1

1 Na tongo nda ni, Tënë ayeke daa; Tënë ni ayeke na tere ti Nzapa si Tënë ni ayeke Nzapa. 2 Na tongo nda ni, Tënë ayeke na tere ti Nzapa. 3 Na lege ti lo laa aye kue abaa gigi, mbeni ye so abaa gigi na mbeni lege nde ayeke daa pepe. 4 Fini ayeke na ya ti lo si fini ni ayeke lumiere ndali ti azo. 5 Lumiere aza na ya ti vukongo ndo si vukongo ndo ahon ndö ti lo pepe. 6 Nzapa atokua mbeni zo, iri ti lo Jean. 7 Lo ga ti fa peko ti ye so lo hinga na ndö ti lumiere, tongaso si azo kue ama na be na lege ti lo. 8 Jean laa ayeke lumiere ni pepe, me lo ga ti fa peko ti ye so lo hinga na ndö ti lumiere. 9 Tënë ni ayeke taa lumiere so aga na ndö ti dunia so; lo za si zo oko oko abaa ndo polele. 10 Tënë ni ayeke na dunia so. Na lege ti lo laa dunia abaa gigi, me azo ti dunia ahinga lo pepe. 11 Lo ga na taa kodro ti lo, me azo ti kodro ti lo ayamba lo pepe. 12 Me azo so kue ayamba lo si ama na be na lo, lo mu na ala lege ti ga amolenge ti Nzapa. 13 Ala ga amolenge ti Nzapa na lege so Nzapa laa adu ala, me na lege ti dungo so zo adu na ni pepe wala na lege so be ti zo aye pepe. 14 Tënë ni aga zo si lo duti na popo ti e, nzoni be na taa-tënë ti lo ahon ndoni. E baa gonda ti lo, gonda so Babâ amu na oko Molenge ti lo. 15 Jean afa peko ti ye so lo hinga na ndö ti lo; lo dekongo, lo tene: “Lo laa mbi tene tënë ti lo ando, mbi tene: ‘Mbeni zo ayeke ga na peko ti mbi, lo yeke kota ahon mbi, ngbanga ti so lo yeke daa kozo ti mbi.’ ” 16 Biani, anzoni ye asi singo na lo, e kue e wara ni na lege ti nzoni be ti lo na peko ti tere, na peko ti tere. 17 Nzapa amu ando Ndia na e na lege ti Moïse, me nzoni be na taa-tënë aga na lege ti Jésus Christ. 18 Zo ade ti baa Nzapa laoko pepe; me gi oko Molenge ni so ayeke Nzapa si lo yeke nduru na tere ti Nzapa Babâ, lo laa lo fa Nzapa na azo titene ala hinga lo. 19 Amakonzi ti azuife ti Jérusalem airi awayango-sandaga na azo ti mara ti Lévi si atokua ala na Jean, ti hunda lo, atene: “Mo yeke zo wa?” 20 Jean atene tënë na ala polele, lo bere pepe, lo tene: “Mbi yeke ti mbi Mesii pepe.” 21 Ala kiri ahunda lo, atene: “Mo yeke ti mo zo wa? Mo yeke Élie?” Jean akiri tënë na ala: “Mbi yeke Élie pepe.” Ala hunda lo, atene: “Mo yeke Wayanga-Nzapa ni?” Jean akiri tënë: “Mbi yeke lo pepe!” 22 Tongaso ala hunda lo, atene: “Mo yeke ti mo zo wa? E hunda tënë so titene e kiri na peko ni na azo so atokua e. Ti be ti mo wani, mo yeke zo wa?” 23 Jean akiri tënë na ala: “Mbi yeke zo so ayeke dekongo na benyama, atene: ‘Ala sara si lege ti Kota Gbia aluti mbirimbiri!’ ” – Tënë so wayanga-Nzapa Ésaïe atene ando laa. 24 Afarizien ayeke nga na popo ti azo so a tokua ala na Jean so. 25 Ala hunda lo, atene: “So mo yeke Mesii pepe, mo yeke Élie pepe, mo yeke Wayanga-Nzapa pepe, ka mo yeke batize azo ngbanga ti nyen?” 26 Jean akiri tënë na ala: “Mbi yeke batize ala na ngu; me mbeni zo ayeke na popo ti ala so ala hinga lo pepe. 27 Lo yeke ga na peko ti mbi, mbi kpa zo ti zi akamba ti poro ti gere ti lo pepe.” 28 Aye so kue asi na kete kodro ti Betanii, na mbage ti ngu ti Jourdain, na ndo so Jean ayeke batize azo daa. 29 Lango oko na pekoni, Jean abaa Jésus so ayeke ga na mbage ti lo si lo tene: “Baa, Kete Taba ti Nzapa so ayeke zi siokpari na li ti azo ti dunia laa! 30 Lo laa mbi tene tënë ti lo lani, mbi tene: ‘Mbeni zo ayeke ga na peko ti mbi, lo yeke kota ahon mbi, ngbanga ti so lo yeke daa kozo ti mbi.’ 31 Mbi hinga ti mbi lo kozoni pepe, me mbi ga ti batize azo na ngu ti sara si azo ti Israel ahinga lo.” 32 Jean afa na azo peko ti ye so lo baa si lo tene: “Mbi baa Yingo alondo na yayu tongana mbipa azu si aduti na ndö ti lo. 33 Mbi hinga ti mbi lo kozoni pepe, me lo so atokua mbi ti batize azo na ngu, lo tene: ‘Zo so mo yeke baa ande Yingo azu si aduti na ndö ti lo, lo laa lo yeke batize azo na Yingo-Vuru.’ 34 Mbi Jean, mbi baa ye so, nilaa mbi tene na azo kue mbi tene: koli so ayeke Molenge ti Nzapa.” 35 Lango oko na pekoni, Jean angba gi na oko ndo ni so, lo na adisiple ti lo use. 36 Lo baa Jésus na hongo ni si lo tene: “Baa, Kete Taba ti Nzapa laa!” 37 Adisiple ti Jean use ama tënë so si ala mu peko ti Jésus. 38 Jésus abaa ndo na peko; lo baa so ala yeke mu peko ti lo, hunda ala, lo tene: “Ala yeke gi nyen?” Ala kiri tënë na lo, atene: “Rabi, mo yeke lango na ndo wa?” – Nda ti Rabi ni atene ‘Wafango-ye’. – 39 Jésus akiri tënë na ala, atene: “Ala ga abaa!” Tongaso ala gue si ala baa ndo so Jésus ayeke lango daa. Ala ngba na tere ti lo na lango ni so. Andaa ngbonga aga nduru na ngbonga osio ti peko ti bekombite. 40 Mbeni oko ti azo use so ama tënë ti Jean si amu peko ti Jésus, ayeke André, ita ti Simon Pierre. 41 Kozo zo so André awara lo ayeke ita ti lo Simon; André atene na lo: “E wara Mesii awe.” – Nda ti Mesii atene ‘Christ’. – 42 Na pekoni, lo mu Simon, lo gue na lo na Jésus. Jésus abaa Simon si lo tene na lo: “Mo yeke Simon, molenge ti Jean; fade azo ayeke iri mo Sefas.” – Nda ti iri so atene ‘Pierre’. – 43 Lango oko na pekoni, Jésus aleke na be ti lo ti gue na sese ti Galile. Lo tengbi na Philippe si lo tene na lo: “Mu peko ti mbi!” 44 Philippe ayeke zo ti Betsaida, kete kodro ti André na ti Pierre. 45 Na pekoni, Philippe awara Natanael si lo tene na lo: “Zo so ando Moïse atene tënë ti lo na ya ti mbeti ti Ndia so, lo so nga awayanga-Nzapa atene tënë ti lo so, e wara lo awe. Zo ni ayeke Jésus, molenge ti Joseph, zo ti Nazaret.” 46 Natanael ahunda lo, atene: “Mbeni ye ti nzoni alingbi ti londo na Nazaret ti ga?” Philippe atene na lo: “Ga mo baa.” 47 Jésus abaa Natanael so ayeke ga na mbage ti lo si lo tene: “Baa, so mbirimbiri zo ti Israel laa. Lo hinga ti tene mvene pepe.” 48 Natanael ahunda Jésus, atene: “Mo hinga mbi na ndo wa?” Jésus akiri tënë na lo, atene: “Na ndembe so mo yeke fade na gbe ti keke ti fige, kozo titene Philippe airi mo, mbi baa mo.” 49 Natanael atene na lo: “Wafango-ye, mo yeke Molenge ti Nzapa! Mo yeke gbia ti Israel!” 50 Jésus akiri tënë na lo, atene: “Mo ma na be, ngbanga ti so mbi tene: ‘Mbi baa mo na gbe ti keke ti fige so’? Fade mo yeke baa ambeni kota ye so ahon ti so!” 51 Jésus akiri atene: “Biani, mbi tene na ala taa-tënë: fade ala yeke baa yanga ti yayu azi si a-ange ti Nzapa ayeke ma na nduzu si ala yeke zu na ndö ti Molenge ti Zo.”

2

1 Lango use na pekoni, mbeni matanga ti mungo tere ti koli na wali aduti na kete kodro ti Kana, na sese ti Galile. Mama ti Jésus ayeke kâ. 2 A tisa nga Jésus na adisiple ti lo na matanga ni. 3 Na ndembe so vin ahunzi awe, mama ti Jésus atene na lo: “Azo ni ayeke na vin mbeni pepe.” 4 Jésus akiri tënë na lo, atene: “Wali, ti mo daa nyen? Ngbonga ti mbi ade alingbi pepe.” 5 Tongaso mama ti Jésus atene na azo ti kua ni, atene: “Ala sara ye so kue lo yeke hunda na ala.” 6 Kâ, ambeni kota ta ti sese omene ayeke daa. Azuife ayeke to ngu na ya ni ti sukula sioni na tere ti ala. Ta oko alingbi ti mu litere nduru na ngbangbo oko. 7 Jésus atene na azo ti kua ni: “Ala tuku ngu na ya ti ata ni, asi.” Ala tuku ngu na ya ti ata ni, asi. 8 Jésus atene na ala: “Ala to mbeni ngu ni, ague na ni na kota zo ti li ti matanga ni.” Ala to ngu ni, ague na ni. 9 Kota zo ti li ti matanga ni atara ngu ni, andaa aga vin awe. Lo hinga ndo so vin ni alondo daa si aga pepe. Me gi azo ti kua so ato ngu ni laa ahinga tënë ni. Tongaso lo iri koli ti mungo wali ni 10 si lo tene na lo: “Azo kue ayeke mu ka nzoni vin na azo kozoni, ala nyon alingbi na ala awe si na pekoni, ala mu na ala vin so ayeke nzoni kete. Me ti mo, mo bata nzoni vin ni ngbii asi na ndembe so!” 11 Lege so Jésus asara kozo ye ti kpene na Kana, mbeni kodro ti Galile laa. Lo fa gonda ti lo si adisiple ti lo ama na be na lo. 12 Na pekoni, Jésus ague na Kapernaum, lo na mama ti lo, a-ita ti lo na adisiple ti lo. Ala lango kâ gi kete. 13 Matanga ti azuife so iri ni Pake aga nduru awe, tongaso Jésus ague na Jérusalem. 14 Na ya ti kota da ti Nzapa, lo wara azo ti kango abagara, ataba na ambipa; lo wara nga azo so aduti na tere ti meza si ala yeke sanze nginza. 15 Tongaso lo mu akamba, lo leke na fimbo si lo tumba ala na ataba ti ala na abagara ti ala na gigi. Lo tuku anginza ti azo ti sanzengo nginza na sese, lo kinda nga na sese ameza ti ala. 16 Lo tene na azo ti kango ambipa ni, lo tene: “Ala zi aye so kue, ahon na ni! Ala sara si da ti Babâ ti mbi aga ndo ti dengo buze pepe!” 17 Adisiple ti lo adabe ti ala na tënë so Mbeti ti Nzapa atene: “Nzapa, fade nzara ti da ti mo ayeke gbi mbi tongana wâ.” 18 Amakonzi ti azuife ahunda lo, atene: “Ye ti kpene wa laa mo yeke sara ti fa na e so, Nzapa laa amu na mo lege ti sara ye so?” 19 Jésus akiri tënë na ala, atene: “Ala kungbi kota da ti Nzapa so na sese, fade na ya ti lango ota, mbi yeke kiri ti leke ni na nduzu.” 20 Azuife ahunda lo, atene: “Kota da ti Nzapa so e sara ni na ya ti ngu baleosio na omene, mo tene ti mo, mo tene, mo yeke leke ni na ya ti lango ota?” 21 Andaa kota da ti Nzapa so lo yeke tene tënë ni so, ayeke tere ti lo wani. 22 Na ndembe so Jésus azingo na kuâ awe, adisiple ti lo adabe ti ala na atënë so lo tene na ala si ala ma na be na Mbeti ti Nzapa nga na atënë so Jésus atene. 23 So Jésus ayeke na Jérusalem, na matanga ti Pake, azo mingi abaa aye ti kpene so lo sara si ala ma na be na lo. 24 Me Jésus azia be ti lo na ndö ti ala pepe, ngbanga ti so lo hinga ala kue. 25 Mbeni zo alingbi ti fa peko ti tënë na Jésus na ndö ti zo pepe, ngbanga ti so lo hinga tënë ti be ti zo nzoni mingi.

3

1 Mbeni koli ayeke lani na popo ti afarizien, iri ti lo Nikodeme; lo yeke mbeni makonzi ti azuife. 2 Lo ga lo baa Jésus na bi si lo tene na lo: “Wafango-ye, e hinga so Nzapa laa atokua mo ti fa ye na e, ngbanga ti so, tongana Nzapa ayeke na zo pepe, zo ni alingbi ti sara aye ti kpene so mo yeke sara so pepe.” 3 Jésus akiri tënë na lo: “Biani, mbi tene na mo taa-tënë: tongana a kiri a du zo pepe, lo lingbi ti baa Kodro-gbia ti Nzapa pepe.” 4 Nikodeme ahunda Jésus, atene: “Zo so aga kangba awe, fade a kiri ti du lo tongana nyen? Lo yeke kiri ti li na ya ti mama ti lo si mama ti lo akiri adu lo?” 5 Jésus akiri tënë na lo: “Biani, mbi tene na mo taa-tënë: tongana a du zo na ngu na Yingo pepe, zo ni alingbi ti li na Kodro-gbia ti Nzapa pepe. 6 Zo ayeke du gi zo, Yingo ayeke du gi yingo. 7 So mbi tene na mo, mbi tene: ‘Alingbi a kiri a du ala si’ so, li ti mo akpe pepe. 8 Pupu ayeke ya na ndo so be ti lo aye; mo yeke ma ni, me mo hinga ndo so alondo daa, wala ndo so ayeke gue daa pepe. Ye ni ayeke tongaso na azo so Yingo adu ala.” 9 Nikodeme atene na Jésus: “Ye ni ayeke duti ande tongana nyen?” 10 Jésus akiri tënë na lo, atene: “Mo so azo ahinga mo tongana wafango-ye na Israel so, mo hinga aye so pepe? 11 Biani, mbi tene na mo taa-tënë: ye so e hinga laa e yeke fa peko ni na azo; ye so e baa laa e yeke tene tënë ni na azo, me ala azo, tënë so e yeke tene, ala ye ti ma ni pepe. 12 So mbi tene na ala tënë ti aye ti sese ge, ala yeda na ni pepe so, tongana mbi tene na ala tënë ti aye ti yayu, fade ala yeke yeda? 13 Zo oko ade ti ma na yayu pepe, gi Molenge ti Zo; lo laa lo londo na yayu si lo zu na sese. 14 Alingbi a kanga Molenge ti Zo na nduzu na ndö ti keke, tongana ti so Moïse akanga ando ngbo na nduzu na benyama, 15 tongaso si azo so kue ama na be na Molenge ni ayeke na fini so angba lakue lakue. 16 Biani, Nzapa aye azo ti dunia so mingi si lo mu gi oko Molenge ti lo titene zo so ama na be na lo alingbi ti kui pepe, me lo yeke na fini so angba lakue lakue. 17 Nzapa atokua Molenge ti lo na dunia so ti fâ ngbanga na li ti azo ti dunia ni pepe, me ti soo ala. 18 Zo so ama na be na Molenge ni, ngbanga ayeke na li ti lo pepe; me zo so ama na be pepe, Nzapa afâ ngbanga na li ti lo awe, ndali ti so lo ma na be na oko Molenge ti Nzapa pepe. 19 Nda ti ngbanga ni ayeke so: lumiere aga na ndö ti dunia so, me azo aye tënë ti lumiere ni pepe; ala ye gi tënë ti vukongo ndo, ngbanga ti so ye so ala yeke sara ayeke sioni. 20 Zo so kue ayeke sara ye ti sioni, lo ke tënë ti lumiere; lo ye ti ga na ya ti lumiere pepe, ngbanga ti so lo kpe titene asioni ye so lo yeke sara asigigi polele. 21 Me zo so ayeke sara ye na lege ti taa-tënë, lo ga na ya ti lumiere. Tongaso, azo abaa aye so lo yeke sara si ala baa so, lo yeke ma yanga ti Nzapa.” 22 Na pekoni, Jésus na adisiple ti lo ague na sese ti Judée. Lo na ala aduti kâ si lo yeke batize azo. 23 Jean nga ayeke batize azo na Enon, nduru na Salim, ngbanga ti so ngu ayeke kâ mingi. Azo aga na lo si lo yeke batize ala. 24 Biani, na ndembe ni so, a de ti bi Jean na da ti kanga pepe. 25 Andaa papa alondo na popo ti adisiple ti Jean na mbeni zuife na ndö ti tënë ti sukulango sioni. 26 Ala gue awara Jean si ala tene na lo: “Wafango-ye, koli so lani mo na lo ayeke na mbage ti ngu ti Jourdain kâ so, lo so mo fa peko ti tënë ti lo so, baa, lo kiri lo yeke batize azo si azo kue ayeke gue gi na lo!” 27 Jean akiri tënë na ala: “Tongana Nzapa amu ye na zo pepe, zo ni alingbi ti wara ni pepe. 28 Ala yeke lani daa si mbi tene: ‘Mbi yeke Mesii pepe, me a tokua mbi ti ga kozo ti lo.’ 29 Zo so ayeke na wali ayeke koli ti wali ni; me zo so lo na koli ti wali ni aye tere, lo yeke luti nduru na tere ti koli ni si lo yeke na ngia ti ma go ti koli ti wali ni. Nda ti ngia so mbi yeke na ni laa; laso ngia ni alingbi kue. 30 Alingbi lo ga kota si mbi ga ti mbi kete.” 31 “Zo so alondo na yayu si aga, lo hon azo kue; me zo so ayeke zo ti sese, lo yeke ti sese, lo yeke tene tënë tongana zo ti sese. Zo so alondo na yayu si aga, lo hon azo kue. 32 Lo yeke fa gi peko ti tënë ti aye so lo baa si lo ma; me zo oko ti yeda na tënë so lo yeke fa so ayeke daa pepe. 33 Zo so ayeda na tënë ti lo, lo yeke fa mbirimbiri na le ti azo so, Nzapa ayeke tene taa-tënë. 34 Zo so Nzapa atokua lo, lo yeke tene gi atënë ti Nzapa, ngbanga ti so Nzapa amu Yingo ti lo ahon ndoni na zo ni. 35 Babâ aye Molenge ni si lo zia ye kue na maboko ti lo. 36 Zo so ama na be na Molenge ni, lo yeke na fini so angba lakue lakue; zo so ake ti ma na be na Molenge ni, fade lo yeke na fini so pepe, me ngonzo ti Nzapa angba na ndö ti lo.”

4

1 Afarizien ama so Jésus ayeke sara si azo mingi aga adisiple si lo yeke batize nga azo mingi ahon Jean. 2 Andaa Jésus wani laa ayeke batize azo pepe, me adisiple ti lo. 3 So Jésus ama tënë so azo ayeke tene na iri ti lo, lo londo na sese ti Judée si lo kiri na Galile. 4 Lege ti guengo na Galile ahon na ya ti gbata ti Samarii. 5 Lo si na ya ti mbeni kete kodro ti Samarii so iri ni Sikar, nduru na yaka so Jacob amu na molenge ti lo Joseph. 6 Du ti ngu ti Jacob ayeke kâ. Jésus awoko na peko ti tambula si lo duti na yanga ti du ti ngu ni. Andaa bekombite aga nduru awe. 7 Mbeni wali ti gbata ti Samarii aga ti to ngu. Jésus atene na lo: “Mu na mbi ngu, mbi nyon.” 8 Andaa adisiple ti Jésus ahon ti ala na gbata ni ti vongo kobe. 9 Wali ti Samarii ni atene na Jésus: “So tënë ti nyen! Mo so mo yeke zuife, mo hunda ngu ti nyongo ni na maboko ti mbi, wali ti Samarii?” Andaa azuife na azo ti Samarii ayeke ma ka tere pepe. 10 Jésus akiri tënë na lo: “Tongana mo hinga fade ye so Nzapa ayeke mu na zo si mo hinga zo so ayeke hunda ngu ti nyongo ni na maboko ti mo so, ka mo wani laa mo yeke hunda na lo ngu so ayeke sara titene zo angba na fini.” 11 Wali ni atene na lo: “Kota zo, mo yeke na ye ti to na ngu pepe si du ti ngu ni ali mingi. Mo yeke wara ngu so ayeke sara titene zo angba na fini so tongana nyen? 12 Kotara ti e Jacob laa azia na e du ti ngu so; lo na amolenge ti lo na anyama ti lo kue anyon ngu ti ya ni. Mo yeke kota, mo hon lo?” 13 Jésus akiri tënë na lo: “Zo so anyon ngu so, fade nzara ti ngu angba ti sara lo; 14 me zo so ayeke nyon ande ngu so mbi yeke mu na lo, nzara ti ngu ayeke kiri ti sara lo pepe. Ngu so mbi yeke mu na lo ayeke ga li ti ngu so fini so angba lakue lakue ayeke sigigi daa.” 15 Wali ni atene na Jésus: “Kota zo, mu na mbi ngu so si nzara ti ngu akiri ti sara mbi pepe, tongaso si mbi kiri ti ga na ndo so ti to ngu pepe.” 16 Jésus atene na lo: “Gue mo iri koli ti mo, mo ga na lo.” 17 Wali ni akiri tënë na lo: “Mbi yeke na koli pepe.” Jésus atene na lo: “Biani, tënë so mo tene: ‘Mbi yeke na koli pepe’ so ayeke taa-tënë, 18 ngbanga ti so mo yeke ando na akoli oku; lo so mo na lo ayeke duti fadeso ayeke koli ti mo pepe. Tënë so mo tene na mbi so ayeke taa-tënë.” 19 Tongaso, wali ni atene na lo: “Kota zo, mbi baa so mo yeke mbeni wayanga-Nzapa! 20 Akotara ti e avoro Nzapa na ndö ti hoto so. Me ti ala, azuife, ala tene: ‘Ndo ti vorongo lo ayeke gi na Jérusalem.’ ” 21 Jésus akiri tënë na lo: “Wali, mo ma tënë ti mbi: ngbonga ayeke ga so fade ala yeke voro Babâ na ndö ti hoto so wala na Jérusalem pepe. 22 Ala azo ti Samarii, ala yeke voro Nzapa so ala hinga lo pepe, me e yeke voro ti e Nzapa so e hinga lo, ngbanga ti so ye so ayeke soo zo na kuâ alondo na mbage ti azuife. 23 Me mbeni ngbonga ayeke ga si ngbonga ni alingbi awe so ambirimbiri zo ti vorongo Babâ ayeke voro lo na lege ti Yingo nga na lege ti taa-tënë. Amara ti azo ti vorongo Nzapa tongaso laa Babâ ayeke gi ala. 24 Nzapa ayeke Yingo; azo so ayeke voro lo, ayeke nzoni ala voro lo na lege ti Yingo nga na lege ti taa-tënë.” 25 Wali ni atene na lo: “Mbi hinga so Mesii so ala iri lo Christ ayeke ga. Tongana lo ga, fade lo yeke fa na e nda ti ye kue.” 26 Jésus akiri tënë na lo: “Mbi so mbi yeke tene tënë na mo so, mbi yeke Mesii ni.” 27 Na ndembe ni so, adisiple ti lo asi. So ala baa, lo yeke tene tënë na wali, li ti ala kue akpe. Me zo oko na popo ti ala ti hunda lo ayeke daa pepe, ti tene: “Mo ye nyen?” wala: “Ngbanga ti nyen laa mo yeke tene tënë na lo?” 28 Tongaso wali ni azia ta ti ngu ti lo na ndo so si lo kiri na ya ti gbata ni; lo tene na azo, lo tene: 29 “Ala ga abaa mbeni koli so atene na mbi tënë ti aye so kue mbi sara. Wala Mesii ni laa?” 30 Azo ni alondo na ya ti gbata ni si ala ga na tere ti Jésus. 31 Na ndembe so wali ni ahon, adisiple ti Jésus atene na lo: “Wafango-ye, te kobe!” 32 Jésus akiri tënë na ala: “Mbi yeke na mbeni kobe ti tengo ni so ala hinga pepe.” 33 Adisiple ti lo ahunda tere ti ala, atene: “Mbeni zo aga na lo kobe?” 34 Jésus atene na ala: “Kobe ti mbi ayeke ti sara ye so be ti lo so atokua mbi aye, ti hunzi kua so lo mu na mbi ti sarango ni. 35 Ala yeke tene: ‘Angba nze osio titene ngoi ti fango ale ti kobe ti yaka asi.’ Me mbi tene na ala: ala yo le ti ala na nduzu, ala baa ndo: ale ti kobe ni abe, alingbi titene a fâ ni awe! 36 Zo ti fango ale ti kobe ayeke wara futa ti lo fadeso si lo yeke bongbi ale ti kobe ni ndali ti fini so angba lakue lakue. Tongaso zo ti lungo kobe na zo ti fango ale ti kobe ni, ala kue awara ngia legeoko. 37 Ndani laa mato so aga taa-tënë: ‘Mbeni zo alu ale ti kobe, mbeni zo afâ ale ti kobe ni.’ 38 Mbi tokua ala ti fâ ale ti kobe so ala baa pasi daa pepe. Ambeni zo abaa pasi kozoni si ala azo ti mbi, ala li na ya ti yaka ni.” 39 Azo ti Samarii mingi ti kete ti kodro ti Sikar ama na be na Jésus ngbanga ti tënë so wali so atene na ala, atene: “Lo tene na mbi tënë ti aye so kue mbi sara.” 40 Tongaso Samarii asi na tere ti Jésus, ala voro lo titene lo ngba na popo ti ala. Jésus asara lango use na ndo so. 41 Azo so ama na be na lege ti atënë ti lo wani ahon ala so ama na be na lege ti atënë ti wali so. 42 Azo ni atene na wali ni, atene: “Gi ndali ti tënë so mo tene laa e ma na be pepe, me e wani e ma lo. E hinga biani so lo yeke taa Wasongo azo ti dunia so.” 43 Lango use na pekoni, Jésus alondo na ndo so si lo gue na Galile. 44 Lo wani lo tene na yanga ti lo, lo tene: “Azo ayeke ne wayanga-Nzapa na taa kodro ti lo pepe.” 45 Me na singo ti lo na Galile, azo ti sese ni ayamba lo nzoni, ngbanga ti so ala nga, ala gue lani na matanga na Jérusalem si ala baa aye so kue Jésus asara. 46 Jésus akiri na Kana, mbeni kete kodro ti Galile. Kâ laa lo mu lani ngu, lo sara si aga vin. Mbeni kota zo so ayeke sara kua na gbia kâ; molenge ti lo ayeke na kobela na Kapernaum. 47 So kota zo ni ama atene, Jésus alondo na Judée asi na Galile, lo gue lo wara lo. Lo voro Jésus titene lo gue, lo kai kobela na tere ti molenge ti lo so aga nduru ti kui. 48 Jésus atene na lo: “Tongana ala baa ye ti kpene na ye ti dongo pepe, fade ala yeke ma na be oko pepe!” 49 Kota zo ni atene na Jésus: “Kota Gbia, mo gue hio si, tongaso pepe molenge ti mbi ayeke kui.” 50 Jésus atene na lo: “Mo gue, molenge ti mo ayeke na fini.” Koli ni ayeda na tënë so Jésus atene na lo si lo gue. 51 So lo ngba na lege ti kiri na kodro, azo ti kua ti lo aga si ala tene na lo: “Molenge ti mo ayeke na fini!” 52 Kota zo ni ahunda ala, atene: “Tere ti molenge ni aga nzoni na ngbonga ti nyen?” Ala kiri tënë na lo: “Biri, na ngbonga oko ti peko ti bekombite si tere ti lo so amu wâ so ade.” 53 Babâ ni adabe ti lo so, ayeke gi na ngbonga ni so laa Jésus atene na lo, atene: “Molenge ti mo ayeke na fini!” Nilaa lo na azo ti sewa ti lo kue ama na be. 54 So ayeke use ye ti kpene so Jésus asara na ndembe so lo londo na Judée si lo kiri na Galile.

5

1 Na pekoni, mbeni matanga ti azuife ayeke daa si Jésus ague na Jérusalem. 2 Na Jérusalem, nduru na yanga ti gbagba ti gbata ni so iri ni Ti-ataba, mbeni ngu ayeke daa, iri ni na yanga ti hebro ayeke Betzata. Averanda oku ayeke na tere ti ngu ni. 3 Gba ti azo ti kobela alango na gbe ti averanda ni: awaziba, azo so gere ti ala abuba na azo so mbeni mbage ti tere ti ala abuba. Ala yeke ku ndembe so ngu ni ayeke yingi, 4 ngbanga ti so na ambeni ngoi, mbeni ange ti Kota Gbia ayeke zu na ya ti ngu ni ti yingi ni. Zo ti kobela so ayeke zu kozo na ya ti ngu ni na peko ti so ngu ni ayingi, ataa kobela ti lo ni ayeke nyen, kobela ni ayeke kai. 5 Mbeni koli ayeke kâ so lo yeke na kobela asara ngu baleota na miombe. 6 Jésus abaa lo yeke lango na sese, lo ma atene, kobela ti lo aninga mingi si lo hunda lo, atene: “Mo ye tere ti mo aga nzoni?” 7 Zo ti kobela ni akiri tënë na lo, atene: “Kota Gbia, na ndembe so ngu ni ayeke yingi, mbeni zo ti bi mbi na ya ni ayeke daa pepe. Tongana mbi londo ti gue, mbeni zo ali daa kozo ti mbi awe.” 8 Jésus atene na lo: “Londo, mo mu konza ti mo, mo tambula!” 9 Gi hio tongaso, tere ti koli ni aga nzoni si lo mu konza ti lo, lo tambula. Andaa, lango ni so ayeke lango ti wungo tere. 10 Tongaso azuife atene na koli so tere ti lo aga nzoni so, atene: “Laso ayeke lango ti wungo tere; Ndia ake na mo ti yo konza ti mo ti tambula na ni.” 11 Me koli so akiri tënë na ala, atene: “Koli so asara si tere ti mbi aga nzoni so laa atene na mbi, atene: ‘Mu konza ti mo, mo tambula.’ ” 12 Ala hunda lo, atene: “Zo wa laa atene na mo, atene: ‘Mu konza ti mo, mo tambula’ so?” 13 Koli so tere ti lo aga nzoni so ahinga lo pepe, ngbanga ti so Jésus asigigi na popo ti gba ti azo so ayeke kâ si lo hon ti lo. 14 Na pekoni, Jésus atengbi na koli ni na ya ti kota da ti Nzapa si lo tene na lo: “Tere ti mo aga nzoni fadeso awe. Kiri mo sara siokpari pepe, ngbanga ti fade mbeni ye ti sioni asi na mo ahon ti kozo.” 15 Koli ni ague, lo tene na amakonzi ti azuife, lo tene: ‘Jésus laa asara si tere ti mbi aga nzoni.’ 16 Nilaa ala to nda ti gi Jésus na tënë, ngbanga ti so lo sara ye so na lango ti wungo tere. 17 Me Jésus akiri tënë na ala: “Babâ ti mbi ayeke sara kua lakue, mbi nga, mbi yeke sara kua.” 18 Na ndö ti tënë so, amakonzi ti azuife ayeke gi lege ngangu ti fâ Jésus, ngbanga ti so lo ke ti kpe ndia ti lango ti wungo tere si na ndö ni, lo kiri lo tene, Nzapa ayeke taa Babâ ti ni; so aye ti fa atene, lo yeke legeoko na Nzapa. 19 Jésus amu tënë si lo tene na ala: “Biani, mbi tene na ala taa-tënë: Molenge ni ayeke sara ye ti be ti lo wani pepe, lo yeke sara gi ye so lo baa Babâ ti lo na sarango ni. Ye so kue Babâ asara, Molenge ni nga ayeke sara, 20 ngbanga ti so Babâ aye Molenge ti lo si lo fa na Molenge ni aye so kue lo yeke sara. Fade lo yeke fa na Molenge ni ambeni ye ti sarango ni so ayeke kota ahon so si fade li ti ala azo, akpe. 21 Tongana ti so Babâ ayeke zingo akuâ si lo yeke mu na ala fini, Molenge nga ayeke mu fini na zo so be ti lo aye. 22 Babâ ayeke fâ ngbanga na li ti zo oko pepe, me lo zia fango ngbanga ni kue na maboko ti Molenge ni 23 si azo kue alingbi ti ne Molenge tongana ti so ala yeke ne Babâ. Zo so ane Molenge ni pepe, andaa so Babâ atokua lo, lo ne lo pepe. 24 “Biani, mbi tene na ala taa-tënë: zo so ama tënë ti mbi si lo ma na be na lo so atokua mbi, lo yeke na fini so angba lakue lakue. A yeke fâ ngbanga na li ti lo pepe, me lo sigigi na ya ti kuâ awe si lo yeke na fini. 25 Biani, mbi tene na ala taa-tënë: mbeni ngbonga ayeke ga si ngbonga ni alingbi awe so akuâ ayeke ma go ti Molenge ti Nzapa si ala so ama go ni ayeke kiri ti duti na fini. 26 Babâ ni ayeke na ngangu ti mu fini na zo, Molenge ni nga ayeke na ngangu ti mu fini na zo, ngbanga ti so Babâ amu na lo ngangu ni awe. 27 Tongaso lo mu ngangu ti fango ngbanga na Molenge ni, ngbanga ti so Molenge ni ayeke Molenge ti Zo. 28 Nilaa, ayeke nzoni li ti ala azo, akpe pepe, ngbanga ti so ngbonga ni ayeke ga so, azo so ayeke na ya ti du ti kuâ ayeke ma go ti lo 29 si ala yeke zingo na kuâ. Azo so asara aye ti nzoni, fade ala yeke zingo na kuâ ti kiri ti duti na fini; me azo so asara aye ti sioni, ala yeke zingo na kuâ titene a fâ ngbanga na li ti ala. 30 Mbi lingbi ti sara ye ti be ti mbi wani pepe. Mbi yeke fâ ngbanga gi na lege ti tënë so mbi ma. Ngbanga ti mbi ayeke na legeni, ndali ti so mbi yeke gi ti sara ye ti be ti mbi wani pepe, me ye so be ti lo so atokua mbi aye.” 31 “Tongana mbi tene fade tënë na ndö ti mbi wani, ka tënë ti mbi ayeke taa-tënë pepe. 32 Me mbeni zo nde laa ayeke tene tënë na ndö ti mbi. Mbi hinga so, tënë so lo yeke tene na ndö ti mbi ayeke taa-tënë. 33 Ala, amakonzi ti azuife, lani ala tokua azo na Jean si Jean atene na ala tënë na ndö ti taa-tënë. 34 Ti mbi, mbi yeke gi titene zo atene tënë na ndö ti mbi pepe; me mbi yeke tene tënë so si ala lingbi ti soo kuâ. 35 Jean ayeke lani tongana lamba so aza si ndo avuru. Ala azo, ala yeda ti sara ngia kete na gbe ti wâ ni. 36 Me ambeni ye ayeke daa so atene tënë na ndö ti mbi ahon ti Jean. Aye ni ayeke aye so Babâ wani amu na mbi ti sarango ni; mbi yeke sara aye ni si aye ni ayeke fa so Babâ laa atokua mbi. 37 Babâ so atokua mbi ayeke tene nga tënë na ndö ti mbi. Ala de ti ma go ti lo laoko pepe, ala de ti baa nga le ti lo laoko pepe. 38 Tënë ti lo angba na be ti ala pepe, ngbanga ti so ala ma na be na zo so lo tokua lo so pepe. 39 Ala yeke gi nda ti Mbeti ti Nzapa, ngbanga ti so ala baa ti ala atene na lege ni, ala yeke wara fini so angba lakue lakue. Andaa gi Mbeti so laa ayeke tene tënë na ndö ti mbi! 40 Me ala azo, ala ye ti ga na mbi pepe ti wara taa fini. 41 “Mbi yeke gi titene azo agonda mbi pepe. 42 Me mbi hinga ala: na be ti ala, ala ye Nzapa pepe. 43 Mbi ga na iri ti Babâ ti mbi, me ala ke ti yamba mbi. Tongana mbeni zo nde aga fade na iri ti lo wani, ka ala yeke yamba lo! 44 Ala ye titene amba ti ala laa agonda ala si ala nga agonda amba ti ala; me gonda so alondo na Nzapa oko, ala ye ti gi ni pepe. Fade ala lingbi ti ma na be tongana nyen? 45 Ala baa ti ala atene, mbi laa mbi yeke bi tënë na li ti ala na gbe ti Babâ? Oko pepe. Moïse, lo so ala zia be ti ala na ndö ti lo, lo laa lo yeke bi tënë na li ti ala. 46 Tongana ala yeda fade na tënë ti Moïse biani, ka ala yeda nga na tënë ti mbi, ngbanga ti so Moïse asu mbeti na ndö ti mbi. 47 So ala yeda na tënë so lo su na mbeti pepe so, fade ala yeda na tënë ti mbi tongana nyen?”

6

1 Na pekoni, Jésus amu lege, lo gue na mbage ti kota ngu ti Galile, so mbeni iri ni Tiberiade. 2 Gba ti azo amu peko ti lo, ngbanga ti so ala baa aye ti kpene so lo sara ti kai kobela na tere ti azo. 3 Tongaso Jésus ague na li ti mbeni hoto; kâ, lo na adisiple ti lo aduti. 4 Andaa Pake, so ayeke matanga ti azuife, aga nduru awe. 5 So Jésus amu le ti lo na nduzu, lo baa gba ti azo ayeke ga na peko ti lo. Tongaso lo hunda Philippe, lo tene: “Fade e yeke wara kobe na ndo wa ti vo si alingbi na azo so kue?” 6 – Jésus ahunda tënë so ti tara gi be ti Philippe. Andaa lo hinga ye so lo leke na be ti lo ti sara. – 7 Philippe akiri tënë na lo: “Ataa e yeke na ale ti nginza ngbangbo use, so ayeke lingbi ande ti vo na kobe si zo oko oko awara kete ate?” 8 Mbeni disiple ti lo oko so iri ti lo André, ita ti Simon Pierre, atene: 9 “Mbeni kete molenge-koli ayeke ge, lo yeke na asusu use na mapa oku so a sara na farini ti orze. Me so ayeke lingbi na azo gbani gbani so tongana nyen?” 10 Jésus atene: “Ala tene na azo ni kue ti duti.” Pere ayeke na ndo ni so mingi. Azo ni aduti; li ti akoli kue aga nduru na saki oku. 11 Tongaso Jésus amu amapa ni, lo mu singila na Nzapa si lo kangbi ni na azo so aduti. Lo kangbi nga asusu ni na ala, zo oko oko ate alingbi na nzara ti lo. 12 So ya ti azo ni asi awe, Jésus atene na adisiple ti lo: “Ala ro anduru kobe so angba so, ala sara si mbeni oko agirisa pepe.” 13 Adisiple aro ni si asi sakpa baleoko na use: so ayeke tanga ti amapa oku so azo ni ate si angba so; a sara mapa ni na farini ti orze. 14 So ala baa ye ti kpene so Jésus asara, azo ni atene: “Koli so ayeke taa Wayanga-Nzapa, lo so azo atene tënë ti gango ti lo na dunia so!” 15 Jésus ahinga atene, azo ni aye ti ga ti mu lo na ngangu ti sara si lo ga gbia. Nilaa lo gboto tere ti lo, lo gue lo duti na ndö ti hoto gi lo oko. 16 Na lakui, adisiple ti Jésus ague na yanga ti kota ngu. 17 Ala ko na ya ti mbeni ngo si ala yeke fâ ngu ti gue na Kapernaum so ayeke na mbage ti ngu ni. Ndo avuko awe, me Jésus ade ti kiri na tere ti ala pepe. 18 Mbeni ngangu pupu aya si ayeke yingi ngu ni ngangu. 19 So ala gue na ngo ni ngbii asi kilometere oku wala omene, ala baa Jésus ayeke tambula na le ti ngu si lo yeke ga nduru na ngo ti ala. Mbeto agbu ala. 20 Me Jésus atene na ala: “Ala sara mbeto pepe, so mbi laa!” 21 Ala ye ti mu lo na ya ti ngo ni, me ngo ni asi na ndo so ala ye ti gue daa awe si agbu sese. 22 Lango oko na pekoni, gba ti azo so angba na mbage ti ngu ni abaa so, gi ngo oko laa ayeke kâ. Ala hinga so Jésus ako na ya ti ngo legeoko na adisiple ti lo pepe; gi adisiple oko laa ahon. 23 Me ambeni ngo nde alondo na gbata ti Tiberiade asi na ndo so Kota Gbia amu mapa, lo mu singila na Nzapa si azo ate so. 24 So gba ti azo ni abaa so Jésus na adisiple ti lo ayeke kâ pepe, ala ko na ya ti ango ni si ala gue ti gi lo na Kapernaum. 25 Azo ni awara Jésus na mbage ti ngu ni si ala hunda lo, atene: “Wafango-ye, mo si ge lawa?” 26 Jésus akiri tënë na ala: “Biani, mbi tene na ala taa-tënë: ala yeke gi mbi ngbanga ti aye ti kpene so ala baa so pepe, me ngbanga ti so ala te mapa ngbii ya ti ala asi. 27 Ayeke nzoni ala sara kua ndali ti kobe so ayeke buba pepe, me ndali ti kobe so ayeke ngba si ayeke mu na zo fini so angba lakue lakue. Molenge ti Zo laa ayeke mu ande na ala kobe ni so, ngbanga ti so Babâ, lo so lo yeke Nzapa wani laa amu na lo ngangu ni.” 28 Ala hunda lo, atene: “Nyen laa e lingbi ti sara tongana e ye ti sara kua ti Nzapa?” 29 Jésus akiri tënë na ala: “Kua so Nzapa ahunda na ala ti sarango ni ayeke ti ma na be na zo so lo tokua lo.” 30 Ala kiri tënë na lo, atene: “Nyen laa mo yeke sara titene e baa si e ma na be na mo? Ye so mo yeke sara ande ayeke nyen? 31 Ando na benyama, akotara ti e ate mane. Mbeti ti Nzapa atene: ‘Lo mu na ala mapa so alondo na yayu si ala te.’ ” 32 Me Jésus akiri tënë na ala, atene: “Biani, mbi tene na ala taa-tënë: mapa so alondo na yayu, Moïse laa amu na ala pepe; me Babâ ti mbi laa amu na ala taa mapa ti yayu, 33 ndali ti so mapa ti Nzapa ayeke zo so alondo na yayu, lo zu si lo yeke mu fini na azo ti dunia.” 34 Ala tene na lo: “Kota Gbia, mu na e mapa ni so lakue!” 35 Jésus atene na ala: “Mbi laa mbi yeke mapa so ayeke mu fini na zo. Zo so aga na mbi, fade nzara ti kobe ayeke sara lo laoko pepe; zo so ama na be na mbi, fade nzara ti ngu ayeke sara lo laoko pepe. 36 Mbi tene na ala awe: ala baa mbi, me ala ma na be pepe. 37 Azo so kue Babâ amu ala na mbi, fade ala yeke ga na mbi; zo so aga na mbi, fade mbi yeke zia lo na gigi oko pepe. 38 Mbi londo na yayu, mbi ga na ndo so ti sara ye ti be ti mbi pepe, me ti sara ye so be ti lo so atokua mbi aye. 39 Ye so be ti lo so atokua mbi aye, ayeke so: na popo ti azo so lo mu ala na mbi, mbi girisa mbeni zo oko pepe, me lo ye si mbi zingo ala kue na kuâ na lango ti ndani. 40 Ye so be ti Babâ ti mbi aye ayeke so: zo so kue abaa Molenge ni si ama na be na lo, lo yeke na fini so angba lakue lakue; fade mbi, mbi yeke zingo lo na kuâ na lango ti ndani.” 41 Azuife ato nda ti kasa Jésus, ngbanga ti so lo tene: “Mbi yeke mapa so alondo na yayu si aga.” 42 Ala hunda tere ti ala, atene: “So Jésus, molenge ti Joseph, so e hinga babâ ti lo na mama ti lo so laa pepe? Tongana nyen laa fadeso lo tene: ‘Mbi londo na yayu si mbi ga so?’” 43 Jésus akiri tënë na ala, atene: “Ala zia ti kasa ndo! 44 Tongana Babâ so atokua mbi airi mbeni zo pepe, zo ni alingbi ti ga na mbi pepe. Tongana zo ni aga na mbi, fade mbi yeke zingo lo na kuâ na lango ti ndani. 45 Awayanga-Nzapa asu na mbeti, atene: ‘Fade Nzapa ayeke fa ye na azo kue.’ Zo so ama tënë ti Babâ si lo yeda ti manda ye so Babâ afa na lo, zo tongaso laa ayeke ga na mbi. 46 So ti tene pepe mbeni zo abaa Babâ awe. Gi zo so alondo na Nzapa aga, lo laa lo baa Babâ.” 47 Biani, mbi tene na ala taa-tënë: “Zo so ama na be, lo yeke na fini so angba lakue lakue. 48 Mbi yeke mapa so ayeke mu fini na zo. 49 Ando na benyama, akotara ti ala ate mane, me ala kui. 50 Me mapa so alondo na yayu si aga, zo so ate ni, fade lo yeke kui pepe. 51 Mbi yeke mapa so ayeke mu fini na zo, mapa so alondo na yayu si aga. Zo so ate mapa so, fade lo yeke ngba na fini lakue lakue. Mapa so mbi yeke mu ande ayeke tere ti mbi so ayeke sara titene azo ti dunia awara fini.” 52 Na ndö ti tënë so, azuife apapa na popo ti ala ngangu si ala tene: “Koli so alingbi ti mu tere ti lo na e ti te tongana nyen?” 53 Jésus atene na ala: “Biani, mbi tene na ala taa-tënë: tongana ala te tere ti Molenge ti Zo pepe si ala nyon nga mene ti lo pepe, fade ala yeke duti na taa fini pepe. 54 Zo so ate tere ti mbi si anyon mene ti mbi, lo yeke na fini so angba lakue lakue. Fade mbi yeke zingo lo na kuâ na lango ti ndani, 55 ngbanga ti so tere ti mbi ayeke taa kobe si mene ti mbi ayeke taa ye ti nyongo ni. 56 Zo so ate tere ti mbi si anyon mene ti mbi, zo so mbi na lo, e yeke duti oko laa. 57 Babâ ti mbi so atokua mbi, lo yeke na fini; na lege ti lo laa mbi yeke na fini. Nilaa, zo so ate tere ti mbi, lo yeke ngba na fini na lege ti mbi. 58 Baa, mapa so alondo na yayu si aga laa: mapa ni ayeke nde na ti so akotara ti ala ate ando. Akotara ti ala akui, me zo so ate kobe so, lo yeke ngba na fini lakue lakue.” 59 Aye so Jésus afa na ya ti da ti sambelango Nzapa na Kapernaum laa. 60 Na mango atënë so, mingi ti adisiple ti Jésus atene: “Tënë so ayeke ngangu mingi! Zo wa laa alingbi ti yeda na ni?” 61 Me Jésus ahinga so, adisiple ti lo ayeke kasa lo na gbe ti go ti ala ngbanga ti tënë so. Ndani laa lo hunda ala, lo tene: “Tënë so aso be ti ala? 62 Ala yeke tene ande nyen na ndembe so Molenge ti Zo ayeke kiri na yayu, na ndo so lo yeke daa kozoni so? 63 Yingo ti Nzapa laa ayeke mu fini na zo; zo alingbi ti wara fini na ngangu ti lo wani pepe. Atënë so mbi tene na ala ayeke tënë ti Yingo na tënë ti fini. 64 Me ambeni zo na popo ti ala ama na be pepe.” Biani, Jésus ahinga ngbene ye na tongo nda ni azo so ama na be pepe nga na zo so ayeke ka ande lo. 65 Lo kiri lo tene: “Ndani laa, mbi tene na ala, tongana Babâ amu lege na mbeni zo pepe, zo ni alingbi ti ga na mbi pepe.” 66 Gi na peko ti tënë so, mingi ti adisiple ti Jésus agboto tere ti ala si ala kiri ague na peko ti lo pepe. 67 Tongaso Jésus ahunda adisiple baleoko na use, atene: “Ala nga, ala ye ti gue pepe?” 68 Simon Pierre akiri tënë na lo: “Kota Gbia, e yeke gue ti e ande na zo wa? Atënë so ayeke mu na zo fini so angba lakue lakue, ayeke gi na yanga ti mo oko. 69 E ma na be si e hinga so, mo yeke zo ti nzoni kue so Nzapa azia mo nde si lo tokua mo.” 70 Jésus akiri tënë na ala, atene: “Mbi laa mbi soro ala so baleoko na use so pepe? Andaa mbeni zo oko na popo ti ala ayeke ti lo mbeni zabolo!” 71 Jésus ayeke tene tënë ti Judas, molenge ti Simon Iskariote. Judas ayeke mbeni oko ti adisiple baleoko na use; lo laa lo yeke ka ande Jésus.

7

1 Na pekoni, Jésus atambula na ya ti sese ti Galile; lo ye ti tambula na ya ti sese ti Judée pepe, ngbanga ti so azuife ayeke gi lege ti fâ lo. 2 Matanga ti azuife so ayeke matanga ti Akpangba aga nduru awe. 3 A-ita ti Jésus atene na lo, atene: “Londo na ndo so, mo gue na Judée si adisiple ti mo nga abaa ye so mo yeke sara. 4 Tongana zo aye titene azo ahinga lo, lo yeke sara ye na hondengo ni pepe. So mo yeke sara amara ti ye tongaso, sara si azo kue ahinga mo.” 5 Ataa a-ita ti lo, ala ma na be na lo pepe. 6 Jésus atene na ala: “Ngbonga ti mbi ade ti lingbi pepe, me ti ala, ngbonga kue ayeke gi nzoni ngbonga. 7 Azo ti dunia alingbi ti ke ala pepe; me azo ni ake mbi, ngbanga ti so mbi tene tënë na ndö ti ala, mbi tene: aye so ala ayeke sara ayeke sioni. 8 Ala wani, ala gue na matanga ni! Mbi yeke gue ti mbi na matanga ni pepe, ngbanga ti so ngbonga ti mbi ade ti lingbi pepe.” 9 Na peko ti tënë so Jésus atene, lo ngba na Galile. 10 So a-ita ti lo ahon na matanga ni awe, Jésus nga ague na matanga ni; me lo gue na hondengo ni si azo abaa lo pepe. 11 Amakonzi ti azuife ayeke gi lo na ya ti matanga ni, ala hunda ndo, atene: “Lo yeke na ndo wa?” 12 Gba ti azo so abongbi kâ ayeke tene tënë ti lo mingi. Ambeni zo ni atene: “Lo yeke nzoni zo”, ambeni atene ti ala: “Mvene, lo yeke handa gba ti azo gi senge senge.” 13 Me zo ti tenengo tënë ti lo polele ayeke daa pepe, ngbanga ti so mbeto ti amakonzi ti azuife ayeke sara ala. 14 So ala de ti sara matanga ni, Jésus alondo, lo gue na ya ti kota da ti Nzapa si lo yeke fa ye na azo. 15 Li ti amakonzi ti azuife kue akpe si ala tene: “Koli so ahinga aye so tongana nyen, so lo manda mbeti pepe so?” 16 Jésus akiri tënë na ala: “Ye so mbi yeke fa na ala alondo na mbi wani pepe, me alondo na lo so atokua mbi. 17 Zo so aye ti sara ye so be ti Nzapa aye, fade lo yeke hinga atene, ye so mbi yeke fa alondo na Nzapa wala mbi yeke tene gi tënë so alondo na mbi wani. 18 Zo so ayeke tene gi tënë ti be ti lo, lo yeke gi titene azo agonda lo. Me zo so ayeke gi titene azo agonda zo so atokua lo, lo yeke tene gi taa-tënë; tënë ti mvene ayeke na yanga ti lo pepe. 19 Moïse amu ando Ndia na ala pepe? Me zo oko na popo ti ala abata ndia ni pepe. Ala yeke gi lege ti fâ mbi ngbanga ti nyen?” 20 Azo ni kue akiri tënë na lo, atene: “Sioni yingo ayeke na ya ti mo! Zo wa laa ayeke gi lege ti fâ mo?” 21 Jésus akiri tënë na ala, atene: “Mbi sara gi ye oko si li ti ala kue akpe! 22 Moïse amu ando yanga na ala ti fâ amolenge ti ala ti koli na ganza. Moïse laa ato nda ti fango ganza pepe, me akotara ti lo laa ato nda ni; nilaa ala yeke fâ azo na ganza, ataa na lango ti wungo tere kue. 23 Ala yeke fâ amolenge-koli na ganza na lango ti wungo tere ti bata Ndia ti Moïse. Ngbanga ti nyen laa ala yeke sara ngonzo na tere ti mbi ndali ti so mbi kai kobela ti mbeni zo na lango ti wungo tere? 24 Ala fâ ngbanga gi ndali ti le ti zo pepe, me ala fâ ngbanga so ayeke na legeni.” 25 Ambeni zo ti Jérusalem ahunda ndo, atene: “Koli so azo ayeke gi lege ti fâ lo so laa pepe? 26 Baa, lo yeke tene tënë na le ti azo kue, me mbeni zo ti zi yanga na lo ayeke daa pepe! Amakonzi ti e ayeda biani awe atene, lo yeke Mesii? 27 Tongana Mesii ni aga ande, zo oko ayeke hinga ndo so lo londo daa pepe; me ti koli so, e hinga ndo so lo londo daa.” 28 Jésus ayeke fa ye na ya ti kota da ti Nzapa si lo tene tënë na kota go, lo tene: “Ala hinga mbi biani? Ala hinga ndo so mbi londo da biani? Mbi ga na iri ti mbi wani pepe. Lo so atokua mbi, lo lingbi titene zo azia be ti lo na ndö ti lo; me ala hinga lo pepe. 29 Ti mbi, mbi hinga lo, ngbanga ti so mbi londo na lo si mbi ga; lo laa lo tokua mbi.” 30 Tongaso, ala gi lege ti gbu Jésus, me zo oko agbu lo pepe, ngbanga ti so ngbonga ti lo ade ti lingbi pepe. 31 Na popo ti gba ti azo so, ambeni mingi ama na be na lo; ala tene: “Tongana Mesii aga, fade lo yeke sara aye ti kpene ahon ti koli so?” 32 Afarizien ama atënë so gba ti azo ayeke tene na gbe ti go ti ala na tere ti Jésus. Tongaso akota wayango-sandaga na afarizien atokua aturugu ti gue ti gbu lo. 33 Jésus atene: “Mbi yeke duti kete na popo ti ala si na pekoni, mbi yeke kiri na tere ti lo so atokua mbi. 34 Fade ala yeke gi mbi, me ala yeke wara mbi pepe, ngbanga ti so ala lingbi ti si na ndo so mbi yeke duti daa so pepe.” 35 Azuife ahunda tere ti ala, atene: “Lo yeke gue ande na ndo wa si e wara lo pepe so? Lo ye ti gue na ndo ti azuife so akangbi tere ti ala na ya ti akodro ti agreke so? Lo yeke gue kâ ti fa ye na agreke ni? 36 Lo tene: ‘Fade ala yeke gi mbi, me ala yeke wara mbi pepe, ngbanga ti so ala lingbi ti si na ndo so mbi yeke duti daa so pepe.’ So aye ti tene nyen?” 37 Tanga ti lango ti matanga ni ayeke mbeni kota lango mingi. Jésus aluti na nduzu si lo tene tënë na kota go, lo tene: “Tongana nzara ti ngu asara mbeni zo, ayeke nzoni lo ga na mbi, lo nyon ngu. 38 Zo so ama na be na mbi, ‘fade ngu so ayeke mu fini na zo ayeke londo na be ti lo ti sua’, tongana ti so Mbeti ti Nzapa afa tënë ni.” 39 Jésus ayeke tene tënë ti Yingo-Vuru so fade azo so ama na be na lo ayeke wara. Na ndembe ni so Yingo-Vuru ade ti ga pepe, ngbanga ti so Jésus ade ti wara gonda ti lo pepe. 40 Na popo ti gba ti azo so ama atënë ti Jésus, ambeni atene: “So taa Wayanga-Nzapa ni laa!” 41 Ambeni atene ti ala: “Lo laa lo yeke Mesii ni!” Ambeni atene: “Mesii ni alingbi ti londo na Galile si aga? 42 Mbeti ti Nzapa atene: ‘Fade Mesii ni ayeke hale ti David. Lo yeke londo ande na Betlehem, kodro ti David si lo yeke ga.’” 43 Popo ti azo ni akangbi ndali ti Jésus. 44 Ambeni na popo ti ala aye ti gbu Jésus, me zo oko andu lo pepe. 45 Aturugu ni akiri na tere ti akota wayango-sandaga na afarizien. Ala hunda aturugu ni, atene: “Ala ga na lo pepe ngbanga ti nyen?” 46 Aturugu ni akiri tënë na ala, atene: “Mbeni zo ti tene tënë tongana koli so ayeke daa oko pepe!” 47 Afarizien ahunda ala, atene: “Ala nga, lo handa ala awe? 48 Mbeni makonzi ti e wala mbeni farizien oko so ama na be na lo ayeke daa? 49 Gi gba ti azo so ahinga Ndia ti Moïse pepe so, ala laa ama na be na lo; Nzapa adeba ala awe!” 50 Na popo ti afarizien, mbeni oko ayeke Nikodeme so ague lani abaa Jésus. Lo tene na ala, lo tene 51 “Ndia ti e amu lege na e ti fâ ngbanga na li ti zo so ade e ma tënë ti lo pepe si ade e hinga ye so zo ni asara pepe?” 52 Ala kiri tënë na lo: “Mo nga, mo yeke zo ti Galile? Mo gi nda ti Mbeti ti Nzapa, fade mo yeke hinga so, mbeni wayanga-Nzapa alondo laoko na Galile aga pepe.” 53 Na pekoni, zo oko oko akiri na da ti lo.

8

1 Jésus amu lege, ague na hoto ti a-olive. 2 Na kota ndaperere, lo kiri na ya ti kota da ti Nzapa, azo kue akiri abongbi na tere ti lo. Lo duti si lo yeke fa ye na ala. 3 Awafango-ndia na afarizien amu mbeni wali so ala wara lo na gingo mbeni koli so ayeke koli ti lo pepe. Ala ga azia lo na le ti azo kue. 4 Ala tene Jésus: “Wafango-ye, e wara wali so ayeke lango na koli so ayeke koli ti lo pepe. 5 Moïse amu ando yanga na e na ya ti Ndia titene e bo amara ti wali tongaso na têne. Me ti mo, mo tene nyen?” 6 Ala hunda tënë so ti sara si Jésus ati na ya ti gbanda ti ala si ala lingbi ti wara mbeni tënë ti bi na li ti lo. Me Jésus aba tere ti lo na sese si lo yeke su mbeti na sese na li ti maboko ti lo. 7 So ala ngba ti hunda Jésus, lo mu li ti lo na nduzu si lo tene na ala: “Na popo ti ala, zo so asara siokpari oko pepe, ayeke nzoni lo mu têne, lo bo na wali ni kozoni!” 8 Na pekoni, Jésus akiri aba tere ti lo na sese si lo yeke su mbeti na sese. 9 So azo ni ama tënë so, ala londo oko na oko ti gue; azo so ahon kozoni ayeke ambakoro. Jésus angba gi lo oko, wali ni angba ti luti na dawa ti lo. 10 Tongaso Jésus amu li ti lo na nduzu si lo hunda wali ni, lo tene: “Azo ni ayeke na ndo wa? Mbeni zo oko afâ ngbanga na li ti mo pepe?” 11 Wali ni akiri tënë na lo: “Kota Gbia, zo oko pepe!” Jésus atene na lo: “Mbi nga, mbi yeke fâ ngbanga na li ti mo pepe. Mo gue, me mo kiri mo sara siokpari pepe.” 12 Jésus akiri atene na gba ti azo ni, atene: “Mbi yeke lumiere ti dunia so. Zo so amu peko ti mbi, fade lo yeke tambula na ya ti vukongo ndo pepe, me lo yeke wara lumiere so ayeke mu fini na zo.” 13 Afarizien atene na lo: “So mo wani mo yeke tene tënë na ndö ti mo so, fade tënë ti mo ni ayeke taa-tënë pepe!” 14 Jésus akiri tënë na ala: “Ataa mbi tene tënë na ndö ti mbi wani, tënë ti mbi ayeke taa-tënë, ngbanga ti so mbi hinga ndo so mbi londo daa nga na ndo so mbi yeke gue daa. Ti ala afarizien, ala hinga ndo so mbi londo daa pepe wala ndo so mbi yeke gue daa pepe. 15 Ala yeke fâ ngbanga gi tongana ti azo; me ti mbi, mbi yeke fâ ngbanga na li ti zo oko pepe. 16 Tongana mbi fâ ngbanga, fango ngbanga ti mbi ayeke na legeni, ndali ti so mbi oko laa mbi yeke fâ ngbanga ni pepe, Babâ ti mbi so atokua mbi ayeke na mbi. 17 Ndia ti ala wani atene: ‘Tongana azo use afa peko ti mbeni tënë si yanga ti ala ague oko, tënë ti ala ayeke taa-tënë.’ 18 Mbi yeke tene tënë na ndö ti mbi wani, Babâ ti mbi so atokua mbi ayeke tene nga tënë na ndö ti mbi.” 19 Ala hunda lo, atene: “Babâ ti mo ni ayeke na ndo wa?” Jésus akiri tënë, atene: “Ala hinga mbi wala Babâ ti mbi pepe. Tongana ala hinga fade mbi, ka ala hinga nga Babâ ti mbi.” 20 Jésus atene atënë so na ndembe so lo yeke fa ye na ya ti kota da ti Nzapa, na ndo so a zia sanduku ti nginza daa. Zo oko agbu lo pepe, ngbanga ti so ngbonga ti lo ade ti lingbi pepe. 21 Jésus akiri atene na ala, atene: “Mbi yeke gue; fade ala yeke gi mbi, me ala yeke kui na ya ti siokpari ti ala. Ala lingbi ti gue na ndo so mbi yeke gue daa pepe.” 22 Azuife atene na popo ti ala, atene: “Lo ye ti fâ tere ti lo laa si lo tene: ‘Ala lingbi ti gue na ndo so mbi yeke gue daa pepe’ so?” 23 Jésus akiri tënë na ala, atene: “Ala yeke azo ti sese so, me mbi, mbi yeke zo ti yayu. Ala yeke azo ti dunia so, me mbi, mbi yeke zo ti dunia so pepe. 24 Ndani laa mbi tene na ala, mbi tene, ala yeke kui ande na ya ti siokpari ti ala. Biani, tongana ala ma na be pepe so ‘Mbi Yeke’, fade ala yeke kui na ya ti siokpari ti ala.” 25 Ala hunda lo, atene: “Mo yeke zo wa?” Jésus akiri tënë na ala, atene: “Gi tënë ni laa mbi tene na ala, ngbene ye na tongo nda ni awe so. 26 Mbi yeke na tënë mingi ti tene na tere ti ala, mbi yeke nga na ngbanga ti fâ na li ti ala. Me lo so atokua mbi, lo yeke tene taa-tënë; gi tënë so mbi ma na yanga ti lo laa mbi yeke tene na azo ti dunia.” 27 Jésus ayeke tene tënë ti Babâ, me ala hinga ti ala pepe. 28 Jésus atene na ala: “Tongana ala kanga ande Molenge ti Zo na nduzu, fade ala yeke hinga so ‘Mbi Yeke’; fade ala yeke hinga so mbi yeke sara ye gi na li ti mbi pepe, me mbi yeke tene gi tënë so Babâ afa na mbi. 29 Lo so atokua mbi, lo yeke na mbi. Lo zia mbi gi mbi oko pepe, ngbanga ti so mbi yeke sara lakue ye so anzere na be ti lo.” 30 Azo mingi ama na be na lo ngbanga ti tënë so lo tene. 31 Jésus atene na azuife so ama na be na lo, atene: “Tongana ala bata tënë ti mbi, andaa ala yeke adisiple ti mbi biani. 32 Fade ala yeke hinga taa-tënë si taa-tënë ayeke zi ala na gbe ti ngbaa.” 33 Ala kiri tënë na lo, atene: “Kotara ti e ayeke Abraham, laoko e sara ngbaa na gbe ti mbeni zo pepe. Tongana nyen laa mo tene e yeke sigigi na gbe ti ngbaa so?” 34 Jésus atene na ala: “Biani, mbi tene na ala taa-tënë: zo so asara siokpari aga ngbaa ti siokpari awe. 35 Ngbaa ayeke duti na ya ti da lakue lakue pepe. Taa molenge ti ya ti da laa ayeke duti lakue lakue na ya ti da ni. 36 Tongana Molenge ni azi ala na gbe ti ngbaa, fade ala yeke sigigi na gbe ti ngbaa biani. 37 Mbi hinga so Abraham ayeke kotara ti ala. Me ala yeke gi lege ti fâ mbi, ngbanga ti so tënë ti mbi awara ndo na be ti ala pepe. 38 Mbi yeke tene ti mbi gi tënë ti ye so mbi baa na Babâ ti mbi; ala yeke sara ti ala gi ye so ala ma na yanga ti babâ ti ala.” 39 Ala tene na lo: “Babâ ti e ayeke Abraham.” Jésus akiri tënë na ala, atene: “Tongana ala yeke fade amolenge ti Abraham, ka ala sara aye so lo sara. 40 Ataa so mbi yeke tene na ala taa-tënë so mbi ma na yanga ti Nzapa, ala yeke gi lege fadeso ti fâ mbi. Abraham asara mara ti ye tongaso laoko pepe! 41 Me ti ala, ala yeke sara ye tongana babâ ti ala.” Ala kiri tënë na lo, atene: “Nzapa oko laa ayeke Babâ ti e. E yeke amolenge so a du e na gigi pepe.” 42 Jésus atene na ala: “Tongana Nzapa ayeke fade Babâ ti ala, ka ala ye mbi, ngbanga ti so mbi londo na lo laa mbi ga. Mbi ga gi ti li ti mbi pepe, me lo laa lo tokua mbi. 43 Ala ma ya ti tënë ti mbi pepe, ngbanga ti nyen? Ngbanga ti so ala lingbi ti ma tënë ti mbi pepe. 44 Babâ ti ala ayeke Zabolo, ala ye ti sara gi ye so be ti lo aye; kua ti lo ngbene ye na tongo nda ni laa. Lo gi lege laoko ti tene taa-tënë pepe, ngbanga ti so taa-tënë ayeke na ya ti fini ti lo pepe. Mvene ayeke ye ti tere ti lo, ngbanga ti so lo yeke zo ti mvene si lo yeke babâ ti mvene. 45 Ti mbi, mbi yeke tene taa-tënë, ndani laa ala ma na be na mbi pepe. 46 Zo wa na popo ti ala alingbi ti fa siokpari so mbi sara? Tongana tënë ti mbi ayeke taa-tënë, ngbanga ti nyen si ala ma na be na mbi pepe? 47 Zo so ayeke ti Nzapa ayeke ma atënë ti Nzapa. Ti ala, ala ma tënë ti mbi pepe, ngbanga ti so ala yeke azo ti Nzapa pepe.” 48 Azuife akiri tënë na Jésus, atene: “Tënë so e tene so ayeke taa-tënë: ‘Mo yeke zo ti Samarii si sioni yingo ayeke na ya ti mo!’ ” 49 Jésus akiri tënë na ala: “Mbi yeke na sioni yingo oko pepe; mbi yeke ne Babâ ti mbi, me ti ala, ala yeke ne mbi pepe. 50 Mbi yeke gi titene azo agonda mbi pepe, me mbeni zo ayeke daa so ayeke sara titene mbi wara gonda, lo laa lo yeke wafango-ngbanga. 51 Biani, mbi tene na ala taa-tënë: zo so asara ye alingbi na atënë ti mbi, fade lo yeke kui laoko pepe.” 52 Azuife akiri tënë na lo, atene: “Fadeso e hinga biani so, mo yeke na sioni yingo na ya ti mo! Abraham akui, awayanga-Nzapa nga akui, me ti mo, mo tene: ‘Zo so asara ye alingbi na atënë ti mo, fade lo yeke kui laoko pepe.’ 53 Mo ye ti tene mo yeke kota, mo hon Abraham, babâ ti e so akui so? Awayanga-Nzapa nga akui. Mo baa tere ti mo, mo tene, mo yeke zo wa?” 54 Jésus akiri tënë na ala, atene: “Tongana mbi gonda tere ti mbi wani, gondango tere ti mbi ni ayeke mbeni ye pepe. Zo ti gondango mbi ayeke Babâ ti mbi, lo so ala tene: ‘Lo yeke Nzapa ti e’ so; 55 me ala hinga lo oko pepe. Mbi laa mbi hinga lo. Tongana mbi tene fade mbi tene: ‘Mbi hinga lo pepe’, ka mbi yeke zo ti mvene tongana ala. Me mbi hinga lo si mbi yeke sara ye alingbi na tënë ti lo. 56 Abraham, babâ ti ala, awara ngia ando mingi, ngbanga ti so lo ku ti baa lango ti gango ti mbi. Lo baa ni si be ti lo asi na ngia.” 57 Na ndö ti tënë so, azuife atene na lo: “Mo so mo de ti wara ngu baleoku pepe so, mo tene mo baa Abraham?” 58 Jésus akiri tënë na ala, atene: “Biani, mbi tene na ala taa-tënë: kozo si a du Abraham, ‘Mbi Yeke.’ ” 59 Ala mu têne ti bo na Jésus, me lo honde tere ti lo si lo sigigi na ya ti kota da ti Nzapa ni, lo hon.

9

1 So Jésus ayeke hon na lege, lo baa mbeni zo so a du lo waziba. 2 Adisiple ti lo ahunda lo, atene: “Wafango-ye, zo wa laa asara siokpari si a du koli so waziba so? Lo, wala babâ na mama ti lo?” 3 Jésus akiri tënë na ala: “Ye so asara si lo ga waziba so ayeke siokpari ti lo wala siokpari ti babâ na mama ti lo pepe. Ye so asi na lo titene azo abaa ye so Nzapa ayeke sara na ya ti fini ti lo. 4 Na ndembe so lâ angba ti su, ayeke nzoni e sara kua ti lo so lo tokua mbi. Ndo aga nduru ti vuko awe, fade zo alingbi ti sara kua mbeni pepe. 5 Na ndembe so mbi yeke na dunia so, mbi yeke lumiere ti dunia ni.” 6 Na peko ti tënë so, Jésus atuku ngu ti yanga ti lo na sese, lo sara potopoto na ni, lo zia potopoto ni na le ti waziba ni 7 si lo tene na lo: “Gue mo sukula le ti mo na du ti ngu ti Siloe.” Nda ti iri ti Siloe atene “Zo ti tokua”. Tongaso koli ni ague, lo sukula le ti lo si na kiringo ti lo, lo baa ndo nzoni. 8 Azo ti tere ti da ti lo na ambeni zo so ayeke baa lo lakue na iringo ye, atene: “Koli so ayeke duti lakue ti iri ye so laa pepe?” 9 Ambeni atene: “Een, lo laa.” Me ambeni atene: “Ên-en, lo laa pepe. Zo ni akpa lo kpango.” Koli ni wani atene na ala: “Mbi laa!” 10 Ala hunda lo, atene: “Asara tongana nyen laa mo yeke baa ndo fadeso?” 11 Koli ni akiri tënë na ala: “Koli so iri ti lo Jésus so, lo laa lo sara potopoto ti sese, lo zia na le ti mbi si lo tene: ‘Gue na du ti ngu ti Siloe, mo sukula le ti mo.’ Mbi gue si gi na peko ti so mbi sukula le ti mbi awe, mbi baa ndo!” 12 Ala hunda lo, atene: “Koli ni ayeke na ndo wa?” Lo kiri tënë na ala, lo tene: “Mbi hinga pepe.” 13 Ala mu waziba so, ala gue na lo na afarizien. 14 Andaa Jésus asara potopoto si lo zi na le ti koli so na lango ti wungo tere. 15 Tongaso afarizien nga ahunda koli ni na ye so asara si lo yeke baa ndo so. Koli ni atene na ala: “Lo zia potopoto na le ti mbi, mbi sukula le ti mbi ni si fadeso mbi yeke baa ndo.” 16 Ambeni farizien ni atene: “Zo so asara ye so alondo na Nzapa pepe, ngbanga ti so lo bata ndia ti lango ti wungo tere pepe.” Ambeni atene ti ala: “Zo ti siokpari alingbi ti sara mara ti aye ti kpene tongaso pepe!” Kangbi ati na popo ti ala. 17 Afarizien akiri ahunda koli ni, atene: “Mo tene, lo laa lo zi le ti mo si mo baa ndo. Me ti be ti mo, lo yeke zo wa?” Koli ni akiri tënë, atene: “Lo yeke mbeni wayanga-Nzapa.” 18 Azuife ake ti yeda na tënë so atene, koli so ayeke lani waziba si fadeso lo yeke baa ndo. Ndani laa ala iri babâ na mama ti lo 19 ti hunda ala kozoni si. Ala hunda babâ na mama ni, atene: “So molenge ti ala laa? Ala tene a du lo waziba? Me asara tongana nyen si fadeso lo yeke baa ndo?” 20 Babâ na mama ti lo atene: “E hinga so lo yeke molenge ti e si a du lo waziba. 21 Me e hinga ye so asara si lo yeke baa ndo fadeso pepe; e hinga nga zo so azi le ti lo pepe. Ala hunda lo, lo ga koli awe, fade lo wani lo yeke kiri tënë daa na ala.” 22 Babâ na mama ti lo atene tënë so, ngbanga ti so mbeto ti azuife asara ala. Andaa azuife ni atene, zo so kue ayeda atene, Jésus ayeke Mesii, ala yeke tumba lo na ya ti da ti sambelango Nzapa ti ala. 23 Ndani laa, babâ na mama ti koli so atene: “Ala hunda lo, lo ga koli awe!” 24 Afarizien akiri airi waziba ni si ala tene na lo: “Mo gonda gi Nzapa! E hinga so koli so azi le ti mo ayeke zo ti siokpari.” 25 Koli ni akiri tënë, atene: “Ataa lo yeke zo ti siokpari oo, ataa lo yeke zo ti siokpari pepe oo, mbi hinga gi ye oko: mbi yeke lani waziba, me fadeso mbi yeke baa ndo.” 26 Ala kiri ahunda lo, atene: “Me nyen laa lo sara na mo? Lo zi le ti mo ni tongana nyen?” 27 Lo kiri tënë na ala, lo tene: “Mbi tene na ala kozoni awe, me ala ye ti ma pepe. Ngbanga ti nyen laa ala ye ti ma ti fani use so? Ala nga, ala ye ti ga adisiple ti lo?” 28 Ala zonga lo si ala tene na lo: “Mo laa mo yeke disiple ti koli so, me e yeke ti e adisiple ti Moïse! 29 E hinga so Nzapa atene tënë na Moïse, me ti koli so, e hinga ndo so lo londo daa si lo ga pepe.” 30 Koli ni akiri tënë, atene: “Ae, ala ma mbeni ye ti kpene! Ala hinga ndo so lo londo daa si lo ga pepe? Ka so lo zi le ti mbi so. 31 E hinga so, Nzapa ayeke ma azo ti siokpari pepe, me lo yeke ma gi azo so ama yanga ti lo si ala yeke sara ye so be ti lo aye. 32 Na ndö ti dunia so, lawa laa e ma tënë ti mbeni zo so a du lo waziba si mbeni zo azi le ti lo? 33 Tongana koli so alondo fade na Nzapa pepe, ka lo lingbi ti sara ye oko pepe.” 34 Ala kiri tënë, atene: “Mo, a du mo si mo kono gi na ya ti siokpari, mo ye ti fa ye na e?” Na pekoni, ala tumba lo na ya ti da ti sambela ni. 35 Jésus ama atene, ala tumba koli so awe; lo gue lo wara lo si lo hunda lo, lo tene: “Mo ma na be na Molenge ti Zo?” 36 Koli ni atene: “Kota Gbia, Molenge ti Zo ni ayeke zo wa si mbi lingbi ti ma na be na lo?” 37 Jésus atene na lo: “Mo baa lo awe, lo laa lo yeke tene tënë na mo fadeso.” 38 Koli ni atene: “Kota Gbia, mbi ma na be.” Lo kuku na gbe ti Jésus. 39 Jésus atene: “Mbi ga na dunia so ti fâ ngbanga: tongaso si awaziba abaa ndo si azo so ayeke baa ndo, akiri aga awaziba.” 40 Ambeni farizien so ayeke kâ ama tënë so Jésus atene so si ala hunda lo, atene: “E nga, e yeke awaziba?” 41 Jésus akiri tënë na ala: “Tongana ala yeke fade awaziba, ka siokpari ayeke na li ti ala pepe. Me so ala yeke tene: ‘Le ti ala ayeke baa ndo’, andaa siokpari angba na li ti ala.”

10

1 Jésus atene: “Biani, mbi tene na ala taa-tënë: zo so ali na ya ti gbagba ti ataba na yanga ti gbagba ni pepe, me lo li na mbeni lege nde, andaa lo yeke zo ti nzi si lo yeke sioni zo. 2 Zo so ali na taa yanga ti gbagba ni ayeke wabatango-taba. 3 Wabatango yanga ti gbagba ni azi yanga ni na lo, ataba ni ama go ti lo. Lo iri ataba ti lo na iri ti ala oko oko si lo sigigi na ala. 4 Tongana lo sigigi na ala kue awe, lo hon na li ni si ala mu peko ti lo, ngbanga ti so ala hinga go ti lo. 5 Ala yeke mu peko ti mbeni zo nde laoko pepe. Tongana ayeke mbeni zo nde, ala yeke kpe lo, ngbanga ti so ala hinga go ti zo ni pepe.” 6 Jésus atene na ala toli so, me ala ma ya ni pepe. 7 Jésus akiri atene: “Biani, mbi tene na ala taa-tënë: mbi laa mbi yeke yanga ti gbagba ti ataba ni. 8 Azo so kue aga kozo ti mbi ayeke azo ti nzi na asioni zo; me ataba ni ama yanga ti ala pepe. 9 Mbi yeke yanga ti gbagba ni. Zo so ali na lege ti mbi, fade lo yeke soo kuâ; lo yeke li, lo yeke sigigi si lo yeke wara kobe ti tengo ni. 10 Zo ti nzi aga ti lo gi ti nzi ye, ti fâ ye, ti buba ye. Ti mbi, mbi ga ti sara si azo aduti na fini si ala duti na fini so awu ahon ndoni. 11 Mbi yeke nzoni wabatango-taba. Nzoni wabatango-taba ayeke ka fini ti lo ndali ti ataba ti lo. 12 Me ti zo so ayeke taa wabatango-taba pepe si lo yeke sara gi kua ndali ti nginza, ataba ni ayeke ti lo pepe. Tongana lo baa mbo ti ngonda na gango ni, lo zia ataba ni, lo kpe. Tongaso mbo ti ngonda agbu ataba ni si lo tumba ala kirikiri. 13 Zo so ayeke sara kua gi ndali ti nginza ayeke bata ataba ni nzoni pepe. 14 Mbi yeke nzoni wabatango-taba. Mbi hinga ataba ti mbi si ala nga, ala hinga mbi, 15 tongana ti so Babâ ahinga mbi si mbi hinga Babâ. Mbi yeke ka fini ti mbi ndali ti ataba ti mbi. 16 Ambeni taba ti mbi ayeke na ya ti gbagba ti ataba so pepe. Alingbi mbi fa na ala lege; fade ala yeke ma go ti mbi si ala kue aga bongbi oko ti ataba na wabatango-taba oko. 17 Babâ ti mbi aye mbi, ngbanga ti so mbi yeke ka fini ti mbi si mbi yeke kiri ti wara ni. 18 Mbeni zo laa ayeke zi fini ti mbi pepe, me mbi wani laa mbi yeda ti ka ni. Mbi yeke na ngangu ti ka ni, mbi yeke nga na ngangu ti kiri ti wara ni. Babâ ti mbi amu yanga na mbi ti sara tongaso.” 19 Na ndö ti tënë so, popo ti azuife akiri akangbi. 20 Ambeni zo mingi na popo ti ala atene: “Sioni yingo ayeke na ya ti lo! Li ti lo aga kirikiri awe! Ala yeke ma lo ngbanga ti nyen?” 21 Ambeni atene ti ala: “Zo so sioni yingo ayeke na ya ti lo ayeke tene amara ti tënë tongaso pepe! Sioni yingo alingbi ti zi le ti waziba?” 22 Ngoi ti de asi awe. Na Jérusalem, azo ayeke sara matanga ti ziango kota da ti Nzapa nde 23 Na ya ti kota da ti Nzapa, Jésus ayeke tambula, lo si kâ, lo si ge na gbe ti veranda so a iri ni Veranda ti Salomon. 24 Azuife abongbi na tere ti lo, ala hunda lo, atene: “Mo ye e ku mo ngbii asi lawa si mo tene na e taa-tënë so? Tongana mo yeke Mesii ni, tene na e polele ma!” 25 Jésus akiri tënë na ala, atene: “Mbi tene na ala awe, me ala yeda na ni pepe. Aye so mbi yeke sara na iri ti Babâ ti mbi ayeke tene tënë na ndö ti mbi. 26 Me ala ma na be pepe, ngbanga ti so ala yeke na popo ti ataba ti mbi pepe. 27 Ataba ti mbi ahinga go ti mbi; mbi hinga ala si ala yeke mu peko ti mbi. 28 Mbi yeke mu na ala fini so angba lakue lakue; ala yeke kui ande laoko pepe, zo oko alingbi ti gboto ala na maboko ti mbi pepe. 29 Babâ ti mbi so amu ala na mbi, lo yeke kota ahon ye kue; zo oko ayeke na ngangu ti gboto ala na maboko ti Babâ pepe. 30 Mbi na Babâ, e yeke oko.” 31 Tongaso azuife akiri amu têne ti bo na Jésus. 32 Lo hunda ala, lo tene: “Na dawa ti ala, mbi sara anzoni ye mingi so alondo na Babâ. Ti so wa laa ala ye ti bo mbi na têne ngbanga ni so?” 33 Azuife akiri tënë, atene: “E ye ti bo mo ngbanga ti mbeni nzoni ye ni pepe, me ngbanga ti so mo zonga Nzapa: mo yeke gi zo senge, me mo ye ti sara tere ti mo Nzapa!” 34 Jésus akiri tënë na ala, atene: “Na ya ti mbeti ti Ndia ti ala, Nzapa atene: ‘Ala yeke anzapa.’ 35 E hinga so, tënë so Mbeti ti Nzapa atene, zo alingbi ti mingo ni pepe. Andaa azo so Nzapa atene tënë ti ala ge so ayeke azo senge, me mbeti ti Ndia airi ala anzapa. 36 Me ti mbi, Babâ ti mbi azia mbi nde si lo tokua mbi na ndö ti dunia so. Ngbanga ti nyen laa ala tene: ‘Mo yeke zonga Nzapa!’ Ngbanga ti so mbi tene: ‘Mbi yeke Molenge ti Nzapa’ so? 37 Tongana mbi sara pepe aye so Babâ ti mbi amu na mbi ti sara, ayeke nzoni ala yeda na tënë ti mbi pepe! 38 Me tongana mbi yeke sara ni, ataa ala yeda na tënë ti mbi pepe, ayeke nzoni ala yeda na aye so mbi yeke sara si ala hinga so mbi na Babâ, e ga oko.” 39 Ala kiri agi lege ti gbu Jésus, me lo kpe na maboko ti ala, lo hon. 40 Jésus akiri ague na mbage ti ngu ti Jourdain, na ndo so Jean abatize azo kozoni daa si lo duti kâ. 41 Azo mingi aga na tere ti lo; ala tene na lo: “Jean asara aye ti kpene oko pepe, me atënë so kue Jean atene na ndö ti koli so ayeke taa-tënë.” 42 Kâ, azo mingi ama na be na Jésus.

11

1 Mbeni koli so iri ti lo Lazare ayeke na kobela. Lo yeke lango na kete kodro ti Betanii, kodro ti Marie na ti ita ti lo Marthe. 2 – Marie ayeke wali so atuku lani yombo na ndö ti gere ti Kota Gbia Jésus si lo mbo ni na kua ti li ti lo. Ita ti lo Lazare laa ayeke na kobela so. – 3 A-ita ti Lazare ti wali atokua na Jésus, atene: “Kota Gbia, zo so mo ye lo mingi so, tere ti lo ayeke so.” 4 So Jésus ama tënë ni, lo tene: “Kobela ti Lazare so ayeke fâ lo pepe; me ayeke sara si azo agonda Nzapa. Na lege ti kobela so si azo ayeke gonda ande Molenge ti Nzapa.” 5 Jésus aye Marthe na ita ti lo ti wali nga na Lazare. 6 So Jésus ama tënë ti kobela ti Lazare, lo kiri lo ngba lango use na ndo so lo yeke daa. 7 Na pekoni, lo tene na adisiple: “E kiri na sese ti Judée.” 8 Adisiple akiri tënë na lo, atene: “Wafango-ye, na ya ti alango so ahon, azuife so kâ agi lege ti bo mo na têne. Mo ye ti kiri kâ?” 9 Jésus atene na ala: “Ti londo na ndaperere ngbii asi na lakui, lâ ayeke su na ya ti ngbonga baleoko na use pepe? Zo so ayeke tambula na kota lâ, lo yeke pika gere ti lo pepe, ngbanga ti so lo yeke baa ndo polele. 10 Me tongana zo atambula na bi, lo yeke pika gere ti lo, ngbanga ti so ndo avuko na le ti lo.” 11 Na peko ti tënë so, Jésus atene na ala: “Lazare so e na lo e ye tere, alango awe; me mbi yeke gue ti zingo lo.” 12 Adisiple akiri tënë, atene: “Kota Gbia, tongana lo lango, fade kobela ti lo ayeke kai senge.” 13 Andaa Jésus ayeke tene tënë ti kuâ ti Lazare, me adisiple abaa ti ala atene, lo yeke tene tënë ti senge lango so zo ayeke lango. 14 Tongaso Jésus atene na ala polele, atene: “Lazare akui awe. 15 Mbi yeke na ngia ndali ti ala, ngbanga ti so mbi yeke fade kâ pepe, tongaso si ala lingbi ti ma na be na mbi. Me e gue na tere ti lo.” 16 Thomas, so mbeni iri ti lo ayeke Ngbo, atene na amba ti lo adisiple, atene: “E nga, e na Jésus e gue si e na lo kue e kui!” 17 Na singo ti Jésus, lo ma atene, Lazare asara lango osio na du ti kuâ awe. 18 Betanii ayeke nduru na Jérusalem, ayo nduru na kilometere ota. 19 Nilaa azuife mingi aga ti baa Marthe na Marie ti zi vundu na be ti ala na peko ti kuâ ti ita ti ala. 20 So Marthe ama atene, Jésus ayeke ga, lo gue na lege ti lo. Marie angba ti duti na da. 21 Marthe atene na Jésus: “Kota Gbia, tongana mo yeke fade na ndo so, ka ita ti mbi akui pepe! 22 Me mbi hinga so Nzapa ayeke mu na mo ye so kue mo yeke hunda na lo.” 23 Jésus atene na lo: “Fade ita ti mo ayeke zingo na kuâ.” 24 Marthe akiri tënë, atene: “Mbi hinga so, lo yeke zingo na kuâ na lango ti ndani.” 25 Jésus atene na lo: “Mbi yeke zingongo ti akuâ, mbi yeke fini. Zo so ama na be na mbi, ataa lo kui, fade lo yeke duti na fini. 26 Zo so kue ayeke na fini si lo ma na be na mbi, lo yeke kui laoko pepe. Mo ma na be na tënë so?” 27 Marthe akiri tënë, atene: “Biani, Kota Gbia! Mbi ma na be so mo yeke Mesii, Molenge ti Nzapa so aga na dunia so.” 28 So Marthe atene tënë so na Jésus awe, lo kiri, lo iri ita ti lo Marie si lo tene na ya ti mê ti lo, lo tene: “Wafango-ye ayeke na ndo so, lo iri mo.” 29 Gi so Marie ama tënë so, lo londo hio si lo gue ti wara Jésus na lege. 30 Andaa Jésus ade ti li na ya ti kodro ni pepe, me lo ngba gi na ndo so Marthe awara fade lo daa. 31 Azuife ayeke na tere ti Marie na da, ala yeke gi ti zi vundu na be ti lo. So ala baa lo na sigingo ni na loro, ala londo si ala mu peko ti lo. Ala baa ti ala atene, lo yeke gue na du ti kuâ ti toto. 32 Marie ague asi na ndo so Jésus ayeke daa. So Marie abaa Jésus, lo ti na gbe ti lo si lo tene na lo: “Kota Gbia, tongana mo yeke fade na ndo so, ka ita ti mbi akui pepe!” 33 So Jésus abaa Marie na azuife so ague na peko ti lo kue na toto, vundu agbu lo si be ti lo ayeke na siriri pepe. 34 Lo hunda ala, lo tene: “Ala lu lo na ndo wa?” Ala tene na lo: “Kota Gbia, ga mo baa.” 35 Jésus atoto. 36 Azuife ni atene: “Ala baa yengo so lo ye na Lazare!” 37 Me ambeni atene ti ala: “Lo so lo zi le ti waziba so, lo lingbi fade pepe ti kanga lege na Lazare ti kui?” 38 Vundu akiri agbu be ti Jésus si lo gue na du ti kuâ ni. Du ti kuâ ni ayeke na ya ti mbeni kota du ti têne si a kanga yanga ni na mbeni kota têne. 39 Lo mu yanga na ala, lo tene: “Ala zi têne ni!” Marthe, ita ti kuâ ni, atene: “Kota Gbia, kuâ ti lo ni ato nda ti fun awe. Lo sara lango osio awe.” 40 Jésus akiri tënë na lo, atene: “Mbi tene fade na mo mbi tene: ‘Tongana mo ma na be, fade mo yeke baa gonda ti Nzapa!’ ” 41 Tongaso ala zi têne ni. Jésus ayo le ti lo na nduzu si lo tene: “Babâ, mbi mu singila na mo, ngbanga ti so mo ma mbi awe. 42 Mbi hinga so, mo yeke ma mbi lakue, me mbi yeke tene tënë so titene azo so ayeke na tere ti mbi ge so alingbi ti ma na be so mo laa mo tokua mbi.” 43 Na peko ti tënë so, Jésus adekongo, lo tene: “Lazare, sigigi!” 44 Tongaso Lazare asigigi, maboko ti lo na gere ti lo angba na kangango ni na ya ti abongo so a lu lo na ni; bongo so a kanga na le ti angba na le ti lo. Jésus atene na azo ni: “Ala zi abongo ni na tere ti lo, ala zia lo, lo gue.” 45 Azuife mingi so aga ti baa Marie, so ala baa ye so Jésus asara, ambeni mingi ama na be na lo. 46 Me ambeni ague abaa afarizien si ala fa na ala peko ti ye so Jésus asara. 47 Tongaso afarizien na akota wayango-sandaga airi Kota Bongbi ti Fango Ngbanga, ala tene: “Fade e yeke sara nyen? Koli so ayeke sara aye ti kpene mingi! 48 Tongana e ngba ti baa lo bango na aye so lo yeke sara so, fade azo kue ayeke ma na be na lo si akota zo ti Rome ayeke ga ti buba kota da ti Nzapa ti e nga na mara ti e!” 49 Mbeni oko na popo ti ala so iri ti lo Kaife, ayeke kota wayango-sandaga na ngu ni so; lo tene: “Li ti ala ayeke daa pepe! 50 Ala gbu li ti ala si! Ayeke nzoni zo oko akui ndali ti azo ni si a buba mara ni kue pepe.” 51 Andaa tënë so lo tene so alondo na lo wani pepe; me ndali ti so lo yeke kota wayango-sandaga na ngu ni so, lo tene gi peko ti tënë ti yanga ti Nzapa ti fa so Jésus ayeke kui ngbanga ti mara ti azuife. 52 Lo yeke kui gi ngbanga ti mara so oko pepe, me lo yeke kui nga ti bongbi amolenge ti Nzapa so ayeke na ndo nde nde si ala ga tere oko. 53 Ti londo na lango ni so, amakonzi ti azuife aleke tënë ti fâ Jésus. 54 Tongaso Jésus ake ti hon na le ti azuife polele. Lo gboto tere ti lo si lo gue na mbage ti benyama, na mbeni gbata so iri ni Efraim, lo na adisiple ti lo aduti kâ. 55 Andaa matanga ti azuife so ayeke Pake aga nduru awe. Azo mingi alondo na akete kodro, ague na Jérusalem ti sukula sioni ti ala kozoni si ala sara matanga ni. 56 Ala yeke gi Jésus. So ala yeke na ya ti kota da ti Nzapa, ala tene na popo ti ala: “Ala baa ti ala tongana nyen? Lo yeke ga ande na matanga ni oko pepe!” 57 Akota wayango-sandaga na afarizien amu yanga, atene: “Tongana mbeni zo ahinga ndo so Jésus ayeke daa, lo tene tënë ni si a lingbi ti gbu lo.”

12

1 So angba lango omene titene matanga ti Pake asi, Jésus ague na Betanii, kodro ti Lazare, koli so lo zingo lo na kuâ so. 2 A leke kobe ndali ti Jésus kâ; Marthe laa asara kua ti kobe ni. Lazare ayeke na popo ti azo so aduti ti te kobe na Jésus. 3 Na pekoni, Marie amu ngbenda ti yombo so a sara ni na ngu ti mbeni kete keke so iri ni nare ti nzoni ni, so ngere ni ayeke ngangu mingi. Lo tuku yombo ni na ndö ti gere ti Jésus si lo mbo ni na kua ti li ti lo. Fion ti yombo ni amu ya ti da ni kue. 4 Judas Iskariote, mbeni disiple oko ti Jésus so ayeke ka ande lo, atene: 5 “Ngbanga ti nyen laa a ka yombo so na ale ti nginza ngbangbo ota si amu nginza ni na azo ti mawa pepe?” 6 Lo tene tënë so, ngbanga ti so tënë ti azo ti mawa agbu be ti lo pepe, me ngbanga ti so lo yeke zo ti nzi: lo yeke bata bozo ti nginza si lo yeke nzi nginza so azo ayeke bi na ya ni. 7 Me Jésus atene: “Zia wali so kpoo! Lo sara ye so ti ku na lango so a yeke lu ande kuâ ti mbi. 8 Azo ti mawa ayeke duti lakue na popo ti ala; me mbi, mbi yeke duti lakue na popo ti ala pepe.” 9 Gba ti azuife ama atene, Jésus ayeke na Betanii. Tongaso ala gue kâ, gi ndali ti Jésus pepe, me ti baa nga Lazare, lo so Jésus azingo lo na kuâ so. 10 Akota wayango-sandaga aleke tënë na popo ti ala ti fâ nga Lazare, 11 ngbanga ti so ndali ti lo, azuife mingi azia akota wayango-sandaga si ala ma na be na Jésus. 12 Lango oko na pekoni, gba ti azo so aga na matanga ti Pake ama atene, Jésus ayeke ga na Jérusalem. 13 Tongaso ala mu amaboko ti akeke ti mburu si ala gue ti wara lo na lege. Ala dekongo, atene: “E gonda Nzapa! Ayeke nzoni Nzapa asara tufa na ndö ti lo so aga na iri ti Kota Gbia; lo yeke gbia ti Israel!” 14 Jésus awara mbeni kete lele si lo ko na ndö ni, tongana ti so Mbeti ti Nzapa atene: 15 “Mbeto asara mo pepe, gbata ti Sion! Baa, gbia ti mo ayeke ga, lo duti na ndö ti mbeni molenge ti lele.” 16 Adisiple ti lo ama ya ti tënë so hio pepe. Me na ndembe so Jésus ali na ya ti gonda ti lo awe, ala dabe ti ala na tënë so Mbeti ti Nzapa atene na ndö ti lo: ye ni kue laa azo asara na lo so. 17 Gba ti azo so ayeke lani na tere ti Jésus na ndembe so lo iri Lazare ti sigigi na du ti kuâ si lo zingo lo na kuâ so, ala fa tënë ti ye so ala baa. 18 Azo ama tënë ti ye ti kpene so Jésus asara, ndani laa gba ti azo aga ti wara lo na lege. 19 Tongaso afarizien atene na popo ti ala: “Ala baa awe? Ye ni akara ala awe: azo ti dunia kue ague gi na peko ti lo!” 20 Ambeni greke ayeke na popo ti azo so ague ti voro Nzapa na matanga so ayeke na Jérusalem. 21 Ala ga nduru na Philippe, zo ti Betsaida, na sese ti Galile; ala tene na lo: “Kota zo, e ye ti baa Jésus.” 22 Philippe ague atene tënë ni na André; ala na lo ague si ala tene tënë ni na Jésus. 23 Jésus akiri tënë na ala, atene: “Ngbonga titene a gonda Molenge ti Zo alingbi awe. 24 Biani, mbi tene na ala taa-tënë: tongana le ti ble ati na sese si akui pepe, lo yeke ngba gi lo oko. Me tongana akui, fade ayeke du ambeni le ni mingi. 25 Zo so aye ti bata fini ti lo ndali ti lo wani, fade lo yeke girisa ni; me zo so ake fini ti lo na ndö ti dunia so, fade lo yeke bata ni ndali ti fini so angba lakue lakue. 26 Zo so aye ti sara kua na mbi, alingbi lo mu peko ti mbi si ndo so mbi yeke daa, lo nga lo yeke daa. Fade Babâ ti mbi ayeke ne zo so ayeke sara kua na mbi.” 27 “Fadeso be ti mbi ayeke na siriri pepe. Fade mbi yeke tene nyen? Wala mbi tene: ‘Babâ, zi mbi na ya ti ngoi ti pasi so ayeke ga!’ Me ayeke ngbanga ti ngoi ti pasi so laa mbi ga. 28 Babâ, gonda iri ti mo!” Mbeni go alondo na yayu, atene: “Mbi gonda ni awe si mbi yeke kiri ti gonda ni.” 29 Gba ti azo so ayeke kâ ama go ni si ambeni atene ti ala atene, so bekpa laa asungba so! Ambeni atene ti ala: “Mbeni ange laa atene tënë na lo!” 30 Jésus atene na ala: “Go so atoto ndali ti mbi pepe, me ndali ti ala. 31 Fadeso, ngbonga ti fango ngbanga na li ti azo ti dunia so alingbi awe; fade a yeke bi gbia ti dunia so na gigi. 32 Ti mbi, tongana a mu mbi na sese, a kanga mbi na nduzu, fade mbi yeke sara si azo kue aga na tere ti mbi.” 33 Jésus atene tënë so ti fa mara ti kuâ so lo yeke kui ande na ni. 34 Gba ti azo ni akiri tënë na lo, atene: “Na ya ti mbeti ti Ndia ti e, e ma atene, fade Mesii ayeke ngba kpu na kpu. Tongana nyen laa mo tene, a yeke mu Molenge ti Zo ti kanga lo na nduzu so? Molenge ti Zo ni ayeke zo wa?” 35 Jésus atene na ala: “Lumiere ade na popo ti ala ndali ti kete ngoi. Ayeke nzoni ala tambula na ndembe so lumiere ni ayeke na tere ti ala, tongaso si vukongo ndo awara ala pepe, ngbanga ti so zo so atambula na ya ti vukongo ndo ahinga ndo so lo yeke gue daa pepe. 36 Na ngoi so lo so lo yeke lumiere ayeke na tere ti ala, ayeke nzoni ala ma na be na lo si ala ga azo so ayeke duti na ya ti lumiere.” Na peko ti tënë so Jésus ahon, lo honde tere ti lo si ala baa lo pepe. 37 Ataa aye ti kpene so kue Jésus asara na le ti azo ni, ala ma na be na lo pepe. 38 Tongaso, tënë so Ésaïe, wayanga-Nzapa atene aga taa-tënë, lo tene: “Kota Gbia, zo wa laa ayeda na tënë so e tene? Kota Gbia afa ngangu ti lo na zo wa?” 39 Azo ni alingbi ti ma na be na lo pepe. Andaa Ésaïe afa nda ni, atene: 40 “Nzapa asara si le ti ala akanga, lo sara si ala hinga ndo pepe. Tongaso si ala baa ndo pepe, ala hinga ndo pepe si ala zia ngbene lege ti sarango ye ti ala pepe. Tongaso si mbi kai kobela ti ala pepe.” 41 Ésaïe atene ando tënë so, ngbanga ti so lo baa gonda ti Jésus si lo tene tënë ti lo. 42 Andaa na popo ti amakonzi ti azuife, ambeni mingi ama na be na Jésus, me ala lingbi ti fa ni na le ti azo pepe, ngbanga ti afarizien. Ala sara mbeto titene a tumba ala na ya ti ada ti sambelango Nzapa. 43 Biani, ala ye titene azo agonda ala ahon titene Nzapa laa agonda ala. 44 Jésus atene na kota go, atene: “Zo so ama na be na mbi, lo ma na be gi na mbi pepe, me lo ma na be nga na lo so atokua mbi. 45 Zo so abaa mbi, lo baa nga lo so atokua mbi. 46 Mbi so mbi yeke lumiere, mbi ga na ndö ti dunia so. Tongaso, zo so ama na be na mbi, lo yeke ngba na ya ti vukongo ndo pepe. 47 Tongana mbeni zo ama atënë ti mbi si lo sara ye alingbi na ni pepe, mbi laa mbi yeke fâ ngbanga na li ti lo pepe. Biani, mbi ga ti fâ ngbanga na li ti azo ti dunia so pepe, me mbi ga ti soo azo ti dunia so na kuâ. 48 Zo so ake mbi si lo ke nga atënë ti mbi, mbeni ye ti fango ngbanga na li ti lo ayeke daa: atënë so mbi tene laa ayeke fâ ngbanga na li ti lo na lango ti ndani. 49 Mbi tene tënë so alondo na mbi wani pepe, me Babâ so atokua mbi laa amu yanga na mbi na ndö ti tënë so alingbi mbi tene nga na ye so alingbi mbi fa. 50 Mbi hinga so, tënë ti yanga ti lo ayeke mu na zo fini so angba lakue lakue. Tënë so mbi yeke tene, mbi tene tongana ti so Babâ atene na mbi.”

13

1 Angba lango oko titene matanga ti Pake asi. Jésus ahinga so ngbonga ti lo ti zia dunia so ti kiri na Babâ alingbi awe. Azo ti lo so ayeke na dunia so, lo ye ala lakue, lo ye ala ngbii asi na ndani. 2 So ala yeke te kobe ti lakui, Zabolo azia na be ti Judas, molenge ti Iskariote ti ka Jésus. 3 Jésus ahinga so Babâ azia aye kue na maboko ti lo. Lo hinga nga so lo londo na Nzapa, lo ga si lo yeke kiri ande na Nzapa. 4 Tongaso, lo londo na tere ti kobe ni, lo zi bongo ti lo ti ndö ni si lo mu mbeni bongo, lo kanga na ya ti lo. 5 Na pekoni, lo tuku ngu na ya ti mbeni kota sembe, lo to nda ti sukula gere ti adisiple ti lo si lo mbo ni na bongo so lo kanga na ya ti lo so. 6 Lo si na Simon Pierre, me Simon Pierre atene na lo: “Kota Gbia, mo ye ti sukula gere ti mbi?” 7 Jésus akiri tënë na lo, atene: “Mo lingbi ti hinga fadeso nda ti ye so mbi yeke sara so pepe, me mo yeke hinga nda ni na peko.” 8 Pierre atene na lo: “Mo ye ti sukula gere ti mbi? Oko pepe! ’Jésus atene na lo: “Tongana mbi sukula gere ti mo pepe, mbeni ye so mo lingbi ti ku na mbage ti mbi ayeke daa pepe.” 9 Simon Pierre atene na lo: “Tongaso, Kota Gbia, mo sukula gi gere ti mbi pepe, me mo sukula gere ti mbi, maboko ti mbi na li ti mbi kue!” 10 Jésus atene na lo: “Zo so asukula tere ti lo awe, lo lingbi ti kiri ti sukula tere ti lo pepe, me gi gere ti lo. Biani, tere ti lo avuru awe. Ti ala, tere ti ala avuru awe, me ala kue pepe.” 11 Jésus ahinga zo so ayeke ka ande lo, ndani laa lo tene: “Ala kue laa tere ti ala avuru pepe.” 12 So Jésus ahunzi sukulango gere ti ala awe, lo kiri lo yu bongo ti lo; lo kiri na tere ti kobe ni. Lo hunda ala, lo tene: “Ala hinga nda ti ye so mbi sara na ala so? 13 Ala yeke iri mbi ‘Wafango-ye’ wala ‘Kota Gbia’, so lege ni laa, ngbanga ti so mbi yeke Wafango-ye si mbi yeke nga Kota Gbia biani. 14 Mbi so mbi yeke Wafango-ye si mbi yeke nga Kota Gbia, mbi sukula gere ti ala, alingbi ala nga, ala sukula gere ti ala na popo ti ala. 15 Mbi sara so ti fa na ala tapande titene ala nga, ala sara ye so mbi sara na ala. 16 Biani, mbi tene na ala taa-tënë: zo ti kua ayeke kota ahon makonzi ti lo pepe; zo ti tokua ayeke kota ahon zo so atokua lo pepe. 17 Fadeso ala hinga ye ni awe. Ti ala nzoni tongana ala sara ye alingbi na ni! 18 Mbi yeke tene tënë so ndali ti ala kue pepe; mbi hinga azo so mbi soro ala. Mbeti ti Nzapa atene: ‘Zo so mbi na lo e yeke te kobe, lo laa lo yo gere ti lo ti do mbi.’ Alingbi tënë so aga taa-tënë. 19 Mbi tene tënë so na ala kozoni si ye ni asi. Tongana ye ni asi ande, ala yeke hinga so ‘Mbi Yeke’. 20 Biani, mbi tene na ala taa-tënë: zo so ayamba mbeni zo so mbi tokua lo, andaa mbi wani laa lo yamba mbi; zo so ayamba mbi, andaa lo yamba lo so atokua mbi.” 21 Na peko ti tënë so, be ti Jésus ayeke na siriri pepe si lo tene polele, lo tene: “Biani, mbi tene na ala taa-tënë: fade mbeni zo oko na popo ti ala ayeke ka mbi.” 22 Adisiple ti lo abaa le ti tere si ala hunda tere ti hinga zo wa laa Jésus ayeke tene tënë ti lo so. 23 Mbeni disiple oko, lo so Jésus aye lo mingi, ayeke duti nduru na tere ti Jésus. 24 Simon Pierre asara maboko na lo si atene na lo: “Hunda lo: zo wa laa lo yeke tene tënë ti lo so?” 25 Disiple ni aba tere ti lo na mbage ti Jésus si lo hunda lo, atene: “Kota Gbia, ayeke zo wa?” 26 Jésus akiri tënë na lo, atene: “Mbi yeke yoro nduru mapa na ya ti ngu ti kasa ti mu na mbeni zo: zo ni laa.” Na pekoni, lo mu mapa, lo yoro na ya ti ngu ti kasa ni si lo mu na Judas, molenge ti Iskariote. 27 So Judas amu mapa ni, Satan ali na ya ti lo. Jésus atene na lo: “Ye so mo ye ti sara, sara ni hio!” 28 Zo oko na popo ti ala so ayeke te kobe ahinga nda ti tënë so Jésus atene na lo so pepe. 29 Judas laa ayeke bata bozo ti nginza. Nilaa ambeni disiple atene na be ti ala, Jésus aye ti tene: “Gue mo vo kobe ti matanga ni”, wala “Gue mo mu mbeni ye na azo ti mawa.” 30 Gi so Judas amu mapa ni awe, lo sigigi hio. Andaa ndo avuko awe. 31 So Judas asigigi awe, Jésus atene: “Fadeso, Molenge ti Zo awara gonda ti lo awe; Nzapa nga awara gonda ti lo na lege ti Molenge ni awe. 32 So Nzapa awara gonda na lege ti lo, fade Nzapa wani laa ayeke fa na le ti azo gonda ti Molenge ti lo; lo ga nduru ti sara ni awe. 33 Amolenge ti mbi, fade mbi yeke ngba na tere ti ala gi na ya ti mbeni kete ngoi. Fade ala yeke gi mbi, me tënë so mbi tene na amakonzi ti azuife lani so, fadeso mbi yeke tene na ala: ‘Ala lingbi ti gue pepe na ndo so mbi yeke gue daa.’ 34 Mbi yeke mu na ala fini ndia: ala ye tere na popo ti ala! Alingbi ala ye tere na popo ti ala tongana ti so mbi ye ala. 35 Tongana ala ye tere na popo ti ala, tongaso fade azo kue ahinga atene ala yeke adisiple ti mbi.” 36 Simon Pierre ahunda lo, atene: “Kota Gbia, mo yeke gue na ndo wa?” Jésus akiri tënë na lo, atene: “Mo lingbi ti mu peko ti mbi na ndo so mbi yeke gue daa fadeso pepe, me mbeni lâ, fade mo yeke mu peko ti mbi.” 37 Pierre atene na lo: “Kota Gbia, ngbanga ti nyen laa mbi lingbi ti mu peko ti mo fadeso pepe? Mbi yeke nduru ti ka fini ti mbi ndali ti mo!” 38 Jésus akiri tënë, atene: “Mo yeke nduru biani ti ka fini ti mo ndali ti mbi? Biani, mbi tene na mo taa-tënë: kozo titene koli-kondo atoto, mo yeke bere tënë ti mbi fani ota.”

14

1 Jésus atene na ala: “Ala gi be ti ala pepe; ala ma na be na Nzapa, ala ma na be na mbi nga. 2 Ndo ti duti ayeke mingi na ya ti da ti Babâ ti mbi. Ndani laa, mbi tene na ala kozoni, mbi tene: ‘Mbi yeke gue ti leke ndo na ala.’ Tongana ye ni ayeke tongaso pepe, ka mbi tene na ala kozoni pepe. 3 Tongana mbi gue, mbi leke ndo na ala awe, fade mbi yeke kiri ti mu ala na tere ti mbi si ala nga, ala duti na ndo so mbi yeke duti daa. 4 Ndo so mbi yeke gue daa so, ala hinga lege ni awe.” 5 Thomas atene na lo: “Kota Gbia, e hinga ndo so mo yeke gue daa pepe. Fade e yeke hinga lege ni tongana nyen?” 6 Jésus akiri tënë na lo: “Mbi yeke lege ni, taa-tënë na fini. Zo oko alingbi ti gue na Babâ na mbeni lege nde pepe, gi na lege ti mbi. 7 Tongana ala hinga mbi, fade ala yeke hinga nga Babâ ti mbi. Fadeso ala hinga lo awe si ala baa nga lo awe.” 8 Philippe atene na lo: “Kota Gbia, fa na e Babâ, awe.” 9 Jésus akiri tënë, atene: “Aninga mingi so mbi yeke na popo ti ala. Philippe, ade mo hinga mbi pepe? Zo so abaa mbi, andaa lo baa Babâ awe. Ngbanga ti nyen laa mo kiri mo hunda mbi, mo tene: ‘Fa na e Babâ’ so? 10 Mbi na Babâ, e yeke oko, mo ma na be na ni pepe? Atënë so mbi yeke tene na ala so alondo na mbi pepe, me Babâ so e na lo e yeke oko laa ayeke sara aye ti lo wani. 11 Ala ma na be so mbi na Babâ e yeke oko. Tongana ala ma na be na mbi pepe, ala ma na be ndali ti aye so mbi sara. 12 Biani, mbi tene na ala taa-tënë: zo so ama na be na mbi, lo nga, fade lo yeke sara aye so mbi sara; lo yeke sara akota ye ahon so, ngbanga ti so mbi yeke gue na Babâ. 13 Ye so kue ala yeke hunda na iri ti mbi, fade mbi sara ye ni si azo agonda Babâ na lege ti Molenge ni. 14 Tongana ala hunda mbeni ye na iri ti mbi, fade mbi yeke sara ni.” 15 “Tongana ala ye mbi, fade ala yeke sara ye alingbi na andia ti mbi. 16 Fade mbi yeke hunda na Babâ ti tokua mbeni Wagbungo-koko na ala titene lo ngba na ala lakue lakue: 17 lo yeke Yingo ti taa-tënë. Azo ti dunia so alingbi ti yamba lo pepe, ngbanga ti so ala baa lo pepe si ala hinga nga lo pepe. Me ti ala, ala hinga lo awe, ngbanga ti so lo yeke na ya ti ala si lo yeke na tere ti ala. 18 Fade mbi yeke zia ala anyindu pepe; mbi yeke kiri na tere ti ala. 19 Ngoi angba gi kete si azo ti dunia so ayeke kiri ti baa mbi pepe. Me ti ala, fade ala yeke baa mbi, ngbanga ti so mbi yeke na fini si ala nga, ala yeke duti na fini. 20 Na lango ni so, fade ala yeke hinga atene, mbi na Babâ e yeke oko, mbi na ala nga, e yeke oko. 21 “Zo so ahinga andia ti mbi si lo sara ye alingbi na ni, lo laa lo ye mbi. Babâ ti mbi ayeke ye lo; mbi nga, mbi yeke ye lo si mbi yeke sara titene lo hinga mbi.” 22 Judas, so ayeke nde na Judas Iskariote, atene na lo: “Kota Gbia, mo ye ti sara titene e laa e hinga mo si azo ti dunia ahinga mo pepe, ngbanga ti nyen?” 23 Jésus akiri tënë na lo, atene: “Zo so aye mbi, fade lo yeke sara ye so mbi tene na lo. Babâ ti mbi ayeke ye lo si mbi na Babâ, e yeke ga ti duti na lo. 24 Zo so aye mbi pepe, lo yeke sara ye alingbi na atënë ti mbi pepe. Tënë so mbi tene na ala so alondo na mbi wani pepe, me alondo na Babâ so atokua mbi. 25 Mbi tene na ala tënë so na ndembe so mbi ngba na popo ti ala. 26 Wagbungo-koko ayeke Yingo-Vuru so Babâ ayeke tokua lo na iri ti mbi. Lo laa lo yeke fa ande na ala nda ti aye kue, lo yeke dabe ti ala na tënë so kue mbi tene na ala. 27 “Mbi zia na ala siriri; siriri ti mbi wani laa mbi yeke mu na ala. Mbi yeke mu ni na ala tongana ti so azo ti dunia ayeke mu ni pepe. Ala gi be ti ala pepe; mbeto asara ala pepe. 28 Ala ma fade tënë so mbi tene: ‘Mbi yeke gue, me mbi yeke kiri na tere ti ala.’ Tongana ala ye fade mbi, ka ala duti na ngia ndali ti so mbi yeke gue na Babâ. Biani, Babâ ayeke kota ahon mbi. 29 Mbi tene na ala aye so kozoni si aye ni asi, tongaso, tongana aye ni asi, ala ma na be. 30 Ti fadeso, mbi yeke kiri ti tene tënë na ala mingi pepe, ndali ti so gbia ti dunia so ayeke ga. Lo yeke na ngangu na ndö ti mbi pepe, 31 me lo yeke ga titene azo ti dunia ahinga so mbi ye Babâ si ala hinga nga so mbi yeke sara ye kue na peko ti yanga ti Babâ. Ala londo na ndo so, e hon!”

15

1 “Mbi yeke taa keke ti vinye si Babâ ti mbi ayeke wa ti yaka ni. 2 Maboko ti keke so kue ayeke na ndö ti mbi si ale pepe, Babâ ayeke fâ ni azi; maboko ti keke so ale, lo yeke zi aguruma ni titene akiri ale mingi. 3 Tënë so mbi tene na ala asara si ala ga nzoni awe. 4 Ala duti oko na mbi si mbi nga, mbi duti oko na ala. Maboko ti keke ayeke le ka gi lo oko pepe, lo yeke le gi tongana lo duti na tere ti keke ni. Nilaa ala nga, tongana ala duti oko na mbi pepe, ala lingbi ti le pepe. 5 Mbi yeke keke ti vinye, ala yeke amaboko ni. Zo so aduti oko na mbi si mbi duti oko na lo, fade lo yeke le mingi. Tongana ala duti nde na mbi, ala lingbi ti sara ye oko pepe. 6 Zo so aduti oko na mbi pepe, fade a yeke bi lo na gigi tongana ti so a yeke bi maboko ti keke si ahole. A yeke bongbi amaboko ti keke ni, a tuku na le ti wâ si agbi. 7 Tongana ala duti oko na mbi si atënë ti mbi aduti na be ti ala, ala hunda ye so be ti ala aye, fade ala yeke wara ni. 8 Fade Babâ ti mbi ayeke wara gonda na lege so: tongana ala le mingi, so afa atene, ala yeke adisiple ti mbi. 9 Tongana ti so Babâ aye mbi, mbi nga, mbi ye ala. Ala ngba na ya ti ndoye ti mbi. 10 Tongana ala sara ye alingbi na andia ti mbi, fade ala yeke ngba na ya ti ndoye ti mbi, tongana ti so mbi sara ye alingbi na andia ti Babâ si mbi ngba na ya ti ndoye ti lo. 11 “Mbi tene tënë so na ala titene ngia ti mbi angba na be ti ala si ngia ti ala alingbi kue. 12 Ndia ti mbi ayeke so: ala ye tere na popo ti ala, tongana ti so mbi ye ala. 13 Tongana mbeni zo aka fini ti lo ndali ti azo so lo ye ala, mbeni ndoye ti hon so ayeke daa pepe. 14 Tongana ala sara ye alingbi na yanga so mbi mu na ala, ala yeke amba ti mbi so mbi na ala e ye tere. 15 Mbi yeke kiri ti iri ala azo ti kua pepe, ngbanga ti so zo ti kua ahinga ye so makonzi ti lo ayeke sara pepe. Me mbi iri ala amba ti mbi so mbi na ala e ye tere, ngbanga ti so mbi fa na ala aye so kue mbi ma na yanga ti Babâ. 16 Ala laa asoro mbi pepe, me mbi laa mbi soro ala; mbi zia ala titene ala gue ti le mingi si lengo ti ala angba lakue. Tongaso, fade Babâ ayeke mu na ala ye so kue ala hunda na lo na iri ti mbi. 17 Ye so mbi mu yanga na ala ti sarango ni ayeke titene ala ye tere na popo ti ala.” 18 “Tongana azo ti dunia so ake ala, ayeke nzoni ala hinga so azo ni ake mbi kozoni. 19 Tongana ala yeke fade azo ti dunia so, ka dunia ni aye ala ndali ti so ala yeke ti lo. Me mbi soro ala na popo ti azo ti dunia si ala yeke azo ti dunia mbeni pepe. Ndani laa dunia ni ake ala. 20 Ala dabe ti ala na tënë so mbi tene na ala: ‘Zo ti kua ayeke kota ahon makonzi ti lo pepe.’ Fade azo ayeke sara ngangu na ala tongana ti so azo ni asara ngangu na mbi. Tongana azo ni asara fade ye alingbi na tënë ti mbi, ka ala sara nga ye alingbi na tënë ti ala. 21 Me fade azo ayeke sara ye so kue na ala ndali ti iri ti mbi, ngbanga ti so azo ni ahinga lo so atokua mbi pepe. 22 Tongana mbi ga fade pepe si mbi tene tënë na azo ni pepe, ka siokpari ayeke na li ti ala pepe. Me fadeso, ala yeke na mbeni tënë ti kiri na ni pepe ndali ti siokpari ti ala. 23 Zo so ake mbi, lo ke nga Babâ ti mbi. 24 Aye so zo asara laoko pepe, mbi sara ni na popo ti azo ti dunia. Tongana mbi sara ni fade pepe, ka siokpari ayeke na li ti ala pepe. Fadeso, ala baa aye so kue mbi sara, me ala ngba ti ke mbi nga na Babâ ti mbi. 25 Me aye so asi titene tënë ti Ndia ti ala aga taa-tënë; Ndia ni atene: ‘Ala ke mbi gi senge senge.’ 26 “Mbi yeke tokua ande na ala Wagbungo-koko: lo yeke Yingo ti taa-tënë so alondo na Babâ si aga. Tongana lo ga, lo laa lo yeke tene tënë na ala na ndö ti mbi. 27 Ala nga, fade ala yeke tene tënë so ala hinga na ndö ti mbi, ngbanga ti so ala yeke na mbi ngbene ye na tongo nda ni.”

16

1 “Mbi tene tënë so na ala titene mabe ti ala ati pepe. 2 Fade azo ayeke tumba ala na ya ti ada ti sambelango Nzapa. Na ndö ni, ngbonga ni ayeke ga so fade ambeni zo ayeke fâ ala si azo ni ayeke tene na be ti ala atene, kua ti Nzapa laa ala yeke sara so. 3 Azo ni ayeke sara ye so na ala, ngbanga ti so azo ni ahinga Babâ wala mbi pepe. 4 Me mbi tene tënë so na ala titene, tongana ngbonga ni alingbi awe, ala dabe ti ala na tënë so mbi tene na ala.” “Mbi tene tënë so na ala kozoni pepe, ngbanga ti so mbi yeke na tere ti ala. 5 Me fadeso, mbi yeke kiri na tere ti lo so lo tokua mbi, me zo oko na popo ti ala ahunda mbi pepe, atene: ‘Mo yeke gue na ndo wa?’ 6 Me vundu agbu be ti ala ngbanga ti tënë so mbi tene na ala so. 7 Andaa mbi tene na ala taa-tënë: ayeke nzoni titene mbi gue. Biani, tongana mbi gue pepe, Wagbungo-koko ayeke ga ande na tere ti ala pepe. Tongana mbi gue, fade mbi yeke tokua lo na ala. 8 Tongana lo ga, fade lo yeke fa na azo ti dunia so atene, ala yeke handa tere ti ala na ndö ti tënë ti siokpari, na ndö ti tënë ti ye ti mbirimbiri nga na ndö ti tënë ti fango ngbanga ti Nzapa. 9 Azo ti dunia ayeke handa tere ti ala na ndö ti tënë ti siokpari, ndali ti so azo ni ama na be na mbi pepe. 10 Azo ni ayeke handa tere ti ala na ndö ti tënë ti ye ti mbirimbiri, ndali ti so mbi yeke gue na Babâ si ala, azo ti mbi, ala yeke kiri ti baa mbi pepe. 11 Azo ni ayeke handa tere ti ala na ndö ti tënë ti fango ngbanga ti Nzapa, ndali ti so a fâ ngbanga na li ti gbia ti dunia so awe. 12 “Mbi yeke na tënë mingi ti tene na ala, me ti fadeso ala lingbi ti kanga be ti ala daa pepe. 13 Tongana Yingo ti taa-tënë aga ande, lo yeke fa na ala taa-tënë kue. Lo yeke fa gi tënë ti be ti lo pepe, me lo yeke fa na ala ye so lo yeke ma; lo yeke fa nga na ala tënë ti aye so ayeke si. 14 Fade lo yeke gonda mbi, ngbanga ti so lo yeke mu tënë ti mbi ti tene na ala. 15 Ye so kue Babâ ayeke na ni, ayeke ti mbi. Ndani laa mbi tene: ‘Fade Yingo ayeke wara ye so ayeke ti mbi si lo yeke tene na ala.’ ” 16 “Ngoi angba gi kete titene ala kiri abaa mbi pepe si kete na pekoni, ala yeke kiri ti baa mbi.” 17 Ambeni disiple ti Jésus ahunda tere ti ala, atene: “Nda ti tënë so lo tene so ayeke nyen, so lo tene: ‘Ngoi angba gi kete titene ala kiri abaa mbi pepe si kete na pekoni, ala yeke kiri ti baa mbi’? Lo tene nga, lo tene: ‘Mbi yeke gue na Babâ.’ 18 So lo tene: ‘Ngoi angba gi kete’, nda ni ayeke nyen? E hinga nda ti tënë so pepe.” 19 Jésus ahinga atene, ala ye ti hunda lo na tënë; nilaa lo tene na ala: “Mbi tene fade, mbi tene: ‘Ngoi angba gi kete titene ala kiri abaa mbi pepe si kete na pekoni, ala yeke kiri ti baa mbi.’ Tënë so ala yeke hunda tere na popo ti ala na ndö ni laa? 20 Biani, mbi tene na ala taa-tënë: fade ala yeke toto, ala yeke dema tere, me azo ti dunia ayeke duti ti ala na ngia. Ala, adisiple ti mbi ayeke na vundu, me vundu ti ala ayeke kiri ti ga ngia. 21 Tongana ngbonga ti dungo ti wali aga nduru, lo yeke na vundu, ngbanga ti so lango ti pasi ti lo asi awe. Me tongana lo du molenge ni awe, lo girisa pasi ti lo; be ti lo ayeke na ngia, ngbanga ti so lo du molenge na sese awe. 22 Ye so ayeke si na ala fadeso ayeke tongaso: fade ala yeke na vundu, me na pekoni, mbi yeke kiri ti ga ti baa ala si be ti ala akiri asi na ngia. Mara ti ngia so, zo oko alingbi ti zi ni na be ti ala pepe. 23 Na lango ni so, ala yeke hunda ande mbi na mbeni ye pepe. Biani, mbi tene na ala taa-tënë: ye so kue ala hunda na iri ti mbi, fade Babâ ayeke mu ni na ala. 24 Ala de ti hunda mbeni ye na iri ti mbi pepe. Ayeke nzoni ala hunda ye, fade ala wara ni si ngia ti ala alingbi kue.” 25 “Mbi tene na ala atënë so na lege ti atoli. Ngbonga ni ayeke ga ande so mbi yeke kiri ti tene tënë na ala na lege ti toli pepe, me mbi yeke tene tënë na ala na ndo ti Babâ polele. 26 Na lango ni so, fade ala yeke hunda ye na lo na iri ti mbi; mbi tene na ala pepe, mbi tene, mbi laa mbi yeke hunda ye na Babâ ndali ti ala, 27 ngbanga ti so Babâ wani aye ala. Lo ye ala, ngbanga ti so ala ye mbi si ala ma na be so mbi londo na Nzapa si mbi ga. 28 Mbi londo na Babâ si mbi ga na dunia. Fadeso, mbi yeke zia dunia ti kiri na Babâ.” 29 Na pekoni, adisiple ti lo atene na lo: “Fadeso, mo yeke tene tënë polele, mo kiri mo tene tënë na lege ti atoli pepe. 30 Ti fadeso, e hinga e tene, mo hinga ye kue, mo lingbi titene zo akiri ahunda mo na mbeni tënë pepe. Ndani laa e ma na be so, mo londo na Nzapa si mo ga.” 31 Jésus akiri tënë na ala, atene: “Ala ma na be fadeso awe? 32 Baa, ngbonga ayeke ga si ngbonga ni alingbi awe so ala kue ayeke kangbi kirikiri, zo oko oko ayeke hon ti zia gi mbi oko. Me mbi yeke gi mbi oko pepe, ngbanga ti so Babâ ayeke na mbi. 33 Mbi tene tënë so na ala titene ala duti na siriri na lege ti gango so ala ga oko na mbi. Na dunia so, fade ala yeke baa pasi, me ala gbu ngangu! Mbi hon dunia so na ngangu awe!”

17

1 Na peko ti tënë so, Jésus ayo le ti lo na nduzu si lo tene: “Babâ, ngbonga ni alingbi awe. Gonda Molenge ti mo si Molenge ti mo agonda mo. 2 Mo mu na lo ngangu ti sara komandema na ndö ti azo kue. Tongaso si lo mu fini so angba lakue lakue na azo so kue mo mu ala na lo. 3 Fini so angba lakue lakue ayeke titene azo ahinga mo, mo so mo yeke oko taa Nzapa si ala hinga nga Jésus Christ, lo so mo tokua lo. 4 Mbi gonda mo na ndö ti sese so awe, mbi hunzi kua so mo mu na mbi ti sara awe. 5 Fadeso, Babâ, sara si mbi duti na gonda na ndo so mo yeke daa, gonda so mbi yeke na ni na tere ti mo kozoni si dunia so abaa gigi. 6 Azo so mo zi ala na dunia si mo mu ala na mbi, mbi sara si ala hinga mo. Ala yeke ti mo, mo mu ala na mbi si ala sara ye alingbi na tënë ti mo. 7 Ala hinga fadeso atene, ye so kue mo mu na mbi alondo na mo. 8 Biani, mbi mu na ala atënë so mo mu na mbi si ala yamba ni. Tongaso ala hinga biani atene, mbi londo na mo si mbi ga, ala ma nga na be so mo laa mo tokua mbi. 9 “Mbi sambela ndali ti ala. Mbi sambela ndali ti azo ti dunia so pepe, me ndali ti ala so mo mu ala na mbi. Biani, ala yeke ti mo. 10 Ye ti mbi kue ayeke ti mo si ye ti mo kue ayeke ti mbi, nilaa azo ayeke baa gonda ti mbi na lege ti ala. 11 Mbi yeke na dunia so mbeni pepe, me ala yeke ti ala na dunia so. Mbi yeke gue ti mbi na tere ti mo. Babâ, mo so mo yeke nde si mo yeke nzoni kue, bata ala na lege ti ngangu ti iri ti mo so mo mu na mbi, tongaso si ala ga oko, tongana ti so mbi na mo e yeke oko. 12 So mbi yeke lani na tere ti ala, mbi bata ala na lege ti ngangu ti iri ti mo so mo mu na mbi. Mbi bata ala si zo oko na popo ti ala agirisa pepe, gi lo so a yeke buba ande lo biani biani so. Tongaso si tënë ti Mbeti ti Nzapa aga taa-tënë. 13 Fadeso mbi yeke kiri na tere ti mo. Mbi tene tënë so na ndembe so mbi de na dunia, tongaso si ngia ti mbi aduti na be ti ala, ngia so asi singo. 14 Mbi mu na ala tënë ti mo si azo ti dunia so ake ala, ndali ti so ala yeke azo ti dunia so pepe, tongana ti so mbi nga, mbi yeke zo ti dunia so pepe. 15 Mbi hunda na mo pepe ti zi ala na dunia so, me ti bata ala si Sioni wato asara sioni na ala pepe. 16 Ala yeke azo ti dunia so pepe, tongana ti so mbi nga, mbi yeke zo ti dunia so pepe. 17 Bata ala nde ndali ti mo na lege ti taa-tënë; tënë ti mo ayeke taa-tënë. 18 Mbi tokua ala na ndö ti dunia, tongana ti so mo tokua mbi na ndö ti dunia. 19 Ndali ti nzoni ti ala, mbi bata tere ti mbi nde ndali ti mo titene ala nga, ala bata tere ti ala nde ndali ti mo na lege ti taa-tënë. 20 “Mbi sambela gi ndali ti ala oko pepe, me mbi sambela nga ndali ti azo so ayeke ma na be ande na mbi na lege ti fango tënë ti ala. 21 Mbi sambela titene ala kue aga gi oko! Babâ, ayeke nzoni ala ga oko na e, tongana ti so mbi na mo, e yeke oko. Ayeke nzoni ala ga oko si fade azo ti dunia ahinga atene, mo laa mo tokua mbi. 22 Mbi sara si ala wara gonda tongana ti so mo sara si mbi wara gonda, tongaso si ala ga oko, tongana ti so mbi na mo e yeke oko. 23 Mbi ga oko na ala, tongana ti so mbi na mo, e yeke oko si ala ga oko biani, tongaso si azo ti dunia ahinga atene, mo laa mo tokua mbi, tongaso si ala hinga nga atene, mo ye ala tongana ti so mo ye mbi. 24 Babâ, mo laa mo mu ala na mbi. Mbi ye titene ala duti na mbi na ndo so mbi yeke daa si ala baa gonda so mo gonda na mbi, ngbanga ti so mo ye mbi kozo si dunia abaa gigi. 25 Babâ so mo yeke mbirimbiri, azo ti dunia so ahinga mo pepe, me mbi hinga mo. Adisiple ti mbi ahinga atene, mo laa mo tokua mbi. 26 Mbi sara si ala hinga mo, mbi ngba ti sara titene ala hinga mo, tongaso si yengo so mo ye na mbi angba na popo ti ala si mbi na ala, e yeke oko.”

18

1 Na peko ti sambela so, Jésus na adisiple ti lo ague na mbage ti ngu ti Sedron. Mbeni ndo so a lu akeke daa ayeke kâ si Jésus na adisiple ti lo ague kâ. 2 Judas, zo ti kango Jésus ahinga ndo ni, ngbanga ti so Jésus na adisiple ti lo abongbi kâ lege mingi. 3 Judas amu li ti mbeni bongbi ti aturugu na awabatango kota da ti Nzapa si ala gue na ndo ni so; akota wayango-sandaga na afarizien laa atokua ala. Ala mu aye ti bira na alamba na wâ ti pere. 4 Jésus ahinga fade ye so kue ayeke si ande na lo. Nilaa lo gue nduru na ala si lo hunda ala, lo tene: “Ala yeke gi zo wa?” 5 Ala kiri tënë na lo, atene: “E yeke gi Jésus, zo ti Nazaret.” Lo kiri tënë, lo tene: “Mbi laa.” Andaa Judas, zo ti kango Jésus ayeke na popo ti azo ni. 6 So Jésus atene na ala, atene: “Mbi laa”, ala kiri na peko si ala ti na sese. 7 Jésus akiri ahunda ala, atene: “Ala yeke gi zo wa?” Ala tene na lo: “E yeke gi Jésus, zo ti Nazaret.” 8 Jésus atene na ala: “Mbi tene fade na ala, mbi tene: ‘Mbi laa.’ Tongana mbi laa ala yeke gi mbi, ala zia tanga ti azo ni ague!” 9 Ye ni asi si tënë so Jésus atene lani alingbi ti ga taa-tënë, lo tene: “Babâ, azo so mo mu ala na mbi, mbi girisa mbeni oko pepe”. 10 Andaa yongoro zeme ayeke na maboko ti Simon Pierre. Lo gboto ni, lo de na zo ti kua ti kota wayango-sandaga si lo fâ mê ti lo ti mbage ti koli. Iri ti zo ti kua ni ayeke Malkus. 11 Me Jésus atene na Pierre: “Kiri na yongoro zeme ti mo na ya ti bozo ni. Kopo ti pasi so Babâ amu na mbi so, mo baa ti mo, mo tene, mbi yeke nyon ni ande pepe?” 12 Tongaso, bongbi ti aturugu ni na makonzi ti ala nga na awabatango kota da ti Nzapa ti azuife agbu Jésus, akanga lo. 13 Ala gue na lo kozoni na Hane, babâ ti wali ti Kaife so ayeke kota wayango-sandaga na ngu ni so. 14 Andaa Kaife laa amu lani wango na amakonzi ti azuife, atene: “Ayeke nzoni zo oko akui ndali ti azo ni.” 15 Simon Pierre na mbeni disiple amu peko ti Jésus. Kota wayango-sandaga ahinga disiple ni so nzoni, nilaa disiple ni ali na peko ti Jésus na ya ti gbagba ti kota wayango-sandaga ni. 16 Me Pierre angba ti lo na gigi nduru na yanga ti gbagba ni. Mbeni disiple ni, lo so kota wayango-sandaga ahinga lo so, asigigi, lo tene tënë na wali so ayeke bata yanga ti gbagba ni si lo zia lege na Pierre ti li. 17 Wali so ayeke bata yanga ti gbagba ni atene na Pierre: “Mo nga, mo yeke mbeni disiple ti koli so-aa!” Pierre abere, atene: “Ên-en! Mbi yeke disiple ti lo pepe.” 18 Andaa de ayeke sara, nilaa azo ti kua na aturugu asara wâ si ala yeke duti na tere ni ti tumba de na tere ti ala. Pierre nga ague, aluti na popo ti ala titene tere ti lo amu wâ. 19 Kota wayango-sandaga ahunda Jésus na tënë na ndö ti adisiple ti lo nga na ndö ti ye so lo yeke fa. 20 Jésus akiri tënë, atene: “Mbi yeke fa ye na azo kue polele; lakue mbi yeke fa ye na ya ti ada ti sambelango Nzapa nga na ya ti kota da ti Nzapa, na ndo so azuife kue ayeke bongbi daa. Mbi tene mbeni tënë na hondengo ni pepe. 21 Ngbanga ti nyen laa mo kiri mo hunda mbi na tënë? Mo hunda azo so ama tënë ti mbi: atënë so mbi tene na ala, ala hinga ni nzoni.” 22 So Jésus atene tënë so, mbeni turugu so ayeke kâ apika ngbangba ti lo si atene na lo: “Lege ti kiringo tënë na kota wayango-sandaga laa?” 23 Jésus akiri tënë na lo, atene: “Tongana mbi tene mbeni sioni tënë, mo fa ni; me tongana mbi tene tënë nzoni, ngbanga ti nyen laa mo pika mbi?” 24 Andaa Jésus angba na ya ti kamba si Hane atokua lo na kota wayango-sandaga Kaife. 25 Na ndembe so Simon Pierre angba ti luti kâ titene tere ti lo amu wâ, mbeni zo ahunda lo, atene: “Mo nga, mo yeke mbeni disiple ti koli so pepe?” Pierre abere, atene: “Ên-en, mbi yeke disiple ti lo pepe.” 26 Mbeni zo ti kua ti kota wayango-sandaga so lo yeke zo ti sewa ti koli so Pierre afâ mê ti lo, ahunda Pierre, atene: “Mbi baa mo na lo na ndo so a lu akeke daa so; so mvene?” 27 Pierre akiri abere. Gi hio tongaso, koli-kondo atoto. 28 Na ndaperere, ala mu Jésus na ndo ti Kaife, ague na lo na da ti govoronere. Amakonzi ti azuife ali na da ni pepe, ngbanga ti so ala ye ti bata tere ti ala nzoni si ala lingbi ti te kobe ti Pake. 29 Pilate asigigi, lo gue na mbage ti ala si lo hunda ala, lo tene: “Ala yeke bi tënë na li ti koli so ngbanga ti nyen?” 30 Ala kiri tënë na lo: “Tongana lo sara fade sioni pepe, ka e ga na lo na mo?” 31 Pilate atene na ala: “Ala mu lo, ala wani afâ ngbanga na li ti lo na lege ti ndia ti ala.” Ala kiri tënë: “A mu lege na e ti fâ zo pepe.” 32 Ye ni asi si tënë so Jésus atene na ndö ti mara ti kuâ so fade lo yeke kui aga taa-tënë. 33 Pilate ali na da si lo iri Jésus, lo hunda lo: “Mo yeke gbia ti azuife?” 34 Jésus akiri tënë na lo: “Tënë so mo hunda so, alondo na be ti mo wani wala ambeni zo laa atene tënë ni na ndö ti mbi na mo?” 35 Pilate akiri tënë na lo, atene: “Mbi yeke zuife? Azo ti mara ti mo na akota wayango-sandaga laa amu mo aga na mo na mbi. Nyen laa mo sara?” 36 Jésus akiri tënë na lo: “Kodro-gbia ti mbi ayeke ti dunia so pepe. Tongana kodro-gbia ti mbi ayeke fade ti dunia so, ka azo ti mbi atiri bira ti kanga lege si azo aga na mbi na amakonzi ti azuife pepe. Me fadeso, kodro-gbia ti mbi ayeke ti ndo so ge pepe.” 37 Pilate ahunda lo, atene: “Ye ni, mo yeke gbia?” Jésus akiri tënë: “Gi tënë ni laa mo tene awe so: mbi yeke gbia. A du mbi si mbi ga na dunia so ti fa ye na ndö ti taa-tënë na azo. Zo so ayeke zo ti taa-tënë, fade lo yeke ma tënë ti mbi.” 38 Pilate ahunda lo, atene: “Taa-tënë ayeke nyen?” Na pekoni, Pilate akiri asigigi, lo gue lo wara azuife si lo tene na ala: “Mbi wara ti mbi mbeni tënë oko pepe ti fâ ngbanga na li ti koli so ndali ni. 39 Me na lege ti sarango ye ti kodro ti ala, lakue na matanga ti Pake, mbi yeke zi mbeni zo ti kanga oko. Ala ye mbi zi na ala gbia ti azuife?” 40 Azo ni ato nda ti dekongo, atene: “Ên-en, lo pepe! Me Barabas!” Andaa Barabas ayeke mbeni sioni zo.

19

1 Tongaso Pilate amu yanga titene a gue na Jésus si a pika lo na fimbo. 2 Aturugu amu akamba ti ki aleke ni tongana kpoto ti gbia si ala zia na li ti lo; ala yu na lo mbeni kota bengba bongo. 3 Ala ga nduru na tere ti lo si ala tene: “E bara mo, gbia ti azuife!” Ala yeke pika ngbangba ti lo. 4 Pilate akiri asigigi si lo tene na azuife: “Ala baa, lo laa mbi yeke sigigi na lo na ala so. Ayeke nzoni ala hinga so mbi wara ti mbi mbeni tënë oko pepe ti fâ ngbanga na li ti koli so ndali ni.” 5 Tongaso Jésus asigigi na kpoto ti ki ni na li ti lo, na kota bengba bongo ni na tere ti lo. Pilate atene na ala: “Baa, koli ni laa!” 6 So akota wayango-sandaga na aturugu ti kota da ti Nzapa abaa Jésus, ala dekongo, atene: “Fâ lo na ndö ti keke ti kroa! Fâ lo na ndö ti keke ti kroa!” Pilate atene na ala: “Ala wani amu lo, afâ lo na ndö ti keke ti kroa ni. Mbi wara ti mbi mbeni tënë oko pepe ti fâ ngbanga na li ti lo ndali ni.” 7 Azuife akiri tënë na lo: “Mbeni ndia ti e ayeke daa; na lege ti ndia ni so, lo lingbi na kuâ, ngbanga ti so lo tene, ni yeke Molenge ti Nzapa.” 8 So Pilate ama tënë so, mbeto agbu lo ahon ndoni. 9 Lo kiri lo li na da si lo hunda Jésus, lo tene: “Mo londo ti mo na ndo wa?” Me Jésus akiri tënë na lo pepe. 10 Tongaso, Pilate atene na lo: “Taa mbi laa mo ke ti zi yanga na mbi? Ayeke nzoni mo hinga mo tene, mbi yeke na ngangu ti zi mo, mbi yeke nga na ngangu ti mu yanga titene a fâ mo na ndö ti keke ti kroa.” 11 Jésus akiri tënë na lo, atene: “Mo yeke na ngangu na ndö ti mbi pepe, gi ngangu so Nzapa amu na mo. Ndani laa zo so azia mbi na maboko ti mo so, kungba ti siokpari ti lo ane ahon ti mo.” 12 Ti londo na ndembe ni so, Pilate ayeke gi lege ti zi Jésus, me azuife akiri adekongo, atene: “Tongana mo zi lo, andaa mo yeke zo ti kota gbia ti Rome pepe! Zo so kue atene, ni yeke gbia, andaa lo ke kota gbia ti Rome awe!” 13 So Pilate ama tënë so, lo hunda titene a sigigi na Jésus. Pilate aduti na ndö ti mbata ti lo ti fango ngbanga, na ndo so iri ni “Litostrotos”; a iri ni na yanga ti hebro “Gabata”. 14 Andaa lango ni so ayeke lango ti lekengo tere ndali ti matanga ti Pake. Nduru na bekombite, Pilate atene na azuife: “Baa, gbia ti ala laa!” 15 Ala kiri adekongo, atene: “Fâ lo! Fâ lo! Fâ lo na ndö ti keke ti kroa!” Pilate ahunda ala, atene: “Ala ye mbi fâ gbia ti ala na ndö ti keke ti kroa?” Akota wayango-sandaga akiri tënë, atene: “E yeke na mbeni gbia nde pepe, gi kota gbia ti Rome oko!” 16 Tongaso Pilate azia Jésus na maboko ti ala titene ala gue afâ lo na ndö ti keke ti kroa. Ala mu Jésus ahon na lo. 17 Lo wani lo yo keke ti kroa ti lo, lo sigigi si lo gue na ndo so ala iri ni “Ndo-ti-abio-ti-li”; a iri ni na yanga ti hebro “Golgota.” 18 Kâ laa aturugu akanga Jésus na ndö ti keke ti kroa. Ala kanga nga ambeni koli use na ndö ti akeke ti kroa, oko na mbage, oko na mbage; Jésus ayeke na popo ti ala. 19 Pilate amu yanga titene a su mbeti si a kanga na li ti keke ti kroa ni. Mbeti ni atene: “Jésus, zo ti Nazaret, gbia ti azuife.” 20 Ndo so a kanga Jésus na ndö ti keke ti kroa daa so ayo na gbata ni pepe, nilaa azuife mingi adiko mbeti ni. A su mbeti ni na yanga ti hebro, na greke nga na laten. 21 Akota wayango-sandaga ti azuife atene na Pilate: “Mo su mbeti ni pepe, mo tene: ‘Gbia ti azuife’, me mo su ni, mo tene: ‘Koli so atene, ni yeke gbia ti azuife.’ ” 22 Pilate akiri tënë, atene: “Ye so mbi su na mbeti awe, mbi su awe!” 23 So aturugu akanga Jésus na ndö ti keke ti kroa awe, ala mu abongo ti lo si ala kangbi ya ni osio, zo oko oko na ti lo. Ala mu nga yongoro bongo ti lo so a fu ni fungo pepe, me ti londo na nduzu asi na gbeni, a leke ni gi le ni oko tongana mapia-bongo. 24 Aturugu ni atene na popo ti ala: “E suru ya ti bongo ni pepe, me e bi dee ti hinga zo so ayeke wara ni.” Ye so asi si tënë ti Mbeti ti Nzapa aga taa-tënë; tënë ni atene: “Ala kangbi ya ti abongo ti mbi na popo ti ala si ala bi dee ti hinga zo so ayeke mu yongoro bongo ti mbi.” Ye so aturugu asara laa. 25 Mama ti Jésus, na ita ti mama ti lo, na Marie, wali ti Klopas nga na Marie ti kodro ti Magdala ayeke luti nduru na tere ti keke ti kroa ti Jésus. 26 Jésus abaa mama ti lo na mbeni disiple ti lo so lo ye lo mingi, ala yeke luti kâ. Tongaso Jésus atene na mama ti lo: “Wali, baa, molenge ti mo laa.” 27 Na pekoni, lo tene na disiple ni: “Baa, mama ti mo laa.” Ti londo na ndembe ni so, disiple ni amu mama ti Jésus na da ti lo. 28 Na pekoni, Jésus ahinga atene, fadeso ye kue ahunzi awe. Ti sara si tënë ti Mbeti ti Nzapa aga taa-tënë, lo tene: “Nzara ti ngu asara mbi!” 29 Mbeni ta ayeke kâ so kpingo vin ayeke na ya ni. Aturugu amu ndokoro ayoro na ya ti kpingo vin ni, ala kanga na li ti mbeni kete keke ti izope, ala zia ni na yanga ti Jésus. 30 Jésus anyon kpingo vin ni si na pekoni, lo tene: “Ye kue ahunzi awe!” Lo ba li ti lo na sese si lo kui. 31 Lango ni ayeke lango ti lekengo tere ndali ti lango ti wungo tere. Azuife aye ka titene akuâ angba na ndö ti akeke ti kroa na lango ti wungo tere pepe. Andaa lango ti wungo tere ni ayeke mbeni kota lango mingi. Tongaso ala gue ahunda Pilate ti mu yanga titene a kungbi agere ti akoli so a kanga ala na ndö ti akeke ti kroa so si ala zi akuâ ni na ndö ti akeke ti kroa ni. 32 Aturugu ague, ala kungbi agere ti kozo zo ni si ala kungbi nga agere ti use zo so a kanga ala na ndö ti keke ti kroa na tere ti Jésus so. 33 Me so ala si na Jésus, ala baa so lo kui awe, nilaa ala kungbi agere ti lo pepe. 34 Mbeni turugu akpo kate ti Jésus na likongo, gi hio tongaso, mene na ngu asigigi daa. 35 Zo so abaa ye ni na le ti lo so, lo laa lo yeke fa peko ti tënë ni, tënë so lo yeke tene ayeke taa-tënë. Lo hinga so, lo yeke tene taa-tënë, tongaso si ala nga, ala lingbi ti ma na be. 36 Ye so asi titene tënë ti Mbeti ti Nzapa aga taa-tënë; tënë ni atene: “Fade bio ti lo oko ayeke kungbi pepe.” 37 Mbeni tënë so a su ayeke so: “Lo so ala kpo lo so, fade azo ayeke baa lo.” 38 Na pekoni, Joseph, mbeni zo ti gbata ti Arimate ague ahunda Pilate ti mu kuâ ti Jésus. – Joseph ayeke mbeni disiple ti Jésus, me lo mu peko ti lo na hondengo ni, ngbanga ti so mbeto ti amakonzi ti azuife asara lo. – Pilate ayeda. Tongaso Joseph ague amu kuâ ni. 39 Nikodeme so ague lani na bi ti baa Jésus, lo na Joseph laa aga. Lo mu mbeni yombo so a bongbi mire na aloes si asara na ni; lo ga na ni kilo baleota. 40 Akoli use so amu kuâ ti Jésus, ala kanga na bongo, ala zia yombo daa tongana ti so azuife ayeke sara lakue ti lu na akuâ ti ala. 41 Mbeni ndo so a lu akeke daa ayeke nduru na ndo so a fâ Jésus daa na ndö ti keke ti kroa so; mbeni fini du ti kuâ ayeke kâ so ade ti lu zo daa pepe. 42 Ala lu Jésus na ya ti du ti kuâ ni, ngbanga ti so ndo ni ayo pepe si lango ni ayeke lango ti lekengo tere ndali ti lango ti wungo tere.

20

1 Na ndaperere ti layenga, so ndo angba ti vuko, Marie ti kodro ti Magdala ague na du ti kuâ ni. Lo baa so a zi têne ti yanga ti du ti kuâ ni awe. 2 Lo kpe, lo gue lo si na Simon nga na mbeni disiple, lo so Jésus aye lo mingi so. Lo tene na ala: “A zi Kota Gbia na ya ti du ti kuâ ni awe, e hinga ndo so a zia lo daa pepe!” 3 Tongaso Pierre na mbeni disiple ni alondo, ala gue na du ti kuâ ni. 4 Ala use kue ayeke kpe loro, me mbeni disiple ni akpe loro ngangu ahon Pierre; lo si na du ti kuâ ni kozoni. 5 Lo kuku si lo baa akamba ti bongo alango na sese, me lo li na ya ti du ni pepe. 6 Simon Pierre asi na peko ti lo si lo li na ya ti du ni. Lo baa akamba ti bongo so ayeke kâ 7 nga na abongo so a kanga na li ti Jésus. Bongo ni na akamba ti bongo ni ayeke na ndo oko pepe, me a kanga ni si a zia ni nde. 8 Tongaso, mbeni disiple ni, lo so asi fade na du ti kuâ kozoni so, lo li, lo baa si lo ma na be. 9 Andaa tënë ti Mbeti ti Nzapa so atene, alingbi Jésus azingo na kuâ so, ala de ti ma ya ni pepe. 10 Na pekoni, adisiple akiri na ndo ti ala. 11 Marie aluti na gigi, na yanga ti du ti kuâ ni si lo yeke toto. So lo ngba ti toto, lo kuku ti baa ndo na ya ti du ni 12 si lo baa a-ange use so ayu vuru bongo. Ala duti na ndo so a zia kuâ ti Jésus daa: oko na mbage ti li ti lo, oko na mbage ti gere ti lo. 13 Ala hunda lo: “Wali, mo yeke toto ngbanga ti nyen?” Lo kiri tënë, lo tene: “Azo amu Kota Gbia ti mbi ahon na lo awe; mbi hinga ndo so ala zia lo daa pepe.” 14 So tënë ni angba na yanga ti lo, lo baa ndo na peko si lo baa Jésus ayeke luti; me lo hinga lo tene, so Jésus laa pepe. 15 Jésus ahunda lo: “Wali, mo yeke toto ngbanga ti nyen? Zo wa laa mo yeke gi lo?” Marie abaa ti lo atene so walekengo-ndo ni so laa si lo tene: “Pakara, tongana mo laa mo mu lo, mo hon na lo, fa na mbi ndo so mo zia lo daa si mbi gue mbi mu lo.” 16 Jésus atene na lo: “Marie!” Marie abaa ndo na mbage ti lo si lo tene na yanga ti hebro lo tene: “Rabuni!” Ndani atene: “Wafango-ye.” 17 Jésus atene na lo: “Zia ti gbu mbi, ngbanga ti so mbi de ti gue na Babâ pepe. Me mo gue, mo baa a-ita ti mbi, mo tene na ala, mo tene: ‘Mbi yeke gue na Babâ ti mbi so ayeke nga Babâ ti ala; lo yeke Nzapa ti mbi na Nzapa ti ala nga.’ ” 18 Tongaso Marie ti kodro ti Magdala ague si lo tene na adisiple ti Jésus atene: “Mbi baa Kota Gbia!” Lo fa na ala nga tënë so Jésus atene na lo. 19 Na lakui ti layenga ni, adisiple abongbi tere ti ala na ya ti mbeni da. Ala kanga yanga ti da ni na ndö ti ala, ngbanga ti so mbeto ti amakonzi ti azuife asara ala. Jésus aga si lo luti na popo ti ala, lo tene na ala: “Siriri aduti na ala!” 20 Na peko ti tënë so, lo fa amaboko ti lo na kate ti lo na ala. So adisiple abaa Kota Gbia, be ti ala asi na kota ngia. 21 Jésus akiri tënë na ala: “Siriri aduti na ala! Tongana ti so Babâ atokua mbi, mbi nga, mbi tokua ala.” 22 Na pekoni, lo huru pupu na ndö ti ala si lo tene: “Ala wara Yingo-Vuru! 23 Tongana ala zi siokpari na li ti mbeni zo, fade siokpari ti zo ni ayeke hon. Tongana ala zi siokpari na li ti mbeni zo pepe, fade siokpari ayeke ngba na li ti lo.” 24 Thomas, mbeni disiple oko na popo ti adisiple baleoko na use, so a iri lo Ngbo, ayeke na popo ti amba ti lo na ndembe so Jésus asi na ni so pepe. 25 Ambeni disiple ni atene na Thomas: “E baa Kota Gbia!” Thomas akiri tënë na ala, atene: “Tongana mbi baa ka ti pondi na ya ti amaboko ti lo pepe, mbi yoro li ti maboko ti mbi daa pepe si mbi yoro maboko ti mbi na ya ti ka ti kate ti lo pepe, mbi yeke ma na be oko pepe.” 26 Yenga oko na pekoni, adisiple akiri abongbi tere ti ala na ya ti da, Thomas ayeke na popo ti ala. Ala kanga yanga ti da ni na kerere, me Jésus aga si lo luti na popo ti ala, lo tene: “Siriri aduti na ala!” 27 Na pekoni, lo tene na Thomas: “Yoro li ti maboko ti mo na ndo so, mo baa maboko ti mbi. Yoro nga maboko ti mo na ndo so na ya ti kate ti mbi. Zia ti dekite, ma na be!” 28 Thomas akiri tënë na lo, atene: “Kota Gbia ti mbi na Nzapa ti mbi!” 29 Jésus atene na lo: “Ngbanga ti so mo baa mbi laa mo ma na be? Ti ala nzoni, ala so abaa mbi pepe si ala ma na be!” 30 Jésus asara ambeni ye ti kpene mingi na le ti adisiple ti lo so a su tënë ni na ya ti mbeti so pepe. 31 Me ti ambeni ye ti kpene so a su tënë ni na mbeti so, a su ni titene ala ma na be so, Jésus ayeke Mesii, Molenge ti Nzapa. Tongana ala ma na be, fade ala yeke duti na fini na lege ti lo.

21

1 Na pekoni, Jésus akiri asi na adisiple ti lo na yanga ti kota ngu ti Tiberiade. Lege so Jésus asi na ni ayeke so: 2 Simon Pierre, Thomas – so a iri lo Ngbo –, Natanael, zo ti kodro ti Kana na Galile, amolenge ti Zebede na ambeni disiple use kue abongbi na ndo oko. 3 Simon Pierre atene na amba ti lo: “Mbi yeke gue ti gi susu.’ Ala tene na lo: “E na mo e gue.” Tongaso ala gue, ala ko na ya ti ngo si ala hon. Me na bi ni kue, ala wara susu oko pepe. 4 So ndo ahan awe, Jésus aluti na yanga ti ngu ni, me adisiple ti lo ahinga pepe, atene lo laa. 5 Lo hunda ala, lo tene: “Tongana nyen amolenge, ala gbu susu pepe?” Ala kiri tënë na lo, atene: “E gbu susu pepe.” 6 Lo tene na ala: “Ala bi gbanda ni na mbage ti maboko ti koli, fade ala yeke gbu asusu.” Tongaso ala bi gbanda ni, me ala gboto ni na gigi gbaa, ngbanga ti so ala gbu asusu mingi. 7 Disiple so Jésus aye lo mingi so atene na Pierre: “Kota Gbia laa!” So Pierre ama atene, so Kota Gbia laa, lo yu bongo ti lo, ngbanga ti so lo zi ni. Na pekoni, lo huru lo ti na ya ti ngu. 8 Ambeni disiple ni akiri na ngo ni na yanga ti ngu si ala yeke gboto gbanda ni so asi singo na asusu. Ala yeke fade yongoro na yanga ti ngu ni pepe, ala yeke nduru na metere ngbangbo oko. 9 So ala si na yanga ti ngu ni, ala baa ambeni le ti wâ, susu ayeke na ndö ni; ala baa nga mapa. 10 Jésus atene na ala: “Ala ga na ambeni susu so ala gbu so.” 11 Simon Pierre ako na ya ti ngo si lo gboto gbanda ni lo sigigi na ni: akota susu so wungo ti ala ayeke ngbangbo oko na baleoku na ota ayeke na ya ni. Ataa so asusu ni ayeke mingi ahon ndoni, gbanda ni asuru pepe. 12 Jésus atene na ala: “Ala ga, ate ye.” Mbeni disiple oko ti hunda lo: “Mo yeke zo wa?” ayeke daa pepe, ngbanga ti so ala hinga atene, so Kota Gbia laa. 13 Tongaso Jésus ague, lo mu mapa si lo kangbi ni na ala; lo kangbi nga asusu ni. 14 Lege ota titene Jésus asi na adisiple ti lo na peko ti zingongo ti lo na kuâ laa. 15 Na peko ti kobe ni, Jésus ahunda Simon Pierre, atene: “Simon, molenge ti Jean, mo ye mbi ahon ala so?” Simon akiri tënë: “Biani, Kota Gbia, mo hinga so mbi ye mo.” Jésus atene na lo: “Bata akete taba ti mbi!” 16 Jésus akiri ahunda lo ti fani use ni, atene: “Simon, molenge ti Jean, mo ye mbi?” Pierre akiri tënë na lo: “Biani, Kota Gbia, mo hinga so mbi ye mo.” Jésus atene na lo: “Bata ataba ti mbi!” 17 Jésus akiri ahunda lo ti fani ota ni, atene: “Simon, molenge ti Jean, mo ye mbi?” Vundu asara Pierre, ngbanga ti so Jésus ahunda lo fani ota, atene: “Mo ye mbi?” Tongaso lo tene na Jésus: “Kota Gbia, mo hinga ye kue, mo hinga so mbi ye mo!” Jésus atene na lo: “Bata ataba ti mbi. 18 Biani, mbi tene na mo taa-tënë: na ndembe so mo de maseka, mo wani laa mo yeke kanga kamba ti ndö ti bongo ti mo si mo yeke gue na ndo so kue be ti mo aye. Me tongana mo ga mbakoro awe, fade mo yeke yoro maboko ti mo si mbeni zo nde ayeke kanga kamba ti ndö ti bongo ti mo si lo yeke gue na mo na ndo so be ti mo aye pepe.” 19 Jésus atene tënë so ti fa mara ti kuâ so Pierre ayeke kui ande na ni si fade Nzapa ayeke wara gonda na lege ti kuâ ni. Na pekoni, Jésus atene na lo: “Mu peko ti mbi!” 20 Pierre abaa ndo na peko si lo baa disiple so Jésus aye lo mingi, lo so na ndembe ti tengo kobe aba tere ti lo na mbage ti Jésus si ahunda lo, atene: “Kota Gbia, zo wa laa ayeke ka mo so?” 21 So Pierre abaa lo, lo hunda Jésus, lo tene: “Kota Gbia, ti lo so, nyen laa ayeke si ande na lo?” 22 Jésus akiri tënë na lo: “Tongana mbi ye titene lo ngba ngbii mbi ga, ti mo daa nyen? Ti mo, mo mu peko ti mbi!” 23 Gi na ndö ti tënë so laa azo ti Christ atene na popo ti ala atene, disiple so ayeke kui ande pepe. Me Jésus atene na disiple ni pepe, atene: “Fade lo yeke kui pepe”. Andaa tënë so Jésus atene ayeke so: “Tongana mbi ye titene lo ngba ngbii mbi ga, ti mo daa nyen?” 24 Disiple ni so laa abaa aye ni, lo fa peko ni si lo su tënë ni na mbeti. E hinga so, tënë so lo tene ayeke taa-tënë. 25 Ambeni ye mingi ayeke daa so Jésus asara. Tongana a su ni oko oko kue na mbeti, mbi baa mbi tene, dunia kue alingbi ti wara ndo pepe ti zia ambeti ni daa.