Řexbar Aṣebḥan n Yeccu Lmasiḥ s ufus n Yuḥanna

1

Lmasiḥ idweř d bnadem

1 Deg umezwaru tuɣa iǧa wawař, awař tuɣa-t ak-d Arebbi, awař tuɣa-t d Arebbi. 2 Wa iǧa ak-d Arebbi deg umezwaru. 3 Zzayes i d itwaxřeq kuřci u nnebřa netta war d itwaxřeq uřa d ict n tmesřact i d itwaxeřqen. 4 Dayes teǧa tudart, tudart tuɣa-tt d tifawt n bnadem. 5 Tifawt tařeqq di taǧest, taǧest war tt-d tiwiḍ. 6 Tuɣa-t d ij n bnadem, issekk it-id Arebbi, qqaren as Yuḥanna. 7 Wa yusi-d i chadet ḥima ad iched i tfawt, ḥima ad zzayes amnen marra. 8 Netta war iǧi ca d tifawt, maca netta itwassekk-d ḥima ad iched i tfawt. 9 Aqqa tifawt n tidett i itticcen tifawt i kuř bnadem, tuɣa tettas-d ɣar ddunnit. 10 Netta tuɣa-t di ddunnit, zzayes tetwagg ddunnit, ddunnit war t tessin ca. 11 Yusi-d ɣar wi iǧan nnes, maca wi iǧan nnes war t iqbiř. 12 Maca marra inni t iqebřen, iwca asen ṣṣulṭa ḥima ad dewřen d tarwa n Arebbi, i yinni ittamnen deg isem nnes, 13 inni war d ixřiqen uřa zeg idammen uřa zi min ixs weysum n bnadem uřa zi min ixs weryaz, maca zi Arebbi i d itwaxeřqen. 14 Awař idweř d aysum, izdeɣ jaraneɣ, neccin neẓra aɛuǧi nnes, aɛuǧi n uyenni n Mmis zi ɣar Babas i iccuren s nniɛmet d tidett. 15 Iched xas Yuḥanna, iřaɣa, inna “D wa min xef nniɣ ‘Wenni i d ɣa yasen awarni ayi, netta idweř zzati, minzi netta tuɣa-t qbeř inu’.” 16 Zi řekmař nnes niwi-d marra, nniɛmet x nniɛmet. 17 Ttawrat temmewc zi Musa, maca nniɛmet d tidett, usint-id zi Yeccu Lmasiḥ. 18 Uřa d ijj war iẓri Arebbi, maca ayenni n Mmis i iǧan deg weḥsin n Tbabat d netta i zzayes issxebbaren.

Chadet n Yuḥanna Amseɣḍaṣ x Yeccu

19 Ta d chadet n Yuḥanna řami d ssekken Wudayen ca n ikehhanen d Ilawiyyen zi Urcalim ḥima ad t sseqsan “Min teɛnid cek?” 20 Tuɣa iched, war issnuffar ca. Uca iched ammu “Necc war ǧiɣ ca d Lmasiḥ.” 21 Sseqsan t “I min teɛnid cek xenni? Ma d cek d amkacaf Iliya?” Inna “War ǧiɣ d necc.” “Ma d cek d amkacaf?” Yarr-d “Lla.” 22 Nnan as “Xenni min teɛnid cek, ḥima ad narr i yinni d aneɣ-d issekken, min teqqared x yixef nnek?” 23 Inna “Necc d tmijja i ittřaɣan di řexřa ‘Seggmem abrid n Arebbi nican!’, am mammec inna umkacaf Icaɛya.” Ica. 40:3 24 Nitni tuɣa twassekken-d zeg Ifarisiyyen 25 uca sseqsan t, nnan “Mařa war teǧid ca d Lmasiḥ uřa d Iliya uřa d amkacaf, i xenni mayemmi tesseɣḍaṣed?” 26 Yuḥanna yarr-d xasen, inna “Necc sseɣḍaṣeɣ deg waman, maca aqqa din ijjen jarawem i war tessinem ca, 27 netta d wenni i d ɣa yasen awarni ayi, netta iǧa qbeř inu, necc war sdiheǧeɣ ad fesyeɣ ifiřan n tsira nnes.” 28 Man aya imsar di Baytɛanya ɣar ujemmaḍ n Lurdun, mani tuɣa Yuḥanna isseɣḍaṣ.

Yeccu Lmasiḥ d Izmar n Arebbi

29 Tiwecca nnes Yuḥanna iẓra Yeccu iggur-d ɣares, inna “Xẓarem, aqqa-t d Izmar n Arebbi i ikkessin ddnub x ddunnit! 30 D wa min xef nniɣ ‘Ad d yas awarni ayi ij n weryaz, yusi-d zzati, minzi netta tuɣa-t qbeř inu.’ 31 Necc war t ssineɣ ca, maca ḥima ad itwassargeb ɣar Israyil, x uyenni usiɣ-d ḥima ad ssɣeḍṣeɣ deg waman.” 32 Yuḥanna iched, inna “Ẓriɣ Arruḥ ihwa-d am ict n tedbirt zeg ujenna, tarsa xas. 33 Necc war t ssineɣ ca, maca wenni d ayi d issekken ḥima ad ssɣeḍṣeɣ deg waman, netta inna ayi ‘Wenni x teẓrid ihwa-d xas Arruḥ uca yarsa xas, d wa d wenni isseɣḍaṣen s Arruḥ Iqeddsen’. 34 Necc ẓriɣ uca cehdeɣ belli netta d Mmis n Arebbi.”

Imeḥḍaren imezwura n Lmasiḥ

35 Tiwecca nnes ɛawed, tuɣa Yuḥanna ibedd ak-d tnayen n imeḥḍaren nnes. 36 Ixẓar ɣar Yeccu i tuɣa igguren uca inna “Xẓarem, d wa d Izmar n Arebbi.” 37 Tnayen n imeḥḍaren sřin as am tt iqqar uca ḍfaren Yeccu. 38 Inneqřeb-d Yeccu, iẓri ten ḍeffaren t-id, isseqsa ten “Min xef tarezzum?” Nitni nnan as “A Rabbi - min ixs ad yini ‘A Amseřmad’, mani tzeddɣed?” 39 Inna asen “Araḥem-d, ad tẓarem.” Ruḥen akides, ẓrin mani izeddeɣ, qqimen akides ass nni, tasaɛɛet tuɣa-tt ɛřaḥař d ɛecra. 40 Andrawus umas n Simɛan Buṭrus tuɣa-t d ijjen zi tnayen nni i isřin aya zi Yuḥanna uca ḍeffaren t. 41 D wa i yufin amezwaru umas Simɛan, inna as “Aqqa nufa ‘Massiya’ ”, isem wanita ixs ad yini ‘Lmasiḥ’. 42 Issiweḍ it-id ɣar Yeccu. Ixẓar dayes Yeccu, inna “Cek d Simɛan, mmis n Yuna, ad ac řaɣan ‘Sifas’ ”, isem wanita ixs ad yini ‘Buṭrus’ ( =aẓru ). 43 Tiwecca nnes tuɣa ixs Yeccu ad iraḥ ɣar Ljalil uca yufa Filibbus. Yeccu inna as “Ḍfar ayi-d!”. 44 Filibbus tuɣa zi Baytṣayda, zi tendint n Andrawus d Buṭrus. 45 Filibbus yufa Natanayil, inna as “Nufa wenni min xef yura Musa di ttawrat d imkacafen, Yeccu mmis n Yusef zi Nnaṣira.” 46 Natanayil inna as “Ma attaɣ izemmar ad d teffeɣ zi Nnaṣira ca n tcuni?” Filibbus inna as “Araḥ-d, texẓared.” 47 Yeccu iẓra Natanayil iggur-d ɣares, inna xas “Xẓar, d wa d ij n Usrayili nican, war dayes bu řɣecc.” 48 Natanayil inna as “Manis d ayi tessned?” Yeccu yarr-d, inna as “Ẓriɣ cek swadday i wartu qbeř mma ad cek-d iřaɣa Filibbus.” 49 Natanayil yarr-d xas “A ‘Rabbi’, cek d Mmis n Arebbi, cek d ajeǧid n Israyil.” 50 Yeccu yarr-d, inna as “Ma tumned s min d ac nniɣ ‘Aqqa ẓriɣ cek swadday i wartu’? Ad tẓared min iǧan ktar zi man aya.” 51 Inna as “S tidett, s tidett, ad awem iniɣ, zi ssa d tsawent ad tẓarem ajenna innurzem u lmalakat n Arebbi ttařyent hekkwant x Mmis n bnadem.”

2

Lmuɛjiza tamezwarut n Lmasiḥ di Qana

1 Deg wass wiss třata temsar din ict n tmeɣra di Qana di Ljalil uca tuɣa din yemmas n Yeccu. 2 Uřa d Yeccu d imeḥḍaren nnes twaɛarḍen-d ɣar tmeɣra. 3 Řami iqḍa binu, tenna as yemmas n Yeccu “War ɣarsen bu binu!” 4 Yeccu inna as “Min jar ayi akidem, a tamɣart? Tasaɛɛet inu war d tiwiḍ ɛad!” 5 Yemmas tenna i imsexxaren “Min d awem i ɣa yini, ggem t.” 6 Tuɣa din setta n iqeddwaḥ n weẓru daysen aman, mmarsen dinni am mammec nnumen tteggen Wudayen řuḍu, kuř ijjen zzaysen ɣares řqedd n tnayen ař třata ‘imetriten’ ( =ɛřaḥař tmanyin ař meyya u ɛicrin litru) . 7 Yeccu inna asen “Ccurem iqeddwaḥ s waman.” Uca ccuren ten s waman ař aqemmum. 8 Řexdenni inna asen “Řexxu agmem-d zzaysen, wcem t i bab n wurar.” Uca ssiwḍen t. 9 Umi bab n wurar iqeǧeb aman i idewřen d binu, - maca netta war issin manis d ikka, maca imsexxaren inni i d as-d yugmen aman, ssnen - , iřaɣa-d bab n tmeɣra x umuřay. 10 Inna as “Kuř bnadem ittqeddam binu aṣebḥan d amezwaru. Mařa inewjiwen swin aṭṭas, ad asen iwc binu war iḥřin, maca cek txemmřed binu iṣebḥen ař i řexxu.” 11 D wa d beddu n řeɛřamat i igga Yeccu di Qana di Ljalil, isseḍhar-d aɛuǧi nnes uca umnen zzayes imeḥḍaren nnes. 12 Awarni man aya iruḥ, ihwa-d ɣar Kafarnaḥum, netta d yemmas, d aytmas, d imeḥḍaren nnes uca qqimen din ca n wussan war iǧi aṭṭas.

Yeccu ittaẓẓeř x isebbaben zi taddart iqeddsen

13 Řami d tiweḍ Basxa, řɛid n Wudayen, issgaɛɛed Yeccu ɣar Urcalim. 14 Yufa di taddart iqeddsen inni din izznuzan ifunasen d wuǧi d idbiren uřa d iṣarrafen n tenɛacin inni din iqqimen. 15 Igga ij n urekkuḍ zeg iseɣwan uca yuẓẓeř xasen marra zi taddart iqeddsen uřa d uǧi d ifunasen. Uca izeǧeɛ iṣuldiyyen n iṣarrafen di tmurt uca iqřeb ṭṭwabeř. 16 Inna i yinni izznuzan idbiren “Kksem man aya ssa. War d ttarram ca taddart n Baba d taddart n ssuq!” 17 Imeḥḍaren nnes ɛeqřen belli tuɣa tura “Cḍaret i taddart nnek icca ayi.” 18 Arrin-d xas Wudayen, nnan as “Man řeɛřamet i d aneɣ i ɣa temřed, belli aqqa ɣarek řḥeqq ḥima ad tegged man aya!” 19 Yeccu yarr-d, inna asen “Hedmem taddart-a iqeddsen uca di třata n wussan ad tt ssbeddeɣ.” 20 Xenni nnan as Wudayen “Taddart-a iqeddsen tebna di setta u arebɛin n iseggwusa, ma cek ad tt-id tessbedded di třata n wussan?” 21 Maca netta tuɣa issawař x taddart iqeddsen n arrimet nnes. 22 Awarni řami d ikkar Yeccu zeg imettinen, xenni ɛeqřen imeḥḍaren nnes min d asen inna uca umnen deg wedlis d wawař i inna Yeccu. 23 Umi t tuɣa di Urcalim di řɛid n Basxa umnen waṭṭas deg yisem nnes, minzi ẓrin řeɛřamat i igga. 24 Maca netta war isscen ca ixef nnes ɣarsen, minzi netta issen iten marra, 25 minzi netta war iḥdij ca ad iched ḥed x bnadem, minzi netta issen min iǧan di bnadem.

3

Yeccu d Nikudimus, amɣar n Wudayen

1 Tuɣa din ij n bnadem zeg Ifarisiyyen qqaren as Nikudimus, netta d ij n umɣar n Wudayen. 2 Yusi-d ɣar Yeccu s ǧiřet, inna as “A Amseřmad, neccin nessen belli cek d Amseřmad i d yusin zi ɣar Arebbi. War izemmar uřa d ijj ad igg řeɛřamat-a i teggid cek, mɣir mařa akis Arebbi.” 3 Yeccu yarr-d xas, inna “S tidett, s tidett, ad ac iniɣ, uřa d ijj war izemmar ad iẓar tageldit n Arebbi mɣir mařa itwaxřeq-d zeg ujenna.” 4 Nikudimus inna as “Mammec izemmar i bnadem ad d ixřeq di tewsar nnes? Ma izemmar ad yadef ict n twařa nneḍni deg uɛeddis n yemmas maḥend ad d itwaxřeq?” 5 Yeccu yarr-d xas “S tidett, s tidett, ad ac iniɣ, mařa ca n yijjen war d ixřiq ca s waman u s Arruḥ, war izemmar ad yadef di tgeldit n Arebbi. 6 Min d itwaxeřqen zeg weysum, netta d aysum. Min d itwaxeřqen zi Arruḥ, netta d Arruḥ. 7 War ttbehtem ca mařa nniɣ awem, ittxeṣṣa kenniw ad d tetwaxeřqem zeg ujenna. 8 Asemmiḍ ittṣuḍ manis ixs, tettesřid i uṣuḍi nnes, war tessined ca manis d ittas uřa mani ittraḥ, ammu ɛawed marra wenni d itwaxeřqen zi Arruḥ.” 9 Nikudimus yarr-d, inna as “Mammec i ɣa yegg ad yiři man aya?” 10 Yeccu yarr-d, inna as “Cek d Amseřmad n Israyil, war tessined ca man aya? 11 S tidett, s tidett, ad ac iniɣ, neccin nessawař x min nessen, neched x min neẓra, waxxa amenni kenniw war teqbiřem ca chadet nneɣ. 12 Mařa ssiwřeɣ awem x tmesřayin n tmurt, kenniw war timnem, mammec i ɣa teggem ad tamnem mařa ssiwřeɣ awem x tmesřayin n ujenna. 13 Uřa d ijj war yuři ɣar ujenna mɣir wenni d ihwan zeg ujenna, netta d Mmis n bnadem wenni iǧan deg ujenna. 14 Amecnaw mammec issgaɛɛed Musa afiɣar di řefyafi, ammu ittxeṣṣ ad itwassgaɛɛed Mmis n bnadem, 15 ḥima marra wenni zzayes i ɣa yamnen war ittmetti ca, maca ad ɣares tiři tudart i řebda. 16 Ammu ixs Arebbi ddunnit ař mani d iwca ayenni n Mmis ḥima kuř ijjen wenni zzayes i ɣa yamnen, war ittmetti ca maca ad ɣares tiři tudart n řebda. 17 Minzi Arebbi war d issekk ca Mmis ɣar ddunnit ḥima ad iḥaseb ddunnit, maca issekk it-id ḥima ad zzayes issenjem ddunnit. 18 Wenni zzayes i ɣa yamnen war ittetwaḥaseb ca, maca wenni war ittimnen ca aqqa itwaḥasab zi řexxu minzi netta war yumin ca deg yisem n uyenni n Mmis n Arebbi. 19 D wa d řeḥkam, aqqa tifawt tusi-d ɣar ddunnit, iwdan xsen taǧest x tfawt, minzi řexdayem nsen tuɣa- tent d tiɛeffanin. 20 Marra wenni itteggen řexdayem tiɛeffanin, icarreh tifawt, war d ittis ca ɣar tfawt, ḥima war twassbanent ca řexdayem nnes. 21 Wenni itteggen tidett ad d yas ɣar tfawt, ḥima ad banent řexdayem nnes, aqqa twaggent di Arebbi.”

Yeccu d Yuḥanna Amseɣḍaṣ

22 Awarni man aya yusi-d Yeccu d imeḥḍaren nnes ɣar tmurt n Yahudiyya, isseɛdu din ca n řweqt akidsen uca tuɣa isseɣḍaṣ. 23 Uřa d Yuḥanna tuɣa isseɣḍaṣ di Ɛaynun i d yusin ṭṭarf i Salim, minzi dinni aman aṭṭas, uca iwdan usin-d dinni uca twassɣeḍṣen. 24 Minzi Yuḥanna tuɣa ɛad war immenḍar ca di řeḥbes. 25 Imsar ij n umḥarweḍ jar imeḥḍaren n Yuḥanna d ij n Wuday x mammec i ɣa yiři řuḍu. 26 U nitni usin-d ɣar Yuḥanna, nnan as “A Amseřmad, xẓar, wenni akik iǧan ɣar ujemmaḍ n Lurdun, wenni min xef tcehded, aqqa netta isseɣḍaṣ u marra ttasen-d ɣares.” 27 Yuḥanna yarr-d, inna “Bnadem war izemmar ad iqbeř uřa d ict n tmesřact mařa war d as temmewc zeg ujenna. 28 Kenniw simant nwem tcehhdem belli necc nniɣ ‘Necc war ǧiɣ ca d Lmasiḥ, maca aqqa necc twassekkeɣ-d zzates’. 29 Wenni i ɣar teǧa tesřit, netta d amuřay. Ameddukeř n umuřay wenni ittbeddan zzates, ittesřa ɣares, ifarreḥ s řefraḥet tameqqrant s tmijja n umuřay. Ammu tetwakemmeř uřa d řefraḥet inu. 30 Ittxeṣṣ ad igma netta u necc ad neqṣeɣ. 31 Wenni i d yusin zi sennej, netta sennej i marra. Wenni iǧan zi tmurt, zi tmurt issawař. Wenni d yusin zeg ujenna, netta sennej i marra, 32 u netta icehhed zi min iẓra d zi min isřa u chadet nnes war tt iqebbeř uřa d ijjen. 33 Wenni iqebbřen chadet nnes d wenni issarsen řxeṭ n ufus nnes belli aqqa Arebbi d tidett. 34 Minzi wenni d issekk Arebbi, issawař s wawařen n Arebbi, minzi netta war itticc ca Arruḥ s řmizan. 35 Tababat ittexs i Tamemmit uca igga as deg ufus nnes kuřci. 36 Wenni ittamnen di Tmemmit, ɣares tudart i řebda, maca wenni war ittimnen ca di Tmemmit, war iẓarr tudart, maca lɣaḍab n Arebbi ad xas iqqim. ”

4

Yeccu issawař ak-d ict n temɣart zi Samariya

1 Umi issen Sidi, aqqa Ifarisiyyen sřin belli Yeccu ittegg u issɣeṭṭaṣ imeḥḍaren ktar zi Yuḥanna, 2 - waxxa netta simant nnes war isseɣḍiṣ ca, maca imeḥḍaren nnes - 3 iffeɣ-d zi Yahudiyya, iruḥ ɛawed ɣar Ljalil. 4 Tuɣa ittxeṣṣ ad icuqq di Samariya. 5 Netta yusi-d ɣar ict n tendint zi Samariya qqaren as Suxar, tenni ɣar ṭṭarf n iyyar i iwca Yaɛqub i mmis n Yusef. 6 Tuɣa din anu n Yaɛqub. Umi yuḥeř Yeccu zeg ibriden, iqqim amenni ɣar wanu, tasaɛɛet tuɣa-tt ɛřaḥař d setta. 7 Tusi-d ict n temɣart zi Samariya ḥima ad tagem aman. Yeccu inna as “Ewc ayi ad sweɣ!”, 8 minzi imeḥḍaren nnes tuɣa ruḥen ɣar tendint ḥima ad sɣen macca. 9 Tamɣart n Samariya tenna as “Mammec teggid tettared zzayi ad teswed, aqqa cek d Uday u necc d tamɣart n Samariya?” Minzi Udayen war nnumen ttemṣurufen ak-d Isamariyyen. 10 Yeccu yarr-d, inna as “Maɛlik tessned timewca n Arebbi d wenni d am iqqaren ‘Ewc ayi ad sweɣ’, iři cem tettar tt zzayes uca netta ad yiři iwc am aman iddaren.” 11 Tenna as temɣart “A Sidi, war ɣarek i zi i ɣa tagmed uca anu yuǧeɣ, manis i d ɣa tawyed aman iddaren? 12 Ma cek d ameqqran zi jedditneɣ Yaɛqub wenni d aneɣ iwcin anu, iswa zzayes, netta d tarwa nnes d řebhayem nnes?” 13 Yeccu yarr-d, inna as “Marra wenni i ɣa iswen zeg waman-a, ad ifud ɛawed, 14 maca wenni i ɣa iswen zeg waman i d as i ɣa wceɣ necc, netta war ittfadi ɛemmarṣ. Minzi aman i d as i ɣa wceɣ necc ad dayes dewřen d timizabin n waman ad ffɣent ɣar tudart n řebda.” 15 Tamɣart tenna as “A Sidi, ewc ayi aman-a ḥima war ttfideɣ, war d ttiseɣ ɛad da, ḥima ad agmeɣ.” 16 Inna as “Ruḥ, řaɣa-d i weryaz nnem uca dweř-d danita.” 17 Tamɣart tarr-d, tenna as “War ɣari bu weryaz.” Yeccu inna as “Tessiwřed nican umi tennid ‘war ɣari bu weryaz’, 18 minzi tuɣa ɣarem xemsa n yeryazen d wenni ɣarem řexxu, war iǧi bu d aryaz nnem. Man aya tennid d tidett.” 19 Tamɣart tenna as “A Sidi, ttwařiɣ belli cek d amkacaf. 20 Řejdud nneɣ ɛebden i Arebbi deg wedrar-a, kenniw teqqarem belli di Urcalim mani iǧa wemcan i di icuwwar ad neɛbed.” 21 Yeccu inna as “Ttiqq ayi, a tameṭṭut, aqqa tasaɛɛet ad d tas i di war tɛebbdem Tababat uřa deg wedrar-a uřa di Urcalim. 22 Kenniw tɛebbdem min war tessinem, maca neccin nɛebbed min nessen, minzi asenjem zeg Wudayen. 23 Tasaɛɛet ad d taweḍ, nettat aqqa-tt řexxu, belli inni iɛebbden nican, ad ɛebden Tababat s arruḥ d tidett. Minzi Tababat yarezzu inni t i ɣa iɛebden ammu. 24 Arebbi d Arruḥ u inni t iɛebbden, ittxeṣṣa asen ad ɛebden s arruḥ d tidett.” 25 Tamɣart tenna as “Necc ssneɣ belli ‘Massiya’ umi qqaren ‘Lmasiḥ’ ad d yas. Xmi i d ɣa yas netta, ad aneɣ ini kuřci.” 26 Yeccu inna as “Aqqa d necc, wenni kim issawařen.” 27 Xenni usi n-d imeḥḍaren nnes, ttɛejben řami t ufin issawař ak-d ict n temɣart. Maca uřa d ijj war ini ‘Min tarezzud?’ niɣ ‘Mayemmi akides tessawařed?’. 28 Tejja temɣart aqedduḥ nnes s waman, tuyur ɣar tendint, tenna i iwdan 29 “Araḥem-d, aqqa ij n weryaz inna ayi marra min ggiɣ. Ma attaɣ netta d Lmasiḥ?” 30 Iwdan ffɣen-d zi tendint, usin-d ɣares. 31 Jar u jar ttaren zzayes imeḥḍaren nnes, nnan “A Amseřmad, ecc!” 32 Maca netta inna asen “Necc aqqa ɣari ij n macca ḥima ad zzayes cceɣ, war t tessinem ca kenniw.” 33 Imeḥḍaren mmseqsan jarasen “Ma iwi as-d ḥed macca?” 34 Yeccu inna asen “Macca inu aqqa ad ggeɣ min ixs wenni d ayi-d issekken uca ad kemřeɣ řxedmet nnes. 35 Ma war teqqarem ‘Iqqim ɛad arebɛa n iyuren uca ad d tas ṣṣabet?’ Necc ad awem iniɣ, sgaɛɛdem tiṭṭawin nwem, xẓarem deg iyyaren, aqqa warɣen wejden i ṣṣabet. 36 Wenni imjaren ad iksi řmunet nnes, iyru řɣiǧet i tudart n řebda, ḥima ad farḥen jmiɛ inni izarrɛen d yinni imejjaren. 37 Minzi di man aya aqqa awař-a d tidett ‘Ijjen ad izarɛ u wenneḍni ad imjar’. 38 Necc ssekkeɣ-d kenniw ḥima ad temjarem waxxa war texdimem kenniw. Inneḍni tuɣa xeddmen, kenniw tudfem ɣar řxedmet nsen.” 39 Aṭṭas n Isamariyyen zi tendint nni umnen zzayes x wawař n temɣart i tuɣa icehhden “Netta inna ayi marra min ggiɣ”. 40 Řami ɣares-d usin Isamariyyen, sseqsan t ḥima akidsen iqqim uca iqqim akidsen tnayen n wussan dinni. 41 Ktaren ɛad inni yumnen s wawař nnes. 42 Nnan i temɣart “Neccin war nettimen ca ɛad zi min d aneɣ tennid, minzi neccin nesřa it s yixef nneɣ, nessen belli wa s tidett d Lmasiḥ, amsenjem n ddunnit.”

Asgenfi n mmis n uxeddam n ujeǧid

43 Awarni tnayen n wussan iffeɣ-d ssenni, iruḥ ɣar Ljalil. 44 Minzi Yeccu simant nnes iched belli amkacaf war ɣares bu ccan di tmurt nnes. 45 Umi d yusa ɣar Ljalil, řqan t-id Ijaliliyyen, minzi nitni ẓrin marra min igga di řɛid di Urcalim, minzi uřa d nitni usin-d ɣar řɛid. 46 Yusi-d ɛawed ɣar tendint n Qana di Ljalil mani yarra aman d binu. Tuɣa din ij n uxeddam n ujeǧid di Kafarnaḥum ɣares mmis ihřec. 47 Řami isřa belli Yeccu yusi-d zi Yahudiyya ɣar Ljalil, iruḥ ɣares, isseqsa t ḥima ad d ihwa maḥend ad issgenfa mmis, wenni tuɣa igguren ad immet. 48 Yeccu inna as “Kenniw war ttimnem ca mařa war teẓrim řeɛřamat d lmuɛjizat.” 49 Inna as uxeddam n ujeǧid “A Sidi, hwa-d ɣar wadday qbeř mma ad immet uḥenjir inu.” 50 Yeccu inna as “Ruḥ aqqa mmic iddar.” Aryaz ittiqq deg wawař i d as inna Yeccu uca iruḥ. 51 Řami d ihwa, mmeřqan akides isemɣan nnes, nnan as ‘Aqqa aḥenjir nnek iddar’. 52 Isseqsa ten x tsaɛɛet min di iggenfa. Nnan as “Iḍennaḍ ɣar sebɛa tejja xas tmessi.” 53 Xenni issen babas belli aqqa imsar ɣar tsaɛɛet i di tuɣa iqqar Yeccu ‘Aqqa mmic iddar’. Yumen netta d marra inni n taddart nnes. 54 Ta d řeɛřamet wiss tnayen i igga Yeccu zeg wami d iffeɣ zi Yahudiyya ɣar Ljalil.

5

Asgenfi n ij n umehřuc ɣar ugeřmam n Baytisda

1 Awarni man aya yiweḍ-d řɛid n Wudayen uca igaɛɛed Yeccu ɣar Urcalim. 2 Ƴar tewwart n wuǧi di Urcalim tuɣa din ij n ugeřmam umi qqaren s tɛibranit ‘Baytisda’, tuɣa ɣares xemsa n ikulwaren ak-d ibilaren. 3 Daysen tuɣa iqqim ij n řɣaci d ameqqran n imehřac d idarɣařen d ineḍbařen d iqejdaḥen, ttrajan anhezzi n waman. 4 Minzi ij n lmalak n Arebbi tuɣa ihekkwa-d deg ugeřmam deg ict n řweqt, issenhezza aman n tařa. Wenni i d ɣa ihwan d amezwaru awarni anhezzi n waman ad itwaggenfa, mammec mma iǧa řehřac nnes. 5 Tuɣa din ij n bnadem dayes řehřac řmijař n tmenya u třatin n iseggwusa. 6 Yeccu iẓra it, isenned dinni, issen belli tuɣa-t din aṭṭas zeg wami, inna as “Ma texsed ad teggenfid?” 7 Yarr-d xas umehřuc “A Sidi, war ɣari bu bnadem wenni d ayi i ɣa issehwan ɣar ugeřmam xmi i ɣa twassenhezzen waman. Xmi ttraḥeɣ necc, ihekkwa-d wenneḍni zzati.” 8 Yeccu inna as “Kkar, teksid tassut nnek, tuyured!” 9 Deɣya iggenfa bnadem nni uca iksi tassut nnes, yuyur. Man aya tuɣa deg wass n ssebt. 10 Nnan Wudayen i wenni tuɣa itwassgenfan “Wa d ass n ssebt, war ɣarek bu řḥeqq ad teksid tassut nnek.” 11 Yarr-d xasen “Wenni d ayi issgenfan, inna ‘Ksi tassut nnek, traḥed!’.” 12 Uca sseqsan t “Min iɛna bnadem-a i d ac innan ‘Ksi tassut nnek, traḥed’?” 13 Wenni itwassgenfan war issin min iɛna netta, minzi Yeccu innejra minzi aqqa din aṭṭas n řɣaci deg wemcan nni. 14 Awarni man aya yufi t Yeccu di taddart iqeddsen, inna as “Xẓaret, aqqa teggenfid, war ttegg bu ddnub ɛad, ḥima war d ac ittemsar min iɛeffnen ktar.” 15 Aryaz iruḥ, ixebbar Udayen belli d Yeccu it issgenfan.

Tababat d Tamemmist d yijjen

16 Xuyennixsen Wudayen ad darrcen x Yeccu, arezzun ad t nɣen, minzi igga man aya deg wass n ssebt. 17 Maca Yeccu yarr-d xasen “Aqqa Baba ixeddem ař yiḍa u necc ɛawed aqqa xeddmeɣ. 18 Di ssibbet-a arezzun Wudayen ɛad ktar ḥima ad t nɣen, war iǧi waha minzi ixařef ssebt, maca uřa minzi iqqar aqqa Arebbi d Babas, ittarra ixef nnes d Arebbi. 19 Yeccu yarr-d, inna asen “S tidett, s tidett, ad awem iniɣ, Tamemmit war izemmar ad igg uřa d ict n tmesřact s yixef nnes, mɣir mařa iẓra Tababat ittegg it. Min mma ittegg netta uřa d Tamemmit ittegg amenni. 20 Tababat ittexs Tamemmit uca isscen as marra min ittegg uca ad as isscen řexdayem timeqqranin x tina ḥima ad tdehcem. 21 Am mammec d issnekkar Tbabat imettinen uca itticc tudart, amenni uřa d Tamemmit itticc tudart i wenni ixs. 22 Tababat war ittḥasab uřa d ijj, maca iwca lḥisab marra i Tmemmit, 23 ḥima ad weqqaren marra Tamemmit am ttweqqaren Tababat. Wenni war ittweqqaren Tamemmit, war ittweqqar ca Tababat wenni it-id issekken. 24 S tidett, s tidett, ad awem iniɣ, wenni ittesřan i wawař inu uca ittamen deg wenni d ayi-d issekken, ɣares tudart n řebda, war d ittis ca ɣar lḥisab, maca netta aqqa immuṭi zi řmewt ɣar tudart. 25 S tidett, s tidett, ad awem iniɣ, ad d tas tsaɛɛet, aqqa-tt řexxu, i di imettinen ad sřen tmijja n Mmis n Arebbi u inni i ɣa isřen, ad ddaren. 26 Maca am mammec ɣar Tbabat ɣares tudart deg ixef nnes, ammu i iwca uřa i Tmemmit ḥima ad ɣares tiři tudart deg ixef nnes. 27 Uca iwca as ṣṣulṭa ḥima ad iḥaseb, minzi netta d Mmis n bnadem. 28 War ttɛejibem ca s man aya, aqqa ad d tas tsaɛɛet i di marra inni iǧan deg imeḍřan ad sřen tmijja nnes 29 uca ad d ffɣen inni iggin taṣebḥant ad kkaren ad raḥen ɣar tnukra n tudart uca inni iggin tuɛeffna ad kkaren, ad raḥen ɣar tnukra n lḥisab. 30 Necc war zemmareɣ ad ggeɣ ca zeg ixef inu. Am mammec ttesřiɣ, ad ḥasbeɣ u lḥisab inu d řḥeqq, minzi necc war arezzuɣ min xseɣ, maca min ixs wenni d ayi-d issekken. 31 Maɛlik cehhdeɣ i ixef inu, iři aqqa chadet inu war teǧi ca nican. 32 Aqqa din ijjen nneḍni wi xafi icehhden. Necc ssneɣ belli chadet i xafi icehhed, aqqa d tidett i teǧa. 33 Kenniw tessekkem-d ɣar Yuḥanna uca netta iched i tidett. 34 Maca necc war qebbřeɣ ca chadet n bnadem. Maca necc qqareɣ man aya ḥima ad tetwassnejmem. 35 Netta d řefnar iyareqqen, ittlillicen, kenniw texsem ad tfarḥem s tfawt nnes ɣar ict n tsaɛɛet. 36 Maca necc ɣari ict n chadet d tameqqrant x tenni n Yuḥanna, minzi řexdayem i d ayi iwca Tbabat ḥima ad tent kemmřeɣ, řexdayem nni i tteggeɣ cehhdent simant nsent aqqa d Tababat d netta i d ayi-d issekken. 37 Tababat wenni d ayi-d issekken, d netta i xafi icehhden. Kenniw ɛemmarṣ war tesřim tmijja nnes uca war teẓrim ca addud nnes 38 uca awař nnes war daywem ittɣimi ca řebda, minzi kenniw war tettimnen ca deg wenni it-id issekken. 39 Arzum deg idlisen, minzi ittɣiř awem aqqa daysen tudart n řebda uca aqqa-ten d inni i xafi icehhden. 40 Waxxa amenni kenniw war tettexsem ad ɣari d tasem ḥima ad ɣarwem tiři tudart. 41 War qebbřeɣ ca aɛuǧi n iwdan, 42 maca necc ssneɣ kenniw, aqqa kenniw war ɣarwem bu tayri n Arebbi deg ixef nwem. 43 Necc usiɣ-d s yisem n Baba, kenniw war d ayi tqebbřem ca. Mařa yusi-d ca n yijjen s yisem nnes, ad t tqebřem. 44 Mammec tzemmarem ad tamnem, mařa kenniw tettexsem aɛuǧi n wayawya, maca war tarezzum ca x uɛuǧi n uyenni n Arebbi? 45 War d awem ittɣiř ad zzaywem cetciɣ ɣar Tbabat. Wenni zzaywem i ɣa icetcan d Musa x wenni tessrusam asitem nwem. 46 Mařa tumnem zi Musa, ad tiři tumnem dayi, minzi netta yura xafi. 47 Mařa kenniw war tuminem ca deg idlisen nnes, mammec i ɣa teggem ad tamnem deg wawařen inu?”

6

Asecci n xemsa ařaf

1 Awarni man aya iruḥ Yeccu ɣar ujemmaḍ n řebḥar n Ljalil, wenni d řebḥar n Tibiriyas. 2 Iḍfar it-id ij n řɣaci d ameqqran, minzi ẓrin řeɛřamat nnes i igga i imehřac. 3 Řexdenni igaɛɛed Yeccu ɣar wedrar uca iqqim dinni ak-d imeḥḍaren nnes. 4 Basxa, řɛid n Wudayen, war d as iqqim ca. 5 Řexdenni issgaɛɛed Yeccu tiṭṭawin nnes uca, umi iẓra ij n řɣaci d ameqqran yusi-d ɣares, inna i Filibbus “Manis i ɣa nseɣ aɣrum, ḥima ad ccen ina?” 6 Inna ammu ḥima ad t ijarreb, minzi netta simant nnes issen min i ɣa yegg. 7 Yarr-d xas Filibbus “Aɣrum s mitayn n ddinar war ten ittqeddi ḥima ad iksi kuř ijjen zzaysen drus.” 8 Ijjen zeg imeḥḍaren nnes, netta d Andrawus, umas n Simɛan Buṭrus, inna as 9 “Aqqa da ij n uḥenjir ɣares xemsa n tecnifin n imendi d tnayen n iseřman, maca anect uya qaɛ i waṭṭas?” 10 Yeccu inna “Sɣimem iwdan.” Tuɣa din aṭṭas n řeḥtic deg wemcan nni. X uyenni qqimen yeryazen, aqqa-ten di xemsa ařaf idsen ɛřaḥař. 11 Yeccu iksi ticnifin, iqada uca ibḍa tent x imeḥḍaren nnes u imeḥḍaren nnes wcin tent i inni iqqimen. Iwca amenni ɛawed zeg iseřman ɛlaḥsab anect ixsen ad ccen . 12 Řami jjiwnen, inna i imeḥḍaren nnes “Yrum iřeqqwaz iceṭṭen, ḥima war ittḍeyyeɛ walu.” 13 Yrun uca ɛemmaren tenɛac n tsuǧatin s iřeqqwaz n xemsa n tecnifin n imendi i iceṭṭen awarni řami ccin. 14 Řami ẓrin iwdan řeɛřamet i igga Yeccu, nnan “Wa d tidett d amkacaf i d ittasen ɣar ddunnit.” 15 Umi issen Yeccu, belli ad d asen nitni, ad t ṭṭfen s uɣiř ḥima ad t ggen d ajeǧid, xenni innejra ɣar wedrar, ḥaca netta weḥdes.

Yeccu iggur x waman n řebḥar

16 Řami d tewḍa tmeddit, hwan-d imeḥḍaren nnes ɣar řebḥar. 17 Nyin di tɣarrabut, qeḍɛen řebḥar ɣar Kafarnaḥum. Iřa teǧa taǧest tqarreb-d u Yeccu tuɣa ɛad war ɣarsen-d yusi. 18 Řebḥar innehweř minzi asemmiḍ tuɣa ittṣuḍ aṭṭas. 19 Ařami tuɣa qeddfen řqedd n ɛřaḥař xemsa u ɛicrin ař třatin ' istadiyyen' (=ɛřaḥař arebɛa ař setta kilumiter ), ẓrin Yeccu iggur x řebḥar, ittqarrab-d ɣar tɣarrabut uca ggweden. 20 Inna asen “Aqqa d necc, war tteggwedem ca.” 21 Nitni xsen ad t ssqebřen di tɣarrabut uca taɣarrabut tiweḍ deɣya ɣar řbarr i ɣar iǧa ttraḥen. 22 Tiwecca nnes ibedd řɣaci ɣar ujemmaḍ n řebḥar, ẓrin belli war din tuɣi uřa d ict n tɣarrabut nneḍnit mɣir icten, tenni mani dayes udfen imeḥḍaren nnes u Yeccu war yudif ca di tɣarrabut ak-d imeḥḍaren nnes, maca aqqa imeḥḍaren nnes ruḥen weḥdsen. 23 Usint-id tɣarruba nneḍnit zi Tibiriyas zzat i wemcan mani ccin aɣrum řami tuɣa iqada Sidi. 24 Řami iẓra řɣaci aqqa war din iǧi Yeccu uřa d imeḥḍaren nnes, udfen uřa d nitni di tɣarrabut uca usin-d ɣar Kafarnaḥum arezzun x Yeccu.

Yeccu netta d aɣrum n tudart

25 Řami t ufin ɣar ujemmaḍ n řebḥar, nnan as “A Amseřmad, meřmi d tusid da?” 26 Yeccu yarr-d xasen, inna “S tidett, s tidett ad awem iniɣ, kenniw tarezzum xafi, war iǧi umi teẓrim řeɛřamat maca umi teccim aɣrum uca tejjiwnem. 27 War ttxedmem i macca ixessaren, maca i macca ittɣiman i tudart n řebda, tenni d awem i ɣa iwc Mmis n bnadem, minzi Tababat, issars ṭṭabeɛ nnes xas.” 28 Nnan as “Min i ɣa negg, ḥima nzemmar ad negg řexdayem n Arebbi?” 29 Yarr-d Yeccu, inna asen “Ta d řxedmet n Arebbi, aqqa ad tamnem deg wenni d issekk netta.” 30 Nnan as “Man řeɛřamet i ɣa tegged ḥima ad nẓar uca ad zzayek namen? Man řxedmet i ɣa tegged? 31 Řejdud nneɣ ccin ‘manna’ di řexřa am mammec tura ‘Netta iwca asen-d aɣrum zeg ujenna ḥima ad t ccen’.” 32 Inna asen Yeccu “S tidett, s tidett ad awem iniɣ, war iǧi d Musa i d awem iwcin aɣrum zeg ujenna, maca Baba itticc awem aɣrum n tidett zeg ujenna. 33 Minzi aɣrum n Arebbi d netta wenni d ihekkwan zeg ujenna uca itticc tudart i ddunnit.” 34 Nnan as “A Sidi, ewc aneɣ-d řebda aɣrum-a.” 35 Yeccu inna asen “Necc d aɣrum n tudart. Wenni ɣari-d i ɣa yasen, war ittřiẓ ɛemmarṣ u wenni dayi i ɣa yamnen war ittfidi ɛemmarṣ. 36 Maca necc nniɣ awem, aqqa kenniw teẓrim ayi, waxxa amenni kenniw war tuminem ca. 37 Marra min d ayi i ɣa iwc Tbabat, ad ɣari-d yas u wenni ɣari-d i ɣa yasen, war t ssuffuɣeɣ ca ɣar barra. 38 Minzi necc hwiɣ-d zeg ujenna, war iǧi ca ḥima ad ggeɣ min xseɣ necc, maca ḥima ad ggeɣ min ixs wenni d ayi-d issekken. 39 D man aya min ixs Tbabat wenni d ayi-d issekken, aqqa marra min d ayi iwca, war zzayes ssweddareɣ walu, maca ad t-id ssnekkareɣ deg wass aneggaru. 40 D man aya min ixs netta wenni d ayi-d issekken, aqqa kuř ijj wenni i ɣa iẓaren Tamemmit uca ad dayes yamen, ad ɣares tiři tudart n řebda uca ad t-id ssnekkareɣ deg wass aneggaru.” 41 Udayen cetcan zzayes, minzi inna “Necc d aɣrum i d ihwan zeg ujenna.” 42 Nnan “Ma d wanita war iǧi bu d Yeccu, mmis n Yusef, neccin nessen babas d yemmas? Mammec i ɣa yini ‘Necc hwiɣ-d zeg ujenna’?” 43 Yeccu yarr-d xasen, inna “War tcetcam ca jarawem. 44 War izemmar uřa d ijj ad ɣari-d yas, mɣir mařa ijebd it- id Tbabat wenni d ayi-d issekken uca necc ad t-id ssnekkareɣ deg wass aneggaru. 45 Aqqa tura deg idlisen n imkacafen ‘Nitni marra ad twassřemden zi Arebbi’. Xenni kuř ijj wenni t isřin u iřmed it zi Tbabat, ad ɣari-d yas. 46 Uřa d ijj war iẓri Tababat mɣir wenni iǧan zi Arebbi. Wa iẓra Tababat. 47 S tidett, s tidett ad awem iniɣ, wenni dayi ittamnen, ad ɣares tiři tudart n řebda. 48 Necc d aɣrum n tudart. 49 Řejdud nwem ccin ‘manna’ di řexřa uca mmuten. 50 Man aya d aɣrum i d ihekkwan zeg ujenna, ḥima marra ad zzayes ccen, war ttmettin ca. 51 Necc d aɣrum iddaren i d ihwan zeg ujenna. Mařa ijjen icca zeg weɣrum-a, ad iddar i řebda. Aɣrum wenni i ɣa wceɣ, netta d aysum inu i ɣa wceɣ i tudart n ddunnit.” 52 Udayen mmenɣen jarasen, nnan “Mammec izemmar wa ad aneɣ iwc aysum nnes ḥima ad t necc?” 53 Yeccu yarr-d xasen “S tidett, s tidett, ad awem iniɣ, mařa war teccim ca aysum n Mmis n bnadem uca ad teswem idammen nnes, xenni war ɣarwem-d tiři tudart deg ixef nwem. 54 Wenni i ɣa iccen aysum inu uca ad isu idammen inu, ad ɣares tiři tudart n řebda u necc ad t-id ssnekkareɣ deg wass aneggaru. 55 Minzi aysum inu d macca d tidett uca idammen inu d tsessit n tidett. 56 Wenni i ɣa iccen aysum inu uca ad isu idammen inu, ad dayi iqqim u necc dayes ɛawed . 57 Am mammec d ayi-d issekk Tbabat iddaren uca necc ddareɣ zi Tbabat, ammu ɛawed ad zzayi iddar wenni zzayi i ɣa iccen. 58 Wa d aɣrum i d ihwan zeg ujenna. War iǧi ca amecnaw mammec ccin řejdud nwem ‘manna’ uca mmuten, maca wenni i ɣa iccen aɣrum-a, ad iddar i řebda.” 59 Inna man aya deg usinagug am tuɣa isseřmad di Kafarnaḥum.

Aṭṭas n imeḥḍaren bdan tteggwejjen x Yeccu

60 Aṭṭas n imeḥḍaren nnes, umi sřin man aya, nnan “Awař-a iqseḥ. Wi izemmaren ad as iseř?” 61 Issen Yeccu deg yixef nnes, aqqa imeḥḍaren nnes cetcan x man aya, xenni inna asen “Ma man aya d řefḍiḥet i kenniw? 62 I mammec mařa teẓrim Mmis n bnadem ittgaɛɛad ɣar mani iřa iǧa qbeř? 63 Arruḥ d wenni itticcen tudart. Aysum war ineffeɛ i walu. Awařen i d awem nniɣ, daysen arruḥ d tudart. 64 Maca aqqa din ca jarawem inni war yuminen.” Minzi Yeccu issen zeg umezwaru man yen iǧan inni war yuminen u man wen t i ɣa isellmen. 65 Inna “S uyenni d awem nniɣ ‘War izemmar uřa d ijj ad ɣari-d yas mɣir mařa temmewc as zi Tbabat’.” 66 Zi řweqt nni dewřen aṭṭas zeg imeḥḍaren nnes ɣar ḍeffar, war qqimen ca gguren akides. 67 Inna Yeccu i tenɛac n imeḥḍaren nnes “Ma uřa d kenniw texsem ad tuyurem?” 68 Simɛan Buṭrus yarr-d xas “A Sidi, wi ɣar i ɣa nraḥ? Cek ɣarek awařen n tudart n řebda, 69 aqqa neccin numen u nessen aqqa cek d Lmasiḥ, Mmis n Arebbi iddaren.” 70 Yeccu yarr-d xasen “Ma war iǧi d necc i kenniw ixḍareɣ s tenɛac? Uca ijjen zzaywem d ibřis.” 71 Inna man aya x Yahuda, mmis n Simɛan Isxariyuṭi, minzi wanita tuɣa ixs ad t isellem u netta d ijjen zi tenɛac.

7

Yeccu iggur ɣar řɛid n Txuzan n ifetwan di Urcalim

1 Awarni man aya tuɣa Yeccu iggur di Ljalil, war ixs ad iraḥ ad inneḍ di Yahudiyya, minzi Udayen tuɣa arezzun ad t nɣen. 2 Iqarreb-d řɛid n Wudayen umi qqaren ‘Tixuzan n ifetwan’. 3 Nnan as aytmas “Ffeɣ ssanita, ruḥ ɣar tmurt n Yahudiyya ḥima uřa d imeḥḍaren nnek zemmaren ad ẓaren man řexdayem nnek i tettegged. 4 Uřa d ijj war ittegg ca n tmesřact s tnuffra, mařa netta s ixef nnes yarezzu ad d iḍhar ɣar barra. Mařa teggid timesřayin-a, scen ixef nnek i ddunnit.” 5 Minzi uřa d aytmas war dayes uminen ca. 6 Inna asen Yeccu “Řweqt inu ɛad war d tiwiḍ, maca řweqt nwem aqqa-tt řebda akidwem. 7 Ddunnit war tzemmar ad kenniw tcarh, maca nettat tcarh ayi, minzi necc cehhdeɣ xas belli řexdayem nnes d tiɛeffanin. 8 Ruḥem kenniw ɣar řɛid-a. Necc war ttriḥeɣ ca ɣar řɛid-a, minzi řweqt inu ɛad war tkemmeř.” 9 Umi d asen inna ammu, iqqim di Ljalil. 10 Maca umi ruḥen aytmas, iruḥ uřa d netta ɣar řɛid, war d iḍhar ɣar barra, maca igga axmi innufar. 11 Udayen arezzun xas di řɛid, nnan “Mani iǧa wanita?” 12 Aṭṭas zi řɣaci temtumen xas, ca zzaysen nnan “Netta d aryaz d aṣebḥan” Maca inneḍni nnan “Lla, issxarriq x řɣaci.” 13 Maca uřa d ijj war xas issiweř s bṭayṭay zi ssibbet n tiggwudi zeg Wudayen. 14 Maca ařami iɛdu wezyen zi řɛid, iruḥ Yeccu ɣar taddart iqeddsen, isseřmad. 15 Udayen dehcen, nnan “Mammec igga netta issen idlisen am war ten iɣri ca?” 16 Yeccu yarr-d xasen “Taɣuri inu war teǧi ca inu, maca zeg wenni d ayi-d issekken. 17 Mařa ijjen ixs ad igg min ixs Arebbi, ad issen ma aqqa taɣuri-ya zi Arebbi niɣ aqqa ssawařeɣ zeg yixef inu. 18 Wenni issawařen zeg yixef nnes yarezzu aɛuǧi nnes, maca wenni yarezzun aɛuǧi n wenni t-id issekken, aqqa netta d tidett, war dayes bu řɣecc. 19 Ma war iǧi d Musa i d awem iwcin ttawrat? Maca uřa d ijj zzaywem war ittegg ttawrat? I mayemmi xenni tarezzum ad ayi tenɣem?” 20 Řɣaci yarr-d “Dayek cciṭan, wi yarezzun ad cek ineɣ?” 21 Yeccu yarr-d xasen “Xedmeɣ ict n řxedmet uca kenniw tettbehtem marra. 22 S uya Musa iwca awem-d axtan, axtan maca war iǧi ca zi Musa, maca zi řejdud nwem u kenniw txettnem i bnadem di ssebt. 23 Mařa iqbeř bnadem ad itwaxten di ssebt ḥima war tetwarezzi ttawrat n Musa, ma ad xafi txeyyqem řami ssgenfiɣ bnadem ikmeř di ssebt? 24 War ḥekkmem ca zi min iḍharen ɣar barra, ḥekmem s ij n řḥukm iseggden.”

Ma Yeccu netta d Lmasiḥ?

25 Ca n iwdan zi Urcalim nnan “Ma war iǧi d wa i yarezzun ad t nɣen? 26 Maca xẓar, issawař s bṭayṭay, war d as qqaren walu. Attaɣ aqqa ssnen imeqqranen n weydud nican belli s tidett wanita d Lmasiḥ? 27 Maca nessen wa, manis netta. Maca xmi i d ɣa yas Lmasiḥ, uřa d ijj war issin manis netta.” 28 Ařami tuɣa isseřmad di taddart iqeddsen, iřaɣa Yeccu, inna “Kenniw tessnem ayi u tessnem manis necc. Necc war d usiɣ s yixef inu, maca wenni d ayi-d issekken aqqa-t d tidett, kenniw war t tessinem ca. 29 Necc ssneɣ t, minzi necc zzayes u netta d wenni d ayi-d issekken.” 30 Xenni arezzun ad t ṭṭfen, maca uřa d ijj war xas issars afus, minzi tasaɛɛet nnes war d tiweḍ ɛad. 31 Aṭṭas zi řɣaci umnen zzayes, nnan “Xmi i d ɣa yas Lmasiḥ, ma ad igg řeɛřamat ktar zi tina i igga wa?”

Udayen arezzun ad ṭṭfen Yeccu

32 Ifarisiyyen sřin min xas itemten řɣaci uca arruyas n ikehhanen d Ifarisiyyen ssekken-d imxazniyyen ḥima ad t ṭṭfen. 33 Yeccu inna “Necc ad kidwem qqimeɣ drus ɛad, xenni ad raḥeɣ ɣar wenni d ayi-d issekken. 34 Ad xafi tarzum, war dayi tetteṭṭifem u mani i ɣa iřiɣ necc, war tzemmarem ad d tadfem. 35 Xenni nnan Wudayen jarasen “Mani i ɣa iraḥ wanita mani war nzemmar ad t naf. Ma xenni ixs ad iraḥ ɣar Iyunaniyyen izeǧɛen maḥend ad isseřmed Iyunaniyyen. 36 Min iɛna wawař-a i inna ‘Ad xafi tarzum, war dayi tetteṭṭifem ca u mani i ɣa iřiɣ necc, war tzemmarem ad d tadfem’?”

Mařa ifud ḥed, ejj it ad ɣari-d yas uca ad isu!

37 Deg wass aneggaru ameqqran zi řɛid, ibedd-d Yeccu uca iřaɣa, inna “Mařa ifud ḥed, ejj it ad ɣari-d yas uca ad isu. 38 Wenni dayi i ɣa yamnen, am mammec inna wedlis, ad zzayes azzřen iɣezran n waman iddaren zeg uɛeddis nnes.” 39 Inna man aya x Arruḥ i ɣa qebřen inni dayes ittamnen. Minzi Arruḥ Iqeddsen war d asen immewc ɛad , minzi Yeccu war itwassɛuǧi ɛad. 40 Ca zi řɣaci xenni, umi sřin awař-a, nnan “D wa d amkacaf s tidett.” 41 Inneḍni nnan “Wa d Lmasiḥ”, maca ca nneḍni zzaysen nnan “Ma iggur ad d yas Lmasiḥ zi Ljalil? 42 Ma war ini wedlis, aqqa Lmasiḥ ad d yas zi zzariɛet n Dawud, zi dcar n Baytlaḥm, manis d yusa Dawud?” 43 Uca imsar umsebḍi n řɣaci di ssibbet nnes. 44 Ca zzaysen xsen ad t ṭṭfen, maca uřa d ijj war xas issars ifassen. 45 Xenni usin-d imxazniyyen ɣar arruyas n ikehhanen u ɣar Ifarisiyyen, u nitni nnan asen i imxazniyyen “Mayemmi war t-id tiwyem?” 46 Arrin-d xasen imxazniyyen “Ɛemmarṣ war issiweř uřa d ijj n bnadem am mammec issawař bnadem-a!” 47 Arrin-d xasen Ifarisiyyen “Ma uřa d kenniw ɛawed tweddarem? 48 Ma xenni din ca n ijjen zeg imeqqranen n weydud niɣ zeg Ifarisiyyen yumen zzayes? 49 Maca řɣaci-ya i war issinen ca ttawrat, aqqa itwanɛeř.” 50 Nikudimus wenni ɣares iruḥen s ǧiřet, netta d ijjen zzaysen, inna asen 51 “Ma ad teḥkem ttawrat nneɣ x ij n bnadem, nnebřa mma ad zzayes tseř uca ad tessen min ittegg netta?” 52 Arrin-d, nnan as “Ma uřa d cek attaɣ zi Ljalil? Arzu, xẓar, uřa d ijj n umkacaf war d ikki ca zi Ljalil.” 53 Xenni iruḥ kuř ijjen ɣar taddart nnes.

8

Tamɣart izennan

1 Maca Yeccu iruḥ ɣar wedrar n Zzitun. 2 Ƴar ṣṣbeḥ zic yusi-d ɛawed ɣar taddart iqeddsen, usin-d ɣares iwdan marra uca am iqqim, ibda isseřmad iten. 3 Imseřmaden n idlisen d Ifarisiyyen iwyen as-d ict n temɣart, tetwaṭṭef tettegg zzina. Ssbedden tt di řwesṭ, 4 nnan as “A Amseřmad, tamɣart-a tetwaṭṭef tettegg zzina. 5 Iweṣṣa aneɣ Musa di ttawrat ad narjem timɣarin amecnaw tanita. Maca min i ɣa tinid cek?” 6 Nnan as man aya ḥima ad t jarrben, ḥima ad ɣarsen tiři minzi xas i ɣa cetcan. Maca Yeccu yuḍar swadday, yura s uḍaḍ nnes di tmurt. 7 Řami qqimen ammu ttesseqsan, ibedd, inna asen “Wi zzaywem iǧan nnebřa ddnub, ad xas inḍar aẓru amezwaru.” 8 Xenni yuḍar ɛawed swadday uca yura di tmurt. 9 Řami sřin man aya, ffɣen ijjen awarni wenneḍni, imeqqranen d amezwaru, xenni ineggura. Iqqim Yeccu weḥdes ak-d temɣart tbedd di řwesṭ. 10 Yeccu, umi ikkar, war iẓri ḥed mɣir tamɣart, inna as “A tamɣart, mani iǧan inni cem iḍeřmen? Ma war cem iḥakem uřa d ijjen?” 11 Nettat tenna “Uřa d ijj, a Sidi.” Yeccu inna as “Uřa d necc war cem ttḥakameɣ ca, ruḥ, war ttɛawad ad tegged ddnub.”

Yeccu d tifawt n ddunnit

12 Řexdenni issiweř Yeccu ɛawed akidsen, inna “Necc d tifawt n ddunnit. Wenni d ayi i ɣa iḍfaren, war iggur ɛemmarṣ di taǧest, maca ad ɣares tiři tfawt n tudart.” 13 Nnan as Ifarisiyyen “Cek tcehhded x yixef nnek, chadet nnek war teǧi ca d tidett.” 14 Yeccu yarr-d, inna asen “Mařa necc cehdeɣ x yixef inu, waxxa amenni chadet inu teǧa d tidett, minzi necc ssneɣ manis d usiɣ u mani i ɣa raḥeɣ, maca kenniw war tessinem ca manis d usiɣ uřa mani i ɣa raḥeɣ. 15 Kenniw tḥakamem ɛlaḥsab aysum, necc war ttḥakameɣ uřa x ijjen. 16 U necc, mařa ḥakmeɣ, ad yiři řeḥkam inu d tidett, minzi necc war ǧiɣ bu weḥdi, maca necc d Tbabat wenni d ayi-d issekken. 17 Tura ɛawed di ttawrat nwem belli chadet n tnayen n iwdan d tidett. 18 Necc d wenni icehhden x yixef inu uca uřa d Tababat wenni d ayi-d issekken, iched xafi.” 19 Nitni nnan as “Mani iǧa Babac?” Yeccu yarr-d “Kenniw war d ayi tessinem ca u war tessinem Baba. Maɛlik kenniw d ayi tessnem ad tiři tessnem uřa d Baba.” 20 Inna awařen-a di mani tuɣa ṣṣenduq n ṣṣedqet, am tuɣa isseřmad di taddart iqeddsen. War t iṭṭif uřa d ijj minzi tasaɛɛet nnes tuɣa ɛad war d tiwiḍ. 21 Xenni Yeccu inna asen ɛawed “Necc ad raḥeɣ, kenniw ad xafi tarzum, ad temmtem di ddnub nwem. Mani i ɣa raḥeɣ necc, war tzemmarem kenniw ad d tasem.” 22 Udayen nnan “Ma ad ineɣ ixef nnes, minzi netta inna ‘Mani i ɣa raḥeɣ necc, war tzemmarem kenniw ad d tasem’?” 23 Netta inna asen “Kenniw zi swadday, necc zi sennej. Kenniw zi ddunnit-a, maca necc war ǧiɣ ca zi ddunnit-a. 24 X uyenni nniɣ awem ‘Ad temmtem di ddnub nwem’. Řami kenniw war tuminem ca aqqa d necc, ad temmtem di ddnub nwem.” 25 Nnan as “Min teɛnid cek?” Yeccu inna asen “Necc d min d awem nniɣ zeg umezwaru. 26 Necc ɣari aṭṭas n tmesřayin i xef zemmareɣ ad xawem ssiwřeɣ uca ad xawem ḥekmeɣ. Maca wenni d ayi-d issekken aqqa-t d tidett. Uca min zzayes sřiɣ necc, ad t iniɣ i ddunnit.” 27 Nitni war fhimen ca, belli tuɣa issawař akisen x Tbabat. 28 Xenni inna asen Yeccu “Xmi i ɣa tessgaɛɛdem Mmis n bnadem, ad tfehmem belli aqqa-t d necc u belli necc war tteggeɣ uřa d ict n řḥajet zeg yixef inu, maca necc ssawařeɣ am mammec d ayi isseřmed Tbabat. 29 Wenni d ayi-d issekken aqqa-t akidi. Tababat war d ayi ijji ca weḥdi, minzi necc tteggeɣ řebda min t yarḍan.” 30 Umi tuɣa issawař x tmesřayin-a, umnen dayes aṭṭas.

Ayt n Ibrahim

31 Inna Yeccu i Wudayen inni dayes yumnen “Mařa teqqimem teṭṭfem deg wawař inu, ad tiřim s tidett d imeḥḍaren inu 32 uca ad tessnem tidett uca tidett ad kenniw tḥarr.” 33 Arrin-d xas “Neccin d ayt n Ibrahim, ɛemmarṣ war neɛbid ḥed. Mammec tzemmared ad tinid ‘kenniw ad twaḥarrem’?” 34 Yeccu yarr-d xasen “S tidett, s tidett, ad awem iniɣ, marra wenni itteggen ddnub netta d ismeɣ n ddnub 35 uca ismeɣ war ittɣimi ca di taddart řebda, maca mmis ad din iqqim i řebda. 36 Xmi kenniw i ɣa iḥarr Tmemmit, ad tiřim s tidett d iḥurriyyen. 37 Necc ssneɣ, aqqa kenniw d ayt n Ibrahim, maca kenniw tarezzum ad ayi tenɣem, minzi awař inu war yufi ca amcan daywem. 38 Necc ssawařeɣ s min ẓriɣ zi Baba. Uřa d kenniw tetteggem zi min teẓrim zi řejdud nwem.” 39 Arrin-d, nnan as “Babatneɣ d Ibrahim.” Inna asen Yeccu “Maɛlik kenniw teǧim zi ayt n Ibrahim ad yiři aqqa tetteggem řexdayem n Ibrahim. 40 Maca řexxu tarezzum ad ayi tenɣem, necc d ij n bnadem i tuɣa akidwem issawařen s tidett i sřiɣ zi Arebbi. Man aya war t iggi ca Ibrahim. 41 Kenniw tetteggem řexdayem n babatwem.” Xenni nnan as nitni “Neccin war d nexřiq ca zi zzina, aqqa ɣarneɣ ijjen wenni d Babatneɣ, aqqa-t d Arebbi.”

Ayt n ibřis

42 Inna asen Yeccu “Maɛlik Arebbi d Babatwem, iři aqqa texsem ayi, minzi necc ffɣeɣ-d zi Arebbi uca usiɣ-d zzayes. War d usiɣ ca zeg yixef inu, maca netta issekk ayi-d. 43 Mayemmi war tefhimem i wawařen inu? Minzi kenniw war tzemmarem ad tesřem i wawař inu. 44 Aqqa ɣarwem ibřis d tababat uca texsem ad teggem immeẓran n babatwem. Netta tuɣa ineqq iwdan zeg umezwaru u war ibedd di tidett minzi war dayes bu tidett. Meřmi mma issiweř s uxarriq, issawař s min dayes, minzi netta d bu-ixarriqen d tababat n uxarriq. 45 Maca, umi necc qqareɣ awem tidett, kenniw war dayi tettimnem ca. 46 Wi zzaywem ad ayi isseqneɛ x ddnub? Umi qqareɣ tidett, mayemmi war dayi tettimnem ca? 47 Wenni iǧan zi Arebbi, ittesřa i wawařen n Arebbi. Minzi kenniw war teǧim ca zi Arebbi, s uyenni kenniw war tettesřim ca.”

Yeccu tuɣa-t din qbeř Ibrahim

48 Udayen arrin-d, nnan as “Ma war iǧi nican umi nenna, aqqa cek d Asamari u dayek cciṭan.” 49 Yeccu yarr-d “Necc war dayi bu cciṭan, maca necc ttweqqareɣ Baba uca kenniw tesseḥqaram ayi. 50 Necc war arezzuɣ ca aɛuǧi inu. Aqqa din ijjen i xas yarezzun u ijjen i ɣa iḥkem. 51 S tidett, s tidett, ad awem iniɣ, mařa ca n yijjen iṭṭef deg wawař inu, ɛemmarṣ ad iẓar řmewt i řebda.” 52 Nnan as Wudayen “Řexxu nessen belli dayek cciṭan. Aqqa Ibrahim d imkacafen mmuten. Cek teqqared ‘mařa ca n yijjen iṭṭef deg wawař inu, ɛemmarṣ ad iqqas řmewt i řebda’. 53 Ma cek temɣared x jedditneɣ Ibrahim wenni immuten? Uřa d imkacafen mmuten. Min tḥesbed ixef nnek?” 54 Yarr-d Yeccu “Mařa necc ssɛuǧiɣ ixef inu, aɛuǧi inu war iǧi d walu. Baba, aqqa issɛuǧa ayi, wenni minxef teqqarem, aqqa-t d Arebbi nneɣ. 55 Kenniw war t tessinem, maca necc aqqa ssneɣ t. Mařa nniɣ ‘war t ssineɣ’, ad iřiɣ necc d bu- ixarriqen am kenniw. Maca necc ssneɣ t uca tteṭṭfeɣ deg wawař nnes. 56 Jedditwem Ibrahim tuɣa ittraja s řefraḥet ḥima ad iẓar ass inu uca iẓra it, uca ifarḥ.” 57 Nnan as Wudayen “Ɛad war ɣarek bu xemsin iseggwusa, mammec teggid teẓrid Ibrahim?” 58 Inna asen Yeccu “S tidett, s tidett, ad awem iniɣ, qbeř mma tuɣa Ibrahim, tuɣa necc ǧiɣ.” 59 Xenni ksin iẓra ḥima ad t arejmen, maca Yeccu issnuffar ixef nnes uca iffeɣ zi taddart iqeddsen, icuqq di řwesṭ nsen, ammu i xasen ikka.

9

Asgenfi n ij n udarɣař zi temẓi nnes

1 Umi xasen-d ikka, iẓra ijj n weryaz tuɣa d adarɣař zeg wami d ixřeq. 2 Imeḥḍaren nnes sseqsan t, nnan “A Amseřmad, wi ixḍan, ma d wa niɣ lwalidin nnes ařami d ixřeq d adarɣař?” 3 Yeccu yarr-d “Uřa d netta war ixḍi uřa d lwalidin nnes, maca man aya aqqa imsar, ḥima ad dayes ḍharent řexdayem n Arebbi. 4 Icuwwar ad xedmeɣ řexdayem n wenni d ayi-d issekken, maḥend ɛad d aziř. Ad d tas taǧest mani war izemmar uřa d ijj ad ixdem. 5 Mintra necc aqqa-yi di ddunnit, necc d tifawt n ddunnit.” 6 Řami inna ammu, issusef di tmurt, igga abeǧaɛ zeg ikuffan nni uca iḥennec tiṭṭawin n udarɣař s ubeǧaɛ. 7 Inna as “Ruḥ, tessirded deg ugeřmam n Siluwam”, isem-a ixs ad yini ‘itwassekken’. Iruḥ, issird, idweř ittwařa. 8 Jjiran d yinni tuɣa t iẓrin qbeř ssnen aqqa-t d adarɣař, nnan “Ma war iǧi d wa d wenni tuɣa ittɣiman ittettar?” 9 Ca zzaysen nnan “Aqqa d netta.” Nnan inneḍni “Ittawi-d dayes”. Maca netta inna “Aqqa d necc.” 10 Nnan as “Mammec ggin tt twarezment tiṭṭawin nnek?” 11 Yarr-d uca inna “Bnadem nni umi qqaren Yeccu, igga abeǧaɛ, iḥennec tiṭṭawin inu uca inna ayi ‘Ruḥ ɣar ugeřmam n Siluwam, tessirded’. Xenni ruḥeɣ, ssirdeɣ uca dewřeɣ ttwařiɣ.” 12 Nnan as “Mani iǧa netta?” Inna “War ssineɣ.” 13 Awyen-d wenni tuɣa iǧa qbeř d adarɣař ɣar Ifarisiyyen. 14 Tuɣa d ssebt řami igga Yeccu abeǧaɛ u yarzem as tiṭṭawin nnes. 15 Sseqsan t Ifarisiyyen ɛawed, mammec idweř ittwařa. Yarr-d xasen “Igga abeǧaɛ x tiṭṭawin inu, xenni ssirdeɣ uca dewřeɣ ttwařiɣ.” 16 Ca zeg Ifarisiyyen nnan “Bnadem-a war iǧi ca zi Arebbi, minzi netta war ittweqqar ca ssebt”. Ca nneḍni nnan “Mammec izemmar ij n bnadem d aɛeffan ad igg řeɛřamat am tina?” Uca imsar ubeṭṭu jarasen. 17 Nnan ɛawed i udarɣař “Min xas teqqared cek, ařami yarzem tiṭṭawin nnek?” Netta inna “Aqqa-t d amkacaf.” 18 Udayen war zzayes uminen ca belli netta tuɣa d adarɣař uca idweř ittwařa, ařami d řaɣan x lwalidin n wenni idewřen ittwařa. 19 Sseqsan ten, nnan “Ma wa d mmitwem minxef teqqarem aqqa itwaxřeq-d d adarɣař? I mammec igga ittwařa řexxu?” 20 Arrin-d lwalidin nnes uca nnan “Neccin nessen belli wa d mmitneɣ, aqqa itwaxřeq-d d adarɣař. 21 Maca mammec igga ittwařa řexxu, war nessin u wi d as yarezmen tiṭṭawin nnes war t nessin ca. Seqsam t simant nnes, netta aqqa d abřiɣ, ad issiweř x yixef nnes.” 22 Nnan lwalidin nnes ammu minzi ggweden zeg Wudayen, minzi Udayen mɛahaden belli wenni i ɣa icehden aqqa netta d Lmasiḥ ad itwassuffeɣ zeg usinagug. 23 X uyenni nnan lwalidin nnes “Netta aqqa-t d abřiɣ, seqsam t s yixef nnes.” 24 Řaɣan-d tawařa wiss tnayen x weryaz wenni tuɣa d adarɣař, nnan as “Sɛuǧa Arebbi! Aqqa nessen belli aryaz-a d ij n umednub.” 25 Netta yarr-d “Ma netta d amednub war ssineɣ, necc ssneɣ ict n tmesřact, aqqa tuɣa-yi d adarɣař, řexxu ttwařiɣ.” 26 Nnan as “Min zzayek igga? Mammec d ac igga yarzem tiṭṭawin nnek?” 27 Yarr-d xasen “Aqqa nniɣ awem t, kenniw war tesřim. Mayemmi texsem ad t tesřem i twařa nneḍni? Ma texsem uřa d kenniw ad dewřen d imeḥḍaren nnes?” 28 Kkwaren t, nnan “Cek d ameḥḍar nnes! Maca neccin aqqa d imeḥḍaren n Musa. 29 Neccin nessen aqqa Arebbi issiweř ak-d Musa, maca wanita war nessin ca manis netta.” 30 Yarr-d weryaz, inna asen “Aqqa di man aya řeɛjeb, kenniw war tessinem ca manis netta, waxxa amenni netta yarzem ayi tiṭṭawin inu. 31 Neccin nessen, aqqa Arebbi war ittesři ca ɣar imednab, maca mařa ca n ijjen ittweqqar Arebbi ad igg min ixs netta, aqqa Arebbi ad ɣares iseř. 32 Ɛemmarṣ war itwasři qaɛ, aqqa ca n ijjen yarzem tiṭṭawin n ijjen ixřeq-d d adarɣař. 33 Mařa wa war iǧi ca zi Arebbi, war izemmar ad igg walu!” 34 Arrin-d, nnan as “Cek txeřqed-d tkemmřed di ddnub, ma xenni tesseřmaded aneɣ?” Xenni nḍaren t ɣar barra. 35 Isřa Yeccu belli nḍaren t ɣar barra, uca, umi t yufa, inna as “Ma tumned zi Mmis n Arebbi?” 36 Yarr-d, inna “Min iɛna netta, a Sidi, ḥima ad dayes amneɣ?” 37 Inna as Yeccu “Aqqa cek teẓrid t uřa d wenni akic issawařen aqqa-t d netta.” 38 Netta inna “Umneɣ, a Sidi” uca iɛebd as. 39 Yeccu inna “I řḥukm i ɣar d usiɣ ɣar ddunnit-a, ḥima ad ẓaren inni war ittwiřin u ḥima inni ittwařan ad darɣřen.” 40 Umi sřin ca n Ifarisiyyen i iǧan akis man aya, nnan as “Ma aqqa d neccin ɛawed d idarɣařen?” 41 Inna asen Yeccu “Maɛlik teǧam d idarɣařen war ɣarwem ittiři bu ddnub, maca řexxu teqqarem ‘aqqa nettwařa’, x uyenni ad iqqim ddnub nwem.”

10

Yeccu d ameksa d aṣebḥan

1 “S tidett, s tidett ad awem iniɣ, wenni war ittidfen zi tewwart ɣar wexxam n wuǧi, maca ad issgaɛɛed manis nneḍni, aqqa-t d aceffar d axewwan. 2 Maca wenni i ɣa yadfen zi tewwart netta d ameksa n wuǧi. 3 Aɛessas n tewwart ad as yarzem i wanita uca uǧi ad iseř i tmijja nnes. Netta ad iřaɣa i wuǧi nnes s ismawen nsen uca ad ten issuffeɣ ɣar barra. 4 Awarni řami issuffeɣ marra uǧi nnes, ad yuyur zzatsen uca uǧi ad t-id iḍfar minzi issen tmijja nnes. 5 Maca abarrani war t ḍeffaren ɛemmarṣ, maca ad zzayes arewřen, minzi nitni war ssinen tmijja n ubarrani.” 6 Inna asen Yeccu amettiř-a, maca nitni war fhimen ca i tmesřayin min xef tuɣa akisen issawař. 7 Yeccu inna ɛawed “S tidett, s tidett ad awem iniɣ, necc d tawwart n wuǧi. 8 Marra inni i d yusin qbeř inu aqqa-ten d iceffaren d ixewwanen. Maca uǧi war d asen isři. 9 Necc d tawwart. Wenni zzayi i ɣa yadfen, ad itwassenjem. Netta ad yadef, ad iffeɣ uca ad yaf mani i ɣa yarwes. 10 Aceffar war d ittis mɣir ḥima ad yacar, ad iɣarṣ uřa ḥima ad isshellek. Necc maca usiɣ-d ḥima ad ɣarsen tiři tudart s waṭṭas. 11 Necc d ameksa d aṣebḥan. Ameksa d aṣebḥan issrusa tudart nnes i wuǧi nnes. 12 Maca amcaray aqqa netta war iǧi ca d ameksa u netta war iǧi ca d bab n wuǧi. X minni i ɣa iẓar uccen yusi-d, ad yejj uǧi uca ad yarweř. Uccen ad ten ixḍef uca ad izeǧeɛ uǧi. 13 Amcaray yarweř minzi netta d amcaray, war t icqi wuǧi. 14 Necc d ameksa d aṣebḥan. Ssneɣ uǧi inu uca uǧi inu issen ayi, 15 am mammec i d ayi issen Tbabat, ammu i ssneɣ necc Tababat. Necc wciɣ tudart inu i wuǧi inu. 16 Ƴari ɛad uǧi nneḍni, inni war iǧin ca zeg wexxam-a. Icuwwar ayi ad ten-d nedheɣ tanya uca ad sřen i tmijja inu, xenni ad tiři d ict n tḥimart d ijj n umeksa. 17 S man aya ittexs ayi Tbabat, minzi necc wciɣ tudart inu ḥima ad tt-id ksiɣ ɛawed. 18 Uřa d ijj war zzayi tt iksi, maca necc wciɣ tt s yixef inu. Ƴari ṣṣulṭa ḥima ad tt wceɣ u ɣari tizemmar ad tt-id ksiɣ ɛawed. Tawṣeyyet-a ṭṭfeɣ tt zi Baba.” 19 Xenni imsar ɛawed ij n ubeṭṭu jar Wudayen s ssibbet n wawařen-a. 20 Aṭṭas zzaysen nnan “Aqqa dayes cciṭan, netta d abuhaři, mayemmi ɣares tettesřam?” 21 Inneḍni nnan “Awařen-a war ǧin ca n ij n umaryaḥ. Ma izemmar cciṭan ɛawed ad yarzem tiṭṭawin n idarɣařen?”

Udayen arezzun ad nɣen Yeccu

22 Yiweḍ-d řɛid n ureqqeɛ d weɛdař n taddart iqeddsen di Urcalim. Tuɣa d řmecta. 23 Yeccu iggur di taddart iqeddsen deg ukulwar s ibilaren n Sulayman. 24 Nnḍen as-d Wudayen, nnan as “Ař meřmi d aneɣ i ɣa tejjed nuyer? Mařa cek d Lmasiḥ, ini aneɣ t s bṭayṭay.” 25 Yarr-d xasen Yeccu “Nniɣ awem t uca kenniw war tuminem. Řexdayem i ggiɣ s yisem n Baba, cehhdent xafi. 26 Maca kenniw war tuminem minzi kenniw war teǧim ca d uǧi inu, am mammec tuɣa d awem nniɣ. 27 Uǧi inu isřa ɣar tmijja inu u necc ssneɣ ten uca nitni ad ayi-d ḍfaren. 28 Ad asen wceɣ tudart n řebda uca war ttwahellken ɛemmarṣ qaɛ uca uřa d ijj war ten ixeṭṭef zeg ufus inu. 29 Baba wenni d ayi ten iwcin, aqqa-t d ameqqran x kuřci. Uřa d ijj war izemmar ad ten ixḍef zeg ufus n Baba. 30 Necc d Baba d ijjen.” 31 Xenni ksin Wudayen ɛawed iẓra ḥima ad t arejmen. 32 Yeccu yarr-d xasen “Aqqa ssecneɣ awem aṭṭas n řexdayem d tiṣebḥanin zi Baba. I man řxedmet zzaysent i texsem ad ayi tarejmem?” 33 Arrin-d xas Wudayen, nnan “War cek narejjem x ict n řxedmet d taṣebḥant, maca umi tekfared u tarrid ixef nnek d Arebbi, waxxa cek d bnadem i teǧid.” 34 Yeccu yarr-d xasen “Ma war turi di ttawrat nwem ‘Necc nniɣ, aqqa kenniw d irebbiten’? 35 Mařa netta isemma ten ‘irebbiten’ i yinni umi d yusa wawař n Arebbi uca war izemmar ad itwayarz wedlis, 36 mammec teqqarem kenniw x wenni itwaqeddsen zi Tbabat u x wenni issekk it-id ɣar ddunnit ‘Aqqa cek tekfared!’, minzi necc nniɣ ‘Aqqa necc d Mmis n Arebbi’? 37 Mařa necc war xedmeɣ ca řexdayem n Baba, xenni war dayi ttamnem ca. 38 Mařa xedmeɣ tent, uca kenniw ɛad war dayi tuminem, amnem xenni di řexdayem ḥima ad tessnem aqqa Tababat dayi u necc aqqa- yi dayes.” 39 Arezzun ad t ṭṭfen ɛawed, ixtutteř asen jar ifassen nsen. 40 Iraḥ ɛawed ɣar ujemmaḍ n yeɣzar n Lurdun ɣar wemcan mani tuɣa issɣeṭṭaṣ Yuḥanna deg umezwaru uca iqqim dinni. 41 Usin-d ɣares waṭṭas n iwdan , nnan “Yuḥanna war iggi uřa d ict n řeɛřamet, maca marra min inna x wanita d tidett.” 42 Uca umnen dayes aṭṭas diha.

11

Asnekkar n Aliɛazer zi řmewt

1 Tuɣa din ij n bnadem ihřec, qqaren as Aliɛazar, netta zi Baytɛanya zi dcar n Maryem d wečmas Marta. 2 Maryem xenni, nettat d tenni i tuɣa idehhnen Sidi s řefwaḥet n mirru uca tmesseḥ iḍaren nnes s ucuwwaf nnes, aqqa umas Aliɛazar tuɣa ihřec. 3 Ssekkent-id twečmatin ɣares, nnant “A Sidi, xẓar, wenni texsed, aqqa ihřec.” 4 Řami isřa Yeccu man aya, inna “Řehřac-a war iǧi ca i řmewt, maca i uɛuǧi n Arebbi, ḥima ad zzayes itwassɛuǧ Mmis n Arebbi.” 5 Tuɣa Yeccu ittexs Marta d wučmas d Aliɛazar. 6 Ařami isřa, aqqa Aliɛazar ihřec, řexdenni iqqim ɛad tnayen n wussan deg wemcan mani t tuɣa. 7 Awarni man aya inna i imeḥḍaren “Ejj aneɣ ad nraḥ ɛawed ɣar tmurt n Yahudiyya.” 8 Imeḥḍaren nnan as “A Amseřmad, drus zeg wami tuɣa Udayen arezzun ad cek arejmen, waxxa amenni, ma cek ad traḥed dinni ɛawed?” 9 Yarr-d Yeccu “Ma war iǧi deg uziř tenɛac n tsaɛɛetin? Mařa ca n yijjen yuyur s uziř, war ittneqriḍ ca, minzi ittwařa tifawt n ddunnit-a. 10 Mařa ca n yijjen ad yuyur s ǧiřet, ad inqareḍ, minzi war dayes bu tfawt.” 11 Awarni řami inna man aya, inna asen “Aliɛazar, ameddukeř nneɣ aqqa itteṭṭeṣ, maca ad raḥeɣ ḥima ad t-id ssnekkareɣ.” 12 Nnan as imeḥḍaren “A Sidi, mařa netta iṭṭeṣ, xenni ad iggenfa!” 13 Maca Yeccu tuɣa issawař x řmewt nnes, maca ittɣiř asen belli netta issawař x arraḥet n yiḍeṣ. 14 Xenni inna asen Yeccu s bṭayṭay “Aqqa Aliɛazar immut. 15 U necc farḥeɣ awem umi necc war din ǧiɣ, ḥima ad tamnem. Maca jjem aneɣ ad ɣares nraḥ.” 16 Xenni inna Tuma, wenni umi qqaren ‘Acniw’, i imeḥḍaren imɛacaren nnes “Ejj aneɣ ad nraḥ uřa d neccin ḥima ad nemmet akides.” 17 Řami d yusa Yeccu, yufa aqqa ɛdun arebɛa n wussan zeg wami tuɣa-t deg wenḍeř. 18 Baytɛanya tuɣa tudes Urcalim ɛřaḥař xemstac n ‘ istadiyyen ’ (=ɛřaḥař třata n kilumiter ) 19 Aṭṭas n Wudayen usin-d ɣar Marta d Maryem ḥima ad tent ɛezzan x umatsent. 20 Řami tesřa Marta, aqqa Yeccu yiweḍ-d, teffeɣ ḥima ad t teřqa, maca Maryem teqqim di taddart. 21 Tenna Marta i Yeccu “A Sidi, maɛlik cek tuɣa da, iři war ittmetti ca uma. 22 Maca řexxu ɛad ssneɣ ɛawed belli marra min i ɣa tettared zi Arebbi, Arebbi ad ac t iwc.” 23 Yeccu inna as “Ad d ikkar umam.” 24 Tenna as Marta “Ssneɣ belli ad d ikkar di tnukra deg wass aneggaru.” 25 Yeccu inna as “Necc d tanukra d tudart. Wenni zzayi i ɣa yamnen, ad iddar, waxxa immut, 26 u marra wenni iddaren uca yumen zzayi, war ittmetti i řebda. Ma tettamned s man aya?” 27 Tenna as “Wah, a Sidi, umneɣ aqqa cek d Lmasiḥ, Mmis n Arebbi wenni tuɣa i d ttasen ɣar ddunnit.” 28 Řami tenna aya, truḥ třaɣa i wečmas Maryem s řḥess, tenna “Amseřmad aqqa-t danita, ittřaɣa-d xam.” 29 Řami tesřa aya, tekkar s tazzřa, tusi-d ɣares. 30 Tuɣa Yeccu war d yusi ca ɛad ɣar dcar, maca tuɣa-t deg wemcan mani t teřqa Marta. 31 Udayen inni iǧan akides di taddart u tuɣa ttɛezzan tt, řami ẓrin Maryem tekkar s tazzřa, teffeɣ, ḍfaren tt xenni, qqaren ‘Aqqa truḥ ɣar wenḍeř ḥima ad tru dinni’. 32 Řami d tusa Maryem ɣar mani tuɣa Yeccu uca teẓri t, tewḍa ɣar iḍaren nnes, tenna as “A Sidi, maɛlik cek tuɣa danita, iři uma war ittmetti ca.” 33 Řami tt iẓra Yeccu tetru d Wudayen inni i d yusin akides ttrun, innehweř arruḥ nnes, inhezz 34 uca inna “Mani t tessarsem?” Nnan as “Araḥ-d, a Sidi, ad texẓared.” 35 Yeccu iru. 36 Udayen nnan “Xẓarem mecḥař t ittexs.” 37 Maca ca zzaysen nnan “Ma war izemmar wa, wenni yarezmen tiṭṭawin i udarɣař, maḥend uřa d wanita war ittmetti ca?” 38 Innehweř Yeccu ɛawed deg yixef nnes uca yusi-d ɣar wenḍeř, aqqa-t d ij n ifri uca ict n teṣḍart tuɣa temmars xas. 39 Yeccu inna “Ksim taṣḍart.” Tenna as Marta, učmas n wenni immuten, “A Sidi, aqqa yarṣuḍ minzi teɛdu xas arebɛa n wussan.” 40 Inna as Yeccu “Ma war d am nniɣ, mařa tumned ad tẓared aɛuǧi n Arebbi?” 41 Kksin taṣḍart mani tuɣa yarsa wenni immuten. Xenni issgaɛɛed Yeccu tiṭṭawin nnes ɣar sennej uca inna “A Tababat, ɛafak řami d ayi tesřid. 42 Necc ssneɣ aqqa řebda tettesřid ɣari, maca di ṭṭweɛ n řɣaci i d ayi-d innḍen, nniɣ t, ḥima ad amnen belli cek tessekked ayi-d.” 43 Řami inna aya, iřaɣa s jjehd “Aliɛazar, ffeɣ-d!” 44 Řexdenni iffeɣ-d umettin, tuɣa ifassen d iḍaren nnes carfen s řecfen uca tuɣa ij umendiř x uɣembub nnes. Inna asen Yeccu “Fesyem as-d. Jjem t ad iraḥ.”

Udayen arezzun ad nɣen Yeccu

45 Aṭṭas n Wudayen inni d yusin ɣar Maryem uca ẓrin min igga, umnen zzayes. 46 Maca ca zzaysen ruḥen ɣar Ifarisiyyen, nnan asen min igga Yeccu. 47 Xenni ggin ar ruyas n ikehhanen d Ifarisiyyen ij n umuni n lmeḥkama tameqqrant n Wudayen umi qqaren Sunhidrin , nnan “Min i ɣa negg? Aryaz-a ittegg aṭṭas n řeɛřamat. 48 Mařa nejj it amya, marra ad zzayes amnen, ad d asen Irumaniyyen, ad kksen amcan nneɣ uřa d iwdan n řgens nneɣ.” 49 Inna asen ijjen zzaysen, aqqa-t d Qayafa, netta d azeǧif n ikehhanen deg useggwas nni “Kenniw war tessinem walu 50 uca war tefhimem ca belli ineffeɛ i neccin x minni i ɣa immet ijj n bnadem di ṭṭweɛ n weydud uca war ittmetti ca řgens nneɣ marra.” 51 War ini ca man aya zeg yixef nnes, maca, am t tuɣa d azeǧif n ikehhanen deg useggwas nni, tuɣa ittkacaf belli Yeccu ad immet di ṭṭweɛ n řgens. 52 War iǧi ḥaca di ṭṭweɛ n řgens nnes, maca uřa ḥima ad issmun ɣar ijjen tarwa n Arebbi i itwazeǧɛen. 53 Zeg wass nni mcawaren xenni ḥima ad t nɣen. 54 S uyenni Yeccu war iqqim iggur jar Wudayen s bṭayṭay, maca iruḥ ssenni ɣar ict n tmurt tudes řexřa, ɣar ict n tendint qqaren as Ifrayim uca iqqim dinni ak-d imeḥḍaren nnes. 55 Tuɣa ‘Basxa’, řɛid n Wudayen, ɛřayen yiweḍ-d. Aṭṭas zi tmurt usin-d ɣar Urcalim ḥima ad ṭehharen ixef nsen qbeř řɛid n Basxa, 56 Nitni tuɣa arezzun x Yeccu uca nnan jarasen umi nitni bedden di taddart iqeddsen “Min tettwařam? Ma war d ittis ɣar řɛid?” 57 Arruyas n ikehhanen d Ifarisiyyen weṣṣan belli mařa ca n yijjen issen mani iǧa, ad t ini, ḥima ad t ṭṭfen.

12

Adhan s řeɛṭur iɣřan di Baytɛanya

1 Setta n wussan qbeř řɛid n Basxa, yusi-d Yeccu ɣar Baytɛanya, mani tuɣa iǧa Aliɛazar wenni d issnekkar Yeccu zeg imettinen. 2 Uca ggin as din ij n umensi u Marta tuɣa tsexxar. Aliɛazar tuɣa d ijjen zeg yinni tuɣa iqqimen akides ɣar ṭṭabřa . 3 Teksi-d Maryem ij n arḍeř n řefwaḥet n ṣṣenbel teṣfa tiɣřa, tedhen iḍaren n Yeccu, xenni temseḥ iḍaren nnes s ucuwwaf nnes. Taddart teccur s řefwaḥet n mirru. 4 Ijjen zeg imeḥḍaren nnes wenni umi qqaren Yahuda Simɛan Isxariyuṭi wenni t i ɣa isellmen, inna 5 “Mayemmi war temmenz ca řefwaḥet-a n mirru s teřt meyya n ddinar, ḥima ad temmewc i imezřaḍ?” 6 Netta inna aya, war iǧi minzi cqan t imezřaḍ, maca minzi netta d aceffar, tuɣa ɣares ṣṣenduq uca ittekkes zi min dayes immarsen. 7 Yeccu inna “Jjem tt, aqqa txemmeř itt i wass n wenḍeř inu. 8 Minzi imezřaḍ aqqa-ten řebda akidwem, maca necc war kidwem ǧiɣ i řebda.” 9 Aṭṭas n řɣaci n Wudayen ssnen belli netta aqqa-t dinni uca usin-d, war iǧi ḥaca zi ssibbet n Yeccu, maca ɛawed ḥima ad ẓaren Aliɛazar wenni d issnekkar zeg imettinen. 10 Mcawaren arruyas n ikehhanen ḥima ad nɣen uřa d Aliɛazar, 11 minzi aṭṭas n Wudayen usin-d zi ssibbet nnes uca umnen di Yeccu.

Adaf n Yeccu ɣar Urcalim

12 Tiwecca nnes, umi sřin aṭṭas n řɣaci inni d yusin ɣar řɛid belli Yeccu ad d yas ɣar Urcalim, 13 ksin ifetwan n tini uca ffɣen ḥima ad t řqan, řaɣan ... “Uṣanna, d amimun wenni i d yusin s yisem n Arebbi, aqqa-t d ajeǧid n Israyil.” Sbḥ. 118:25-26 14 Yufa Yeccu ij n wesnus uca inya xas, am mammec tura 15 “War tteggwed ca, a tayeǧit n Siyun, xẓar, ajeǧid nnem ad d yas, iqqim x wesnus n teɣy uč.” Zak. 9:9 16 Imeḥḍaren nnes war fhimen ca timesřayin-a deg umezwaru. Maca awarni řami itwassuɛřa Yeccu, řexdenni ɛeqřen belli man aya tura xas uca belli nitni ggin zzayes man aya. 17 Řɣaci i tuɣa iǧan akides, umi iřaɣa x Aliɛazar zeg wenḍeř, tuɣa iched aqqa netta issnekkar it- id zeg imettinen. 18 S man aya iřqa t-id řɣaci minzi nitni sřin belli igga řeɛřamet-a. 19 Ifarisiyyen xenni nnan jarasen “Tettwařam mliḥ belli kenniw tettakkwaḍem ɣar walu, xẓarem, aqqa qaɛ ddunnit teḍfar it-id.”

Yeccu izwar issiweř x řmewt nnes

20 Tuɣa din ca n Iyunaniyyen jarasen, inni d yusin ḥima ad ɛebden di řɛid. 21 Ina ruḥen ɣar Filibbus, wenni zi tendint n Baytṣayda di Ljalil, sseqsan t, nnan “A Sidi, nexs ad nẓar Yeccu.” 22 Yusi-d Filibbus, inna tt i Andrawus, Andrawus d Filibbus ɛawed nnan tt i Yeccu. 23 Maca Yeccu yarr-d xasen, inna “Aqqa tiweḍ-d tsaɛɛet i di i ɣa itwassɛuǧ Mmis n bnadem. 24 S tidett, s tidett, ad awem iniɣ, mařa war iwḍi řḥebb n yirden di tmurt uca ad immet, xenni ad iqqim weḥdes, maca mařa immut, xenni ad d tawyi řɣiǧet aṭṭas. 25 Wenni ittexsen tudart nnes, ad tt ixsar u wenni i ɣa icarhen tudart nnes di ddunnit-a, ad tt ixemmeř i tudart n řebda. 26 Mařa ca n yijjen isexxar ayi, ejj it ad ayi iḍfar. Mani i ɣa iřiɣ necc, dinni i ɣa yiři ɛawed umsexxar inu. Mařa ca n ijjen ixdem ayi, ad t icenneɛ Tbabat. 27 Řexxu uř inu innehweř, min i ɣa iniɣ? A Tababat, senjem ayi zi tsaɛɛet-a? Maca x uyenni i d usiɣ ɣar tsaɛɛet-a. 28 A Tababat, sɛuǧi isem nnek.” Xenni tusi-d ict n tmijja zeg ujenna “Ssɛuǧeɣ t uca ad t ssɛuǧeɣ ɛawed.” 29 Řɣaci i tuɣa ibedden din isřa t uca inna “Aqqa imsar wajjaj”. Inneḍni nnan “Aqqa issiweř-d ɣares ij n lmalak”. 30 Yarr-d Yeccu, inna “Tmijja-ya war teǧi ca di ṭṭweɛ inu maca di ṭṭweɛ nwem. 31 Řexxu ad yiři řḥukm x ddunnit-a. Řexxu ad immenḍar umeqqran n ddunnit-a ɣar barra. 32 U necc, x minni i ɣa twassgaɛɛdeɣ zi tmurt, ad ɣari-d jebdeɣ marra.” 33 Inna man aya ḥima ad isscen ɣar man řmewt i ɣa immet. 34 Řɣaci yarr-d xas “Neccin nesřa zi ttawrat belli aqqa Lmasiḥ ad iqqim i řebda. I mammec teqqared cek belli ittxeṣṣ a i Mmis n bnadem ad itwassgaɛɛed? Min iɛna Mmis n bnadem?” 35 Yeccu inna asen “Tifawt ad tiři akidwem drus n řweqt ɛad. Uyurem, řami ɛad ɣarwem tifawt, ḥima war kenniw teṭṭef taǧest. Wenni igguren di taǧest, war issin mani iggur. 36 Amnem di tfawt maḥend nettat ɛad aqqa-tt ɣarwem, ḥima kenniw ad tiřim tarwa n tfawt.” Ammu i tuɣa issawař Yeccu, řexdenni yuyur uca innufar zzaysen.

Awař n Yeccu x yinni yumnen d yinni war yuminen ca

37 Tuɣa Yeccu ittegg aṭṭas n řeɛřamat zzatsen, maca waxxa amenni nitni war zzayes uminen, 38 ḥima ad itwakemmeř wawař n umkacaf Icaɛya i innan “A Sidi, wi yumnen s řexbar nneɣ? I umi itwassargeb ufus n Arebbi?” Ica. 53:1 39 X uyenni war zemmaren ad amnen, minzi Icaɛya inna ɛawed 40 “Netta issdarɣeř tiṭṭawin nsen, isseqseḥ uřawen nsen, ḥima war tettwiřin s tiṭṭawin nsen, war fehhmen s wuř nsen, ad tuben uca necc ad ten ssgenfiɣ.” 41 Inna Icaɛya ammu, minzi iẓra aɛuǧi nnes uca tuɣa issawař xas. 42 Waxxa amenni umnen zzayes aṭṭas n imeqqranen n řgens , maca s ssibbet n Ifarisiyyen, war zzayes cehden ca, ḥima war xasen ttiẓẓřen zeg usinagug. 43 Minzi nitni tuɣa xsen aɛuǧi zeg iwdan x uɛuǧi zi Arebbi. 44 Maca Yeccu iřaɣa, inna “Wenni dayi ittamnen, war dayi ittimen ca, maca zeg wenni d ayi-d issekken. 45 Wenni d ayi iẓrin, iẓra wenni d ayi-d issekken. 46 Usiɣ-d d tifawt ɣar ddunnit, ḥima kuř ijjen wenni dayi ittamnen, war ittɣimi ca ɛad di taǧest. 47 Mařa ca n yijjen isřa i wawařen inu uca war yumin, necc war xas ḥekkmeɣ ca. Necc war d usiɣ ca ḥima ad ḥekmeɣ x ddunnit, maca ḥima ad ssnejmeɣ ddunnit. 48 Wenni d ayi isseḥqaren uca war iqbiř awařen inu, ɣares wenni xas i ɣa iḥekmen. Awař i nniɣ, netta ad xas iḥkem deg wass aneggaru. 49 Minzi necc war ssiwřeɣ ca zi ɣari, maca Tababat wenni d ayi-d issekken iwca ayi ict n tewṣeyyet x min i ɣa iniɣ d min xef i ɣa ssiwřeɣ. 50 Necc ssneɣ tawṣeyyet nnes, aqqa-tt d tudart n řebda. Min ssawařeɣ xenni, ssawařeɣ t am mammec d ayi inna Tbabat.”

13

Asird n iḍaren n imeḥḍaren

1 Qbeř i řɛid n Basxa, umi Yeccu issen aqqa tasaɛɛet nnes tiweḍ-d belli ad immuṭi zi ddunnit-a ɣar Tbabat awarni řami tuɣa ittexs inni iǧan nnes, inni iǧan di ddunnit, xenni tuɣa ittexs iten ař aneggaru. 2 Řami ikemmeř umensi, umi iɛarn ibřis uř n Yahuda mmis n Simɛan Isxariyuṭi maḥend ad t isellem, 3 uca Yeccu tuɣa issen belli Tababat iwca as kuřci deg ifassen nnes u belli iffeɣ-d zi ɣar Arebbi u ɣar Arebbi i ɣa iraḥ, 4 xenni ikkar-d x umensi, ikkes arruḍ nnes, iksi ij n umendiř uca ibyes it i yixef nnes. 5 Xenni ifarreɣ aman di tbanyut uca ibda issirid iḍaren n imeḥḍaren, imesseḥ asen s umendiř i zi tuɣa ibyes. 6 Řami d yusa ɣar Simɛan Buṭrus, inna as wanita “A Sidi, ma texsed ad tessirded iḍaren inu?” 7 Yarr-d Yeccu, inna as “Cek war tefhimed ca řexxu min tteggeɣ, maca ad tfehmed man aya awarni manawenni.” 8 Inna as Buṭrus “Qaɛ ɛemmarṣ ad tessirded iḍaren inu.” Yarr-d xas Yeccu “Mařa war d ac ssirdeɣ, war ɣarek bu tasɣart akidi.” 9 Inna as Simɛan Buṭrus “A Sidi, war iǧi iḍaren inu waha maca uřa d ifassen d uzeǧif.” 10 Yeccu inna asen “Wenni itwassirden, war iḥdij mɣir ad twassirden iḍaren nnes waha, minzi netta d amezdag amen ikmeř. Kenniw tizdigem, maca war iǧi marra.” 11 Netta tuɣa issen wi t i ɣa isellmen, x uyenni inna “Kenniw war teǧim ca marra d imezdag.” 12 Awarni řami tuɣa issirid iḍaren nsen uca yarreḍ arruḍ nnes, xenni iqqim ɛawed, inna asen “Ma tfehmem min daywem ggiɣ? 13 Kenniw tettřaɣam ayi ‘Amseřmad’ d ‘Sidi’ uca tidett i tennam, minzi wa d necc. 14 Mařa necc d Sidi d Amseřmad uca ssirdeɣ iḍaren nwem, řexdenni ittxeṣṣ uřa i kenniw ad tessirdem iḍaren ijjen i wenneḍni, 15 Minzi necc zeɛma wciɣ awem ij n umedya, ḥima, am mammec ggiɣ necc akidwem, ad teggem kenniw ɛawed. 16 S tidett, s tidett ad awem iniɣ, ismeɣ war yuɛři x sides uřa d amazan war yuɛři x wenni it-id issekken. 17 Mařa tessnem timesřayin-a, ad tiřim tetwabarkem mařa teggim zzaysent.

Yeccu izwar issiweř x wenni t i ɣa isellmen

18 “War t qqareɣ ca xawem marra. Necc ssneɣ inni i xḍareɣ. Maca ittxeṣṣa ad itwakemmeř min yuran deg wedlis ‘Wenni i ɣa iccen zeg weɣrum akidi, aqqa yarfeɛ xafi anirz nnes .’ Sbḥ. 41:9 19 Řexxu ad awem t iniɣ qbeř mma ad imsar, ḥima, x minni i ɣa imsar, ad tamnem belli aqqa d necc. 20 S tidett, s tidett, ad awem iniɣ, wenni iqebbřen wenni i d ɣa ssekkeɣ, ad ayi iqbeř u wenni d ayi iqebbřen, ad iqbeř uřa d wenni d ayi-d issekken.” 21 Awarni řami inna Yeccu man aya, innehweř arruḥ nnes uca iched, inna “S tidett, s tidett, ad awem iniɣ, ijjen zzaywem ad ayi isellem.” 22 Imeḥḍaren xẓaren ɣar wayawya, qqimen cekken di min xef tuɣa issawař. 23 Ijjen zeg imeḥḍaren nnes i tuɣa Yeccu ittexs it, tuɣa isenned x idmaren n Yeccu. 24 Isscen Simɛan Buṭrus ɣares, ḥima ad isseqsa min iɛna wenni min xef tuɣa issawař. 25 Wanita xenni, umi isenned x idmaren n Yeccu, inna as “A Sidi, min iɛna?” 26 Yarr-d Yeccu “D wenni umi i ɣa ssisneɣ ařeqqim n weɣrum, ad as t wceɣ.” Řexdenni issisen ařeqqim n weɣrum, iksi t-id, iwca as t-id i Yahuda mmis n Simɛan Isxariyuṭi. 27 Awarni i uřeqqim-a n weɣrum, yudef it Cciṭan. Inna as Yeccu “Min i ɣa tegged, egg it deɣya.” 28 Uřa d ijj zeg yinni tuɣa issenden war issin mayemmi netta i d as inna man aya. 29 Ittɣiř asen i ca zzaysen , umi Yahuda aqqa-t x ṣṣenduq, aqqa Yeccu inna as “Seɣ min i ɣa neḥdaj i řɛid!” niɣ ḥima ad iwc ca i imezřaḍ. 30 Wanita, awarni řami iṭṭef ařeqqim n weɣrum, iffeɣ-d deɣya. Tuɣa d ǧiřet.

Yeccu issawař x řmewt nnes u x tayri jar wawmaten

31 Řami d iffeɣ, inna Yeccu “Aqqa řexxu itwassɛuǧ Mmis n bnadem uca itwassɛuǧ Arebbi dayes. 32 Mařa Arebbi aqqa itwassɛuǧ dayes, řexdenni Arebbi ad t itwassɛuǧ ɛawed deg yixef nnes u ad t itwassɛuǧ deɣya. 33 A iḥenjiren imeẓyanen, necc aqqa-yi akidwem drus n řweqt ɛad. Kenniw ad xafi tarzum uca, am mammec nniɣ i Wudayen, ‘Mani i ɣa raḥeɣ necc, war tzemmarem ad d tasem’, ad awem t iniɣ ɛawed řexxu. 34 Tawṣeyyet n jdid i d awem i ɣa wceɣ ḥima ad texsem ijjen wenneḍni, am mammec necc ttexseɣ kenniw, uřa d kenniw ad texsem ayawya. 35 S man aya ad ssnen marra aqqa kenniw d imeḥḍaren inu, mařa din ɣarwem tayri jarawem.”

Yeccu izwar issiweř x wenkar n Buṭrus

36 Simɛan Buṭrus inna “A Sidi, mani i ɣa traḥed?” Yarr-d Yeccu “Mani i ɣa raḥeɣ necc, war tzemmared řexxu ad ayi-d teḍfared, maca awarni manawenni ad ayi-d teḍfared ɣar uneggaru.” 37 Buṭrus inna as “A Sidi, mayemmi war zemmareɣ ad cek-d ḍfareɣ řexxu? Necc ad wceɣ tudart inu i cek.” 38 Yarr-d Yeccu “Ma ad ayi tewced tudart nnek? S tidett, s tidett, ad ac iniɣ, war isququɛ ca uyaẓiḍ, qbeř mma ad ayi tenkared třata n twařawin.”

14

Yeccu netta d abrid d tidett d tudart

1 “Ksem anehweř zeg wuřawen nwem. Kenniw tettamnem di Arebbi, amnem ɛawed zzayi. 2 Di taddart n Baba dayes aṭṭas n tzeddiɣin, maɛlik war iǧi amenni, iři nniɣ awem t. Necc ad raḥeɣ ḥima ad awem ssewjdeɣ amcan. 3 Uca, awarni řami ruḥeɣ uca ssewjdeɣ awem amcan, xenni ad ɛeqbeɣ ɛawed, ad kenniw d awyeɣ ɣari, ḥima, mani ǧiɣ necc, ad din tiřim uřa d kenniw. 4 U mani i ɣa raḥeɣ aqqa tessnem tt uca tessnem abrid.” 5 Inna as Tuma “A Sidi, war nessin mani i ɣa traḥed i mammec nzemmar ad nessen abrid.” 6 Yeccu inna as “Necc d abrid d tidett d tudart, war d ittis uřa d ijj ɣar Tbabat mɣir zzayi. 7 Mařa tuɣa tessnem ayi, ad tiři aqqa tessnem uřa d Baba. Zi řexxu aqqa tessnem t, teẓrim t.” 8 Filibbus inna as “A Sidi, scen aneɣ Tababat uca ikfa.” 9 Yeccu inna as “Anect uya n řweqt qaɛ necc akidwem, ma war d ayi tessined, a Filibbus? Wenni d ayi iẓrin, iẓra Tababat. Mammec teqqared ‘Scen aneɣ Tababat’? 10 Ma war tumined ca aqqa necc aqqa-yi di Tbabat d Tbabat aqqa-t dayi? Awařen i d awem qqareɣ, war ten qqareɣ ca zi ɣari, maca Tababat wenni dayi izeddɣen, netta ittegg řexdayem nnes . 11 Amnem ayi aqqa necc aqqa-yi di Tbabat, Tababat aqqa-t dayi. U mařa war iǧi amenni, amnem ayi x ssibbet n řexdayem simant nsent. 12 S tidett, s tidett ad awem iniɣ, wenni dayi ittamnen, aqqa řexdayem i tteggeɣ, ad zzaysent igg uřa d netta uca ad igg tinni iǧan d timeqqranin x man aya, minzi necc ad raḥeɣ ɣar Baba. 13 Uca marra min i ɣa tettarem s yisem inu, ad t ggeɣ ḥima ad itwassɛuǧ Tbabat s Tmemmit. 14 Min d ayi i ɣa tettarem s yisem inu, ad t ggeɣ.

Řwaɛd n Arruḥ Iqeddsen

15 Mařa texsem ayi, ṭṭfem di tweṣṣa inu. 16 Uca necc ad ẓẓaǧeɣ i Tbabat uca ad awem iwc Amsfewwej nneḍni ḥima ad kiwem iqqim i řebda, 17 Arruḥ n tidett wenni war tzemmar ddunnit ad t teqbeř, minzi war t tettwiři, war t tessin. Maca kenniw tessnem t, minzi netta ad kiwem iqqim uca ad daywem yiři. 18 War kenniw ttejjiɣ ca d iyujiřen. Necc ad ɣarwem-d aseɣ. 19 Drus n řweqt ɛad uca ddunnit war d ayi tẓarr ɛad. Maca kenniw tettwařam ayi, minzi necc ddareɣ uca uřa d kenniw ad teddarem. 20 Deg wass nni ad tessnem belli aqqa necc aqqa-yi di Baba, kenniw dayi u necc daywem. 21 Wenni ɣar iǧa tiweṣṣa inu uca ad daysent iṭṭef d wenni d ayi ittexsen, u wenni d ayi ittexsen, uřa d Tababat ad t ixs uca necc ad t xseɣ ɛawed uca ad as ssecneɣ ixef inu.” 22 Inna as Yahuda, war iǧi d Isxariyuṭi “A Sidi, mammec d aneɣ i ɣa tessecned ixef nnek, war iǧi ca i ddunnit?” 23 Yeccu yarr-d, inna as “Mařa ca n yijjen ixs ayi, xenni ad iṭṭef deg wawař inu uca Baba ad t ixs uca ɣares i d ɣa nas u ɣares i ɣa nezdeɣ. 24 Wenni war d ayi ittexsen, war itteṭṭif ca deg wawař inu. Uca awař i tesřim, war iǧi ca zi ɣari, maca zi Tbabat wenni d ayi-d issekken. 25 Ssiwřeɣ akidwem man aya umi necc ɛad qqimeɣ akidwem. 26 Maca Amsfewwej, Arruḥ Iqeddsen, wenni i d ɣa issekk Tbabat s yisem inu, ad awem isseřmed kuřci, ad awem issfekkar marra min d awem nniɣ. 27 Řehna ad awem t jjeɣ, necc ad awem wceɣ řehna inu. War iǧi ca am mammec daywem tetticc ddunnit ad t daywem wceɣ. Kkes anehweř zeg wuřawen nwem, war tteggwed ca. 28 Aqqa tesřim necc nniɣ awem ‘Necc ad uyureɣ uca ad ɣarwem-d aseɣ ɛawed’. Mařa texsem ayi, ad tfarḥem, minzi nniɣ ‘ad raḥeɣ ɣar Tbabat’, minzi Tababat yuɛřa xafi. 29 Necc nniɣ awem tt řexxu qbeř mma ad imsar, ḥima ad tamnen x minni i ɣa yiři uya. 30 War kiwem ssiwiřeɣ ɛad aṭṭas ktar, ad d yas umeqqran n ddunnit-a, war ɣares walu dayi. 31 Maca d man aya ḥima ad tessen ddunnit aqqa necc ttexseɣ Tababat uca tteggeɣ min d ayi iweṣṣa Tbabat. Kkarem, ad nuyur ssanita.”

15

Tazayart d tiṣedwin nnes

1 “Necc d tazayart n tidett, Baba d bab n weḥwic n tzayart. 2 Kuř taseṭṭa dayi i war itticcen řɣiǧet, ad tt ikkes uca kuř taseṭṭa i d ittawyen řɣiǧet, ad tt issizdeg, ḥima ad tarni di řɣiǧet. 3 Kenniw aqqa twassizzedgem di ssibbet n wawař i d awem nniɣ. 4 Qqimem dayi, necc aqqa-yi daywem. Amecnaw taseṭṭa i war izemmaren ad d tawyi řɣiǧet zeg yixef nnes mařa war teqqim di tzayart, amya uřa d kenniw, mařa war dayi teqqimem. 5 Necc d tazayart, kenniw d tiseḍwin. Wenni dayi i ɣa iqqimen u necc dayes, netta ad d yawi řɣiǧet aṭṭas, minzi nnebřa zzayi war tzemmarem ad teggem walu. 6 Mařa ca n yijjen war dayi iqqim, ad immenḍar ɣar barra amecnaw taseṭṭa, ad yaẓeɣ, xenni ad tent yarwen, ad tent nḍaren di tmessi, ad arɣen. 7 Maca mařa teqqimem dayi uca awařen inu ad daywem qqimen, ttarem min texsem uca ad ɣarwem yiři. 8 Zi man aya ad itwassɛuǧ Baba xmi i d ɣa tawyem aṭṭas n řɣiǧet uca ad tiřim d imeḥḍaren inu. 9 Am mammec Tababat tuɣa ittexs ayi uřa d necc tuɣa ttexseɣ kenniw. Qqimem di tayri inu. 10 Mařa teṭṭfem di tweṣṣa inu, ad teqqimem di tayri inu, am mammec necc tuɣa tteṭṭfeɣ di tweṣṣa n Baba uca ttɣimeɣ di tayri nnes. 11 Nniɣ awem man aya ḥima ad daywem tiři řefraḥet inu uca ḥima ad tetwakemmeř řefraḥet nwem. 12 Tawṣeyyet inu tanita, aqqa ad texsem ijjen wenneḍni am mammec necc tuɣa kenniw xseɣ. 13 Uřa d ijj war ɣares bu tayri tameqqrant x tanita, belli ad iwc tudart nnes i imeddukař nnes. 14 Kenniw d imeddukař inu, mařa teggim am mammec kenniw weṣṣiɣ. 15 War ttɛiwideɣ ad awem semmiɣ isemɣan, minzi ismeɣ war issin min ittegg sides. Maca necc tuɣa ttřaɣiɣ awem d imeddukař, minzi necc ssecneɣ kenniw marra min sřiɣ zi Baba. 16 War iǧi d kenniw i d ayi ixḍaren, maca d necc i kenniw ixḍaren uca necc ggiɣ kenniw ḥima ad traḥem, ad d tawyem řɣiǧet u ḥima ad teqqim řɣiǧet nwem, ḥima marra min i ɣa tettarem zi Tbabat s yisem inu, ad awem t iwca netta. 17 D man aya i zi kenniw ttweṣṣiɣ, ḥima ad texsem ijjen wenneḍni.

Ddunnit tcarreh Yeccu d imeḥḍaren nnes

18 Mařa ddunnit ad kenniw tcarh, snem aqqa tcarh ayi qbeř kenniw. 19 Mařa aqqa kenniw zi ddunnit, iři aqqa ddunnit tuɣa tettexs inni zzayes. Maca minzi kenniw war teǧim ca zi ddunnit, maca necc ixḍareɣ kenniw zi ddunnit, s uyenni ddunnit tcarreh kenniw. 20 Ɛeqřem awař i d awem nniɣ ‘Ismeɣ war yuɛři x sides.’ Mařa marrten ayi, ad kenniw marrten ɛawed. Mařa ṭṭfen deg wawař inu, ad ṭṭfen ɛawed deg wawař nwem. 21 Maca ad zzaywem ggen man aya marra di ssibbet n yisem inu, minzi nitni war ssinen ca wenni d ayi-d issekken. 22 Mařa war d usiɣ u war kisen ssiwřeɣ, ad yiři war ɣarsen bu ddnub. Maca řexxu war ɣarsen bu smaḥet x ddnub nsen. 23 Wenni d ayi icarrhen, ad icarh uřa d Baba. 24 Mařa war ggiɣ jarasen řexdayem i war tent iggi uřa d ijj nneḍni, ad yiři war ɣarsen bu ddnub. Maca řexxu ẓrin tent u carhen uřa d Baba. 25 Maca ittxeṣṣ ad itwakemmeř wawař i yuran di ttawrat nsen ‘Carhen ayi x walu’ . Sbḥ. 35:19; Sbḥ. 69:4 26 Xmi i d ɣa yas Umsfewwej, wenni ɣarwem-d i ɣa ssekkeɣ zi Tbabat, Arruḥ n tidett i d yusin zi ɣar Tbabat, xenni netta ad ayi iched. 27 Ad tcehdem uřa d kenniw, minzi tuɣa kenniw akidi zeg umezwaru.”

16

1 “Aqqa ssiwřeɣ akidwem aya ḥima war tendrifem. 2 Ad kenniw ssuffɣen zeg usinagug. Iwa, tasaɛɛet ad d tas umi kuř ijjen wenni kenniw i ɣa inɣen ad as ittɣiř aqqa ittegg řxedmet i Arebbi. 3 Ad zzaywem ggen man aya, minzi nitni war ssinen Tababat uřa d necc. 4 Maca aqqa nniɣ awem man aya ḥima, xmi i d ɣa tas tsaɛɛet, xenni ad tɛeqřem belli d necc i d awem innan man aya. Necc war daywem nniɣ ca man aya zeg umezwaru, minzi necc tuɣa-yi akidwem.

Yeccu ad issekk Amsfewwej, Arruḥ Iqeddsen

5 Maca řexxu ad raḥeɣ ɣar wenni d ayi-d issekken uca uřa d ijj zzaywem war d ayi isseqsi ‘Mani i ɣa traḥed?’ 6 Maca minzi nniɣ awem man aya, aqqa ccuren uřawen nwem s wecḍan. 7 Maca necc ad awem iniɣ tidett, ḥsen awem ad raḥeɣ. Mařa war ruḥeɣ ca, war ɣarwem-d ittis Umsfewwej. Mařa ruḥeɣ, ad awem t-id ssekkeɣ. 8 Řami d yusa wanita, ad isseqneɛ ddunnit x ddnub x tsegda u x řḥukm. 9 X ddnub minzi nitni war zzayi uminen 10 uca x tsegda, minzi necc ad raḥeɣ ɣar Baba uca war d ayi tẓarrem ɛad 11 uca x řḥukm minzi ameqqran n ddunnit-a aqqa itwaḥaseb. 12 Ƴari aṭṭas min daywem i ɣa iniɣ, maca řexxu war tzemmarem ad t teksim. 13 Maca řami d yusa Arruḥ n tidett, ad kenniw indeh di marra tidett, minzi netta war issiwiř ca zeg yixef nnes, maca marra min i ɣa isřa, ad zzayes issiweř uca ad awem isscen timesřayin i d ɣa yasen. 14 Netta ad ayi issɛuǧ, minzi ad iksi zi min ɣari uca ad kenniw issxebbar zzayes. 15 Marra min iǧan ɣar Tbabat, aqqa-t inu. S uyenni nniɣ belli netta ad iksi zi min ɣari uca ad kenniw issxebbar zzayes. 16 War ittɣimi ca uca war d ayi tẓarrem u xenni ɛawed war ittɣimi ca uca ad ayi tẓarem ɛawed, minzi necc ad raḥeɣ ɣar Tbabat.” 17 Ca zeg imeḥḍaren nnes nnan jarasen “Ma man aya min d aneɣ inna ‘War ittɣimi ca uca war d ayi tẓarrem u xenni ɛawed war ittɣimi ca uca ad ayi tẓarem ɛawed, minzi necc ad raḥeɣ ɣar Tbabat’ ”? 18 Xenni nnan “Min ixs ad yini min iqqar ‘War ittɣimi ca’? War nessin ca min xef issawař.” 19 Issen Yeccu aqqa nitni xsen ad t sseqsan, xenni inna asen “Ma temmesseqsam minzi nniɣ ‘War ittɣimi ca uca war d ayi tẓarrem u xenni ɛawed war ittɣimi ca uca ad ayi tẓarem ɛawed’? 20 S tidett, s tidett, ad awem iniɣ aqqa ad trum, ad tesɣuyem, maca ddunnit ad tfarḥ. Kenniw ad tceḍnem, maca acḍan nwem ad idweř d řefraḥet. 21 Tamɣart, xmi i ɣa tařu, ad tffugem minzi tasaɛɛet nnes aqqa tiweḍ-d. Maca xmi i ɣa tařu aḥenjir, war tfekkar ca ɛad di řeḥriq nnes zi řefraḥet minzi tarni-d ij n bnadem ɣar ddunnit. 22 Uřa d kenniw aqqa daywem acḍan řexxu, maca ad kenniw ẓareɣ ɛawed uca ad farḥen wuřawen nwem uca uřa d ijj war zzaywem ittekkes řefraḥet nwem. 23 Deg wass nni war d ayi tettsseqsim ca. S tidett, s tidett, ad awem iniɣ, marra min i ɣa tettarem i Tbabat s yisem inu, ad awem t iwc. 24 Ař i řexxu war tettarem ca s yisem inu. Ttarem, ad teksim, ḥima ad tiři řefraḥet nwem tekmeř. 25 Ssiwřeɣ awem x man aya s imettiřen, maca ad d taweḍ tsaɛɛet i di war ɣarwem i ɣa ssiwiřeɣ ɛad s imettiřen, maca ad awem-d barrḥeɣ x Tbabat s bṭayṭay. 26 Deg wass nni ad tettarem s yisem inu. Necc war d awem qqareɣ ca belli ad ttareɣ i Tbabat di ṭṭweɛ nwem, 27 minzi Tababat simant nnes ittexs kenniw, minzi kenniw tuɣa tettexsem ayi uca aqqa tumnem aqqa necc zi ɣar Arebbi i d ffɣeɣ. 28 Ffɣeɣ-d zi Tbabat, usiɣ-d ɣar ddunnit. Ad jjeɣ necc ɛawed ddunnit uca ad raḥeɣ ɣar Tbabat.” 29 Nnan as imeḥḍaren nnes “Aqqa řexxu cek tessawařed s bṭayṭay, war tessiwiřed ca s imettiřen. 30 Řexxu nessen aqqa tessned kuřci, war teḥdijed ad cek isseqsa ḥed. Zi manawenni numen aqqa d cek teffɣed-d zi Arebbi.” 31 Yeccu yarr-d xasen “Ma řexxu tumnem? 32 Ad d taweḍ tsaɛɛet, aqqa tiweḍ-d, i di i ɣa tetwazeǧɛem, kuř ijj ad iṭṭef abrid nnes, ad ayi tejjem weḥdi. Maca necc war ǧiɣ bu weḥdi, minzi Tababat aqqa-t akidi. 33 Aqqa ssiwřeɣ akidwem s man aya ḥima ad ɣarwem yiři řehna dayi. Di ddunnit ad ɣarwem tiři řeḥṣart, ggem uř, necc aqqa ɣellbeɣ x ddunnit.”

17

Taẓaǧit n Yeccu

1 Tuɣa Yeccu issawař s man aya uca issgaɛɛed tiṭṭawin nnes ɣar ujenna, inna “A Baba, aqqa tasaɛɛet tiweḍ-d. Suɛřa Mmic, ḥima uřa d Mmic ad cek issuɛřa, 2 am mammec d as tewcid ṣṣulṭa x kuř aysum, ḥima xenni netta ad iwc tudart n řebda i kuř ijjen i d as tewcid. 3 D tanita d tudart n řebda, aqqa nitni ad cek ssnen, aqqa cek d Arebbi d tidett weḥdec d Yeccu Lmasiḥ wenni i d tessekked. 4 Necc ssuɛřiɣ cek x tmurt. Necc kemmřeɣ řxedmet i d ayi tewcid ḥima ad tt ggeɣ. 5 Řexxu sɛuǧi ayi, a Tababat, ɣar ixef nnek s uɛuǧi i tuɣa ɣari qbeř mma ad tiři ddunnit. 6 Seccneɣ isem nnek i iwdan inni d ayi tewcid zi ddunnit. Nitni tuɣa-ten nnek, tewcid ten i necc, aqqa ṭṭfen deg wawař nnek. 7 Ssnen řexxu belli marra min d ayi tewcid, aqqa-t zzayek. 8 Minzi necc wciɣ asen awařen i d ayi tewcid uca nitni qebřen zzaysen, ssnen s tidett belli necc ffɣeɣ-d zzayek, umnen aqqa cek tessekked ayi-d. 9 Necc ttareɣ di ṭṭweɛ nsen, war ttettareɣ di ṭṭweɛ n ddunnit maca di ṭṭweɛ n yinni i d ayi tewcid, minzi aqqa-ten nnek. 10 Marra min iǧan inu aqqa-t nnek u min iǧan nnek aqqa-t inu. Necc twassɛuǧeɣ daysen. 11 Necc war ǧiɣ ɛad di ddunnit, maca nitni aqqa- ten di ddunnit uca necc ad ɣarek-d aseɣ. A Tababat iqeddsen, ḥḍa ten deg isem nnek, inni i d ayi tewcid ḥima nitni ad iřin d ijjen am neccin. 12 Mintra aqqa-yi akidsen, ad ten ḥḍiɣ deg isem nnek. Necc ɛesseɣ x inni i d ayi tewcid, war itwahellek uřa d ijj zzaysen mɣir mmis n lhalak ḥima ad ikemmeř wedlis. 13 Maca řexxu ad ɣarek-d aseɣ u ssawařeɣ x man aya di ddunnit ḥima ad tiři řefraḥet inu tekmeř daysen. 14 Wciɣ asen awař nnek uca ddunnit tuɣa tcarreh iten minzi war ǧin ca zi ddunnit am necc war ǧiɣ ca zi ddunnit. 15 Necc war ttareɣ ḥima ad ten teksid zi ddunnit, maca ḥima ad ten teḥḍid zi tuɛeffna. 16 Nitni war ǧin ca zi ddunnit am necc war ǧiɣ ca zi ddunnit. 17 Qeddes iten di tidett, awař nnek d tidett. 18 Am mammec i d ayi-d tessekked ɣar ddunnit, ssekkeɣ ten ɛawed ɣar ddunnit. 19 Ttqeddaseɣ ixef inu di ṭṭweɛ nsen, ḥima ad twaqeddsen uřa d nitni di tidett. 20 War ttareɣ di ṭṭweɛ n yina waha, maca ɛawed di ṭṭweɛ n yinni dayi yumnen s wawař nsen. 21 Ḥima ad iřin marra d ijjen, a Tababat, am cek dayi u necc dayek, ḥima uřa d nitni ad iřin d ijjen dayneɣ, ḥima ad tamen ddunnit belli aqqa d cek i d ayi-d issekken. 22 Necc wciɣ asen aɛuǧi i d ayi tewcid, ḥima ad iřin d ijjen am mammec neccin neǧa d ijjen. 23 Necc daysen, cek dayi, ḥima ad iřin twakemmřen ɣar ijjen, ḥima ad tessen ddunnit aqqa cek tessekked ayi-d u texsed ten am mammec i d ayi texsed. 24 A Tababat, xseɣ i inni i d ayi tewcid ad iřin akidi mani mma ǧiɣ necc uca ad ẓaren aɛuǧi inu i d ayi tewcid, minzi cek texsed ayi qbeř mma ad tetwagg ddunnit. 25 A Tababat iseggden, aqqa ddunnit war cek tessin, maca necc aqqa ssneɣ cek u ina ssnen aqqa cek tessekked ayi-d. 26 Necc ssecneɣ asen isem nnek u ad t ssecneɣ, ḥima tayri i zi tuɣa d ayi tettexsed ad tiři daysen u necc daysen.”

18

Uḍuf n Yeccu

1 Awarni řami inna Yeccu aya, iffeɣ ak-d imeḥḍaren nnes, ẓwan x yeɣzar n Qidrun, tuɣa din ij n weḥwic, yudef dayes ak-d imeḥḍaren nnes. 2 Uřa d Yahuda wenni t isellmen, issen amcan nni ɛawed, minzi Yeccu tuɣa issmuna dayes aṭṭas ak-d imeḥḍaren nnes. 3 Xenni yiwi-d Yahuda akides ict n terbiɛt n řɛeskar d imxazniyyen n arruyas n ikehhanen d Ifarisiyyen uca yusi-d diha s řeqnadeř d iṣefḍawen d řesnaḥ. 4 Yeccu xenni, umi issen marra min d as i ɣa imsaren, iffeɣ-d, inna asen “Min tarezzum?” 5 Arrin-d xas “Yeccu Nnaṣiri.” Inna asen “D necc.” Tuɣa Yahuda, wenni t isellmen, ibedd ɛawed akidsen. 6 Řami d asen inna “D necc”, dewřen ɣar ḍeffar uca wḍan ɣar tmurt. 7 Isseqsa ten ɛawed “Min tarezzum?” Nnan “Yeccu Nnaṣiri.” 8 Yeccu yarr-d “Aqqa nniɣ awem, aqqa d necc. Mařa tarezzum xafi, jjem ina ad raḥen”, 9 ḥima ad itwakemmeř wawař i tuɣa inna “Inni i d ayi tewcid, war zzaysen weddareɣ uřa d ijj.” 10 Simɛan Buṭrus xenni, am tuɣa ɣares ssif, ijbed it-id, iwta zzayes ismeɣ n uzeǧif n ikehhanen, iqeṣṣ as amezzuɣ nnes afusi. Tuɣa ismeɣ nni qqaren as Malxis. 11 Xenni inna Yeccu i Buṭrus “Arr ssif ɣar weɣřaf nnes, řkas wenni d ayi iwca Tbabat, ma war t sesseɣ?”

Yeccu zzat i uzeǧif n ikehhanen

12 Tarbiɛt d ukumandar d imxazniyyen n Wudayen ṭṭfen Yeccu, carfen t. 13 Nedhen t amezwaru ɣar Hannan, minzi netta d aḍekkwař n Qayafa, wenni tuɣa d azeǧif n ikehhanen deg useggwas nni. 14 Qayafa d netta tuɣa iweṣṣa i Wudayen, aqqa ḥsen ad immet ijj n bnadem di ṭṭweɛ n weydud.

Ankar n Buṭrus

15 Simɛan Buṭrus tuɣa iḍeffar Yeccu ak-d ij n umeḥḍar nneḍni. Ameḥḍar nni tuɣa itwassen ɣar uzeǧif n ikehhanen uca yudef ak-d Yeccu ɣar řemraḥ n taddart n uzeǧif n ikehhanen. 16 Buṭrus ibedd-d barra ɣar tewwart. Iffeɣ-d umeḥḍar i tuɣa itwassnen ɣar uzeǧif n ikehhanen, issiweř ak-d tɛessast tenni iḥeṭṭan tawwart uca issidef-d Buṭrus ɣar daxeř. 17 Tayya tenni iḥeṭṭan tawwart tenna i Buṭrus “Ma war teǧid cek zeg imeḥḍaren n bnadem-a?” Inna “Necc, lla.” 18 Tuɣa isemɣan d imxazniyyen bedden din , ssarɣen timessi s řefḥem, minzi tuɣa tesmeḍ uca tuɣa ttweqqaḥen. Uřa d Buṭrus ibedd akidsen, ittweqqaḥ.

Iseqsiten n uzeǧif n ikehhanen i Yeccu

19 Isseqsa uzeǧif n ikehhanen Yeccu x imeḥḍaren nnes u x tɣuri nnes. 20 Yarr-d xas Yeccu “Necc tuɣa ssawařeɣ i ddunnit s bṭayṭay, ssɣareɣ řebda deg usinagug u di taddart iqeddsen mani ttmunen Wudayen řebda uca di tnuffra war ssiwřeɣ uřa d ict n řḥajet. 21 Mayemmi d ayi tesseqsid? Seqsa inni isřan min d asen nniɣ. Xẓar, nitni ssnen min nniɣ.” 22 Řami inna ammu, xenni ijjen zeg imxazniyyen i tuɣa ibedden dinni iwca i Yeccu ij n umeddarḍar, inna “Ma ammu i ɣa tarred x uzeǧif n ikehhanen?” 23 Yarr-d xas Yeccu “Mařa ssiwřeɣ min war iḥřin, ched x min war iḥřin, maca mařa ssiwřeɣ mliḥ, mayemmi d ayi teccated?” 24 Tuɣa Hannan issekk it itwacarf ɣar Qayafa, azeǧif n ikehhanen.

Ankar n Buṭrus i twařa nneḍnit

25 Tuɣa Buṭrus ibedd dinni ittweqqaḥ. Nnan as “Ma war teǧid uřa d cek zeg imeḥḍaren nnes?” Netta inkar, inna “War ǧiɣ ca d necc” 26 Ijjen zeg isemɣan n uzeǧif n ikehhanen i tuɣa itteɛnan i wenni umi iqeṣṣ Buṭrus amezzuɣ, inna “Ma war cek ẓriɣ akides di teḥwict?” 27 Řexdenni inkar Buṭrus ɛawed uca deɣya isquqeɛ uyaẓiḍ.

Yeccu zzat i Bilaṭus

28 Xenni iwyen-d Yeccu zi Qayafa ɣar taddart n ccraɛ, tuɣa d zic. Nitni war udifen ca ɣar řfusina, ḥima war ttwassixen, maca zemmaren ad ccen zi macca n řɛid n Basxa. 29 Iffeɣ-d ɣarsen Bilaṭus, inna “Man acetci i ɣarwem x bnadem-a?” 30 Arrin-d, nnan as “Mařa wa war tuɣi ittegg tuɛeffna, ad tiři war d ac t-id nettiwi.” 31 Inna asen Bilaṭus “Awyem t-id kenniw, tḥekmem xas ɛlaḥsab ttawrat nwem.” Xenni nnan as Wudayen “War ɣarneɣ bu řḥeqq ad neneɣ uřa d ijj,” 32 ḥima ad itwakemmeř wawař n Yeccu i tuɣa iqqar, am tuɣa isscanen i man řmewt i ɣa immet. 33 Xenni yudef-d Bilaṭus ɛawed ɣar taddart n ccraɛ, iřaɣa x Yeccu, inna as “Ma cek d ajeǧid n Wudayen?” 34 Yarr-d xas Yeccu “Ma teqqared aya zi ɣarek niɣ tuɣa inneḍni qqaren ac t xafi?” 35 Yarr-d Bilaṭus “Ma attaɣ necc d Uday? Aqqa řgens nnek d arruyas n ikehhanen iwyen-d cek ɣari. Min tuɣa teggid?” 36 Yarr-d xas Yeccu “Tageldit inu war teǧi ca zi ddunnit-a. Mařa teǧa tgeldit inu zi ddunnit-a, ad yiři aqqa ixeddamen inu ad mmenɣen ḥima war ttetwasellmeɣ ɣar Wudayen, maca řexxu tageldit inu war teǧi ca ssanita.” 37 Bilaṭus inna as “Ma zi xenta cek d ajeǧid nican?” Yarr-d Yeccu “Cek teqqared, aqqa necc d ajeǧid. I man aya i d xeřqeɣ u i uya i d usiɣ ɣar ddunnit ḥima ad cehdeɣ i tidett. Marra wenni iǧan zi tidett, ad iseř i tmijja inu.” 38 Inna as Bilaṭus “Umi qqaren d tidett?” Řami inna ammu, iffeɣ-d ɛawed ɣar Wudayen, inna asen “War dayes ufiɣ uřa d ijj n uxeṭṭu. 39 Maca aqqa tennumem ad awem sarrḥeɣ ijj n bnadem di řɛid n Basxa. Ma texsem ad awem sarrḥeɣ i ujeǧid n Wudayen?” 40 Sɣuyyen ɛawed marra, nnan “War iǧi ca wanita, ḥaca Barabbas!”. Tuɣa Barabbas d aceffar.

19

Řḥukm x Yeccu s řmewt x ṣṣalib

1 Xenni yiwi Bilaṭus Yeccu uca ihettek it s urekkuḍ. 2 Uca iɛeskariyyen muden as ict n temrist zeg isennanen, ssarsen as tt x uzeǧif nnes, nḍaren xas aseřham d azeggwaɣ. 3 Uca qarrben-d ɣares, nnan “Sřam xak, a ajeǧid n Wudayen”, ssmeddarḍaren t. 4 Iffeɣ-d ɛawed Bilaṭus, inna asen “Ad awem t-id ssuffɣeɣ, ḥima ad tessnem belli necc war dayes ufiɣ uřa d ijj n řɛib.” 5 Xenni iffeɣ-d Yeccu s temrist n isennanen d ujeǧab azeggwaɣ. Inna asen Bilaṭus “Xẓarem, bnadem!” 6 Řami t ẓrin arruyas n ikehhanen d imxazniyyen, sɣuyen, nnan “Ṣellbem t, ṣellbem t” Inna asen Bilaṭus “Awyem t-id kenniw, tṣellbem t, minzi necc war dayes ufiɣ bu řɛib.” 7 Arrin-d xas Wudayen “Ƴarneɣ ttawrat. Ɛlaḥsab ttawrat nneɣ ittxeṣṣa ad immet, minzi netta ittarra ixef nnes d Mmis n Arebbi.” 8 Řami isřa Bilaṭus awař-a, yarni di tiggwudi. 9 Yudef ɛawed ɣar taddart n ccraɛ, inna i Yeccu “Manis cek?” Maca Yeccu war xas-d yarri ca. 10 Inna as Bilaṭus “Ma war texsed ad kidi tessiwiřed? Ma war tessined ca aqqa ɣari ṣṣulṭa ḥima ad cek ṣellbeɣ u ɣari tizemmar ad ac ssarrḥeɣ?” 11 Yarr-d xas Yeccu “War ɣarek bu ṣṣulṭa xafi, mařa war d ac temmewc zi sennej, s man aya, wenni d ayi-d ɣarek iwyen, aqqa xas ddnub imɣar.” 12 Zi řexdenni tuɣa Bilaṭus yarezzu ad as isarreḥ, maca Udayen sɣuyen, nnan “Mařa tsarrḥed i weryaz-a, ad tiři war teǧid ca d ameddukeř n qayṣar. Kuř ijjen wenni ittarran ixef nnes d ajeǧid, netta ittɛekkas qayṣar.” 13 Řami isřa Bilaṭus i wawař-a, issuffeɣ Yeccu, iqqim x řkursi n ccraɛ deg wemcan umi qqaren as ‘Azzay n luṣa’, qqaren as s tɛibranit ‘Gabbata.’ 14 Tuɣa d asewjed i Basxa uca tuɣa ɛřaḥař d setta. Inna i Wudayen “Xẓarem, ajeǧid nwem.” 15 Maca nitni sɣuyen “Ksim t, ksim t, ṣellbem t!” Inna asen Bilaṭus “Ma ad ṣellbeɣ ajeǧid nwem?” Arrin-d xas arruyas n ikehhanen “War ɣarneɣ bu ujeǧid mɣir qayṣar!” 16 Xenni isellem asen t ḥima ad itwaṣelleb. Uca nitni ksin Yeccu, awyen t ssenni.

Yeccu yarebbu ṣṣalib

17 Uca iffeɣ am yarbu simant nnes ṣṣalib ɣar wemcan umi qqaren ‘Taceqquft n uzeǧif’, umi qqaren s tɛibranit ‘Gulguta’, 18 ṣellben t dinni uca ṣellben akides tnayen nneḍni, ssa d ssa u Yeccu di řwesṭ. 19 Yura Bilaṭus ca n tira, issars itent x ṣṣalib. Itwari di tira-ya ‘Yeccu Nnaṣiri, Ajeǧid n Wudayen.’ 20 Tira-ya ɣrin tent aṭṭas n Wudayen, minzi amcan mani tuɣa ṣellben Yeccu yudes-d i tendint. Tira-ya twarint s tɛibranit d tlatinit d tyunanit. 21 Nnan arruyas n ikehhanen n Wudayen i Bilaṭus, “War ttari ca ‘Ajeǧid n Wudayen’, maca ‘Wanita inna: Necc d Ajeǧid n Wudayen.’ ” 22 Yarr-d xasen Bilaṭus “Min uriɣ, aqqa uriɣ t.” 23 Řami semmaren iɛeskariyyen Yeccu x ṣṣalib, ksin arruḍ nnes, bḍan t x arebɛa n tseqqar, i kuř aɛeskari ict n tesɣart, uca ksin ɛawed tcamir. Tuɣa tcamir nnebřa taxeyyaṭ, tetwaxeyyeḍ qaɛ zi sennej. 24 Nnan i wayawya “War t nettcarrig ca, ad xas negg akeccuḍ, ad nẓar wi t i ɣa yawyen, ḥima ad itwakemmeř wedlis i iqqaren “Bḍan arruḍ inu jarasen u x warruḍ inu ggin akeccuḍ.” Sbḥ. 22:18 Man aya i iggin iɛeskariyyen. 25 Ƴar ṣṣalib n Yeccu tbedd yemmas d wečmas n yemmas d Maryem tamɣart n Klubas d Maryem n Majdala. 26 Řami iẓra Yeccu yemmas d umeḥḍar wenni tuɣa ittexs, bedden zzates, inna i yemmas “A tamɣart, wa d mmim!” 27 Řexdenni inna i umeḥḍar “Aqqa-c yemmac!” Zi tsaɛɛet nni iksi tt umeḥḍar ɣar taddart nnes.

Řmewt n Yeccu x ṣṣalib

28 Awarni man aya, umi issen Yeccu aqqa kuřci tuɣa itwakemmeř, řexdenni ḥima ad itwakemmeř wedlis, inna “Necc fudeɣ.” Sbḥ. 22:15; 69:21 29 Tuɣa din ij n uɣarraf iccur s řxeǧ, ssɣeḍṣen ict n sbunxa n hisub s řxeǧ uca ggin tt x uɣanim, ssiwḍen as tt ɣar uqemmum nnes. 30 Řami iqqas Yeccu řxeǧ, inna “Aqqa itwakemmeř!” Uca yuḍar azeǧif nnes, isellem arruḥ nnes . 31 Umi tuɣa ass n usewjed n Basxa u ḥima war ttɣimin arrimat nsen x ṣṣalib di ssebt, minzi wass n ssebt nni tuɣa d ameqqran aṭṭas, ttaren Wudayen zi Bilaṭus ḥima ad twarzen iḍaren nsen uca ad ten ssiggwjen. 32 Usin-d iɛeskariyyen, arzin iḍaren n umezwaru u n wenneḍni i tuɣa ad kis twaṣellben. 33 Maca řami d usin ɣar Yeccu, war arzin ca iḍaren nnes umi ẓrin aqqa immut. 34 Maca ijjen zeg iɛeskariyyen issnuqqeb it s ict n fřitca deg uɣezdis nnes uca ffɣen-d idammen d waman deɣya. 35 Wenni iẓrin man aya, tuɣa iched u chadet nnes d tidett. Netta issen, aqqa iqqar tidett, ḥima ad tamnem uřa d kenniw. 36 Timesřayin-a msarent, ḥima ad itwakemmeř wedlis i iqqar “War zzayes ittarezzi yiɣes.” Ufɣ. 12:46; Řxř. 9:12; Sbḥ. 34:20 37 Uca ij n wawař nneḍni zeg wedlis iqqar “Nitni ad xẓaren wenni t issnuqqben.” Zak. 12:10

Anḍeř n Yeccu

38 Awarni man aya Yusef zi Arimatiya, wenni tuɣa d ij n umeḥḍar n Yeccu maca s tnuffra zi tiggwudi zeg Wudayen, ittar as i Bilaṭus ttesriḥ ḥima ad iksi arrimet n Yeccu uca Bilaṭus isarreḥ as. Xenni yusi-d, iksi arrimet n Yeccu. 39 Yusi-d ɛawed Nikudimus wenni tuɣa ɣares-d yusin tawařa tamezwarut s ǧiřet, yiwi-d akides axeǧeḍ n řefwaḥet n mirru d ssibři ɛřaḥař meyya ireḍřen . 40 Xenni ksin arrimet n Yeccu, řeḥḥfen tt di řecfun ak-d řeɛṭur, am mammec nnumen tteggen tt Wudayen i wenḍeř. 41 Tuɣa din ij n weḥwic deg wemcan mani t ṣellben uca deg weḥwic ij n wenḍeř n jdid, ɛemmarṣ war dayes neḍřen uřa d ijj. 42 Neḍřen Yeccu din zi ssibbet n usewjed n Wudayen, minzi anḍeř nni tuɣa yudes.

20

Anḍeř n Yeccu ixwa

1 Deg wass amezwaru n ssimana tusi-d Maryem n Majdala zic ɣar wenḍeř, tuɣa ɛad d taǧest uca teẓra taṣḍart aqqa temmeksi x wenḍeř. 2 Tuzzeř-d, tusi-d ɣar Simɛan Buṭrus u ɣar umeḥḍar nneḍni wenni tuɣa ittexs it Yeccu, tenna asen “Ksin Yeccu zeg wenḍeř, war nessin mani t ggin.” 3 Iffeɣ-d Buṭrus d umeḥḍar nneḍni uca usin-d ɣar wenḍeř. 4 Nitni uzzřen s tnayen idsen. Ameḥḍar nneḍni izwar i Buṭrus uca yiweḍ d amezwaru ɣar wenḍeř. 5 Yuḍar, iẓra řecfun mmarsen, maca netta war yudif ca. 6 Yusi-d Simɛan Buṭrus, wenni it-id iḍfaren uca yudef deg wenḍeř, iẓra řecfun mmarsen din , 7 maca amendiř wenni tuɣa x uzeǧif nnes, war immars ca ak-d řecfun, maca tuɣa iḍfeṣ deg wemcan weḥdes. 8 Řexdenni yudef-d uřa d ameḥḍar nneḍni, wenni d yusin d amezwaru ɣar wenḍeř, iẓra man aya uca yumen. 9 Minzi nitni tuɣa ɛad war ssinen adlis, belli ittxeṣṣ as ad ikkar zeg imettinen.

Aḍhar n Lmasiḥ i Maryem zi Majdala

10 Xenni dewřen imeḥḍaren ɣar taddart nsen. 11 Maca Maryem teqqim tbedd ɣar wenḍeř barra, tettru. Řami tuɣa tettru, tuḍar ɣar wenḍeř, 12 teẓra tnayen n lmalakat s warruḍ d acemřař, qqiment mani tuɣa temmars arrimet n Yeccu, ijjen ɣar uzeǧif, ijjen ɣar iḍaren. 13 Nnan as “A tamɣart, mayemmi tettrud?” Tenna asen “Kksin Sidi inu, war ssineɣ mani t ssarsen.” 14 Umi tenna man aya, tenneqřeb ɣar ḍeffar, teẓra Yeccu ibedd, maca war tessin ca aqqa-t d Yeccu. 15 Yeccu inna as “A tamɣart, mayemmi tettrud? Min xef tarezzud?” Tettɣiř as netta d bab n teḥwict, tenna as “A Sidi mařa cek it iksin, ini ayi mani t tessarsed, ad t ksiɣ.” 16 Yeccu inna as “A Maryem!” Nettat tenneqřeb, tenna as s tɛibranit “Rabbuni!”, min ixs ad yini ‘A Amseřmad!’ 17 Yeccu inna as “War d ayi ttḥada, aqqa necc ɛad war gaɛɛdeɣ ca ɣar Baba, maca ruḥ ɣar aytma, ini asen ‘Necc aqqa ad gaɛɛdeɣ ɣar Baba d Babatwem, ɣar Arebbi inu d Arebbi nwem.’ ” 18 Teɛqeb-d Maryem n Majdala tessxebbar imeḥḍaren belli nettat teẓra Arebbi u belli netta inna as man aya.

Aḍhar n Lmasiḥ i imeḥḍaren nnes

19 Ƴar tmeddit n wass nni, netta d amezwaru n ssimana, tuɣa tiwwura qqnent mani tuɣa munen imeḥḍaren s tiggwudi zeg Wudayen uca yusi-d Yeccu, ibedd di řwesṭ, inna asen “Sřam xawem.” 20 Awarni řami inna aya, immeř asen ifassen nnes d uɣezdis nnes. Farḥen imeḥḍaren řami ẓrin Sidi. 21 Inna asen ɛawed Yeccu “Sřam xawem, am mammec d ayi-d issekk Tbabat, uřa d necc ad kenniw-d ssekkeɣ.” 22 Awarni řami inna man aya, iṣuḍ daysen, inna asen “Qebřem Arruḥ Iqeddsen.” 23 Wenni umi i ɣa teɣfarem ddnub, ad as twaɣfaren ddnub nnes . Wenni umi d as i ɣa teṭṭfem di ddnub nnes, ad as twaṭṭfen ddnub nnes .” 24 Maca Tuma, ijjen zi tenɛac, wenni umi qqaren ‘Acniw’, war tuɣi ca akidsen, řami d yusa Yeccu. 25 Nnan as imeḥḍaren nneḍni “Aqqa neẓra Sidi!” Maca netta inna asen “Mařa war ẓriɣ řimařt n imesmiren deg ifassen nnes, ad ssarseɣ aḍaḍ inu deg wemcan n imesmiren uca ad ssarseɣ afus inu deg uɣezdis nnes, war ttimneɣ.” 26 Awarni tmenya n wussan udfen imeḥḍaren nnes ɛawed ɣar daxeř u tuɣa Tuma akidsen. Yusi-d Yeccu, waxxa tiwwura tuɣa qqnent, uca ibedd-d di řwesṭ inna “Sřam xawem!” 27 Inna i Tuma “Awi-d aḍaḍ nnek, xẓar deg ifassen inu, sars afus nnek x uɣezdis inu, war jehheř ca, maca amen.” 28 Yarr-d Tuma, inna as “A Sidi inu d Arebbi inu!” 29 Inna as Yeccu “S minzi cek d ayi teẓrid, ma tumned? Sseɛd n inni yumnen, waxxa nitni war dayi ẓrin.” 30 Yeccu igga aṭṭas n řeɛřamat nneḍni qibač i imeḥḍaren nnes, tinni war yurint ca deg wedlis-a. 31 Maca tina urant ḥima ad tamnem belli Yeccu netta d Lmasiḥ, Mmis n Arebbi uca ḥima, am tettamnem, ad ɣarwem tiři tudart s yisem nnes.

21

Yeccu d tyemmart tameqqrant n iseřman

1 Awarni uya tuɣa Yeccu immeř ixef nnes ɛawed i imeḥḍaren ɣar řebḥar n Tibiriyas, iḍhar-d ammu. 2 Tuɣa din jmiɛ Simɛan Buṭrus d Tuma, wenni umi qqaren ‘Acniw’, d Natanayil, wenni tuɣa zi Qana di tmurt n Ljalil, d tarwa n Zabadi, d tnayen nneḍni zeg imeḥḍaren nnes. 3 Inna asen Simɛan Buṭrus “Necc ad raḥeɣ ad ymareɣ iseřman .” Nnan as “Ad kik nraḥ uřa d neccin.” Ffɣen-d uca nyin deɣya di tɣarrabut. Di ǧiřet nni war ṭṭifen walu. 4 Ƴar ṣṣbeḥ zic, ibedd Yeccu x tma n řebḥar. Maca imeḥḍaren war ssinen ca aqqa d Yeccu. 5 Inna asen Yeccu “A iḥenjiren, ma attaɣ ɣarwem ca n iseřman?” Arrin-d xas “Lla!” 6 Inna asen “Nḍarem tracca ak-d uɣezdis afusi n tɣarrabut, ad tafem.” Xenni nḍaren tracca uca war zemmaren ad t-id jebden s ubarru n iseřman. 7 Inna umeḥḍar wenni i tuɣa ittexs it Yeccu i Buṭrus “Aqqa netta d Sidi.” Řami isřa Simɛan Buṭrus aqqa netta d Sidi, ibyes arruḍ nnes minzi tuɣa d aɛaryan, inḍar ixef nnes di řebḥar. 8 Maca imeḥḍaren inneḍni usin-d s tɣarrabut minzi war iggwijen ca x řbarr mɣir mitayn n iɣaǧen (= ɛřaḥař 100 mitru) uca nitni jebden-d tracca s iseřman. 9 Řami d ffɣen ɣar řbarr, ẓrin diha afennic n řefḥem mani mmarsen iseřman d weɣrum. 10 Inna asen Yeccu “Awyem-d zeg iseřman i teymarem řexxu.” 11 Simɛan Buṭrus yuyur, ijbed tracca teccur s iseřman imeqqranen ɣar řbarr, aqqa-tt dayes meyya u třata u xemsin. Waxxa dayes s wanect uya aṭṭas , war tcarreg ca tracca. 12 Inna asen Yeccu “Araḥem-d da, ad tariyyqem.” Uřa d ijj zeg imeḥḍaren war izɛim ad t isseqsa ‘Min teɛnid cek?’. Ssnen aqqa-t d Yeccu. 13 Řexdenni yusi-d Yeccu iksi aɣrum, iwca asen t uca ammu uřa d iseřman. 14 Wanita d tawařa wiss třata i d iḍhar Yeccu i imeḥḍaren nnes awarni řami d itwassnekkar zeg imettinen.

Yeccu ittseqsa Buṭrus “Ma tettexsed ayi?”

15 Awarni řami ariyyqen, inna Yeccu i Simɛan Buṭrus “A Simɛan, mmis n Yuna, ma tettexsed ayi ktar zeg yina?” Inna as “Wah, a Sidi, cek tessned aqqa necc ttexseɣ cek.” Inna as “Arwes izmaren inu.” 16 Inna as ɛawed “A Simɛan, mmis n Yuna, ma tettexsed ayi?” Inna as “Wah a Sidi, cek tessned aqqa necc ttexseɣ cek.” Inna as “Arwes uǧi inu.” 17 Inna as wiss třata “A Simɛan, mmis n Yuna, ma tettexsed ayi?” Icḍen Buṭrus minzi inna as t wiss třata ‘Ma tettexsed ayi?’, uca inna as “A Sidi, cek tessned kuřci, tessned aqqa necc ttexseɣ cek.” Inna as Yeccu “Arwes uǧi inu. 18 S tidett, s tidett, ad ac iniɣ, řami tuɣa cek d ameẓyan, tbeysed i yixef nnek, truḥed mani texsed, maca x minni i ɣa tewsared, ad tesswizzded ifassen nnek uca wenneḍni ad ac ibyes uca ad cek yawi ɣar mani war tettexsed.” 19 Inna ammu ḥima ad isscen i man řmewt i zi i ɣa issɛuǧ Arebbi. Řami d as inna ammu, inna as “Ḍfar ayi-d!” 20 Inneqřeb Buṭrus, iẓra ameḥḍar wenni i tuɣa ittexs it Yeccu, iḍfar it, netta d wenni i tuɣa isennden x idmaren nnes ɣar umensi, inna “A Sidi, wi cek i ɣa isellmen?” 21 Řami iẓra Buṭrus wa, inna i Yeccu “A Sidi, i wa, min d as i ɣa imsaren?” 22 Inna as Yeccu “Mařa xseɣ ad iqqim ař i d ɣa ɛeqbeɣ, i min d ac iruḥen? Cek ḍfar ayi-d!” 23 Uca iffeɣ-d wawař-a jar wawmaten belli ameḥḍar nni war ittmetti ca, maca Yeccu war d as inni ca belli netta war ittmetti ca, maca “Mařa xseɣ ad iqqim ař i d ɣa ɛeqbeɣ, i min d ac iruḥen?” 24 D wa d ameḥḍar wenni icehhden s man aya uca netta yura man aya, u neccin nessen aqqa chadet nnes d tidett. 25 Aqqa din ɛad aṭṭas n tmesřayin nneḍni i igga Yeccu. Mařa twarint ict awarni tenneḍnit, ad ayi ittɣiř, ad tiři ddunnit simant nnes war ɣares bu ttasiɛ ḥima ad teksi idlisen i ɣa itwarin. Amin!

© 2009 DHIMH Multimedia All rights reserved. Free and unlimited reproduction and distribution of this publication in whatever form is permitted if it serves the interest of the spread of the Good News of Jesus Christ, on the condition that the contents of this publication will not be changed and this same and complete copyright notice will be included and on the condition that its distribution does not serve any commercial purpose. Marra řḥuquq twaḍemnen. Itwasmeḥ ad itwagg wedlis-a ɛawed s ɛřam kuř ibriden u s marra tiřelli, mařa man aya ittiři di ṭṭweɛ n uwezzeɛ n Řexbar Aṣebḥan n Yeccu Lmasiḥ maca nnebřa abeddeř n min dayes. Ittxeṣṣ ad itwagg dayes řebda awař-a simant nnes marra zi jjihet n řḥuquq am ittxeṣṣ ɛawed belli awezzeɛ nnes ad yiři nnebřa arbeḥ d usebbeb.