1 Ntanzi ya kulengua byonse, Keebo waali waliko. Ozo Keebo waali pamo ni Leza, kabili i waali Leza. 2 Ntanzi Keebo waali wali pamo ni Leza. 3 Leza waalengele byonse na Keebo, pasili Keebo, tekuli kantu kaalengelue. 4 Bukose bwaali mu Keebo, ni bukose bwaali musaniko wa bantu. 5 Musaniko uliwasanika mu nfinzi, inzi nfinzi yaandilue kuuzimia. 6 Leza waatumine mukenzi wakue liina lyakue Yoane. 7 Ozo mukenzi waizile kusininkizia palua musaniko evi bantu bonse bonvue ni kuzumina. 8 Yoane taali musaniko, inzi wene waizile kusininkizia palua ozu musaniko. 9 Ozu i musaniko wa kiine uliwaiza kusanikila kubalua muntu ali mu kyalo. 10 Ozo Keebo waali mu kyalo. Leza waalengele kyalo na Keebo, inzi bekala kyalo tebaamumanine Keebo. 11 Keebo waizile kwabo, Inzi bakwabo tebaamupokeleele. 12 Bonse baamupokeleele ni kumuketekela, Leza waabapeele buvinde bwa kwaluka bena Leza. 13 Baba bena Leza tebaavyelue mulimwavyalilua bantu bonse na maka a bumuntu, ao na maka a kimubili, ao na kutona kwa muntu, inzi baavyelue na Leza. 14 Ozo Keebo waizile kwialula muntu waikeele pamo ni fwefue. Twaamwene bulumba bwakue, bulumba bwakua muvyalua lyonga wizuzi buwame ni kiine, bulumba buapeelue na Se. 15 Yoane waasininkiziizie walanda, "Ozu i olia unaamyanine nangue, 'Kuli muntu umo alimukwiza mu kyamba kyane, wene i mukulu kunkila pantu waaliko lunaali nsinavyalue.' " 16 Kabili mu buwame bwakue twaapaaliiluemo sana. 17 Leza waamutumine Musa kuya kubapeela bantu Mizilo, inzi Yesu Kristu i waaleetele buwame ni kiine. 18 Tekuli ata muntu waamumwene Leza. Inzi Mwana lyonga ali mu kyeni kyakua Se, ni ye i wenka Leza, wene i waatumaniizie Leza. 19 Bayuda ba mu Yeruzalemu baatumine babitambua ni Balawi baye bamwipuzie nangue, "Ati, uli ni?" 20 Yoane waabaasukile wasininkizia nangue, "Nene nsili Kristu." 21 Kabili baamwipuziizie, "Eba, ale uli ni? Uli Elia?" Yoane waabaasukile, "Ata, te nene." Baamwipuziizie, "Eba, wewe i olia kabika?" Yoane waabaasukile, "Ata, te nene!" 22 Kupwako bamwana, "Twane kine wewe uli ni, evi tuye tubaane balia batutumanga. Ati, we mwine uliwalanda nangue uli ni?" 23 Yoane waalandile, "Nene ndi lizui lya muntu aliwapunda mu kaseeba nga mwaalandiile kabika Isaya nangue, 'Olole nzila yakua Mulopue!' " 24 Babo bantu baali baatuminue na Bafarizeo 25 baamwipuziizie Yoane, "Eba, ale wewe ulimukubatiziizia ki kine teuli Kristu, ao kine teuli Elia, ao kine teuli olia Kabika apembeelue?" 26 Yoane waabaasukile, "Nene ndimukubatizia mu menda, inzi pakati kenu pemeene muntu umo umusimanine. 27 Wene i alimukwiza mu kyamba kyane, kabili nsipalile kumukakula mikonda ya ku nkwabilo yakue." 28 Totu tonse twaakitikiile ku Betania ku bwala Mwenzi wa Yordani kwaali kwabatiziizia Yoane. 29 Lukeele lwakue Yoane luamumwene Yesu walimukwiza, waalandile evi, "Ozu i Mwana mukooko wakua Leza aliwafumia bibalo bya bantu! 30 Ozu i olia unaamyanine nangue, 'Kuli muntu umo alimukwiza mu kyamba kyane, wene i mukulu kunkila pantu waaliko lunaali nsinavyalue.' 31 Nene nsyaali namumanine, inzi naizile kubatizia mu menda evi Baizraeli bamumane." 32 Kabili Yoane waasininkiziizie nangue, "Naamwene Mweo wafuma mwiulu nga nkunda ni kwikalilila pali Yesu. 33 Nsyaali namumanine, inzi Leza antumine kubatizia mu menda, i wanghanine nangue, 'Olia uwaakamona wakookelua na Mweo ni kwikalililua, i waakabatizyania mu Mweo Muzuuke.' 34 Naimweneene, kabili naasininkiziizie nangue, ozu i Mwina Leza." 35 Kabili lukeele lwakue Yoane waali waimeene penka papo pamo ni basambi bakue babili. 36 Luamwene Yesu walimukupita, Yoane waalandile, "Olia i Mwana mukooko wakua Leza." 37 Babo basambi babili lubaunvwile Yoane walimukulanda evio, penka papo bamukonka kale Yesu. 38 Yesu waikebukile. Luabamwene bamukonkele waabeepuziizie, "Ati, mulimukukeba ki?" Baamwaasukile, "Rabi, wikeele pi?" (Rabi i kulanda nangue, "Kasambilizia.") 39 Waabaanine, "Twende mumone." Ozo musita yaali yasyakumana nsita ina ya kyungulo. Baile kumona kuali waikala, ni bobo busiku baazikiizie nakue. 40 Umo pa babo babili baunvwile twebo twaalandile Yoane ni kumukonka Yesu, waali Andrea mwalawakue kwa Simoni Petro. 41 Andrea luamumwene mukuluube Simoni, waamwanine, "Twamumonanga Kristu!" 42 Kupwako wamutwala Simoni kuli Yesu. Yesu wamubatikizia Simoni wamwana, "We uli Simoni mwina Yoane, waya wasyakuutua Kefa." (Leli liina mu Kigriki lililyakuutua Petro. I kulanda nangue, "Kilibue.") 43 Lukeele lwakue Yesu waatonene kuya ku Galilaya, luamusangile Filipo, waamwanine, "Nkonke." 44 Filipo waali wa ku Betesaida mu muzi mwaali mwaikala Andrea ni Petro. 45 Filipo luamusangile Natanaeli waamwanine evi, "Twamumonanga olia waalandilue na Musa mu kitabu kya Mizilo, ozu muntu, ni bakabika baamulembele, i Yesu mwina Yusufu wa ku Nazareti." 46 Natanaeli waamwanine, "Kubako ni kiine ku Nazareti kuti kwafuma ni kiweme?" Filipo waamwanine, "Iza umone." 47 Yesu luamwene Natanaeli walimukwiza, waabambile kulanda palwakua Natanaeli nangue, "Ozu i Muizraeli mwine mwine, muli wene temuli bupompo." 48 Natanaeli waamwipuziizie Yesu, "Eba, ale wanmana syani?" Yesu waamwaasukile wamwana, "Nakumonanga waikeele mwinsina kimuti kya miku Filipo luakiba tanakukuute." 49 Natanaeli waamwanine, "We Kasambilizia, kisinka uli Mwina Leza! Wewe uli Likolo lya Baizraeli!" 50 Yesu waamwanine, "Eba, wazumina pantu nakwana nangue, nakumonanga waikeele mwinsina kimuti kya miku? Waakamona bintu bikata kukila bebi!" 51 Kabili Yesu waabaanine, "Namyana kisinka nangue mwaakamona lyulu lyaizukile, ni bamalaika bakua Leza basela ni kukookela Mwina Muntu."
1 Busiku bwa butatu, mu muzi wa Kana mu Galilaya, mwaali buinga. Ni nghina kwa Yesu waali waliko. 2 Yesu ni basambi bakue ni bo baakupilueko. 3 Divai luyaapwile, nghina kwa Yesu waamwanine Yesu, "Tebakili na divai." 4 Yesu waamwanine, "We yangu, ni kiki? Nsita yane teinakumane." 5 Nghina kwa Yesu waabaanine babombi, "Kite byonse bialikumyana." 6 Paali ngeso mutanda ibaali babiikamo menda a kusamba kukonkana ni mibeele ya Bayuda. Lweso lumo lwaali lwaingizia mpindi 80 , ao 120 . 7 Yesu waabaanine babombi, "Izuzie menda mu ngeso. Ni bo baizuzia sie zu." 8 Waabaanine evi, "Ale tapule menda mumutwalile sinwelenzi wa buinga." Kupwako bamutwalila 9 sibolenzi wa buinga, ni ye waatompele menda aalwilue divai tekuba wamanine kuyaafumine, (inzi babombi bene baali bamanine kuyaafumine pantu i baatapile menda). Sibolenzi wa buinga waamukuutile syabuinga 10 wamwana, "Kubalua muntu, aliwaleetanke divai iweme, bakupilue pa bapua kumina iweme, i kusyaleeta isiwamisie. Inzi wewe walabukilanga divai iweme ni lenu kumo!" 11 Kaka i kalangi ka mambo kaakitilue na Yesu ku Kana mu Galilaya walangisia bulumba bwakue. Ni pakako, basambi bakue baamuzumiine. 12 Buinga lubwaapwile, Yesu ni nghina ni balabakue pamo ni basambi bakue baile ku Kafarnaumu. Inzi tebaikeeleko nsiku ingi. 13 Lwaapaleeme nsikunkulu ya Bayuda iliyakuutua Pasaka, Yesu waile ku Yeruzalemu. 14 Mu Nghanda yakua Leza waasangilemo bantu baali basisia nghombe, ni mikooko, ni nkunda. Bange bene baali basintuzyania nfolanga baikeele ku meza yabo. 15 Luakitile musepe wa lozi, waabakumbiile bonse panze pamo ni mikooko, ni nghombe. Waasalanghaniizie nfolanga ya balia baali basintuzyania, kabili waafulamwine meza yabo. 16 Waabaanine baali basisia nkunda, "Ale fumie bebi bili papa! Tekwalule Nghanda yakua Tawe kuba mukisisiizio!" 17 Basambi bakue baalangulukile twebo tulembelue nangue, "Kwipeela kwane pa nghanda yobe kwangipaya." 18 Bayuda baamwipuziizie, "Eba, ni kalangi ki kaulikukita ka kuti tumweneko nangue uli ni buvinde bwa kukita evi?" 19 Yesu waabaasukile, "Tuutulule ezi Nghanda yakua Leza. Nene nakaba kuikuula kabili mu nsiku itatu." 20 Baamwipuziizie, "Pa kukuula ezi Nghanda yakua Leza, paapitile myaka 46 , ale we i wakaba kuikuula mu nsiku itatu?" 21 Inzi nghanda yaali yalanda Yesu, waali mubili wakue. 22 Yesu luatuntumukile, basambi bakue baalangulukile twebo twakue, kabili baazumiine malembo ni twebo twaalandile Yesu. 23 Yesu luali mu Yeruzalemu mwaali nsikunkulu ya Pasaka, bantu bengi baamuzumiine lubaamwene tupapo tuakitile. 24 Inzi Yesu taabaketekeele pantu waali wabamanine bonse. 25 Taali wakeba muntu wa kumubwila mibeele ya bantu, pantu waali wamanine byonse byaali mu mitima yabo.
1 Kwaali muntu umo lisiiko lya Kiyuda wa mu libumba lya Bafarizeo liina lyakue Nikodemu. 2 Ozo muntu waile kuli Yesu musita wa busiku. Waamwanine evi, "We Kasambilizia, tumanine nangue wewe utuminue na Leza, pantu tekuli muntu aliwavinda kukita totu tupapo tuuliwakita kine Leza tali pamo nakue." 3 Yesu waamwaasukile, "Nakwana kisinka nangue, muntu kine taavyelue lya bubili, tavinda kwingila mu Bukolo bwakua Leza." 4 Nikodemu waamwipuziizie, "Eba, ale muntu wasyali mukote kuti wavyalua syani lya bubili? Ale alikwingila syani mu livumo lyakua nghina pakuti avyalue lya bubili?" 5 Yesu waamwaasukile, "Nakwana kisinka nangue muntu tavinda kwingila mu Bukolo bwakua Leza kine taavyelue mu menda ni Mweo. 6 Kivyelue na mubili i mubili, Inzi kivyelue na Mweo i mweo. 7 Tekupapa pantu nakwana nangue vyalua lya bubili. 8 Mwela uliwapuupila kuutonene. Wewe waya waunvwileko sie katuuto ka mwela pasili kumana kulimukufuma mwela ni kulimukuya mwela. Evi i vili ni muntu aliwavyalua na Mweo." 9 Nikodemu waamwipuziizie, "Ale bebi bintu kuti byakitika syani?" 10 Yesu waamwaasukile, "Wewe uli kasambilizia wa Baizraeli. Ale waandua syani kumana bebi bintu? 11 Nakwana kisinka nangue fwefue tulitwalanda bintu bitumanine ni kusininkizia bintu bitwaamwene, kabili busininkizio bwetu temwabupokelela. 12 Lundinamyana bintu bya pano pa kyalo temwabizumina, ale kuti mwazumina syani kine namyana bya mwiulu? 13 Kabili tekuli muntu waaselele mwiulu, inga sie olia waakookele kufuma mwiulu, i Mwina Muntu." 14 Nga evelia Musa vialendwile nzoka wa mukuba mu kaseeba, i vyaakalendulua ni Mwina Muntu. 15 Evi kubalua muntu wamuketekela aye wali ni bukose bwa muyayaya. 16 Pantu Leza waatoneesie bantu ba mu kyalo, i kiapeeleele Mwana wakue lyonga, evi kubalua muntu wamuketekela tekuti azeeze, inzi aye wali ni bukose bwa muyayaya. 17 Pantu Leza taatumine Mwana wakue kuti akande bantu ba mu kyalo, inzi waamutumine kuti abapususie. 18 Onse amuketekeele Mwina Leza takandilue, inzi asimuketekeele, akandiilue mbeela pantu tamuketekeele Mwana lyonga wakua Leza. 19 Kibaakakandilua ni keki: Musaniko waizile mu kyalo, inzi bantu batoneesie nfinzi kukila musaniko, pantu bikitua byabo bibiipile. 20 Muntu aliwakita bibiipile asuulile musaniko, kabili tezi kupalama ku musaniko, pantu tatonene bialiwakita bimoneke. 21 Inzi muntu aliwakita biweme, aliwapalama ku musaniko, evi bialiwakita bimoneke, pantu aliwakita mutoneene Leza. 22 Bebio lubyaapwile, Yesu waile pamo ni basambi bakue mu kyalo kya Yudea, koko i kuazikiizie nabo walimukubatizia. 23 Yoane ni ye waali wabatizia bantu ku Ainoni pepi ni Salimu, pantu koko i kwaali kwavulile menda. Bantu baali bayako, ni Yoane waali wababatizia. 24 Ozo musita Yoane waali tanakakue. 25 Kabili bange pa basambi bakua Yoane baabambile kukanzana na Muyuda umo pa mulandu wa kusambua. 26 Baile kumwana Yoane nangue, "We kasambilizia, olia muntu uwaali nakue ku bolia bwala bwa Mwenzi wa Yordani ni uwaali walandapo, mona ni ye lenu alimukubatizia, ni bengi balimukuya kuli wene!" 27 Yoane waabaasukile, "Muntu tavinda kuya wali na kantu kaasipeelue na Leza. 28 Mwe bene benka musininkiziizie nangue naalandile evi, 'Nene nsili Kristu, inzi naatuminue sie kuti ngie namutangiliile.' 29 Mwine wa nabuinga i syabuinga, inzi kibuza wakua syabuinga, aliwaimana ni kumutwilizia, aliwawaminua lualiwaunvua syabuinga walanda. Koku i kuwaminua kwane kupwililikile. 30 Kafwene wene aye wakililepo, nene ngie nakeepele." 31 Olia afumine ku muulu i mukulu kukila bonse, wa pa kyalo wene wa pa kyalo sie, kabili aliwalanda sie bya pa kyalo, inzi olia afumine ku muulu i mukulu kukila bonse. 32 Wene aliwasininkizia twebo tuamwene ni kunvua, inzi tekuli muntu aliwaitabila bialiwalanda. 33 Inzi onse aliwaitabila bialiwalanda, aliwasininkizia nangue Leza ni wa kiine. 34 Olia aliwatumua na Leza, aliwalanda twebo twakua Leza pantu Leza i aliwapaana Mweo pasili kipiimo. 35 Se amutonene Mwana, kabili waamupeele bintu byonse. 36 Olia amuketekeele Mwana ali ni bukose bwa muyayaya. Inzi olia asimuketekeele takamona bukose pantu kikonko kyakua Leza kili pali wene.
1 Bafarizeo baunvwile nangue Yesu waali ni basambi bengi kukila Yoane ni kubabatizia. 2 Inzi kulanda kisinka, Yesu mwine taali wabatiziako, inga sie basambi bakue. 3 Yesu luaunvwile evio, wafuma ku Yudea, waya ku Galilaya. 4 Lolo lwendo lwakue, lwaali lwa kuya kupita mu Samaria. 5 Waafikile mu Samaria mwaali mwakuutua Sikari, pepi ni bukaba bwakua Yakobo buapeele mwana wakue Yusufu. 6 Papo, i paali kiina kya menda kyaimbilue na Yakobo, Yesu luatopele na lwendo, waikeele mumbali kiina kya menda. Nsita yaali yasyakumana koba mukati. 7 Mwanakazi umo Musamaria luaizile ku kutapa menda, Yesu waamwanine, "Nmpeeleko menda a kumina." 8 (Ozo musita, basambi bakue baali baile ku muzi ku kusita bilio.) 9 Mwanakazi Musamaria waamwipuziizie, "Wewe uli Muyuda, nene ndi Musamaria. Ale wanomba syani menda a kumina?" (Pantu Bayuda ni Basamaria tebaali bapwene.) 10 Yesu waamwaasukile, "Kabenge wamanine bupe bwakua Leza, ni alimukukulomba menda a kumina nangue nani, nga wamulomba, ni wene nga wakupeela menda alialeeta bukose." 11 Ozo mwanakazi waamwanine, "We Mulopue, ale viusikwete kya kutapwilako! Kabili kiina kya menda kizikile. Ale ulikufumia pi azo menda alialeeta bukose? 12 Eba, wewe uli mukulu kukila situe Yakobo waatupeele keki kiina kya menda kiali waminamo, wene ni baana bakue pamo ni nama yakue?" 13 Yesu waamwaasukile, "Kubalua muntu aliwamina aza menda waakonvua kyaka. 14 Inzi olia waakamina menda anaakamupeela takonvua kyaka, pantu menda anaakamupeela, aakaaluka kasulo ka menda aliabiluluka mukati mwakue, azo aakamuleetela bukose bwa muyayaya." 15 Mwanakazi waamwanine, "Ale nmpeeleko azo menda tekuti nkonvue kyaka kabili, evi tekuti ngie naiza ku kutapa menda." 16 Yesu waamwanine, "Endo umukuute mulume obe wize nakue pano." 17 Mwanakazi waamwanine, "Nene nsili na mulume." Yesu waamwanine, "Walanda kisinka nangue teuli na mulume, 18 pantu waali na balume basaano, ni ozu uuli nakue lenu te mulume obe. Evi walanda kisinka." 19 Mwanakazi waamwanine, "We Mulopue, nainika nangue uli kabika. 20 Bikolue byetu byaali byapupila Leza pa lolu lupili, inzi mwemue mulimwalanda nangue bantu bapapile kupupila mu Yeruzalemu." 21 Yesu waamwanine, "We mwanakazi, unvua, musita ulimukwiza umusikapupila kabili Tawe pa lolu lupili ao ku Yeruzalemu. 22 Mwemue Basamaria mulimwapupa kimusimanine, inzi fwe Bayuda tulitwapupa kitumanine pantu bupusuko bulibwapitila ku Bayuda. 23 Musita ulimukwiza, ni kwiza wizile, bapupi ba kiine lubaakamupupa Tawe mu mweo ni mu kiine. Tawe atonene kupupua na bantu ba ozu musango. 24 Leza i Mweo, ni balia balibamupupa, bapalile kuya bamupupa mu mweo ni mu kiine." 25 Mwanakazi waamwanine, "Nmanine nangue Mupususi aliwakuutua Kristu, waakeeza. Luakeeza, waakatubwila bintu byonse." 26 Yesu waamwanine, "I nene wenka alimukulanda nobe." 27 Penka papo basambi bafika kale, babamba kupapa pantu bamusanga walimukulanda na mwanakazi, inzi tepaali waamwipuziizie nangue, "Ulimukukeba ki?" Ao nangue, "Ulimukulanda nakue ki?" 28 Kupwako, mwanakazi wasia lweso lwakue lwa menda, waya mu muzi, wabaana balalume, 29 "Ize mumone muntu wanghananga byonse binaakitile. Ozu abule kuba Kristu?" 30 Kupwako, bafuma mu muzi, baya kuli Yesu. 31 Ozo wenka musita basambi bakue bamupaapaata bamwana, "We Rabi, lia." 32 Inzi waabaanine, "Nene ndi ni bilio binge bimusimanine." 33 Basambi bakue babamba kwipuzyania, "Eba, kuli ni muntu wamuletelanga bilio?" 34 Yesu waabaasukile, "Bilio byane, ni kukita kutona kwakua olia antumine, ni kufikilizia miilo yakue. 35 Ale temulimwalanda nangue kusyele myezi ina ya kutendeka kuzombola? Evi namyana, 'Kente mumone buzombozi vibusyaumine, kuzombola kwapalama.' 36 Muzombozi asaziiziiziwe mbeela, ni byaliwazombola aliwabitwala ku bukose bwa muyayaya. Evi mulimi ni muzombozi bonse bawaminue. 37 Ee, kaka keebo ni ka kisinka, 'Muntu wa kubyala ni unge, inzi wa kuzombola ni unge.' 38 Mwemue naamitumine kuya kuzombola mu makaba aliminue na bange, ni mwe mulimwamwenamo kibwezia mu miilo yabo." 39 Basamaria bengi ba mu ozo muzi baamuketekeele Yesu pa mulandu wa twebo twaalandile olia mwanakazi nangue, "Wakinghana byonse binaakitile." 40 Kupwako, balia Basamaria baya kumupaapaata Yesu ekale nabo, ni ye waikeele nabo nsiku ibili. 41 Bantu bengi baamuketekeele Yesu pantu baunvwile mualandiile. 42 Babo bantu baamwanine olia mwanakazi, "I vitwaketekela, te pa mulandu wa twebo tuwalandanga, inzi pantu twaiunvwila fwe bene mu kanua kakue, kabili pantu twasininkizia nangue wene i Mupususi wa kyalo." 43 Lupaapitile nsiku ibili, Yesu waafumineko ni kuya ku Galilaya, 44 pantu Yesu mwine waalandile evi, "Tekuli kabika aliwakindikua kwabo." 45 Luafikile mu Galilaya, Bagalilaya baamupokeleele bwino pantu baamwene byonse byaakitile Yesu ku Yeruzalemu ku nsikunkulu ya Pasaka. 46 Yesu luabweleele ku Galilaya, waile mu muzi wa Kana muakitile menda kwaluka divai. Momo mwaali kiloolo umo wakua likolo waali ni mwana waali walwele ku Kafarnaumu. 47 Ozo kiloolo luaunvwile nangue Yesu ezile mu Galilaya kufuma ku Yudea, waile kuli Yesu ni kumupaapaata aye akosie mwana wakue waali wasyaumiine kufua. 48 Yesu waamwanine, "Mwemue temwizi kuketekela kine temumwene tulangi ni tupapo." 49 Ozo kiloolo wakua likolo waamwanine, "We Mulopue, lenga ukooke mwana wane luasinaafue." 50 Yesu waamwanine, "Endo, mwana obe wakosa!" Ozo muntu waazumiine keebo kaaninue na Yesu. Kupwako, waya. 51 Musita ualiwabwelela kwakue, waasakeene ni babombi bakue. Baamwanine evi, "Mwana obe wakosa!" 52 Kiloolo wabeepuzia, wakyunvua bwino musita ki? Bamwasuka, "Wakikosa lukeele pa nsita imo ya koba." 53 Se ipakwinika nangue ni wenka olia musita wakyaninuapo na Yesu nangue, "Mwana obe wakosa." Kupwako wazumina pamo ni lupua lwakue lonse. 54 Kaka i kalangi ka bubili kaakitilue na Yesu, luafumine ku Yudea kuya ku Galilaya.
1 Kabili Yesu waaselele ku Yeruzalemu ku nsikunkulu ya Bayuda. 2 Koko ku Yeruzalemu, pepi ni mulyango wa mikooko, paali kiina kya menda kyaali kyakuutua mu Kiebrania nangue, Betesaza, kyaali ni nkungu isaano. 3 Mu ezio nkungu mwaali mwaleele bampofu ni bite pamo ni ba bulebe. 4 Pantu musita umo, malaika waali wakooka kwiza kutensia menda. Muntu waali wakookelamo wa mambo menda asyatensiiziwe, waali wakosa bulwele bwakue bonse. 5 Kwaali muntu umo waali ni bulwele bwaakokwele myaka 38 . 6 Yesu luamumwene waleele, Kabili pantu waali wamanine nangue wapua myaka ingi walwele, waamwipuziizie, "Utonene kukosa?" 7 Ozo mulwele waamwaasukile, "We Mulopue, nsili na muntu wa kuntwala mu kiina kya menda lualiatensiwa, pantu ndinakita kine nsyayamo, unge muntu wantangilila kale." 8 Yesu waamwanine, "Ale buuka utwame kisalo kyobe uye waya." 9 Penka papo ozo muntu wakosa, watwama kisalo kyakue waya. Inzi bobo busiku bwaali busiku bwa Sabata. 10 Bayuda lubaamwene olia waakosiiziwe watweme kisalo, baamwanine, "Mizilo yetu ikaaniizie muntu kutwama kisalo busiku bwa Sabata." 11 Ozo muntu waabaasukile, "Olia wankosyanga, i wanghananga nangue twama kisalo kyobe uye waya." 12 Baamwipuziizie, "Muntu wakwananga nangue twama kisalo kyobe uye waya, nani?" 13 Inzi wene tamanine muntu waamukosiizie, pantu Yesu waazembulukile mu lelio libumba. 14 Lupaapitile musita unini, Yesu waile kumusanga mu Nghanda yakua Leza. Waamwanine, "Mona wakosanga, tekuti ukabale kabili, pantu nga waakakitikilua na kintu kibiipiisie." 15 Kupwako ozo muntu waya kutwala mpunda ku Bayuda nangue Yesu i wakimukosia. 16 Ni pakako, Bayuda baabambile kumwemia Yesu bakeba kumwipaya pantu waakosyaniizie busiku bwa Sabata. 17 Yesu waabaanine, "Tawe aliwabomba lyonse, ni ne wenka ndimukubomba." 18 Ni pakako Bayuda baali basyakita maka a kumwipaya, te pa mulandu wa kwinoona sie Sabata, inzi pantu kabili waalandile nangue Leza i Se, kabili nangue ndi Leza. 19 Kupwako, Yesu wabaana, "Namyana kisinka nangue Mwana tavinda kukita kantu ye mwine, inzi aliwakita mualiwamwena Se wakita. Pantu Mwana aliwakita byonse mulimwakitila Se. 20 Pantu Se atonene Mwana, i kialiwamulangisiizia bintu byonse bialiwakita. Kabili waakamulangisia bintu bikata kukila bebi, ni kupapa mwakapapa. 21 Pantu nga evelia Tawe vyaliwabatuntumuna bafwile ni kubapeela bukose, Mwana ni ye aliwabapeela bukose balia ba atonene kupeela. 22 Tawe tezi kupingula muntu, inzi waamupeele Mwana wakue maka onse a kupingula 23 evi bantu bonse bamukindike Mwana nga evelia vibalibakindika Se. Muntu kine tezi kukindika Mwana, tavinda kukindika Se waamutumine. 24 "Namyana kisinka nangue kine muntu wamuketekela Leza mukunvua keebo kane, ali ni bukose bwa muyayaya. Takapingulua, inzi afumine mu lufu, kabili tasyaingiile mu bukose. 25 Namyana kisinka nangue musita ulimukwiza, ni kwiza wizile, musita bafwile ubakaba kunvua lizui lyakua Mwina Leza, balia bakaba kunvua lizui lyakue, bakaba kukosa. 26 Nga evelia Se viali kasulo ka bukose, i vyaamulengele ni Mwana kuya wali kasulo ka bukose. 27 Kabili waamupeele buvinde bwa kupingula pantu i Mwina Muntu. 28 Tekupape pantu musita ulimukwiza, bafwile baakonvua lizui lyakue, 29 balia balibakita biweme, baakatuntumukila bukose, inzi balia balibakita bibiipile, baakatuntumukila kutanua nsambu. 30 "Nsivinda kukita kantu muntoneene ne mwine pantu ndinapingula mundinaaninua na Tawe. Bupinguzi bwane ni bwa kisinka, pantu nsiizi kukita muntoneene, inzi ndinakita mutoneene Tawe antumine. 31 "Kine naisininkizia ne mwine, busininkizio bwane ni bwa mpuni. 32 Kuli ni unge aliwansininkizia, kabili nmanine nangue busininkizio bualiwansininkizia, ni bwa kisinka. 33 Mwemue mwaatumine bantu kuli Yoane, ni wene waalandile kisinka palwakua nene. 34 Nene nsiizi kuketekela busininkizio bwa muntu, inzi kindinalandila evi ni pakuti mwemue mupusuke. 35 Yoane waali wali nga litala lyaali lyaleema ni kusanika, mwemue mwaawamiinue na kisue kyakue pa musita unini. 36 Inzi busininkizio bundi nabo bukilile bwakua Yoane, pantu miilo inaapeelue na Tawe kuti nmbombe, ni lenu ndinaibomba, i iliyasininkizia nangue Tawe i antumine. 37 Tawe antumine ni ye aliwansininkizia. Lizui lyakue temunalyunvue, ni kumumona temunamumone. 38 Keebo kakue tekaikalilila mukati mwenu, pantu temumuketekeele olia atuminue. 39 Muli mwakebelezia mu malembo pantu mulangakeene nangue i muli bukose bwa muyayaya, inzi aza malembo i aliansininkizia. 40 Kabili mulimwakaana kwiza kuli nene kuti muye mwali ni bukose. 41 "Nene nsiizi kukeba kulumbua na bantu. 42 Inzi nmanine nangue temumutonene Leza. 43 Nene naatuminue na Tawe, ni mwemue temwanmpokelela. Inzi kine unge waiza mu maka akue, mulikumupokelela. 44 Ale kuti mwazumina syani mwe balibalumbana benenke basilibakeba kulumbua na Leza? 45 Inzi tekulangakane nangue naakamisongela kuli Tawe, kuli umo aliwamisongela, i Musa kiswapilo kyenu. 46 Kabenge mwamuzumiine Musa, nga munzumiine ni nene, pantu Musa i waalembele palwakua nene. 47 Ale kine temuzumiine malembo akue, kuti mwazumina syani twebo twane?"
1 Kupwako Yesu waya ku bwala kiziba kya Galilaya. Linge liina kilikyakuutua Tiberia. 2 Bantu bengi baamukonkele pantu baamwene wakita tupapo twa kukosia balwele. 3 Yesu waaselele pa kapili, papo i paikeele pamo ni basambi bakue. 4 Ni nsikunkulu ya Pasaka ya Bayuda yaali yasyapalama. 5 Yesu luamwene libumba likata lyaiza kuali, waamwipuziizie Filipo, "Ewe, tulikusita pi mikate yakuti balie?" 6 (Waalandile evio wamuketa sie pantu mwine waali wamaniine mbeela vyalikukita.) 7 Filipo waamwaasukile, "Mikate ya nfolanga 200 teivulile anzia tubakasania tunini tunini." 8 Musambi umo liina lyakue Andrea mwalawakue kwa Simoni Petro, waamwanine Yesu, 9 "Pali mwanike umo pano ali ni mikate isaano ya nghano ni tusabi tubili tunini. Kubako baba bantu bavulile evi balikukumana!" 10 Yesu waabaanine, "Ale baane bantu beekale." Pa kekio kifuka paali bikusi bingi. Kupwako, bantu baikala. Bonse pamo baali balalume 5 ,000 . 11 Yesu waakwete mikate, wamusantila Leza, wabakasania babo baali baikeele papo, kabili wabakasania ni tusabi nga mubaali batoneene. 12 Lubaikutile, Yesu waabaanine basambi bakue, "Kolonghanie bisoso byasyalangapo, tekuti penooneke ata kimo." 13 Kupwako bakolonghania, baizuzia bipanda likumi na bibili bya bisoso bya mikate isaano ya nghano byasyalangapo lubalyanga. 14 Babo bantu lubaamwene kapapo kaakitilue na Yesu, baalandile, "Kisinka ozu i olia kabika waalailue nangue waakeeza mu kyalo." 15 Yesu luamanine nangue balibakeba kumutwama bamwalule likolo, waabutukiile ku kapili kwa bunke. 16 Lubwailile, basambi bakue baakookeele ku kiziba. 17 Baapateeme mu bwato, babamba kwabukila ku Kafarnaumu. Paali pasyali pa kafinzi, inzi Yesu waali tanaye koko kubaali. 18 Kiziba kyatungupila, ni mwela ukata wapuupa. 19 Kupwako, baoba lwendo lwa kilometre isaano ao mutanda, bamumona Yesu walimukwenda pa menda. Luapaleeme ku bwato, baunvwile mwezo ukata. 20 Yesu waabaanine, "Tekutiine, ni nene." 21 Kupwako tebakeba bamupokelele mu bwato, papa ni papa basiika kale kunze kubaali baya. 22 Busiku bwaakokenkelepo, libumba lyaasyele ku bwala kiziba, lyaamwene nangue koko tekwaali bunge bwato, inga sie bwenka bolia bumo bwaapateememo basambi bakue. Kabili Yesu taapateeme mu bwato bwalimo basambi bakue, inzi basambi baile sie bunke. 23 Inzi ange maato aafumine ku Tiberia, aile kusiika pepi ni kelia kifuka kibaaliiliilepo mikate Yesu luamusantiile Leza. 24 Libumba lulyaamwene nangue Yesu ni basambi bakue tebaalipo, lyaapateeme mu maato, lyaya lyamukeba Yesu ku Kafarnaumu. 25 Lubaamumweene ku bwala kiziba, baamwanine, "We Kasambilizia, waizanga pano musita ki?" 26 Yesu waabaasukile. "Namyana kisinka nangue mwe mulimukunkeba, te pa mulandu wa kalangi kamwakimona, inzi mulimukunkeba pantu mwakilia mikate ni kwikuta. 27 Tekuba mwabombela bilio bilibyainooneka, inzi bombele bilio bilibyaleeta bukose bwa muyayaya, bilio bimwaakapeelua na Mwina Muntu, pantu wene i apeelue kalangi ka buvinde na Leza Se." 28 Kupwako bamwipuzia, "Ale tulikukita syani pakuti tubombe mwilo wakua Leza?" 29 Yesu waabaasukile, "Leza kiatonene kuti mukite ni keki, mumuzumine olia atuminue na Leza." 30 Baamwipuziizie, "Ni kapapo ki kaulikukita ka kuti tumone ni kukuzumina? Ni kiki kiulikukita? 31 Bikolue byetu byaaliile maana mu kaseeba, nga mukyaalembeelue nangue, 'Waabapeele bilio kufuma mwiulu byakuti balie.' " 32 Yesu waabaanine, "Namyana kisinka nangue te Musa waamipeele bilio kufuma mwiulu, inzi ni Tawe, kabili i aliwamipeela mukate wa kiine kufuma mwiulu. 33 Pantu mukate wakua Leza, i olia uliwakooka kufuma mwiulu ni kuleeta bukose mu kyalo kyonse." 34 Baamwanine, "We Mulopue, kansi uye watupeela ozu mukate kubalua busiku." 35 Yesu waabaanine, "Nene i mukate wa bukose, olia aliwaiza kuli nene takonvua nzala, ni olia aliwanketekela takonvua kyaka. 36 Namyananga nangue nene mwakinmona, inzi temunketekeele. 37 Bonse baanapeelue na Tawe balibaiza kuli nene, ni aliwaiza kuli nene nsikamukumba. 38 Kine naafumine mwiulu, te pa mulandu wa kukita muntoneene, inzi ni pa mulandu wa kukita kutona kwakua olia antumine. 39 Kutona kwakua Tawe antumine ni koku: Tekuti nzeezie ata umo pa balia banaapeelue na Tawe, inzi nkabatuntumune busiku bwa mpeleezio. 40 Tawe atonene evi, kubalua muntu wamumona Mwana ni kumuketekela abe ni bukose bwa muyayaya, kabili nkamutuntumune busiku bwa mpeleezio." 41 Kupwako Bayuda batendeka kumwivokombela pantu walandanga nangue, "Nene i mukate ufumine mwiulu." 42 Baipuzyaniizie, "Ati emwe, ozu te Yesu mwina Yusufu? Se ni nghina tubamanine. Ale walandila ki nangue nfumine mwiulu?" 43 Yesu waabaasukile, "Tekwivokombe evio pakati kenu. 44 Tekuli muntu aliwaiza kuli nene kine takuutilue na Tawe antumine, kabili naakamutuntumuna busiku bwa mpeleezio. 45 Bakabika baalembele evi, 'Bantu bonse baakaba basambiliziiziwe na Leza.' Onse aliwaunvua ni kusambilila kuli Tawe, aliwaiza kuli nene. 46 Tekuli muntu waamumwene Tawe, inga sie olia afumine kwa Leza i waamumwene Tawe. 47 Namyana kisinka nangue, olia aliwanketekela ali ni bukose bwa muyayaya. 48 Nene ndi mukate wa bukose. 49 Bikolue byenu byaaliile maana mu kaseeba, ni kufua byafwile. 50 Ono i mukate ufumine mwiulu, onse aliwaulia takafua. 51 Nene ndi mukate wa bukose ufumine mwiulu. Kine muntu walia ozu mukate, waakeekalilila. Mukate unaakapaana i mubili wane pakuti bekala kyalo babe ni bukose." 52 Kupwako, Bayuda babamba kukanzana balanda, "Emwe, ozu muntu kuti watupeela syani mubili wakue tulie?" 53 Yesu waabaanine, "Namyana kisinka nangue kine temuliile mubili wa Mwina Muntu, ni kumina mulopa wakue, temukaba na bukose mukati mwenu. 54 Onse aliwalia mubili wane, ni kumina mulopa wane, ali ni bukose bwa muyayaya, ni nene naakamutuntumuna busiku bwa mpeleezio. 55 Pantu mubili wane i kilio kya kiine, ni mulopa wane i kya kumina kya kiine. 56 Onse aliwalia mubili wane ni kumina mulopa wane, aliwaikalilila muli nene, ni nene muli wene. 57 Tawe antumine i ntulo ya bukose, ni nene ndi ntulo ya bukose pa mulandu wakue, evi i vili ni onse aliwandia, ni ye kumo mukose pa mulandu wane. 58 Ozu i mukate ufumine mwiulu, tekili nga evelia bikolue byenu vibyaaliile maana ni kufua. Inzi onse aliwalia ozu mukate waakeekalilila sie muyayaya." 59 Yesu waalandile totu twebo luali mu nghanda ya malombi musita uali wasambilizia ku Kafarnaumu. 60 Basambi bengi lubaunvwile evio, baalandile, "Aza masambilizio akolele. Nani alikwitabila?" 61 Inzi Yesu waamanine nangue basambi bakue balimukwivokombela aza masambilizio. Waabeepuziizie, "Ati emwe, ale aza masambilizio amiluvia ki? 62 Ale mwaakakita syani lumukamona Mwina Muntu wasela kuafumine? 63 Ozu i Mweo wakua Leza aliwapaana bukose, maka a muntu, ene teezi kukita kantu. Twebo tunamyana i Mweo, kabili i bukose. 64 Inzi pakati kenu, pali bantu bamo basizumiine." Inzi pantu Yesu waali wamaniine mbeela nangue ni bani basizumiine, kabili nangue nani waakamupaana ku balwani, 65 waalandile evi, "I kinamyanina nangue, tekuli muntu wakuvinda kwiza kuli nene kine takuutilue na Tawe." 66 Kutula ozo musita, basambi bakue bengi baalekeele kumukonka. 67 Yesu waabeepuziizie balia basambi likumi na babili, "Ati, ni mwemue kumo mutonene muye mwaya nga balia?" 68 Simoni Petro waamwaasukile, "We Mulopue, tulikuya kuli ni? Wewe i ali ni twebo tulitwaleeta bukose bwa muyayaya. 69 Kabili twazumina ni kumana nangue wewe usaakwilue na Leza." 70 Yesu waabeepuziizie, "Ati, nsyaamisaakwile mwali likumi na babili ni umo pakati kenu wali Kibanda?" 71 Yesu waali walandila sie Yuda Iskarioti mwina Simoni, pantu wene i waakamupaana ku balwani, ni ye waali umo wa pa basambi likumi na babili.
1 Kupwako Yesu waya mu Galilaya. Taatonene kwendela mu Yudea, pantu Bayuda baali bakeba kumwipaya. 2 Ni nsikunkulu ya Bayuda, nsikunkulu ya mitanda, yaali yapaleeme. 3 Balabakue baamwanine, "Fumako kono uye waya mu Yudea, evi basambi bobe bamone miilo iuliwabomba. 4 Pantu muntu aliwakeba kumanua, tezi kukita miilo mu kafiso. Kine wewe watona kukita bebi bintu, ilangisie we mwine ku bekala kyalo." 5 (Balabakue ni bo tebaamuzumiine.) 6 Yesu waabaanine, "Musita wane teunakumane, inzi mwemue musita wenu ukumeene lyonse. 7 Bekala kyalo tebavinda kumisuula mwemue, inzi nene bansuulile pantu ndinabaana nangue bikitua byabo bibiipile. 8 Endo mwaya ku nsikunkulu, ne nsiyako ku ezi nsikunkulu pantu musita wane teunakumane." 9 Luapwile kulanda evio, wene waasyele waikeele mu Galilaya. 10 Inzi balabakue kwa Yesu lubaali basyaile, ni ye kumo waile ku nsikunkulu, taamwenekele ku bantu, inzi waile mu kafiso. 11 Bayuda baali bamupempa koku balimukwiipuzia balanda, "Emwe, ale Yesu ali pi?" 12 Libumba lyaabambile kwisonghania pa mulandu wakue. Bange baali balanda evi, "Wene ni muntu aweme." Ni bange baali balanda nangue, "Iya, ozu muntu aliwabeepa sie libumba." 13 Inzi anzia kine kyaali evio, tepaali muntu waamuzimbwile pa menso a bantu pantu baali batiina Bayuda. 14 Nsikunkulu luyaatiikiile, Yesu waaselele ku Nghanda yakua Leza ni kutendeka kusambilizia. 15 Bayuda baapapile balimukwiipuzia, "Emwe, ale ozu muntu viasisambiliile, wafumia pi aza maano?" 16 Yesu waabaasukile, "Aza masambilizio ane, teane, inzi ni akua Leza antumine. 17 Kine muntu watona kukita mutoneene Leza, alikumana kine aza masambilizio afumine kuli Leza, ao kine ndinailandila sie ne mwine. 18 Onse aliwailandila sie byakue, aliwaikebela sie bulumba bwakue, inzi onse aliwabombela pa mulandu wa bulumba bwakua olia amutumine, wene i muntu wa kiine, ni mukati mwakue temuli bufi. 19 Eba, te Musa waamipeele Mizilo? Inzi pakati kenu tepali ata umo anakiile Mizilo. Ale mulimwakeba kungipaila ki?" 20 Libumba lyaamwaasukile, "We wa myela! Nani aliwakeba kukwipaya?" 21 Yesu waabaasukile, "Nakitanga kapapo kamo, ni mwe bonse mwapapanga. 22 Inzi pantu Musa waamyanine muye mwateeta yando baana benu (te yando yakufuma kuli Musa, inzi ni yando ifumine ku bikolue byenu), i kimulimwateetela yando muntu busiku bwa Sabata. 23 Kine muntu wateetua yando busiku bwa Sabata, Mizilo yakua Musa teizi kwinooneka. Ale nene mwanfiitilua ki pa mulandu wa kukosia muntu busiku bwa Sabata? 24 Tekuba mwapingula sie bupinguzi bwa pa menso, inzi pingule bupinguzi bulungheeme." 25 Bantu bamo ba mu Yeruzalemu baipuziizie, "Ati emwe, ozu te i olia omiine kwipawa na Bayuda? 26 Mone alimukulanda sie pa menso a bantu tekuba bamwana kantu! Emwe, i kulanda nangue bainika nangue ozu i Kristu? 27 Ozu muntu kwabo tumanineko. Inzi lwaakeeza Kristu, tekuli muntu waakamana kuafumine." 28 Yesu luali wasimikila mu Nghanda yakua Leza, waazanzwile lizui walanda, "Ee, munmanine, kabili ni kwetu mumanineko. Nsyaizile pano pa kyalo na kutona kwane, Tawe wa kisinka i antumine. Inzi mwemue temumumanine. 29 Nene nmumanine pantu nfumine kuli wene, ni ye, i antumine." 30 Kupwako, tebakeba kumukwata, inzi tepaali muntu waamukwete, pantu musita wakue waali teunakumane. 31 Inzi bantu baamuketekeele mu lelio libumba baali balanda nangue, "Emwe, kubako ozo Kristu waakeeza, waakeeza kukita tupapo twingi kukila tupapo tulimukukita ozu muntu?" 32 Bafarizeo baunvwile libumba lyaisonghania palwakua Yesu. Kupwako makolo a babitambua ni Bafarizeo batuma balukale bakuya kumukwata Yesu. 33 Yesu waalandile, "Nkili pamo nenu musita unini, mane nkabe kuya kuli Leza antumine. 34 Mwaakankeba, inzi temukanmona, ni pa kifuka pa naakaba, temukeezapo." 35 Bayuda baabambile kwipuzyania nangue, "Mwe bakwetu, ozu muntu wakaba kuya pi ni fwe tekuti tukamumone? Wakaba kuya ku mizi ya Bagriki kwikeele bantu betu ni kuya kubasambilizia? 36 Walandilanga ki nangue mwaakankeba, inzi temukanmona, ni pa kifuka pa naakaba, temukeezapo?" 37 Busiku bwa kupeleezia nsikunkulu, Yesu waimeene, ni kuzanzula lizui walanda, "Muntu kine waunvua kyaka, eze amine kuli nene. 38 Olia anketekeele waakamina aza menda. Malembo alandile evi, 'Twezi twa menda a bukose twaakafuma muli wene.' " 39 Kaka keebo waalandiile palua Mweo Muzuuke waakapokelelua na bantu bamuketekeele pantu Mweo waali tanaize, kabili pantu Yesu waali tanalumbue. 40 Bantu bamo pa lelio libumba lubaunvwile evio, baalandile, "Kisinka ozu i olia kabika!" 41 Bange baalandile, "Ozu i Kristu." Inzi bange baalandile, "Ata! Kristu kuti wafuma ku Galilaya! 42 Ale Malembo vialandile nangue Kristu waakafuma mu lupua lwakua Daudi ni kufuma ku Betlehemu mu muzi wakua Daudi?" 43 Kupwako libumba lyakasanika pa mulandu wakue. 44 Bamo pakati kabo, baali basyakeba kumukwata, inzi tepaali muntu waamukwete. 45 Kupwako, balukale babwelela ku bakulu ba babitambua ni Bafarizeo. Baabeepuziizie, "Ale mwamusiilanga ki?" 46 Balukale baabaasukile, "Tetunamone muntu aliwalanda nga wene!" 47 Bafarizeo baabeepuziizie, "Eba, i kulanda nangue ni mwemue benka mwabeepua? 48 Ale pa makolo a Bayuda ni Bafarizeo nani wamuzuminanga? 49 Inzi leli libumba lisimanine Mizilo lyene litiipilue." 50 Nikodemu waali wa pa babo, olia waizile busiku kuli Yesu, waabaanine evi, 51 "Eba, Mizilo yetu iliyatwitabizia kutana muntu nsambu luasinaunvwiwe ni kumana mulandu wakue?" 52 Baamwaasukile, "Eba! Ni we uli Mugalilaya? Ezyanke kukebelezia mu malembo umone kine ku Galilaya kuti kwafuma ni kabika." 53 Kupwako basalanghana, kubalua muntu waya ku nghanda yakue.
1 Inzi Yesu wene waile ku Lupili lwa Mizeituni, 2 kabili waabweleele mu Nghanda yakua Leza paakili lukeelekeele. Bantu bengi baamukolongheene, ni ye waikeele ni kubamba kubasambilizia. 3 Bakasambilizia ba Mizilo ni Bafarizeo baamutwaliile Yesu mwanakazi wakwetue mu bukende, bamuteeka pabukata. 4 Baamwanine Yesu nangue, "We Kasambilizia, ozu mwanakazi wakisangiliziwa wakita bukende. 5 Musa waalandile mu Mizilo yakue nangue banakazi ba ozu musango bapalile kutootua mabue ni kwipawa. Ale wewe wamonapo syani?" 6 Baali balandila sie kumuketa pakuti bamone mulandu wa kumusongela. Inzi Yesu waakonteeme ni kubamba kulemba pansi na munue. 7 Lubaatwaliliile kumwipuzia, waakontamukile ni kubaana, "Kine umo pakati kenu tali na kibalo, atendeke kumotoota libue." 8 Kabili waakonteeme ni kutwalilila kulemba pansi. 9 Lubaunvwile evio, i kwenka kutendeka sie kufumapo umo umo. Bakuliisie i baabambiilepo. Yesu waasyele penka papo ni mwanakazi waimeene pa musolo. 10 Yesu waakontamukile ni kumwipuzia, "We mwanakazi, ale balia baakusongelanga bali pi?" Tepasyele ata umo wa kukutana nsambu? 11 Mwanakazi waamwaasukile, "We Mulopue, tepasyele muntu." Yesu waamwanine, "Ni nene wenka nsikutana nsambu. Endo, inzi tekuti ukabale kabili." 12 Kabili Yesu waabaanine evi, "Nene ndi musaniko wa kyalo. Kubalua muntu wa kunkonka takikenda mu nfinzi, inzi waakaba ni musaniko uliwaleeta bukose." 13 Bafarizeo baamwanine, "Wewe uliwaisininkizia sie we mwine, ni pakako busininkizio bobe te bwa kisinka." 14 Yesu waabaasukile, "Anzia kine ndinaisininkizia ne mwine, busininkizio bwane ni bwa kisinka, pantu ne mwine nmanine ku nfumine ni kundimukuya. Inzi mwemue temumanine ku nfumine ni kundimukuya. 15 Mwemue mulimwapingula sie bupinguzi bwa pa menso, inzi nene nsiizi kupingula muntu. 16 Kabili kine napingula, bupinguzi bwane ni bwa kisinka, pantu nsili ne bunke, inzi ndi ni Tawe antumine. 17 Mu Mizilo yenu mulembelue nangue busininkizio bwa bantu babili i bwa kisinka. 18 Nene ndinaisininkizia ne mwine, ni Tawe antumine i musininkizi wane." 19 Kupwako bamwipuzia, "Eba, ale So ali pi?" Yesu waabaasukile, "Ne temunmanine, Tawe ni ye temumumanine. Mubenge mwanmanine, ni Tawe nga mwakimumana." 20 Totu twebo Yesu waalandile musita uali wasambilizia mu Nghanda yakua Leza mubaali babiika bukonto bwa bulongio. Inzi tekwaali muntu waamukwete, pantu musita wakue waali teunakumane. 21 Kabili Yesu waabaanine, "Ne naya, ni mwemue mwaakankeba, kabili mwaakafwila mu bibalo byenu. Kunaakaya temukeezako." 22 Keki i kyaalengele Bayuda kwipuzyania nangue, "Ati emwe, wakaba kwiipaya? Pantu walanda nangue, 'Kunaakaya, temukeezako.' " 23 Yesu waabaasukile, "Mwemue muli ba pansi, nene ndi wa ku muulu, mwemue muli ba mu keno kyalo, inzi nene nsili wa mu keno kyalo. 24 I kinamyanina nangue mwaakafwila mu bibalo byenu. Pantu kine temuzumiine nangue 'Nene i wenka', mwaakafwila mu bibalo byenu." 25 Baamwipuziizie, "Eba, wewe uli ni?" Yesu waabaasukile, "Nene ndi wenka olia nga munamyaniine pa mambo. 26 Ndi ni bintu bingi bya kumyana ni bya kumitaninapo nsambu. Kabili olia antumine aliwalanda twebo twa kisinka, ni byonse bindinalanda mono mu kyalo bilibyafuma kuli wene." 27 Tebainikile nangue waali wabalandila palwakua Se. 28 Kupwako Yesu wabaana, "Musita umwakamulendula Mwina Muntu, i pamwaakeenika nangue 'Nene i Nene', kabili mwaakeenika nangue nsiizi kukita kantu muntoneene ne mwine, inzi ndinakita nga vinaasambiliziiziwe na Tawe. 29 Olia antumine ali pamo ni nene. Wene tansiile ne bunke pantu musita onse ndinakita bintu muatoneene." 30 Lubaunvwile twebo twaali twalanda Yesu, bengi baamuketekeele. 31 Yesu waabaanine Bayuda baamuketekeele nangue, "Kine mulikuya mwanakila twebo twane, mulikuya mwali basambi bane ba kiine. 32 Mwaakamana kisinka, ni kisinka kyaakamilubula." 33 Baamwaasukile, "Fwefue tuli ba mu luvyalo lwakua Abrahamu, kabili tetunateekuepo buzia na muntu. Eba, ale walandila ki nangue mwaakalubuka?" 34 Yesu waabaasukile, "Namyana kisinka nangue kubalua muntu aliwabala, i muzia wa bibalo. 35 Muzia tezi kwikalilila mu lupua, inzi mwana i aliwaikalililamo nsiku yonse. 36 Kine Mwana wamilubula, mwaakaba mwalubukile kisinka. 37 Nmanine nangue muli ba mu luvyalo lwakua Abrahamu, inzi muumiine kungipaya pantu temulimwapokelela keebo kane. 38 Ndinamyana bintu binaamwene kuli Tawe, ni mwemue mulimwakita bimwaalandilue na sinue." 39 Baamwanine, "Fwefue tuli bena Abrahamu." Yesu waabaanine, "Kabenge mwali bena Abrahamu, nga mulimwabomba miilo yaabombele Abrahamu. 40 Inzi evi mulimukukeba kungipaya ne alimukumyana kisinka kinaunvwile kuli Leza. Abrahamu taakitile bintu bya ozu musango! 41 Mwemue mulimwabomba miilo yakua sinue." Baamwanine, "Fwefue tetuli baana ba mu bukende, tuli sie na situe umo, i Leza." 42 Yesu waabaanine, "Kabenge Leza wali Sinue, nga muntonene pantu nene nfumine kuli Leza, ni evi vyenka vindi pano, nsyaiiziile ne mwine, inzi wene i antumine. 43 Eba, ale kimusiinikile twebo tundimukulanda ni kiki? Temwinikile pantu temulimukunvua masambilizio ane. 44 Muli bena Satana, ni belia bitonene sinue, i bimulimwakita. Wene waali ngipaani kutula ku mambo, kabili taikeele mu kisinka, pantu mukati mwakue temuli kisinka. Lualiwalanda bufi, aliwalanda mubeeleele bulanzi bwakue, pantu wene i kabeepa, kabili wene i ntuntuko ya bufi. 45 Mwemue temunketekeele pantu ndinalanda kisinka. 46 Nani pakati kenu wakunsongela nangue ndi ni kibalo? Kine ndinalanda kisinka, ale kimusingitabiliile ni kiki? 47 Muntu wakua Leza, aliwaunvua twebo twakua Leza, inzi mwemue temwaunvua pantu temuli bantu bakua Leza." 48 Bayuda baamwaasukile, "I kitulitwalandila nangue uli Musamaria, kabili nangue uli ni myela?" 49 Yesu waabaasukile, "Nsili na myela, inzi ndinamukindika Tawe. Mwemue mundebwile. 50 Nene nsiizi kukeba kulumbua na muntu, inzi kuli umo aliwakeba kulumbua, ni ye i aliwapingula. 51 Namyana kisinka nangue muntu kine wanakila keebo kane takafua." 52 Bayuda baamwanine, "I vitwasininkizia nangue ni kiine uli ni myela. Abrahamu waafwile, ni bakabika baafwile, inzi wewe kuya walanda nangue kine muntu wanakila keebo kane takafua. 53 Eba, we uli mukulu kukila situe Abrahamu waafwile? Ni bakabika baafwile? Ale wewe wimwene kuya wali ni?" 54 Yesu waabaasukile, "Kine naitasia ne mwine, bulumba bwane te kantu, inzi Tawe i aliwanumba, olia umulimwalanda nangue i Leza wenu. 55 Mwemue temumumanine, inzi nene nmumanine. Kine nalanda nangue nsimumanine, ndikwaluka wa bufi nga mwemue, inzi nene nmumanine, kabili ndinanakila twebo twakue. 56 Sinue Abrahamu waawamiinue kumona busiku bwa kwiza kwane. Waabumwene ni kuwaminua." 57 Bayuda baamwanine, "Wewe teunakumanie myaka 50 ! Ale waamumwene syani Abrahamu?" 58 Yesu waabaasukile, "Namyana kisinka nangue, Abrahamu luali tanavyalue, nene naaliko." 59 Kupwako, batoola mabue bamutoote, inzi Yesu wafyama, ni kubazembuluka, wafumina panze pa Nghanda yakua Leza.
1 Yesu luali walimukupita, waamwene muntu umo waavyelue wali mpofu. 2 Basambi bakue baamwipuziizie, "We Kasambilizia, ale pakuti ozu muntu avyalue wali mpofu, kyaalengele ni kibalo kyakue ao ni kibalo kya bavyazi bakue?" 3 Yesu waabaasukile, "Ozu muntu ao bavyazi bakue tebaabalile, inzi waavyelue wali mpofu pakuti miilo yakua Leza imonekele muli wene. 4 Kansi evi koba vikakiseeme, tubombe miilo yakua olia antumine, pantu tekuli muntu wakuvinda kubomba busiku bwasyailile. 5 Musita unkili pano pa kyalo, ndi musaniko wa kyalo." 6 Yesu luapwile kulanda evio, watiila mate pansi, wakandila lutipa na alia mate, wabuula lutipa ni kutendeka kusuba pa menso pa olia mpofu. 7 Waamwanine, "Ale endo usambe mu kiziba kya Siloamu." (Siloamu, i kulanda nangue atuminue.) Ni kiine waya kusamba, luafumine koko, waabwelele wamwene. 8 Benakue pamo ni balia baali bamumanine nangue waali walombelezia, baipuzyaniizie, "Emwe, ozu muntu te i olia waali wazikia walombelezia?" 9 Bange baalandile, "I wenka." Ni bange baalandile, "Ata, bapaleene sie nakue." Inzi ye mwine waalandile, "I nene wenka." 10 Baamwipuziizie, "Eba, ale menso obe akitendeka syani kumona?" 11 Waabaasukile, "Kuli muntu umo aliwakuutua Yesu i wakikandila lutipa ni kunsuba pa menso ni kunghana nangue, 'Endo usambe ku menso ku kiziba kya Siloamu.' Lunakiya kusamba, nakimona." 12 Baamwipuziizie, "Ale ozo muntu ali pi?" Waabaasukile, "Inga." 13 Ozo muntu waali mpofu baamutwele ku Bafarizeo. 14 Bwaali busiku bwa Sabata Yesu luakandiile lutipa ni kulengia ozo mpofu amone. 15 Kupwako Bafarizeo ni bo bamwipuzia. Ati, wakitendeka syani kumona? Waabaasukile, "Wakibiika lutipa pa menso ane, nasamba, ni evi nmwene." 16 Bafarizeo bamo baalandile, "Ozu muntu tatuminue na Leza pantu tezi kunakila mafunde a Sabata." Inzi bange baipuziizie, "Kubako muntu wa bibalo kuti wakita tupapo nga totu?" Kupwako ni kupusana kwatendeka pakati kabo. 17 Kabili Bafarizeo baamwipuziizie ozo mpofu, "Ale we wamonapo syani pali ozu muntu wakilengia kuti umone?" Waalandile, "Ozu muntu ni kabika." 18 Bayuda tebaitabiile busininkizio bwakue nangue waali mpofu, kabili nangue amwene. Ni pakako, baakuutile bavyazi bakue 19 ni kubeepuzia, "Ati, ozu i mwana wenu umulimwalanda nangue waavyelue waali mpofu? Ale wakitendeka syani kumona?" 20 Bavyazi bakue baabaasukile, "Tumanine nangue ni mwana wetu, kabili nangue waavyelue wali mpofu. 21 Inzi evi vyasyatendekele kumona, tetumanine, ni waalengele kuti aye wamona tetumumanine. Ye mwine ni muntu mukulu, mwipuzie sie alikumyasuka." 22 Bavyazi bakue baalandile evio pantu baali batiina Bayuda. Baba Bayuda baali baunvwene nangue, onse waakeetabiziako sie nangue Yesu i Kristu, bakamukumba mu nghanda ya malombi. 23 Bavyazi bakue i kibaalandiile nangue, "Wene ni muntu mukulu mwipuzie sie." 24 Kabili Bafarizeo baamukuutile ozo waali mpofu. Baamwanine, "Ewe, landa kisinka ku menso akua Leza pantu fwefue tumanine nangue wewe wakikosiiwa na muntu wa bibalo." 25 Wene waabaasukile, "Ozo muntu kine ni wa bibalo, nene nsimanine. Nmanineko sie kantu kamo, nene naavyelue nali mpofu, inzi evi nmwene." 26 Kabili baamwipuziizie, "Wakikukitila ki? Wakikita syani pakuti utendeke kumona?" 27 Waabaasukile, "Ale vinamyana sie lenu! Temunvwile? Ale kabili kimwakebela kunvua ni kiki? Mutonene mwaluke basambi bakue?" 28 Kupwako bamusasilila bamwana, "Wewe i musambi wakue! Fwefue tuli basambi bakua Musa. 29 Tumanine sie nangue Leza waalandile na Musa, inzi ozu muntu, tetumanine kwafumine!" 30 Ozo muntu waalandile, "Emwe, napapa! Eyo kansi temumanine kwafumine! Inzi i wakikosia menso ane! 31 Tumanine sie nangue Leza tezi kunvua wa bibalo, inzi aliwaunvua sie olia aliwamukindika ni kukita kutona kwakue. 32 Kutula kulengua kwa kyalo, tekunaunvwike nangue kuli ni muntu waakosiizie menso a muntu waavyelue wali mpofu. 33 Kabenge ozu muntu tekuba watuminue na Leza, nga takinkosia." 34 Baamwaasukile, "Eba, we muntu waavyaliilue mu bibalo ni kukulila mu bibalo i we watendeka kutusambilizia?" Kupwako bamukumbila panze pa nghanda ya malombi. 35 Yesu waunvwile nangue olia waali mpofu baamukumbiile panze. Luamusangile, waamwipuziizie, "Ati, umuketekeele Mwina Muntu?" 36 Waamwaasukile, "We Mulopue, ale ozo muntu nani? Nmbwile nmuketekele!" 37 Yesu waamwanine, "Umumwene, i nene wenka alimukulanda nobe." 38 Waalandile, "We Mulopue, naketekela." Kupwako wamupupa. 39 Yesu waalandile, "Nene kinaiziile pano pa kyalo ni pa mulandu wa kupingula, evi bampofu bamone, ni bamwene baaluke bampofu." 40 Bafarizeo baali bali pamo nakue, lubaunvwile evio baamwipuziizie, "Eba, i kulanda nangue ni fwefue tuli bampofu?" 41 Yesu waabaanine, "Mubenge mwali bampofu, nga temuli na bibalo. Inzi pantu mulimwalanda nangue tumwene, muli ni bibalo."
1 Yesu waabaanine evi, "Namyana kisinka nangue muntu aliwaingilila pange pange pasili mulyango wa kipata kya mikooko ni kabooko, kabili ni mupoti. 2 Inzi muntu aliwaingilila pa mulyango, wene i musungi wa mikooko, 3 mulindi aliwamwizwila mulyango, ni mikooko iliyaunvua lizui lyakue, ni wene aliwakuuta mikooko mu meena abo ni kuilombola panze. 4 Lualiwafumia mikooko yakue panze, aliwaitangilila, ni yo iliyaya yamukonkele pantu imanine lizui lyakue. 5 Ezio mikooko teivinda kumukonka mweni, inzi iliyamubutuka pantu teimanine vili lizui lyakue." 6 Anzia kine Yesu waabaanine keki kipalo, bene tebainikile kialandiile evio. 7 Kabili Yesu waabaanine evi, "Namyana kisinka nangue nene ndi mulyango wa kipata kya mikooko. 8 Bonse bantangiliile ni bakabooko, kabili ni bapoti, inzi mikooko ni yo teyaabonvwile. 9 Nene i mulyango. Kubalua muntu aliwaingilila kuli nene, waakapusuka, waakaba waingila ni kufuma, kabili waakaba wasanga bilio. 10 Kabooko wene aliwaizila sie kwiba ni kwipaya pamo ni kwinoona. Inzi nene naiziile kuti iye yali ni bukose bwine bwine. 11 "Nene i musungi aweme, musungi aweme aliwafwila pa mulandu wa mikooko yakue. 12 Inzi musungi aliwasaziiwa, asili mwine wa mikooko, lualiwamona miponda yalimukwiza, aliwasia mikooko ni kubutuka, ni miponda iliyaiza kusakukila mikooko ni kuisalanghania. 13 Muntu aliwasaziiwa kuti wabutuka pantu wene ni mubombi sie, kabili tasakameene ezio mikooko. 14 Nene ndi musungi aweme. Nmanine mikooko yane, ni mikooko yane inmanine. 15 Nga evelia vinmaninue na Tawe, ni nene i vinmumanine Tawe, kabili ndinafwila pa mulandu wa mikooko yane. 16 Ndi ni mikooko inge isili ya mu keno kipata, inzi ni yo nakaba kuileeta evi iye yaunvua lizui lyane, kabili yaakaaluka sie kisepe kimo, ni musungi waakaba sie umo. 17 "Keki i kintoneenue na Tawe pantu nmpeene bukose bwane, evi kabili mane nkabupoke. 18 Tekuli muntu wakunmpoka bobu bukose, inga sie nmpaane ne mwine. Ndi ni buvinde bwa kupaana ni kupokolola. Leli i lifunde linaalailue na Tawe." 19 Toto twebo twaalengiizie kabili Bayuda bapusane. 20 Bengi pakati kabo baalandile evi, "Ozu muntu ali ni Kibanda, kabili azambukile! Ale kyakumutwiliziizia ni kiki?" 21 Bange ni bo baalandile, "Totu twebo, te twa muntu ali ni Kibanda. Kubako Kibanda kuti kyazibula menso a bampofu?" 22 Ku Yeruzalemu kwaali nsikunkulu ya kuzuukia Nghanda yakua Leza. Waali wali musita wa kasama. 23 Yesu waali waya waenda lya mu lukungu lwa Nghanda yakua Leza lwaali lwakuutua Solomoni. 24 Bayuda baizile kumuzyungulukila, baabambile kumwipuzia evi, "Ewe, waya watwemiaemia sie? Twane kine wewe uli Kristu." 25 Yesu waabaasukile, "Naamyanine kale, inzi mwemue temwazumina. Tupapo tundinakita mu Liina lyakua Tawe i tulitwansininkizia. 26 Inzi temuzumiine pantu temuli mikooko yane. 27 Mikooko yane iliyaunvua lizui lyane, ni nene ngimanine, ni yo iliyankonka. 28 Ni nene ndinaipeela bukose bwa muyayaya, ni yo teikikazeeza. Kabili tekuli muntu waakansompola mu maboko ane. 29 Tawe wanmpeele ezi mikooko, i mukulu kukila bonse, kabili tekuli muntu waakamusompola mikooko mu maboko akue. 30 Nene ni Tawe, tuli umo." 31 Kupwako, kabili Bayuda batoola mabue bamutoote. 32 Yesu waabaanine, "Mone miilo bwingi iweme indinakita na buvinde bwakua Tawe. Eba, ale ni mwilo ki umwakeba kuntootelapo mabue?" 33 Bayuda baamwaasukile, "Pa mwilo uweme wene tetukutootelapo mabue, inzi tulikukutoota pantu uliwamufuupula Leza. Wewe uli sie muntu inzi kuya waialula kuba Leza!" 34 Yesu waabaasukile, "Eba, tekilembelue mu Mizilo yenu nangue, 'Leza waalandile nangue Mwemue muli baleza?' 35 Kine waabakuutile 'baleza' balia baiziilue na keebo kakua Leza, malembo teavinda kuvuika. 36 Inzi nene naasaakwilue na Tawe ni kutumua mu kyalo. Ale kuti mwalandila ki nangue, 'Namufuupula Leza' pantu naalandile nangue, 'Ndi Mwina Leza?' 37 Kine nsiizi kubomba miilo yakua Tawe, kansi tekunketekele. 38 Inzi kine ndinaibomba, anzia kine temunketekeele, ketekeleko sie tupapo tundinakita, evi mumane kisinka nangue Tawe ali muli nene, ni nene ndi muli Tawe." 39 Penka papo kabili tebomiine bamukwate, inzi wene waifompola mu minue yabo. 40 Kabili Yesu waabweleele ku bwala Mwenzi wa Yordani kwaali kwabatiziizia Yoane, kupwako waikala koko kwenka. 41 Bantu bengi baamukonkele balanda, "Yoane taakitile tupapo, inzi twebo tonse twaali twasininkiziiwa na Yoane palua ozu muntu, twaali twa kisinka." 42 Ku ezio nkendo bantu bengi baamuketekeele Yesu.
1 Kwaali mulwele umo liina lyakue Lazaro. Ozo muntu waali wa mu Betania mu muzi mwaali mwaikeele Maria ni nkaziize Marta. 2 Ozo Maria i olia waamusubile Mulopue mafuta a munu ku makasa ni kumupukusa na misisi yakue. Ndumeeze Lazaro waali walwele. 3 Bankaziize baatumine mukenzi wa kuya kumwana Yesu nangue, "We Mulopue, mutonua obe alwele." 4 Yesu luaunvwile evio, waalandile, "Bobu bulwele te bwa kufua, inzi ni bwa kulangisia bulumba bwakua Leza, evi Mwina Leza alumbiluemo." 5 Yesu waali wabatonene ba Marta ni Maria pamo ni Lazaro. 6 Luaunvwile nangue Lazaro alwele, taileko, paapitile ni inge nsiku ibili waikeele kwenka koko. 7 Ezio nsiku luyaapwile, waabaanine basambi bakue nangue, "Ale twende tubwelele ku Yudea." 8 Basambi bakue baamwanine, "We Kasambilizia, tuye koku kuwakisia kutootua mabue na Bayuda! Ale kiutoneene kubwelelako ni kiki?" 9 Yesu waabaasukile, "Eba, mu koba kamo temuli nsita likumi na ibili? Mone muntu kine waenda koba kaseeme tavinda kwipuutala pantu asanikiilue na musaniko wa mono mu kyalo. 10 Inzi kine waenda busiku alikwipuutala pantu tasanikiilue." 11 Yesu luapwile kulanda evio, waabaanine evi, "Kibuza wetu Lazaro onene, inzi ndikuya nmubuusie." 12 Basambi baamwanine, "We Mulopue, kine onene, alikubuuka." 13 Yesu waali walandile lufu lwakua Lazaro, inzi bene baali baizi nangue onene sie tulo. 14 Yesu i luabaanine sie kisinka nangue, "Lazaro afwile, 15 inzi nawaminua pa mulandu wenu pantu nsyakibako, kabili pantu mulikunketekela. Ale twende." 16 Inzi Toma, linge liina waali wakuutua Mpundu, waabaanine basambi nakue, "Twende tufue pamo ni Kasambilizia!" 17 Yesu waile kumusanga Lazaro wasyali na nsiku ina mu kilibu. 18 Muzi wa Betania waali wali sie pepi ni muzi wa Yeruzalemu. Paali pali sie kilometre itatu. 19 Kwaali Bayuda bengi baali baile ku kufwinika Marta ni Maria baali bafwiliilue na ndumyabo. 20 Marta luaunvwile nangue Yesu alimukwiza, waile kumusensekela. Inzi Maria wene wasyele waikeele mu nghanda. 21 Marta waamwanine Yesu, "We Mulopue, ubengepo ndumyamwine, nga takifua. 22 Inzi nmanine nangue ata lenu lyenka Leza alikukupeela kyonse kiulikumulomba." 23 Yesu waamwanine, "Marta, ndumeezo alikutuntumuka." 24 Marta waamwanine, "Ee, nmanine nangue waakatuntumuka busiku bwa mpeleezio." 25 Yesu waamwanine, "Nene i butuntumuko ni bukose. Onse anketekeele anzia afua, waakaba wakosele, 26 kabili onse akosele wanketekeele, takikafua. Waitabila kako?" 27 Marta waamwanine, "We Mulopue, naitabila ni kwinika nangue uli Kristu Mwina Leza waalailue nangue waakeeza mu kyalo." 28 Marta luapwile kulanda evio, waile kumukuuta nkaziize Maria ni kumwana mu kansongia nangue, "Kasambilizia waiza, kabili wakukuuta." 29 Ni ye luaunvwile evio, waasakamukile, waya kuli Yesu. 30 (Ozo musita Yesu waali tanaingile mu muzi, waali wakili sie palia penka paamusangile Marta.) 31 Bayuda baali baikeele ni Maria mu nghanda bamufwinika lubaamumwene wasakamuka ni kufumina panze, baamukonkele baizi nangue pange waya ku mankabuli ku kulila. 32 Maria waafikile paali paimeene Yesu, wamumona, wafukama wamwana, "We Mulopue, ubengepo ndumyamwine nga takifua." 33 Yesu luamumwene Maria walimukulila pamo ni Bayuda baile nakue, ni wene waunvwile bulanda bukata. 34 Waabeepuziizie, "Mwakimubiika pi?" Baamwaasukile, "We Mulopue, iza umone." 35 Yesu walila. 36 Bayuda baalandile, "Emwe, mone vyaali wamutonene!" 37 Inzi bange baalandile, "Emwe, ozu muntu waazibwile menso a bampofu. Ale wakyandua syani kukita ozu muntu tekuti afue?" 38 Yesu luaunvwile bulanda bukata paakale, waile ku mankabuli. Kilibu kyaaziikiluemo Lazaro kyaali kyali lipala lyaali lyaizeluepo libue. 39 Yesu waalandile, "Fumiepo libue!" Marta nkaziize kwa olia waafwile, waamwanine, "We Mulopue! Alimukununka, pantu tepasyapitile nsiku ina wali mu kilibu." 40 Yesu waamwanine, "Nsyakwananga nangue kine wazumina ulikumona bulumba bwakua Leza?" 41 Kupwako, bafumiapo libue. Yesu wakenta mu muulu walanda, "We Tawe, nasantila pantu wanghunvua. 42 Kabili nmanine nangue uliwanghunvua nsiku yonse, inzi nalandilanga sie leli libumba linzyungulukiile kuti liinike ni kuzumina nangue wewe i antumine." 43 Luapwile kulanda evio, waazanzwile lizui walanda, "Lazaro, fumina panze!" 44 Muntu waali wafwile, wafumina panze wapambiliilue mupangalala ku maboko ni ku maulu, inzi pa menso wavimbiliiluepo ngubo. Yesu waabaanine, "Ale mukakule aye." 45 Bayuda bengi baali baile ku kufwinika Maria lubaamwene bintu byaakitile Yesu, baamuketekeele. 46 Inzi bange pakati kabo baile kubabwila Bafarizeo bintu byonse byaakitile Yesu. 47 Makolo a babitambua ni Bafarizeo baateekele kilie balanda, "Emwe, tulikukita syani? Pantu ozu muntu aliwakita tupapo twingi! 48 Kine twamulekeela sie kuti aye wakita evi, bantu bonse baakamuketekela, kabili Baroma kuti baiza kwinoona Nghanda yakua Leza pamo ni ntundu yetu!" 49 Umo pa babo liina lyakue Kaifa, ozo waali kitambua mukulu mu ozo mwaka, waabaanine, "Mwemue temumanine kantu! 50 Kubako temwinikile nangue muntu umo apalile kufwila bantu, evi ntundu yonse tekuti izeeze?" 51 Toto twebo taalandile sie twa kwitungila. Inzi pantu waali kitambua mukulu mu ozo mwaka, waabikwile nangue Yesu waakafwila ntundu ya Bayuda. 52 Kabili te ezi ntundu sie bunke, inzi kuti akolonghanie bantu bonse bakua Leza baasalanghaniine kule evi babe libumba limo. 53 Kutula bobo busiku, baatendekele kumukambila kuti bamwipaye. 54 Ni pakako, Yesu waali wasyaenda sie tekuba wamoneka ku Bayuda, inzi waile sie kwikala pepi ni kaseeba, ku muzi umo waali wakuutua Efrahimu, koko i kuaikeele ni basambi bakue. 55 Nsikunkulu ya Bayuda yaali yakuutua Pasaka luyaali yasyapalama, bantu bengi baafumine mu mizi kuti baye ku Yeruzalemu evi baye baswesiwe Pasaka luisinatendeke. 56 Baabambile kumukeba Yesu. Kabili lubaali bali mu Nghanda yakua Leza, baipuzyaniizie, "Ati, mwamona syani? Kubako ozu muntu alikwiza ku nsikunkulu?" 57 Inzi makolo a babitambua ni Bafarizeo baali basyapeene nsambu nangue kubalua muntu alikumumona kuali, aye alande evi baye bamukwate.
1 Lukwaali kwasyele nsiku mutanda pakuti nsikunkulu ya Pasaka ibambe, Yesu waile ku Betania koko kwaali Lazaro uatuntumwine. 2 Koko i kubaamutebeteele bilio bya kyungulo. Marta i waali wateania bilio, Lazaro waali waikeele pamo ni bantu baali balimukulia pamo ni Yesu. 3 Maria waizile watweme lichupa lyaali lyaizuzimo mafuta a munu a mutengo ukata, mafuta aliakitua ku kimuti kya nardo iine iine, wasuba ku makasa akua Yesu. Kabili waabambile kupukusako na misisi yakue. Mu nghanda monse mwaanunkiile na azo mafuta. 4 Inzi Yuda Iskarioti mwina Simoni, umo wa pa basambi bakue, ozo waamusangukiile Yesu, waipuziizie, 5 "Emwe, ale aza mafuta kiasyakisisiiziwa na nfolanga 30 ni kupeela bapabi ni kiki?" 6 Tekulanda nangue waalandile evio pantu waali wabonvwiliile bapabi nkumbu, inzi waalandile evio pantu waali kabooko, kabili i waali wasunga kipao kya nfolanga ni kuya waibamo. 7 Inzi Yesu waamwanine, "Ozu mwanakazi tekumukite kantu pantu waasungile aza mafuta kuti ansubile mbeela lunsinaziikue. 8 Bapabi muli nabo nsiku yonse, inzi nene temuli nane nsiku yonse." 9 Bayuda bengi lubaunvwile nangue Yesu waali ku Betania, baileko. Tebailiileko sie kumumona Yesu, inzi bailiile kuti baye bamumoneko ni Lazaro waatuntumwinue na Yesu. 10 Makolo a babitambua baali bakambila kumwipaya ni Lazaro 11 pantu i waalengiizie Bayuda bengi bafume kuli bene ni kuya kumuketekela Yesu. 12 Lukeele lwakue bantu bengi baile ku nsikunkulu. Lubaunvwile nangue Yesu alimukwiza mu Yeruzalemu, 13 baatweme misambo ya bunkindu ni kuya kumusensekela baazanzwile mazui balanda, "Leza alumbue! Apaalue olia uatumine! Apaalue Likolo lya Baizraeli!" 14 Yesu luasangile kena punda, waikeelepo nga mulandiile Malembo nangue, 15 "We mwana wane Sayuni tekutiina, mona Likolo lyobe lilimukwiza lyaikeele pa kena punda." 16 Pa mambo basambi bakue tebainikile kialandiile totu twebo, inzi Yesu luatuntumukile, i lubainikile nangue wene i waalembeelue totu twebo, kabili nangue totu twebo tonse baamukitiile wenka wene. 17 Bantu baali bali pamo ni Yesu musita uakuutile Lazaro mu kilibu ni kumutuntumuna, baatwele mpunda konse ku baile. 18 Ni pakako, bantu baile kumusensekela Yesu pantu baunvwile nangue waakitile kako kapapo. 19 Bafarizeo baabambile kulanzyania nangue, "Emwe, temwamona nangue tetukitilepo kantu! Mone bantu bonse vibalimukumukonka!" 20 Kwaali Bagriki bamo pa babo bantu baile ku Yeruzalemu ku kupupa Leza musita wa nsikunkulu. 21 Baba bantu baile kuli Filipo wa ku Betesaida ya mu Galilaya. Baamwanine evi, "We Mukwetu, tulimukukeba kumumona Yesu." 22 Filipo waile kumubwila Andrea, penka papo bonse babili baya kumubwila Yesu. 23 Yesu waabaanine evi, "Musita wa kulumbua Mwina Muntu wakumana. 24 Namyana kisinka nangue lubezu lwa nghano kine teluponeene pa bulongo ni kufua, lulikuya lwali sie evelia vyenka, inzi kine lwafua, lwaakatwama nghano ingi. 25 Muntu atonene bukose bwakue waakabuzeezia, inzi muntu asuulile bukose bwakue mu keno kyalo waakabusunga, kabili waakaba ni bukose bwa muyayaya. 26 Kubalua muntu atonene kunmbombela, ankonke. Mubombi wane waakaba waikeele palia pandi. Kine muntu wanmbombela, Tawe alikumukindika. 27 "Evi mutima wane wakisa. Ndikulanda syani? Tawe, nmpususie mu aza maavia a ono musita. Inzi keki i kingiziile kya kupita mu ono musita wa maavia. 28 We Tawe, lumba Liina lyobe!" Kupwako lizui lyafuma mwiulu lyalanda, "Naalilumbile, kabili naakalilumba." 29 "Bantu baali baimeene pepi lubaunvwile lizui lyalanda, baalandile nangue ni mutukumo. Bange ni bo baalandile nangue ni malaika wamulanzia!" 30 Inzi Yesu waabaanine, "Lizui limwaunvua telyunvwikiile nene, inzi lyaunvwikila mwemue. 31 Ono i musita wa kupingulua bekala kyalo, kabili kateeka wa keno kyalo waakapoozua panze. 32 Inzi nene musita unaakalendulua pa musalaba, naakeepalamikila bantu bane bonse." 33 (Yesu kialandiile evi, ni pa mulandu wa kulangisia vyaliwakafua.) 34 Kupwako libumba lyamwasuka, "Fwefue twaunvwile mu Mizilo nangue Kristu waakeekalilila muyayaya. Ale walandila ki nangue, 'Mwina Muntu waakalendulua pa musalaba?' Eba, ozu Mwina Muntu nani?" 35 Yesu waabaanine nangue, "Musaniko ukili pamo nenu pa musita unini. Kansi ende mu kisue lumukisanikiilue, evi tekuti mwanziiwe na nfinzi pantu muntu aliwaenda mu nfinzi, tezi kumona kwali waya. 36 Lumukili ni musaniko, ketekele musaniko evi mukabe bantu ba mu kisue." Yesu lualandile evio, waabazembulukile waya kufyama kule. 37 Inzi anzia kine waakitile tupapo twingi, Bayuda tebaamuketekeele. 38 Waalandile evi pakuti keebo kaalandile kabika Isaya kafikiliziiwe nangue, "We Mulopue, nani waazumiine mpunda yetu? Nani waafyuliilue buvinde bwakua Mulopue?" 39 Ni pakako baandilue kumuketekela pantu kabili Isaya waalandile nangue, 40 "Leza waabafofiizie menso abo, kabili waafiniizie mitima yabo, bakeeza kumona na menso abo, bakeeza kwinika mu mitima yabo, bakeeza kwalukila kuli nene, ni nene nabakosia." 41 Isaya waalandile totu twebo pantu waamwene bulumba bwakua Yesu. Kabili waali walanda palwakua wene. 42 Inzi anzia kine kyaali evio, bakulu bengi ba Bayuda, bamuketekeele Yesu. Inzi tebailumbile pantu baali batiina Bafarizeo bakabakumba mu nghanda ya malombi. 43 Kabili pantu baatonene kutasiwa na bantu kukila kutasiwa na Leza. 44 Yesu wazanzula lizui walanda, "Kine muntu wanketekela, tanketekeele sie nene, inzi waketekela Leza antumine. 45 Ni onse aliwanmona, aliwamumona ni Leza antumine. 46 Naizile mu kyalo kuti ngie nali musaniko, evi onse wanketekela tekuti ekale mu nfinzi. 47 Kabili muntu kine waunvua twebo twane koku tekuba watunakila, ne nsimupingula. Pantu nsyaiziile kupingula bekala kyalo, inzi naiziile kupususia bekala kyalo. 48 Muntu aliwansuula ni kukaana twebo twane, ali ni waakamupingula. Twebo tundinamyana i twaakamupingula busiku bwa mpeleezio. 49 Pantu nsiizi kulandila mu buvinde bwane, inzi ndinalandila mu buvinde bwakua Tawe antumine. Kabili i wanmpeele mulao wa twebo tundinalanda ni musango wa kulandilamo. 50 Kabili nmanine nangue mulao wakue uliwaleeta bukose bwa muyayaya. Totu twebo tundinalanda, ndinalanda munaalailue na Tawe."
1 Kwaali kwasyele sie busiku bumo pakuti nsikunkulu ya Pasaka ibambe. Yesu waali wamanine nangue musita wakue wakumana wa kuti afume mu keno kyalo ni kuya kuli Se. Waali wabatonene bantu bakue baali nabo mu kyalo, kabili waabatoneesie. 2 Yesu ni basambi bakue lubaali balimukulia bilio bya kyungulo, Kibanda kyaali kyasyabiikiile mbeela malanga abi mu mutima wakua Yuda mwina Simoni Iskarioti, evi amupaane Yesu. 3 Inzi pantu Yesu waali wamanine nangue Se amupeele bintu byonse mu maboko akue, kabili nangue Leza i amutumine, kabili nangue alimukuya kuli Leza, 4 waafumine pa baali balia, wabiika ngubo yakue ya pa muulu pambali, wabuula ngubo ya kupukusilako waikaka mu kitungu, 5 wabiika menda mu musambilo, wabamba kusamba makasa a basambi bakue ni kubapukusa na ngubo iaikakile mu kitungu. 6 Luafikile pali Simoni Petro, Petro waamwipuziizie, "We Mulopue, wakeba kunsamba makasa?" 7 Yesu waamwaasukile, "Kaka kandimukukita lenu pano teukamanine, inzi waakakamana pa kyamba." 8 Petro waamwanine, "Wewe teupalile kunsamba makasa, nakaana!" Yesu waamwanine, "Kine wewe nsikusambile teuba mulundanane." 9 Simoni Petro waamwanine, "We Mulopue, kansi tekunsamba sie makasa, inzi unsambe ni ku maboko pamo ni ku mutue!" 10 Yesu waamwanine, "Muntu asambile mubili onse tezi kukeba kabili kusamba mubili onse, inga sie kusamba ku makasa, pantu wene aswetele sie pepepe. Mwemue muswetele, inzi te mwe bonse." 11 (Pantu waali wamanine nangue nani waakamupaana, i kialandiile nangue, "Te mwe bonse baswetele.") 12 Luapwile kubasamba makasa abo, wavwala ngubo yakue ya pa muulu, waikala kabili ku meza ni kubaana, "Ati, mwamana kinamisambila? 13 Mulimwankuuta nangue, 'Kasambilizia', kabili mulimwalanda nangue, 'Mulopue'. Kisinka mulimwalanda sie bwino pantu ivindi. 14 Kansi kine ne Mulopue ni Kasambilizia wenu namisamba makasa enu, ni mwemue muye mwakita evio vyenka. 15 Evi vinamilangilila i vyakuti mukabe mwakita. 16 Namyana kisinka nangue muzia te mukulu kukila selenzi, ao mukenzi te mukulu kukila olia amutumine. 17 Inzi pantu mwamana kinalandila evi, mwaakaba mwasyukile kine mukabe mwakita! 18 "Te mwe bonse bandimukulandila totu twebo. Nmanine banaasaakwile. Inzi ni pakuti Malembo afikiliziwe nangue, 'Olia unaaliile nakue i wangalukiile.' 19 Namyanina mbeela pabisinakitike, evi pabikakitika mukasininkizie nangue 'Nene i wenka.' 20 Namyana kisinka nangue, onse aliwapokelela kubalua muntu undinatuma, aliwanmpokelela nene, kabili onse aliwanmpokelela nene aliwamupokelela olia antumine." 21 Yesu luapwile kulanda evio, waunvwile mutima wakisa. Waalandile pa menso a bantu nangue, "Namyana kisinka nangue umo pakati kenu wakaba kunmpaana." 22 Basambi bakue baabambile kukentana babebukile. Inzi tebaali bamanine kine Yesu waali waana ni. 23 Pa basambi bakue paali umo waali wailikiizie pa nkulo yakua Yesu, ozu muntu waali watoneesiwe na Yesu. 24 Kupwako, Simoni Petro wamupesula wamwana, "Ewe, mwipuzie alande kine alimukwana ni." 25 Olia waali wailikiizie pa nkulo yakua Yesu, waamwipuziizie, "Ati Mulopue, nani?" 26 Yesu waamwaasukile, "Olia muntu undikupeela kisoso kya mukate kindikutobela, i wenka." Kupwako, wabuula kisoso kya mukate, watobela, wamupeela Yuda mwina Simoni Iskarioti. 27 Yuda luapokeleele sie kekio kisoso kya mukate, penka papo Satana wamwingila. Yesu waamwanine, "Kako kaumiine kukita, lenga ukite!" 28 Pa ezio meza ibaalipo tepaali muntu waamanine kiamwaaniine evio. 29 Bantu bamo baali baizi nangue, watumua kuya ku kusita bilio bya kulia musita wa nsikunkulu, ao nangue waya kupeela bapabi tuntu tumo tumo, pantu Yuda i waali kasunga wa kipao. 30 Yuda luapokeleele sie kekio kisoso kya mukate, penka papo wafumina panze. Ozo musita bwaali bwasyailile. 31 Yuda luafumiine panze, Yesu waalandile, "Evi bulumba bwa Mwina Muntu bulikumoneka, kabili Leza alikulumbilua muli wene. 32 Kine bulumba bwakua Leza bulikumonekela muli wene, kansi Leza mwine i alikulangisia bulumba mu mwana wakue, kabili alikubulangisia sie lenu. 33 Mwe baana bane, ndikuba nenu pa musita unini. Mwaakankeba nga munaabaaniine Bayuda. Namyana nangue, 'Kundimukuya mwemue temuvinda kwizako!' 34 Namipeela mulao wa lenu, 'Tonane.' Nga evelia vinmitonene, i vyakuti mutonane ni mwemue. 35 Pantu kine mwatonana, bantu bonse balikumana nangue muli basambi bane." 36 Simoni Petro waamwipuziizie, "Ati we Mulopue, ulikuya pi?" Yesu waamwaasukile, "Kundikuya teuvinda kunkonka, inzi waakankonka pa kyamba." 37 Petro waamwanine, "We Mulopue, ale kindikwandilua kukukonka lenu ni kiki? Kine ni kufua, ndikufua pamo nobe!" 38 Yesu waamwaasukile, "We Petro! Kubako ni kiine ulikufua pamo nane? Nakwana kisinka nangue, kazenze pakasinabike waakaba wasyankeene litatu.
1 "Tekusakamane mu mitima yenu, muketekele Leza, munketekele ni nene wenka. 2 Mu nghanda mwa Tawe muli bifuka bingi bya kwikalamo, kabenge tekuba mwali, nga nakimyanina mbeela. Ndikuya kumiteaniizia kifuka. 3 Kabili kine naya kumiteaniizia kifuka, naakabwela kumitwama evi mukabe pamo ni nene ponse panaakaba. 4 Kolia kundikuya mumanineko, ni nzila muimanine." 5 Toma waamwipuziizie, "We Mulopue, tetumanine kuulikuya, ale tulikumana syani nzila?" 6 Yesu waamwanine, "Nene i nzila, nene i kiine, nene i bukose. Tekuli muntu wakuya kuli Tawe kine tapitiile muli nene. 7 Inzi pantu mwanmana, ni Tawe mwaakamumana. Kutula lelo mwamumana, kabili mumumwene." 8 Filipo waamwanine, "We Mulopue, kansi tulangisie So." 9 Yesu waamwanine, "We Filipo, eyo kansi ozu musita onse ungikeele nenu teunanmane! Unvua, olia anmwene, amumwene ni Tawe. Eba, ale walandila ki nangue, 'Kansi tulangisie So?' 10 Teuketekeele nangue nene ndi muli Tawe, Tawe ni ye wali muli nene? Totu twebo tundinamyana tetwakwitungila sie, inzi tufumine kuli Tawe mwine. Tawe ekeele muli nene aliwaila miilo yakue. 11 Ketekele nangue nene ndi muli Tawe, kabili nangue Tawe ali muli nene. Kine temuketekeele twebo tundimukulanda, kansi ketekele sie pa mulandu wa miilo indinakita. 12 Namyana kisinka nangue: Olia anketekeele, ni ye waakaba wakita miilo indinakita, kabili waakakita miilo ikata kukila ezi pantu ne naya kuli Tawe. 13 Kabili byonse bimwaakaba mwalomba mu Liina lyane naakaba namipeela, evi Tawe alumbue kupitila mu Mwana wakue. 14 Kyonse kimwaakaba mwalomba mu Liina lyane, naakaba namipeela. 15 "Kine muntonene, mulikunakila mulao wane. 16 Kabili naakamulomba Tawe akamipeele Mukwasi unge wakwiza kwikala pamo nenu muyayaya. 17 Bekala kyalo baandilue kumupokelela pantu tebanamumone, kabili tebamumanine. Inzi mwemue mumumanine pantu mwikeele nakue, kabili ali mukati mwenu. 18 "Nsikamisia bunke, naakabwela kuli mwemue. 19 Kusyele sie musita unini, bekala kyalo tebaakanmona kabili, inzi mwemue mwaakaba mwanmona, pantu nene nkosele, ni mwemue mwaakaba mwakosele. 20 Lwaakafika bobo busiku mwaakamana nangue nene ndi muli Tawe, ni mwemue muli nene, ni nene muli mwemue. 21 "Muntu aliwapokelela mulao wane ni kuunakila, wene i antonene. Muntu antonene, Tawe alikumutona, kabili nene ndikumutona ni kwilangisia kuli wene." 22 Inzi Yuda, te Iskarioti, waamwanine, "We Mulopue, ulikwilangisia syani kuli fwefue pasili kwilangisia ku kyalo?" 23 Yesu waamwaasukile, "Kine muntu wantona, alikunakila keebo kane. Tawe alikumutona, kabili ni fwefue tulikwiza kwikala muli wene. 24 Muntu asintonene tavinda kunakila twebo twane. Totu twebo tumulimwaunvua te twebo twane, inzi ni twakua Tawe antumine. 25 Namyana totu twebo lunkili pamo nenu. 26 Inzi Mukwasi, Mweo Muzuuke, waakatumua na Tawe mu Liina lyane, wene i waakamisambilizia byonse ni kumilangulusia byonse bindinamyana. 27 "Namisiila mutende. Mutende unamipeela teuli nga mutende uliwapaanua na bekala kyalo. Tekutoobole mitima yenu, kabili tekutiine. 28 Mwaunvwanga vinamyananga nangue, 'Ndikuya, kabili naakabwela kuli mwemue.' Muntonenge nga mwawaminua pantu ndikuya kuli Tawe, kabili pantu Tawe ni mukulu kunkila. 29 Ni evi namyanina mbeela pabisinakitike, evi pabikakitika mukazumine. 30 Nsikilanda nenu twebo twingi kabili, pantu Satana, kateeka wa keno kyalo waiza. Inzi tali na kantu kuli nene. 31 Evi bekala kyalo bamane nangue nene nmutonene Tawe, kabili ndinakita munaalailue na Tawe. "Ale buuke tuye twaya.
1 "Nene ndi muzabibu wiine wiine, Tawe i mulimi. 2 Kubalua musambo uli kuli nene usiliwaseekako mazabo aliwauteeta. Kabili kubalua musambo uliwaseekako mazabo aliwautyonena, evi useekesie. 3 Mwemue temusyaswesiiziwe na keebo kanaamyanine. 4 Ikalilile muli nene, evi ni nene ngikalilile muli mwemue. Musambo wa muzabibu kine uli pa bunke teuvinda kuseekako mazabo, inga sie kine ukuneeme ku kisinte kya muzabibu. Ni mwemue benka kine temwikaliliile muli nene temuvinda kuseekako mazabo. 5 "Nene ndi muzabibu, mwemue muli misambo. Kubalua muntu ekaliliile muli nene, ni nene naikaliliile muli wene, ozu i aliwaseeka mazabo engi pantu kine nene nsilipo, tavinda kukita kantu. 6 Kine muntu tekeele muli nene, aliwapoozua panze, kabili aliwauma nga musambo. Misambo yumine iliyatoolua na bantu ni kuziziiwa. 7 Kine mwaikalilila muli nene, ni twebo twane twaikalilila muli mwemue, mulikulomba kubalua kantu kamutonene, ni mwe mulikupeelua. 8 Ni mukuseekako mazabo i mwaakakindikilua Tawe. Kine mwaseekako mazabo engi, mwaakaba mwali basambi bane. 9 Nene nmitonene nga vintonenue na Tawe. Kansi ikalilile mukutona kwane. 10 Kine mwanakila mulao wane, mwaakaba mwaikaliliile mukutona kwane nga evelia nene vinaanakiile mulao wakua Tawe ni kwikalilila mukutona kwakue. 11 "Kinamyanina evi, ni pakuti kuwaminua kwane kuye kwali muli mwemue, ni kuwaminua kwenu kuye kwapwililikile. 12 Ozu i mulao wane, tonane nga vinmitonene. 13 Koku i kutona kwine kwine, muntu kufwila bibuza byakue. 14 Kine mulikuya mwakonka mafunde ane, mulikuya mwali bibuza byane. 15 Nsikiya namikuuta babombi bane, pantu mubombi tezi kumana vilivyakita selenzi. Mwemue ndikuya namikuuta bibuza byane, pantu byonse binaunvwile kuli Tawe nakimyana. 16 Te mwemue bansaakwile, inzi nene i waamisaakwile, kabili nene naamitumiine muye mwaseeka mazabo, evi mazabo enu ekalilile, mane byonse bimwaakaba mwamulomba Tawe mu Liina lyane, akabe wamipeela. 17 Ozu i mulao wane: Tonane. 18 "Kine bekala kyalo bamisuula, mane nangue ni nene wenka naansuulilue mwemue lumwaali temunasuulue. 19 Mubenge mwali bekala kyalo, nga bekala kyalo bamitonene pantu muli bekala kyalo. Inzi nene naamisaakwile ni kumifumia pakati kabo. Keki i kimusuuliilue pantu mwemue temuli bekala kyalo. 20 Languluke keebo kanaamyanine nangue, 'Muzia te mukulu kukila selenzi.' Ni pakako kine banghemiizie nene, ni mwemue benka baakamyemia. Kine baanakiile twebo twane, baakanakila ni twebo twenu evelia vyenka. 21 Baakaba bamikitila bebi byonse pa mulandu wa Liina lyane, kabili pantu tebamumanine olia antumine. 22 Kabenge nsyaizile ni kulanda nabo, nga tebali na bibalo, inzi evi tebali na kakubeepela pa bibalo byabo. 23 Muntu ansuulile, amusuulile ni Tawe. 24 Kabenge nsyaakitilepo miilo isinakitwepo na unge muntu, nga tebali na bibalo. Miilo indinabomba baimwene, inzi nene ni Tawe batusuulile. 25 Bebi byonse bipalile kukitika, evi byonse bilandilue mu Mizilo yabo bifikiliziwe. Bilandilue nangue, 'Bansuulile sie kya mpuni.' 26 "Musita waakeeza Mukwasi, Mweo wa kisinka waakafuma kuli Tawe, Mweo unaakamitumina, wene i waakalanda kisinka palwakua nene. 27 Kabili ni mwemue mwaakaba basininkizi bane pantu mwaali pamo ni nene kutula pa mambo.
1 "Kinamyanina totu twebo ni pakuti tekuti mukapone mu buzumino. 2 Mwemue mwaakakumbua mu nghanda ya malombi. Inzi musita ulimukwiza, bantu baakamiipaya, baakaba baizi nangue balimukumubombela Leza. 3 Baakamikitila evio pantu tebaamumanine Tawe, ni ne wenka tebanmanine. 4 Inzi kinamyanina evi, ni pakuti mumane, evi musita wabo paukakumana, mukalanguluke nangue naamyanine. "Nsyaamyanine totu twebo kutula pa mambo pantu naali pamo nenu. 5 Inzi evi naya kuli olia antumine, ni pakati kenu tepali muntu wangipuzia nangue, 'Ulikuya pi?' 6 Evi mwaunvua bulanda bukata mu mitima yenu pantu namyana totu twebo. 7 Inzi nene namyana kisinka nangue kine nene naya, ni lisyuko lyenu, pantu kine nsiile, Mukwasi takamiizila. Inzi kine naya, naakamitumina. 8 Lwaakeeza Mukwasi, waakabasininkizia bekala kyalo palua bibalo ni palua bulunghami pamo ni palua bupinguzi. 9 Waakabasininkizia palua bibalo pantu tebanketekeele. 10 Waakabasininkizia palua bulunghami pantu naya kuli Tawe, kabili temukikanmona. 11 Waakabasininkizia palua bupinguzi pantu Satana kateeka wa keno kyalo tasyapingwilue. 12 "Nkili ni twebo twingi twa kumyana, inzi ono musita temuvinda kumana kindikumyanina. 13 Inzi musita waakeeza Mweo wa kiine, wene iwaakamilombola mu bisinka byonse, pantu takaba walanda twebo twa kwitungila, inzi waakaba walanda twebo tuaunvwile. Kabili waakaba walanda ni bintu byaakeeza. 14 Waakanumba pantu waakamyana twebo tuakabuula pa twebo twane. 15 Byonse byakua Tawe ni byane. Ni pakako i kinalandila nangue Mweo waakamyana twebo tuakabuula pa twebo twane. 16 "Musita unini temukanmona. Pakapitapo musita unini mwaakanmona kabili." 17 Bange pa basambi bakue, baipuzyaniizie, "Emwe, Ale walandila ki evi nangue musita unini temukanmona. Pakapitapo musita unini mwaakanmona kabili pantu naya kuli Tawe?" 18 Baatwaliliile kwiipuzia, "Kulanda nangue musita unini i kulanda syani? Tetumanine kialandila evi!" 19 Yesu waamanine nangue balimukukeba kumwipuzia palua bintu biabaana. Waabaanine, "Mulimukwipuzyania nangue, 'Walandila ki nangue musita unini temukanmona. Pakapitapo musita unini mwaakanmona kabili?' 20 Namyana kisinka nangue mwaakalila ni kuloosia, inzi bekala kyalo baakawaminua. Mwemue mwaakaba ni bulanda, inzi bulanda bwenu bwaakaaluka nsansa. 21 Mwanakazi pakuvyala, aliwaaluka ni bulanda pantu musita wakue wapalama, inzi wasyavyele mwana, aliwalaba misa yonse, aliwawaminua pantu muntu wavyalua mu kyalo. 22 Ono musita mwemue muli ni bulanda, inzi naakeeza kumimona kabili, evi mitima yenu ikawaminue sana, kabili tekuli muntu waakamipoka nsansa yenu. 23 Bobo busiku temukangipuzia kantu. Namyana kisinka nangue byonse bimwaakaba mwamulomba Tawe mu Liina lyane, waakaba wamipeela. 24 Kutula lolo mpaka lelo temunalombe kantu mu Liina lyane. Lombe, mulikupeelua, evi kuwaminua kwenu kuye kwapwililikile. 25 "Naali namyanina mu bipalo, inzi musita waakeeza, nsikamyanina kabili mu bipalo, naakaba nalanda twebo twakua Tawe pasili bipalo. 26 Kutula bobo busiku mwaakaba mwalomba mu Liina lyane. Nsilimukulanda nangue naakaba namilombela kuli Tawe, 27 pantu Tawe mwine amitonene. Amitonene pantu muntonene, kabili pantu mwitabiile nangue naafumine kuli Leza. 28 Lunaafumine kuli Tawe, naizile mono mu kyalo. Kabili nakaba kubwelelamo kuli Tawe." 29 Basambi bakue baamwanine, "Evi i viwalanda twebo twaunvwikile pasili kulandila mu bipalo. 30 Kabili i vitwasininkizia nangue ni kiine umanine byonse, kabili wewe teuli wakwipuziiwa na muntu. I vitwasininkizia nangue ufumine kuli Leza." 31 Yesu waabeepuziizie, "Eba, i vimwasininkizia? 32 Musita ulimukwiza, kabili teusyaizile, musita umulikusalanghaniwa, kubalua muntu abutukile kwakue bunke. Mulikunsia bunke, inzi nsiya nali bunke pantu Tawe ali pamo ni nene. 33 Kinamyanina evi, ni pakuti muye mwali ni mutende wane. Mono mu kyalo mwaakamonamo lyemo, inzi tekukatooboke mu mitima yenu pantu nene naanzia kyalo!"
1 Yesu luapwile kulanda evio, wakenta mwiulu walanda, "We Tawe, musita wakumana! Lumba Mwana obe, evi ni ye akulumbe, 2 pantu waamupeele buvinde pa bantu bonse, kuti ni ye abapeele bukose bwa muyayaya balia bonse baawamupeele. 3 Bukose bwa muyayaya ni bobu: Kukumana wewe bunke Leza wa kiine, ni Yesu Kristu uwaatumine. 4 Nakikulumba mu kyalo, kabili miilo ya kubomba iwanmpeele nakiibomba. 5 We Tawe, ale numbe nga evelia vinaali ni bulumba lunaali nakili pamo nobe kyalo lukyaali tekinalengue. 6 "Bantu bawanmpeele pa kyalo naababwilile Liina lyobe. Baali bali bobe, kabili wanmpeele, ni bo baanakiile keebo kobe, 7 ni evi bamanine nangue byonse biwanmpeele byaafumine kuli wewe. 8 Pantu naabapeele twebo tuwanmpeele, ni bo baatupokeleele, kabili bamanine kisinka nangue naafumine kuli wewe, kabili betabiile nangue wewe i antumine. 9 "Naabalombela. Nsilimukulombela bekala kyalo, inzi ndimukulombela sie balia bawanmpeele pantu i bobe. 10 Bonse bane ni bobe, kabili bonse bobe ni bane. I kindinalumbilua muli bene. 11 Nene nsikiikalilila mu kyalo, inzi bene bakili mu kyalo, nene naiza kuli wewe. We Tawe Muzuuke, nalomba ubalabukile na maka a Liina lyobe liwanmpeele evi baye baali umo nga fwefue vituli umo. 12 Musita unaali pamo nabo, naabalabukiile na maka a Liina lyobe. Bonse bawanmpeele naabasungile, ni pakati kabo, tepazeezele ata umo, inga sie olia waali wapalile kuzeeza, pakuti Malembo afikiliziwe. 13 Ni evi ndimukwiza kuli wewe, kinalandila evi lunkili pano pa kyalo, ni pa mulandu wa kuwaminua kwane kuye kwali mukati mwabo. 14 Pantu naabapeele keebo kobe, i kibaakendeelue na bekala kyalo nga evelia nene vinsili mwikala kyalo. 15 Nsikulombele ubafumie pa kyalo, inzi nakulomba ubalabukile ku Olia Mubi. 16 Bene te bekala kyalo, ni nene wenka nsili mwikala kyalo. 17 Baswesie na kiine kyobe. Keebo kobe i kiine. 18 Nga evelia viwantumine mu kyalo, ni nene wenka nabatuma mu kyalo. 19 Naipeela ne onse kuli wewe pa mulandu wabo, evi ni bene baye baipeele kuli wewe. 20 "Nsilimukulombela sie bene bunke, inzi ndimukulombela ni balia bonse bakaba kunketekela kupitila mu twebo twabo, 21 evi bonse baye bali umo nga evelia vituli. Nene ndi muli wewe, kabili wewe uli muli nene. Nalomba ni bene baye baali umo muli fwefue, evi kyalo kiinike nangue, wewe i antumine. 22 Naabapeele bulumba buwanmpeele, evi baye baali umo nga vituli umo. 23 Nene muli bene, ni wewe muli nene, pakuti baye bapwililikile mu buumo, evi bekala kyalo benike nangue, wewe i antumine, kabili benike nangue ubatonene nga evelia viuntonene. 24 "We Tawe! Ntonene palia pandi, ni balia bawanmpeele bakabe balipo, evi bakamone bulumba bwane buwanmpeele, pantu wantonene kyalo lukyaali tekinabeko. 25 We Tawe Mulunghami, bekala kyalo tebakumanine, inzi nene nkumanine, baba ni bo bamanine nangue wewe i antumine. 26 Naababwilile Liina lyobe, kabili naakatwalilila kubabwila, evi kolia kuntona kuwantonene kuye kwali mukati mwabo, kabili nene ngie nali muli bene."
1 Yesu Luapwile kulomba, waile ku bwala Lulambe lwa Kidroni kwaali kwali bukaba. Mu bobo bukaba i mwaile Yesu pamo ni basambi bakue. 2 Yuda olia waamupeene, waali wamanineko pantu Yesu ni basambi bakue i kubaali balonghanina. 3 Kupwako, Yuda watwama balukale ba Kiroma waya nabo pamo ni bakalinda bamo ba Nghanda yakua Leza babo baatuminue na makolo a babitambua ni Bafarizeo. Waile nabo lya koko kwenka. Baali batweme matala ni myenge pamo ni bilwilo. 4 Inzi pantu Yesu waali wamaniine mbeela byonse byaakamukitikila, waabapalamiine ni kubaana, "Ati, mulimukukeba ni?" 5 Baamwaasukile, "Tulimukukeba Yesu wa ku Nazareti." Yesu waabaanine, "I nene." Ozo musita Yuda olia waamupeene, waali waimeene pamo nabo. 6 Yesu lualandile sie nangue, "I nene," baabwelele kinfwenfue ni kuponena pansi. 7 Kabili waabeepuziizie, "Ati, mulimukukeba ni?" Baalandile, "Tulimukukeba Yesu wa ku Nazareti." 8 Yesu waabaanine, "Namyana sie lenu nangue, i nene. Kansi kine i nene umwakeba, baleke baba baye." 9 (Kialandiile evi, ni pakuti Malembo afikiliziwe alandile nangue, "We Tawe, nsyaazeeziiziepo ata umo pa balia bawanmpeele.") 10 Simoni Petro waali watweme ni kipanga. Kupwako wasomona kale ni kukomapo mubombi umo wakua kitambua mukulu ni kumusempa kutui kwa kulio. Ozo mubombi waali wakuutua Malko. 11 Yesu waamwanine Petro, "Bwezia kipanga kyobe mu kitubo. Ale ndikukaanina ki lyemo linaapeelue na Tawe?" 12 Kupwako babo balukale ni mukulu wabo, pamo ni balindi ba Kiyuda bamukwata Yesu ni kumukaka. 13 Baamutwelenke kuli Ana waali sevyala wakua Kaifa. Kaifa waali wali kitambua mukulu ozo mwaka. 14 Ozu Kaifa, i olia waabasokele Bayuda nangue muntu umo apalile kufwila bantu bonse. 15 Simoni Petro pamo ni musambi unge, baali bamukonkele Yesu. Inzi pantu ozo musambi waali wamaninue na kitambua mukulu, waingiile pamo ni Yesu mu musolo wakua kitambua mukulu. 16 Petro wene wasyele waimeene panze pepi ni mulyango. Olia unge musambi waali wamaninue na kitambua mukulu waafumiine panze ni kuya kumwana olia mwanakazi mulindi wa pa mulyango amwingizie Petro. 17 Ozo mwanakazi mulindi wa pa mulyango, waamwipuziizie Petro, "Ati, ni wewe uli umo wa pa basambi bakua ozu muntu?" Waamwaasukile, "Ata te nene!" 18 Bakalinda pamo ni babombi, baali bakoziizie ni mulilo wa mafito pantu kwaali kasama. Baba bantu baali baimeene baonta mulilo. Petro ni ye waali waimeene pamo nabo walimukwitutumuna. 19 Kitambua mukulu waali wamwipuzia Yesu palua basambi bakue, ni palua masambilizio akue. 20 Yesu waamwaasukile, "Naali nalanda pa menso a bantu bonse, naali nasambilizia sie lyonse mu nghanda ya malombi ni mu Nghanda yakua Leza mwaali mwalonghanina Bayuda bonse, kabili nsyaalandile kantu mu kafiso. 21 Ulimukungipuziizia ki? Ipuzia balia baali basanguapo pantu bene i bamanine vinaali nalanda." 22 Yesu lualandile sie evio, lukale umo waali waimeene pepi ni kiloolo waamuumine Yesu lupi pa menso ni kulanda, "I vyakwasuka kitambua mukulu evio!" 23 Yesu waamwanine, "Ale nsyute kine naluvyanga mukulanda kwane, nmbwile kilubo kyane. Kine nsiluviizie, ale wanghumina ki?" 24 Kupwako, Ana wamutwala wakakilue evelia vyenka kuli Kaifa kitambua mukulu. 25 Simoni Petro waali waimeene walimukwitutumuna. Baamwipuziizie, "Ewe, wewe uli umo wa pa basambi bakue?" Waakeene walanda, "Ata te nene." 26 Umo wa pa babombi bakua kitambua mukulu, ozo waali lupua lwakua olia waasempwilue kutui na Petro waamwipuziizie, "Ewe, te wewe unamonanga ku bukaba wali pamo nakue?" 27 Kabili Petro waakeene. Kupwako penka papo ni kazenze kabika. 28 Lubaamufumiizie Yesu kuli Kaifa, baamutwele ku nghanda yakua ndabukizi Muroma. Ozo musita kwaali kwasyali kumakia, inzi Bayuda bene tebaingiilemo mu nghanda yakua ndabukizi Muroma bakeeza kwingila mu kilubo, evi bakalie bwino bilio bya nsikunkulu ya Pasaka. 29 Pilato waafumiine panze pa baali, ni kuya kubeepuzia, "Ati, ozu muntu waluvia ki pakuti mwize mumusongele?" 30 Baamwaasukile, "Ozu muntu kabenge tekuba wali na bilubo, nga tetumuleetele kuli wewe." 31 Kupwako Pilato i kwenka kubaana sie nangue, "Ale mutwame mwe bene, mumupingule kukonkana ni mizilo yenu." Baamwanine, "Fwefue tetuli na nsambu ya kwipaya muntu." 32 (Bebi byaakitikile sie pakuti bafikilizie keebo kaalandilue na Yesu musita uali wababwila nfua iali waakafwilamo.) 33 Pilato waabweleele mu nghanda yakue, wamukuuta Yesu ni kumwipuzia, "Ati, wewe uli likolo lya Bayuda?" 34 Yesu waamwipuziizie, "Eba, walanda bya mu maano obe ao kuli ni bantu baakubwilanga palwakua nene?" 35 Pilato waasukile, "Eba, umwene nene nali Muyuda? Ntundu yobe pamo ni makolo a babitambua i bakuleetanga kuli nene. Eba, wakikita ki?" 36 Yesu waamwaasukile, "Bukolo bwane te bwa pano pa kyalo, bubenge bwa pano pa kyalo, bantu bane nga bakindwisiizia tekuti nmpaanue ku Bayuda. Inzi evi bukolo bwane te bwa pano pa kyalo." 37 Pilato waamwipuziizie, "Eba, Kansi uli likolo?" Yesu waamwaasukile, "Ee, uli ni nsambu ya kulanda nangue ndi likolo. Naavyelue, kabili naizile mono mu kyalo kuti ndeete busininkizio bwa kisinka. Kubalua muntu ali mu kisinka, aliwaunvua lizui lyane." 38 Pilato waamwipuziizie, "Ale kisinka i kiki?" Pilato luapwile kulanda evio, waafumiine kabili panze ni kubaana nangue, "Mu ozu muntu nsimwenemo mulandu wa kumutaninapo nsambu. 39 Inzi kukonkana ni mibeele yenu yakuti nene ngie namikakwila muntu umo busiku bwa nsikunkulu ya Pasaka, namiipuzia evi, mutonene nmikakwile likolo lya Bayuda?" 40 Baazanzwile mazui balanda, "Ozo abe, fwefue tutonene utukakwile Baraba." (Ozo Baraba waali wali mupoti.)
1 Penka papo Pilato wabaana kale balukale bamusepule Yesu na misepe. 2 Balukale baalemene nghana ya myungamyunga, bamuvwika ku mutue, ni kumuvwika likooti lyakasi. 3 Baile kumupalamina bamwana, "Mwapola we Likolo lya Bayuda!" Bamuumamo ni mapi. 4 Kabili Pilato waafumiine panze wabaana, "Mone namuleeta kabili kuli mwemue, Evi mumane nangue mu ozu muntu nsimwenemo mulandu wa kumutaninapo nsambu." 5 Kupwako, Yesu wafumina panze wavwele nghana ya myungamyunga ni likooti lyakasi. Pilato waabaanine, "Mone, muntu ozu!" 6 Makolo a babitambua pamo ni biloolo byabo lubamumwene, baasamwine balanda, "Akonkomenue, akonkomenue!" Inzi Pilato waabaanine, "Mutwame mwe bene muye mumukonkomene pantu mu ozu muntu nsimwenemo mulandu wa kumutaninapo nsambu." 7 Bayuda baamwanine, "Fwefue tuli ni mizilo. Kukonkana ni ezi mizilo, ozu muntu apalile kufua, pantu waalandile nangue wene ni Mwina Leza." 8 Pilato luaunvwile evio, kwenka kukila sie kutiina. 9 Pilato waabweleele mu nghanda, wamwipuzia Yesu nangue, "Ufumine pi?" Inzi Yesu taamwaasukile kantu. 10 Pilato waamwanine, "Eba, ale viusiliwangasuka? Tewizi nangue ndi ni buvinde bwa kukukonkomena, kabili nangue ndi ni buvinde bwa kukukakula?" 11 Yesu waamwaasukile, "Teuvinda kuya wali ni buvinde pali nene kine teupeelue na Leza. Ni pakako, olia wandeetele mu maboko obe, ali ni kilubo kikata kukila wewe." 12 Kutula papo, Pilato waali wasyakeba kumukakula. Inzi Bayuda baazanzwile mazui balanda, "Kine wamukakula sie ozu muntu, we teukiya wali kibuza wakua Kaizari. Kubalua muntu aliwaialula likolo, aliwamukaana Kaizari!" 13 Pilato luaunvwile evio, waamufumiiziizie Yesu panze, kupwako Pilato waikala pa kitebe kya bupinguzi, papo paali pakuutua nangue, musolo wa mabue. Inzi mu Kiebrania paali pakuutua, 'Gabata.' 14 Busiku bwa kulaalila nsikunkulu ya Pasaka, luyaali yasyakumana nsita likumi na ibili, Pilato waabaanine Bayuda, "Likolo wenu ozu!" 15 Inzi bene baazanzwile mazui balanda, "Epawe! Epawe! Akonkomenue!" Pilato waabeepuziizie, "Nene kuti nakonkomena likolo lyenu?" Makolo a babitambua aamwaasukile, "Fwefue tetuli na linge likolo, inga sie Kaizari!" 16 Pa mpeleezio Pilato waabapeele Yesu kuti bamukonkomene. Kupwako balukale bamutwama Yesu. 17 Yesu waafumine watweme musalaba wakue ni kuya ku kifuka kyaali kyakuutua nangue, "Kabongozio." (Mu Kiebrania kekio kifuka kyaali kyakuutua, "Golgota.") 18 Koko i kubaamukonkomeene pamo ni bange babili. Umo kulio, ni unge kuso, Yesu wali pabukata. 19 Pilato waalembele kamanino ni kukalamika peulu musalaba. Kaali kalembelue evi: Yesu wa ku Nazareti likolo lya Bayuda. 20 Bayuda bengi baabelengelepo pantu pa kekio kifuka kyaakonkomeenuepo Yesu pa musalaba, paali pali sie pepi ni muzi. Kako kamanino kaali kalembelue mu ndimi itatu. Mu Kiebrania, ni mu Kilatini ni mu Kigriki. 21 Makolo a babitambua ba Bayuda baamwanine Pilato, "Tekulemba nangue, likolo lya Bayuda, inzi lemba evi, waalandile ye mwine nangue, 'Nene ndi likolo lya Bayuda.' " 22 Pilato waabaasukile, "Munakilembela i mwenka." 23 Balukale lubaamukonkomeene Yesu, baabuulile ngubo yakue ni kukasania pana, kubalua lukale pa balukale bana waabuulilepo. Kabili baabuulile ni nkanzu yakue isyaali na musono. 24 Baalandile evi, "Emwe, tekuti tukaate ezi nkanzu, inzi tuteye sie bubale tumone kine ilikutapua nani." Bebi byonse byaakitikile kuti keebo kali mu Malembo kafikiliziwe nangue, "Baakaseene ngubo yane, nkanzu yane ni yo baiteele bubale." Evi, i vyaakitile balukale. 25 Pepi ni musalaba wakua Yesu, paali paimeene nghina ni nkaziize kwa nghina, Maria muka Kleopa, ni Maria Magdalena. 26 Yesu luamumwene nghina baimeene ni musambi uali watoneesie, waamwanine nghina, "We mwanakazi, kutula lelo, ozu i mwana obe." 27 Kabili waamwanine, musambi, "Kutula lelo, ozu i noko" Penka papo, ozo musambi wamutwama Maria nghina kwa Yesu waya nakue ku nghanda yakue. 28 Kabili pantu Yesu Waali wamanine nangue byonse byapua, waalandile nangue, "Nafua kyaka." Waalandile evi pakuti Malembo afikiliziwe. 29 Paali ni lweso lwaali lwaizuzimo siki. Balukale baatubiiziemo lifwafua, batunga ku kamuti ka isopo bamusumbwila pa milomo. 30 Yesu luatompeleko, waalandile evi, "Byonse byapua!" Kupwako wakobola mutue wafua. 31 Bayuda baamulombele Pilato kuti abapeele nsambu ya kuya kutyona maulu a bantu baakonkomeenue pa misalaba, ni nsambu ya kuya kusaamuna mibili yabo. Baalombeele kuti bakite evio, pantu bwaali busiku bwa kuteania Sabata. Tekyaali kyapalile mibili isyalilile pa misalaba busiku bwa Sabata pantu bobo busiku bwaali bwakindikilue. 32 Balukale baile kutyona maulu a bantu baali baakonkomeenue pamo ni Yesu pa misalaba. Baatyonene maulu a wa mambo ni maulu a wa bubili. 33 Lubaafikile pali Yesu, baamusangile wasyafwile. Ni pakako, tebaamutyonene maulu. 34 Inzi lukale umo waamutunkile Yesu mukuki pa lubali, penka papo, mulopa ni menda byafuma. 35 Olia muntu waamwene bintu byaakitikile i waasininkiziizie, kabili busininkizio bwakue bwaali bwa kisinka. Ni pakako waasininkiziizie nangue bialimukulanda te bya bufi, evi ni mwemue muzumine. 36 Pantu bebi byonse byaakitikiile kuti Malembo afikiliziwe nangue, "Pa bikuza byakue tepali kikuza kyaakatyonua." 37 Kabili mu ange Malembo mulembelue nangue, "Baakamukentesia olia ubaatunkile." 38 Kupwako Yusufu wa ku Arimatea, ozo waali musambi wa mu kafiso wakua Yesu pantu waali watiina Bayuda, walomba nsambu kuli Pilato kuti atwame mubili wakua Yesu. Pilato waamwitabiile. Kupwako Yusufu waya kutwama mubili wakua Yesu. 39 Nikodemu, olia wailenke kuli Yesu musita wa busiku, ni wene waile pamo ni Yusufu, kabili waaleetele mafuta engi abanga asanziiziwemo miila ni kizime. Azo mafuta abanga afinine kilo 30 . 40 Baba babili baatweme mubili wakua Yesu, baupambilila mu ngubo ya kitani ni kuusansila mafuta a munu nga mwaali mwakitila Bayuda ntanzi ya kuya kuziika. 41 Pepi ni palia paakonkomeenue Yesu paali ni bukaba. Mu bobo bukaba mwaali ni kilibu kya lenu kisinaziikuemo muntu. 42 Momo, i mubaabiikile mubili wakua Yesu pantu bwaali busiku bwakuteania Sabata. Kekio kilibu kyaali kyali sie pepi.
1 Busiku bwa kileza ku makia pakifiitile, Maria Magdalena waile ku mankabuli. Luafikile, waasangile libue lyafumiiziwe pa kilibu. 2 Waabweleelemo lubilo waya kuli Simoni Petro ni musambi unge waali watonesiwe na Yesu. Waabaanine, "Mulopue bakimufumiamo mu kilibu. Evi tetumanine kine bakimubiika pi!" 3 Penka papo Petro ni olia musambi unge bafuma kale ni kubamba kuya ku mankabuli. 4 Bonse babili baile bakundukile, inzi olia musambi unge wene waakundukisie kukila Petro ni kuya kufiika wa mambo ku mankabuli. 5 Luakonteeme ni kusunukila mu kilibu, waamwenemo sie kiiviimbo kya kitani kyabiikilue. Inzi wene taingiilemo. 6 Simoni Petro waali wamukonkele pa kyamba wene waafikile sie ni kwingila mu kilibu. Ni ye waamwenemo sie kiiviimbo kya kitani kyabiikilue, 7 inzi ngubo yaali yavimbilue ku mutue wakua Yesu yene teyaali yabiikilue pamo ni kelia kiiviimbo kya kitani, yene yaali yapetelue ni kubiikua pambali pa bunke. 8 Olia musambi waafikile wa mambo ni ye i luaingiilemo. Luamwene evio, waazumiine. 9 (Tebaali bainikile Malembo alandile nangue Yesu mpaka akatuntumuke.) 10 Kupwako balia basambi babili, babwela ku muzi kwabo. 11 Maria waali waimeene sie panze pa kilibu walimukulila. Luali walimukulila, waafwineeme ni kusunukila mu kilibu, 12 waamwenemo bamalaika babili bavwele ngubo yasue baikeele palia paali pa biikilue mubili wakua Yesu. Umo waikeele ku mitue, ni unge waikeele ku ntambalilo. 13 Baamwipuziizie. "We mwanakazi, ulimukulila ki?" Waabaasukile, "Ndimukulila pantu bakimufumiamo Mulopue wane, kabili nsimanine kubakimubiika." 14 Luali wakilanda sie evio, wapilibuka kale, wamumona Yesu waimeene. Inzi tainikile nangue ni Yesu. 15 Yesu waamwipuziizie, "We mwanakazi, ulimukulila ki? Kabili ulimukukeba ni?" Wene waali wamanine nangue alimukwipuziiwa na mulimi wa mu bukaba. Waamwaasukile, "Ewe, kine wewe i wakimutwama, nmbwile kuwakimubiika evi ngie mutwame." 16 Yesu waalandile, "Maria!" Maria waamupilibukiile wamwana mu Kiebrania, "Raboni!" (I kulanda nangue Kasambilizia.) 17 Yesu waamwanine, "Tekunkwata pantu nsinasele kuli Tawe. Inzi endo ubaane bakwane nangue nasela kuli Tawe ni Sinue, nasela kuli Leza wane ni Leza wenu." 18 Maria Magdalena waile kubabwilako basambi nangue waamumwene Mulopue, kabili waabaanine byonse biaunvwile kuli Mulopue. 19 Bwenka bobo busiku bwa kileza kyungulo, basambi bakue baali baikeele mu nghanda baikikiliile pantu baali batiina Bayuda. Yesu waile kwimana pabukata bwabo. Waabaanine evi, "Mutende ube nenu!" 20 Luabaanine evio, waabalangisiizie mu minue yakue, ni pa lubali. Basambi baawamiinue sana lubaamumwene Mulopue. 21 Kabili Yesu waabaanine, "Be ni mutende! Nga evelia vinaatuminue na Tawe, ni nene wenka namituma." 22 Luapwile kulanda evio, waabapuziile walanda, "Pokelele Mweo Muzuuke. 23 Bonse baamwakeeleela bibalo byabo, baakeeleelua, inzi bonse baamwakakaanina kweleela bibalo, tebakeeleelua." 24 Toma, waali wakuutua Mpundu, umo wa pa balia likumi na babili, taali walimo musita waizile Yesu. 25 Basambi bange i baamubwilileko sie nangue, "Twamumonanga Mulopue!" Toma waabaanine nangue, "Kine nene nsinamone mikovu ya nsunga mu minue yakue, kabili kine nsinasinikemo munue wane mu mikovu ni kubiika kuboko kwane pa lubali lwakue, nsikazumina." 26 Lupaapitile nsiku mwanda, basambi bakua Yesu kabili baakolongheene mu nghanda ni kwikiikilila. Lolo lwendo Toma ni ye waali walimo. Yesu waizile kwimana pabukata. Waalandile, "Mutende ube nenu." 27 Kabili waamwanine Toma, "Palamika pano munue obe, kumia mu minue yane, palamika pano kuboko kobe, biika mu lubali lwane. Lekela kutwisika. Zumina!" 28 Toma waamwaasukile, "We Mulopue wane, Leza wane!" 29 Yesu waamwanine, "Wazumina sie pantu wanmona. Balia balibazumina tekuba bamwene, basyukile!" 30 Kabili Yesu waakitile ni tunge tupapo twingi pa basambi bakue tusilembelue mu keki kitabu. 31 Inzi bebi kibyaalembeelue, ni pakuti muzumine nangue Yesu i Kristu Mwina Leza. Kabili mukuzumina kwenu muye mwali ni bukose muli wene.
1 Bebio byonse lubyaapwile, Yesu wailangisiizie kabili ku basambi bakue mumbali kiziba kya Tiberia. Waamonekele evi: 2 Simoni Petro, ni Toma aliwakuutua Mpundu, ni Natanaeli wa ku Kana ya Galilaya, ni baana bakua Zebedeo, ni bange babili ba pa basambi bakua Yesu. Baba bonse baali bali sie pamo. 3 Simoni Petro waabaanine, "Ne naya mukuloba." Bange baamwanine, "Tulikuya sie bonse." Baile kwingila mu bwato, Inzi bobo busiku musita wa busiku, tebaalobele kantu. 4 Lukeelekeele bwasyakiile, baamumwene Yesu waimeene mumbali kiziba, inzi basambi tebaali bainikile nangue ni Yesu. 5 Yesu waabeepuziizie, "Mwe balumendo, temulobele masabi?" Baamwaasukile, "Ata!" 6 Waabaanine, "Ale poozele bukila ku kulio kwa bwato mulobe masabi." Lubaapoozele bukila, baandilue kukula pantu mwaali masabi engi. 7 Musambi waali waatoneesiwe na Yesu waamwanine Petro, "We Petro, Ozu ni Mulopue!" Simoni Petro luaunvwile nangue ni Mulopue, wabuula kale ngubo, wavwala (pantu taali wavwele). Kupwako waipooza pa menda. 8 Basambi bange baizile lwa bwato balimukukula bukila bwaali bwaizuzimo masabi. Tepaali paleepeesie, inzi paali paleepele sie metre 90 . 9 Lubaile kusiika kunze ni kupatuka, baamwene mazekezeke a mulilo pa apikilue masabi ni mikate. 10 Yesu waabaanine, "Leetepo masabi amo pa azo amwaloba." 11 Simoni Petro wapatama kale mu bwato ni kufumia bukila bwaali bwalimo masabi 153 akatanke. Anzia kine aali avulile evio, bukila tebwaakaatikile. 12 Yesu waabaanine, "Ize mulie." Kabili pa babo basambi tepaali waamwipuziizie nangue, "Uli ni?" Pantu baali basyamanine nangue ni Mulopue. 13 Kupwako, Yesu wapalama, wabuula mikate ni masabi wabapeela. 14 Lolu i lwaali lwendo lwa butatu lwaamwenue Yesu na basambi bakue luabanga wasyatuntumukile. 15 Lubaapwile kulia, Yesu waamwipuziizie Simoni Petro, "Ati Simoni, mwina Yona, untonene kukila baba?" Petro waamwaasukile nangue, "Ee, umanine sie nangue nkutonene." Yesu waamwanine, "Sunga bena mikooko bane." 16 Kabili Yesu waamwipuziizie lya bubili nangue, "We Simoni mwina Yona, untonene?" Petro waamwanine, "Ee, umanine sie nangue nkutonene." Yesu waamwanine, "Sunga mikooko yane." 17 Yesu waamwipuziizie ni lya butatu nangue, "We Simoni mwina Yona, untonene?" Petro waafiitilue pantu waamwipuziizie ni lya butatu nangue, "Untonene?" Petro waamwanine, "We Mulopue, wewe umanine byonse, umanine nangue nkutonene!" Yesu waamwanine, "Sunga mikooko yane. 18 Nakwana kisinka nangue musita uwaali mulumendo, waali wavwala musipi obe ni kuya konse kuwaali watona kuya. Inzi luukaba wasyakotele, waakaba wasyaolola sie maboko ni kuvwikua musipi na unge, kabili waakaba watwalua kuusitonene kuya." 19 (Yesu kialandiile evi, waalangisiizie musango waakafwilamo Petro ni vyaali waakamulumba Leza). Luapwile kulanda evio, waamwanine, "Nkonke!" 20 Petro luapilibukile, waamumwene olia musambi waali watonenue na Yesu wamukonkele. Ozo musambi i olia wenka waali wailikiizie pa nkulo yakua Yesu musita ubaali balimukulia bilio bya kyungulo ni kulanda nangue, "We Mulopue, nani wakaba kukupaana?" 21 Petro luamumwene, waamwipuziizie Yesu, "We Mulopue, ale ozu muntu wene kyaakaba syani?" 22 Yesu waamwaasukile, "Kine nene natona ozu ekalilile mpaka pankaba kwiza, wewe te mulandu obe! We nkonke sie." 23 Keki i kyaalengele ezi mpunda ya kwana nangue Yoane takafua ikumane ku Bakristu bonse. Yesu taalandile nangue takaba kufua. Inzi waalandile evi, "Kine nene natona ozu ekalilile mpaka pankaba kwiza, wewe te mulandu obe!" 24 Ozu i olia musambi aliwasininkizia bebi bintu, kabili i waabilembele. Kabili tumanine nangue busininkizio bwakue ni bwa kisinka. 25 Yesu waakitile ni binge bintu bingi. Bilembwenge kimo kimo, mukumona kwane, pange ni nkendo ya kubiikapo bitabu byonse byaasiile kulembua nga yaabulile mu kyalo kyonse.