Ondaka yomwenyo
1 Peutilo pa li Ondaka. Ondaka ya li puKalunga, nOndaka ya li Kalunga. 2 Ondaka hendji ya li peutilo puKalunga. 3 Ovipuka avihe vya utwa okupitila mOndaka, kape na tja otjipuka tjimo tjomeuto hitja utwa ahai po. 4 MOndaka mwa li omwenyo, nomwenyo wa ninga otjiten̯i tjovantu. 5 Otjiten̯i matji tungatele met̯iku, net̯iku kali dhimine po otjiten̯i. 6 Kalunga wa tuma omulumentu nguu tiwa oJohannes. 7 Ye we ya a hipululile ovantu otjiten̯i, opo avehe va tyee elaka, wo va itavele. 8 Ye haye a li otjiten̯i, we ya vala a hipulule otjiten̯i. 9 Otjiten̯i tjatjatjili himatji tungatele omuntu auhe matji ya mouye. 10 Ondaka ya li mouye, Kalunga we i utitha ouye, atjaa ouye kau i nongonokele. 11 Ye we ya kowoyawo, nowoyawo kave mu tambulile. 12 Iya avehe mboka mbave mu tambula, hava itavele ena lye, we ve pa odhonkono va ninge odhondele dhaKalunga. 13 Wo kava yumukilwe ngahi tji yumukwa ovantu, okutya tjo katja li mehalo lyomulumentu, iya va yumukwa muKalunga. 14 Ondaka ya ninga omuntu ngwaa kala mokati ketu. Nt̯e twa tala etumbalo lye, etumbalo lyOngunga yaIhe. Ye wa li ae yula et̯ilonkenda notjatjili. 15 Johannes we mu hipulula, ha popi peulu ha tyaa: “Hengu oye e li ye nawanawa ngoka ngumba popya he tyaa: ‘Ngoka ngume ya kon̯ima yandje omunene kwaame, mena lyokutya oko a li, tainkolo ame amba li ahe ko.’ ” 16 Mowingi wet̯ilonkenda lye nt̯e atuhe twa pewa mo elao ndyaa wedhwa ket̯ilonkenda. 17 Iya oveta Kalunga we i yandja ya pitila muMoses, et̯ilonkenda notjatjili vya etwa kuJesus Kristus. 18 Kaku na tja noumo ngwaa mona Kalunga nokanunu, Ongunga aika nguu li mekolo lyaIhe, oye e mu hololola.
Oumbangi waJohannes Omutjatji
19 Hembu owo u li oumbangi waJohannes, Ovajuda womoJerusalem hiva tuma ovayambethi nOvalevi ve mu pule va tyee: “Oove an̯i?” 20 Johannes ka anyene oku ve yaka, wa hipulula ha tyaa: “Ame haame Messias.” 21 Wo ve mu pula hava tyaa: “Iya oove an̯i? Oove Elia?” Ye ha tyaa: “Aai, haame!” Wo ve mu pula uke hava tyaa: “Oove omuprofeti ngunya?” Johannes ha tyaa: “Aai.” 22 Wo ve mu pula hava tyaa: “Iya oove an̯i, opo tu ka popye kumboka mbave tu tumu? Ove mo litya vi?” 23 Johannes wa yaka ha tyaa: “Aame ondaka yomuwololoki mokuti ndjimai tyaa: ‘Vyuukililithen̯i ondjila yaMuhona,’ omuprofeti Jesaja ngahi a popya.” 24 Odhontumwa ndhoka dha li owomOvafarisai. 25 Wo va pula Johannes hava tyaa: “Omena lyatji himo tjatja, andaa haove Messias ne Elia ne omuprofeti ngunya?” 26 Johannes we ve yaka ha tyaa: “Ame me tjatja nomeva, iya mokati ken̯i mwa kulama ngoka nguhamu i. 27 Ngoka ngume ya kon̯ima yandje, ame híme tji ulu nangahi tji li okukutulula omivya vyodhongaku dhe.” 28 Ovipuka hembi vya ningilwa moBetania tjikoohehinya tjomulonga waJordan, hoka Johannes hwaa li ama tjatjele ovantu.
Ondjona yaKalunga
29 Ngamuhuka Johannes wa mona Jesus ame ya kuye. Johannes wa popya ha tyaa: “Taa tuutuu, Ondjona yaKalunga ndjimai itha po odhonkali dhouye! 30 Hengu oye e li ye nawanawa ngoka ngumba popile he tyaa: ‘Omulumentu ngume ya kon̯ima yandje omunene, mena lyokutya wa li ko, tainkolo ame amba li ahe ko.’ 31 Ame mba li ahe mu i, iya mbe ya okutjatja nomeva, opo a ivithilwe Ovaisraeli.” 32 Johannes we mu hipulula ha tyaa: “Mba mona Ombepo yaKalunga amai lauka meulu ngonguti, hai mu wilile. 33 Ame mba li ahe mu i, iya Kalunga, ngoka ngwaa ntuma okutjatja nomeva, wa ntjeela ha tyaa: ‘Ngoka ngumo mono ama wililwa kOmbepo, hai kala kombanda ye, oye e li ye ngoka nguma tjatja nOmbepo Ondhilikwa.’ 34 Ame mbe tji mona, otjo me mu hipululile okutya ye OmunwaKalunga.”
Ovalongwa vaJesus wolutenga
35 Ngamuhuka Johannes wa li aa kulama uke navavali owomovalongwa ve. 36 Johannes hiaa mono Jesus ama ende po, ha tyaa: “Taa tuutuu, Ondjona yaKalunga.” 37 Ovalongwa ve vavali ve mu tyaa hima popi nyahoka, hava landula Jesus. 38 Jesus wa piluluka, hiee ve mono himave mu landula, he ve pula ha tyaa: “Mamu taendha tji?” Wo va yaka hava tyaa: “U kala pi, Rabbi?” Otjitya hehi matji tya Omulongethi. 39 Jesus we ve heela ha tyaa: “Indjen̯i, mu tale!” Wo hiva i naye, va mona mpaa kala, hava kala puye otjihupe tjetango ndyoka. Owola ya li ontyane. 40 Umo owomovalongwa hembenya vavali mbava tyaa Johannes, hava landula Jesus, wa li Andreas, omunitjaSimon Petrus. 41 Andreas wa wanena dhiva nomukulwe Simon, he mu heele ha tyaa: “Nt̯e twa mono Messias.” Otjitya hehi matji tya Omuvavekwa. 42 Ye wa twala Simon kuJesus. Jesus we mu tala ha tyaa: “Oove Simon yaJohannes, iya mo ka ithanwa Kefas,” ndyoka ndimali tya Petrus.
Jesus ma ithana Filippus naNatanael
43 Ngamuhuka Jesus wa li ama hala okuya koGalilea, ha wanene naFilippus, ha tyaa: “Ndandula ndje.” 44 Filippus wa li Omubetsaida womondolopa ndjoka mumu kala Andreas naPetrus. 45 Filippus wa wanena naNatanael, ha tyaa: “Nt̯e twa mona omulumentu ngoka ngwaa sonekwa kuMoses membo lyoveta nokovaprofeti, Jesus, omunwaJosef, Omunasareta.” 46 Natanael we mu pula ha tyaa: “MoNasaret mamu ulu tuu okudha ouwa watja?” Filippus we mu heela ha tyaa: “Indjo, u tale!” 47 Jesus wa mona Natanael ame ya kuye. Iya Jesus wa popya ouhunga naye ha tyaa: “Taa tuutuu, Omwiisraeli watjatjili ngoka nguhe na tja ovithithi!” 48 Natanael we mu pula ha tyaa: “Wa ndjiwa vi?” Jesus we mu heela ha tyaa: “Mbe ku mona hiwa li momukuyu, tainkolo Filippus héye ku ithana.” 49 Natanael we mu yaka ha tyaa: “Rabbi, oove OmunwaKalunga! Oove ohamba yaIsrael!” 50 Jesus we mu yaka ha tyaa: “Ove ngundhe wa itavele vala himba tya mbe ku mona hiwa li momukuyu? Mo ka mona ovipuka ovinene mbyaa pon̯a hembi.” 51 Jesus we ve heela ha tyaa: “Ame me mu heele otjatjili okutya mamu ka mona eulu ndyee liyapuka, novaengeli vaKalunga himava londo nahimava heluka okuya kOmuna wOmuntu.”
Olukupo lwokoKana
1 Hipa piti omatango atatu, kwa li aku na olukupo koKana, ondolopa yomoGalilea. Ina yaJesus oko a li. 2 Jesus novalongwa ve va li wo ava kongwa kolukupo. 3 Ovinyu avihe hivya pu po, ina yaJesus we mu heela ha tyaa: “Kave na tja ovinyu.” 4 Jesus we mu heela ha tyaa: “Mee, hó kala notjiho naame. Owola yandje kaiye ya.” 5 Ina wa heela ovaundapi ha tyaa: “Ningen̯i atjihe soka hime mu heele.” 6 Monteto yokulikoha kwOvajuda kwa li aku na odhombiya epandu. Ombiya aihe i lithike povyeemele vivali ne vitatu. 7 Jesus wa heela ovaundapi ha tyaa: “Odhombiya dhi tekelen̯i omeva, dhi yule.” Wo ve dhi tekela, hadhi yula katee naa potjinyo. 8 Jesus we ve heela ha tyaa: “Iya napano e lundululen̯i mo iya, mu e twalele omuviyuli wotjipito.” Wo have mu twalele o. 9 Omuviyuli hiaa makele omeva ngoka ngaa tjituka ovinyu, wa li ahe e i mpaa dhi. Iya ovaundapi mbava teka omeva, va li ave tji i. Omuviyuli wa ithana omukupi 10 ha tyaa: “Olutenga omuntu u yandja ovinyu mbyaa ngala oviwa, iya andaa ovantu va pyaluka, ove ho ve pa atjaa ovingwalulu. Iya ovinyu hembi oviwa we vi holeke, katee we ke vi eta kon̯ima.” 11 Otjilingatangan̯eko hehi tjolutenga Jesus we tji ningila moKana, ondolopa yomoGalilea, ye wa hololola etumbalo lye, novalongwa ve va itavela muye. 12 Kon̯ima yovipuka hembi Jesus naina novanitje ovalumentu novalongwa ve va ya koKapernaum, hava kala ko omatango amo.
Jesus ma thevetha otempeli
13 Otjipito tjOpaasa yOvajuda hitja li popedhi, Jesus wa ya koJerusalem. 14 Ye wa vadha ovantu motempeli amava landetha odhongombe, odhondhu nodhonguti, novapimpi wodhombongo ava kala pohi povitaafula vyawo. 15 Ye wa poha ongola, he ve ta mo avehe motempeli pamo nodhongombe nodhondhu dhawo. Ye wa tilahi odhombongo dhovapimpi, novitaafula vyawo we vi yundulila pohi. 16 Ovalandethi wodhonguti we ve heela ha tyaa: “Ithen̯i mo ovipuka hembi avihe! Ondjuwo yaTate hámu i ningi otjilandethelo.” 17 Ovalongwa ve va thipaluka okutya omisonekwa mavi tyaa: “Ouvandhi mena lyondjuwo yoye mau ndi.” 18 Ovajuda va pula Jesus hava tyaa: “Etangan̯eko patji ndimo tu yulikile okutya wa thele okuundapa ovipuka hembi?” 19 Jesus we ve yaka ha tyaa: “Kumunen̯i po otempeli hendji, ame me i tungulula momatango atatu.” 20 Iya Ovajuda ve mu heela hava tyaa: “Otempeli hendji ya tungwa odhombula omilongo vine nepandu, ove mo i tungulula momatango atatu?” 21 Iya otempeli ndjaa popya, oyolutu lwe. 22 Iya Jesus hiaa imunwa kout̯e, ovalongwa ve va thipaluka odhondaka ndhoka ndhaa popile, wo hava itavele omisonekwa nodhondaka ndhee ve heela.
Jesus u i omuntu auhe
23 Jesus hiaa li moJerusalem potembu yotjipito tjOpaasa, ovantu ovengi ve mu itavela hiva mono ovilingatangan̯eko mbyoka mbyaa ninga. 24 Iya Jesus ke liun̯ikile muwo, mena lyokutya ye omwene nahi u ve i avehe. 25 Ye kaa li ama hepa ngume mu hipululile ouhunga nomuntu, mena lyokutya ye omwene u tji i soka hitji li momuntu.
Jesus naNikodemus
1 Iya kwa li omulumentu umo owomovanene wOvajuda, Omufarisai nguu tiwa oNikodemus. 2 We ya kuJesus out̯iku ha tyaa: “Rabbi, tu tji i okutya oove omulongethi ngoka ngwaa tumwa kuKalunga, mena lyokutya kaku na tja noumo nguma ulu okuninga ovilingatangan̯eko mbyoka mbimo ningi, nkwai oKalunga ae li pamo naye.” 3 Jesus we mu yaka ha tyaa: “Ame me ku heele otjatjili okutya omuntu andaa kaa yumukululwa, kaa ulu okumona otjilongo tjaKalunga.” 4 Nikodemus we mu yaka ha tyaa: “Omuntu andaa omunene, ma ulu vi okuyumukululwa? Kaa ulu ngundhe okutjuna medhimo lyaina, a yumukwe olutyavali?” 5 Jesus we mu yaka ha tyaa: “Ame me ku heele otjatjili okutya omuntu kaa ulu okuya motjilongo tjaKalunga, andaa ka yumukilwe momeva nomOmbepo, 6 mena lyokutya hitja yumukwa momuntu, omuntu, nasoka hitja yumukwa mOmbepo, ombepo. 7 Hó kumwa, himbe ku heele okutya mwa thele okuyumukululwa. 8 Ombepo i pepa apehe mpoka mpaya hala. Ove mo tee vala otjihoomo tjayo, iya ku tji i mpamai dhi nahumai vyuuka. Iya otjo tji li nyahoka komuntu auhe nguma yumukwa mOmbepo.” 9 Nikodemus we mu pula ha tyaa: “Ovipuka hembi mavi ulu okuningwa vi?” 10 Jesus we mu yaka ha tyaa: “Ove umulongethi waIsrael, iya nan̯i hehi ku tji i? 11 Me ku heele otjatjili okutya nt̯e matu popi soka hitu i, hatu hipulula soka hitwa mona, n̯e kaamu hala okutambula otjihipululo tjetu. 12 Andaa me mu heele ovipuka vyokombanda yohi, n̯e kamu itavele, mamu ulu vi okwiitavela, andaa me mu heele ovipuka vyomeulu? 13 Kape na tja noumo ngwaa londa, ha i meulu kakele kOmuna wOmuntu, ngoka ngwaa dha meulu.” 14 NgaMoses hiaa yelele onyoka peulu mokuti, nOmuna wOmuntu otjo ma ka yelwa peulu, 15 opo auhe ngoka nguma itavele muye, a kale ae na omwenyo waapehe. 16 Iya Kalunga otjo a kala ae hole ouye, ye wa yandja Omuna Ongunga, opo auhe ngoka ngwaa itavela muye ahama keka, iya a kale ae na omwenyo waapehe. 17 Iya Kalunga ka tumine Omuna mouye a koye ouye, we mu tuma, opo ouye u hupithwe kuye. 18 Ngoka nguma itavele muye, kaa koywa, ngoka nguha itavelele, wa koywa ae, mena lyokutya ka itavelele OmunwaKalunga Ongunga. 19 Ekoyo li li mpoka okutya otjiten̯i tje ya mouye, wo ovantu ve hole et̯iku okupon̯a otjiten̯i, mena lyokutya ovilinga vyawo ovivi. 20 Auhe ngoka nguu undapa ouvi, u yele otjiten̯i, ye ke ya potjiten̯i, mena lyokutya ka hala ovilinga vye ovivi vi moneke. 21 Iya ngoka nguma undapa ovilinga mbyaa vyuuka, me ya potjiten̯i, ovilinga vye vi moneke okutya hiaa undapa, we tji undapa muKalunga.
Jesus naJohannes Omutjatji
22 Kon̯ima yovipuka mbyoka Jesus novalongwa ve ve ya motjilongo tjaJudea. Hoka okwaa kala pamo nawo, ama tjatja ovantu. 23 Iya Johannes wo wa li ama tjatjele koAinon popedhi naSalim, mena lyokutya kompuka hoka kwa li omeva omengi. Ovantu ve ya, hava tjatjwa. 24 Iya hehi tja ningilwe, tainkolo Johannes aheya yedhililwa mokaliwoso. 25 Vamo owomovalongwa vaJohannes va uta okulitetha ombata nOmujuda umo ouhunga nokulikohola kwOvajuda. 26 Wo ve ya kuJohannes hava tyaa: “Rabbi, mo thipaluka omulumentu ngoka ngwaa li pamo naove tjikoohehinya tjomulonga waJordan, ngoka nguwa hipulula? Ma tjatja, ovantu avehe mava i kuye.” 27 Johannes wa yaka ha tyaa: “Omuntu kaa ulu okuliithila otjipuka, nkwai oKalunga me mu pa tjo. 28 N̯e ovene mudhombangi dhandje, himba tile: ‘Ame haame Messias, mba tenga vala okutumwa.’ 29 Ngoka nguu na omukupwa, oye e li omukupi. Epanga lyomukupi ma kulama ama teelele ondaka yomukupi, he i hulukilwa unene. Iya mena lyotjipuka hehi ehuluko lyandje lya hwithilwa po. 30 Ame ndji tha okuninga omununu, ye u tha okuninga omunene.”
Ngwee ya okudha meulu
31 Ngwaa dhi peulu omunene, wa pon̯a ovantu avehe. Nguu li pohi owopohi, ma popi ovipuka vyopohi. Ngwaa dhi meulu omunene, wa pon̯a ovantu avehe. 32 Ye ma hipulula soka hiaa mona nahiaa tyaa, iya kape na tja noumo nguma itavele otjihipululo tje. 33 Nguma itavele otjihipululo tje, ma koleke okutya Kalunga oye e li Kalunga katjatjili. 34 Iya ngwaa tumwa kuKalunga, oye ma popi odhondaka dhaKalunga, mena lyokutya Kalunga kee mu pa Ombepo ama yeleke, iya me mu pa ndjaa hulu. 35 Ihe u hole Omuna, we mu pa ovipuka avihe momawoko e. 36 Nguma itavele mOmuna, u na omwenyo waapehe, iya nguhama itavele mOmuna, kaa mono omwenyo, iya oluyuma lwaKalunga malu kala kombanda ye.
Jesus nomukadhintu Omusamaria
1 Ovafarisai va tyaa okutya Jesus wa mona ovalongwa ovengi, ye wa tjatja okupon̯a ovaJohannes. 2 (Tjo otjene Jesus ka tjatjele omuntu noumo, ovalongwa ve owo va tjatja.) 3 Jesus hiaa tee soka himatji hewa kovantu, wa dha mo moJudea, ha tjuna koGalilea. 4 Mondjila ye hiaa tjuna, wa li ae na okupita moSamaria. 5 Iya we ya motjitungwalongo tjaSamaria hitji tiwa oSikar, hitji li popedhi notjana soka Jakob hiaa pele omuna Josef. 6 Kompuka hoka kwa li ondjombo yaJakob. Jesus hiee ulwa nondjila, wa li aa kala pohi pondjombo, owola ya li ontyamulongo nambali yokomutenya. 7 Omukadhintu umo Omusamaria we ya okuteka omeva. Jesus we mu kumba ha tyaa: “Mpa ndje wo omeva okunwa.” 8 (Iya ovalongwa ve va vadhwa ava i kondolopa, opo va ka lande ovikulya.) 9 Iya omukadhintu Omusamaria ha tyaa: “Ove uMujuda, ame ndjimukadhintu Omusamaria, mo nkumbu vi omeva okunwa?” (Mena lyokutya Ovajuda nOvasamaria kave liende.) 10 Jesus wa yaka ha tyaa: “Ngaile wa iwa soka Kalunga hiaa yandja, nangume ku kumbu omeva okunwa okutya aan̯i, ngai we mu kumbu wo, e ku pe omeva omanamwenyo.” 11 Omukadhintu wa yaka ha tyaa: “Taa, ove ku na tja otjiteko, nondjombo onde. Omeva omanamwenyo mo e vadha pi? 12 Ove umunene nan̯i wa pon̯a tateombwale Jakob, ngoka ngwee tu pa ondjombo ndji, ngwaa li aa nwa mo ye omwene pamo novana novipako vye?” 13 Jesus we mu yaka ha tyaa: “Auhe ngoka nguma nu omeva henga, ma ka t̯a onyota uke. 14 Iya nguma nu omeva ngoka ngame mu pa, kaa t̯a uke onyota katee apehe. Iya omeva ngoka ngame mu pa, maa ka ninga muye othimo yomeva ngamaa thuluka momwenyo waapehe.” 15 Omukadhintu we mu kumba ha tyaa: “Taa, mpa ndje wo omeva ngoka, opo hé t̯a uke onyota, ame ahame ya huno kondjombo okuteka.” 16 Jesus we mu heela ha tyaa: “Enda, u ka ithane omulumentu woye, ove u ye naye huno.” 17 Omukadhintu we mu yaka ha tyaa: “Hí na tja omulumentu.” Jesus we mu heela ha tyaa: “Wa popi otjatjili okutya ku na tja omulumentu. 18 Iya ove wa li novalumentu vatano, nangoka nguu na ye napano, hamulumentu woye. Motjipuka soka wa popi otjatjili.” 19 Omukadhintu wa yaka ha tyaa: “Taa, ndji ku lwete okutya ove umuprofeti. 20 Ootateombwale Ovasamaria nahi va kumba Kalunga kondundu hendji, n̯e Ovajuda mu tya Jerusalem olo lu li oluvedhe mumu tha okukumbila.” 21 Jesus we mu heela ha tyaa: “Ove ndjitavela ndje, owola mai ya, etango ndyoka ndihamamu ka kumba Tate kondundu hendji ne moJerusalem. 22 N̯e Ovasamaria ngumu kumba, kamu mu i. Nt̯e Ovajuda tu mu i ngoka ngutu kumba, mena lyokutya ehupitho mali dhi mOvajuda. 23 Iya owola mai ya, yo opo i li ae, katango ovakumbi vatjatjili mava ka kumba Tate mombepo nomotjatjili, mena lyokutya ovakumbi mbave li nyahoka, Tate owo a hala. 24 Kalunga Ombepo, namboka mbamave mu kumbu, va thele okukumba mombepo nomotjatjili.” 25 Omukadhintu wa yaka ha tyaa: “Ndji tji i okutya Messias nguu tiwa oKristus, me ya. Ye hime ya, me ke tu heela ovipuka avihe.” 26 Jesus we mu heela ha tyaa: “Aame nawanawa ngume popi naove.” 27 Iya poluvedhe lwatjo tuu ndoka ovalongwa ve ve ya. Wo have kumwa hiva mono Jesus, hima popi nomukadhintu ngoka. Iya kapa li noumo ngwee mu pula ha tyaa: “Mo hala tji?” ne: “Omena lyatji himo popi naye?” 28 Iya omukadhintu wa thiaa po otjipopo tje, ha i kondolopa. Ye wa heela ovantu ha tyaa: 29 “Indjen̯i, mu ka tale omulumentu ngoka ngwaa ntjeele ovipuka avihe mbimba ninga, pamo oye e li Messias?” 30 Wo va dha mo mondolopa, have ya kuJesus. 31 Ovantu tainkolo háveye ya, ovalongwa va kala amava heele Jesus amava tyaa: “Rabbi, lya.” 32 Iya wa yaka ha tyaa: “Ame ndji na ovikulya mbyoka mbihamu i.” 33 Ovalongwa ve have lipula hava tyaa: “Pamo pe na ngwee mu etele ovikulya?” 34 Jesus we ve heela ha tyaa: “Ovikulya vyandje okuundapa ehalo lyahengu ngwaa ntuma nokuhwithila po otjilinga tje. 35 N̯e mu tyaa: ‘Ku na vala omiedhi vine, eteyo li thike.’ Iya ame me mu heele okutya yumben̯i omeho en̯i kovyana, eteyo lye thiki! 36 Omuteyi ma pewa othuto ye, novilya me vi ungulile omwenyo waapehe, omukuni opo e hulukwe pamo nomuteyi. 37 Iya otjipuka hehi hitja popilwe lukulu otjatjili, okutya omukuni u lili nomuteyi u lili. 38 Ame mbe mu tuma okuteya mpoka mpahamu undapele. Vamo owo va undapa, n̯e mwe ya okulya ovinyango vyovilinga vyawo.”
Ovasamaria ovengi va itavela
39 Ovengi owomOvasamaria womondolopa ndjoka va itavela muJesus mena lyodhondaka dhomukadhintu ngoka hiee ve heela ha tyaa: “Ye wa ntjeele ovipuka avihe mbyoka mbimba ninga.” 40 Ovasamaria hive ya kuJesus, ve mu kumba a kale puwo. Ye wa kala puwo omatango avali. 41 Ovantu ovengi mbava pon̯a mboka owolutenga, va itavela muJesus mena lyodhondaka dhe omwene. 42 Wo va heela omukadhintu hava tyaa: “Nt̯e katu itavelele uke mena lyodhondaka dhoye, iya nt̯e twe mu tee ovene, tu tji i okutya ye Omuhupithi wouye.” 43 Omatango ngoka avali hiaa piti po, Jesus wa dha ko hoka, ha i koGalilea. 44 Iya ye omwene wa popya ha tyaa: “Omuprofeti ka tumbalele motjilongo tjawo ovene.” 45 Hiaa thiki moGalilea, Ovagalilea ve mu tambula, mena lyokutya nawo wo va li motjipito tjOpaasa moJerusalem, hava mono ovipuka avihe mbyoka mbyaa ninga motjipito.
Jesus ma velula ondele yosekulu
46 Jesus we ya uke moKana, ondolopa yomoGalilea, moka mwaa li aa tjitukitha omeva ovinyu. MoKapernaum mwa li osekulu imo ndjaa li nomuna omudhantu ngwaa li ama vele. 47 Osekulu hiya tee okutya Jesus wa dhi koJudea, we ya koGalilea, ye ya kuye oku mu kumba, e ye okuvelula omuna ngwaa li popavi. 48 Jesus we mu heela ha tyaa: “N̯e andaa kamu mwene ovilingatangan̯eko novilingakumithi, kaamu itavele.” 49 Osekulu ye mu heela hai tyaa: “Taa, indjo, tainkolo ondele yandje héya t̯a!” 50 Jesus we mu heela, ha tyaa: “Enda, omunoye u na omwenyo.” Omulumentu wa itavela odhondaka dhaJesus ndhee mu heela, ha i. 51 Mokutjuna konganda, wa wanena novapika pokati, have mu heele okutya omuna u na omwenyo. 52 Omulumentu we ve pula owola ndjaa uta okukala nawa. Wo hava tyaa: “Ongulohi powola ontenga yomutenya, elema opo lye mu yethele.” 53 Ihe wa thipaluka okutya opo pe li po nawanawa powola yatjo ndjoka Jesus ndjee mu heelele ha tyaa: “Omunoye u na omwenyo.” Ye ha itavele pamo nonganda ye aihe. 54 Otjilingatangan̯eko hehi Jesus hiaa ninga uke otjityavali, hiaa dha koJudea, hime ya koGalilea.
Omuvedhi womoBetesda ma velulwa
1 Kon̯ima yovipuka hembi kwa li aku na otjipito tjOvajuda, iya Jesus wa ya koJerusalem. 2 MoJerusalem pomuvelo mbuu tiwa Omuvelo wOdhondhu, pa li ape na etala ndii na odhondjuwo ntano. MOtjiheberi etala ndyoka li tiwa oBetesda. 3 Modhondjuwo ndhoka mwa li amu lala ovavedhi ovengi: Ovapot̯i, ovilema novinkoma. Ovavedhi hemba va kala amava kevelele okunyungutithwa kwomeva. 4 Iya pomaluvedhe nomaluvedhe omweengeli waMuhona u ya metala, ha nyungutitha omeva. Omuvedhi ngoka nguma tenge okuthika mo, omeva hiaa nyungutithwa, u veluka kouvela auhe mbwee nawo. 5 Kwa li aku na omulumentu umo ngwaa vela odhombula omilongo vitatu nepandutatu. 6 Jesus hiee mu mono aa lala po, wa li ae tji i okutya omulumentu ngoka wa vela olule. Jesus we mu pula ha tyaa: “Mo hala okuveluka?” 7 Omuvedhi wa yaka ha tyaa: “Taa, hí na tja nguma ntwala metala etango omeva amaa nyungutithwa. Otwingi tainkolo ame lolokele okuya mo, omukwetu umo u ntenga ko okuthika mo.” 8 Jesus we mu heela ha tyaa: “Kulama, itha po otjiyalo tjoye, ove u ende.” 9 Dhivadhiva omulumentu ha veluka, ye ha itha po otjiyalo tje, ha i. Otjipuka hehi tja ningwa metango lyEsabati. 10 Ovajuda va heela omulumentu ngoka ngwaa velulwa hava tyaa: “Ndino etango lyEsabati, noveta kaai ku itavele, u tjinde otjiyalo tjoye.” 11 Iya omulumentu we ve yaka ha tyaa: “Ngwaa mbelula, oye a ntjeele ha tyaa: ‘Itha po otjiyalo tjoye, ove u ende.’ ” 12 Ovajuda ve mu pula hava tyaa: “Omulumentu aan̯i ngwee ku heele ha tyaa: ‘Itha po otjiyalo tjoye, ove u ende’?” 13 Omuvelulwa kaa li ae i okutya aan̯i, mena lyokutya pa li ovantu ovengi, ye Jesus wa vadhwa aa i. 14 Kon̯ima Jesus we mu mona motempeli ha tyaa: “Taa tuutuu, napano wa veluka. Hó lundha uke, opo hó vadhwa kouvi mbwaa pon̯a hembu.” 15 Iya omulumentu ha i okuhipululila Ovajuda okutya oJesus e mu velula. 16 Iya Ovajuda va uta okutaata Jesus, mena lyokutya wa velula omuntu mEsabati. 17 Jesus we ve yaka ha tyaa: “Tate katee napano ma undapa, naame wo me undapa.” 18 Mena lyodhondaka hendhi Ovajuda va li amava hala oku mu dhipaa, mena lyokutya ye ka lundhile vala Esabati, wa tya wo Kalunga oIhe, iya nyahoka we lininga okutya u lithike naKalunga.
Odhonkono dhOmuna
19 Jesus we ve yaka ha tyaa: “Ame me mu heele otjatjili okutya omuna kaa ulu okuninga notjimo muye omwene. Ma ningi vala soka hiee lwete Ihe hima ningi. Soka Ihe hima ningi, Omuna naye wo otjo ma ningi. 20 Iya Ihe u hole Omuna, ye me mu yulikile ovipuka avihe mbyoka ye omwene mbima ningi. Ye me ke mu yulikila ovilinga ovinene mbyaa pon̯a hembi, opo mu kumwe. 21 Iya ngaIhe hima imuna ovat̯e noku ve yandjela omwenyo, nOmuna otjo ma yandja omwenyo kumboka mbama hala. 22 Ihe kaa koyo noumo, iya ekoyo alihe we li yandja kOmuna, 23 ovantu avehe opo va tumbaleke Omuna, ngahi mava tumbaleke Ihe. Ngoka nguhama tumbaleke Omuna, kaa tumbaleke Ihe, ngoka ngwee mu tuma. 24 “Ame me mu heele otjatjili okutya ngoka nguma tee odhondaka dhandje, ye ha itavele mungoka ngwaa ntuma, u na omwenyo waapehe, ye kaa koywa, wa dha mo met̯o, we ya momwenyo. 25 Ame me mu heele otjatjili okutya owola mai ya, ye ya ae, katango ovat̯e mava ka tyaa ondaka yOmunwaKalunga. Avehe mboka mbamave i tee, mava ka kala nomwenyo. 26 Iya ngaIhe hiee li othimo yomwenyo muye omwene, wa pa Omuna odhonkono, a kale othimo yomwenyo muye omwene. 27 Ye wa pa Omuna odhonkono dhokukoya, mena lyokutya ye Omuna wOmuntu. 28 Hámu kuminwa otjipuka hehi, mena lyokutya owola mai ya, katango ovat̯e avehe mava ka tyaa ondaka ye, 29 wo mava ka dha modhombila dhawo. Mboka mbava undapa ouwa, mava ka imuka kout̯e, hava kala nomwenyo, iya mboka mbava undapa ouvi, mava ka imuka kout̯e, hava koywa.
Ovahipululi vaJesus
30 “Ame híme ulu okuninga tja nokanunu mwaame omwene. Me koyo vala, ngaKalunga hima ntjeele, nekoyo lyandje lya vyuuka, mena lyokutya híme landula ehalo lyandje omwene, iya olyangoka ngwaa ntuma. 31 “Andaa me lihipulula omwene, ndino otjihipululo tjandje kaatji liun̯ikwa. 32 Iya ku na umo nguma ntjipulula, ame ndji i okutya otjihipululo soka hima ntjipulula otjatjili. 33 N̯e mwa tumine odhontumwa kuJohannes, iya ye wa hipulula otjatjili. 34 Iya ame híme hepwa otjihipululo tjomuntu, iya me popi ovipuka hembi, opo mu hupithwe. 35 Johannes wa li olamba ndjaa tema, hai tungatele, iya n̯e mwa halele okuhulukilwa motjiten̯i tje okaluvedhe okathupi vala. 36 Iya ame ndji na otjihipululo otjinene hitja pon̯a hehinya otjaJohannes. Iya ovilinga mbyoka Tate mbyaa mpa ndji vi hwithile po, ovyo mavi ntjipulula, vyo mavi yulike okutya Tate oye a ntuma. 37 Tate ngwaa ntuma, oye ma ntjipulula omwene. N̯e kamu teele nokanunu ondaka ye, n̯e kamu mwene olupe lwe. 38 Odhondaka dhe kadhi mo mun̯e, mena lyokutya ngwaa tumwa kuye kamu mu itavelele. 39 N̯e mamu thongonona mOmisonekwa, mena lyokutya mamu soko okutya muvyo omo mamu mono omwenyo waapehe. Omisonekwa mbyoka ovyo nawanawa mavi ntjipulula. 40 Iya n̯e kamu halele okuya kwaame, opo mu kale nomwenyo. 41 “Ame hí na tja netumbalo lyovantu. 42 Ame ndji mu i okutya kamu na tja ohole yokuhole Kalunga momienyo vyen̯i. 43 Ame mbe ya mena lyaTate, iya n̯e kamu ntambulile. Ngaile maku dhi umo ngume ya muye omwene, ngai mamu mu tambula. 44 Mamu ulu vi okwiitavela, n̯e mboka mbamu litumbaleka, etumbalo ndyoka ndyaa dha kuKalunga aika, kaamu li taendha. 45 Hámu soko okutya ame me ke mu lela ko kuTate. Moses oye me ke mu lela ko, Moses tuu ngoka ngumwe liun̯ika. 46 Iya ngaile mwa itavelele Moses, ngai naame wo mwa ndjitavela, mena lyokutya Moses wa soneka ama ntjipulula. 47 Iya hihamu itavelele soka hiaa soneka, mamu ulu vi okwiitavela odhondaka dhandje?”
Jesus ma kutitha ovalumentu omayovi atano
1 Kon̯ima yovipuka hembi Jesus wa ya tjikoohehinya tjelunga lyaGalilea ne ndii tiwa elunga lyaTiberias. 2 Owingi wovantu we mu landula, mena lyokutya wo va mona ovilingatangan̯eko mbyoka mbyaa ninga, hiaa velula ovavedhi. 3 Jesus wa londa kondundu, ha kala pohi hoka pamo novalongwa ve. 4 Iya Opaasa, otjipito tjOvajuda, tja li popedhi. 5 Jesus hiaa yele omeho, wa mona owingi wovantu mbumau ya kuye, wa pula Filippus ha tyaa: “Matu ka landa pi ovikulya mbimavi hulu ovantu hemba?” 6 Hehi we tji popya a lole Filippus, mena lyokutya ye omwene wa li ae tji i soka hima hala okuninga. 7 Filippus we mu yaka ha tyaa: “Omingome vyodhondenari omathele avali kaavi ve hulu, opo auhe ngaile a pewe tuu okanyembu okanunu vala.” 8 Umo owomovalongwa ve, Andreas, omunitjaSimon Petrus, we mu heela ha tyaa: 9 “Hempa pe na omudhantu nguu na omingome vitano nodhohi mbali, atjaa hembi mavi popile tji kovantu ovengi mbave lithike hempa?” 10 Jesus we ve heela ha tyaa: “Kalethen̯i pohi ovantu.” Pompuka mpoka pa li ehodhi en̯ingi. Ovantu avehe va kala pohi. Ovalumentu mboka va li omayovi atano. 11 Jesus wa itha po omingome, ha kumbu, he vi yandja kovantu mboka mbava li ava kala pohi, otjo a ninga wo nodhohi. Avehe hava mono ovikulya mbyaa hulu. 12 Ovantu avehe hive kuta, Jesus wa heela ovalongwa ve ha tyaa: “Ongedhen̯i ovinyembu avihe mbyoka mbyaa hupu po, hávi yonaka.” 13 Iya va ongedha ovinyembu avihe mbyoka mbyaa hupithwa po kovantu hive kuta, have yulitha odhombwe omulongo nambali. 14 Ovantu mboka mbava mona otjilingakumithi hehi Jesus hiaa ninga, hava tyaa: “Nguka oye e li ye nawanawa omuprofeti ngoka ngwaa li ae na okuya mouye.” 15 Jesus wa li ae tji i okutya ovantu mava hala okuya, ve mu kambule, wo ve mu ninge ohamba kodhonkono, Jesus ha tjuna uke kondundu aika.
Jesus ma ende kombanda yomeva
16 Iya okawiiwii hika wile pohi, ovalongwa ve va ya kontyo yelunga. 17 Wo va londa mowato, hava utu okuyauka elunga, hava i koKapernaum. Iya katee kwa dhiwele, Jesus wa li aheye ya kuwo. 18 Ombepo onene ya uta okupepa, hai imuna elunga. 19 Wo hiva liya otjikambo hitji lithike podhokilometa ntano ne epandu, va mona Jesus ama ende kombanda yomeva aa vyuuka kowato, wo va li ava tila. 20 Iya Jesus we ve heela ha tyaa: “Hámu tila, aame!” 21 Iya ovalongwa mokuhala oku mu tambula mowato, owato we thika dhivadhiva keheke hoka huva vadhwa amava hala okuya.
Ovantu mava taendha Jesus
22 Ngamuhuka owingi wovantu wa li tjikoohehinya tjelunga. Va mona okutya kwa li vala owato umo, wo va li ave tji i okutya Jesus ka ile mo mowato pamo novalongwa ve, iya ovalongwa va ya aveika. 23 Omawato omakwawo ngaa dha koTiberias, e ya kontyo popedhi noluvedhe ndoka ovantu huva lilile omingome, Muhona hiaa kumbile. 24 Owingi wovantu hiwa mono okutya Jesus ke ko hoka, novalongwa ve kave ko, wa ya momawato, have ya koKapernaum okutaendha Jesus.
Jesus omungome womwenyo
25 Ovantu hiva vadha Jesus tjikoohehinya tjelunga, ve mu pula hava tyaa: “Rabbi, we ya po nalun̯i hempa?” 26 Jesus we ve yaka ha tyaa: “Ame me mu heele otjatjili okutya n̯e kaamu ntaendha mena lyahimwa mono ovilingatangan̯eko mbyoka mbimba ningi, iya omena lyokutya mwa li omingome hembinya hamu kuta. 27 Hámu taendha ovikulya mbyoka mbimavi hulu, taendhen̯i ovikulya mbimavi kala po katee momwenyo waapehe, Omuna wOmuntu mbime ke mu pa, iya oye e li ye ngoka Ihe Kalunga ngwee mu twaa otjilimbo tje.” 28 Iya wo ve mu pula hava tyaa: “Ngatu ninge tji, opo tu undape ovilinga vyaKalunga?” 29 Jesus we ve yaka ha tyaa: “Ovilinga mbyoka Kalunga mbyaa hala, mu vi undape, hoovyombi okutya mu itavele mungoka ngwaa tumwa kuye.” 30 Wo ve mu pula hava tyaa: “Otjilingatangan̯eko otjin̯i himo ningi, tu tji mone nt̯e tu ku itavele? Mo ningi tji? 31 Ootateombwale va lile omanna mokuti, omisonekwa ngahi mavi popi himavi tyaa: ‘Ye we ve pa omungome womeulu, va lye.’ ” 32 Jesus we ve heela ha tyaa: “Ame me mu heele otjatjili okutya Moses haye e mu pele omungome womeulu, Tate oye e mu pa omungome watjatjili mbumau dhi meulu. 33 Iya ngoka nguma dhi meulu, oye e li omungome waKalunga, ma yandja omwenyo kouye.” 34 Wo ve mu kumba hava tyaa: “Taa, iya tu pa omungome mboka apehe.” 35 Jesus we ve heela ha tyaa: “Aame omungome womwenyo. Ngume ya kwaame kaa t̯a ondjala nokanunu, nangoka nguma itavele mwaame kaa t̯a uke onyota. 36 Iya ame mbe mu heela okutya mwa mbona, atjaa kamu itavelele. 37 Ovantu avehe mboka Tate mbaa mpa, mave ya kwaame. Ame híme ta po noumo ngoka ngume ya kwaame, 38 mena lyokutya ame mba dha meulu, hí dhile okuhwithila po ehalo lyandje omwene, mbe ya okuhwithila po ehalo lyahengu ngwaa ntuma. 39 Ehalo lyahengu ngwaa ntuma hoolyondi okutya ahame keketha noumo owomovantu mboka avehe Tate mbaa mpa, iya ndji ke ve imune kout̯e avehe metango lyathiinina. 40 Iya ehalo lyaTate hoolyondi okutya auhe ngoka nguma mono Omuna, ha itavele muye, ma kala nomwenyo waapehe, ame me ke mu imuna metango lyathiinina.” 41 Ovajuda va uta okun̯umutula, Jesus hiaa tyaa: “Aame omungome mboka mbwaa dha meulu.” 42 Wo ve lipula hava tyaa: “Nguka haJesus nan̯i, omunwaJosef? Ina naihe tu ve i. Ovi iya napano, hima tya wa dha meulu?” 43 Jesus we ve yaka ha tyaa: “Hámu n̯umutula. 44 Kaku na tja omuntu noumo nguma ulu okuya kwaame, kakele kaTate ngwaa ntuma ae mu eta kwaame, ame me ke mu imuna kout̯e etango lyathiinina. 45 Ovaprofeti va soneka hava tyaa: ‘Ovantu avehe mava ka kala ava longethwa kuKalunga.’ Auhe ngoka nguma tee hitja dhi kuTate, ye he lilongo tjo, oye me ya kwaame. 46 Hehi kaatji tya ngaile pe na omuntu ngwaa mona Tate, aai, Omuna ngoka ngwaa dha kuKalunga, oye aika a mona Tate. 47 Ame me mu heele otjatjili okutya ngwaa itavele, u na omwenyo waapehe. 48 Aame omungome womwenyo. 49 Owoihoombwale va lile omanna mokuti, iya va t̯a. 50 Kwalukele ngoka nguma li omungome mboka mbwaa dha meulu, ke na mpoka mpameya t̯i. 51 Aame omungome womwenyo mboka mbwaa dha meulu. Kwalukele ngoka nguma li omungome hembu, ma kala ae na omwenyo katee apehe. Omungome mboka mbume mu pa, olutu lwandje, ndoka ndume yandja, lu ninge omwenyo wouye.” 52 Hehi tja eta olutangu olunene mokati kOvajuda. Wo ve lipula hava tyaa: “Omulumentu hengu ma ulu vi oku tu pa olutu lwe, tu lu lye?” 53 Jesus we ve yaka ha tyaa: “Ame me mu heele otjatjili okutya andaa kaamu li olutu lwOmuna wOmuntu n̯e kaamu nu ombindhi ye, kaamu kala amu na omwenyo. 54 Ngoka nguma li olutu lwandje, ye ha nu ombindhi yandje, u na omwenyo waapehe, naame me ke mu imuna kout̯e etango lyathiinina. 55 Iya olutu lwandje ovikulya vyatjatjili, nombindhi yandje okunwa kwatjatjili. 56 Nguma li olutu lwandje, ye ha nu ombindhi yandje, ma kala mwaame, naame me kala muye. 57 NgaTate ngwaa ntuma hiee na omwenyo, naame wo ndji na omwenyo mena lye, nanguma li olutu lwandje, ma kala nomwenyo mena lyandje. 58 Hembu omungome mbwaa dha meulu, mbuhau ngala mboka mbwaa lilwe kowoihoombwale, mbava t̯a. Nguma li omungome hembu, ma kala nomwenyo katee apehe.” 59 Odhondaka hendhi Jesus we dhi popila mosinagoga moKapernaum, hiaa li ama longo ovantu.
Odhondaka dhomwenyo waapehe
60 Ovengi owomovalongwa ve mboka mbava tyaa odhondaka hendhi, va popya hava tyaa: “Elongo hendi ekukutu unene. Aan̯i nguma ulu oku li teelela?” 61 Jesus hiee tji nongonoka omwene okutya ovalongwa ve mava n̯umutula mena lyodhondaka ndhoka ndhaa popi, we ve heela ha tyaa: “Odhondaka ndhika dhe mu ningitha omutima omuvi? 62 Mamu tya vi, ndimwa ka mona Omuna wOmuntu ama londo, ha tjuna hoka hwaa li lukulu? 63 Ombepo oyo mai yandja omwenyo, soka hitji li momuntu kaatji popile tja. Odhondaka ndhimbe mu heele odho dhi li Ombepo ndjimai yandja omwenyo. 64 Iya mokati ken̯i mu na vamo mboka mbahava itavelele.” Iya okudha peutilo Jesus wa kala ae tji i okutya owaan̯i mboka mbahave mu itavelele, nangoka ngume ke mu weleleka. 65 Iya we ve heela ha tyaa: “Hehi otjo mbe mu heele okutya kaku na tja noumo nguma ulu okuya kwaame, kakele vala ae tji yandjelwa kuTate.” 66 Okudha mpoka ovengi owomovalongwa ve va tjuna mon̯ima, wo kava endele uke pamo naye. 67 Iya Jesus wa heela ovalongwa ve mboka omulongo navavali ha tyaa: “N̯e kaamu hala wo okuya?” 68 Simon Petrus we mu yaka ha tyaa: “Muhona, matu i kwaan̯i? Ove u na odhondaka dhomwenyo waapehe. 69 Nt̯e twa itavela, ye tu tji i okutya oove Omudhilikwa waKalunga.” 70 Jesus we ve yaka ha tyaa: “Hí mu holowolele omulongo navavali? Iya nandaku tiwa otjo nyahoka, umo owomun̯e omudiapoli.” 71 Jesus wa li ama popi Judas munkwaSimon Iskariot. Iya Judas, nandaku tiwa wa li umo owomovalongwa omulongo navavali, oye a li ame ke mu weleleka.
Jesus novanitje ovalumentu
1 Kon̯ima yovipuka hembi Jesus wa li ama ende moGalilea. Wa li ahama hala okweenda moJudea, mena lyokutya Ovajuda va li amava hala oku mu dhipaa. 2 Otjipito tjOvajuda, otjipito tjomasase, tja li atje ya popedhi. 3 Ovanitje ovalumentu ve mu heela hava tyaa: “Dha po hempa, u ende koJudea, ovalongwa woye opo va mone wo ovilinga mbyoka mbimo ningi. 4 Iya kaku na tja omuntu nguu undapa tja meholamo ye ama hala okumoneka. Andaa mo undapa ovilinga hembi, liholololela ouye.” 5 Iya novanitje ovalumentu va li ahave mu itavelele. 6 Jesus we ve heela ha tyaa: “Otembu yandje kaiye ya. Iya n̯e apehe mu na otembu. 7 N̯e ouye kaau kala au mu yele, iya ame u ndjele, mena lyokutya me u hipululile okutya ovilinga vyawo ovivi. 8 N̯e enden̯i kotjipito, ame híme i ko kotjipito soka, mena lyokutya otembu yandje kaiye thika.” 9 Iya hiaa dhi poku ve heela ovipuka hembi, wa kala mo uke moGalilea.
Jesus kotjipito tjomasase
10 Kon̯ima ovanitjaJesus ovalumentu hiva i kotjipito, Jesus naye wo wa ya ko, nandaku tiwa hapoluhandja, wa ya ko meholamo. 11 Iya Ovajuda va kala amave mu taendhataendha motjipito, have lipula hava tyaa: “Omulumentu ngoka u li pi?” 12 Mowingi wovantu mwa li en̯umutulo en̯ingi mena lye. Ovantu vamo va popya hava tyaa: “Omulumentu ngoka omuwa,” iya vamo hava tyaa: “Aai, ma pukitha ovantu.” 13 Kapa li noumo ngwee mu popya poluhandja, mena lyokutya va tila Ovajuda. 14 Iya mokati kotjipito Jesus wa ya motempeli, ha utu okulonga ovantu. 15 Ovajuda ve kumwa unene hava tyaa: “Omulumentu hengu we iwa vi omisonekwa, ye há longethelwe?” 16 Iya Jesus we ve yaka ha tyaa: “Elongo hendi lyandje, halyandje omwene, iya lya dha kungoka ngwaa ntuma. 17 Kwalukele ngoka nguma hala okuundapa ehalo lyaKalunga, ma ka nongonoka elongo hendi ndime longo, andaa lya dha kuKalunga, ne me popi vala mwaame omwene. 18 Omuntu ngoka ngume lipopi, ma taendha etumbalo lye omwene, iya nguma taendha etumbalo lyangoka ngwee mu tuma, owatjatjili, muye kamu na ovithithi. 19 Moses ke mu pele oveta? Iya kamu na tja noumo mun̯e nguma ulu oveta. Omena lyatji mamu hala okundhipaa?” 20 Owingi we mu yaka hau tyaa: “Nkwai u na ondemoni. Aan̯i nguma hala oku ku dhipaa?” 21 Jesus we ve yaka ha tyaa: “Ame mba undapa otjilinga tjimo, n̯e amuhe mwe kumwa. 22 Moses we mu pa otjitumino, mu pitithe ovanwen̯i etanda, nandaku tiwa haMoses e tji yandja, owoihoombwale owo ve tji uta. Iya n̯e mu pititha etanda mEsabati. 23 Andaa mu pititha etanda mEsabati, oveta yaMoses opo i hwithilwe po, omena lyatji himwa ndjumaneke, himba velula omuntu mEsabati? 24 Hámu koyo, ngahi mamu tala nomeho, koyen̯i ekoyo ndyaa vyuuka.”
Nguka oye e li tuu Messias?
25 Ovantu vamo womuJerusalem va popya hava tyaa: “Omulumentu nguka haye mava hala okudhipaa? 26 Taa tuutuu, ye ma popi movipathi vyawo, iya kape na tja ngoka nguma popi ko, pamo ovanene va nongonoka okutya omulumentu hengu oye e li Messias? 27 Iya omulumentu hengu hwaa dha, tu ku i, Messias hime ya, kape na nguu tji i hoka huma dhi.” 28 Iya Jesus wa popya peulu motempeli, hiaa li ama longo ovantu ha tyaa: “Mu ndji i, nahumba dha mu ku i? Ame hí dhile mwaame omwene, iya ngwaa ntuma owatjatjili, n̯e kamu mu i. 29 Ame ndji mu i, mena lyokutya mba dha kuye, ye oye a ntuma.” 30 Iya wo va li amava hala oku mu kambula, atjaa kapa li noumo ngwee mu twaa okuwoko, mena lyokutya owola ye ya li ahaiye thika. 31 Iya ovantu ovengi owomowingi ve mu itavele, hava tyaa: “Messias hime ya, ma ka ninga tuu ovilingatangan̯eko ovingi mbyaa pon̯a mbika mbimavi ningwa komulumentu ngu?”
Ovayungi mava tumwa okukambula Jesus
32 Ovafarisai va tyaa enyongotolo lyowingi wovantu, himava popi ovipuka mbyoka ouhunga naJesus. Iya wo pamo novayambethi ovanene va tuma ovayungi, va ka kambule Jesus. 33 Jesus we ve heela ha tyaa: “Ame ndji li pun̯e okaluvedhe okanunu uke. Iya okudha mpoka me i kungoka ngwaa ntuma. 34 Mamu ka ntaendha, atjaa kaamu ka mbona, nahume ka kala, kaamu ka ula okuya ko.” 35 Ovajuda ve lipula hava tyaa: “Omulumentu nguka atjaa ma i pi, mpoka mpahamatu mu mono uke? Ma i kumbava handjanena movilongo vyOvagreka, a ka longe Ovagreka? 36 Iya ma hala okutya vi, hima tyaa: ‘Mamu ka ntaendha, atjaa kaamu ka mbona, nahoka hume i, kaamu ka ula okuya ko’?”
Omilonga vyomeva omanamwenyo
37 Etango lyathiinina lyotjipito, etango enene, Jesus wa kulama, ha popi peulu ha tyaa: “Andaa pe na ngwaa t̯i onyota, nge ye kwaame, a nwe. 38 Omisonekwa ngahimavi popi okutyaa: ‘Kwalukele ngoka ngwaa itavele mwaame, momwenyo we mamu ka kunguluka omilonga vyomeva omanamwenyo.’ ” 39 Iya Jesus wa popya odhondaka hendhi ouhunga nOmbepo ndjimai ka pewa mboka mbava itavele muye. Potembu ndjoka Ombepo ya li ahaiya yandjwa, mena lyokutya etumbalo lyaJesus lya li ahaliya holololwa.
Odhombata mokati kovantu
40 Vamo owomowingi wovantu hiva tee odhondaka ndhoka, va popya hava tyaa: “Kape na tja omalimbililo, omulumentu hengu oye e li omuprofeti hengunya.” 41 Ovakwawo va popya hava tyaa: “Omulumentu hengu oye e li Messias.” Iya vamo hava tyaa: “Messias ma ulu okudha moGalilea? 42 Omisonekwa mavi tya Messias ma dhi moluyumuko lwaDavid, ha yumukilwa moBetlehem, mondolopa moka David mwaa li.” 43 Iya odhombata otjo dha uta nyahoka mokati kovantu mena lyaJesus. 44 Vamo va li amava hala okukambula Jesus, iya kapa li noumo ngwee mu twaa omawoko.
Okuhaitavela kwovanene Ovajuda
45 Ovayungi hiva tjuna, ovayambethi ovanene nOvafarisai ve ve pula hava tyaa: “Omena lyatji hihamu mu etele huno?” 46 Ovayungi ve ve yaka hava tyaa: “Nalukulu kakuya moneka omuntu nguma popi ngomulumentu hengwii.” 47 Ovafarisai ve ve pula hava tyaa: “Nan̯e wo mwa pukithwa? 48 Pe na tuu umo owomovanene vetu ne mOvafarisai ngwee mu itavela? 49 Ovantu hemba kave i oveta yaMoses, iya ve li kohi yethingo lyaKalunga.” 50 Nikodemus ngoka ngwaa ile lukulu kuJesus, wa li umo owomOvafarisai mbava itavela Jesus. Ye wa yaka ha tyaa: 51 “Moveta yetu, nt̯e kaatu ulu okukoya omuntu, tainkolo aheya teelelwa, opo ku moneke soka hiaa ningi.” 52 Wo ve mu yaka hava tyaa: “Naove wo wa dha koGalilea nan̯i? Thongonona omisonekwa, iya mo ka mona okutya moGalilea kamu dhile nalukulu omuprofeti.” 53 Okudha mpoka auhe wa ya koyawo.
Omukadhintu ngwaa hupulwa ama vakwa
1 Jesus wa ya kOndundu yomiholivi. 2 Omuhuka omunene we ya uke motempeli. Ovantu avehe ve ya kuye. Iya ye wa kala pohi, he ve longo. 3 Ovalongiveta nOvafarisai va eta mo omukadhintu ngwaa hupulwa ama vakwa, have mu kulameke mokati kawo. 4 Iya wo va heela Jesus hava tyaa: “Mulongethi, omukadhintu hengu wa hupulwa ama vakwa. 5 Iya napano moveta yetu Moses we tu heela okutya omukadhintu ngwaa ningi nyahoka, nga dhipawe nomawe. Iya ove mo tya vi?” 6 Hehi ve tji popya, opo va lole nyahoka Jesus, opo ve tjiiwe oku mu vela odhombedhi. Jesus wa yongama, ha soneke pohi nomunwe. 7 Iya hiva li amava pula Jesus omapulo, Jesus wa yongamuka ha tyaa: “Nguhe na tja odhonkali mokati ken̯i, nga tenge oku mu tona newe.” 8 Jesus we liyongamena uke, ha soneke pohi. 9 Wo hive tji tee, va ya kooumo nooumo okuuta kovanene. Jesus we thiwa po aika nomukadhintu ngoka ngwaa kulama mpoka. 10 Jesus wa yongamuka, he mu pula ha tyaa: “Ove, iya vamo ve li pi? Kape na ngwee ku koyo?” 11 Omukadhintu wa yaka ha tyaa: “Aai, Muhona, kape na tja noumo.” Jesus we mu heela ha tyaa: “Naame híme ku koyo. Iya enda, okudha hempa hó lundha uke.”
Jesus otjiten̯i tjouye
12 Jesus wa heela uke ovantu ha tyaa: “Aame otjiten̯i tjouye. Nguma ndandula, kaa ende met̯iku nokanunu, iya ma kala notjiten̯i tjomwenyo.” 13 Iya Ovafarisai ve mu heela hava tyaa: “Mo lihipulula ove omwene. Otjihipululo tjoye hatjatjili.” 14 Jesus we ve yaka ha tyaa: “Nandaku tiwa me lihipulula ame omwene, me popi otjatjili, mena lyokutya ame ndji ku i hoka humba dha nahoka hume i. Iya n̯e kamu ku i hoka humba dha nahoka hume i. 15 N̯e mamu koyo monkalo yountu, iya ame hí na ngume koyo. 16 Iya andaa me koyo, ekoyo lyandje li li mondjila, mena lyokutya ame haame aika motjipuka hehi, iya tu li naTate, ngoka ngwaa ntuma. 17 Iya nomoveta yen̯i mwa sonekwa okutya otjihipululo tjovantu vavali otjatjili. 18 Ame me lihipulula ame omwene, naTate, ngoka ngwaa ntuma, ma ntjipulula.” 19 Ovafarisai ve mu pula hava tyaa: “Iho u li pi?” Jesus we ve yaka ha tyaa: “Ame kamu ndji i, naTate kamu mu i. Ngaile mu ndji i, ngai naTate mu mu i wo.” 20 Odhondaka hendhi adhihe Jesus we dhi popya, hiaa li ama longo ovantu motempeli, mondjuwo ndjoka mumwa li ovikasa mumu tuwa mbimavi yambwa. Iya kape na tja omuntu noumo ngwee mu kambula, mena lyokutya owola ye ya li ahaiye thika.
Kompuka hoka hume i, kaamu ka ula okuya ko
21 Jesus we ve heela uke ha tyaa: “Ame me i, n̯e mamu kala amamu ntaendha, iya mamu ka t̯ila modhonkali dhen̯i. Kompuka hoka hume i, kaamu ka ula okuya ko.” 22 Ovajuda va popya hava tyaa: “Ma hala pamo okulidhipaa, hima tyaa: ‘Kompuka hoka hume i, kaamu ka ula okuya ko’?” 23 Jesus wa yaka ha tyaa: “N̯e mwa dha huno pohi, iya ame mba dha kombanda. N̯e muwomouye, iya ame hiwomouye hembu. 24 Iya otjo me mu heele okutya mamu ka t̯ila modhonkali dhen̯i. Iya andaa kaamu itavele okutya ‘Ame Aame,’ mamu ka t̯ila modhonkali dhen̯i.” 25 Wo ve mu pula hava tyaa: “Ove oove an̯i?” Jesus we ve yaka ha tyaa: “Ohimbe mu heele ae lukulu. 26 Ame ndji na otjingi okupopya ouhunga nan̯e noku mu koya. Iya ngoka ngwaa ntuma, owatjatjili. Mbyoka mbime tee kuye, ovyo me heele ouye.” 27 Ovajuda va li ahave tji i okutya Jesus me ve heele Ihe. 28 Iya Jesus we ve heela ha tyaa: “Katango mamu ka yela Omuna wOmuntu peulu, mamu ka mona okutya aame. Iya mamu ka mona okutya ame híme ningi tja mwaame omwene, iya me popi ovipuka mbyoka Tate mbyaa ndonga. 29 Iya ngoka ngwaa ntuma, u li pamo naame, ye ka ndjetha ndji kale aika, mena lyokutya apehe ndji undapa ovipuka mbyee mu thevelwa.” 30 Jesus hiaa popi ovipuka hembi, ovantu ovengi va itavela muye.
Otjatjili matji mu kutulula
31 Jesus wa heela Ovajuda mboka mbave mu itavela ha tyaa: “Andaa mamu kala modhondaka dhandje, otjatjili mamu kala ovalongwa vandje. 32 Mamu ka iwa otjatjili, iya otjatjili matji ke mu kutulula.” 33 Wo ve mu yaka hava tyaa: “Nt̯e tumbuto yaAbraham, katu na mpatwa li ovapika wovantu. Mo popi vi, himo tyaa: ‘Mamu ka kutululwa?’ ” 34 Jesus we ve yaka ha tyaa: “Ame me mu heele otjatjili okutya auhe ngoka nguma undapa oulundhi, omupika woulundhi. 35 Iya omupika ka kala monganda apehe, iya omuna u kala mo apehe. 36 Iya Omuna andaa me mu kutulula, otjatjili mamu kala amwa kutuluka. 37 Ndji tji i okutya n̯e mumbuto yaAbraham, atjaa mamu hala okundhipaa, mena lyokutya odhondaka dhandje kadhi mwene mo oluvedhe mun̯e. 38 Ame me popi ovipuka mbimba mona puTate, iya n̯e mamu undapa soka himwa heelwa kwiiho.” 39 Wo ve mu yaka hava tyaa: “Tate oAbraham.” Jesus we ve heela ha tyaa: “Ngaile mudhondele dhaAbraham, ngai mamu undapa ovilinga mbyoka Abraham mbyaa undapa. 40 Iya napano n̯e mamu hala okundhipaa, ngundji mu hipululila otjatjili himba tyaa kuKalunga. Iya Abraham ke tji ningile. 41 N̯e mamu undapa ovilinga vyaiho.” Wo ve mu yaka hava tyaa: “Nt̯e katu yumukililwe movihulo. Tu na Tate umo vala, oKalunga.” 42 Jesus we ve heela ha tyaa: “Ngaile Kalunga oye a li iho, ngai mu ntjole, mena lyokutya ame mbe ya okudha kuKalunga, ame napano aame hengu. Ame hí dhile mwaame omwene, iya oye a ntuma. 43 Omena lyatji hihamamu koneke hime popi? Omena lyokutya n̯e kaamu ulu okutyaa odhondaka dhandje. 44 N̯e mu na iho omudiapoli, mamu hala okuundapa ehalo lyaiho. Ye omudhipai okudha peutilo, ye ke na tja mpoka mpaa li motjatjili, mena lyokutya muye kamu na tja otjatjili. Ama popi ovithithi, u popya ovipuka vye omwene, mena lyokutya ye onkembi, ye oye e li ihe yovithithi avihe. 45 Iya n̯e kaamu ndjitavele mena lyokutya me popi otjatjili. 46 Aan̯i mun̯e nguma ulu okuyulika okutya ndji na odhonkali? Andaa me popi otjatjili, omena lyatji iya hihamu ndjitavele? 47 Ngoka ngwaa dha kuKalunga, u tyaa odhondaka dhaKalunga. N̯e kaamu tee odhondaka dhaKalunga, mena lyokutya kamu dhile kuKalunga.”
Jesus naAbraham
48 Ovajuda va yaka Jesus hava tyaa: “Katu popile hitja vyuuka, hitwa tyaa uMusamaria, ove u na ondemoni?” 49 Jesus wa yaka ha tyaa: “Ame hí na tja ondemoni, iya ame me tumbaleke Tate, iya n̯e mwa ntomba. 50 Ame híme taendha etumbalo lyandje omwene. Pe na umo ngoka ngume li ntjalele, ye oye e li omukoyi. 51 Ame me mu heele otjatjili okutya kwalukele ngoka nguma takametha odhondaka dhandje kaa t̯i katee apehe.” 52 Ovajuda ve mu heela hava tyaa: “Napano tu tji i nawa okutya u na ondemoni. Abraham novaprofeti va t̯a, iya ove mo tyaa: ‘Kwalukele ngoka nguma takametha odhondaka dhandje, ke na tja mpama ka lola et̯o katee apehe.’ 53 Ove umunene nan̯i wa pon̯a tate Abraham ngwaa t̯a? Ovaprofeti nawo va t̯a lukulu. Ove mo liningi an̯i?” 54 Jesus we ve yaka ha tyaa: “Ame ngaile me litumbaleke omwene, ngai etumbalo lyandje kali na tjilinga. Tate, ngumu tya, oye e li Kalunga ken̯i, oye a ntumbaleka. 55 N̯e kamu mu i, iya ame ndji mu i. Ngaile mba tya hí mu i, ngai ame ndjinkembi ngan̯e. Iya ame ndji mu i, nodhondaka dhe ndji dhi takametha. 56 Iho Abraham we hulukilwa okutya ma ka mona etango lyandje, ye we li mona, he hulukwa.” 57 Ovajuda ve mu heela hava tyaa: “Ove kuya ninga uke odhombula omilongo vitano, napano mo tya wa mona Abraham?” 58 Jesus we ve yaka ha tyaa: “Ame me mu heele otjatjili okutya Abraham tainkolo aheya yumukwa, ame oko mba li lukulu.” 59 Ovajuda va nyanga omawe, ve mu tone, atjaa Jesus ha holama, ha dhi mo motempeli.
Jesus ma velula omulumentu ngwaa yumukwa omupot̯i
1 Jesus tainkolo a li ama ende, wa mona omulumentu ngwaa yumukilwe omupot̯i. 2 Ovalongwa ve ve mu pula hava tyaa: “Rabbi, aan̯i ngwaa lundha, ovanene ve ne oye omwene, omulumentu hengu opo a yumukwe omupot̯i?” 3 Jesus we ve yaka ha tyaa: “Hadhonkali dhe ne odhovanene ve, hehi tja ningwa, ovilinga vyaKalunga opo vi holololwe muye. 4 Iya tu tha okuundapa ovilinga vyahengu ngwaa ntuma, tainkolo omutenya. Out̯iku mau ya, iya himau ya, kape na nguma ulu okuundapa. 5 Tainkolo ame ndji li mouye, aame otjiten̯i tjouye.” 6 Jesus hiaa popi ovipuka hembi, wa kambela omate pohi, ha lungu ontata nomate. Ontata ndjoka we i vaveka pomeho omupot̯i ngoka, 7 he mu heele ha tyaa: “Enda, u ke likohe metala lyaSiloa.” Ena hendi mali tya “Tumwa.” Wa ya, he likoho, ha tjuna ko aa twikuluka. 8 Iya ovalaanganda novantu mboka mbava li ave mu mona lukulu, ama hungilile, va popya hava tyaa: “Omulumentu hengu haye e li ye nahi nguu kala pohi otjo ma hungilile?” 9 Vamo hava tyaa: “Oye e li ye ngoka.” Ovakwawo hava tya: “Aai, haye, ve litha vala.” Omulumentu ye omwene we ve heela ha tyaa: “Aai, mbee aame.” 10 Wo ve mu pula hava tyaa: “Omeho oye a twikuluka vi?” 11 Omulumentu wa yaka ha tyaa: “Omulumentu ngwinya nguu tiwa oJesus, oye a lunga ontata nomate, he i vaveke pomeho andje, ha ntjeele ndji ke likohe metala lyaSiloa. Ame he i, himbe likoho, he twikuluka.” 12 Wo va pula hava tyaa: “Omulumentu ngoka u li pi?” Ye ha tyaa: “Hí tji i.”
Ovafarisai mava thongonona evelulo
13 Iya ovantu va twala omulumentu ngoka ngwaa li omupot̯i kOvafarisai. 14 Etango ndyoka Jesus hiaa lunga ontata nomate, ha twikulula omeho e, lya li Esabati. 15 Ovafarisai va pula uke omupot̯i okutya wa twikuluka vi. Ye we ve heela ha tyaa: “Ngwaa ntwikulula, wa vaveka ontata pomeho andje, ame he likoho, tjau he twikuluka.” 16 Vamo owomOvafarisai ve mu heela hava tyaa: “Omulumentu hengu ngwaa ningi otjipuka hehi, ka dhile kuKalunga, mena lyokutya ka takametha oveta yEsabati.” Ovakwawo hava tyaa: “Omulumentu hengu andaa omulundhi, ma ulu vi okuninga ovilingatangan̯eko mbii lithike hempa?” Iya ve liyapauka pokati. 17 Ovafarisai va pula uke omupot̯i hava tyaa: “Ove mo tya vi ouhunga nomulumentu hengu ngwaa twikulula omeho oye?” Omupot̯i wa yaka ha tyaa: “Omuprofeti.” 18 Ovajuda va kala ahamava hala okwiitavela okutya omulumentu hengu wa li omupot̯i, ye napano ae ku lwete. Iya va ithana ovanene ve, 19 have ve pula hava tyaa: “Nguka omunwen̯i, ngumwa tya wa yumukwa omupot̯i? Ovi iya, napano hiee ku lwete?” 20 Ovanene ve va yaka hava tyaa: “Nt̯e tu tji i okutya omulumentu hengu omunwetu, ye wa yumukwa omupot̯i, 21 atjaa nt̯e katu tji i okutya wa twikuluka vi, nangwee mu twikulula nt̯e katu mu i. Mu pulen̯i, omunene, nga yake ye omwene.” 22 Ovanene ve va popya nyahoka, mena lyokutya va li amava tila Ovajuda. Iya Ovajuda va laa omulao okutya kwalukele ngoka nguma hipulula okutya Jesus oye e li Messias, ma lambwa mo mosinagoga. 23 Ovanene ve opo va popila nyahoka hiva tyaa: “Mu pulen̯i omwene, omunene.” 24 Ovafarisai va ithana olutyavali omulumentu ngoka ngwaa li omupot̯i hava tyaa: “Popya otjatjili kotjipala tjaKalunga! Nt̯e tu tji i okutya omulumentu ngoka ngwee ku velula, omulundhi.” 25 Iya omulumentu ngoka wa yaka ha tyaa: “Ame hí tji i, andaa ye omulundhi. Tjimo atjiika ame hindji i, okutya ame mba li omupot̯i, iya napano mba twikuluka.” 26 Iya wo ve mu pula hava tyaa: “We ku ninga vi? Omeho oye we e twikulula vi?” 27 Ye we ve yaka ha tyaa: “Mbe mu hipululile ae lukulu, iya kamu nteelelele. Omena lyatji mamu hala oku tji tyaa uke? Nan̯e wo mamu hala okwiila ovalongwa ve?” 28 Ovafarisai ve mu popya hava tyaa: “Oove aika omulongwa womulumentu ngoka, nt̯e tuvalongwa vaMoses. 29 Tu tji i okutya Kalunga wa popile naMoses, iya nt̯e omulumentu ngoka katu mu i hwaa dha.” 30 Omutwikululwa we ve yaka ha tyaa: “Iya otjatjili, hwaa dha, kamu ku i, atjaa wa ntwikulula. 31 Nt̯e tu tji i okutya Kalunga ka teelele odhondaka dhovalundhi, iya u tyaa ovantu mboka mbave mu tila, hava hwithile po ehalo lye. 32 Okudha peuto lyouye kakuya teeka omuntu ngwaa twikulula omuntu ngwaa yumukwa omupot̯i. 33 Omulumentu hengu ngaile ka dhile kuKalunga, ngai ke na tja soka hima ulu okuninga.” 34 Wo ve mu yaka hava tyaa: “Ove wa yumukilwa moulundhi, ho kulile moulundhi, atjaa ove mo tu longo?” Wo ve mu lamba mo mosinagoga.
Oupot̯i wopambepo
35 Jesus wa tyaa okutya omulumentu ngwaa li omupot̯i Ovafarisai ve mu lamba mo mosinagoga. Iya hiee mu mono, we mu pula ha tyaa: “Wa itavela mOmuna wOmuntu?” 36 Omulumentu ngoka wa yaka ha tyaa: “Taa, ntjeela ndje okutya aan̯i, opo ndji ule okwiitavela muye.” 37 Jesus we mu heela ha tyaa: “We mu mono ae, ye oye mo popi naye.” 38 Omulumentu wa yaka ha tyaa: “Muhona, mba itavele.” Wa twika odhongolo kotjipala tjaJesus. 39 Jesus we mu heela ha tyaa: “Ame mbe ya mouye hembu mena lyekoyo, mboka mbahave ku mono, ve ku mone, mbave ku mona, va twike.” 40 Vamo owomOvafarisai mboka mbava li pamo naye, va tyaa odhondaka hendhi hava tyaa: “Nant̯e wo tuvapot̯i?” 41 Jesus we ve yaka ha tyaa: “Ngaile mwa li ovapot̯i, ngai kamu na tja odhonkali, iya himamu tyaa: ‘Nt̯e tu ku lwete,’ ndino matji tya, mu na odhonkali.”
Eeli lyotjuunda tjodhondhu
1 Jesus we ve heela ha tyaa: “Ame me mu heele otjatjili okutya nguma i motjuunda tjodhondhu ahama pitile potjivelo, iya ha hitile mpape lili otjimpulu, ye omupundi. 2 Iya omut̯ita wodhondhu u pitila potjivelo. 3 Omuyungi wopotjivelo ma yelula omut̯ita, nodhondhu madhi tee ondaka ye. Ma ithana odhondhu dhe komana, he dhi pititha mo. 4 Hime dhi pititha mo adhihe, me dhi pitile komeho, dho madhi mu landula, mena lyokutya dhi i ondaka ye. 5 Iya ongendi kaadhi mu landula, madhi mu inkolo, mena lyokutya ondaka ye kadhi i i.” 6 Eeli hendi Jesus we ve heela lyo, wo hiva li ahave tji i okutya ma hala okutya vi.
Jesus omut̯ita omuwa
7 Jesus we ve heela uke ha tyaa: “Ame me mu heele otjatjili okutya aame otjivelo tjodhondhu. 8 Avehe mboka mbava ntengela, ovimpulu novapundi, iya odhondhu kadhi ve teele. 9 Aame otjivelo. Kwalukele ngoka nguma i mo, ama pitile mwaame, ma ka hupithwa. Ye ma ka kala ame ya mo, ha piti mo, ye ha mono oulithilo. 10 Otjimpulu tji endela vala okuvaka, okudhipaa nokuhan̯auna. Ame mbe ya, opo va kale nomwenyo, omwenyo mbwaa hulu. 11 “Ame ndjimut̯ita omuwa. Omut̯ita omuwa u yandjela odhondhu omwenyo we. 12 Omuthutwa ngoka nguhe thi omut̯ita nodhondhu ndhihadhi thi odhe omwene, aa mono eungu amali ya, u ka inkola, odhondhu he dhi thii po. Eungu mali dhi hongo, lyo hali dhi handjaneke. 13 Omuthutwa ma ka inkola, mena lyokutya ma undapele vala ondjambi, ye ka ihamenenwe nodhondhu. 14 Ame ndjimut̯ita omuwa. Odhondhu dhandje ndji dhi i, dho nadho dhi ndji i, 15 Tate ngahi e ndji i, naame ndji i Tate. Ame naame wo odhondhu me dhi yandjele omwenyo wandje. 16 Ku na odhondhu dhandje dhimo ndhoka ndhihadhi mo motjuunda hehi. Me tha wo oku dhi eta mo. Madhi ka tyaa ondaka yandje, hadhi ningi otjuunda tjimo, dho hadhi kala nomut̯ita umo. 17 “Tate u ntjole, mena lyokutya ame me yandja omwenyo wandje, opo ndji ke u tambule uke. 18 Kaku na tja noumo ngume u ndjeka. Ame omwene me u yandja kehalo lyandje omwene. Ame ndji na odhonkono oku u yandja, ndji na uke odhonkono oku u tambula. Hehi otjo soka Tate hiaa ntjeela, ndji tji ninge.” 19 Okuliyapauka kwa uta uke mokati kOvajuda mena lyodhondaka hendhi. 20 Ovantu ovengi va li amava tyaa: “Jesus u na ondemoni, ma vele epamba. Mamu mu teelele tji?” 21 Ovakwawo hava tyaa: “Nguu na ondemoni kaa ulu okupopya odhondaka ndhii li nyahoka. Ondemoni mai ulu vi okutwikulula omeho ovapot̯i?”
Jesus ka tambulilwe kOvajuda
22 Kwa li otjipito tjokuthipaluka evyaalo lyotempeli moJerusalem, 23 tja li pompepela. Jesus wa li ama ende motempeli motjiwalanda tjaSalomo. 24 Iya Ovajuda ve mu onganena hava tyaa: “Katee nalun̯i mo tu kaleke momalimbililo? Tu heela otjatjili otjene, andaa ove Messias.” 25 Jesus we ve yaka ha tyaa: “Mbe mu heela, atjaa n̯e kamu ndjitavelele. Ovilinga mbyoka mbimba ninga mena lyaTate, ovyo mavi ntjipulula. 26 Iya n̯e kaamu ndjitavele, mena lyokutya n̯e kamudhondhu dhandje. 27 Odhondhu dhandje dhi tyaa ondaka yandje, ndji dhi i, dho dhi ndandula. 28 Ame me dhi pa omwenyo waapehe, dho kadhi na tja mpoka mpamadhi ka yonaka katee apehe. Kaku na tja ngoka ngume dhi mpundu mokuwoko kwandje. 29 Tate, ngoka ngwee dhi mpa, omunene wa pon̯a ovantu avehe, iya kape na tja ngoka nguma ulu oku dhi punda mo mokuwoko kwe. 30 Ame naTate tuvamo.” 31 Ovajuda va nyanga uke omawe ve mu dhipae. 32 Jesus we ve yaka ha tyaa: “Ame mba undapa ovilinga ovingi oviwa mbyoka Tate mbyaa mpa, ndji vi undape mokati ken̯i. Omena lyotjilinga tjin̯i tjomuhembi himamu hala okundhipaela nomawe?” 33 Ovajuda ve mu yaka hava tyaa: “Nt̯e kaatu hala oku ku dhipaa mena lyotjilinga tjontumba otjiwa ngaile, iya omena lyokutya wa penya Kalunga, ove umuntu wanyahinya, iya mo hala okulininga Kalunga.” 34 Jesus we ve yaka ha tyaa: “Moveta yen̯i kamu sonekelwe okutya Kalunga ma tyaa: ‘Ame mba tya, on̯e ookalunga’? 35 Iya andaa mboka mbava pewa odhondaka dhe me ve ithana ookalunga, nomisonekwa kaavi ulu okwiithwa po, 36 mamu ulu vi okutya ame me penye Kalunga, híme tya ame ndjiMunwaKalunga, ame ngoka Tate ngwaa ndinga omudhilikwa, ha ntumu mouye? 37 Ame andaa híme undapa ovilinga vyaTate, hámu ndjitavele. 38 Iya andaa me vi undapa, itavelen̯i ovilinga ovyene, nandahamu ndjitavele, opo mu iwe, n̯e mu tji iwe nawa okutya Tate u li mwaame, naame ndji li muTate.” 39 Wo va li amava hala uke oku mu kambula, atjaa wa dha mo momawoko awo, ha i. 40 Jesus wa tjuna uke tjikoohehinya tjomulonga waJordan, kompuka hoka Johannes nahi hwaa tjatjela ovantu, oko a ka kala. 41 Ovantu ovengi ve ya kuJesus hava tyaa: “Johannes ka undapele otjilingakumithi notjimo, iya ovipuka avihe mbyoka mbyaa popya ouhunga nomulumentu hengu, ovyatjatjili.” 42 Ovantu ovengi ovahoka va itavela muye.
Okut̯a kwaLasarus
1 Omulumentu umo owomokalongo kaBetania nguu tiwa oLasarus, ngwaa li nodhompandje mbali Maria naMarta, wa li ama vele. 2 Maria hengu oye e li ye ngoka ngwaa tilile omadhi odhompadhi dhaMuhonaJesus, he dhi theta nodhondjutji dhe. Ompandje Lasarus wa vadhwa ama vele. 3 Iya odhompandje dha tuma elaka kuJesus hadhi tyaa: “Muhona, epanga lyoye nguu hole ma vele.” 4 Jesus hiee tji tee, ha tyaa: “Ouvela mboka kaau ka twala Lasarus met̯o, owokutumbaleka Kalunga, opo OmunwaKalunga a tumbalekethwe kuwo.” 5 Jesus wa li ae hole Marta, Maria naLasarus. 6 Ye hiaa tee okutya Lasarus ma vele, wa kala uke omatango avali kompuka hoka hwaa vadhwa. 7 Kon̯ima yomatango ngoka avali Jesus wa heela ovalongwa ve ha tyaa: “Tu tjunen̯i uke koJudea.” 8 Ovalongwa ve mu heela hava tyaa: “Rabbi, Ovajuda opo va dhi napano okuhala oku ku dhipaa nomawe, ove napano mo hala uke okutjuna ko?” 9 Jesus wa yaka ha tyaa: “Otjitenya katji na odhowola omulongo nambali, hatjo? Ngoka nguma ende omutenya, kaa putala, mena lyokutya u lwete otjiten̯i tjouye hembu. 10 Iya kwalukele ngoka nguma ende out̯iku, ma putala, mena lyokutya muye kamu na tja otjiten̯i.” 11 Jesus hiaa popi odhondaka hendhi, ha tyaa: “Epanga lyetu Lasarus wa lala, atjaa me hala, ndji ke mu imune po.” 12 Ovalongwa ve mu yaka hava tyaa: “Muhona, andaa wa lala, ma ka veluka.” 13 Jesus wa li ama popi okut̯a kwaLasarus, ovalongwa va li amava tya pamo ma popi okulala olupot̯i. 14 Iya Jesus we ve heela nawa ha tyaa: “Lasarus wa t̯i. 15 Ame mbe hulukwa híhe vadhelwe ko, opo mu kale neitavelo. Ngatu enden̯i kuye.” 16 Iya Tomas, ngoka nguu tiwa oKawiyu, wa heela ovalongwa ovakwawo ha tyaa: “Ngatu enden̯i, nant̯e wo tu ka t̯e pamo naye.”
Jesus eimuko nomwenyo
17 Jesus hiee ya koBetania, wa vadha Lasarus aa ningi ae omatango ane mombila. 18 Okalongo hoka ka li popedhi naJerusalem, odhokilometa ndatu nyahoka. 19 Ovajuda ovengi va vadhwa ave ya kuMarta naMaria oku ve popitha mena lyet̯o lyompandjawo Lasarus. 20 Marta hiaa tee okutya Jesus we ya, wa ya e ke mu wan̯e. Iya Maria we thiwa monganda. 21 Marta wa heela Jesus ha tyaa: “Muhona, ngaile opo wa li, ngai ompandjandje ka t̯ile, 22 atjaa ndji tji i okutya Kalunga me ke ku pa atjihe soka himo mu kumbu.” 23 Jesus we mu heela ha tyaa: “Ompandjoye ma ka imuka po uke.” 24 Marta we mu yaka ha tyaa: “Ndji tji i okutya ma ka imuka po metango lyathiinina meimuko kout̯e.” 25 Jesus we mu heela ha tyaa: “Aame eimuko nomwenyo. Omuntu ngoka ngwaa itavela mwaame, ma ka kala ae na omwenyo, nandaku tiwa wa t̯i. 26 Iya auhe ngoka nguu na omwenyo, ye ha itavele mwaame, kaa t̯i uke katee apehe. Hehi we tji itavele?” 27 Marta wa yaka ha tyaa: “Iinga, Muhona, mba itavela okutya oove Messias, OmunwaKalunga, ngukwa tiwa me ya mouye.”
Jesus ma lili
28 Marta hiaa popi odhondaka hendhi, wa ka ithana omunitje Maria, he mu heele pokampengi ha tyaa: “Omulongethi we ya, me ku pula.” 29 Maria hiee tji tee, wa kulama dhiva, ha i kuye. 30 Iya Jesus wa vadhwa aheya thika mokalongo moka, wa li uke kompuka hoka Marta hwee ke mu wan̯a. 31 Iya Ovajuda mboka mbava vadhwa ave li naMaria monganda amave mu dhimbitha, hive mu mono, hima piti mo ama kanyauka, ve mu landula. Va li amava tya pamo ma i kombila, ma ka lila. 32 Maria hiee ya kompuka hoka hukwa li Jesus, we mu mona, ha twike odhongolo podhompadhi dhe, ye ha tyaa: “Muhona, ngaile opo wa li, ngai ompandjandje ka t̯ile.” 33 Jesus hiee mu mono ama lili, nOvajuda wo mboka mbave ya pamo naye amava lili, wa ihama momutima, ha teketa. 34 Ye we mu pula ha tyaa: “Mwe mu paka pi?” Ve mu yaka hava tyaa: “Muhona, indjo u tale.” 35 Jesus wa lila. 36 Iya Ovajuda hava tyaa: “Taa tuutuu, nahi hiee mu hole!” 37 Atjaa vamo owomuwo hava tyaa: “Haye a twikulula omeho omupot̯i? Ka tjaelele tji Lasarus ahama t̯i?”
Lasarus ma imunwa kout̯e
38 Jesus hiee ya kombila, wa ihama uke momutima. Ombila ya li eleva ndyaa yedhilwa newe. 39 Jesus we ve heela ha tyaa: “Ithen̯i po ewe!” Marta, ompandje yomut̯e, we mu heela ha tyaa: “Muhona, olutu lwa n̯ika, mena lyokutya lwa ningi omatango ane mombila.” 40 Jesus ha tyaa: “Hí ku heelele okutya andaa wa itavele, mo ka mona etumbalo lyaKalunga?” 41 Wo va itha po ewe. Iya Jesus wa tala peulu ha tyaa: “Taa, me ku pandula, ove hiuu ntyaa. 42 Ndji tji i okutya ove u ntyaa apehe, iya me popi odhondaka hendhi mena lyowingi wovantu hembu mbwaa ndjonganene, opo va itavele okutya oove wa ntuma.” 43 Hiaa popi odhondaka hendhi, wa popya peulu ha tyaa: “Lasarus, dha mo!” 44 Iya Lasarus, ngoka ngwaa li aa t̯i, wa dha mo. Odhompadhi dhe nomawoko e vya li avya kutwa novitopa, notjipala tje tja li atja kutwa nelesu. Jesus we ve heela ha tyaa: “Mu kutululen̯i, mu mu yethe.”
Etompo lyokudhipaetha Jesus
45 Ovengi owomOvajuda mboka mbave dhile okupopitha Maria, va mona soka Jesus hiaa ninga, hava itavele muye. 46 Iya vamo owomuwo va ya kOvafarisai, have ve hipululile soka Jesus hiaa ninga. 47 Iya Ovafarisai novayambethi ovanene va konga Otjoongi tjOvanene hava tyaa: “Matu ningi vi? Iya omulumentu hengu ma ningi ovilingatangan̯eko ovingi. 48 Andaa matu mu yetha nyahoka, a twikile monkalo ndjoka, ovantu avehe mava ka itavela muye. Iya Ovaroma mave ke ya, hava han̯auna po otempeli notjiwan̯a tjetu atjihe.” 49 Umo owomuwo nguu tiwa oKaifas, ngoka ngwaa li omuyambethi omunene ombula ndjoka, we ve heela ha tyaa: “N̯e kamu na hímu i. 50 Kamu tji i nan̯i okutya okut̯a kwomuntu umo poluvedhe lwovantu avehe hahe, kwa pon̯a okuyonaka kwotjiwan̯a atjihe?” 51 Tjo otjene, ka popile otjipuka hehi muye omwene, iya omena lyokutya ye wa li omuyambethi omunene ombula ndjoka, wa thimbila nyahoka okutya Jesus ma ka t̯ila otjiwan̯a tjOvajuda, 52 hamena lyotjiwan̯a tjOvajuda atjiika, iya opo wo a kongolole odhondele dhaKalunga avehe mboka mbave li po ava handjana, va ninge engundwa limo. 53 Okudha ketango ndyoka ovanene wOvajuda va taendha ondunge okudhipaa Jesus. 54 Iya Jesus ka endele uke poluhandja mokati kOvajuda, wa ya kondolopa imo ndjii li popedhi nokuti, ndjii tiwa oEfraim, ye ha kala hoka pamo novalongwa ve. 55 Opaasa, otjipito tjOvajuda, ya li popedhi. Ovantu ovengi va dha kovilongo vyokokule, have ya koJerusalem, tainkolo Opaasa ahaiye thika, opo ve likohe ngahi va ninga monteto yawo yOvajuda. 56 Wo va taendha Jesus. Hiva onganene motempeli, ve lipulapula hava tyaa: “N̯e mamu soko vi? Mpaeli kee ya kotjipito?” 57 Ovayambethi ovanene nOvafarisai va vadhwa ava yandja ae elaka okutya andaa ku na ngoka nguu i Jesus mpoka mpae li, nge tji hololole, opo ve mu kambule.
Jesus ma vavekwa moBetania
1 Omatango epandu, tainkolo Opaasa háiye thika, Jesus wa ya koBetania, hoka huku kala Lasarus, omulumentu ngoka Jesus ngwaa imuna kout̯e. 2 Wo ve mu twiila po ovikulya. Marta oye a li ama yandjele ovantu, iya Lasarus wa li umo owomovantu mboka mbava li amava li pamo naJesus. 3 Iya Maria wa itha po otjivavelo tjomadhi onarde yokalu, he e tile kodhompadhi dhaJesus, ye he dhi theta nodhondjutji dhe. Iya ondjuwo aihe ye yulile ethi lyomadhi ngoka. 4 Iya Judas Iskariot, umo owomovalongwa vaJesus, ngoka ngwaa li ame ke mu weleleka, wa popya ha tyaa: 5 “Omena lyatji otjivavelo hehi hihatji landethelwe po odhondenari omathele atatu, dhi yandjwe kovathona?” 6 Hehi ke tji popile, mena lyokutya wa li ae na otjiho novathona, iya omena lyokutya wa li otjimpulu. Ye wa li wo aa tjinda okapapo kodhombongo, nahi u itha mo hitji tuwa mo. 7 Iya Jesus we mu heela ha tyaa: “Mu yethen̯i, hehi we tji ungulile etango lyepako lyandje. 8 Ovathona mu na wo apehe, iya ame híme kala nan̯e apehe.”
Lasarus ma ambwa
9 Engundwa enene lyOvajuda lya tyaa okutya Jesus u li moBetania, hako ve ya. Wo kava ile ko mena lyaJesus aika, va li amava hala okumona wo Lasarus, ngoka Jesus ngwaa imuna kout̯e. 10 Ovayambethi ovanene va taendha ondunge va dhipae wo Lasarus, 11 mena lyotjihipululo tje, Ovajuda ovengi va yetha ovaviyuli vawo, hava itavele muJesus.
Jesus ma kavile ma i koJerusalem
12 Iya ngamuhuka owingi wovantu mboka mbwee ya kotjipito tjOpaasa, wa tyaa okutya Jesus me ya koJerusalem. 13 Iya va itha omavale kovivale, hava i oku ke mu wan̯a. Wo va wololoka hava tyaa: “Hosianna! Nga tumbalekwe hengu ngume ya mena lyaMuhona, ohamba yaIsrael!” 14 Jesus wa mona ombulona, he i kavile, omisonekwa ngahi mavi hee himavi tyaa: 15 “TjaSion, hó tila. Taa tuutuu, Ohamba yoye mai ya, aya kavile kombulona.” 16 Olutenga ovalongwa ve kava li ave yuvite ovipuka mbyoka. Iya Jesus hiaa tumbalekethwa, va thipaluka okutya omisonekwa hembi mavi popi otjipuka hehi, novipuka mbyoka ovantu mbive mu ningila. 17 Ovantu mboka mbava li pamo naJesus, hiaa ithana Lasarus a dhe mo mombila, he mu imuna kout̯e, va hipulula soka hitja ningwa po. 18 Iya owingi wovantu hiwa tee wo okutya Jesus wa ninga otjilingakumithi hehi, ve ya wo oku mu wan̯a. 19 Iya Ovafarisai ve liheela hava tyaa: “Mu lwete okutya kamu na himamu ulu uke. Taa tuutuu, ouye auhe mau mu landula.”
Ovagreka vamo mava taendha Jesus
20 Mokati kamboka mbave dhile kotjipito tjOpaasa okukumba, mwa li Ovagreka vamo. 21 Ve ya kuFilippus ngoka ngwaa dha koBetsaida moGalilea, have mu kumbu hava tyaa: “Taa, matu hala okumona Jesus.” 22 Filippus wa ya, he tji heele Andreas. Andreas naFilippus va ya, have tji heele Jesus. 23 Jesus we ve yaka ha tyaa: “Owola ye thiki, Omuna wOmuntu a tumbalekethwe. 24 Ame me mu heele otjatjili: Ombuma yotjilya andaa kaai wile meheke i t̯ile mo, mai kala vala imo, iya andaa kai t̯ile, mai kwata odhombuma odhingi. 25 Ngoka nguu hole omwenyo we, me u keketha, iya nguu yele omwenyo we mouye hembu, me ke u hupithila momwenyo waapehe. 26 Kwalukele ngoka nguma ndjundapele, nga ndandule, ame hundji li, omuntu wandje oko ma ka kala wo. Tate ma ka tumbaleka kwalukele ngoka nguma ndjundapele.
Jesus ma popi kombinga yokut̯a kwe
27 “Napano omwenyo wandje we ihamenwa, me tya vi uke? Ndji tye: ‘Taa, ntjupitha ndje mowola ndji’? Iya mowola hendji otjo tja ndjeta. 28 Taa, tumbaleketha ena lyoye.” Iya meulu mwa dha ondaka hai tyaa: “Mbe li tumbaleketha, me li tumbaleketha uke.” 29 Owingi wovantu mboka mbwaa li awa kulama mpoka, hiwa tee ondaka hau tyaa: “Ombula ya titima.” Ovakwawo hava tyaa: “Omweengeli we mu popitha.” 30 Jesus we ve yaka ha tyaa: “Ondaka hendji kai popile mena lyandje, ya popi mena lyen̯i. 31 Ouye hembu napano mau koywa. Omutumini wouye hembu napano ma ka yumbwa pondje. 32 Iya hime ka yelwa po pohi, ovantu avehe me ke ve nanena kwaame.” 33 Hehi we tji popya, opo a hololole okutya et̯o ndyoka ndima ka t̯a, li li vi. 34 Owingi we mu yaka hau tyaa: “Oveta ye tu heela okutya Messias ma ka kala ae na omwenyo apehe. Ove mo tya vi iya, himo tya Omuna wOmuntu hengu ma ka yelwa? Omuna wOmuntu aan̯i?” 35 Jesus we ve heela ha tyaa: “Ku na uke okaluvedhe okanunu otjiten̯i atji li mokati ken̯i. Enden̯i, tainkolo amu na otjiten̯i, opo hámu vadhwa ket̯iku. Iya ngoka nguma ende met̯iku, ke ku i hoka huma i. 36 Itavelen̯i otjiten̯i, tainkolo amu na tjo, opo mu ninge odhondele dhotjiten̯i.”
Okuhaitavela kwOvajuda
Jesus hiaa popi odhondaka ndhoka wa dha po, ye he ve holama. 37 Nandaku tiwa wa ninga ovilingatangan̯eko ovingi movipathi vyawo, kava itavelele muye, 38 odhondaka dhomuprofeti Jesaja opo dhi hwithilwe po, hima tyaa: “Muhona, aan̯i ngwaa itavela eteetho lyetu? Aan̯i ngoka Muhona ngwaa holololela odhonkono dhe?” 39 Iya wo kava ulile okwiitavela, mena lyokutya Jesaja u na uke mpaa popya ha tyaa: 40 “Kalunga wa twikitha omeho awo, ye wa kukutika omitima vyawo, omeho awo opo háe ku mono, nomitima vyawo opo hávi koneke, ahamave liteyulula, ndji ve velule.” 41 Jesaja wa popya odhondaka hendhi, mena lyokutya wa mona etumbalo lyaJesus, he mu hipulula. 42 Iya ovengi owomovanene va itavela muJesus, iya mena lyOvafarisai kave tji hipululile movipathi vyovantu, opo háva lambwa mo mosinagoga. 43 Iya wo va li ave hole okupandulwa kovantu okupon̯a okupandulwa kuKalunga.
Odhondaka dhaJesus ndhimadhi popi ekoyo
44 Iya Jesus wa popya peulu ha tyaa: “Ngwaa itavele mwaame, haame a itavele, iya ma itavele ngwaa ntuma. 45 Ngoka ngwaa mbono, wa mono ngoka ngwaa ntuma. 46 Ame mbe ya, ndji kale otjiten̯i tjouye, opo auhe ngoka ngwaa ndjitavele, ahama kala uke met̯iku. 47 Iya kwalukele ngoka nguma tee odhondaka dhandje, ye ahame dhi takametha, ame hime ke mu koya. Ame hí dhile okukoya ouye, iya okutya ndji hupithe ouye. 48 Nguhama ntambula, ye kaa tambula odhondaka dhandje, u na omukoyi ngume mu koyo. Odhondaka ndhoka ndhimba popya, odho madhi ke mu koya etango lyathiinina. 49 Iya ame hí popile mwaame omwene, iya Tate ngwaa ntuma, oye a ntjeela himba thele okupopya. 50 Ame ndji tji i okutya otjitumino tje matji eta omwenyo waapehe. Iya soka himba hee, otjo soka Tate hiaa ntjeela ndji tji popye.”
Jesus ma koho odhompadhi dhovalongwa ve
1 Iya tainkolo etango lyotjipito tjOpaasa háliye ya, Jesus wa li ae tji i okutya owola ye ye thiki okuthiaa po ouye hembu, a ende kwiIhe, ye ngahi a li ae hole mboka ove, mbava li mouye, wa li ae ve hole katee pehulilo. 2 Iya Jesus novalongwa ve hive ya pokulya, omudiapoli wa vadhwa aa twaa omalipulo momutima waJudas yaSimon Iskariot, a weleleke Jesus. 3 Jesus wa li ae tji i okutya Ihe we mu pa ovipuka avihe momawoko e, ye wa li ae tji i okutya ye wa dha kuKalunga, ma ka tjuna kuKalunga. 4 Iya wa kulama povikulya, ye he lidhula omudhalo we wokombanda, ha itha otjihanduke, he lipoleke natjo motjivya. 5 Wa tila omeva melonga lyokulikohela, ha utu okukoha odhompadhi dhovalongwa ve, he dhi theta notjihanduke soka hiee lipoleke natjo motjivya. 6 Iya hiee ya puSimon Petrus, Petrus we mu pula ha tyaa: “Muhona, mo koho odhompadhi dhandje?” 7 Jesus we mu yaka ha tyaa: “Soka hime ningi, nkele napano ku tji i, iya mo ke tji iwa komeho.” 8 Petrus we mu heela ha tyaa: “Hó nkoho kodhompadhi nokanunu!” Jesus we mu yaka ha tyaa: “Iya andaa híme ku koho kumulongwa wandje.” 9 Simon Petrus wa yaka ha tyaa: “Muhona, hó nkoho vala kodhompadhi, iya nkoha ndje wo komawoko nomomutwe.” 10 Jesus wa yaka ha tyaa: “Ngoka ngwee likoha, wa kohoka, kaa hepa okukohwa kakele kodhompadhi dhe. N̯e mwa kohoka, atjaa haamuhe.” 11 Jesus wa ivilwe ngume ke mu weleleka, tjo otjo aa tila: “Haamuhe mwa kohoka.” 12 Iya Jesus hiaa mana okukoha odhompadhi dhawo, wa dhala omudhalo we wokombanda, ha tjuna uke pokulya. Ye we ve pula ha tyaa: “Himbe mu ningile mu tji i? 13 Mu ndjithana Omulongethi noMuhona, mu li mondjila, mena lyokutya aame. 14 Iya andaa aame Muhona nomulongethi wen̯i, mba koho odhompadhi dhen̯i, nan̯e wo kohen̯i ovakwen̯i kodhompadhi. 15 Iya ngahi me mu ningile, nan̯e wo ngatjo mu ninga. 16 Ame me mu heele otjatjili okutya omupika ka pon̯ene omuhona we, nontumwa kai pon̯ene omutumi wayo. 17 Ovipuka hembi andaa mu vi i, muvanalao, andaa mamu vi ningi. 18 “Híme popi n̯e amuhe, mboka mbamba holowola ndji ve i. Iya omusonekwa mboka mau hwithilwa po, mbumau tyaa: ‘Omulumentu ngoka nguma li ovikulya vyandje, wa mpilukile po.’ 19 Hehi me mu heele tjo, tainkolo hátjiya ningwa, opo mu itavele okutya aame, katango matji ningwa. 20 Ame me mu heele otjatjili okutya ngoka nguma tambula auhe ngoka ngume tumu, ma ntambula, nangoka nguma ntambula, ma tambula ngoka ngwaa ntuma.”
Jesus ma hololola eweleleko lye
21 Jesus hiaa popi ovipuka hembi, wa ponga mombepo, ha tyaa: “Ame me mu heele otjatjili okutya umo mun̯e ma ka mbweleleka.” 22 Ovalongwa va ngwangwana, have ke litala kovipala, have lipula okutya nguma hewa aan̯i. 23 Umo owomovalongwa ngoka Jesus ngwaa li ae hole, wa yaamena pontulo yaJesus, tainkolo a li ama li. 24 Simon Petrus we mu n̯anga, he mu heele a pule Jesus okutya ma popi an̯i. 25 Omulongwa ngoka ngwaa yaamena pontulo yaJesus, we mu pula ha tyaa: “Muhona, aan̯i ngoka?” 26 Jesus wa yaka ha tyaa: “Oye ngoka ngume pa onkanko hendji ndjime himi mombiyona.” Ye wa hima onkanko, he i pa Judas yaSimon Iskariot. 27 Judas hiaa li onkanko ndjoka, Satana wa ya muye. Iya Jesus we mu heela ha tyaa: “Soka himo ningi, tji ninga dhiva.” 28 Mumboka mbava li pokulya, kamwa li noumo ngoka ngwaa li ae tji i soka Jesus hiee mu heela. 29 Judas nahi hiaa kala nokapapo kodhombongo, vamo owomovalongwa va soka okutya pamo Jesus we mu heela, a ende, a ka lande soka hiva hepa mena lyotjipito, ne pamo we mu heela a ithile mo ovathona. 30 Judas hiaa tambula onkanko, wa ya dhiva pondje, kokwa li kout̯iku.
Otjitumino otjipe
31 Judas hiaa i pondje, Jesus wa popya ha tyaa: “Napano Omuna wOmuntu wa tumbalekethwa, naKalunga wa tumbalekethwa muye. 32 Andaa Kalunga wa tumbalekethwa muye, okutya Kalunga omwene ma ka tumbaleketha Omuna wOmuntu, me ke mu tumbaleketha dhiva. 33 Vanwandje, híme ka kala uke nan̯e olule. Mamu ka ntaendha, atjaa me mu heele napano soka himba heela Ovajuda okutya kompuka hoka hume i, kaamu ulu okuya ko. 34 Otjitumino otjipe me mu pa tjo, mu kale amu lihole, ngahi ndji mu hole, nan̯e wo kalen̯i amu lihole. 35 Andaa mu lihole, okutya ovantu avehe mava ka iwa okutya n̯e muvalongwa vandje.”
Jesus ma londola ovalongwa ve
36 Simon Petrus we mu pula ha tyaa: “Muhona, mo i pi?” Jesus we mu yaka ha tyaa: “Koo ulu okundandula napano hoka hume i, iya komeho mo ka ndandula.” 37 Petrus we mu pula ha tyaa: “Muhona, omena lyatji hihame ulu oku ku landula napano? Ame mbe lilongekedha okut̯a mena lyoye.” 38 Jesus wa yaka ha tyaa: “We lilongekedha okut̯a mena lyandje? Ame me ku heele otjatjili okutya tainkolo onkondombolo háiya popya, ove mo lintendele tutatu.”
Jesus ondjila notjatjili nomwenyo
1 Jesus wa heela ovalongwa ve ha tyaa: “Omienyo vyen̯i hávi kala avya dhiwele. Itavelen̯i muKalunga, n̯e mu itavele wo mwaame. 2 Monganda yaTate mu na omaluvedhe okukala omengi. Ngaile katja li nyahoka, ngai híme mu heele okutya me ke mu longekedhela oluvedhe. 3 Iya andaa mba i, he ke mu longekedhela oluvedhe, me ka tjuna uke, ndji mu ile, opo mu ka kale hoka hundji li. 4 Ondjila yahoka hume i, mu i i.” 5 Tomas we mu heela ha tyaa: “Muhona, nt̯e katu ku i hoka humo i, ondjila matu i iwa vi?” 6 Jesus we mu heela ha tyaa: “Aame ondjila notjatjili nomwenyo. Kape na tja ngume ya kuTate, ahama pitile mwaame. 7 Ngaile mu ndji i, ngai naTate wo mu mu i, okudha napano mu mu i, n̯e mwe mu mona.” 8 Filippus we mu heela ha tyaa: “Muhona, tu yulikila Iho, soka otjo matu hala vala.” 9 Jesus we mu yaka ha tyaa: “Ame mba kala nan̯e oluvedhe olule, atjaa nan̯i ku ndji i, Filippus? Ngoka ngwaa mbona, wa mona Tate. Omena lyatji iya mo tyaa: ‘Tu yulikila Iho’? 10 Ku itavelele nan̯i, Filippus, okutya ame ndji li muTate, naTate u li mwaame? Odhondaka ndhoka ndhimbe mu heele, híme dhi popi mwaame omwene, iya Tate nguu li mwaame, oye ma undapa ovilinga vye. 11 Ndjitavela ndjen̯i okutya ame ndji li muTate, naTate u li mwaame. Iya andaa kaamu hala okundjitavela, ndjitavela ndjen̯i vala mena lyovilinga mbindji undapa. 12 Ame me mu heele otjatjili okutya ngoka ngwaa itavele mwaame, oye ma ka undapa uke ovilinga ovinene mbyaa pon̯a mbyoka, mena lyokutya ame me i kuTate. 13 Iya kwalukele soka himamu kumbu mena lyandje, me tji ningi, Tate opo a tumbalekethwe mOmuna. 14 Andaa mamu nkumbu tja mena lyandje, me tji ningi.
Ombepo Ondhilikwa mai hipululwa
15 “Andaa mu ntjole, mamu takametha ovitumino vyandje. 16 Ame me ka kumba Tate, e ke mu tumine Omupopili umo, a kale pamo nan̯e apehe. 17 Ombepo hendji yatjatjili ouye kaau ulu oku i tambula, mena lyokutya wo kau i lwete, wo kau i i. Iya n̯e mu i i, mena lyokutya mai kala pamo nan̯e, yo mai ka kala mun̯e. 18 “Ame híme mu thii ngodhothiwa, iya me ka tjuna kun̯e. 19 Andaa pa piti okaluvedhe okanunu, ouye kaau mbono uke, iya n̯e mamu ka mbona. Iya mena lyokutya ame ndji na omwenyo, nan̯e wo mamu ka kala nomwenyo. 20 Etango ndyoka mamu ka iwa okutya ame ndji li muTate, nan̯e mu li mwaame, naame ndji li mun̯e. 21 “Ngoka nguma tambula ovitumino vyandje, ye he vi takametha, u ntjole. NaTate wo ma kala ae hole ngoka nguu ntjole, naame me ka kala andji mu hole, he liholololele ye.” 22 Judas, nguhe thi Judas Iskariot, ha tyaa: “Muhona, omena lyatji himo hala okuliholololela nt̯e, hihamo liholololele ouye?” 23 Jesus we mu yaka ha tyaa: “Iya kwalukele ngoka nguu ntjole, ma takametha odhondaka dhandje. Tate ma ka kala ae mu hole, iya nt̯e naTate matu ya kuye, hatu kala muye. 24 Ngoka nguhe ntjole, kaa takametha odhondaka dhandje. Iya odhondaka hendhi ndhimbe mu heele, hadhandje omwene, odhaTate ngoka ngwaa ntuma. 25 “Iya ovipuka hembi mbe mu heele vyo, tainkolo andji li pun̯e. 26 Iya Omupopili, Ombepo Ondhilikwa, ngoka Tate nguma ka tuma mena lyandje, oye me ke mu longa avihe, he ke mu thipalukitha ovipuka avihe mbyoka mbimbe mu heela. 27 “Ouwa me mu thiile wo. Ouwa wandje omwene me mu pa wo. Ame híme mu pa wo ngouye hiuu yandja. Omienyo vyen̯i hávi dhiwele, n̯e hámu tila. 28 Mwa tee himbe mu heele okutya me i, iya me ka tjuna kun̯e. Ngaile mu ntjole, ngai mamu hulukwa, hime i kuTate, mena lyokutya Tate omunene, wa mpon̯a. 29 Ame me mu heele tjo napano, tainkolo hátjiya ningwa, opo mu itavele, himatji ka ningwa. 30 Híme popi uke nan̯e olule, mena lyokutya omutumini wouye hembu me ya, atjaa ye ke na tja odhonkono okuntumina. 31 Iya ouye opo u iwe okutya ame ndji hole Tate, me undapa ngahi a ntjeela. “Kulamen̯i, tu dhen̯i po hempa.
Jesus omuvinyu watjatjili
1 “Aame omuvinyu watjatjili. Tate oye e li omwene wotjuundo tjomivinyu. 2 Ye ma tete ko ontai aihe kwaame ndjihamai ma ovinyango, iya ontai aihe ndjimai ma, me i thevethwa, i me ovinyango ovingi. 3 N̯e mwa thevethwa ae kodhondaka ndhoka ndhimbe mu heela. 4 Kalen̯i mwaame, naame me kala mun̯e. Ngontai hihamai ulu okuma, andaa kai li komuti, nan̯e kaamu ulu okuma, andaa kaamu kala mwaame. 5 “Aame omuvinyu, n̯e mudhontai. Nguma kala mwaame, naame me kala muye, ye ma ma otjingi, iya andaa kaamu kala mwaame, kamu na himamu ulu okuninga. 6 Nguhama kala mwaame, ma yekelwahi ngontai, ha kukuta. Odhontai madhi ongedhwa, hadhi yumbwa momulilo, hadhi pi. 7 Andaa mamu kala mwaame, nodhondaka dhandje hadhi kala mun̯e, atjihe soka himamu hala okukumba, mamu ke tji ningilwa. 8 Andaa mamu ma ovinyango ovingi, Tate ma tumbalekethwa, n̯e mamu ile ovalongwa vandje. 9 Tate ngahi e ntjole, naame otjo ndji mu hole; kalen̯i mohole yandje. 10 Andaa mamu takametha ovitumino vyandje, mamu kala mohole yandje, ngaame himba takametha ovitumino vyaTate, me kala mohole ye. 11 “Hehi mbe mu heele tjo, opo ehuluko lyandje li kale mun̯e, nehuluko lyen̯i li kale alya hwithilwa po. 12 Otjitumino tjandje hootjohi, okutya mu kale amu lihole ngaame hindji mu hole. 13 Kape na omuntu nguu na ohole ndjaa pon̯a oyomuntu nguma yandjele omapanga e omwenyo we. 14 N̯e mumapanga andje, andaa mamu ningi soka hime mu heele. 15 Híme mu ithana uke ovapika, mena lyokutya omupika ke tji i soka omuhona we hima undapa. Iya ame me mu ithana omapanga andje, mena lyokutya ovipuka avihe mbimba tyaa kuTate, mbe mu heela vyo. 16 Han̯e mwa ntjolowola, iya ame mbe mu holowola, mbe mu holowola mu ende ko, mu ka me ovinyango mbimavi kala ko, opo atjihe himamu kumbu Tate mena lyandje, e mu pe tjo. 17 Soka hime mu heele hootjohi okutya kalen̯i amu lihole.
Okuliyele kwouye
18 “Ouye andaa u mu yele, kalen̯i amu tji i okutya aame wa kala au yele olutenga. 19 Ngaile mwa li owomouye, ngai ouye u hole ovantu wawo. Iya ame mbe mu holowola mo mouye, mena lyokutya n̯e kamuwomouye, iya ouye u mu yele. 20 Thipaluken̯i soka himbe mu heela he tyaa: ‘Omupika ka pon̯ene omuhona we.’ Andaa ovantu va ntaata, nan̯e wo mave ke mu taata. Andaa va takametha odhondaka dhandje, nodhen̯i wo mave ke dhi takametha. 21 Iya ovipuka hembi avihe ovyo mave ke mu ningila mena lyokutya n̯e muvalongwa vandje, mena lyokutya kave mu i ngoka ngwaa ntuma. 22 Ngaile ame hí dhile, he ve heele, ngai wo kave na tja onkali. Iya napano wo kave na uke notjimo okulipopila kodhonkali dhawo. 23 Ngoka nguu ndjele, u yele wo Tate. 24 Ngaile mba li ahe undapele mokati kawo ovilinga mbyoka mbihavi undapelwe komuntu umo, ngai wo kave na tja onkali. Iya napano ve tji mona, wo ve tu yele nt̯e naTate. 25 Iya ondaka hendji ndjaa sonekwa moveta yawo, i tha okuhwithilwa po ndjimai tyaa: ‘Wo ve ndjele vala, atjaa ame hí na himbe ve ninga.’ 26 “Iya Omupopili hime ya, Ombepo yatjatjili ngoka nguma dhi kuTate, ame me ke mu tuma, ma ka dha kuTate, oye ma ka ntjipulula. 27 Nan̯e wo mamu ntjipulula, mena lyokutya mwa kala pamo naame okudha keutilo.
Ovalongwa mava ka lambwalambwa 1 “Ovipuka hembi mbe mu heela vyo, opo hámu yetha eitavelo. 2 Ovanene wOvajuda mave ke mu lamba mo modhosinagoga dhawo. Iya owola mai ke ya, katango auhe ngume mu dhipaa, ma ka soka okutya aa ningi nyahoka, ma undapele Kalunga. 3 Ovipuka hembi mave ke mu ningila vyo, mena lyokutya kave ndji i, naTate kave mu i. 4 Iya avihe hembi mbe mu heele vyo, owola yatjo aye thiki, mu thipaluke okutya mbe mu heela tjo.
Otjilinga tjOmbepo Ondhilikwa
“Ovipuka hembi hí mu heelele vyo peutilo, mena lyokutya mba li pun̯e. 5 Iya napano me i kungwaa ntumine, kape na tja noumo mun̯e nguma mpula ha tyaa: ‘Mo i pi?’ 6 Iya mena lyokutya mbe mu heele ovipuka hembi, omitima vyen̯i vya etetha onkenda. 7 Iya ame me mu heele otjatjili okutya onawa hime i mena lyen̯i, mena lyokutya andaa híme i, iya Omupopili kee ya kun̯e. Iya andaa me i, okutya me ke mu tuma kun̯e. 8 Omupopili hime ke ya, ma ka yulikila ovantu wouye ouhunga noulundhi nouhunga nouvyuuki nekoyo lyaKalunga. 9 Ye me ke ve yulikila oulundhi wovantu, mena lyokutya kava itavelele mwaame. 10 Ye me ke ve yulikila ouvyuuki, mena lyokutya me i kuTate, n̯e kaamu ka mbona uke. 11 Ye me ke ve yulikila ekoyo lyaKalunga, mena lyokutya omutumini wouye hembu wa koywa. 12 “Ndji na uke ovipuka ovingi oku mu heela, atjaa kaamu vi ulu oku vi tyaa napano. 13 Ombepo yatjatjili himai ya, mai ke mu longa otjatjili atjihe. Yo kaai ka popya muyo oyene, iya mai ke mu heela soka hiya tyaa, mai ke mu hipululila ovipuka mbyoka mbimavi ke ya. 14 Yo mai ka ntumbaleka, mena lyokutya mai ke mu hipululila himai ka tambula kwaame. 15 Ovipuka avihe vyaTate ovyandje, otjo me tile Ombepo mai ke mu hipululila himai ka tambula kwaame.
Otjinkendeleka nehuluko
16 “Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona.” 17 Iya vamo owomovalongwa ve ve lipula hava tyaa: “Matji tya vi, hime tu heele hima tyaa: ‘Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona’? He tu heele uke ha tyaa: ‘Hehi matji ningwa, mena lyokutya me i kuTate.’ ” 18 Iya wo ve lipula hava tyaa: “Ma hala okutya vi hima tyaa: ‘Okaluvedhe okanunu’? Katu yuvite okutya ma hala okutya vi.” 19 Jesus wa iwa okutya mava hala oku mu pula. We ve heela ha tyaa: “Mamu lipula tji? Ame mbe mu heela okutyaa: ‘Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona.’ 20 Ame me mu heele otjatjili okutya mamu ka lila, hamu ka etetha onkenda, iya ouye mau ke hulukwa. Mamu ka kala notjinkendeleka, iya otjinkendeleka tjen̯i matji ka tjituka ehuluko. 21 Omukadhintu andaa me lipa omwenyo, u etetha onkenda, mena lyokutya owola ye ye thiki. Iya ondele andaa wa yumukwa, ka thipaluka oviihamo vye mena lyehuluko, mena lyokutya omuntu we ya mouye. 22 Iya napano nan̯e mwa etetha onkenda, atjaa me ke mu mona uke, nomitima vyen̯i mavi ke hulukwa, ehuluko ndyoka kape na tja ngume ke mu nyeka lyo. 23 “Etango ndyoka, kamu na himamu ka mpula. Ame me mu heele otjatjili okutya atjihe soka himamu kumbu kuTate amamu tumbula ena lyandje, me ke mu pa tjo. 24 Katee napano kamu na himuya kumba amamu tumbula ena lyandje, kumben̯i, mamu pewa, ehuluko lyen̯i opo li hwithilwe po.
Jesus wa ula ouye odhonkono
25 “Ame mbe mu heele ovipuka hembi momaeli. Owola mai ke ya, katango háme ka popya uke momaeli, iya me ke mu heela odhondaka ndhaa thituluka ouhunga naTate. 26 Etango ndyoka mamu ka kumba Tate amamu tumbula ena lyandje, haame uke me ke mu kumbila kuTate. 27 Iya Tate omwene u mu hole, mena lyokutya mu ntjole, mwa itavela okutya mba dha kuKalunga. 28 Ame mba dha kuTate, he ya mouye, iya me thii po uke ouye, he i kuTate.” 29 Ovalongwa ve, ve mu heela hava tyaa: “Napano mo popi odhondaka ndhaa thituluka, koo popi uke momaeli. 30 Napano tu tji i okutya ovipuka avihe u vi i, koo hepa omuntu ngume ku pula omapulo. Hehi tje tu itaveletha okutya ove wa dha kuKalunga.” 31 Jesus we ve yaka ha tyaa: “Napano mwa itavele? 32 Taa tuutuu, owola mai ya, yo ye ya ae, mamu ka handjana po, auhe ma ka ya koyawo. N̯e mamu ka nt̯iaa po aika. Iya hí li po aika, mena lyokutya Tate u li pamo naame. 33 Ovipuka hembi mbe mu heele vyo, opo mu kale nouwa mwaame. N̯e mu na omaudheu mouye, atjaa hámu tila, ame mba ula ouye odhonkono!”
Jesus me likumbile 1 Jesus hiaa popi ovipuka hembi, wa yela omeho e, ha tala keulu ha tyaa: “Taa, owola ye ya, tumbaleketha omunoye, omunoye e ku tumbalekethe. 2 Ngahi we mu pa odhonkono okutumina ovantu avehe, opo a yandje omwenyo waapehe kuwo avehe mboka mbawe mu pa. 3 Omwenyo waapehe hoowombu, okutya ve ku iwe ove Kalunga aika katjatjili, wo va iwe wo Jesus Kristus, ngoka nguwa tuma. 4 Ame mbe ku tumbaleketha kombanda yohi, mba hwithila po otjilinga soka hiwa mpa, ndji tji undape. 5 Taa, iya napano ntumbaleketha ndje movipathi vyoye netumbalo lyoye ndyoka ndimba li nalyo, tainkolo ouye háuya utwa.
Jesus ma kumbile ovayapostoli ve
6 “Ena lyoye mbe li holololela ovantu mboka womouye mbawa mpa. Wo va li owoye, ove we ve mpa. Wo va takametha odhondaka dhoye. 7 Iya napano ve tji i okutya atjihe soka hiwa mpa, tja dha kwoove. 8 Iya ame mbe ve pa odhondaka ndhoka ndhiwa mpa, wo ve dhi tambula. Wo ve tji i okutya ame mba dha tjatjili kwoove, wo va itavela okutya ove wa ntuma. 9 “Me ve kumbile, híme kumbile ouye, iya owomboka mbawa mpa, mena lyokutya owoye. 10 Otjandje atjihe otjoye, otjoye otjandje, mba tumbalekethwa muwo. 11 Ame hí li uke mouye, me ya kwoove, wo ve li mouye. Taa omudhilikwa, ve takametha mena lyoye ndiwa mpa, opo va ile omuntu umo ngant̯e naove hitu li umo. 12 Ame himba li pamo nawo, mbe ve takametha mena lyoye ndiwa mpa. Kaku na tja noumo ngwaa kekethwa, kakele kangoka ngwaa thele okukeka, omusonekwa opo u hwithilwe po. 13 Iya napano ame me ya kwoove, iya tainkolo ndji li mouye, me popi ovipuka hembi, opo va kale nehuluko lyandje, lyo li hwithilwe po muwo. 14 Ame mbe ve pa odhondaka dhoye, nouye mau kala au ve yele, mena lyokutya wo hawomouye, ngaame hihe thi owomouye. 15 Ame híme kumbu, okutya u ve ithe mo mouye, iya me kumbu u ve amene kouvi. 16 Ngahi hé thi owomouye, iya nawo hawomouye. 17 Ve ninga ovadhilikwa motjatjili, odhondaka dhoye odhatjatjili. 18 Ngahi wa ntuma mouye, naame wo otjo mbe ve tuma mouye. 19 Ame me lidhilike mena lyawo, opo nawo va ningwe ovadhilikwa motjatjili.
Jesus ma kumbile ovaitaveli avehe
20 “Háwo aveika hemba mbame kumbile, iya namboka wo mbava itavela keteetho lyawo. 21 Me ve kumbile, opo avehe va ile omuntu umo. Taa, nawo ngava kale munt̯e, ngaove hiuu li mwaame, naame hindji li mwoove. Ngava ninge omuntu umo, opo ouye u itavele okutya ove wa ntuma. 22 Ame mbe ve pa etumbalo ndyoka ndiwa mpa, opo va ninge umo, ngant̯e naove hitu li umo. 23 Ame ndji li muwo, naove omwaame, opo va kale moukumo mbwee lihwile po, ouye opo u iwe okutya ove wa ntuma, ove u ve hole, ngahi u ntjole. 24 “Taa, me hala mboka mbawa mpa, va kale wo pamo naame hoka hundji li, opo va tale etumbalo lyandje, etumbalo ndyoka ndiwa mpa, mena lyokutya ove wa kala au ntjole, tainkolo ouye háuya utwa. 25 Taa omuvyuuki, ouye kau ku i, iya ame ndji ku i, namboka ovandje ve ku i okutya ove wa ntuma. 26 Ame mbe ve ivithila ena lyoye, me ka twikila oku tji ninga, opo ohole ndjoka ndjuu ntjole nayo i kale muwo, naame ndji kale muwo.”
Jesus ma kambulwa
1 Jesus hiaa popi ovipuka hembi, wa pita mo pamo novalongwa ve, ha yauka ondondhi yaKedron, hoka hukwa li otjuundo, moka mwaa ya novalongwa ve. 2 Judas, ngoka ngwee mu weleleka, wa li wo ae i oluvedhe ndoka, mena lyokutya Jesus novalongwa ve nahi va onganena ko otwingi. 3 Iya Judas wa ya kotjuundo hoka nengundwa lyovakwavita navamo owomovayungi wotempeli, mbava tumwa okudha kovayambethi ovanene nokOvafarisai. Ve ya ko novithithi vyomulilo nodholamba novilwitho. 4 Iya Jesus atjihe wa li ae tji i himatji ke mu vadha, wa ya nokuwo, he ve pula ha tyaa: “Mamu taendha an̯i?” 5 Wo ve mu yaka hava tyaa: “OJesus Omunasareta.” Jesus we ve heela ha tyaa: “Aame hengu.” Judas wo, omuweleleki we, wa li aa kulama pamo nawo. 6 Iya Jesus hiee ve heele ha tyaa: “Aame hengu,” va tjuna otjan̯imwan̯imwa, have lisata pohi. 7 Jesus we ve pula uke ha tyaa: “Mamu taendha an̯i?” Ve mu yaka hava tyaa: “OJesus Omunasareta.” 8 Jesus we ve heela ha tyaa: “Ame mbe mu heele okutya aame hengu, iya andaa aame mamu taendha, ovalumentu hemba ve yethen̯i va ende.” 9 Ye wa popya nyahoka, opo odhondaka ndhoka ndhaa popile dhi hwithilwe po ndhimadhi tyaa: “Ame hí kekethele po noumo mumboka mbawa mpa.” 10 Simon Petrus ngwaa li nomukonda, we u pweya mo, ha tono omupika womuyambethi omunene, he mu kopola okutwi kwokokulyo. Ena lyomupika ngoka u tiwa oMalkus. 11 Jesus wa heela Petrus ha tyaa: “Tjun̯a mo omukonda woye motjilalo. Hé nu otjinwino himba pewa kuTate?”
Jesus kotjipala tjaHannas
12 Iya ovakwavita nomuviyuli wawo novayungi wotempeli va kambula Jesus, have mu kutu. 13 Olutenga ve mu twala kuHannas, mena lyokutya oye a li iheivi yaKaifas, ngoka ngwaa li omuyambethi omunene ombula ndjoka. 14 Kaifas oye e li ye ngoka ngwaa heelele Ovajuda omaeli okutya hahe omuntu umo oye a t̯e poluvedhe lwovantu avehe.
Petrus me litendele Jesus
15 Simon Petrus nomulongwa omukwawo va landula Jesus. Omulongwa ngoka omukwawo ngwaa li ae iwe komuyambethi omunene, wa ya pamo naJesus mokati konganda yomuyambethi omunene. 16 Iya Petrus wa kulama pondje pomuvelo. Omulongwa omukwawo ngoka ngwaa li ae iwe komuyambethi omunene, wa pita mo, ha popitha omukadhona omuyungi wopotjivelo, ha eta Petrus mokati. 17 Omukadhona ngoka omuyungi wopotjivelo wa pula Petrus ha tyaa: “Ove haove wo umo owomovalongwa womulumentu ngu?” Petrus we mu yaka ha tyaa: “Aai, ame haame.” 18 Ovapika novayungi va li ava kulama pomulilo mbuva ten̯a, amava ungulukwa, mena lyokutya kwa li outalala. Petrus naye wo wa li aa kulama pamo nawo pomulilo ama ungulukwa.
Jesus kotjipala tjaKaifas
19 Omuyambethi omunene wa pula Jesus ouhunga novalongwa ve nelongo lye. 20 Jesus we mu yaka ha tyaa: “Ame ndji popya apehe movipathi vyovantu avehe. Mba longa apehe modhosinagoga nomotempeli, moka mumu ongana Ovajuda avehe. Ame hí popile notjimo meholamo. 21 Omena lyatji himo mpula? Pula ovantu mboka mbava tyaa soka himbe ve heela. Iya himba popya ve tji i.” 22 Iya Jesus hiaa popi odhondaka ndhoka, omuntu umo owomovayungi mboka mbava li ava kulama mpoka, we mu tona epi, ha tyaa: “Otjo mo yaka momuyambethi omunene nyahoka?” 23 Jesus we mu yaka ha tyaa: “Andaa mba popi navi, heela auhe ngoka nguu li hempa okutya otjitji. Iya andaa himba popi tji li mouhunga, mo ntonene tji?” 24 Iya Hannas we mu tuma ae li modhonkuto, he mu tumu komuyambethi omunene Kaifas.
Petrus me litendele uke Jesus
25 Petrus wa li aa kulama pomulilo, ama ungulukwa. Iya mboka mbava li pamo nawo ve mu pula hava tyaa: “Ove haove wo umo owomovalongwa ve?” Petrus we litendela ha tyaa: “Aai, ame haame.” 26 Umo owomovapika womuyambethi omunene, owawo womulumentu ngoka Petrus ngwaa kopolele okutwi, wa heela Petrus ha tyaa: “Hí ku mwene motjuundo pamo naye?” 27 Petrus we litendela uke, iya dhivadhiva onkondombolo hai popi.
Jesus kotjipala tjaPilatus
28 Iya omuhuka omunene ovakwavita va itha mo Jesus moyaKaifas, have mu twala kombala yomutumini Omuroma. Iya Ovajuda mombala kava ile mo, mena lyokutya va li amava hala okukala ava kohoka, opo va ule okulya ondjona yOpaasa. 29 Iya Pilatus wa pita mo, ha i kuwo, he ve pula ha tyaa: “Omulumentu nguka mamu mu kondjethele tji?” 30 Wo ve mu yaka hava tyaa: “Omulumentu hengu ngaile ka ningile ovilinga ovivi, ngai nt̯e katu mu etele kwoove.” 31 Iya Pilatus we ve heela ha tyaa: “Mu ithen̯i po ovene, mu ke mu koye moveta yen̯i.” Ovajuda ve mu yaka hava tyaa: “Nt̯e twa tjaelwa okudhipaa omuntu.” 32 Hehi tja ningwa, opo odhondaka ndhoka Jesus ndhaa popya dhi hwithilwe po, hiaa hololola okutya et̯o ndyoka ndima t̯i, li li vi. 33 Pilatus, wa tjuna uke mombala, ha ithana Jesus, ye he mu pula ha tyaa: “Oove ohamba yOvajuda?” 34 Jesus wa yaka ha tyaa: “Epulo hendi lya dhi mwoove omwene ne omovantu vamo mbava ntjipulula pwoove?” 35 Pilatus we mu yaka ha tyaa: “Ame ndjiMujuda? Ovantu wotjiwan̯a tjoye novayambethi vawo ovene owo ve ku eta kwaame. Wa ningi tji?” 36 Jesus wa yaka ha tyaa: “Ouhamba wandje hawomouye hembu. Ngaile ouhamba wandje wa li owomouye hembu, ngai ovantu vandje va nkondjele, ahame yandjwa momawoko Ovajuda. Iya ouhamba wandje hawahempa.” 37 Pilatus we mu pula ha tyaa: “Oove ohamba nan̯i?” Jesus we mu yaka ha tyaa: “U li mondjila himo tya ndjihamba. Otjo mba yumukilwa, tjo otjo mbe dhila mouye hembu, opo ndji popye otjatjili. Auhe nguu li motjatjili, ma nteelele.” 38 Pilatus we mu pula ha tyaa: “Otjatjili otjitji?”
Jesus ma koyelwa et̯o
Pilatus hiaa popi nyahoka wa tjuna uke pondje kOvajuda ha tyaa: “Ame hí lwete mo onkali muye. 39 Iya pomatango otjipito tjOpaasa mu na onkalo yoku mu kutululila onkwatwa imo. Mamu hala ndji mu kutululile ohamba yOvajuda?” 40 Iya wo va wololoka uke unene hava tyaa: “Aai, haye ngoka! Nt̯e matu hala Barabas!” Iya Barabas wa li omputji.
Ovakwavita mava tono Jesus
1 Iya Pilatus wa itha po Jesus, ye he mu tonetha. 2 Ovakwavita va manga ohala yomakuya, have mu dhaleke yo komutwe, iya have mu dhaleke omudhalo omunene wopurpuri. 3 Va kala amave ya kuye, hava tyaa: “Lyepeko, ohamba yOvajuda!” Have mu tono nomapi motjipala. 4 Pilatus wa tjuna uke pondje kOvajuda ye ha tyaa: “Taa tuutuu, mbe mu eta hempa pondje pun̯e, opo mu iwe okutya hí lwete mo onkali muye.” 5 Jesus wa pitithwa mo aa dhalekwa ohala yomakuya nomudhalo omunene wopurpuri. Pilatus we ve heela ha tyaa: “Mu talen̯i!” 6 Iya ovayambethi ovanene novayungi hive mu mono, va wololoka hava tyaa: “Mu papela komutjaakano! Mu papela komutjaakano!” Pilatus we ve heela ha tyaa: “Mu ithen̯i po ovene, n̯e mu mu papele komutjaakano, mena lyokutya ame hí lwete mo onkali muye.” 7 Ovajuda ve mu yaka hava tyaa: “Nt̯e tu na oveta ndjoka ndjimai tyaa: Wa thele okut̯a, mena lyokutya we lininga OmunwaKalunga.” 8 Pilatus wa tilile unene hiaa tee odhondaka ndhoka. 9 Ye wa tjuna uke mombala, ha pula Jesus ha tyaa: “Wa dha pi?” Iya Jesus ke mu yakele. 10 Pilatus we mu pula ha tyaa: “Koo ndjaka? Ku tji i okutya ndji na odhonkono oku ku kutulula, ye ndji na odhonkono oku ku papeletha komutjaakano?” 11 Jesus we mu yaka ha tyaa: “Ku na tja odhonkono okunkondjetha, andaa ku dhi pelwe kuKalunga. Iya nomulumentu ngoka ngwaa ndjandja kwoove, onkali ye ya pon̯a uke oyoye.” 12 Iya okudha mpoka Pilatus wa halele nodhonkono okukutulula Jesus, atjaa Ovajuda va wololoka hava tyaa: “Omulumentu hengu andaa we mu kutulula, ndino haove epanga lyomukesari, mena lyokutya auhe ngoka ngume liningi ohamba, ondjedhi yomukesari!” 13 Iya Pilatus hiaa tee odhondaka ndhoka, wa twala Jesus pondje, ye ha kala pohi kotjipunditumino poluvedhe ndoka nduu tiwa ondambo yOmawe, mOtjiheberi “Gabbata.” 14 Owola ya li ontyamulongo nambali yokomutenya yetango lyokulilongekedhela Opaasa. Pilatus wa heela Ovajuda ha tyaa: “Taa tuutuu, ohamba yen̯i hooyondji!” 15 Iya Ovajuda mboka va wololoka hava tyaa: “Mu dhipaa! Mu dhipaa! Mu papela komutjaakano!” Pilatus we ve pula ha tyaa: “Nge papele ohamba yen̯i komutjaakano?” Ovayambethi ovanene va yaka hava tyaa: “Nt̯e katu na tja ohamba, tu na vala omukesari!” 16 Iya Pilatus wa yandja Jesus kuwo, opo a ka papelwe komutjaakano.
Jesus ma papelwa komutjaakano
Ovakwavita va itha po Jesus, 17 ye he litjindile ko omutjaakano we omwene, he ya kOkalundu kOtjoolotwe, mOtjiheberi matji tya oGolgata. 18 Hoka oko ve mu papela komutjaakano. Jesus wa papelwa pamo novalumentu vavali, umo okokulyo nomukwawo okokumbinda kwe, naJesus pokati kawo. 19 Pilatus wa soneka wo odhondaka dhomutwe, ye he dhi twaa komutjaakano waJesus. Dha sonekelwe hinyahi: “Jesus Omunasareta, Ohamba yOvajuda.” 20 Ovajuda ovengi va tanga odhondaka ndhoka, mena lyokutya oluvedhe mpoka Jesus mpaa papelelwa komutjaakano, pa li popedhi notjitungwalongo. Odhondaka ndhoka dha sonekelwe mOtjiheberi, mOtjilatina nomOtjigreka. 21 Ovayambethi ovanene wOvajuda va heela Pilatus hava tyaa: “Hó soneke okutya ‘Ohamba yOvajuda,’ iya u tyaa: ‘Omulumentu hengu u tya, aame ohamba yOvajuda.’ ” 22 Pilatus wa yaka ha tyaa: “Soka himba soneke, mba soneke ae.” 23 Iya ovakwavita hiva papele Jesus komutjaakano, va itha po omidhalo vye, have vi yapaula movipuka vine, omukwavita auhe wa pewa otjipuka tjimo. Wo va itha po omudhalo umo wokohi mbwaa tungwa nomawoko, mbuhau na tja omupampo nokanunu. 24 Iya ovakwavita ve liheela hava tyaa: “Hátu u tete, iya tu undapethen̯i otjiholowoletho, opo tu mone okutya mau ningi owaan̯i.” Hehi ve tji ninga, omisonekwa opo vi hwithilwe po mbyoka mbimavi tyaa: “Wo ve liyandjela omidhalo vyandje, omudhalo wandje ve liyandjela wo, amava undapetha otjiholowoletho.” Ovakwavita otjo va ninga. 25 Popedhi nomutjaakano waJesus pa kulamene ina naina yomunene, Maria, omukadhintu waKleopas naMaria Magdalena. 26 Jesus hiaa mono ina nomulongwa ngoka nahi ngwee hole, ava kulama mpoka, wa heela ina ha tyaa: “Mee, omunoye oyo ngoka.” 27 Ha wedha ko uke, ha heele omulongwa we ha tyaa: “Taa tuutuu, nyoko oyo ngoka.” Powola vala ndjoka omulongwa wa tambula Maria, a kale monganda ye.
Et̯o lyaJesus
28 Jesus wa li ae tji i okutya napano ovipuka avihe vya hwithilwa po. Omusonekwa opo u hwithilwe po, wa popya ha tyaa: “Mba t̯i onyota.” 29 Kwa li ombiya ndjee yula ovinyu mbyaa lula. Ovakwavita va tjava otjitjawo movinyu mbyaa lula, have tji twaa kotjingenge, have tji yelele kotjinyo tjaJesus. 30 Hiaa makele ovinyu mbyoka mbyaa lula ha tyaa: “Avihe vya hwithilwa po!” Iya wa yongameka omutwe we, tjau ha t̯i.
Jesus ma twelwa pontyo
31 Iya Ovajuda mena lyokutya tja li etango lyokulilongekedhela Esabati, va li ahamava hala ovivimbi vi kale avya yendjelela komitjaakano mEsabati ndyoka ndyaa tumbuka. Va kumba Pilatus, opo va tjatjaule omipindi vyovalumentu mboka mbava papelwa, wo va ithwe ko komitjaakano. 32 Ovakwavita va ya, hava tjatjaula omipindi vyomulumentu ngoka owolutenga novyomukwawo ngoka nguva papelwa naye. 33 Iya hive ya puJesus, va mona okutya hengu wa t̯i ae lukulu, iya ahamava tjatjaula omipindi vye. 34 Iya umo owomovakwavita wa twela Jesus neonga pontyo, hamu dhi ombindhi nomeva. 35 Ngoka ngwee tji mona, oye e tji hipulula. Nt̯e tu tji i okutya soka hima popi, otjatjili, naye u tji i okutya ma popi otjatjili, opo nan̯e wo mu itavele. 36 Hehi tja ningwa, opo omisonekwa vi hwithilwe po mbyoka mbimavi tyaa: “Kaa tjatjaulwa et̯ipa nolimo.” 37 Omusonekwa omukwawo uke mau tyaa: “Ovantu mava ka tala kungoka nguva twele pontyo.”
Jesus ma pakwa
38 Kon̯ima yovipuka hembi Josef owokoArimatia, ngwaa li omulongwa waJesus meholamo mena lyokutila Ovajuda, wa kumba Pilatus, a ithe ko otjivimbi tjaJesus. Pilatus we mu itavela. Josef wa itha ko otjivimbi, ha i natjo. 39 Nikodemus, ngoka ngwee dhile kuJesus out̯iku, naye wo we ya pamo naJosef, ae na otjidhimba tjoaloe hitja lumbwalumbwa mumo nomira hitji lithike pondjundo yodhokilo omilongo vitatu. 40 Ovalumentu hemba vavali va itha po otjivimbi tjaJesus, wo have tji dhingile movitopa vyodholiina, mumu na otjidhimba. Hendji oyo ya li onteto yOvajuda yokupaka. 41 Koluvedhe hoka Jesus hwaa papelelwa komutjaakano, kwa li otjuundo. Motjuundo soka mwa li ombila ompe moka muhamuya pakwa omuntu noumo. 42 Iya va paka Jesus mombila ndjoka, mena lyokutya lya li etango lyOvajuda lyokulilongekedha, yo ombila ya li popedhi.
Mombila mu li vala
1 Iya omuhuka omunene wetango lyolutenga lyotjivike, tainkolo akwa dhiwele, Maria Magdalena wa ya kombila, ha mono okutya ewe lya ithwa po pombila. 2 Wa dhamuka, ha i kuSimon Petrus nokomulongwa omukwawo ngoka Jesus ngwaa li ae hole, he ve heele ha tyaa: “Va itha mo Muhona mombila, nt̯e katu tji i mpave mu twaa.” 3 Iya Petrus nomulongwa omukwawo va ya kombila. 4 Wo aveevali ve ke litenga ko, atjaa omulongwa ngoka omukwawo wa thiaa po Petrus, ye oye e thika ko olutenga kombila. 5 Wa vandamena mo, ha mono ovitopa vyoliina, atjaa ka ile mo. 6 Simon Petrus we ya wo, he mu landula, ha hiti mombila. Wa mona mo ovitopa vyoliina 7 nelesu ndyoka ndyaa li alya kutwa komutwe waJesus, atjaa elesu kalya li povitopa vyoliina, lya li alye likalekelwa poluvedhe lwalyo. 8 Iya omulongwa omukwawo ngoka ngwaa tenga okuthika kombila, naye wo wa ya mo, hiee vi mono, ha itavele. 9 Iya va li ahave yuvite omusonekwa mboka mbwaa tya, u tha oku ka imuka kout̯e. 10 Iya ovalongwa va tjuna koyawo.
Jesus me liholololele Maria Magdalena
11 Maria wa kulama pombila pondje ama lili, iya hiaa li ama lili nyahi, wa vandamena mombila. 12 Wa mona mo ovaengeli vavali mbava dhala omidhalo omipembadhi, mbava kala pohi mpoka nahi mpapa li apa lala otjivimbi tjaJesus, umo okomutwe nomukwawo okomakulu. 13 Ve mu pula hava tyaa: “Ove, mo lilile tji?” Maria we ve yaka ha tyaa: “Ovantu va itha mo Muhona wandje mombila, ame hí tji i mpave mu twaa.” 14 Hiaa popi nyahi, wa piluluka, ha tala kon̯ima, ha mono Jesus aa kulama mpoka, atjaa wa li ahe tji i okutya oJesus. 15 Iya Jesus we mu pula ha tyaa: “Ove, mo lilile tji? Mo hala an̯i?” Maria wa soka okutya pamo oye e li omwene wotjuundo, ha tyaa: “Taa, andaa oove we mu itha mo, ntjeela ndje hoka huwe mu twaa, ndji ke mu ete ko.” 16 Jesus we mu heela ha tyaa: “Maria!” Maria wa piluluka, ha popi mOtjiheberi ha tyaa: “Rabbuni!” Matji tya Mulongethi. 17 Jesus we mu heela ha tyaa: “Hó nt̯in̯i, mena lyokutya híya londa okutjuna kuTate. Iya enda kovakwetu, u ke ve heele okutya ame me tjuna kuTate, Kalunga kandje, ye nguu li wo Iho, Kalunga ken̯i.” 18 Iya Maria Magdalena wa ya, ha ka heela ovalongwa okutya wa mono Muhona, ngoka ngwee mu heele odhondaka ndhoka.
Jesus me liholololele ovalongwa ve
19 Kongulohi yetango ndyoka lyolutenga lyotjivike tainkolo ovalongwa va li ava ongana mondjuwo, omivelo vyayo vya li avya ikwa, mena lyokutya va li amava tila Ovajuda. Iya Jesus we ya, ha kulama mokati kawo, ha tyaa: “Ouwa ngau kale nan̯e!” 20 Kon̯ima hiaa popi nyahi, we ve yulikila omawoko e nopontyo mpaa twelelwe. Ovalongwa ve hulukilwe unene hiva mono Muhona. 21 Jesus we ve heela uke ha tyaa: “Ouwa ngau kale nan̯e! Tate ngahi a ntuma, naame wo otjo me mu tumu.” 22 Jesus hiaa popi nyahoka, we ve thuvila, he ve heele ha tyaa: “Tambulen̯i Ombepo Ondhilikwa. 23 Mboka mbamamu ithile po odhonkali, mave dhi ithilwa po, namboka mbahamamu ithile po, nawo kaave dhi ithilwa po.”
Jesus naTomas
24 Jesus hiee liholololele ovalongwa, Tomas, umo owomovalongwa ngoka nguu tiwa oKawiyu, ka vadhelwe po. 25 Ovalongwa ovakwawo ve mu heela hava tyaa: “Nt̯e twa mono Muhona!” Tomas we ve heela ha tyaa: “Ame andaa hí mwene ovito vyodhopeleko movikanda vye, he twele mo omunwe wandje movito moka mumwa li odhopeleko, nopontyo mpaa twelelwe, ndji twele po nokuwoko, híme itavele.” 26 Kon̯ima yomatango epandutatu, ovalongwa va vadhwa uke ava ongana mondjuwo, naTomas va li naye. Omivelo vya li avya ikwa. Jesus we ya, ha kulama mokati kawo ha tyaa: “Ouwa ngau kale nan̯e!” 27 Iya wa heela Tomas ha tyaa: “Vyuukitha omunwe woye huno, ove u tale omawoko andje. Eta okuwoko, ove u nt̯in̯e pontyo. Iya itavela, hó kala uke awe limbililwa.” 28 Tomas we mu yaka ha tyaa: “Muhona wandje! Kalunga kandje!” 29 Jesus we mu heela ha tyaa: “Wa itavele, mena lyokutya wa mbono? Ovanalao owomboka mbava itavela, nandaku tiwa kava mwene.”
Ontanto yembo hendi
30 Iya Jesus wa undapa ovilingatangan̯eko vimo ovingi movipathi vyovalongwa ve, mbyoka mbihavi sonekelwe mo membo hendi. 31 Iya hembi vya sonekwa, opo mu itavele okutya Jesus oye e li Messias, OmunwaKalunga, andaa mwa itavele muye, mamu kala amu na omwenyo.
Jesus me liholololele ovalongwa epanduvali
1 Kon̯ima yovipuka mbyoka Jesus we liholololela uke ovalongwa ve pelunga lyaTiberias hinyahi. 2 Mbava li ava ongana pamo, va li: Simon Petrus, Tomas, ngoka nguu tiwa oKawiyu, Natanael ngwaa dha koKana moGalilea, oomunkwaSebedeus novalongwa ovakwawo vaJesus vavali. 3 Simon Petrus we ve heela ha tyaa: “Ame me ka hwaa.” Ovakwawo ve mu heela hava tyaa: “Nant̯e wo matu i naove.” Va ya, hava i mowato. Out̯iku auhe kava kambulile mo tja. 4 Iya hikwa tji, Jesus wa kulama kontyo, ovalongwa va li ahave mu dhimbukile okutya oJesus. 5 Jesus we ve pula ha tyaa: “Vakwe, mu na himwa kambula mo?” Ovalongwa ve mu yaka hava tyaa: “Aai!” 6 Jesus we ve heela ha tyaa: “Yumben̯i owaanda wen̯i kokulyo kwowato, mamu viki ko.” Va yumba mo, hava anyenwa oku u nana mo, mena lyokutya va hwaa odhohi odhingi. 7 Omulongwa ngoka nahi nguu holwe kuJesus, wa heela Petrus ha tyaa: “OMuhona!” Simon Petrus hiaa tee okutya oMuhona, wa dhala ombaikitha ye, mena lyokutya wa vadhwa aa dhala ovikutu vyokohi aviika, ha lombokele momeva. 8 Ovalongwa ovakwawo ve ya nowato, hava nana mo owaanda, mboka mbwee yulile odhohi. Kava li unene kokule neheke, iya va li potjikambo hitji lithike podhometa ethele. 9 Hive thiki kontyo, va mona ekundungala lyomulilo mbwaa wengauka omakala, nopomulilo mpoka pa li ape na odhohi nomungome. 10 Iya Jesus we ve heela ha tyaa: “Eten̯i odhohi dhimo huno dhomundhimwa kambula napano.” 11 Simon Petrus wa londa mowato, ha nanene owaanda kontyo. Wo we yulile odhohi odhonene, ethele limo nomilongo vitano nandatu. Iya odhohi nandaku tiwa dha li mo odhingi nyahi, owaanda kau uthukile nokanunu. 12 Jesus we ve heela ha tyaa: “Indjen̯i, tu lye.” Kape na tja noumo movalongwa ngoka ngwaa li nodhonkono oku mu pula a tyee: “Oove aan̯i?” Va li ave tji i okutya oMuhona. 13 Jesus we ya, ha itha po omungome, he ve pa, otjo a ninga uke nopodhohi. 14 Hehi otjikando otjityatatu, Jesus hiee liholololela ovalongwa ve kon̯ima yokwiimunwa kwe kout̯e.
Jesus naPetrus
15 Iya hiva mana okulya, Jesus wa heela Simon Petrus ha tyaa: “Simon yaJohannes, u ntjole tuu okupon̯a mba?” Petrus we mu yaka ha tyaa: “Iinga, Muhona, u tji i okutya ndji ku hole.” Jesus we mu heela ha tyaa: “Tekula odhondjona dhandje.” 16 Jesus we mu heela uke olutyavali ha tyaa: “Simon yaJohannes, u ntjole?” Ye we mu yaka ha tyaa: “Iinga, Muhona u tji i okutya ndji ku hole.” Jesus we mu heela ha tyaa: “Litha odhondhu dhandje.” 17 Jesus we mu heela otjikando otjityatatu ha tyaa: “Simon yaJohannes, u ntjole?” Petrus wa nkinduka momwenyo, Jesus hiee mu pula otjikando otjityatatu ha tyaa: “U ntjole?” Ye we mu yaka ha tyaa: “Muhona, u i ovipuka avihe, u ndji i okutya ndji ku hole.” Jesus we mu heela ha tyaa: “Tekula odhondhu dhandje. 18 Ame me ku heele otjatjili okutya hiwa li omudhantu, nahi u likuta omuvya motjivya, ho i humo hala, iya andaa wa kulupa, mo yele omawoko oye, umo he ku kutu, ye he ku twala hoka huhamo hala okuya.” 19 Hehi we tji popya, opo a yulike okutya Petrus ma ka t̯a et̯o ndii li vi lyokutumbaleka Kalunga. Iya Jesus we mu heela ha tyaa: “Ndandula ndje!”
Jesus naJohannes
20 Petrus wa piluluka, ha mono omulongwa ngoka Jesus ngwaa li ae hole, ame ve landula. Ye oye e li ngoka ngwaa li aa kala pohi popedhi nontulo yaJesus pokulya, ngwaa pulile Jesus ha tyaa: “Muhona, aan̯i ngoka ngume ke ku weleleka?” 21 Petrus hiee mu mono, wa pula Jesus ha tyaa: “Muhona, ovi ouhunga nomulumentu hengu?” 22 Jesus we mu yaka ha tyaa: “Andaa ame mba hala, a kale nomwenyo katee me ya, u na tji natjo? Ndandula ndje.” 23 Iya omipopyo mokati kovalongwa vaJesus vya ya amavi tya, omulongwa ngoka kaa t̯i. Jesus ka tile, kaa t̯i, iya wa tyaa: “Ame andaa mba hala, a kale nomwenyo katee me ya, u na tji natjo?” 24 Omulongwa ngoka ngwaa hipulula ovipuka hembi, oye e vi soneka. Nt̯e tu tji i okutya soka hima popi, otjatjili.
Omaandelo
25 Iya ku na ovipuka ovikwawo wo ovingi Jesus mbyaa ninga. Ngaile avihe vya sonekelwe tjimo kutjimo, ngai omambo ngoka kaa yauka mo mouye.