1 Neet nang A̱gwaza ka̱n nyia̱ swanta hu bah, nang Swang A̱lyiat nshya̱, ji̱ ku shya̱ dundung ma̱ng A̱gwaza. A̱wot Swang A̱lyiat ji ku yet A̱gwaza wa. 2 Jija ku shya̱ dundung ma̱ng A̱gwaza, neet nang á̱ ka̱n mat swanta hu bah. 3 Jija ku yet vak hu nang A̱gwaza ku nnyia̱ kuzang kyang a̱ni. Á̱ mbyia̱ kyang nyiung nang A̱gwaza ku nyia̱ mi̱ swanta hu da̱ ma̱ng a̱nji a̱ni bah. 4 Swang A̱lyiat ji ku yet a̱tyin nswuan. A̱wot swuan jini si̱ bai ma̱ng á̱nietbishyi sai. 5 Sai hu si̱ tyia̱ a̱vwuo ka ka̱ yet lyin a̱ni, si̱ teak. A̱wot di̱ lyin hu, ku swuo chet sai hu bah. 6 A̱gwaza ku ta̱m a̱ta̱m nggu wu á̱ si̱ ngyei gu Yoona. 7 Nggu wa ku bai tak ta̱m ji kpa̱sai tazwa sai A̱gwaza hu. Da̱nian á̱niet ba ba̱ ka fa̱k, ba̱ nwuak a̱chuchuk di̱ sai hu. 8 Nggu ma̱ a̱pyia̱ nggu, nggu wa yet sai hu bah. A̱ ku bai a̱ ka tak ta̱m ja tazwa sai A̱gwaza hu. 9 Sai huni hwa ku yet a̱tsatsak wu. Ku na bai mi̱ swanta hu, ku sai tazwa a̱mgba̱m á̱nietbishyi ba. 10 Swang A̱lyiat ji ku bai mi̱ swanta hu. Dundung ma̱ng a̱nji wa A̱gwaza si̱ mmat swanta hu. A̱wot á̱niet mi̱ swanta ba si̱ fi̱k gu bah. 11 A̱ ku bai da̱ a̱vwuo á̱niet guu. A̱wot á̱niet nggu ba si̱ lak san gu hu! 12 A̱mgba̱m ma̱ng a̱nia, á̱niet ba̱ san guu, ba̱ si̱ nwuak fwuo da̱ nggu a̱ni; á̱ nang ba tyok ma̱ng a̱wat ba̱ yet mman A̱gwaza. 13 Bibya yet á̱niet ba da̱ á̱ tyei ba̱ yet mman A̱gwaza mat a̱sok nia a̱ni bah; da̱ nyia̱ mat chat vam hwa bah; da̱ mat fa a̱tyubishyi hwa bah. Da̱ a̱kwonu a̱kya, swuan jini, A̱gwaza wa ma̱ a̱pyia̱ nggu nang mba jii. 14 Swang A̱lyiat ji ku tyia̱ a̱tyubishyi. A̱ si̱ swan dundung ma̱ng a̱nzi̱t. Zi̱ si̱ li a̱kyenkyai shi nggu wu. A̱ si̱ byia̱ shok ma̱ng a̱chuchuk gba̱mgbam. A̱kyenkyai shi wuni wa ku tak nang gu ma̱nyin gu neet da̱ a̱vwuo A̱gwaza. 15 Yoona mameang ku tak a̱lyiat kpa̱sai tazwa nggu. A̱ si̱ ta̱ngam a̱nwuat nggu ka mi̱ chet nyia̱, “A̱tyu wuni wa nang n ku ndyiat tazwa nggu, ‘A̱tyu a̱ chobai, a̱ khwi nung lilyim a̱ni, a̱ yet a̱tyu kwak a̱son nung wa. A̱wot a̱ si̱ swak nung ma̱ng shi hu ba̱t. Mat a̱ nshya̱ neet nang á̱ ka̱n byin nung bah.’ ” 16 A̱mgba̱m nzi̱t, mat a̱gba̱mgbam shok nggu ji ja nang zi̱ nshya̱ nwuo hu ma̱ sa̱t. 17 Mat A̱gwaza ku nwuak Musa wa doka nggu ji. A̱wot shok ji ma̱ng gba̱mgbam tsotswat wu si̱ bai mat Yesu Kristi wa. 18 Á̱ mbyia̱ a̱tyu a̱ ka̱n di A̱gwaza a̱ni bah. Nggwon kikya ma̱nyin ka, ka̱ yet A̱gwaza, a̱wot ka̱ si̱ shya̱ da̱ a̱vwuo a̱nyiung ma̱ng A̱tyia̱ wu; kikya tak za̱kwa A̱gwaza ji kpa̱sai. 19 Á̱lyiat nani nia yet á̱si̱ nang Yoona ku tak kpa̱sai di̱n jen nang a̱cha̱chet A̱yahudawa Urusha̱lima ba ku nta̱m a̱yaapris ba mbeang A̱li̱viyawa ba, nyia̱ ba̱ lyip Yoona, “Nwan wa yet a̱nyan?” 20 Yoona si̱ ta̱n lyip mba hu bah. A̱ si̱ tyai mba a̱tsatsak a̱lyiat wu kpa̱sai nyia̱, “Nung gwa ngyet Kristi wu bah!” 21 A̱jawa ba̱ si̱ bu lyip gu nyia̱, “Nwan wa yet Iliya a̱ta̱m a̱kwonu A̱gwaza wu a?” Yoona si̱ nwuak ba shim nyia̱, “Kaai, nung gwa bah.” Ba̱ si̱ bu lyip gu, nyia̱ “Nwan wa yet a̱ta̱m a̱kwonu A̱gwaza wu nang á̱ nyia̱ a̱ na ta̱m ndyo a̱ni a?” A̱ si̱ nyia̱ ma̱ng a̱mba, “Kaai.” 22 Ba̱ si̱ bu nyia̱, “Tak zi̱t tangka̱i a̱tyu nang a yet a̱ni! Mat ku yet zi̱t ta hwa zi̱ bwuok nat zi̱ tak ma̱ng á̱niet ba, ba̱ ta̱m zi̱t a̱ni. Nwan a yei a̱pyia̱ ang a̱nyan?” 23 Yoona si̱ nwuak ba shim ma̱nang Ishaya a̱ta̱m a̱kwonu A̱gwaza wu ku nhyia̱ a̱ni, nyia̱, “N gyet nwuat kya ka̱ yei mi̱ chet mi̱ ntswa a̱yit a̱ni: ‘Nyi jhyi vak da̱nian A̱tyoli nzi̱t wu, ku nat cha̱chaat gu ba̱ nkai!’ ” 24 A̱jawa A̱fa̱risawa a̱bya nang á̱ ku ta̱m ba a̱ja a̱ni, 25 ba̱ si̱ lyip Yoona nyia̱, “Ka̱ nwan wa yet Kristi wu bah, a̱wot a bu yet Iliya bah, da̱ nwan a bu yet a̱ta̱m a̱kwonu A̱gwaza bah; mi̱ yihwa mbyia̱ nang a nnyia̱ á̱niet ba ba̱ptisman ji?” 26 Yoona si̱ nwuak ba shim nyia̱, “N nyia̱ nyin ba̱ptisman ji ma̱ng a̱sa̱khwot nia. A̱wot a̱yin yong mami nyin da̱nang nyi lyen a̱ni bah. 27 A̱ chobai a̱ khwi nung lilyim. A̱wot n maai mi̱ maai n byii̱k ywan á̱kwatak gu hu bah.” 28 Á̱ ku lyiat á̱lyiat nani ma̱ a̱keang Ba̱ta̱ni kya a̱ma̱nyi fam a̱tak a̱ghyui Urdun, da̱ a̱vwuo ka nang Yoona nnyia̱ á̱niet ba ba̱ptisman ji a̱ni. 29 Da̱ a̱tsotson tat ka, Yoona si̱ li Yesu gu chobai da̱ a̱vwuo nggu. A̱jawa gu nyia̱, “Di, Fi̱ng A̱nfwuk nang A̱gwaza neap a̱ni! Nggu wa na chi a̱ka̱tuk nyia̱ á̱niet wu mi̱ swanta hu. 30 A̱tyu wuni wa nang n ku ndyiat ma̱ng a̱nyin nang n ku nnyia̱, ‘A̱yin chobai, a̱ khwi nung lilyim. A̱wot a̱ swak nung ma̱ng shi hu ba̱t, mat a̱ nshya̱ neet nang á̱ ka̱n byin nung bah.’ 31 “N mi̱ nfi̱k a̱tyu nang gu yet a̱ni bah. Ma̱ng a̱nia, n bai n nyia̱ á̱niet ba̱ptisman ma̱ng a̱sa̱khwot, da̱nian á̱ ka tyai nggu shansham da̱ a̱vwuo á̱niet Isi̱rela ba.” 32 A̱jawa Yoona si̱ tak kpa̱sai tazwa Yesu, nyia̱, “N ku ndi nang A̱za̱za̱rak Ntswa A̱gwaza chorop a̱ neet Ma A̱gwaza tswazwa a̱ chobai nang a̱bwa a̱ni, a̱ si̱ ba̱ swan da̱ nggu. 33 Bi̱ri̱ng ma̱ng a̱nia, n si̱ nfi̱k gu bah. A̱wot A̱gwaza a̱ ku ta̱m nung n nyia̱ ba̱ptisman ji ma̱ng a̱sa̱khwot na a̱ni, si̱ nyia̱ ma̱ng a̱nung a̱ni, ‘A̱tyu nang a li A̱za̱za̱rak Ntswa wu chorop a̱ chobai a̱ ba̱ swan da̱ nggu a̱ni; nggu wa yet a̱tyu a̱ na nyia̱ á̱niet ba ba̱ptisman ji ma̱ng A̱za̱za̱rak Ntswa A̱gwaza wu a̱ni.’ 34 N di a̱nia, n tak nyin kpa̱sai nang nggu wa ngyet Nggwon A̱gwaza ka.” 35 Da̱ a̱tsotson tat ka nang Yoona ngyong ma̱ng mman ta̱m nggu a̱feang a̱ni, 36 a̱ si̱ kin di Yesu gu chong a̱ sweap. A̱jawa gu nyia̱, “Di, Fi̱ng A̱nfwuk nang A̱gwaza neap a̱ni!” 37 Nang mman nta̱m a̱feang a̱nia nfa̱k gu nhyia̱ a̱nia a̱ni, ba̱ si̱ kin doot á̱ khwi Yesu. 38 Nang Yesu mbwuak a̱ si̱ li nang ba̱ khwi nggu a̱ni, a̱ si̱ lyip ba nyia̱, “Yihwa nang nyi chat?” Ba̱ si̱ nwuak gu shim ma̱ng lyip nyia̱, “Rabi!” (Swang jini fa, “A̱tyu tyiet.”) “A̱ji wa nang a nshya̱?” 39 Yesu si̱ nyia̱ ma̱ng a̱mba a̱ni, “Nyi bai, nyi lii.” A̱jawa ba̱ si̱ nat, ba̱ si̱si̱ li a̱vwuo ka nang nggu nshya̱ a̱ni; nang jen ji yet tswam nyaai jenshyung, a̱wot ba̱ si̱ swan á̱ tyak á̱kum mam ka dundung ma̱ng a̱nggu. 40 A̱tyo nyiung mami mman ta̱m a̱feang ba̱ ku fa̱k a̱lyiat Yoona ba̱ si̱ khwi Yesu a̱ni; nggu wa yet Anda̱rawut, a̱na̱nyiuk Siman Bitut. 41 Anda̱rawut si̱ nat a̱ si̱ chat a̱na̱nyiuk nggu wu Bitut, a̱ si̱ nyia̱ ma̱ng a̱nggu a̱ni, “Zi̱ shya̱ a̱tyu a̱ yet Ma̱siha wu a̱ni!” (Ku fa “Kristi” da̱ a̱lyem A̱helenawa). 42 A̱ si̱ nat ma̱ng Bitut da̱ a̱vwuo Yesu ka. Nang Yesu ndi Bitut a̱ni, a̱ si̱ nyia̱ ma̱ng a̱nggu, “Nwan wa yet Siman nggwon Yoona kaa? Á̱ na ngyei ang ‘Kefat.’ ” (A̱lyoot ka nat cha̱chaat ma̱ng a̱lyoot Bitut ka, ka̱ fa “A̱fang”). 43 Da̱ a̱tsotson tat ka, Yesu si̱ kyiak mi̱ fwuo a̱ nat a̱byin Ga̱lili. A̱ si̱ myim ma̱ng Filibut. A̱ si̱ nyia̱ ma̱ng a̱nggu, “Khwi nung!” 44 Nggu Filibut mameang, ku yet a̱tyu a̱ neet ma̱ a̱keang Ba̱tsaida kya dundung ma̱ng Anda̱rawut ma̱ng Bitut. 45 Filibut mameang si̱ nat a̱ si̱ shya̱ Nataniyel. A̱ si̱ nyia̱ ma̱ng a̱nggu a̱ni, “Zi̱ shya̱ a̱tyu nang Musa ku lyuut nkhang nggu na mami ta̱ka̱da doka ji a̱ni! A̱yaata̱m a̱kwonu A̱gwaza si̱ bu lyuut nkhang nggu na! Nggu wa yet Yesu A̱tyu Na̱za̱ra̱t, nggwon Isuu!” 46 Nataniyel si̱ nyia̱ ma̱ng a̱nggu, “Ka̱ doot a̱tsatsak kyang a̱ ghwut mi̱ Na̱za̱ra̱t a?!” A̱jawa Filibut si̱ nyia̱ ma̱ng a̱nggu a̱ni, “Bai, a lii!” 47 Nang Yesu ndi Nataniyel nchobai da̱ a̱vwuo nggu a̱ni, a̱ si̱ kaat tazwa nggu nyia̱, “Nyi li a̱tan a̱tyu Isi̱rela a̱ sang a̱bun a̱ni!” 48 A̱jawa Nataniyel si̱ nyia̱ ma̱ng Yesu a̱ni, “A̱ji wa nang a ndyen nung?” Yesu si̱ nwuak gu shim hu nyia̱, “Neet nang Filibut ka̱n gyorong ang bah, nang a ku nswan a̱tyin a̱kwon a̱bwabwap ka a̱ni; n ku ndi ang a̱ja.” 49 A̱jawa Nataniyel si̱ nyia̱, “A̱tyu tyiet, nwan wa yet Nggwon A̱gwaza ka! Nwan wa yet A̱gwam Isi̱rela wu!” 50 Yesu si̱ nyia̱ ma̱ng a̱nggu a̱ni, “A nwuak a̱chuchuk mat n tak ang nang n ku ndi ang di̱n jen nang a ku nswan a̱tyin a̱kwon a̱bwabwap ka a̱ni a? A na li a̱cha̱chet nkyang jhyang na̱ swak si̱ nani a̱ni!” 51 A̱jawa Yesu si̱ bu nyia̱ ma̱ng a̱mba a̱ni, “N tak nyin a̱tsak a̱lyiat; nyi bye li Ma A̱gwaza tswazwa ka khwuk, a̱wot nyi li a̱yaata̱m tswá A̱gwaza nang ba̱ ban á̱ tsa á̱ nchorop a̱zaghyi Nggwon A̱tyubishyi!” Log In or Sign Up To access Bookmarks, Highlights, & Notes.
1 A̱tuk mam tat si̱ kaat a̱ bai, á̱ si̱ nyia̱ nyeang ma̱ a̱keang Kana ka̱ shya̱ mi̱ fam a̱byin Ga̱lili a̱ni. A̱yang byin Yesu si̱ nat nyeang hu, 2 á̱ ku mun á̱ hyia̱ ma̱ng Yesu nyeang hu. A̱ si̱ nat dundung ma̱ng mman ta̱m nggu na. 3 Jen nang á̱ nswuo a̱nya̱nyiat a̱sa̱khwot a̱na̱p wu á̱ tyak a̱ni, a̱jawa a̱yang byin Yesu wu si̱ nyia̱ ma̱ng a̱nggu a̱ni, “Ba̱ swuo a̱nya̱nyiat a̱sa̱khwot a̱na̱p wu á̱ tyak.” 4 Yesu si̱ nyia̱ ma̱ng a̱yang byin nggu wu a̱ni, “A̱yang, a̱lyiat nani yet a̱si̱ nwan nia bah. Jen nung ji ka̱n nyia̱ bah, ya ngyok.” 5 A̱yang byin Yesu wu si̱ nyia̱ ma̱ng mman ta̱m na a̱ni, “Nyi nyia̱ kuzang kyang nang gu tak ma̱ng a̱nyin a̱ni.” 6 Da̱ a̱vwuo nyeang ka, á̱ ku byia̱ a̱khwot dudong nfang a̱sa̱khwot a̱taa, nang á̱ sak a̱ja; ma̱nang A̱yahudawa ba ka̱n meang ma̱ng ntyei a̱sa̱khwot mi̱ dudong hu á̱ saai da̱nian kwi a̱ti̱tak ma̱ng bwak a̱ni. Huhwa ku mbyia̱ ba̱ si̱ nsak hu a̱ja. Kuzang a̱dong ku kwok li̱la̱n nswak nfeang si̱ nat nswak ntat. 7 A̱jawa Yesu si̱ nyia̱ ma̱ng á̱khwo nyeang ba, “Nyi fwuoi a̱sa̱khwot, nyi tyia̱ mi̱ dudong huni.” Ba̱ si̱ fwuoi a̱sa̱khwot na á̱ hyaai dudong hu tyentyang a̱ntyang. 8 A̱jawa Yesu si̱ nyia̱ ma̱ng á̱khwo nyeang ba, “Ma̱ninika, nyi bwuo na nyi nat ndyo. Nyi si̱ nwuak a̱tyu a̱ saai á̱nietchen ba mi̱ nyeang hu a̱ni.” Ba̱ si̱ bwuo a̱sa̱khwot na, ba̱ si̱si̱ nwuak guu. 9 Nang a̱tyu saai á̱nietchen wu nfwup a̱sa̱khwot nang á̱ si̱ bwuak na̱ si̱ tyia̱ a̱nya̱nyiat a̱sa̱khwot a̱na̱p wu a̱ni; a̱ si̱ lyen a̱vwuo ka nang á̱ nshya̱ na a̱ni bah. Mi̱ mman ta̱m ni̱nia ku lyen a̱vwuo ka nang á̱ mbwuo a̱sa̱khwot a̱na̱p na a̱ni. A̱tyu saai á̱nietchen wu si̱ yorong a̱tyu a̱ byia̱ nyeang hu a̱ni, da̱ gbang a̱nyiung. 10 A̱ si̱ nyia̱, “Kuzang a̱tyu a̱ byia̱ nyeang a̱ni, a̱tsatsak a̱nya̱nyiat a̱sa̱khwot a̱na̱p wu wa ni̱ yet a̱son ka, nang á̱niet ba na swuo a̱ni. Ka̱ á̱nietchen ba ba̱ swuo ba̱ si̱ swa̱i, gu sii nang mba a̱sa̱khwot a̱na̱p na̱ nwai swan nya̱nyiat hu a̱ni. A̱wot nwan, a ba̱ sak a̱tsatsak a̱nya̱nyiat a̱sa̱khwot a̱na̱p wu, a sii ghwut ndyo wa ma̱ninika!” 11 Si̱ huni hwa yet a̱son kyang a̱ga̱de nang Yesu ku nyia̱ a̱ni. A̱ ku nyia̱ hu ma̱ a̱keang Kana ka̱ shya̱ ma̱ a̱byin Ga̱lili a̱ni. A̱ja wa nang gu nnyia̱ a̱lama wuni a̱ tyai a̱kyenkyai shi nggu wu. Mman ta̱m nggu na mameang, ba̱ si̱ nwuak a̱chuchuk da̱ nggu ba̱t. 12 Nang á̱ ku ntyak nyeang hu a̱ni, Yesu mbeang a̱yang byin nggu wu, ma̱ng á̱na̱nyiuk nggu ba, ma̱ng mman ta̱m nggu na, ba̱ si̱ nat a̱keang Ka̱fanahum. Ba̱ si̱ ya mbwuo mmam a̱ja. 13 Nang jen song A̱yet Ghwut Mman Isi̱rela mi̱ Khwo ji nshim bai kpa̱mkpaan a̱ni, a̱jawa Yesu si̱ doot a̱ nat Urusha̱lima. 14 Mami didyaat A̱li Nwuat Za̱nang A̱gwaza hu, a̱ si̱ shya̱ á̱niet a̱bwuang nang ba̱ lyiai nyák, ma̱ng á̱niet lyiai zón seap, ma̱ng á̱niet lyiai a̱yaabwa a̱mali, ma̱ng á̱niet shai a̱ka̱kurum nang ba̱ swan da̱ a̱vwuo nta̱m mba na. 15 A̱jawa Yesu si̱ bat a̱ya̱u. A̱ si̱ nvwuong mbaa a̱ ghwut ndyo mi̱ didyaat A̱li Nwuat Za̱nang A̱gwaza hu, ma̱ng zón seap ji, mbeang nyák ji. A̱ si̱ seang á̱niet shai a̱ka̱kurum ba ma̱ng kurum mba hu. A̱ si̱ bwan a̱yaatyii mba ba a̱ ya̱gurup a̱byin. 16 Yesu si̱ kam á̱niet ba̱ lyiai a̱yaabwa a̱mali ba a̱ni nyia̱, “Nyi kwok nkyang nyin na a̱ji, nyi doot! Nyi yok bwuak A̱li A̱tyia̱ nung ka ntyia̱ a̱vwuo a̱bwuang bah!” 17 A̱jawa mman ta̱m nggu na si̱ kin jhyung nang á̱lyiat nani mbai cha̱chaat ma̱ng kyang nang á̱ lyuut ma̱ A̱lyiat A̱gwaza na a̱ni nyia̱, “N kwi swam za̱m tazwa A̱li Nwuat Za̱nang A̱gwaza mi̱ fwuo nung hu.” 18 A̱cha̱chet A̱yahudawa ba si̱ bwuok á̱ bai da̱ a̱vwuo nggu. Ba̱ si̱ lyip gu nyia̱, “Zang kyang a̱ga̱de hwa nang a na nyia̱ nzi̱t ndyo ku yet a̱lama a̱ tak a byia̱ tyok a nyia̱ tangka̱i kyang huni?” 19 Yesu si̱ nwuak ba shim nyia̱, “Nyi bi̱ri̱m A̱li Nwuat Za̱nang A̱gwaza kani. Nung mameang, mami mam ntat, n bu na nok ka.” 20 Ba̱ si̱ lyip Yesu nyia̱, “A bu na nok ka mami mam ntat a? Á̱ ku nyia̱ a̱lyia̱ swak naai ma̱ a̱taa kya, nang á̱ nok A̱li Nwuat Za̱nang A̱gwaza kani. Nwan, a nyia̱ a na nok mami mam ntat a?” 21 A̱li Nwuat Za̱nang A̱gwaza ka nang Yesu ku lyiat a̱ni; vam nggu hu hwa. 22 A̱wot nang á̱ ku nta̱ngam gu ma̱ng swuan ma̱ á̱niet ba̱ ka̱n kwi a̱ni, mman ta̱m nggu na si̱ jhyung nang gu ku nhyia̱ a̱nia. A̱wot ba̱ si̱ nwuak a̱chuchuk da̱ A̱lyiat A̱gwaza nang á̱ lyuut a̱ni, ma̱ng kyang hu nang Yesu ku hyia̱ a̱ni. 23 Nang Yesu ku nshya̱ ma̱ a̱keang Urusha̱lima di̱n jen A̱yet Ghwut Mman Isi̱rela mi̱ Khwo hu a̱ni, á̱niet ma̱ a̱di̱di̱t ku nwuak fwuo da̱ nggu, mat nkyang a̱ga̱de nang gu nyia̱ a̱ni. 24 A̱mgba̱m ma̱ng a̱nia, Yesu ku byii̱k ma̱ng a̱mba bah. Mat a̱ ku lyen za̱kwa á̱nietbishyi ji shansham ba̱t! 25 Da̱ mba, ba̱ byia̱ a̱yin a̱ na hyia̱ ma̱ng a̱nggu kyang tazwa a̱tyubishyi a̱ni bah. Mat, a̱ ku lyen kyang hu ku shya̱ mi̱ nfwuo mba na a̱ni.
1 A̱ghyang a̱niet ku nshya̱, á̱ si̱ ngyei gu Nikodimut. A̱ ku yet a̱kwak a̱son A̱yahudawa. A̱ si̱ bu shya̱ mi̱ sot á̱niet, ba̱ ku yet A̱fa̱risawa ba a̱ni. 2 Nggu wa ku bai da̱ a̱vwuo Yesu a̱tyetuk, a̱ si̱ ba̱ nyia̱, “A̱tyu tyiet, zi̱ lyen nang a ngyet a̱tyu tyiet wa nang A̱gwaza ta̱m ndyo a̱ni. Mat á̱ mbyia̱ a̱tyu a̱ na nyia̱ ntangka̱i a̱cha̱chet nkyang a̱ga̱de nani nang a nyia̱ a̱ni; ka̱nang A̱gwaza shya̱ dundung ma̱ng a̱nggu bah.” 3 Yesu si̱ nyia̱ ma̱ng a̱nggu, “Yok n tak ma̱ng a̱nwan a̱tsatsak a̱lyiat, ka̱ a byin ang a̱ka̱feang bah, a si̱ mi̱n di Tyok A̱gwaza hu lili bah za̱m.” 4 Nikodimut si̱ lyip Yesu nyia̱, “Ku na li ni wa á̱ mbyin a̱yin nang gu ka̱n kwop? Ka̱ doot gu bu nwuo ma̱ a̱fa a̱yang nggu ka, á̱ bu byin gu a̱ka̱feang a?” 5 Yesu si̱ nwuak gu shim nyia̱, “Yok, n tak ma̱ng a̱nwan a̱tsatsak a̱lyiat; ka̱ á̱ byin a̱yin ma̱ng a̱sa̱khwot ma̱ng A̱za̱za̱rak Ntswa bah, a̱ si̱ mi̱n nwuo Tyok A̱gwaza hu bah. 6 Kyang a̱tyubishyi byin a̱ni; ku yet a̱tyubishyi wa. Kyang á̱ byin ma̱ A̱za̱za̱rak Ntswa a̱ni; yet A̱za̱za̱rak Ntswa wa. 7 Ku yok yet ang kyang a̱ga̱de bah, nang n nyia̱ ma̱ng a̱nwan, ‘Ku yet ta hwa á̱ bu byin a̱yin a̱ka̱feang a̱ni.’ 8 Wun hu ni̱ hyap a̱ tyei da̱ a̱vwuo ka nang ku tyei a̱ni. A ni̱ fa̱k nang ku khwom wa. Da̱ nwan, a lyen a̱vwuo ka ku nneet a̱ni, ke tyan nang ku nnaat a̱ni bah. Ma a̱nia wa ku ndi ma̱ng byin A̱za̱za̱rak Ntswa hu.” 9 Nikodimut si̱ bu lyip Yesu nyia̱, “Ku na nyia̱ ni ku ndi a̱nia?” 10 Yesu si̱ nwuak gu shim nyia̱, “A̱wot nwan mameang, a yet a̱gba̱ndang a̱tyu tyiet Isi̱rela wu a̱ni; a̱wot a lyen nkyang nani baa? 11 Yok, n tak ma̱ng a̱nwan tsatsak a̱lyiat; zi̱ lyiat kyang hu nang zi̱ lyen a̱ni. Zi̱ si̱ bu shei kyang hu nang zi̱ ka̱n di a̱ni. Ma̱ng a̱nia, á̱ mbyia̱ a̱yin ma̱ nyin a̱ chat a̱ san shei kpa̱sai nzi̱t hu tazwa nkyang nani a̱ni bah. 12 “A̱wot ka̱ n shei ma̱ng a̱nyin a̱lyiat tazwa nkyang na̱ shya̱ mi̱ swanta huni a̱ni, a̱wot nyi si̱ nwuak fwuo da̱ nung bah; mi̱ nyi na nyia̱ ni wa nyin nnwuak fwuo da̱ nung ka̱ n nwuo shei ma̱ng a̱nyin a̱lyiat tazwa nkyang na̱ shya̱ Ma A̱gwaza tswazwa ka a̱ni? 13 A̱wot á̱ mbyia̱ a̱tyu a̱ ka̱n nyeak a̱ nat A̱ma A̱gwaza tswazwa a̱ni bah; mi̱ Nggwon A̱tyubishyi kya ma̱nyin ka, ku chyok a̱ neet a̱ja. 14 “Ma̱nang Musa ku nta̱ngam ghwughwu nzwak hu ku ku yet a̱kpeap ka mi̱ tswa a̱yit ji a̱ni; ma a̱nia wa nang á̱ ba̱ nta̱ngam Nggwon A̱tyubishyi ka ma̱ cha̱chaat. 15 Da̱nian konyan wa nwuak fwuo da̱ nggu a̱ni, a̱ na shya̱ swuan sang sangba̱p ji. 16 “Mat A̱gwaza ku fa̱k da̱ á̱niet mi̱ swanta ba ba̱t. Huhwa si̱ tyia̱ a̱ si̱ neap Nggwon nang gu byia̱ ma̱nyin ka a̱ni; da̱nian konyan wa nwuak fwuo da̱ nka a̱ni, a̱ na khwu bah, a̱wot a̱ na shya̱ swuan sang sangba̱p ja. 17 “A̱gwaza ku ta̱m ma̱ng nggwon nggu ka mi̱ swanta hu, da̱nian ka̱ ka yet a̱tyu nyia̱ shi̱ri̱ya wa bah. A̱ ku ta̱m ma̱ng a̱nka da̱nian ka̱ ka yet A̱tyusan á̱niet mi̱ swanta bya, ba̱ shya̱ swuan da̱ a̱vwuo nka kya. 18 Kuzang a̱yin wa nwuak fwuo di̱ nggwon A̱gwaza ka, á̱ na nyia̱ gu shi̱ri̱ya bah. A̱wot a̱tyu a̱ lak nwuak fwuo da̱ nka a̱ni, á̱ wa ka̱n faat gu shi̱ri̱ya. Mat a̱ lak nwuak fwuo da̱ Nggwon A̱gwaza ka, ma̱nyin ka. 19 “Faat shi̱ri̱ya hu na li a̱ni wa; sai A̱gwaza hu ku bai mi̱ swanta hu. A̱mgba̱m ma̱ng a̱nia, á̱niet mi̱ swanta ba ku chat lyin hu a̱ lan sai A̱gwaza hu. Mat, ba̱ nyia̱ a̱ka̱tuk nyia̱. 20 Konyan wa nyia̱ a̱ka̱tuk nyia̱ a̱ni, a̱ ni̱ lak sai huhwa. A̱wot a̱ ni̱ bai da̱ a̱vwuo sai A̱gwaza hu bah, kalak á̱ tyai a̱ka̱tuk nang gu nyia̱ a̱ni kpa̱sai. 21 A̱wot konyan wa nyia̱ a̱chuchuk nta̱m a̱ni, a̱ ni̱ bai da̱ a̱vwuo sai A̱gwaza hu. Da̱nian á̱ ka li kyang gu nyia̱ a̱ni kpa̱sai, ku nnaat ma̱ cha̱chaat mi̱ si̱sak nang A̱gwaza mbeang nggu a̱ni.” 22 Nang Yesu ntyak a̱lyiat nani a̱ni, a̱ si̱ doot mbeang mman ta̱m nggu na. Ba̱ si̱ nat di̱ fam a̱byin Yahudiya. A̱ si̱si̱ labeang dundung ma̱ng a̱mba, nang gu nyia̱ á̱niet ba̱ptisman ji a̱ja. 23 Yoona mameang, nang gu ni̱ nyia̱ ba̱ptisman ji mi̱ nnang Ainon kpa̱mkpaan ma̱ng a̱keang Sa̱lima; mat a̱sa̱khwot na ku shi a̱ja ba̱t. Á̱niet si̱ ya a̱son á̱ chong da̱ a̱vwuo nggu nang gu nyia̱ mba ba̱ptisman ji. 24 (Di̱n jen a̱ja, nang á̱ ka̱n ta̱bat Yoona, á̱ si̱ tyia̱ nggu mi̱ jaru ji bah). 25 A̱jawa á̱ghyang á̱niet mami mman ta̱m Yoona na, ba̱ si̱ nwuo ya fwuang ma̱ng a̱tyu A̱yahudawa a̱ghyang tazwa a̱lyiat kwi vam di̱n vak khwi A̱gwaza. 26 Huhwa ba̱ si̱ nat, ba̱ si̱si̱ shya̱ Yoona. Ba̱ si̱ nyia̱ ma̱ng a̱nggu a̱ni, “A̱tyu tyiet, a jhyung a̱tyu a̱ ku shya̱ dundung ma̱ng a̱nwan a̱ma̱nyi fam a̱tak a̱ghyui Urdun ka nang a ku lyiat a̱ni a? Di, nggu wa nyia̱ á̱niet ba̱ptisman di̱ yong huni! A̱wot á̱niet ma̱ a̱di̱di̱t chong da̱ a̱vwuo nggu!” 27 Huhwa Yoona si̱ ma nyia̱, “A̱yin byia̱ tyok san kyang, da̱nang á̱ nang gu neet Ma A̱gwaza tswazwa a̱ni bah. 28 Nyin ma̱ á̱pyia̱ nyin, nyi yet á̱niet ba̱ ku mun á̱ fa̱k kyang hu nang n ku ndyiat a̱ni, nang n ku nnyia̱, ‘Nung gwa ngyet Kristi wu bah. Da̱ a̱kwonu a̱kya, nung gwa nang á̱ ta̱m n khwat a̱son gu.’ 29 “A̱tyu a̱ nyia̱ nyeang fai hu a̱ni; nggu wa byia̱ a̱byii̱k wu. A̱kpa̱ndang a̱tyu byia̱ nyeang wu yong kpa̱mkpaan a̱ myiai a̱fufwuo, a̱wot a̱ ni̱ fa̱k a̱lyia̱ sai, ka̱ a̱ fa̱k a̱nwuat a̱tyu byia̱ nyeang ka. Ma a̱nia wa, nung n byia̱ a̱jhyem a̱lyia̱ sai ba̱t. 30 Nggu, ku yet ta hwa gu yong mi̱ di̱ mban. A̱wot nung mameang, shi nung hu ku ma nghyuai. 31 “Nggu a̱tyu a̱ bai a̱ neet Ma A̱gwaza tswazwa ka a̱ni, a̱ shi a̱ swak konyan. Nggu a̱tyu a̱ shya̱ a̱byin ka a̱ni, a̱ lyiat a̱lyiat nkyang na̱ shya̱ a̱byin a̱ni. Nggu a̱tyu a̱ bai a̱ neet Ma A̱gwaza tswazwa ka a̱ni, a̱ shi a̱ swak konyan. 32 “A̱ shei kyang hu kpa̱sai nang gu ka̱n di, a̱ si̱ fa̱k a̱ni. A̱mgba̱m ma̱ng a̱nia, á̱ mbyia̱ a̱tyu a̱ san a̱lyiat nggu na a̱ni bah. 33 Konyan wa san a̱lyiat nang gu tak kpa̱sai a̱ni, a̱ si̱ nwuak a̱chuchuk; a̱ tak, nang A̱gwaza ngyet a̱tyu a̱tsatsak a̱lyiat wa. 34 Mat a̱tyu nang A̱gwaza ku ta̱m a̱ni, a̱ shei a̱lyiat A̱gwaza nia, mat nang A̱gwaza nnwuak gu A̱za̱za̱rak Ntswa nggu wu ma̱ gba̱mgbam a̱mgbam a̱ni. 35 A̱tyia̱ wu fa̱k da̱ Nggwon ka ba̱t. Huhwa mbyia̱ a̱ si̱ tyia̱ kuzang kyang mbwak nka. 36 Konyan wa nwuak fwuo di̱ Nggwon A̱gwaza ka, a̱ byia̱ swuan sang sangba̱p. A̱wot konyan wa lak khwi Nggwon A̱gwaza ka, a̱ si̱ mi̱n shya̱ swuan bah. A̱wot mwai lyen A̱gwaza hu ni̱ swan tazwa gu.”
1 Nang Yesu ndyen nang A̱fa̱risawa ba nfa̱k nkhang nang gu nshyat á̱niet ba̱ khwi gu a̱ni, a̱wot a̱ si̱ nyia̱ mba ba̱ptisman ba̱ si̱ yet mman ta̱m guu, ba̱ si̱ swak mman ta̱m Yoona na ma̱ng shi á̱kpa hu. 2 (Mami a̱chuchuk, Yesu wa ma̱ a̱pyia̱ nggu ku nyia̱ ba ba̱ptisman ji bah. Mman ta̱m gu ni̱nia ku nyia̱.) 3 Jen ji Yesu ku nfa̱k kyang hu nang á̱ lyiat a̱ni, a̱ si̱ ghwon fam a̱byin Yahudiya hu, a̱ si̱ bwuok a̱ nat a̱byin Ga̱lili. 4 Nang gu nshya̱ da̱ a̱chyet ka a̱ni, ku si̱ yet gu ta hwa a̱ kai a̱ ghwut mi̱ fam a̱byin Sa̱mariya. 5 Yesu si̱ nwuo ma̱ a̱keang a̱ghyang mi̱ fam a̱byin Sa̱mariya hu, nang á̱ ngyei Sa̱ikar a̱ni. (Ka̱ shya̱ kpa̱mkpaan ma̱ng a̱byin nang Yakubu ku nwuak a̱fai nggu wu nang á̱ ku ngyei Isuu a̱ni.) 6 Ri̱jiya Yakubu hu ku shya̱ a̱ja. A̱wot nang Yesu ka̱n van ma̱ng a̱chyet, a̱ si̱ swan a̱ fwung a̱ja da̱ a̱nu ri̱jiya ka. Jen a̱ja nang mam hu shim bai di̱di̱r. 7 A̱jawa a̱nap A̱sa̱mariya a̱ghyang si̱ kin bai bwuo a̱sa̱khwot. Yesu si̱ nyia̱ ma̱ng a̱nggu a̱ni, “Nang nung a̱sa̱khwot na, n swuo.” 8 (Di̱n jen a̱ja nang mman ta̱m nggu na nat san kyayak mami a̱keang). 9 A̱jawa a̱nap wu si̱ nyia̱ ma̱ng a̱nggu a̱ni, “A yet a̱tyu A̱yahudawa, a̱wot nung n si̱ ngyet a̱nap A̱sa̱mariya. A na nyia̱ a̱ni, a naai a̱sa̱khwot swuo da̱ a̱vwuo nung?” (A̱ hyia̱ a̱nia, mat A̱yahudawa byia̱ a̱meang ma̱ng A̱sa̱mariyawa bah). 10 Yesu si̱ nwuak gu shim nyia̱, “Ka a wa lyen za̱nang A̱gwaza, a̱wot a si̱ bu lyen a̱tyu a̱ nyia̱ a nang gu a̱sa̱khwot na gu swuo a̱ni; si̱ a na lyip gu, a̱wot gu nang ang a̱sa̱khwot nswuan.” 11 A̱jawa a̱nap wu nyia̱ ma̱ng a̱nggu a̱ni, “Nwan a̱tyoli, a byia̱ kyang bwuo a̱sa̱khwot hu bah. Ri̱jiya huhwa hu ku yet a̱tsuung. Ka̱ a̱nia wa, a̱ji wa nang a na nshya̱ a̱sa̱khwot nswuan na? 12 Ke a lan a̱tyia̱ a̱khwop nzi̱t wu Yakubu; nggu wa ku lung ri̱jiya huni a̱ si̱ ghwon nzi̱t ndyo? A̱wot nggu ma̱ a̱pyia̱ nggu ma̱ng mman nggu na mbeang nkyang zwá nggu na ba̱ ku swuo a̱sa̱khwot na mi̱ ri̱jiya huni hwa. Nwan a lan gu ma̱ng shi hu a?” 13 Yesu si̱ nwuak a̱nap wu shim nyia̱, “Konyan wa swuo a̱sa̱khwot nani, mashyi bu na ta̱bat guu. 14 Da̱ a̱kwonu a̱kya, a̱sa̱khwot nang n na nang nggu a̱ni, a̱ bu si̱ mi̱n mak fa̱k mashyi bah. A̱sa̱khwot na nang n na nnang nggu a̱ni; na̱ na yet nnang a̱sa̱khwot na̱ hyai á̱ ghwut. A̱wot na̱ bu na nwuak gu swuan sang sangba̱p.” 15 A̱nap Sa̱mariya wu si̱ nyia̱ ma̱ng a̱nggu a̱ni, “A̱tyoli, ma̱sa̱kut nang nung tangka̱i a̱sa̱khwot swuo a̱hwa! Mat n chat mashyi hu bu ta̱bat nung bah. A̱wot da̱ nung, n bu na mbai tok a̱sa̱khwot mi̱ ri̱jiya huni bah.” 16 Yesu si̱ nyia̱ ma̱ng a̱nggu a̱ni, “Nat, a yorong a̱tyok ang wu, nyi bai a̱ji dundung ma̱ng a̱nggu.” 17 A̱nap wu si̱ nyia̱ ma̱ng Yesu a̱ni, “N byia̱ a̱tyok bah.” A̱jawa Yesu si̱ ma nyia̱, “A byia̱ a̱chuchuk nang a nhyia̱ nyia̱ da̱ a byia̱ a̱tyok a̱ni bah. 18 A ka̱n nyeang á̱tyok a̱fwuon. A̱wot á̱tyok nang a shya̱ ma̱ng a̱nggu ma̱ninika a̱ni; nggu wa yet a̱tsatsak a̱tyok ang wu bah. A tak nung a̱tsatsak a̱lyiat.” 19 A̱nap wu si̱ nyia̱ ma̱ng Yesu a̱ni, “A̱tyoli, n fi̱k nang a ngyet a̱ta̱m a̱kwonu A̱gwaza wa! 20 A̱wot a̱yaatyia̱ a̱khwop nzi̱t ba, ba̱ yet A̱sa̱mariyawa ba a̱ni; ba̱ ku kwok ntong da̱ a̱fan Ga̱rizim kani kya. A̱wot nyin A̱yahudawa, nyi nyia̱ Urusha̱lima hwa yet a̱vwuo ka̱ myim zi̱ nkwok ntong a̱zaghyi A̱gwaza a̱ni.” 21 A̱wot Yesu si̱ nyia̱ ma̱ng a̱nap wu a̱ni, “A̱yang a̱li, nwuak a̱chuchuk di̱ kyang nang n hyia̱ ma̱ng a̱nwan a̱ni. Jen chobai da̱nang á̱niet bye nkwok ntong a̱zaghyi A̱tyia̱ tswazwa da̱ a̱fang kani a̱ni bah. A̱wot da̱ mba ba̱ bu na kwok ntong mi̱ Urusha̱lima bah. 22 Nyin A̱sa̱mariyawa, nyi lyen a̱tyu nang nyi kwok gu ntong na a̱ni shansham bah. A̱wot nzi̱t A̱yahudawa zi̱ kwok ntong a̱zaghyi a̱tyu nang zi̱ lyen a̱ni. Mat, vak swuan sang sangba̱p hu á̱ nwuak A̱yahudawa bya. 23 “Jen chobai, ku di̱ yong huni ji̱ wa ka̱n nyia̱, nang á̱niet ba̱ kwok ntong mami a̱chuchuk na nkwok ntong a̱zaghyi A̱tyia̱ ma̱ng A̱za̱za̱rak Ntswa ma̱ng a̱chuchuk a̱ni. Bibya yet tangka̱i á̱niet ba̱ kwok ntong nang A̱tyia̱ wu chat a̱ni. 24 A̱gwaza yet A̱za̱za̱rak Ntswa wa. A̱wot á̱niet ba ba̱ na kwok gu ntong a̱zaghyi nggu a̱ni; ku yet ta hwa ba̱ kwok gu ntong mami A̱za̱za̱rak Ntswa ma̱ng a̱chuchuk.” 25 A̱nap wu si̱ nyia̱ ma̱ng Yesu a̱ni, “N dyen nang a̱ta̱m a̱kwonu A̱gwaza nang á̱ ngyei ‘Kristi’ a̱ni chobai. Ka̱ a̱ ba̱ bai, a̱ na tak ma̱ng a̱nzi̱t kuzang kyang.” 26 Yesu si̱ tak ma̱ng a̱nggu nyia̱, “Nung gwa ngyet nggu; nung, n dyiat ma̱ng a̱nwan lyiat huni a̱ni.” 27 Da̱ a̱chak a̱kya mman ta̱m Yesu na si̱ kin bwuok á̱ neet ma̱ a̱keang ka. A̱wot ba̱ si̱ fa̱k a̱ga̱de nang ba̱ nshya̱ Yesu nang gu lyiat ma̱ng a̱nap hu a̱ni! A̱mgba̱m ma̱ng a̱nia, á̱ byia̱ a̱yin ma̱ a̱mba a̱ lyip a̱nap wu, “Yihwa nang a chat a̱ji?” Ke a̱ ma ndyip Yesu, “Yihwa mbyia̱ nang a ndyiat ma̱ng a̱nap wuni?” a̱ni bah. 28 A̱jawa a̱nap A̱sa̱mariya wu si̱ kin ghwon a̱dong bwoi a̱sa̱khwot ka. A̱ si̱ bwuok a̱ nat ma̱ a̱keang ka. A̱ si̱si̱ tak ma̱ng á̱niet ba, nyia̱ 29 “Nyi bai nyi li a̱tyu a̱ tyai nung a̱mgba̱m kyang nang n ka̱n nyia̱ a̱ni! Ke nggu wa yet Kristi wu la?!” 30 Huhwa á̱niet ba si̱ ghwut ma̱ a̱keang ka. Ba̱ si̱ nat da̱ a̱vwuo Yesu. 31 A̱ shya̱ di̱ nyia̱ a̱nia, a̱jawa mman ta̱m Yesu si̱ naai nggu nyia̱, “A̱tyu tyiet, ma̱sa̱kut ya kyayak hu.” 32 Huhwa Yesu si̱ nyia̱ ma̱ng a̱mba a̱ni, “N byia̱ tangka̱i kyayak ghyang nang nyi lyen a̱ni bah.” 33 A̱jawa mman ta̱m na si̱ lyi̱ri̱m á̱ghyang mba, nyia̱, “A̱yin ka̱n bai ma̱ng a̱nggu kyayak hwa kee?” 34 Yesu si̱ nyia̱ ma̱ng a̱mba a̱ni, “Kyayak nung huhwa yet; n khwi kyang nang a̱tyu a̱ ta̱m nung chat a̱ni, a̱wot n bu nyia̱ ta̱m nang gu nwuak nung a̱ni, n tyak hu. 35 N gyei nyi ni̱ nyia̱, ‘Zwát nyaai ja bwat, á̱ sii nwuo chak yak hu’ a? Nyi gba̱t á̱ghyi nyi lii bibyin yak hu. Yak hu byang, a̱wot ku si̱ maai chak! 36 A̱tyu a̱ chak yak hu a̱ni, á̱ na tan gu zang. A̱wot a̱ na tung yak hu, a̱ shya̱ zang swuan sang sangba̱p. Da̱nian a̱tyu a̱ chyui yak hu a̱ni, ma̱ng a̱tyu a̱ chak a̱ni; ba̱ ka gwai dundung. 37 “Huhwa mbyia̱ á̱ ni̱ nyia̱, ‘A̱ghyang a̱niet chyui yak, a̱wot a̱ghyang a̱niet wa si̱ chak,’ yet a̱tsatsak a̱lyiat wa. 38 N ta̱m nyin nyi nat nyi chak yak hu nang nyi chyui a̱ni bah. Á̱ghyang á̱niet bya kwan ba̱ si̱ chyui yak hu. A̱wot ma̱ninika nyi bya na chak yak hu.” 39 A̱sa̱mariyawa ma̱ a̱di̱di̱t ma̱ a̱keang a̱kya si̱ nwuak fwuo di̱ Yesu, mat si̱sak ji nang a̱nap wu ku nhyia̱ ma̱ng a̱mba, nyia̱: “A̱ hyia̱ ma̱ng a̱nung kuzang kyang nang n ka̱n nyia̱ a̱ni.” 40 A̱wot nang A̱sa̱mariyawa ba mbai da̱ a̱vwuo Yesu a̱ni, ba̱ si̱ naai nggu gu swan ma̱ng a̱mba. A̱wot Yesu si̱ shim, a̱ si̱ bwuo mam feang ma̱ng a̱mba. 41 Á̱niet ma̱ a̱di̱di̱t ba̱ ku nwuak fwuo di̱ Yesu a̱ni, ba̱ si̱ mbeang á̱kpa ka, mat a̱sham a̱lyiat nggu ka. 42 A̱jawa ba̱ si̱ nyia̱ ma̱ng a̱nap wu a̱ni, “Nzi̱t mameang, zi̱ nwuak fwuo di̱ Yesu ma̱nini, mat kyang nang a hyia̱ wa a̱ni bah. A̱wot nzi̱t ma̱ á̱pyia̱ nzi̱t mameang, zi̱ fa̱k a̱lyiat nggu na. A̱wot zi̱ lyen za̱m nang nggu wa ngyet A̱tyusan á̱niet mi̱ swanta ba!” 43 Yesu si̱ bwuo mam feang a̱ja, a̱ si̱ doot, a̱ si̱ swak a̱ nat Ga̱lili. 44 Yesu ma̱ a̱pyia̱ nggu ka̱n hyia̱ nyia̱, “A̱ta̱m a̱kwonu A̱gwaza shyat shi ma̱ a̱keang nggu bah.” 45 A̱mgba̱m ma̱ng a̱nia, nang gu si̱ nwuo mi̱ fam a̱byin Ga̱lili hu a̱ni; á̱niet Ga̱lili ba si̱ tyia̱ nggu aba̱n. Ba̱ si̱ san gu mbwak nfeang, mat ba̱ ku nat A̱yet Ghwut mman Isi̱rela mi̱ Khwo wu mi̱ Urusha̱lima, ba̱ si̱ li kuzang kyang nang Yesu ku nyia̱ di̱n jen a̱yet ji a̱ni. 46 Yesu si̱ bu bwuok a̱ nat a̱keang Kana mi̱ fam a̱byin Ga̱lili, a̱keang ka nang gu ku mbwuak a̱sa̱khwot na, na̱ si̱ tyia̱ a̱sa̱khwot a̱na̱p na a̱ni. Á̱ ku byia̱ a̱tyu ta̱m tyok ma̱ a̱keang Ka̱fanahum. A̱ si̱ byia̱ nggwon seam nang ka̱ fa̱k nyinyang bah. 47 Nang a̱tyia̱ nggwon wu nfa̱k nyia̱ Yesu neet mi̱ fam a̱byin Yahudiya a̱ bai Ga̱lili a̱ni; a̱ si̱ nat da̱ a̱vwuo nggu. A̱ si̱si̱ naai nggu gu nat Ka̱fanahum, a̱ si̱ choot nggu nggwon ka nang zwan ji nyia̱ nang ka̱ chak a̱ kwi a̱ni. 48 Yesu si̱ nyia̱ ma̱ng a̱nggu a̱ni, “Ka̱ nyi li kyang a̱ri̱bi̱di ma̱ng a̱ga̱de bah, nyi si̱ mi̱n nwuak fwuo da̱ nung bah.” 49 A̱tyu nta̱m tyok wu si̱ nyia̱, “A̱tyoli, ma̱sa̱kut khwi nung a̱nggang, a bai; kalak nggwon nung ka na khwu!” 50 Yesu si̱ nyia̱ ma̱ng a̱nggu a̱ni, “Bwuok nat nkyang ang. Nggwon ang ka na swuan!” A̱tyu nta̱m tyok wu si̱ nwuak a̱chuchuk di̱ kyang nang Yesu hyia̱ a̱ni. A̱ si̱ bwuok a̱ nkat. 51 A̱ shya̱ di̱ chyet a̱ naat a̱mali, mman ta̱m nggu na si̱ kan bai san guu. Ba̱ si̱ nyia̱ ma̱ng a̱nggu a̱ni, “Nggwon ang ka shyip, ka̱ shya̱ a̱chet!” 52 A̱tyu nta̱m tyok wu si̱ lyip ba jen ji nang nggwon ka ku nchoot a̱ni. Ba̱ si̱ nyia̱ ma̱ng a̱nggu, “Lyuo hwa nang nggwon ka ku nchoot, nang mam hu ka̱n hyian; zwan ji si̱ kin ghwon kaa!” 53 A̱tyia̱ nggwon wu si̱ kin jhyung nang a̱cha̱chaat jen a̱wa wa nang Yesu ku nyia̱ ma̱ng a̱nggu, “Nggwon ang ka na swuan!” Huhwa nggu ma̱ng a̱mgba̱m kyang mbwak nggu hu, ba̱ si̱ nwuak fwuo di̱ Yesu. 54 Si̱ huni hwa yet kyang a̱ga̱de feang hu nang Yesu ku nyia̱ nang gu ku mbwuok a̱ neet Yahudiya a̱ si̱ bai Ga̱lili a̱ni.
1 Nang si̱ a̱hwa nswak a̱ni, Yesu si̱ nat Urusha̱lima a̱tuk A̱yet A̱yahudawa a̱ghyang. 2 A̱ja mi̱ Urusha̱lima hu, kpa̱mkpaan ma̱ng a̱zanunwuai ka nang á̱ ngyei “A̱zanunwuai Zón Seap” a̱ni. Á̱ ku byia̱ jok a̱sa̱khwot, á̱ si̱ ngyei ji “Ba̱ta̱si̱da” da̱ a̱lyem Ibriniyawa. A̱wot á̱ si̱ bu tyong ji á̱ kaat ma̱ng ndidyaat nfwuon. 3 Mami ndidyaat a̱nia nia nang á̱niet nzwán ma̱ a̱di̱di̱t ni̱ mmyian a̱ni; á̱ si̱ byia̱ á̱niet a̱fi̱fan, á̱niet kwang a̱byin, ma̱ng á̱niet ta̱luk nkap ba. 5 A̱tyok a̱ghyang ku shya̱ a̱ja nang gu nyia̱ ma̱ng zwan a̱lyia̱ nswak ntat ma̱ a̱ni̱nai. 6 Nang Yesu ndi gu nang gu myian a̱ja a̱ni, Yesu si̱ lyen nang nggu ka̱n dabeang ma̱ng zwan ji. A̱jawa Yesu nyia̱ ma̱ng a̱nggu a̱ni, “A chat á̱ choot ang a?” 7 A̱tyu nzwan wu si̱ nwuak Yesu shim nyia̱, “A̱tyoli, n byia̱ a̱tyu a̱ na tyia̱ nung ma̱ a̱sa̱khwot na di̱n jen nang á̱ ni̱ nkyiai na a̱ni bah. Ka̱ n doot na nwuo ma̱ a̱sa̱khwot na, a̱ghyang a̱niet ni̱ shya̱ a̱son nung di̱ nwuo hu!” 8 Yesu si̱ nyia̱ ma̱ng a̱nggu a̱ni, “Doot, yong! A kyiak a̱kpang ang wu, a nkat.” 9 Mi̱ di̱ yong a̱hwa, a̱tyu nzwan wu si̱ kin choot! A̱ si̱ kyiak a̱kpang nggu wu, a̱ si̱ nkat. A̱wot a̱tuk a̱kya ku yet Mam Fwung A̱yahudawa hwa. 10 Huhwa ku mbyia̱ a̱cha̱chet A̱yahudawa ba, si̱ nyia̱ ma̱ng a̱tyu nzwan wu nang á̱ choot a̱ni, “Mam huni yet a̱tuk Mam Fwung kya; hu myim di̱ khwi doka nzi̱t ji a kyiak a̱kpang ang wu a̱fwun bah!” 11 A̱tyu nang á̱ choot a̱ni, a̱ si̱ nwuak ba shim nyia̱, “A̱tyu a̱ choot nung a̱ni; nggu wa ba̱ nyia̱ ma̱ng a̱nung, ‘Kyiak a̱kpang ang wu a nkat!’ ” 12 A̱yahudawa ba si̱ lyip a̱tyu nang á̱ choot a̱ni nyia̱, “Nggu a̱tyu wuni wa yet a̱nyan, gu nyia̱ ma̱ng a̱nwan a kyiak a̱kpang ang wu a nkat a̱ni?” 13 Nggu a̱tyu nang á̱ ku choot a̱ni, a̱ ku lyen a̱tyu a̱ choot gu a̱ni bah; mat nang Yesu wa ka̱n tyia̱ ghyuai a̱ doot a̱ja mat á̱kpa á̱niet ka. 14 Á̱ si̱ labeang bah, Yesu si̱ myim ma̱ng a̱tyu nang gu ku choot mami didyaat A̱li Nwuat Za̱nang A̱gwaza hu. A̱ si̱ nyia̱ ma̱ng a̱nggu a̱ni, “Di, a choot ma̱ninika! Mat a̱nia, ghwon a̱ka̱tuk nyia̱ ang wu. Kalak a̱bombwuon kyang a̱ swak zwan jini ma̱ng shi a̱ni, na shya̱ ang!” 15 A̱jawa a̱tyu nang á̱ choot a̱ni, si̱ kan doot, a̱ si̱ hyia̱ ma̱ng a̱cha̱chet a̱yaakwak a̱son A̱yahudawa ba nang Yesu wa nchoot guu. 16 Huhwa si̱ mbyia̱ A̱yahudawa ba si̱ ka̱n ta̱bat nyia̱ Yesu a̱ka̱kpa̱t, mat nang a̱ nchoot a̱tyu nzwan a̱tuk Mam Fwung. 17 A̱wot Yesu si̱ nyia̱, “A̱tyia̱ nung nyia̱ nta̱m kuzang jen. A̱wot nung mameang, ku yet ta hwa n nyia̱ ta̱m.” 18 Mat kyang nang gu hyia̱ hyia̱ huni a̱ni, A̱yahudawa ba, si̱ mbeang chat vak nang ba̱ na nhyat gu a̱ni; nyia̱ da̱ziya nang gu mbyian mba a̱tuk Mam Fwung, a̱wot a̱ si̱ bu nyia̱ A̱gwaza wa yet A̱tyia̱ nggu, nyia̱ a̱ kyiak a̱pyia̱ nggu cha̱chaat ma̱ng A̱gwaza. 19 A̱jawa Yesu si̱ wa̱i a̱lyiat nyia̱, “N na hyia̱ ma̱ng a̱nyin a̱chuchuk; Nggwon A̱gwaza ka nyian kuzang kyang ma̱nyin ka bah; a̱ ni̱ nyia̱ kuzang nkyang nang gu li nang A̱tyia̱ wu nyia̱ wa a̱ni. Mat kuzang kyang nang A̱tyia̱ wu nyia̱ a̱ni; huhwa nang Nggwon ka nyia̱ mameang. 20 Mat A̱tyia̱ wu fa̱k di̱ nggwon ka ba̱t. Huhwa mbyia̱ gu si̱ nshei ma̱ng Nggwon ka a̱mgba̱m nkyang nang gu nyia̱ a̱ni. A̱tyia̱ wu na hyia̱ ma̱ng Nggwon ka a̱cha̱chet nkyang na̱ lan á̱si̱ nani a̱ni, ka̱ nyia̱. A̱wot nyi na fa̱k a̱ga̱de. 21 “Ma̱nang A̱tyia̱ wu ni̱ nta̱ngam á̱niet ba̱ ka̱n kwi, a̱wot a̱ bu nwuat ba swuan a̱ni; ma a̱nia wa nang Nggwon ka nnwuat swuan da̱ a̱tyu nang ka̱ shim nwuak a̱ni. 22 A̱tyia̱ wu ma̱ a̱pyia̱ nggu na nyia̱ a̱yin shi̱ri̱ya bah. A̱ wa ka̱n nwuak Nggwon nggu ka tyok ka̱ nyia̱ konyan shi̱ri̱ya. 23 Da̱nian a̱mgba̱m á̱niet ba ba̱ ka nwuak Nggwon ka shi, ma̱ cha̱chaat nang ba̱ nnwuat A̱tyia̱ wu a̱ ta̱m ma̱ng a̱nka a̱ni. 24 “N tak nyin a̱tsatsak a̱lyiat; kuzang a̱yin wa fwuong a̱lyiat nung na, a̱wot a̱ si̱ nwuak fwuo da̱ a̱tyu a̱ ta̱m nung a̱ni; a̱ byia̱ swuan sang sangba̱p. Á̱ na nyia̱ gu shi̱ri̱ya bah. A̱wot a̱ wa ka̱n shot a̱khwu, a̱ si̱ shya̱ swuan. 25 “N tak nyin a̱tsatsak a̱lyiat; jen na bai, a̱wot ma̱ninika ji̱ wa ka̱n nyia̱, nang á̱niet ba̱ ka̱n kwi a̱ni na nfa̱k a̱nwuat Nggwon A̱gwaza. A̱wot á̱niet ba̱ fa̱k a̱ni, ba̱ na shya̱ swuan. 26 Ma̱nang A̱tyia̱ wu ma̱ a̱pyia̱ nggu ngyet a̱tyin swuan a̱ni; ma a̱nia wa nang nggu nwuak Nggwon nggu ka, ka̱ nwuat swuan ji ma̱ cha̱chaat. 27 Ma a̱nia wa, a̱tyia̱ wu si̱ bu nwuak Nggwon ka tyok ka̱ nyia̱ shi̱ri̱ya, mat ka̱ yet Nggwon A̱tyubishyi kya. 28 “Nyi yok ghwon si̱ huni ku tyia̱ nyi fa̱k a̱ga̱de bah! Jen chobai nang a̱mgba̱m á̱niet ba̱ ka̱n kwi, a̱wot ba̱ shya̱ ma̱ a̱ka̱bi a̱ni; ba̱ bye fa̱k a̱nwuat Nggwon A̱gwaza ka. 29 A̱wot ba̱ na ghwut ma̱ a̱ka̱bi na. Á̱niet ba ba̱ ku nyia̱ a̱tan kyang nang ba̱ shya̱ a̱chet a̱ni, ba̱ na doot ba̱ shya̱ swuan. A̱wot á̱niet ba ba̱ ku nyia̱ a̱ka̱tuk nang ba̱ shya̱ a̱chet a̱ni, ba̱ na doot a̱ faat mba shi̱ri̱ya a̱khwu. 30 N si̱ mi̱n nyia̱ kyang ma̱nyin nung bah. N nyia̱ shi̱ri̱ya di̱ si̱sak nang A̱gwaza ntak ma̱ng a̱nung a̱ni. Huhwa mbyia̱, nyia̱ shi̱ri̱ya nung hu naat cha̱chaat. Mat, n kwan n nyia̱ kyang hu nang n chat wa a̱ni bah. Kyang hu nang a̱tyu a̱ ta̱m nung chat a̱ni; huhwa n nyia̱. 31 “Ki̱ n tak kyang kpa̱sai tazwa a̱pyia̱ nung, kyang hu nang n tak kpa̱sai a̱ni, á̱ si̱ mi̱n san hu nang a̱tsatsak a̱lyiat wa a̱ni bah. 32 A̱wot, a̱tyu a̱ shei kpa̱sai a̱lyiat a̱kwonu nung a̱ni, nshya̱. A̱wot n dyen kyang nang gu tak kpa̱sai tazwa nung a̱ni, a̱tsatsak a̱lyiat wa za̱m. 33 “Nyi ku ta̱m a̱yaata̱m da̱ a̱vwuo Yoona. A̱wot a̱ si̱ tak nyin kpa̱sai tazwa nung mami a̱chuchuk. 34 A̱mgba̱m ma̱ng a̱nia, n chat n ba̱ng fwuo di̱ kyang nang a̱tyubishyi tak kpa̱sai tazwa nung a̱ni bah. N tak a̱nia da̱nian nyi ka shya̱ swuan ja. 35 Yoona ku li nang long fi̱tila hu sai a̱vwuo a̱ni. A̱wot nyi si̱ khai da̱ a̱banjen ma̱ a̱da̱dei, nyi ka gwai mami sai nggu hu. 36 “A̱mgba̱m ma̱ng a̱nia, n byia̱ nkyang na̱ shei a̱chuchuk wu kpa̱sai tazwa nung, na̱ lan si̱ Yoona hu ma̱ng shi a̱ni. Huhwa yet nta̱m na nang n nyia̱ a̱ni; nta̱m na nang A̱tyia̱ nung wu ku nwuak nung n nyia̱ a̱ni. Nta̱m ni̱nia lyiat da̱ a̱kwonu nung. A̱wot na̱ si̱ tak nyin nang A̱tyia̱ nung wu wa ku nta̱m nung. 37 “A̱wot A̱tyia̱ ma̱ a̱pyia̱ nggu a̱ ta̱m nung a̱ni; nggu wa shei kpa̱sai kyang gu lyen tazwa nung a̱ni. Nyin, nyi ka̱n fa̱k a̱nwuat nggu ka bah. Da̱ nyin, nyi ka̱n di a̱ghyi nggu ba bah. 38 A̱wot a̱lyiat nggu na, nyi san naa, nyi si̱ sak mi̱ nfwuo nyin na bah. Mat nyi nwuak fwuo da̱ a̱tyu nang gu ta̱m ndyo a̱ni bah. 39 “Nyi zop A̱lyiat A̱gwaza na, mat nyi fa nyi na shya̱ swuan sang sangba̱p ja. A̱wot A̱lyiat A̱gwaza na; ni̱nia tyai nyin a̱tyu nang ngyet a̱ni! 40 A̱mgba̱m ma̱ng a̱nia, nyi lak bai da̱ a̱vwuo nung, nyi ka shya̱ swuan ji. 41 “N chat á̱niet bya ba̱ chyin nung bah. 42 A̱mgba̱m ma̱ng a̱nia, n dyen nang nyi nfa̱k da̱ A̱gwaza mi̱ fwuo nyin na bah. 43 Nung, n bai da̱ a̱lyoot A̱tyia̱ nung kya. Da̱ nyin, nyi san nung bah. A̱wot ka̱ a̱ghyang a̱niet bai da̱ a̱lyoot a̱pyia̱ nggu, nyi na san gu mbwak nfeang. 44 “Nyi na nyia̱ ni wa nyi nwuak a̱chuchuk, ka̱nang nyi chat dyep da̱ a̱vwuo á̱ghyang nyin; a̱wot da̱ nyin nyi chat chyin ku neet da̱ a̱vwuo A̱gwaza ma̱nyin nggu a̱ni bah? 45 “Nyi yok nyia̱ a̱di̱dam nyia̱ n na mbat nyin a̱hyiak da̱ a̱vwuo A̱tyia̱ nung ka bah. A̱tyu a̱ na bat nyin a̱hyiak na a̱ni; nggu wa yet Musa. Nggu wa nang nyi mba̱ng fwuo hu. 46 Ka̱ nyi wa nwuak a̱chuchuk di̱ Musa za̱m, si̱ nyi nwuak a̱chuchuk da̱ nung. Mat Musa ku lyuut nkhang nung nia! 47 A̱wot ka̱ nyi nwuak a̱chuchuk di̱ kyang nang Musa ku lyuut a̱ni bah; nyi na nyia̱ ni wa nyi nwuak a̱chuchuk da̱ lyiat nung na?”
1 Nang Yesu ntyak nkyang nani a̱ni, a̱ si̱ bwuok a̱ nat. A̱ si̱si̱ byia̱k a̱ nat a̱ma̱nyi a̱gba̱ndang jok Ga̱lili (nang á̱ bu ngyei “Jok Tiba̱riyat ji” a̱ni.) 2 Á̱kpa á̱niet si̱ khwi nggu, mat ba̱ ku li a̱cha̱chet nkyang a̱ga̱de nang gu ku nyia̱ di̱ choot á̱niet nzwán ba a̱ni. 3 Yesu si̱ nyeak a̱ nat tazwa a̱fan, a̱ si̱si̱ swan a̱ja dundung ma̱ng mman ta̱m nggu na. 4 A̱wot nang A̱yet Ghwut Mman Isi̱rela mi̱ Khwo wu mbai kpa̱mkpaan a̱ni, 5 Yesu si̱ nwuan a̱ kaat, a̱di̱dam si̱ bai nggu. A̱ si̱ li nang a̱gba̱ndang á̱kpa á̱niet chobai da̱ a̱vwuo nggu. A̱jawa gu nyia̱ ma̱ng Filibut a̱ni, “A̱ji wa zi̱ na nsan kyayak ku maai zi̱ nnwuak á̱niet bani?” 6 Yesu ku lyip a̱lyiat nani a̱ ku chat a̱ ka mak Filibut wa. Mat nggu ma̱ a̱pyia̱ nggu, a̱ ku mi̱ ndyen kyang hu nang gu na nyia̱ a̱ni. 7 Filibut si̱ nwuak gu shim hu nyia̱, “Ka̱ konyan ma̱ mba na shya̱ burodi ma̱ chunchwiit, zi̱ na hyat kurum ku swak kurum ta̱m zwát a̱taa a̱ni!” 8 A̱jawa a̱tyo nyiung mami mman ta̱m Yesu na nang á̱ ku ngyei Anda̱rawut a̱ni, a̱na̱nyiuk Siman Bitut, si̱ nyia̱, 9 “Di, banggwon seam kya a̱ji, ka̱ byia̱ burodi a̱fwuon ma̱ng fa̱n feang! Ku na nyia̱ ni ku maai a̱di̱di̱t á̱niet wuni?” 10 Yesu si̱ nyia̱ ma̱ng mman ta̱m nggu na a̱ni, “Nyi tyia̱ á̱niet ba ba̱ swan a̱byin.” A̱vwuo ka ku byia̱ á̱kwop ba̱t. A̱jawa a̱mgba̱m á̱niet ba si̱ swan a̱byin. (Á̱tyok ma̱nyin mba si̱ yet chyikwop tsuon.) 11 Yesu si̱ kyiak burodi a̱ si̱ gwai A̱gwaza, a̱ si̱ ka̱u á̱niet ba ba̱ swan a̱ja a̱ni. Ma a̱nia wa gu si̱ nyia̱ ma̱ng fa̱n hu. A̱wot konyan si̱ ya, ku si̱ maai guu nang gu nchat a̱ni. 12 Nang á̱niet ba ngya nkyayak na ba̱ si̱ swa̱i a̱ni, a̱jawa Yesu si̱ nyia̱ ma̱ng mman nta̱m nggu na a̱ni, “Nyi tung á̱kum kyayak na̱ bwat a̱ni, kalak na̱ byian.” 13 A̱jawa ba̱ si̱ tung á̱kukum burodi ba nang á̱niet ba ya, ba̱ si̱ bwat mi̱ burodi a̱fwuon wu a̱ni. Ba̱ si̱ hyaai a̱ka̱cheang swak ma̱ a̱feang. 14 Nang á̱niet ba a̱ja ndi a̱gba̱ndang kyang a̱ga̱de nang Yesu nyia̱ a̱ni, ba̱ si̱ nyia̱, “A̱tsak a̱lyiat wa za̱m; a̱tyu wuni yet A̱ta̱m a̱kwonu A̱gwaza wa a̱ na bai mi̱ swanta hu a̱ni!” 15 Nang Yesu ndyen nang ba̱ nchobai ba̱ ta̱bat guu, ba̱ ka kup gu tyok mi̱ chet; huhwa si̱ mbyia̱ a̱ si̱ tyia̱ ghyuai a̱ ghwut. A̱ si̱ nkat tazwa tsutsok ka nggu ma̱nyin nggu. 16 Nang jenshyung nnyia̱ a̱ni, a̱jawa mman ta̱m Yesu na si̱ doot, ba̱ si̱ kpa̱k á̱ chyok á̱ nat a̱tak a̱gba̱ndang jok ka. 17 Ba̱ si̱ nwuo kukwon a̱wak. Ba̱ si̱ bwuok lilyim á̱ byei a̱sa̱khwot na á̱ naat Ka̱fanahum. Di̱n jen a̱ja nang a̱vwuo ka si̱ ntyei lyin nang Yesu ka̱n bwuok a̱ bai ma̱ng a̱mba bah. 18 A̱jawa a̱ka̱tuk ngwun si̱ kin nwuo hyap. A̱sa̱khwot na si̱ ta̱bat chi̱p, mat wun hu ku hyap a̱ni. 19 Nang mman ta̱m Yesu na ka̱n duk kukwon a̱wak hu a̱ nyia̱ a̱ka̱tyong a̱tat si̱ nat a̱naai; ba̱ si̱ kin ndi Yesu gu chong tazwa a̱sa̱khwot ka, a̱ chobai kpa̱mkpaan ma̱ng kukwon a̱wak mba hu! A̱wun si̱ ta̱bat baa, ba̱ si̱ ya̱dyuut! 20 A̱jawa Yesu si̱ nyia̱ ma̱ng a̱mba a̱ni, “Nyi yok fa̱k a̱wun bah; nung gwa!” 21 Ba̱ si̱ shim, ba̱ si̱ kyiak gu mi̱ kukwon a̱wak hu. Mi̱ di̱ yong a̱hwa kukwon a̱wak hu si̱ kin tat khwong a̱sa̱khwot hu a̱ma̱nyi ka nang ba̱ nnaat a̱ni! 22 Da̱ a̱tsotson tat ka, á̱kpa á̱niet ka ba̱ ku shya̱ da̱ ma̱nyii a̱gba̱ndang jok ka a̱ni, ku nwuan ba̱ si̱ li nang kukwon a̱wak nyiung hwa bwat a̱ja. Ba̱ si̱ lyen nang Yesu nnwuo kukwon a̱wak hu dundung ma̱ng mman ta̱m nggu na bah; nang mman ta̱m nggu na ka̱n nkat ma̱nyin mba. 23 A̱wot a̱kukwon a̱wak á̱ghyang sii du neet Tiba̱riyat, ba̱ si̱ ba̱ yong kpa̱mkpaan ma̱ng a̱vwuo ka nang Yesu ku ngwai A̱gwaza di̱ burodi nang á̱kpa á̱niet ka ku ya a̱ni. 24 Nang á̱kpa á̱niet ka ndi nang Yesu ma̱ng mman ta̱m nggu na nshya̱ a̱ja a̱ni bah; ba̱ si̱ nwuo bachyuang kukwon a̱wak na. Ba̱ si̱ byia̱k á̱ nat chat gu ma̱ a̱keang Ka̱fanahum. 25 Nang á̱kpa á̱niet ka ku nshya̱ Yesu da̱ ma̱nyii a̱gba̱ndang jok a̱nyiung ka a̱ni, huhwa ba̱ nyia̱ ma̱ng a̱nggu, “A̱tyu tyiet, zang jen ja nang a bai a̱ji?” 26 Yesu si̱ nwuak mba shim nyia̱, “N na ntak nyin a̱tsatsak a̱lyiat; nyi chat nung, mat nyi ku ya burodi wu nyi si̱ swa̱i; da̱ nyia̱ nyi fi̱k nkyang a̱ga̱de nang n nyia̱ wa a̱ni bah. 27 “Nyi yok veang chat nkyayak na̱ na byian a̱ni bah. Da̱ a̱kwonu a̱kya, nyi nyia̱ ta̱m da̱nian kyayak hu na nwai byian a̱ni; ma̱ng si̱ hu ku na nwuak nyin swuan sang sangba̱p ji a̱ni. Huhwa yet kyayak nang Nggwon A̱tyubishyi ka na nwuak nyin a̱ni. Mat Nggwon A̱tyubishyi kya nang A̱tyia̱ wu ka̱n shim nka ndyo.” 28 A̱jawa á̱kpa á̱niet ka si̱ nyia̱ ma̱ng Yesu a̱ni, “Yihwa zi̱ na nyia̱, zi̱ nnyia̱ ntangka̱i nta̱m nang A̱gwaza wu chat a̱ni?” 29 Yesu si̱ nwuak mba shim nyia̱, “Ta̱m huni hwa nang A̱gwaza chat nyi nyia̱; nyi nwuak fwuo da̱ a̱tyu nang gu ta̱m ndyo a̱ni.” 30 A̱jawa á̱niet ba si̱ nyia̱ ma̱ng Yesu a̱ni, “Zang tangka̱i kyang a̱ga̱de hwa ku yet a̱lama nang a na nyia̱ nzi̱t ndyo zi̱ li, zi̱ ka nnwuak fwuo da̱ nwan? Yihwa a na nyia̱? 31 A̱yaatyia̱ a̱khwop nzi̱t ba ku ya kyayak nang á̱ ngyei ‘mana’ a̱ni, mi̱ tswa a̱yit; ma̱nang á̱ ku ndyuut a̱ni, ‘A̱gwaza ku nwuak ba kyayak neet tswazwa, ba̱ si̱ ya.’ ” 32 A̱jawa Yesu si̱ nyia̱ ma̱ng a̱mba a̱ni, “A̱tsatsak a̱lyiat wa za̱m, n na hyia̱ ma̱ng a̱nyin, Musa wa ku nwuak nyin kyayak hu, ku neet Ma A̱gwaza tswazwa ka a̱ni bah. A̱tyia̱ nung wu wa ma̱ a̱pyia̱ nggu; nggu wa nwuat nyin a̱tsatsak kyayak a̱ neet tswazwa ka a̱ni. 33 Mat kyayak A̱gwaza hu ku neet tswazwa kya a̱ni; huhwa nwuat á̱niet mi̱ swanta ba swuan ji.” 34 A̱jawa á̱niet ba si̱ nyia̱ ma̱ng Yesu a̱ni, “A̱tyoli, nwuat zi̱t tangka̱i kyayak huni nchi̱ri̱ng!” 35 Yesu si̱ nyia̱ ma̱ng a̱mba a̱ni, “Nung gwa ngyet kyayak nwuat swuan a̱hwa. A̱tyu a̱ bai da̱ a̱vwuo nung a̱ni, a̱ bu na mak fa̱k zong bah. A̱tyu a̱ nwuak fwuo da̱ nung a̱ni, a̱ bu si̱ mi̱n fa̱k mashyi bah. 36 “A̱wot ma̱nang n ka̱n hyia̱ ma̱ng a̱nyin a̱ni; nyi li nung, a̱mgba̱m ma̱ng a̱nia, da̱ nyin nyi nwuak fwuo da̱ nung bah. 37 “A̱mgba̱m á̱niet ba nang A̱tyia̱ nung wu nwuak nung a̱ni, ba̱ na bai da̱ a̱vwuo nung. A̱wot a̱tyu a̱ bai da̱ a̱vwuo nung a̱ni, n si̱ mi̱n dak gu bah, ku ma̱ chunchwiit! 38 N chyok neet Ma A̱gwaza tswazwa, n ka nyia̱ ta̱m a̱pyia̱ nung hwa bah. Ta̱m a̱tyu a̱ ta̱m nung wa a̱ni; huhwa nang n nyia̱. 39 “Ta̱m A̱tyu a̱ ta̱m nung a̱ni, huhwa yet; ki̱ di̱ a̱tyo nyiung gu di̱ bwuk mami á̱niet nang gu nwuak nung a̱ni. A̱wot n ba̱ nta̱ngam mba ma̱ng swuan ma̱ á̱niet ba̱ ka̱n kwi a̱ni a̱tuk mam doot swanta ka. 40 “Mat ta̱m hu nang A̱tyia̱ nung wu chat a̱ni, huhwa yet; konyan wa li Nggwon nggu ka, a̱ si̱ nwuak fwuo da̱ nka a̱ni, a̱ na shya̱ ma̱ng swuan sang sangba̱p. Nung meang, n ma nta̱ngam nggu ma̱ng swuan ma̱ á̱niet ba̱ ka̱n kwi a̱ni a̱tuk mam doot swanta ka.” 41 Huhwa a̱cha̱chet A̱yahudawa ba si̱ ta̱bat ya fwuang ma̱ng Yesu, mat nang gu nnyia̱, “Nung gwa ngyet kyayak hu neet Ma A̱gwaza tswazwa ka a̱ni.” 42 Ba̱ si̱ nyia̱, “A̱tyu wuni wa yet Yesu a̱ yet nggwon Isuu ka a̱ni baa? Zi̱ lyen a̱tyia̱ nggu wu ma̱ng a̱yang byin nggu wu. Ka̱ a̱nia wa, yihwa mbyia̱ nang gu nyia̱ a̱ chyok a̱ neet Ma A̱gwaza tswazwa kya?” 43 Yesu si̱ nwuak ba shim nyia̱, “Nyi yok ya fwuang tsi̱tsak nyin bah. 44 Á̱ mbyia̱ a̱tyu a̱ si̱ mi̱n bai da̱ a̱vwuo nung, ka̱nang A̱tyia̱ nung wu a̱ ta̱m nung a̱ni, khwat gu a̱ bai ndyo bah. A̱wot nung mameang, n na nta̱ngam gu ma̱ng swuan ma̱ á̱niet ba̱ ka̱n kwi a̱ni a̱tuk mam doot swanta ka. 45 “A̱ta̱m a̱kwonu A̱gwaza ma̱ a̱di̱di̱t ku lyuut nyia̱, ‘A̱mgba̱m á̱niet ba, A̱gwaza wa na tyiet mbaa.’ Konyan wa fa̱k, a̱wot a̱ si̱ myiam da̱ a̱vwuo A̱tyia̱ nung ka; a̱tyu a̱wa na bai da̱ a̱vwuo nung. 46 (N fa á̱ mbyia̱ a̱yin a̱ ka̱n di A̱tyia̱ wu a̱ni bah; ma̱ nggu wa a̱tyu a̱ neet da̱ a̱vwuo A̱gwaza ka a̱ni. Nggu wa ma̱nyin gu ka̱n di A̱tyia̱ wu). 47 “A̱chuchuk wa za̱m n chat n tak ma̱ng nyin; a̱tyu a̱ nwuak fwuo da̱ nung a̱ni, a̱ byia̱ swuan sang sangba̱p. 48 A̱tsak a̱lyiat, nung gwa ngyet kyayak ku nwuat swuan a̱ni. 49 A̱yaatyia̱ a̱khwop nyin ba ku ya ‘mana’ mi̱ ntswa a̱yit. A̱mgba̱m ma̱ng a̱nia, ba̱ si̱ kwi. 50 “A̱wot kyayak ku chyok a̱ neet Ma A̱gwaza tswazwa a̱ni; konyan wa ya kyayak a̱hwa, a̱ na khwu bah. 51 Nung gwa ngyet kyayak swuan ku chyok neet Ma A̱gwaza tswazwa ka a̱ni. Konyan wa ya kyayak a̱hwa a̱ na shya̱ swuan sang sangba̱p. Kyayak a̱hwa nang n na nwuak a̱nyuu a̱ni; ku na yet nam vam nung hu hwa, nang n na neap da̱nian a̱mgba̱m á̱niet mi̱ swanta ba, ba̱ ka shya̱ swuan ji.” 52 A̱lyiat nani ku tyia̱ A̱yahudawa ma̱ a̱di̱di̱t si̱ fa̱k a̱lyia̱ ya. Ba̱ si̱ ta̱bat ya fwuang ma̱ng á̱ghyang mba nyia̱, “A̱tyu wuni na nyia̱ ni wa, a̱ nnwuak nzi̱t nam vam gu hu, zi̱ ya?” 53 Yesu si̱ nyia̱ ma̱ng a̱mba a̱ni, “A̱chuchuk wa n na tak nyin; ka̱ nyi ya nam vam Nggwon A̱tyubishyi, a̱wot nyi si̱ swuo a̱sok nka na bah, nyi si̱ mi̱n shya̱ swuan ji bah. 54 Konyan wa ya nam vam nung hu, a̱wot a̱ si̱ swuo a̱sok nung na; a̱ na shya̱ swuan sang sangba̱p. A̱wot n na ta̱ngam gu ma̱ng swuan ma̱ á̱niet ba̱ ka̱n kwi a̱ni a̱tuk doot mam swanta ka. 55 “Nam vam nung hu yet a̱tsatsak kyayak wa. A̱sok nung na mameang, si̱ yet a̱tsatsak kyang swuo wa. 56 Konyan wa ya nam vam nung hu, a̱ si̱ swuo a̱sok nung na; a̱tyu a̱wa swan dundung ma̱ng a̱nung. A̱wot nung mameang, n shya̱ dundung ma̱ng a̱nggu. 57 Ma̱nang A̱tyia̱ wu a̱ yet a̱tyu nswuan wu nta̱m nung a̱ni; ma a̱nia wa nang n swuan da̱nian A̱tyia̱ wu. A̱wot ma a̱nia wa, konyan wa kyiak nung nang kyayak gu a̱ni, a̱ na swuan da̱nian nung. 58 “Nung gwa ngyet a̱tsatsak kyayak wu a̱ chyok a̱ neet Ma A̱gwaza tswazwa ka a̱ni. Ku vwuon ma̱ng kyayak hu nang a̱yaatyia̱ a̱khwop nyin ba ku ya mi̱ tswa a̱yit ji. A̱wot a̱mgba̱m ma̱ng ya kyayak a̱hwa, ba̱ si̱ kwi. A̱tyu a̱ ya kyayak nung hu a̱ni, a̱ na shya̱ swuan sang sangba̱p.” 59 Yesu ku lyiat á̱lyiat nani di̱n jen nang gu ku ntyiet á̱niet ba mi̱ tutu a̱tung A̱yahudawa hu ma̱ a̱keang Ka̱fanahum a̱ni. 60 Nang mman nta̱m Yesu ma̱ a̱di̱di̱t nfa̱k tyiet gu hu a̱ni, ba̱ si̱ nyia̱, “Tyiet ang hu vwuo a̱khwu ba̱t! A̱nyan wa na san huu?” 61 Ma̱nang Yesu ndyen nang mman ta̱m nggu na ngya fwuang mi̱ nfwuo mba na tazwa tyiet gu hu a̱ni. Huhwa gu nyia̱ ma̱ng a̱mba, “A̱lyiat nani byian nyin nfwuo a? 62 Ka̱ a̱nia wa, yihwa nang nyi na dam ka̱ nyi li Nggwon A̱tyubishyi ka̱ bwuot a̱ naat a̱ nyeak da̱ a̱vwuo ka ka̱ ku nshya̱ gbangbang a̱ni? 63 A̱za̱za̱rak Ntswa wa nwuat swuan ji. Chet vam a̱tyubishyi yet kyang bah. Swáng A̱lyiat nang n dyiat ma̱ng a̱nyin a̱ni, ji ja neet da̱ a̱vwuo A̱za̱za̱rak Ntswa ka. A̱wot ji̱ si̱ nwuat swuan. 64 “A̱mgba̱m ma̱ng a̱nia, á̱ghyang ma̱ nyin nwuak a̱chuchuk bah.” Mat Yesu ku mi̱ ndyen á̱niet ba̱ na lak nwuak a̱chuchuk wu a̱ni, ma̱ng a̱tyu a̱ na yet gu a̱bang a̱byin wu a̱ni. 65 A̱jawa Yesu si̱ bu nyia̱ ma̱ng a̱mba a̱ni, “Huhwa mbyia̱ nang n hyia̱ ma̱ng a̱nyin; á̱ mbyia̱ a̱tyu a̱ na bai da̱ a̱vwuo nung a̱ni bah; ka̱nang A̱tyia̱ nung wu wa bai ma̱ng a̱nggu bah.” 66 Mat a̱nia wa á̱niet ma̱ a̱di̱di̱t ba̱ ku khwi Yesu a̱ni, ba̱ si̱ bwuok lilyim. Ba̱ si̱ lak khwi nggu hu. 67 Yesu si̱ lyip a̱yaata̱m swak ma̱ a̱feang gu ba, “Nyin mameang, nyi chat nyi nkat a?” 68 Bitut si̱ nwuak gu shim nyia̱, “A̱tyoli, da̱ a̱vwuo a̱nyan kya zi̱ na nnat? Nwan wa byia̱ á̱lyiat na̱ nwuat swuan sang sangba̱p a̱ni. 69 A̱wot ma̱ninika, zi̱ nwuak a̱chuchuk, zi̱ si̱ lyen nang nwan wa ngyet A̱za̱za̱rak A̱tyu a̱ neet da̱ a̱vwuo A̱gwaza a̱ni!” 70 Yesu si̱ nyia̱ ma̱ng mman ta̱m nggu na a̱ni, “N ku khai nyin swak ma̱ a̱feang. A̱mgba̱m ma̱ng a̱nia, a̱tyo nyiung ma̱ nyin yet A̱ta̱nyeang!” 71 Yesu ku lyiat a̱lyiat nani tazwa Yahuda, a̱fai Siman Iska̱riyoti. Mat Yahuda, byi̱ri̱ng ma̱ng yet a̱tyo nyiung mami a̱ta̱m swak ma̱ a̱feang a̱bya nang Yesu ku khai a̱ni, a̱ ku yet a̱bang a̱byin a̱ na bwuk ma̱ng Yesu a̱ni.
1 Nang si̱ huni nswak a̱ni, Yesu si̱ ya a̱son ma̱ng a̱chyet a̱ kat fam a̱byin Ga̱lili hu. A̱ ku shim a̱ nwuai a̱ chong a̱ kat fam a̱byin Yahudiya hu bah. Mat a̱cha̱chet A̱yahudawa ba ku chat hyat gu. 2 A̱wot nang A̱yet Á̱suswak A̱yahudawa wu bwat kpa̱mkpaan, 3 huhwa á̱na̱nyiuk Yesu ba si̱ nyia̱ ma̱ng a̱nggu a̱ni, “Ku myim a ghwon a̱vwuo kani a nat fam a̱byin Yahudiya. Da̱nian mman ta̱m ang na ba̱ ka li ntangka̱i a̱cha̱chet nta̱m nang a nyia̱ a̱ni. 4 Ka̱ a̱yin chat a̱ lyen nggu shansham, a̱ si̱ mi̱n niat nkyang nang gu nyia̱ a̱ni bah. Nang a nnyian nkyang nani a̱ni, ku myim a tyia̱ a̱mgba̱m swanta hu ku lyen ang!” 5 Mat á̱na̱nyiuk Yesu ba byi̱ri̱ng ba̱ ku nwuak a̱chuchuk da̱ nggu bah. 6 Yesu si̱ nyia̱ ma̱ng á̱na̱nyiuk nggu ba a̱ni, “Jen nung ji ka̱n nyia̱ bah. A̱wot nyin, kuzang jen yet si̱ nyin ja. 7 Swanta hu si̱ mi̱n dak nyin bah. A̱wot nung gwa nang á̱niet mi̱ swanta ba lak li hu. Mat n tak ma̱ng a̱mba nang ba̱ nyian a̱ka̱tuk nkyang. 8 Nyin, nyi nat a̱yet wu. Nung, n na nat a̱yet wu bah, mat jen nung ji ka̱n nyia̱ bah.” 9 Yesu ku hyia̱ a̱lyiat nani, a̱wot a̱ si̱ ya ndabeang mi̱ swat hu mi̱ fam a̱byin Ga̱lili hu. 10 Nang á̱na̱nyiuk Yesu ba ndoot ba̱ si̱ nat a̱yet wu a̱ni, Yesu mameang, a̱ si̱ doot a̱ si̱ nat a̱yet wu. A̱ ku chong kpa̱sai bah. A̱ ku nat da̱ bang. 11 A̱wot a̱cha̱chet A̱yahudawa ba ku chat ba̱ shya̱ nggu da̱ a̱vwuo a̱yet ka. Ba̱ si̱ nyia̱, “A̱tyu a̱wa shya̱ a̱ji wa?” 12 A̱wot mami á̱kpa á̱niet ba̱ ku shya̱ ma̱ a̱yet wu a̱ni, ba̱ si̱ chyuang tazwa Yesu nyia̱, “A̱tyu a̱wa yet a̱tan a̱yin!” A̱wot á̱ghyang á̱niet si̱ nyia̱, “Kaai, a̱tyu a̱wa laai á̱niet bibya!” 13 A̱mgba̱m ma̱ng a̱nia, á̱ byia̱ a̱tyu á̱ ku lyiat tazwa Yesu kpa̱sai a̱ni bah, mat ba̱ ku fwuong a̱wun a̱cha̱chet A̱yahudawa ba ba̱t. 14 A̱wot ma̱ a̱ka̱wa̱tyia̱ song a̱yet wu, Yesu si̱ nwuo mami didyaat A̱li Nwuat Za̱nang A̱gwaza ka, a̱ si̱ ta̱bat tyiet á̱niet ba a̱ja. 15 A̱cha̱chet A̱yahudawa ba si̱ fa̱k a̱ga̱de di̱ tyiet gu hu ba̱t. Huhwa ba̱ si̱ nyia̱, “Ku lili huni wa, nang a̱tyu wuni ndyen fang ta̱ka̱da hu a̱nia? Da̱ nggu, a̱ ka̱n mak nat a̱ si̱ tyiet gu fang ma̱ng lyuut baa?” 16 Yesu si̱ nwuak ba shim, “Ta̱m ji nang n tyiet a̱ni, ji̱ yet si̱ nung ja bah; ji̱ neet da̱ a̱vwuo A̱gwaza kya. Nggu wa ta̱m nung. 17 Konyan wa chat nyia̱ kyang nang A̱gwaza chat a̱ni, a̱ na fi̱k tyiet huni; ka̱ ku yet si̱ A̱gwaza hwa, kee n ma ndyiat a̱kwonu a̱pyia̱ nung kya. 18 Ka̱ a̱yin lyiat di̱ nkyang na̱ yet si̱ a̱pyia̱ nggu a̱ni, a̱ ni̱ chat a̱ nwuak a̱pyia̱ nggu shi hwa. A̱wot a̱tyu a̱ lyiat da̱ a̱kwonu a̱tyu a̱ ta̱m gu a̱ni, da̱nian a̱ chat a̱ ka nwuak a̱tyu a̱ ta̱m gu a̱ni wa shi hu; nggu wa byia̱ a̱chuchuk wu. A̱ yet a̱tyu bwoi a̱ka̱laa wa bah. 19 “Musa wa ku nwuak nyin doka A̱gwaza ji baa? A̱mgba̱m ma̱ng a̱nia, á̱ mbyia̱ a̱tyo nyiung ma̱ nyin a̱ khwi doka A̱gwaza ji a̱ni bah. Yihwa mbyia̱ nyi nchat nyi hyat nung?” 20 Á̱kpa á̱niet ka si̱ nwuak gu shim nyia̱, “A byia̱ a̱ka̱tuk ntswa! A̱nyan wa chat hyat ang hu?” 21 Yesu si̱ nyia̱, “N nyia̱ kyang a̱ga̱de nyiung hwa ma̱nyin hu. A̱wot a̱mgba̱m nyin, nyi ku fa̱k a̱ga̱de. 22 Musa ku nwuak nyin doka nyi saai mman a̱sam nyin na mi̱ chen. (A̱wot Musa wa ma̱ a̱pyia̱ gu ku tsa si̱ a̱hwa bah; a̱yaatyia̱ a̱khwop nyin bibya ku tsa hu.) Nyi ni̱ sak nggwon a̱sam ka mi̱ nchen hu a̱tuk Mam Fwung kya. 23 Ka̱ á̱ ni̱ sak nggwon a̱sam mi̱ chen a̱tuk Mam Fwung ka kalak á̱ du tyat doka Musa ji; ka̱ doot nyi mwai lyen ma̱ng a̱nung da̱ziya nang n choot a̱yin a̱tuk Mam Fwung ka a? 24 Nyi yok nyia̱ shi̱ri̱ya nyin ji tazwa kyang nang nyi li ma̱ng á̱ghyi bya a̱ni bah. Nyi nyia̱ shi̱ri̱ya ji mami a̱chuchuk ma̱ng kyang nang nyi lyen wa a̱ni.” 25 Á̱ghyang á̱niet ba̱ neet mi̱ Urusha̱lima a̱ni, ba̱ si̱ nyia̱, “A̱tyu wuni wa nang ba̱ chat hyat hu baa? 26 Di, nggu wa yong a̱ji! A̱ yong kpa̱sai a̱ lyiat. Da̱ mba, ba̱ nyia̱ nggu kyang bah. Ke a̱cha̱chet A̱yahudawa ba shim nang nggu wa ngyet Kristi wu la? 27 “Ka̱ a̱tyu wuni wa, zi̱ lyen a̱vwuo nang gu nneet a̱ni. A̱wot ka̱ Kristi wu ba̱ bai, á̱ byia̱ a̱tyu a̱ bye lyen a̱vwuo ka nang gu nneet a̱ni bah!” 28 Nang Yesu ku ntyiet mi̱ didyaat A̱li Nwuat Za̱nang A̱gwaza hu a̱ni, a̱ si̱ lyiat ma̱ng a̱gba̱ndang a̱nwuat nyia̱, “Nyin, nyi lyen nung shansham ma̱ng a̱vwuo ka nang n neet a̱ni a? Nung, n bai da̱nian a̱pyia̱ nung bah. A̱tyu a̱ ta̱m nung a̱ni; nggu wa byia̱ a̱chuchuk wu. Da̱ nyin, nyi lyen gu bah. 29 A̱wot nung, n dyen gu, mat n neet da̱ a̱vwuo nggu kya. Nggu wa ta̱m nung.” 30 Huhwa, ba̱ si̱ chat ba̱ ta̱bat gu. A̱wot a̱yin si̱ sak gu bwak bah. Mat jen a̱khwu nggu ji ka̱n nyia̱ bah. 31 Ma̱ng a̱nia, á̱niet ma̱ a̱di̱di̱t mami á̱kpa á̱niet ka si̱ nwuak fwuo da̱ nggu. Ba̱ si̱ nyia̱, “Jen ji nang Kristi bye mbai a̱ni, a̱ si̱ ba̱ nyia̱ a̱cha̱chet nkyang a̱ga̱de na̱ lan si̱ nang a̱tyu wuni ka̱n nyia̱ a̱ni a?” 32 Nang A̱fa̱risawa ba ku nfa̱k nang á̱kpa á̱niet ka chyuang tazwa Yesu a̱ni; a̱jawa mba ma̱ng a̱cha̱chet a̱yaapris ba, ba̱ si̱ ta̱m á̱niet chok A̱li Nwuat Za̱nang A̱gwaza ba, ba̱ ka ta̱bat guu. 33 Yesu si̱ nyia̱, “N na nswan ma̱ng a̱nyin da̱ a̱banjen ma̱ a̱da̱dei. A̱wot n na mbwuok nat da̱ a̱vwuo a̱tyu a̱ ta̱m nung a̱ni. 34 Nyi bye chat nung. Da̱ nyin, nyi na li nung bah. Mat, a̱vwuo ka nang n shya̱ a̱ni, nyi si̱ mi̱n nat bah.” 35 A̱jawa a̱cha̱chet A̱yahudawa ba si̱ nyia̱ ma̱ng á̱ghyang mba a̱ni, “A̱ji wa nang gu nnaat da̱nang zi̱ si̱ mi̱n shya̱ nggu bah? Ke a̱ naat da̱ a̱vwuo A̱yahudawa ba̱ seang á̱ kai nnwap na̱ nwai yet A̱yahudawa ba a̱ni; gu ka tyiet mba wa kee? Shimba a̱ na tyiet A̱helenawa mameang! 36 A̱ nyia̱, ‘Nyi na chat nung da̱ nyin nyi na li nung bah. A̱wot a̱vwuo ka nang n naat a̱ni, nyi si̱ mi̱n nat bah.’ Yihwa nang gu fa?” 37 A̱tuk ngaan A̱yet Á̱suswak ka, mam a̱hwa hwa yet a̱gba̱ndang mam a̱yet wu. Yesu si̱ doot a̱ yong. A̱ si̱ ta̱ngam a̱nwuat ka mi̱ chet nyia̱, “Konyan wa fwuong mashyi a̱sa̱khwot a̱ni, gu bai da̱ a̱vwuo nung, gu swuo! 38 Konyan wa nwuak fwuo da̱ nung a̱ni, ma̱nang A̱lyiat A̱gwaza na nhyia̱ a̱ni; ‘Mami nfwuo gu kikya nang a̱chi̱chen a̱sa̱khwot nwuat swuan ba ntyong.’ ” 39 (Yesu lyiat á̱lyiat nani tazwa A̱za̱za̱rak Ntswa wu nang á̱niet ba̱ nwuak fwuo da̱ nggu na san a̱ni. Mat ba̱ng ba̱ tat jen jini á̱ ka̱n ta̱m ma̱ng A̱za̱za̱rak Ntswa wu bah. Mat á̱ ka̱n ta̱ngam Yesu ma̱ng swuan ma̱ á̱niet ba̱ ka̱n kwi a̱ni, a̱ si̱ shya̱ a̱kyenkyai shi tyok nggu wu bah.) 40 Nang á̱kpa á̱niet ka nfa̱k á̱lyiat Yesu na a̱ni, ba̱ si̱ nyia̱, “A̱tsatsak a̱lyiat wa za̱m; a̱tyu wuni yet a̱ta̱m a̱kwonu A̱gwaza wa nang zi̱ fwuong a̱ni!” 41 Á̱ghyang á̱niet mami mba si̱ nyia̱, “A̱tyu wuni wa yet A̱tyusan nang zi̱ fwuong a̱ni!” A̱wot á̱ghyang á̱niet si̱ nyia̱, “Yihwa a? Kristi, a̱tyu nang A̱gwaza na kup gu tyok a̱ni, na ghwut ma̱ a̱byin Ga̱lili kyaa? 42 Wá ngyei A̱lyiat A̱gwaza na nyia̱ Kristi wu na ghwut mi̱ kwai Da̱wuda ja. A̱wot á̱ byin nggu ma̱ a̱keang Ba̱italami, a̱da̱dei a̱keang nang a̱gwam Da̱wuda ku nswan a̱ni a?” 43 A̱nia wa á̱kpa á̱niet ka ku ngya fwuang ji. Ba̱ si̱ ghai kankang da̱nian guu. 44 Á̱ghyang á̱niet si̱ chat ta̱bat guu. A̱wot á̱ byia̱ a̱tyu a̱ sak gu bwak a̱ni bah. 45 A̱jawa á̱niet chok A̱li Nwuat Za̱nang A̱gwaza ba si̱ bwuok mbwak nkhwot, á̱ nat da̱ a̱vwuo a̱cha̱chet a̱yaapris ma̱ng A̱fa̱risawa ba. Mba mameang, ba̱ si̱ lyip ba nyia̱, “Yihwa mbyia̱ nang nyi nwai mbai ma̱ng a̱nggu hu?” 46 A̱jawa á̱niet chok a̱vwuo ba si̱ nyia̱ ma̱ng a̱mba a̱ni, “Kaai, á̱ mbyia̱ a̱tyu a̱ ka̱n mak lyiat nang a̱tyu wuni a̱ni bah!” 47 Huhwa A̱fa̱risawa ba si̱ lyip á̱niet chok a̱vwuo ba nyia̱, “Nyin mameang, a̱ laai nyin a? 48 Á̱ mbyia̱ a̱yin mami a̱cha̱chet a̱yaapris mbeang A̱fa̱risawa ba á̱ ka̱n nwuak fwuo da̱ nggu a̱ni a? 49 Á̱kpa á̱niet kani lyen doka nang A̱gwaza ku nwuak Musa a̱ni bah! Mat a̱nia, shyishyi A̱gwaza si̱ ta̱bat mba!” 50 Nikodimut a̱wa a̱ ku nat da̱ a̱vwuo Yesu a̱tyetuk ka di̱n jen jhyang a̱ni, a̱ ku yet a̱tyo nyiung mami mba; huhwa gu nyia̱ ma̱ng a̱mba a̱ni, 51 “Mami doka nzi̱t ji, á̱ ni̱ faat a̱lyiat na tazwa a̱yin neet nang á̱ ka̱n fa̱k a̱lyiat a̱bwonu guu, a̱wot á̱ zop kyang hu nang gu nyia̱ a̱ni baa?” 52 Ba̱ si̱ nyia̱, “Nwan meang, a yet a̱tyu Ga̱lili wa a? Zop A̱lyiat A̱gwaza na shansham a lii; á̱ byia̱ a̱ta̱m a̱kwonu A̱gwaza a̱ na ghwut ma̱ a̱byin Ga̱lili a̱ni bah!” 53 A̱jawa konyan ma̱ a̱mba si̱ ndoot, a̱ si̱ nkat a̱mali nggu.
1 A̱wot Yesu si̱ nyeak Tsok Za̱itun. 2 Da̱ a̱tsotson tat ka, Yesu si̱ bu bwuok a̱ nat mi̱ didyaat A̱li Nwuat Za̱nang A̱gwaza hu. A̱mgba̱m á̱kpa á̱niet ka si̱ bai da̱ a̱vwuo nggu. A̱ si̱ bwuok a̱ swan a̱byin, a̱ si̱ tyiet mbaa. 3 A̱jawa a̱cha̱chet a̱yaagwak tyiet doka A̱gwaza ma̱ng A̱fa̱risawa ba, ba̱ si̱ bai ma̱ng a̱byii̱k nang á̱ ta̱bat gu di̱ katnaan. Ba̱ si̱ tyia̱ a̱byii̱k wu si̱ yong a̱ka̱wa̱tyia̱ á̱niet ka. 4 Ba̱ si̱ nyia̱ ma̱ng Yesu a̱ni, “A̱tyu tyiet, di a̱byii̱k wuni á̱ ta̱bat nggu wa ba̱t, nang gu nshya̱ mami katnaan! 5 A̱wot mami doka A̱gwaza nang gu nwuak Musa a̱ni, á̱ tak zi̱t nyia̱; zi̱ mang tangka̱i á̱niet huni ma̱ng fang hyaai. Nwan mameang, yihwa nang a hyia̱?” 6 Ba̱ ku lyip gu a̱lyiat nani, da̱nian ba̱ tya̱ra̱m nggu, ba̱ ka shya̱ kyang hu nang ba̱ na ntyap guu, ba̱ tyia̱ nggu a̱bun a̱ni. A̱mgba̱m ma̱ng a̱nia, Yesu si̱ beak, a̱ si̱ lyuut a̱byin ma̱ng ga̱swuong. 7 Nang ba̱ ngyong a̱ja, ba̱ ya a̱son ma̱ng lyi̱ri̱m nggu a̱lyiat a̱ni. A̱ si̱ doot a̱ yong, a̱ si̱ nyia̱ ma̱ng a̱mba a̱ni, “Mami nyin, a̱tyu da̱ á̱ ka̱n mak nyia̱ a̱ka̱tuk nyia̱ ma̱nyin a̱ni bah; gu yet a̱son kyiak a̱fang gu nta a̱byii̱k wuni, zi̱ li.” 8 Yesu si̱ bu beak a̱byin, a̱ si̱ ya a̱son ma̱ng lyuut hu. 9 Nang ba̱ nfa̱k a̱nia a̱ni, ba̱ si̱ ya̱bam á̱ vwuot a̱nyanyin kyiak neet da̱ a̱niet khwop si̱ nat da̱ a̱shushyuo. Ba̱ si̱ ghwon Yesu a̱ja ma̱nyin nggu ma̱ng a̱byii̱k wu. 10 Yesu si̱ doot a̱ yong a̱ka̱tsak, a̱ si̱ nyia̱ ma̱ng a̱byii̱k wu a̱ni, “A̱yang a̱li, á̱niet ba ba̱ ta̱bat ang a̱ni, ba̱ shya̱ a̱ji? Á̱ mbyia̱ a̱tyo nyiung mami mba a̱ yong a̱ nyia̱ ang shi̱ri̱ya a̱ni baa?” 11 A̱byii̱k wu si̱ nyia̱, “Kaai, A̱tyoli.” A̱jawa Yesu si̱ nyia̱ ma̱ng a̱nggu a̱ni, “Nung mameang, n tyia̱ ang a̱bun bah. Nkat kyang ang. A̱wot, bu yok nyia̱ a̱ka̱tuk nyia̱ bah.” 12 Yesu si̱ bu nyia̱ ma̱ng a̱mba a̱ni, “Nung gwa ngyet sai hu mi̱ swanta hu. Konyan wa khwi nung a̱ni, a̱ na chong mi̱ ndyin bah. A̱ na shya̱ swuan, a̱wot a̱ si̱ mi̱n mak chong mi̱ ndyin bah.” 13 Mat a̱nia, A̱fa̱risawa ba si̱ nyia̱ ma̱ng Yesu a̱ni, “A yong shei a̱chuchuk a̱lyiat tazwa a̱pyia̱ ang. Kyang hu nang a lyiat a̱ni, a̱tsatsak a̱lyiat wa bah!” 14 Yesu si̱ nyia̱, “Ka̱ n tak a̱chuchuk kpa̱sai tazwa a̱pyia̱ nung, kyang hu nang n tak a̱ni, a̱tsatsak a̱lyiat wa. Mat, n dyen a̱vwuo ka nang n neet a̱ni, ma̱ng a̱vwuo ka nang n na mbwuok n nat a̱ni. A̱wot nyin, nyi lyen a̱vwuo ka nang n neet a̱ni bah. Da̱ nyin, nyi lyen a̱vwuo ka nang n na mbwuok n nat a̱ni bah. 15 Nyin, nyi nyia̱ shi̱ri̱ya nang á̱niet mi̱ swanta a̱ni. Nung, n nyia̱ shi̱ri̱ya tazwa a̱yin bah. 16 A̱mgba̱m ma̱ng a̱nia, ka̱ n si̱ mi̱n nyia̱ shi̱ri̱ya, shi̱ri̱ya nung ji yet a̱tsotswat wa. Mat nung gwa ma̱nyin nung bah; nung gwa mbeang A̱tyia̱ nung wu a̱ ta̱m nung a̱ni, a̱ shya̱ dundung ma̱ng a̱nung. 17 “Mami doka nyin ji á̱ lyuut nyia̱ ka̱ á̱niet a̱feang nwuak sheda tazwa kyang, kyang hu ba̱ nwuak sheda hu a̱ni ku yet a̱tsatsak a̱lyiat wa. 18 Nung, n nwuak sheda tazwa a̱pyia̱ nung. A̱wot A̱tyia̱ wu a̱ ta̱m nung a̱ni; nggu wa mameang, a̱ nwuak sheda tazwa nung.” 19 Ba̱ si̱ lyip Yesu, nyia̱ “A̱tyia̱ ang wu shya̱ a̱ji wa?” Yesu si̱ nwuak ba shim nyia̱, “Mat nang nyi ndyen nung a̱ni bah, huhwa mbyia̱ nang nyi ndyen A̱tyia̱ nung wu bah. Ka̱ nyi wa lyen nung, si̱ nyi lyen A̱tyia̱ nung wu mameang.” 20 Yesu ku lyiat a̱lyiat nani di̱n jen tyiet nggu ji mi̱ didyaat A̱li Nwuat Za̱nang A̱gwaza, nang gu shya̱ kpa̱mkpaan ma̱ng a̱vwuo khwot kurum ka. A̱mgba̱m ma̱ng a̱nia, á̱ ku mbyia̱ a̱tyu a̱ na ta̱bat gu a̱ni bah; mat nang jen nta̱bat gu ji ka̱n nyia̱ bah. 21 Yesu si̱ bu nyia̱ ma̱ng a̱mba a̱ni, “N na nkat, a̱wot nyi na chat nung. Ma̱ng a̱nia, nyi na kwi ma̱ a̱ka̱tuk nyia̱ nyin wu. A̱vwuo ka nang n na nat a̱ni, nyi si̱ mi̱n nat bah.” 22 Huhwa a̱cha̱chet A̱yahudawa ba si̱ lyip, nyia̱ “A̱ na hyat a̱pyia̱ nggu kya kee? Nang gu nnyia̱, ‘A̱vwuo ka nang n naat a̱ni, nyi si̱ mi̱n mak nat bah.’ ” 23 Huhwa Yesu si̱ nyia̱ ma̱ng a̱mba a̱ni, “Nyin, nyi shya̱ a̱byin kya a̱ji. A̱wot nung, n neet Ma A̱gwaza tswazwa kya. Nyin, nyi yet á̱niet mi̱ swanta bya. A̱wot nung, n gyet a̱tyu mi̱ swanta wuni wa bah. 24 Huhwa mbyia̱ n hyia̱ ma̱ng a̱nyin, nang nyi na nkwi ma̱ a̱ka̱tuk nyia̱ nyin wu. Mat ka̱ nyi nwuak a̱chuchuk nyia̱ nung gwa ngyet a̱tyu nang n tak n gyet a̱ni bah; nyi na kwi ma̱ng a̱ka̱tuk nyia̱ nyin wu mut!” 25 Huhwa ba̱ nyia̱ mi̱ Yesu a̱ni, “Nwan wa yet a̱nyan?” Yesu si̱ nyia̱ ma̱ng a̱mba a̱ni, “N mi̱ nhyia̱ ma̱ng a̱nyin neet di̱ tsa hu. 26 Nkyang nshya̱ ma̱ a̱di̱di̱t nang n na nhyia̱ n bu nnyia̱ nyin shi̱ri̱ya a̱ni. A̱mgba̱m ma̱ng a̱nia, a̱tyu a̱ ta̱m ma̱ng a̱nung a̱ni, a̱ byia̱ a̱chuchuk. A̱wot kyang hu nang n fa̱k da̱ a̱vwuo nggu a̱ni; huhwa nang n na ntak ma̱ng á̱niet mi̱ swanta ba.” 27 Ba̱ ku fi̱k nang Yesu ndyiat ma̱ng a̱mba tazwa A̱tyia̱ nggu wu wa a̱ni bah. 28 Yesu si̱ nyia̱ ma̱ng a̱mba a̱ni, “Jen nang nyi bye nta̱ngam Nggwon A̱tyubishyi tswazwa a̱ni; jen a̱ja ja nang nyi bye ndyen nang nung gwa ngyet a̱tyu nang n tak ngyet a̱ni. N nyia̱ kyang ma̱nyin nung bah. N nyia̱ di̱ si̱sak ji nang A̱tyia̱ nung wu ntyiet nung a̱ni; a̱nia wa nang n dyiat. 29 A̱wot a̱tyu a̱ ta̱m nung a̱ni, a̱ shya̱ dundung ma̱ng a̱nung. Mat kuzang jen n ni̱ nyia̱ kyang hu nang gu chat a̱ni.” 30 Á̱niet ma̱ a̱di̱di̱t ba̱ si̱ fa̱k nkyang Yesu lyiat a̱ni, ba̱ si̱ nwuak a̱chuchuk da̱ nggu. 31 A̱jawa Yesu si̱ lyiat ma̱ng A̱yahudawa ba, ba̱ ku nwuak fwuo da̱ nggu a̱ni, a̱ si̱ nyia̱, “Ka̱ nyi wa khwi a̱lyiat nang n tyiet nyin a̱ni, si̱ nyin bya chi̱k yet mman nung na. 32 Nyi na lyen a̱chuchuk wu, a̱wot a̱chuchuk wu na tyia̱ nyi yet á̱sa̱t á̱niet.” 33 Ba̱ si̱ nyia̱, “Nzi̱t, zi̱ yet kwai Ibrahim ja. Zi̱ ka̱n mak yet a̱khwo a̱yin bah. Yihwa nang a fa a na tyia̱ zi̱ nshot?” 34 Yesu si̱ nwuak ba shim nyia̱, “A̱tsatsak a̱lyiat, n hyia̱ ma̱ng a̱nyin; konyan wa nyia̱ a̱ka̱tuk nyia̱ a̱ni, a̱ yet a̱khwo a̱ka̱tuk nyia̱ wa za̱m! 35 A̱khwo yet nggwon a̱li kuzang jen bah. A̱tyu a̱ yet nggwon a̱li ka a̱ni; nggu wa na swan a̱mali ka si̱ nat sang sangba̱p. 36 Ka̱ Nggwon A̱gwaza ka kya ti̱n nyin mi̱ khwo hu, a̱tsatsak a̱lyiat wa; nyi na yet á̱sa̱t á̱niet bya za̱m! 37 “N dyen nang nyi ngyet kwai Ibrahim ja. A̱mgba̱m ma̱ng a̱nia, nyi kwan nyi hyat nung. Mat a̱lyiat nung na shya̱ mi̱ fwuo nyin na bah. 38 Nung, n dyiat kyang hu nang n di da̱ a̱vwuo A̱tyia̱ nung ka a̱ni. A̱wot nyin mameang, nyi ni̱ nyia̱ kyang hu nang a̱tyia̱ nyin wu hyia̱ ma̱ng a̱nyin, nyi si̱ fa̱k a̱ni.” 39 A̱cha̱chet A̱yahudawa ba si̱ nyia̱, “A̱tyia̱ nzi̱t wu wa yet Ibrahim!” Yesu mameang si̱ nyia̱ ma̱ng a̱mba a̱ni, “Kaai, ka̱ a̱tsatsak a̱lyiat wa nang nyi nyia̱ nyi yet mman Ibrahim nia; nyi na nyia̱ tangka̱i nta̱m hu nang Ibrahim ku nyia̱ a̱ni. 40 Nyin bya ba di̱ yong huni, nyi chat nyi hyat nung; nung a̱tyu n tak ma̱ng a̱nyin a̱chuchuk nang n fa̱k da̱ a̱vwuo A̱gwaza a̱ni. A̱nia wa nang Ibrahim ku nnyia̱ bah. 41 Nyi nyian kyang nang a̱tyia̱ nyin wu nyia̱ wa a̱ni.” Ba̱ si̱ nyia̱, “A̱gwaza wa ma̱ a̱pyia̱ nggu yet A̱tyia̱ nzi̱t wu! Á̱ tyei nzi̱t di̱n vak katnaan bah. A̱gwaza wa ma̱ a̱pyia̱ nggu tyei nzi̱t, zi̱ yet mman gu nia za̱m!” 42 Yesu si̱ nyia̱ ma̱ng a̱mba a̱ni, “Ka̱ a̱tsatsak a̱lyiat wa nang A̱gwaza wa yet A̱tyia̱ nyin wu; si̱ nyi fa̱k da̱ nung. Mat, n ghwut neet da̱ a̱vwuo A̱gwaza kya; n shya̱ a̱ji ma̱ninika. N bai a̱ji da̱nian a̱pyia̱ nung bah, A̱gwaza wa ta̱m nung. 43 Yihwa mbyia̱ nang nyi nnwai fi̱k kyang hu nang n dyiat a̱ni? Mat, nyi chat nyi myiai a̱fufwuo, nyi fa̱k á̱lyiat nung na bah. 44 “Nyin, nyi yet mman A̱ta̱nyeang nia; kikya yet a̱tyia̱ nyin wu. A̱wot nyi fa nyi khwi kyang hu nang A̱ta̱nyeang ka chat a̱ni. Neet gbangbang, A̱ta̱nyeang ka ka̱ yet a̱gwam á̱ka̱tuk ntswá wu a̱ni, ka̱ yet a̱tyu hyaai á̱niet wa. Da̱ nka, ka̱ lyiat a̱tsatsak a̱lyiat bah. A̱mgba̱m jen nang ka̱ mbwoi a̱ka̱laa na a̱ni, ka̱ ni̱ nyia̱ kyang hu myim nka wa a̱ni. Mat, ka̱ yet a̱tyu bwoi a̱ka̱laa wa, ma̱ng a̱tyia̱ á̱niet bwoi a̱ka̱laa. 45 Nung, n dyiat a̱tsatsak a̱lyiat wa. Huhwa mbyia̱ nang nyi ndak nwuak fwuo da̱ nung. 46 “Mami nyin, a̱nyan wa doot a̱ tak nang gu ka̱n di nang n nyia̱ a̱ka̱tuk nyia̱? Ka̱ a̱tsatsak a̱lyiat wa nang n dyiat, yihwa mbyia̱ nang nyi ndak nwuak fwuo hu da̱ nung? 47 A̱tyu a̱ yet a̱si̱ A̱gwaza a̱ni, a̱ ni̱ myiai a̱fufwuo a̱ fa̱k a̱lyiat A̱gwaza na. Nyin, nyi yet á̱niet A̱gwaza bah. Huhwa mbyia̱ nyi si̱ mi̱n myiai a̱fufwuo nyi fa̱k a̱lyiat A̱gwaza na bah.” 48 A̱cha̱chet A̱yahudawa ba si̱ nyia̱. “Zi̱ ku bwuo la nang zi̱ ku nhyia̱ ma̱ng a̱nwan nyia̱ a yet a̱tyu Sa̱mariya, a̱wot a si̱ byia̱ a̱ka̱tuk ntswa a̱ni a?” 49 Yesu si̱ nyia̱, “Nung, n byia̱ a̱ka̱tuk ntswa bah! N nwuat A̱tyia̱ nung wu shi. A̱wot nyin, nyi jhyuai nung. 50 N chat shi a̱pyia̱ nung bah. A̱yin nshya̱ a̱ chat nung ndyo a̱ni. A̱wot nggu wa yet a̱tyu nyia̱ shi̱ri̱ya wu da̱ a̱kwonu nung. 51 N na tak ma̱ng a̱nyin a̱chuchuk za̱m; konyan a̱ khwi a̱lyiat nung na a̱ni, a̱ si̱ mi̱n khwu bah, ba̱ng si̱ nat sang sangba̱p!” 52 Huhwa a̱cha̱chet A̱yahudawa ba si̱ nyia̱ ma̱ng Yesu a̱ni, “Di̱ yong huni, zi̱ lyen chi̱k nang a mbyia̱ a̱ka̱tuk ntswa! Mat Ibrahim ku khwu, ma a̱nia wa a̱yaata̱m a̱kwonu A̱gwaza á̱ghyang. A̱mgba̱m ma̱ng a̱nia, a nyia̱, ‘Konyan wa khwi a̱lyiat nung na, a̱ si̱ mi̱n khwu bah. A̱ na shya̱ swuan sang sangba̱p.’ 53 Nwan, a lan a̱tyia̱ a̱khwop nzi̱t wu Ibrahim mbeang a̱yaata̱m a̱kwonu A̱gwaza á̱ghyang ba̱ ku kwi a̱ni a? A̱nyan wa nang a fa nyia̱ a yet?” 54 Yesu si̱ nwuak mba shim nyia̱, “Ki̱ n nwuak a̱pyia̱ nung shi, shi nung hu na tyak kyang bah. A̱tyia̱ nung wu, nggu wa nwuat nung shi hu; a̱tyu nang nyi nyia̱ nggu wa yet A̱gwaza nyin wu a̱ni. 55 “Nyin, nyi lyen gu bah. A̱wot nung, n dyen nggu. Ki̱ n nyia̱ di̱ n dyen gu bah, n na ngyet a̱tyu bwoi a̱ka̱laa cha̱chaat ma̱ng a̱nyin. A̱wot n dyen nggu za̱m, a̱wot n si̱ khwi a̱lyiat nggu na. 56 Ibrahim, a̱ ku yet a̱tyia̱ nyin wu a̱ni, a̱ ku shya̱ ma̱ng a̱sai a̱lyia̱ mat chat li jen nang n ku nshya̱ mi̱ swanta hu a̱ni. A̱ ku li njii, a̱ si̱ gwai!” 57 Huhwa a̱cha̱chet A̱yahudawa ba si̱ nyia̱, “Di̱ yong huni, a ka̱n tat a̱lyia̱ nswak nfwuon bah! Huhwa nang a nyia̱ a ku li Ibrahim wu a?” 58 Yesu mameang si̱ nwuak ba shim nyia̱, “N na ntak ma̱ng a̱nyin a̱tsatsak a̱lyiat; kyiak neet nang á̱ ka̱n byin Ibrahim bah, nung gwa ngyet A̱gwaza wu!” 59 Nang ba̱ nfa̱k a̱nia a̱ni, ba̱ si̱ kyiak nfang, ba̱ na mmang guu. Yesu si̱ tyia̱ ghyuai a̱ ghwut mi̱ didyaat A̱li Nwuat Za̱nang A̱gwaza hu.
1 Nang Yesu sweap, a̱ si̱ kin di a̱tyok nang á̱ ku byin ma̱ng a̱fi̱fan a̱ni. 2 Huhwa mman ta̱m Yesu na si̱ lyip gu nyia̱, “A̱tyu tyiet, a̱nyan wa ku nyia̱ a̱ka̱tuk nyia̱ wu, a̱ ku tyia̱ á̱ si̱ mbyin a̱tyu wuni ma̱ng a̱fi̱fan ba? Nggu wa ku nyia̱ a̱ka̱tuk nyia̱ wu, ke á̱niet mbyin nggu bibya?” 3 Huhwa Yesu si̱ nyia̱ ma̱ng a̱mba, “A̱ka̱tuk nyia̱ nggu ma̱ng á̱ka̱tuk á̱niet mbyin nggu wa mbyia̱ nang gu ngyet a̱tyu a̱fi̱fan bah. A̱ yet a̱tyu a̱fi̱fan wu da̱nian á̱ ka tak si̱sak ji nang Tyok A̱gwaza hu nnyia̱ ta̱m da̱ nggu a̱ni. 4 “Ku yet ta hwa zi̱ nyia̱ ta̱m a̱tyu a̱ ta̱m nung a̱ni, neet nang mam ni̱ sai. A̱tyetuk na khwat, da̱nang a̱yin si̱ mi̱n nyia̱ ta̱m a̱ni bah. 5 Jen nang n shya̱ mi̱ swanta hu a̱ni, nung gwa ngyet sai hu mi̱ swanta hu.” 6 Nang Yesu nhyia̱ a̱nia a̱ni, a̱ si̱ ta a̱ta̱mpyia̱ a̱byin, a̱ si̱ ni̱m mbyin na. A̱ si̱ khap, a̱ si̱ kwon ma̱ á̱ghyi a̱tyu a̱fi̱fan ba. 7 A̱ si̱ nyia̱ ma̱ng a̱nggu, “Nat, a kwi á̱ghyi ang ba mi̱ njok Si̱luwam” (A̱lyoot kani fa “Á̱ Ta̱m”). A̱tyu a̱fi̱fan wu si̱ nat, a̱ si̱si̱ kwi á̱ghyi ba. A̱ si̱ shya̱ nwuan a̱vwuo, a̱ si̱ bwuok a̱ bai. 8 Á̱kpa̱ndang nswat nggu ba ma̱ng á̱niet ma̱ a̱di̱di̱t ba̱ ku meang ma̱ng nwuan guu nang gu yet a̱tyu a̱shweang gbangbang a̱ni; ba̱ si̱ nyia̱, “A̱tyu wuni wa ku yet a̱tyu a̱ ku swan a̱ shweang di̱n vak hu a̱ni baa?” 9 Á̱ghyang á̱niet si̱ nyia̱, “Nggu wa za̱m!” A̱wot á̱ghyang si̱ nyia̱, “Kaai, á̱niet tai wa!” Huhwa a̱tyu a̱ ku byia̱ a̱fi̱fan ba a̱ni, si̱ hyia̱ ma̱ a̱pyia̱ nggu, nyia̱, “Nung gwa wu za̱m!” 10 Huhwa ba̱ si̱ nyia̱ ma̱ng a̱nggu a̱ni, “A nyia̱ nini wa, á̱ghyi ang ba si̱ nkhwuk?” 11 A̱tyu a̱ ku yet a̱tyu a̱fi̱fan wu a̱ni, si̱ nwuak ba shim nyia̱, “A̱tyu a̱wa nang á̱ ngyei Yesu wu a̱ni; nggu wa ku ni̱m byin, a̱ si̱ kwon nung ndyo ma̱ á̱ghyi ba. A̱wot a̱ si̱ nyia̱ ma̱ng a̱nung a̱ni, ‘Nat mi̱ jok Si̱luwam, a si̱ kwi á̱ghyi ang ba a̱ja.’ Nung mameang, n si̱ nat, n si̱si̱ nkwi á̱ghyi ba a̱ja. Huhwa mbyia̱ nang n nwuan a̱vwuo na.” 12 Ba̱ si̱ lyip gu, nyia̱, “A̱ shya̱ a̱ji wa?” A̱ si̱ nwuak mba shim, nyia̱, “N dyen a̱vwuo ka nang gu nshya̱ a̱ni bah.” 13 Huhwa ba̱ si̱ kyiak a̱tyu a̱ ku byia̱ a̱fi̱fan ba a̱ni, ba̱ si̱ nat ma̱ng a̱nggu da̱ a̱vwuo A̱fa̱risawa. 14 A̱tuk Mam Fwung kya nang Yesu ku nnu mbyin na a̱ si̱ nkhwuk a̱tyu a̱fi̱fan wu á̱ghyi ba. 15 Mat a̱nia, A̱fa̱risawa ba si̱ bu lyip a̱tyu a̱ ku byia̱ a̱fi̱fan ba a̱ni, si̱sak ji nang á̱ nkhwuk gu á̱ghyi ba a̱ni. A̱ si̱ nyia̱ ma̱ng a̱mba a̱ni, “A̱ ku nu mbyin, a̱ si̱ nkwon nung ndyo ma̱ á̱ghyi ba. A̱wot n si̱ nkwi á̱ghyi ba. Huhwa mbyia̱ nang n nwuan a̱vwuo na ma̱nini.” 16 Huhwa A̱fa̱risawa á̱ghyang si̱ nyia̱, “A̱tyu wuni neet da̱ a̱vwuo A̱gwaza bah. Mat a̱ nyia̱ ta̱m a̱ si̱ tyat doka a̱tuk Mam Fwung ji!” Á̱ghyang á̱niet mameang, ba̱ si̱ nyia̱, “Á̱ na nyia̱ ni wa a̱tyu a̱ka̱tuk nyia̱ gu nnyia̱ ntangka̱i a̱cha̱chet nkyang a̱ga̱de nani?” Huhwa ba̱ si̱ ta̱bat ya fwuang ma̱ng á̱ghyang mba. 17 Ba̱ si̱ bu nyia̱ ma̱ng a̱tyu a̱ ku byia̱ a̱fi̱fan ba a̱ni, “Nwan a nyia̱ a̱ khwuk ang á̱ghyi; yihwa nang a na hyia̱ da̱ nggu?” Nggu meang, a̱ si̱ nyia̱ ma̱ng a̱mba, “A̱tyu a̱wa yet a̱ta̱m a̱kwonu A̱gwaza wa!” 18 A̱cha̱chet a̱yaakwak a̱son A̱yahudawa ba, ba̱ ku lak ba̱ nwuak a̱chuchuk nyia̱ a̱tyu wuni ku yet a̱tyu a̱fi̱fan wa gbangbang, a̱wot di̱ yong huni á̱ khwuk gu á̱ghyi, a̱ si̱ shya̱ nwuan a̱vwuo bah. Mat a̱nia, ba̱ si̱ yorong á̱niet mbyin a̱tyu a̱fi̱fan ba. 19 Ba̱ si̱ lyip ba, nyia̱ “Nggwon a̱sam nyin kya lili huni a? Nyi nyia̱ nyi byin gu ma̱ng a̱fi̱fan. Á̱ nyia̱ ni wa gu nnwuan a̱vwuo na ma̱ninika?” 20 Á̱niet mbyin nggu ba si̱ nwuak ba shim, nyia̱, “Zi̱ lyen nang nggwon nzi̱t kya ka, a̱wot zi̱ si̱ bu byin gu ma̱ng a̱fi̱fan. 21 A̱mgba̱m ma̱ng a̱nia, zi̱ lyen si̱sak nang gu nnyia̱ á̱ghyi gu ba si̱ nkhwuk a̱ni bah. Da̱ nzi̱t, zi̱ lyen a̱tyu a̱ khwuk gu á̱ghyi ba a̱ni bah. Nyi lyip gu, a̱ yet nggwon bah. A̱ maai a̱yin, a̱ na nwuak shim hu ma̱ a̱pyia̱ nggu!” 22 Á̱niet mbyin a̱tyu a̱ ku byia̱ a̱fi̱fan ba a̱ni si̱ hyia̱ a̱lyiat nani, mat ba̱ ku fa̱k a̱wun a̱cha̱chet a̱yaakwak a̱son A̱yahudawa ba. Mat ba̱ ku la̱p á̱ sak nyia̱ ka̱ ba̱ shya̱ a̱yin a̱ si̱ shim nyia̱ Yesu wa yet Kristi, a̱tyu nang A̱gwaza kup gu tyok a̱ni; nang ba̱ fwuong a̱ni, á̱ na ti̱n nggu á̱ ghwut ndyo mami tutu a̱tung A̱yahudawa ka. 23 Huhwa ku mbyia̱ á̱niet mbyin a̱tyu a̱ ku byia̱ a̱fi̱fan ba a̱ni, ba̱ si̱ nyia̱, “A̱ yet nggwon kya bah. A̱ maai a̱yin, nyi lyip gu!” 24 A̱cha̱chet a̱yaakwak a̱son A̱yahudawa ba si̱ bu yorong a̱tyu a̱ ku byia̱ a̱fi̱fan ba a̱ni, ba̱ si̱ nyia̱, “Fa̱k a̱wun A̱gwaza, a hyia̱ a̱tsatsak a̱lyiat! Nzi̱t, zi̱ lyen nang a̱tyu wuni a̱ choot ang a̱ni; ngyet a̱tyu a̱ka̱tuk nyia̱ wa.” 25 A̱ si̱ nyia̱ ma̱ng a̱mba a̱ni, “Ke a̱ yet a̱tyu a̱ka̱tuk wa wo, nung n dyen bah. Kyang nyiung hwa nang n dyen. N ku ngyet a̱tyu a̱fi̱fan gbangbang. A̱wot di̱ yong huni, n nwuan a̱vwuo!” 26 Ba̱ si̱ bu lyip gu, nyia̱ “Yihwa nang gu nyia̱ ang ndyo? A̱ nyia̱ ni wa, a̱ si̱ nkhwuk ang á̱ghyi ba?” 27 A̱tyu a̱ ku byia̱ a̱fi̱fan ba a̱ni si̱ nyia̱ ma̱ng a̱mba a̱ni, “N wa ka̱n hyia̱ ma̱ng a̱nyin. A̱wot nyi si̱ lak fa̱k hu. Yihwa mbyia̱ nang nyi nchat nyi bu fa̱k? Ke nyin mameang, nyi chat nyi yet mman ta̱m gu nia?” 28 Huhwa a̱cha̱chet A̱yahudawa ba si̱ ta̱bat fwuoi nggu. Ba̱ si̱ nyia̱, “Nwan wa yet nggwon nta̱m nggu ka! Nzi̱t bani, zi̱ yet mman ta̱m Musa nia! 29 Zi̱ lyen nang A̱gwaza ku ndyiat ma̱ng Musa! A̱wot a̱tyu wuni, zi̱ lyen a̱vwuo ka nang gu neet a̱ni bah!” 30 A̱tyu a̱ ku byia̱ a̱fi̱fan ba a̱ni, si̱ nyia̱, “N fa̱k a̱ga̱de da̱ a̱lyiat nyin na! Nyi lyen a̱vwuo ka nang gu neet a̱ni bah. A̱mgba̱m ma̱ng a̱nia, nggu wa khwuk nung á̱ghyi ba! 31 Zi̱ lyen á̱niet ba̱ nyia̱ a̱ka̱tuk a̱ni, A̱gwaza fwuong mba bah. A̱ fwuong á̱niet ba̱ nwuat gu shi. A̱wot ba̱ si̱ khwi kyang hu nang gu chat ba̱ nyia̱ a̱ni. 32 “Neet nang á̱ nnyia̱ swanta huni, á̱ ka̱n fa̱k nang a̱yin khwuk á̱ghyi a̱tyu nang á̱ byin ma̱ng a̱fi̱fan a̱ni bah. 33 Ka̱ a̱tyu wuni wa yet a̱tyu a̱ neet da̱ a̱vwuo A̱gwaza a̱ni bah, a̱ si̱ mi̱n nyia̱ kyang bah.” 34 A̱cha̱chet A̱yahudawa ba si̱ nyia̱, “Nwan a̱tyu nang á̱ byin mami a̱ka̱tuk nyia̱, a̱wot a si̱ shi mami a̱ka̱tuk a̱ni; nwan wa chat tyiet zi̱t a?!” Huhwa ba̱ si̱ vwuong nggu, á̱ ghwut ndyo mi̱ tutu a̱tung A̱yahudawa hu. 35 Nang Yesu ku nfa̱k nkhang nyia̱ á̱ ka̱n vwuong a̱tyu a̱ ku byia̱ a̱fi̱fan ba, á̱ ghwut ndyo mi̱ tutu a̱tung A̱yahudawa hu a̱ni; a̱ si̱ chat gu a̱ shya̱. Huhwa gu nyia̱ ma̱ng a̱nggu a̱ni, “A nwuak fwuo di̱ Nggwon A̱gwaza kaa?” 36 A̱tyu a̱ ku byia̱ a̱fi̱fan ba a̱ni si̱ nyia̱, “A̱tyoli, nggu wa yet a̱nyan? Hyia̱ ma̱ng nung, n ka nwuak fwuo da̱ nggu.” 37 Yesu si̱ nyia̱ ma̱ng a̱nggu a̱ni, “A wa ka̱n di ngguu; nggu wa yet a̱tyu a̱ lyiat ma̱ng a̱nwan a̱ni!” 38 Huhwa a̱tyu a̱ ku byia̱ a̱fi̱fan ba a̱ni nyia̱, “Nwan A̱tyoli nung, n nwuak fwuo da̱ nwan!” A̱wot a̱ si̱ kyuak ntong a̱zaghyi Yesu. 39 Yesu si̱ nyia̱, “N bai mi̱ swanta hu, da̱nian n ka nghai á̱niet. M bai da̱nian á̱niet di̱ ba̱ nwuan a̱vwuo a̱ni bah, ba̱ ka shya̱ nwuan hu; a̱wot á̱niet ba̱ dam nyia̱ ba̱ nwuan a̱ni, ba̱ ka tyia̱ á̱niet a̱fi̱fan.” 40 Nang A̱fa̱risawa ba̱ shya̱ ndung ma̱ng Yesu nfa̱k a̱nia a̱ni, ba̱ si̱ nyia̱ ma̱ng a̱nggu a̱ni, “Nzi̱t mameang, zi̱ yet á̱niet a̱fi̱fan byaa?” 41 Yesu si̱ nyia̱ ma̱ng a̱mba a̱ni, “Ka̱ nyi wa yet á̱niet a̱fi̱fan bya, si̱ nyi byia̱ a̱bun bah. A̱wot nang nyin nyia̱ nyi nwuan a̱ni, a̱ka̱tuk nyia̱ nyin wu yong da̱ nyin.”
1 “Yok n hyia̱ ma̱ng a̱nyin a̱chuchuk; a̱tyu da̱ a̱ nwuo a̱na̱nyuo a̱ta̱mpwom zón seap ka a̱ni bah, a̱wot a̱ si̱ nwuo di̱n vak ghyang hwa ma̱ zan; a̱tyu a̱wa yet a̱tang, a̱ si̱ bu yet a̱tyu a̱tsaai wa! 2 A̱tyu a̱ nwuo a̱na̱nyuo a̱ta̱mpwom ka nang á̱ ntyia̱ nyinyiit hu a̱ni; a̱ yet a̱tyu chok zón seap wa. 3 A̱tyu a̱ chok a̱na̱nyuo a̱ta̱mpwom ka a̱ni, ni̱ khwuk gu ndyo. A̱wot zón seap ji ni̱ fa̱k a̱nwuat nggu ka a̱ lyen. A̱wot nggu mameang, a̱ ni̱ yei kuzang zon seap da̱ a̱lyoot ji. A̱ kwak ji a̱son a̱ ghwut ma̱ng a̱nji ta̱usa. 4 “Ka̱ a̱ ghwut ma̱ng zón seap gu ji ta̱usa, gu khwat a̱son, ji̱ khwi ngguu, mat ji̱ fi̱k a̱nwuat nggu ka. 5 Zón seap ji si̱ mi̱n khwi á̱nietchen bah. Ka̱ ji̱ li ngguu ji̱ ni̱ tyong gu, mat ji̱ lyen a̱nwuat á̱nietchen bah.” 6 Yesu ku tak ma̱ng a̱mba kidee jini. Da̱ mba, ba̱ fi̱k kyang hu nang gu lyiat a̱ni bah. 7 Yesu si̱ bu nyia̱, “Yok, n tak nyin a̱chuchuk; nung gwa ngyet a̱na̱nyuo zón seap ka. 8 A̱mgba̱m á̱niet ba̱ yet a̱son ka á̱ bai á̱ ghwon nung a̱ni; ba̱ yet á̱tang bya, ma̱ng á̱niet á̱tsaai, mat zón seap ji ku lak fa̱k mba hu. 9 Nung gwa ngyet a̱na̱nyuo ka. Konyan wa nwuo da̱ a̱na̱nyuo ka, a̱ na shya̱ san. A̱ na nwuai a̱ ghwut, a̱ shyat nkyang nang gu chat a̱ni. 10 A̱tang wu ni̱ bai da̱nian gu ka nyiin, gu hyaat. Nung, n bai n nwuak á̱niet ba a̱jhyem swuan, ba̱ shya̱ nji gba̱mgbam! 11 “Nung gwa ngyet a̱tan a̱tyu chok wu. A̱tan a̱tyu chok wu ni̱ nwuak swuan nggu ji da̱nian zón seap ji. 12 A̱tyu a̱ chok da̱nian á̱ ka tan gu zang a̱ni, a̱ yet a̱tsatsak a̱tyu chok wa bah. A̱wot di̱ zón seap ji, ji̱ yet si̱ nggu bah. Ka̱ a̱ li a̱bwu a̱yit ka chobai, a̱ ni̱ tyong a̱ kai zón seap ji a̱ ghwon, a̱bwu a̱yit ka ka̱ ya̱baat, a̱wot ka̱ seang á̱kum ka ka̱ mat a̱ fwuoi. 13 Mat, a̱ nyia̱ ta̱m a̱tan gu zang ja. Zón seap ji yet si̱ nggu ja bah. A̱wot a̱ chok ji shansham bah. 14 “Nung gwa ngyet a̱tan a̱tyu chok wu. N dyen zón seap nung ji, a̱wot ji̱ si̱ lyen nung. 15 Ma̱nang A̱tyia̱ nung wu ndyen nung a̱ni; nung mameang, n si̱ ndyen A̱tyia̱ nung wu. N shya̱ mi̱ fwuo n khwu da̱nian zón seap nung ji. 16 N byia̱ zón seap jhyáng di̱ ji̱ shya̱ ma̱ a̱sorong kani a̱ni bah. Zón seap a̱ja, ku yet ta hwa mbai ma̱ng a̱nji ma̱ a̱sorong kani. Ba̱ na fa̱k a̱nwuat nung ka, ba̱ yet a̱sorong a̱nyiung, a̱tyu chok a̱nyiung. 17 “Huhwa mbyia̱, A̱tyia̱ nung wu fa̱k da̱ nung. Mat, n shim n neap swuan nung ji, a̱wot n bu byia̱ chet mbwuok ma̱ng a̱nji. 18 Á̱ mbyia̱ a̱tyu a̱ na san swuan nung ji a̱ ghwon nung a̱ni bah. Nung gwa shim, n na neap swuan nung ji, a̱wot n doot n bu mbwuok ma̱ng a̱nji. Si̱ huni hwa yet kyang hu nang A̱tyia̱ nung wu ta̱m nung n nyia̱ a̱ni.” 19 A̱wot a̱lyiat nani si̱ tyia̱ a̱cha̱chet A̱yahudawa ba si̱ ta̱bat ya fwuang tsi̱tsak mba. 20 Á̱ghyang mba si̱ nyia̱, “A̱tyu a̱wa byia̱ a̱ka̱tuk ntswa! A̱ tyong jhyiip wa! Yihwa mbyia̱ nang nyi myiai a̱fufwuo fwuong kyang hu gu lyiat a̱ni?” 21 Á̱ghyang á̱niet mameang si̱ nyia̱, “Kaai, a̱tyu byia̱ a̱ka̱tuk ntswa si̱ mi̱n dyiat a̱ni bah! Á̱ na nyia̱ ni wa, a̱ka̱tuk ntswa a̱ nkhwuk á̱ghyi a̱tyu a̱fi̱fan?” 22 Jen A̱yet Khwuk A̱li Nwuat Za̱nang A̱gwaza mi̱ Urusha̱lima, si̱ kaat a̱ bai. 23 Jen a̱ja ku yet seam hwa. Yesu si̱ chong a̱ bwan mi̱ a̱junjung didyaat a̱ byia̱ a̱kup a̱ni, nang á̱ ngyei “Didyaat Solomon hu” a̱ni. 24 Huhwa a̱cha̱chet A̱yahudawa ba si̱ tyong nggu á̱ keang, ba̱ si̱ nyia̱ ma̱ng a̱nggu, “A̱zatuk kya a na ghwon zi̱t ma̱ a̱di̱dam? Tak ma̱ng a̱nzi̱t kpa̱sai a̱tsak a̱lyiat; nwan wa yet a̱tyu A̱gwaza kup gu tyok hu nang zi̱ fwuong a̱ni a?” 25 Yesu si̱ nwuak ba shim nyia̱, “N wa ka̱n tak ma̱ng a̱nyin. A̱mgba̱m ma̱ng a̱nia, nyi si̱ lak nwuak fwuo hu da̱ nung. Nkyang a̱ga̱de na nang n nyia̱ da̱ a̱lyoot A̱tyia̱ nung ka a̱ni, ni̱nia lyiat a̱kwonu nung ka, na̱ si̱ bu shei kyang hu nang n gyet a̱ni. 26 “A̱wot, nyi nwuak fwuo da̱ nung bah, mat nyi yet zón seap nung ja bah. 27 Zón seap nung ji ni̱ myiai a̱fufwuo ji̱ fa̱k a̱nwuat nung ka. N dyen mba. A̱wot ba̱ si̱ khwi nung. 28 N na nwuak mba swuan sang sangba̱p, a̱wot ba̱ na kwi bah. A̱yin si̱ mi̱n ta̱wap mba bwak nung bah. 29 A̱tyia̱ nung wu a̱ nwuak nung mba a̱ni, a̱ swak ma̱ng shi hu. A̱wot á̱ byia̱ a̱tyu á̱ na ta̱wap mba bwak A̱tyia̱ nung ka a̱ni bah. 30 Nung ma̱ng A̱tyia̱ nung wu, zi̱ yet kyang nyiung hwa.” 31 Huhwa A̱yahudawa ba si̱ bu kyiak nfang nang ba̱ na mmang nggu a̱ni. 32 A̱jawa, Yesu si̱ nyia̱ ma̱ng a̱mba, “N ka̱n nyia̱ a̱tan nta̱m ma̱ a̱di̱di̱t nang A̱tyia̱ nung wu nwuak nung n nyia̱ a̱ni a̱zaghyi nyin. Zang huhwa nang n nyia̱, nang nyi nchat mang nung ma̱ng nfang na?” 33 A̱yahudawa ba si̱ nwuak Yesu shim nyia̱, “Zi̱ na mang ang mat a̱tan nta̱m nang a nyia̱ a̱ni bah. A̱wot mat lihyat nang a nyia̱ A̱gwaza ndyo wa a̱ni! Nwan a yet a̱tyubishyi a̱ni, a kyiak a̱pyia̱ ang cha̱chaat ma̱ng A̱gwaza!” 34 Yesu si̱ nyia̱ ma̱ng a̱mba a̱ni, “Á̱ ku lyuut mi̱ doka nyin ji nyia̱, A̱gwaza nyia̱ ma̱ng a̱yaakwak a̱son á̱niet Isi̱rela á̱ghyang; ‘Nyi yet a̱yaagwaza bya.’ 35 A̱wot nyi lyen nang A̱lyiat A̱gwaza na nang á̱ lyuut a̱ni, ngyet a̱ka̱laa nia bah. Ka̱ A̱gwaza ngyei á̱niet ba ba̱ fa̱k a̱lyiat nggu na a̱ni, nyia̱ ba̱ yet ‘a̱yaagwaza’; 36 to, ka̱ nung nang A̱tyia̱ wu ja̱u, a̱wot a̱ si̱ bu ta̱m ndyo mi̱ swanta hu a̱ni, lihyat hwa nang n dyiat A̱gwaza wu ndyo nang n nyia̱, ‘N gyet Nggwon A̱gwaza kya’ a̱ni a? 37 “Ki̱ nta̱m A̱tyia̱ nung nia nang n nyia̱ bah, nyi yok nwuak fwuo da̱ nung bah. 38 A̱wot ki̱ nta̱m A̱tyia̱ nung nia nang n nyia̱, ku da̱ nyi nwuak fwuo da̱ nung bah; ku myim nyi nwuak a̱chuchuk di̱ nta̱m a̱ga̱de na; nyi ka lyen, nyi bu fi̱k nang A̱tyia̱ wu nshya̱ dundung ma̱ng a̱nung; nung mameang n si̱ shya̱ dundung ma̱ng a̱nggu.” 39 A̱wot ba̱ si̱ bu chat ta̱bat Yesu, a̱ si̱ bu ghyuai a̱ ghwut. 40 A̱wot Yesu si̱ bu bwuok lilyim, a̱ nat ma̱ a̱ma̱nyi fam a̱tak a̱ghyui Urdun, da̱ a̱vwuo nang Yoona ku nnyia̱ á̱niet ba ba̱ptisman ji a̱ni. A̱ si̱si̱ ya nswan a̱ja. 41 A̱wot á̱niet ma̱ a̱di̱di̱t si̱ bu bai da̱ a̱vwuo nggu. Ba̱ si̱ shei á̱ nchi̱ri̱ng nyia̱, “Yoona ku nyia̱ nkyang a̱ga̱de bah. Ma̱ng a̱nia, a̱mgba̱m nkyang nang gu ku lyiat tazwa a̱tyu kani a̱ni, na̱ yet a̱chuchuk wa!” 42 Da̱ a̱vwuo a̱kya, á̱niet ma̱ a̱di̱di̱t si̱ nwuak fwuo di̱ Yesu.
1 A̱tyok a̱ghyang ku nshya̱, á̱ si̱ ngyei nggu Laaza̱rut. A̱ ku swan ma̱ a̱bada̱dei a̱keang nang á̱ ngyei Ba̱ta̱ni a̱ni. A̱ si̱ nyia̱ ma̱ng zwan. Ba̱ta̱ni ku yet a̱keang á̱niet Ma̱ryamu ma̱ng a̱na̱nyiuk nggu wu Ma̱rta. 2 Laaza̱rut, a̱ ku nyia̱ ma̱ng zwan ji a̱ni, a̱ ku yet a̱na̱nyiuk Ma̱ryamu wa. (Ma̱ryamu wuni wa, na kwon Yesu a̱sham a̱myia̱ ka, ka̱ nyui turare a̱ni; a̱wot a̱ lyang a̱ti̱tak Yesu ba ma̱ng pyia̱ nggu hu.) 3 Á̱na̱nyiuk a̱nap Laaza̱rut ba si̱ ta̱m da̱ a̱vwuo Yesu nyia̱, “A̱tyoli, a̱kpa̱ndang nang a fa̱k da̱ nggu a̱ni, a̱ fa̱k nyinyang bah.” 4 Nang Yesu nfa̱k a̱nia a̱ni, huhwa gu nyia̱, “Zwan ji nyia̱ Laaza̱rut a̱ni, zwan a̱khwu ja bah. Ji̱ na bai ma̱ng A̱gwaza wa shi ma̱ng Nggwon ka.” 5 Yesu ku fa̱k da̱ Ma̱rta ba̱t mbeang a̱na̱nyiuk nggu wu Ma̱ryamu ma̱ng Laaza̱rut. 6 A̱mgba̱m ma̱ng a̱nia, nang Yesu nfa̱k nkhang zwan Laaza̱rut na a̱ni, a̱ si̱ mbeang mam feang di̱ tyan nang nggu nshya̱ a̱ni. 7 Gu si̱ nyia̱ ma̱ng mman ta̱m nggu na a̱ni, “Nyi bai, zi̱ bwuok nat fam a̱byin Yahudiya!” 8 Mman ta̱m nggu na si̱ nyia̱, “A̱tyu tyiet, á̱ ka̱n dabeang bah, mi̱ mam nani nia nang a̱cha̱chet A̱yahudawa ba nchat ba̱ mang ang ma̱ng nfang. Huhwa a bu chat zi̱ bwuok nat a̱ja a?” 9 Yesu si̱ nwuak ba shim nyia̱, “Awa swak ma̱ a̱feang wa nang mam nyiung byia̱ baa? To, konyan wa chong a̱ta̱mam a̱ni, a̱ si̱ mi̱n tuk tak bah. Mat a̱ nwuan shansham mat sai swanta hu. 10 A̱wot a̱tyu a̱ chong a̱tyetuk a̱ni, a̱ na tuk tak, mat a̱vwuo ka byia̱ lyin.” 11 Nang Yesu ntyak a̱lyiat nani a̱ni, a̱jawa gu nyia̱ ma̱ng a̱mba, “Laaza̱rut, a̱kpa̱ndang nzi̱t wu kai nda. Mat a̱nia, n naat n shyip gu mi̱ nda na.” 12 Huhwa mman ta̱m na si̱ nyia̱, “Ki̱ nda nia nang gu kai, a̱ na shyip!” 13 Yesu ku fa Laaza̱rut khwu wa. A̱wot mba mman ta̱m nggu na, ba̱ ku fi̱k kyang hu gu lyiat a̱ni bah. Ba̱ ku fa nyia̱ Laaza̱rut kai nda nia, da̱nian gu ka fwung. 14 Huhwa Yesu si̱ tak ma̱ng a̱mba kpa̱sai nyia̱, “Laaza̱rut khwu. 15 A̱wot, n byia̱ a̱sai a̱lyia̱ da̱nian nyin, nang n ku nshya̱ da̱ a̱vwuo kya a̱ni bah; da̱nian nyi ka nwuak fwuo da̱ nung. A̱mgba̱m ma̱ng a̱nia, nyi bai zi̱ nat da̱ a̱vwuo nggu ka.” 16 A̱jawa nang Toma, a̱ byia̱ a̱lyoot nggan nang á̱ ngyei “A̱hyaai ka” a̱ni, si̱ nyia̱ ma̱ng á̱kum mman ta̱m ka a̱ni, “Nzi̱t mameang, zi̱t nat zi̱ kwi dundung ma̱ng a̱nggu!” 17 Nang Yesu si̱ nwuo ma̱ a̱keang Laaza̱rut ka a̱ni, a̱ si̱ shya̱ nang á̱ wa ka̱n niat gu; a̱ si̱ nyia̱ mam naai ma̱ a̱bi ka. 18 (A̱keang Ba̱ta̱ni ka shya̱ kpa̱mkpaan ma̱ng Urusha̱lima, ku tat met a̱tat bah). 19 A̱yahudawa ma̱ a̱di̱di̱t ku bai ba̱ byiat Ma̱rta ma̱ng Ma̱ryamu á̱na̱nyiuk mba wu a̱khwu ka. 20 Nang Ma̱rta nfa̱k nyia̱ Yesu chobai a̱ni, a̱ si̱ doot a̱ si̱ nat a̱ san ngguu, a̱ bu tyia̱ nggu a̱la̱baa. A̱ si̱ ghwon Ma̱ryamu a̱mali. 21 Huhwa Ma̱rta si̱ nyia̱ ma̱ng Yesu a̱ni, “A̱tyoli, ka̱ a wa ku nshya̱, si̱ a̱na̱nyiuk nung wu khwu bah! 22 A̱mgba̱m ma̱ng a̱nia, n dyen A̱gwaza doot a̱ nang ang kuzang kyang nang a lyip gu a̱ni.” 23 Yesu si̱ nyia̱ ma̱ng a̱nggu, “A̱na̱nyiuk ang wu na shyip ma̱ng swuan.” 24 Ma̱rta si̱ nwuak gu shim nyia̱, “N dyen nang gu bye doot ma̱ng swuan a̱tuk mam fak shi̱ri̱ya ngaan ka.” 25 Yesu si̱ nyia̱ ma̱ng a̱nggu a̱ni, “Nung gwa ngyet a̱tyu ya̱ngam á̱niet ba̱ ka̱n kwi a̱ni ma̱ng swuan. Nung gwa si̱ bu ngyet swuan ji. A̱tyu a̱ nwuak fwuo da̱ nung a̱ni, a̱ na shya̱ swuan, ku nang gu khwu. 26 A̱tyu a̱ shya̱ a̱chet, a̱ si̱ bu nwuak fwuo da̱ nung a̱ni; a̱ na khwu bah, ba̱ng si̱ nat sang sangba̱p. A nwuak a̱chuchuk a?” 27 A̱jawa Ma̱rta si̱ nwuak Yesu shim nyia̱, “Ii, A̱tyoli, n nwuak a̱chuchuk nwan wa yet Kristi a̱tyu nang A̱gwaza kup gu tyok nang zi̱ fwuong a̱ni; Nggwon A̱gwaza ka nang á̱ ku sak ka̱ na bai mi̱ swanta hu a̱ni.” 28 Nang Ma̱rta ntyak a̱lyiat na ma̱ng Yesu a̱ni, a̱ si̱ doot a̱ si̱ nat. A̱ si̱si̱ yei a̱na̱nyiuk nggu wu Ma̱ryamu nyia̱, “A̱tyu tyiet bai, a̱ chat li ang!” 29 Nang Ma̱ryamu nfa̱k a̱nia a̱ni, a̱ si̱ kin tat a̱ doot ma a̱nggang, a̱ si̱ nat da̱ a̱vwuo Yesu. 30 Ba̱ng ba̱ ntat jen a̱ja, Yesu ka̱n nwuo a̱da̱dei a̱keang Ba̱ta̱ni wu bah. Nang gu ni̱ nshya̱ di̱n tyan nang Ma̱rta ba̱ myim ma̱ng a̱nggu a̱ni. 31 Nang A̱yahudawa ba̱ shya̱ a̱mali ka dundung ma̱ng Ma̱ryamu á̱ byiat gu a̱khwu ka a̱ni, ndi nang gu ndoot ma a̱nggang; ba̱ si̱ ma ndoot ba̱ si̱ khwi ngguu. Ba̱ ku fa nyia̱ a̱ naat ma̱ a̱bi kikya, gu si̱ twei a̱ja. 32 Nang Ma̱ryamu si̱ ntat tyan ji Yesu nshya̱ a̱ni, nang gu ndi Yesu a̱ni; a̱ si̱ ka̱n ta̱bwak a̱zaghyi nggu. A̱ si̱ nyia̱ ma̱ng a̱nggu, “A̱tyoli, ka̱ a wa ku nshya̱, si̱ a̱na̱nyiuk nung wu ku khwu bah!” 33 Nang Yesu ndi Ma̱ryamu twei, a̱ si̱ bu li nang A̱yahudawa ba̱ shya̱ dundung ma̱ng a̱nggu twei a̱ni; fwuo hu si̱ byian ba̱t. 34 Huhwa gu si̱ nyia̱ ma̱ng a̱mba, “A̱ji wa nang nyi mmyiai ngguu?” Ba̱ si̱ nyia̱ ma̱ng a̱nggu a̱ni, “A̱tyoli, bai a lii!” 35 A̱jawa Yesu si̱ koot ndang a̱ghyi. 36 Huhwa si̱ mbyia̱ A̱yahudawa ba si̱ nyia̱, “Nyi li si̱sak ji nang gu nchat gu a̱ni!” 37 Bi̱ri̱ng ma̱ng a̱nia, A̱yahudawa á̱ghyang si̱ nyia̱ ma̱ng á̱ghyang mba a̱ni, “A̱tyu a̱ ku teak a̱tyu a̱fi̱fan wu á̱ghyi ba a̱ni, ka̱ doot a̱ vwuong a̱tyu wuni a̱khwu ka baa?” 38 Nang Yesu ni̱ nshya̱ ma̱ng byian fwuo ba̱t, a̱ si̱ nat ma̱ a̱bi Laaza̱rut ka. A̱bi Laaza̱rut ka, ku yet a̱ghwop a̱fang kya. A̱wot á̱ si̱ kyiak a̱fang a̱ghyang, á̱ si̱ nkup a̱nu a̱bi ka. 39 A̱jawa Yesu si̱ nyia̱ ma̱ng a̱mba, “Nyi yuut a̱fang ka, sak zan!” A̱jawa Ma̱rta a̱na̱nyiuk a̱tyo a̱ khwu a̱ni si̱ nyia̱, “A̱tyoli, di̱ yong huni mam naai hwa hu nang gu nkhwu á̱ si̱ niat gu a̱ni. A̱ na nyui!” 40 Yesu si̱ nyia̱ ma̱ng Ma̱rta, “Wa n gyei n nyia̱, ka̱ a nwuak fwuo da̱ nung, a na li shi A̱gwaza hu a?” 41 Ba̱ si̱ yuut a̱fang ka á̱ sak zan. Yesu si̱ gba̱t á̱ghyi Ma A̱gwaza tswazwa. A̱ si̱ nyia̱, “Nwan A̱tyia̱ nung, n gwai ma̱ng a̱nwan nang a mmyiai a̱fufwuo a si̱ fa̱k nung a̱ni. 42 Neet gbangbang, n za ma ndyen kuzang jen a fwuong nung. A̱wot n hyia̱ á̱si̱ nani da̱nian á̱niet ba̱ yong a̱ji a̱ni, ba̱ ka nwuak a̱chuchuk nang nwan wa nta̱m nung mi̱ swanta hu.” 43 Nang gu nhyia̱ a̱nia a̱ni, a̱ si̱ kin ta̱ngam a̱nwuat nggu ka mi̱n chet. A̱ si̱ yorong, “Laaza̱rut, ghwut!” 44 A̱jawa nang a̱tyo a̱ khwu wu si̱ kin ghwut, nang a̱ti̱tak nggu ba ma̱ng bwak na shya̱ di̱ gat ma̱ng kikyak; ma a̱nia wa a̱ghyi nggu ba, a̱ si̱ gat ma̱ng kikyak nang á̱ nniat nkwom na a̱ni. Yesu si̱ nyia̱ ma̱ng a̱mba, “Nyi byii̱k gu ghwon, gu nkat.” 45 Mat a̱nia A̱yahudawa ma̱ a̱di̱di̱t ba̱ ku bai byiat Ma̱ryamu a̱khwu Laaza̱rut ka a̱ni, nang ba̱ ku ndi kyang hu nang Yesu nyia̱ a̱ni, ba̱ si̱ nwuak fwuo da̱ nggu! 46 A̱wot á̱ghyang si̱ nat da̱ a̱vwuo A̱fa̱risawa. Ba̱ si̱ hyia̱ ma̱ng a̱mba kyang hu nang Yesu nyia̱ a̱ni. 47 Mat a̱nia, a̱cha̱chet a̱yaapris ba mbeang A̱fa̱risawa si̱ yorong a̱gba̱ndang a̱tung sot a̱cha̱chet A̱yahudawa wu. Ba̱ si̱ lyip á̱ghyang mba nyia̱, “Yihwa nang zi̱ na nyia̱ la?! Di, a̱tyu wuni nyian nkyang a̱ga̱de ma̱ a̱di̱di̱t! 48 Ka̱ zi̱ kai nggu ghwon nang gu nyian nkyang nani, a̱mgba̱m á̱niet ba na nwuak fwuo da̱ nggu! A̱wot A̱romawa ba na bai, ba̱ seang a̱byin nzi̱t ka, mbeang A̱li Nwuat Za̱nang A̱gwaza nzi̱t ka!” 49 A̱jawa nang a̱tyo nyiung ma̱ a̱mba, á̱ ku ngyei nggu Ka̱yafat (nggu wa ku yet a̱gba̱ndang pris wu a̱lyia̱ a̱kya); a̱ si̱ nyia̱ ma̱ng a̱mba, “Nyin, nyi lyen kyang bah za̱m! 50 Da̱ nyin, nyi nyia̱ a̱di̱dam bah. Ku na lan a̱tyo nyiung a̱khwu da̱nian á̱niet ma̱ a̱di̱di̱t, nang á̱ na mbwuk a̱mgba̱m a̱byin a̱ni!” 51 A̱lyiat nani nang Ka̱yafat ku lyiat a̱ni, na̱ ku yet a̱di̱dam a̱pyia̱ nggu wa bah. Kyang hu ku mbyia̱ a̱ni; nang nggu wa ngyet a̱gba̱ndang pris wu ma̱ a̱lyia̱ a̱kya, a̱ ku hyia̱ kyang ku na bai á̱zanson kya a̱ni; nang Yesu na nkhwu da̱nian á̱niet A̱yahudawa a̱ni. 52 (A̱wot A̱yahudawa bya ma̱nyin ba Yesu na khwu da̱nian ba bah. A̱ na khwu da̱nian a̱ ka tung a̱mgba̱m á̱niet ba̱ yet mman A̱gwaza na ba̱ kai swanta hu a̱ni, ba̱ ka mun á̱pyia̱ ba̱ yet kyang nyiung.) 53 Neet a̱tuk a̱kya, ba̱ si̱ la̱p a̱nu di̱ si̱sak ji nang ba̱ na nhyat Yesu a̱ni. 54 Huhwa si̱ mbyia̱ Yesu si̱ bu chong kpa̱sai ma̱ a̱byin A̱yahudawa ka bah. A̱ si̱ ghwon a̱byin a̱kya, a̱ si̱ nat ma̱ a̱byin ka̱ shya̱ kpa̱mkpaan mi̱ tswa a̱yit a̱ni, A̱ ku si̱ nwuo ma̱ a̱keang nang á̱ ngyei Ifremu a̱ni. A̱jawa gu si̱ nswan dundung ma̱ng mman ta̱m nggu na. 55 Nang A̱yet Ghwut Mman Isi̱rela mi̱ Khwo wu ku mbai kpa̱mkpaan a̱ni, á̱niet ma̱ a̱di̱di̱t si̱ ghwut á̱ neet ma̱ bachyuang a̱ka̱keang. Ba̱ si̱ nat Urusha̱lima da̱nian ba̱ ka nyia̱ taada kwi vam hu á̱ nfwuong jen Song A̱yet ji. 56 Ba̱ si̱ chat ba̱ ta̱bat Yesu. Ba̱ si̱ yong mi̱ didyaat A̱li Nwuat Za̱nang A̱gwaza hu. Ba̱ si̱ lyi̱ri̱m á̱ghyang, nyia̱, “Yihwa nang nyi li? A̱ na bai A̱yet wu a?” 57 Mat nang a̱gba̱ndang pris wu ma̱ng A̱fa̱risawa ba ku mi̱ nnwuak doka nyia̱; konyan wa lyen a̱vwuo ka nang Yesu nshya̱ a̱ni, gu bai a̱ hyia̱, da̱nian ba̱ ka ta̱bat guu.
1 Mam a̱taa nia bwat á̱ nwuo A̱yet Ghwut Mman Isi̱rela mi̱ Khwo hu, Yesu si̱ doot a̱ si̱ nat Ba̱ta̱ni di̱ tyan nang Laaza̱rut nshya̱ a̱ni. Nggu wa yet a̱tyu a̱ ku khwu, á̱ si̱ niat; a̱wot Yesu si̱ shyip gu ma̱ng swuan ma̱ á̱niet ba̱ ka̱n kwi a̱ni. 2 Á̱ ku wan gu kyayak a̱tyetuk a̱kya, nang gu na ya a̱ nkwai a̱ni. Ma̱rta wa ku ka̱u kyayak hu. Laaza̱rut si̱ ya kyayak hu dundung ma̱ng Yesu. 3 Ma̱ryamu si̱ doot, a̱ si̱ kyiak sha̱p a̱myia̱ ji byia̱ swam turare a̱ni. A̱wot na̱ si̱ bu byia̱ kurum ba̱t, á̱ ku nyia̱ na ma̱ng nar wa. A̱ si̱ koot a̱sham a̱myia̱ ka da̱ a̱ti̱tak Yesu ba. A̱wot a̱ si̱ fwut ma̱ng pyia̱ nggu hu. Swam a̱sham a̱myia̱ a̱hwa si̱ kai a̱li ka a̱mgba̱m. 4 A̱wot a̱tyo nyiung mami mman ta̱m Yesu na, á̱ ku ngyei nggu Yahuda Iska̱riyoti, nggu wa ku bwuk ma̱ng Yesu, a̱ si̱ nyia̱, 5 “Yihwa mbyia̱ á̱ ndak lyap a̱myia̱ nani, á̱ si̱ ka̱u á̱kunak na kurum hu?! Kurum a̱myia̱ hu tat si̱ nta̱m a̱lyia̱ a̱nyiung!” 6 Yahuda ku hyia̱ a̱lyiat nani mat nang gu nchat á̱kunak ni̱nia a̱ni bah; a̱wot mat nang gu ngyet a̱tang wa a̱ni. Nggu wa ku yet a̱tyu ba̱ng gumaat kurum ji. A̱ ku nyiin a̱ tsa a̱ bu mbwoi pinchee mami. 7 Ma̱ng a̱nia, Yesu si̱ nyia̱ ma̱ng Yahuda a̱ni, “Yok a̱byii̱k a̱wa shonshyon! A̱ sak kyang hu nang gu byia̱ a̱ni, da̱nian mam nang n na nkhwu á̱ niat nung a̱ni. 8 Á̱kunak na shya̱ dundung ma̱ng a̱nyin kuzang jen. A̱wot nung n na shya̱ dundung ma̱ng a̱nyin kuzang jen bah.” 9 Nang A̱yahudawa ma̱ a̱di̱di̱t ku nfa̱k nkhang nyia̱ Yesu shya̱ ma̱ a̱keang Ba̱ta̱ni ka a̱ni; ba̱ si̱ ghwut ba̱ si̱ bai, da̱nian ba̱ ka li Yesu wa ma̱nyin gu bah; ba̱ ku chat ba̱ bu ndi Laaza̱rut wa; a̱tyu nang Yesu ku ta̱ngam ma̱ng swuan ma̱ á̱niet ba̱ ka̱n kwi a̱ni. 10 A̱jawa, a̱cha̱chet a̱yaapris ba si̱ la̱p a̱nu nyia̱ ba̱ na hyat Laaza̱rut mameang. 11 Mat kyang hu ku shya̱ Laaza̱rut a̱ni, huhwa si̱ mbyia̱ A̱yahudawa ma̱ a̱di̱di̱t ku ndak khwi a̱yaapris ba, ba̱ si̱ nwuak fwuo di̱ Yesu. 12 Da̱ a̱tsotson tat ka, á̱niet ma̱ a̱di̱di̱t ba̱ ku bai song A̱yet Ghwut Mman Isi̱rela mi̱ Khwo hu a̱ni; nang ba̱ ku nfa̱k nyia̱ Yesu shya̱ di̱n vak chobai Urusha̱lima a̱ni; 13 ba̱ si̱ kin sam a̱kyikyo a̱ka̱kwon tswan. Ba̱ si̱ ghwut á̱ nat ba̱ myim ma̱ng a̱nggu, ba̱ san guu. Ba̱ si̱ kan ta̱ngam nwunwuat hu mi̱ chet nyia̱, “Dyep A̱gwaza! Dyep yet si̱ A̱tyu a̱ chobai mami a̱lyoot A̱gwaza a̱ni! A̱gwaza, gu nang A̱gwam Isi̱rela wu a̱li̱ba̱rka!” 14 Yesu ku shya̱ a̱banggwon a̱ka̱za̱nki kya, a̱ si̱ nyeak. Ku si̱ bai ma̱ cha̱chaat ma̱ng kyang hu nang á̱ ku lyuut ma̱ A̱lyiat A̱gwaza na, nyia̱, 15 “Nyi yok fa̱k a̱wun bah; nyin á̱niet Urusha̱lima! Di A̱gwam nyin wu wa chobai, a̱ nyeak a̱banggwon a̱ka̱za̱nki!” 16 Da̱ a̱chak a̱kya mman ta̱m Yesu na ku fi̱k kyang hu ku bai a̱ni bah. Jen nang Yesu ku ba̱ ndoot á̱ si̱ nwuak gu a̱kyenkyai shi a̱ni; jija mman ta̱m na ku njhyung nang á̱ ndyuut nkyang nani tazwa nggu. A̱wot nkyang na si̱ bai ma̱ cha̱chaat da̱ a̱nu ka nang á̱ ndyuut na a̱ni. 17 Á̱kpa á̱niet ba̱ ku shya̱ dundung ma̱ng Yesu di̱n jen nang gu ku ngyorong Laaza̱rut a̱ si̱ ghwut ma̱ a̱bi ka a̱ni; a̱wot a̱ si̱ bu ta̱ngam guu ma̱ng swuan ma̱ á̱niet ba̱ ka̱n kwi a̱ni; bibya ku yong mi̱ di̱ shei á̱niet ba kpa̱sai tazwa kyang hu nang Yesu ku nyia̱ a̱ni. 18 Á̱niet ma̱ a̱di̱di̱t ku nat, ba̱ san Yesu mat ba̱ ku fa̱k nkhang kyang a̱ga̱de nang gu nyia̱ a̱ni. 19 A̱jawa A̱fa̱risawa ba si̱ lyiat ma̱ng á̱ghyang mba nyia̱, “Nyi nwuan nyi lii, zi̱ si̱ mi̱n mak swuo chet a̱tyu wuni bah! A̱ swak chet zi̱t ba̱t. Nyi li si̱sak nang swanta hu ntyong a̱ khwi nggu a̱ni!” 20 Mami á̱niet ba̱ ku bai song A̱yet Ghwut Mman Isi̱rela mi̱ Khwo hu, a̱wot ba̱ bu kyuak ntong a̱zaghyi A̱gwaza a̱ni; A̱helenawa ku nshya̱. 21 Ba̱ si̱ bai da̱ a̱vwuo Filibut, a̱ ku neet ma̱ a̱keang Ba̱tsaida ka̱ shya̱ mi̱ fam a̱byin Ga̱lili a̱ni. Ba̱ si̱ nyia̱ ma̱ng a̱nggu a̱ni, “A̱tyoli, zi̱ chat zi̱ bwoi nkhang ma̱ng Yesu.” 22 Filibut si̱ nat, a̱ si̱ shya̱ Anda̱rawut. Mba a̱feang, ba̱ si̱ nat dundung, ba̱ si̱si̱ hyia̱ ma̱ng Yesu ta̱m ji. 23 Huhwa Yesu si̱ nwuak ba shim nyia̱, “Jen nyia̱ nang á̱ na nnwuak Nggwon A̱tyubishyi a̱kyenkyai shi a̱ni. 24 A̱tsatsak a̱lyiat wa za̱m nang n shei nyin; ka̱ á̱ ti̱p tswa nswaat a̱byin bah, ji̱ na swan jhyung ja ma̱nyin ji. Ki̱ ji khwu a̱byin ka, ji̱ na saat ba̱t. Ji̱ tyei tswá ma̱ a̱di̱di̱t. 25 “Konyan wa chat swuan gu, a̱ na nwai nji. A̱tyu a̱ ma ndak swuan gu ji mi̱ swanta huni a̱ni, a̱ na shya̱ swuan sang sangba̱p. 26 Konyan wa nyia̱ nung ta̱m a̱ni, ku yet ta hwa gu khwi nung. Mat a̱mgba̱m a̱vwuo ka nang n shya̱ a̱ni, a̱ja wa nang a̱khwo nung wu na nshya̱ dundung ma̱ng a̱nung. A̱tyia̱ nung wu mameang, na nwuak a̱tyu a̱ nyia̱ nung ta̱m a̱ni shi.” 27 “Di̱ yong huni fwuo nung hu byian ba̱t! Yihwa nang n na hyia̱? N hyia̱ nyia̱, ‘A̱tyia̱, ti̱n jen jini ji̱p nung ndyo a?’ Kaai, n na hyia̱ a̱nia bah. Mat kyang ku bai ma̱ng a̱nung a̱ni, huhwa hu; n swuo a̱bung di̱n jen jini. 28 A̱tyia̱, nwuak a̱lyoot ang ka shi!” A̱nwuat si̱ kin ghwut a̱ neet Ma A̱gwaza tswazwa nyia̱, “N mi̱ nkai nwuak a̱lyoot nung ka shi. A̱wot n bu na nwuak ka shi hu mbeang!” 29 Á̱kpa á̱niet ba̱ ku yong a̱ja ba̱ si̱ fa̱k a̱nwuat ka a̱ni; á̱ghyang si̱ nyia̱, “A̱gbai nza wa a̱wa!” Á̱ghyang si̱ ma nyia̱, “A̱ta̱m tswa A̱gwaza wa kaat ma̱ng a̱nggu!” 30 A̱jawa Yesu si̱ nyia̱ ma̱ng a̱mba, “A̱nwuat ka nang nyi fa̱k fa̱k huni a̱ni, ka̱ bai da̱nian kpangti̱n nyin ja; da̱ nyia̱ nung gwa bah. 31 Ma̱nini kya nang á̱ na nyia̱ á̱niet mi̱ swanta ba shi̱ri̱ya, a̱wot á̱ bu vwuong A̱ta̱nyeang swanta kani. 32 Jen nang á̱ bye nta̱ngam nung ma̱ng swuan ma̱ á̱niet ba̱ ka̱n kwi a̱ni, n bye nkhwat a̱mgba̱m á̱niet ba bai ndyo da̱ a̱vwuo nung.” 33 Yesu ku hyia̱ a̱lyiat nani da̱nian gu ka tak ma̱ng a̱mba tangka̱i a̱khwu nang gu na khwu wa a̱ni. 34 Huhwa á̱kpa á̱niet ka si̱ nyia̱ ma̱ng Yesu a̱ni, “Doka nzi̱t ji ma̱ng A̱lyiat A̱gwaza na tak ma̱ng a̱nzi̱t nyia̱; Kristi a̱tyu nang zi̱ fwuong a̱ni, na swan ba̱ng si̱ nat sang sangba̱p. Yihwa mbyia̱ nang a na nnyia̱ hu yet ta hwa á̱ ta̱ngam Nggwon A̱tyubishyi? A̱nyan wa yet Nggwon A̱tyubishyi a̱kya?” 35 Yesu si̱ nyia̱ ma̱ng a̱mba, “Sai hu shya̱ dundung ma̱ng a̱nyin da̱ a̱bada̱dei njen. Nyi chong di̱n jen ji nang sai hu nshya̱ dundung ma̱ nyin a̱ni, kalak lyin ku shya̱ nyin. Mat a̱tyu a̱ chong mi̱ ndyin a̱ni, a̱ lyen a̱vwuo ka nang gu nchong a̱ ntyei a̱ni bah. 36 Nyi nwuak a̱chuchuk di̱ sai hu, neet nang nyi ni̱ shya̱ ndung ma̱ng a̱nhu. Da̱nian nyin, nyi ka yet mman a̱tyu a̱ yet sai hu a̱ni.” Nang Yesu ntyak a̱lyiat nani a̱ni, a̱ si̱ nat a̱ si̱ ta̱kup. 37 A̱mgba̱m ma̱ng a̱cha̱chet nkyang a̱ga̱de ma̱ a̱di̱di̱t nang Yesu ku nyia̱ a̱zaghyi A̱yahudawa ba a̱ni, ba̱ si̱ nwuak fwuo da̱ nggu bah. 38 Hu ku bai ma̱ cha̱chaat nang Ishaya a̱ta̱m a̱kwonu A̱gwaza wu nshei á̱zanson a̱ni, nyia̱, “A̱tyoli, a̱nyan wa nwuak a̱chuchuk da̱ a̱lyiat nzi̱t na? Da̱ a̱vwuo a̱nyan kya nang á̱ ntak chet Tyok A̱gwaza hu kpa̱sai?” 39 Huhwa si̱ mbyia̱ nwuak fwuo hu si̱ nkaat mbaa, mat Ishaya bu hyia̱ nyia̱, 40 “A̱gwaza ku koot mba a̱fi̱fan. A̱ si̱ bu tyia̱ nfwuo mba na si̱ khwu. Kalak ba̱ du li ma̱ng á̱ghyi mba ba, kalak ba̱ du fi̱k a̱lyiat nggu na mi̱ nfwuo mba na. Ka̱ ku li a̱nia, kalak ba̱ du bwuok á̱ bai da̱ a̱vwuo nung, n choot baa.” 41 Ishaya ku hyia̱ a̱lyiat nani á̱ nfa Yesu, mat a̱ ku mi̱ ndi a̱kyenkyai shi Kristi wu, a̱wot a̱ si̱ mbwoi á̱niet ba nkhang. 42 A̱mgba̱m ma̱ng a̱nia, á̱niet ma̱ a̱di̱di̱t si̱ mun nwuak fwuo di̱ Yesu. Mbeang a̱cha̱chet a̱yaakwak a̱son mba ba, ba̱ ku mun a̱ nwuak fwuo di̱ Yesu. A̱wot mat si̱sak nang ba̱ ku nfwuong a̱wun A̱fa̱risawa ba a̱ni; ba̱ ku ghwut kpa̱sai ba̱ si̱ tak nang ba̱ nnwuak fwuo bah; nyia̱ kalak á̱ vwuong mba á̱ ghwut ndyo ma̱ á̱tutu a̱tung A̱yahudawa ba. 43 Mat ba̱ ku chat dyep da̱ a̱vwuo á̱nietbishyi a̱ swak si̱sak nang A̱gwaza na ndyep mba a̱ni. 44 A̱jawa Yesu si̱ ngeap a̱nu. A̱ si̱ hyia̱ ma̱ng a̱gba̱ndang a̱nwuat nyia̱, “Konyan wa nwuak fwuo da̱ nung a̱ni, da̱ nung wa nang gu nnwuak fwuo hu bah; a̱ nwuak fwuo da̱ a̱tyu a̱ ta̱m nung wa a̱ni! 45 Konyan wa nwuan nung a̱ni, a̱ nwuan A̱tyu a̱ ta̱m nung wa a̱ni. 46 N ku mbai mi̱ swanta hu. N si̱ ndi nang sai a̱ni, da̱nian konyan wa nwuak fwuo da̱ nung, a̱ si̱ mi̱n swan mi̱ ndyin bah. 47 “Konyan wa fa̱k tyiet nung hu, da̱ nggu a̱ khwi hu a̱ni bah, nung gwa na nyia̱ gu shi̱ri̱ya ji bah. Mat n ku mbai n nyia̱ swanta hu shi̱ri̱ya ja bah. N ku mbai wa n san a̱mgba̱m á̱niet ba mi̱ swanta hu. 48 “A̱tyu a̱ lak nung, a̱wot a̱ si̱ lak san a̱lyiat nung na a̱ni; a̱tyu a̱wa byia̱ a̱tyu á̱ na nyia̱ gu shi̱ri̱ya a̱ni. A̱lyiat na nang n dyiat a̱ni, ni̱nia na faat gu shi̱ri̱ya ji a̱tuk mam ngaan ka. 49 “Nkyang nang n tyiet a̱ni, na̱ neet da̱ a̱vwuo nung kya bah. A̱tyia̱ nung wu wa a̱ ta̱m nung a̱ni; nggu wa tak nung a̱lyiat nang n dyiat a̱ni. 50 A̱wot n bu ndyen, a̱lyiat nggu na nwuat swuan sang sangba̱p. Mat a̱nia, a̱mgba̱m kyang nang n hyia̱ a̱ni, n hyia̱ nhu ma̱ cha̱chaat ma̱ng kyang hu nang A̱tyia̱ nung tak ma̱ng a̱nung n dyiat a̱ni.”
1 Neet nang jen song A̱yet Ghwut Mman Isi̱rela mi̱ Khwo ji ka̱ mbai bah, Yesu ku mi̱ ndyen nang jen gu na nghwon swanta huni gu bwuok a̱ nat da̱ a̱vwuo A̱tyia̱ nggu. Mat nang Yesu nchat á̱niet nggu ba, ba̱ shya̱ mi̱ swanta hu a̱ni. A̱wot a̱ si̱ bu tak mba tangka̱i a̱jhyem chat nang gu byia̱ da̱nian mba a̱ni. 2 Di̱n jen nang Yesu ma̱ng mman ta̱m nggu na nshya̱ di̱ ya kyayak a̱tyetuk a̱ni, nang A̱ta̱nyeang ka mameang ka̱n tyia̱ mi̱ fwuo Yahuda Iska̱riyoti, a̱fai Siman, nggu wa ku yet a̱bang a̱byin wu; gu bwuk ma̱ng Yesu. 3 Yesu ku lyen nang A̱tyia̱ nggu wu ntyia̱ kuzang kyang bwak gu. A̱ si̱ bu lyen nang gu nneet da̱ a̱vwuo A̱gwaza, a̱wot a̱ bu na bwuok a̱ nat da̱ a̱vwuo A̱gwaza kya. 4 Di̱n jen nang ba̱ nshya̱ di̱ ya kyayak hu a̱ni, Yesu si̱ kin doot a̱ yong. A̱ si̱ khwuk a̱toot nang gu kup a̱ni. A̱ si̱ ghwon a̱si̱ mami wu, a̱ si̱ kyiak ta̱wul, a̱ si̱ gaat ndyang. 5 A̱ si̱ bwuo a̱sa̱khwot a̱ si̱ koot mi̱ chi̱chya̱ ntswam. A̱ si̱ kin nwuo khwi mman ta̱m nggu na a̱ti̱tak. A̱ si̱ tyia̱ ta̱wul nang gu la̱p a̱ kaat ndyang ka a̱ni, a̱ si̱ nshwa̱i mba a̱ti̱tak ba. 6 Nang Yesu ntat da̱ a̱vwuo Bitut a̱ni, a̱jawa nang Bitut nnyia̱ ma̱ng a̱nggu, “A̱tyoli nung, nwan wa na kwi nung a̱ti̱tak baa?!” 7 A̱jawa Yesu si̱ nwuak gu shim nyia̱, “Ma̱ninika, a si̱ mi̱n dyen kyang hu nang n nyia̱ a̱ni bah. A̱wot a bye fi̱k hu di̱n jen jhyang.” 8 A̱jawa Bitut si̱ nyia̱ ma̱ng Yesu a̱ni, “Kaai A̱tyoli, n si̱ mi̱n shim a mak khwi nung a̱ti̱tak bah!” Yesu si̱ ma nyia̱, “To, ka̱ a shim n si̱ nkwi ang a̱ti̱tak bah, a tyak a̱kwonu ang da̱ a̱vwuo nung; a byia̱ kyang ma̱ng a̱nung bah.” 9 Bitut si̱ nyia̱, “A̱tyoli nung, ka̱ a̱nia wa, ma̱ a̱ti̱tak bya ma̱nyin ba nang a na kwi bah. N chat a mun kwi mbwak nung na ma̱ng a̱pyia̱ nung ka mbeang!” 10 Yesu si̱ bu nyia̱, “Ka̱ a̱yin ka̱n swuo, vam nggu hu ni̱ tyia̱ a̱za̱za̱rak wa. Á̱ bu si̱ mi̱n swuo nggu bah, ku myim á̱ kwi nggu a̱ti̱tak bya ma̱nyin mba. Mat a̱nia, a̱mgba̱m nyin nyi yet á̱za̱za̱rak á̱niet bya, kang ma̱ng a̱tyo nyiung.” 11 Yesu ku lyen a̱tyu a̱ yet a̱bang a̱byin wu a̱ na bwuk ma̱ng a̱nggu a̱ni. Huhwa ku mbyia̱ a̱ si̱ nyia̱ ma̱ng a̱mba a̱mgba̱m konyan wa ma̱ a̱mba yet a̱za̱za̱rak bah. 12 Nang Yesu ntyak kwi mba a̱ti̱tak ba a̱ni, a̱ si̱ kyiak a̱ta̱swak nggu wu, a̱ si̱ kup. A̱ si̱ bwuok a̱ nat di̱ tyan swat nggu ji, a̱ si̱si̱ swan a̱byin. A̱jawa gu si̱ lyip ba nyia̱, “Nyi fi̱k kyang hu nang n nyia̱ nyin ndyo a̱ni a? 13 Nyi yei nung ‘A̱tyu tyiet’ ma̱ng ‘A̱tyoli.’ Nyi shei cha̱chaat, nyi ghyuap bah. A̱nia wa nang ngyet. 14 Ka̱ n gyet A̱tyoli nyin ma̱ng A̱tyu tyiet nyin, a̱mgba̱m ma̱ng a̱nia n si̱ nkwi nyin a̱ti̱tak; nyin mameang ku myim nyi kwi á̱ghyang nyin ndyo. 15 “N tak nyin kidee ja, da̱nian nyin meang nyi ka nyia̱ di̱ si̱sak ji nang n nnyia̱ nyin ndyo a̱ni. 16 A̱tsak a̱lyiat, n tak nyin; a̱khwo si̱ mi̱n shya̱ shi a̱ swak a̱tyoli nggu bah. Ma a̱nia wa, nggwon nta̱m si̱ mi̱n swak a̱tyu a̱ ta̱m ka a̱ni bah. 17 Ma̱ninika nang nyi ndyen tsatsak a̱lyiat wuni, nyi na shya̱ a̱lyia̱ a̱sai ka̱ nyi nyia̱ nta̱m ma̱ng á̱na. 18 “A̱mgba̱m nyin wa nang n dyiat bah. N dyen á̱niet ba nang n ku nkhai ma̱ nyin a̱ni. A̱mgba̱m ma̱ng a̱nia, ku yet ta hwa A̱lyiat A̱gwaza na na̱ bai cha̱chaat nyia̱, ‘A̱tyu a̱ ya kyayak hu ma̱ng a̱nung a̱ni, a̱ bwuak a̱ si̱ tyia̱ a̱tyu lak li nung.’ 19 “N shei ma̱ng a̱nyin a̱lyiat nani ma̱ninika, neet nang na̱ ka̱ mbai da̱ a̱nu ka bah. Da̱nian jen nang na̱ bye mbai da̱ a̱nu ka a̱ni, nyi ka nwuak a̱chuchuk nang nung gwa ngyet A̱tyu A̱gwaza kup gu tyok a̱ni. 20 A̱tsatsak a̱lyiat wa nang n shei ma̱ng a̱nyin; konyan wa san a̱tyu nang n ta̱m ndyo a̱ni ma̱ng fwuo nyiung, ku li á̱ ngyei nung gwa gu san. Ma a̱nia wa, a̱tyu a̱ ma nsan nung ma̱ng fwuo nyiung a̱ni, a̱ mun a̱ san a̱tyu a̱ ta̱m ma̱ng a̱nung wa a̱ni.” 21 Nang Yesu ntyak a̱lyiat nani a̱ni, fwuo nggu hu si̱ byian. Huhwa si̱ mbyia̱ a̱ si̱ ghwut a̱ si̱ hyia̱ ma̱ng a̱mba kpa̱sai nyia̱, “A̱tsatsak a̱lyiat, n tak ma̱ng a̱nyin; a̱tyo nyiung mami nyin na yet nung a̱bang a̱byin!” 22 Huhwa mman ta̱m Yesu na si̱ ta̱bat bwan nwuan á̱ghyang. Mat, ba̱ lyen nggwon ta̱m ka nang Yesu lyiat a̱ fa da̱ nka a̱ni bah. 23 A̱tyo nyiung mami mman ta̱m nang Yesu fa̱k da̱ nggu a̱ni ba̱t, nang gu swan ma̱ kpa̱mkpaan ma̱ng Yesu; 24 huhwa Bitut si̱ lyiat ma̱ng a̱nggu mi̱ bwak, a̱ si̱ tyan nggu ndyo nyia̱, “Lyip A̱tyoli nzi̱t wu, a̱tyu nang gu lyiat a̱ni.” 25 A̱jawa, nggwon ta̱m ka nang Yesu fa̱k da̱ nka a̱ni, si̱ shoot a̱ nat kpa̱mkpaan ma̱ng Yesu. Ka̱ si̱ lyip gu nyia̱, “A̱tyoli, a̱nyan wa nang a lyiat?” 26 Yesu si̱ nwuak gu shim hu nyia̱, “A̱tyu nang n na nzwup chunchong burodi jini mi̱ nyung, n nang nggu a̱ni; a̱tyu a̱wa wa!” A̱jawa Yesu si̱ kyiak chunchong burodi ji, a̱ si̱ zwup mi̱ nyiung hu. A̱ si̱ nwuak Yahuda, a̱fai Siman Iska̱riyoti. 27 Nang Yahuda nsan chunchong burodi ji a̱ni, di̱ yong a̱hwa A̱ta̱nyeang ka si̱ kin nwuo mami nggu. A̱jawa Yesu si̱ nyia̱ ma̱ng Yahuda a̱ni, “Kyang hu nang a chat nyia̱ hu a̱ni; nyia̱ hu a̱nggang.” 28 A̱mgba̱m mba, ba̱ shya̱ di̱ ya kyayak hu dundung ma̱ng Yesu a̱ni, á̱ mbyia̱ a̱tyu a̱ ku fi̱k kyang hu ku mbyia̱ Yesu nhyia̱ ma̱ng a̱nggu a̱nia a̱ni bah. 29 Mat nang Yahuda wa ku mba̱ng a̱burga kurum mba wu a̱ni; huhwa si̱ mbyia̱ á̱ghyang á̱niet mami mman ta̱m na ku fa Yesu shei ma̱ng a̱nggu gu san kyang nang á̱ na chat ma̱ A̱yet wu a̱ni; kalak ke gu ma nchat kyang gu mbeang á̱kunak ni̱nia a̱ni. 30 Nggu Yahuda meang, nang gu nsan chunchong burodi ji a̱ni, a̱ si̱ kin ghwut a̱ nat ta̱usa. Di̱n jen a̱ja nang a̱tyetuk ka̱n khwat. 31 Nang Yahuda nghwut a̱ si̱ nkat a̱ni, Yesu si̱ nyia̱, “Ma̱nini kya nang á̱ na nnwuak Nggwon A̱tyubishyi, a̱wot a̱ bu nwuak A̱gwaza shi mat Nggwon A̱tyubishyi. 32 Ka̱ A̱gwaza shya̱ shi mat Nggwon A̱tyubishyi; ma a̱nia wa nang A̱gwaza na nnwuak Nggwon ka shi da̱nian a̱pyia̱ nggu. A̱wot ka̱ na shya̱ shi mi̱ di̱ yong a̱hwa. 33 “Nyin mman nung, jen ji nang n na nshya̱ ma̱ng a̱nyin a̱ni, ji̱ bu la̱u shi hu bah. Nyi na chat nung, a̱wot ma̱nang n hyia̱ ma̱ng A̱yahudawa ba a̱ni; a̱vwuo ka nang n naat a̱ni, nyi si̱ mi̱n nat bah. Huhwa n chat n tak nyin. 34 Doka swai ja nang n nwuat nyin: Nyi chat á̱ghyang nyin! Ma̱nang n chat nyin a̱ni; ma a̱nia wa nyin mameang, nyi na nchat á̱ghyang. 35 A̱nia wa na mbyia̱, konyan mi̱ swanta hu á̱ nfi̱k nang nyi ngyet mman ta̱m nung nia.” 36 Siman Bitut si̱ lyip Yesu nyia̱ “Nwan A̱tyoli nung, a naat a̱ji wa?” Yesu si̱ nwuak gu shim hu nyia̱, “A si̱ mi̱n khwi nung di̱ yong huni, a nat tyan ji nang n naat a̱ni bah. Di̱n jen jhyang ja nang a bye nkhwi nung, a nat dundung ma̱ng a̱nung.” 37 Bitut si̱ bu lyip Yesu nyia̱, “A̱tyoli nung, yihwa mbyia̱ nang n si̱ mi̱n khwi ang ma̱ninika bah? Di̱ yong huni, n da̱p vam n khwu dundung ma̱ng a̱nwan!” 38 Yesu si̱ nyia̱ ma̱ng a̱nggu a̱ni, “A̱tsatsak a̱lyiat wa, a la̱p vam a khwu da̱nian nung a? N chat n tak ang tsatsak a̱lyiat; neet nang a̱gbak ka̱n tyiap bah, a na fwuo lyen nung bwuo a̱ka̱tat!”
1 “Nfwuo nyin na na̱ yok byian bah. Nyi nwuak fwuo da̱ A̱gwaza. A̱wot nyi bu nwuak fwuo da̱ nung. 2 Mat Mali A̱tyia̱ nung ka, a̱vwuo nswat nshya̱ ma̱ a̱di̱di̱t. Ka̱ á̱ wa nyia̱ da̱ a̱nia wa bah, si̱ n na ntak ma̱ng a̱nyin. N na nat n si̱ njhyi nyin a̱vwuo nswat. 3 Ka̱ n nat n si̱si̱ njhyi nyin a̱vwuo nswat ka, n na mbwuok mbai n ba̱ kyiak nyin nat ndyo da̱ a̱vwuo nung ka. Da̱nian nyin mameang, nyi ka swan dundung ma̱ng a̱nung da̱ a̱vwuo nang n shya̱ a̱ni. 4 Nyi lyen vak nyi na kai nyi nnat da̱ a̱vwuo nang n naat a̱ni.” 5 A̱jawa Toma si̱ nyia̱ ma̱ng Yesu a̱ni, “Nwan A̱tyoli, zi̱ lyen a̱vwuo ka nang a naat a̱ni bah. Zi̱ na nyia̱ ni wa zi̱ ndyen vak hu?” 6 Yesu si̱ nyia̱ ma̱ng Toma a̱ni, “Nung gwa ngyet vak hu. Nung gwa si̱ ngyet a̱chuchuk wu. Nung gwa si̱ bu ngyet swuan ji. Á̱ mbyia̱ a̱tyu a̱ na nat da̱ a̱vwuo A̱tyia̱ ka, ka̱nang a̱nyuu khwi nung a̱ni bah. 7 Ka̱ nyi wa lyen nung, si̱ nyi lyen A̱tyia̱ nung wu mameang. Di̱ yong huni si̱ nat á̱zanson, nyi na lyen gu za̱m! A̱wot nyi wa ka̱n di ngguu.” 8 Huhwa Filibut si̱ nyia̱ ma̱ng Yesu a̱ni, “A̱tyoli, tak ma̱ng a̱nzi̱t A̱tyia̱ wu, gu ka maai nzi̱t shansham.” 9 Yesu si̱ nwuak Filibut shim hu nyia̱, “N dabeang ma̱ng a̱nyin ba̱t a̱ni. A̱mgba̱m ma̱ng a̱nia, nyi lyen nung baa? Konyan wa li nung, a̱ wa ka̱n di A̱tyia̱ nung wu za̱m! Yihwa mbyia̱ nang a nyia̱, ‘Tak zi̱t A̱tyia̱ wu’? 10 A nwuak a̱chuchuk nyia̱ n shya̱ mami A̱tyia̱ nung wu, A̱tyia̱ nung wu mameang, si̱ shya̱ mami nung baa? A̱lyiat nang n ndyiat ma̱ng a̱nyin a̱ni, n ndyiat naa mi̱ tyok a̱pyia̱ nung hwa bah. A̱tyia̱ nung wa a̱ swan mami nung ka a̱ni; nggu wa ma̱ a̱pyia̱ nggu nyia̱ nta̱m gu. 11 Nyi nwuak a̱chuchuk nang n shya̱ mami A̱tyia̱ nung ka; a̱tyia̱ nung wu mameang, si̱ shya̱ mami nung. Kalak ka̱ nyi na nyia̱ a̱nia bah, nyi nwuak a̱chuchuk di̱ nta̱m a̱ga̱de na nang n nyian a̱ni. 12 “A̱tsatsak a̱lyiat wa nang n shei nyin; konyan wa nwuak fwuo da̱ nung a̱ni, a̱ na nyia̱ nta̱m nang n nyia̱ a̱ni. Shimba, gu nyia̱ nta̱m na̱ swak á̱si̱ na n nyia̱ a̱ni, mat n naat da̱ a̱vwuo A̱tyia̱ nung. 13 A̱wot n bu na nyia̱ kuzang kyang nang nyi naai mami a̱lyoot nung da̱nian hu a̱ni. N na nyia̱ nyin ndyo, da̱nian A̱tyia̱ nung wu a̱ ka shya̱ a̱kyenkyai shi wu kpa̱sai mat Nggwon ka. 14 Kuzang kyang nang nyi naai mami a̱lyoot nung a̱ni, n na nyia̱ nyin ndyo.” 15 “Ka̱nang nyi chat nung, ku myim nyi khwi doká nung ji. 16 Nung mameang, n na naai da̱ a̱vwuo A̱tyia̱. Nggu meang, a̱ na ta̱m ma̱ng nyin a̱tyu a̱ na beang nyin a̱ni; gu shya̱ dundung ma̱ng a̱nyin ba̱ng si̱ nat sang sangba̱p. 17 Nggu wa yet a̱chuchuk A̱za̱za̱rak Ntswa wu, nang á̱niet mi̱ swanta ba lak san hu a̱ni. Mat ba̱ si̱ mi̱n ndi nggu bah. Da̱ mba, ba̱ si̱ mi̱n dyen gu bah. A̱wot nyin, nyi lyen nggu, mat a̱ swan dundung ma̱ng a̱nyin, a̱ si̱ bu shya̱ mi̱ nfwuo nyin na. 18 “N na ghwon nyin ma̱nyin nyin nang á̱kunak a̱ni bah. N na mbwuok mbai da̱ a̱vwuo nyin. 19 N bwat a̱banjen ma̱ chunchwiit á̱niet mi̱ swanta ba bu na li nung bah. A̱wot nyin, nyi na li nung. Mat nang nung nshya̱ ma̱ng swuan a̱ni; ma a̱nia wa, nyin mameang nyi na nswuan. 20 A̱tuk a̱kyakya nang nyi na ndyen nang nung nshya̱ mami A̱tyia̱ nung; nyin, nyi si̱ ma nshya̱ mami nung; nung mameang, n si̱ ma shya̱ mami nyin. 21 “Konyan wa lyen doká nung ji, a̱wot a̱ si̱ khwi nji a̱ni, nggu wa yet a̱tyu a̱ chat nung a̱ni. A̱tyu a̱ chat nung a̱ni; nggu wa nang A̱tyia̱ nung wu ma na chat. Nung, mameang, n na chat gu, a̱wot n tyai a̱pyia̱ nung kpa̱sai da̱ a̱vwuo nggu.” 22 Yahuda a̱ghyang (kang ma̱ng Yahuda Iska̱riyoti wu), a̱ si̱ lyip Yesu nyia̱, “Nwan A̱tyoli, yihwa mbyia̱ a na ntyai a̱pyia̱ ang da̱ a̱vwuo nzi̱t kya ma̱nyin zi̱t, kang ma̱ng á̱niet mi̱ swanta ba?” 23 Yesu si̱ ma nwuak gu shim nyia̱, “Konyan wa chat nung a̱ni, a̱ na khwi á̱lyiat nung na. A̱wot A̱tyia̱ nung wu na chat gu. Nung ma̱ng A̱tyia̱ nung wu, zi̱ na bai da̱ a̱vwuo nggu, zi̱ swan dundung ma̱ng a̱nggu. 24 A̱tyu a̱ nwai chat nung a̱ni mameang, a̱ khwi á̱lyiat nung na bah. Á̱lyiat nung na nang nyi fwuong a̱ni, á̱si̱ nung nia bah; á̱lyiat A̱tyia̱ nia. Nggu wa ta̱m ma̱ng a̱nung mi̱ swanta hu. 25 “A̱mgba̱m á̱lyiat nani, n dyiat na neet nang n ni̱ shya̱ dundung ma̱ng a̱nyin. 26 A̱wot A̱tyu Beang wu, nggu wa yet A̱za̱za̱rak Ntswa nang A̱tyia̱ wu na ta̱m ndyo da̱ a̱kwonu nung a̱ni; nggu wa na tyiet nyin kuzang kyang. A̱wot a̱ bu jhyung nyin a̱mgba̱m kuzang kyang nang n ka̱n hyia̱ ma̱ng a̱nyin a̱ni. 27 “N nang nyin swat nyinyang; swat nyinyang nung huhwa nang n nwuak nyin. N nwuat nyin huu nang swanta hu nnwuat a̱ni bah. Mat a̱nia, nyi yok byia̱ a̱ka̱tuk a̱fi̱fa, ku nyi bu fa̱k a̱wun bah. 28 Nyi jhyung n hyia̱ ma̱ nyin nyia̱; n na nat mbwuok mbai da̱ a̱vwuo nyin. Ka̱ nyi wa chat nung, si̱ nyi gwai nang n naat da̱ a̱vwuo A̱tyia̱ nung a̱ni. Mat A̱tyia̱ nung wu shi a̱ lan nung. 29 Ma̱ninika, n hyia̱ ma̱ng a̱nyin neet nang nkyang nani ka̱n bai bah. Da̱nian jen nang na̱ bye mbai a̱ni, nyi na nwuak fwuo da̱ nung. 30 “N bu si̱ mi̱n dyiat ma̱ng a̱nyin a̱jojoot a̱lyiat bah, mat A̱ta̱nyeang swanta kani, ka̱ chobai. A̱mgba̱m ma̱ng a̱nia, ka̱ si̱ mi̱n nyia̱ tyok tazwa nung bah. 31 Ma̱ng a̱nia, ku myim swanta hu ku lyen nang n chat A̱tyia̱ wu. Huhwa mbyia̱ nang n nyia̱ kuzang kyang cha̱chaat nang gu ntak ma̱ng a̱nung n nyia̱ a̱ni.” “To, nyi bai zi̱ doot zi̱ ghwon a̱vwuo kani!”
1 “Nung gwa ngyet a̱tsatsak a̱kwon a̱na̱p wu. A̱wot A̱tyia̱ nung wa si̱ yet a̱tyu khap wu. 2 Kuzang bwak a̱kwon ku shya̱ da̱ nung a̱ni, ka̱ ku tyia̱ sum bah, á̱ na tyap hu á̱ ji̱p. Kuzang bwak a̱kwon ku tyei sum a̱ni, á̱ ni̱ shyok hu da̱nian hu ka mbeang sum hu. 3 Nyin ma̱ninika, nyi yet á̱za̱za̱rak á̱niet bya. Mat a̱lyiat na nang n hyia̱ ma̱ng a̱nyin a̱ni. 4 Nyi ta̱meet da̱ nung; nung mameang n na nta̱meet da̱ nyin. Ma̱nang bwak a̱kwon a̱na̱p si̱ mi̱n tyia̱ sum ma̱nyin hu ka̱nang ku ta̱meet da̱ a̱tyin a̱kwon a̱na̱p ka a̱ni bah; ma a̱nia wa nyin mameang, nyi si̱ mi̱n nyia̱ kyang ma̱nyin nyin, ka̱nang nyi ta̱meet da̱ nung bah. 5 “Nung gwa ngyet a̱tyin a̱na̱p ka. Nyin bya yet mbwak a̱kwon na. A̱tyu a̱ ta̱meet da̱ nung a̱ni; nung mameang n si̱ nta̱meet da̱ nggu. A̱ na tai a̱kwon ka̱ tyei sum ma̱ a̱di̱di̱t a̱ni. Mat, ka̱ nyi ta̱meet da̱ nung wa bah, nyi maai nyi nyia̱ kyang bah. 6 Konyan wa da̱ a̱ ta̱meet da̱ nung a̱ni bah, a̱ tai bwak a̱kwon nang á̱ ni̱ tyap á̱ ji̱p ku khwot a̱ni. Á̱nietbishyi ni̱ tung ntangka̱i a̱khwot mbwak a̱kwon a̱nia á̱ ntyia̱ long. Long hu ku ya na a̱mgba̱m. 7 Ka̱ nyi ta̱meet da̱ nung, a̱wot a̱lyiat nung na si̱ shya̱ mi̱ fwuo nyin na; nyi doot nyi lyip kuzang kyang nang nyi chat a̱ni, á̱ na shim á̱ nyia̱ nyin ndyo. 8 Ka̱ nyi tyei sum ma̱ a̱di̱di̱t nang A̱gwaza chat a̱ni, nyi na tak nang nyi ngyet a̱tsatsak mman ta̱m nung nia. Nyi tsa bu nshei shi A̱tyia̱ nung hu kpa̱sai. 9 “Ma̱nang A̱tyia̱ wu nchat nung a̱ni; ma a̱nia wa nang n chat nyin. Ma̱ninika, nyi ya a̱son ma̱ng swan mami chat nang n tak nyin a̱ni. 10 Ka̱ nyi khwi doká nung ji; huhwa na tak nang nyi nchat nung. Ma̱ cha̱chaat nang n khwi doká A̱tyia̱ nung ji, n si̱ ntak si̱sak nang n chat gu a̱ni. 11 “N tak ma̱ nyin á̱lyiat nani, da̱nian nyi ka shya̱ ma̱ng a̱gwai nang n byia̱ a̱ni. A̱wot a̱gwai nyin na, na̱ bu yet a̱jhyem a̱gwai wa. 12 Doka nung ji nang n nwuat nyin a̱ni, jija yet; nyi chat á̱ghyang nyin, ma̱ cha̱chaat di̱ si̱sak nang n chat nyin a̱ni. 13 A̱gba̱ndang chat nang a̱tyubishyi na tak a̱kpa̱ndang nggu ba a̱ni, huhwa yet; gu nwuak swuan nggu ji da̱nian mbaa. 14 “A̱wot nyi yet á̱kpa̱ndang nung bya, ka̱nang nyi khwi doka ji nang n nwuak nyin a̱ni. 15 N bu si̱ mi̱n mak yorong nyin á̱khwo bah. Mat, á̱khwo lyen kyang hu nang A̱tyoli nggu wu nyia̱ a̱ni bah. Da̱ a̱kwonu a̱kya, n gyei nyin á̱kpa̱ndang bya. Mat n tak ma̱ng a̱nyin a̱mgba̱m nkyang na nang n fa̱k da̱ a̱vwuo A̱tyia̱ nung ka a̱ni. 16 “Nyin bya ku khai nung bah. Nung gwa ku khai nyin. N si̱ ntyia̱ nyin, nyi nat nyi tyei sum ma̱ a̱di̱di̱t. Sum hu ku na labeang a̱ni. Huhwa na mbyia̱, A̱tyia̱ wu a̱ nang nyin a̱mgba̱m nkyang nang nyi naai mami a̱lyoot nung ka a̱ni. 17 Doka ji nang n nwuak nyin a̱ni, ji ja yet; nyi chat á̱ghyang nyin. 18 “Ka̱ á̱niet mi̱ swanta ba lak li nyin, nyi yok bwung bah, ku myim nyi lyen nang ba̱ ntsa lak li nung hu á̱ ghwon nyin. 19 Ka̱ nyi wa yet á̱niet mi̱ swanta bani bya, si̱ á̱niet swanta ba chat nyin nang á̱si̱ mba a̱ni. Nung gwa khai nyin ghwut ndyo mi̱ swanta hu. Huhwa mbyia̱ nang á̱niet mi̱ swanta ba ndak li nyin hu. 20 Nyi jhyung nkyang na nang n ku hyia̱ ma̱ng a̱nyin a̱ni; nyi yok bwung bah. N ku nyia̱, ‘A̱khwo si̱ mi̱n shya̱ shi a̱ swak a̱tyoli nggu bah.’ Ka̱ ba̱ lak li nung, ba̱ si̱ ya̱shuk nung; nyin mameang, ba̱ na lak li nyin, ba̱ ya̱shuk nyin. Ka̱ ba̱ wa ku khwi á̱lyiat nung na, si̱ ba̱ na khwi á̱lyiat nyin na mameang. 21 “Ba̱ na nyia̱ nyin a̱ka̱kpa̱t, mat nyi yet a̱si̱ nung bya. A̱wot ba̱ bu lyen a̱tyu a̱ ta̱m ma̱ng a̱nung a̱ni bah. 22 Ka̱ n wa ku ngyok bai n si̱ ndyiat ma̱ng a̱mba bah; si̱ ba̱ yet á̱niet bwoi a̱bun bya. Nang ku ndi a̱nia a̱ni, di̱ yong huni ba̱ byia̱ ta̱fwat kyang tazwa a̱ka̱tuk nyia̱ mba wu bah. 23 Konyan wa lak li nung, a̱ lak li A̱tyia̱ nung wu wa oo! 24 “N ku nyia̱ nkyang a̱ga̱de ma̱ a̱di̱di̱t a̱zaghyi mba. Mami mba, á̱ mbyia̱ a̱tyu a̱ ka̱ mak nyia̱ na a̱ni bah. Ka̱ á̱ wa nyia̱, di̱ n wa nyia̱ nkyang a̱ga̱de a̱nia a̱zaghyi mba bah; si̱ ba̱ byia̱ a̱bun bah. A̱wot ma̱ninika, ba̱ li kyang hu nang n nyia̱ a̱ni. A̱mgba̱m ma̱ng a̱nia, ba̱ si̱ lak li nung, á̱ tsa bu ndak li A̱tyia̱ nung wu. 25 “Kyang hu ba̱ nyia̱ a̱ni, ku ku bai da̱ a̱nu ka ma̱ cha̱chaat ma̱ng kyang nang á̱ ku lyuut mami doka mba ji a̱ni nyia̱, ‘Ba̱ ku lak li nung ma̱ kpa̱a̱t. Da̱ mba, ba̱ byia̱ ta̱fwat bah.’ 26 “A̱wot n na ntyia̱ A̱tyu Beang gu bai da̱ a̱vwuo nyin. A̱ na neet da̱ a̱vwuo A̱tyia̱. Nggu wa yet A̱za̱za̱rak Ntswa a̱ shei a̱chuchuk wu a̱ni. Nggu, a̱ na neet da̱ a̱vwuo A̱tyia̱ kya. Nggu wa na tak nyin kpa̱sai tazwa nung. 27 A̱wot nyin mameang, ku yet ta hwa nyi na shei kpa̱sai a̱chuchuk wu nang nyi lyen tazwa nung a̱ni. Mat nyi shya̱ dundung ma̱ng a̱nung neet di̱ tsa a̱tyin ta̱m nung ka.
1 “N shei nyin a̱mgba̱m nkyang nani, da̱nian nyi ka bwuok lilyim da̱ nwuak fwuo nyin hu da̱ nung bah. 2 Ba̱ na ti̱n nyin, á̱ ghwut ndyo mami á̱tutu a̱tung A̱yahudawa ba. A̱wot jen bye bai, nang á̱ghyang á̱niet na nhyaai nyin. Ba̱ nyia̱, ba̱ nyia̱ A̱gwaza wa ta̱m! 3 Ba̱ na nyia̱ a̱nia, mat ba̱ ka̱n dyen A̱tyia̱ wu ma̱ng a̱nung bah. 4 Huhwa mbyia̱ n shei nyin á̱lyiat nani, da̱nian ka̱ jen ji ba̱ nyia̱ nang á̱niet ba na nnyia̱ nkyang nani a̱ni; nyi ka jhyung nyi lyen nang n ku mi̱ ngba nyin da̱ na. N ku nhyia̱ ma̱ng a̱nyin nkyang nani neet di̱n tsa hu bah, mat n ku shya̱ dundung ma̱ng a̱nyin. 5 “A̱wot di̱ yong huni, ma̱ninika n bwuot naat da̱ a̱vwuo a̱tyu a̱ ta̱m nung a̱ni. Ma̱ng a̱nia, a̱yin du lyip nung, ‘A̱ji wa nang a naat?’ bah. 6 A̱wot ma̱ninika nang n tak ma̱ng a̱nyin á̱lyiat nani a̱ni, nfwuo nyin na si̱ byian. 7 A̱wot, n shei nyin a̱chuchuk; ka̱ n ghwon nyin, ku na yet nyin a̱sham za̱m. Mat, ki̱ n nkat n si̱ ghwon nyin bah, A̱tyu Beang wu na bai da̱ a̱vwuo nyin bah. Huhwa mbyia̱, ka̱ n nkat, n na nta̱m ma̱ng a̱nyin guu. 8 Jen ji nang A̱tyu Beang wu na mbai a̱ni, a̱ na tak á̱niet mi̱ swanta ba nang a̱di̱dam mba wu ngyet bah; tazwa a̱ka̱tuk nyia̱, ma̱ng tsotswat, mbeang shi̱ri̱ya. 9 “A̱tyu Beang na tyiet mba nang a̱di̱dam mba wu tazwa a̱ka̱tuk nyia̱ ngyet bah. Mat ba̱ lak nwuak fwuo da̱ nung. 10 “A̱ bu na tyiet mba tazwa tsotswat hu. Mat n naat da̱ a̱vwuo A̱tyia̱ nung ka; da̱ nyin, nyi bu na li nung bah. 11 “A̱wot a̱ bu na tyiet mba tazwa nyia̱ shi̱ri̱ya. Mat á̱ wa ka̱n nyia̱ A̱ta̱nyeang swanta ka shi̱ri̱ya. 12 “N byia̱ nkyang ma̱ a̱di̱di̱t nang n na hyia̱ ma̱ng a̱nyin a̱ni. A̱wot ma̱ninika nyi si̱ mi̱n ba̱ng na bah. 13 Mat a̱nia, ka̱ A̱za̱za̱rak Ntswa a̱ yet a̱chuchuk a̱ni bai, a̱ na kwak nyin a̱son di̱ kuzang a̱chuchuk. A̱lyiat a̱pyia̱ nggu nia gu na lyiat bah. A̱ na lyiat kyang nang gu fwuong wa a̱ni. A̱wot a̱ bu na tak ma̱ng a̱nyin nkyang na̱ na bai á̱zanson a̱ni. 14 A̱ bye nnwuak nung shi, da̱nian á̱lyiat nung nia gu bye hyia̱ ma̱ng a̱nyin. 15 A̱mgba̱m nkyang nang A̱tyia̱ wu byia̱ a̱ni, si̱ nung nia. Huhwa mbyia̱ nang n nyia̱ A̱za̱za̱rak Ntswa wu na kyiak kyang hu nang n hyia̱ a̱ni, a̱ tak nyin. 16 “Á̱ na labeang bah, nyi na chat nung lyin. A̱wot á̱ bu na labeang bah, nyi bu li nung.” 17 Huhwa mman ta̱m nggu á̱ghyang nyia̱ ma̱ng á̱ghyang mba, “Yihwa nang gu fa nang gu nyia̱ ma̱ng a̱nzi̱t; ‘Á̱ na labeang bah, nyi na chat nung lyin, á̱ bu labeang bah, nyi bu na li nung?’ ” A̱wot ba̱ si̱ bu lyip á̱ghyang, “Yihwa nang gu fa a̱ naat da̱ a̱vwuo A̱tyia̱ wu?” 18 A̱wot ba̱ si̱ bu lyip á̱ghyang, nyia̱ “Yihwa nang gu fa nang gu nnyia̱, ‘Á̱ na labeang bah?’ Zi̱ fi̱k kyang hu nang gu lyiat a̱ni bah.” 19 Yesu ku lyen nang mman ta̱m nggu na nchat ba̱ lyip gu kyang gu fa tazwa á̱lyiat nani a̱ni. Huhwa gu si̱ nyia̱ ma̱ng a̱mba, “Nyi lyi̱ri̱m á̱ghyang nyin tazwa a̱lyiat nang n hyia̱, ‘Á̱ na labeang bah, nyi na li nung bah; á̱ bu na labeang bah, nyi na li nung’ a? 20 “N chat n tak ma̱ng a̱nyin a̱chuchuk; nyi na twei, nyi shya̱ byian fwuo. A̱mgba̱m ma̱ng a̱nia, á̱niet mi̱ swanta ba na shya̱ ma̱ng a̱gwai. Nyi na shya̱ byian fwuo. A̱wot byian fwuo nyin ji na tyia̱ a̱gwai. 21 Ka̱ a̱byii̱k nwuo twei ma̱ng byin, a̱ ni̱ fa̱k a̱khwu za̱m, mat jen swuo a̱bung ja yet twei ma̱ng byin hu. A̱wot ka̱ a̱ ba̱ byin nggwon ka, a̱ si̱ tyia̱ ka̱nka̱ra̱ng a̱ tyak, a̱ na bwung swuo a̱bung hu ma̱ng a̱khwu nang gu ku fa̱k a̱ni. Mat a̱ shya̱ ma̱ng a̱gwai, mat nggwon ka nang gu byin a̱ mat mi̱ swanta hu a̱ni. 22 A̱nia wa ku na ndi da̱ a̱vwuo nyin. Ma̱ninika, nyi shya̱ ma̱ng byian fwuo. A̱mgba̱m ma̱ng a̱nia, n bu na ndi nyin. A̱wot a̱yin si̱ mi̱n ti̱n nyin a̱gwai a̱nia bah. 23 “A̱tuk a̱kya, nyi si̱ ba̱ lyip nung kyang bah. N tak ma̱ng a̱nyin a̱chuchuk; a̱tyia̱ nung wu na nang nyin a̱mgba̱m kyang hu nang nyi lyip mami a̱lyoot nung a̱ni. 24 Ba̱ tat nang yong huni a̱ni, nyi ka̱n dyip kyang da̱ a̱lyoot nung bah. Nyi lyip, nyi na san, da̱nian a̱gwai nyin na na̱ ka yet a̱jhyem. 25 “N ku ndyiat ma̱ng a̱nyin di̱ kidee ja, da̱nian n ka ntyai nyin nkyang nani. A̱wot jen chobai nang n bye ndyiat ma̱ng a̱nyin kuzang kyang kpa̱sai tazwa A̱tyia̱ nung wu a̱ni. N bu bye ndyiat ma̱ng a̱nyin di̱ kidee bah. 26 A̱tuk a̱kya, nyi na naai da̱ a̱lyoot nung. Nyi na naai A̱tyia̱ ma̱ á̱pyia̱ nyin. Nung gwa na naai nyin ndyo bah. 27 “Nggu A̱tyia̱ wu fa̱k da̱ nyin ma̱ a̱pyia̱ nggu, mat si̱sak nang nyi nfa̱k da̱ nung a̱ni, a̱wot nyi si̱ bu nwuak a̱chuchuk nang n neet da̱ a̱vwuo gu kya. 28 N ghwut neet da̱ a̱vwuo A̱tyia̱ kikya, n si̱ mbai mi̱ swanta hu. A̱wot ma̱ninika, n na ghwon swanta hu, n bwuok nat da̱ a̱vwuo A̱tyia̱ nung ka.” 29 Huhwa mman ta̱m Yesu na si̱ nyia̱ ma̱ng a̱nggu a̱ni, “Nhyii! Ma̱nini kya nang a ndyiat ma̱ng a̱nzi̱t kpa̱sai. A bu lyiat ma̱ng a̱nzi̱t di̱ kidee bah. 30 Ma̱nini kikya nang zi̱ nfi̱k nang a ndyen kuzang kyang ka̱ doot a nwuak shim nang a̱yin ka̱n dyip ang kyang bah. Si̱ huni tyia̱ zi̱ si̱ nwuak a̱chuchuk nang a neet Ma A̱gwaza tswazwa kya.” 31 Yesu si̱ nyia̱, “Ma̱nini kya nang nyi mang nwuak a̱chuchuk a? 32 To, ka̱ a̱nia wa, jen na bai, di̱ yong huni ji wa ka̱n nyia̱, nang á̱ na nseang nyin! Konyan a̱ bwuok a̱ nat a̱mali nggu, nyi ghwon nung ma̱nyin nung! Ma̱ng a̱nia, nung gwa ma̱nyin nung bah; a̱tyia̱ nung wu shya̱ dundung ma̱ng a̱nung. 33 “N wa ka̱n tak ma̱ng nyin nkyang nani, da̱nian nyi ka shya̱ dundung ma̱ng a̱nung. Nyi na shya̱ swat nyinyang. Mi̱ swanta hu nyi na swuo a̱bung. Ma̱ng a̱nia, nyi gwai, mat n wa ka̱n swuo chet swanta hu!”
1 Nang Yesu ntyak á̱lyiat nani a̱ni, huhwa gu si̱ gba̱t á̱ghyi, a̱ si̱ nwuan Ma A̱gwaza tswazwa. A̱ si̱ naai nyia̱, “A̱tyia̱ nung, jen nyia̱. Nwuak nggwon ang ka shi; nka mameang, ka̱ ma nwuak ang shi. 2 A nwuak Nggwon ang ka tyok tazwa a̱mgba̱m á̱niet ba. Da̱nian ka̱ ka nnwuak á̱niet ba nang a nwuak nka a̱ni swuan sang sangba̱p. 3 “Swuan sang sangba̱p jini ja yet; á̱niet ba ba̱ lyen ang, nang nwan wa ma̱nyin ang ngyet a̱tsatsak A̱gwaza wu, ma̱ng Yesu Kristi, a̱tyo nang a ku nta̱m ndyo mi̱ swanta hu a̱ni. 4 “N wa ka̱n nwuak ang shi mi̱ swanta hu, mat si̱sak ji nang n ku ntyak ta̱m hu nang á̱ ku nwuak nung n nyia̱ a̱ni. 5 A̱wot ma̱ninika, A̱tyia̱ nung, bu nwuak nung a̱kyenkyai shi nang n ku mbyia̱ a̱zaghyi ang, neet nang á̱ ka̱n mat swanta hu a̱ni bah. 6 “N wa ka̱n tyai za̱kwa ang ji da̱ a̱vwuo á̱niet nang a nwuak nung mi̱ swanta hu a̱ni. Neet a̱fwun bah, ba̱ yet á̱niet ang bya. Mat a̱nia, a si̱ nwuak nung mbaa. Mba mameang, ba̱ si̱ khwi a̱lyiat ang na. 7 A̱wot ma̱ninika ba̱ lyen nang kuzang kyang nang a nang nung a̱ni, ku neet da̱ a̱vwuo ang kya. 8 A̱lyiat na nang a ku hyia̱ ma̱ng a̱nung nyia̱ n si̱ hyia̱ ma̱ng mba a̱ni; n ku hyia̱ ma̱ng a̱mba, ba̱ si̱ san. Ba̱ lyen za̱m nang nung n neet da̱ a̱vwuo ang kya. A̱wot ba̱ si̱ nwuak a̱chuchuk nang nwan wa ta̱m nung. 9 “N naai ang da̱nian mbaa. N naai da̱nian á̱niet ba̱ yet á̱niet swanta bya a̱ni bah. A̱wot n naai da̱nian á̱niet nang a nwuak nung, mat ba̱ bu tsa á̱ ngyet á̱si̱ nwan bya a̱ni. 10 A̱mgba̱m á̱niet ba ba̱ yet á̱si̱ nung a̱ni, á̱si̱ nwan bya. A̱wot a̱mgba̱m á̱niet ba nang a byia̱ a̱ni, á̱si̱ nung bya. A̱wot bibya shei a̱kyenkyai shi nung wu. 11 “A̱wot ma̱ninika, n bwuot chobai da̱ a̱vwuo ang. N bu na swan mi̱ swanta huni bah. Bibya ni̱ ya nswan mi̱ swanta hu. Nwan A̱za̱za̱rak A̱tyia̱ nung! Chok ba ma̱ng tyok a̱lyoot ang nhu; a̱lyoot ka nang a ku tyia̱ nung da̱nian ba̱ ka mun á̱pyia̱ ma̱ng á̱ghyang; ma̱ cha̱chaat nang nwan ma̱ng a̱nung, zi̱ mmun á̱pyia̱ ma̱ng á̱ghyang a̱ni. 12 Nang n ku nshya̱ dundung ma̱ng a̱mba a̱ni, n ku nchok ba mi̱ chet a̱lyoot ang hu; a̱lyoot ka nang a ku tyia̱ nung a̱ni. N si̱ nkeang mba ntyia̱, á̱ si̱ byia̱ a̱tyu a̱ bwuk a̱ni bah; a̱tyo nyiung wa ma̱nyin nggu ku bwuk. A̱ ku bwuk wa ma̱nang á̱ ku ndyuut mami A̱lyiat A̱gwaza na a̱ni, ku si̱ bai ma̱ cha̱chaat da̱ a̱nu ka. 13 “Ma̱ninika n chobai da̱ a̱vwuo ang. A̱wot n tak ma̱ng a̱mba nkyang nani neet nang n ni̱ shya̱ mi̱ swanta hu. Da̱nian á̱niet khwi nung ba, ba̱ ka shya̱ a̱jhyem a̱gwai nung wu mi̱ nfwuo mba na. 14 N si̱ ntak ma̱ng a̱mba A̱lyiat ang na. A̱wot á̱niet mi̱ swanta ba si̱ lak li mbaa, mat ba̱ yet á̱niet mi̱ swanta bya bah; ma̱nang nung n nwai ngyet a̱tyu mi̱ swanta wu a̱ni. 15 N naai ang da̱nian a ka kyiak ba ghwut ndyo mi̱ swanta huhwa bah. N naai da̱nian a ka chok ba wa, kalak A̱ta̱nyeang ka ka̱ bwuk ma̱ng mba. 16 Ba̱ yet á̱si̱ mi̱ swanta bya bah, ma̱nang nung n nwai ngyet a̱tyu mi̱ swanta wu a̱ni. 17 “Ja̱u mba ma̱ng a̱chuchuk wu, a̱wot a bu tyiet mba á̱lyiat ang na; ni̱nia yet a̱chuchuk wu. 18 Ma̱nang a nta̱m nung mi̱ swanta hu a̱ni; a̱nia wa n ma nta̱m mba mi̱ swanta hu. 19 Mat bibya mbyia̱ n ja̱u a̱pyia̱ nung di̱ nyia̱ ta̱m, da̱nian mba mameang á̱ ka ja̱u mbaa ba̱ nyia̱ ta̱m shansham mami a̱chuchuk. 20 “Á̱niet bani bya ma̱nyin mba nang n naai ba ndyo bah. N naai tazwa a̱mgba̱m á̱niet ba̱ na nwuak fwuo da̱ nung, mat A̱lyiat A̱gwaza nang á̱niet bani na shei ma̱ng a̱mba a̱ni. 21 A̱tyia̱ nung, n naai da̱nian a̱mgba̱m á̱niet khwi ba ba̱ mun á̱pyia̱ ma̱ng á̱ghyang, ma̱nang nwan ma̱ng a̱nung zi̱ mun á̱pyia̱ ma̱ng á̱ghyang a̱ni. N naai da̱nian mba mameang; ba̱ na mun á̱pyia̱ ma̱ng a̱nzi̱t da̱nian á̱niet mi̱ swanta ba na nwuak a̱chuchuk nang nwan wa nta̱m nung mi̱ swanta hu. 22 “Nung, n nwuak á̱niet a̱bya shi nang a nwuak nung a̱ni. Da̱nian ba̱ ka mun á̱pyia̱ ma̱ng á̱ghyang; ma̱nang nung ma̱ng a̱nwan, zi̱ mun á̱pyia̱ ma̱ng á̱ghyang a̱ni. 23 N na swan dundung ma̱ng a̱mba; nwan mameang, a ma nswan dundung ma̱ng a̱nung. Yok ba̱ mun á̱pyia̱ za̱m, ku na tyia̱ á̱niet ma̱ a̱di̱di̱t mi̱ swanta hu ba̱ lyen nang nwan wa nta̱m nung; a̱wot ba̱ bu lyen nang a nchat ba ma̱ cha̱chaat nang a nchat nung a̱ni. 24 “A̱tyia̱ nung, n chat á̱niet bani nang a nwuak nung a̱ni, ba̱ swan dundung ma̱ng a̱nung di̱n tyan nang a nshya̱ a̱ni, da̱nian ba̱ ka li a̱kyenkyai shi ang wu, nang a ku nwuak nung a̱ni. A ku chat nung neet nang a ka mat swanta hu bah. 25 “A̱tsotswat A̱tyia̱ nung, á̱niet mi̱ swanta ba lyen ang bah. A̱wot nung, n dyen ang. Á̱niet bani mameang, ba̱ si̱ lyen nang nwan wa nta̱m nung. 26 N si̱ ntyai mba si̱sak ji nang za̱kwa ang ji ndi a̱ni. A̱wot n bu na ngya a̱son ma̱ng tyai mba ndyo hu. Da̱nian mba, ba̱ ma nshya̱ tangka̱i chat nang a tak nung a̱ni; nung mameang, n swan dundung ma̱ng a̱mba.”
1 Nang Yesu ntyak naai hu a̱ni, a̱ si̱ ghwut ma̱ng mman ta̱m nggu na. Ba̱ si̱ byia̱k chen Kidron. Da̱ ma̱nyii chen a̱kya, sop a̱ka̱kwon za̱itun ku nshya̱, Yesu ma̱ng mman ta̱m nggu na, ba̱ si̱ nwuo ma̱ a̱byin ka. 2 Yahuda, a̱bang a̱byin wu, ku lyen a̱vwuo ka, mat kuzang jen Yesu ku chong mi̱ mman ta̱m nggu na a̱ja. 3 Huhwa Yahuda si̱ kin doot a̱ si̱ bwuo á̱niet nzwang ma̱ng á̱niet chok A̱li Nwuat Za̱nang A̱gwaza ba, nang a̱cha̱chet pris ma̱ng A̱fa̱risawa ku ta̱m a̱ni; ba̱ si̱ nat ma̱ a̱byin ka. Ba̱ si̱ ba̱ng long sang ma̱ng a̱ka̱fi̱t ndong. Ba̱ si̱ mbeang nkyang nzwang. 4 Yesu mameang ku lyen a̱mgba̱m kyang hu ku na shya̱ nggu a̱ni. Huhwa si̱ mbyia̱ a̱ si̱ ghwut mami mman ta̱m nggu na a̱ bai a̱zanson. A̱ si̱ nyia̱ ma̱ng a̱mba, “A̱nyan wa nang nyi chat?” 5 Ba̱ si̱ ma shim nggu ndyo nyia̱, “Yesu, A̱tyu Na̱za̱ra̱t wa!” Yesu si̱ nyia̱ ma̱ng a̱mba, “Di, nung gwa wu!” (Yahuda a̱bang a̱byin wu a̱ na bwuk ma̱ng Yesu a̱ni, nang gu yong dundung ma̱ng a̱mba a̱ja.) 6 Nang Yesu nnyia̱ ma̱ng a̱mba “Di, nung gwa wu” a̱ni, a̱mgba̱m mba ba̱ si̱ kin tuk lilyim, ba̱ si̱ shyot á̱ kwa̱i a̱byin! 7 Yesu si̱ bu lyip ba a̱ka̱feang nyia̱, “A̱nyan wa nang nyi chat la?” Ba̱ si̱ bu nwuak gu shim nyia̱, “Yesu A̱tyu Na̱za̱ra̱t!” 8 Yesu si̱ bu nyia̱ ma̱ng a̱mba a̱ni, “N wa ka̱n tak ma̱ng a̱nyin; nung gwa ngyet gu. Ka̱nang nung gwa nang nyi chat, yok á̱niet bani ba̱ nkat.” 9 Yesu ku hyia̱ a̱lyiat nani, da̱nian na̱ ka nat cha̱chaat ma̱ng a̱lyiat na nang gu ku mi̱ nhyia̱ ma̱ng a̱mba nyia̱, “A̱tyia̱, mami á̱niet ba nang a nwuak nung a̱ni; a̱tyo nyiung ma̱ng a̱mba, na bwuk bah.” 10 Nang Siman Bitut shya̱ ma̱ng tswat, a̱ si̱ tyap a̱khwo a̱gba̱ndang pris wu fufwuo mbwak yak hu a̱ ti̱n. A̱khwo wu, á̱ ku ngyei nggu Ma̱lkut. 11 Huhwa Yesu si̱ nyia̱ ma̱ng Bitut a̱ni, “Bwuok ma̱ng tswat ang ji, a tyia̱ mi̱n kwa nji hu! A fa n na swuo ma̱ a̱kashyi swuo a̱bung wu nang A̱tyia̱ wu nang nung a̱ni baa?” 12 Sot á̱niet nzwang, mbeang a̱kwak a̱son mba wu, ma̱ng á̱niet chok a̱cha̱chet A̱yahudawa si̱ kin bai. Ba̱ si̱ ba̱ ta̱bat Yesu, ba̱ si̱ la̱p gu. 13 Mi̱ di̱ tsa hu ba̱ si̱ ya nnat ma̱ng a̱nggu da̱ a̱vwuo Hanana, a̱ ku yet a̱kwang Ka̱yafat wa. Ka̱yafat mameang, nggu wa ku yet a̱gba̱ndang pris wu ma̱ a̱lyia̱ a̱kya. 14 Nggu, Ka̱yafat wa ku tyiet A̱yahudawa ba nyia̱; ku yet a̱sham ba̱t a̱tyo nyiung wa a̱ khwu a̱kwonu á̱kum á̱niet ka. 15 Siman Bitut ma̱ng á̱ghyang á̱niet mami mman ta̱m Yesu á̱ghyang si̱ khwi nggu lilyim. Nggwon ta̱m Yesu a̱kya, a̱gba̱ndang pris wu ku lyen ka shansham. Nka mameang, ka̱ ku nwuo mi̱n didyaat gaat a̱gba̱ndang pris ji dundung ma̱ng Yesu. 16 A̱wot Bitut si̱ yong a̱ta̱usa a̱zanunyuo. Nggwon ta̱m a̱nyiung ka nang a̱gba̱ndang pris wu lyen shansham a̱ni, ka̱ si̱ ghwut a̱ nat ta̱usa. Ka̱ si̱ lyiat ma̱ng nggwon neam ka̱ chok a̱zanunyuo ka a̱ni, ka̱ nwuo ma̱ng Bitut mami gaat ji. 17 Nggwon neam ka ka̱ yong a̱ cham a̱na̱nyuo ka a̱ni, si̱ nyia̱ ma̱ng Bitut a̱ni, “Nwan, a yet a̱tyo nyiung mi̱ mman ta̱m a̱tyu nani baa?” Bitut si̱ nwuak ka shim nyia̱, “Kaai! Nung gwa bah!” 18 Di̱n jen a̱ja a̱vwuo ka ku shi̱ri̱m. Mat a̱nia á̱niet nta̱m ma̱ng á̱niet chok A̱li Nwuat Za̱nang A̱gwaza ba si̱ kai long ma̱ng chan. Ba̱ si̱ yong á̱ keang long hu á̱ wa̱i. Bitut mameang, si̱ nat a̱ si̱ yong dundung ma̱ng a̱mba, a̱ wa̱i long hu. 19 A̱gba̱ndang pris si̱ lyi̱ri̱m Yesu a̱lyiat tazwa mman ta̱m nggu na ma̱ng nkyang nang gu tyiet a̱ni. 20 Yesu si̱ nyia̱, “N ku ndyiat kpa̱sai a̱zaghyi konyan. N si̱ bu ngyong mi̱ di̱ tyiet á̱niet ba ma̱ á̱tutu a̱tung, ma̱ng A̱li Nwuat Za̱nang A̱gwaza, nang a̱mgba̱m A̱yahudawa ba ni̱ ntung a̱ni. N ka̱n mak lyiat kyang da̱ bang bah. 21 Yihwa mbyia̱ nang nyi ndyi̱ri̱m nung? Nyi lyi̱ri̱m á̱niet ba ba̱ fwuong á̱lyiat nung na a̱ni, mat ba̱ lyen kyang hu nang n ndyiat a̱ni.” 22 Nang Yesu nhyia̱ a̱nia a̱ni, huhwa a̱tyo nyiung ma̱ á̱niet chok a̱vwuo ba si̱ lwi nggu. A̱ si̱ nyia̱ “Yihwa a ndyiat a̱nia ma̱ng a̱gba̱ndang pris wu?!” 23 Yesu si̱ nwuak gu shim nyia̱, “Ka̱ n hyia̱ kyang da̱ ku yet a̱ni bah, tak ma̱ng konyan a̱ji kyang hu n hyia̱ a̱ni. A̱wot ka̱ n hyia̱ a̱chuchuk mami kyang nang n dyiat a̱ni; yihwa mbyia̱ a ndwi nung?” 24 Huhwa Hanana si̱ tyia̱, á̱ si̱ ta̱m ma̱ng Yesu ma̱ng la̱p hu da̱ a̱vwuo Ka̱yafat. 25 Ba̱ng ba̱ tat di̱ yong huni, Bitut ni̱ wa̱i long hu. Huhwa á̱ghyang á̱niet si̱ nyia̱ ma̱ng a̱nggu a̱ni, “N gyei a yet a̱tyo nyiung mami mman ta̱m a̱tyu nani a?” A̱jawa Bitut si̱ bu fwuo nyia̱, “Kaai, n shya̱ ma̱ng a̱mba bah!” 26 A̱tyo nyiung mami á̱khwo a̱gba̱ndang pris wu ku shya̱ a̱ja. A̱ ku kwon byin ma̱ng a̱tyu nang Bitut ku tyap gu fufwuo hu a̱ni, si̱ nyia̱, “N gyei n ku ndi ang dundung ma̱ng a̱tyu wuni ma̱ a̱byin kaa?” 27 Huhwa Bitut si̱ bu fwuo nyia̱, “Kaai!” Mi̱ di̱ yong a̱hwa, a̱gbak si̱ kin tyiap! 28 Ma̱ a̱tsotson a̱tson, ba̱ si̱ ghwut ma̱ng Yesu neet a̱mali Ka̱yafat. Ba̱ si̱ nat ma̱ng a̱nggu ma gwomna A̱romawa. Nang ba̱ si̱ ntat kpa̱mkpaan ma̱ng ma gwomna ka a̱ni, ba̱ si̱ lak nwuo hu nyia̱; kalak ba̱ kyiak á̱pyia̱ mba a̱na̱ndyung á̱ na vwuong ba nat kpa̱mkpaan ma̱ng A̱gwaza a̱ni; a̱wot á̱ bu vwuong ba ya nkyayak A̱yet Ghwut Mman Isi̱rela mi̱ Khwo. 29 Huhwa ku mbyia̱ gwomna Bilatut si̱ ghwut a̱ nat a̱ta̱usa, a̱ si̱si̱ shya̱ mba. A̱ si̱ lyip ba nyia̱, “Zang a̱hyiak nia nang nyi mbat a̱tyu wuni?” 30 Huhwa ba̱ si̱ nwuak gu shim nyia̱, “Ka̱ a̱tyu wuni wa yok bwuo a̱bun bah, si̱ zi̱ bai ma̱ng a̱nggu da̱ a̱vwuo ang ka bah!” 31 Gwomna Bilatut si̱ nyia̱ ma̱ng a̱mba, “Nyi nat ma̱ng a̱nggu ma̱ á̱pyia̱ nyin! Nyi nyia̱ gu shi̱ri̱ya ji cha̱chaat ma̱ng doka nyin ji!” Huhwa A̱yahudawa ba si̱ nyia̱ ma̱ng a̱nggu a̱ni, “Á̱ nwuak zi̱t chet zi̱ faat a̱yin shi̱ri̱ya a̱khwu bah!” 32 (A̱lyiat nani ku bai da̱nian na̱ ka nat ma̱ cha̱chaat ma̱ng kyang nang Yesu ku tak á̱zanson di̱n jen nang gu ku ntyai tangka̱i a̱khwu nang gu na khwu a̱ni.) 33 Huhwa gwomna Bilatut si̱ kin bwuok a̱ nwuo mi̱ gaat tyok ji. A̱ si̱ yorong Yesu, a̱ si̱ lyip gu nyia̱, “Nwan wa yet a̱gwam A̱yahudawa wu a?” 34 Yesu si̱ nwuak gu shim nyia̱, “Lyip huni yet si̱ a̱pyia̱ ang hwa; ke á̱ghyang á̱niet bya lyiat ma̱ng a̱nwan tazwa nung?” 35 Bilatut si̱ nwuak Yesu shim nyia̱, “A lyen nung n gyet a̱tyu A̱yahudawa bah. Á̱niet ang bibya ma̱ng a̱cha̱chet a̱yaapris ba; bibya bai ma̱ng a̱nwan da̱ a̱vwuo nung ka! Yihwa nang a nyia̱?” 36 Yesu si̱ ma nwuak Bilatut shim hu nyia̱, “Tyok nung hu yet si̱ mi̱ swanta huni hwa bah. Ka̱ tyok nung hu wa yet si̱ mi̱ swanta huni hwa, si̱ á̱niet ba̱ nyia̱ nung nta̱m a̱ni, na nyia̱ zwang da̱nian nung, ba̱ nvwuong á̱ tyia̱ nung bwak a̱cha̱chet A̱yahudawa ba.” 37 Huhwa gwomna Bilatut si̱ nyia̱, “A yet a̱gwam wa a?” Yesu si̱ ma nwuak gu shim nyia̱, “A hyia̱ cha̱chaat nang ngyet a̱gwam wa. Á̱ ku byin nung, á̱ si̱ ta̱m ma̱ng a̱nung mi̱ swanta hu, mat kyang nyiung hwa, huhwa yet; n tak ma̱ng á̱niet ba a̱chuchuk wu kpa̱sai. A̱wot konyan wa khwi a̱chuchuk wu, a̱ ni̱ myiai a̱fufwuo a̱ fa̱k nung.” 38 Gwomna Bilatut si̱ lyip Yesu nyia̱, “Yihwa yet a̱chuchuk wu?” Nang Bilatut ndyip lyip huni a̱ni, a̱ si̱ bu ghwut a̱ nat a̱ta̱usa da̱ a̱vwuo a̱cha̱chet A̱yahudawa ba. 39 A̱ si̱ nyia̱ ma̱ng a̱mba a̱ni, “Nung, n shya̱ a̱tyu wuni ma̱ng a̱bun bah. A̱wot, nyi byia̱ taada jhyang nang nyi ni̱ nyia̱ a̱ni; ka̱ A̱yet Ghwut Mman Isi̱rela mi̱ Khwo bai, nyi ni̱ naai nung n ti̱n nyin a̱tyo nyiung mi̱ khwo ba nang á̱ la̱p a̱ni ghwon. Ka̱ a̱nia wa, nyi chat n byii̱k nyin a̱gwam A̱yahudawa wu a?” 40 Ba̱ si̱ koot a̱gugwong, nyia̱, “Kaai, a̱tyo wuni wa a na byii̱k kai ghwon bah! Zi̱ chat a byii̱k zi̱t Ba̱ra̱bat wa!” Ba̱ra̱bat wa ku yet a̱tyu a̱ chat ta̱gurup tyok A̱romawa hu a̱ni.
1 A̱jawa Bilatut si̱ tyia̱ á̱ si̱ ta̱bat Yesu á̱ si̱ tsot gu ma̱ng a̱ya̱u a̱ byia̱ pyipyia̱ ntswam a̱ni. 2 Á̱niet nzwang ba si̱ chyip bung tyok sa̱kan. Ba̱ si̱ kup Yesu a̱pyia̱. Ba̱ si̱ bu kup gu a̱shong a̱toot nang a̱si̱ tyok a̱ni. 3 A̱wot ba̱ si̱ chong á̱ tsot gu, á̱ tsa á̱ nyia̱ gu lihyat, “Shyichet ang ku labeang, A̱gwam A̱yahudawa!” 4 Gwomna Bilatut si̱ bu ghwut a̱ bai ta̱usa. A̱ si̱ nyia̱ ma̱ng a̱cha̱chet A̱yahudawa ba a̱ni, “Nyi li, n na ghwut ma̱ng Yesu n bai ma̱ng a̱nyin ndyo. N chat nyi lyen nang n shya̱ nggu ma̱ng a̱bun bah!” 5 Huhwa Yesu si̱ ghwut a̱ bai ta̱usa ma̱ng bung tyok sa̱kan ji a̱pyia̱ nggu ka; mbeang tangka̱i a̱shong a̱toot, a̱ yet a̱gba̱ndang a̱toot tyok a̱ni. Gwomna Bilatut si̱ nyia̱ ma̱ng a̱mba, “Nyi li, di nggu wa wu!” 6 Nang a̱cha̱chet a̱yaapris ma̱ng á̱niet cham A̱li Nwuat za̱nang A̱gwaza ba ndi Yesu a̱ni, ba̱ si̱ koot a̱gugwong mi̱ chet nyia̱, “Á̱ kpang nggu da̱ a̱team a̱khwu!” Huhwa Bilatut si̱ nyia̱ ma̱ng a̱mba, “Nyi nat nyi kpang nggu da̱ a̱team a̱khwu wu ma̱ á̱pyia̱ nyin! Mat nung, n shya̱ nggu ma̱ng a̱bun bah!” 7 A̱yahudawa ba si̱ yong chi̱k nyia̱, “Nzi̱t zi̱ byia̱ doka, a̱wot kyang hu nang doka nzi̱t ji hyia̱ a̱ni, huhwa yet; ku myim á̱ hyat gu. Mat a̱ kyiak a̱pyia̱ nggu nang Nggwon A̱gwaza a̱ni!” 8 Jen nang gwomna Bilatut nfa̱k kyang ba̱ lyiat a̱ni, a̱wun nggu na si̱ mbeang. 9 A̱ si̱ bwuok a̱ nwuo mi̱ gaat ji. A̱ si̱si̱ lyip Yesu nyia̱, “A neet a̱ji wa?” Yesu si̱ nwuak gu shim bah. 10 Huhwa gwomna Bilatut si̱ nyia̱ ma̱ng a̱nggu, “A lak lyiat hu ma̱ng a̱nung, ka̱ni? A lyen n byia̱ a̱wat n tyia̱ á̱ byii̱k ang á̱ ghwon; n si̱ bu mbyia̱ a̱wat ka nang n na ntyia̱ á̱ kpang ang da̱ a̱team a̱khwu a̱ni baa?” 11 Yesu si̱ ma nwuak gu shim nyia̱, “A byia̱ tyok hu tazwa nung, ka̱nang á̱ jong ang hu neet Ma A̱gwaza tswazwa. Huhwa mbyia̱, á̱niet ba̱ ta̱bat nung ba̱ si̱ nwuak ang a̱ni; a̱ka̱tuk nang ba̱ nyia̱ a̱ni, swak a̱ si̱ nwan wu.” 12 Nang gwomna Bilatut nfa̱k a̱lyiat na a̱ni, a̱ si̱ kwan a̱ chat vak nang gu na nkai Yesu a̱ wot a̱ni. A̱mgba̱m ma̱ng a̱nia, A̱yahudawa ba si̱ bu koot a̱gugwong mi̱ chet nyia̱, “Ka̱ a kai a̱tyu wuni ghwon; to, nwan wa yet a̱kpa̱ndang Kaisar, a̱gwam shan A̱romawa wu bah! Konyan wa kyiak a̱pyia̱ nggu nang a̱gwam a̱ni, a̱tyu wa nyia̱ na̱nvan hwa ma̱ng Kaisar!” 13 Nang gwomna Bilatut nfa̱k a̱lyiat a̱nia a̱ni, a̱ si̱ ghwut ma̱ng Yesu a̱ bai ndyo a̱ta̱usa. A̱ si̱ swan di̱n chuk tyok nyia̱ shi̱ri̱ya tazwa a̱tyii nang á̱ ku nok ma̱ng nfang a̱ni. Da̱ a̱lyem A̱yahudawa ka, á̱ ngyei a̱tyii wu “Ga̱bata.” 14 A̱tuk a̱kya nang mam ka̱ mbai di̱di̱r, nang á̱ wu shyip á̱ nwuo A̱yet Ghwut mman Isi̱rela mi̱ Khwo hu; huhwa gwomna Bilatut nyia̱ ma̱ng a̱mba a̱ni, “Nyi li, a̱gwam nyin wu wa wu!” 15 A̱yahudawa ba si̱ bu koot a̱gugwong mi̱ chet nyia̱, “Á̱ hyat gu! Á̱ kpang gu da̱ a̱team a̱khwu!” Bilatut si̱ lyip ba nyia̱, “Nyi chat n kpang a̱gwam nyin wu da̱ a̱team a̱khwu a?!” Huhwa a̱cha̱chet a̱yaapris ba si̱ nwuak gu shim nyia̱, “Nzi̱t, zi̱ byia̱ a̱gwam a̱ghyang bah; mi̱ Kaisar wa ma̱nyin nggu!” 16 Huhwa gwomna Bilatut si̱ kin ta̱bat Yesu a̱ nwuak a̱cha̱chet A̱yahudawa ba, nyia̱ ba̱ kpang gu da̱ a̱team a̱khwu wu. Á̱niet nzwang ba, si̱ ta̱bat Yesu ba̱ si̱ nkat ma̱ng a̱nggu. 17 Yesu si̱ ghwut ma̱ a̱keang ka, a̱ fan a̱team a̱khwu wu ma̱ a̱pyia̱ nggu. A̱ si̱ nat ndyo da̱ a̱vwuo nang á̱ ngyei, “A̱vwuo A̱ghyighyak A̱pyia̱.” (Da̱ a̱lyem A̱yahudawa ka, á̱ ngyei, a̱vwuo ka “Goli̱gota”). 18 Da̱ a̱vwuo kani kya nang á̱ ku nkpang Yesu da̱ a̱team a̱khwu wu, dundung ma̱ng á̱tang a̱feang; a̱tyo nyiung a̱zayak, a̱tyo nyiung a̱za myian. 19 Gwomna Bilatut mameang si̱ tyia̱ á̱ si̱ lyuut a̱lyiat da̱ a̱lo á̱ si̱ lya̱u tazwa a̱team a̱khwu wu. Kyang nang gu ku lyuut a̱ni huhwa yet; “Di, Yesu A̱tyu Na̱za̱ra̱t A̱gwam A̱yahudawa wu wa wu!” 20 A̱yahudawa ma̱ a̱di̱di̱t si̱ fang a̱lyiat nani. Kyang ku mbyia̱ a̱ni, a̱vwuo ka nang á̱ ku nkpang Yesu da̱ a̱team a̱khwu wu a̱ni, ka̱ ku shya̱ kpa̱mkpaan ma̱ng a̱gba̱ndang a̱keang wu. Á̱ ku lyuut a̱lyiat nani da̱ a̱lyem A̱yahudawa, A̱romawa, ma̱ng A̱helenawa. 21 Huhwa a̱cha̱chet a̱yaapris ba̱ yet A̱yahudawa a̱ni, ba̱ si̱ nyia̱ ma̱ng gwomna Bilatut a̱ni, “Yok lyuut, nyia̱, ‘A̱gwam A̱yahudawa’ bah. A̱wot kyang hu á̱ na lyuut a̱ni huhwa yet; ‘A̱tyu wuni kyiak a̱pyia̱ nggu a̱ yet a̱gwam A̱yahudawa wa.’ ” 22 Gwomna Bilatut si̱ nwuak ba shim nyia̱, “Kyang hu n dyuut a̱ni, n wa ka̱n dyuut!” 23 Nang á̱niet nzwang ba ku nkpang Yesu da̱ a̱team a̱khwu a̱ni, ba̱ ku kyiak a̱yaatoot nggu ba, ba̱ si̱ ka̱u mba a̱ka̱naai. Kuzang a̱tyu nzwang si̱ kyiak a̱kpa a̱nyiung. A̱wot ba̱ si̱ bu kyiak a̱junjung a̱toot nggu wu nang á̱ ku nwai twai hu a̱ni. A̱wot á̱ ku nok a̱toot wu a̱ka̱mbi̱ri̱ng neet di̱n fwuo si̱ nat da̱ a̱ti̱tak. 24 Huhwa á̱niet nzwang ba si̱ nyia̱ ma̱ng á̱ghyang mba a̱ni, “Zi̱ yok sam a̱toot a̱ni bah. Kyang hu myim a̱ni, huhwa yet; zi̱ koot tswák da̱ a̱toot a̱ni, zi̱ ka li a̱tyu a̱ na ya a̱ni!” Ku ku li a̱ni wa da̱nian ku ka bai cha̱chaat ma̱ng kyang á̱ lyuut mami A̱lyiat A̱gwaza na a̱ni, nyia̱, “Ba̱ ku ka̱u a̱yaatoot nung ba di̱ tsi̱tsak mba. A̱toot nung wu meang, ba̱ si̱ koot tswák da̱ nggu.” Kyang hu nang á̱niet nzwang ku nyia̱ a̱ni, huhwa hu. 25 Á̱niet ba̱ ku yong kpa̱mkpaan ma̱ng a̱team a̱khwu Yesu wu a̱ni, bibya yet; a̱yang byin nggu wu, ma̱ng a̱yang a̱feang nggu, ma̱ng Ma̱ryamu a̱byii̱k Kilobat, ma̱ng Ma̱ryamu Ma̱ga̱daliya. 26 Nang Yesu ndi a̱yang byin nggu wu mbeang nggwon nta̱m nang gu chat a̱ni, kpa̱mkpaan ma̱ng a̱yang wu; huhwa gu nyia̱ ma̱ng a̱yang byin nggu wu a̱ni, “A̱yang, di nggwon ang kya ka!” 27 A̱wot a̱ si̱ nyia̱ ma̱ng nggwon nta̱m nggu ka a̱ni, “Di, a̱yang ang wu wa wu!” Neet di̱n jen a̱ja, nggwon nta̱m ka si̱ kin kyiak a̱yang byin Yesu wu, ka̱ si̱ nat ndyo a̱mali a̱ si̱si̱ swan ndung ma̱ng a̱nggu. 28 Yesu lyen nang di̱ yong huni, kuzang kyang mbai tyak. A̱wot da̱nian kuzang kyang hu ka nat cha̱chaat nang á̱ ku ndyuut mami A̱lyiat A̱gwaza na a̱ni; huhwa si̱ mbyia̱, a̱ si̱ nyia̱, “N fwuong mashyi.” 29 A̱kumbu ku shya̱ a̱ja, a̱ si̱ ntyia̱ a̱sa̱sat a̱sa̱khwot a̱na̱p na si̱ nhyat tyentyang. Ba̱ si̱ kyiak soso, ba̱ si̱ nzwup mami a̱sa̱khwot na. Ba̱ si̱ ti̱n soso ji, ba̱ si̱ la̱p ji da̱ a̱shya̱. Ba̱ si̱ tyia̱ Yesu ndyo a̱bwonu. 30 Nang Yesu nniaat a̱sa̱sat a̱sa̱khwot a̱na̱p wu a̱ni, huhwa gu nyia̱, “Ku tyak!” Gu si̱ kin totong a̱pyia̱ a̱byin, a̱ si̱ khwat swuan, a̱ si̱ nkat. 31 Huhwa a̱yaakwak a̱son A̱yahudawa ba si̱ naai gwomna Bilatut; gu ghwon á̱ luk a̱ti̱tak á̱niet ba nang á̱ a̱kpang da̱ a̱team a̱khwu wu a̱ni, a̱wot a̱ bu chyok ma̱ng nkwom na tazwa a̱yaateam a̱khwu ba. Kyang hu ku mbyia̱, ba̱ si̱ nnaai gwomna Bilatut a̱ni huhwa yet; da̱ a̱tsotson ntat a̱tuk Mam Fwung kya. Ba̱ ku chat nkwom á̱niet na na̱ swan a̱nia tazwa a̱team a̱khwu wu a̱tuk Mam Fwung ka bah. Mat hu na yet a̱gba̱ndang Mam Fwung wa. 32 Á̱niet nzwang ba si̱ kin bai da̱ a̱vwuo á̱niet nang á̱ ku kpang da̱ a̱team a̱khwu wu dundung ma̱ng Yesu a̱ni. Ba̱ si̱ kpa̱ra̱m a̱ti̱tak a̱tyo a̱zanson ba. Ba̱ si̱ swak ba̱ si̱ kpa̱ra̱m a̱ti̱tak a̱tyo ngaan ba. 33 A̱wot nang ba̱ mbwuok á̱ bai da̱ a̱vwuo Yesu ka a̱ni, ba̱ si̱ kpa̱ra̱m gu a̱ti̱tak ba bah. Mat ba̱ ku shya̱ nang nggu wa ka̱n khwu. 34 Huhwa a̱tyo nyiung mami á̱niet nzwang ba si̱ nwuan Yesu, a̱ si̱ ti̱p da̱ a̱beam tsi̱ntsa̱u ma̱ng zwang ji. Mi̱ di̱ yong a̱hwa, a̱sok ma̱ng a̱sa̱khwot si̱ kin ghwut. 35 (Nggu, a̱tyu a̱ li kyang nang á̱ nyia̱ ma̱ng á̱ghyi nggu ba a̱ni, nggu wa hyia̱ a̱lyiat nani. A̱wot a̱mgba̱m kyang hu gu hyia̱ a̱ni, a̱tsatsak a̱lyiat wa. A̱wot nggu ma̱ a̱pyia̱ nggu a̱ lyen nang a̱tsatsak a̱lyiat wa nang nggu ndyiat. A̱wot a̱ lyiat wa da̱nian nyin nyi ka nwuak a̱chuchuk.) 36 Si̱ huni ku bai da̱nian ku ka nat cha̱chaat ma̱ng kyang nang á̱ ku lyuut mami A̱lyiat A̱gwaza na a̱ni nyia̱, “Á̱ byia̱ kunkup gu nyiung nang á̱ na but a̱ni bah.” 37 A̱wot A̱lyiat A̱gwaza a̱ghyang si̱ bu nyia̱, “Á̱niet na nwuan a̱tyu nang ba̱ ku ti̱p a̱ni.” 38 Nang á̱ nyia̱ a̱nia a̱ni, huhwa a̱ghyang a̱niet nang á̱ ngyei nggu Isuu, a̱tyu A̱ri̱matiya (nggu a̱ ku yet nggwon ta̱m Yesu kya da̱ bang mat nang gu fwuong a̱wun A̱yahudawa a̱ni,) a̱ si̱ naai gwomna Bilatut a̱ nwuak nggu shim nang gu na nkyiak kwom Yesu hu, gu niat a̱ni. Gwomna Bilatut meang si̱ shim gu ndyo. A̱ si̱ nat, a̱ si̱ kyiak kwom Yesu hu. 39 Nikodimut mameang, a̱tyu a̱ ku bai da̱ a̱vwuo Yesu a̱tyetuk a̱ni, a̱ si̱ doot a̱ si̱ nat dundung ma̱ng Isuu. Nggu, a̱ ku ba̱ng hya̱u nang gu kyiai mur ma̱ng a̱lot a̱ni. Ku si̱ swan kpa̱p nang kweanghyi nchyi a̱ni. 40 Á̱niet a̱feang bani si̱ kyiak kwom Yesu hu, ba̱ si̱ gat hu ma̱ng kikyak. Ba̱ si̱ nkwon nkyuo turare, ma̱nang taada niat nkwom A̱yahudawa ji ndi a̱ni. 41 A̱vwuo ka nang á̱ ku nkpang Yesu da̱ a̱team a̱khwu wu a̱ni, ku shya̱ kpa̱mkpaan ma̱ng a̱byin chyui nkyang fwung. A̱wot lyak fai ku shya̱ a̱ja, da̱nang á̱ ka̱n niat a̱yin a̱ni bah. 42 Nang a̱tuk a̱kya kya ka̱n gyet mam nang á̱ wu shyip á̱ shya̱ Mam Fwung A̱yahudawa hu a̱ni; a̱wot lyak hu ku shya̱ kpa̱mkpaan a̱ja; huhwa ku mbyia̱, ba̱ si̱ kin myiai kwom Yesu hu a̱ja.
1 Ma̱ a̱tsotson a̱tson a̱tuk Ladi ka, nang a̱vwuo ka ni̱ li duduu, Ma̱ryamu Ma̱ga̱daliya si̱ nat da̱ a̱bi ka. A̱wot a̱ si̱si̱ shya̱ nang á̱ ka̱n gyuut a̱fang ka da̱ a̱nu a̱bi ka á̱ sak zan! 2 A̱ si̱ tyong chung a̱ nat da̱ a̱vwuo Siman Bitut, ma̱ng nggwon ta̱m ka nang Yesu chat a̱ swak a̱ni. A̱ si̱ hyia̱ ma̱ng a̱mba nyia̱, “Ba̱ kyiak kwom Yesu ma̱ a̱bi ka! A̱wot zi̱ lyen a̱vwuo ka nang ba̱ si̱ nsak gu a̱ni bah!” 3 Huhwa Bitut ma̱ng nggwon ta̱m a̱nyiung ka si̱ doot! A̱wot ba̱ si̱ nat da̱ a̱bi ka. 4 Ba̱ shya̱ di̱n chung mba a̱feang, a̱wot nggwon ta̱m a̱nyiung nka si̱ tyong Bitut a̱ ghwon. Kikya si̱ yet a̱son di̱n tat da̱ a̱bi ka. 5 A̱ si̱ beak a̱ nwuan, a̱ si̱ li a̱sai a̱toot wu. A̱wot da̱ nggu, a̱ nwuo bah. 6 A̱wot Siman Bitut a̱ ku shya̱ lilyim ka a̱ni, a̱ si̱ neet a̱ ba̱ nwuo ma̱ a̱bi ka. A̱ si̱ li a̱sai a̱toot nang á̱ nggat Yesu a̱ni, myian a̱ja; 7 ma̱ng a̱toot wu nang á̱ nggaat a̱pyia̱ Yesu ka a̱ni, nang gu myian zan; ma a̱nia wa a̱sai a̱toot wu si̱ byuut a̱ swan zan. 8 A̱wot nggwon ta̱m ka ka̱ ku yet a̱son nat da̱ a̱bi ka a̱ni, si̱ mun a̱ nwuo mami. A̱ si̱ li, a̱ si̱ nwuak a̱chuchuk. 9 (Bi̱ri̱ng ma̱ng a̱nia, ba̱ ku fi̱k kyang hu nang A̱lyiat A̱gwaza na fa nyia̱ Yesu na doot ma̱ng swuan ma̱ á̱niet ba̱ ka̱n kwi a̱ni bah). 10 A̱wot mman ta̱m na si̱ bwuok á̱ nat a̱mali. 11 A̱wot Ma̱ryamu Ma̱ga̱daliya si̱ yong a̱ta̱usa da̱ a̱nu a̱bi ka, a̱ twei. Nang gu ni̱ shya̱ da̱ a̱nak ka, a̱ si̱ beak a̱ nwuan mami a̱bi ka. 12 A̱jawa gu si̱ li a̱yaata̱m tswá A̱gwaza a̱feang, nang ba̱ swan ma̱ng a̱sai a̱yaatoot da̱ a̱vwuo nang á̱ ku myian Yesu a̱ni; a̱tyo nyiung a̱zapyia̱ ka, a̱tyo nyiung tatak. 13 Ba̱ si̱ lyip gu nyia̱, “A̱byii̱k, yihwa mbyia̱ nang a ntwei?” A̱ si̱ nyia̱, “Ba̱ kyiak kwom a̱tyoli nung wu á̱ doot ndyo! A̱wot ndyen tyan ji ba̱ si̱ nsak hu a̱ni bah!” 14 Nang gu nhyia̱ a̱nia a̱ni, a̱ si̱ bwuak, a̱ si̱ li Yesu gu yong. Da̱ nggu, a̱ fi̱k gu bah! 15 Yesu si̱ lyip gu nyia̱, “A̱byii̱k, yihwa mbyia̱ nang a ntwei? A̱nyan wa nang a chat?” Ma̱ryamu si̱ fa á̱ ngyei a̱tyu cham a̱vwuo wu wa. A̱wot a̱ si̱ nyia̱ ma̱ng a̱nggu, “Ki̱ nyi kyiak gu doot ndyo, a hyia̱ ma̱ng a̱nung tyan ji a si̱ nsak hu a̱ni, a̱wot n nat n kyiak guu!” 16 Yesu si̱ nyia̱ ma̱ng a̱nggu, “Ma̱ryamu!” A̱ si̱ bwuak a̱ nat ma̱ng Yesu. A̱ si̱ kaat da̱ a̱lyem A̱yahudawa, nyia̱ “Raboni!” Huhwa yet “A̱tyu tyiet.” 17 Yesu si̱ nyia̱ ma̱ng a̱nggu, “Yok vwuk nung bah, mat n ka̱n bwuok nat tswazwa da̱ a̱vwuo A̱tyia̱ ka bah. Ya mbwuok nat da̱ a̱vwuo á̱na̱nyiuk nung ba, a̱ si̱ hyia̱ ma̱ng a̱mba; n na mbwuok nat tswazwa da̱ a̱vwuo A̱tyia̱ nung ma̱ng A̱tyia̱ nyin, A̱gwaza nung ma̱ng A̱gwaza nyin.” 18 Ma̱ryamu Ma̱ga̱daliya si̱ nat a̱ si̱si̱ hyia̱ ma̱ng mman ta̱m Yesu na nang gu ndi ngguu. A̱wot a̱ si̱ tak ma̱ng a̱mba kyang nang gu lyiat ma̱ng a̱nggu a̱ni. 19 Jenshyung a̱tuk Ladi ka, a̱wot mman ta̱m na si̱ tung dundung nang nyinyiit hu shya̱ di̱ nyim, mat ba̱ fwuong a̱wun a̱cha̱chet A̱yahudawa ba. A̱wot Yesu si̱ bai a̱ ba̱ yong ma̱ng a̱mba! A̱ si̱ nyia̱ “Swat nyinyang ku shya̱ dundung ma̱ng a̱nyin!” 20 Nang gu nhyia̱ a̱nia a̱ni, a̱ si̱ tak ma̱ng a̱mba mbwak nggu na ma̱ng a̱gbang tsi̱ntsa̱u nggu wu. Mman ta̱m na si̱ gwai ba̱t nang ba̱ ndi A̱tyoli Yesu a̱ni! 21 A̱wot Yesu si̱ bu nyia̱ ma̱ng a̱mba, “Swat nyinyang ku shya̱ ma̱ng a̱nyin! Ma̱nang A̱tyia̱ wu nta̱m nung a̱ni; ma a̱nia wa, n ma nta̱m nyin!” 22 Nang gu nhyia̱ a̱nia a̱ni, a̱ si̱ hyiap mba swuan. A̱ si̱ nyia̱, “Nyi san A̱za̱za̱rak Ntswa wu! 23 Ka̱ nyi chi a̱yin a̱bun nggu wu, á̱ ma na chi nggu ndyo. A̱tyu nang nyi ba̱ng gu a̱bun nggu wu a̱ni, á̱ na ba̱ng nggu ndyo.” 24 A̱tyo nyiung mi̱ mman ta̱m swak ma̱ a̱feang na Toma, a̱ ku byia̱ a̱lyoot nggan nang á̱ bu ngyei “A̱hyaai ka” a̱ni; ku shya̱ ma̱ng a̱mba nang Yesu ku mbai a̱ni bah. 25 Nang á̱kum mman ta̱m ka n tak ma̱ng a̱nggu a̱ni, “Zi̱ li A̱tyoli nzi̱t wu a̱ni!” Toma si̱ nyia̱ ma̱ng a̱mba, “Ka̱ n di a̱bubwong nkusa ba di̱ mbwak nggu na; n si̱ bu nsak ga̱swuong nung ji bah; a̱wot n si̱ bu nsak bwak da̱ a̱gbang tsi̱ntsa̱u nggu wu bah; n na nwuak a̱chuchuk bah!” 26 Nang mam a̱ni̱nai nswak a̱ni, nang mman ta̱m nggu na bu shya̱ a̱mali ka, ba̱ nyim á̱pyia̱ mba á̱ tyia̱, nang Toma shya̱ dundung ma̱ng a̱mba. A̱wot nang nyinyiit na shya̱ di̱ nyim, Yesu si̱ bai a̱ ba̱ yong ma̱ng a̱mba! A̱ si̱ nyia̱, “Swat nyinyang ku shya̱ dundung ma̱ng a̱nyin!” 27 A̱jawa Yesu si̱ nyia̱ ma̱ng Toma, “Tyia̱ ga̱swuong ang ji, a̱wot a nwuan mbwak nung na. Neap bwak ang hu a tyia̱ mi̱ tsi̱ntsa̱u nung ji. Yok, but mi̱ fwuo bah; nwuak a̱chuchuk!” 28 Toma si̱ nyia̱ ma̱ng a̱nggu, “A̱tyoli nung ma̱ng A̱gwaza nung!” 29 Yesu si̱ bu nyia̱ ma̱ng a̱nggu, “A nwuak fwuo mat nang a ndi nung wa a̱ni a? Á̱niet a̱li̱ba̱rka bya yet á̱si̱ ba̱ nwai li nung; a̱mgba̱m ma̱ng a̱nia ba̱ si̱ nwuak fwuo da̱ nung a̱ni.” 30 Yesu ku nyia̱ nkyang a̱ga̱de ma̱ a̱di̱di̱t nang gu nshya̱ ma̱ng mman ta̱m nggu na, á̱ lyuut na mi̱ ta̱ka̱da huni bah. 31 A̱mgba̱m ma̱ng a̱nia, á̱ lyuut nkyang nani da̱nian nyi ka nwuak a̱chuchuk nang Yesu wa ngyet Kristi, A̱tyu nang A̱gwaza kup gu tyok a̱ni, ma̱ng Nggwon A̱gwaza; a̱wot mami nwuak fwuo nyin hu da̱ nggu, nyi ka shya̱ swuan mami a̱lyoot gu.
1 Nang si̱ huni nswak a̱ni, Yesu si̱ bu tyai a̱pyia̱ nggu da̱ a̱vwuo mman ta̱m nggu na a̱beam a̱gba̱ndang jok Ga̱lili ka. Di si̱sak gu ntyai a̱pyia̱ gu a̱ni: 2 Siman Bitut, ma̱ng Toma (a̱ ku byia̱ a̱lyoot nggan nang á̱ bu ngyei “A̱hyaai ka” a̱ni); ma̱ng Nataniyel a̱ ku neet mi̱ Kana mi̱ a̱keang Ga̱lili a̱ni; ma̱ng á̱fai Za̱ba̱di, ma̱ng mman ta̱m a̱feang á̱ghyang Yesu na; ku mun á̱ shya̱ a̱ja dundung. 3 Siman Bitut si̱ nyia̱ ma̱ng a̱mba, “N naat bwoi fa̱n!” Ba̱ si̱ nyia̱ ma̱ng a̱nggu, “Zi̱ na khwi ang!” A̱wot ba̱ si̱ nat, ba̱ si̱ nwuo kukwon a̱wak hu. Ba̱ si̱ tyak a̱mgba̱m a̱tyetuk a̱kya nang ba̱ bwoi fa̱n bah. 4 Ma̱ a̱tsotson a̱tson, Yesu si̱ yong di̱ khwong a̱sa̱khwot hu. A̱wot ba̱ ku fi̱k Yesu bah. 5 A̱wot a̱ si̱ nyia̱ ma̱ng a̱mba, “Zám jini, nyi bwuo a̱fa̱n baa?” Ba̱ si̱ nyia̱, “Kaai, zi̱ ka̱n bwuo kyang bah.” 6 Yesu si̱ nyia̱ ma̱ng a̱mba, “Nyi koot a̱ka̱li nyin ka a̱zayak; nyi mbwoi fa̱n hu.” Nang ba̱ koot a̱ni, ba̱ si̱ bwoi fa̱n ba̱t! A̱ka̱li ka̱ si̱ khat ba kwak hu! 7 Nggwon ta̱m ka nang Yesu ku chat a̱ swak a̱ni, si̱ nyia̱ ma̱ng Bitut, “A̱tyoli Yesu wa!” Mi̱ di̱ yong a̱hwa nang Bitut nfa̱k nang Yesu wa a̱ni, a̱ si̱ kup a̱yaatoot nggu ba, (nang gu khwuk a̱yaatoot gu ba, a̱ koot); a̱wot a̱ si̱ fi̱p a̱ kwa ma̱ a̱sa̱khwot na! 8 Á̱kum mman ta̱m ka si̱ bai ba̱ si̱ kwak a̱ka̱li ka tyentyang ma̱ng fa̱n hu; mat nang ba̱ shya̱ gbang ma̱ng khwong hu bah, ku ku yet nang a̱ka̱tyong nchyi a̱ni. 9 Mi̱ di̱ ghwut mba hu ma̱ a̱sa̱khwot na, ba̱ si̱ li a̱chi̱chan ndong ma̱ng fa̱n tazwa ndong ka, mbeang burodi. 10 Yesu si̱ nyia̱ ma̱ng a̱mba, “Nyi bai ma̱ng fa̱n ghyáng a̱ji nang nyi ka̱n bwoi a̱ni.” 11 Huhwa Siman Bitut si̱ nyeak kukwon a̱wak hu, a̱ si̱ khwat a̱ka̱li ka bai ndyo di̱ khwong hu, nang ka̱ nhyat ma̱ng fa̱n. Fa̱n hu ku yet chyi ma̱ng nswak nfwuon ma̱ a̱tat (153 ). Bi̱ri̱ng ma̱ng a̱di̱di̱t fa̱n a̱wa, a̱ka̱li ka du tyat bah! 12 Yesu si̱ nyia̱ ma̱ng a̱mba, “Nyi bai nyi tyat a̱ta̱mpyia̱!” Á̱ mbyia̱ nggwon ta̱m ka̱ du gbang a̱lyia̱ ka̱ lyip gu, “Nwan wa a̱nyan?” bah, mat ba̱ ku lyen nang A̱tyoli Yesu wa! 13 A̱wot Yesu si̱ nat a̱ si̱ kyiak burodi wu, a̱ si̱ ka̱u mbaa. Ma a̱nia wa, gu si̱ bu nnyia̱ ma̱ng fa̱n hu. 14 Si̱ huni hwa ku yet a̱ka̱tat ka nang Yesu ntyai a̱pyia̱ nggu da̱ a̱vwuo mman ta̱m nggu ka, nang gu ku ndoot ma̱ng swuan ma̱ á̱niet ba̱ ka̱n kwi a̱ni. 15 Nang ba̱ ntyak ya kyayak hu a̱ni, Yesu si̱ nyia̱ ma̱ng Siman Bitut, “Siman a̱fai Yoona, a̱tsak a̱lyiat, a chat nung swak á̱si̱ bani a?” A̱ si̱ shim, nyia̱ “Ii, A̱tyoli a lyen nang n chat ang!” Yesu si̱ nyia̱ ma̱ng a̱nggu, “Ka̱u mman zón seap nung na kyayak.” 16 A̱ka̱feang ka Yesu si̱ nyia̱ ma̱ng a̱nggu, “Siman, a̱fai Yoona, a̱tsak a̱lyiat a chat nung a?” A̱ si̱ shim, nyia̱ “Ii, A̱tyoli, a lyen nang n chat ang!” Yesu si̱ nyia̱ ma̱ng a̱nggu, “Chok zón seap nung ji.” 17 Yesu si̱ bu lyip gu da̱ a̱ka̱tat ka, nyia̱, “Siman, a̱fai Yoona, a chat nung a?” Bitut si̱ fa̱k a̱lyia̱ ya di̱ si̱sak nang Yesu bu ndyip gu da̱ a̱ka̱tat ka, nyia̱, “A chat nung a?” A̱ si̱ nyia̱ “A̱tyoli, a lyen kuzang kyang, a lyen nang n chat ang!” Yesu si̱ nyia̱ ma̱ng a̱nggu, “Ka̱u zón seap nung ji kyayak. 18 “N hyia̱ ma̱ng a̱nwan a̱tsak a̱lyiat; jen nang a ku ngyet fi̱ng nggwon seam a̱ni, a ni̱ kup a̱toot nang a chat a̱ni. A nat koji wa nang a chat nat a̱ni. A̱wot ka̱ a ba̱ kwop, a na neap mbwak ang na, a̱yin a̱ kup ang a̱yaatoot ang ba, a̱ nat ma̱ng a̱nwan da̱ a̱vwuo nang a chat a̱ni bah.” 19 (Yesu ku hyia̱ si̱ huni da̱nian gu ka tak tangka̱i a̱khwu nang Bitut na̱ khwu, ka̱ ka nwuak A̱gwaza shi a̱ni). A̱wot Yesu si̱ nyia̱ ma̱ng Bitut, “Khwi nung!” 20 Bitut si̱ ta̱ghak, a̱ si̱ li nggwon ta̱m nang Yesu chat ba̱t a̱ni ka̱ khwi mbaa. Nggu wa ku shya̱ a̱ hyia̱k Yesu gi̱ngi̱ng, di̱n jen ya nkyayak A̱yet Ghwut Mman Isi̱rela mi̱ Khwo wu; a̱ si̱ lyip Yesu nyia̱, “A̱tyoli, a̱nyan wa chat bwuk ma̱ng a̱nwan hu?” 21 Nang Bitut nta̱ghak a̱ si̱ li ngguu a̱ni, a̱ si̱ nyia̱ ma̱ng Yesu, “A̱tyoli, a̱tyu wuni fa?” 22 Yesu si̱ nwuak gu shim, nyia̱, “Ka̱ n shim gu ndyo nyia̱ a̱ na swuan si̱ nat jen n na mbwuok a̱ni; yihwa ngyet si̱ nwan hu? Nwan, khwi ma̱ nung!” 23 Mat a̱nia, nkhang na si̱ kai a̱ kaat á̱niet khwi Yesu ba, nang á̱ nyia̱ nggwon ta̱m kani na khwu bah. A̱wot Yesu ku hyia̱ nang gu na nwai khwu hwa bah. A̱ ku nyia̱, “Ki̱ n nyia̱ n na nghwon guu gu swuan si̱ nang n bwuok; yihwa ngyet a̱ka̱ta ang ka?” 24 A̱tyu wuni wa yet nggwon ta̱m ka ka̱ shei kpa̱sai a̱chuchuk tazwa a̱mgba̱m nkyang nani a̱ni; a̱ si̱ lyuut naa. Zi̱ lyen nang kyang gu hyia̱ a̱ni, yet a̱tsak a̱lyiat wa za̱m! 25 Nkyang njhyang ma̱ a̱di̱di̱t nang Yesu ku nyia̱ a̱ni. Ka̱ á̱ wa lyuut na a̱mgba̱m, n fa a̱mgba̱m swanta hu si̱ mi̱n kyiak nta̱ka̱da na nang á̱ ndyuut a̱ni bah!