kwele kezha mpi nya kaghala ghala, ama katesame mbeli nyi kemenete wəsə kwa ndiremi kezha meha ghwə. Ghena nyi kenegha fete yitea Yɛsə 30 Kashɛ 'ya mene kwete wəsə le ghəa ɗa we. Kala nya gezete ɗa Shala meha ghwə 'ya. Tiɗiɗi ghwə nya meha 'ya te mbeli, kwa nza ŋkɛ wəshi nyi ɗe 'ya yamene 'ya we, ama wəshi nyi ɗe wəndə nya keghweneke ɗa. 31 Ma nda 'ya nde neghate fete yitea ghəa ɗa ne, nza kanewe yɛ kakaganda we. 32 Kwete wəndə nya kenegha fete yitea 'ya ya shɛ. Nahe 'ya keɗepe kaganda ghena nya gezete ŋkɛ te 'ya. 33 Nahe yɛ keghweneghe nda mbeli ke Zhaŋe. Nahe ŋkɛ keneghate fete yitea kaganda. 34 Ma 'ya ne, katsakɛ ɗa negha fete ta wəndə ŋelɛ we. Ama yitea mbele ŋayɛ yɛ nda gezete 'ya tsagha. 35 Kala paterela nya kewaŋe ŋkwa se Zhaŋe. Nahe yɛ keɗehwe zlama yitea waŋe ta ŋkɛ kavə ɓɛhwɛ. 36 Ama kwete wəsə kenegha ɗa fete ya shɛ za ma ke ŋa Zhaŋe, slene nya mene 'ya, nya ndeke ɗa Shala kamene, nde geze ghena te 'ya ba'a nde ncɛ nda ke mbeli Yita nde ghweneke ɗa. 37 Kanegha fete Yita nya keghweneke ɗa yitea 'ya perə. Kegha yɛ kafa mɛa ŋkɛ we, kegha yɛ kanakɛ kema ta ŋkɛ we. 38 Kave ghena ta ŋkɛ yɛ kwa wənəa ŋayɛ, va nya ɗema yɛ keyɛte wəndə nya ghweneke ŋkɛ we. 39 Kazele zeweve ta ghena nyi mbe Ghena ta Shala va nya zəzə yɛ katekemave mpi nya kaghala ghala yɛ mbe hɛ. Ama ghena ta ɗa yancɛ ŋayɛ Ghena ta Shala nya jaŋga yɛ. 40 Ama gheyɛ, kaɗe yɛ kase sha 'ya kezha kemave mpi nya kaganda we. 41 Kaɗe zləvə nya ve mbeli te 'ya 'ya we. 42 Ama nahe 'ya keɗepe ŋayɛ: ɗe kezha Shala shɛ kwa wənəa ŋayɛ we. 43 Te sləa Yiteyɛ ɗa se 'ya, ama kekemaneve ɗa yɛ we. Ama kese kwete wəndə le ɗe ta ŋkɛ ne, kakemane ŋkɛ yɛ. 44 Kaɗe yɛ kave zləvə te ghəa ŋkɛ kwelɛ ghəa ŋayɛ, ama kazele zləvə nya kese va Shala kwetɛŋenyɛ yɛ we. Tsema nza yɛ kayɛte ɗa wa? 45 Zəzəma yɛ 'ya nde teve ŋayɛ fete kwa kema ta Yita ma. Ma wəndə nya keteve ŋayɛ fete ne, Moyize nya veyi zəzə ta ŋayɛ yɛ te. 46 Ma nda nahe yɛ keyɛte Moyize, nza kateyɛ ɗa yɛ perə, va nya nza ŋkɛ te 'ya rafete ghena Moyize. 47 Ma kala nya sema yɛ kayɛ ghena ta ŋkɛ ne, tsema nza yɛ kayɛte ŋa ɗa wa?»
Yɛsə kabehe mbeli slibə mcɛfe
1 Kwetere wəmbəa ŋkɛ, ntəŋə Yɛsə kajive kema ta ndərəa Galilɛ, nya heka mbeli kandərəa Tibɛriyade perə. 2 Kwele kwele mbeli nyi kezele ŋkɛ va nya nakɛ wəshi meŋele nyi menete ŋkɛ hɛ laka mbe ka zereghwe. 3 Tarame Yɛsə kwa ghəa kwete ghweme, ntishɛ ŋkɛ le mbeli nyi ketəkwə təkwə. 4 Nahe gəsəkə Pake ta ka Zhəwif kenza takwa takwa. 5 Newe ke Yɛsə ne, kwele kwele mbeli kase shɛ. Ma ke sha Filipe: «Tema nza gheɓəmə kapave wəshi kezeme kezha ve nda ke mbeli nyi tse wa?» 6 Deke kezha dzeghe gea Filipe gezete Yɛsə tsagha, kwa nza ŋkɛ nahe ŋkɛ keɗepe wəsə nya temene ŋkɛ. 7 Ma ke Filipe shɛ: «Ya kaslibə bakemsə ne, wa wəsə nya nza gheɓəmə kapave kezha ndɛamakɛ yayata wəndəa nci wa?» 8 Ma ke kwete hwa mbeli nyi ketəkwə təkwə sləa ŋkɛ Andrɛ, wəza meghekɛa Simon Piyɛre ŋkɛ: 9 «Kwete dɛgwə ya shɛ teke nya nza 'yɛmbe dəghwəa ɗafa megi mcɛfe ba'a kelepe bake ve. Ama wa wəsə nya nza hɛ kaketekɛ nda ke mbeli nyi kwele kwele nyi wa?» 10 Tagha gɛ, ma ke Yɛsə: «Geze nda mə ke mbelia shɛhɛ kantishɛ.» Kwele kwele gwəzə te ŋkwa shɛ. Pɛtɛ hɛ ntishɛnji, gare slibə mcɛfe nza zhili. 11 Pa Yɛsə kelete ɗafa, kwa tsate nda ŋ'wese ŋkɛ ke Shala ne, pa nehave nda ke mbeli nyi mentishɛ tagha. Tsagha neheve nda kelepe ŋkɛ ke hɛ perə, kala nya ɗe hɛ. 12 Ma kwa zehwe hɛ behe behe ne, ma ke Yɛsə sha mbeli nyi ketəkwə təkwə: «Tsenete mə kwetiɓəa ɗafa nyi ketene yagha wəsə kaza.» 13 Pa hɛ tsenete hɛ ba'a viɗikɛ kwaciga meŋe bakeghəmbe le kwetiɓəa ɗafa nyi ketene yitea ɗafa megi nyi mcɛfe nyi zehwe hɛ. 14 Ma kwa nakɛ wəsə meŋele nya menete Yɛsə mbeli ne, ma ke hɛ: «Kaganda nza wəndə nya kaNde mɛ ŋkwa, nya kehi kase kadzete hɛɗi lema.» 15 Ma kwa ɗepe Yɛsə kaɗe hɛ kave nda meghe le berete ne, ntəŋə ŋkɛ ɓiyitsa kwetɛŋenyɛ kadzeme ghəa ghweme.
Yɛsə kadzeghwa te yɛmə
16 Ma kwa se tɛhwɛɗi ne, cape mbeli nyi ketəkwə təkwə Yɛsə kalə kadzemɛa hələ. 17 Tarame hɛ kwa kwambelə, ntəŋə hɛ jive te yɛmə kezha dzawa Kapɛrnawəm. Pa viɗi keseve hɛ te yɛmə, kenaka Yɛsə kase sha hɛ we. 18 Kagaŋkəɗə ndərə le berete, va nya nza sefə kavɛ kwele kwele. 19 Mcɛfe keɗema ŋkwaŋe kilemɛtre menete hɛ nda nakɛ Yɛsə hɛ kadzeghwa te yɛmə kase sha kwambeləa nci. Tagha gɛ, ntake hɛ kaghazlənə. 20 Ma ke Yɛsə sha hɛ: «'Ya ŋkɛ, ghazlənəma yɛ ma.» 21 Kaɗe hɛ kakele Yɛsə kadzawa kwambelə, ama taghanyɛ ntsehe hɛ te ŋkwa nya lə hɛ.
Mbeli kazele Yɛsə
22 Ma te hendɛ ta ŋkwa, nahe mbeli nyi kese pelɛ kema ta hələ keɗepe kwetɛŋe kwambelə nya kejivenyɛ. Nahe hɛ keɗepe kaɗema Yɛsə kedzawa kwambeləa shɛ yitea mbeli nyi ketəkwə təkwə, deke mbelia shɛhɛ kadzawa kaghəa nci. 23 Hwa'a kweci kwambelə nyi kese mbe meleme ta Tibɛriyade nya takwa takwa yitea ŋkwa nya zehwe ɗafa hɛ, kwa tsate nda hana Nde sleke ŋkwa ke Shala. 24 Kwa nakɛ mbeli nyi ketsenete geva nyi kaɗema Yɛsə tagha, ya ka təkwə təkwə ŋkɛ ne, pa hɛ dzawa kwambeləa shɛhɛ, ntəŋə hɛ kadzawa Kapɛrnawəm kazele Yɛsə.
Yɛsə ya kaɗafa ta mpi
25 Kwa nakɛ Yɛsə mbeli nyighɛ pelɛ kema ta hələ ne, ma ke hɛ shɛ: «Rabi, hweŋkwa se ŋa na teke wa?» 26 Ma ke Yɛsə: «Kaganda ne, ma 'ya sha gheyɛ: wəshi meŋele nyi menete 'ya nde keleke ŋayɛ kase teke we, ama ɗafa nya behekɛ ŋayɛ 'ya le nde keleke ŋayɛ. 27 Menema slene yɛ kezha kemave wəshi kezeme nyi kedaɗə gəmə ma, mene mə slene kezha wəshi kezeme nyi keɗema kadaɗə, nyi kaŋa mpi nya keɗema kakiɗi. Wəzege ta za nde teve ŋayɛ wəshi kezemea shɛ, gheŋkɛ yavate lamba ta berete ta ŋkɛ Shala Yita te.» 28 Ma ke hɛ shɛ: «Tsema mene n'yɛ nda nza n'yɛ kamenete slene nya ɗe Shala tse wa?» 29 Ma ke Yɛsə sha hɛ: «Ma slene nya ɗe Shala kamene yɛ ne, yɛ mə wəndə nya ghweneke ŋkɛ.» 30 Ma ke hɛ shɛ: «Wa wəsə kencɛ wəsə nya nza na kamenete n'yɛ kezha yɛte ŋa ghen'yɛ wa? Wa sləa slene nya temene na wa? 31 Nahe ka shihɛ n'yɛ kezehwe mane kwamte te ɓerama, kwa nza ŋkɛ ma ke rafete geva mbe Ghena ta Shala: Nahe ŋkɛ kendeke nda wəsə kezeme ke hɛ sawa pelɛ ghweme.» 32 Ma ke Yɛsə sha hɛ: «Kaganda ne, ma 'ya sha gheyɛ: Moyize nde ndeke ŋayɛ ɗafa nya kesawa pelɛ ghweme we, Yiteyɛ ɗa nde ndeke ŋayɛ ɗafa nya kaganda sawa pelɛ ghweme. 33 Ma ɗafa nya kese va Shala, nya kesawa pelɛ ghweme ne, gheŋkɛ nde ve nda mpi ke pɛtɛa mbeli nyi te hɛɗi.» 34 Ma ke hɛ shɛ: «Nde sleke ŋkwa, ve n'yɛ ɗafa shɛ keveci keveci gi!» 35 Ma ke Yɛsə sha hɛ: «'Ya ya kaɗafa ta mpi. Ma yayata wəndə nya kese sha 'ya ne, katezhɛ nda ma kaghala ghala we. Ma yayata wəndə nya keyɛte ɗa ne, katezhɛ nda ndere kaghala ghala we. 36 Nahe 'ya kegezete ŋayɛ, nahe yɛ kenakɛ ɗa, ama keyɛte ɗa yɛ we. 37 Katese yayata wəndə nya ndeke ɗa Yiteyɛ ɗa sha 'ya. Kateŋka wəndə nya kese sha 'ya 'ya we. 38 Kwa nza ŋkɛ kesawa 'ya pelɛ ghweme kezha mene ɗe ta ɗa we, ama kezha mene ɗe ta wəndə nya keghweneke ɗa. 39 Wa nya wəsə nya ɗe wəndə nya keghweneke ɗa nya: Kezha ɗema 'ya kwete wəndəa mbeli nyi ndeke ɗa ŋkɛ. Ama kezha fə hɛ 'ya same kwa kwele te veci nya kiɗi hɛɗi. 40 Wa nya wəsə nya ɗe Yiteyɛ ɗa nya: yayata wəndə nya kenakɛ Wəzege ba'a nya keyɛte ŋkɛ ne, katekemave mpi nya kaghala ghala. Kambele ŋkɛ 'ya same kwa kwele te kwa keɗaŋe ta hɛ.» 41 Ntake ka Zhəwif kandəghwə ndəghwə va nya gezete Yɛsə, ma ke: «'Ya ya kaɗafa nya kesawa pelɛ ghweme.» 42 Ma ke hɛ: «Ashɛ wəzege ta Zhozɛf Yɛsə wəka? Nahe gheɓəmə keɗepe yitenyɛ ba'a meghekɛ. Tsema geze ŋkɛ ɓəmə ŋkɛ sawa pelɛ ghweme ŋkɛ wa?» 43 Ma ke Yɛsə sha hɛ: «Ndəghwə ndəghwəma yɛ kwelɛ ghəa ŋayɛ ma. 44 Wəndə shɛ kase sha 'ya keɗema Yiteyɛ ɗa nya keghweneke ɗa kentseheke ŋkɛ we. Ama 'ya ne, katekele yayata wəndə nya kese sha 'ya 'ya same kwa kwele te veci nya kiɗi hɛɗi. 45 Ma ke ka mɛ ŋkwa rafete: Kateteke nda wəshi Shala ke hɛ pɛtɛ. Yayata wəndə nya kefate ghena ta Yiteyɛ ɗa nya ba'a nya kekelete, kase wəndəa shɛ sha 'ya. 46 Wəndə shɛ kenakɛ Yita 'ya we. Deke wəndə nya kesawa pelɛagha sha Shala nde nakɛ Yita. 47 Kaganda ne, ma 'ya sha gheyɛ: nahe yayata wəndə nya keyɛte kekemave mpi nya kaghala ghala. 48 'Ya ya kaɗafa ta mpi. 49 Mane yazehwe ka shihɛ ŋayɛ te ɓerama, ama nahe hɛ kempə. 50 Ama ɗafa nya kesawa pelɛ ghweme nya geze ŋayɛ nya 'ya ne, katemte yayata wəndə nya kezehwe we. 51 'Ya ya kaɗafa nya nza mpi mbe nya kesawa pelɛ ghweme. Yayata wəndə nya kezehwe ɗafa shɛ ne, teghweme tenza ŋkɛ kaghala ghala. Ɗafa nya teve ŋayɛ 'ya ne, gheŋkɛ slia geva ta ɗa, kave nda ŋkɛ 'ya ke mbeli kezha kemave mpi mbeli.» 52 Tagha gɛ, ntake ka Zhəwif kaghəpə kwele kwele kwelɛ ghəa nci, ma ke hɛ: «Tsema nza wəndə nya kandeke ɓəmə slia geva ta ŋkɛ kawəsə kezeme wa?» 53 Ma ke Yɛsə sha hɛ: «Kaganda ne, ma 'ya sha gheyɛ: ma keɗema yɛ kezehwe geva ta Wəzege ta za ba'a kesahwe mimia ŋkɛ ne, katenza mpi yɛ mbe gheyɛ we. 54 Ma yayata wəndə nya kezeme slia geva ta ɗa ba'a nya kesa mimia ɗa ne, mpi nya kaghala ghala ya ve. Katekele ŋkɛ 'ya same kwa kwele te kwa keɗaŋe ta veci. 55 Kwa nza ŋkɛ ne, wəsə kezeme ganyɛ slia geva ta ɗa, wəsə kesa ganyɛ mimia ɗa perə. 56 Yayata wəndə nya kezehwe slia geva ta ɗa ba'a nya kesahwe mimia ɗa ne, mbe 'ya nza wəndəa shɛ, mbe wəndəa shɛ nza 'ya perə. 57 Teghweme Yita nya keghweneke ɗa, laka gheŋkɛ nza 'ya teghweme perə. Tsagha yayata wəndə nya kezeme geva ta ɗa, laka 'ya nza ŋkɛ teghweme perə. 58 Tsagha ɗafa nya kesawa pelɛ ghweme, kejikə nde le ɗafa nya zehwe ka shihɛ ŋayɛ nyi kempənji we. Yayata wəndə nya kezehwe ɗafa nya ne, teghweme tenza ŋkɛ kaghala ghala.» 59 Mbe cɛ kesəkwə ghə gezete ghena nyi Yɛsə, vəa ŋkwa nya teke nda wəshi ŋkɛ ke mbeli kwa Kapɛrnawəm.
Ghena ta mpi nya kaghala ghala
60 Ma kwa fate ghena ta Yɛsə nya hɛ, ma ke kweci hwa ka təkwə təkwə kwele kwele: «Dzawe ghena shɛ deŋwa. Tsema nza wəndə kayipəyi kwa kala nya geze ŋkɛ wa?» 61 Nahe Yɛsə keɗepe mbe ghəa ŋkɛ kandəghwə ndəghwə ka təkwə təkwə va ghena shɛ. Ma ke sha hɛ: «Kazhɛ ŋayɛ wənəa ŋayɛ va ghena nya geze nya 'ya na? 62 Tsema temene yɛ tsagha kenakɛ Wəzege ta za yɛ kalə kadzete ŋkwa nya se ŋkɛ te wa? 63 Sefəa Shala nde ve nda mpi ke wəndə, slia geva le ghəa ŋkɛ ne, gəmə ŋkɛ. Ghena nyi se nyi 'ya kageze ŋayɛ ne, ghena ta Sefəa Shala hɛ, ghenci mpi. 64 Ama kayɛ kweci hwa gheyɛ we.» Kwa nza ŋkɛ nahe Yɛsə keɗepe kaghate mbeli nyi keɗema kayɛ ghena ta ŋkɛ, le wəndə nya ketepamte. 65 Ma ke Yɛsə sha hɛ: «Va nya kala nya gezete ŋayɛ 'ya, wəndə shɛ kase sha 'ya keɗema Yiteyɛ ɗa kekeleke we.» 66 Se mɛa ghena shɛ, kwele kwele mbeli nyi ketəkwə təkwə nyi kewəfəyite Yɛsə, kaɗe hɛ zele ɓiyitsa we. 67 Ma ke Yɛsə gezete nda ke mbeli nyi ketəkwə təkwə nyi meŋe bakeghəmbe: «Pa le gheyɛ kaɗe kaslə na?» 68 Ma ke Simon Piyɛre shɛ: «Nde sleke ŋkwa, sha wa lə n'yɛ gɛ? Gha wəndə nya nza ghena ta mpi nya kaghala ghala ve. 69 Ghen'yɛ tsetsenya ne, nahe ghen'yɛ keyɛhwe ŋa, nahe ghen'yɛ keɗepe ɓiyitsa gha wəndə nya ntave Shala.» 70 Ma ke Yɛsə sha hɛ: «Ashɛ 'ya nde tsehave ŋayɛ, gheyɛ nyi meŋe bakeghəmbe wəka? Ama kwete wəndəa ŋayɛ ne, 'yi'yɛghwə ŋkɛ.» 71 Te ghəa Zhəwdas, wəzege ta Simon Iskariyote gezete ghena shɛ ŋkɛ va nya nza ŋkɛ gheŋkɛ nde tepamte Yɛsə, ya kwela nza ŋkɛ hwa mbeli nyi ketəkwə təkwə nyi meŋe bakeghəmbe.
Ka menəhɛnyɛa Yɛsə kaɗema yɛ ŋkɛ
1 Kwetere wəmbəa ŋkɛ, cape Yɛsə kadzeghwa dzeyi te hɛɗia ka Galilɛ, hɛreɗɛ ɗema dzeghwa te hɛɗia ka Zhəwdɛ va nya nza hɛ kamene ntsehwele kapesle. 2 Takwa takwa gəsəkəa cɛ ghwəlia ka Zhəwif te vecia shɛ. 3 Ma ke ka menəhɛnyɛ sha Yɛsə: «Slə ŋa teke, kwiɗi kadzembe Zhəwdɛ yitea nakɛ slene nyi mene na mbeli nyi ketəkwə təkwə ŋa. 4 Wəndə shɛ kamene wəsə tewəfərə keɗe ŋkɛ kafa zləvəa ŋkɛ mbeli we. Ma kenza nde wəshi meŋele yamene na ne, dzeyi te ŋwela nda nza mbeli nakɛ ŋa pɛtɛ.» 5 Pa le ka menəhɛnyɛ kaɗema yɛ Yɛsə. 6 Ma ke Yɛsə sha hɛ: «Kenaka və kedzeme ta ɗa kadzeghete geva we. Ya te nyama nyama və dzeme yɛ ne, megela ŋkɛ sha gheyɛ. 7 Mbeli nza zlɛ va gheyɛ na, ama 'ya ne, dzawe zlɛ hɛ va 'ya, va nya nza ŋkɛ ndiremike wəshi nyi mene yɛ 'ya sha hɛ. 8 Kwiɗi mə yitea gəsəkə le ŋa ŋayɛ, kadzeme 'ya we. Kenaka ŋa ɗa və kedzeme we.» 9 Pa gezete nda ghena shɛ ke hɛ kala nyagha, pa ntishɛnyɛ mbe Galilɛ.
Yɛsə mbe gəsəkəa cɛ ghwəli
10 Ma kwa dzemenji ka menəhɛnyɛ yitea gəsəkə ne, ntəŋə Yɛsə kwetere wəmbəa nci kadzeme te ghərə te ghərə. Kese ŋkɛ ncɛ nda geva ke mbeli we. 11 Kazele ka Zhəwif dzeyi hwa mbeli, ma ke hɛ: «Tema ŋkɛ wa.» 12 Kwele kwele geze ghena ta Yɛsə mbeli mbe slene mbe slene hwa mbeli nyi ketsenete geva tipə tipə, ma ke kweci: «Wəndə nya ganyɛa mehele, wəndə nya.» Ma ke kweci: «Ewə, ghwete yaghwete ŋkwa ŋkɛ gəmə.» 13 Ama wəndə shɛ kashɛ geze ghena kwa ntsə kwa ntsə te ghəa Yɛsə va ghazlənə ta ka Zhəwif we. 14 Kwele ma nya kenahe na, na, kwele ma nya mba na, gəsəkə nda dzembe ghɛa Shala Yɛsə kateke nda wəshi ke mbeli. 15 Hehake ka Zhəwif, ma ke hɛ: «Tsema ɗepe wəshi nyi wəndə nya kaɗema ŋkɛ ketekeve wəshi wa?» 16 Ma ke Yɛsə sha hɛ: «Se va 'ya se ghena nya tekete ŋayɛ 'ya we, ama se va wəndə nya keghweneke ɗa. 17 Kateɗepe yayata wəndə nya keɗe kamene wəshi nyi ɗe Shala kenza nde se va Shala se ghena nya teke nda 'ya ke mbeli keɗema shave mbe ghəa ɗa shave hɛ. 18 Wəndə nya kegeze ghena nya keshave mbe ghəa ŋkɛ ne, yitea ve zləvə mbeli te ga ŋkɛ wəka? Ama wəndə nya keve zləvə te wəndə nya keghwenakɛ ne, gheŋkɛ nde geze kaganda. Tseŋwə hwa ghena ta ŋkɛ tɛape we. 19 Ashɛ Moyize kendeke ŋayɛ wəsə mahalegə wəka? Ama wəndə shɛ hwa gheyɛ kemenete slene le wəsə mahalegə we. Yitea wa ɗe yɛ kapesle ɗa wa?» 20 Ma ke mbeli nyi ketsenete geva shɛ: «Shewə na va 'yi'yɛghwə na? Wa nde ɗe kapesle ŋa wa?» 21 Ma ke Yɛsə: «Wəsə meŋele kwetɛŋe yamenete 'ya, ama nahe pɛtɛa ŋayɛ kenza heheɓake ve. 22 Take ne, nahe Moyize kendeke ŋayɛ hweŋkwa kesla nda mɓɛta ke ŋwale, ya kwela nza ŋkɛ kaɗema kaMoyize nde ghate kamene, ama ka shihɛ ɓəmə. Nahe yɛ keyɛhwe sla mɓɛta ya te vecia kezhɛne mpi. 23 Ma kenza nde kasla nda mɓɛta yɛ ke wəzege ya te veci kezhɛne mpi kaɗema wəsə mahalegə kabezemte geva ne, yitea wa hwepe wənə yɛ va nya mbete wəndə 'ya zake te vecia shɛ wa? 24 Neghama fete yɛ yitea wəndə deke te wəshi nyi nakɛ yɛ ma, pa yɛ ɗepe negha fete tiɗiɗi.»
Mɛsi Yɛsə na?
25 Ma ke kweci mbeli mbe Zhɛrəzalɛm: «Take ne, ashɛ wəndə nya yazele mbeli kapesle wəka? 26 Wa nyagha mə gɛ! Darahwe darahwe geze ghena ŋkɛ, wəndə shɛ kamɛ shɛ we. Nahe mbeli nyi jama ta ɓə keɗepete gheŋkɛ Mɛsi kaganda na? 27 Wəndə nya ne, nahe mə keɗepe ŋkwa nya se ŋkɛ te, kenza Mɛsi kase ne, wəndə shɛ kaɗepe ŋkwa nya tese ŋkɛ te we.» 28 Ma kwa teke nda wəshi Yɛsə ke mbeli mbe ghɛa Shala ne, ma ke zlapete ghena: «Nahe yɛ keɗepe ɗa ba'a ŋkwa nya se 'ya te? Ma 'ya ne, 'ya nde ghweneke ghəa ɗa we, ama kaganda yageze wəndə nya keghweneke ɗa. Keɗepe wəndəa shɛ yɛ we. 29 'Ya nde ɗepe, kwa nza ŋkɛ yite se 'ya, gheŋkɛ nde ghweneke ɗa kase.» 30 Se te ghena shɛ ɗe hɛ kakese Yɛsə, ama wəndə shɛ kedapate dzeve te we, kwa nza ŋkɛ kenaka vəa ŋkɛ kase we. 31 Kwele kwele mbeli nyi keyɛte Yɛsə hwa mbeli nyi ketsenete geva, ma ke hɛ: «Ma kese Mɛsi ne, za ma temene wəshi meŋele ŋkɛ ke wəndə nya na?» Mbeli ghweneke ka ya ghɛa Shala kakese Yɛsə 32 Ma kwa fate ghena nyi geze mbeli mbe slene mbe slene te Yɛsə ka Fariziyɛn ne, jikə hɛ jikəte geva le mbeli nyi te ghəa ka dzeghe Shala, pa hɛ ghweneke ka ya ghɛa Shala kakese Yɛsə. 33 Ma ke Yɛsə gezete: «Mba 'ya katemə ɓɛhwɛ hwa gheyɛ zhɛkwa, nda telə 'ya sha wəndə nya keghweneke ɗa. 34 Katesepa ɗa yɛ, ama katesləyi ɗa yɛ we, va nya ɗema yɛ katentsehe te ŋkwa nya telə 'ya.» 35 Ma ke ka Zhəwif kwelɛ ghəa nci: «Tema telə ŋkɛ nda geze ŋkɛ: Katesləyi ɗa yɛ we, ke wa? Gheŋkɛ kalə sha ka Zhəwif nyi te hɛɗia ka Grɛk yitea teke nda wəshi ke ka Grɛk na, na, tsema wa? 36 Ma ke ɓiyitsa: Katesepa ɗa yɛ, ama ashɛ yɛ kateslə ɗa we, va nya ɗema yɛ katentsehe te ŋkwa nya telə 'ya. Wa yaɗe ŋkɛ kageze tsagha wa?»
Hələa yɛməa mpi
37 Kwa keɗaŋe ta gəsəkə yaza ma. Vəa ŋkwa shɛ, ghereŋe Yɛsə kwa kema ta mbeli, ma ke zlapete ghena: «Ma kezhɛ nda ndere ke wəndə ne, se ŋkɛ kasa yɛmə va 'ya. 38 Ma ke mbe Ghena ta Shala: Wəndə nya keyɛte ghena ta ɗa ne, katehwɛ yɛmə nya keɗema kakiɗi shave mbe wənəa ŋkɛ.» 39 Ghena ta Sefəa Shala nya tekemave mbeli nyi keyɛte yageze Yɛsə tsagha. Te vəa shɛ ne, kenaka mbeli kakemave Sefəa Shala kaba kwa nza ŋkɛ kenaka Shala ndeke nda zləvə ke Yɛsə we.
Mbeli kanehe geva mbe tewəmbəreke Yɛsə
40 Hwa mbeli nyi ketsenete geva nyi, ma ke mbeli kwele kwele kwa fate ghena ta Yɛsə hɛ: «Wəndə nya ne, Nde mɛ ŋkwa ta Shala ŋkɛ fate.» 41 Ma ke kweci: «Mɛsi ŋkɛ.» Ma ke kweci kwa ŋa nci: «Se te hɛɗia ka Galilɛ tese Mɛsi na?» 42 Nahe Ghena ta Shala kegezete: «Mbe hwelefe ta David teya Mɛsi, se mbe Bɛtelɛhɛm meleme ta David.» 43 Pa mbeli neheve geva mbe tewəmbəreke Yɛsə. 44 Pa kweci mbeli ɗe kakese Yɛsə, ama wəndə shɛ kedapate dzeve te we.
Yɛma Yɛsə ta mbeli nyi te ghəa ka Zhəwif
45 Zhɛne ka ya ghɛa Shala kalə sha ka Fariziyɛn le mbeli nyi te ghəa ka dzeghe Shala. Ma hɛ 'yɛwete va hɛ: «Va wa ɗema yɛ keseke ŋkɛ wa?» 46 Ma ke ka ya ghɛa Shala: «Wəndə shɛ kegha kagezete ghena kala nya geze wəndəa shɛ we.» 47 Ma ke ka Fariziyɛn zhɛnete: «Zlaɓe le gheyɛ ghwetete ŋkɛ perə ka? 48 Nahe yɛ kegha kanakɛ kwete hwa ghen'yɛ, mbeli nyi jama jama le ka Fariziyɛn nya kegha yɛte na? 49 Ama mbeli nyi ketsenete geva gəmə yite ne, keɗepe wəshi mahalegə hɛ we. Nahe Shala kebezlamte hɛ pɛtɛ.» 50 Tagha Nikodɛme hwa mbeli nyi jama nyi. Gheŋkɛ wəndə nya kese sha Yɛsə vecagha. Ma ke sha hɛ: 51 «Kala nya geze wəshi mahalegəa Shala ta ɓəmə, berete va gheɓəmə kandeke nda fete ke wəndə keɗema mə kefate ba'a keɗepe wəshi nyi menete ŋkɛ perə we.» 52 Ma ke hɛ shɛ: «Kaya, nde Galilɛ na perə na? Kwiɗi jaŋgate Ghena ta Shala tiɗiɗi, pa na ncɛte ŋkwa nya gezete geva ŋkɛ te kenza nde nahe nde mɛ ŋkwa ta Shala kegha same kwa Galilɛ ya kwetɛŋe.» 53 Kwetere wəmbəa ŋkɛ, kwetɛ kwetɛŋe hɛ lənji sha ghɛ.
Male nya keseve mbeli te vale tahe
1 Ntəŋə Yɛsə kadzeme ghweme ta Bekele. 2 Kiɗima ta ŋkwa masheke masheke ne, pa Yɛsə zhɛneke geva kadzembe ghɛa Shala. Kwele kwele mbeli kase shɛ. Ntishɛ ŋkɛ kateke nda wəshi ke hɛ. 3 Tagha gɛ, pɛkwe ka rafe wəsə mahalegə le ka Fariziyɛn, le kwete male nya keseve hɛ te vale tahe. Pa hɛ veyi te tepe ta mbeli pɛtɛ. 4 Ma ke hɛ sha Yɛsə: «Nde sleke ɗa, male nya ne, te vale tahe keseve mbeli. 5 Nahe wəsə mahalegəa Moyize kegezete n'yɛ kapesle male nya kala nya le pelɛ. Tsema pa sha ŋa ŋa wa?» 6 Yitea ŋa nda keleŋa ke Yɛsə ba'a yitea zele hweŋkwa kekese gezete hɛ tsagha. Vəkwə Yɛsə karafe wəshi te hɛɗi le dzeve. 7 Ghwə yitea shaga ghwə yitea dəghwə hɛ ka'yɛwe va Yɛsə. Pa Yɛsə kafete kema. Ma ke sha hɛ: «Wəndə nya keghama kamenete jaɗafa hwa gheyɛ ne, ghate beza malea shɛ ŋkɛ le pelɛ ga!» 8 Ntiŋə ŋkɛ sha ghə ɓiyitsa karafe wəshi zhɛkwa te hɛɗi. 9 Kwa fate ghena ta Yɛsə nyagha hɛ ne, ntake hɛ kaghərə geva kwetɛ kwetɛ, mpelɛa meha mehɛɗi dzeghwanji, zhɛne mempɛhwetɛti. Tene Yɛsə le male nyagha meslete mbe kema ta ŋkɛ. 10 Kafe Yɛsə sha ghə, ma ke: «Male, tema hɛ gɛ wa? Wəndə shɛ kendeke ŋa fete wəka?» 11 Ma ke malea shɛ zhɛnete: «Wəndə shɛ we, Nde sleke ŋkwa we.» Tagha gɛ, ma ke Yɛsə shɛ: «Ma 'ya perə ne, kave ŋa fete 'ya we. Kwiɗi ŋa, zhɛnema na kamene jaɗafa tɛape ma.»
Yɛsə nde waŋe nda ŋkwa ke mbeli pɛtɛ
12 Ma ke Yɛsə geze nda ke mbeli zhɛkwa: «'Ya ya kawaŋe ta hɛɗi lema. Ma yayata wəndə nya ketəkwə təkwəte ɗa ne, katedzeghwa ŋkɛ hwa ŋkwesle we, ama katekemave waŋea mpi ŋkɛ.» 13 Ma ke ka Fariziyɛn shɛ: «Gha nde negha fete yitea ghəa ŋa ne, ndeɗekə ghena ta ŋa shɛ tsagha tse yi!» 14 Ma ke Yɛsə: «Ya 'ya nde negha fete te ghəa ɗa ne, kaganda ghena nya geze 'ya. Kwa nza ŋkɛ nahe 'ya keɗepe ŋkwa nya se 'ya te, nahe 'ya keɗepe ŋkwa nya telə 'ya te perə. Ama gheyɛ ne, keɗepe ŋkwa nya se 'ya te le nya telə 'ya te yɛ we. 15 Kala wəndə ŋelɛ meha ghwə yɛ, 'ya ne, ama wəndə shɛ kameha ghwə 'ya te we. 16 Ya 'ya nza meha ghwə te mbeli ne, ghwə nya tiɗiɗi yameha 'ya. Kwa nza ŋkɛ deke 'ya kwetɛŋe ɗa nde meha ghwəa shɛ we, ama ghen'yɛ le Yiteyɛ ɗa nya keghweneke ɗa. 17 Nahe yɛ keɗepe, ma ke mbe wəsə mahalegəa ŋayɛ: Ma keneghate fete mbeli bake yipə yipə ne, kaganda ghena shɛ. 18 Ya, wa nyagha gɛ. 'Ya ne, fete yanegha 'ya yitea ghəa ɗa, fete yanegha Yiteyɛ ɗa nya keghweneke ɗa ɓiyitsa te 'ya perə.» 19 Ma ke hɛ shɛ: «Tema Yite ŋa shɛ tse wa?» Ma ke Yɛsə zhɛnete: «Keɗepe ɗa yɛ we, keɗepe Yiteyɛ ɗa yɛ perə we. Ma nda nahe yɛ keɗepe ɗa ne, kateɗepe Yiteyɛ ɗa yɛ perə.» 20 Mbe ghɛa Shala gezete ghena nya Yɛsə kwa teke nda wəshi ŋkɛ ke mbeli vare wəsə nya bete cɛdɛ mbeli kwa. Wəndə shɛ kedapate dzeve te yitea kese va nya nakama vəa ŋkɛ kase we.
Slə ta Yɛsə ba'a meha ghwə
21 Ma ke Yɛsə sha hɛ ɓiyitsa: «Katedzeghwa ɗa 'ya, katezele ɗa yɛ, mbe jaɗafa ta ŋayɛ tempə yɛ va nya ɗema yɛ kapesle kalə te ŋkwa nya telə 'ya te.» 22 Ma ke ka Zhəwif kwelɛ ghəa nci: «Yitea wa geze ŋkɛ: Ashɛ yɛ kakekave ŋkwa nya telə 'ya te we, ke wa? Gheŋkɛ nza telə katepesle ghəa ŋkɛ na?» 23 Ma ke Yɛsə zhɛnete nda ke hɛ: «Ŋa ŋkwa nya teke te hɛɗi yɛ, ama 'ya, sawa pelɛ yitea ghweme sawa 'ya. Ŋa ŋkwa nya kwake te hɛɗi yɛ mbeli, ama 'ya ne, ŋa ŋkwa te hɛɗi 'ya we. 24 Vatse geze ŋayɛ 'ya, katempə yɛ mbe jaɗafa ta ŋayɛ. Kaganda tempə yɛ mbe jaɗafa ta ŋayɛ keɗema yɛ keyɛte: 'Ya ya ka'ya.» 25 Ma ke hɛ shɛ: «Wa sləa ŋa wa?» Ma ke zhɛnete: «Kala nya gezete ŋayɛ 'ya ghalanza, tsagha 'ya. 26 Kwele kwele ghena va 'ya kageze ŋayɛ, kwele kwele ɓiyitsa yitea meha ghwə te gheyɛ perə. Tiɗiɗi ghena ta wəndə nya keghweneke ɗa. Deke wəshi nyi fave 'ya ve yageze nda 'ya ke mbeli nyi te hɛɗi.» 27 Keɗepe mbeli nyighɛ ne, ghena ta Yita yageze Yɛsə we. 28 Ma ke Yɛsə sha hɛ: «Ma vəa ŋkwa nya teslete Wəzege ta za yɛ te sheghwə, vəa ŋkwa shɛ teɗepe yɛ 'ya ya ka'ya. Kateɗepe yɛ, ashɛ 'ya kamene wəsə kwetɛŋe ɗa we, deke wəshi nyi gezete ɗa Yiteyɛ ɗa yateke ŋayɛ 'ya. 29 Ma wəndə nya keghweneke ɗa ne, ghen'yɛ le keveci keveci. Kesərəakɛ ɗa kwetɛŋe ɗa we, va nya nza ŋkɛ keveci keveci mene wəshi nyi ɗe ŋkɛ 'ya.» 30 Ma kwa gezete ghena nya Yɛsə kala nya ne, kwele kwele mbeli nyi keyɛte ŋkɛ.
Ka mamzashi ba'a ka mavashi
31 Ma ke Yɛsə sha ka Zhəwif nyi keyɛte: «Ma kenza ŋayɛ dɛŋe dɛŋe te wəshi nyi se 'ya kateke ŋayɛ yɛ ne, kambeli nyi ketəkwə təkwə nyi ɗa tenza yɛ. 32 Kateɗepe ghena nya kaganda yɛ deŋwa. Katezhɛre ŋayɛ ghena nya kaganda shɛ kaka mamza.» 33 Ma ke hɛ shɛ: «Ka shihɛnyɛa Abraham ghen'yɛ wəka? Kegha ghen'yɛ kanza kamava ta wəndə we. Tsema geze na: Katezhɛre yɛ kaka mamza pa wa?» 34 Ma ke Yɛsə sha hɛ: «Kaganda geze ŋayɛ 'ya, yayata wəndə nya kemene jaɗafa ne, mava ta jaɗafa ŋkɛ. 35 Ma mava ne, kanza ŋkɛ ki ghɛ keveci keveci we, ama wəzege ne, keveci keveci tenza ŋkɛ ki ghɛa yitenyɛ. 36 Ma kembelete ŋayɛ Wəzege ta Shala shave mbe mava ne, kaka mamza tenza yɛ fate fate. 37 Nahe 'ya keɗepe, kaka shihɛnyɛa Abraham yɛ. Ama hweŋkwa kepesle ɗa yazele yɛ, va nya ɗema yɛ kepelakɛ ghena ta ɗa kadzawa wənəa ŋayɛ. 38 Wəshi nyi nakɛ 'ya va Yiteyɛ ɗa yageze 'ya. Ama gheyɛ le ŋa ŋayɛ ne, wəshi nyi fate yɛ va yiteyɛ ŋayɛ yamene yɛ.» 39 Ma ke hɛ zhɛnete nda: «Abraham ya kayite n'yɛ.» Ma ke Yɛsə sha hɛ: «Ma kenza nde kaŋwalea Abraham yɛ kaganda ne, slene nya se Abraham kamene yatemene yɛ. 40 Ya tsemanyɛ geze ŋayɛ ghena ganyɛ 'ya nya fave 'ya va Shala, ashɛ yɛ kaɗe we, hweŋkwa kepesle ɗa yazele yɛ. Tsetse se Abraham kamene we. 41 Wəshi nyi se yiteyɛ ŋayɛ kamene yamene yɛ.» Ma ke hɛ shɛ: «Ŋwalea male wede ghen'yɛ we, Yita ya va ghen'yɛ kwetɛŋe, gheŋkɛ Shala Yita nya pelɛ ghweme.» 42 Ma ke Yɛsə sha hɛ: «Ma nda Shala Yite ŋayɛ ne, nza kateɗe ɗa yɛ, va nya nza ŋkɛ sawa pelɛagha 'ya shɛ, gheŋkɛ nde veyi ɗa teke. 'Ya nde ghweneke ghəa ɗa we, gheŋkɛ nde ghweneke ɗa. 43 Yitea wa ɗema yɛ fa ghena nya geze ŋayɛ 'ya wa? Va nya dewə berete va gheyɛ kafa ghena ta ɗa. 44 Gətəli yiteyɛ ŋayɛ. Wəshi nyi ɗe yiteyɛ ŋayɛ yaɗe yɛ kamene, se te kwa ghate veyi geva ŋkɛ kezha pesle ŋkwa, kashɛ nza mbe kaganda tɛape we, va nya ɗema kaganda ve. Ma nda sla tseŋwə ŋkɛ ne, va nya nza ŋkɛ kande tseŋwə nda geze ŋkɛ tsagha. Gheŋkɛ yitenyɛa tseŋwə pɛtɛ. 45 Ama 'ya ne, ghena nya kaganda yageze 'ya, vatse ɗema yɛ kayɛ ɗa. 46 Wa wəndə nya kegha nakɛ ɗa hwa gheyɛ kamene jaɗafa wa? Ma kenza nde ghena nya kaganda yageze 'ya ne, va wa ɗema yɛ kayɛ ɗa wa? 47 Ma wəndə nya kawəndəa Shala ne, ghena ta Shala yafa ŋkɛ. Ama gheyɛ ne, mbelia Shala yɛ we, vatse ɗema yɛ fa ɗa ghena.»
Yɛ Yɛsə le Abraham
48 Ma ke ka Zhəwif sha Yɛsə: «Kaganda geze n'yɛ kande Samari ba'a 'yi'yɛghwə nde zhɛ ŋa.» 49 Ma ke Yɛsə sha hɛ: «Kazhɛ ɗa 'yi'yɛghwə we. Yiteyɛ ɗa yave kwele 'ya te. Gheyɛ ne, kaɗe yɛ kakelemte kwele te 'ya. 50 'Ya ne, kesepa zləvə 'ya kaŋa ghəa ɗa we, le kwete wəndə shɛ nya keve zləvə te 'ya, gheŋkɛ nde tedzeghe nza ta ŋkɛ. 51 Kaganda ne, ma 'ya sha gheyɛ: katemte wəndə nya keyate ghena ta ɗa kaghala ghala we.» 52 Ma ke ka Zhəwif shɛ: «Yawa, nahe n'yɛ keɗepe tsetsenya 'yi'yɛghwə nde zhɛ ŋa fate fate. Nahe Abraham kemte, nahe ka mɛ ŋkwa ta Shala kempənji, ma gha le ŋa ŋa ne, ma pa na: katemte wəndə nya keyate ghena ta ɗa kaghala ghala we. 53 Za ma na ke shia n'yɛ Abraham nya kemtenyɛ na? Nahe ka mɛ ŋkwa ta Shala kempənji. Kande wa zəzə ghəa ŋa na wa?» 54 Ma ke Yɛsə sha hɛ: «Kenza nde 'ya le ghəa ɗa nde ve zləvə te ghəa ɗa ne, gəmə tenza zləvəa shɛ. Wəndə nya keveyi zləvə te 'ya ne, Yiteyɛ ɗa nya heka yɛ kaShala ta ŋayɛ. 55 Ama keɗepe yɛ we. Ma 'ya, nahe 'ya keɗepe. Ma ya nahe 'ya kegeze: Keɗepe 'ya we, 'ya ne, nde sla tseŋwə 'ya kala gheyɛ. Ama nahe 'ya keɗepe, kaya ghena ta ŋkɛ 'ya. 56 Nahe shia ŋayɛ Abraham kese kazlama kwa vate ghə ŋkɛ tenewe vecia ɗa. Nahe ŋkɛ kenakɛ, kwele kwele se ŋkɛ kazlama.» 57 Ma ke ka Zhəwif shɛ: «Tsetsenya ne, kenaka na kakekave va mcɛfemsə we, ama nahe na kenakɛ Abraham pa na?» 58 Ma ke Yɛsə: «Kaganda ne, ma 'ya sha gheyɛ: ma nda teya Abraham: 'Ya ya ka'ya.» 59 Pa hɛ tsehave pelɛ kabeza Yɛsə. Pa Yɛsə wəfərənyɛ, pa yitenyɛ shave mbe ghɛa Shala.
Yɛsə mbete wəndə nya yake mbeli kaghwələ
1 Ma kwa hweŋkwa ne, pa Yɛsə nakɛ kwete wəndə nya yake mbeli kaghwələ. 2 Ma ke mbeli nyi ketəkwə təkwə sha Yɛsə: «Rabi, wa nde bezemte ghena nda yake wəndə nya mbeli kaghwələ tse wa? Mbeli nyi keyake na, na, wəndəa shɛ le ghəa ŋkɛ na?» 3 Ma ke Yɛsə: «Va ghena nya bezemte mbeli nyi keyake ba'a va ŋa ŋkɛ we, ama yitea ncɛte geva slene nya ɗe Shala kamene mbe, nda yake geva ŋkɛ tsagha. 4 Ma heveci ŋkwa ne, nda gheɓəmə kamene slene ganjia wəndə nya keghweneke ɗa. Viɗi nde tese, ashɛ mbeli menete slene heviɗi we. 5 Ma mba ɗa 'ya te hɛɗi lema ne, 'ya ya kawaŋea hɛɗi lema.» 6 Ma kwa gezemte ghena nya Yɛsə ne, pa ntifəyi ndɛghwɛɗɛ te hɛɗi, pa hwaɗete hɛɗia shɛ, ntsape ŋkɛ shɛ te ntsə va ghwələa shɛ. 7 Ma ke shɛ: «Kwiɗi pɛkɛ ntsə ta ŋa kwa ghwa ta Silowɛ, geze ta ŋkɛ: Wəndə nya ghwenakɛ mbeli.» Ntəŋə wəndə nyagha kalə kapɛ kema, ma kwa se ŋkɛ, wɛŋe newe ŋkwa ŋkɛ. 8 Ntake mbeli nyi te ghedəkwəa ŋkɛ le nyi kenakɛ kasəkwə wəshi ghala veci va mbeli ka'yɛwe, ma ke hɛ: «Take ne, ashɛ wəndə nya ya mɛa hweŋkwa kasəkwə wəshi ghala veci wəka?» 9 Ma ke kweci: «Gheŋkɛ ŋkɛ.» Ma ke kweci: «Gheŋkɛ we.» Ma ke kweci: «Pa yayipə hɛ le.» Ma ke wəndə nyagha sha hɛ: «'Ya ŋkɛ kaganda.» 10 Ma ke hɛ 'yɛwete ve: «Tsema se ŋkɛ nda pelemte geva ntsə ta ŋa gɛ wa?» 11 Ma ke wəndəa shɛ: «Wəndə nya heka nya mbeli kaYɛsə nde hwaɗete hɛɗi, pa hwehwekɛ ntsə ta ɗa le. Kwiɗi pɛkɛ ntsə ta ŋa kwa hələa Silowɛ, ke sha 'ya. Ntəŋə 'ya. Pɛkɛma ta ɗa kepɛ ne, ntake 'ya kanewe ŋkwa wɛŋe.» 12 Ma ke hɛ shɛ: «Tema wəndəa shɛ tse wa, a ke hɛ shɛ. Keɗepe 'ya we.»
Ka Fariziyɛn ka'yɛwe ghena va ghwələ
13 Pa hɛ keleghe wəndə nya kese nya kaghwələ sha ka Fariziyɛn. 14 Kwa nza ŋkɛ ne, te veci kezhɛne mpi hwaɗete hɛɗi Yɛsə ba'a kepelemte ntsə ta Ghwələ ŋkɛ. 15 Ma ke ka Fariziyɛn le ŋa nci 'yɛwete va wəndəa shɛ: «Tsema menete geva ŋkɛ nda se na kanewe ŋkwa tsetsenya wa?» Ma ke zhɛnete nda ke hɛ: «Pa ŋkɛ menate ɗa rekɛ te ntsə, pa 'ya pɛkɛ pɛ, ŋkwa yanewe 'ya tsetsenya.» 16 Ma ke kweci ka Fariziyɛn: «Ma wəndə nya ne, wəndəa Shala ŋkɛ we. Kwa nza ŋkɛ ne, kahawe ŋkɛ va veci kezhɛne mpi we.» Ma ke kweci kwa ŋa nci: «Tsema nza nde jaɗafa kamenete wəsə meŋele kala nya wa?» Pa hɛ neheve geva mbe. 17 Ma ke ka Fariziyɛn sha wəndə nya kese kaghwələ: «Ma gha le ŋa ŋa ne, wa ghena nya geze na te wəndə nya keghwenemte ntsə ta ŋa wa?» Ma ke zhɛnete: «Nde mɛ ŋkwa ta Shala ŋkɛ.» 18 Ama kaɗe ka Zhəwif kayɛ kaghwələ se wəndəa shɛ, nda newe ŋkwa ŋkɛ tsetsenya we. Vatse hekake mbeli nyi keyake ŋkɛ hɛ. 19 Ma ke hɛ 'yɛwete va hɛ: «Kaganda nza wəndə nya kawəzege ta ŋayɛ nya geze yɛ keyake geva kaghwələ na? Wa nde menete geva nda se ŋkɛ kanewe ŋkwa tiɗiɗi tsetsenya wa?» 20 Ma ke mbelia shɛhɛ sha hɛ: «Ma wəsə nya ɗepe n'yɛ ne, wəzege ta n'yɛ ŋkɛ ba'a kaghwələ yake geva ŋkɛ. 21 Ama keɗepe wəsə nya kemenete geva n'yɛ nda newe ŋkwa ŋkɛ tsetsenya ba'a wəndə nya kepelemte nda ntsə ta ŋkɛ ghen'yɛ we. 'Yɛwe mə ve gi! Nahe ŋkɛ kenza wəbake gare zhɛne ghena le ghəa ŋkɛ.» 22 Va ghazlənə va ka Zhəwif gezete mbeli nyi keyake ŋkɛ tsagha. Kwa nza ŋkɛ ne, nahe ka Zhəwif ketsahwe kwelɛ ghəa nci kezha ŋka yayata wəndə nya kegeze nahe Yɛsə kenza kaMɛsi shave mbe cɛ kesəkwə ghə. 23 Vatse gɛ, ma ke mbeli nyi keyake ŋkɛ: «Nahe ŋkɛ kenza wəbake kezha zhɛne ghena, 'yɛwe mə ve gi!» 24 Pa ka Fariziyɛn hekakɛ wəndə nya kese kaghwələ kakwa bake zhigə, ma ke hɛ shɛ: «Geze kaganda kwa kema ta Shala. Nahe n'yɛ keɗepe nde jaɗafa wəndəa shɛ.» 25 Ma ke zhɛnete: «Keɗepe 'ya kenza ŋkɛ kande jaɗafa we. Ama wəsə nya ɗepe 'ya ne, nahe 'ya kese kaghwələ, ama ŋkwa yanewe 'ya wɛŋe tsetsenya.» 26 Ma ke hɛ shɛ: «Wa wəsə nya menete ŋa ŋkɛ wa? Tsema ghwenemte ŋa ntsə ta ŋa ŋkɛ wa?» 27 Ma ke wəndəa shɛ zhɛnete: «Nahe 'ya kegezete ŋayɛ mshena, ama kese yɛ kafa ghena ta ɗa we. Kezha wa zhɛne yɛ ka'yɛwe va 'ya wa? Na, gheyɛ ɗe kazhɛre ka təkwə təkwə wəndəa shɛ na?» 28 Ma ke hɛ ŋelete ŋkɛ: «Gha ya kande təkwə təkwə wəndəa shɛ. Ma ghen'yɛ le ŋa n'yɛ ne, ka təkwə təkwə Moyize ghen'yɛ. 29 Nahe n'yɛ keɗepe nahe Shala kegezete nda ghena ke Moyize, ama gheŋkɛ ne, keɗepe ŋkwa nya se ŋkɛ te ghen'yɛ we.» 30 Ma ke wəndəa shɛ sha hɛ: «Wa nya wəsə nya nza 'ya heɓake ve nya: keɗepe ŋkwa nya se ŋkɛ te gheyɛ we, ama nahe ŋkɛ kepelemte ntsə ta ɗa. 31 Nahe gheɓəmə keɗepe kaɗema Shala kafa ghena ta ka jaɗafa. Ama ghena ta wəndə nya dɛŋe dɛŋe te ba'a nya kemene ɗe ta ŋkɛ yafa ghena ta ŋkɛ ŋkɛ. 32 Ama kegha mbeli kafa nahe kwete wəndə kepelemte ntsə ta wəndə nya keyake geva kaghwələ we. 33 Ma ya kaɗema wəndəa shɛ kawəndəa Shala ne, nza wəsə shɛ katemene ŋkɛ we.» 34 Ma ke hɛ zhɛnete nda: «Ghala ya na ne, bətə na mbe jaɗafa, ama gha ɗe kateke n'yɛ wəsə na?» Tagha gɛ, pa hɛ ŋkakave ŋkɛ.
Ghwələ nya kwa wənə
35 Ma kwa fate Yɛsə, na mbeli keŋkamte wəndəa shɛ, pa begeme le, ma ke shɛ: «Kayɛ Wəzege ta za na na?» 36 Ma ke wəndəa shɛ zhɛnete nda: «Nde sleke ɗa, wa wəndəa shɛ kezha yɛte 'ya wa?» 37 Ma ke Yɛsə shɛ: «Nahe na kenakɛ ŋkɛ, gheŋkɛ nde geze ŋa ghena tsetsenya.» 38 Ma ke wəndəa shɛ: «Kayɛ 'ya, Nde sleke ŋkwa.» Tagha gɛ, gwəɗəŋə ŋkɛ kwa kema ta ŋkɛ. 39 Ma ke Yɛsə: «Se ta ɗa hwa mbeli se kameha ghwə, yitea newe ŋkwa nyi kaghwələ, yitea ghwələpənji nyi kenewe ŋkwa.» 40 Kwa fave ghena nya kweci ka Fariziyɛn nyi tagha ne, ma ke hɛ shɛ: «Ka ghwələa kɛfi n'yɛ tse gɛ na?» 41 Ma ke Yɛsə sha hɛ: «Ma nda kaka ghwələa kɛfi yɛ ne, nza jaɗafa va gheyɛ we. Kanewe ŋkwa n'yɛ pe yɛ, vatse nza yɛ kaka jaɗafa.»
Ghena keyipə pa ta nde ya wəshi
1 Ma ke Yɛsə: «Kaganda ne, ma 'ya sha gheyɛ: keɗema wəndə kedzawa zlema dzawa kwa mɛa ŋkɛ, pa dzawanyɛ laka kwete ŋkwa ne, ghərə ŋkɛ, mefətekwə ŋkɛ. 2 Ama wəndə nya kedzawa kwa mɛa zlema, gheŋkɛ ya kawəndə nya keya timɛti. 3 Katepele nda ŋkwa wəndə nya keya zlema heviɗi. Katefa mɛa ŋkɛ timɛtia ŋkɛ kwa heka hɛ ŋkɛ keslə keslə kashave te ŋwela. 4 Ma kwa ŋkaghe hɛ ŋkɛ kajive te ŋwela ne, ntəŋə ŋkɛ te kema ta nci. Cape hɛ hwe sebe ta ŋkɛ, kwa ɗepe mɛa ŋkɛ hɛ. 5 Katəkwə təkwə wəndə nya ɗepema hɛ hɛ we, hwɛ yahwɛ hɛ ve kwa ɗepema mɛa ŋkɛ hɛ.» 6 Yɛsə gezete nda ghena keyipə pa nya ke hɛ, ama kefa wəshi nyi gezete Yɛsə mbe hɛ we.
Yɛsə ya kande ya wəshi ganyɛ
7 Ma ke Yɛsə sha hɛ: «Kaganda ne, ma 'ya sha gheyɛ: 'ya ya kamɛa zlema ta timɛti. 8 Ma mbeli nyi kese mpelɛa ke 'ya pɛtɛ, ka ghərəa kɛfi ba'a ka mefətekwə hɛ. Kese timɛti fa ghena ta nci we. 9 'Ya ya kamɛa zlema, yayata wəndə nya kedzeki ghɛ laka 'ya ne, katembele ŋkɛ. Wərə ŋkɛ kadzeki ba'a kashave, katekemave wəshi kezeme ta ŋkɛ ŋkɛ. 10 Ma ghərə ne, deke yitea ghərə, pesle ŋkwa ba'a kezha za sebe se ŋkɛ. 'Ya le ghəa ɗa ne, nahe 'ya kese yitea kemave mpi mbeli, yitea kemave hɛ kwele kwele. 11 'Ya kande ya wəshi ganyɛ. Nde ya wəshi ganyɛ nya keza mpia ŋkɛ kezha timɛtia ŋkɛ. 12 Ma wəndə nya səkwəve mbeli kaya wəshi, ma kenakɛ deghwava ŋkɛ kase ne, pa hwɛnyɛ mba timɛti. Ntake deghwava kakese kweci dzate hwa hɛ, kwetɛ kwetɛŋe tazemte hɛ. 13 Hwɛ yahwɛ wəndəa shɛ va nya nza ŋkɛ yitea cɛdɛ mene slene ŋkɛ. Ketsakɛ ghena ta timɛti we. 14 'Ya ya kande ya wəshi ganyɛ. Nahe 'ya keɗepe timɛtia ɗa, nahe hɛ keɗepe ɗa, 15 kala nya ɗepe ɗa Yiteyɛ ɗa ne, tsagha ɗepe Yiteyɛ ɗa 'ya. Kaza mpia ɗa 'ya tewəmbəreke timɛtia ɗa. 16 Le kweci timɛti va 'ya nyi kenakama dzawa zlema ta ɗa kaba. Ama kateŋka hɛ 'ya kadzawa. Katefa mɛa ɗa hɛ, kwetɛŋe tenza zlema ta nci, kwetɛŋe nde ya hɛ. 17 Kaɗe ɗa Yita va nya yɛhwe mte 'ya, katekemave mpia ɗa 'ya zhɛkwa. 18 Wəndə shɛ kakelehwe mpia ɗa le berete we, le ɗe ta ghəa ɗa nda mte 'ya. Berete keza mpia ɗa va ya shɛ va 'ya, berete kezhɛneke mpia ɗa ya shɛ va 'ya. Shala Yita nde gezete ɗa kamene kala nya.» 19 Pa ka Zhəwif neheve geva mbe te ghena nya gezete Yɛsə. 20 Ma ke kweci kwele kwele hwa hɛ: «'Yi'yɛghwə nde zhɛ nda yitea ghə, gezhi ŋkɛ. Wa raberə fa ghena ta ŋkɛ yɛ wa?» 21 Ma ke kweci: «Kageze ghena nde 'yi'yɛghwə kala nya na? Kaghwenemte ntsə ta wəndə nya kaghwələ nde 'yi'yɛghwə na?»
Ka Zhəwif kaɗema ghena ta Yɛsə
22 Te kwete veci, pa kwete gəsəkə menete geva mbe Zhɛrəzalɛm hefeghwe, gəsəkə nya zəzə ŋa ta ghɛa Shala mbeli te. 23 Kadzeghwa Yɛsə dzeyi mbe kwete ŋkwa nya heka mbeli kagelɛŋka ta Salomon. 24 Dzasle ka Zhəwif dzaslete, ma ke hɛ shɛ: «Hweŋkwa tencɛ n'yɛ ghəa ŋa na, mba ghen'yɛ kezəzə bake bake wa? Kenza nde gha Mɛsi, wəndə nya ghweneke Shala, gezete n'yɛ fəyitekeghə gi!» 25 Ma ke Yɛsə sha hɛ: «Nahe 'ya kegezete ŋayɛ, kese yɛ kayɛ we. Slene nyi mene 'ya kala nya gezete ɗa Yiteyɛ ɗa ne, ghenci ka negha fete yitea 'ya. 26 Ama gheyɛ ne, ashɛ yɛ kayɛ we, va nya ɗema yɛ katimɛtia ɗa. 27 Kafa mɛa ɗa timɛtia ɗa, nahe 'ya keɗepe hɛ, katəkwə təkwə ɗa hɛ. 28 Kave nda mpi nya kaghala ghala 'ya ke hɛ. Kaza hɛ tɛape we. Wəndə shɛ kazləgwəhwe hɛ shave mbe dzeve ta ɗa we. 29 Kwele ma Yiteyɛ ɗa nya kendeke ɗa hɛ ke wəshi pɛtɛ. Wəndə shɛ kezləgwəhwe kwete wəsə mbe dzeve ta Yita we. 30 Kanya kwetɛŋe n'yɛ le Yita.» 31 Pa ka Zhəwif hwepete wənə zhɛkwa, pa hɛ tsehake pelɛ kabeza Yɛsə le. 32 Ma ke Yɛsə sha hɛ: «Kwele kwele wəshi ganji nyi menete 'ya kwa ntsə ta ŋayɛ le berete ta Yita. Yitea nyama hwa hɛ ɗe yɛ kabeza ɗa wa?» 33 Ma ke ka Zhəwif shɛ: «Va nya menete wəshi ganji na nda ɗe n'yɛ kabeza ŋa we, ama va nya ŋ'wəshi Shala na, kwa yipə ghəa ŋa na le Shala, gha wəndə ŋelɛ gəmə.» 34 Ma ke Yɛsə sha hɛ: «Nahe ŋkɛ kerafete geva mbe palepa ta wəshi mahalegəa ŋayɛ vəashi, ma ke Shala gezete: Gheyɛ ya kakweci shala. 35 Nahe mə keɗepe ɓiyitsa, wəsə nya gezete Shala ne, kakelemte geva ŋkɛ we, kashala yɛ ke Shala sha mbeli nyi geze nda geva ghena ta ŋkɛ. 36 Ama 'ya ne, nahe Shala keveyi ɗa tekeleke ba'a keghweneke ɗa kasawa te hɛɗi. Tsema geze yɛ ŋele yaŋele Shala 'ya pe yɛ va nya gezete 'ya kaWəzege ta Shala 'ya wa? 37 Ma keɗema 'ya kamene slene ta Yiteyɛ ɗa ne, yɛma ghena ta ɗa yɛ ma. 38 Ama kwa nza ŋkɛ slenea shɛ yamene 'ya, ya kwela ɗema yɛ kayɛ ɗa ne, yɛ mə wəshi meŋele nyi mene 'ya ɓetəkə gi. Tagha gɛ, kateɗepe yɛ megela mbe 'ya Yita ba'a mbe Yita 'ya.» 39 Ntake hɛ kaɗe kakese zhɛkwa, pələsə Yɛsə mbelenyɛ shave mbe dzeve ta nci. 40 Pa Yɛsə zhɛneghe geva kajive te kema ta hələa Zhəwrdɛŋe, te ŋkwa nya ghate Zhaŋe kamene nda batɛme ke mbeli. Pa ntishɛnyɛ pelɛagha. 41 Tipə tipə mbeli tseneke nda geva te ŋkwa shɛ, ma ke hɛ: «Kegha Zhaŋe menete wəsə meŋele ya kwetɛŋe we, ama kaganda yayata ghena nya gezete ŋkɛ te wəndə nya.» 42 Kwele kwele mbeli nyi keyɛ Yɛsə te ŋkwa shɛ.
Mte ta Lazare
1 Kwete wəndə nya nza sləa ŋkɛ kaLazare ya shɛ shewə. Nde Bɛtani ŋkɛ, meleme ta yɛ Mari le wəzha ta meghekɛ Marte. 2 Maria shɛ nde fikɛ seɗa ta Nde sleke ŋkwa le 'wərdə, pa sehwemte le shintia ghəa nta. Wəza meghekɛ Lazare yashewə. 3 Pa ŋwalea kwɛa meghekɛ nyi ghwenakɛ nda mɛ ke Yɛsə, ma hɛ: «Nde sleke ŋkwa, shewə mcɛ ŋa nya ɗe na kala mpi tsetsenya.» 4 Ma kwa fate ghena shɛ Yɛsə kala nya ne, ma ke: «Zereghwe ta ŋkɛa shɛ ne, zereghwe kemte ŋkɛ we, ama nahe ŋkɛ kemenete geva yitea newe zləvəa Shala mbeli te, laka gheŋkɛ tekemave zləvə Wəzege ta Shala perə.» 5 Kwele kwele ɗe yɛ Marte le Mari Yɛsə, tsagha wəza megheyɛa nci Lazare. 6 Ma kwa fate zereghwe ta Lazare Yɛsə ne, mba ŋkɛ te ŋkwa nya nza shɛ ŋkɛ kahɛ bake. 7 Kwetere wəmbəa ŋa ŋkɛ, ma ke sha mbeli nyi ketəkwə təkwə: «Ngara ɓəmə kadzawa Zhəwdɛ zhɛkwa.» 8 Ma ke hɛ shɛ: «Rabi, kwa te nantse se ka Zhəwif kazele ŋa yitea beza ŋa le pelɛ, gheɓəmə kadzeme te sebe zhɛkwa pa na?» 9 Ma ke Yɛsə: «Ashɛ lerə meŋe bakeghəmbe mbe vəghwə wəka? Wəndə nya kedzeghwa heveci ne, katsa tehene we, va nya newe waŋea ŋkwa nya te hɛɗi nya ŋkɛ. 10 Ma wəndə nya kedzeghwa heviɗi ne, katsa ŋkɛ tehene va nya ɗema waŋe shɛ kwa ntsə ta ŋkɛ.» 11 Kwetere wəmbəa ghena nya, ma ke Yɛsə: «Yitea hɛ mcɛ ɓə Lazare, lə 'ya kafeɗeghete.» 12 Ma ke mbeli nyi ketəkwə təkwə shɛ: «Ma nda tehɛ ŋkɛ ne, pələsə tenza ŋkɛ tsagha wəka?» 13 Mte ta Lazare yaɗe Yɛsə kageze nda ke hɛ, ama ma ke mbeli nyi ketəkwə təkwə le ŋa nci: «Hɛa shɛ yahɛ Lazare fate.» 14 Ma ke Yɛsə gezete nda dazhɛ dazhɛ ke hɛ: «Nahe Lazare kemte. 15 Zlama ya va 'ya te ghəa ŋayɛ kwa ɗema 'ya tagha nda mtenyɛ ŋkɛ. Tsagha ne, kateyɛ ɗa yɛ. Ama mbi mə kalə shɛ.» 16 Tagha gɛ, ma ke Tomas, nya nza sləa ŋkɛ kaKwalegha sha kweci mbeli nyi ketəkwə təkwə Yɛsə: «Ngara ɓəmə perə kamte le.»
Yɛsə ya kasame kwa kwele ba'a mpi
17 Nda kekave ŋkwa shɛ Yɛsə, nahe Lazare kehɛ wəfaɗe kwa kwele. 18 Takwa takwa Bɛtani yitea Zhɛrəzalɛm, gare kilemɛtre mahekene ya kwelɛ hɛ. 19 Kwele kwele ka Zhəwif nyi kesawa pelɛ Zhɛrəzalɛm yitea njiŋwe yɛ Marte le Mari va mte ta wəza megheyɛa nci. 20 Ma kwa fa se ta Yɛsə Marte ne, cape nde kalə yitea begeme hɛ le kwa hweŋkwa. Ama ki ghɛ ntishɛ nda Mari kwa ŋa nta. 21 Ma ke Marte sha Yɛsə: «Nde sleke ŋkwa, ma nda teke na ne, nza katemte wəza meyɛ ɗa we. 22 Ama nahe 'ya keɗepe, ya tsetsenyanyɛ ŋkɛ, yayata wəsə nya 'yɛwe na va Shala ne, kateve ŋa ŋkɛ.» 23 Ma ke Yɛsə shɛ: «Katesame wəza meyɛ ŋa kwa kwele le mpi.» 24 Ma ke Marte: «Nahe 'ya keɗepe, katesame ŋkɛ kwa kwele le mpi vəa ŋkwa nya tesame mbelia kwahɛɗi kwa kwele.» 25 Ma ke Yɛsə: «'Ya ya kasame kwa kwele ba'a kampi. Ma wəndə nya keyɛte ɗa ya tsemanyɛ mtenyɛ ŋkɛ ne, katenza ŋkɛ teghweme. 26 Yayata wəndə nya teghweme nya keyɛte ɗa, katemte ŋkɛ kaghala ghala we. Nahe na keyɛte na?» 27 Ma ke Marte shɛ: «Kaganda ŋa Nde sleke ŋkwa, gha ya kaMɛsi, Wəzege ta Shala nya geze se ta ŋkɛ mbeli ghalanza te hɛɗi.»
Yɛsə kanehwene
28 Ma kwa gezemte ghena Marte kala nyagha, cape nde kalə kaheka wəzha ta meghekɛ Mari, ma ke shɛ ɓɛhwɛ ɓɛhwɛ: «Teke Nde sleke ɓəmə, kaheka ŋa ŋkɛ.» 29 Ma kwa fate ghena shɛ Mari, pelɛhetɛme nde, ntəŋə nde kahe kahe kalə sha Yɛsə. 30 Kenaka Yɛsə kadzembe meleme we, mbanyɛ ŋkɛ te ŋkwa nya begeme hɛ le Marte. 31 Ma kwa nakɛ shave ta Mari hɛ kahe kahe, ntəŋə ka Zhəwif nyi kese katsa nda ɗese va mte ta wəza meghekɛ hwe sebe ta nta. Ma ke hɛ mbe ghəa nci: «Gheŋkɛ dzeme kwele kanehwene pelɛagha.» 32 Pɛkwe ma ta Mari sha Yɛsə, gwəɗəŋə nde mbe kema ta ŋkɛ: «Nde sleke ŋkwa, ma nda teke na veci ŋkwa shɛ ne, nza katemte wəza meyɛ ɗa we.» 33 Kwa nakɛ Mari Yɛsə kanehwene ba'a kweci ka Zhəwif nyi kese le kanehwene ne, kazhɛ nda wənəa ŋkɛ kwele kwele, kwetɛ kwetɛŋe mehele ta ŋkɛ. 34 Ma ke sha hɛ: «Tema lamte ŋkɛ yɛ wa?» Ma ke hɛ: «Nde sleke ŋkwa, nde nakɛma gi!» 35 Ntake Yɛsə kanehwene. 36 Ma ke ka Zhəwif: «Newe ma mə ɗe nya ɗe wəndəa shɛ ŋkɛ gi!» 37 Ma ke kweci: «Ashɛ gheŋkɛ nde pelemte nda ntsə ke kwete ghwələ vecagha wəka? Va wa ɗema ŋkɛ fɛake Lazare kemte tsagha wa?»
Lazare kelakame geva same kwa kwele le mpi
38 Kwetɛ kwetɛŋe mehele ta Yɛsə zhɛkwa, ntəŋə ŋkɛ kalə kadzemɛa kwele. Mbe zlera kwelea shɛ, pa kwete pelɛ kewəbanyɛ mɛ. 39 Ma ke Yɛsə: «Pəŋəmte mə pelɛa shɛ.» Ma ke Marte, wəzha ta meghekɛa wəndə nya kemte: «Nde sleke ŋkwa kedaɗə daɗə tenza ŋkɛ, kwa nza ŋkɛ hɛ wəfaɗe menete ŋkɛ kwa kwele.» 40 Ma ke Yɛsə zhɛnete nda: «Ma 'ya gezete ŋa: Ma keyɛte na ne, katenewe zləvəa Shala na.» 41 Pa mbeli tsəkwəmte pelɛa shɛ. Slete Yɛsə sletete kema yitea ghweme, ma ke: «Yita, hana 'ya sha gha, va nya fate səkwə ta ɗa na. 42 Nahe 'ya keɗepe kafa səkwə ta ɗa na keveci keveci. Ama deke yitea mbeli nyi teke yitea 'ya geze 'ya, yitea ɗepe hɛ kaganda gha nde ghweneke ɗa kase.» 43 Kwa sebe ta ŋkɛ, ma ke Yɛsə zlapete: «Lazare, same kwagha.» 44 Pa wəndə kemte mte same kwa kwele. Kepeɗe peɗe yɛ dzeve ta ŋkɛ le seɗa ta ŋkɛ mbe zlave nyi lamte mbeli le. Dəmbəli mbəli kema ta ŋkɛ tepeɗe. Tagha gɛ, ma ke Yɛsə: «Pelemte mə ŋkɛ ba'a sərəakɛ mə ŋkɛ kaslə.»
Ka Zhəwif nyi jama jama katsa ghena kapesle Yɛsə
45 Kwele kwele kweci ka Zhəwif nyi kese katsa nda ɗese ke Mari, nyi keyɛte Yɛsə kwa nakɛ wəshi nyi menete ŋkɛ hɛ. 46 Cape kweci ka Zhəwif kalə kageze nda wəshi nyi menete Yɛsə ke ka Fariziyɛn. 47 Pa ka Fariziyɛn le mbeli nyi te ghəa ka dzeghe Shala tsenete mbelia jama nyi te ghə, ma ke hɛ: «Tsema temene gheɓəmə le wəndə nya wa? Kwele kwele wəshi meŋele nyi mene ŋkɛ. 48 Ma kesərəakɛ gheɓəmə kamene kala nya ne, kateyɛ ŋkɛ mbeli pɛtɛ, kwetere wəmbəa ŋkɛ, katese ka Rome kabeze ghɛa Shala ta ɓəmə ba'a hɛɗia ɓəmə.» 49 Pa kwete wəndə sate hwa hɛ, Kayife sləa ŋkɛ. Gheŋkɛ wəndə kwelea ka dzeghe Shala te va shɛ. Ma ke sha hɛ: «Kafa wəsə yɛ tɛape we, 50 keɗepe yɛ, jara ma mtenyɛ wəndə kwetɛŋe te ŋkwa mbeli kwele kwele ba'a te ŋkwa pɛtɛa hwelefe wəka?» 51 Shave mbe ghəa ŋkɛ ghena nya gezete ŋkɛ we, ama va nya nza ŋkɛ kawəndə kwelea ka dzeghe Shala te va shɛ ne, nahe ŋkɛ kegezete ghena kelɛŋə tsema tsema hi Yɛsə kamte kezha mbele hwelefe ta ka Zhəwif, 52 kenza deke kezha hwelefe ta ka Zhəwif we, ama kezha jikə ŋwalea Shala nyi ketazemte geva kanya kwetɛŋe. 53 Se te vecia shɛ tarete mte ta Yɛsə mbelia jama ta ka Zhəwif. 54 Vatse ɗema Yɛsə kezhɛne se kadzeghwa hwa mbeli darahwe rahwe hwa ka Zhəwif. Cape ŋkɛ slə te ŋkwa shɛ kadzembe meleme nya takwa takwa yitea gamba, nya heka mbeli kaƐfrayim. Ntishɛ ŋkɛ pelɛagha le mbeli nyi ketəkwə təkwə. 55 Takwa takwa gəsəkəa Pake ta ka Zhəwif. Kwele kwele mbeli shave mbe kweci meleme kadzeme Zhɛrəzalɛm kezha yaɓe ghəa nci wɛŋe nda tegha geva gəsəkə. 56 Ntake hɛ kazele Yɛsə. Ma ke hɛ kwelɛ ghəa nci kwa nza hɛ mbe ghɛa Shala: «Tsema pe yɛ wa? Katese ŋkɛ fate yitea gəsəkə nya na, na, kaɗema ŋkɛ se na?» 57 Ma ke mbeli nyi te ghəa ka dzeghe Shala le ka Fariziyɛn: «Yayata wəndə nya kenakɛ Yɛsə ne, ncɛ yancɛ ŋkɛ yitea kese mbeli.»
Mari kafi seɗa ta Yɛsə le 'wərdə
1 Tene hɛ ŋkwaŋe yitea gəsəkəa Pake. Ntəŋə Yɛsə kadzawa Bɛtani, meleme ta yɛ Lazare, wəndə nya kelakame ŋkɛ same kwa kwele le mpi. 2 Tagha ne, pa mbeli menete nda wəsə kezeme kazləvəa ŋkɛ, Marte nde hi nda wəshia shɛhɛ. Hwa mbeli nyi kezeme ɗafa shɛ Lazare. 3 Pa Mari kelete kwa bake ta bela ta litrəa 'wərdə ganyɛ nya jakeja. Ntake nde kasheke te seɗa ta Yɛsə ba'a kasehwe le shintia ghəa nta. Ka'wərdəa shɛ zəŋwə ŋkwa nya ki ghɛ shɛ pɛtɛ. 4 Ma ke Zhəwdas Iskariyote, wəndə nya ketepamte Yɛsə hwa mbeli nyi ketəkwə təkwə: 5 «Va wa ɗema mbeli pamte 'wərdə nya yitea ve nda cɛdɛ nya kese te kaslibə mahekenemsə gwəmsə ke ka titikwəa kɛfi wa?» 6 Va nya zhɛ heli ŋkɛ yitea ka titikwəa kɛfi nda gezete ghena shɛ Zhəwdas tsagha we, ama va nya nza ŋkɛ kande ghərə. Gheŋkɛ yanza slibə pase ve, kaghərə cɛdɛ nya kwa ŋkɛ. 7 Ma ke Yɛsə shɛ: «Zlenekɛ male nyagha veyi 'wərdəa shɛ nde yitea fi ɗa nde te veci nya tela ɗa mbeli. 8 Teke ka titikwəa kɛfi keveci keveci hwa gheyɛ, ama 'ya ne, teke tenza 'ya keveci keveci hwa gheyɛ we.»
Mbeli katsa ghena kapesle Lazare
9 Nahe ka Zhəwif nyi ketsenete geva tipə tipə kefave se ta Yɛsə kwa Bɛtani. Deke yitea newe Yɛsə se hɛ we, ama yitea newe Lazare nya kelakame Yɛsə same kwa kwele le mpi. 10 Pa mbeli nyi te ghəa ka dzeghe Shala tsahwe ghena ta nci yitea pesle Lazare perə, 11 va nya nza ŋkɛ kwele mbeli nyi kelənji ba'a nyi keyɛhwe Yɛsə.
Yɛsə kadzembe Zhɛrəzalɛm
12 Te hendɛ ta ŋkwa, nahe mbeli nyi kese yitea gəsəkəa Pake kwele kwele kefa se ta Yɛsə kadzeme Zhɛrəzalɛm. 13 Pa hɛ tsasleve dzeve ta peha kalə kakemane kwa hweŋkwa. Ma ke hɛ zlapete: «Tsahe ɓəmə Shala tehwə ghweme. Kewəpi wəpi nza wəndə nya kese te sləa Mahwətə. Wəpi yawəpi meghea ka Israyɛl ŋkɛ.» 14 Pa Yɛsə nakɛ kwete leve ta kwara, tarame ŋkɛ pelɛ kala nya kerafete geva mbe Ghena ta Shala: 15 «Meleme ta Siyon, ghazlənəma na ma: Wa nya meghea ŋa nya kasame te leve ta kwara.» 16 Kenaka mbeli nyi ketəkwə təkwə Yɛsə kafave ghena shɛ we. Ma kwa dzembe zləvəa ŋkɛ Yɛsə ne, ntake hɛ kazəzə ghena nya kerafete geva mbe Ghena ta Shala te ghəa ŋkɛ, nahe mbeli kemenete wəsə nya gezete ghena shɛ. 17 Ntake mbeli nyi tagha nda hekakame Lazare Yɛsə same kwa kwele le mpi kanegha fete te wəshi nyi nakɛ hɛ. 18 Vatse se mbeli kakemane Yɛsə kwa hweŋkwa, kwa nza nde nahe hɛ kefave wəsə meŋele nya menete ŋkɛ. 19 Tagha gɛ, ma ke ka Fariziyɛn kwelɛ ghəa nci: «Newe mə gɛ, kwete wəsə shɛ kamenete mə ɓiyitsa we. Pɛtɛ mbeli katəkwə təkwə tsetsenya.»
Kweci ka Grɛk kasepa Yɛsə
20 Pa kweci ka Grɛk hwa mbeli nyi kedzeme Zhɛrəzalɛm kahawe va Shala te vecia gəsəkə. 21 Pa hɛ hendave nda geva ke Filipe nde Bɛtesayida nya te hɛɗia ka Galilɛ, ma ke hɛ shɛ: «Wəndə ɗa, kaɗe n'yɛ begeme le Yɛsə.» 22 Cape Filipe kalə kageze nda ke Andrɛ. Ntəŋə hɛ bake bake kalə kageze nda ke Yɛsə. 23 Ma ke Yɛsə sha hɛ: «Nahe və nya teŋ'we zləvəa ŋkɛ Wəzege ta za kwa kedzeghete geva tsetsenya. 24 Kaganda, ma 'ya sha gheyɛ: ma keɗema ha nya keteɗe te hɛɗi kemte ne, kwetɛŋenyɛ nza ŋkɛ. Ama ma kemte ŋkɛ ne, kwele kwele teya ŋkɛ. 25 Yayata wəndə nya keɗehwe mpia ŋkɛ ne, kateza ŋkɛ, ama wəndə nya keɗema mpia ŋkɛ teke te hɛɗi nya ne, mpi nya kaghala ghala yatekemave ŋkɛ. 26 Keɗe wəndə kamene slene ta ɗa ne, pa katəkwə təkwə ɗa. Te ŋkwa nya nza 'ya, tagha tenza wəndə nya kemene slene ta ɗa. Kateve nda zləvə Yita ke wəndəa shɛ.
Yɛsə kageze ghena ta mte ta ŋkɛ
27 Kwetɛ kwetɛŋe mehele ta ɗa tsetsenya. Wa 'ya sha geze tse gɛ. Kashɛ 'ya geze, Yita, fɛake yaka nya tesa nya 'ya mbe və nya, 'ya tse gɛ na? Va nya nza ŋkɛ kezha və nya se 'ya. 28 Yita, vate zləvə te sləa ŋa tsetsenya.» Tagha gɛ, ma ke kwete ghena sawa pelɛ ghweme: «Nahe 'ya kevate zləvə te, kateve zləvə 'ya te zhɛkwa.» 29 Ma ke mbeli nyi tagha na: «Va nde gaka.» Ma ke kweci: «Ewə, nde ghwene ta Shala nde se kageze nda ghena.» 30 Ma ke Yɛsə sha hɛ: «Kaŋa ɗa gezeke geva ghena nya sawa pelɛ ghweme we, ama kaŋa ŋayɛ. 31 Tsetsenya ne, katemeha ghwə Shala te mbeli nyi te hɛɗi. Tsetsenya ne, kateŋkamte meghe nya ndiremia mehele nya Shala te hɛɗi nya. 32 Ma 'ya le ŋa ɗa, ma vəa ŋkwa nya tesletete geva 'ya dzeme yitea ghweme ne, katefə mbeli 'ya kase sha 'ya pɛtɛ.» 33 Ma laka ghena shɛhɛ ne, ncɛ yancɛ Yɛsə tsema tsema temte ŋkɛ. 34 Ma ke mbeli nyi ketsenete geva tagha: «Nahe n'yɛ kejaŋgate mbe palepa ta wəsə mahalegə, ma Mɛsi, wəndə nya ghweneke Shala ne, kaghala ghala tenza ŋkɛ, tsema geze na kateslete Wəzege ta za mbeli dzeme yitea ghweme pa wa? Wa Wəzege ta za shɛ wa?» 35 Ma ke Yɛsə sha hɛ: «Mbanyɛ waŋe kahɛ ɓɛhwɛ hwa gheyɛ. Dzeghwa mə tsetsenya yitea waŋea shɛ yagha ŋkwesle tese kaŋzlete ŋayɛ. Va nya nza ŋkɛ wəndə nya kedzeghwa te ŋkwesle ne, keɗepe ŋkwa nya dzeghwa ŋkɛ te we. 36 Yɛte mə waŋe mbanyɛ ŋkɛ kaɓele hwa gheyɛ, yitea nza yɛ kambelia waŋe.»
Ka Zhəwif kaɗema yɛ Yɛsə
Ma kwa gezemte ghena Yɛsə kala nya ne, pa slənyɛ ba'a wəfərənyɛ va hɛ. 37 Ya tsemanyɛ menete wəshi meŋele Yɛsə mbe kema ta nci ne, ashɛ hɛ kayɛ ŋkɛ we. 38 Wa nya tsetse menete geva wəsə nya gezete Ɛzayi, nde mɛ ŋkwa: «Shala Mahwətə, wa nde yɛte ghena ta n'yɛ wa? Ke wa ncɛte nda berete ta ŋkɛ Shala wa?» 39 Nahe Ɛzayi gezete va wa va wa shaŋe mbelia shɛhɛ kayɛ, ma ke: 40 «Nahe Shala keghwəghwələpəmte hɛ, nahe ŋkɛ keŋzleŋzlete mehele ta nci, yitea ɗema ntsə ta nci kanakɛ ŋkwa ba'a yitea ɗema mehele ta nci kafave ghena. Vatse ɗema hɛ shɛ zhɛre geva kase sha 'ya kezha mbe hɛ 'ya.» 41 Ma nda gezete Ɛzayi kala nya ne, va nya nakɛ zləvəa Yɛsə ŋkɛ, va nya gezete ghena ŋkɛ te ghəa ŋkɛ. 42 Ya tsemanyɛ nza ŋkɛ tsagha, kwele kwele kweci hwa mbelia jama ta ka Zhəwif nyi keyɛte Yɛsə. Ama va ghazlənə va ka Fariziyɛn ne, hɛreɗɛ hɛ ɗema ncɛ ghəa nci yagha mbeli teŋkamte hɛ shave mbe cɛ kesəkwə ghə. 43 Ɗe ma zləvə nya kese hɛ va mbeli ke ŋa Shala.
Ghena ta Yɛsə nde meha ghwə te mbeli
44 Ma ke Yɛsə zlapete: «Yayata wəndə nya keyɛte ɗa ne, deke 'ya yayɛte ŋkɛ we, ama wəndə nya keghweneke ɗa perə. 45 Yayata wəndə nya kenakɛ ɗa ne, nahe ŋkɛ kenakɛ wəndə nya keghweneke ɗa ɓiyitsa. 46 Nahe 'ya kese te hɛɗi kala waŋe, yitea ɗema wəndə nya keyɛte ɗa kanza mbe ŋkwesle. 47 Mbeli nyi kefate ghena ta ɗa nda ɗema hɛ mene slene le ne, 'ya nde meha ghwə te hɛ we, kwa nza ŋkɛ ma se ta ɗa hwa mbeli ne, yitea meha ghwə te hɛ we, yitea mbele hɛ. 48 Ma wəndə nya keɓela ɗa ma ne, nya keɗema yɛ ghena ta ɗa ne, katemeha ghwə mbeli te, ghena nya gezete 'ya nde temeha ghwə te kwa keɗaŋe ta hɛ. 49 Kwa nza ŋkɛ ŋa ɗa ghena nya geze 'ya we, ama Yiteyɛ ɗa nya keghweneke ɗa nde gezete ɗa ghena nyi geze 'ya. 50 Nahe 'ya keɗepe, ma ghena nya gezeke ŋkɛ ne, gheŋkɛ nde ve nda mpi nya kaghala ghala ke mbeli. Nya gezete ɗa Yiteyɛ ɗa, kala gheŋkɛ geze nda 'ya ke mbeli.»
Yɛsə kapɛ nda seɗa ke mbeli nyi ketəkwə təkwə
1 Nda tenaka gəsəkəa Pake, nahe Yɛsə keɗepe nahe vəa ŋkɛ kedzeghete geva kasərə hɛɗi nya yitea lə sha Yitenyɛ. Mbe ɗe mbeli nyi ketəkwə təkwə nyi kwake te hɛɗi ŋkɛ shanda. Nahe ŋkɛ keɗete hɛ hwa'a te kwa keɗaŋe. 2 Kazeme ɗafa yɛ Yɛsə le mbeli nyi ketəkwə təkwə. Nahe gətəli kevame zəzə mbe wənəa Zhəwdas, wəzege ta Simon Iskariyote, yitea pamte Yɛsə. 3 Nahe Yɛsə keɗepe pɛtɛ ndeke nda wəshi Yitenyɛ mbe dzeve ta ŋkɛ. Nahe ŋkɛ keɗepe se laka Shala se ŋkɛ, katezhɛne geva ŋkɛ kalə shɛ zhɛkwa. 4 Pa Yɛsə sate, pa seɗemte kwete lekwesa ta ŋkɛ, laŋe kelete zlave pa hwepekɛ hwə le. 5 Kwa sebe ta ŋkɛ pa gəve yɛmə kwa kwapɛ, ntake kapɛ seɗa ta mbeli nyi ketəkwə təkwə le, kasehwe yɛmə ŋkɛ sawa te hɛ le zlave nya hwepete hwə ŋkɛ le. 6 Hwa'a ŋkɛ sha Simon Piyɛre yitea pɛ nda ŋa ŋkɛ seɗa. Ma ke Piyɛre shɛ: «Nde sleke ŋkwa, gha nde pɛ ɗa seɗa na?» 7 Ma ke Yɛsə shɛ: «Kenaka na kaɗepe wəsə nya mene 'ya tsetsenya we, te kwete veci teɗepe na.» 8 Ma ke Piyɛre shɛ: «Katepɛ ɗa seɗa na tɛape we.» Ma ke Yɛsə shɛ: «Ma keɗema 'ya kepɛkɛ ŋa seɗa ne, wəsə shɛ kateŋ'we na mbe wəsə nya tekele 'ya kase we.» 9 Ma ke Simon Piyɛre shɛ: «Ma nda tsagha nde ne, deke seɗa yapɛ na we, ama pɛkɛ ɗa yɛ dzeve ba'a ghə perə.» 10 Ma ke Yɛsə shɛ: «Ma wəndə nya kepɛkɛ pɛ ne, kazhɛne ŋkɛ kaɗe kapɛ we, deke yɛ seɗa. Kwa nza ŋkɛ ne, pɛtɛa geva ta ŋkɛ wɛŋe. Ma gheyɛ ne, nahe yɛ kenza wɛŋe wɛŋe, ama pɛtɛa ŋayɛ we.» 11 Nahe Yɛsə keɗepe wəndə nya ketepamte ŋkɛ, vatse gɛ, ma ke: «Kenza yɛ pɛtɛ wɛŋe wɛŋe we.» 12 Pɛmtema ta Yɛsə ke seɗa ta nci, seɗakwe ŋkɛ sha lekwesa ta ŋkɛ, ntishɛ ŋkɛ te ŋkwa ŋkɛ, ma ke sha hɛ: «Nahe yɛ keɗepe wəsə nya menete ŋayɛ nya 'ya na? 13 Nde sleke ɗa, pe yɛ sha 'ya, Nde sleke ŋkwa, pe yɛ sha 'ya, kaganda ŋayɛ, gheŋkɛa shɛ 'ya deŋwa. 14 Kwa nza ŋkɛ Nde sleke ŋkwa 'ya ba'a Nde sleke ŋayɛ 'ya ne, nahe 'ya kepɛkɛ ŋayɛ seɗa ta ŋayɛ, nahe ŋkɛ kehite geva yitea pɛ nda yɛ ke ghəa ŋayɛ perə. 15 Nahe 'ya kencɛte ŋayɛ hweŋkwa yitea mene yɛ kala nya menete ŋayɛ 'ya. 16 Kaganda ne, ma 'ya sha gheyɛ: mava shɛ kanza kwele ma ke wəndə nya kesleke we, kanza wəndə nya ghwenakɛ mbeli kwele ma ke wəndə nya keghwenakɛ we. 17 Tsetsenya ne, nahe yɛ keɗepe ghena shɛ, katezlama yɛ kemenete yɛ. 18 Gheyɛ pɛtɛ yageze 'ya we, nahe 'ya keɗepe mbeli nyi tsehave 'ya. Nahe ŋkɛ kemenete geva kala nya yitea nza wəshi nyi kerafete geva mbe Ghena ta Shala kaganda, ma ke: Wəndə nya kezehwe ɗafa le 'ya nde zhɛrenyɛ kande ghema ta ɗa. 19 Tsetsenyanyɛ geze ŋayɛ 'ya tewə wəsəa shɛ kemenete geva, yitea yɛte yɛ veci nya temene geva ŋkɛ: 'Ya ya ka'ya. 20 Kaganda geze ŋayɛ 'ya, ma wəndə nya kekemaneve wəndə nya ghwenakɛ 'ya ne, 'ya yakemaneve ŋkɛ. Ma wəndə nya kekemaneve ɗa ne, wəndə nya keghweneke ɗa yakemaneve ŋkɛ.»
Yɛsə kancɛ nda ke mbeli Zhəwdas nde tepamte
21 Kwa gezemte ghena nyi Yɛsə ne, pa mehele ta ŋkɛ tazemte geva kwetɛ kwetɛŋe, ma ke: «Kaganda ne, ma 'ya sha gheyɛ: kwete wəndə hwa gheyɛ katepamte ɗa.» 22 Ntake mbeli nyi ketəkwə təkwə kanewe ghəa nci, ma ke hɛ: «Wa wəndə nya geze ghena nya ŋkɛ te wa?» 23 Ntishɛnyɛ kwete wəndə nya ɗe ŋkɛ za ma hwa nyi ketəkwə təkwə dzeme vare Yɛsə. 24 Deghwaɗe Simon Piyɛre deghwaɗakɛ yitea 'yɛwe wəndəa shɛ va Yɛsə. 25 Pa yiŋwəte geva laka Yɛsə, ma ke: «Wa wəndəa shɛ wa, Nde sleke ŋkwa?» 26 Ma a ke Yɛsə zhɛnete: «'Ya katemze nɗeli te ɗafa: ma wəndə nya teve nda ɗafa shɛ 'ya ne, gheŋkɛ ŋkɛ.» Pa Yɛsə ŋave ɗafa, pa mzate nɗeli te ba'a ndeke nda ke Zhəwdas, wəzege ta Simon Iskariyote. 27 Keletema ta Zhəwdas ke ɗafa shɛ, shilimə Satan mbe wənəa ŋkɛ. Ma ke Yɛsə shɛ: «Ma wəsə nya ɗe nya na kamene ne, menete kahe kahe.» 28 Wəndə shɛ hwa mbeli nyi kənəa ɗafa le Yɛsə keɗepete va wa va wa geze nda ghena nya ŋkɛ ke Zhəwdas we. 29 Ma ke kweci hwa hɛ: «Nahe Yɛsə keghwenakɛ Zhəwdas kapa wəshi yitea gəsəkə keɗema kaneheve nda cɛdɛ ke ka titikwəa kɛfi.» Va nya nza cɛdɛa nci va Zhəwdas. 30 Zehwema ta Zhəwdas ke ɗafa shɛ ne, ntəŋə shavenyɛ. Heviɗi ŋkwa.
Ɗe mə ghəa ŋayɛ ke Yɛsə
31 Kwa shavenyɛ Zhəwdas ne, ma ke Yɛsə: «Tsetsenya ne, kateve geva zləvə te Wəzege ta za. Tsetsenya ɓiyitsa ne, katenewe zləvəa Shala mbeli laka gheŋkɛ. 32 Ma kenakɛ zləvəa Shala mbeli laka gheŋkɛ ne, Shala nde tencɛ zləvəa Wəzege ta ŋkɛ le ghəa ŋkɛ perə, takwa takwa ŋkɛ katencɛ. 33 Ŋwalea ɗa, mba 'ya katetemə le gheyɛ kwele kwele ɓiyitsa we. Katezele ɗa yɛ, kala nya gezete nda 'ya ke ka Zhəwif: ashɛ yɛ kakekave ŋkwa nya telə 'ya te we. 34 Wa nya ghena mɛnɛfɛ nya geze ŋayɛ 'ya nya: ɗe mə ghəa ŋayɛ. Pa yɛ hi kaɗe ghəa ŋayɛ kala nya se 'ya ɗe ŋayɛ. 35 Ma kenza nde kaɗe ghəa ŋayɛ yɛ ne, pɛtɛ teɗepe ŋayɛ mbeli kaka təkwə təkwə ɗa yɛ.»
Yɛsə kageze kateɗema ŋkɛ Piyɛre
36 Ma ke Simon Piyɛre sha Yɛsə: «Kadzema na wa, Nde sleke ŋkwa?» Ma ke Yɛsə shɛ: «Ashɛ nahe na kantsehe ŋa te ŋkwa nya telə 'ya te kaba we, te kwete veci nza na kantsehe ŋa te.» 37 Ma ke Piyɛre shɛ: «Nde sleke ŋkwa, va wa ɗema 'ya kazele ŋa tsetsenya wa? Ya mtenyɛ ŋkɛ ne, wərə 'ya kamte kezha gha.» 38 Ma ke Yɛsə zhɛnete nda: «Kaganda ɗe na kamte tewəmbəreke 'ya pa na? Fəyitekeghə geze ŋa 'ya kaganda ne, ma nda teheka ŋələ, kategeze na mahekene zhigə kaɗema na keɗepe ɗa.»
Yɛsə ya kahweŋkwa kelə sha Yita
1 Ma ke Yɛsə: «Ghazlənəma yɛ ma, yɛhwe mə Shala, yɛte ɗa mə perə. 2 Kwele kwele ŋkwa kenza pelɛ ghɛa Yiteyɛ ɗa. Dzeme yadzeme 'ya yitea hi ŋayɛ ŋkwa. Keɗema ŋkɛ kakaganda ne, nza kageze ŋayɛ 'ya we. 3 Ma kehite ŋayɛ ŋkwa 'ya ne, nda se 'ya kakele ŋayɛ kadzete ŋkwa nya se 'ya, yitea nza mə le gheyɛ te ŋkwa shɛ. 4 Nahe yɛ keɗepe hweŋkwa kelə kadzete ŋkwa nya telə 'ya te.» 5 Ma ke Tomas shɛ: «Nde sleke ŋkwa, keɗepe ŋkwa nya telə na te ghen'yɛ we. Tsema nza n'yɛ kateɗepete hweŋkwa kelə wa?» 6 Ma ke Yɛsə shɛ: «'Ya ya kahweŋkwa, kakaganda ba'a kampi. Wəndə shɛ kalə sha Yita keɗema laka 'ya we. 7 Ma nahe yɛ keɗepe ɗa ne, kateɗepe Yiteyɛ ɗa yɛ perə. Tsetsenyanyɛ ne, nahe yɛ keɗepe, nahe yɛ kenakɛ.» 8 Ma ke Filipe shɛ: «Nde sleke ŋkwa, ncɛte n'yɛ Yite ŋa shɛ, wərə n'yɛ ŋkɛ.» 9 Ma ke Yɛsə shɛ: «Filipe, ghalanza mə le gheyɛ ne, nda keɗepe ɗa na we pa na? Wəndə nya kenakɛ ɗa ne, nahe ŋkɛ kenakɛ Yiteyɛ ɗa. Yitea wa 'yɛwe na va 'ya: Ncɛte n'yɛ Yita pa wa? 10 Keyɛte na mbe Yiteyɛ ɗa 'ya, mbe 'ya Yiteyɛ ɗa wəka? Se va 'ya se ghena nyi geze ŋayɛ 'ya we. Yiteyɛ ɗa nya kenza mbe 'ya nde mene slene ta ŋkɛ. 11 Yɛte ɗa mə, mbe Yiteyɛ ɗa 'ya, mbe 'ya Yiteyɛ ɗa. Keɗema yɛ kayɛ ghena ta ɗa, yɛte mə te wəshi meŋele nyi se 'ya kamene. 12 Kaganda ne, ma 'ya sha gheyɛ: ma wəndə nya keyɛte ɗa ne, katemene slene nyi se 'ya kamene ŋkɛ. Za ma ŋkɛ temene ke 'ya, va nya nza 'ya katelə ɗa sha Yiteyɛ ɗa. 13 Yayata wəsə nya 'yɛwe yɛ te sləa ɗa ne, katemene ŋayɛ 'ya yitea ncɛte geva zləvəa Yita mbe Wəzege ta ŋkɛ. 14 Yayata wəsə nya 'yɛwete yɛ te sləa ɗa ne, katemene ŋayɛ hɛ 'ya.
Kateghwene ŋayɛ geva Sefəa Shala
15 Ma kenza nde kaɗe ɗa yɛ ne, katehawe yɛ va ghena nya gezeke 'ya. 16 Katesəkwə Yita 'ya yitea ve ŋayɛ wəndə nya kekemane ŋayɛ ŋkɛ, yitea nza ŋkɛ le gheyɛ keveci keveci, 17 gheŋkɛ Sefəa Shala nya le kaganda, ashɛ mbeli nyi te hɛɗi kakemaneve we, va nya nza ŋkɛ shaŋe hɛ kanakɛ, shaŋe hɛ kaɗepe. Ama gheyɛ kwa ŋa ŋayɛ ne, nahe yɛ keɗepe, va nya nza ŋkɛ le gheyɛ, mbe gheyɛ ŋkɛ. 18 Kazlenekɛ ŋayɛ 'ya kaka mezhɛtiti we, katese 'ya sha gheyɛ zhɛkwa. 19 Temə vireɗi ne, katezhɛne mbeli kanakɛ ɗa we, ama gheyɛ ne, katenakɛ ɗa yɛ le mpi, le mpia shɛ tenza yɛ perə. 20 Te vecia shɛ ne, kateɗepe yɛ mbe Yiteyɛ ɗa 'ya, gheyɛ ɓiyitsa, mbe 'ya yɛ, mbe gheyɛ 'ya. 21 Wəndə nya kendeke nda ghəa ŋkɛ ke ghena nya gezeke 'ya, pa ŋkɛ menete slene le ne, gheŋkɛ nde ɗe ɗa. Wəndə nya keɗe ɗa, gheŋkɛ yaɗe Yiteyɛ ɗa. Kateɗe wəndəa shɛ 'ya perə, pa 'ya ncɛte nda ghəa ɗa.» 22 Ma ke Zhəwde nya keɗema kaZhəwdas Iskariyote shɛ: «Nde sleke ŋkwa, tsema temene geva ŋkɛ nda nza na kancɛte n'yɛ ghəa ŋa, kaɗema ke kweci mbeli wa?» 23 Ma ke Yɛsə shɛ: «Wəndə nya keɗe ɗa ne, katehawe ŋkɛ va ghena ta ɗa, kateɗe Yiteyɛ ɗa. Ghen'yɛ le Yiteyɛ ɗa katese n'yɛ shɛ kanza mbe. 24 Wəndə nya keɗema ɗa ne, kahawe ŋkɛ va ghena ta ɗa we. Ghena nya fa nya yɛ va 'ya tse ne, ŋa ɗa ghena shɛ we, ama ŋa Yiteyɛ ɗa nya keghweneke ɗa kase. 25 Nahe 'ya kegezete ŋayɛ wəshi nyi mba 'ya teke hwa gheyɛ. 26 Wəndə kekemane ŋkwa nya teghwene ŋayɛ Yiteyɛ ɗa te sləa ɗa ne, gheŋkɛ Sefəa Shala, gheŋkɛ nde teteke ŋayɛ wəshi pɛtɛ, gheŋkɛ nde tezəzə ŋayɛ wəshi nyi se 'ya teke ŋayɛ pɛtɛ. 27 Nza mə kwelɛŋe kwetere wəmbəa ɗa, ŋa ɗa kwelɛŋe nya ve ŋayɛ 'ya. Kala nya ve mbeli nyi te hɛɗi ve ŋayɛ 'ya we. Nzama mehele ta ŋayɛ ketaze taze ba'a ghazlənəma yɛ ma. 28 Nahe yɛ kefate ghena nya gezete ŋayɛ 'ya: Dzeghwa ɗa 'ya, ama katese 'ya sha gheyɛ zhɛkwa. Kenza nde kaɗe ɗa yɛ ne, katezlama yɛ te lə ta ɗa sha Yiteyɛ ɗa, va nya nza ŋkɛ wəba ma ke 'ya. 29 Nahe 'ya kegezete ŋayɛ ghena tsetsenya nda temene geva wəshia shɛhɛ. Tewəmbəreke nda temene geva hɛ, pa yɛ yɛte. 30 Katezhɛne 'ya kageze ghena kwele kwele le gheyɛ we, kwa nza ŋkɛ se yase meghe nya ndiremia mehele nya kaŋa hɛɗi nya. Kaganda ne, berete kesleke ɗa shɛ ve we. 31 Ama se ta ŋkɛ yitea ɗepe mbeli kaɗe Yiteyɛ ɗa 'ya, kamane pɛtɛa wəshi nyi gezete ɗa ŋkɛ 'ya. Sate mə, slə ɓəmə teke.»
Yɛsə ya kawəfe ta rɛzɛŋe ganyɛ
1 Ma ke Yɛsə: «'Ya ya kawəfe ta rɛzɛŋe ganyɛ, Yiteyɛ ɗa nde mɓete wəfea shɛ. 2 Katsasle dzeve ta wəfe nyi te 'ya nyi keɗema kaya ŋkɛ, sahwe yasahwe dzeve nya keya ŋkɛ nda ya ŋkɛ kwele ma. 3 Kesahwe sahwe yɛ va ghena nya gezete ŋayɛ 'ya. 4 Nza mə jikə le 'ya kala nya nza 'ya le gheyɛ. Tsagha dzeve ta wəfe perə kayate ya le ghəa ŋkɛ keɗema ŋkɛ te dəŋwəa ŋkɛ we. Tsagha yɛ perə, ashɛ yɛ kayate ya keɗema yɛ jikə le 'ya we. 5 'Ya ya kadəŋwəa wəfe, ma gheyɛ ne, dzeve ta ɗa yɛ. Wəndə nya kenza te 'ya, nya nza n'yɛ jikə le ne, kwele kwele teya ŋkɛ, va nya ɗema yɛ kamenete wəsə keɗema 'ya kanza le gheyɛ. 6 Yayata wəndə nya keɗema kanza jikə le 'ya ne, pa mbeli tsaslemte kala dzeve ta wəfe nya tsasle mbeli, pa ghwelenyɛ, pa mbeli tsenete kandəmte le ghwə. 7 Ma kenza yɛ jikə le 'ya, pa ghena ta ɗa mbe wənəa ŋayɛ ɓiyitsa ne, 'yɛwe mə yayata wəsə nya ɗe yɛ, katekemave yɛ. 8 Ma wəsə nya ketencɛ zləvəa Yiteyɛ ɗa ne, nda yɛ kayate ya kwele kwele, pa yɛ kancɛ ghəa ŋayɛ kambeli nyi ketəkwə təkwə ɗa. 9 Kaɗe ŋayɛ 'ya kala nya ɗe ɗa Yiteyɛ ɗa. Nza mə mbe ɗe nya ɗe ŋayɛ 'ya. 10 Ma keyate ghena nya gezeke 'ya yɛ ne, mbe ɗe nya ɗe ŋayɛ 'ya tenza yɛ, kala nya yate ghena nya gezeke Yiteyɛ ɗa 'ya ba'a nya nza ɗa 'ya mbe ɗe ta ŋkɛ. 11 Nda gezete ŋayɛ 'ya kala nya ne, yitea nza zlama nya mbe wənəa ɗa mbe wənəa ŋayɛ, nda zlama yɛ fate fate. 12 Wa nya ghena nya geze ŋayɛ 'ya kamene yɛ nya: Ɗe mə ghəa ŋayɛ kala nya ɗe ŋayɛ 'ya. 13 Ma ɗe nya wəba nya nza wəndə kancɛte ne, zamte mpia ŋkɛ ŋkɛ yitea ka mcɛhɛnyɛ. 14 Kaka mcɛhɛ ɗa yɛ kemenete wəshi nyi geze ŋayɛ 'ya kamene yɛ. 15 Kazhɛne 'ya kaheka ŋayɛ kaka mavashi ɓiyitsa we, va nya ɗema mava keɗepe wəshi nyi mene wəndə nya kesleke. Kaka mcɛhɛ ɗa zhɛne 'ya kaheka ŋayɛ, va nya nza ŋkɛ pɛtɛ 'ya kencɛmte ŋayɛ wəshi nyi fave 'ya va Yiteyɛ ɗa. 16 Gheyɛ ka ntave ɗa we, ama 'ya nde tsehave ŋayɛ. Nahe 'ya keghwenakɛ ŋayɛ hwa mbeli kezha yate ya nya ketemə yɛ. Ma tsagha ne, pɛtɛa wəshi nyi 'yɛwe yɛ va Yiteyɛ ɗa te sləa ɗa, kateve ŋayɛ ŋkɛ. 17 Gheŋkɛ ghena nya gezeke ŋayɛ 'ya tsetsenya, ɗe mə ghəa ŋayɛ.
Mbeli kazlɛ va yɛ Yɛsə le mbelia ŋkɛ
18 Ma kenza mbeli kazlɛ va gheyɛ ne, 'ya yaghate hɛ kazlɛ ve. 19 Ma ya ŋa mbeli nyi te hɛɗi nya yɛ ne, nza mbe ɗe ŋayɛ hɛ. Ama ŋa nci yɛ we, 'ya nde tsehave ŋayɛ kafəmte ŋayɛ shave hwa hɛ, vatse zlɛ hɛ va gheyɛ. 20 Zəzəte mə ghena nya gezete ŋayɛ 'ya: Mava shɛ kanza kwele ma ke wəndə nya kesleke we. Mbeli nyi kese kaghweze mɛ hwa 'ya, tsagha shɛ teghweze mɛ hɛ hwa gheyɛ perə. Ma ya nahe hɛ keyate ghena ta ɗa, tsagha teya ŋa ŋayɛ hɛ perə. 21 Pɛtɛ temene ŋayɛ wəshi nyi hɛ tewəmbəreke 'ya, va nya ɗepema wəndə nya keghweneke ɗa hɛ. 22 Ma keɗema 'ya kese kageze nda ghena ke hɛ ne, fete ta jaɗafa va hɛ we. Nahe 'ya kese sha hɛ. Kashɛ hɛ zhɛne ghəpə tsetsenya laka geze: Fete ta jaɗafa va ghen'yɛ we, ke hɛ we. 23 Ma wəndə nya kezlɛ va 'ya ne, kazlɛ ŋkɛ va Yiteyɛ ɗa perə. 24 Ma ya kaɗema 'ya kese kamenete slene nya ɗema yayata wəndə kamenete ne, nza fete ta jaɗafa va hɛ we. Ama tsetsenya, nahe hɛ kenakɛ wəshi nyi menete 'ya, mba hɛ kazlɛ va ghen'yɛ le Yiteyɛ ɗa. 25 Nahe wəsəa shɛ kemenete geva kezha yipə geva le ghena nya kerafete geva mbe Ghena ta Shala, ma ke: Gəmə ɗema ntsə ta hɛ. 26 Ma kese wəndə nya ketekemane ŋayɛ, nya teghwene ŋayɛ 'ya se va Yita, Sefəa Shala nya kaganda nya kaŋa Yita ne, gheŋkɛ nde tenegha fete yitea 'ya le ghəa ŋkɛ. 27 Ma gheyɛ le ŋa ŋayɛ ne, kaka negha fete yitea 'ya tenza yɛ, va nya nza mə le gheyɛ ghalanza.
1 Nahe 'ya kencɛmte ŋayɛ wəshi nyi yagha tehene tetsa ŋayɛ mbe dzeghe nya ketedzeghe ŋayɛ. 2 Kateŋka ŋayɛ mbeli shave mbe cɛ kesəkwə ghə. Katese kwete və, katezəzə yayata wəndə nya kempə ŋayɛ kaslene ta Shala yamene ŋkɛ, ke mbe ghəa ŋkɛ. 3 Ma nda mene wəshi nyi kala nyi hɛ ne, va nya ɗepema Yiteyɛ ɗa hɛ le 'ya perə. 4 Nahe 'ya kegezete ŋayɛ ghena nyi tsetsenya yitea zəzə ghena shɛ yɛ, və nya tesa ŋayɛ yaka hɛ.
Slene ta Sefəa Shala
Ma nda ɗema 'ya geze ŋayɛ ghala veci ne, va nya nza mə le gheyɛ. 5 Tsetsenya, 'ya kazhɛne geva kalə sha wəndə nya keghweneke ɗa. Wəndə shɛ hwa gheyɛ ka'yɛwe ŋkwa nya lə 'ya te we. 6 Kazhɛ ŋayɛ ghena shɛ te wənə va nya gezete ŋayɛ 'ya kala nya. 7 Ndagwara kaganda yageze ŋayɛ 'ya: Jara slə 'ya kezha gheyɛ, tewəmbəreke keɗema 'ya kelə ne, ashɛ wəndə nya ketekemane ŋayɛ katese we. Kelə 'ya, kateghwene ŋayɛ 'ya kase. 8 Vəa ŋkwa nya tese ŋkɛ ne, kancɛ nda ŋkɛ ke mbeli nyi te hɛɗi, nahe hɛ kezamte hweŋkwa le zəzə ta nci te jaɗafa, katencɛ nda ghena nya tiɗiɗi ŋkɛ ke hɛ, le ghwə nya temeha Shala. 9 Nahe hɛ kezamte hweŋkwa le zəzə ta nci te jaɗafa, va nya ɗema hɛ keyɛte ɗa. 10 Nahe hɛ kezamte hweŋkwa le zəzə ta nza tiɗiɗi, va nya nza 'ya kalə sha Yiteyɛ ɗa, mba yɛ zhɛkwa nakɛ ɗa we. 11 Nahe hɛ kezamte hweŋkwa le zəzə te ghwə nya meha Shala, va nya ndeke nda fete Shala ke meghe nya ndiremia mehele nya te hɛɗi nya. 12 Mba ghena va 'ya kwele kwele kageze ŋayɛ, ama kazereghete yɛ kaba we. 13 Ma kese Sefəa Shala nya kaganda, katebeghe ŋayɛ ŋkɛ kalə sha kaganda. Se ve se ghena nya tegeze ŋkɛ we, wəshi nyi fave ŋkɛ yategeze ŋkɛ, katencɛ ŋayɛ wəshi nyi ketese ŋkɛ. 14 Kateve zləvə ŋkɛ te 'ya, va nya nza ŋkɛ va 'ya tefa ghena nyi tegeze ŋayɛ ŋkɛ. 15 Yayata wəsə nya va Yiteyɛ ɗa, ŋa ɗa ŋkɛ. Vatse geze 'ya, Sefəa Shala shɛ nde tekele ghena ta ɗa kageze ŋayɛ.»
Katezhɛre heɗe kema kazlama
16 Ma ke Yɛsə: «Mbe və ɓɛhwɛ ne, katenakɛ ɗa yɛ we, temə vireɗi ɓiyitsa, katenakɛ ɗa yɛ.» 17 Ma ke kweci ka təkwə təkwə kwelɛ ghəa nci: «Wa yaɗe ŋkɛ kageze kwa geze ŋkɛ: Mbe və ɓɛhwɛ ne, katenakɛ ɗa yɛ we, temə vireɗi ɓiyitsa, katenakɛ ɗa yɛ ba'a va nya nza 'ya kalə sha Yiteyɛ ɗa wa?» 18 Ma ke hɛ ɓiyitsa: «Mbe və ɓɛhwɛ, wa yaɗe ŋkɛ kageze wa? Ashɛ mə keɗepe wəsə nya ɗe ŋkɛ kageze we.» 19 Nahe Yɛsə keɗepe kaɗe hɛ ka'yɛwe ghena ve. Ma ke sha hɛ: «Va nya geze 'ya: Mbe və ɓɛhwɛ ne, katenakɛ ɗa yɛ we, temə vireɗi ɓiyitsa, katenakɛ ɗa yɛ, vatse 'yɛwe yɛ kwelɛ ghəa ŋayɛ na? 20 Kaganda ne, ma 'ya sha gheyɛ: katenehwene yɛ ba'a kateŋələvə yɛ. Ma mbeli nyi teke te hɛɗi, katezlama hɛ. Ama katezhɛre geva heɗe kema ta ŋayɛ kazlama. 21 Kala nya nza male kaheha nda teya nde, teheɗe kema ve kwa se vəa nta. Ama kwa nakɛ wəzege nde, pa zaghəyite yaka nya sahwe nde. Kazlama nde yitea ya ta wəzege kanza teghweme. 22 Tsagha yɛ perə tsetsenya, teheɗe kema va gheyɛ. Ama katese 'ya kanewe ŋayɛ zhɛkwa. Kwele kwele tezlama yɛ te vecia shɛ, wəndə shɛ katekelemte zlama mbe wənəa ŋayɛ we. 23 Veci ŋkwa shɛ ne, kwete wəsə shɛ kate'yɛwe yɛ va 'ya we. Kaganda ne, ma 'ya sha gheyɛ: yayata wəsə nya te'yɛwe yɛ va Yiteyɛ ɗa te sləa ɗa ne, kateve ŋayɛ ŋkɛ. 24 Pa tsetsenya, kese yɛ ka'yɛwe wəsə te sləa ɗa we. 'Yɛwe mə, kateve ŋayɛ mbeli nda zlama yɛ fate fate.
Yɛsə ya kande hərə berete ta hɛɗi lema
25 Le ghena keyipə pa se 'ya geze ŋayɛ ghena nyi. Katese kwete və nya ɗema 'ya tegeze ŋayɛ ghena le ghena keyipə pa te zhɛkwa, ama ntare ntare tegeze ŋayɛ ghena ta Yiteyɛ ɗa 'ya. 26 Ma vəa ŋkwa shɛ ne, gheyɛ le ghəa ŋayɛ nde te'yɛwe wəsə va Yiteyɛ ɗa te sləa ɗa. Kegeze 'ya, 'ya nde səkwə Shala kezha gheyɛ 'ya we, 27 tewəmbəreke kaɗe ŋayɛ Yiteyɛ ɗa le ghəa ŋkɛ. Kaɗe ŋayɛ ŋkɛ va nya nza yɛ kaɗe ɗa ba'a va nya yɛte yɛ se laka Shala se 'ya. 28 Se laka Yita se 'ya kasawa kadzete hɛɗi. Tsetsenya ne, 'ya kaslə te hɛɗi kalə ɗa sha Yita.» 29 Ma ke mbeli nyi ketəkwə təkwə shɛ: «Yawa, tsetsenya ne, ntare ntare geze ghena na, ghena keyipə pa hwe ɓiyitsa we. 30 Nahe n'yɛ keɗepe tsetsenya pɛtɛ ɗepe wəshi na. Ma nda te'yɛwe ghena wəndə va gha ne, nahe na keɗepe wəsə nya ɗe ŋkɛ. Vatse yɛ n'yɛ se va Shala se na.» 31 Ma ke Yɛsə sha hɛ: «Kayɛ yɛ tsetsenya na? 32 Yawa, takwa takwa və nya tetaze geva yɛ kwetɛ kwetɛŋe te. Nahe vəa shɛ kese. Katelə yɛ pɛtɛ sha ghɛa ŋayɛ, tene 'ya kwetɛŋe ɗa. Ama kwetɛŋe ɗa tenza 'ya we, 'ya le Yiteyɛ ɗa. 33 Nahe 'ya kegezete ŋayɛ wəshi nyi pɛtɛ yitea kemave kwelɛŋe yɛ kwa nza mə jikə le gheyɛ. Katesa yaka yɛ teke te hɛɗi, ama hwepe mə ghə, nahe 'ya kehərəte berete ta hɛɗi lema.»
Yɛsə kasəkwə ghə kezha mbeli nyi ketəkwə təkwə
1 Ma kwa gezemte ghena nyi Yɛsə ne, pa kafete kema yitea ghweme. Ma ke: «Yita, na və kese. Ncɛte zləvəa Wəzege ta ŋa, nda ncɛ zləvəa ŋa Wəzege ta ŋa perə. 2 Tewəmbəreke nahe na kendeke nda berete kasleke mbeli pɛtɛ yitea ve nda mpi nya kaghala ghala ŋkɛ ke mbeli nyi ndeke nda na. 3 Ma kemave mpi nya kaghala ghala ne, gheŋkɛ kemaneve ŋa, gha Shala kwetɛŋe nya kakaganda ba'a Yɛsə Kriste nya ghweneke na. 4 Nahe 'ya kencɛmte nda zləvəa ŋa ke mbeli nyi te hɛɗi, nahe 'ya kekiɗimte slene nya ndeke ɗa na kamene. 5 Tsetsenya gɛ Yita, ndeke ɗa zləvə nya kese va 'ya vare gha vəashi kwa nza mə le gha tewə hɛɗi kenaka pate geva. 6 Nahe 'ya kencɛte nda ŋa ke mbeli nyi tsehave ɗa na shave hwa mbeli nyi te hɛɗi. Ŋa ŋa hɛ, pa na fəave ɗa hɛ, pa hɛ yɛte fete yitea ghena ta ŋa. 7 Nahe hɛ keɗepe tsetsenya yayata wəsə nya kaŋa ɗa ne, se va gha se ŋkɛ. 8 Ghena nya gezete nda 'ya ke hɛ, gha nde gezete ɗa. Nahe hɛ keyɛte megela. Nahe hɛ keɗepe fate fate laka gha se 'ya. Nahe hɛ keyɛte gha nde ghweneke ɗa. 9 Yitea hɛ səkwə ghə 'ya. Yitea pɛtɛa mbeli nyi te hɛɗi səkwə ghə 'ya we, deke yitea mbeli nyi ndeke ɗa na, va nya nza hɛ kaŋa ŋa. 10 Yayata wəsəa ɗa ne, ŋa ŋa ŋkɛ. Yayata wəsəa ŋa ne, ŋa ɗa ŋkɛ perə. Tsetse nza zləvə te 'ya mbe hɛ. 11 Mba 'ya kwake te hɛɗi we, ama ghenci ne, mba hɛ te hɛɗi. 'Ya kadzeme sha gha Yita nya keveyi geva tekeleke, yate hɛ te zlaɓa ta sləa ŋa nya ndeke ɗa na, yitea nza hɛ kanya kwetɛŋe kala nya nza mə le gha. 12 Kwa nza n'yɛ le hɛ ghalanza ne, nahe 'ya keyate hɛ le berete ta ŋa. Nahe 'ya keyate hɛ, kwete shɛ keza hwa hɛ we, deke wəndə nya keveyi geva kezha za, yitea yipə geva wəshi nyi kerafete geva mbe Ghena ta Shala. 13 'Ya lə sha gha tsetsenya. Mba 'ya teke te hɛɗi nda geze nda ghena shɛ 'ya ke hɛ, yitea nza zlama ta ɗa kwa wənəa nci fate fate. 14 Nahe 'ya kegezete nda ghena ta ŋa ke hɛ. Ama nahe mbeli nyi te hɛɗi kezlɛnji va hɛ kwa ɗema hɛ kaŋa nci mbeli, kala nya ɗema 'ya kaŋa nci perə. 15 Kelemte hɛ te hɛɗi 'ya sha gha we, ama yate hɛ va Nde ghwete ŋkwa. 16 Ashɛ hɛ kaŋa ŋkwa nya te hɛɗi kala nya ɗema 'ya kaŋa ŋkwa nya te hɛɗi we. 17 Veyi hɛ kaŋa ŋa mbeli fəyitekeghə laka kaganda. Ghena ta ŋa ya kakaganda deŋwa. 18 Kaghwene hɛ 'ya dzeyi te ŋkwa pɛtɛ kala nya ghweneke ɗa na kadzete ŋkwa nya te hɛɗi. 19 Kave ŋa pɛtɛa ghəa ɗa 'ya kezha hɛ, yitea nza hɛ kaŋa ŋa fəyitekeghə. 20 Deke kezha hɛ səkwə ghə ŋa 'ya we, ama kezha mbeli nyi keteyɛ ɗa te zlaɓa ta ghena ta nci. 21 Kasəkwə ghə 'ya yitea nza hɛ kanya kwetɛŋe. Te zlaɓa ta ŋa Yita, jikəte hɛ le gheɓə yitea nza mə le hɛ kanya kwetɛŋe kala nya nza na mbe 'ya ba'a kala nya nza 'ya mbe gha, nda nza mbeli kaɗepe gha nde ghweneke ɗa. 22 Nahe 'ya kendeke nda zləvə nya ndeke ɗa na ke hɛ, yitea nza hɛ kanya kwetɛŋe kala nya nza mə le gha, 23 mbe hɛ 'ya kala nya nza na mbe 'ya, yitea nza hɛ kanya kwetɛŋe fate fate, yitea ɗepe mbeli nyi te hɛɗi gha nde ghweneke ɗa, yitea ɗepe hɛ ɓiyitsa kaɗe mbelia shɛhɛ na kala nya ɗehwe ɗa na. 24 Yita, nahe na kendeke ɗa hɛ. Kaɗe 'ya kanza hɛ te ŋkwa nya kwetɛŋe le 'ya, yitea nakɛ zləvə nya ndeke ɗa na hɛ, va nya ɗete ɗa na tewə hɛɗi kenaka pate geva. 25 Yita nya tiɗiɗi, keɗepe ŋa mbeli nyi te hɛɗi we, ama 'ya ne, nahe 'ya keɗepe ŋa. Mbelia ɗa nyi ɓiyitsa ne, nahe hɛ keɗepe, gha nde ghweneke ɗa. 26 Nahe 'ya kencɛte nda sləa ŋa ke hɛ, mba 'ya tencɛ nda ŋa ke hɛ zhɛkwa, yitea nza ɗe nya ɗe ɗa na mbe wənəa nci, yitea nza 'ya mbe wənəa nci perə.»
Kese ta Yɛsə
1 Kwa gezemte ghena nya Yɛsə ne, cape hɛ le mbeli nyi ketəkwə təkwə kajive te kema ta hələa Sɛdron. Pa hɛ dzawanji kwa kwete ntsa tagha. 2 Nahe Zhəwdas nya kepamte Yɛsə keɗepe ŋkwa shɛ va nya nza nde mbe ghɛa wəfea shɛ tsene geva yɛ Yɛsə le mbeli nyi ketəkwə təkwə ghalanza. 3 Shilimə Zhəwdas mbe le kweci ka sewajɛ, le ka ya ghɛa Shala mbe sebe ta ŋkɛ nyi ghwenakɛ mbeli nyi te ghəa ka dzeghe Shala le ka Fariziyɛn. Wəshi kempa ya va hɛ, le paterela, le ghwə te wəvəzə. 4 Ma kwa ɗepe ghena nyi ketemene nda geva Yɛsə ne, pa hendave nda geva ke hɛ, ma ke: «Wa wəndə nya zele yɛ wa?» 5 Ma ke hɛ shɛ: «Yɛsə nde Nazarɛt.» Ma ke Yɛsə sha hɛ: «Wa nya 'ya nya.» Tagha Zhəwdas nya kepahwe Yɛsə hwa mbelia shɛhɛ. 6 Ma kwa geze Yɛsə: «Wa nya 'ya nya», a ke ne, zhewefene hɛ dzeyi te sebe, teyɛɓe hɛ betate geva te hɛɗi. 7 Ma ke Yɛsə sha hɛ zhɛkwa: «Wa wəndə nya zele yɛ wa?» Ma ke hɛ: «Yɛsə nde Nazarɛt.» 8 Ma ke Yɛsə: «Wa nya 'ya nya, 'ya sha gheyɛ. Kenza nde 'ya yazele yɛ, pelakɛ mə mbeli nyi dzeghwanji hɛ.» 9 Tsetse menete geva ghena nyi gezete Yɛsə kezha yipəyi geva ŋkɛ kwa, ma ke: «Yita, keza kwete hwa mbeli nyi ndeke ɗa na ya kwetɛŋe we.» 10 Masalame ya va Simon Piyɛre. Fakaka nteɗakave shave mbe kwəɓə, kwɛ'a tsaslakawa sleme kwa zeme va ghə va nde mene slene ta wəndə kwelea ka dzeghe Shala, nya nza sləa ŋkɛ kaMalkəs. 11 Ma ke Yɛsə sha Piyɛre: «Zhɛname masalamea ŋa mbe kwəɓə. Kashɛ 'ya zereghe yaka nya ndeke ɗa Yiteyɛ ɗa we, pa sha ŋa ŋa na?»
Mbeli keleghe Yɛsə kalə dzawa kema ta Ane
12 Pa ka sewajɛ le mbeli nyi te ghəa nci, le ka ya ghɛa Shala ta ka Zhəwif keseve Yɛsə, mɓizə hɛ hwepate te zewe. 13 Pa hɛ keleghe nda ke Ane kaba. Mekwea Kayife Anea shɛ. Kayife ya kawəndə kwelea ka dzeghe Shala te va shɛ. 14 Gheŋkɛ nde gezete nda ke ka Zhəwif, ma ke: «Jara ma mtenyɛ wəndə kwetɛŋe te zhia mbeli pɛtɛ.»
Piyɛre kaɗepema Yɛsə
15 Mbe sebe ta Yɛsə yɛ Simon Piyɛre le kwete wəndə nya ketəkwə təkwə Yɛsə. Nahe wəndəa shɛ keɗepe ghə le wəndə kwelea ka dzeghe Shala, vatse dzeki ghɛa wəndə kwelea shɛ ŋkɛ kwetere wəmbəa Yɛsə. 16 Mba Piyɛre pelɛke kwa degha. Pa wəndə nya ketəkwə təkwə Yɛsə, nya keɗepe ghə nya le wəndə kwelea ka dzeghe Shala. Ma ke sha male nya keya mɛ degha: «Pelave n'yɛ ŋkwa kezha dzeki n'yɛ ghen'yɛ.» Pa ŋkɛ keleghe Piyɛre kadzeki. 17 Ma ke kwatera nya keya degha sha Piyɛre: «Ashɛ na hwa mbeli nyi ketəkwə təkwə wəndəa shɛ perə wəka?» Ma ke zhɛnete: «Ewə, hwa hɛ 'ya we.» 18 Nahe ka mavashi le ka ya ghɛa Shala kemehate ghwə va ntasle. Dzasle hɛ yite le Piyɛre.
Wəndə kwelea ka dzeghe Shala ka'yɛwe ghena va Yɛsə
19 Pa wəndə kwelea ka dzeghe Shala 'yɛwakɛ va Yɛsə te nza ta mbeli nyi ketəkwə təkwə ba'a te ntsehwelea ŋkɛ kateke nda wəshi ke mbeli. 20 Ma ke Yɛsə shɛ: «Darahwe darahwe se 'ya kageze nda ghena ta ɗa ke mbeli. Mbe cɛ kesəkwə ghə ba'a mbe ghɛa Shala se 'ya kateke nda wəsə ke hɛ, te ŋkwa nya tsene geva ka Zhəwif pɛtɛ. Kegha 'ya gezete ghena tewəfərə we. 21 Yitea wa 'yɛwe na va 'ya wa? 'Yɛwe va hɛ te wəsə nya fate hɛ, nyi se 'ya kageze nda ke hɛ. Nahe hɛ keɗepe le ghəa nci.» 22 Ma kwa gezete ghena nya Yɛsə ne, pa kwete nde ya ghɛa Shala nya meslete dzeme vare mpave le balema, ma ke shɛ: «Tsetse zhɛne nda ghena na ke wəndə kwelea ka dzeghe Shala na?» 23 Ma ke Yɛsə shɛ: «Kenza nde ghena nya ndiremi yagezete 'ya, ncɛte ɓə nya ndiremia shɛ. Ma nda megela gezete 'ya, yitea wa mpa ɗa na wa?» 24 Pa Ane ghweneghe nda mba ŋkɛ tehwepe ke Kayife wəndə kwelea ka dzeghe Shala pɛtɛ.
Piyɛre zhɛne ɗepema Yɛsə
25 Ma Simon Piyɛre, mba ŋkɛ tagha kaslene ghwə. Ma ke mbeli shɛ: «Ashɛ na kakwete hwa mbeli nyi ketəkwə təkwə wəndə nya we, pa na?» Ma ke Piyɛre: «Ewə, hwa hɛ 'ya we.» 26 Kwete mava ta wəndə kwelea ka dzeghe Shala ya shɛ tagha. Menə ŋkɛ le wəndə nya slamte sleme Piyɛre va ghə ve. Ma ke shɛ: «Ashɛ 'ya kenakɛ ŋayɛ le mbe kwa kwete ntsa wəka?» 27 Ma ke Piyɛre: «Ewə.» Te ŋkwa shɛnyɛ, pa ŋələ heka.
Yɛsə te kema ta Pilate
28 Pa hɛ keleke Yɛsə se ki ghɛa Kayife kadzeki ghɛa ŋgwamna. Masheke ŋkwa tsagha. Ama kese ka Zhəwif kadzeki ghɛ meghe yitea ɗema hɛ kanza wale wale ba'a kezha zeme wəsə kezeme ta gəsəkəa Pake we. 29 Vatse shave ŋgwamna Pilate sha hɛ. Ma ke: «Wa wəsə nya ndeke nda fete yɛ te ke wəndə nya wa?» 30 Ma ke hɛ shɛ: «Ma nda kaɗema ŋkɛ kande beze ghena ne, pa ghen'yɛ keleke ŋa na?» 31 Ma ke Pilate: «Kele mə wəsəa ŋayɛ, mehate mə ghwə te kala nya ɗepe yɛ te wəshi mahalegəa ŋayɛ.» Ma ke hɛ shɛ: «Hweŋkwa va ghen'yɛ kameha ghwə te wəndə yitea pesle mbeli we.» 32 Nahe wəshi nyi kemenete geva kala nya yitea yipəyi geva ghena nya gezete Yɛsə kwa, te mte ta ŋkɛ nya temte ŋkɛ. 33 Pa Pilate dzembe cɛ kemeha ghwə zhɛkwa. Pa heka Yɛsə, ma ke shɛ: «Gha ya kameghea ka Zhəwif na?» 34 Ma ke Yɛsə shɛ: «Gha nde gezete le ghəa ŋa na, na, kweci mbeli nde gezete ŋa te ghəa ɗa na?» 35 Ma ke Pilate shɛ: «Nde Zhəwif 'ya na? Ashɛ hwelefe ta ŋa ka Zhəwif le mbeli nyi te ghəa ka dzeghe Shala nyi kekeseve ŋa kandeke ɗa ŋa wəka? Wa wəsə nya menete na wa?» 36 Ma ke Yɛsə shɛ: «Meghe nya te hɛɗi meghea ɗa we. Ma nda meghe nya te hɛɗi meghea ɗa ne, nza katempa mbeli nyi keya ɗa te 'ya yitea fɛa mbeli kekese nda ɗa ke ka Zhəwif. Ma tsetsenya, meghe nya te hɛɗi meghea ɗa gɛ na?» 37 Ma ke Pilate shɛ: «Meghe na tsagha wə?» Ma ke shɛ: «Gha nde gezete kameghe 'ya. Yitea negha fete te ghena nya kaganda yake geva 'ya, yite se 'ya te hɛɗi. Yayata wəndə nya kezele ghena kaganda, ghena nya geze 'ya yafa ŋkɛ.» 38 Ma ke Pilate shɛ: «Wa ghena kaganda wa?»
Mbeli ndeke nda fete kemte ke Yɛsə
Ma kwa gezemte ghena shɛ Pilate, ntəŋə ŋkɛ kashave sha ka Zhəwif zhɛkwa. Ma ke: «Kenakɛ fete 'ya va wəndə nya we. 39 Ama kala wəsə ke shia ŋayɛ nya mene yɛ ne, kapele ŋayɛ wəndə 'ya kwetɛŋe hwa gəsəkəa Pake. Kaɗe yɛ kapelave ŋayɛ meghea ka Zhəwif 'ya na?» 40 Ma ke hɛ tsate lewela: «Ewə, gheŋkɛ we. Barabas yapele na.» Ndagwara nde ŋwasle ŋkwa Barabas wəka?
1 Tagha gɛ, pa Pilate kelete Yɛsə ba'a ɗate ŋkɛ le kwərəpə. 2 Pa ka sewajɛ nderete tigə kala derə meghe, pa hɛ veyi nda mbe ghə ke Yɛsə. Pa hɛ seɗaghe nda gare kwa gheme kala meghe. 3 Pa hɛ hendave nda geva ke Yɛsə, ma ke hɛ sha njiŋwe: «Same meghea ka Zhəwif.» Kapesle hɛ le dzeve kwa sleme. 4 Pa Pilate zhɛne kashave sha ka Zhəwif. Ma ke sha hɛ: «Newe mə, nahe 'ya kekelakave ŋayɛ wəndəa shɛ yitea ɗepe yɛ kenakɛ fete nya pesle mbeli 'ya yite we.» 5 Cape Yɛsə shave te ŋwela le tigə yitea ghə kala derə meghe, le gare kwa gheme kənə kala meghe. Ma ke Pilate sha hɛ: «Wa nya wəndəa shɛ nya.» 6 Ma kwa nakɛ mbeli nyi te ghəa ka dzeghe Shala le ka ya ghɛa Shala ta nci ne, ma ke hɛ: «Baŋate te sheghwə kwa zleŋkwa, baŋate te sheghwə kwa zleŋkwa.» Ma ke Pilate sha hɛ: «Kele mə wəsəa ŋayɛ, baŋate mə te sheghwə kwa zleŋkwa le ghəa ŋayɛ. 'Ya ne, kenakɛ fete 'ya ve le ŋa ɗa ghə we.» 7 Ma ke ka Zhəwif shɛ: «Wəsə mahalegə ya va ghen'yɛ. Ma kala nza ta ghena nya kegezete geva te, wərə mte wəndə nya va nya geze ŋkɛ kawəzege ta Shala ŋkɛ.» 8 Ma kwa fate ghena shɛ Pilate, pa ghazlənə kazhɛ nda za ma. 9 Ntəŋə ŋkɛ kadzembe cɛ zhɛkwa. Ma ke sha Yɛsə: «Tema se na wa?» Kese Yɛsə kazhɛne nda we. 10 Ma ke Pilate shɛ: «Va wa ɗema na zhɛne ɗa ghena wa? Keɗepe na, wərə 'ya kapelakɛ ŋa keɗema kabaŋete ŋa te sheghwə kwa zleŋkwa wəka?» 11 Ma ke Yɛsə shɛ: «Berete kesleke ɗa va gha we, keɗema nya ndeke ŋa Shala sawa pelɛ ghweme we. Vatse nza nde za ma jaɗafa ta wəndə nya kepahwe ɗa va gha ke gha.» 12 Se mɛa vəa shɛ ne, hweŋkwa kepele Yɛsə yazele Pilate. Ntake ka Zhəwif katsa lewela, ma ke hɛ: «Ma kepelakɛ wəndə nya na ne, mcɛnyɛa Sɛzar na we. Nahe yayata wəndə nya keve ghəa ŋkɛ kameghe kenza kande ghema ta Sɛzar.» 13 Ma kwa fate ghena nya Pilate, pa kelakave Yɛsə kashave kwa degha. Pa ŋkɛ ntishɛnyɛ te ŋkwa kemeha ghwə, te ŋkwa nya heka mbeli kaGabata sha ka Zhəwif, geze ta ŋkɛ, pelɛ ghəa tsehala. 14 Tene hɛ kwetɛŋe nda temene gəsəkəa Pake mbeli. Kwa ghə veci ne, ma ke Pilate sha ka Zhəwif: «Wa nya mə meghea ŋayɛ nya.» 15 Ma ke hɛ tsate lewela: «Peslekɛ, peslekɛ, baŋate te sheghwə kwa zleŋkwa.» Ma ke Pilate: «Baŋate meghea ŋayɛ 'ya te sheghwə pe yɛ na?» Ma ke mbeli nyi te ghəa ka dzeghe Shala: «Kwete meghe shɛ va ghen'yɛ za ma ke Sɛzar we.» 16 Pa Pilate ndeke nda Yɛsə ke hɛ yitea baŋe te sheghwə kwa zleŋkwa.
Mbeli kabaŋe Yɛsə te sheghwə kwa zleŋkwa
Pa hɛ kelete Yɛsə. 17 Le sheghwə kwa zleŋkwa ta ŋkɛ ne, pa Yɛsə shave mbe meleme ba'a ntsehe te ŋkwa nya heka mbeli kaŊkwa 'yɛ'yɛa ghə, nya heka mbeli le ghena ta ka Ɛbrə kaGolgota. 18 Te ŋkwa shɛ baŋete Yɛsə hɛ te sheghwə kwa zleŋkwa. Te vecia shɛnyɛ baŋate kweci hɛ mbeli bake le, təhə kwa zeme, təhə te kwa gwela, te tepe Yɛsə. 19 Ma ke Pilate rafete te sheghwə nya baŋete Yɛsə mbeli te: «Yɛsə nde Nazarɛt, meghea ka Zhəwif.» 20 Kwele kwele ka Zhəwif nyi kejaŋgate rafea shɛ, va nya nza ŋkwa nya baŋate Yɛsə mbeli te sheghwə te takwa takwa yitea Zhɛrəzalɛm. Le ghena ta ka Zhəwif, le ŋa ka Rome, le ŋa ka Grɛk rafete geva ghena shɛ. 21 Ma ke mbeli nyi te ghəa ka dzeghe Shala ta ka Zhəwif sha Pilate: «Rafema na: Meghea ka Zhəwif, pa ma, ama ma pa na sha rafe: Ma ke wəndəa shɛ gezete: 'Ya ya kameghea ka Zhəwif.» 22 Ma ke Pilate sha hɛ: «Ma wəsə nya rafete 'ya ne, nza ŋkɛ tsagha shɛ.» 23 Ma kwa baŋate Yɛsə ka sewajɛ te sheghwə kwa zleŋkwa ne, pa hɛ neheve lekwesa ta ŋkɛ wəfaɗe mbe, kwete kwete va yayata sewajɛ. Tene tɛagwarea ŋkɛ nya ɗema ntsəzlə te, tsa tsa tsate mbeli se pelɛghə kare te wəmbəa seɗa. 24 Ma ke hɛ kwelɛ ghəa nci: «Ŋkwahema mə ma. Slate ɓəmə kwasheghediɗi. Wəndə nya kentave, pa kelehwe. Nahe wəshi nyi kemenete geva yitea yipə ghena nyi kerafete geva mbe Ghena ta Shala, ma ke: Nahe hɛ kenehehwe lekwesa ta ɗa, pa hɛ gehwe tɛagwarea ɗa le kwasheghediɗi.» Tsetse menete ka sewajɛ vəa ŋkwa shɛ. 25 Meslete meghekɛa Yɛsə dzeme vare sheghwə kwa zleŋkwa shɛ, hɛ le wəzha ta meghekɛa meghekɛ, le Mari male ta Keleyopas, le Mari wəzha ta ka Magdala. 26 Pa Yɛsə nakɛ meghekɛ, hɛ le kwete mcɛnyɛ nya ɗe ŋkɛ za ma hwa mbeli nyi ketəkwə təkwə. Ma ke sha meghekɛ: «Male, wa nya wəzege ta ŋa nya.» 27 Ma ke sha wəndə nya ketəkwə təkwəa shɛ: «Wa nya meyɛ ŋa nya.» Ghala se te vecia shɛ ne, pa wəndəa shɛ keleghe kalə sha ghɛa ŋkɛ.
Mte ta Yɛsə
28 Kwetere wəmbəa ŋkɛ ne, nahe Yɛsə keɗepe pɛtɛ ŋkɛ kekiɗimte slene ta ŋkɛ tsetsenya. Kezha menete geva wəshi nyi kerafete geva mbe Ghena ta Shala kaganda ne, ma ke: «Shewə 'ya va ndere.» 29 Tagha kwete jɛŋa viɗi tɛa rɛzɛŋe kwa ŋkɛara kwa. Pa hɛ selamahwe bəzə hwa tɛa shɛ, hwepakwe hɛ shɛ te geta ta wəfe nya heka mbeli kaizope, pa hɛ heyite nda yitea mɛa Yɛsə. 30 Kwa mɓisəakɛ tɛa shɛ Yɛsə, ma ke: «Nahe slene ta ɗa kekiɗi gɛ.» Pa ŋate ghə, mtiwə ŋkɛ.
Sewajɛ kampahwe slerepe ta Yɛsə
31 Ma kwa nza nde hendɛ veci kezhɛne mpi ta ka Zhəwif, kaɗe hɛ kanza mbeli kebaŋe baŋe te sheghwə te vecia shɛ we, va nya nza ŋkɛ kaveci kezhɛne mpi nya wəba hwa kweci veci kezhɛne mpi. Ntəŋə hɛ kalə ka'yɛwe va Pilate yitea ɓele seɗa ta mbeli nyi baŋete mbeli te sheghwə yitea kelakawa hɛ mbeli sawa te sheghwə nda tese veci kezhɛne mpi. 32 Pa ka sewajɛ se kaɓelemte seɗa yitea nde ghate, tsagha ŋa kwete, nyi baŋete mbeli yipə yipə le. 33 Kwa se hɛ yitea Yɛsə, newe ke hɛ ne, nahe ŋkɛ kemte. Vatse ɗema hɛ ɓele seɗa ta ŋkɛ. 34 Ama pa kwete sewajɛ mpahwemte slerepe ta Yɛsə le megha. Te ŋkwa shɛnyɛ, ŋkeɗe mimi le yɛmə same kwa. 35 Ma wəndə nya kegeze wəshia shɛhɛ ne, nahe ŋkɛ kenakɛ le ntsə ta ŋkɛ, negha fete nya kaganda yageze ŋkɛ. Nahe ŋkɛ keɗepe kaganda ghena ta ŋkɛ yitea yɛhwe yɛ ɓiyitsa, gheyɛ le ghəa ŋayɛ. 36 Pɛtɛ wəshi nyi kemenete geva yitea yipəyi geva wəshi nyi kerafate geva mbe Ghena ta Shala, ma ke: «Kese mbeli ɓele 'yɛ'yɛa ŋkɛ ya kwetɛŋe we.» 37 Ma ke kwete ghena mbe Ghena ta Shala ɓiyitsa: «Katenewe wəndə nya mpahwemte hɛ hɛ.»
Mbeli kave Yɛsə kwa kwele
38 Kwetere wəmbəa ŋkɛ, pa Zhozɛf nde Arimatɛ 'yɛwakɛ geva ta Yɛsə va Pilate. Zhozɛf ɓiyitsa ne, nde təkwə təkwə Yɛsə ŋkɛ, ama tewəfərə ŋkɛ va ghazlənə va ka Zhəwif. Pa Pilate pelave nda. Pa Zhozɛf kelete geva ta Yɛsə. 39 Nikodɛme, wəndə nya kese sha Yɛsə heviɗi vəashi, pa ŋkɛ se le 'wərdə ganyɛ ba'a kwete 'wərdə. Kakiləwə mahekenemsə nza 'wərdəa shɛ. 40 Pa hɛ kelete geva ta Yɛsə, pa hɛ fikɛ le 'wərdə, pa hɛ peɗame mbe zlave kala nya mene ka Zhəwif nda tela wəndə hɛ. 41 Le kwete ntsa shɛ te ŋkwa nya baŋete Yɛsə mbeli te sheghwə kwa zleŋkwa. Kwa ntsa shɛ ne, le kwete kwele shɛ kamɛnɛfɛ. Kegha mbeli lamte wəndə kwa we. 42 Kwa nza ŋkɛ te hendɛ ta ŋkwa veci kezhɛne mpi ba'a va nya nza kwelea shɛ dekwede ne, pa hɛ veyi geva ta Yɛsə kwa.
Shalala ŋkwa nya kwa kwele
1 Masheke masheke vəa ŋkwa demase, mba ŋkwa zlərə zlərə ne, cape Mari, wəzha ta ka Magdala kalə kadzemɛa kwele ta Yɛsə. Newe ke ne, nahe pelɛ ketsəkwəmte geva seyi mɛa kwele. 2 Tewətelɛwe nde le hwɛ kalə sha Simon Piyɛre le kwete wəndə nya ɗe Yɛsə za ma hwa mbeli nyi ketəkwə təkwə. Ma ke sha hɛ: «Nahe mbeli kekelemte Nde sleke ŋkwa same kwa kwele. Keɗepe n'yɛ tema tema veyi mbeli we.» 3 Cape Piyɛre le kwete nde təkwə təkwə Yɛsə kalə kadzemɛa kwele. 4 Tereŋe hɛ yitea hwɛ bake nci. Ama hwɛ ma kwete wəndə nya ketəkwə təkwə Yɛsə ke Piyɛre. Mpelɛa ŋkɛ ntsehe mɛa kwele ke Piyɛre. 5 Vəkwə ŋkɛ, wəmbɛne ke sha ŋkwa kedzawa kwele ne, deke lekwesa yanakɛ ŋkɛ kwa te hɛɗi. Ama kese ŋkɛ dzawa we. 6 Pɛkwe Simon Piyɛre hwe sebe ta ŋkɛ, shilimə ŋkɛ kwa kwele. Dəkwə ŋkɛ te zlave nyi te hɛɗi 7 le zlave nya peɗekɛ ghəa Yɛsə mbeli le perə. Ashɛ te ŋkwa nya kwetɛŋe yɛ lekwesa shɛ le zlave we, te ŋa ŋkɛ ŋkwa kepeɗe peɗe. 8 Pa kwete nde təkwə təkwə Yɛsə nya kese mɛa kwele mpelɛa dzawa kwelea shɛ perə. Ma kwa nakɛ ŋkɛ ne, pa yɛte. 9 Nda tsetse ŋkɛ ne, kenaka mbeli nyi ketəkwə təkwə Yɛsə kafave ghena nya rafete mbeli mbe Ghena ta Shala we, ma kegezete geva: «Katesame Yɛsə hwa mbelia kwahɛɗi.» 10 Ntəŋə mbeli nyi bake nyi ketəkwə təkwə Yɛsə kalə sha ghɛa nci.
Yɛsə kancɛte nda geva ke Mari ta ka Magdala
11 Meghereŋe Mari mɛa kwele, kanehwene nde. Ma kwa nehwene nde ne, wəmbɛne ke sha ŋkwa nya kwa kwele. 12 Dəkwə nde te ka ghwene ta Shala bake mbe lekwesa kwa tɛawetɛa. Mentishɛ hɛ te ŋkwa nya se geva ta Yɛsə, te ŋkwa nya se ghə kwete, te ŋkwa nya se seɗa kwete. 13 Ma ke shɛ: «Male, yitea wa nehwene na wa?» Ma ke Mari zhɛnete: «Nahe mbeli kekelemte Nde sleke ŋkwa ta ɗa, keɗepe ŋkwa nya veyi hɛ te 'ya we.» 14 Ma kwa gezemte ghena nya Mari ne, pa zhɛrete geva. Dəkwə nde te Yɛsə tagha. Ama keɗepe nde kaYɛsə we. 15 Ma ke Yɛsə shɛ: «Va wa nehwene na wa male? Wa yazele na wa?» Ma zəzə Mari ne, kawəndə nya kewəza wəshi te ŋkwa shɛ nde geze nda ghena. Vatse geze nde: «Kenza nde gha nde kelete ne, wəndə ganyɛ ne, ncɛte ɗa ŋkwa nya veyi na te, yitea lə 'ya kakele gi.» 16 Ma ke Yɛsə: «Mari!» Pa Mari zhɛrete geva, ma ke shɛ le ghena ta ka Ɛbrə: «Rabəwni», geze ta ŋkɛ, «Nde sleke ɗa». 17 Ma ke Yɛsə sha Mari: «Kwaɗe ɗa ma na ma. Kenaka 'ya kadzeme sha Yiteyɛ ɗa we. Ama kwiɗi geze nda ke ka kesaka meyɛ ɗa, 'ya kadzeme sha Yiteyɛ ɗa, nya kaYite ŋayɛ, sha Shala ta ɗa, nya kaShala ta ŋayɛ.» 18 Ntəŋə Mari lə kageze nda ke mbeli nyi ketəkwə təkwə Yɛsə, ma ke: «Nahe 'ya kenakɛ Nde sleke ŋkwa.» Pa nde ɓelate nda wəsə nya gezete nda ŋkɛ ke hɛ.
Yɛsə kancɛ nda geva ke mbeli nyi ketəkwə təkwə
19 Kwa tɛhwɛɗi vecia demasea shɛ, pa mbeli nyi ketəkwə təkwə Yɛsə tsenete geva te ŋkwa nya kwetɛŋenyɛ ki kwete ghɛ, pa hɛ ŋzleyite ŋkwa yitea ghəa nci le lakelɛ va ghazlənə va ka Zhəwif. Ma newe hɛ ne, vəkə Yɛsə hwa hɛ, ma ke sha hɛ: «Kwelɛŋe pe yɛ!» 20 Ma kwa gezemte ghena shɛ ŋkɛ, pa ncɛte nda dzeve ta ŋkɛ ke hɛ le slerepe ta ŋkɛ. Ntake hɛ kazlama kwele kwele va nya nakɛ Nde sleke ŋkwa hɛ. 21 Zhɛne Yɛsə kageze nda ke hɛ zhɛkwa: «Kwelɛŋe pe yɛ. Kala nya ghweneke ɗa Yiteyɛ ɗa ne, tsagha ghwene ŋayɛ 'ya perə.» 22 Ma kwetere wəmbəa ghena nyi ne, vɛsə ke sha sefə kənəa hɛ, ma ke: «Kemave mə Sefəa Shala. 23 Ma mbeli nyi kelemte nda jaɗafa ta nci yɛ ke hɛ te wənə ne, nahe ŋkɛ kekelemte nda geva ke hɛ. Ma mbeli nyi keseyi yɛ mɛa wənə ne, tsagha shɛ keseyi geva hɛ.»
Yɛ Yɛsə le Tomas
24 Tomas, nya heka mbeli kaKwalegha, kwete wəndəa mbeli nyi meŋe bakeghəmbe nyi ketəkwə təkwə Yɛsə shɛ tagha nda se ŋkɛ hwa hɛ we. 25 Ma ke kweci ka təkwə təkwə shɛ: «Nahe ghen'yɛ kenakɛ Nde sleke ŋkwa.» Ma ke Tomas sha hɛ: «Kenakɛma mevɛvi nyi mbe dzeve ta ŋkɛ 'ya, kekwaɗakɛma zhia kwesa 'ya le dzeve ta ɗa, keɗema 'ya kekwaɗakɛ zhi nya mbe slerepe ve ne, kayɛ 'ya we.» 26 Ma shikwə kwetɛŋe kadzeghe, nahe ka təkwə təkwə Yɛsə ketsenete geva zhɛkwa ki ghɛ. Hwa hɛ Tomas vəa ŋkwa shɛ. Ndagwara nahe hɛ keŋzleyite cɛ yitea ghəa nci le lakelɛ. Vəkə Yɛsə hwa hɛ, ma ke sha hɛ: «Kwelɛŋe pe yɛ.» 27 Ma ke gezete nda ke Tomas: «Hake dzeve ta ŋa, shɛ na mareve ŋa ɗa. Hake dzeve ta ŋa ɓiyitsa, pa na kwaɗakɛ ŋkwa megha nya mbe slerepe ta ɗa. Mba na kezhɛne ghəpə zhɛkwa, yɛhwe.» 28 Ma ke Tomas shɛ: «Nde sleke ŋkwa ta ɗa, Shala ta ɗa.» 29 Ma ke Yɛsə shɛ: «Va nya nakɛ ɗa na nda yɛhwe na wəka? Zlama ya va mbeli nyi keyɛhwe kaɗema hɛ kenakɛ.»
Ghena nya ɗe palepa nya kancɛ
30 Kwele kwele menete kweci wəshi kencɛ wəshi Yɛsə kwa ntsə ta mbeli nyi ketəkwə təkwə, ama kerafete geva hɛ pɛtɛ mbe palepa nya we. 31 Ma nyi kerafete geva ne, yitea yɛhwe yɛ Yɛsə ya kaMɛsi, gheŋkɛ Wəzege ta Shala. Ma keyɛhwe yɛ ne, katekemave mpi yɛ te sləa Yɛsə.
Yɛsə kancɛ nda geva ke ka təkwə təkwə ŋkɛ mberefaŋe
1 Tewə hɛ kedzeyi ne, pa Yɛsə ncɛte nda geva zhɛkwa ke mbeli nyi ketəkwə təkwə mɛa ndərəa Tibɛriyade. Wa nya tsetse ncɛte nda geva ŋkɛ ke hɛ: 2 ma te ŋkwa nya kwetɛŋenyɛ ne, yɛ Simon Piyɛre, le Tomas nya heka mbeli kaKwalegha, le Natanayɛl nde Kana ta ka Galilɛ, le ŋwalea Zɛbɛdɛ, le kweci mbeli bake hwa nyi ketəkwə təkwə Yɛsə ya shɛ. 3 Ma ke Simon Piyɛre sha hɛ: «Lə 'ya tekese kelepe.» Ma ke hɛ shɛ: «Lə n'yɛ yitea gha perə.» Pa hɛ dzawa kwambeləa nci. Hwencɛke ncɛke hɛ te viɗia shɛ kakese kelepe kaɗema hɛ kekeseve wəsə. 4 Ghwɛɗɛɗɛa ŋkwa, hwa'a Yɛsə mɛa hələa shɛ. Ama keɗepe hɛ kaYɛsə ŋkɛ we. 5 Ma ke sha hɛ: «Nahe yɛ kekeseve kelepe tse na megelɛshi.» Ma ke hɛ shɛ: «Ewə!» 6 Ma ke sha hɛ: «Negheyi mə bararawea ŋayɛ dzawa te kwa zeme ta kwambelə nda nza yɛ kakemave.» Pa hɛ neghate, ndɛare hɛ va ntsehe va nya nza kelepe viɗi te. 7 Ma ke wəndə nya ɗe Yɛsə za ma hwa nyi kezele sha Piyɛre: «Nde sleke ŋkwa wəndə nya.» Nahe Piyɛre keseɗemte lekwesa ta ŋkɛ. Kwa fate ŋkɛ Nde sleke ŋkwa Yɛsə wəndəa shɛ, pa seɗete lekwesa ta ŋkɛ, fɛke neghate ghəa ŋkɛ te yɛmə. 8 Ntake kweci mbeli nyi ketəkwə təkwə Yɛsə kase le kwambelə kantsehe bararawe va nya nza ŋkɛ viɗi va kelepe. Cakeɗake hɛ yitea hələbə we, gare ɓela ta seɗa gwəmsə. 9 Sawama ta nci kwa kwambelə ne, dəkwə hɛ te laɗe ta ghwə gheme ba'a kelepe mɛ, ɗafa ya tagha yite. 10 Ma ke Yɛsə sha hɛ: «Ntaveka mə kelepe nyi keseve yɛ.» 11 Tarame Simon Piyɛre pelɛ kwambelə, fehe ŋkɛ ntsehakawa bararawe nya nza kelepe nyi jama jama viɗi te, gwəmsə ba'a mcɛfemsə mahekeneghəmbe pɛtɛa kelepea shɛhɛ. Ya kwela nza kelepe shɛhɛ kwele kwele ne, keŋkwahe bararawe. 12 Ma ke Yɛsə sha hɛ: «Nde mə yitea ɗafa.» Kwete hwa hɛ kese ka'yɛwe: «Wa ŋkɛ na wa?», ke we, va nya ɗepe hɛ, gheŋkɛ Nde sleke ŋkwa. 13 Pa Yɛsə hendeke nda geva ke hɛ, pa ŋkɛ ndeke nda ɗafa shɛ ke hɛ le kelepe. 14 Kwa maheke ta zhigəa Yɛsə nyagha kancɛ nda geva ke mbeli nyi ketəkwə təkwə ghala kwa same ŋkɛ kwa kwele le mpi.
Yɛ Yɛsə le Piyɛre
15 Kwa zehwe ɗafa hɛ ne, ma ke Yɛsə sha Simon Piyɛre: «Simon, wəzege ta Zhaŋe, kaɗe ɗa na za ma ke mbeli nyi na?» Ma ke Piyɛre shɛ: «E'e Nde sleke ŋkwa, nahe na keɗepe kaɗe ŋa 'ya.» Ma ke Yɛsə shɛ: «Yawa, ya zhɛgwəa lɛməa timɛtia ɗa.» 16 Ma ke Yɛsə sha Piyɛre kakwa bake zhigə: «Simon, wəzege ta Zhaŋe, kaɗe ɗa na na?» Ma ke Piyɛre shɛ: «E'e Nde sleke ŋkwa, nahe na keɗepe kaɗe ŋa 'ya.» Ma ke Yɛsə shɛ: «Yawa, nza kande ya timɛtia ɗa.» 17 Ma ke Yɛsə shɛ kakwa maheke zhigə: «Simon, wəzege ta Zhaŋe, kaɗe ɗa na pa na?» Benake Piyɛre va nya 'yɛwe Yɛsə kakwa maheke zhigə. Ma ke: «Nde sleke ŋkwa, nahe na keɗepe wəshi pɛtɛ, nahe na keɗepe ɓiyitsa kaɗe ŋa 'ya.» Ma ke Yɛsə shɛ: «Yewə, ya timɛtia ɗa.» 18 Ma ke Yɛsə: «Kaganda ne, ma 'ya sha gha: ma kwa nza na kamempɛhweta ne, gha nde hwepe hətəa ŋa le ghəa ŋa, te ŋkwa nya ɗe na lə na, ama kehale na ne, kateslete dzeve na nda hwepete ŋa hətəa ŋa kwete wəndə, nya ketekele ŋa kadzete ŋkwa nya ɗema na.» 19 Ma mbe ghena nya ne, Yɛsə ɗe kancɛ tsema tsema temte Piyɛre yitea ncɛ nda zləvəa Shala ke mbeli. Ma ke Yɛsə gezete nda: «Zare ɗa.»
Yɛ Yɛsə le nde təkwə təkwə nya ɗe ŋkɛ
20 Tewətelɛwe ke Piyɛre ne, dəkwə ŋkɛ te kwete wəndə nya ɗe Yɛsə za ma. Gheŋkɛ nde se terasle mentishɛ vare Yɛsə kwa zeme ɗafa hɛ, nya kese 'yɛwe ve: «Nde sleke ŋkwa, wa wəndə nya ketepamte ŋa wa.» 21 Kwa nakɛ Piyɛre, ma ke sha Yɛsə: «Nde sleke ŋkwa, ma wəndə nya ne, wa nde temene nda geva wa?» 22 Ma ke Yɛsə: «Keɗe nza ta ŋkɛ 'ya teghweme vaŋe te veci nya tese 'ya ne, ŋa ŋa kwete hwe na? Gha ne, zare ɗa ke ta ŋa gi!» 23 Deke te ghena shɛ ne, ma ke mbeli nyi kezele Yɛsə: «Mba wəndəa shɛ kamte zhɛkwa we.» Ndagwara kegezete nda Yɛsə ke Piyɛre: «Kamte ŋkɛ, ke we.» Ama «keɗe nza ta ŋkɛ 'ya teghweme vaŋe te veci nya tese 'ya, ŋa ŋa kwete hwe na» a ke shɛ. 24 Nde təkwə təkwə Yɛsə shɛnyɛ nde neghate fete yitea wəshi nyi, gheŋkɛ nde rafete hɛ, nahe gheɓəmə keɗepe kaganda fete nya neghate ŋkɛ.
Kwa keɗaŋe ta ghena
25 Kweci ghena ya shɛ kwele kwele nyi menete Yɛsə. Ma keɗe mbeli karafe ghena shɛ pɛtɛ kwete kwete kwete, ma zəzə 'ya ne, ŋkwa shɛ te hɛɗi kabete palepa shɛ we.