1

1 S-tizarăt, a-s wăr t-illa a dd-ixlakăn, wăr t-illa a t-illăn a săl Wa s-itawănna Măjrăd, Măjrăd ill'-e ɣur-Măssinăɣ, Măjrăd ĕnta a-s Măssinăɣ. 2 Ill'-e s-tizarăt ɣur-Măssinăɣ, 3 ĕnta a-s dd-ixlăk Măssinăɣ hărăt iket-net, wăr t-illa a dd-ixlakăn ar s-ĕnta, 4 ĕnta a ăssodărăn hărăt iket-net, tămudre-ten-dăɣ ihakk a-s ănnur i-dăgg-adĕm; 5 ănnur, ămilăwlăw dăɣ-tihay măšan, unjăynăt săr-s. 6 Osă-dd ăhalĕs dd-ăsimašăl Măssinăɣ s-isĕm-net Exya, 7 i-ad-umas tajuhe, amĕnăn dăgg-adĕm s-ănnur wa făll-hasăn-itajăyha. 8 Wăr-ămoos ĕnta iman-net ănnur, tajuhe-net a ămoos. 9 Ănnur-i-hi, ĕnta a-s wa n-tidĕt dd-osăn ăddunya i-ad-imlĕwlĕw făll-dăgg-adĕm, arr tiṭṭawen-năsăn. 10 Wa s-itawănna Măjrăd, ijjăš-dd ăddunya, tĕbnă-dd săr-s măšan, tunjăy s-ad-t-tĕzzĕy, 11 osă-dd ănnur ăkall-net măšan, wăr t-ăqbelăn imălan-net, 12 hakd a-wen-dăɣ dăɣ, wi t-ăqbălnen, omănăn săr-s, ăsdabăt-tăn ad-umasăn aratăn n-Măssinăɣ. 13 Aratăn-en, tiwit-năsăn, wăr tămoos ta n-tăsa wăla ta n-erhet n-taɣĕssa wăla erhet n-ăgg-adĕm, ti n-Măssinăɣ. 14 Măjrăd, ămoos-dd ăgg-adĕm, izzăɣ-dd jere-năɣ ănnuuflăy dăɣ-ănnuɣmăt d-tidĕt, năjjunfă dăɣ-ălxurmăt-net, ălxurmăt daɣ wa ikarrăš Alyaḍ s-wăr-il' Abba i săl ĕnta. 15 Ǝnta-en-dăɣ a făll-ăjjĕyha ănnăbi Exya a-s innă s-afălla: "Ad-hi-dd-išrĕy ere hi-ojărăn făl-a-s ill'-e hărwa wăr dd-ăxlekăɣ." 16 Nĕjrăw iket dăɣ-nănăɣ ejădăr-nănăɣ dăɣ-ălxurmăt n-ănnuɣmăt-net, ajăraw nĕja-dăɣ, ilkam-as iyyăn 17 făl-a-s, ĕmmĕk wa s-ija Măssinăɣ Ăṭṭăwrăt dăɣ-ăfuss n-ănnăbi Mosa, ĕnta daɣ a-s ija ănnuɣmăt-net d-tidĕt-net dăɣ-ăfuss n-Ɣisa Ălmasex. 18 Măssinăɣ, wăr t-illa ere s-kăla t-inhăy măšan, Rure-s wa n-iyyăn ɣur-s izzăɣăn, ăsbayăn-anăɣ-t-dd. 19 Ǝnta da tajuhe ta ij' Exya a-s săr-s dd-ăšmăšălăn imănokalăn n-kăl-Ălyăhud wi hănen Yărussălam, kăl-tikutawen d-dăgg-Lewi i-ad-t-sĕstĕnăn d-a-wa ămoos. 20 Wăr hasăn-iffer iman-net, inn'-asăn: "Wădden năkk a-s Ălmasex." 21 Olăsăn-t asĕstan: "Adiš mi tămoosăd? Ămmuukkăn kăyy a-s ănnăbi Ɣĕli?" Inn'-asăn: "Wăr t-ămoosăɣ." Ǝnnăn-as: "Adiš kăyy a-s ănnăbi wa s-ĕnnăn ănnăbităn ilkam a dd-ass?" Inn'-asăn: "Ăbo!" 22 Olăsăn-as tĕnna: "Adiš, mi tămoosăd? Nărha ălwižab năwwăy i-ăddinăt wi hanăɣ-dd-ăšmašălnen, ma tĕnned, mi tămoosăd?" 23 Inn'-asăn: "Năkk a-s wa ăseɣăren dăɣ-tenere, janneɣ: 'sĕssiɣĕdăt tabarăt dat-Emăli', s-ĕmmĕk wa s-tăn-innă ănnăbi Saya. " 24 Ăddinăt-win-dăɣ săr-s dd-ămešălnen, i n-taggayt ta n-kăl-faris. 25 Olăsăn-t asĕstan daɣ, ĕnnăn-as: "Adiš mafăl salmaɣăd ăddinăt dăɣ-aman a-s wădden kăyy a-s Ălmasex wăla, Ɣĕli wăla ănnăbi wa s-ătwănna?" 26 Ăwwežăb-asăn, inn'-asăn: "Năkk, aman a dăɣ-salmaɣăɣ ăddinăt măšan, ill'-e jere-wăn ere wăr tĕzzeyăm, 27 ad-hi-dd-išrĕy, wăr-ănhăjjăɣ wăla-dăɣ d-ad-ăḍĕsăɣ issal n-tifădelen-net făl mijraw-i-dăɣ hi-ija." 28 Tadăbayt ta n-Bitanya tĕwărăt asălim n-Ɣurdĕni wa n-atăram a dăɣ-itajj a-wa-dăɣ, dihen-dăɣ ad-isalmaɣ Exya ăddinăt dăɣ-aman. 29 Ašăl wa n-ḍarăt-wen, inhăy Exya Ɣisa ikk'-e-hi-dd, innă i-tamĕtte: "Ǝnhĕywăt-ak Ašăɣol n-Măssinăɣ wa itakkăsăn ibăkkaḍăn n-ăddunya! 30 Ǝnta-i-dăɣ a făll-hawăn-ĕnneɣ: ad-hi-dd-išrĕy ere hi-ojărăn făl-a-s ill'-e hărwa wăr dd-ăxlekăɣ; 31 năkk iman-in, ibda wăr t-ĕzzeyăɣ măšan, i-ad-dd-ibbuyĕn i-kăl-Iṣrayil, oseɣ-dd i-ad-salmaɣăɣ dăɣ-aman." 32 Olăs daɣ Exya ajĕyh, inna: "Hannăyăɣ Unfas Šăddijăn, ifal-dd išĕnnawăn dăɣ-ănnuɣ n-tedăbert măllăt har fălla-s ăsjăn, izzăɣ fălla-s. 33 Kăla t-ĕlleɣ wăr t-ĕzzeɣăɣ măšan, wa hi-dd-ăšmašălăn i-ad-salmaɣăɣ dăɣ-aman, inn'-ahi: 'Ere wa s-tĕnhăyăd Unfas har fălla-s ăsjăn, izzăɣ fălla-s, ĕnta a ihakkăn Unfas Šăddijăn.' 34 Năkk daɣ, ĕnhăyăɣ-t, ăjjĕyhăɣ a-s ĕnta a-s Rure-s n-Măssinăɣ." 35 Ašăl wa n-ḍarăt-wen, ibdad Exya d-inĕṭṭulab-net ĕssin dăɣ-edăgg-wĕnnin-dăɣ a-s iswăḍ, 36 inhăy Ɣisa okay ɣas, innă: "Ǝnhĕywăt-ak Ašăɣol n-Măssinăɣ!" 37 Ǝslăn inĕṭṭulab-net wi n-ĕssin i-măjrăd-wen-dăɣ ij' Exya ɣas, ĕlkămăn i-Ɣisa. 38 Ăšnăšlăm Ɣisa ḍara-s, inhăy a-s ĕlkamăn-as ɣas, inn'-asăn: "Ma tărham?" Ǝnnăn-as: "Răbbi, a-wen ălmăɣna-net: Ălɣalim! Ǝnde d-tĕzzaɣăd?" 39 Inn'-asăn: "Ǝyyăwăt, ad-t-tĕnhĕyăm." Ǝglăn, ĕnhăyăn dihad izzăɣ, ĕzzăɣăn ɣur-s ašăl-en-dăɣ. Itajj a-wen s-takkăṣt. 40 Inĕṭṭulab wi n-ĕssin ĕslănen i-măjrăd wa ij' Exya făll-Ɣisa ɣas ĕlkămăn-as, iyyăn dăɣ-săn Idris wa n-ă/n/na-s n-Simyon Bĕṭrus; 41 Idris-en-dăɣ a osăn ă/n/na-s Simyon, inn'-as: "Ǝyyăw, nĕjrăw Ălmasex". Ălmasex, ălmăɣna-net: Wa innĕfrănăn. 42 Ilwăy Idris Simyon s-Ɣisa. Ikna Ɣisa akăyad dăɣ-Simyon, inn'-as: "Wădden isĕm-năk: Simyon ăgg Yunĕs? Ad-kăy-iwăr isĕm Sefas". Sefas, ălmăɣna-net: Tăhunt. 43 Ašăl wa n-ḍarăt-wen, ikka Ɣisa teje ta n-Galila a-s ămmoqqăs d-Fĕlibb, inn'-as: "Fĕlibb, ĕlkĕm-ahi." 44 Fĕlibb hakd Idris d-Bĕṭrus, iket-năsăn, i n-taɣrĕmt ta n-Băṭsayda. 45 Iglă Fĕlibb ĕnta-dăɣ har osa Natanăhil, inn'-as: "Ašăl-i, nĕjrăw ere wa s-ij' ănnăbi Mosa isălan-net dăɣ-Ăṭṭăwrăt, ĕllăɣen daɣ ănnăbităn s-ass-net: a t-ămoosăn Ɣisa wa n-ăgg Yusĕf n-taɣrĕmt ta n-Năṣirăt". 46 Inn'-as Natanăhil: "Ajăn Năṣirăt, a tăt-dd-ifĕl a olaɣăn?" Inn'-as Fĕlibb: "Ǝyyăw, ĕnhĕy-t." 47 Inhăy Ɣisa Natanăhil ikk'-e-hi-dd ɣas, innă: "Ašăl-i-š, hannăyăɣ U-Bănu-Iṣrayil n-ăgg-alăṣăl wăr ha tăkkărzăzzăl." 48 Inn'-as Natanăhil: "Ǝnde hi-tĕzzăyăd?" Inn'-as Ɣisa: "Hannăyăɣ-kăy hărwa wăr kăy-dd-iɣra Fĕlibb, a-s ija a-wen, tĕlled-t daw-tele n-ašar." 49 Iḍkăl Natanăhil emăsli-net, innă: "Ălɣalim, kăyy a-s Rure-s n-Măssinăɣ, kăyy a-s ămănokal n-Iṣrayil!" 50 Inn'-as Ɣisa: "Ɣas a-wa-dăɣ făl hak-ĕnneɣ hannăyăɣ-kăy hărwa tĕlled-t daw-tele n-ašar a făl tomănăd? Ǝlmĕd a-s ilkam dăɣ-k ad-tĕnhĕyăd hărătăn ojărnen a-wen-dăɣ tĕmɣăre. 51 Ălleɣeɣ-awăn s-tidĕt tădduuttet a-s ad-tĕnhĕyăm išĕnnawăn ămerăn, tĕnhĕyăm daɣ ănjălosăn n-Măssinăɣ tiwĕnĕn tizĕbbun-dd făll-Ăgg-ăgg-adĕm."

2

1 Kăraḍ išilan ḍarăt-a-wen, ij' aẓli dăɣ-hin-tătiwăɣra ma-s n-Ɣisa dăɣ-taɣrĕmt n-Kăna ta n-Galila; 2 ătwăɣr'-in daɣ Ɣisa s-aẓli-en-dăɣ ĕnta d-inĕṭṭulab-net. 3 Ǝmdăn aman n-lăɣnăb wi ăxxiimmărnen tamăswanen dăɣ-aẓli ɣas, tĕnn'-as ma-s: "Ăddinăt ya, ăbas lan aman n-lăɣnăb wi ăxxiimmărnen ĕswăn." 4 Inn'-as Ɣisa: "Anna, taẓidert, ăssaɣăt-in, wăr dd-iwweḍ hărwa." 5 Tĕnnă ma-s i-inaxdimăn: "A hawăn-innă-dăɣ, tĕjĕm-t." 6 Ǝllan-t dihen săḍis iɣsas măqqornen ĕknanen dăɣ-tăhunt s-tĕggatăn kăl-Ălyăhud ălwă/l/la s-aman-wi tăn-hănen; hak iyyăn dăɣ-iɣsas-en-dăɣ, itiwĕy temeḍe n-lităr. 7 Innă Ɣisa i-inaxdimăn: "Ǝḍkărăt-dd iɣsas-i-hi aman"; ĕḍkărăn-tăn har imawăn-năsăn. 8 Inn'-asăn daɣ: "Ǝlkĕwăt ămăra, tawĕyĕm i-ere-wa ănnihăḍăn dăɣ-imĕnsiwăn"; jăn a-wa hasăn-inna. 9 Ăkrăbbăt emănnăhăḍ n-imĕnsiwăn aman n-lăɣnăb wi ăxxiimmărnen s-wăr-issen e-s t-dd-hăn kud-dăɣ ĕssanăn inaxdimăn-wi tăn-dd-ĕlkăwnen siha s-dd-hăn; iɣră-dd ămaẓlay, 10 inn'-as: "Wăr t-illa ere s-wădden aman n-lăɣnăb wi ăxxiimmărnen ăẓednen a isaswa ăddinăt har tăn-ijmĕḍ ĕnniyăt tĕzzar, išĕšrĕy-tăn-dd wi wăren ĕkna tăẓude măšan, kăyy wi ăẓednen a tĕššĕšrăyăd." 11 Iji n-Măssinăɣ wa-dăɣ ija Ɣisa dăɣ-Kăna ta n-Galila a-s iji-net wa ăzzarăn, ăsnăfalăl-dd săr-s tărna-net dat-ăddinăt, omănăn sar-s inĕṭṭulab-net. 12 Ătrara Ɣisa ḍarăt-a-wen, ikka taɣrĕmt ta n-Qăfărnaxum ăddeew d-ma-s d-ayĕtma-s d-inĕṭṭulab-net măšan, wăr-ăhoja dihen. 13 Ohăẓ-dd ămudd n-kăl-Ălyăhud wa n-Faṣka ɣas, ăjoẓăy Ɣisa, ikka Yărussălam. 14 Ogăẓ-dd dăɣ-ehăn n-ămudd wa măqqărăn ăttužžar n-iwdesăn d-tihatten d-tidăberen d-kăl-amăhaš ăqqiimăn dăɣ-s, 15 iknă-dd ebărtăk n-iɣunan, ad-tăn-isattăɣ ĕntăneḍ d-tihatten-năsăn d-iwdesăn-năsăn, išamăhaš iẓărfan n-kăl-amăhaš, isibrăɣwil tisĕskar-năsăn, 16 ijanna i-ăttužžar n-tidăberen: "Ǝkkĕsăt a-wa diha, wăr jem ehăn n-Abba-nin ehăn n-mamăla." 17 Innă a-wen ɣas, ĕktăn-dd inĕṭṭulab-net a-s iktab dăɣ-măjrăd n-Măssinăɣ a-s: "Tĕdgaẓ-ahi tărha n-ehăn-năk." 18 Ǝggădăn-dd săr-s imizărăn n-kăl-Ălyăhud, ĕnnăn-as: "Ma ămoos iji n-Măssinăɣ wa s-tăddobed iji-net i-ad-hanăɣ-sĕflĕsăd a-s a-wa jed ămăra-dăɣ, led săr-s." 19 Inn'-asăn: "Ăndăt ehăn n-ămudd-wa-dăɣ ad-hawăn-t-dd sĕbdĕdăɣ dăɣ-kăraḍ išilan." 20 Ǝnnăn-as kăl-Ălyăhud: "Kăhh! Ajăn wădden ehăn n-ămudd-wa-dăɣ, ĕkkoẓăt timĕrwen n-awătay d-săḍis a ija ibinnĕw tĕzzar imdă, ɣas ĕndek dihad ila ĕmmĕk ad-t-dd-sĕbdĕdăd kăyy dăɣ-kăraḍ išilan?" 21 Ij'-asăn Ɣisa măjrăd-wen-dăɣ măšan, wăr-ĕjrehăn a-s ehăn n-ămudd wa s-hasăn-iha isălan-net, taɣĕssa-net ĕnta iman-net. 22 Šămad dd-inkăr Ɣisa jer-inĕmmuttan a dd-ĕktăn inĕṭṭulab-net tifer-tin-dăɣ ija, omănăn s-a-wa ĕnnăn ĕlkĕttabăn d-a-wa innă ĕnta iman-net. 23 Ăzzăman-wen-dăɣ n-ămudd wa n-Faṣka ăssakăy dăɣ-Yărussălam, omănăn săr-s ăddinăt ăjjootnen hannăynen ijităn n-Măssinăɣ wi ităjj, 24 măšan wăr tăn-ifles ed izzay-tăn iket-dăɣ-năsăn, 25 wăr-ămɣatăr daɣ, ad-has-ăjjăyh ăwadĕm wăl' iyyăn făll-iyyăn ed, issan d-iman-net a-wa ihăn ulh n-e d t-illăm ăgg-adĕm.

3

1 Ehăḍ iyyăn, osă-dd iyyăn dăɣ-imănokalăn n-kăl-Ălyăhud la taggayt ta n-kăl-faris s-isĕm-net Nikodem Ɣisa, 2 inn'-as: "Ălɣalim, nĕssan a-s kăyy ălɣalim dd-ăšimasăl Măssinăɣ a tămoosăd făl-a-s ijităn n-Măssinăɣ wi tăjjăd, wăr t-illa ere ăddooben iji-năsăn ar s-ad-t-idhal Măssinăɣ." 3 Ăwwežăb-as Ɣisa, inn'-as: "Ălleɣeɣ-ak s-tidĕt tădduuttet a-s a ikkăs ăwadĕm wăr-ija tiwit ta tăynayăt dd-fălăt išĕnnawăn, wăr mad-inhĕy Tĕmmĕnĕya ta n-Măssinăɣ." 4 Inn'-as Nikodem: "Ǝndek ĕmmĕk wa s-mad-iwĕy ăwadĕm wăššărăn? Ajăn ăddobăt ad-iqqĕl tăsa n-ma-s, ăj-dd tiwit ta s-sănatăt?" 5 Inn'-as Ɣisa: "Ălleɣeɣ-ak s-tidĕt tădduuttet a-s ere wărăn iwa s-aman d-Unfas Šăddijăn, wăr-e ijjĕš Tĕmmĕnĕya n-Măssinăɣ 6 făl-a-s, a-wa dd-torăw taɣĕssa, i n-taɣĕssa, a-wa dd-orăw Unfas daɣ, i n-Unfas. 7 Wăr-ităqqănet eɣăf-năk făl-a-s innin ĕnneɣ-ak: 'Wăr hawăn-t-tĕlla ar tiwit ta tăynayăt dd-fălăt išĕnnawăn.' 8 Wădden aḍu itĕhhal siha s-irha, sallăd i-emăsli-net măšan, wăr tĕssenăd siha s-dd-iha wăla siha s-ikka, a-wen-dăɣ daɣ, a ij' ăwadĕm iket-net dd-iwan s-Unfas n-Măssinăɣ." 9 Issĕstăn Nikodem Ɣisa daɣ, inn'-as: "Ǝndek ĕmmĕk wa s-mad-ăj a-wen?" 10 Inn'-as Ɣisa: "Ǝnd'-e-d-il' ĕmmĕk a-s kăyy ălɣalim n-Iṣrayil ogdăhăn d-a-wa-dăɣ, uhĕn-dăɣ wăr kăy-hen isălan n-a-wen-dăɣ? 11 Ălleɣeɣ-ak s-tidĕt tădduuttet a-s nĕtajj isălan n-a-wa nĕssăn, nĕtajăyha daɣ făll-a-wa nĕnhăy măšan kăwăneḍ, wăr tărḍem s-tajuhe-nănăɣ. 12 Ɣas, kunta wăr hi-tĕflesăm dihad hawăn-ăssewălăɣ dăɣ-isălan n-hărătăn wi n-ăddunya, ĕndek ĕmmĕk wa s-hi-mad-tĕflĕsăm afăl hawăn-ăssewălăɣ dăɣ-isălan wi n-tidĕt ĕlkămnen n-išĕnnawăn? 13 Wăr t-illa ere iwwaḍăn išĕnnawăn kunta wădden ere wa-tăn-dd-ifălăn, a-wen a t-ămoosăn Ăgg-ăgg-adĕm-i dăɣ-săn izzăɣăn. 14 Ǝmmĕk-wa-dăɣ s-issărjăj ănnăbi Mosa taššălt dăɣ-tenere, ĕmmĕk-wen-dăɣ daɣ a-s ilzam, ad-itwĕḍkĕl Ăgg-ăgg-adĕm, 15 dihen, ere săr-s omănăn-dăɣ, ad-ijrĕw tămudre tăɣlalăt 16 făl-a-s, Măssinăɣ, ija i-ăddunya tărha-ta-dăɣ făl ikfa Rure-s wa n-iyyăn i-ere săr-s omănăn-dăɣ, wăr-e ămmăt, ănn-ak, ad-ijrĕw tămudre ta tăɣlălăt; 17 Măssinăɣ, wăr dd-ăšmašăl Rure-s s-ăddunya i-ad-tăt-išrăɣ, ănn-ak i-ad-tăt-iɣlĕs. 18 Ere săr-s omănăn, wăr t-e-išrăɣ măšan, ere săr-s wărăn omen, ăru d-itbăt ăššăreɣa-net făl-a-s, wăr-omen s-Rure-s n-Măssinăɣ wa n-iyyăn. 19 Ăddălil n-ăššăreɣa-en, ĕnta da: osă-dd ănnur ăddunya măšan, ăssofăn dăgg-adĕm tihay ed timašalen-năsăn ti lăbasnen. 20 Ăwadĕm itamašalăn a lăbasăn hărkuk ăššunjăt ănnur, wăr dawa-s dd-itĕmmil ed ăksuḍ ad-dd-ĕffukkărăn erk imojjan-net 21 măšan, ere iglan făl tidĕt, wăr-ăksuḍ ad-dd-ăkk ănnur i-ad-dd-infilĕl a-s imojjan-net, Măssinăɣ a-s ĕssĕbab-năsăn." 22 Ḍarăt-a-wen, ikka Ɣisa d-inĕṭṭulab-net teje ta n-Ălyăhudĕyăt, ĕzzăɣăn dihen-dăɣ, ad-isalmaɣ ăddinăt. 23 A-s ija a-wen, Exya ĕnta, tisĕn-t-dd ăddinăt, isalmaɣ-tăn dăɣ-edăgg s-isĕm-net Anun dăɣ-ihĕẓ n-tadăbayt ta n-Salĕm făl-a-s, ĕjjĕtăn aman dihen. 24 A-wen itajj hărwa wăr hin-ătwăjăr Exya dăɣ-takărmut. 25 Tĕnkăr tamɣĕnnant jer-inĕṭṭulab n-Exya d-ăgg-Ălyăhud iyyăn dăɣ-isălan n-ălwă/l/la wa išăšdajăn ɣas, 26 ĕkkăn-t-dd, ĕnnăn-as: "Ălɣalim, ăhalĕs wa s-kăla dăr-s tărtăyăd făll-tăjjĕyhăd făll-ašrut n-ejănš n-Ɣurdĕni wa iyyăḍăn, ămăra isalmaɣ ĕnta-dăɣ, takkăn-t ăddinăt iket-năsăn." 27 Inn'-asăn Exya: "Ăgg-adĕm, wăr-e ăj ar a-wa dăr-t-ăskăllăf Măssinăɣ. 28 Wădden, tăjjĕyhăm iket-năwăn a-s ĕnneɣ: 'Năkk, wăr-ămoosăɣ Ălmasex, ămišĕl ɣas a dd-jeɣ data-s.' 29 Nĕssan a-s ămaẓlay ĕnta a ilăn tămaẓlayt măšan, amidi n-ămaẓlay-i ɣur-săn t-illăn ăsijăd, ăsidăwăt-t emăsli n-ămaẓlay wa s-isăll. Ǝlmĕdăt a-s tedăwit-ten-dăɣ ităjj amidi n-ămaẓlay, a jeɣ năkk-dăɣ ămăra, tedăwit-in daɣ, tĕjlay, tĕmda. 30 Imɣaret isĕm-net, ifnĕẓet wa-nin." 31 "Ere wa dd-ifălăn išĕnnawăn, ojăr ăddinăt iket-năsăn, ere wa dd-ifălăn ăkall, i n-ăkall, wăr mad-ăj daɣ ar isălan n-ăkall-i-dăɣ măšan, ere wa dd-ifălăn išĕnnawăn, ((ojăr ăddinăt iket-năsăn ed)) 32 ĕnta isălan n-a-wa inhăy d-a-wa islă a itajj măšan, wăr t-illa ere t-iflasăn. 33 Ere wa t-iflăsăn, ăssiitbăt tĕnna n-Măssinăɣ 34 făl-a-s, ere wa dd-ăšmašăl Măssinăɣ, a-wa innă Măssinăɣ a ijanna ed ăsinăflăy-t Măssinăɣ dăɣ-isuf n-Unfas-net. 35 Abba ikna tărha n-Rure-s, hărăt iket-net a ija dăɣ-ifassăn-net. 36 Ere wa omănăn s-Rure-s, ijraw tămudre ta tăɣlălăt, ere wa săr-s wărăn omen, wăr mad-inhĕy tămudre ta ihăkk Măssinăɣ ed, insa fălla-s aḍkăr n-Măssinăɣ."

4

1 Ilmăd Ɣisa a-s ĕslăn kăl-faris a-s ojărăn inĕṭṭulab wi isălmaɣ ĕnta, uhĕn wi isălmaɣ Exya, a-wen-dăɣ a ăɣelăn. 2 Tidĕt a-s, Ɣisa ĕnta iman-net, wăr t-illa ere ăssilmăɣ, inĕṭṭulab-net ɣas a salmaɣnen ăddinăt. 3 Ifăl teje ta n-Ălyăhudĕyăt, olăs tikawt n-ta n-Galila 4 măšan, i-ad-ăj a-wen, ilzam-t ad-ijlĕy teje ta n-Sămari. 5 Ăssookal har dd-iwwăḍ aɣrĕm n-Sămari s-isĕm-net Sišar, ikkă dihen anu wa ihăn ašĕkrĕš wa iɣăš ănnăbi Yaqub tĕzzar ikf'-e i-rure-s Yusĕf, anu-en, iwăr-t isĕm wa n-Yaqub. 6 Osă-dd anu ɣas, ăqqimă făll-emm-net i-ad-isunf a-wa-dăɣ has-ija alĕḍḍeš n-asikĕl. A-wen a itajjăn s-tarăhut. 7 Ăqqiima făll-emm n-anu-en-dăɣ a-s dd-tosa tu-Sămarit dd-tĕšrajăt, inn'-as Ɣisa: "Tamăḍt, săsw'-ahi-dd." 8 A-s ităjj a-wen-dăɣ, ĕkkan inĕṭṭulab-net aɣrĕm i-ad-dd-žĕnšĕn imĕnsiwăn ĕkšăn. 9 Tĕnn'-as tamăḍt: "Ma kăy-ăsihălăn kăyy-i n-ăgg-Ălyăhud, ad-dăɣ-i tĕttărăd aman năkk-i n-tu-Sămarit?" Ăzzăman-en, kăl-Ălyăhud d-kăl-Sămari, wăr-ănmănnăkăn. 10 Inn'-as Ɣisa: "Ǝnnar tĕssanăd făll-isuf n-Măssinăɣ d-ere wa ham-ijănnen: 'săsw'-ahi-dd'; kămm a has-madăn-ănn: 'săsw'-ahi-dd'; ăkf'-im ĕnta, aman ĕddărnen." 11 Tĕnn'-as tamăḍt: "Ălɣalim, anu-i, i šĕjreen, kăyy daɣ wăr led ăja, ɣas, ĕndek ĕmmĕk wa s-mad-dd-tĕjrĕwăd aman ĕddărnen wi s-jănned? 12 Ajăn tojărăd abba-nănăɣ ănnăbi Yaqub-i hanăɣ-ikfăn anu-i-dăɣ dăɣ-iswa ĕnta d-aratăn-net d-irĕzzejăn-net?" 13 Inn'-as Ɣisa: "Ere iswăn aman n-anu-i-dăɣ, ad-alĕs fad 14 măšan, ere iswăn aman-wi t-mad-ăkfăɣ, wăr dăɣ-s ilkem fad ed, ad-dăɣ-s umasăn aman wi t-mad-ăkfăɣ, a dăɣ-has-dd-tĕffay tămudre ta tăɣlălăt." 15 Tĕnn'-as tamăḍt: "Ălɣalim, săsw'-ahi dăɣ-aman-win-dăɣ i-ad-ăbas tifadăɣ, ĕbḍĕwăɣ s-iyyăt d-ašăroj n-anu-i-dăɣ." 16 Inn'-as Ɣisa: "Ǝglĕw, idaw-dd d-ăhalĕs-năm, tăqqĕlăd-ahi-dd." 17 Tĕnn'-as tamăḍt: "Wăr-ădobănăɣ." Inn'-as Ɣisa: "Tĕnned tidĕt a-s wăr tădobănăd 18 făl-a-s, jed sĕmmos idubnawăn măšan, tĕzjărăt-tăn-dd iket-năsăn, ăhalĕs daɣ wa dăr-tărtăyăd ămăra-dăɣ, wăr tămsăxlălăm." 19 Tĕnn'-as tamăḍt: "Ălɣalim, hannăyăɣ a-s kăyy ya ănnăbi a tămoosăd! 20 Ibda abbatăn-nănăɣ aḍaɣ-wa-dăɣ a făll-ɣabbădăn Măssinăɣ măšan, kăwăneḍ-i n-kăl-Ălyăhud, tĕnnăm wăr t-illa ălɣibadăt n-Măssinăɣ ar dăɣ-Yărussălam." 21 Inn'-as Ɣisa: "Tamăḍt, ĕflĕs-ahi, ilkam ălwăqq d-wăr mad-tăɣbĕdăm Abba făll-aḍaɣ-wa-dăɣ wăla dăɣ-Yărussălam. 22 Kăwăneḍ, ɣabbădăm a wăr tĕssenăm măšan, năkkăneḍ nĕssan ere wa nĕɣabbăd ed, ĕlɣĕllas, kăl-Ălyăhud a dd-ifăl. 23 Măšan, ilkam ăssaɣăt s-ĕnta-da-dăɣ nĕha ămăra-dăɣ dăɣ-mad-ăɣbĕdăn imumĕnăn wi n-tidĕt Abba s-tidĕt dăɣ-ĕnniyătăn-năsăn făl-a-s, inaɣbadăn ĕjlaynen šund-win-dăɣ a has-ĕjraẓnen. 24 Măssinăɣ, Unfas, wăr-itĕtwĕnhĕy, a-wen-dăɣ a făl ere t-iɣabbădăn, iɣbĕdet-t s-ĕnniyăt d-tidĕt." 25 Tĕnn'-as tamăḍt: "Ǝssanăɣ a-s Wa innĕfrănăn s-itawănna Ălmasex, ilkam ad-dd-ass, afăl dd-osa, ad-hanăɣ-isĕssiɣĕd dăɣ-hărăt iket-net." 26 Inn'-as Ɣisa: "Năkk-i-dăɣ ham-ămmiijrădăn a t-ămoosăn." 27 Ămmiijrăd-as Ɣisa hărwa a-s dd-ĕqqălăn inĕṭṭulab-net. Iqqăn a-wa s-ămmijrăd i-tamăḍt iɣăfawăn-năsăn măšan, hakd a-wen-dăɣ, wăr tăn-iha-i t-ăssistănăn d-a-wa dăɣ-s irha wăla a-wa făl dăr-s ădiwănnăt. 28 Toyyă tamăḍt aɣăsis-net dihen-dăɣ, tăqqăl aɣrĕm, tĕnnă i-ăddinăt: 29 "Ǝyyăwăt, ĕnhĕywăt ăhalĕs hi-illăɣen a-wa s-kăla t-jeɣ iket-net, ămmuukkăn a-s ĕnta-i-dăɣ a-s Ălmasex." 30 Ǝzjărăn-dd kăl-aɣrĕm, ĕkkăn-dd Ɣisa. 31 A-s ităjj a-wen, salɣadăn inĕṭṭulab ălɣalim-năsăn i-ad-ămmăklăw 32 măšan, inn'-asăn: "Năkk, leɣ a ĕkšeɣ wăr tĕssenăm." 33 Ad-tinmĕnnin: "Ajăn iwwăy-as-dd ăwadĕm amĕnsi ḍara-năɣ?" 34 Inn'-asăn Ɣisa: "Amĕnsi-nin, iji n-erhet n-Wa hi-dd-ăšmašălăn, sĕtbĕtăɣ ămašal-net. 35 Wădden a jannem diha-dăɣ s-ĕkkoẓ orăn ad-ămalăyăn išĕkraš? Ǝnneɣ-awăn: ĕnhĕywăt, ĕḍkĕlăt tiṭṭawen-năwăn, tĕkyĕdăm dăɣ-išĕkraš, ĕ/n/nan, wăr-ĕrhen ɣas ar amili. 36 Ăssaɣăt wa d-ijarrăw ănaxdim wa itilĕyĕn išĕkraš ălxaqq n-tide-net, ĕnta-da-dăɣ dăɣ-tĕssĕba n-ad-isĕdĕw allon-net i-tămudre ta tăɣlălăt, i-ad-imzĕyyĕt ănaxdim-wa ăddomen d-wa itilĕyĕn tedăwit 37 ed, oẓẓ wa innăn: 'ăddomăt iyyăn, olăy wa iyyăḍăn', innă tidĕt. 38 Năkk, ăssokăɣ-kăwăn illuy n-išĕkraš dăɣ-wăn wăren irh' ăṣṣahăt, iyyăḍ a tăn-ixdămăn, tărbăxăm kăwăneḍ-dăɣ ăṣṣahăt-năsăn." 39 Omănăn kăl-Sămari n-aɣrĕm-ĕnnin-dăɣ ăjjootnen s-Ɣisa dăɣ-tĕssĕba n-tajuhe ta hasăn-tĕja tamăḍt a-s hasăn-tĕnna: "Illăɣăt-ahi a-wa s-kăla t-jeɣ iket-net." 40 A-wen-dăɣ a făl osăn-dd Ɣisa ɣas, dălăn-t d-ad-ɣur-săn izzăɣ, ija ɣur-săn ĕssin išilan. 41 Ǝslăn-as ĕnta iman-net ămmijrăd ɣas, jăn wi săr-s omănnen ĕjut ojărăn wĕnnin. 42 Ǝnnăn wi săr-s omănnen i-tamăḍt: "Ămăra, ăbas săr-s noman dăɣ-tĕssĕba n-a-wa hanăɣ-tĕnned, nĕsl'-as iman-nănăɣ, nomăn daɣ a-s ădduuttăt a-s ĕnta a-s Ămaɣlas n-ăddunya." 43 Ăssakăy Ɣisa ĕssin išilan-win-dăɣ dihen ɣas, ikkă teje ta n-Galila 44 ed, issan a-s: "Wăr t-illa ănnăbi ătiwăsămɣărăn dăɣ-ăkall-net." 45 Măšan, diha-dăɣ d-hin-iwwăḍ Galila, ad-t-ăsbărrăkăn kăl-ăkall ed, ĕnhăyăn dăɣ-săn i ăjjootnen dăɣ-wi ăssakăynen ămudd dăɣ-Yărussălam a-wa ija Ɣisa iket-net. 46 Iqqăl Ɣisa ḍarăt-a-wen tadăbayt ta n-Kăna hăt teje ta n-Galila dăɣ-ăsmăskăl aman, ij'-en aman n-lăɣnăb ăxxiimmărnen. A-s ităjj a-wen-dăɣ, ih' ăgg-ĕlxĕkum iyyăn s-ărhin rure-s aɣrĕm wa n-Qăfărnaxum. 47 Islă a-s Ɣisa ifăl-dd Ălyăhudĕyăt s-Galila ɣas, ikk'-e-hi-dd, ad-t-ilaqqăd i-ad-dd-itrur, izuzĕy rure-s s-išwar t-ăba. 48 Inn'-as Ɣisa: "Adiš kăwăneḍ a tĕkkăm wăr tĕnheyăm ijităn n-Măssinăɣ d-tikunen, wăr-e tamĕnăm s-Măssinăɣ." 49 Inn'-as kăbtăn: "Ălɣalim, năglet šik iket-di d-wăr-ămmut alyaḍ-in." 50 Inn'-as Ɣisa: "Ǝglĕw, rure-k iddar." Iflăs kăbtăn a-wa has-innă Ɣisa, iglă. 51 Ikka-dd ehăn-net hărwa a-s has-dd-ĕlkăḍăn inaxdimăn-net, ĕnnăn-as: "Rure-k, iddar." 52 Issĕstăn-tăn d-ăssaɣăt wa-dăɣ ijrăw ălafu, ĕnnăn-as: "Ǝnḍĕšel s-tezzar ad-t-toyyă tenăde." 53 Inhăy abba n-alyaḍ a-s ălwăqq-wen-dăɣ iman-net ad-has-innă Ɣisa: "Rure-k, iddar". Omăn ašăl-wen-dăɣ s-Ɣisa ĕnta hakd ejădăš-net iket-net. 54 Iji n-Măssinăɣ wa-dăɣ a-s wa s-ĕssin ija Ɣisa ḍarăt efel-net i-Ălyăhudĕyăt s-Galila.

5

1 Ijă ămudd iyyăn daɣ n-kăl-Ălyăhud ɣas, olăs Ɣisa tikawt n-Yărussălam. 2 Yărussălam, ujĕš-net wa s-itawănna wa n-tihatten, h'-e tăsahaɣt n-aman s-isĕm-net dăɣ-Ɣăbranĕyya: Bătẓata, ăɣlaynăt-tăt sĕmmosăt tisĕkla 3 daw-ĕnsan imarhinăn d-imĕddorɣal d-inĕbdan d-inaɣyabăn ăjjootnen ((ăqqalnen i-emăremar n-aman 4 făl-a-s dehiyyăn, itizĕbbut-dd ănjălos n-Emăli dăɣ-tăsahaɣt, isĕmrumăr aman-net. Ere ăzzarăn s-ujĕš n-aman-en-dăɣ ḍarăt a-s tăn-ăsimăramăr ănjălos, ad-izzĕy a tămoos turhĕnna-net dăɣ)). 5 Ins' ăhalĕs dihen ibdanăn a ilan kăraḍăt timĕrwen n-awătay d-ĕttam. 6 Inhăy-t Ɣisa insa, ilmăd dăɣ-iman-net a-s ăhoja ăssins'-e bĕddin-net dihen-dăɣ ɣas, inn'-as: "Ajăn tărhed ad-kăy-dd-iqqĕl ăssexăt-năk?" 7 Inn'-as anăbdon: "Ălɣalim, wăr leɣ ăwadĕm hi-ijărăn dăɣ-tăsahaɣt e-d ămramărăn aman. E-d săr-săn dd-ămhărhămărăɣ-dăɣ, ad-hi săr-săn išwăr ere hi-ojărăn armuḍ." 8 Inn'-as Ɣisa: "Ǝbdĕd, ĕḍkĕl asĕftăɣ-năk, ărjĕš." 9 Izzăy ăhalĕs ălwăqq-wen-dăɣ, iḍkăl asĕftăɣ-net, irjăš. Ašăl wa d-ităjj a-wen-dăɣ, ašăl n-ĕssĕbĕt-i n-tăsonfat. 10 Izzăy ɣas, osăn-t-dd imizărăn n-kăl-Ălyăhud, ĕnnăn-as: "Ajăn wăr tĕssenăd a-s ašăl-i, ĕssĕbĕt-i-dăɣ wăr hak-xălal aggay n-asĕftăɣ-năk." 11 Inn'-asăn: "Ăhalĕs wa hi-ăzozăyăn, a hi-innăn: 'Ǝḍkĕl asĕftăɣ-năk, ărjĕš.' " 12 Ǝnnăn-as: "Ma ămoos ăhalĕs wa hak-innăn: 'Ǝḍkĕl asĕftăɣ-năk, ărjĕš?' " 13 Ăhalĕs wa izzăyăn, wăr-izzey ere wa t-ăzozăyăn ed ăzozăy-t Ɣisa ɣas, izjăr tamĕtte. 14 Ămmoqqăs dăr-s Ɣisa ḍarăt-a-wen dăɣ-ehăn n-ămudd wa măqqărăn, inn'-as: "Ămăra d-tĕzzeyăd, wăr tolesăd iji n-abăkkaḍ, uksaḍ ad-kăy-ijrĕw a irnăn a-wa s-kăla kăy-ijrăw." 15 Igl' ăhalĕs ḍarăt-a-wen, illăɣăt i-imizărăn n-kăl-Ălyăhud a-s Ɣisa a t-ăzozăyăn. 16 Ǝslăn i-a-wen ɣas, ad-tattărăn arămas n-Ɣisa ed ămešăl iji n-Măssinăɣ wen-dăɣ dăɣ-ašăl n-ĕssĕbĕt-i n-tăsonfat. 17 Inn'-asăn Ɣisa: "Abba-nin, ixdam hărkuk, năkk-dăɣ, a-wen-dăɣ a jeɣ." 18 Ămoos a-wen ămăra ăsaru wa făl tattărăn imizărăn n-kăl-Ălyăhud iji n-iman-net ed ĕnnăn, wăr-issĕmɣăr ašăl wa n-ĕssĕbĕt-i n-tăsonfat, ăsisăgdăh daɣ iman-net d-Măssinăɣ ed, innă Abba-net a ămoos. 19 Inn'-asăn Ɣisa daɣ: "Ălleɣeɣ-awăn s-tidĕt tădduuttet a-s, wăr t-illa a ixaddăm Rure-s n-Măssinăɣ ar a-wa s-inhăy Abba-net ixdam-t, a-wa ămešăl Abba iket-net, ad-t-ămašăl Rure-s ĕnta-dăɣ 20 făl-a-s, Abba ikna tărha n-Rure-s, isakn'-e daɣ a-wa itamašal iket-net, ad-t-isĕkĕn daɣ ijităn ojărnen wi-dăɣ tĕmɣăre, ĕknĕn iɣăfawăn-năwăn uɣĕn. 21 Făl-a-s, ĕmmĕk wa s-dd-isănkar Abba inĕmmuttan i-ad-tăn-isudăr, ĕmmĕk-wen-dăɣ daɣ a-s ihakk Rure-s tămudre ere wa s-tăt-irha. 22 Wăr-išĕrrăɣ Abba ăwadĕm wăl' iyyăn măšan, ija ăššăreɣa n-hărăt iket-net jer-ifassăn n-Rure-s 23 dăɣ-tĕssĕba n-ad-t-sĕmɣărăn ăddinăt iket-năsăn s-ĕmmĕk wa s-ăssimɣărăn Abba-net. Ere wărăn issĕmɣăr Rure-s n-Măssinăɣ, wăr mad-isĕmɣăr Abba-i t-dd-ăšmašălăn. 24 Ălleɣeɣ-awăn s-tidĕt tădduuttet a-s ere ăsjădăn i-măjrăd-in, omăn s-wa hi-dd-ăšmašălăn, ijraw tămudre ta tăɣlălăt, wăr-e inhĕy ăššăreɣa, ănn-ak, ad-dd-ihlĕbbĕt dăɣ-ifassăn n-tamăttant, ijjĕš tămudre ta tăɣlălăt. 25 Ălleɣeɣ-ăwăn s-tidĕt tădduuttet a-s imal-dd ăssaɣăt s-ĕnta-da-dăɣ nĕha dăɣ-mad-ĕslĕn inĕmmuttan i-emăsli n-Rure-s n-Măssinăɣ. Wi has-maden-isĕll, ad-ĕddărăn 26 făl-a-s, ĕmmĕk-wa-dăɣ s-tămudre, ifassăn n-Abba a tĕha, ĕmmĕk-wen-dăɣ daɣ a-s ikfa Rure-s tădabit n-ad-isudăr ăddinăt. 27 Ǝnta a ikfă tădabit n-ăššăreɣa-năsăn ed ĕnta iman-net a-s Ăgg-ăgg-adĕm. 28 Ɣas, wăr tăqqănnet iɣăfawăn-năwăn făl-a-s, imal-dd ăssaɣăt dăɣ-mad-ĕslĕn inĕmmuttan iket-năsăn i-emăsli n-Ăgg-ăgg-adĕm. 29 Ašăl-en dd-nakkăr tamĕtte jer-inĕmmuttan, ăddinăt wi ămešălnen sărho, ad-dd-ĕnkărăn i-tămudre ta tăɣlălăt, wi s-tăllăbăst ɣas a ămešălăn, ad-dd-ĕnkărăn i-ăššăreɣa." 30 "Năkk, wăr t-illa făw a tajjăɣ d-iman-nin ɣas, tĕnna n-Măssinăɣ ɣas a-s šarrăɣăɣ, ăššăreɣa-nin daɣ hărkuk oɣad ed, wădden erhet wa n-iman-in a-s tattărăɣ iji-net, wăr tĕttărăɣ ar iji n-erhet n-Wa hi-dd-ăšmašălăn. 31 Afăl ăqqălăɣ tajuhe i-iman-in, wăr mad-tĕnfĕw tajuhe-nin hărăt. 32 Ere săl năkk a făll-i itajăyhen, ĕssanăɣ daɣ a-s tajuhe-net făll-i ĕnta, wăr tăt-iha ăššăk. 33 Wădden a-s tăšmašălăm ăddinăt s-Exya, ăjjĕyha făll-i. 34 Ǝlmĕdăt a-s năkk, wăr t-illa ăgg-adĕm dăɣ-tattărăɣ tajuhe măšan, a-wa hawăn-ĕnneɣ, ĕnnĕɣ-awăn-t dăɣ-derhan n-ad-tăɣlĕsăm. 35 Exya, a-s dd-osă, ămoos tefătelt tărɣat, tămilăwlăw măšan, wăr tĕtterăm ar tedăwit n-ăssaɣăt ĕnḍărrăn dăɣ-ănnur-net. 36 Năkk, leɣ tajuhe tojărăt ta făll-i ijă Exya făl-a-s, ijităn wi s-hi-ikfa Abba tădabit-năsăn, ĕntăneḍ-en-dăɣ a ăsidăttătnen s-ĕnta a hi-dd-ăšmašălăn. 37 Abba daɣ-i hi-dd-ăšmašălăn, ăsidăttăt a-wa ĕnneɣ măšan, wăr kăla tĕslăm i-emăsli-net, wăr kăla t-tĕnhăyăm daɣ, 38 tănimăšrăyăm daɣ i-măjrăd-net ed, wăr tomenăm s-ere wa dd-ăšmašăl. 39 Ǝlkĕttabăn n-Măssinăɣ di-dăɣ safăykem, tammăɣăm dăɣ-săn i-tămudre ta tăɣlălăt, a tajăyhanen făll-i 40 măšan, hakd a-wen-dăɣ, tunjayăm s-ad-hi-dd-tĕkkĕm năkk, i-ad-tĕjrĕwăm tămudre ta tăɣlălăt. 41 Tĕmmal-in wădden dăgg-adĕm a dd-tĕfal 42 măšan, ĕzzayăɣ-kăwăn, ĕssanăɣ a-s wăr tĕha tărha n-Măssinăɣ ulhawăn-năwăn. 43 Năkk-i dd-osăn făll-isĕm n-Abba-nin, tĕnkarăm-ahi măšan, afăl kăwăn-dd-osa ere iglan dăɣ-ălhimmăt n-iman-net, šik a-s mad-t-tăqbĕlăm. 44 Ǝndek ĕmmĕk wa s-mad-tamĕnăm kăwăneḍ-i wăren ĕtĕmmăɣ ar i-tĕmmal jer-iman-năwăn, a-s ija a-wen, wăr tĕmmeɣăm i-tĕmmal ta dd-fălăt Măssinăɣ-i n-iyyăn. 45 Wăr teɣalăt năkk a kăwăn-e-isĕḍlĕmăn dat-Abba, ănnăbi Mosa-i s-tĕnnăm ĕnta a dăɣ-jarăm ăṭṭăma, a kăwăn-e-isĕḍlĕmăn 46 făl-a-s, ĕnnar tĕflasăm ănnăbi Mosa, tamĕnăm săr-i ed, isălan-nin, iktab-tăn. 47 Ɣas, šămad wăr tĕflesăm a-wa iktăb, ĕndek ĕmmĕk wa s-mad-tĕflĕsăm a-wa hawăn-janneɣ?"

6

1 Ijlăy Ɣisa ḍarăt-a-wen s-asălim n-ejănš wa iyyăḍăn n-Galila s-itawănna wa n-Tibăryad. 2 Ǝlkămăn-as-dd ăddinăt ăjjootnen hannăynen ijităn n-Măssinăɣ wi s-izizuy imarhinăn. 3 Iwwăn taḍaɣt ĕnta d-inĕṭṭulab-net, ăqqima fălla-s. 4 Ăzzăman-en, ohaẓ-dd ămudd n-kăl-Ălyăhud wa s-itawănna Faṣka. 5 Iḍkăl Ɣisa akăyad-net, inhăy tamĕtte ta tăjjet t-dd-tĕkkăt ɣas, inna i-Fĕlibb: "Ǝndek diha d-mad-nĕžănš tijĕlwen ăššikšănen tamĕtte-ta-dăɣ?" 6 Irrum ɣas a t-itajj ed issan ɣur-iman-net a-wa mad-ăj. 7 Ăwwežăb-as Fĕlibb, inn'-as: "Kud-nĕžžĕnša tijĕlwen n-sănatăt timaḍ n-ărriyal n-aẓrĕf-dăɣ, wăr mad-igdăh a-wen i-tamĕtte jat ĕjut-wa-dăɣ kud-dăɣ s-afărs-afărs." 8 Iggăd-dd iyyăn dăɣ-inĕṭṭulab wa s-isĕm-net Idris n-ă/n/na-s n-Simyon Bĕṭrus, inn'-as: 9 "Ill'-e alyaḍ diha ilan sĕmmosăt tijĕlwen n-tărruza d-ĕssin imănan măšan, a-wen ma ikna dăɣ-tamĕtte jat ĕjut-wa-dăɣ?" 10 Inn'-asăn Ɣisa: "Săqqĕymăt tamĕtte." Eddăg-en, ăssiidwăl teyĕšše, tăqqima fălla-s tamĕtte iha a iwwăḍăn sĕmmos afḍăn n-ăhalĕs. 11 Iḍkăl Ɣisa tijĕlwen ti n-sĕmmosăt, ămmoy i-Măssinăɣ tĕzzar, ăẓun-tănăt i-tamĕtte. Ija a-wen-dăɣ daɣ i-imănan wi n-ĕssin, tĕkša tamĕtte har tăssakăy. 12 Ălwăqq wa d-ĕkšăn, ĕyyĕwănăn, innă Ɣisa i-inĕṭṭulab-net: "Sădwăt-dd ifărsăn wi ăjolăšnen i-ad-wăr-ibăxxĕs ĕttăɣam." 13 Ăsdăwăn-dd a-wa dd-ĕjlăšăn ăddinăt, osăn-t iḍnăy măraw deketăn d-ĕssin n-tijĕlwen. 14 Ǝnhăyăn ăddinăt iji n-Măssinăɣ wa s-iket t-ija Ɣisa ɣas, ĕnnăn: "Ădduuttăt a-s ĕnta-da-dăɣ ănnăbi wa ilăn s-a dd-ass ăddunya." 15 Ilmăd Ɣisa a-s ărhan ad-t-sĕmmĕnukĕlăn s-ăššil ɣas, ifăl-tăn, olăs aggan n-taḍaɣt ĕnta ɣas. 16 Ijă ehăḍ ɣas, ătrarăn-dd inĕṭṭulab-net ejănš, 17 ĕjjăšăn turăft n-aman, ad-jallăyăn ejănš s-efăyy wa n-aɣrĕm wa n-Qăfărnaxum. A-s ităjj a-wen-dăɣ, janăt tihay, wăr tăn-dd-ăwweḍ daɣ Ɣisa hărwa. 18 Inkăr-dd fălla-săn aḍu ăṣṣoohen, ănmăntaš ejănš. 19 Ăɣyămmen turăft n-aman-năsăn har ujĕjăn asălim n-ejănš s-a iwwăḍăn sĕmmos meɣ săḍis kelumetărăn tĕzzar, ĕnhăyăn-t, ikk'-en-dd, irjaš făll-aman. 20 Ărmăɣăn măšan, inn'-asăn: "Năkk a-wa, wăr tărmeɣăm." 21 Diha-dăɣ d-ĕttărăn ad-dd-ijjĕš turăft fălla-săn ad-tăsjăn, tĕḍăs ăkall wa ĕkkăn. 22 Ăffăw ɣas, ĕjrăhăn-in ăddinăt-wi wărnen asălim n-ejănš wa dd-fălăn a-s turăft n-aman tiyyăt ɣas a-s kăla tăsjăn dihen măšan, wăr dăɣ-s igla Ɣisa, inĕṭṭulab a dăɣ-s ĕglănen, ăkunăn. 23 Osănăt-dd daɣ turfen n-aman tiyyăḍ dd-falnen Tibăryad, ĕkkanăt-dd edăgg-wĕnnin dăɣ-ĕkšăn ăddinăt tijĕlwen ḍarăt tămayit ta ija Ɣisa i-Emăli. 24 Tĕjrăh-in tamĕtte a-s Ɣisa hakd inĕṭṭulab-net ăbas t-ĕllan dihen ɣas, ĕjjăšăn turfen n-aman ti s-iket dd-osănăt, ĕkkăn Qăfărnaxum, ĕmmaɣăn-as. 25 Ǝjrăwăn-t făll-asălim n-ejănš wa iyyăḍăn ɣas, ĕnnăn-as: "Ălɣalim, ĕmme dd-tosed diha?" 26 Inn'-asăn Ɣisa: "Ălleɣeɣ-awăn s-tidĕt tădduuttet a-s wădden ijităn n-Măssinăɣ wi tĕnhăyăm a făl hi-tammăɣăm, ănn-ak, tammăɣăm-ahi dăɣ-tĕssĕba n-tijĕlwen ti-dăɣ tĕyyĕwănăm. 27 Wăr tăxdemăm i-išĕkša-i s-ilkam ad-tăn-iba, ănn-ak, ăxdĕmăt i-išĕkša wi dd-tiirĕwnen săr-wăn tămudre ta tăɣlălăt-i kăwăn-mad-ăkf Ăgg-ăgg-adĕm, ed ĕnta-en-dăɣ a ăswăr Abba Măssinăɣ ešwăl-net." 28 Ǝnnăn-as: "Ǝndek ĕmmĕk wa s-mad-năxdĕm erhet n-Măssinăɣ?" 29 Inn'-asăn Ɣisa: "Erhet n-Măssinăɣ a t-ămoosăn ad-tĕflĕsăm wa dd-ăšmašăl." 30 Ǝnnăn-as: "Săkĕn-anăɣ iji n-Măssinăɣ wa hanăɣ-kăy-madăn-isĕflĕs. 31 Abbatăn-nănăɣ a-s ĕzzaɣăn tenere, ĕkšăn tajĕlla ta hasăn-dd-ăsfăl Măssinăɣ išĕnnawăn făl-a-s, iktab a-s: 'Ikf'-en Măssinăɣ tajĕlla dd-falăt išĕnnawăn i-ad-tăt-ĕkšĕn.' " 32 Inn'-asăn Ɣisa: "Ălleɣeɣ-awăn s-tidĕt tădduuttet a-s wădden ănnăbi Mosa a kăwăn-ikfăn tajĕlla ta dd-fălăt išĕnnawăn, Abba-nin ĕnta, ad-kăwăn-ăkf tajĕlla ta n-tidĕt dd-fălăt išĕnnawăn 33 ed, tajĕlla ta ihăkk Măssinăɣ a tăt-ămoosăn ere wa dd-ifălăn išĕnnawăn, ĕnta a ihakkăn tămudre i-ăddinăt." 34 Ǝnnăn-as: "Ălɣalim, ten-dăɣ tajĕlla, ăkf'-anăɣ-tăt hărkuk." 35 Inn'-asăn Ɣisa: "Năkk a-s tajĕlla ta hakkăt tămudre, wa hi-dd-ikkăn, wăr-ilkem ad-ălluẓ, wa săr-i omănăn wăr-ilkem ad-ăffud. 36 Ăssiilmădăɣ-kăwăn a-s tĕnhăyăm-ahi măšan, tunjăyăm tomănăm. 37 Ɣas, ĕlmĕdăt a-s ăddinăt-wi hi-ikfa Abba-nin a hi-dd-asĕn iket-dăɣ-năsăn, wăr mad-ăkfăɣ daɣ ărori-nin i-ere hi-dd-ikkan 38 ed, wăr dd-felăɣ išĕnnawăn i-ad-ăjăɣ erhet-in, fălăɣ-tăn-dd i-ad-ăjăɣ erhet n-Wa hi-dd-ăšmašălăn. 39 Erhet daɣ n-Wa hi-dd-ăšmašălăn a t-ămoosăn, ad-wăr-ăsbătăɣ wăl' iyyăn dăɣ-ăddinăt-wi hi-ikfa, ănn-ak, a irha ad-tăn-dd-sĕnkărăɣ dăɣ-tamăttant ašăl wa ilkămăn 40 făl-a-s, erhet n-Abba-nin ĕnta da: e d t-illăm ere săr-i omanăn năkk-i n-Rure-s, ad-ijrĕw tămudre ta tăɣlălăt, sĕnkărăɣ-t-dd dăɣ-tamăttant ašăl wa ilkămăn." 41 Ad-simtĕktikăn kăl-Ălyăhud jer-iman-năsăn făl-a-s innin inn'-asăn: "Năkk a-s tajĕlla ta dd-fălăt išĕnnawăn", 42 tinmĕnnin: "Ak wa ĕnta, wădden Ɣisa wa-dăɣ n-ăgg Yusĕf, nĕzzay ti-s, nĕzzay ma-s? Ɣas, ma t-isawănnen išĕnnawăn a dd-ifal?" 43 Ăwwežăb-asăn, inn'-asăn: "Ăyyăt fălla-wăn takšiwen, 44 wăr t-illa ere ăddoben ad-hi-dd-ăkk ar s-ad-t-dd-intaš Abba-nin săr-i, ere daɣ wa săr-i omănăn, ad-t-dd-sĕnkărăɣ dăɣ-tamăttant ašăl wa ilkămăn. 45 Ajăn wădden ĕktabăn ănnăbităn a-s: 'Ilkam ad-umasăn dăgg-adĕm iket-năsăn inĕṭṭulab n-Măssinăɣ', ɣas, ere islăn i-tĕnna n-Abba, irḍa s-a-wa t-issăɣra, ad-hi-dd-ăkk. 46 Ălmăɣna n-a-wen a-s wăr t-illa ere inhayăn Abba kunta wădden ere wa dd-ašmašăl Măssinăɣ, ĕnta ɣas a inhayăn Abba. 47 Ălleɣeɣ-awăn s-tidĕt tădduuttet a-s ere wa săr-i omănăn, ijraw tămudre ta tăɣlălăt. 48 Năkk a-s tajĕlla ta hakkăt tămudre. 49 Abbatăn-năwăn a-s ĕzzaɣăn tenere, ĕkšăn mana, a-wen tajĕlla n-talĕmmiẓt ta hasăn-dd-ăsfăl Măssinăɣ išĕnnawăn, hakd a-wen-dăɣ, ămmun, 50 măšan, tajĕlla ta dd-tĕšrăyăt dd-fălăt išĕnnawăn, ere tăt-ikšăn, wăr-e ămmăt. 51 Năkk a-s tajĕlla ta n-tămudre dd-fălăt išĕnnawăn, ere ikšan tajĕlla-ten-dăɣ, ad-iddar hărkuk; taɣĕssa-nin a-s tajĕlla-ten-dăɣ mad-ăkfăɣ i-ad-tĕddăr ăddunya." 52 Inna Ɣisa a-wen ɣas, tĕnkăr tamɣĕnnant tăṣṣoohet jer-kăl-Ălyăhud, ad-tinmĕnnin: "Ǝndek ĕmmĕk wa s-mad-hanăɣ-ăkf taɣĕssa-net i-ad-tăt-năkš?" 53 Inn'-asăn Ɣisa: "Ălleɣeɣ-awăn s-tidĕt tădduuttet a-s afăl wăr tĕkšem taɣĕssa-nin năkk-i n-Ăgg-ăgg-adĕm, tĕswĕm daɣ ašni-nin, wăr mad-tĕddărăm. 54 Ere ikšăn taɣĕssa-nin, iswă ašni-nin, ijraw tămudre ta tăɣlălăt, sĕnkărăɣ-t-dd daɣ dăɣ-tamăttant ašăl wa ilkămăn 55 făl-a-s, taɣĕssa-nin a-s amĕnsi wa n-tidĕt, ašni-nin a-s tesăse ta n-tidĕt. 56 Ere ikšăn taɣĕssa-nin, iswă ašni-nin, nosăɣ năkk d-ĕnta, heeɣ-t, ih'-ahi. 57 Ǝmmĕk wa s-iddăr Abba-i hi-dd-ăšmašălăn, ĕmmĕk-wen-dăɣ a-s ĕddarăɣ năkk-dăɣ. Ɣas, ere ikšăn taɣĕssa-nin dăɣ, ad-has-umasăɣ ĕssĕbab n-tămudre tăɣlalăt. 58 Ǝnta-da-dăɣ tajĕlla ta dd-fălăt išĕnnawăn tĕẓlăyăt d-tajĕlla ta ĕkšăn abbatăn-năwăn uhĕn-dăɣ, ămmun. Ere wa ikšăn tajĕlla ta ămoosăɣ, ad-iddar hărkuk." 59 Ǝnta-da-dăɣ ălxuṭbăt wa ija Ɣisa dăɣ-ehăn n-ăddin wa n-kăl-Ălyăhud ihăn aɣrĕm wa n-Qăfărnaxum. 60 Ǝslăn inĕṭṭulab-net ăjjootnen i-ălxuṭbăt wa s-iket t-ijă ɣas, ănmănnăn jer-iman-năsăn: "Wa măjrăd, ojăr-anăɣ, mi ăddoben asjĕd-has?" 61 Ilmăd Ɣisa ɣur-iman-net a-wa simtĕktikăn, inn'-asăn: "Ajăn wa măjrăd, ikm'-iwăn? 62 Kud-tăjjĕyhăm i-Ăgg-ăgg-adĕm har iqqăl dăɣ-išĕnnawăn edăgg wa s-kăla t-iha s-tizarăt, ma mad-tĕnnĕm? 63 Unfas n-Măssinăɣ a ihakkăn tămudre, taɣĕssa mălayăɣna. Imĕjridăn wi hawăn-jeɣ, hen tămudre ed, Unfas Šăddijăn a dd-falăn 64 măšan, iyyăḍ dăɣ-wăn hi-ĕlkamnen, wăr săr-i omenăn." Inn'-asăn Ɣisa a-wen ed issan ašăl ăzzarăn ăddinăt wi has-ĕlkămnen a-s ija a-wen wăr săr-s omenăn, issan daɣ dăɣ-săn ere wa t-madăn-isĕssăɣdăr. 65 Ăssewăḍ Ɣisa făll-a-wen, innă: "Ǝnta-den-dăɣ a-wa făl hawăn-ĕnneɣ ihĕnnin a-s wăr t-illa ere hi-dd-madăn-ăkk ar s-ad-ijraw turhajăt n-a-wen ɣur-Abba." 66 Ɣur-ten-dăɣ, ĕqqălăn ḍara-s inalkimăn ăjjootnen, ăbas has-ĕlkamăn. 67 Innăḍ-dd Ɣisa ḍarăt-a-wen s-inĕṭṭulab-net wi n-măraw d-ĕssin, inn'-asăn: "Kăwăneḍ-i-š, ajăn wăr tărhem uɣĕl ḍar'-i?" 68 Inn'-as Simyon Bĕṭrus: "Ălɣalim, mi mad-năkk? Kăyy a iṭṭafăn imĕjridăn-wi hakkănen tămudre ta tăɣlălăt; 69 noman săr-k, nĕkkas daɣ ăššăk a-s kăyy a-s Wa Šăddijăn dd-ifălăn Măssinăɣ." 70 Inn'-asăn Ɣisa: "Kăwăneḍ-i n-măraw d-ĕssin, ajăn wădden năkk a kăwăn-ăsnăfrănăn? Hakd a-wen-dăɣ, iyyăn dăɣ-wăn, iblis." 71 Măjrăd-wen-dăɣ, ij'-e Ɣisa făll-Yăhudĕs Ăgg Simyon wa n-Isxaryut făl-a-s, ĕnta-i-dăɣ n-iyyăn dăɣ-inĕṭṭulab wi n-măraw d-ĕssin a t-madăn-isĕssăɣdăr.

7

1 Ăllil Ɣisa ḍarăt-a-wen teje ta n-Galila făl-a-s, wăr irha ad-ilal ta n-Ălyăhudĕyăt ed, ăɣtafăn-as dăɣ-s imizărăn n-kăl-Ălyăhud i-ad-t-ănɣĕn kĕrĕf. 2 Ăzzăman-en, ohaẓ ămudd n-kăl-Ălyăhud wa s-e-d dd-ija ad-ĕzzăɣăn daw-ihĕktan. 3 Ǝggădăn-dd ayĕtma-s n-Ɣisa, ĕnnăn-as: "Ăkk Ălyăhudĕyăt i-ad-ĕnhĕyăn inĕṭṭulab-năk wi t-ĕllanen dihen ijităn-năk ĕntăneḍ-dăɣ, 4 ed ere irhan ad-săr-s ĕlmĕdăn ăddinăt, wăr-ixĕddĕm dăɣ-ufăr, ɣas, kunta tajjăd timašalen ogdăhnen d-a-wa-dăɣ asuksăḍ, ăj'-enăt dat-ăddunya iket-net." 5 Ǝnnăn-as ayĕtma-s a-wen ed wăr săr-s omenăn ĕntăneḍ-dăɣ. 6 Inn'-asăn Ɣisa: "Ălwăqq-in wăr-ija hărwa măšan, wa-năwăn ija hărkuk, 7 kăwăneḍ wăr tĕla ăddunya ăddălil făl kăwăn-tĕkšăr măšan, năkk tĕkšar-ahi ed, tajăyheɣ făll-ijităn-net wi lăbasnen. 8 Ăglăt ɣas kăwăneḍ, ăkkăt ămudd, năkk wăr t-ĕkkeɣ ed ăssaɣăt-in, wăr-iwweḍ." 9 Inn'-asăn Ɣisa a-wen ɣas, ăqqima dăɣ-Galila-en-dăɣ. 10 Ǝkkăn ayĕtma-s ămudd ɣas, ikk'-e ĕnta-dăɣ ḍarăt-a-wen, măšan, dăɣ-ufăr i-ad-wăr săr-s ilmed ăwadĕm. 11 Ij' ašăl wa n-ămudd ɣas, ad-has-tammăɣăn imizărăn n-kăl-Ălyăhud, sastanăn d-diha d-t-illa. 12 Tĕnkăr tamɣĕnnant dăɣ-tamĕtte dăɣ-isălan-net, ijanna aɣil iyyăn: "Ăwadĕm olaɣăn a ămoos", ijanna aɣil wa iyyăḍăn: "A făw, a-di, išinmĕšrĕy tamĕtte"; 13 măšan, hakd a-wen-dăɣ, wăr t-illa ere iḍakkălăn emăsli-net i-ad-amĕl Ɣisa făl tuksĕḍa n-imizărăn n-kăl-Ălyăhud. 14 Ăẓunăn išilan n-ămudd ɣas, ikka Ɣisa ehăn n-ămudd wa măqqărăn, ad-dăɣ-s isaɣra. 15 Ăkunăn kăl-Ălyăhud dăɣ-ălxikmatăn wi tăn-isasla har jannen: "Wa ălžahil, ĕnde d-dd-iɣra, mi t-issĕlmădăn ăttăfăssir n-ĕlkĕttabăn?" 16 Ăwwežăb-asăn, inn'-asăn: "A-wa săɣreɣ, wădden a dd-izjarăn erhet-in, erhet n-Măssinăɣ-i hi-dd-ăšmašălăn a dd-ifal. 17 Ɣas, ere irhăn ad-ămašăl erhet n-Măssinăɣ, ad-ilmĕd kunta asĕssăɣăr wa tajjăɣ Măssinăɣ a dd-ifal meɣ-i dd-ĕkneɣ ɣur-iman-in. 18 Ere itamăjradăn făll-iman-net, aḍkul n-iman-net ɣas a itattăr măšan, ere itattărăn tĕmmal n-wa t-dd-ăšmašălăn, tidĕt a ijanna, wăr t-iha a ifraɣăn. 19 Ajăn wădden ănnăbi Mosa a kăwăn-ikfăn Ăṭṭăwrăt? Adiš mafăl wăr tĕmišilăm a-wa hawăn dăɣ-s inna? Ma hawăn-ăɣšădăɣ a-s tattărăm tenăɣe-nin?" 20 Ǝnnăn-as: "Tidĕt-dăɣ a-s ih'-ik alšin, mi itattărăn tenăɣe-năk?" 21 Inn'-asăn Ɣisa: "Jeɣ data-wăn iji iyyăn ɣas, tăkunăm dăɣ-s, 22 amili, nĕssan a-s wădden ănnăbi Mosa a făll-dd-ăzzubbăt s-tizarăt, imɣarăn wi has-ăzzarnen a făll-dd-ăzzubbăt măšan, omăr-kăwăn săr-s ɣas, ad-samalayăm aratăn wăla dăɣ-ašăl n-ĕssĕbĕt-i n-tăsonfat. 23 Ɣas, šămad wăr kăwăn-ăšnămăšrăy d-Ăṭṭăwrăt asĕmmili n-ara dăɣ-ašăl n-ĕssĕbĕt-i n-tăsonfat, adiš, mafăl kăwăn făll-i ih' ălhăm făl-a-s innin ăzozăyăɣ ăwadĕm imdan dăɣ-ašăl n-ĕssĕbĕt? 24 He kăwăneḍ! Wăr tĕḍkeḍăm ăwadĕm s-a-wa s-tordăm, hannăyăm fălla-s, ĕḍkĕḍăt-t s-a-wa ămoosăn tidĕt." 25 Innă Ɣisa a-wen ɣas, ad-jannen iyyăḍ dăɣ-kăl-Yărussălam: "Ajăn wădden ĕnta-i-dăɣ a-s tattărăn tenăɣe-net? 26 Ǝnhĕywăt-t, ădiwănnăt dăr-săn s-ĕmmĕk wa s-irha uhĕn wăr t-illa a has-ɣaššădăn. Tordam a-s wădden asĕdĕttu a jăn imizărăn-nănăɣ a-s ĕnta-i-dăɣ a-s Ălmasex? 27 Ălwăxla a-s ĕnta-i, nĕssan siha s-dd-iha, a-s ija a-wen Ălmasex, wăr t-illa ere issanăn siha s-mad-dd-ihiy." 28 Iḍkăl Ɣisa emăsli-net, hărwa isaɣra dăɣ-ehăn n-ămudd wa măqqărăn, innă: "Wădden tĕzzayăm-ahi, tĕssanăm daɣ siha s-dd-heɣ măšan, hakd a-wen-dăɣ, ĕlmĕdăt a-s wăr dd-ăšmašălăɣ iman-in, ere wa hi-dd-ăšmašălăn, wăr t-tĕzzeyăm măšan, ădduuttăt; 29 năkk-i t-dd-ifălăn, ĕzzayăɣ-t ed ĕnta a hi-dd-ăšmašălăn." 30 Ǝttărăn arămas-net măšan, wăr t-illa ere t-iḍasăn ed ălwăqq-net, wăr dd-iwweḍ hărwa. 31 Omănăn ăddinăt ăjjootnen hanen ălžămaɣăt-en-dăɣ s-Ɣisa ɣas, ad-tinmĕnnin jer-iman-năsăn: "Ak tordam a-s Ălmasex făw kud-dd-osa-dăɣ, ajăn ad-ăj ijităn n-Măssinăɣ ojărnen wi ij' ăhalĕs-i-dăɣ!" 32 Ǝslăn kăl-faris i-aḍkul wa tĕja tamĕtte Ɣisa dăɣ-ătuktek ɣas, ĕssĕglăn imizărăn n-kăl-tikutawen d-kăl-faris ălgomităn n-ehăn n-ămudd wa măqqărăn i-ad-dd-ărmĕsăn Ɣisa. 33 Inn'-asăn Ɣisa: "Ǝlleɣ jere-wăn ălwăqq ĕnḍărrăn, ḍarăt-a-wen, ad-ăqqĕlăɣ ere wa hi-dd-Ăšmašălăn. 34 Ilkam dăɣ-wăn ad-hi-tĕmmăɣăm măšan, wăr mad-hi-tĕjrĕwăm ed siha s-ĕkkeɣ, wăr tăddobem aggaḍ-net." 35 Ănmănnăn imizărăn n-kăl-Ălyăhud jer-iman-năsăn: "Ǝndek ɣas edăgg wa mad-ăkk dăɣ-t wăr mad-nĕjrĕw? Tordam a-s irha ad-ăkk kăl-Ălyăhud wi ĕmmăhăšnen jer-kăl-Ălyunan meɣ tordam a-s kăl-Ălyunan-en-dăɣ a mad-ăkk i-ad-tăn-isăɣăr ămăra? 36 Meɣ ma tordam ĕndek ălmăɣna n-a-wa s-innă: 'Ad-hi-tĕmmăɣăm măšan, wăr hi-mad-tĕjrĕwăm' d-a-wa s-innă daɣ: 'Siha s-ĕkkeɣ, wăr tăddobem aggaḍ-net?' " 37 Ašăl wa išrăyăn măqqărăn d-imiddĕw ămudd, ibdăd Ɣisa dat-ălžămaɣăt, iḍkăl emăsli-net, innă: "Ere ăffudăn-dăɣ, aset-ahi-dd, ăswet. 38 Ere săr-i omănăn, ad-ĕnjĕyăn ijĕrwan n-aman ĕddarnen dăɣ-ulh-net s-ĕmmĕk wa s-tăn-innă ĕlkĕttab n-Măssinăɣ." 39 Innă Ɣisa a-wen, dăɣ-isălan n-Unfas n-Măssinăɣ wa mad-ĕjrĕwăn wi maden-amĕn săr-s ed a-s ităjj a-wen-dăɣ, wăr dd-ăzzubbăt Unfas Šaddijăn ed Ɣisa wăr-ijješ ălxurmăt-net hărwa. 40 Tĕslă tamĕtte ta tăsijădăt i-a-wa innă ɣas, inn' aɣil-net iyyăn: "Ădduuttăt a-s ănnăbi wa s-ătwănna ĕnta-da-dăɣ." 41 Inn' aɣil iyyăn daɣ: "Ălmasex lab ĕnta-da-dăɣ." Inn' aɣil wa iyyăḍăn: "Ajăn Ălmasex Galila a mad-dd-ifĕl? 42 Wădden inn'-anăɣ ĕlkĕttab n-Măssinăɣ a-s: 'Ălmasex ĕzzurĕyăt ta n-ămănokal Dawĕd d-tadăbayt-net Bătlehăm ta s-kăla dăɣ-s-izzăɣ a dd-mad-izjăr?' " 43 Tăẓun tamĕtte dăɣ-tĕssĕba n-Ɣisa, 44 ĕttărăn iyyăḍ dăɣ-săn ad-t-ărmĕsăn măšan, ikkă jere-săn, wăr t-illa ere t-iḍasăn. 45 Ǝqqălăn-dd ălgomităn n-ehăn n-ămudd wa măqqărăn, ĕnnăn-asăn imizărăn n-kăl-tikutawen d-kăl-faris: "Mafăl wăr t-dd-tĕlweyăm?" 46 Ǝnnăn-asăn ălgomităn: "Năkkăneḍ a nĕwa-dăɣ, wăr kăla nĕslă i-ăwadĕm ijan măjrăd irẓan wa ija ăhalĕs-i-dăɣ." 47 Ǝnnăn-asăn kăl-faris: "Adiš kăwăneḍ-dăɣ, ăšnămăšrăy-kăwăn? 48 Meɣ ajăn hannăyăm dăɣ-năɣ ămizăr meɣ ere tĕla taggayt ta n-kăl-faris săr-s omanăn? 49 Ajăn wăr hĕnnĕyăm a-s wăr săr-s omen ar ăddinăt wi n-ălžuhal wăren ĕssen a ihăn Ăṭṭăwrăt." 50 Iggăd-dd Nikodem wa n-u-faris s-kăla dd-ădwănnăt i-Ɣisa s-ehăḍ, inn'-asăn: 51 "Ajăn ăššăreɣa-nănăɣ isaḍlam ăwadĕm dat-ad-has-ĕslĕn ăddinăt, itwĕlmĕd a-wa iɣšăd?" 52 Ǝnnăn-as: "Ajăn kăyy-dăɣ Galila a kăy-tĕlăt? Sĕffĕyk ɣas ĕlkĕttabăn n-Măssinăɣ, tĕmmaẓ tĕkkăsăd-dd dăɣ-săn ănnăbi dd-ifalăn Galila." (( 53 Ḍarăt măjrăd-wen-dăɣ, hak ăwadĕm ikk' ehăn-net.

8

1 Odwa Ɣisa ĕnta ehăḍ-wen taḍaɣt ta n-ihĕškan wi n-ĕzzăytun. 2 Ăffăw ɣas, olăs-dd uɣĕl n-ehăn n-ămudd wa măqqărăn, tăddew-dd săr-s daɣ tamĕtte iket-net, ăqqima, ad-tăt-isaɣra. 3 Ǝwwăyăn-dd ălɣulam n-Ăṭṭăwrăt d-kăl-faris tamăḍt tăttirmăsăt dăɣ-ĕzzĕna, ĕssĕbdădăn-tăt dăɣ-ammas n-ălžămaɣăt tĕzzar, 4 ĕnnăn i-Ɣisa: "Ălɣalim, ta-dăɣ tamăḍt, a-s tăt-dd-năɣdăr, izinnĕw-tăt ăhalĕs iyyăn. 5 Dăɣ-isălan n-tiḍeḍen-ti maden-ăttărmăs dăɣ-ĕzzĕna, inn'-anăɣ ănnăbi Mosa dăɣ-Ăṭṭăwrăt a-s ad-tănăt-năkf sămmăjori n-tihun. Ămăra, năssistăn-kăy, ma tĕnned kăyy dăɣ-isălan-win-dăɣ?" 6 Otasăn ălɣulam n-Ăṭṭăwrăt d-kăl-faris asĕstan-net, wăr tĕmmăɣăn ɣas ar i-ăsaru făl t-ĕssĕḍlămăn. Ǝnnăn-as a-wen ɣas, ăddunkăt Ɣisa ad-ikattăb făll-ăkall s-assĕkăḍ-net. 7 Ăxwălăn-t s-asĕstan ɣas, iḍkăl-dd săr-săn asăwaḍ-net, inn'-asăn: "Ijăret-tăt dăɣ-wăn wa s-kăla wăr-ofa abăkkaḍ s-tăhunt ta tăzzarăt." 8 Ăddunkăt daɣ ḍarăt-a-wen, ad-ikattăb făll-ăkall. 9 Ǝslăn ălɣulam n-Ăṭṭăwrăt d-kăl-faris i-a-wa hasăn-inna ɣas, ĕglăn s-iyyăn-iyyăn, ɣur-wi wăššarnen har wi măḍroynen. Wăr dd-ăqqima dăɣ-edăgg-ĕnnin-dăɣ ar Ɣisa, tĕbdad data-s tamăḍt, dăɣ-ammas n-edăgg wa s-kăla dăɣ-s ibdăd ălžămaɣăt. 10 Ibdăd-dd săr-s Ɣisa, inn'-as: "Tamăḍt! Ma jăn ăddinăt wi s-kăla kăm-ĕṭṭăfăn? Ajăn ăbas kăm-ăsiwăr ăwadĕm wăl' iyyăn uḍlem?" 11 Tĕnn'-as: "Ăbo, Ălɣalim, ăbas t-illa ăwadĕm wăl' iyyăn." Inn'-as Ɣisa daɣ: "Wăr kăm-ĕssĕḍlămăɣ năkk-dăɣ, ămăra, ĕglĕw măšan, wăr tolesăd iji n-abăkkaḍ.")) 12 Innă Ɣisa ḍarăt-a-wen i-tamĕtte: "Năkk a-s ănnur n-ăddunya, ere-wa hi-ilkămăn wăr mad-irjĕš dăɣ-tihay, ănn-ak, ad-ijrĕw ănnur wa ihăkkăn tămudre." 13 Ǝggădăn-dd kăl-faris, ĕnnăn-as: "Kăyy ya tajăyhed făll-iman-năk, a-wen-dăɣ daɣ a ăsdătten a-s tajuhe-năk, bahu." 14 Inn'-asăn Ɣisa: "Kud-tajăyheɣ făll-iman-in-dăɣ, năkk, tajuhe-nin, tădduuttăt ed, ĕssanăɣ siha s-dd-heɣ, ĕssanăɣ daɣ siha s-hălăɣ măšan kăwăneḍ, wăr tĕssenăm siha s-dd-heɣ, wăla siha s-ĕkkeɣ. 15 Kăwăneḍ, tayĕtte ta n-dăgg-adĕm a-s šarrăɣăm ăddinăt, năkk wăr t-illa ere šarrăɣăɣ, 16 ḍarăt-a-wen daɣ, năkk, kud-ĕšrăɣăɣ ăwadĕm-dăɣ, a-s mad-tasĕm ăššăreɣa-nin, i n-tidĕt făl-a-s, wăr t-jeɣ d-iman-in ɣas, oharăɣ-t d-Abba-nin i hi-dd-ăšmašălăn. 17 Wădden iktab dăɣ-alămăr-năwăn a-s tĕgdăh tajuhe n-ĕssin ăddinăt i-asĕtbat n-hărăt. 18 Ăywa, năkk leɣ sănatăt tijuhawen, ămoosăɣ tajuhe făll-iman-in, ăjjĕyh'-ahi daɣ Abba-i hi-dd-ăšmašălăn." 19 Innă Ɣisa a-wen ɣas, ĕnnăn-as kăl-faris: "Abba-năk-i-š, ĕndek diha t-illa?" Inn'-asăn Ɣisa: "Wăr hi-tĕzzeyăm năkk wăla Abba-nin ed, ĕnnăr hi-tĕzzayăm, tĕzzĕyăm daɣ Abba-nin." 20 A-s ijă Ɣisa măjrăd-wa-dăɣ, isaɣra dăɣ-ehăn n-ămudd wa măqqărăn, edes i-ĕssĕndoqq wa dăɣ-inass aẓrĕf d-orăɣ wa tĕkkatăn ăddinăt i-ehăn n-ămudd wa măqqărăn măšan, wăr t-illa ere t-irmasăn ed, ălwăqq-net wăr dd-iwweḍ hărwa. 21 Inn'-asăn Ɣisa daɣ: "Tĕlkam dăɣ-i tekle, tekle daɣ dăɣ-mad-hi-tĕmmăɣăm măšan, ad-tămmătăm dăɣ-abăkkaḍ-năwăn ed, edăgg wa ĕkkeɣ, wăr tăddobem aggaḍ-net." 22 Ǝslăn kăl-Ălyăhud i-a-wen ɣas, ănmănnăn jer-iman-năsăn: "Tordam a-s wădden a-s ăbok ad-ănɣ iman-net a-s ijăn: 'Edăgg wa ĕkkeɣ, wăr tăddobem aggaḍ-net.' " 23 Inn'-asăn Ɣisa: "Kăwăneḍ ăddunya-i-dăɣ a kăwăn-lăt, năkk išĕnnawăn a hi-lănen, kăwăneḍ, tĕl'-iwăn ăddunya-ta-dăɣ, a-s ija a-wen năkk, wăr hi-tĕla. 24 A-wen-dăɣ daɣ a făl hawăn-ĕnneɣ a-s ad-tămmătăm dăɣ-ibăkkaḍăn-năwăn ed, ijmăḍ-t ăššăk a-s afăl wăr tomenăm a-s 'Năkk a iɣlalăn', ad-tămmătăm dăɣ-ibăkkaḍăn-năwăn." 25 Ǝnnăn-as: "Kăyy-š, mi tămoosăd?" Inn'-asăn Ɣisa: "Ămoosăɣ a-di-dăɣ s-ăru d-hawăn-ĕnneɣ: 'Năkk ăɣlalăɣ'. 26 Leɣ a ăjjeen fălla-wăn ĕnneɣ, ill'-e daɣ uḍlem ăjjeen kăwăn-ăswărăɣ măšan, Wa hi-dd-ăšmašălăn, ădduuttăt, wăr jĕnneɣ daɣ i-ăddunya ar a-wa s-has-ĕsleɣ har tăn-innă." 27 Inn'-asăn Ɣisa a-wen-dăɣ măšan, wăr ĕfhemăn s-isălan n-Abba-net a hasăn-itajj. 28 Inn'-asăn daɣ ălwăqq-wen: "Afăl dd-osa ašăl wa d-tĕnhăyăm Ăgg-ăgg-adĕm ămmiiḍkăl s-išĕnnawăn dăɣ-ammas-năwăn, dihen, ad-tĕlmĕdăm a-s: 'Năkk a iɣlalăn', tĕlmĕdăm daɣ a-s wăr t-illa a tajjăɣ d-iman-nin, wăr jĕnneɣ ɣas ar a-wa hi-issăɣra Abba. 29 Ǝnta-i hi-dd-ăšmašălăn, idhal-ahi, wăr hi-oyya d-iman-in ɣas ed, ĕnta ɣas a-s tamašalăɣ erhet-net hărkuk." 30 Orăw-dd măjrăd-wen-dăɣ ija Ɣisa, immun s-ăddinăt ăjjootnen. 31 Inna Ɣisa ḍarăt-a-wen i-kăl-Ălyăhud wi săr-s omănnen: "Afăl tĕkfăm iman-năwăn i-măjrăd-in, ad-tumasăm inĕṭṭulab ĕtbatnen, 32 tĕzzĕyăm tidĕt, sĕddărfĕt-kăwăn." 33 Ǝnnăn-as: "Năkkăneḍ-š wădden ĕzzurĕyăt n-ănnăbi Ibrahim a nămoos, wăr kăla hanăɣ-ikrăš ăwadĕm wăl' iyyăn ɣas, ĕnnăr ĕmmĕk wa s-jănned ad-năddărf?" 34 Inn'-asăn Ɣisa: "Ălleɣeɣ-awăn s-tidĕt tădduuttet a-s, e d t-illăm ăwadĕm itamašalăn abăkkaḍ, ăkkilăt-as. 35 Tĕssanăm a-s akli, wăr-itĕzzăɣ dăɣ-ehăn n-măssi-s hărkuk măšan, Rure-s n-măssi-s n-ehăn ĕnta, ad-dăɣ-s izzaɣ hărkuk. 36 Afăl kăwăn-ăsdărfăt Rure-s n-măssi-s n-ehăn, ad-tĕjrĕwăm iman-năwăn. 37 Ǝssanăɣ a-s ĕzzurĕyăt n-ănnăbi Ibrahim a tămoosăm măšan, hakd a-wen-dăɣ, tattărăm tenăɣe-nin făl-a-s, wăr-ijrew măjrăd-in edăgg dăɣ-ulhawăn-năwăn. 38 Năkk, wăr hawăn-jĕnneɣ ar a-wa ĕnhăyăɣ ɣur-Abba-nin ɣas, kăwăneḍ daɣ, wăr tĕjjĕm ɣas ar a-wa s-tĕslăm ɣur-abba-năwăn." 39 Ăwwežăbăn-as, ĕnnăn-as: "Năkkăneḍ, ănnăbi Ibrahim a-s abba-nănăɣ." Inn'-asăn Ɣisa: "Ǝnnar ihăyawăn n-ănnăbi Ibrahim a tămoosăm, ikad-di, tămašălăm a-wa ămešăl 40 măšan ămăra, kăwăneḍ-da-dăɣ, tattărnen tenăɣe-nin făl-a-s innin ĕnneɣ-awăn tidĕt-ta s-ĕsleɣ ɣur-Măssinăɣ, tăkunt šund-ten, wăr tăt-ija Ibrahim. 41 A-wen-dăɣ a făl hawăn-janneɣ a-s kăwăneḍ, ijităn n-abba-năwăn ɣas, a tamašalăm." Ǝnnăn-as: "Năkkăneḍ ya, wădden ikẓewăn a nămoos, Abba iyyăn a nĕla, a t-ămoosăn: Măssinăɣ." 42 Inn'-asăn Ɣisa: "Ǝnnar ămoos Măssinăɣ Abba-năwăn, tărhĕm-ahi ed ĕnta a dd-ĕzjarăɣ, ĕnta daɣ a dd-fălăɣ, wăr dd-ĕgleɣ d-iman-in, ĕnta a hi-dd-ăšmašalăn. 43 Ajăn ma hawăn-igdalăn ad-tĕjrăhăm a-wa hawăn-janneɣ? Igdal-awăn-t a-wa-dăɣ s-tunjăyăm asjĕd i-măjrăd-in. 44 Iblis a-s abba-năwăn, ĕnta a-s tăqbalăm amišĕl n-derhanăn-net, ĕnta-i-s s-alăṣăl dăɣ-emăjj n-iman, wăr kăla ibdăd făll-tidĕt ed, tidĕt făw a wăr-issen. E-d immĕjrăd-dăɣ, bahu ɣas a ijanna ed a-wen-dăɣ a-s agna-net făl-a-s, ănăsbahu a ămoos, ĕnta daɣ a-s abba n-bahu. 45 Năkk wăr hi-tĕflesăm ed tidĕt a hawăn-janneɣ. 46 Ǝndek dăɣ-wăn ɣas wa ăddoben ad-ăjjăyh a-s kăla ămešălăɣ abăkkaḍ? Šămad tidĕt a hawăn-janneɣ, adiš mafăl wăr hi-fĕllĕsăm? 47 Ere wa ila Măssinăɣ, asjĕd a itajj i-a-wa innă Măssinăɣ măšan, kăwăneḍ, wăr tămoosăm aratăn n-Măssinăɣ, a-wen-dăɣ a făl wăr hi-sĕjidăm." 48 Ăwwežăbăn-as kăl-Ălyăhud, ĕnnăn-as: "A-wa tidĕt-dăɣ a-s nĕnna kăyy u-Sămari a tămoosăd, ih'-ik alšin." 49 Inn'-asăn Ɣisa: "Năkk lab, wăr h'-iha alšin, semɣar ɣas a jeɣ Abba-nin, a-s ija a-wen kăwăneḍ, tunjayăm s-asĕmɣar-in. 50 Năkk, wăr tĕttărăɣ ad-hi-sĕmɣărăn ăddinăt, ill'-e ere wa itattărăn ad-hi-sĕmɣărăm, ĕnta-en-daɣ a kăwăn-madăn-išrăɣ. 51 Ălleɣeɣ-awăn s-tidĕt tădduuttet a-s ere iṭṭafăn măjrăd-in, wăr dăɣ-s ilkem ad-inhay tamăttant." 52 Ǝnnăn-as kăl-Ălyăhud: "Ɣur-ta-dăɣ, ad-nĕlmăd s-tidĕt-dăɣ a-s ih'-ik alšin, ajăn wădden Ibrahim hakd ănnăbităn wi iyyăḍnen, tĕmmăr-tăn-in tamăttant, ɣas kăyy, ma kăy-ăsihălăn tĕnna n-a-s: 'Ere iṭṭafăn măjrăd-in, wăr dăɣ-s ilkem ad-inhay tamăttant.' 53 Adiš kăyy ija ɣur-k a-s tojărăd abba-nănăɣ Ibrahim d-ănnăbităn wi iyyăḍnen ămmutnen? Ajăn kăyy, ma s-tăɣelăd tămoosăd-t?" 54 Inn'-asăn Ɣisa: "Ǝnnar iman-in ɣas a timĕlaɣ, wăr-inĕffĕw a-wen hărăt, Abba-nin-i s-tĕnnăm Emăli-năwăn a ămoos, ĕnta a hi-itimĕlăn. 55 Abba-nin-en, ĕzzayăɣ-t măšan kăwăneḍ, wăr t-tĕzzeyăm. Afăl hawăn-ĕnneɣ wăr t-ĕzzeyăɣ, ad-umasăɣ ănăsbahu dăr-wăn olăhăn. Ădduuttăt a-s Abba-nin, ĕzzayăɣ-t, tamašalăɣ daɣ măjrăd-net. 56 Ănnăbi Ibrahim daɣ-i s-jannem abba-năwăn a ămoos, iddĕwăt dăɣ-derhan n-ahănay n-ašăl wa n-tiwit-in, inhăy-t ɣas, ija tedăwit tĕmdat." 57 Innă Ɣisa a-wen ɣas, ĕnnăn-as kăl-Ălyăhud: "Kăyy, wăr led wăla-dăɣ sĕmmosăt timĕrwen n-awătay, uhĕn-dăɣ, hălăd ad-tĕnnĕd, tĕnhayăd ănnăbi Ibrahim?" 58 Inn'-asăn Ɣisa: "Ălleɣeɣ-awăn s-tidĕt tădduuttet a-s dat-tiwit n-Ibrahim, ĕlleɣ-t ed 'Năkk ăɣlalăɣ.' " 59 Ǝḍkălăn ălwăqq-wen-dăɣ tihun i-ad-t-ĕjrĕn săr-snăt măšan, iffăr-asăn dăɣ-tamĕtte, izjăr ehăn n-ămudd wa măqqărăn.

9

1 Ašăl iyyăn, irjaš Ɣisa a-s inhăy ăhalĕs s-a-s dd-iwa-dăɣ dărɣal. 2 Ǝssĕstănăn-t inĕṭṭulab-net, ĕnnăn-as: "Ălɣalim, ak ăhalĕs-i-dăɣ s-ad-dd-iwa-dăɣ dărɣal, ĕnta a ămešălăn abăkkaḍ wa has-ămoosăn ĕssĕbab n-tăddărɣălt meɣ imărawăn-net?" 3 Ăwwežăb-asăn, inn'-asăn: "Wăr-ofa abăkkaḍ ĕnta wăla imărawăn-net, ănn-ak Măssinăɣ a irhan ad-ăj ălɣib-net ĕssĕbab s-issĕkna tărna-net. 4 Iwar-anăɣ ad-năxdĕm tărha n-Wa hi-dd-ăšmašălăn hărwa ij' ašăl făl-a-s, imal-dd ehăḍ s-wăr t-illa ere ăddoben ălxidmăt dăɣ-s. 5 A ĕkkeɣ heɣ ăddunya-ta-dăɣ, năkk a-s ănnur-net." 6 Innă Ɣisa a-wen ɣas, ăssotăf făll-ăkall, issĕbdăj tălaɣt s-tisutaf-net tĕzzar, isĕls'-et tiṭṭawen n-emĕdderɣĕl. 7 Inn'-as ḍarăt-a-wen: "Ǝglĕw, ărdĕb dăɣ-tăsahaɣt n-aman ta n-Silwi." (Silwi, ălmăɣna-net: ănămmašul.) Iglă, irdăb-dd, a-s dd-iqqăl, ihannăy. 8 Ǝnhăyăn-t ănhărajăn-net d-ăddinăt wi t-ĕzzăynen hărwa dărɣal ɣas, ănmănnăn: "Ka! Ajăn wădden a-wa emĕdderɣĕl wa itaɣăymen dăɣ-tăšarrit itattăr takute dăɣ-ăddinăt?" 9 Inn' aɣil-năsăn: "Ewă/l/la ĕnta." Inn' aɣil wa iyyăḍăn: "Aa făw! Wădden ĕnta, milhaw ɣas a jan." Iggăd-dd emĕdderɣĕl iman-net ălwăqq-wen, inn'-asăn: "A-wa năkk wĕdi-dăɣ tĕzzăyăm." 10 Ǝnnăn-as: "Ǝndek ĕmmĕk wa s-ămerănăt tiṭṭawen-năk?" 11 Inn'-asăn emĕdderɣĕl: "Ăhalĕs wa s-isĕm-net Ɣisa a issĕbdăjăn tălaɣt, issĕls'-et tiṭṭawen-in tĕzzar, inn'-ahi: 'Ǝglĕw, ărdĕb dăɣ-tăsahaɣt n-aman ta n-Silwi'. Ǝkkeɣ tăsahaɣt n-aman ălwăqq-wen-dăɣ, ărdăbăɣ-dd dăɣ-s." 12 Ǝnnăn-as ăddinăt: "Wa kăy-ăzozăyăn-š, ma ija?" Inn'-asăn ăhalĕs: "Wăr-ĕssenăɣ." 13 Ǝmdăn ăddinăt d-asĕstan n-ăhalĕs wa s-kăla dărɣal ɣas, ăwwăyăn-t s-kăl-faris 14 făl-a-s, ašăl n-ĕssĕbĕt-i n-tăsonfat a dăɣ-issĕbdăj Ɣisa tălaɣt-ta ăswăr tiṭṭawen-net, or'-enăt. 15 Osă-dd emĕdderɣĕl wa izzăyăn kăl-faris ɣas, ĕssĕstănăn-t d-ĕmmĕk wa s-izzăy. Inn'-asăn: "Ăswăr Ɣisa tălaɣt tiṭṭawen-in, ărdăbăɣ, ĕnhăyăɣ." 16 Inn' aɣil n-kăl-faris iyyăn: "Wa-dăɣ Ɣisa, wăr-ămoos ănămmašul n-Măssinăɣ ed ĕnnar t-ămoos, isĕmɣăr ašăl wa n-ĕssĕbĕt-i n-tăsonfat." Inn' aɣil-năsăn wa-iyyăḍăn: "Ajăn anăsbăkkaḍ wăr-idhel Măssinăɣ, ăddoobăt amišĕl n-ijităn wi ităjj ăhalĕs-i-dăɣ ?" Ǝqqălăn-dd ɣas ămiɣănnănăn jer-iman-năsăn dihen-dăɣ. 17 Ǝssĕstănăn ḍarăt-a-wen emĕdderɣĕl wa izzăyăn, ĕnnăn-as: "Kăyy ma tĕnned, ma iqqal ăhalĕs wa orăn tiṭṭawen-năk?" Inn'-asăn: "Un ănnăbi a ămoos." 18 Ăɣrăn-dd imizărăn n-kăl-Ălyăhud ḍarăt-a-wen imărawăn n-emĕdderɣĕl făl-a-s, wăr-ĕflesăn a-s kăla dărɣal, izzăy. 19 Osăn-dd imărawăn n-ăhalĕs ɣas, ĕssĕstănăn-tăn: "Ak rure-wăn wa s-tĕnnăm a-s dd-iwa-dăɣ, dărɣal, ĕnta-da-dăɣ meɣ? Kunta daɣ a dd-iwa-dăɣ, dărɣal, ĕndek ĕmmĕk wa s-ămăra, ihannăy?" 20 Ǝnnăn-asăn imărawăn n-ăhalĕs: "Tidĕt lab a-s a-wa rure-năɣ, wăr t-ih' ăššăk daɣ s-a-s dd-iwa-dăɣ, dărɣal 21 măšan, dăɣ-isălan n-ĕmmĕk wa s-ihannăy ămăra d-ere wa orăn tiṭṭawen-net, a-wen, wăr hanăɣ-ha tijya-net, sĕstĕnăt-t ĕnta iman-net ed ăhalĕs iššamăn a ămoos, ăddoobăt ad-ăj isălan n-a-wa t-iqqălăn." 22 Tuksĕḍa n-imizărăn n-kăl-Ălyăhud a tăswănnăt imărawăn-net a-wen făl-a-s, ăssiibdădăn imizărăn n-kăl-Ălyăhud s-e d t-illăm ere irḍăn a-s: "Ɣisa a-s Ălmasex", ad-has-ĕgdĕlăn ujĕš n-ehăn n-ăddin wa n-kăl-Ălyăhud. 23 Dăɣ-tuksĕḍa n-a-wen-dăɣ a făl ĕnnăn imărawăn n-ăhalĕs: "Ăhalĕs iššamăn a ămoos, sĕstĕnăt-t ĕnta iman-net." 24 Olăsăn-dd kăl-faris teɣăre n-ăhalĕs wa s-kăla dărɣal, ĕnnăn-as: "Ănn tidĕt i-Măssinăɣ făl-a-s, nĕssan a-s wa kăy-ăzozăyăn, anăsbăkkaḍ a ămoos." 25 Inn'-asăn: "Kunta anăsbăkkaḍ a ămoos wăla, wăr-ĕssenăɣ; hărăt iyyăn a ĕssanăɣ: kăla dărɣalăɣ, ămăra, hannăyăɣ." 26 Ǝnnăn-as daɣ: "Lăɣăt-anăɣ ma hak-ija? Ǝndek ĕmmĕk wa s-ora tiṭṭawen-năk?" 27 Inn'-asăn ăhalĕs: "Wădden ăru d-hawăn-tăn-ĕnneɣ măšan, wăr hi-tăsjădăm ɣas, mafăl tărham daɣ ad-hawăn dăɣ-s ăqqĕlăɣ? Adiš a tărham ad-tumasăm kăwăneḍ-dăɣ hărăt dăɣ-inĕṭṭulab-net?" 28 Inn'-asăn a-wen ɣas, ad-t-gaggărăn, jannen-as: "Aa tĕfĕw! Kăyy ɣas a-s ănăṭṭalib-net, năkkăneḍ, inĕṭṭulab n-ănnăbi Mosa a nămoos, 29 nĕssan daɣ a-s ănnăbi Mosa immĕjrăd-as Măssinăɣ măšan, wa-hi, wăr nĕssen e-s dd-iha." 30 Inn'-asăn emĕdderɣĕl wa izzăyăn: "Adiš tăqqăn n-eɣăf tĕja hărwa ed, ĕnta a orăn tiṭṭawen-in măšan hakd a-wen, wăr tĕssenăm e-s dd-iha." 31 Inn'-asăn daɣ: "Nĕssan a-s Măssinăɣ, wăr iɣĕbbĕl tittar n-inăsbăkkaḍăn măšan, iɣabbăl tittar n-e d t-illăm ere t-ăksuḍăn, itamašalăn erhet-net. 32 Nĕssan daɣ a-s wăr kăla ătwăsla ăwadĕm oran tiṭṭawen n-ere s-a-s dd-iwa-dăɣ, dărɣal. 33 Ɣas, ăhalĕs-i-dăɣ, ĕnnăr wădden Măssinăɣ a dd-ifal, wăr-ikĕrrĕš tădabit n-a-wa ităjj." 34 Issĕmdă emĕdderɣĕl wa izzăyăn d-măjrăd ɣas, ĕnnăn-as: "Ewad! Kăyy iket-năk abăkkaḍ a dăɣ-wed, ma kăy-ăsihălăn ălxuṭbăt wa hanăɣ-tăjjăd?" Ăššewăjăn săr-s ḍarăt-a-wen har t-ĕzzĕzjărăn ehăn n-ăddin wa hăn. 35 Islă Ɣisa a-s ĕkkăsăn-t dăɣ-ehăn n-ăddin-năsăn ɣas, os'-e-hi-dd, inn'-as: "Ak kăyy tomanăd s-Ăgg-ăgg-adĕm meɣ?" 36 Inn'-as ăhalĕs wa s-kăla dărɣal: "Ălɣalim, săkĕn-ahi-t ɣas ad-săr-s amĕnăɣ." 37 Inn'-as Ɣisa: "Tĕnhăyăd-t ed, ĕnta-da-dăɣ hak-ămmijrădăn ămăra-dăɣ." 38 Inn'-as ăhalĕs ălwăqq-wen: "Ălɣalim, omanăɣ săr-k." Irkăɣ dat-Ɣisa ăssaɣăt-wen-dăɣ. 39 Innă Ɣisa i-tamĕtte ḍarăt-a-wen: "Năkk, oseɣ-dd i-ad-ĕbḍĕwăɣ jer-ăddinăt: wi dărɣalnen, ad-ĕnhĕyăn, wi hannăynen, ad-ăddărɣălăn." 40 Ǝslăn kăl-faris wi t-ĕllănen ɣur-Ɣisa i-măjrăd-wen-dăɣ ija ɣas, ĕnnăn-as: "Ajăn năkkăneḍ-dăɣ imĕddorɣal a nămoos?" 41 Inn'-asăn Ɣisa: "Ǝnnăr tămoosăm imĕddorɣal, wăr kăwăn-itĕgger uḍlem wa n-abăkkaḍ măšan, dăɣ-tĕssĕba n-a-di-dăɣ s-tĕnnăm hannăyăm, a făl, tumast-năwăn i-inăsbăkkaḍăn, tĕtbat."

10

1 Inn'-asăn Ɣisa ḍarăt-a-wen: "Ălleɣeɣ-awăn s-tidĕt tădduuttet a-s e d t-illăm ere dd-ijjašăn afăraj n-arĕzzej s-ašrut săl wa n-emm-net, emăkrăḍ d-ănarkab a ămoos, 2 măšan, amăḍan n-tihatten ĕnta, emm n-afăraj a-s dd-itajjăš făll-tihatten-net. 3 E-d tănăt-dd-osa, ad-has-arr ănaɣlaf-năsnăt s-ehăḍ emm n-afăraj. Afăl has-ămera afăraj har dd-ijjăš fălla-snăt, ad-ĕslĕnăt tihatten-net i-emăsli-net, iɣăr hak iyyăt s-isĕm-net tĕzzar, izĕzjăr-tănăt, 4 afăl tănăt-dd-izzĕzjăr iket-năsnăt, ad-imĕl data-snăt, ĕlkĕmnăt-as ed, ĕzzaynăt emăsli-net. 5 Amăḍan-en, tihatten-net, wăr mad-ĕlkĕmnăt i-amăjar, ănn-ak, ad-has-ĕffoqqĕtnăt ed, wăr-ĕzzeynăt emăsli-net." 6 Ăsnăfăqq'-asăn Ɣisa isălan-win-dăɣ măšan, indăr-asăn ad-ĕfhĕmăn a dăɣ-hasăn-ăssewăl. 7 Olăs daɣ, inn'-asăn: "Ălleɣeɣ-awăn s-tidĕt tădduuttet a-s năkk a-s emm n-afăraj wa s-tajjăšnăt tihatten, 8 ăddinăt-wi hi-dd-ăzzarnen, imăkrăḍăn d-inarkabăn a ămoosăn iket-dăɣ-năsăn, wăr hasăn-ăsjădnăt tihatten; 9 năkk a-s emm n-afăraj, ere săr-i t-dd-ijjăšăn-dăɣ, ad-iɣlĕs, ad-igillĕw, itaqqăl-dd, ijarrăw daɣ amăḍon. 10 Emăkrăḍ ĕnta, wăr dd-itis ar i-tikra d-aɣăras d-ahălak; năkk, oseɣ-dd i-ad-ĕjrĕwăn dăgg-adĕm tămudre, ĕjrĕwăn-tăt daɣ s-tănoflayt. 11 Năkk a-s amăḍan wa olăɣăn, amăḍan wa olăɣăn iman-net a ihakk i-ad-ăɣlĕsnăt tihatten-net 12 măšan, ere wa s-tefert a făl ixdam, wăr-ămoos amăḍan olaɣăn, wădden ĕnta a-s măssi-s n-tihatten. A-wen-dăɣ a-s, afăl inhăy taɣĕssit dd-malăt, ad-ăjawăḍ, ăyy tihatten d-iman-năsnăt, tĕjjĕš-tănăt taɣĕssit, šĕmmĕhĕš-tănăt, 13 ed issan a-s tefert ɣas a făl ixdam, wăr-ăkkul a jănăt tihatten. 14 Năkk a-s amăḍan wa olăɣăn, ĕzzayăɣ tihatten-in, ĕzzaynăt-ahi daɣ. 15 Ǝzzaynăt-ahi s-ĕmmĕk wa s-ĕzzayăɣ Abba, izzay-ahi daɣ ĕnta. Hakkăɣ-tănăt tămudre-nin, 16 leɣ hărwa tihatten ăjjootnen wăren ha afăraj-wa-dăɣ, iwar-ahi s-ad-tănăt-dd-ĕwĕtăɣ, ĕslĕnăt ĕntănăteḍ-dăɣ i-emăsli-nin, tĕmĕl-t tiyyăt tahrut iḍan iyyăn n-amăḍan. 17 Abba ĕnta, irh'-ahi ed hakkăɣ tămudre-nin, siɣulăɣ-tăt-dd iman-in. 18 Wăr t-illa ere ăddoben ad-dăɣ-i ahăɣ tămudre-nin, hakkăɣ-tăt d-iman-in, siɣulăɣ-tăt-dd dăɣ d-iman-in, ĕnta-den-dăɣ turhajăt ta ĕjrăwăɣ ɣur-Abba-nin." 19 Ǝslăn kăl-Ălyăhud i-măjrăd-wen-dăɣ ija Ɣisa ɣas, tĕnkăr tamɣĕnnant daɣ jere-săn. 20 Ǝggădăn-dd dăɣ-săn iyyăḍ ăjjootnen, ad-jannen: "Ak mafăl tăsijădăm i-ere ih' alšin, ăbbuddăl?" 21 Jannen wi iyyăḍnen: "Măjrăd wa dd-izjărăn emm n-ăhalĕs-i-dăɣ, wădden măjrăd s-ăddoobăt ad-t-ăj ere ih' alšin, nĕssan daɣ a-s ere ih' alšin, wăr-ăddoobăt ad-arr tiṭṭawen n-imĕddorɣal." 22 Ăzzăman-en, ijă ămudd n-tasăktot n-ašĕšdaj wa jăn kăl-Ălyăhud i-ehăn n-ămudd wa măqqărăn ihăn Yărussălam s-tajrĕst, 23 irjăš Ɣisa dăɣ-ehăn n-ămudd wa măqqărăn dăɣ-tele n-edăgg wa s-itawănna: Wa n-Sulăyman, 24 ĕžžĕmmăɣăn-dd fălla-s kăl-Ălyăhud, ĕnnăn-as: "Ǝkkĕs-anăɣ dăɣ-taɣdărt, kunta kăyy a-s Ălmasex, ănn'-anăɣ-tăn, ma s-tăqqalăd, tĕkkĕsăd-anăɣ dăɣ-tăqqăn n-eɣăf-ta-dăɣ?" 25 Ăwwežăb-asăn, inn'-asăn: "Wădden, ĕllăɣeɣ-awăn măšan, tunjăyăm tomănăm săr-i, ĕnhĕywăt ɣas ijităn wi s-hi-ikfa Abba-nin turhajăt n-amišĕl-năsăn, ĕntăneḍ-en-dăɣ a tajăyhanen făll-i. 26 Kăwăneḍ, wăr săr-i tomenăm făl-a-s wăr tăḍḍinăm dăɣ-ăddinăt wi hănen tahrut ta n-inalkimăn-in. 27 Tahrut ta leɣ n-inalkimăn-in, sallăn i-emăsli-nin, ĕzzayăɣ-tăn, ĕlkamăn-ahi daɣ. 28 Wi leɣ, hakkăɣ-tăn tămudre ta tăɣlălăt, wăr dăɣ-săn tĕlkem tamăttant, wăr tăn-mad-ahăɣ daɣ ăwadĕm wăl' iyyăn dăɣ-ăfuss-in 29 făl-a-s, Abba-nin-i hi-tăn-ikfăn, wăr t-illa ere s-wădden ill'-e jĕnnĕj-s, wăr t-illa daɣ ere ăddooben ukĕs-năsăn dăɣ-ăfuss-net. 30 Năkk d-Abba, iyyăn hărăt, wăr nĕẓley." 31 Innă Ɣisa a-wen ɣas, obărăn-dd săr-s tihun i-ad-t-ĕkfĕn sămmăjori-năsnăt măšan, inn'-asăn: 32 "Lăɣătăt-ahi ɣas dăɣ-ijităn n-Abba wi-dăɣ ăhuskătnen jeɣ jere-wăn, ĕndek dăɣ-săn wa ilăn ăddălil n-tenăɣe ta s-tărham ad-hi-tăt-tĕjĕm?" 33 Ǝnnăn-as kăl-Ălyăhud: "Wădden dăɣ-tĕssĕba n-iji ăhusken jed a făl kăy-nĕhakk tamăttant, ănn-ak dăɣ-tĕssĕba n-asĕkkufar wa jed ed kăyy-i n-ăgg-adĕm, tăsisăgdăhăd iman-năk d-Măssinăɣ." 34 Inn'-asăn Ɣisa: "Ajăn wădden iktab dăɣ-Ăṭṭăwrăt-năwăn a-s, Măssinăɣ, innă: 'Ăxlăkăɣ-dd dăgg-adĕm dăɣ-milhaw-in'. 35 Wădden, nĕssan daɣ a-s măjrăd n-Măssinăɣ, iɣlal, wăr-itĕmĕttĕy. Ɣas kunta ăddinăt wi ĕlkămnen i-măjrăd-en, ixlăk-tăn-dd dăɣ-milhaw-net, 36 mafăl jannem ăskafărăɣ, năkk-i ăsnăfrăn Abba, ăšmašăl-ahi-dd s-ăddunya făl-a-s innin ĕnneɣ-awăn: 'Năkk Rure-s n-Măssinăɣ a ămoosăɣ.' 37 Ămăra kunta ɣas a-wa tamašalăɣ wădden Abba-nin a dd-ifal, adiš wăr săr-i tomenăm măšan, 38 kunta a-wa tamašalăɣ Abba-nin a dd-ifal, adiš kud-dăɣ wăr săr-i tomenăm năkk, ămĕnăt s-timašalen-en-dăɣ i-ad-tĕlmĕdăm, sĕbbuyĕnăm a-s năkk, ărtayăɣ d-Abba, irtay dăr-i daɣ ĕnta, heeɣ-t, ih'-ahi." 39 Ăsmăgăggăyăn daɣ kăl-Ălyăhud dăɣ-arămas-net măšan, ăẓlăbbăt-dd Ɣisa dăɣ-săn, iglă. 40 Ikka ḍarăt-a-wen asălim wa n-emăynăj n-ejănš wa n-Ɣurdĕni, dăɣ-edăgg wa s-kăla dăɣ-s isalmaɣ Exya ăddinăt, izzăɣ dihen-dăɣ. 41 Ǝkkăn-t-dd ăddinăt ăjjootnen, jannănen: "Exya, wăr-ija tăkunt wăl' iyyăt măšan, a-wa inna făll-ăhalĕs-i-dăɣ, itbat iket-net." 42 Omănăn ăddinăt ăjjootnen s-Ɣisa dăɣ-edăgg-en-dăɣ.

11

1 Ăzzăman-wen-dăɣ ad-ărhin Lazar wa n-taɣrĕmt ta n-Bitanya n-ă/n/na-s n-Marta d-Măryăma 2 ta s-kăla tĕssĕnɣăl aḍutăn făll-iḍarăn n-Ɣisa tĕzzar, ad-tăn-timĕs s-tišĕkkaḍ-net. Ǝnta-i-dăɣ a-s ămăra, ărhiin ă/n/na-s, Lazar. 3 Ărhin ɣas, ăssawăynăt šătma-s ămašal s-Ɣisa, ĕnnănăt-as: "Ălɣalim, ăss-dd, emărh-năk Lazar ărhiin." 4 Iwwăḍ-dd ămašal Ɣisa ɣas, innă: "Turhĕnna ta tărmăsăt Lazar, wădden ĕnta a t-madăt-tawĕy s-ălaxărăt, turhĕnna-net ta-dăɣ a madăt-tumas ĕssĕbab făl ătwăsămɣăr Măssinăɣ, itwĕsĕmɣăr daɣ Rure-s." 5 Tărha ta ija Ɣisa i-Lazar, ĕnta daɣ a ija i-Marta d-wălătma-s Măryăma. 6 Ǝjjăšăn isălan n-turhĕnna n-Lazar Ɣisa măšan, ăssakăy dăɣ-edăgg-ĕnnin-dăɣ ĕssin išilan tĕzzar, 7 innă i-inĕṭṭulab-net: "Ăqqĕlăt-anăɣ Ălyăhudĕyăt." 8 Ǝnnăn-as inĕṭṭulab-net: "Ălɣalim, ajăn wădden a ăynayăn tattărăn kăl-Ălyăhud, ad-kăy-ĕkfĕn sămmăjori n-tihun dăɣ-teje-ten-dăɣ, ɣas ma dăɣ-s tăqqalăd?" 9 Inn'-asăn Ɣisa: "Ajăn wădden măraw ăssaɣătăn d-ĕssin a hanen ašăl? Ere irjašăn hărwa ijă ašăl, wăr mad-ăjjărtăqqĕl făl-a-s ihannăy data-s 10 măšan, ăwadĕm irjašăn s-ehăḍ, ad-ăjjărtăqqăl ed irjaš dăɣ-tihay." 11 Ija Ɣisa măjrăd-wen-dăɣ ɣas, inn'-asăn: "Emărh-nănăɣ Lazar, iṭṭas măšan, ĕgleɣ i-ad-t-dd-sĕnkărăɣ." 12 Ǝnnăn-as inĕṭṭulab-net: "Ălɣalim, adiš kunta eḍĕs ɣas a ija, ill'-e ăṭṭăma n-ad-izzĕy." 13 Măjrăd wa hasăn-ija, ij'-asăn-t i-ad-tăn-isĕlmĕd a-s Lazar ăba-t măšan, ĕbdadăn ĕnniyătăn-năsăn făll-eḍĕs wa n-ere ilɣad eḍĕs. 14 Ij'-asăn Ɣisa ḍarăt-a-wen măjrăd s-ăddooben afăham-net, inn'-asăn: "Ǝlmĕdăt a-s Lazar ya ăba-t, măšan, 15 ăddiweɣ dăɣ-tĕssĕba-năwăn ed a-s ărhin, wăr ɣur-s t-ĕlleɣ, ătiwatăs a-wen i-ad-săr-i tamĕnăm; ămăra, ĕnkărăt, ăkkăt-anăɣ-t." 16 Iggăd-dd Tomi wa s-itawănna Didim, a-wen ălmăɣna-net: ekne, innă i-inĕṭṭulab wi iyyăḍnen: "Ăglăt-anăɣ năkkăneḍ-dăɣ i-ad-nahăr d-ălɣalim-nănăɣ tamăttant." 17 A-s hin-osa Ɣisa Bitanya, ila Lazar ĕkkoẓ išilan dăɣ-aẓĕkka. 18 Bitanya-i dăɣ-t-ăba, wăr jere-s t-illa d-Yărussălam ar kăraḍ kelumetărăn. 19 Ăba Lazar ɣas, osăn-dd kăl-Ălyăhud ăjjootnen Marta d-Măryăma, ad-sasmaḍăn ulhawăn-năsnăt. 20 Tĕsla Marta a-s imal-dd Ɣisa ɣas, tĕlkăḍ-as, a-s ija a-wen Măryăma ĕnta, tăqqima-hin ɣur-ehăn. 21 Tămmoqqăs d-Ɣisa ɣas, tĕnn'-as: "Ălɣalim, ĕssanăɣ a-s ĕnnăr tĕlled diha-dăɣ, wăr-itiba ă/n/na-ɣ. 22 Măšan hakd a-wen-dăɣ, ĕssanăɣ a-s kăyy a tĕttărăd, dăɣ-Măssinăɣ-dăɣ, ad-hak-t-ăkf." 23 Inn'-as Ɣisa: "Ă/n/na-m a dd-inkăr dăɣ-tamăttant." 24 Tĕnn'-as Marta: "Ǝssanăɣ lab s-ad-dd-inkăr dăɣ-tamăttant ašăl wa ilkămăn." 25 Inn'-as Ɣisa: "Năkk a-s Wa dd-isănkarăn dăɣ-tamăttant, năkk a ihakkăn tămudre, ere săr-i omănăn-dăɣ, ad-iddar hărkuk kud-dăɣ ămmut, 26 ere iddarăn daɣ har săr-i omăn, wăr dăɣ-s tĕlkem tamăttant făw. Ak kămm Marta, tĕflasăd a-wen meɣ?" 27 Tĕnn'-as Marta: "Ǝyya Ălɣalim, omanăɣ a-s kăyy a-s Ălmasex wa n-Rure-s n-Măssinăɣ s-ătwănna ilkam ad-dd-ass ăddunya." 28 Tĕja Marta măjrăd-wen-dăɣ ɣas, tĕglă, tĕkkăs-dd wălătma-s s-takše, tĕnn'-as: "Ălɣalim ya, osă-dd, inn'-am ad-t-in-tasĕd." 29 Tĕsla Măryăma i-a-wen ɣas, tĕggăd ăssaɣăt-wen-dăɣ, tĕkkă Ɣisa. 30 A-s ităjj a-wen-dăɣ, wăr dd-ijješ Ɣisa aɣrĕm hărwa, ih' edăgg-wĕnnin-dăɣ dăɣ-dăr-s tămmoqqăs Marta, 31 ĕllan-t daɣ imănokalăn n-kăl-Ălyăhud iyyăḍ ɣur-Măryăma dăɣ-ehăn, sasmaḍăn ulh-net. Ǝnhăyăn-tăt a-s tĕbdăd šik, tĕzjăr ɣas, ĕlkămăn-as ed ija ɣur-săn a-s Lazar a tĕkka i-ad-tălh făll-aẓĕkka-net. 32 Tăwwăḍ-in Măryăma diha t-illa Ɣisa, tĕnhăy-t ɣas, tărkăɣ-as, tĕnn'-as: "Emăli, ĕssanăɣ a-s ĕnnăr tĕlled diha-dăɣ, wăr-itiba ă/n/na-ɣ." 33 Inhăy-tăt Ɣisa hall ĕnta d-wi dăr-s ăddewnen, ɣas, ăsnin, ĕkmăn-t iman-net, 34 inn'-asăn: "Săknăt-ahi aẓĕkka wa dăɣ-jăm Lazar." Ǝnnăn-as: "Ǝyyăw, ĕnhĕy-t." Inhăy-t ɣas, 35 ilhă Ɣisa. 36 Ǝnnăn iyyăḍ dăɣ-imănokalăn n-kăl-Ălyăhud: "Tĕmɣăre n-tărha ij'-et i-Lazar", 37 ĕnnăn wi iyyăḍnen: "Ǝnta-i orăn tiṭṭawen n-emĕdderɣĕl, indăr-as ad-igdĕl i-Lazar tamăttant?" 38 Olăsăn-t iman-net tĕkma, iglă ḍarăt-a-wen, ikk' aẓĕkka wa iha Lazar iɣăšăn dăɣ-esăwăl, ihar s-tăhunt măqqoorăt. 39 Osă-dd Ɣisa aẓĕkka ɣas, innă i-ăddinăt: "Ǝkkĕsăt-in tăhunt ta hărăt aẓĕkka." Tĕggăd-dd Marta ta n-wălăt ma-s n-enĕmmettĕn ăssaɣăt-wen, tĕnna i-Ɣisa: "Ălɣalim, Lazar ya ăru d-irkăh, ašăl-net wa s-ĕkkoẓ a-wa ih' aẓĕkka." 40 Inn'-as Ɣisa: "Ajăn wădden Marta ăru d-ham-ĕnneɣ a-s afăl săr-i tomănăd, ad-tĕnhĕyăd tărna n-Măssinăɣ?" 41 Ǝkkăsăn-in ăddinăt tăhunt făll-emm n-aẓĕkka ɣas, ăjoẓăy Ɣisa išĕnnawăn, innă: "Abba, ămmoyăɣ-ak aɣăbal wa jed a-wa dăɣ-k ĕttărăɣ, 42 ĕssanăɣ daɣ a-s ɣabbălăd tittar-in hărkuk măšan, ămmijrădăɣ-ak ămăra dăɣ-tĕssĕba n-ălžămaɣăt-wa-dăɣ ibdădăn, dăɣ-tĕssĕba n-ad-amĕnăn ăddinăt a-s kăyy a hi-dd-ăšmašălăn." 43 Innă Ɣisa a-wen ɣas, iḍkăl emăsli-net, innă: "Lazar, ĕzjăr-dd!" 44 Izjăr-dd Lazar aẓĕkka, ăqqanăn ifassăn-net d-iḍarăn-net s-isĕssora, ilsă ekăršăy idĕm-net. Inn'-asăn Ɣisa ălwăqq-wen: "Arăt-t, tĕbḍĕwăm-t d-ikăršăyăn-wi-dăɣ ittăl, tĕyyĕm-t ad-iglĕw." 45 Osăn-dd kăl-Ălyăhud ăjjootnen, ĕnhăyăn a-wa ija Ɣisa ɣur-Măryăma ɣas, omănăn săr-s 46 măšan, ĕglăn iyyăḍ dăɣ-săn, osăn kăl-faris, ĕllăɣen-asăn a-wa ija Ɣisa. 47 Ǝžžĕmmăɣăn-dd imănokalăn n-kăl-tikutawen d-kăl-faris d-ălžămaɣăt wa n-kăl-Sinhidrin-i iɣattăsăn ăššăreɣa, ănmănnăn: "Ǝndek ăddăbara? Wa ăwadĕm, ĕjjĕtăn fălla-năɣ ijităn-net wi ăssuksăḍnen! 48 Ǝlmĕdăt a-s afăl t-noyya s-ĕmmĕk-wa-dăɣ, ad-săr-s amĕnăn ăddinăt iket-năsăn. Afăl ămoos a-wen a ijan, ad-ărẓĕn kăl-Roma-i hanăɣ-ăsităɣmărnen ehăn n-ămudd-nănăɣ wa šăddijăn, ăttăɣtăɣăn ăkall-nănăɣ." 49 Iggăd-dd dăɣ-săn Qayăf-i s-ĕnta a ăminakălăn făll-kăl-tikutawen awătay-wen-dăɣ, innă: "Ijmaḍ-t ăššăk a-s wăr t-illa a tĕjrahăm iket-dăɣ-năwăn, 50 ajăn wăr hĕnnĕyăm a-s uf'-awăn, ad-ămmăt ăwadĕm iyyăn dăɣ-tĕssĕba n-tamĕtte uhĕn ad-tămmăt tamĕtte iket-net." 51 Măjrăd-wen-dăɣ ija Qayăf, wădden a dd-ifalăn tayĕtte-net măšan, šămad ĕnta a ăminakălăn făll-kăl-tikutawen awătay-wen-dăɣ, ikf'-e Măssinăɣ măjrăd hin-ăssawăḍ tamĕtte n-a-s ilkam ad-ămmăt Ɣisa, dăɣ-tĕssĕba n-tamĕtte ta n-Iṣrayil iket-net. 52 Tĕzzar daɣ wădden kăl-Iṣrayil ɣas a-s mad-ămmăt, ad-ămmăt i-ad-dd-isĕdĕw aratăn n-Măssinăɣ wi ĕmmăhăšnen jer-ikallăn, umasăn tiyyăt taɣĕssa. 53 Ăɣtăsăn ɣur-ašăl-wen-dăɣ n-a-s wăr-e sunfĕn făw wăr jen iman-net. 54 Iɣtăf ĕnta-dăɣ ɣur-ašăl-wen-dăɣ i-răjjoš dăɣ-edăgg t-hannăyăn kăl-Ălyăhud. Ifăl ăkall-wen-dăɣ hăn, ikkă teje ta tohăẓăt tanĕẓruft, izzăɣ ĕnta d-inĕṭṭulab-net dăɣ-aɣrĕm s-isĕm-net Ifɣahim. 55 Ohăẓ-dd ămudd n-kăl-Ălyăhud wa n-Faṣka ɣas, ăhhujjăjăn-dd ăddinăt ăjjootnen s-Yărussălam i-ad-šĕšdĕjăn iman-năsăn dat-ămudd-en-dăɣ, 56 ad-tammăɣăn imĕhhujjaj iket-năsăn i-Ɣisa, tinmĕnnin jer-iman-năsăn dăɣ-ehăn n-ămudd wa măqqărăn: "Ak, tordam a-s ihăl a dd-ăkk ămudd meɣ?" 57 A-s jănnen a-wen-dăɣ, omarăn imănokalăn n-kăl-tikutawen d-kăl-faris s-ere ilmădăn diha t-illa Ɣisa iket-net, isăɣdăret-t i-ad-ăttărmăs.

12

1 Ašăl wa s-săḍis dat-ămudd wa n-Faṣka, ikkă Ɣisa taɣrĕmt ta n-Bitanya dăɣ-izzăɣ Lazar wa dd-issĕnkăr jer-inĕmmuttan. 2 Tĕssĕskăr-dd Marta imĕnsiwăn dat-Ɣisa, ăniɣăyma d-Lazar d-imăjarăn wi iyyăḍnen. 3 Tĕḍkăl Măryăma ḍarăt-a-wen tăẓune n-lităr n-aḍutăn lanen ălqim wăr-iqqer hărăt, ad-tăn-sanɣal făll-iḍarăn n-Ɣisa, timĕs-tăn s-tišĕkkaḍ-net. Ăbɣănɣălăn aḍutăn dăɣ-ehăn-ĕnnin-dăɣ iket-net. 4 Iggăd-dd iyyăn dăɣ-inĕṭṭulab n-Ɣisa wa s-isĕm-net Yăhudĕs wa n-Isxaryut-i t-e-isĕssăɣdărăn, innă: 5 "Mafăl aḍutăn-wi-dăɣ wăr hin-ĕnšen kăraḍăt timaḍ n-ărriyal n-aẓrĕf ămoosnen takute i-tilăqqiwen." 6 Innă a-wen wădden dăɣ-a-s innin oẓar dăɣ-a ĕjrăwnăt tilăqqiwen, ănn-ak făl-a-s innin emăkrăḍ a ămoos, ĕnta a-s ănaẓraf n-taggayt ta n-inalkimăn n-Ɣisa, a ătwăjjăn dăɣ-ĕssĕndoqq wa n-aẓrĕf-dăɣ, ad-dăr-s in-išlĕy. 7 Inn'-asăn Ɣisa: "Ăkfăt-tăt ălɣafyăt, a-wa tĕja, tĕj'-e dăɣ-tĕssĕba n-ašăl wa d-mad-ĕjjĕšăɣ aẓĕkka. 8 Tilăqqiwen ya, ĕllanăt ɣur-wăn hărkuk măšan năkk, ilkam ad-kăwăn-ăflăɣ." 9 Ǝslăn kăl-Ălyăhud ăjjootnen a-s iha Ɣisa taɣrĕmt ta n-Bitanya ɣas, fălăn-dd Yărussălam, ĕkkăn-t-dd măšan, wădden ĕnta ɣas a-s otasăn ahănay-net, ĕrhan daɣ, ad-ĕnhĕyăn Lazar wa dd-issĕnkăr jer-inĕmmuttan, 10 ăɣtăsăn imănokalăn n-kăl-tikutawen s-ad-ĕjĕn iman n-Lazar ĕnta-dăɣ 11 ed hannăyăn a-s, dăɣ-tĕssĕba n-asĕnkar wa t-dd-ija Ɣisa jer-inĕmmuttan a făl, taqqălăn imănokalăn n-kăl-Ălyăhud ăjjootnen ḍarăt kăl-tikutawen, timĕnĕn s-Ɣisa. 12 Ăffăw ɣas, tĕslă tamĕtte ta tăjjet dd-tĕkkăt ămudd a-s Ɣisa ikkă-dd Yărussălam. 13 Ǝjjăšăn-tăt isălan ɣas, ad-dd-ɣattăsăn ăddinăt ilĕktan n-tišday, lakkăḍăn-as, săɣăren s-afălla: "Ozana! Ija Măssinăɣ ălbăraka dăɣ-ămănokal wa n-Iṣrayil dd-osăn făll-isĕm n-Emăli." 14 Ijrăw Ɣisa ăẓa iyyăn dăɣ-zăbo, inăy-t, ămoos a-wen a ăssitbătăn a-wa iktăbăn dăɣ-ĕlkĕttab n-Măssinăɣ a-s innă: 15 "Yărussălam ta dăyăt făll-taḍaɣt ta n-Sayon, wăr tărmeɣăd, ĕnhĕy ɣas ămănokal-năm imal-dd inay ara n-tešeḍt." 16 Ašăl wa d-jăn hărătăn-winnin-dăɣ, wăr tăn-ĕfhemăn inĕṭṭulab n-Ɣisa măšan, ašăl wa d-ijjăš tĕmɣăre n-ălxurmăt-net, ĕktăn-dd a-s ĕnta-en-dăɣ a făl ĕktăbăn ănnăbităn hărătăn-win-dăɣ, ămešăl-tăn daɣ. 17 Ašăl-wen-dăɣ, tăssoɣăl tamĕtte iket-net a-wa ijă Ɣisa ed, tăjjĕyha a-s dd-issĕnkăr Lazar jer-inĕmmuttan, ikkăs-t-dd dăɣ-aẓĕkka. 18 Tĕlkăḍ-dd tamĕtte-en iket-net i-Ɣisa dăɣ-tĕssĕba n-iji n-Măssinăɣ wa-dăɣ s-tĕslă ij'-e. 19 Ǝnhăyăn kăl-faris a-wen ɣas, ănmănnăn jer-iman-năsăn: "Tĕnhăyăm ămăra a-s a-wa wădden a dd-nĕkka d-hărăt, tamĕtte iket-dăɣ-net a ḍara-s tošalăt." 20 Osăn-dd hărăt dăɣ-kăl-Ălyunan s-ijraẓ ăddin wa n-kăl-Ălyăhud, ĕkkan-dd daw-ămudd-i-dăɣ i-ad-ăɣbĕdăn Măssinăɣ dăɣ-Yărussălam, 21 ĕjrăwăn ănăṭṭalib wa s-isĕm-net Fĕlibb wa n-taɣrĕmt ta n-Băṭsăyda ta n-Galila, ĕnnăn-as: "Ăhalĕs, nărha ad-nĕnhĕy Ɣisa." 22 Iglă Fĕlibb, ija isălan dăɣ-Idris, ăddewăn issĕnăn-essăn s-Ɣisa, ĕllăɣen-as. 23 Ǝwwăḍăn-dd Ɣisa ɣas, inn'-asăn: "Ăssaɣăt wa dăɣ-mad-ijjĕš Ăgg-ăgg-adĕm ălxurmăt-net, osă-dd. 24 Ălleɣeɣ-awăn s-tidĕt tădduuttet a-s a tĕkkăs temătăwt n-ălkăma wăr tĕnbel dăɣ-ăkall tămmăt, ad-tămoos tiyyăt tablalt ɣas măšan, afăl tĕnbăl dăɣ-ăkall har tămmut, a dd-tarĕw tiblalen ăjjootnen. 25 Ere wa wărăn itĕttăr ar ĕmmĕk s-ijmăr iman-net dăɣ-ăddunya-ta-dăɣ, ad-ifut dăɣ-ălžănnăt, măšan, ăwadĕm wa irḍăn ăfota dăɣ-iman-net, dăɣ-ăddunya-ta-dăɣ, dăɣ-ăddimmăt-nin, ad-ijrĕw tămudre ta tăɣlălăt. 26 Ere dăɣ-wăn irhăn tumast n-ănaxdim-in-dăɣ adiš, ilkĕmet-ahi făl-a-s, năkk edăgg wa dăɣ-mad-ĕzzăɣăɣ, ĕnta daɣ a dăɣ-mad-izzăɣ ănaxdim-in, ijrĕw semɣar ɣur-Abba." 27 "Ărɣan iman-in, ărɣan ămăra-dăɣ, ak ma he-ănnăɣ făw? Abba, ăɣlĕs-ahi dăɣ-ăssaɣăt-wa-dăɣ? Făw, năkk, ĕssanăɣ a-s tĕssĕba n-ăssaɣăt-wa-dăɣ a făl dd-ămešălăɣ. 28 Abba, sĕkĕn ăddinăt tĕmɣăre n-ălxurmăt n-isĕm-năk." Ifăl-dd emăsli ălwăqq-wen-dăɣ išĕnnawăn innăn: "Isĕm-in, ĕssĕmɣărăɣ-t, ad-t-alĕsăɣ daɣ asĕmɣar." 29 Tĕslă tamĕtte ta t-tĕllăt dihen i-emăsli-ĕnnin-dăɣ ɣas, innă aɣil-net iyyăn: "Ak sallăm i-ejjaj wa ijjăjăn?" Inna aɣil wa iyyăḍăn: "A-di wădden ejjaj, ănjălos a has-immĕjrădăn." 30 Inn'-asăn Ɣisa daɣ: "Emăsli wa s-iket has-tĕslăm, wădden tĕssĕba-nin a dăɣ-ija, tĕssĕba-năwăn kăwăneḍ a dăɣ-ija. 31 Ǝlmĕdăt a-s ămăra-dăɣ, ad-mad-tĕtwĕšărrăɣ ăddunya, itwĕstăɣ daɣ ămănokal-net Iblis, 32 năkk daɣ, afăl ĕmmĕḍkălăɣ, ad-dd-ăɣrăɣ s-iman-in ăddinăt iket-năsăn." 33 Innă a-wen-dăɣ i-ad-tăn-isĕlmĕd ĕmmĕk wa s-mad-ămmăt. 34 Tĕnn'-as tamĕtte: "Ajăn wădden năɣra dăɣ-Ăṭṭăwrăt a-s Ălmasex, wăr-e ămmăt, iɣlal, adiš ma kăy-isawănnen: 'Ăgg-ăgg-adĕm, ad-ămmăḍkăl?' Wa Ăgg-ăgg-adĕm făl wăr nĕssen madăn-ămmăḍkăl, mi ămoos?" 35 Inn'-asăn Ɣisa: "Ănnur, wăr has-in-ăqqima ar a ĕnḍărrăn ill'-e jere-wăn, ăsimătărăɣ-kăwăn d-ad-has-tĕlkĕmăm i-ad-wăr kăwăn-ɣăddărnet tihay făl-a-s, ere irjašăn dăɣ-tihay, wăr-issen e-s ihăl. 36 Iket-di tăẓẓegăẓăm a-wen, a ikkăs ănnur ill'-e jere-wăn, amĕnăt săr-s i-ad-tumasăm dăgg-ănnur." Innă Ɣisa a-wen ɣas, ifăl tamĕtte, iffăr. 37 Ija Ɣisa data-săn ijităn n-Măssinăɣ-i-dăɣ ăjjootnen măšan, unjăyăn săr-s omănăn, 38 ămoos a-wen a ăssiitbătăn măjrăd wa ikfă Măssinăɣ ănnăbi Saya a-s innă dăɣ-ĕlkĕttab n-Măssinăɣ: "Emăli, mi omănăn s-a-wa nĕnna? Mi s-dd-tănfalăl tărna n-ăfuss n-Emăli?" 39 Ăqqurăn ulhawăn n-kăl-Iṣrayil făl-a-s, innă ănnăbi Saya daɣ: 40 "Ăsdărɣăl-tăn Măssinăɣ, ăsɣăr ulhawăn-năsăn i-ad-wăr hĕnnĕyăn s-tiṭṭawen-năsăn, ĕjrăhăn hărăt s-ulhawăn-năsăn, utabăn i-ad-tăn-izuzĕy Măssinăɣ." 41 Măjrăd-wen-dăɣ, ij'-e ănnăbi Saya ăzzăman wa d-has-dd-ănfalăl ălxurmăt n-Ɣisa, ădwănnăt dăɣ-isălan-net. 42 Hakd a-wen-dăɣ, omănăn imizărăn n-kăl-Ălyăhud ăjjootnen s-Ɣisa măšan, tĕgdal-asăn tuksĕḍa n-kăl-faris ad-sĕtbĕtăn immun-năsăn, făl-a-s ăksuḍăn ad-tăn-ĕkkĕsăn dăɣ-ihănan n-ăddin-năsăn, 43 ăssofăn tĕmmal ta dd-fălăt dăgg-adĕm uhĕn ta n-Măssinăɣ. 44 Iḍkăl Ɣisa emăsli-net, innă: "Ere săr-i omănăn-dăɣ, ilmĕdet a-s wădden năkk a-s omăn, Măssinăɣ-i hi-dd-ăšmašălăn a-s omăn, 45 ere daɣ wa hi-inhăyăn, ilmĕdet a-s Măssinăɣ-i hi-dd-ăšmašălăn a inhăy. 46 Năkk a-s ănnur, ămešălăɣ-dd s-ăddunya dăɣ-tĕssĕba n-ad-wăr-itĕzzăɣ făw ere săr-i omanăn dăɣ-tihay, 47 ere islăn i-măjrăd-in wăr t-iṭṭef, wădden năkk a t-madăn-išrăɣ făl-a-s, wăr dd-ămešălăɣ i-ad-ĕšrăɣăɣ ăddunya, ănn-ak, ămešălăɣ-dd i-ad-tăt-ăɣlĕsăɣ. 48 Ere săr-i unjăyăn, unjăy s-măjrăd-in, măjrăd-en-dăɣ a t-e-išrăɣăn ašăl wa ilkămăn 49 făl-a-s, măjrăd wa jeɣ iket-net, wădden a dd-ĕkkasăɣ dăɣ-eɣăf-in ɣas, Abba-nin ĕnta iman-net-i hi-dd-ăšmašălăn a hi-ikfăn turhajăt n-ad-ănnăɣ a-wa hi-inna, ăjăɣ daɣ isălan-net i-ăddinăt. 50 Ǝssanăɣ daɣ a-s e d t-illăm ăwadĕm ilkamăn i-a-wa innă, ad-ijrĕw tămudre ta tăɣlălăt. A-wen-dăɣ a făl năkk, a-wa jănneɣ iket-net, jănneɣ-tăn s-ĕmmĕk wa s-hi-tăn-innă Abba."

13

1 Ehăḍ wa n-dat-wa n-ămudd wa n-Faṣka, ilmăd Ɣisa s-ăssaɣăt n-ajmuḍ-net i-ăddunya i-ad-akk Abba, iwwăḍ-dd. Ehăḍ-en-dăɣ, issĕmdă-dd tĕmɣăre n-tărha-net s-inĕṭṭulab-net, issĕkn'-en tărha tokăyăt ta tăn-isakna hak ašăl a ija a-wa-dăɣ. 2 Hărwa tamănsawăn a-s ija Iblis dăɣ-ulh n-Yăhudĕs Ăgg Simyon wa n-Isxaryut erk ĕnniyăt wa n-ad-isăɣdăr Ɣisa. 3 Dăɣ-tĕllulĕya-net, issan Ɣisa a-s wăr t-illa a-s wădden ij'-e Abba-net dăɣ-ifassăn-net, issan daɣ a-s Măssinăɣ-i t-dd-ăšmašălăn, ĕnta a iqqal. 4 Ǝssĕmdăn tetăte ɣas, ibdăd Ɣisa, ikkăs emăls-net, iḍkăl-dd ekăršăy iyyăn, ijbăs săr-s, 5 ijă ḍarăt-a-wen aman dăɣ-taẓăwat, ad-isarad iḍarăn n-inĕṭṭulab-net, itimĕs-tăn s-ekăršăy wa s-ijbăs. 6 Iwwăḍ-dd ăssaɣăt wa n-asirĕd n-iḍarăn n-Simyon Bĕṭrus ɣas, iggăd inna i-Ɣisa: "Xăša Ălɣalim! Năkk a iwar asirĕd n-iḍarăn-năk wădden kăyy." 7 Inn'-as Ɣisa: "A-wa hi-išlăn, wăr mad-tĕjrăhăd ălmăɣna-net ămăra-dăɣ măšan, ilkam ad-t-tĕfhĕmăd." 8 Inn'-as Bĕṭrus ălwăqq-wen: "Kăla kăla Ălɣalim, năkk lab wăr-ilkem ad-ărḍeɣ tăsserădăd iḍarăn-in." Inn'-as Ɣisa: "Afăl wăr-ăsserădăɣ iḍarăn-năk, wăr hak t-illa ad-nahăr." 9 Innă Simyon Bĕṭrus: "Adiš Ălɣalim, wăr tĕbdedăd ɣur-iḍarăn-in ɣas, sirĕd daɣ eɣăf-in hakd ifassăn-in." 10 Inn'-as Ɣisa: "Wădden ere ăsserădăn telămăkt-net, wăr-ămɣatăr s-ad-alĕs asirĕd daɣ kunta wădden iḍarăn-net ed, šăddij iket-net, kăwăneḍ, a-s tĕkkăsăm iyyăn dăɣ-wăn, šăddiijăm." 11 Măjrăd-wen-dăɣ, ij'-e Ɣisa ed, issan ere wa t-madăn-isĕssăɣdăr. Dăɣ-tĕssĕba n-a-wen-dăɣ a făl hasăn-innă iyyăn dăɣ-săn, wăr šăddij. 12 Ăsserăd iḍarăn-năsăn ɣas, ils' emăls-net, iqqăl-dd, ăqqima dăɣ-edăgg wa n-imĕnsiwăn, inn'-asăn: "Ak, kăwăneḍ, tĕfhamăm a-wa s-iket hawăn-t-jeɣ meɣ? 13 Wădden a hi-jannem: 'Ălɣalim d-Emăli,' ikna ed a-wen-dăɣ a ămoosăɣ 14 ɣas, šămad năkk-i n-Emăli d-ălɣalim, ăsserădăɣ iḍarăn-năwăn, adiš kăwăneḍ-dăɣ, iwar-kăwăn ad-tinmĕsiridăm iḍarăn jer-iman-năwăn; 15 ĕssĕknăɣ-kăwăn ălmital he-tinmĕjjim jer-iman-năwăn s-ĕmmĕk-wa-dăɣ s-hawăn-t-jeɣ. 16 Ălleɣeɣ-awăn s-tidĕt tădduuttet a-s wăr t-illa akli ojărăn măssi-s, wăla ănămmašal ojărăn ere wa t-ăšmašălăn. 17 Tĕnḍĕḍ-awăn kunta tĕssanăm s-hărătăn-wi-dăɣ, ad-tăn-tamašalăm. 18 A-wa hawăn-janneɣ, wădden iket-năwăn a făl t-janneɣ făl-a-s năkk, ĕzzayăɣ inĕṭṭulab-in wi ăsnăfrănăɣ, ămăra, măjrăd n-Măssinăɣ a madăn-isĕtbĕt a-wen ed, iktab dăɣ-s a-s: 'Wa dăr-i ohărăn ăkoss, ĕnta a-s ašănjo-nin.' 19 Ǝkkasăɣ-kăwăn dăɣ-taɣdărt n-hărătăn-wi-dăɣ hărwa wăr-ĕtbetăn dăɣ-tĕssĕba n-a-s afăl jăn, ad-tamĕnăm a-s: 'Năkk, ăɣlalăɣ'. 20 Ălleɣeɣ-awăn s-tidĕt tădduuttet a-s ere ăsbărrăkăn ere hin-ăsimašălăɣ, a ămoos-dăɣ, năkk a ăsbărrăk, ere daɣ wa hi-ăsbărrăkăn, Wa hi-dd-ăšmašălăn a ăsbărrăk." 21 A-s issĕmda Ɣisa măjrăd-wa-dăɣ, ĕkman-t iman-net, inn'-asăn: "Ălleɣeɣ-awăn s-tidĕt tădduuttet a-s iyyăn dăɣ-wăn a hi-madăn-isĕssăɣdăr." 22 Ǝslăn inĕṭṭulab i-a-wen ɣas, ad-tinmĕkyidăn, tinmĕsĕstinăn d-ere wa s-iha ti-net. 23 A-s ităjj a-wen-dăɣ, ăsiɣămăr ănăṭṭalib wa ikna Ɣisa tărha edes-has, 24 inẓăj-as Simyon Bĕṭrus tiṭṭ, inn'-as, ad-isĕstĕn Ɣisa d-ere wa s-iha ti-net. 25 Ăsmătăktăk ănăṭṭalib-en i-Ɣisa, inn'-as: "Ălɣalim, mi kăy-madăn-isĕssăɣdăr?" 26 Inn'-as Ɣisa: "Ere wa s-mad-sĕlmăɣăɣ afărs n-tajĕlla dăɣ-aḍrĕẓ, ĕnta-en-dăɣ a hi-madăn-isĕssăɣdăr." Issĕlmăɣ Ɣisa afărs n-tajĕlla dăɣ-aḍrĕẓ, ikf'-e Yăhudĕs wa s-itawănna Isxaryut n-ăgg Simyon. 27 Diha-dăɣ d-irmăs Yăhudĕs afărs n-tajĕlla-ĕnnin-dăɣ, ad-innăhăḍ Iblis dăɣ-ulh-net, inn'-as Ɣisa ălwăqq-wen: "Yăhudĕs! A-wa tăjjăd, ăj'-e šik." 28 Ijă Ɣisa i-Yăhudĕs măjrăd-wen-dăɣ măšan, wăr t-illa dăɣ-inĕṭṭulab-net wi iyyăḍnen ăsiiɣămărnen dăɣ-isĕftaɣ i ifhamăn a-wa innă, 29 ăɣelăn a has-innă: "Žănš-dd a-wa s-nămiɣatăr i-ămudd wa n-Faṣka" meɣ "Ăkf hărăt tilăqqiwen" făl-a-s, ĕnta a-s ănaẓraf-năsăn. 30 Irmăs-dd Yăhudĕs afărs n-tajĕlla wa has-dd-iẓẓăl Ɣisa ɣas, izjăr. Isălan-wi-dăɣ, ehăḍ a-s tajjăn. 31 Izjăr Yăhudĕs ɣas, innă Ɣisa i-inĕṭṭulab-net: "Ămăra-dăɣ ad-mad-itwĕsĕmɣăr Ăgg-ăgg-adĕm, itwĕsĕmɣăr daɣ Măssinăɣ dăɣ-tĕssĕba-net, 32 ăkf Ăgg-ăgg-adĕm ălxurmăt ɣur-iman-net, ăkf'-as-t daɣ šik. 33 Ilyaḍăn-in, wăr-e ăhajăɣ ĕlleɣ jere-wăn, ĕssanăɣ a-s ilkam ad-hi-tĕmmăɣăm măšan, ĕnneɣ-awăn a-wa s-kăla tăn-ĕnneɣ i-kăl-Ălyăhud wi iyyăḍnen: 'Edăgg wa ĕkkeɣ, wăr mad-tudabem aggaḍ-net'. 34 Ămăra, ĕnta-da fărĕḍ wa ăynayăn ĕfrăḍăɣ fălla-wăn: 'Nĕmĕjjăt jer-iman-năwăn anmărh šund wa hawăn-jeɣ, nĕmărhăt jer-iman-năwăn, 35 anmărh jer-iman-năwăn en-dăɣ a he-isĕlmĕdăn ăddinăt a-s tidĕt-dăɣ a-s inĕṭṭulab-in a tămoosăm.' " 36 Issĕmdă Ɣisa măjrăd-wen-dăɣ ɣas, iggăd-dd Simyon Bĕṭrus, innă: "Ălɣalim, ĕndek siha s-tĕkked?" Inn'-as Ɣisa: "Edăgg wa ĕkkeɣ, wăr tăddobed ad-hi-săr-s tĕlkĕmăd ămăra-dăɣ măšan, ilkam dăɣ-k ad-hi-dd-tawĕḍăd dăɣ-s." 37 Inn'-as Bĕṭrus: "Ălɣalim, mafăl wăr-ăddobeɣ alkum-hak ămăra-dăɣ? Ăddobeɣ-t, năkk, ăsidăwăɣ wăla i-tamăttant dăɣ-tĕssĕba-năk." 38 Inn'-as Ɣisa: "Wădden tĕnned tăsidăwăd wăla i-tamăttant dăɣ-tĕssĕba-nin? Ikna măšan, ăsidătteɣ-ak a-s, wăr-e iwĕt ekăz ăɣora wăr hi-tăkkuddălăd har kăraḍ ihăndăggan."

14

1 Inn'-asăn Ɣisa ḍarăt-a-wen: "Wăr rammăɣnet ulhawăn-năwăn, amĕnăt s-Măssinăɣ, amĕnăt săr-i, 2 ehăn n-Abba-nin, han-t idăggan ăjjootnen, ĕnnăr wăr-itbet a-wen, wăr hawăn-jĕnneɣ ĕgleɣ i-ad-hawăn-sĕmmĕjnuɣ edăgg, 3 afăl ĕgleɣ har hawăn-ăsmăjneɣ edăgg, ad-kăwăn-dd-ăqqĕlăɣ, ĕḍkĕlăɣ-kăwăn, tĕmlĕm diha t-ĕlleɣ. 4 Edăgg daɣ wa ĕkkeɣ, tĕssanăm tabarăt-net." 5 Iggăd-dd ănăṭṭalib wa s-isĕm-net Tomi, inn'-as: "Ălɣalim, năkkăneḍ lab, wăr nĕssen siha s-tĕkked, ĕndek ĕmmĕk wa s-mad-nĕlmĕd tabarăt-net?" 6 Inn'-as Ɣisa: "Năkk a-s tabarăt, năkk a-s tidĕt, năkk daɣ a-s tămudre, wăr t-illa făw ere ăddooben aggaḍ n-Abba ar s-ad-hi-ija ĕssĕbab n-a-wen. 7 Šămad daɣ năkk tĕzzayăm-ahi, ad-tĕzzĕyăm Abba-nin, šămad tĕzzayăm-t, adiš, tĕnhăyăm-t." 8 Iggăd-dd wa s-isĕm-net Fĕlibb, inn'-as: "Ălɣalim, sĕkĕn-anăɣ ɣas Abba, igdăh-anăɣ a-wen-dăɣ." 9 Inn'-as Ɣisa: "Ɣas Fĕlibb, a-wa-dăɣ jeɣ iket-net ărtayăɣ dăr-wăn, wăr hi-tĕzzeyăd? Wa hi-inhăyăn, inhay Abba, ɣas ĕndek ĕmmĕk wa s-jănned: 'săkĕn-anăɣ Abba'. 10 Ajăn wăr tomenăd a-s năkk ărtayăɣ d-Abba, irtay dăr-i daɣ ĕnta, heeɣ-t, ih'-ahi? A-wen-dăɣ a făl imĕjridăn wi hawăn-tăjjăɣ, wădden a dd-ĕkkasăɣ dăɣ-eɣăf-in ɣas, Abba-i dăr-i irtăyăn a ămoosăn ĕssĕbab n-ijităn wi tamašalăɣ iket-năsăn. 11 Amĕnăt a-s năkk ărtayăɣ d-Abba, irtay dăr-i daɣ ĕnta, heeɣ-t, ih'-ahi. Kunta daɣ wăr tomenăm s-măjrăd-in, amĕnăt bănnan s-ijităn-wi tamašalăɣ. 12 Ălleɣeɣ-awăn s-tidĕt tădduuttet a-s ere săr-i omănăn-dăɣ, ad-ăj ĕnta-dăɣ ijităn-wi jeɣ, ăj făw-i tăn-ĕknanen mijraw ed năkk, ĕkkeɣ Abba. 13 A-wen-dăɣ a făl a tĕttărăm-dăɣ s-isĕm-in, ad-t-ăjăɣ i-ad-ijrĕw Abba ălxurmăt dăɣ-tĕssĕba n-Rure-s. 14 A tĕttărăm-dăɣ s-isĕm-in, ad-hawăn-t-ăjăɣ." 15 "Kunta tidĕt-dăɣ a-s tărham-ahi adiš, ĕṭṭĕfăt fărĕḍăn-in, 16 ad-hawăn-ădĕlăɣ Abba i-ad-kăwăn-ăkf ănabdid iyyăn ɣur-wăn e-illan hărkuk, 17 ĕnta a-s Unfas wa s-tidĕt ɣas a t-dd-zajjărăt, wăr tăddoobăt ăddunya ad-t-tăqbĕl făl-a-s wăr tăddobăt ahănay-net wăla muzĕyăt-net măšan, kăwăneḍ, tĕzzayăm-t ed ăherăj dăr-wăn, izzaɣ daɣ dăɣ-ulhawăn-năwăn. 18 Wăr kăwăn-mad-ăyyăɣ tăjohălăm, ad-kăwăn-dd-ăqqĕlăɣ, 19 ăqqim-in a ĕnḍărrăn i-ad-ăbas hi-hannăy ăddunya măšan kăwăneḍ, a hi-hannăyăm făl-a-s, ĕddarăɣ, tĕddarăm. 20 Ašăl-wen-dăɣ ad-mad-tĕlmĕdăm a-s năkk ărtayăɣ d-Abba, tărtayăm dăr-i kăwăneḍ, ărtayăɣ dăr-wăn daɣ năkk. 21 Ere wa iknăn uḍĕf n-fărĕḍăn-in, ĕnta a-s emărh-in, ere daɣ wa hi-irhăn, ad-t-ărh Abba-nin, ărhăɣ-t năkk-dăɣ, sĕnnĕfilĕlăɣ-as-dd daɣ iman-in." 22 Inn'-as ănăṭṭalib wa s-isĕm-net Hudd iẓleyăn d-Yăhudĕs wa n-Isxaryut: "Ălɣalim, ĕndek ĕmmĕk wa s-mad-hanăɣ-dd-sĕnnĕfilĕlăd iman-năk wăr tăn-dd-tăsnăfalălăd i-ăddunya?" 23 Inn'-as Ɣisa: "Ere hi-irhan, ad-agĕẓ măjrăd-in, dihen, ad-t-ărh Abba-nin, nidaw-dd săr-s, nĕzzăɣ ɣur-s. 24 Ere wa hi-wărăn-irha, wăr mad-iṭṭĕf măjrăd-in. Măjrăd wa s-tĕslăm ɣur-i, wădden a dd-ĕkkasăɣ dăɣ-eɣăf-in ɣas, Abba-nin-i hi-dd-ăšmašălăn ahi-ikfăn turhajăt n-tĕnna-net. 25 Ɣas, ĕkkasăɣ-kăwăn dăɣ-taɣdărt hărwa ĕlleɣ jere-wăn, 26 ănabdid daɣ wa s-hawăn-ĕnneɣ, a t-ămoosăn Unfas Šăddijăn, ad-hawăn-t-dd-isĕssiwĕy Abba s-isĕm-in, afăl hawăn-t-dd-ăssawăy, ad-kăwăn-isăɣăr hărăt iket-net, isĕktĕw-kăwăn-dd a-wa hawăn-ĕnneɣ iket-net. 27 Ămăra, oyyeɣ ɣur-wăn ălxer, ălxer daɣ wa s-năkk ɣas a t-ihakkăn a ɣur-wăn oyyeɣ ed năkk, isuf-wi hawăn-tăjjăɣ, wăr-olehăn d-wi hawăn-tăjj ăddunya, wăr tăšăwwašnet ulhawăn-năwăn, wăr rămmăɣăt. 28 Wădden, sallăm-ahi a-s hawăn-ĕnneɣ: 'Ǝgleɣ dăɣ-tĕssĕba n-ad-kăwăn-dd-ăqqĕlăɣ', ɣas ĕnnăr hi-tărham, ijrĕẓ-awăn a-wa hawăn-ĕnneɣ ed Abba-i ĕkkeɣ, ojăr-ahi. 29 Hărătăn-wi-dăɣ, janneɣ-awăn-tăn ămăra-dăɣ i-ad-kăwăn-ĕkkĕsăɣ dăɣ-taɣdărt hărwa wăr jen, dihen afăl jăn, ad-tamĕnăm săr-i. 30 Igdăh dăɣ-măjrăd diha-dăɣ ămăra făl-a-s, Iblis-i n-ămănokal n-ăddunya, imal-dd. Ǝlmĕdăt a-s wăr făll-i ila tărna 31 măšan, ărheɣ ad-tĕlmĕd ăddunya a-s năkk ărheɣ Abba, wăr tĕmišilăɣ daɣ ɣas ar erhet-net. Ǝnkărăt ămăra, ăflăt-anăɣ edăgg-wa-dăɣ."

15

1 Fălăn dihen ɣas, inn'-asăn Ɣisa: "Năkk a-s ahĕšk n-lăɣnăb wa n-tidĕt, Abba-nin a-s ănăsdamu. 2 Kăwăneḍ a-s ilĕktan n-ahĕšk, e d t-illăm elăkăt dăɣ-i irmamăn wărăn itirĕw, ad-t-in-iɣtĕs Abba-nin, elăkăt daɣ iket-net itirĕwăn aratăn, ad-hin-isrĕmsĕrĕm ileḍan-net, išĕšdĕj-t i-ad-dd-arĕw aratăn s-ĕjut. 3 Ɣur-ămăra-dăɣ, ĕlmĕdăt a-s šăddijăm dăɣ-tĕssĕba n-asĕssăɣăr wa kăwăn-jeɣ. 4 A-wen-dăɣ a făl ɣaymăt tărtayăm dăr-i s-ĕmmĕk wa s-dăr-wăn ărtayăɣ. Wăr t-illa elăkăt ăddooben tiirwe d-iman-net afăl wăr-irmem d-tafăja, ĕmmĕk-wen-dăɣ daɣ a-s wăr t-illa a iha ărramăt s-tăddobem amišĕl-net i-Măssinăɣ ar s-ad-dăr-i tărtayăm. 5 Ăssiilmădăɣ-kăwăn a-s năkk a-s tafăja n-ahĕšk n-lăɣnăb, kăwăneḍ a-s ilĕktan-net. Ere wa dăr-i irtayăn, ărtayăɣ dăr-s năkk-dăɣ, ad-ămašăl i-Măssinăɣ a iha ărramăt făl-a-s, wăr t-illa a-s tăddobem iji-net wăla năkk. 6 Ere dăr-i wărăn irtey iket-net, ad-hin-itwăɣtĕs, itwĕjăr-in šund elăkăt ăqqurăn s-afăl hin-ătwăjăr dăɣ-efew, ad-ărɣ s-iyyăt măšan, 7 afăl năkk a ihan inĕzjam-năwăn, ad-dăr-i tărtayăm, tamašalăm măjrăd-in, a tĕttărăm dăɣ-Măssinăɣ-dăɣ, ad-hawăn-t-ăkf. 8 Afăl inĕṭṭulab tamašalnen a iha ărramăt i-Măssinăɣ a tămoosăm, ad-hawăn-dd-isĕnnifilĕl a-wen ălxurmăt n-Abba-nin. 9 Tărha ta-hi ija Abba, ĕnta a hawăn-jeɣ năkk-dăɣ; ĕṭṭĕfăt tărha-nin, tĕzzăɣăm dăɣ-s. 10 Tărha-nin daɣ, wăr tăt-mad-tĕṭṭĕfăm ar s-ad-tĕṭṭafăm fărĕḍăn-in s-ĕmmĕk wa s-ĕṭṭafăɣ fărĕḍăn n-Abba-nin, ĕlkamăɣ i-tărha-net, ĕzzaɣăɣ dăɣ-s." 11 "Măjrăd-wa-dăɣ hawăn-jeɣ, jeɣ-awăn-t dăɣ-tĕssĕba n-ad-tĕjĕm tedăwit šund ta jeɣ, tĕjĕm daɣ tedăwit tĕmdat. 12 Ămăra, ĕnta da fărĕḍ wa kăwăn-ăsiwărăɣ: 'Nĕmărhăt jer-iman-năwăn s-ĕmmĕk-wa-dăɣ s-kăwăn-ărheɣ'. 13 Wăr t-tĕlla tărha tojărăt ad-ăkf ăwadĕm iman-net dăɣ-tĕssĕba n-imidiwăn-net, 14 afăl tamašalăm a-wa fălla-wăn ĕfrăḍăɣ, ad-kăwăn-ɣarrăɣ s-isĕm: 'imidiwăn-in', 15 ad-ăbas kăwăn-jeɣ eklan-in ed akli, wăr dăɣ-s itĕjj măssi-s isălan-net, ănn-ak, ad-tumasăm imidiwăn-in făl-a-s, a-wa s-ĕsleɣ ɣur-Abba-nin iket-net, ĕssĕlmădăɣ-awăn-t. 16 Wădden kăwăneḍ a hi-ăsnăfrănăn, năkk a kăwăn-ăsnăfrănăn, ăɣreɣ-kăwăn-dd i-ad-tamašalăm a iha ărramăt i-Măssinăɣ, umasnăt timašalen-năwăn a iɣlalăn. Afăl jăm a-wen, a tĕttărăm dăɣ Abba-nin s-isĕm-in, ad-hawăn-t-ăkf. 17 Ǝnta da a-wa s-kăwăn-omarăɣ: 'Nĕmărhăt jer-iman-năwăn.' " 18 "Kunta tokăḍ dăr-wăn ăddunya, ĕlmĕdăt a-s tokăḍ dăr-i data-wăn, 19 ĕnnăr tămoosăm ăddinăt ăttilălnen a-wa făll-tĕgl' ăddunya, wăr kăwăn-kĕssĕn. Ăssiilmădăɣ-kăwăn a-s wăr kăwăn-tĕla ăddunya, tokăḍ dăr-wăn daɣ dăɣ-tĕssĕba n-a-wa s-kăwăn-ăsnăfrănăɣ. 20 Ɣaymăt dd-kittĕwăm măjrăd wa s-kăla hawăn-t-jeɣ a-s hawăn-ĕnnĕɣ: 'Wăr t-illa akli ojărăn măssi-s.' Kunta, tăqquzzăbăt-ahi ăddunya-ta-dăɣ, adiš ad-kăwăn-tăqquzzĕbĕt kăwăneḍ-dăɣ, kunta daɣ tăsjăd i-măjrăd-in, adiš, ad-hawăn-sĕjĕd kăwăneḍ-dăɣ 21 măšan, ĕlmĕdăt a-s wăr hawăn-mad-sĕjdĕn ăddinăt, ănn-ak, ălɣizabăt a kăwăn-e-sĕknĕn dăɣ-tĕssĕba-nin ed, wăr-ĕzzeyăn ere wa hi-dd-ăšmašălăn. 22 Ǝnnăr wăr dd-oseɣ i-ad-hasăn-ăjăɣ isălan, iket-di, wăr tăn-itĕwwer abăkkaḍ măšan, ămăra-dăɣ d-hasăn-jeɣ isălan, ăbas hasăn-t-illa ăsaru injărăn ibăkkaḍăn-năsăn. 23 Ere wa dăr-i okăḍăn, okăḍ daɣ d-Abba-nin. 24 Ǝnnăr wăr jere-săn jeɣ ijităn n-Măssinăɣ s-kăla wăr tăn-ija ăwadĕm dat-i, ăqqaymĕn wăr tăn-iwer abăkkaḍ, măšan ămăra-dăɣ, d-ĕnhăyăn ijităn n-Măssinăɣ wi jeɣ dat-tiṭṭawen-năsăn, okăḍăn dăr-i năkk hakd Abba-nin. 25 Hakd a-wen-dăɣ, mikḍaw-năsăn dăr-i, i n-tĕssĕba n-ad-itbat măjrăd n-Măssinăɣ wa iktăbăn dăɣ-alămăr-năsăn a-s tăn-iɣtăl, inn'-asăn: 'Okăḍăn dăr-i dăgg-adĕm bănnan baṭilăn.' 26 Afăl hawăn-dd-ăssawăyăɣ ănabdid wa t-illan ɣur-Abba, ĕnta-i n-Unfas wa wăr dd-zĕjjăr ar tidĕt ta dd-fălăt Abba, ad-hawăn-ăj isălan-in, 27 tumasăm tijuhawen-in făl-a-s, kăwăneḍ-i-dăɣ a-s wi s-a ĕssĕntăɣ ămašal-in har năkk-da-dăɣ, tăddewăm dăr-i."

16

1 "Jeɣ dăɣ-wăn isălan-wi-dăɣ i-ad-wăr tinmĕšrĕyăm. 2 Ilkam ad-hawăn-ĕgdĕlăn kăl-Ălyăhud ămudd dăɣ-ihănan n-ăddin-năsăn, ilkam făw ăzzăman s-ăwadĕm inɣăn iyyăn dăɣ-wăn, ad-iɣal teɣse a ikăt i-Măssinăɣ. 3 Ad-ĕjĕn a-wen ed wăr hi-ĕzzeyăn năkk wăla Abba. 4 Ǝllăɣeɣ-awăn hărwa ămăra, dăɣ-tĕssĕba n-a-s afăl dd-ĕwwăḍăn hărătăn-win-dăɣ, ad-dd-tĕktĕwăm a-s ălleɣeɣ-awăn săr-săn hărwa wăr jen, wăr hawăn săr-săn ĕllăɣeɣ ăru ed a-s ija a-wen, ărtayăɣ dăr-wăn măšan 5 ămăra-dăɣ d-ăssawăḍăɣ uɣĕl n-Wa hi-dd-ăšmašălăn, wăr kăwăn-iha-i hi-isastanăn d-diha ĕkkeɣ 6 măšan, ăɣšadăn ulhawăn-năwăn dăɣ-tĕssĕba n-a-wa hawăn-ĕnneɣ. 7 Tidĕt a hawăn-ĕnnĕɣ, uf'-awăn ad-ăglăɣ ed, afăl wăr-ĕgleɣ, wăr mad-kăwăn-dd-ass ănabdid, afăl ĕgleɣ, ad-hawăn-t-dd-sukăɣ. 8 Afăl dd-osa ănabdid, ad-isĕlmĕd a-s toška ăddunya dăɣ-a-wa ămoosăn abăkkaḍ d-a-wa ămoosăn iqqud d-a-wa ămoosăn ăššăreɣa n-Măssinăɣ; 9 ad-isĕlmĕd ăddinăt a-s oškan dăɣ-isălan n-ibăkkaḍăn ed, wăr săr-i omenăn, 10 isĕlmĕd-tăn a-s oškan dăɣ-isălan n-iqqud ed ĕkkeɣ Abba, wăr-ilkem ad-hi-tĕnhayăm, 11 isĕlmĕd-tăn a-s oškan dăɣ-isălan n-ăššăreɣa ed Iblis-i n-ămănokal n-ăddunya, ăššăreɣa-net, ăru d-t-iɣtăs Măssinăɣ. 12 Leeɣ a ăjjeen s-ărheɣ ad-hawăn-t-ănnăɣ măšan, wăr tăddobem ujreh-net ămăra-dăɣ. 13 Afăl dd-osa Unfas wa wăr dd-zĕjjăr ar tidĕt, ad-kăwăn-aɣĕd dăɣ-tidĕt iket-net făl-a-s, wădden isălan n-iman-net a dăɣ-e ămmăjrăd, ănn-ak, ad-ăj isălan n-a-wa s-islă, ăllăɣăt-awăn hărătăn-wi dd-malĕnen. 14 Afăl dd-osa Unfas, ad-hi-isĕmɣăr făl-a-s, ad-dd-irmĕs măjrăd-in, isuɣĕl-awăn-t. 15 A-wa ila Abba iket-net, i-nin, a-wen-dăɣ a făl hawăn-ĕnneɣ, ad-dd-irmĕs măjrăd-in, isuɣĕl-awăn-t." 16 "Ăqqima-hin a ĕnḍărrăn i-ad-ăbas hi-hannăyăm, akĕy daɣ ăssaɣăt ĕnḍărrăn, talĕsăm-ahi ahănay." 17 Ǝslăn iyyăḍ dăɣ-inĕṭṭulab-net i-tifer-tin-dăɣ ɣas, ănmănnăn jer-iman-năsăn: "Ǝndek ălmăɣna n-măjrăd wa hanăɣ-ija a-s innă: 'Ăqqima-hin a ĕnḍărrăn i-ad-ăbas hi-hannăyăm, akĕy daɣ ăssaɣăt ĕnḍărrăn, talĕsăm-ahi ahănay.' Ma ămoos daɣ ălmăɣna n-: 'ĕkkeɣ Abba-nin' wa hanăɣ-innă?" 18 Ănmănnăn daɣ: "Năkkăneḍ ya wăr t-illa a nĕfham, ma ămoos ălmăɣna 'n-ălwăqq ĕnḍărrăn' wa s-hanăɣ-ijănna." 19 Ilmăd Ɣisa a-s ărhan ad-t-sĕstĕnăn ɣas, inn'-asăn: "Kăwăneḍ, tinmĕssĕstinăm hărwa jer-iman-năwăn dăɣ-a-wa s-hawăn-ĕnneɣ: 'Ăqqima-hin a ĕnḍărrăn i-ad-ăbas hi-hannăyăm, akĕy daɣ ăssaɣăt ĕnḍărrăn, talĕsăm-ahi ahănay'. 20 Ălleɣeɣ-awăn s-tidĕt tădduuttet a-s ad-šoršĕm, sĕkkĕlĕlăm, a-s ija a-wen ăddunya ĕnta tăsriiw, ad-ăɣšĕdăn iman-năwăn măšan, ad-dd-tĕšrĕy tedăwit a-wen. 21 Wădden tamăḍt ed, tăbok ajăraw n-eɣăf-net, ad-taẓăr hullan măšan, afăl tĕjrăw eɣăf-net ad-hin-titaw tiẓẓurt-net tĕnnin-dăɣ iket-net, tisnant-net, ad-has-tăt-in-sĕtĕw tedăwit n-ara wa tĕkrăš. 22 Ǝmmĕk-wen-dăɣ a-s kăwăneḍ-dăɣ ămăra-dăɣ, ăɣšadăn iman-năwăn măšan, ad-kăwăn-alĕsăɣ ahănay, ăddăwen ulhawăn-năwăn, ĕjĕn daɣ tedăwit-ta-dăɣ s-wăr t-illa ere ăddoben aɣăšad-net. 23 Ašăl-wen d-hi-mad-tĕnhĕyăm, wăr mad-t-imĕl făw a-s tămiɣatărăm d-asĕstan-in dăr-s. Ălleɣeɣ-awăn s-tidĕt tădduuttet a-s a tĕttărăm dăɣ-Abba s-isĕm-in, ad-hawăn-t-ăkf. 24 Har ămăra-dăɣ, wăr t-illa a dăɣ-t-dalăm s-isĕm-in, ădĕlăt-t ămăra, ad-kăwăn-ăkf a-wa dăɣ-s tĕttărăm i-ad-săr-wăn dd-tĕmdĕw tedăwit." 25 "A ija a-wa-dăɣ, saɣlayăɣ-kăwăn tangalen, sinfăqqeɣ-awăn hărătăn, măšan, imal-dd ălwăqq d-ăbas hawăn-e-tamăjradăɣ s-tangalen, ašăl-en, ad-hawăn-ăjăɣ isălan n-Abba s-ĕmmĕk ăssiifhămăn. 26 Ašăl-wen, wăr mad-tĕmɣutărăm s-ad-hawăn-ădĕlăɣ Abba, ad-t-tĕdĕlĕm kăwăneḍ iman-năwăn s-isĕm-in 27 făl-a-s, Abba iman-net irh'-iwăn ed tărham-ahi, tomanăm daɣ a-s Măssinăɣ a dd-falăɣ. 28 Ǝnta a hi-dd-ăšmašălăn s-ăddunya ɣas, ămăra, falăɣ-tăt, ăqqalăɣ-t ĕnta-i n-Abba." 29 Ǝnnăn-as inĕṭṭulab-net: "Năkkăneḍ iket nĕjrăh a-wa hanăɣ-janned ed, ăbas hanăɣ-saɣlayăd tangalen, a-wa hanăɣ-janned ămăra iket-net, il' ujreh. 30 Nĕssan ămăra a-s wăr t-illa a-s wădden tĕssanăd-t, wăr tămɣatărăd s-ad-kăy-isĕstĕn ăwadĕm d-hărăt wăl' iyyăn. Dăɣ-tĕssĕba n-a-wen-dăɣ a făl noman a-s kăyy Măssinăɣ a dd-falăd." 31 Inn'-asăn Ɣisa: "Ak tĕnnăm tomanăm săr-i wădden? 32 Ikna măšan, ăssiilmădăɣ-kăwăn a-s imal-dd ăssaɣăt, ăssaɣăt daɣ s-išwar dd-osa, ad-tămmăhăšăm, ilal hak iyyăn dăɣ-wăn tenere n-iman-net, tĕyyĕm-ahi năkk ɣas măšan, kud-hi-fălăm-dăɣ, wăr mad-ăqqaymăɣ năkk ɣas ed, idhal-ahi Abba. 33 Ǝkkăsăɣ-kăwăn dăɣ-taɣdărt n-hărătăn-wi-dăɣ i-ad-săr-i tamĕnăm, tĕjrĕwăm ălxer. Ǝlmĕdăt a-s ad-tĕnhĕyăm aɣăna dăɣ-ăddunya-ta-dăɣ măšan, wăr kăwăn-isărmaɣet hărăt, ĕkrăšăɣ ašăl făll-ăddunya."

17

1 Ija Ɣisa isălan-win-dăɣ ɣas, ăjoẓăy išĕnnawăn, innă: "Abba, tăqqăn ta hi-tĕkfed, tăwwăḍ-dd, sĕtbĕt tĕmɣăre n-ălxurmăt n-Rure-k i-ad-isĕtbĕt ĕnta-dăɣ wa-năk 2 făl-a-s Rure-k, ĕnta a tĕkfed tărna făll-e d t-illăm ăgg-adĕm i-ad-umas ĕssĕbab wa ihăkkăn tămudre ta tăɣlălăt i-ăddinăt wi t-tĕssăɣlăfăd. 3 Tămudre-en, a tăt-ămoosăn: ad-kăy-ĕzzĕyăn, kăyy-i n-Măssinăɣ wa n-tidĕt, ĕzzĕyăn Rure-k Ɣisa Ălmasex wa dd-tăšmašălăd. 4 Ǝssĕlmădăɣ s-ălxurmăt-năk făll-ărori n-ăkall, ăssawăḍăɣ-in daɣ ămašal wa hi-tĕssăɣlăfăd, 5 ămăra Abba, iqqĕlet-ahi-dd ălxurmăt wa ɣur-k leɣ hărwa wăr dd-tăxlek ăddunya. 6 Dăɣ-a-wa ĕkkăsăɣ heɣ ăddunya-ta-dăɣ, ăsbayănăɣ-kăy i-ăddinăt wi hi-dd-tohăɣăd dăɣ-s, tĕssăɣlăfăd-ahi-tăn; kăyy a tăn-ilăn măšan, tĕkfed-ahi-tăn daɣ ɣas, ĕlkămăn i-măjrăd-năk, ĕṭṭăfăn-t. 7 Ašăl-i, ĕlmădăn a-s a-wa hi-tĕkfed iket-net, kăyy a dd-ifal 8 făl-a-s, a-wa hi-tĕnned iket-net, ĕnneɣ-asăn-t, ăqbălăn-t, ĕlmădăn daɣ a-s tidĕt a-s kăyy a dd-fălăɣ, ĕflăsăn a-s kăyy a hi-dd-ăšmašălăn. 9 Tĕddalăɣ-kăy hasăn, wăr kăy-tĕddilăɣ i-ăddunya ta wărăt săr-k tomen, tĕddalăɣ-kăy i-ăddinăt wi hi-tăsnăfrănăd făl-a-s, ăddinăt-win-dăɣ a-s wi-năk. 10 A-wa leɣ iket-net, i-năk, a-wa led daɣ iket-net, i-nin; ĕntăneḍ-en-dăɣ daɣ săr-k omănnen a dăɣ-dd-ănfalăl ălxurmăt-in. 11 Šămad năkk ămăra, ĕzjarăɣ ăddunya-ta-dăɣ i-ad-kăy-in-ăkkăɣ, ăqqaymĕn dăɣ-s ĕntăneḍ, ĕttarăɣ dăɣ-k Abba Šăddijăn, ad-tăn-tagĕẓăd s-tărna n-isĕm-năk wa hi-tĕkfed năkk-i n-Rure-k, i-ad-osaɣăn s-ĕmmĕk wa s-nosaɣ năkk d-kăyy. 12 Ăzzăman wa ĕkkăsăɣ jere-săn, ogaẓăɣ-tăn s-tărna n-isĕm-năk, ogăẓăɣ-tăn daɣ iket-dăɣ-năsăn, jeɣ ĕnniyăt, wăr tăn-iha făw-i hi-ănimăšrăyăn a-s tĕkkăsăd wa n-ăgg-ĕlhĕllak i-ad-itbĕt a-wa dăɣ-ălolăy ĕlkĕttab. 13 Ămăra, năkk-da-dăɣ s-išwar kăy-in-ăqqalăɣ, tajjăɣ-asăn măjrăd-wa-dăɣ, dăɣ-ăddunya-ta-dăɣ, i-ad-ăddăwen s-tedăwit n-tănoflayt ta s-năkk ɣas a tăt-ihakkăn. 14 Ǝssăɣlăfăɣ-tăn măjrăd-năk măšan, tăššunjăt-tăn ăddunya ed, wăr tăn-tĕla s-ĕmmĕk wa s-wăr hi-tĕla năkk-i s-omănăn. 15 Abba, wăr dăɣ-k tĕttărăɣ ad-tăn-tĕkkĕsăd dăɣ-ăddunya-ta-dăɣ, ănn-ak, tattărăɣ dăɣ-k, ad-tăn-tagĕẓăd dăɣ-a-wa lăbasăn. 16 Wăr tăn-tĕla ăddunya-ta-dăɣ s-ĕmmĕk wa s-wăr hi-tĕla năkk-dăɣ-i s-omănăn. 17 Šĕšdĕj-tăn s-măjrăd-năk ed măjrăd-năk a-s tidĕt ta n-tidĕt. 18 Ăšimašălăɣ-tăn s-ăddunya s-ĕmmĕk wa s-hi-dd-tăšmašălăd săr-s, 19 năkk, hakkăɣ-kăy iman-in dăɣ-tĕssĕba-năsăn i-ad-kăy-ĕkfĕn iman-năsăn ĕntăneḍ-dăɣ, šĕšdĕj-tăn s-tidĕt-năk. 20 Wădden ĕntăneḍ-i-dăɣ ɣas a făl kăy-tĕddalăɣ, tĕddalăɣ-kăy daɣ i-ăddinăt iket-dăɣ-năsăn wi s-ilkam ad-săr-k amĕnăn dăɣ-tĕssĕba n-tajuhe-ta mad-ĕjĕn făll-i, 21 umasnet iket-dăɣ-năsăn iyyăt taɣĕssa s-ĕmmĕk wa s-nămoos năkk d-kăyy iyyăn, heɣ-kăy, hed-ahi, umasnet ĕntăneḍ-dăɣ iyyăn dăr-năɣ i-ad-tĕflĕs ăddunya a-s kăyy a hi-dd-Ăšmašălăn. 22 Năkk daɣ, ălxurmăt wa hi-tĕkfed, ĕkfeɣ-asăn-t i-ad-osaɣăn, ămoosăn iyyăn s-ĕmmĕk wa s-nosaɣ, nămoos năkk d-kăyy, iyyăn. 23 Tartit-ta dăr-k jeɣ a dăr-săn jeɣ năkk-dăɣ i-ad-tumas tartit-năsăn ti tĕmdat, tĕlmĕd daɣ ăddunya a-s kăyy a hi-dd-ăšmašălăn, tĕlmĕd daɣ a-s jed-asăn tărha šund ta hi-jed. 24 Ǝttarăɣ dăɣ-k Abba a-s edăgg wa hi-tĕkfed, ăhrăɣet-t ɣur-k daɣ d-ăddinăt-wi hi-tĕkfed i-ad-ĕjjunfun ĕntăneḍ-dăɣ, dăɣ-ălxurmăt wa hi-tĕkfed ed, kăyy tărha-ta hi-jed, jed-ahi-tăt hărwa wăr dd-tăxlek ăddunya. 25 Abba, kăyy-i oɣădăn, tunjăy ăddunya-ta-dăɣ s-ad-kăy-tĕzzĕy măšan năkk, ĕzzăyăɣ-kăy, ăddinăt daɣ wi săr-i omănnen, ĕflasăn a-s kăyy a hi-dd-ăšmašălăn; 26 ăzozăyăɣ-tăn isĕm-năk, ad-kăy-alĕsăɣ daɣ azuzi-hasăn i-ad-tĕjjĕš tărha-ta hi-jed ulhawăn-năsăn, ăknăɣ tartit dăr-săn."

18

1 Issĕmda Ɣisa d-tittar-tin-dăɣ ɣas, iglă ĕnta d-inĕṭṭulab-net, ĕjlăyăn tasĕnjit ta s-itawănna ta n-Šădron, ĕjjăšăn ammas n-ašĕkrĕš n-ihĕškan ihan asălim n-aman, 2 a-wen edăgg s-issan Yăhudĕs-i t-madăn-isĕssăɣdăr a-s itakk'-e-hi-dd Ɣisa d-inĕṭṭulab-net. 3 Iha Ɣisa ammas n-ašĕkrĕš-en-dăɣ a-s Yăhudĕs-da-dăɣ ăddew d-ĕssărdusa d-ălgomităn n-ehăn n-ămudd wa măqqărăn dd-ăssiglăn imănokalăn n-kăl-tikutawen d-kăl-faris ăwwayăn tiftĕl d-imămmălăn, ĕšlajăn tikobawen. 4 Issan Ɣisa ɣur-iman-net a-wa has-iqqălăn, izjăr-dd săr-săn, inn'-asăn: "Mi s-tammăɣăm?" 5 Ǝnnăn-as: "Ɣisa wa n-Năṣirăt." Inn'-asăn Ɣisa: "Năkk da." Ăddinăt-en, ih'-en Yăhudĕs-i t-e-isĕssăɣdărăn. 6 Diha-dăɣ d-hasăn-innă: "Năkk da", issĕkn'-en iman-net, ad-ăškătarăšăn, tĕwăt-tăn tarĕmmeɣt s-ăkall ălwăqq-wen-dăɣ. 7 Olăs-tăn asĕstan, inn'-asăn: "Ak kăwăneḍ, mi s-tammăɣăm?" Ǝnnăn-as daɣ: "Ɣisa wa-n Năṣirăt." 8 Inn'-asăn: "Wădden ĕnneɣ-awăn: 'Năkk da.' Kunta tidĕt-dăɣ a-s năkk a-s tĕmmaɣăm adiš, ăyyăt inĕṭṭulab-in ad-ĕglun." 9 Ijă Ɣisa măjrăd-wen-dăɣ i-ad-umas a ăsidătten a-wa s-kăla tăn-innă a-s innă: "Abba, wi hi-tĕkfed, wăr dăɣ-săn ănmăšrăy wăl' iyyăn." 10 Ilbăy-dd ălwăqq-wen-dăɣ Simyon wa s-itawănna Bĕṭrus tăkoba-net, iwăt săr-s Malkus wa n-akli n-ămănokal n-kăl-tikutawen, inkăḍ-dd tamĕẓẓujt-net ta n-aɣil. 11 Iɣtăl Ɣisa Bĕṭrus, inn'-as: "Suɣĕl tăkoba-năk titar; wăr t-illa ĕmmĕk s-unjăyăɣ s-tesăse n-kara n-tisnant wa hi-iẓẓăl Abba ăssaɣăt-wa-dăɣ." 12 Irmăs kumănda d-ĕssărdusa-net d-ălgomităn-wi dd-ăšmašălăn imănokalăn n-kăl-Ălyăhud Ɣisa, ĕkrădăn-t, 13 ĕlwăyăn-t s-tizarăt s-ehăn n-Xăna wa n-aḍăggal n-Qayăf-i n-ămănokal n-kăl-tikutawen awătay-wen-dăɣ. 14 Qayăf-en-dăɣ a-s kăla innă i-imănokalăn n-kăl-Ălyăhud dăɣ-isălan n-Ɣisa: "Ufa ămmut ăhalĕs iyyăn uhĕn tĕlhăs tamĕtte iket-net." 15 A-s ităjj a-wen-dăɣ, ăddeew Simyon Bĕṭrus d-ănăṭṭalib iyyăn, ĕjan alkum šĕjren i-Ɣisa. Ănăṭṭalib-en dăr-ăddew Simyon, izzay-t ămănokal n-kăl-tikutawen, ijrăw-as a-wen-dăɣ ad-imzĕyyĕt d-Ɣisa ujĕš n-ăɣalla n-ehăn n-ămănokal n-kăl-tikutawen 16 măšan, ăqqima-hin Bĕṭrus ĕnta ibdad dăɣ-tĕfărre dat-emm n-ăɣalla. Ăhoja ănăṭṭalib wa izzăy ămănokal n-kăl-tikutawen ɣas, izjăr-dd, immĕjrăd i-tamăḍt ta tĕṭṭăfăt emm n-ăɣalla, toyy'-e, ăššojăš-dd Bĕṭrus. 17 Tĕkyăd tănaxdimt ta tĕṭṭăfăt emm n-ăɣalla dăɣ-Bĕṭrus, tĕnn'-as: "Ajăn kăyy wădden iyyăn dăɣ-inĕṭṭulab n-ăhalĕs-wa-dăɣ s-iket ittărmăs?" Inn'-as Bĕṭrus: "Wăr t-ămoosăɣ." 18 Itajj a-wen s-ăzzăman n-tajrĕst, ăssiirɣăn inaxdimăn n-ămănokal n-kăl-tikutawen d-ălgomităn wi ăɣlăfnen ehăn n-ămudd wa măqqărăn efew, ĕzzahăn săr-s, ibdăd-dd Bĕṭrus edes-hasăn, ad-itazzăh ĕnta-dăɣ. 19 Issĕstăn ămănokal n-kăl-tikutawen Ɣisa, ittăr dăɣ-s ad-has-ăj isălan n-inĕṭṭulab-net d-a-wa tăn-isăɣra. 20 Ăwwežăb-as Ɣisa, inn'-as: "Năkk, wăr kăla ĕnneɣ hărăt făw i-ăddinăt dăɣ-ufăr, ĕssăɣrăɣ dăɣ-ihănan n-ăddin wi n-kăl-Ălyăhud d-ehăn n-ămudd wa măqqărăn-i dăɣ-tažămmaɣăn kăl-Ălyăhud, wăr t-illa a ăssiɣrăɣ dăɣ-ufăr ɣas, 21 mafăl hi-sastanăd? Sĕstĕn ăddinăt-wi ĕslănen i-a-wa ĕssăɣrăɣ, ĕssanăn a-wa hasăn-ĕnneɣ." 22 Diha-dăɣ d-innă Ɣisa a-wen-dăɣ ad-has-istăɣ iyyăn dăɣ-ălgomităn n-ehăn n-ămudd wa măqqărăn, inn'-as: "Kăyy, ma kăy-ăsihălăn a tĕjĕd erk măjrăd i-amănokăl n-kăl-tikutawen?" 23 Inn'-as Ɣisa: "Kunta jeɣ erk măjrăd, săkĕnăt-ahi a-wa dăɣ-ănmăšrăyăɣ, kunta daɣ măjrăd oɣadăn a jeɣ adiš, mafăl tamătteɣ?" 24 Issĕgdăh Xăna dăɣ-isĕstanăn n-Ɣisa ɣas, ikrăd-t, ăssawăy-t i-Qayăf-i n-ămănokal n-kăl-tikutawen. 25 A-s ităjj a-wen-dăɣ, ăqqiima Simyon Bĕṭrus hărwa s-efew, itazzăh. A ĕnḍărrăn, ăkrăttăt-t ăwadĕm iyyăn, inn'-as: "Wădden kăyy-dăɣ iyyăn dăɣ-inĕṭṭulab-net?" Ăkkuddăl Bĕṭrus a-wen, innă: "Wăr t-ămoosăɣ." 26 Iggăd-dd iyyăn dăɣ-inaxdimăn n-ămănokal n-kăl-tikutawen, ămoosăn ašăqqaɣ n-ăhalĕs wa s-dd-ifrăs Bĕṭrus tamĕẓẓujt-net s-tăkoba, innă i-Bĕṭrus: "Kăyy-i-dăɣ, ĕnhayăɣ-kăy tăddewăd d-Ɣisa dăɣ-ašĕkrĕš n-ihĕškan wa-dăɣ ittărmăs?" 27 Olăs daɣ Bĕṭrus akuddĕl n-a-wen. Tamăzăyyat-ten-dăɣ, ad-iwăt ekăz ăɣora. 28 Hărwa tifawt ad-fălăn d-Ɣisa ehăn wa n-Qayăf, ĕkkăn dăr-s ehăn wa n-gĕfăr măšan, unjăyăn s-ad-ĕjjĕšăn ammas-net făl tuksĕḍa n-ad-sĕmmĕḍĕsăn iman-năsăn, igdĕl-asăn a-wen-dăɣ tetăte n-isan n-taɣsiwen-ti lănen s-ad-ăɣrĕsnăt ašăl wa n-ămudd wa n-Faṣka. 29 Ǝbdadăn dăɣ-ajăma n-ehăn-en-dăɣ a-s săr-săn dd-izjăr Bilatĕs, inn'-asăn: "Ma ămoos uḍlem wa tăsiwărăm ăhalĕs wa tĕlwăyăm?" 30 Ǝnnăn-as: "Ǝnnăr a-s ija a lăbasăn, wăr t-dd-nĕlĕwwĕy săr-k." 31 Inn'-asăn Bilatĕs: "Ăglăt, ĕšrăɣăt-t s-a-wa innă ălqanun-năwăn." Ǝnnăn-as imănokalăn n-kăl-Ălyăhud: "Năkkăneḍ, dăɣ-a-wa innă ălqanun-nănăɣ, wăr hanăɣ-t-illa ad-năj iman n-ăwadĕm." 32 Wăr hasăn-ijrew ălqanun-năsăn tenăɣe n-ăwadĕm i-ad-tĕdduttĕt tĕnna n-Ɣisa făl tamăttant ta mad-ăj. 33 Olăs Bilatĕs ujĕš n-ehăn-net, iɣră-dd Ɣisa tĕzzar, inn'-as: "Ak, kăyy a-s ămănokal n-kăl-Ălyăhud meɣ?" 34 Inn'-as Ɣisa: "Ak tifer-ti-dăɣ jed ămăra-dăɣ, ad-dd-tĕkkasăd dăɣ-eɣăf-năk meɣ măsăllăt a tănăt-jed?" 35 Inn'-as Bilatĕs: "Năkk-š ma ăkkulăɣ, ajăn ăgg-Ălyăhud a ămoosăɣ, tăjjăšăn-ahi isălan-năk? Tumast-năk d-imănokalăn n-kăl-tikutawen a kăy-dd-ăwwăynen săr-i, ɣas, lăɣăt-ahi, ma tăɣšădăd?" 36 Inn'-as Ɣisa: "Tĕmmĕnĕya-nin, wăr tăt-tĕla ăddunya-ta-dăɣ, ĕnnăr tăt-tĕla ăddunya-ta-dăɣ, iket-di, ĕknĕsăn inĕṭṭulab-in i-ad-wăr hi-jen imănokalăn n-kăl-Ălyăhud dăɣ-ifassăn-năk, ămăra, Tĕmmĕnĕya-nin, wăr tăt-tĕla ăddunya-ta-dăɣ." 37 Inn'-as Bilatĕs ălwăqq-wen: "Adiš tidĕt-dăɣ a-s ămănokal a tămoosăd?" Inn'-as Ɣisa: "Kăyy iman-năk tĕnned-tăn, ămănokal a ămoosăɣ. Năkk, ămešălăɣ-dd s-ăddunya-ta-dăɣ, weɣ-dd dăɣ-s i-ad-umasăɣ tajuhe i-tidĕt, ere wa ilkămăn i-tidĕt iket-net, ad-isĕjĕd i-a-wa jănneɣ." 38 Innă Ɣisa a-wen ɣas, inn'-as Bilatĕs: "Tidĕt-i-dăɣ făw, ĕndek-tăt?" Innă Bilatĕs a-wen ɣas, izjăr-dd daɣ s-imănokalăn n-kăl-Ălyăhud, inn'-asăn: "Ăhalĕs wa hi-dd-tăwwăyăm, wăr fălla-s ĕjrewăɣ uḍlem t-ăsinăhăjjăn d-tamăttant măšan, 39 šămad ăssilmădăɣ-kăwăn a-s hak ămudd n-Faṣka, ăsiwăyyăɣ-awăn-in u-takărmut iyyăn, ĕssĕnăt ten'-i-dăɣ tărham ad-hawăn-in-sĕwwĕyyăɣ ămănokal n-kăl-Ălyăhud meɣ?" 40 Ǝslăn i-a-wen ɣas, ăsɣăren dăɣ-išĕnnawăn, ĕnnăn-as: "Făw, wăr hanăɣ-t-dd-toyyed, ănn-ak, sĕwwĕyy-anăɣ-dd Bărɣăbbas." Bărɣăbbas-i s-ărhan a hasăn-t-dd-isĕwwĕyy, ătiwăssan a-s ănaɣtaf a ămoos.

19

1 Irmăs Bilatĕs Ɣisa, omăr ĕssărdusa i-ad-dăɣ-s ĕjĕn tiwit s-ibărtăkăn. 2 Ǝggădăn-dd ĕssărdusa, ĕẓẓăn ălmăt, korona, a-wen, takĕnbut n-isĕnnanăn šund ta tăjjăn imănokalăn tĕzzar, ăswărăn-tăt eɣăf-net, ĕssĕlsăn-t anăkăbba šăggăɣăn 3 tĕzzar, ad-t-tiɣliɣĕlĕyăn, jannen-as: "Ămănokal n-kăl-Ălyăhud, nĕj'-ak gărdĕbu", sattăɣăn-as siha d-siha. 4 Izjăr-dd Bilatĕs daɣ s-kăl-Ălyăhud, innă: "Ǝnhĕywăt, ăhalĕs-i-dăɣ, ăssoɣălăɣ-awăn-t-in i-ad-kăwăn-sĕlmĕdăɣ a-s wăr t-illa uḍlem fălla-s ĕjrawăɣ t-ăsinăhăjjăn d-tamăttant." 5 Izjăr-dd Ɣisa săr-săn ḍarăt-a-wen, ija takĕnbut ta n-isĕnnanăn, ilsa anăkăbba wa šăggăɣăn, inn'-asăn Bilatĕs ălwăqq-wen "Ăhalĕs-năwăn dĕdi." 6 Ǝnhăyăn imănokalăn n-kăl-tikutawen d-ălgomităn Ɣisa ikk'-en-dd ɣas, ăsɣăren iket-năsăn, ĕnnăn i-Bilatĕs: "Itwĕṣlĕbet făll-tajĕttewt, Itwĕṣlĕbet făll-tajĕttewt!" Inn'-asăn Bilatĕs ămăra: "Ărmĕsăt-t, tĕṣlĕbăm-t făll-tajĕttewt kăwăneḍ iman-năwăn făl-a-s năkk, wăr t-illa uḍlem fălla-s ĕjrawăɣ t-ăsinăhăjjăn d-tamăttant." 7 Ǝnnăn-as imănokalăn n-kăl-Ălyăhud: "Năkkăneḍ, ijraw-anăɣ Ăṭṭăwrăt iji n-iman-net ed, ija iman-net Rure-s n-Măssinăɣ." 8 Isla Bilatĕs i-măjrăd-wen-dăɣ ɣas, irmăɣ, 9 ijjăš ehăn-net tĕzzar, innă i-Ɣisa: "Kăyy-i-dăɣ făw, ĕndek siha s-dd-hed?" Wăr t-illa a has-inna Ɣisa. Inn'-as Bilatĕs: 10 "Mafăl wăr hi-jĕnnid hărăt? Ajăn wăr tĕssenăd a-s năkk leɣ tădabit n-ad-kăy-in-ăyyăɣ, leɣ daɣ tădabit n-ad-kăy-ĕṣlĕbăɣ făll-tajĕttewt?" 11 Inn'-as Ɣisa: "Wăr făll-i mad-tĕkrĕšăd tărna wăl' iyyăt săl ta kăy-ikfa Măssinăɣ dăɣ-ăssaɣăt-wa-dăɣ, a-wen-dăɣ a făl ere wa hi-ijăn jer-ifassăn-năk, ojăr-kăy tifut n-abăkkaḍ." 12 Ad-itammăɣ ya Bilatĕs i-ăddăbara s-t-in-ăswăyya măšan, ăsɣăren kăl-Ălyăhud dăɣ-išĕnnawăn, ĕnnăn-as: "Afăl t-in-toyyed, ad-nĕlmĕd a-s kăyy wădden amidi n-Qăyṣăr a tămoosăd făl-a-s, nĕssan a-s ere ijan iman-net ămănokal iket-net, ad-umas ašănjo n-Qăyṣăr." 13 Islă Bilatĕs i-a-wen ɣas, izzĕzjăr-dd Ɣisa tĕzzar, ăqqima dăɣ-edăgg wa dăɣ-iɣattăs ăššăreɣa s-itawănna dăɣ-Ɣăbranĕyya: Ɣăbbata. 14 Itajj a-wen s-tarăhut n-ašăl wa n-dat-wa n-ămudd wa n-Faṣka. Innă Bilatĕs i-imănokalăn n-kăl-Ălyăhud: "Uhĕnăt, ămănokal-năwăn dĕdi." 15 Măšan, ăskălălăn iket-năsăn, ĕnnăn-as: "Ămmătet, ămmătet, itwĕṣlĕbet făll-tajĕttewt." Inn'-asăn Bilatĕs: "Ɣas kăwăneḍ, ăba-hawăn ere tĕṣlăbăm ar ămănokal-năwăn?" Ǝnnăn-as imănokalăn n-kăl-tikutawen: "Năkkăneḍ, wăr nĕla ămănokal săl Qăyṣăr." 16 Ijă Bilatĕs Ɣisa jer-ifassăn-năsăn i-ad-itwĕṣlĕb făll-tajĕttewt. Ărmăsăn ĕssărdusa Ɣisa, ĕlwăyăn-t tĕzzar, 17 ăslănjen-t tajĕttewt ta făll-mad-itwĕṣlĕb, ĕzjărăn dăr-s aɣrĕm, ĕkkăn dăr-s edăgg wa s-itawănna dăɣ-Ɣăbranĕyya: "Gălgota"; a-wen ălmăɣna-net: "Edăgg wa n-akărkor." 18 Ašăl-en, ămizăyyen ĕssin inaɣtafăn atwĕṣlĕb d-Ɣisa; iyyăn daw-aɣil-net, wa iyyăḍăn daw-tăšalje-net, imăl-t ĕnta jere-săn. 19 Ǝṣlăbăn Ɣisa ɣas, issĕktăb Bilatĕs făll-ăllox iyyăn a-s: "A|sc-WA |dƔ|scISA WA N-|dN|scĂṢIRĂT|r |scN-ĂMĂNOKAL N-|dK|scĂL-|dĂ|scLYĂHUD|d".|r Ǝttĕytăyăn-t jĕnnĕj-s făll-tajĕttewt ta făll-ătwăṣlăb. 20 Akătab-en, ăɣrăn-t kăl-Ălyăhud ăjjootnen făl-a-s, edăgg wa dăɣ-ătwăṣlăb Ɣisa, ohaẓ aɣrĕm. Ăllox-en, akătab wa t-iwarăn, ija dăɣ kăraḍ imĕjridăn: Ɣăbranĕyya, Tăromanit d-Tălyunanit. 21 Ǝggădăn-dd imănokalăn n-kăl-tikutawen d-kăl-Ălyăhud, ăsmătărăn Bilatĕs d-udaɣ ad-iktĕb a-s Ɣisa ămănokal n-kăl-Ălyăhud ănn-ak, iktĕbet a-s, innă: năkk, ămănokal n-kăl-Ălyăhud măšan, 22 inn'-asăn Bilatĕs: "A-wa s-išwăr ĕktăbăɣ-t, ĕktăbăɣ-t." 23 Ǝṣlăbăn ĕssărdusa Ɣisa făll-tajĕttewt ɣas, ĕjăn i-isĕlsa-net ĕkkoẓăt tiẓunawen, iḍkăl hak iyyăn dăɣ-săn tăẓune tiyyăt, wăr dd-ăqqima ar tanăkăbbat wăr iha aẓămay wăl' iyyăn. 24 Ărmăsăn-tăt ĕssărdusa ɣas, ănmănnăn jer-iman-năsăn: "Udaɣ ad-tăt-nĕsăɣărriwĕt, năjet fălla-s tisăɣeren i-ad-t-ikrĕš iyyăn dăɣ-năɣ." Ǝjăn tisăɣeren, ămoos a-wen a ăssiitbătăn a-wa iktăbăn dăɣ-măjrăd n-Măssinăɣ a-s inna: "Ăẓunăn isĕlsa-nin, jăn tisăɣeren făll-tanăkăbbat-in." Jăn ĕssărdusa a-wen s-ĕmmĕk-wa-dăɣ s-tăn-innă ĕlkĕttab n-Măssinăɣ. 25 Edes i-tajĕttewt ta făll-ătwăṣlăb Ɣisa, tĕbdad ma-s d-wălătma-s n-ma-s d-Măryăma ta n-hănne-s n-Klufas d-Măryăma ta s-itawănna ta n-Mulăždalĕyăt. 26 Inhăy Ɣisa ma-s tĕbdad edes i-ănăṭṭalib wa ikna tărha ɣas, inn'-as: "Anna, rure-m dĕdi ibdădăn edes-ham." 27 Innă daɣ i-ănăṭṭalib: "Kăyy daɣ, ma-k dĕdi tĕbdădăt edes-hak, taɣălift-năk." Ɣur-ašăl-wen-dăɣ, ij'-et-dd ănăṭṭalib-en s-iman-net, iṭṭăf-as tămudre. 28 Ilmăd Ɣisa a-s ĕssĕbab wa făl dd-ămešăl s-ăddunya, ăssawăḍ-t-in iket-net, făll-tajĕttewt-en-dăɣ, innă: "Ăffuudăɣ." Ămoos a-wen a ăssiitbătăn a-wa innă ĕlkĕttab n-Măssinăɣ fălla-s. 29 Iskar dihen ăkoss iḍkarăn bĕnegăr, innă Ɣisa ăffuud ɣas, ĕttălăn ĕssărdusa tăḍuft făll-ăbori, ĕssĕlmăɣăn-tăt dăɣ-bĕnegăr tĕzzar, ĕẓẓălăn-as-tăt i-ad-tăt-isumĕm măšan, 30 ăkrăbbăt Ɣisa bĕnegăr ɣas, inna: "A-wa s-dd-oseɣ, ijă, imdă". Ăskărăyrăy-dd eɣăf-net ḍarăt-a-wen, ijmăḍ-t unfas. 31 Itajj a-wen ašăl wa n-dat-wa n-Faṣka-i-dăɣ sadawăn ăddinăt i-ămudd. Šămad wăr-ĕrhen imănokalăn n-kăl-Ălyăhud ad-tăn-dd-iɣdăr ămudd wa n-Faṣka-i ĕknăn asĕmɣar ed awătay-wen, oḍa ašăl wa n-ămudd făll-ĕssĕbĕt-i n-tăsonfat, ɣas, osăn Bilatĕs, ĕttărăn dăɣ-s ad-amăr i-ĕssărdusa terăẓẓe n-iḍarăn n-ăddinăt-wi ătwăṣlăbnen făll-tijĕttewen tĕzzar, ĕkkĕsăn-tăn-dd fălla-snăt. 32 Osăn-dd ĕssărdusa ɣas, ărẓăn iḍarăn n-ănaɣtaf wa ăzzarăn, okăyăn daɣ s-amidi-net wa iyyăḍăn, jăn-as a-wen-dăɣ ĕnta-dăɣ. 33 Ǝwwăḍăn-dd Ɣisa, ĕnhăyăn-t ămmut ɣas, okăyăn-t wăr-ărẓen iḍarăn-net 34 măšan, inbăj iyyăn dăɣ-ĕssărdusa tajĕẓẓelt n-Ɣisa s-allaɣ-net, izjăr-tăt-dd ašni s-ĕlkamăn aman. 35 Năkk a iktăbăn isălan-wi-dăɣ ed, ăjjĕyhăɣ-asăn iket-dăɣ-năsăn, tajuhe-nin daɣ, wăr tăt-ih' ăššăk. Ɣas, siɣulăɣ-tăn năkk-i tăn-inhăyăn s-tiṭṭawen-in dăɣ-tĕssĕba n-ad-tamĕnăm s-Ɣisa. 36 Isălan-wi-dăɣ, jăn i-ad-itbĕt a-wa iktăbăn dăɣ-măjrăd n-Măssinăɣ a-s innă: "Wăr mad-ărẓ eɣăs-net wăl' iyyăn." 37 Innă daɣ măjrăd n-Măssinăɣ dăɣ-edăgg iyyăn săl-wen: "Ad-ĕjjĕnfun ăddinăt dăɣ-wa dăjăn." 38 Osă-dd Yusĕf wa n-tadăbayt ta n-Arimata. Ămoos ĕnta iman-net, ănăṭṭalib n-Ɣisa, măšan, iffar a-wen făl tuksĕḍa n-a-wa dăɣ-s-e-ĕnnĕn imănokalăn n-kăl-Ălyăhud. Ǝnta-en-dăɣ a ihălăn tikawt n-Bilatĕs, ittăr dăɣ-s turhajăt n-ad-dd-ikkĕs tafĕkka n-Ɣisa făll-tajĕttewt; ikf'-e Bilatĕs turhajăt n-a-wen ɣas, ikkăs-dd tafĕkka n-Ɣisa făll-tajĕttewt. 39 Osă-dd daɣ dihen Nikodem wa s-kăla dd-ădwănnăt i-Ɣisa s-ehăḍ, iwway a okăyăn kăraḍăt timĕrwen n-kelu n-matălxer d-aḍutăn. 40 Ărmăsăn tafĕkka n-Ɣisa, ĕknăn-tăt s-matălxer d-ăḍutăn tĕzzar, ĕttălăn-tăt dăɣ-tefit, ed a-wen-dăɣ a tajjăn kăl-Ălyăhud i-ere ăba tĕzzar, ĕjăn-t dăɣ-aẓĕkka. 41 Edăgg wa dăɣ-ătwăṣlăb Ɣisa, ohaẓ-t ašĕkrĕš n-ihĕškan, iha aẓĕkka s-kăla wăr dăɣ-s insa ere ăba. 42 Aẓĕkka-wen-dăɣ a dăɣ-jăn tafĕkka n-Ɣisa ed, wăr tăn-ujĕj, ăsinăkmăm-tăn daɣ ămudd-i s-afăl dd-iwwăḍ ăssaɣăt-net, ad-ăbas t-illa emăremar.

20

1 Abĕnnĕbĕn n-ălxad-i n-ašăl ăzzarăn dăɣ-ĕssĕboɣ, hărwa janăt tihay, tĕnšăy Măryăma ta n-Mulăždalĕyăt aẓĕkka wa iha Ɣisa, tĕnhăy a-s tăhunt ta măqqărăt hărăt emm n-aẓĕkka, tămmuqqăs-in. 2 Tošăl s-Simyon Bĕṭrus d-ănăṭṭalib wa iyyăḍăn ikna Ɣisa tărha, tĕnn'-asăn: "Tafĕkka n-Ălɣalim-nănăɣ, tĕmmăḍkăl, ăbas ha aẓĕkka, wăr nĕssen ĕnde d-tăt-jăn ămăra." 3 Igla Bĕṭrus d-ănăṭṭalib wa iyyăḍăn, ĕkkăn aẓĕkka. 4 Ošălăn issĕnăn-essăn măšan, ijmăḍ ănăṭṭalib wa iyyăḍăn Bĕṭrus dăɣ-azzal, išwăr-t-in s-aẓĕkka, 5 ăddunkăt, ăssijjă dăɣ-ammas-net, inhăy tefit tĕnsa d-iman-net măšan, wăr-ijješ ammas n-aẓĕkka. 6 Iwwăḍ-t-dd Simyon Bĕṭrus ɣas, ijjăš ĕnta aẓĕkka, inhăy tefit ta tĕnsăt d-iman-net, 7 olăs daɣ ahănay n-taswĕḍt ta s-kăla tĕttăl eɣăf n-Ɣisa, tĕnsa d-iman-net s-edes, toḍha. 8 Ijjăš-dd fălla-s ḍarăt-a-wen ănăṭṭalib wa iyyăḍăn t-dd-išwărăn s-aẓĕkka, inhăy, omăn; 9 făl-a-s, a-wa-dăɣ jăn ărtayăn d-Ɣisa iket-net, wăr-ĕfhemăn a-wa ĕnnăn ĕlkĕttabăn dăɣ-isălan-net, a-s ĕnnăn a-s, ilzam ad-t-iba tĕzzar, inkăr-dd jer-inĕmmuttan. 10 Ǝqqălăn ḍarăt-a-wen ihănan-năsăn. 11 Tăqqimă-dd ḍara-săn Măryăma, tĕbdad edes i-aẓĕkka, hall. Halla dihen-dăɣ har šik-dăɣ tăssijjă dăɣ-ammas n-aẓĕkka, 12 tĕnhăy ĕssin ănjălosăn ăssiimlălnen, ăqqimăn dăɣ-edăgg wa s-kăla dăɣ-s tĕnsa tafĕkka n-Ɣisa. Ăqqiima iyyăn dăɣ-edăgg wa s-kăla dăɣ-s insa eɣăf n-Ɣisa, ăqqiima wa iyyăḍăn dăɣ-edăgg wa s-kăla dăɣ-s ĕnsăn iḍarăn-net. 13 Ǝssĕstănăn ănjălosăn Măryăma, ĕnnăn-as: "Măryăma, ma kăm-isalhen?" Tĕnn'-asăn: "Tafĕkka n-Ălɣalim-in a tĕmmăḍkălăt, wăr-ĕssenăɣ ĕnde d-tăt-jăn ămăra." 14 Tĕnna a-wen ɣas, tăšnăšlăm, tĕnhăy Ɣisa ibdad măšan, indăr-as ad-t-tĕzzĕy. 15 Immĕjrăd-as, inn'-as: "Tamăḍt, ma kăm-isalhen? Ma dăɣ-m ăba?" Ămmiijrăd-as măšan, tăɣel Măryăma măssi-s n-ašĕkrĕš a has-ămmijrădăn, tĕnn'-as: "Ya ăhalĕs-i-dăɣ, kunta kăyy a iḍkălăn tafĕkka n-Emăli-nin, ĕttarăɣ dăɣ-k idĕm n-ad-hi-sĕknĕd diha tăt-jed i-ad-tăt-ĕḍkĕlăɣ." 16 Iɣr'-et Ɣisa s-isĕm-net, inn'-as: "Măryăma!" Tĕggăd tĕzzar, tĕnnăḍ-dd săr-s, tĕnn'-as dăɣ-Ɣăbranĕyya: "Rabbuni"; a-wen ălmăɣna-net: "Măssi-ɣ." 17 Inn'-as Ɣisa ălwăqq-wen: "Wăr hi-ḍesăd, tawĕɣĕd-ahi făl-a-s, wăr-oseɣ išĕnnawăn-i iha Abba-nin hărwa. Ămăra, ĕglĕw, lăɣăt i-ayĕtma-ɣ a-s ĕkkeɣ Abba-nin-i s-ĕnta daɣ a-s Abba-năwăn, ĕkkeɣ Măssi-ɣ-i n-Măssinăɣ-i s-ĕnta a-s Măssinăɣ-i n-Măssi-wăn." 18 Tĕkkă Măryăma ta n-Mulăždalĕyăt inĕṭṭulab, tĕnn'-asăn: "Năkk, ĕnhayăɣ Emăli". Ad-dăɣ-săn tajj isălan n-a-wa has-innă Ɣisa. 19 Ehăḍ n-ašăl-wĕnnin-dăɣ n-ălxad, ăžžiimmăɣăn inĕṭṭulab dăɣ-ehăn iyyăn, ăṭṭubben imawăn-net făll-iman-năsăn a-wa hasăn-tĕja tuksĕḍa n-imănokalăn n-kăl-Ălyăhud. Wăr tăn-hen isălan a-s ĕnta iman-net da-dăɣ dd-ibdădăn jere-săn, inn'-asăn: "Ins' ălxer n-Măssinăɣ fălla-wăn." 20 Ij'-asăn isofan, ad-tăn-isakna ifassăn-net d-tajĕẓẓelt-net. Ălwăqq-i-dăɣ t-ĕnhăyăn, ĕjăn inĕṭṭulab tedăwit-i-dăɣ măqqărăt. 21 Inn'-asăn Ɣisa: "Ins' ălxer n-Măssinăɣ fălla-wăn. Ămašal wa ijă Abba dăɣ-ifassăn-in, jeɣ-t năkk-dăɣ ămăra dăɣ-ifassăn-năwăn." 22 Ḍarăt-a-wen, ăshăḍ Ɣisa jĕnnĕj-iɣăfawăn-năsăn, inn'-asăn: "Uhĕnăt Unfas Šăddijăn, 23 ere wa s-tĕnšăm ibăkkaḍăn-net, ad-ijrĕw tenăšše-năsăn, ere wa s-tăn wăr tĕnšem, wăr mad-ijrĕw tenăšše-năsăn." 24 Ašăl wa d-jăn isălan-wi-dăɣ, wăr t-illa iyyăn dăɣ-inĕṭṭulab wi n-măraw d-ĕssin s-isĕm-net Tomi wa s-itawănna Ekne. 25 Osă-dd ɣas, ĕnnăn-as inĕṭṭulab wi iyyăḍnen: "Išrăy-kăy-dd Emăli Ɣisa." Unjăy s-ad-tăn-iflĕs, inn'-asăn: "Năkk ɣas, a ĕkkăsăɣ wăr t-ĕnheyăɣ s-tiṭṭawen-in, ĕnhĕyăɣ daɣ idraš n-ibuyĕsăn dăɣ-ifassăn-net, ăjăɣ daɣ assĕkăḍ-in dăɣ-adăriš n-ibuyĕsăn, ăjăɣ ăfuss-in dăɣ-tajĕẓẓĕlt-net ta inbăj allaɣ, wăr mad-ĕflĕsăɣ a-s dd-inkar jer-inĕmmuttan." 26 Ašăl wa n-ĕttam ḍarăt-a-wen, ăžžiimmăɣăn inĕṭṭulab dăɣ-ehăn ăṭṭubben, ih'-en ămăra Tomi. Wăla hin-ĕjrăhăn a-s dd-ibdăd Ɣisa jere-săn, inn'-asăn: "Ins' ălxer n-Măssinăɣ fălla-wăn." 27 Innă Ɣisa i-Tomi ḍarăt-a-wen: "Ahĕẓ-ahi-dd, sĕjrăh ifassăn-in, hĕnda assĕkăḍ-năk, ăj'-e dăɣ-ăfuss-in, tĕjĕd-t daɣ dăɣ-tajĕẓẓelt-in, wăr tăsɣărăd ulh-năk." 28 Ăwwežăb-as Tomi, inn'-as: "Emăli-nin, Măssi-ɣ Măssinăɣ." 29 Inn'-as Ɣisa: "Kăyy, tĕnhăyăd-ahi tĕzzar tomănăd, tĕnḍĕḍ i-ăddinăt wi hi-wăren-ĕnhey măšan, omănăn." 30 Ija Ɣisa dat-inĕṭṭulab-net ijităn n-Măssinăɣ ăjjootnen wăren ĕkteb dăɣ-ĕlkĕttab-wa-dăɣ 31 măšan, a-wa dăɣ-săn iktăbăn dăɣ-ĕlkĕttab-wa-dăɣ iket-net, iktab dăɣ-tĕssĕba n-ad-tamĕnăm a-s Ɣisa a-s Ălmasex wa n-Rure-s n-Măssinăɣ, ere omănăn s-isĕm-net-dăɣ, ad-ijrĕw tămudre ta tăɣlălăt.

21

1 Ḍarăt-a-wen-dăɣ ijăn, ăsnăfalăl-dd Ɣisa daɣ iman-net i-inĕṭṭulab-net dăɣ-asălim n-ejănš wa s-itawănna Tibăryad. Ǝnta da ĕmmĕk wa s-hasăn-dd ăsnăfalăl iman-net: 2 Ašăl iyyăn, ăžžiimmăɣ Simyon Bĕṭrus, Tomi wa n-ekne d-Natanăhil wa n-taɣrĕmt ta n-Kăna tĕhăt teje ta n-Galila d-dăgg-Zăbdi d-ĕssin inĕṭṭulab iyyăḍ daɣ, 3 ăqqiimăn har šik-dăɣ, inn'-asăn Simyon Bĕṭrus: "Năkk, ĕkkeɣ ejănš i-ad-ĕhhuyeɣ imănan." Ǝnnăn-as inĕṭṭulab wi iyyăḍnen: "Ăqqĕl-anăɣ, năddew dăr-k." Ǝzjărăn, ĕjjăšăn turăft n-aman, ĕglăn. Okăy-tăn ehăḍ-wen-dăɣ iket-net, wăr t-illa a ărmasăn. 4 Ăffăw ɣas, iwăr-dd Ɣisa asălim n-ejănš măšan, indăr-asăn ad-t-ĕzzĕyăn. 5 Iɣr'-en, inn'-asăn: "Ilyaḍăn, ajăn wăr lem a tĕkšăm?" Ǝnnăn-as: "Ăbo!" 6 Inn'-asăn: "Ăjrăt ămăra tătart-năwăn s-ašrut wa n-aɣil n-turăft n-aman, ad-tărmĕsăm imănan." Jărăn tătart-năsăn s-ašrut-wen-dăɣ tăn-issĕkna, ĕttărăn ad-tăt-dd-ărkĕbăn dăɣ-aman măšan, tĕndăr-asăn făl aḍănay-i-dăɣ tĕja imănan. 7 Inhăy ănăṭṭalib wa ikna Ɣisa tărha a-wen ɣas, inna i-Bĕṭrus: "Ijmaḍ-t ăššăk a-s a-wa Emăli-nănăɣ." Islă Simyon Bĕṭrus a-s a-wa Emăli Ɣisa ɣas, iḍkăl emăls-net wa ikkăs i-ălxidmăt, ij'-e dăɣ-err-net, ijăr iman-net dăɣ-aman, išyăf, ikk' asălim. 8 Ăɣyămmen-dd inĕṭṭulab wi iyyăḍnen turăft, ăhoben-dd tătart ta tĕḍkărăt imănan ed, wăr t-illa jere-săn d-asălim n-ejănš ar sănatăt timaḍ n-aɣil. 9 Ǝwwăḍăn asălim n-aman ɣas, ĕnhăyăn efew irɣan făll-na/n/năn imănan d-tajĕlla, 10 inn'-asăn Ɣisa: "Awĕyăt-dd a lăn imănan dăɣ-wi s-iket tăn-dd-tărmăsăm." 11 Ijjăš Simyon Bĕṭrus turăft ta n-aman, ăhobăt-dd tătart s-asălim n-aman, osăn-tăt, ih'-et a iwwăḍăn temeḍe d-sĕmmosăt timĕrwen n-emăn d-kăraḍ dăɣ-wi šuharnen măšan, hakd a-wen-dăɣ, wăr ser tătart. 12 Ǝ/n/năn imănan d-tajĕlla ɣas, inn'-asăn Ɣisa: "Ǝyyăwăt, mănsăwăt." Itajj a-wen-dăɣ iket-net măšan, wăr tăn-iha-i ihălăn asĕstan-net d-ere wa ămoos ed, ĕssanăn ămăra a-s Emăli iman-net a-wa. 13 Iḍkăl Ɣisa tajĕlla, ăẓun-asăn-tăt, ăẓun daɣ imănan jere-săn. 14 Ǝnta-da-dăɣ anfilĕl wa s-kăraḍ dd-ija Ɣisa i-inĕṭṭulab-net ḍarăt tanăkra-net jer-inĕmmuttan. 15 Ǝkšăn ɣas, innă Ɣisa i-Simyon Bĕṭrus: "Simyon ăgg Yunĕs, ak torded a-s tojăr tărha ta hi-jed, ta hi-jăn imidiwăn-năk?" Inn'-as Simyon: "Emăli, tĕssanăd a-s ărheɣ tĕmmidĕwa-năk." Inn'-as Ɣisa: "Adiš, ăj i-inĕṭṭulab-in taɣălift ta ităjj amăḍan i-ikĕrwatăn-net." 16 Ij'-as Ɣisa asĕstan wa s-ĕssin, inn'-as: "Simyon ăgg Yunĕs, ak torded a-s tărhed-ahi?" Inn'-as Simyon: "Năkk lab, ărheɣ tĕmmidĕwa-năk." Inn'-as Ɣisa: "Adiš, ăj i-inĕṭṭulab-in tamăḍint ta ităjj amăḍan i-tihatten-net." 17 Ij'-as Ɣisa asĕstan wa s-kăraḍ, inn'-as: "Simyon ăgg Yunĕs, ak tidĕt-dăɣ a-s tărhed tĕmmidĕwa-nin?" Inxăs a-wen-dăɣ iman n-Bĕṭrus d-a-s har kăraḍ ihăndăggan isastan-t d-a-s irh'-e meɣ? Inn'-as Bĕṭrus ămăra: "Emăli, wăr t-illa a-s wădden tĕssanăd-t, tĕssanăd a-s jeɣ-ak tărha tĕmdat." Inn'-as Ɣisa: "Adiš, ăj i-inĕṭṭulab-in taɣălift ta ităjj amăḍan i-tihatten-net. 18 Ălleɣeɣ-ak s-tidĕt tădduuttet a-s dăɣ-tĕmmiwĕḍa-năk, salsed iman-năk, erhet-năk ɣas a kăy-išillĕwăn măšan, afăl wăššarăd, ere wăr tămoosăd a kăy-madăn-isăls, tăttărmăsăd, tăttălwăyăd s-edăgg wăr tărhed." 19 Inn'-as a-wen-dăɣ i-ad-isĕlmĕd Bĕṭrus ălxal n-tamăttant ta has-tăqqălăt madăt-tumas tajuhe ta s-mad-isĕmɣăr Măssinăɣ. Ij'-as Ɣisa măjrăd-wen-dăɣ ɣas, inn'-as: "Ǝlkĕm-ahi." 20 Ăšnăšlăm Bĕṭrus ḍara-s, inhăy ănăṭṭalib wa irha Ɣisa, ilkam-asăn. Ănăṭṭalib-wen-dăɣ a dd-insăn făll-idmarăn n-Ɣisa ehăḍ wa dăr-s ohărăn amĕnsi, ĕnta-en-dăɣ a issĕstănăn Ɣisa ehăḍ-wen a-s has-innă: "Ălɣalim, ĕndek dăɣ-năɣ wa kăy-madăn-isĕssăɣdăr?" 21 Inhăy-t Bĕṭrus ilkam-asăn ɣas, innă i-Ɣisa: "Emăli, wa hi-š ănăṭṭalib, ma dăɣ-s ilkamăn?" 22 Inn'-as Ɣisa: "Kud-ărheɣ ad-iddar har dd-ăqqĕlăɣ, ma tăkkuulăd dăɣ-a-wen? Kăyy, ĕlkĕm-ahi ɣas." 23 Măjrăd-wen-dăɣ ija Ɣisa i-Bĕṭrus a dd-orăwăn a-wa s-jannen inalkimăn n-Ɣisa, ănăṭṭalib-en-dăɣ, wăr dăɣ-s tĕlkem tamăttant măšan, wăr has-inna Ɣisa wăr mad-ămmăt, ănn-ak a inna i-Bĕṭrus: "Ajăn kud-ărheɣ ad-iddar har dd-ăqqĕlăɣ, ma tăkkuulăd dăɣ-a-wen?" 24 Ănăṭṭalib-wen-dăɣ făll-ija Ɣisa tajuhe-ten-dăɣ, a ăjjĕyhăn i-isălan-wi-dăɣ, iktăb-tăn, nĕssan daɣ a-s tajuhe-net, tădduuttăt. 25 Ǝllan-t hărătăn ăjjootnen ija Ɣisa wăren ĕkteb diha-dăɣ. A-wa ija, ija ĕjut wa-dăɣ s-ĕnnăr ittăr ăwadĕm akătab-net s-iyyăn-iyyăn, wăr-ordeɣ a-s tăddobăt tăkost n-ăkall-i-dăɣ aggay n-ĕlkĕttabăn-win-dăɣ he-siwĕlnen dăɣ-isălan-net. Amin!