Liloŵe lya Umi
1 Pandanda lyapali Liloŵe, Liloŵe lyaliji ni Mlungu, Liloŵelyo lyaliji Mlungu. 2 Kutandila pandanda pasyesyene Liloŵe lyaliji ni Mlungu. 3 Mlungu ŵapanganyisye yindu yosope yene kupitila mwa jwalakwe, mwa yiwumbe yosopeyi pangali cindu cimo ciŵacipanganyisye pangali jwalakwe. 4 Liloŵe lyaliji ndande ja umi, ni wele umiwo ni uwayice ni lilanguka kwa ŵandu. 5 Lilangukalyo likusaŵalaga mcipi, ni cipico ngaŵa mkulisimisya lilangukalyo. 6 Mlungu ŵamtumisye jwa mtenga jwakwe, lina lyakwe Yohane, 7 juŵayice kukwasalila ŵandu ya lilangukalyo, ni kuti wosope awupikane utengawo ni kuwukulupilila. 8 Jwalakwe msyene nganaŵa lilanguka, nambo ŵayice kukusala ya lilangukalyo. 9 Ali ni lilanguka lisyesyene, lilanguka lyalikwisa mcilambo capasi ni kumulicilaga pa jwalijose. 10 Liloŵe lyaliji mcilambo capasi, ni atamose Mlungu ŵapanganyisye cilambo capasi kupitila mwa jwalakwe, nambope cilambo capasi nganicim'manyilila jwalakwe. 11 Jwalakwe ŵayice ku cilambo cakwe, nambo ŵandu ŵakwe ŵene nganampocela. 12 Nambope, ŵane ŵampocele ni ŵakulupilile mwa jwalakwe, myoyo kwa ŵelewo jwalakwe ŵapele macili gakuŵa ŵanace ŵa Mlungu. 13 Jemanjajo ngaŵa kuti ŵaŵele ŵanace ŵa Mlungu mwa matala gakupagwila ŵandu, mpela ŵanace ŵakwete acatati ŵawo iyayi. Mlungu msyene ni juŵaliji atati ŵawo. 14 Liloŵe lyaŵele mundu, ni ŵatemi pasikati petu. Twaluweni lumbili lwakwe, lumbili luŵalupocele mpela mwanace jumope jwa Atati. Mwa jwelejo ŵatulosisye umbone mtima wa Mlungu ni usyesyene. 15 Yohane ŵaŵecete ya jwalakwe. Ŵagumisile kuti, “Aju ni junaŵecetaga ya jwalakwe pinatiji pala kuti, ‘Jwalakwe akwisa panyuma pangu, nambo ali jwamkulungwa kumbunda une, ligongo jwalakwe ŵapali une mkanimbagwe.’ ” 16 Mwa kugumbala kwa umbone mtima wakwe atupele uwe wosope ŵene upile, wakuyana ni upile ujakwe. 17 Mlungu ŵapelece Malamusi kupitila mwa Mose, nambo umbone mtima ni usyesyene yayice kupitila mwa Yesu Klistu. 18 Kutandilila kalakala pangali atamose jumo juŵam'weni Mlungu, akaŵe Mwanace jumo pejo, jwali jwakulandana ni Mlungu soni ali pakuŵandikana ni Atatigwe, ni jwamtendesye kuti Mlungujo amanyice.
Utenga wa Yohane M'batisi
19 Acakulungwa ŵa Ciyuda ŵa m'Yelusalemu ŵatumile ŵakutaga mbopesi ŵane ni Alefi kwa Yohane, kukumwusya kuti, “Ana wawo ŵani?” 20 Yohane ŵajitice nganakana, nambo ŵaŵecete mwangasisa ni mwakupikanika, kuti: “Une nganimba Klistu.” 21 Jemanjajo ŵamwusisye kuti, “Nambi sambano wawo ŵani? Ana wawo Eliya?” Yohane ŵajanjile kuti, “Iyayi, ngaŵa une.” Jemanjajo ŵawusisye kuti, “Ana wawo ŵakulocesya?” Jwalakwe ŵajanjile kuti, “Iyayi.” 22 Jemanjajo ŵatite kuti, “Atusaliletu ana ŵalakwe ŵani? Tukusosa tujigale yisyesyene kuti tukasalile ŵatutumile uwewo. Ana cici citasale cakwayana ni ya wawojo asyene?” 23 Yohane ŵajanjile pakugakuya malemba ga jwakulocesya Yesaya gakuti: “Une ni ‘liloŵe lya jwine jwakwe jwakugumila mcipululu: akusala kuti, Kolosyani litala lyakupita Ambuje!’ ” 24 Ŵamitenga, ŵiŵatumidwe ni Afalisi ŵala, 25 ŵamwusisye Yohane kuti, “Naga nganimŵa Klistu, kapena Eliya, kapena Jwakulocesya, ligongo cici mkubatisya?” 26 Yohane ŵajanjile kuti, “Une ngumbatisya ni mesi, nambo pasikati penu pajimi jumo jungakum'manyilila. 27 Jwalakwe akwisa panyuma pangu, nambo nganguŵajilwa amta panandi kugopola ngonji sya sapato syakwe.” 28 Ayi yosopeyi yatendekwe m'Betaniya kungopoko lyuŵa kwa Lusulo lwa Yolodani, kuŵabatisyaga Yohane.
Mwanace jwa Ngondolo ja Mlungu
29 Kundaŵi kwakwe Yohane ŵam'weni Yesu ali mkwisa kwa jwalakwe, ni ŵatite kuti, “Aju ni Mwanace Jwangondolo jwa Mlungu, jwakutyosya ulemwa wa cilambo capasi! 30 Jweleju ni junagambaga jula pinaŵecetaga kuti, ‘Mundu akwisa panyuma pa une, nambo ali jwamkulungwa kupunda une, ligongo jwalakwe ŵapali une mkanimbagwe.’ 31 Une nganimanyilila kuti taciŵa jwamti uli, nambo nayice kukubatisya ni mesi kuti nimtendekasye jwalakwe amanyice kwa ŵandu ŵa Isalaeli.” 32 Yohane ni ŵapelece awu umboniwu wakuti: “Naweni Msimu ali mkutuluka kutyocela kwinani mpela ngunda ni kutama pa jwalakwe. 33 Une naliji jwangamanyililape kuti ŵaliji jwelejo, nambo Mlungu, ŵiŵandumisye une kukubatisya ni mesi, ŵaliji ali asalile une kuti, ‘Timciwuwona Msimu uli mkutuluka ni kutama pa mundu, jwelejo ni jwakasabatisyaga ni Msimu Ŵaswela.’ 34 Yohane ŵatite kuti, ‘Une nayiweni ayi yili mkutendedwa nipo ngutendela umboni kuti jwalakweju ali Mwanace jwa Mlungu.’ ”
Ŵakulijiganya ŵandanda ŵa Yesu
35 Kundaŵi kwakwe Yohane ŵaliji ali ajimi pa malo palapala, pampepe ni ŵakulijiganya ŵakwe ŵaŵili. 36 Piŵam'weni Yesu ali mkwenda, Yohanejo jwatite kuti, “Mlole, Mwanace Jwangondolo jwa Mlungu.” 37 Ŵakulijiganya ŵaŵili ŵala piŵagapikene maloŵego, ŵamkuyisye Yesujo. 38 Yesu piŵagalawice ŵaweni kuti jemanja jila akumkuya, nipo ŵawusisye kuti, “Ana mkusaka cici?” Jemanjajo ŵajanjile kuti, “Labi, ana akutama kwapi?” (Liloŵe lyakuti “Labi” ligopolela kuti, “Cemwalimu”.) 39 Yesu ŵajanjile kuti, “Ayice akakuwone.” (Jeleji jaliji ciŵandika 4 koloko ja ligulo.) Ni ŵalongene najo ni kukuwona kuŵatamaga, ni lisikulyo lyamalile ali najo yalumo. 40 Jumo jwa jemanjajo ŵaliji Andileya, mpwakwe jwa Petulo. 41 Candanda ciŵatesile Andileya ni kuja kukwasimana akulu ŵawo Simoni ni kwasalila kuti, “Uwe tumsimene Mesiya.” (Liloŵeli kugopolela kwakwe ni kuti, “Klistu.”) 42 Kaneko Andileya ŵamjigalile Simoni kwa Yesu. Yesu ŵamlolite ni ŵatite kuti, “Wawo lina lyawo Simoni mwanace jwa Yohane, nambo tacikolanjidwa Kefa.” (Linali yalumo ni kuti Petulo, gopolela kuti, “lwala.”)
Yesu akwaŵilanga Filipi ni Nataniyeli
43 Kundaŵi kwakwe Yesu ŵaganisisye kuti ajawule ku Galileya. Jwalakwe ŵamsimene Filipi ni ŵasalile kuti, “Anguye une!” 44 (Filipi ŵatyocelaga ku Betisaida, ku msinda kuŵatamaga Andileya ni Petulo.) 45 Filipi ŵamsimene Nataniyeli ni ŵamsalile kuti, “Uwe tumsimene mundu jula juŵalembile Mose m'buku ja Malamusi ni ŵakulocesya ŵakwe soni ŵalembile ya jwalakwe. Jwalakwe ni Yesu mwanace jwa Yosefe, jwa ku Nasaleti.” 46 Nataniyeli ŵawusisye kuti, “Ku Nasaleti mpaka kukopoce cilicose cambone?” Filipi ŵajanjile kuti, “Ayice alole.” 47 Yesu piŵam'weni Nataniyeli ali mkwisa kwa jwalakwe, ŵaŵecete ya Nataniyelijo kuti, “Aju ni m'Isalaeli msyesyene, mwa jwalakwe mwangali unami!” 48 Nataniyeli ŵamwusisye Yesu kuti, “Une amanyilile camtuli?” Yesu ŵajanjile, “Une naweni wawo ndaŵi jiŵaliji pasi pa citela ca mkuju pala mkanaŵilanjidwe ni Filipi.” 49 Nataniyeli ŵajanjile kuti, “Mwalimu, wawo ni Mwanace jwa Mlungu! Soni mwenye jwa Isalaeli!” 50 Yesu ŵatite, “Ana akukulupilila ligongo lyakuti nasalile kuti naweni ndaŵi jiŵaliji pasi pa citela ca mkuju? Taciyiwona yindu yayikulungwa yakupunda yeleyi!” 51 Ni ŵasalile jemanjajo kuti, “Une ngwasalila jemanja yakuwona kuti: tacikuwona kwinani kuli kuwugwice malayika ga Mlungu gali mkukwela ni kutulucila pa Mwanace jwa Mundu.”
Ulombela wa ku Kana
1 Gali gapite masiku gaŵili kwaliji kwana ulombela mu msinda wa Kana m'Galileya. Mama ŵawo ŵa Yesu ŵaliji kukoko, 2 nambo soni Yesu ni ŵakulijiganya ŵakwe ŵaŵilasile ku ulombelako. 3 Piŵamasile finyo, mama ŵawo Yesu ŵamsalile jwalakwe kuti, “Ŵanduŵa ŵangali finyo amasile.” 4 Yesu ŵajanjile kuti, “Mama, ngakuŵajilwa kusalila une yakutenda, ndaŵi jangu nganijikwane.” 5 Mama ŵawo Yesu ŵasalile ŵamasengowo kuti, “Agambe kutenda yiliyose yitiŵasalileyo.” 6 Ayuda ŵakwete malamusi gakuliswejesya pakupopela, pa lyele ligongoli yapali yiŵiga ya maganga msano ni cimo ukulu wakwe, cilicose kwinjilamo ma lita 75 mpaka 100 . 7 Yesu ŵasalile ŵamasengo ŵala kuti, “Agumbasye ayi yiŵigayi ni mesi.” Jemanjajo ŵagumbesye yiŵigayo mpaka mu ngomo. 8 Kaneko jwalakwe ŵasalile kuti, “Atece sambano ni ajigale akapelece kwa jwamkulungwa jwa cindimba.” Ni ŵamjigalile mesigo. 9 Sambano galiji gali gasandwice finyo ni jwalakwe ŵamwele. Nganamanyilila kose kuŵatyocele jwele finyoju (nambo, ŵamasengo ŵiŵatecile mesi ŵala ni ŵiŵamanyilile.) Ni ŵamŵilasile msyene ulombela jwamlume 10 ni ŵatite kwa jwalakwe, “Jwalijose akusapelekaga finyo jwambone mnope pandanda, ni acalendowo ali ajikwite, ni akusapelekaga finyo wamba. Nambo ŵagambile kusalasya finyo jwambonejo mpaka sambano jino!” 11 Yesu ŵapanganyisye cakusimonjesya candandaci ku Kana m'Galileya, kuŵalosisye lumbili lwakwe, ni ŵakulijiganya ŵakwe ŵakulupilile mwa jwalakwe. 12 Panyuma pa yeleyi, Yesu, mama ŵawo, acapwakwe, ni ŵakulijiganya ŵakwe ŵajawile ku Kapelenaumu ni ŵatemi kweleko masiku gakuŵalanjika.
Yesu akwawula ku Nyumba ja AMBUJE
13 Jaliji ndaŵi jakuŵandicila Cindimba ca Pasaka, ni Yesu ŵajawile ku Yelusalemu. 14 M'Nyumba ja AMBUJEMO ŵasimene ŵandu ali mkusumisya ng'ombe, ngondolo, ni ngunda, ni ŵandu ŵakutenda malonda ga gakucenga mbiya ali atemi pigaliji matebulo gawo. 15 Yesu ŵapanganyisye cikoti ca ngonji ni ŵakopocesye wosope kusa kwa Nyumba ja AMBUJE, pampepe ni ngondolo ni ng'ombe syakwe. Ŵapikwisye matebulo giŵatendelaga malonda gakucenganya mbiya ni kusimwanya mbiyasyo. 16 Ŵalamwile ŵiŵasumisyaga ngunda kuti, “Asikoposye amuno ngundasyo! Akajitenda nyumba ja Atati ŵangu kuŵa malo ga malonda!” 17 Ŵakulijiganya ŵakwe ŵakumbucile kuti malemba gakuti, “Ambuje Mlungu, cinonyelo cangu ca pa nyumba jawo, ticicimbulajisya une.” 18 Acakulungwa ŵa Ciyuda ŵamwusisye ciwusyo cakuti, “Ana cici cakusimonjesya campaka apanganye ni kutulosya uwe kuti wawo akuŵajilwa kutenda yeleyi?” 19 Yesu ŵajanjile kuti, “Agwisye Nyumba ja AMBUJEJI, nipo tinjitaŵa soni gali gapite masiku gatatu.” 20 Jemanjajo ŵamwusisye kuti, “Tacijitaŵa soni pa masiku gatatupe basi? Jamasiletu yaka 46 ali mkutaŵa jele Nyumba ja AMBUJEJI!” 21 Nambo Nyumba ja AMBUJE jiŵagambaga Yesu caliji cilu cakwe. 22 Jwalakwe piŵamjimwisye ku ŵawe, ŵakulijiganya ŵakwe ŵakumbucile kuti jwalakwe ŵaliji ali aŵecete yeleyi, piŵagakulupilile Malemba ni yiŵaŵecete Yesu.
Yesu akumanyilila muwuŵelele umi wa ŵandu
23 Piŵaliji Yesu m'Yelusalemu pa ndaŵi ja cindimba ca Pasaka, ŵandu ŵajinji ŵakulupilile mwa jwalakwe piŵayiweni yakusimonjesya yiŵayipanganyisye. 24 Nambo Yesu nganasosa kuti ŵanduwo akole macili pa jwalakwe ligongo ŵamanyilile wosope mitima jawo. 25 Paliji pangasosekwa soni kuti jwine amsalile ya ŵanduwo, ligongo ŵamanyilile msyene kalape yiyaliji m'mitima mwawo.
Yesu ni Nikodemo
1 Ŵapali jwamkulungwa jwine jwa Ciyuda lina lyakwe Nikodemo, jwa likuga lya Afalisi. 2 Jweleju ŵajawile kwa Yesu cilo ni ŵatite kuti, “Mwalimu, uwe tukumanyilila kuti wawo ni mwalimu juŵatumisidwe ni Mlungu. Pangali mundu jwampaka apakombole kuyitenda yakusimonjesya yakuyitenda ŵalakwe naga Mlungu nganaŵa najo.” 3 Yesu ŵajanjile kuti, “Une ngwasalila yakuwona kuti: pangali jwakupakombola kuwuwona Ucimwene wa Mlungu naga nganapagwa soni kaŵili.” 4 Nikodemo ŵawusisye kuti, “Ana mundu jwamkulungwa mpaka apagwe kaŵili camtuli? Pakuŵa yili yangakomboleka kuti jwalakwe ajinjile mcitumbo ca mamagwe ni kupagwa soni kaŵili!” 5 Yesu ŵajanjile kuti, “Une ngwasalila jemanja yakuwona kuti, pangali jwampaka apakombole kwinjila mu Ucimwene wa Mlungu ali jwangapagwa mwa mesi ni Msimu. 6 Ku cilu mundu akusapagwaga mwa acinangolo, nambo ku usimu akusapagwaga mwa Msimu. 7 Akasimonga cinguŵecetela kwa jemanja kuti wosope ŵene akwenela kupagwa kaŵili. 8 Mbungo jikasapujila kujikusosa, jemanja akusajipikana lisegwe lyakwe, nambo ŵangamanyilila kujikusatyocela kapena kujikwawula. Yili myoyo kwa jwalijose jwakupagwa mwa Msimu.” 9 Nikodemo ŵawusisye kuti, “Yeleyi mpaka yikombolece camtuli?” 10 Yesu ŵajanjile kuti, “Ana wawo ngakumanyilila yeleyi kutendaga ali mwalimu jwamkulungwa mu Isalaeli?” 11 Une ngwasalila yakuwona kuti: “Uwe tukuŵeceta yitukuyimanyilila ni kusala yituyiweni, nambope pangali jumo jwa jemanja jwakusosa kwiticisya utenga wetu. 12 Jemanja ngakungulupilila une pingumsalila yindu ya cilambo acino, nambi tacingulupilila camtuli pitinasalile yindu ya kwinani? 13 Ni pangali mundu jumo juŵakwesile kwawula kwinani nambo Mwanace jwa Mundupe basi juŵayice pasi pano kutyocela kwinani.” 14 Mpela muŵatendele Mose kuti ŵalikolece pa citela lijoka lya bulonsi mcipululu, yalumo soni Mwanace jwa Mundu akuŵajilwa kumkwesya, 15 kuti jwalijose jutamkulupilile jwalakwe akole umi wangamala. 16 Pakuŵa Mlungu ŵacinonyele cilambo capasi mnope mwakuti jwalakwe ŵampelece Mwanace jwakwe jumopejo, ni kuti jwalijose jwakukulupilila mwa jwalakwe akawa nambo akole umi wangamala. 17 Pakuŵa Mlungu nganamtumisya Mwanace jwakwe mcilambo kuti aŵe jwakulamula magambo ga ŵandu, nambo kuti ŵakulupusye. 18 Ŵandu ŵakukulupilila mwa Mwanacejo ngakwalamula, nambo ŵakakukulupilila ŵalamwile kala, ligongo nganakulupilila mwa Mwanace jwa Mlungu jumopejo. 19 Amu ni muciciŵela cilamulo cakwe: lilanguka liyice mcilambo capasi, nambo ŵandu akunonyela cipi kupunda lilanguka, ligongo yitendo yawo yili yakusakala. 20 Wosope ŵene ŵakusatenda yakusakala akusaliŵenga lilanguka soni ŵangayika kulili lilanguka, ligongo ngakusosa kuti yitendo yawo yakusakala yiwonecele pakulanguka. 21 Nambo ŵandu ŵakutenda yayili yakuwona akusayika kulili lilanguka kuti lilangukalyo lilosye kuti yiŵayitesileyo yaliji yakumpikanila Mlungu.
Yesu ni Yohane
22 Panyuma pa yeleyi, Yesu ni ŵakulijiganya ŵakwe ŵajawile ku upande wa Yudeya, kuŵatemi ni jemanjajo ndaŵi panandi soni ŵabatisye. 23 Yohane nombe najo ŵabatisyaga mu Ainoni, ngaŵa kwakutalikangana ni ku Salimu, ligongo gapali mesi gamajinji mu gele malogo. Ŵandu ŵaliji mkwawula kwa Yohane ni ŵabatisyaga. 24 (Pelepa ni kuti Yohane ŵaliji mkanaponyedwe mu ukayidi.) 25 Ŵakulijiganya ŵane ŵa Yohane ŵatandite kukangana ni Myuda jwine ya ngani ja msyungu wakuliswejesya. 26 Ni jemanjajo ŵajawile kwa Yohane ni ŵamwusisye kuti, “Mwalimu, ana akumkumbucila mundu juŵaliji najo lisi lya kungopoko lyuŵa kwa Yolodani, jwejula juŵamtendelaga umboni jula? Jwalakwejotu ali mkubatisya sambano jino ni mundu jwalijose akuwutucila kwa jwalakwejo!” 27 Yohane ŵajanjile kuti, “Pangali mundu jwampaka akole cilicose naga Mlungu nganacipeleka kwa jwalakwe. 28 Jemanja acimsyene ali mboni syangu kuti une natite, ‘Une nganimba Mkulupusyo, nambo andumile kuti longolele pasogolo pa jwalakwe.’ 29 Jwakulombedwa akusaŵa m'myala mwa jwakulombela, nambo mjakwe jwa jwakulombela, jwakusajimililaga ni kupikanilaga, akuŵa jwakusangalala pakupikana maloŵe ga jwakulombela. Myoyo soni une kusengwa kwangu kukwanile. 30 Jwalakwe akwenela kuŵa jwamkulungwa nambo une mbe jwamnondi.”
Yesu ŵatyocele kwinani
31 Jwele jwakutyocela kwinani ali jwamkulungwa kwapunda wosope. Jwele jwakutyocela pa cilambo capasi ali jwapacilambo capasi ni akusaŵecetaga yindu ya pa cilambo capasi, nambo jwele jwakutyocela kwinani ali penani pa wosope. 32 Jwalakwe akusasala yayiweni ni kuyipikana, nambo pangali atamose jumo jwakuwupocela utenga wakwe. 33 Nambo jwalijose jwakuwupocela utenga wakwe akusimicisya kuti Mlungu ali ŵakuwona. 34 Pakuŵa jwele jwatumidwe ni Mlungu akusaŵeceta maloŵe ga Mlungu, ligongo Mlungu akusampaga macili gosope ga Msimu. 35 Atati akusamnonyelaga Mwanace jwawo soni yosope yene ayiŵisile m'myala mwakwe. 36 Jwalijose jwakukulupilila mwa Mwanace akwete umi wangamala, jwalijose jwangampikanila Mwanace ngasakola umi, nambo Mlungu tacapa yisawusyo mpaka kalakala.
Yesu ni jwamkongwe jwa ku Samaliya
1 Afalisi ŵapikene kuti Yesu ŵaliji mkumkuya ŵakulijiganya ŵajinji ni kubatisya ŵandu ŵajinji kumpunda Yohane. 2 (Yakuwona yakwe ni yakuti, Yesu msyenejo nganabatisya mundu jwalijose, nambo ŵakulijiganya ŵakwe.) 3 Myoyo Yesu piŵapikene yiyaŵecetedwagayo, ŵatyosile ku Yudeya ni kuwujila ku Galileya. 4 Wele ulendowu jwalakwe ŵapitile ku Samaliya. 5 Mu Samaliya Yesu ŵayice ku msinda wine lina lyakwe Sukali, uwaliji pakuŵandikana ni mgunda uŵapelece Yakobo kwa mwanace jwakwe Yosefe. 6 Kweleko capali cisima ca Yakobo. Yesu ali apesile ni ulendo, ŵatemi pa cisimapo. Waliji musi lyuŵa lili mpela pa mtwe. 7 Jwamkongwe jwa ci Samaliya ŵayice kukuteka mesi, ni Yesu ŵamŵendile kuti, “Ambe mesi gakumwa.” 8 (Ŵakulijiganya ŵakwe ŵaliji ali apite ku msinda kukusuma yakulya.) 9 Jwamkongwe ŵajanjile kuti, “Wawo Myuda, une Msamaliya ni tiyikombolece camtuli kuti aŵende mesi kwa une?” (Ayuda ni Asamaliya ngaŵa mkumwela yikapu ni yiŵiga yimo.) 10 Yesu ŵajanjile kuti, “Wawo akamanyilile yakusapelekaga Mlungu nipo kuti nduni jwakwaŵenda mesi gakumwajo, wawo akamŵendile jwalakwejo, nipo jwalakwe akapele ŵalakwe mesi gakupeleka umi.” 11 Jwamkongwe ŵatite, “Bwana,” wawo nganakola cibekete, soni cisimaci cakusokoka. Wawo mpaka agapate kwapi gele mesi gakupeleka umigo? 12 Nangolo jwetu Yakobo ni juŵatupele uwe cele cisimaci, jwalakwe ni ŵanace ŵakwe ŵacalume ni yilangwa yakwe ŵamwaga pelepa. Ana wawo mpaka aŵe ŵakulungwa kumpunda Yakobo? 13 Yesu ŵajanjile kuti, “Wosope ŵene ŵakumwa gele mesiga tijicakola njota soni, 14 nambo jwalijose jwakumwa mesi gitinjimpa une ngasijimkola njota soni. Mesi gitinjimpa tigaciŵa nduluko jitijicipeleka mwa jwalakwe mesi gakupeleka umi ni tigacimpa umi wangamala.” 15 Jwamkongwe ŵatite kuti, “Ambuje, ambe une gele mesigo, kuti jikasijingola soni njota, kuti ngayika soni akuno kukuteka mesi.” 16 Yesu ŵamsalile jwamkongwe jula kuti, “Jawulani mkaŵilanje ŵamkwenu ni mkawuje.” 17 Jwalakwe ŵajanjile kuti, “Nganingola ŵalume.” Yesu ŵamsalile kuti, “Mŵecete cenene pakuŵeceta kuti nganimkola ŵalume. 18 M'mwe ŵamlombile acalume msano, ni jwamlume jumli najo sambano jino nganaŵa ŵamkwenu asyesyene. Yimŵeceteyi yakuwona.” 19 Jwamkongwejo ŵatite kuti, “Bwana, une manyilile kuti wawo ali jwakulocesya.” 20 “Acinangolo ŵangu ŵa mtundu wa ci Samaliya ŵamlambilaga Mlungu pa lyele litumbili, nambo jemanja Ayuda akuti ku Yelusalemu ni kumalo peko kucitukamlambileje Mlungu.” 21 Yesu ŵamsalile jwalakwe kuti, “M'mwe ŵakongwe, mungulupilile une, tijiciyika ndaŵi jakuti, ŵandu ngasiŵalambila Atati mwitumbi atamose mu Yelusalemu. 22 Jemanja Asamaliya ngamkum'manyilila jwakumlambila kusyesyene, nambo uwe Ayuda tacim'manyilila, pakuŵa cikulupusyo cikutyocela kwa Ayuda. 23 Nambo tijiciyika ndaŵi soni jiyice kala, jakuti ŵandu tacalambila Atati mpela mwaŵelele ni macili ga Msimu wa Mlungu, tacalambila mwakuwona mpela mwakusosela asyene. 24 Mlungu ali Msimu, ni ŵandu mpaka apakombole kumlambila jwalakwe mpela mwaŵelele ni macili ga Msimu wakwepe basi.” 25 Jwamkongwejo ŵatite, “Ngumanyilila kuti Mkulupusyo taciyika, ni pitaciyika, tacitusalila uwe yosope yene.” 26 Yesu ŵajanjile kuti, “Jwelejo ni une jwene, junguŵeceta ni m'mwejo sambano.” 27 Ndaŵi jelejo ŵakulijiganya ŵa Yesu ŵala ŵawusile, ni ŵasimonjile mnope kumsimana jwalakwe ali mkuŵeceta ni jwamkongwe. Nambo pangali juŵamwusisye jwamkongwejo kuti, “Ana mkusosa cici?” Kapena kumwusya Yesu kuti, “Ligongo cici akuŵeceta ni jwamkongweju?” 28 Kaneko jwamkongwejo ŵalesile lulo lwakwe lwa mesi, ŵawujile ku msinda ni kuja kwasalila ŵandu kweleko kuti, 29 “Kwende akamlole mundu jwasalile une yosope yene yinayitesile. Pane jweleju ali Mkulupusyo jula?” 30 Ni wosope mu msinda mula ŵakopwece kwawula kwa Yesu. 31 Ndaŵi jelejo ŵakulijiganya ŵala ŵamŵendaga Yesu kuti, “Mwalimu, ayice alye yakulya!” 32 Nambo Yesu ŵajanjile kuti, “Une ngwete yakulya yangamkuyimanyilila jemanja.” 33 Ni ŵakulijiganya ŵala ŵatandite kuwusyana acimsyenepe, “Ana kapena pana mundu jwine juŵajigalile yakulya?” 34 Yesu ŵasalile kuti, “Yakulya yangu ni kupikanila yakusosa ŵele ŵiŵandumile une ni kumalisya kutenda masengo giŵambele. 35 Jemanja akwete msyungu wakuti, ‘Jisigele miesi mcecepe kaneko kugowola.’ Nambo ngumsalila kuti, alolecesye cenene ku migunda, mbeju sikomele ni sili cile kuti asigowole! 36 Jwakugowola mbeju akusamlipilaga ni akusasonganya mbeju sya ku umi wangamala, ni jwine jwakusapandaga ni jwakusagowolaga tacisangalala yalumo. 37 Yakusaŵeceta ŵandu yili yakuwona kuti, ‘Jwine akusapandaga, jwine akusagowolaga.’ 38 Une namtumisye jemanja kukugowola mbeju m'migunda mumkinapanganya masengo, ŵane ŵapanganyisye masengo mwelemo, ni jemanja akupatila kumasengo giŵatesile jemanjajo.” 39 Asamaliya ŵajinji ŵa mu msindamo ŵakulupilile mwa Yesu ligongo jwamkongwe jula ŵatite kuti, “Jwalakwejo asalile yosope yene yinayitesile.” 40 Myoyo Asamaliya piŵayice kwa Yesu, ŵamŵendile jwalakwejo kuti atame ni jemanjajo, nipo Yesu ŵatemi kweleko masiku gaŵili. 41 Ŵandu ŵajinji ŵakulupilile ligongo lya utenga wakwe. 42 Jemanjajo ŵamsalile jwamkongwejo kuti, “Sambano tukulupilile, ngaŵa ligongo lya yimwaŵecete m'mwejo, nambo ligongo tupikene uwe acimsyene, ni tukumanyilila kuti jwalakweju ali Mkulupusyo jusyesyene jwa cilambo capasi.”
Yesu ŵamposisye mwanace jwamlume jwa nduna ja mwenye
43 Ali atemi kweleko masiku gaŵili, Yesu ŵatyosile ni kwawula ku Galileya. 44 Pakuŵa jwalakwe msyene ŵaŵecete kuti, “Ŵandu ŵangamcimbicisya jwakulocesya mcilambo ca kumangwakwe.” 45 Piŵayice m'Galileya, ŵandu ŵampocele, ligongo ŵaliji ali ajawile ku Cindimba ca Pasaka ku Yelusalemu ni ŵayiweni yosope yene yiŵayitesile pa ndaŵi ja cindimbaco. 46 Kaneko Yesu ŵawujile ku Kana ku Galileya, kuŵagasandwisye mesi kuŵa finyo kula. Kweleko japali nduna ja boma nambo mwanace jwakwe jwamlume ŵaliji mkulwala ku Kapelenaumu. 47 Pijapikene ndunajo kuti Yesu ŵayice ku Galileya kutyocela ku Yudeya, ŵapite kwa jwalakwe ni kumŵenda kuti ajawule ku Kapelenaumu akamposye mwanace jwakwe, juŵasigele panandi kuwa. 48 Yesu ŵamsalile kuti, “Pangali atamose jumo jwa jemanja jutacikulupilila naga akayiwona yimanyisyo ni yakusimonjesya.” 49 Nduna jajanjile kuti, “Bwana, kwende tulongane mwanangu mkanawe.” 50 Yesu ŵamsalile jwalakwe kuti, “Jawulagani, mwanagwenu aposile!” Mundu jula ŵakulupilile maloŵe ga Yesu gala nipo ŵawujile kumangwakwe. 51 Piŵaliji mkwenda mwitala ŵasimene ni ŵakutumicila ŵakwe ŵele ŵiŵamsalile kuti, “Mwanagwenu aposile.” 52 Myoyo ŵawusisye ya ndaŵi jiŵapolele mwanacejo; nipo jemanjajo ŵatite, “Liso m'ma 1 koloko ja musi ni ndaŵi jele ciwawasa camlesile.” 53 Myoyo babagwejo ŵamanyilile kuti jaliji ndaŵi jilajila jiŵasalilidwe ni Yesu kuti, “Mwanagwenu aposile.” Kaneko ŵakulupilile pampepe ni ŵa mwiŵasa mwakwe. 54 Celeci caliji cakusimonjesya caŵili ciŵacitesile Yesu ali ayice ku Galileya kutyocela ku Yudeya.
Yesu akuposya mundu jwamlemale
1 Panyuma pa yeleyi, Yesu ŵajawile ku cindimba ca Pasaka ca Ayuda ku Yelusalemu. 2 Mu Yelusalemu mwana litamanda lina lyakwe Betisata Mcihebeli, pakuŵandikana ni Cipata ca Ngondolo, lyana tulindo msano pambali pakwe. 3 Likuga lyalikulungwa lya ŵandu ŵakulwala ŵagonaga mtulindomo, ŵangalola, ŵalemale, ni ŵawe yiŵalo. 4 Jemanjajo ŵajembecelaga kuti mesi gatenganyice. Ligongo ndaŵi ni katema kele lilayika lya Ambuje lyatulucilaga mwitamandamo ni kugatenganya mesi. Mundu jwandanda kwinjila mwitamandamo mesigo ali agatenganyisye ŵapolaga cilwele cilicose ciŵakwete. 5 Pelepo ŵapali mundu jwamlume juŵalwalaga kwa yaka 38 . 6 Yesu ŵam'weni ali cigonele pa malopo, ni ŵamanyilile kuti mundujo ŵalwasile kwa ndaŵi jelewu, ni ŵamwusisye kuti, “Ana mkusosa kuŵa cenene?” 7 Jwamlume jwakulwala jula ŵajanjile kuti, “Bwana, nganingola jwalijose akuno jwakunjigalila mwitamanda pati mesi agatenganyisye, pingulinjilila kuti njinjile, jwine akusaŵa ajinjile kalape mwelemo.” 8 Yesu ŵamsalile kuti, “Mjimuce, mnyakule ugono wenu, ni mjende.” 9 Ndaŵi jijojo mundu jula ŵaposile, ŵanyakwile ugono wakwe ni ŵatandite kwenda. Ayi ŵayitesile pa lisiku lyakupumula lya Ayuda, 10 ni acakulungwa ŵa Ciyuda ŵamsalile mundu juŵamposisye jula kuti, “Lelo ni lisiku lyakupumula lyetu, nipo malamusi getu ngagakumkunda kuti m'mwejo mnyakule ugono wenu.” 11 Jwalakwe ŵajanjile kuti, “Mundu jwambosisye ni jwasalile une kuti nyakule ugono wangu njawuleje.” 12 Jemanjajo ŵamwusisye kuti, “Jwele mundujo nduni juŵamsalile m'mwejo kuti mtende yeleyi?” 13 Nambo mundu juŵamposisyejo nganamanyilila kuti Yesu ŵaliji ŵani, pakuŵa paliji pana likuga lya ŵandu, soni Yesu ŵaliji ali apite. 14 Kaneko, Yesu ŵamsimene mundu jula m'Nyumba ja AMBUJE ni ŵamsalile kuti, “Mpikane, m'mwejo mli cenene sambano, ni mkasimtenda soni ulemwa nimkaŵa kumwonecela cindu cakogoya.” 15 Kaneko mundujo ŵatyosile ni ŵasalile acakulungwa ŵa Ciyuda ŵala kuti Yesu ni juŵamposisye. 16 Ni ŵatandite kumsawusya Yesu, ligongo ŵapanganyisye masengo gakuposya lisiku lyakupumula lya Ayuda. 17 Yesu ŵajanjile jemanjajo kuti, “Atati ŵangu akupanganya masengo masiku gosope, ni une soni ngwenela kupanganya masengo.” 18 Ligongo lyakuti Yesu ŵaŵecete yeleyi, acakulungwa ŵa Ciyuda ŵapundile kusosa kumwulaga, ngaŵa ligongo lyakasa Lilamusi lya lisiku lyakupumulape, nambo soni ŵatite kuti Mlungu ŵaliji Atati ŵakwe ni mulyele litalali ŵalilandenye jwalakwe msyene ni Mlungu.
Mlungu akupeleka macili kwa Mwanagwe
19 Pelepo Yesu ŵajanjile jemanjajo kuti, “Ngumsalila jemanja yakuwona kuti, Mwanace ngaŵa mkupakombola kutenda cilicose pajika, akusapanganya yelepeyo yakusayiwona ali mkuyitenda Atatigwe. Yakusayitenda Atati, nombe najo Mwanace akusayitendaga myoyo. 20 Pakuŵa Atati akusamnonyelaga Mwanace ni akusamlosyaga yosope yakuyipanganya jwalakwe. Jwalakwe tacimlosya Mwanagwe atamose yindu yakuti ayipanganye kupunda yeleyi, ni jemanja wosope timcisimonga. 21 Mpela mwakwimucisya Atati ŵandu ŵawe ni kwapa umi, yalumo soni Mwanace akupeleka umi kwa ŵele ŵasosile kwapa. 22 Atamose kulamula kwene, Atati ŵangalamula jwalijose. Ampele mwanagwawo macili gosope gakulamula, 23 myoyo ŵandu wosope tacimpa ucimbicimbi mwanagwawojo mpela mwakwapela ucimbicimbi Atati. Jwalijose jwangakumcimbicisya Mwanacejo ngakwacimbicisya soni Atati ŵiŵamtumisye Mwanacejo. 24 “Une ngwasalila jemanja yakuwona kuti: ŵele ŵakugapikana maloŵe gangu ni kwakulupilila ŵele ŵiŵandumile une akwete umi wangamala. Ngasiŵalamula, nambo kuti atyosile ku ciwa kwawula ku umi wangamala. 25 Une ngumsalila jemanja yakuwona kuti: ndaŵi jili mkwisa soni jiyice kala jakuti ŵandu ŵele ŵakuŵa mpela ŵawile tacigapikana maloŵe ga Mwanace jwa Mlungu, ni kuti ŵele ŵitacigapikanawo tacikulupilila ni tacikola umi. 26 Mpela muyiŵelele kuti Atati ŵangu ni ŵakusiŵapaga ŵandu umi myoyo soni amtesile Mwanagwawo kuŵa jwakupeleka umi. 27 Ni ampele Mwanacejo macili gakulamula, ligongo ali Mwanace jwa Mundu. 28 Akasimonga pa yeleyi; pakuŵa jili mkwisa ndaŵi jakuti ŵawile wosope tacigapikana maloŵe gakwe 29 ni tacikopoka m'malembe mwawo: ŵele ŵatesile cenene tacijimuka ni kuŵa umi, ni ŵiŵatesile yakusakala tacijimuka ni kwajimba magambo.
Ŵakumtendela Yesu umboni
30 “Une ngaŵa mkupakombola kutenda kandu kalikose mwa une jikape; ngusalamulaga mwele pemo mpela mwakusasalilaga Atati ŵangu, myoyo kulamula kwangu kuli kwambone, ligongo ngangutenda yinguyisosa une, nambo yele peyo yakusosa Atati ŵangu ŵiŵandumile une kuti nayitende. 31 “Naga ngulitendela umboni une namsyene, ni umboni wangu uli wangakwanila. 32 Nambo apali jwine jwakwe jweleju ni Atati ŵangu ŵakusatendaga umboni wa une, ni ngumanyilila kuti yakuŵeceta jwalakwe ya une yili yakuwona. 33 Jemanja ŵatumisye ŵamitenga ŵawo kwa Yohane, ni jwalakwejo ŵaŵecete ya une yiyaliji yakuwona. 34 Ngaŵa kuti ngukulupilila umboni wa mundu jwalijose; nambo kuti nguŵeceta yeleyi kuti jemanja akulupuce. 35 Yohane ŵaliji mpela nyali jakolela ni jakuŵala, nipo jemanja mwasakaga kusengwa ni lilanguka lyakwelyo kwa kandaŵi. 36 Nambo une ngwete umboni wa une jika wakupunda wele uŵapelece Yohane: welewu ni umboni wa yingutenda, yayili yitendo yiŵambele Atati ŵangu kuti nayitendeje, yeleyi yikuŵeceta ni kulosya kusyesyene mumbelele une, soni yingutendayo yikulosya kuti ndumidwe ni Atati ŵangu. 37 Ni Atati ŵiŵandumile unewo, nombe nawo akundendela une umboni. Jemanja nganagapikaneje maloŵe gawo atamose kujiwona ngope jawo. 38 Jemanja ngamkugasunga maloŵe gawo m'mitima mwenu, pakuŵa ngakumkulupilila jwele juŵamtumisye Atatijo. 39 Jemanja akulijiganya Malemba, ligongo akuganisya kuti taciwupata umi wangamala m'Malembamo. Malemba gakwe ni gagaga gakuŵeceta ya une! 40 Posepo jemanja ngakusosa kwika kuti alijiganye kwa une kuti akole umi. 41 “Une ngangwembeceya ucimbicimbi kutyocela kwa ŵandu. 42 Nambo ngumanyilila mumŵelele jemanja, soni ngumanyilila kuti jemanja ngakumnonyela Mlungu. 43 Une mbice ni ulamusi wa Atati ŵangu, nambo jemanja nganimumbocela kose; nambo pitayicepo jwine ni ulamusi wakwe jemanja timcimpocela. 44 Jemanja kumnonyela kupocela ucimbicimbi kutyocela kwa ŵandu, nambo ngamkulinjilila kutenda yindu yamti jumope jwali Mlungu mpaka ŵalapilile; nambi sambano yikomboleka camtuli kuti jemanja mungulupilile une? 45 Akaganisyaga kuti, une ni jutinjimjimba magambo jemanja pameso pa Atati ŵangu, Mose jumkumkulupililajo kuti mpaka amkamucisye ni jujojo ni jutacimjimba magambo jemanja. 46 Yikaŵe kuti jemanja mwamkulupilile Mose kusyene, mkangulupilile une, ligongo jwalakwe jwalembile ya une. 47 Nambo pakuŵa ngamkukulupilila yiŵalembile, ana mpaka mkulupilile camtuli yinguŵeceta une?”
Yesu akulisya likuga lyalikulungwa lya ŵandu
1 Kaneko Yesu ŵajombwece Nyasa ja Galileya (lina lyakwe line Nyasa ja Tibeliya). 2 Likuga lyalikulungwa lya ŵandu lyamkuyisye, ligongo ŵayiweni yimanyisyo yakusimonjesya ni yakwaposya ŵandu ŵiŵaliji mkulwala. 3 Yesu ŵakwesile penani pa litumbi ni ŵatemi pasi ni ŵakulijiganya ŵakwe. 4 Ndaŵi ja Cindimba ca Pasaka ja Ayuda jaŵandicile. 5 Yesu piŵalolite ŵaliweni likuga lyalikulungwa lya ŵandu lili mkwisa kwa jwalakwe, ni ŵamwusisye Filipi kuti, “Ana mpaka tukasume kwapi yakulya yakwanila kwalisya ŵandu wosope ŵa?” 6 Yesu ŵaŵecete yeleyi kuti amlinje Filipijo; nambo ŵamanyililaga yakatesile. 7 Filipi ŵajanjile kuti, “Naga kuti jwalijose akole cakulya camnono, pakusosekwa mbiya syakupunda masilifa 200 kuti tusume mikate jakwanila.” 8 Jwakulijiganya jwakwe jwine lina lyakwe Andileya, mpwakwe jwa Simoni Petulo, ŵamsalile Yesu kuti, 9 “Pana mcanda jwine panopano jwakwete mikate msano ja balele ni somba siŵilipe. Yeleyi ngiyakwanila ŵandu wosopeŵa.” 10 Nambo Yesu ŵasalile jemanjajo kuti, “Ŵasalile ŵanduwo kuti atame pasi.” (Pa malopo paliji pana manyasi gejinji.) Myoyo ŵandu wosope ŵene ŵatemi pasi; mwikugamo mwapali mpela acalume ciŵandika 5 ,000 . 11 Yesu ŵajigele mikate jila, ni ŵamtogolele Mlungu, kaneko ŵayipelegenye kwa ŵandu ŵiŵatemi pelepowo. Yesu ŵatesile yalumo soni ni somba sila, ni wosope ŵala ŵagaŵene mpela muŵasoselaga. 12 Wosope ŵene ŵala piŵajikwite, Yesu ŵasalile ŵakulijiganya ŵakwe ŵala kuti, “Alokotanye makombogo; kwende tukagajasa.” 13 Myoyo ŵalokotenye sigasiga syosope syene nipo ŵagumbesye likumi ni siŵili ni makombo ga mikate msano ja balele jiŵalile ŵandu jila. 14 Pakuciwona cimanyisyo cakusimonjesya ciŵatesile Yesu ŵanduwo ŵatite kuti, “Yakuwona aju ni Jwakulocesya jula, Malemba gaŵecete ya jwalakwe kuti taciyika mcilambo capasi!” 15 Apa Yesu ŵamanyilile kuti ŵandu ŵala ŵatiji amjigale ni kumjinjisya ucimwene, myoyo jwalakwe ŵatyosile kwawula soni kwitumbi jikape.
Yesu akwenda pa Nyasa ja Galileya
16 Pikwaswele, ŵakulijiganya ŵa Yesu ŵapite ku nyasa, 17 ŵakwesile mwiboti, ni ŵawujile kombokanya nyasa kwinjilila ku Kapelenaumu. Cipi catandite, nambo Yesu ŵaliji mkinayicepe kwa jemanjajo. 18 Pa jele ndaŵijo mbungo jamacili jaliji mkupuga ni matumbela gatandite. 19 Ŵakulijiganya ŵala ŵaliji ali apalese liboti makilomita ciŵandika msano kapena msano ni jimo piŵam'weni Yesu ali mkwenda pacanya pa mesi, ni kwikaga ciŵandika ni libotilyo, jemanjajo ŵajogwepe. 20 Yesu ŵasalile kuti, “Akatenda woga, ndili une!” 21 Kaneko ŵamkundile kwinjila mwibotimo, ni mwangakaŵa libotilyo lyayice pamkuli.
Ŵandu akumlolesya Yesu
22 Kundaŵi kwakwe likuga lya ŵandu lilyaliji lisi line lya nyasa lyamanyilile kuti lyapali liboti limope basi kweleko. Jemanjajo ŵamanyilile kuti Yesu nganajawula mu lyele libotilyo ni ŵakulijiganya ŵakwe, nambo kuti ŵakulijiganyawo ŵatyosile muli mwangali Yesujo. 23 Maboti gane gakutyocela ku Tibeliya, gayice kukocesya ku mkuli ciŵandika ni ku malo kulyalile likuga lya ŵandu lila mikate Ambuje ali atogolele kwa Mlungu. 24 Likuga lila pilyayiweni yakuti kwaliji kwangali Yesu kweleko, atamose ŵakulijiganya ŵakwe, lyakwesile mu gele mabotigo ni kwawula ku Kapelenaumu kukumlolesya Yesu.
Yesu ali cakulya cakupeleka umi
25 Ŵandu ŵala piŵamsimene Yesu lisi line lya nyasa, ŵamwusisye kuti, “Mwalimu, ŵayice lisikuci akuno?” 26 Yesu ŵajanjile kuti, “Ngumsalila jemanja yakuwona kuti mkundolesya une ngaŵa ligongo lyakuti mwapikanicisye yimanyisyo yakusimonjesya yangu, nambo ligongo mwalile mikate ni kwikuta. 27 Alimbicileje kuti apate yakulya yakwatendesya ŵandu kuti aŵeje ni umi wa mpaka kalakala ngaŵa kupata yakulya yayikusajonasika. Yeleyi ni yakulya yitacapa jemanja Mwanace jwa Mundu, ligongo Mlungu, Atati, alosisye kuti amsagwile jwalakwejo.” 28 Myoyo jemanjajo ŵamwusisye kuti, “Ana uwe tukwenela kutenda cici kuti tupanganye masengo gakugasosa Mlungu kuti tugatende?” 29 Yesu ŵajanjile kuti, “Mlungu cakusosa kuti jemanja acitende cili cakuti jemanja mkulupiciceje mwa jwele pejo juŵamtumisyejo.” 30 Jemanjajo ŵamwusisye kuti, “Ana timtende cakusimonjesya camtuli kuti tuciwone ni tumkulupilile? Timtende cici? 31 Acinangolo ŵetu ŵalile mana mcipululu, mpela mwalembele m'Malemba kuti, ‘Jwalakwe ŵapele mikate jakutyocela kwinani kuti alye.’ ” 32 Yesu ŵatite kuti, “Ngumsalila jemanja yakuwona kuti, yiŵapele Mose jemanja nganiyiŵa yakulya yakutyocela kwinani, pakuŵa ali Atati ŵangupe basi ŵakumpaga jemanja yakulya yisyesyene yakutyocela kwinani. 33 Pakuŵa yakulya yakusapelekaga Mlungu ni jwalakwejo jwakusatulukaga pasi pano kutyocela kwinani ni akusapelekaga umi usyesyene kwa ŵandu ŵa cilambo cosope capasi.” 34 Ŵanduwo ŵamŵendile Yesu kuti, “Ambuje, atupeje uwe yele yakulyayi masiku gosope.” 35 Yesu ŵasalile kuti, “Une ni mkate wakupeleka umi, ŵele ŵakwisa kwa une ngasijakola soni sala, ŵele ŵakukulupilila mwa une ngasijakola soni njota. 36 Nambo nasalile jemanja kuti, atamose ambweni une nambo ngasakulupilila. 37 Jwalijose jwambele une Atati ŵangu taciyika kwa une. Ni jwalijose jwakwisa kwa une ngaŵa kumjasa kusa, 38 ligongo natulwice pasi pano kutyocela kwinani ngaŵa kukutenda yinguyisosa une nambo yakusosa Mlungu juŵandumile une kuti nayitende. 39 Yakusosa Mlungu juŵandumile une ni yakuti ngajasa jwalijose jwa ŵandu wosope ŵele ŵambele une jwalakwejo, nambo ngusosekwa kuti tinajimusye ku ŵawe wosope ŵenewo pa lisiku lyakumalicisya. 40 Pakuŵa yakusosa Atati ŵangu ni yakuti, wosope ŵakumanyilila une kuti ndili Mwanace jwa Mlungu ni kungulupilila akole umi wangamala. Ni tinjajimusya ku ŵawe pa lisiku lyakumalisya.” 41 Ayuda ŵala ŵatandite kunyinyita ligongo lyakuti Yesu ŵatite kuti, “Une ndili mkate uwatulwice kutyocela kwinani.” 42 Myoyo jemanjajo ŵatite kuti, “Ana ajuju ngati Yesu mwanace jwa Yosefe, ngaŵa ni jweleju? Uwe tukwamanyililatu cenenepe babagwe ni mamagwe. Sambano jwalakwe akupakombola camtuli kuŵeceta kuti, ŵatulwice kutyocela kwinani?” 43 Yesu ŵajanjile kuti, “Alece kunyinyita jemanja acimsyenepe. 44 Pangali mundu jwampaka apakombole kwisa kwa une nambo akaŵe naga Atati ŵiŵandumilewo akumlongolela kwa une, ni tinjimjimusya pa lisiku lyakumalisya. 45 Jumo jwa ŵakulocesya ŵalembile kuti, ‘Mlungu ni jutacajiganya wosope.’ Jwalijose jwakwapikana Atati ni kulijiganya kutyocela kwa ŵelewo akwika kwa une. 46 Ayi ngayikugopolela kuti jwalijose ŵaweni Atati iyayi, jwele jwali jwakutyocela kwa Mlungu ni jwele pejo juŵaweni Atati. 47 Une ngumsalila jemanja yakuwona kuti, mundu jwakukulupilila mwa une akwete umi wangamala. 48 Une ndili mkate wakupeleka umi. 49 Acinangolo ŵawo ŵalile mana mcipululu, nambo ŵawile. 50 Nambo mkate wakutuluka kutyocela kwinani uli wakuti, jwalijose jwakuwulya ngasawa kose. 51 Une ndili mkate wa umi uwatulwice kutyocela kwinani. Naga mundu akulya wele mkatewu taciŵa ni umi mpaka kalakala. Mkate wawumi utinjimpa jwalakwe ni cilu cangu, cingucipeleka kwa ŵandu ŵa cilambo cosope capasi kuti akole umi.” 52 Myoyo Ayuda ŵatumbile ni kutanda kukangana acimsyenepe. Jemanjajo ŵawusisye kuti, “Jwele munduju mpaka atupe uwe cilu cakwe kuti tulye camtuli?” 53 Yesu ŵasalile kuti, “Une ngumsalila jemanja yakuwona kuti, naga ngakulya cilu ca Mwanace jwa Mundu ni kumwa miasi jakwe, nditu ngasakola umi. 54 Ŵele ŵakulya cilu cangu ni kumwa miasi jwangu akwete umi wangamala, ni tinjajimusya ku ŵawe pa lisiku lyakumalicisya. 55 Pakuŵa cilu cangu cili cakulya cisyesyene, ni miasi jangu jili cakumwa cisyesyene. 56 Ŵele ŵakulya cilu cangu ni kumwa miasi jangu akutama mwa une ni une ngutama mwa jemanjajo. 57 Atati ŵa umi ŵandumile une, ni ligongo lya jemanja une soni ndili umi. Yalumo soni jwakundya une taciŵa umi ligongo lya une. 58 Myoyo welewu ni mkate uwatulwice kutyocela kwinani, nganiwuŵa mpela mkate uŵalile acinangolo ŵa jemanja. Ŵawile panyuma pakwe, nambo ŵele ŵakulya awu mkatewu taciŵa umi mpaka kalakala.” 59 Yesu ŵaŵecete yeleyi piŵajiganyaga m'nyumba jakupopelela m'Kapelenaumu.
Maloŵe gakupeleka umi wangamala
60 Ŵakulijiganya ŵakwe ŵajinji ŵayipikene yeleyi ni ŵatite kuti, “Aci cijiganyoci cili cakusawusya mnope kucijiticisya. Ŵani ŵampakana ajiticisye yakuŵeceta Yesuyi?” 61 Mwangalajila kumsalila, Yesu ŵamanyilile msyenepe kuti ŵakulijiganya ŵala ŵatandite kunyinyilika ya yeleyi, myoyo jwalakwe ŵawusisye jemanjajo kuti, “Ana yeleyi yikumtendekasya jemanja kusosa kwasa cikulupi cenu? 62 Nambi uli naga akamwone Mwanace jwa Mundu ali kuwujila ku malo kuŵaliji kala? 63 Msimu wa Mlungu ni ukasiwupelekaga umi, macili ga ŵandu ngaŵa mkutenda cilicose. Maloŵe gimbecete kwa jemanja gakwatendesya kuti akole Msimu wa Mlungu ŵakupeleka umi. 64 Nambope ŵane ŵa jemanja ngamkukulupilila.” (Kutandila pandanda pene Yesu ŵamanyilile ŵele ŵiŵaliji ŵamti ngasakulupilila soni jwele jutacimpeleka jwalakwejo.) 65 Yesu ŵapitilisye kuti, “Ali ni ligongo lyakwe namsalile jemanja kuti, pangali jwalijose jwampaka apakombole kwika kwa une akaŵe Atati amtendesye jwalakwejo kuti apakombole kutenda myoyo.” 66 Ŵakulijiganya ŵajinji ŵa Yesu ŵawujile munyuma ligongo lya yeleyi soni nganajenda najo kose. 67 Myoyo jwalakwe ŵawusisye ŵakulijiganya likumi ni ŵali ŵala kuti, “Nambi jemanja akusosa nombe nawo kutyoka?” 68 Simoni Petulo ŵamjanjile kuti, “Ambuje, mpaka tujawule kwa ŵani? Wawojo akwete maloŵe gakupeleka umi wangamala. 69 Ni sambano uwe tukulupilile ni kumanyilila mwakusimicisya kuti ŵalakwe ali ŵaswela ŵiŵayice kutyocela kwa Mlungu.” 70 Yesu ŵajanjile kuti, “Namsagwile jemanja ŵakwana likumi ni ŵaŵili, ngaŵa myoyo? Nambo jumo jwa jemanja ali jwakusakala.” 71 Jemanjaji ŵamgambaga Yudasi, mwanace jwa Simoni Isikaliyoti, pakuti atamose kuti jwalakwejo jwaliji jumo jwa ŵakulijiganya likumi ni ŵaŵili, jwelejo ni juŵaliji jwakumpeleka Yesu kwa amagongo ŵakwe.
Acalongo acimjakwe ŵa Yesu nganamkulupilila
1 Kaneko, Yesu ŵaliji mkwendela upande wa ku Galileya; jwalakwejo nganasaka kwendela upande wa ku Yudeya ligongo lyakuti Ayuda ŵasakaga kumwulaga. 2 Ndaŵi ja cindimba ca masakasa, jaŵandicile 3 myoyo acalongo acimjakwe ŵa Yesu ŵamsalile jwalakwejo kuti, Atyoce akuno, ni ajawule ku Yudeya kuti ŵakulijiganya ŵawo nombe nawo akagawone masengo gakutendaga. 4 Pangali jwakusasisaga yitendo yakwe naga akusosa kuti aŵe jwakumanyika. Pakuŵa ŵalakwe akupanganya yele yinduyi, alilosye wawo asyene kwa ŵandu ŵa cilambo capasi! 5 (Atamose acalongo acimjakwe ŵene nganamkulupililaga jwalakwejo.) 6 Yesu ŵasalile kuti, Ndaŵi jangu jakuŵajilwa nganijikwane. Nambo kwa jemanja ndaŵi jilijose jikuŵa jili jekwane. 7 Ŵandu pa cilambo capasi ngaŵa mkumŵenga jemanja, nambo akuŵengana ni une, ligongo masiku gosope ngwasalila kuti matala gawo gali gakusakala. 8 Jemanja ajawule ku cindimbako. Une nganjawula, ligongo ndaŵi jangu jakuŵajilwa nganijikwane. 9 Ali aŵecete yeleyi, jwalakwe ŵatemi masiku gane panandi ku Galileya.
Yesu akwawula ku Cindimba ca masakasa
10 Acalongo acimjakwe ŵala ali apite ku cindimbako, Yesu nombe najo ŵajawile, nambotu nganajawula mwakulilosya nambo mwakulisisa. 11 Acakulungwa ŵa Ayuda ŵaliji mkumlolesya ku cindimbako. Ŵaliji mkuwusya, Ana ali kwapi jwelejo? 12 Ŵandu ŵajinji ŵa mwikugamo ŵaliji mkusongona jwine ni mjakwe ya jwalakwe. Ŵane ŵatiji kuti, Yesu ali mundu jwambone. Nambo soni ŵane ŵatiji kuti, Ngaŵa yeleyo, jwalakwejo ni jwakwasokonesya ŵandu. 13 Nambo pangali jwalijose juŵaŵecete ya jwalakwe pakulanguka, ligongo ŵajogopaga acakulungwa ŵa Ayuda. 14 Cindimba cila cili cisigele mpela hafu kuti cimale, ndaŵi jeleji ni jiŵajawulaga Yesu ku Nyumba ja AMBUJE ni kuja kutanda kwiganya. 15 Acakulungwa ŵa Ayuda ŵasimonjile mnope ni ŵatite, Ana jwele munduju akumanyilila camtuli yindu yejinji kutendaga nganalijiganyeje majiganyo galigose? 16 Yesu ŵajanjile kuti, Yingwiganyayi ngayikutyocela kwa une, nambo kwa Mlungu juŵandumile une. 17 Jwalijose jwakusosa kuyitenda yele yakusosa Mlungu tacimanyilila cenenepe naga yingwiganyayi yikutyocela kwa Mlungu kapena nguŵeceta ni macili ga une jikape. 18 Mundu jwakuŵeceta ni macili ga msyene jikape akwamba kulijigalila ucimbicimbi wa msyene pejo basi. Nambo jwele jwakusosa lumbili lwa jwele pejo juŵamtumilejo ali jwakulupicika soni mwa jwalakwejo mwangali cilicose ca unami. 19 Ana ngaŵa Mose ni ŵiŵampele jemanja wosope Malamusi ga Mlungu? Nambotu ngapagwa jumo jwa jemanja jwakutenda yigakusala Malamusigo. Ligongo cici akusosa kumbulaga une? 20 Likuga lya ŵandu lila lyajanjile kuti, Wawo akwete msimu wakusakala mkati mwawo! Ŵandu ŵakwe ŵani ŵakusosa kwawulaga ŵalakwe? 21 Yesu ŵajanjile kuti, Une nagambile kutenda masengo kamope basi ni jemanja wosope ŵene mwasimonjile. 22 Ŵamlamwile jemanja kuti mwawumbasyeje ŵanace ŵenu ŵa acalume (atamose nganaŵa Mose ŵiŵatandisye nambo acinangolo ŵa jemanja), ni myoyo akusamwumbasyaga mwanace jwamlume pa lisiku lyakupumula lya Ayuda. 23 Naga mwanace jwamlume akusamwumbasyaga pa lisiku lyakupumula lya Ayuda mwamti Lilamusi lya Mose lisaŵaga lyangakasika, jemanja cakundumbilila une ni kuŵaga cici kutendaga namposisye kusyesyene mundu pa lisiku lyakupumula lya Ayuda? 24 Alece kulamula yindu mpela mwayikuwonecela, nambo alamuleje mwacilungamo mpela muyiŵelele yinduyo.
Ŵandu akuwusya naga Yesu ali Mesiya
25 Ŵane mwa ŵandu ŵa ku Yelusalemu ŵatite kuti, Ana jweleju ngaŵa ni mundu jwakusosa kumwulaga acakulungwa jula? 26 Ngati ajo jwali apopojo! Akuŵeceta pakulanguka, nambo mwa acakulungwa ŵa Ayuda pangali jwalijose jwakuŵeceta cilicose cakusisyana najo! Ana ngaŵa mkuŵa yakomboleka kuti jemanjaji akumanyilila kusyesyene kuti jweleju ali Mesiya? 27 Nambo pitaciyikaga Mesiya pangali jutacimanyilila kwakutyocela. Kutendaga uwe wosope tukukumanyilila kwakutyocela jwele munduju. 28 Yesu piŵajiganyaga mu Nyumba ja AMBUJE, ŵakwesisye maloŵe gakwe kuti, Ana nambo jemanja mkumanyilila une cenenepe nipo soni mkukumanyilila kunatyocele? Unetu nganimbika ni macili ga une jikape. Jwele juŵandumile unejo ali jwakuwona ni jwacikulupi. Jemanja ngakum'manyilila kose, 29 nambo une ngum'manyilila ligongo natyocele kwa jwalakwe soni jwalakwejo ni juŵandumile une. 30 Myoyo ŵandu ŵane pelepo ŵatiji amkamule, nambo pangali juŵapakombwele kumkamula jwalakwe, ligongo ndaŵi jaliji mkanijikwane jakuti amkamule. 31 Nambo ŵandu ŵajinji ŵa mwikugamo ŵakulupilile mwa jwalakwe ni ŵatite kuti, Ana pitaciyikaga Mesiyajo, tacitenda yakusimonjesya yejinji yakupunda yatesile aju munduju? Asilikali ŵa Ayuda ŵakulondela Nyumba ja AMBUJE ŵatumile kukumkamula Yesu 32 Afalisi ŵapikene ŵandu ŵa mwikuga mula ali mkusongona jwine ni mjakwe yele yindu yakwamba Yesuyi, myoyo jemanjajo ni acakulungwa ŵa ŵakutaga mbopesi ŵatumile asilikali kuti akamtaŵe Yesu. 33 Yesu ŵatite, Tinjiŵape ni jemanja kwa ndaŵi japanandi, ni tinjityoka kwawula kwa ŵele ŵiŵandumile unewo. 34 Jemanja timcindolesya une, nambo ngasimumbona kose, ligongo jemanja ngaŵa mkwawula kwele kutinjijawula uneko. 35 Acakulungwa ŵa Ayuda ŵaŵecetaga acimsyenepe kuti, Ana jweleju akusosa ajawule kwapi kwamti uwe ngasitumpata? Mwine tacijawula ku misinda ja Adamu kwakutama ŵandu ŵetu ni kuja kukwajiganya Agilikiwo? 36 Jwalakwetu akuŵeceta kuti uwe tucimlolesya nambo ngasitumpata kose, nambo soni akuti uwe ngaŵa mkwawula kwele kutaciŵa jwalakweju. Jweleju akugopolela cici?
Sulo sya mesi gakupeleka umi
37 Pa lisiku lyakumalisya ni lyalikulungwa lya cindimba Yesu ŵajimi ni ŵaŵecete mwakwesya maloŵe kuti, “Jwalijose jwajimkwete njota ayice kwa une kuti amwe. 38 Mpela mugakuŵecetela Malemba kuti, Sulo sya mesi gakupeleka umi tisicikopoka mu mtima mwa jwalijose jwakukulupilila mwa une.” 39 Yesu piŵaŵecetaga yeleyi, ŵaŵecetaga ya Msimu wa Mlungu, welewu ni Msimu kwa ŵele ŵiŵamkulupilile Yesu ni ŵitaciwupocelaga. Pa jele ndaŵijo Mlungu ŵaliji mkinapelece Msimu kwa ŵele ŵiŵakulupilile, ligongo Yesu ŵaliji mkinamkomele pa msalaba, mkinamjimusye ku ŵawe ni kumpa ucimbicimbi.
Ŵandu ŵagaŵikene
40 Ŵandu ŵane ŵa mwikugamo piŵampikene jwalakwe ali mkuŵeceta yeleyi ŵatite, Aju munduju ali Jwakulocesya jutwamjembeceyaga jula. 41 Ŵane ŵatite, Jweleju ali Klistu jula! Nambo ŵane ŵatite, Klistu ngasatyocelatu ku Galileya! 42 Malemba gatite kuti Klistu taciŵa jwakutyocela ku mtundu wa Mwenye Daudi ni tacipagwila ku Betelehemu, uwuli msinda wa kumangwawo Mwenye Daudiwo. 43 Nambo ŵane ŵaŵecete ya kusisyana najo Yesu. 44 Ŵane mwa jemanjajo ŵasosaga kuti amkamule Yesu nambo pangali jwalijose juŵamkwayiye. Acakulungwa ŵa Ayuda akukana kukulupilila mwa Yesu 45 Piŵawujile asilikali ŵakulondela Nyumba ja AMBUJE ŵala kwa acakulungwa ŵa ŵakutaga mbopesi ni Afalisi ŵala, ŵawusisye asilikaliwo kuti, Ligongo cici nganimyika najo Yesu akuno? 46 Asilikaliwo ŵajanjile kuti, Pangali mundu jwine ni kalakose juŵaŵecetepo yindu mpela yaŵecete jwalakwe! 47 Afalisiwo ŵawusisye jemanjajo kuti, Ana jwalakwejo ŵamloŵesye ni jemanja ŵakwe soni? 48 Ana mkum'manyilila jumo jwa acakulungwa kapena Mfalisi jumo jwakukulupilila mwa jwalakwe? 49 Lyele likuga lya ŵanduli ngalikugamanyilila Malamusiga, myoyo ali ŵakulweseka ni Mlungu! 50 Jumo jwa Afalisi pelepo ŵaliji Nikodemo, juŵaliji ali ajawile kukumlola Yesu kala. Jwalakwe ŵatite kwa acimjakwe, 51 Malinga ni Malamusi getu ngatukwenela kuti uwe tumlamule mundu mkanitumpikane kaje ni kucimanyilila catesile jwalakwejo. 52 Jemanjajo ŵajanjile kuti, Nomwe ŵakwe soni mkutyocela ku Galileya eti? Mkaŵalanje Malemba ni timkasimane kuti pangali jwakulocesya jwampaka atyocele ku Galileya. 53 Myoyo jwalijose ŵawujile kumangwakwe.
Ŵamkamwile jwamkongwe ali mkutenda cikululu
1 Yesu ŵajawile Kwitumbi lya Olifi. 2 Kundaŵindaŵipe ŵawujile soni ku Nyumba ja AMBUJE kula. Ŵandu wosope ŵasongene ni kumsyungulila Yesu, ni jwalakwe ŵatemi pasi ni kutanda kwajiganya. 3 Aciŵalimu ŵagopolela Malamusi ni Afalisi ŵayice ni jwamkongwe juŵamkamwile ali mkutenda cikululu, ni ŵamjimice pameso pa ŵandu wosope ŵene ŵala. 4 Acimsalilaga Yesu kuti, “Mwalimu, aju jwamkongweju amkamwile ali mkutenda cikululu. 5 M'malamusi getu, Mose ŵalamwile kuti jwamkongwe jwamti myoyojo akuŵajilwa kuwulajidwa pakumponya maganga. Wawojo akuti uli pa yeleyi?” 6 Jemanjaji ŵaŵecete yeleyi pakusosa kumtega Yesu, kuti amjimbe magambo. Nambo jwalakwe ŵajineme ni ŵalembile pasi ni cala cakwe. 7 Ali cimile papopo ni kumwusyaga Yesu yiwusyo, jwalakwe ŵajinamukwice ni ŵatite kwa jemanjajo, “Jwalijose jwa jemanja jumkinatendeje ulemwa atande kumponya maganga jwamkongwejo.” 8 Myoyo ŵajineme soni kaŵili ni ŵalembile pasi. 9 Piŵapikene yeleyi, jemanjajo ŵatyosile, jumojumo kutandila ŵiŵaliji acakulungwawo. Yesu ŵamlesile jika, pamo ni jwamkongwe jula ali agambile kwima palapala piŵaliji pala. 10 Kaneko Yesu ŵajinamukwice ni ŵamwusisye jwamkongwejo kuti, “Ana ali kwapi ŵamjimbileje magambo ŵala? Pangali jwalijose jwasigele jwakuti amgomece m'mwejo kuti mkuŵajilwa kuwa?” 11 “Pangali atamose jumo jwasigele jwakunjimba magambo bwana.” Yesu ŵamsalile kuti, “Myoyo, ni une jwakwe soni ngangumjimba magambo. Jawulagani, nambo mkaja kutenda ulemwa soni.”
Yesu ali lilanguka lya ŵandu ŵa cilambo capasi
12 Myoyo Yesu ŵaŵecete kwa Afalisiwo soni. Jwalakwe ŵatite, “Une ndili lilanguka lya ŵandu ŵa cilambo capasi. Jwalijose jutaŵe jwakulijiganya jwangu tacikola lilanguka lyakupeleka umi ni ngasajenda soni mcipi.” 13 Afalisi ŵatite kwa jwalakwe, “Ana sambano uli mkulitendela mwasyenepe umboni, yimkuŵecetayi nganiyiŵa yakuwona.” 14 Yesu ŵajanjile, “Iyayi, atamose ngulitendela namsyene umboni, yinguŵeceta une yili yakuwona, ligongo ngukumanyilila kunatyocele ni kungwawula. 15 Jemanja akulamula mpela mwakusalamulila ŵandu masiku gosope acimjawo, unetu ngangumlamula mundu jwalijose. 16 Nambo yikaŵe kuti ngulamula, kulamula kwangu kukaliji kwacilungamo, pakuŵa ngangutenda yeleyi pa une jikape, Atati ŵangu ŵiŵandumisye une, ali pampepe ni une mu yitendo yangu. 17 M'malamusi ga jemanja mwana aga maloŵega gakuti, naga umboni ŵa ŵandu ŵaŵili ukukamulana cimo, ni kuti yakuŵecetayo yili yakuwona. 18 Une ngutenda umboni wa une namsyene, ni Atati ŵiŵandumisye une nombe nawo akundendela soni umboni.” 19 Jemanjajo ŵamwusisye kuti, “Atati ŵenuwo ali kwapi?” Yesu ŵajanjile kuti, “Jemanjatu ngamkumanyilila une kusyesyene atamose Atati ŵangu, pakuŵa mkamanyilile une, mkamanyilile Atati ŵangu soni.” 20 Yesu ŵaŵecete yele yindu yosopeyi piŵajiganyaga mu Nyumba ja AMBUJE, mcipinda muŵaŵisile mabokosi gakupelecela mbopesi. Ni pangali juŵamkamwile, ligongo ndaŵi jakwe jaliji mkanijikwane.
Jemanja ngaŵa mkupakombola kwawula kungwawula une
21 Yesu ŵasalile jemanjajo soni kuti, “Une ngwawula, jemanja timcindolesya nambo pakuŵapo kuti mkupitilisya kutenda ulemwa timciwa nawo. Jemanja ngaŵa mkupakombola kwawula kungwawula une.” 22 Myoyo acakulungwa ŵa Ayuda ŵaŵecetaga ni kuwusyanaga acimsyenepe, “Jweleju akuti uwe ngaŵa mkupakombola kwawula kwele kwakwawula jwalakwejo. Ana maloŵega gakugopolela kuti taciliwulaga msyene?” 23 Yesu ŵajanjile kuti, “Jemanja mli ŵa cilambo capasi cino, nambotu une ngutyocela kwinani. Jemanja akutyocela pa cilambo capasi pano, nambotu une ngangutyocela kose pa cilambo capasi pano. 24 Ni ligongo lyakwe namsalile kuti naga mkupitilisya ni ulemwa wenuwo timciwa. Timciwa ni ulemwa wenuwo naga ngamkukulupilila kuti ‘Une Ndili Jundili.’ ” 25 Ayuda ŵamwusisye kuti, “Ana wawoji ali ŵani?” Yesu ŵajanjile, “Kusala ni kunamsalile jemanja kula kutandila pandanda pene. 26 Une ngwete yindu yakuyiŵeceta yejinji ya jemanja, soni pana yejinji yakumjimba nayo magambo. Nambo jwele juŵandumile une ali jwakuwona, ni ngumsalila jemanja pa cilambo capasi pano, yele peyo yinayipikene kutyocela kwa jwalakwe.” 27 Ŵanduwo nganapikanicisya kuti Yesu ŵaŵecetaga kwa jemanjajo yakwamba Atati ŵakwe ŵakwinani. 28 Myoyo jwalakwe ŵatite kwa jemanjajo, “Pitamkwesye Mwanace jwa Mundu pa msalaba, ni pitacimanyilila kuti ‘Une Ndili Jundili’, myoyo soni tacimanyilila kuti jwangatenda cindu cilicose mwamacili ga une jikape, nambo kuti ngasaŵecetaga yele peyo yasalile Atati kuti nayiŵecete. 29 Ni kuti jwele juŵandumisye unejo ali yalumo ni une nganandeka jikape, ligongo masiku gosope ngasatendaga yiyikumnonyela jwalakwejo.” 30 Ŵandu ŵajinji ŵiŵampikene Yesu ali mkuŵeceta yele yinduyi ŵakululupilile mwa jwalakwe.
Cakuwona cikusicagopola ŵandu
31 Myoyo Yesu ŵaŵecete kwa ŵandu ŵiŵakulupilile mwa jwalakwe ŵala kuti, “Naga mkuyitenda yinajiganyisye une, nditu jemanja mli ŵakulijiganya ŵangu, 32 timcicimanyilila cakuwona, ni cakuwonaco ticicimgopola jemanja.” 33 Jemanjajo ŵajanjile kuti, “Uwe tuli yisukulu ya Abulahamu soni nganituŵeje acikapolo ŵa mundu jwine jwalijose. Nambi wawo akugopolela cici, pakuŵecetaga kuti, ‘Timciŵa ŵagopoka?’ ” 34 Yesu ŵajanjile kuti, “Une ngumsalila jemanja yakuwona: jwalijose jwakutenda ulemwa ali kapolo jwa ulemwawo. 35 Kapolo jwangaŵa nawo mwiŵasa ndaŵi josope, nambo mwanace. 36 Nambo naga mwanacejo akumgopola, jwalakwejo taciŵa mlukosyo. 37 Ngumanyilila kuti mli yisukulu ya Abulahamu, nambope mkusaka kumbulaga ligongo lyakuti ngasimgapocela majiganyo gangu m'mitima mwenu. 38 Une ngusaŵeceta yele yinayiweni kwa Atati ŵangu, nambo jemanja mkusatendaga yiŵamsalile atati ŵenu.” 39 Jemanjajo ŵajanjile kuti, “Atati ŵetu ali Abulahamu.” Nambo Yesu ŵasalile jemanjajo kuti, “Jemanja mkaŵe ŵanace ŵa Abulahamu ŵene, mkatesile yindu yakulandana ni yiŵatesile Abulahamu. 40 Cinacitesile une ni cakumsalila jemanja yakuwona yinayipikene kutyocela kwa Mlungu, nambo jemanja mkusosa kumbulaga. Ayi ngaŵa yiŵayitesile Abulahamu! 41 Jemanja mkutenda yiŵatesile atati ŵenu.” Jemanjajo ŵajanjile, “Mlungu msyene ni ŵali Atatipe ŵitukwete, ni uwe tuli ŵanace wakwe ŵasyesyene.” 42 Yesu ŵasalile kuti, “Akaŵe kuti Mlungu ali Atati ŵenu asyesyene, jemanja mkanonyele une, ligongo une nayice akuno kutyocela kwa Mlungu. Nganimbika mwamacili ga une jika namsyene, nambo ŵatesile kundumisya. 43 Ligongo cici jemanja ngakuyipikana yinguŵeceta? Yili myoyo ligongo ngakusaka kuwupikanila utenga wangu? 44 Satana ni jwali atati ŵenu jemanja, ni mkasasosa kutenda yindu yakusasosa kutenda atati ŵenuwo. Kutandila pandanda pasyesyene jwalakwe ŵaliji jwakuwulaga ŵandu ndaŵi syosope soni nganatameje kuŵa ku mbali ja yakuwona, mwangali cakuwona cilicose mwa jwalakwe. Pakuŵeceta ya unami, akwamba kutenda yawukusosa umi wakwe, pakuŵa ali jwa unami ni ali atati ŵa unami wosope. 45 Nambo une ngusala yakuwona, ni ligongo lyakwe jemanja ngamkungulupilila une. 46 Nduni mwa jemanja jwa mpaka alosye pakulanguka kuti une jwana ulemwa? Naga ngumsalila yakuwona, ligongo cici jemanja ngamkungulupilila? 47 Jwele jwali jwakutyocela kwa Mlungu akusapikanilaga maloŵe ga Mlungu. Nambo jemanja ngakutyocela kwa Mlungu, ni ligongo lyakwe akukana kupikanila.”
Yesu ŵapali Abulahamu mkinapagwe
48 Ayuda ŵala ŵamwusisye Yesu kuti, “Ana uwe mpela twalemwisye pakuŵeceta kuti wawojo ali Msamaliya, soni akwete msimu wakusakala?” 49 Yesu ŵajanjile kuti, “Une nganingola msimu wakusakala. Une ngwacimbicisya Atati ŵangu, nambo jemanja ngamkunjimbicisya une. 50 Unetu ngangulisosela ucimbicimbi namsyene. Nambo pana jwine jwakwe jwakusosa kuti une ngapocele ucimbicimbi. Jwalakwejo ni jwakulamula mwa cilungamo. 51 Une ngumsalila jemanja yakuwona: jwalijose jwakutenda yinimjiganyisye kuti ayitende ngasawa kose.” 52 Jemanjajo ŵamsalile kuti, “Sambano tusimicisye kuti wawo akwete msimu wakusakala! Abulahamu ŵawile, soni ŵakulocesya ŵawile, ni wawojo akuti jwalijose jwakutenda yamjiganyisye kuti ayitende ngasawa kose. 53 Atati ŵetu Abulahamu ŵawile, nambi wawo akuŵeceta camtuli kuti ali ŵakulungwa kwapunda Abulahamu? Ŵakulocesya nombe nawo ŵawile. Ana wawo akulitenda kuti ali ŵani?” 54 Yesu ŵajanjile kuti, “Naga yikaŵe kuti ngulicimbicisya namsyene, wele ucimbicimbiwo ukaliji wangali mate. Ŵele ŵakunjimbicisya une ni ŵali Atati ŵangu ŵenewo ŵakwatenda jemanja kuti ali Mlungu ŵawo. 55 Jemanja nganiŵamanyilileje Atatiwo, nambo une ngwamanyilila. Nambo ningajile kuti ngangwamanyilila ni ngaliji une jwa unami mpela jemanja. Nambo ngwamanyilila ni ngusimbikanilaga maloŵe gawo. 56 Atati ŵenu jemanja, Abulahamu, ŵasengwile kuti akajiweni ndaŵi ja kwika kwangu, myoyo ŵajiwonele cile ni ŵasangalele.” 57 Jemanjajo ŵamjanjile kuti, “Wawo nganakwane kose yaka 50 myoyo akuŵeceta camtuli kuti am'weni Abulahamu?” 58 Yesu ŵajanjile kuti, “Une ngumsalila jemanja yakuwona kuti, Abulahamu mkinapagwe, une naliji ndili mbali.” 59 Myoyo jemanjajo ŵalokotenye maganga kuti amponye, nambo Yesu ŵajuŵile ni kutyoka mu Nyumba ja AMBUJE mula.
Yesu akuposya mundu jwangalola
1 Yesu piŵajendaga, ŵam'weni mundu juŵaliji jwangalola cipagwile. 2 Ŵakulijiganya ŵakwe ŵamwusisye kuti, “Mwalimu, ulemwa waceni uwamtendesye jweleju kuti aŵe jwangalola cipagwile? Ana wamsyeneju kapena wa acinangolo ŵakwe?” 3 Yesu ŵajanjile kuti, “Pangali kulumbikana kulikose pasikati pa ungalola wakwe ni ulemwa wakwe kapena ulemwa wa acinangolo ŵakwe. Jwalakweju ali jwangalola myiyi kuti ŵandu agalole macili ga Mlungu gali mkutenda masengo mwa jwalakwe. 4 Pikuli ciŵela musi myiyi, tukwenela kupitilisya kutenda masengo ga jwele juŵandumile une, pakuŵapo cilo cikwisa ni pangali jutacipakombola kutenda masengo galigose. 5 Pindili pa cilambo capasi, une ni jundili lilanguka lya ŵandu ŵa cilambo capasi.” 6 Ali aŵecete yeleyi, Yesu ŵasunile mata pasi ni ŵawunyile litope ni matago ni ŵapacile litopelyo m'meso ga mundujo. 7 Kaneko ŵamsalile kuti, “Jawulani mkasukusule Mwitamanda lya Shilowamu.” (Gopolela kwa lyele linali ni kuti, “Kutumidwa.”) Myoyo mundu jula ŵajawile, kuja kusukusula, ni ŵawusile ali mkulola. 8 Myoyo acanasi ŵakwe, ni ŵandu ŵiŵam'weni ali mkuŵenda yeleyi mkaniyitendekwe, ŵawusisye kuti, “Ana ngaŵa aju mundu juŵatamaga pasi ni kuŵendaga jula?” 9 Ŵane ŵatite kuti, “Ni jujuju,” nambo ŵane ŵatite, “Iyayi nganaŵajo, agamba kulandana basi.” Myoyo mundujo ŵajanjile msyene kuti, “Mundujo ni une.” 10 Jemanjajo ŵamwusisye kuti, “Citendece cici kuti m'mwejo mpakomboleje kulola sambano?” 11 Jwalakwe ŵajanjile, “Mundu jwakolanjidwa Yesu ŵawunyile litope, ni kulipaka m'meso mwangu, ni ŵasalile kuti njawule ku Shilowamu ngasukusule. Myoyo najawile, pinagambile kusukusulapo, natandite kulola.” 12 Ŵandu ŵala ŵawusisye kuti, “Ali kwapi jwalakwejo?” Jwalakwe ŵajanjile kuti, “Ngangumanyilila.”
Afalisi akumwusya mundu juŵatandite kulola jula
13 Kaneko ŵamkanganicisye mundu juŵaliji jwangalola jula kuti alongane najo kwa acakulungwa ŵa Afalisi. 14 Lisiku liŵawunyile Yesu matope ni kumposya mundu jwangalola jula lyaliji lyakupumula Ayuda. 15 Myoyo Afalisi nombe nawo ŵatandite kumwucisya mundu jula mpela muŵamwucisye ŵandu ŵane ŵala muŵapakombolele kulola mwakwe. Jwalakwe ŵasalile jemanja jila kuti, “Jwalakwejo ŵambacile matope pa yikope ya meso gangu, nasukuswile ni sambano ngupakombola kulola.” 16 Ŵane ŵa Afalisiwo ŵatite kuti, “Jwele mundu juŵatesile yeleyi ngaŵa mkomboleka kuŵa jwakutyocela kwa Mlungu, pakuŵa ngakupikanila kuti asunje malamusi ga Lisiku lyakupumula.” Nambo ŵandu ŵane ŵaŵecete kuti, “Ana mpaka yikombolece camtuli kuti mundu jwali jwa ulemwa atende yakusimonjesya mpela yeleyi?” Ni paliji pana kugaŵikana pasikati pawo. 17 Myoyo Afalisi ŵapitilisye kumwusya mundujo, “M'mwejo mkuti amposisye ungalola wenu nambi m'mwe mwasyene mkuti cici ya jwele mundujo?” Mundu juŵaposile jula ŵajanjile kuti, “Jwele mundujo ali jwakulocesya.” 18 Ayuda nganasosa kose kukulupilila kuti mundu juŵaliji jwangalola kala sambano ŵatandite kulola pa jele ndaŵijo, mpaka ŵaŵilasile acinangolo ŵakwe. 19 Jemanjajo ŵawusisye acinangolowo kuti, “Ana aju mcandaju mwanagwawo? Nambi uli akuti ŵapali ali jwangalola? Nambi yitite uli kuti sambano akulola?” 20 Acinangolo ŵakwe ŵajanjile kuti, “Uwe tukumanyilila kuti jweleju mwanagwetu, ni tukumanyilila kuti ŵapagwile ali jwangalola. 21 Nambo ngatukumanyilila muyitendecele kuti sambano akupakombola kulola, atamose kum'manyilila juŵamposisye ungalola wakwewo. Amwusye msyenejo pakuŵa jwamkulungwa, ni talijanjile msyene!” 22 Acinangolo ŵakwe ŵaŵecete yeleyi ligongo ŵajogopaga acakulungwa ŵa Ayuda, ŵiŵaliji ali akamulene kala kuti jwalijose jwakuŵeceta kwa mjakwe kuti ŵakulupilile kuti Yesu ŵaliji Klistu akatyosisye ni kwalekasya kwawula ku m'Nyumba jakupopelela. 23 Ni ligongo lyakwe acinangolo ŵakwe ŵagambile kuti, “Amwusye msyenejo pakuŵa jwamkulungwa!” 24 Ayudawo ŵamŵilasile soni kaŵili mundu juŵapagwile ali jwangalola jula, ni ŵamsalile kuti, “Lumbilani pameso pa Mlungu kuti yitimŵecete tiyiŵe yakuwona! Uwe tukumanyilila kuti mundu juŵamposisye m'mwejo ali jwa ulemwa.” 25 Mundu jula ŵajanjile kuti, “Ngangumanyilila kuti mundujo jwa ulemwa kapena iyayi, cindu cimope cingucimanyilila ni cakuti, naliji jwangalola, nipo sambano ngulola.” 26 Jemanjajo ŵamwusisye kuti, “Ana jwalakwejo ŵatesile cici kwa m'mwejo? Ana ŵamposisye camtuli ungalola wenuwo?” 27 Jwalakwe ŵajanjile kuti, “Une namsalile jemanja kalape nipo ngamkusosa kupikana. Ligongo cici mkusosa kupikana soni kaŵili? Mwinetu nombe jemanja mkusosa kuŵa ŵakulijiganya ŵakwe?” 28 Jemanjajo ŵamlwesisye papopo acimsalilaga kuti, “M'mwejo ni ŵimli ŵakulijiganya ŵa jwele mundujo Yesu, nambo uwe tuli ŵakulijiganya ŵa Mose. 29 Tukusimicisya kuti Mlungu ŵaŵecete kwa Mose, nambo kwamba ya jwele mundujo Yesu, ngatukumanyilila atamose msinda uŵapagwile!” 30 Mundu jula ŵajanjile kuti, “Nambotu yele ni yakusimonjesya! Jemanja ngakukumanyilila kwakutyocela mundujo, nambotu une ni ŵambosisye ungalola wangu! 31 Uwe tukumanyilila kuti Mlungu ŵangapikanila ŵandu ŵakupopela ali ŵa ulemwa nambo akusiŵapikanila ŵandu ŵakupopela ni ŵakumpikanila jwalakwe ni kutenda yakusosa jwalakwejo. 32 Citandilile kalakala pangali jwalijose juŵapikene mundu jwine ali mkumwugula m'meso mundu juŵapagwile ali jwangalola. 33 Aju mundu juŵambosisye uneju ŵatyocele kwa Mlungu, yingaŵe kuti ngaŵa myoyo ngamkanapakombola kutenda kandu.” 34 Jemanjajo ŵamjanjile kuti, “M'mwe mwapagwile ni kumlela mu ulemwa mpaka mpakombole camtuli kulinga kutujiganya uwe?” Nipo ŵamtyosisye ni kumlekasya kwawula ku nyumba jakupopelela.
Ungalola wa mu mtima
35 Yesu piŵapikene yiyatendeceyo, ŵamlolesisye mundu jula ni ŵamsimene nipo ŵamwusisye kuti, “Ana m'mwejo mkukulupilila mwa Mwanace jwa Mundu?” 36 Mundu jula ŵajanjile kuti, “Bwana asalile une, jwelejo nduni, kuti une ngulupilile mwa jwalakwejo!” 37 Yesu ŵamsalile kuti, “M'mwejo mum'weni jwalakwejo kala, nipo ni mnene junguŵeceta ni m'mwejo sambano jino.” 38 Mundu jula ŵatindiŵele ni ŵamlambile Yesu nipo ŵatite, “Ngukulupilila Ambuje!” 39 Yesu ŵatite kuti, “Une nayice ku cilambo capasi kuti ulemwa wa ŵandu uwonecele pakulanguka, kuti ŵali ŵangalola alole nipo ŵali ŵakulola aŵe ŵangalola.” 40 Afalisi ŵiŵam'wandicile Yesu ŵampikene jwalakwe ali mkuŵeceta yeleyi nipo ŵamwusisye kuti, “Ana yakuwona wawo akugopolela kuti uwe soni tuli ŵangalola?” 41 Yesu ŵajanjile kuti, “Yikaŵe kuti jemanja ali ŵangalola, ngamkinakola ulemwa kose, nambo pakuŵapo akulitenda kuti akupakombola kulola, yikwamba kugopolela kuti jemanja ali ciŵela mu ulemwa mwawo.”
Citagu ca jwakucinga ngondolo
1 Yesu ŵatite kuti, “Une ngumsalila jemanja yakuwona: kuti mundu jwakwinjila mwicinga lya ngondolo ni ngapitila pa mlango, nambo kwinjila pa kwelela pane palipose, jwelejo ni mundu jwawiyi soni jwalukwakula. 2 Mundu jwakwinjila kupitila pa mlango ni mkucinga ngondolosyo. 3 Mlonda jwa pa mlango akusamwugulilaga jwalakwejo, ngondolo syakwesyo sikasapikana maloŵe gakwe pakusiŵilanga mena gakwe jimojimo, nipo akusasilongolelaga pakopoka pasa. 4 Pati asikopwesye ngondolosyo pasa, akasajawulaga pasogolo pakwe, nipo sikasisimkuyaga, ligongo sikugamanyila maloŵe gakwe. 5 Ngasisimkuya jwine jwalijose, m'malo mwakwe, ticisimtila jwamti myoyojo ligongo ngasikumanyilila maloŵe gakwe.” 6 Yesu ŵasalile jemanjajo cele citaguci, nambo jemanjajo nganamanyilila kose yiŵasosaga kwasalilayo.
Yesu mkucinga jwambone
7 Myoyo Yesu ŵaŵecete soni kaŵili kuti, “Une ngumsalila jemanja yakuwona: Une ndili mlango wa ngondolo. 8 Wosope ŵene ŵiŵayice kala une mkanimbice ali ŵawiyi nipo ŵalukwakula, nambo soni ngondolo nganisyapikanila. 9 Une ni mlango. Jwalijose jwakwinjila kupitila mwa une tacikulupuka, tacijinjila ni kopoka nipo taciyisimana yakulya. 10 Jwawiyi akasagambaga kwika kuti ajiŵe, kuwulaga ni konanga. Une mbice kuti jemanja mkole umi, umi wakwe wapawinji. 11 “Une ndili mkucinga jwambone, jwakulipeleka kuti mbwe ligongo lya ngondolo. 12 Mundu jwaganyu, jumkinigaŵa masengo gakwe gakuciga soni jumkanisiŵa syakwe ngondolo, pati aliweni lisogo lilimkwisa, papopo akusasileka ngondolosyo ni kutila, myoyo lisogo lila likusakamulaga jimo, sine sila ni kupwilingana. 13 Mundu jwakulembedwa masengojo akusatilaga myoyo ligongo agambile kukulupilila kulembedwa masengo peko basi nipo nganakola nayo masengo ya ngondolosyo. 14 -15 Une ndili mkucinga jwambone. Mpela Atati akumanyilila une nipo soni une ngwamanyilila Atati, yalumo soni une ngusimanyilila ngondolo syangu nombe nasyo sikumanyilila une. Nipo une ngulipeleka kuti mbwe ligongo lya ngondolosyo. 16 Sipali ngondolo sine syasili syangu simkanisiŵa mwicingamu. Une nguŵajilwa kusisonganya nombe nasyo, nipo tisicipikana maloŵe gangu, nipo tipaciŵa likuga limo ni mkucinga jumo. 17 “Atati ŵangu akunonyela une ligongo ngulipeleka namsyene kuti mbwe, ni cakulinga cakuti mbe jwa umi soni. 18 Pangali jwalijose jutacindyocesya umi wangu. Une namsyene ni jungukunda kuti ambulaje. Ngwete macili gakukunda kuti ambulaje, nipo ngwete macili gakupakombola kuŵa jwa umi soni. Napocele kwa Atati ŵangu lyele lilamusili kuti une nayitende yeleyi.” 19 Ayuda ŵasisyene soni acimsyenepe ligongo lya gele maloŵe ga Yesugo. 20 Ŵandu ŵajinji mwa jemanjajo ŵatite, “Jweleju akwete msimu wakusakala! Myoyo jweleju jwa masoka! Ligongo cici akumpikanila jwalakweju?” 21 Nambo ŵane ŵatite, “Mundu jwakwete msimu wakusakala ngaŵa mkupakombola kuŵeceta camti myiyi! Ana msimu ŵakusakala kuŵa mkupakombola kuwugula m'meso ŵandu ŵangalola?”
Ŵandu ŵamkanile Yesu
22 Ku Yelusalemu kwaliji kwana cindimba ca ndaŵi jakukumbucila kupelecedwa soni kwa Nyumba ja AMBUJE. Jaliji ndaŵi jakusisima. 23 Yesu ŵaliji mkwendajenda mu Nyumba ja AMBUJE mwipenu lyakolanjidwa Lipenu lya Solomoni. 24 Ŵandu ŵane ŵasongene ni kumsyungulila nipo ŵamwusisye kuti, “Ana tagambe kutuleka tuli mkusimongape mpaka cakaci? Atusalile mwakupikanika cenene yakuwona yisyesyene: ana wawojo ali Klistu jula?” 25 Yesu ŵajanjile kuti, “Une namsalile kala jemanja, nambo nganasaka kungulupilila. Yindu yinguyitenda peyo mwamacili ga Atati ŵangu yikundendela une umboni. 26 Nambo jemanja ngamkukulupilila, pakuŵa nganimŵa ngondolo syangu. 27 Ngondolo syangu sikusapikana maloŵe gangu, une ngasasimanyililaga, nipo sikusanguyaga. 28 Une ngusapelekaga umi wangamala kwa ŵakunguya ŵangu, nipo ngasawa kose. Pangali jwakupakombola kusumula une ŵakunguya ŵanguwo. 29 Atati ŵangu ŵiŵambele une ŵanduwo ali ŵakulungwa kupunda yosope yene, nipo pangali jwalijose jwakupakombola kusumula ŵele ŵanduwo kwa Atati ŵakwasamalila jemanjajo. 30 Atati ni une tuli ŵakulumbikana yalumo mpela mundu jumo.” 31 Myoyo Ayuda ŵalokotenye soni maganga kuti amponye Yesu. 32 Yesu ŵawusisye kuti, “Une mbanganyisye masengo gambone gamajinji gimgaweni jemanja giŵasalile Atati ŵangu kuti nagatende, ana mwa gele masengo gambonega gapi gamkusosela kumbonya nago une maganga kuti mbwe?” 33 Ayuda ŵala ŵajanjile kuti, “Uwe ngatukusosa kwasoma wawojo maganga ligongo lya masengo galigose gambone iyayi, nambo ligongo lyakuti wawojo akumlemwecesya Mlungu! Wawo agambile kuŵa mundu wamba, nambo akulinga kulitenda Mlungu wawo asyenepe!” 34 Yesu ŵajanjile kuti, “Ana ngati yilembedwe m'Malamusi ga jemanja kuti Mlungu ŵatite, ‘Jemanja mli milungu.’ 35 Tukumanyilila kuti yigakuŵeceta Malemba yili yakuwona mpaka kalakala, nipo Mlungu ŵakolasile ŵele ŵanduwo milungu. Ŵeleŵa ni ŵandu ŵiŵapele maloŵe ga Mlungu. 36 Kwamba ya une, Atati ŵasagulile une ku gele masengoga nipo ŵandumisye ku cilambo capasi. Sambano jemanja akupakombola camtuli kuŵeceta kuti une ngumlemwecesya Mlungu pa ligongo lyakuti naŵecete kuti une ndili Mwanace jwa Mlungu? 37 Myoyotu mkangulupilila une naga ngangutenda yindu yakusosa Atati ŵangu kuti nayitende. 38 Nambo naga nguyitenda, atamose jemanja ngamkungulupilila une, nambope akulupilile yitendo yanguyo, pakusosa kuti jemanja m'manyilile kuti Atati ali mwa une ni kuti une ndili mwa Atati.” 39 Papopo Ayuda ŵala ŵasakaga kumkamula nambo jwalakwejo ŵalikulupwisye. 40 Myoyo Yesu ŵawujile soni pesi pa Lusulo lwa Yolodani kumalo kwele Yohane ŵaliji mkwabatisya ŵandu pandanda kula, nipo ŵatemi kukoko. 41 Ŵandu ŵajinji ŵayice kwa jwalakwejo, ni ŵatite kuti, “Yohane nganatendaga yindu yakumasya lunda, nambo yosope yiŵaŵecete yakwamba mundu aju yaliji yakuwona.” 42 Ŵandu ŵajinji ŵamkulupilile Yesu kweleko.
Ciwa ca Lasalo
1 Ŵapali mundu jwine lina lyakwe Lasalo juŵalwalaga. Betaniya waliji msinda wa kumangwawo soni kuŵatamaga acalumbugwe, Maliya ni mkulugwe Malita. 2 (Jweleju ŵaliji Maliya jwakwe juŵapakesye mawuta gakununjila sajo sya Ambuje ni kusipukuta ni umbo syakwe jula, Lasalo juŵalwalaga jula ŵaliji mlumbugwe.) 3 Myoyo acalumbugwewo ŵamtumicisye mtenga Yesu: “Ambuje, mjawo jwakusamnonyela jula akulwala.” 4 Yesu piŵapikene yeleyi ŵatite kuti, “Yakuyicisya ya kwele kulwalaku ngasiyiŵa ciwa ca Lasalope iyayi, yeleyi yitendece kuti lumbili lwa Mlungu luwonece, cine soni kuti ŵandu taluwone lumbili lwa Mwanace jwa Mlungu.” 5 Yesu ŵanonyelaga Malita ni Maliya ni mlumbugwawo Lasalo. 6 Jwalakwe ali apocele mtenga wakuti Lasalo ŵaliji mkulwala, ŵatemipe kuŵalijiko kwa masiku gane gaŵili. 7 Kaneko ŵasalile ŵakulijiganya ŵakwe kuti, “Kwende tujawule soni ku Yudeya.” 8 Ŵakulijiganya ŵajanjile kuti, “Mwalimu, pangakaŵapepa ŵandu ŵakweleko ŵasosaga kuti ŵasome ni maganga, sambano ligongo cici akusosa kuwujila soni kulakula?” 9 Yesu ŵajanjile kuti, “Lisiku likwete ma awala 12 ngaŵa? Myoyo mundu jwakwenda musi lyuŵa lilimkuŵala jwangakuŵala, pakuŵa akuliwona lilanguka lya pa cilamboci. 10 Nambo naga akwenda ndaŵi ja cilo akasakuŵalaga, ligongo nganakola lilanguka lililyose.” 11 Yesu ali aŵecete yeleyi ni ŵatite soni, “Mjetu Lasalo agonile lugono, nambo une tinjawule ngamjimusye.” 12 Myoyo ŵakulijiganyawo ŵamjanjile kuti, “Ambuje, naga ali mlugono, ŵelewo takaŵe cenene.” 13 Yesu ŵagopolelaga kuti Lasalo ŵaliji ali awile, nambo ŵakulijiganya ŵaganisyaga kuti ŵagambaga ya lugono basi. 14 Myoyo Yesu ŵasalile mwangasisa kuti, “Lasalo awile! 15 Une ngusengwa mnope kuti kwaliji kwangali une kweleko ligongo lya yeleyi, kuti jemanja mkulupilile. Tukuŵajilwa sambano kwawula kwa jwalakwejo.” 16 Tomasi (jwakolanjidwa Jwamaŵila) jwatite kwa ŵakulijiganya acimjakwe, “Kwende nowe ŵakwe wosope tulongane ni Mwalimuju, kuti tukawe najo pamo!”
Yesu jwakwimusya ŵandu ku ŵawe ni kuleka umi
17 Piŵayice Yesu ku Betaniya, ŵasimene kuti papite masiku mcece pacisicile mtembo wa Lasalo mwilembe. 18 Ku Betaniya kwaliji kwakuŵandikana ni ku Yelusalemu pa mkuli wakwana makilomita gatatu. 19 Ŵandu ŵajinji ŵa ku Yudeya ŵayice kukwakopocela Malita ni Maliya pa ciwa ca mlumbugwawo. 20 Piŵapikene Malita kuti Yesu ŵaliji mkwisa, ŵakopwece pasa kuja kuwonegana najo, nambo Maliya ŵagambile kutama m'nyumba pemo. 21 Malita ŵatite kwa Yesu, “Akaŵe kunokuno, Ambuje, mlumbugwangu ngimkinawa! 22 Nambope ngumanyilila kuti atamose sambano jino Mlungu tiŵape cilicose citaŵende.” 23 Yesu ŵajanjile kuti, “Alumbuŵenu taciŵa umi soni.” 24 Malita ŵatite, “Ngumanyilila kuti tacijimuka ni kuŵa umi soni pa lisiku lyakumalisya.” 25 Yesu ŵamsalile kuti, “Une ndili jwakwimusya ŵandu ku ŵawe nipo soni jwakupeleka umi. Jwalijose jwakukulupilila une, atamose awe taciŵa umi. 26 Nipo ŵosope ŵali umi mu msimu ni kumkulupilila une ngasawa kose mu msimu. Ana mkukulupilila yeleyi?” 27 Jwalakwe ŵajitice kuti, “Elo Ambuje! Une ngukulupilila kuti wawojo ali Klistu, Mwanace jwa Mlungu, juŵalocesye Mlungu kuti, taciyika ku cilambo capasi.”
Yesu ŵalisile
28 Malita ali aŵecete yeleyi, ŵawujile nipo ŵaŵilasile Maliya ŵiŵaliji apwawo pambali. Myoyo ŵamsalile kuti, “Ayice Mwalimu jwetu ni akumŵilanga.” 29 Maliya piŵapikene yeleyi, ŵajimwice ni kopoka pasa mwacitema kuja kuwonegana najo. 30 (Yesu ŵaliji mkanayice m'musimo nambo ŵaliji ali ciŵela kumalo kuŵasimene ni Malita kula.) 31 Ŵandu ŵiŵaliji najo Maliya m'nyumbamo ni kumtulasyaga mtima pasi ŵala, ŵamkuyisye piŵam'weni ali mkwimuka ni kopoka pasa mwacitema. Jemanjajo ŵaganisyaga kuti Maliya ŵajawulaga ku malembe kukulila. 32 Maliya ŵayice kuŵaliji Yesu, nipo piŵagambile kumwona, ŵaligwisisye pa sajo syakwe. Papopo jwalakwe ŵatite, “Ambuje, yikaŵe kuti wawojo ŵaliji kunokuno, mlumbugwangu ngimkinawa kose!” 33 Yesu ŵam'weni ali mkulila Maliya, nambo soni ŵaweni ŵandu ŵiŵaliji najo muŵalililaga mwakwe, pelepo yamgundile mu mtima, nipo yamlagasisye mnope. 34 Jwalakwe ŵawusisye jemanjajo kuti, “Ana ŵamsicile kwapi?” Jemanjajo ŵajanjile kuti, “Ambuje, ayice akuno nipo takakuwone.” 35 Yesu ŵalisile. 36 Ŵandu ŵala ŵatite kwa jwine ni mjakwe, “Alole muŵamnonyelele mwakwe!” 37 Ŵane mwa jemanjajo ŵatite kwa jwine ni mjakwe, “Ana jweleju ngaŵaga juŵamwugwile m'meso mundu jwangalola jula? Ana ngamkaniyikomboleka kutendesya Lasalo kuti akawa?”
Yesu ŵamjimwisye Lasalo
38 Yesu yili yimlagasisye mnope yilayila, ŵajawile ku malembe gigaliji mbanga jiŵaŵisile liganga mpela litanga kumlango kwakwe. 39 Yesu ŵasalile ŵandu kuti, “Atyosye ligangalyo!” Malita, mlumbugwe jwa mundu jwakuwajo ŵajanjile, “Ambuje, sambano jino atandite kuwola ŵelewo, papite masiku mcece casicile mwilembe!” 40 Yesu ŵaŵecete najo kuti, “Ana nganinamsalila m'mwejo kuti, timciluwona lumbili lwa Mlungu naga mkukulupilila?” 41 Ŵandu ŵala ŵatyosisye liganga lila. Yesu ŵalolite kwinani ni ŵapopesile kuti, “Ngwatogolela wawojo Atati, pakuŵa akusambikanila. 42 Une ngumanyilila kuti wawo akusambikanila masiku gosope, nambo nguŵeceta ayi ligongo lya ŵandu ŵali apanoŵa, kuti jemanjaji akulupilile kuti wawojo ŵandumile une.” 43 Ali amasile kupopela myiyi, ŵaŵilasile ni maloŵe gakwesya, “Lasalo, kopokani pasa!” 44 Jwalakwe ŵakopwece pasa, ali jwamtaŵetaŵe makono gakwe ni sajo syakwe ali jwamŵilijile ni nguwo sya bafuta sya ku malembe, atamose ngope jakwe jaliji jeŵilijile ni nguwo. Yesu ŵasalile ŵanduwo kuti, “Ŵagopole, nipo ŵalece ajawuleje.”
Malindi gakuti amwulaje Yesu
45 Ŵajinji mwa ŵandu ŵiŵayice kukunguluka kwa Maliya ŵayiweni yiŵatesile Yesu, nipo ŵakulupilile mwa jwalakwe. 46 Nambo ŵane mwa jemanjajo ŵapite kwa Afalisi ni ŵasalile jemanjajo yiŵatesile Yesu. 47 Myoyo Afalisi ni acakulungwa ŵa ŵakutaga mbopesi ŵaŵilasisye Nganya ja Ayuda ja Ayuda ni ŵaliji mkuwusyana kuti, “Ana pelepa tutende cici? Alole yakusimonjesya yosope yene yakuyitenda jwele munduju! 48 Naga tukumkunda kuti apitilisye kutenda yakusimonjesyayi, ŵandu wosope ŵa cilambo capasi tacimkulupilila, nipo Aloma taciyika ni kutujonanjila malo getu geswela ga Nyumba ja AMBUJE jetu ni mtundu wetu wakwe!” 49 Jumo jwa jemanjajo, lina lyakwe Kayafa, juŵaliji jwamkulungwa jwa ŵakutaga mbopesi cele cakaco, ŵatite, “Jemanja pangali cimkumanyilila cilicose! 50 Jemanja ngamkumanyilila kuti kuli kwambone kukunda kuti mundu jumo awe ligongo lya ŵandu ŵajinji, m'malo mwakuti mtundu wosope wene ujonasice?” 51 Pakuŵeceta yakuwona, nganagamba kuŵeceta ni lunda lya msyene jikape iyayi, nambo kuti mpela Jwamkulungwa jwa ŵakutaga mbopesi cele cakaco, ŵaliji mkulocesya kuti Yesu tacawila ŵandu ŵa mtundu wa Ayuda, 52 nipo ngaŵa jemanja pewo, nambo soni kwasonganya pamo mwikuga limo ŵandu wosope ŵa Mlungu ŵiŵapwilingene. 53 Myoyo kutandila lyele lisikulyo Nganya ja Ayuda jatandite kusosa matala gakumwulajila Yesu. 54 Ni Yesu nganajendajenda mwakulilosya pasikati pa Ayuda, nambo ŵatyosile ni kwawula ku malo gakuŵandikana ni cipululu, ku msinda wine lina lyakwe Efelemu, kuŵatemi ni ŵakulijiganya ŵakwe. 55 Ndaŵi ja Cindimba ca Pasaka jaŵandicile, nipo ŵandu ŵajinji ŵatyocele ku misi jawo kwawula ku Yelusalemu kukutenda msyungu wa kuliswejesya Pasaka mkanijiyice. 56 Jemanjajo ŵaliji mkumlolesya Yesu, nipo piŵasongene mu Nyumba ja AMBUJE, ŵawusyanaga jwine ni mjakwe kuti, “Wawo akuganisya uli? Jwelejotu ngayika kose ku cindimba kuno, kutiji tayice?” 57 Acakulungwa ŵa ŵakutaga mbopesi ni Afalisi ŵalamwile kuti, naga jwalijose ŵakumanyilile kuŵaliji Yesu, ŵasalile jemanjajo, kuti akamkamule.
Maliya akumpakasya mawuta Yesu
1 Gali gasigele masiku msano ni limo mkanijiyice Pasaka, Yesu ŵajawile ku Betaniya, kumangwakwe kwa Lasalo, juŵamjimwisye ku ŵawe jula. 2 Kweleko Yesu ŵamlinganyicisye yakulya, nipo Malita ni juŵakamucisyaga kutumicila; Lasalo ŵaliji jumo jwa ŵandu ŵiŵatemi nawo pa tebulo ni Yesu. 3 Kaneko Maliya ŵajigele mawuta gakununjila ga mtengo wapenani litika lya lita jimo giŵasumile ni mbiya syapawinji gakupanganya ni sipikenadi jwakununjila, ŵagapungulile pa sajo sya Yesu, nipo ŵasipukwite sajosyo ni umbo syakwe. Liwungo lyakununjila cenene lya mawutalyo lyagumbele m'nyumba josope jene. 4 Jumo jwa ŵakulijiganya ŵa Yesu, Yudasi Isikaliyoti juŵaliŵicile cile yakumpeleka Yesu ŵatite, 5 “Ligongo cici gele mawuta gakununjila cenenega nganagasumisya pa mtengo wa mbiya syakwanila masilifa 300 , mbiyasyo ni kuja kwapa ŵandu ŵakulaga?” 6 Jweleju ŵaŵecete yeleyi, ngaŵa ligongo lyakuti ŵasamalilaga ŵandu ŵakulaga iyayi, nambo kuti ligongo ŵaliji mundu jwawiyi. Ŵaliji ŵakusunga msaku wa mbiya nipo ŵalikamucisyaga nasyo asyene jika ndaŵi ni ndaŵi. 7 Nambo Yesu ŵatite kuti, “Mumlece jwamkongweju! Mumlece akumbucileje yayitesileyo pakuŵapo jwalakwe atendele cile ya lisiku lyakusika malilo gangu. 8 Timciŵa ni ŵandu ŵakulaga pasikati pa jemanja ndaŵi syosope nambo une ngasimba pasikati pa jemanja ndaŵi syosope.”
Malindi gakuti amwulaje Lasalo
9 Likuga lyalikulungwa lya ŵandu lyapikene kuti Yesu ŵaliji ku Betaniya, myoyo ŵajawile kweleko, ngaŵa ligongo lya Yesupejo iyayi nambo soni kukumlola Lasalo, juŵajimusidwe ni Yesu ku ŵawe. 10 Myoyo acakulungwa ŵa ŵakutaga mbopesi ŵalinganyisye matala gakumwulajila soni Lasalo, 11 ligongo Ayuda ŵaliji mkwakana jemanjajo ni kukulupililaga mwa Yesu. Jemanjajo ŵatesile myiyi ligongo lya yiyatendece kwa Lasalo.
Likuga lya ŵandu lyamcimbicisye Yesu pakwinjila mu Yelusalemu
12 Kundaŵi kwakwe likuga lyalikulungwa lya ŵandu ŵiŵayice ku Cindimba ca Pasaka ŵapikene kuti Yesu ŵaliji mkwisa ku Yelusalemu. 13 Myoyo ŵajigele nyambi sya yitela ya kanjesa ni kopoka kukumcingamila acitandikaga nyambisyo mumsewo. Ŵaliji mkugumila kuti, “Amcimbicisye Mlungu! Mlungu ampe upile jwele jwakwisa mu lina lya Ambuje! Mlungu ampe upile mwenye jwa Isalaeli!” 14 Yesu ŵamsimene mwanace jwa bulu ni ŵakwesile, mpela muŵalembele m'Malemba kuti, 15 “Akasajogopa cilicose, ŵandu ŵa Yelusalemu! Mwenye jwawo ali kwisa sambano, ali akwesile pa mwanace jwa bulu.” 16 Ŵakulijiganya ŵakwe nganamanyilila yiyatendekwagayi pa jele ndaŵiji, nambo piŵamjimwisye Yesu ku ŵawe mu lumbili lwa Mlungu, ŵakumbucile kuti yele yinduyi yalembedwe kusala ya jwalakwe, nipo yatendece kwa jwalakwe mpela muŵalembelemo. 17 Yesu piŵamŵilangaga Lasalo kuti akopoce m'malembe ni kumjimusya ku ŵawe, ŵandu ŵiŵaliji pelepo ŵajile kukusala yele yiyatendece kwa Lasaloyi. 18 Ali ni ligongo lyakwe likuga lya ŵandu lyakopwece kukuwonegana najo Yesu pakuŵapo ŵapikene kuti ŵatesile cele cakusimonjesyaci. 19 Myoyo Afalisi ŵasalilene jwine ni mjakwe kuti, “Akuyiwona, mwetu ni tulepele basi! Alole, jwalijose pa cilambo capasi akumkuya jwalakwe!”
Agiliki ŵane akumsosa Yesu
20 Agiliki ŵane ŵaliji pasikati pa ŵandu ŵiŵajawile ku Yelusalemu kukupopela mu ndaŵi ja cindimba ca Pasaka. 21 Jemanjajo ŵajawile kwa Filipi (juŵatyocelaga ku Betisaida ku Galileya) ni ŵamŵendile kuti, “Bwana, uwe tukusosa kuwonegana ni kuŵeceta najo Yesu.” 22 Filipi ŵamsalile Andileya nipo ŵaŵiliwo ŵalongene kukumsalila Yesu yiŵaŵecete Agilikiyo. 23 Yesu ŵatite kwa ŵandu wosope ŵene ŵiŵaliji pelepo, “Sambano ndaŵi jiyice jakuti Mlungu alosye pakulanguka lumbili lwa Mwanace jwa Mundu. 24 Une ngumsalila jemanja yakuwona kuti: lusongolo lumo lwambeju ja tiligu lukasagamba kuŵa lumo pelo basi akaŵe jwine alupande mwitaka ni lukasawaga. Pati luwile, mpela mulukusatendelaga mula, kaneko lukusasogolaga songolo syejinji. 25 Ŵele ŵakuwunonyela ni kuwujumilila umi wawo taciwujasa, ni ŵele ŵakakuwunonyela umi wawo mcilambo capasi cino taciwusunga ku umi wangamala. 26 Naga jwalijose jwa jemanja akusosa kuti une mbe mbujegwe anguye une, kuti mpela ŵakundumicila ŵangu, akaŵe ni une kutingaŵe uneko. Myoyo Atati ŵangu tacimpa ucimbicimbi jwalijose jwakungamucisya une.
Yesu akuŵeceta ya ciwa cakwe
27 “Sambano umi wangu ulasile ana ndende uli? Ana kuŵa mkuŵeceta kuti, ‘Atati, akasakunda kuti une linjidwe mu lyele litalali?’ Nambotu yeleyi ni yinayicile pasi pano kukulaga mpela mutindajile ndaŵi ajino. 28 Atati awumbule lumbili lwawo kwa ŵandu!” Papopo Mlungu ŵaŵecete kutyocela kwinani kuti, “Une nalulosisye lumbili lwangu kala nipo tinjilulosya soni.” 29 Likuga lya ŵandu ŵiŵajimi pelepo ŵagapikene maloŵego, nipo ŵane ŵa jemanjajo ŵatite kuti, kulindimako kwaliji njasi, nambo ŵane ŵatite kuti, “Lilayika lyaliji mkuŵeceta ni jwalakwejo.” 30 Nambo Yesu ŵasalile jemanjajo kuti, “Maloŵega nganigaŵecetedwa ligongo lya une, nambo ligongo lya jemanja. 31 Sambano ajino jili ndaŵi jakuti cilambo acino cilamulidwe; jwakulamula jwa cilambo capasi taciponyedwa kusa. 32 Une patinjinyakulidwa kwawula kwinani, ŵandu wosope tinjawutila kwa une.” 33 Ŵaŵecete gele maloŵega pakusaka kwamanyisya jemanjajo mwele mutaciwila jwalakwejo. 34 Ŵanduwo ŵajanjile kuti, “Uwe twapikene m'Malamusi getu kuti, Klistu tacitama ni umi mpaka kalakala. Nambi uli sambano ŵalakwe akuti Mwanace jwa Mundu tacijigalidwa kwawula kwinani? Ana Mwanace jwa Mundu ali nduni?” 35 Yesu ŵajanjile kuti, “Lilanguka tiliciŵa pasikati pawo kwa kandaŵi panandi. Mpitilisye kwenda mu lilangukali, kuti cipi cikasicimsimana, pakuŵa mundu jwakwenda mcipi jwangamanyilila kwakwawula. 36 Myoyo akulupilile mwa jwele jwakutendesya kuti kuŵe lilangukalyo, pali najo ciŵela, myoyo jemanja timciŵa ŵandu ŵa lilangukalyo.”
Ŵajinji mwa Ayuda ŵakanile kumkulupilila Yesu
Yesu ali aŵecete yeleyi, ŵatyosile ni ŵajile kutama kumalo kwakusisika mwakuti ngaŵa kumsimana. 37 Atamose jwalakwe ŵatesile yakusimonjesya yosopeyi pameso pawo, jemanjajo ŵakanile kukulupilila mwa jwalakwejo, 38 kuti yiŵaŵecete jwakulocesya Yesaya yitendekwe: “Ambuje, nduni jwakulupilile utenga utulalicile? Ana nduni jwamwumbulile Ambuje macili gakwe?” 39 Ni myoyo nganapakombola kukulupilila mpela muŵaŵecetele soni Yesaya kuti: 40 “Mlungu ŵatatalesye meso gawo nipo ŵajumwisye mitima jawo, kuti meso gawo gakasigalola, nipo mitima jawo jikasijipikanicisya, nipo jemanjajo akusapitikucila kwa une, akuti Mlungu kuti une naposye.” 41 Yesaya ŵaŵecete yele yinduyi ligongo ŵaluwonele cile lumbili lwa Yesu nipo ŵaŵecete ya jwalakwe mutiyiciŵela. 42 Atamose pelepa, acakulungwa ŵa Ayuda ŵajinji ŵakulupilile mwa Yesu, nambo ligongo lyakwajogopa Afalisi nganaŵeceta kwa ŵandu ŵane kuti jemanjajo akukulupilila mwa Yesu, kuti akusiŵatyosya ni kwalekasya kwawula ku nyumba jakupopelela. 43 Jemanjajo ŵanonyelaga kupocela ucimbicimbi kutyocela kwa ŵandu kupunda ucimbicimbi ŵakutyocela kwa Mlungu.
Maloŵe ga Yesu gacilamula ŵandu
44 Yesu ŵaŵecete mwakwesya maloŵe kuti, “Mundu jwalijose jwakukulupilila mwa une ngagamba kukulupilila mwa unepe jika iyayi nambo soni mwa jwele juŵandumile une. 45 Mundu jwalijose jwakumbona une akwawona soni ŵele ŵiŵandumile une. 46 Mbice une ku cilambo capasi mpela mundu jwakutendesya kuti lilanguka liŵale pa ŵandu, kuti jwalijose jwakukulupilila mwa une akasatama kose mcipi. 47 Naga jwine akugapikana maloŵe gangu nambo ngakupikanila yinamsalileyo kuti ayitende, une ngasinimlamula. Nganimbika ku cilambo capasi kuti nalamule ŵandu iyayi nambo kukwakulupusya. 48 Jwalijose jwakungana une ni ngawukunda utenga wangu pana jutacimlamula. Maloŵe gimbecete une ni gitigacimlamula pa lisiku lyakumalisya! 49 Ayi ni yakuwona yakwe, ligongo nganimbeceta mwamacili ga une jika, nambo Atati ŵiŵandumisye une ni ŵandamwile yayili yakuŵajilwa kuyisala ni kuyiŵeceta. 50 Nipo ngumanyilila kuti yalamwile jwalakwe yikwatendesya ŵandu kuti aŵe umi mpaka kalakala. Myoyo, yingusala une, ni yandumile Atati kuti nayisale.”
Yesu ŵacapile sajo sya ŵakulijiganya ŵakwe
1 Lyaliji lisiku lyakuti Cindimba ca Pasaka caliji mkaniciyice ni piŵamanyilile Yesu kuti ndaŵi jakuti jwalakwe atyoce pa cilambo capasi ni kwawula kwa Atati ŵakwe jakwanile. Jwalakwe ndaŵi syosope pa cilambo capasi pano ŵanonyele ŵandu ŵiŵamkulupilile, nipo ŵanonyele mpaka pa mbesi pa umi wakwe. 2 Yesu ni ŵakulijiganya ŵakwe ŵaliji mkulya pamo ligulo. Satana ŵatendesye Yudasi, mwanace jwa Simoni Isikaliyoti kuti akole nganisyo syakumpeleka Yesu. 3 Yesu ŵamanyilile kuti Atati ŵakwe ŵampele macili gosope gene, jwalakwe ŵamanyilile kuti ŵatyocele kwa Mlungu nipo ŵaliji mkwawula kwa Mlungu. 4 Myoyo Yesu ŵajimi ni ŵawusile mkanjo wakwe, ni ŵataŵile mciwunu mwakwe nguwo jakupukutila. 5 Kaneko ŵatasile mesi mwibeseni ni kutanda kucapa sajo sya ŵakulijiganya ŵala ni kwapukuta ni nguwo jiŵawete mciwunu jila. 6 Yesu ŵayice kwa Simoni Petulo, juŵamwusisye kuti, “Ambuje, ana akusosa kucapa sajo syangu?” 7 Yesu ŵamjanjile kuti, “Wawo ngakumanyilila pa sambano jino yingutenda une, nambo tacipikana cenene pasogolo pakwe pa yele yinduyi.” 8 Petulo ŵajanjile kuti, “Ngasiyikomboleka mu ndaŵi jilijosejo kuti wawo tacape sajo syangu!” Yesu ŵajanjile kuti, “Naga nganjapa kose sajo syawo, wawojo ngasaŵa soni jwakulijiganya jwangu.” 9 Simoni Petulo ŵajanjile kuti, “Ambuje, naga myoyo ni akagamba kunjapa sajopesyo iyayi! Nambo acape magasa gangu ni mtwe wakwe soni!” 10 Yesu ŵajanjile kuti, “Ŵandu ŵajosile akuŵa ali aswejele mnope nipo ŵangalajila soni kulicapa acimsyene, nambo akasagamba kulicapa sajope basi. Jemanja wosope aswejele nditu, nambo jumope jwa jemanja nganaswejela.” 11 (Yesu ŵaliji ali am'manyilile kala jutacimpeleka jwakwe, ni ligongo lyakwe ŵatite kuti, “Jemanja wosope aswejele, nambo jumope jwa jemanja nganaswejela.”) 12 Yesu piŵacapile sajo syawo sila, ŵawete mkanjo wakwe ula soni ni kuwujila kuja kutama pa malo pakwe piŵalilaga yakulya pala. Kaneko jwalakwe ŵawusisye kuti, “Nambo akumanyilila gopolela kwa yele yindu yingambile kuyitendayi?” 13 Jemanja akasangolangaga une kuti Mwalimu ni Ambuje, nipo akulondola cenene pakungolangaga myoyo, pakuŵa yakungolangayi ni une jwene. 14 Myoyo une jundili Ambuje ŵawo ni Mwalimu jwawo, ngambile kucapa sampanoji sajo syawo. Jemanja nombe nawo soni akuŵajilwa kucapa sajo sya acimjawo. 15 Une napele jemanja cisyasyo, kuti nombe nawo tacitenda soni mpela yinatendele une. 16 Une ngumsalila jemanja yakuwona kuti: pangali acikapolo ŵakusaŵa ni ulamusi wakwapunda ambuje wawo, nipo soni jwakutumidwa ngaŵa kumpunda mkutumajo. 17 Pakuŵapo sambano jemanja amanyilile kuti yimbecete uneyi yili yakuwona, tacilupata lukondwa lwawo naga ayitendeje yele yinduyo. 18 “Une nganguŵeceta ya jemanja wosope iyayi, ngwamanyilila cenenepe ŵandu ŵinasagwile. Nambo yikuŵajilwa kutendeka yigakusala Malemba kuti, ‘Mundu junagaŵene najo mkate wangu ŵanjimucile.’ 19 Ngwasalila cile jemanja ya yeleyi mkaniyitendece, kuti patiyicitendekaga, tacikulupilila kuti ‘Une ni Jundili.’ 20 Une ngwasalila jemanja yakuwona kuti: mundu jwakumpocela jwalijose jungumtumisya une akumbocela soni une, nipo mundu jwakumbocela une akwapocela ŵele ŵiŵandumile une.”
Yesu akulocesya ya ndaŵi jitacipelecedwa kwa amagongo ŵakwe
21 Yesu ali aŵecete yeleyi, ŵalasile mnope mu mtima nipo ŵaŵecete mwangasisa kuti, “Ngumsalila jemanja yakuwona kuti: jumo jwa jemanja tambelece kwa amagongo.” 22 Ŵakulijiganya ŵala ŵalolegene jwine ni mjakwe, ali ŵakusimonga mnope ya mundu jusyesyene juŵamgambaga Yesu. 23 Jumo jwa ŵakulijiganya ŵala juŵamnonyelaga Yesu mnope jula, ŵatemi ku mkono ŵa mlyo ŵa Yesu. 24 Simoni Petulo ŵamkodwele jwelejo ni kumsalila kuti, “Mwawusye Ambujewo jwakumgamba.” 25 Myoyo jwakulijiganyajo ŵasejelele kwa Yesu ni kumwusya kuti, “Ambuje, ana akwagamba ŵani?” 26 Yesu ŵajanjile kuti, “Tindoŵece mkate mu msusi, ni kuwupeleka kwa jwalakwejo, jutinampejo ni jujojo.” Myoyo ŵajigele mkate, ni kupamba mu msusi, kaneko ŵawupelece kwa Yudasi, mwanace jwa Simoni Isikaliyoti. 27 Ndaŵi jijojo ali nalya pejo Yudasi mkatewo, Satana ŵatandite kwalamulila. Yesu ŵamsalile kuti, “Janguyani kutenda yimkusosa kuyitendayo!” 28 Mwa ŵandu ŵiŵatemi piŵalyaga yakulyapo pangali jumo juŵapikanicisye ligongo lyakwe liŵaŵecetele yeleyi Yesu kwa Yudasi. 29 Pakuŵa Yudasi ŵaliji jwakusunga msaku wa mbiya, ŵakulijiganya ŵane ŵaganisyaga kuti Yesu ŵamtumile kuti ajawule akasume yiŵayisosaga jemanjajo kupanganyicisya masengo pa cindimbapo, kapena kuti ŵape yindu ŵandu ŵakulaga. 30 Yudasi ŵapocele mkate kala nipo ndaŵi jijojo ŵakopwece pasa. Celeci caliji cilo.
Lilamusi lya sambano
31 Yudasi ali atyosile, Yesu ŵatite kuti, “Sambano ŵandu taciluwona lumbili lwa Mwanace jwa Mundu, sambano ŵandu taciluwona lumbili lwa Mlungu kupitila mwa jwalakwe. 32 Nipo naga ŵandu taciluwona lumbili lwa Mlungu kupitila mwa jwalakwe, myoyo Mlungu tacilosya lumbili lwa Mwanace jwa Mundu mwa jwalakwe msyene, nipo tacilulosya lumbililo mwangakaŵa. 33 Ŵanace ŵangu, tindame namwe kwa ndaŵi japanandipe basi. Jemanja timcindolesyaga une, nambo sambano ngumsalila yinasalile acakulungwa ŵa Ayuda kuti, ‘Jemanja ngaŵa mkupakombola kwawula kungwawula une iyayi.’ 34 Nipo sambano une ngumpa jemanja lilamusi lyasambano lyakuti: Mnonyelaneje jwine ni mjakwe. Mpela munanonyele une mula, jemanja akuŵajilwa soni kuti anonyelaneje jwine ni mjakwe. 35 Naga mkunonyelana jwine ni mjakwe, pelepo ŵandu wosope tacimanyilila kuti jemanja mli ŵakulijiganya ŵangu.”
Yesu akuŵecetela cile yakuti Petulo tacimkana jwalakwejo
36 Simoni Petulo ŵamwusisye jwalakwe kuti, “Ana akwawula kwapi Ambuje?” Yesu ŵamjanjile kuti, “Wawo ngaŵa mkupakombola kunguya kungwawula une sambano jino, nambo pasogolo pakwe tacinguya.” 37 Petulo ŵajanjile kuti, “Ambuje, ligongo cici une ngaŵa mkupakombola kwakuya wawojo sambano jino, unetu ndili cile kuti mbwe m'malo mwa wawo!” 38 Yesu ŵamjanjile kuti, “Wawo akupakombola camtuli kuŵeceta kuti ali cile kuwa m'malo mwa une? Une ngwasalila wawojo yakuwona kuti: tambala mkanatongole wawo taciŵeceta katatu kuti ngakumanyilila une.”
Yesu ali litala lya kwa Atati
1 Yesu ŵasalile ŵakulijiganya ŵakwe kuti, “Mitima jawo jikalagaga mnope, akulupilile mwa Mlungu nipo soni akulupilile mwa une. 2 M'nyumba ja Atati ŵangu mwana malo gejinji, ni ngwawula kukumlinganyicisya malo jemanja. Yikaŵe kuti nganiyiŵa myoyo, ngamkaninamsalila yeleyi. 3 Patinjawule kuja kukumlinganyicisya jemanja malo, tinjiwuja nipo tinjajigalila kwa une namsyene kuti akatame kungutama une. 4 Jemanja mkulimanyilila litala lyakwawula kumalo kungwawula une.” 5 Tomasi ŵawusisye kuti, “Ambuje, uwe ngatukukumanyilila kwakwawula wawojo, ni mpaka tupakombole camtuli kulimanyilila litala lyakuja kuyicila kweleko?” 6 Yesu ŵamjanjile kuti, “Une ndili litala, usyesyene, ni umi, pangali mundu jwakwawula kwa Atati akaŵe kupitila mwa une basi.” 7 Jwalakwe ŵasalile ŵakulijiganyawo kuti, “Pakuŵa jemanja sambano mumanyilile une, timcamanyilila Atati ŵangu soni, nipo kutandilaga sambano jino mpaka pasogolo jemanja akwamanyilila soni ŵaweni.” 8 Filipi ŵatite kwa Yesu, “Ambuje, atulosye uwe Atati ŵawowo, uwe yeleyo ni yitukusosa.” 9 Yesu ŵajanjile kuti, “Une mbele ndili ni jemanja wosope kwa ndaŵi jelewu, ni mosopemo ngamkumanyilila une Filipi? Mundu jwambweni une ŵaweni soni Atati. Nambi ligongo cici mkuŵeceta kuti, ‘Atulosye Atati’? 10 Ana Filipi ngamkukulupilila kuti Atati alumbikene ni une nipo une lumbikene ni Atati? Yesu ŵaŵecete kwa ŵakulijiganya ŵakwe kuti, maloŵe gimbecete ni jemanja, ngagakutyocela kwa une jikape iyayi. Atati, ŵakusatamaga mwa une ni ŵakupanganya gele masengo gakwega.” 11 Angulupilile une yingwasalilayi kuti une lumbikene ni Atati nipo Atati alumbikene ni une. Naga ngakukulupilila yinguŵecetayi, akulupilile ligongo lya yindu yindesileyi. 12 Une ngwasalila jemanja yakuwona: ŵele ŵakukulupilila mwa une tacitenda yindu yakusimonjesya mpela yingutenda une jemanjajotu taciyitenda atamose yindu yakupunda yeleyi ligongo une ngwawula kwa Atati ŵangu. 13 Nipo tinjitenda cilicose citaciŵenda mu lina lyangu, mwakuti lumbili lwa Atati tiluciwoneka kupitila mwa Mwanace. 14 Naga akuŵenda cilicose mu lina lyangu, une tinjicitenda.
Cilanga ca Msimu Ŵaswela
15 “Naga jemanja akunonyela une, tacigapikanila malamusi gangu. 16 Une tinjaŵenda Atati, nipo tacimpa Namangoswe jwine, jutaciŵa ni jemanja mpaka kalakala. 17 Namangoswejo ni Msimu jutaciwumbula yakuwona ya Mlungu. Ŵandu ŵa cilambo capasi ngaŵa mkupakombola kumpocela jwalakwe, ligongo ngaŵa mkupakombola kumwona kapena kum'manyilila. Nambo jemanja mkum'manyilila, ligongo akutama ni jemanja nipo taciŵa mkati mwa jemanja. 18 “Pitinjawule ngasinaleka kuŵa jika ŵangali ŵakumkamucisya, une timbice soni kwa jemanja. 19 Mwa ndaŵi japanandi ŵandu ŵa cilambo capasi ngasambona soni une, nambo jemanja timcimbona, nipo pakuŵa une ndili umi sambano, jemanja soni timcikola umi. 20 Pitiliciyika lyele lisikulyo, jemanja timcimanyilila kuti une lumbikene na Atati ŵangu nipo kuti jemanja mlumbikene ni une, mpela mulumbikanile une ni jemanja. 21 “Ŵele ŵakupikanila ni kutenda yinalamwile kuti ayitende jemanjajo ni ŵakunonyela une. Myoyo Atati ŵangu tacanonyela ŵele ŵakunonyela unejiwo, une soni tinjanonyela jemanjajo ni kuliwonesya namsyene kwa ŵelewo.” 22 Yudasi (jwine ngaŵa Yudasi Isikaliyoti) ŵatite, “Ambuje, tiyikombolece camtuli kuti wawojo taciliwonesya asyene kwa uwepe nambo ngaŵa kwa ŵandu ŵa cilambo capasi?” 23 Yesu ŵamjanjile kuti, “Jwakunonyela une taciyitenda yindu yinamlamwile kuti ayitende. Atati ŵangu tacimnonyela, nipo Atati ŵangu pamo ni une tuciyika kwa jwalakwe ni kutamaga ni jwalakwe. 24 Jwele jwakakunonyela une jwangapikanila ni kuyitenda yele yingumlamula kuti ayitende. Nipo maloŵe gimgapikene jemanja kutyocela kwa une nganigaŵa nganisyo sya une namsyene iyayi, nambo gakutyocela kwa Atati, ŵiŵandumisye une. 25 “Mbecete gele maloŵega kwa jemanja pindili ciŵela yalumo ni jemanja. 26 Namangoswe, jwali Msimu Ŵaswela, jutacimtumisya Atati mu lina lyangu, tacajiganya jemanjajo cilicose ni kwakumbusya yosope yene yinasalile jemanjajo. 27 “Mtendele ni ungumlecela jemanja, mtendele wakwe wa une namsyene ni ungwapa. Nganguwupeleka mpela mwakupelecela ŵandu wa cilambo capasi. Akasadandawula ni kulaga pa yindu yitiyitendece, akatenda woga uliwose. 28 Jemanja ŵambikene une ndili mkwasalila kuti, ‘Ngutyoka, nambo tinjiyika soni kwa jemanja.’ Yikaŵe kuti jemanja akunonyela une, jemanja akaliji ŵakusangalala kuti ngwawula kwa Atati, pakuŵa Atati ali ŵakulungwa kumbunda une. 29 Une nasalile cile yeleyi jemanja mkaniyitendece, kuti patiyicitendekapo, jemanja tacikulupilila. 30 Nganapakombola kuŵeceta ni jemanja kwakupitilisya mnope, ligongo jwakulamula jwa cilambo capasi ali mkwisa. Jwelejo ngaŵa mkupakombola kundamula une. 31 Nambo ŵandu ŵa cilambo capasi akuŵajilwa kumanyilila kuti une ngwanonyela Atati, ni ligongo lyakwe ngasindendaga cilicose mpela mwakundamulila une kuti nacitende. Ajimuce, kwende tutyoce apano tujawuleje.
Yesu ali mpeleya usyesyene
1 “Une ndili citela ca mpeleya usyesyene, nipo Atati ŵangu ni ŵakuwulimila. 2 Akusakataga lunyambi lulilose lwakusimanika mwa une lwangasogola yisogosi, nipo akusasamalilaga lunyambi lwakusogola yisogosi pakulusandulila nyambi wamba, kuti luŵe lwakusalala ni kusogola yisogosi yejinji. 3 Jemanja msalele kala ligongo lya utenga wangu unapele. 4 Jemanja mŵe ŵakulumbikana mwa une, nipo une tinjiŵa jwakulumbikana mwa jemanja. Lunyambi ngakomboleka kusogola cisogosi pajika, nambo mpaka yikombolece kusogola naga luli lulumbikene ni citela ca mpeleya. Yalumo soni jemanja ngakomboleka kusogola cisogosi nambo akaŵe mli mlumbikene ni une. 5 “Une ndili citela ca mpeleya, nipo jemanja mli nyambi syakwe. Mundu jwakutamape mwa une, nipo une mwa jwalakwe, tacisogola yisogosi yejinji, pakuŵa naga pangali une jemanja ngakomboleka kutenda cilicose. 6 Jwalijose jwakakutamape mwa une akumponya pasa mpela lunyambi nipo akasajumulaga, syelesi ni nyambi syakasasisonganya ŵandu ni kusiponya pamoto, ni sikusakolelaga. 7 Naga akutama mwa une nipo maloŵe gangu gakutama mwa jemanja, ni kuti timciŵenda cilicose cimkucisosa, nipo timcicipocela. 8 Naga jemanja msogwele yisogosi yejinji, tiyicilosya kuti mli ŵakulijiganya ŵangu, myoyo lumbili lwa Atati ŵangu tiluciwonecela. 9 Mpela Atati anonyele une, myoyo soni une nanonyele jemanja. Mtameje mu cinonyelo canguco. 10 Naga mkupikanila malamusi gangu, tinjipitilisya kumnonyela jemanja, mpela mundendele une pakupikanila malamusi ga Atati ŵangu, nipo akupitilisya kunonyela. 11 “Nimsalile ayi kuti lukondwa lwangu luŵe mwa jemanja ni soni kuti lukondwa lwenu luŵe lwekwanile. 12 Lilamusi lyangu ni ali lyakuti: Mnonyelaneje jwine ni mjakwe, mpela une mungusinamnonyelela jemanja. 13 Cinonyelo cekulungwa cele mundu kukomboleka kola kwa acimjakwe cili kupeleka umi wakwe kwa jemanjajo. 14 Jemanja mli acimjangu naga mkusatendaga yele yinamlamulile kuti myitendeje. 15 Ngangumkolanga jemanja kuti mli ŵakutumicila, ligongo jwakutumicila jwangamanyilila cele cakutenda ambujegwe. Myoyo, ngumkolanga jemanja kuti ŵakutumicila nambo ngumkolanga kuti acimjangu ligongo nimsalile yosope yimbikene kutyocela kwa Atati ŵangu. 16 Jemanja nganimusagula une; Une ni junamsagwile jemanja kuti mjawule ni mkasogole yisogosi yejinji, yele yili yakutamilisya. Myoyo Atati tacimpa yiliyose yitimwaŵende mu lina lyangu. 17 Myoyo, lilamusi lyangu kwa jemanja ni ali: anonyelaneje jwine ni mjakwe.
Ŵandu ŵa cilambo capasi tacimŵenga jemanja
18 “Naga ŵandu ŵa cilambo capasi akumŵenga jemanja mgambeje kukumbucila kuti ŵatandite kumbenga une. 19 Yikaŵe kuti jemanja mli ŵa pacilambo capasi, ŵanduwo akamnonyele mpela acimjawo. Nambo une namsagwile jemanja kumtyosya pasikati pawo, nipo nganaŵa acimjenu, ni ligongo lyakwe akumŵenga. 20 Mkumbucile maloŵe ginasalile gakuti: ‘Ŵamasengo ŵangapunda ambuje ŵakwe.’ Naga ŵandu ŵasawisye une, tacimsawusya jemanja soni, nambo naga ŵapikanile maloŵe gangu, tacimpikanila soni maloŵe genu. 21 Nambo jemanjajo tacitenda yosope yakumsawusya jemanjayi ligongo mli ŵa une, pakuŵa jemanjajo ngakwamanyilila ŵele ŵiŵandumile une. 22 Yikaŵe kuti nganimbika ni kuŵeceta nawo, ngamkanakola ulemwa, nambo muyiŵelelemu, ngaŵa mkukana kuti nganamanyilila kuti yiŵatasileyo yaliji ya ulemwa. 23 Jwalijose jwakumbenga une akwaŵenga soni Atati ŵangu. 24 Jemanjajo ngamkanimkola ulemwa yikaŵe kuti, nganindenda yakusimonjesya pasikati penu yimkanayitendeje jwalijose citandilile, nambo muyiŵelelemu, ngati ŵayiweni yinayitesile une, nipo akutuŵenga wosope uwe Atati ŵangu ni une jwakwe. 25 Myoyopeyo, ayi yaŵajilwe kuwoneka kuti yitendece yiyalembedwe m'buku ja Malamusi yakuti: ‘Ŵagambile kumbenga pangali ligongo kose.’ 26 “Nambo pana jwele jwakolanjidwa kuti Jwakukamucisya jutinjimtumicisya kutyocela kwa Atati. Jwakukamucisyajo ni Msimu wa yakuwona, wakutyocela mwa Atati. Jwalakwejo pitaciyika tacindendela une umboni.” 27 Jemanja nombe nawo timcindendela une umboni ligongo mwatemi ni une kutandila pandanda.
1 “Une namsalile jemanja yeleyi, kuti kasimleka kukulupilila. 2 Tacimtyosya ni kumlekasya kupopela ku nyumba syakupopelela, nipo tijiciyika ndaŵi jakuti jwalijose jwakumwulaga jemanja taciganisyaga kuti akumtumicila Mlungu pakutenda yeleyo. 3 Ŵandu tacimlagasya jemanja camti myiyi ligongo ngakwamanyilila Atati kapena une. 4 Une namsalile cile jemanja yeleyi, kuti pitijiciyika ndaŵi jakuti jemanjajo atende yele yinduyi, jemanja tacikumbucila kuti paja namsalile cile.
Masengo gitacitenda Msimu Ŵaswela
“Nganinamsalila jemanja yele yinduyi pandanda, pakuŵa naliji pamo ni jemanja. 5 Nambo sambano une ngawula kwa Atati ŵangu ŵiŵandumile, nambo pangali jumo jwa jemanja jwakumbusya kuti, ‘Ana akwawula kwapi?’ 6 Nambo sambano pakuŵapo namsalile jemanja ya yele yinduyi, mitima jenu jigumbele canasa. 7 Nambo ngwasalila yakuwona kuti: yili cenene kuti ngwawula, ligongo naga ngajawula, Jwakukamusya ngasayika kwa jemanja. 8 Nipo pitaciyika jwelejo, tacilosya ŵandu ŵa cilambo capasi kuti akwete nganisyo syangalumbana pa ulemwa, ya cilungamo ca Mlungu, ni ya kulamula kwakwe. 9 Ŵanduwo akwete nganisyo syangalumbana pa ulemwa, ligongo akukana kukulupilila mwa une, 10 akwete nganisyo syangalumbana pa yindu yayili ya cilungamo, ligongo une ngwawula kwa Atati ŵangu nipo jemanja ngasambona soni, 11 nipo akwete nganisyo syangalumbana pa ya kulamula, ligongo jwakulamula jwa cilambo capasici alamwile kala. 12 “Ngwete yindu yejinji yakuti namsalile, nambo sambano jino tiyimtupile mpaka ngapakombola kuyipikanicisya. 13 Nambo pitaciyika Msimupo, ŵakusala yakuwona ya Mlungu, jwelejo tacimlongolela mu yakuwona yosope yene. Jwalakwe ngasaŵeceta ya pa macili ga jikape iyayi, nambo taciŵeceta yitaciyipikana, nipo tacimsalila ya yindu yamsogolo. 14 Ŵelewo tacimlosya jemanja lumbili lwangu lusyesyene, ligongo tacipikana yitinjasalila une nipo taciyisala kwa jemanja. 15 Yosope yene yakwete Atati ŵangu yili yangu, ni ligongo lyakwe natite kuti Msimu tacipikana yitinjimsalila une nipo kaneko Ŵelewo taciyisala yinduyo kwa jemanja.
Canasa ni kusangalala
16 “Kwa ndaŵi japanandi jemanja ngasambona soni, nipo kwa ndaŵi japanandi soni tacimbona.” 17 Ŵane mwa ŵakulijiganya ŵakwe ŵawusyanaga kuti, “Ana Ambujeŵa akusosa kutusalila cici pati acitiji, kwa ndaŵi japanandi ngasitwawona, nipo kwa ndaŵi japanandi jinejo tucawona, soni akuŵeceta kuti, ‘Ligongo lyakwe une ngwawula kwa Atati.’ 18 Ana ‘kwa ndaŵi japanandi’ gopolela kwakwe ni cici? Uwe ngatukumanyilila yakugopolela!” 19 Yesu ŵamanyilile kuti ŵasosaga kumwusya jwalakwejo, myoyo ŵatite kwa jemanjajo, “Une natite kuti, ‘Kwa ndaŵi japanandi jemanja ngasimumbona, nipo kwa ndaŵi japanandi jinejo tacimbona.’ Ana ayi ni yakuwusyana pasikati pawo?” 20 Une ngumsalila jemanja yakuwona kuti: tacilila ni kuwuwula, nambo ŵandu ŵa cilambo capasi tacisangalala, jemanja taciŵa ŵacanasa pandanda, nambo canasa cawo ticicigalawuka kuŵa kusangalala. 21 Pati ŵakongwe asigele panandi kuŵeleka mwanace, akasalaga ni ululu ligongo ndaŵi jakupweteka jiyice, nambo pati mwana apagwile, akasaliŵalilaga kupweteka kwakwe kula, ligongo akuŵa ŵakusengwa kuti kupagwile mundu ku cilambo capasi. 22 Ayi ni muyiŵelele ni jemanja kuti: sambano ali ŵa canasa, nambo tinjawona soni, nipo mitima jenu tijicigumbala ni kusangalala, kusangalala kwakwe kwamti pangali jwalijose jwakupakombola kwatyocesya. 23 Patiliciyika lyele lisikulyo, jemanja ngasaŵenda une cilicose. Une ngumsalila yakuwona jemanja kuti: Atati ŵangu tacimpa cilicose citimciŵenda mu lina lyangu. 24 Mpaka sambano jino jemanja nganimŵenda cilicose mu lina lyangu, mŵende nipo timcipocela, kuti cisangalalo cenu ciŵe cakwanila mnope.
Yesu apundile cilambo capasi
25 “Une mbecete kwa jemanja yele yinduyi mwakusepelesya. Nambo tijiciyika ndaŵi jitinjiŵeceta mwangasepelesya nambo mwakupikanika cenene ya Atati. 26 Patiliciyika lyele lisikulyo, jemanja timcaŵenda Atatiwo mu lina lyangu, nipo nganguŵeceta kuti une tinjiŵenda m'malo mwa jemanja, 27 pakuŵa Atati asyenewo akumnonyela jemanja ligongo mkunonyela une nipo mkulupilile kuti une natyocele kwa Mlungu. 28 Une natyocele kwa Atati, nipo nayice ku cilambo capasi, nipo sambano ngutyoka kucileka cilambo capasi kwawula kwa Atati.” 29 Myoyo ŵakulijiganya ŵakwe ŵatite kwa jwalakwe, “Sambano akuŵeceta mwakupikanika cenene, mwa yitagu. 30 Sambano tusimicisye kuti jemanja mkumanyilila yosope yene, pangali ligongo lyakuti mundu jwine soni ŵawusye yiwusyo. Ayi yikututendesya uwe kukulupilila kuti ŵalakwe ŵatyocele kwa Mlungu.” 31 Yesu ŵajanjile jemanjajo kuti, “Ana mkulupilile sambano? 32 Ndaŵi jili mkwisa, nipo jiyice kala, jakuti jemanja wosope timcipwilingana, jwalijose jwa jemanja ulendo kumangwakwe, nipo une timcindeka jikape. Nambo nganimba jikape kusyesyene, ligongo Atati ali ni une. 33 Une namsalile yeleyi kuti jemanja timcikola mtendele pakulumbikana ni une. Mcilambo capasi cikwete yisawusyo. Nambo mŵe ŵakulimba mtima! Nacipundile cilambo capasi!”
Yesu akwapopelela ŵakumkuya ŵakwe
1 Piŵamalisisye Yesu kuŵeceta ni ŵakulijiganya ŵakwe, ŵalolite kwinani ni ŵapopesile acitiji, “Atati, ndaŵi jiyice. Ŵalosye ŵandu lumbili lwa mwanagwawo, kuti Mwanagwawo nombe najo ŵalosye ŵandu lumbili lwa ŵalakwe. 2 Pakuŵa ŵalakwe ŵampele macili mwanacejo pa ŵandu wosope, kuti apelece umi wangamala kwa ŵandu ŵiŵampele kuti aŵe ŵakumkuya ŵakwe. 3 Nipo umi wangamala ugopolela kuti ŵandu ŵamanyilile ŵalakwe ŵali Mlungu jikape ŵakuwona, nipo soni am'manyilile Yesu Klistu juŵamtumile wawojo. 4 Une nalulosisye lumbili lwawo pa cilambo capasi, malisisye kupanganya masengo giŵambele kuti nagatende. 5 Atati! Sambano anjimbicisye une pameso pawo, ni lumbili lunakwete pinaliji ni wawojo mkanicipanganyidwe cilamboci. 6 “Une namanyisye wawojo kwa ŵandu ŵiŵambele pa cilambo capasi. Ŵaliji ŵa wawojo, nipo wawo ŵapelece kwa une. Ŵanduwo apikanile pakutenda yiŵasalile kuti ayitende, 7 nipo sambano akumanyilila kuti yiliyose yiŵambele une yikutyocela nditu kwa wawojo. 8 Une namsalile jemanjajo maloŵe giŵasalile kuti namsalile nipo ŵagapocele, akumanyilila kuti yili yakuwona yakuti une natyocele kwa wawojo, nipo akulupilile kuti wawojo ŵandumisye une. 9 “Ngumpopelela jemanjaji. Ngaŵa kuti ngucipopelela cilambo capasi, nambo ngwapopelela ŵele ŵiŵambele pewo basi ligongo ali wa wawojo. 10 Yosope yingwete une yili ya wawojo, nipo yosope yakwete wawojo yili yangune, nipo ŵandu akuluwona lumbili lwangu lusyesyene kupitila mu yeleyo. 11 Nipo sambano ngwisa kwa wawojo, pangakaŵapa ngamba soni mcilambo capasi cino, nambo jemanjaji tacipitilisya kuŵape mcilambo muno. Atati ŵangu, ŵali Ŵaswela! Ŵasunje ni macili gawo, macili giŵambele une, kuti aŵe ŵamo mpela mutuŵelele wawojo ni une. 12 Pinaliji nawo pamo, nasunjile ni macili ga lina lyawo, lina lyakwe liŵambele une. Nasunjile cenene, nipo pangali jumo jwa jemanjajo juŵajasice, nambo akaŵe mundu juŵaŵajilwe pejo kuti ajasice kuti Malemba gigalembedwe gatendece. 13 Nipo sambano ngwisa kwa wawojo, nipo nguŵeceta yele yinduyi ndili ciŵela mcilambo capasi kuti ŵanduŵa akole lukondwa lwangu m'mitima mwawo lwagumbala mnope. 14 Une nasalile ŵanduwo maloŵe giŵasalile wawojo, nipo ŵandu ŵa cilambo capasi ŵaŵengene nawo jemanjajo, ligongo nganaŵa ŵa cilambo capasi mpela une nganimba jwa cilambo capasi. 15 Nganguŵenda kuti ŵatyosye jemanjaji pa cilambo capasi, nambo ngwaŵenda kuti ŵasunje cenene kwa Jwakusakala jula. 16 Mpela une nganimba jwa cilambo capasi, jemanjajo nganaŵa ŵa cilambo capasi. 17 Ŵaswejesye kuti aŵe ŵandu ŵa Mlungu ligongo lya maloŵe gawo gigali gakuwona. 18 Une natumisye jemanjajo ku cilambo capasi, mpela soni muŵandumicisye une ku cilambo capasi. 19 Nipo ligongo lya jemanjajo ngulipeleka une namsyene kwatumicila wawojo, kuti nombe nawo jemanjajo, alipelece acimsyene kusyesyene kwatumicila wawojo ligongo lya maloŵe gawo gakuwona. 20 “Ngingwapopelela jemanja pewo iyayi, nambo soni ŵele ŵakukulupilila mwa une ligongo lya maloŵe gitaciŵeceta gakwamba ya une. 21 Une ngupopela kuti atendeje yosope yalumo mpela mwakusatendelaga mundu jumo. Atati! Ŵakunde jemanjaji kuti atameje mwa uwe, mpela mwaŵelele wawojo mwa une nipo une ndili mwa wawojo. Akunde kuti jemanjaji aŵe ŵamo, kuti ŵandu ŵa cilambo capasi akulupilile kuti wawo ŵandumile une. 22 Une napele jemanjaji lumbili lulolo luŵambele wawojo une lula, kuti aŵe ŵamo, mpela muyiŵelele kuti wawojo ni une tuli ŵamo: 23 Une mwa jemanjajo nipo wawojo mwa une, kuti jemanjajo akwanile mnope kuŵa ŵamo, kuti ŵandu ŵa cilambo capasi amanyilile kuti wawojo ŵandumile une nipo kuti akwanonyela jemanjajo mpela mwakunonyelela une. 24 “Atati! Wawo ŵapelece jemanjaji kwa une, nipo une ngusosa kuti jemanjajo akaŵe ni une kwele kutingatameko, kuti akaluwone lumbili lwangu lusyesyene, lumbili luŵambele wawojo, pakuŵa wawo ŵanonyele une mkanapanganye cilambo capasi. 25 Atati ŵangu ŵali Ŵacilungamo! Ŵandu ŵa cilambo capasi ngakwamanyilila kose wawojo, nambo une ngwamanyilila wawojo, nipo jemanjaji akumanyilila kuti ŵalakwe ŵandumile une. 26 Une namanyisye wawojo kwa ŵanduŵa, nipo tinjipitilisyape kutenda myoyo, kuti cinonyelo cakwete wawo pa une ciŵe mwa jemanjaji, nipo kuti une soni mbe mwa jemanjaji.”
Acakulungwa ŵa Ayuda akumkamula Yesu
1 Yesu piŵapopesile myiyi, ŵatyosile ni ŵakulijiganya ŵakwe ni kwawula pesi lusulo lwakolanjidwa Kidiloni. Kwele kumaloko kwaliji kwana mgunda, nipo Yesu ni ŵakulijiganya ŵakwe ŵajinjile mu mgundamo. 2 Yudasi, juŵampelece Yesu jula, nombe najo ŵakumanyilile kumaloko, ligongo kakajinji Yesu ŵasimanganaga ni ŵakulijiganya ŵakwe kweleko. 3 Myoyo Yudasi ŵalilongolele likuga lya asilikali ŵa Aloma, ni alonda ŵane ŵa ku Nyumba ja AMBUJE ŵiŵatumisye acakulungwa ŵa ŵakutaga mbopesi ni Afalisi ku mgundako, jemanjaji ŵajigele mawupanga gawo, ŵanyakwile soni nyali ni muli syakwe. 4 Yesu ŵayimanyilile yosope yene cile yiyatiji yimtendecele, myoyo jwalakwe ŵajawile pasogolo ni kuja kwawusya jemanjajo kuti, “Ana ŵani ŵakwalolesya?” 5 Jemanjajo ŵajanjile, “Yesu jwa ku Nasaleti.” Jwalakwe jwatite, “Ni une jwene.” Yudasi jwakumpelekajo, ŵajimi papopo ni jemanjajo. 6 Yesu piŵatite kwa jemanjajo, “Ni une jwene,” ŵawujile munyuma nipo ŵagwile pasi. 7 Yesu ŵawusisye soni kaŵili, “Ana ŵani ŵakwalolesya?” Jemanjajo ŵatite, “Yesu jwa ku Nasaleti.” 8 Yesu ŵatite, “Une ngati namsalile kalape jemanja kuti ni une jwene, myoyo, naga jemanja mkundolesya une, mwalece ŵandu ŵaneŵa ajawuleje.” 9 (Jwalakwe ŵaŵecete yeleyi kuti yiŵaŵecete kala yitendece yakuti: “Atati, nganinjasa atamose jumo jwa ŵele ŵiŵambele une.”) 10 Simoni Petulo, juŵakwete upanga, ŵawukopwesye ni kata lipikanilo lya ku mlyo lya jwamasengo jwa jwamkulungwa jwa ŵakutaga mbopesi. Jwamasengojo lina lyakwe lyaliji Malikosi. 11 Yesu ŵatite kwa Petulo, “Mwucisye upanga wenu mwigonelo mwakwe! Ana mkuganisya kuti une ngangusosa kumwela mgawo wa yisawusyo mu litala lyalinganyisye Atati ŵangu kuti ndaje?”
Ŵapite najo Yesu kwa Anasi
12 Kaneko asilikali ŵa Aloma ni jwamkulungwa jwakulamula pamo ni alonda ŵa Ayuda ŵamkamwile Yesu, ni kumtaŵa, 13 ni ŵamjigalile jwalakwejo kwa Anasi ŵele ŵiŵaliji akwegwe ŵawo ŵalume ŵa Kayafa juŵaliji jwamkulungwa jwa ŵakutaga mbopesi m'caka celeco. 14 Kayafajo ni jwele juŵaliji ali ŵasalile acakulungwa ŵa Aloma kuti kwaliji kwambone kuti mundu jumo awe m'malo mwa ŵandu wosope.
Petulo ŵamkanile Yesu
15 Simoni Petulo pamo ni jwakulijiganya jwine ŵamkuyaga Yesu. Jwakulijiganya jwinejo jwaliji jwakumanyika mnope kwa jwamkulungwa jwakutaga mbopesi, myoyo ŵalongene ni Yesu ku luŵala lwa mkati mwa nyumba ja jwamkulungwa jwa ŵakutaga mbopesi. 16 Nipo Petulo ŵaliji mkulola yiyaliji mkutendekwa pa cipata. Kaneko jwakulijiganya jwine jwakopwece, nipo jwaliji mkuŵeceta ni mwali juŵalindililaga pa cipata jula, ni ŵamjinjisye Petulo. 17 Mwali pa cipatapo ŵaŵecete ni Petulo, “Wawo nganaŵa soni jumo jwa ŵakulijiganya jwa aju munduju?” Petulo ŵajanjile kuti, “Iyayi, nganimba une.” 18 Kwaliji mkusisima, myoyo ŵamasengo ni alonda ŵakolesisye moto wa makala ni ŵajimi kusyungulila pamotopo, ni jemanjajo ŵajotaga. Myoyo Petulo ŵajawile papopo kuja kwima ni kotaga nawo motowo.
Jwamkulungwa jwa ŵakutaga mbopesi akumwusya Yesu
19 Jwamkulungwa jwa ŵakutaga mbopesi ŵamwusisye Yesu ya ŵakulijiganya ŵakwe ni ya majiganyo gakwe. 20 Yesu ŵajanjile kuti, “Une ndaŵi syosope naliji mkuŵeceta mwagopoka mwakuti jwalijose jwa cilambo capasi ni kupakombola kupikana, yakwiganya yangu yosope yatendekaga m'nyumba syakupopelela ni mu Nyumba ja AMBUJE, mwakasasonganaga ŵandu wosope. Une nganimbeceteje cindu cilicose mwakusisa. 21 Sambano, ligongo cici akumbusya une? Ŵawusye ŵandu ŵiŵambikene une yinasalile jemanjajo, akumanyilila yinaŵecete.” 22 Piŵaŵecete Yesu yeleyi, jumo jwa asilikali ŵakulondela Nyumba ja AMBUJE juŵaliji pelepo ŵamputile Yesu likofi, ni ŵatite, “M'mwe, ŵamsalile ŵani kuŵeceta camti myoyo kwa Jwamkulungwa jwa ŵakutaga mbopesi!” 23 Yesu ŵamjanjile, “Naga une mbecete cindu cakulemwa, amsalile mundu jwalijose panopano cakulemwaco. Nambo naga mbecete cilungamo, ligongo cici akumbuta?” 24 Kaneko Anasi ŵamtumisye jwalakwe kwa Kayafa Jwamkulungwa jwa ŵakutaga mbopesi.
Petulo akumkana Yesu kaŵili
25 Aji ndaŵiji Petulo ŵaliji cimile palapala ni kotaga moto. Myoyo ŵandu ŵane ŵamwusisye kuti, “Ana wawo nganaŵa soni ŵamo mwa ŵakulijiganya ŵa jwele munduju?” Nambo Petulo ŵakanile yeleyo ŵatite, “Iyayi, nganimba une.” 26 Jumo jwa ŵamasengo ŵa Jwamkulungwa jwa ŵakutaga mbopesi jwapawulongo ni mundu juŵamkatile Petulo lipikanilo jula, ŵamwusisye Petulo kuti, “Ana nganinawona wawojo ali najo Yesu mu mgunda mula?” 27 Petulo ŵakanile soni kuti, “Iyayi” nipo ndaŵi jijojo tambala ŵatongwele.
Acakulungwa ŵa Ayuda akumjimba magambo Yesu pameso pa Pilato
28 Ŵalaŵilile kundaŵi kumjigala Yesu kutyocela ku nyumba ja Kayafa kwawula ku nyumba ja bwanamkubwa. Acakulungwa ŵa Ayuda nganajinjila mkati mwa nyumbajo, ligongo ŵasosaga kuti akalisakasya, pakusosa kuti akapakombole kulya yakulya ya cindimba ca Pasaka. 29 Myoyo Pilato ŵakopwece pasa kuja kukwawusya jemanjajo kuti, “Ana munduju akumjimba magambo gamti uli?” 30 Kwanga kwawo kwaliji mwakuti, “Uwe ngamkanitumpeleka m'myala mwa ŵalakwe akaŵe kuti nganalemwa.” 31 Pilato ŵasalile jemanjajo kuti, “Myoyotu amjigale jemanja acimsyene kuti akamjimbe magambo malinga ni malamusi gawo.” Jemanjajo ŵajanjile kuti, “Uwe malamusi gangatukunda kumwulaga mundu jwalijose.” 32 (Ayi yaliji myiyi kuti gatendece maloŵe ga Yesu, giŵaŵecete pakusala ya mutaciwila.) 33 Pilato ŵawujile soni m'nyumba ni ŵamŵilasile Yesu. Kaneko ŵamwusisye kuti, “Ana m'mwejo mli mwenye jwa Ayuda?” 34 Yesu ŵamwusisye kuti, “Ana cele ciwusyoci cikutyocela kwa wawojo kapena ŵandu ŵane ni ŵiŵasalile wawojo ya une?” 35 Pilato ŵajanjile kuti, “Ana wawo akuganisya kuti une Myuda? Ŵandu ŵawotu pamo ni acakulungwa ŵa ŵakutaga mbopesi ni ŵiŵapelece wawo m'myala mwangu. Ana wawo atesile cici?” 36 Yesu ŵajanjile kuti, “Ucimwene wangu nganiwuŵa kose wa cilambo capasi pano, ukaŵe wa cilambo capasi pano, ŵakunguya ŵangu akatesile ngondo kuti une ngapelecekwa m'myala mwa acakulungwa ŵa Ayuda. Une Ucimwene wangu nganiwuŵa wa cilambo capasi pano iyayi!” 37 Myoyo Pilato ŵamwusisye jwalakwejo kuti, “Ana ni kuti m'mwejo mli mwenye?” Yesu ŵajanjile kuti, “Mkuŵeceta m'mwejo kuti une ndili mwenye. Une napagwile nipo nayice pa cilambo capasi pano ni ligongo limo lyele lyakuti, mbecete yindu yakuwona. Jwalijose jwali mbali ja yakuwona akusambikanila.” 38 Pilato ŵamwusisye, “Ana yakuwona yakwe ni yamti uli?”
Pilato akumpeleka Yesu kuti amwulaje
Kaneko Pilato ŵakopwece soni pasa kwa ŵandu kukumsalila kuti, “Une ngangupakombola kose kuliwona ligongo lyakumjimbila magambo munduju. 39 Nambo pakuŵapo caka cilicose pa cindimba ca Pasaka ngasinagopolelaga jemanja mkayidi, ana akusosa kuti nagopolele mwenye jwa Ayuda?” 40 Jemanjajo ŵamjanjile mwagumila, “Iyayi, ngaŵa jwelejo! Uwe tukumsosa Balaba!” (Balaba ŵaliji jwaciswamba.)
1 Kaneko Pilato ŵalamwile kuti amjigale Yesu ni akampute. 2 Asilikali ŵapanganyisye cisoti ca ucimwene cakuluka kutyocela ku nyambi sya miŵa ni kum'weca mu mtwe mwakwe, kaneko ŵam'wecice mkanjo wa papo. 3 Ŵayikagayikaga kwa jwalakwe ni kumtendaga, “Akole umi welewu mwenye jwa Ayuda!” Nipo ŵajawulaga ni kuja kumputa makofi. 4 Pilato ŵakopwece soni pasa ni kuja kuŵeceta ni likuga lya ŵandu ŵala kuti, “Alole, une ngumkoposya mundujo pasa pano kuti jemanja amanyilile kuti nganguliwona ligongo lililyose lyakumjimbila magambo jwalakwejo.” 5 Myoyo Yesu ŵakopwece pasa, ali awete cipewa ca ucimwene ca miŵa ni mkanjo wa papo. Pilato ŵatite kwa jemanjajo, “Alole! Ajutu mundu jula!” 6 Acakulungwa ŵa ŵakutaga mbopesi ni asilikali ŵakulondela Nyumba ja AMBUJE piŵam'weni jwalakwe, ŵagumisile kuti, “Amkomele pa msalaba! Amkomele pa msalaba!” Pilato ŵatite kwa jemanjajo, “Amjigale jemanja acimsyene, ni akamkomele pa msalaba. Une nganguliwona ligongo lililyose lyakumjimbila magambo jwalakweju.” 7 Likuga lya ŵandulyo lyajanjile kuti, “Uwe tukwete lilamusi, malinga ni lyele lilamusilyo, jweleju akuŵajilwa kuti awe, ligongo alitesile msyeneju kuti ali Mwanace jwa Mlungu.” 8 Pilato piŵapikene yeleyi, ŵajogwepe mnope. 9 Ŵajinjile soni m'nyumba ni ŵamwusisye Yesu kuti, “Ana mkutyocela kwapi?” Nambo Yesu nganajanga kandu kalikose. 10 Pilato ŵatite kwa jwalakwe, “Ana wawo ngakusosa kuŵeceta ni une? Ngakumanyilila kuti une ngwete macili gakuti ni kwagopola wawojo nambo soni gakukunda kuti wawojo ŵakomele pa msalaba.” 11 Yesu ŵajanjile kuti, “Wawo ngamkanapakombola kwalamula ŵandu kuti andendele une yindu nambo ligongo Mlungu ŵakundile kuti atende. Myoyo mundu jwambelece une kwa wawojo ni jwapundile kola ulemwa.” 12 Piŵapikene yeleyi Pilato ŵalinjile kusosa nditu kuti amgopole Yesu. Nambo likuga lya ŵandu lyagumisile kuti, “Naga akumgopola jwelejo, ni basi wawojo nganaŵa mjakwe jwa Kayisala! Jwalijose jwakulitenda msyene kuti ali mwenye, akusisyana ni Kayisala!” 13 Pilato piŵapikene gele maloŵega, ŵamkopwesye Yesu pasa ni ŵatemi pa citengu cakulamulila magambo pa malo gakolanjidwa “Pa liganga lyakusepa”. (Mcihebeli lina lyakwe “Gabata”.) 14 Ndaŵi jaliji ciŵandika 12 koloko jamusi lisiku lyakulilinganyicisya cile cindimba ca Pasaka. Pilato ŵatite kwa Ayuda ŵala, “Aju mwenye jwenu!” 15 Jemanjajo ŵagumisile kuti, “Amwulaje! Amwulaje! Amkomele pa msalaba!” Pilato ŵawusisye jemanjajo kuti, Ana akusosa kuti une nimkomele pa msalaba mwenye jwawoju? Acakulungwa ŵa ŵakutaga mbopesi ŵajanjile kuti, “Mwenye jutukwete uwe ni Kayisalape basi!” 16 Kaneko Pilato ŵampelece Yesu kwa jemanjajo kuti akamkomele pa msalaba.
Yesu akumkomela pa msalaba
Myoyo asilikali ŵamtyosisye Yesu. 17 Ŵakopwece pasa, ali anyakwile msalaba wakwe, nipo ŵayice kumalo giŵagakolangaga kuti, “Malo ga Cikalakasa”. (Mu ciŵeceto ca Cihebeli gakusakolanjidwa kuti “Gologota”.) 18 Kweleko ni kuŵamkomele jwalakwe, nipo soni ŵakomele ŵandu ŵaŵili, jumo mbali ja ku mkono wamlyo, jwine mbali ja ku mkono wa mciji wa Yesu, nipo Yesu ŵaliji pasikati pa jemanjajo. 19 Pilato ŵalembile cimanyisyo ni kuciŵika pa msalaba. Maloŵe gakwe galiji gakuti, “Yesu jwa ku Nasaleti, Mwenye jwa Ayuda.” 20 Ŵandu ŵajinji ŵaciŵalasile, ligongo malo giŵamkomele Yesu nganigaŵa kwakutalicila ni msinda. Cimanyisyoco ŵacilembile myiŵeceto ya Cihebeli, Cilatini ni Cigiliki. 21 Acakulungwa ŵa ŵakutaga mbopesi ŵamsalile Pilato kuti, “Akasalemba kuti ‘Mwenye jwa Ayuda’, nambo kuti, ‘Jwele munduju ŵatite kuti, “Une ni mwenye jwa Ayuda.” ’ ” 22 Pilato ŵajanjile kuti, “Une linembile ni lembile basi.” 23 Asilikali ŵala piŵamasile kumkomela pa msalaba Yesu, ŵajigele yakuwala yakwe ni kuyigaŵanya pacece, msilikali jwalijose ŵajigele cakuwala cakwe. Ŵajigele soni mkanjo, uŵawupanganyisye ni nguwo jimo jangali lutoto palipose. 24 Asilikali ŵala ŵasalilene kuti, “Kwende tukawupapula, nambo kuti kwende tutende cisango kuti tumwone jutawujigale.” Ayi yatendekwe kuti malemba gatendekwe gakuti: “Ŵagaŵene acimsyenepe yakuwala yangu nipo mkanjo wangu ŵawulondolele cisango.” Nipo ayi ni yiŵayitesile asilikali ŵala. 25 Ŵiŵajimi ciŵandika ni msalaba wa Yesu ŵaliji mamagwe, ni mamagwe ŵanandi, Maliya ŵamkwawo ŵa Kiliyopa, ni Maliya jwa ku Magadala. 26 Yesu ŵaweni mamagwe ni jwakulijiganya juŵamnonyelaga jula ali ajimi pelepo, myoyo ŵatite kwa mamagwe, “Jwalakweju ni mwanagwenu.” 27 Kaneko ŵamsalile jwakulijiganya jula kuti, “Aŵa ni mama ŵenu.” Kutandila jele ndaŵijo jwakulijiganya jula ŵajigele mama ŵala ni kujaga kutama nawo kumangwakwe.
Ciwa ca Yesu
28 Yesu ŵamanyilile kuti yosope yene sambano yayice pambesi, nipo pakusosa kuti yitendece yigatite Malemba, jwalakwe ŵatite kuti, “Jingwete njota.” 29 Paliji pana lulo, lwagumbala ni finyo jwamcesuce, myoyo ŵaloŵece siponji mu finyojo ni kujisomeka ku litete ni kujikwesya mpaka kukamwa kwakwe. 30 Yesu ŵamwele finyojo kaneko ŵatite kuti, “Yosope yene yitendekwe!” Kaneko ŵajinamisye mtwe wakwe ni ŵawile.
Asilikali ŵamsomile Yesu mu mbalati
31 Acakulungwa ŵa Ayuda ŵamŵendile Pilato kuti ŵakunde akatemangule ngongolo sya ŵandu ŵiŵakomele pa msalaba ŵala, ni kuti akayitulusye yilu yawo pa misalabapo. Ŵaŵendile myiyi ligongo lyaliji lisiku lya Msano, nipo nganasosa kuti yiluyo yiŵe pa misalabapo lisiku lyakupumula lya Ayuda, pakuŵapo lisiku lyakupumula lya Ayuda lilyayikagalyo lyaliji lyalikulungwa. 32 Myoyo asilikali ŵajawile ni kuja kutemangula ngongolo sya mundu jwandanda soni kaneko sya mundu jwine jula ŵiŵakomele pamo ni Yesu ŵala. 33 Nambo piŵayice pa Yesu, ŵamsimene ali awile kala, myoyo nganatemangula ngongolo syakwe. 34 Nambope jumo jwa asilikaliwo ŵasomile mumbalati mwa Yesu ni lipanga lyakwe, nipo ndaŵi jijojo miasi ni mesi yakopwece yalumo. 35 (Jwele juŵayiweni yeleyi yili mkutendeka ni jwaŵecete yele yinduyi, kuti jemanja nombe nawo akulupilile. Yiŵaŵecete jwalakwejuyi yili yakuwona, nipo akumanyilila kuti akuŵeceta yakuwona.) 36 Yeleyi yatendece myiyi kuti yiyalembedwe m'malemba yiŵe yakuwona yakuti: “Pangali atamose limo lya mawupa gakwe litacilitemangula.” 37 Nipo pana malemba gane gigalembedwe kuti, “Ŵandu tacimlolecesya jwele juŵamsomile ni lipangajo.”
Akusika mtembo wa Yesu
38 Panyuma pa yele yinduyi, Yosefe juŵatyocelaga ku msinda wa Alimateya, ŵamŵendile Pilato naga kwaliji kwakomboleka kuwujigala mtembo wa Yesu. (Yosefe ŵaliji jwakulijiganya jwa Yesu, nambo mwakulisisa, ligongo ŵajogopaga acakulungwa ŵa Ayuda.) Pilato ŵamsalile kuti akukomboleka kuja kujigala mtembowo, myoyo Yosefe ŵajawile ni kuja kuwutyosya. 39 Nikodemo, juŵajawile pandanda kuja kukumlola Yesu cilo jula, ŵajawile ni Yosefe, ali ajigele mawuta gakununjila ga mule gakuwanganya ni aloye gakusitopa ciŵandika makilogalamu 30 . 40 Ŵele ŵandu ŵaŵiliŵa ŵajigele mtembo wa Yesu ni kuwuŵijilila mu nguwo jeswela ja bafuta pamo ni mawuta gakununjila gala mpela mwakusatendelaga pa misyungu ja Ayuda jakulinganyicisya mtembo pakuja kukuwusika. 41 Pa malo piŵamwulajile Yesu wapali mgunda, uwakwete lilembe lyasambano mumkanamsiceje mundu jwalijose citandilile. 42 Pakuŵapo lyaliji lya Msano, lisiku lyakupumula lya Ayuda mkinilikwane, pakuti lilembe lyaliji pakuŵandicila, myoyo ŵasicile mtembo wa Yesu mwelemo.
Yesu ŵajimwice ku ŵawe
1 Kumasikusiku kwa lisiku lya mlungu, cipi cili ciŵela, Maliya jwa ku Magadala ŵajawile ku malembe nipo ŵasimene kuti liganga lya pa mbanga jakwinjilila m'malembemo pangali. 2 Ŵajawile ali mkuwutuka kwa Simoni Petulo ni jwakulijiganya jwine juŵamnonyelaga Yesu jula, nipo ŵasalile jemanjajo kuti, “Ŵandu ŵatyosisye Ambuje ŵala ku malembe, nipo ngatukumanyilila kuŵaŵisile!” 3 Kaneko Petulo ni jwakulijiganya jwinejo ŵajawile ku malembeko. 4 Ŵaŵili wosopewo ŵaliji mkuwutuka, nambo jwakulijiganya jwinejo ŵawutwice mnope kumpunda Petulo ni ŵaliji jwandanda kuja kwika ku malembe. 5 Jwalakwe ŵajineme ni kusiwona sanda siŵamŵijilile sila, nambo nganajinjila. 6 Simoni Petulo juŵamkuyaga nombe najo ŵayice, ni ŵajinjile mwilembemo. Jwalakwe ŵasiweni sanda siŵamŵijililesyo sili pasi. 7 Nambo soni ŵajiweni nguwo jijaliji kumtwe kwa Yesu. Jeleji nganijiŵa pamo ni nguwo sine sila nambo kuti jaliji jajiŵilije mpela muŵawalile. 8 Kaneko jwakulijiganya jwine jula, juŵatandite kwika pa lilembepo, ŵajinjile nombe najo, ŵalolite nipo ŵakulupilile. 9 (Jemanjajo ŵaliji mkanapikanicisyepe pa jele ndaŵiji yiyalembedwe m'Malemba kuti jwalakwe akuŵajilwa kwimuka ku ŵawe.) 10 Kaneko ŵakulijiganya ŵala ŵawujile kumangwawo.
Yesu akuwonecela kwa Maliya jwa ku Magadala
11 Maliya ŵajimi pasa ciŵandika ni lilembelyo ni kulilaga. Ali mkulilape yilayila, ŵajineme ni kulingulila mwilembemo, 12 nipo ŵagaweni malayika gaŵili mwelemo gewale yeswela gali gatemi piwaliji mtembo wa Yesu, limo kumitwe ni line kumatambalicilo. 13 Jemanjajo ŵamwusisye jwamkongwejo kuti, “Ana, ligongo cici mkulila?” Jwamkongwejo ŵajanjile kuti, “Ŵandu ŵatyosisye Ambuje ŵangu, ni ngangumanyilila kuŵaŵisile!” 14 Kaneko ŵagalawice nipo ŵam'weni Yesu ali ajimi pelepo, nambo jwalakwe nganamanyilila kuti ŵaliji Yesu. 15 Yesu ŵamwusisye kuti, “M'mwe ŵakongwe, ligongo cici mkulila? Ana mkwasosa ŵani?” Jwalakwejo ŵaganisyaga kuti ŵaliji mundu juŵapanganyaga masengo mu mgundamo, myoyo ŵamsalile mundujo kuti, “Naga ali wawojo ŵiŵamtyosisye, bwana, asalile kwamŵisile, nipo tinjawule ngamjigale.” 16 Yesu ŵatite kwa jwalakwe, “Maliya!” Jwalakwe ŵagalawucile kuŵaliji Yesu ni ŵaŵecete Mcihebeli kuti, “Laboni!” (Kugopolela kuti “Mwalimu.”) 17 Yesu ŵamsalile kuti, “Mkasimungamula, ligongo nganingwele kuwujila kwinani kwa Atati. Nambo m'malo mwakwe mjawule kwa acalongo acimjangu ni mkasalile kuti une nguwujila kwa ŵele ŵali Atati ŵangu ni Atati ŵenu, Mlungu jwangu ni Mlungu jwenu.” 18 Myoyo Maliya jwa ku Magadala ŵajawile ni kwasalila ŵakulijiganya ŵala kuti jwalakwe ŵaweni Ambuje nipo ŵalondecesye jemanjajo yiŵamsalile Yesu jwalakwejo.
Yesu akuwonecela kwa ŵakulijiganya ŵakwe
19 Lyaliji lya Mlungu ligulo kuli kuswele, nipo ŵakulijiganya ŵasongene pamo ali awugele matanga mcipinda muŵalijimo, mtande wakwajogopa acakulungwa ŵa Ayuda. Kaneko Yesu ŵayice ni kwima pasikati pawo. Jwalakwe ŵatite, “Mtendele uŵe ni jemanja.” 20 Ali aŵecete gele maloŵega, ŵalosisye jemanjajo maŵanga ga m'magasa mwakwe ni mumbalati mwakwe. Ŵakulijiganyawo ŵaliji ŵakusangalala mnope piŵaweni Ambuje. 21 Yesu ŵaŵecete nawo kaŵili, “Mtendele uŵe ni jemanja. Mpela Atati ŵandumisye une, une soni ngumtumisya jemanja.” 22 Kaneko ŵapepelele lipuje pa jemanjajo ni ŵatite, “Apocele Msimu Ŵaswela. 23 Naga jemanja mkwakululucila ŵandu ulemwa wawo, jemanjajo akululucidwe, naga jemanja ngakwakululucila, jemanjajo taciŵa ŵangakululucikwa.”
Yesu ni Tomasi
24 Jumo jwa ŵakulijiganya likumi ni ŵaŵili ŵala, ŵaliji Tomasi (lina lyakwe line lyaliji Jwamaŵila), jweleju nganaŵa pamo ni acimjakwewo piŵalilosyaga Yesu kwa jemanjajo. 25 Ni ŵakulijiganya ŵanewo ŵamsalile kuti, “Uwe twaweni Ambuje!” Nambo Tomasi ŵasalile jemanjajo kuti, “Naga ngangugawona maŵasi ga m'magasa mwakwe mujapite misomali ni kuŵika cala cangu pa gele maŵasigo ni kuŵika ligasa lyangu mumbalati mwakwe, ngasingulupilila kose.” 26 Gali gapite masiku msano ni gatatu ŵakulijiganya ŵakwe ŵala ŵasongene soni mkati mwa nyumba mula, nipo Tomasi ŵaliji nawo yalumo. Matanga galiji gewugale ni maloko, nambo Yesu ŵayice ni kwima pasikati pawo nipo ŵatite, “Mtendele uŵe ni jemanja.” 27 Kaneko ŵamsalile Tomasi kuti, “Aŵice cala cawo pegasa pangu, nipo agalole magasa gangu, kaneko atambasukule mkono wawo ni awuŵice mumbalati mwangu. Alece kukayicila nipo akulupilileje!” 28 Tomasi ŵatite, “Ambuje ŵangu ni Mlungu jwangu!” 29 Yesu ŵatite kwa jwalakwe, “Ana mkulupilile ligongo mumbweni? Akwete upile ŵele ŵakukulupilila atamose nganambona une!”
Cakulinga ca bukuji
30 Yesu piŵaliji ni ŵakulijiganya ŵakwe, ŵapanganyisye yakusimonjesya yine yayijinji yimkanalemba mu jele bukuji. 31 Nambo ayi yinduyi ayilembile kuti jemanja mkulupilile kuti Yesu ali Klistu, Mwanace jwa Mlungu, nipo kuti jemanja akole umi pakukulupilila mu lina lyakwe.
Yesu ŵalilosisye kwa ŵakulijiganya ŵakwe msano ni ŵaŵili
1 Gali gapite masiku ga panandi, Yesu ŵalilosisye soni kwa ŵakulijiganya ŵakwe ku Nyasa ja Tibeliya. Amu ni muyatendecele: 2 Simoni Petulo, Tomasi (juŵamkolangaga lina lyakuti Jwamaŵila), Nataniyeli (juŵatyocelaga ku msinda wa Kana ku Galileya), ŵanace ŵa Sebedayo, nipo soni ŵakulijiganya ŵane ŵaŵili ŵa Yesu wosopewo ŵaliji pampepe. 3 Simoni Petulo ŵatite kwa jemanjajo, “Une ngwawula kukuwulaga somba.” Jemanjajo ŵamjanjile kuti, “Uwe tutulongane nawo.” Myoyo ŵajawile mwiboti, nambo cele ciloco nganawulaga cilicose. 4 Nambo pikwacaga, Yesu ŵajimi pamkuli, nipo ŵakulijiganya ŵala nganam'manyilila kuti ŵaliji Yesu. 5 Kaneko jwalakwe ŵawusisye kuti, “Acimjangu, ana nganawulaga cilicose?” Jemanjajo ŵajanjile kuti, “Nganituwulaga somba amta jimo jose.” 6 Jwalakwe ŵasalile kuti, “Aponye likoka lyawo ku mbali ja mlyo ja libotilyo, nipo takamule somba.” Myoyo ŵaponyisye likoka lila m'mesimo nipo ŵalepele kuliwuta likokalyo kuti akusulile sombasyo mwiboti, ligongo ŵakamwile somba syasijinji mnope. 7 Jwakulijiganya juŵamnonyelaga Yesu jula ŵatite kwa Petulo, “Ŵeleŵatu Ambuje!” Petulo piŵapikene kuti ŵaliji Ambuje, ŵawete yakuwala yakwe (pakuŵa ŵayiwusile) nipo ŵasumbile m'nyasa. 8 Ŵakulijiganya ŵane ŵala ŵayice kumkuli ali mwiboti aku ali mkuwuta likoka lila lilyagumbele ni somba. Nganatalicila mnope ni pa mkuli, ulewu wakwe pagambile kuŵa mamita 100 basi. 9 Piŵayice pamkuli, ŵawuweni moto wa makala pali pana somba ni mkate. 10 Kaneko Yesu ŵatite kwa jemanjajo, “Ayice nasyo akuno somba sine syakamwile sampanosyo.” 11 Myoyo Simoni Petulo ŵakwesile mwiboti ni kuliwutila likoka lila pamkuli lili lyegumbale ni somba syasikulungwa, syakwanila pamo 153 , nambo atamose sombasyo syapali syasijinji myoyo likokalyo nganilipapuka kose. 12 Yesu ŵatite kwa jemanjajo, “Ayice alye.” Nipo pangali jumo jwa ŵakulijiganya ŵala juŵalimbile mtima kumwusya kuti, “Ana wawo ŵani?” Pakuŵa ŵamanyilile kuti ŵaliji Ambuje. 13 Myoyo Yesu ŵajawile piŵalijipo, ŵajigele mkate ula nipo ŵapele jemanjajo, ŵatesile soni myoyo ni somba sila. 14 Aji jaliji ndaŵi jatatu jiŵalilosisye Yesu kwa ŵakulijiganya ŵakwe Mlungu ali amjimwisye ku ŵawe.
Yesu ni Petulo
15 Jemanjajo piŵamasile kulya, Yesu ŵatite kwa Simoni Petulo, “Simoni mwanace jwa Yohane, ana wawo akusanonyelaga une mnope kupunda ni mwakasiŵanonyelelaga ŵane wosopeŵa?” Jwalakwe ŵajanjile kuti, “Elo Ambuje, wawojo akumanyilila kuti ngusinanonyela.” Yesu ŵamsalile kuti, “Mwasamalile ŵakulijiganya ŵangu mpela mumkusamalila ŵanace ŵangondolo syangu.” 16 Yesu ŵawilisye soni kumwusya kuti, “Simoni mwanace jwa Yohane, ana mkusimunonyela une?” Jwalakwe ŵajanjile kuti, “Elo Ambuje, wawojo akumanyilila kuti ngusinanonyela.” Yesu ŵamsalile kuti, “Mwasamalile ŵakulijiganya ŵangu mpela mumkusisamalila ngondolo syangu.” 17 Yesu ŵamwusisye katatu kuti, “Simoni mwanace jwa Yohane, ana mkusimunonyela une?” Apa Petulo camtesile canasa ligongo Yesu ŵamwusisye katatu kuti, “Ana mkunonyela une?” Myoyo ŵamjanjile kuti, “Ambuje, wawojo akumanyilila yosope yene, akumanyilila kuti ngusinanonyela!” Yesu ŵamsalile kuti, “Mwasamalile ŵakulijiganya ŵangu mpela mumkusisamalila ngondolo syangu. 18 Une ngumsalila yakuwona kuti: piŵaliji wawojo ŵanondi, ŵalilinganyaga ni kwawula kulikose kuŵasosaga, nambo pati akalambele, tacitambasukula magasa gawo nipo mundu jwine tacataŵa ni kwajigalila kumalo kwakakusosa kwawula.” 19 (Pakuŵeceta yeleyi, Yesu ŵalosyaga cile mutaciwila Petulo ni mutacilocesya lumbili lwa Mlungu ligongo lya ciwa cakweco.) Kaneko Yesu ŵamsalile kuti, “Anguye une!”
Yesu akuŵeceta ya jwakulijiganya juŵamnonyele jula
20 Petulo piŵapitikwice ŵam'weni jwakulijiganya juŵamnonyelaga Yesu jula ali mkwakuya panyuma pawo; juŵagonece mtwe wakwe pamtima pa Yesu ndaŵi jiŵalyaga nipo juŵawusisye jula kuti, “Ambuje, ana ŵani ŵitacapeleka wawojo?” 21 Petulo piŵam'weni, ŵamwusisye Yesu kuti, “Ambuje, nambi aju munduju tacisimangana ni yindu yamti uli?” 22 Yesu ŵamjanjile kuti, “Naga ngusosa kuti ŵeleŵa aŵe umi mpaka tinjiyika, wawo akwete nayo masengoci yeleyo? Anguye une!” 23 Myoyo yakuyicisya yakwe, ŵakulijiganya ŵajinji ŵa Yesu ŵaganisyaga kuti jwele jwakulijiganyaju ngasawa kose. Nambo Yesu nganaŵeceta kuti jwalakwe ngasawa kose iyayi, jwalakwe ŵagambile kuti, “Naga ngusosa kuti jwalakwe aŵe umi mpaka tinjiyika, wawo akwete nayo masengoci yeleyo?” 24 Jwele ni jwakulijiganya juŵaŵecete ya yele yinduyi, jujojo soni ni juŵayilembile, nipo tukumanyilila kuti yiŵaŵeceteyo yili yakuwona.
Maloŵe gakumalicisya
25 Nambo pana yindu yine yejinji yiŵayitesile Yesu. Yikaŵe kuti yosopeyo ŵayilembile cimo ni cimo, nguganisya kuti cilambo cosope cene capasi cikasoŵile malo ga mabuku gakalembile ŵanduwo.