Madhu ehisadduwa okala muthu, muthu oyo di Kirixtu
1 Vowambeela wa dhaatedhene yaali Madhu, Madhu yaali vamohi ni Mulugu, vano Madhu yaali Mulugu. 2 Okuma omambeelelo Madhu ala yaali ni Mulugu. 3 Mulugu ahipaddusa dhaatedhene mwa Madhu ala teto kavili yego eyene yapaddusiwe Madhu ala ehilivo. 4 Mwa oliye mwaali egumi, egumiya yaali waara waamoneyela athu. 5 Waara woomoneya muyiihini teto yiihi kayaandile ogonjiha waara. 6 Ahikumelela muthu mmohi arumiwe ni Mulugu, ndina naaye eeriwa Zhuwawu. 7 Oliye ahidha wi akale namoona, ahiirela onamoona waarawo wi athu aatene eroromele waarawo. 8 Kahuwo wi oliye daali waarawo, mbwenye adheele wiirela onamoona waarawo. 9 Waara wa ebaribari, waamoneyela athu aatene, wahidha elabo ya vati. 10 Ole oli Madhu aali mwiilaboni ya vati teto Mulugu ahipaddusa elabo ya vati mwa oliye, mbwenye athu a elabo ya vati kayamudidele. 11 Oliye ahidha elabo yaaye ya vati, vano athuya kayamwaakele. 12 Mbwenye aatene yamwaakele, eroromelaga ndina naaye, oliye ahaavaha oneeti wi yiiriwege ahima a Mulugu. 13 Okala ahima a Mulugu weewa kudheele mwa awale-wale eewa, naari moobaliwa mwa mwiili, naari mwa ofuna wa muthu, mbwenye ebaliwe mwa Mulugu. 14 Madhu yahisadduwa okalana mwiili wa emuthu, odha okalaga vaari va athu. Madhu ayo yahidhaaliwa mahala ni ebaribari, vano nihoona nthithimiho naaye wona nthithimiho na Mwaana mmohive a Babe. 15 Zhuwawu oomwiirela Yesu onamoona. Awaaddelaga athu, eeraga: "Ola di olene gamuwogiimi wi: Ole onadha mundduli mwaaga, onogikwaranya miyo; vowi gihinabaliwe, oliye ahikalawo". 16 Hiyo aatene nihaakela mareeliho mookwaranya moohuhiyedhedha odheela mwa mahala aaye. 17 Malamulo yavahiwe odheela mwa Mozezi, mbwenye mahala ni ebaribari dhidheele mwa Yesu Kirixtu ole aroromelihiwe. 18 Kalivo muthu onamoonaga Mulugu, ahili mmohi baahi, oliye di Mulugu, oli muumohini ni Ababe, dimunoneyihe Mulugu.
Onamoona wa Zhuwawu Namabathiza
19 Mudhidhi mmohi apogo a aZhudewu a oZheruzalemi yahaarumaga anamakutha ni aLeevi amohi omukoha Zhuwawu, wiira: "We oli aani?" 20 Oliye ahiirelaga onamoona moohulogoha, wiira: "Miyo kagili Kirixtu ole aroromelihiwe, eehi". 21 Yahimukohaga teto, wiira: "Ki oli aani? Oli Eliyazi?" Oliye ahiiraga: "Eehi, kagili Eliyazi". Aliwa yahiiraga: "Ki oli Namavuhulela onamujejihiihu?" Vevale Zhuwawu ahaakulaga, wiira: "Eehi". 22 Vano yahimwaaddelaga, wiira: "We oli aani? Owoge ebaribari wi nawaaddele pama ayene enirumile wuno. Onawoga ddi dha we?" 23 Zhuwawu ahawaakulaga, wiira: Wona mwawogele namavuhulela Ezaya, eera: "Miyo gili ndhu na muthu onakuwa mwiiddeddereni onawoga wi: 'Mmogoolele rampa wi Nabwiya aviremo' ". 24 Athu ale yarumiwege yaaligi a nikuru na aFarizi. 25 Vano yahimukohaga Zhuwawu, wiira: "Akala we kuli Kirixtu aroromelihiwe, naari Eliyazi, naari Namavuhulela ole, ki onabathizela ddi?" 26 Zhuwawu ahawaakulaga, wiira: "Miyo ginabathiza ni mahinje, mbwenye vaari veenyu ohukalavo mmohi nyo muhumunoniliinyu. 27 Muthu oyo onadha mundduli mwaaga, kagifwaneelele otapula mingoyi dha sapatho dhaaye". 28 Dhi dheereyilege oBetaniya, kobela ya mwihinje Zhordawu, wewo Zhuwawu wabathizigiiye.
Yesu thili Nibila na Mulugu
29 Omenseloni wiwa Zhuwawu ahimoonaga Yesu adhaaga wa oliye, vevale ahiiraga: "Mmoone, ndde thi Nibila na Mulugu, nnavenyihavo dhoothega dha athu a mwiilaboni ya vati. 30 Ola di olene gamuwogiimi wi: 'Muthu onadha mundduli mwaaga onogikwaranya miyo, vowi gihinabaliwe oliye ahikalawo'. 31 Miyo teto kagamunonile, mbwenye gadheele obathiza ni mahinje wi nlogo na Ezarayeli nimunone". 32 Zhuwawu ahiirelaga onamoona, wiira: "Gahoona Muneba Woweela ni mooneyelo a kangayiwa okitaga odhulu wahimorelaga okala va oliye. 33 Miyo kagamunonilege, mbwenye Mulugu ogirumile obathiza ni mahinje, digaaddele, wiira: 'Oyene onadhiiwe omoone Muneba Woweela okitaga odhulu omorela okala va oliye, di oyene onabathizege ni Muneba Woweela'. 34 Miyo gahoonaga, vano gahiirelaga onamoona wi ebaribareene ola di Mwaana a Mulugu".
Wiithaniwa wa anamasuuza owambeela
35 Omenseloni wiwa Zhuwawu agawelele wewule vamohi ni mwa anamasuuza aaye abiili, 36 Zhuwawu ahimoonaga Yesu aviraga, wiira: "Moone, Nibila na Mulugu!" 37 Anamasuuza abiili ale egeewile madhu ale, yahimuharaga Yesu. 38 Yesu ahirugunuwaga wawoona wi enoomuhara, vano ahaakohaga, wiira: "Nyo munafuna ddi?" Aliwa yahiiraga: "Rabi, munakala wuuvi?" (Otapulela wa Rabi sowi Namasuuziha.) 39 Yesu ahiiraga: "Mudhe moonewo onakaliimi". Vano wora egali wona nnayi ya ciguwo, aliwa yahimveleelaga, woonawo wakaliiye, vano yahikalaga ni oliye mahiyu alene. 40 Mmohi mwa abiili ale eewilege madhu a Zhuwawu amuhara Yesu, aaligi Andire. Andire aali ddibila a Simawu Peduru. 41 Vevale vowambeela amfwanyilege ddibile Simawu, omwaaddela, wiira: "Nihimfwanya Muthikitheliwi".(Enatapulela Kirixtu ole aroromelihiwe.) 42 Nuwindo, ahimudhowagana wa Yesu. Yesu ahimusugwaga, wiira: "We oli Simawu, mwaana a Zhuwawu. Ndina naawo onakala Sefasi". (Otapulela wa madhu owi Sefasi mu ewogelo ya eZhudewu, sowi: Peduru.)
Yesu onomwiithana Filipi ni Nataniyeli
43 Omenseloni wiwa Yesu ahimaruwelaga olenddo woodhowa oGalileya. Ahimfwanyaga Filipi, omwaaddela, wiira: "Ogihare". 44 Filipi aali a nluwa na oBetisayida, owaniwa wa Andire ni Peduru. 45 Filipi ahimfwanyaga Nataniyeli omwaaddela, wiira: "Nihimfwanya muthu ole aroromelihiwe Mozezi amulebiliiye mMalamuloni teto ni dhalebile anamavuhulela. Oliye di Yesu a oNazarethi, mwaana a Zhuuze". 46 Mbwenye Nataniyeli ahiiraga: "ONazarethi! Mburo woonyemuwa kunaakume yego yapama"! Filipi ahiiraga: "Ndowe wi woone". 47 Yesu agamoonile Nataniyeli adhaaga vowi hivale ahiiraga: "Mmoone ohufiya muEzarayeli a ebaribari oohukanna yoonyengetha". 48 Nataniyeli ahimukohaga, wiira: "Muginonile addi?" Yesu ahiiraga: "Filipi ahinowiithane, miyo guhuwoona ogali musiddo mwa namutaambwi". 49 Nataniyeli ahiiraga: "Namasuuziha, nyo muli Mwaana a Mulugu, muli Mwene a Ezarayeli". 50 Yesu ahimukohaga, wiira: "Orumeedhele mwaha wi guhuwaaddela wi guhuwoona ogali musiddo mwa namutaambwi? Oneere woona dhootikiniha okwaranya dhedhi". 51 Ahiwelelaga owoga, wiira: "Ebaribareene, ebaribareene ginowuwaaddelani wi munoodha moone odhulu ogathuleye, angero a Mulugu egwelaga, ekitelaga vili Mwaana a Muthu".
Matelo a oKana
1 Vigavirile malabo maraaru, wahikalaga matelo mudhi wa oKana murudda wa oGalileya. Amaaye Yesu yaaligi wewo. 2 Yesu vamohi ni anamasuuza aaye teto yahiithaniwaga omateloni. 3 Vinyu agamalile, amaaye Yesu yahimwaaddelaga, wiira: "Vinyu ohaamalela". 4 Yesu ahaakulaga, wiira: "Mmani, ki munafuna giire ddi? Mudhidhi waaga kunafiye". 5 Vevale amaaye yahawaaddelaga amwiimeleli, wiira: "Dhaatedhene dhinowaaddeligiiyeni, mwiirena". 6 Vevale vahikalaga mapiso a mabwe matanu ni nimohi, ayene yaaheliliisuvo mwaha wa elemeelelo yowiyeeliha wa aZhudewu. Mapiso ale yaakwana vakukuuve maniituru makumi matanu ni maraaru (80), mamohi yaakwana vakukuuve maniituru zana ni makumi meenddi (120). 7 Yesu ahawaaddelaga amwiimeleli ale, wiira: "Dhaalihani mahinje mapiso ala". Vano yahidhaalihaga ofiya mmilomoni. 8 Nuwindo, Yesu ahawaaddelaga, wiira: "Dhiinova mwaarugwe, mwaadhowena wa mpogo a mathanga". Aliwa yahaadhowagana. 9 Vevale mpogo a mathanga ahaalawihaga mahinje, vano yahisadduliwa okala vinyu. Oliye kaanonilege wadhiilege vinyu ole. (Mbwenye amwiimeleli yaarugwilege mahinje ale, yahinonagawo.) Vano mpogo a mathanga ahimwiithanaga namatelaya, 10 omwaaddela, wiira: "Akwiinyu enamvaha vowambeela vinyu apamaya, athuya yalezela, waavahaga vinyu oodhiva vang'ono. Mbwenye nyo mmulogolele vinyu apama vajinji ofiyedha dhiinova". 11 Yesu ahoonihaga etoonyihedho yaaye yowambeela mudhi wa oKana murudda wa oGalileya. Vevale ahoonihaga nthithimiho naaye teto anamasuuza aaye yahimuroromelaga. 12 Vooharela Yesu ahidhowaga oKafaranawu, vamohi ni amaaye, addibile ni anamasuuza aaye, yahikala wewo malabo oweelengeya.
Yesu onoweeliha nyuba ya Mulugu
13 Ogaaddamele mudhidhi wa Paxkwa, othabela wa aZhudewu, Yesu ahimaruwaga ogwela oZheruzalemi. 14 Wewo ahivolowaga nyuba ya Mulugu waafwanyamo athu egulihaga ng'ombe, mabila ni kangayiwa. Mwahikalaga teto athu oocenja korowa. 15 Vevale Yesu ahisasanyaga muwaxaxu wa mungoyi wambeela waakumihedha aatene ode, vamohi ni mabila ni ng'ombe dhiwa-dhene. Ahibidhulaga meeza oocenja korowa, omwadha korowa dheewa. 16 Teto ahaalamulaga ooguliha kangayiwa ale, wiira: "Ndo kumihamoni. Nyuba ya Ababa kamusaddule okala nyuba yomweeddamo nagooso". 17 Anamasuuza aaye yahuubuwelelaga Maleba Ootaleleya ale yiire: "Nthakwithakwi ninniimina wa nyuba yaawo nnogizhiha murima". 18 Vevo apogo a aZhudewu yahimukohaga, wiira: "Onaanoonihe etoonyihedho baani, enooniha wi ohukanna owodha wowiirana dhedhi?" 19 Yesu ahawaakulaga, wiira: "Bwanyulani nyuba ya Mulugu ela, miyo ginoodha gimage va malabo maraaru". 20 Vevo aliwa yahiiraga: "Nyuba ya Mulugu ela ehilogela yaaka makumi mannayi ni yaaka tanu ni emohi emagiwaga, vano nyo munamage malabo maraaru baahi?" 21 Mbwenye nyuba ele Yesu yawogigiiye, awogaga dha mwiili waaye. 22 Oliye agavenyihiwe muukwani, anamasuuza aaye yahuubuwelelaga wi ahiwoga dhedhi, vano yahiroromela Maleba Ootaleleya ni madhu yaawogile Yesu.
Yesu ohunona dhowuubuwelela dha athu aatene
23 Yesu agali muZheruzalemi vamathangani a Paxkwa, athu ajinji yahiroromelaga wa oliye vowoona dhitoonyihedho dheeriiyena. 24 Mbwenye Yesu kaaroromela aliwa mwaha wi oliye ahinona moobuwelelo a athu aatene. 25 Kayafuneya wi muthu mmohi amwaaddele dha athu aatene, vowi mwiinyeene oonona moobuwelelo a mmirimani mwa athuya.
Yesu onothapanya ni Nikodemu
1 Ahikalawo muthu mmohi a nikuru nuulubale na aFarizi, ndina naaye eeriwa Nikodemu, musogoleli a aZhudewu. 2 Oliye ahidhaaga mahiyu wa Yesu, wiira: "Namasuuziha, nihinona wi muli namasuuziha ookumela wa Mulugu, vowi kavili muthu onaanda wiirana dhitoonyihedho dhedho nyo muneeriinyuna, Mulugu aahikala ni oliye". 3 Yesu ahiiraga: "Ebaribareene, ebaribareene ginowuwaaddela wi muthu aahibaliwa dila biili, kanoone Omwene wa Mulugu". 4 Nikodemu ahimukohaga, wiira: "Ki muthu onaande addi obaliwa dila biili agooluvale? Oneere ovolowa mbaani mwa amaaye wi abaliwe dila biili?" 5 Yesu ahiiraga: "Ebaribareene, ebaribareene ginowuwaaddela wi muthu aahibaliwa mmahinjeni ni mwa Muneba Woweela, kanaakwaniha ovolowa mu oMwene wa Mulugu. 6 Enabaliwa mwa omuthu ba omuthu baahi, mbwenye enabaliwa mwa Muneba ba muneba. 7 Kutikine vuwaaddeliimi giira soofuneya wi obaliwe dila biili. 8 Pevo enowoobela wewo onafuniiwa teto onowiiwa wooba wiwa, mbwenye kunanona onakumiiwa naari onadhowiiwa. Dhinooligana ni athu aatene ayene enabaliwa mwa Muneba Woweela". 9 Nikodemu ahimukohaga, wiira: "Dhedhi dhinaandeye addi?" 10 Yesu ahiiraga: "We kuli namasuuziha oononeya vaari va aEzarayeli, ki vano kuneewelelamo dhego nda? 11 Ebaribareene, ebaribareene ginowuwaaddela wi nnawoga dhinoniliihu teto nneerela onamoona dhooniliihu, mbwenye nyo kamunaroromela onamoona weehu ola. 12 Akala kamunaroromela dhinowaaddeliimini dha elabo ela ya vati, ki munadha muroromele addi gowaaddelani dha odhulu? 13 Kaavo agwelile adhowa odhulu, ahili ole okitile odhulu, Mwaana a Muthu. 14 "Wona mwemo Mozezi mwatomeyeliiye nyowa vamuthankoni mwiiddeddereni, mwa mukalelo mmohive Mwaana a Muthu soofuneya wi atomeyiwe, 15 wi aatene enamuroromela oliye ekalena egumi yoohumala. 16 "Mulugu ahidhivela vajinji elabo ela ya vati, ofiyedha ompeleka Mwaanaye mmohive wi aatene enaamuroromele ehirimeele, mbwenye ekalena egumi yoohumala. 17 Mulugu ahimuruma Mwaanaye elabo ya vati ehili wi athonge elaboya, mbwenye wi mwa oliye evulumusiwe. 18 "Ole onamuroromela kanathongiwa, mbwenye ohunamuroromela ohuthongiwa mwaha wi karoromele ndina na Mwaana mmohive a Mulugu. 19 Muladduya buula: Waara ogadhiile elabo ya vati, athuya yadhiveliwe yiihi, ohiya odhiveliwa waara mwaha wi dhowiira dheewa dhaali dhootakala. 20 Aatene eneerana dhootakala, enowiiddana ni waara. Kinaaddamela vowaara enoova wi dhowiira dheewa dhinooneyege. 21 Mbwenye oneerana dhoororomeleya onowooneyela vowaara teto dhowiira dhaaye dhinononeya wi ohiirana momwiiwelela Mulugu".
Zhuwawu Namabathiza onomwiirela Yesu onamoona dila ya nabiili
22 Vevale Yesu ni anamasuuza aaye yahidhowaga okala murudda wa oZhudeya. Ahikala wewule ni aliwa mudhidhi mujinji, aabathizaga athu. 23 Teto Zhuwawu oobathiza oEnoni vakukuuve ni Salimi mwaha wi wewo wahikala mahinje majinji. Athu yoofiyawo, oliye waabathizaga. 24 (Mudhidhi oyene Zhuwawu aali ahinafugeliwe mukaambura.) 25 Anamasuuza amohi a Zhuwawu yahambeelaga okangana ni muZhudewu mmohi mwaha wa elemeelelo yowiyeeliha. 26 Mowindo anamasuuza yahidhaaga wa Zhuwawu omwaaddela, wiira: "Namasuuziha keeng'anani, muthu ole aali ni nyo kobela ya Zhordawu, olene mwamwiireliinyu onamoona ni oliyeene onobathiza, athu aatene enamuthamagela oliye". 27 Zhuwawu ahaakulaga, wiira: "Muthu kanaakele yego eli yaatene Mulugu ahimvahile. 28 Nyo muli anamoona aaga dhowi gahiira: 'Kagili Kirixtu ole aroromelihiwe, mbwenye gili oorumiwa osogolo waaye'. 29 Muliba oteliwa mwiinya di ole omutelile. Mukwaaye a namatela onomveleela baahi, onohagalala eewaga madhu a namatelaya. Teto mwa mukalelo mmohive peeno ohagalala waaga ohaakwanela. 30 Soofuneya oliye oonuwege, miyo giyevege". 31 "Ookumela odhulu oli vadhulu va aatene. Ookumela vati vano da vati veva teto onowoga dha vati vano. Ookumela odhulu oli vadhulu va aatene. 32 Oliye onowiirela onamoona dhedho dhooniliiye ni onona naari ndo kalivo onaarumeedha madhu aaye. 33 Mbwenye muthu onarumeedha madhu aaye, onodidela wi Mulugu da ebaribari. 34 Oyene Mulugu omurumiliiye, onowoga madhu a Mulugu, vowi Mulugu onoveleela Muneba Woweela moohuhiyedhedha. 35 Baabi onomudhivela Mwaanaye teto ahihela dhaatedhene mmadani mwaaye. 36 Muthu onamuroromela Mwaana oyo, ohukanna egumi yoohumala. Mbwenye onakoodda omuroromela Mwaana oyo, kadha oona egumi, mwaha wi owali wa Mulugu oli va oliye".
Yesu ni mwihiyana a murudda wa oSamariya
1 AFarizi yahiiwa wi Yesu onowaakwekwetha anamasuuza ajinji aabathizaga omukwaranya Zhuwawu. 2 (Mbwenye ebaribari, abathiza kaali Yesu oyo, yaali anamasuuza aaye). 3 Yesu aganonile wi aFarizi ehiiwa dhedho, ahivenyagawo oZhudeya odhowaga oGalileya. 4 Yaali yoofuneya wi Yesu avire murudda wa oSamariya wi afiye oGalileya. 5 Vano ahifiyaga nluwa nimohi na oSamariya, ndina niwa Sikari, vakukuuve ni mudda oyene Yakobo wamvahiliiye mwaanaye, Zhuuze. 6 Wewo wahikala ceela ya Yakobo. Yesu ahikaraatigi seresere ya ceela ele mwaha wi ahigomaga ni weedda. Yaaligi wora ya neekumi nabiili ya mutana, 7-8 vano anamasuuza aaye yadhowilege oluwani ogula dhooja. Egadhowile vahifiyaga mwihiyana mmohi a oSamariya adheelaga orugwa mahinje. Yesu ahimulobaga, wiira: "Mugivahe mahinje oong'wa". 9 Mwihiyana a oSamariya ole ahaakulaga, wiira: "Nyo muli muZhudewu, mwaha wa ddi munagilobeliinyu mahinje, miyo ngali muSamariya teto gili mwihiyana?" (Vowi aZhudewu kineeddelana ni aSamariya.) 10 Yesu ahiiraga: "Wahaanonege Mulugu enandiiye ovaha teto wahaamunone oyene onaloba mahinje oong'wa, we weere omuloba, oliye eere wuuvaha mahinje enavaha egumi". 11 Mwihiyana ole ahiiraga: "Babani, kamwinna yoorugwana teto ceela ela sooddiiha. Ki mahinje oovaha egumi ayo munaadhana wuuvi? 12 Yakobo, nikolo neehu danivahile ceela ela, mwiinyeene vang'wiiye vamohi ni anaaye teto ni dhoofuwa dhaaye. Ki nyo muhumukwaranya oliye?" 13 Yesu ahiiraga: "Aatene enang'wa mahinje ala enowelela okalana nthona. 14 Mbwenye ole onaadhe ang'we mahinje ayene miyo ginamvahiimi, kadha awelela okalana nthona. Vowi mahinje ayene ginamvahiimi enomusaddula okala aneedduuddu enaakumege mahinje oovaha egumi yoohumala". 15 Mwihiyana ole ahiiraga: "Babani, givahewoni mahinje ayene wi gihiwelele okalana nthona naari odhaaga orugwaga mahinje wuno". 16 Yesu ahiiraga: "Dhowa wamwiithane mamuno, adhe wuno". 17 Mwihiyana ole ahiiraga: "Kaginna mamunaga". Yesu ahaakulaga, wiira: "Ohuwoga pama wi kawinna mamuno. 18 Vowi wahiteliwa wale ni alobwana atanu, vano mulobwana onakaliiwena dhiinova kahuwo aawo. Dhiwogiliiwe seebaribari". 19 Mwihiyana ole ahaakulaga, wiira: "Babani, dhiinova gihinona wi muli namavuhulela. 20 Makolo eehu yamweebedhesa Mulugu mwaango olena, mbwenye nyo aZhudewu muneera wi ofwaneelele athu weebedha fu oZheruzalemi". 21 Yesu ahimwaaddelaga, wiira: "Mmani, girumeedheni wi onoodha mudhidhi vevo munamweebedhigiinyu Baabi, ohukala vamwaangoni ola naari oZheruzalemi. 22 Nyo aSamariya muneebedha eyene ehinoniliinyu. Hiyo aZhudewu nneebedha eyene enoniliihu, vowi ovulumusa onakumela mwa aZhudewu. 23 Onoodha mudhidhi teto ohufiya mudhidhiya, vevo athu oweebedha mwa ebaribari enoodha emweebedhege Baabi mwa muneba ni mwa ebaribari. Baabi onaafuna athu owindo wi bineere emweebedhege. 24 Mulugu di muneba, vano oomweebedha emweebedhege mwa muneba ni mwa ebaribari". 25 Mwihiyana ole ahiiraga: "Gihinona wi onoodha Muthikitheliwi ole aroromelihiwe teto ononiwe ni ndina na 'Kirixtu'. Oliye afiya onoodha anaaddele dhaatedhene". 26 Yesu ahimwaaddelaga, wiira: "Dimiyeene ginawoga ni we". 27 Mudhidhi oyene anamasuuza a Yesu yahifiyaga, yahitikinaga vomoona athapanyaga ni mwihiyana. Naari ndo kaalivo amukohilege, eera: "Onafuna ddi?" naari: "Munathapanyedha ddi ni mwihiyana ola?" 28 Mwihiyana ole ahihiyaga muno waaye odhowa muluwani wawaaddela athu, wiira: 29 "Ndoweni, mwamoone muthu ogaaddele dhaatedhene dhedho dheeriimina. Kadha akala Kirixtu ole aroromelihiwe?" 30 Vevale athu ale yahikumaga muluwani mule odhowa wa Yesu. 31 Mudhidhi oyene anamasuuza a Yesu yahimulobaga ni ntidi, wiira: "Namasuuziha, jani". 32 Oliye ahiiraga: "Miyo gihikanna yooja emohi nyo muhunoniliinyu". 33 Vevale anamasuuza ale yookohanaga mmohi ni mukwaaye, wiira: "Sowi ohukalavo omudheelena yooja?" 34 Mbwenye Yesu ahaakulaga, wiira: "Yooja yaaga fuwiirana efunelo ya ole ogirumile wi gimarihe mabasa egivahiliiye. 35 Nyo kamuneera: 'Dhavira mweeri minnayi, onofiya mudhidhi woohadda?' Mbwenye miyo gineera: Mfugule meento, musugwe mmiddani. Musugwe wi dhilo dhihiithwa ohufiya mudhidhi woohadda. 36 Dhiinova, namahadda onalaba, onowaakelave yooliveliwa yaaye. Dhilo dhinahaddiiye si egumi yoohumala wa athu. Mowindo namadhala ni namahadda enahagalala vamohive. 37 Ebaribari dhinowogiwa wi: 'Onadhala di mmohi, onahadda di mmohiwa'. 38 Miyo guhuurumani wi muhadde dhedho dhihikumiheliinyu nikurumela. Amohi bikumihile nikurumela, nyo daakelile opura wa nikurumela neewa". 39 ASamariya ajinji a mmuruddani mule yahimuroromelaga Yesu mwaha wa onamoona wa mwihiyana ole, wowi: "Oliye ohugaaddela dhaatedhene dheeriimina". 40 Vevale aSamariya yahifiyaga wa Yesu, omuloba wi akale ni aliwa wewule. Vano ahikala wewule malabo meenddi. 41 Vevale athu amohi ajinji yahimuroromela Yesu mwaha wa madhu aaye. 42 Vowi yahimwaaddelaga mwihiyana ole, wiira: "Dhiinova nihiroromela, ehili mwaha wa madhu aawo, mbwenye mwaha wi nihiiwa weekiihu. Nihinona wi ola di Mvulumusi a athu a elabo yaatene ya vati".
Yesu onomuyiliha mwaana a nameeddiha dha mwene
43 Vigavirile malabo meenddi, Yesu ahivenyaga wewule odhowaga oGalileya. 44 Yesu mwiinyeene ahiiraga: "Kawuli namavuhulela onariihiwa veelaboni vaaye". 45 Naari ndo vafiyiligiiye oGalileya, aGalileya yahimwaakelaga mwaha wi aliwa teto yahidhowagawo omamuthabelelo Paxkwa oZheruzalemi, yahoonaga dhaatedhene Yesu dheeriligiiye wewo. 46 Yesu ahidhowaga dila ya nabiili nluwa na oKana murudda wa oGalileya, wewo oliye waasadduligiiye mahinje ekala vinyu. Wahikala wewule nameeddiha dha mwene mwaanaye abulela oKafaranawu. 47 Veewiligiiye wi Yesu ahiwelawo oZhudeya ohufiya oGalileya, ahidhowaga wa oliye omuloba wi adhowe oKafaranawu, amuyilihe mwaanaye aaligi vakukuuve ni okwa. 48 Yesu ahimwaaddelaga, wiira: "Mwaahoona dhitoonyihedho ni dhootikiniha, kamunaroromela". 49 Nameeddiha ole ahiiraga: "Nabwiyani, ndoweni mowaaguva, mwaanaga ahinakwe". 50 Yesu ahimwaaddelaga, wiira: "Dhowa! Mwaanawo onokalawo". Muthu ole ahiroromelaga madhu a Yesu, odhowa owaniwa. 51 Mundila ahigumanaga ni amwiimeleli aaye, aliwa yahimwaaddelaga, wiira: "Mwaaninyu oneere okalawo". 52 Ahaakohaga dha mudhidhi wambeeliiye oyila mwaana ole, aliwa yahiiraga: "Nipaddawe naaye nimwihiyile ndilo mudhidhi wa wora emohi ya mutana". 53 Baabi ole ahinonelagamo wi waali mudhidhi olene Yesu wamwaaddeligiiye, eera: "Mwaanawo onokalawo". Oliye vamohi ni aatene a vaade vaaye yahimuroromelaga Yesu. 54 Ela yaali etoonyihedho yaaye ya nabiili Yesu yoonihiligiiye vaweliligiiye oZhudeya afiyaga oGalileya.
Yesu onomuyiliha muthu a oBetezata
1 Dhigeereye ndo, wahikalaga othabela wa aZhudewu, Yesu ahidhowaga oZheruzalemi. 2 Wewo oli nthiya, ndina niwa mu ewogelo ya eZhudewu nneeriwa Betezata. Nthiya nddi nili vakukuuve ni Vamavolowelo va Mabila, nowaapeeleliwa ni makodde matanu. 3 Mmakoddeni mwiwa mookonaantesa athu ajinji oobulela: oohoona, ooragala meddo ni oopoondeya yaano. Aliwa yajejiha wi mahinje ekahinyeye. 4 Vowi mudhidhi mmohi mungero a Nabwiya ookitela vanthiyani vale okahinya mahinje ale. Owambeela obwinavo mahinje yakahinyiwa, naari akalena oredda buuredda ooyila. 5 Vaari va athu ale ahikalagavo ookwa-yaano mmohi abulele yaaka makumi maraaru ni yaaka tanu ni thaaru. 6 Yesu ahimoonaga agali ookonaanteene, onona wi ahibulela mudhidhi mujinjeene. Ahimukohaga, wiira: "We onofuna oyila?" 7 Ookwa-yaano ole ahimwaakulaga, wiira: "Nabwiyani, kaginna muthu oogikamihedha obwina vanthiyani va, mahinje yakahinyiwa. Miyo gafunaga obwinavo, mmohi dinaaguvela obwinavo gihinafiyevo". 8 Yesu ahimulamulaga, wiira: "Venya, othukule olili waawo, weeddege". 9 Vevale muthu ole ahiyilaga, othukula olili waaye, wambeela weedda. Nlabo nddo naaligi sabuddu. 10 Mowindo aZhudewu yahimwaaddelaga muthu ayilihiwege ole, wiira: "Peeno sabuddu. Malamulo eehu kinarumeedhiha othukula olili waawo nlabo na sabuddu". 11 Oliye ahiiraga: "Ole ogiyilihile digaaddele, wiira: 'Thukula olili waawo, weeddege' ". 12 Aliwa yahimukohaga, wiira: "Muthu baani wuwaaddele wi othukule olili waawo, weeddege?" 13 Mbwenye ooyilihiwa ole kaamunonilege amuyilihilege, vowi Yesu ahirimeelaga vaari va anamwinji yaaligi vevale. 14 Vooharela Yesu ahimfwanyaga ooyilihiwa ole mu nyuba ya Mulugu, omwaaddela, wiira: "Keeng'ana, vano ohuyila. Kuwelele othega wi enaadhe yuumorele yowoopiha emohi yookwaranya elene". 15 Muthu ole ahidhowaga wawaaddela asogoleli a aZhudewu, wiira: "Ogiyilihile di Yesu". 16 Mwaha wi naali nlabo na sabuddu Yesu veeriligiiyena dhedhi, asogoleli a aZhudewu yahambeelaga omuharahara. 17 Yesu ahawaaddelaga, wiira: "Ababa enoolabave ofiyedha dhiinova, mowindo miyo teto ginoolabave". 18 Mwahaya buuyene asogoleli a aZhudewu wathabweliiwa omusayela efunaga ompa. Yeeraga wi kanahariha nlamulo nnawoga dha sabuddu teto onowoga wi Mulugu di Babe, eeliganihaga ni Mulugu.
Owodha wa othongi wa Mwaana
19 Vano Yesu ahiiraga: "Ebaribareene, ebaribareene ginowuwaaddelani wi miyo kaginaanda wiirana yego menkaaga. Gineerana dhinooniimi Baabi eeragana. Dhaatedhene Baabi dhineeriiyena, Mwaana teto oneerana dhimohive. 20 Vowi Baabi onomudhivela Mwaana, omoonihaga dhaatedhene dhedho oliye dhineeriiyena. Baabi onoodha amoonihe mabasa ookwaranya alena wi mudhe mutikine. 21 Wona Baabi onaavenyiha muukwani, aavahaga egumi, mowindo Mwaana onowaavaha egumi ayene oliye enaafuniiye waavaha egumi. 22 Baabi kanamuthonga muthu oli aatene, mbwenye omuthomele Mwaanaye wi akale namathonga a dhaatedhene. 23 Baabi onafuna wi athu aatene emuriihege Mwaana wona munamuriiheliiwa Baabi. Muthu ohunamuriiha Mwaana, kanamuriiha Baabi omurumile. 24 "Ebaribareene, ebaribareene ginowuwaaddelani wi muthu oneewa ndhu naaga, amuroromela ogirumile, ohukanna egumi yoohumala. Oliye kadha athongiwa, mbwenye ohuvira muukwani ohuvolowa mwiigumini. 25 Ebaribareene, ebaribareene ginowuwaaddelani wi onoodha mudhidhi teto ohufiya mudhidhiya, athu ekwile vineeriiwa yiiwe ndhu na Mwaana a Mulugu, ayene eneewe eneere okalawoove. 26 Wona Baabi oli needduuddu a egumi, mwa mukalelo mmohive ohumuthomela Mwaana wi ni oliyeene akale needduuddu a egumi. 27 Ahimvaha Mwaana owodha wa othongi, mwaha wi di Mwaana a Muthu. 28 Kamutikine dhedhi, vowi onoodha mudhidhi vevo athu aatene eli mmasiye vineeriiwa yiiwe ndhu naaye, ekumemo. 29 Athu ayene yiirilena dhapama, evenyihiwe wi ekalena egumi, mbwenye ale yiirilena dhootakala, evenyihiwe ethongiwe, ekoniwe".
Onamoona womwiirela Yesu
30 "Miyo kaginaanda wiirana yego menkaaga. Ginathonga mooligana munagaaddelela Ababa. Ginathonga mowogoowa, mwaha wi kaginahara dhinafuniimi, mbwenye dhinafuna oyene ogirumile. 31 "Akala gineyiirela onamoona menkaaga, onamoona waaga bohaakwanela. 32 Ohukalavo mmohi onagiirela onamoona, gihinona wi onamoona onagiireliiye bwa ebaribari. 33 Nyo mwahaaruma aliba mutheenga wa Zhuwawu Namabathiza, oliye ahiirela onamoona wa ebaribari. 34 Miyo kaginarabulela onamoona wa muthu, mbwenye ginawogela dhedhi wi mvulumuwe. 35 Zhuwawu aali wona panti yoohidda yowaara, vano mwa mudhidhi vang'ono mwahifuna ohagalala ni waara waaye. 36 Mbwenye miyo gihikanna onamoona wookwaranya ole wa Zhuwawu. Mabasa enaahiddiimi egivahile Baabi wi gaahiddege enogiirela onamoona. Mabasa ayo enowooniha wi Baabi digirumile. 37 Baabi ogirumile, onogiirela onamoona. Vano nyo kamuneewa ndhu neewa, naari kamunoonege mooneyelo eewa. 38 Madhu eewa kinakalave mmirimani mweenyu, mwaha wi kamunamuroromela oyene Baabi omurumiliiye. 39 Munosuuza Maleba Ootaleleya mowaatiba, mwaha wi munoobuwela ofwanyamo egumi yoohumala. Maleba ayo binagiirela onamoona! 40 Naari ndo nyo munokoodda odha wa miyo wi mukanne egumi. 41 "Miyo kaginapwatha dhedho mwaha wi oriihiwa waaga kunadheela wa athu. 42 Guhuunonani; nyo kamwinna odhivela wa Mulugu mmirimani mweenyu. 43 Miyo gidhiile mu ndina na Baabi kamugaakele. Mbwenye mmohi adha mu ndina na oliye yeeka, munomwaakela. 44 Ki munaroromele addi, mudhiveliwaga oriihana vikaleliinyu, muhusayelaga oriiha onadheela wa Mulugu mmohive? 45 Muhuubuwele wi ginowuusumelani wa Baabi. Ohukalawo onoosumeleni: Mozezi munamuroromeliinyu dinoosumeleni. 46 Mwahaamuroromele Mozezi mwa ebaribari, mweerege ogiroromela, vowi oliye alebile dha miyo. 47 Mbwenye akala kamunaroromela dhalebiliiye, ki munaaroromele addi madhu aaga?"
Yesu onowiinjiviha mikaathe ni somba
1 Nuwindo, Yesu ahilabuwaga Nyaza ya oGalileya (naari wi Nyaza ya oTiberiyasi). 2 Anamwinji yahimuharaga, mwaha wi yahoonaga dhitoonyihedho dheerigiiyena vowaayiliha aredda. 3 Yesu ahigwelaga vamwaangoni, okaraati ni anamasuuza aaye. 4 (Mudhidhi wa mathanga oofuneya a aZhudewu, eneeriwa Paxkwa, wahaaddamela.) 5 Vevale Yesu veeng'aniligiiye, ahawoonaga anamwinji emudheelaga. Vano ahimukohaga Filipi, wiira: "Ki nnaagule waani dhootakuna wi athu aatene ala etakune?" 6 (Yesu akohaga dhedhi wi amweehe Filipi, mbwenye mwiinya ahinonaga dhafunigiiye wiira.) 7 Filipi ahaakulaga, wiira: "Naari korowa dha parata mazana meenddi (200) kadhinaakwana ogulana yootakuna eng'onong'onove wi athu ala etakune". 8 Namasuuza aaye mmohiwa, ndina naaye Andire, ddibila a Simawu Peduru, ahimwaaddelaga Yesu, wiira: 9 "Ohukalavo mwaana muzombwe winna mikaathe mitanu dha sevada ni somba biili, ki dhedhi wa athu aatene ala ddi?" 10 Yesu ahiiraga: "Mwawaaddele athu ekaraati". (Vevale vahikalaga thongwe ejinji.) Athu yahikaraatigi. Alobwanave yaaligivo owaakwana macikwi matanu (5.000). 11 Vano Yesu ahithukulaga mikaathe nde, omutamaala Mulugu, waagawela athu yakaraatilege vevale. Ahiiragana emodha-modhave ni somba nde, waagawela wona mwemo athu mwafuneliiwa. 12 Athu aatene egajile, yahirubalaga, Yesu ahawaaddelaga anamasuuza aaye, wiira: "Ddoddelani dhoohala dhiwa wi vihithathiliwe yego". 13 Yahiddoddelaga dhoohala dhaatedhene dha mikaathe mitanu nde, dhaseelelege ale yajilege, odhaaliha middanga kumi ni miinddi. 14 Vevo athu yoonilege etoonyihedho yootikiniha ele yeerilegena Yesu, yahiiraga: "Ebaribareene ola di Namavuhulela awogiwa wi onoodha adhe elabo ya vati". 15 Yesu aganonile wi anamwinji ale yoofunaga omwihidda wi emuhabihe emwene, ahivenyagavo owelela omwaangoni yeeka.
Yesu onoweedda vadhulu va mahinje munyaza
16 Ociguwoni, anamasuuza a Yesu yahikitelaga onyaza. 17 Egoonile wi ode ohuriba, Yesu kanafiye, yahuubuwelaga omaruwa, ogwela mmwanddeyani odhowaga oKafaranawu wekiiwa. 18 Vevale pevo yuulubale yahambeelaga wooba evenyihaga kuluzi yaakathamihaga. 19 Egacapile mwanddeya makilomeeturu owaakwana matanu, naari matanu ni nimohi yahimoonaga Yesu eeddaga vadhulu va mahinje, aaddamelaga mwanddeya weewa, vano aliwa yowoovaga. 20 Mbwenye Yesu ahiiraga: "Kamoove. Di miyo". 21 Yahimwaakelaga Yesu mmwanddeyani, mowaaguva mwanddeya weewa wahiimelaga seresere ya kobela wadhowigiiwa.
Athu enomusayela Yesu
22 Obebehini wiwa anamwinji ale yahalilege kobela ya nyaza, yahinonaga wi mwanddeya waalivo mmohi baahi. Teto anamwinji ale yahinonaga wi Yesu kaavolowilegemo mmwanddeyani ni anamasuuza aaye, aliwa yadhowilege wekiiwa. 23 Naari ndo mwanddeya dhimohi dhookumela nluwa na Tiberiyasi dhahifiyaga vakukuuve ni mburo oyene athu vajiligiisu mikaathe, Nabwiya agamutamaale Mulugu. 24 Anamwinji ale vooniligiiwa wi Yesu kaalivo, anamasuuza aaye naaliweene teto kilivo, athu aatene yahivolowaga mmwanddeyani nde, odhowa oKafaranawu, emusayelaga Yesu.
Yesu dili yooja enavaha egumi
25 Vevale athu yahimfwanyaga Yesu kobela ya nyaza, yahimukohaga, wiira: "Namasuuziha, mfiyile alini wuno?" 26 Yesu ahawaaddelaga, wiira: "Ebaribareene, ebaribareene ginowuwaaddelani wi nyo kamunagisayelela mwaha wowiiwelelamo etoonyihedho ele, eehi, mbwenye mwaha wi mwahija yooja ofiyedha orubala. 27 Kamwihiddege mabasa wi mfwanye yooja enanoongeya, mbwenye mulabege mabasa wi mfwanye yooja yoologela, eli yoovaha egumi yoohumala. Vowi miyo, Mwaana a Muthu, dinoovaheni yooja ele, Mulugu Baabi ahigirumeedhiha wi guuvaheni". 28 Vevale athu ale yahambeelaga omukoha, yiiraga: "Niire avi wi nilabe mabasa Mulugu enaafuniiye?" 29 Yesu ahawaakulaga, wiira: "Mulugu mabasa enaafuniiye baala: Mmuroromele ole omurumiliiye". 30 Aliwa yahimukohaga, wiira: "Munanoonihe etoonyihedho yootikiniha ddi wi noona nuuroromeleni? Munaanda wiirana ddi? 31 Awale-wale eehu yooja manaa mwiiddeddereni wona Maleba Ootaleleya mulebeliwiiwa wi: 'Owaavaha yooja yadha odhulu wi ejege' ". 32 Yesu ahiiraga: "Ebaribareene, ebaribareene ginowuwaaddelani wi oyene oovahani yooja yadha odhulu, kaali Mozezi, eehi. Ababa boovahani yooja ya ebaribari yowaakwana yadha odhulu. 33 Vowi yooja Mulugu enaveleeliiye si eyene ekitile okumela odhulu, enavaha egumi yoohumala wa athu a elabo ya vati". 34 Ale yaaligi vevale yahimulobaga Yesu, wiira: "Nabwiya, munivahege yooja eyo malabo maatene". 35 Yesu ahawaaddelaga, wiira: "Miyo gili yooja enavaha egumi. Muthu oli aatene onadha wa miyo, kadha akanna dala. Aatene enagiroromela, kidha ekanna nthona. 36 "Ginowuwaaddelani wi ee, nyo muhugoona, mbwenye kamunagiroromela. 37 Aatene Baabi enagivahiiye, enoodha wa miyo. Teto athu aatene enagidheela, kagidha gaakoodda. 38 Vowi gihikita okumela odhulu odha wiirana dhoofuna dha ole ogirumile, ehili wiirana dhoofuna dhaaga. 39 Yoofuna ya ole ogirumile siila: Gihimurimeelihevo naari mmohi mwa ayene egivahiliiye, mbwenye gidhe gaavenyihe muukwani va nlabo noomariha. 40 Ela teto soofuna ya aBaba wi muthu oli aatene onamusugwa Mwaana, amuroromela, akalena egumi yoohumala, vano miyo ginoodha gimvenyihe muukwani nlabo noomariha". 41 Vevale aZhudewu yahambeelaga waaba mwaha wi Yesu ahiiraga: "Miyo gili yooja ekitile okumela odhulu". 42 Aliwa yoowogaga, yiiraga: "Ola kahuwo Yesu, mwaana a Zhuuze? Babe ni maaye kanaanonile? Ki onawoga addi wi: 'Miyo gikitile okumela odhulu?' " 43 Yesu ahawaakulaga, wiira: "Kamugaabe vikaleliinyu. 44 Kalivo muthu onaadhe wa miyo, Baabi ogirumile ahimudhiilena; vano miyo ginoodha gimvenyihe muukwani nlabo noomariha. 45 Dhihilebiwa mwa anamavuhulela wi: 'Aatene enoodha ekale oosuuzihiwa ni Mulugu'. Muthu oli aatene onamwiiwa Baabi, asuuza wa aliwa, onoodha wa miyo. 46 Kalivo muthu omoonile Baabi, ahili ole okumele wa Mulugu; oliye yeeka dimoonile Baabi. 47 "Ebaribareene, ebaribareene ginowuwaaddelani wi onagiroromela, ohukanna egumi yoohumala. 48 Miyo gili yooja enavaha egumi. 49 Awale-wale eenyu yahija manaa mwiiddeddereni, naari ndo yahikwa. 50 Mbwenye yooja enawogiimi si eyene yakitile okumela odhulu wi muthu aja ahikwe. 51 Miyo gili yooja yeegumi ekitile okumela odhulu. Muthu aja yooja ela, onoodha akalena egumi yoohumala. Yooja ela bu mwiili waaga, onaveleeliimi wa athu a elabo yaatene ya vati wi ekalena egumi". 52 Amohi mwa aZhudewu yahambeelaga ovaanyihana vakaleligiisu, yiiraga: "Muthu ola onaande addi onivaha mwiili waaye wi nije?" 53 Yesu ahaakulaga, wiira: "Ebaribareene, ebaribareene ginowuwaaddelani wi akala kamunaaje mwiili wa Mwaana a Muthu ni ong'wa mwazi waaye, kamunaakalena egumi mwa nyo weekiinyu. 54 Muthu oli aatene onaaje mwiili waaga ni ong'wa mwazi waaga, ohukanna egumi yoohumala, miyo ginoodha gimvenyihe muukwani nlabo noomariha. 55 Vowi mwiili waaga si yooja ya ebaribari teto mwazi waaga si yoong'wa ya ebaribari. 56 Muthu oli aatene onaje mwiili waaga, ang'wa mwazi waaga, onakala mwa miyo teto ginakala mwa oliye. 57 Baabi ogirumile mugumi, miyo teto gili mugumi mwaha wa Baabi. Mwa mukalelo mmohive, ole onaajeve mwiili waaga, onokanna egumi mwaha wa miyo. 58 Ela si yooja ekitile okumela odhulu. Eyene eli yoohiyana ni manaa a awale-wale eenyu yaajiliiwa, ekwa. Muthu onaja yooja ela onoodha akalewo okala ni okala". 59 Yesu awogilege dhedhi asuuzihaga mu nyuba ya matugumano ya oKafaranawu.
Madhu oovaha egumi yoohumala
60 Anamasuuza ajinji a Yesu egeewile dhedhi yahiiraga: "Madhu ala bookukumula. Onaande waarumeedha baani?" 61 Yesu ahinonaga mmurimani mwaaye wi anamasuuza aaye enowaaba wa nde dheewiligiisu. Vano ahaakohaga, wiira: "Enookukumulani ddi? 62 Ki mmoona Mwaana a Muthu agwelaga adhowaga wewo waaliiye wale muneere avi? 63 Muneba wa Mulugu bunavaha egumi, mwiili wa emuthu kunapuriha yego. Madhu guwaaddeliimini, bili muneba ni egumi. 64 Mbwenye ehikalavo amohi vaari va nyo ehinaroromela dhinawogiimi". (Vowi Yesu ahaanona wambeela wale ale yahaaroromele teto ni ole aampeleke.) 65 Yesu ahiwelelaga owoga, wiira: "Mwahaya buuyene wuwaaddeleliimini wi kavili muthu onaande odha wa miyo, Baabi aahimvaha oliye odha". 66 Okuma vevale anamasuuza ajinji a Yesu yahimwihiya, kuhumweeddagana. 67 Yesu ahaakohaga anamasuuza kumi ni abiili ale, wiira: "Ki nyo teto kamunafuna odhowa?" 68 Simawu Peduru ahaakulaga, wiira: "Nabwiya, nnadhowe waani? Nyo dinna madhu oovaha egumi yoohumala. 69 Hiyo nnororomela, nihinona wi nyo dili Oweela ookumela wa Mulugu". 70 Vevale Yesu ahaakulaga, wiira: "Gahuusakulani nyo kumi ni abiili, kahuwo mwemo? Naari ndo, mmohi vaari va nyo da Ddiyabo". 71 Oliye amuwogaga Zhudasi, mwaana a Simawu a oEsikariyothi. Naari aalive mmohi mwa anamasuuza kumi ni abiili ale, oliye dampelekile Yesu.
Addibila a Yesu kayamuroromele
1 Dhigavirile nda Yesu oweeddeedda murudda wa oGalileya. Kaafunile weeddela murudda wa oZhudeya, mwaha wi apogo a aZhudewu a wewule yafuna empe. 2 Mudhidhi oyo Othabeliwa wa Misasa wa aZhudewu, sowi ogali vakukuuve. 3 Vano addibila a Yesu yahimwaaddelaga, wiira: "Ovenyewo wuno, odhowe oZhudeya wi anamasuuza aawo wewo naaliweene yoone dhedho dhineriiwena. 4 Ole onafuna ononeya ni athu kaneerana yego mowiipiteya. Vowi nyo munowiirana mabasa owinda, mweyoonihe vowooneya vameentoni va athu aatene wi yuunoneni". 5 (Sowi addibile naaliweene, kayamuroromela.) 6 Yesu ahawaaddelaga, wiira: "Mudhidhi waaga kunafiye, mbwenye nyo mudhidhi oli waatene bweenyu. 7 Elabo ya vati kidha yuwiiddani, mbwenye enagiidda miyo, mwaha wi ginowiirela onamoona wi athu a elabo ya vati dhineeriiwa sootakala. 8 Nyo dhowani omathabelelo. Dhiinova miyo kaginayawo omathabelelowo, mwaha wi mudhidhi waaga kunafiye". 9 Yesu agawogile dhedho, ahihalaga oGalileya.
Yesu onodhowa Omathabelelo wa Misasa
10 Egadhowile addibile omathabelelo wa Misasa wule, Yesu teto ahidhowagawo. Kaadhowilege mowooneya, mbwenye mowiipiteya. 11 Apogo a aZhudewu yoomusayelaga vamathabelelo vale, ekohanaga, yiiraga: "Mulobwana ole oli wuuvi?" 12 Teto vahikalaga onong'ona wujinji owoga dha oliye vaari va anamwinji. Amohi yoowogaga, yiiraga: "Di muthu apama". Mbwenye amohi yowiiraga: "Eehi, onoviriganiha nlogo". 13 Naari ndo kaalivo muthu awogaga voweela dha oliye mwaha wowawoova apogo a aZhudewu. 14 Othabela ogali vaari, Yesu ahivolowaga nyuba ya Mulugu wambeela osuuziha mwemule. 15 Apogo a aZhudewu yahitikinaga, wiira: "Mwaha bwaddi muthu ola winna tthottho dhowinda ahisuuzile?" 16 Yesu ahaakulaga, wiira: "Dhinasuuzihiimi kahuwo dhaaga, dhinadha wa ole ogirumile. 17 Aatene enafuna wiirana dhoofuna dha Mulugu, enoodha enone akala dhinawogiimi sookumela wa Mulugu naari wa miyo meenka. 18 Oyene oneewogela yeeka, oneefunela wiiriiha yeeka. Mbwenye onasayela omuriiha ole omurumile, dili a ebaribari, mmurimani mwaaye kamuli yoonyengetha. 19 Mozezi kahuwo oovahileni Malamulo a Mulugu? Kavili mmohi mwa nyo onaahariha. Ki munafunela ddi ogipa?" 20 Mbwenye anamwinji yahimwaakulaga, wiira: "We ohiddiwe muneba wootakala. Onafuna wuupa baani?" 21 Yesu ahawaakulaga, wiira: "Giirilena yego emohi baahi, mwaatene otikinaga. 22 Teto nyo munomwiinela mwihima amulobwana naari nigali nlabo na sabuddu. Mozezi ahuulamulani wiira mwawiinelege aniinyu anaalobwana (naari elemeelelo eyo ehili yookumela wa Mozezi mbwenye wa awale-wale eenyu ale). 23 Akala mwaana onowiineliwa va nlabo na sabuddu wi yaakwanele Malamulo a Mozezi, mwaha bwaddi munatakaleliwa ni miyo voomuyiliha muthu nlabo na sabuddu? 24 Kamuthongege vowoona mukalelo wa muthuya, mbwenye muthongege mwa ebaribari, ni mowogoowa".
Yesu dili Kirixtu ole aroromelihiwe
25 Vevale athu amohi a oZheruzalemi yahiiraga: "Ki muthu onamusayeliiwa wi empe, kahuwo olena? 26 Kahuwo olena onawoga voweela va, kalivo onamwiirela yego! Sowi asogoleli ehinona ebaribareene wi oliye di Kirixtu? 27 Vowi Kirixtu aroromelihiwe wi adhe, kalivo ononile onaakumiiye. Mbwenye ola aatene nihinona okumeliiye". 28 Vevale Yesu asuuzihaga nyuba ya Mulugu, ahiwogaga moogweliha madhu, wiira: "Nyo muhuginona teto okumiliimi muhunonawo. Mbwenye kagidhiile mwa ofuna waaga-waaga. Ole ogirumile da ebaribari. Nyo kammunonile. 29 Mbwenye miyo gihimunona mwaha wi gikumele wa oliye, ogirumile di oliye". 30 Vevale athu yoofunaga omwihidda Yesu, mbwenye kaalivo mmohi amukahinyilege, mwaha wi mudhidhi waaye waaligi ohunafiye. 31 Mbwenye athu ajinji mwa anamwinji yahimuroromela, yowiiraga: "Kirixtu vineeriiye adhe, oneere wiirana dhitoonyihedho dhookwaranya dhedhi mulobwana ola dhiiriliiyena?"
Anamaang'anela enorumiwa omwihidda Yesu
32 AFarizi yahiiwaga onong'ona wa anamwinji yawogaga dha Yesu. Vano aliwa vamohi ni apogo a anamakutha yahaarumaga anamaang'anela a Nyuba ya Mulugu wi yamwihidde. 33 Vevale Yesu ahiwogaga ni anamwinji, wiira: "Ginokala ni nyo mudhidhi vang'ono, geera ndo ginowelela wa ole ogirumile. 34 Munoodha mugisayelege, mbwenye kamudha mugifwanya. Oneeriimi gakalewo, kamunaande ofiyawo". 35 AZhudewu yahambeelaga okohana mmohi ni mukwaaye, yiiraga: "Onafuna adhowe wuuvi ohunamfwanyiihuwo? Onafuna adhowe wa aZhudewu ebalaleyele vaari va athu a malogo mamohi? Onafuna aasuuzihege athu oode? 36 Madhu alena enatapulela ddi? Onawoga wi: 'Munoodha mugisayelege mbwenye kamudha mugifwanya', teto oni: 'Oneeriimi gakalewo kamudha mfiyawo' ".
Mihinje dha mahinje oovaha egumi
37 Nlabo noomariha na othabela naali noofuneyesesa. Nlabo ndde Yesu ahiimelaga, owoga ni ndhu nootaama, wiira: "Akalavo winna nthona, adhe wa miyo ang'we. 38 Maleba Ootaleleya yiire: 'Muthu onagiroromela, murima waaye onaakale wona needduuddu a mihinje dha mahinje enavaha egumi' ". 39 (Oliye awogaga dha Muneba Woweela athu oomuroromela yaakeliisu. Mudhidhi oyene Muneba Woweela waali ohunadhe, mwaha wi Yesu aaligi ahinadhowe waakela nthithimiho.)
Ogawanyeya wa athu
40 Anamwinji egeewile madhu alena, amohi vaari va aliwa yowiiraga: "Ebaribareene muthu ola dili Namavuhulela". 41 Amohi yoowogaga, yiiraga: "Ola dili Kirixtu aroromelihiwe". Mbwenye amohiwa yawogaga, yiiraga: "Kirixtu onakumela oGalileya? 42 Maleba Ootaleleya kayiire Kirixtu onadheela wa anamabaliwelamo a Davidi, nluwa na oBetelemi, wewo Davidi wakaliiye?" 43 Mowindo anamwinji yahigawanyeyaga mwaha wa Yesu. 44 Amohi yoofunaga omwihidda mbwenye kaalivo amukahinyilege.
Ohuroromela wa apogo a aZhudewu
45 Anamaang'anela a nyuba ya Mulugu yahiwelelaga wa apogo a anamakutha ni wa aFarizi. Aliwa yahaakohaga anamaang'anela ale, wiira: "Mwaha bwaddi mudhe muhumwihiddege?" 46 Anamaang'anela yahaakulaga, wiira: "Kanakalegewo onawogaga wona mulobwana ole". 47 Vevale aFarizi yahiiraga: "Sowi ninyeene teto muhunyengethiwa ni mulobwana ole? 48 Kalivo naari mmohi mwa hiyo naari aFarizi emuroromele. 49 Mbwenye athu bure ale ehinonile Malamulo a Mozezi, booddubeya!" 50 Vano Nikodemu, mmohi mwa aFarizi, oyene amusayele Yesu wale, ahaakohaga akwaaye, wiira: 51 "Malamulo eehu kinarumeedhiha omuthonga muthu nihineewe madhu aaye, nnona dhiiriliiye?" 52 Aliwa yahaakulaga, wiira: "Teto niweene oli a oGalileya? Odhowe wasayele mMalebani oneere woona wi kavili namavuhulela ookumela oGalileya". 53 Vevale athu aatene yahiwelelaga mmavade mweewa.
Mwihiyana ooraruwa
1 Yesu ahidhowaga oMwaangoni wa Olivera. 2 Ogaasile ahidhowaga nyuba ya Mulugu. Athu aatene yahidhaaga wa oliye, vano ahikaraatigi wambeela waasuuziha. 3 Anamasuuziha a Malamulo vamohi ni aFarizi yahimudhaagana mwihiyana yamwihiddiligiiwa araruwaga, omwiimeliha vaari va athu aatene. 4 Vano yahimwaaddelaga Yesu, wiira: "Namasuuziha, mwihiyana ola ohiddiwe araruwaga. 5 Malamulo a Mozezi enanilamula wi ahiyana ooraruwa wona ola naapege mowaavonya ni mabwe. Nyo muni avi?" 6 Yamukohelaga wi emweehe, emfwanyena mwaha. Yesu ahiworomaga, wambeela oleba vati ni embuno. 7 Vowi aliwa yoomukohagave, Yesu ahinuuwaga, wiira: "Vaari veenyu ohunathegege, ambeele omvonya ni nibwe mwihiyana oyo". 8 Ageere ndo ahiwelelaga oworoma dila ya nabiili, olebaga vati. 9 Egeewile madhu alena, yahambeelaga ovenyavo mmohi mmohi, wambeela wa apogo ofiyedha oogomihedha; ohalavo Yesu ni mwihiyana ole weekiiwa. 10 Vano Yesu ahinuuwaga omukoha, wiira: "Mwihiyana, athu ale eli wuuvi? Kaavo wuukonile?" 11 Mwihiyana ole ahiiraga: "Kalivo muthu, Nabwiya". Vano Yesu ahimwaaddelaga, wiira: "Miyo teto kaginookona. Dhowaga, kuwelele othega".
Yesu dili waara onavaha egumi
12 Vevale Yesu ahiwelelaga owoga ni aFarizi, wiira: "Miyo gili waara wa elabo. Ole onagihara kadha eedda muyiihini, mbwenye onoodha akalena waara onavaha egumi yoohumala". 13 AFarizi yahimwaaddelaga, wiira: "Oneyiirela onamoona weeka. Onamoona waawo oyo kahuwo wa ebaribari". 14 Yesu ahawaakulaga, wiira: "Naari giyiirelaga onamoona meenka, onamoona waaga bwa ebaribari, vowi gihinona okumiliimi teto onadhowiimi. Mbwenye nyo kamunonile okumiliimi, naari onadhowiimi. 15 Nyo munathonga voohariha moobuwelo a omuthu. Miyo kaginamuthonga muthu. 16 Akala ginothonga, ginathonga mowogoowa, vowi kagili meenka, Baabi ogirumile oli ni miyo. 17 Malamulo eenyu elebiwe wi onamoona wa athu abiili bwa ebaribari. 18 Miyo ginowiyiirela onamoona meenka teto Baabi ogirumile onogiirela onamoona". 19 Vevale aliwa yahimukohaga, wiira: "ABabo eli waani?" Yesu ahiiraga: "Nyo kamuginonile teto aBaba kamwaanonile. Mwahaaginone, mowaanona aBaba". 20 Yesu awogilege madhu alena asuuzihaga mu nyuba ya Mulugu, vakukuuve ni suubi mwalogoleliwa dhooveleela dha athu. Kalivo amwihiddilege, mwaha wi mudhidhi waaye waaligi ohunafiye. 21 Yesu ahiwelelaga wawaaddela, wiira: "Miyo ginoodhowa. Munoodha mugisayelege, mbwenye munookwela mudhoothegani mweenyu. Onadhowiimi, kamunaande ofiyawo". 22 Vevale apogo a aZhudewu yahiiraga: "Onafuna eepe, onawoga wi: 'Onadhowiimi, kamunaande ofiyawo?' " 23 Yesu ahiwelelaga wawaaddela, wiira: "Nyo muli a vati va, miyo gili a odhulu. Nyo muli a elabo ela, miyo kagili a elabo ela. 24 Miyo guhuwaaddelani wi munokwela mudhoothegani mweenyu. Akala kamunaroromela wi Miyo Gili, munokwela mudhoothegani mweenyu". 25 Vevale aliwa yahimukohaga, wiira: "We oli aani?" Yesu ahawaakulaga, wiira: "Miyo gili eyene guwaaddeliimini okuma omambeelelo. 26 Miyo gihikanna dhijinji dhoowoga dha nyo ni wuurunihani dhineeriinyu, mbwenye ginawoga dhedho dhiiwiliimi wa ole ogirumile wi gawaaddele athu a elabo ya vati, vowi oliye da ebaribari". 27 Athu ale kayeewelelemo wi Yesu awogaga dha aBabe. 28 Yesu ahawaaddelaga, wiira: "Mwadha mmutomeya Mwaana a Muthu, munoodha munone wi Miyo Gili. Mowindo kagineerana yego mwa meenka, ginawoga dhedho Baabi dhigisuuzihiliiye. 29 Ole ogirumile, oli ni miyo, kagihiyile meenka, vowi mudhidhi dhaatedhene ginowiirana dhoomudhivela". 30 Yesu agawogile dhedhi, athu ajinji yahimuroromelaga.
Ebaribari enowaatapula athu
31 Vano Yesu ahawaaddelaga aZhudewu yamuroromela, wiira: "Mweera mukalagave mmadhuni aaga, ebaribareene munakala anamasuuza aaga. 32 Mowindo munoodha munone ebaribari, vano ebaribari eyo enoodha yuutapuleni". 33 Aliwa yahiiraga: "Hiyo nili anamabaliwelamo a Abarahamu, okalawene kannakalege adhaari a mmohi. Ki onawogela ddi wi nnoodha nikale ootapuwa?" 34 Yesu ahawaakulaga, wiira: "Ebaribareene, ebaribareene ginowuwaaddelani wi ole oneerana yoothega mudhaari a yoothega. 35 Mudhaari kanakala mwiimudhini mudhidhi dhaatedhene, mbwenye mwaana dinakala mwiimudhini mudhidhi dhaatedhene. 36 Eera akala Mwaana onootapuleni, munoodha mukale ootapuwa-mutapuwelo. 37 Gihinona wi muli anamabaliwelamo a Abarahamu, naari ndo munafuna ogipa, mwaha wi mmirimani mweenyu kamunarumeedha madhu aaga. 38 Miyo ginawoga dhedho aBaba dhigoonihiliiwa, mbwenye nyo muneerana dhedho dhiiwiliinyu wa babiinyu". 39 Aliwa yahiiraga: "Hiyo, babiihu di Abarahamu". Yesu ahawaakulaga, wiira: "Mwahaakale ahima a Abarahamu, mweerege wiirana dhedho Abarahamu dheeriiyena. 40 Mbwenye vano munosayela ogipa, naari ngali muthu onowaaddelani ebaribari yiiwiliimi wa Mulugu. Abarahamu kaadhe eerana dhowindo. 41 Nyo muneerana dhedho babiinyu dhineeriiyena". Aliwa yahimwaakulaga, wiira: "Hiyo kanili ahima a mmararuwoni. Nihikanna Babiihu mmohi, oli Mulugu". 42 Yesu ahiiraga: "Mulugu ahaakale Babiinyu, mweerege ogidhivela, mwaha wi gikumele wa Mulugu, dhiinova gili wuno. Kagidhiile ni owodha wa miyo meenka, mbwenye oliye digirumile. 43 Mwaha bwaddi kamuneewelelamo dhinawogiimi? Sowi kamunaakwaniha wiiwa madhu aaga. 44 Nyo muli ahima a Ddiyabo oli babiinyu, muneerana dhedho babiinyu dhinafuniiye. Oliye aalive namapa okumela omambeelelo. Onowiiddana ni ebaribari, mwaha wi mwa oliye kamuli ebaribari. Oratha bu mukalelo waaye, vowi oliye namaratha, baabi a anamaratha aatene. 45 Mbwenye mwaha wi ginawoga ebaribari, kamunagiroromela. 46 Ogoonilena yoothega vaari va nyo baani? Akala ginawoga ebaribari, muhunagirumeedhela ddi? 47 Ole oli a Mulugu, onorumeedha madhu a Mulugu. Mbwenye nyo kamunarumeedha Mulugu dhinawogiiye, vowi kamuli aaye".
Yesu onowoga dha Abarahamu
48 Amohi mwa aZhudewu ale yahimwaakulaga Yesu, wiira: "Dhinawogiihu kahuwo ebaribari, neeraga wi oli muSamariya ohuhiddiwa ni muneba wootakala?" 49 Yesu ahawaakulaga, wiira: "Miyo kagihiddiwe ni muneba wootakala. Ginowariiha Ababa, vano nyo munogivevusa. 50 Miyo kagineesayelela meenka oriihiwa. Ohukalawo mmohi onagisayelela oriihiwa, oliye dili namathonga oogomihedha a dhaatedhene. 51 Ebaribareene, ebaribareene ginowuwaaddelani wi muthu oneewelela madhu aaga, kadha akwa". 52 AZhudewu ale yahimwaaddelaga, wiira: "Vano nihinona we ohuhiddiwa ni muneba wootakala. Abarahamu ohukwa, anamavuhulela aatene ehikwa, we oni: 'Muthu eewelela madhu aaga kadha akwa'. 53 We ohumukwaranya babiihu Abarahamu? Oliye ohukwa wona teto anamavuhulela ehikwa. Ki we onoobuwelela wi oli aani?" 54 Yesu ahawaakulaga, wiira: "Akala ginowiriiha meenka, nriiho naaga theebeweene. Ohukalawo onagiriiha, eli aBaba, ayene nyo munawiriinyu di Mulugu eenyu. 55 Nyo kamwaanonile, mbwenye miyo gihaanona, vowi gaheerege kagaanonile gaakale namaratha wona nyo. Mbwenye gihaanona teto ginowiiwelela madhu eewa. 56 Babiinyu Abarahamu ahiteyela wi oone nlabo naaga. Ahoona ebaribareene nigafiyile, ahihagalala". 57 Vevale aZhudewu ale yahimukohaga, wiira: "Yaaka dhaawo kadhinaakwane makumi matanu (50), omoonile addi Abarahamu?" 58 Yesu ahawaakulaga, wiira: "Ebaribareene, ebaribareene ginowuwaaddelani wi Abarahamu ahinabaliwe, Miyo Gili". 59 Vevale aZhudewu ale yahaaddoddaga mabwe wi emvonyena. Mbwenye Yesu ahiipitaga nuwindo okuma mu nyuba ya Mulugu.
Yesu onomuyiliha mulobwana oohoona
1 Yesu eeddaga, ahimoonaga muthu oohoona woobaliwana. 2 Anamasuuza aaye yahimukohaga, wiira: "Namasuuziha, othegile baani wi muthu ola abaliwe ahoonaga? Othegile di oliye naari ababiinya?" 3 Yesu ahawaakulaga, wiira: "Kahuwo wi oliye dithegile naari ababiinya. Mbwenye obaliwe oohoona wi Mulugu oonihe owodha wa mabasa aaye, mwa nde dhineereye mwa oliye. 4 Veva viliiwa mutana enofuneya nihiddege mabasa a ole ogirumile. Mahiyu enoodha muthu vihinaakwanihigiiye ohidda mabasa. 5 Viliimi elabo ya vati vano, gili waara wowaamoneya athu aatene". 6 Yesu agawogile dhedho, ahitaperaga mare vati okanddana theya, odholiha maddoguya mmeentoni mwa muthu oohoona ole, 7 omwaaddela, wiira: "Dhowa wasuusule onthiyani na Silowe". (Enatapulela wi: Oorumiwa.) Muthu ole ahidhowaga osuusula, owelawo oonaga. 8 Vano amwaaddamani aaye ni amohi yamoonesa wale aloba-lobaga, yahiiraga: "Ola kahuwo olene akaraatesa alobaga?" 9 Amohi yoorumeedhaga, yiiraga: "Di oliyeene". Amohiwa yowiiraga: "Eehi, onooliganana". Mbwenye mwiinyeene ahiiraga: "Ee, di miyeene". 10 Aliwa yahimukohaga, wiira: "Ki meento aawo efuguwe addi?" 11 Oliye ahaakulaga, wiira: "Muthu oneeriwa Yesu dikanddile theya ni mare, odholiha maddoguya mmeentoni mwaaga. Ogaaddela, wiira: 'Dhowa, wasuusule onthiyani na oSilowe'. Miyo odhowa osuusula, vano ginowoona". 12 Athu ayo yahimukohaga, wiira: "Muthu oyo oli wuuvi?" Oliye wiira: "Kaginonilewo".
AFarizi enomukoha mulobwana ooyilihiwa ole
13 Anamwinji yahimuthukulelaga mulobwana aali oohoona ole wa aFarizi. 14 Naaligi nlabo na sabuddu Yesu nakanddiligiiye theya ni mare amuyilihana muthu ahoona ole. 15 Vano aFarizi naaliweene teto yahimukohaga muthu ole, wiira: "We, woonile addi?" Oliye ahawaaddelaga, wiira: "Agidholihile maddogu mmeentoni mwaaga, miyo odhowa osuusula, vano ginowoona". 16 AFarizi amohi yahiiraga: "Mulobwana oyo kahuwo ookumela wa Mulugu, mwaha wi kanahariha nlamulo nnawoga dha sabuddu". Mbwenye amohiwa yowiiraga: "Dhinowaandeya namathega wiirana dhitoonyihedho dhowindo?" Mowindo vahikalaga ogawanyeya. 17 Vano aFarizi yahiwelelaga omukoha muthu aali oohoona ole, wiira: "Ki weevo oneera avi dha oliye, vuwoonihiliiye?" Muthu ole ahaakulaga, wiira: "Oliye di namavuhulela". 18 Mbwenye apogo a aZhudewu kayaroromele wi muthu ole wale koona, dhiinova onowoona, yahifiyedhaga wawiithaniha ababiinya. 19 Vano yahaakohaga, wiira: "Nyo, mwiire ola di mwaaninyu? Obaliwe ahoonaga? Ki dhiireyile avi wi vano oonege?" 20 Ababiinya yahaakulaga, wiira: "Enoniliihu sowi ola di mwaanihu, obaliwe ahoonaga. 21 Mbwenye kannonile dhiireyile wi dhiinova oonege naari omuyilihile. Mmukohe mwiinya, oliye di pogweene, onowaanda owoga yeeka". 22 Ababiinya yawogelege ndo mwaha wi yawoovaga apogo a aZhudewu. Vowi aliwa yahipanganela wi akalawo muthu onaakulele wi Yesu dili Kirixtu aroromelihiwe, emwiigare mu nyuba ya matugumano. 23 Mwahaya buuyene ababiinya yawogeligiiwa, yiira: "Di pogweene, mmukohege mwiinya". 24 Vevo apogo a aZhudewu yahimwiithanaga dila ya nabiili muthu aali oohoona ole, omwaaddela, wiira: "Omoove Mulugu, owoge ebaribari. Hiyo nihinona wi muthu ole namathega". 25 Oliye ahawaakulaga, wiira: "Miyo kaginonile akala oliye namathega. Enoniliimi sowi wale kagoona, dhiinova ginowoona". 26 Aliwa yahimukohaga, wiira: "Oliye owiirilena avi oofugulaga meento?" 27 Oliye ahawaakulaga, wiira: "Guhuwaaddelani wale, nyo kamunarumeedha. Ki munafunela ddi wiiwa dila biili-biili? Ninyeene teto munafuna mukale anamasuuza aaye?" 28 Vevale aliwa yahimuruwanaga, wiira: "Namasuuza aaye di we. Hiyo nili anamasuuza a Mozezi. 29 Nihinona wi Mulugu ahiwoga ni Mozezi. Mbwenye dha mulobwana ola, kannonile odheeliiye". 30 Muthu ole ahawaakulaga, wiira: "Vinatikiniha fivevo: Nyo kamunonilewo odheeliiye, naari ndo ohuyiliha meento aaga. 31 Nihinona wi Mulugu kanawiiwa anamathega, mbwenye oliye onamwiiwa ole onamuriiha, eeragana ofuna waaye. 32 Okuma omapaddusiwelo wa elabo, kanneewege wi ohukalawo amoonihilege muthu abaliwe ahoonaga. 33 Mulobwana ole aheere ahikumela wa Mulugu, kaandege wiirana yego". 34 Aliwa yahimwaakulaga, wiira: "We wabaliwe mudhoothegani. Onafuna onisuuzihege?" Egawogile ndo yahimwiigaragavo.
Ohoona mwa muneba
35 Yesu ageewile wi apogo a aZhudewu ehimwiigara muthu ole mu nyuba ya matugumano, agamfwanyile, ahimukohaga, wiira: "We onomuroromela Mwaana a Muthu?" 36 Oliye ahimwaakulaga, wiira: "Nabwiyani, Mwaana a Muthu oyo onamuwogiinyu baani wi gimuroromele?" 37 Yesu ahimwaaddelaga, wiira: "Ohumoona. Mwaana a Muthu di oyene onawoga ni we". 38 Oliye ahimwaakulaga, wiira: "Nabwiyani, ginororomela". Ageere ndo, ahikokoraga omweebedha Yesu. 39 Yesu ahiiraga: "Gidheele wi gaathonge athu aatene a elabo ela, oohoona gawoonihege, vano owoona gihawoonihege". 40 AFarizi amohi yaaligi vakukuuve ni oliye, egeewile dhedhi yahimukohaga, wiira: "Sowi onawoga wi nihiyeene nili oohoona?" 41 Yesu ahiiraga: "Mwahaakale oohoona, kamwakanne muladdu. Mbwenye munawoga wi: 'Nnowoona', muladdu weenyu ohukalawoove".
Musibe wa nikola na mabila
1 Yesu ahiiraga: "Ebaribareene, ebaribareene ginowuwaaddelani wi ole ohunavolowela vamulago va nikola na mabila, agwelela cinga epaddi emoheene, oyo mbava, namapa. 2 Ole onavolowela vamulago dili makambuzi mwiinya a mabilaya. 3 Oliye amuruma namaang'anela ofugula mulago, onowiithana ndina na kadda nibila teto onowaasogolela waadhowana ode, mwaha wi mabila ale ehinona ndhu naaye. 4 Aakumiha mabila ale maatene, onosogola mabilaya omuharaga, vowi ehinona ndhu naaye. 5 Ohumunoniliisu kinamuhara, mwaha wi kinonile ndhu na muthu ole". 6 Yesu ahaawogelaga musibe ola mbwenye aliwa kayeewelelegemo dhawaaddeligiiye.
Yesu dili makambuzi apama
7 Vano Yesu ahawaaddelaga dila ya nabiili, wiira: "Ebaribareene, ebaribareene ginowuwaaddelani wi miyo gili mulago vinavolowela mabila. 8 Aatene yadhiile miyo gihinadhe, ambava, anamapa, mabilaya kayawiiwelele. 9 Miyo gili mulago. Ole onavolowela wa miyo onoodha avulumuwe. Onoodha avolowe, akume, afwanye thongwe. 10 Mbava onadheela wiiya, opa ni obwanyula. Vano miyo gidheele waavaha egumi, egumiya yowaakwanela. 11 "Miyo gili makambuzi apama. Makambuzi apama onoveleela egumi yaaye mwaha wa mabila aaye. 12 Namalaba kahuwo makambuzi oli mwiinya a mabila. Mowindo oona miiji dhidhaaga onowaahiya mabilaya othawa, vano miiji ndo dhinowaahiddavo mabila mamohi, mamohiiwa enomwadheya. 13 Namalaba onoothawa mwaha wi onaharavo oliveliwa baahi, kanapwatha dha mabilaya. 14 Miyo gili makambuzi apama. Mabila aaga gihaanona teto aliwa ehiginona 15 wona Baabi muginoneliiye, miyo teto gihimunona Baabi. Mwa eyo ginoveleela egumi yaaga wa mabila aaga. 16 Gihikanna mabila mamohi ehili a nikola nddi. Ayene enofwaneelela waasogolela. Enoodha yiiwe ndhu naaga teto enoodha ekale a nikola nimohive vano ekalena makambuzi mmohi baahi. 17 "Baabi munagidhiveleliiye, sowi ginoveleela egumi yaaga wi gidhe gikalena egumiya dila biili. 18 Kalivo muthu onaagaake egumi yaaga ela, ginoveleela meenka. Gihikanna owodha wooveleela egumi yaaga teto owodha wookalana egumiya dila biili. Olamula wula gaakelile wa aBaba". 19 Mulogo wa aZhudewu ogeewile ndo, wahiwelela ogawanyeya. 20 Ajinji mwa aliwa yowiiraga: "Ohukanna muneba wootakala, ohusavuwa. Mwaha bwaddi munamvuruwaniinyu?" 21 Mbwenye amohi yowiiraga: "Madhu alena kahuwo a muthu oohiddiwa ni muneba wootakala. Mineba dhootakala dhinowaanda ofugula meento a aliba ohoona?"
AZhudewu enomukoodda Yesu
22 OZheruzalemi wahikalaga othabela wooveleeliwa Nyuba ya Mulugu. Waaligi mudhidhi wooddiddila. 23 Yesu aaligi nyuba ya Mulugu mukodde mweeriwa Nikodde na Salomawu. 24 Apogo a aZhudewu yahimwaapeelelaga, omukoha, wiira: "Wuwaanganyedha weehu onaamale alini? Akala oli Kirixtu ole aroromelihiwe, onaaddele mowiiweya". 25 Yesu ahawaakulaga, wiira: "Guhuwaaddelani wale, mbwenye kamunaroromela. Mabasa ginawiiriimina mu ndina na aBaba, baayene enagiirela onamoona. 26 Nyo kamunaroromela mwaha wi kamuli a nikola naaga. 27 Mabila aaga enowiiwa ndhu naaga. Miyo gihaanona, aliwa enogihara. 28 Ginowaavaha egumi yoohumala teto kidha erimeela. Kavili muthu onagaake mmadani mwaaga. 29 ABaba egivahile mabila ayo enowaakwaranya athu aatene, kalivo onaande wawaaka mmadani mweewa. 30 Miyo ni Baabi nili mmohi baahi". 31 AZhudewu ale yahiddoddaga mabwe wi emvonyena dila ya nabiili. 32 Yesu ahaakohaga, wiira: "Guhuwoonihani mabasa apama majinji Baabi yagirumiliiye wiirana. Ki mwa mabasa alena enafuneliinyu ogivonyela ni mabwe baavi?" 33 AZhudewu ale yahimwaakulaga, wiira: "Kannafuna wuuvonya ni mabwe mwaha wa mabasa apama, eehi, mbwenye mwaha woomunyemula Mulugu. We oli muthu bure, onowiyiira Mulugu". 34 Yesu ahawaakulaga, wiira: "MMalamuloni mweenyu kamulebiwe wi Mulugu ahiira: 'Nyo muli amilugu'? 35 Maleba Ootaleleya yaawogiliiye kidha ethimihiwa. Akala Maleba mamohive ayene enowawiira amilugu ale yarumihedhiwe Madhu a Mulugu, 36 ki giwoge ddi dha ole Baabi ompelekiliiye amuruma mwiilaboni? Vano munagisumelela ddi mwiiraga ginonyemula mwaha wi gihiira: 'Gili Mwaana a Mulugu'? 37 Akala kagineerana mabasa aBaba egivahiliiwa, kamugiroromele. 38 Mbwenye akala ginowiirana mabasa ayo mwa ebaribari, roromelani, naari miyo muhugiroromelaga. Vano muneere onona moohaanganyedha wi Baabi oli mwa miyo teto miyo gili mwa Baabi". 39 Vevale aZhudewu ale yahixixaga wi emwihidde Yesu dila emohiwa, mbwenye oliye ahaathawaga. 40 Vano ahiwelelaga kobela ya mwihinje Zhordawu, mburo Zhuwawu wabathizesiiye vowambeela, okala wewo. 41 Athu ajinji yoofiya wa oliye, owogaga, yiiraga: "Zhuwawu keerilena etoonyihedho naari emohi, mbwenye dhaatedhene dhawogiiye dha muthu ola seebaribari". 42 Vevale athu ajinji yahimuroromela Yesu.
Okwa wa Lazaro
1 Vahikala muthu mmohi, ndina naaye Lazaro, oyene abulela. Aali a nluwa na oBetaniya, owaniwa Mariya ni ddibile Maarata. 2 Mariya oyo di ole amukuthulele makura oonukwela Nabwiya manyalo aaye, amuhuhuraga ni nthithi naaye. Lazaro abulela aali murogoriye. 3 Vano arogoriye ale yahirumihaga muselu wa Yesu omwaaddela, wiira: "Nabwiya, ole onamudhiveliinyu muredda". 4 Yesu veewiligiiye dhedho, ahiiraga: "Oredda oyo kahuwo wookwana, mbwenye dhiireyile wi Mulugu athithimihiwe teto wi Mwaana a Mulugu athithimihiwe mwaha wa oredda oyo". 5 Yesu oomudhivela Maarata ni ddibile Mariya ni Lazaro. 6 Naari ndo Yesu veewiligiiye dha oredda oyo, ahivireliwa malabo meenddi vamburoni vaaligiiye. 7 Vevale ahawaaddelaga anamasuuza aaye, wiira: "Ndoweni niwelele oZhudeya". 8 Anamasuuza aaye yahiiraga: "Namasuuziha, dhiinoveva apogo a aZhudewu yoofuna wuuvonyani ni mabwe, vano munafuna muwelele wewo?" 9 Yesu ahawaakulaga, wiira: "Mutana kwinna mawora kumi ni meenddi? Muthu oli aatene oneedda mutana, kanakwakwathuwa, mwaha wi onowoona waara wa elabo ela. 10 Mbwenye oneedda mahiyu, onokwakwathuwa mwaha wi mwa oliye kamuli waara". 11 Ageere ndo ahawaaddelaga, wiira: "Lazaro, owaandanana eehu, ohugona, mbwenye ginadhowa wewo gamvenyihe". 12 Vevale anamasuuza aaye yahimwaakulaga, wiira: "Nabwiya, akala onoogona, oneere ovulumuwa". 13 (Aliwa yoobuwelaga wi Yesu awoga dha kove bure, mbwenye awogaga dha okwa wa Lazaro.) 14 Vano Yesu ahawaaddelaga mowiiweya, wiira: "Lazaro ohukwa. 15 Mbwenye miyo ginohagalala mwaha wi kagaali wewo, wi muroromele. Dhiinova ndoweni wewo namoone". 16 Vevale Tome, eethaniwa Ddiddimu, ahawaaddelaga anamasuuza akwaaye, wiira: "Ndoweni vamohi ni Namasuuziha, ndo nneere okwa ni oliye".
Yesu dili ovenya muukwani ni egumi
17 Yesu agafiyile oBetaniya, amfwanyilege Lazaro agalogohiwe egavirile malabo mannayi. 18 (Betaniya alapelane ni Zheruzalemi vakukuuve makilomeeturu maraaru. 19 Mwaha wowaaddamana wula, aZhudewu ajinji yahidhowaga wa Maarata ni Mariya wi yaatodole mwaha wa okwa wa murogoriwa.) 20 Vevale Maarata ahiiwaga wi Yesu onoodha, ahidhowaga omwaakela, mbwenye Mariya ahihalaga vaade. 21 Maarata ahimwaaddelaga Yesu, wiira: "Nabwiya, mwahaakale wewuno, murogoraga kaakwe. 22 Mbwenye gihinona wi naari dhiinoveva, dhaatedhene dhinaamulobigiinyu Mulugu, oliye oneere wuuvani". 23 Yesu ahimwaaddelaga, wiira: "Murogoriyo oneere ovenya muukwani". 24 Maarata ahiiraga: "Gihinona wi onoodha avenyihiwe muukwani, athu aatene yadha evenyihiwaga muukwani va nlabo noomariha". 25 Yesu ahimwaaddelaga, wiira: "Miyo gili ovenya muukwani ni egumi. Ole onagiroromela, naari akwe, onoodha akalewo. 26 Oli aatene oliwo agiroromelaga, kadha akwa. We onororomela dhedhi?" 27 Oliye ahimwaakulaga, wiira: "Ee, Nabwiya, goororomela, ginororomelave wi nyo muli Kirixtu aroromelihiwe, Mwaana a Mulugu, oyene aadhe mwiilaboni ya vati".
Yesu onowundda
28 Maarata agawogile dhedhi, ahimwiithanelaga vowihivale ddibile Mariya, omwaaddela, wiira: "Namasuuziha ohufiya, onowuwiithana". 29 Mariya ageewile madhu ala, ahivenyaga mowaaguva, odhowa vaaligi Yesu. 30 Yesu aaligi ahinafiye muluwani mule, mbwenye eemelilege vamburoni vagumaniligiiye ni Maarata. 31 AZhudewu yaaligi mba emutodolaga Mariya, egamoonile wi ohuvenya mowaaguva akuma, yahimuharaga. Yoobuwelaga wi onadhowa omasiye anddege. 32 Mariya ahidhowaga vaaligi Yesu, agamoonile, ahitongwelaga vamanyaloni a Yesu, wiira: "Nabwiya, mwahaakale wewuno, murogoraga kaakwe". 33 Yesu agamoonile Mariya anddaga teto aZhudewu yaadhiligiiyena yiinddaga, ahikubanyaga vajinji teto ahukuuwaga mmurimani. 34 Vevale Yesu ahaakohaga, wiira: "Mmulogohile wuuvi?" Aliwa yahiiraga: "Nabwiya, ndoweni moonewo". 35 Yesu ahunddaga. 36 Vevale aZhudewu ale yahiiraga: "Ee, ebaribareene oomudhivela". 37 Mbwenye amohi vaari va aliwa yowiiraga: "Muthu ola kahuwo olene amoonihile oohoona ole? Kaakwanihe ohiiha wi Lazaro ahikwe?"
Yesu onomvenyiha Lazaro muukwani
38 Yesu ahiwelelaga wukuuwa mmurimani, ofiya onsiyeni wule, naali nikungu nafugiwe vamavoloweloviwa ni nibwe nuulubale. 39 Vano ahiiraga: "Mvenyihevo nibwe nddo". Maarata, murogora a marafula ole, ahimwaaddelaga Yesu, wiira: "Nabwiya, ohambeela onukwa, vowi ohulogelamo malabo mannayi". 40 Yesu ahimwaakulaga, wiira: "Kaguwaaddele wi waroromela onowoona nthithimiho na Mulugu?" 41 Vano athu yahivenyihagavo nibwe ndde. Yesu ahisugwaga odhulu, wiira: "Babani, ginowuutamalelani mwaha wi muhugiiwa. 42 Gihinona wi munogiiwa mudhidhi dhaatedhene. Mbwenye giwogele dhedhi mwaha wa anamwinji eli va yaande ororomela wi nyo digirumile". 43 Ageere ndo ahimwiithanaga ni ndhu nootaama, wiira: "Lazaro, kakumela ode!" 44 Vevale muthu ole akwile ahikumaga, meddo ni madada dhigali dhoohuruwedhiwadhene ni middiddi. Kove yaaye egakuneeliwe ni leeso. Yesu ahawaaddelaga athu yaaligi vevale, wiira: "Mukunuuleni, mmwihiye adhowege".
Opanganela wi empe Yesu
45 AZhudewu ajinji yadhiilege ni Mariya, egoonile dheerilege Yesu, yahimuroromelaga. 46 Vano amohi yahidhowaga wawaaddela aFarizi dhedho dheerilegena Yesu. 47 Vevale apogo a anamakutha ni aFarizi yahiithanihaga Nikuru nuulubale na apogo a aZhudewu, waakoha, wiira: "Veva niirevo avi? Mulobwana ola onowiirana dhitoonyihedho dhijinji. 48 Namwihiya oliye, athu aatene eneerege omuroromela, mowindo aRoma enoodha ebwanyule mburo weehu woweela ni mulogo weehu". 49 Vevale mmohi mwa aliwa, ndina naaye Kayifa, oyene aali musogoleli a anamakutha a yaaka elene, ahawaaddelaga, wiira: "Nyo kamunonile yego. 50 Kamuneewelelamo wi yaali pama muthu mmohi aakwele athu aatene, ohiya wi mulogo waatene onoongeye". 51 (Kayifa kaawogile dhedhi mwa yeeka. Oliye vookala musogoleli a anamakutha a yaaka elene, avuwihaga mutheenga wa Mulugu wi Yesu eere okwela nlogo na aZhudewu. 52 Ehili okwelave nlogo nddi teto aakwele ahima a Mulugu ebalaleyele mwiilaboni ya vati wi aataganyihedhe aatene ekale mulogo mmohi baahi.) 53 Wambeela nlabo nendde apogo a aZhudewu yahipang'anelaga wi empe. 54 Mowindo Yesu keedda voweela vaari va aZhudewu. Ahivenyagawo, odhowa elabo yaali vakukuuve ni kokola, murudda oneethaniwa Efarayimu, okala wewo vamohi ni anamasuuza aaye. 55 Othabela wa Paxkwa a aZhudewu waaddamelaga, athu ajinji ookumela mmavade, yahidhowaga oZheruzalemi, wiirihedha elemeelelo ya wiyeeliha. 56 Yoomusayelagave Yesu wewule. Vatugumaniligiisu mu nyuba ya Mulugu yookohanaga mmohi ni mukwaaye, yiiraga: "Munoobuwela avi? Oliye oneere odha omathabelelo wuno?" 57 Apogo a anamakutha ni aFarizi yahilamulaga, wiira: "Ole onaanone oli Yesu, anaaddele wi namwihidde".
Yesu onokuthuleliwa makura
1 Egahalile malabo matanu ni nimohi wi ofiye Othabela wa Paxkwa, Yesu ahifiyaga oBetaniya, wewo wakala Lazaro, ole Yesu amvenyihiliiye muukwani. 2 Yahimusasanyedhelaga yooja Yesu. Maarata owawiimelelaga, Lazaro aali mmohi aaligi vamajelo ni oliye. 3 Vano Mariya ahithukulaga meya niituru na makura oonukwela a mutheengo wookwima, eneeriwa naarudu. Okuthulelaga manyalo a Yesu, waahuhuraga ni nthithi naaye. Mbamwa mwahidhaalaga onukwela wa makura ale. 4 Mbwenye Zhudasi a oEsikariyothi, mmohi wa anamasuuza a Yesu, oyene aampeleke, ahiiraga: 5 "Mwaha bwaddi makura ala kigulihiwe korowa dha parata dhowaakwana mazana maraaru (300), nda dhivahiwa athu oorabula"? 6 Yamuwogihaga ndo kawaali mwaha wowaakubanyedha oorabula, mbwenye mwaha wi oliye aali mbava. Oliye dalogolela nthumba na korowa, wiiyagamo. 7 Yesu ahiiraga: "Omwihiye, aalogolele makura ala ofiyedha nlabo na ologohiwa waaga. 8 Oorabula munaakalegena mudhidhi dhaatedhene, mbwenye miyo kaginaakalege ni nyo mudhidhi dhaatedhene".
Apogo a anamakutha enopanganela dha ompa Lazaro
9 AZhudewu ajinji egeewile wi Yesu oli oBetaniya, yahidhowaga wewo. Kayadhowelegewo mwaha wa Yesu baahi teto yadhowelegewo wi yamoone Lazaro, ole Yesu amvenyihiliiye muukwani. 10 Mowindo apogo a anamakutha yahipanganelaga wi teto empe Lazaro, 11 vowi mwaha wa Lazaro ola aZhudewu ajinji yookuma mwa asogoleli eewa, omuroromelaga Yesu.
Yesu onovolowa muZheruzalemi ni ovuwa
12 Omenseloni wiwa, anamwinji yadheelege othabela, egeewile wi Yesu onofiya muZheruzalemi, 13 yahithukulaga mijindda dha kanjesa, okuma wi yamwaakele, ekuwaga, yiiraga: "Hozana! Ooreelihiwa di ola onadha mu ndina na Nabwiya, ola oli Mwene a Ezarayeli!" 14 Vano Yesu ahimfwanyaga mwaana a buuru, omugwela wona munawogela Maleba Ootaleleya, yiiraga: 15 "We, nluwa na Ziyoni, ohoove. Kamwiing'ane, Mwene aawo onoodha, okaraatile va mwaana a buuru". 16 Mudhidhi olene anamasuuza aaye kayanonelemo dhego nde. Mbwenye Yesu agavenyihiwe ni nthithimiho, aliwa yahambeelaga ononelamo wi dhego nde dhalebiwe dhamuwoga oliye teto dhego nde dhahimwiireyela. 17 Anamwinji yaaligi ni Yesu vevale vamvenyihiligiiye Lazaro muukwani, amwiithana munsiyeni mule, anamwinji ale yahiwelelaga wiirela onamoona dhooniligiiwa. 18 Mwaha wi yahiiwa wi Yesu ahiiriha etoonyihedho ele, athu ajinji yahidhowaga wi yamwaakele. 19 Vevale aFarizi yahambeelaga waaddelana, yiiraga: "Kanddoddilevo yego. Keeng'anani, athu aatene enomuthamagela".
AGerego enomusayela Yesu
20 Vahikalaga aGerego amohi vaari va ayene yadhowilege omathabelelo wule omweebedha Mulugu. 21 Aliwa yahidhowaga wa Filipi, (aali a nluwa na oBetisayida, murudda wa oGalileya,) aliwa omuloba, wiira: "Babani, kamwiirena, nnafuna nimoone Yesu". 22 Filipi ahimwaaddelaga Andire, vevale Andire vamohi ni Filipi yahidhowaga omwaaddela Yesu. 23 Yesu ahawaakulaga, wiira: "Ohufiya mudhidhi wi Mwaana a Muthu athithimihiwe. 24 Ebaribareene, ebaribareene ginowuwaaddelani wi bewu ya namudhe yaahimorela vatheyani ekwa, enakala emohive baahi. Mbwenye yakwa, enovaha dhoovaha dhijinji. 25 Ole onadhivela egumi yaaye, onoyeleela, mbwenye ole oneeddana ni egumi yaaye mwiilaboni mu, onologolela egumi yaaye wa egumi yoohumala. 26 Ole onagiimelela enofuneya oliye agiharege; wewo onaakaliimi, mwiimeleli aaga funaakaligiiye. Ole onagiimelela, Ababa enoodha emuriihe".
Yesu onowoga dha okwa waaye
27 Yesu ahiwelelaga owoga, wiira: "Murima waaga onowukuuwa. Ki giwoge ddi? Sowi giire: 'Babani, givulumuseni va mudhidhi ola wa masooso'? Eehi, vowi gidheele mwaha wa mudhidhi olena. 28 Babani, thithimihani ndina neenyu". Vevale wahiiweyaga ndhu nakumelege odhulu, neeraga: "Gahithithimiha ndina naaga, vano ginowelela othithimiha ndina naaga". 29 Anamwinji yaaligi vevale veewiligiisu madhu ayo, yahiiraga: "Dari sirumile". Amohi yeeraga: "Ole awogiiyena aali mungero". 30 Yesu ahawaaddelaga, wiira: "Ndhu nddi nidheele wi nuukamihedheni, kahuwo wi nigikamihedhe miyo. 31 Dhiinova ohufiya mudhidhi wi athu a elabo ya vati ethongiwe. Dhiinova ole onalamula elabo ya vati oneere wiigariwa. 32 Vano gadha gitomeyiwa, ginoodha gaadhena athu aatene wa miyo". 33 (Yesu ahiwogaga madhu alena wi awaaddele mukalelo wookwa weeriiye akwe.) 34 Anamwinji yahaakulaga, wiira: "Hiyo nihiiwa mMalamuloni wi Kirixtu onaakale a okala ni okala, ki we onawoga addi, wiiraga: 'Soofuneya wi Mwaana a Muthu atomeyiwe'? Mwaana a Muthu oyo baani?" 35 Yesu ahawaaddelaga, wiira: "Waara oli vaari veenyu onaakale wa mudhidhi vang'ono baahi. Mweeddege vevo vinniinyuna waarawo wi yiihi ehuuhuruwedheni. Vowi oneedda muyiihini kanoonawo onadhowiiye. 36 Mudhidhi ola waara viliiwa vaari veenyu, muroromele waarawo wi mukale athu oweedda mowaara". Yesu agawogile dhedhi, ahivenyagavo, odhowa wiipita.
AZhudewu kayamuroromele Yesu
37 Naari Yesu eerilenaave dhitoonyihedho dhaatedhene nde, kayamuroromele, 38 wi dhaakwanele dhawogile namavuhulela Ezaya, eera: "Nabwiya, ororomele olaleya weehu baani? Woonihiwe owodha wa Nabwiya baani?" 39 Mowindo aliwa kayaroromele, vowi Ezaya teto ahiwoga, wiira: 40 "Mulugu ahaathimiha meento eewa wi ehoonege; waavaaddiha mirima dheewa wi ehiiwelelegemo; ndo kayaandile otthwaruwa, ewelela wa miyo wi gaayilihe". 41 (Ezaya awogele ndo dha Yesu mwaha wi ahoona nthithimiho naaye). 42 Naari ndo, apogo ajinji yahimuroromela Yesu. Mbwenye mwaha wa aFarizi, kayeesoriha voweela. Vowi yowoova wiigariwa mu nyuba ya matugumano. 43 Aliwa yadhiveliwa oriihiwa ni athu ohiya oriihiwa ni Mulugu.
Madhu a Yesu enoodha yaathonge athu
44 Yesu ahiwogaga moogweliha madhu, wiira: "Ole onagiroromela kanagiroromela miyove baahi, mbwenye onamuroromela teto ole ogirumile. 45 Vano ole onagoona, onamoona teto ole ogirumile. 46 Gidhiile mwiilaboni mu wona waara wi ole onagiroromela ahikaleve muyiihini. 47 Ole oneewa madhu aaga, ahaalogolela, miyo kaginamuthonga. Vowi kagidheele wi gaathonge athu, mbwenye gidheele wi gaavulumuse. 48 Ole onagikoodda, ahaakela madhu aaga, ohukalawo onaadhe amuthonge. Madhu ginaawogesiimi binaadhe emuthonge va nlabo noomariha. 49 Kagawoga dhookumela wa miyo meenka, Baabi ogirumile digilamule wi giwoge ni osuuziha dhaatedhene dhedhi. 50 Miyo gihinona wi nlamulo neewa nnovaha egumi yoohumala. Dhinawogiimi, ginawoga mooligana mugaaddelele Baabi".
Yesu onowaahuwa manyalo a anamasuuza aaye
1 Othabela wa Paxkwa ogali vakukuuve, Yesu aganonile wi mudhidhi waaye wahifiya woovenyamo mwiilaboni mu, adhowe wa Baabi vowi ahaadhivela ale yaali aaye mwiilaboni mu, owaadhivela ofiyedha omakuthulo. 2 Yesu ni anamasuuza aaye yajaga yooja ya ciguwo. Ddiyabo agamalile ohela moobuwelelo abure mmurimani mwa Zhudasi mwaana a Simawu a oEsikariyothi wi dampeleke Yesu. 3 Yesu ahinonaga wi Baabi ahimpelekela dhego dhaatedhene mmadani mwaaye. Teto oliye ahinonaga wi akumele wa Mulugu, vano onowelela wa Mulugu. 4 Nuwindo, Yesu ahivenyaga vajigiisu, okurula yoowara yaaye, othukula yowiifufuthana, wiimagana mmwiinuni. 5 Ageere ndo, ahihelaga mahinje mbaasiyani, wambeela waahuwa manyalo a anamasuuza aaye, waafufuthaga ni yowiifufuthana ele yamageligiiye mmwiinuni. 6 Yesu agafiyile vaaligi Simawu Peduru, Peduru ahiiraga: "Nabwiya, nyoovo mugihuwe manyalo aaga?" 7 Yesu ahimwaakulaga, wiira: "Dhiinova kunonile dhineeriimi, mbwenye osogolo oneere ononelamo". 8 Peduru ahiiraga: "Kamudha mwaahuwa manyalo aaga". Yesu ahimwaakulaga, wiira: "Gahuuhuwa, kunakala aaga". 9 Vano Simawu Peduru ahaakulaga, wiira: "Nabwiya, dhakala ndo, kamwaahuwe manyalove teto mwaahuwe madada aaga ni muruya". 10 Yesu ahimwaakulaga, wiira: "Ole ohabile enafuneya ahuwe manyalove baahi. Vowi mwiili waaye bwapameene. Nyo muli apameene, mbwenye kahuwo mwaatene". 11 Yesu ahimunonaga ole ampeleke, bumwahaya wawogeliiye, eera: "Kahuwo wi mwaatene muli apameene". 12 Yesu agaahuwile manyalo a anamasuuza aaye, ahiwelelaga owara odhowa vamajelo vale. Vooharela ahaakohaga, wiira: "Nyo muhunonelamo dhuwiireliimini? 13 Nyo munagiira 'Namasuuziha' ni 'Nabwiya'. Vano munowoga pama, vowi miyo gili. 14 Akala miyo, Nabwiya ni Namasuuziha eenyu, guhuuhuwani manyalo, enofuneya teto muhuwanege manyalo mmohi ni mukwaaye. 15 Guhuuvahani nifwanafwaniho wi teto mwiiregena wona miyo guwiireliimini. 16 Ebaribareene, ebaribareene ginowuwaaddelani wi mudhaari kanamukwaranya nabwiya aaye, naari oorumiwa kanamukwaranya omurumile. 17 Mweera munonelamo dhego dhedhi, munakala ooreelihiwa mweeragana".
Yesu onovuwiha wi oneere opelekiwa
18 Yesu ahiwelelaga owoga, wiira: "Dhego nda kaginoowogelani mwaatene. Gihaanona ale gaasakuliimi. Mbwenye wi dhaakwanelihiwe Maleba Ootaleleya dhinawogiiwa: 'Olene aja vamohi ni miyo ohugiinyuwela'. 19 Ginowuwaaddelani dhedhi dhihinapadduwe wi dhapadduwa muroromele wi Miyo Gili. 20 Ebaribareene, ebaribareene ginowuwaaddelani wi onamwaakela ole onamurumiimi, onagaakela miyo. Teto onagaakela miyo, onamwaakela ole ogirumile".
Yesu onomuthoma onampeleke
21 Yesu agawogile dhedhi, murima waaye wahukuuwaga, owoga mowiiweya, wiira: "Ebaribareene, ebaribareene ginowuwaaddelani wi mmohi mwa nyo onogipeleka". 22 Anamasuuza ale yowiing'ananaga ehinonile wi amwaagaga aani. 23 Namasuuza mmohi, ole Yesu amudhiveliiye vajinji, aaligi vakukuuve ni Yesu. 24 Vano Simawu Peduru ahimutoonyaga namasuuza ole wi amukohe Yesu onamwaagiiyena. 25 Vevale namasuuza ole ahisameelaga omurimani wa Yesu, omukoha, wiira: "Nabwiya, munamwaaga aani?" 26 Yesu ahaakulaga, wiira: "Ole onamvahiimi epaddi ya mukaathe ele enaarehiimi mmuziwoni, di oyene". Vano agarehile mukaathe ole, ahimvahaga Zhudasi mwaana a Simawu a oEsikariyothi. 27 Zhudasi ahijaga mukaathe ole. Vano Sathana ahivolowaga mwa oliye. Yesu ahimwiirelaga: "Eneeriiwena, wiirena mowaaguva". 28 Vaari va alene yaaligi vamajelo vale, kalivo anonelegemo dhedho dhamwaaddeligiiye. 29 Voonona wi Zhudasi dalogolela nthumba na korowa, akwaaye yoobuwelaga wi Yesu afunaga Zhudasi adhowe agule dhoofuneya dha vamathangani, naari onadhowa apeleke yego wa oorabula. 30 Oliye agajile mukaathe ole, ahikumaga mowaaguva. Mudhidhi olene yeeraga ogaribile.
Nlamulo nixa
31 Zhuda agakumile, Yesu ahiiraga: "Mwaana a Muthu onothithimihiwa, vano odheela mwa oliye, Mulugu onothithimihiwa. 32 Akala Mulugu onothithimihiwa odheela mwa Mwaana, Mulugu mwa oliyeneene oneere omuthithimiha Mwaana, vano Mulugu oneere omuthithimiha mowaaguva. 33 Ahima aaga, ginokala ni nyo mudhidhi vang'ono. Munoodha mugisayelege, mbwenye ginowaaddelani dhiinova wona mwawaaddeleliimi apogo a aZhudewu, giira: 'Wewo onadhowiimi, nyo kamunaande ofiyawo'. 34 Guhuuvahani nlamulo nixa nddi: Mudhivelanege mmohi ni mukwaaye. Wona miyo moodhiveleliimini, nyo teto mudhivelanege mmohi ni mukwaaye. 35 Mwaadhivelanaga mmohi ni mukwaaye, athu aatene enoodha enone wi ebaribareene muli anamasuuza aaga".
Yesu onomwaaddela Peduru wi oneere omukoodda
36 Simawu Peduru ahimukohaga Yesu, wiira: "Nabwiya, munadhowa wuuvi?" Yesu ahaakulaga, wiira: "Onadhowiimi, dhiinova kunaande ogihara, mbwenye osogolo onoodha ogihare". 37 Peduru ahimukohaga, wiira: "Nabwiya, mwaha bwaddi dhiinova ohunaandeliimi wuuharani? Miyo ginovaha egumi yaaga mwaha wa nyo". 38 Vevale Yesu ahimwaakulaga, wiira: "Onovaha egumi yaawo mwaha wa miyo? Ebaribareene, ginowuwaaddela wi: Mutubi ahinandde 'Kokoliko', oneere ogikoodda dila thaaru, wiiraga kuginonile".
Yesu dili dila yoodhowana wa Baabi
1 Yesu ahawaaddelaga anamasuuza aaye, wiira: "Mirima dheenyu kadhikathamiheye. Mmuroromele Mulugu teto mugiroromele miyo. 2 Nyuba ya aBaba muhukala mburo dhijinji. Dhaheere dhihikala ndo kagowaaddelani wi ginadhowa goosasanyedheleni mburo. 3 Gadhowa goosasanyedhelani, ginoowela, gidhe guuthukuleleni wa miyo wi onaakaliimi nyo teto mwakalege wewo. 4 Wewo onadhowiimi, muhunona dilaya". 5 Tome ahiiraga: "Nabwiya, kannonile wewo munadhowiinyu, vano dilaya nnaanone addi?" 6 Yesu ahimwaakulaga, wiira: "Miyo gili dilaya teto gili ebaribari ni egumi. Kalivo onadhowa wa Baabi ahivirile wa miyo. 7 Mwahaaginone ebaribareene teto mweere waanona aBaba. Wambeela dhiinova muhaanona aBaba teto muhawoona". 8 Filipi ahiiraga: "Nabwiya, nooniheni Baabi oyo, enafuniihu si eyene baahi". 9 Yesu ahimwaakulaga, wiira: "Filipi, gihikala ni nyo mudhidhi waatene, kunaginoneve? Ole ogoonile, ohumoona Baabi. Oneerela ddi wi: 'Noonihe Baabi'? 10 Kunaroromela wi miyo ginakala mwa Baabi teto Baabi onakala mwa miyo? Madhu ginowaaddeliimini kinakumela wa miyo meenka, enakumela mwa Baabi onakala mwa miyo, oliye onahidda mabasa aaye. 11 Muroromele wi miyo ginakala mwa Baabi teto Baabi onakala mwa miyo. Mwaanganyedhaga, roromelani mwaha wa mabasa eneereya. 12 Ebaribareene, ebaribareene ginowuwaaddelani wi oyene onagiroromela, oliye oneerege wiirana dhedhi dhineeriimina. Teto oneere waanda wiirana okwaranya dhedhi mwaha wi miyo ginadhowa wa Baabi. 13 Dhaatedhene munadhiinyu mulobe mwa ndina naaga gineerege wiirana wi Baabi athithimihiwe odheela mwa Mwaana. 14 Mwagiloba yego mwa ndina naaga, gineerege wiirana".
Yesu onororomeliha ovaha Muneba Woweela
15 "Akala munogidhivela, muneerege wawiiwelela malamulo aaga. 16 Vano ginoodha gimulobe Baabi, oliye oovaheni Namaakihedha mmohiwa wi akalege ni nyo okala ni okala. 17 Namaakihedha oyo bu Muneba wa ebaribari. Athu a elabo kinaanda omwaakela mwaha wi kinamoonege naari omunona. Nyo muhumunona mwaha wi oliye onakala ni nyo teto onakalave mwa nyo. 18 Kaginoohiyeni wona anakwaadhuni. Ginoowelela wa nyo. 19 Mwa mudhidhi vang'ono athu a elabo kidha egoona dila biili, mbwenye nyo munoodha mugoone. Miyo gihikalana egumi, mwaha wa ela nyo teto munoodha mukalenaave egumi. 20 Nlabo nenddo munoonona wi miyo ginakala mwa aBaba, nyo munakala mwa miyo teto miyo ginakala mwa nyo. 21 "Ole winna malamulo aaga, awiiwelelaga, dinagidhivela. Ole onagidhivela, aBaba enoodha emudhivele. Miyo teto ginoodha gimudhivele, vano ginoodha giyooneyihe wa oliye". 22 Zhudasi, (ahili Zhudasi a oEsikariyothi ole,) ahimukohaga, wiira: "Nabwiya, munafunela ddi wi mwiyooneyihe wa hiyo baahi, ohuli wa athu aatene?" 23 Yesu ahaakulaga, wiira: "Ole onagidhivela oneerege wawiiwelela madhu aaga, aBaba enoodha emudhivele; vano hiyo nnoodha wa oliye, nikalege mwa oliye. 24 Ole ohunagidhivela kanawiiwelela madhu aaga. Madhu ala munawiiwiinyu kahuwo aaga, mbwenye ba Baabi, oyene ogirumile. 25 "Gahuwaaddelani dhaatedhene dhedhi vaaliimi ni nyo. 26 Vano Namaakihedha, oli Muneba Woweela, ole Baabi onadhiiye oorumihedheni mu ndina naaga, bunadha wusuuziheni dhaatedhene, wuwuubusedhagani dhaatedhene dhiwogiliimi ni nyo. 27 "Ginowuuhiyedhani murenddele. Murenddele waaga ginowuuvahani, kaginoovahani wona elabo munavaheliiwa. Mirima dheenyu kadhikathamiheye naari woova. 28 Mwihiiwa guwaaddeliimini wi: 'Miyo ginoodhowa, mbwenye ginowelela wa nyo'. Mwahaagidhivelege mweere ohagalala munonaga wi ginadhowa wa Baabi, vowi Baabi ohugikwaranya miyo. 29 Ginowuwaaddelani dhihinapadduwe wi dhapadduwa muroromele. 30 Dhiinova kaginaawoge dhijinji ni nyo, vowi Sathana, oolamula a elabo ela, onoodha. Mwa miyo oliye kanna mburo, 31 miyo gineerana nde Baabi dhigilamuleliiye wiirana wi athu aatene enone wi ginomudhivela Baabi. Ndoweni, nivenyevo".
Yesu dili mvidera wa ebaribari
1 Yesu wiire: "Miyo gili mvidera wa ebaribari, aBaba bili namalimaya. 2 Mijindda dhaatedhene dhili mwa miyo dhihinavaha dhoovaha enokakatha, mijindda dhaatedhene dhinavaha dhoovaha enothungulela wi dhivahege dhoovaha dhijinji. 3 Nyo muhuhuwiwa pama mwaha wa madhu guwaaddeliimini. 4 Kalanive mwa miyo, vano miyo gikalegeve mwa nyo. Mijindda kadhinanda ovaha dhoovaha va weekiiwa dhaahikalave vamuthankoniviwa. Mwa mukalelo mmohive nyo mwaahikalave mwa miyo, kamunaande ovaha dhoovaha. 5 "Miyo gili mvidera, nyo muli mijinddadha. Muthu ole onakalave mwa miyo, miyo mwa oliye, oliye dinavaha dhoovaha dhijinji. Vowi mwamwalana ni miyo kamunaande wiirana yego. 6 Ole ohunaakaleve mwa miyo onothathileliwa okwibi wona mujindda, wumma. Mijindda nde dhinoddoddeliwa, ovokedhiwa vamunddoni, ozha. 7 Mwakalave mwa miyo, mwiiwelelagave dhosuuziha dhaaga, mwaloba dhinafuniinyu, muneerege ovahiwa. 8 ABaba enothithimihiwa mwaavahaga dhoovaha dhijinji, moonihaga wi muli anamasuuza aaga a ebaribari. 9 "Wona Baabi munagidhiveleliiye, mwa mukalelo mmohive, miyo ginowuudhivelani. Mukalegeve mwa odhivela waaga. 10 Akala muneedda mmalamuloni mwaaga, munokalave mwa odhivela waaga wona miyo gineedda mmalamuloni a aBaba, ndo ginakalave mwa odhivela weewa. 11 "Guhuwaaddelani dhego dhedhi wi ohagalala waaga okale mwa nyo wi ohagalala weenyu okale wowaakwanela. 12 Nlamulo naaga thi nddi: Mudhivelanege mmohi ni mukwaaye wona miyo muudhiveleliimini. 13 Odhivela wuulubale fuwula: Oveleela egumi yaawo vamburoni va akwaawo. 14 Nyo muli akwaaga mweeddagave mule munoolamuliimini. 15 Dhiinova kaginowiithanani amwiimeleli, vowi mwiimeleli kananona dhineerana nabwiya aaye. Moohiyaniha, ginowiithanani akwaaga, mwaha wi dhaatedhene dhiiwiliimi wa aBaba guhuwaaddelani. 16 Kahuwo nyo mugisakulile, mbwenye miyo duusakulileni, wuuthomani wi mudhowe, mwavahe dhoovaha, dhoovaha dhiwa dhoologela. Mweeragana ndo dhaatedhene munamulobigiinyu Baabi mwa ndina naaga oneerege wuuvahani. 17 Nlamulo naaga thi nddi: Mudhivelanege mmohi ni mukwaaye".
Nihidda na athu a elabo ya vati wa oororomela
18 "Akala athu a elabo ela ya vati ehuwiiddani, nonani wi vowambeela yagiiddile miyo. 19 Nyo mwahaakale a elabo ela, athu yeerege wuuddhivelani wona muli eewa. Mbwenye nyo kamuli a elabo ela, miyo guhuusakulani, wuuvenyihamoni; bu mwahaya onowiiddeliisuni. 20 Muubuwelege madhu yowaaddeleliimini owi: 'Mudhaari kanamukwaranya nabwiya aaye'. Akala miyo yahigiharahara teto eneere wuuharaharani. Akala aliwa yahiiwelela madhu aaga teto eneere wawiiwelela madhu eenyu. 21 Dhaatedhene dhedho dhinowiireyeleni mwaha wa miyo, vowi kimunonile ole ogirumile. 22 Gaheere gihidha, gaasuuziha, kayakanna muladdu wa dhoothega dheewa. Dhiinova kinna woothawela wa dhoothega dheewa. 23 Muthu onagiidda teto onowiiddana ni aBaba. 24 Gaheere gihiirana mabasa vaari veewa, athu aatene ehinandiisu wawiirana, kayakanna muladdu. Aliwa ehoona, ogiidda miyo ni aBaba. 25 Nda dhapadduwele wi dhaakwanelihe dhalebiwe Mmalamuloni eewa, dhowi: 'Yahigiidda vihili mwaha'. 26 "Adha Namaakihedha, ole oneeriimi guurumihedheni okumela wa Baabi, oyene oli Muneba wa ebaribari wookumela wa Baabi, Muneba oyo wadha, oneere wiirela onamoona dha miyo. 27 Nyo teto muneere wiirela onamoona dha miyo, vowi muhukala ni miyo okuma omambeelelo".
1 Yesu ahiwogaga, wiira: "Gahuwaaddelani dhedhi wi munaadhe mukwakwathuwe. 2 Enoodha yuwiigaregeni mu nyuba dha matugumano. Ebaribari mudhidhi onoodha wi aatene enadhe yuupegeni enoobuwelege wi enamulaba Mulugu. 3 Enoodha yiiregena dhedhi mwaha wi kimunonile Baabi, naari miyo. 4 Ginowaaddelani nda wi wafiya mudhidhiya muubuwelege wi gahuwaaddelani.
Mabasa a Muneba Woweela
"Vowambeela kagowaaddeleni dhedhi mwaha wi gaali vamohi ni nyo. 5 Mbwenye dhiinova ginodhowa wa ole agirumile. Vano kalivo mwa nyo onagikoha, eera: 'Munadhowa wuuvi?' 6 Mmurimani mweenyu muhudhaala okubanya mwaha wi guhuwaaddelani dhedhi. 7 Mowindo ginowuwaaddelani ebaribari ela: Sapama wa nyo miyo gidhowe. Vowi gaahidhowa Namaakihedha kanaadhe wa nyo. Vano gadhowa ginowuurumihedhani. 8 Oliye adha oneere wawooniha athu dhoothega dheewa, awoonihe wogoowa, teto awoonihe othongi wa Mulugu: 9 Wa dhoothega mwaha wi kigiroromele; 10 wa wogoowa mwaha wi ginadhowa wa Baabi, vano kamunawelela mugoona; 11 wa othongi mwaha wi oolamula a elabo ya vati ohukoniwa wale. 12 "Gihikanna madhu majinji wi guwaaddeleni, mbwenye dhiinova kamunaande ovilelana. 13 Wafiya Muneba wa ebaribari oneere wusuuzihani ebaribari yaatene. Vowi kudha owogaga dhookumela wa oliye yeeka, mbwenye dhaatedhene dhinewiiye, sinadhiiye awogege. Onoodha oolaleyeleni dhinaapadduwe musogolo. 14 Oliye onoodha agithithimihe, vowi onoodha aakele wa miyo, vano alaleyelege wa nyo. 15 Dhaatedhene dhinna Ababa saaga. Bumwahaya giwogeliimi wi Muneba ole onoodha waakele dhookumela wa miyo wi wuulaleyeleni". Okubanya weenyu onoodha osadduwe ohagalala 16 "Va mudhidhi vang'ono kamudha mugoona, vano vavira mudhidhi vang'ono, munoodha mugoone". 17 Anamasuuza aaye amohi yookohanaga, yiiraga: "Ki elaya enanaaddeliiye ddi? Oliye oneera: 'Va mudhidhi vang'ono kamudha mugoona, vano vavira mudhidhi vang'ono, munoodha mugoone'. Teto onawoga wi: 'Ginadhowa wa Baabi' ". 18 Yookohanaga, yiiraga: "Mwaha wa ddi enawogeliiye, eeraga: 'Va mudhidhi vang'ono'? Kanneewelelamo dhinafuniiye owoga". 19 Yesu aganonile wi yoofunaga omukoha mwaha wawogeliiye, ahaakohaga, wiira: "Munakohana madhu ala ewogiliimi, giira: 'Va mudhidhi vang'ono kamudha mugoona, vano vavira mudhidhi vang'ono, munoodha mugoone'? 20 Ebaribareene, ebaribareene ginowuwaaddelani wi nyoovo munoodha muundde, mukuwaga, mbwenye athu a elabo ya vati ela enoodha ehagalalege. Munookalana okubanya, vano okubanya weenyu onoodha osadduwe ohagalala. 21 Mwihiyana wafiya mudhidhi waaye wa obala, onokubanya mwaha wi mudhidhi waaye wa goyi ohufiya. Mbwenye mwaana abaliwa, mwihiyana ole kanoobuwelela goyi yaaye, vowi ohuhagalala voombala muthu mwiilaboni mu. 22 Mwa mukalelo mmohive dhiinova muli ookubanya, vano ginoodha guwooneni dila ya nabiili, vevo mirima dheenyu dhinoodha dhihagalale. Kalivo onowaakeni ohagalala weenyu. 23 Va nlabo nenddo kamudha mugiloba yego. Ebaribareene, ebaribareene ginowuwaaddelani wi dhaatedhene munamulobigiinyu Baabi mwa ndina naaga oneerege wuuvahani. 24 Dhiinova kamunalobe yego mu ndina naaga. Lobani, munoodha mwaakele wi ohagalala weenyu okale wowaakwanela".
Yesu ohugonjiha elabo ya vati
25 Yesu wiire: "Miyo guwaaddeleni dhaatedhene mwa misibe. Mudhidhi onoodha vineeriimi gihiwogege ni nyo mwa misibe, mbwenye giwogege mowiiweya dha Baabi. 26 Nlabo nenddo munoodha mulobege mwa ndina naaga, kadhinaafuneyege wi guulobelelegeni wa Baabi, 27 vowi Baabi mwinnyeene onowuudhivelani. Onowuudhivelani mwaha wi munogidhivela teto mwaha woororomela wi ginakumela wa Mulugu. 28 Miyo gidhiile wa Baabi elabo ela ya vati. Dhiinova ginohiya, ginawelela wa Baabi". 29 Anamasuuza aaye yahiiraga: "Eyaa! Dhiinova munowoga mowiiweya, ehili mwa madhu oorusa wawiiwelelamo. 30 Vano nihinona wi muhunona dhaatedhene, kavili mwaha wi muthu ookohegeni. Mwa ela nnororomela wi mukumile wa Mulugu". 31 Yesu ahawaakulaga, wiira: "Dhiinova muhuroromela? 32 Mvuruwane, onoodha mudhidhi, vano ebaribari mudhidhiya ohufiya, aatene vinadhiinyu mbalalesiwe, kadda muthu adhowege owaniwa, mugihiye meenka. Mbwenye kagili meenka, Baabi oli ni miyo. 33 Dhego dhedhi ginowuwaaddelani wi mukanne murenddele mwa miyo. Elabo ela ya vati muneere okanna makathamiho, mbwenye mmage mirima, vowi miyo gihigonjiha elabo ela ya vati".
Yesu onowiilobelela
1 Yesu agawogile dhedhi, ahaang'anaga odhulu, wiira: "Babani, mudhidhi ohufiya. Muthithimiheni Mwaaninyu wi Mwaaninyu oothithimiheni. 2 Vowi muhumvaha owodha wowaalamula athu aatene, owodha wi aavahe egumi yoohumala athu aatene mumvahiliinyu. 3 Egumi yoohumala siila: Yuunoneni nyo, Mulugu a ebaribari teto emunone Yesu Kirixtu, oyene mwamurumiliinyu mwiilaboni ya vati. 4 Gaakwanihiliimi mabasa mwagivahiliinyu vati vano, guhuuthithimihani. 5 Dhiinova, Babani, mugithithimihe vameentoni veenyu ni nthithimiho nanniimina wa nyo, ehinapaddusiwe elabo ya vati".
Yesu onowaalobelela anamasuuza aaye
6 "Gihawooniha ndina neenyu ayene egivahiliinyu vati vano. Yaali eenyu, muhugipelekela, vano enowiiwelela madhu eenyu. 7 Dhiinova ehinona wi dhaatedhene mwagivahiliinyu sookumela wa nyo. 8 Gihaavaha masuuziho mwagivahiliinyu, ehaarumeedha. Ehinona ebaribareene wi gikumele wa nyo teto enororomela wi di nyo mugirumile. 9 "Miyo ginowaalobelela. Kaginaalobelela athu a elabo ela ya vati, mbwenye ginaalobelela ale yagivahiliinyu, vowi beenyu. 10 Dhaatedhene dhili dhaaga seenyu; dhaatedhene dhili dheenyu saaga, vano ginothithimihiwa odheela wa aliwa. 11 Miyo kagili vati vano, mbwenye aliwa enakala vati vano. Ginoodha wa nyo. Babani oweela, akameeleni odheela owodha wa ndina neenyu mwagivahiliinyu wi ekale amohive wona hiyo nili mmohive. 12 Vaaliimi vamohi ni aliwa, gowaakameela ni owodha wa ndina neenyu, mwagivahiliinyu. Gahawiing'anela pama, kalivo arimeele, omwihiya oobwanyuwa ole, ndi dhapadduwele wi dhaakwanelihe dhedho Maleba Ootaleleya dhawogiliiwa. 13 "Dhiinova ginadha wa nyo. Ginawoga dhedhi viliimi vati vano wi ekalena ohagalala wowaakwanela winniimina. 14 Gihaasuuziha madhu eenyu, vano athu a elabo ela ya vati enowawiidda mwaha wi aliwa kahuwo a elabo ela, wona miyo teto kagili a elabo ela ya vati. 15 Kaginaloba wi mwaavenyihevo vati vano, mbwenye wi mwawiing'anele wa Nambure. 16 Aliwa kahuwo a elabo ela ya vati wona miyo teto kagili a elabo ela ya vati. 17 Mwa ebaribari mwiirihe wi aliwa ekale athu eenyu epelekiwe; vowi madhu eenyu si ebaribari. 18 Muhugiruma vati vano, mwa mukalelo mmohive gihaaruma mwiilaboni ela ya vati. 19 Mwaha wa aliwa ginowiipeleka wa nyo wi aliwa teto epelekiwe wa nyo mwa ebaribari".
Yesu onowaalobelela aatene enaadhe emuroromele
20 "Kaginaalobelela aliwave weekiiwa teto ginowaalobelela ale enaadhe egiroromele mwaha wa madhu a akwaaga ala; 21 wi aatene ekale amohive. Babani, ginowaalobelela wi ekale mwa hiyo wona nyo munakala mwa miyo teto wona miyo ginakala mwa nyo. Mowindo athu enoodha eroromele wi di nyo mugirumile. 22 Nthithimiho nenddo mwagivahiliinyu gihaavaha aliwa wi ekale amohive wona hiyo nili mmohive; 23 miyo gikale mwa aliwa, nyo mukale mwa miyo wi ekale amohive mowaakwanela. Mowindo athu aatene enonona wi di nyo mugirumile teto enonona wi munowaadhivela wona munagidhiveleliinyu. 24 "Babani, ginafuna wi ayene mugivahiliinyu ekale vamohi ni miyo vevo vinaakaligiimi. Ginafuna wi yoone nthithimiho naaga, ndde nagivahiliinyu mwaha wi mwahigidhivela ehinapaddusiwe elabo ela ya vati. 25 Babani owogoowa, athu a vati vano kayuunonileni, mbwenye miyo guhuunonani teto ala mugivahiliinyu ehinona wi di nyo mugirumile. 26 Gihaanoniha ndina neenyu teto gineerege waasuuziha wi odhivela weenyu munagidhiveliinyuna okalegeve mwa aliwa teto miyo ginaakalegeve mwa aliwa".
Omagiwa wa Yesu
1 Yesu agamalile olobela, ahivenyaga ni anamasuuza aaye yahidhowaga kobela ya mukolopa Kederoni. Wewo wahikala mudda wa olivera, ahivolowaga mwemo ni anamasuuza aaye. 2 Zhudasi oyene aampeleke Yesu, ahinona mburo oyo, vowi Yesu oodhowesa wewo ni anamasuuza aaye. 3 Zhudasi ahithukulaga nikuru na anyakoddo a oRoma, vamohi ni anamaang'anela yarumiwege ni apogo a anamakutha ni aFarizi. Aliwa yahifiyaga mmuddani mule egathukule mitigo dhuulubale, mwenje ni yeela dha koddo. 4 Yesu ahinonaga dhaatedhene dhaamwiireyele. Mwaha wa ela ahawaaddamelaga waakoha, wiira: "Munamusayela aani?" 5 Yahimwaakulaga, wiira: "Yesu a oNazarethi". Yesu ahiiraga: "Miyo Gili". (Vano Zhudasi, muliba ompeleka Yesu, aaligi ni aliwa.) 6 Yesu ageerile: "Miyo Gili", aliwa yahiwelelaga mundduli, otongwela vati. 7 Vano Yesu ahaakohaga dila biili, wiira: "Munamusayela aani?" Aliwa yahiiraga: "Yesu a oNazarethi". 8 Oliye wiira: "Gihimala wuwaaddelani wi miyo gili oliye. Vano akala munagisayela miyo, ahiyeni alobwana ala edhowege". 9 (Yesu awogelege ndo wi dhaakwanele oliye dhawogiliiye mundduli wi: "Kagimurimeelihevo naari mmohi mwa ale mwagivahiliinyu".) 10 Vano Simawu Peduru ahixomolaga supaadda nannigiiyena, omporosana mwiimeleli a musogoleli a anamakutha, ompadha nibaru na omoononi wooja. (Ndina na mwiimeleli oyo eeriwa Maliku.) 11 Yesu ahimwiirelaga Peduru: "Welihedha supaadda naawo muncethani! Kaginaamung'we nakoma a goyi ogivahile Baabi?"
Yesu onodhowiwana wa Annasi
12 Vevale nikuru na anyakoddo a oRoma ale, vamohi ni musogoleli eewa teto ni anamaang'anela a aZhudewu, yahimwihiddaga Yesu, ommaga. 13 Vowambeela yamudhowilegena wa Annasi, aali mooyaaye Kayifa, musogoleli a anamakutha a yaaka elene. 14 (Kayifa duuleene awaaddelege aZhudewu wi yaali pama muthu mmohi aakwele athu aatene.)
Peduru onomukoodda Yesu
15 Simawu Peduru vamohi ni namasuuza mmohiwa yahimuharaga Yesu. Namasuuza mmohiwa oyo ahinoniwa ni musogoleli a anamakutha. Mwaha wa ela namasuuza oyo ahivolowaga vamohi ni Yesu vathaddo va musogoleli a anamakutha. 16 Mbwenye Peduru ahiimelaga vamulago ode. Mowindo namasuuza mmohiwa anoniwe ni musogoleli a anamakutha, ahikumaga, owoga ni namaang'anela a vamulago, omvolosiha Peduru. 17 Namaang'anela a namwali ole ahimukohaga Peduru, wiira: "We kuli mmohi a anamasuuza a mulobwana ola?" Peduru ahaakulaga, wiira: "Eehi, kagili". 18 Amwiimeleli vamohi ni a anamaang'anela ale yahitubaanyaga munddo mwaha wi wooddiddilaga, yahiimelaga, woothaga. Peduru aaligi vevale owiimeleene woothaga vamohi ni aliwa.
Musogoleli a anamakutha ahimukohaga Yesu
19 Vano musogoleli a anamakutha ahimukohaga Yesu dha anamasuuza aaye ni dhosuuziha dhaaye. 20 Yesu ahimwaakulaga wiira: "Miyo gawogesa mowiiweya vameentoni va athu aatene. Goosuuzihesa mu nyuba dha matugumano teto mu nyuba ya Mulugu, mwemo mwatugumana aZhudewu aatene. Kagiwogile yego mowiipiteya. 21 Ki vano, munagikohela ddi? Akoheni ayene yiiwile dhawaaddeliimi. Aliwa ehinona pamadhene dhawogiimi". 22 Agawogile dhedhi, mmohi mwa anamaang'anela aaligi vevale ahimuddwadhaga Yesu wiintoni, wiira: "Onamwaakula ndo musogoleli a anamakutha?" 23 Yesu ahimwaakulaga, wiira: "Akala giwogile mootakaliha, wiirele onamoona wa yootakala eyo. Mbwenye akala giwogile mwa ebaribari, onagiddwadhela ddi?" 24 Vevale Annasi ahimurumihaga Yesu oomagiweene, wa Kayifa, musogoleli a anamakutha.
Peduru onowelela omukoodda Yesu
25 Simawu Peduru agali owiimeleene oothaga wewule. Yahimukohaga, wiira: "We teto kuli mmohi mwa anamasuuza aaye?" Peduru ahikooddaga, wiira: "Eehi, kagili". 26 Mwiimeleli mmohi a musogoleli a anamakutha, mmudhi a ole Peduru amugwaddiligiiye nibaru, ahimukohaga, wiira: "We kaguwoonile ni oliye mmuddani mule?" 27 Peduru ahiwelelaga okoodda dila ya neethaaru, mowaaguva mutubi ahunddaga.
Yesu vameentoni va kuminadori Pilatu
28 Bebeheene yahimuthukulaga Yesu, okumela wa Kayifa, omudhowana vaade va kuminadori. Apogo a aZhudewu kayavolowilegewo mwaha wi kayafunaga wiitakaliha, vowi yoofunaga oja Mathanga a Paxkwa. 29 Mowindo Pilatu ahikumelaga ode, waakoha, wiira: "Mulobwana ola mumfwanyilena yootakala ddi?" 30 Yahimwaakulaga, wiira: "Aheere ahiiragana yootakala, kanamudhana wa nyo". 31 Vevale Pilatu ahawaaddelaga, wiira: "Muthukuleni, mwamuthonge voohariha malamulo eenyu". Mbwenye aZhudewu yahiiraga: "Kannarumeedhihiwa ompa muthu". 32 (Dhapadduwile ndo wi dhaakwanele dhedho Yesu dhawogiliiye dha mukalelo wa okwa waaye wa vamuraddini.) 33 Pilatu ahiwelelaga ovolowa, omwiithana Yesu, omukoha, wiira: "We oli mwene a aZhudewu?" 34 Yesu ahaakulaga, wiira: "Yookoha ela seenyu, naari ehikalavo yuwaaddeleni dha miyo?" 35 Pilatu ahaakulaga, wiira: "Miyo gili muZhudewu? Athu a mulogo waawo ni apogo a anamakutha buupelekile wa miyo. Wiirile ddi?" 36 Yesu ahaakulaga, wiira: "Omwene waaga kahuwo wa elabo ela ya vati. Omwene waaga wahaakale wa vati vano, amwiimeleli aaga yeere owana koddo wi gihipelekiwe wa apogo a aZhudewu. Mbwenye Omwene waaga kahuwo wa vati vano". 37 Pilatu ahiiraga: "We oli mwene?" Yesu ahaakulaga, wiira: "Nyo dinawoga wi gili mwene. Miyo gihibaliwa, gihidha vati vano wi giirele onamoona ebaribari. Aatene eli a ebaribari enowiiwa ndhu naaga". 38 Pilatu ahimukohaga, wiira: "Ebaribari si ddi?" Agawogile madhu alene, ahiwelelaga waaligi aZhudewu, wawaaddela, wiira: "Miyo kagimfwanyilena mwaha woomukonana. 39 Vano voohariha elemeelelo yeenyu, mudhidhi wa omuthabela Paxkwa ginowuutapulelesani munyakaambura mmohi. Ki munafuna ddi guutapuleleni, 'Mwene a aZhudewu'?" 40 Vevale aliwa yahikuwaga, wiira: "Eehi, oyo eehi! Nnafuna mmutapule Baraba". (Baraba oyo aali nipanga.)
1 Vevale Pilatu ahaalamulaga, wiira: "Emuthukule, emuwaxule". 2 Vano anyakoddo yahiluwaga kara ya miinga, omuwariha mmuruni mwaaye. Yahimuwarihaga yoowara ya roxa ombeddaga. 3 Anyakoddo yoomwaaddamelaga, yiiraga: "Nnowuulojelani nyo, Mwene a aZhudewu!" Teto yoomuddwadhaga wiintoni. 4 Pilatu ahiwelelaga okuma, wawaaddela aZhudewu, wiira: "Mvuruwane, ginowuudhelanaani Yesu munone wi kaginamfwanyana mwaha oli waatene woomukonana". 5 Yesu ahikumaga agawarile kara ya miinga ni yoowara yaroxa. Pilatu ahiiraga: "Mmwiing'ane! Mulobwana ola oli va". 6 Apogo a anamakutha ni anamaang'anela eewa egamoonile Yesu, yahikuwaga, wiira: "Mmukomele! Mmukomele vamuraddini!" Pilatu ahawaakulaga, wiira: "Nyoovo mmuthukule, mwamukomele; miyovano kagimfwanyilena mwaha". 7 AZhudewu yahiiraga: "Nihikanna nlamulo, voohariha nlamulo nddo efwaneelele akwe, mwaha wowiyiira Mwaana a Mulugu". 8 Pilatu veewiligiiye madhu ale, woova waaye wahenjedhedheyaga. 9 Vano ahivolowaga, owelela omukoha Yesu, wiira: "Owaninyu fuuvi?" Yesu kamwaakulilege. 10 Vevale Pilatu ahimukohaga, wiira: "Kunagaakula? Kunonile wi gihikanna owodha wowuutapula, naari wowuukomela?" 11 Yesu ahiiraga: "Kawakanna owodha oli waatewene wa miyo waheere ohuvahiwa ni Mulugu. Ole ogipelekile dinna yoothega mookwaranya". 12 Wambeela vevale, Pilatu oosayelaga dha omutapula Yesu. Mbwenye aZhudewu yahikuwaga, wiira: "Mwamutapula olena kamuli mukwaaye a Sezari. Muthu onadhiira mwene, domwiinyuwela Sezari". 13 Pilatu ageewile dhedho, ahimukumihaga Yesu, okaraati veettenguni voothonga miladdu, vamburoni vineethaniwa "Nthaddo noomareliwa ni mabwe". (Mu eZhudewu eneeriwa "Gabata".) 14 Naaligi nlabo noosasanyedhela na omuthabela Paxkwa, mudhidhi ogali vakukuuve wora ya neekumi nabiili ya mutana. Pilatu ahawaaddelaga aZhudewu, wiira: "Mwene eenyu ola-to". 15 Aliwa yahikuwaga, wiira: "Mvenyihevoni! Mvenyihevoni! Mwamukomele vamuraddini!" Pilatu ahaakohaga, wiira: "Gimukomele mwene eenyu?" Apogo a anamakutha yahaakulaga, wiira: "Kaninna mwene mmohi, ahili Sezari". 16 Vevale Pilatu ahimpelekaga Yesu wi yamukomele vamuraddini.
Okomeliwa wa Yesu vamuraddini
Aliwa yahimuthukulaga Yesu. 17 Oliye agakapathile muraddi waaye, ahikumagana muluwani odhowa omburoni oneethaniwa "mburo wa Egarigadhi". (Mu eZhudewu oneeriwa: "Gologotha".) 18 Wewo yahimukomelaga vamuraddini. Yahaakomelaga teto athu amohi abiili, mmohi omoononi wooja, mmohiwa woong'oto, Yesu okala vaari. 19 Pilatu ahilebaga yoonihelo, ohela vamuraddinivo. Ahilebagavo, wiira: "YESU A ONAZARETHI, MWENE A AZHUDEWU". 20 AZhudewu ajinji yaheelengaga yoonihelo ele mwaha wi vamburoni vevo Yesu vamukomeliisu vaali vakukuuve ni nluwa na oZheruzalemi; teto mwaha wi yoonihelo ele yalebiwe mu eZhudewu, mu eRoma teto mu eGerego. 21 Apogo a anamakutha yahimwaaddelaga Pilatu, wiira: "Kamulebe wi: 'Mwene a aZhudewu', eehi, mbwenye mulebe wi: 'Ola wiire: Gili Mwene a aZhudewu' ". 22 Pilatu ahiiraga: "Dhedho dhilebiliimi, gihileba". 23 Anyakoddo egamukomele Yesu, yahithukulaga dhoowara dhaaye, ogawanya dhipaddi nnayi, munyakoddo oli aatene epaddi yaaye. Yahithukulaga teto mukanjo waaye, waali wooluwiwa wambeela vadhulu ofiya omanyaloni, woohukanna musono. 24 Vano anyakoddo ale wiiwananela, wiira: "Kanitalanye, moohiyaniha, noombezele gari wi noone onaakale wawani". Ndo dheereyele wi dhaakwanelihe dhedho Maleba Ootaleleya dhawogiliiwa, yiira: "Yahigawana dhoowara dhaaga, teto mukanjo waaga yahoombezelaga gari". Dhedhi seerile anyakoddo ale. 25 Kukuru ya muraddi wa Yesu yahiimelaga amaaye, ddibila a amaaye, Mariya mwadha a Kolopa ni Mariya oMagadala. 26 Vevale Yesu agawoonile amaaye ni namasuuza amudhiveliiye vajinji, ageemelile vakukuuve, ahawaaddelaga amaaye, wiira: "Mmani, mulobwana oyo di mwaana aawo". 27 Vooharela ahimwaaddelaga namasuuza ole, wiira: "Ola di mma aawo". Vano wambeela vevale namasuuza ole ahimuthukulelaga vaade vaaye mma ole, omukameelaga.
Okwa wa Yesu
28 Dhigavirile nda Yesu ahinonaga wi dhaatedhene dhihiireya. Vano wi dhaakwanele Maleba Ootaleleya dhawogiliiwa, oliye ahiiraga: "Gihikanna nthona". 29 Vevale vahikalaga muno wodhaala ni vinyu oonyuunya. Anyakoddo ale yahibwinihaga nthoje mvinyuni mule, oseredha ommirini wa hisope, ofiyiha omulomoni waaye. 30 Yesu agamulawihile vinyu oonyuunya ole, ahiiraga: "Dhaatedhene dhihaakwanelihiwa". Vooharelaviwa ahiworomihaga muru, opeleka egumi yaaye. 31 Naaligi nlabo noosasanyedhela omuthabela Paxkwa. Apogo a aZhudewu kayafunilege wi miruthu nde dhikale vamuraddini nlabo na sabuddu, mwaha wi sabuddu ole aaligi oothabela. Mowindo yahimulobaga Pilatu wi alamule yaakothole meddo. 32 Vano anyakoddo yahidhaaga waakothola meddo wa mmohi mwa abiili ale yakomeliwege vamohi ni Yesu. Teto yahimwiiragana ndo mukwaaye ole. 33 Vafiyiligiiwa wa Yesu, egamoonile wi ohukwa, kayakotholege meddo dhaaye. 34 Mmohi mwa anyakoddo ale ahimulataga mbararuni mwaaye ni mwaalago, mowaaguva okumamo mwazi ni mahinje. 35 Ole oonilege dhedhi onowiirela onamoona, onamoona waaye bwa ebaribari. Oliye ohunona wi dhinawogiiye seebaribari, ohiirela onamoona wi nyo teto muroromele. 36 Dhapadduwele ndo wi dhaakwanelihe dhedho Maleba Ootaleleya dhawogiliiwa wi: "Kidha epwesa nikuva naaye". 37 Maleba mamohi yiire: "Enoodha emusugwege vamulatiligiisu".
Ologohiwa wa Yesu
38 Vooharelaviwa Zhuuze a oArimateya ahimulobaga Pilatu wi amurumeedhihe ovenyihavo mwiili wa Yesu. (Zhuuze aali namasuuza a Yesu mowiipiteya mwaha wowawoova apogo a aZhudewu.) Vano Pilatu agamurumeedhihile, Zhuuze ahivenyihagavo muruthu ole. 39 Ahidhaaga teto Nikodemu, ole adhiilege wa Yesu mahiyu. Oliye ahidhaagana dhoonukwela mira ootaganyihiwa ni alowe, dhanyemela kilu makumi maraaru. 40 Aliwa yahithukulaga mwiili wa Yesu, ohuruwedha ni guwo dhoweela vamohi ni dhoonukwela nde, voohariha dhilemeelelo dha ologohiwa wa aZhudewu. 41 Wewo Yesu wakomeliwigiiye wahikala mudda. Vano mmuddani mule mwahikala nsiye nixa, naali nihinalogohiwege muruthu. 42 Mwaha wi naali nlabo na aZhudewu noosasanyedhela Paxkwa teto nsiye nddo naaligi vakukuuve, yahimulogohaga Yesu mwemo.
Ovenyihiwa wa Yesu muukwani
1 Nlabo nowambeela na sumaana bebeheene, ogali yiihi, Mariya oMagadala ahidhowaga onsiyeni wa Yesu. Ahoonaga wi nibwe na omulago wa nsiye ndde nihivenyihiwawo. 2 Mowindo ahithamagelaga wa Simawu Peduru ni wa namasuuza mmohi ole Yesu amudhiveliiye vajinji. Agafiyile ahawaaddelaga, wiira: "Ehimvenyihamo Nabwiya munsiyeni mule, kannonilewo omuheliliisu". 3 Vevale Peduru ni namasuuza mmohi ole yahikumaga, odhowaga onsiyeni wule. 4 Aabiileene yahithamagaga vamohi, mbwenye namasuuza mmohi ole ahithamagaga omukwaranya Peduru, okala muraaji ofiya onsiyeni wule. 5 Ahiworomaga, woona guwo nde dhigali vevale, vano kaavolowilemo. 6 Simawu Peduru amuharaga agafiyile, ahivolowaga munsiyeni mule. Ahoonaga guwo dhoweela nde dhigali mwemule, 7 teto ahoonaga guwo yaaligi mmuruni mwa Yesu. Guwo eyo kayaaligi vamohi ni guwo dhimohi nde, yaaligi veewavene, egali yookuneene. 8 Vevale ahivolowaga teto namasuuza mmohi ole muraaji ofiya onsiyeni wule; agoonile, ahiroromelaga. 9 Aliwa yaaligi ehineewelelemo Maleba Ootaleleya yeera, yaali yoofuneya wi Yesu avenyihiwe muukwani. 10 Vooharela anamasuuza ale yahiwelelaga mmawaniwa.
Yesu onomooneyela Mariya a oMagadala
11 Mariya ahikalagave owiimeleene ode wa nsiye anddaga. Vano anddagave ndale, ahiworomaga oturumelaga munsiyeni mule, 12 ahawoonaga angero abiili yawarilege guwo dhoweela, yakaraatilege vamburoni vaaligi muruthu wa Yesu, mmohi omuruni, mmohiwa omanyaloni. 13 Aliwa yahimukohaga, wiira: "Mmani, munanddela ddi?" Oliye ahaakulaga, wiira: "Mwaha wi ehimuthukulamo Nabwiya aaga, vano kaginonile omuheliliisu". 14 Agawogile dhedhi ahirugunuwaga, vevale omoona Yesu ageemelile, naari ndo kaamudidelege wi aaligi Yesu. 15 Vano Yesu ahimukohaga, wiira: "Mmani, munanddela ddi? Munamusayela aani?" Mariya oobuwelaga wi oliye aali namaang'anela a mburo ole, ahiiraga: "Nabwiyani, akala omuthukulilemo di nyo, mugaaddele omwihiyiliinyu wi gamuthukulewo". 16 Yesu ahiiraga: "Mariya!" Oliye ahirugunuwaga, owoga mu eHeberi, wiira: "Raboni!" (Enatapulela wi "namasuuziha".) 17 Yesu ahimwaaddelaga, wiira: "Kugihidde, vowi kaginagwele odhowa wa Baabi. Mbwenye dhowa wa addibilaga, wawaaddele wi: 'Ginogwela odhowa wa aBaba, oyene oli Baabi eenyu teto, odhowa wa Mulugu aaga, oli Mulugu eenyu' ". 18 Mariya a oMagadala ahidhowaga wa anamasuuza, waalaleyela, wiira: "Gihimoona Nabwiya!" Teto ahawaaddelaga dhedho Nabwiya dhamurumiligiiye.
Yesu onowiyooniha wa anamasuuza aaye
19 Nlabo nendde, nowambeela na sumaana, ogaribile, anamasuuza egatugumane vamohi. Misiwo dhaaligi dhoofugiwadhene mwaha wowawoova apogo a aZhudewu. Ahidhaaga Yesu, wiimela vaari veewa, owoga, wiira: "Murenddele okale ni nyo!" 20 Ageere ndo, ahawoonihaga madada aaye ni mbararuni mwaaye; anamasuuza yahihagalalaga vajinji vomoona Nabwiya. 21 Yesu ahiwelelaga owoga madhu mamohive, wiira: "Murenddele okale ni nyo. Wona Baabi ogirumile, miyo teto ginowuurumani". 22 Agawogile ndo, ahaakudheelelaga mwela, wiira: "Akelani Muneba Woweela. 23 Ayene munaaleveleligiinyu dhoothega dheewa enoodha eleveleliwege, mbwenye ale muhunaleveleligiinyu, kidha eleveleliwa".
Ohuroromela wa Tome
24 Tome, (eethaniwa Ddiddimu), mmohi mwa anamasuuza kumi ni abiili ale, kaaligi vamohi ni akwaaye Yesu vadhiiligiiye. 25 Vano anamasuuza akwaaye yahimwaaddelaga, wiira: "Hiyo nihimoona Nabwiya!" Tome ahaakulaga, wiira: "Gaahoona mabamba a perego mmadani mwaaye, gaahihela embuno yaaga mmabambani mwaaye teto gaahihidda ni ndada naaga mbararuni mwaaye, kagidha giroromelawene". 26 Vigavirile malabo matanu ni maraaru, anamasuuza aaye ale yahiwelelaga otugumana mba mule, Tome aaligi vamohi ni aliwa. Misiwo dhaaligi dhoofugiwadhene, naari ndo Yesu ahidhaaga, wiimela vaari veewa, wiira: "Murenddele okale ni nyo!" 27 Ageere ndo, ahiwogaga ni Tome, wiira: "Odhena va embuno yaawo; kawiing'ane madada aaga. Odhena ndada naawo, ohidde mbararuni mwaaga. Kukale oohuroromela, okale ororomela". 28 Tome ahimwaakulaga, wiira: "Nabwiya aaga! Mulugu aaga!" 29 Yesu ahimwaadelaga, wiira: "Ororomele mwaha wi ohugoona? Ooreelihiwa baayene enaroromela naari ehoonile".
Mwahaya wa niivuru ndda
30 Vameentoni va anamasuuza aaye, Yesu ahiiragana dhitoonyihedho dhijinji dhihilebiwe muniivuruni mu. 31 Dhego dhedhi dhilebeliwe muroromele wi Yesu dili Kirixtu aroromelihiwe, Mwaana a Mulugu, vano mwamuroromela Kirixtu munokalana egumi odheela mu ndina naaye.
Yesu onowawooneyela anamasuuza atanu ni abiili
1 Nuwindo, Yesu ahiwelelaga wiyooneyiha wa anamasuuza aaye onyaza ya oTiberiyasi. Ahiyooneyihaga mowinda: 2 Yaaligi vamohive Simawu Peduru; Tome (oneethaniwa Ddiddimu;) Nataniyeli, ookumela nluwa na oKana murudda wa oGalileya; ahima a Zebedeyo ni anamasuuza amohi abiili. 3 Simawu Peduru ahiwogaga ni aliwa, wiira: "Ginaya gatote". Aliwa yahiiraga: "Nihiyeene nnowuuhara". Yahimaruwaga, ogwela mmwanddeyani. Naari ndo mahiyu alene kayapilege yego. 4 Ogasile Yesu ahiimelaga seresere ya nyaza. Anamasuuza ale kayamudidelege wi aaligi Yesu. 5 Vano oliye ahaakohaga, wiira: "Anaaga, muhupawo somba?" Aliwa yahaakulaga, wiira: "Nivang'onong'ono!" 6 Yesu ahawaaddelaga, wiira: "Vokedhani nthavi omoononi wooja wa mwanddeya, muneere ofwanya somba". Aliwa egavokedhewo nthavi ndde kayaandilege owetela mmwanddeyani mwaha wowiinjiva wa somba. 7 Vevale namasuuza ole Yesu amudhiveliiye vajinji ahimwaaddelaga Peduru, wiira: "Ole di Nabwiya!" Simawu Peduru veewiligiiye wi aali Nabwiya, ahiwaraga yoowara yaaye (vowi eeraga agakuguule,) vano ahilupelaga mu nyaza. 8 Anamasuuza amohi yahidhaaga ni mwanddeya, owetaga nthavi noodhaala somba. Vowi kayaaligi woolapela ni ode, yaaligi vakukuuve wona meeturu zana. 9 Ekitaga mmwanddeyani, egwelelaga ode, yahawoonaga makala a munddo, vigali somba ni mikaathe. 10 Yesu ahawiirelaga: "Dhaanaani somba dhimohi dhipiliinyu dhiinova". 11 Vevale Simawu Peduru ahigwelaga mmwanddeyani mule, owetela nthavi ode. Nthavi ndde naaligi nodhaalanene somba dhuulubale, dhowaakwana somba zana ni makumi matanu ni somba thaaru (153). Naari somba ndo dhaalive dhinjinji, nthavi ndde kanataleyege. 12 Yesu ahawaaddelaga, wiira: "Dhaani, muje". Kaalivo mmohi vaari va anamasuuza ale alibilege murima amukoha, eera: "Muli aani?" Vowi yahididelaga wi aali Nabwiya. 13 Yesu ahawaaddamelaga, othukula mikaathe nde, waavaha. Ahiiragana emodha-modhave ni somba nde. 14 Ela yaaligi dila ya neethaaru wi Yesu eyooneyihe wa anamasuuza aaye vavenyihiwiiye muukwani.
"Waakameele mabila aaga"
15 Aliwa egamalile oja, Yesu ahimukohaga Simawu Peduru, wiira: "Simawu, mwaana a Zhuwawu, onogidhivela okwaranya ala munagidhiveleliiwa?" Oliye ahaakulaga, wiira: "Ee, Nabwiya, muhunona wi ginowuudhivelani". Yesu ahimwaaddelaga, wiira: "Waakameele mabila aaga". 16 Yesu ahimukohaga dila ya nabiili, wiira: "Simawu, mwaana a Zhuwawu, onogidhivela?" Oliye ahaakulaga, wiira: "Ee, Nabwiya, muhunona wi ginowuudhivelani". Yesu ahimwaaddelaga, wiira: "Waakukule mabila aaga". 17 Yesu ahimukohaga dila ya neethaaru, wiira: "Simawu, mwaana a Zhuwawu, onogidhivela?" Peduru ahukuuwaga mwaha wi Yesu ahimukohaga dila ya neethaaru, eeraga: "Onogidhivela?" Peduru ahaakulaga, wiira: "Nabwiyani, nyo muhunona dhaatedhene. Muhunona wi ginowuudhivelani". Yesu ahimwaaddelaga, wiira: "Waakameele mabila aaga. 18 Ebaribareene, ebaribareene, ginowuwaaddela wi ogali muzombwe, wawara weeka odhowaga wewo wafuniiwe odhowa. Mbwenye wadha okalaba, onodha otapule moono dhaawo, vano mmohi oowarihege, oothukulele wewo ohunafuniiwe odhowawo". 19 (Yesu awogelege dhedhi wi ooneyihe mukalelo wookwa Peduru weeriiye akwe wi amuthithimihena Mulugu.) Ageere ndo, ahimwaaddelaga Peduru, wiira: "Ogihare". 20 Peduru ahirugunuwaga, omoona namasuuza ole Yesu amudhiveliiye vajinji aaharaga. Aaligi namasuuza ole asameelege omurimani wa Yesu vamathangani, amukohilege, eera: "Nabwiya, onoopelekeni baani?" 21 Peduru agamoonile namasuuza ole, ahimukohaga Yesu, wiira: "Nabwiya, ki mulobwana ola, oneeriwena avi?" 22 Yesu ahimwaaddelaga, wiira: "Akala ginafuna wi oliye akalewoove ofiyedha giwele, ki yaawo elivo ddi? Weevo ogiharege". 23 Vano dhahiiweyaga vaari va ale yamuhara Yesu wi namasuuza ole kadha akwa. Mbwenye Yesu kaamwaaddelege wi kadha akwa, eerilege: "Akala ginafuna wi oliye akalewoove ofiyedha giwele, ki yaawo elivo ddi?" 24 Ola di namasuuza oneerela onamoona dhedho dheereyilege, oliyeene dalebile dhego nda. Nihinona wi onamoona waaye bwa ebaribari. 25 Vihikala dhego dhimohi dhijinji Yesu dhiiriliiye. Dhaatedhene dhahaalebiwe, ginowuubuwela wi mwiilaboni yaatene ya vati kamwaakale mburo wowaakwana maniivuru maatene yaalebiwe.