Kriste ke Modimo. Bohlatse bja Mokolobetši. Barutiwa ba pele ba Jesu
1 Mathomong e a bego a le gona ke yena LENTŠU. Gomme yena LENTŠU o be a le go Modimo. Gomme yena LENTŠU e be e le Modimo. 2 Ke yena a bego a le gona mathomong. 3 Tšohle di dirilwe ke yena; mme go tše di dirilwego ga go se se sa kago sa dirwa ke yena. 4 Bophelo bo be bo le mo go yena; mme bophelo bjoo e be e le sona seetša sa batho. 5 Mme seetša seo se bonega leswiswing; fela, leswiswi ga la ka la se amogela. 6 Go kile gwa tšwelela motho, e a romilwego ke Modimo; leina la gagwe ke Johane. 7 O be a tlile go ba hlatse, a hlatsela seetša, gore batho ba dumele ka yena. 8 E be e se yena seetša; se a se tletšego e be e le gore a be hlatse ya sona seetša. 9 Seetšaetša sa go bonegela batho bohle ke yena Motlafaseng. 10 O be a le gona lefaseng, mme lefase le dirilwe ke yena; gomme lefase ga la ka la mo tseba. 11 A tla go tša gagwe; mme ba gagwe ga ba ka ba mo amogela. 12 Fela, bohle ba ba mo amogetšego o ba neile maatla a go ba bana ba Modimo. Ke bao ba go dumela leina la gagwe. 13 Ke bao ba sa kago ba tswalwa ka madi le ka nama le ka thato ya monna; ke bao ba go tswalwa ke Modimo. 14 Me yena LENTŠU a ba nama, a tla a aga le rena; ra bogela letago la gagwe, letago la Motswalwaeši wa Tatagwe, Motlalakgaugeloletherešo. 15 Johane o mo hlatsela a goelela a re: Ke yena yo ke mmoletšego ka re: E a ntlhatlamago, ke e a bego a nthakile pele gobane o be a le gona, nna ke sešo ka ba gona. 16 Gomme mo go botlalo bja gagwe ke mo rena re amogetšego kgaugelo ka go gaugelwa. 17 Gobane molao, batho ba o neilwe ka Moshe; ge e le kgaugelo le therešo ke tša go ba gona ka Jesu Kriste. 18 Ga go e a bilego a bona Modimo le neng, wa go re bea seetšeng ke yena Morwamotswalwaeši, e a lego difarong tša Tatagwe. 19 Bohlatse bja Johane šebo. Ke bja mohla Bajuda ba romile baperisita le Balefi, ba tla ba etšwa Jerusalema ba mmotšiša ba re: O mang? 20 Johane o ipoletše, a se latole; a ipolela a re: Nna, ga se nna Kriste. 21 Ba mmotšiša ba re: O eng gee? A o Eliya? Yena a re: Ga se nna. Ba re: A o yena moporofeta? A fetola a re: Aowa! 22 Bona ba napa ba re: O mang gee? Re tle re botše ba go re roma. O reng ge o ipolela? 23 Johane a re: Ke lentšu la segoeledi lešokeng; ke re lokišang tsela ya Morena, bjalo ka ge moporofeta Jesaya a boletše. 24 Ba ba romilwego bao, e be e le ba bafarisei. 25 Ba mmotšiša ba re: Bjalo o reng o kolobetša ge o se Kriste, o se Eliya, O se yena Moporofeta? 26 Johane a fetola a re: Nna ke kolobetša ka meetse. Fela, mo gare ga lena go eme yo le sa mo tsebego. 27 Ke yena a tlago a etilwe pele ke nna, mola e le wa go ba gona pele ga ka, yo nna ke sa swanelago le go ka hunolla le lerala la seeta sa gagwe. 28 Ditaba tše ke tša Bethabara, mošola wa noka ya Jorodane, mo Johane a bego a kolobetša gona. 29 Ka la ka moswana Johane a bona Jesu a etla go yena; a re: Bonang Kwana ya Modimo e rwelego sebe sa lefase. 30 Ke Yena eo ke mmoletšego ka re: Yo a ntlhatlamago ke e a nthakilego pele, gobane o be a le gona, nna ke sešo ka ba gona. 31 Le nna ke be ke sa mo tsebe; fela tše nna ke tletšego tšona ka kolobetša ka meetse, ke gore yena a bonagale mo go Isiraele. 32 Johane a mo hlatsela a re: Ke bone Moya o theoga legodimong o le bjalo ka leeba, wa tla wa dula o mo okametše. 33 Le nna ke be ke sa mo tsebe. Fela, e a nthomilego go kolobetša ka meetse, o be a mpoditše a re: Yo o mmonago Moya o mo theogela, wa dula o mo okametše, ke yena wa go kolobetša ka Moya wo Mokgethwa. 34 Gomme ke di bone ka bea bohlatse ka re: Yo ke yena Morwa-Modimo. 35 Ka moso o mongwe Johane o be a eme a na le ba babedi ba barutiwa ba gagwe, 36 A bona Jesu a itshepelela, a re: Bonang Kwana ya Modimo. 37 Barutiwa ba babedi bao ba mo kwa a realo, ba latela Jesu. 38 Jesu a retologa a ba bona ba mo latela, a ba botšiša a re: Le nyakang? Bona ba re: Rabi, (ke go re: Moruti) o dula kae? 39 Yena a re: Tlang le yo bona. Ba ya ba bona mo a dutšego. Mme tšatši leo ba hlwa ba na le yena. Nako e be e le ya lesome. 40 E mongwe wa bona babedi bao ba go kwa Johane mme ba latela Jesu, e be e le Andrea, ngwanabo Simone Petro. 41 Yena yo a thoma go hwetša Simone mogolwagwe, a mmotša a re: Re hweditše Mesia! (Ke go re Kriste.) 42 A mo iša go Jesu. Jesu a re go mmona, a re: Ke wena Simone Morwa-Jona; O tlo bitšwa ka la Kefase (ke go re Petro). 43 Ka la ka moswana, Jesu ge a re ke ya Galilea, a hwetša Filipi; a bolela le yena a re: Ntatele. 44 Filipi e be e le wa Betsaida, wa motse wa ga bo-Andrea le Petro. 45 Filipi a hwetša Nathanaele, a mmotša a re: Yola, yo Moshe a ngwadilego tša gagwe le bona baporofeta, re mo hweditše; ke Jesu Morwa Josefa wa Natsaretha. 46 Nathanaele a fetola a re: Se sebotse se se kago tšwa Natsaretha e ka bang? Filipi a re: Tlaa o bone! 47 Jesu a bona Nathanaele a etla go yena, a mmolela a re: Šo Moisiraele wa makgonthe, a se nago bomenetša. 48 Nathanaele a mmotšiša a re: O ntsebela kae? Jesu a re: Ke go bone Filipi a sešo a go bitša, o le moriting wa mogo. 49 Nathanaele a fetola a re: Ke wena Morwa-Modimo; ke wena Kgoši ya Isiraele. 50 Jesu a re: O dumela ka ge ke re ke go bone moriting wa mogo; o sa tlo bona tše di fetišago tšeo. 51 A ba a re: Ruri, ruri, ke a le botša, go tloga bjalo le tlo bona legodimo le bulegile, barongwa ba Modimo ba hlatloga ba fologela go Morwamotho.
Mohlolo wa kua Kana. Jesu o lwela Ntlokgethwa
1 Ka tšatši la boraro go be go na le monyanya wa lenyalo motsaneng wa Kana wa Galilea. Le mmago Jesu o be a le moo. 2 Jesu le yena a biletšwa monyanyeng, le barutiwa ba gagwe. 3 Gomme ge beine e hlaela, mmago Jesu a mmotša a re: Ga ba na beine. 4 Jesu a fetola a re: A ke tša ka le tša gago, wena Mosadi? Nna nako ya ka ga e ešo ya tla. 5 Mmagwe a botša bahlanka a re: Se a tlogo le botša le se dire. 6 Mme lapeng leo go be go beilwe dinkgo tše seletšego tša mabje, e le go ya ka mokgwa wa Bajuda wa go hlapa; nkgo e bjalo e be e tlala ka meetse a meeta e mebedi le ge e le e meraro. 7 Jesu a botša bahlanka a re: Tlatšang dinkgo tšeo meetse. Ba di tlatša ba gomiša ka melomo. 8 A ba laela a re: Bjalo gang le iše go makgetla. Bona ba iša. 9 Makgetla ge a lekile meetse ao a fetogilego beine, a sa tsebe mo e tšwago gona, go tseba bahlanka fela ba go ga meetse, a bitša monyadi. 10 A bolela le yena a re: Batho ka moka ba thoma go tliša beine e botse, e botšwa ba e tliše ge batho ba kgotšwe. Ge e le wena, beine e botse o e boloketše bjalo. 11 Mohlolo wo wa pele Jesu o o dirile motseng wa Kana wa Galilea, a bonagatša letago la gagwe; mme barutiwa ba gagwe ba mo dumela. 12 Ka moso Jesu a fologela motseng wa Kaperenaume a na le mmagwe le bana babo le barutiwa ba gagwe; ba dula gona matšatši a sego makae. 13 Paseka ya Bajuda e be e le kgauswi; mme Jesu a rotogela Jerusalema. 14 A hwetša Ntlongkgethwa go dutše babapatši ba dikgomo le ba dinku le ba maeba, le ba ba rekanyago ditšhelete. 15 Jesu a dira tshelane ka dithala, a ba raka Ntlongkgethwa ka moka ga bona, le dinku le dikgomo, a tšholla ditšhelete tša barekanyi ba tšona, a uša dithalana tša bona. 16 Babapatši ba maeba a ba laela a re: Tlošang dilo tše. Ngwako wa Tate le se ke la o dira borekelo. 17 Barutiwa ba gagwe ba elelwa ge go ngwadilwe gwa thwe: Ke llwe ke lehufa ka baka la Ngwako wa gago. 18 Bajuda ba tla ba mmotšiša ba re: Bohlatse bja go re o ka dira tše bjalo o ka re bontšha ka mohlolo ofe? 19 Jesu a fetola a re: Phušolang Ntlokgethwa ye, ke buše ke e tsoše ka matšatši a mararo. 20 Ke mo Bajuda ba itšego: Ntlokgethwa ye, ba feditše nywaga e masome a mane e metšo e selelago ba e aga, mme wena o re o tlo e tsoša ka matšatši a mararo? 21 Gomme Jesu o be a era Ntlokgethwa ya mmele wa gagwe. 22 Mehleng ya ge a tsogile bahung, ke mo barutiwa ba gagwe ba eletšwego taba ye a e boletšego ye, ba dumela mangwalo le lentšu le Jesu a le boletšego. 23 Mehleng yeo ya monyanya wa Paseka, a le motseng wa Jerusalema, ba bantši ba dumela leina la gagwe, ge ba bona mehlolo ye a bego a e dira. 24 Ge e le Jesu ga a ka a ikholofetša ka bona, ka gore a tseba bohle. 25 Gobane Jesu e be e se wa go lemoga motho ka go kwa bohlatse bja e mongwe, gobane a hlatha se se lego mothong.
Nikodemo. Bohlatse bja Johane Mokolobetši
1 Go be go na le motho e mongwe wa bafarisei; leina la gagwe ke Nikodemo, wa bagolo ba Bajuda. 2 Yena e a tla go Jesu e le bošego a bolela a re: Moruti! Re tseba ge o le moruti e a tšwago go Modimo, ka gobane ga go motho e a kgonago go dira mehlalo ye o e dirago ge Modimo a se na le yena. 3 Jesu a fetola a re: Ruri, ruri, ke a go botša, ge motho e se wa go tswalwa lefsa, a ka se ke a bona mmušo wa Modimo. 4 Nikodemo a re: Motho a ka tswalwa bjang ge a tšofetše? A a ka buša a boela mmeleng wa mmagwe, a tswalwa? 5 Jesu a re: Ruri, ruri, ke a go botša, ge motho a sa tswalwe ka meetse le ka Moya, a ka se ke a tsena mmušong wa Modimo. 6 Sa go tswalwa ke nama ke nama; sa go tswalwa ke Moya ke moya. 7 O se kgotse ge ke go botša ke re: le swanetše go tswalwa lefsa. 8 Moya o fokela mo o ratago; mme modumo wa wona o a o kwa, o sa tsebe mo o tšwago le mo o yago. Go bohle ba ba tswetšwego ke Moya go ba bjalo. 9 Nikodemo a mmotšiša a re: Gomme tseo di direga bjang? 10 Jesu a fetola a re: O re o le moruti wa Isiraele wa se tsebe tšeo? 11 Ruri, ruri, ke a go botša, re bolela se re se tsebago; re dihlatse tša tše re di bonego; mme bohlatse bja rena ga le bo amogele. 12 Ge le sa dumele mola ke le botša tša mo lefaseng, le tlo dumela bjang ge ke le botša tša legodimong? 13 Ga go e a kilego a rotogela legodimong, ge e se e a fologilego a etšwa gona, yena Morwamotho wa go ba legodimong. 14 Gomme bjalo ka ge Moshe a fegile noga kua lešokeng, Morwamotho le yena o tlo fegwa ka mokgwa woo, 15 Gore mang le mang e a mo dumelago a se lahlege; a upše a be le bophelo bjo bo sa felego. 16 Gobane Modimo o ratile lefase gakaakaa, a ba a le nea Morwa wa gagwe e a tswetšwego a nnoši, gore mang le mang e a mo dumetšego a se ke a lahlega, a be le bophelo bjo bo sa felego. 17 Gobane Modimo, Morwa wa gagwe ga a ka a mo romela lefaseng gore a le ahlole; o mo romile gore lefase le phološwe ke yena. 18 E a mo dumetšego a ka se ke a lahlwa. E a sa dumelego, yena o šetše a tšwilwe, gobane a sa ka a dumela leina la Morwa motswalwaeši wa Modimo. 19 Kahlolo yona še: Seetša se tlile lefaseng; gomme batho ba rata leswiswi gagolo, ba nyatša seetša gobane mediro ya bona e le e mebe. 20 Gobane modiratšempe mang le mang o hloile seetša, ga a tle go sona, gore mediro ya gagwe e se ke ya kgalwa. 21 Modiratherešo yena o tla seetšeng, gore mediro ya gagwe e bonagale, gobane e dirilwe Modimo a le mo go yona. 22 Ka la ka moswana Jesu a tšwela nageng ya Judea a na le barutiwa ba gagwe; a fetša lebaka a le gona a na le bona a kolobetša. 23 Ke ge Johane le yena a le Enone kgauswi le Salima a kolobetša, gobane felo fao go be go na le meetse a mantši, batho ba tla ba kolobetšwa. 24 Ke mola Johane a sešo a išwa kgolegong. 25 Gwa tsoga kgang mo go barutiwa ba Johane le Bajuda ka baka la tlhatso. 26 Ba tla go Johane ba re: Moruti, motho yola a bego a na le wena mošola wa Jorodane yo o mmeetšego bohlatse, šolee o a kolobetša, mme bohle ba ya go yena. 27 Johane a fetola a re: Ga go se motho a ka fogo se tšea, ge a sa fiwe se etšwa legodimong. 28 Lena beng le dihlatse tša ge ke boletše ka re: Nna ga se nna Kriste. Ka re: Ke moromiwa wa go mo eta pele. 29 Monyadi ke eo a nago le monyalwa. Ge e le mogwera wa monyadi, ge a eme mme a mo kwa, lentšu la monyadi o le thabela ka gogolo. Lethabo la ka leo bjale ke gona le phethegile. 30 Yena ke wa go gola; nna ke wa go kokobela. 31 Motšwagodimo o okametše bohle. Wa lefase ke wa lefase, mme o bolela e le wa lefase. Mookamelabohle ke eo a tšwago legodimong. 32 Ke yena hlatse ya tše a di bonego le tše a di kwilego; mme bohlatse bja gagwe ga bo amogelwe ke motho. 33 E a amogelago bohlatse bja gagwe, o tiišitše le go re: Modimo ke wa go rereša. 34 Gomme moromiwa wa Modimo o bolela mantšu a Modimo, ka ge Modimo a sa lekanyetše Moya ka go hlaetša. 35 Tatago Morwa o rata Morwa wa gagwe, mme tšohle o di beile seatleng sa gagwe. 36 E a dumelago Morwa, o na le bophelo bjo bo sa felego. E a sa mo dumelego, a ka se ke a ba a bo bona; se se tlogo dula se mo okametše ke bogale bja Modimo.
Mosadi wa Mosamaria. Morwa wa mokgoma wa Kaperenaume
1 Morena, ka go tseba gore bafarisei ba kwile ge barutiwa ba gagwe e eba ba bantši, mme a kolobetša bjalo ka Johane, 2 le ge go sa ka gwa kolobetša yena mong, go kolobetša barutiwa ba gagwe, 3 a tloga moo nageng ya Juda a ya Galilea. 4 Gomme o be a swanetše go phatša naga ya Samaria. 5 A tla motseng o mongwe wa Samaria, wo ba rego ke Sikara, o lego kgauswi le tšhemo ye Jakobo a e neilego Josefa morwa wa gagwe. 6 Gona moo go be go na le sediba sa Jakobo. Bjale Jesu, a lapile ka leeto, a dula moo sedibeng seo. E be e ka ba nako ya go selela. 7 Gwa tla mosadi wa Mosamaria go ga meetse. Jesu a mo kgopela a re: Mphe ke nwe. 8 Ge e le barutiwa ba gagwe bona ba be ba ile motseng go reka dijo. 9 Mosadi eo wa Mosamaria a re: O reng o le Mojuda wa nkgopela meetse, ke le mosadi wa Mosamaria? Gobane Bajuda ga ba kgonane le Basamaria. 10 Jesu a fetola a re: Ge o ka be o tseba neo ya Modimo, wa tseba le yo a go kgopelago a re: Mphe ke nwe, ke wena o ka bego o kgopela yena, mme a go nea meetse a phelago. 11 Mosadi a re: Morena, le sego ga o naso, mme molete wa sediba o a iša; bjale, meetse a phelago o a tšea kae? 12 A o re o ka phala Jakobo tata wešo, e a re filego sediba se, le yena a nwa go sona, le barwa ba gagwe, le dikgomo tša gagwe? 13 Jesu a fetola a re: Bohle ba nwago meetse a ba tlo buša ba nyorwa. 14 Gomme e a ngwago meetse a nna ke tlogo mo fa, a ka se ke a ba a nyorwa neng le neng. Gomme meetse a nna ke tlogo mo fa, mo go yena a tlo ba mothopo wo o tšwago meetse a go iša bophelong bjo bo sa felego. 15 Mosadi a re: Morena! A nke o mphe meetse ao gore ke se hlwe ke nyorwa ka tla fa go ga meetse. 16 Jesu a re: Sepela o yo bitša monna wa gago, le tle mo. 17 Mosadi a re: Ga ke na monna. Jesu a re: O a rereša ge o re ga ke na monna; 18 Gobane banna ba o bilego le bona ke ba bahlano; gomme yo o nago le yena bjale, ga se monna wa gago. Moo o boletše therešo. 19 Mosadi a re: Morena! Ke a bona, o moporofeta. 20 Botatawešo ba be ba rapela thabeng ye; gomme lena le re mo go swanetšego go rapelwa ke Jerusalema. 21 Jesu a re: Mosadi! Ntumele ge ke re: Go etla lebaka leo le ka se kego la rapela Tate thabeng ye, le ge e le Jerusalema. 22 Lena le rapela se le sa se tsebego, Rena re rapela se re se tsebago; gobane phološo e tšwa go Bajuda. 23 Fela, go tla lebaka, le bjale ke lona, leo barapedi ba makgonthe ba tlogo rapela Tate ka Moya le ka therešo. Le gona Tate o nyaka ba ba Mo rapelago ka mokgwa woo. 24 Modimo ke Moya; gomme ba ba mo rapelago ba tlo mo rapela ka moya le ka go rereša. 25 Mosadi a re: Ke tseba gobane Mesia o etla, yena Kriste. Ke yena a tlogo re ge a tlile, a re botša tšohle. 26 Jesu a re: Yena eo ke nna ke bolelago le wena. 27 Ke ge go boa barutiwa ba gagwe; ba kgotsa ge a bolela le mosadi eo. Fela, gwa se be le e a rego: O mmotšišang? O bolelang le yena? 28 Mosadi eo a tlogela moeta wa gagwe, a ya motseng, a botša batho a re: 29 Tlang le bone motho e a mpoditšego tšohle tše ke di dirilego; le bone ge e ka se be yena Kriste. 30 Ba motseng ba tšwa ba tla go Jesu. 31 Barutiwa ba be ba šetše ba mo phegelela ba re: Moruti, a nke o je! 32 Jesu a fetola a re: Ke na le sejo se ke se jago, seo le sa se tsebego. 33 Barutiwa ba botšišana ba re: Afa go ka ba le e a mo tlišeditšego tša go ja? 34 Jesu a bolela le bona a re: Sejo sa ka ke ge ke dira thato ya e a nthomilego, ge ke phetha mediro ya gagwe. 35 A ga le re go sa šetše dikgwedi tše nne, ya tlo ba gona go tlago puno? Bonang, nna ke le botša ke re: Lebelelang le bone mašemo, gobane a šetše a šweufaletše go bunwa. 36 Mmuni o šetše a tšea moputso, mme o kgobelela bophelo bja bo sa felego dienywa, gore mobjadi le mmuni ba thabe gammogo. 37 Gobane moo go rereša lentšu le rego: Mobjadi o šele, mmuni o šele. 38 Nna ke le rometše go buna se le sa kago la itapiša ka sona; go itapišitše ba bangwe, mme lena le tsene modirong wa bona. 39 Mo go Basamaria ba motse woo go be go na le ba bantši ba ba mo dumetšego ka polelo ya mosadi eo wa go mo hlatsela a re: O mpoditše tšohle tše ke di dirilego. 40 Bjale Basamaria, ge ba tlile go Jesu, ba mo phegelela ba re a dule le bona. Mme a fetša matšatši a mabedi a le moo. 41 Ba bantši ba dumela ka go kwa go bolela yena mong. 42 Ge ba bolela le mosadi eo ba re: Ga re sa dumela ka baka la polelo ya gago; rena beng re kwile, ra tseba, gore ka kgonthe ke yena Kriste Mophološi wa lefase. 43 Ge go fetile matšatši a mabedi ao, a feta a ya Galilea. 44 Fela le yena mong o kile a bolela a re: Moporofeta, motseng wa gabo ga a retwe. 45 Bjale ge a etla Galilea, Bagalilea ba mo amogela, ka gobane ba be ba bone tšohle tše a di dirilego Jerusalema monyanyeng. 46 A tla gape motseng wa Kana wa Galilea, mo a kilego a fetoša meetse a ba beine. 47 Motseng wa Kaperenaume go be go na le mokgoma e mongwe, yo morwa wa gagwe a bego a babja. Ge a ekwa gore Jesu o mo Galilea a etšwa Jerusalema, a ya go yena a mo rapela a re a fologe a tle a fodiše morwa wa gagwe, gobane o be a šetše a nyako hwa. 48 Jesu a fetola a re: Ge le sa bone dika le mehlolo, ga le dumele. 49 Mokgoma a re: Morena! A nke o fologe, ngwana wa ka a sešo a hwa. 50 Jesu a re: Sepela; morwa wa gago o a phela. Motho eo a dumela lentšu leo Jesu a mmotšago lona, a sepela. 51 A re a sa fologa, a gahlanetšwa ke bahlanka ba gagwe; ba mmotša ba re: Morwa wa gago o a phela. 52 A ba botšiša a re: Ke ka nako efe ge a ekwa bokaone? Bona ba re: Ke maabane ka nako ya go šupa ge phišo e mo tloga. 53 Yena tatago ngwana a tseba ge e le lona lebaka la ge Jesu a mmotša a re: Morwa wa gago o a phela. Mme a dumela, le bohle ba lapeng la gagwe. 54 Ke wona mohlolo wa bobedi wo Jesu a o dirilego a boetše Galilea, a etšwa nageng ya Juda.
Molwetši wa Bethesida. Jesu o kgothatša Bajuda
1 Gwa tla lebaka la monyanya o mongwe wa Bajuda; mme Jesu a rotogela Jerusalema. 2 Moo Jerusalema ka thoko ya kgoro ya dinku go na le sediba; ka Sehebere ba re ke Bethesida. Se na le nywako e mehlano ya mathudi. 3 Gona moo go be go letše bontši bjo bogolo bja balwetši, ba difofu le dihlotša, le ba ba omeletšego ditho, ba lebeletše go seloga ga meetse. 4 Gobane morongwa o be a fologela sedibeng ka mabaka a hudue meetse; gomme e a thomago a tsena meetseng ge a sa tšo seloga e be e le yena a folago, le ge bolwetši bja gagwe e le bofe. 5 Bjale felo fao go be go na le motho e mongwe, e a feditšego nywaga e masome a mararo a metšo e seswai a babja. 6 Jesu ge a mmona a letše malaong, a tseba ge e šetše e le kgale motho eo a babja, a mmotšiša a re: A o rata go fola? 7 Molwetši a fetola a re: Morena! Ga ke na motho, yo e rego ge meetse a huduegile, a mphološetša sedibeng. Gomme ge ke re ke sa ya, e mongwe a fologele pele ga ka. 8 Jesu a re: Tsoga! O tšee malao a gago o sepele. 9 Motho eo a napa a fola e sa le semeetseng, a rwala malao a gagwe a sepela. — Gomme tšatši leo e be e le la Sabatha. 10 Bajuda ba bolela le motho eo a fodišitšwego, ba re: Ke Sabatha; ga go a swanela ge o rwala malao ao. 11 Yena a fetola a re: E a mphodišitšego ke yena a mpoditšego a re: Rwala malao a gago o sepele. 12 Ba mmotšiša ba re: Ke mang motho eo a go boditšego a re: Rwala malao a gago o sepele? 13 Gomme motho eo a fodišitšwego o be a sa mo tsebe, ka gobane Jesu o be a širetše ka ge felo fao go ne batho ba bantši. 14 Ge go fetile lebakanyana, Jesu a mo hwetša Ntlongkgethwa; a bolela a re: O ko bone! O fodišitšwe. O se ke wa hlwa o dira dibe, o se tlo welwa ke tše di fetago tšela. 15 Motho eo a tloga moo, a yo botša Bajuda a re ke fodišitšwe ke Jesu. 16 Ke ka baka leo Bajuda ba hloilego Jesu, ba rata go mmolaya, ka gobane a dira tše bjalo ka Sabatha. 17 Jesu ge a bolela le bona a re: Tate o sa dira le bjalo; mme le nna ke a dira. 18 Ke tšona tše Bajuda ba mo hloetšego tšona ka go fetiša ba rata go mmolaya, ba re: O re go goboša Sabatha, a buša a re Modimo ke Tatagwe ka sebele, a itekanya le Modimo. 19 Jesu ge a bolela le bona a re: Ruri, ruri, ke a le botša, ga go se Morwa a kgonago go se dira ka la gagwe; gobane tše Tatagwe a di dirago ke tšona tše le Morwa a di dirago. 20 Gobane Tate o rata Morwa, mme o mo laetša tše a di dirago tšohle. O sa tlo mo laetša mediro e fetago ye ka bogolo la tlo ba la tlabega. 21 Bjalo ka ge Tate a tsoša bahu a ba phediša, le yena Morwa ba a ratago go ba phediša o ba phediša ka mokgwa woo. 22 Le gona Tate ga a sekiše motho, kahlolo ka moka o e gafetše Morwa, 23 gore bohle ba boife Morwa, bjalo ka ge ba boifa Tate. E a sa boifego Morwa, ga a boife Tate e a mo romilego. 24 Ruri, ruri ke a le botša, e a kwago se ke se bolelago a dumela e a nthomilego, o na le bophelo bjo bo sa felego, a ka se ke a tsena kahlolong; o tlogile lehung a selela bophelong. 25 Ruri, ruri ke a le botša, go tla lebaka, le bjale e šetše e le lona, leo bahu ba tlogo kwa lentšu la Morwa-Modimo; mme ba ba le kwilego ba tlo phela. 26 Gobane bjalo ka Tate ge a na le bophelo e le yena mong wa bjona, le Morwa o mo neile bophelo, a be mong wa bjona. 27 O mo neile maatla gore moahlodi e be yena, ka ge e le yena Morwamotho. 28 Di se ke tša le tlaba; gobane go tla lebaka leo bohle ba lego mabitleng ba tlogo kwa lentšu la Morwa-Modimo ka lona. 29 Gomme ba tlo tšwa; ba ba dirilego tše botse ba tlo tsoga ba phela; ba ba dirilego tše mpe ba tlo tsoga ba lahlwa. 30 Ga go se ke kgonago go se dira ka la ka; ke ahlola ka mo ke kwilego; mme kahlolo ya ka ke ya toko, gobane ga ke nyake se nna ke se ratago, ke nyaka se se ratwago ke e a nthomilego. 31 Bohlatse bja ka ge e ka ba go ipolela, gona bohlatse bja ka e ka be e se bja go rereša. 32 Ke e mongwe e lego hlatse ya ka; gomme bohlatse bjo a mpolelago ka bjona, le tseba ge e le bja go rereša. 33 Le kile la roma batho ba ya go Johane, mme a hlatsela therešo. 34 Ge e le nna ga ke wa go hlatselwa ke motho; fela tše bjalo ke di bolela gore le phološwe. 35 Johane e be e le lebone le le tukago la bonega; fela, le ratile go hlalala seetšeng sa gagwe lebakanyana fela. 36 Ge e le nna ke na le bohlatse bjo bo fetago bjoo bja Johane; gobane mediro ye Tate a nneilego yona gore ke e phethe, yona mediro ye ke e dirago, e hlatsela nna gore Tate o nthomile. 37 Le yena Tate e a nthomilego o ntlhatsetše. Lentšu la gagwe ga le ešo la ba la le kwa; le se a lego sona ga le ešo la se bona. 38 Le tše a di boletšego, ga go mo di dulago go lena, ka gobane le sa dumele Moromiwa wa gagwe. 39 Latišang mangwalong, ka gobane lena le re le na le bophelo bjo bo sa felego ka ona; gomme ke ona gee a a hlatselago nna. 40 Gomme ga le rate go tla go nna la ba le bophelo bjo bo sa felego. 41 Ga se go re ke nyaka go tumišwa ke batho; 42 Fela se ke se lemogilego, ke ge mo go lena go se na lerato la Modimo. 43 Nna ke tlile leineng la Tate; mme lena ga le nkamogele. Mohla go tlago e mongwe, wa go tla leineng la yena mong, le tlo mo amogela. 44 Le tlo kgona bjang go dumela ge le le ba go rata go retana, le sa nyake go retwa ke Modimo fela? 45 Le se ke la re ke nna ke tlogo le bega go Tate; wa go le bega o gona, ke Moshe, yo le mmotilego. 46 Gobane ge le ka be le dumela Moshe, le nna le ka be le ntumela, gobane Moshe o mpoletše ka mangwalo a gagwe. 47 Bjale ge le sa dumele mangwalo a gagwe, tše nna ke di bolelago le tlo di dumela bjang?
Jesu o horiša ba 5000 ; o sepela godimo ga meetse. Bogobe bja bophelo. Bohlatse bja Petro
1 Ka le lengwe lebaka Jesu a tloga a selela mošola wa lewatle la Galilea, la Tiberia. 2 A latelwa ke lešaba le lentši la batho, ka gobane ba be ba bona mehlolo ye a bego a e dira go balwetši. 3 Jesu a namela thaba a dula gona a na le barutiwa ba gagwe. 4 Ke ge monyanya wa Bajuda wa Paseka o le kgauswi. 5 Jesu ge a emiša mahlo a bona lešaba le lentši le etla go yena, a botšiša Filipi a re: Re tlo reka kae dinkgwa gore batho bao ba je? 6 Ge a realo e be e le go mo leka, gobane yena o be a tseba se a tlogo se dira. 7 Filipi a fetola a re: Dinkgwa tša mašeleng a makgolo a mabedi di ka ba hlaela le ge e mongwe le e mongwe a ka tšea mo gonyane. 8 Gwa bolela e mongwe wa barutiwa ba gagwe, ke Andrea ngwanabo-Simone Petro; 9 A re: Go na le mohlankana e a nago le dinkgwa tše tlhano le dihlapi tše pedi; fela, tšeo ke eng ge batho e le ba bakaakaa? 10 Jesu a re: Bokanyang batho fase. Gomme felo fao bjang e be e le bjo bontši; gwa bokana banna ba e ka bago ba dikete tše tlhano. 11 Jesu a tšea dinkgwa tšeo, a leboga, a nea barutiwa, barutiwa ba abela ba ba dutšego; le dihlapi a ba abela ka mo ba bego ba rata. 12 Ge ba hoše, a laela barutiwa ba gagwe a re: Kgobelang maratha a šetšego, gore go se lahlege selo. 13 Ba a kgobela ba tlatša diroto tše lesome la metšo e mebedi ka maratha a dinkgwa tšeo tše thlano, a a šadišitšwego ke ba ba llego. 14 Bjale batho ge ba bona mohlolo woo Jesu a o dirilego, ba re: Ka kgonthe ke yena Moporofeta wa go tla lefaseng. 15 Gomme Jesu, ka ge a tseba gore ba tlo tla ba mo goga gore ba mmee kgoši, a ba ngwegela a boela thabeng a nnoši. 16 Ge e šetše e le mantšiboa, barutiwa ba gagwe ba fologela lewatleng. 17 Ba namela leselawatle, ba boela mošono wa lewatle, motseng wa Kaperenaume. Ke ge leswiswi le šetše le swere; mme Jesu o be a sešo a tla go bona. 18 Lewatle lona la tsošwa ke phefo e kgolo e tšutlago. 19 Ya re ge ba sa sela, ba feditše sebaka se e ka bago dikgato tše dikete tše tharo le go fetiša fao, ba bona Jesu a sepela godimo ga lewatle, a batamela leselawatle; gomme ba boifa. 20 Yena a bolela le bona a re: Ke nna! Se boifeng! 21 Ya ba gona ba ratilego ge a tla go bona leselawatleng. Gomme leselawatle le se hlwe le diega go fihla nageng ye ba bego ba eya go yona. 22 Ka la ka moswana batho ba ba bego ba eme mošono wa lewatle, ba bona ge go se na leselawatle le lengwe moo, ge e se leo barutiwa ba le nametšego. Gomme ba be ba bone ge Jesu a sa ka a namela le bona barutiwa, ba tlogile ba nnoši. 23 Le a mangwe maselawatle a tšwago Tiberia, a be a ile felo fala ba llego dinkgwa ka tšhegofatšo ya Morena. 24 Batho bao ge ba bona Jesu a se gona fao, le barutiwa ba se gona, ba namela maselawatle ba tla Kaperenaume ba nyaka Jesu. 25 Ba tla ba mo hwetša mošono wa lewatle, ba mmotšiša ba re: Moruti, o tlile neng mono? 26 Jesu a fetola a re: Ruri, ruri ke a le botša, ga le nnyake ka gobane le bone mohlolo; Le nnyaka ka gobane le lle dinkgwa tšela la hora. 27 Le se ke la phegelela dijo tše di felago. Phegelelang dijo tše di tlogo dula di le gona go iša bophelong bjo bo sa felego, tše Morwamotho a tlogo le fa tšona, gobane ke yena yo Modimo a mmeilego seka sa gagwe sa bohlatse. 28 Bjale ba mmotšiša ba re: Re ka reng gore re dire mediro ya Modimo? 29 Jesu a fetola a re: Modiro ke gore le dumele Moromiwa wa gagwe. 30 Bona ba re: O tlo dira mohlolo ofe wa gore re bone re go dumele? O tlo dirang? 31 Botatawešo ba lle Mana lešokeng, bjalo ka ge go ngwadilwe gwa thwe: O ba file bogobe bjo bo tšwago legodimong, ba ja. 32 Jesu a re: Ruri, ruri, ke a le botša, ga se Moshe e a le neilego bogobe bjoo bo tšwilego legodimong. Ke Tate wa go le nea bogobe bja makgonthe bjo bo tšwago legodimong. 33 Gobane bogobe bja Modimo ke yena Mofologalegodimong, wa go fa lefase bophelo. 34 Bona ba re: Morena! Re fe bogobe bjoo ka mehla. 35 Jesu a re: Bogobe bja bophelo ke nna. E a tlago go nna a ka se ke a kwa tlala; e a ntumelago a ka se ke a ba a nyorwa. 36 Fela, lena ke le boditše ka re: Le ge le mpone, ga le ntumele. 37 Bohle ba Tate a nneago bona, ba tla go nna; gomme e a tlago go nna, nka se ke ka mo lelekela ntle. 38 Gobane ge ke fologile kua legodimong, ga ka tlela go dira thato ya ka; ke tlile go dira thato ya e a nthomilego. 39 Gomme thato ya Tate e a nthomilego ke gore ke se lahle le o tee wa ba a nneilego bona, bohle ke ba tsoše ka tšatši la mafelelo. 40 Gomme thato ya e a nthomilego ke gore mang le mang a bonago Morwa mme a mo dumela, a be le bophelo bjo bo sa felego, ke mo tsoše ka tšatši la mafelelo. 41 Bajuda ba mo tsota ka ge a itše: Ke nna bogobe bjo bo fologilego legodimong. 42 Ba re: A ga se yena Jesu morwa wa Josefa yo re tsebago tatagwe le mmagwe? Bjale o bolela bjang ge a re: Ke fologile legodimong? 43 Jesu a re: Lesang go tsota seng sa lena. 44 Ga go motho e a kgonago go tla go nna, ge a sa gogwe ke Tate e a nthomilego; gomme ke nna ke tlogo mo tsoša ka tšatši la mafelelo. 45 Baporofeta ba ngwadile ba re: Bohle e tlo ba ba rutilwego ke Modimo. Bohle ba ba kwago tše Tate a di boletšego mme ba ithuta, ba tla go nna. 46 Ga se gore motho o kile a bona Tate; e a mmonego ke eo a tšwago go Modimo. Ke yena a bonego Tate. 47 Ruri, ruri, ke a le botša, e a ntumelago o na le bophelo bjo bo sa felego. 48 Bogobe bja bophelo ke nna. 49 Botataweno ba lle mana lešokeng, moka ba hwa. 50 Bogobe šebo bjo bo fologago legodimong, bjo motho a bo jago a se hlwe a ehwa. 51 Bogobe bjoo bja go phela, bjo bo fologilego legodimong, ke nna. Ge motho a eja bogobe bjo bja ka, o tlo phela go ya go ile. Gomme bogobe bjo nna ke tlogo bo ntšha gore lefase le phele, ke nama ya ka. 52 Ke mo Bajuda ba tšerego kgang seng sa bona, ba re: Motho e a ka re nea bjang nama ya gagwe ra e ja? 53 Jesu a re: Ruri, ruri, ke a le botša, ge le sa je nama ya Morwamotho la nwa madi a gagwe, le ka se be le bophelo mo teng ga lena. 54 E a nago le bophelo bjo bo sa felego ke eo a jago nama ya ka a nwa madi a ka, mme nna ke tlo mo tsoša ka tšatši la mafelelo. 55 Gobane nama ya ka ke sona selewalewa, mme madi a ka ke sona senwewanwewa. 56 E a jago nama ya ka, mme a nwa madi a ka o tlo dula e le wa ka, le nna ke le wa gagwe. 57 E a ntšago o tlo phela ka nna, bjalo ka ge nna ke phela ka Tate, yena Tatemophedi e a nthomilego. 58 Šeboo bogobe bjo bo fologilego legodimong. Ga bo etše bjola bjo botataweno ba bo llego lešokeng, ba fela ba ehwa. E a jago bogobe bjo, o tlo phela ka go sa felego. 59 Ke tšona Jesu a di boletšego ge a ruta phuthegong ya Kaperenaume. 60 Bjale barutiwa ba bantši ba gagwe ge ba ekwa a realo, ba re: Polelo ye ke e thata; a ka kwewa ke mang? 61 Jesu ka go tseba se barutiwa ba gagwe ba dumadumago ka baka la sona, a ba botšiša a re: A seo ke se boletšego se a le kgopiša? 62 Le tlo reng ge le bona Morwamotho a rotogela mo a bego a le gona pele? 63 Se se phedišago ke Moya, nama ga e thuše selo. Mantšu a ke le botšago ona ke Moya le bophelo. 64 Fela, mo go lena go na le ba bangwe ba ba sa dumelego. Gobane go tloga mathomong Jesu o be a tseba gore ba ba dumelago ke bafe, le gore e a tlogo mo eka ke mang. 65 A bolela a re: Ke ka baka leo ke le boditšego ka re: Ga go e a kago tla go nna, ge a sa fiwe ke Tate. 66 Go tloga moo ba bantši ba barutiwa ba gagwe ba gomela morago, ba se hlwe ba sepela le yena. 67 Jesu a botšiša ba lesome la metšo e mebedi a re: Afa le lena ga le rate go tloga? 68 Simone Petro a fetola a re: Morena! Re tlo tloga re leba go mang? O na le mantšu a bophelo bjo bo sa felego. 69 Gomme rena re dumetše ra tseba ge o le Kriste Morwa wa Modimo e a phelago. 70 Jesu a fetola a re: A ga nka ka le hlaola la ba ba lesome la metšo e mebedi? Gomme e mongwe wa lena ke Diabolo. 71 O be a era Judase morwa wa Simone Isikariothe, gobane ke yena a bego a tlo mo eka, e le e mongwe wa ba lesome la metšo e mebedi.
Bajuda ba ngangana le Jesu. Meetse a go phela
1 Go tloga moo Jesu a sepela le naga ya Galilea; o be a sa rate go sepela le naga ya Juda, ka gobane Bajuda ba be ba rata go mmolaya. 2 Ke ge monyanya wa Bajuda wa go hloma mešaša o batametše. 3 Bana babo ba bolela le yena ba re: Sepela o ye nageng ya Juda, gore le barutiwa ba gago ba bone mediro ye o e dirago. 4 Gobane ge motho a rata go tšwelela pepeneneng, ga a fele a dira kutamong. Ge o dira tšeo, iponatše go lefase. 5 Gobane le bana babo ba be ba sa mo dumele. 6 Jesu a fetola a re: Lebaka la ka ga le ešo la ba gona; la lena lebaka le dula le le gona. 7 Lefase le ka se le hloye, mola nna le ntlhoile ka ge le hlatsela ke re mediro ya lona ke e mebe. 8 Lena rotogelang monyanyeneng wo. Nna ga e ešo ya ba go rotogela ga ka monyanyeng wo, gobane lebaka la ka ga le ešo la phethega. 9 A realo, a šala Galilea. 10 Ya re ge bana babo ba rotogile, le Yena a rotogela monyanyeng, e sego pepeneneng; a ya bjalo ka eke o a ikuta. 11 Kua monyanyeng Bajuda ba mo nyaka ba re: Motho eo o kae? 12 Go mmelaela ya ba mo gogolo mašabeng a batho. Ba bangwe ba re: O lokile. Ba bangwe ba re: Aowa, o aroša setšhaba. 13 Gwa se be e mmolelago pepeneneng, ka gore ba be ba boifa Bajuda. 14 Ya re mola monyanya o šetše o hlakane, Jesu a rotogela Ntlongkgethwa a ruta. 15 Bajuda ba tlabega ba re: Naa motho e mangwalo o a tseba bjang a sa rutwa? 16 Jesu a fetola a re: Thuto ya ka ga se ya ka; ke ya e a nthomilego. 17 Ge motho a rata go dira se se ratwago ke yena eo, o tlo lemoga ge thuto ye e le e tšwago go Modimo, ke sa bolele tša ka. 18 E a bolelago tša gagwe, o rata gore go tumišwe yena. E a ratago gore go tumišwe e a mo romilego, ke yena wa go rereša, mme ga a na bokgopo. 19 A ga ke re Moshe o le neile Molao, mme mo go lena gwa se be le e a dirago se Molao o se bolelago. Le reng ge le rata go mpolaya? 20 Lešaba la fetola la re: O ne moyamobe! Ke mang e a ratago go go bolaya? 21 Jesu a re: Ke modiro o tee wo ke o dirilego, la kgotsa ka moka. 22 Moshe o le neile molao wa lebollo, e se go re le thomile ka Moshe; le tšwa go botataweno; gomme le bolotša motho ka Sabatha. 23 Bjalo ge motho a bolotšwa ka Sabatha gore go se selwe molao wa Moshe, le reng le mpefelelwa ge ke fodišitše motho mmele ka moka ka Sabatha? 24 Lesang go hlaola ge le ahlola. Ahlolang ka maohlolelo wa go loka. 25 Ke mo ba bangwe ba Jerusalema ba itšego: A ga se yo ba ratago go mmolaya? 26 Bjale šo o bolela pepeneneng, mme ga ba mmotše selo. A fae ba bagolo ba lemogile ge e le yena Kriste? 27 Fela, yo re tseba mo a tšwago. Gomme Kriste mohla a tlago go ka se tsebe motho mo a tšwago. 28 Bjale Jesu ge a ruta Ntlongkgethwa, a hlaboša lentšu a re: Nna le a ntseba; le mo ke tšwago le a go tseba. Fela, ge ke tla, ga ka itliša; o gona ruri e a nthomilego, yo le sa mo tsebego. 29 O tsebja ke nna, gobane ke tšwa go yena; gomme o nthomile. 30 Bjale ba rata go mo swara; fela, gwa se be le e a mo išago seatla, ka gobane lebaka la gagwe le be le sešo la tla. 31 Mo setšhabeng go be go na le ba bantši ba mo dumelago, ba re: Kriste, mohla a tlago, a o tlo dira mehlolo e kago feta ye e dirilwego ke yena yo? 32 Bafarisei ba kwa setšhaba ge se dumaduma, se mmolela ka ditaba tšeo. Ke mo bona bafarisei le baperisita ba bagolo ba romilego bahlanka, gore ba mo sware. 33 Jesu a bolela le bona a re: Ke sa na le lebakanyana fela ke na le lena, ka tlo tsebo boela go e a nthomilego. 34 Le tlo nnyaka la se nkhwetše; Le ka se ke la fihla mo ke lego gona. 35 Bjale Bajuda ba botšišana ba re: O tlo ya kae, ge a re re ka se ke ra mo hwetša? A o tlo ya mo go faletšego Bagerika, a ruta bona Bagerika? 36 Ba re: Lentšu leo a le boletšego le reng ge a re: Le tlo nnyaka le se nkhwetše, ge a re: Le ka se ke la fihla mo ke lego gona? 37 Ka tšatši la go kgaotša monyanya, e lego lona le legolo, Jesu a ema a hlaboša lentšu a re: Ge motho a nyorwa, a tle go nna a nwe. 38 E a ntumelago ka mo mangwalo a boletšego, mmeleng wa gagwe go tlo tšwa dinoka tša meetse a phelago, tša ela. 39 A realo a era Moya, wo ba dumelago ba tlogo o fiwa; gobane Moyamokgethwa o be o sešo wa ba gona ka ge Jesu a sešo a ba letagong la gagwe. 40 Ba bantši ba setšhaba ge ba ekwa se a se bolelago, ba re: Ka kgonthe, motho yo ke yena Moporofeta. 41 Ba bangwe ba re: Ke yena Kriste. Ba bangwe ba re: A Kriste a ka tšwa Galilea? 42 Ba re: A mangwalo ga a re Kriste o tlo tšwa lelokong la Dafida, o tlo tšwa Betlehema motseng wo Dafida a tšwilego go wona? 43 Gwa ba le phapang mo lešabeng ka baka la gagwe. 44 Ba bangwe ba rata go mo swara; fela, gwa se be le e a mo išago seatla. 45 Bahlanka bala ba boela go baperisita ba bagolo le go bafarisei; ba fihla gwa thwe: Le reng le sa mo tliše; 46 Bahlanka ba re: Ga go ešo gwa ba le motho e a bolelago bjalo ka motho eo. 47 Bafarisei ba ba kgala ba re: E se be le lena le arošitšwe? 48 A go na le e mongwe wa bagolo goba mofarisei e a mo dumetšego? 49 Ke setšhaba se sa go se tsebe Molao; sona ke dihlobogwa. 50 Ke mo Nikodemo, yola wa go tla go Jesu bošego, e le e mongwe wa bona, a ba botšišitšego a re: 51 A gomme ka Molao wa rena re ka bea motho molato a sešo a sekišwa, gwa tsebja se a se dirago? 52 Ba fetola ba re: Anthe le wena o Mogalilea? Tsomeša o bone ge go se moporofeta wa go thwe o tlo tsoga Galilea. 53 Gomme ba phatlalala ba ikela magaeng.
Mosadi wa seotswa. Jesu o fetolana le Bajuda
1 Jesu a ya thabeng ya Mehlware. 2 Ka meso a boela Ntlongkgethwa; batho ka moka ba tla go yena, mme a dula a ba ruta. 3 Bamangwalo le bafarisei ba tla go yena ba tliša mosadi e a swerwego a otswa ba mmea gare. 4 Ba bolela ba re: Moruti! Mosadi e o swerwe a sa tšo dira bootswa. 5 Moshe ka Molao o re laetše gore ba bjalo ba thungwe ka mabje. Ge e le wena o reng? 6 Ge ba realo e be e le go mo leka gore ba hwetše se ba kago mmea molato ka sona. Gomme Jesu a inamela fase, a ngwala mo fase ka monwana. 7 Bjale ge ba phegelela go mmotšiša, a inamologa, a bolela a re: E a se nago sebe mo go lena, a e be yena a thomago go mo thuma ka lebje. 8 A realo a buša a inama a ngwala mo fase. 9 Bona ge ba mo kwile a realo ba tšwa ba šalane morago, ba solwa ke letswalo bohle, ba bagolo le banyane. Jesu a šala a nnoši; le mosadi eo a šala a sa eme moo ba mmeilego gare. 10 Jesu ge a inamologa, a bona ge go se motho, ge e se mosadi eo; a mmotšiša a re: Mosadi, ba kae babegi ba gago? A ga go na e a go lahlilego? 11 Mosadi a re: Aowa, Morena! Jesu a re: Gona le nna ga ke go lahle. Sepela, mme o se ke wa hlwa o dira dibe. 12 Jesu a buša a bolela le bona a re: Ke nna seetša sa lefase. E a ntatelago a ka se ke a sepela leswiswing; o tlo ba le seetša sa bophelo. 13 Bafarisei ba re: Ke gona ge o itlhatsela gee, bohlatse bja gago ga se bja go rereša. 14 Jesu a fetola a re: Le ge ke itlhatsela, bohlatse bja ka ke bja go rereša, gobane mo ke tšwago le mo ke yago ke a go tseba; mme lena ga le tsebe mo ke tšwago le mo ke yago. 15 Lena le ahlola ka go bona mmele wa motho; mme nna ga ke ahlole motho. 16 Le ge nka ahlola, kahlolo ya ka e tlo ba ya go rereša, gobane ga ke noši; go ne nna le Tate e a nthomilego. 17 Gomme Molaong wa lena go ngwadilwe gore bohlatse bja batho ba babedi ke bja therešo. 18 Ge e le nna ke hlatselwa ke nna mong, gomme le Tate e a nthomilego o a ntlhatsela. 19 Bjale bona ba re: Tatago o kae? Jesu a re: Nna ga le ntsebe, mme le Tate ga le mo tsebe, ge le ka be le ntseba, le ka be le tseba le yena Tate. 20 Ditaba tše Jesu o di boletše mo go lego polokelo ya mahumo a ruta Ntlongkgethwa. Gwa se be le e a mo swarago, gobane e be e sešo ya ba lebaka la gagwe. 21 A buša a bolela le bona a re: Ke a tloga, gomme le tlo nnyaka; fela, le tlo hwela sebeng sa lena. Mme mo ke yago, le ka se ke la fihla gona. 22 Bajuda ba re: A e se be a tlo ipolaya, ge a re: Mo ke yago le ka se ke la fihla gona? 23 Jesu a re: Lena le ba mono tlase; nna ke wa godimo. Lena le ba lefase leno, nna ga ke wa lefase leno. 24 Ke sa tšo le botša ka re: Le tlo hwela dibeng tša lena. Gobane ga le dumele se nna ke lego sona, le tlo hwela dibeng tša lena. 25 Bona ba re: O mang? Jesu a fetola a re: Ke sa le se ke felago ke le botša sona. 26 Ke na le tše ntši tša go le bolela ka tšona le go le ahlola; fela, e a nthomilego ke wa therešo, mme nna ke tsebiša lefase tše ke di kwilego go yena. 27 Bona ba se hlaologanye ge a bolela a re: Tate. 28 Ke mo Jesu a itšego: E tlo re ge le fegile Morwamotho, ke mo le tlogo lemoga se ke lego sona, le gore ga ke dire selo ka la ka, le gore ke bolela ka mo Tate a nthutilego. 29 Gomme yena e a nthomilego o na le nna; Tate ga a ntahletše, gobane ke dira se se mo kgahlago. 30 Ge a bolela ditaba tše, ba bantši ba na ba mo dumela. 31 Bona Bajuda bao ba bego ba mo dumela Jesu o boletše le bona a re: Ge le nama le lentšu la ka, le barutiwa ba ka ka go rereša, 32 la tlo tseba therešo, mme therešo ya tlo le lokolla. 33 Ba fetola ba re: Rena re bana ba Aborahama; ga re ešo ra ba bahlanka ba motho le neng. O bolela bjang ge o re: Le tlo lokollwa? 34 Jesu a fetola a re: Ruri, ruri, ke a le botša, mang le mang e a dirago sebe, ke mohlanka wa sona sebe. 35 Mohlanka gomme a ka se dule ntlong go ya go ile; wa go dula go ya go ile ke Morwa. 36 Ke gona, ge Morwa a le lokolla, ke mo le tlogo ba le lokolotšwe ruri. 37 Ke tseba ge le le bana ba Aborahama. Fela le ntsoma gore le mpolaye, gobane lentšu la ka le hloka matseno go lena. 38 Nna ke bolela se ke se bonego go Tate; mme lena le dira tše le di bonego go tataweno. 39 Ba fetola ba re: Rena tatawešo ke Aborahama. Jesu a re: Ge le ka be le le bana ba Aborahama, le ka be le dira mediro ya Aborahama. 40 Ge bjale le ntsoma gore le mpolaye, nna motho wa go le botša therešo ye ke e kwilego go Modimo, le dira se Aborahama a sa kago a se dira. 41 Mediro ye le e dirago ke ya tataweno. Bjale ba re: Ga ra tswalwa ka bootswa; re na le Tatawešo, ke Modimo. 42 Jesu a re: Ge Modimo e ka be e le yena Tataweno, le ka be le nthata, gobane ge ke tlile, setlogo sa ka ke yena Modimo. Ga ka itliša ke romilwe ke yena. 43 Le šiišwa ke eng go hlaologanya se ke se bolelago? Ke ka gobane le sa kgone go kwišiša lentšu la ka. 44 Tataweno yo le tšwago go yena ke Diabolo; mme le phegella go dira mediro ya yena tataweno eo. Ke yena senokwane go tloga mathomong, gobane mo go yena therešo ga e yo, ge a bolela maaka, o bolela tša gagwe; gobane ke yena moaketši le rragomoaketši. 45 Mme nna le sa ntumele, ke ka gobane ke bolela therešo. 46 Ke mang mo go lena a kago mpea molato wa sebe? Gomme ge ke bolela therešo, le sa ntumele le dirwa keng? 47 Motšwa Modimong o kwa lentšu la Modimo. Ge lena le sa kwe, ke ka gobane le sa tšwe Modimong. 48 Bajuda ba fetola ba re: A ga re bolele gabotse ge re re o Mosamaria, le gona ge re re o na le moyamobe? 49 Jesu a fetola a re: E a nago le moyamobe ga se nna. Se se lego gona sese, ke godiša Tate, mme lena le a nkgoboša. 50 Ga se nna ke nyakago gore ke godišwe. E a di nyakago le e a ahlolago o gona. 51 Ruri, ruri, ke a le botša, ge motho a lotola lentšu la ka, a ka se ke a bona lehu go iša go sa felego. 52 Bjale Bajuda ba re: Bjale gona re lemogile ge o na la moyamobe. Aborahama tatawešo o hwile; le baporofeta ba hwile; wena wa tla wa re: Ge motho a lotola lentšu la ka a ka se ke a kwa lehu go iša go sa felego? 53 A o re o e mogolo go Aborahama tatawešo e a hwilego? Le baporofeta ba hwile. O itira mang? 54 Jesu a re: Ge nka be ke ikgodiša, kgodišo ya ka e ka be e se ya selo. E a nkgodišago ke Tate, yo le rego ke Modimo wa lena. 55 Gomme ga le ešo la mo lemoga. O tsebja ke nna. Ge nka re: Ga ke mo tsebe, nka ba wa maaka ka etša bolena. Gomme nna ke a mo tseba; mme ke lotola lentšu la gagwe. 56 Aborahama tataweno o hlalaletše go tlo bona tšatši la ka, a le bona a thaba. 57 Bjale Bajuda ba re: A o re o bone Aborahama mola nywaga ya gago e sešo ya ba e masome a mahlano? 58 Jesu a fetola a re: Ruri, ruri, ke a le botša, mola Aborahama a sešo a tšwelela ke ge nna ke le gona. 59 Bjale gona ba topa mabje a go mmetša. Jesu a ikuta, a tšwa Ntlongkgethwa a iphetela gare ga bona, a tloga.
Sefofu sa go fola Siloa se emela Jesu
1 Jesu, ge a iphetela, a bona motho e a tswetšwego e le sefofu. 2 Barutiwa ba gagwe ba mmotšiša ba re: Moruti, go sentše mang? A e ka ba yena goba batswadi ba gagwe, ge a tlo tswalwa e le sefofu? 3 Jesu a fetola a re: Ga go a senya yena, le ge e le batswadi ba gagwe. Ge a le bjale ke gore mo go yena go bonagatšwe mediro ya Modimo. 4 E ka kgona ke dire mediro ya e a nthomilego, ge letšatši le sa le gona. Go tla bošego bjo motho a ka se kego a dira ka bjona. 5 Ge ke sa le mo lefaseng, ke seetša sa lefase. 6 Ge a itšalo, a tshwa mare a duba seretse ka ona, mme a tlotša mahlo a sefofu seo, 7 A re: Sepela o yo hlapa sedibeng sa Siloa (ke go re sa Boromelo.) Motho eo a ya, a hlapa, a boa a bona. 8 Bjale baagišani le ba ba mmonego mola e sa le mokgopedi, ba re: A ga se yena yola a bego a dutše a kgopela? 9 Ba bangwe ba re: Ke yena. Ba bangwe ba re: O fo swana le yena. Yena mong a re: Ke nna. 10 Ba mmotšiša ba re: Mahlo a gago a budulogile bjang? 11 A ba botša a re: Motho yola ba rego ke Jesu o dubile seretse a ntlotša mahlo, a re: Sepela o yo hlapa sedibeng sa Siloa. Nna ka ya; ke re ke sa hlapa ka bona. 12 Bjale ba re: O kae motho eo? Yena a re: Ga ke tsebe. 13 Ba tšea motho eo a foufologilego, ba mo iša go bafarisei. 14 Bjale, tšatši leo le Jesu a dubilego seretse ka lona a budulola mahlo a sefofu, e be e le la Sabatha. 15 Bafarisei le bona ba mmotšiša ka mo a foufologilego ka gona. A ba botša a re: O mpeile seretse mahlong, ka yo hlapa; mme bjale ke a bona. 16 Ba bangwe ba bafarisei ba re: Motho eo ga se wa Modimo, ka gobane a sa hlokomele Sabatha. Ba bangwe ba re: Motho wa modiradibe a ka kgona bjang go dira mehlolo e mebjalo? Gwa tsoga phapang mo go bona. 17 Ba botšiša sofofu seo ba re: Wena o reng ka yena, ge a go budulotše mahlo. Yena a re: Ke moporofeta. 18 Bajuda ba gana go dumela taba yeo ya ge e be e le sefofu mme a foufologa; ba ba ba bitša batswadi ba motho eo wa go foufologa; 19 Ba ba botšiša ba re: Motho eo a ke ngwana wa lena, yo le rego o tswetšwe e le sefofu? Bjale o bona kang? 20 Batswadi ba gagwe ba fetola ba re: Rena re tseba ge e le ngwana wa rena, le ge a tswetšwe e le sefofu. 21 Se re sa se tsebego ke mokgwa wo a foufologilego ka wona; le eo a mmudulotšego mahlo ga re mo tsebe. Botšišang yena, o godile; o tlo ipolelela. 22 Batswadi ge ba bolela ka mokgwa woo, e be e le ka go boifa Bajuda; gobane Bajuda ba be ba šetše ba lakane ba re: E a mmolelago a re ke yena Kriste, o tlo ntšhiwa phuthegong. 23 Ke ka baka leo batswadi ba gagwe ba itšego: O godile; botšišang yena. 24 Bjale ba mmitša gape, ba bolela nae ba re: Leboga Modimo; rena motho eo re tseba ge e le modiradibe. 25 Yena a fetola a re: Ge e le modiradibe, nna ga ke tsebe; se ke se tsebago sese: Ke be ke le sefofu, ka foufologa. 26 Ba buša ba mmotšiša ba re: O go dirileng? Mahlo a gago o a budulotše ka mokgwa ofe? 27 A fetola re: Ke sa tšo le botša. A ga la kwa? Le reng le rata go kwa gape? A fa le lena le rata go ba barutiwa ba gagwe? 28 Ba mo omanya ba re: Morutiwa wa gagwe ke wena. Rena re barutiwa ba Moshe. 29 Re tseba ge Modimo a boletše le Moshe; gomme motho eo ga re tsebe mo a tšwago. 30 Monna eo a fetola a re: Moo gomme go a kgotsiša, ge le sa tsebe mo a tšwago, etšwe a budulotše mahlo a ka. 31 Modimo re tseba ge a sa kwe badiradibe; ge motho e le wa borapedi, mme a dira se Modimo a se ratago, gona Modimo o a mo kwa. 32 Go tloga mehleng le mehla ga go ešo gwa kwala gore motho o budulotše mahlo a wa go tswalwa e le sefofu. 33 Ge motho eo e ka be e se wa Modimo, a ka be a sa kgona go dira selo. 34 Ba fetola ba re: Wena o tswaletšwe go ba wa sebe ka go fela, wa tla wa re o a re ruta? Mme ba mo lelekela ntle. 35 Jesu a kwa gobane ba mo lelekile. A re go mo hwetša Ntlongkgethwa, a mmotšiša a re: A o dumela Morwa-Modimo? 36 Motho eo a re: Morena! Gomme ke ofe, ke tle ke mo dumele? 37 Jesu a re: Gomme o mmone. E a bolelago le wene ke yena. 38 Motho eo a re: Morena, ke a dumela, mme a mo lotšha. 39 Jesu a re: Nna se ke se tletšego mo lefaseng ke kahlolo, gore ba ba sa bonego ba bone; mme ba ba bonago e be difofu. 40 Ba bangwe ba bafarisei ba mo kwa ge a realo; ba tla ba mmotšiša ba re: A o re le rena re difofu? 41 Jesu a re: Ge le ka be le le difofu, le ka be le se na sebe. Gomme bjale le re: Re a bona! Ke ka baka leo sebe sa lena se dulago se le gona.
Modiši yo bolo. Bajuda ba tšea kgang le Jesu
1 Ruri, ruri, ke a le botša, e a sa tsenego lešakeng la dinku ka mojako, a upša a namela ka gošele, yena eo ke lehodu le mohlakodi. 2 Modiši wa dinku ke eo a tsenago ka kgoro. 3 Moletamojako o tlo mmulela; gomme dinku di e di kwe lentšu la gagwe, a bitša tša gagwe ka maina, a tsebo tšwa natšo. 4 Ge a ntšhitše dinku tša gagwe ka moka, o di ete pele, dinku di latele, gobane di tseba lentšu la gagwe. 5 O šele di ka se mo latele; di tlo mo tšhaba, ka gobane di sa tsebe lentšu la ba šele. 6 Jesu ge a ba botša seswantšho se ga ba ka ba lemoga se a ba botšago ka sona. 7 Jesu a buša a bolela le bona a re: Ruri, ruri, ke a le botša, mojako wa dinku ke nna. 8 Bohle ba ba tlilego pele ga ka ke mahodu le bahlakodi; mme dinku ga tša ka tša ba kwa. 9 Mojako ke nna. Ge motho a tsena ka nna, o tlo phološwa; o tlo fela a tsena a etšwa a hwetša mafulo. 10 Lehodu ge le tla, le tlela go utswa, le go hlaba, le go fediša. Se nna ke se tletšego ke gore di be le bophelo le mohora. 11 Ke nna modiši yo bolo. Modiši yo bolo o gafa bophelo bja gagwe ka baka la dinku. 12 Ge e le mothwalwa yo e sego mong wa dinku, o bona phiri e etla, a lahle dinku a tšhabe; gomme phiri e di sware, e di gašanye. 13 Mothwalwa o a tšhaba, ka gobane e le mothwalwa, a sa re selo ka dinku. 14 Nna ke modiši yo bolo. Tše e lego tša ka ke a di tseba; tša ka le tšona di a ntseba. 15 Bjalo ka ge Tate a ntseba, Tate le nna ke a mo tseba, mme ke gafa bophelo bja ka ka baka la dinku tša ka. 16 Gomme ke sa na le dinku tše dingwe tše e sego tša lešaka le. Le tšona ke swanetše go di gapa; mme di tlo kwa lentšu laka, ya tlo ba mohlape o tee le modiši o tee. 17 Se Tate a nthatelago sona ke ge ke gafa bophelo bja ka ke tle ke boele ke bo tšee. 18 Ga go e a nkamogago bophelo bja ka; ke nna mong ke bo gafago. Ke na le maatla a go bo gafa; le gona ke na le maatla a go boela ke bo tšea. Ke yona taelo ye ke e filwego ke Tate. 19 Gwa buša go tsoga phapang mo go Bajuda ka baka la dipolelo tšeo. 20 Ba bantši ba bona ba re: O na le moyamobe; o hlakane hlogo. Le reng le mo theetša? 21 Ba bangwe ba re: Ditaba tše ga se tša motho wa moyamobe. A moya o mobe o ka budulola mahlo a difofu? 22 Gwa fihla monyanya wa kgetho ya Ntlokgethwa motseng wa Jerusalema; gomme e be e le marega. 23 Jesu a le Ntlongkgethwa a itshepelela mathuding a Salomo. 24 Bajuda ba tla ba mmea gare, ba mmotšiša ba re: O tla hlwa o belaetša dipelo tša rena go le gokae? Ge o le Kriste re botše ka hlatlologanyo. 25 Jesu a fetola a re: Ke le boditše, me ga le dumele. Mediro ye ke e dirago ka ina la Tate ke yona e ntlhatselago. 26 Gomme ge le sa dumele, ke ka gobane le se ba dinku tša ka, bjalo ka ge ke le boditše. 27 Dinku tša ka di kwa lentšu laka. Gomme nna ke a di tseba mme tšona di a ntatela. 28 Ke nna ke di neago bophelo bjo bo sa felego. Di ka se ke tša ba tša lahlega neng le neng. Ga go e a kago di utla atleng tšaka. 29 Tate e a nneilego tšona ke yena Mogologobohle; mme ga go e a kgonago go di utla seatleng sa Tate. 30 Nna le Tate re batee. 31 Moo Bajuda ba buša ba topa mabje a go mo thuma. 32 Jesu a bolela a re: Ke le bontšhitše mediro e mentši e botse ye e tšwago go Tate; ke ka baka la ofe wa yona le tlogo nthuma ka mabje? 33 Bajuda ba re: Ge re go thuma ga se ka baka la modiro o botse; ke ka baka la ge o goboša Modimo; mola o le motho, wa itira Modimo. 34 Jesu a fetola a re: Molaong, a ga go a nagwalwa gwa thwe: Nna ke be ke re le badimo? 35 Ge ešita bao ba boditšwego lentšu leo la Modimo ba thwe le badimo, mangwalo ga a kgone go fedišwa, 36 a mokgethwa wa Tate, yo a mo rometšego lefaseng, a le re o goboša Modimo ge a re: Ke morwa wa Modimo? 37 Ge nka be ke sa dire mediro ya Tate, gona le ka lesa go ntumela. 38 Fela, ge ke dira yona, ge le gana go dumela nna, dumelang yona mediro, gore le tle le lemoge le kgolwe ge Tate a le mo go nna, le nna ge ke le mo go yena. 39 Ba buša ba leka go mo swara; mme a tšwa diatleng tša bona a tloga. 40 A tloga a boela mošola wa noka ya Jorodane, felo mo Johane a kilego a kolobetša gona; a dula moo. 41 Batho ba bantši ba tla go yena, ba re: Le ge Johane a se na mohlolo wo a o dirilego, o rerešitše ka tšohle tše a di boletšego a era motho e. 42 Mme ba felo fao ba mo dumela e le ba bantši.
Latsaro wa Bethania. Bajuda ba lakana Jesu
1 Go be go na le motho e mongwe, Latsaro wa Bethania motsana wa gabo-Maria le Mareta ngwanabo. 2 Maria ke yola wa go tlotša Morena ka setlolo, a mo phumola maoto ka meriri ya gagwe. Kgaetšedi ya eo ke Latsaro; gomme o be a babja. 3 Bokgaetšediagwe ba roma motho a tla go Jesu, a re: Morena, tseba gore yola o mo ratago o a babja. 4 Jesu a di kwa, a re: Bolwetši bjoo ga se bja go iša lehung, ke bja gore go retwe Modimo, le gore Morwa Modimo a retwe ka bjona. 5 Gomme Mareta, le ngwanabo, le yena Latsaro, Jesu o be a ba rata. 6 Bjale ge a kwile gore Latsaro o a babja, a fetša matšatši a mabedi a le felo fao a bego a le gona. 7 Ya ba gona a boletšego le barutiwa ba gagwe a re: A re boeleng re ye nageng ya Juda. 8 Barutiwa ba bolela le yena ba re: Moruti, Bajuda ba sa tšo nyaka go go thuma ka mabje; gomme a o buša o boela gona kua? 9 Jesu a fetola a re: A letšatši ga le na nako tše lesome le metšo e mebedi? Ge motho a sepela mosegare, a ka se ke a kgopša, ka gobane a bona seetša sa lefase le. 10 Fela, ge motho a sepela bošego, o a kgopša, ka ge go se seetša go yena. 11 A realo, a tsebo ba botša a re: Latsaro mogwerarena o robetše; gomme ke ya go mo tsoša borokong. 12 Barutiwa ba gagwe ba re: Morena, ge a robetše, gona o tlo fola. 13 Ge e le Jesu, o be a era go hwa; mme bona ba re o ra go robala boroko. 14 Ke mo Jesu a ba boditšego ka tlhathologanyo, a re: Latsaro o hwile. 15 Fela ke thaba ka baka la lena ge ke be ke se gona, gore le tle le dumele. Bjale gona a re yeng go yena. 16 Gwa fetola Tomase, wa go bitšwa ka la Didimo, a bolela le barutiwa a re: A re yeng le yena re yo hwa nae. 17 Jesu ge a fihla Bethania, a hwetša matšatši e šetše e le a mane a le lebitleng. 18 Bethania e be e le kgauswi le Jerusalema, e ka ba dikgato tše dikete tše pedi; 19 Mme Bajuda ba bantši ba be ba tlile go Mareta le go Maria, go ba emela lehung la ngwanabo. 20 Mareta bjale ge a ekwa gore Jesu o etla, a ya a mo gahlanetša. Ge e le Maria o be a dutše ka ngwakong. 21 Mareta a tla go Jesu a re: Morena, ge o ka be o be o le fa, kgaetšedi ya ka a ka be a sa ka a hwa. 22 Fela, le bjale ke tseba gobane tšohle tše o di kgopelago go Modimo, Modimo o tlo go fa. 23 Jesu a re: Kgaetšedi ya gago e tlo tsoga. 24 Mareta a re: Ke tseba gore o tlo tsoga ka tsogo ya letšatši la bofelo. 25 Jesu a re: Ke nna tsogo le bophelo. E a ntumetšego o tlo phela le ge a ka hwa. 26 Gomme e a phelago a ntumela, a ka se ke a be a hwa go iša go sa felego. A lentšu le o a le dumela? 27 Mareta a re: E, Morena! Nna ke dumetše ge Kriste Morwa wa Modimo Motlafaseng e le wena. 28 Ge a itšalo a tloga, a yo botša Maria ngwanabo ka thopeng a re: Moruti o fihlile; o a go bitša. 29 Maria a re go mo kwa a napa a nanoga a ya go Jesu. 30 Ge e le Jesu, o be a sešo a tsena motseng; o be a sa le felo fala Mareta a mo gahlaneditšego gona. 31 Bjale Bajuda ba ba bego ba na le Maria ka ngwakong ba mo emetše, ge ba mmona a nanoga a tšwela ntle, ba mo šala morago, ba re o yo lla lebitleng. 32 Maria ge a fihla moo Jesu a bego a le ntshe, a mmona, a wela fase maotong a Jesu, a re: Morena, ge o ka be o be o le fa, kgaetšedi ya ka a ka be a sa ka a hwa. 33 Jesu ge a mmona a lla, go lla le Bajuda ba ba tlilego le yena, a huduega moyeng, a hlokofala. 34 A re: Le mmeile kae? Bona ba re: Morena, tlaa o bone. 35 Gomme Jesu a tšwa megokgo. 36 Bajuda ba re: Bonang, gale o be a mo rata! 37 Ba bangwe ba re: Yena e wa go budulola mahlo a sefofu, a ga a ka a kgona go diba lehu la motho e? 38 Jesu a boela a huduega moyeng; mme ba fihla lebitleng. Lebitla e be e le leriba, le le tswaletšwego ka letlapa. 39 Jesu a re: Pshikološang letlapa leo. Mareta kgaetšedi ya mohu a re: Morena! O šetše a nkga, gobane e šetše e le matšatši a mane a hwile. 40 Jesu a re: A ga nka ka go botša ka re: Ge o dumela, o tlo bona letago la Modimo? 41 Ke ge ba pshikološa letlapa la moo mohu a bolokilwego gona. Jesu a lelalela godimo a re: Tata, ke a go leboga gobane o nkwile. 42 Ge e le nna ke tseba gore o nkwa ka mehla; ge ke itšalo ke ka baka la batho ba ba emego fa gore ba dumele ge e a nthomilego e le wene. 43 Ge a itšalo a hlaboša lentšu a re: Latsaro! Tswaa o tle mo! 44 Mohu a tšwa a tatetšwe matsogo le maoto ka mašela, sefahlogong a tatetšwe ka lešelana. Jesu a re: Mo tlemolleng le mo lese a ikele. 45 Ba bantši ba Bajuda ba ba tlilego go Maria, ge ba bona tše Jesu a di dirago, ba mo dumela. 46 Ba bangwe ba bona ba ya go bafarisei, ba ba botša tše Jesu a di dirilego. 47 Baperisita ba bagolo le bafarisei ba napa ba kgopela pitšo, ba re: Re tlo reng? Motho e o dira mehlolo e mentši. 48 Ge re ka fela re mo lesa, bohle ba tlo mo dumela, mme Baroma ba tlo tla ba re amoga naga le batho. 49 Gwa bolela Kayafa e mongwe wa bona, e bego e le yena moperisita e mogolo ka ngwaga woo, a re: Lena ga le tsebe selo. 50 Le gona ga le lemoge gore bokaone le tlo bo bona ge go ehwa motho o tee bakeng sa batho, gore go se senyege setšhaba ka moka. 51 Lentšu leo ga a ka a le bolela ka la gagwe; o porofetile ka ge e le yena moperisita e mogolo ka ngwaga woo; gobane Jesu e be e le wa go hwela setšhaba. 52 E sego go hwela setšhaba seo fela, e be gore a bothe bana ba Modimo ba ba gašanego, gore e be batee. 53 Ke lona tšatši le ba tlogilego ba tlemile la go re ba tlo mmolaya. 54 Jesu go tloga moo a se hlwe a sepela pepeneneng gare ga Bajuda; a tloga a ya nageng ye e bataganego le lešoka, motseng wo ba rego ke Efurema, a dula moo a na le barutiwa ba gagwe. 55 Ke ge go batametše Paseka ya Bajuda. Batho ba go tšwa dinageng ba rotogela Jerusalema e le ba bantši, gore ba hlapišwe dibe Paseka e sa tla. 56 Ba nyaka Jesu; ba botšišana ba eme Ntlongkgethwa, ba re: Le reng ge le bona? A a ka se tle monyanyeng? 57 Ge e le baperisita ba bagolo le bafarisei ba be ba beile molao wa go re, ge motho a tseba mo Jesu a lego gona, a mmege gore ba tle ba mo sware.
Maria o tlotša Jesu. Hosiana, Kgoši ya Isiraele Bagerika ba rata go bona Jesu. O ruta Bajuda Ntlongkgethwa
1 Monyanya wa Paseka ge o fihla, go sa šetše matšatši a selelago, Jesu a tla motsaneng wa Bethania, mo go bego go le Latsaro, yo Jesu a mo tsošitšego mola a hwile. 2 Gona moo ba mo direla monyanya; Mareta a ba apeela; mme Latsaro e be e le mongwe wa ba ba dutšego dijong le Jesu. 3 Maria a tšea sebjana sa setlolo sa theko e kgolo, a tlotša dinao tša Jesu, a di phumola ka meriri ya gagwe; mme ngwako ka moka wa tlala monko wa setlolo seo. 4 E mongwe wa barutiwa ba gagwe, Judase morwa wa Simone Isikariothe, yola wa go tlo mo eka a re: 5 Ke go reng setlolo seo se sa ka sa rekišwa ka mašeleng a makgolo a mararo, a newa badiitšana? 6 Ge a realo o be a sa boledišwe ke go setša badiitšana, ke ka gobane e be e le lehodu, a swere sekhwama sa tše ba bego ba di fiwa. 7 Jesu a re: Mo lese! O di diretše letšatši la go bolokwa ga ka lebitleng. 8 Gobane badiitšana le na nabo ka mehla; ge e le nna le ka se be le nna ka mehla. 9 Batho ba bantši ba Bajuda ba kwa ge a le fao; mme ba tla, e sego ka baka la Jesu fela; ba tla gore ba bone Latsaro eo a mo tsošitšego a hwile. 10 Ke mo baperisita ba bagolo ba lakanego gore le yena Latsaro ba mmolaye; 11 Ka gobane e be e le ka baka la gagwe ge Bajuda ba eya mme ba dumela Jesu. 12 Ka la ka moswana batho ba bantši ba ba tlilego monyanyeng, ba kwa gore Jesu o etla Jerusalema. 13 Ba swara mahlare a molala, ba tšwela go mo gahlanetša, ba hlaboša mantšu ba re: Hosiana, go retwe e a tlago ka leina la Morena, Kgoši ya Isiraele. 14 Jesu a hwetša pokolwana, a e namela, bjalo ka ge go ngwadilwe, 15 Gwa thwe: Se boife, wena Morwedi wa Tsione; še Kgoši ya gago e tla go wena e nametše pokolo. 16 Taba ye barutiwa ba gagwe ga ba ka ba e hlaologanya mehleng yeo; ba e lemogile mola Jesu a šetše a ile letagong, ba elelwa gore mangwalo a mmoletše, mme batho ba mo dira ka mokgwa woo. 17 Batho bala ba bego ba na le yena mohla wola ge a bitša Latsaro a le lebitleng a mo tsoša a hwile, ba be ba mmoletše; 18 Ke ka baka leo setšhaba se mo gahlaneditšego, se kwile gore o dirile mohlolo woo. 19 Bafarisei bona ba botšana ba re: Lebelelang! Ga le fenye selo; lefase ka moka le mo šetše nthago. 20 Mo go ba ba rotogetšego go rapela ka monyanya go be go na le Bagerika ba bangwe. 21 Bona bao ba tla go Filipi wa Betsaida wa Galilea, ba mo kgopela ba re: Morena, re rata go bona Jesu. 22 Filipi a tla a botša Andrea; Andrea le Filipi ba botša Jesu. 23 Jesu a bolela le bona a re: Lebaka la gore Morwamotho a ye letagong la gagwe le tlile. 24 Ruri, ruri, ke a le botša, ge thoro ya mabele e sa wele mobung ya hwa, e tlo dula e nnoši; fela ge e hwa, ke gona e enyago dienywa tše ntši. 25 E a ratago bophelo bja gagwe, o tlo bo timetša. Gomme e a hloilego bophelo bja gagwe lefaseng leno, o tlo bo lotela bophelo bjo bo sa felego. 26 Ge motho a ntirela, a a ntatele. Mo nna ke lego gona, le mohlanka wa ka o tlo ba gona. Ge motho a ntirela, Tate o tlo mo godiša. 27 Moya wa ka o huduegile. Gomme ke tlo reng? Tata! Mphološe nakong ye! Fela, ke tšona tše ke di tletšego nakong ye. 28 Tata! Nea ina la gago letago. Ge a realo gwa kwala lentšu le etšwa legodimong le re: Ke le neile letago; mme ke sa tlo boela ke le nea letago. 29 Lešaba le le emego fao la re: E dumile! Ba bangwe ba re: Ke morongwa a bolelago le yena. 30 Jesu a re: Lentšu leo ga la tlela nna; le tletše bolena. 31 Bjale go tlile kahlolo ya lefase, Bjale mmuši wa lefase le o tlo lahlelwa ntle. 32 Gomme nna e tlo re ge ke phagamišwa, ke tlo gogela bohle go nna. 33 A realo a šupa lehu le a tlogo hwa ka lona. 34 Batho ba fetola ba re: Rena Molaong re kwa gore Kriste ke wa go tlo ba gona ka go sa felego. O rang ge o re: Morwamotho o tlo phagamišwa? Morwamotho eo ke mang? 35 Jesu a fetola a re: Seetša se sa tlo fetša lebakanyana e sego lekae se le mo go lena. Sepelang bjale le sa na le sona seetša, gore le se tlo welwa ke leswiswi. Gomme e a sepelago leswiswing ga a tsebe mo a yago. 36 Ge le sa na le seetša, dumelang sona seetša gore le be bana ba seetša. 37 Jesu ge a boletše ditaba tše, a tloga a ikuta, ba se hlwe ba mmona, mme bona ba se dumele le ge a dirile mehlolo e mekao mo go bona. 38 E be e le gore go phethege lentšu la moporofeta Jesaya ge a re: Morena, ke mang a dumetšego ditaba tše re di begago, mme letsogo la Morena le utolletšwe mang? 39 Ke ka baka leo ba šitilwego go dumela, gobane mo gongwe Jesaya o boletše a re: 40 O foufaditše mahlo a bona, a thatafatša dipelo tša bona, gore ba se hlwe ba bona ka mahlo, ba se ke ba hlaologanya ka pelo, ba se ke ba sokologa ka ba fodiša. 41 Ditaba tše Jesaya o di boletše, mohla wola a bonego letago la Morena, a mmolela a realo. 42 Le ge go le bjalo, ba bantši ba bagolo ba mo dumetše; fela, ba se ipolele ka baka la bafarisei, gore ba se tlo ntšhiwa phuthegong. 43 Ba be ba kganyoga go retwa ke batho, ba nyatša go retwa ke Modimo. 44 Jesu a hlaboša lentšu a re: E a ntumelago ga se gore o dumela nna; o dumela e a nthomilego. 45 Le e a bonago nna, o bona e a nthomilego. 46 Ke tlile mo lefaseng ke le seetša, gore mang le mang e a ntumelago a se ke a dula leswiswing. 47 Ge motho a ekwa mantsu a ka, mme a se dumele, ga ke mo ahlole; gobane ga nka ka tla go ahlola lefase, ke tlile go le phološa. 48 E a nnyatšago mme a se amogele mantšu aka, o na le se se mo ahlolago; se se tlogo mo ahlola ka tšatši la bofelo ke lentšu le ke le boletšego. 49 Gobane ga nka ka bolela ka la ka. Tate e a nthomilego ke yena a ntaetšego tše ke di bolelago ke botša batho. 50 Gomme ke tseba ge taelo ya gagwe e le bjona bophelo bjo bo sa felego. Ke gona, ge ke bolela, ke bolela tše Tate a ntaetšego tšona.
Jesu o hlatswa maota a barutiwa. O a laela
1 Monyanya wa Paseka ge o tla, ke ge Jesu a tseba gore lebaka la gagwe le tlile la go tloga lefaseng le go ya go Tatagwe. Ka ge a ratile ba gagwe ba lefaseng, a hlwa a ba rata go fihla bofelong. 2 Ge ba le selalelong, ke ge Diabolo a šetše a lahletše pelong ya Judase wa Simone wa Isikariothe maano a gore a mo eke. 3 Jesu yena o be a tseba gore Tatagwe o mo neetše tšohle diatleng, le gore a boele go Modimo, boka ge a tšwile go Modimo. 4 A tsoga ba le selalelong, a apola kobo, a tšea lešela, a itlema matheka ka lona. 5 A tšhela meetse mogopong, a thoma go hlatswa maoto a barutiwa ba gagwe, a a phumola ka lešela leo a itlemilego ka lona. 6 Ge a fihla go Petro, Petro a bolela a re: Morena, a ke hlatswiwa maoto ke wene? 7 Jesu a fetola a re: Se ke go dirago sona, ga o ešo wa se tseba; o tlo se lemoga ka morago. 8 Petro a gana a re: O ka se ke wa ba wa ntlhatswa maoto le neng. Jesu a re: Ge ke sa go hlatswe, gona o ka se be le kabelo go nna. 9 Petro bjale a re: Morena, gona a e se be maoto fela; a e be le diatla le hlogo. 10 Jesu a re: E a hlapilego go mo lekane ge a hlatswiwa maoto fela, gobane o hlatswegile moka. Lena le hlatswegile; fela, e sego bohle. 11 A realo ka go tseba wa go tlo mo eka; ke ka baka leo a itšego: Ga la hlatswega bohle. 12 Ge a ba hlatswitše maoto, a tšea kobo ya gagwe, a boela madulong a gagwe; a ba botšiša a re: A le lemogile se ke le diretšego sona? 13 Lena ge le mpolela le re: Moruti le Morena. Gomme ge le realo le a rereša; gobane ke se ke lego sona. 14 Bjale ge nna ke lego Moruti le Morena, ke le hlatswitše maoto, le lena go le swanetše ge le hlatswana maoto. 15 Gobane ke le beetše mokgwa, gore le lena le dire se nna ke se dirilego. 16 Ruri, ruri, ke a le botša, mohlanka ga a fete mong wa gagwe; moromiwa ga a fete moromi wa gagwe. 17 Ge le tseba tšeo, le ba lehlogonolo ge le di dira. 18 Ga se gore ke le bolela bohle, ba ke ba kgethilego ke a ba tseba, gobane go sa tlo phethega mangwalo a rego: E a bego a eja bogobe le nna, o ntsošeditše serethe sa gagwe. 19 Ke le botša tšeo e sa le bjale, di sešo tša direga, gore mohla di diregago, le dumele se ke lego sona. 20 Ruri, ruri, ke a le botša e a amogelago e mongwe wa baromiwa ba ka, o amogela nna, o amogela e a nthomilego. 21 Ya re ge a boletše tšeo, a huduega moyeng, a bolela a re: Ruri, ruri, ke a le botša, e mongwe wa lena o tlo nkeka. 22 Barutiwa ba gagwe ba gadimana ba gakanegile ka go re: O ra mang? 23 Gomme e mongwe wa barutiwa ba gagwe o be a dutše dijong a batagane le Jesu; e be e le yena yo Jesu a bego a mo rata. 24 Simone Petro a kgwatha yena eo, a re a botšiše a re o ra mang. 25 Morutiwa eo wa go batagana le Jesu, a mmotšiša a re: Morena, ke mang? 26 Jesu a re: Ke eo ke tlogo ina thathana ka mo nea. A ina thathana a e nea Judase wa Simone wa Isikariothe. 27 Yena eo, a re ge a e lle, a ba a tsenwa ke Sathane. Jesu a bolela nae a re: Se o se dirago, akgofiša go se dira. 28 Go ba ba dutšego dijong go be go se e a kwešago se a se bolelago ge a realo. 29 Ba bangwe, ka ge Judase a swere sekhwama, ba hloma eke Jesu o re a rekele monyanya tše ba di hlokago, goba a yo hlallela badiitšana. 30 Yena ge a lle thathana yeo, a akgofa a tšwa. Gomme e be e le bošego. 31 Ya re ge a tšwile, Jesu a re: Bjalo Morwamotho o fiwa letago; gomme Modimo e ba wa letago ka yena. 32 Ge Modimo e le wa letago ka yena, le yena Morwamotho Modimo o tlo mo fa letago ka yena Modimo; mme o tlo mo fa letago e sa le bjale. 33 Bana ba ka, ke sa na le lena go se gokaenyana fela. Le tlo nnyaka; gomme ke le botša se ke se boditšego Bajuda: Mo ke yago le ka se ke la tla gona. 34 Ke le nea molao o mofsa, wa go re le ratane, wa go re le ratane bjalo ka nna ge ke le ratile. 35 Seo bohle ba tlogo tseba ka sona ge le le barutiwa ba ka, ke ge le na le leratano. 36 Ke mo Simone Petro a itšego Morena, o ya kae? Jesu a re: Mo ke yago o ka se ke wa ntatela bjale; o tlo ba wa ntatela ka morago. 37 Petro a re: Morena, ke šitišwa ke eng go go latela bjale? Le bophelo bja ka nka bo gafa ka baka la gago. 38 Jesu a fetola a re: A o re le bophelo bja gago o ka bo gafa ka baka la ka? Ruri, ruri, ke a go botša, mogogonope ge o lla, o tlo ba o latotše gararo wa re ga o ntsebe.
Ngwako wa Tate. Moya wa therešo, Molwedi
1 Dipelo tša lena di se tšhoge; dumelang Modimo, le nna le ntumele. 2 Ngwakong wa Tate go na le madulo a mantši. Ge go ka be go se bjalo, a nka be ke le boditše ka re ke ya go le lokišetša sebaka? 3 Ge ke ya go le lokišetša sebaka, ke tlo boa ka le tšea, gore mo nna ke lego gona le lena le be gona. 4 Mo ke yago le a go tseba, le tsela le a e tseba. 5 Gwa bolela Tomase a re: Mo o yago ga re go tsebe; mme tsela re ka e tseba bjang? 6 Jesu a re: Tsela ke nna, le therešo, le bophelo. Ga go e a tlago go Tate ge e se ka nna. 7 Ge nna le ka be le ntsebile, le Tate le ka be le mo tsebile. Bjale le thomile go mo tseba, gomme le mmone. 8 Filipi a re: Morena, re laetše Tatago; ke mo re tlogo wa pelo. 9 Jesu a re: E sa le mola ke na le lena, mme ga o ešo wa ntseba? Filipi, e a bonego nna o bone Tate. O bolela bjang ge o re: Re laetše Tatago? 10 A ga o dumele gore nna ke mo go Tate, le gore Tate o mo go nna? Mantšu a ke a bolelago le lena ga ke bolele a ka; gomme Tate e a dulago a le mo go nna, ke yena a dirago mediro ya gagwe. 11 Ntumeleng ge ke re: Ke mo go Tate, Tate o go nna. Ge le sa kgone, gona le ntumele ka go bona yona mediro. 12 Ruri, ruri, ke a le botša, e a ntumelago, o tlo dira mediro ye ke e dirago, o tlo dira le e fetišago yeo, gobane nna ke ya go Tate. 13 Se le se kgopelago ka Leina la ka, le ge e ka bang, ke tlo se dira, gore Tate a be le letago ka Morwa. 14 Ge le kgopela selo ka leina la ka, e tlo ba nna ke se dirago. 15 Ge le nthata, le lotole melao ya ka. 16 Mme nna ke tlo kgopela Tate, a tlo le nea Molwedi e mongwe, gore a tle a dule le lena go iša go sa felego. 17 Ke Moya wa therešo, wo lefase le sa kgonego go o amogela, ka gobane le sa o bone, mme le sa o tsebe. Lena gomme le a o tseba, ka ge o dutše go lena, mme o tlo ba ka go lena. 18 Nka se ke ka le tlogela la ba dišuana; ke tla go lena. 19 Go šetše lebakanyana, mme lefase le ka se hlwe le mpona. Ge e le lena le tlo mpona, gobane ke a phela, mme le lena le tlo phela. 20 Mohla woo ke mo le tlogo lemoga ge ke le mo go Tate, ge lena le le mo go nna, mme nna ke le mo go lena. 21 E a nago le melao ya ka mme a e lotola, ke yena a nthatago. Mme e a nthatago, o tlo ratwa ke Tate. Le nna ke tlo mo rata ka iponatša go yena. 22 Judase, e sego Isikariothe, a mmotšiša a re: Morena, molato ke eng, ge o tlo iponatša go rena, e sego go lefase? 23 Jesu a fetola a re: Ge motho a nthata, o tlo lotola lentšu la ka; le Tate o tlo mo rata. Gomme re tlo tla go yena ra mo dira madulo. 24 E a sa nthatego, ga a lotole mantšu a ka; gomme lentšu le le le kwago, ke la Tate e a nthomilego. 25 Ditaba tše ke le boditše ke dutše le lena. 26 Yena Molwedi Moyamokgethwa, wo Tate a tlogo o roma ka leina la ka, o tlo le ruta tšohle, o tlo le gakolla tšohle tše ke le boditšego tšona. 27 Ke le tlogelela molao; ke le fa molao wa ka. Nna ga ke le nee ka mo lefase le neago ka gona. Dipelo tša lena di se huduege, di se šie. 28 Le kwile ge ke re: Ke a tloga; ka re ke tla go lena. Ge le nthata, le tlo thaba ge ke re: Ke ya go Tate; gobane Tate o mpheta ka bogolo. 29 Ditaba tše ke le boditše e sa le bjale, di sešo tša direga, gore mohla di diregago le dumele. 30 Nka se hlwe ke bolela tše ntši le lena, gobane mmuši wa lefase o etla; gomme ga a na se a tlogo ntira sona. 31 Fela, emang re tloge mo, gore lefase le tsebe ge ke rata Tate, le gore ke dira tše Tate a ntaetšego tšona.
Morara wa mokgonthe. Malaeledi a go re ba ratane
1 Ke nna sehlare sa morara wa makgonthe; molemi ke Tate. 2 Lekala lefe le lefe mo go nna le sa enywego dienywa, o a le ripa; lefe le lefe le le enywago, o a le thenela gore le atiše dienywa. 3 Lena le šetše le thenetšwe ka lentšu le ke le boditšego lona. 4 Dulang le le mo go nna, ke le go lena. Boka lekala, ge le sa kgone go enywa le le noši, le sa dule sehlareng sa morara, le go lena go tlo ba bjalo, ge le sa dule mo go nna. 5 Sehlare sa morara ke nna, makala ke bolena. E a dulago a le mo go nna, le nna ke le go yena, o tlo enywa dienywa tše ntši, gobane ge le se ne nna, le ka se ke la kgona selo. 6 Motho ge a sa dule a le mo go nna, o lahletšwe ntle bjalo ka lekala ge le omeletše; motho a le topa a le lahlela mollong la swa. 7 Ge le dula le le go nna, le mantšu a ka ge a dula a le mo go lena, gona le tlo kgopela se le se ratago, la se hwetša. 8 Se Tate a tlogo retwa ka sona, ke ge le enywa dienywa tše ntši, le eba barutiwa ba ka. 9 Ke le ratile bjalo ka ge Tate a nthatile. Dulang le le leratong la ka. 10 Ge le lotola melao ya ka, ke gona le dulago le le leratong la ka, bjalo ka ge ke lototše melao ya Tate, ke dutše ke le leratong la gagwe. 11 Ditaba tše ke le boditše, gore lethabo la ka le be gona mo go lena, gore lethabo la lena e be le le tletšego. 12 Molao wa ka šo: Ratanang bjalo ka ge nna ke le ratile. 13 Ga go e a nago le lerato le le fetišago la eo a gafago bophelo bja gagwe ka baka la bagwera ba gagwe. 14 Lena le bagwera ba ka, ge le dira tše ke le laelago tšona. 15 Ga ke re le bahlanka; gobane mohlanka ga a tsebe se mong wa gagwe a se dirago. Lena, ke re le bagwera, ka gobane ke le boditše tšohle tše ke di kwilego go Tate. 16 Ga se lena le ntlhaotšego; ke nna ke hlaotšego bolena, ka le bea gore le ye le bee dienywa; mme dienywa tša lena di dule di le gona, gore se le kago se kgopela go Tate ka leina la ka, a le nee. 17 Se nna ke le laelago sona ke gore le ratane. 18 Ge lefase le le hloya, le tsebe gore le thomile go hloya nna. 19 Ge le ka be le le ba lefase, lefase le ka ba le rata ba e lego ba galo; gomme le le hloile ka ge le se ba galo, ka ge ke le hlaotše lefaseng. 20 Gopolang lentšu le ke le boditšego lona ka re: Mohlanka ga a fete mong wa gagwe. Ge nna ba ntlhomere, le lena ba tlo le hlomara. Ge la ka lentšu ba le lototše, le la lena ba tlo le lotola. 21 Gomme tše ka moka ba tlo le dira ka baka la leina la ka, e a nthomilego ba sa mo tsebe. 22 Ge nka be ke se tle ka ba botša, ba ka be ba se na molato. Gomme bjale ga ba na sa go ipata ka sona bakeng sa sebe sa bona, 23 E a hloilego nna, o hloile le Tate. 24 Ge nka be mo go bona ke se dire mediro ye e sešogo ya dirwa ke motho ba ka be ba se na sebe; bjale gomme ba e bone, moka ba nthloya, le Tate ba mo hloya. 25 Fela, ke gore go phethege lentšu le le ngwadilwego molaong wa bona, la re: Ba fo nthloya. 26 E tlo re ge go tlile yena Molwedi, yo ke tlogo re ke le go Tate ka mo roma a tla go lena, wona Moya wa therešo, e tlo ba yena hlatse ya go mpolela. 27 Gomme le lena le dihlatse ka gobane le be le na le nna go tloga mathomong.
Lefase le tlo ba hloya, Molwedi o tlo ba lemoša, Tatagwe o ba ratile
1 Ditaba šedi tše ke le boditšego tšona, gore le se tlo kgopišwa. 2 Ba tlo le ntšha phuthegong; go tlo ba gwa tla lebaka la ge motho a le bolaya a tlogo re ke gona ge a direla Modimo. 3 Ke tše ba tlogo di dira ka gobane ba sa ka ba tseba Tate, le nna ba sa ntsebe. 4 Ge e le nna ke le boditše ditaba tše, gore mohla lebaka la tšona le tlago, le elelwe gore nna ke le boditše. Ge go tloga mathomong ke sa ka ka le botša, ke ka gobane ke be ke sa na le lena. 5 Bjale ke ya go e a nthomilego; mme mo go lena ga go e a mpotšišago a re: O ya kae? 6 Fela bjale ge ke le boditše, dipelo tša lena di tletše manyami. 7 Gomme ke le botša therešo ge ke re: Go a le hola ge ke tloga. Gobane ge ke sa tloge, Molwedi a ka se tle go lena. Fela, ge ke ya, ke tlo mo roma a tla go lena. 8 Gomme yena e tlo re ge a tlile, a tlo lemoša lefase se e lego sebe, le toko le kahlolo. 9 O tlo le lemoša ge sebe e le go se ntumele. 10 O tlo le lemoša se e lego toko, gobane ke ya go Tate; le ka se hlwe le mpona. 11 O tlo le lemoša se e lego kahlolo; gobane mmuši wa lefase leno o ahlotšwe. 12 Ke sa na le tše ntši tša go le botša; fela ge e le bjale le ka se kgone go di rwala. 13 Mohla go tlile Moya wa therešo, o tlo le sepediša tsela ya therešomoka; gobane a ka se ke a bolela tša gagwe. O tlo bolela se a se kwilego, a tlo le tsebiša tše di tlogo tla. 14 Ke yena a tlogo mpha letago; gobane o tlo tšea go tše di lego go Nna, a tsebiša bolena. 15 Tšohle tše Tate a nago le tšona ke tša ka; ke ka baka leo ke itšego: o tlo tšea go tše di lego go nna, a le tsebiša. 16 Go šetše lebakanyana, le se sa tlo mpona. Gwa tlo buša go feta le bakanyana, la mpona. Gobane nna ke ya go Tate. 17 Mo go barutiwa ba gagwe ba bangwe ba botšišana ba re: O rang ge a re: Go šetše lebakanyana le se sa tlo mpona? Ge a re: Go tlo buša go feta labakanyana la mpona? Ge a re: Ke ya go Tate? 18 Ba re: O rang ge a re: Go sa šetše lebakanyana? Se a se bolelago ga re se tsebe. 19 Jesu a tseba gore ba rata go mmotšiša; a bolela le bona a re: Naa le nyakišana taba ye ke e boletšego ka re: Go šetše lebakanyana le se sa tlo mpona? 20 Ruri, ruri, ke a le botša, le tlo lla la golola; mme lefase le tlo thaba, le tlo nyamišwa; fela, manyami a lena a tlo fetoga thabo. 21 Mosadi ge a belega o ba le bohloko, ge lebaka la gagwe le tlile. E tlo re ge a belege ngwana, a se hlwe a gopola bohloko ka go thabela motho e a belegwego a tla lefaseng. 22 Lena bjale le na le manyami. Fela, ke tlo boela ke le bona, dipelo tša lena tša tlo thaba; gomme lethabo leo la lena le ka se le amogiwe ke motho. 23 Mme mohla woo le ka se mpotšiše selo. Ruri, ruri, ke a le botša, tšohle tše le tlogo di kgopela go Tate ka leina laka o tlo le fa. 24 Go fihla bjale le be le sešo la kgopela selo ka leina la ka. Kgopelang, gomme le tlo tšea, gore lethabo la lena e be le le tletšego. 25 Tše ke di boletšego, ke be ke le botša ka diswantšho. Fela, go tla lebaka, le nka se kego ka hlwa ke bolela le lena ka go swantšha, ka tlo le anegela tša Tate ka tlhathologanyo. 26 Mohla woo ke mo le tlogo kgopela ka leina la ka. Gomme ga ke re ke tlo le kgopelela go Tate. 27 Gobane Tate yena mong o a le rata, ka gobane le nthatile la dumela gore ke tšwa go Modimo. 28 Ke tšwile go Modimo ka tla lefaseng. Ke buša ke tloga lefaseng, mme ke ya go Tate. 29 Barutiwa ba gagwe ba re: Šedio ge, bjale o bolela ka tlhatlologanyo, ga o sa bolela ka go swantšha. 30 Bjale ke gona ge re tsebile gore o tseba tšohle; gomme ga go a swanela, ge motho a sa go botšiša. Rena ka tšona tše re dumetše ge o tšwa go Modimo. 31 Jesu a bolela a re: Bjale le a dumela. 32 Tsebang gore go tla lebaka, le bjale e šetše e le lona, leo le tlogo gašanywa, e mongwe le e mongwe a ya mo a yago; nna la tlo ntlogela ke nnoši. Fela, ga ke noši, gobane Tate o na le nna. 33 Ditaba tše ke le boditše, gore le be le molao ka nna. Mono lefaseng le tlo ba tlalelong. Fela, betang dipelo, gobane lefase le fentšwe ke nna.
Thapelokgolo ya Jesu
1 Jesu ge a itšalo, a lelalela legodimong a re: Tata! Lebaka le tlile; nea Morwago letago, gore le wena o be le letago ka yena morwago. 2 Boka ge o mo neile maatla a go buša nama yohle gore bohle ba o mo neilego bona a ba fe bophelo bjo bo sa felego. 3 Bophelo bjo bo sa felego ke ge ba go tseba, wena Modimodimo o le noši. Ba tsebe le Moromiwa wa gago Jesu Kriste. 4 Ge e le nna, ke go dirile wa letago mo faseng ka go phetha tiro ye o ntaetšego wa re ke e dire. 5 Bjale nea nna letago, wena Tata, ke le kgauswi le wena, ka letago le ke bego ke na nalo ke na nago mola lefase le sešo la ba gona. 6 Ke tsebaditše ina lago mo bathong ba o nneilego bona ba etšwa faseng. E be e le ba gago, wa nnea bona; mme ba lototše ntšu la gago. 7 Bjale ba tsebile ge tšohle tše o nneilego tšona, di etšwa go wena. 8 Gobane ke ba file mantšu a wena o mphilego ona; gomme ba a amogetše, ba tseba sa ruri ge ke tšwa go wena, ba dumela gore o nthomile. 9 Ke kgopelela bona, e sego lefase. Ke kgopelela ba o nneilego bona; ka gobane ke ba gago. 10 Hleng tša ka tšohle ke tša gago, mme tša gago ke tša ka; ka hwetša letago ka bona. 11 Ge e le nna ga ke sa le lefaseng; ba ba lego lefaseng ke bona; mme nna ke tla go wena. Tata, wena mokgethwa! Ba o nneilego bona ba lotole, ba dule ba le leineng la gago, gore e be batee bjalo ka rena. 12 Mola ke sa na le bona lefaseng, ke ba lototše, ba dula ba le leineng la gago, bona ba o nneilego bona. Ke ba dišitše, gwa se lahlege le o tee wa bona, ge e se morwamolahlegi, wa gore go phethege tša mangwalo. 13 Nna bjale ke tla go wena. Ge ke bolela taba tše ke sa le mo faseng ke gore thabo ya ka ba be le yona e le e tletšego. 14 Nna ke ba neile ntšu la gago; mme lefase le ba hloya ka ge e se ba galo, bjalo ka nna ke se wa galo. 15 Ga ke kgopele gore o ba tloše lefaseng; ke ba kgopelela go phemelwa bobe. 16 Bona ga se ba lefase, bjalo ka nna ke se wa lefase. 17 Ba kgethe therešong ya gago; lentšu la gago ke yona therešo. 18 Ke ba roma gore ba ye le lefase, boka mola o nthoma ka tla lefaseng. 19 Ke ikgethile ka ba wa bona, gore le bona e be ba bakgethwa ka therešo. 20 Ga ke kgopelele bona fela; ke kgopelela le bao ba go tlo dumela ka lentšu la bona. 21 Gore bohle e be batee, bjalo ka ge wena Tate o le go nna, le nna ke le go wena. E be batee ka rena gore lefase le tle le dumele gore ke wena o nthomilego. 22 Mme nna, letago le o nneilego lona, ke le neile bona, gore e be batee, bjalo ka ge rena re le batee, 23 nna ke le go bona, wena o le go nna, gore e be ba phethegilego ka botee. Ke mo lefase le tlogo lemoga ge o ratile nna. 24 Tata! Ke rata gore mo nna ke lego gona, le bona ba o nneilego bona ba be gona, ba bone tago la ka le o nneilego lona, o nthatile lefase le sešo la thewa. 25 Tate, wena moloki! Ge e le lefase ga la ka la go tseba; o tsebilwe ke nna; le bona ba lemogile ge wena o nthomile. 26 Ke ba tsebišitše ina lago; mme ke sa tlo ba tsebiša lona, gore lerato wa go nthata ka lona, le be go bona, le nna ke be mo go bona.
Bajuda ba a mo swara, ba a mo sekiša. Petro o a latola; ba mo iša go Pilato
1 Ya re ge Jesu a feditše go bolela ditaba tšeo, a tšwa le barutiwa ba gagwe, a sela nokana ya Kidirone, a tla mo go bego go le serapa, a tsena gona le barutiwa ba gagwe. 2 Le Judase wa go mo eka, felo fao o be a go tseba, ka gobane ke gantši Jesu a phuthegela gona le barutiwa ba gagwe. 3 Mohla woo Judase a tšwa le sehlopha, le bahlanka ba baperisita ba bagolo le ba bafarisei, ba tla gona ba swere dirumola le dipone le marumo. 4 Bjale Jesu, ka gobane a tseba tšohle tše di tlogo mo tlela, a tšwa a ba botšiša a re: Le tsoma mang? 5 Ba fetola ba re: Jesu wa Natsaretha. Jesu a re: Ke nna e! Ke ge Judase wa go mo eka a eme le bona. 6 Bjale Jesu ge a re: Ke nna e, ba kgaramologa ba wela fase. 7 A buša a ba botšiša a re: Le tsoma mang? Bona ba re: Jesu wa Natsaretha. 8 Jesu a re: Ke le boditše ka re ke nna. Bjale ge le tsoma nna, lesang ba ba ikele. 9 E be e le gore go phethege le a le boletšego a re: Ba o nneilego bona, ga ka lahlegelwa ke o tee wa bona. 10 Simone Petro yena a bego a na le tšhoša, a e hlomola, a rema mohlanka wa moperisita e mogolo, a mo ripa tsebe ya go le letona. Leina la mohlanka eo e be e le Malego. 11 Gomme Jesu a sola Petro a re: Bušetša thšoša bodulong bja yona. A o re senwelo se Tate a nneilego sona ke se ke ka se nwa? 12 Bjale ba sehlopha, le tona, le bahlanka ba Bajuda, ba swara Jesu ba mo tlema. 13 Ba thoma ka go mo iša go Hanna; gobane e be e le yena mogwegadi wa Kayafa yo e bego e le moperisita e mogolo ka ngwaga woo. 14 Kayafa ke yola wa go eletša Bajuda a re: Go kaone ge motho o tee a hwela setšhaba. 15 Simone Petro, a na le morutiwa e mongwe, a latela Jesu. Morutiwa eo o be a tsebana le moperisita e mogolo, a tsena le Jesu lapeng la moperisita e mogolo. 16 Petro a ema mojako ka ntle. Morutiwa eo wa go tsebana le moperisita e mogolo, a boa a bolela le moletedi wa mojako, a tsentšha Petro. 17 Mosetsana eo wa go leta mojako, a botšiša Petro a re: A ga o e mongwe wa barutiwa ba motho eo le wena? Petro a re: Ga se nna. 18 Ge e le balata le bahlanka, ba be ba eme ba gokolotše magale ba ora, gobane go be go le maruru. Petro a ema le bona a ikomoša. 19 Ke ge moperisita e mogolo a botšiša Jesu barutiwa ba gagwe le thuto ya gagwe. 20 Jesu a fetola a re: Nna ke boletše le lefase pepeneneng. Ke rutile ka mehla diphuthegong le Ntlongkgethwa, mo go phuthegelago Bajuda ka moka. Ga nka ka bolela thopeng. 21 O reng o botšiša nna? Botšiša bao ba kwilego se ke ba boditšego sona; ke bona ba tsebago tše nna ke di boletšego. 22 Ge a realo, e mongwe wa bahlanka e a bego a eme fao, a phasola Jesu thama a re: A o fetola ka mokgwa wo ge o bolela le moperisita e mogolo? 23 Jesu a fetola a re: Ge o re ke boletše le lebe, laetša bobe bja lona; ge ke boletše gabotse, o ntielang? 24 Hanna a mo romela go Kayafa moperisita e mogolo, a ya a le bjalo a tlemilwe. 25 Simone Petro o be a sa eme a ikomoša. Ba mmotšiša ba re: A ga o e mongwe wa barutiwa ba gagwe le wena? Petro a latola a re: Ga se nna. 26 Gwa bolela e mongwe wa gabo yola wa go ripiwa tsebe ke Petro, a re: A ga nka ka go bona o na nae kua serapeng? 27 Petro a buša a latola; gomme mogogonope wa napa wa lla. 28 Moo ga Kayafa ba tloga ba na le Jesu, ba mo iša ngwakong wa kahlolo. Gomme e be e sa le ka meso. Bona ba se tsene gore ba se tlo tšhilafala ba ithibela go ja Paseka. 29 Pilato a tšwela go bona, a botšiša a re: Motho e le mmega ka molato ofe? 30 Ba fetola ba re: Ge motho e e ka be e se mosenyi, re ka be re sa mo tliša go wene. 31 Pilato a re: Mo tšeeng gee le mo sekiše ka molao wa lena. Bajuda ba re: Hleng re ileditšwe go bolaya motho! 32 E be e le gore go phethege lentšu la Jesu, le a le boletšego a ba botša mokgwa wo a tlogo bolawa ka wona. 33 Pilato a boela ngwakong wa kahlolo, a bitša Jesu a mmmotšiša a re: A ke wena kgoši ya Bajuda? 34 Jesu a fetola a re: A tše o di bolelago ke tša gago, goba ke tša ba bangwe ba go mpolela go wena? 35 Pilato a re? A ke Mojuda? Ke setšhaba sa geno le baperisita ba bagolo ba ba go tlišago go nna. O dirileng? 36 Jesu a fetola a re: Mmušo wa ka ga se o tšwago faseng leno. Ge mmušo wa ka o ka be o etšwa lefaseng leno, bahlanka ba ka ba ka be ba o hlabanela. Bjale mmušo wa ka ga se o tšwago mono. 37 Pilato a mmotšiša a re: Anthe o kgoši? Jesu a fetola a re: O boletše; ke kgoši. Ke se ke se tswaletšwego; ke tletše sona lefaseng gore ke be hlatse ya therešo. Gomme mang le mang e lego wa therešo o kwa lentšu la ka. 38 Pilato a fetola a re: Therešo ke eng? A realo a boela a tšwela go Bajuda a re: Nna ga ke hwetše molato go yena, le ofe. 39 Fela, go na le motlwae wa gore ke le lokollele motho ka monyanya wa Paseka. Bjale a le rata ge nka le lokollela kgoši ya Bajuda? 40 Ba buša ba goa bohle, ba re: E se be yo! A e be Baraba! Gomme Baraba eo e be e le mohlakodi.
Kahlolo ya Pilato. Jesu o hwela sefapanong; o a bolokwa
1 Ya ba gona Pilato a mo tšerego a mo otla. 2 Bahlabani ba loga mphapahlogo ka meetlwa, ba o bea hlogong ya gagwe, ba mo apeša kobo ya matsaka. 3 Ba tla ba re: Dumela, Kgoši ya Bajuda! Ba mo phasola dithama. 4 Pilato a buša a tšwa, a bolela a re: Bonang, ke mo tliša fa ntle go lena, gore le tsebe gobane ga go molato wo ke o hwetšago go yena. 5 Jesu a tla a rwele mphapahlogo woo wa meetlwa, a apere kobo yeo ya matsaka. Pilato a re: Bonang, ke motho mang! 6 Baperisita ba bagolo le bahlanka, ge ba mmona, ba goa ba re: Mmapole, mmapole! Pilato a re: Gona mo tšeeng lena, le mmapole. Ge e le nna ga ke hwetše molato go yena. 7 Bajuda ba fetola ba re: Re na le molao wo o rego, o swanetše go bolawa, gobane o itirile morwa wa Modimo. 8 Bjale Pilato ge a ekwa tšeo, ya ba gona a boifago. 9 A boela ngwakong wa kahlolo, a botšiša Jesu a re: O wa go kae? Mme Jesu a se fetole. 10 Pilato a ba a re: A ga o bolele le nna? A ga o tsebe ge ke na le maatla a go go lokolla, le maatla a go go bapola? 11 Ke mo Jesu a fetotšego a re: O ka be o se ne maatla a go ntira selo le sefe, ge o ka be o sa ka wa a fiwa a etšwa legodimong. Ke ka baka leo molato o mogolo e le wa bao ba nkgafetšego wena. 12 Go tloga moo Pilato a phegelela go mo lokolla. Fela, Bajuda ba goa ba re: Ge o ka lokolla motho e, gona ga o motho e a kwanago le Kesara, gobane mang le mang e a itirago kgoši, o lwa le Kesara. 13 Pilato ge a ekwa ba realo, a ntšhetša Jesu ntle, a dula sedulong sa kahlolo, felo ga mathudi, mola Sehebere ba rego ke Gabatha. 14 E be e le letšatši la go itokišetša Paseka, e nyakile go ba nako ya go selela. Pilato a re: Šeowe kgoši ya lena! 15 Bajuda ba goa ba re: Mo tloše! Mo tloše! Mmapole! Pilato a re: A ke bapole kgoši ya lena? Baperisita ba bagolo ba fetola ba re: Ga re na kgoši ge e se Kesara. 16 Ya ba gona a mo gafelago bona gore a bapolwe. Ba tšea Jesu ba tloga nae. 17 Jesu a ya a rwele sefapano sa gagwe. Ba tšwela, felo mo ba rego ke Legateng. Ka Sehebere ba re ke Gologotha. 18 Gona moo ba mmapola; gwa bapolwa le ba bangwe ba babedi ba bewa thoko ye le ye, Jesu a ba gare. 19 Pilato a ngwala lengwalo, a le bea nthleng ya sefapano; a ngwala a re: JESU WA NATSARETHA KGOŠI YA BAJUDA. 20 Bajuda ba bantši ba bala lengwalo leo, gobane felo mo Jesu a bapotšwego, e be e le kgauswi le motse; gomme le be le ngwadilwe ka Sehebere le ka Segerika le ka Seroma. 21 Baperisita ba bagolo ba Bajuda ba tla go Pilato ba re: Se ngwale o re: kgoši ya Bajuda. O nke o re: O itše ke nna kgoši ya Bajuda. 22 Pilato a fetola a re: Se ke se ngwadilego ke se ngwadile. 23 Bahlabani ge ba feditše go bapola Jesu, ba tšea diaparo tša gagwe, ba di aroganya karolo tše nne, mohlabani a tšea karolo. Ba tšea le yona kobo. Yona e be e se na moroko, e logilwe go tloga godimo go ya mo go fela. 24 Ba botšana ba re: A re se e gagoleng. A re direng matengwa, re bone ge e tlo ba ya mang. E be e le gore go phethege lengwalo le le rego: Ba abelane diaparo tša ka; mme kobo ya ka yona ba e direla matengwa. Ke tšona tše bahlabani ba di dirilego. 25 Mo sefapanong sa Jesu go be go eme mmagwe, le ngwanabommagwe, le Maria mogatša Kleopa, le Maria Magdalena. 26 Jesu ge a bona mmagwe, le morutiwa yo a bego a mo rata a eme le yena, a bolela le mmagwe a re: Mosadi, morwa wa gago šoo. 27 A tsebo bolela le morutiwa eo, a re: Mmago šoo! Go tloga ka nako yeo morutiwa eo a mo iša gagabo. 28 Ge go fetile lebaka, ge Jesu a tseba gore go phethegile tšohle gore go phethege mangwalo, a re: Ke nyorilwe! 29 Go be go beilwe pitša e nago le mokgope gona moo. Ba tšea motšitla, ba o ina mokgopeng, ba o hlomela lehlakeng, ba o iša molomong wa gagwe. 30 Gomme Jesu ge a nwile mokgope woo, a re: Go phethegile, a duta hlogo a neela moya. 31 Bjale Bajuda, ka go re mebele e se ke ya dula e bapotšwe difapanong ka la Sabatha, ka gobane Sabatha ya tšatši leo e be e le e kgolo, e šetše e le letšatši la go itokišetša yona, — ba kgopela Pilato ba re ba ba bapotšwego ba robje maoto, ba kgone ba fegollwa. 32 Bahlabani ba tla ba roba maoto a wa pele, le a wa bobedi a bego a bapotšwe nae. 33 Ge ba etla go Jesu, ba hwetša a šetše a hwile; ba lesa go mo roba maoto. 34 E mongwe wa bahlabani a mo phula lehlakore ka lerumo, gwa napa go etšwa madi le meetse. 35 E a di bonego e bile hlatse ya tšona; mme bohlatse bja gagwe ke bja go rereša. O tseba ge a bolela therešo, gore le lena le dumele. 36 Dilo tše di diregile gore go phethege lengwalo le le rego: O se ke wa roba lešapo la yona. 37 Le gona go na le lengwalo le lengwe le le rego: Ba tlo lebelela yo ba mo hlabilego. 38 Ge go fetile lebaka, Josefa wa Arimathea, e bego e le morutiwa wa Jesu, gomme a ikutile ka go boifa Bajuda, a tla a kgopela Pilato mmele wa Jesu. Pilato a dumela. Josefa a tla a fegolla mmele wa Jesu. 39 Gwa tla le Nikodemo. Ke yola wa go tla go Jesu bošego. Yena a tla le ditlolo tše di hlakantšhitšwego le dinoko, tše e nyakilego go ba tša diponto tše lekgolo. 40 Ba tšea mmele wa Jesu, ba o phuthela ka mašela le dinoko tšeo; ba dira ka mokgwa wa Bajuda wa go boloka mohu. 41 Gomme felo moo Jesu a bego a bapotšwe gona, go be go le serapa. Serapeng seo go be go le lebitla le lefsa, le go sešogo gwa bewa motho go lona. 42 Ke gona moo ba beilego Jesu gona, ka gobane lebitla leo le be le le kgauswi, le gona e be e le letšatši la Bajuda la go itokiša.
O tsoga bahung. Maria Magdalena. Thomase
1 Ka la pele la go hlatlama Sabatha, e sa le lerotho, Maria Magdalena a tla lebitleng, a bona lebje le tlošitšwe lebitleng. 2 A napa a kitima a tla go Simone Petro, le go morutiwa eo Jesu a bego a mo rata, a bolela a re: Ba ntšhitše Morena lebitleng; gomme mo ba mmeilego ga re go tsebe. 3 Petro le morutiwa eo ba tšwa ba ya lebitleng. 4 Ba ya ka go kitima ka babedi. Morutiwa eo e mongwe a šia Petro, a fihla pele lebitleng. 5 A inama a nyarela, a bona mašela a beilwe; mme a se ke a tsena. 6 Petro, a mo šetše nthago, a fihla a tsena lebitleng, a bona mašela a beilwe. 7 Lešelana le bego le le hlogong ya Jesu, a bona le sa ka la bewa le mašela a mangwe, le mennwe le beilwe thoko. 8 Le morutiwa eo wa go fihla pele lebitleng, a tsena, a bona a dumela. 9 Gobane ba be ba sešo ba hlaologanya lengwalo le le rego o swanetše go tsoga bahung. 10 Barutiwa bao ba boela gae. 11 Maria yena o be a eme ka ntle ga lebitla, a lla. A sa lla a inama a nyarella lebitleng. 12 A bona barongwa ba babedi ba ba bego ba apere bošweu ba dutše moo mmele wa Jesu o bego o beilwe gona, e mongwe ka hlogong, e mongwe ka maotong. 13 Ba mmotšiša ba re: Mosadi, o llelang? Yena a re: Ba tšere mong wa ka; mme ga ke tsebe mo ba mmeilego. 14 Ge a sa realo a retologa, a bona Jesu a eme moo, mme a se tsebe ge e le Jesu. 15 Jesu a mmotšiša a re: Mosadi, o llelang? Maria a sa re ke moloti wa serapa, a re: Morena, ge o mo tlošitše, mpotše mo o mmeilego, ke tle ke mo tšee. 16 Jesu a re: Maria! Maria a retologa, a bolela ka Sehebere, a re: Rabuni, ke gore: Moruti. 17 Jesu a bolela nae a re: Se ntshware; gobane ke sa tlo rotogela go Tate. Sepela o ye go bana bešo, o ba botše o re: Ke rotogela go Tate, le go Tataweno, go Modimo wa ka, le go Modimo wa lena. 18 Maria a tla a botša barutiwa a re: Ke bone Morena, mme tše a ntaetšego šedi. 19 Ka mantšiboa a lona tšatši leo la go hlatlama la Sabatha, mejako ya mo barutiwa ba phuthegetšego gona e tswaletšwe ka go boifa Bajuda, Jesu a tla a ema mo gare, a ba dumediša a re: Khutšo a e be go lena! 20 A realo a ba laetša diatla le lehlakore la gagwe. Ke gona barutiwa ba thabilego ge ba bona Morena. 21 Jesu a boela a re: Khutšo a e be go lena. Bjale ka ge Tate a nthomile, bjale nna ke roma bolena. 22 Ge a realo a ba budulela, a re: Amogelang Moyamokgethwa. 23 Bao le ba rolago dibe ba rotšwe; bao le sa ba rolego, ga ba rolwa. 24 Tomase, e mongwe wa ba lesome le metšo e mebedi, e a bitšwago ka la Didimo, o be a se gona ge Jesu a etla. 25 Barutiwa ba bangwe ba mmotša ba re: Re bone Morena. Yena a re: Ge ke sešo ka bona mabadi a dimapolo diatleng tša gagwe, ka iša monwana mo mabading a dimapolo, ka iša seatla lehlakoreng la gagwe, nka se ke ka dumela. 26 Ge go fetile matšatši a seswai barutiwa ba gagwe ba be ba le ngwakong gape, le Tomase a na le bona. Jesu a tla mejako e tswaletšwe, a ema mo gare, a ba dumediša a re: Khutšo a e be go lena! 27 A tsebo bolela le Tomase a re: Tliša monwana wa gago, o bone diatla tša ka. O tliše seatla sa gago, o se iše lehlakoreng la ka; mme o se be moganyetši, o be modumedi. 28 Tomase a fetola a re: Morena wa ka! Modimo wa ka! 29 Jesu a re: Tomase! O dumela o mpone. Ba lehlogonolo ke ba dumetšego ba sa bona. 30 Mehlolo ye Jesu a e dirilego a bonwa ke barutiwa ba gagwe ke e mentši, ye e sa kago ya ngwalwa pukung ye. 31 Gomme tše di ngwadilwego ke tša gore le dumele ge Jesu e le yena Kriste, le gore ka go dumela le be le bophelo ineng la gagwe.
Barutiwa ba na le Jesu lewatleng la Tiberia
1 Ge go fetile lebaka, Jesu a boela a iponatša go barutiwa ba gagwe lewatleng la Tiberia. Tša ge a iponatša moo šedi: 2 Simone Petro, le Tomase wa go bitšwa ka la Didimo, le Nathanaele wa Kana wa Galilea, le barwa bala ba Tsebedeo, ba be ba le gammogo. 3 Simone Petro a bolela nabo a re: Nna ke yo rea dihlapi. Bona ba re: Le rena re ya nago. Ba tšwa ba namela leaselawatle; mme bošego bjoo ba se sware selo. 4 Ya re ge go šetše go esa, Jesu a ema lebotong, barutiwa ba se tsebe ge e le yena Jesu. 5 Jesu a bolela nabo a re: Bana ba ka! A ga le na sešeba? Ba fetola ba re: Aowa. 6 Jesu a re: Lahlelang malokwa ka lehlakoreng le letona la leselawatle; ke mo le tlogo swara. Ba a lahlela gona, ba šitwa le go a goga ka bontši bja dihlapi. 7 Ke mo morutiwa eo Jesu a bego a mo rata a boletšego le Petro a re: Ke Morena. Petro a re go kwa ge e le Morena, a itlema ka seaparo, gobane o be a hlobotše, a napa a ikušetša lewatleng. 8 Barutiwa ba bangwe ba tla ka leselawatle; gobane e be e se kgole le naga, e be e ka ba kgato tše makgolo a mabedi. 9 Bjale ge ba fologela nageng, ba bona go le mollo wa magala, go šimetšwe hlapi le senkgwa. 10 Jesu a re: Tlišang tše dingwe tša dihlapi tše le tšwago go di swara. 11 Petro a namela, a gogela malokwa fase a tletše dihlapi tše kgolo, e le tše lekgolo le nago le masome a mahlano a metšo e meraro; gomme le ge e le tše kao, malokwa a se gagoge. 12 Jesu a re: Tlang re fihloleng. Gwa se be le o tee wa barutiwa ba gagwe e a lekilego le go re: O mang? Gobane ba tsebile ge e le yena Morena. 13 Jesu a tla, a tšea senkgwa a ba nea, le hlapi a e dira ka mokgwa woo. 14 E be e šetše e le la boraro ge Jesu a iponatša go barutiwa ba gagwe a tsogile bahung. 15 Ge ba feditše go fihlola, Jesu a bolela le Simone Petro a re: Simone Morwajona! A o nthata go fetiša ba? Petro a re: E Morena, o tseba gobane ke a go rata. Jesu a re: Fudiša dikwanyana tša ka. 16 A boela a mmotšiša la bobedi a re: Simone Morwajona! A o a nthata? Petro a re: E Morena, o tseba gobane ke a go rata. Jesu a re: Diša dinku tša ka. 17 A mmotšiša la boraro a re: Simone Morwajona! A o a nthata? Petro a hlokofala ge a mmotšiša la boraro a re: A o a nthata; a fetola a re: Morena, o tseba tšohle, o tseba gobane ke a go rata. Jesu a re: Fudiša dinku tša ka. 18 Ruri, ruri, ke a go botša, mola o sa le e mofsa, o be o itlema matheka ka noši, wa ikela mo o bego o go rata. E tlo re ge o tšofetše, o tlo ntšha matsogo a gago, mme wa tlengwa ke e mongwe, a go iša mo o sa go ratego. 19 Ge a realo e be e le go mo swantšhetša lehu le yena Petro a tlogo godiša Modimo ka lona. Ge a itšalo a re: Ntatele. 20 Petro ge a retologa, a bona morutiwa yola Jesu a bego a mo rata, a latela. Ke yola a bego a batagane le Jesu ba le salalelong, a botšiša Jesu a re: Morena, ke mang a tlogo go eka? 21 Petro a re go mmona, a botšiša Jesu a re: Morena, gomme eo o tlo reng? 22 Jesu a re: Ge nka rata gore mohla ke tlago ke mo hwetše a le gona, a ke taba ya gago? Wena ntatele. 23 Ke mo go tšwago morero mo go badumedi, wa go re morutiwa eo a ka se ke a hwa. Fela, Jesu ga a ka a re: A ka se ke a hwa; o itše: Ge nka rata gore mohla ke tlago ke mo hwetše a le gona, a ke taba ya gago? 24 Morutiwa eo ke yena e lego hlatse ya ditaba tše; ke yena a di ngwadilego. Gomme re tseba gobane bohlatse bja gagwe ke bja go rereša. 25 Go sa na le tše dingwe tše ntši tše Jesu a di dirilego, tše e rego ge di ka ngwalwa ka go hlatlamana ga tšona, nna ke re lefase le ka se akaretše mangwalo ao a bego a ka ngwalwa.