The New Testament of our Lord and Saviour Jesus Christ
1 Cha chada ai dege ulita Jesucristo giti, Jesucristo David oindalla, David kwian israelita enusulian unsuialin oña chugagwalla kweri, kaire Jesucristo kwian israelita enusulian unsuialin oña kada Abraham oindalla. Jesucristo enusulian unsuialin oña ulita kalla kle ai kare: 2 Abraham kirolla Isaac, Isaac kirolla Jacob, Jacob kirolla gdataboko giti gdaboke molen, ama gdaite kadakle Judá, 3 Judá kirolla gdaboke Fares kaire Zara, Fares kaire Zara chebia kadakle Tamar, Fares kirolla Esrom, Esrom kirolla Aram, 4 Aram kirolla Aminadab, Aminadab kirolla Naasón, Naasón kirolla Salmón, 5 Salmón kirolla Booz, Booz chebia kadakle Rahab, Booz kirolla Obed, Obed chebia kadakle Rut, Obed kirolla Isaí, 6 Isaí kirolla kwian chugagwalla kweri David, David kirolla Salomón, Salomón chebia mo jun ngeru Urías ole, gire David muinga e junnga Urías ngeru chagedu ama ole, David kirolla muinga e giti ama Salomón. 7 Salomón kirolla Roboam, Roboam kirolla Abías, Abías kirolla Asa, 8 Asa kirolla Josafat, Josafat kirolla Joram, Joram kirolla Uzías, 9 Uzías kirolla Jotam, Jotam kirolla Acaz, Acaz kirolla Ezequías, 10 Ezequías kirolla Manasés, Manasés kirolla Amón, Amón kirolla Josías, 11 Josías kirolla tanre molen, ama gdaite kadakle Jeconías, Jeconías kaire Jeconías daballa ulita toidu suiale kwian israelita tanre dule skage nga Babiloniage. 12 Jeconías kaire kwian israelita na tanre dule skage nga Babiloniage tane giti Jeconías kirolla Salatiel manadu, Salatiel kirolla Zorobabel, 13 Zorobabel kirolla Abiud, Abiud kirolla Eliaquim, Eliaquim kirolla Azor, 14 Azor kirolla Sadoc, Sadoc kirolla Aquim, Aquim kirolla Eliud, 15 Eliud kirolla Eleazar, Eleazar kirolla Matán, Matán kirolla Jacob, 16 Jacob kirolla José, José María ñengulalla, María kirolla Jesu. Jesu amaña kada Cristo, Chube ama kagu kwian Chugagwallale. 17 Abraham oindalla bitataboko giti bitabagage tangle gire David, David oindalla bitataboko giti bitabagage tangle gire kwian israelita tanre dule skage nga Babiloniage. Ne suiale kwian israelita tanre dule skage ama ulita oindalla bitataboko giti bitabagage tangle gire Jesucristo chku. 18 Jesucristo bebi menga gire boidu ene: María Jesu chebia ama mo chuia tku mo jwen José ole, María bebi chage ule José ole mo ñengula kare gire María chegu gaba Chube Oña kiralla giti. 19 Josége chku uñale María kle chage gaba agwa me José olia, José tañachugu María kle chage gaba onbre na ole malen José mo ta gbu me mo jwen María ole. José kwian no no, diali ama agenga no Chube takalin kare, José kwian ene malen ama me tadu agekalin me no María ole, José tañachugu mo tale gballa: “Cha mi mo jwen María ole agwa cha mi gerule kwian na ole boidu giti María ole, cha mi María gbe jiske kwian na ulita gwa giti, ma no cha chege kamne.” 20 José kledu tañachuge age ene gire lle boanga Chube alin nga ngaña giti gdaite chku gerule José ole José kle gbe gire, gerudu José ole gbire: “José, ba David oindalla, ba me kennga María gai mo muirallale. Chube Oña chku Maríadi malen María be kirogwa molen, Chube mo kiralla giti kirogwa e gbu Maríadige, kirogwa e Chube Kirolla. 21 María be kirogwa onbre molen ama ka be chege Jesu, ama be mo bitalla ulita jwen siere ji chugege age me no gdale, malen ama ka be chege ene Jesu.” Lle boanga Chube alin gerudu ene José ole gbire. 22 Ai boidu ulita Chube gerudu kare kwian Chube gerua ketanga unsuialin kada Isaías ole, Isaías Chube gerua degu unsuialin, chada e gerule: 23 “Muinga biale me chageba onbre ole, muinga ene be chege gaba ama be kirogwa molen, kirogwa ka be chege Emanuel.” Unsuialin Isaías Chube gerua degu ene. (Ka Emanuel e gerule: “Chube kle ule che ole.”) 24 José kledu gbe gire José chiu tachke gbeske, ama agedu ulita lle boanga Chube alin nga ngaña giti gerudu kare, José María gau mo muirallale, 25 agwa ama me toidu kwian onbre kle mo jwen kle toi kare ama María manadu sugekare moge ama me gbedu ule gire kirogwa chku María kote, José María kirolla e kimule ka gbu Jesu Chube gerudu kare.
1 Herodes kwian chugagwalla rey nga Judeage suiale Jesu medunga chebia kote una Belénge nga Judeage. Gire kwian gweale geru jwannga beu ulita giti kle toi nga chui chie ngwange ngnagu jo kirogwa Jesu jinade nate, ama ulita jo chke una Jerusalénge chugagwalla rey Herodes kle ngwadi. 2 Kwian e ulita geru kadu Herodege: —¿Nga bainige kwian israelita chugagwalla rey medunga? Cha ulita tendu beu gbaitedi nga ngaña giti, beu e me beu na ulita kare, beu e giti chku uñale cha ulitage kwian chugagwalla kweri medunga nga gwealege. Cha kle chage ama nate, ¿ama kle baini? Cha ta gwagekalin amadi, cha ama gakalin dage kwian chugagwallale kweri, cha ama olladakalin. 3 Kwian chugagwalla rey Herodes tañachugu tanre ta me no ole gerudre ama ole giti kwian chugagwalla jagere ñage chege kwian chugagwallale Herodes taneage, kaire kwian una Jerusalénmu ulita chegu tañachuge tanre gerudre giti. 4 Herodes kwian gerunga Chube ole daba alin chugagwalla ulita kadu, kaire Herodes kwian daba tkanga tangle Moisés chadalla giti ulita kadu, Herodes kwian ene ulita kadu geru trage ama ole, Herodes geru kadu ama ulitage: —Sbali Chube gerudu ama be kwian jwannga siere kada Cristo kage kwian alin, ¿nga bainige Cristo be menga? 5 Gire kwian gerunga Chube ole daba alin chugagwalla kaire kwian daba tkanga tangle Moisés chadalla giti, ama ulita jaindunga: —Cristo be menga una Belénge nga Judeage, kwian Chube gerua ketanga unsuialin kada Miqueas chada degu e giti, chada e gerule: 6 “Chube gerudu: ‘Una Belén nga Judeage, una e soli agwa me una ngwale. Una ege kwian gdaite be menga, ama be chege kwian israelita ulita Chugagwallale, malen una Belén una no ñanaske.’ Chube gerudu ene una Belén giti.” Miqueas Chube gerua degu ene unsuialin una Belén giti. 7 Herodes kwian keruchugu gerule ene, gire Herodes kwian geru jwannga beu giti kadu gerule ama ole sugekare, Herodes geru kadu ama ulitage: —¿Chui minege ba gwagedu beu e gbaitedi? Cha takalin ba gerule trate cha ole beu medu ngaminegire bage. Geru jwannga beu giti gerudu trate Herodes ole beu gbaite giti, 8 gire Herodes ama ulita kagu una Belén ngnagu, Herodes gerudu: —Ba joge una Belénge, ba geru kade no no kwiange kirogwa onbre e giti. Kirogwa onbre be skwen bage, cha takalin ba chieni geru kirogwa giti jigeni chage, ene cha kaire ñage joge ama nate ama gai dage kwian chugagwallale kweri ama ollade mnalin. Herodes gerudu ene agwa ama me gerudu ta no giti, ama sodu, ama me kle tañachuge no ulia kirogwa giti ama kle gerule kare. 9 Kwian geru jwannga beu giti ulita Herodes keruchugu gerule ene gire ama ulita jo chage dare beu gbaite nate, beu e ama jonlla du una Belén ngnagu, beu e jo chke jage ngaña kirogwa soli kledu ngwadi, gire nga sugadu noare ama ulitadi, ama ñadu kirogwa soli kledu ngwadi. 11 Ama ulita jo chke uge gwa gire ama tendu kirogwa onbre solidi, kirogwa kledu chebia María ole. Gire kwian geru jwannga beu giti ulita jongnagwa skutu dba kirogwa soli gai dage. Kwian e ulita nu chieba lle no no dbe gdege ketadale kirogwage, ama lle ñanaske kada oro kaire lle ñachke no kada incienso kaire lle ñachke no kada mirra jun gdege, ama lle e ulita ketu kirogwa solige. 12 Ngajrege kwian geru jwannga beu giti ulita gbedu gire Chube gbi gbu ama gwage, Chube gerudu ama ole gbire: “Ba me ñage jogeni naskuni Herodedi tangle ba chiu kare, ma no ba jogeni jon na kare.” Chube gerudu ene gbire gire kwian geru jwannga beu giti ulita jon na gau, joni mo jwiageni jon na kare. 13 Kwian geru jwannga beu giti ulita joni gire lle boanga Chube alin nga ngaña giti gdaite chku gerule José ole gbire, gerudu: “¡Chkede bduge, kigede kirogwa ole chebia ole llagli, joga kige nga Egiptoge! Herodes be kwian kage kirogwa soli jinade nate aini gwadaleda, malen ba kigedale kirogwa ole Herodes ngeru. Ba chegedale llani nga Egiptoge, cha be geru kete bage gire ba ñage chieni nga aige.” 14 Lle boanga Chube alin gerudu ene José ole gire José chiu tachke, blike José kirogwa soli kaire chebia gbu biale, gire ama ulita jo chage ngajrege jon joge nga Egipto ngnaguge. 15 Ama ulita jo chke nga Egiptoge, eni José chegu toi kirogwa ole kirogwa chebia ole gire chuia jo sbali Herodes jokeda. Ai ulita boidu ene kwian Chube gerua ketanga unsuialin kada Oseas Chube gerua degu kare, chada e gerule: “Chube gerudu: ‘Nga Egiptoge cha mo Kirolla kadu toi naskuni mo jwiage.’ ” Chube Oseas ta gbu chada dege ene unsuialin Jesu giti. 16 Jesu kledu toi José ole chebia ole nga Egiptoge Herodes bebi jogeda gire, Herodege chku uñale kwian geru jwannga beu giti me agedu Herodes gerudu kare me chiuni geru jige Herodege kirogwa Jesu giti, gire Herodes skochiu tanre, ta skochie ene ole Herodes kirogwa soli onbre ulita chura gdaboke gwadbiguda gwanguda kirogwa onbre soli kle toi una Belénge kaire kirogwa onbre soli kle toi una Beléndi tangle, Herodes kirogwa onbre soli ene ulita chura gdaboke gwadbiguda gwanguda. Kwian geru jwannga beu giti geruba Herodes ole ama ulita tendu beu gbaitedi ngaminegire, e giti chku uñale Herodege kirogwa chura minege gwangeda, ene chke uñale trate Herodege ama kirogwa Jesu gwanguda kaire. 17 Boidu kwian Chube gerua ketanga kada Jeremías Chube gerua degu unsuialin kare, chada e gerule muinga unsuialin kada Raquel giti, Raquel olidu ama kirolla jokeda giti, e kare kwian una Belénmu olidu ama kirolla soli guleda giti. Jeremías chada degu e giti, chada e gerule: 18 “Una Ramáge kwian gdaite olire tanre kweri, kwian e kerua sugedu kwian una Ramámu ulita ologe, kwian gdaite e muinga kada Raquel ama kledu olire mo kirolla nate. Raquel kirolla ulita jogebakeda malen Raquel kledu olire tanre, ama me kwian na chugu ngwadi ama ta gbe nga suga no ole.” Jeremías chada degu ene unsuialin. 19 Herodes jokeda gire lle boanga Chube alin nga ngaña giti gdaite chku gerule José ole gbire nga Egiptoge, gerudu: 20 “Ba chkedale bduge ba kirogwa kaire kirogwa chebia gbe biale, ba jogedaleni naskuni nga Judeage kwian israelita jwiage, kwian tadu kirogwa soli onbre gwakalinda ama jokeda, nege ba ñage jogeni mo jwiage.” 21 Lle boanga Chube alin gerudu ene José ole, gire José chku bduge kirogwa soli kaire kirogwa soli chebia du naskuni nga Judeage. 22 Chku uñale Josége kwian ka jwankle Arquelao chegu kwian chugagwallale mo ñenua Herodes taneage nga Judeage, malen José kendunga joge naskuni nga Judeage. Chube gbi gbu José gwage José ñage joge toi nga Galileage, 23 José jo toi una soli ka jwankle Nazarege nga Galileage. Ai ulita boidu ene kwian Chube gerua ketanga chada degu unsuialin kare Jesu giti, chada e gerule: “Cristo una Nazaremu.”
1 Chura jo tangle sbali Jesu kledu toi una Nazarege, e suiage tangle Juan-Bautista chku Chube gerua trage kwian bai tendu ama ngwange ole nga gballage nga Judeage. 2 Juan-Bautista gerudu kwian e ulita ole: “Ba mo ta blitadale Chube ole, ba age me no chuge ngwadi me chage age me no dare, ba Chube gerua gadale ulia. Chube be che Chugagwalla gbe age kwian ulita alin chuia kle kodige, ba mo ta gbadale biale ama gai ngwange no.” Juan-Bautista gerudu ene Jesu giti kwian ole. 3 Kwian Chube gerua ketanga kada Isaías chada degu unsuialin Juan-Bautista giti, chada e gerule: “Nga gballage kwian gdaite kerua be suge kwian tanrege, ama be gerule: ‘Che Chugagwalla be chie, ba ulita kledale biale ama ngwange, ba mo ta gbadale biale trate no ama ngwange kwian jon lite trate biale chugagwalla ngwange kare.’ ” Isaías chada degu ene unsuialin. 4 Juan-Bautista suiage tangle boidu ene ulita Chube Isaías ta gbu chada dege kare. Juan-Bautista toidu nga gballage, bda ka jwankle camello boli dodaba ñometraleske Juan-Bautista mo ngama tku, kaire ama mo ñometralla mo bonga tangle luguda chbi kwara dodabale drega giti. Juan-Bautista sri kweri kweri gutu kaire ama likin jau. 5 Juan-Bautista toidu ene kare nga gballage, nga ege kwian tanre diali kledu joge chke Juan-Bautistadi Juan-Bautista keruchuge gerule Chube gerua giti, kwian tanre una Jerusalénmu, kwian tanre nga Judeamu, kaire kwian tanre toinga kodi chi Jordánge, kwian tanre nga e ulitamu mo litu Juan-Bautistadi Juan-Bautista keruchuge gerule Chube gerua giti. 6 Kwian e gweale mo ta blitu Chube ole, kwian ene ulita gerudu ai kare Chube ole kwian na ulita gwa giti: “Chube, cha agedu me no tanre ba dollale, cha me ta agekalin me no ene dare, nege cha ba gakalin ulia mo Chugagwallale.” Kwian mo ta gbu no ene Chube ole gire Juan-Bautista ama ñeu chiske gau ngaña chigage chi Jordánge kwian na ulita gwa giti. 7 Juan-Bautista kledu kwian ñe chiske ene gire kwian fariseo ngle kaire kwian saduceo ngle chku Juan-Bautista kle ngwadi, ama ulita takalin Juan-Bautista ama ñe chiske, Juan-Bautista gerudu kwian ene ulita ole: —Ba ulita ta me no me no, diali ba ta agekalin me no Chube dollale. ¿Chema geru ketu bage ba mo ñeange chiske alin allabi me mo ta blite Chube ole, ene ba tien gitiru ji chugege ba agedu me no gdale? 8 Me ene dale ba kle tañachuge kare, ba ta tienkalin gitiru ji chugege ba agedu me no gdale ba mo ta blitadale Chube ole mo ta gbe chage trate no Chube takalin kare, ene kwian gwage badi ulia ba mo ta blitu Chube ole. 9 Ba me ñage tañachuge mau giti: “Cha enusulian oña Abraham oindalla, malen Chube me ji gbe cha giti cha agedu me no gdale.” Ba me ñage tañachuge ene. Cha gerule ba ulita ole, ba me mo ta blite Chube ole ba me ña tien gitiru ji chugege ba agedu me no gdale. Ba Abraham oindalla, agwa ba me kle age Chube takalin kare. Chube takalin ama ñage ke blite Abraham oindallale gire ke e joge blitaba kwianle kwian e be age Chube takalin kare. 10 Ba me mo ta blite ulia, ba salengwli gli me no kare me gbachie no, gli ene alin gli mauña kle biale mochuga ole gli datagda, gli mauña be gli ene date guge ulita, ene kaire Chube kle biale ji gbe kwian me no giti bai kaire me mo ta blitakalin ulia Chube ole. 11 Ba mo ta blitadale Chube ole gire cha ñage ba ñe chiske Chube kalla giti. Cha ñage age ene ba alin, agwa kwian gdaite be chie cha nate ama ma kira molen chage, ama be ñage age ma no kwian alin chage. Ama be Chube Oña gbe kwian tale, ene diali kwian be chage Chube Oña ole, Chube Oña be kwian ta gbe age no diali Chube takalin kare. Cha ñage kwian ñe chiske alin agwa cha me ñage Chube Oña gbe kwian tale kwian ta blite age Chube takalin kare. Ulia kwian gdaite be chie cha nate ama ma no ma kweri no trate chage, cha me ñanaske ama chudaboangale ni ama zapatolla dbe ama alin. 12 Kwian gdaite be chie cha nate kle biale kwian chage no Chube takalin kare jwen sugekare kwian me noge, kwian no be toi no Chube ole diali, agwa kwian me no be toi sugekare diali Chubege ji chuge chui tangle, kwian ni ñage joge siere ji chuge ege. E salengwli kwian kle trigo kwara batenga kare, trigo tagla no alin chege sugekare trigo kwara me noge, trigo tagla ogakle no agwa trigo kwara gugakle jitaske, malen cha gerule ba ulita ole, ba tienkalin gitiru ji chugege ba mo ta blitadale Chube ole —Juan-Bautista gerudu ene ulita kwian ole. 13 Jesu kle nga Galileage jo chi ka jwankle Jordánge Juan-Bautista kledu ngwadi mo ñeangale chiske Juan-Bautistage. 14 Juan-Bautistage sugedu moge ama ma soli Jesuge, malen ama tañachugu ama me ñanaske Jesu ñeale chiske, Juan-Bautista gerudu Jesu ole: —Cha suge moge ma soli bage, ¿mineade ba chku mo ñeangale chiske chage? Cha me ñanaske ba ñe chiske, ma no ba cha ñeadale chiske. 15 Jesu jaindunga: —Ba me tallade e giti, ba mo ta gbadale age cha alin cha ñe chiske, Chube takalin che age ene Chube gwa giti, ene Chubege suge che kle age no ama takalin kare. Jesu gerudu ene gire Juan-Bautista mo ta gbu age Jesu gerudu kare. 16 Juan-Bautista Jesu ñeu chiske Jesu gau ngaña chigage, Jesu jo kedagu gire nga ngaña giti nga tigedunga, Jesu gwagedu nga ngaña ngnagu Chube Oñadi beusi kare chie gwadbiguda ama giti. 17 Gire Chube gerudu nga ngaña giti Jesu giti, ama kerua sugedu nga dba ai giti, ama gerudu: “Ai cha Kirolla, cha no no ama ole, nga suga noare chadi ama giti.” Chube kerua sugedu ene gerule mo Kirolla Jesu giti.
1 Boidu ene Jesu ole chi Jordánge gire Chube Oña Jesu ta gbu joge toi nga gballage, ene che dolla Satanás ñage mo chuge Jesu ole, Satanás tadu Jesu ta blitakalin age me no Chube dollale. 2 Nga gballage Jesu toidu chagere chui cuarenta, chui e ulitage ngajudi ngajrege Jesu me blidu dale. Gire bdagli ama bli ole tanre. 3 Uñadu Satanáge Jesu bli ole gire Satanás chku Jesudi mo chuge Jesu ole, Satanás gerudu Jesu ole: —Ba Chube Kirolla ulia ba ke ai blite bligdale mo alin ba gute. Ba ke blite bligdale ene be suge chage ulia ba Chube Kirolla. 4 Jesu gerudu: —Cha mi age ba takalin kare, Chube gerua degaba unsuialin gerule: “Me bligda alin allabi giti kwian ñage toi, agwa kaire Chube gerua gai ulia giti kwian ñage toi no.” 5 Jesu gerudu ene gire Satanás jo Jesu dbe una no Chubenu kada Jerusalénge, jo chke llani gire ama Jesu du ngaña u jiri bdagli giti u gerungwa Chube ole giti, jo chke ngaña gire Satanás gerudu Jesu ole: —Ba Chube Kirolla ulia ba skwen dbige aini. Chube gerua degaba unsuialin gerule: “Chube be lle boanga mau alin nga ngaña giti kage ba alin, lle boanga Chube alin be ba manade. Lle boanga Chube alin be ba gai ngwange kote, ene ba me lentige, ni ba be sera lentige kege.” Chube gerua degaba unsuialin gerule ene malen ba ñage skwen dbige aini ba mi lentige dale. 7 Jesu jaindunga Satanás kalen: —Cha mi age ba takalin kare, Chube gerua degaba unsuialin gerule: “Chube kwian ulita Chugagwalla, kwian me mo chugadale mo Chugagwalla Chube ole.” 8 Jesu gerudu ene Satanás ole gire Satanás Jesu du jwichuga kweri ngaña giti gire Satanás nga ulita nga dba ai giti kaitu Jesuge, Satanás gerudu: —¡Gwagede nga e ulita no nodi! Ba jongnagwa skute dba chadi cha gai dage gerule no cha giti gire cha be nga e no no ulita kete bage, ene ba ñage chege kwian nga ulitamu chugagwallale. 10 Satanás gerudu ene ulita gire Jesu jaindunga Satanás kalen: —Cha mi age ba takalin kare, cha mi ba gai dage dale. ¡Joga siere chage Satanás! Chube gerua degaba unsuialin gerule: “Chube kwian ulita Chugagwalla, kwian ulita mo Chugagwalla Chube alin allabi gadale dage gerule no ama alin giti, kaire kwian ulita mo ta gbadale lle boi ama alin allabi.” 11 Jesu gerudu ene gire Satanás jo siere Jesuge, lle boanga Chube alin nga ngaña giti tanre chku Jesudi Jesu chudaboi Jesu kira gbe. 12 Jesu kledu nga Judeage gire chku uñale amage Juan-Bautista tkere skage gire Jesu jo una Nazarege nga Galileage, agwa Jesu me chegu toi una Nazarege nge kare, ama jo toi una Capernaumge kodi chibita kagda giti, una Capernaum chege kodi nga kada Zabulónge kaire nga kada Neftalíge. 14 Jesu jo toi una ege, ene Jesu giti kwian ulita nga emu geru no ulia Chube giti keruchugu, boidu ene kwian Chube gerua ketanga dabage kada Isaías Chube gerua degu unsuialin kare, chada e gerule: 15 “Nga Zabulón kaire nga Neftalí kle chege nga Galileage chi kada Jordán kagda giti kodi chibitage, ne ngwadi kwian tanre me israelita kle toi. 16 Kwian ulita kledu toi nga ne ngwadige me Chube uñu ama ulita kledu toi nga jereske kare, kaire ama ulita kledu toi ta kennga jogeda, kwian ene ulita alin kwian jwannga siere ji chugege age me no gdale chiu, kwian jwannga siere e giti kwian nga ege Chube uñu, ene kwian me chage dare nge kare nga jereske kare. Kwian jwannga siere kwian ene ta gbu suge Chube giti salengwli chui chra kle kwian gbe ten kare.” Isaías chada degu ene unsuialin Jesu giti. 17 Jesu jo toi una Capernaumge, chui ege gwangerudba Jesu chagedu gerule kwian ulita ole: “Ba mo ta blitadale Chube ole, ba age me no chuge ngwadi me chage age me no dare. Chube cha kagu ba jwen siere ji chugege ba agedu me no gdale, cha kle aini ba ulitaske, ba mo ta gbadale cha gerua gai ulia.” Jesu chagedu geru e kete ene kwian ulitage. 18 Jesu jo chage chibita kada Galilea kagdage, ne ngwadi Jesu gwagedu kwian onbre gdabokedi, gdaite Simón amaña kada Pedro, kaire Simón daballa kada Andrés. Kwian boke e ngwe jwannga ama kledu gdeba tke chiske ngwe gai gdebage, 19 gire Jesucristo gerudu ama ole: —Bai chage cha ole geru jwen chage, nege ba kwian ngwe jwannga, agwa chui negege gwangerugu cha be ba gbe kwian na tke tangle cha gerua giti, ene ba giti kwian ngle be cha gerua gai ulia. 20 Jesu gerudu ene Simón ole Andrés ole gire sugeti ama gdabonate gdeba chugu ngwadi, jo chage Jesu ole. 21 Jesu jo chage gwangerugu ule Simón ole Andrés ole gire Jesu gwagedu kwian onbre na gdabokedi, gdaite ka jwankle Santiago kaire ama daballa Juan, ama ñenua kadakle Zebedeo. Santiago kaire Juan kledu ñenua ole du toli gdeba ugachuge, gire Jesu gerudu ama ole: —Bai chage cha ole geru jwen chage. 22 Jesu gerudu ene gire blikare Santiago kaire Juan mo ñenua chugu ngwadi du toli, jo chage Jesu ole. 23 Jesu jo chage una kaire kairege nga ulita Galileage ule geru jwannga amage ulita ole, una gdaite gdaitege Jesu kwian tku tangle u mo litangwa Chube gerua jwanngwage. Jesu chagedu gerule kwian ulita ole kwian ñage Chube uñe, kwian mo ta blitadale Chube ole Chube gai mo Chugagwallale, ene Chube be kwian e jwen siere ji chugege agedu me no gdale. Kaire agwe Jesu kwian jingmere dodadu kaire kwian oga lle na tanre kote Jesu ama ulita dodadu. 24 Jesu kledu chage age ene nga ulita Galileage gire geru Jesu giti jo chke nga na kada Siriage, nga ulita Siriage geru Jesu giti chageduda kwian ulitaske Jesu kwian oga dodanga, malen kwian ngle nga Siriage oga jingme tanre kote dbachku Jesudi, kwian e gweale skibachie tanre, kwian na jwligebanga che dolla kote, kwian na gweale oga jingme tirare ole kwian e oga jwligebanga kare, kwian na gweale skliebadba trate jegwale, Jesu kwian oga ene ulita dodadu kwian chegu no trate. 25 Kwian tanre nga Galileamu, kaire kwian tanre una ulitamu nga Decápolige, kaire kwian tanre una Jerusalénmu, kaire kwian tanre nga Judeamu, kaire kwian tanre kle toi chui chie ngwange chi Jordánge kagda ongoru giti, kwian ene ulita chagedu Jesu nate baini kaire Jesu jo ngwadi.
1 Jesu gwagedu kwian tanredi chage ama nate gire ama jo jwichuga giti ngaña. Ne ngwadi Jesu toidu dba gire kwian geru jwannga Jesuge ulita mo litu Jesudi. 2 Jesu kwian geru jwannga tku tangle tanre kwian Chubenu toidale mine, Jesu gerudu: 3 —Cha gerule ba ulita ole, ba cha keruchuge no no. Kwian baige kaire suge ama agenga me no Chube gwa giti kaire suge amage Chube alin allabi ñage ama ta blite age no trate Chube takalin kare, kwian enege suge Chube ama Chugagwalla, Chube kle diali ama ole, malen nga suga noare kwian enedi mo tale. 4 ’Kwian bai kaire ta olire tanre, suge amage Chube kle ama chudaboi kle ama kira gbe, malen kwian enedi nga suga noare mo tale. 5 ’Kwian bai kaire me kle mo sobade dabadi dale, me kle tañachuge mau alin giti allabi, kwian ege suge chui be chke gire Chube be chege kwian ulita Chugagwallale, ne suiale nga dba ai giti be chege kwian e kote kwian e be chege toi no, malen kwian enedi nga suga noare mo tale. 6 ’Kwian bai kaire ta agekalin diali no trate ulita Chube takalin kare, kwian ege suge Chube be age no ama alin, Chube be ama chudaboi age no Chube takalin kare, malen kwian enedi nga suga noare mo tale. 7 ’Kwian bai kaire tai dage daba nage, kwian ege suge Chube be tai dage kaire agwe amage, malen kwian enedi nga suga noare mo tale. 8 ’Kwian bai kaire ta no trate kle mo ta gbe tañachuge no Chube takalin kare, kwian ege suge bdagli ama be toi diali Chube ole nga ngaña giti, malen kwian enedi nga suga noare mo tale. 9 ’Kwian bai kaire daba jwen siere kira batege daba ta gbe toi no daba na ole ule, kwian ege suge Chube kle ama gai mo kirogwallale, malen kwian enedi nga suga noare mo tale. 10 ’Kwian bai kaire kle age no Chube takalin kare gire daba na kle ama gbe boi daga ngwale Chube gerua gdale, kwian ege suge ama Chubenu Chube ama Chugagwallale, Chube kle diali ama ole ama chudaboi ama kle boi daga ngwaleske, malen kwian enedi nga suga noare mo tale. 11 ’Kwian kidere badi, kwian age me no ba ole kwian geru jinade ngle ngwale badi, kwian age me no ene ulita ba ole cha gdale, suge bage chui be chke gire Chube be lle noare kete bage nga ngaña giti Chube ngwadi ba mo ta gbu me joge siere cha geruage boi daga ngwaleske ñanale, suge bage Chube be age ene ba alin bdagli, malen nga suga noare badi mo tale. Kwian age me no ba ole cha gdale ba me tallade, ma no ba mo ta gbadale nga suga no ole diali, kwian kle age me no ba ole nege, ene kaire unsuialin tangle kwian Chube gerua ketanga ulita bole daga ngwale Chube gerua gdale. 13 Jesu gerudu dare kwian geru jwannga amage ulita ole: —Cho mana noare agwa cho joge skeke gire cho ene me ñage jwliteni naskuni bale gutadale. Cho sketigeda me no, kwian cho ene mlienga goga tangle, kwian chage cho e giti ama me tallade, cho e ngwale. Ene kaire ba me toi no daba gwa giti Chube takalin kare, Chube be ba gbe ji chuge, ene ba be chege salengwli kwian kle cho sketigeda mlienga kare. Ba toidale no kwian ulita gwa giti Chube takalin kare, ene Chube ñage ba gbe lle boi ama alin nga dba ai giti Chube takalin kare. 14 ’Che jichra gwadege nga jereske ene che ñage ten no trate. Ba ulita cha gerua gaba ulia ba jichra gwadegaba kare kwian me Chube uñeske, kwian ene kle chage nga jereske kare. Kwian ene gwage badi ba kle chage no, ene chke uñale amage Chube ba ta blitu toi ene Chube takalin kare. E salengwli una gbaba jwichuga ngaña giti kare, una e kare me kle ogaba skwlenre kwian gwage, kwian ulita ñage gwage no trate una enedi. Ene kaire ba cha gerua gaba me ñage mo ogeda cha gerua ole, ma no ba ulita toidale no kwian me Chube uñeske, ene ama ñage gwage trate badi ñage cha gerua keruchuge ba giti. 15 Kaire kwian jichra gwadege me kle jichra gbe sugekare baini kwian me tendi, me kle un blite kaboge jichra giti, agwa ama jichra gbe ngaña nga ngwale giti, ene jichra chra tien no gwa tangle. 16 Ene kaire ba ulita mo ta gbadale toi kwian ulitaske jichra gbaba nga ngwale giti kare, ba agedale no trate Chube takalin kare kwian ulita gwa giti, ene kwian be gwage badi be suge trate kwiange Chube kle ba ta gbe age no trate ene, e giti kwian be gerule Chube nga ngaña giti ole: “Chube, ba no ulia, ba kle age no kwian e alin.” 17 Jesu gerudu dare: —Cha me chiu gerule ba ole ba me agedale dare Moisés nu Chube gerua degaba unsuialin kle gerule kare, ni cha chiu gerule ba ole kwian Chube gerua ketanga dabage unsuialin geru amanu ngwale. Cha chiu ba ulita tke tangle no trate geru amaña giti Moisés chada degu kare kaire kwian Chube gerua ketanga chada degu kare, cha chiu geru e ulita trennga bage. 18 Cha gerule ulia ba ole, ba cha keruchuge no, Chube gerua ulita Moisés nu degaba unsuialin jo gbaba kwian alin, ulita be boi ulia ulia geru e kle degaba kare nga dba ai giti nga ngaña giti ulita bebi joge tangle gire. 19 Moisés nu Chube gerua degaba, geru e ulita no be chege gbaba diali kwian ulita alin malen kwian bai me kle Moisés chadalla ulita gai ulia me kle age chada e gerule kare kaire kle daba na tke tangle Moisés chadalla ulita chada ngwale kwian me agedale chada kle degaba kare, kwian ulita bai kle age ene ama me Chubenu ama mi toi Chube ole nga ngaña giti. Agwa kwian bai kle Moisés chadalla ulita gai ulia kle age chada e gerule kare kaire kle daba na tke tangle geru e giti geru e no daba agedale ulita chada e gerule kare, kwian ulita bai kle age ene ama Chubenu ama be toi Chube ole nga ngaña giti. 20 Ba kle tañachuge kwian fariseo ulita kaire kwian daba tkanga tangle Moisés chadalla giti ulita kle age no trate ulita Chube gerudu kare Moisés giti, agwa ama me kle age ene dale. Cha gerule ba ole, ba me mo ta gbe toi ama kle toi kare, ba mo ta gbadale age Chube gerua degaba gerule kare ma no trate kwian fariseoge kaire kwian daba tkanga tangle Moisés chadalla gitige, ene ba be ñage toi Chube ole nga ngaña giti. 21 Jesu gerudu dare: —Moisés Chube gerua degu unsuialin tangle, ba ulita nege tangle kle geru e keruchuge gerule: “Me mo gweda, kwian bai kaire daba na gweda kwian e ji chugale tanre daba gweda gdale.” Nege ba kle mo ta gbe age daba ole geru e kle degaba kare. 22 Agwa cha gerule ulia ba ulita ole, kwian bai kaire skochie alin dabadi, Chube gwa giti e salengwli kwian daba gweda kare, kwian ene ji chugadale tanre daba gdale salengwli kwian daba gwangada ji chugadale kare. Kaire kwian bai kaire ka boi mno daba ole ta skochie ole, kwian ene dbabe ji chugale kwian israelita chugagwalla kweri ulita ngwadi gerube kwian ene ole ama jiske. Kaire kwian bai ka boi obere daba ole ta skochie ole kwian na gwa giti, kwian ene boidale daga ngwale nga dbigu giti jitaske. Kwian ulita bai age me no ene daba na ole ta skochie ole, Chube gwa giti e salengwli ama daba gweda kare malen ama ji chugale e giti. 23 ’Ba lle gweale dbe Chube alin u gerungwa Chube olege ba agedu me no ñanale gire ba tachke ba kle ta me no dbe daba gweale ole kaire daba ta me no dbe ba ole, ba kle lle dbe ketadale Chubege ba lle e jige eni gire ba jogedale geru trage trate daba ole ta no giti ba mo ta gbe no daba ole. Ba ta chegeni no daba ole gire ba ñage jogeni naskuni u gerungwa Chube olege, ba ñage lle kete Chube alin ta no giti. 25 ’Kwian na ba gbe jiske ba agedu gweale giti, ama ba dbe chugagwalla ngwadi ba gbale jiske chugagwallage, kwian age ene ba ole ma no jonkare ba mo ta gbadale no kwian ba dbanga ole, ba gerule no ama ole: “Cha me ta jogekalin chugagwalla ngwadi, ma no cha alin cha agedu me no che chege e trage modi ta no giti aini jonkare, gire ene ulita ñage chege no trate ba tale kaire cha tale, ene ba me cha gbe jiske chugagwallage.” Ba gerule ene ba dbanga ole jonkare, gire kwian ba dbanga me ba dbe chugagwalla ngwadi, ene chugagwalla me ba kete guardia dongage tkale skage. 26 Cha gerule ulia ba ole, guardia donga ba tke skage ba mi ñage joge siere ne ngwadige blike, ngeru ba igi ulita ba agedu me no ñanalla ketale mo giti gire ene ba ñage skachienga. E kare ene ba me ta chegekalin me no jiske Chube gwa giti, ba me ta dbe skochie daba na ole age me no daba ole. 27 Jesu gerudu dare: —Moisés Chube gerua degu unsuialin tangle, ba ulita nege tangle kle geru e keruchuge gerule: “Onbre mo jwanba me mo chugale ke giti muinga na ole, muinga mo jwanba me mo chugale ke giti onbre na ole.” Nege ba kle mo ta gbe age ene geru e kle degaba kare. 28 Agwa cha gerule ulia ba ulita ole, kwian onbre bai kaire gwage muingadi gire tañachuge mo tale me no muinga e nate: “Cha takalin muinga ege mo alin”, onbre tañachuge alin ene muinga nate, Chube gwa giti e salengwli onbre kle mo chuge ke giti muinga e ole kare. 29 ’Ba gwage lle gwealedi mo gwagwa giti gire gwage edi giti ba ta agekalin gweale me no, ba me mo chuge ngwadi gwage lle edi dare tañachuge lle e giti dare, ma no ba mo linge siere lle ege. Ba agedale salengwli ba gwagwa gbaite jo jwanba siere mliabanga kare ene ba me ñage gwage dare lle edi ba takalin kare. Ma no toi gwagwa gbaitre alin ole toi gwagwa gbabonate no olege ji chuge tirare ngwadi boi daga ngwale jitaske ba agedu me no Chube dollale ñanale. 30 Kaire ba ta agekalin gweale me no mo ko taingwli giti ba mo ta gbadale me tañachuge age me no ene kare ko e giti, ba age me no ene talla chuge ngwadi, e salengwli ba mo ko tkenga kare, ene ba me age me no dare mo ko giti kare. Ma no toi ko gdaitre alin ole me toi ko gdabonate no ole gire ji chuge tirare ngwadi boi daga ngwale jitaske ba agedu me no Chube dollale ñanale. Ba mo ta gbadale diali age no Chube takalin kare me tañachuge age me no giti dare, ma no lle ulita kle ba gbe age me no ba joge siere lle ege. 31 Jesu gerudu dare: —Moisés Chube gerua degu unsuialin tangle, ba ulita nege tangle kle geru e keruchuge gerule: “Kwian onbre ta mo muiralla chugakalin ngwadi, onbre e chada degadale kete mo muirallage, chada e gerule muinga e me amanu dare, onbre age ene gire onbre ñage mo muiralla chuge ngwadi.” Nege ba kle mo ta gbe age ene geru e kle degaba kare. 32 Agwa cha gerule ulia ba ulita ole, muinga kle toi no diali mo ñengulalla ole me kle gbe onbre na ole, muinga e ñengulalla ama chuge ngwadi, gire muinga e mo jwen kwian onbre na ole kwian onbre ngeru kle muinga gbe jiske Chube gwa giti, Chube gwa giti e salengwli muinga e kle mo chuge ke giti onbre na ole kare. Kaire kwian onbre mo jwen muinga onbre na nu chugaba ngwadi ole, onbre e kle age me no Chube gwa giti, Chube gwa giti e salengwli onbre e kle mo chuge ke giti muinga na ole kare. 33 Jesu gerudu dare kwian geru jwannga ulita ole: —Moisés Chube gerua degu unsuialin tangle, ba ulita nege tangle kle geru e keruchuge gerule: “Ba gerule Chube gwa giti ba be age gweale ulia ulia, ba me ñage gerule alin allabi, ba agedale ulia ba gerudu kare Chube gwa giti.” Moisés Chube gerua gbu ene unsuialin kwian israelita ulita alin. 34 Nege kaire cha gerule e giti ba ulita ole, ba ulita agedale ulia diali ba gerule kare me gerule lle gweale kalla giti ba be age gweale ulia ulia gire me tallade ba age o me age. Me gerule daba na ole nga ngaña kalla giti ba be age gweale ulia ulia, nga ngaña giti Chube kle toi nga ege. 35 Kaire me gerule daba na ole nga dba ai kalla giti ba be age gweale ulia ulia, nga dba ai ulita Chubenu kaire, Chube nga dba ai ulita mauña. Kaire me gerule daba na ole una Jerusalén kalla giti ba be age gweale ulia ulia, una Jerusalén Chube che Chugagwalla kwerinu, Chube no una e ole. 36 Kaire me gerule daba na ole mo chugaga kalla giti ba be age gweale ulia ulia, ba me ñage mo chugaga jere blite chugaga jutredi kaire ba me ñage chugaga jutre blite chugaga jeredi, Chube alin allabi ñage age ene ulita. 37 Ngwale ba gerule daba na ole lle gweale kalla giti o nga gweale kalla giti ba be age gweale ulia ulia, e me no Chube gwa giti. Ma no ba gerule trate alin daba na ole ba be age gweale ulia ulia gire ba mo ta gbadale age ulia ba gerudu kare. Ba gerule trate alin daba na ole ba mi age gweale ulia ulia gire ba mo ta gbadale me age. Cha gerule ba ole, ba ulita mo ta gbadale age ulia diali ba gerule kare, ba me age ene ba kle sole, che dolla Satanás kle ba ta gbe gerule ngwale daba na ole. 38 Jesu gerudu dare: —Moisés Chube gerua degu unsuialin tangle, ba ulita nege tangle kle geru e keruchuge gerule: “Kwian mo bate daba ole daba gwagwa jwennga, kaire agwe gwangoguda mo jia gbadale daba gwagwa jwanlenga. Kaire agwe kwian kira bate daba ole daba dau skutenga, kaire agwe gwangoguda mo jia gbadale daba dau skutalenga. Kwian kle daba gbe boi daga ngwale kaire kwian e boidale daga ngwale salengwli daba kare.” Moisés geru jigu degaba gerule ene, nege ba kle mo ta gbe age ene geru e kle degaba kare, 39 agwa cha gerule ulia ba ulita ole, me kira bate kwian ole kwian bai kaire kle age me no ba ole, ba tañachugadale ama giti ta no ole. Kaire agwe kwian ba bate gwage ba gwa ongoru kaitadale amage batadale, ba me age ama ole ama kle age ba ole kare. 40 Kaire agwe kwian ta ba dbakalin gbale jiske kwian chugagwalla gwa giti ama ta ba ñometralla gweale badige jwankalinnga dbadale, ba mo ñometralla e chuge ngwadi amage ama jwennga badige, kaire kwian ene ole ba gerudale: “Ba takalin cha llea na gweale dbe kaire ba ñage dbe.” 41 Kaire kwian ta me no ba ole gerule ba ole: “Ba cha terua dbe sugeti alin allabi.” Kwian gerule ene bage, ba me ama terua dbe sugeti alin allabi, ba ama terua dbale dare ta no giti ma bate ama gerudu bage kare. 42 Kwian gweale lle banu kade bage mo alin, ba lle e ketadale amage ta no ole, kaire kwian na gweale lle banu kade sugetidale bage mo alin, ba mo ta gbe no ama ole, ba lle ketadale amage ama lle kadu bage kare, ba me mo ta dbe kibale ba lleage kwian ole. 43 ’Kwian daba tkanga tangle Moisés chadalla giti kle ba ulita tke tangle geru giti, ba ulita kle geru e keruchuge gerule ene: “Ba mo ta dbadale no ba skatemanalla ole, agwa ba me mo ta dbadale no kwian ba dolla ole.” Nege ba kle mo ta gbe age daba ole geru e kle degaba kare. 44 Agwa cha gerule ba ole, ba mo ta dbadale no ba dolla ole kaire. Kwian kle ba oña boi me no, kwian ene ole ba gerudale: “Cha takalin Chube age no ba alin.” Kwian kle jainchke badi, kwian ene alin ba agedale no. Kwian kle ba ta gbe olire kle gerule me no badi kle kira bate ba ole, kwian ene giti ba gerudale Chube ole. 45 Ba mo ta dbe ene ba dolla ole, ene ba kle age ba Ñenua Chube takalin kare, ulia ba Chube kirolla Chube jian. Chube kle age no kwian ulita alin, Chube kle chuira gbe kwian ulita alin kwian ta no alin kaire kwian ta me no alin. Chube kle noi kage kwian ulita alin kwian ta no alin kaire kwian ta me no alin, ene chude kle tige no kwian ulita ole. 46 Ba mo ta dbadale no ba dolla ole kaire ba skatemanalla ole. Ba no kwian ba skatemanalla ole alin allabi, ¿Chube be age mine no ba alin e ñanale? Chube mi age no ba alin dale e ñanale, kwian ulita no mo skatemanalla ole. Kaire kwian igi ganga chugagwalla emperador nga Romamu alin ama no mo skatemanalla ole, ba gwa giti ama kwian me no me no, agwa diali ama no mo skatemanalla ole, kwian bai no ama ole, kwian ene ole alin ama no. Ba me mo ta dbe no kwian ulita ole ba kle age salengwli kwian igi ganga kare. 47 Kaire agwe ba kle gbi kade mo skatemanallage alin allabi, ba kle age salengwli kwian ulita kle age kare, kwian me Chube uñe kle age ene kaire. 48 Ba mo ta dbadale no kwian ulita ole kwian bai no ba ole kaire kwian bai me no ba ole, kwian e ulita ole ba mo ta dbadale no diali. Ba agedale no ulita Chube kle age kare, Chube no kwian ulita ole, kaire ba nodale kwian ulita ole.
1 Jesu gerudu dare kwian ole: —Ba age no kwian gweale alin kwian na gwa giti, ba gerule mau giti: “Cha agedu no daba e alin.” Ba age ene, ba takalin kwian ulita gwage badi gerule no ba giti: “Ama no, ama kle age no daba na alin.” Ba age daba na alin ta ene kare ole, Chube mi age no ba alin ba agedu no daba alin ñanale. 2 Malen cha gerule ba ole, ba daba me lle molen chudaboi, ba me ñage gerule kwian na ole: “Cha daba me lle molen chudabo no.” Me no age ene kwian na tanre kle age kare. Kwian bai kle daba me lle molen chudaboi lle gweale giti gire kle gerule e giti kwian na tanre ole u mo litangwa Chube gerua jwanngwage kaire kle gerule kwian na tanre ole bai kaire ten jonkare gire gerule: “Cha daba me lle molen chudabo no, cha lle ketu amage ama chudaboagda.” Kwian e kle lle kete nobi daba me lle molenge agwa me kle kete ta no giti, ama kle age mo sobadagda kwian na gwa giti. Ama kle age ene, gire ene kwian na ñage gerule ama giti ama daba chudaboanga ama kwian no, gire ulia ama ta me no kwiandi. Ba me age ama kle age kare. Ba daba chudaboi kwian ulita gwa giti takalin kwian ulita gerule no ba giti age ene ñanale, ba age daba alin ta ene kare ole Chube mi gerule no ba ole ba agedu giti mi age no ba alin ba agedu no daba alin ñanale. 3 Ba daba me lle molen chudaboi, ma no ba me gerudale ni kwian gdaite ole ba agedu no daba alin giti. 4 Ba alin allabi tañachugadale ba agedu giti, noare ba daba chudaboi kwian na ulita gwa skwlenre, ene Chube kle gwage badi ba kle age mine daba alin, ene Chube be gerule ba ole: “Ba agedu no daba alin.” Chube be gerule ene ba ole be age no ba alin ba agedu no daba alin ñanale. 5 Jesu gerudu dare kwian ole: —Ba gerule Chube ole gire me no age kwian na tanre kle age kare kle mo gbe gerule Chube ole kwian ulita gwa giti agwa ama ta kle bate Chubege. Ba gerule Chube ole gire ba me age ama kle age kare. Ama kle gerule Chube ole jagebanga gdate kwian ngle gwa giti u mo litangwa Chube gerua jwanngwage kaire kle gerule Chube ole jonkare kwian ngleske. Ene ama takalin kwian gwage amadi kaire gerule no ama giti. Ba me age ama kle age kare. Kwian gwage amadi ama takalin kare kwian gerule ama giti: “Kwian e ulia gerunga no Chube ole.” Kwian gerule ene ama giti gire Chube be gerule ama giti: “Kwian e me kle age no, ama kle age ngwale ulita.” Chube be gerule ene ama giti, Chube mi age no ama alin. 6 Ba gerule Chube ole gire, ba jogedale nga sugekarege kwian me ñage gwage badi ngwadi, ene ba ñage mo ta gbe ulia gerule Chube ole, Chube kle ba ole alin allabi gwakabongwadi. Ene Chube che Ñenua gwage badi, uñale amage ba ta mine ama ole, ama ba keruchuge, ba kle age ama takalin kare ñanale ama be age no ba alin ba kle kade kare amage. 7 ’Ba gerule Chube ole gire ba me geru ngwale alin jwen kate ngle kwian me Chube uñe kle age kare. Kwian e kle tañachuge kwian gerudale tanre tanre Chube ole gire Chube ñage ama keruchuge ñage age kwian takalin kare. 8 Ba me age kwian e kare. Chubege uñale trate llema llema ba takalinge, ngerutabi amage uñale llema ba ta kadakalin amage. 9 Ba gerule Chube ole ba gerudale ene: “Cha Ñenua, ba kle nga ngaña giti, ba no trate ulita, cha takalin kwian ulita gerule no ba giti. 10 Cha takalin kwian ulita nga ulitage ba gai mo Chugagwallale. Cha takalin ba age mo ta giti ba ta agekalin kare nga dba ai giti salengwli ba kle age nga ngaña giti kare. 11 Cha takalin ba bligda kete chage gutadale chui gdale toigda. 12 Cha agedu me no cha takalin ba talla mlienga, ene kaire daba age me no cha ole cha talla mlienga. 13 Ba me cha chuge ngwadi che dollage, ene ama me ñage age me no cha ole. Ba cha jwen siere lle me no ulitage. Uñale chage ba kwian ulita Chugagwalla ma kweri, ba kiraske ba ñage age ulita mo kiralla giti, ba no no, ba ene diali chui tangle. Cha gerule ene ulita ba ole cha Ñenua. Ene nobi.” Ba ulita gerudale ene Chube ole. 14 ’Kaire cha gerule ba ole, kwian agedu me no ba ole ba talla me no mlienga ama agedu me no ba ole giti, ba me tañachuge dare ama agedu me no ba ole giti. Ba age ene talla mlienga daba na agedu me no ba ole giti, ene kaire Chube be talla mlienga ba agedu me no giti, ama mi tañachuge dare ba agedu me no giti. 15 Agwa ba me talla me no mlienga kwian agedu ba ole giti ene kaire agwe Chube mi talla mlienga ba agedu me no giti. 16 Jesu gerudu dare kwian ole: —Ba chui gbaite gai mo tke bage bligdage gerudale Chube ole alin allabi, ba kle age ene gire ba me mo gwa gbale olire kwian na tanre kle age kare. Kwian ene kle bage bligdage gerudale Chube ole agwa ama me kle mo ta gbe no ulia Chube ole, ama me kle tañachuge Chube giti ama kle tañachuge mau alin giti, ama takalin daba na gwage amadi ama kwian no Chube gwa giti malen ama mo gwa gbale olire daba na gwa giti, ene chke uñale daba nage ama kle bli ole bage bligdage gdale, ene daba na gwage amadi tai dage amage gerule no ama giti: “Kwian e no Chube ole, ama kle mo tke bage bligdage Chube gwa giti malen Chube be age no ama alin.” Kwian na be gerule ene kwian kle bage takalin kare, agwa cha gerule ba ulita ole, kwian bai kle mo tke bage bligdage ene kwian ulita gwa giti takalin kwian ulita gerule no ama giti age ene ñanale, kwian ene giti Chube mi gerule no mi age no ama alin ama mo tku bage bligdage ñanale. 17 Ba mo tke bage bligdage Chube gwa giti gerudale ama ole ma no ba age kwian na gwa skwlenre, ba mo dodadale trate diali kare me mo gwa gbe olire, ene kwian na gwage badi me chke uñale amage ba kle mo tke bage bligdage Chube gwa giti, ene kwian na me gerule no ba giti ba kle bage bligdage gire. Agwa Chubege alin allabi be chke uñale, Chube ba Ñenua, diali ama kle gwage ba kle age ulitadi, ba age Chube takalin kare ñanale Chube be gerule no ba giti be age no ba alin. 19 Jesu gerudu dare kwian ole: —Ba me mo ta gbe tañachuge lle oge mau alin nga dba ai giti diali chui tangle, chui gweale lle e ulita be jogenga ngwale, chubdu kle lle gute kwian ngeru, lle kle joge me no sugaska, kaire kwian skwe boanga kle skwe boi kle lle dbe kwian ngeru, malen ngwale ba tañachuge lle tanre lite ole mau alin nga dba ai giti. 20 Ma no ba tañachuge Chube giti, ba age ulita nga dba ai giti Chube takalin kare gire Chube be lle no oge nga ngaña giti ba alin ba age no ñanale. Ba joge toi ama ole nga ngaña giti chuia chke, chui ege Chube be age no no ba alin be lle no e kete bage ba agedu no nga dba ai giti ama takalin kare ñanale. Nga ngaña giti lle ketabe bage mi jogenga ngwale dale, chubdu me lle gute ba ngeru, lle me joge me no sugaska, ni kwian skwe boanga kle nga ngaña giti, lle ulita be chege no trate diali dale alin. 21 Ba mo ta gbe lle lite ole tanre mau alin nga dba ai giti, ba be kle tañachuge diali lle nga dba ai giti alinge, ba be ta jogenga tañachuge Chube giti. Agwa ba mo ta gbe diali tachke Chube giti age ama takalin kare nga dba ai giti, ba ta be kle ule diali Chube ole nga ngaña giti tañachuge Chube giti alin allabi. 22 Jesu gerudu: —Ba gwagwa kle ba gbe ten, ba gwagwa kle no me oga, ene ba ñage ten no trate ulita. Ene kaire kwian bai kle chage no trate Chube takalin kare ama kwian gwagwa no kare chage nga chra no giti. 23 Agwa ba gwagwa oga ba me ñage ten no trate, ba kle chage nga jereske. Ene kaire kwian bai me kle chage trate Chube geruadi kle chage age me no diali ama kwian gwagwa me no kare chage nga jereske, ama ñage boi tirare nga jereske, kwian ene kare kle chage sugekare Chubege age tanre me no, ni suge amage Chube takalin ama toi mine no trate Chube gwa giti, ulia kwian ene kle chage nga jereske. 24 Jesu gerudu: —Ni kwian gdaite ñage lle boi no chugagwalla gdaboke alin. Kwian mo ta gbe lle boi no chugagwalla gdaite alin, kwian me ñage lle boi no chugagwalla na alin kaire. Kwian lle boi chugagwalla gdaboke alin gire kwian mo ta dbe no chugagwalla gdaitre alin ole, chugagwalla na ole ama me mo ta dbe no dale, ama be jainchke chugagwalla edi. Ene kaire ba mo ta gbadale tañachuge lle boi no Chube alin me tañachuge diali igi gai giti lle lite ole ngle mau alin giti, ma no ba mo ta gbe tañachuge Chube giti alin allabi toi ama takalin kare. Ba mo ta dbe no igi alin ole ba me ñage mo ta dbe no Chube ole, ma no tañachuge Chube alin giti, me tañachuge lle boke giti ule. 25 ’Cha gerule ba ole, ba me mo ta dbe tañachuge tanre diali lle toigda alin giti, ba be llema gute ba be llema jai toigda chui bdugu, llema giti ba be mo ngama tke. Noare ba bligda molen gutadale, noare ba chi molen jadale, noare ba ñometra molen mo ngama tkagda, agwa me no tañachuge tanre diali bligda alin giti chi alin giti ñometra alin giti mo alin toigda. Chube ba dodadu ama ba gbu toi gwade, ene kaire Chube be lle ulita kete bage toigda, malen ma no ba mo ta gbe tañachuge diali Chube giti me lle alin allabi giti toigda no nga dba ai giti. 26 Ba ulita tachkedale bdada giti, bdada me kle chude ngama gbe, me kle chude tke, me kle bligda lite ole ogadale, me kle lle boi dale agwa kle toi no, ba Ñenua Chube kle ama manade, Chube kle bligda kete bdadage gutadale. Chube alin ba ma ñanaske bdadage, bdada me ñanaske ba kare Chube gwa giti agwa Chube kle ama manade no, ene kaire bage sugedale Chube be ba manade no diali. 27 Ngwale ba tañachuge tanre lle ulita giti mo alin toigda, tañachuge tanre ene kare giti ba me ñage chui na dare gai mo alin toingwa, chui be chke ba alin jogeda gire ba be jogeda diali. Ngwale ba tañachuge tanre lle toigda giti, Chube kle ba manade. 28 ’¿Mineade ba kle mo ta gbe tañachuge tanre ñometra giti mo ngama tkagda? Ba ulita tachkedale glijra giti, che gwage glijradi glijra noare, diali glijra meñe no, e Chube kle gbe ene, glijra me lle boi dale, meñe no alin allabi. 29 Cha gerule ba ole, kwian chugagwalla unsuialin kada Salomón, ama kwian kweri, ama mo ngama tku ñometra noareske, agwa glijra ma noare Salomón ñometrallage. 30 Chube glijra gbe tige no, nege glijra kle no, suialin gire glijra kwenga. Glijra me ñanaske ba kare Chube gwa giti agwa Chube kle glijra gbe skiennga no, Chube gwa giti ba ñanaske tanre ama be ba manade no diali, lle gweale me ba ole toigda Chube be lle e kete bage. Ba me kle Chube gai ulia Chube ñage ba manade no, ba mo ta gbadale me tañachuge ene dare, ulia Chube be ba manade no diali, ba ama gadale ulia. 31 Ba Chube uñe malen ba me mo ta dbadale olire lle toigda nate, ba be llema gute, ba be llema jai, llema giti ba be mo ngama tke. 32 Kwian me Chube uñe ulita diali kle mo ta dbe olire lle toigda nate. Agwa ba Chubenu, Chube ba Ñenua nga ngaña giti, amage uñale ba takalin llemage ene ba toi no nga dba ai giti. 33 Ba mo ta gbadale Chube gai ma no diali mo Chugagwallale, ba ama gadale dage, ba mo ta gbadale age no trate ama takalin kare diali, ene Chube be ba manade no be lle toigda kete bage lle bai me ba ole ene ba toi no nga dba ai giti. 34 Malen ba me tañachugadale tanre ba be toi llema giti suialindale, suialin chui be kle tañachugangwa, ba me tañachuge nege be boi gweale suialin giti, ba me chegedale tañachuge tanre e giti Chube be ba manade be ba chudaboi be boi gweale giti ba ole.
1 Jesu gerudu dare kwian ulita ole: —Me no mo ta dbe tañachuge ba alin allabi kle age no Chube gwa giti gerule daba nadi daba me no Chube gwa giti, ba gerule me no dabadi ene, Chube be ba gbe jiske gerule ene dabadi gdale. 2 Ba gerule daba nadi daba me no Chube gwa giti, Chube be gwage me no badi kaire agwe, gire Chube be age ba ole ba kle age daba na ole kare. Ba gerule me no tanre dabadi, Chube be ji gbe ba giti tanre, kaire ba gerule me no sidri dabadi Chube be ji gbe ba giti sidri. Ba age batre daba na ole Chube be age ene batre kaire ba ole. 3 ¿Mineade ba kle tañachuge diali daba na kle age me no giti? Diali ba kle gerule me no dabadi daba gbale jiske daba kle age me no giti agwa ni ba kle tañachuge sidri ba agali kle age ma me no dabage giti. E salengwli ba kle gwage ngajwna daba gwagwagedi kare, ba ta ngajwna e jwankalinnga daba gwagwage, agwa ngajwna ma kweri kle mo gwagwage. Bage me suge ngajwna kweri kle ba gwagwage, ngwale ba gerule daba ole: “Daba, cha chugene ngajwna soli jwennga ba gwagwage.” 5 Ngeru ba ngajwna kweri jwandalenga mo gwagwage mo gwagwa jige trate, ene ba ñage daba chudaboi ngajwna soli jwennga ama gwagwage. E salengwli kwian kle gerule dabadi age me no sidri giti, me suge mau tale ama kle age ma me no dabage. Ama takalin daba na ulita tañachuge ama giti ama no ulita agwa gire ama ulia ta me no. Cha gerule ba ulita ole, ma no ba mo ta gbe tañachuge ba kle age me no giti ngeru me tañachuge daba na kle age me no giti, ba mo ta gbadale trate biale gire ba ñage daba na ta gbe ama kle age giti ba ñage ama chudaboi. 6 ’Kaire cha gerule ba ole Chube gerua kete kwian nage giti. Ba me kle samla bita ma no kete toge. Ba samla e kete toge to be srechie samla nadi gire be ba gute samla gdale. Kaire chunchi, ba me kle lle ñanaske igigwa kare mlienga ngwale dba chunchige, chunchi be skite giti igigwa be jwatenga ulita chunchi me igigwa gai dage dale. E kare ene ba Chube gerua kete kwian me Chube uñege, kwian e me ta geru e keruchugakalin me geru e gai dage gire ba me Chube gerua trage dare ama ole. 7 Jesu gerudu dare kwian ole: —Ba lle kade diali Chubege, e salengwli kwian kle lle kade dabage diali kare gire lle ketakle amage, e salengwli kwian kle lle jinade nate diali kare gire lle kle skwen amage, e salengwli kwian kle ugaka dagenga kare ta jogekalin gwa daba ullage gire daba kle ugaka degenga ama alin jogedale gwa. 8 Kwian ulita bai kaire lle kade diali, kwian enege lle keta. Kwian bai kaire lle jinade nate diali, kwian enege lle skwen. Kwian bai kaire ugaka dagenga diali, kwian ene alin ugaka tigenga. Ene kaire ba lle kade Chubege, Chube be ba keruchuge Chube be age ba alin. 9 Ba ulita gweale kirogwa molen, kirogwa pan kade bage, ¿gire ba be ke kete amage gutadale? Me dale, ba mi mo ta gbe ke kete kirogwage gutale, diali ba lle no ketakalin kirogwa banuge. 10 Ba kirogwalla ngwe kade bage gutale, ¿gire ba be jorisi kete amage gutadale? Me dale, ba mi mo ta gbe age ene mo kirogwalla ole. 11 Ba ulita talla agenga me no, agwa gire ba me lle me no kete ba kirogwallage, ba kle mo ta gbe age no mo kirogwalla alin, ba lle no ketakalin diali ba kirogwallage. Chube ba Ñenua kle nga ngaña giti, ama no trate ulita, ama ñage age ma no ulita ba alin ba kle age ba kirogwalla alinge, ama lle ma no kete bage, ama ta agekalin no no ba alin diali, ba bai lle kade Chubege Chube lle no kete bage. 12 ’Ba takalin kwian na ulita age ba alin, kaire ene ba mo ta gbadale age ene kwian na ulita alin. Moisés nu Chube gerua degaba unsuialin kaire kwian Chube gerua ketanga ulita nu Chube gerua degaba unsuialin, geru e ulita gerule kwian ulita agedale no ene daba alin. 13 Jesu gerudu dare: —Ba ulita mo ta gbale joge tangle gereka ugakalla ka ulege chage jon soli jegwale kare. Joge Chube ngwadi salengwli joge tangle gereka ugakalla ka ulege kare. Kwian Chube gerua gai ulia ama ñage joge jon e kare, ene bdagli kwian ene ñage joge toi Chube ole nga ngaña giti diali chui tangle. Agwa mnoare kwian alin Chube gerua gai ulia toi Chube takalin kare nga dba ai giti malen kwian bedre alin Chube gerua gai ulia. Kwian tanre me Chube gerua gai ulia, ama ulita kle toi nga dba ai giti age ulita ama agali ta agekalin kare, e salengwli kwian joge tangle gereka ugakalla kwerige chage jon kweri jegwale kare, kwian ene kle chage sugekare Chubege kle age che dolla takalin kare. Bdagli kwian ene be boi daga ngwale nga dbigu giti che dolla ngwadi agedu me no kbiale, kwian ngle be boi ene. 15 Jesu gerudu dare kwian ole: —Ba bai Chube gerua gaba batre, ba ulitaske kwian na geru me ulia dbanga be chke gerule no ba ulita ole Chube giti. Gwangea ama be chage no ba ulita ole, ene ama takalin ba mo ta gbe no ama ole, agwa bigire be chke uñale bage ama ta me no, ama me kle gerule ulia ba ole Chube giti. Ama ta ba anblitakalin geru me uliage malen ba kledale ta giti, ba me kwian ene kerua tallade, ama kle gerule ngwale. 16 Ama kle chage me no baske giti ñage chke uñale bage ama ta mine ulia, ñage chke uñale bage kwian e kwian me no me kle Chube gerua dbe ulia, ama geru ngwale dbanga, e salengwli gligba giti chke uñale chege gli mine. Uñale trate ba ulitage idongi me gbachie uvale, drinkin me gbachie higole. 17 Gli no gbachie no diali, kaire gli me no gbachie me no diali. 18 Gli no me ñage gbachie me no, gli me no me ñage gbachie no. 19 Kaire gli me no me gbachie no, ama datakle gugakle jitaske. 20 Gligba giti gli chke uñale nate gli bai no gli bai me no. Ene kaire kwian kle age no o kle age me no ba ulitaske giti ñage chke uñale trate ba ulitage kwian bai no kwian bai me no kwian bai Chube gerua ulia dbanga kwian bai geru ngwale dbanga. 21 Jesu gerudu dare kwian ole: —Chui bdagli be chke gire Chube be kwian me no gbe ji chuge boi daga ngwale tanre diali chui tangle. Chui ege kwian tanre be gerule ama kle cha gai mo Chugagwallale agwa ama me mo ta gbaba ulia age cha Ñenua Chube takalin kare, malen ngwale kwian ene gerule ama kle cha gai mo Chugagwallale. Kaire chui bdaglige kwian tanre be gerule cha ole: “Ba cha Chugagwalla, ba kalla giti cha ba gerua ketu kwiange kaire ba kiralla giti cha dolla kagu siere kwian jwligebangage, lle no tanre cha dodadu ba kiralla giti.” Kwian be gerule ene agwa ama me cha gerua gaba ulia gire cha be jainnga ama kalen: “Ba me cha gerua gau ulia, cha me ba uñe, ba me chanu, ba kwian agenga me no. ¡Joga siere chage! Ba me ñage joge toi cha ole cha Ñenua Chube ole nga ngaña giti.” Cha be gerule ene kwian me cha gerua gaba ole chui bdaglige. Cha gerule ba ole, kwian bai kle age Chube takalin kare, ama alin allabi be ñage joge toi Chube ole nga ngaña giti. 24 Jesu gerudu dare kwian ole: —Kwian bai kle cha keruchuge gire mo ta gbe age cha gerule kare, kwian e ta no molen tañachuge trate, ama salengwli kwian u gbanga no kare. Ngeru kwian u gbanga no kle dbi bage jere bu tke dbige jere gire kle ke ten budi tangle, ene bu chege kejre me joge chke dba, u kle dodaba no kiraske. 25 Noi boi kweri gire chi uda joge kweri, mle kweri tiennga u edi, u me joge chke dba, chi uda me ñage u dbe, u gbanga no bu tku jere dbige malen chi uda me ñage u e dbe. Kwian bai cha gerua keruchuge gire mo ta gbe age cha gerule kare, kwian ene salengwli kwian u gbanga no e kare. 26 Agwa kwian bai kle cha keruchuge gire me mo ta gbe age cha gerule kare, ama salengwli kwian u gbanga me no kare ama me tañachuge no, ama kle u gbe dbi giti alin me bu tke dbige jere me ke ten budi tangle. 27 Noi boi kweri ene chi uda joge kweri, mle kweri tiennga u edi, u joge chke dba, u joge ulita chi giti —Jesu gerudu ene kwian ulita ole. 28 Jesu gerudu ene ulita gire kwian tanre chegu tañachuge tanre Jesu gerudu giti, kwian tañachugu mo tale: “¿Mineade ama ñage che tke tangle ene trate? Ama kle che tke tangle ma no ma kiraske kwian che tkanga tangle Moisés chadalla giti ulitage, ama kle che tke tangle kwian geru mauña kweri kare.” Kwian ulita tañachugu ene mo tale Jesu giti.
1 Jesu jo dbige jwichugage kwian geru jwannga amage ulita ole, kwian tanre chagedu ama nate. 2 Kwian onbre gdaite chku Jesudi gerule Jesu ole, onbre e oga jingme kwara gbe tuge kote, onbre ege sugedu Jesu kira molen ngle malen ama jongnagwa skutu dba Jesu gwangnagu gire gerudu Jesu ole: —Ba takalin cha dodade, uñale chage ba ñage jingme ai jwen siere chage ene cha chege trate jingme aige. 3 Kwian oga gerudu ene Jesu ole gire Jesu ko chugu amadi, Jesu gerudu: —Cha takalin ba jingmea jwen siere bage, nege nege ba chege no trate. Jesu gerudu ene gire sugeti jingme jo siere onbrege onbre chegu trate. 4 Jesu gerudu oga jo chkeni no ole: —Ba me gerule ni kwian gdaite ole cha ba dodadu giti agwa ba agedale Chube nu geru gbaba unsuialin kwian alin Moisés giti gerule kare, chada e gerule ba agedale ai kare: Joga u gerungwa Chube olege mo kaite kwian gerunga Chube ole daba alinge, ba bdada gbaboke dbadale ule gugadale Chube gwa giti u ege ba chegu no trate ñanale, joga age ene ulita gire be chke uñale kwian ulitage ba jo chkeni no ba jingmeage —Jesu gerudu ene kwian onbre jo chkeni ole. 5 Jesu jo chage una Capernaum ngnagu, jo chke una ege guardia donga chugagwalla nga Romamu gdaite chku Jesudi gerule Jesu ole, ama gerudu: 6 —Cha ba gai kweri, cha takalin ba cha chudaboi, kwian lle boanga cha alin gdaite kle gwa ama oga jabale, ama skliebadba trate jegwale, ama skibachie tanre me ña jwlitenga. Noare ba cha chudaboi, noare ba lle boanga chanu oga dodade cha alin, ene ama joge chkeni noni. 7 Jesu jaindunga: —Cha ta ba chudaboakalin, cha be joge ule ba ole oga kle ngwadige jingme jwennga siere amage. 8 Guardia donga chugagwalla gerudu Jesu ole: —Cha ba gai kweri, chage suge cha me no, uñale chage trate ba no no, malen ma no ba me joge gwa cha ullage oga kle ngwadi, ba gerule alin allabi aini jonke lle boanga cha alin oga giti, ene uñale chage ama be joge chkeni noni. 9 Uñale chage ba kwian chugagwalla kweri ba kira molen ulita, ba gerule alin allabi gire jingme joge siere kwian ogage. Cha chugagwalla ñage cha kage lle boi ene cha age ama gerule kare, kaire cha guardia donga chugagwalla ñage guardia donga ulita kage lle boi ama age cha gerule kare, cha gerule guardia donga gdaite ole: “¡Joga!”, gire ama joge. Cha gerule na ole: “¡Bai aini!”, gire ama chie. Cha kwian lle boanga cha alin kage lle boi gire ama lle boi cha gerule kare. Ba ma kweri kira molen malen uñale chage ba gerule alin allabi jonke ba kle ngwadi jingme kage siere lle boanga chanuge, gire jingme be joge siere amage ama be joge chkeni noni. 10 Jesu guardia donga chugagwalla gerua keruchugu ene gire Jesu chegu tañachuge noare amadi, Jesu gerudu kwian kle chage Jesu ole ulita ole: —Ni kwian gdaite nga Israel ulitage guardia donga chugagwalla ta e kare molen, ama kle mo ta gbe cha gerua gai ulia mo tale ma no kwian israelita ulitage. 11 Cha gerule ba ulita ole, cha chuia be chke bdagli gire kwian me israelita tanre nga ulitage be chie chui ollade Chube ngwadi, ama ulita cha gerua gaba malen ama be toi no nga ngaña giti Chube ngwadi ule kwian israelita enusulian unsuialin Abraham ole Isaac ole Jacob ole. 12 Kwian israelita ulita kledale Chube ngwadi chui ege agwa ama tanre me cha gerua gau ulia, malen ama gbabe sugekare Chubege ji chuge tirare boi tanre daga ngwale nga jereske, ne ngwadi kwian e ulita be olire tanre ji chuge tirarege. 13 Jesu gerudu ene kwian ulita ole gire Jesu gerudu bdagli guardia donga chugagwalla ole: —Jogani ba ullage, ba cha gau ulia cha ñage gerule alin aini jonke gire lle boanga ba alin oga be joge chkeni, be boi ene ba cha gau ulia kare, oga e be joge chkeni. Jesu gerudu ene gire sugetibi e suiale kwian lle boanga oga kledu gwa jo chkeni no trate. 14 Jesu jo Pedro kle toi ngwadi gire Pedro ñemaña skwendu oga ankwa giti nganagda ole. 15 Jesu jo chke muinga oga kle ngwadi, ko gau kote gire sugeti nganagda me chegu chkedi dare, nganagda ulita jo siere Pedro ñemañage. Ama cheguni noni chku gdate, gire ama bli jinadu Jesu alin kaire kwian na kle ne ngwadi alin. 16 Chui amañage ngabi nga jo jere gire kwian tanre oga dule Jesu ngwadi, kwian jwligebanga ngle che dolla kote kaire kwian ngle oga jingme tanre ole dule Jesu ngwadi dodadale. Jesu gerudu geru gbaitre alin allabi kiraske dolla ulita ole gire dolla jo siere kwiange, kaire Jesu kwian na oga dodadu ulita. 17 Ai ulita boidu ene kwian Chube gerua ketanga kada Isaías Chube gerua degu unsuialin gerule kare, chada e gerule: “Ama che boi daga ngwale ulita chegu ama kote kaire che oga ama che dodadu.” Isaías chada degu ene unsuialin Jesu giti. 18 Kwian tanre kledu Jesudi tangle, malen Jesu tadu joge tangle chi kagda giti ongoru, Jesu gerudu kwian geru jwannga amage ulita ole: —Che jogedale tangle chi kagda giti ongoru, ba mo gbe biale. 19 Jesu gerudu ene kwian geru jwannga amage ulita ole gire sugeti kwian daba tkanga tangle Moisés chadalla giti gdaite chku Jesudi gerudu Jesu ole: —Ba kwian tkanga tangle geruge, cha ta jogekalin ba ole ba be joge baini kaire ngwadi, cha be chage ule ba ole geru jwen bage. 20 Jesu gerudu kwian e ole: —¿Ulia ulia ba ñage chage cha ole baini kaire cha be joge chage ngwadige? Bliski ugara molen gbengwa kaire bdada ugara molen gbengwa, agwa cha me dale. Chube nu cha kagaba nga dba ai giti kwian kare, cha me u molen agali gbengwa. 21 Jesu gerudu ene kwian daba tkanga tangle Moisés chadalla giti gdaite ole gire kwian na gdaite kle ne ngwadi gerudu Jesu ole: —Cha chagekalin ba ole geru jwen bage kaire, agwa nege nege cha me ñage, cha be manade, cha ñenua be jogeda cha be ama jaba tke dbige gire cha be ñage chage ba ole. 22 Jesu jaindunga kwian e kalen: —Ba ta chagekalin cha ole me ñage manade, bai chage cha ole nege. Ba mo ta gbadale chage cha gerua nate ulia, ba bitalla ulita me Chube gerua gai ulia ba ama jige ba ñenua jaba tke dbige. 23 Jesu gerudu ene kwian ole gire Jesu jo du toli kwian geru jwannga amage gdataboko giti gdaboke ole, ama ulita jo chage duge chiga giti jo chibita kagda giti ongoru. 24 Jesu ule kwian geru jwannga ulita ole kle chage duge ene chiga giti gire Jesu gbedu. Jesu kle gbe gire sugeti ngwale mle chku dba kweri kiraske chi skwendu bdugu chi jo du toli, du biri jwlitenga. 25 Gire ta kennga tanre ole kwian geru jwannga Jesuge Jesu gau gdate, ama gerudu Jesu ole: —¡Cha Chugagwalla! ¡Chkede bduge cha chudaboi! ¡Che ulita be joge chiske duge llagli, che be unjoge! 26 Jesu jaindunga: —¿Mineade ba ulita ta kennga tanre? ¿Ba me cha gai ulia cha ñage ba manade nga tirareske? Jesu gerudu ene gire ama chku gdate gerudu mle ole gerudu chi ole: —¡Chegede ngwedige ngeru kare! Gire mle kaire chi chegu ngwedi Jesu gerudu kare. 27 Jesu agedu ene mle ole chi ole gire kwian geru jwannga Jesuge ulita chegu tañachuge tanre noare Jesudi, ama ulita geru kadu moge ongoru ongoru: —¿Kwian ai mine, ade mle kaire chi kle ama kerua gai dage ama gerule kare? —kwian geru jwannga geru kadu moge ene Jesu giti. 28 Jesu jo chage dare duge chiga giti kwian geru jwannga amage ulita ole, Jesu jo chke chi kagda giti ongoru nga ka jwankle Gadarage. Ne ngwadi Jesu jo kedagu gire kwian gdaboke jwligebanga dolla kote chku ten Jesu ngwange, kwian jwligebanga gdaboke e kledu toi kwian jaba ogakle keugage ngwadi. Kwian jwligebanga gdaboke e saingwli tanre, malen kwian na ulita ta kendunga chage ne ngwadi jon e giti. Kwian jwligebanga e chku Jesudi, 29 gire dolla kwian boke e tale kwian gbu ngaute Jesuge: —Uñale chage ba Chube Kirolla. ¿Lledale ba chiu cha nate nga aige? ¿Ba chiu aini cha gbe boi daga ngwale ngerutabi Chube be cha ulita gbe ji chuge chuia bebi chke gire? Cha me takalin ba cha gbe boi dagale tanre nege. 30 Ne ngwadi gwajangeti chunchi tanre kledu blire, 31 gire dolla kledu kwian tale gerudu Jesu ole: —Ba be cha ulita kage siere kwian aige, cha me takalin ba cha kage ji chuge nege nga tirarege, ma no cha takalin ba cha ulita kage toi chunchi e ulita tale. 32 Jesu gerudu amage: —¡Dolla ulita, joga siere kwian aige! ¡Joga toi chunchi tale! Jesu gerudu ene gire dolla jo siere blike kwian onbre bokege jo chunchi tale, kwian boke chegu trate no. Dolla jo chunchi e ulita tale gire chunchi jo jrite ulita jo kegdege dolla kote, chunchi ulita jo chiske jokeda chi kote dolla kbiale. 33 Gire kwian chunchi mananga ulita gwagedu chunchi boidu ene ulitadi gire ama ulita jo jrite kwachieske ama jo geru kete kwian ngleage unaske, ama geru tragu boidu chunchi ole giti kaire geru tragu Jesu kwian jwligebanga boke dodadu giti. 34 Chunchi mananga geru e ulita tragu kwian unaske ole, gire kwian ulita kledu toi una ege jo tienda Jesudi. Kwian e ulita jo chke Jesudige gire gerudu Jesuge: —Cha ulita me takalin ba chege dare aini nga aige. ¡Joga siere nga aige me age ene dare aini!
1 Kwian nga Gadarage Jesu kagu siere nga ege gire Jesu jo du toli geru jwannga amage ulita ole, ama ulita joni tangle chibita kagda giti ongoru. Gire ama ulita jo chkeni Jesu jwiage Jesu toidu ngwadi. 2 Ne ngwadi kwian oga skliebada trate jegwale dule ankwa giti Jesudi, Jesu gwagedu kwian ogadi gire uñadu Jesuge kwian oga kaire kwian oga dbanga ulita mo ta gbaba ulia Jesu ole Jesu ñage kwian oga dodade, malen Jesu gerudu kwian oga ole: —Ba mo ta gbe suga no. Cha gerule ba ole, ba ageba me no ulita talla cha mlienga, nege ba chege no trate me jiske Chube gwa giti. 3 Kwian daba tkanga tangle Moisés chadalla giti gweale kledu eni Jesu keruchuge gerule ene kwian oga ole gire tañachugu Jesudi mo tale: “Onbre e kle gerule me no, ama kle mo gbe kweri Chube kare. ¿Chema ñage kwian age me no ulita talla mlienga kwian gbe no trate me jiske Chube gwa giti? Chube alin allabi ñage, onbre e me ñage age ene Chube kare.” 4 Kwian daba tkanga tangle Moisés chadalla giti ulita kledu tañachuge ene mo tale Jesudi, gire Jesuge uñadu trate kwian e ulita kle tañachuge giti, Jesu geru kadu kwian e ulitage: —¿Mineade ba ulita kle tañachuge me no ene chadi? 5 ¿Bai ma mno cha alin: kwian oga ai ageba me no ulita talla mlienga o kwian oga ai dodade jingmege? Cha alin ai me mno ulita gdabonate. 6 Nege cha be kwian oga ai dodade ba ulita gwa giti ene be chke uñale bage ulia Chube cha kagu nga dba ai giti kwian kare, Chube kiralla giti cha ñage kwian oga dodade jingmege kaire agwe cha ñage kwian age me no ulita talla mlienga kwian gbe no trate me jiske Chube gwa giti. Jesu gerudu ene kwian daba tkanga tangle Moisés chadalla giti ulita ole gire Jesu gerudu kwian oga skliebada trate jegwale ole: —Nege cha gerule ba ole, chkede gdate mo ankwalla blienga dbadale, jogani chage ba kle toi ngwadige. 7 Jesu gerudu ene gire kwian oga skliebada chku gdate mo ankwalla gau kote ama joni chage ama kle toi ngwadige. 8 Kwian ulita kledu ne ngwadi gwagedu ai ulita boidudi gire kwian ulita ta me jo sugano chegu tañachuge tanre, kwian gerudu no Chube giti: —Chube noare, ama kira molen ulita, ulia ama kira ketu Jesuge kwian oga skliebada trate jegwale dodade, ulia Chube no no —kwian ulita gerudu no ene Chube giti. 9 Jesu kwian oga skliebada dodadu ene gire Jesu jo chage dare, Jesu gwagedu kwian onbre ka jwankle Mateodi. Mateo kwian igi ganga chugagwalla emperador nga Romamu alin, ama kledu toiba dba igi ketakle ngwadi igi gai kwiange, gire Jesu chku amadi gerudu ama ole: —Bai chage cha ole geru jwen chage. Jesu gerudu ene gire Mateo chku gdate lle e boi chugu ngwadi ulita, ama jo chage Jesu ole. 10 Chui gbaite Jesu jo blire Mateo ullage kwian geru jwannga amage ulita ole, Jesu kle blire eni gire kwian tanre igi ganga chugagwalla emperador nga Romamu alin kaire kwian na tanre agenga me no chku Mateo ngwadi, kwian e ulita toidu dba blire ule Jesu ole kaire kwian geru jwannga Jesuge ole. 11 Kwian fariseo mneite kledu eni gwagedu Jesudi blire ule kwian tanre agenga me no ole gire kwian fariseo e geru kadu Jesu giti ta me no ole kwian geru jwannga Jesuge ulitage: —¿Mineade ba tkanga tangle geruge kle blire ule kwian igi ganga chugagwalla emperador nga Romamu alin ole kaire kwian na tanre agenga me no ole? 12 Kwian gerudu ene kwian geru jwannga Jesuge ole gire Jesuge geru sugedu kwian kledu geru kade giti, malen Jesu gerudu kwian e ole: —Cha gerule ba ulita ole, kwian kle no trate me oga me joge kwian mo dodanga ngwadi mo dodade, agwa kwian oga ima ama joge kwian mo dodanga ngwadi mo dodade. 13 Cha tai dage kwian ai ulita cha kle blire olege, cha ta ama ulita chudaboakalin kwian mo dodanga kwian oga chudaboi kare. Ba geru jwandale Chube gerua degaba unsuialinge ene suge bage chada e giti Chube kle gerule mine, chada e gerule: “Chube gerudu: ‘Cha me takalin ba bda gweda cha gwa giti age no cha ole alin allabi. Agwa kaire cha takalin ba tai dage daba nage diali ba agedale no ama alin.’ ” Chube gerua degaba unsuialin gerule ene. Cha gerule ba ulita ole, cha chiu nga dba ai giti kwian agenga me no ta blite Chube ole joge siere ama kle age me noge, agwa kwian gweale kle tañachuge mo tale ama no trate me jiske Chube gwage, kwian kle tañachuge mo giti ene alin cha me chiu, cha chiu kwian agenga me no alin —Jesu gerudu ene kwian fariseo ulita ole. 14 Kwian tanre chagedu Juan-Bautista ole Juan-Bautista gatedi geru jwen Juan-Bautistage ama jo Jesudi geru kade Jesuge, ama gerudu Jesu ole: —Cha ulita geru jwannga Juan-Bautistage kaire kwian fariseo ulita diali kle chui gweale gai mo tkale bage bligdage gerudale Chube ole alin chui ulita me blire. Cha ulita kle age ene tanre, agwa kwian geru jwannga bage ni gdaite kle age ene. ¿Mineade geru jwannga bage me kle mo tke bage bligdage chui gwealege cha ulita kle age kare? Kwian geru jwannga bage ulita kle blire chui ulitage. 15 Jesu jaindunga: —Cha be geru ai ñachuge ba ulita alin, ene be chke uñale bage mineade kwian geru jwannga chage me kle mo tke bage bligdage kwian na kle age kare: Kwian onbre mo jwen chuia gbe, mo jwen chuia chke gire kwian kadaba ulita be joge chui ollade ule kwian onbre mo jwannga ole. Kwian kadaba ulita be chke chui ollade, ¿chema gerule kwian e me ñage blire? Kwian ulita be blire nga suga no ole chui ollade ule kwian onbre mo jwannga ole. Agwa chui e joge tangle gire chui gbaite be chke kwian onbre mo jwannga dbabe sugekare, chui ege kwian mo jwen chuia olladanga ulita be chege ta olire kwian onbre mo jwannga nate gire kwian chui olladanga ulita be mo tke bage bligdage ta olire ole. Ulia cha gerule ba ulita ole, cha kwian onbre mo jwannga e kare, kwian geru jwannga chage ulita kwian mo jwen chuia olladanga kare. Nege cha kle ule geru jwannga chage ulita ole, agwa chui be chke gire cha dbabe sugekare amage, chui ege ama be mo tke bage bligdage ta olire tanre ole. 16 Jesu geru ñachugu ene kwian alin gire Jesu geru na ñachugu ama alin kaire: —Cha gerule ba ulita ole, ni kwian gdaite kle mo ñometralla juda ugachuge ñometra jagere me gligabage. Che ñometra jagere gbe ñometra juda giti, gire che ñometra jagere glige ñometra junbate ñometra chege ma soli, ñometra jagere kle ñometra juda gbe dretenga, gire ñometra uga kle chege ma me no kweri, ulita kle chege me no. 17 Kaire ni kwian gdaite kle lle gage jagere tke bda kwara dodaba lle gage dbangwa judage. Che lle gage tke bda kwara judage lle gage jagere kle lie gire bda kwara juda kle skiennga ulita, gire lle gage ulita kle jogenga ngwale ulita, kaire bda kwara kle chege me no ulita. Malen diali lle gage jagere tkakle bda kwara jagerege, ene lle gage kle lie, bda kwara me skiennga, lle gage me jogenga ngwale. Jesu geru ñachugu ene ulita kwian geru jwannga Juan-Bautistage alin, uñadu Jesuge kwian e me ta Jesu gerua jagere gakalin ulia me ta mo gerua juda gbaba unsuialin chugakalin ngwadi, malen Jesu geru ñachugu ene ama alin geru jagere giti geru juda giti. 18 Jesu kledu gerule kwian geru jwannga Juan-Bautistage ole gire kwian israelita chugagwalla gdaite chku Jesudi, ama jongnagwa skutu dba Jesu gwangnagu mo chudaboi kade Jesuge, ama gerudu Jesu ole: —Cha jian jokeda sugeti, cha takalin ba joge ule cha ole cha ullage cha jian jaba kle ngwadi, ba ko gbe ama jaba giti ene ama be chkeni gwade. 19 Gire Jesu chku gdate Jesu jo chage kwian e ole kwian e ulla ngnagu, kaire kwian geru jwannga Jesuge gdataboko giti gdaboke jo ule Jesu gatedi. 20 Jesu kledu chage jon jegwale gire muinga oga jo chke kodi Jesudi Jesu nate jonke, muinga e oga daige sbali, chura gdataboko giti gdaboke chui kaire kairege muinga e kledu toi daige diali, muinga e tañachugu mo tale: “Uñale chage cha ko chuge Jesu ñometralladi alin allabi gire ene cha be joge chkeni noni Jesu kiralla giti.” Muinga tañachugu ene mo tale gire ama agedu, ama ko chugu Jesu ñometralladi, 22 gire Jesu jwlituda modi tangle, Jesu tendu muinga ogadi gire Jesu gerudu muinga ole: —Ba mo ta gbe suga no, ba mo ta gbu cha gai ulia malen e giti cha ba dodadu, ba jo chkeni noni. Jesu gerudu ene gire sugeti ngwale muinga chegu no trate muinga jo chkeni ama jingmeage. 23 Jesu jo chage ngeru gire ama jo chke gwa kwian israelita chugagwalla ullage. Jesu gwagedu kwian tanre kle mo litaba enidi, kwian e ulita kledu olire kweri sui jwennga kirogwa muire jaba nate, kaire kwian gweale kledu ngwane lle ngwanegda kada flautage biale joge oña jaba tke dbige. 24 Jesu gwagedu kwian ene ulitadi gire Jesu gerudu ama ulita ole: —¡Joga siere aini! Kirogwa muire me jogebakeda dale, agwa ama kle gbe alin allabi. Jesu gerudu ene gire kwian ulita gidedu Jesudi Jesu gerudu giti, kwian ulitage uñadu kirogwa muire e nu jogebakeda ulia. 25 Jesu kwian e ulita kagu siere ne ngwadige gire Jesu jo chiga kirogwa muire jaba kle ngwadige, ama kirogwa muire jaba ko gau kote gire kirogwa muire chkuni gwade, ama chku bduge. 26 Jesu kirogwa muire jaba gbuni gwade ene, gire geru e jo chage kwian ulitaske nga e ulitage Jesu kirogwa muire jaba gbuni gwade giti. 27 Jesu jo chage ngeru ne ngwadi gire kwian gdaboke gwagwa me chagedu Jesu nate jonkare ngaute Jesuge: —¡Ba che chugagwalla unsuialin David oindalla, ba tai dage chage, ba cha gdaboke gwagwa dodade! 28 Jesu jo chke gwa gire kwian gdaboke gwagwa me chku gwa Jesu nate, Jesu geru kadu ama bokege: —¿Ba cha gai ulia cha ñage ba gwagwa dodade ene ba ten? Ama boke jaindunga: —Ima, uñale chage ulia ba ñage cha gwagwa dodade cha gbe ten. 29 Gire Jesu ko chugu ama gdaboke gwagwadi, Jesu gerudu: —Ba cha gau ulia cha ñage ba gwagwa dodade, malen ba gwagwa be chege no ba takalin kare, ba be ten no trate. 30 Jesu gerudu ene gire kwian gdaboke gwagwa chegu no, ama ñadu ten no trate, Jesu gerudu ama ole: —Ba me geru trage ni kwian gdaite ole cha ba gwagwa dodadu giti. 31 Kwian gdaboke jo siere ne ngwadi ama me ñadu geru gate mo tale, ama geru tragu kwian ulita nga ege ole Jesu agedu giti no ama alin Jesu ama boke gwagwa dodadu. 32 Jesu kwian onbre gdaboke gwagwa gbu ten, kwian e boke kledu joge siere Jesu kledu ngwadige gire kwian na chiu daba keru me dbe Jesuge dodadale, onbre e nu jwligebanga che dolla kote, me ñage gerule che dolla kbiale. 33 Jesu dolla kagu siere onbre ege gire onbre e ñadu gerule. Kwian kle ne ngwadi ulita chegu tañachuge tanre Jesu agedu giti, kwian gerudu: —Ni cha nu gwageba kwian mo dodanga nodi e kare aini nga Israel ulitage. 34 Agwa kwian fariseo ulita kle ne ngwadi gerudu Jesudi: —Dolla chugagwalla kle kira kete amage, kira e giti ama kle ñage dolla na kage siere kwiange —kwian fariseo gerudu ene me no Jesudi. 35 Jesu jo chage una kaire kairege kwian tke tangle u mo litangwa Chube gerua jwanngwage. Una ulita baini kaire Jesu jo chke ngwadi ama gerudu kwian ulita ole kwian ñage Chube uñe, kwian mo ta blitadale Chube ole Chube gai mo Chugagwallale, ene Chube be kwian e jwen siere ji chugege agedu me no gdale. Jesu chagedu gerule ene kwian ole, kaire agwe Jesu kwian jingmere dodadu, kaire kwian oga lle na tanre kote Jesu kwian oga ene dodadu ulita. 36 Baini kaire Jesu jo ngwadi kwian ngle kledu, diali Jesu gwagedu kwian e ulitadi gire Jesu taidu dage kwian e ulitage, Jesu gwagedu kwian e ulitadi ta olire, kwian e ulita kira me chage no Chube takalin kare, chudaboanga me kwian e alin kwian e tke tangle no trate Chube gerua giti. Jesuge sugedu kwian e ulita bda oveja me mo mananga molen kare, 37 malen Jesu gerudu kwian geru jwannga amage ulita ole kwian ene giti: —Kwian tanre me Chube gerua uñe kle Chube gerua manade ngwange, agwa Chube gerua dbanga bedreare. E salengwli bligda tanre kle biale jwandale kare, bligda e jogeba dabe, agwa kwian bligda jwannga bedreare kagadale bligda e jwen. E kaire ene kle boi Chube gerua giti, 38 malen ba gerudale Chube ole Chube kwian gai kage ama gerua kete kwian me ama gerua uñege. E salengwli bligda mauña kle kwian na kage bligda jwen ama alin kare —Jesu gerudu ene kwian geru jwannga amage ulita ole.
1 Chui nage Jesu kwian geru jwannga amage gdataboko giti gdaboke kadu geru trage, chui ege Jesu mo kiralla ketu ama ulitage lle daga ngwale no tanre dodade Jesu kiralla giti, Jesu gerudu ama ole: —Nege gwangerugu cha kiralla giti ba ñage dolla kage siere kwian jwligebanga dolla kotege, kaire ba ñage kwian jingmere dodade ba ñage kwian oga lle na tanre kote dodade. 2 Jesu gerudu ene kwian geru jwannga amage ulita ole, kwian e ulita kada ene: Simón (amaña kada Pedro), Andrés (ama Pedro daballa), Santiago (ama Zebedeo kirolla), Juan (ama kaire Zebedeo kirolla, ama Santiago daballa), 3 Felipe, Bartolomé, Tomás, Mateo (ngeru ama igi ganga chugagwalla emperador nga Romamu alin), Santiago (ama Alfeo kirolla), Tadeo, 4 Simón (ama kwian kira batanga mo jwia gdale), Judas-Iscariote (bdagli ama jwlitedu Jesu dollale Jesu ketu gwaleda). Jesu mo kiralla ketu kwian e ulita gdataboko giti gdabokege gire Jesu ama ulita kagu Chube gerua dbe kwian nage. 5 Jesu bebi kwian e ulita kage Chube gerua Jesu giti dbe kwian nage gire Jesu gerudu ama ulita ole: —Ba joge chage Chube gerua dbe gire ba me joge nga kwian me israelita kle toi ngwadige Chube gerua trage ama ole, kaire ba me joge una ulita nga Samariage Chube gerua trage kwian e ole. 6 Ma no ba jogedale Chube gerua trage kwian israelita ulita ole, ama bda oveja jogebanga kare, ama me Chube gerua cha giti uñe. 7 Ba joge geru trage kwian ene ole Chube giti, ba gerudale: “Chube be age kwian ulita alin chuia kle kodi, ba mo ta blitadale Chube ole ama gai mo Chugagwallale.” 8 Ba chagedale geru e trage kwian ulita ole, kaire ba kwian oga dodade, ba kwian jogebakeda gbeni gwade, ba kwian oga kwara tuge jingmea kada lepra ole dodade jige trate, ba dolla kage siere kwian jwligebanga dolla kotege. Cha kira ketu bage, kira e giti ba kwian oga dodade, ba kwian oga dodade ba me igi kade kwiange ba kwian dodadu ñanale, ba me ñage kwian oga dodade mo kiralla giti, cha kira e ketu bage malen ba agedale no kwian na alin me igi kade amage age ene ñanale. 9 Ba joge age ene kwianske ba me teru dbe mo ole llagli, ba jogedale kole. Ba me igi dbe mo alin lle gigagda, ba me gde teru dbangwa dbe, ba jogedale ñometra modi alinske, ba zapato dbe modi alin, ba me zapato na ni ñometra na dbe mo ole llagli. Kaire ba me glita chagegda dbe. Chkedale uñale bage ba be Chube gerua dbe kwian nage, kwian e ba manadale lle ulita giti, malen ba me teru dbadale ni ba tañachugadale lle giti mo alin toigda. 11 ’Una ulitage baini kaire ba joge chke ngwadi ba chagedale u kaire kairege kwian ta no ole jinade, kwian ene kare skwen bage ama ba gai ngwange no mo ullage age no ba alin, kwian e ullage ba chegedale toi ba kle Chube gerua dbe kwian una emuske gire. Ba joge dare una nage ba age ene una kaire kairege baini kaire ba joge chke ngwadi. 12 U bai kairege ba joge chke ba gbi kadadale no kwian ulitage kle toi u ege, ba gerudale ama ulita ole: “Cha takalin Chube age no ba ulita alin, ene ba ulita ta dbe suga no.” 13 Ba gbi kade no ene kwiange gire kwian jainnga ta no giti ba kalen gwajondoida kwian ba gai ngwange no, kwian ene alin Chube be age no. Agwa ba gbi kade kwiange gire kwian me jainnga ba kalen ta no giti me ba gai ngwange no, kwian ene alin Chube mi age no, Chube be age no ba alin allabi, ngwale ba gbi kade kwian enege, ama mi ba keruchuge gerule Chube giti. 14 Baini kaire ba joge chke ngwadige kwian me ba gai ngwange no ni kwian ta ba keruchugakalin gerule Chube gerua giti, ba me tallade, ba jogedale siere u ege una ege, ba dbi mnuña skiennga mo serage kwian ene gwa giti, ene be suge kwian ege ama chege jiske tanre Chube gwa giti me ba gai ngwange no gdale Chube gerua giti. 15 Cha gerule ulia ba ulita ole, chui be chke gire Chube be ji gbe kwian una ege alin bai me ba gau ngwange no me tadu Chube gerua keruchugakalin, kwian ene alin Chube be ji gbe ma mno Chube ji gbu kwian agenga me no ulita alin una Sodomamuge una Gomorramuge unsuialin tangle. 16 Jesu gerudu dare kwian geru jwannga amage ole: —Cha gerule ba ulita ole, cha kle ba kage cha gerua trage kwian ole, joga ta giti. Cha kle ba kage, kwian ta me no me cha gerua gaba ulia be age ba dollale, ama ta ba gbakalin boi daga ngwale, ba be chage kwian eneske salengwli bda oveja chage gude tirareske kare. Ba chagedale ta giti kwian eneske salengwli jorisi kle mo gbe biale kare, kaire ba chagedale no trate kwian e gwa giti, me mo gbe jiske amage salengwli beusi me mo gbe jiske kwiange kare, ba tachkedale age no diali kwianske. 17 Ba ulita kledale ta giti, kwian gweale me ta cha gerua keruchugakalin, ta me no ole kwian ene be ba gai be ba kete kwian israelita chugagwallage boadalenga daga ngwale cha gerua gdale, kwian chugagwalla e be ba dbe u mo litangwa Chube gerua jwanngwage be ba batange obere giska giti kwian na ulita gwa giti. 18 Kaire agwe ba dbabe kwian chugagwalla tanre ma kweri ngwadi, chugagwalla e ulitage ba gbabe jiske cha gerua gdale, ba kle chugagwalla e ngwadi gire ba be ñage gerule no cha giti chugagwalla e ulita gwa giti kaire kwian me israelita na tanre gwa giti. 19 Ba ulita be geru cha giti kete kwiange, e giti kwian tanre be ba dollale be ba gai be ba dbe gbale jiske kwian chugagwalla kweri ulitage, ba boi ene gire ba me mo tallade ba be gerule mine mo giti kwian chugagwalla kweri e ulita gwa giti. Ba be kle eni kwian e gwa giti gire chui ege ba mi gerule mau tale, ba Ñenua Chube ama Oña be ba ta gbe ba gerudale mine kwian ole, ulia Chube Oña be ba chudaboi be ba ta gbe geru ulita giti. 21 ’Cha gerua gdale kwian be ta jwlite mo daballanu dollale be mo daballa kete kwian chugagwallage gwaleda, kaire ñenua be ta jwlite mo kirogwallanu dollale be mo kirogwalla gwangeda cha gerua gdale, kirogwa be ta jwlite mo ñenua dollale mo chebia dollale be mo chebia mo ñenua gwangeda cha gerua gdale. 22 Kaire cha gerua gdale kwian ulita be jainchke badi, agwa ba me mo tallade, ba bai me mo chuge ngwadi joge siere cha geruage boi daga ngwaleske, ba mo ta gbe cha gerua gai ulia mo tale diali gwangerugu mo ta gbe age no diali Chube takalin kare, ba bai mo ta gbe ene, chui bdagli be chke gire ba be toi no diali chui tangle cha ole Chube ngwadi. 23 Nege gwangerugu ba be kle chage una kaire kaire ulitage geru cha giti trage kwian ulita ole. Una gwealege kwian ba jrite nate ba gbale boi daga ngwale cha gerua giti, ba kigedale kwian una emuge ngeru, ba jogedale cha gerua trage una nage. Cha gerule ba ulita ole, lle tanre kle ba alin boadale cha gerua dbe una ulitage, ba bebi cha gerua trage kwian ulita ole una ulita kwian israelita kle toi ngwadige gire Chube be cha kageni nakwaite nga dba ai giti kwian ulita Chugagwallale. 24 ’Cha gerule ba ulita ole, ba geru jwannga chage ba lle boanga cha alin, cha gerua dbe gdale ba ulita be boi daga ngwale cha kle boi daga ngwale kare. Kwian geru jwannga mo ta dbadale mo tkanga tangle talla kare, kwian lle boanga mo ta dbadale mo mauña talla kare. Ni kwian geru jwannga gdaite ma kweri mo tkanga tanglege, ni kwian lle boanga gdaite ma kweri mo mauñage. Kwian daba tkanga tangle boi daga ngwale, ene kaire geru jwannga amage be boi daga ngwale salengwli mo tkanga tangle kare. Kwian gerule me no kwian daba tkanga tangledi, kaire kwian be gerule me no geru jwanngadi. Kwian gerule daba tkanga tangle e che dolla kada Beelzebú bitalla, ene kaire kwian be gerule me no ene geru jwannga ulita amagedi. Sugedale ba ulita cha gerua jwanngage ba be boi salengwli cha kle boi kare. 26 ’Kwian me no cha gerua ole ba gbe boi daga ngwale ba me mo ta dbadale kennga amadi, kwian ene age me no ba ulita ole skwlenre, e mi chege skwlenre diali, chui be chke gire kwian e agedu me no ulita ba ole be chke uñale nate kwian na ulitage. 27 Cha kle Chube gerua kete ba alinge sugekare kwian na ulitage, ba geru e tragale kwian ulita gwa giti. Ba kle geru keruchuge chage sugekare kwian na ulitage, ba me ta kennga geru e kete kwian na ulitage una kaire kairege. 28 Cha gerule ba ole, ba me mo ta dbadale kennga kwiandi kwian bai ba gwakalinda cha gerua gdale, ama ñage ba gweda alin allabi, ama me ñage age ba oña ole. Ma no ba mo ta dbe kennga Chubedi, Chube ñage kwian gweda, kaire Chube ñage age kwian oña ole ñage kwian oña kage nga dbigu giti ji chuge diali. Chube ñage age ene malen ma no ba mo ta dbadale kennga Chubedi mo ta gbadale Chube gai dage no. 29 Chube kle ba ulita manade no malen ba me mo ta dbadale kennga kwian agenga me no ba oledi. Bdada soli gai gbaboke bdada soli chbade, igi gai sidri bdada ñanale, bdada me ñanaske. Ba ulita me ene, ba ñanaske tanre Chube alin. Bdada me ñanaske agwa Chube kle bdada manade no diali, Chube tale ama me bdada talla kagenga gbaite. Kaire ene Chube kle ba manade ma no bdadage, ba chugaga ulita Chubege uñale gdamangire. Ulia Chube kle ba manade no no malen ba me mo tallade kwian kle age me no ba ole giti, ba me ta dbe kennga cha gerua trage kwian ulita ole. 32 ’Cha gerule ba ole, kwian bai kaire gerule no cha giti nga dba ai giti kwian ulita gwa giti, kwian e gerule ama cha gai ulia, ama gerule ene no cha giti, ene kaire bdagli nga ngaña giti cha be gerule no cha Ñenua Chube ole kwian e giti. 33 Agwa kwian bai kaire gerule me no cha giti nga dba ai giti kwian ulita gwa giti, kwian e gerule kwian ulita ole ama me cha gai ulia ama me cha uñe, ene kaire bdagli cha be gerule cha Ñenua ole cha me kwian e uñe dale, ama me kwian chanu. 34 Jesu gerudu: —Ba me ñage tañachuge cha chiu nga dba ai giti kwian ulita gbe toi no ule ene kwian me kira bate dare. Me ene dale. Cha gerua giti kwian tanre be mo tke dollale daba na ole, kwian gweale be cha gerua gai ulia, gweale na me dale, gire kwian ene me cha gerua gai ulia be kira bate kwian cha gerua gai ulia ole. 35 Cha gerua giti kwian tanre be mo tke dollale mo bitallanu ole, kirolla be kira bate ñenua ole, jian be kira bate chebia ole, gwadimea be kira bate ñemaña ole. 36 Kwian cha gerua gai ulia, kwian ene bitallanu gwa be chege ama dollale cha gerua giti. 37 ’Kwian bai ta chagekalin ulia cha ole age cha takalin kare diali, kwian ene mo ta dbadale ma no cha ole mo bitallanu ulita olege. Kwian bai kle mo ta dbe ma no mo ñenua ole mo chebia ole, bai kle mo ta dbe ma no mo kirolla ole mo jian ole, kwian ene kle mo ta dbe ma no mo bitallanu ole cha olege, ama kle tañachuge mo bitalla giti ngeru me kle tañachuge cha giti ngeru, malen ama me ñage chage cha ole. 38 Kwian bai ta chagekalin ulia cha ole me ñage tañachuge mau giti ngeru chage, kwian ene mo ta gbadale cha alin ole age ulita cha takalin kare, kwian ene boi daga ngwale cha gerua dbe gdale me tallade, kwian ene kle mo ta gbe age cha takalin kare ama ñage chage cha ole. 39 Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare giti, bdagli kwian ene be jogenga sugekare Chubege be chege boi tanre daga ngwale diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 40 ’Cha kle ba kage cha gerua trage kwian na ole, kwian bai ba gai ngwange no ba keruchuge no, kwian ene me kle ba alin allabi gai ngwange, kaire ama kle cha gai ngwange no agali kare ba giti. Chube cha kagu nga dba ai giti ama gerua kete kwiange, kwian bai cha gai ngwange no, kwian ene me kle cha alin allabi gai ngwange, kaire ama kle cha kaganga gai ngwange no agali kare cha giti. 41 Kwian Chube gerua ketanga Chube kle ama kage Chube gerua kete kwiange gire kwian bai ama gai ngwange no ama gerua gai ulia, kwian enege Chube be lle no kete bdagli salengwli Chube be lle no kete geru ketangage kare. Kwian baige suge daba na gweale ulia agenga no trate Chube takalin kare gire ama daba e gai ngwange no daba kle age no giti, bdagli Chube be lle no kete kwian ege daba gau ngwange no ñanale salengwli Chube be lle no kete daba agenga no trate Chube takalin karege. 42 Kwian bai gwage cha gerua ganga me sbalidi chage sie ole gire tai dage cha gerua ganga ege kwian bai chi kete amage jadale, kwian enege Chube be lle no kete amage ama chi ketu cha gerua ganga me sbalige ñanale —Jesu gerudu ene ulita kwian geru jwannga gdataboko giti gdaboke ole, gire Jesu kwian e kagu nga ulitage Jesu gerua trage kwian na ole.
1 Jesu gerudu ene kwian geru jwannga amage gdataboko giti gdaboke ole ama ulita ta gbale biale Chube gerua trage kwian na ole, gire Jesu jo dare kwian na tanre tke tangle Chube gerua giti una kaire kairege nga kweri Galileage. 2 E suiale Juan-Bautista kledu skage, amage geru chku uñale Jesu kle age ulita kwianske giti gire Juan-Bautista kwian gweale geru jwannga amage kagu tienda Jesudi. 3 Kwian geru jwannga Juan-Bautistage bebi joge tienda Jesudi gire Juan-Bautista geru ñachugu kwian ege geru kadadale mine Jesuge, Juan-Bautista gerudu: —Joga Jesu kle ngwadi ba geru kade amage: “Unsuialin Chube gerudu be kwian jwannga siere kage kwian alin, ¿ba amaña o ama bebi chie, cha chegedale ama manade ngwange dare o me?” Joga geru kade ene Jesuge. Kwian geru jwannga Juan-Bautistage jo chke Jesudi, ama geru kade Jesuge Juan-Bautista gerudu kare. 4 Jesu jaindunga: —Jogani Juan-Bautista kle ngwadi, ba gerule Juan-Bautista ole ba kle gwagedi nege giti, kaire ba kle geru keruchuge nege ba e tragadale Juan-Bautista ole. 5 Kwian gwagwa me cha kle gwagwa gbe ten, kwian me ñage chage cha kle ama gbe chage, kwian oga kwara tuge jingmea ole cha kle dodade ene ama chege trate, kwian me olo molen cha kle olo gbe tren, kwian jaba cha kle gbeni gwade, kaire Chube gerua cha giti kle joge chke kwian me lle molenge, ene ama ñage Chube gerua cha giti gai ulia tiendale gitiru ji chugege age me no gdale. Cha kle age no ene ulitadi ba kle gwage nege, jogani Juan-Bautista kle ngwadi e ulita trage ama ole. Kaire ba geru ai kete amage: 6 “Nga suga no kwiandi kwian bai cha gai ulia Chube nu cha kagaba kwian ulita jwanngale siere ji chugege age me no gdale, kwian bai mo ta gbe cha gai ulia ene diali, kwian ene me jogenga cha giti mo tale, ama be chege ta suga no ole.” Ba geru e ulita kete Juan-Bautistage cha alin. 7 Jesu gerudu ene ulita kwian geru jwannga Juan-Bautistage ole gire kwian e joni Juan-Bautista kledu skage ngwadi. Kwian e jo gire Jesu gerudu kwian ulita kledu eni ole Juan-Bautista giti, Jesu gerudu: —Ba ulita jo tienda Juan-Bautistadi nga gballage, ba gwagedu amadi ama me kledu boi eske kle jwliennga ongoru ongoru mleudage kare, kwian boi eske kare mleuda ole e salengwli gerule kwian me ñage tañachuge mo tale no gwangeru alin trate, diali kle tañachuge gwangeru gwanaskuda, Juan-Bautista me ene, ama mo ta gbu kiraske Chube gerua cha giti gai ulia diali. 8 Ba jo tienda Juan-Bautistadi nga gballage, ba me jo tienda kwiandi kwian nu mo ngama tkaba ñometra noare gigaba kwangleske. Uñale bage kwian kle mo ngama tke ñometra eneske me kle toi nga gballage, kwian ene kle toi chugagwalla ullage u no kweri tratege, Juan-Bautista me toidu u enege. 9 Ba me jo tienda kwian kle toi u e karegedi, ba jo tienda kwian Chube gerua ketanga dabagedi. Cha gerule ba ole, ulia Juan-Bautista Chube gerua ketanga, kaire agwe Juan-Bautista ma kweri kwian Chube gerua ketanga na ulitage. 10 Chube gerua degaba unsuialin gerule Chube be Juan-Bautista kage cha ngeru, chada e gerule: “Chube gerudu: ‘Cha be kwian gdaite cha gerua ba giti dbanga kage ba ngeru, kwian geru dbanga e be kwian na ta gbe biale ulita ba ngwange.’ ” Chube gerua degaba unsuialin gerule ene Juan-Bautista giti. 11 ’Cha gerule ba ole, aini nga dba giti kwian na me Juan-Bautista kare, ni kwian gdaite ma kweri Juan-Bautistage Chube gwa giti. Agwa nege gwangerugu kwian bai mo ta gbe cha gerua gai ulia, kwian e me chege kweri kwian na gwa giti agwa Chube gwa giti kwian ene ulita chege ma kweri Juan-Bautistage Chube gwa giti —Jesu gerudubi ene kwian ole Juan-Bautista giti. 12 Gire Jesu gerudu dare kwian ole: —Unsuialin Moisés Chube gerua degu, geru e chegu degaba kwian alin, ene chku uñale ba enusulian oñage ama chagedale mine Chube takalin kare. Kaire kwian Chube gerua ketanga tanre Chube gerua tragu ba enusulian oña ole, kwian Chube gerua ketanga unsuialin gweale gerudu ba enusulian oña ulita ole daba na be chie giti, daba e Chube gerua ketanga dabage salengwli Chube gerua ketanga kada Elías kare, e Juan-Bautista. Ba ulita mo ta gbe kwian Chube gerua ketanga unsuialin gerua gai ulia gire ene be suge trate bage Juan-Bautista chku kle toi ai suiale, Juan-Bautista e amaña kwian Chube gerua ketanga unsuialin gerudu giti. Juan-Bautista chku, ama chuiage gwangerugu Chube gerua tragale kwian ulita ole, Juan-Bautista kwian tanre ta gbu Chube gai ulia mo Chugagwallale, ene kwian chege Chubenu, ene kwian ñage toi Chube ole nga ngaña giti. Kaire nege tangle kwian tanre kle geru e keruchuge kle geru e gai ulia, gire ama ulita kle boi tanre daga ngwale Chube gerua e gai ulia gdale kwian me geru gai ulia kote. Kwian Chube gerua ganga ulia kle gerule kwian na ole Chube chuia be chke gire Chube be gerule nga ulita giti kwian Chugagwallale, kwian me Chube gerua ganga me takalin geru e chage dare kwianske, malen ama kle kwian Chube gerua ganga gbe boi daga ngwale. 15 Ba ulita me cha gerua ai keruchuge alin allabi mo ologe, agwa kaire ba ulita mo ta gbadale geru ai gbe gdadi. 16 Jesu gerudu dare kwian ulita ole: —Nege cha be gerule ba ole kwian kle toi nege tangle giti. ¿Ama kwian mine? ¿Ama llema kare? Kwian tanre nege tangle salengwli kirogwa kare kirogwa kle kolale mo skatemanalla ole goga tangle, me kolale no kle ka boi mo skatemanalla ole, kirogwa gerule daba ole: 17 “Cha ngwanedu chirege ba alin, ene ba ñage skwen gdate chire keruge, agwa ba me nga talladu, nga me sugadu no badi. Gire cha mo gatu ta olire giti, agwa ba me tadu olire.” Kirogwa kira bate ene ulita modi, kwian tanre nege tangle kle age ene kare. 18 Juan-Bautista chku Chube gerua trage kwian ole, kwian tanre gwagedu Juan-Bautistadi Juan-Bautista toidu me blire kwian ulita kle blire kare Juan-Bautista me uva chia jau kwian ulita kle jai kare, Juan-Bautista toidu ene kare gdale kwian tanre me Juan-Bautista gau ngwange no kwian gerudu me no Juan-Bautistadige Juan-Bautista kwian jwligebanga che dolla kote. 19 Chube nu cha kagaba kwian kare nga dba ai giti, cha me kle toi Juan-Bautista toidu kare, cha kle blire kwian ulita kle blire kare kaire cha kle uva chia jai kwian ulita kle jai kare, cha kle toi ene kare gdale kwian tanre me kle cha gai ngwange no kle gerule me no chadi cha kwian bligda gutanga ngle cha kle chage kwian llale kare, kaire kwian gerule chadi cha kle kwian igi ganga chugagwalla emperador nga Romamu alin gai mo skatemanallale kaire kwian na agenga me no ulita gai mo skatemanallale. Kwian tanre kle gerule ene me no chadi, kwian gerudu me no kaire Juan-Bautistadi, agwa Chube gwa giti Juan-Bautista kwian no kaire cha kwian no. Juan-Bautista toidu no Chube ama ta gbu toi kare, kaire agwe ene cha kle toi no Chube kle cha ta gbe toi kare kwian gwa giti, malen cha giti kaire Juan-Bautista giti kwian tanre Chube gerua gau ulia —Jesu gerudu ene ulita kwian ole. 20 Gire Jesu gerudu mno kwian toinga una gweale giti: —Una tanrege baini kaire cha jo chke ngwadi cha lle daga ngwale no tanre dodadu Chube kiralla giti kwian una e ulitage gwa giti, agwa kwian una e ulitage me tadu cha gerua gakalin ulia, ama me mo ta blitu Chube ole joge siere ama kle age me no Chube dollalege. 21 Chube be ji gbe tirare kwian una emu ulita alin kwian me cha gau ulia gdale. Una Corazínge kaire una Betsaidage cha lle daga ngwale no tanre dodadu Chube kiralla giti, kwian tanre toinga una boke ege gwagedu chadi age no ene amaske agwa ama me mo ta blitu Chube ole joge siere ama kle age me no Chube dollalege. E kare ene lle daga ngwale no jo dodabale una Sidónge una Tiroge kwian una boke emu gwa giti, gire ene kwian tanre una emu sbali mo ta blitu Chube ole, ene kwian e ulita ñometra juda me no tku modi ta olire ole kaire mnugda batu mo jegwale, ene ama mo kaite ta olire ole agedu me no ngerule giti. 22 Agwa lle daga ngwale no me jo dodabale Chube kiralla giti una Sidónge una Tiroge lle daga ngwale no jo dodabale una Corazínge una Betsaidage kare, malen chui bdaglige Chube be ji gbe kwian agenga me no ulita alin chuia, chui ege Chube be kwian una Corazínmu kwian una Betsaidamu gbe ji chuge ma jabale kwian una Tiromuge una Sidónmuge. 23 Kaire kwian una Capernaummu jiske tanre, ama kle tañachuge ama ulita ma no kwian una na ulitage, ene bdagli ama be joge toi no Chube ole nga ngaña giti. E me ene dale. Bdagli Chube be ji gbe tirare kwian una Capernaummu alin, kwian e kagabe ji chuge tirare ngwadi nga dbigu giti. Ulia kwian una Capernaummu jiske tanre Chube gwage, Chube kiralla giti cha lle daga ngwale no tanre dodadu kwian una emu ulita gwa giti, agwa kwian e me mo ta blitu Chube ole joge siere ama kle age me no Chube dollalege. E kare ene lle daga ngwale no jo dodabale una Sodomage kwian una emu gwa giti, gire ene kwian tanre una Sodomage mo ta blitu Chube ole. Agwa lle daga ngwale no me jo dodabale Chube kiralla giti una Sodomage lle daga ngwale no jo dodabale una Capernaumge kare, kwian una Sodomage me mo ta blitu Chube ole, ama chegu age me no tanre Chube dollale malen Chube ji gbu tirare kwian ulita una emu alin, Chube kwian e una Sodomamu ulita kagunga, una e chegu kugeba ulita. 24 Cha gerule ba ole, chui bdaglige Chube be ji gbe kwian agenga me no ulita alin chuia, chui ege Chube be kwian una Capernaummu gbe ji chuge ma jabale kwian una Sodomamuge —Jesu gerudu ene kwian toinga una tanre giti bai me ama gau ulia. 25 Gire ne suialege tangle Jesu gerudu Chube ole: “Cha Ñenua, ba nga ngaña giti nga dba ai giti ulita Chugagwalla, nga suga noare chadi ba giti, ba noare ulita. Kwian me geru molen ama ta ba gerua gakalin ulia blike salengwli kirogwa geru gai blike kare, noare ba kwian ene ta gbu, ene amage ba gerua sugedu. Agwa kwian geru molen geru jun tanre lle ulita giti, kwian enege ba gerua me sugedu, ba gerua chegu ogabada kare amage. 26 Chadi nga suga noare ba giti, ba kle kwian ta gbe ba takalinge kare, e no cha Ñenua.” 27 Jesu gerudu ene Chube ole gire gerudu kwian kledu ne ngwadi ama keruchuge ole: —Cha Ñenua mo kiralla mo talla ulita ketu chage. Cha Chube Kirolla, ulia ni kwian gdaite cha ta uñe trate, cha Ñenua alin allabi cha ta uñe trate. Kaire agwe ni kwian gdaite cha Ñenua ta uñe trate, cha alin allabi cha Ñenua ta uñe trate. Kwian baige cha takalin chke uñale cha Ñenua mine, cha kwian ene ta gbe, ene cha giti ama ñage cha Ñenua ta uñe trate. 28 Ba bai kle ta olire tanre sugekare Chubege bai kle skwatige mo ta dbe jiske ba kle age me no Chube dollale gdale, ba ulita bai kaire kle toi ene ba salengwli kwian kle chage teru ngle gaba dbe kare. Cha ta ba chudaboakalin cha ta ba ta gbakalin no Chube ole ba ta gbe suga no diali, ene ba me chege ta olire dare. 29 Ba takalin cha ba chudaboi ba cha gerua gadale ulia, ba mo ta gbadale age cha gerule kare, kaire ba geru jwandale cháge cha kle toi ta mine kare ole kwian ulita ole. Cha me kle ka boi kwian ole ta skochie ole, kaire cha me mo gbe tangle kwiandi, me ene, cha kle mo ta dbe no kwian ulita ole, cha ta ama ulita chudaboakalin diali. 30 Ba mo ta gbadale age no cha gerule kare diali gire cha be kira kete bage age ene, ene mi skwen mnoare bage toi no trate cha takalin kare —Jesu gerudu ene ulita kwian ole.
1 E suiale chui gbaite undege chuiage Jesu kledu chage trigoske tangle deage ule kwian geru jwannga amage ulita ole, kwian geru jwannga ulita bli ole, malen ama ulita mo gbu trigo dabe bulu ite gutadale gire ama trigogba gutu. 2 Kwian fariseo mneite gwagedu kwian geru jwannga Jesuge ulitadi ama kle lle boi kare deage undege chuiage gire kwian fariseo gerudu Jesuge: —Gwagede kwian geru jwannga bage ulitadi, ama kle age me no Chube gerua Moisés nu degaba unsuialin dollale. Uñale bage Moisés chadalla e giti geru kle gbaba che alin che me ñage lle boi undege chuiage, ¿mineade ba kle geru jwannga bage ulita chuge ngwadi lle boi deage undege chuiage? 3 Jesu jaindunga kwian fariseo kalen: —¿Ba ulita me nu chada batabanga che chugagwalla unsuialin David agedu giti? Chui gbaite David ule ama chagemanalla ulita ole bli ole tanre, gire ¿ama agedu mine? 4 Uñale ba ulitage David jo gwa u gerungwa Chube olege ule ama chagemanalla ulita ole, u ege gwa pan gbakle, pan e chegedale Chube gwa giti diali, Chube gerua kle gbaba kwian ulita alin geru e gerule kwian gerunga Chube ole daba alin ama alin allabi ñage pan e gute, ni kwian na gdaite ñage pan e gute. Agwa David bli ole tanre ama pan e gutu kaire ama pan e ketu kwian ulita kledu chage ama olege gutadale. David pan e gutu Chube gwa giti agwa ama me boidu dale, Chube me ama gbu jiske ama pan e gutu gdale. 5 ¿Ba me Moisés nu Chube gerua degaba unsuialin batabanga kwian gerunga Chube ole daba alin giti? Uñale ba ulitage chada e gerule kwian gerunga Chube ole me kle undege chuia gai undegangwa agwa ama me chege jiske e gdale. Moisés chadalla gerule kwian gerunga Chube ole daba alin ñage lle boi Chube alin u gerungwa Chube olege undege chuiage, Chube gwa giti ama me jiske dale lle boi undege chuiage gdale. 6 Ba ulita kle tañachuge diali Moisés nu Chube gerua degaba alin giti daba gbe jiske geru e giti, agwa cha gerule ba ulita ole, geru ma kweri geru ege kle baske, ba geru e gbadale gdadi, e cha gerua. Cha me kle tañachuge diali kwian gbe jiske kwian me kle age ulita Moisés chadalla gerule kare gdale, cha tai dage kwian ulitage, ene kaire ba ulita mo ta gbadale no daba na ole, Chube gerua kle degaba unsuialin gerule e giti, chada e gerule: “Chube gerudu: ‘Cha me takalin ba bda gweda cha gwa giti age no cha ole alin allabi. Agwa kaire cha takalin ba tai dage daba nage diali, ba agedale no ama alin.’ ” Chube gerua degaba gerule ene, geru e sugedu bage ulia ba me kwian geru jwannga chage gbe jiske ama trigo bulu itu undege chuiage gdale, Chube gwa giti ama me jiske dale. 8 Cha gerule ba ulita ole, Chube cha kagu nga dba ai giti kwian kare, ama cha gbu undege chuia mauña, malen cha ñage gerule kwian ole kwian llema boadale undege chuiage llema me boadale undege chuiage —Jesu gerudu ene ulita kwian fariseo mneite ole. 9 Jesu jo chage dare jo chke u mo litangwa Chube gerua jwanngwage. 10 Ne ngwadi kwian onbre gdaite oga kledu, ama oga ko ole ko kwebanga. Kwian fariseo mneite kledu eni gwa u ege, ama ulita tadu Jesu gbakalin jiske lle boi undege chuiage gdale, malen ama geru kadu Jesuge: —Geru kle degaba che me ñage lle boi chui undege chuiage. Nege chui undegangwa che alin, ¿che ñage kwian oga dodade chui aige o me? 11 Jesu jaindunga kwian fariseo ulita kalen: —Ale gerule ba bda oveja gdaite molen, bda e joge sklienga blebitaske undege chuiage, ¿ba be bda e jwen keda blike chui e amañage undege chuiage o ba be lle boi chuia manade gire ba be bda jwen keda? Ba mi manade dale, ba be tai dage bda skliebanga blebitaskege gire blike ba be ama jwen siere ama kle skliebanga ngwadige. Ba age ene gire kwian mi gerule badi ba agedu me no. 12 Chube gwa giti kwian ma ñanaske ngle lle bdalege, malen cha gerule ba ulita ole, che ñage age no daba na chudaboadale undege chuiage, che age ene undege chuiage che kle age no Chube gwa giti. 13 Jesu gerudu ene kwian fariseo ulita ole gire gerudu kwian oga ole: —Mo ko kwebanga kwrida trate. Onbre mo ko kwriu Jesu gerudu kare gire onbre ko kwebanga jo chkeni no trate ko gdaite kare. 14 Jesu onbre ko kwebanga dodadu undege chuiage kwian fariseo gwa giti, e giti kwian fariseo ulita ta skochiu tanre Jesudi jo siere blike u ege, ama ulita mo teun Jesudi mo ta gbu ule Jesu gweda Jesu agedu gdale. 15 Uñadu Jesuge kwian fariseo ulita ta ama gwakalinda, malen ama jo siere ne ngwadige. Kwian tanre chagedu Jesu nate, kwian e ulitaske kwian oga tanre kledu, Jesu kwian oga e ulita dodadu. 16 Jesu gerudu kwian e ulitage: —Ba me cha trage ni kwian gdaite ole cha ba dodadu giti. 17 Ai ulita boidu ene Chube gerua degaba gerule kare, kwian Chube gerua ketanga ka jwankle Isaías Chube gerua degu unsuialin tangle, chada e gerule ene Jesu giti: 18 “Chube gerudu: ‘Kwian ai gdaite lle boanga cha alin, cha no no ama ole, cha ama gau cha gerua dbe kwian alin, nga suga noare chadi ama giti. Cha be mo Oña gbe diali ama tale, ene cha Oña kirallaske ama be cha gerua trage kwian me cha uñe ole nga ulitage, ama be geru kete kwian ulitage kwian ñage tien gitiru ji chugege agedu me no gdale ñage chege no trate cha gwa giti. 19 Kwian ai lle boanga cha alin be gerule ta no giti diali kwian ulita ole, ama mi ngaute kwiandi ta skochie ole, ama mi kira bate ongoru ongoru cha gerua gdale mi ka boi kwian ama dollale ole, ama mi mo kalla itenga, kwian mi ama keruchuge gerule keru kweri ole mo giti mo gbale kweri kwian na gwa giti. 20 Kwian ai lle boanga cha alin be age no kwian ulita alin be kwian ulita chudaboi. Kwian gweale kle boi tanre me no kle ta olire tanre, gweale ta chagekalin no trate cha gwa giti cha takalin kare agwa me ñage, kira me. Kwian kle boi ene ama salengwli eske chege bedre chitedalenga kare, kaire ama salengwli jichra chege bedre jogedaleda kare. Kwian ai lle boanga cha alin mi kwian ene gbe boi ma tirare kwian kle boige, me ene, ama be kwian ene ulita chudaboi be ama kira gbe, be kwian ta gbe no cha ole. Kwian ai lle boanga cha alin, ama giti be chke uñale kwian nga ulitage kwian ñage cha uñe ñage tien gitiru ji chugege agedu me no ulita gdale, kwian ai giti kwian tanre be cha gerua gai ulia be mo ta gbe chage no trate cha takalin kare. Chui bdaglige kwian ai lle boanga cha alin be kirachke cha dolla ulitadi be ji gbe kwian ulita alin bai me mo ta blite cha ole.’ ” Isaías Chube gerua degu ene Jesu giti. 22 Jesu kledu ngwadige kwian onbre jwligebanga dule, dolla nu onbre e gbaba jwligebanga malen ama gwagwa me keru me. Jesu dolla kagu siere onbre ege gire onbre jo chkeni noni, ama ñadu gerule kaire ñadu ten. 23 Kwian ulita gwagedu boi enedi chegu tañachuge Jesudi, ama geru kadu moge ongoru ongoru Jesu giti: —¡Kwian e kira molen tanre kwian oga dodade ene! ¿Ama che chugagwalla unsuialin David oindalla Chube be kage che alin che chugagwallale? ¿Ama e? 24 Kwian fariseo ulita kle ne ngwadi geru e keruchuge gire ama ulita gerudu Jesudi: —Dolla chugagwalla Satanás kle kira kete amage, kira e giti ama kle dolla na kage siere kwian jwligebangage. 25 Jesuge uñale kwian fariseo kledu mo ten me no ulita amadi gire Jesu gerudu ama ulita ole: —Cha gerule ba ulita ole, kwian chugagwalla nga gdaitemu mo tke dole kwian ulita kle toi nga amañage ole, ama kwian ulita gbe kira bate modi ongoru ongoru, ene bdagli kwian be mo gweda ulita, chugagwalla be chege gballa ama mi chege kiraske. Kaire kwian toinga una gdaitre alinge, kwian e chugagwalla ama ulita gbe kira bate modi ongoru ongoru ene bdagli chugagwalla be chege gballa ama mi chege kiraske. Ene kaire kwian toinga u gbaitre alinge kira bate modi mo bitalla gwa ole ulita, bdagli kwian e ulita be joge toi sugekare gdaite gdaite gire u mauña be chege toi gballa ama mi chege kiraske ama gdaitre alin chudaboanga me. 26 E ene ulia cha kle gerule kare, ¿mineade ba kle tañachuge dolla Satanás ñage mo kiralla kete chage amaña chudaboangalla kage siere kwiange? Kwian agenga Satanás kiralla giti me kle dolla chugagwalla Satanás chudaboangalla kage siere kwiange, Satanás me ta agekalin me no ene mo chudaboangalla ole. Dolla chugagwalla Satanás mo tke dole mo chudaboangalla ole mo gbe kira bate modi daba kage siere kwiange, dolla Satanás age ene mo chudaboangalla ole ama mi chege kiraske kwian gbanga age me no Chube dollale. 27 Ba ulita tañachuge cha kle dolla kage siere kwiange Satanás kiralla giti, ba geru kade ba bitallage ba bitalla bai kle dolla kage siere kwiange, geru kade amage chema kle kira kete amage dolla kage siere kwiange, gire ama be gerule ba ole ama me kle dolla kage siere kwiange dolla kiralla giti. Ba bitalla be gerule ene ba ole, gire e giti ñage suge trate bage ba me kle gerule ulia cha giti. 28 Cha me kle dolla kage siere kwiange Satanás kiralla giti, me ene, Chube Oña kiralla giti cha kle dolla kage siere kwiange, e giti nege chkedale uñale ba ulitage ulia Chube cha kagu ba ulitaske aini age ama kiralla giti. 29 ’Cha gerule ba ulita ole, kwian gdaite ta jogekalin gwa onbre kiraske ullage skwe boi lle ulitage onbre e ngeru, kwian skwe boanga e chegedale ma kiraske onbre lle mauñage ene kwian skwe boanga ñage onbre lle mauña gai ko luge kejre, ene kwian skwe boanga ñage lle ulita dbe lle mauña ngeru ama takalin kare. Agwa skwe boanga me kira molen lle mauña ko luge ama me ñage skwe boi lle mauña ngeru. E kare ene Satanás kiraske tanre agwa cha ma kiraske dolla chugagwalla Satanáge, Chube kiralla giti cha kirachke diali Satanádi, cha Satanás chudaboangalla kage siere kwiange. 30 Cha gerule ba ole, kwian bai me kle cha bale ama kle cha dollale, kwian ene me kle cha gerua gai ulia me kle cha gerua kete daba nage, ama kle daba na gbe kige cha geruadi. 31 Cha geru ai kete bage kaire, ba ulita cha keruchuge no. Kwian bai age me no kaire gerule me no Chube dollale, kwian e mo ta blite Chube ole gire Chube kwian ene agedu me no kaire gerudu me no Chube dollale talla mlienga ulita. Agwa kwian bai kaire gerule me no Chube Oña dollale, Chube me kwian gerule me no ene talla mlienga dale. 32 Cha chiu nga dba ai giti kwian kare, nege cha kle chage aini kwianske, kwian bai gerule me no cha dollale, gire bigwa kwian e mo ta blite cha ole, kwian ene gerudu ulita me no cha dollale Chube talla mlienga. Agwa kwian bai gerule cha kle age dolla Satanás kiralla giti, kwian ene me kle gerule me no cha alin allabi dollale agwa kaire ama kle gerule Chube Oña dollale, Chube me kwian gerudu me no ene talla mlienga dale. Kwian bai gerule me no Chube Oña dollale ama chege jiske tanre Chube gwa giti diali dale alin, chui bdaglige kwian ene be chege ji chuge diali chui tangle ama gerudu me no Chube Oña dollale gdale —Jesu gerudu ene kwian fariseo ole. 33 Jesu gerudu dare kwian fariseo ulita ole: —Gli kaire kaire chke uñale nate gba giti, gli no alin ñage gbachie no, gli me no me ñage gbachie no. 34 Ba ulita kwian agenga me no me no, diali ba ta agekalin me no Chube dollale, ba ta me no molen, malen ba me ñage gerule no Chube takalin kare, ba ulita salengwli gli gbachie me no kare. Kwian ta no kle gerule no, kwian ta me no kle gerule me no. Kwian kle tañachuge mo tale kaire kle gerule kle tañachuge kare. 36 Cha gerule ba ulita ole, chui bdaglige Chube be gerule kwian bai ulita jiske ama gwa giti, chui ege kwian kaire kaire be chke uñale nate kwian gerudu giti nga dba ai giti. Ba bai gerudu sugaska jain jain ba ta me no, chui bdaglige ba be chege jiske Chube gwa giti ba gerua ngwale ulita giti, geru e kbiale ba be boi daga ngwale tanre. Agwa ba bai me gerudu jain jain ba gerudu no Chube takalin kare, ba ta no, chui bdaglige ba be chege no trate Chube gwa giti, Chube mi ba gbe ji chuge, agwa Chubege uñale ama be gerule ba ulita giti ba jiske o ba me jiske ama gwa giti —Jesu gerudu ene kwian fariseo ulita ole. 38 Kwian fariseo mneite kaire kwian daba tkanga tangle Moisés chadalla giti mneite gerudu Jesu ole: —Kwian tkanga tangle geruge, ba kle gerule Chube ba kagu nga dba ai giti, cha takalin nege ba lle daga ngwale no kweri dodade kwian me ña dodade mo kira giti kare, ba lle ene dodade cha ulita gwa giti, ene be chke uñale trate cha ulitage ulia Chube ba kagu ba kle age Chube kiralla giti. 39 Jesu jaindunga: —Ba ulita kle toi chui aige ba kwian me no me no, ba ulita agenga me no, cha agedu no ba ulita gwa giti, agwa e giti ba me kle cha gai ulia. Ba kle cha kage lle daga ngwale no na dodade ba gwa giti ene ba gerule ba be cha gai ulia Chube cha kagu nga dba ai giti, agwa nege nege cha mi age ba takalin kare. Chui be chke gire cha be boi ba ulita gwa giti salengwli kwian Chube gerua ketanga unsuialin kada Jonás boidu kare, chui ege be chke uñale ba ulitage ulia Chube cha kagu. 40 Cha chiu nga dba ai giti kwian kare, Chube cha kagu kwian kle toi chui aige alin salengwli Chube Jonás kagu kwian unsuialin toinga una Nínivege alin kare ama ulita ta gbe agedu me no giti. Jonás toidu chui gbamai ngwe kweri kweri tadi gire ngwe Jonás mliunga kedagu gwade, e giti chku uñale kwian ngle toinga Jonás suialege ulia Chube Jonás kagu Chube gerua trage kwian ole. Ene kaire cha be boi, cha gwabeda, cha be chege dbiske chui gbamai gire Chube be cha jaba gbeni gwade. Cha be boi ene gire be chke uñale trate ba ulitage Chube cha kagu. 41 Chui bdaglige Chube be ji gbe kwian agenga me no ulita alin, chui ege kwian unsuialin toinga una Nínivege be meñe kwian ulitage. Unsuialin Jonás jo Chube gerua kete kwian una Nínivemu ulitage, kwian Nínivege Jonás gerua keruchugu no, kwian mo ta blitu Chube ole jo siere ama kledu age me no Chube dollale ulitage. Cha gerua ma kweri Jonás geruage, nege cha agali kle gerule baske aini agwa ba me ta cha gerua gakalin ulia, malen chui bdaglige kwian una Nínivemu be ba ulita kle toi nege tangle gbe jiske Chubege ba me cha gerua gau ulia gdale. 42 Chui bdaglige Chube be ji gbe kwian agenga me no ulita alin chuia, chui ege kaire muinga gdaite nga kada Sabámu be meñe kwian ulitage, muinga e kwian nga Sabámu chugagwalla unsuialin. Muinga ege geru chku uñale kwian israelita chugagwalla unsuialin kada Salomón giti Salomón ta molen tanre, malen unsuialin muinga e jo bate bate Salomón jwiage Salomón gerua keruchugale, muinga e jo ene Salomón gerua nate. Cha gerua ma kweri Salomón geruage, nege cha agali kle gerule baske aini agwa ba me ta cha gerua gakalin ulia, malen chui bdaglige muinga e be ba ulita kle toi nege tangle gbe jiske Chubege ba me cha gerua gau ulia gdale. 43 Jesu gerudu dare kwian fariseo gweale ole kaire kwian daba tkanga tangle Moisés chadalla giti gweale ole: —Nege tangle ba ulita kle boi salengwli kwian jwligebanga dolla kote kare. Dolla joge siere kwiange gire dolla chage nga gballage nga jinade undegangwa, nga me skwen amage, 44 gire ama tañachuge: “Cha be jogeni naskuni cha kwian jigu ngwadi, cha be jogeni toi ama tale nakwaite.” Gire dolla joge chkeni kwian e ngwadi, kwian e tale skwen dollage salengwli u gballa kare, nga kle litaba trate ulita, u e kle biale kwian alin toingwa. 45 Kwian ta skwen ene dollage u gballa biale kare, gire dolla e joge dolla na tirare gdaguke jwen toi ule ama ole kwian e tale, bdagli kwian e boi ma dare ngeruguge. Ba ulita agenga me no kle toi nege tangle be boi kaire cha gerudu boidu kwian ai giti ole kare, ba cha gerua keruchuge agwa gire me cha gerua gai ulia malen ba be boi ma daga ngwale kledu toi ngeru karege. 46 Jesu kledu gerule ene kwian ole ne ngwadi gire Jesu chebia ule Jesu daballa ole chku goga chegu manade goga tadu geru tragakalin Jesu ole. 47 Kwian gdaite jo gwa gerule Jesu ole ama giti, ama gerudu: —Ba chebia ba daballa ulita kle goga, ama ta geru tragakalin ba ole. 48 Jesu gerudu kwian geru dbanga ole: —Cha be gerule ba ole chema ulia cha chebia chema ulia cha daballa. 49 Gire Jesu ko itu kwian geru jwannga amage ulitadi gerudu: —Ai cha chebia kare kaire cha daballa kare. 50 Kwian bai age cha Ñenua Chube takalin kare, kwian ene cha daballa kare cha ibotea kare kaire agwe cha chebia kare, ama cha bitallanu ulia, cha no no ama ulita ole —Jesu gerudu ene ulita.
1 Jesu kledu gwa kwian tke tangle gire chui e amañagebi Jesu jo siere u ege jo chke chibitage toidu dba chibita kagda giti. 2 Ne ngwadi kwian litedu tanre Jesudi, nga me chegu Jesu alin toingwa malen Jesu jo chiga du kledu ne ngwadige, Jesu toidu dba du toli, kwian ulita chegu kedagu Jesu keruchuge. 3 Gire Jesu geru tanre ñachugu kwiange, ngeru ama geru ñachugu chude giti, ama gerudu kwian ole: —Cha gerule ba ulita ole chude drennga giti, kwian jo chude drennga deage, kwian jo chke deage, ama chude ngle dreunnga kote. 4 Kwian e kle chude drennga kote, gire chude e gweale jo chke dba jon jegwale, bdada chiu, bdada chude gutu. 5 Chude na gweale jo chke dba dbi arale ke giti ngwadi, chude e numachiu blikeare, agwa me dbi uda alin malen chude e me sera toiduda dbiske no, ke kle, chude me ñadu sera joge dbiske no. 6 Chudenuma chku ngaña agwa chui jute kote chudenuma kwedunga junbatu jokeda ama me sera jo dbiske no kbiale. 7 Chude na jo chke dba drinkin sera tanre ngwadi, chude gwatigu agwa drinkin tigedu ule chudenuma ole, drinkin chudenuma guda, chude me tigedu chude me gbachiu, drinkin kote chude jokeda ulita. 8 Agwa chude na jo chke dba dbi no giti, chude e gwatigu no gbachiu no ngle. Chude skute chuia chku gire chude e nu gbachieba ngle, chude bulu gweale gbachiu ngle ngle chude cien bulu gdaitege, chude bulu gweale na gbachiu ngle chude sesenta, chude bulu gweale na gbachiu no chude treinta. 9 Cha kle geru ai ñachuge ba alin, ba me geru ai keruchuge alin allabi mo ologe, agwa kaire ba ulita mo ta gbadale geru ai gbe gdadi, ba tañachugadale lledale cha kle geru ai chude giti ñachuge ba ulita alin. 10 Jesu geru ñachugu ene kwian ngle ulita alin gire kwian geru jwannga amage Jesuge ulita mo litu Jesudi, geru kadu Jesuge: —Ba gerudu giti kwian ole, ¿geru e mine? Me suge cha ulitage mineade ba geru ñachugu kwiange chude giti. ¿Mineade ba me geru gbu chke uñale nate trate kwiange Chube giti? 11 Jesu jaindunga: —Ba ulita kle cha gerua gai ulia malen Chube kle ba ta gbe chke cha kle gerule giti, ene geru e giti kle suge trate bage kwian bai kaire cha gai ulia mo Chugagwallale kwian ene chege no trate Chube gwa giti. Kwian na me kle cha gerua gai ulia, ama alin cha kle geru ñachuge, kwian geru e keruchuge agwa geru e ulita skwen mnoare amage, geru e me suge amage dale. 12 Kwian bai kaire cha gerua gai ulia cha gerua manade no mo tale, kwian ene mi ta jogenga Chube geruage, kwian enege cha gerua be suge ma ngle diali, Chube be kwian ene chudaboi be kwian ene ta gbe suge ma ngle cha gerua giti. Agwa kwian bai kaire me mo ta gbe cha gerua gai ulia, kwian ene tale cha gerua gweale kle, agwa ama me kle mo ta gbe tañachuge geru e giti malen ama be ta jogenga cha geruage ulita, ama be chege kwian me cha gerua keruchugaba kare. 13 Kwian ene me cha gai ulia malen cha kle geru ñachuge ama alin, geru me suge amage. Kwian ene kle gwage chadi cha kle lle tanre no dodade, agwa ama chege kwian gwagwa me kare, me suge amage cha kle lle e tanre no dodade ama gwa giti Chube kiralla giti. Kaire kwian ene kle cha gerua keruchuge tanre agwa ama chege kwian olo me kare, geru me suge trate amage cha kle gerule giti. 14 Kwian ene kle boi Chube gerua degaba unsuialin gerule kare, kwian Chube gerua ketanga ka jwankle Isaías Chube gerua degu unsuialin, chada e gerule: “Chube gerudu: ‘Cha gerua tragabe kwian ole, ama be cha gerua keruchuge agwa cha gerua mi suge amage. Lle tanre no dodabe kwian gwa giti, ama be gwagedi agwa mi suge amage chema kiralla giti lle dodakle. 15 Kwian ene ulita mo ta gbu mnoare, ama me takalin cha gerua gbe gdadi. Ama kle mo olo jege cha gerua ngeru, ene geru me suge amage. Mo gwagwa giti kwian kle ten lle no dodakledi, agwa me gbakalin gdadi mo tale. Ama kle mo ta gbe ene ulita malen ama me ñage mo ta blite cha ole. Cha ta ama chudaboakalin mo ta blite chage cha ole agwa ama me takalin mo ta gbe siere ama kle age me no gitige.’ ” Isaías Chube gerua degu ene kwian me ta cha gerua gakalin ulia giti. 16 ’Cha gerule ulia ba ulita ole, Chube kle age no no ba ulita alin malen ba ulita nga dbale suga no. Cha kle aini baske age tanre no ba gwa giti Chube kiralla giti, ba ulita mo gwagwa giti kle gwage Chube kle agedi, kaire mo olodi ba ulita kle geru Chubenu keruchuge. Kwian Chube gerua ketanga unsuialin kaire kwian ta no trate Chube gwa giti unsuialin, kwian ene ngle tadu gwagekalin Chube kle agedi ba ulita kle gwagedi nege kare, agwa e suiale kwian e ulita me ñadu gwage ba ulita nege tangle kle gwage Chube kle agedige. Kaire kwian e ulita tadu geru keruchugakalin ba kle geru keruchuge nege kare cha giti, agwa ama me ñadu geru ai kare keruchuge —Jesu gerudu ene kwian geru jwannga amage ulita ole. 18 Gire Jesu gerudu dare ama chude drennga gerua ñachugu kwian alin giti, Jesu gerudu kwian geru jwannga ole: —Ba ulita cha keruchugadale no, cha geru ñachugu chude drennga giti, nege cha geru e gbe chke uñale bage cha gerudu kare giti. 19 Kwian gweale kle boi Chube gerua ole salengwli chude jo chke dba jon jegwale kare. Kwian e Chube gerua keruchuge, agwa amage geru me suge trate, bigwa che dolla Satanás kwian ta gbe geru e chuge ngwadi, me geru gai jumale, Satanás kle age kwian ole salengwli bdada agedu chude ole kare, ene Chube gerua kle jogenga kwian tale. 20 Kwian gweale kle boi Chube gerua ole salengwli chude joge chke dba dbi arale ke giti ngwadi kare. Kwian e Chube gerua keruchuge, ama kle geru e gai blikare nga suga no ole agwa ama me mo ta gbe ulia Chube ole me kle Chube gerua gai jumale ulia, malen ama tale geru me ñage tige no kiraske salengwli chude me ñage sera joge dbiske ke giti me ñage tige no kare. Kwian e Chube gerua gau ulia agwa me kira ole gwangerugudba geru e gai ulia, ama kle boi daga ngwale Chube gerua gdale, gire blikare ama Chube gerua chuge ngwadi, ama jogeni naskuni chage ngeru kare. 22 Kwian gweale kle boi Chube gerua ole salengwli chude jo chke dba drinkin sera tanre ngwadi kare. Kwian e kle Chube gerua keruchuge kle Chube gerua gai ulia agwa me kle mo ta gbe tañachuge diali Chube gerua giti no, ama kle mo ta gbe tañachuge tanre lle ngwale alin giti, ama ta igi jwankalin ngle mau alin, ama ta agekalin ulita ama takalin kare. Ama kle tañachuge ma ngle lle e kare giti Chube gerua gitige, malen Chube gerua kle jogenga ama tale, gire ene kwian me kira molen toi no Chube takalin kare ni ñage Chube gerua dbe kwian nage. 23 Kwian gweale kle boi Chube gerua ole salengwli chude joge chke dba dbi no giti kare. Kwian e kle Chube gerua keruchuge, Chube gerua kle suge trate amage gire ama mo ta gbe ulia Chube ole Chube gerua gai ulia. Ama Chube chuge ngwadi age ama tale Chube takalin kare, ene Chube ama ta gbe chui gbaite gbaite kaire kairege ma ngle Chube gerua giti. Kwian ene mo ta dbe no diali Chube gerua kete daba na ulitage daba chudaboi Chube gerua giti, kwian Chube gerua ketanga ene giti kwian tanre chke Chube gerua gai ulia salengwli chude joge chke dba dbi no giti gbachie no kare, chude gweale gbachie treinta, na gbachie ma ngle sesenta, na gbachie ngle ngle cien. Ene kaire kwian bai mo ta gbe ulia Chube ole Chube gerua gai ulia diali, kwian ene giti kwian na tanre Chube gerua gai ulia mo tale —Jesu gerudu ene kwian geru jwannga amage ulita ole. 24 Jesu geru na ñachugu chude giti kwian ngle kledu mo litaba chi kagda giti alin, Jesu gerudu: —Cha be geru na trage ba ole, ba cha keruchuge no. Chube chuia be chie gire Chube be chege kwian ulita Chugagwallale, chui ege Chube be gerule kwian ulita giti kwian bai jiske kwian bai me jiske Chube gwa giti, Chube be kwian ulita bai jiske gbe ji chuge kwian agedu me no gdale. Cha be geru ñachuge ba ulitage ai kare chui e giti: Kwian chude no tku dbige deage, kwian chude tku ulita, gire chude tkanga joni gudegu. 25 Ngajrege chude tkanga kle gbe kaire lle boanga ama alin ulita kle gbe, gire kwian na chude tkanga dolla jo skwlenre ngajrege giskagba me no skie chude noske gire kwian e joni kige. 26 Chudenuma trendunga tigedu ama gbachiu gire giskanuma me no tigedu kaire ule chudeske. 27 Kwian lle boanga chude mauña alin gwagedu giskanuma me no kle tigedi gire ama ulita jo gerule kwian chude mauña ole: “Cha chugagwalla, ba chude no tku deage, ¿mineade giskanuma me no gwatigu, kle tige ule chudeske?” 28 Gire kwian chude mauña gerudu kwian lle boanga ole: “Kwian gweale ta me no che ole ama agedu.” Kwian lle boanga geru kadu: “¿Ba takalin cha joge giskanuma me no juge chudege?” 29 Chude mauña jaindunga: “Ba me joge giskanuma me no juge, ba giskanuma juge chudege gire chudenuma no ñage chie keda ule kaire agwe. 30 Ma no che giskanuma e chuge ngwadi tige ule chude ole, che chude skute chuia manade ngwange, chui e chke gire cha be gerule kwian chude skutanga ulita ole ene: ‘Ngeru ba giska me no juge luge buluge gugadale, e ulita kle boaba gire ba chude skute nga tagla giti, ba chude e oge no gwa nga noge.’ ” Chude mauña gerudu ene lle boanga amanu ole —Jesu geru ñachugu ene kwian ulita alin. 31 Kaire agwe Jesu geru ñachugu mostaza chudea giti, Jesu gerudu: —Cha geru na ñachuge ba ulita alin, geru ai giti sugedale bage nege kwian bedreare kle mo ta gbe ulia Chube gerua gai jumale cha kle gerule giti, agwa bdagli kwian ngle be Chube gerua gai ulia be Chube gai mo Chugagwallale, e salengwli kle boi mostaza chudea giti kare. Mostaza chudea ma soli jalin chude na ulitage skiadale dbige. Onbre joge deage chude e skie dbige gire chude e kle tige kle chege gli kweri kweri ngaña. Mostaza kle nangachie kweri kweri, gire bdada ngle ñage ugara gbe gli e nanga jegwale ulita toingwa. Ene kaire kwian bai Chube gerua gai ulia, kwian e Chube gerua trage kwian na ole, ene geru e chke uñale kwian na tanrege, gire bdagli kwian tanre be Chube gerua gai ulia be Chube gai mo Chugagwallale salengwli mostaza chudea soli tige joge kweri nanga tanre molen kare. 33 Jesu geru na ñachugu kwian alin, Jesu gerudu: —Cha geru ñachuge bage ai kare: Muinga kle pan dodade levadura ole, ama levadura sidri tugenga harina tanreske gire bedre bedre harina uda be sie kweri dodadale panle. E kare ene kwian me Chube uñe be Chube gerua keruchuge, kwian be geru e gai ulia, geru e be tige ama tale, kaire Chube gerua giti bedre bedre kwian na tanre be Chube gai ulia mo Chugagwallale levadura sidri harina gbe sie kweri kare —Jesu gerudu ene ulita kwian ole Chube gerua giti. 34 Jesu geru ngle ene kare ñachugu kwian tanre alin diali, geru e ulita giti Jesu kledu kwian tke tangle Chube giti. Jesu geru ñachugu ene ulita agwa me sugedu kwiange Jesu kledu gerule llema giti, kwian tanre tañachugu Jesu kledu gerule lle ngwale alin giti. 35 Diali Jesu geru ñachugu kwian ulita alin kwian ta gbagda Chube giti, ai ulita boidu ene kwian Chube gerua ketanga kada Isaías Chube gerua degu unsuialin gerule kare Jesu giti, chada e gerule: “Chube nga ulita dodadu unsuialin tangle nge jondege, chui ege gwangerugu Chube gerua tanre chegu ogaba skwlenre kwian ulitage, agwa cha be geru e ulita trage kwian kle toi nege tangle ole geru ñachuge giti.” Isaías Chube gerua degu ene Jesu giti unsuialin tangle. 36 Jesu gerudubi ene ulita kwian ole gire Jesu joni gudegu ama kle toi ngwadi, Jesu jo chke gwa gire kwian geru jwannga amage ulita chku, mo litu amadige, geru kadu amage: —Ba geru ñachugu kwian ngle alin kwian chude no tku giti, kwian chude no tku gire kwian na jo giskagba me no skie chude eske. Ba geru e ñachugu kwian alin, geru e me sugedu chage, cha ulita takalin ba geru e trennga chage. 37 Jesu jaindunga: —Cha gerule ba ulita ole, cha chiu nga dba ai giti kwian kare Chube gerua no ketale kwiange, cha chiu geru no Chube giti gbale kwian tale chude tkakle dbiske kare. 38 Nga dba ai ulita nga chude ngamale kare Chube gerua alin. Chude no, e kwian nu mo ta gbaba Chube gai mo Chugagwallale kare, kwian ene Chubenu be toi Chube ole. Giskanuma me no, e kwian me mo ta gbaba Chube gai mo Chugagwallale kare, kwian ene che dolla Satanánu. 39 Kwian ta me no giskagba me no skianga ama che dolla Satanás kare. Cha be chieni chui bdaglige, chui ege cha be kwian chanu ulita dbe toi cha ole nga ngaña giti, e salengwli chude kle joge dabe kwian kle chude jwen kare. Lle boanga Chube alin nga ngaña giti tanre kwian litanga ole Chube alin, lle boanga Chube alin nga ngaña giti e ulita salengwli kwian lle boanga kle chude jwen kare. 40 Giskanuma me no litakle ole tkakle jitaske gugadale, ene kare be boi kwian agenga me no Chube dollale ulita ole chui bdaglige. 41 Chui ege cha be lle boanga Chube alin nga ngaña giti tanre kage ji gbe kwian agenga me no ulita alin, kwian agali kle age me no Chube dollale kaire kwian kle daba na gwabate age me no Chube dollale, lle boanga Chube alin nga ngaña giti be chie kwian ene ulita jwen gbale ji chuge agedu me no ulita giti. 42 Lle boanga Chube alin nga ngaña giti be kwian agenga me no ene ulita kage nga dbigu giti jitaske, nga ege kwian e be boi tanre daga ngwale, e kote ama be chege olire tanre kaire be sui jwennga tanre mo giti nga tirare ngeru. 43 Agwa kwian bai nu cha gerua gaba ulia bai nu mo ta gbaba age no Chube takalin kare, chui bdaglige kwian ene ulita be joge toi Chube ole be chege no trate ulita. Chui kle gwadenga no kare, ene kwian Chubenu be chege no Chube kle toi ngwadi, ama be toi diali Chube chralla giti. Ba ulita me cha gerua ai keruchuge alin allabi mo ologe, agwa kaire ba ulita mo ta gbadale geru ai gbe gdadi. 44 Jesu gerudu: —Cha geru na trage ba ulita ole, cha gerua chke uñale kwiange gire kwian bai cha gerua gai ulia kwian e be toi no ule Chube ole diali, Chube be chege ama Chugagwallale, e salengwli lle no no ñanaske tanre skwendu kwiange kare. Lle no ñanaske ogaba dbiske skwendu kwian onbrege agwa dbi e me ama dbia, dbi e kwian nanu. Nga suga noare onbre edi lle ñanaske e giti malen ama mo ta gbu dbi e gige mo alin. Ama lle ñanaske ogoda naskuni skwendu amage ngwadi, ama joni mo llea chbade ulita gire lle e ñana giti ama dbi lle ñanaske kledu ogaba ngwadi gigu, ene lle no no ñanaske tanre chegu amanu. Ene kare kwian Chube gerua keruchuge kwian mo ta gbe Chube gerua gai ulia, nga suga noare amadi Chube gerua giti, malen ama mo ta gbe ulia Chube ole, ene chui bdaglige ama ñage chege toi no Chube ole diali. 45 Jesu gerudu dare: —Cha gerule ba ole, ba cha keruchuge no. Kwian bai cha gerua keruchuge cha gerua gai ulia, e salengwli kwian igigwagba kweri ñanaske gai mo alin kare. Kwian chagedu igigwagba no no ñanaske jinade nate gigadale. 46 Bigwa gire igigwagba gbaite no no kweri ñanaske tanre ma no igigwagba na ulitage skwendu amage. Igigwagba ene skwendu amage gire ama joni mo ullage ama lle ulita amanu chbadu, lle e ñana giti ama igigwagba e gbaite no no gigu, ene igigwagba no no kweri ñanaske tanre chegu amanu. Ene kare kwian cha gerua keruchuge kwian mo ta gbe cha gerua gai ulia, kwian ene mo ta gbe ulia Chube ole, ene chui bdaglige ama ñage chege toi no Chube ole diali. 47 Jesu gerudu: —Cha gerule ba ulita ole, kwian agenga me no me nu cha gerua gaba ulia, kwian ene ulita be ji chuge kweri chui bdaglige, e giti cha geru ai kare ñachuge ba ulitage: Kwian ngwe jwannga gdeba tku chiske gire ngwe tanre jo gdeba toli. 48 Gdeba chku ete gire kwian ngwe jwannga gdeba jun keda kodi chi kagda giti, gire ama ngwe litu ole nate. Ngwe no gutadale kwian ngwe jwannga litu ole gbu sugekare, ngwe me no gutadale ama ngwe mliunga naskuni chiske. 49 Ai kaire be boi ene chui bdaglige, lle boanga Chube alin nga ngaña giti tanre be chie kwian agenga me no ulita jwen siere kwian no ulitage, 50 be kwian agenga me no ulita kage nga dbigu giti jitaske, nga ege kwian e be chege boi tanre daga ngwale, jita kote ama be chege olire tanre kaire be sui jwennga tanre mo giti nga jute tirareske. 51 Jesu geru kadu kwian geru jwannga ulitage: —Cha gerudu ulita lle tanre giti ba ole, ¿geru e ulita sugedu bage cha kle gerule giti ba ole? Kwian geru jwannga jaindunga Jesu kalen: —Ima cha Chugagwalla, geru ulita sugedu chage. 52 Gire Jesu gerudu: —Ulia geru ulita suge bage ba kle gerule kare, gire ba ñage kwian na tke tangle Chube gerua ulita giti no, ba ñage kwian tke tangle Moisés Chube gerua degu unsuialin giti kaire agwe ba ñage kwian tke tangle Chube gerua jagere cha kle trage ba ole nege tangle giti. Ba chege salengwli kwian u mauña kare. U mauña lle molen tanre, ama lle gweale juda molen lle gweale jagere molen, u mauña lle e ulita manade no lle e ulita oge no nga gwealege gwa, ene ama kle biale diali daba na chudaboi lle monu giti. Ene kaire ba kle Chube gerua unsuialin kaire Chube gerua jagere manade no ba tale, ene ba be kle biale diali daba na chudaboi geru e giti, ba be ñage kwian tke tangle Chube gerua unsuialin giti kaire Chube gerua nege jagere giti kwian ta gbagda suga no —Jesu gerudu ene ulita kwian geru jwannga amage ole. 53 Jesu geru ene ulita ñachugu lle tanre giti kwian alin gire jo sugekare nga ege, 54 Jesu joni mo jwiage una ama manadre ngwadi, una ege ama kwian tku tangle Chube gerua giti u mo litangwa Chube gerua jwanngwage. Kwian ulita chegu tañachuge tanre Jesu gerua giti gire kwian ulita gerudu modi Jesu giti: —Ama kle gerule no tanre Chube giti, ¿ama geru e ulita jun baini? Ama ta ngle molen, ¿chema ama tku tangle tachke ngle ene? Kaire ama kle kwian oga dodade kle lle na tanre daga ngwale no dodade, ¿chema kirallaske ama kle age? 55 ¿Ama me che tigemanalla? ¿Kwian e ñenua me ka jwankle José gli drega dodanga lle tanrere? ¿Kaire ama chebia me ka jwankle María? Che ama daballa ulita uñe, ¿ama daballa me Santiago kaire José kaire Simón kaire Judas? 56 ¿Kaire ama ibotea ulita me kle toi cheske kaire agwe? ¿Agwa gire mineade geru ai ulita Chube giti kle chke uñale amage? 57 Kwian gerudu ene Jesudige malen kwian me jaindu Jesu gerua gai ulia, sugedu kwiange Jesu kwian ngwale. Jesu gerudu kwian e ulita ole: —Cha gerule ba ole, kwian Chube gerua ketanga kle joge nga baini kairege kwian tke tangle Chube gerua giti, kwian nga emu kle kwian Chube gerua ketanga keruchuge kle ama gerua gai dage. Agwa kwian Chube gerua ketanga jogeni mo bitallaske mo jwiage ama manadre ngwadi, nga ege kwian me ama gai ngwange no, ni ama bitalla kle gwa ama gai kwian Chube gerua ketanga ulia kare, kwian me ama gerua gai dage ni kwian ama keruchugakalin —Jesu gerudu ene kwian ama jwiamu ole. 58 Kwian Jesu jwiage me Jesu gau ngwange no me Jesu gerua gau ulia, malen Jesu me lle daga ngwale no tanre dodadu kwian eske.
1 E suiale kwian kada Herodes ama kwian nga Galileamu chugagwalla rey, Herodes kwian gweale keruchugu gerule Jesu giti. 2 Gire Herodege me chege no chema giti tra no kwian kle gerule, malen Herodes gerudu kwian lle boanga mo alin ole Jesu giti, Herodes gerudu: —Cha kle kwian keruchuge gerule no kwian kadakle Jesu giti. ¿E me Juan-Bautista jogebakeda amaña chkuni gwade? E amaña chkuni gwade malen nege ama kle age tanre no mo kiralla giti kwian ulita gwa giti —Herodes gerudu ene Jesu giti. 3 Juan-Bautista kledu gwade suiale gire ama nu ka boaba tanre Herodes ole muinga kada Herodías gdale, muinga e Herodes daballanu kada Felipe muira. Herodes kle toi Herodías e ole mo muira kare, e giti Juan-Bautista nu ka boaba tanre Herodes ole, Juan-Bautista gerudu: “Chube gerua degaba unsuialin gerule ba me ñage toi ba daballanu muira ole mo muira kare, e giti ba jiske tanre Chube gwa giti.” Juan-Bautista gerudu ene Herodes ole gire Herodes skochiu tanre Juan-Bautistadi e gdale, Herodes kwian kagu Juan-Bautista gai Juan-Bautista ko luge tkale skage. 5 Juan-Bautista kledu skage gire Herodes tadu Juan-Bautista gwakalinda Juan-Bautista nu geruba Herodías giti gdale, agwa Herodes kwachiu kwian nglea ngeru kwian e ulita kle Juan-Bautista gerua gai dage, kwiange sugedu Juan-Bautista ulia kwian Chube gerua ketanga dabage, Herodes kwachiu kwian ene ulita ngeru malen Herodes me ñadu Juan-Bautista gweda blike. 6 Chui jo tangle gire Herodes nu mebanga chuia chku chui e olladre, chui ege Herodías jian jo skwen gdate kwian ngle kadaba chui ollade gwa giti. Herodege skwendu noare Herodías jian skwendu gdate no ene kwian ulita gwa giti, 7 malen ama gerudu Herodías jian ole: —Nga suga no chadi ba skwendu gdate noare cha ulita gwa giti, malen cha mo gerua ulia gbe ba alin nege Chube gwa giti kaire kwian ngle ai gwa giti cha be age no ulita ba alin ba takalin kare, ba takalin lle gwealege ba lle kade chage, cha be lle kete bage ba takalin kare. 8 Chku uñale Herodíage Herodes gerudu giti ama jian ole, gire Herodías gerudu mo jian ole: —Ba Juan-Bautista chugabita kade Herodege batekwa giti. Gire Herodías jian mo chebia kerua gau dage ama agedu chebia gerudu kare, ama gerudu Herodes ole: —Cha takalin ba Juan-Bautista chugabita kete chage batekwa giti nege nege. 9 Chugagwalla rey Herodedi nga chiu olire tanre e giti, ama me tadu agekalin ene Herodías jian gerudu kare, agwa ama agedale, kwian ulita gwa giti Herodes nu gerubabi Herodías jian ole Herodías jian lle gweale kade ama be ketege. Malen Herodes kwian lle boanga gweale kagu age Juan-Bautista ole, Herodes gerudu lle boanga e ole: —Joga Juan-Bautista kle skage ngwadi, ba ama chuga tkenga gire ba chieni ama chugabita dbe aini batekwa giti, ba e kete Herodías jiange. 11 Gire agedre ulita Herodes gerudu kare. Juan-Bautista chuga tkerenga dule Herodías jiange batekwa giti, gire Herodías jian Juan-Bautista chugabita ketu mo chebiage. 12 Juan-Bautista guleda ene gire kwian geru jwannga Juan-Bautistage ulita jo Juan-Bautista jaba jwen ogadale keugage. Kwian geru jwannga Juan-Bautistage Juan-Bautista jaba ogo gire ama ulita jo Jesu kle ngwadi, ama geru ketu Jesuge boidu ulita Juan-Bautista ole giti. 13 Jesuge chku uñale Juan-Bautista boidu ene, gire ama jo siere kledu ngwadi jo duge ule kwian geru jwannga amage ulita ole nga gballage sugekare kwian na ulitage. Agwa kwian ngle una tanremuge chku uñale Jesu jo siere nga ege gire ama ulita chagedu seradi Jesu nate. 14 Jesu jo chke chibita kagda giti ongoru, Jesu jo siere duge gwagedu kwian tanredi chage Jesu nate, Jesu taidu dage kwian e ulitage, kwian gweale oga kledu kwian ngleaske, Jesu kwian oga e ulita dodadu. 15 Nga jeredu gire kwian geru jwannga Jesuge ulita chku Jesudi gerudu Jesu ole: —Nga jo jere, nga ai che kle ngwadi nga gballa, bligda me nga aige kwian ulita alin gutadale. Noare ba gbi kade bdagli kwian ulitage ba ama ulita kage siere nga aige, ene ama ulita ñage joge una gwealege bligda gige mo alin gutadale. 16 Jesu jaindunga: —Me no ama ulita kage siere me bliba, ba ulita agali bligda kete ama ulitage gutadale. 17 Kwian geru jwannga Jesuge jaindunga: —¿Che kwian nglea ulita ulle llemadi? Bligda me ngle che ole kwian tanre alin gutadale, che pan molen gdatigale alin ngwe gdabokle alin allabi, bligda e me ñage kwiange ulita. 18 Jesu gerudu: —Ba pan e kaire ngwe e kete chage. 19 Jesu gerudu ene geru jwannga amage ole, gire Jesu kwian nglea ulita gbangu toi dba ngauda giti. Kwian ulita toidu dba gire Jesu pan gdatiga ngwe gdaboke gau kote, Jesu gwagedu nga ngaña giti, Jesu gerudu Chube ole bligda giti: “Cha Ñenua, noare ba pan ai ngwe ai ketu kwian ai ulita alin gutadale.” Jesu gerudu ene Chube ole, Jesu pan skutunga ngwe uda junnga, gire Jesu ngwe uda pan bita ketu kwian geru jwanngage girabatadale kwian ngle ulita ole. Jesu bligda gbu jriennga kwian e ulita alin gutadale. 20 Kwian ngle ulita blidu no, kwian onbre ngle cinco mil blidu, kaire muinga ngle kirogwa ngle blidu agwa ama me jo teanba, Jesu kwian e ulita ullu pan gdatigale alindi ngwe gdabokle alindi. Kwian ulita unchku no bligdadi gire bligda bita ngle cheguda, kwian geru jwannga Jesuge bligda bita e ulita litu ole ski kweri gbataboko giti gbaboke, ski e ulita chku ete bligda cheguda ole. 22 Jesu kwian ngle ullu ene, bigire Jesu gerudu kwian geru jwannga amage ulita ole: —Joga duge chibita tkenga tangle chkagu chi kagda giti. Cha be chege gbi jige bdagli kwian ngleage, gire cha be joge ba nate. 23 Kwian geru jwannga Jesuge ulita jo chage duge chiga giti, gire Jesu gbi jigu bdagli kwian ulitage, Jesu jo sugekare kwian e ulitage jo gballa jwichuga giti ngaña gerule Chube ole. Jesu kledu eni gballa gerule Chube ole gire nga jeredu. 24 Nga jo jere gire kwian geru jwannga Jesuge jo bate duge chi bonga, mleuda kweri kledu tiennga kiraske dudi, chi kledu skwen bdugu tanre mleuda kote gire kwian geru jwannga ulita kledu chi bage blikare. 25 Nga chiu kamalin ngwange bdugu Jesu jo chage seradi chiga giti kwian geru jwannga kle duge ngwadi ngnagu chi bonga. 26 Kwian geru jwannga Jesuge ulita gwagedu Jesudi chage seradi chiga giti gire ama ulita kendunga tanre, ama ngautu kweri chru ole: —¿E llema? ¿E oñakwa kle chage? 27 Gire Jesu gerudu ama ulita ole: —Ba me kennga, ba mo ta gbe kiraske, cha amaña kle chage. 28 Jesu gerudu ene gire Pedro gerudu Jesu ole: —Cha Chugagwalla, ulia ba amaña kle chage, ba cha gbe chage seradi kaire chiga giti joge ba ngnagu. 29 Jesu gerudu Pedro ole: —Bai cha gitigu chage seradi chiga giti. Gire Pedro jo siere duge jo chage seradi chiga giti Jesu ngnagu. 30 Pedro kledu chage no chiga giti Jesu ngnagu, agwa gire Pedro gwagedu chi skwen bdugu tanre mleuda kote gire ama kendunga. Ama kendunga gire ama jo chiske dbigu, ama ngautu Jesuge: —¡Cha Chugagwalla, cha be unjoge, ba cha jwen siere chige! 31 Gire blike Jesu ama gau koge, Jesu gerudu ama ole: —¿Mineade ba me kle mo ta gbe cha gai ulia? Cha ñage kira kete bage chage no seradi chiga giti, agwa ba me mo ta gbu cha gai ulia, malen ba me ñadu chage seradi chiga giti cha kare. 32 Jesu jo ule Pedro ole du tadi gire mleuda me chegu tiennga dare, chi chegu ngwedi. 33 Boidu ene gire kwian geru jwannga Jesuge ulita Jesu gau dage gerudu no no Jesu ole: —Ulia ulia ba Chube Kirolla. 34 Jesu jo chage duge gwangerugu kwian geru jwannga amage ulita ole, ama ulita jo chke chi kagda giti ongoru nga kadakle Genesarege. 35 Kwian tanre nga emu gwagedu Jesudi gire chku uñale kwian e ulitage Jesu amaña chku ama jwiage, kwian e giti geru jo chage nga ulita Genesarege Jesu kle ngmadi. Kwian tanre geru e keruchugu gire ama chiu kwian oga ulita dbe Jesu kle ngwadi dodale. 36 Kwian daba oga dbanga ulita gerudu Jesu ole daba oga giti: —Noare ba oga chuge ngwadi ko chuge sidri ba ñometralladi alin allabi, chage suge trate oga ba chugedi ene daba oga be joge chke noni. Kwian chudaboi kadu ene Jesuge oga alin, gire kwian oga ulita bai kaire ko chugu alin Jesu ñometralladi, kwian ene ulita jo chkeni noni me chegu oga dare.
1 Kwian fariseo mneite ule kwian daba tkanga tangle Moisés chadalla giti ngle ole chiu una Jerusalénge chku Jesu kle ngwadi gerule Jesu ole, kwian e ulita geru kadu Jesuge: 2 —Che enusulian unsuialin geru gbu che kwian israelita ulita toidale giti, ¿mineade kwian geru jwannga bage me kle age geru e kle gbaba gerule kare? Kwian geru jwannga bage ulita me kle mo ko glige trate tanre ngeru blirege che enusulian unsuialin suia kare, malen cha ulita gwage ama kle age me no. 3 Jesu jaindunga kwian e kalen: —¿Mineade ba ulita kle ba enusulian unsuialin suia gai dage ma no Chube gerua uliage? Ulia ba ulita kle ba enusulian unsuialin suia alin allabi gai mo alin agwa ba me kle Chube gerua ulia gai dage ba me kle age Chube takalin kare. 4 Unsuialin Chube geru ketu Moisége degadale kwian ulita alin, chada e gerule: “Ba mo ñenua mo chebia gadale dage no.” Kaire chada na Moisés nu degaba kle gerule: “Kwian gerule me no mo ñenuadi kaire mo chebiadi, kwian na kwian bai gerule ene gwadaleda.” 5 Moisés Chube gerua degu ene ulita unsuialin, agwa ba ulita agali me kle geru e gbe gdadi, kaire ba kle daba na tke tangle age nganake me age chada e gerule kare. Ba kle kwian ta gbe me mo ñenua mo chebia gadale dage no me ama chudaboadale me lle ketadale amage ama llea me gire. Ba kle kwian tke tangle gerule mo ñenua ole mo chebia ole: “Mama, tata, cha me ñage ba chudaboi, lle ulita chanu cha ketu Chubege, cha ole lle me ba chudaboagda.” 6 Ba kle kwian tke tangle age me no ene mo chebia ole mo ñenua ole ba kle age Chube gerua dollale, ba ulita nu Chube gerua mliabanga me mo ñenua mo chebia manade Chube geru gbu kare unsuialin tangle, ba kle ba enusulian unsuialin suia gai dage ma no Chube gerua uliage. 7 ¿Mineade ba kle gerule kate ba kle Chube gerua gai dage, gire ba me kle age ba kle gerule kare? Ba ulita ta me no. Kwian Chube gerua ketanga kada Isaías Chube gerua degu unsuialin ba ulita giti, chada e gerule: 8 “Chube gerudu: ‘Kwian ai ulita kle gerule ama kle cha gai dage, kle gerule ene ka giti alin allabi, agwa ulia ama me kle cha gai dage ulia mo tale, ama ta kle bate chage ama kle gerule alin allabi. 9 Kwian kle gerule ama kle cha gai dage mo Chubeale, agwa ngwale ama kle gerule ene, ama me kle mo ta gbe cha ole ulia age cha takalin kare. Kaire ama me kle daba tke tangle cha gerua ulia giti, agwa ama kle daba tke tangle geru ngwale giti ama agali kle tañachuge kare mo tale.’ ” Isaías chada degu ene Chube gerudu giti. 10 Jesu gerudu ene kwian fariseo ulita ole kaire kwian daba tkanga tangle Moisés chadalla giti ulita ole, gire Jesu kwian na ulita kadu mo gitigu ama keruchuge, Jesu gerudu kwian e ulita ole: —Ba cha keruchuge no, cha takalin geru ai suge trate ba ulitage: 11 Ni lle gdaite kwian kle gute kle kwian gbe me no jiske Chube gwa giti, agwa kwian kle tañachuge me no mo tale gire kwian kle gerule me no age me no ama kle tañachuge kare, e ulita kle kwian gbe me no jiske Chube gwa giti. 12 Jesu gerudu ene kwian ulita ole gire kwian geru jwannga amage ulita chiu Jesu gitigu sugekare, geru kadu Jesuge: —¿Uñale bage kwian fariseo ulita ta skochiu mo gdale ba gerudu ama ole giti? 13 Jesu jaindunga: —Ima, uñale chage ama kle tañachuge me no mo tale chadi, agwa ba me tallade kwian e skochiu chadi giti, ama ulita chugene tañachuge ama takalin kare. Kwian e kle daba na tke tangle geruge, geru e me cha Ñenua Chube gerua ulia, geru e geru ngwale, cha Ñenua me kle geru e gbe ama tale tragadale daba na ole, agwa geru e kle chie kwian e agali tale, malen chui be chke gire Chube be age kwian e ulita ole be kwian gbe jiske ama kle daba tke tangle geru ngwalege gdale. Kwian e ulita kle chage kwian gwagwa me kare, kaire ama kle daba na kle chage kwian gwagwa me kare jonlla dbe, ene ama gdabonate me ten, me uñale amage ama kle chage baini, gire bdagli ama gdabonate joge chke dba dbiugage ama lentige boi daga ngwale tanre. Kwian fariseo ulita kle chage kwian ene kare, ama me kle Chube gerua ulia gai mo alin, kaire ama kle daba na tke tangle geru ngwalege enusulian suia giti, malen bdagli Chube be ama ulita gbe boi daga ngwale age ene ulita gdale. 15 Jesu gerudu ene gire Pedro gerudu Jesu ole: —Ba gerudu sbaliga kwian ole bligda che kle gute me che gbe me no jiske Chube gwa giti, geru e me suge chage ba kledu gerule llema giti, cha takalin ba geru e trennga no cha ulitage. 16 Jesu jaindunga Pedro kalen: —¿Ba ulitage kaire agwe geru e me suge? 17 Sugedale bage ni lle gdaite che kle gute ñage che ta gbe chege jiske Chube gwa giti. Che blire gire bligda me kle joge chke che tale che ta gbagda age me no Chube dollale, che blire gire bligda joge che kdege, bigire bligda e kle joge tangle ulita, che kle mlienga. 18 Agwa kwian kle tañachuge me no mo tale, talla e giti kwian kle age me no kle gerule me no ama kle tañachuge kare, talla e kle kwian gbe chege jiske Chube gwa giti. 19 Kwian tale bai kaire talla me no kle, kwian ene be mo ta gbe age me no diali ai kare ulita: Kwian daba gweda. Onbre mo jwanba mo chuge ke giti muinga na ole, muinga mo jwanba mo chuge ke giti onbre na ole. Onbre muinga me mo jwanba mo chuge ke giti. Kwian skwe boi daba ngeru. Kwian geru jinade daba ole. Kwian gerule me no daba nadi. 20 Lle ai ulita cha kle ka jwen ba ole, e ulita kle chie kwian tale, e kle kwian gbe jiske Chube gwa giti. Agwa blire me ko gligaba tanre bitangle, e me kwian ta gbe jiske Chube gwa giti kwian fariseo kle gerule kare —Jesu gerudu ene ulita kwian geru jwannga ulita ole. 21 Jesu jo chage dare kwian geru jwannga amage ulita ole una Tiro ngnagu una Sidón ngnagu, 22 ama jo chke kodi una boke ege gire muinga gdaite toinga nga ege chiu Jesu ngnagu, muinga e me kwian israelita, ama kwian cananea, ama chku Jesudi, ama ngautu: —Ba kwian chugagwalla unsuialin David oindalla, uñale chage Chube ba kagu nga dba ai giti. Ba tai dage chage, cha jian jwligebanga dolla kote, ba cha jian dodade dolla kage siere amage. 23 Jesu me jaindunga muinga kalen agwa kwian geru jwannga Jesuge jo kodi Jesudige, gerudu Jesu ole: —Cha takalin ba gerule muinga e ole muinga e kage siere chege. Muinga e kle che jugeda tanre, ama kle chie ngaute che nate tanre. 24 Jesu gerudu muinga e ole: —Kwian israelita ulita bda oveja jogebanga kare, ama me Chube uñe, kwian ene alin Chube cha kagu nga dba ai giti, Chube cha kagu kwian israelita alin allabi chudaboi tke tangle Chube giti. 25 Muinga e kwian me israelita, ama Jesu keruchugu gerule ene agwa ama me ta chugu gerule Jesu ole, ama jongnagwa skutu dba Jesu gwangnagu Jesu gai dage, muinga gerudu Jesu ole: —Ba kweri cha ba gai dage, cha takalin ba cha chudaboi. 26 Jesu jaindunga: —Cha bitalla israelita alin cha lle no tanre boadale, ba muinga me israelita, cha ba chudaboi e chege salengwli bligda no jwennga kirogwa ngeru kare kete toge gutadale. 27 Jesu gerudu ene agwa gire muinga jaindunga: —E ulia ba gerudu kare, agwa bligda jwna kle jwatenga to mauña kote, to kle bligda jwna jwen nate kle gute, e kare ene cha takalin ba age cha alin sidri, ba dolla kage siere cha jiange. 28 Jesu muinga keruchugu gire Jesu gerudu: —Muinga, ulia ba kle mo ta gbe cha gai ulia kweri, malen ba jian alin cha age ba takalin kare, ba jian jo chkeni no. Jesu gerudu ene gire blike muinga e jian jo chkeni no, dolla jo siere amage. 29 Jesu jo siere nga ege, Jesu jo chke chibita kada Galilea kagdage, eni Jesu jo jwichuga giti toidu dba. 30 Kwian tanre jo Jesu nate daba oga daga ngwale tanre dbe Jesuge dodadale, kwian e ulita mo litu Jesudige, kwian jo oga ai kare dbe Jesuge: kwian me ñage chage trate, kwian gwagwa me, kwian ko kwebanga, kwian keru me, kaire kwian oga jingme na tanre kote ulita dule Jesuge, kwian ngle gwa giti Jesu oga e ulita dodadu. 31 Kwian ulita gwagedu Jesudi kwian oga dodade ene gire ama ulita chegu tañachuge tanre no Jesu giti. Kwian keru me Jesu ama gbu keru ole, kwian ko kwebanga Jesu ama ko gbu no trate, kwian sera kwebanga Jesu ama gbu chage trate, kwian gwagwa me ten Jesu ama gwagwa gbu ten no trate. Kwian ulita gwagedu Jesudi age no ene kwian alin gire kwian ulita gerudu no nga suga no ole Chube kwian israelitanu giti. 32 Jesu kledu eni jwichuga giti kwian ngle ole gire Jesu kwian geru jwannga amage gdataboko giti gdaboke kadu mo gitigu, Jesu gerudu kwian geru jwannga ulita ole: —Cha tai dage kwian ai ulitage, chui gbamai kwian ai ulita kle cha ole aini, bligda ulita bidegu ama ole gire nege ama ulita me bligda molen gutadale. Cha me ta ama ulita kagakalin bliage gudeguni, ama ulita jogeni bliage, nga ñage jogenga ama ulita gwage bli ole jonkare, bligda kete ama ulitage gutadale. 33 Kwian geru jwannga Jesuge gerudu Jesu ole: —¿Che age mine kwian ngle ulita alin bligda giti? Aini nga gballage kwian me kle toi, ¿chema ngwadi che joge bligda jinade kwian ngle alin gutadale? 34 Jesu geru kadu: —¿Pan gdamangire ba kle chage dbe? Kwian geru jwannga jaindunga Jesu kalen: —Cha kle chage pan gdaguke dbe kaire ngwe soli gdamoite dbe agwa me ngle, bligda e me ñage kwian ulitage gutadale. 35 Jesu kwian ulita gbu toi dba dbi giti, 36 gire Jesu pan gdaguke gau kote kaire ngwe soli gau kote, Jesu gerudu Chube ole: “Cha Ñenua, nga suga noare chadi ba bligda ai ketu chage kwian ai ulita ullagda.” Jesu gerudu ene Chube ole bligda giti gire Jesu pan skutunga kaire ngwe uda junnga ketu geru jwannga ulitage girabatadale kwian ulita ole. Pan kaire ngwe jriendunga ngle kwian ulita alin gutadale. 37 Kwian ngle ulita blidu no, kwian onbre ngle cuatro mil blidu, kaire muinga ngle kirogwa ngle blidu agwa ama me jo teanba. Ulita blidu unchku no bligdadi gire pan bita ngle cheguda kaire ngwe bita ngle cheguda litre ole, ski kweri gbaguke chku ete bligda bita cheguda ole. 39 Jesu kwian ullu ene ulita gire Jesu gbi jigu bdagli kwiange kwian kaguni gudeguni, gire Jesu jo duge chi kagda giti ongoru una ka jwankle Magadán giti.
1 Kwian fariseo mneite kaire kwian saduceo mneite jo Jesu kle ngwadi mo chuge Jesu ole, ama ulita gerudu Jesu ole: —Ba kle gerule mo giti Chube ba kagu nga dba ai giti, cha takalin nege ba lle daga ngwale no kweri kwian me ña dodade mo kira giti, ba dodade cha ulita gwa giti, ene be chke uñale trate cha ulitage ulia Chube ba kagu ulia ba kle age Chube kiralla giti. 2 Jesu jaindunga ama kalen: —Cha mi age ba takalin kare, ba cha keruchuge no. Ba ulita ta kle chke nga gbe gdadi noi be boi noi mi boi, ngabi ba kle gwage bogakwa chratigenga dabe no no nga ngaña gire ba kle gerule: “Nga be boi no”, gire kle boi ene ulia ba gerule kare. 3 Kaire ngabebita ba kle gwage bogakwa gwalugenga jere ngaña gire ba kle gerule: “Nege nga be boi tira”, gire kle boi ene ulia ba gerule kare. Ba kle nga ngaña giti gbe gdadige, gire chke uñale bage nga be boi tira nga mi boi tira. E suge trate ba ulitage, gire ¿mineade ba me ñage mo ta gbe tañachuge trate ulita kle boi giti nege tangle baske? ¿Mineade me suge kaire ba ulitage cha kle age Chube kiralla giti cha me kle age Chube kiralla giti aini baske? 4 Ba ulita kle toi chui aige ba me kle mo ta gbe geru ulia gai ulia, ba ulita agenga me no, geru ulia me suge bage, cha agedu no kwian me dodaba cha e dodadu ba ulita gwa giti agwa e giti ba me kle cha gai ulia. ¿Lledale cha lle daga ngwale no dodade ba gwa giti? Ba me kle cha gai ulia Chube cha kagu nga dba ai giti, agwa nege nege cha mi age ba ulita takalin kare. Agwa chui be chke gire cha be boi ba ulita gwa giti salengwli Jonás boidu unsuialin kare, ene be chke uñale ba ulitage Chube nu cha kagaba. Jonás toidu chui gbamai ngwe kweri kweri tadi gire ngwe Jonás mliunga kedagu gwade, e giti chku uñale kwian ngle toinga Jonás suialege ulia Chube Jonás kagu Chube gerua trage kwian ole. Jesu gerudu ene gire Jesu kwian ulita chugu ngwadi, Jesu jo chage sugekare kwian geru jwannga amage alin ole. 5 Kwian geru jwannga Jesuge ulita jo Jesu ole chibita kagda giti ongoru, kwian geru jwannga Jesuge ta jonga pan dbe gutadale duge. 6 Jesu gerudu kwian geru jwannga ulita ole: —Cha gerule ulia ba ole, ba mo ta manadale chage ta giti kwian fariseo kwian saduceo ulitaske ba ulita me mo ta gbale levadura amanu gai mo alin pan dodagda. 7 Kwian geru jwannga ulita tañachugu Jesu kle gerule levadura ulia giti pan dodagda gire ama gerudu modi: —Che me chiu pan dbe gutadale malen Jesu kle gerule ene che ole levadura giti. 8 Jesuge chku uñale kwian geru jwanngage me sugedu Jesu tadu gerukalin giti, ama ulita tañachugu levadura ulia giti, me sugedu trate kwian geru jwanngage gire Jesu gerudu ama ulita ole: —¿Mineade ba kle gerule modi ba me chiu pan dbe gutadale? ¿Mineade ba ulita me kle cha gai ulia mo tale? 9 ¿Bage me suge cha ñage bligda kete ba ulitage? ¿Ba ta jonga ulita cha kwian ngle ullu bligda sidridi giti? Cha kwian onbre ngle cinco mil ullu pan gdatigale alindige, kwian e ulita unchku, gire ¿ba bligda bita cheguda litu ole ski gbamangirege? 10 ¿Kaire ba ta jonga cha kwian ngle cuatro mil ullu pan gdagukedi? Kwian e ulita unchku, gire ¿ba bligda bita cheguda litu ole ski gbamangirege? 11 Sbaliga cha gerudu ba ulita ole ba me mo chuge ngwadi kwian fariseo kwian saduceo levaduralla gai pan dodale mo alin, ¿mineade me chke uñale bage cha me kledu gerule pan ulia giti ba ole? Cha kledu gerule kwian fariseo kwian saduceo gerua giti, ama gerua geru ngwale, geru e levadura kare, ba me ama gerua ngwale gai mo alin. 12 Jesu gerudu ene batre chku uñale kwian geru jwanngage Jesu me kle gerule pan giti ni levadura giti, Jesu kledu gerule kwian fariseo kaire kwian saduceo kle kwian tke tangle gerua ngwalege giti, e giti Jesu kledu geru jwannga ta gbe chke ama ulita mo ta manadale geru ulia alindi Jesu kle gerule kare, ama ulita mo ta gbadale sugekare ulita kwian fariseo geruage kwian saduceo geruage. 13 Jesu jo chage dare duge kwian geru jwannga ole, ama ulita jo chke nga ka jwankle Cesarea-Filipoge gire Jesu geru kadu kwian geru jwannga ulitage: —¿Kwian ulita kle gerule mine cha giti cha chema? 14 Kwian geru jwannga jaindunga: —Kwian gweale kle gerule ba Juan-Bautista jogebakeda chkuni gwadeni. Kwian na kle gerule ba kwian unsuialin kada Elías chkuni. Kwian na kle gerule ba kwian unsuialin kada Jeremías jogebakeda chkuni gwadeni. Kaire gerukle ba kwian gweale Chube gerua ketanga unsuialin jogebakeda chkuni gwadeni. 15 Kwian geru jwannga gerudu ene Jesu ole gire Jesu geru kadu dare ama ulitage: —Kwian na kle gerule ene cha giti, ¿agwa ba gerule mine? ¿Cha chema? 16 Simón-Pedro jaindunga Jesu kalen: —Ba Cristo, ba Chube gwade ulia Kirolla, Chube ba kagu nga dba ai giti kwian kare kwian jwen siere ji chugege agedu me no gdale. 17 Gire Jesu gerudu Simón-Pedro ole: —Simón, ba Jonás kirolla, cha Ñenua nga ngaña giti agedu no ba alin, ama ba ta gbu chke suge ulia cha ama Kirolla, malen ba gerudu ene cha giti, ni kwian gdaite ba ta gbu suge ene. 18 Cha gerule ba ole Simón, ba kalla na Pedro, ka e kle gerule “kechuga”. Ba kechuga kare, kechuga chege kiraske tanre diali, ene kaire ba be chege kiraske cha geruadi, ene ba giti kwian tanre be cha gerua keruchuge be cha gerua gai ulia, kwian e ulita be chege Chubenu. Ni jogeda ni che dolla Satanás ule mo chudaboangalla ulita ole be ñage kirachke kwian cha gerua gangadi, kwian ene be chege Chubenu diali, bdagli ama be joge toi Chube ole nga ngaña giti diali chui tangle. 19 Cha be ba gbe kwian ulita cha gerua ganga chugagwallale nga dba ai giti. Cha kiralla giti ba be Chube gerua cha giti dbe nga dba ai giti kwianske, kaire cha kiralla giti ba be kwian tke tangle toidale mine nga dba ai giti Chube takalin kare. Kwian bai geru gai ba ama tke tangle kare, kwian ene ulita chege Chubenu, agwa kwian bai mi geru cha giti gai ba kle gerule kare, kwian ene me Chubenu. 20 Jesu gerudubi Pedro ole gire Jesu gerudu kwian geru jwannga gdataboko giti gdaboke ulita ole: —Ba me gerule ni kwian gdaite ole cha Cristo Chube Kirolla Chube cha kagu nga dba ai giti —Jesu gerudu ene kwian geru jwannga ulita ole. 21 Ne suiage gwangerugu Jesu gerudu kwian geru jwannga ulita ole Jesu be boi giti, Jesu gerudu: —Cha jogedale una Jerusalénge, una ege cha be mo boange tanre daga ngwale kwian nage. Kwian israelita chugagwalla juma ulita kaire kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita me cha gerua gai ulia, ama ulita be jainchke chadi cha gerua gdale be cha gbe boi daga ngwale, bdagli cha gwabeda agwa mongikege cha jaba be chkeni gwade. 22 Jesu gerudu ene mau giti gire Pedro Jesu du sugekare, Pedro gerudu mno Jesu ole: —Cha Chugagwalla, ¡Chube me takalin ba boi ene ba kle tañachuge kare! E me ñage boi ba ole ba kle gerule kare ba gwabeda. 23 Pedro gerudu ene Jesu ole gire Jesu jwlituda gdate naskuni gerudu Pedroge: —¡Chegede kamne! Ba kle gerule Satanás kiralla giti ba kle gerule ama takalin kare, ba me ñage gerule ene dare. Ba kle gerule kare ba ta cha ta blitakalin me age Chube takalin kare, ba me kle tañachuge Chube takalin kare, ba kle tañachuge kwian onbre ngwale kle tañachuge kare. 24 Jesu gerudu ene Pedroge gire Jesu gerudu kwian geru jwannga ulita ole: —Kwian bai ta chagekalin ulia cha ole me tañachugadale dare mau giti alin allabi me agedale dare ama agali ta agekalin kare, ama mo ta gbadale cha gerua gbe gdadi age cha takalin kare, kwian na ama gbe boi daga ngwale cha gerua gdale kaire kwian na ta ama gwakalinda cha gerua gdale, ama me mo talladale. Kwian bai mo ta gbe ene ñage chage cha ole. 25 Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 26 Cha gerule ulia ba ole, ngwale kwian tañachuge tanre lle lite ole ngle giti ama kle toi nga dba ai giti gire. Kwian tañachuge lle lite ole alin allabi mau alin agwa ama me mo ta gbe ulia Chube ole, kwian e be jogenga ngwale, ama be chege sugekare Chubege diali chui tangle. Kwian me ñage tañachuge lle no ñanaske gweale kete Chubege gire e giti Chube be ama gbe toi no ule Chube ole nga ngaña giti diali chui tangle, me ene dale. 27 Chube cha kagu nga dba ai giti kwian kare, chui bdaglige cha be chieni nakwaite cha Ñenua Chube kirallaske, cha be chieni ule lle boanga Chube alin nga ngaña giti ngle ole. Chui ege cha be gerule kwian bai jiske Chube gwa giti kwian bai me jiske Chube gwa giti. Kwian bai agedu me no Chube dollale, kwian ene jiske Chube gwa giti, cha be kwian ene ulita gbe ji chuge agedu me no kbiale. Kwian bai agedu no Chube takalin kare cha mi kwian ene gbe jiske Chube gwa giti, cha be age no ama ulita alin ama agedu no trate Chube takalin kare ñanale. 28 Cha gerule ulia ba ulita ole, Chube cha kagu nga dba ai giti kwian kare, ba gweale kle aini cha ole cha keruchuge ba bebi jogeda gire ba gwa giti Chube be age no no cha ole ama kiralla giti, ba gwage chadi ene gire be suge trate bage cha noare cha kweri cha kwian ulita Chugagwalla —Jesu gerudu ene ulita kwian geru jwannga ole.
1 Chui dereke jo tangle gire Jesu jo jwichuga giti bate ngaña, ama kwian geru jwannga amage gdamaire alin allabi du ule, ama Pedro kaire Santiago kaire Santiago daballa Juan du ule ama gatedi. Ama ulita jo chke jwichuga giti kwian na me kle ngwadi, 2 gire Chube Jesu blitu ulita jegwale kwian geru jwannga gdamai e gwa giti. Jesu gwa chratigunga chui chra kare Jesu ñometralla ulita jwlitedu jutre Jesudige jichra chra jutre kare. 3 Kwian geru jwannga gdamai gwagedu Jesudi ene gire blike kwian unsuialin boke ka jwankle Moisés kaire Elías medu geru trage Jesu ole ama gdamai gwa giti. 4 Pedro gwagedu ene Moisédi Elíadi geru trage Jesu ole, gire Pedro gerudu Jesu ole: —Cha Chugagwalla, nga suga noare chadi che ulita chku aini. Ba takalin, cha u soli gbe gbamai aini toingwa sugetidale, u gbaite ba alin, u gbaite Moisés alin, u gbaite Elías alin. 5 Pedro kledu gerule ene Jesu ole, gire bogakwa jutre chra gwadetranga chku blike ama ulita giti, ama ulita chegu bogakwaske gire bogakwaske Chube kerua sugedu ama ologe gerule: “Ai cha Kirolla, cha no no ama ole, nga suga noare chadi ama giti, ba ulita ama keruchugadale no, ba mo ta gbadale ama kerua gbe gdadi no diali.” 6 Ama gdamai Jesu gerua jwannga geru e keruchugu gerule Jesu giti gire ama kendunga tanre ama ulita mo ñeu kaboge jongnagwa giti ama gwa ñadu dbidi chru ole. 7 Jesu jo ama gdamai e kle ngwadi Jesu ama ulita chugudi kodi, Jesu gerudu: —Chkede gdate, ba me kwachie. 8 Ama gdamainate gwa gaunga ngaña tienda mo giti me gwagedu kwian kledu geru trage Jesu oledige, Jesu alin kleduni gballa. 9 Boidu ene ulita jwichuga giti gire Jesu joni chage jwichugadi gwajimogu ule kwian geru jwannga gdamai ole, Jesu gerudu ama ole jonkare: —Mo gwagwa giti ba gwagedudi jwichuga giti nege kaire ba geru keruchugu cha giti, ba me e trage ni kwian na gdaite ole. Cha chiu nga dba ai giti kwian kare, cha be jogekeda, cha be chkeni gwade gire ba ñage boidu nege gerua ulita trage kwian na ole. 10 Jesu kwian geru jwannga gdamai ta gbu ene kwian gwagedu giti kaire kwian geru keruchugu giti gire geru jwannga geru kadu Jesuge: —¿Mineade kwian daba tkanga tangle Moisés chadalla giti kle gerule Elías chkedale chage kwianske nga dba ai giti ngeru, gire Chube be kwian daba jwannga siere kage kwian ulita alin? Ba klebi nga dba ai giti kwianske, malen me suge chage mineade kwian e kle gerule Elías bebi chke. 11 Jesu jaindunga: —E ulia kwian kle gerule kare, Elías chiedale kwian ulita ta gbe biale ngeru, gire Chube kwian daba jwannga siere kage chuiage kwian ulita ta kle biale kwian daba jwannga siere gai ngwange no, e trate ene ulia. 12 Agwa cha gerule ba ole, Elías chkubi kwianske, agwa kwian me ama gau ngwange no jumale, kwian ama gau kwian ngwale kare, kwian agedu dagale ama ole me no kwian tadukalin kare. Ene kaire kwian e amaña be age dagale cha ole me no, cha Chube Kirolla chiu kwian kare nga dba ai giti, agwa kwian e cha gai kwian ngwale kare, ama be cha gbe boi dagale tanre me no salengwli ama Elías gbu boi daga ngwale tanre me no kare. 13 Jesu gerudu ene kwian geru jwannga gdamai ole Elías giti, gire chku uñale amage Jesu kledu gerule Juan-Bautista giti, Juan-Bautista Elías kare. 14 Jesu ule kwian geru jwannga gdamai ole jo chke jwichuga gdoge dbani, gire ne ngwadi kwian na geru jwannga Jesuge ulita kaire kwian na tanre kledu Jesu manade ngwange. Gire kwian onbre gdaite kle kwian ngleske chku Jesudi, ama jongnagwa skutu dba Jesu gwangnagu chudaboi kade Jesuge, gerudu Jesu ole: 15 —Kwian chugagwalla, ba tai dage cha kirollage, dolla kle nga kagenga ama chuga giti, ama oga jabale dolla kote, diali ama kle skwetenga kle joge chke dba jitaske kaire kle joge chke dba chiske. Cha chiu cha kirolla dbe kwian geru jwannga banuge dodadale, agwa ama me ñadu dolla kage siere cha kirollage, malen cha chiu ba nate, ba tai dage cha kirollage, ba cha kirolla dodade. 17 Jesu kirogwa ñenua keruchugu gerule ene gire Jesu gerudu kwian ulita kle ne ngwadi ole: —Ba ulita me kle mo ta gbe cha gai ulia, ba ta me no. ¿Ngamangire ba be mo ta gbe cha gai ulia, ene Chube ñage kira kete bage age ulita cha kle age kare? ¿Ngamangire ba be kle kian gbe chage cha ba chudaboadale? Kirogwa du cháge aini. 18 Jesu gerudu ene kwian ulita ole gire kirogwa dule Jesuge, Jesu ka bo mno dolla ole: —¡Joga siere kirogwage! Jesu gerudu ene gire dolla jo siere kirogwage, sugeti kirogwa cheguni no trate. 19 Jesu dolla kagu siere kirogwage gire kwian geru jwannga Jesuge ulita chku Jesudi geru kadu Jesuge sugekare kwian nglea ulitage: —¿Mineade cha me ñadu dolla kage siere kirogwa ege? 20 Jesu jaindunga: —Ba me kle mo ta gbe cha gai ulia malen ba me ñadu. Cha gerule ulia ba ulita ole, ba mo ta gbe sidri alin cha gai ulia, gire bedre bedre cha be ba ta gbe cha gai ma ngle, e salengwli mostaza chudea soli tkakle kle tige kle joge kweri kare. Ba mo ta gbe cha gai ulia ene, gire ba ñage dolla kage siere kwiange cha kiralla giti. Ene kaire ba ñage lle na tanre boi cha kiralla giti, ba ñage gerule jwichuga ai ole: “¡Joga siere aini, joga nga nage!”, ba gerule ene gire jwichuga be joge nga nage ba gerudu kare. Ba cha gadale ulia mo tale, ene ba ñage lle ulita boi cha kirallaske. 21 Kwian jwligebanga dolla tirare kote kirogwa e kare, ba ta dolla e kare kagakalin siere kwiange ba mo ta gbadale mo tke bage bligdage gerule tanre Chube ole kira kade amage dolla kagagda siere kwiange, ene ba ñage. Ba me mo tke bage bligdage ni gerule Chube ole kira kade amage, ene ba me ñage dolla e kare kage siere kwiange —Jesu gerudu ene kwian geru jwannga amage ulita ole. 22 Jesu kledu chage nga Galileage ule kwian geru jwannga amage ulita ole, gire Jesu gerudu ama ole: —Chube cha kagu nga dba ai giti kwian kare, cha ketabe kwian agenga me no cha dollalege gwaleda, 23 ama be cha gweda, agwa chui mongikege cha jaba be chkeni gwadeni. Jesu gerudu ene gire kwian geru jwannga Jesuge nga chiu olire tanre ama ulitadi Jesu kle gerule giti. 24 Jesu kledu chage nga Galileage gire jo chke una Capernaumge, una ege kwian igi ganga u gerungwa Chube ole managda, kwian e jo chke Pedrodi geru kadu Pedroge: —¿Kwian ba tkanga tangle geruge kle igi kete u gerungwa Chube ole managda che ulita kle igi kete kare o me? 25 Pedro jaindunga: —Ima, ama kle igi kete kwian ulita kle age kare. Bigwa Pedro jo chke gwa uge Pedro bebi geru trage Jesu ole igi giti gire Jesu gerudu ama ole: —¿Ba tañachuge mine Simón-Pedro? ¿Chemage kwian nga gwealemu chugagwalla kle igi kade, kle igi kade mo kirogwallage o kwian na nga amañamuge? 26 Pedro jaindunga: —Kwian chugagwalla kle igi kade kwian na nga amañamuge me kle igi kade mo kirogwallage. Jesu gerudu: —Ima, ba gerudu ulia. Kwian chugagwalla me igi kade mo kirogwallage, malen ama kirogwalla me igi ketadale. Ene kaire cha Chube Kirolla malen cha me igi ketadale u gerungwa Chube ole managda, u e cha Ñenuanu. 27 Agwa cha me takalin kwian skochie kaire kwian tañachuge chadi cha me kle Chube gai dage malen suge chage ma no che igi kete kwian ulita kle igi kete kare. Joga chibitage ngwe jwen, ngwe ngerutabi be blire ba ole, ngwe e kate igi be skwen bage. Ba igi e kete che gdaboke giti kwian igi gangage u gerungwa Chuge ole manangage. Jesu gerudu ene ulita Pedro ole gire Pedro agedu ulita Jesu gerudu kare.
1 E suiale kwian geru jwannga Jesuge ulita chku Jesudi geru kadu Jesuge: —Chui be chke ba be gerule nga ulita giti kwian ulita Chugagwallale gire chui ege ¿cha ulitage bai be chege ma kweri Chube gwa giti? 2 Kwian geru jwannga geru kadu ene Jesuge gire Jesu kirogwa soli gdaite kledu ne ngwadi kadu mo gitigu, Jesu kirogwa e gbu kwian geru jwannga ulita gwa giti, 3 gire Jesu gerudu: —Cha gerule ulia ba ulita ole, ba me mo ta blite ta gbe tañachuge kirogwa soli ai kare cha gai ulia mo tale, ba me ñage kle ule cha ole cha chuiage cha be gerule nga ulita giti kwian ulita Chugagwallale gire. 4 Kwian bai kle Chube gai dage ulia, bai kle mo gbe suge soli daba na chudaboangale, kwian ene kle mo ta gbe tañachuge salengwli kirogwa soli ai tañachuge kare, kwian ene ma kweri Chube gwa giti. 5 Kwian bai kaire no cha ole ulia, kwian ene kle kirogwa ai kare gai ngwange no kle age no ama alin, kwian age ene me kle kirogwa alin allabi gai ngwange no, kaire ama kle cha gai ngwange no kle age no cha agali alin kare, kwian ene be ma kweri Chube ngwadi. 6 Jesu gerudu dare kwian geru jwannga amage ulita ole: —Cha gerule ulia ba ulita ole, kwian bai kaire age me no kwian chanu ole kwian cha gerua gaba ulia me sbali kwian na daba ene ta gbeni bliteni naskuni age gweale me no Chube dollale, ma no kwian daba gbanga age me no ene alin ke kweri lugaba mo siroge mlienga ble jereske age me no giti gdale kwian chanu ole, ene kwian e be jogekeda mi chege dare kwian chanu ta gbe age me no joge siere cha geruage. 7 Nga dba ai giti lle me no tanre kle diali kwian ulita takalin age, kwian bai age me no diali ama ta agekalin kare, kwian ene be boi daga ngwale age me no ene kbiale. Agwa kwian bai daba na gbe age me no, kwian e be boi daga ngwale ma tirare, ama be ji chuge daga ngwale tanre daba gbe age me no kbiale. 8 Malen ba ta agekalin gweale me no mo ko giti chage age gweale me no mo sera giti ba mo ta gbadale me tañachuge dare age me no ene kare mo ko e giti mo sera e giti, ba age me no ene talla chuge ngwadi, e salengwli ba mo ko tkenga kare mo sera tkenga kare, ene ba me age me no dare mo ko giti mo sera giti kare. Ma no ba alin joge ko bitale ole sera bitale ole toi Chube ole nga ngaña giti diali dale alin ba agedu no Chube takalin kare ñanale, agwa me no ba alin joge ko no gdabonate ole sera no gdabonate ole ji chuge tirare ngwadi boi daga ngwale jitaske ba agedu me no mo ko giti mo sera giti Chube dollale ñanale, jita ne ngwadi mi joge gwabada dale be chege diali gwade tirare kwian agenga me no gbagda boi daga ngwale diali chui tangle. 9 Kaire agwe ba gwage lle gwealedi mo gwagwa giti gire gwage edi giti ba ta agekalin gweale me no, ba me mo chuge ngwadi gwage lle edi dare ni tañachuge lle e giti dare, ma no ba mo linge siere lle ege. Ba agedale salengwli ba gwagwa gbaite jo jwanba siere mliabanga kare ene ba me ñage gwage lle me nodi ba takalin kare. Ma no ba alin joge gwagwa gbaitre alin ole toi Chube ole nga ngaña giti diali dale alin ba agedu no Chube takalin kare ñanale, agwa me no ba alin joge mliabanga gwagwa gbabonate no ole ji chuge tirare ngwadi boi daga ngwale jitaske ba agedu me no Chube dollale ñanale. Ba mo ta gbadale diali age no Chube takalin kare me tañachuge age me no giti dare, ma no lle ulita kle ba gbe age me no ba joge siere lle e karege. 10 Jesu gerudu: —Cha gerule ba ole, ba mo ta gbadale me daba na cha gerua gaba ibade, ba daba ene gweale ibade ba me kle age sugekare Chube gwage, me ene, diali lle boanga ulita cha Ñenua Chube alin nga ngaña giti kle cha Ñenua ole, cha Ñenua kle ama kage kwian cha gerua gaba manade. 11 Cha chiu nga dba ai giti kwian kare kwian agenga me no alin, cha chiu kwian ene chudaboi ta blite Chube ole, cha chiu ama jwen siere ji chugege age me no gdale. Kwian agenga me no kle chage sugekare Chubege salengwli bda oveja jogebanga kle chage sugekare mo mauñage kare. 12 ’Cha geru ñachuge ai kare bage: Kwian gdaite bda oveja ngle molen cien, bda oveja gdaite jogengwa kwian ngeru, ¿ba tañachuge mine? ¿Kwian oveja mauña be age mine? ¿Oveja mauña be ta jogenga oveja gdaite jogebanga giti be oveja chuge ngwadi jogenga? ¡Me dale! Ama be oveja na dare noventa y nueve jige litaba ole ngmadi nga oveja manangwage gire ama be joge oveja jogebanga gdaite jinade nate. 13 Cha gerule ulia ba ole, oveja soli be skwen amage gire nga be chie suga noare amadi oveja gdaite jogebanga giti ma no oveja na dare noventa y nueve me jogebangage. 14 Kwian oveja mauña me tadu oveja jogebanga chugakalin ngwadi, ene kaire ba ulita Ñenua Chube nga ngaña giti me takalin kwian gdaite cha gerua gaba joge siere cha geruage oveja jogebanga kare, malen ba mo ta gbadale me kwian Chubenu ibade ni ama ta gbe age me no —Jesu gerudu ene kwian geru jwannga amage ole. 15 Jesu gerudu dare: —Cha gerule ba ulita ole, daba Chubenu gweale age me no ba dollale, ba gerudale ama ole sugekare ama agedu me no giti. Daba Chubenu e ba gerua keruchuge chke uñale amage ama agedu me no gire ama mo ta blite no ba ole gerule ba ole: “Cha mi age dare me no ba dollale, cha agedu me no ba dollale ba talla mlienga.” Ama gerule ene gire chke uñale bage ba ñadu ama chudaboi tien gitiru ama agedu me no giti. 16 Agwa daba Chubenu e me ba gerua gbe gdadi me mo ta blite no ba ole, ba jogedale daba Chubenu na gdaite o gdaboke jwen dbe ule daba agedu me no ngwadi. Gire ba gerudale nakwaite ama ole daba bai ba du ule gwa giti, ene daba bai ba duge be chke uñale ba takalin daba Chubenu agedu me no chudaboi ba takalin toi no naskuni ama ole, daba bai ba du be chege ba ka chudaboanga. 17 Daba agedu me no ba ka chudaboanga keruchuge gire mo ta blite no ba ole, e no, ene daba e be chegeni no ba ole. Agwa daba agedu me no ni ba keruchuge ni ba ka chudaboanga keruchuge, gire ba daba e dbadale kwian Chubenu ulita kle mo lite ole ngwadi, ba daba e kaitadale kwian Chubenu ulita kle mo litaba olege gerule ulita daba e agedu me no ba dollale giti. Ba age ene, daba e ni kwian Chubenu ulita kle mo litaba ole keruchuge me mo ta blite no ba ole, gire ba ñage gerule ama ole: “Ba kwian agenga me no me Chube uñe kare.” Gire kwian Chubenu ulita gwa giti daba e be chege kwian agenga me no kwian me Chube uñe kare kaire kwian me Moisés nu Chube gerua degaba ganga ulia kare, ama jogedale siere ba kwian Chubenu ulitage, ba me ñage skate dare amage. 18 ’Cha gerule ulia ba kwian geru jwannga chage ole, ba ulita mo ta gbe ule geru gbe salengwli daba alin daba agedu me no gdale, ba geru trage modi daba e giti kaire ba chudaboi kade Chubege gire be suge ba ulitage ba geru gbadale mine daba e alin ba ji gbadale daba alin ama agedu me no gdale o ba talla e mliadalenga. Ba ulita mo ta gbe salengwli geru gbe ene daba alin nga dba ai giti, ene kaire geru be joge gbaba nga ngaña giti Chube kle ngwadi. 19 Kaire cha gerule ba ulita ole, ba gdabokle alin allabi mo ta gbe ule tañachuge salengwli daba gweale giti, ba gdabonate gerule ule ama giti Chube ole, ba chudaboi kade Chubege, Chube be ta kete bage ba agedale mine daba alin. 20 Ulia baini kaire kwian cha gerua gaba mo lite ole gdaboke o gdamai cha kalla giti, ne ngwadi cha be kle amaske cha ama keruchuge cha ama chudaboi. 21 Jesu gerudu ene kwian geru jwannga amage ulita ole gire Pedro geru kadu Jesuge: —Cha Chugagwalla, daba gweale age me no cha dollale me bitaitre alin agwa bitangle bitaguke, ¿cha ama age me no talla mlialenga kaire bitaguke o me? ¿Bitamangire daba amaña age me no cha dollale cha talla mlialenga? 22 Jesu jaindunga Pedro kalen: —Cha gerule ba ole, me bitagukle alin ba ama agedu me no talla mlialenga, agwa ba mo ta gbale ama agedu me no talla mlienga diali bitangle ngle, ba me ñage tañachuge ama agedu me no talla mliadalenga bedre alin. 23 Bitangle diali Chube kle ba age me no ama dollale talla mlienga malen ba kaire mo ta gbadale daba age me no ba dollale talla mlienga Chube kle age ba alin kare, e salengwli ai kare: Kwian chugagwalla gdaite lle boanga tanre molen mo alin, lle boanga e ulita jiske igi giti mo chugagwallage. Chui chku gire chugagwalla e tadu igi kadakalin naskuni kwian lle boanga ama alin ulitage lle boanga gdaite gdaite jiske batre. 24 Kwian chugagwalla kledu tañachuge kwian lle boanga ama alin ulita gdaite gdaite jiske mangire amage, gire kwian lle boanga ama alin gdaite dbajo kaitadale chugagwalla ngwadi, lle boanga e jiske ngleare igi e diez mil. 25 Kwian lle boanga e me igi molen ketadaleni mo chugagwallage gire ama chugagwalla mo ta gbu ama chbade kwian nage kaire ama muira ama kirogwalla ulita chbade. Chugagwalla tadu agekalin ene gire ama ñage igi jwen nate naskuni kwian lle boanga e jiske amage batre. 26 Chugagwalla tadu agekalin ene gire kwian lle boanga e jongnagwa skutu dba ama chugagwalla ngnagu gerudu: “Cha chugagwalla, ba manade sugeti kaire ba tai dage chage, cha ole igi me, igi be skwen chage gire cha be igi ulita keteni naskuni ulita bage cha jiske batre.” 27 Kwian lle boanga e gerudu ene mo chugagwalla ole gire chugagwalla taidu dage kwian lle boanga amanuge, ama gerudu lle boanga e ole: “Ba me igi ketadaleni chage, cha mi ba chbade dale, ba me jiske chage dare, cha be ba jiske talla mlienga ulita.” Chugagwalla gerudu ene gire chugagwalla lle boanga e chugu ngwadi ngwedi ngeru kare. 28 Chugagwalla kwian lle boanga mo alin e jiske talla mliunga ene, gire kwian lle boanga e jo siere ne ngwadi tendu ama skatemanalla gdaite jiske sidri amage ngwange. Ama mo skatemanalla gau siroge siro kwetunga nga kagunga skatemanalla giti gire ama gerudu skatemanalla ole: “¡Ba jiske chage igi e ba ketadaleni chage blikare!” 29 Kwian lle boanga gerudu ene mo skatemanalla ole gire ama skatemanalla jongnagwa skutu dba ama gwa giti, ama skatemanalla gerudu ama ole: “Igi me cha ole, ba manade sugeti kaire ba tai dage chage, igi be skwen chage gire cha be igi ulita keteni naskuni bage cha jiske batre.” 30 Kwian lle boanga skatemanalla gerudu ene ama ole agwa lle boanga e me taidu dage mo skatemanallage, ama mo skatemanalla kaitu tkadale skage, ama skatemanalla igi keteni ulita amage gire ñage skachienga. 31 Kwian lle boanga na ulita gwagedu kwian lle boanga gdaite edi daba na tke skage igi gerua giti gire kwian lle boanga e ulita jo geru kete chugagwallage boidu giti. 32 Chugagwalla geru e keruchugu gire ama kwian lle boanga daba tkanga skage kadu mo ullage gerudu ama ole: “Ba kwian agenga me no me no. Ba jiske tanre chage, cha igi kaduni bage ba gerudu cha taidale dage bage gire cha agedu ba gerudu kare, ba me chegu jiske chage, cha ba jiske ulita talla mliunga. 33 ¿Gire mineade ba me taidu dage ba skatemanallage cha taidu dage bage kare? ¿Mineade ba me agedu no ba skatemanalla ole cha agedu no ba ole kare? Ulia ba agedu me no me no.” 34 Chugagwalla ka bo ene kwian lle boanga ole, ama skochiu tanre kwian lle boanga edi gire chugagwalla kwian lle boanga e kaitu dbadale skage ji chugadale, ama chegedale skage, ama igi ulita ketale naskuni ama chugagwallage ama jiske batre gire ama ñage chienga skage. 35 Jesu geru ñachugu ene kwian geru jwannga ulita ole gire gerudu dare: —Chugagwalla agedu kwian lle boanga ole kare, ene kaire cha Ñenua Chube be age ba ulita ole ba bai me daba agedu me no talla mlienga mo tale trate.
1 Jesu gerudu ene ulita kwian geru jwannga amage ulita ole gire ama ulita jo siere nga Galileage jo nga Judeage jo chke chi Jordán kagda giti ongoru. 2 Ne ngwadi kwian tanre chagedu Jesu nate gire Jesu kwian tanre oga dodadu. 3 Kwian fariseo gweale chku Jesudi mo chuge Jesu ole, ama ulita takalin Jesu gerule gweale me no Moisés chadalla dollale, ene ama ñage Jesu gbe jiske e gdale, ta ene ole kwian fariseo ulita geru kadu Jesuge: —Cha geru kade bage, ¿kwian onbre mo jwanba ñage mo muiralla chuge ngwadi muinga age gweale gdale? ¿Age ene e skwen no Chube gwa giti o skwen me no Chube gwa giti? 4 Jesu jaindunga: —¿Ba me Moisés nu Chube gerua degaba unsuialin batabanga? Chada e gerule: “Gwange jondege alin Chube nga ulita lle ulita dodadu, Chube kwian onbre dodadu kwian muire dodadu.” 5 Kaire chada e amaña gerule: “Chube kwian dodadu ene onbre, muire, malen kwian onbre mo jwankalin muinga ole ama mo ñenua mo chebia chugadale ngwadi mo ta gbe ule muinga ole gire ene ama gdabonate chege kwian gdaitre alin kare ta salengwli ole.” Moisés Chube gerua degu ene. 6 Nege cha gerule ba ulita ole, kwian mo jwanba me chege kwian gdaboke kare agwa Chube gwa giti ama boke chege kwian gdaitre alin kare onbre muinga ole muinga onbre ole, ama boke ta chegedale ule salengwli. Ulia me no kwian onbre mo gbe sugekare mo muirallage, Chube muinga ketu onbrege, Chube onbre ketu muingage, Chube kwian gbu mo jwen ene, malen onbrenu muirenu me ñage age ama takalin kare joge siere muingage o muinga joge siere onbrege, e me no Chube gwa giti. 7 Jesu gerudu ene gire kwian fariseo gerudu Jesu ole dare: —Agwa kaire Moisés nu Chube gerua degaba unsuialin gerule onbre mo muiralla chugakalin ngwadi, onbre e chada degadale kete mo muirallage, chada e gerule muinga e me amanu dare, onbre age ene gire onbre ñage mo muiralla chuge ngwadi. E ulia ba kle gerule kare, gire ¿mineade Moisés chada degu ene? 8 Jesu jaindunga: —Ulia gwange jondege alin Chube kwian onbre dodadu kwian muire dodadu mo jwanle toi no ule diali, agwa ba ulita ta mnoare ba me Chube gerua gbakalin gdadi no age Chube takalin kare, ba ulita agekalin mau tale ba takalin kare, malen Chube Moisés ta gbu chada dege ene kwian ulita alin. 9 Cha gerule ba ole, muinga mo jwanba me kle chage onbre na ole ke giti agwa kle toi no mo ñengulalla alin allabi ole, gire muinga e ñengulalla ama chuge ngwadi mo jwen muinga na ole, onbre e kle age me no Chube gwa giti, Chube gwage e salengwli onbre e kle mo chuge ke giti muinga e ole kare. 10 Jesu gerudu ene ulita kwian fariseo ole gire kwian geru jwannga Jesuge gerudu Jesu ole: —E ene ulia ba kle gerule kare onbre toidale no ule diali mo muiralla ole me ñage mo muiralla chuge ngwadi, ma no kwian onbre chege gballa me mo jwen muinga ole. 11 Jesu jaindunga: —Ulia mnoare kwian onbre alin mo ta gbe toi no ule diali mo muiralla ole me mo muiralla chuge ngwadi, agwa kaire mnoare onbre alin chege gballa diali me mo jwen muinga ole, agwa Chube onbre gweale ta gbe chege toi gballa me mo jwen muinga ole. 12 Kwian onbre gweale menga chebia kote me ñage toi muinga ole me ñage kirogwa molen muinga giti, malen onbre ene kle chege gballa me mo jwen. Kwian onbre gweale ole kwian na me no kle age gweale gire ene onbre e me ñage kirogwa molen muinga giti, malen onbre ene kle chege gballa me mo jwen. Kwian onbre gweale ta lle boakalin Chube alin allabi, malen onbre ene kle mo ta gbe toi gballa me mo jwen, onbre bai kaire ta chegekalin toi ene lle boi Chube alin Chube gerua kete kwian nage, noare ama alin mo ta gbe kiraske me mo jwen chege toi gballa diali lle boi Chube alin —Jesu gerudu ene ulita kwian geru jwannga amage ole. 13 Kirogwa ñenua kirogwa chebia tanre chiu mo kirogwalla soli dbe Jesu kle ngwadi, kirogwa ñenua, chebia takalin Jesu ko gbe kirogwa soli e giti gerule Chube ole Chube age no kirogwa alin Chube kirogwa manade no. Kwian geru jwannga Jesuge ulita gwagedu kwian tanre edi chie kirogwa dbe Jesu kle ngwadi gire ama ka bo kirogwa ñenua ole chebia ole: —¿Lledale ba kle chie kirogwa dbe Jesuge? ¡Joga, joga siere, ba me chie kirogwa dbe Jesuge! 14 Kwian geru jwannga ka bo ene kirogwa dbanga ulita ole gire Jesu gerudu kwian geru jwannga ole: —Me no ka boi ene kirogwa ñenua ole chebia ole, ba ama ulita chugene chie mo kirogwalla dbe chage. Kirogwa soli ta kle biale Chube gerua gai blike, kirogwa talla ene kare Chube takalinge, kwian ulita bai kaire mo ta gbe ulia Chube ole kirogwa talla ene kare ole, kwian ene chege Chubenu, ama be toi diali chui tangle Chube ole. 15 Jesu gerudu ene kwian geru jwannga ole gire kirogwa ñenua, chebia ulita chiu mo kirogwalla dbe Jesuge, Jesu ko gbu kirogwa ulita gdaite gdaite giti, Jesu gerudu Chube ole Chube age no kirogwa alin kirogwa manade no. Jesu agedu ene kirogwa ulita dbachiu amage alin, gire Jesu jo siere nga ege. 16 Kwian onbre gdaite chku tienda Jesudi geru gweale kade Jesuge, ama gerudu Jesu ole: —Ba kwian tkanga tangle geruge, cha takalin ba geru kete chage, ¿cha llema no boadale nga dba ai giti gire ene cha ñage toi no diali chui tangle Chube ole nga ngaña giti? 17 Jesu jaindunga onbre e kalen: —¿Mineade ba kle geru kade chage lle no boi giti? Kwian ulita nga dba ai giti ni gdaite agenga no agwa gdaitre alin agenga no kle, e Chube. Cha gerule ba ole, ba ta toikalin no diali chui tangle Chube ole, ba mo ta gbale Chube gerua unsuialin Chube ketu Moisége gbe gdadi geru e gai dage. 18 Jesu gerudu ene gire kwian onbre e geru kadu Jesuge: —Chube geru ketu Moisége, Moisés geru e ulita degu, ¿geru e bai cha gadale dage? Jesu gerudu: —Chube geru ketu Moisége kwian toidale mine Chube gwa giti, Moisés Chube gerua e degu unsuialin, chada e gerule: “Ba me daba gweda. Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole. Ba me skwe boi daba ngeru. Ba me geru jinade ngwale daba na dollale. 19 Ba mo ñenua mo chebia gadale dage. Kaire agwe ba mo ta dbadale no daba na ulita ole salengwli ba kle mo ta dbe no mo ole kare.” Ba agedale ene geru ai kle gerule kare ene ba toi no diali chui tangle Chube ole. 20 Kwian onbre gerudu Jesu kalen: —Geru e ulita cha nu gaba dage, cha kle toi geru e ulita kle gerule kare. ¿Llema dare cha me kle age cha me kle gai dage? ¿Llema dare kle cháge boadale? 21 Jesu jaindunga: —Ba takalin chege no trate Chube gwa giti, ba jogedale lle banu ulita chbade, igi ulita lle e ñana ba kete kwian me lle molenge. Ba age ene ulita gire ba chieni cha kle ngwadi ba mo ta gbe chage cha ole diali geru jwen chage. Gire ene ba be kle biale joge toi diali chui tangle Chube ole nga ngaña giti, Chube be age no ba alin ba age no ñanale. 22 Kwian onbre Jesu keruchugu gerule ene gire ama joni ta olire tanre ole, onbre e lle molen tanre, malen ama me ta lle ulita chbadakalin Jesu gerudu kare ama ole. 23 Kwian e joni gire Jesu gerudu kwian geru jwannga ulita ole: —Cha gerule ulia ba ulita ole, mnoare kwian lle molen tanre alin Chube gerua gai ulia mo ta gbe age ulita Chube takalin kare. Agwa kwian me age ene kwian me ñage toi diali chui tangle Chube ole nga ngaña giti. 24 Cha gerule nakwaite ba ole kwian lle molen tanre giti, kwian lle molen tanre alin mnoare Chube gerua gai ulia age Chube takalin kare, kwian ene kle mo ta dbe no no mo llea tanre ulita ole malen mnoare ama alin mo ta gbe mo llea chuge ngwadi Chube gerua gai ulia mo alin age Chube takalin kare, mnoare kwian ene alin mo ta dbe ma no Chube ole ama kle mo ta dbe no mo llea olege, kwian ene me ñage mo ta gbe age Chube takalin kare salengwli bda kweri kadakle camello me ñage joge tangle agu kwebege kare. 25 Kwian geru jwannga Jesuge Jesu keruchugu gerule ene gire ama ulita chegu tañachuge tanre ma ngle geru e giti, ama geru kadu Jesuge: —E ene ulia mnoare age Chube takalin kare ba kle gerule kare, gire ¿chema ñage age ulita Chube takalin kare, ene toi no diali chui tangle Chube ole nga ngaña giti? 26 Jesu gwagedu ama ulitadige, Jesu gerudu: —Kwian agali gballa me ñage age ulita Chube takalin kare me ñage age mau alin agali toi diali chui tangle Chube ole. Agwa Chube alin allabi ñage kwian kira gbe age ulita Chube takalin kare ñage kwian gbe toi diali chui tangle ama ole. Chube alin allabi ñage age ulita, lle ulita me mno ama alin boadale. 27 Gire Pedro gerudu Jesu ole: —Cha ulita geru jwannga bage kle chage ba ole diali geru jwen bage, cha ulita mo llea ulita nga dba ai giti chugu ngwadi gire cha ulita mo ta gbu chage diali ba ole baini kaire ba kle joge ngwadi. Cha ulita agedu ulita ba gerudu kare onbre lle molen tanre ole, ¿cha ulita be llema gai bdagli mo ta gbe chage no ene ba ole ñanale? 28 Jesu jaindunga: —Chui bdagli Chube be lle ulita nga ngaña giti nga dba ai giti dodadeni nakwaite jagere, gire ne suiale Chube be cha gbe gerule nga ulita giti kwian ulita Chugagwallale, chui ege Chube gwa giti cha be gerule kwian nga ulitamu giti bai jiske Chube gwage bai me jiske Chube gwage. Ene kaire chui ege ba ulita geru jwannga chage kle chage diali cha ole nga dba ai giti, ba ulita be chege daba chugagwallale ule cha ole gerule kwian ulita giti, chui ege cha be ba ulita gbe ba bitalla ulita israelita mne gdataboko giti gdaboke chugagwallale gerunga kwian e ulita giti bai jiske bai me jiske Chube gwage. 29 Kaire cha gerule ba ole, kwian ulita bai kaire mo ta dbe ma no cha ole kwian kle mo ta dbe no mo bitalla ulita olege mo llea ulita olege, kwian ene ta kle biale mo llea chuge ngwadi kaire mo bitalla chuge ngwadi cha gerua dbe gdale. Kwian u chuge ngwadi, kwian dbi chuge ngwadi, kwian mo daballa chuge ngwadi, kwian mo ñenua chuge ngwadi, kwian mo chebia chuge ngwadi, kwian mo kirogwalla chuge ngwadi, kwian bai mo ta gbe lle gweale o bitalla gweale chuge ngwadi ene cha gerua dbe kwian nage gdale, kwian ege Chube be lle ma no ma ngle kwian e nu lle chugaba ngwadige kete amage nga dba ai giti kwian ene age cha takalin kare ñanale, kaire bdagli kwian ene be toi no diali chui tangle nga ngaña giti Chube ole. 30 Cha gerule ba ulita ole, nege nga dba ai giti kwian gweale kle suge moge ma kweri daba nage, chui bdaglige kwian ene be ma soli Chube gwa giti Chube ngwadi. Agwa nege nga dba ai giti kwian gweale suge moge ma soli daba nage, chui bdaglige kwian ene be ma kweri Chube gwa giti Chube ngwadi —Jesu gerudu ene ulita kwian geru jwannga amage ole.
1 Jesu gerudu dare kwian geru jwannga ole: —Cha gerule ba ole, kwian ulita salengwli Chube gwa giti, kwian bai age Chube takalin kare Chube be age no salengwli kwian ene ulita alin. Chube chuia be chke gire Chube be gerule nga ulita giti kwian Chugagwallale, chui ege Chube be age no kwian ulita alin bai kaire lle bo no ama alin ama takalin kare, e salengwli dbi mauña igi kete kwian lle boanga ama alinge kare. Cha geru ñachuge ba ulitage e giti: Chui gbaitege ngabebitabi kwian dbi mauña mo ta gbu joge kwian ngle jinade lle boangale mo alin deage. 2 Kwian gweale skwendu amage ama gerudu kwian e ulita ole lle boi giti ama alin, ama gerudu: “Cha be igi kete bage lle boi ñanale mangire batre kwian ulita kle gai kare lle boi chui gbaitege.” Kwian lle boanga jaindunga kwian dbi mauña kalen: “Nobi, cha be lle boi ba alin ba takalin kare.” Gire kwian dbi mauña kwian lle boanga kagu lle boi deage, kwian dbi mauña joni gudegu. 3 Chui e amañage chui jo bate ngaña gire dbi mauña joni nakwaite naskuni kwian na jinade lle boi ama alin, ama tendu kwian ngwange jonke kwian e ulita kledu ngwale, 4 gire ama gerudu kwian e ole: “Ba kle ngwale, noare ba ulita joge lle boi cha ngwadi deage, cha be igi kete no bage ba lle boi ñanale.” Dbi mauña gerudu ene kwian ole gire kwian e ulita jo lle boi kwian dbi mauña alin, kwian dbi mauña jo naskuni gudegu ama toi ngwadige. 5 Chui bduke gire kwian dbi mauña joni nakwaite kwian na dare jinade lle boi mo alin, kwian gweale na kle ngwale skwendu amage gire ama kwian e ulita kadu lle boi mo alin deage. Chui jwlite ongoru dbige gire dbi mauña jo nakwaite kwian na jinade, kwian na skwendu amage, ama kwian e ulita kadu lle boi mo alin. 6 Ngabi gire dbi mauña joni nakwaite tendu kwian na kle ngwale ngwange jonke gire geru kadu kwian e ulitage: “¿Mineade ba ulita kle aini chui ai ulita kagenga ngwale? ¿Lle me boadale ba alin?” 7 Gire kwian e ulita jaindunga: “Kwian me cha kadu lle boi mo alin malen cha kle aini ngwale.” Gire kwian dbi mauña gerudu: “Ba ulita jogedale lle boi cha alin cha ngwadi deage.” Kwian dbi mauña gerudu ene gire kwian e ulita jo lle boi dbi mauña alin deage. 8 ’Nga jeredu gire kwian dbi mauña gerudu kwian ulita lle boanga deage chugagwalla ole: “Ba kwian ulita lle bo cha alin chui gbaite aige kade ba igi ketadale ama ulitage ama lle bo ñanale. Kwian chku bdagli lle boi ngabi ngnagu, amage ba igi ketadale ngeru, gire kwian chku ngeruge ba igi ketadale bdagli.” 9 Kwian dbi mauña gerudu ene gire kwian lle boanga chugagwalla kwian kadu igi ketadale ama ulitage ama lle boi ñanale, kwian e ulita chku amadige. Kwian lle bo ngabi ngnagu, ama chku ngeru igi gai, kwian e igi gau ko ñanale ama lle bo chui gbaite ulita kare. 10 Kwian lle boanga ngeruge chku uñale igi ketre ngle kwian chku ngabi ngnaguge, malen ama tañachugu igi ketabe ma ngle amage ama lle bo chui ulita ñanale. Kwian lle boanga nage igi ketre ulita, gire kwian ulita bai lle bo chui ulita chiu igi gai, ama ulita tañachugu igi gai ma ngle, agwa dbi mauña igi ketangu amage salengwli igi ketre kwian lle boanga na ulitage kare. 11 Kwian lle boanga e ulita lle bo chui ulita agwa ama igi gau lle boi ñanale salengwli batre kwian lle bo chui bonga alin kare, e giti lle boanga ulita bai lle bo chui ulita ta skochiu tanre dbi mauñadi, lle boanga e igi gau gire ama ulita daba gdaitre alin gau gbu gerule kwian dbi mauña ole ama ulita giti, daba e ka bo mo gdale dbi mauña ole: “¿Mineade kwian chku ma bdagli cha ulitage lle boi deage sidri mebi hora gdaitre alin allabi gire ba igi ketu batreti ba kle kete chage kare? ¿Mineade cha ulita lle bo ngabebita nga joge jere chui juteske gire ba igi ketu chage batreti ba igi ketu amage kare? ¿Mineade ba kle age ene?” 13 Kwian dbi mauña gerudu kwian lle boanga e ole: “Cha skatemanalla, cha me kle skwe boi ba ngeru ba kle tañachuge kare. ¿Bage me chke uñale cha gerudu ba ole cha be igi kete e batre bage ba lle boi ñanale? Gire ba jaindunga: ‘Ima.’ Malen cha kle igi kete bage cha igi geruadu batre ba ole. 14 Igi e ulita cha igia, cha ñage mo igia kete kwiange cha takalin kare. Cha kle mo ta dbe no kwian ulita ole, malen cha tale cha igi ketangu kwian chku bdaglige cha igi ketangu bage batre kare. ¿Ba kle mo ta dbe semale daba ole cha kle age no ama alin gdale? Ma no ba igi gai ta suga no ole cha igi ketangu bage batre kare gire jogani gudegu.” Kwian dbi mauña gerudu ene kwian lle boanga e ulita ole. 16 Jesu geru ñachugu ene kwian geru jwannga ole gire gerudu dare ama ulita ole: —Cha gerule ba ole, ene kare chui bdaglige Chube be age kwian ole. Nege nga dba ai giti kwian gweale kle suge moge ma kweri daba nage, chui bdaglige kwian ene be ma soli Chube gwa giti Chube ngwadi. Agwa nege nga dba ai giti kwian gweale suge moge ma soli daba nage, chui bdaglige kwian ene be ma kweri Chube gwa giti Chube ngwadi —Jesu gerudu ene ulita kwian geru jwannga amage ole. 17 Jesu jo chage kwian tanre ole jon Jerusalén ngnagu giti gire Jesu kwian geru jwannga amage kwian gdataboko giti gdaboke kadu sugekare kwian ngleage gerule ama ole Jesu be boi giti ulita, jonkare Jesu gerudu ama ulita ole: 18 —Bage uñale che ulita kle joge una Jerusalénge, una ege kwian be age cha dollale, cha ketabe boalenga ngwale kwian gerunga Chube ole daba alin chugagwalla ulitage kaire kwian daba tkanga tangle Moisés chadalla gitige, kwian e ulita me kle cha gerua gai ulia Chube cha kagu nga dba ai giti kwian kare malen ama be gerule cha jogedaleda cha jiske kweri Chube gwa giti kbiale, ama ulita be cha kete kwian me israelitage gwaleda. Kwian me israelita be kidere tanre chadige, be cha bate tanre obere giska giti, be cha gbe boi daga ngwale tanre ene gire bdagli be cha gweda kruge. Cha gwabeda agwa chui mongikege cha be chkeni gwadeni —Jesu gerudu ene ulita kwian geru jwannga amage gdataboko giti gdaboke ole. 20 Zebedeo muira ule mo kirolla boke Santiago ole Juan ole jo chke Jesudige gire muinga e jongnagwa skutu dba Jesu gwangnagu gerudale Jesu ole mo kirolla boke giti. 21 Jesu geru kadu muingage: —¿Ba takalin cha age mine ba alin? Muinga gerudu Jesu ole: —Ba chuia be chke gire ba be chege kwian ulita Chugagwalla ma kweri, chui ege cha takalin ba cha kirolla boke ai gbe kweri ule ba ole daba chugagwallale, noare ba cha kirolla ai gdaite gbe toi dba ba ko taingwli giti gdaite gbe toi dba ba ko jole giti, cha takalin ba age no ene cha kirolla boke ai alin. 22 Jesu jaindunga: —Bage me suge ba kle llema kade chage. ¿Ba tañachuge ba kirolla gdaboke ñage mo kete boange daga ngwale cha be boi daga ngwale kare? Gire Santiago kaire Juan gerudu Jesu ole: —Ima, cha ñage mo kete boange daga ngwale ba gerua gdale ba be boi daga ngwale kare. 23 Jesu gerudu: —Ulia ba be boi daga ngwale cha kare cha gerua gdale, agwa cha me ñage gerule ba ole cha chuia be chke gire ba gdaite be chege toiba dba cha ko taingwli giti gdaite cha ko jole giti daba chugagwallale ma kweri daba na ulitage. Cha me ñage gerule ene, agwa cha e jige Chube kote, Chube alin allabi ñage kwian gbe kweri daba chugagwallale toi dba cha ko taingwli giti cha ko jole giti chui bdaglige —Jesu gerudu ene Santiago ole Juan ole. 24 Kwian geru jwannga Jesuge na ulita gdataboko geru e keruchugu gire ama ulita skochiu tanre daba gdabokedi ama boke gerudu Jesu ole gdale. 25 Jesu kwian geru jwannga amage ulita kadu mo gitigu gire Jesu gerudu ama ulita ole: —Bage uñale nga ulitage nga dba ai giti kwian chugagwalla ulita kle kwian ulita kage age chugagwalla takalin kare, kwian agedale ulita chugagwalla kle gerule kare, kwian chugagwalla kle kwian kage age chugagwalla takalin kare, ene chugagwalla suge moge kweri. 26 Agwa ba ulita me ñage tañachuge kwian chugagwalla nga dba ai giti ulita kle tañachuge kare, ba tañachugadale nganake, ba me mo ta gbe daba kage age ba takalin kare, agwa ba mo ta gbale diali age no daba na ulita alin daba chudaboi ta no giti, ba age ene gire Chube gwa giti ba chege kweri daba chugagwallale. 28 Ba ulita tañachugadale cha kle tañachuge kare, cha chiu nga dba ai giti kwian kare, cha me chiu kwian kagangale age no cha alin cha chudaboi, agwa cha chiu kwian ulita chudaboangale, cha chiu age no kwian alin kwian chudaboi, kaire cha chiu mo ketale gwaleda kwian ulita alin, ene cha jogeda giti cha kwian jwen siere ji chugege ama agedu me no gdale —Jesu gerudu ene ulita kwian geru jwannga amage ole. 29 Jesu kledu una Jericóge Jesu jo dare chage una Jerusalén ngnagu ule kwian geru jwannga amage ulita ole, kaire kwian na tanre chagedu Jesu ole Jesu gatedi. 30 Kwian gdaboke gwagwa me, ama kledu toiba dba jonke, ama ologe gerudre Jesu kle joge tangle gire ama boke ngautu Jesuge: —¡Ba kwian chugagwalla kweri unsuialin David oindalla, ba tai dage chage! 31 Kwian boke ngautu ene Jesuge gire kwian nglea kledu ne ngwadi ka bo kwian gwagwa me ole: —¡Me ngaute, chegede kamne! Kwian nglea ka bo ene agwa kwian gdaboke gwagwa me ama me talladu, ama mo ta gbu ngaute gwangerugu ma ngle Jesuge: —¡Cha ba gai kweri, ba kwian chugagwalla kweri unsuialin David oindalla, ba tai dage chage! 32 Jesu kwian boke e keruchugu gire Jesu me chagedu dare, Jesu chegu jagenga gdate jonke, Jesu kwian gwagwa me kadu mo gitigu gire geru kadu kwian gwagwa mege: —¿Ba takalin cha llema boi ba alin ba chudaboagda? 33 Kwian gwagwa me jaindunga: —Cha takalin ba cha gwagwa dodade ba cha gbe ten. 34 Jesu taidu dage tanre ama bokege, Jesu ko chugu ama gwagwadi gire sugetibi allabi ama gwagwa jo chkeni ama gwagwa chra chku ñadu ten no trate. Jesu kwian gwagwa dodadu ene gire kwian e boke jo chage Jesu nate Jesu gatedi.
1 Jesu jo chage dare una Jerusalén ngnagu jo chke kodi una Jerusalénge ule kwian geru jwannga amage gdataboko giti gdaboke ole, una soli kada Betfagége chege kodi kodi una Jerusalénge Ngwiskinro Jwichugalla gdoge dba. Ama ulita jo chke ne ngwadi, gire Jesu kwian geru jwannga amage gdaboke kagu mo ngeru, 2 Jesu gerudu ama boke ole: —Joga gdabonate cha ngeru una soli kle ngeruge, ba be joge chke una soli ege burro chebia ule soli ole be skwen bage ba ngwange lugabada glige, ba ama skatrennga, ba chie ama gdaboke dbe chage. 3 Kwian gweale geru kade bage lledale ba kle burro e skatrennga, ba gerule kwian e ole: “Cha Chugagwalla takalin burro aige, me sbali cha Chugagwalla be burro ai gdaboke kageni naskuni aini.” 4 Jesu kwian geru jwannga amage gdaboke kagu ene burro jwen ama alin chagedale giti una Jerusalénge, ene ai ulita boidu Jesu ole kwian Chube gerua ketanga unsuialin Chube gerua degu kare, chada e gerule: “Ba gerule kwian una Siónmu ole (una amaña kada Jerusalén), ba gerule kwian e ulita ole: ‘Gwagede ba Chugagwalla kweridi chie ba ulitaske. Ama me kle mo ta gbe chie ba ulitaske kwian chugagwalla kweri nga dba ai giti kle mo ta gbe kare, ama kle chie chage burro soli giti, burro chebia teru alin dbanga, ama solia giti ba Chugagwalla kweri kle chie chage ba ulitaske.’ ” Chube gerua degaba unsuialin gerule ene Jesu giti. 6 Kwian geru jwannga Jesuge gdaboke jo agedu ulita Jesu ama kagu age kare. 7 Ama chiu burro chebia dbe ule burro soli ole Jesu kle ngwadi, ama mo ñometralla gitiru gbu burro soli trigda giti Jesu alin, gire Jesu skwendu burro soli giti, gire Jesu jo chage dare una Jerusalén ngnagu burro soli giti. 8 Kwian tanre kledu Jesu ngwange jon jegwale, kwian e ngle mo ñometralla gitiru treun dba jonkare Jesu gai ngwange no mo Chugagwallale kweri, kwian gweale na ugananga tkunga gbu jonkare, e giti burro soli chagedu Jesu gwaru. 9 Kwian tanre chagedu Jesu gwangerudba kaire Jesu natedba, kwian e ulita kledu ngaute nga suga no ole Jesu giti: —¡Nga suga noare chadi ba giti! Noare ba chiu cha ulita Chugagwallale, suge chage ulia ba che chugagwalla kweri unsuialin David oindalla. Noare Chube ba kagu nga dba ai giti cha ulita alin. Chube kle nga ngaña giti, ama noare ama kweri, ama kle age no tanre cha ulita alin ba giti —kwian tanre ngautu ene jonkare Jesu gai ngwange no Jesu gai mo Chugagwallale kweri. 10 Jesu jo chke una Jerusalénge ule kwian ngle kle ngaute ole gire kwian ulita toinga una ege chegu tañachuge tanre kledu boi giti, me sugedu amage kle boi mine, ama ulita me chegu ngwedi ama chagedu geru kade tanre moge ongoru ongoru Jesu giti: —¿Kwian e mine? ¿E chema? 11 Kwian nglea kle chage Jesu ole kwian toinga una Jerusalénge keruchugu geru kade ene moge gire ama jaindunga: —E Jesu kle chage, ama kwian toinga una Nazarege nga kweri Galileage, ama Chube gerua ketanga. 12 Una Jerusalénge Jesu jo u gerungwa Chube olege, u ege kwian tanre skwendu Jesuge lle chbade kaire lle gige, kaire kwian kledu igi blite daba na ole u ege. Jesu gwagedu kwian ulitadi age ene ulita gire Jesu ama ulita kagu siere, Jesu mesa igi blitangwa blitunga ulita kaire Jesu glidrega beusi chbadanga toingwalla chbadangwa blitunga ulita, ene kwian me ñage lle chbade dare eni. 13 Jesu agedu ene, gire Jesu ka bo kwian e ulita ole: —Uñale ba ulitage Chube gerua degaba unsuialin gerule u ai giti, chada e gerule: “Chube gerudu: ‘U ai chanu chegedale u gerungwa cha ole alin allabi.’ ” Chube gerua degaba unsuialin gerule ene agwa ba ulita kle u ai gai mo alin, ba kwian skwere, ba kle lle chbade dabage kwangleare, ene ba igi gai ngle mo alin, Chube gwage e me no, e salengwli ba kle u Chubenu gai mo alin skwe boanga daba na ngeru kare —Jesu gerudu ene ulita kwian ole. 14 Jesu kledu u gerungwa Chube olege gire kwian tanre gwagwa me kaire kwian tanre sera kwebanga jo chke Jesudige u ege, Jesu kwian oga ene ulita dodadu. 15 Kwian gerunga Chube ole daba alin chugagwalla tanre kaire kwian daba tkanga tangle Moisés chadalla giti tanre kledu eni, ama ulita gwagedu Jesudi kwian oga ulita dodade ene, kaire ama ulita kirogwa soli tanre keruchugu ngaute no Jesu giti u gerungwa Chube olege, kirogwa e ulita kledu gerule: “¡Nga suga noare chadi ba giti che chugagwalla unsuialin David oindalla chiu nege, ba cha Chugagwalla!” Kirogwa soli ngautu no ene Jesu giti gire kwian gerunga Chube ole chugagwalla ulita kaire kwian daba tkanga tangle Moisés chadalla giti ulita skochiu Jesudige, 16 ta skochie ole ama gerudu Jesuge: —¿Geru suge bage kirogwa e ulita kle gerule mine ba giti? Jesu jaindunga: —Ima, geru suge chage. Chube gerua degaba unsuialin gerule kirogwa e giti, ¿ba me chada e batabanga? Chada e gerule: “Kirogwa soli jalindi nga be suga noare Chube giti, malen ama be Chube ollade be kle mo gate diali no trate Chube giti.” Ba chada e batunga tanre agwa me suge bage chada e kle gerule mine. 17 Jesu gerudu ene kwian e ulita ole, gire Jesu jo siere ne ngwadige jo una soli kadakle Betaniage, chui ege ngajrege Jesu gbedu una ege. 18 Nagbietege ngabebita Jesu joni chage naskuni una Jerusalén ngnagu ule kwian geru jwannga amage ole, ama ulita kledu chage jonkare gire Jesu bli ole, Jesu tadu blikalin. 19 Jesu gwagedu gli kadakle higueradige jonke gire ama jo gli e gitigu gligba gweale jwen gutadale, gligba me skwenduge gutadale glinanga jegwale, gliga alin skwendu Jesuge gire Jesu gerudu glige: —¡Chui aige gwangerugu ba mi gbachie dare, ni kwian gdaite be ñage ba gba gute! Jesu gerudu ene gire sugeti allabi gli jokeda. 20 Kwian geru jwannga Jesuge ulita gwagedu Jesu agedu ene gli ole gire ama chegu tañachuge tanre, geru kadu Jesuge: —Gli kle no, ¿mineade gli e jokeda sugeti ngwale? Gli jogeda bedre bedre, gli me ñage jogeda blike ene gli e jokeda kare. 21 Jesu jaindunga: —Cha gerule ulia ba ole, ba mo ta gbe ulia Chube ole Chube gai ulia me tañachuge ni sidri mo tale Chube me ñage age ba alin, ba mo ta gbe ulia ene Chube ole gire Chube kiralla giti ba ñage age ulita. Ba ñage age cha agedu kare gli ole, kaire ta amaña giti ba ñage age ma ngle cha agedu aige, ba ñage gerule jwichuga aige: “¡Joga siere nga aige, joga bleske!” Ba gerule ene jwichugage mo ta gbaba ulia Chube ole giti gire Chube be jwichuga kage bleske ba gerudu kare. 22 E kare ene ba gerule Chube ole lle gweale giti ba takalin ama age ba alin kare, kaire ba mo ta gbe ulia Chube ole Chube be age ba alin ulia ba gerudu ama ole kare, ba lle kade Chubege ta ene giti gire ulia Chube be age ba alin ba takalin kare. 23 Jesu jo chkeni una Jerusalénge gire jo u gerungwa Chube olege, ama kledu ne ngwadi kwian tke tangle Chube giti gire kwian gerunga Chube ole daba alin chugagwalla mneite kaire kwian israelita chugagwalla juma mneite, ama ulita chku Jesudige, geru kadu Jesuge: —¿Chema ba kagu age ba kle age kare? ¿Chema kiralla giti ba kle age ulita? 24 Jesu jaindunga: —Cha kaire agwe geru kade gbaite bage: ¿Chema Juan-Bautista kagu? ¿Chube Juan-Bautista kagu kwian ñe chiske o kwian Juan-Bautista kagu kwian ñe chiske? Cha gerule ba ole, ba jainnga cha kalen chema Juan-Bautista kagu, gire cha be geru kete bage chema cha kagu age ulita cha kle age kare. Jesu gerudu ene gire kwian ulita bai geru kadu Jesuge chegu gerule tanre modi Jesu geru kadu amage giti: —¿Che jainnga mine Jesu kalen? Che gerule Chube Juan-Bautista kagu kwian ñe chiske, gire Jesu be geru kade chege: “¿Gire mineade ba me Juan-Bautista gerua cha giti gau ulia?” 26 Agwa che gerule kwian Juan-Bautista kagu, gire kwian ulita be che keruchuge be age gweale me no che ole gerule ene gdale, che kennga gerule ene, kwian kle tañachuge ulia Chube Juan-Bautista kagu Chube gerua kete kwiange. ¿Malen che gerule mine ama ole Juan-Bautista giti? 27 Kwian geru tragu ene modi Juan-Bautista giti gire ama mo ta gbu gerule Jesu ole: —Cha ulitage me uñale chema Juan-Bautista kagu. Gire Jesu gerudu ama ole: —Kaire agwe cha mi gerule ba ole chema cha kagu age ene ni cha be gerule ba ole chema kiralla giti cha kle age aini ba ulita gwa giti. 28 Jesu gerudu dare kwian israelita chugagwalla ulita ole: —Cha be geru ñachuge bage onbre kirolla gdaboke giti, ba ulita cha keruchuge no ene ba be ñage gerule cha ole ba tañachuge mine onbre kirolla e giti. Onbre gdaite kirolla gdaboke molen, ñenua gerudu kirogwa gdaite ole: “Cha kirolla, cha takalin ba joge lle boi deage cha alin nege.” 29 Kirolla e jaindunga ñenua kalen: “Cha me ta jogekalin lle boi deage nege, cha mi joge.” Kirolla gerudu ene agwa bigwa ama ta jwlitedu ama jo lle boi deage ñenua alin. 30 Kaire ñenua gerudu kirolla gdaite na ole: “Cha kirolla, cha takalin ba joge lle boi deage cha alin nege.” Kirolla e jaindunga: “Ima, cha be joge lle boi deage ba alin.” Kirolla e gerudu ene agwa bigwa ama ta jwlitedu ama me jo dale. 31 Jesu geru ñachugu ene gire Jesu geru kadu kwian israelita chugagwalla ulitage: —¿Kirogwa gdaboke e miamne agedu ñenua takalin kare? Kwian jaindunga: —Ñenua gerudu kirogwa ngeru ole, ama alin allabi agedu ñenua takalin kare. Jesu gerudu: —Ba gerudu ulia. Cha gerule ba ole, kwian igi ganga chugagwalla emperador nga Romamu alin kaire muinga mo chbadanga kwian onbrege, kwian ene ulita giti suge ba ulitage kwian agenga me no me no, ba ulita gwage amadi ama lle me no boanga, ama ulita salengwli kirogwa ngeru kare mo ta gbu age ñenua alin. Kwian e agedu me no me no agwa bigwa ama ta jwlitedu Chube ole, nege ama kle Chube gai ulia kle mo ta gbe age ulia Chube takalin kare, ama chege no trate Chube gwa giti ama Chubenu malen ama be toi bdagli Chube ole nga ngaña giti. Agwa ba me dale, ba ulita salengwli kirogwa bai ñenua gerudu bdagli ole kare, ba kle gerule ngwale mo ka giti alin ba ta agekalin no Chube takalin kare, agwa ba me kle Chube gai ulia me kle mo ta gbe age ulia Chube takalin kare, malen ba me Chubenu ba mi ñage toi bdagli Chube ole nga ngaña giti. 32 Juan-Bautista chiu ba ulita tke tangle Chube giti, ama gerudu ba ulita ole ba mo ta blitadale Chube ole ba jogedale siere ba kle age me noge toi no Chube gwa giti Chube takalin kare, agwa ba me Juan-Bautista gerua gau ulia ba me agedu ama gerudu kare. Agwa kwian igi ganga kaire muinga mo chbadanga kwian onbrege, kwian ene tanre Juan-Bautista keruchugu Juan-Bautista gerua gau ulia, ama mo ta blitu joge siere ama kle age me noge chage no Chube takalin kare. Ba gwagedu kwian edi mo ta blite ene Chube ole, ba gwagedu kwian edi agwa ba me mo ta blitu Chube gai ulia —Jesu gerudu ene kwian israelita chugagwalla ulitage. 33 Jesu geru na ñachugu kwian israelita chugagwalla tanre kle mo litaba Jesudi alin, Jesu gerudu: —Cha gerule ba ulita ole, kwian onbre gdaite uvagba ngama gbu gire ama gere tku uva ngama giti tangle, kaire ama nga dodadu uvagba chia ogangwa, kaire ama dbi gweale jigu ngwale uva ngamaske u gbangwa, ama ke ulla dodadu jeike ngaña uva ngamaske uva manangwa. Uva ngama mauña lle e bo ulita bigire ama kwian gweale gau uva ngama manangale, ama uva ngama ketu kaire u uva manangwa ketu uva ngama mananga ulitage, uva ngama mauña uva ngama jigu uva manangage gire ama jo toi nga batege. 34 Chui jo sbali gire uva mauñage chku uñale uvagba joge dabe suia chku gire uva mauña kwian lle boanga gweale mo alin kagu uvagba bonga amanu kade mo alin kwian uva manangage. 35 Kwian lle boanga e ulita jo chke kwian uva manangadige uvagba kade uva manangage, kwian uva mananga ulita kira batu ama ulita ole, uva mananga kwian lle boanga gdaite guda, ama lle boanga gdaite lendegu, ama lle boanga gdaite skiu ke giti. 36 Boidu ene gire kwian uva mauña kwian lle boanga na ma ngle kagu uvagba amanu nate. Lle boanga e ulita jo chke uva manangadige gire kwian uva mananga agedu kwian lle boanga e ulita ole salengwli agedu lle boanga kagaba ngeru ulita ole kare. 37 Bdagli kwian uva mauña kirolla amanu kagu uvagba nate. Ama tañachugu mo tale: “Cha be mo kirollanu kage, uñale chage kwian uva mananga ulita be cha kirolla gai dage gai ngwange no.” Uva mauña tañachugu ene, malen ama mo kirolla kagu. 38 Kwian uva mananga ulita gwagedu uva mauña kirolladi chie ama gitigu, gire ama ulita gerudu modi ongoru ongoru: “Kwian chiu e uva ngama mauña kirolla, bdagli ama be chege ama ñenua llea ulita dbia ulita mauñale. Ale ama gweda, ene lle ulita be chege chege, che be chege uva ngama ai ulita mauñale.” 39 Uva mananga ulita gerudu ene modi gire ama uva mauña kirolla gau du siere uva ngamallage, gire ama ulita uva mauña kirolla guda. 40 Jesu geru ñachugu ene ulita gire geru kadu kwiange: —¿Ba tañachuge mine geru e giti? Kwian uva mauñage be chke uñale boidu ulita ama kirolla ole gire ¿ama be age mine kwian uva mananga ulita ole? 41 Kwian israelita chugagwalla ulita jaindunga Jesu kalen: —Kwian uva mauñage be chke uñale, gire ama mi tai dage kwian agedu me no ama kirolla olege, ama be kirolla jia gbe kwian e ulitage be kwian e gweda. Kaire agwe ama be kwian na gbe uva ngama manade kwian bai mo ta gbe uvagba bonga uva mauñanu kete uva mauñage uvagba joge dabe suiale. 42 Jesu gerudu ama ulita ole: —Ulia ba gerudu e ulia. Cha gerule ba ole, Chube be age ene kwian ole kwian bai me Chube Kirolla gai ulia. ¿Ba me nu Chube gerua batabanga? Chube gerua degaba unsuialin tangle gerule Chube Kirolla be boi giti, chada e gerule: “Kwian u dodanga ke gbu gerere, ke gbaite ama mliunga, ama gerudu ke e me no dale ke e ngwale, agwa ke e ama mliunga, ke e ma no ke na ulitage. Kwian ke gbu ulita gerere, nga bebi ke gbaite alin gere me kle kiraske, ke mliabanga gbere gerere gire u chegu kiraske. Ai ulita Chube dodadu malen nga suga noare chedige.” Chube gerua degaba unsuialin gerule ene. 43 Cha gerule ba ole ke e giti, kwian gweale joge chke dba ke e giti kwian lentige, ke e joge chke dba kwian giti kwian mnuña alin chege ke e kote. Cha salengwli ke mliabanga kare, kwian bai me cha gai ulia ama salengwli kwian u dodanga kare, kwian bai me ta cha gakalin ulia, bdagli kwian ene be boi tanre daga ngwale be chege ji chuge diali. Cha gerule ba ole, ba kle age cha ole salengwli kwian uva mananga agedu kwian uva mauña kirolla ole kare, ba me cha gakalin ulia malen Chube be mo gerua cha giti kete kwian nage kwian me israelitage, kwian e be geru e gai ulia. 45 Jesu geru ñachugu ene ulita gire sugedu trate kwian gerunga Chube ole daba alin chugagwalla ulitage kaire kwian fariseo ulitage Jesu kle gerule ama ulita giti. 46 Gire e giti ama ulita skochiu tanre Jesudi, ama ulita tadu Jesu gakalin blike tkale skage gwaleda agwa ama ulita kendunga kwian ngleadi age Jesu ole, kwian ngle kle Jesu gai kwian Chube gerua ketangale malen kwian Jesu dollale kendunga age Jesu ole ama tadu agekalin kare.
1 Jesu geru ñachugu kwian ngle alin kwian mo jwen chuia ollade giti, Jesu gerudu: 2 —Cha gerule ba ole, kwian ulita bai Chube gai ulia mo Chugagwallale, bdagli kwian ene be joge toi Chube ole nga ngaña giti salengwli kwian joge mo jwen chuia ollade kare, cha geru ñachuge bage e giti: Kwian chugagwalla gdaite chui tke mo kirolla mo jwen chuia ollade, ama kwian ulita ta gbangu mo jwen chuia giti. 3 Chui e chku, lle ulita kledu biale mo jwen chuia ollade gire kwian chugagwalla lle boanga mo alin gweale kagu kwian ulita kade mo lite ule mo kirolla mo jwen chuia ollade, agwa kwian ngle jo kadaba me jaindu mo lite mo jwen chuia ollade. 4 Boidu ene gire kwian chugagwalla kwian lle boanga na kagu gerule kwian kadaba ole nakwaite, chugagwalla gerudu kwian lle boanga e ulita ole: “Ba gerule kwian kadaba ulita ole: ‘Bligda kle biale gutadale, cha chugagwalla bda ngle blodi gwanguda kwian ulita alin gutadale, bai mo jwen chuia ollade.’ ” 5 Kwian lle boanga mo chugagwalla gerua ketu kwian kadaba ulitage agwa kwian me nga talladu chui ollade giti, ni gdaite jo chugagwalla ngwadi chui ollade. Kwian kadaba gweale jo lle boi deage, gweale jo lle na boi mo alin, 6 kwian kadaba na ulita lle boanga chugagwalla alin ulita gau batu bo dagale gire kwian ama ulita guda. 7 E ulita chku uñale kwian chugagwallage gire ama skochiu tanre, chugagwalla guardia donga tanre mo alin kagu kwian gweda lle boanga jokeda jiale, kaire chugagwalla gerudu guardia donga ulita ole kwian lle boanga gwangada unalla gugadale ulita. Kwian chugagwalla gerudu ene gire guardia ulita agedu kwian chugagwalla gerudu kare. 8 Bigire kwian chugagwalla gerudu nakwaite kwian lle boanga na gweale ole: “Lle ulita kle boabale chui ollade kwian alin agwa kwian me tadu chiekalin, kwian e ulita ta me no, ma no che kwian na jinade mo jwen chuia ollade. 9 Joga chage jonkare, kwian ulita bai kaire ba ten ngwange jonkare ba kade cha kirolla mo jwen chuia ollade.” 10 Chugagwalla gerudu ene gire kwian lle boanga chugagwalla alin jo chage jonkare, kwian ulita skwendu amage, ama kwian e kadu, kwian e gweale kwian no kaire gweale kwian me no. Kwian e ulita jo mo lite mo jwen chuia ollade, gire kwian chugagwalla ulla chku ete kwian ngle ole chui ollade. 11 ’Kwian kadaba ulita kledu manade gwa gire kwian chugagwalla jo chke kwian ulita kle manade ngwadi, chugagwalla chku gwa tienda kwian ulita kadaba chui olladedige. Ama tendu kwian onbre gdaitedi, kwian onbre e me mo ngama tkaba no mo jwen chuia ollade ñometrallaske kwian na ulita kare. 12 Kwian chugagwalla gerudu kwian gdaite e ole: “¿Mineade ba chku aini gwa me mo ngama tkaba no mo jwen chuia ollade ñometrallaske? Bage chke uñale ba me kle chage ñometra noske, ñometra e ba kle chageske me tkakle modi chui mo jwanngwa olladakle ngwadi.” Kwian chugagwalla ka bo ene kwian onbre e ole gire kwian onbre chegu kamne mo giti. 13 Kwian chugagwalla gerudu lle boanga amanu ole: “Onbre e jwen sugekare ko luge sera luge, mli jondoi nga jereske, ama chegedale goga olire sugekare chage.” Kwian chugagwalla gerudu ene ulita gire lle boanga agedu onbre ole ama gerudu kare. Jesu geru ñachugu ene, gire Jesu gerudu dare: —Cha gerule ba ole, e kare ene kwian bai me Chube gerua gakalin, bdagli ama be boi daga ngwale ji chuge ngwadi nga dbigu giti, ne ngwadi ama be ta olire tanre sugekare Chubege. 14 Kwian tanre kle Chube gerua keruchuge agwa gire uñale Chubege kwian ulita me ta ama gerua gakalin ulia, kwian bedreare alin be ama gerua gai ulia, Chube kwian ene ta gbe tañachuge no geru ulia giti. 15 Jesu gerudu ene ulita gire kwian fariseo ulita jo mo ten Jesudi sugekare Jesu tke gdege, ama takalin Jesu gerule gweale mau tale ene ama ñage Jesu tke skage Jesu gerudu giti. 16 Malen ama ulita mo skatemanalla gweale kagu ule kwian chugagwalla rey Herodes skatemanalla gweale ole tienda Jesudi Jesu kle ngwadi mo chuge Jesu ole Jesu gbe gerule gweale chugagwalla kweri emperador dollale giti, kwian e ulita jo chke Jesudige gire gerudu Jesu ole: —Ba kwian tkanga tangle geruge, uñale chage ba diali kle gerule ulia trate, kaire ba kle kwian ulita tke tangle geru ulia giti kwian toidale mine Chube takalin kare. Ba kle gerule kwian ulita ole salengwli, ba gwa giti kwian salengwli ulita. Ba kle mo ta gbe age ene diali me mo tallade kwian tañachuge mine badi giti. 17 Ba kwian ene malen cha geru kade bage gbaite, ba jainnga cha kalen ba tañachuge mine. Geru gbaba nga Romage kwian ulita igi ketadale kwian chugagwalla kweri nga Romamuge, cha me kwian nga Romamu, cha kwian israelita, gire ¿no Chube gwa giti cha igi kete kwian chugagwalla kweri nga Romamuge ama kle kade chage kare o cha me igi ketadale amage? —kwian geru kadu ene Jesuge ta me no ole Jesu gbagda jiske gerule me no gweale giti. 18 Jesuge uñadu kwian e kle tañachuge me no amadige, gire Jesu gerudu ama ulita ole: —Ba ulita kle mo chuge ta me no giti cha ole, ¿mineade ba kle gerule ene cha ole? Cha gwale ba kle gerule no cha ole agwa ba tale ba kle tañachuge me no chadi. ¿Mineade ba cha batakalin gdege? 19 Igi ketakle kwian chugagwalla nga Romamuge, igi kete chage gaite gwagegda. Kwian igi ketu Jesuge gaite gwagegda, 20 gire Jesu geru kadu kwiange: —¿Chema oña kle gbaba igi ai giti? ¿Kaire chema kalla kle gbaba igi ai giti? 21 Kwian jaindunga: —Kwian oña e chugagwalla kweri emperador nga Romamu kada César, kaire ama kalla kle gbaba igi e giti. Kwian jaindunga ene gire Jesu gerudu: —Lle chugagwalla kweri Césarnu kaire keteni Césarge, lle Chubenu kaire keteni Chubege. 22 Kwian ulita Jesu keruchugu gerule ene gire kwian chegu tañachuge tanre Jesu gerudu giti ama ole, gire ama me ñadu Jesu gbe jiske malen ama ulita Jesu jigu ne ngwadi ama ulita joni. 23 Chui amañage kwian saduceo mneite jo Jesu kle ngwadi geru kade Jesuge, kwian saduceo kle gerule kwian jogebakeda jaba mi chkeni gwade chui bdaglige, ama tadu Jesu gbe gerule gweale Moisés nu Chube gerua degaba unsuialin dollale, malen ama gerudu Jesu ole: 24 —Ba kwian tkanga tangle geruge, uñale bage Moisés Chube gerua degu unsuialin, chada e gerule kwian onbre jogekeda me kirogwa molen mo muira giti, gire ama daballa na kle gwade mo jwandale ñanea oli ole, ene onbre e kirogwa molen muinga e giti daballa jogebakeda alin, ene daballa olia chege gdaite muinga e giti. Moisés chadalla gerule ene. 25 Nege cha gerule ba ole boidu cha bitallaske giti, aini cha bitallaske onbre gdaguke modi mo daballale. Daballa kimule mo jun muinga ole agwa ama jokeda ni ama kirogwa molen gdaite mo muira giti. Gire daballa nate mo jun ñanea oli ole, 26 agwa daballa e kaire jokeda ni ama kirogwa molen gdaite muinga e giti. Gire onbre jogebakeda daballa na ama nate mo jun muinga amaña ole, agwa ama boidu salengwli ama daballa ngeru gdaboke kare, ama gdamai ulita jokeda ni muinga ko toidu kirogwage gdaite. Boidu ene ulita onbre gdaguke e ulita ole, ama ulita gdaite gdaite mo jun muinga amaña ole, muinga e chegu ama gdaguke muiralla, agwa ulita gdaguke jokeda gdaite gdaite, ni ama gdaite kirogwa molen muinga e giti. 27 Bdagli muinga gballa e jokeda kaire agwe. 28 Cha gerule ba ole, ulia onbre e gdaguke ulita toidu gdaite gdaite muinga amaña ole mo muira kare, chui bdaglige kwian jaba ulita be chkeni gwade chuiage, ¿chui ege onbre bai be chege muinga e ñengulallale? 29 Jesu jaindunga kwian saduceo kalen: —Ba me kle tañachuge trate dale, ni ba geru ulia uñe. Ba me Moisés nu Chube gerua degaba unsuialin uñe trate, kaire me suge trate bage Chube kweri Chube ñage age ulita mo kiralla giti, malen ba me kle tañachuge trate geru e giti. 30 Sugedale trate ba ulitage chui bdaglige Chube be kwian jaba ulita gbeni gwade kwian onbrenu muirenu mi mo jwen ni be tañachuge mo jwen giti, ama ulita be chege salengwli lle boanga Chube alin nga ngaña giti kare, lle boanga Chube alin nga ngaña giti me mo jwen. 31 ¿Me uñale ba ulitage Moisés nu Chube gerua degaba unsuialin gerule trate kwian jaba be chkeni gwade giti? ¿Ba me chada e batabanga? Chada e giti Chube gerule trate ba ulita alin, chada e gerule: 32 “Cha Abraham Chubea, cha Isaac Chubea, cha Jacob Chubea, ama ulita kle cha gai mo Chugagwallale.” Moisés Chube gerua degu ene unsuialin tangle, e giti ñage suge trate ba ulitage chui bdaglige kwian ulita jogebakeda jaba be chkeni gwade. Abraham kaire Isaac kaire Jacob ama gdamai jogebakeda gire Chube gerudu Moisés ole ama gdamai giti Chube ama Chubea, ulia Chube kwian gwade alin Chubea, ama me kwian jaba Chubea, malen chkedale uñale bage kwian jogekeda kwian oña e kle chege gwade, kaire agwe chui bdaglige kwian jaba ulita be chkeni gwadeni. 33 Jesu gerudu ene ulita kwian saduceo ole, gire kwian nglea kledu eni kaire Jesu keruchugu, kwian e ulita chegu tañachuge tanre no Jesu kwian saduceo tku tangle giti. 34 Jesu gerudu giti kwian saduceo ole Jesu ama ulita gbu ka chite, e chku uñale kwian fariseoge gire kwian fariseo ulita mo litu Jesudi tangle. 35 Kwian fariseo e gdaite ama daba tkanga tangle Moisés chadalla giti, ama tadukalin Jesu gbe jiske geru gweale giti, ta ene ole ama geru kadu Jesuge: 36 —Ba kwian tkanga tangle geruge, cha geru kade bage, Moisés Chube gerua degu unsuialin, ¿geru e bai ma kweri geru ulitage cha gadale dage? 37 Jesu jaindunga ama kalen: —Moisés chadalla gerule ene: “Ba nodale ba Chugagwalla kweri Chube ole, ba mo ta dbadale no trate ulita ama ole diali, ba tañachugadale diali mo tale ama giti, ba mo chuga gbale no Chube alin ole.” 38 Chube gerua e ma kweri na ulitage gbadale gdadi. 39 Agwa kaire agwe geru na gbabokedale kweri ba gbadale gdadi, geru e kle gerule: “Ba mo ta dbadale no daba na ulita ole salengwli ba no mo ole naskuni kare.” 40 Moisés Chube gerua tanre jigu degaba geru e no, kaire kwian Chube gerua ketanga ama ulita Chube gerua tanre jigu degaba trate kwian alin, agwa geru gbaboke ai ma kweri Chube gerua na ulita kle degabage —Jesu gerudu ene kwian fariseo ulita ole. 41 Kwian fariseo kledu Jesudi tangle mo litaba ole ngmadi, gire Jesu geru kadu ama ulitage: 42 —Uñale bage unsuialin Chube gerudu be Cristo kage kwian alin, ¿ba tañachuge mine Cristo giti, Cristo chema oindalla? Kwian fariseo jaindunga: —Cristo che enusulian oña David oindalla. 43 Jesu gerudu: —Ba gerule Cristo enusulian oña David oindalla, e ulia, agwa Cristo me David oindalla alin allabi, kaire Chube Oña David ta gbu Cristo kade mo Chugagwalla, unsuialin David chada degu e giti, chada e gerule: 44 “Chube gerudu cha Chugagwalla ole: ‘Toi dba cha ngena cha ko taingwli giti, chui be chke gire cha be ba gbe kirachke ba dolla ulitadi, ba be chege dolla ulita Chugagwalla kweri.’ ” 45 David chada degu ene unsuialin Cristo giti, chada e giti sugedale kwian ulitage Cristo me David oindalla alin allabi, agwa kaire Cristo David Chugagwalla, David agali gerudu Cristo ama Chugagwalla. 46 Jesu gerudu ene kwian fariseo ulita ole agwa ni ama gdaite ñadu jainnga ni sidri Jesu kalen. Ne suiagebi kwian me jaindu geru kade dare Jesuge mo chuge Jesu ole, sugedu kwian ulitage Jesu ta ole kwian me ñage kirachke Jesu gbe jiske geru giti ama tadukalin kare.
1 Ne suiagebi kaire Jesu gerudu kwian tanre kle mo litaba Jesudi ole kaire kwian geru jwannga amage gdataboko giti gdaboke ole: 2 —Kwian daba tkanga tangle Moisés chadalla giti ulita kaire kwian fariseo ulita kle geru trage Moisés nu Chube gerua degaba unsuialin giti kwian na ulita ole. 3 Cha gerule ba ole, ama ulita kle gerule ulia Moisés chadalla giti, ba kwian e kerua gai kle gerule Moisés chadalla giti, ba agedale ama kle gerule kare agwa ba me age ama kle age kare, ama agali me kle age no ama kle daba tke tangle kare, ama kle gerule nganake gire kle age nganake. 4 Kwian daba tkanga tangle Moisés chadalla giti kaire kwian fariseo, kwian e ulita kle age me no daba na ulita ole, ama kle daba na gbe age ulita Moisés chadalla gerule kare, kaire ama kle daba gbe age geru na ama agali kle gbe gerule kare. Ama daba na ulita gbe age ene agwa ama agali me kle age. Kaire ama me kle daba na chudaboi age no geru kle gbaba kare. 5 Ama ulita ta lle boakalin ulita Chube alin kwian na gwa giti ene kwian na ñage gwage amadi kwian ñage gerule no ama giti. Chube gerua gweale degaba chada soli giti ama kle luge mo skadagdage kaire mo kligda jegwale kwian israelita kle age kare, agwa ama kle chada e dodade ma kweri kwian na ulita kle dodadege kle luge mo skadagdage kaire mo kligda jegwale, ene ama tañachuge kwian na ulita ñage ten chadadi no ñage gerule kwian e lle boanga no ulia Chube alin. Kaire ama kle ñometra no tke modi ama kle gerule Chube oleske dbe ma no jeike kwian na gwa giti, ene ama tañachuge kwian na ulita ñage gerule no ama giti ama kwian gerunga no Chube ole. 6 Kaire kwian e kle joge chui ollade gire kle nga ma no bligda gutangwa jinade ama toikalin dba ule kwian chui olladanga chugagwalla ole, ama kle mo gbe ma kweri kwian nage. Kaire ama kle joge u mo litangwa Chube gerua jwanngwage gire ama ta toikalin toingwa ma no giti kwian na ulita gwa giti. 7 Kaire agwe kwian e kle chage jonkare, kwian na ten ama ngwange ama takalin kwian e ulita ama gai dage tañachuge ama kwian kweri, ama takalin kwian gbi kade no amage kwian kle gbi kade mo chugagwalla kwerige kare. Kaire ama takalin kwian gerule no ama ole: “Ba daba tkanga tangle geruge no.” Ama takalin kwian gerule diali no ene ama ole. 8 Jesu gerudu jonlekanga kwian ulitage ene, gire Jesu gerudu kwian geru jwannga ole: —Cha me takalin ba age kwian fariseo ulita kaire kwian daba tkanga tangle Moisés chadalla giti ulita kle age kare. Ba me mo gbe ma kweri daba nage, kaire ba me daba na chuge ngwadi ba kade daba tkanga tangle geruge, ba ulita salengwli modi, cha alin allabi ba ulita tkanga tangle. 9 Kaire ba me ñage kwian ngwale nga dba ai giti kade mo ñenua kare ba Chube ka jwen kare. Ba Ñenua gdaitre alin allabi kle toi nga ngaña giti, ba Ñenua Chube, ba ama gadale dage. 10 Chube nu cha kagaba nga dba ai giti kwian ulita Chugagwallale. Cha alin allabi ba ulita Chugagwalla ba me ñage mo gbe daba na chugagwallale. 11 Ba ta chegekalin kweri daba na gwa giti ba mo ta gbadale diali age no daba na ulita alin daba chudaboi ta no giti. 12 Kwian baige suge kweri mo tale kaire mo gbe no kweri kwian na gwa giti, Chube gwage kwian ene me kweri, ama ngwale ama soli. Agwa kwian baige suge soli mo tale kaire mo gbe daba na chudaboangale, Chube gwage kwian ene kweri. 13 Jesu gerudu ene ulita kwian geru jwannga amage ole, gire Jesu mo ta gbu gerule kwian daba tkanga tangle Moisés chadalla giti ulita gwale kaire kwian fariseo ulita gwale, Jesu gerudu: —Ba kwian daba tkanga tangle Moisés chadalla giti kaire ba kwian fariseo, cha gerule ba ulita ole, ba ulita be ji chuge tirare bdagli ba kle age giti, ba kle gerule nganake ba kle age nganake. Ba kate ba kle gerule ba kle Chube gerua gai ulia ba kle Chube gai mo Chugagwallale, agwa ba tale ba me kle Chube gerua gai ulia ba me kle Chube gai mo Chugagwallale, malen ba me Chube uñe ba me Chubenu. Kwian na tanre ta Chube gerua uñakalin no trate ba giti agwa ba me takalin kwian e Chube gerua gai ulia mo alin ba me takalin ama Chube gai mo Chugagwallale, malen ba me kle ama chudaboi Chube gerua ulia uñe ba me kle ama tke tangle trate geru uliage. Age ene gdale ba ulita be ji chuge tanre bdagli. 14 Ba kwian daba tkanga tangle Moisés chadalla giti kaire ba kwian fariseo, cha gerule ba ulita ole, ba ulita be ji chuge tirare bdagli ba kle age giti, ba kle mo gbe no kweri kwian gwa giti, ba takalin kwian ulita gerule no ba giti malen ba kle gerule sbali Chube ole ngle kwian gwa giti, ene kwian be tañachuge ulia ba kwian agenga no no Chube alin. Ba kle age ene kwian gwa giti agwa ba tale ba kwian me no, ba kle age tanre me no muinga chegeba oli ñengulage ole, ba kle u jwennga muinga e ngeru, e gdale ba be ji chuge tanre ba agedu me no ene muinga oli ole giti. 15 Ba kwian daba tkanga tangle Moisés chadalla giti kaire ba kwian fariseo, cha gerule ba ulita ole, ba ulita be ji chuge tirare bdagli ba kle age giti. Ba kle joge nga ulitage baini kaire ba ñage joge ngwadi, nga e ulitage ba kle kwian me israelita tke tangle ba kwian israelita suia giti, ba takalin kwian ene ba suia gai mo alin. Kwian me israelita gdaitre alin mo ta blite ba ole ba suia gai mo alin gire nga suga no no badi. Agwa ba me kle age no kwian e alin, kwian e ba suia gai gire ama mi Chube gerua ulia gai, ama be mo ta gbe age me no ba kle age me no kare, agwa kaire ama be age ma me no ba kle agege. Ba kle age ene ba kle kwian e gbe jiske Chube gwa giti ba kbiale, ama be boi daga ngwale tanre bdagli nga dbigu giti ma tirare ba be boige. 16 ’Cha gerule ba ulita ole, ba ulita be ji chuge tirare bdagli ba kle age giti. Ba kle kwian tke tangle Chube gerua giti, agwa Chube gerua me suge bage trate, ba me ñage kwian tke tangle no trate geru ege salengwli kwian gwagwa me me ñage kwian na jonlla dbe kare. Ba kle daba tke tangle gire ba kle sole ama ole, ba kle gerule ai kare ama ole: “Ba gerule u gerungwa Chube ole kalla giti ba be age gweale ulia ulia, ba gerule ene gire ba me age ba gerudu kare ba me talladale e giti, ba me agedale ba gerudu kare u gerungwa Chube ole kalla giti. Agwa ba gerule lle ñanaske kada oro kle gwa u gerungwa Chube olege kalla giti ba be age gweale ulia ulia, ba gerule ene ba me ñage gerule alin ngwale ba be age, ba mo ta gbadale age ulia ba gerudu kare oro kalla giti.” Ba kle gerule ngwale ene kwian ole. 17 Ulia ba ulita chuga me, ba kwian gwagwa me kare, geru ulia me suge bage. ¿Mineade ba kle gerule oro kle gwa u gerungwa Chube olege oro e ma ñanaske Chube gwa giti u e amañage? Oro me kle gwa u ege gire oro e me ñanaske dale Chube gwa giti. 18 Kaire ba kle sole daba na ole ai kare: “Ba gerule nga bda gugakle ngwadi kalla giti ba be age gweale ulia ulia, ba gerule ene gire ba me age ba gerudu kare ba me talladale e giti, ba me mo ta gbadale age ulia ba gerudu kare nga bda gugakle ngwadi kalla giti. Agwa ba gerule bda gugakle Chube alin kalla giti ba be age gweale ulia ulia, ba gerule ene ba me ñage gerule alin ngwale ba be age, ba mo ta gbadale age ulia ba gerudu kare.” Ba kle gerule ene daba ole, ene ba kle kwian tke tangle age ngwale. 19 Ba ulita kwian gwagwa me kare, geru ulia me suge bage dale. ¿Mineade ba kle gerule bda gugakle Chube alin ma ñanaske Chube gwa giti ngage bda gugakle ngwadi? Bda e me kle nga ege gire bda e me ñanaske dale Chube gwa giti. 20 Kwian bai kle gerule nga bda gugakle ngwadi kalla giti ama be age gweale ulia ulia, kwian ene me kle gerule nga e kalla alin allabi giti, agwa kaire ama kle gerule lle ulita mangire batre kle ne ngwadi kalla giti. 21 Kaire agwe kwian bai kle gerule u gerungwa Chube ole kalla giti ama be age gweale ulia ulia, kwian ene me kle gerule u e kalla alin allabi giti, kaire ama kle gerule Chube agali kalla giti, Chube kle kwian ole diali u ege. 22 Kwian bai kle gerule nga ngaña Chube kle ngwadi kalla giti ama be age gweale ulia ulia, kwian ene me kle gerule nga e kalla alin allabi giti, ama kle gerule kaire agwe Chube toigdalla no kweri kalla giti, Chube kwian ulita Chugagwalla kle toiba dba toigda e giti nga ngaña giti. 23 ’Ba kwian daba tkanga tangle Moisés chadalla giti kaire ba kwian fariseo, cha gerule ba ulita ole, ba ulita be ji chuge tanre bdagli, ba me kle age no Chube takalin kare. Ngwale ba kle lle ulita maunu kete sidri Chubege Moisés chadalla gerule kare, gliga kada menta kaire gliga kada anís kaire chude soli kada comino ba kle kete sidri Chubege, ba kle lle e ulita kete sidri Chubege gire ba tañachuge ba no trate ulita Chube gwa giti. Ngwale ba kle lle alin kete Chubege, ba ta me kle Chube ole, kaire ba me kle mo ta gbe age no daba na alin. Ba ta chegekalin no trate Chube gwa giti, ngeru ba mo ta gbadale ulia Chube ole, ba agedale no daba ulita alin, ba taidale dage dabage ama chudaboi, Chube gwage age ene ulita ma no lle ulita maunu kete sidrige, ba mo ta gbe age ene gire ba lle ulita maunu kete sidri Chubege Moisés chada degu kare. 24 Ba kle kwian tke tangle Chube gerua giti agwa geru e me suge trate bage dale, ba kwian gwagwa me kare kwian na jonlla dbe. Diali ba kle tañachuge age Moisés nu Chube gerua degaba alin gerule kare ene ba tañachuge ba chege no trate Chube gwa giti. Agwa ba me kle mo ta gbe ulia Chube ole age no trate ulita ama takalin kare, ni suge bage ba kle age me no Chube gwa giti. E salengwli kwian kle bellekwa jai kare gire ama ten jinisolindi bellekwaske, ama jinisolin jwennga bellekwage mlienga gire bellekwa chege no trate ama bellekwa jai ulita. Agwa lle ma kweri jinisolinge kle bellekwaske bda camello batre, ni ama ten lle edi, ama bellekwa e ulita jai dbige me tallade, me chke uñale amage lle me no kle bellekwaske. 25 ’Ba kwian daba tkanga tangle Moisés chadalla giti kaire ba kwian fariseo, ba ulita be ji chuge tirare bdagli, ba kle mo gbe no kweri kwian gwa giti agwa ba ta me no ulia. E salengwli kwian kle chi jangwa kaire batekwa glige giti tangle alin kare gire tañachuge chi jangwa kaire batekwa chege trate ulita, agwa batekwa kaire chi jangwa gligaba ene me trate dale, chi jangwa e kaire batekwa e skieru kle chege sugaska. Ene kaire ba, ba ulita kle tañachuge ba age ba enusulian unsuialin suia alin kare, ene ba kwian no trate Chube gwa giti, agwa me ene ba kle tañachuge kare, ba tale ba ta me no, age me no tanre kle ba tale diali, diali ba kle tañachuge mo tale skwe boi daba ngeru kaire age tanre me no daba dollale. Ba ulita kle chage kwian gwagwa me kare, me suge bage Chube takalin mine. Ba ulita gdaite gdaite mo ta blitadale ngeru Chube ole gire ba ta be chege no trate chi jangwa kaire batekwa gligaba no trate skieru kare, ene ba be ta agekalin no trate Chube takalin kare. 27 ’Ba kwian daba tkanga tangle Moisés chadalla giti kaire ba kwian fariseo, ba ulita be ji chuge tirare bdagli ba kle age giti, ba me kle age no ulia Chube takalin kare. Ba ulita salengwli nga kwian jogebakeda tkakle keugage ngwadi kare, kwian kle nga keuga ege dai jutre ene kwian gwage keugadi keuga kle chege no trate giti tangle. Agwa keuga skieru kwian jogebakeda gda alin kle ngle keugage kaire lle na tanre ñachke sugaska kle ne ngwadi. 28 E kare ene ba, kwian kle gwage ba ulitadi kle tañachuge ba kwian no ba kle age no Chube takalin kare, agwa ba tale ba ta me no Chube gwa giti. Ba kle gerule nganake ba kle age nganake, ba kle gerule mo ka giti alin allabi no, agwa ba kle age mau tale diali me no, e gdale Chube be ji gbe ba giti bdagli. 29 ’Ba kwian daba tkanga tangle Moisés chadalla giti kaire ba kwian fariseo, cha gerule ba ulita ole ba ulita be ji chuge tanre bdagli ba kle age me no gdale, ba kle gerule nganake ba kle tañachuge mo tale nganake. Ba enusulian unsuialin kwian ngle Chube gerua ketanga gau, guda, kwian Chube gerua ketanga e jaba jo tkaba dbige, gire nege tangle ba ulita kle kwian e jaba dbia dodade no trate ba kle nga e manade no, ba kle lle gweale no gbe kwian Chube gerua ketanga unsuialin jaba dbia giti, age ene giti ba takalin kwian ulita tañachuge ba kle Chube gerua ketanga oña e ulita gai dage malen ba kle ama jaba dbia manade no. 30 Kaire ba ulita kle gerule: “Cha enusulian unsuialin kwian ngle Chube gerua ketanga guda, cha me kledu toi chui ege, agwa cha toidu chui ege cha me agedu cha enusulian unsuialin agedu kare kwian Chube gerua ketanga ole, chage suge cha enusulian unsuialin ulita agedu me no.” 31 Ba ulita kle gerule ene agwa ba tale ba kle tañachuge nobi ba enusulian unsuialin Chube gerua ketanga ngle guda, malen ba kle mo gbe jiske Chubege salengwli ba agali kwian e guda kare. 32 Ba ulita kwian ta me no ba enusulian unsuialin tangle ta me no kare, malen ba kaire be age me no kwian Chube gerua ketanga dabage nege tangle ole, ba be ama gbe boi daga ngwale ba be ama gweda. 33 ’Ba ulita kwian agenga me no me no, diali ba ta agekalin me no Chube dollale, ba ta me no molen. Ba kle tañachuge ba be tien gitiru ji chugege nga dbigu giti agwa me dale, ba ulia be boi daga ngwale tanre ji chuge ngwadi nga dbigu giti ba agedu me no ulita kbiale. 34 Chage uñale ba be age me no kwian Chubenu tanre ole, malen cha be kwian Chube gerua ketanga kage ba alin, cha be kwian ta ole kage ba alin kaire cha be kwian daba tkanga tangle kage Chube gerua trage ba ole. Agwa ba be kwian ene gweale gweda kaire ba be ama gweale gbe kruge gwaleda, ba be ama gweale gbe boi daga ngwale, ba be ama gweale lendege u mo litangwa Chube gerua jwanngwage kwian na gwa giti kaire ba be ama gweale jrite nate una kaire kairege. 35 Bdagli ba be ama ulita jia chuge ba agedu me no ulita ene kare ama ole gdale. Kaire ba enusulian unsuialin tangle kbiale ba be ji chuge, ba enusulian unsuialin tangle kwian Chube gerua ketanga guda tanre, Chube be kwian e ulita gwabada jia kade ba kwian kle toi nege tanglege. Kwian kada Abel ama kwian unsuialin agenga no Chube gwa giti ama jo gwabada, e suiage dare kwian ngle Chube gerua ketanga jo gwabada, chku kwian kada Zacarías suiage tangle, Zacarías kaire jo gwabada, ama jo gwabada u gerungwa Chube olege, Zacarías e Berequías kirolla. 36 Cha gerule ulia ba ulita ole, Chube be kwian Chube gerua ketanga e ulita gwabada jia kade ba kwian kle toi nege tanglege —Jesu gerudu ene ulita kwian daba tkanga tangle Moisés chadalla giti ulitage kaire kwian fariseo ulitage. 37 Jesu kledu tañachuge tanre kwian ulita una Jerusalénmu giti gire gerudu: —Kwian ulita una Jerusalénmu, ba enusulian unsuialin kwian ngle Chube gerua ketanga guda, kaire nege Chube kle mo gerua dbanga ngle kage ba ulita alin, ba kle ama skie ke giti kle ama gweda, ba kle age salengwli ba enusulian oña unsuialin agedu kare. Cha ta olire tanre ba ulita giti, cha noare ba ulita ole, agwa ba me no cha ole. Cha tadukalin tanre age no ba ulita alin ba ulita manade no salengwli koi kle soli lite ole manade no jiga gwaru kare, agwa ba ulita me tadukalin cha age ene ba alin, ba me cha gau ulia. 38 Malen cha ba chuge ngwadi jogengale sugekare chage. 39 Cha gerule ba ulita ole, nege gwangerugu ba mi gwage chadi dare aini, agwa chui bdagli be chke gire ba ulita be gwage chadi chieni nakwaite, chui ege be suge ba ulitage Chube cha kagu ba ulita alin gire ba ulita be gerule cha giti: “Ama noare, Chube ama kagu nga dba ai giti kwian ulita alin” —Jesu gerudu ene ulita kwian una Jerusalénmu giti.
1 Jesu jo gwajondoida u gerungwa Chube olege gire kwian geru jwannga amage ulita chku Jesudi gerule ama ole u gerungwa Chube ole giti. Kwian geru jwannga gerudu u e noare, 2 gire Jesu gerudu ama ole: —Nege ba kle gwage u kweri edi u e no no dodaba ke kweri no giti, agwa cha gerule ulia ba ulita ole, me sbali u e ulita be chege skianbada lle ngwale kare, ke mi chege gbaba mo giti giti ni gbaite, u ulita be chege skianbada. 3 Jesu gerudu ene kwian geru jwannga ole gire Jesu jo Ngwiskinro Jwichugallage, ne ngwadi Jesu toidu dba gire kwian geru jwannga Jesuge ulita chku Jesudige, geru kadu Jesuge sugekare: —Cha geru jwannga bage batre takalin ba geru kete chage, ¿ngaminegire u gerungwa Chube ole be joge skiendba ba gerudu kare? ¿Nga ai ulita be boi mine ba be chieni ngwange gire? ¿Be boi mine ngeru gire ene chke uñale cha ulitage chui bdagli kle kodi? 4 Jesu jaindunga: —Ba ulita kledale ta giti ene ba mi skate alenske ba mi mo chuge ngwadi mo anblitange kwian daba anblitangage cha chieni chuia giti. 5 Chui bdagli chke kodi gire kwian tanre be chie mo gbe kweri gerule no mo giti daba anblitagda, ama be chage kwianske mo ka gbaba cha kalla giti gerule mau giti: “Cha Cristo, Chube cha kaguni kwian alin.” Kwian tanre be chage gerule ene agwa kwian ene me ulia Cristo, kwian ene ulita be kwian tanre anblite geru ngwalege, kwian tanre be ama gerua gai ulia. 6 Ba be geru keruchuge kwian kle dole tanre kweri modi nga tanrege, ba geru e keruchuge ba me mo ta dbe kennga kle boi giti. Boidale ene ulita ngeru agwa chui bdagli bebi chke. 7 Kwian chudalla na be mo tke dole kwian chudalla na ole, kaire kwian toinga nga kweri nage be mo tke dole kwian toinga nga kweri nage ole. Kaire bli suia kweri be kle tanre, kwian ngle be jogekeda bli kweri kote, kaire nga be jwlien tanre kegde kweri be chite tanre nga tanrege. 8 E ulita be kle boi gwangeale nga dba ai giti agwa chui bdagli bebi chke, lle na tanre tirare be boi ngeru, lle e ulita kote kwian be ta olire tanre boi daga ngwaleske. 9 Kaire kwian cha dollale be ba ulita cha gerua ganga kete mo chugagwallage, chugagwalla e kote ba be boi daga ngwale tanre, ba gweale gwabeda, kwian nga ulitamu be jainchke badi cha gerua giti. 10 Chui ege tangle kwian tanre cha gerua ganga be cha gerua chuge ngwadi be mo ta blite age me no joge siere cha geruage, kwian ene ulita be jainchke modi ongoru ongoru kaire be daba kete boadale daga ngwale tanre kwian chugagwallage. 11 Kaire agwe chui ege tangle kwian daba tkanga tangle geru ngwale me uliage, kwian ene tanre be chie tangle gerule ama kle chage geru ulia Chubenu dbe kwian alin, agwa ama kle sole ngwale kwian ole kle geru ngwale trage, kwian tanre be mo anblitange kwian ege be ama gerua ngwale gai ulia. 12 E suiage tangle age me no tanre be kle nga dba ai giti kwian ulitaske, age me no tanre ene be kwian tanre cha gerua ganga ulia ta gbe bate chage, kwian ene mi mo ta dbe no cha ole ngeru kare kaire ama mi mo ta dbe no daba na ole. 13 Agwa kwian bai me mo chuge ngwadi joge siere cha geruage boi daga ngwaleske, kwian ene mo ta gbe cha gerua gai ulia mo tale diali gwangerugu mo ta gbe age no diali Chube takalin kare, kwian bai mo ta gbe ene, chui bdagli be chke gire kwian e be toi no diali chui tangle cha ole Chube ngwadi. 14 Chube gerua no ulia cha giti jogedale ketaba kwian nga ulitamuge, ene chke uñale kwian nga ulitamuge ama cha gai mo Chugagwallale ene ama chege no Chube gwa giti ama Chubenu, kwian nga ulitamu geru e keruchugadale ngeru, gire chui bdagli be chke —Jesu gerudu ene ulita kwian geru jwannga ole. 15 Cha chada ai deganga gerule ba bai chada ai batenga ole, ba geru ai gbadale gdadi tañachuge no mo tale Jesu kle gerule giti gire ene geru be suge no trate bage. Jesu gerudu dare kwian geru jwannga amage ulita ole: —Kwian Chube gerua ketanga dabage unsuialin kada Daniel Chube gerua degu, chada e gerule chui be chke kwian be age gweale me no me no sugaska Chube gwa giti una no Chubenu Jerusalénge nga kweri Judeage. Ba gwage kwian age me no sugaska enedi una Jerusalénge Daniel chada degu kare, 16 gire ba bai kaire ulita kle nga Judeage kigedale ngaske jwichugage mo manadale nga be boi tirare ngeru. 17 Chui ege kwian ulita kigedale blikare ni lle amanu tallade. Kwian bai kaire skate goga tangle ama me jogedaleni chiga u amanuge lle gweale amanu gwa tangle lite ole dbadale, ama lle ulita amanu chugadale ngwadi gwa ama jogedale kige blike kole. 18 Kaire agwe kwian bai kaire skate lle boi deage me jogedaleni gudegu mo ñometralla lite ole, ama jogedale kige blike gwangerugu me joge naskuni. 19 Chui ege muinga bai kaire kle chage gaba kaire muinga bai kaire kle chage kirogwa soli sidri jusulidi ole, muinga e ulitage cha tai dage noare, ama ulita be boi daga ngwale tirare, be mnoare ama alin kige blike. 20 Chui ege kwian be boi tanre daga ngwale tirare me nu boiba daga ngwale ngeru kare chui Chube nga ulita dodaduge gwangerugu joge nege tangle, boi daga ngwale ene chuia be joge tangle ulita gire mi boi dare ene kare nakwaite. Ulia chui ege be boi tanre daga ngwale malen e gdale ba ulita gerudale diali Chube ole boi daga ngwale e chuia me chke noi suiale ni kwian israelita undege chuiage, chui be chke undege chuiage o noi suiage ene kwian ñage boi ma jabale me ñage kige blike dale. 22 E suiale Chube kwian chuge ngwadi boi daga ngwale chui ngle kwian ulita be jogenga boi daga ngwale kote, agwa Chube tale Chube be mo ta dbe no kwian ole kwian bai Chube nu gaba mo alin ole, Chube mi kwian chuge ngwadi boi daga ngwale chui ngle, Chube be boi daga ngwale chuia gbe buli, ama me takalin kwian amanu boi daga ngwale chui ngle, ama no no kwian ole. 23 Kaire e suiale kwian gweale be gerule ba ole: “¡Gwage ai, Cristo chku! Ama kle aini, Chube ama kagu.” Kaire kwian na be gerule: “Kwian chiu e, ama Cristo ulia.” Kwian gerule ene ba ole, sugedale bage ama me kle gerule ulia ama kle gerule mau tale ngwale, ba me ama gerua gai ulia. 24 Kaire chui ege kwian gweale be chage kwianske mo kalla itenga, be gerule: “Cha Cristo ulia, Chube cha kagu.” Kwian na be sole kwian ole kwian ulita anblite, be gerule: “Ulia cha Chube gerua ketanga dabage.” Kwian e ulita be gerule ene kaire ama be lle daga ngwale tanre dodade kwian gwa giti, age ene giti ama takalin kwian tañachuge ama kle age Chube kiralla giti, ama be age ene ulita kwian Chubenu anblitagda. Kwian daba anblitanga e ulita be takalin kwian Chube nu gaba mau alin gbe age me no Chube dollale me Chube gerua gai ulia dare, ama tañachuge ama ñage kwian Chubenu ta blite chage ama nate ama gerua ngwale gai ulia, agwa kwian daba anblitanga e ulita kle tañachuge ene ngwale. 25 Cha geru ai ulita ketu bage ba ta gbale be boi giti chui bdaglige, ene chui ege kwian me ba anblite joge siere geru uliage. 26 Ba ulita me mo chuge ngwadi mo anblitange, kwian gweale be gerule ba ole: “Cristo kle nga gballage, joga nga ege tienda Cristodi.” Kwian gerule ene ba ole gire ba me joge. Kwian gweale na be gerule ba ole: “Bai aini tienda Cristodi, Cristo kle mo ogabada nga aige.” Kwian gerule ene ba ole gire ba me ama gerua gai ulia, ama kle sole. 27 Cha gerule ulia ba ole, cha chieni chuiage me kwian bedre alin be gwage chadi chieni, agwa kwian ulita nga ulitage be gwage trate chadi cha be chieni chuiage salengwli kwian ulita kle gwage nga ko chrachiengadi nga ngaña giti kare. 28 Cha gerule ba ole, juntenge uñale lle jogebakeda chegale kle baini, ne ngwadi junten ngle kle mo lite dba, ene kaire kwian cha gerua gaba uliage be chke uñale trate cha chieni chuia kle kodi gire. 29 Jesu gerudu ene gire gerudu dare kwian geru jwannga ole ama chieni chuia giti: —E ulita cha gerudu kare ba ole be boi daga ngwale ene ulita, gire sugeti ngwale chui be gwajoge jere ngajudi, kaire dai mi chege gwadenga ngajrege, beu ulita be jain dbige nga ngaña giti, nga ngaña giti nga ulita be jwlien, beu mi chege ngwedi beu kle kare, lle ulita mi chege ngeru kare nga ngaña giti. 30 Nga be boi ene ulita gire Chube be cha kageni, cha be chieni nga dba ai giti ngnagu bogakwaske Chube kirallaske, chui ege kwian ulita nga ulitamu be gwage chadi cha noare cha kweri, ulia cha kwian ulita Chugagwalla. Kwian ulita be gwage chadi chieni ene gire ama be kennga tanre kaire be ta olire tanre mau giti, be suge trate ama ulitage e cha amaña chiu nga dba ai giti kwian kare kle chieni nabitaite. 31 Lle ngwanegda kada trompeta be gdade kweri kweri gire cha be lle boanga cha alin nga ngaña giti ngle kage cha ngeru nga ulitage nga dba ai giti, ama be kwian nga ulitamu bai kaire cha nu gaba mau alin lite ole ulita dbale nga ngaña giti toi cha ole Chube kle ngwadi. 32 ’Nege cha geru ñachuge ba ulita alin gli kada higuera giti, ba cha keruchuge no gire ene be suge bage cha kle gerule mine ulia. Gli higuera kle ga jain ulita gire gliga na bli erutu kle chieni, ba gwage glidi ene aini che jwiage gire bage uñale chuda suia kle kodi. 33 Ene kaire ba be gwage lle tanredi boi ulita cha gerudu kare ba ole sbaliga gire chkedale uñale bage cha be chieni chuia kle kodi kodi, me sbali gire cha be chieni. 34 Cha geru kete bage e ulia, cha gerudu kare be boi ene ulita ngeru kwian ulita kle toi chui aige bebi joge tangle. 35 Nga ngaña giti nga dba ai giti mi chege diali dale alin, nga ulita ulita be joge tangle, agwa cha gerua mi joge tangle dale, cha gerua be chege diali dale alin, be boi ulita cha gerua kle gerule kare. 36 ’Cha geru kete bage ni kwian gdaitege uñale chui baige chui mangire cha be chieni, kaire agwe lle boanga cha Ñenua Chube alin nga ngaña giti ulita ni gdaitege uñale cha be chieni ngaminegire, ni cha Chube Kirolla agalige uñale chui baige Chube be cha kageni, cha Ñenua Chubege alin allabi uñale. 37 Cha be chieni chuiage, e suiale kwian tanre be kle toi age salengwli kwian unsuialin kledu toi age Noé suiale kare. 38 Kwian ulita toidu Noé suiale me kledu Noé kerua gbe gdadi me kledu tañachuge chui be boi tirare giti. Kwian e kledu blire, kwian kledu mo jwen, kaire kwian kledu mo jian gbe ule, kwian ulita kledu tañachuge toi age diali ene kare alin allabi, kaire kwian ulita kledu toi nga suga no ole age me no diali me kledu tañachuge chui be boi tirare giti. Agwa chui boi tirare chuia chku gire Noé jo chiga du kweri toli ule mo bitalla ulita batre ole Chube gerudu Noé ole kare. 39 Agwa kwian na ulita me kledu mo tallade nga be boi giti, toidu ama kledu toi diali kare gire sugeti ngwale noi kweri boidu, kwian me ñadu tien gitiru chi udage, kwian ulita unjo chiske jokeda chi kote. Ene kaire kwian tanre be kle toi cha chieni suiage kwian ene mi kle tañachuge be boi giti be kle toi age diali kare, gire sugeti ngwale cha be chieni, kwian ene ulita be chege boi daga ngwale tanre diali, mi ñage tien gitiru ege. 40 Chui e suiage kwian onbre boke be skate deage lle boi, onbre gdaite dbabe Chube kle ngwadi onbre gdaite jigabeda ji chuge. 41 Muinga boke be skate ke uge ule gwa, muinga gdaite dbabe Chube kle ngwadi muinga gdaite jigabeda ji chuge. 42 ’Me uñale bage ngaminegire cha ba Chugagwalla be chieni malen ba kledale ta giti diali chui ulitage, ba ta kledale biale cha chieni chuia ngwange, me skate alenske ta me gbaba biale cha be chieni chuiage. 43 Ba geru ai gbe gdadige ba tañachuge geru ai giti: Kwian u mauñage chke uñale trate ngajrege kwian skwe boanga be chie lle jwennga ama ngeru, ene kwian u mauña be chege gwade ta giti ngajrege ulita kwian skwe boanga jege ngwange, ama mi kwian skwe boanga chuge ngwadi lle jwennga ngajrege ama ngeru. 44 Ene kaire ba ulita kledale biale cha chieni chuia manade ngwange. Cha chiu nga dba ai giti kwian kare, cha be chieni nakwaite, agwa me uñale bage chui baige cha be chieni, malen ba kledale biale diali. Ba me mo ta gbe tañachuge diali cha be chieni giti, gire cha be chieni chuiage ba be skate alenske chage, cha me takalin ba skate alenske chage. 45 Jesu gerudu ene ulita ama be chieni chuia giti gire Jesu geru ñachugu kwian lle boanga u mauña alin giti: —Cha gerule ba ulita ole, ba kledale biale cha manade ngwange lle boi no diali cha takalin kare. E salengwli kwian gdaite lle boanga no u mauña alin kare. Kwian lle boanga e ta molen lle boi, u mauña be joge toi nga nage chui gwealege gire u mauña be kwian lle boanga no e jige lle boanga na ulita chugagwallale, lle boanga no ene be lle boanga na ulita manade no be bligda kete ama ulitage gutadale, be age ulita u mauña gerudu kare. 46 U mauña be chkeni, be gwage kwian lle boanga ama alin gdaitedige ama jigu lle boanga na ulita chugagwallale ama kle lle boi no u mauña gerudu kare, nga be suga noare kwian lle boanga edi ama skwendu u mauñage lle boi no u mauña gerudu kare. 47 Ulia cha gerule ba ole, kwian ene lle boi no ulita u mauña gerule kare gire ene u mauña be lle boanga e gbe lle amanu ulita manade. 48 Agwa kwian lle boanga u mauña alin me no, u mauña kwian ene jige lle boanga na ulita chugagwallale gire joge nga gwealege, lle boanga me no e be tañachuge mo tale: “Cha chugagwalla u mauña mi chieni blike, cha me lle boadale blike dale.” 49 Ama tañachuge ene, gire ama be age dagale lle boanga na ulita ole be lle boanga na ulita gbe boi tanre daga ngwale, ama be skate ule kwian lle gage janga ole, ama be sui chuge blire lle gage jai ule kwian ene ole. 50 Agwa gire chui gbaite kwian lle boanga me no e me kle mo chugagwalla u mauña manade ngwange me kle tañachuge chui baige chui mangirege chugagwalla be chieni, ama ni kle tañachuge ama chugagwalla be chieni giti, gire chui ege chugagwalla be chkeni. 51 U mauña kwian jigu lle boanga ama alin ulita chugagwallale, kwian e be skate u mauñage age me no, malen u mauña be ji gbe kweri kwian ene giti, ama me agedu u mauña gerudu kare, u mauña be ama mlienga, ama be joge boi daga ngwale ule kwian na agenga me no ulita ole, ne ngwadi ama be olire tanre be boi daga ngwale tirare —Jesu geru ñachugu ene kwian lle boanga u mauña alin giti, ene ñage suge trate kwian ulitage kwian mo ta gbadale age no Chube takalin kare diali Jesu chieni chuia manade ngwange ta giti.
1 Jesu geru na ñachugu kwian geru jwannga amage alin, Jesu gerudu: —Cha gerule ba ulita ole, chui bdaglige Chube be cha kageni gerule nga ulita giti kwian Chugagwallale, chui ege kwian gweale be kle mo ta gbaba biale no cha chieni chuia manade ngwange, agwa kwian na mi kle biale dale cha ngwange, ama me nu Chube gerua cha giti gaba ulia. Chui ege be boi salengwli kwian ulita ole boidu muinga judige gdataboko ole kare, muinga e ulita jo jichra dbe mo skatemanalla onbrella manade ngwange jonkare gadale ngwange onbre e mo jwen chuiage. 2 Muinga judige gdataboko ulita jo jichra dbe kwian onbre gai ngwange jonkare onbre mo jwen chuiage, muinga judi e gdatiga me kin jichra gwadegagda du ngle, ama jichra alin du kin ole llagli, ama me kin na du jichra gwadegagda nakwaite, ama me chagedu ta giti, ama me tañachugu kwian onbre ñage chke sbali, ama kaire manadale sbali. Agwa muinga na gdatiga ama tachku jichra gwadegagda ñage bidege, malen ama kin du ngle tkale jichrage, ama chagedu biale ta giti. 5 Muinga gdataboko kle mo skatemanalla onbrella manade ngwange ene jichra ole jonkare, agwa onbre e me chku blikare, muinga ulita skwatigu manade gire ama ulita gbigachiu, ama gbedu. 6 Agwa nga jere bduke chku gire muinga gdataboko ulitage geru sugedu, ngautre: “¡Ba skatemanalla kwian onbrella chiu! ¡Joga kwian onbre e gai ngwange jonkare!” 7 Ngautre ene amage gire muinga judi ulita chku bduge, ama jichra dodadu ene ama ñage joge ten kwian onbre ngwange. 8 Agwa muinga judi gdatiga ta me ama gerudu muinga gdatiga ta molen ole: “Ba kin kete chage sidri cha jichralla alin, cha jichralla me gwadenga no, jichra ta jogekalinda.” 9 Agwa muinga gdatiga ta molen gerudu: “Cha me ñage kin kete bage, cha kete bage kin me ñage chege cha alin ngle. Ma no ba joge kin chbadakle ngwadi ba ñage kin gige llani.” 10 Gire muinga judi gdatiga ta me ama jo kin gige kin chbadakle ngwadi, ama me kle gire ama skatemanalla onbrella chku. Muinga judi gdatiga ta molen, ama alin allabi onbre e gau ngwange no, muinga gdatiga e jo chiga ule onbre ole mo jwen chuia ollade, gire ugaka jegle ama ulita nate. 11 Boidu ene gire muinga na gdatiga chku ugakadi gerule: “¡Ugaka dégenga, cha jogekalin chiga!” 12 Gire kwian onbre be mo jwen ama kledu chiga jaindunga muinga judi gdatiga e kalen: “Cha gerule ulia ulia ba ole, cha me ba uñe, malen ba me ñage chie chiga chui ollade ule cha ulita ole.” Kwian onbre be mo jwen gerudu ene muinga judi gdatiga ta me ole, gire muinga e ulita chegu goga sugekare. 13 Jesu geru ñachugu ene gire gerudu: —Ene kaire ba ulita kledale ta giti cha chieni chuia manade ngwange muinga judi gdatiga ta molen kare. Ba ulitage me uñale cha be chieni chui mangirege malen ba kledale biale cha manade ngwange diali —Jesu gerudu ene ulita kwian geru jwannga amage ole. 14 Jesu geru ñachugu dare kwian geru jwannga ulita alin, Jesu gerudu: —Cha gerule ba ole, chui bdaglige Chube be cha kageni gerule nga ulita giti kwian Chugagwallale, chui e ngwange ba kledale biale, kwian ulita bai agedu cha takalin kare nga dba ai giti, kwian e alin cha be age no chui ege ama agedu no ñanale. Cha be chieni salengwli kwian chugagwalla jo nga batege chiuni kare. Kwian chugagwalla e bebi joge gire ama kwian lle boanga mau alin gdamai kadu mo gitigu gire igi ketu ama ulitage, ene kwian lle boanga e ulita ñage igi e gbe jrien ma ngle mo chugagwalla alin. 15 Kwian lle boanga gdaitege chugagwalla igi ketu ngle ngle cinco mil, lle boanga na gdaitege chugagwalla igi ketu ma bedrekanga ngeruge dos mil, lle boanga na gdaitege chugagwalla igi ketu un mil alin allabi ma sidri. Chugagwalla me igi ketu salengwli lle boanga gdamai ulitage, chugagwallage uñadu kwian lle boanga ama alin ta mine. Chugagwalla jo nga na batege. 16 Kwian lle boanga gdaite igi gau cinco mil mo chugagwallage, kwian lle boanga e lle gweale gigu igi e giti gire lle chbadu, kledu age ene gire igi jriendunga ama ole bitaboke tangle ma ngle, bdagli igi chku ulita ama ole ngle ngle diez mil. 17 Kaire agwe kwian lle boanga na gdaite igi gau dos mil mo chugagwalla alin, ama agedu kaire agwe, igi jriendunga ama ole bitaboke tangle ma ngle, ene ama igi litu ole ngle cuatro mil. 18 Agwa kwian lle boanga gdaite igi ma sidri igi un mil gau mo chugagwallage, kwian lle boanga e dbi bagu gire ne ngwadi ama igi e ulita ogo chugagwalla alin, ama ole igi me ñadu jriennga, igi chegu salengwli igi ketre batre amage kare. 19 ’Chui jo sbali gire kwian lle boanga chugagwalla chkuni ama kwian maidige, chugagwalla kwian lle boanga e kadu mo gitigu geru trage ama ole igi giti ama igi gbu jriennga mangire. 20 Kwian lle boanga igi ketrege ngle cinco mil, ama jo tienda ngeru chugagwalladige, ama gerudu: “Ba igi ketu cinco mil chage, cha igi na gau e batre cinco mil, igi ngle ngle ulita diez mil kle ai ba alin cha chugagwalla.” 21 Kwian lle boanga gerudu ene gire chugagwalla gerudu ama ole: “Ba kwian lle boanga no ulia, ba mo ta gbu lle boi no cha alin, ba agedu no no. Cha igi ketu bage, igi e ole ba lle bo no cha alin, ba igi na gau ngle cha alin. Ba lle bo no cha alin igi e ole, malen nege cha be lle ma kweri kete bage boadale cha alin. Nga suga no chadi ba lle bo no cha alin giti, bai cha ole chui ollade nga suga no ole.” Chugagwalla gerudu ene kwian lle boanga ngeru ole. 22 Kaire agwe kwian lle boanga gdaitege igi dos mil ketaba, ama jo tienda chugagwalladi, gerudu chugagwalla ole: “Ba igi ketu chage dos mil, cha igi na gau e batre dos mil, igi ulita cuatro mil kle ai ba alin cha chugagwalla.” 23 Kwian lle boanga gerudu ene gire chugagwalla gerudu ama ole: “Kaire agwe ba kwian lle boanga no ulia, ba mo ta gbu lle boi no cha alin, ba agedu no no. Cha igi ketu bage, igi e ole ba lle bo no cha alin, ba igi na gau ngle cha alin. Ba lle bo no cha alin igi e giti, malen nege cha be lle na ma kweri kete bage boadale cha alin. Nga suga no chadi ba lle bo no cha alin giti, bai cha ole chui ollade nga suga no ole.” Chugagwalla gerudu ene kwian lle boanga e ole. 24 ’Kwian lle boanga gdaitege igi un mil ketaba, ama jo tienda chugagwalladi gire gerudu: “Cha chugagwalla, chage uñale ba kibale ba kle kwian gbe lle boi mno ba alin bigire ba kle lle ulita jwen ama ngeru mau alin. 25 Ba kwian ene malen cha ta kendunga badi, cha tañachugu cha lle boi igi e giti igi e jogenga gire ba skochie chadige igi gdale, malen cha igi e ulita ogo dbiske, cha me igi na litu ole ba alin, nege cha igi amaña keteni bage.” 26 Gire chugagwalla jaindunga lle boanga e kalen: “Ba kwian lle boanga me no kaire ba kwian kianle tanre. Ba tañachugu chadi cha kle kwian gbe lle boi mno gire cha kle lle ulita jwen ama ngeru mau alin, e uñale bage ene ¿mineade ba me jo igi oge kwian kle igi oge ngwadi? Ene llani kwian na ñadu lle boi igi e giti, cha chieni gire ama igi na kete chage ma ngle cha igia kledu llani ñanale.” Chugagwalla gerudu ene kwian lle boanga me no ole. 28 Kwian na kledu ule ne ngwadi chugagwalla ole, kwian e ulita ama ole chugagwalla gerudu kwian lle boanga me no giti: “Cha igi ketu un mil amage ba igi e jwennga ama ngeru kete kwian lle boangage bai igi molen ma ngle diez mil. 29 Kwian ai lle boanga me no kianle tanre ba ama mlie siere cháge goga nga jereske, ne ngwadi ama be olire tanre ama be boi daga ngwale tanre ama agedu me no giti. Cha gerule ba ole, kwian bai lle boi no cha alin cha takalin kare, cha be lle na kete amage boadale cha alin, cha be age no no ama alin lle boi no cha alin ñanale. Agwa kwian bai me lle boi no cha alin cha takalin kare, kwian ene mi ñage lle boi cha alin dare.” Chugagwalla gerudu ene lle boanga ama alin giti. Jesu geru ñachugu ene kwian geru jwannga alin, ene ñage suge trate ama ulitage ama mo ta gbadale ulia lle boi no Chube alin Jesu chieni chuia manade ngwange. 31 Jesu gerudu dare kwian geru jwannga amage ulita ole: —Chube nu cha kagaba nga dba ai giti kwian kare, ama be cha kageni nabitaite kira kweri molen kwian ulita Chugagwallale. Cha chieni chuiage lle boanga Chube alin nga ngaña giti ngle be chie ule cha ole mo litaba chadi tangle, chui ege cha be gerule kwian ulita giti nga ulitage kwian bai Chube gerua gau ulia kwian bai me Chube gerua gau ulia. 32 Kwian ulita nga ulitamu dbabe cha gwa giti gire cha be kwian ta no gbe sugekare cha be kwian ta me no jige sugekare salengwli kwian bda mananga kle bda oveja gbe sugekare chivoge kare. Cha be kwian ta no Chube gerua gaba ulia gbe ko taingwli ngnagu, kwian ta me no me Chube gerua gaba ulia cha be ama gbe ko jole ngnagu. 34 Cha kwian ulita Chugagwalla be gerule kwian cha ko taingwli ngnagu ole: “Bai cha ole ba mangire batre Chube gerua gau ulia, cha Ñenua Chube no no ba ole ama age no ba alin diali. Nege nga no lle no kle dodaba ba alin nga ngaña giti Chube kle ngwadi, Chube nga ulita lle ulita dodadu unsuialin gwangerutabi gire ama nga dodadubi ama kle ngwadi ba mangire batre ngwange. 35 Ulia ba ulita agedu tanre no cha alin ai kare: Cha bli ole, ba bligda ketu chage. Cha siechiu, ba chi ketu chage jadale. Cha chagedu basale ba kledu toi ngwadi, ba me cha uñu agwa ba cha gau ngwange no, ba nga ketu chage gbengwa. 36 Cha me ñometra ole, ba ñometra ketu chage. Cha ogadu, ba diali cha manadu. Cha tkere skage, diali ba jo tienda chadi. Ba diali cha chudabo ene, malen nege ba ñage chege toi cha ole.” Chui bdaglige cha be gerule ene kwian ulita ole bai mo ta gbu age no. 37 Cha be gerule ene gire kwian ene ulita be geru kade chage: “Cha Chugagwalla, ¿ngaminegire cha gwagedu badi bli ole, gire cha lle ketu bage gutadale? ¿Ngaminegire cha gwagedu badi sie ole, gire cha chi ketu bage jadale? 38 ¿Ngaminegire ba chagedu basale cha kledu toi ngwadi, gire cha nga ketu bage gbengwa? ¿Ngaminegire ba me ñometra ole, gire cha ñometra ketu bage? 39 ¿Ngaminegire cha gwagedu badi oga, gire cha ba manadu? ¿Ngaminegire ba tkere skage, gire cha jo tienda badi?” 40 Kwian be geru kade ene chage, gire cha be jainnga: “Cha gerule ulia ba ulita ole, kwian tanre cha gerua gaba ulia me lle molen, ba kwian ene manadu no, ba lle ketu amage, ba ama chudabo, e salengwli ba cha agali chudabo kare.” 41 ’Cha kwian Chugagwalla be gerule no ene kwian ulita ole bai mo ta gbu age no kle cha ko taingwli ngnagu ole, gire cha be gerule kwian ulita ole bai mo ta gbu age me no kle cha ko jole ngnagu ole: “Joga siere chage, ba jiske kweri Chube gwa giti, ji kle ngle ba giti ba agedu me no gdale, joga nga dbigu giti, ne ngwadi jita me kle jogekeda dale, nga e kle dodaba biale ji chugangwa dolla chugagwalla Satanás alin kaire Satanás chudaboangalla ulita alin. ¡Joga nga ege kaire! 42 Ba agedu me no cha alin ai kare: Ba gwagedu chadi bli ole, ba me bligda ketu chage gutadale. Ba gwagedu chadi sie ole, ba me chi ketu chage jadale. 43 Cha jo chage basale ba kledu toi ngwadi, ba me cha gau ngwange no, ba me cha chudabo ba me nga ketu chage gbengwa. Ñometra me chegu cha ole, ba me ñometra ketu chage. Cha ogadu, ba me cha manadu. Cha kledu skage, ba me jo tienda chadi. Ba me cha chudabo, malen ba be boi daga ngwale ji chuge tanre.” 44 Chui bdaglige cha be gerule ene kwian ulita ole bai mo ta gbu age me no cha ole, gire ama be geru kade chage: “Cha Chugagwalla, ¿ngaminegire cha gwagedu badi bli ole, gire cha me bligda ketu bage gutadale? ¿Ngaminegire cha gwagedu badi sie ole, gire cha me chi ketu bage jadale? ¿Ngaminegire ba chagedu basale cha kledu toi ngwadi, gire cha me nga ketu bage gbengwa? ¿Ngaminegire ñometra me chegu ba ole, gire cha me ñometra ketu bage? ¿Ngaminegire ba ogadu, gire cha me ba manadu? ¿Ngaminegire ba tkere skage, gire cha me jo tienda badi?” 45 Kwian be geru kade ene chage gire cha be jainnga ama kalen: “Ulia ulia cha gerule ba ulita ole, ba me kwian cha gerua gaba chudabo lle me ama ole gire, ba me lle ketu amage e salengwli ba me cha agali chudabo kare. Ba me kwian ene chudabo, ene kaire ba me cha chudabo.” Cha be jainnga ene kwian mo ta gbu age me no kalen. 46 Cha be kwian mo ta gbanga age me no kage boi daga ngwale tanre nga dbigu giti chui diali chui tangle. Agwa kwian mo ta gbanga ulia cha ole age no cha takalin kare, kwian ene be joge toi nga ngaña giti cha ole kaire cha Ñenua Chube ole diali chui tangle —Jesu gerudu ene ulita kwian geru jwannga amage ole.
1 Jesu kwian geru jwannga amage ulita ta gbu ene Jesu chieni chuia giti gire Jesu gerudu dare ama ulita ole: 2 —Bage uñale chui chegu gbabokle alin allabi gire Pascua chuia chke chui olladangwa, chui ege cha gabe cha ketabe gwaleda kruge —Jesu gerudu ene kwian geru jwannga amage ulita ole. 3 Kwian gerunga Chube ole daba alin chugagwalla ulita kaire kwian israelita chugagwalla juma ulita, kwian e ulita mo litu kwian kada Caifás ullage, Caifás kwian gerunga Chube ole chugagwalla ma kweri. 4 Ne ngwadi kwian e ulita mo litu mo ten sugekare Jesudige mo kaire, ama ulita mo ta gbu age gweale skwlenre Jesu gai dbale skage Jesu gwangeda. 5 Kwian e ulita gerudu modi: —Che me ñage age gweale Jesu dollale Pascua chuiage, kwian tanre be kle chui ege chui ollade una aige, che age me no Jesu ole kwian ngleaske gire kwian ulita be kira bate modi Jesu gdale, ma no che chui na manade kwian ngle me kle mo litaba una aige gire —kwian israelita chugagwalla ulita gerudu ene modi. 6 Jesu jo chke una Betaniage ule kwian geru jwannga amage ulita ole, ama ulita jo Simón ullage blire Simón ole ule. Ngeru Simón e amaña chagedu oga kwara tuge jingmea kada lepra ole agwa ama jogeba chkeni noni, Simón e ngwadi Jesu jo blire kwian geru jwannga amage ole, ama ulita kledu blire gire muinga gdaite chku Jesudige lle ñachke no kada nardo chia dbe lle gweale limeta soli karege tkale Jesu chuga giti, nardo e kwangleare. Muinga nardo chia e ulita oto Jesu chuga giti. 8 Kwian geru jwannga Jesuge ulita gwagedu muingadi nardo chia ote Jesu chuga giti, gire ama ulita ta skochiu muingadi nardo chia gdale, ama ulita gerudu modi muingadi: —¿Mineade muinga nardo chia kwangleare kagunga ngwale? 9 Muinga ñadu nardo chia chbade kwangleare, ene ama ñadu kwian me lle molen chudaboi nardo chia ñanalla giti. 10 Jesuge chku uñale kwian geru jwannga amage ulita gerudu ene modi muingadi gire Jesu gerudu kwian geru jwannga ulita ole: —Muinga ai agedu no no cha alin, ¿mineade ba kle mo ta dbe gerule me no amadi ama nardo chia oto cha chuga giti gdale? 11 Cha gerule ba ole, kwian me lle molen be kle toi diali ba ulitaske, chui ngle kle ba alin kwian me lle molen chudaboale, agwa cha mi chege toi diali aini baske. 12 Me sbali cha be jogekeda, muinga ai nardo chia oto cha chuga giti cha jegwale gbe biale cha jaba ogabe chuia ngwange. 13 Cha gerule ulia ba ole, chui aige gwangerugu nga ulitage baini kaire geru no cha giti be joge tragaba kwian ole ngwadi, nga e ulitage geru muinga ai agedu no cha alin giti be joge tragaba kaire, ene kwian nga e ulitage be tachke diali muinga ai agedu giti cha alin. 14 Jesu gerudu ene kwian geru jwannga Jesuge gdataboko giti gdaboke ole gire ama gdaitea kada Judas-Iscariote jo tienda kwian gerunga Chube ole chugagwalla ulitadi, 15 Judas-Iscariote gerudu kwian e ulita ole: —¿Ba takalin igi kete mangire chage Jesu ñanale, ene cha Jesu kete bage gadale gwangeda? Kwian gerunga Chube ole chugagwalla ulita ta Jesu gakalin ama kle biale, ama ulita gerudu Judas-Iscariote kalen: —Cha igi treinta kete bage Jesu kete ñanale. 16 Chui ege gwangerugu Judas-Iscariote kledu kote Jesu ole Jesu gdea tke baini Jesu be kle gballa gire ama Jesu kete gwaleda. 17 Pan me dodadre levadura ole gute suia chku, chui gwangeage kwian israelita ulita diali Pascua chuia ollade, chui e chku gire kwian geru jwannga Jesuge ulita chku Jesudi geru kadu Jesuge: —¿Baini ba takalin cha bli jinade che ulita alin gutadale Pascua chuia olladale ule? ¿Che be blire baini? 18 Jesu jaindunga: —Joga una Jerusalénge ba ten kwian gdaite ngwange, amage ba gerule: “Cha tkanga tangle geruge cha kagu gerule ba ole, ama gerudu: ‘Cha chuia kle kodi jogeda, nege cha ta jogekalin ba ullage Pascua chuia ollade bdagli ule kwian geru jwannga chage ulita ole.’ ” Ba geru kete ene kwian ege. 19 Jesu gerudu ene kwian geru jwannga amage ole gire kwian geru jwannga agedu ulita Jesu gerudu kare, kwian geru jwanngage u skwendu, ama bligda jinadu u ege Pascua chuia olladale. 20 Jesu jo u bligda jinadre ngwadige, nga jo jere ngabi gire Jesu toiba dba blire ule kwian geru jwannga amage gdataboko giti gdaboke ole. 21 Ama ulita kledu blire gire Jesu gerudu: —Cha gerule ulia ba ulita ole, ba ulita kle aini blire ule cha ole gdaite be cha kete kwian cha dollalege gwaleda. 22 Kwian geru jwannga Jesuge ulita Jesu keruchugu gerule ene gire kwian geru jwannga ulita ta chegu olire tanre mo tale, kaire ama ulita gdaite gdaite geru kadu Jesuge: —¿Chema be age ene ba dollale? ¿Cha? 23 Jesu jaindunga: —Ba kwian geru jwannga chage ulita kle blire ule cha ole aini kle pan bita gbe date bligda chiaske batekwa amaña giti cha ole, ba gdaite e be cha kete gwaleda. 24 Cha chiu nga dba ai giti kwian kare, ulia cha ketabe boadale daga ngwale gwaleda Chube gerua degaba unsuialin kle gerule kare. Agwa kwian onbre bai be cha kete boadalenga daga ngwale gwaleda ama be boi dageare daga ngwale tanre ama agedu cha ole kbiale, ma no ama alin ama me medunga chebia kote dale. 25 Jesu gerudu ene kwian geru jwannga ulita ole gire geru jwannga gdaite kada Judas-Iscariote ama be Jesu kete gwaleda, amaña e geru kadu Jesuge: —Cha tkanga tangle geruge, ¿chema be age ene ba dollale? ¿Cha? Jesu gerudu: —Ima, ba amaña be age cha dollale —Jesu gerudu ene Judas-Iscariote ole. 26 Kwian geru jwannga Jesuge kledu blire ule Jesu ole, gire Jesu pan gau kote gerudu Chube ole pan giti: “Cha Ñenua, noare ba pan ai ketu cha ulitage gutadale.” Jesu gerudu ene Chube ole pan giti gire Jesu pan skutunga ketu kwian geru jwannga kaire kairege gutale, Jesu gerudu: —Ba pan ai gute, pan ai cha uda kare. 27 Gire Jesu chi jangwa gau kote uva chia ole, Jesu gerudu Chube ole uva chia giti: “Cha Ñenua, noare ba uva chia ai ketu cha ulitage jadale.” Jesu gerudu ene Chube ole uva chia giti gire ama uva chia ketu kwian geru jwannga kaire kairege jadale, Jesu gerudu: —Ba ulita uva chia ai jai, uva chia ai cha be kare, cha jogeda giti be suge trate ba ulitage Chube kle geru jagere gbe kwian ulita alin cha giti, nege gwangerugu cha jogeda giti kwian ulita bai kaire cha gai ulia be chege no trate Chube gwa giti, kwian e agedu me no Chube be talla mlienga ulita. 29 Cha geru kete bage, nege alin cha kle uva chia jai ba ole ule, agwa nege gwangerugu cha mi kle ba ole dare ba gatedi uva chia jai ule nga dba ai giti. Chui bdagli be chke gire cha Ñenua Chube be cha gbe gerule kwian ulita giti kwian Chugagwallale, gire chui ege cha be uva chia jai nakwaite ule ba ole —Jesu gerudu ene geru jwannga amage ulita ole. 30 Blidubi gire ama ulita mo gatu no Chube giti, gire ama ulita jo siere nga ege, ama ulita jo chage Ngwiskinro Jwichugalla ngnagu. 31 Jesu gerudu kwian geru jwannga amage ulita ole: —Cha gerule ulia ba ulita ole nege, nege ngajrege ba ulita be cha chuge ngwadi boidale daga ngwale gballa Chube gerua degaba unsuialin tangle kle gerule kare, Zacarías Chube gerua degu cha giti kaire ba ulita giti, chada e gerule: “Chube gerudu: ‘Cha be kwian oveja mananga chuge ngwadi kagadale kodi gire oveja ulita be kige.’ ” Zacarías Chube gerua degu ene unsuialin. 32 Cha be jogeda, cha jaba be chkeni gwadeni Chube kiralla giti gire cha be joge nga Galileage ma ngeru ba ulitage, ba be joge cha nate gire nga ege che be mo lite ule. 33 Jesu gerudu ene kwian geru jwannga ulita ole gire Pedro gerudu Jesu ole: —Kwian geru jwannga na ulita be ba chuge ngwadi agwa cha me dale, cha mi ba chuge ngwadi jogeda gballa. 34 Jesu gerudu Pedro ole: —Cha gerule ulia ba ole, nege ngajrege ngakamalin bdugu antalan bebi ngwane gire ba agali be gerule bitamai kwian na ole ba me cha uñe. 35 Pedro ka bo mno Jesu ole: —Cha me dale, cha me mo tallade cha jogekeda ba ole ule, cha mi gerule kwian ole cha me ba uñe, cha be chege ba ole diali. Pedro gerudu ene, kaire agwe kwian geru jwannga Jesuge na ulita kledu eni gerudu salengwli Pedro gerudu kare. 36 Jesu kledu Ngwiskinro Jwichugallage ule kwian geru jwannga ulita ole gire ama ulita jo nga kada Getsemaníge, ne ngwadi Jesu gerudu kwian geru jwannga ulita ole: —Ba ulita toi dba aini sugeti cha manade, cha be joge sugekare gerule Chube ole gballa. 37 Jesu gerudu ene gire Jesu jo Pedro dbe kaire Zebedeo kirolla gdaboke dbe mo ole llagli. Jesudi nga chiu olire tanre ama be boi daga ngwale giti, 38 ta ene ole Jesu gerudu kwian geru jwannga gdamai e ole: —Cha ta olire tanre mo giti cha be boi daga ngwale giti, suge chage cha me jage tañachuge e giti. Cha joge sugekare gerule Chube ole, cha takalin ba gdamai chege aini ngmadi cha manade, ba chegedale ta giti gwade ba me mo chuge ngwadi gbe, ba jagedale gbiga kote gwade. 39 Jesu gerudu ene kwian geru jwannga gdamai ole gire Jesu jo chage ma ngerugu sidri sugekare gballa, ama mo ñeu kaboge jongnagwa giti ama gwa ñadu dbidi gire ama gerudu Chube ole: “Cha Ñenua, cha me ta boikalin daga ngwale, cha me takalin ba kwian me no chuge ngwadi cha gweda, ba takalin ba ñage cha jwen siere cha be boi tirarege, agwa ba age cha alin mo tale ba takalin kare, me cha takalinge kare.” 40 Jesu gerudu ene Chube ole gire joni naskuni kwian geru jwannga amage gdamai kledu manade ngwadige, kwian geru jwannga e ulita skwendu Jesuge gbe, gire Jesu gerudu Pedro ole: —¡Chkede bduge! ¿Ba gdamai me ñadu chege gwade sugeti alin cha manade? 41 Ba ulita mo ta gbadale chege gwade, ba gerudale Chube ole mo chudaboi kade amage, ene ba me ta jwlite joge siere cháge age me no. Uñale chage ulia ba ta agekalin ulita cha kle gerule kare agwa ba me kira molen age cha takalin kare, malen ba gerudale Chube ole kira kade amage mo alin. 42 Jesu gerudu ene gire Jesu jo sugekare nakwaite gerule Chube ole: “Cha Ñenua, ba me takalin cha jwen siere cha be boi daga ngwalege, ba ñage age ulita ba takalin kare cha ole.” 43 Jesu gerudu ene Chube ole gire ama joni naskuni kwian geru jwannga gdamaidini gire nakwaite kwian geru jwannga e ulita skwendu Jesuge gbe, ama me ñadu chege gwade chuge, ama gbigachiu tanre ama gwagwa kledu jegaba gbiga kote. 44 Jesu jo sugekare gerule nakwaite bitamaige tangle Chube ole, Jesu geru amaña ama gerudu Chube ole giti ngeru jun kate bitamaige tangle. 45 Jesu gerudubi ene ulita Chube ole gire ama jo naskuni kwian geru jwannga gdamai kledu gbe ngwadi, Jesu gerudu ama ulita ole: —¿Ba kle chage gbe kaire? ¡Chkede bduge! Nege cha boabe daga ngwale gwaleda chuia chku. Chube cha kagu nga dba ai giti kwian kare, nege sugeti cha ketabe kwian cha dollalege boadale daga ngwale gwaleda kwian agenga me no kote. Nege nege kwian cha ketanga kwian cha dollalege chiu kodi, ale ten ama ngwange jonkare. 47 Jesu kle gerule ene kwian geru jwannga amage ole gire kwian geru jwannga Jesuge na gdaite kada Judas-Iscariote chku ule guardia donga nglea ole Jesu kle ngwadi, guardia donga e gweale chku sbadi ole na chku glita ole. Kwian gerunga Chube ole daba alin chugagwalla ulita kaire kwian israelita chugagwalla juma ulita, kwian e ulita nu guardia donga ngle kagaba Jesu gai dbale skadi. 48 Guardia donga ulita bebi joge Jesu nate ule Judas-Iscariote ole gire Judas-Iscariote nu geruba: “Kwian gdaite bai cha be sobade, ama chkedale uñale bage e Jesu, ba kwian e amaña gai dbale skadi.” 49 Judas-Iscariote jo chke Jesudige, gerudu Jesu ole: —Cha tkanga tangle geruge, ¿che kle mine? Judas-Iscariote gbi kadu ene Jesuge gire ama Jesu sobadu. 50 Jesu gerudu Judas-Iscariote ole: —Cha skatemanalla, ba chiu age cha ole, agede ene blike ba takalin kare. Jesu gerudu ene Judas-Iscariote ole gire guardia donga ulita jo Jesu gitigu ama Jesu gau dbale skadi. 51 Boidu ene Jesu ole gire kwian geru jwannga ulita kle chage Jesu ole ama gdaite sbadi junnga kwarage, sbadi giti ama kwian gdaite ologa gaite tkunga ulita, kwian ologa jo tkabanga, kwian e lle boanga kwian gerunga Chube ole chugagwalla ma kweri alin. 52 Kwian geru jwannga kwian ologa tkunga ene gire Jesu gerudu ama ole: —Ba mo sbadilla gbe naskuni sbadi kwarage. Cha gerule ba ole, kwian bai kle kira bate sbadi giti kwian ene gwabeda sbadi giti kaire agwe. 53 ¿Me uñale bage cha takalin cha ñage gerule nege cha Ñenua ole chudaboi kade amage? Gire blike ama be lle boanga ama alin nga ngaña giti ngle ngle kage cha chudaboi cha jwen siere cha dolla kote. 54 Agwa cha mi age ene, cha age ene gire me ñage boi ulita cha ole Chube gerua degaba unsuialin gerule kare, Chube gerua kle gerule kwian agenga me no be cha gbe boi daga ngwale. 55 Jesu gerudu ene kwian geru jwannga ole gire Jesu geru kadu kwian Jesu dolla ulitage: —¿Mineade ba ulita kle chage sbadi ole glita ole cha gai nate kwian jiskenga kare? Ba kle age cha ole salengwli ba age kwian agenga me no me no ole kare. Chui ulitage diali cha kledu ba ulita gwa giti kwian tke tangle u gerungwa Chube olege agwa ni bitaite ba cha gau dbale skadi cha kledu gerule giti. 56 Kwian tanre Chube gerua ketanga Chube gerua degu unsuialin, chada e gerule cha be boi giti, nege ba kle age cha ole, e ulita kle boi ulia Chube gerua degaba unsuialin gerule kare. Jesu gerudu ene ulita kwian Jesu dolla ulita ole gire kwian geru jwannga Jesuge ulita jo kige, ama ulita Jesu chugu ngwadi boi daga ngwale gballa. 57 Kwian Jesu ganga dbale skage, ama ulita Jesu du kwian gerunga Chube ole daba alin chugagwalla ma kweri ullage, chugagwalla e kada Caifás. U ege kwian israelita chugagwalla na ulita kledu mo litaba, kwian daba tkanga tangle Moisés chadalla giti ulita kaire kwian israelita chugagwalla juma ulita, kwian e ulita kledu mo litaba Jesu manade ngwange. 58 Pedro jo chage gwage bate Jesu nate jo chke chege goga kodi uge kwian gerunga Chube ole daba alin chugagwalla ma kweri ullage, ne ngwadi Pedro toidu dba ule guardia u gerungwa Chube ole mananga ngle ole, Pedro kledu gwage ne ngwadi ene chke uñale Pedroge Jesu boabe mine bdagli. 59 Kwian gerunga Chube ole daba alin chugagwalla ulita kaire kwian israelita chugagwalla kweri na ulita kle mo litaba u ege jennga Jesudi, ama ulita kledu kwian gweale jinade gerule ngwale Jesu dollale Jesu gbagda jiske, ene kwian israelita chugagwalla e ulita ñage Jesu gwangeda Jesu agedu gweale gdale. 60 Kwian tanre chiu chugagwalla ulita mo litaba ngwadi geru gweale jinade ngwale Jesu dollale agwa ni kwian gdaite e gerua ngwale giti chugagwalla ñadu Jesu gbe jiske Jesu gwangeda, ama ulita me kle gerule ulia Jesu giti. Bdagli kwian gdaboke chku gerule me no Jesu giti, 61 kwian e gdaboke gerudu: —Cha Jesu keruchugu gerule ene: “Cha ñage u gerungwa Chube ole skiendba ulita gire chui gbamaire alin cha ñage u gbeni naskuni no biale.” Cha Jesu keruchugu sole ngwale ene, ama gerudu giti chage suge ama kle mo gbe kweri Chube kare, Chube alin allabi ñage age ene ama gerudu kare ama me Chube. 62 Kwian gdaboke gerudu ene gire kwian gerunga Chube ole chugagwalla ma kweri chku gdate geru kadu Jesuge: —¿Mineade ba me kle jainnga gerule mo giti kwian boke e kalen? Ama kle gerule ba dollale, ¿ama kle gerule ulia ba giti o me? 63 Kwian gerunga Chube ole chugagwalla ma kweri gerudu ene Jesuge agwa Jesu me jaindunga dale, Jesu chegu kamne. Kwian gerunga Chube ole chugagwalla ma kweri gerudu nakwaite Jesu ole: —Cha gerule ba ole Chube gwa giti, Chube kle gwade ama kle che keruchuge che kle gerule giti, malen ba gerudale ulia mo giti cha ulita ole: ¿Ba Cristo, Chube nu ba kagaba ulia kwian alin o me? ¿Ba Chube Kirolla ulia o me? 64 Jesu jaindunga: —Ima, cha amaña ba ulita kle gerule kare, cha Chube Kirolla. Cha gerule ba ulita ole, Chube kira molen tanre ulita, ama cha kagu kwian kare nga dba ai giti, chui be chke gire ba ulita be gwage chadi toiba dba Chube ko taingwli giti nga ngaña giti kwian ulita Chugagwallale, bdagli cha be chieni bogakwaske nga ngaña giti ba ulita gwa giti. 65 Kwian gerunga Chube ole daba alin chugagwalla ma kweri Jesu keruchugu gerule ene gire ama skochiu Jesu gerudu giti, ta skochie ene ole ama ñometra modige gagunga, ama gerudu kwian chugagwalla na ulita ole Jesu giti: —Ba ulita onbre ai keruchugu gerule ama Chube Kirolla Chube nu ama kagaba. Ama kle gerule ene mo giti ama kle gerule Chube dollale. Ama kle mo gbe jiske agali ama kle gerule giti, malen che me kwian jinade dare gerule amadi ama gbagda jiske. 66 ¿Ba ulita tañachuge mine ama giti? ¿Che age mine ama ole? Kwian chugagwalla mo litaba ole ulita jaindunga: —Ama jiske tanre ulia, ama jogedaleda ama gerudu Chube dollale kbiale, che ama gwangeda. 67 Kwian chugagwalla ulita gerudu ene gire ama gweale jolo tku Jesu gwadige ama Jesu batu, na Jesu batu gwage, 68 gire geru kadu Jesuge Jesu gbe kidegda: —Ba kle gerule ba Cristo, e ulia gire gerule cha ole, ¿chema kle ba bate gwage? 69 Jesu kle boi ene gwa Caifás ullage gire Pedro kledu manade goga jita ngwachuge. Muinga gdaite lle boanga chugagwalla ma kweri alin kledu eni, ama chku Pedrodige gerudu Pedro ole: —Ba kaire kledu chage ule Jesu nga Galileamu ole. 70 Pedro gerudu muinga ole kwian ulita gwa giti: —Me dale, cha me ama uñe dale, ni uñale chage ba kle llema geruade cha ole. 71 Pedro gerudu ene gire Pedro jo manade ugakage, eni muinga lle boanga na gdaite gwagedu Pedrodi gerudu kwian na ole Pedro giti: —Kwian onbre e kledu chage ule Jesu una Nazaremu ole. 72 Pedro muinga lle boanga e keruchugu gerule ene gire Pedro gerudu nakwaite: —Cha gerule ulia ba ole Chube gwa giti, cha me kwian onbre e uñe dale. 73 Sugeti kwian na ulita kledu eni Pedroge kodi jo Pedro gitigu gerudu Pedroge: —Kwian mneite chagedu Jesu ole diali, suge chage ulia ulia ba kwian ene gdaite. Ba gerule kwian nga Galileamu kare, ba kerua chege Jesu kle gerule kare, e giti suge chage ba ama chagemanalla ulia. 74 Pedro kwian keruchugu gerule ene gire ama ta skochiu tanre e gdale, ama gerudu: —Cha gerule ulia ulia ba ulita ole Chube gwa giti, cha me kwian onbre e ba kle gerule giti uñe. Cha me kle gerule ulia ba ole, gire ene Chube ñage cha gbe ji chuge tanre e gdale. Pedro gerudu ene gire sugetibi allabi antalan ngwanedu, 75 blikare Pedro tachku Jesu gerudu giti ama ole ngeru: “Antalan bebi ngwane gire ba agali be gerule bitamai kwian na ole ba me cha uñe.” Pedro tachku Jesu gerudu ene giti gire Pedro jo sugekare, ama olidu tanre tanre ama gerudu Jesu dollale giti.
1 Nga chku ju gire kwian gerunga Chube ole daba alin chugagwalla ulita kwian israelita chugagwalla juma ulita mo ta gbu salengwli biale Jesu gweda giti, 2 kwian e ulita Jesu ko lugangu, ama Jesu du chugagwalla gobernador Pilato ngwadi gbale jiske Pilatoge, Pilato kwian nga Romamu ama kwian nga Judeamu chugagwalla. 3 Judas-Iscariote Jesu ketanga kwian Jesu dollage, ama gwagedu Jesudi mo dbange gbale jiske gire ama tale sugedu amage ama agedu me no Jesu ole. Judas-Iscariote ta olidu tanre ama tañachugu mo tale: “Ma no cha me agedu ene Jesu dollale.” Judas-Iscariote tañachugu ene malen ama mo ta gbu igi treinta Jesu ñanalla keteni naskuni kwian israelita chugagwalla ulitage, ama jo u gerungwa Chube olege kwian gerunga Chube ole daba alin chugagwalla ulita kaire kwian israelita chugagwalla juma ulita kle mo litaba ngwadi, 4 Judas-Iscariote gerudu kwian e ulita ole: —Cha agedu me no Jesu ole, cha Jesu ketu ba ulitage gwaleda agwa cha gerule ba ole ama me jiske, ama agedu no diali kwian ulita alin, malen cha chiuni igi keteni naskuni bage. Gire kwian chugagwalla ulita jaindunga: —Ba me chie gerule cha ole e giti, cha ulita me kle tañachuge ba agedu giti, e ba agedu me cha agedu. 5 Kwian gerudu ene Judas-Iscariote ole gire igi treinta Jesu ñanalla Judas-Iscariote mliunga dba gwa ne ngwadi u gerungwa Chube olege. Judas-Iscariote agedu ene gire ama jo siere u ege jo nga sugekarege, nga ege Judas-Iscariote giska tku mo siroge, ama mo guda agali. 6 Kwian gerunga Chube ole daba alin chugagwalla ulita igi e jun nate gire gerudu modi igi giti: —Igi ai kwian gwabeda bea ñanalla, geru gbaba che ulita alin gerule che me ñage igi ai kare tke igi ogangwage u ai gerungwa Chube olege. 7 Kwian gerunga Chube ole chugagwalla ulita geru tragu modige igi giti, gire bdagli ama ulita mo ta gbu dbi gige igi e giti, gire dbi ege kwian ñage kwian me una Jerusalénmu jaba tke dbige, ene kwian una namu jogekeda ama kle una Jerusalénge gire, nga kle ama jaba tkangwa dbige. Kwian dbi jutre jwdetigenga dodanga jogdale kaire lle na tanrere, kwian ege kwian gerunga Chube ole daba alin chugagwalla ulita dbi gigu. 8 Dbi e jo gigaba ene kwian ege igi Jesu gwabeda bea ñanalla giti, malen dbi e ka gbere “Be Ngalla”, kadakle ene kaire nege tangle. 9 Ai boidu ene ulita kwian Chube gerua ketanga kada Jeremías Chube gerua degu unsuialin tangle kare, chada e gerule: “Igi treinta galeni naskuni kwian israelita ketu batre kwian gwabeda ñanale. 10 Igi e giti dbi gigle kwian dbi jutre jwdetigenga dodanga jogdalege, ulita boidu salengwli Chube gerudu kare cha ole.” Jeremías Chube gerua degu ene unsuialin tangle. 11 Jesu dbajo chke kwian nga Judeamu chugagwalla Pilato ngwadige, Pilato geru kadu Jesuge: —¿Ba kwian israelita ulita chugagwalla kweri? Jesu jaindunga Pilato kalen: —Ima, cha amaña ba kle gerule kare. 12 Jesu gerudu ene gire kwian gerunga Chube ole daba alin chugagwalla ulita kaire kwian israelita chugagwalla juma ulita me chegu ta chuge Jesu gbe jiske Pilatoge ama ulita gerudu tanre me no Jesu giti, agwa Jesu chegu kamne kwian ulita keruchuge alin. 13 Gire Pilato geru kadu Jesuge: —Kwian ulita kle ba gbe jiske, ¿ba me kle ama ulita keruchuge gerule ba dollale? ¿Mineade ba me gerule mo giti? 14 Agwa Jesu ni gerudu gbaite, Jesu chegu kamne me jaindunga dale kwian ulita kalen kaire Pilato kalen, malen Pilato chegu tañachuge tanre Jesu giti mineade Jesu me kle gerule mo giti ni sidri. 15 Diali Pascua chuiage chura kaire kaire Pilato kwian ageba me no kle skage gweale gdaite skajwanngenga kwian ulita takalin kare. 16 E suiale kwian gdaite agenga tanre me no kada Barrabás kledu skage agedu me no gdale. Kwian ulitage uñadu Barrabás agedu tanre me no malen e gdale ama kle skage. 17 Kwian nglea ulita kledu mo litaba Pilatodi Jesu giti, Pilato geru kadu amage: —¿Ba ulita takalin cha chema skajwanngenga, cha Barrabás skajwanngenga o cha Jesu amaña kada Cristo skajwanngenga? 18 Pilatoge uñadu ulita trate kwian israelita chugagwalla ulita semadu tanre Jesu ole, malen ama ulita Jesu du Pilatoge Jesu gbe jiske gwaleda. 19 Pilato kledu manade toi dba kle lle boi ngwadige gire Pilato muira geru kagu Pilato alin Pilato ta gbagda: “Ba me age me no sidri onbre e ole, ama kwian no ama me jiske. Ngajrege cha gbi chugu tirare ama giti, e giti cha chegu tañachuge tanre chui ulita nege, ma no ba me age ama ole.” Pilato muira geru kagu ene Pilato alin agwa Pilato me geru e talladu. 20 Kwian gerunga Chube ole daba alin chugagwalla ulita kaire kwian israelita chugagwalla juma ulita kwian ulita kledu eni ta gbu chke gerule Pilato ole Barrabás giti Pilato Barrabás skajwanngenga, ene Jesu chege Barrabás taneage gwaleda. 21 Gire Pilato geru kadu nakwaite kwian ulitage: —¿Kwian gdaboke ai bai ba takalin cha skajwanngenga? Kwian ngle ulita jaindunga: —Cha takalin ba Barrabás skajwanngenga. 22 Gire Pilato geru kadu: —Cha Barrabás skajwanngenga, gire ¿cha be age mine Jesu amaña kada Cristo ole? Kwian ulita jaindunga: —¡Ama gwangeda kruge! 23 Pilato gerudu: —¿Mineade ba takalin cha ama gwangeda kruge? Chage suge trate ni ama agedu me no sidri, ¿llema giti ama jiske? Kwian ulita ngautu ma kweri Jesu dollale: —¡Ama gwangeda kruge! 24 Pilato gwagedu kwian ngle ulita kledu skochie ma ngle Pilatodi Jesu giti, ta skochie ene ole kwian ngle ulita ñage mo ta gbe dole tirare, malen sugedu Pilatoge ngwale ama gerule dare kwian ngle ole Jesu giti, kwian mi ta jwlite dale Jesu giti. Gire Pilato chi kadu mo ko gligagda kwian ulita gwa giti, Pilato tañachugu age ene Pilato ñage chege trate Chube gwa giti me chege jiske Jesu giti, Pilato mo ko gligu kwian ngle ulita gwa giti, ama gerudu: —Cha me jiske dale onbre ai giti, bage uñale ba be age mine kaire ama ole, ba be ama gweda, ama jia be chege ba ulita alin me cha alin. 25 Kwian ngle ulita gerudu Pilato kalen: —Chage suge onbre ai jogeda gdale jia mi kle ni kwian gdaite alin, agwa onbre ai jogeda gdale jia ulia kle, e be chege cha alin kaire cha chudalla ulita alin onbre ai gweda gdale. 26 Kwian ngle ulita gerudu ene Pilato ole, gire Pilato Barrabás skajwanngunga. Pilato Jesu batangu ngeru gire Pilato Jesu ketu kwiange kwian ulita takalin kare Jesu gwaleda kruge. 27 Guardia donga Pilato alin Jesu du Pilato ulla kwerige gwa gire eni guardia donga e ngle ulita mo litu Jesudi tangle kidere Jesudi. 28 Guardia donga Jesu ñometralla junnga Jesudige, ama Jesu ngama tku kwian chugagwalla kweri nga dba aimu kle mo ngama tke kare, ñometra e kareske Jesu jo ngama tkaba. 29 Kaire guardia donga giska kobaske bliu Jesu chuga batreti gire batu Jesu chugaske, guardia donga glita kliu Jesu ko taingwli kote. Guardia donga Jesu ngama tku ene ulita gire ama ulita jongnagwa skutu dba Jesu gwangnagu ngaute kweri Jesu gbe gidagda, ama gerudu Jesu ole kidere: —¡Ba kwian israelita ulita chugagwalla kweri noare, ba chege no kweri kwian ulita gwa giti! 30 Guardia donga ulita gerudu ene Jesu ole ta me no ole, gire ama jolokwa tku Jesudi, kaire glita klire Jesu kote guardia donga glita e amaña junnga Jesuge kote glita e amaña giti guardia donga Jesu batu chugage. 31 Guardia donga agedu ene ulita kidere Jesudi, gire ama ñometra chada dabere junnga Jesudige, ama Jesu ngama tkuni naskuni Jesu ñometrallaske, gire ama ulita jo Jesu dbe gwaleda kruge. 32 Guardia donga ulita jo Jesu dbe kru ole nga Jesu gwabeda ngwadi, gire jonkare guardia donga tendu onbre kada Simón ngwange, Simón una Cirenemu, guardia donga Simón gau gbu Jesu krulla dbe. 33 Guardia donga ulita jo chke Jesu dbe nga kada Gólgotage, kaire nga e amaña kada Calavera, nga ege Jesu dule gwaleda. 34 Guardia donga bebi Jesu bate clavo giti kruge gire ama uva chia dage tugebanga gdege gageske ketu Jesuge jadale, Jesu uva chia e manachugu allabi gire me jaindu jai dare. 35 Guardia donga Jesu gbu kruge ngaña, gire Jesu ñometralla jo jwanbanga Jesudige, ñometra e ulita guardia donga ulita girabatu modi guardia donga bai kaire blachku ole. 36 Guardia donga ulita toidu dba Jesu kle kruge ngaña ngwadi, ama ulita chegu gwage Jesudi Jesu manadedi. 37 Jesu chuga giti ngaña Jesu krullage chada degle gbere, chada e gerule: “Kwian ai kada Jesu ama kwian israelita ulita chugagwalla kweri rey.” 38 Kaire kwian na gdaboke gbere kru na gdabokege ule Jesu ole, kwian e gdabonate agenga me no kwian skwe boanga, gdaite gbere kruge Jesu ko taingwli ngnagu giti, gdaite gbere kru nage Jesu ko jole ngnagu giti. 39 Kwian ulita bai kaire kledu joge tangle Jesu kle kruge ngaña ngwadi, kwian e ulita gwagedu Jesudi kruge gire kwian chuga mliunga kidere Jesudi, 40 ama gerudu me no tanre Jesu ole: —¿Ba amaña me gerudu ba ñage u gerungwa Chube ole skiendba ulita gire chui gbamaire alin ba ñage u e gbeni naskuni no biale? Ulia ba Chube Kirolla, gire ba mo jwennga kruge agali, ¡bai dbige kruge! 41 Kwian ulita jo tangle Jesu kledu kruge ngwadi gerudu ene kidere Jesudi, ene kaire kwian gerunga Chube ole daba alin chugagwalla ulita, kwian daba tkanga tangle Moisés chadalla giti ulita, kwian israelita chugagwalla juma ulita, kwian e ulita kledu eni, ama kidedu tanre Jesudige, kwian e ulita gerudu me no modige Jesu giti: 42 —Ama ñadu kwian na tanre chudaboi agwa ama me ñage mo chudaboi agali dale mo jwennga kruge. Ama kwian israelita chugagwalla kweri ulia ama mo jwanlenga agali kruge, ene be suge che ulitage ama ulia Chube Kirolla gire che be ama gai ulia. Ama agali gerudu mo giti ama Chube Kirolla ama nu mo ta gbaba Chube ole, ulia ama Chube Kirolla ama gerudu kare, ulia Chube no ama ole, ¿mineade Chube me ama jwen siere ama kle boige nege? 44 Kwian israelita chugagwalla ulita gerudu me no ene kidere Jesudi, kaire kwian agenga me no gdaboke kledu Jesu ole mo kaire kruge, ama gdabonate gerudu me no kidere Jesudi salengwli kwian na ulita kledu gerule kare. 45 Chui chku bduke gire nga ulita nga dba ai giti chegu nga jereske, nga jere jagedu ene hora gdamai, chui jo chege nga bonga dbigu gire nga chra chiuni. 46 Chui jo chege nga bonga dbigu gire Jesu ngautu kiraske mau kwirale: —Elí, Elí, ¿lema sabactani? —geru e gerule: “Cha Chubea, cha Chubea, ¿mineade ba cha chugu ngwadi boi daga ngwale gballa?” 47 Kwian gweale kle ne ngwadi Jesu keruchugu, geru me sugedu trate kwian ege gire kwian e ulita gerudu modi: —Jesu kle ngaute kwian gerunga Chube alin daba ole unsuialin kadakle Elíage. 48 Kwian ulita kle ne ngwadi gerudu ene modi Jesu giti gire kwian e gdaite jo jrite blike Jesu chudaboi, kwian e lle dagli kare ñeu uva chia gageske gbu glita gwagdage gire ama jo Jesu krulladi, glita giti ama uva chia gage gbu Jesu kate jadale ngaña kruge. 49 Kwian na ulita kledu eni gerudu kwian gdaite e ole: —Ama chugene, ale manade gwage alin amadi Elías be chie ama jwen dbige kruge o me. 50 Jesu ngautu kweri nakwaite gire Jesu jokeda. 51 Jesu jokeda ene gire sugeti ngwale ñometra ura kle itabanga gwa u gerungwa Chube olege, ñometra e skagedunga tainkwli bonga ngaña joge dba. Dbi jwliendu, kechuga skiendunga, 52 kaire keuga kwian jaba ogaba ngwadi tanre skiendunga nate, gire kwian jogebakeda sbali Chubenu ngle chkuni gwade. 53 Kwian chkuni gwade ama chegu ne ngwadi, Jesu chkuni gwade gire kwian e ulita jo una Jerusalénge, kwian na tanre gwagedu kwian jogebakeda chkuni gwadedi. 54 Guardia donga chugagwalla gdaite kledu ne ngwadi ule guardia donga na ngle ole Jesu gdachuge giti, ama ulita gwagedu dbi jwliendudi kaire lle na tanre kledu boi Jesu giti, kwian e ulita kendunga tanre kaire ama gerudu Jesu giti: —¡Ulia ulia kwian onbre ai Chube Kirolla! 55 Kaire muinga tanre kledu gwage bate Jesudige Jesu boidu ulita giti, muinga e ulita nu chieba nga Galileage Jesu ole llagli, ama ulita nu chageba Jesu ole Jesu chudaboi baini kaire Jesu chagedu ngwadi, muinga e ulita nu jogeba chke una Jerusalénge ule Jesu ole Jesu gatedi. Muinga e ulitaske muinga gdaite kadakle María-Magdalena kledu. Kaire María na kledu, ama Santiago kaire José chebia. Kaire Zebedeo kirolla chebia kledu ule. Muinga gdamai e kledu ule muinga na ulita ole gwage bate Jesudige Jesu jokeda ngwadi. 57 Jesu jokeda chuia ngabi gire kwian onbre gdaite igi molen tanre kadakle José jo tienda Pilatodi, José una Arimateamu ama Jesu gerua ganga. 58 José jo chke Pilato ngwadi, ama Jesu jaba kadu Pilatoge ogadale. Gire Pilato geru kagu guardia donga alin guardia ñage José chuge ngwadi Jesu jaba jwennga kruge dbe ogadale keugage. 59 José jo chke Jesu jabadige gire José Jesu jaba jun dbige kruge, José Jesu jaba bliu ñometra no glitaleske. 60 José jo Jesu jaba dbe, jo chke Jesu jaba oge keuga jagere dodabage keuga e jagere Josénu, kaire keuga ege ni kwian jaba ogaba gdaite ne ngwadi. José Jesu jaba ogo ne ngwadi chiga gire ama kechuga kweri gbu ugakallage Jesu jaba nate gire José joni. 61 Agwa María-Magdalena kaire María na gdaite ama boke chegu toiba dba keuga Jesu ogle ngwadi ugakalla ngnagu. 62 Chui nagbietege chui e undege chuiage kwian gerunga Chube ole daba alin chugagwalla ulita kaire kwian fariseo ulita jo tienda Pilatodi, 63 kwian ene ulita gerudu Pilato ole: —Cha chugagwalla, che tachkedale Jesu oña giti, ama songa ngwale, ama kledu gwade gire ama gerudu ama be chkeni gwade chui gbamaige. 64 Malen ma no ba kwian gweale kagadale Jesu ogle ngwadi keuga e manadedi chui mongikege, ene kwian geru jwannga amage me ñage chke ngajrege skwe boi Jesu jabage. Kwian gweale me keuga e manade gire kwian geru jwannga Jesuge ñage skwe boi Jesu jabage gire ñage gerule Jesu chkuni gwade, ene kwian songa ngwale e gerua ñage chege tragale ma ngle ngeruge. 65 Pilato jaindunga: —Guardia donga mneite kle e, ba ama ulita dbe keuga ugakalla manade, ba ama ulita gbe ugaka manade no no ta giti, ba me kwian chuge ngwadi skwe boi Jesu jabage. 66 Pilato gerudu ene kwian israelita chugagwalla ulita ole gire kwian e ulita jo kwian guardia donga mneite dbe Jesu ogle ngwadi, keuga ugakalla giti ama lle uda eru gbu, lle uda e sklie kejre ene kwian me ñage keuga ugakalla e jwennga. Ama ulita keuga jegu kejre ene, gire ama guardia donga gbu Jesu jaba ogle ngwadi manadedi, ene kwian mi chie skwe boi Jesu jabage. Kwian israelita chugagwalla agedu ene ulita gire ama ulita joni.
1 Undege chuia jo tangle gire nagbietege chui domingoge ngabebitabi muinga gdaboke joni Jesu jaba ogle ngwadi, muinga e gdaite María-Magdalena kaire María na gdaite jo tienda keugadi Jesu ogle ngwadi. 2 Muinga e bebi joge chke ne ngwadi gire lle boanga Chube alin nga ngaña giti chku nga dba ai giti Jesu jaba ogle ngwadi, lle boanga Chube alin kechuga kweri gbaba keuga kage biunga siere, gire e kote nga jwliendu kweri, lle boanga toidu dba kechuga biabanga siere giti. 3 Lle boanga Chube alin e gwadenga no nga ko chrachienga kare, ama ñometralla jutre salengwli dagli kare. 4 Guardia donga ulita kledu Jesu jaba ogle ngwadi manadedi, ama ulita gwagedu lle boanga Chube alin edi gire guardia donga ulita gda jiredunga chru ole ama kira jonga nga jonga ama giti, ama chegu sugeti kwian jogebakeda kare. 5 María-Magdalena kaire María na jo chke ne ngwadi gire lle boanga Chube alin nga ngaña giti gerudu muinga e ole: —Ba me kennga, uñale chage ba kle chage Jesu jinade nate. 6 Ama me kle aini dale. Ulia ama gbere kruge, ama jokeda agwa ama chkuni gwadeni ama gerudu kare. ¡Bai aini, gwagede ama jaba ogle ngwadi, ama me kle aini dale, nege ama kle gwadeni! 7 Joga blikare kwian geru jwannga Jesuge gdataboko giti gdaite kle ngwadi, ba geru ketadale ama ulitage Jesu giti, ba geru ai kete ama ulitage: “Jesu chkuni gwade, ama be joge nga Galileage ba ngeru, ba ulita jogedale ne ngwadige ten ama ngwange.” Ba geru kete ene ama ulitage cha kle gerule kare ba ole. ¡Joga, joga! 8 Lle boanga Chube alin gerudu ene ulita gire blikare muinga boke jo siere keuga Jesu ogle ngwadige kennga tanre kaire agwe nga suga no ole, ama jo jrite blikare geru kete kwian geru jwannga ulitage lle boanga Chube alin geru ketu amage kare. 9 Muinga boke kledu jrite geru kete kwian geru jwanngage gire Jesu chku mo kaite muinga ege jonke, Jesu gbi kadu muingage: —¿Che kle mine? Muinga boke jo Jesu gitigu ama jongnagwa skutu dba ko bliu Jesu seradi Jesu gai dage ama Jesu olladu. 10 Jesu gerudu muinga e ole: —Ba me ta kennga gerule cha giti. Joga geru kete kwian geru jwannga chage ulitage ama jogedale nga Galileage ten cha ngwange, ne ngwadi ama be gwage chadige —Jesu gerudu ene ulita María-Magdalena ole kaire María na ole. 11 María-Magdalena ule María na ole jo jrite geru Jesu giti kete kwian geru jwannga Jesuge ulitage gire kaire agwe guardia donga keuga Jesu jaba ogle ngwadi mananga gweale jo unaske, guardia e ulita geru ketu kwian gerunga Chube ole daba alin chugagwalla ulitage boidu mine ulita ama gwa giti Jesu jaba ogle ngwadige. 12 Kwian gerunga Chube ole daba alin chugagwalla e mo litu kwian israelita chugagwalla juma ulita ole, ama ulita mo teun boidu Jesu ole giti. Gire ama ulita mo ta gbu ule igi kete tanre guardia donga keuga Jesu jaba ogle ngwadi mananga ulitage. 13 Kwian gerunga Chube ole daba alin chugagwalla kaire kwian israelita chugagwalla juma ulita gerudu guardia donga e ulita ole ama ulita gerudale mine kwian ole Jesu jaba giti, ama ulita gerudu guardia ole: —Ba gerule kwian geru jwannga Jesuge ulita kigedu Jesu jaba ole ngajrege ba kledu gbe gire. Ba geru tragadale ene kwian ulita ole Jesu jaba giti. 14 Chugagwalla Pilatoge be chke uñale ba ulita chegu gbe gire kigedre Jesu jaba ole, cha ulita be Pilato sko ñe, cha be gerule no trate ama ole ba ulita giti, ene ama mi ba gbe boi daga ngwale Jesu jaba gdale —kwian israelita chugagwalla gerudu ene ulita guardia keuga Jesu jaba ogle ngwadi mananga ole. 15 Guardia e igi gau gerule ngwale Jesu jaba giti ñanale gire ama agedu ulita kwian israelita chugagwalla gerudu kare. E boidu ene e suiage tangle chui jo aige tangle kwian israelita kle gerule kaire kwian geru jwannga Jesuge ulita kigedu Jesu jaba ole ngajrege. 16 María-Magdalena ule María na ole jo chke kwian geru jwannga Jesuge gdataboko giti gdaite ngwadi, muinga e Jesu gerua ulita ketu ama ulitage gire geru jwannga ulita jo nga Galileage jwichuga Jesu nu geruba ama ole giti kare. 17 Kwian geru jwannga Jesuge jo chke jwichuga ege, ne ngwadi ama ulita gwagedu Jesudige gire ama gwealege sugedu e ulia Jesu, geru jwannga e Jesu olladu nga suga no ole, agwa gweale na tañachugu e me dale Jesu ulia. 18 Jesu jo kwian geru jwannga amage ulita gitigu gire Jesu gerudu: —Chube cha gbu nga ngaña giti mauñale nga dba ai giti mauñale, cha ñage age ulita Chube kiralla giti cha takalin kare. 19 Malen cha gerule ba ulita ole, joga cha gerua trage kwian nga ulitamu ole, ba gerudale ama ole cha giti ene ama ñage cha gerua gai ulia ba kare, kwian ulita bai kaire cha gerua keruchuge ba giti gire mo ta gbe cha gai ulia, ba kwian ene ulita ñeadale chiske gai ngaña chigage cha Ñenua kalla giti cha Chube Kirolla kalla giti kaire Chube Oña kalla giti. 20 Kaire ba kwian e ulita tkale tangle cha gerua gai dage ulia age diali ulita cha gerudu ba ole kare. Ba ulita joge cha gerua dbe ene, gire cha be kle ba ole ule diali ba chudaboi chui tangle chui ulitage —Jesu gerudu ene ulita kwian geru jwannga amage ulita ole.
1 Jesucristo Chube Kirolla, Chube gerua no ama giti kle degaba chada ai ulita giti. 2 Ngeru Jesucristo bebi chie nga dba ai giti Chube gerudu ama be kwian gdaite Jesucristo gerua dbanga kage kwianske gerule gwangea kwian ole Jesucristo giti, e suiale kwian Chube gerua ketanga kadakle Isaías Chube ama gbu chada dege kwian Jesucristo gerua dbanga be chie giti, chada e gerule, Chube gerudu: “Cha be kwian gdaite cha gerua dbanga kage ba ngeru, kwian geru dbanga e be kwian na ta gbe biale ulita ba ngwange. 3 Nga gballage kwian gdaite e be gerule kwian ole ene: ‘Che Chugagwalla be chie baske, ba ulita kledale biale ama ngwange, ba mo ta gbadale biale no trate ama ngwange kwian kle jon lite trate biale chugagwalla ngwange kare.’ ” Isaías chada jigu degaba unsuialin gerule ene kwian geru dbanga be chie giti, 4 kwian geru dbanga e kada Juan-Bautista, ama chku Isaías chada degu kare. Juan-Bautista suiage tangle boidu ene ulia Chube Isaías ta gbu chada dege kare. Juan-Bautista toidu nga gballage, bda kada camello boli dodaba ñometraleske Juan-Bautista mo ngama tku, kaire ama mo ñometralla mo bonga tangle luguda chbi kwara dodaba drega giti. Juan-Bautista sri kweri kweri gutu, kaire ama likin jau. Juan-Bautista toidu nga gballage, nga ege kwian tanre kledu joge chke Juan-Bautistadi Juan-Bautista keruchuge gerule Chube gerua giti. Kwian tanre nga Judeamu kaire kwian tanre una Jerusalénmu jo chke Juan-Bautista kle ngwadi, kwian e ulita bai kaire kledu joge chke Juan-Bautista kle ngwadi Juan-Bautista gerudu ai kare ama ole: “Ba ulita mo ta blitadale Chube ole, ba age me no chuge ngwadi me chage age me no dare, kaire ba mo chugadale ngwadi mo ñeange chiske kwian na gwa giti ene ba kle mo kaite nate kwian nage ba mi chage age me no ba chagedu ngeru kare. Ba age ene gire ba agedu me no ulita Chube be talla mlienga, ama mi tañachuge dare ba agedu me no giti.” Kwian ulita Juan-Bautista keruchugu gerule ene gire ama gweale mo ta blitu Chube ole, kwian ene ulita gerudu ai kare Chube ole kwian na ulita gwa giti: “Chube, cha agedu me no tanre ba dollale, cha me ta agekalin me no ene dare, nege cha ba gakalin ulia mo Chugagwallale.” Kwian mo ta gbu no ene Chube ole gire Juan-Bautista ama ulita ñeu chiske gau ngaña chigage chi kada Jordánge. 7 Kaire Juan-Bautista gerudu kwian ulita ole Jesu giti, ama gerudu: “Ulia kwian gdaite be chie cha nate, ama ma kira molen chage, ama be ñage age ma no kwian alin chage, ama be Chube Oña gbe kwian tale. Cha ñage kwian ñe chiske alin agwa cha me ñage Chube Oña gbe kwian tale. Ulia kwian gdaite be chie cha nate ama ma no ma kweri ulita chage, cha me ñanaske ama chudaboangale ni ama zapatolla jwennga ama serage.” Juan-Bautista chagedu gerule ene kwian ole Jesu giti. 9 Jesu kledu toi una Nazarege nga kweri Galileage gire ama jo chke Juan-Bautista kle kwian ñe chiske ngwadi chi Jordánge, ne ngwadi Juan-Bautista Jesu ñeu chiske. 10 Jesu joni keda chi kagdage gire ama tienduda nga ngaña giti, ama gwagedu nga tigedunga nga ngaña giti, ama gwagedu Chube Oñadi beusi kare chie gwadbiguda ama giti. 11 Gire Chube kerua sugedu Jesuge gerule nga ngaña giti, Chube gerudu Jesu ole: “Ba cha Kirolla, cha no no ba ole, nga suga noare chadi ba giti.” Chube kerua sugedu ene gerule mo Kirolla Jesu ole. 12 Boidu ene Jesu ole chi Jordánge gire Chube Oña Jesu ta gbu joge toi nga gballage, 13 lle ngaske chudalla daga ngwale kledu ne ngwadi. Jesu toidu gballa nga ege chui ngle cuarenta, Jesu kle toi ne ngwadi gire che dolla Satanás mo chugu tanre Jesu ole, Satanás tadu Jesu ta blitakalin age me no Chube dollale, agwa Jesu me agedu Satanás tadukalin kare. Nga ege lle boanga Chube alin nga ngaña giti tanre chku Jesudi Jesu chudaboi Jesu kira gbe. 14 Juan-Bautista kle skage suiale Jesu joni nga Galileage Chube gerua kete kwian ulitage. 15 Jesu gerudu kwian ole ene: “Me sbali gire kwian ulitage be suge Chube kwian Chugagwalla kweri kiraske, Chube cha kagu ba ulita jwen siere ji chugege ba agedu me no gdale, malen cha gerule ba ole, ba ulita mo ta blitadale Chube ole age no ama takalin kare, ba age me no chuge ngwadi me chage age me no dare, ba ulita mo ta gbadale Chube gerua gai ulia age no Chube takalin kare.” Jesu chagedu gerule ene kwian ole nga Galileage. 16 Chui gbaite Jesu jo chage chibita kada Galilea kagdage, ne ngwadi Jesu gwagedu kwian onbre gdabokedi, ama gdaite kada Simón kaire Simón daballa kada Andrés. Kwian gdaboke e ngwe jwannga ama kledu gdeba tke chiske ngwe gagda, 17 gire Jesu gerudu kwian ngwe jwannga boke e ole: —Bai chage cha ole geru jwen chage, nege ba kwian ngwe jwannga, agwa chui negege gwangerugu cha be ba gbe kwian na tke tangle cha gerua giti, ene ba giti kwian ngle be cha gerua gai ulia, ba kle ngwe gai ngle gdebage kare ene ba be kwian gai cha alin cha gerua giti. 18 Jesu gerudu ene Simón ole kaire Andrés ole gire sugeti ama gdabonate gdeba chugu ngwadi, jo chage Jesu ole. 19 Jesu jo chage na sugeti onbre e boke ole gire Jesu tendu Santiago ngwange kaire Santiago daballa kada Juan ngwange, Santiago kaire Juan kledu ule ñenua kadakle Zebedeo ole gdeba ugachuge du toli chiga. 20 Gire Jesu gerudu Santiago ole kaire Juan ole: —Bai chage cha ole geru jwen chage. Jesu gerudu ene gire onbre gdabonate e ñenua Zebedeo jigu du toli chiga kwian na ñenua chudaboanga ulita ole, gire ama gdabonate jo chage Jesu ole. 21 Jesu ule kwian geru jwannga amage ulita ole jo chke una Capernaumge gire chui e ama jo chkege chui e undege chuia kwian israelita alin, chui ege Jesu jo u mo litangwa Chube gerua jwanngwage, u ege Jesu kwian tku tangle Chube gerua giti. 22 Kwian ulita kledu eni Jesu keruchuge ama ulita chegu tañachuge tanre Jesu gerudu giti, kwian tañachugu mo tale: “¿Mineade ama ñage che tke tangle ene trate? Ama kle che tke tangle ma no ma kiraske kwian che tkanga tangle Moisés chadalla giti ulitage, ama kle che tke tangle kwian geru mauña kweri kare.” Kwian ulita tañachugu ene mo tale Jesu giti. 23 Jesu kledu kwian tke tangle ene gwa u mo litangwa Chube gerua jwanngwage, kwian onbre gdaite jwligebanga che dolla kote kledu eni, 24 dolla onbre e gbu ngaute Jesuge: —¡Jesu una Nazaremu, cha ulita chugene toi no! Chage uñale ba chema, ba Chube Kirolla no trate, uñale chage ba chiu nga dba ai giti cha ulita gbe ji chuge. Cha me takalin ba cha gbe boi daga ngwale, ba cha ulita chuge ngwadi ngwedi. 25 Jesu ka bo dolla e ole: —¡Chegede kamne, joga siere onbre ege! 26 Jesu gerudu kiraske ene dollage gire dolla kledu kwian edi nga kagunga onbre e giti onbre gbu trateda dba tangle, dolla e onbre gbu ngaute kiraske kweri gire dolla e jo siere onbre ege. 27 Boidu ene kwian ulita gwa giti gire kwian chegu tañachuge tanre, kwian geru kadu moge ongoru ongoru: —¿Kle boi mine aini cheske? Ulia Jesu kle che tke tangle geru jagere giti, kaire ama kle age kiraske che gwa giti. Ama kle gerule dolla ole dolla jogedale siere kwian jwligebangage gire dolla kle ama kerua gai dage kle age Jesu kle ama kage kare. 28 Ai ulita kledu boi ene Jesu ole, gire nga ulita nga Galileage geru chagedu kwianske, chku uñale kwiange Jesu kledu age kiraske tanre kwian gwa giti kwian ngwale me ñage age kare. 29 Jesu jo siere u mo litangwa Chube gerua jwanngwage gire Jesu jo chage Santiago ole kaire Juan ole, kaire kwian geru jwannga Jesuge na jo ama ole ule. Ama ulita jo chke Simón kaire Andrés ullage. 30 Jo chke ne ngwadi gire kwian geru ketu Jesuge Simón ñemaña giti ama kledu gwa ankwa giti oga nganagda ole. 31 Jesu geru e keruchugu gire Jesu jo Simón ñemaña kledu gbeba dba ngwadige, Jesu muinga e ko gau kote ama gau bdugu. Gire sugetibi allabi nganagda jo siere muingage muinga jo chkeni noni, gire muinga e mo gbubi bli jinade Jesu alin kaire kwian na ulita kledu eni alin, ama bligda dodadu gutadale. 32 Chui amañage ngabi nga jo jere gire kwian tanre una ege jo chke u Jesu kle ngwadige daba oga dbe Jesuge dodadale. Kwian ngle oga jingme tanre ole dule Jesu kle ngwadi, kaire kwian ngle jwligebanga dolla kote dule Jesu kle ngwadi dodadale. 34 Gire Jesu kwian oga jingme ole tanre ulita dodadu kaire dolla kwian gbaba jwligebanga ulita Jesu kagu siere kwian jwligebangage, kwian ulita cheguni no naskuni. Jesu dolla ulita kagu siere kwiange, dolla e ulitage uñadu Jesu Chube Kirolla, Jesu me tadukalin dolla geru e kete kwiange malen Jesu me dolla chugu ngwadi gerule, dolla ulita chegu kamne. 35 Nga ju ngwange nga bebi chra chke dba no gire Jesu chku bduge jo siere unage ama jo nga gballage kwian me ngwadi gerule Chube ole. 36 Nga chku ju ni uñadu Simónge ni uñadu geru jwannga na ulitage Jesu kle baini. Simón kwian geru jwannga na ulita ole jo Jesu jinade nate, gire Jesu skwendu amage nga gballage. Simón gerudu Jesu ole: —Kwian ulita kle ba jinade nate. 38 Jesu jaindunga Simón kalen: —Ale una nage kodi che kle ngwadige Chube gerua no kete kwiange. Ulia Chube cha kagu nga dba ai giti ama gerua gbadale chke uñale kwian nage kaire. 39 Jesu chagedu una ulitage nga Galileage kwian tke tangle Chube gerua giti, diali ama jo u mo litangwa Chube gerua jwanngwage una kaire kairege Chube gerua trage kwian ole, kaire ama dolla tanre kagu siere kwiange, diali Jesu kwian chudabo no ulita. 40 Kwian onbre gdaite oga jingme kwian kwara gbe tuge ole, kwian e jo Jesu gitigu. Kwian ege sugedu Jesu kira molen ngle malen ama jongnagwa skutu dba Jesu gwangnagu gire gerudu Jesu ole: —Ba takalin cha dodade, uñale chage ba ñage jingme ai jwen siere chage ene cha chege no trate jingme aige. 41 Kwian gerudu ene Jesu ole gire Jesu taidu dage amage, Jesu ko gbu onbre e giti gire Jesu gerudu: —Cha takalin ba jingmea jwen siere bage, nege nege ba chege no trate. 42 Jesu gerudu ene gire sugeti jingme jongwa onbredi, ama chegu noni. 43 Gire Jesu gerudu onbre jo chke noni ole: —Ba me gerule ni kwian gdaite ole cha ba dodadu giti agwa ba agedale Chube nu geru gbaba unsuialin kwian alin Moisés giti gerule kare, chada e gerule ba agedale ai kare: Joga u gerungwa Chube olege mo kaite kwian gerunga Chube ole daba alinge, ba bdada gbaboke dbadale ule gugadale Chube gwa giti u ege ba chegu no trate ñanale, joga age ene ulita gire be chke uñale kwian ulitage ba jo chkeni no ba jingmeage. 45 Jesu gerudu kwian onbre e ole onbre me geru ketadale kwian nage Jesu ama dodadu giti, agwa onbre me geru e gatu mo tale Jesu gerudu kare, onbre chagedu geru e trage kwian ulitage Jesu agedu ama alin giti, onbre e giti kwian tanrege chku uñale Jesu giti, malen Jesu me chegu ñage joge unaske, ama chegu nga gballage kwian me kle toi ngle ngwadige agwa kwian nga tanremu chiu kaire Jesu nate Jesu kledu ngwadige mo chudaboi kade Jesuge.
1 Chui gweale jo tangle gire Jesu joni naskuni una Capernaumge, jo chke gwa ama kle toi ngwadige una ege, gire chku uñale kwian una emuge Jesu kledu gwa. 2 Kwian tanre mo litu ne ngwadi ni kwian na gdaite ñage tien kwianske tangle u ugakallage. Jesu kledu geru Chube giti kete kwiange kwian tke tangle Chube gerua giti, 3 gire kwian gdabaga chku daba oga dbe ankwage mo kaskwada dodadale Jesuge. Kwian e oga skliedba trate jegwale me ñage chage. 4 Kwian chku daba oga dbe goga ugakage agwa me ñadu tien gudegu ugakage kwian tanre kledu ugakage, gire ama ulita jo u giti bdugu kalerage daba oga ole, jo chke u giti gire udrega junnga ankwa tien mangire batre gire ama ankwa ska tku giska giti, ankwa tku dbige daba oga ole Jesu gwangnaru Jesu kle ngwadi gwa. 5 Jesu gwagedu kwian ogadi gire uñadu Jesuge kwian oga kaire kwian oga dbanga ulita mo ta gbaba ulia Jesu ole Jesu ñage kwian oga dodade, malen Jesu gerudu kwian oga ole: —Cha gerule ba ole, ba ageba me no ulita talla cha mlienga, nege ba chege no trate me jiske Chube gwa giti. 6 Kwian daba tkanga tangle Moisés chadalla giti gweale kledu toiba dba eni Jesu keruchuge gerule ene kwian oga ole gire tañachugu Jesudi mo tale: 7 “¿Mineade onbre e kle gerule ene kwian oga ole? Ama me ñage gerule ene, ama kle mo gbe kweri Chube kare. ¿Chema ñage kwian age me no ulita talla mlienga kwian gbe no trate me jiske Chube gwa giti? Chube alin allabi ñage, onbre e me ñage age ene Chube kare.” 8 Kwian daba tkanga tangle Moisés chadalla giti ulita kledu tañachuge ene mo tale Jesudi gire ulia Jesuge uñadu trate kwian e ulita kle tañachuge giti, Jesu geru kadu kwian e ulitage: —¿Mineade ba ulita kle tañachuge ene chadi? 9 ¿Bai ma mno cha alin: kwian oga ai ageba me no ulita talla mlienga o kwian oga ai dodade jingmege? Cha alin ai me mno ulita gdabonate. 10 Nege cha be kwian oga ai dodade ba ulita gwa giti ene be chke uñale bage ulia Chube cha kagu nga dba ai giti kwian kare, Chube kiralla giti cha ñage kwian oga dodade jingmege kaire agwe cha ñage kwian age me no ulita talla mlienga kwian gbe no trate me jiske Chube gwa giti. Jesu gerudu ene kwian daba tkanga tangle Moisés chadalla giti ulita ole gire Jesu gerudu kwian oga skliebada trate jegwale ole: 11 —Nege cha gerule ba ole, chkede gdate mo ankwalla blienga dbadale, jogani chage ba kle toi ngwadige. 12 Jesu gerudu ene gire kwian oga skliebada chku gdate sugeti no trate, ama mo ankwalla gau kote, ama joni chage kwian ulita kle ne ngwadi gwa giti. Kwian e ulita gwagedu ai ulita boidudi gire kwian ulita ta me jo sugano chegu tañachuge tanre, kwian gerudu no Chube giti: —Chube noare, ama kira molen ulita. Noare Jesu kwian oga dodadu Chube kiralla giti, ni bitaite che nu gwageba kwian skliebada gbere chage no trate ai karedi, ulia Chube no no —kwian ulita gerudu no ene Chube giti. 13 Jesu kwian oga skliebada dodadu ene gire Jesu joni nakwaiteni chage chibita kagda giti. Ne ngwadi kwian ngle jo chke Jesudi tangle gire Jesu kwian ulita tku tangle Chube gerua giti diali kare. 14 Jesu jo chage dare gire ama gwagedu kwian onbre kadakle Levídi, Leví Alfeo kirolla, Leví kwian igi ganga chugagwalla emperador nga Romamu alin, ama kledu toiba dba igi ketakle ngwadi igi gai kwiange, gire Jesu chku amadi, gerudu ama ole: —Bai chage cha ole geru jwen chage. Jesu gerudu ene gire Leví chku gdate lle e boi chugu ngwadi ulita, ama jo chage Jesu ole. 15 Bigire Leví Jesu kadu blire mo ullage, gire Jesu jo ule kwian geru jwannga amage ulita ole Leví ullage blire ule Leví ole. Kaire agwe kwian na tanre igi ganga chugagwalla emperador nga Romamu alin kaire kwian na tanre agenga me no kledu chage Jesu nate diali Jesu keruchuge gerule Chube giti, kwian e ulita chku ne ngwadi kaire blire ule Jesu ole. 16 Kwian ulita kle blire ene gire kwian daba tkanga tangle Moisés chadalla giti mneite kaire kwian fariseo mneite kledu eni gwagedu Jesudi blire ule kwian tanre agenga me no ole, gire kwian e geru kadu Jesu giti ta me no ole kwian geru jwannga Jesuge ulitage: —¿Mineade ama kle blire ule kwian igi ganga chugagwalla emperador nga Romamu alin ole kaire kwian na tanre agenga me no ole? 17 Kwian gerudu ene kwian geru jwannga Jesuge ole gire Jesuge geru sugedu kwian kledu geru kade giti, malen Jesu gerudu kwian e ole: —Cha gerule ba ulita ole, kwian kle no trate me oga me joge kwian mo dodanga ngwadi mo dodade, agwa kwian oga ima ama joge kwian mo dodanga ngwadi mo dodade. Cha chiu nga dba ai giti kwian agenga me no ta blite Chube ole joge siere ama kle age me noge, agwa kwian gweale kle tañachuge mo tale ama no trate me jiske Chube gwage, kwian kle tañachuge mo giti ene alin cha me chiu, cha chiu kwian agenga me no alin —Jesu gerudu ene kwian ulita ole. 18 Chui gbaitege kwian geru jwannga Juan-Bautistage ulita kaire kwian fariseo ulita kledu mo tke bage bligdage gerudale Chube ole, gire kwian gweale jo geru kade Jesuge e giti, kwian e gerudu Jesu ole: —Kwian geru jwannga Juan-Bautistage ulita kaire kwian fariseo ulita diali kle chui gweale gai mo tkale bage bligdage gerudale Chube ole alin chui ulita me blire. Kwian e ulita kle age ene tanre agwa kwian geru jwannga bage ni gdaite kle age ene. ¿Mineade kwian geru jwannga bage me kle mo tke bage bligdage chui gwealege cha ulita kle age kare? Kwian geru jwannga bage ulita kle blire chui ulitage. 19 Geru kadre ene Jesuge gire Jesu jaindunga ene kwian kalen: —Cha be geru ai ñachuge ba ulita alin, ene be chke uñale bage mineade kwian geru jwannga chage me kle mo tke bage bligdage kwian na kle age kare. Kwian onbre mo jwen chuia gbe, mo jwen chuia chke gire kwian kadaba ulita be joge chui ollade ule kwian onbre mo jwannga ole. Kwian kadaba ulita be chke chui ollade, ¿chema be gerule kwian e me ñage blire? Kwian ulita be blire nga suga no ole chui ollade ule kwian onbre mo jwannga ole. 20 Agwa chui e joge tangle gire chui gbaite be chke kwian onbre mo jwannga dbabe sugekare, chui ege kwian mo jwen chuia olladanga be chege ta olire kwian onbre mo jwannga nate gire kwian chui olladanga ulita be mo tke bage bligdage ta olire ole. Ulia cha gerule ba ulita ole, cha kwian onbre mo jwannga e kare, kwian geru jwannga chage ulita kwian mo jwen chuia olladanga kare. Nege cha kle ule geru jwannga chage ulita ole, agwa chui be chke gire cha dbabe sugekare amage, chui ege ama be mo tke bage bligdage ta olire tanre ole. 21 Jesu geru ñachugu ene kwian alin gire Jesu geru na ñachugu dare ai kare: —Cha gerule ba ulita ole, ni kwian gdaite kle mo ñometralla juda ugachuge ñometra jagere me gligabage. Che ñometra jagere gbe ñometra juda giti, gire che ñometra jagere glige ñometra junbate ñometra chege ma soli, ñometra jagere kle ñometra juda gbe dretenga, gire ñometra uga kle chege ma me no kweri, ulita kle chege me no. 22 Kaire ni kwian gdaite kle lle gage jagere tke bda kwara dodaba lle gage dbangwa judage. Che lle gage jagere tke bda kwara judage lle gage jagere kle lie gire bda kwara juda kle skiennga ulita, gire lle gage ulita kle jogenga ngwale ulita kaire bda kwara kle chege me no ulita. Malen diali lle gage jagere tkakle bda kwara jagerege, ene lle gage kle lie, bda kwara me skiennga, lle gage me jogenga ngwale. Jesu geru ñachugu ene ulita kwian alin, uñadu Jesuge kwian gweale me ta Jesu gerua jagere gakalin ulia me ta mo gerua juda gbaba unsuialin chugakalin ngwadi, malen Jesu geru ñachugu ene kwian alin geru jagere giti geru juda giti. 23 Chui gbaite undege chuiage Jesu kledu chage trigoske tangle deage ule kwian geru jwannga amage ulita ole, gire kwian geru jwannga Jesuge ulita mo gbu trigo dabe bulu ite gutadale. 24 Kwian fariseo mneite gwagedu kwian geru jwannga Jesuge ulitadi ama kle lle boi kare deage undege chuiage gire kwian fariseo gerudu Jesuge: —Gwagede kwian geru jwannga bage ulitadi, ama kle age me no Chube gerua Moisés nu degaba unsuialin dollale. Uñale bage Moisés chadalla e giti geru kle gbaba che alin che me ñage lle boi undege chuiage, ¿mineade ba kle geru jwannga bage ulita chuge ngwadi lle boi deage undege chuiage? 25 Jesu jaindunga kwian fariseo kalen: —¿Ni bitaite ba nu chada batabanga che chugagwalla unsuialin David agedu giti? Chui gbaite David ule ama chagemanalla ulita ole bli ole tanre, ¿gire ama agedu mine? 26 Uñale ba ulitage David jo gwa u gerungwa Chube olege ule ama chagemanalla ulita ole, u ege gwa pan gbakle, pan e chegedale Chube gwa giti diali, Chube gerua kle gbaba kwian ulita alin geru e gerule kwian gerunga Chube ole daba alin ama alin allabi ñage pan e gute ni kwian na gdaite ñage pan e gute. Agwa David bli ole tanre, ama pan e gutu kaire ama pan e ketu kwian ulita kledu chage ama olege gutadale. David pan e gutu Chube gwa giti agwa ama me boidu dale, Chube me ama gbu jiske ama pan e gutu gdale. David agedu ene suiale kwian kada Abiatar chegu gerunga Chube ole daba alin ma kweri na ulitage u gerungwa Chube olege. 27 Cha gerule ba ulita ole, ba me ñage kwian geru jwannga chage gbe jiske ama trigo bulu itu undege chuiage gdale, Chube gwa giti ama me jiske dale. Chube undege chuia gbu kwian alin undegangwa nga suga no ole, chui e chegu no kwian ulita alin, Chube me chui e gbu kwian alin kwian ta gbagda olire. 28 Chube cha kagu nga dba ai giti kwian kare, ama cha gbu undege chuia mauña, malen cha ñage gerule kwian ole kwian llema boadale chui undegangwage llema me boadale chui undegangwage —Jesu gerudu ene ulita kwian fariseo mneitege.
1 Kwian israelita me lle boi chuiage chui undegangwa chui ege Jesu jo chkeni nakwaite u mo litangwa Chube gerua jwanngwage, eni onbre gdaite oga kledu, onbre e oga ko kwebanga ole. 2 Kwian fariseo mneite kledu eni gwa u ege, kwian fariseo e kledu tatra onbre oga ko kwebanga giti, ama ulita tadu Jesu gbakalin jiske lle boi undege chuiage gdale, malen ama ulita chegu gwage Jesudi Jesu be onbre oga dodade o mi onbre dodade undege chuiage. 3 Jesu gwagedu onbre ko kwebangadi, Jesu gerudu onbre e ole: —Chkede gdate, bai aini kwian ulita gwa ngeru mo ko oga kaite kwian ulita gwa giti. 4 Onbre oga chku gdate kwian ulita gwa giti, gire Jesu geru kadu kwian ulita kle amadi tanglege: —¿Che llema boadale undege chuiage? ¿Che age no kwian alin o che age me no kwian alin? ¿Che ñage kwian oga chudaboi o che kwian oga chugadale ngwadi boi daga ngwale jogekeda? Jesu geru kadu ene kwiange, agwa kwian ulita chegu kamne kwian me jaindunga Jesu kalen. 5 Gire Jesu ta skochiu kwian mangire batre kledu amadi tangle ole, kaire Jesu ta olire kwian ulita giti, uñale Jesuge kwian ulita me kle tai dage daba ogage ni ta daba chudaboakalin. Jesu gerudu kwian oga ko kwebanga ole kwian ulita gwa giti: —Mo ko kwebanga kwrida trate. Onbre mo ko kwriu Jesu gerudu kare, gire ama ko kwebanga jo chkeni no trate. 6 Jesu onbre ko kwebanga dodadu undege chuiage kwian fariseo gwa giti, e giti kwian fariseo ulita ta skochiu tanre Jesudi jo siere blike u ege, ama ulita mo ta gbu ule chugagwalla Herodes skatemanalla ulita ole ama ulita mo ta gbu salengwli Jesu gbe jiske Herodege Jesu agedu giti, ene Herodes be Jesu gwangeda talla jo chke kwian fariseoge kaire Herodes skatemanalla ulitage. 7 Jesu jo siere u mo litangwa Chube gerua jwanngwage gire ama jo chage chibita kagda giti ule kwian geru jwannga amage ulita ole, kwian tanre jo chage Jesu nate, kwian tanre nga Galileamu, 8 kwian tanre nga Judeamu, kwian tanre una Jerusalénmu, kwian tanre nga Idumeamu, kwian tanre toinga chi kada Jordán giti chkagu, kwian tanre toinga una Tiro giti tangle, kwian tanre toinga una Sidón giti tangle, kwian tanre nga ege ulitamuge geru Jesu giti chkeba uñale malen ama ulita jo tienda Jesudi Jesu keruchuge. 9 Kwian e ulitaske Jesu kwian oga tanre dodadu malen kwian oga na ulita kledu kwian nglea bienga jogedale chke kodi Jesuge, kwian oga e tadu Jesu chugakalindi ene ama tañachuge ama joge chkeni noni trate. Kwian tanre kledu mo lite Jesudi tangle kwian chege sklieba kejre moske malen Jesu gerudu kwian geru jwannga amage ulita ole: —Ba du gaite gbadale biale cha alin. Kwian ngle kle, nga me cha alin gerungwa no kwian ulita ole, cha joge duge chi kagdage ene cha ñage gerule ma no kwian ulita ole —Jesu gerudu ene kwian geru jwannga amage ulita ole, kwian geru jwannga agedu Jesu gerudu kare ama ole. 11 Ne ngwadi kwian tanre jwligebanga che dolla kote kledu kwian nglea ulitaske, kwian jwligebanga e bai kaire chku Jesudi dolla kwian e gbu mo jongnagwa skute dba Jesu gwangnagu, dolla kwian tale kwian ta gbu gerule Jesu ole: —¡Uñale chage ulia ba Chube Kirolla! Dolla kwian tale kwian ta gbu gerule ene, Jesu me tadukalin dolla Jesu kalla itenga Jesu Chube Kirolla, malen Jesu ka bo kiraske dolla ole: —Ba me gerudale kwian na ologe cha Chube Kirolla, joga siere kwiange —Jesu ka bo ene dolla ole dolla ka chite Jesu ngeru, dolla jo siere kwiange. 13 Bigire Jesu jo jwichuga giti, Jesu kwian tanre bai ama tadukalin joge ama ole Jesu kwian e ulita kadu chie ama nate jwichuga giti. Kwian e ulita mo litu ule Jesu ole, 14 gire kwian eske ulita Jesu kwian gdataboko giti gdaboke gau chage diali ama ole ama gatedi, Jesu kwian e amaña gau kagadale Jesu gerua dbe kwian nage, kaire Jesu kira ketu kwian ege dolla kagagda siere kwian jwligebangage. Jesu kwian mneite e ka gbu kwian Jesu gerua ketanga. 16 Kwian Jesu gerua ketanga gdataboko giti gdaboke ama ulita kada ene: Simón (kaire Jesu ama ka gbu Pedro), 17 Santiago (ama Zebedeo kirolla), Juan (ama kaire Zebedeo kirolla ama Santiago daballa, Zebedeo kirolla boke e Jesu ama ka gbu Boanerges, geru e kle gerule ama boke kerua enusulindra kare, onbre boke e gerule kweri kiraske kwian ulita ole malen Jesu ama boke ka gbu ene Boanerges), 18 Andrés, Felipe, Bartolomé, Mateo, Tomás, Santiago (Santiago ai Alfeo kirolla), Tadeo, Simón (Simón ai kira batanga mo jwia gdale), 19 Judas-Iscariote (bigwa ama jwlitedu Jesu dollale Jesu ketu gwaleda). Jesu kwian e ulita gdataboko giti gdaboke gau ama gerua ketangale kwian nage. 20 Bigire Jesu joni gudegu ule kwian geru jwannga amage gdataboko giti gdaboke ole. Ama jo chkeni gwa ama kledu toi ngwadige gire kwian tanre mo litu nakwaite Jesudi, malen ni Jesu ni geru jwannga amage ñadu blire kwian tanreske. 21 E suiale kledu boi ene diali Jesu ole Jesu kle age tanre no kwian ulita alin kwian chudaboi ni ama kle tañachuge bligda gute giti. Kwian gweale gwagedu Jesudi toi ene gire ama gerudu Jesu giti: “Jesu kle chage kwian jwligebanga kare me kle mo manade no kwian ulita mo manade kare.” Kwian gweale gerudu ene Jesu giti, geru e chku uñale Jesu bitallanuge malen ama ulita jo Jesu jwen nate Jesu dbe ama ulita kle toi ngwadi. 22 Jesu bitalla bebi joge chke Jesu kledu ngwadige, gire kwian daba tkanga tangle Moisés chadalla giti mneite nu chieba una Jerusalénge gerudu Jesudi: —Jesu kle chage age ulita Satanás kirallaske, Satanás dolla ulita chugagwalla kweri, ama kle kira kete Jesuge malen Jesu ñage dolla kage siere kwiange, dolla kle Jesu kerua gai dage. 23 Kwian daba tkanga tangle Moisés chadalla giti gerudu ene me no Jesudi, Jesuge uñale kwian kle gerule me no amadi, Jesu kwian e ulita kadu mo gitigu gire gerudu ama ole: —Sugedale ba ulitage kwian agenga Satanás kiralla giti me kle dolla chugagwalla Satanás chudaboangalla kage siere kwiange Satanás me ta agekalin me no ene mo chudaboangalla ole. Satanás takalin mo chudaboangalla ulita chege age kwian tale kwian gbe age me no Satanás takalin kare. 24 Cha geru ñachuge bage e giti: Kwian chugagwalla nga gdaitemu mo tke dole kwian ulita kle toi nga amañage ole, ama kwian ulita gbe kira bate modi ongoru ongoru, ene bdagli kwian be mo gweda ulita, chugagwalla be chege gballa ama mi chege kiraske. 25 Kaire kwian toi u gbaitre alinge kira bate modi mo bitalla gwa ole ulita, kwian ulita u ege be boi tanre daga ngwale, ene bdagli kwian ulita be joge toi sugekare gdaite gdaite gire kwian u mauña be chege toi gballa ama mi chege kiraske ama gdaitre alin chudaboanga me. 26 E kare ene dolla chugagwalla Satanás mo tke dole mo chudaboangalla ole mo gbe kira bate modi daba kage siere kwiange, dolla Satanás age ene mo chudaboangalla ole ama mi chege kiraske kwian gbanga age me no Chube dollale. 27 Jesu gerudu ene gire Jesu geru na ñachugu kwiange kwian boke giti, kwian gdaite kirachkedale kwian gdaitedi, Jesu gerudu: —Kwian gdaite ta jogekalin gwa onbre kiraske ullage skwe boi lle ulitage onbre e ngeru, kwian skwe boanga e chegedale ma kiraske onbre lle mauñage ene kwian skwe boanga ñage onbre lle mauña gai ko luge kejre, ene kwian skwe boanga ñage lle ulita dbe lle mauña ngeru ama takalin kare. Agwa skwe boanga me kira molen lle mauña ko luge, ama me ñage skwe boi lle mauña ngeru. E kare ene Satanás kiraske tanre agwa cha ma kiraske dolla chugagwalla Satanáge, Chube kiralla giti cha kirachke diali Satanádi, cha dolla Satanás chudaboangalla kage siere kwiange. 28 Cha gerule ulia ba ulita ole, ba cha keruchuge no, kwian age me no kaire gerule me no cha dollale Chube dollale, gire bigwa kwian e mo ta blite Chube ole cha ole, kwian ene agedu me no ulita kaire gerudu me no ulita Chube dollale cha dollale Chube talla mlienga ulita Chube me tañachuge dare kwian e agedu me no kaire gerudu me no giti. 29 Agwa kwian bai kaire gerule cha kle age dolla Satanás kiralla giti, kwian ene kle gerule me no Chube Oña dollale Chube me kwian gerule me no ene talla mlienga dale, kwian ene chege jiske tanre Chube gwa giti diali ama gerudu me no Chube Oña dollale kbiale —Jesu gerudu ene ulita kwian daba tkanga tangle Moisés chadalla giti ulita ole. 30 Kwian daba tkanga tangle Moisés chadalla giti kledu gerule Jesudi Jesu kle age ulita dolla Satanás kiralla giti. Kwian kledu gerule ene Jesudi agwa ulia Jesu kledu age ulita Chube Oña kiralla giti, malen Jesu gerudu kiraske kwian ole kwian kledu gerule me no Chube Oña dollale giti. 31 Jesu kledu gerule ene kwian daba tkanga tangle Moisés chadalla giti ole gire Jesu chebia kaire Jesu daballa ulita chku Jesu kle ngwadige Jesu jwen nate. Jesu chebia Jesu daballa ulita chegu manade goga tangle gire ama geru kagu Jesu alin kwian gweale ole chiga Jesu kle ngwadige. 32 Kwian tanre kledu toiba dba Jesudi tangle gire kwian geru dbanga chku Jesudi ama gerudu Jesu ole: —Ba chebia ba daballa kle goga tangle ba jinade nate, ama takalin gerule ba ole. 33 Gire Jesu gerudu kwian ole: —Cha be gerule ba ole chema ulia cha chebia chema ulia cha daballa. 34 Ama gerudu ene gire ama tienduda modi tangle kwian ulita kledu toiba dba Jesudi tangle Jesu keruchuge, kwian e ulita giti Jesu gerudu: —Kwian ai ulita kle cha ole cha keruchuge, kwian ai ulita cha chebia kare cha daballa kare. 35 Kwian bai kaire ulita cha keruchuge age cha Ñenua Chube takalin kare, kwian ene cha daballa kare cha ibotea kare cha chebia kare, ama cha bitallanu ulia Chube giti, cha no no ama ulita ole —Jesu gerudu ene kwian ulita kle mo ta gbe age Chube takalin kare giti.
1 Jesu joni nakwaite chibita kagda giti kwian tke tangle. Kwian litedu tanre Jesudi, nga me chegu Jesu alin toingwa malen Jesu jo chiga du kledu ne ngwadige, Jesu toidu dba du toli, kwian ulita chegu kedagu Jesu keruchuge. 2 Gire Jesu geru tanre ñachugu kwiange, ngeru ama geru ñachugu chude giti, ama gerudu kwian ole: 3 —Cha gerule ba ulita ole chude drennga giti, ba ulita cha keruchuge no cha be gerule ai kare ba ulita ole: Kwian jo chude drennga deage, kwian jo chke deage, ama chude ngle dreunnga kote. 4 Kwian e kle chude drennga kote gire chude e gweale jo chke dba jon jegwale, bdada chiu, bdada chude gutu ulita. 5 Chude na gweale jo chke dba dbi arale ke giti ngwadi, chude e numachiu blikare, agwa me dbi uda alin malen chude e me sera toiduda dbiske no, ke kle, chude me ñadu sera joge dbiske no. 6 Chudenuma chku ngaña agwa ama sera me jo no dbiske, chui jute kote chudenuma junbatu jokeda. 7 Chude na jo chke dba drinkin sera tanre ngwadi, chude gwatigu agwa drinkin tigedu ule chudenuma ole, drinkin chudenuma guda, chude me tigedu chude me gbachiu, drinkin kote chude jokeda ulita. 8 Agwa chude na jo chke dba dbi no giti, chude e gwatigu no gbachiu no ngle. Chude skute chuia chku gire chude e nu gbachieba ngle, chude bulu gweale gbachiu no chude treinta, chude bulu gweale na gbachiu ngle chude sesenta, chude bulu gweale na gbachiu ngle ngle chude cien bulu gdaitege. 9 Jesu geru ñachugu ene ulita chude giti gire Jesu gerudu dare kwian ole: —Cha kle geru ai ñachuge ba alin, ba me geru ai keruchuge alin allabi mo ologe, agwa kaire ba ulita mo ta gbadale geru ai gbe gdadi, ba tañachugadale lledale cha kle geru ai chude giti ñachuge ba ulita alin. 10 Jesu geru ñachugu ene kwian nglea ulita alin gire kwian geru jwannga amage gdataboko giti gdaboke kaire kwian na kle chage Jesu ole geru jwen amage, kwian e ulita mo litu Jesudi sugekare kwian ngleage, geru kadu Jesuge: —¿Ba gerudu giti kwian ole, geru e mine? Me suge cha ulitage mineade ba geru ñachugu kwiange chude giti. ¿Mineade ba me geru gbu chke uñale nate trate kwiange Chube giti? 11 Kwian geru jwannga Jesuge geru kadu ene gire Jesu jaindunga ama kalen: —Ba ulita kle cha gerua gai ulia malen Chube kle ba ta gbe chke cha kle gerule giti, ene geru e giti kle suge trate bage kwian bai kaire cha gai ulia mo Chugagwallale kwian ene chege no trate Chube gwa giti. Kwian na me kle cha gerua gai ulia, ama alin cha kle geru ñachuge, kwian geru e keruchuge agwa geru e ulita skwen mnoare amage geru e me suge amage dale. 12 Kwian ene gwa giti cha kle lle tanre no dodade agwa ama chege kwian gwagwa me kare, me suge amage cha kle lle e dodade Chube kiralla giti kwian ta gbagda Chube giti. Kaire kwian ene kle cha gerua keruchuge, agwa ama chege kwian olo me kare, geru me suge trate amage cha kle gerule giti. Geru suge amage ama mo ta blite Chube ole, ene Chube kwian ene agedu me no talla mlienga ulita. Agwa kwian ene me ta cha gerua gakalin ulia malen cha gerua me suge amage, ama chege jiske Chube gwa giti —Jesu gerudu ene kwian geru jwannga amage ulita ole. 13 Gire Jesu gerudu dare ama chude drennga gerua ñachugu kwian alin giti, Jesu gerudu kwian geru jwannga ole: —¿Geru chude drennga giti cha ñachugu ba alin geru e me suge bage? Geru e me suge bage, ene kaire cha geru na ma mno ñachuge ba alin, geru e mi suge bage kaire. 14 Ba cha keruchuge no, nege cha geru chude drennga giti gbe chke uñale bage cha gerudu kare giti. Cha gerudu kwian chude dreannga giti kwian e chege salengwli kwian Chube gerua ketanga daba nage kare. 15 Kwian gweale kle boi Chube gerua ole salengwli chude jo chke dba jon jegwale kare. Kwian e Chube gerua keruchuge, agwa geru me suge amage trate, bigire che dolla Satanás kwian ta gbe geru e chuge ngwadi me geru e gai ulia jumale. Satanás kle geru jwennga kwian tale salengwli bdada kle chude jwennga kare, ene geru Chubenu ulita jogenga kwian tale. 16 Kwian gweale kle boi Chube gerua ole salengwli chude jo chke dba dbi arale ke giti ngwadi kare. Kwian e Chube gerua keruchuge, ama kle geru e gai blikare nga suga no ole, agwa ama me mo ta gbe ulia Chube ole, ama me kle Chube gerua gai jumale ulia, malen ama tale geru me ñage tige no kiraske salengwli chude me ñage sera joge dbiske ke giti me ñage tige no kare. Kwian e Chube gerua gau agwa me kira ole gwangerugudba geru e gai ulia, ama boi daga ngwale Chube gerua gdale, gire blikare kwian e Chube gerua chuge ngwadi, ama jogeni naskuni chage ngeru kare. 18 Kwian na gweale kle boi Chube gerua ole salengwli chude jo chke dba drinkin sera tanre ngwadi kare drinkinnuma tige chude ole ule kare. Kwian e kle Chube gerua keruchuge kle Chube gerua gai ulia agwa me kle mo ta gbe tañachuge diali Chube gerua giti no, ama kle mo ta gbe tañachuge tanre lle ngwale alin giti, ama ta igi jwankalin ngle mau alin kle gwage lle ulitadi ama takalin lle ege mau alin, ama ta agekalin ulita ama takalin kare. Ama kle tañachuge ma ngle lle e kare gitige me kle tañachuge no Chube gerua gitige, malen Chube gerua kle jogenga ama tale, gire ene kwian me kira molen toi no Chube takalin kare ni kwian ñage Chube gerua dbe kwian nage. 20 Agwa kwian gweale kle boi Chube gerua ole salengwli chude jo chke dba dbi no giti kare. Kwian e kle Chube gerua keruchuge, Chube gerua kle suge trate amage gire ama mo ta gbe ulia Chube ole Chube gerua gai ulia. Ama kle Chube chuge ngwadi age ama tale Chube takalin kare, ene Chube ama ta gbe chui gbaite gbaite kaire kairege ma ngle Chube gerua giti. Kwian ene mo ta dbe suge no diali Chube gerua kete daba na ulitage daba chudaboi ta gbe chage gwangerugu Chube gerua giti. Kwian Chube gerua ketanga ene giti kwian tanre chke Chube gerua gai ulia salengwli chude joge chke dba dbi no giti gbachie no ngle kare, chude gweale gbachie treinta, na gbachie ma ngle sesenta, na gbachie ngle ngle cien. Ene kaire kwian bai mo ta gbe ulia Chube ole Chube gerua gai ulia diali, kwian ene giti kwian na tanre Chube gerua gai ulia mo tale —Jesu gerudu ene kwian geru jwannga amage ulita ole. 21 Jesu geru na ñachugu kwian alin, Jesu gerudu: —Nege cha geru ñachuge ba ulita alin jichra giti, kwian age jichra ole kare, e kare ene kwian agedale Chube gerua ole. Kwian jichra gwadege me kle un blite kaboge jichra giti ni kle jichra gbe ankwa gwaru nga gbagda chra, kwian me age ene jichra ole. Kwian jichra gwadege, kwian jichra gbe ngaña nga ngwale giti ene jichra chra chratigenga ulita gwa tangle ene kwian ulita ten lle ulitadi jichra chra giti nga jereske, jichra chrage lle ulita me chege skwlenre kwian gwage. 22 Ene kaire Chube gerua me chege skwlenre, kwian Chube gerua ganga giti geru e be chke uñale kwian nage, kwian Chube gerua ganga me ta chegedale skwlenre Chube gerua ole kwianske. 23 Cha kle geru ai ñachuge ba alin, ba me geru ai keruchuge alin allabi mo ologe, agwa kaire ba ulita mo ta gbadale geru ai gbe gdadi, ba tañachugadale lledale cha kle geru ai jichra giti ñachuge ba ulita alin. 24 Jesu geru ñachugu ene kwian alin gire Jesu gerudu dare: —Ba mo ta gbadale tañachuge trate Chube gerua ba kle keruchuge chage giti, kaire ba mo ta gbadale geru e gbe gdadi age Chube takalin kare. Ba me mo ta gbe Chube gerua gai ulia kiraske age Chube takalin kare gire Chube gerua mi suge trate bage dale. Ba Chube gerua gbe gdadi batre Chube be mo gerua na gbe suge bage. Ba Chube gerua gbe gdadi ba age cha kle gerule kare ba ole ene Chube mo gerua gbe suge ma no trate bage. 25 Kwian bai kaire kle Chube gerua gai ulia Chube gerua manade no mo tale, kwian ene mi ta jogenga Chube geruage, kaire Chube be kwian ene ta gbe dare Chube gerua giti. Agwa kwian bai kaire me kle mo ta gbe Chube gerua gai ulia me kle mo ta gbe tañachuge Chube gerua giti kaire me kle age Chube gerua kle gbaba kare, kwian ene be ta jogenga Chube geruage ulita ama be chege kwian me Chube gerua keruchugaba kare. 26 Jesu geru na ñachugu kwian alin chude giti, ama gerudu: —Cha be geru na ñachuge ba ulita alin, ba cha keruchuge no. Geru ai giti sugedale bage cha kle ba ta gbe suge Chube alin allabi kle kwian ta gbe Chube gerua gai ulia Chube gai mo Chugagwallale. Cha geru kete bage ene: Kwian chude skie ulita deage gire ama jogeni gudegu. 27 Kwian me kle manade deage chude chudaboi tige no, ngajrege ulita sbali kwian kle gbe ngajrege gwa, ngajudi ama kle lle na boi, agwa chude ama skiaba deage kle gwatige no kle tige no gballa. Ulia ni uñale kwian chude skiangage chude e kle tige mine. 28 Dbi gballa kle chude gbe tige. Chude kle gwatige kle gachie gire kle skachie, ska jegwale kle gbachie no ulita. 29 Chudegba kle joge dabe, gire kwian chude skiangage chke uñale chude skute chuia chkeba, ene kwian kle joge deage chude skute kle chude lite ole ulita —Jesu geru ñachugu ene chude giti kwian alin kwian ta gbagda kwian Chube gai mo Chugagwallale giti. 30 Jesu geru ñachugu kwian ole mostaza chudea giti: —Cha geru na ñachuge ba ulita alin, geru ai giti sugedale bage nege kwian bedreare kle mo ta gbe ulia Chube gerua gai jumale cha kle gerule giti, agwa bdagli kwian ngle be Chube gerua gai ulia be Chube gai mo Chugagwallale, e salengwli kle boi mostaza chudea ole kare. Mostaza chudea ma soli jalin chude na ulitage skiadale dbige. 32 Agwa mostaza chudea skiakle dbige gire chude e kle tige kle chege gli kweri kweri ngaña. Mostaza glia kle nangachie kweri kweri, gire bdada ngle ñage ugara gbe gli e nanga jegwale ulita toingwa. E kare ene kwian bai Chube gerua gai ulia, kwian e Chube gerua trage kwian na ole ene geru e chke uñale kwian na tanrege, gire bdagli kwian tanre be Chube gerua gai ulia be Chube gai mo Chugagwallale salengwli mostaza chudea soli tige joge kweri nanga tanre molen kare. 33 Jesu geru ngle ai kare ñachugu kwian nglea alin ñage suge kwiange batre. Ulia Jesu me kledu geru trage geru ngwale alin giti kwian gweale tañachugu kare agwa geru ai giti Jesu kledu kwian tke tangle Chube gerua giti. 34 Jesu diali geru ñachugu ene kwian alin lle gweale giti kwian ngle ta gbagda Chube giti, agwa Jesu chegu gballa sugekare ule kwian geru jwannga amage ole gire ama geru e tragu ama ole geru e kle gerule llema llema giti ulita. 35 Chui e amañage ngabi Jesu kledu toiba dba du toli kwian nglea tke tangle Chube gerua giti, gire Jesu gerudu kwian geru jwannga amage gdataboko giti gdaboke ole: —Ale chibita kagda giti chkagu. Jesu gerudu ene gire kwian geru jwannga ulita jo Jesu ole duge kwian nglea ulita chugu ngwadi chi kagda giti, kaire kwian na jo du nage du Jesu jóge gatedi. 37 Du kledu chage anleda chiga giti Jesu kledu gbe mo chuga gbaba chugagda giti du skugda ngnagu, gire mle tirare kweri kweri chku dba kiraske, mle chi gbu chite tanre, chi skwendu bdugu mlege chi jo chiga du toli, du kledu chke ete chi kote. Gire kwian geru jwannga Jesu gau gdate ta kennga ole, ama gerudu: —¡Cha tkanga tangle! ¡Chkede bduge cha chudaboi! ¡Che ulita be joge chiske duge llagli, che be unjoge ba kle gbeba jabale gire! 39 Kwian geru jwannga gerudu ene Jesuge gire Jesu chku bduge mo gbu gdate, ama gerudu mle ole: —¡Chegede kamne, me tiennga dare! Kaire Jesu gerudu chi ole: —¡Klede ngwedi! Jesu gerudu ene gire sugeti ngwale mle jo tangle me tiunnga dare kaire chi chegu ngwedi ulita me chitedu dare. 40 Ulita chegu ngwedi gire Jesu ka bo kwian geru jwannga amage ulita ole: —¿Mineade ba ulita ta kennga tanre mledi? ¿Ba me cha gai ulia cha ñage ba manade nga tirareske? 41 Jesu gerudu ene gire kwian geru jwannga ulita ta chegu kwachie tanre, ama ulita geru kadu moge ongoru ongoru: —¿Kwian ai mine, ade mle kaire chi kle ama kerua gai dage ama kle gerule kare? —kwian geru jwannga geru kadu moge ene Jesu giti.
1 Jesu jo chage dare duge chiga giti kwian geru jwannga amage ulita ole, Jesu jo chke chi kagda giti chkagu nga ka jwankle Gadarage. 2 Ne ngwadi Jesu chiu dbige duge ule geru jwannga amage ole gire kwian onbre jwligebanga che dolla kote chku ten Jesu ngwange. Kwian jwligebanga e kledu toi kwian jaba ogakle keugage ngwadi, ama kiraske tanre che dolla kiralla giti ni kwian gdaite ñadu kwian jwligebanga e lugeda hierrogda dodabale cadenale giti. 4 Kwian kle no kle kwian jwligebanga e ska gbe diali agwa blikare che dolla kle kwian jwligebanga kira gbe kwian jwligebanga kle cadena datenga mau giti kle kige, ama kiraske tanre, malen ama diali toidu gbale, kwian me ñadu ama gai manadale skage. 5 Kwian jwligebanga e diali kledu chage ngajudi ngajrege jwichuga jegwale kaire kwian jaba ogakle keugage ngwadi, ama kledu ngaute kweri kledu mo lendege jere jere kechugage diali. 6 Kwian jwligebanga tendu Jesu ngwange gwagedu Jesudi chie bate, ama jo jrite Jesu ngnagu, gire Jesu gerudu kiraske dolla kle kwian e tale ole: —¡Ba me no me no, joga siere onbre aige, onbre ai chuge ngwadi sugekare! Jesu gerudu ene dolla ole gire dolla kwian jwligebanga gbu jongnagwa skute dba Jesudi Jesu gagda dage gire dolla kwian gbu gerule kweri Jesu ole: —Uñale chage ba Jesu, ba Chube kweri kiraske Kirolla. ¿Lledale ba chiu cha nate nga aige? Cha ulita gerule ba ole Chube gwa giti, ba me age me no cha ole cha gbe boi daga ngwale sugekare kwian aige, ma no ba cha chuge ngwadi toi kwian ai tale. 9 Jesu geru kadu dolla kle chage kwian olege: —¿Ba kada mine? Dolla jaindunga Jesu kalen: —Cha kada Ngleare. Cha bitalla tanre kle toi ule cha ole kwian ai tale malen cha ulita kada Ngleare. 10 Dolla chegu gerule tanre Jesu ole: —Ba tai dage cha ulitage, ba me cha ulita kage nga ji chugangwage, ba cha kage toi nga gwealege ngmadi aini. 11 Jesu kledu gerule dolla ole ngwadi kodi jwichuga giti chunchi tanre kledu chage jwichugage blire. 12 Dolla ulita kledu kwian jwligebanga gbe gerule, ama ulita gerudu Jesu ole: —Ba cha ulita kage chunchi kle ngwadi, ene cha ulita ñage toi no chunchi tale. 13 Jesu gerudu dolla ole: —¡Joga siere onbre aige, joga toi chunchidi ulita! Jesu gerudu ene dolla ole gire dolla ulita jo siere blike onbrege, dolla ulita jo chunchi ngle ngwadi toi chunchi tale. Chunchi ngle dos mil kledu nga ege, dolla jo chke chunchi e ulita tale gire chunchi ulita jo jrite jo kegdege dolla kote, chunchi ulita jwatedunga kegdege chunchi jo chiske, chunchi dos mil ulita unjo jokeda chi kote dolla kbiale. 14 Kwian chunchi mananga ulita gwagedu chunchidi boi ene ulita gire ama ulita jo jrite jo chunchi gerua kete kwian ngleage unaske kaire kwian kle toi jon jegwalege chunchi mananga geru ketu. Kwian ulita chunchi mananga gerua keruchugu, kwian e jo tienda chunchi boidu giti chunchi tanege. 15 Gire kwian ulita jo tienda Jesudi ama jo chke Jesu kledu ngwadi, kwian ulita gwagedu kwian onbre nu jwligebanga nu jogeba chkeni noni, onbre e kledu toiba dba ngwedi mo ngama tkaba no. Kwian ulita gwagedu ene kwian onbre Jesu nu dodabadi, gire kwian ulita kwachiu tanre Jesu ngeru. 16 Kwian ulita bai gwagedu Jesudi mo gwagwa giti Jesu dolla kagu siere onbre jwligebanga ege gire, kwian e ulita geru e ulita tragu kwian chiu unaskege ole kwian jon jegwalege ole, kwian geru tragu kwian na ulita ole Jesu dolla kagu siere onbre jwligebangage giti. 17 Gire kwian ulita toinga nga Gadarage mo ta gbu gerule Jesu ole: —Cha me takalin ba chege dare cha kle toi ngwadi nga aige. ¡Joga siere nga aige, ba me chegedale age ene dare aini nga aige! 18 Kwian gerudu ene Jesu ole gire Jesu joni naskuni du toli, kwian nu jogeba chkeni noni jo Jesu nate gerudu Jesu ole: —Ba cha dbe ule cha ta jogekalin ule ba ole nga baini kairege ba be joge ngwadi cha be chage ule. 19 Jesu gerudu ama ole: —Ba me ñage joge ule cha ole, ba jogedaleni ba bitalla kle toi ngwadi geru trage kwian ulita ole Chube ba Chugagwalla agedu giti ba alin. Ba ogadu dolla kote Chube taidu dage bage, Chube ba dodadu ba geru e ketadale ba bitalla ulitage. 20 Jesu gerudu ene onbre e ole gire onbre e cheguda ama jo una ulitage nga kada Decápolige gerule kwian ulita ole Jesu ama dodadu giti, kwian ulita bai kaire onbre e keruchugu gerule Chube agedu giti ama alin, kwian e ulita chegu tañachuge no tanre Chube agedu giti onbre e alin. 21 Jesu joni naskuni duge chi kagda giti ongoru ule kwian geru jwannga amage ulita ole, ama ulita jo chkeni llani gire kwian tanre litedu Jesudi Jesu chegu chi kagda giti kwian tke tangle Chube giti. 22 Jesu kle kwian ulita tke tangle gire onbre gdaite kwian israelita chugagwalla u mo litangwa Chube gerua jwanngwage chku Jesu kle ngwadi, onbre e kada Jairo ama chku Jesudi gire ama jongnagwa skutu dba Jesu gwangnagu mo chudaboi kade Jesuge, 23 Jairo gerudu Jesu ole: —Ba cha chudaboi, cha jian oga jabale jabale chege bedre ama ngeru ama jogekeda. Bai blike cha ullage tienda cha jian ogadi, ba ko gbe cha jian oga giti ene ama mi jogekeda, uñale chage ba kiralla giti ama be joge chkeni noni ama chege gwade. 24 Jesu Jairo keruchugu gire Jesu jo Jairo ole Jairo ulla ngnagu. Kwian tanre jo Jesu ole llagli Jesu gatedi, kwian tanre jo chage moge kejre Jesu nate Jesu ngeru kaire Jesudi tangle chage ule Jesu ole. 25 Jesu kledu chage kwian tanre ole Jairo ulla ngnagu gire muinga oga daige sbali chku chage Jesu nate kwian ngleaske. Chura gdataboko giti gdaboke muinga e kledu toi daige diali chui ulita oga jabale dai gitige ole. 26 Muinga e nu jogeba kwian mo dodanga tanre ngwadi, ama nu igi maunu ulita ketaba mo dodade giti kwian mo dodangage, agwa ni ama jo chkeni noni, ngwale ama igi ngle ketu mo dodade giti agwa ama kledu chage oga daige ma jabale diali. 27 Muinga ege geru chku uñale Jesu kledu chage kwianske gire muinga e jo chage Jesu nate kwian ngleaske. Muinga e jo chke kodi Jesudi, ama tañachugu mo tale: “Uñale chage cha ko chuge Jesu ñometralladi alin allabi gire ene cha be joge chkeni noni Jesu kiralla giti.” Muinga tañachugu ene gire ama ko chugu Jesu ñometralladi gire sugeti allabi ama me chegu toi oga dare daige ama kledu toi sbali kare, blike ama sugedu moge ama jo chkeni noni trate ama kledu ogage, ama jo chkeni mo ta gbe Jesu ñometralla chugedi giti, ene muinga e chegu no trate. 30 Jesuge chku uñale ama kiralla giti kwian gweale oga jo chkeni, Jesuge sugedu moge ene, gire Jesu tiunda mo nate, ama geru kadu kwian ulita kledu ne ngwadige: —¿Chema ko chugu cha ñometralladi? 31 Kwian geru jwannga Jesuge jaindunga Jesu kalen: —Kwian tanre kle chage ba nate ba ngeru badi tangle ba gate kejre moske, ¿mineade ba geru kade chema kle ba ñometralla chugedi? 32 Kwian geru jwannga gerudu ene Jesu ole, agwa Jesuge uñadu ulia kwian gweale oga ama chugudi jo chkeni no, malen ama kledu tienda mo nate dba kwian oga jo chkeni nate chema ama ñometralla chugudi. 33 Uñadu muingage Jesu ama dodadu, gire muinga e jo Jesu ngnagu ama mo jongnagwa skutu dba Jesudi Jesu gagda dage, ama kennga tanre jirenga trate jegwale chru ole Jesu ngeru, muinga gerudu Jesu ole: —Cha chagedu sbali oga tanre daige ole chui ulita, malen cha chiu ba nate cha mo ta gbu ko chuge ba ñometralladi cha tañachugu ene cha be joge chkeni noni, cha mo ta gbu age ene gire nege cha kle noni ba cha dodadu. 34 Muinga gerudu ene Jesu ole gire Jesu gerudu ama ole: —Ba mo ta gbu cha gai ulia malen e giti cha ba dodadu, nege ba jo chkeni noni trate. Jogani nga suga no ole me tañachuge dare ba jingmea giti. 35 Jesu kle gerule ene muinga ole gire kwian gweale chiu Jairo ullage chku geru jige Jairoge jonke Jairo jian giti, kwian e ulita gerudu: —Ba kwian tkanga tangle chuge ngwadi lle na boi, ngwale ba kle ama dbe mo ullage, ba jian me chegu. 36 Kwian e ulita chku geru jige ene Jairoge, agwa Jesu me kwian e kerua talladu, ama gerudu Jairo ole: —Ba me ta dbe kennga ba jian giti, ba me mo ta gbe olire ba jian nate, ba mo ta gbe cha gai ulia cha ñage ba jian dodade. 37 Jesu gerudu ene Jairo ole, gire Jesu me kwian na chugu ngwadi joge dare ule ama gatedi, agwa Jesu kwian geru jwannga amage kada Pedro kaire Santiago kaire Santiago daballa kada Juan du ule mo ole llagli Jairo ngwadi. 38 Jesu jo chke ugakage Jairo kle toi ngwadige, gire Jesu gwagedu kwian tanredi olire, kwian ulita kledu sui jwennga kirogwa muire jabadi. 39 Jesu jo chke gwa Jairo ullage, ama gerudu kwian ole: —¿Mineade ba ulita kle mo ta dbe olire kirogwa nate? Ba me olire dare, ulia kirogwa muire me jogebakeda dale, agwa ama kle gbe alin allabi. 40 Jesu gerudu ene kwian ole gire kwian gidedu Jesudi Jesu gerudu giti. Kwian ulita kledu gwa Jesu kwian e ulita kagu siere, gire Jesu kwian geru jwannga gdamai kle Jesu gatedi kaire kirogwa muire ñenua kirogwa muire chebia, Jesu kwian e alin du ule kirogwa muire jaba kledu ngwadi. 41 Jesu kirogwa muire jaba gau koge, Jesu gerudu jaba ole mo kwirale: —Talita, cum —geru e gerule: “Kirogwa muire, cha gerule ba ole, ¡chkede bduge!” 42 Jesu gerudu ene gire blike kirogwa muire jaba chkuni gwade, kirogwa chku gdate chagedu mo ñenua mo chebia gwa giti. Kirogwa muire ñenua, chebia gwagedu mo jian chkuni gwadenidi gire ama chegu tañachuge tanre nga suga no ole Jesu agedu giti, ama gerudu no modi Jesu giti: —¡Ulia Jesu kiraske, ama agedu no no che alin, ama che jian jaba gbuni gwade! Gire Jesu gerudu kirogwa muire ñenua ole chebia ole: —Cha ba jian jaba gbuni gwade giti ba me geru e ketadale kwian nage, ba geru e gatadale mo tale. Nege ba bligda kete ba jiange gutadale ama kira gbagda. Jesu kirogwa muire jaba gbuni gwade ene, kirogwa muire ege chura gdataboko giti gdaboke chkeba.
1 Jesu joni mo jwiage una ama manadre ngwadi ule kwian geru jwannga amage ulita ole. 2 Jesu jo chkeni una ege gire kwian israelita undege chuiage Jesu jo u mo litangwa Chube gerua jwanngwage kwian tke tangle Chube gerua giti. Kwian tanre kledu u ege Jesu keruchuge gerule Chube giti, kwian e ulita chegu tañachuge tanre Jesudi, kwian gerudu modi ongoru ongoru Jesu giti, ama gerudu: —Ama kle gerule no tanre Chube giti, ¿ama geru e ulita jun baini? Ama ta ngle molen, ¿chema ama tku tangle tachke ngle ene? Kaire kwian oga me boale dodadale ama kle ñage kwian oga tanre ene dodade, ama kle age tanre kwian ngwale me ñage age kare. 3 ¿Agwa ama me che tigemanalla? ¿Ama me kwian glidrega dodanga lle tanrere? ¿Kaire ama me María kirolla? Che ama daballa ulita uñe, ¿ama daballa me Santiago kaire José kaire Judas kaire Simón? ¿Kaire ama ibotea ulita me kle toi cheske kaire agwe? ¿Agwa gire mineade geru ai ulita Chube giti kle chke uñale amage? Kwian ulita gerudu ene Jesudige malen kwian me jaindu Jesu gerua gai ulia, sugedu kwiange Jesu kwian ngwale kare. 4 Jesu gerudu kwian e ulita ole: —Cha gerule ba ole, kwian Chube gerua ketanga kle joge nga baini kairege kwian tke tangle Chube gerua giti, kwian nga emu kle kwian Chube gerua ketanga keruchuge kle ama gerua gai dage. Agwa kwian Chube gerua ketanga jogeni mo bitallaske mo jwiage ama manadre ngwadi, kwian me ama gai ngwange no, ni ama bitalla gdaite ama gai kwian Chube gerua ketanga ulia, kwian me ama gerua gai dage ni kwian ama keruchugakalin —Jesu gerudu ene kwian ama jwiamu ole. 5 Kwian Jesu jwiage me Jesu gau ngwange no me Jesu gerua gau ulia, malen Jesu me kwian tanre oga dodadu ni lle na daga ngwale no tanre dodadu kwian nga ege alin, Jesu kwian bedreare alin oga dodadu, ama mo ko gbu kwian oga e giti gire kwian jo chkeni noni ulita. 6 Jesu chegu tañachuge tanre kwian ama jwiamu giti mineade kwian me ta mo ta gbakalin ama gerua gai ulia. Jesu jo chage kwian geru jwannga amage ulita ole una kaire kairege una Nazaret giti tangle kwian tke tangle Chube gerua giti. 7 Jesu kwian geru jwannga amage gdataboko giti gdaboke kadu mo gitigu, Jesu mo kiralla ketu ama ulitage dolla kagagda siere kwian jwligebanga dolla kotege, gire Jesu kwian geru jwannga amage kagu gdaboke kaire kaire modi nga ulitage Chube gerua Jesu giti kete kwian nage. 8 Kwian geru jwannga ulita bebi joge Chube gerua dbe kwiange, gire Jesu ama ulita ta gbu ama agedale giti ama joge chage geru dbe gire, Jesu gerudu ama ulita ole: —Ba joge chage Chube gerua dbe gire ba jogedale kole ba me lle gweale dbe mo alin, ba ñage glita gdaitre alin dbe chagegda. Ba me gde teru dbangwa dbe ni ba bligda dbe mo liullale jonkare ni ba igi dbe mo alin lle gigagda. 9 Ba joge ñometra modi alinske kaire ba zapato dbe modi alin, ba me zapato na ni ñometra na dbe mo ole llagli. 10 Una ulitage baini kaire ba joge chke ngwadi ba u gbaitre alin gai toingwa, ba chege toi u e mauña ole ba kle Chube gerua dbe kwian una emuske gire. Ba joge dare una nage, ba age ene una kaire kairege baini kaire ba joge chke ngwadi. 11 Una ulitage baini kaire ba joge chke ngwadi, una e gwealege kwian me ba gai ngwange no ni kwian ta ba keruchugakalin gerule Chube gerua giti, ba me tallade, ba jogedale siere una ege, ba me chege geru dbe kwian una emuske, ba joge siere una ege ba dbi mnuña skiennga mo serage kwian ene gwa giti, ene be suge kwian una emuge ama chege jiske tanre Chube gwa giti me ba gai ngwange no gdale Chube gerua giti. 12 Jesu gerudu ene kwian geru jwannga ulita ole ama ta gbagda gire kwian geru jwannga ulita jo chage gdaboke kaire kaire modi una kaire kairege Chube gerua trage kwian na ole, ama gerudu kwian ulita ole: —Ba ulita Chube gerua gadale ulia, ba ulita mo ta blitadale Chube ole, ba age me no ulita chugadale ngwadi me chage age me no dare. 13 Kwian geru jwannga Jesuge chagedu una kaire kairege gerule ene kwian ulita ole. Kaire kwian geru jwannga dolla kagu siere kwian tanre jwligebanga dolla kotege, kaire ama kwian tanre oga dodadu, ama lle kinre gbu kwian oga chuga giti gire kwian oga jo chkeni noni. 14 Chube gerua Jesu giti kledu chage nga ulitage, e suiale kwian kada Herodes ama nga kwian nga Galileamu chugagwalla, Herodes geru e Jesu giti keruchugu Jesu kle age giti, geru chku uñale Herodege kwian gweale kle gerule Jesu giti ene: —Juan-Bautista jogebakeda amaña chkuni gwadeni, malen nege ama kle age tanre no mo kiralla giti kwian ulita gwa giti. 15 Kaire kwian na kledu gerule Jesu giti: —Onbre e kwian Chube gerua ketanga unsuialin tangle kada Elías amaña chkuni. Kaire kwian na kledu gerule Jesu giti: —Onbre e kle age tanre no kiraske kwian gwa giti salengwli kwian Chube gerua ketanga unsuialin tangle kledu age kare Chube ama ta gbu age kare. 16 Geru ai ulita Jesu giti chku uñale chugagwalla rey Herodege, Herodes gerudu: —Cha kwian gbu Juan-Bautista chuga tkenga, agwa nege Juan-Bautista nu jogebakeda amaña chkuni gwade —chugagwalla rey Herodes gerudu ene ta kennga ole. 17 Ulia Herodes nu Juan-Bautista gbaba boi daga ngwale jogekeda chuia jo tangle sbali. Juan-Bautista giti boidu ulita ai kare: Herodes mo jun mo daballanu Felipe muira kada Herodías ole, e giti Juan-Bautista gerudu Herodege: “Chube gerua kle degaba gerule ba me ñage chage mo daballa muira ole mo muira kare, e giti ba jiske tanre Chube gwa giti.” Juan-Bautista gerudu ene Herodes ole Herodes ñanea Herodías giti, malen muinga Herodías jainchku tanre Juan-Bautistadi Juan-Bautista gerudu gdale, Herodías tadu Juan-Bautista gwakalinda, agwa me chku boale amage ama Juan-Bautista gweda mine. Herodes kendunga Juan-Bautista gbe boi daga ngwale gweda, ulia Herodes Juan-Bautista gau dage, Herodege uñadu Juan-Bautista kwian Chubenu no trate me jiske Chube gwa giti, Herodege me sugedu ulita Juan-Bautista kle gerule giti agwa ama diali tadu Juan-Bautista keruchugakalin ta no ole gerule Chube giti. Herodes Juan-Bautista manadu skage gwade Herodías ngeru, Herodías tadu Juan-Bautista gwakalinda Juan-Bautista gerudu giti agwa me chku boale Herodíage age mine tra no Juan-Bautista ole gire ama ta chege no. 21 Chui gbaitege chku uñale Herodíage ama ñage Juan-Bautista gweda mine. Chura chku chugagwalla rey Herodege gire ama mo skatemanalla tanre kadu blire ama ole ama medunga chebia kote chuia ollade. Herodes kwian tanre kadu, kwian Herodes chudaboanga ngle Herodes nu gbaba daba chugagwallale kaire guardia donga chugagwalla ngle kaire kwian na kweri nga Galileage ngle, Herodes kwian ene ulita kadu mo chuia ollade. 22 Kwian chui olladanga ulita kledu blire gire Herodías jian ama kirogwa muire biale jo chke Herodes kledu ngwadi ama skatemanalla ole chui ollade, Herodías jian e skwendu gdate kwian ulita gwa giti, gire skwendu noare Herodege kaire Herodes skatemanalla ulitage Herodías jian kledu skwen gdate giti, Herodes gerudu ama jingdalla ole nga suga no ole: —Nga suga no chadi ba skwendu gdate noare cha ulita gwa giti. Ba ñage lle ba takalinge kade chage cha be kete bage. 23 Chube gwa giti cha geru gbe egdage ba ole kwian chui olladanga ulita gwa giti, ba takalin lle ulita chanu bonga, cha be lle kete bonga ulita bage, ba ñage chege daba gweale chugagwallale nga aige. 24 Chugagwalla rey Herodes gerudu ene Herodías jian ole gire Herodías jian jo siere ne ngwadige ama jo gerule ama chebia ole, ama gerudu: —¿Cha llema kade chugagwalla rey Herodege cha skwendu gdate ñanale? Herodías jaindunga mo jian kalen: —Ba Juan-Bautista chugabita kade Herodege. 25 Chebia gerudu ene jian ole gire jian joni blikare Herodes kledu chui ollade ngwadi, Herodías jian gerudu Herodes ole ama chebia ama ta gbu gerule kare: —Negetabi cha takalin ba Juan-Bautista chugabita kete chage batekwa giti. 26 Chugagwalla rey Herodes Herodías jian keruchugu gerule ene ama ole gire ama ta olidu tanre. Agwa ama nu gerubabi Chube gwa giti kaire kwian na ulita gwa giti ama be lle kete Herodías jiange Herodías jian lle kade amage kare malen Herodes me ñadu geru e blite nganake Herodías jiange. 27 Malen Herodes kwian lle boanga ama alin gdaite kadu mo gitigu, Herodes gerudu kwian e ole: —Joga Juan-Bautista gweda, ba ama chuga tkenga gire ba chieni Juan-Bautista chugabita dbe chage batekwa giti. 28 Kwian lle boanga e jo Juan-Bautista kledu skage ngwadi, ama jo chke llani gire ama Juan-Bautista chuga tkunga. Kwian e Juan-Bautista chugabita du batekwa giti Herodías jian alin, gire Herodías jian Juan-Bautista chugabita ketu mo chebia Herodíage. 29 Geru chku uñale kwian Juan-Bautista gerua jwannga ulitage Juan-Bautista guleda gire ama ulita jo Juan-Bautista kledu skage ngwadi Juan-Bautista jaba jwen ogadale keugage. Ai ulita boidu ene Juan-Bautista giti malen geru chku Herodes ologe kwian gweale kle tañachuge Juan-Bautista jogebakeda chkebani gwade, gire Herodes ta kendunga tanre ama tañachugu ulia Juan-Bautista chkuni gwade, agwa me ene ulia Herodes kwian keruchugu gerule kare. 30 Jesu nu kwian geru jwannga amage ulita kagaba chage una kaire kairege Chube gerua trage daba na ole, kwian geru jwannga ulita chkuni Jesu kle ngwadige, gire ama ulita geru ketu Jesuge ama lle bo ulita giti kaire ama kwian tku tangle mine giti. 31 Kwian geru jwannga kledu geru e trage ulita Jesu ole, gire kwian na tanre kledu chie Jesu kledu ngwadi, kwian gweale kledu jogeni kaire kwian na kledu chke Jesudi, kwian tanre kledu ne ngwadi ni Jesu ni kwian geru jwannga amage ñadu blire, malen Jesu gerudu geru jwannga amage ole: —Kwian tanre kle chke chedi, ale joge sugekare kwian ai ulitage, che alin ulita jogedale undege nga gballage kwian tanre me kle joge chke ngwadi. 32 Gire Jesu ule kwian geru jwannga amage ulita ole kwian na ulita chugu ngwadi kedagu, jo duge nga gballage. 33 Kwian tanre gwagedu ama ulitadi joge, chku uñale kwian ege e Jesu amaña jo sugekare nga ege kwian geru jwannga Jesuge ulita ole, gire kwian ngle una tanrege jo chage blike seradi chi kagda jegwale Jesu nate, kwian ñadu ngeru nga Jesu be joge undege ngwadige. 34 Jesu jo chke chibita kagda giti ongoru nga ama be undege ngwadi ule kwian geru jwannga amage ole, Jesu jo siere duge gire Jesu gwagedu kwian tanredi kledu mo litaba ama manade ngwange. Jesu taidu dage kwian e ulitage, chudaboanga me kwian e alin kwian e tke tangle no trate Chube gerua giti, Jesuge sugedu kwian e ulita bda oveja me mo mananga molen kare, malen Jesu taidu dage kwian e ulitage Jesu kwian e chudabo Jesu kwian e tku tangle tanre Chube gerua giti. 35 Nga jo chege bi, gire kwian geru jwannga Jesuge ulita chku Jesudi gerudu Jesu ole: —Nga jo jere, nga ai che kle ngwadi nga gballa, bligda me nga aige kwian ulita alin gutadale. 36 Noare ba gbi kade bdagli kwian ulitage ba ama ulita kage siere nga aige, ene ama ulita ñage joge nga gwealege una gwealege bligda gige mo alin gutadale. 37 Geru jwannga Jesuge gerudu ene Jesu ole gire Jesu gerudu ama ole: —Ba ulita agali bligda kete kwian ulitage gutadale. Kwian geru jwannga jaindunga: —¿Cha kwian ulita ulle llemadi? ¿Ba takalin cha joge pan gige kwian ai ngle ulita alin? Igi kwangle pan gigagda kwian ngle alin gutadale. 38 Jesu geru kadu kwian geru jwanngage: —¿Ba kle chage pan dbe gdamangire? Joga pan ten pan gdamangire kle. Kwian geru jwannga Jesuge jo pan gdachuge bigire ama geru duni Jesuge pan giti, ama gerudu Jesu ole: —Pan kle gdatigale alin allabi, kaire ngwe kle gdabokle alin allabi. 39 Kwian geru jwannga gerudu ene Jesu ole gire Jesu kwian nglea ulita gbangu toi dba ngauda giti mne kaire kaire. 40 Kwian ulita toidu dba mne kaire kaire sugekare, kwian cincuenta mne gweale kaire kaire kwian cien mne gweale kaire kaire, kwian ulita toidu dba ene ngauda giti. 41 Gire Jesu pan gdatiga ngwe gdaboke gau kote, Jesu gwagedu nga ngaña giti, Jesu gerudu Chube ole bligda giti: “Cha Ñenua, noare ba pan ai ngwe ai ketu kwian ai ulita alin gutadale.” Jesu gerudu ene Chube ole gire ama pan gdatiga skutunga pan ketu kwian geru jwanngage girabatadale kwian ulita ole. Jesu pan gbu jriennga pan ñadu kwian ulita mo litabage. Kaire Jesu ngwe uda junnga ngwe ketu kwian geru jwanngage girabatadale kwian ulita ole. Boidu ngwe ole salengwli boidu pan ole kare Jesu kiralla giti bligda jriendunga ngle. 42 Kwian ngle ulita blidu no, kwian onbre ngle cinco mil blidu, kaire muinga ngle kirogwa ngle blidu agwa ama me jo teanba, Jesu kwian e ulita ullu pan gdatigale alindi ngwe gdabokle alindi. Kwian ulita unchku no bligdadi gire bligda bita ngle cheguda, kwian geru jwannga Jesuge bligda bita e ulita litu ole ski kweri gbataboko giti gbaboke, ski e ulita chku ete bligda cheguda ole. 45 Jesu kwian ngle ullu ene, bigire Jesu gerudu kwian geru jwannga amage ulita ole: —Joga duge chibita tkenga tangle chkagu chi kagda giti una kada Betsaidage. Cha be chege gbi jige bdagli kwian nglege, gire cha be joge ba nate. 46 Kwian geru jwannga Jesuge ulita jo chage duge chiga giti una Betsaida ngnagu, gire Jesu gbi jigu bdagli kwian ulitage Jesu jo sugekare kwian e ulitage jo gballa jwichuga giti ngaña gerule Chube ole. 47 Nga jo jere gire Jesu chegu gballa jwichuga giti, kwian geru jwannga Jesuge jo bate duge chi bonga. 48 Nga chiu kamalin ngwange bdugu gire Jesu jo chage seradi chiga giti kwian geru jwannga ulita kle duge ngwadi ngnagu chi bonga. Mle kweri kledu tiennga kiraske dudi kwian geru jwannga gwangnagu, ama ulita kledu chi bage blikare agwa mle kweri kote ama me ñadu du dbe no. Uñadu Jesuge kwian geru jwannga ulita kledu kira bate tanre ene mle ole. Jesu jo chke kodi duge gire kwian geru jwannga ulita gwagedu Jesudi chage seradi chiga giti agwa me chku Jesu uñe, kwian geru jwannga ulita ta kendunga tanre, ama ulita tañachugu oñakwa kledu chage. Kwian geru jwannga ulita ngwanedunga chru ole, gire blikare Jesu gerudu: —Ba me kennga, ba mo ta gbe kiraske, cha amaña kle chage. 51 Jesu jo du toli kwian geru jwannga ulita kledu ngwadi gire mle me chegu tiennga dare, chi chegu ngwedi. Boidu ene gire kwian geru jwannga ulita chegu tañachuge tanre Jesu agedu giti, e ulita me sugedu trate amage. 52 Kaire ama ulita nu gwageba Jesudi bligda gbe jriennga ngle kwian tanre ullagda, agwa ni e sugedu kwian geru jwanngage, ama me kle mo ta gbe Jesu gai ulia, malen Jesu agedu ene ulita mo kirallaske me sugedu amage. 53 Jesu jo chage duge gwangerugu kwian geru jwannga amage ulita ole, ama ulita jo chke chi kagda giti ongoru nga kada Genesarege. Ne ngwadi ama ulita jo siere duge ama du jun kedagu chi kagda giti, ama du luguda. 54 Kwian tanre nga emu gwagedu Jesudi joge dbige gire chku uñale kwian e ulitage Jesu amaña chku. 55 Kwian e jo blikare daba ulita nga e ulitage ta gbe Jesu kle chage nga ege, gire kwian tanre chiu daba oga dbe ankwa giti Jesu kledu ngwadi dodadale. Jesu jo chke kwian ngle kle toi ngwadi jo chke kwian bedre kle toi ngwadi, nga ulitage baini kaire Jesu jo chke ngwadi kwian tanre chiu diali daba oga dbe Jesu ngwange jonke dodadale Jesuge. Kwian daba oga dbanga ulita gerudu Jesu ole daba oga giti: —Ba daba oga chuge ngwadi ko chuge sidri ba ñometralladi alin allabi, ene daba oga be joge chkeni noni. Kwian chudaboi kadu ene Jesuge daba oga alin, gire kwian oga ulita bai kaire ko chugu alin Jesu ñometralladi, kwian ene ulita jo chkeni noni me chegu oga dare.
1 Kwian fariseo mneite ule kwian daba tkanga tangle Moisés chadalla giti gweale ole chiu una Jerusalénge, chku Jesu kle ule kwian geru jwannga amage ulita ole ngwadi. 2 Kwian e ulita gwagedu kwian geru jwannga Jesuge ulitadi blire, chku uñale amage kwian geru jwannga Jesuge bebi blire gire ama me mo ko gligu trate bitangle geru unsuialin kle gbaba kwian israelita alin gerule kare. 3 Kwian fariseo e ulita kaire kwian israelita na ulita kle mo ta gbaba age diali ama enusulian unsuialin tangle geru gbu kare kwian israelita toidale giti, geru e gerule kwian israelita bebi blire gire ama mo ko gligadale trate tanre geru kledu gbaba unsuialin tangle gerule kare. 4 Kwian israelita joge lle gige lle chbade gire ama joge chkeni gwa ama agedale ulita geru kle gbaba gerule kare, ama me ñage blire ama bebi mo ko glige trate tanre gire. Kaire geru na tanre kledu gbaba unsuialin tangle kwian israelita kle gai dage, geru e gweale kle gbaba un giti lle chi jangwa giti batekwa giti. Kwian israelita lle e kare ulita gligadale no trate geru kle gbaba gerule kare ama bebi gai gire. Kwian israelita kle tañachuge ama me age ulita ai kare gire ene ama kle age me no Chube dollale ama chege jiske Chube gwa giti. 5 Kwian fariseo ulita kaire kwian daba tkanga tangle Moisés chadalla giti ulita bai nu chieba una Jerusalénge kle toi ene geru unsuialin kle gbaba gerule kare, kwian e ulita jo chke Jesu kle ngwadi, ama ulita gwagedu kwian geru jwannga Jesugedi blire ama bebi ko glige trate tanre gire, ama ulita tañachugu e me no gire ama ka bo Jesu ole kwian geru jwannga Jesuge kledu age giti gdale: —¿Mineade kwian geru jwannga bage me kle che enusulian unsuialin suia gai dage? Ama me kle age ulita geru kle gbaba gerule che israelita toidale giti kare. Ama me kle ko glige trate bitangle ama bebi blire gire, ama kle age me no blire ko sugaska ole llagli. 6 Jesu jaindunga kwian e ulita kalen: —¿Mineade ba kle gerule kate ba kle Chube gerua gai dage, gire ba me kle age ba kle gerule kare? Ba ulita ta me no. Kwian Chube gerua ketanga kada Isaías Chube gerua degu unsuialin tangle ba ulita giti, chada e gerule: “Chube gerudu: ‘Kwian ai ulita kle gerule ama kle cha gai dage, kle gerule ene ka giti alin allabi, agwa ulia ama me kle cha gai dage ulia mo tale, ama ta kle bate chage ama kle gerule alin allabi. 7 Kwian kle gerule ama kle cha gai dage mo Chubeale, agwa ngwale ama kle gerule ene, ama me kle mo ta gbe cha ole ulia. Kaire ama me kle daba tke tangle cha gerua ulia giti, agwa ama kle daba tke tangle geru ngwale giti ama agali kle tañachuge kare mo tale.’ ” Kwian Chube gerua ketanga Isaías chada degu ene Chube gerudu giti. 8 Ulia Chube kledu gerule ba kwian fariseo giti kaire ba kwian daba tkanga tangle Moisés chadalla giti ulita giti. Cha gerule ulia ba ulita ole, ba me kle Chube gerua ulia gai dage age geru e kle gbaba kare, agwa ba kle chage kwian ngwale unsuialin tangle suia kle gbaba kare, e ngwale ba kle age kare. 9 Jesu gerudu mno dare kwian e ulita ole: —Diali ba kle mo ta gbe Chube gerua gai ngwale, ba kle ba enusulian unsuialin tangle suia alin allabi gai mo alin, unsuialin ba enusulian geru gbu kwian israelita toidale mine gire nege tangle ba kle age ama geru gbu kare alin allabi ba me kle age Chube geru gbu kare. 10 Unsuialin Chube geru ketu Moisége degadale kwian ulita alin, chada e gerule: “Ba mo ñenua kaire mo chebia gadale dage no.” Kaire chada na Moisés nu degaba kle gerule: “Kwian bai kaire gerule me no mo ñenua dollale mo chebia dollale kwian ene gwadaleda blike.” 11 Moisés Chube gerua degu ene ulita unsuialin, agwa ba ulita agali me kle geru e gbe gdadi kaire ba kle daba na tke tangle age nganake me age chada e kle degaba gerule kare. Ba kle kwian ta gbe me mo ñenua mo chebia chudaboadale me lle ketadale amage ama llea me gire. Ba kle kwian tke tangle gerule mo ñenua ole mo chebia ole: “Mama, tata, cha me ñage ba chudaboi, lle ulita chanu cha ketu Chubege, cha ole lle me ba chudaboagda.” Ba kle kwian tke tangle ama llea ulita ka gbe “corbán” (geru e gerule “lle ai cha nu ketaba Chubege”). 12 Ba kle kwian tke tangle kwian gerule ene ama nu mo llea ulita ketaba Chubege, gire ama me chege jiske ama ñenuage ama chebiage Chube gwa giti, ama me mo ñenua mo chebia chudaboadale. 13 Ba kle age me no ene malen cha gerule ba ole, ba ulita nu Chube gerua mliabanga me mo ñenua mo chebia manade Chube geru gbu kare unsuialin tangle, ba kle ba enusulian unsuialin suia gai dage ma no Chube gerua uliage. Ba kle kwian tke tangle geru na tanre ngwale giti. 14 Jesu gerudu ene kwian fariseo ulita ole kwian daba tkanga tangle Moisés chadalla giti ulita ole, gire Jesu kwian na ulita kledu ne ngwadi kadu mo gitigu ama keruchuge, Jesu gerudu kwian e ulita ole: —Ba cha keruchuge no, cha takalin geru ai suge trate ba ulitage: 15 Ni lle gdaite kwian kle gute kle kwian gbe me no jiske Chube gwa giti, agwa kwian kle tañachuge me no mo tale, gire kwian kle gerule me no age me no ama kle tañachuge kare, e ulita kle kwian gbe me no jiske Chube gwa giti. 16 Ba ulita me cha gerua ai keruchuge alin allabi mo ologe, agwa kaire ba ulita mo ta gbadale geru ai gbe gdadi. 17 Jesu gerudu ene ulita kwian ole gire ama kwian ulita chugu ngwadi goga tangle, ama jo gwa ule kwian geru jwannga amage ulita ole, kwian geru jwannga Jesuge gerudu Jesu ole: —Ba gerudu sbaliga kwian ole bligda che kle gute me che gbe me no jiske Chube gwa giti, geru e me suge chage ba kledu gerule llema giti, cha takalin ba geru e trennga cha ulitage. 18 Jesu jaindunga kwian geru jwannga amage kalen: —¿Ba ulitage kaire agwe geru e me suge? Sugedale bage ni lle gdaite che kle gute ñage che ta gbe me no jiske Chube gwa giti. 19 Che blire gire bligda me kle joge chke che tale che ta gbagda age me no Chube dollale, agwa che kle blire gire bligda kle joge che kdege bigire bligda e kle joge tangle ulita, che kle mlienga. Jesu gerudu ene bligda giti, Jesu kwian ta gbu bligda ulita no trate kwian alin gutadale. 20 Gire Jesu gerudu gwangerugu kwian geru jwannga amage ulita ole: —Cha gerule ba ulita ole, kwian kle tañachuge me no mo tale, talla e giti kwian kle age me no kle gerule me no ama kle tañachuge kare, e kle kwian gbe jiske Chube gwa giti. 21 Kwian tale bai kaire talla me no kle, kwian ene be mo ta gbe age me no diali ai kare ulita: Onbre muinga me mo jwanba mo chuge ke giti. Onbre mo jwanba mo chuge ke giti muinga na ole, muinga mo jwanba mo chuge ke giti onbre na ole. Kwian skwe boi daba ngeru. Kwian daba gweda. 22 Kwian ta lle tanre gakalin mau alin allabi. Kwian age tanre sugaska me no. Kwian daba anblite geru ngwalege. Kwian mo ta gbe age ulita me no ama takalin kare kwian na gwa giti. Kwian jainchke dabadi lle dabanu gdale ama semale tanre daba ole lle dabanu giti. Kwian gerule me no daba nadi. Kwian mo sobade daba nadi. Kwian age ulita ama takalin kare ni tañachuge Chube giti, ama me ta ole. 23 Lle ai ulita cha kle ka jwen ba ole, e ulita kle chie kwian tale, e kle kwian gbe me no jiske Chube gwa giti. Kwian tañachuge me no mo tale gire ama kle age me no ama tañachuge kare, age me no giti kwian mo gbe me no jiske Chube gwa giti —Jesu gerudu ene kwian geru jwannga amage ulita ole. 24 Jesu jo chage dare kwian geru jwannga amage ulita ole una Tiro ngnagu, ama jo chke kodi una Tiroge gire u skwendu amage undegangwa. Ama jo chke gwa u ege, ama me tadukalin chke uñale ni kwian gdaitege ama kle nga ege agwa ama me ñadu mo ogeda dale kwian ngeru. 25 Geru chku uñale kwiange Jesu kle ngmadi, gire blike muinga gdaite jo tienda Jesudi. Muinga e me kwian israelita, ama nga namu nga kada Sirofeniciamu, muinga e jian oga jwligebanga dolla kote, malen muinga e jo Jesu kle ngwadi chudaboi kade Jesuge mo jian alin. Ama jo chke Jesu kle ngwadi ama jongnagwa skutu dba Jesu gwangnagu Jesu gai dage, gire muinga e gerudu Jesu ole: —Cha jian jwligebanga dolla kote, cha takalin ba cha jian dodade ba dolla kage siere cha jiange. 27 Jesu gerudu muinga ole: —Cha bitalla israelita alin cha lle no tanre boadale, ba muinga me israelita, cha ba chudaboi e chege salengwli bligda jwennga kirogwa ngeru kete toge gutadale kare, ma no kirogwa chuge ngwadi blire ngeru. 28 Jesu gerudu ene gire muinga jaindunga Jesu kalen: —E ulia ba gerudu kare kwian chugagwalla, agwa to kle manade kirogwa kle blire ngwadi gire bligda jwna jwatenga kirogwa kote to kle e gute. E kare ene cha takalin ba cha chudaboi, ba dolla kage siere cha jiange. 29 Jesu gerudu muinga ole: —Ulia ba gerudu no, ba gerudu giti suge chage ba kle cha gai ulia, malen e giti cha be dolla gbe joge siere ba jiange, ba ñage jogeni gudegu ba jian kle ngwadi, ba jian kle no. 30 Muinga joni mo ullage, ama jo chkeni gwa gire jian skwendu amage mo undege ankwa giti, ama jian jo chkeni noni chegu trate, dolla jogeba siere kirogwa muire ege Jesu kiralla giti. 31 Jesu jo siere una Tiroge jo chage ule kwian geru jwannga amage ulita ole chibita kada Galilea ngnagu, Jesu chagedu una Sidónske tangle kaire una na tanreske tangle nga Decápolige gire Jesu jo chke chibitage nga Galileage. 32 Ne ngwadi kwian chku daba gdaite olo me dbe Jesudi dodadale, kaire daba oga e me ñage gerule trate. Kwian daba oga e dbanga gerudu Jesu ole: —Cha takalin ba ko gbe daba ai giti, uñale chage ba ñage daba ai dodade ene ama joge chkeni noni. 33 Jesu onbre oga du sugekare kwian ngleage, gire Jesu ko chugu onbre olo toli, Jesu mo jolokwa jun kodige gbu onbre kwira giti. 34 Jesu gwa gaunga ngaña, Jesu unjunnga kweri tai dage tanre onbre oga ege, gire Jesu gerudu mo kwirale onbre oga ole: —¡Efata! —geru e gerule: “¡Olo trende!” 35 Jesu gerudu ene onbre oga ole gire sugeti onbre olo trendu ama ñadu geru keruchuge kaire ama kwira chegu no ama ñadu gerule no trate. 36 Jesu onbre dodadu ene gire Jesu gerudu kwian ulita ole: —Ba me geru kete ni kwian gdaitege cha onbre ai dodadu giti. Jesu gerudu ene tanre kwian ole me geru kete kwian nage Jesu onbre e dodadu giti agwa kwian me ñadu chege kamne, kwian ulita geru e tragu kwian na ole Jesu onbre oga dodadu giti. 37 Kwian ulita bai geru e keruchugu chegu tañachuge tanre no Jesu giti, ama ulita chegu gerule no modi Jesu giti: —Jesu kle age ulita no kwian alin. Kwian olo me ama kle kwian ene gbe olo tren geru keruchuge trate, kaire kwian keru me ama kwian ene gbe gerule trate —kwian ngle gerudu no ene Jesu giti.
1 E suiale nakwaite kwian ngle mo litu Jesudi tangle Jesu keruchuge, Jesu gwagedu kwian ulitadi sugedu Jesuge kwian ulita me bligda molen gutadale, Jesu kwian geru jwannga amage ulita kadu mo gitigu, Jesu gerudu kwian geru jwannga ole: 2 —Cha tai dage kwian ai ulitage, chui maike chku ama ulita kle cha ole aini, bligda ulita bidegu ama ole gire nege ama ulita me bligda molen gutadale. 3 Cha kwian ulita kageni gudeguni me bliba, gire nga ñage jogenga kwian ulita gwage bli ole jonkare, cha me takalin kwian boi ene, kwian gweale nu chieba nga batege, cha me ama ulita kagakalin bliage. 4 Kwian geru jwannga Jesuge ulita gerudu Jesu ole: —¿Che age mine? Aini nga gballa kwian na me kle toi aini, ¿chema ngwadi che joge bligda jinade kwian ngle alin gutadale? 5 Jesu geru kadu kwian geru jwanngage: —¿Pan gdamangire ba kle chage dbe? Kwian geru jwannga jaindunga Jesu kalen: —Pan gdagukle alin kle. 6 Jesu kwian ulita gbu toi dba dbi giti gire ama pan gdaguke gau kote, ama gerudu Chube ole: “Cha Ñenua, nga suga noare chadi ba pan ai ketu chage kwian ulita ullagda.” Jesu gerudu ene Chube ole pan giti gire ama pan skutunga kote, ama pan ketu kwian geru jwannga ulitage girabatale kwian ulita ole, pan jriendunga ngle pan ñadu kwian mo litaba mangire batre alin. 7 Kaire agwe kwian geru jwannga kledu chage ngwe soli ole gdamoite, Jesu ngwe gau kote, gerudu Chube ole ngwe giti gire ama ngwe ketu kwian geru jwannga ulitage girabatale ulita kwian ulita ole, ngwe jriendunga ngle ngwe ñadu kwian mo litaba mangire batre alin ulita. 8 Kwian ngle cuatro mil blidu ulita pan gutu kaire ngwe gutu ulita unchku ama takalin kare. Pan bita ngwe bita cheguda ngle, kwian geru jwannga bligda bita e litu ole, ski kweri gbaguke chku ete bligda bita cheguda ole. Jesu kwian ulita ullu ene gire Jesu gbi jigu bdagli kwiange, kwian kaguni gudeguni. 10 Gire Jesu jo duge ule kwian geru jwannga ulita ole chi kagda giti ongoru nga kada Dalmanutage. 11 Jesu jo chke nga Dalmanutage ule kwian geru jwannga ulita ole, gire kwian fariseo ngle chku mo lite Jesudi mo chuge Jesu ole ta me no ole, kwian fariseo gerudu Jesu ole: —Ba kle gerule Chube ba kagu nga dba ai giti, cha takalin nege ba lle daga ngwale no kweri kwian me ñage dodade mo kira giti kare ba lle ene dodade cha ulita gwa giti, ene be chke uñale trate cha ulitage ulia Chube ba kagu ba kle age Chube kiralla giti. 12 Jesu ta olire tanre kwian fariseo me kle ama gai ulia giti, Jesu gerudu kwian fariseo e ulita ole: —¿Mineade diali ba ulita kle toi chui aige tangle takalin cha age ene ba gwa giti? Ba kle gerule alin cha lle daga ngwale no dodade ba gwa giti kwian me ña lle dodade mo kira giti lle ene cha dodadale gire ba be cha gai ulia Chube cha kagu age ama kiralla giti. Agwa ulia cha gerule ba ole, cha mi age ba kle toi chui aige tangle alin ba ulita takalin kare. 13 Jesu gerudu ene kwian fariseoge, gire Jesu nga jigunga ama ulitadi, Jesu joni naskuni du toli kwian geru jwannga amage ulita ole, ama ulita jo chage duge chkagu chibita kagda ongoru ngnagu. 14 Kwian geru jwannga Jesuge ta jonga pan dbe gutadale duge, pan gdaitre alin allabi kledu ama ole du toli. 15 Jesu kwian geru jwannga ulita ta gbu me geru ngwale gai, Jesu gerudu ama ulita ole: —Cha gerule ulia ba ole, ba mo ta manadale chage ta giti kwian fariseoske kaire chugagwalla rey Herodege, ba me mo chuge ngwadi ama levaduralla gai pan dodale mo alin. 16 Kwian geru jwannga ulita tañachugu Jesu kle gerule pan dodaba levadura ole ulia giti gire gerudu modi: —Che me chiu pan dbe gutadale malen Jesu kle gerule ene che ole levadura giti. 17 Jesuge chku uñale kwian geru jwannga kle gerule modi Jesu gerudu giti, uñadu Jesuge geru levadura giti me sugedu trate kwian geru jwanngage, Jesu gerudu ama ulita ole: —¿Mineade ba kle gerule modi ba me chiu pan dbe mo ole llagli giti? ¿Bage me suge bligda me gire cha ñage bligda kete ba ulitage? ¿Ba bebi mo ta gbe ulia cha ole cha kiraske cha ñage age ulita Chube kiralla giti? 18 Cha lle daga ngwale no tanre dodadu ba gwa giti, agwa me suge bage cha mine. Ba cha gerua keruchugu cha kledu kwian tanre tke tangle gire, agwa geru me suge bage dale. ¿Ba ta jonga ulita cha kwian ngle ullu bligda sidridi giti? 19 Cha pan gdatiga girabatangu bage kwian onbre ngle cinco milge, kwian e ulita unchku gire ¿ba bligda bita cheguda litu ole ski gbamangirege? Kwian geru jwannga Jesuge jaindunga: —Ski gbataboko giti gbaboke chku ete bligda bita cheguda ole. 20 Jesu gerudu dare: —Ba gerudu trate. Kaire agwe cha pan gdaguke girabatangu bage kwian ngle cuatro milge, gire ¿ba bligda bita cheguda litu ole ski gbamangirege? Kwian geru jwannga jaindunga: —Ski gbaguke chku ete bligda bita cheguda ole. 21 Gire Jesu gerudu geru jwannga ole: —¿Bage geru bebi suge cha gerudu sbaliga ba ole giti? Cha gerudu ba ulita ole ba me mo chuge ngwadi kwian fariseo kaire chugagwalla rey Herodes levaduralla gai mo alin giti, cha me kledu gerule levadura ulia giti, agwa cha kledu gerule kwian fariseo gerua ngwale giti kaire chugagwalla rey Herodes gerua ngwale giti —Jesu gerudu ene kwian geru jwannga amage ulita ole. 22 Jesu ule kwian geru jwannga amage ulita ole chagedu dare duge gire ama ulita jo chke una Betsaidage, ama ulita chiu dbige duge gire onbre gdaite gwagwa me dbachku Jesudi dodadale. Onbre gwagwa me dbanga gerudu Jesu ole: —Ba ko gbe onbre ai gwagwa giti ene ama joge chkeni noni. 23 Kwian gerudu ene Jesu ole gire Jesu onbre gwagwa me gau koge du sugekare una ege. Jesu mo jolokwa jun gbu onbre gwagwa giti, Jesu ko gbu onbre gwagwa giti gire ko junnga onbre gwagwa giti, Jesu geru kadu onbre gwagwa mege: —¿Ba ñage ten lle gwealedi o me? 24 Onbre gwagwa me ama gwagwa trendu sidri gire ama jaindunga Jesu kalen: —Ima, cha kle ten kwiandi agwa kwian kle meñe cha gwage salengwli gli kare, ama kle chage. 25 Jesu ko gbu nakwaite onbre gwagwa giti, gire onbre gwagwa trendu no jo chkeni ulita, ama tendu lle ulitadi trate. 26 Jesu gerudu ama ole: —Ba jogeni blike gudegu mo ullage, ba me joge unaske geru trage kwian na ole cha ba dodadu giti —Jesu gerudu ene onbre ama nu dodaba ole. 27 Jesu jo chage dare kwian geru jwannga amage ulita ole una soli ulita gdaite gdaitege una kweri kada Cesarea-Filipo giti tangle. Gire jonkare Jesu geru kadu kwian geru jwanngage: —¿Kwian ulita kle gerule mine cha giti cha chema? 28 Kwian geru jwannga jaindunga: —Kwian gweale kle gerule ba Juan-Bautista jogebakeda chkuni gwade, kwian na kle gerule ba kwian Chube gerua ketanga dabage unsuialin kada Elías chkuni, kaire kwian na kle gerule ba Chube gerua ketanga unsuialin jogebakeda chkuni gwade. 29 Kwian geru jwannga gerudu ene Jesu ole gire Jesu geru kadu dare ama ulitage: —Kwian na kle gerule ene cha giti, ¿agwa ba gerule mine? ¿Cha chema? Pedro jaindunga Jesu kalen: —Ba Cristo, Chube ba kagu nga dba ai giti kwian kare kwian jwen siere ji chugege agedu me no gdale. 30 Pedro gerudu ene Jesu giti gire Jesu gerudu kwian geru jwannga ulita ole: —Pedro gerudu trate, agwa ba me geru e trageni kwian gdaite na ole, me gerule kwian na ole cha Cristo Chube nu cha kagaba nga dba ai giti —Jesu gerudu ene kwian geru jwannga amage ulita ole. 31 Jesu kwian geru jwannga amage ulita ta gbu Jesu be boi mine giti, Jesu gerudu: —Chube cha kagu nga dba ai giti kwian kare, kwian tanre be age cha dollale cha gbe boi tanre daga ngwale, kwian israelita chugagwalla juma ulita kaire kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti, kwian e ulita me cha gerua gai ulia, ama ulita be jainchke chadi cha gerua gdale be cha gbe boi daga ngwale, bdagli cha gwabeda agwa mongikege cha jaba be chkeni gwade. 32 Jesu gerudu trate ene mau giti kwian geru jwannga amage ta gbagda Jesu be boi giti, gire Pedro Jesu du sugekare, Pedro gerudu Jesu ole: —Ba me gerule ene, ba mi boi daga ngwale ene ba kle gerule kare. 33 Jesu jwlituda gdate naskuni gwagedu kwian geru jwannga na ulita ngnagu gire ama ka bo mno Pedro ole: —¡Chegede kamne! Ba kle gerule Satanás kiralla giti ba kle gerule ama takalin kare, ulia ba me kle tañachuge Chube takalin kare ba kle gerule kwian onbre ngwale kle tañachuge kare. 34 Jesu gerudu ene Pedro ole gire Jesu kwian na nglea kadu mo gitigu ule kwian geru jwannga amage ulita ole, Jesu gerudu kwian ulita ole: —Kwian bai ta chagekalin ulia cha ole me tañachugadale dare mau giti alin allabi me agedale dare ama agali ta agekalin kare, ama mo ta gbadale cha gerua gbe gdadi age cha takalin kare, kwian na ama gbe boi daga ngwale cha gerua gdale kaire kwian na ta ama gwakalinda cha gerua gdale ama me mo talladale. Kwian bai mo ta gbe boi cha giti kwian ene ñage chage cha ole. 35 Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua dbe gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 36 Cha gerule ba ole, ngwale kwian tañachuge tanre lle lite ole ngle giti ama kle toi nga dba ai giti gire. Kwian tañachuge lle lite ole alin allabi mau alin agwa ama me mo ta gbe ulia Chube ole, kwian e be jogenga ngwale ulita, ama be chege sugekare Chubege diali chui tangle. 37 Kwian me ñage tañachuge lle no ñanaske gweale kete Chubege, gire e giti Chube be ama gbe toi no ule Chube ole nga ngaña giti diali chui tangle, me ene dale. 38 Cha gerule ba ole, Chube cha kagu nga dba ai giti kwian kare chui bdaglige cha be chieni nakwaite cha Ñenua Chube kiralla giti, cha be chieni ule lle boanga Chube alin nga ngaña giti ngle ole. Kwian nege tangle bai kaire cha gai ulia agwa ama ibule cha giti cha gerua giti kwian agenga me no me cha gerua gaba ngeru, kwian ene ole nga chie ibule amage gerule ama cha gai ulia. Kwian bai ibule ene cha giti nege, kwian ene giti cha mi gerule no cha be chieni chuiage, chui ege cha mi gerule ama giti ama chanu.
1 Jesu gerudu dare kwian ulita ole: —Cha gerule ulia ba ulita ole, ba gweale kle aini cha ole cha keruchuge ba bebi jogekeda, gire ba gwa giti Chube be age no no cha ole ama kiralla giti, ba gwage chadi ene, gire be suge trate bage cha noare cha kweri cha kwian ulita Chugagwalla —Jesu gerudu ene ulita. 2 Chui gbadereke jo tangle gire Jesu jo jwichuga giti bate ngaña, ama kwian geru jwannga amage gdamaire alin allabi du ule, ama Pedro kaire Santiago kaire Juan du ule ama gatedi. Ama ulita jo chke jwichuga giti kwian na me kle ngwadi, gire Jesu jegwale jwlitedu ulita kwian geru jwannga gdamai e gwa giti. 3 Jesu ñometralla ulita jwlitedu jutre jutre Jesudige gwadenga noare, ni kwian gdaite ñage ñometra glige ene chege jutre Jesu ñometralla kare. 4 Kwian geru jwannga gdamai gwagedu Jesudi ene, gire blike kwian unsuialin boke kada Elías kaire Moisés medu geru trage Jesu ole ama gdamai gwa giti. 5 Pedro gwagedu ene Moisédi Elíadi geru trage Jesu ole, gire Pedro gerudu Jesu ole: —Cha tkanga tangle geruge, nga suga noare chadi che ulita chku aini. Cha be u soli gbe aini gbamai toingwa sugetidale, u gbaite ba alin, u gbaite Moisés alin, u gbaite Elías alin —Pedro gerudu ene Jesu ole. 6 Ulia kwian geru jwannga Jesuge kendunga tanre ama kle gwage giti me sugedu amage kle boi mine gire me chku uñale Pedroge ama gerudale mine. 7 Pedro kledu gerule ene Jesu ole gire bogakwa jutre chra gwadetranga chku blikare ama ulita giti, ama ulita chegu bogakwaske gire bogakwaske Chube kerua sugedu ama ologe gerule: “Ai cha Kirolla, cha no no ama ole. Ba ulita ama keruchugadale no, ba mo ta gbadale ama kerua gbe gdadi no diali.” 8 Chube kerua sugedu ene kwiange gire blikare kwian geru jwannga Jesuge tienduda modi tangle gire Elías Moisés me medu dare kwian geru jwannga gwage, Jesu alin kleduni gballa. 9 Boidu ene ulita jwichuga giti gire Jesu joni chage jwichugadi gwadbiguda ule kwian geru jwannga gdamai ole, Jesu gerudu ama ole jonkare: —Mo gwagwa giti ba gwagedudi jwichuga giti nege kaire ba geru keruchugu cha giti, ba me e trage ni kwian na gdaite ole. Cha chiu nga dba ai giti kwian kare cha be jogekeda, cha jaba be chkeni gwade gire ba ñage boidu nege gerua trage kwian na ole. 10 Jesu kwian geru jwannga gdamai ta gbu ene kwian gwagedu giti kaire kwian geru keruchugu giti, gire kwian geru jwannga gdamai geru e ulita gatu mo tale, agwa ama gdamai kledu gerule modi ongoru ongoru: —Jesu gerudu ama be chkeni gwade, geru e me suge chage. ¿Ama kledu gerule llema giti? Ama gerudu modi ene agwa boidu ulita jwichuga giti ama me geru e ketu kwian nage. 11 Kaire kwian geru jwannga gdamai geru kadu Jesuge: —¿Mineade kwian daba tkanga tangle Moisés chadalla giti kle gerule Elías chkedale chage kwianske nga dba ai giti ngeru, gire Chube be kwian daba jwannga siere kage kwian ulita alin? Ba klebi nga dba ai giti kwianske malen me suge chage mineade kwian e kle gerule Elías bebi chke. 12 Jesu jaindunga ama kalen: —E ulia kwian kle gerule kare, Elías chiedale kwian ulita ta gbe biale ngeru, gire Chube kwian daba jwannga siere kage chuiage kwian ulita ta kle biale kwian daba jwannga siere gai ngwange no, e trate ene ulia. Chube gerua degaba unsuialin gerule cha giti chada e kle gerule Chube be cha kage nga dba ai giti kwian jwanngale siere, kaire chada e gerule kwian tanre be cha gai kwian ngwale kare be cha gbe boi daga ngwale tanre me no. Chube gerua kle degaba unsuialin gerule ene cha giti, ¿ba tañachuge mine geru e giti? 13 Cha gerule ba ole, Elías chkubi kwianske agwa kwian ama gau kwian ngwale kare kwian me ama gau dage, kwian ama gbu boi jere jere kwian tadukalin kare, ama boidu ene ulia Chube gerua kle degaba unsuialin kle gerule kare —Jesu gerudu ene kwian geru jwannga amage gdamai ole. 14 Jesu kaire kwian geru jwannga gdamai jo chkeni kwian geru jwannga na ulita kledu ngwadi gire amage kwian geru jwannga na ulita skwendu kwian na tanre ole mo litaba. Kaire kwian daba tkanga tangle Moisés chadalla giti ngle kledu gerule tanre ka boi kwian geru jwannga ole dolla kage siere kwiange giti. 15 Kwian ulita gwagedu Jesudi chie ama gitigu, ama ulitadi nga chegu suga noare, ama ulita jo jrite Jesu gitigu Jesu gai ngwange no ama gbi kadu Jesuge: —¿Che kle mine? 16 Jesu gerudu kwian ulita ole: —Che kle ngwakwli. ¿Kle boi mine aini? ¿Kwian kle gerule llema giti aini ka boi kwian geru jwannga chage ole? 17 Kwian gdaite kledu kwian ngleaske jaindunga Jesu kalen: —Kwian tkanga tangle geruge, cha chiu cha kirolla ai dbe dodadale, cha tañachugu ba kle aini ene ba ñage cha chudaboi cha kirolla jwligebanga dolla kote dodade. Cha kirolla oga sbali dolla kbiale ama me ñage gerule dale ama keru me. 18 Dolla kle age me no cha kirolla ole diali chui gwealege ama kle no chui gwealege ama kle boi tirare dolla kote, dolla kle nga kagenga cha kirolla giti, dolla kiralla kle cha kirolla lugeda dba tangle, ama kle jolokwa mlienga tanre kate, ama kle dau jrite tirare kaire dolla kle ama gbe sklieda ulita jegwale. Cha gerudu kwian geru jwannga bage ulita ole chudaboi kade amage dolla kage siere cha kirollage agwa ama ulita me ñadu, malen cha chiu ba nate ba cha kirolla dodade. 19 Jesu kirogwa ñenua keruchugu gerule ene gire Jesu gerudu kwian ulita kle ne ngwadi ole: —Ba ulita me kle mo ta gbe cha gai ulia. ¿Ngaminegire ba be mo ta gbe cha gai ulia, ene Chube ñage kira kete bage age ulita cha kle age kare? ¿Ngamangire ba be kle kian gbe chage cha ba chudaboadale? Kirogwa du chage aini. 20 Jesu gerudu ene kwian ole gire kirogwa e dule Jesuge, dolla kle kirogwa tale gwagedu Jesudi gire dolla e nga kagunga ma obere kirogwa giti, dolla kirogwa luguda dba tangle, kirogwa jolo alin mliunga ngle kate. 21 Jesu geru kadu kirogwa ñenuage: —¿Ngaminegire ama kledu boi ene? Kirogwa ñenua jaindunga Jesu kalen: —Ama chiu tige sidri ama ogabi ene dolla kote. 22 Diali dolla kle kirogwa gbe boi tirare ama kle boi ba gwa giti nege kare kaire agwe chui gwealege dolla kle ama gbe joge chke dba jitaske kaire chiske. Dolla kle age ene kirogwa gbale jogekeda, malen cha gerule ba ole, ba ñage age gweale cha kirolla chudaboi ba agedale. Ba tai dage chage ba cha chudaboi, ba dolla kage siere cha kirollage. 23 Jesu gerudu kirogwa ñenua ole: —¿Mineade ba kle gerule cha ñage age gweale ba kirolla chudaboi cha agedale? Kwian ulita bai kaire kle mo ta gbe ulia Chube ole kle mo ta gbe Chube gerua gai ulia, kwian ene alin Chube be age ulita no kwian chudaboagda. 24 Kirogwa ñenua gerudu Jesu ole: —Cha kle mo ta gbe ulia Chube ole, agwa ba cha chudaboi mo ta gbe ma ngle gwangerugu Chube gai ulia diali. 25 Jesu gwagedu kwian tanre kledu mo litaba amadi tangle, gire Jesu gerudu dolla kledu kirogwa tale ole: —Ba dolla kwian gbanga olo me keru me, ba ole cha gerule, ba jogedale siere kirogwa aige, ba me ñage age dare me no ama ole ni ba ñage joge chkeni ama tale dare. ¡Joga siere amage! 26 Jesu gerudu ene gire dolla ngautu kweri skochiu tanre ama nga kagunga kirogwa giti nakwaite ma obere ngerugu gire dolla jo siere kirogwage, dolla kirogwa jigu jogebakeda kare. Kwian tanre gerudu dolla kirogwa guda, 27 agwa Jesu kirogwa ko gau kote Jesu kirogwa chudabo chke gdate, kirogwa chku gdate chegu no trate ulita. 28 Bigire Jesu jo sugekare kwian ngleage ama jo gwa u gbaitege ule kwian geru jwannga amage ulita ole, gire kwian geru jwannga geru kadu amage: —¿Mineade cha me ñadu dolla kage siere kirogwa ege? 29 Jesu jaindunga kwian geru jwannga amage kalen: —Kwian jwligebanga dolla tirare kote kirogwa e kare, ba ta dolla e kare kagakalin siere kwiange, ba mo ta gbadale mo tke bage bligdage gerule tanre Chube ole kira kade amage dolla kagagda siere kwiange, ene Chube kirallaske ba ñage. Ba me mo tke bage bligdage ni gerule Chube ole kira kade amage, ene ba me ñage dolla e kare kage siere kwiange —Jesu gerudu ene kwian geru jwannga amage ulita ole. 30 Jesu kaire kwian geru jwannga amage ulita jo siere ne ngwadige ama ulita jo chage nga Galileage tangle. Jesu tadukalin kwian geru jwannga amage tke tangle sugekare kwian na ulitage Jesu be boi giti malen Jesu kledu chage nga ege tangle skwlenre kwian ngleage, Jesu kledu chage kwian geru jwannga ole, gire ama gerudu: —Chube cha kagu nga dba ai giti kwian kare, cha ketabe kwian agenga me no cha dollalege gwaleda, ama be cha gweda, agwa chui mongikege cha jaba be chkeni gwadeni. 32 Kwian geru jwannga ulitage me sugedu trate Jesu kledu ama tke tangle giti, ama ulita ibudu geru kade Jesuge geru Jesu kledu gerule ama ole giti. 33 Bigire Jesu jo chke una Capernaumge ule kwian geru jwannga amage ole. Jonkare kwian geru jwannga ulita kledu mo ka dodadeda ongoru ongoru ama kledu chage modi batre, malen ama ulita jo chke gwa uge gire Jesu geru kadu ama ulitage: —¿Ba ulita kledu mo ka dodadeda llema giti ongoru ongoru jonkare? ¿Geru mine giti ba kledu mo ka dodadeda jonkare? Jesu geru kadu kwian geru jwanngage ene, gire ni kwian gdaite jaindunga ama kalen, ama ulita chegu kamne, ulia jonkare ama ulita kledu gerule modi chema be chege ma kweri Chube gwa giti daba na ulitage, ama ulita ibudu gerule Jesu ole llema giti ama kledu gerule modi jonkare malen ama ulita me jaindunga Jesu kalen. 35 Agwa uñadu Jesuge ama ulita kledu gerule llema giti. Jesu toidu dba gire ama kwian geru jwannga gdataboko giti gdaboke ulita kadu mo gitigu, Jesu gerudu ama ulita ole: —Kwian bai kaire chegekalin ma kweri daba nage, kwian ene sugedale moge ma soli daba nage, ama mo ta gbadale daba na ulita chudaboi ta no ole age no daba ulita alin. 36 Jesu gerudu ene gire Jesu kirogwa soli gdaite kle ne ngwadi gau kote ama kirogwa gbu toi dba mo skwagda giti kwian ulita gwa giti, Jesu gerudu: 37 —Kwian bai kaire no cha ole ulia, kwian ene kle kirogwa ai kare gai ngwange no kle age no ama alin, kwian age ene me kle kirogwa alin allabi gai ngwange no, kaire ama kle cha gai ngwange no kle age no cha agali alin kare. Ene kaire kwian bai kaire cha gai ngwange no, kwian ene kle Chube cha kaganga nga dba ai giti gai ngwange no kaire —Jesu gerudu ene kwian geru jwannga amage ole. 38 Gire Juan gerudu Jesu ole: —Cha tkanga tangle geruge, cha ulita gwagedu kwian gdaitedi dolla kage siere daba jwligebangage, kwian e gerudu ama kledu dolla kage siere dabage ba kiralla giti. Ama me kle chage che ole malen cha gerudu ama ole ama me ñage age ene dare. 39 Jesu gerudu: —Ba me gerule ama ole ama me ñage age ene dare, ba me ñage mo gbe ma kweri amage. Kwian ulita bai kaire kle lle daga ngwale no dodade cha kiralla giti, kwian ene mi gerule blike me no cha dollale, ama be gerule no cha giti. 40 Ulia kwian bai me kle age che dollale, kwian ene kle age che bale kle che chudaboi, ba me ka boi ama ole. 41 Cha gerule ba ole, kwian bai kaire tai dage ba cha gerua gangage age no ba alin ba cha gerua dbe gdale ama chi kete bage jadale ba siechie gire, kwian ene alin Chube be age no kwian ba chudabo ñanale. 42 Jesu gerudu dare: —Cha gerule ulia ba ulita ole, kwian bai kaire age me no kwian chanu ole kwian cha gerua gaba ulia me sbali kwian na daba ene ta gbeni bliteni naskuni age gweale me no Chube dollale, ma no kwian daba gbanga age me no ene alin ke kweri lugaba mo siroge mlienga ble jereske age me no giti gdale kwian chanu ole, ene kwian e be jogekeda mi ñage chege dare kwian chanu ta gbe age me no joge siere cha geruage. 43 Kaire sugedale bage ba agali kle mo gbe age me no. Ba ta agekalin gweale me no mo ko gdaite giti, ba mo ta gbadale me tañachuge dare age me no ene kare ko e giti, ba age me no ene talla chuge ngwadi, e salengwli ba mo ko tkenga kare, ene ba me age me no dare mo ko giti kare. Ma no ba alin joge ko bitale ole toi Chube ole nga ngaña giti diali dale alin ba agedu no Chube takalin kare ñanale, agwa me no ba alin joge ko no gdabonate ole ji chuge tirare ngwadi boi daga ngwale jitaske ba agedu me no mo ko giti Chube dollale ñanale, jita e kle ngwadi mi jogeda dale jita e chege diali gwade tirare kwian agenga me no gbagda boi daga ngwale chui tangle. 44 Ji chuge daga ngwale ngwadi lle ulita joge chegale sugaska gutaba gwita kote, gwita e ulita mi jogekeda dale. Kaire jita diali be kle gwade kwian agenga me no gbagda boi daga ngwale, jita e mi joge gwabada jita e chege diali chui tangle. 45 Kaire ba sera giti ba jogekalin age gweale me no, ba mo ta gbe mo sera tkenga kare ene ba me tañachuge dare age me no mo sera giti, ba agedale salengwli ba sera bitale kare ene ba me ñage age me no mo sera giti ba takalin kare. Ma no ba alin joge sera bitale ole toi Chube ole nga ngaña giti diali dale alin ba agedu no Chube takalin kare ñanale, agwa me no ba alin ba joge mliabanga sera no gdabonate ole ji chuge tirare ngwadi boi daga ngwale ba agedu me no mo sera giti Chube dollale ñanale. 46 Ji chuge daga ngwale ngwadi lle ulita joge chegale sugaska gutaba gwita kote, gwita e ulita mi jogekeda dale. Kaire jita diali be kle gwade kwian agenga me no gbagda boi daga ngwale, jita e mi joge gwabada jita e chege diali chui tangle. 47 Kaire agwe ba gwage lle gwealedi mo gwagwa giti gire gwage edi giti ba ta agekalin gweale me no, ba me mo chuge ngwadi gwage lle edi dare tañachuge lle e giti dare, ma no ba mo linge siere lle ege. Ba agedale salengwli ba gwagwa gbaite jo jwanba siere kare ene ba me ñage gwage lle me nodi ba takalin kare. Ma no ba alin joge gwagwa gbaitre alin ole toi Chube ole nga ngaña giti diali chui tangle ba agedu no Chube takalin kare ñanale, agwa me no ba alin joge mliabanga gwagwa gbabonate no ole ji chuge tirare ngwadi boi daga ngwale ba agedu me no Chube dollale ñanale. 48 Ji chuge daga ngwale ngwadi lle ulita joge chegale sugaska gutaba gwita kote, gwita e ulita mi jogekeda dale ne ngwadi, kaire jita diali be kle gwade kwian agenga me no gbagda boi daga ngwale, jita e mi joge gwabada jita e chege diali chui tangle. 49 ’Cha gerule ulia ba ulita ole, che me takalin samla tuge gire che cho bate ngle samlage, ene samla me joge chegale, e kare ene Chube kle ba kwian amanu gbe boi daga ngwale gweale ba ta gbagda ama gai ma ngle, ene ba me mo ta blite age me no Chube dollale. 50 Cho mana noare, agwa cho joge skeke gire che me ñage cho gbeni naskuni bale, che cho skeke mliadalenga, cho e ngwale. E kare ene ba kle gerule modi chema chema ma kweri daba na ulitage, ba mo gbakalin ma kweri daba nage ba me ñage lle boi no Chube alin, ene ba kle chege cho skeke kare ngwale. Ba me mo gbe ma kweri daba nage, ba mo ta gbadale toi no daba na ulita ole daba ulita chudaboangale —Jesu gerudu ene ulita kwian geru jwannga amage ole.
1 Jesu jo siere una Capernaumge ule kwian geru jwannga amage ulita ole, ama ulita jo nga Judeage, jo chke chi Jordánge ama jo chi kagda giti ongoru. Ne ngwadi kwian tanre litedu Jesudi tangle gire Jesu kwian tku tangle Chube giti ama kle age diali kare. 2 Kwian fariseo gweale chku Jesudi mo chuge Jesu ole, ama ulita takalin Jesu gerule gweale me no Moisés chadalla dollale, ene ama ñage Jesu gbe jiske e gdale, ta ene ole kwian fariseo ulita geru kadu Jesuge: —Cha geru kade bage, ¿kwian onbre mo jwanba ñage mo muiralla chuge ngwadi? ¿Age ene e skwen no Chube gwa giti o skwen me no Chube gwa giti? 3 Jesu jaindunga: —Kaire cha geru kade bage, Moisés Chube gerua degu unsuialin, ¿chada e gerule mine muinga chuge ngwadi giti? 4 Kwian fariseo jaindunga Jesu kalen: —Moisés Chube gerua degu unsuialin chada e gerule onbre ta mo muiralla chugakalin ngwadi, onbre e chada degadale kete mo muirallage, chada e gerule muinga e me amanu dare, onbre age ene gire onbre ñage mo muiralla chuge ngwadi. 5 Gire Jesu gerudu: —Kwian ulita me age Chube takalin kare, kwian me no kwian ta agekalin mau tale me no kwian takalin kare, malen Chube Moisés ta gbu chada dege kwian ulita alin ene kwian ulita tachke ama me agedale me no. 6 Kaire Chube Moisés ta gbu chada dege unsuialin gwange jondege alin nga ulita lle ulita jo dodaba giti, chada e gerule: “Chube kwian onbre dodadu kwian muire dodadu.” 7 Kaire chada e amaña gerule: “Chube kwian dodadu ene onbre muire, malen kwian onbre mo jwankalin muinga ole, ama mo ñenua mo chebia chugadale ngwadi mo ta gbe ule muinga ole gire ene ama gdabonate chege kwian gdaitre alin kare ta salengwli ole.” Moisés Chube gerua degu ene. Nege cha gerule ba ulita ole, kwian mo jwanba me chege kwian gdaboke kare, agwa Chube gwa giti ama boke chege kwian gdaitre alin kare onbre muinga ole muinga onbre ole, ama boke ta chegedale ule salengwli. 9 Ulia me no kwian onbre mo gbe sugekare mo muirallage, Chube muinga ketu onbrege, Chube onbre ketu muingage, Chube kwian gbu mo jwen ene, malen onbrenu muirenu me ñage age ama takalin kare, onbre joge siere muingage o muinga joge siere onbrege, e me no Chube gwa giti —Jesu gerudu ene kwian fariseo ulita ole. 10 Bigire Jesu jo gwa ule kwian geru jwannga amage ulita ole, kwian geru jwannga geru kadu Jesuge: —Jesu, cha takalin ba cha ulita ta gbe dare ba gerudu giti kwian fariseo ole onbre mo muiralla chuge ngwadi giti. 11 Jesu gerudu kwian geru jwannga ole: —Cha gerule ulia ba ulita ole, kwian onbre bai kaire mo muiralla chuge ngwadi gire mo jwen muinga na ole, onbre e kle age me no Chube gwa giti, Chube gwage e salengwli onbre e kle mo chuge ke giti muinga e ole kare, kaire onbre e kle age me no muinga ngeru dollale. 12 Kaire agwe muinga mo ñengulalla chuge ngwadi gire mo jwen onbre na ole, muinga e kle age me no Chube gwa giti, Chube gwa giti e salengwli muinga e kle mo chuge ke giti onbre na ole kare —Jesu gerudu ene kwian geru jwannga amage gdataboko giti gdaboke ole. 13 Kirogwa ñenua kirogwa chebia tanre chiu mo kirogwalla soli dbe Jesu kle ngwadi, kirogwa ñenua chebia takalin Jesu ko gbe kirogwa soli e giti gerule Chube ole Chube age no kirogwa alin Chube kirogwa manade no. Kwian geru jwannga Jesuge ulita gwagedu kwian tanre edi chie kirogwa dbe Jesuge gire ama ka bo kirogwa ñenua ole chebia ole: —¿Lledale ba kle chie kirogwa dbe Jesuge? ¡Joga, joga siere, ba me chie kirogwa dbe Jesuge! 14 Jesu gwagedu kwian geru jwanngadi ka boi kirogwa ñenua ole chebia ole me ñage kirogwa dbe Jesuge, gire Jesu ta skochiu tanre kwian geru jwannga ulitadi, Jesu gerudu kwian geru jwannga ole: —Me no ka boi ene kirogwa ñenua ole chebia ole, ba ama chugene chie mo kirogwalla dbe chage. Kirogwa soli ta kle biale Chube gerua gai ulia blike, kirogwa talla ene kare Chube takalinge, kwian ulita bai kaire mo ta gbe ulia Chube ole kirogwa talla ene kare ole, kwian ene chege Chubenu, ama be toi diali chui tangle Chube ole. 15 Cha gerule ulia ba ulita ole, kwian ulita bai kaire me mo ta gbe kirogwa talla kare Chube ole, kwian ene me ñage toi ule Chube ole, ama be chege sugekare Chubege. 16 Jesu gerudu ene kwian geru jwannga ole gire kirogwa ñenua chebia ulita chiu mo kirogwalla dbe Jesuge, Jesu kirogwa soli ulita gdaite gdaite gau kote, ama ko gbu kirogwa ulita giti gerudu Chube ole Chube age no kirogwa alin kirogwa manade no. 17 Jesu jo chage dare gwangerugu, gire onbre gdaite chiu jrite Jesu ngnagu jonkare, onbre e mo jongnagwa skutu dba Jesu ngwange Jesu gai dage gire ama gerudu Jesu ole: —Ba kwian tkanga tangle noare, cha takalin ba geru kete chage, ¿cha llema boadale nga dba ai giti gire ene cha ñage toi no diali chui tangle Chube ole nga ngaña giti? 18 Jesu jaindunga kwian e kalen: —¿Mineade ba gerudu cha no? Ulia ni kwian gdaite no trate, Chube alin allabi no trate ulita. 19 Bage uñale trate Chube nu geru gbaba kwian ulita alin kwian toidale mine Chube gwa giti, Moisés Chube gerua e degu unsuialin ba chada e uñe trate, chada e gerule: “Ba me daba gweda. Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole. Ba me skwe boi daba ngeru. Ba me geru jinade ngwale daba na dollale. Ba me gerule ngwale daba anblitagda lle amanu jwennga ama ngeru mau alin. Ba mo ñenua mo chebia gai dage.” Moisés Chube gerua degu ene unsuialin kwian ulita alin, ba agedale ulita geru e kle degaba kare. 20 Jesu gerudu ene kwian onbre ole gire kwian onbre e gerudu Jesu ole: —Cha kledubi soli gwangeabi cha jo juma gdate cha kle geru e ulita gai dage age ulita geru e kle gbaba kare. 21 Jesu gwagedu kwian onbre edi Jesu ta no onbre e ole, Jesu gerudu: —Noare ba kle age ene, agwa cha gerule ba ole, ba mo ta gbadale age na gdaite. Joga, lle banu ulita chbade, igi ulita lle e ñana ba kete kwian me lle molenge. Ba age ene ulita gire ba chieni cha kle ngwadi ba mo ta gbe chage cha ole diali geru jwen chage. Gire ene ba be kle biale joge toi diali Chube ole nga ngaña giti, Chube be age no ba alin ba agedu no ñanale. 22 Kwian onbre Jesu keruchugu gerule ene gire ama chegu ta olire tanre, onbre e lle molen tanre, malen ama me tadu lle ulita chbadakalin Jesu gerudu kare ama ole, ama jo siere Jesuge ta olire ole. 23 Jesu gwagedu modi tangle, Jesu gerudu kwian geru jwannga amage ulita ole: —Ulia mnoare kwian lle molen tanre alin Chube gerua gai ulia mo ta gbe age ulita Chube takalin kare. Agwa kwian me age ene kwian me ñage toi diali chui tangle Chube ole nga ngaña giti. 24 Kwian geru jwannga Jesuge ulita chegu tañachuge tanre Jesu gerudu giti gire Jesu gerudu dare ama ole: —Ba ulita cha olia kare, cha gerule ulia ba ole, mnoare kwian lle molen tanre Chube gerua gai ulia mo ta gbe age ulita Chube takalin kare. 25 Uñale bage bda kweri kada camello me ñage joge tangle agu kwebege, camello kweriare, ene kaire kwian lle molen tanre alin mnoare Chube gerua gai mo ta gbe age Chube takalin kare. Kwian ene kle mo ta dbe no no lle amanu tanre ulita ole malen mnoare ama alin mo ta gbe lle amanu chuge ngwadi Chube gerua gai ulia mo alin age Chube takalin kare, mnoare kwian ene alin mo ta dbe ma no Chube ole ama kle mo ta dbe no lle amanu olege. 26 Kwian geru jwannga Jesuge Jesu keruchugu gerule ene gire ama ulita chegu tañachuge tanre ma ngle geru e giti, ama geru kadu moge ongoru ongoru: —E ene ulia mnoare age Chube takalin kare ama kle gerule kare, gire ¿chema ñage age ulita Chube takalin kare, ene toi no diali chui tangle Chube ole nga ngaña giti? Ni kwian gdaite ñage age ene. 27 Jesu gwagedu ama ulitadige, Jesu gerudu: —Kwian agali gballa me ñage age ulita Chube takalin kare me ñage age mau alin agali toi diali chui tangle Chube ole. Agwa Chube alin allabi ñage kwian kira gbe age ulita Chube takalin kare, ñage kwian gbe toi diali chui tangle ama ole. Chube alin allabi ñage age ulita, lle ulita me mno ama alin boadale. 28 Gire Pedro gerudu Jesu ole: —Cha ulita geru jwannga bage kle chage ba ole diali geru jwen bage, cha ulita lle ulita chanu nga dba ai giti chugu ngwadi gire cha ulita mo ta gbu chage diali ba ole baini kaire ba kle joge ngwadi, cha ulita agedu ulita ba gerudu kare onbre lle molen tanre ole. 29 Jesu gerudu: —Cha gerule ulia ba ulita ole, kwian ulita bai kaire mo ta dbe ma no cha ole kwian kle mo ta dbe no mo bitalla ulita olege lle ulita amanu olege, kwian ene ta kle biale lle amanu chuge ngwadi kaire mo bitalla chuge ngwadi cha gerua dbe gdale. Kwian e ulita bai lle amanu gweale o mo bitalla gweale chuge ngwadi age cha takalin kare cha gerua dbe, kwian enege Chube be lle tanre no kete kwian ene age cha takalin kare ñanale. Kwian u chuge ngwadi, kwian dbi chuge ngwadi, kwian mo daballa chuge ngwadi, kwian mo ibotea chuge ngwadi, kwian mo chebia chuge ngwadi, kwian mo ñenua chuge ngwadi, kwian mo kirogwalla chuge ngwadi, kwian bai mo ta gbe lle gweale o bitalla gweale chuge ngwadi ene cha gerua dbe kwian nage gdale, kwian enege Chube be lle ma no ma ngle kwian e nu lle chugaba ngwadige kete amage nga dba ai giti kwian ene age cha takalin kare ñanale. Chube be age no kwian ene alin kwian ene be chege lle ulita ma ngle ole, kwian enege Chube be u na kete toingwa, kaire Chube be dbi na kete amage, kaire Chube be daballa na ibotea na chebia na ñenua na kirogwalla na kete kwian enege. Ulia Chube be bitalla kaire lle ma ngle keteni kwiange kwian mo ta gbu cha gerua dbe daba nage ñanale agwa kaire kwian ene be boi daga ngwale tanre cha gerua dbe gdale. 31 Cha gerule ba ulita ole, nege nga dba ai giti kwian gweale kle suge moge ma kweri daba nage, chui bdaglige kwian ene be ma soli Chube gwa giti Chube ngwadi. Agwa nege nga dba ai giti kwian gweale suge moge ma soli daba nage, chui bdaglige kwian ene be ma kweri Chube gwa giti Chube ngwadi —Jesu gerudu ene ulita kwian geru jwannga amage ole. 32 Jesu jo chage una Jerusalén ngnagu, kwian geru jwannga amage gdataboko giti gdaboke kledu chage Jesu nate tañachuge tanre Jesu gerudu giti. Kaire kwian na tanre kledu chage Jesu nate ta kennga ole. Jesu kwian geru jwannga amage ulita kadu sugekare kwian ngleage gerule nakwaite ama ole Jesu be boi giti ulita, 33 Jesu gerudu: —Bage uñale che ulita kle joge una Jerusalénge, una ege kwian be age cha dollale, cha ketabe boalenga daga ngwale kwian gerunga Chube ole daba alin chugagwalla ulitage kaire kwian daba tkanga tangle Moisés chadalla giti ulitage, kwian e ulita me kle cha gerua gai ulia Chube cha kagu nga dba ai giti kwian kare, malen ama be gerule cha jogedaleda cha jiske kweri Chube gwa giti kbiale, ama ulita be cha kete kwian me israelitage gwaleda. 34 Kwian me israelita e ulita be kidere tanre chadi, ama be jolo tke cha giti, ama be cha bate tanre obere giska giti be age ene ulita dagale cha ole gire bdagli ama be cha gweda. Cha gwabeda agwa chui mongikege cha jaba be chkeni gwadeni —Jesu gerudu ene ulita kwian geru jwannga amage ole ama ta gbagda Jesu be boi giti una Jerusalénge. 35 Santiago kaire Juan ama gdaboke Zebedeo kirolla, ama jo kodi Jesu gitigu gire ama gerudu Jesu ole: —Cha tkanga tangle geruge, cha takalin ba age no cha alin cha be kade bage kare. 36 Jesu geru kadu amage: —¿Ba takalin cha age mine ba alin? 37 Ama gdabonate jaindunga Jesu kalen: —Ba chuia be chke gire ba be chege kwian ulita Chugagwalla ma kweri, chui ege cha gdaite toikalin dba ba ko jole giti cha gdaite toikalin dba ba ko taingwli giti, cha gdabonate ta chegekalin kweri ule ba ole daba chugagwallale. 38 Jesu gerudu ama ole: —Bage me suge ba kle llema kade chage. Ulia cha gbabe boi daga ngwale kaire cha gwabeda Chube gerua gdale, gire cha geru kade bage, ¿ba kle biale boi daga ngwale ene cha be boi kare? ¿Ba kle biale jogeda cha be jogeda kare? 39 Gire ama gdabonate jaindunga: —Ima, cha ñage mo kete boange daga ngwale ba gerua gdale ba be boi daga ngwale kare. Jesu gerudu: —Ulia ba be boi tanre daga ngwale cha kare cha gerua gdale, 40 agwa cha me ñage gerule ba ole cha chuia be chke gire ba be chege toiba dba cha ko jole giti cha ko taingwli giti daba chugagwallale ma kweri daba na ulitage. Cha me ñage gerule ene, cha e jige Chube kote, Chube alin allabi ñage kwian gbe kweri daba chugagwallale toi dba cha ko jole giti cha ko taingwli giti chui bdaglige —Jesu gerudu ene Santiago ole Juan ole. 41 Kwian geru jwannga Jesuge na ulita gdataboko geru e keruchugu gire ama ulita skochiu tanre Santiagodi kaire Juandi ama boke gerudu Jesu ole gdale. 42 Jesu kwian geru jwannga amage ulita kadu mo gitigu gire Jesu gerudu ama ulita ole: —Bage uñale nga ulitage nga dba ai giti kwian chugagwalla ulita kle kwian kage age chugagwalla takalin kare, kwian agedale ulita chugagwalla kle gerule kare, kwian chugagwalla kle kwian kage age chugagwalla takalin kare, ene chugagwalla suge moge kweri. 43 Agwa ba ulita me ñage tañachuge kwian chugagwalla nga dba ai giti ulita kle tañachuge kare, ba tañachugadale nganake. Ba me mo ta gbe daba kage age ba takalin kare, agwa ba mo ta gbale diali age no daba na ulita alin daba chudaboi ta no giti, ba age ene gire Chube gwa giti ba chege kweri daba chugagwallale. 45 Ba ulita tañachugadale cha kle tañachuge kare. Cha chiu nga dba ai giti kwian kare, cha me chiu kwian kagangale age no cha alin cha chudaboi, agwa cha chiu kwian ulita chudaboangale, cha chiu age no kwian alin kwian chudaboi kaire cha chiu mo ketale gwaleda kwian ulita alin, ene cha jogeda giti cha kwian jwen siere ji chugege ama agedu me no gdale —Jesu gerudu ene ulita kwian geru jwannga amage ole. 46 Jesu kledu chage una Jerusalén ngnagu ule kwian geru jwannga amage ulita ole gire ama ulita jo chke una Jericóge. Jesu jo tangle una ege, kwian geru jwannga amage kaire kwian na tanre jo chage ama ole ama gatedi. Jesu kledu chage kwian tanre ole gire Jesu tendu kwian gdaite ngwange jonke, kwian e gwagwa me ama kledu toiba dba jonke igi kade kwian nage, kwian e kadakle Bartimeo ama Timoteo kirolla. 47 Bartimeo kwian na keruchugu gerule Jesu una Nazaremu kle chage ngmadi gire Bartimeo mo gbu ngaute Jesuge: —¡Jesu, ba kwian chugagwalla kweri unsuialin David oindalla, ba tai dage chage! 48 Kwian tanre Bartimeo keruchugu ngaute ene Jesuge, gire kwian ka bo jabale Bartimeo ole ene ama ka chite ngaute, agwa Bartimeo me ka chitedu, ama mo ta gbu ngaute gwangerugu ma ngle: —¡Jesu, ba kwian chugagwalla kweri unsuialin David oindalla, ba tai dage chage! 49 Jesu Bartimeo e keruchugu ama me chagedu dare, Jesu chegu jagenga gdate jonke, Jesu gerudu kwian na ole: —Ba kwian e kade chie cha gitigu. Kwian ngautu Bartimeoge: —¡Chkede gdate nga suga no ole! Bai aini, Jesu kle ba kade mo gitigu. 50 Bartimeo kwian keruchugu gerule ene gire blike ama ñometra kledu mo bliabaske jigu mliabanga, ama chku gdate blikare, jo Jesu gitigu. 51 Jesu geru kadu Bartimeoge: —¿Ba takalin cha llema boi ba alin ba chudaboagda? Bartimeo jaindunga Jesu kalen: —Cha ba gai kweri, cha takalin ba cha gwagwa dodade ba cha gbe ten. 52 Jesu gerudu ama ole: —Ba mo ta gbu ulia cha ole malen cha ba gwagwa ulita dodade, ba ñage jogeni gudegu. Jesu gerudu ene Bartimeo ole gire sugetibi allabi Bartimeo gwagwa ulita trendu no trate, ama ñadu ten no trate, gire ama jo chage Jesu nate Jesu gatedi.
1 Jesu jo chage dare una Jerusalén ngnagu jo chke kodi una Jerusalénge ule kwian geru jwannga amage gdataboko giti gdaboke ole, una soli boke kada Betfagé kada Betania chege kodi kodi una Jerusalénge Ngwiskinro Jwichugalla gdoge dba. Ama ulita jo chke ne ngwadi, gire Jesu kwian geru jwannga amage gdaboke kagu mo ngeru, 2 Jesu gerudu ama boke ole: —Joga gdabonate cha ngeru, una soli kle ngeruge, ba be joge chke una soli ege burro soli be skwen bage ba ngwange lugabada glige, burro soli e giti ni kwian gdaite nu chageba bitaite giti, burro e ba skatrennga, ba chie dbe chage. 3 Kwian gweale geru kade bage: “¿Lledale ba kle burro soli e skatrennga?” Ba gerule kwian e ole: “Cha Chugagwalla takalin burro soli aige, me sbali ama be burro soli ai kageni naskuni aini.” 4 Jesu gerudu ene ulita gire kwian geru jwannga gdaboke e jo Jesu ama kagu kare, amage burro soli skwendu lugabada jonke kodi ugakage. Kwian geru jwannga jo chke burro solidi, ama kle burro soli skatrennga dbadale, 5 gire kwian gweale kledu eni geru kadu amage: —¿Ba kle llema boi? ¿Lledale ba kle burro soli e skatrennga? 6 Ama jaindunga kwian kalen Jesu gerudu kare ama ole: —Cha Chugagwalla takalin burro soli aige, me sbali ama be burro soli ai kageni naskuni aini. Kwian geru jwannga gerudu ene gire kwian ama chugu ngwadi burro soli dbe. 7 Kwian geru jwannga boke chiu burro soli dbe Jesu kle ngwadi, ama mo ñometralla gitiru gbu burro soli trigda giti Jesu alin, gire Jesu skwendu burro soli giti, burro soli giti Jesu jo chage una Jerusalén ngnagu. 8 Kwian tanre kledu Jesu ngwange jon jegwale kwian e ngle mo ñometralla gitiru treun dba jonkare Jesu gai ngwange no mo Chugagwallale kweri, kwian gweale na ugananga tkunga gbu jonkare, e giti burro soli chagedu Jesu gwaru. 9 Kwian tanre chagedu Jesu gwangerudba kaire Jesu natedba, kwian e ulita kledu ngaute nga suga no ole Jesu giti: —¡Nga suga no chadi ba giti! Noare ba chiu cha ulita Chugagwallale, suge chage ulia Chube kle ba gbe kweri cha Chugagwallale salengwli Chube che enusulian David gbu kweri kwian chugagwallale unsuialin kare. Noare Chube ba kagu nga dba ai giti cha ulita alin, Chube kle nga ngaña giti, ama noare ama kweri, ama kle age no tanre cha ulita alin ba giti —kwian tanre ngautu ene jonkare Jesu gai ngwange no Jesu gai mo Chugagwallale kweri. 11 Jesu jo chke una Jerusalénge gire ama jo u gerungwa Chube olege, ne ngwadi Jesu gwagedu lle ulita kle boidi u ege, Jesu ta olidu kle boi giti, Jesu tadu agekalin gweale ene me boi dare eni, agwa nga jeredu malen ama joni kwian geru jwannga amage gdataboko giti gdaboke ole una soli Betaniage chege gbe eni. 12 Nagbietege ngabebita Jesu jo siere una Betaniage joni chage naskuni una Jerusalén ngnagu ule kwian geru jwannga amage ole, ama ulita kledu chage jonkare gire Jesu bli ole Jesu tadu blikalin. 13 Jesu gwagedu bate mo ngeru gli kada higueradi, Jesu gwagedu gliga tanre kle gli ege, Jesu jo gli e gitigu gligba gweale jwen gutadale, gligba me skwenduge gutadale glinanga jegwale, gliga alin skwendu Jesuge, higueragba suia bebi chke higuerage, bebi gbachie. 14 Gire Jesu gerudu higuerage: —¡Chui aige gwangerugu ba mi gbachie dare, ni kwian gdaite be ñage ba gba gute! Kwian geru jwannga Jesuge ulita Jesu keruchugu gerule ene gli higuerage. 15 Bigire Jesu jo chkeni una Jerusalénge ule kwian geru jwannga amage ulita ole, Jesu jo u gerungwa Chube olege, u ege kwian tanre skwendu Jesuge lle chbade lle gige kaire kwian kledu igi blite daba na ole u ege. Jesu gwagedu kwiandi age ene ulita, gire Jesu ama ulita kagu siere, Jesu mesa igi blitangwa blitunga ulita kaire Jesu kwian beusi chbadanga toingwalla blitunga ulita, ene kwian me ñage lle chbade dare eni. 16 Jesu agedu ene, gire ama ni kwian gdaite chugu ngwadi chage dare lle dbe u gerungwa Chube olegedi tangle. 17 Kaire Jesu kwian tku tangle trate u gerungwa Chube ole giti, Jesu gerudu: —Uñale bage Chube gerua degaba unsuialin gerule u ai giti, chada e gerule: “Chube gerudu: ‘U ai chanu chegedale u gerungwa cha alin ole allabi kwian nga ulitamu alin.’ ” Chube gerua kle degaba ene, agwa ba ulita kle u ai gai mo alin, ba kwian skwere, ba kle lle chbade dabage kwangleare, ene ba igi gai ngle mo alin, Chube gwage e me no, e salengwli ba kle u Chubenu gai mo alin skwe boangwa daba na ngeru kare —Jesu gerudu ene ulita kwian ole. 18 Kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita kledu ne ngwadi, ama Jesu keruchugu gerule ene ulita gire ama mo ta gbu age gweale mo ten modi Jesu dollale ama ulita ñage age mine Jesu gwangeda. Kwian na tanre diali kle mo ta gbe Jesu keruchuge ulita no, malen e giti kwian gerunga Chube ole daba alin ulita kaire kwian daba tkanga tangle Moisés chadalla giti ulita semadu Jesu ole, ama ulita kendunga kwian na tanre be chage Jesu gerua nate me ama gerua nate, malen ama tadu Jesu gbe jogekeda. 19 Agwa nga jo jere gire Jesu kaire kwian geru jwannga amage ulita jo siere una ege, ama ulita joni una Betaniage. 20 Nagbietege ngabebita Jesu joni chage nakwaite una Jerusalén ngnagu ule kwian geru jwannga amage ulita ole, ama ulita jo tangle kodi gli higuerage Jesu nu geruba ole. Ama ulita gwagedu gli edi drale, gli nu kwebanga ulita, gli sera ulita junbatebanga. 21 Pedro tachku boidu giti higuera ole gire ama geru kadu Jesuge: —Cha tkanga tangle geruge, gwage higueradi. Ba ka bo gli e ole me gbachie dare, gire ulia gli e kwedunga jokeda ulita. 22 Jesu jaindunga: —Ba mo ta gbadale ulia Chube ole, ene ba ñage age ulita cha kle age kare. 23 Cha gerule ulia ba ole, ba cha keruchuge no no. Ba bai kaire mo ta gbe ulia Chube ole Chube gai ulia me tañachuge ni sidri mo tale Chube me ñage age ba alin ba kade Chubege kare, ba mo ta gbe ulia ene Chube ole gire Chube kiralla giti ba ñage age ulita. Ba ñage gerule jwichuga aige: “¡Joga siere nga aige, joga bleske!” Ba gerule ene jwichugage mo ta gbaba ulia Chube ole giti gire Chube be jwichuga kage bleske ba gerudu kare. 24 E kare ene ba gerule Chube ole lle gweale giti ba takalin ama age ba alin kare, kaire ba mo ta gbe ulia Chube ole Chube be age ba alin ulia ba gerudu ama ole kare, ba lle kade Chubege ta ene giti gire ulia Chube be age ba alin ba tadukalin kare. 25 Agwa ba kle biale gerule Chube ole gire ba tale talla me no kle daba gweale agedu me no ba ole giti, ba talla e mliadalenga me tañachuge daba agedu giti ba ole dare, gire ene kaire che Ñenua Chube be ba agedu me no ama dollale talla mlienga kaire agwe. Ba age ene ulita gire ba ta kle biale gerule Chube ole. 26 Agwa ba me daba agedu me no ba ole talla mlienga ba kle geru e oge mo tale, che Ñenua Chube mi ba agedu me no talla mlienga kaire. 27 Jesu gerudu ene kwian geru jwannga amage ole gire ama ulita jo chkeni nakwaite una Jerusalénge, Jesu jo u gerungwa Chube olege gire ne ngwadi kwian gerunga Chube ole daba alin chugagwalla mneite jo chke Jesudi kaire kwian daba tkanga tangle Moisés chadalla giti mneite kaire kwian israelita chugagwalla juma mneite ama ulita jo chke Jesudi gerule Jesu ole, 28 ama ulita geru kadu Jesuge: —¿Chema ba kagu age ba kle age kare? ¿Chema kiralla giti ba kle age ulita? 29 Jesu jaindunga: —Cha kaire agwe geru kade gbaite bage: ¿Chema Juan-Bautista kagu? ¿Chube Juan-Bautista kagu kwian ñe chiske o kwian Juan-Bautista kagu kwian ñe chiske? Cha gerule ba ole, ba jainnga cha kalen chema Juan-Bautista kagu, gire cha be geru kete bage chema cha kagu age ulita cha kle age kare. 31 Jesu gerudu ene gire kwian ulita bai geru kadu Jesuge chegu gerule tanre modi Jesu geru kadu amage giti: —¿Che jainnga mine Jesu kalen? Che gerule Chube Juan-Bautista kagu kwian ñe chiske gire Jesu be geru kade chege: “¿Gire mineade ba me Juan-Bautista gerua cha giti gau ulia?” 32 Che me ñage gerule Chube Juan-Bautista kagu, agwa ni che ñage gerule kwian ngwale Juan-Bautista kagu, kwian tanre tañachuge Chube nu Juan-Bautista kagaba malen kle Juan-Bautista gerua gai dage ulia. Kwian geru tragu ene modi ama jainnga mine Jesu kalen giti. Ulia kwian tanre Juan-Bautista gerua gau ulia tañachuge Chube nu Juan-Bautista kagaba Chube gerua ulia kete kwian nage malen e giti kwian israelita chugagwalla ulita geru kadanga Jesuge kwachiu kwian ngleadi kwachiu gerule kwian ngwale nu Juan-Bautista kagaba daba ñe chiske Chube gwa giti, ama gerule ene gire kwian ngle ñage kira bate jabale ama ole Juan-Bautista gerua gdale. 33 Malen kwian geru kadanga Jesuge jaindunga Jesu kalen: —Cha ulitage me uñale chema Juan-Bautista kagu. Gire Jesu gerudu ama ole: —Kaire agwe cha mi gerule ba ole chema cha kagu age ulita cha kle age kare aini ba gwa giti.
1 Kwian israelita chugagwalla tanre kledu mo litaba Jesudi, ama alin Jesu geru ñachuge, Jesu gerudu: —Cha gerule ba ulita ole, kwian onbre gdaite uva ngama gbu gire ama gere gbu uva ngama giti tangle, kaire ama nga dodadu uvagba chia ogangwa, kaire ama dbi gweale jigu ngwale uva ngamaske u gbangwa, ama ke ulla dodadu jeike ngaña uva ngamaske uva manangwa. Uva ngama mauña lle e bo ulita bigire ama kwian gweale gau uva ngama manangale ama uva ngama ketu kaire u uva manangwa ketu uva ngama mananga ulitage, uva ngama mauña uva ngama jigu uva manangage gire ama jo toi nga batege sbali. 2 Chui jo sbali gire uva mauñage chku uñale uvagba joge dabe suia chku, uva mauña kwian lle boanga mo alin gdaite kagu uvagba bonga amanu kade mo alin kwian uva manangage. 3 Kwian lle boanga e jo chke kwian uva manangadige uvagba kade uva manangage, kwian uva mananga ulita daba e lle boanga uva mauña alin batu jabale agedu dagale daba e ole, kwian uva mananga ulita daba kaguni kole uva mauña ngwadi, me su uvagba kete ni malen gbaite dabage. 4 Boidu ene gire kwian uva mauña lle boanga mo alin na kagu uvagba kade. Lle boanga e jo chke kwian uva manangadi, gire kwian uva mananga ulita daba e batu obere chugage agedu me no tanre daba dollale, uva mananga daba kaguni kole lendegaba uva mauña ngwadi. 5 Boidu ene nakwaite gire uva mauña lle boanga na gdaite kagu uvagba kade kwian uva manangage agwa lle boanga e jo chke kwian uva mananga ngwadi ama bole ma jabale ama guleda. Chui nage uva mauña lle boanga na tanre kagu gdaite gdaite uvagba kade kwian uva mananga ulitage, gire uva mananga lle boanga gweale batu bo daga ngwale, lle boanga gweale na, uva mananga ama guda. 6 Bdagli kwian gdaitre alin allabi chegu gwa uva mauña ole kagadale, kwian e uva mauña kirollanu, uva mauña no no mo kirolla e ole gire ama mo kirolla kagu, ama tañachugu mo tale: “Cha be mo kirollanu kage, uñale chage kwian uva mananga ulita be cha kirolla gai dage gai ngwange no.” Uva mauña tañachugu ene, malen ama mo kirolla kagu. 7 Uva mauña kirolla medu jonkare uva manangage gire uva mananga gerudu modi ongoru ongoru: “Kwian chiu e uva ngama mauña kirolla, bdagli ama be chege ama ñenua llea ulita dbia ulita mauñale. Ale ama gweda, ene lle ulita be chege chege, che be chege uva ngama ai ulita mauñale.” 8 Uva mananga ulita gerudu ene modi gire ama uva mauña kirolla gau guda jaba mliunga sugekare bate uva ngamallage. 9 Jesu geru ñachugu ene ulita gire ama geru kadu kwiange: —¿Ba tañachuge mine geru e giti? Kwian uva mauñage be chke uñale boidu ulita ama kirolla ole gire ¿ama be age mine kwian uva mananga ulita ole? Cha gerule ulia ba ole, uva mauñage be chke uñale ama kirolla guleda gire ama be joge kwian uva mananga gweda ulita, ama be kwian na gbe uva ngama manade. 10 Ene kaire Chube be age kwian ole kwian bai me ama Kirolla gai ulia. ¿Ba me nu Chube gerua batabanga? Chube gerua degaba unsuialin gerule Chube Kirolla be boi giti, chada e gerule: “Kwian u dodanga ke gbu gerere ke gbaite ama mliunga ama gerudu ke e me no dale ke e ngwale, agwa ke e ama mliunga, ke e ma no ke na ulitage. Kwian ke gbu ulita gerere, nga bebi ke gbaite alin gere me kle kiraske, ke mliabanga gbere gerere gire u chegu kiraske. 11 Ai ulita Chube dodadu, malen nga suga noare chedi.” Chube gerua degaba unsuialin gerule ene. 12 Jesu gerudu ene ulita gire kwian israelita chugagwalla ulitage sugedu trate Jesu kle gerule ama giti ama ulita salengwli uva ngama mananga me no ulita kare, e giti ama ulita skochiu tanre Jesudi, malen ama tadu Jesu gakalin blike tkale skage, agwa me ñadu, kwian israelita chugagwalla ulita kendunga kwian ngleadi, uñadu amage kwian tanre no Jesu ole, ama age me no Jesu ole kwian gwa giti, kwian ulita be skochie amadi Jesu gdale, malen ama Jesu chugu ngwadi ne ngwadi, kwian israelita chugagwalla ulita joni siere. 13 Kwian israelita chugagwalla mneite jo siere Jesuge ta skochie ole, ama ulita mo ta gbu Jesu tke gdege, ama takalin Jesu gerule gweale, ene Jesu tke skage Jesu gerudu giti. Malen ama ulita kwian fariseo gweale kaire kwian chugagwalla rey Herodes skatemanalla gweale kagu tienda Jesudi Jesu kle ngwadi mo chuge Jesu ole Jesu gbe gerule gweale chugagwalla kweri dollale giti. 14 Kwian e ulita jo chke Jesudige gire gerudu Jesu ole: —Cha ulita ba gai kweri, uñale chage ba diali kle gerule ulia trate, ba kle mo ta gbe gerule ene diali me mo tallade kwian tañachuge mine badi giti, ba gwa giti kwian ulita salengwli, ba kle kwian ulita tke tangle salengwli geru ulia giti kwian toidale mine Chube takalin kare. Ba kwian ene malen cha geru kade bage gbaite, ba jainnga cha kalen ba tañachuge mine. Geru gbaba nga Romage kwian ulita igi ketadale kwian chugagwalla kweri emperador nga Romamuge, cha me kwian nga Romamu, cha kwian israelita, gire ¿no Chube gwa giti cha igi kete kwian chugagwalla kweri emperador nga Romamuge ama kle kade chage kare o me? 15 ¿Ba gerule mine, cha igi e ketadale chugagwallage o cha me igi ketadale? —kwian geru kadu ene Jesuge ta me no ole. Jesuge uñadu trate kwian kledu mo ta gbe geru kade alin ngwale amage ama gbagda jiske, malen Jesu gerudu ama ulita ole: —¿Mineade ba cha batakalin gdege? Ba igi kete chage gaite gwagegda sugeti. 16 Jesu gerudu ene kwiange gire igi ketre Jesuge, Jesu gerudu kwian ole: —¿Chema oña kle gbaba igi ai giti? ¿Kaire chema kalla kle gbaba igi ai giti? Kwian jaindunga Jesu kalen: —Kwian oña e chugagwalla emperador nga Romamu kada César, kaire ama kalla kle gbaba igi e giti. 17 Kwian jaindunga ene gire Jesu gerudu: —Lle chugagwalla kweri Césarnu kaire keteni Césarge, lle Chubenu kaire keteni Chubege. Jesu jaindunga ene kwian kalen gire kwian chegu tañachuge tanre Jesu gerua no giti, ama me ñadu Jesu gbe jiske Jesu gerudu giti. 18 Kwian saduceo mneite jo Jesu kle ngwadi geru kade Jesuge, kwian saduceo kle gerule kwian jogebakeda jaba mi chkeni gwade chui bdaglige, ama ulita tadu Jesu gbe gerule gweale Moisés nu Chube gerua degaba unsuialin dollale, 19 malen ama gerudu Jesu ole: —Kwian tkanga tangle geruge, uñale bage Moisés Chube gerua degu unsuialin tangle, chada e gerule kwian onbre jogekeda me kirogwa molen mo muira giti, gire ama daballa na kle gwade mo jwandale ñanea oli ole, onbre kirogwa molen muinga e giti daballa jogebakeda alin, ene daballa jogebakeda olia chege gdaite muinga e giti. Moisés chadalla gerule ene. 20 Nege cha gerule ba ole boidu cha bitallaske giti, aini cha bitallaske onbre gdaguke modi mo daballale. Daballa kimule mo jun muinga ole, agwa ama jokeda ni ama kirogwa molen gdaite mo muira giti. 21 Gire daballa nate mo jun ñanea ole, agwa daballa e kaire jokeda ni ama kirogwa molen gdaite muinga e giti. Gire onbre jogebakeda daballa na ama nate mo jun muinga amaña ole, agwa ama boidu salengwli ama daballa ngeru gdaboke kare, ama gdamai ulita jokeda ni muinga ko toidu kirogwage. 22 Boidu ene ulita onbre gdaguke e ulita ole, ama ulita mo jun gdaite gdaite muinga amaña ole, muinga e chegu ama gdaguke muirale, agwa ulita gdaguke jokeda gdaite gdaite, ni ama gdaite kirogwa molen muinga e giti. Bdagli muinga gballa e jokeda kaire. 23 Cha gerule ba ole, ulia onbre e gdaguke ulita toidu gdaite gdaite muinga amaña ole mo muira kare, chui bdaglige kwian jaba ulita be chkeni gwade chuiage, ¿chui ege onbre bai be chege muinga e ñengulallale? 24 Jesu jaindunga kwian saduceo kalen: —Ba me kle tañachuge trate dale, ni geru ulia ba uñe. Ba me Moisés nu Chube gerua degaba unsuialin uñe trate, kaire me suge bage Chube kweri Chube ñage age ulita mo kiralla giti, malen ba me kle tañachuge trate e giti. 25 Sugedale trate ba ulitage chui bdaglige Chube be kwian jaba ulita gbeni gwade, kwian onbrenu muirenu mi mo jwen ni be tañachuge mo jwen giti, ama ulita be chege salengwli lle boanga Chube alin nga ngaña giti kare, lle boanga Chube alin nga ngaña giti me mo jwen. 26 ¿Me uñale ba ulitage Moisés nu Chube gerua degaba unsuialin gerule trate kwian jaba be chkeni gwade giti? ¿Ba me chada e batabanga? Chada ege chke uñale bage unsuialin Chube kerua sugedu Moisége gerule Moisés ole gli soli kle kugeske, Moisés chada degu e giti, chada e gerule: “Cha Abraham Chubea, cha Isaac Chubea, cha Jacob Chubea, ama ulita kle cha gai mo Chugagwallale.” Moisés Chube gerua degu ene unsuialin tangle, 27 e giti ñage suge trate ba ulitage chui bdaglige kwian ulita jogebakeda jaba be chkeni gwade. Abraham kaire Isaac kaire Jacob ama gdamai jogebakeda, gire Chube gerudu Moisés ole ama gdamai giti Chube ama Chubea, ulia Chube kwian gwade alin Chubea, ama me kwian jaba Chubea, malen chkedale uñale bage kwian jogekeda kwian e oña kle chege gwade, kaire agwe chui bdaglige kwian jaba ulita be chkeni gwade. Sugedale bage ba me kle tañachuge trate kwian jaba mi chkeni gwade, ulia kwian jaba ulita be chkeni gwade, ba kle tañachuge nganake geru Chubenuge, malen ba kle jogebanga geru uliage —Jesu gerudu ene kwian saduceo ulita ole. 28 Kwian gdaite daba tkanga tangle Moisés chadalla giti kledu ne ngwadi Jesu keruchuge geru trage kwian saduceo ulita ole, kaire ama kwian saduceo keruchugu gerule Jesu ole Jesu gbagda jiske Moisés chadalla giti, amage sugedu Jesu jaindunga no trate kwian saduceo kalen saduceo me ñadu gerule dare saduceo chegu kamne jo ngeru, gire kwian fariseo geru kadu Jesuge: —Moisés Chube gerua degu unsuialin tangle, geru e kle degaba che ta gbagda che toidale mine Chube gwa giti, ¿geru e miamne ma kweri geru na ulitage kwian gadale dage? 29 Jesu jaindunga kwian e daba tkanga tangle Moisés chadalla giti kalen: —Chube gerua ma kweri Moisés jigu degaba kwian gadale dage, geru e kle gerule: “Cha gerule ba kwian israelita ulita ole, ba cha keruchuge no, ba geru ai gbadale gdadi: Chube che Chugagwalla kweri, ama gdaitre alin allabi ulia. 30 Gire ba nodale ba Chugagwalla kweri Chube ole, ba mo ta dbadale no trate ulita ama ole diali, ba tañachugadale diali mo tale ama giti, ba mo chuga gbale no Chube alin ole, ba mo ta gbadale kiraske lle boi ama alin ama takalin kare.” Chube gerua e ma kweri gbadale gdadi. 31 Agwa kaire agwe geru na gbabokedale kweri ba gbadale gdadi, geru e kle gerule: “Ba mo ta dbadale no daba na ulita ole salengwli ba no mo ole naskuni kare.” Geru na tanre kle gbaba ba alin agwa geru gbaboke e ma kweri ulitage ba mo ta gbadale geru e gai dage ulia ba agedale ulita geru gbaboke e kle gerule kare. 32 Kwian daba tkanga tangle Moisés chadalla giti gerudu Jesu ole: —Ba gerudu no trate ulia, ulia Chube gdaitre alin allabi kle, Chube na me kle dale. 33 Kwian unsuialin tangle bda guda bda gugu Chube gwa giti kwian agedu me no giti, age ene giti Chubedi nga sugadu no. Agwa nga suga ma no Chubedi che mo ta dbe no ama ole diali, che tañachuge mo tale diali ama giti, che mo ta gbe kiraske lle boi ama alin ama takalin kare, kaire che mo ta dbe no daba na ulita ole salengwli mo ole naskuni kare. Che age ene ulita geru kle gbaba gerule kare, e skwen no no Chubege, e kle ama gbe nga suga no ole che giti. 34 Kwian daba tkanga tangle Moisés chadalla giti gerudu ene Jesu gerudu giti ama ole, gire Jesuge sugedu kwian e kledu jainnga ta no ulia ole Jesu kalen, Jesu gerudu ama ole: —Ulia ba kle tañachuge no trate, me sbali gire ba be Chube gai ulia mo Chugagwallale. Ne suiagebi ni kwian gdaite jaindu geru kade dare Jesuge ama kledu age kare diali Jesu gbagda jiske Moisés chadalla giti, sugedu kwian ulitage Jesu ta ole kwian me ñage kirachke Jesudi Jesu gbe jiske geru giti. 35 Jesu kledu kwian tke tangle Chube gerua giti u gerungwa Chube olege, gire Jesu gerudu kwian ulita kle ama keruchuge ole: —Kwian daba tkanga tangle Moisés chadalla giti ulita kle gerule Chube be Cristo kage kwian alin Cristo amaña che chugagwalla unsuialin David oindalla alin allabi. ¿Bage suge mine geru e giti? ¿E ulia kwian e kle gerule kare? 36 Cha gerule ba ulita ole, Chube Oña David amaña ta gbu chada dege Cristo giti unsuialin tangle, chada e gerule: “Chube gerudu cha Chugagwalla ole: ‘Toi dba cha ngena cha ko taingwli giti, chui be chke gire cha be ba gbe kirachke ba dolla ulitadi, ba be chege dolla ulita Chugagwalla kweri.’ ” 37 David chada degu ene unsuialin Cristo giti, chada e giti sugedale kwian ulitage Cristo me David oindalla alin allabi agwa kaire Cristo David Chugagwalla, David agali gerudu Cristo ama Chugagwalla. Jesu gerudu ene gire kwian ngle Jesu keruchugu nga suga no ole. 38 Jesu chegu kwian tke tangle dare, Jesu gerudu: —Ba mo manadale ta giti kwian daba tkanga tangle Moisés chadalla giti ulitage, ba me ama chuge ngwadi ba anblite. Ama ulita takalin kwian na ama gai ngwange no mo chugagwallale kweri, ama ta chegekalin no kwian na ulita gwa giti, malen ama diali ñometra jeike no dbe modi mo kaite kwian ngleaske, kaire nga ulita baini kaire ama kle chage ngwadi ama takalin kwian ulita gbi kade no amage ama gai dage kwian chugagwallale. 39 Ama kle joge u mo litangwa Chube gerua jwanngwage gire diali ama kle toingwa ma no jinade mo alin toi dba kwian ulita gwa giti mo gbagda kweri daba na ulitage. Kaire kwian e kle joge chui ollade gire kle nga ma no bligda gutangwa jinade, ama toikalin dba ule kwian chui olladanga chugagwalla ole. 40 Kaire kwian daba tkanga tangle Moisés chadalla giti ulita kle muinga chegeba oli onbrege anblite lle ulita jwennga muinga oli ngeru u jwennga kaire muinga ngeru mo alin. Kaire kwian e kle mo gbe gerule kweri sbali Chube ole kwian ngle gwa giti, ene kwian ulita be tañachuge kwian e no no Chube ole. Kwian daba tkanga tangle Moisés chadalla giti diali ta mo gbakalin no kweri kwian ulita gwa giti agwa ama tale ama kwian me no me no, e gdale ama be boi tanre daga ngwale bdagli, Chube be ji gbe tirare tirare ama ulita giti —Jesu kwian tku tangle ene ulita kwian daba tkanga tangle Moisés chadallage giti. 41 Jesu kledu u gerungwa Chube olege ule kwian geru jwannga amage gdataboko giti gdaboke ole, gire Jesu jo toi dba kodi nga igi ketakle ngwadige. Ama gwagedu kwian tanredi eni chie igi tke lle igi litangwa olege. Kwian ngle igi molen tanre chku igi tanre tke igi litangwa ole tadi, 42 kaire agwe ama gwagedu muinga chegeba oli onbrege gdaitedi chie igi monu ulita dbe, muinga e me lle molen ama igi gabokle alin allabi molen agwa ama igi e ulita tku igi litangwa olege Chube alin. Ulia igi e bedreare me ñanaske kwian na gwa giti, 43 agwa Jesu gwa giti igi e ngle, Jesu gwagedu muinga edi igi monu ulita tke igi litangwa tadi, gire Jesu kwian geru jwannga kadu mo gitigu, Jesu gerudu ama ulita ole muinga e giti: —Cha gerule ulia ba ulita ole, muinga oli e llea me, ama igi gabokle alin molen allabi ketu ulita, kwian ulita gwa giti muinga igi ketu ma bedre kwian na ulitage, agwa Chube gwa giti muinga e igi ketu ma ngle kwian na ulitage. 44 Kwian igi molen tanre kle lle gige tanre mo alin ama takalin kare gire igi chegeda ama kle igi e kete Chube alin, ulia kwian gwa giti ama igi tanre ketu, Chube gwa giti me dale. Agwa muinga e me kle age ene dale, muinga e igi amanu mo managda ulita ketu Chube alin, igi toigda me chegu ama ole, Chube gwa giti muinga e igi ma ngle ketu Chube alin kwian na ulitage —Jesu gerudu ene kwian geru jwannga ole muinga igi monu ulita ketu Chube alin giti.
1 Jesu jo siere u gerungwa Chube olege ule kwian geru jwannga amage gdataboko giti gdaboke ole, gire kwian geru jwannga gdaite gerudu Jesu ole: —Cha tkanga tangle geruge, u gerungwa Chube ole u kweri noare, u dodaba ke kweri no giti, u e no no. 2 Jesu jaindunga: —Nege ba kle gwage no u kweri edi u e no no, agwa cha gerule ulia ba ole, me sbali u e ulita be chege skianbada lle ngwale kare, ke mi chege gbaba mo giti ni gbaite, u ulita be chege skianbada. 3 Jesu gerudu ene kwian geru jwannga amage ole gire Jesu jo ule geru jwannga ulita ole Ngwiskinro Jwichugallage, jwichuga e chege u gerungwa Chube ole ngwadi gwangnagu. Ne ngwadi Jesu toidu dba, kaire Pedro kaire Santiago kaire Juan kaire Andrés toidu dba Jesu ole sugekare kwian na ulitage, ama geru kadu Jesuge: 4 —Cha geru jwannga bage batre takalin ba geru kete chage, ¿ngaminegire u gerungwa Chube ole be skiendba ba gerudu kare? ¿Be boi mine ngeru gire ene chke uñale cha ulitage chui bdagli kle kodi? 5 Jesu jaindunga kwian e kalen: —Ba ulita kledale ta giti ene ba mi skate alenske ba mi mo chuge ngwadi mo anblitange kwian daba anblitangage chui bdagli giti. 6 Chui bdagli chke kodi gire kwian tanre be chie mo gbe kweri gerule mo giti daba anblitagda, ama be chage kwianske mo ka gbaba cha kalla giti gerule mau giti: “Cha Cristo, Chube cha kaguni kwian alin.” Kwian tanre be chage gerule ene agwa kwian ene me ulia Cristo, kwian ene ulita be kwian tanre anblite geru ngwalege kwian tanre be ama gerua gai ulia. 7 Ba be geru keruchuge kwian kle dole tanre kweri modi nga tanrege, ba geru e keruchuge, ba me mo ta dbe kennga kle boi giti, boidale ene ulita ngeru agwa chui bdagli bebi chke. 8 Kwian chudalla na be mo tke dole kwian chudalla na ole, kaire kwian toinga nga kweri nage be mo tke dole kwian toinga nga kweri nage ole. Kaire nga be jwlien tanre kegde kweri be chite tanre nga tanrege, kaire bli suia kweri be kle tanre, kwian ngle be jogekeda bli kweri kote. E ulita be kle boi gwangea nga dba ai giti agwa chui bdagli bebi chke, lle na tanre tirare be boi ngeru, lle e ulita kote kwian be ta olire tanre boi daga ngwaleske. 9 Jesu gerudu ene kwian geru jwannga amage ole gire gerudu dare: —Ba ulita kledale ta giti, kwian che dollale be ba ulita cha gerua ganga gai be ba kete kwian israelita chugagwallage boadalenga daga ngwale cha gdale, kwian chugagwalla e be ba dbe u mo litangwa Chube gerua jwanngwage ba batange obere giska giti kwian na ulita gwa giti. Kaire ba dbabe kwian chugagwalla tanre ma kweri ngwadi, chugagwalla e ulitage ba gbabe jiske cha gerua gdale, ba kle kwian chugagwalla e ngwadi gire ba be ñage gerule no cha giti kwian e ulita gwa giti. 10 Chube gerua no cha giti jogedale ketaba kwian nga ulitamuge ngeru gire chui bdagli be chke. 11 Ba ulita be geru cha giti kete kwiange, e giti kwian tanre be mo tke dole ba ole ama be ba gai be ba dbe gbale jiske kwian chugagwalla kweri ulitage, be boi ene gire ba me mo tallade ba be gerule mine mau giti kwian chugagwalla kweri e ulita gwa giti. Ba be kle eni kwian e gwa giti gire ba mi gerule mau tale, Chube Oña be ba ta gbe ba gerudale mine kwian ole, ulia Chube Oña be ba chudaboi ene ulita geru giti. 12 Chui bdagli bebi chke gire kwian be ta jwlite mo daballanu dollale be mo daballa kete kwian chugagwallage gwaleda cha gerua gdale, kaire ñenua be ta jwlite mo kirogwallanu dollale be mo kirogwalla gwangeda cha gerua gdale, kirogwa be ta jwlite mo ñenua dollale mo chebia dollale be mo chebia mo ñenua gwangeda cha gerua gdale. 13 Kaire cha gerua gdale kwian ulita be jainchke badi agwa ba me mo tallade, ba bai me mo chuge ngwadi joge siere cha geruage boi daga ngwaleske ba mo ta gbe cha gerua gai ulia mo tale diali gwangerugu mo ta gbe age no diali Chube takalin kare, ba bai mo ta gbe ene, chui bdagli be chke gire ba be toi no diali chui tangle cha ole Chube ngwadi —Jesu gerudu ene kwian geru jwannga ole. 14 Cha chada ai deganga gerule ba bai chada ai batenga ole, ba geru ai gbadale gdadi tañachuge no mo tale Jesu kle gerule giti, gire ene geru be suge no trate bage. Jesu gerudu dare kwian geru jwannga amage ole: —Chui be chke gire kwian be age gweale me no me no sugaska Chube gwa giti una no Chubenu Jerusalénge nga kweri Judeage, ba gwage kwian age me no sugaska enedi una Jerusalénge, gire ba bai kaire ulita kle nga Judeage kigedale ngaske jwichugage mo manadale nga be boi tirare ngeru. 15 Chui ege kwian ulita kigedale blikare ni lle amanu tallade. Kwian bai kaire kle goga tangle ama me jogedale gwa u amanuge lle gweale amanu ñanaske gwa tangle lite ole dbadale, ama lle ulita amanu chugadale ngwadi gwa ama jogedale kige blike kole. 16 Agwa kwian bai kaire skate lle boi deage me jogedaleni gudegu mo ñometralla lite ole, ama jogedale kige blike gwangerugu me joge naskuni. 17 Chui ege muinga bai kaire kle chage gaba kaire muinga bai kaire kle chage kirogwa soli sidri jusulidi ole, muinga e ulitage cha tai dage noare, ama ulita be boi daga ngwale tirare, be mnoare ama alin kige blike. 18 Chui ege kwian be boi tanre daga ngwale tirare me nu boiba daga ngwale ngeru kare chui Chube nga ulita dodaduge gwangerugu joge nege tangle, boi daga ngwale ene chuia be joge tangle ulita gire mi boi dare ene kare nakwaite. Ulia chui ege be boi tanre daga ngwale malen e gdale ba ulita gerudale diali Chube ole boi daga ngwale ene chuia me chke noi suiale, chui be chke noi suiage ene kwian ñage boi ma jabale me ñage kige blike dale. 20 E suiale Chube kwian chuge ngwadi boi daga ngwale chui ngle kwian ulita be jogenga boi daga ngwale kote, agwa Chube tale Chube be mo ta dbe no kwian ole kwian bai Chube nu gaba mo alin ole, Chube mi kwian chuge ngwadi boi daga ngwale chui ngle, Chube be boi daga ngwale chuia gbe buli, ama me takalin kwian amanu boi daga ngwale chui ngle, ama no no kwian ole. 21 Kaire e suiale kwian gweale be gerule ba ole: “¡Gwage ai, Cristo chku! Ama kle aini Chube ama kagu.” Kaire kwian na gerule ba ole: “Kwian chiu e, ama Cristo ulia.” Kwian gerule ene ba ole, sugedale bage ama me kle gerule ulia ama kle gerule mau tale ngwale, ba me ama gerua gai ulia. 22 Kaire chui ege kwian gweale be chage kwianske mo kalla itenga be gerule: “Cha Cristo ulia, Chube cha kagu.” Kwian na be sole kwian ole kwian ulita anblite, be gerule: “Ulia cha Chube gerua ketanga dabage.” Kwian e ulita be gerule ene kaire ama be lle daga ngwale no tanre dodade kwian ulita gwa giti, age ene giti ama takalin kwian tañachuge ama kle age Chube kiralla giti, ama be age ene ulita kwian Chubenu anblitagda. Kwian daba anblitanga e ulita be takalin kwian Chube nu gaba mau alin gbe age me no Chube dollale me Chube gerua gai ulia dare, ama tañachuge ama ñage kwian Chubenu ta blite chage ama nate ama gerua ngwale gai ulia, agwa kwian daba anblitanga e ulita kle tañachuge ene ngwale. 23 Ba ulita kledale ta giti, cha geru ai ulita ketu bage ba ta gbale be boi giti chui bdaglige, ene chui ege kwian me ba anblite joge siere geru uliage. 24 Jesu gerudu ene gire gerudu dare kwian geru jwannga amage ole ama chieni chuia giti: —E ulita cha gerudu kare ba ole be boi daga ngwale ene ulita, gire chui be gwajoge jere ngajudi, kaire dai mi chege gwadenga ngajrege, beu ulita be jain dbige nga ngaña giti, nga ngaña giti nga ulita be jwlien, beu mi chege ngwedi beu kle kare, lle ulita mi chege ngeru kare nga ngaña giti. 26 Nga be boi ene ulita gire Chube be cha kageni, cha be chieni nga dba ai giti ngnagu bogakwaske Chube kiralla giti, chui ege kwian ulita be gwage chadi cha noare cha kweri, ulia cha kwian ulita Chugagwalla. Be suge trate kwian ulitage e cha amaña chiu nga dba ai giti kwian kare kle chieni nabitaite. 27 Cha be lle boanga cha alin nga ngaña giti ngle kage cha ngeru nga ulitage nga dba ai giti, ama be kwian nga ulitamu bai kaire cha nu gaba mau alin lite ole ulita dbale nga ngaña giti toi cha ole Chube kle ngwadi. 28 ’Nege cha geru ñachuge ba ulita alin gli kada higuera giti, ba cha keruchuge no gire ene be suge bage cha kle gerule mine ulia. Gli higuera kle ga jain ulita gire gliga na bli erutu kle chieni, ba gwage glidi ene aini che jwiage gire bage uñale chuda suia kle kodi. 29 Ene kaire ba be gwage lle tanredi boi ulita cha gerudu kare ba ole sbaliga gire chkedale uñale bage cha be chieni chuia kle kodi kodi, me sbali gire cha be chieni. 30 Cha geru kete bage ulia, cha gerudu kare be boi ene ulita ngeru kwian ulita kle toi chui aige bebi joge tangle. 31 Nga ngaña giti nga dba ai giti mi chege diali dale alin, nga ulita be joge tangle, agwa cha gerua mi joge tangle dale. Cha gerua be chege diali chui tangle, ulita be boi cha gerua kle gerule kare. 32 Jesu gerudu ene gire gerudu dare ama be chieni chuia giti: —Ni kwian gdaitege uñale chui baige chui mangire cha be chieni, kaire agwe lle boanga cha Ñenua Chube alin nga ngaña giti ulita ni gdaitege uñale cha be chieni ngaminegire, ni cha Chube Kirolla agalige uñale chui baige Chube be cha kageni, cha Ñenua Chube alin allabige uñale. 33 Cha gerule ulia ba ole, me uñale bage ngaminegire cha be chieni malen ba kledale ta giti diali chui ulitage, ba ta kledale biale cha chieni chuia ngwange, me skate alenske ta me gbaba biale cha be chieni chuiage. 34 Ai ulita cha kle gerule kare cha be chieni chuia giti chege salengwli kwian onbre gweale jo chage bate nga nage kare. Kwian onbre e bebi joge gire, ama lle boanga mau alin ta gbu llema boadale u mauña me gire. Kwian u mauña lle boanga gdaite gdaite ta gbu u kaire lle ulita u mauñanu manadale mine, kwian u mauña kwian lle boanga gdaite gbu ugaka manade no tatra kwian u mauña chieni ngwange. 35 E kare ene ba kledale diali ta giti cha be chieni ngwange. Me uñale bage chui baige cha be chieni salengwli lle boangage me uñadu chui baige kwian u mauña be chieni kare. Cha ñage chieni ngakamalin bdugu, cha ñage chieni ngabebitabi, cha ñage chieni chui bduke, cha ñage chieni ngabi, cha ñage chieni ngajrege ba kle gbe gire, bage me uñale chui mangire cha be chieni. 36 Malen diali ba mo ta gbadale biale cha chieni ngwange, me no cha chieni gire ba skate alenske cháge ba kle gbe kare. 37 Ulia ba ulita kledale ta giti diali, ba cha chieni chuia manadale ngwange tatra me chege gbeba kare. Cha ba ulita ta gbe ene kaire cha kwian na ulita ta gbe ene, ene ba ulita be kle biale cha ngwange cha chieni chuiage —Jesu gerudu ene ulita kwian geru jwannga amage ole.
1 Chui chegu gbabokle alin allabi gire Pascua chuia chke chui olladangwa kwian israelita alin, chui ege kwian israelita kle tachke Chube ama enusulian unsuialin ulita jun siere nga kweri Egiptoge, kwian israelita kle chui e ollade ama kle pan me dodadre levadura ole gute. E suiale kwian gerunga Chube ole daba alin chugagwalla tanre kaire kwian daba tkanga tangle Moisés chadalla giti tanre, kwian e ulita mo ta gbu age gweale skwlenre Jesu gai dbale skage Jesu gwangeda. 2 Kwian ene ulita gerudu modi: —Che me ñage age gweale Jesu dollale Pascua chuiage, kwian tanre be kle chui ege chui ollade una aige, che age me no Jesu ole kwian ngleaske gire kwian ulita be kira bate modi Jesu gdale, ma no che chui na manade kwian ngle me kle mo litaba una aige gire —kwian israelita chugagwalla ulita gerudu ene modi. 3 Jesu jo chke una kada Betaniage ule kwian geru jwannga amage ulita ole, ama ulita jo Simón ullage blire Simón ole ule. Ngeru Simón e amaña chagedu oga kwara tuge jingmea kada lepra ole, agwa ama jogeba chkeni noni. Simón e ngwadi Jesu jo blire kwian geru jwannga amage ole, ama ulita kledu blire gire muinga gdaite chku Jesudige lle ñachke no kada nardo chia dbe lle gweale limeta soli karege tkale Jesu chuga giti, nardo chia e kwangleare. Muinga limeta e kagda skutunga gire ama nardo chia e ulita oto Jesu chuga giti. 4 Kwian gweale kledu blire ne ngwadi gwagedu muingadi nardo chia kwangleare ote Jesu chuga giti gire kwian ta skochiu muingadi nardo chia gdale. Kwian e gerudu modi muingadi: —¿Mineade muinga nardo chia kwangleare kagunga ngwale? 5 Ma no muinga nardo chia e chbade kwangle trescientos ene ama ña kwian na me lle molen chudaboi nardo chia ñanalla giti —kwian gerudu me no ene ta skochie ole muingadi muinga nardo chia oto Jesu chuga giti gdale. 6 Agwa Jesu gerudu muinga giti kwian ole: —¡Muinga chugene! Ba me mo ta dbe gerule me no amadi dare, ama agedu no no cha alin, ¿mineade ba kle tañachuge me no amadi nardo chia gdale? 7 Cha gerule ba ole, kwian me lle molen be kle toi diali ba ulitaske, chui ngle kle ba alin kwian me lle molen chudaboale ba takalin kare, agwa cha mi chege toi diali aini baske. 8 Me sbali cha be jogekeda, muinga ai kle nardo chia ote cha chuga giti cha jegwale gbe biale cha jaba ogabe chuia ngwange, muinga kle age no ulita cha alin ama ñadu kare. 9 Cha gerule ulia ba ole, chui aige gwangerugu nga ulitage baini kaire geru no cha giti be joge tragaba kwian ole ngwadi, nga e ulitage geru muinga ai agedu no cha alin giti be joge tragaba kaire, ene kwian nga ulitage be tachke muinga ai agedu giti cha alin. 10 Jesu gerudu ene gire kwian geru jwannga Jesuge gdataboko giti gdaboke gdaite kada Judas-Iscariote, Judas-Iscariote jo Jesu chada jige gadale kwian gerunga Chube ole daba alin chugagwalla ulitage, Judas-Iscariote gerudu ama ulita ole: —Cha ta ba ulita chudaboakalin cha ña Jesu kete bage gwangeda. 11 Kwian chugagwalla ulita Judas-Iscariote keruchugu gerule ene Jesu giti gire ama ulitadi nga chegu suga no Judas-Iscariote be ama chudaboi Jesu kete gadale, ama ulita mo ta gbu no Judas-Iscariote ole ama igi ketu Judas-Iscariotege Jesu kete ñanale. Chui ege gwangerugu Judas-Iscariote kledu kote Jesu ole Jesu gdea tke baini Jesu be kle gballa sugekare kwian ngleage ene ama be Jesu kete kwian Jesu dollalege. 12 Pan me dodadre levadura ole gute suia chku, chui gwangeage diali kwian israelita ulita bda cordero gweda gutadale Pascua chuia ollade. Chui e chku gire kwian geru jwannga Jesuge geru kadu Jesuge: —¿Baini ba takalin cha bli jinade che ulita alin gutadale Pascua chuia olladale ule? ¿Che be blire baini? 13 Kwian geru jwannga ulita geru kadu ene Jesuge gire Jesu geru jwannga gdaboke gau, Jesu gerudu ama boke ole: —Joga una Jerusalénge, una ege kwian onbre gdaite be skwen bage chage chi dbe lle chi tkangwage, kwian e nate ba joge chage, ama be ba jonlla dbe. 14 Kwian e be joge chke gwa ngwadi ba joge gwa kaire, ba geru kade kwian u mauñage: “Cha tkanga tangle geruge cha kagu aini geru kade bage nga giti blingwa, ¿baini nga kle biale cha tkanga tangle alin blire ule geru jwannga amage ulita ole Pascua chuia ollade?” 15 Ba gerule ene u mauña ole gire ama be nga kweri dodabale ngaña gwa u amanuge kaite bage, nga e be kle litaba trate ulita gbaba biale. Ne ngwadi ba bli jinade che ulita alin gutadale. 16 Jesu kwian geru jwannga amage gdaboke ta gbu ene gire kwian gdaboke jo una Jerusalénge. Ama jo chke una ege gire lle ulita skwendu boabale Jesu gerudu kare ama ole. Ne ngwadi kwian geru jwannga gdaboke bligda dodadu gutadale Pascua chuiage Jesu ama kagu kare. 17 Nga jo jere ngabi gire Jesu jo una Jerusalénge ule kwian geru jwannga ulita ole, ama ulita jo chke u ege ama be blire Pascua chuia ollade ngwadi. 18 Jesu kledu toiba dba blire ule kwian geru jwannga gdataboko giti gdaboke ole gire Jesu gerudu: —Cha gerule ulia ba ulita ole, ba ulita kle aini blire ule cha ole gdaite be cha kete kwian cha dollalege gwaleda. 19 Kwian geru jwannga Jesuge ulita Jesu keruchugu gerule ene gire kwian geru jwannga ulita ta chegu olire tanre mo tale, ama ulita gdaite gdaite geru kadu Jesuge: —¿Chema be age ene ba dollale? ¿Cha? 20 Jesu jaindunga: —Ba kwian geru jwannga chage gdataboko giti gdaboke kle blire ule cha ole aini kle pan bita gbe date bligda chiaske batekwa amaña giti cha ole ba gdaite e be cha kete gwaleda. 21 Cha chiu nga dba ai giti kwian kare, ulia cha ketabe boadale daga ngwale gwaleda Chube gerua degaba unsuialin kle gerule kare. Agwa kwian onbre bai be cha kete boadalenga daga ngwale gwaleda, onbre e be boi dageare daga ngwale tanre ama agedu cha ole kbiale, ma no ama alin ama me medunga chebia kote dale —Jesu gerudu ene kwian geru jwannga amage gdaite giti. 22 Ama ulita kledu blire ule gire Jesu pan gau kote gerudu Chube ole pan giti: “Cha Ñenua, noare ba pan ai ketu cha ulitage gutadale.” Jesu gerudu ene Chube ole pan giti gire Jesu pan skutunga ketu kwian geru jwannga kaire kairege gutale, Jesu gerudu: —Ba pan ai gute, pan ai cha uda kare. 23 Gire Jesu chi jangwa gau kote uva chia ole, Jesu gerudu Chube ole uva chia giti: “Cha Ñenua, noare ba uva chia ai ketu cha ulitage jadale.” Jesu gerudu ene Chube ole uva chia giti gire ama uva chia ketu kwian geru jwannga kaire kairege jadale, geru jwannga ulita uva chia jau. 24 Jesu gerudu: —Uva chia ai cha be kare, cha jogeda giti be suge trate ba ulitage Chube kle geru jagere gbe kwian ulita alin cha giti, nege gwangerugu cha jogeda giti kwian ulita bai kaire cha gai ulia be chege no trate Chube gwa giti. 25 Cha gerule ulia ba ole, nege alin cha kle uva chia jai ba ole ule, agwa nege gwangerugu cha mi kle ba ole dare ba gatedi uva chia jai ule nga dba ai giti. Chui bdagli be chke gire Chube be cha gbe gerule kwian ulita giti kwian Chugagwallale, chui ege cha be uva chia jai nakwaite ule ba ole —Jesu gerudu ene geru jwannga amage ole. 26 Blidubi gire ama ulita mo gatu no Chube giti, gire ama ulita jo siere nga ege, ama ulita jo chage Ngwiskinro Jwichugalla ngnagu. 27 Jesu gerudu kwian geru jwannga amage ulita ole: —Cha gerule ulia ba ole, nege ngajrege ba ulita be cha chuge ngwadi boi daga ngwale gballa Chube gerua degaba unsuialin tangle kle gerule kare, chada e gerule: “Chube gerudu: ‘Cha be kwian oveja mananga chuge ngwadi gwangeda gire oveja ulita be kige.’ ” Chube gerua degaba unsuialin tangle gerule ene ba giti cha giti. 28 Cha gwabeda, cha jaba be chkeni gwadeni Chube kiralla giti, gire cha be joge ba ulita ngeru nga Galileage. 29 Jesu gerudu ene geru jwannga amage ulita ole Jesu be boi giti, gire Pedro gerudu: —Kwian na ulita be ba chuge ngwadi boi daga ngwale gballa, agwa cha mi ba chuge ngwadi boi daga ngwale gballa. 30 Jesu gerudu Pedro ole: —Cha gerule ulia ba ole, nege ngajrege ngakamalin bdugu antalan bebi ngwane bitabokedale gire ba agali be gerule bitamai kwian na ole ba me cha uñe. 31 Jesu gerudu ene Pedroge agwa Pedro gerudu dare: —Me dale, cha mi age ene ba kle gerule kare cha ole, cha me mo tallade cha be jogekeda ba ole ule, cha mi gerule kwian ole cha me ba uñe. Pedro gerudu ene gire kaire kwian geru jwannga Jesuge na ulita gerudu gdaite gdaite salengwli Pedro gerudu kare. 32 Jesu kledu Ngwiskinro Jwichugallage ule kwian geru jwannga amage ulita ole gire ama ulita jo nga kada Getsemaníge, ne ngwadi Jesu gerudu kwian geru jwannga ulita ole: —Ba ulita toi dba aini sugeti cha manade. Cha be joge sugekare gerule Chube ole gballa. 33 Jesu gerudu ene gire Jesu jo Pedro dbe jo Santiago dbe kaire jo Juan dbe mo ole llagli. Jesudi nga chiu olire tanre ama be boi daga ngwale giti, 34 ta ene ole Jesu gerudu kwian geru jwannga gdamai ole: —Cha ta olire tanre mo giti cha be boi daga ngwale giti, suge chage cha me jage tañachuge e giti. Cha joge sugekare gerule Chube ole, cha takalin ba gdamai chege aini ngmadi cha manade, ba chegedale ta giti gwade ba me mo chuge ngwadi gbigage gbe. 35 Jesu gerudu ene kwian geru jwannga gdamai ole gire Jesu jo chage ma ngerugu sidri sugekare gballa, ama mo ñeu kaboge jongnagwa giti ama gwa ñadu dbidi gire ama gerudu Chube ole: “Cha Ñenua, cha me ta boikalin daga ngwale, cha me takalin ba kwian me no chuge ngwadi cha gweda, ba takalin ba ñage cha jwen siere cha be boi tirarege. Uñale chage ba kiraske ba ñage age no ulita cha alin cha takalin kare, agwa cha me takalin boi ulita cha ole cha takalin kare, ma no cha takalin boi ulita cha ole ba takalin kare cha mo gbe biale age ba takalin kare.” 37 Jesu gerudu ene Chube ole gire ama joni naskuni kwian geru jwannga amage gdamai kledu ama manade ngwadige, kwian geru jwannga e ulita skwendu Jesuge gbe, gire Pedro amaña kadakle Simón Jesu gerudu ama ole: —¡Simón, chkede bduge! ¿Mineade ba kle gbe? ¿Ba gdamai ni ñadu chege gwade cha manade sugeti? 38 Ba ulita mo ta gbadale chege gwade, ba gerudale Chube ole mo chudaboi kade amage, ene ba me ta jwlite age me no ba takalin kare. Uñale chage ulia ba ta agekalin ulita cha kle gerule kare, agwa ba me kira molen age cha takalin kare, malen ba gerudale Chube ole kira kade amage mo ta kira gbagda. 39 Jesu gerudu ene gire Jesu joni nakwaite sugekare gballa gerule Chube ole, Jesu gerudu ngeru kare Chube ole ama be boi giti. 40 Gire Jesu joni naskuni kwian geru jwannga gdamaidini gire kwian geru jwannga ulita skwendu gbe Jesuge nakwaite, ama me ñadu chege gwade chuge, ama gbigachiu tanre ama gwagwa kledu jegaba gbiga kote, ama ulitage me chku uñale ama gerule mine Jesu ole mo giti. 41 Jesu joni nakwaite bitamaidale sugekare gballa gerule Chube ole. Jesu gerudubi ulita Chube ole gire ama joni naskuni kwian geru jwannga gdamai kledu gbe ngwadi, Jesu gerudu ama ulita ole: —¿Ba kle chage gbe kaire? ¡Chkede bduge, ba me gbe dare! Nege cha boabe daga ngwale kwiange chuia chku kaire cha gwabeda chuia chku. Chube cha kagu nga dba ai giti kwian kare, nege sugeti cha ketabe kwian agenga me no kote boadale daga ngwale ama be cha gweda. Nege nege cha ketanga kle chie ule cha dollale ole kodi chege, ale ten ama ngwange jonkare. 43 Jesu kle gerule ene kwian geru jwannga amage ole gire kwian geru jwannga Jesuge na gdaite kada Judas-Iscariote chku ule guardia donga nglea ole Jesu kle ngwadi, guardia donga e gweale chiu sbadi ole na chiu glita ole. Kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita kaire kwian israelita chugagwalla juma ulita, kwian e ulita nu guardia nglea kagaba Jesu gai dbale skadi. 44 Guardia donga ulita bebi joge Jesu nate ule Judas-Iscariote ole, Judas-Iscariote nu geruba: “Kwian gdaite bai cha be sobade, ama chkedale uñale bage e Jesu, ba kwian e amaña gai ba ama ko luge kejre ba ama dbe skage che chugagwalla ulita ngwadige.” 45 Judas-Iscariote jo chke Jesudige, gerudu Jesu ole: —Ba cha tkanga tangle geruge. Judas-Iscariote gbi kadu ene Jesuge gire ama Jesu sobadu. 46 Judas-Iscariote agedu ene gire guardia donga ulita Jesu gau dbale skadi. 47 Boidu ene Jesu ole gire kwian geru jwannga ulita kle chage Jesu ole ama gdaite sbadi jun modi gire ama kwian gdaite ologa gaite tkunga ulita, kwian ologa jo tkabanga kwian e lle boanga kwian gerunga Chube ole chugagwalla ma kweri alin. 48 Jesu geru kadu kwian Jesu dolla ngleage: —¿Mineade ba ulita kle chage sbadi ole glita ole cha gai nate kwian jiskenga kare? Ba kle age cha ole salengwli ba age kwian agenga me no me no ole kare. 49 Chui ulitage diali cha kledu ba gwa giti kwian tke tangle u gerungwa Chube olege, ni bitaite ba cha gau dbale skadi cha kledu gerule giti. Agwa nege kle boi ulita cha ole salengwli Chube gerua degaba unsuialin tangle kle gerule be boi cha ole giti kare. 50 Jesu gerudu ene kwian Jesu dolla ulita ole gire kwian geru jwannga Jesuge ulita jo kige, ama ulita Jesu chugu ngwadi boi daga ngwale gballa. 51 Jesu gale Jesu dbajo gire kirogwa onbre biale gdaite kledu chage Jesu nate mo bliaba manta alinske, guardia donga tadu kirogwa e gakalin kaire dbale skage ule Jesu ole, kirogwa mantalla skatu guardia donga kote kirogwa kigedu taglale, guardia donga me ñadu kirogwa gai. 53 Guardia donga ulita Jesu du kwian gerunga Chube ole daba alin chugagwalla ma kweri ullage. U ege kwian israelita chugagwalla na ulita kledu mo litaba, kwian gerunga Chube ole daba alin chugagwalla na ulita kaire kwian israelita chugagwalla juma ulita kaire kwian daba tkanga tangle Moisés chadalla giti ulita, kwian e ulita kledu mo litaba Jesu manade ngwange. 54 Pedro jo chage gwage bate Jesu nate jo chke chege goga kodi uge kwian gerunga Chube ole daba alin chugagwalla ma kweri ullage, ne ngwadi Pedro toidu dba ule guardia u gerungwa Chube ole mananga ngle ole, Pedro chegu jita ngwachuge ule kwian e ulita ole. 55 Kwian gerunga Chube ole daba alin chugagwalla ulita, kaire kwian israelita chugagwalla kweri na ulita kle mo litaba u ege jennga Jesudi, ama ulita kledu kwian jinade gerule ngwale Jesu dollale Jesu gbagda jiske, ene kwian israelita chugagwalla e ulita ñage Jesu gwangeda Jesu agedu gweale gdale. Kwian tanre chiu chugagwalla ulita mo litaba ngwadi geru gweale jinade ngwale Jesu dollale, agwa kwian gerunga ngwale ulita kledu gerule nganake, me kledu gerule salengwli Jesu dollale Jesu gbagda jiske, malen kwian chugagwalla ulita me ñadu Jesu gbe jiske Jesu gwangeda geru ngwale e giti. 57 Bdagli kwian gweale ta me no ole gerudu Jesudi kwian chugagwalla gwa giti: —Cha ulita Jesu keruchugu gerule ene: “Cha be u ai gerungwa Chube ole kwian nu dodaba skiendba ulita, gire chui gbamaire alin cha be u gbeni naskuni no biale agwa u jagere mi joge dodaba kwian giti, cha agali be u e dodade.” Cha Jesu keruchugu sole ngwale ene, ama gerudu giti chage suge ama kle mo gbe kweri Chube kare, Chube alin allabi ñage age ene Jesu gerudu kare. 59 Kwian gweale gerudu ene Jesu dollale kaire kwian na gerudu Jesu gerua e amaña giti agwa kwian e gerudu nganake, kwian ulita me gerudu salengwli Jesu gerua e amaña giti. 60 Kwian gerunga Chube ole chugagwalla ma kweri ama kwian e ulita keruchugu gerule Jesu dollale gire ama chku gdate kwian israelita chugagwalla na ulita gwa giti, ama geru kadu Jesuge: —¿Mineade ba me kle jainnga gerule mo giti kwian kalen? Kwian tanre kle gerule ba dollale, ¿ama ulita kle gerule ulia ba giti o me? 61 Kwian gerunga Chube ole ma kweri gerudu ene Jesuge agwa Jesu me jaindunga dale, Jesu chegu kamne. Kwian gerunga Chube ole chugagwalla ma kweri gerudu nakwaite Jesu ole: —Cha geru kade bage, ba jainnga ulia cha kalen, ¿ulia ba Cristo Chube Kirolla? ¿Chube nu ba kagaba nga dba ai giti kwian alin o me? 62 Jesu jaindunga: —Ima, cha amaña ba ulita kle gerule kare, cha Chube Kirolla. Chube kira molen ulita, ama cha kagu kwian kare nga dba ai giti, chui be chke gire ba ulita be gwage chadi toiba dba Chube ko taingwli giti nga ngaña giti kwian ulita Chugagwallale, kaire bdagli cha be chieni bogakwaske nga ngaña giti ba ulita gwa giti. 63 Kwian gerunga Chube ole daba alin chugagwalla ma kweri Jesu keruchugu gerule ene gire ama skochiu Jesu gerudu giti, ta skochie ene ole ama ñometra modige gagunga, ama gerudu kwian chugagwalla na ulita ole Jesu giti: —Ba ulita onbre ai keruchugu gerule ama Chube Kirolla Chube nu ama kagaba. Ama kle gerule ene mo giti, ama kle gerule Chube dollale. Ama kle mo gbe jiske agali ama kle gerule giti malen che me kwian jinade dare gerule amadi ama gbagda jiske. ¿Ba ulita tañachuge mine ama giti? ¿Che age mine ama ole? Kwian chugagwalla mo litaba ole ulita jaindunga: —Ama jiske tanre ulia, ama jogedaleda ama gerudu Chube dollale kbiale, che ama gwangeda. 65 Kwian chugagwalla ulita gerudu ene gire ama gweale jolo tku Jesudi, kaire kwian Jesu gwagwa gatuda ñomedrega giti, ene Jesu me chegu ten kwiandi, kwian Jesu batu obere gire geru kadu Jesuge: —Gerule cha ole, ¿chema kle ba bate? Ama ulita kledu kidere ene Jesudi, kaire guardia u gerungwa Chube ole mananga ulita Jesu batu obere agedu dagale Jesu ole tanre me no. 66 Jesu kle boi ene gwa kwian gerunga Chube ole chugagwalla ma kweri ullage, gire Pedro kledu manade goga jita ngwachuge. Muinga gdaite lle boanga chugagwalla ma kweri alin chku eni, 67 ama gwagedu Pedrodi toiba dba jita ngwachuge, gire muinga chegu gwage tanre Pedrodi, ama gerudu Pedro ole: Pedro kle goga jita ngwachuge —Ba kaire kledu chage ule Jesu una Nazaremu ole. 68 Pedro gerudu: —Me dale, cha me ama uñe dale, ni uñale chage ba kle llema geruade cha ole. Pedro gerudu ene muinga kalen gire Pedro jo manade ugakage, gire antalan ngwanedu. 69 Muinga lle boanga chugagwalla alin chegu gwage tanre Pedrodi, gerudu kwian na ulita kledu eni ole Pedro giti: —Onbre ai ulia kledu chage ule Jesu ole. 70 Pedro gerudu nakwaite: —Me dale, cha me kwian e uñe. Bigire kwian na ulita kledu ne ngwadi gerudu Pedroge: —Kwian mneite chagedu Jesu ole diali, suge chage ulia ulia ba kwian ene gdaite. Uñale chage ba kwian nga Galileamu. 71 Pedro kwian keruchugu gerule ene gire ama ta skochiu tanre e gdale, ama gerudu: —Cha gerule ulia ulia ba ulita ole Chube gwa giti, cha me kwian onbre e ba kle gerule giti uñe. Cha me kle gerule ulia ba ole, gire ene Chube ñage cha gbe ji chuge tanre e gdale. 72 Pedro gerudu ene gire sugetibi allabi antalan ngwanedu bitabokedale, blikare Pedro tachku Jesu gerudu giti ama ole ngeru: “Antalan bebi ngwane bitabokedale gire ba agali be gerule bitamai kwian na ole ba me cha uñe.” Pedro tachku Jesu gerudu ene giti gire Pedro olidu tanre tanre ama gerudu Jesu dollale giti.
1 Nga chku ju gire kwian gerunga Chube ole daba alin chugagwalla ulita mo litu ule kwian israelita chugagwalla juma ulita ole kaire kwian daba tkanga tangle Moisés chadalla giti ulita ole kaire kwian israelita chugagwalla na ulita ole, kwian e ulita mo litu jennga Jesu giti ama be age mine Jesu ole. Ama ulita mo ta gbu salengwli Jesu gbe jiske chugagwalla gobernador Pilatoge. Ama ulita Jesu ko lugangu Jesu du skage chugagwalla Pilato ngwadi. 2 Pilato geru kadu Jesuge: —¿Ba kwian israelita ulita chugagwalla kweri? Jesu jaindunga Pilato kalen: —Ima, cha amaña ba kle gerule kare. 3 Kwian gerunga Chube ole daba alin chugagwalla ulita gerudu tanre Pilato ole Jesu gbe jiske lle tanre giti. 4 Pilato geru kadu nabitaite Jesuge: —¿Mineade ba me kle gerule mo giti sidri kwian kle ba gbe jiske giti? Ama kle ba gbe jiske chage ba gwa giti lle tanre giti. Gerule cha ole, ¿ama kle gerule ulia o me? 5 Agwa Jesu me jaindunga dale, Jesu chegu kamne, malen Pilato tañachugu tanre Jesu giti mineade Jesu me kle gerule mo giti ni sidri. 6 Diali Pascua chuiage chura kaire kaire Pilato kwian ageba me no kle skage gweale gdaite skajwanngenga kwian ulita takalin kare. 7 E suiale onbre agenga me no gdaite kada Barrabás kledu skage daba agenga me no na tanre ole, ama ulita nu mo ta gbaba ule kira bate gobierno dollale kaire ama kwian gweale guda, malen ama ulita kledu skage age me no ene gdale. 8 Kwian nglea chku Pilatodige gerudu Pilato ole: —Cha takalin ba kwian gdaite skajwanngenga jige gbale ba diali kle age kare Pascua chuiage. 9 Pilato geru kadu kwiange: —¿Ba ulita takalin cha ba kwian israelita chugagwalla kweri ai skajwanngenga jige gbale nege? 10 Pilatoge uñadu ulita trate kwian gerunga Chube ole daba alin chugagwalla ulita semale tanre Jesu ole, malen ama ulita Jesu du Pilatoge Jesu gbe jiske gwaleda. 11 Kwian gerunga Chube ole daba alin chugagwalla ulita kwian nglea ulita ta gbu gerule Pilato ole ma no Barrabás giti Pilato Barrabás skajwanngenga, ene Jesu chege Barrabás taneage. 12 Gire Pilato geru kadu kwian nglea ulitage: —Cha Barrabás skajwanngenga, ¿gire cha be age mine kwian ai ka jwankle kwian israelita chugagwalla kweri rey ole? 13 Gire kwian nglea ulita jaindunga Pilato kalen: —¡Ama gwangeda kruge! 14 Pilato gerudu kwian ole: —¿Mineade ba takalin cha ama gwangeda kruge? Chage suge trate ni ama agedu me no sidri, ¿llema giti ama jiske? Kwian ulita ngautu ma kweri Jesu dollale: —¡Ama gwangeda kruge! 15 Pilato kwian keruchugu gerule ene, Pilato tadukalin chege no kwian ulita ole malen ama Barrabás skajwanngunga, Pilato Jesu batangu ngeru gire Pilato Jesu ketu kwiange kwian ulita takalin kare Jesu gwaleda kruge. 16 Guardia donga Pilato alin Jesu du Pilato ulla kwerige gwa, gire eni guardia donga e ulita mo litu Jesudi tangle kidere Jesudi. 17 Guardia donga Jesu ngama tku kwian chugagwalla kweri nga dba aimu kle mo ngama tke kare ñometra chada dabere, ñometra e kareske Jesu jo ngama tkaba, guardia donga giska kobaske bliu Jesu chuga batreti batu Jesu chugaske. 18 Gire ama ulita mo gbu ngaute kweri Jesu gbe gidagda, ama gerudu Jesu ole kidere: —¡Ba kwian israelita chugagwalla kweri rey noare, ba chege no kweri kwian ulita gwa giti! 19 Guardia donga ulita gerudu ene Jesu ole ta me no ole, gire ama Jesu batu chugage glita giti, ama jolokwa tku Jesudi, kaire ama jongnagwa skutu dba Jesu gwangnagu ama kle chugagwalla kweri gai dage kare agwa ama kledu age ene Jesu gbe gidagda. 20 Guardia donga agedu ene ulita kidere Jesudi gire ama ñometra chada dabere junnga Jesudige, ama Jesu ngama tkuni naskuni Jesu ñometrallaske, gire ama ulita jo Jesu dbe gwaleda kruge. 21 Guardia donga ulita jo Jesu dbe kru ole nga Jesu gwabeda ngwadi gire jonkare guardia donga tendu onbre kada Simón ngwange, Simón una Cirenemu, ama Alejandro kaire Rufo ñenua, Simón kledu chage una Jerusalén ngnagu gire guardia donga Simón gau gbu Jesu krulla dbe. 22 Guardia donga ulita jo chke Jesu dbe nga kada Gólgotage, kaire nga e amaña kada Calavera, nga ege Jesu dule gwaleda. 23 Guardia donga bebi Jesu bate clavo giti kruge gire ama uva chia gage tugebanga gdege kada mirraske ketu Jesuge jadale, agwa Jesu me jaindu uva chia jai. 24 Guardia donga Jesu gbu kruge ngaña, gire Jesu ñometralla jo jwanbanga Jesudige, ñometra e ulita guardia donga ulita girabatu modi guardia donga bai kaire blachku no ole. 25 Chada jo degaba Jesu giti, chada e gbere kruge Jesu chuga giti ngaña, chada e gerule Jesu jiske llema giti kwian ulita gwage, chada e gerule: “Ai kwian israelita ulita chugagwalla kweri rey.” Chui jo bate ngaña gire Jesu gbere kruge ngaña. 27 Kaire kwian na gdaboke gbere kru na gdabokege ule Jesu ole, kwian e gdabonate agenga me no kwian skwe boanga, gdaite gbere kruge Jesu ko taingwli ngnagu giti, gdaite gbere kru nage Jesu ko jole ngnagu giti. 28 Boidu ene ulita Chube gerua degaba unsuialin gerule kare, chada e gerule: “Ama boidu daga ngwale ule kwian agenga me no ole.” Chube gerua degaba unsuialin gerule ene Jesu giti. 29 Kwian ulita bai kaire kledu joge tangle Jesu kle kruge ngaña ngwadi, kwian e ulita gwagedu Jesudi kruge gire ama chuga mliunga kidere Jesudi, ama gerudu me no tanre Jesuge: —¿Ba amaña me gerudu ba ñage u gerungwa Chube ole skiendba ulita gire gbeni naskuni no biale chui gbamaire alin? 30 Bage suge ba kira molen tanre ene, gire ba mo jwennga kruge agali, ¡bai dbige kruge! 31 Kwian ulita jo tangle Jesu kle kruge ngaña ngwadi gerudu ene kidere Jesudi, ene kaire kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita kledu eni, ama kidedu Jesudige, kwian e ulita gerudu me no modige Jesu giti: —Ama ñadu kwian na tanre chudaboi, agwa ama me ñage mo chudaboi agali dale mo jwennga kruge. 32 Ama ulia Cristo Chube nu ama kagaba nga dba ai giti, ama ulia kwian israelita ulita Chugagwalla kweri, ama mo jwanlenga agali kruge che ulita gwa giti, ene be suge che ulitage ama ulia Cristo gire che ulita be ama gai ulia. Kwian israelita chugagwalla ulita gerudu me no ene kidere Jesudi, kaire kwian gdaboke kledu Jesu ole kruge mo kaire ama gdabonate gerudu me no kidere Jesudi salengwli kwian na ulita kledu gerule kare. 33 Chui chku bduke gire nga ulita nga dba ai giti chegu nga jereske, nga jere jagedu hora gdamai, chui jo chege nga bonga dbigu gire nga chra chiuni. 34 Chui jo chege nga bonga dbigu gire Jesu ngautu kiraske mau kwirale: —Eloi, Eloi, ¿lema sabactani? —geru e gerule: “Cha Chubea, cha Chubea, ¿mineade ba cha chugu ngwadi boi daga ngwale gballa?” 35 Kwian gweale kle ne ngwadi Jesu keruchugu, geru me sugedu trate kwian ege Jesu ngautu mine gire kwian e ulita gerudu modi: —Jesu kle ngaute kwian Chube gerua ketanga unsuialin kadakle Elíage. 36 Kwian ulita kle ne ngwadi gerudu ene modi Jesu giti gire kwian e gdaite jo jrite Jesu chudaboi, kwian e lle dagli kare ñeu uva chia gageske gbu glita gwagdage ama jo Jesu krulladi gire glita giti ama uva chia gage gbu Jesu kate jadale ngaña kruge, gire ama gerudu kwian na ulita ole: —Ale manade gwage alin amadi Elías be chie ama jwen dbige kruge o me. 37 Jesu ngautu kweri kiraske gire Jesu jokeda. 38 Jesu jokeda ene gire sugeti ngwale ñometra ura kle itabanga gwa u gerungwa Chube olege, ñometra e skagedunga tainkwli bonga ngaña joge dba. 39 Guardia donga chugagwalla kweri gdaite kledu Jesu gwangnagu, ama gwagedu ulita boidudi kaire ama Jesu keruchugu ngaute kweri kiraske gire Jesu jokeda, guardia donga chugagwalla gwagedu e ulitadi gire ama gerudu Jesu giti: —¡Ulia ulia kwian onbre ai Chube Kirolla! 40 Kaire muinga tanre kledu gwage bate Jesudige Jesu boidu ulita giti, muinga e ulita nu chieba nga Galileage Jesu ole llagli, ama ulita nu chageba Jesu ole Jesu chudaboi baini kaire Jesu chagedu ngwadi, muinga e ulita nu jogeba chke una Jerusalénge ule Jesu ole Jesu gatedi. Muinga e ulitaske muinga gdaite kadakle María-Magdalena kledu. Kaire muinga na gdaite kadakle María kledu, María e ama kirolla boke gdaite kadakle José gdaite kadakle Santiago, ama José daballa soli. Kaire muinga na gdaite kadakle Salomé kledu. Muinga gdamai e kledu muinga na ulita ole gwage bate Jesudige Jesu jokeda kruge ngwadi. 42 Jesu jokeda chuia, chui ege kwian ulita kle lle ulita gbe biale undege chuia ngwange suialin kare. Chui lle gbangwa bialege ngabi gire kwian onbre kadakle José mo ta gbu kiraske joge Jesu jaba kade chugagwalla Pilatoge. José nga Arimateamu ama kwian israelita chugagwalla gdaite, kwian ulita gwa giti José kwian no kwian ulita ama gai dage. José noare Chube ole ama kledu Chube chuia manade ngwange chui Chube be gerule kwian ulita giti kwian ulita Chugagwallale. José jo Pilato kledu ngwadi, ama gerudu Pilato ole: —Cha takalin Jesu jaba jwen dbige kruge ogadale keugage. ¿Cha ñage o me? 44 Pilato chegu tañachuge tanre, me uñadu Pilatoge Jesu jokeda ulia o kle gwade. Pilato guardia donga chugagwalla kweri kadu mo gitigu, Pilato geru kadu kwian ege: —¿Ulia Jesu jokeda? 45 Guardia donga chugagwalla jaindunga Pilato kalen: —Ima, ulia Jesu jokeda sbaliga. Pilato guardia donga chugagwalla keruchugu gerule ene gire Pilato gerudu José ole: —Ba ñage Jesu jaba jwen dbige kruge dbe nga ogangwage ba takalin kare. 46 Gerudre ene José ole gire José jo ñometra no glitale dbe Jesu jaba kledu kruge ngwadi, ñometra e Jesu jaba bliagda. José Jesu jaba jun dbige kruge, José Jesu jaba bliu no ñometra eske gire José jo Jesu jaba dbe nga jaba ogakle ngwadige, José Jesu jaba ogo keugage gire ama ke kweri bolole gbu keuga ugakallage gire nga chegu jenba trate. 47 José Jesu jaba ogo keugage ene gire muinga boke kledu eni gwage Josédi, muinga gdaite María-Magdalena, muinga gdaite María, María e José na chebia. Muinga e gdaboke gwagedu Josédi Jesu jaba oge.
1 Undege chuia jo tangle gire nagbietege chui domingoge ngabebitabi María-Magdalena kaire María na Santiago chebia kaire Salomé, muinga e gdamai jo lle ñachke no tanre dbe tkadale Jesu jaba giti, muinga nu lle ñachke e gigaba sábadoge ngajrege. Chui chku ngwale dbi giti gire muinga e ulita kledu chage Jesu jaba ogle ngwadi ngnagu, 3 ama ulita kledu gerule modi jonkare: —¿Che be age mine? ¿Chema be kechuga kweri kle keuga ugakallage Jesu jaba ogle ngwadi jwennga che alin? Kechuga kweriare che me kira molen kechuga e jwen siere keuga ugakallage. 4 Ama kledu gerule ene jonkare, ama jo chke Jesu jaba ogle ngwadi, ama gwagedu kechuga kweridi klodegaba siere keuga ugakallage, keuga ugakalla chegeba ka ngwale. 5 Muinga e ulita gdamainate jo chiga keugage gire ama gwagedu mo ko taingwli giti kirogwa bialedi, kirogwa biale e mo ngama tkaba ñometra jutreske ama kledu toiba dba Jesu jaba ogle ngwadi. Muinga e ulita kwachiu tanre kirogwa bialedi. 6 Kirogwa biale gerudu muinga ole: —Ba me kwachie, uñale chage ba kle Jesu una Nazaremu jinade nate. Ama me kle aini dale. Ulia ama gbere kruge, ama jokeda, agwa ama chkuni gwadeni. ¡Gwagede aini ama jaba ogle ngwadi, ama me kle aini dale, nege ama kle gwadeni! 7 Joga blike kwian geru jwannga Jesuge gdataboko giti gdaite kle ngwadi, ba geru ketadale ama ulitage Jesu giti, ba geru ai kete Pedroge kaire kwian geru jwannga na ulitage: “Joga nga Galileage, Jesu be joge nga ege ba ulita ngeru, ne ngwadige ba be ten ama ngwange ama gerudu kare ba ole ama bebi jogekeda gire.” Ba gerudale ene Pedro ole kaire kwian geru jwannga na ulita ole. ¡Joga, joga! 8 Kirogwa biale gerudu ene muinga gdamai ole gire muinga ulita jo kige keugage siere, ama ulita kledu gdajirenga tanre chru ole. Jonkare muinga me geru ketu kwiange dale, ama kwachiu tanre malen ama me geru e gbu chke uñale kwian nage Jesu giti. 9 Jesu chkuni gwade chui domingoge ngabebitabi gire Jesu medu gwangea María-Magdalenage, María ege Jesu nu dolla gdaguke kagaba siere. 10 Jesu medu muinga ege gire muinga jo, geru ketu kwian geru jwannga ulitage Jesu chkuni gwade giti, kwian e ulita kledu olire tanre Jesu nate. 11 María-Magdalena jo chke kwian geru jwannga kledu ngwadi, ama gerudu: —¡Jesu chkuni gwade! Ulia cha gwagedu amadi gwadeni. ¡Jesu kle gwadeni! Kwian geru jwannga Jesuge ulita María-Magdalena keruchugu gerule ene Jesu giti gire ama ulita María-Magdalena kerua gau ngwale, tañachugu María-Magdalena kle sole ama ulita ole. 12 Kwian geru jwannga Jesuge gdaboke kledu chage ngaske ngnagu, gire jonke Jesu medu amage. Kwian geru jwannga e gdabonate me chku Jesu uñe nate blikare, 13 agwa bigwa chku uñale trate ama bokege ulia Jesu amaña kledu chage ama ole jonkare gire ama joni kwian geru jwannga na kledu ngwadi, ama geru ketu dabage ulita Jesu giti, ama gerudu: —¡Jesu chkuni gwade ulia! Cha gwagedu amadi sbaliga jonkare. Kwian geru jwannga gdaboke gerudu ene Jesu giti geru jwannga na ulita ole, gire kaire kwian geru jwannga na ulita ama boke kerua gau ngwale ni gdaite ama kerua Jesu chkuni gwade giti gau ulia. 14 Bigwa Jesu medu kwian geru jwannga ulita gdataboko giti gdaitege gwadeni, ama ulita kledu mo litaba blire gire Jesu chku, Jesu gerudu ama ulita ole: —Cha ta olire tanre ba giti. Kwian ulita bai kaire gwagedu chadi gwadeni ama geru kete bage cha giti, ni ba ama kerua gau ulia cha chkuni gwade giti, ba me kle mo ta gbe ulia cha ole. 15 Jesu ka bo ene kwian geru jwannga amage gdataboko giti gdaite ole gire Jesu gerudu dare ama ole: —Ba jogedale nga ulitage Chube gerua no cha giti kete kwian na ulitage. 16 Kwian bai kaire ulita mo ta gbe cha gerua gai ulia, ba kwian e ñeadale chiske gai ngaña chigage. Kwian cha gerua gai ulia giti Chube be kwian e jwen siere ji chugege age me no gdale gire kwian e be toi diali chui tangle ule Chube ole nga ngaña giti. Agwa kwian bai kaire me cha gerua gai ulia ba geru kete amage kare, kwian ene Chube be ama kage ji chuge daga ngwale ngwadi toi diali sugekare Chubege. 17 Kwian bai kaire ulita mo ta gbe cha gerua gai ulia, amage cha be kira kete lle daga ngwale no tanre dodade, cha kiralla giti kwian cha gerua ganga be ñage age ulita ai kare: Kwian cha gerua ganga be ñage dolla kage siere kwian jwligebangage, kaire ama be ñage gerule kwira nale ni ama geru jwanba giti, 18 kaire ama be ñage jorisi jwen kote ni jorisi be age me no ama ole, kaire ama be ñage veneno jai gire ni ama be oga venenodi ni ama be jogeda kote, kaire ama be ñage ko gbe kwian oga giti gerule Chube ole gire kwian oga be joge chkeni noni trate. Kwian cha gerua ganga be ñage age ene ulita cha kiralla giti —Jesu gerudu ene kwian geru jwannga amage ulita ole. 19 Chugagwalla Jesu gerudu ene ulita kwian geru jwannga ulita ole ama ulita ta gbagda, Jesu gerudu ene ulita gire Jesu dule nga ngaña giti Chube kle ngwadi, Jesu toidu dba Chube ko taingwli giti kwian Chugagwalla kweri. 20 Jesu joni nga ngaña giti ene, gire kwian geru jwannga Jesuge ulita jo nga ulitage Jesu ama kagu kare geru no Jesu giti kete kwian na ulitage. Jesu ama chudabo, Jesu mo kira ketu ama ulitage Jesu kiralla giti ama ulita lle daga ngwale no tanre dodadu kwian tanre na gwa giti, e giti kwian nage sugedu Jesu kle ama chudaboi age no kwianske.
1 Jesu kledu chage nga dba ai giti gire kwian tanre gwagedu mo gwagwa giti Jesudi Jesu boidu ulita mine nga dba ai giti. Kwian ene ulita chegu geru Jesu boidu giti trage kwian na ole, ene kwian tanre geru e keruchugu gire kwian e gweale geru Jesu giti degu ama geru keruchugu kare. 3 Cha gerule ba ole cha skatemanalla Teófilo, cha chagedu tanre geru e ulita jwen no ta giti, kaire cha geru kadu kwian tanrege Jesu giti, ene chku uñale no trate chage Jesu boidu mine ulita nga dba ai giti. Cha takalin geru e ulita chke uñale trate bage Teófilo, malen cha tañachuge noare cha geru ai ulita dege ba alin nege ta giti, ene geru ulia Jesu giti be chke uñale ma no ma trate bage kwian ba tku tangle Jesu gerua giti kare. Cha takalin geru ulita Jesu giti chke uñale trate bage. 5 Kwian kada Herodes ama kwian ulita chugagwalla rey nga kweri kada Judeage, e suiale kwian onbre kada Zacarías kle toi nga Judeage. Zacarías kwian gerunga Chube ole daba alin, ama kle lle boi u gerungwa Chube olege ule kwian gerunga Chube ole tanre na ole, kwian gerunga Chube ole e ulita kwian gdaite unsuialin kada Abías mneitella, ama ulita Abías oña oindalla. Zacarías muingalla kada Elisabet, Elisabet kwian unsuialin gerunga Chube ole kada Aarón oña oindalla. 6 Zacarías kaire Elisabet kwian noare, ama bonate chagedu trate no Chube gwa giti, ama bonate Chube gau mo Chugagwallale, diali ama kle age Chube takalin kare Chube nu geru gbaba kare. 7 Sbali Zacarías, Elisabet mo jun bdale, Zacarías toidu ule Elisabet ole agwa Elisabet muinga gballa ama me ñadu kirogwa molen, ama bonate toidu chui sbali ule ama jo juma juma me kirogwa molen gdaite. 8 Chui chku gire Abías mneitella jogedale lle boi u gerungwa Chube olege, e suiale Zacarías jo chke kaire lle boale ule Abías mneitella kle age kare. Chui gbaitege kwian gerunga Chube ole ulita Abías mneitellanu blachke gbu ama ulita kle mo litaba eni alin, ene kwian gdaite bai blachke ama jogedale gwa u gerungwa Chube olege lle ñachke no kada incienso guge Chube gwa giti, chui ege Zacarías blachku joge gwa incienso guge jita ngama giti. 10 Zacarías jo gballa dbige gwa incienso gugale gire kwian tanre mo litaba chegu goga gerule Chube ole. 11 Zacarías kle incienso guge jita ngama giti gwa gire lle boanga Chube alin nga ngaña giti gdaite me chiu gda uñale kle jageba gdate jita ngamadi ko taingwli giti. 12 Zacarías gwagedu amadi Zacarías me tachku gda uñale Zacarías kwachiu tanre. 13 Lle boanga Chube alin gerudu Zacarías ole: —Zacarías, ba me ta dbe kwachie, Chube cha kagu geru jige bage, sbali ba gerudu tanre Chube ole ba takalin kirogwage, e giti Chube ba keruchugu Chube be age no ba alin, ba muingalla Elisabet be kirogwa onbre molen, ba be kirogwa e ka gbe Juan. 14 Kirogwa e be chke Elisabet kote ba ta be suga noare kirogwa giti, nga be suga noare badi, kaire kwian na tanredi nga be suga noare. 15 Kirogwa be chage no trate Chube gwa giti, ama me ñage mo chuge ngwadi lle gage jai dale ni uva chia jai, ama be kle chebiadige gire Chube Oña be kle ama ole, kaire ama chke chebia kote gire Chube Oña be kle ama ole diali chui gdale, ama be toi Chube Oña kirallaske diali. 16 Ama be kwian israelita tanre ta gbeni Chube ole, ene kwian israelita tanre be mo ta bliteni Chube ole be Chube gai mo Chugagwallale. 17 Juan be joge ngeru gerule kwian ulita ole Chugagwalla be chie giti, ama be chage Chube Oña kiralla giti kwian unsuialin kada Elías chagedu kare. Ama be kwian ta gbe toi no mo bitalla ole, ñenua skochie kirogwa skochie me toi no ule, Juan be kirogwa ene ta gbe chke toi no mo ñenua ole ñenua ta gbe chke toi no mo kirolla ole. Kwian me Chube gai dage, kaire Juan be kwian ene ta gbe chke no Chube ole trate. Ene Juan be kwian ta gbe biale Chugagwalla ngwange. 18 Lle boanga Chube alin gerudu ene Zacarías ole gire Zacarías geru kadu amage: —¿Mine be chke uñale chage e be boi ene ba kle gerule kare? Cha juma, cha muingalla kaire juma. 19 Lle boanga Chube alin jaindunga: —Cha kada Gabriel, cha kle lle boi Chube alin, diali Chube kle cha kage, nege aini cha kle Chube gwa giti gerule ba ole, Chube cha kagu geru no ai kete bage. 20 Ulia chui be chke gire be boi ene ulita cha gerudu kare ba ole, agwa ba me cha gerua gau ulia malen nege gwangerugu ba mi ñage gerule, ba be chege kwian keru me kare, ba kirolla be chke ba muingalla kote gire ba be ñage geruleni —lle boanga gerudu ene ulita Zacarías ole gire ama joni. 21 Kledu boi ene Zacarías ole gwa incienso gugangwage gire kwian nglea kledu Zacarías manade goga, ama ulita chegu tañachuge mo tale: “¿Mineade nga chegu ta Zacarías nate dbige gwa incienso gugangwage?” 22 Kwian nglea kledu tañachuge ene gire Zacarías chiu jondoi dbige. Zacarías me ñadu gerule kwian ole, Zacarías ko alin ñachugu kwian ole, Zacarías chegu kwian keru me kare. Kwian gwagedu Zacaríadi ene gire chku uñale kwiange Zacarías gwagedu lle gweale Chubenudi incienso gugangwage. 23 Boidu ene ulita Zacarías ole gire Zacarías chegu lle boi u gerungwa Chube olege Abías mneitella ole chui gweale dare, Zacarías alin lle boi chuia ulita bidu gire Zacarías joni mo ullage. 24 Zacarías jo chkeni mo ullage, chui gweale jo tangle gire Zacarías muingalla Elisabet chegu gaba. Elisabet chegu gwa mo ullage dai gdatiga, dai e gdatiga ulita ama me jo siere mo ullage chage kwianske, ama chegu gwa gerule mo tale: 25 “Chube cha Chugagwalla cha chudabo tanre malen nege cha ñadu chage gaba. Sbali kwian tanre cha gidadu cha me kirogwa molen, nege kwian ene mi ñage tañachuge me no chadi nge kare.” 26 Dai gdadereke bebi joge tangle Elisabege gire Chube lle boanga mo alin nga ngaña giti gdaite kagu geru jige muinga kadakle Maríage. María toinga una kadakle Nazarege nga Galileage, María me chageba kwian onbre ole mo ñengula kare ni bitaite. María muinga biale mo chuia tkaba bebi mo jwen kwian onbre kadakle José ole, José enusulian oña David oindalla. Chube lle boanga mo alin kadakle Gabriel kagu llani María kle toi ngwadi geru jige Maríage. 28 Gabriel jo chke María ngwadi, ama gbi kadu Maríage: —¿Che kle mine? Ba dageare Chubedi, Chube kle ba ole kle age no no ba alin. 29 Gabriel gbi kadu ene Maríage, geru e me chku suge Maríage, ama tañachugu mo tale: “¿Mineade ama gbi kadu ene chage?” 30 Gire Gabriel gerudu María ole: —María, ba me kwachie, ba dageare Chubedi. 31 Ba be chage gaba, ba be kirogwa onbre molen, ba be kirogwa e ka gbe Jesu. 32 Kaire agwe kirogwa e ka be chege Chube kweri nga ngaña giti Kirolla, kirogwa e be chege kweri. Chube be kirogwa e gbe kwian Chugagwallale kweri salengwli ama enusulian oña unsuialin kadakle David kare. 33 Kirogwa e be chege kwian israelita ulita Chugagwallale diali, ama kiralla mi bidege dale. 34 Gabriel gerudu ene María ole, gire María geru kadu Gabrielge: —Cha bebi mo jwen toi ule onbre ole, ¿mine cha be kirogwa molen? 35 Gabriel jaindunga María kalen: —Chube Oña be chke badi, ene Chube kiralla giti ba be kirogwa molen, kirogwa e no trate ama Chube Kirolla. 36 Ba bitalla kada Elisabet me olia giti, ama juma juma be kirogwa molen kaire agwe, amage dai gdadereke chku. 37 Ulia Chube alin lle ulita me mno, Chube ñage age ulita. 38 Gabriel gerudu ene María ole, gire María gerudu: —Cha Chubenu, ama cha Chugagwalla, cha be chege lle boangale ama alin, nobi cha alin ama be age cha ole ba kle gerule kare —María gerudu ene Gabriel ole gire Gabriel joni. 39 E suiale María me manadu, ama jo blike Elisabet ngwadi, Elisabet kle toi Zacarías ole unaske una chege jwichuga giti nga Judeage. 40 María jo chke gwa Elisabet ngwadi gire María gbi kadu Elisabege, 41 Elisabet María keruchugu gbi kade amage gire kirogwa Elisabedige skwendu ngaña Elisabedige, Chube Oña kiralla chku Elisabedige, 42 gire Chube Oña kirallaske Elisabet gerudu kiraske María ole: —Chube kle age noare ba alin, ba me muinga ulita kare, Chube ba gau muinga na ulitaske, kaire ba kirolla bebi chke ba kote Chube kle age no ama alin. 43 Cha me muinga kweri ba cha Chugagwalla chebia kare, ¿lledale ba cha Chugagwalla chebia chiu basale chadi? 44 Ba gbi kadu chage, cha ba keruchugu gire blike cha kirolla skwendu ngaña nga suga no ole chadige. 45 Noare ulia Chube nu geru kagaba ba alin ba geru gau ulia mo tale Chube be age ulita ba ole Chube gerudu kare. 46 Elisabet gerudu ene ulita Chube Oña kirallaske gire María gerudu: “Chube noare ulia, ama cha Chugagwalla, ama cha jwannga siere, nga suga noare chadi ama giti. 48 Chube cha Chugagwalla, ama ñage cha kage ama takalin kare, cha kwian ngwale, cha kwian ene gire Chube noare cha ole, ama kle cha manade diali. Chube noare trate ulita, ama me age me no ni sidri. Chube agedu no tanre cha alin mo kiralla giti, malen nege gwangerugu kwian ulita be gerule diali cha giti Chube agedu noare cha alin. 50 Chube tai dage kwiange bai ama gai dage, Chube taidu dage kwian unsuialinge bai ama gau dage, Chube tai dage kwian negege bai kaire Chube gai dage, Chube be tai dage kwian bdaglige bai kaire be Chube gai dage. 51 Chube kira molen tanre ama agedu tanre mo kiralla giti. Kwian gweale diali suge moge ama ma no kwian na ulitage, Chube kwian ene kagu sugekare mo kaire kaire, ene kwian e me ñage age kwian agali takalin kare. 52 Kwian chugagwalla nga dba ai giti daba ulita kage age chugagwalla takalin kare, Chube kwian chugagwalla ene gbu kwian ngwale kare, ene kwian e me ñage daba kage dare. Kwian ngwale kwian ulitaske Chube kwian ene gbu daba chugagwallale. 53 Kwian me lle molen, Chube kwian ene gbu lle molen tanre. Kwian lle ngle molen, Chube kwian ene jigu me lle molen gbu chage ko ngwale. 54 Chube kwian israelita ulita gau lle boangale Chube alin, Chube kwian e chudabo. Unsuialin Chube gerudu kwian israelita enusulian nge oña ulita ole Chube be tai dage kwian israelita kada Abrahamge kaire Abraham oindalla ulitage, Chube gerudu Chube be kwian ene chudaboi diali chui ulita. Chube agedu ene ulia Chube gerudu kare, kaire Chube be age dare no gwangerugu.” María gerudu noare ene ulita Chube giti. 56 María chegu toi Elisabet ole dai gdamai gire María joni mo ullage. 57 Kirogwa chuia tigunga Elisabege gire kirogwa chku Elisabet kote, kirogwa onbre. 58 Geru chku uñale Elisabet bitalla ulitage kaire kwian na tanrege kle toi kodi Elisabet ullage, kwian ene ulitadi nga chegu suga no Elisabet kirolla giti, ama ulita gerudu modi: —Nga suga noare cha ulitadi Elisabet kirolla giti, ulia Chube taidu dage amage, Chube agedu noare ama alin. 59 Kirogwage chuiapake chku gire kwian e ulita jo Elisabet ngwadi kirogwa kwara tkangenga sidri chada gbe kare kwian israelita ulita kle age kare, kaire chui ege kirogwa ka gbere, kwian ulita tadu kirogwa ka gbe ñenua kadakle kare, Zacarías, 60 agwa Elisabet gerudu: —Kirogwa ka mi chege Zacarías, ama ka be chege Juan. 61 Kwian gerudu Elisabet ole: —¿Mineade ba be kirogwa ka gbe Juan? Ni ba bitalla gdaite kada Juan. 62 Kwian gerudu ene Elisabet ole gire kwian ko alin ñachugu kirogwa ñenuage geru kade ñenuage ñenua takalin kirogwa ka chege mine. 63 Zacarías chada kadu kirogwa ka degagda, chada ketre Zacaríage gire Zacarías kirogwa ka degu ai kare: “Kirogwa ka be chege jwanle Juan.” Kwian ulita chada e batunga gire chegu tañachuge tanre mo tale e giti. 64 Zacarías kirogwa ka degu ene gire blike ama ñaduni geruleni nge kare, gire ama gerudu tanre no Chube giti Chube agedu no ulita ama alin giti. 65 Kwian ulita kle toi kodi Zacarías ullage gwagedu Zacaríadi boi ulita ene, kwian e ulita chegu tañachuge tanre Zacarías giti Zacarías kirolla giti, nga Judeage ulita kwian ulita geru tragu modi daba na ole e ulita boidu giti. 66 Kwian ulita geru keruchugu e giti, sugedu kwiange ulita kirogwa e me kirogwa ulita kare agwa ulia Chube kiralla kle kirogwa e ole, malen kwian ulita chegu tañachuge tanre boidu ulita giti, kwian geru kadu mo tale kirogwa giti: “¿Kirogwa e be joge juma be chege mine?” 67 Boidu ene ulita gire Chube Oña Juan ñenua Zacarías ta gbu gerule Chube be age giti kwian israelita ulita alin, Zacarías gerudu: 68 “Cha tale nga suga no no Chube giti, ama noare ulita, ama kwian israelita ulita Chugagwalla. Che kwian israelita ulita Chubenu, Chube be chie che chudaboi, be che ulita jwen siere ji chugege age me no gdale. 69 Chube be che jwannga siere kage che alin, ama kira molen, ama David oña oindalla, David che enusulian oña lle boanga Chube alin unsuialin. 70 Unsuialin Chube gerudu kwian Chube gerua ketanga ole, gire kwian e Chube gerua ketu daba na ulitage, 71 Chube gerudu ama be che jwen siere kwian agenga me no che dollalege, kwian kle dole che ole kwian ta me no chedi, kwian ene ulitage Chube be che jwen siere. 72 Chube gerudu che enusulian oña nge ole Chube be tai dage che kwian israelita ulitage be age no che ulita alin. Chube be age ene ulia ama gerudu kare, mi geru e talla mlienga. 73 Chube gerudu che enusulian oña kada Abraham ole ulia Chube be Abraham chudaboi kaire Chube be Abraham bdadalla nabitaite ulita chudaboi. 74 Kaire Chube gerudu unsuialin Abraham ole Chube be che jwen siere kwian che dollalege ene che me ta dbale kwachie ni sidri lle boi no Chube alin, 75 ene che be kle diali mo ta gbaba Chube ole chage no trate Chube gwage. Che mo ta gbale joge siere ulita age me noge Chube gwa giti, che mo ta gbadale ene diali chui ulita che be kle toi gwade gire.” 76 Zacarías gerudubi ene kwian ulita ole Chube giti gire gerudu mo kirolla alin ole, Zacarías gerudu: “Ba cha kirolla, ulia Chube kweri kira molen, ba kirogwa amanu, ba joge juma ba be chege lle boanga Chube alin Chube gerua ketangale daba nage, Chube be ba kage gerule kwian ulita ole ngeru Chugagwalla be chie giti, ba be kwian ta gbe biale Chugagwalla kweri ngwange. 77 Ba be Chube gerua trage kwian israelita ole, ene ba giti be chke uñale kwian israelitage ama ñage tien gitiru ji chugege agedu me no ulita gdale, ama ba gerua Chube giti gai ulia, ene ama agedu me no ulita Chube be talla mlienga. 78 Chube noare kwian ulita ole, Chube tai dage che kwian israelita ulitage malen Chube be kwian jwannga siere kage che ulita alin, kwian jwannga siere be chie kwian ta gbale suge ma no trate Chube giti chui chra kle chie ngabebita kle kwian gbe ten kare. 79 Kwian me Chube uñe kle toi nga jereske kare kle toi kennga tanre jogedadi, ba be kwian ene ulita ta gbe suge Chube giti, ene ama mi chage dare nga jereske kare, ba giti kwian tanre be mo ta gbe chage no Chugagwalla nga suga no mauña ngwange salengwli chui chra kle kwian gbe ten kare.” Zacarías gerudu ene ulita mo kirolla Juan ole Chube Oña kirallaske. 80 Chui chagedu kirogwage kirogwa kledu tige no trate, kaire kirogwa jo ta ole Chube kiralla giti. Jo juma gire jo toi nga gballage kwian me kle toi ngwadi, kledu toi nga ege gire ama chuia chku gerule Chube giti kwian israelita ulita ole.
1 Kwian kada Augusto, ama kwian nga kweri ulita chugagwalla emperador, kwian na kada Cirenio ama kwian chugagwalla gobernador nga kadakle Siriage, e suiale Augusto geru gbu kwian ulita alin nga ulitage kwian ulita mo ka gbadale chada giti, ene be chke uñale Augustoge kwian gdabaige kle toi nga ulitage. Augusto kwian gwangea geru e kare gbe kwian ulita alin kwian ulita nga ulitage teanle. 3 Augusto geru gbu ene kwian ulita alin gire kwian ulita joni mo enusulian jwiage mo ka gbe chada giti. 4 E suiale kwian kadakle José kledu toi una kadakle Nazarege nga Galileage gire Augusto gerua jo chke Josége. José jo kaire mo enusulian jwiage una kadakle Belénge nga Judeage, una Belén José enusulian oña kadakle David jwia. 5 José jo una Belénge mo ka gbe chada giti José bebi mo jwen muinga kadakle María ole, ama jo María dbe ule gire e suiale María kledu chage gaba. 6 José jo chke una Belénge María ole, kledu una Belénge gire Maríage chui chku María be kirogwa molen. 7 Mo ka gbe chada giti suiale kwian tanre jogeba chke una Belénge, José alin María alin u me skwendu gbengwa, malen chbi ulla ketre amage gbengwa, ne ngwadi María kirolla kimule chku María kote, María kirogwa bliuda ñometraske, gbu chbi blingwalla tabale, ni u gbaite kle ngwale José alin chegengwa ule kirogwa ole María ole. 8 Kodi una Belénge kwian bda oveja mananga tanre kledu oveja manade kegda giti ngajrege. 9 Kwian kle oveja manade gire Chube lle boanga mo alin nga ngaña giti gdaite kagu geru jige bda oveja mananga e ulitage. Lle boanga Chube alin e gdaite medu kwian oveja mananga ulita gwage, gire Chube kiralla giti nga chratigunga kwian ulitadi tangle, kwian ulita kledu oveja manade kwachiu tanre ni gwageba boi enedi bitaite. 10 Lle boanga Chube alin e gerudu ama ulita ole: —Ba me kwachie, cha kle chage geru noare jige bage kwian ulita alin. Kwian ulita be geru ai cha kle kete bage uñe, nga be suga noare amadi geru ai giti. 11 Cha geru kete ba ulitage, nege ba enusulian oña David unallaske kirogwa no no chku chebia kote, kirogwa e kwian ulita jwannga siere ji chugege kwian agedu me no gdale. Sbali Chube gerudu be ama kage, nege ama chku kwian ulita alin kaire agwe ba ulita alin, ama kada Cristo, ama che Chugagwalla. 12 Cha nga gbe egdage ba ulita alin, ba ulita be joge, kirogwa be skwen bage bliabada ñometraske chbi blingwalla tabale, ene be chke uñale bage cha gerudu ulia ba ole cha kle geru kete bage kare. 13 Lle boanga Chube alin gdaite e gerudu ene gire sugeti lle boanga Chube alin na tanre chku daba nate, ama ulita chku gerule noare Chube giti. 14 Ama ulita gerudu: —Chube noare, ama kweri, nga ngaña giti Chube ngwadi nga suga no no cha ulitadi Chube kle age giti no kwian nga dba ai giti alin. Nege gwangerugu kwian ulita bai kaire alin Chube age no, nga be suga noare kwian ene ulitadi, kwian ene be ta dbe no Chube ole kaire agwe be ta dbe no daba na ulita ole nga dba ai giti —lle boanga Chube alin gerudu ene gire ama ulita joni nga ngaña giti. Oveja mananga gerudu modige: —Lle boanga Chube alin nga ngaña giti chku Chube gerua jige che alin, ale llani una Belénge tienda boidu minedi. 16 Ama ulita jo jrite blike kirogwa jinade nate una Belénge, jo chke llani gire María kaire José kaire kirogwa onbre soli skwendu oveja mananga ulitage, kirogwa kle chbi blingwalla tabale. 17 Oveja mananga ulita gwagedu kirogwadi, gire ama lle boanga Chube alin nga ngaña giti gerua tragu kwian na ole ulita lle boanga Chube alin geru ketu amage kare kirogwa giti. 18 Kwian tanre oveja mananga keruchugu geru e trage, kwian e ulita chegu tañachuge tanre noare oveja mananga keruadi gerule kirogwa giti. 19 María chegu kamne María geru keruchugu geru ogo mo tale ulita, María me ta jonga geru ege mo tale. 20 Kwian oveja mananga ulitadi nga suga no no, ama joni geru trage modi jonkare gerule no Chube giti, ama gerudu: —¿Chema Chube kare ñage age ene no? Chube alin ñage age no ene ulita, boidu ulita lle boanga Chube alin nga ngaña giti gerudu kare che ole. 21 María kirollage chuiapake chku gire kirogwa kwara tkerenga sidri chada gbe kare kwian israelita ulita kle age kare. Kirogwa ka gbere Jesu, lle boanga Chube alin nga ngaña giti ka e ketu ngeru Maríage María bebi chage gaba gire. 22 José, María mo ta gbu age ulita kirogwa soli Jesu giti Moisés nu Chube gerua degaba unsuialin gerule kare, chada e gerule: “Kirogwa onbre chke chebia kote, ñenua, chebia manadale dai gdaite giti chui gbataboko gire ñenua, chebia jogedale u gerungwa Chube olege beusi gbaboke dbe gugale bda gugangwage Chube gwa giti, ene ñenua, chebia chege no trate Chube gwa giti. Kwian me ñage beusi dbe kwian bdada soli chke beusidi kare dbadale gbaboke gugadale.” Moisés chadalla gerule ene malen José, María jo una Jerusalénge bdada dbe gugadale bda gugangwage Chube gwa giti u gerungwa Chube olege. Kaire ama Jesu du ule una Jerusalénge Jesu kaite Chubege Moisés nu Chube gerua degaba unsuialin gerule kare, chada e gerule: “Chebia biale kirogwa onbre molen kimule, chebia kirogwa e kaitadale Chubege lle boangale Chube alin, kirogwa e Chubenu.” María, José jo chke u gerungwa Chube olege una Jerusalénge, ama agedu ulita Moisés chadalla gerule kare. 25 E suiale kwian onbre kada Simeón kle toi una Jerusalénge, ama kwian no kle mo ta gbe diali chage no trate Chube ole kle Chube gai dage. Simeón kledu chui manade ngwange gire Chube be kwian jwannga siere kage kwian israelita ulita chudaboale, diali Chube Oña kledu Simeón ole ta gbe manade ta no ole. 26 Sbali Chube Oña geru ketu Simeónge ngeru jogedage Simeón be gwage Cristodi, Chube be Cristo kage kwian israelita ulita alin Chube gerudu kare. 27 Chube Oña Simeón ta gbu joge u gerungwa Chube olege malen Simeón kledu u ege gire José, María jo chke Jesu dbe u gerungwa Chube olege Jesu kaitadale Chubege Moisés nu Chube gerua degaba unsuialin gerule kare. 28 Simeón gwagedu Jesudi, sugedu Simeónge e Cristo malen Simeón Jesu jun kote gire Simeón gerudu no no Chube ole: 29 “Cha Chugagwalla, cha lle boanga ba alin nga dba ai giti, noare cha ñadu gwage kwian jwannga sieredi, noare ba ama kagu kwian ulita alin. Nege cha ñage jogeda ta no no ole, ba agedu ba gerudu kare cha ole, 31 ba Cristo kagu kwian nga ulitage alin. 32 Cristo giti kwian me israelita be ba uñe, ba Cristo kagu jichra kare kwian me israelita alin, ene kwian me israelita be ba uñe, kwian me israelita be gerule no no kwian banu israelita giti.” 33 Simeón gerudu ene Chube ole Jesu giti, José, María geru e keruchugu, chegu tañachuge tanre noare geru e giti. 34 Gire Simeón gerudu José ole María ole kirogwa ole: —Cha takalin Chube age no no ba ulita alin. Simeón gerudu ene gire gerudu kirogwa chebia María ole: —Chube kirogwa ai kagu nga dba ai giti kwian ulita alin, ama be gerule Chube giti kwian ulita ole, ene ama giti kwian tanre be Chube uñe. Kaire ama giti be chke uñale nate kwian israelita ulita ta mine Chube ole, kwian israelita gweale be ba kirolla gerua gai ulia, kwian e be tien gitiru ji chugege age me no gdale, gweale na mi ba kirolla gerua gai ulia, bdagli Chube be kwian e gbe ji chuge tirare diali chui tangle age me no gdale. Ba be ta dbe dageare ba kirollage, kwian tanre be mo tke dole ama ole malen ba be ta dbe olire tanre ama giti —Simeón gerudu ene María ole Jesu giti. 36 Chui ege muinga kada Ana kledu u gerungwa Chube olege, Ana Chube gerua ketanga, ama onbre kada Fanuel jian, Ana onbre israelita unsuialin kada Aser chudalla. Ana muinga juma juma, chura ochenta y cuatro chkeba amage. Ana mo jun bdale bdale, chura gdaguke toidu ule ñengula ole, gire ñengula jokeda, Ana chegeba oli onbrege. Ana noare Chube ole, ama gerule diali Chube ole u gerungwa Chube olege, ama lle boi nga ju nga jere Chube alin, chui gwealege ama mo tke bagere bligdage, me blire chuiete ulita, ama chege gerule Chube ole chui ulita bliage. 38 Simeón kle gerule kirogwa Jesu giti gire Ana chku Simeón kle ngwadi Jesu ole, Ana Simeón keruchugu gire Ana gerudu Chube ole kirogwa giti: “Chube, noare ba kirogwa ai kagu nga dba ai giti kwian ulita alin.” Ana chegu gerule kirogwa Jesu giti kwian ulita una Jerusalénge ole kwian bai kledu kwian jwannga siere manade. 39 José, María agedu ulita Moisés nu Chube gerua degaba gerule kare, gire José, María joni kirogwa dbe nga Galileage, jo chkeni mo ullage una Nazarege. 40 Una ege kirogwa Jesu toidu José ole María ole, chui chagedu Jesuge Jesu tigedu no kaire Jesu jo ta ole Chube kiralla giti, diali Chube agedu noare kirogwa Jesu alin Chube Jesu gbu tige ta molen tanre ole. 41 Chura kaire kairege kwian israelita ulita kle Pascua chuia ollade una Jerusalénge, chui ege kwian israelita kle tachkeni Chube ama enusulian unsuialin ulita jun siere nga Egiptoge. Diali Jesu ñenua, Jesu chebia kle joge una Jerusalénge Pascua chuia ollade ule kwian nglea ole. 42 Jesuge chura gdataboko giti gdaboke chku gire José, María jo una Jerusalénge chui ollade ama kle age diali kare, Jesu jo ule. 43 José, María chui olladubi gire joni chage una Nazaret ngnagu, me uñadu Josége Maríage kirogwa Jesu cheguda una Jerusalénge. 44 José, María joni chage kwian tanre ole, ama bonate tañachugu Jesu kle chage kwian ngleaske skatemanalla ole. Ama chagedu kwian nglea ulita ole chui gbaite, chui e jo tangle gire ama tañachugu ma no ama Jesu jinade nate kwian ngleaske. José, María Jesu jinadu jinadu, 45 Jesu me skwendu Josége Maríage gire José, María joni naskuni Jesu jinade una Jerusalénge baini chagedu ngwadi. 46 José, María jo chkeni una Jerusalénge Jesu jinade nate, mongike gire Jesu skwendu nate Josége Maríage u gerungwa Chube olege. Jesu kle gwa u ege toiba dba geru trage kwian daba tkanga tangle geruge tanre ole, Jesu kle kwian e gerua keruchuge, kle geru kade tanre amage. 47 Kwian daba tkanga tangle e ulita kaire kwian na kle Jesu keruchuge, kwian ulita kle gwage Jesudi tañachuge tanre Jesudi, ni kirogwa gdaitedi kwian keruchugaba gerule ene Jesu kle gerule kare, kwian ulita chegu tañachuge mo tale Jesu giti: “¿Mineade kirogwa e ñage gerule no ta giti ene? Amage kwian daba tkanga tangle kle geru kade gire kirogwa kle jainnga no ama kalen. Ulia kirogwa e ta ngleare molen, ama kle gerule no no ulita.” Kwian kle Jesu keruchuge chegu tañachuge tanre Jesu gerudu giti ulita kwian e ole. 48 Josége Maríage Jesu skwendu geru trage kwian daba tkanga tangle ole u gerungwa Chube olege, José, María gwagedu Jesudi, chegu tañachuge tanre mo tale: “¿Mineade boidu ene? ¿Kaikwliade che kirolla ñage gerule no kwian daba tkanga tangle ole ta ngleare ole?” José María tañachugu ene mo tale Jesu giti gire María ka bo Jesu ole: —Cha kirolla, ¿mineade ba agedu ene cha ole? Cha ba ñenua ole kledu ba jinade nate tañachuge tanre ba giti. 49 Jesu gerudu chebia kalen: —¿Mineade ba kle cha jinade nate? ¿Me suge bage cha chegedale cha Ñenua ullage lle boi cha Ñenua alin? 50 José, María Jesu keruchugu, agwa geru me sugedu ama bokege. 51 Jesu joni gudegu ule José ole María ole, jo chkeni una Nazarege, una ege Jesu toidu José ole María ole Jesu José gau dage María gau dage diali. Jesu boidu ulita una Jerusalénge María geru e manadu mo tale, María me ta jonga geru ege mo tale. 52 Jesu tigedu no kaire Jesu tigedu ta ngleare ole. Chube gwage kwian gwage Jesu diali agedu noare ulita, Chubedi kwiandi nga suga noare Jesu giti.
1 Kwian kada Tiberio-César ama kwian nga kweri ulita chugagwalla emperador, ama chegu kwian chugagwallale churalla gdataboko giti gdatiga chku. E suiale Poncio-Pilato kwian nga Judeage ulita chugagwalla gobernador, Herodes kwian nga Galileage ulita chugagwalla Herodes daballa kada Felipe kwian nga Itureage ulita chugagwalla kaire kwian nga Traconitege ulita chugagwalla, Lisanias kwian nga Abiliniage chugagwalla. 2 Kwian boke kada Anás kada Caifás ama gdaboke kwian gerunga Chube ole daba alin chugagwalla ma kweri. E suiale Zacarías kirolla kada Juan-Bautista gerule Chube giti kwian ole chuia chku, Juan-Bautista kle toi nga gballage gire Chube geru ketu amage tragadale kwian na ole. 3 Chube geru ketu Juan-Bautistage gire Juan-Bautista jo chage chi kada Jordán kagdage ulita Chube gerua trage kwian ulita ole, Juan-Bautista gerudu kwian ulita bai ama tendu ngwange ole: “Ba ulita mo ta blitadale Chube ole, ba age me no chuge ngwadi me chage age me no dare, kaire ba mo chugadale ngwadi mo ñeange chiske kwian na gwa giti ene ba kle mo kaite nate kwian nage ba mi chage age me no ba chagedu ngeru kare. Ba age ene gire ba agedu me no ulita Chube be talla mlienga ama mi tañachuge dare ba agedu me no giti.” Juan-Bautista chagedu gerule ene kwian ole. 4 Boidu ulita Chube gerua degaba unsuialin gerule kare, kwian Chube gerua ketanga kada Isaías chada degu Juan-Bautista giti, chada e gerule: “Nga gballage kwian gdaite kerua be suge kwian tanrege, ama be gerule: ‘Che Chugagwalla be chie, ba ulita kledale biale ama ngwange, ba mo ta gbadale biale trate no ama ngwange kwian kle jon lite trate biale chugagwalla ngwange kare. 5 Kwian kle jon lite trate biale chugagwalla kweri gai ngwange no ama kle nga kegdere jonkare ulita gbe no trate dba kegata kare, kaire kle jwichuga, dbira gbe no trate dba kegata kare, kle jon itole lite tainkwli kle jon sugaskare lite trate. Ene kaire ba ulita mo ta gbadale no trate biale che Chugagwalla be chie gai ngwange no, 6 Chube be ama kage gire kwian ulita be gwage amadi ama kwian ulita jwannga sieredi.’ ” Isaías nu chada degaba unsuialin gerule ene. 7 Kwian tanre chku Juan-Bautista kle ngwadi, kwian e ulita takalin Juan-Bautista ama ulita ñe chiske, Juan-Bautista gerudu ama ulita ole: —Ba ulita kwian agenga me no me no, diali ba ta agekalin me no Chube dollale, ba ta me no molen. ¿Chema geru ketu bage ba mo ñeange chiske alin allabi me mo ta blite Chube ole, ene ba tien gitiru ji chugege ba agedu me no gdale? 8 Me ene dale. Ba ta tienkalin gitiru ji chugege ba agedu me no gdale ba mo ta blitadale Chube ole mo ta gbe chage trate no Chube takalin kare, ene kwian gwage badi ulia ba mo ta blitu Chube ole. Ba me ñage tañachuge mau giti: “Cha enusulian oña Abraham oindalla, malen Chube me ñage ji gbe cha giti cha agedu me no gdale.” Ba me ñage tañachuge ene. Cha gerule ba ulita ole, ba me mo ta blite Chube ole ba me ña tien gitiru ji chugege ba agedu me no gdale. Ba Abraham oindalla agwa ba me kle age Chube takalin kare. Chube takalin ama ñage ke blite Abraham oindallale gire ke e joge blitaba kwianle, kwian e be age Chube takalin kare. 9 Ba me mo ta blite ulia, ba salengwli gli me no kare, me gbachie no, gli ene alin gli mauña kle biale mochuga ole gli datagda, gli mauña be gli ene date guge ulita, ene kaire Chube kle biale ji gbe kwian me no giti bai kaire me mo ta blitakalin ulia Chube ole. 10 Juan-Bautista gerudu ene kwian ulita ole gire kwian geru kadu amage: —¿Cha llema boadale gire cha ñage chage no Chube takalin kare? 11 Juan-Bautista jaindunga: —Ba camisa boke molen camisa gdaite ketadale kwiange kwian bai me camisa molen bitaite. Ba bligda molen bligda girabatadale kwian ole kwian bai me bligda molen sidri —Juan-Bautista gerudu ene kwian ole. 12 Kaire kwian gweale igi ganga chugagwalla emperador nga Romamu alin chiu Juan-Bautista kle ngwadi mo ñeange chiske, ama geru kadu Juan-Bautistage: —Kwian tkanga tangle geruge, cha ulita igi ganga chugagwalla emperador nga Romamu alin, ¿cha llema boadale gire cha ñage chage no Chube takalin kare? 13 Juan-Bautista jaindunga: —Ba igi gadale mangire batre ba chugagwalla gerudu kare, me igi gai ma gitikanga sidri mau alin —Juan-Bautista gerudu ene kwian igi ganga ole. 14 Kaire guardia donga gweale geru kadu Juan-Bautistage: —Cha guardia donga, ¿cha llema boadale gire cha ñage chage no Chube takalin kare? Juan-Bautista jaindunga: —Ba lle boi ñanale igi keta bage, igi e alin ole ba ta chegedale no. Ba me lle jwennga kwian ngeru, ba me kwian oña boi lle gdale, ba me kwian gbe jiske geru me ulia giti. 15 Kwian ulita kle Juan-Bautista keruchuge chegu tañachuge mo tale Juan-Bautistadi: “¿Ama Cristo? Sbali Chube gerudu be kwian jwannga siere kage che ulita alin, ¿ama e Chube gerudu kare o me?” Kwian ulita chegu tañachuge ene manade Juan-Bautista be age mine ama ulita gwa giti ene chke uñale amage Juan-Bautista amaña Cristo o me. 16 Kwian ulita kle tañachuge ene mo tale gire Juan-Bautista gerudu kwian ulita ole: —Cha me Cristo, agwa kwian gdaite be chie cha nate, ama Cristo, ama ma kira molen chage, ama be ñage age ma no kwian alin chage, ama be Chube Oña gbe kwian tale, ene diali kwian be chage Chube Oña ole, Chube Oña be kwian ta gbe age no diali Chube takalin kare. Cha ñage kwian ñe chiske alin, agwa cha me ñage Chube Oña gbe kwian tale kwian ta blite age Chube takalin kare. Ulia kwian gdaite be chie cha nate ama ma no ma kweri ulita chage, cha me ñanaske ama chudaboangale ni ama zapatolla jwennga ama serage. 17 Kwian gdaite be chie cha nate kle biale kwian chage no Chube takalin kare jwen sugekare kwian me noge, kwian no be toi no Chube ole diali, agwa kwian me no be toi sugekare diali Chubege ji chuge chui tangle, kwian mi ñage joge siere ji chuge ege. E salengwli kwian kle trigo kwara batenga kare, trigo tagla no alin chege sugekare trigo kwara me noge, trigo tagla ogakle no agwa trigo kwara gugakle jitaske. Malen cha gerule ba ulita ole ba tienkalin gitiru ji chugege ba mo ta blitadale Chube ole. 18 Juan-Bautista gerudu ene Cristo chie chuia giti, kaire chagedu geru na no Chubenu Cristo giti trage kwian ulita ole. 19 Chui gbaite Juan-Bautista gerudu kwian nga Galileage ulita chugagwalla rey kada Herodes ole, Juan-Bautista ka bo Herodes ole: —Herodes, ba kle age tanre me no, ba kle toi muinga kada Herodías ole, ama me ba muiralla, ama ba daballa kada Felipe muiralla, me no ba kle age ene, kaire ba lle na tanre me no boabale, ba ta jwlitedale age nganake ba kle agege nege kare. 20 Juan-Bautista ka bo ene Herodes ole, agwa Herodes me Juan-Bautista keru talladu, Herodes skochiu, kaire Herodes lle na me no bo, ama mo ta gbu Juan-Bautista tke skage Juan-Bautista ka bo ama ole kle age giti gdale. 21 Juan-Bautista bebi tka skage gire ama kledu kwian ulita mo ta gbu Chube ole ñe chiske, e suiale Jesu kaire chku Juan-Bautista kle ngwadi mo ñeangale chiske Juan-Bautistage. Juan-Bautista Jesu ñeu chiske Jesu gau ngaña chigage gire Jesu gerudu Chube ole. Jesu kle gerule Chube ole gire nga ngaña giti nga tigedunga, 22 Chube Oña chku dba Jesu giti beusi kare, gire Chube kerua sugedu Jesuge gerule nga ngaña giti, Chube gerudu Jesu ole: “Ba cha Kirolla, cha no no ba ole, nga suga noare chadi ba giti.” Kwian kledu enige Chube kerua sugedu ene gerule no mo Kirolla Jesu ole. 23 Jesuge chura treinta chku gire ege gwangerugu Jesu lle bo kwian gwa giti gwangea Chube alin kwianske. Kwian ulita tañachugu Jesu José kirolla. José Elí kirolla, 24 Elí Matat kirolla, Matat Leví kirolla, Leví Melqui kirolla, Melqui Jana kirolla, Jana José kirolla, 25 José Matatías kirolla, Matatías Amós kirolla, Amós Nahúm kirolla, Nahúm Esli kirolla, Esli Nagai kirolla, 26 Nagai Maat kirolla, Maat Matatías kirolla, Matatías Semei kirolla, Semei Josec kirolla, Josec Judá kirolla, 27 Judá Joanán kirolla, Joanán Resa kirolla, Resa Zorobabel kirolla, Zorobabel Salatiel kirolla, Salatiel Neri kirolla, 28 Neri Melqui kirolla, Melqui Adi kirolla, Adi Cosam kirolla, Cosam Elmadam kirolla, Elmadam Er kirolla, 29 Er Josué kirolla, Josué Eliezer kirolla, Eliezer Jorim kirolla, Jorim Matat kirolla, 30 Matat Leví kirolla, Leví Simeón kirolla, Simeón Judá kirolla, Judá José kirolla, José Jonám kirolla, Jonám Eliaquim kirolla, 31 Eliaquim Melea kirolla, Melea Mena kirolla, Mena Matata kirolla, Matata Natán kirolla, 32 Natán David kirolla, David Isaí kirolla, Isaí Obed kirolla, Obed Booz kirolla, Booz Sala kirolla, Sala Naasón kirolla, 33 Naasón Aminadab kirolla, Aminadab Admin kirolla, Admin Arni kirolla, Arni Esrom kirolla, Esrom Fares kirolla, Fares Judá kirolla, 34 Judá Jacob kirolla, Jacob Isaac kirolla, Isaac Abraham kirolla, Abraham Taré kirolla, Taré Nacor kirolla, 35 Nacor Serug kirolla, Serug Ragau kirolla, Ragau Peleg kirolla, Peleg Heber kirolla, Heber Sala kirolla, 36 Sala Cainán kirolla, Cainán Arfaxad kirolla, Arfaxad Sem kirolla, Sem Noé kirolla, Noé Lamec kirolla, 37 Lamec Matusalén kirolla, Matusalén Enoc kirolla, Enoc Jared kirolla, Jared Mahalaleel kirolla, Mahalaleel Cainán kirolla, 38 Cainán Enós kirolla, Enós Set kirolla, Set Adán kirolla, Adán Chube kirolla.
1 Jesu mo ñeangu chiske chi Jordánge, ne ngwadi Chube Oña chkeba dba Jesudige chi Jordánge Jesu mo ñeangu chiske ngwadi, Jesu jo siere nga ege gire Chube Oña ama ta gbu joge toi nga gballage. 2 Nga gballage Jesu toidu chagere chui cuarenta Chube Oña ama ta gbu kare chage nga gballage. Jesu kledu toi nga gballa ege gire che dolla Satanás mo chugu tanre Jesu ole, Satanás tadu Jesu ta blitakalin age me no Chube dollale. Chui ngle cuarenta ulita Jesu me blidu dale, gire bdagli ama bli ole tanre. 3 Uñadu Satanáge Jesu bli ole gire Satanás chku Jesudi mo chuge Jesu ole, Satanás gerudu Jesu ole: —Ba Chube Kirolla ulia ba ke ai blite bligdale mo alin ba gute. Ba ke blite bligdale ene be suge chage ulia ba Chube Kirolla. 4 Jesu gerudu: —Cha mi age ba takalin kare, Chube gerua degaba unsuialin gerule: “Me bligda alin allabi giti kwian ñage toi, agwa kaire Chube gerua gai ulia giti kwian ñage toi no.” 5 Jesu gerudu ene Satanás ole gire Satanás Jesu du jwichuga ngaña giti gire sugeti ngwale Satanás nga ulita nga dba ai giti kaitu Jesuge, 6 Satanás gerudu: —¡Gwagede nga e ulita no nodi! Nga e ulita chanu, e ulita ketaba chage cha ñage nga e kete kwian bai kaire cha takalin karege. Cha takalin ba jongnagwa skute dba chadi cha gai dage gerule no cha giti, gire cha be nga e no no kweri ulita kete bage, ba be chege nga e ulita mauña, kaire ba be chege kwian nga ulitamu chugagwallale. 8 Satanás gerudu ene ulita Jesu ole gire Jesu jaindunga Satanás kalen: —Cha mi age ba takalin kare, cha mi ba gai dage dale, Chube gerua degaba unsuialin gerule: “Chube kwian ulita Chugagwalla, kwian ulita mo Chugagwalla Chube alin allabi gadale dage gerule no ama alin giti, kaire kwian ulita mo ta gbadale no lle boi Chube alin allabi.” 9 Jesu gerudu ene gire Satanás jo Jesu dbe una kada Jerusalénge, jo chke llani gire ama Jesu du ngaña u jiri bdagli giti u gerungwa Chube ole giti, jo chke ngaña gire Satanás gerudu Jesu ole: —Ba Chube Kirolla ulia ba skwen dbige aini. 10 Chube gerua degaba unsuialin gerule: “Chube be lle boanga mo alin nga ngaña giti kage ba alin, lle boanga Chube alin be ba manade. 11 Lle boanga Chube alin be ba gai ngwange kote, ene ba me lentige, ni ba sera lentige kege.” Chube gerua degaba unsuialin gerule ene malen ba ña skwen dbige aini ba mi lentige dale. 12 Jesu jaindunga: —Cha mi age ba takalin kare, Chube gerua degaba unsuialin gerule: “Chube kwian ulita Chugagwalla, kwian me mo chugadale mo Chugagwalla Chube ole.” 13 Bdagli Satanáge me chku boale age ama takalin kare Jesu ole, Satanás me ñadu mo chuge dare Jesu ole, Satanás Jesu chugu ngwadi ama jo siere Jesuge, chui gweale ama be mo chugakalin kwaite Jesu ole. 14 Satanás mo chugu ene ulita Jesu ole nga gballage gire Chube Oña kiralla giti Jesu joni nga Galileage, Jesu jo chkeni nga Galileage gire geru Jesu giti chagedu nga ulitage nga Galileage. 15 Nga ege Jesu kwian tku tangle tanre Chube geruadi u mo litangwa Chube gerua jwanngwage, kwian ulita bai ama keruchugu gerudu Jesu giti: —Jesu noare, ama kle cha tke tangle no, kwian na me ama kare kwian tke tangle no. 16 Jesu chagedu kwian nga Galileage tke tangle gire Jesu joni mo jwiage una kada Nazarege Jesu manadre ngwadi. Jesu kledu una Nazarege gire kwian israelita undege chuia chku, chui ege Jesu jo u mo litangwa Chube gerua jwanngwage, u ege Jesu jo mo lite kwian ole Jesu kle age diali kare undege chuiage kaire kairege. Gwa u ege Jesu chku gdate kwian ulita gwangnagu Chube gerua degaba unsuialin batalenga kwian ulita alin. 17 Kwian Chube gerua ketanga kada Isaías nu Chube gerua degaba unsuialin, chada e ketre Jesuge batadalenga. Jesu chada e treunda, geru kle degaba Jesu jinadu batadalenga, geru skwendu Jesuge gire ama geru e batunga kwian ulita alin, geru e gerule ene Jesu giti: 18 “Chube mo Oña ketu chage, Chube cha gbu geru noare trage Chube Oña kirallaske kwian ulita ole bai me lle molen. Chube cha kagu kwian ta olire tanre blite nga suga no ole, ene nga be suga noare kwiandi. Chube cha kagu kwian skage skajwennga, ene kwian me chege toi skage. Chube cha kagu kwian me gwagwa molen dodade gbe ten, ene kwian be ten no mo gwagwa giti. Kwian me ngwaña kwian nage Chube cha kagu kwian ene gbe toi ta suga no ole. 19 Kaire Chube cha kagu geru trage kwian ulita ole: ‘Nege Chube chuia chku Chube be age no no kwian ulita alin.’ ” 20 Jesu chada batunga ene ulita, gire Jesu chada bliuda, Jesu chada ketuni kwian u manangage, Jesu toidu dba. Kwian ulita kle ne ngwadi chegu gwage tanre Jesudi alin, 21 Jesu gerudu kwian ulita ole: —Nege geru ai kle degaba unsuialin kle boi ulia ba ulita gwa giti chada kle gerule kare. 22 Kwian Jesu keruchugu gerule ene gire kwian kle mo litaba chegu tañachuge tanre noare Jesu giti, ama ulita gerudu Jesu giti modige: —Kwian e noare ulia, ama gerule noare ulita, ¿mineade ama ene? ¿Agwa e me José kirolla? 23 Jesu gerudu kwian ulita ole: —Ulia ba be gerule geru uñale aige cha ole: “Ba kwian mo dodanga, nege mo dodade agali.” Kaire ba be gerule cha ole: “Cha geru keruchugu ba lle daga ngwale no tanre dodadu una Capernaumge, nege dodade kaire ene aini ba jwiage.” 24 Jesu gerudu dare kwian ole: —Ulia cha gerule ba ole, kwian Chube gerua ketanga, ama jwiage bitalla me ama gai ngwange kwian Chube gerua ketanga ulia kare. 25 Unsuialin muinga tanre me chegu kwian onbrege nga Israelge Elías suiale, Elías kwian Chube gerua ketanga, e suiale noi me boidu chura gdamai giti dai gdadereke, bli kweri gbere kwian ulita alin. 26 Chube me Elías kagu muinga me chegu kwian onbrege kle toi nga Israelge chudaboi, me ene, agwa Chube Elías kagu muinga gdaite kle toi nga nage chudaboi, muinga gdaite me chegu kwian onbrege kle toi una kada Sarepta nga Sidónge, Elías muinga e chudabo. 27 Kwian Chube gerua ketanga na kada Eliseo, ama suiale kwian tanre oga nga Israelge kwara tuge jingmea kada lepra ole. Eliseo me kwian nga Israelge oga kwara tuge jingmea ole dodadu, me ene, agwa Eliseo kwian onbre gdaite kada Naamán toinga nga na kada Siriage dodadu. 28 Jesu gerudu ene kwian ole u mo litangwa Chube gerua jwanngwage, kwian ulita Jesu keruchugu, kwian skochiu tanre Jesudi tañachugu Jesu kledu gerule kwian ama jwiallamu dollale. 29 Kwian ulita chku gdate Jesu dbe mlialenga unage, kwian Jesu du una jwichugalla gwagda giti, be Jesu mlienga kegdege. 30 Agwa Jesu jwliteduda kwianske tangle, Jesu jo siere kwian e ulitage, kwian me ñadu Jesu mlienga kegdege kwian tadukalin kare. 31 Jesu jo siere una Nazarege jo chkeni una Capernaumge nga Galileage. Undege chuiage Jesu jo u mo litangwa Chube gerua jwanngwage, u ege Jesu kwian tku tangle Chube gerua giti. 32 Kwian ulita kledu eni Jesu keruchuge chegu tañachuge tanre Jesu gerudu giti, kwian tañachugu mo tale: “¿Mineade ama ñage che tke tangle ene trate? Ama kle che tke tangle no kwian geru mauña kweri kare.” 33 Jesu kledu kwian tke tangle ene gwa u mo litangwa Chube gerua jwanngwage, kwian onbre gdaite jwligebanga dolla kote kledu eni, dolla onbre e gbu ngaute kweri Jesudi: 34 —¡Jesu una Nazaremu, cha ulita chugene! Chage uñale ba chema, ba Chube Kirolla no trate, uñale chage ba chiu nga dba ai giti cha ulita gbe ji chuge. Cha me takalin ba cha gbe boi daga ngwale, ba cha ulita chuge ngwadi toi ngwedi. 35 Jesu ka bo dolla e ole: —¡Chegede kamne, joga siere onbre ege! Dolla onbre e mliu dba kwian ulita gwa giti gire dolla jo siere onbrege, onbre chegu no ulita, me boidu dare. 36 Boidu ene kwian ulita gwa giti, kwian chegu tañachuge tanre, ama ulita ta me jo sugano ama ulita gerudu: —¿Kle boi mine aini cheske? ¿Mine Jesu ñage gerule alin dolla ole gire dolla age ama gerule kare? Ama kle gerule dolla ole dolla jogedale siere kwian jwligebangage gire dolla kle ama kerua gai dage dolla joge siere ama gerule kare. 37 Jesu dolla kagu siere onbrege giti geru e jo chage kwian ulitaske nga Galilea ulitage. 38 Jesu jo siere u mo litangwa Chube gerua jwanngwage gire ama jo Simón ullage Simón ñemaña oga ngwadi, Simón ñemaña oga jabale nganagda ole, kwian tanre gerudu Jesu ole: —Cha takalin ba Simón ñemaña oga nganagda ole dodade. 39 Gire Jesu jo oga ankwallage kodi, Jesu gerudu nganagda ole: —¡Joga siere muingage! Gire nganagda ulita jo siere blike muingage, sugeti ama cheguni noni chku gdate gire ama bli jinadu Jesu alin kaire kwian na ulita alin. 40 Chui jo joge dba dbi giti kwian ngle kle no chiu oga tanre jingme ole dbe Jesudi dodadale. Jesu ko gbu kwian oga gdaite gdaite giti ulita, Jesu kwian oga ulita dodadu. 41 Jingme jo siere kwian tanrege, kaire dolla jo siere kwian tanrege, dolla ulita kle joge siere kwiange gire gerudu Jesuge: —Ba Chube Kirolla. Jesu ka bo dolla ole: —Ba me gerule ene cha giti, joga kamne siere. Uñale dolla ulitage Jesu amaña Cristo, Chube nu Jesu kagaba kwian jwen siere ji chugege age me no gdale Chube nu geruba sbali kare, malen dolla gerudu Jesu Chube Kirolla. Jesu me dolla chugu ngwadi Jesu kalla itenga Jesu amaña Cristo Jesu Chube Kirolla, malen Jesu ka bo dolla ulita ole, Jesu me dolla gdaite chugu ngwadi gerule trate Jesu giti. 42 Nagbietege ngabebitabi Jesu jo nga gballage kwian me ngwadi. Kwian ulita jo Jesu jinade nate, kwian jo chke Jesudige, kwian ulita gerudu Jesu ole: —Cha ulita me takalin ba joge siere chage. 43 Jesu gerudu kwian ole: —Cha me ñage chegeda aini ba ulita ole, Chube cha kagu geru no kete kwian ulitage nga kaire kairege malen cha chagedale nga ulitage gerule kwian ole kwian ulita ñage Chube uñe, kwian mo ta blitadale Chube ole ene Chube be kwian jwen siere ji chugege agedu me no gdale. Chube cha kagu geru e kete kwian nga ulitage, malen cha me ñage chegeda aini, cha jogedale dare. 44 Jesu gerudu ene kwian ole gire Jesu jo chage nga Galileage ulita, nga Galileage ulita Jesu chagedu Chube gerua trage kwian nga Galileamu ole u mo litangwa Chube gerua jwanngwage.
1 Bitaite Jesu kle chibita kada Genesaret kagdage, kwian tanre chku sklie kejre Jesudi tangle, kwian ulita ta Chube gerua keruchugakalin. 2 Jesu gwagedu du kwara alindi gabonate kodi chibita kagda giti, kwian ngwe jwannga nu du jwanba kedagu, du mauña kle gdeba glige. 3 Du e gaite Simónnu, Jesu jo chiga du ege, gire Jesu gerudu Simón ole: —Du binga bamlinga chibita kagdage. Simón du biunga, du chegu bamlinga chibita kagdage gire Jesu toidu dba du toli, ama kwian ngle ulita kle kedagu tku tangle Chube gerua giti. 4 Ama geru tragubi kwian e ole gire gerudu Simón ole: —Che joge chibita jerege gire ba gdeba tke chiske ngwe jwangda. 5 Simón jo du toli ule Jesu ole gire Simón gerudu Jesu ole: —Ba cha tkanga tangle geruge, cha lle bo tanre ule cha chagemanalla ole beigliga nga chiu ju nege, cha ni ngwe gdaite jun, gire ba cha kage chibita amañage cha be gdeba tke chiske nakwaite ba gerudu kare. 6 Simón gerudu ene Jesu ole gire ama daba na ole gdeba tku chiske. Ama gdeba tku chiske gire ngwe tanre chku gdebage. Simón gdeba jun keda ngwe ngle kle gdebage, gdeba chege bedre gdeba dretenga ngwe ole. 7 Ama chagemanalla kle du nage bate, ama ko meagu mo gitigu ama chudaboi ngwe jwen keda. Ama chagemanalla chku amadi, ama Simón kaire daba na chudabo ngwe jwen keda, ama ngwe gbu du boke toli, du bonate chku ete ulita ngwe ole, du boke biri joge chiske ngwe tanre ole. 8 Simón-Pedro gwagedu ngwe tanredi gire ama jongnagwa skutu dba Jesu gwangnaru gerudu Jesu ole: —Cha Chugagwalla, suge trate chage ba noare kweri ba kiraske tanre, chage suge cha kwian agenga me no tanre, malen ma no ba me chage dare cha ole. 9 Simón ngwe tanre gau chagemanalla ole, ngwe e giti ama ulita ta me jo sugano ama ngwe jun giti, ama ulita chegu tañachuge mo tale: “¿Mineade che ngwe jun ngle ene?” 10 Zebedeo kirolla kada Juan kada Santiago, ama boke Simón chagemanalla, ama chegu tañachuge tanre kaire. Jesu gerudu Simón ole: —Ba me chegedale tañachuge tanre, nege ba kwian ngwe jwannga agwa nege gwangerugu cha be ba gbe kwian gangale cha gerua giti, ene ba giti kwian ngle be cha gerua gai ulia. 11 Jesu gerudu ene Simón ole, gire Simón jo ule Jesu ole Juan ole Santiago ole du dbe chibita kagda ngnagu, ama jo chkeni chibita kagdage gire Simón kaire Juan kaire Santiago lle chugu ngwadi ulita gire jo chage Jesu ole geru jwen amage. 12 Chui gbaite Jesu kle una gdaitege gire kwian onbre gdaite oga trate jegwale chku Jesu kle ngwadi, ama oga jingme kwara tuge ole. Kwian oga e gwagedu Jesudi gire ama mo ñeu dba jongnagwa giti kaboge dba dbidi Jesu gwangnaru, ama gerudu Jesu ole: —Ba takalin cha dodade, uñale chage ba ñage jingme ai jwen siere chage ene cha chege trate jingme aige. 13 Kwian oga gerudu ene Jesu ole gire Jesu ko gbu ama giti, Jesu gerudu: —Cha takalin ba jingmea jwen siere bage, nege nege ba chege no trate. Jesu gerudu ene gire sugeti jingme jongwa kwiandi, kwian oga chegu noni. 14 Jesu gerudu dare kwian jo chkeni ole: —Ba me gerule ni kwian gdaite ole cha ba dodadu giti agwa ba agedale Chube nu geru gbaba unsuialin kwian alin Moisés giti gerule kare, chada e gerule ba agedale ai kare: Joga u gerungwa Chube olege mo kaite kwian gerunga Chube ole daba alinge, ba bdada gbaboke dbadale ule gugadale Chube gwa giti u ege ba chegu no trate ñanale, joga age ene ulita gire be chke uñale kwian ulitage ba jo chkeni no ba jingmeage —Jesu gerudu ene kwian onbre jo chkeni ole. 15 Chui ege gwangerugu geru Jesu giti chagedu ma dare kwian ulitaske malen diali kwian tanre kledu mo lite Jesudi Jesu gerua keruchuge, kaire kwian tanre oga chku Jesudi Jesu ama dodadale. 16 Chui gwealege Jesu joge nga gballage geru trage Chube ole agwa gire chieni kwian chudaboi nakwaiteni. 17 Bitaite Jesu kledu kwian tke tangle gwa gire kwian fariseo mneite kaire kwian daba tkanga tangle Moisés chadalla giti mneite kle toiba dba Jesu kle kwian tke tangle ngwadi, kwian e gweale nu chieba una ulitage nga Galileage kaire una ulitage nga Judeage kaire una Jerusalénge, una e ulitage kwian e nu chieba. Kaire kwian na tanre kledu eni Jesu keruchuge. Jesu kle kwian tke tangle kaire kle kwian oga dodade Chube kiralla giti, 18 gire kwian na gweale chiu daba oga gdaite skliebada trate jegwale dbe ankwage Jesu kle ngwadi dodadale, kwian e kle no tadu daba oga e dbe ugakage gudegu gbe Jesu gwangnaru. 19 Agwa kwian tanre kle gwa sklieba kejre ulita ugakage malen daba oga dbanga ulita me ñadu tien gudegu oga ole, gire jo oga dbe ankwage u giti bdugu, jo chke u giti ama u uga degunga ankwa tien mangire batre gire ama ankwa kagu giskage dbige Jesu gwangnaru. 20 Jesu gwagedu kwian ogadi gire uñadu Jesuge kwian oga kaire kwian oga dbanga ulita mo ta gbaba ulia Jesu ole Jesu ñage kwian oga dodade, malen Jesu gerudu kwian oga ole: Kwian israelita ulla —Cha gerule ba ole, ba ageba me no ulita talla cha mlienga, nege ba chege no trate me jiske Chube gwa giti. 21 Jesu gerudu ene kwian oga ole gire kwian daba tkanga tangle Moisés chadalla giti ulita kaire kwian fariseo ulita tañachugu mo tale Jesudi: “¿Mineade onbre e kle gerule ene kwian oga ole? Ama me ñage gerule ene, ama kle mo gbe kweri Chube kare. ¿Chema ñage kwian age me no ulita talla mlienga kwian gbe no trate me jiske Chube gwa giti? Chube alin allabi ñage, onbre e me ñage age ene Chube kare.” 22 Kwian kledu tañachuge ene mo tale Jesudi gire Jesuge uñadu ama ulita kle tañachuge giti, Jesu geru kadu ama ulitage: —¿Mineade ba ulita kle tañachuge ene chadi? 23 ¿Bai ma mno cha alin: kwian oga ai ageba me no ulita talla mlienga o kwian oga ai dodade jingmege? Cha alin ai me mno ulita gdabonate. 24 Nege cha be kwian oga ai dodade ba ulita gwa giti ene be chke uñale bage ulia Chube cha kagu nga dba ai giti kwian kare, Chube kiralla giti cha ñage kwian oga dodade jingmege kaire agwe cha ñage kwian age me no ulita talla mlienga kwian gbe no trate me jiske Chube gwa giti. Jesu gerudu ene kwian fariseo ulita ole kaire kwian daba tkanga tangle Moisés chadalla giti ulita ole, gire Jesu gerudu kwian oga ole: —Nege cha gerule ba ole, chkede gdate mo ankwalla gai blienga dbadale, jogani chage ba kle toi ngwadige. 25 Jesu gerudu ene gire kwian oga skliebada chku gdate blike trate no kwian ngle gwa giti, ama mo ankwalla gau kote joni chage ama kle toi ngwadige gerule noare Chube giti. 26 Kwian ngle ulita gwagedu ai ulita boidudi gire kwian ulita ta me jo sugano kwian ulita chegu tañachuge tanre, kwian gerudu noare Chube giti: —Chube noare, ama kira molen ulita, nege Chube kiralla giti Jesu kwian oga skliebada trate jegwale dodadu che ulita gwa giti, ni bitaite che nu gwageba boi ene karedi, ulia Chube no no —kwian ulita gerudu no ene Chube giti. 27 Jesu kwian oga skliebada dodadu ene gire Jesu jo chage dare, ama gwagedu kwian onbre kada Levídi. Leví kwian igi ganga chugagwalla emperador nga Romamu alin, ama kledu toiba dba nga igi ketakle ngwadi igi gai kwiange gire Jesu chku amadi gerudu ama ole: —Bai chage cha ole geru jwen chage. 28 Jesu gerudu ene gire Leví chku gdate, lle chugu ngwadi ulita, jo chage Jesu ole. 29 Leví Jesu du ule kwian geru jwannga Jesuge ulita ole mo ullage blire, Leví jo chkeni mo ullage, bligda dodangu no Jesu alin. Kaire kwian na tanre kle Leví ullage, ama gweale igi ganga chugagwalla emperador nga Romamu alin Leví kare, kwian e ulita blidu ule Jesu ole Leví ole. 30 Kwian ulita kle blire kle geru trage gire kwian fariseo mneite kaire kwian daba tkanga tangle Moisés chadalla giti mneite kledu eni gwagedu kwian tanredi blire ule kwian geru jwannga Jesuge ulita ole, ama ulita ka bo geru jwannga Jesuge ole: —¿Mineade ba kle blire ule kwian igi ganga chugagwalla emperador nga Romamu alin ole kaire kwian na tanre agenga me no ole? 31 Kwian gerudu ene kwian geru jwannga Jesuge ole gire Jesuge geru sugedu kwian kledu geru kade giti, malen Jesu gerudu ama ulita ole: —Cha gerule ba ulita ole, kwian kle no trate me oga me joge kwian mo dodanga ngwadi mo dodade, agwa kwian oga mo dodanga jinade ama joge kwian mo dodanga ngwadi mo dodade, kwian tañachuge kle no ¿lledale ama be mo dodanga jinade mo dodade? 32 Cha chiu nga dba ai giti kwian agenga me no ta blite Chube ole joge siere ama kle age me noge, agwa kwian gweale kle tañachuge mo tale ama no trate me jiske Chube gwage, kwian kle tañachuge mo giti ene alin cha me chiu, cha chiu kwian agenga me no alin ama ta blite age no. 33 Jesu gerudu ene ulita gire kwian gweale na kledu eni ama gerudu Jesuge geru na giti, ama gerudu: —Kwian geru jwannga Juan-Bautistage kaire kwian geru jwannga kwian fariseoge, kwian e ulita kle chui gweale gai mo tkale bage bligdage, chui ege kwian e kle tañachuge gerule Chube ole alin me blire, kwian e kle age ene chui tanrege. ¿Mineade kwian geru jwannga bage me kle age ene kwian e kare? Kwian geru jwannga bage ulita diali kle blire. 34 Jesu jaindunga: —Cha be geru ai ñachuge ba ulita alin, ene be chke uñale bage mineade kwian geru jwannga chage me kle mo tke bage bligdage kwian na kle age kare. Kwian onbre mo jwen chuia gbe, mo jwen chuia chke gire kwian kadaba ulita be joge chui ollade ule kwian onbre mo jwannga ole. Kwian kadaba ulita be chke chui ollade, ¿chema be gerule kwian e me ñage blire? Kwian ulita be blire nga suga no ole chui ollade ule kwian onbre mo jwannga ole. 35 Agwa chui e joge tangle gire chui gbaite be chke gire kwian onbre mo jwannga dbabe sugekare, chui ege kwian mo jwen chuia olladanga ulita be chege ta olire kwian onbre mo jwannga nate gire kwian chui olladanga ulita be mo tke bage bligdage ta olire ole. Ulia cha gerule ba ulita ole, cha kwian onbre mo jwannga e kare, kwian geru jwannga chage ulita kwian mo jwen chuia olladanga kare. Nege cha kle ule geru jwannga chage ulita ole, agwa chui be chke gire cha dbabe sugekare amage, chui ege ama be mo tke bage bligdage ta olire tanre ole. 36 Jesu geru ñachugu ene kwian ulita alin gire Jesu geru na ñachugu ama alin kaire: —Ni kwian gdaite ñometra jegaba jagere drega jwennga ñometra juda ugachuge ñometra drega jagere ege. Kwian age ene ñometra jegaba jagere me chege no, kaire ñometra drega jagere me chege no ñometra judage. 37 Kaire ni kwian gdaite kle lle gbe gage bda kwara dodaba lle gage dbangwa judage. Kwian lle gbe gage bda kwara judage lle gage kle lie gire bda kwara juda kle skiennga ulita, gire lle gage ulita kle jogenga ngwale ulita kaire bda kwara kle chege me no ulita. 38 Malen diali lle gbakle gage bda kwara jagerege, ene lle gage kle lie, bda kwara me skiennga, lle gage me jogenga ngwale. 39 Kwian ulita lle gage no no jai me ta lle bale jakalin, lle bale me skwen no amage, ama gerule lle gage ma no ama alin jadale. Jesu geru ñachugu ene ulita kwian fariseo alin kaire kwian daba tkanga tangle Moisés chadalla giti alin, uñadu Jesuge kwian e ulita me ta Jesu gerua jagere gakalin ulia, me ta mo gerua juda gbaba unsuialin chugakalin ngwadi, malen Jesu geru ñachugu ene ama ulita alin geru jagere giti geru juda giti.
1 Chui gbaite undege chuiage Jesu kledu chage trigoske tangle deage ule kwian geru jwannga amage ulita ole, gire kwian geru jwannga Jesuge ulita mo gbu trigo dabe bulu ite gutadale, ama trigogba gweale mongonga, kwara glogonga sulikwa giti, gba skieru gutu. 2 Kwian fariseo mneite gwagedu kwian geru jwannga Jesuge ulitadi ama kle lle boi kare deage undege chuiage gire kwian fariseo gerudu ama ulita ole: —¿Mineade ba ulita kle lle boi deage undege chuiage? Ba age ene ba kle age me no Chube gerua Moisés nu degaba unsuialin dollale. Uñale ba ulitage Moisés chadalla e giti geru kle gbaba che alin che me ñage lle boi undege chuiage, ¿mineade ba me kle geru e gbe gdadi? 3 Jesu jaindunga kwian fariseo kalen: —¿Ba ulita me nu chada batabanga che chugagwalla unsuialin David agedu giti? Chui gbaite David ule ama chagemanalla ulita ole bli ole tanre, ¿gire ama agedu mine? 4 Uñale ba ulitage David jo gwa u gerungwa Chube olege ule ama chagemanalla ulita ole, u ege gwa pan gbakle, pan e chegedale Chube gwa giti diali, Chube gerua gbaba unsuialin kwian ulita alin geru e gerule kwian gerunga Chube ole daba alin, ama alin allabi ñage pan e gute, ni kwian na gdaite ñage pan e gute. Agwa David bli ole tanre ama pan e gutu kaire ama pan e ketu kwian ulita kledu chage ama olege gutadale. David pan e gutu Chube gwa giti agwa ama me boidu dale, Chube me ama gbu jiske ama pan e gutu gdale. 5 Ene kaire kwian geru jwannga chage me jiske Chube gwa giti ama trigo bulu itu undege chuiage gdale, Chube cha kagu nga dba ai giti kwian kare, ama cha gbu undege chuiage mauña malen cha ñage gerule kwian ole kwian llema boadale undege chuiage llema me boadale undege chuiage —Jesu gerudu ene ulita kwian fariseo mneite ole. 6 Chuia nale undege chuiage Jesu jo u mo litangwa Chube gerua jwanngwage, Jesu jo chke ne ngwadi gire Jesu kwian tku tangle. Eni kwian onbre gdaite oga kledu, onbre e oga ko taingwli ole ko kwebanga. 7 Kwian daba tkanga tangle Moisés chadalla giti mneite kaire kwian fariseo mneite kledu eni gwa u ege, kwian e ulita kledu tatra onbre oga ko kwebanga giti, ama ulita tadu Jesu gbakalin jiske lle boi undege chuiage, malen ama ulita chegu gwage Jesudi Jesu be onbre oga dodade o mi onbre oga dodade undege chuiage. 8 Jesuge uñale kwian daba tkanga tangle Moisés chadalla giti kaire kwian fariseo ulita kle tañachuge mine Jesudige, Jesu gerudu onbre oga ole: —Chkede gdate, bai aini kwian ulita gwangnaru mo ko oga kaite kwian ulita gwa giti. Onbre oga chku gdate mo gbu kwian ulita gwangnaru, 9 gire Jesu gerudu kwian daba tkanga tangle Moisés chadalla giti ole kaire kwian fariseo ole ulita: —Cha geru kade bage: ¿Che llema boadale undege chuiage? ¿Che age no kwian alin o che age me no kwian alin? ¿Che ñage kwian oga chudaboi o che kwian oga chugadale ngwadi boi daga ngwale jogeda? 10 Jesu gerudu ene gire Jesu gwagedu kwian ulitadi, Jesu gerudu onbre oga ole: —Mo ko kwebanga kwrida trate. Onbre agedu Jesu gerudu kare gire onbre ko kwebanga jo chkeni no trate. 11 Jesu onbre oga dodadu ene undege chuiage kwian daba tkanga tangle Moisés chadalla giti ulita gwa giti kaire kwian fariseo ulita gwa giti, e giti kwian e ulita skochiu tanre Jesudi, ama ulita geru tragu modige ama be llema boi Jesu dollale. 12 Chui gbaitege Jesu jo nga jwichugale giti geru trage gballa Chube ole, ngajrege ulita Jesu gerudu Chube ole. 13 Nga chku ju, kwian tanre kle chage Jesu nate diali geru jwen amage, Jesu ama ulita kadu Jesu kle ngwadi, ama ulita jo chke Jesudige gire kwian e ulitaske Jesu kwian gdataboko giti gdaboke gau ama gerua dbe kwian nage, Jesu kwian mneite e ka gbu Jesu gerua ketanga, 14 kwian e ulita kada ene: Simón (kaire Jesu ama ka gbu Pedro), Andrés (ama Simón-Pedro daballa), Santiago, Juan, Felipe, Bartolomé, 15 Mateo, Tomás, Santiago (Santiago ai Alfeo kirolla), Simón (Simón ai kira batanga mo jwia gdale), 16 Judas (ama Santiago na daballa), Judas-Iscariote (bigwa ama jwlitedu Jesu dollale Jesu ketu gwaleda). Jesu kwian e ulita gdataboko giti gdaboke gau ama gerua ketangale. 17 Jesu kwian gdataboko giti gdaboke gau ene ama gerua dbe kwian nage gire Jesu jo dbige jwichugage ama ulita ole, chkuni manade nga kegatale giti. Kwian ngle ulita kle chage Jesu nate diali geru jwen amage kledu nga ege, kaire kwian na tanre chkeba nga ege, ama ulita chieba nga tanrege: kwian tanre nga Judeamu, kwian tanre una Jerusalénmu, kaire kwian blemu toinga una Tiroge una Sidónge. Kwian e ulita chkeba Jesu kle ngwadi Jesu keruchuge, kaire kwian ta mo dodakalin Jesuge. 18 Jesu kwian oga tanre dodadu, kaire Jesu dolla kagu siere kwian ulita jwligebanga dolla kotege gire kwian e ulita chegu no. 19 Kwian oga na ulita chagedu dabaske tangle Jesu nate, kwian oga e ulita takalin Jesu chugedi mo dodadale Jesuge, uñale amage Jesu kira molen Jesu kwian oga dodade jingme ulitage. Kwian oga ulita bai jo chke Jesudi ko ñadu Jesudi, kwian ene jo chke noni Jesu kiralla giti. 20 Jesu kwian oga dodadu ulita gire Jesu gerudu kwian geru jwannga amage ulita ole: —Ba bai kaire me lle molen, suge bage Chube ba Chugagwalla, ama kle ba manade, malen nga suga no badi mo tale. 21 ’Nege ba bai kaire bli ole, suge bage chui be chke gire ba mi bli ole dare, ba be kle diali unchkeba no, malen nga suga no badi mo tale. ’Nege ba bai kaire kle olire, suge bage chui be chke gire ba be gide nga suga no ole, malen nga suga no badi mo tale. 22 ’Chube nu cha kagaba nga dba ai giti kwian kare, cha giti kwian jainchke badi, kwian ba tke jondoi, kwian ba ta gbe olire, kwian gerule badi ba kwian me no, kwian age me no ene ba ole, suge bage chui be chke gire Chube be lle noare kete bage nga ngaña giti Chube ngwadi ba mo ta gbu me joge siere cha geruage boi daga ngwaleske ñanale, suge bage Chube be age ene ba alin, malen nga suga no badi mo tale. Kwian age me no ba ole cha gdale ba me tallade, ma no ba mo ta gbadale nga suga no ole diali, kwian kle age me no ba ole nege, ene kaire unsuialin kwian e enusulian oña agedu me no kwian Chube gerua ketanga ole. 24 ’Ba bai kaire lle molen tanre ba mo ta dbe no lle e ulita alin allabi ole me tañachuge Chube giti, bdagli lle ulita banu be bidege, ba mi chege lle molen, gire ba be chege boi tanre daga ngwale sugekare Chubege. 25 ’Ba bai kaire kle blire no nege, ba mo ta dbe tañachuge blire no alin allabi giti me tañachuge Chube giti, bdagli ba be boi daga ngwale, bligda mi kle ba alin gutadale, ba be bli ole tanre sugekare Chubege. ’Ba bai kaire nga dbe suga noare age ba takalin kare nga dba ai giti me tañachuge Chube giti, bdagli ba be boi tanre daga ngwale, ba be olire, ba ta be chege olire diali sugekare Chubege. 26 ’Ba bai kaire giti kwian na ulita gerule noare, bdagli ba be boi tanre daga ngwale, ba enusulian oña unsuialin gerudu no kaire kwian geru me ulia ketanga giti, bdagli kwian ene ulita be boi daga ngwale sugekare Chubege. 27 Jesu gerudu dare: —Ba ulita kle aini cha keruchuge, cha gerule ba ulita ole, ba mo ta dbadale no mo dolla ole, kwian kle jainchke badi, kwian ene alin ba agedale no. 28 Kwian kle ba oña boi me no, kwian ene ole ba gerudale: “Cha takalin Chube age no ba alin.” Kwian kle ba ta gbe olire kle gerule me no bage, kwian ene giti ba gerudale Chube ole. 29 Kwian ba bate gwage ba gwa ongoru gbadale kwiange batadale. Kwian camisa badige jwennga dbadale, kwian ene ole ba gerudale: “Ba takalin cha llea na gweale dbe kaire ba ñage.” 30 Kwian lle gweale kade bage, ba lle ketadale kwian enege. Kwian ba llea gweale jwennga dbadale, ba me lle e kadeni kwian enege. 31 Ba takalin kwian na ulita age no ba alin, kaire ba mo ta gbadale age no ngeru kwian na ulita alin. 32 ’Ba me mo ta dbadale no ba skatemanalla alin ole allabi agwa kaire ba mo ta dbadale no kwian ba dolla ole, ba noare ba skatemanalla alin allabi ole, ¿Chube be age mine no ba alin e ñanale? Chube mi age no ba alin dale e ñanale, kwian ulita no mo skatemanalla ole, kaire kwian me no ama no mo skatemanalla ole. 33 Ba age no kwian bai age no ba ole alin allabi, kwian ene alin allabi ole ba age no, ¿Chube be age mine no ba alin age ene ñanale? Kwian me Chube uñe kle age ene diali, kwian bai age no ama ole, kwian ene alin allabi ole ama age no. 34 Kwian lle kade sugeti bage ba lle kete kwiange kwian bai ñage lle keteni naskuni bage, kwian ene alinge ba lle kete sugeti, ¿Chube be age mine no ba alin age ene ñanale? Kwian me Chube uñe kle age ene diali, kwian bai ñage lle keteni naskuni amage, kwian ene alinge ama lle kete sugeti. 35 Ba me ñage tañachuge kwian ulita tañachuge kare, ba tañachugadale nganake. Ba mo ta dbadale no mo dolla ole age no ama alin diali. Ama lle gweale kade sugeti bage ba lle ketadale me tañachuge lle e gaini naskuni. Ba mo ta dbe ene mo dolla ole, bdagli nga ngaña giti Chube be lle noare kete bage age no ene ñanale, ba age ene ba kle age ba Ñenua Chube takalin kare, ulia ba Chube olia. Chube kweri, ama noare ulita, ama age no kwian ulita alin, me age no kwian no alin allabi, agwa kaire ama age no kwian me no alin, kwian me Chube uñe ni gerule no Chube ole Chube kle age no ama alin. 36 Chube tai dage kwian ulitage, ene kaire ba taidale dage no kwian ulitage Chube kle age kare. 37 Jesu gerudu dare kwian ulita ole: —Me no mo ta dbe tañachuge ba alin allabi kle age no Chube gwa giti gerule daba nadi daba me no Chube gwa giti, me no mo ta dbe daba gbe jiske diali lle gweale giti, ba ta daba gbakalin jiske ene diali ta me no ole, ene kaire Chube be ba gbe jiske. Daba na age gweale me no ba ole ba talla e mlienga, ene kaire Chube be ba age me no Chube dollale talla mlienga. 38 Ba mo ta gbe daba na chudaboi lle kete amage, ene Chube be age kaire ba ole, ba me lle kete sidri alin allabi dabage, ba lle ketadale ngle. Ba kle arogba kete dabage ba arogba ñachuge no gdege, ba gde dage dbige alin, ene arogba chke kejre gdege arogba chke ete ete gdege. Ba lle kete dabage ene kare, ene Chube be age kaire ba ole. Ba lle kete mangire batre dabage Chube lle keteni kaire mangire batre bage. 39 Jesu gerudu ene ulita gire Jesu geru ñachugu kwian ulita alin, Jesu gerudu: —Kwian boke gwagwa me, ¿ama gdaite me ten ñage daba na me ten jonlla dbe? Me dale. Ama gdabonate me ten, me uñale amage ama kle chage baini, ama gdabonate be joge chage be jogenga be joge chke dba dbiugage. 40 Kwian geru jwannga me ñage mo ta gbe chke ma ngle geru uñe ma no kwian ama tkanga tanglege, agwa geru jwannga geru jwen ulita trate ama tkanga tanglege, gire ene ama ñage geru uñe kwian ama tkanga tangle geru uñe kare. 41 ¿Mineade ba kle tañachuge diali daba na kle age me no giti? Diali ba kle gerule me no dabadi daba gbale jiske daba kle age me no giti, agwa ni ba kle tañachuge sidri ba agali kle age ma me no dabage giti. E salengwli ba kle gwage ngajwna daba gwagwagedi kare, ba ta ngajwna e jwankalinnga daba gwagwage agwa ngajwna ma kweri kle mo gwagwage. Bage me suge ngajwna kweri kle ba gwagwage, ngwale ba gerule daba ole: “Daba, cha chugene ngajwna soli jwennga ba gwagwage.” Ngeru ba ngajwna kweri jwandalenga mo gwagwage mo gwagwa jige trate, ene ba ñage daba chudaboi ngajwna soli jwennga ama gwagwage. E salengwli kwian kle gerule dabadi age me no sidri giti, me suge mo tale ama kle age ma me no dabage. Ama takalin daba na ulita tañachuge ama giti ama no ulita agwa gire ama ulia ta me no. Cha gerule ba ulita ole, ma no ba mo ta gbe tañachuge ba kle age me no giti ngeru me tañachuge daba na kle age me no giti, ba mo ta gbadale trate biale gire ba ñage daba na ta gbe ama kle age giti ba ñage ama chudaboi. 43 Jesu geru na ñachugu kwian ulita alin, Jesu gerudu: —Gli no me ñage gbachie me no, gli me no me ñage gbachie no. 44 Gli kaire kaire chke uñale nate gba giti, drinkin me gbachie higogba kare, idongi me gbachie uvagba kare. 45 Ene kaire kwian ta no ama age no ama gerule no, kwian ta me no gerule me no, kwian kle tañachuge mo tale kaire kle gerule ama kle tañachuge kare. 46 Jesu gerudu: —¿Mineade ba ulita cha kade mo Chugagwalla agwa ba me kle age cha gerule kare? 47 Cha gerule ba ulita ole, kwian bai kle chie chadi cha keruchuge gire mo ta gbe age cha gerule kare, kwian e ta no molen tañachuge trate, ama salengwli kwian u gbanga no kare. Ngeru kwian u gbanga no kle dbi bage jere bu tke dbige jere gire kle ke ten budi tangle, ene bu chege kejre me joge chke dba, u kle dodaba no kiraske. Chi uda joge kweri, chi uda chke udi kiraske, u me joge chke dba, chi uda me ñage u dbe, u gbanga no bu tku jere dbige malen chi uda me ñage u e dbe. Kwian bai cha gerua keruchuge gire mo ta gbe age cha gerule kare, kwian ene salengwli kwian u gbanga no e kare. 49 Agwa kwian bai kle cha keruchuge gire me mo ta gbe age cha gerule kare, kwian ene salengwli kwian kle u gbe dbi giti alin me bu tke dbige jere me ke ten budi tangle, ene chi uda joge kweri, chi uda chke udi kiraske, u joge chke dba, u joge ulita chi giti —Jesu gerudu ene ulita kwian ole.
1 Jesu geru tragubi kwian ulita ole gire Jesu jo chage una Capernaum ngnagu, Jesu jo chke una ege. 2 Guardia donga chugagwalla nga Romamu gdaite kle una Capernaumge, kwian lle boanga gdaite ama alin oga chegu sidri lle boanga jogeda, guardia donga chugagwalla noare kwian lle boanga e ole. 3 Gire guardia donga chugagwalla ologe gerudre Jesu giti, amage chku uñale Jesu kwian oga dodade malen ama kwian israelita chugagwalla juma gweale kagu geru jige Jesuge guardia donga chugagwalla takalin Jesu chie kwian lle boanga ama alin oga dodade. 4 Gire kwian israelita chugagwalla juma mneite jo chke Jesudige gerule Jesu ole, ama gerudu: —Kwian lle boanga gdaite guardia donga chugagwalla alin oga jabale chegu sidri ama ngeru ama jogeda, cha ulita takalin ba joge guardia donga chugagwalla chudaboi ba lle boanga ama alin dodade. Guardia donga chugagwalla ama kwian noare, 5 ama no no kwian israelita ulita ole, ama u mo litangwa Chube gerua jwanngwa dodangu cha ulita alin una aige. Guardia donga chugagwalla kwian ene malen noare ba joge lle boanga ama alin oga dodade. 6 Kwian israelita chugagwalla juma ulita gerudu ene Jesu ole gire Jesu jo chage ule ama ole guardia donga chugagwalla ulla ngnagu, Jesu jo chke kodi uge gire guardia donga chugagwalla mo skatemanalla na kagu mneite geru jige Jesuge jonke, guardia donga chugagwalla skatemanalla gerudu Jesu ole: —Guardia donga chugagwalla geru ai kagu ba alin: “Cha ba gai kweri, chage suge cha me no, uñale chage trate ba no no, malen cha me jo agali ba jwen. Ma no ba me joge gwa cha ullage oga kle ngwadi, ba gerule alin allabi jonke lle boanga oga giti cha alin, ene uñale chage ama be joge chkeni noni. 8 Uñale chage ba kwian chugagwalla kweri ba kira molen ulita, ba gerule alin allabi gire jingme joge siere kwian ogage. Cha chugagwalla ñage cha kage lle boi ene cha age ama gerule kare, kaire cha guardia donga chugagwalla ñage guardia donga ulita kage lle boi ama age cha gerule kare, cha gerule guardia donga gdaite ole: ‘¡Joga!’, gire ama joge. Cha gerule na ole: ‘¡Bai aini!’, gire ama chie. Cha kwian lle boanga cha alin kage lle boi gire ama lle boi cha gerule kare. Ba ma kweri kira molen malen uñale chage ba gerule alin allabi jonke ba kle ngwadi jingme kage siere lle boanga chanuge, gire jingme be joge siere amage ama be joge chkeni noni.” 9 Guardia donga chugagwalla skatemanalla ulita geru e ketu Jesuge, Jesu geru e keruchugu gire Jesu chegu tañachuge noare guardia donga chugagwalla giti ama kle mo ta gbe giti Jesu gai ulia no. Jesu jwlituda gdate naskuni gwagedu kwian nglea kle chage Jesu natedige, Jesu gerudu ama ulita ole: —Ni kwian gdaite nga Israel ulitage guardia donga chugagwalla ta e kare molen, ama kle mo ta gbe cha gerua gai ulia mo tale ma no kwian israelita ulitage. 10 Guardia donga chugagwalla skatemanalla mneite joni gudegu oga kle ngwadi, jo chkeni gwa gire gwagedu lle boanga guardia donga chugagwalla alin nu jogeba chkeni noni ulita jingmege. 11 Boidu ene ulita gire Jesu jo una kada Naínge, kwian geru jwannga Jesuge ulita kle chage ule Jesu ole, kaire kwian na tanre jo ule. 12 Jesu jo chke kodi una Naínge gire Jesu gwagedu kwian tanre una emudi jonke, kwian e ulita kle chage oñakwa jaba dbe lugaba glige tkadale dbige, kirogwa onbre e gdaitre alin chebiage jokeda, sbali chebia chegeba oli mo ñengulallage, kwian tanre una emu kledu muinga oli gatedi. 13 Jesu gwagedu muinga olidige olire tanre Jesu taidu dage muingage, Jesu gerudu muinga oli ole: —Ba me mo ta dbe olire dare ba kirolla nate. 14 Jesu gerudu ene muinga ole gire Jesu jo oñakwa jaba gitigu, Jesu oñakwa jaba glilla gau kodi, kwian oñakwa jaba dbanga ulita jagedu gdate jonke oñakwa jaba gwaru, gire Jesu gerudu oñakwa jaba ole: —¡Kirogwa onbre, chkedeni bduge! 15 Jesu gerudu ene jaba ole gire blike jaba chkuni gwade chku bduge gerule no, Jesu ama ketuni gwadeni chebiage. 16 Kwian ulita gwagedu edi kwian ta me jo sugano Jesu agedu gitidi, gire kwian ulita gerudu noare Chube giti, kwian gerudu: —Nege kwian Chube gerua ketanga kle cheske aini, ama noare, Chube ama kagu che ulita chudaboi. 17 Kwian nga Judeage ulita kaire kwian toinga nga Judeadi tangle, ulitage geru chku nate uñale Jesu kwian jaba gbuni gwadeni. 18 Geru chku uñale Juan-Bautistage kwian geru jwannga amage geru tragu Jesu kle age giti ulita kwianske giti, 19 gire Juan-Bautista kwian geru jwannga amage boke gau kagu, ama gerudu: —Ba geru kade ai kare Jesuge: “Unsuialin Chube gerudu be kwian jwannga siere kage kwian alin, ¿ba amaña o ama bebi chie, cha chegedale ama manade ngwange dare o me?” 20 Kwian geru jwannga Juan-Bautistage boke jo chke Jesudige gire gerudu: —Juan-Bautista cha kagu gdabonate geru kade bage, ama geru ai kagu ba alin: “Unsuialin Chube gerudu be kwian jwannga siere kage kwian alin, ¿ba amaña o ama bebi chie, cha chegedale ama manade ngwange dare o me?” 21 Kwian geru jwannga Juan-Bautistage boke geru kadu ene Jesuge, gire ama gwagedu Jesudi kwian oga tanre dodade ama boke gwa giti. Jesu kwian oga tanre ai kare dodadu: Jesu kwian oga jingme ole dodadu, Jesu dolla kagu siere kwian jwligebangage, kwian tanre me gwagwa molen Jesu gbu ten. 22 Jesu agedu ene ulita kwian geru jwannga Juan-Bautistage gwa giti gire Jesu gerudu ama ole: —Jogani Juan-Bautista kle ngwadi, ba gerule Juan-Bautista ole ba kle gwagedi nege giti, kaire ba kle geru keruchuge nege ba e tragadale Juan-Bautista ole. Kwian gwagwa me cha kle gwagwa gbe ten, kwian me ñage chage cha kle ama gbe chage, kwian oga kwara tuge jingmea ole cha kle dodade ene ama chege trate, kwian me olo molen cha kle olo gbe tren, kwian jaba cha kle gbeni gwade, kaire Chube gerua cha giti kle joge chke kwian me lle molenge, ene ama ñage Chube gerua cha giti gai ulia tiendale gitiru ji chugege age me no gdale. 23 Cha kle age no ene ulitadi ba kle gwage nege, jogani Juan-Bautista kle ngwadi e ulita trage ama ole. Kaire ba geru ai kete amage: “Nga suga no kwiandi kwian bai cha gai ulia Chube nu cha kagaba kwian ulita jwanngale siere ji chugege age me no gdale, kwian bai mo ta gbe cha gai ulia ene diali, kwian ene me jogenga cha giti mo tale, ama be chege ta suga no ole.” Ba geru e ulita kete Juan-Bautistage cha alin. 24 Jesu gerudu ene ulita kwian geru jwannga Juan-Bautistage boke ole gire kwian e joni Juan-Bautista kle ngwadi. Kwian e jo gire Jesu gerudu kwian ulita kledu eni ole Juan-Bautista giti, Jesu gerudu: —Ba ulita jo tienda Juan-Bautistadi nga gballage, ba gwagedu amadi ama me kledu boi eske kle jwliennga ongoru ongoru mleudage kare, kwian boi eske kare mleuda ole e salengwli gerule kwian me ñage tañachuge mo tale no gwangeru alin trate, diali kle tañachuge gwangeru gwanaskuda, Juan-Bautista me ene, ama mo ta gbu kiraske Chube gerua cha giti gai ulia diali. 25 Ba jo tienda Juan-Bautistadi nga gballage ba me jo tienda kwiandi kwian nu mo ngama tkaba ñometra noare gigaba kwangleske. Uñale bage kwian kle mo ngama tke ñometra eneske me kle toi nga gballage, kwian ene kle toi chugagwalla ullage u no kweri tratege. Juan-Bautista me toidu u enege. 26 Ba me jo tienda kwian kle toi u e karegedi, ba jo tienda kwian Chube gerua ketangadi. Cha gerule ba ole, ulia Juan-Bautista kwian Chube gerua ketanga, kaire agwe Juan-Bautista ma kweri kwian Chube gerua ketanga na ulitage. 27 Chube gerua degaba unsuialin gerule Chube be Juan-Bautista kage cha ngeru, chada e gerule: “Chube gerudu: ‘Cha be kwian gdaite cha gerua ba giti dbanga kage ba ngeru, kwian geru dbanga e be kwian na ta gbe biale ulita ba ngwange.’ ” Chube gerua degaba unsuialin gerule ene Juan-Bautista giti. 28 Cha gerule ba ole, aini nga dba giti kwian na me Juan-Bautista kare, ni kwian gdaite ma kweri Juan-Bautistage Chube gwa giti. Agwa nege gwangerugu kwian bai mo ta gbe cha gerua gai ulia, kwian e me chege kweri kwian na gwa giti agwa Chube gwa giti kwian ene ulita chege ma kweri Juan-Bautistage —Jesu gerudubi ene kwian ole Juan-Bautista giti. 29 Kwian Jesu gerua Juan-Bautista giti keruchugu gire kwian igi ganga chugagwalla emperador nga Romamu alin ulita bai Juan-Bautista nu ñeaba chiske kaire kwian na ulita bai Juan-Bautista nu ñeaba chiske, ama ulita gerudu Chube giti: “Ulia Chube noare, Chube diali age no trate ulita.” 30 Kwian fariseo ulita kaire kwian daba tkanga tangle Moisés chadalla giti ulita, kwian e ulita me gerudu ene no Chube giti, ama me mo ñeangu chiske Juan-Bautistage, ama me mo ta blitakalin Chube ole. Chube tadu agekalin no ama ulita alin agwa ama Chube ibaitu me tadu agekalin Chube takalin kare. 31 Jesu gerudu dare kwian ulita ole: —Nege cha be gerule ba ole kwian kle toi ai suiale giti. ¿Ama kwian mine? ¿Ama llema kare? 32 Kwian tanre nege tangle salengwli kirogwa kare kirogwa kle kolale mo skatemanalla ole goga tangle, me kolale no kle ka boi mo skatemanalla ole, kirogwa gerule daba ole: “Cha ngwanedu chirege ba alin, ene ba ñage skwen gdate chire keruge, agwa ba me nga talladu, nga me sugedu no badi. Gire cha mo gatu ta olire giti, agwa ba me tadu olire.” Kirogwa kira bate ene ulita modi, kwian tanre nga ai suiale kle age ene kare. 33 Juan-Bautista chku Chube gerua trage kwian ole, ba ulita gwagedu Juan-Bautistadi Juan-Bautista toidu me blire kwian ulita kle blire kare, Juan-Bautista me uva chia jau kwian ulita kle jai kare, Juan-Bautista toidu ene gdale ba me Juan-Bautista gau ngwange no ba gerudu me no Juan-Bautistadi Juan-Bautista kwian jwligebanga kare che dolla kote toi nga gballage. 34 Chube nu cha kagaba kwian kare nga dba ai giti, cha me kle toi Juan-Bautista toidu kare nga gballage, cha kle toi kwianske, cha kle blire kwian ulita kle blire kare kaire cha kle uva chia jai kwian ulita kle uva chia jai kare, cha kle toi ene gdale ba me kle cha gai ngwange no ba ulita kle gerule me no chadi cha kwian bligda gutanga ngle cha kle chage kwian llale kare, kaire ba gerule chadi cha kwian igi ganga chugagwalla emperador nga Romamu alin gai mo skatemanallale kaire ba gerule cha kwian agenga me no na ulita gai mo skatemanallale. 35 Kwian tanre kle gerule me no ene chadi, kwian gerudu me no kaire Juan-Bautistadi, agwa Chube gwa giti Juan-Bautista kwian no kaire cha kwian no. Juan-Bautista toidu no Chube ama ta gbu toi kare, kaire agwe ene cha kle toi no Chube kle cha ta gbe toi kare kwian gwa giti, malen cha giti kaire Juan-Bautista giti kwian tanre kle mo ta gbe Chube gerua gai ulia —Jesu gerudu ene ulita kwian ole. 36 Kwian onbre fariseo gdaite kada Simón Jesu kadu joge mo ullage blire ule. Jesu jo, jo chke gwa Simón ullage, Jesu toidu dba blingwage. 37 Gire muinga gdaite kle toi una ege agenga me no, muinga ege chku uñale Jesu kle blire Simón ullage, gire muinga jo Jesu nate u ege, lle chiale ñachke noare muinga du lle gweale limeta soli karege Jesu alin. 38 Muinga jo chke Jesudi muinga toidu dba Jesu sera ngena olire tanre, amage sugedu ama ageba me no tanre, muinga olidu tanre Jesu sera jo date ulita muinga ngwalangwallage, muinga Jesu sera unbatu mo chugaga giti. Muinga Jesu sera sobadu gire muinga lle chiale ñachke noare ulita tku Jesu sera giti. 39 Kwian fariseo nu Jesu kadaba blire mo ullage gwagedu muingadi age ene Jesu ole, gire kwian fariseo e tañachugu mo tale: “Muinga e agenga me no me no, onbre e Chube gerua ketanga ulia muinga e talla chkedale uñale onbre ege muinga e no ni no gire, agwa ama kle mo chuge ngwadi mo gange kodi muingage.” 40 Kwian fariseo kle tañachuge ene mo tale Jesudi muinga giti, e chku uñale Jesuge gire Jesu gerudu kwian fariseo e ole: —Simón, cha gerukalin gbaite ba ole. Simón gerudu: —Kwian tkanga tangle geruge, gerule cha ole. 41 Jesu gerudu: —Onbre boke jiske onbre na gdaitege igi giti, onbre gdaite e igi mauña igi ketu sugetidale onbre boke ege, igi mauña igi ketu onbre gdaitege cincuenta igi ma ngle ketu onbre na gdaitege quinientos, ama boke igi kadu sugetidale igi mauñage. Gire onbre bonate me ñadu igi keteni igi mauñage, bonate chegu jiske igi giti, igi mauña me su igi kadeni onbre bokege, igi mauña gerudu onbre boke jiske ole: “Ba nu igi kadaba sugetidale chage, cha gerule ba ole ba me igi e ketadaleni naskuni chage, ba me tañachuge dare ba jiske giti, cha ba jiske talla mlienga ulita, cha no ba ole.” Igi mauña gerudu ene onbre boke ole ene ama boke me chegu jiske dare igi mauñage. Nege cha geru kade bage Simón, kwian boke jiske igi giti, ¿bai be ta dbe ma no igi mauña ole? 43 Simón jaindunga: —Cha tañachuge kwian jiske ma ngle ama be ta dbe ma no igi mauña ole, ama jiske ma ngle igi giti igi mauñage agwa igi mauña ama jiske ngle talla mliunga mo ta gbu no ama ole, ene ama chegu ama me jiske kare, e giti kwian e ta dbe ma no igi mauña ole igi mauña agedu giti ama alin. Jesu gerudu: —Ba gerudu e ulia. 44 Gire Jesu gwagedu muingadi Jesu gerudu Simón ole: —Gwage muinga aidi ama kle age giti cha alin. Ba ullage cha chku ba me chiu chi dbe cha alin cha sera gligagda, agwa muinga ai chku aini ama cha sera gliguda ngwalangwa giti, ama cha sera unbatu mo chugaga giti. 45 Cha chku ba ullage ba me cha sobadu ngwange, agwa muinga ai chku aini blike ama jo chke dba cha sera ngena, ama me kle skwatige cha sera sobade. 46 Cha chku aini ba me cha gau ngwange lle ñachke no giti, ba me lle ñachke no tku cha chuga giti, agwa muinga ai lle ñachke noare tku cha sera giti. 47 Cha gerule ba ole Simón, muinga ai agedu tanre me no Chube dollale, Chube muinga ai agedu me no ulita talla mliunga, malen muinga ai kle mo ta dbe no tanre cha giti Chube ole kle cha gai dage no ngle Chube agedu giti ama alin. Agwa kwian bai agedu me no bedre Chube dollale, Chube kwian ene agedu me no bedre talla mliunga, kwian ene mo ta dbe no bedre cha ole ama me cha gai dage no ngle. 48 Jesu gerudu ene ulita Simón ole gire gerudu muinga ole: —Ba agebale me no ulita Chube dollale cha talla ulita mlienga. 49 Kwian ulita kle toiba dba blingwage Jesu keruchugu gerule ene muinga ole gire ama ulita chegu tañachuge mo tale Jesu giti: “¿Onbre e chema ade ñage kwian age me no talla mlienga Chube kare?” 50 Jesu gerudu dare muinga ole: —Ba cha gau ulia mo jwanngale siere ji chugege ba agedu me no ulita gdale, malen cha ba agedu me no ulita talla mlienga nege, ba ñage jogeni gudegu nga suga no ole.
1 Jesu chagedu una kaire kairege, una ulita baini kaire Jesu jo chke ngwadi ama gerudu kwian ulita ole kwian ñage Chube uñe, kwian mo ta blitadale Chube ole Chube gai mo Chugagwallale, ene Chube be kwian e jwen siere ji chugege agedu me no gdale. Jesu chagedu geru trage ene kwian ulita ole una kaire kairege, kwian geru jwannga Jesuge gdataboko giti gdaboke chagedu ule Jesu gatedi. 2 Kaire muinga gweale Jesu nu dolla jwanba sierege, kaire muinga gweale oga Jesu nu dodabale nu jogeba chkeni no, muinga ene ulita Jesu gatudi kaire. Muinga e ulitaske María-Magdalena kledu, amage dolla gdaguke Jesu nu jwanba siere. 3 Muinga na gdaite kada Juana, ama Cuza muingalla, onbre kada Cuza daba ulita lle boanga Herodes alin chugagwalla. Muinga na gdaite kada Susana. Muinga e ulita, kaire muinga na tanre Jesu gatudi chudaboi bligda ole igi ole lle na tanre ole. 4 Kwian una tanrege jo chke Jesu kle ngwadi, kwian e ulita mo litu Jesudi gire Jesu geru ñachugu ama alin chude drennga giti, Jesu gerudu: 5 —Cha gerule ba ulita ole chude drennga giti, kwian jo chude drennga deage, kwian jo chke deage, ama chude ngle dreunnga kote. Kwian e kle chude drennga kote, gire chude e gweale jo chke dba jon jegwale, kwian ngle chagedu jon jegwale skitedu chude giti, bdada chiu, bdada chude gutu. 6 Chude na gweale jo chke dba dbi arale ngwadi ke giti, chude e gwatigu, chudenuma junbatedunga dbi arale ulenge. 7 Chude na gweale jo chke dba drinkin sera tanre ngwadi, chude gwatigu, agwa drinkinnuma gwatigu ule chudenuma ole, drinkin chudenuma guda. 8 Chude na jo chke dba dbi no giti, chude e ulita gwatigu no gbachiu no ngle. Chude skute chuia chku gire chude e ulita nu gbachieba ngle ngle chude cien bulu gdaitege. Jesu geru ñachugu ene ulita chude giti gire Jesu gerudu kweri kwian ole: —Cha kle geru ai ñachuge ba alin, ba me geru ai keruchuge alin allabi mo ologe, agwa kaire ba ulita mo ta gbadale geru ai gbe gdadi, ba tañachugadale lledale cha kle geru ai chude giti ñachuge ba ulita alin. 9 Jesu gerudu ene kwian ngle ulita ole gire kwian geru jwannga Jesuge geru kadu Jesuge: —¿Ba geru ñachugu chude giti, e gerule mine? 10 Jesu jaindunga: —Ba ulita kle cha gerua gai ulia malen Chube kle ba ta gbe chke cha kle gerule giti, ene geru e giti kle suge trate bage kwian bai kaire cha gai ulia mo Chugagwallale kwian ene chege no trate Chube gwa giti. Kwian na me kle cha gerua gai ulia, ama alin cha kle geru ñachuge, kwian geru e keruchuge agwa geru e ulita skwen mnoare amage, geru e me suge amage dale. Kwian ene gwa giti cha kle lle tanre no dodade, agwa ama chege kwian gwagwa me kare, me suge amage cha kle lle e dodade Chube kiralla giti kwian ta gbagda Chube giti. Kaire kwian ene kle cha gerua keruchuge agwa ama chege kwian olo me kare, geru me suge trate amage cha kle gerule giti. 11 Cha geru ñachugu chude drennga giti, nege cha geru e gbe chke uñale bage cha gerudu kare giti. Chube gerua chude kare. 12 Kwian gweale kle boi Chube gerua ole chude jo chke dba jon jegwale kare. Kwian e Chube gerua keruchuge, bigwa che dolla Satanás chie Chube gerua jwennga bdada agedu chude ole kare, gire geru Chubenu ulita jogenga kwian tale, ene kwian e me ñage geru e gai ulia, me ñage tien gitiru ji chugege ama agedu me no gdale, ene me ñage toi Chube ole. 13 Kwian gweale kle boi Chube gerua ole chude jo chke dba dbi arale ke giti ngwadi kare. Kwian e Chube gerua keruchuge, geru e gai, nga suga noare amadi geru e giti agwa ama me mo ta gbe ulia Chube ole me kle Chube gerua gai jumale ulia malen ama tale geru me ñage tige no kiraske chude me ñage sera joge dbiske ke giti me ñage tige no kare. Kwian e Chube gerua gai ulia bedre me kira ole gwangerugudba geru e gai ulia, ama boi daga ngwale Chube gerua gdale, gire ama geru e chuge ngwadi, ama jogeni naskuni chage ngeru kare. 14 Kwian gweale kle boi Chube gerua ole chude jo chke dba drinkin sera tanre ngwadi kare. Kwian e Chube gerua keruchuge Chube gerua gai ulia agwa ama me kle mo ta gbe tañachuge diali Chube gerua giti no, ama kle mo ta gbe tañachuge tanre lle ngwale alin giti, ama ta igi jwankalin ngle mau alin, ama ta agekalin ulita ama takalin kare. Ama kle tañachuge ma ngle lle e kare giti Chube gerua gitige, malen Chube gerua kle jogenga ama tale, gire ene kwian me kira molen toi no Chube takalin kare ni kwian ñage Chube gerua dbe kwian nage. 15 Kwian gweale kle boi Chube gerua ole chude jo chke dba dbi no giti kare. Kwian e Chube gerua keruchuge gire ama mo ta gbe geru e gai jumale mo tale, ama tañachuge no diali Chube gerua giti, ama Chube chuge ngwadi age ama tale Chube takalin kare, ene Chube ama ta gbe chui gbaite gbaite kaire kairege ma ngle Chube gerua giti. Kwian ene mo ta dbe no diali Chube gerua kete daba na ulitage, ene daba tanre chke geru gai ulia kwian e giti —Jesu gerudu ene kwian geru jwannga amage ulita ole. 16 Jesu geru na ñachugu kwian alin, Jesu gerudu: —Nege cha geru ñachuge ba ulita alin jichra giti, kwian age jichra ole kare, e kare ene kwian agedale Chube gerua ole. Kwian jichra gwadege me kle un blite kaboge jichra giti ni kle jichra gbe ankwa gwaru nga gbagda chra, kwian me age ene jichra ole. Kwian jichra gwadege kwian jichra gbe ngaña nga ngwale giti, ene jichra chra chratigenga ulita gwa tangle, ene kwian na chie gwa ñage ten jichra chralla giti, ene uñale kwiange ama chagedale baini, jichra chrage lle ulita me chege skwlenre kwian gwage. 17 Ene kaire Chube gerua me chege skwlenre kwiange, kwian Chube gerua ganga giti geru e be chke uñale kwian nage malen kwian Chube gerua ganga me chagedale ta skwlenre Chube gerua ole kwianske. 18 Jesu geru ñachugu ene gire Jesu gerudu dare: —Ba cha keruchuge no no. Kwian bai kaire Chube gerua gai ulia Chube gerua manade no mo tale, kwian ene mi ta jogenga Chube geruage, kwian enege Chube gerua be suge ma ngle diali, Chube be kwian ene chudaboi be kwian ene ta gbe suge ma ngle Chube gerua giti. Agwa kwian bai kaire me mo ta gbe Chube gerua gai ulia, ama kle tañachuge alin allabi kle Chube gerua gai ulia kle mo anblite agali, kwian ene be ta jogenga Chube geruage ulita be chege kwian me Chube gerua keruchugaba kare. 19 Jesu kle gerule ene kwian ngle ole gire Jesu chebia jo chke ule Jesu daballa ulita ole Jesu kle ngwadi, kwian tanre kle Jesu ole Jesu keruchuge malen Jesu chebia Jesu daballa me ñadu joge chke Jesudige kodige. 20 Kwian na geru ketu Jesuge chebia giti daballa giti: —Ba chebia ba daballa ulita kle goga, ama ta geru tragakalin ba ole. 21 Jesu gerudu kwian ole: —Kwian bai Chube gerua keruchuge Chube gerua gbe gdadi age geru e gerule kare, cha alin kwian e ulita cha chebia kare cha daballa kare, ama cha bitallanu ulia, cha no no ama ulita ole. 22 Bitaite Jesu jo du toli ule kwian geru jwannga amage gdataboko giti gdaboke ole, gire Jesu gerudu: —Ale chibita kagda giti chkagu. Jesu kwian geru jwannga ole jo. 23 Jesu kwian geru jwannga ole kle chage duge chiga giti gire Jesu gbedu. Jesu kle gbe gire mle kweri chiu dudi, chi mlege jo chite juga juga chi jo du toli, du kagda chagedu mebi chigage nga tirareske. 24 Gire ta kennga tanre ole kwian geru jwannga Jesu gau gdate gerudu Jesu ole: —¡Cha tkanga tangle geruge! ¡Chkede bduge cha chudaboi! ¡Che ulita be joge chiske duge llagli, che be unjoge! Jesu chku bduge mo gbu gdate, Jesu gerudu mle ole chi ole: —¡Chegede ngwedige! Gire sugeti ngwale mle kaire chi chegu ngwedi ulita Jesu gerudu kare. 25 Jesu agedu ene mle ole chi ole gire Jesu gerudu kwian geru jwannga ole: —¿Mineade ba ulita ta kennga tanre mledi? ¿Ba me cha gai ulia cha ñage ba manade nga tirareske? Jesu gerudu ene kwian geru jwannga ole gire ama ulita ta chegu kwachie tanre, kaire ama ulita chegu tañachuge tanre noare, kwian geru jwannga geru kadu modige ulita: —¿Kwian ai mine ade ama gerule mle ole chi ole, gire chi kaire mle ama kerua gai dage chege ngwedi? —kwian geru jwannga geru kadu modige ene Jesu giti. 26 Jesu jo chage dare duge chiga giti kwian geru jwannga amage ulita ole, Jesu jo chke chi kagda giti chkagu nga kada Gadarage, nga e nga Galileadi chkagu. 27 Ne ngwadi Jesu jo kedagu gire kwian onbre jwligebanga dolla kote chku ten Jesu ngwange, kwian jwligebanga e una emu. Sbali kwian jwligebanga e toidu dolla ole, me toidu ñometraske, me toidu gwa, toidu sbali jaba ogakle keugage ngwadi. Diali dolla kira ulita kete kwian jwligebanga ege malen ama kiraske tanre. Diali kwian kle no kle kwian jwligebanga e gai lugeda hierrogda dodabale cadenale giti tañachuge kwian jwligebanga me ñage kige, agwa dolla kirallaske kwian jwligebanga cadena datenga gire dolla ama gbe kige bate nga gballage kwian me kle toi ngwadi. Jesu jo chke nga ege gire kwian jwligebanga e kledu chage eni kaire, kwian jwligebanga gwagedu Jesudige gire dolla kwian jwligebanga gbu joge chke dba jongnagwa giti Jesu ngeru, Jesu gerudu dolla kle toiba kwian e tale ole: —¡Joga siere kwian aige! Dolla kwian jwligebanga gbu gerule kweri Jesu ole: —Uñale chage ba Jesu ba Chube kweri kiraske Kirolla. ¿Lledale ba chiu cha nate nga aige? Ba me age me no cha ole cha gbe boi daga ngwale sugekare kwian aige, ma no ba cha chuge ngwadi toi kwian ai tale. 30 Jesu geru kadu dollage: —¿Ba kada mine? Ama jaindunga: —Cha kada Ngleare. Dolla tanre kle toi kwian jwligebanga e tale malen dolla gerudu ene Jesu ole. 31 Jesu kledu gerule dolla ole ngwadi kodi jwichuga giti chunchi tanre kledu chage jwichugage blire. Dolla ulita gerudu Jesu ole: —Cha me takalin ba cha kage bate nga dbigu giti ji chuge ngwadi, ma no ba cha ulita kage chunchi kle ngwadi, ene cha ulita ñage toi no chunchi tale. Jesu gerudu dolla ole: —¡Joga siere onbre aige, joga toi chunchi ole ulita! 33 Jesu gerudu ene dolla ole gire dolla ulita jo siere blike onbrege, dolla ulita jo chunchi ngle ngwadi toi chunchi tale. Gire sugeti chunchi ulita jo jrite jo kegdege dolla kote, chunchi ulita jwatedunga kegde gwagda giti, chunchi ulita jo chiske, chunchi ulita unjo jokeda chi kote dolla kbiale. 34 Kwian chunchi mananga ulita gwagedu chunchidi boi ene ulita gire ama ulita jo jrite, ama jo geru trage kwian kle toi jon jegwale ole kwian kle toi unaske ole boidu ulita giti. 35 Kwian ulita chunchi mananga gerua keruchugu, kwian e jo tienda boidu chunchi oledi. Kwian e ulita jo chke Jesu kle ngwadi, ama ulita gwagedu kwian onbredi dolla nu toiba ole, dolla jogeba siere amage, kwian onbre e jogeba chkeni noni, ama kle ñometraske toiba dba Jesu kle ngwadi. Kwian ulita gwagedu ene kwian onbre Jesu nu dodabadi gire ama ulita kwachiu tanre Jesu ngeru. 36 Kwian ulita bai gwagedu Jesudi mo gwagwa giti Jesu dolla kagu siere onbre jwligebanga ege gire, kwian e geru e ulita tragu kwian chiu unaskege ole kwian jon jegwalege ole, geru tragu ama ulita ole Jesu dolla kagu siere onbre jwligebangage. 37 Gire kwian ulita toinga nga Gadarage ta kwachiu tanre Jesudi kwian gerudu Jesu ole: —Cha me takalin ba chege dare cha kle toi ngwadi nga aige. ¡Joga siere nga aige me age ene dare aini! 38 Kwian gerudu ene Jesu ole gire Jesu joni naskuni du toli, kwian onbre jogeba chkeni noni jo Jesu nate gerudu Jesu ole: —Cha ta jogekalin ule ba ole, ba cha dbe ule nga baini kaire ba joge ngwadi. Jesu gerudu ama ole: —Ba me ñage joge ule cha ole, ba jogedaleni ba ullage geru trage ba bitalla ulita ole Chube agedu giti ba alin. Jesu gerudu ene onbre e ole gire Jesu joni, kwian onbre jo mo bitalla ngwadi geru trage kwian unaske ulita ole Jesu agedu noare ama alin, Jesu dolla kagu siere amage ama geru e tragu kwian ulita ole. 40 Jesu joni duge chi giti chkagu, jo chkeni llani kwian ngle kle Jesu manade ngwange, kwian ulita Jesu gau ngwange nga suga no ole. 41 Gire onbre gdaite kwian israelita chugagwalla u mo litangwa Chube gerua jwanngwage chku Jesu kle ngwadi, onbre e kada Jairo, ama chku Jesudi toidu dba jongnagwa giti Jesu gwangnaru mo chudaboi kade Jesuge, Jairo gerudu Jesu ole: —Cha takalin ba joge cha ullage cha jian dodade. 42 Cha jian gdaitre alin ama oga jabale, amage chege bedre jogeda, cha jian chura gdataboko giti gdaboke molen. Jesu Jairo keruchugu gire Jesu jo Jairo ole Jairo ulla ngnagu, kwian tanre jo Jesu ole ule, Jesu chagedu sklie kejre kwianske. 43 Kaire kwian ngleaske muinga oga chagedu, muinga e oga daige sbali, chura gdataboko giti gdaboke chui kaire kairege muinga e kledu toi daige diali. Muinga e nu jogeba kwian mo dodanga tanrege mo dodade, kwian mo dodanga ulita me ñadu muinga dodade, ngwale muinga igi ulita monu ketu kwian mo dodangage, mo dodanga me ñadu muinga dodade. 44 Muinga e chagedu Jesu nate jo chke kodi Jesudi, muinga ko chugu Jesu ñometralladi alin allabi gire sugeti muinga oga daige jo chke noni. 45 Muinga ko chugu Jesu ñometralladi ene gire Jesu geru kadu kwian nglege: —¿Chema cha chugudi? Kwian ulita gerudu: —Cha me ba chugudi. Kwian ulita gerudu ene gire Pedro gerudu Jesu ole: —Cha tkanga tangle geruge, kwian tanre kle chage ba ugenga, kwian kle ba bienga ulita ongoru ongoru, ¿mineade ba kle geru kade chema ba chugudi? 46 Jesu gerudu: —Ulia kwian gdaite oga cha chugudi, nege sugeti uñale chage cha kwian oga dodadu cha kiralla giti. 47 Muingage sugedu uñadu Jesuge ama Jesu chugudi muinga kendunga, muinga chku Jesudi jirenga trate jegwale toidu dba jongnagwa giti Jesu ngeru Jesu gai dage, gire muinga gerudu Jesu ole kwian ngle gwa giti: —Cha chagedu oga sbali malen cha mo ta gbu ba chugedi, sugedu chage cha ba chugedi alin allabi ene cha be joge chkeni. Boidu ene ulia cha tañachugu kare, cha ko chugu ba ñometralladi gire sugeti cha chegu trate no ulita. 48 Muinga gerudu ene gire Jesu gerudu ama ole: —Ba mo ta gbu cha gai ulia malen e giti cha ba dodadu ba jo chke noni. Jogani nga suga no ole me tallade. 49 Jesu kle gerule ene muinga ole gire onbre gdaite chiu Jairo ullage chku geru jige Jairoge jonke Jairo jian giti, onbre geru jiganga gerudu Jairo ole: —Ba kwian tkanga tangle geruge chuge ngwadi lle na boi, ngwale ba kle ama dbe mo ullage, ba jian me chegu. 50 Jesu geru e keruchugu gire Jesu gerudu Jairo ole: —Ba me ta dbe kennga ba jian giti, ba me mo ta gbe olire ba jian nate, ba mo ta gbe cha gai ulia alin, e giti ba jian be joge chkeni noni. 51 Jesu jo dare Jairo ole, jo chke Jairo ullage, ne ngwadi kwian tanre kle olire kle sui jwennga Jairo jian jaba nate, Jesu gerudu kwian e ulita ole: —Ba me olire dare, ulia kirogwa muire me jogebada dale, agwa ama kle gbe alin allabi. Jesu gerudu ene gire kwian ulita gidedu Jesudi, kwiange uñale Jairo jian jokeda, ama me kle gbe ulia. Jesu jo chiga Jairo jian jaba kle ngwadi, Jesu jo Pedro ole Juan ole Santiago ole kaire kirogwa muire ñenua ole chebia ole, Jesu kwian e alin allabi chugu ngwadi joge chiga ule, Jesu me kwian na chugu ngwadi joge ule jaba kledu ngwadi. 54 Jesu kirogwa muire jaba gau koge, Jesu gerudu ama ole: —¡Kirogwa muire, chkede bduge! 55 Jesu gerudu ene gire kirogwa muire jaba chkuni gwade naskuni, blike chku mo klodegenga bduge, gire ama ñenua ama chebia chegu tañachuge tanre Jesu agedu giti, ama gerudu no modi Jesu giti: —Ulia Jesu kiraske, ama agedu no no che alin, ama che jian jaba gbuni gwadeni. Gire Jesu gerudu kirogwa muire ñenua ole chebia ole: —Cha ba jian jaba gbuni gwade giti ba me geru e kete kwian nage, ba geru e gatadale mo tale. Nege ba bligda kete ba jiange gutadale ama kira gbagda.
1 Jesu kwian geru jwannga amage gdataboko giti gdaboke kadu mo lite ule ama ole, gire Jesu mo kiralla ketu ama ulitage dolla daga ngwale kagagda siere kwian jwligebanga dolla kotege kaire kira ketu kwian oga jingme daga ngwale ole dodagda. 2 Jesu mo kiralla ketu ene kwian geru jwanngage gire Jesu ama ulita kagu Chube gerua Jesu giti trage kwian ole, kaire Jesu kwian geru jwannga kagu kwian tanre oga dodade. 3 Kwian geru jwannga bebi joge Chube gerua dbe kwiange gire Jesu ama ulita ta gbu ama agedale giti ama joge chage geru dbe gire, Jesu gerudu ama ulita ole: —Ba joge Chube gerua dbe gire ba me lle dbe mo alin, ba jogedale kole. Ba me glita chagegda dbe, ba me gde teru dbangwa dbe ni ba bligda dbe mo liullale jonkare ni ba igi dbe mo alin lle gigagda. Ba ñometra dbe modi alin, ba me ñometra na dbe mo ole llagli. 4 Una ulitage baini kaire ba joge chke ngwadi, ba u gbaitre alin gai toingwa, ba chege toi u e mauña ole gire ba Chube gerua dbe kwian una emuske. Ba joge dare una nage ba age ene una kaire kairege baini kare ba joge chke ngwadi. 5 Una ulitage baini kaire ba joge chke ngwadi, una e gwealege kwian me ba gai ngwange no, ba me tallade, ba jogedale siere una ege, ba me chege geru dbe kwian una emuske, ba joge siere una ege ba dbi mnuña skiennga mo serage kwian ene gwa giti, ene be suge kwian una emuge ama chege jiske tanre Chube gwa giti me ba gai ngwange no gdale Chube gerua giti. 6 Jesu gerudu ene kwian geru jwannga ulita ole gire kwian geru jwannga ulita jo una ulitage kaire kaire Chube gerua trage kwian ole kaire kwian tanre oga dodade. 7 E suiale kwian kada Herodes ama kwian nga Galileamu chugagwalla rey, Herodes ole kwian tanre geru tragu Jesu giti Jesu kle age giti ulita nga Galileage, e giti Herodes tañachugu tanre ni chku uñale amage kle boi mine. Kwian gweale gerudu Jesu giti Jesu amaña Juan-Bautista jogebada chkuni gwade. Kwian na gerudu Jesu giti Jesu amaña kwian Chube gerua ketanga unsuialin kada Elías chkuni. Kwian na gerudu Jesu giti Jesu amaña kwian gweale Chube gerua ketanga na nu jogebada unsuialin chkuni gwade. Kwian gerudu ene Herodes ole, Herodes me tachku gda uñale. 9 Herodes gerudu kwian ole: —Cha agali kwian kagu Juan-Bautista chuga tkenga, ¿chema tra no kle chage nege, cha geru keruchuge tanre ama kle age giti? Herodes gerudu ene gire ama mo ta gbu gwage mo gwagwa giti Jesudi blike. 10 Jesu nu kwian geru jwannga amage ulita kagaba chage una kaire kairege Chube gerua trage daba na ole, ama ulita chkuni Jesu kle ngwadige, ama geru tragu Jesu ole ama lle bo ulita giti. Bigire Jesu jo ama ulita ole sugekare kwian na ulitage jo nga gballage kodi una Betsaidage. 11 Kwian tanrege chku uñale Jesu jo nga gballage gire kwian e ulita jo Jesu nate, kwian jo chke Jesudi, Jesu kwian e ulita gau ngwange no, Jesu gerudu no trate kwian e ole Chube giti kaire Jesu kwian tanre oga dodadu. 12 Ngabi kodi nga jere ngnagu kwian geru jwannga ulita jo chke Jesudige gerudu Jesu ole: —Nga ai che kle ngwadi nga gballa, nga aige bligda me kwian ulita ai alin gutadale, kaire u gbengwa me ama alin. Noare ba gbi kade bdagli kwian ulitage, ba ama ulita kage siere nga aige, ene ama ulita ñage joge nga gwealege o una gwealege bligda gige mo alin gutadale kaire u gbengwa jinade mo alin. 13 Jesu gerudu: —Ba ulita agali bligda kete kwian ulitage gutadale. Kwian geru jwannga gerudu Jesu ole: —¿Che kwian ngle ulita ulle llemadi? Bligda me ngle che ole kwian tanre alin gutadale, che pan molen gdatigale alin ngwe gdabokle alin, bligda e me ñage kwiange ulita. ¿Ba takalin cha ulita joge bligda ngle ngle gige kwian ai ulita ullagda, ene che ñage bligda kete kwian ulitage gutadale? 14 Kwian geru jwannga Jesuge gerudu ene gire Jesu gerudu ama ulita ole: —Ba kwian ngle ulita gbe toi dba kwian cincuenta mne kaire kaire. Kwian geru jwannga kwian gbu toi dba ulita Jesu gerudu kare, kwian ene ulitaske kwian onbre ngle cinco mil kledu, kaire muinga ngle kirogwa ngle kledu ule kwian onbre ngle eske, agwa muinga, kirogwa me jo teanba. 16 Ama ulita toidu dba gire Jesu pan gdatiga ngwe gdaboke gau kote, Jesu gwagedu nga ngaña giti, Jesu gerudu Chube ole: “Cha Ñenua, noare ba pan ai ngwe ai ketu kwian ai ulita alin gutadale.” Jesu gerudu ene Chube ole gire Jesu pan skutunga ngwe uda junnga, Jesu ngwe uda pan bita ketu kwian geru jwanngage girabatadale kwian ngle ulita ole. Jesu bligda gbu jriennga kwian ngle ulita alin gutadale. 17 Kwian ngle ulita blidu no, kwian ulita unchku no bligdadi, gire bligda bita ngle cheguda, kwian geru jwannga Jesuge bligda bita e ulita litu ole ski kweri gbataboko giti gbaboke, ski e ulita chku ete bligda cheguda ole. 18 Chui gbaite Jesu jo sugekare kwian ngle ulitage gerule Chube ole, kwian geru jwannga alin allabi kledu ama ole gire Jesu geru kadu kwian geru jwannga ulitage: —¿Kwian ulita kle gerule mine cha giti cha chema? 19 Kwian geru jwannga jaindunga: —Kwian gweale kle gerule ba Juan-Bautista jogebakeda chkuni gwade, kwian na kle gerule ba kwian unsuialin kada Elías chkuni, kwian na kle gerule ba kwian Chube gerua ketanga dabage unsuialin gdaite chkuni gwade. 20 Kwian geru jwannga gerudu ene Jesu ole gire Jesu geru kadu dare ama ulitage: —Kwian na kle gerule ene cha giti, ¿agwa ba gerule mine? ¿Cha chema? Pedro jaindunga Jesu kalen: —Ba Cristo, Chube ba kagu nga dba ai giti kwian kare kwian jwen siere ji chugege agedu me no gdale. 21 Pedro gerudu ene Jesu giti gire Jesu gerudu kwian geru jwannga amage gdataboko giti gdaboke ulita ole: —Pedro gerudu trate, agwa ba me geru e cha giti trage ni kwian gdaite na ole —Jesu gerudu ene kwian geru jwannga amage ulita ole. 22 Jesu kwian geru jwannga amage ulita ta gbu Jesu be boi mine giti, Jesu gerudu: —Chube cha kagu nga dba ai giti kwian kare, kwian tanre be age cha dollale cha gbe boi daga ngwale, kwian israelita chugagwalla juma ulita kaire kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita me cha gerua gai ulia, ama ulita be jainchke chadi cha gerua gdale be cha gbe boi daga ngwale, bdagli cha gwabeda agwa mongikege cha jaba be chkeni gwade. 23 Jesu gerudu ene mau giti gire gerudu dare: —Kwian bai ta chagekalin ulia cha ole me tañachugadale dare mau giti alin allabi me agedale dare ama agali ta agekalin kare, chui gdale ama mo ta gbadale cha gerua gbe gdadi age cha takalin kare, kwian na ama gbe boi daga ngwale cha gerua gdale kaire kwian na ta ama gwakalinda cha gerua gdale, ama me mo talladale. Kwian bai mo ta gbe ene ñage chage cha ole. 24 Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 25 Cha gerule ulia ba ole, ngwale kwian tañachuge tanre lle lite ole ngle giti ama kle toi nga dba ai giti gire. Kwian tañachuge lle lite ole alin allabi mau alin agwa ama me mo ta gbe ulia Chube ole, kwian e be jogenga ngwale, ama be chege sugekare Chubege diali chui tangle. 26 Cha gerule ba ole, Chube cha kagu nga dba ai giti kwian kare, chui bdaglige cha be chieni nakwaite cha Ñenua Chube kiralla giti, cha be chieni ule lle boanga Chube alin nga ngaña giti ngle ole, kwian ulita be gwage chadi cha noare cha kweri. Kwian nege tangle bai kaire cha gai ulia agwa ama ibule cha giti cha gerua giti, nga chie ibule amage gerule kwian na ole ama cha gai ulia giti, kwian bai ibule ene cha giti nege, kwian ene giti cha mi gerule no cha be chieni chuiage, chui ege cha mi gerule ama giti ama chanu. 27 Cha gerule ulia ba ulita ole, ba gweale kle aini cha ole cha keruchuge ba bebi jogeda gire ba gwa giti Chube be age no no cha ole ama kiralla giti, ba gwage chadi ene gire be suge trate bage cha noare cha kweri cha kwian ulita Chugagwalla —Jesu gerudu ene ulita. 28 Jesu gerudu ene ulita kwian ole, chui gbapa jo tangle gire Jesu jo jwichuga giti gerule Chube ole, Jesu kwian geru jwannga amage gdamaire alin allabi du ule, ama Pedro kaire Juan kaire Santiago du ule ama gatedi. 29 Jesu jo chke jwichuga giti, eni Jesu kle gerule Chube ole gire Jesu gwa jwlitedu Jesu ñometralla ulita jwlitedu kwian geru jwannga gdamai gwa giti, Jesu ñometralla chratigunga jutre jutre. 30 Kwian geru jwannga gdamai gwagedu Jesudi ene gire sugeti onbre nga ngaña giti boke chiu Chube kirallaske chku Jesu kle ngwadi, onbre edi tangle nga chratigunga, onbre e kada Moisés kaire Elías, ama boke chku geru trage Jesu ole Jesu be boi giti, ama gerudu Jesu ole: —Ba be boi dagale tanre, ba gwabeda una Jerusalénge Chube gerudu unsuialin kare. 32 Kledu boi ene ulita gire Pedro kaire kwian geru jwannga na boke gbigachiu tanre, agwa ama jagedu gwade gwagedu nga chralladi nga chratigunga Jesu kle ngwadi kwian boke kle Jesu ole. 33 Moisés kaire Elías jo jogeni siere Jesuge gire Pedro gerudu Jesu ole: —Cha tkanga tangle geruge, nga suga noare chadi che ulita chku aini. Cha be u soli gbe gbamai aini toingwa sugetidale, u gbaite ba alin, u gbaite Moisés alin, u gbaite Elías alin. Pedro gerudu ene ngwale, Pedroge me uñale ama kle gerule llema giti. 34 Pedro kledu gerule ene u giti gire bogakwa chku amadi tangle kaire ama skatemanalla bokedi tangle, ama ulita chegu bogakwaske gire ama kwachiu tanre. 35 Gire bogakwaske Chube kerua sugedu ama ologe gerule: “Ai cha Kirolla, cha no no ama ole, ba ulita ama keruchugadale no, ba mo ta gbadale ama kerua gbe gdadi diali.” 36 Chube kerua sugedu ene bogakwaske gire Pedro kaire Juan kaire Santiago gwageduni Jesudi Jesu kle gballa. Ulita gwagedu Jesudi boi ene me su gerule kwian na ole gdaite Jesu boidu giti, ama chegu kamne, gerudu modi alin allabi gwagedudi giti. 37 Nagbietege Jesu ule kwian geru jwannga gdamai ole jo chkeni jwichuga gdoge dba, gire kwian geru jwannga Jesuge na ulita kaire kwian na tanre tendu Jesu ngwange jonke. 38 Gire kwian onbre gdaite kle kwian ngleaske ngautu Jesuge: —Kwian tkanga tangle geruge, ba cha keruchuge, cha gerule ba ole cha takalin ba tai dage chage, cha kirolla gdaitre alin cháge ama oga, cha takalin ba ama dodade. 39 Dolla kle age me no cha kirolla ole diali, chui gwealege ama kle no, chui gwealege ama kle boi tirare dolla kote, dolla kle cha kirolla gbe ngaute kweri, kaire kle nga kagenga kirogwa giti, kle kirogwa gbe trateda dba tangle gire kirogwa jolo tanre mlienga kate dolla kote, dolla age tanre me no cha kirolla ole, dolla me ta kirogwa chugakalin ngwadi ngwedige. 40 Cha gerudu kwian geru jwannga bage ulita ole chudaboi kade amage dolla kage siere cha kirollage, agwa ama ulita me ñadu, malen cha chiu ba nate ba cha kirolla dodade. 41 Jesu kirogwa ñenua keruchugu gerule ene gire Jesu gerudu kwian ulita kle eni ole: —Ba ulita me kle mo ta gbe cha gai ulia, ba ta me no. ¿Ngaminegire ba be mo ta gbe cha gai ulia, ene Chube ñage kira kete bage age ulita cha kle age kare? ¿Ngaminegire ba be kle kian gbe chage cha ba chudaboadale? Jesu gerudu ene kwian ulita ole gire Jesu gerudu kirogwa ñenua ole: —Kirogwa du chage aini. 42 Ñenua jo mo kirolla dbe Jesu ngnagu gire blike dolla kirogwa mliudba, dolla nga kagunga kirogwa giti, kirogwa tratuda dba tangle dolla kiralla kote, Jesu ka bo mno dolla ole: —¡Joga siere kirogwage blike! Jesu gerudu ene gire dolla jo siere kirogwage, sugeti kirogwa jo chkeni noni, Jesu kirogwa ketuni noni ñenuage manadale. 43 Kwian ulita gwagedu Jesudi dolla kage siere kirogwage kwian ta me jo sugano Jesu agedu Chube kiralla gitidi. Gire Jesu gerudu kwian geru jwannga gdataboko giti gdaboke ole: 44 —Ba ulita geru ai keruchuge ba gbe mo chugadi, ba me geru talla kagenga mo giti. Chube cha kagu nga dba ai giti kwian kare, kwian cha dollale be cha gai be age me no cha ole ama takalin kare. 45 Jesu gerudu ene kwian geru jwannga ole, agwa kwian geru jwanngage geru e me sugedu, Chube me ama ta gbu chke uñale malen ama tale ama kledu nga jereske kare, ama ulita ibudu geru kade Jesuge Jesu kle gerule llema giti. 46 Kwian geru jwannga Jesuge gdataboko giti gdaboke kledu mo ka dodadeda ongoru ongoru ama ulitage bai be chege ma kweri Chube gwa giti. 47 Chku uñale Jesuge kwian geru jwannga ulita kle tañachuge mine mo tale gire Jesu kirogwa soli gdaite kle eni gau gbu gdate mo ngena, 48 Jesu gerudu kwian geru jwannga ulita ole: —Kwian bai kaire no cha ole ulia, kwian ene kle kirogwa ai kare gai ngwange no kle age no ama alin, kwian age ene me kle kirogwa alin allabi gai ngwange no, kaire ama kle cha gai ngwange no kle age no cha agali alin kare. Ene kaire kwian bai kaire cha gai ngwange no, kwian ene kle Chube cha kaganga nga dba ai giti gai ngwange no kaire. Kwian kle baske aini nga dba ai giti bai mo gbe soli daba na chudaboangale, kwian ene kweri Chube gwage —Jesu gerudu ene kwian geru jwannga amage ulita ole. 49 Gire Juan gerudu Jesu ole: —Cha tkanga tangle geruge, cha ulita gwagedu kwian gdaitedi dolla kage siere kwian jwligebangage, kwian e gerudu ama kledu dolla kage siere dabage ba kiralla giti. Ama me kle chage che ole malen cha gerudu ama ole ama me ñage age ene dare. 50 Jesu gerudu Juan ole: —Ba me gerule ama ole ama me ñage age ene dare, ba me ñage mo gbe ma kweri amage. Ulia kwian bai me kle age che dollale kwian ene kle age che bale kle che chudaboi, ba me ka boi ama ole —Jesu gerudu ene Juan ole. 51 Chui chege kodi Jesu ngeru Jesu be jogeni nga ngaña giti, gire Jesu mo ta gbu joge una Jerusalénge. 52 Jesu jo chage una Jerusalén ngnagu gire ama kwian gweale kagu mo ngeru u jinade nga Samariage, kwian e jo chke una gdaitege nga Samariage u jinade Jesu alin chegedaleda sugetidale. 53 Bigwa Jesu chku una ege, chku uñale kwian toinga una ege Jesu be joge una Jerusalénge malen ama me Jesu gau ngwange no me u ketu amage gbengwa, kwian toinga nga Samariage me no kwian una Jerusalénmu ole. 54 Kwian geru jwannga Jesuge boke kada Santiago kaire Juan gwagedu kwian nga Samariamu me Jesu gau ngwange no, Santiago kaire Juan gerudu Jesu ole: —Cha Chugagwalla, ¿ba takalin cha jita nga ngaña giti kade kwian una aimu gugagda ulita? 55 Santiago kaire Juan gerudu ene Jesu ole kwian nga Samariamu giti gire Jesu gwagedu ama bokedi ka bo ama ole, Jesu gerudu: —¿Ni uñale bage cha talla mine kwian ole? 56 Chube cha kagu nga dba ai giti kwian kare, cha me chiu kwian gwangaleda, cha chiu kwian jwanngale siere ji chugege age me no gdale. Jesu ka bo ene Santiago kaire Juan ole gire Jesu jo ule ama ole una nage. 57 Jesu kle chage jonkare gire kwian gdaite gerudu Jesu ole: —Kwian chugagwalla, cha ta mo ta gbakalin chage ba ole baini kaire ba be joge ngwadi, cha be chage ule ba ole geru jwen bage. 58 Jesu gerudu kwian e ole: —¿Ulia ba be ñage mo ta gbe chage cha ole baini kaire cha be joge chage ngwadige? Bliski ugara molen gbengwa kaire bdada ugara molen gbengwa, agwa cha me dale. Chube nu cha kagaba nga dba ai giti kwian kare, cha me u molen agali toingwa kaire gbengwa. 59 Jesu gerudu ene gire chagedu dare, jonkare Jesu gerudu kwian na gdaite ole: —Bai chage cha ole geru jwen chage. Kwian e gerudu Jesu ole: —Kwian chugagwalla, cha chagekalin ba ole geru jwen bage agwa nege nege cha me ñage, cha be manade, cha ñenua be jogeda cha be ama jaba tke dbige gire cha be ñage chage ba ole. 60 Jesu gerudu kwian e ole: —Ba ta chagekalin cha ole me ñage manade, ba chie chage cha ole nege. Ba mo ta gbadale ulia chage cha ole cha gerua nate, ba bitalla ulita me Chube gerua gai ulia ba ama jige ba ñenua jaba tke dbige, agwa ba chiedale chage cha ole Chube gerua jwen Chube gerua dbe kwian ulitage, ba geru Chube giti tragadale kwian ole. 61 Jesu gerudu ene gire kwian na gdaite chku Jesudi gerule Jesu ole, ama gerudu: —Kwian chugagwalla, cha ta chagekalin ba ole, agwa cha takalin ba cha chuge ngwadi ngeru basale bdagli cha bitalladi, gire cha be chage ba ole. 62 Jesu gerudu kwian e ole: —Kwian joge deage nga bate, ama nga bate sidri alin allabi gire blike ama ta jogekalinni gudegu, kwian ene me mo ta gbu lle boi no ulia, kwian ene me ñage lle boi no. Ene kaire kwian ta chagekalin cha ole lle boakalin no cha alin me ñage mo ta gbe tañachuge ngeru lle na giti, kwian tañachuge lle na giti ngeru, kwian ene me ñage Chube gerua dbe trage kwian ole.
1 Iti Jesu kwian na setenta y dos gau kagale gdaboke mo kaire kaire mo ngeru ngage unage ulita baini Jesu be joge ngwadi. 2 Kwian e ulita mo litu Jesudi gire Jesu gerudu ama ole: —Cha kle ba kage Chube gerua trage kwian ole salengwli kwian bligda ngamalla mauña kle kwian bligda jwannga kage kare. Bligda chke noare joge dabe gire bligda mauña kwian bligda jwannga kage bligda jwen. Ene kaire kwian tanre me Chube gerua uñe, ama kle Chube gerua manade ngwange, ama bligda jogeba dabe kare, cha kle ba kage Chube gerua dbe amage. Kwian ngle kle Chube gerua manade ngwange, kwian geru dbanga bedreare, ba gerudale Chube ole ba takalin mo chudaboanga nglege, ene Chube be kwian na kage ba chudaboi Chube gerua dbe. 3 Jesu gerudu ene kwian setenta y dos ole gire Jesu gerudu dare ama ole: —Cha kle ba ulita kage Chube gerua trage kwian ole, joga ta giti kwianske. Cha kle ba kage, kwian ta me no ama me no cha gerua ulia ole be age ba dollale, ama ta ba gbakalin boi daga ngwale, ba be chage kwian eneske salengwli bda oveja soli chage gude tirareske kare. 4 Ba joge Chube gerua dbe ba me teru dbe mo ole llagli, ba jogedale kole. Ba me igi dbe mo alin lle gigagda, ba me gde teru dbangwa dbe, ba zapato dbe modi alin, ba me chege jagenga gdate jonkare gbi kade kwiange. 5 U bai kairege ba joge chke, ba gbi kadadale no kwian ulitage kle toi u ege, ba gerudale ama ulita ole: “Cha takalin Chube age no ba ulita alin, ene ba ulita ta dbe suga no.” 6 Ba gbi kade no ene kwiange gire kwian jainnga ta no giti ba kalen gwajondoida kwian ba gai ngwange no, kwian ene alin Chube be age no. Agwa ba gbi kade kwiange gire kwian me jainnga ba kalen ta no giti me ba gai ngwange no, kwian ene alin Chube mi age no, Chube be age no ba alin allabi, ngwale ba gbi kade kwian enege, ama mi ba keruchuge gerule Chube giti. 7 Una ulitage baini kaire ba joge chke ngwadi, ba u gbaitre alin gai toingwa, ba chegedale toi u e amañage, ba me joge chage uge nganake nganake. Bligda ketabe bage ba gute, ba kle cha gerua dbe kwiange ñanale Chube be kwian e ta gbe bligda kete bage, e salengwli igi ketakle lle boangage lle boi ñanale. 8 Ba be joge chke una baige kaire ba gabe ngwange bligda ole, ba bligda e ulita gutadale kwian kete bage kare. 9 Una bai kairege ba joge chke ngwadi ba kwian oga dodadale, kaire ba gerudale kwian ulita una ege ole: “Chube be age kwian ulita alin chuia kle kodi, ba mo ta blitadale Chube ole ama gai mo Chugagwallale.” 10 Una baini kaire ba joge chke ngwadige kwian me ba gai ngwange no, ba me tallade, ba jogedale siere una ege, ba gerudale kwian ulita una ege ole: 11 “Dbi mnuña ba unallage kwedu cha serage, cha dbi mnuña e skiennga trate cha serage ba ulita dollale ba me cha gau ngwange no gdale, ene be suge bage ba chege jiske tanre Chube gwa giti me cha gai ngwange no gdale Chube gerua giti. Cha takalin chke uñale bage Chube be age kwian ulita alin chuia kle kodi.” Ba gerudale ene ulita kwian una emu ole gire ba mo linge siere una ege. 12 Cha gerule ba ulita ole, chui be chke gire Chube be ji gbe kwian una ege alin bai me ba gau ngwange no me tadu Chube gerua keruchugakalin, kwian ene alin Chube be ji gbe ma mno Chube ji gbu kwian agenga me no ulita alin una Sodomamuge unsuialin tangle. 13 Kaire Chube be ji gbe tirare kwian una Corazínmu alin kwian una Betsaidamu alin, una Corazínge una Betsaidage cha lle daga ngwale no tanre dodadu Chube kiralla giti, kwian tanre toinga una boke ege gwagedu chadi age no ene amaske agwa ama me mo ta blitu Chube ole joge siere ama kle age me no Chube dollalege. E kare ene lle daga ngwale no jo dodabale una Sidónge una Tiroge kwian una boke emu gwa giti, gire ene kwian tanre una emu sbali mo ta blitu Chube ole, ene kwian e ulita ñometra juda me no tku modi ta olire ole kaire mnugda batu mo jegwale, ene ama mo kaite ta olire ole agedu me no ngerule giti. 14 Agwa lle daga ngwale no me jo dodabale Chube kiralla giti una Sidónge una Tiroge lle daga ngwale no jo dodabale una Corazínge una Betsaidage kare, malen chui bdaglige Chube be ji gbe kwian agenga me no alin ulita chuia, chui ege Chube be kwian una Corazínmu kwian una Betsaidamu gbe ji chuge ma jabale kwian una Tiromuge kwian una Sidónmuge. 15 Kaire kwian una Capernaumge jiske tanre, ama kle tañachuge ama ulita ma no kwian una na ulitage ene bdagli ama be joge toi no Chube ole nga ngaña giti. E me ene dale. Bdagli Chube be ji gbe tirare kwian una Capernaummu alin, kwian e kagabe ji chuge tirare ngwadi nga dbigu giti. 16 Jesu gerudu ene kwian setenta y dos ole kwian me Chube gerua gai giti, gire Jesu gerudu dare kwian setenta y dos ulita ole: —Nege cha kle ba kage Chube gerua trage kwian na ole, kwian bai ba gai ngwange no ba keruchuge no, kwian ene me kle ba alin allabi gai ngwange no keruchuge no, kaire ama kle cha gai ngwange no cha keruchuge no agali kare ba giti. Kwian me ba gai ngwange no me ba gerua Chube giti gai ulia, e salengwli ama me kle cha agali gai ngwange no kare e salengwli ama me kle cha agali gerua gai ulia kare. Kwian me cha gerua gai ulia, e salengwli ama me kle Chube cha kaganga agali gerua gai ulia kare. Gire nege cha gerule ba ulita ole, joga Chube gerua trage kwian ulita ole una kaire kairege. Jesu gerudu ene kwian setenta y dos ole, gire kwian ulita jo gdaboke modi kaire kaire, ama ulita chagedu Chube gerua dbe kwian nage Jesu gerudu kare. 17 Chui jo tangle gire kwian e ulita Jesu nu kagabage lle boadale bidegu Jesu kagu kare, ama chiunini nga suga noare oledi, chkuni Jesu kle ngwadi gire gerudu Jesu ole: —Cha Chugagwalla, ba kiralla giti cha dolla kagu siere kwian jwligebangage, dolla agedu cha gerudu kare. 18 Jesu gerudu: —Ba kledu dolla kage siere kwiange, ba gerudu dolla ole gire sugeti cha gwagedu dolla ulita chugagwalla kada Satanádi, Satanás kira jonga ulita, cha kirachku Satanádi ulita blike salengwli nga ko chrachienga dba blike kare. 19 Cha kiralla giti ba ñage kirachke dolladi, ba ñage skite jorisi giti jebda giti lle e me ba lendege. Cha kiralla giti ba ñage kirachke dolla ulitadi diali, dolla me ñage age me no ba ole. 20 Ba ñage kirachke dolla ulitadi, agwa e giti ba me nga dbe suga no, ma no ba nga dbadale suga no mo kalla giti kle degaba nga ngaña giti Chube kle ngwadi. 21 Jesu kle gerule ene kwian setenta y dos ole gire Jesudi nga suga noare Chube Oña kirallaske, Jesu gerudu Chube ole: “Cha Ñenua, ba nga ngaña giti nga dba ai giti ulita Chugagwalla, nga suga noare chadi ba giti, ba noare ulita. Kwian me geru molen ama ta ba gerua gakalin ulia blike salengwli kirogwa geru gai blike kare, noare ba kwian ene ta gbu, ene amage ba gerua sugedu. Agwa kwian geru molen geru jun tanre lle ulita giti, kwian enege ba gerua me sugedu, ba gerua chegu ogabada kare amage. Chadi nga suga noare ba giti, ba kle kwian ta gbe ba takalinge kare, e no cha Ñenua.” 22 Jesu gerudu ene Chube ole gire gerudu dare kwian setenta y dos ole: —Chube cha Ñenua ama mo kiralla mo talla ulita ketu chage. Cha Chube Kirolla, ulia ni kwian gdaite cha talla uñe trate, cha Ñenua alin allabi cha talla uñe trate. Kaire agwe ni kwian gdaite cha Ñenua talla uñe trate, cha alin allabi cha Ñenua talla uñe trate. Kwian baige cha takalin chke uñale cha Ñenua mine, cha kwian ene ta gbe, ene cha giti ama ñage cha Ñenua talla uñe trate. 23 Jesu gerudu ene kwian setenta y dos ole gire Jesu gerudu kwian geru jwannga amage gdataboko giti gdaboke ole sugekare kwian na ulitage, Jesu gerudu: —Cha gerule ba ulita ole, Chube kle age no no ba ulita alin malen ba ulita nga dbadale suga no. Cha kle aini baske age tanre no ba gwa giti Chube kiralla giti, ba ulita mo gwagwa giti kle gwage Chube kle agedi. Kwian Chube gerua ketanga unsuialin kaire kwian chugagwalla kweri unsuialin, kwian ene ngle tadu gwagekalin Chube kle agedi ba ulita kle gwagedi nege kare, agwa e suiale kwian e ulita me ñadu gwage ba ulita nege tangle kle gwage Chube kle agedige. Kaire kwian e ulita tadu geru keruchugakalin ba kle geru keruchuge nege kare cha giti, agwa ama me ñadu geru ai kare keruchuge —Jesu gerudu ene kwian geru jwannga amage ulita ole. 25 Chui gbaite kwian daba tkanga tangle Moisés chadalla giti gdaite jo Jesu kle ngwadi ama ta mo chugakalin Jesu ole, kwian e chku Jesudi geru kadu Jesuge: —Ba kwian tkanga tangle geruge, cha geru kade bage, ¿cha llema boadale gire cha ñage toi diali chui tangle Chube ole nga ngaña giti? 26 Jesu gerudu: —¿Moisés chadalla kle degaba gerule mine e giti? ¿Chada e suge mine bage? 27 Kwian daba tkanga tangle Moisés chadalla giti jaindunga: —Moisés chadalla gerule: “Ba nodale ba Chugagwalla kweri Chube ole, ba mo ta dbadale no trate ulita ama ole, ba tañachugadale diali mo tale ama giti, ba mo ta gbadale kiraske lle boi ama alin ama takalin kare, ba mo chuga gbale no Chube alin ole.” Kaire Moisés chadalla gerule: “Mo ta dbadale no daba na ulita ole salengwli ba no mo ole naskuni kare.” 28 Jesu gerudu: —Ba jaindunga geru uliage. Ba age ene ba ñage toi diali chui tangle Chube ole nga ngaña giti. 29 Kwian daba tkanga tangle Moisés chadalla giti me tadukalin Jesu ama gbe jiske malen ama geru kadu Jesuge: —¿Kwian bai ole cha mo ta dbadale no? 30 Jesu jaindunga: —Cha geru ai kete bage: Kwian onbre gdaite chagedu una Jerusalén jonlla kare joge una Jericó ngnagu, ama kwian israelita, kle chage jonkare gire ama tendu skwe boanga gweale ngwange, skwe boanga onbre batu tanre onbre kwara ngwale alin tkudadba, skwe boanga lle junnga ulita ama ngeru, ñometra onbre kle chage dbe modi skwe boanga junnga kigedu ole onbre ngeru, skwe boanga onbre chugu ngwadi jonke lendegaba jabale. 31 Boidu ene gire kwian israelita gerunga Chube ole daba alin gdaite jo jon amaña kare, ama gwagedu onbre lentigeba jabaledi me onbre lentigeba jabale talladu, ama nga bliu giti jo tangle. 32 Bigwa kwian israelita gerunga Chube ole daba alin chudaboanga gdaite chagedu jon amaña kare, ama gwagedu onbre lentigeba jabaledi me onbre lentigeba jabale talladu, ama nga bliu giti jo tangle. 33 Bigwa onbre gdaite nga Samariamu jo jon amaña kare, onbre e gwagedu onbre lentigeba jabaledi jonke, ama taidu dage onbre ege. 34 Ama jo chke onbre lentigeba jabaledi ama onbre e dodadu, drega gligu gdege kadakle vino giti, gdege na lle kin kare gbu dregage, ama onbre lentigeba jabale drega gatuda drega luguda onbre lentigeba dodadu ulita. Gire onbre nga Samariamu onbre e gbu mo jalla giti gire du, ama u jinadu onbre lentigeba jabale manale ngwadi, u skwendu gire ama onbre lentigeba manadu u ege chuiete. 35 Nagbietege onbre nga Samariamu be joge dare gire ama igi jun kwaboke modige ketu kwian u mauñage, ama gerudu u mauña ole: “Ba onbre ai manade no, ama be jiske ngle bage ba ama manade ñanale, cha be chieni gire cha be igi ama manade ñana kete ulita bage.” Onbre nga Samariamu gerudu ene gire ama jo dare. 36 Jesu gerudu ene ulita kwian daba tkanga tangle Moisés chadalla giti ole gire Jesu geru kadu amage: —¿Ba tañachuge mine, onbre gdamai bai mo ta du no daba lentigeba jabale ole? 37 Kwian daba tkanga tangle Moisés chadalla giti jaindunga Jesu kalen: —Gdaitre alin allabi taidu dage onbre lentigeba jabalege agedu no ulita onbre e alin, onbre nga Samariamu mo ta du no daba ole. Gire Jesu gerudu: —Ba mo ta gbadale age kaire onbre nga Samariamu agedu kare, ba agedale no daba ulita alin diali. 38 Jesu chagedu dare kwian geru jwannga gdataboko giti gdaboke ole una Jerusalén ngnagu, Jesu jo chke unage muinga kada Marta kle toi ngwadi, Marta Jesu gau ngwange no mo ullage. 39 Jesu jo chke gwa, Marta daballa kada María kle gwa, María toidu dba Jesu sera ngena Jesu gerua keruchuge, agwa Marta me dale. 40 Marta kle lle boi tanre, kle tañachuge lle tanre giti boadale, ama chku Jesudi gerudu Jesu ole: —Cha Chugagwalla, ¿ba me nga tallade cha giti? Lle tanre boadale, cha daballa kle cha chuge ngwadi lle boi gballa, gerule cha daballa ole ama cha chudaboi, ama kle toiba dba ngwale geru alin keruchuge. Jesu chke basale Martadi Maríadi 41 Jesu gerudu Marta ole: —Marta, ba kle tañachuge lle tanre giti, ba kle ta olire lle tanre kle boadale bage giti, lle e ulita ba me ta chugakalin ngwadi sugeti gire cha gerua keruchuge. 42 Lle gdaitre alin allabi noare ba alin, e Chube gerua. Cha kle gerule Chube giti, María kle cha keruchuge, geru e be chege diali ama tale, kwian na mi ñage geru e jwennga ama ngeru.
1 Chui gbaite Jesu kledu gerule Chube ole nga gwealege, kwian geru jwannga gdataboko giti gdaboke kledu ule Jesu ole, Jesu gerudubi Chube ole gire kwian geru jwannga gdaite gerudu Jesu ole: —Cha Chugagwalla, cha takalin ba cha ulita tke tangle gerule Chube ole Juan-Bautista kwian geru jwannga amage tku tangle kare. 2 Jesu gerudu kwian geru jwannga amage ulita ole: —Ba gerule Chube ole ba gerudale ene: “Cha Ñenua, ba kle nga ngaña giti, ba no trate ulita, cha takalin kwian ulita gerule no ba giti. Cha takalin kwian ulita nga ulitage ba gai mo Chugagwallale. Cha takalin ba age mo ta giti ba ta agekalin kare nga dba ai giti salengwli ba kle age nga ngaña giti kare. 3 Cha takalin ba bligda kete chage gutadale chui gdale toigda. 4 Cha agedu me no cha takalin ba talla mlienga, ene kaire daba age me no cha ole cha talla mlienga. Ba me cha chuge ngwadi che dolla Satanáge, ene ama me ñage age me no cha ole. Ba cha jwen siere lle me no ulitage.” Ba ulita gerudale ene Chube ole. 5 Kaire Jesu gerudu: —Ale gerule ba gweale skatemanalla molen gdaite, ba joge chke ba skatemanalla ullage nga jere bduke lle kade amage ba gerule ama ole: “Cha skatemanalla, ba bligda kete chage cha be bligda keteni daba ñanale bage. 6 Cha skatemanalla na chiu bate chku cha ullage nege sugeti, cha ole bligda me ama ullagda.” 7 Ba bligda kade ene ba skatemanallage nga jere bduke, ¿ama be jainnga mine? Ale gerule ama jainnga ene: “Ba me cha chugedi, ulia ba cha skatemanalla agwa nege cha me ñage bligda kete bage, ugaka kle jegaba, cha kle gbe kaire cha kirolla ulita, cha me chkekalin gdate bligda kete bage sidri.” Ba skatemanalla gerule ene ba ole ba be bligda kade dare amage, ba be bligda kade tanre bdagli ama be chke gdate bligda kete bage ulita ba takalinge kare, ene ba me ama chugedi dare. Ene kaire ba ulita lle kadadale diali Chubege. 9 Ba lle kade diali ene Chubege, e salengwli kwian kle lle kade dabage diali kare gire lle ketakle amage, e salengwli kwian kle lle jinade nate diali kare gire lle kle skwen amage, e salengwli kwian kle ugaka dagenga kare ta jogekalin gwa daba ullage gire daba kle ugaka degenga ama alin jogedale gwa. 10 Kwian ulita bai kaire lle kade diali, kwian enege lle keta. Kwian bai kaire lle jinade nate diali, kwian enege lle be skwen. Kwian bai kaire ugaka dagenga diali, kwian ene alin ugaka tigenga. Ene kaire ba lle kade Chubege Chube be ba keruchuge Chube be age ba alin. 11 Ba ulita gweale kirogwa molen, kirogwa pan kade bage, ¿gire ba be ke kete amage gutale? Me dale, ba mi mo ta gbe ke kete kirogwage gutale, diali ba lle no ketakalin kirogwa banuge. Ba kirogwalla ngwe kade bage gutale, ¿gire ba be jorisi kete amage gutadale? Me dale, ba mi mo ta gbe age ene. 12 Ba kirogwalla koi kegwa kade bage gutadale, ¿gire ba be jebda kete amage gutadale? Me dale, ba be lle no alin kete amage gutadale. 13 Ba ulita talla agenga me no, agwa gire ba me lle me no kete ba kirogwallage, ba kle mo ta gbe age no mo kirogwalla alin, ba lle no ketakalin diali ba kirogwallage. Chube ba Ñenua kle nga ngaña giti, ama no trate ulita, ama ñage age ma no ulita ba alin ba kle age ba kirogwalla alinge, ama lle ma no kete bage, ama ta agekalin no no ba alin diali, kaire ama mo Oña kage ba alin ba bai ama Oña kade amage —Jesu gerudubi ene kwian geru jwannga amage ulita ole. 14 Bitaite Jesu kle dolla kage siere kwian onbre gdaite jwligebangage, dolla nu onbre e gbaba keru me, onbre me ñage gerule. Jesu dolla kagu siere onbre ege gire onbre e jo chkeni ama ñaduni gerule. Kwian na ulita gwagedu boi enedi chegu tañachuge tanre Jesudi onbre jwligebanga jo chkeni no giti, kwian e ulita gerudu Jesu giti: —¡Kwian e kira molen tanre kwian oga dodade ene! 15 Agwa kwian na gweale gerudu Jesudi: —Dolla chugagwalla Satanás kle kira kete amage, kira e giti ama kle dolla kage siere kwian jwligebangage. 16 Kwian gweale na mo chugakalin Jesu ole, ama gerudu Jesu ole: —Ba kle gerule Chube ba kagu nga dba ai giti, cha takalin nege ba lle daga ngwale no kweri kwian me ña dodade mo kira giti kare, ba lle ene dodade cha ulita gwa giti, ene be chke uñale trate cha ulitage ulia Chube ba kagu ba kle age Chube kiralla giti. 17 Uñale Jesuge kwian kle tañachuge mine Jesudi mo tale malen Jesu gerudu ama ulita ole: —Cha gerule ba ulita ole, kwian chugagwalla nga gdaitemu mo tke dole kwian ulita kle toi nga amañage ole, ama kwian ulita gbe kira bate modi ongoru ongoru, ene bdagli kwian be mo gweda ulita, chugagwalla be chege gballa ama mi chege kiraske. Kaire kwian toinga u gbaitre alinge kira bate modi mo bitalla gwa ole ulita, kwian ulita u ege be boi tanre daga ngwale, ene bdagli kwian e ulita be joge toi sugekare gdaite gdaite gire u mauña be chege toi gballa ama mi chege kiraske ama gdaitre alin chudaboanga me. 18 E kare ene dolla chugagwalla Satanás mo tke dole mo chudaboangalla ole mo gbe kira bate modi daba kage siere kwiange, dolla Satanás age ene mo chudaboangalla ole ama mi chege kiraske kwian gbanga age me no Chube dollale. Ba ulita kle gerule cha kle dolla kage siere kwiange dolla chugagwalla kada Satanás kiralla giti, agwa e me ulia ba ulita kle gerule kare. 19 Ba ulita tañachuge cha kle dolla kage siere kwiange Satanás kiralla giti, ba geru kade ba bitallage ba bitalla bai kle dolla kage siere kwiange, geru kade amage chema kle kira kete amage dolla kage siere kwiange, gire ulia ama be gerule ba ole ama me kle dolla kage siere kwiange dolla kiralla giti. Ba bitalla be gerule ene ba ole, gire e giti ñage suge trate bage ba me kle gerule ulia cha giti. 20 Cha me kle dolla kage siere kwiange Satanás kiralla giti, me ene, Chube kiralla giti cha kle dolla kage siere kwiange, e giti chkedale uñale ba ulitage ulia Chube cha kagu ba ulitaske aini age ama kiralla giti. 21 ’Cha geru ai ñachuge ba ulita alin: Onbre gdaite donga kiraske tanre, ama kle mo ulla manade no, ama kle mo dogdalla ulita manade no, ama tañachuge mo tale: “Cha dogdalla kle biale ulita, kwian na me ñage lle jwennga ni dogda jwennga cha ngeru, cha ñage kirachke kwian ulitadi dogda giti.” Ama kle tañachuge ene gire donga na ma kiraske chke ama ullage kira bate ama ole, donga u mauña me kirachke donga nadi gire kwian donga na dogda jwennga ulita ama ngeru lle ulita ama ullage jwen dbe girabate mo skatemanalla na ulita ole. 23 Cha gerule ba ole, kwian bai me kle cha bale ama kle cha dollale, ama me kle cha gerua gai ulia me kle cha gerua kete daba nage, ama kle daba na gbe kige cha geruadi. 24 Jesu gerudu dare dolla giti: —Dolla joge siere kwiange gire dolla chage nga gballage nga jinade undegangwa, nga me skwen amage gire ama tañachuge: “Cha be jogeni naskuni cha kwian jigu ngwadi, cha be jogeni toi ama tale nakwaite.” 25 Gire dolla joge chkeni kwian e ngwadi, kwian e tale skwen dollage salengwli u gballa kare, nga kle litaba trate ulita, u e kle biale kwian alin toingwa. 26 Kwian ta skwen ene dollage u gballa biale kare, gire dolla e joge dolla na tirare gdaguke jwen toi ule ama ole kwian e tale, bdagli kwian e boi ma dare ngeruge. 27 Jesu kle gerule ene gire muinga gdaite gerudu kweri kwian ngleaske, ama gerudu Jesu ole: —Cha tañachuge nga suga noare ba chebiadi ba giti, noare ba medunga ama kote ama ba manadu no, ulia Chube agedu no ba chebia alin. 28 Muinga gerudu ene gire Jesu gerudu muingage: —E ulia no agwa kwian bai Chube gerua keruchuge age Chube gerule kare, kwian ene mo ta dbe ma suga no ole cha chebia mo ta dbe nga suga no ole cha gitige. 29 Kwian tanre litedu Jesudi gire Jesu gerudu kwian ulita ole: —Ba ulita kle toi chui aige ba kwian me no me no, ba ulita agenga me no, diali ba takalin cha lle daga ngwale no na dodade ba gwa giti, ene ba gerule ba be cha gai ulia Chube cha kagu nga dba ai giti, agwa nege nege cha mi age ba ulita takalin kare. Chui be chke gire cha be boi ba ulita gwa giti salengwli Jonás boidu unsuialin kare, Jonás toidu chui gbamai ngwe kweri kweri tadi gire ngwe Jonás mliunga kedagu gwade, e giti chku uñale kwian ngle toinga Jonás suialege ulia Chube Jonás kagu Chube gerua trage kwian ole. 30 Nege cha chiu nga dba ai giti kwian kare, Chube cha kagu kwian kle toi chui aige alin salengwli Chube Jonás kagu kwian unsuialin toinga una Nínivege alin kare. 31 Chui bdaglige Chube be ji gbe kwian agenga me no ulita giti chuia be chke, chui ege muinga gdaite nga kada Sabámu be meñe kwian ulitage, muinga e kwian nga Sabámu chugagwalla unsuialin. Muinga ege geru chku uñale kwian israelita chugagwalla unsuialin kada Salomón giti Salomón ta molen tanre, malen unsuialin muinga e jo bate bate Salomón jwiage Salomón gerua keruchugale, muinga e jo ene Salomón gerua nate. Cha gerua ma kweri Salomón geruage, nege cha agali kle gerule baske aini ba me ta cha gerua gakalin ulia, malen chui bdaglige muinga e be ba ulita kle toi nege tangle gbe jiske Chubege ba me cha gerua gau ulia gdale. 32 Chui bdaglige Chube be ji gbe kwian agenga me no ulita alin chuia be chke, chui ege kaire kwian unsuialin toinga una Nínivege be meñe kwian ulitage. Unsuialin Jonás jo Chube gerua kete kwian Nínivemu ulitage, kwian Nínivege Jonás gerua keruchugu no, kwian mo ta blitu Chube ole jo siere ama kledu age me no Chube dollale ulitage. Cha gerua ma kweri Jonás geruage, nege cha agali kle gerule baske aini agwa ba me ta cha gerua gakalin ulia, malen chui bdaglige kwian una Nínivemu be ba ulita kle toi nege tangle gbe jiske Chubege ba me cha gerua gau ulia gdale. 33 Jesu gerudu ene kwian ulita ole gire geru ñachugu jichra giti, Jesu gerudu: —Kwian jichra gwadege me kle jichra gbe sugekare baini kwian me tendi, me kle un blite kaboge jichra giti, agwa kwian jichra gbe ngaña nga ngwale giti, ene jichra chra tien no gwa tangle ene kwian chie eni ñage ten no gwa. 34 Ba gwagwa salengwli jichra kare. Ba gwagwa kle ba gbe ten, ba gwagwa kle no me oga, ene ba ñage ten no trate ulita. Ene kaire kwian bai kle chage no trate Chube takalin kare ama kwian gwagwa no kare chage nga chra no giti. Agwa ba gwagwa oga, ba me ñage ten no trate ba kle chage nga jereske. Ene kaire kwian bai me kle chage trate Chube geruadi kle chage age me no diali ama kwian gwagwa me no kare chage nga jereske. 35 Ba chage ta giti me mo chuge ngwadi chage age me no, ene ba me chege nga jereske kare. 36 Ulia ba mo ta gbadale chage no trate ulita Chube gwa giti ba me mo ta gbe age me no, ene ba me chege nga jereske kare agwa ba chege diali nga chra no giti kare, be chke uñale bage ba toidale mine no trate Chube takalin kare. 37 Jesu kledu geru trage kwian ole gire kwian fariseo gdaite Jesu kadu blire ule mo ullage. Jesu jo, jo chke gwa, Jesu toidu dba blingwage kwian fariseo ole. 38 Jesu kle blire gire kwian fariseo Jesu kadanga chegu tañachuge tanre mo tale Jesudi: “Jesu me agedu kwian israelita ulita kle age kare, kwian israelita diali kle ko glige trate tanre ngeru blirege, Jesu blidu me ko gligu ene kare.” 39 Uñale Jesuge fariseo e kle tañachuge mine mo tale amadi, Jesu gerudu: —Ba kwian fariseo ulita kle tañachuge ba age ba enusulian unsuialin suia alin kare, ene ba tañachuge ba kwian no trate Chube gwa giti, agwa me ene ba kle tañachuge kare, ba tale ba ta me no, age me no tanre kle ba tale diali, diali ba kle tañachuge mo tale skwe boi daba ngeru kaire age tanre me no daba dollale. E salengwli kwian kle chi jangwa kaire batekwa glige giti tangle alin kare gire tañachuge chi jangwa kaire batekwa chege trate ulita, agwa batekwa kaire chi jangwa gligaba ene me trate dale, chi jangwa e batekwa e skieru kle chege sugaska. Ene kaire ba, ba tale ba kwian me no sugaska. 40 Nga ngwale ba chuga giti, ba me kle tañachuge no. ¿Ba tañachuge Chube ba jegwale alin dodadu me ba tadi dodadu? Chube ba jegwale dodadu kaire ba tadi dodadu, malen uñale amage ba ta mine ulita. 41 Ba kwian fariseo ulita mo ta ketadale Chubege gire Chube be ba ta lite trate ulita kwian kle lle gligenga trate kare, ene Chube be ba ta gbe suge ta no daba ole daba bai me lle molen. 42 ’Ba kwian fariseo ulita be ji chuge tanre bdagli, ba me kle age no Chube takalin kare. Ngwale ba kle lle ulita maunu kete sidri Chubege Moisés nu Chube gerua degaba unsuialin gerule kare, gliga kada menta kaire gliga kada ruda kaire gliga na tanre ba kle kete sidri Chubege, ba kle gliga e ulita kete sidri Chubege gire ba tañachuge ba no trate ulita Chube gwa giti. Ngwale ba kle lle alin kete Chubege, ba ta me kle Chube ole kaire ba me kle mo ta gbe age no daba na alin. Ba ta chegekalin no trate Chube gwa giti, ngeru ba mo ta gbadale no Chube ole kaire daba ulita ole, ba agedale no daba ulita alin, gire ba mo ta gbe lle maunu kete Chubege, ene no Chube alin. 43 ’Ba kwian fariseo ulita be ji chuge tanre bdagli, diali ba mo gbakalin ma kweri daba na ulitage. Ba kle joge u mo litangwa Chube gerua jwanngwage gire ba ta toikalin toingwa ma no giti kwian na ulita gwa giti. Ba kle chage jonkare, kwian na ten ba ngwange ba takalin kwian e ulita ba gai dage tañachuge ba kwian kweri, ba takalin kwian gbi kade bage kwian kle gbi kade mo chugagwallage kare. 44 ’Ba kwian fariseo ulita be ji chuge tanre bdagli ba kle age me no gdale. Ba ulita salengwli jaba dbia kare. Kwian ulita ñage chage ba nate ba kle age kare, kwian na ulita kle tañachuge ba kle chage no Chube gwa giti, agwa ba me chage ene dale, me chke uñale kwiange ba ta me no molen gire kwian kle chage ba nate chege kaire ba kare ta me no molen. E salengwli kwian chage jaba dbia giti tangle me chke uñale amage ama kle chage jaba dbia giti, agwa age ene gdale ama chege me no Chube gwa giti kwian israelita kle gerule kare. 45 Jesu gerudu ene kwian fariseo ole gire kwian daba tkanga tangle Moisés chadalla giti gdaite Jesu gerua keruchugu, ama gerudu Jesuge: —Ba kwian tkanga tangle geruge, ba kle ka boi kwian fariseo ole me chege no chage, chage suge ba kle ka boi kaire cha ulita daba tkanga tangle Moisés chadalla giti ole. 46 Jesu gerudu: —Ba ulita kwian daba tkanga tangle Moisés chadalla giti ba kaire be ji chuge tanre bdagli, ba ulita kle age me no daba na ulita ole, ba kle daba na gbe age ulita Moisés chadalla gerule kare, kaire ba kle daba gbe age geru na ba agali kle gbe gerule kare. Ba daba na ulita gbe age ene agwa ba agali me kle age, kaire ba me kle daba na chudaboi age no geru kle gbaba kare e giti. 47 ’Ba ulita be ji chuge tanre bdagli, ba salengwli ba enusulian unsuialin kare, ba enusulian unsuialin kwian ngle Chube gerua ketanga gau, guda, Chube gerua ketanga e jaba jo tkaba dbige. Gire nege tangle ba ulita kle nga lite trate dbi edi diali, age ene giti ba takalin kwian ulita tañachuge ba kle kwian Chube gerua ketanga oña e ulita gai dage malen ba kle ama jaba dbia manade no. Agwa ba tale ba kle tañachuge nobi ba enusulian unsuialin kwian Chube gerua ketanga ngle guda. 49 Jondege uñale ulita Chubege kwian be age me no kwian Chube gerua ketanga ole, malen unsuialin Chube gerudu: “Cha be kwian tanre cha gerua ketanga dabage kaire kwian tanre cha gerua dbanga kwianske kage kwian ulita alin, kwian me no be ama gweale gweda be na gweale gbe boi tanre daga ngwale.” Chube gerudu ene unsuialin be boi giti. 50 Ba enusulian unsuialin ulita kwian ngle Chube gerua ketanga guda, Chube be kwian e ulita gwabada jia kade ba kwian kle toi negege. 51 Kwian kada Abel ama kwian Chube gerua ketanga ngeru jo gwabada, e suiage dare kwian ngle Chube gerua ketanga jo gwabada, chku kwian kada Zacarías suiage tangle, Zacarías kaire jo gwabada, ama jo gwabada u gerungwa Chube olege. Cha gerule nakwaite ba ulita ole, Chube be kwian Chube gerua ketanga e ulita gwabada jia kade ba kwian kle toi negege tangle. 52 ’Ba kwian daba tkanga tangle Moisés chadalla giti ba ulita be ji chuge tanre bdagli, ba kate ba kle gerule ba kle Chube gerua gai ulia agwa ba tale ba me kle geru e gai ulia dale, malen ba me Chube uñe ba me Chubenu. Kwian na tanre ta Chube gerua uñakalin no trate ba giti agwa ba me takalin kwian e Chube gerua gai ulia mo alin, malen ba me kle ama chudaboi Chube gerua ulia uñe ba me kle ama tke tangle trate geru uliage. Age ene gdale ba ulita be ji chuge tanre bdagli. 53 Jesu gerudubi ene ulita gire Jesu jo siere nga ege. Kwian daba tkanga tangle Moisés chadalla giti ulita kaire kwian fariseo ulita skochiu tanre Jesudi geru e giti, malen ama ulita jo chage Jesu nate geru kade tanre Jesuge Jesu tkale gdege, 54 ama tañachuge geru kade tanre ene Jesuge Jesu ñage gerule gweale me no, ene ama ñage Jesu gbe jiske geru gweale giti ama ulita takalin kare.
1 Kwian nglea litedu Jesudi kwian jennga moge alin dabaske gire Jesu gerudu ngeru kwian geru jwannga amage gdataboko giti gdaboke ole: —Ba ulita kledale ta giti kwian fariseo ulitage, kwian fariseo kle gerule ama kle Chube gerua ulia alin trage kwian ole, ene kwian ulita tañachuge kwian fariseo kwian no trate, agwa ulia kwian fariseo ta me no, ama kle kwian tanre anblite geru giti. Malen ba ulita mo ta manadale no kwian fariseoge, ba kwian fariseo keru gbe gdadi ama ta me no be ñage chege ba tale. E salengwli pan dodade levadura ole kare, levadura tugaklenga ulita harinaske gire kle sie dodadale panle. 2 Kwian fariseo age skwlenre me no ulita mi chege ogabada diali, chui be chke gire kwian fariseo agedu talla ulita be chke uñale nate. 3 Ba mo ta gbadale me age kwian fariseo kare. Ba gerule skwlenre, bdagli be chke nate uñale ulita ba gerudu mine. Ba gerule jalin jalin sugekare kwian na ole, bdagli ba gerudu mine be suge kweri kwian ulitage, kwian ulita be ba gerua e keruchuge. 4 Jesu gerudu dare: —Ba ulita cha skatemanalla chanu, cha gerule ba ole ba me mo ta dbadale kennga kwiandi kwian bai ba gwakalinda cha gerua gdale, ama ñage ba gweda alin allabi, ama me ñage age ba oña ole. 5 Cha gerule ba ole, ma no ba mo ta dbe kennga Chubedi, Chube ñage kwian gweda, kaire Chube ñage age kwian oña ole ñage kwian oña kage nga dbigu giti ji chuge diali. Chube ñage age ene malen ma no ba mo ta dbadale kennga Chubedi mo ta gbadale Chube gai dage no. 6 Chube kle ba ulita manade no malen ba me mo ta dbadale kennga kwian agenga me no ba oledi. Bdada soli gai gbatiga bdada soli chbade, igi gai sidri bdada ñanale, bdada me ñanaske. Ba ulita me ene, ba ulita ñanaske tanre Chube alin. Bdada me ñanaske agwa Chube kle bdada manade no diali, Chube tale ama me bdada talla kagenga gbaite. Kaire ene Chube kle ba manade ma no bdadage, ba chugaga ulita Chubege uñale gdamangire. Ulia Chube kle ba manade no no malen ba me mo tallade kwian kle age me no ba ole giti, ba me ta dbe kennga cha gerua trage kwian ulita ole. 8 ’Cha gerule ba ole, cha chiu nga dba ai giti kwian kare, kwian bai kaire gerule no cha giti nga dba ai giti kwian ulita gwa giti, kwian e gerule ama cha gai ulia, ama gerule ene no cha giti, ene kaire bdagli cha be gerule no kwian e giti lle boanga Chube alin nga ngaña giti ulita ole. 9 Agwa kwian bai kaire gerule me no cha giti nga dba ai giti kwian ulita gwa giti, kwian e gerule kwian ulita ole ama me cha gai ulia ama me cha uñe, ene kaire bdagli cha be gerule lle boanga Chube alin nga ngaña giti ulita ole cha me kwian e uñe dale, ama me kwian chanu. 10 Kwian bai gerule me no cha dollale gire bigwa kwian e ta jwlite cha ole, kwian ene gerudu ulita me no cha dollale Chube talla mlienga. Agwa kwian bai gerule me no Chube Oña dollale, Chube me kwian gerudu me no ene talla mlienga dale, kwian ene chege jiske diali Chube gwa giti ama gerudu Chube Oña dollale gdale. 11 Kwian tanre cha gerua dollale be ba cha gerua ganga dbe u mo litangwa Chube gerua jwanngwage, u ege kwian e be ba gbe jiske kwian israelita chugagwalla ulitage cha gerua gdale, ba boi ene gire ba me mo tallade ba be gerule mine mau giti chugagwalla kweri e ulita gwa giti. 12 Ba be kle eni kwian e gwa giti gire chui ege Chube Oña be ba ta gbe ba gerudale mine kwian ole, ulia Chube Oña be ba chudaboi ulita geru giti —Jesu gerudu ene ulita kwian geru jwannga gdataboko giti gdaboke ole. 13 Kwian onbre daba ngleaske gdaite gerudu Jesu ole: —Kwian tkanga tangle geruge, cha ñenua me chegu, ama lle jigu ngle cha alin cha daballa alin, ama chude jigu bda jigu dbi jigu cha gdaboke alin. Cha daballa lle e gau ulita mau alin, cha takalin ba gerule ama ole ama lle ulita girabatadale bonga cha ole. 14 Jesu gerudu onbre e ole: —Cha me ta agekalin ba takalin kare. Chube me cha kagu nga dba ai giti kwian daba gbanga jiske kare kle kwian me chegeba llea girabate kwian oña bitalla ole. 15 Kaire Jesu gerudu kwian nglea ole ulita: —Ba me mo ta gbadale tañachuge diali ba ta lle na tanre gakalin mau alin. Kwian lle tanre gai, ama jogeda lle e ulita me ñage ama oña jwen siere ji chugege me ñage ama oña gbe toi diali chui tangle Chube ole. 16 Gire Jesu geru ñachugu kwian ulita alin: —Kwian onbre gdaite lle molen tanre, ama chudea ulita chku noare. 17 Kwian e lle molen tanre tañachugu mo tale: “¿Cha be age mine? ¿Cha be bligda jwen ulita cha be oge baini? Bligda ngle, u bligda ogangwa soliare.” 18 Kwian lle molen tanre kle tañachuge ene gire tachku, ama gerudu mo tale: “Nege uñale chage cha be age mine, cha be u soli skiendba cha be u na kweri dodade u soli tanege, ene bligda ulita kaire cha llea ulita cha be oge u kweri e gbaitre alinge. 19 Lle kle ogaba ulita gire cha be tañachuge mo tale gballa: ‘Lle tanre kle ogaba chura tanre alin, nege cha undege, cha blire, cha lle jai, cha nga dbe suga no.’ ” 20 Kwian kle tañachuge ene gire Chube gerudu ama ole: “Nga ngwale ba chuga giti, nege ngajrege ba be jogeda, ba kle lle ulita oge, ¿e be chege chema alin?” Jesu geru ñachugu ene gire Jesu gerudu kwian nglea ole: —Chube gerudu ene kwian lle molen tanre e ole. Cha gerule ba ole, ngwale kwian lle tanre gai, ama tañachuge toi no ene, tañachuge e alin giti me tañachuge Chube giti, Chube gwage kwian ene me lle molen dale. 22 Jesu gerudu ene kwian nglea ulita ole gire Jesu gerudu kwian geru jwannga amage ulita ole: —Cha gerule ba ole, ba me mo ta dbe tañachuge tanre diali lle toigda giti, ba be llema gute toigda chui bdugu, llema giti ba be mo ngama tke. Noare ba bligda molen gutadale, noare ba ñometra molen mo ngama tkagda, agwa me no tañachuge tanre diali bligda alin giti ñometra alin giti mo alin toigda. Chube ba dodadu ama ba gbu toi gwade, ene kaire Chube be lle ulita kete bage toigda, malen ma no ba mo ta gbe tañachuge diali Chube giti me tañachuge lle alin allabi giti toigda no nga dba ai giti. 24 Ba ulita tachkedale bdada giti, bdada me kle chude ngama gbe, me kle chude tke, me kle bligda lite ole ogadale, me kle lle boi dale agwa kle toi no, Chube kle ama manade, Chube kle bligda kete bdadage gutadale. Chube alin ba ma ñanaske bdadage, bdada me ñanaske ba kare Chube gwa giti agwa Chube kle ama manade no, ene kaire bage sugedale Chube be ba manade no diali. 25 Ngwale ba tañachuge tanre lle ulita giti mo alin toigda, tañachuge tanre ene kare giti ba me ñage chui na dare gai mo alin toigda, chui be chke ba alin jogeda gire ba be jogeda diali. 26 Ulia ba agali me ñage chui na dare gbaite gai mau alin toingwa, Chube alin allabi ñage ba gbe toi chui dare. ¿Mineade ba kle tañachuge tanre lle ulita giti mo alin toigda? Chube kle ba manade. 27 Ba ulita tachkedale glijra giti, che gwage glijradi glijra noare, diali glijra meñe no, e Chube kle gbe ene, glijra me lle boi dale, meñe no alin allabi. Cha gerule ba ole, kwian chugagwalla unsuialin kada Salomón, ama kwian kweri, ama mo ngama tku ñometra noareske, agwa glijra ma noare Salomón ñometrallage. 28 Chube glijra gbe tige no, nege glijra kle no, suialin gire glijra kwenga. Glijra me ñanaske ba kare Chube gwa giti agwa Chube kle glijra gbe skiennga no, Chube alin ba ñanaske tanre ama be ba manade no diali, lle gweale me ba ole toigda Chube be lle e kete bage. Ba me kle Chube gai ulia Chube ñage ba manade no, ba mo ta gbadale me tañachuge ene dare, ulia Chube be ba manade no diali, ba ama gadale ulia. 29 Ba Chube uñe malen ba me mo ta dbadale olire lle toigda nate, ba be llema gute, ba be llema jai, llema giti ba be mo ngama tke. 30 Kwian me Chube uñe ulita diali kle mo ta dbe olire lle toigda nate. Agwa ba Chubenu, Chube ba Ñenua, amage uñale ba takalin llemage ene ba toi no. 31 Ba mo ta gbadale Chube gai diali mo Chugagwallale, ba ama gadale dage age ama takalin kare, ene Chube be ba manade no be lle toigda kete bage lle bai me ba ole ene ba toi no nga dba ai giti. 32 Jesu gerudu dare: —Ba bedreare kle mo ta gbe cha gai ulia, agwa gire ba ulita me mo ta dbadale kennga, Chube ba Ñenua, ama ba gau mau alin, ama kle ba manade no, ama ta lle ketakalin bage toigda chui gdale nga dba ai giti, kaire chui be chke gire ba be toi no ule ama ole nga ngaña giti diali chui tangle, e nobi Chube alin. 33 Ba me mo ta gbe tañachuge lle oge mau alin nga dba ai giti diali chui tangle, chui gweale lle e ulita be jogenga ngwale. Ba lle molen ba lle e chbadale, igi gai lle ñanale ba igi e ketadale kwian bai me lle molenge. Ba kwian chudaboi ene nga dba ai giti, nga ngaña giti Chube kle lle noare oge ba alin, lle nga ngaña giti me jogenga ngwale dale, llani kwian skwe boanga me joge chke lle banu jwen, kaire chubdu me lle banu gute. 34 Ba mo ta gbe lle lite ole tanre mau alin nga dba ai giti ba be kle tañachuge diali lle nga dba ai giti alinge, ba be ta jogenga tañachuge Chube giti. Agwa ba mo ta gbe diali tachke Chube giti age ama takalin kare nga dba ai giti, ba ta be kle ule diali Chube ole nga ngaña giti tañachuge Chube giti alin allabi. 35 Jesu gerudu ene ulita kwian geru jwannga gdataboko giti gdaboke ole gire Jesu geru ñachugu ama alin: —Cha be chieni ba ulita kledale manade biale cha ngwange salengwli kwian lle boanga kle manade biale mo chugagwalla ngwange kare. Chugagwalla joge kwian mo jwen chuia ollade, kwian lle boanga ama alin ulita chegeda gwa chugagwalla chieni manade ngwange, ngajrege kwian lle boanga jichra gwadege chugagwalla manade ngwange jichra giti, ama be kle manade gire sugeti chugagwalla be chkeni ugaka dagenga, gire kwian lle boanga be ugaka degenga chugagwalla ngwange. 37 Chugagwalla ñage chkeni nga jere bduke ñage chkeni ngakamalin bdugu, kwian lle boanga me kle gbe, kle chege gwade chugagwalla manade ngwange, noare kwian lle boanga ulita skate chugagwallage gwade. Chugagwalla be chkeni gwa, lle boanga skate chugagwallage gwade chugagwalla manade ngwange chugagwalla be bligda kete agali kwian lle boangage, nga be suga noare kwian lle boangadi. 39 Jesu geru na ñachugu: —Kwian u mauñage chke uñale ngaminegire kwian skwe boanga be chie lle jwennga ama ngeru, ene kwian u mauña be chege gwade ta giti kwian skwe boanga jege ngwange, ama mi kwian skwe boanga chuge ngwadi lle jwennga ama ngeru. 40 Ene kaire ba ulita kledale biale cha chieni chuia manade ngwange. Cha chiu nga dba ai giti kwian kare, cha be chieni nabitaite, agwa me uñale bage chui baige cha be chieni, malen ba kledale biale diali. Ba me mo ta gbe tañachuge diali cha be chieni giti, gire cha be chieni chuiage ba be skate alenske chage. Cha me takalin ba ulita skate alenske chage. 41 Jesu gerudu ene gire Pedro geru kadu Jesuge: —Cha Chugagwalla, ¿ba geru e ñachugu cha geru jwannga bage gdataboko giti gdabokege alin allabi o kwian na ulitage kaire? 42 Jesu gerudu Pedro ole: —Cha gerule ba ulita ole, ba kledale biale cha manade ngwange lle boi no diali cha takalin kare, cha geru ñachuge bage ai kare: Kwian gdaite lle boanga no u mauña alin, kwian lle boanga e ta molen lle boi, u mauña be joge toi nga nage chui gwealege gire u mauña be kwian lle boanga no e jige lle boanga na ulita chugagwallale, lle boanga no ene be lle boanga na ulita manade no be bligda kete ama ulitage gutadale, be age ulita u mauña gerudu kare. 43 U mauña be chkeni be gwage kwian lle boanga ama alin gdaitedige ama jigu lle boanga na ulita chugagwallale ama kle lle boi no u mauña gerudu kare, nga be suga noare kwian lle boanga edi ama skwendu u mauñage lle boi no u mauña gerudu kare. 44 Ulia cha gerule ba ole kwian ene lle boi no ulita u mauña gerule kare gire ene u mauña be lle boanga e gbe lle amanu ulita manade. 45 Agwa kwian lle boanga u mauña alin me no, u mauña kwian ene jige lle boanga na ulita chugagwallale gire joge nga gwealege, lle boanga me no e be tañachuge mo tale: “Cha chugagwalla u mauña mi chieni blike, cha me lle boadale blike dale.” Ama tañachuge ene, gire ama be age dagale lle boanga na ulita ole be lle boanga na ulita gbe boi daga ngwale tanre, ama be sui chuge blire lle gage jai. 46 Agwa gire chui gbaite kwian lle boanga me no e me kle mo chugagwalla u mauña manade ngwange ama me kle tañachuge chui baige chui mangirege chugagwalla be chieni, ama ni kle tañachuge ama chugagwalla be chieni giti, gire chui ege chugagwalla be chkeni. U mauña kwian jigu lle boanga ama alin ulita chugagwallale, kwian e be skate u mauñage age me no, malen u mauña be ji gbe kweri kwian ene giti, ama me agedu u mauña gerudu kare, u mauña be ama mlienga, ama be joge boi daga ngwale ule kwian na agenga me no ulita ole. 47 U mauña kwian jige lle boanga na ulita chugagwallalege suge uñale u mauña takalin ama agedale u mauña gerule kare, agwa gire kwian e me u mauña gai dage me age u mauña gerudu kare, kwian ene alin u mauña be ji gbe mnoare. 48 Agwa kwian baige me uñale u mauña takalin ama agedale u mauña gerule kare gire kwian e age me no, me uñale amage u mauña takalin mine, kwian ene be ji chuge bedre. Kaire ene kwian bai me Chube gai dage me age ama gerule kare, Chube be ji gbe kwian alin. Kwian bai Chube gerua uñe ngle kwian ene Chube gerua gadale dage ngle. Chube kwian bai ta gbe lle boi ama alin, kwian ene lle boadale no diali Chube alin, kwian me age ene kwian be ji chuge tanre. 49 Jesu gerudu ene mo chieni chuia giti gire gerudu dare: —Cha chiu nga dba ai giti lle ulita me no mlienga salengwli nga databa sbali jogeba ulen jita nga ene guge ulita nga chege trate kare. Cha me ta manakalin dare, lle tanre kle boale cha alin nga dba ai giti, cha ta lle e boakalin ulita blike. 50 Uñale chage cha be boi daga ngwale, kwian me no be cha gweda, cha kle ta dbe olire tanre tañachuge cha be boi giti. 51 ¿Ba kle tañachuge cha chiu nga dba ai giti kwian ulita gbe toi no ule ene kwian me kira bate? Me dale. Cha gerua giti kwian tanre be mo dollale daba na ole, kwian gweale be cha gerua gai ulia, gweale na me dale, gire kwian ene me cha gerua gai ulia be kira bate daba ole bai cha gerua gai ulia ole. 52 Cha gerua giti nege gwangerugu kwian tanre be mo dollale mo bitallanu ole, kwian tiga toi u gbaitre alinge, kwian gdamai be kira bate kwian boke ole, kwian boke be kira bate kwian gdamai ole. 53 Ñenua be kira bate kirolla ole, kirolla be kira bate ñenua ole, chebia be kira bate jian ole, jian be kira bate chebia ole, ñemaña be kira bate gwadimea ole, gwadimea be kira bate ñemaña ole, ulita gwa mi tañachuge ule modi. 54 Jesu gerudu ene kwian geru jwannga ulita ole, gire Jesu gerudu kwian nglea ulita ole: —Ba ulita ta kle chke nga gbe gdadi noi be boi noi mi boi, ba gwage bogakwadi nga gwalugenga gire ba kle gerule: “Noi be boi”, gire kle boi ene ulia ba gerule kare. 55 Kaire ba gwage nga ngañadi, bogakwa me, nga trate ngaña gire ba kle gerule: “Chui be boi jute”, gire kle boi ene ulia ba gerule kare. 56 Uñale bage gwage nga ngañadi suge bage nga be boi mine, noi be boi o noi mi boi. E suge trate ba ulitage, ¿mineade me suge kaire bage cha kle age Chube kiralla giti cha me kle age Chube kiralla giti aini baske? Ngwale ba kle gerule ba Chube uñe, ba me Chube uñe ulia, ba kle gerule alin allabi ba Chube uñe, agwa gire ta me kle Chube ole. 57 ¿Mineade ba me mo ta gbe ulia Chube ole age no ama takalin kare, ene ba me jiske Chube gwa giti? 58 Ale gerule ba jiske daba gwealege age gweale me no ama ole giti, daba e ba dbe chugagwalla ngwadi ba gbale jiske chugagwallage, daba age ene ba ole ma no jonkare ba mo ta gbadale no kwian ba dbanga ole, ba gerule no ama ole: “Cha me ta jogekalin chugagwalla ngwadi, ma no cha alin cha agedu me no che chege e trage modi ta no giti aini jonkare, gire ene ulita ñage chege no trate ba tale kaire cha tale, ene ba me cha gbe jiske chugagwallage.” Ba gerule ene ba dbanga ole jonkare, gire kwian ba dbanga me ba dbe chugagwalla ngwadi, ene chugagwalla me ba kete kwian guardia dongage tkale skage. 59 Cha gerule ba ole, guardia donga ba tke skage ba mi ñage joge siere ne ngwadige blike, ngeru ba igi ulita ba agedu me no daba ole ñanalla ketadale mo giti gire ene ba ñage skachienga. E kare ene ba mo ta gbadale no Chube ole nege, ene ba me chege jiske Chube gwa giti, ene Chube mi ba gbe ji chuge ba agedu me no gdale —Jesu gerudubi ene ulita kwian nglea ulita ole.
1 E suiale kwian gweale chku Jesudi gerule Jesu ole kwian chugagwalla gobernador kada Pilato giti, ama gerudu Jesu ole: —Pilato kwian kagu kwian nga Galileamu gweda, Pilato kwian bea tugangunga bda beaske gugle Chube gwa giti u gerungwa Chube olege una Jerusalénge. 2 Jesu gerudu: —¿Ba tañachuge mine e giti? ¿Ba tañachuge kwian toinga nga Galileage ulitaske kwian jokeda alin allabi agenga me no tanre malen ama guleda ene? 3 Cha gerule me dale, kwian ulita agenga me no. Ba ulita bai me mo ta blite Chube ole ba be jogeda gire ba oña be kle sugekare Chubege diali chui tangle. 4 Nga soli kada Siloége una Jerusalénge u gbaite kweri jeike ngaña kledu, u e jo chke dba kwian gdataboko giti gdapa ulita giti, kwian e ulita jokeda u kote. ¿Ba tañachuge mine e giti? ¿Kwian toinga una Jerusalénge ulitaske kwian gdataboko giti gdapa e alin allabi agenga me no tanre malen ama jokeda ene? 5 Cha gerule me dale, kwian ulita agenga me no. Ba ulita bai me mo ta blite Chube ole ba be jogeda gire ba oña be kle sugekare Chubege diali chui tangle. 6 Jesu gerudu ene ulita gire Jesu geru na ñachugu kwian ulita alin, Jesu gerudu: —Cha geru ñachuge bage ai kare: Onbre gdaite gli kada higuera tku deage, gli e tigedu gli jo kweri. Gli mauña jo gwage gli edi deage gli gbachiu gweale itadale o me, gli mauña jo chke deage gwagedu glidi, gligba me skwendu amage. 7 Gli mauña chagedu chura gdamai deage gligba nate, gligba me skwendu amage, malen ama gerudu kwian gli mananga ole: “Cha chagedu chura gdamai gligba nate jwandale, gligba me skwendu chage ni gbaite. Ba gli e date, ngwale gli kle dbi gai gli me gbachie.” 8 Kwian gli mananga gerudu kwian gli mauña ole: “Ba gli chuge ngwadi chura na gdaite, cha be nga lite trate ulita glidi tangle, cha be mnugda bate glidi tangle, 9 ene gli ñage gbachie, agwa gli me gbachie ba ñage cha kage kwaite gli date.” Jesu geru ñachugu ene kwian higuera mauña giti, ene be suge kwiange kwian ta me no kwian me mo ta blite Chube ole Chube be ama gbe ji chuge kwian higuera mauña higuera me no datangu kare, kwian ene be chege sugekare Chubege diali chui tangle. 10 Bitaite chui na undege chuiage Jesu kledu kwian tke tangle u mo litangwa Chube gerua jwanngwage. 11 Muinga oga gdaite kle eni Jesu gerua keruchuge, muinga e nu ogaba sbali chura gdataboko giti gdapa, ama chagedu kwebanga kaboge, me ñadu chage kwian kle chage kare, dolla ama gbu oga malen ama chegu ene kwebanga. 12 Jesu gwagedu muinga edi Jesu muinga kadu mo gitigu. Muinga chku Jesudi, Jesu gerudu muinga ole: —Nege ba me chege oga dare, ba be chege toi no. 13 Jesu gerudu ene gire ama ko gbu muinga giti, sugeti muinga cheguni no trate nge kare. Gire muingadi nga chegu suga noare, muinga gerudu no no Chube giti. 14 Jesu muinga dodadu ene gire kwian u mo litangwa Chube gerua jwanngwa mananga skochiu Jesudi Jesu muinga dodadu undege chuiage giti, kwian e u mo litangwa mananga gerudu kwian ulita ole: —Chui dereke lle boi chuia, chui ege ba ñage chie u aige mo dodade, agwa me no chie mo dodade undege chuiage, che undege chuia gadale dage. 15 Kwian u mo litangwa mananga gerudu ene gire Jesu gerudu ama ole kaire kwian na ulita kle eni ole: —Ba ulita ta me no, ba kle gerule nganake ba kle age nganake. ¿Mineade ba kle tañachuge cha agedu me no cha muinga dodadu undege chuiage giti? Ba ulita bda molen, bda siechie, undege chuiage ba me bda chuge ngwadi jogeda sie ole, ba bda skajwennga dbe chi jai undege chuiage ba kle age chui na ulita lle boi chuiage kare. 16 Ba age ene bda alin undege chuiage kaire cha ñage age no muinga ai alin, cha ñage ama dodade undege chuiage. Muinga ai kwian israelita unsuialin kada Abraham oindalla, dolla Satanás nu muinga gaba sbali chura gdataboko giti gdapa, muinga chagedu oga dolla kote chui e ulitage. ¿Ba kle tañachuge ma no cha ama chuge ngwadi oga me ama dodade undege chuiage? Ba ta me no, ba me kle tañachuge no trate. 17 Jesu gerudu ene gire kwian ulita bai Jesu dollale amadi nga chiu ibule, kwian na nglea ulita gwage Jesudi nga suga noare kwiandi Jesu giti, kwian e ulita gerudu: —Jesu kle age tanre noare Chube kirallaske che gwa giti. 18 Jesu geru ñachugu kwian alin mostaza chudea giti, Jesu gerudu: —Cha geru na ñachuge ba ulitage, geru ai giti sugedale bage nege kwian bedreare kle mo ta gbe ulia Chube gerua gai jumale cha kle gerule giti, agwa bdagli kwian ngle be Chube gerua gai ulia be Chube gai mo Chugagwallale, e salengwli kle boi mostaza chudea giti kare. Kwian onbre joge mostaza chudea soli gbaite skie deage, mostaza chudea e tige joge kweri nanga tanre molen gire bdada ngle ñage ugara gbe gli e nanga jegwale ulita toingwa. Ene kaire kwian bai Chube gerua gai ulia kwian e Chube gerua trage kwian na ole, ene geru e chke uñale kwian na tanrege, gire bdagli kwian tanre be Chube gerua gai ulia be Chube gai mo Chugagwallale salengwli mostaza chudea soli tige joge kweri nanga tanre molen kare. 20 Jesu geru na ñachugu kwian alin, Jesu gerudu: —Cha geru ñachuge bage ai kare: Muinga kle pan dodade levadura ole, ama levadura sidri tugenga harina tanreske gire bedre bedre harina uda be sie kweri dodadale panle. E kare ene kwian me Chube uñe be Chube gerua keruchuge, kwian be geru e gai ulia, geru e be tige ama tale, kaire Chube gerua giti bedre bedre kwian na tanre be Chube gai ulia mo Chugagwallale levadura sidri harina gbe sie kweri kare —Jesu gerudu ene ulita kwian ole Chube gerua giti. 22 Jesu chagedu dare una Jerusalén ngnagu, una ulita baini kaire Jesu chagedu ngwadi ama kwian una emu ulita tku tangle Chube geruage. 23 Una e gdaitege kwian gdaite geru kadu Jesuge: —Kwian chugagwalla, ¿kwian tanre be tien gitiru ji chugege joge toi Chube ngwadi o me? Jesu gerudu kwian ulita ole: 24 —Kwian tanre ta jogekalin toi Chube ngwadi agwa kwian me mo ta blite ulia Chube ole joge siere age me noge, kwian ene me ñage joge toi Chube ngwadi. Malen cha gerule ba ulita ole, ba ta jogekalin toi Chube ngwadi ba mo ta gbadale ulia kiraske Chube ole age no ama takalin kare. Joge Chube ngwadi salengwli joge tangle ugaka ka ulege kare, 25 ba me mo kira gbe joge tangle blike ugaka ka ulege, u mauña ugaka jege gire ba ulita be chege goga ba be ta jogekalin gwa ba be ugaka dagenga ba be gerule u mauña ole: “Cha chugagwalla, ugaka degenga cha alin.” Chugagwalla be gerule ba ulita ole: “Cha me ñage ugaka degenga ba alin, me uñale chage ba chema.” 26 Gire ba ulita be gerule chugagwalla ole: “Ba cha ulita uñe, cha ulita blidu ule ba ole, cha unallaske ba cha ulita tku tangle geruge.” 27 Chugagwalla be gerule: “Cha gerule ba ulita ole, ¿ba chema? Cha me ba uñe. Ugaka kle jegaba, joga siere chage, ba ulita kwian agenga me no tanre.” 28 U mauña be gerule ene gire ba ulita be chege goga olire tanre ji chuge boi tirare ngeru. Ba be chege goga, ba be ñage gwage kwian be kle Chube ngwadidi, ba be ten Abrahamdi Isaacdi Jacobdi kaire ba be ten kwian Chube gerua ketanga ulitadi, agwa ba be chege siere kwian e ulitage. Kaire ba be gwage kwian chieba chui chie ngwangedi kwian chieba chui joge ngwangedi, ba be gwage kwian chieba nga na ulitagedi, kwian ulita be kle toiba dba Chube ngwadi ule Chube ole nga suga no ole. 30 Jesu gerudu ene kwian ole gire gerudu dare: —Cha gerule ba ulita ole, nege nga dba ai giti kwian gweale kle suge moge ma kweri dabage, Chube ngwadi kwian ene be ma soli Chube gwa giti. Agwa nege nga dba ai giti kwian gweale suge moge ma soli daba nage, Chube ngwadi kwian ene be ma kweri Chube gwa giti. 31 Jesu kle gerule ene gire kwian fariseo chku mneite gerule Jesu ole, ama ulita gerudu: —Joga siere aini, ba me manade dare, chugagwalla rey Herodes ta ba gwakalinda. 32 Gire Jesu gerudu kwian fariseo e ulita ole: —Jogani geru dbe kwian daba anblitanga ege, ba geru kete amage ai kare cha alin: “Nege, suialin cha be kle lle boi aini, cha be dolla jwen siere kwiange, cha be kwian oga tanre dodade, gire mongikege lle cha alin boadale be bidege. 33 Agwa nege, suialin, mongi cha chagedale dare una Jerusalén ngnagu. Ama me ñage cha gweda aini, kwian Chube gerua ketanga me ñage mo gwangeda sugekare una Jerusalénge.” Ba geru e kete Herodege cha alin. 34 Jesu geru kagu ene kwian fariseo ole Herodes alin, gire Jesu chagedu lle boi dare una Jerusalén ngnagu, jonkare Jesu kledu tañachuge kwian ulita una Jerusalénmu giti Jesu gerudu: —Kwian ulita una Jerusalénmu, ba enusulian unsuialin kwian ngle Chube gerua ketanga guda, kaire nege Chube kle mo gerua dbanga ngle kage ba ulita alin, ba kle ama skie ke giti kle ama gweda, ba kle age salengwli ba enusulian oña unsuialin agedu kare. Cha ta olire tanre ba ulita giti, cha noare ba ulita ole, agwa ba ulita me no cha ole. Cha tadukalin tanre age no ba ulita alin ba ulita manade no salengwli koi kle soli lite ole manade mo jiga gwaru kare, agwa ba ulita me tadukalin cha age ene ba alin, ba me cha gau ulia. 35 Malen cha ba chuge ngwadi jogengale sugekare chage. Cha gerule ba ulita ole, nege gwangerugu ba mi gwage chadi dare aini, agwa chui be chke gire ba ulita be gwage chadi chieni nakwaite, chui ege be suge ba ulitage Chube cha kagu ba ulita alin gire ba ulita be gerule cha giti: “Ama noare, Chube ama kagu nga dba ai giti kwian ulita alin” —Jesu gerudu ene ulita kwian una Jerusalénmu giti.
1 Chui gbaite undege chuiage Jesu jo blire kwian fariseo chugagwalla gdaite ullage, kwian fariseo na tanre kledu eni, kaire kwian tanre daba tkanga tangle Moisés chadalla giti kledu u ege, kwian e ulita takalin Jesu gbe jiske age gweale giti undege chuiage malen ama ulita kle eni gwage Jesudi. 2 Kwian onbre gdaite oga jingme lute ole kledu u e amañage malen kwian kledu kote kwian oga giti Jesu ole. 3 Jesu geru kadu kwian fariseo ulitage kaire kwian daba tkanga tangle Moisés chadalla giti ulitage: —¿Noare kwian oga dodade undege chuiage o me? ¿Moisés chadalla gerule mine e giti? 4 Kwian fariseo ulita kaire kwian ulita daba tkanga tangle Moisés chadalla giti chegu kamne me su jainnga. Jesu kwian oga gau kodi, Jesu kwian oga dodadu gire kwian oga jo chke noni, Jesu ama kaguni gudegu. 5 Gire Jesu gerudu kwian fariseo ole kwian daba tkanga tangle Moisés chadalla giti ole ulita: —Ale gerule kirolla banu bda banu joge sklienga blebitaske undege chuiage, ¿ba be lle boi chuia manade gire ba be bda jwen keda kirolla jwen keda, o ba be ama jwen keda blike chui e amañage undege chuiage? Ba mi manade dale, ba be tai dage kirollage bdage gire blike ba be ama jwen siere ama kle skliebanga ngwadige. 6 Jesu gerudu ene gire kwian fariseo kaire kwian daba tkanga tangle Moisés chadalla giti chegu kamne me ñadu jainnga Jesu kalen. 7 Jesu gwagedu kwian ulita kadabadi blire kwian fariseo chugagwalla ullage, kwian ulita kledu toingwa no jinade toigda dba blingwage, malen Jesu geru ñachugu kwian e ulita alin: 8 —Kwian gweale ba kade mo jwen chuia ollade, ba joge chke chui edi gire ba me toingwa no jinade toigda, kwian na ma kweri ma no bage be chke, ama toidale dba toingwa e giti. 9 Ba nu toingwa no gaba gire kwian nu ba kadaba ñage gerule ba ole: “Ba toingwa ai chuge ngwadi daba na alin, ama ma kweri bage be toi dba aini.” Kwian gerule ene ba ole gire badi nga be chie ibule joge toi toigda bdagli nate dba giti. 10 Kwian ba kade chui ollade, ba joge chke gire ba toidale dba toigda bdagli giti, ene kwian ba kadu gwage badi gire gerule ba ole: “Cha skatemanalla, bai toi dba toigda no ai ngerudba giti.” Kwian gerule ene ba ole gire nga be suga noare badi ba be toigda no kweri gai kwian kle ba ole blingwage ulita gwa giti. 11 E kare ene kwian baige suge kweri mo tale kaire mo gbe no kweri kwian na gwa giti, Chube gwage kwian ene me kweri, ama ngwale ama soli. Agwa kwian baige suge soli mo tale kaire mo gbe kwian na chudaboangale, Chube gwage kwian ene kweri. 12 Jesu gerudu ene kwian kadaba ulita ole gire kwian nu Jesu kadaba ama ole Jesu gerudu: —Ba bligda dodade chui ollade gire ba me mo skatemanalla alin kade, me mo daballa alin kade, me mo bitallagda alin kade, me kwian lle molen tanre kle toi kodi ba ullage alin kade blire ba ole, kwian e ulita lle molen tanre ñage ba kade ama ullage blire ba ama kadu blire kare, agwa kwian me lle molen me ñage age ene naskuni ba alin. 13 Ma no ba bligda dodade chui ollade ba kwian ai kare kade: Ba kwian me lle molen kade, ba kwian me chage trate kade, ba kwian me ten kade blire ba ole. 14 Ba kwian ene kade gire nga be suga no badi, kwian ene blire ba ole me ñage ba kade ba ama ullu kare, agwa bdagli Chube be kwian no ulita gbeni gwade chuia, chui ege nga be suga noare badi, ba agedu no kwian alin nga dba ai giti ñanale Chube be age no ba alin nga ngaña giti —Jesu gerudu ene kwian nu Jesu kadaba ole. 15 Kwian tanre kle toiba dba blingwage Jesu keruchugu gerule ene gire kwian gdaite gerudu Jesuge: —Chui be chke gire nga be suga no no kwiandi kwian bai joge toi Chube ngwadi nga ngaña giti, nga ngaña giti Chube ngwadi kwian e be kle ule Chube ole kwian e be nga ollade nga suga no ole. 16 Kwian gerudu ene ama kledu tañachuge mau giti ama agali be kle ule Chube ole be nga ollade nga ngaña giti. Chku uñale Jesuge kwian gdaite e kle tañachuge ene mau giti, Jesu gerudu ama ole: —Cha geru ñachuge bage ai kare: Kwian gdaite u mauña chui gbu nga ollade, ama kwian ngle kadu blire ule, ama bligda jinangu ngle kwian kadaba ulita alin. 17 Chui ollade chku, bligda klebi biale, gire u mauña kwian lle boanga ama alin gdaite kagu geru jige kwian kadaba ulitage bligda kle bialebi gutadale. Kwian lle boanga jo, ama gerudu kwian kadaba ulita ole: “Nege ba chie nga ollade, bligda kle biale gutadale.” 18 Kwian lle boanga jo chke geru kete kwian kadaba ulitage gire kwian kadaba ulita gdaite gdaite gerudu: “Ba chugagwalla chui gbu nga ollade, ama cha kadu, cha gerudu ama ole ima cha ñage joge chui ollade ama ole, agwa gire nege cha me ñage joge.” Kwian ngeru gerudu: “Cha dbi gigu, cha jogedale tienda dbidi malen cha me ñage joge nga ollade ule. Gerule ba chugagwalla ole cha me ñage joge blire ama ole, cha lle na boadale mo alin.” 19 Na gerudu: “Cha chbi gigu gdataboko lle boagda, cha jogedale ama chuge ama lle boi no o me lle boi no, malen cha me ñage joge blire ule.” 20 Na gerudu: “Cha mo jun nege sugeti, cha me muinga jigakalin gballa malen cha me ñage joge.” 21 Kwian kadaba ulita gdaite gdaite gerudu salengwli ene kwian lle boanga ole, lle boanga joni jo chkeni chugagwalla ngwadi geru tragu ulita chugagwalla ole, gire chugagwalla skochiu tanre kwian kadaba ulita ole, chugagwalla gerudu kwian lle boanga ole nabitaite: “Joga jrite jon kaire kaire unaske kwian na jinade, ba kwian me lle molen kade, ba kwian me chage trate kade, ba kwian me ten kade. Joga kwian ene kade nga ollade cha ole, ba chieni kwian ene dbe.” 22 Lle boanga jo, ama agedu ulita chugagwalla ama kagu kare, gire kwian lle boanga chkuni gerudu chugagwalla ole: “Cha chugagwalla, cha chkuni kwian ngle dbe, agwa nga bebi kwian na alin, bligda kle kwian na alin kaire.” 23 Chugagwalla gerudu kwian lle boanga ole: “Joga jrite blike kwian me kle toi unaske nate, ba jrite jon kaire kaire ba ten ngwange ba kwian kade, ba gerule kwian e ulita ole ama chiedale blire nga ollade cha ole, kwian e ulita chke gire u be chke ete kwian ole. 24 Cha gerule ba ole, cha kwian ngeru kadu blire, kwian e ulita ni gdaite be cha bligdalla gute nga ollade cha ole.” Jesu geru ñachugu ene ulita kwian fariseo ullage Jesu blidu ngwadi gire Jesu jo dare una Jerusalén ngnagu. 25 Jesu kle chage jonkare, kwian tanre jo ule Jesu ole, Jesu gwagedu kwiandi chage mo nate gire Jesu gerudu ama ulita ole: 26 —Kwian bai ta chagekalin ulia cha ole age cha takalin kare diali, kwian ene mo ta dbadale ma no cha ole mo bitallanu ulita olege, kwian mo ta dbadale ma no cha ole mo ñenua olege mo chebia olege mo muiralla olege mo kirogwalla olege mo daballa olege mo ibotea olege kaire mau olege, kwian bai mo ta dbe no ene cha ole ñage chage ulia cha ole age cha takalin kare diali. Agwa kwian bai me tañachuge cha giti ngeru tañachuge kwian na ulita giti ngeru, kwian ene me kle mo ta gbe age cha takalin kare ama me ñage chage cha ole. 27 Kwian bai ta chagekalin ulia cha ole me ñage tañachuge mau giti ngeru, ama mo ta gbadale cha alin ole age ulita cha takalin kare, kwian ene boi daga ngwale cha giti me tallade, kwian ene kle mo ta gbe age cha takalin kare ama ñage chage cha ole. 28 Ale gerule ba gweale ta u kweri jeike ngaña dodakalin, ngeru ba be tañachuge: “¿Cha be lle ulita u dodagda gige kwabaige?” Ngeru ba be igi banu ten ulita, ene chke uñale bage igi be ñage lle ulita gigagda o me. 29 Ba me age ene ngeru ba lle gige blike u dodagda igi mi ñage ba ole, u mi joge ka giti ba ole, kwian ulita be gwage badi, kwian be gide badi, 30 kwian be gerule me no badi: “Kwian e u dodadu me ñadu u gbe ka giti, ama ta kirogwa kare me tañachugu kwian juma kare, me ñadu u dodade ulita, ama koladu ngwale udi.” 31 Ale gerule kwian chugagwalla giti, chugagwalla nga nage be chie dole chugagwalla nga gdaite ole, ngeru chugagwalla gdaite be guardia donga ten nate ulita biale, guardia donga ngle diez mil, donga nga nage ma ngle veinte mil, ¿donga diez mil ñage kirachke donga veinte mildi? 32 Suge chugagwalla gdaitege donga diez mil me ñage kirachke veinte mildi, chugagwalla na donga ma ngle veinte mil molen kle bate gire chugagwalla donga ma bedre diez mil ole be kwian mneite gai be kage geru jige chugagwalla na kwian donga veinte mil olege: “Che me kira bate, che chegedale ta no ole modi.” 33 Guardia donga ulita bebi kira bate gire chugagwalla gdaite kle tañachuge ngeru be boi bdagli giti, ene kaire ba ulita bai ta chagekalin cha ole, ngeru ba tañachugadale no chage cha ole giti ulia ba be ñage mo ta gbe kiraske chage diali cha ole me mo tallade, ba ta me kle biale ba llea ulita chuge ngwadi chage cha ole gdale, ene ba me ñage chage cha ole. 34 Jesu gerudu dare: —Cho mana noare, agwa cho joge skeke gire cho ene me ñage jwliteni naskuni bale gutadale. 35 Cho sketigeda me no, ¿lledale kwian cho ene oge? Kwian me cho ene oge dale, kwian cho ene mlienga, cho ene ngwale. Ene kaire kwian bai me kle mo ta gbe tañachuge ngeru cha giti age cha takalin kare, Chube gwa giti kwian ene salengwli cho sketigeda me no cho ngwale kare. ’Kwian bai ta Chube gerua uñakalin kwian ene cha kerua gbadale gdadi —Jesu gerudubi ene kwian ulita kle chage ama nate ole.
1 Bitaite kwian ulita igi ganga chugagwalla emperador nga Romamu alin kaire kwian na tanre agenga me no jo chke mo lite Jesu kle ngwadi Jesu keruchuge gerule Chube giti. 2 Kwian fariseo mneite kaire kwian daba tkanga tangle Moisés chadalla giti mneite kledu gwage kwian ulita kledu mo lite Jesu oledi gire ama gerudu modige Jesudi kwian ulita kle mo litaba giti: —Onbre e kle age me no, ama kle mo ta dbe no kwian agenga me no ole kle kwian agenga me no ulita gai ngwange no, diali ama kle blire ule kwian agenga me no ulita ole. 3 Kwian fariseo mneite alin kaire daba tkanga tangle Moisés chadalla giti mneite alin Jesu geru ai ñachugu, Jesu gerudu: 4 —Ba ulita kle aini gweale bda oveja ngle molen cien, gire bda oveja gdaite jogengwa ba ngeru, ¿ba be age mine? ¿Ba be ta jogenga oveja gdaite jogebanga giti be oveja gdaite chuge ngwadi jogenga? Ba oveja mauña mi ta jogenga ovejage, ba be oveja na dare noventa y nueve jige litaba ole ngmadi nga oveja manangwage gire ba be joge oveja gdaite jogebanga jinade nate, ba be oveja jinade tanre gire oveja skwen bage. 5 Oveja skwen bage ba oveja gai ba oveja mlie kwligage nga suga no ole oveja giti. 6 Gire ba chieni oveja dbe gudegu, ba chkeni gude gire ba mo skatemanalla ulita kade kaire ba kwian na ulita kle toi kodi ba ullage kade, gire ba gerule kwian e ulita ole: “Bai nga ollade cha ole oveja ai giti, nga suga noare chadi oveja giti, oveja jongwa cha ngeru, cha oveja jinadu, oveja skwendu chage. ¡Ale oveja ollade nga suga no ole!” 7 Nga dba ai giti ba mo ta dbe ene oveja jogebanga ole, e kare ene nga suga no nga ngaña giti kwian gdaitre alin joge siere age me noge mo ta blite Chube ole giti, nga ma suga no kweri nga ngaña giti kwian e gdaite giti kwian na ulita noventa y nueve gitige, kwian noventa y nueve ulita tañachuge ama ta no trate Chube gwa giti, kwian e ulitage agali suge ama kle age no ulita malen ama me mo ta blitadale Chube ole —Jesu geru ñachugu ene oveja gdaite jogebanga giti. 8 Jesu geru na ñachugu kwian fariseo ulita alin kaire kwian daba tkanga tangle Moisés chadalla giti ulita alin: —Muinga gdaite igi molen gugataboko, igi e gugaite jogenga muinga ngeru, ¿muinga be age mine igi e nate? Muinga be jichra gwadege, jichra giti muinga be igi jinade nate trate gwa ugdo jegwale, muinga be nga lite ulita gwa tangle, bdagli ene igi be skwen nate muingage. 9 Igi be skwen nate muingage gire muinga be skatemanalla ulita kade, kaire be kwian na ulita kle toi kodi ama ullage kade, be gerule kwian ulita ole: “Nga suga noare chadi. Bai nga ollade cha ole igi giti, igi jongwa cha ngeru, cha igi jinadu nate, igi skwendu chage. ¡Ale igi ollade nga suga no ole!” Muinga be gerule ene kwian ole be kwian kade nga ollade nga suga no ole. 10 Cha gerule ba ole, ene kaire nga ma suga no lle boanga Chube alin nga ngaña giti tanredi kwian gdaitre alin ole joge siere age me noge mo ta blite Chube ole giti. 11 Kaire Jesu geru na ñachugu: —Kwian onbre gdaite kirogwa onbre molen gdaboke. 12 Kirogwa daba nate gerudu ñenua ole: “Tata, bdagli ba be chude girabate bda girabate dbi girabate ulita cha ole cha daballa ole, ba e bonga chanu kete chage nege, cha me ta manakalin.” Kirogwa daba nate gerudu ene ñenua ole gire ñenua chude girabatu bda girabatu dbi girabatu ulita kirolla boke ole, ñenua lle ngle ketu kirolla bokege. 13 Jo chuia kaire kirogwa daba nate chude, bda, dbi maunu ulita chbadu, gire ama igi gau ngle lle e ulita ñanale. Ama jo toi bate nga nage, jo chke nga batege gire ama me mo ta gbu chage trate, ama igi kagunga ulita lle tanre ngwale giti. 14 Ama igi kagunga ngwale ulita gire bli kweri chiu nga ege kwian ulita alin, kwian onbre e chegu me igi molen ama bli chugu tanre. 15 Ama ole igi me, ama chagedu kole malen ama jo lle boi jinade boadale kwian onbre gdaite lle molen kle toi nga ege ngwadi, onbre e kle toi nga ege lle boale ketu amage boadale, ama chunchi manadu onbre e alin. 16 Ama kle chunchi ulle gligbadi, ama bli ole tanre ama takalin chunchi bligdalla gute tike, agwa ama alin ni gligba keta gutadale. 17 Ama jogeda dare bli ole gire ama tachku mo ñenuage, ama gerudu mo tale: “Llani cha ñenua jwiage bligda tanre no gutadale, kwian lle boanga cha ñenua alin ulita kle blire no, cha ama kirolla aini cha jogeda bli ole. 18 Cha be jogeni cha ñenua ngwadi, cha be gerule cha ñenua ole: ‘Tata, cha agedu me no Chube dollale ba dollale kaire, 19 chage suge cha me agedu no ba ole malen cha takalin ba me cha gaini mo kirollale, agwa ba cha gai kwian lle boanga ba alin.’ ” 20 Ama gerudu ene mo tale gire ama mo gbu biale ama joni jonkare ama ñenua nate, ama jo gwagudeguda bate jonkare ñenua gwagedu mo kirolladi chieni gwagudeguda, ñenua ta sugedu tai dage tanre mo kirollage, ñenua jritedu ama ngwange, ñenua ama gau ngwange nga suga no ole, ñenua ko bliu kirolladi, ñenua kirolla sobadu. 21 Gire kirolla gerudu ñenua ole: “Tata, cha agedu me no Chube dollale ba dollale, chage suge cha me agedu no ba ole malen cha takalin ba me cha gaini mo kirollale, ba cha gai kwian lle boanga kare ba alin.” Ñenua gerudu kirolla ole: “Ba cha kirolla chanu, ba me tallade cha ngeru, ba cha kirolla, cha no ba ole.” 22 Ñenua gerudu ene mo kirolla ole gire gerudu kwian lle boanga ulita ole: “Joga ñometragda no jwen blike cha kirolla alin, ba ama ngama tke no, lle tkale koge jwen tke ama koge, kaire zapato tke ama serage. 23 Ba joge chbi ma blodi jwen, ba chbi gweda. Ale blire ule cha kirolla ole, ale nga dbe suga no cha kirolla ole. Cha kirolla ai jongwa chage, cha tañachugu ama jokeda. Me dale ene. Ama kle gwade, nege ama chkuni aini chadige. ¡Ale cha kirolla chuia ollade ule!” Kwian ulita lle boanga tale nga chegu suga no, ama ulita chui olladu ule kirogwa ñenua ole kirolla chkuni giti. 25 ’Kirolla daba ngeru kledu lle boi deage, ama chiuni gudegu chku kodi uge gire ama ologe sugedu kwian kle lle dagenga kwian ulita kle nga ollade skwen gdate. 26 Kirolla e lle boanga gdaite kadu mo gitigu gire geru kadu amage: “¿Kle boi mine gwa?” 27 Kwian lle boanga gerudu: “Ba daballa chkuni noni gudeni ba ñenuadi, malen ba ñenua kle ba daballa chuia ollade, ba ñenua chbi ma blodi gwanguda ba daballa alin gutadale ule.” 28 Daballa ngeruge geru e chku uñale gire ama skochiu tanre mo tale, ama me mo ta gbu joge gwa daballa soli kle ngwadi, ama chegu bate sugekare uge. Bdagli ñenua jo agali kirolla juma jwen gudegu, ñenua gerudu kirolla juma ole: “Bai cha ole gwa ba daballa chkuni chuia ollade.” 29 Kirolla juma gerudu ñenua ole: “Cha mi joge gwa ba ole ba kirolla soli chuia ollade. Sbali chura ngle cha kledu lle boi no ba alin, cha ba gau dage no diali, gire mau tale ni ba bda soli gdaite ketu gwaleda chui olladale cha alin blire ule cha skatemanalla ole. 30 Ba kirolla soli me no ba ole me ba gau dage, ama ba igia junnga ulita ama ba igia kagunga ngwale muinga tanre me nodi, nege ama chkeni gire blike ama alin ba chbi blodi gwanguda gutale ama alin.” 31 Kirolla juma ka bo ene ñenua ole gire ñenua gerudu kirolla ole: “Cha kirolla, ba me ka boi ene cha ole, ba diali kle cha ole, lle chanu ulita banu. 32 Agwa ba daballa jogebanga ama chkuni, noare che ama chuia ollade ta no ole ama ole ule, che nga dbale suga no ama giti, ama jongwa chege, che tañachugu ama jokeda che mi gwageni amadi, agwa nege ama chkuni aini chedige, ama kle gwade malen noare che ba daballa chuia ollade, che mo ta gbale nga suga no chui ollade ba daballa giti” —Jesu geru ñachugu ene ulita kwian fariseo alin kaire kwian daba tkanga tangle Moisés chadalla giti alin.
1 Jesu geru ñachugu kwian geru jwannga amage gdataboko giti gdaboke alin, Jesu gerudu: —Kwian onbre gdaite igi molen tanre kaire lle molen tanre. Ama kwian igi mananga gdaite gbu igi amanu kaire lle ulita amanu manade. Kwian na gwagedu igi manangadi me kle igi manade no gire kwian e jo geru kete igi mauñage, kwian gerudu: “Kwian igi mananga ba alin me kle igi manade no, ama kle ba igia kagenga tanre ngwale.” 2 Kwian igi mauñage chku uñale kwian igi mananga me kle lle boi no gire kwian igi mauña kwian igi mananga kadu geru trage. Kwian igi mananga chku kwian igi mauñadige, gire igi mauña gerudu igi mananga ole: “Cha ole gerudre ba me kle mo ta gbe cha igia manade no, cha takalin ba lle bo ulita chadalla kete chage, nege gwangerugu ba mi lle boi cha alin dare, nege cha ba mlienga.” 3 Kwian igi mauña gerudu ene gire kwian igi mananga tañachugu mo tale: “¿Nege gwangerugu cha be age mine? Cha chugagwalla mi cha gbe lle boi dare, cha me ñage lle na boi mo alin toigda, cha kira me chude ngama gbe, kaire nga chie ibule chadi igi kade kwian nage mo alin toigda. ¿Cha be age mine?” 4 Kwian igi mananga kle tañachuge ene gire ama tachku ama be age mine, ama tañachugu mo tale: “Nege cha be age no kwian na alin, ene kwian e ulita be cha gai ngwange no ama ullage cha mi kle lle boi dare igi mauña alin gire.” 5 Igi mananga tañachugu ene mo tale gire ama daba na jiskenga igi mauñage kadu gdaite gdaite geru trage ole, kwian jiskenga ngeru chku igi manangadi, igi mananga geru kadu daba jiskenga ege: “¿Ba jiske mangire cha chugagwallage?” 6 Kwian jaindunga: “Cha jiske kin bajrilella ngle cien.” Kwian igi mananga gerudu: “Chada degaba ba jiske giti kle ai gerule ba jiske kin bajrilella ngle cien, nege ba chada dege ba jiske kin bajrilella ma bedre cincuenta alin allabi.” 7 Kwian jiskenga na chku igi manangadi, igi mananga geru kadu amage: “¿Ba jiske mangire cha chugagwallage?” Kwian jaindunga: “Cha jiske trigo sakolla ngle cien.” Kwian igi mananga gerudu: “Chada degaba ba jiske giti kle ai gerule ba jiske trigo sakolla ngle cien, nege ba chada dege ba jiske trigo sakolla ma bedre ochenta alin allabi.” 8 Igi mauñage chku uñale igi mananga tachku blike age no kwian jiskenga ole gire igi mauña gerudu no igi mananga ole: “Ba chuga no no, ba tañachugu blike age mo alin, e no.” Jesu geru ñachugu ene gire gerudu dare kwian geru jwannga ole: —Kwian me Chube uñe tachke age ma blike daba na alin ene daba na ñage ama chudaboi naskuni, ama kle mo ta gbe blike age ta giti daba na alin, kwian Chube uñe me age ene. 9 Cha gerule ba ole ba bai Chube gai ulia, ba igi molen ba kwian me lle molen chudaboadale igi e giti, ene kwian e be ba gai mo skatemanallale. Lle ulita banu be bidege, ba mi chege lle molen gire ba tachkedale chui be chke gire Chube be ba gai ngwange no nga ngaña giti be age no ba alin ba daba me lle molen chudaboi nga dba ai giti ñanale. 10 Bai mo ta gbe ulia lle bedre boi no kaire be mo ta gbe ulia lle ngle boi no, bai me mo ta gbe ulia lle bedre boi no kaire mi mo ta gbe ulia lle ngle boi no. 11 Nga dba ai giti ba me mo ta gbe ulia ba igia manade no, me age no igi ole, gire Chube mi lle noare nga ngaña giti kete bage. 12 Ba me ta gbe ulia igi daba nanu manade no, ¿chema be ta igi ketakalin bage ba alin age ole ba takalin kare? Ba me mo ta gbe ulia igi daba nanu manade no, ene kaire ba mi mo ta gbe igi maunu manade no. 13 Kwian lle boanga gdaite me ñage lle boi no chugagwalla boke alin. Lle boanga mo ta gbe lle boi no chugagwalla gdaite alin ama me ñage lle boi no chugagwalla na alin kaire. Lle boanga lle boi chugagwalla boke alin gire ama be mo ta dbe no chugagwalla gdaitre alin ole, chugagwalla na ole ama mi mo ta dbe no dale, ama be jainchke chugagwalla edi. Ene kaire ba mo ta gbadale tañachuge lle boi no Chube alin me tañachuge diali igi gai giti lle lite ole ngle mau alin giti, ma no ba mo ta gbe tañachuge Chube giti alin allabi toi ama takalin kare. Ba mo ta dbe no igi alin ole me ñage mo ta dbe no Chube ole, ma no tañachuge Chube alin giti, me tañachuge lle boke giti ule. 14 Jesu gerudu ene gire kwian fariseo ulita kle mo ta gbe no igi ole Jesu keruchugu gerule ene igi giti, gire fariseo ulita Jesu gidadu geru Jesu gerudu giti. 15 Jesu gerudu kwian fariseo ole: —Ba ulita takalin kwian na gwage ba kle age nodi, gire ba takalin kwian gerule ba giti ba noare ba kle chage trate. Ba age kwian gwa giti ene kwian tañachuge ba kle age trate ulia Chube takalin kare, agwa me uñale kwiange ba ta mine, Chube gwage ba tadi, uñale Chubege ba ta mine. Ba age no kwian tañachuge kare agwa Chube gwage ba kwian me no —Jesu gerudu ene kwian fariseo ole. 16 Jesu gerudu dare: —Unsuialin Moisés Chube gerua degu, geru e chegu degaba kwian ulita alin, ene chku uñale ba enusulian oña ulitage ama chagedale mine Chube gwa giti. Kaire kwian tanre Chube gerua ketanga Chube gerua tragu ba enusulian oña ulita ole. Geru e chku Juan-Bautista chuiage tangle gire Juan-Bautista chuiage gwangerugu Chube gerua jagere tragle kwian ulita ole, geru e gerule kwian bai Chube gerua cha giti gai ulia kaire Chube gai mo Chugagwallale, kwian ene be toi diali chui tangle Chube ole nga ngaña giti. Kwian tanre kle geru e keruchuge nga suga no ole, kwian e ulita kle mo ta gbe ulia Chube gai mo Chugagwallale. 17 E me gerule Moisés nu Chube gerua degaba unsuialin geru e me no ba kle toi nege alin, geru e ulita no ba ulita alin. Nga ngaña giti kaire nga dba ai giti, nga e ulita be bidege, agwa Moisés nu Chube gerua degaba mi bidege dale ni geru gbaite be bidege, geru e ulita be chege diali chui tangle kwian ulita alin. 18 ’Cha gerule ba ulita ole, kwian onbre bai kaire mo muingalla chuge ngwadi gire mo jwen muinga na ole, onbre e kle age me no Chube gwa giti, Chube gwage e salengwli onbre e kle mo chuge ke giti muinga e ole kare. Kaire ñengula nu mo muingalla chugaba ngwadi, muinga e ole onbre na mo jwen, onbre e kle age me no Chube gwa giti, Chube gwage e salengwli onbre e kle mo chuge ke giti muinga e ole kare. 19 Jesu gerudu ene kwian fariseo ole gire Jesu geru ñachugu ama ulita alin, Jesu gerudu: —Kwian onbre gdaite igi molen tanre lle molen tanre, diali chui gdale ama kle toi no kle bligda tanre no gute kle mo ngama tke ñometra noareske. 20 Kwian na kada Lázaro, ama me lle molen, ama oga, ama uda tuge nate jingme ole, diali ama kle toiba dba onbre lle molen ullage goga ugakage. 21 Lázaro bli ole kle bligda manade ugakage, kwian lle molen bligdalla bita jwatenga dba Lázaro bligda bita ene jwankalin nate mo alin gutadale, ama ta unchkekalin ngle kwian lle molen bligdalladi, agwa bligda mauña ni bligda sidri kete Lázaroge. Kaire to ngle chke amadige, to ama uda tugebada denga. 22 Jo chuia kaire gire Lázaro jokeda, lle boanga Chube alin nga ngaña giti ngle Lázaro oña du Abraham oña kle ngwadi nga noarege kwian no oña kle toi ngwadige. Kwian lle molen tanre kaire jokeda, ama jaba tkere dbige, 23 ama oña dule kwian me no oña kle joge ngwadige, nga me noge jitaleske. Kwian lle molen oña kle boi daga ngwale nga ege gire ama gwagedu bate Lázaro oñadi, Lázaro oña kle ule Abraham oña ole nga noarege. 24 Kwian lle molen oña ngautu Abraham oñadi: “Cha enusulian unsuialin Abraham, tai dage chage, ba Lázaro kage chi dbe cha alin sidri jadale, cha kle boi daga ngwale tanre aini jitaske.” 25 Abraham gerudu: “Cha gerule ba ole nege, ¿ba me tachke ba kledu toi nga dba giti ba toidu no ulita agwa Lázaro me toidu no? Nege Lázaro kle toi no aini, ba me dale, nege ba kle boi daga ngwale. 26 Kaire kwian aini me ñage joge ba ngwadi, kwian llani me ñage chke aini cha ngwadi, kegde kweri kle cha ngwange ba ngwange, cha me ñage Lázaro kage ba ngwadi.” 27 Gire kwian lle molen oña gerudu Abraham ole: “Cha takalin ba Lázaro kage cha bitalla ngwadi gerule cha daballa gdatiga ole chegu llani, 28 ba Lázaro kage geru kete cha daballa gdatiga cheguge ama ulita mo ta blitadale Chube ole, ama ulita mo ta gbadale Chube gai ulia, ene ama me chie aini boi nga daga ngwalege.” 29 Abraham oña gerudu: “Cha me Lázaro kage Chube gerua trage ba daballa ole, unsuialin Moisés Chube gerua degu kaire kwian ngle Chube gerua ketanga Chube gerua degu, ba daballa chada e ulita molen, Chube gerua degaba chada ege ba daballa mo ta gbadale gai dage.” 30 Gire kwian lle molen oña gerudu: “Ulia ama Chube gerua degaba molen, agwa ama me kle geru e gai ulia, ma no kwian jogebada chkeni gwade jogeni nga dba giti geru jige amage gerule no ama ole ama Chube gerua gadale ulia, kwian jogebada chkebani gwade gerule ene ama ole gire ama be mo ta blite ulia Chube ole.” 31 Abraham oña gerudu: “Moisés nu Chube gerua degaba, kwian Chube gerua ketanga nu Chube gerua degaba, ba daballa me kle geru e gai ulia, kaire agwe ene ama mi kwian jogebada chieni gwade gerua gai ulia.” Abraham oña gerudu ene ulita kwian lle molen oña ole —Jesu geru ñachugu ene ulita kwian alin.
1 Jesu gerudu kwian geru jwannga gdataboko giti gdaboke ole: —Diali lle me no be kle nga dba ai giti, kwian be ta agekalin me no. Kwian bai age me no daba na ole daba gbe age me no, kwian ene be boi daga ngwale be ji chuge tanre daba gbe age me no gdale. 2 Ma no kwian daba gbanga age me no ene alin joge mliaba ble jereske ke kweri lugaba mo siroge, ene kwian e be jogekeda mi chege dare daba nu cha gerua gaba ulia me sbali gbe ta blite age me no joge siere cha geruage. 3 Ba ulita mo ta gbale chage ta giti me daba na gbe age me no. ’Cha gerule ba ole, daba Chubenu age gweale me no ba dollale ba ka boadale ama ole ta no giti ama kle age giti, ama ba keruchuge mo ta blite ama gerule ba ole: “Cha me age dare me no ba dollale”, gire ama agedu me no ba talla mliadalenga. 4 Chui gbaite ama age me no bitaguke ba dollale gire bitaguke ama mo ta blite chke gerule ba ole: “Cha me age dare me no ba dollale”, bitaguke ama agedu me no ba dollale ba talla mlienga. 5 Jesu gerudu ene gire kwian geru jwannga Jesuge ulita gerudu Jesu ole: —Cha Chugagwalla, cha takalin ba cha ta gbe ma ngle no Chube gerua gai ulia. 6 Jesu gerudu: —Ba mo ta gbe sidri alin Chube gerua gai ulia gire bedre bedre Chube be ba ta gbe ama gerua gai ma ngle, e salengwli mostaza chudea soli tkakle, kle tige kle joge kweri kare. Ba mo ta gbe Chube gerua gai ulia ene, gire ba ñage gerule gli kweri ole: “Chieda keda, joga toi bleske”, ba gerule ene gli ole gire gli age ba gerudu kare. 7 Jesu gerudu dare kwian geru jwannga ole: —Ale gerule ba gweale kwian lle boanga molen, ba ama kage lle boi deage ama kle nga bate kle bda manade, bigwa chieni gudegu chke gwa gire ¿ba be gerule ama ole: “Bai toi dba aini blire cha ole”? 8 Ba mi age ene dale, ba be gerule ama ole: “Ba bligda dodadale cha alin cha gute, ba cha ulle ngeru gire bigwa ba ñage blire.” 9 Kaire ba mi gerule ama ole ama bligda dodadu giti: “Noare ba agedu cha alin no, ba bli jinadu no cha alin.” Ba mi gerule ene dale lle boanga ole, ba ama kagu lle boi, ama me lle bo mo ta giti ba alin. 10 Ene kaire ba ulita lle boanga Chube alin, Chube ba kagu kare lle boi gire ba gerudale ai kare mau giti: “Mo ta giti cha me lle boanga Chube alin, Chube kle cha kage gire cha lle e alin boi allabi, ni mo ta giti agali cha kle mo ta gbe lle boi Chube alin.” Ba ulita tachkedale ene —Jesu gerudubi ene ulita kwian geru jwannga gdataboko giti gdaboke ole. 11 Jesu kle chage dare una Jerusalén ngnagu Jesu jo tangle nga kada Samariage kaire nga kada Galileage. 12 Jesu jo chke una solige gire kwian gdataboko oga kwara tuge jingmea kada lepra ole tendu Jesu ngwange, ama ulita chegu ngaute bate Jesuge, 13 ama ulita mo keru gbu kweri ngaute Jesuge, ama gerudu: —Jesu kwian tkanga tangle geruge, ba tai dage cha ulitage. 14 Jesu gwagedu ama ulitadige gire Jesu gerudu: —Joga kwian gerunga Chube ole daba alin ngwadi, ba ulita mo oga kaite amage. Kwian oga kwara tuge jingmea ole ulita jo chage jonkare gire blike ama ulita chegu trate, jingme ulita jongwa. 15 Sugedu ama ulitage ama ulita jo chkeni noni, ama ulita sugedu moge ama jegwale kle no, gire gdaitre alin allabi mo ta gbu jogeni Jesu nate gerule no Jesu ole jo chkeni giti, jonke kwian gdaite e mo keru gbu kweri gerule no Chube giti, ama gerudu: —Chube noare, Chube mo kiralla giti cha dodadu, nga suga noare chadi Chube agedu giti kweri cha alin. 16 Kwian gdaite e kwian nga Samariamu, ama chiuni Jesu gitigu, ama jo chke dba jongnagwa giti Jesudi ñedu kaboge dbidi Jesu gwangeru dba gire gerudu Jesu ole: —Noare ba agedu no cha alin, ba cha dodadu, nga suga no chadi e giti. 17 Jesu gerudu kwian gdaite e ole: —¿Kwian gdataboko chegu trate siere jingmege gdaitre alin chkuni aini? ¿Gdainka kle baini? 18 Ba kwian nga Samariamu alin allabi chiuni naskuni gerule no no Chube ba dodadu giti, 19 cha gerule ba ole, chkede gdate, jogani, ba mo ta gbu Chube gai ulia malen Chube ba dodadu ba jo chkeni noni. 20 Chui gbaite kwian fariseo tanre geru kadu Jesuge: —¿Ngaminegire chui be chke gire Chube be mo gbe kwian ulita Chugagwalla kweri nga dba ai giti? Jesu jaindunga: —Chube chuia be chke ni be uñale kwiange, edi che me ten che ten lledi kare. 21 Kwian me ñage gwage aini gire gerule: “Ama kle aini”, kwian me ñage gwage eni gire gerule: “Ama kle eni.” Cha gerule ba ole, chui e chkubi, Chube kle nege ba ulitaske. 22 Jesu gerudu ene kwian fariseo ole gire Jesu gerudu kwian geru jwannga amage gdataboko giti gdaboke ole: —Cha chiu nga dba ai giti kwian kare, nege ba ulita kle chage cha ole, agwa cha mi kle ule ba ole diali nga dba ai giti. Chui be chie gire ba be takalin gwageni chadi nga dba ai giti kwian ulita Chugagwallale, agwa ba mi ñage gwage chadi chui ege, cha mi kle aini, ba cha chuia manadale dare. 23 Kwian na tanre be gerule ba ole cha giti: “Ama chkuni, ama kle aini”, na be gerule: “Ama chkuni, ama kle eni.” Kwian gerule ene ba ole ama kle sole, ba me kwian ene kerua gbe gdadi, ba me chage ama nate cha jinade nate. 24 Cha chieni chuiage me kwian bedre alin be gwage chadi chieni, agwa kwian ulita nga ulitage be gwage trate chadi cha be chieni chuiage salengwli kwian ulita kle gwage nga ko chrachiengadi nga ngaña giti kare. 25 Ngeru nga dba ai giti cha be boi tanre daga ngwale, kwian tanre kle toi chui aige me cha gai ulia, ama be mo tke cha dollale, be cha gweda. 26 Gire cha be chieni chuiage, e suiale kwian tanre be kle toi age salengwli kwian unsuialin kledu toi age Noé suiale kare. 27 Kwian ulita toidu Noé suiale me kledu Noé kerua gbe gdadi me kledu tañachuge chui be boi tirare giti. Kwian e kledu blire, kwian kledu mo jwen, kaire kwian kledu mo jian gbe ule, kwian ulita kledu tañachuge toi age diali me no alin allabi, kaire kwian ulita kledu toi nga suga no ole age me no ulita giti diali, me kledu tañachuge chui be boi tirare giti. Agwa chui boi tirare chuia chku gire Noé jo chiga du kweri tadi ule mo bitalla ulita batre ole Chube gerudu Noé ole kare, gire noi kweri chiu, noi boidu tanre, kwian kle toi ulita nga dba ai giti e suiale jokeda chi kote, agwa Noé alin allabi tiun gitiru mo bitalla mneite ole. 28 Kaire boidu unsuialin Lot toidu suiale una Sodomage. Chui ege kwian kledu blire, kwian kledu lle chbade, kwian kledu lle gige, kwian kledu chude skie, kwian kledu u dodade. 29 Kwian ulita kledu toi kledu lle e kare alin boi allabi, kaire kwian ulita kledu toi nga suga no ole ama kledu age me no giti diali, me kledu tañachuge chui be boi giti gire chui chku boidale tirare. Lot jo siere una Sodomage gire Chube jita kagu nga ngaña giti una Sodomage alin, jita chiu ule lle jribabita gwade kare ole, chku nga dba giti kwianske ulita, kwian ulita una Sodomage kugedu ulita, Lot alin tiun gitiru. 30 Ene kaire cha be chieni chuiage kwian tanre be kle toi age kwian unsuialin suia toi age Noé chuiage tangle kare, kwian tanre be kle toi age kwian unsuialin suia toi age Lot chuiage tangle kare, kwian ene ulita mi kle tañachuge be boi giti, be kle toi age me no tanre, gire chui ege sugeti ngwale cha be chieni, kwian ene ulita be chege boi daga ngwale tanre diali, mi ñage tien gitiru boi tirarege. 31 Cha be chieni chuiage kwian bai kaire skate goga tangle ama me jogedaleni chiga u amanuge lle gweale amanu gwa tangle lite ole dbadale, ama lle ulita amanu chugadale ngwadi gwa ama jogedale kige blike kole. Kaire agwe kwian bai kaire skate lle boi deage me jogedaleni gudegu, ama jogedale kige blike gwangerugu me joge naskuni. 32 Tachkede Lot muirallage ama boidu mine unsuialin, ama tadu jogekalinni naskuni una Sodomage. 33 Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare, bdagli kwian ene be jogengwa sugekare Chubege be chege boi tanre daga ngwale diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 34 Cha gerule ba ole, cha be chieni chuiage ngajrege kwian boke be skate gbe ankwa gaitre alin giti, gdaite dbabe Chube kle ngwadi gdaite jigabeda ji chuge. 35 Muinga boke be skate ke uge ule gwa, muinga gdaite dbabe Chube kle ngwadi muinga gdaite jigabeda ji chuge. 36 Kwian onbre boke be skate deage lle boi, onbre gdaite dbabe Chube kle ngwadi onbre gdaite jigabeda ji chuge. 37 Kwian geru jwannga Jesuge Jesu gerua keruchugu gire geru kadu Jesuge: —Cha Chugagwalla, ba kle gerule giti, ¿e be boi ene baini? Jesu jaindunga: —Cha gerule ba ole, juntenge uñale lle jogebakeda chegale kle baini, ne ngwadi junten ngle kle mo lite dba, ene kaire kwian cha gerua gaba uliage be chke uñale trate e ulita be kle boi gire.
1 Jesu kwian geru jwannga amage tku tangle ama ulita gerudale diali Chube ole, ama ulita me skwatigedale chudaboi kade Chubege. Jesu geru ñachugu kwian geru jwannga amage ulita alin ene suge trate geru jwannga ulitage Jesu kle ama tke tangle giti, 2 Jesu gerudu: —Una gdaitege kwian gdaite gerunga daba giti kle toi, ama kwian me no, me kle mo ta dbe Chube gai dage, kaire ama me mo ta dbe no kwian na ulita ole. 3 Kaire una e amañage muinga me chegu ñengulage kle toi, kwian gdaite kledu age tanre me no muinga e dollale gire muinga e chagedu bitangle gerule kwian gerunga daba giti ole mo jwannge giti: “Cha takalin ba cha chudaboi cha dollage, ba ji gbe ama alin ene ama me age cha dollale dare.” 4 Sbali muinga chagedu diali gerule ene kwian gerunga daba giti ole, agwa kwian e me ta muinga chudaboakalin, bdagli kwian e tañachugu mo tale: “Cha me Chube gai dage ni cha no kwian ulita ole, 5 cha me ta muinga chudaboakalin, agwa ama kle chie kian gbe tanre chage aini, cha ama chudaboadale, cha be ama chudaboi, ene ama me chie dare aini cha jugeda kian gbe chage.” 6 Jesu geru ñachugu ene ulita kwian giti gire Jesu gerudu dare kwian geru jwannga ole: —Kwian gerunga daba giti kwian me no, ama me tadu muinga chudaboakalin ngeru, agwa ama skwatigu muinga keruchuge gerule tanre malen bdagli ama muinga chudabo. 7 Kwian me no e ama muinga chudabo ene, Chube me kwian e kare, Chube no trate ulita, Chube ma no ulita ¿ba tañachuge Chube me ta ba chudaboakalin? Chube kwian gau mau alin, kwian ene mo ta gbadale gerule Chube ole chui gdale nga ju nga jere, Chube mi olo jege kwian ene kerua ngeru, agwa Chube be ama chudaboi be age no ama alin kwian kle kade kare. 8 Kwian Chubenu gerule nga ju nga jere Chube ole, Chube me manade, ama kwian chudaboi blike. Cha chiu nga dba ai giti kwian kare, cha be chieni nabitaite nga dba ai giti gire ¿kwian ulita Chube gerua gaba be kle mo ta gbaba gerule Chube ole Chube gerua gai ulia chui ege? 9 Kwian gweale kledu Jesu ngwadi, kwian e ulita kle tañachuge mo giti ama noare trate ulita kwian na ulita me ama kare no, Jesu geru ñachugu kwian ulita kle tañachuge ene alin, Jesu gerudu: 10 —Kwian boke jo chke u gerungwa Chube olege gerule Chube ole, kwian gdaite kwian fariseo, gdaite kwian igi ganga chugagwalla emperador nga Romamu alin. 11 Kwian fariseo jagedunga gdate gerule Chube ole, ama gerudu ene: “Chube, nga suga noare chadi, noare cha me kwian na kare agenga me no, cha me skwe boanga daba ngeru, cha me mo chuganga ke giti muinga ole daba ngeru, ni cha kle age me no sidri kwian ai kle ule cha ole igi ganga chugagwalla emperador nga Romamu alin kle age kare. 12 Diali cha bage bligdage chui boke semana gdaite gdaite tañachugagda ba alin ole. Lle boi ñanale cha igi gai, diali cha kle igi e sidri kete bage.” Kwian fariseo gerudu ene Chube ole. 13 Kwian igi ganga kle gdate bate kwian fariseoge, amage sugedu ama kwian me no, ama chegu gwa tkaba dbigu me gwa gau ngaña, ama mo batu kudegdage ta olire ole, gerudu Chube ole: “Chube, ba ta dbe no cha ole tai dage chage, chage cha suge cha agenga me no.” Kwian igi ganga gerudu ene Chube ole. 14 Jesu gerudu dare: —Cha gerule ba ulita ole, Chube kwian igi ganga ta blitu, kwian igi ganga joni mo ullage Chube ole ta no giti, agwa kwian fariseo me dale. Kwian baige suge kweri mo tale kaire mo gbe no kweri kwian na gwa giti, Chube gwage kwian ene me kweri, ama ngwale ama soli. Agwa kwian baige suge soli mo tale kaire mo gbe daba na chudaboangale, Chube gwage kwian ene kweri. 15 Kirogwa ñenua kirogwa chebia tanre chiu mo kirogwalla soli dbe Jesu kle ngwadi, kirogwa ñenua, chebia takalin Jesu ko gbe kirogwa soli e giti gerule Chube ole Chube age no kirogwa alin Chube kirogwa manade no. Kwian geru jwannga Jesuge ulita gwagedu kwian tanredi chie kirogwa dbe Jesuge gire ama ka bo kirogwa ñenua ole chebia ole: —¿Lledale ba kle chie kirogwa dbe Jesuge? ¡Joga, joga siere! Ba me chie kirogwa dbe Jesuge. 16 Agwa Jesu gerudu kirogwa ñenua ole chebia ole: —Bai aini kirogwa dbe chage. Gire Jesu gerudu kwian geru jwannga ole: —Me no ka boi kirogwa ñenua ole chebia ole, ba ama ulita chugene chie mo kirogwalla dbe chage. Kirogwa soli ta kle biale Chube gerua gai ulia blike, kirogwa talla ene kare Chube takalinge, kwian ulita bai kaire mo ta gbe ulia Chube ole kirogwa talla ene kare ole, kwian ene chege Chubenu, ama be toi diali chui tangle Chube ole. 17 Cha gerule ulia ba ulita ole, kwian ulita bai kaire me mo ta gbe kirogwa talla kare Chube ole, kwian ene me ñage toi ule Chube ole, ama be chege sugekare Chubege —Jesu gerudu ene kwian geru jwannga ulita ole. 18 Kwian israelita chugagwalla gdaite chku Jesudi geru gweale kade Jesuge, ama gerudu Jesu ole: —Ba kwian tkanga tangle noare geruge, cha takalin ba gerule cha ole ¿cha llema boadale nga dba ai giti gire ene cha ñage toi no diali chui tangle Chube ole nga ngaña giti? 19 Jesu jaindunga kwian e kalen: —¿Mineade ba gerudu cha no? Ulia ni kwian gdaite no trate, Chube alin allabi no trate ulita. 20 Bage uñale trate Chube nu geru gbaba kwian ulita alin kwian toidale mine Chube gwa giti, Moisés Chube gerua e degu unsuialin, ba chada e uñe trate, chada e gerule: “Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole. Ba me daba na gweda. Ba me skwe boi daba ngeru. Ba me geru jinade ngwale daba na dollale. Ba mo ñenua mo chebia gai dage.” Moisés Chube gerua degu ene unsuialin kwian ulita alin, ba agedale ulita geru e kle degaba kare. 21 Jesu gerudu ene onbre e ole gire onbre gerudu Jesu ole: —Cha kledubi soli gwangeabi cha jo juma gdate cha kle geru e gai dage age ulita geru e kle gbaba kare. 22 Jesu kwian keruchugu ene gire Jesu gerudu: —Noare ba kle age ene, agwa cha gerule ba ole, lle gdaite ba bebi age. Joga lle banu ulita chbade, igi ulita lle e ñanalla ba kete kwian me lle molenge. Ba age ene ulita gire ba chieni cha kle ngwadi ba mo ta gbe chage cha ole diali geru jwen chage. Gire ene ba be kle biale joge toi diali chui tangle Chube ole nga ngaña giti, Chube be age no ba alin ba agedu no ñanale. 23 Onbre Jesu keruchugu gerule ene, gire ama chegu ta olire tanre, onbre e lle molen tanre, malen ama me tadu lle ulita chbadakalin Jesu gerudu kare ama ole. 24 Jesu gwagedu onbre lle molen tanredi ta olire ole gire Jesu gerudu kwian geru jwannga ulita ole: —Ulia mnoare kwian lle molen tanre alin Chube gerua gai ulia mo ta gbe age ulita Chube takalin kare. Agwa kwian me age ene kwian me ñage toi diali chui tangle Chube ole nga ngaña giti. 25 Uñale bage bda kweri kada camello me ñage joge tangle agu kwebege, camello kweriare, ene kaire kwian lle molen tanre alin mnoare Chube gerua gai mo ta gbe age Chube takalin kare. Kwian ene kle mo ta dbe no no mo llea tanre ulita ole malen mnoare ama alin mo ta gbe mo llea chuge ngwadi Chube gerua gai ulia mo alin age Chube takalin kare, mnoare kwian ene alin mo ta dbe ma no Chube ole ama mo ta dbe no mo llea olege. 26 Kwian geru jwannga Jesu gerua keruchugu gire geru kadu Jesuge: —E ene ulia mnoare age Chube takalin kare ba kle gerule kare, gire ¿chema ñage age ulita Chube takalin kare, ene toi no diali chui tangle Chube ole nga ngaña giti? 27 Jesu gerudu: —Kwian agali gballa me ñage age ulita Chube takalin kare me ñage age mau alin agali toi diali chui tangle Chube ole. Agwa Chube alin allabi ñage kwian kira gbe age ulita Chube takalin kare ñage kwian gbe toi diali chui tangle ama ole. Chube alin allabi ñage age ulita, lle ulita me mno ama alin boadale. 28 Gire Pedro gerudu Jesu ole: —Cha ulita geru jwannga bage kle chage ba ole diali geru jwen bage, cha ulita mo llea ulita nga dba ai giti chugu ngwadi gire cha ulita mo ta gbu chage diali ba ole baini kaire ba kle joge ngwadi, cha ulita agedu ulita ba gerudu kare onbre lle molen tanre ole. 29 Jesu gerudu kwian geru jwannga ulita ole: —Cha gerule ulia ba ulita ole, kwian ulita bai kaire mo ta dbe ma no Chube ole kwian kle mo ta dbe no mo bitalla ulita olege mo llea ulita olege, kwian ene ta kle biale mo llea chuge ngwadi mo bitalla chuge ngwadi tañachuge ngeru Chube giti age ulita Chube takalin kare. Kwian u chuge ngwadi, kwian mo ñenua mo chebia chuge ngwadi, kwian mo daballa chuge ngwadi, kwian mo kirogwalla chuge ngwadi, kaire kwian mo ta gbe me mo jwen muinga ole, kwian bai mo ta gbe lle gweale o bitalla gweale chuge ngwadi ene Chube giti tañachuge ngeru Chube giti age Chube takalin kare, 30 kwian enege Chube be lle ma no ma ngle kwian e nu lle chugaba ngwadige kete amage nga dba ai giti, kaire bdagli kwian ene be toi no diali chui tangle Chube ole nga ngaña giti —Jesu gerudu ene kwian geru jwannga ulita ole. 31 Jesu kwian geru jwannga amage gdataboko giti gdaboke kadu sugekare kwian ngleage gerule ama ole Jesu be boi giti ulita, Jesu gerudu: —Nege che be joge una Jerusalénge, Chube cha kagu nga dba ai giti kwian kare, una Jerusalénge cha be boi ulita kwian Chube gerua ketanga nu chada degaba unsuialin gerule kare. 32 Cha ketabe kwian me israelitage gwaleda, kwian e be age me no tanre cha ole, be cha gbe gidagda, be ka boi cha ole me no, be jolo tke chadi, 33 be cha bate tanre obere giska giti, be age ene ulita dagale cha ole gire bdagli ama be cha gweda. Cha gwabeda agwa chui mongikege cha be chkeni gwadeni. 34 Kwian geru jwannga ulita Jesu keruchugu gerule ene Jesu be boi giti una Jerusalénge, geru e me sugedu gbaite amage, geru chegu skwlenre amage, me uñale Jesu kle llema geruade ama ole, ama tañachugu me mi boi ene ulia Jesu gerudu kare. 35 Jesu kledu chage una Jerusalén ngnagu ule kwian geru jwannga amage ulita ole, gire Jesu jo chke kodi una Jericóge, kwian gdaite gwagwa me kle toiba dba jonke igi kade kwiange. 36 Kwian gwagwa me ologe sugedu kwian nglea kle chage amage kodi tangle, gire ama geru kadu kwian nage: —¿Mineade kwian nglea kle chage? ¿Kle boi mine? 37 Jaindrenga kwian gwagwa me kalen: —Jesu una Nazaremu kle chage tangle aini. 38 Kwian gwagwa me kwian na keruchugu Jesu kle joge tangle kodi amage gire ama ngautu Jesuge: —Jesu, ba kwian chugagwalla kweri unsuialin kada David oindalla, ba tai dage chage. 39 Kwian kle chage jonkare Jesu ngeru ama kwian gwagwa me keruchugu ngaute Jesuge, gire kwian ka bo jabale kwian gwagwa me ole ama ka chitedale, kwian ka bo ene ama ole ama me talladu ama me ka chitedu, ama mo ta gbu ngaute gwangerugu ma ngle: —Ba kwian chugagwalla kweri unsuialin David oindalla, ba tai dage chage. 40 Jesu kwian gwagwa me keruchugu gire Jesu me chagedu dare, Jesu chegu jagenga gdate jonke Jesu gerudu kwian na ole chie kwian gwagwa me dbe Jesudige. Kwian gwagwa me dbachku Jesudi gire Jesu geru kadu amage: 41 —¿Ba takalin cha llema boi ba alin ba chudaboagda? Kwian gwagwa me jaindunga Jesu kalen: —Cha ba gai kweri, cha takalin ba cha gwagwa dodade ba cha gbe ten. 42 Jesu gerudu ama ole: —Nege ba be gwagwa molen, ba mo ta gbu ulia cha ole malen cha ba gwagwa dodade ulita, nege ba jo chkeni noni. 43 Jesu gerudu ene gire sugetibi allabi kwian gwagwa me ñadu ten no trate, ama gwagwa jo chkeni ulita, gire ama chagedu Jesu nate ta noare ole gerule noare Chube giti. Kwian ulita gwagedu amadi ama gwagwa molen ñage ten no trate, gire kwian e ulita gerudu noare Chube giti.
1 Jesu jo chke una Jericóge, jo una Jericóske tangle. 2 Una ege kwian gdaite igi molen tanre kada Zaqueo kle toi. Kwian ulita igi ganga chugagwalla emperador nga Romamu alin Zaqueo kwian ene ulita igi ganga chugagwalla. 3 Zaqueo ta gwagekalin noare Jesudi Jesu miamne, agwa ama me ñadu gwage Jesudi, kwian tanre kledu ama gwangnaru, Zaqueo kwian soli, ama me tigedu ngaña. 4 Ama ta gwagekalin noare Jesudi mo gwagwa giti malen ama jo jrite ngeruda Jesu ngwange, Zaqueo jo ngaña glige kada sicómoroge Jesu manade ngwange. Zaqueo kledu ngaña glige kodi Jesu joge tangle ngwadi gire Jesu chiu, 5 Jesu jo chke Zaqueo glia gdoge gire Jesu gwagedu ngaña glige Zaqueodi, Jesu gerudu: —Zaqueo, bai dbigu blike, ale ba ullage, nege cha be joge chege ba ngwadi. 6 Zaqueo chiu dbigu blike chku dba, nga suga noare Zaqueodi Jesu giti, ama gerudu Jesu ole: —Jesu, nga suga noare chadi ba joge cha ole cha ullage nege. Gire Zaqueo jo Jesu dbe mo ullage. 7 Kwian ulita gwagedu Jesudi joge Zaqueo ullage, gire kwian ulita gerudu modi tanre me no Jesudi Zaqueo giti, kwian gerudu: —Kwian agenga me no ullage Jesu kle joge chege. 8 Zaqueo jo chke gwa mo ullage Jesu ole gire gerudu Jesu ole: —Kwian chugagwalla, cha llea ulita bonga cha be kete kwian me lle molenge. Cha daba anblitu cha skwe bo daba ngeru, daba enege cha igi keteni naskuni na kwabaga giti dare. 9 Jesu gerudu Zaqueo ole: —Ba kle gerule giti suge trate ba kle mo ta gbe joge siere ba kle age me no ulitage ba kle mo ta gbe no ulia Chube ole, malen nege Chube ba jun siere ji chugege ba agedu me no ulita gdale, nege ba mo ta gbu ulia Chube ole giti ba chege enusulian unsuialin Abraham oindalla ulia. 10 Cha chiu nga dba ai giti kwian kare kwian agenga me no alin, kwian agenga me no kle jogebanga sugekare Chubege, cha chiu kwian ene chudaboi ta blite Chube ole, cha chiu ama jwen siere ji chugege age me no gdale. 11 Jesu gerudu ene Zaqueo ole kwian na tanre kledu Jesu keruchuge, chui ege Jesu kle kodi una Jerusalénge malen kwian e ulita kledu tañachuge mo tale chui be chke sugeti gire Jesu be mo gbe kwian ulita Chugagwallale kweri una Jerusalénge. Kwian kledu tañachuge ene, Jesu kwian talla uñu nate malen Jesu geru ñachugu kwian e ulita alin, 12 Jesu gerudu: —Kwian onbre gdaite kweri kwian na gwage ama jo nga na batege, kwian chugagwalla kweri nga ege be ama gbe daba mo jwiamu chugagwallale gire onbre be chieni mo jwiage. 13 Onbre e bebi joge, ngeru ama kwian lle boanga ama alin gdataboko kadu mo gitigu, ama igi kwangle ketu gaite gaite ulita kwian lle boanga gdatabokoge, ama gerudu kwian lle boanga e ulita ole: “Igi ai ole ba chege lle boi, cha be chieni gire igi chkeba mangire ma ngle.” Ama gerudu ene lle boanga ole gire jo nga na batege. 14 Kwian tanre ama jwiage skochie amadi, kwian me takalin chugagwalla kweri nga na batege ama gbe daba ulita chugagwallale mo jwiage, malen kwian mneite kagle ama nate gerule chugagwalla kweri nga na batege ole: “Cha ulita me takalin ba ama gbe cha chugagwallale.” 15 Agwa onbre e chegu diali kwian chugagwalla, gire ama joni mo jwiage. Ama chkuni gire ama kwian lle boanga ama alin ulita kadu bai kairege igi ketu lle boagda, ama ta igi uñakalin lle boanga gdaite gdaite igi gau kwamangire dare. 16 Lle boanga gdaite chku ngeru amadige, lle boanga gerudu: “Cha chugagwalla, ba igi kwaite ketu chage, cha igi e gbu jrien, cha igi na gau kwataboko ba alin.” 17 Chugagwalla gerudu ama ole: “Ba kwian lle boanga noare, igi bedre ole ba lle bo no ba igi na gau ngle, ba lle soli bo no, nege cha be lle kweri kete bage boadale, nege cha be ba gbe kwian una gdatabokomu chugagwallale.” 18 Kwian lle boanga na chku amadige gerudu: “Cha chugagwalla, ba igi kwaite ketu chage, cha igi e gbu jrien, cha igi na gau kwatiga ba alin.” 19 Chugagwalla gerudu ama ole: “Ba kwian lle boanga no, nege cha be ba gbe kwian una gdatigamu chugagwallale.” 20 Kwian lle boanga na chku amadige gerudu: “Cha chugagwalla, ba igi kwaite ketu chage, cha igi ogo ñometra dregaske, ene igi me jogenga ba ngeru. 21 Cha kwachiu badi, uñale chage cha me lle boi no trate ba igia ole ba be skochie, diali kwian na kle lle boi ba kle lle e gai mau alin, ba me kle lle boi agali ngwadi ñanalla ba kle geruade nate mau alin. Ba kwian ene malen cha tañachugu ma no cha me lle boi ba igia ole, cha ba igia ogo no ñometra dregaske, nege ba chkuni cha igi amaña keteni bage.” 22 Chugagwalla gerudu lle boanga e ole: “Ba kwian lle boanga ta me no, ba me lle bo igi ole cha tadukalin kare. Uñale bage kwian me lle boi no cha alin cha skochie, kaire uñale bage baini cha me lle boi ngwadi cha kle lle ene geruade nate mo alin. 23 E ulita uñale bage, ¿mineade ba me su joge igi kete kwiange igi ogakle ngwadige?, ene igi ogangwage kwian lle boi igi ole cha chkeni cha igi ñanalla na gai ma giti dare.” 24 Gire chugagwalla gerudu kwian na ole kwian lle boanga me no giti: “Cha igi ketu amage igi e jwennga ama ngeru, kete kwian lle boanga bai igi molen kwatabokoge.” 25 Kwian gerudu chugagwalla ole: “Me no igi e kete kwian bai igi molen kwatabokoge, ma no igi kete kwian bai me igi molenge.” 26 Chugagwalla gerudu: “Cha gerule ba ole, kwian baige lle sidri ketaba boadale gire kwian lle e boi no mo chugagwalla alin, kwian enege lle na tanre ketabe boadale mo chugagwalla alin. Baige lle sidri ketaba boadale gire kwian me lle e boi no mo chugagwalla alin, kwian ene ngeru lle sidri e ulita jwanbenga ama ngeru. 27 Kaire cha gerule ba ole kwian cha dollale giti, ama me takalin cha chege ama chugagwallale, joga kwian ene jwen dbe aini gweda cha gwa giti.” Chugagwalla gerudu ene ulita lle boanga ama alin giti. Jesu geru ñachugu ene kwian ulita alin Zaqueo ullage ene suge kwiange ama ulita mo ta gbadale lle boi no Chube alin ama kle Jesu chuia manade ngwange gire. 28 Jesu geru ñachugu ene ulita kwian alin Zaqueo ullage, gire Jesu jo chage dare una Jerusalén ngnagu ule kwian geru jwannga amage gdataboko giti gdaboke ole. 29 Jesu jo chke kodi kodi una soli bokege kada Betfagé kada Betania Ngwiskinro Jwichugalla gdoge dba. Ama ulita jo chke ne ngwadi, gire Jesu kwian geru jwannga amage gdaboke kagu mo ngeru, Jesu gerudu ama boke ole: 30 —Joga gdabonate cha ngeru una soli kle ngeruge, ba be joge chke una soli ege burro soli be skwen bage ba ngwange lugabada glige, burro soli e giti ni kwian gdaite nu chageba giti, burro soli e ba skatrennga, ba chie burro dbe cháge. 31 Kwian gweale geru kade bage: “¿Lledale ba kle burro soli e skatrennga?”, ba gerule kwian e ole: “Cha Chugagwalla takalin burro soli aige.” 32 Jesu gerudu ene ulita gire kwian geru jwannga gdaboke e jo, amage burro soli skwendu lugabada ulita Jesu gerudu kare. 33 Kwian geru jwannga jo chke burro solidi, ama kle burro soli skatrennga dbadale gire burro soli mauña geru kadu amage: —¿Lledale ba kle burro soli e skatrennga? 34 Kwian geru jwannga jaindunga: —Cha Chugagwalla takalin burro soli aige. 35 Kwian geru jwannga boke chiu burro soli dbe Jesu kle ngwadi, ama mo ñometralla gitiru gbu burro soli trigda giti Jesu alin, gire kwian geru jwannga Jesu chudabo skwen burro soli giti, 36 burro soli giti Jesu jo chage una Jerusalén ngnagu. Kwian geru jwannga ulita kaire kwian na ulita kle chage ule Jesu ole jo Jesu ngeru mo ñometralla gitiru tren dba jonkare Jesu gai ngwange no mo Chugagwallale kweri. 37 Jesu jo chke Ngwiskinro Jwichugallage gwadbigu kodi una Jerusalénge, kwian tanre nu Jesu gerua gaba ulia kle chage Jesu ole, amadi ulita nga suga noare Jesu giti, ama ulita chagedu ngaute kweri Jesu giti: —Cha gerule no no Chube giti, ama kiralla giti ba lle daga ngwale no tanre dodadu cha ulita gwa giti. Noare Chube ba kagu nga dba ai giti cha ulita alin cha Chugagwallale kweri, ba giti kwian tanre be ta gbe no Chube ole, Chube noare Chube kweri, ama kle age no tanre cha ulita alin ba giti. 39 Kwian fariseo gweale kle chage kwian nu Jesu gerua gaba ulia ngleaske, kwian fariseo kwian e ulita keruchugu ngaute tanre gire kwian fariseo gerudu Jesu ole: —Kwian tkanga tangle geruge, kwian ulita kle chage ba ole kle ngaute tanre, ka boi ama ole ene ama chege kamne. 40 Jesu gerudu kwian fariseo ole: —Cha gerule ba ole, kwian kle chage cha ole be ka chite ke be ngaute Chube giti no kwian kle ngaute kare. 41 Jesu gerudu ene kwian fariseo ole gire Jesu chagedu dare una Jerusalén ngnagu, Jesu jo chke kodi una Jerusalénge, Jesu gwagedu una Jerusaléndi ulita gire olidu kwian kle toi una Jerusalénge giti. 42 Jesu gerudu ta olire ole: —Kwian una Jerusalénmu, Chube cha kagu nga dba ai giti ba ulita alin, cha giti Chube ta ba ta gbakalin no ama ole ene ba me chege sugekare amage dare, agwa ba me ta cha gakalin ulia malen me suge bage Chube ta agekalin no ba alin cha giti, e ulita kle ogabada kare bage. 43 Chui me no be chke bage, kwian ba dollale be gere gbe ba unalladi tangle, kwian be mo lite badi tangle ulita, ene ba me ñage kige. 44 Kwian ba dollale be ba ulita gweda ule ba olia ole, be u banu ulita skiendba ni u gbaite be chege. Chui ai ba chuia ba cha gadale ulia, ene kwian ba dollale me ñage ba gweda ulita, agwa ba me ta cha gakalin ulia, malen kwian ba dollale be chke chui gwealege be ba gweda ulita —Jesu gerudu ene ta olire ole. 45 Jesu jo chke una Jerusalénge, jo u gerungwa Chube olege, u ege kwian tanre skwendu Jesuge lle chbade, Jesu kwian e ulita kagu siere u ege, 46 Jesu ka bo ama ulita ole: —Uñale ba ulitage Chube gerua degaba unsuialin gerule u ai giti, chada e gerule: “Chube gerudu: ‘U ai chanu chegedale u gerungwa cha ole alin allabi.’ ” Chube gerua kle degaba ene agwa ba ulita kle u ai gai mo alin skwe boangwale kwian nage, ba kle bda chbade dabage kwangleare ene ba igi gai ma ngle mo alin, Chube gwage e me no, e salengwli ba kle u Chubenu gai mo alin skwe boi daba na ngeru kare —Jesu gerudu ene kwian bda chbadanga ulita ole. 47 Jesu kwian lle chbadanga kagu siere u gerungwa Chube olege, gire chui gdale Jesu kwian tku tangle Chube giti u ege. Jesu kle kwian tke tangle ene gire kwian gerunga Chube ole daba alin chugagwalla kaire kwian daba tkanga tangle Moisés chadalla giti kaire kwian chugagwalla na, kwian e ulita mo ta gbu age gweale mo ten modi Jesu dollale ama ulita ñage age mine gire ñage Jesu gwangeda. 48 Agwa kwian ene ulitage me chku boale age mine gire ama ulita ñage Jesu gai, kwian ngle kledu Jesu ole kle mo ta gbe Jesu gerua keruchuge ulita no, malen kwian Jesu dollale me ñadu Jesu gai agedale me no ama ole.
1 Bitaite Jesu kledu gwa u gerungwa Chube olege kwian tanre tke tangle Chube gerua giti gire kwian gerunga Chube ole daba alin chugagwalla mneite kaire kwian daba tkanga tangle Moisés chadalla giti mneite chku Jesudi ule kwian israelita chugagwalla juma mneite ole, 2 ama ulita geru kadu Jesuge: —Ba gerule cha ulita ole, ¿chema ba kagu age ba kle age kare? ¿Chema kiralla giti ba kle age ulita? 3 Jesu jaindunga: —Cha kaire agwe geru kade gbaite bage: ¿Chema Juan-Bautista kagu? ¿Chube Juan-Bautista kagu kwian ñe chiske o kwian Juan-Bautista kagu kwian ñe chiske? Cha gerule ba ole, ba jainnga cha kalen chema Juan-Bautista kagu, gire cha geru kete bage chema cha kagu age ulita cha kle age kare. 5 Jesu gerudu ene gire kwian ulita bai geru kadu Jesuge chegu gerule tanre modi Jesu geru kadu amage giti: —¿Che jainnga mine Jesu kalen? Che gerule Chube Juan-Bautista kagu kwian ñe chiske gire Jesu be geru kade chege: “¿Gire mineade ba me Juan-Bautista gerua cha giti gau ulia?” 6 Agwa che gerule kwian Juan-Bautista kagu gire kwian ulita be che keruchuge be che skie ke giti be che gweda gerule ene gdale, kwian ene ulita tañachuge ulia Chube Juan-Bautista kagu Chube gerua kete kwiange. 7 Kwian geru tragu ene modige Juan-Bautista giti gire gerudu Jesu ole: —Cha ulitage me uñale chema Juan-Bautista kagu. 8 Gire Jesu gerudu: —Kaire agwe cha mi gerule ba ole chema cha kagu age ulita cha kle age kare aini ba gwa giti. 9 Jesu gerudu ene kwian ole gire Jesu geru ñachugu ama ulita alin, Jesu gerudu: —Cha gerule ba ulita ole, kwian onbre gdaite uva ngama gbu, gire ama kwian gweale gau uva ngama manangale, ama uva ngama ulita jigu uva ngama mananga ulita kote gire ama jo toi nga batege sbali. 10 Chui jo sbali gire chku uñale uva mauñage uvagba joge dabe suia chku, uva mauña kwian lle boanga ama alin gdaite kagu tienda uvagba bonga amanu kade mo alin kwian uva manangage. Kwian lle boanga e jo chke uva manangadige uvagba kade uva manangage, kwian uva mananga ulita daba e lle boanga uva mauña alin batu jabale agedu dagale daba e ole, uva mananga ulita daba kaguni kole uva mauña ngwadi, me su uvagba kete ni malen gbaite dabage. 11 Boidu ene gire kwian uva mauña lle boanga na kagu uvagba kade. Lle boanga e jo chke kwian uva manangadige, gire kwian uva mananga daba e batu jabale agedu me no tanre daba dollale, uva mananga ulita daba kaguni kole lendegaba uva mauña ngwadi. 12 Boidu ene nakwaite gire uva mauña kwian lle boanga na gdaite kagu uvagba kade uva manangage, kaire kwian uva mananga lle boanga e lendegu tanre kaguni uva mauña ngwadi, me uvagba ketu lle boanga ege. 13 Bdagli uva mauña tañachugu mo tale: “¿Cha age mine? Cha be mo kirollanu kage, cha no no mo kirolla ole, cha tañachuge uva ngama mananga be cha kirolla gai dage gai ngwange no.” Uva mauña tañachugu ene malen ama mo kirolla kagu. 14 Kwian uva mananga ulita gwagedu uva mauña kirolladi chie ama gitigu gire ama ulita gerudu modige: “Kwian chiu e uva mauña kirolla, bdagli ama be chege ama ñenua llea ulita dbia ulita mauñale. Ale ama gweda, ene lle ulita be chege chege, che be chege uva ngama ai ulita mauñale.” 15 Kwian uva mananga ulita gerudu ene modige gire ama uva mauña kirolla gau du siere uva ngamage, gire ama ulita uva mauña kirolla guda. Jesu geru ñachugu ene ulita gire geru kadu kwiange: —¿Ba tañachuge mine geru e giti? Kwian uva mauñage be chke uñale boidu ulita ama kirolla ole giti gire ¿ama be age mine kwian uva mananga ulita ole? 16 Cha gerule ulia ba ole, uva mauñage be chke uñale ama kirolla guleda gire ama be joge kwian uva mananga gweda ulita, ama be kwian na gbe uva ngama manade. Ene kaire Chube be age kwian ole kwian bai me ama Kirolla gai ulia. Kwian geru keruchugu ene gire kwian gerudu: —Cha takalin Chube me age ene che ulita ole. 17 Jesu gwagedu kwian israelita chugagwalla ulitadi gire gerudu ama ole: —Ulia Chube be age ene kwian ulita ole bai me Chube Kirolla gai ulia. Chube gerua degaba unsuialin gerule Chube Kirolla be boi giti, chada e gerule: “Kwian u dodanga ke gbu gerere ke gbaite ama mliunga ama gerudu ke e me no dale ke e ngwale, agwa ke e ama mliunga, ke e ma no ke na ulitage. Kwian ke gbu ulita gerere nga bebi ke gbaite alin gere me kle kiraske, ke mliabanga gbere gerere gire u chegu kiraske.” Chube gerua degaba unsuialin gerule ene. 18 Cha gerule ba ole ke e giti, kwian gweale joge chke dba ke e giti kwian lentige, ke e joge chke dba kwian giti kwian mnuña alin chege ke e kote. Cha salengwli ke mliabanga kare, kwian bai me cha gai ulia, bdagli kwian ene be boi tanre daga ngwale be chege ji chuge diali. 19 Jesu gerudu ene ulita gire sugedu trate kwian gerunga Chube ole daba alin chugagwalla ulitage kaire kwian daba tkanga tangle Moisés chadalla giti ulitage Jesu kle gerule ama giti ama ulita salengwli uva ngama mananga me no ulita kare, e giti ama skochiu tanre Jesudi malen ama tadu Jesu gakalin blike tkale skage, agwa ama me ñadu, ama ulita kendunga kwian ngleadi, uñadu amage kwian tanre no Jesu ole, ama age me no Jesu ole kwian gwa giti kwian ulita be skochie amadi Jesu gdale. 20 Kwian gerunga Chube ole chugagwalla ulita kaire kwian daba tkanga tangle Moisés chadalla giti ulita mo ta gbu Jesu gbe jiske geru gweale giti, ama kwian mneite kagu tienda Jesudi Jesu kle ngwadi mo chuge Jesu ole Jesu gbe gerule gweale chugagwalla kweri dollale me no gire be ñage Jesu dbe gbe jiske chugagwallage. Kwian mneite e jo chke Jesudige gire Jesu gwale ama mo ta gbu gerule no Jesu ole agwa ama tale ama kle tañachuge me no Jesudi, ama ulita gerudu no Jesu ole: —Ba kwian tkanga tangle geruge, uñale chage ba diali kle gerule ulia trate, kaire ba kle kwian ulita tke tangle no trate geru ulia giti kwian toidale trate Chube takalin kare. Ba kle gerule kwian ulita ole trate salengwli, kaire ba gwa giti kwian ulita salengwli. 22 Ba kwian ene malen cha geru kade bage gbaite: Geru gbaba nga Romage kwian ulita igi ketadale kwian chugagwalla kweri emperador nga Romamuge, cha me kwian nga Romamu, cha kwian israelita cha takalin ba gerule cha ole, ¿no Chube gwa giti cha igi kete kwian chugagwalla kweri nga Romamuge ama kle kade chage kare o me? —kwian geru kadu ene Jesuge ta me no ole mo chugagda Jesu ole. 23 Jesuge uñadu kwian e kle tañachuge me no amadige, kate kle gerule no Jesu ole, tadi me kle tañachuge no dale, ama ulita kle mo ta gbe Jesu anblite, Jesu gerudu ama ulita ole: 24 —Ba igi kete chage gaite gwagegda. Kwian igi ketu Jesuge gire Jesu geru kadu amage: —¿Chema oña kle gbaba igi ai giti? ¿Kaire chema kalla kle gbaba igi ai giti? Kwian jaindunga: —Kwian oña e chugagwalla kweri nga Romamu kada César, kaire ama kalla kle gbaba igi e giti. 25 Kwian jaindunga ene gire Jesu gerudu: —Lle chugagwalla kweri Césarnu kaire keteni Césarge, lle Chubenu kaire keteni Chubege. 26 Jesu gerudu ene gire kwian e chegu kamne, chegu tañachuge tanre Jesu gerudu ama ole giti, ama me ñadu Jesu gbe jiske geru kade giti Jesuge igi giti kwian ngle gwa giti ama tañachugu kare. 27 Kwian saduceo mneite jo Jesu ngwadi geru trage Jesu ole, kwian saduceo kle gerule kwian jogebada jaba mi chkeni gwade chui bdaglige, ama tadu Jesu gbe gerule gweale Moisés nu Chube gerua degaba unsuialin dollale, 28 malen ama gerudu Jesu ole: —Ba kwian tkanga tangle geruge, Moisés Chube gerua degu unsuialin, chada e gerule kwian onbre jogeda me kirogwa molen mo muira giti, gire ama daballa na kle gwade mo jwandale ñanea oli ole, onbre kirogwa molen muinga e giti daballa jogebada alin, ene daballa jogebada olia chege gdaite muinga e giti. Nege cha gerule ba ole boidu cha bitallaske giti, aini cha bitallaske onbre gdaguke modi mo daballale kledu. Daballa kimule mo jun muinga ole agwa ama jokeda ni ama kirogwa molen gdaite mo muira giti. 30 Gire daballa nate mo jun ñanea oli ole, agwa daballa e kaire jokeda ni ama kirogwa molen gdaite muinga e giti. 31 Gire onbre jogebada daballa na ama nate mo jun muinga amaña ole, agwa ama boidu salengwli ama daballa ngeru gdaboke kare, ama gdamai ulita jokeda ni muinga ko toidu kirogwage. Boidu ene ulita onbre gdaguke e ulita ole, ama ulita gdaite gdaite mo jun muinga amaña ole, muinga e chegu ama gdaguke muirale, agwa ulita gdaguke jokeda gdaite gdaite, ni ama gdaite kirogwa molen muinga e giti. 32 Bdagli muinga gballa e jokeda kaire. 33 Cha gerule ba ole, ulia onbre e gdaguke ulita toidu gdaite gdaite muinga amaña ole mo muira kare, chui bdaglige kwian jaba ulita be chkeni gwade chuiage, ¿chui ege onbre bai be chege muinga e ñengulallale? 34 Jesu jaindunga kwian saduceo kalen: —Nga dba ai giti kwian onbre kwian muire mo jwen. 35 Kwian bai Chube gau ulia kle toi nga dba ai giti gire, chui bdaglige Chube be kwian ene jaba gbe chkeni gwade toi diali chui tangle Chube ole nga ngaña giti, nga ege kwian e be toi Chube ole lle boanga Chube alin nga ngaña giti kle toi diali Chube ole kare, malen kwian e mi jogeda dare. Nga ngaña giti onbre be chege Chube kirollale muire be chege Chube jianle, gire onbrenu muirenu mi mo jwen ni be tañachuge mo jwen giti. 37 Unsuialin Moisés agali Chube gerua degu, chada e giti chkedale uñale bage kwian jaba be chkeni gwade, chada e gerule Chube kerua sugedu Moisége gli soli kle kugeske, Chube gerudu Moisés ole Chube Abraham Chubea kaire Isaac Chubea kaire Jacob Chubea. Moisés Chube gerua e degu unsuialin, 38 e giti ñage suge trate ba ulitage chui bdaglige kwian ulita jogebada jaba be chkeni gwade. Abraham kaire Isaac kaire Jacob ama gdamai jogebada gire Chube gerudu Moisés ole ama gdamai giti Chube ama Chubea, Chube alin kwian e ulita kle gwade. Ulia Chube kwian gwade alin Chubea, ama me kwian jaba Chubea, malen chkedale uñale bage kwian jogebada kwian e oña kle chege gwade, kaire agwe chui bdalige kwian jaba ulita be chkeni gwadeni. 39 Kwian gweale daba tkanga tangle Moisés chadalla giti kledu eni kaire Jesu keruchuge, ama ulita gerudu Jesu ole: —Ba gerudu ulia trate ulita. 40 Chui ege gwangerugu kwian saduceo ulita me su geru kade dare Jesuge. 41 Jesu geru kadu kwian ulitage: —¿Mineade kwian tanre kle gerule Cristo chugagwalla David unsuialin oindalla alin allabi? 42 Unsuialin David agali chada degu Cristo giti, chada Salmos giti geru e gerule: “Chube gerudu cha Chugagwalla ole: ‘Toi dba cha ngena cha ko taingwli giti, 43 chui be chke gire cha be ba gbe ma kweri ba dolla ulitage, bdagli ba be kirachke ba dolla ulitadi gire ba be chege dolla ulita Chugagwalla kweri.’ ” 44 David chada degu ene unsuialin Cristo giti, chada e giti sugedale kwian ulitage Cristo me David oindalla alin allabi agwa kaire Cristo David Chugagwalla, David agali gerudu Cristo ama Chugagwalla. 45 Kwian ulita kle Jesu keruchuge gerule ene gire Jesu gerudu kwian geru jwannga gdataboko giti gdaboke ole: 46 —Ba mo manadale ta giti kwian daba tkanga tangle Moisés chadalla giti ulitage, ba me mo chuge ngwadi mo anblite ama ulitage. Ama ulita takalin kwian na ama gai ngwange no kweri mo chugagwallale, ama ta chegekalin no kwian na ulita gwa giti, malen ama diali mo ñometra jeike no dbe modi mo kaite kwian ngleaske, kaire nga ulita baini kaire ama kle chage ngwadi ama takalin kwian ulita gbi kade no amage ama gai dage kwian chugagwallale. Ama kle joge u mo litangwa Chube gerua jwanngwage gire diali ama kle toingwa ma no jinade mo alin toigda dba kwian ulita gwa giti mo gbagda kweri daba na ulitage. Kaire kwian e kle joge chui ollade gire kle nga ma no bligda gutangwa jinade, ama toikalin dba ule kwian chui olladanga chugagwalla ole. 47 Kaire kwian daba tkanga tangle Moisés chadalla giti ulita kle muinga chegeba oli onbrege anblite lle ulita jwennga muinga oli ngeru u jwennga kaire muinga oli ngeru mo alin. Kaire kwian e kle mo gbe gerule kweri sbali Chube ole kwian ngle gwa giti, ene kwian ulita be tañachuge kwian e no no Chube ole. Kwian daba tkanga tangle Moisés chadalla giti diali ta mo gbakalin no kweri kwian ulita gwa giti agwa ama tale ama kwian me no me no, e gdale ama be boi tanre daga ngwale bdagli, Chube be ji gbe tirare tirare ama ulita alin —Jesu gerudu ene kwian geru jwannga amage ulita ole kwian daba tkanga tangle Moisés chadallage giti.
1 Jesu kledu u gerungwa Chube olege ule kwian geru jwannga amage gdataboko giti gdaboke ole, gire Jesu gwagedu kwian ngle igi molen tanre kle igi tanre tke lle igi litangwage. 2 Kaire Jesu gwagedu muinga chegeba oli onbrege gdaitedi chie igi monu ulita dbe, muinga e me lle molen ama igi gabokle alin allabi molen, agwa ama igi e ulita tku igi litangwage Chube alin. 3 Jesu gwagedu muingadi igi monu ulita tke igi litangwage tadi gire Jesu gerudu kwian geru jwannga ulita ole: —Cha gerule ulia ba ulita ole, muinga oli e llea me, ama igi gabokle alin molen allabi ketu ulita, kwian ulita gwa giti muinga igi ketu ma bedre kwian na ulitage, agwa Chube gwa giti muinga e igi ketu ma ngle kwian na ulitage. 4 Kwian igi molen tanre kle lle gige tanre mo alin ama takalin kare gire igi chegeda ama kle igi e kete Chube alin, ulia kwian gwa giti ama igi tanre ketu, Chube gwa giti me dale. Agwa muinga e me kle age ene dale, muinga e igi amanu mo managda ulita ketu Chube alin, igi toigda me chegu ama ole, Chube gwa giti muinga e igi ma ngle ketu Chube alin kwian na ulitage —Jesu gerudu ene kwian geru jwannga ole muinga igi monu ulita ketu Chube alin giti. 5 Kwian geru jwannga Jesuge gweale kle gerule u gerungwa Chube ole giti, ama kle gwage u edi u dodaba ke kweri noare giti, kaire kle gerule igi giti kwian tanre igi gbu u e dodagda. 6 Jesu kwian geru jwannga gweale kledu gerule ene u gerungwa Chube ole giti, Jesu ama keruchugu gire Jesu gerudu ama ulita ole: —Nege ba ulita kle gwage u kweri edi u e dodaba no no, agwa cha gerule ba ole, me sbali u e ulita be chege skianbada lle ngwale kare, ke mi chege gbaba mo giti ni gbaite, u ulita be chege skianbada. 7 Jesu gerudu ene gire kwian geru jwannga geru kadu Jesuge: —Ba cha tkanga tangle geruge, ba kle gerule giti ¿e be boi ngaminegire? ¿Be boi mine ngeru? Gerule cha ole e giti gire ene chke uñale cha ulitage be boi chuia kle kodi. 8 Jesu jaindunga: —Ba ulita kledale ta giti ene ba mi skate alenske ba mi mo chuge ngwadi mo anblitange kwian daba anblitangage chui bdagli ngnaguge. Chui bdagli chke kodi gire kwian tanre be chie mo gbe kweri gerule no mo giti daba anblitagda, ama be chage kwianske mo ka gbaba cha kalla giti gerule mau giti: “Cha Cristo, Chube cha kaguni kwian alin, chui bdagli chku.” Kwian gerule ene kle sole, ba me kwian ene keru gbe gdadi, ba me chage ama nate. 9 Ba be geru keruchuge kwian kle dole tanre kweri modi nga tanrege, kaire kwian kle mo lite ole ngle kira batadale gobierno dollale giti, geru ene chke ba kote ba me mo ta dbe kennga kle boi giti, boidale ene ulita ngeru agwa chui bdagli bebi chke. 10 ’Kwian chudalla na be mo tke dole kwian chudalla na ole, kaire kwian toinga nga kweri nage be mo tke dole kwian toinga nga kweri nage ole. 11 Kaire nga be jwlien tanre, kegde kweri be chite tanre nga tanrege, kaire bli suia kweri be kle tanre, kwian ngle be jogeda bli kweri kote, kaire jingme tirare be chage tangle nga ulitage, kaire lle tirare be meñe nga ngaña giti, kwian nga dba ai giti ulita be gwage nga ngaña giti ulita boi ene gire kwian ulita be kwachie tanre. 12 Ngeru bebi boi ene ulita kwian cha gerua dollale be ba ulita cha gerua ganga gai cha gdale, kwian e age me no ba ole be ba dbe u mo litangwa Chube gerua jwanngwage ba gbale jiske kwian israelita chugagwallage. Ba tkabe skage, kaire ba dbabe kwian chugagwalla tanre ma kweri ngwadi, chugagwalla e ulitage ba gbabe jiske cha gerua gdale. 13 Ba kle chugagwalla e ngwadi gire ba be ñage gerule no cha giti kwian e ulita gwa giti. 14 Ba ulita mo ta gbadale me mo tallade ba be gerule mine mau giti chugagwalla kweri e ulita gwa giti, 15 ba kle eni kwian e gwa giti gire chui ege cha be ba ta gbe ngle, cha be ba ta gbe gerule no no, kwian ba dollale be ba keruchuge gire ni ama gdaite be ñage gerule me no ba kalen, ama mi ñage gerule dare me no ba giti ba gbale jiske. 16 Chui bdagli bebi chke gire ba ñenua, ba chebia, ba daballa, ba bitalla ulita, ba skatemanalla, kwian ene tanre be ta jwlite ba dollale be ba kete kwian chugagwallage boadalenga daga ngwale cha gerua gdale, kwian chugagwalla e be ba gweale gwangeda cha gerua gdale. 17 Kaire cha gerua gdale kwian ulita be jainchke badi, 18 agwa cha ngeru ba mi jogenga gdaite, kaire ni ba ulita chugaga gdaite be jogenga chage. 19 Kwian age me no ba ole ba me mo tallade, ba bai me mo chuge ngwadi joge siere cha geruage boi daga ngwaleske, ba mo ta gbe cha gerua gai ulia mo tale diali gwangerugu mo ta gbe age no diali Chube takalin kare, ba bai mo ta gbe ene, chui bdagli be chke gire ba be toi no diali chui tangle cha ole Chube ngwadi. 20 ’Chui be chke gire ba be gwage guardia donga tanre be lite una Jerusaléndi tangle, ba gwage edi ba tachkedale chui kle kodi gire guardia donga ulita be kwian una Jerusalénge gweda ulita be u skienda ulita. 21 Chui ege kwian kle una Jerusalénge kigedale guardia donga ngeru bate una Jerusalénge, kaire kwian kle nga kweri Judeage kigedale jwichugage bate una Jerusalénge, kwian kle ngaske bate una Jerusalénge me chiedaleni naskuni una ege. 22 Chui ege Chube be ji gbe tirare kwian ulita agenga me no alin, be boi ulia ulita Chube gerua degaba unsuialin gerule kare. 23 Chui ege muinga bai kaire kle chage gaba kaire muinga bai kaire kle chage kirogwa soli sidri jusulidi ole, muinga e ulitage cha tai dage noare, ama ulita be boi daga ngwale tirare, be mnoare ama alin kige blike. Chui ege kwian ulita nga dba ai giti be boi tanre daga ngwale, chui ege Chube be ji gbe tirare kweri kwian israelita ulita alin bai me Chube gerua gau ulia. 24 Guardia donga ngle kwian me israelita alin be kirachke kwian israelita una Jerusalénmu ulitadi, guardia donga e ulita be kwian israelita tanre gweda be kwian israelita na tanre dbe tkale skage nga na ulitage. Be boi ene ulita kwian israelita una Jerusalénmu ulita ole gire kwian me israelita be una e gai mo alin. Chube be kwian me israelita chuge ngwadi dole ene kwian israelita ole sbali, kwian me israelita dole ene chuia be bidege gire Chube mi ama chuge ngwadi age dare kwian israelita ole. 25 ’Chui ege chui, dai, beu ulita be jwlite nganake tirare, ni kwian gwageba chuidi daidi beudi boi ene kare. Kwian nga dba ai giti ulita be gwage nga ngaña giti ulita boi ene gire kwian ulita be kennga tanre. Kaire chui ege ble mi kle ble kle kare, ble be gdade tirare kwian ologe, kwian be kennga tanre ble chite tiraredi. 26 Nga ngaña giti nga ulita be jwlien, beu mi chege ngwedi beu kle kare, lle ulita mi chege ngeru kare nga ngaña giti. Kwian nga ulitage be gwage boi enedi nga ngaña giti gire ama be chege tañachuge tanre be boi gwangerugu giti, kwian ulita ta be chege skeke skeke chru ole, kenngaske nga be jogenga kwian tanre giti. 27 Nga be boi ene ulita gire Chube be cha kageni, cha be chieni nga dba ai giti ngnagu bogakwaske Chube kiralla giti, chui ege kwian ulita be gwage chadi cha noare cha kweri, ulia cha kwian ulita Chugagwalla. Be suge trate kwian ulitage e cha amaña chiu nga dba ai giti kwian kare kle chieni nabitaite. 28 Nga be boi ene ba me ta dbe kennga, ba mo ta gbadale suga noare, ba be tien gitiru boi daga ngwale ulitage nga dba ai giti, ba be toi cha ole Chube kle ngwadi chuia kle kodi. 29 Jesu gerudu ene gire Jesu geru ñachugu kwian geru jwannga ulita alin gli kada higuera giti, Jesu gerudu: —Ba ñage gwage gli higueradi kaire gli na ulitadi. 30 Ba gwage chuda ngwange glidi, gliga bli kle tige, ene chke uñale bage agali chuda kle kodi. 31 Ene kaire ba be gwage lle tanredi boi ulita cha gerudu kare ba ole sbaliga gire chkedale uñale bage chui kle kodi gire cha be chieni nga dba ai giti kwian ulita Chugagwallale. 32 Cha geru kete bage ulia, cha gerudu kare be boi ene ulita ngeru kwian ulita kle toi chui aige bebi joge tangle. 33 Nga ngaña giti nga dba ai giti mi chege diali dale alin, nga ulita be joge tangle, agwa cha gerua mi joge tangle dale, cha gerua be chege diali dale alin, be boi ene ulita cha gerua kle gerule kare. 34 Ba ulita chagedale ta giti me mo chuge ngwadi age me no, ba me sui chuge lle gage jai, me mo ta gbe tañachuge lle nga dba ai giti alin ole, ba me chegedale tañachuge kle boi ba ole no o me no skegiti, cha be chieni chuiage ba me skatedale alenske. 35 Chui ege kwian ulita bai kle toi nga dba ai giti age me no ama agali ta agekalin kare, kwian ene mi kle biale cha ngwange gire sugeti ngwale cha be chieni ama ulita be boi salengwli lle tien dáge kare. 36 Ba ulita kledale biale trate ta no ole cha ngwange, ba kira kadadale Chubege ba gerudale chui gdale Chube ole, ene ba be kle biale ba ñage tien gitiru lle ulita be boi me noge chui bdaglige, ba kle biale ene chui ege ba be kle cha ole ba mi ibule cha ngeru —Jesu gerudu ene ulita kwian geru jwannga ole. 37 Diali chui ulita Jesu kwian tku tangle Chube geruage u gerungwa Chube olege, gire diali ngajrege ulita Jesu jo undege Ngwiskinro Jwichugallage. 38 Diali ngabebitabi Jesu jo chkeni u gerungwa Chube olege gire kwian ulita chku Jesu keruchuge ngabebitabi.
1 Pan me dodadre levadura ole gute chuia chiu kodi, chui e kada Pascua. 2 E suiale kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita kle tañachuge age mine gire ama ñage Jesu gai gwangeda. Agwa ama kennga kwian ngleadi kle chage Jesu bale malen ama me takalin age Jesu ole kwian ulita gwa giti. 3 Kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita kle tañachuge ene Jesudi gire dolla Satanás chku Judas-Iscariote tale, Judas-Iscariote ama kwian geru jwannga Jesuge gdaite ule kwian gdataboko giti gdaite na ole. 4 Dolla Satanás chku Judas-Iscariote e tale gire Judas-Iscariote jo kwian gerunga Chube ole daba alin chugagwalla ulita kle ngwadige, kaire guardia u gerungwa Chube ole mananga ngle kle ne ngwadi, Judas-Iscariote chku kwian e ulita kle ngwadi gire Judas-Iscariote gerudu ama ulita ole be age giti, ama gerudu: —Cha ta ba ulita chudaboakalin Jesu gai gwangeda, cha ñage ba ulita dbe Jesu kle ngwadi ene ba ulita ñage ama gai. 5 Judas-Iscariote gerudu ene kwian chugagwalla e ulita ole gire ama ulitadi nga jo chke suga noare, ama gerudu Judas-Iscariote ole: —Ba be cha chudaboi giti cha be igi ngle kete bage ba Jesu kete chage ñanale. 6 Judas-Iscariote gerudu ama ulita ole: —Nobi cha alin, cha be ba chudaboi. Judas-Iscariote gerudu ene gire chui ege gwangerugu ama kledu kote Jesu ole Jesu gdea tke baini Jesu be kle gballa sugekare kwian nglege gire ama joge kwian Jesu dollale ole Jesu gai. 7 Pan me dodadre levadura ole gute chuia chku, chui ege kwian israelita ulita bda cordero gweda gutadale Pascua chuia ollade. 8 Chui e chku gire Jesu gerudu Pedro ole Juan ole: —Joga bligda dodade che ulita alin gutadale Pascua chuia ollade ule. 9 Pedro, Juan geru kadu Jesuge: —¿Baini ba takalin cha joge bligda dodade? ¿Che be blire baini? 10 Jesu jaindunga: —Ba joge una Jerusalénge, una ege kwian onbre gdaite be skwen bage chi dbe lle chi tkangwage, ba joge kwian onbre e nate baini ama be joge chke gude ngwadi, 11 gire ba gerule kwian u mauña ole: “Cha tkanga tangle geruge cha kagu aini geru kade bage nga giti blingwa, ¿baini nga kle biale cha tkanga tangle alin blire ule geru jwannga amage ulita ole Pascua chuia ollade?” 12 Ba gerule ene u mauña ole gire ama be nga kweri dodabale ngaña gwa u amanuge kaite bage, nga e be kle litaba trate ulita gbaba biale. Ne ngwadi ba bligda dodade che ulita alin gutadale. 13 Jesu Pedro kaire Juan ta gbu ene gire Pedro, Juan jo una Jerusalénge. Ama boke jo chke una ege gire lle ulita skwendu boabale Jesu gerudu kare ama ole. Ne ngwadi Pedro, Juan bligda dodadu gutadale Pascua chuiage Jesu ama kagu kare. 14 Bligda kle biale gire Jesu jo u bligda dodadre ngwadige, Jesu toidu dba blire ule kwian geru jwannga amage gdataboko giti gdaboke ole. 15 Gire Jesu gerudu kwian geru jwannga ulita ole: —Cha tadu tanre Pascua chuia ai ollade ule ba ulita ole ngeru cha be jogedage. 16 Cha gerule ba ole, nege cha kle blire bdagli ba ole Pascua chuia ollade, cha mi Pascua chuia ollade dare ule ba ole nga dba ai giti nege gwangerugu. Chui bdagli be chke gire Chube be cha gbe gerule kwian ulita giti kwian Chugagwallale, chui ege che be kle ule ulita nakwaite. 17 Jesu gerudu ene kwian geru jwannga ulita ole gire Jesu chi jangwa gau kote uva chia ole, Jesu gerudu Chube ole uva chia giti: “Cha Ñenua, noare ba uva chia ai ketu cha ulitage jadale.” Jesu gerudu ene Chube ole uva chia giti gire ama chi jangwa uva chia ole ketu kwian geru jwanngage jadale, Jesu gerudu: —Ba uva chia ai girabate modi ulita. 18 Cha geru kete bage, nege alin cha kle uva chia jai ba ole ule, agwa nege gwangerugu cha mi kle ba ole dare ba gatedi uva chia jai ule nga dba ai giti. Chui bdagli be chke gire Chube be cha gbe gerule kwian ulita giti kwian Chugagwallale, gire chui ege cha be uva chia jai nakwaite ule ba ole. 19 Jesu gerudu ene geru jwannga ulita ole gire Jesu pan gau kote gerudu Chube ole pan giti: “Cha Ñenua, noare ba pan ai ketu cha ulitage gutadale.” Jesu gerudu ene Chube ole pan giti gire Jesu pan skutunga ketu kwian geru jwannga kaire kairege gutale, Jesu gerudu: —Pan ai cha uda kare, cha ketabe gwaleda ba ulita giti, ba blire ai kare cha talla ole diali, ene ba tachke chage, ene ba mi ta jogengwa cha agedu giti ba alin. 20 Jesu blidu ulita kwian geru jwannga ulita ole, gire Jesu gerudu kaire uva chia giti: —Uva chia ai cha be kare, ba uva chia jai cha talla ole diali, ene ba ulita be tachke cha bege cha jogeda giti ba ulita alin, cha jogeda giti be suge trate ba ulitage Chube kle geru jagere gbe ba ulita alin. 21 Jesu gerudu ene gire gerudu dare: —Cha gerule ba ulita ole, onbre gdaite be cha kete gwaleda, ama kle aini ule toiba dba blire cha ole. 22 Cha chiu nga dba ai giti kwian kare, ulia cha ketabe boadale daga ngwale gwaleda Chube nu geruba kare unsuialin. Agwa onbre bai be cha kete boadalenga daga ngwale gwaleda, onbre e be boi dageare daga ngwale tanre, ama be cha jia chuge kweri. 23 Jesu gerudu ene gire kwian geru jwannga geru kadu modi ulita: —Che ulita gdataboko giti gdaboke kle aini Jesu ole, ¿che ulitage bai be age ene Jesu dollale? ¿Bai be Jesu kete gwaleda? 24 Kwian geru jwannga geru kadu modi ene, gire ama ulita mo ka dodaduda ongoru ongoru, ama gerudu modi: —Che ulita kle chage diali Jesu ole, ¿bai chege ma no ma kweri kwian na ulita gwa giti? 25 Jesu kwian geru jwannga ulita keruchugu gerule ene modi gire Jesu gerudu: —Bage uñale nga ulita nga dba ai giti kwian chugagwalla ulita kle kwian kage age chugagwalla takalin kare, kwian agedale ulita chugagwalla kle gerule kare, kwian chugagwalla kle kwian kage age chugagwalla takalin kare, ene chugagwalla suge moge kweri, ama mo ka gbe: “Cha kwian ulita chudaboanga noare.” 26 Agwa ba ulita me ñage tañachuge kwian chugagwalla nga dba ai giti ulita kle tañachuge kare, ba tañachugadale nganake. Kwian bai ma kweri ba ulitaske, kwian e mo gbadale ma soli, kaire kwian bai daba kaganga ama mo ta gbadale daba chudaboi no. 27 Kwian ulita tañachuge kwian toiba dba blingwage kwian e ma kweri kwian bligda ketangage. Ba me ñage tañachuge ene, ba ulita tañachugadale cha kle tañachuge kare, cha kle chage nga dba ai giti age no kwian ulita alin kwian ulita chudaboi, cha me kle kwian kage age no cha alin cha chudaboi, agwa cha ta agekalin mo tale no kwian ulita chudaboi. 28 Kwian tanre agedu me no cha ole, agwa ba ulita chagedu ule cha ole ba me cha chugu ngwadi gballa, 29 malen chui bdaglige cha be ba ulita gbe kweri daba chugagwallale. Chui ege cha Ñenua Chube be cha gbe gerule nga ulita giti kwian ulita Chugagwallale, chui ege Chube gwa giti cha be gerule kwian nga ulitamu giti bai jiske Chube gwage bai me jiske Chube gwage. Ene kaire chui ege ba ulita be kle ule cha ole cha be ba ulita gbe daba chugagwallale ule cha ole gerule kwian ulita giti, cha be ba ulita gbe ba bitalla ulita israelita mne gdataboko giti gdaboke chugagwallale gerunga kwian e ulita giti bai jiske bai me jiske Chube gwage. 31 Jesu gerudu ene kwian geru jwannga amage gdataboko giti gdaboke ole gire gerudu Simón alin ole allabi sugekare: —Simón, ba cha keruchuge, cha gerule ba ole. Satanás ta ba ta gbakalin joge siere cha geruage salengwli kwian trigo kwara batenga batekwa giti kare ene trigo kwara joge siere trigo taglage. Satanás gerudu Chube ole: “Cha ta mo chugakalin Simón ole kaire kwian geru jwannga na ulita ole, ene ama ulita be mo ta blite joge siere ba geruage.” Chube be Satanás chuge ngwadi mo chuge ba ole. 32 Gire cha gerudu tanre ba giti Chube ole: “Cha Ñenua, cha takalin ba Simón ta gbe chage no cha alin ole diali me mo ta blite Satanás ole. Ba kira kete amage, ene ama mi joge siere cha geruage.” Cha gerudu ene Chube ole ba giti. Uñale chage ba be mo ta blite sugeti Satanás ole, gire bigwa ba be tachkeni chage, ba be mo ta bliteni cha ole naskuni gire ba geru jwannga na ulita chudaboadale chage no kiraske diali cha geruage. 33 Simón gerudu Jesu ole: —Cha Chugagwalla, cha mi ba chuge ngwadi dale, cha kle biale joge ule ba ole skage, me joge skage alin allabi ba ole llagli agwa kaire cha mo ta gbe jogeda ule ba ole. 34 Jesu gerudu: —Pedro, cha gerule ba ole, nege ngajrege ngakamalin bdugu antalan bebi ngwane gire ba agali be gerule bitamai kwian na ole ba me cha uñe. 35 Jesu gerudu ene Simón ole gire Jesu gerudu kwian geru jwannga gdataboko giti gdaboke ulita ole: —Bitaite cha ba kagu Chube gerua trage kwian ulita ole kaire kwian oga dodade. E suiale ba me jo gde dbe ba me jo igi dbe ba me jo zapato giti, ¿ba chagedu no o ba me chagedu no? Kwian geru jwannga ulita gerudu: —Cha chagedu no. 36 Jesu gerudu: —Nege ba age nganake, ba bai gde molen ba gde dbe, ba bai igi molen ba igi dbe, ba bai me sbadi molen ba camisa chbade camisa ñanalla giti ba sbadi gige dogda. 37 Chube gerua degaba unsuialin gerule cha giti, chada e gerule: “Kwian be gerule ama kwian me no, kwian be ama gbe jiske kwian me no kare, ama gwabeda kwian me no ole ule.” Cha boabe ene ulia, cha be boi ene chuia kle kodi chada degaba unsuialin gerule kare. 38 Kwian geru jwannga ulita gerudu: —Cha Chugagwalla, sbadi dogda gaboke kle ai biale. Jesu gerudu: —E nobi, che mi gerule dare e giti. 39 Jesu gerudu ene kwian geru jwannga amage ulita ole gire Jesu jo siere ama kledu ngwadige jo Ngwiskinro Jwichugallage ule kwian geru jwannga ulita ole, jwichuga ege Jesu kle joge diali gerule Chube ole. 40 Jesu jo chke jwichuga ege nga e Jesu kle joge kare ngwadi, gire Jesu gerudu kwian geru jwannga ulita ole: —Ba ulita gerudale Chube ole mo chudaboi kade amage, ene ba me ta jwlite joge siere chage age me no. 41 Jesu gerudu ene gire Jesu jo sugekare kwian geru jwanngage bateno ke mlie ke jange mangire batre ngwadi, eni Jesu jo chke dba jongnagwa giti gerule Chube ole. 42 Jesu gerudu: “Cha Ñenua, cha me ta boikalin daga ngwale, cha me takalin ba kwian me no chuge ngwadi cha gweda, ba takalin ba ñage cha jwen siere cha be boi tirarege. Agwa ba age cha alin mo tale ba takalin kare, me cha takalinge kare.” 43 Jesu kledu gerule ene Chube ole gire lle boanga Chube alin nga ngaña giti chku Jesudi Jesu kira gbe. 44 Jesu kle tañachuge tanre ama be boi giti, ta olire tanre ole Jesu gerudu ma no mno dare Chube ole mo kira gbe ama be boi giti gire Jesu gwingwa jritedu salengwli be kle chie be kle joge dba dbiske kare. 45 Jesu gerudubi Chube ole, Jesu chku gdate, Jesu joni kwian geru jwannga kle manade ngwadi. Jesuge kwian geru jwannga skwendu gbe, kwian geru jwannga ta olire ole ama skwatigu ama gbedu. 46 Jesu gerudu: —¿Mineade ba ulita kle gbe? Chke bduge gerule Chube ole, ene ba me ta jwlite joge siere chage age me no. 47 Jesu kle gerule ene kwian geru jwannga amage ole gire kwian geru jwannga Jesuge na gdaite kada Judas-Iscariote chku kwian ngle dbe ule Jesu kle ngwadi. Judas-Iscariote jo chke Jesudige Jesu sobadadale, ene chke uñale kwian Jesu dollage Judas-Iscariote giti e Jesu, ene Jesu dolla ñage Jesu gai. 48 Jesu gerudu Judas-Iscariotege: —Judas-Iscariote, cha gerule ba ole, Chube cha kagu nga dba ai giti kwian kare, ¿nege ba kle mo ta gbe cha sobade ketadale gwaleda kwian agenga me noge? 49 Kwian geru jwannga ulita kle chage Jesu ole gwagedu Judas-Iscariotedi age ene Jesu ole gire sugedu ama ulitage Jesu be boi daga ngwale, ama ulita tadu Jesu chudaboakalin malen ama ulita geru kadu Jesuge: —Cha Chugagwalla, ¿ba takalin cha kira bate ba dolla ai ulita ole sbadi giti? 50 Kwian geru jwannga ulita geru kadu ene Jesuge gire blike ama gdaite kwian gdaite ologa taingwli tkunga ulita sbadi giti, kwian ologa jo tkabanga kwian e lle boanga kwian gerunga Chube ole chugagwalla ma kweri alin. 51 Jesu gerudu kwian geru jwannga ole: —¡Ba me age dare ene kwian ole! Jesu gerudu ene gire Jesu kwian ologa gatuda kodi, ene kwian ologa jo chkeni noni. 52 Kwian gerunga Chube ole daba alin chugagwalla ngle, kwian u gerungwa Chube ole mananga ngle, kwian israelita chugagwalla juma ngle, kwian e ulita kaire kle chage Jesu jwen dbale skadi, Jesu gerudu ama ulita ole: —¿Mineade ba ulita kle chage sbadi ole glita ole cha gai nate kwian jiskenga kare? Ba kle age cha ole salengwli ba age kwian agenga me no me no ole kare. 53 Chui ulitage diali cha kledu ba ulita ole u gerungwa Chube olege, ni bitaite ba cha gau dbale skadi. Agwa nege chui chku ba alin age cha ole Chube kle ba chuge ngwadi age kare, malen nege ba ñage age cha ole ba takalin kare Satanás kiralla giti, Satanás kwian me no ulita chugagwalla, ba ulita kle age ama takalin kare. 54 Jesu gerudu ene gire kwian ngle ulita Jesu gau Jesu du skadi kwian gerunga Chube ole daba alin chugagwalla ma kweri ullage. Pedro jo chage gwage bate Jesu nate. 55 Kwian Jesu ganga jo chke Jesu dbe kwian gerunga Chube ole chugagwalla ma kweri ullage, kwian ulita jo chke llani gire kwian jita teun goga kwian ulita toidu dba jita ngwachuge. Pedro kaire chegu jita ngwachuge ule kwian nglea ole. 56 Muinga gdaite lle boanga gwagedu Pedrodi toiba dba jitadi, muinga e chegu gwage tanre Pedrodi, muinga gerudu kwian ulita ole: —Onbre e kledu chage ule Jesu ole. 57 Pedro gerudu muinga ole: —Cha me chagedu ama ole, cha me ama uñe. 58 Bigwa kwian na gwagedu Pedrodi, gerudu Pedro ole: —Kwian mneite chagedu Jesu ole diali, suge chage ba kwian ene gdaite, ulia ba ama chagemanalla. Pedro gerudu kwian ole: —Me dale, cha me ama chagemanalla. 59 Hora gdaite jo tangle gire kwian na gerudu Pedro giti: —Uñale chage onbre e nga Galileamu, ama kledu chage Jesu ole. 60 Pedro gerudu: —Cha me ama uñe dale, me uñale chage ba kle llema geruade cha ole. Pedro kle gerule ene kwian ole, Pedro bebi keru tiendba ulita gire antalan ngwanedu. 61 Jesu jwliteduda gwagedu Pedrodige, Pedro tendu Jesudi gire Pedro tachku Jesu gerudu giti ama ole ngeru: “Nege ngajrege ngakamalin bdugu antalan bebi ngwane gire ba agali be gerule bitamai kwian na ole ba me cha uñe.” 62 Pedro tachku Jesu gerudu ene giti gire Pedro jo sugekare, ama olidu tanre tanre ama gerudu Jesu dollale giti. 63 Kwian israelita chugagwalla ulita Jesu gbanga jiske ama ulita agedu tanre me no Jesu ole, ama Jesu gbu gidagda, ama Jesu batu, ama Jesu gwagwa gatuda ñomedrega giti ene Jesu me chegu ten kwiandi, ama Jesu batu obere gire geru kadu Jesuge: —Gerule cha ole, ¿chema kle ba bate? Ama ulita gerudu tanre me no me no Jesu dollale kidere Jesudi. 66 Nga chku ju gire kwian israelita chugagwalla juma ulita, kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti, kwian e ulita mo litu jennga Jesu giti, ama ulita Jesu dbangu ama ulita gwa giti, gire chugagwalla e ulita geru kadu Jesuge: 67 —Gerule cha ole, ¿ulia ba Cristo? ¿Chube nu ba kagaba ulia nga dba ai giti kwian alin o me? Jesu jaindunga: —Cha jainnga ima ba mi cha gerua gai ulia. 68 Cha geru kade bage ba tale ba tañachuge cha chema ba mi jainnga, ba mi gerule ulia cha ole cha chema. 69 Cha gerule ulia ba ulita ole, Chube kira molen ulita, ama cha kagu nga dba ai giti kwian kare, nege gwangerugu cha mi chege aini, cha be jogeni nga ngaña giti Chube ngwadi gire cha be toi dba diali Chube ko taingwli giti kwian ulita Chugagwallale. 70 Jesu gerudu ene gire kwian ulita geru kadu Jesuge: —¿Ba kle gerule ba Chube Kirolla? Jesu jaindunga: —Ima, cha amaña ba ulita kle gerule kare, cha Chube Kirolla. 71 Kwian ulita gerudu modi: —¿Lledale che kwian na kade gerule ama giti ama gbale jiske? Ama kle mo gbe jiske agali ama kle gerule giti, ama agali gerudu ama Chube Kirolla, che ulita ama keruchugu ama me ñage gerule ene, e me ulia.
1 Kwian israelita chugagwalla ulita jo Jesu dbe chugagwalla Pilato ngwadi gbale jiske Pilatoge, Pilato nga Romamu ama kwian nga Judeamu chugagwalla. 2 Kwian israelita chugagwalla ulita jo chke Pilato ngwadi gire kwian Jesu gbu jiske Pilatoge, kwian gerudu: —Onbre ai skwendu cha ulitage gerule cha bitalla ulita ole gobierno dollale, kle gerule cha ulita me igi ketadale kwian nga Romamu chugagwalla kweri emperador kada Césarge, kaire kle gerule ama Cristo Chube nu ama kagaba nga dba ai giti kwian Chugagwallale. 3 Kwian gerudu ene Jesu gbale jiske Pilatoge, gire Pilato geru kadu Jesuge: —¿Ba kwian israelita ulita chugagwalla kweri? Jesu jaindunga: —Ima, cha amaña ba kle gerule kare. 4 Jesu gerudu ene gire Pilato gerudu kwian gerunga Chube ole daba alin chugagwalla ulita ole kaire kwian ngle kledu eni ole: —Cha geru tragu tanre onbre ai ole, suge chage trate ama me jiske dale. 5 Pilato gerudu ene gire kwian ulita me ta chugu gerule Pilato ole Jesu dollale, ama ulita gerudu: —Onbre ai kle chage kwian tke tangle geru me uliage nga Judea ulitage. Ngeru ama chagedu kwian tke tangle nga Galileage, nege ama kle age ene kaire aini, ama kle kwian tanre anblite mau alin kle kwian ta gbe age chugagwalla kweri César dollale. 6 Pilato kwian keruchugu gerule ene Jesu giti Jesu kledu chage kwian tke tangle nga Galileage, gire Pilato geru kadu kwian ulitage: —¿Onbre ai nga Galileamu? 7 Kwian jaindunga: —Ima, ama nga Galileamu. Gire Pilato Jesu dbangu Herodes ngwadi, Herodes kwian nga Galileamu chugagwalla gobernador malen Pilato Jesu kagu Herodege, chui ege Herodes kaire kledu una Jerusalénge. 8 Jesu dule jo chke Herodes ngwadi, Herodes gwagedu Jesudige gire nga chegu suga noare Herodedi, Herodes ologe kwian geruba Jesu kle lle daga ngwale no tanre dodade Chube kiralla giti malen sbali Herodes tadu gwagekalin Jesudi, Herodes kle Jesu manade ngwange chui gwealege Jesu lle daga ngwale dodade Chube kiralla giti Herodes gwa giti. 9 Herodes gwagedu Jesudi gire Herodes geru kadu tanre amage, agwa Jesu me jaindunga ni sidri Herodes kalen. 10 Kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita kledu ule eni, ama ulita gerudu tanre me no Jesu giti Jesu gbe jiske Herodege. 11 Herodes geru e ulita Jesu giti keruchugu gire Herodes ule mo guardialla donga ole agedu tanre daga ngwale Jesu ole, ama Jesu gbu gidegda tanre, ama Jesu ngama tku ñometra noareske kwian chugagwalla ñometralla kare Jesu gbale gidegda, ñometra eske Herodes Jesu kaguni naskuni Pilato ngwadi. 12 Amaña chuiage Herodes kaire Pilato jwlitu mo skatemanallale, ngeru ama mo dollale. 13 Jesu dbajo chkeni Pilato ngwadi gire Pilato mo litu kwian israelita ulita kledu eni ole kaire kwian israelita chugagwalla ulita ole, 14 Pilato gerudu kwian e ulita ole: —Ngeru ba chiu onbre ai dbe aini ba gerudu onbre ai kle gerule ba bitalla ulita ole gobierno dollale. Cha geru kadu amage ba ulita gwa giti, ba cha keruchugu, chage suge trate onbre ai me jiske dale ba kle ama gbe jiske kare. 15 Cha ama kagu chugagwalla Herodes ngwadi, Herodege kaire onbre ai me skwendu jiske malen Herodes ama kaguni naskuni che ulita ngwadi. Ba ulitage sugedale trate kaire ama me jiske ama me jogedaleda. 16 Cha be ama kwabate alin gire bigwa cha be ama chuge ngwadi gbale. 17 Pilato be kwian gdaite kle skage skajwanngenga ama age diali kare Pascua chuiage, malen Pilato takalin Jesu skajwanngenga, 18 agwa kwian ulita ule ngautu kweri: —Kwian ai gwangeda, Barrabás chuge ngwadi gbale. 19 Barrabás jo tkaba skage gobierno giti, Barrabás kwian na tanre ole unaske mo ta gbu ule kira bate gobierno dollale, kaire Barrabás daba na guda, age me no e gdale Barrabás kledu skage. 20 Kwian ulita takalin Barrabás chege gbale agwa Jesu jogedaleda. Pilato gerudu nabitaite kwian ole: —Cha takalin Jesu chuge ngwadi gbale, cha be ama skajwanngenga. 21 Gire kwian ulita ngautu ma kweri: —¡Ama gwangeda kruge! ¡Ama gwangeda kruge! 22 Bitamaidale Pilato gerudu kwian ulita ole: —¿Mineade ba takalin cha ama gwangeda kruge? Chage suge trate ni ama agedu me no sidri, ¿llema giti ama jiske? Chage ama me skwen jiske dale ama me jogedaleda. Cha be ama kwabate alin gire bigwa cha be ama chuge ngwadi gbale. 23 Pilato gerudu ene gire kwian ulita ngautu dare kweri: —¡Ama gwangeda kruge! ¡Ama gwangeda kruge! Kwian ulita ngautu tanre ene, gire bdagli Pilato agedu kwian ulita tadukalin kare. 24 Pilato gerudu kwian nglea ulita ole: —Cha be age ba ulita takalin kare, cha be onbre ai kete bage, ba ta agekalin kare ama ole ba age. 25 Pilato Jesu ketu ene kwian ulitage gwaleda kwian takalin kare, gire Pilato Barrabás skajwanngunga, Barrabás jo tkaba skage gobierno giti, ama kwian na tanre ole mo ta gbu ule kira bate gobierno dollale, kaire Barrabás daba na guda, age me no e gdale Barrabás kledu skage, Pilato onbre e agenga me no skajwanngunga agwa Pilato Jesu ketu gwadaleda kwian ulita tadukalin kare. 26 Guardia donga ulita jo Jesu dbe kru ole nga Jesu gwabeda ngwadi, gire jonkare guardia donga tendu onbre kada Simón ngwange, Simón una Cirenemu, Simón kledu chage una Jerusalén ngnagu gire guardia donga Jesu gau gbu Jesu krulla dbe Jesu nate. 27 Kwian nglea una Jerusalénge chagedu Jesu nate, kwian nglea eske muinga tanre chagedu ta olire tanre Jesu giti, ama ulita chagedu Jesu nate. 28 Jesu gwagedu muinga tanre kle oliredi gire Jesu gerudu ama ulita ole: —Muinga una Jerusalénmu, ba ulita me olire cha giti, ma no ba ulita olidale mo giti kaire ba ulita olidale mo kirogwalla giti. 29 Bdagli kwian boi daga ngwale chuia be chke, chui ege kwian ulita be gerule: “Noare muinga ulita alin bai toidu onbre ole agwa me ñadu chage gaba, noare muinga ulita alin bai me ñadu kirogwa molen me su jusuli kete kirogwage.” 30 Kaire chui ege kwian ulita be gerule dbinanga ole: “¡Chitedenga cha giti!” Be gerule jwichuga dbira ole: “¡Cha gateda!” 31 Cha agali ole kwian kle age me no ba ulita gwa giti, ba ole bdagli be boi ma tirare. Cha gli lere kare, kwian kle age tanre me no cha ole. Ba gli dra kare, ba ole be boi ma tirare bdagli —Jesu gerudu ene muinga e ulita ole. 32 Kwian jiskenga boke dule gwaleda ule Jesu ole. 33 Kwian boke e jo chke Jesu ole nga kada Calaverage, eni guardia donga Jesu gbu kruge ngaña, kaire guardia donga kwian jiskenga boke e gbu kru na gdabokege ngaña, gdaite gbere kruge Jesu ko taingwli ngnagu giti, gdaite gbere kru nage Jesu ko jobole ngnagu giti. 34 Jesu kledu kruge ngaña gire Jesu gerudu Chube ole: —Cha Ñenua, kwian ulita kle age me no cha ole, agwa amage me suge ama kle age giti, cha takalin ba ama kle age me no ulita cha ole talla mlienga —Jesu gerudu ene mo Ñenua ole. Jesu ñometralla jo jwanbanga Jesudige, ñometra e ulita guardia donga ulita girabatu modi guardia donga bai kaire blachku no ole. 35 Kwian tanre kledu eni gwage Jesudi, kaire kwian israelita chugagwalla tanre kledu eni kidere tanre Jesudige, chugagwalla e ulita gerudu me no modige Jesu giti: —Ama ñadu kwian na tanre chudaboi, nege ama mo chudaboadale agali, ama ulia Cristo Chube nu ama kagaba nga dba ai giti ama mo jwanlenga agali kruge. 36 Kwian israelita chugagwalla ulita gerudu me no ene kidere Jesudi, kaire guardia donga ulita ama gidedu tanre Jesudi, ama uva chia gage gatu Jesuge jadale, 37 gire guardia donga gerudu me no Jesu ole Jesu gbagda gidagda, ama ulita gerudu: —Ulia ba kwian israelita ulita chugagwalla kweri ba mo jwennga agali kruge. 38 Chada jo degaba Jesu giti, chada e gbere kruge Jesu chuga giti, chada e gerule: “Ai kwian israelita ulita chugagwalla kweri rey.” 39 Kwian jiskenga gdaboke kledu Jesu ole kruge mo kaire, kwian jiskenga e gdaite gerudu me no kidere Jesudi, ama gerudu: —¿Ba me gerudu ba Cristo Chube nu ba kagaba nga dba ai giti? Ba ulia Cristo ba gerudu kare gire ba mo jwennga agali kruge, kaire ba cha boke jwennga kruge. 40 Kwian jiskenga na gdaite ka bo skatemanalla ole skatemanalla gerudu me no Jesu ole giti, jiskenga e gerudu skatemanallage: —¿Ba ta me kwachie Chubedi? Che kle ji chuge ule onbre ai ole, 41 che ji chugadale gballa gdabonate, che jiske ulia, che agedu me no malen che kle aini ji chuge che agedu me no giti, agwa ama me su age me no, ama me jiske dale. 42 Jiskenga gdaite ka bobi ene mo skatemanalla ole Jesu gdale gire ama gerudu Jesu ole: —Jesu, ba chuia be chke gire ba be chege kwian ulita Chugagwalla kweri, chui ege cha takalin ba tachke cha giti ba tai dage chage. 43 Jesu jaindunga onbre e kalen: —Cha gerule ulia ba ole, nege sugeti ba be kle ule cha ole nga noarege nga ngaña giti Chube ngwadi. 44 Chui chku bduke gire nga ulita nga dba ai giti chegu nga jereske, chui me chratigunga dare, nga jere ene jagedu hora gdamai, chui jo chege nga bonga dbigu gire nga chra chiuni. Boidu ene gire sugeti ngwale ñometra ura kle itabanga gwa u gerungwa Chube olege, ñometra e skagedunga tainkwli bonga ngaña joge dba. 46 Gire Jesu gerudu kweri Chube ole: skagenga tainkwli bonga ngaña joge dba —Cha Ñenua, cha mo oña kete bage manadale. Jesu gerudu ene gire Jesu jokeda. 47 Guardia donga chugagwalla gdaite kledu eni ama gwagedu Jesu boidu ene ulitadi, gire guardia chugagwalla e gerudu: —Chube noare kweri, ulia Chube onbre ai kagu nga dba ai giti, ama trate, ama me agenga me no, ama me jiske dale. 48 Kwian ngle mo litaba kledu gwage Jesu boidu ulitadi, gire kwian e ulita jo gwasieruda mo bate kudegdage ta olire ta kwachie ole Jesu giti. 49 Kwian Jesu uñanga onbre kaire muire ulita nu chieba nga Galileage Jesu ole llagli kledu eni gwage bate Jesudi Jesu boidu ulitadi. 50 Onbre gdaite kada José kledu eni Jesu jokeda kruge ngwadi, ama kwian israelita chugagwalla gdaite, ama kwian no, ama chagedu no Chube takalin kare, ama kwian una Arimateamu nga Judeage. 51 José noare Chube ole, ama kledu Chube chuia manade ngwange Chube be gerule nga ulita giti kwian ulita Chugagwallale. Josége me chegu no kwian israelita chugagwalla na ulita agedu Jesu ole Jesu gwanguda. 52 José jo Pilato ngwadi Jesu jaba kade Pilatoge ogadale, José gerudu Pilato ole: —Cha ta Jesu jaba ogakalin. Pilato jaindunga: —Ba ñage Jesu jaba oge. 53 José Jesu jaba jun dbige kruge, José Jesu jaba bliuda ñometra no glitaleske gire José jo Jesu jaba dbe keuga jaba ogangwage, José Jesu jaba gbu keugage, keuga ege ni kwian jaba ogaba gdaite, eni Jesu jaba jo ogaba. 54 Muinga ulita nu chieba Jesu ole nga Galileage, muinga e ulita jo chage José nate Jesu jaba oge ngwadi. José Jesu jaba gbu chiga keugage muinga e ulita gwa giti, malen muinga ege chku uñale Jesu jaba chegu ogaba keuga ege. Jesu jaba ogle chuia, chui e chege chuietre alin kwian israelita undege chuia. 56 Muinga ulita joni gudegu, muinga lle ñachke noare dodadu gbu biale dbe tkale Jesu jaba giti. Gire chuietege undege chuiage muinga e ulita undegu Moisés chadalla gerule kare.
1 Muinga ulita nu chieba Jesu ole nga Galileage muinga e ulita undegu undege chuiage, undege chuia jo tangle gire nagbietege chui domingoge ngabebitabi muinga e ulita jonini Jesu jaba ogle ngwadi lle ñachke noare dbe tkadale Jesu jaba giti. 2 Muinga e jo chke keugage Jesu jaba ogle ngwadi, muinga gwagedu kechuga kweridi kechuga e gbaba keugage me kle kaire, kechuga jwanbanga, keuga ugakalla chegeba ka ngwale. 3 Muinga jo chiga keugage, muingage ama Chugagwalla Jesu jaba me skwendu. 4 Muinga chegu tañachuge tanre, me uñale muingage boidu mine Jesu jaba ole, kle tañachuge ene gire sugeti ngwale onbre boke kle jageba gdate ule muinga ole, onbre e mo ngama tkaba ñometra gwade chra chraske. 5 Muinga gwagedu onbre edi, muinga gwa gbu gwadbiguda kenngaske gire onbre e gerudu muinga ole: —¿Mineade ba ulita kle chage aini kwian gwade jinade kwian jaba ogangwage? 6 Aini ama me kle. Ama chkuni gwade. ¿Ba me tachke ama gerudu giti ba ole ama kledu llani nga Galileage gire? Ama gerudu: “Chube cha kagu nga dba ai giti kwian kare, cha ketabe kwian me noge gwadaleda kruge, chui gbamaige gire cha be chkeni gwade.” ¿Ba me tachke e giti? 8 Onbre gerudu ene muinga ole gire muinga ulita tachku Jesu gerudu ama ole giti. 9 Muinga ulita joni, muinga geru tragu kwian geru jwannga Jesuge gdataboko giti gdaite ole ama gwagedudi giti, kaire muinga geru e tragu kwian na dare ole. 10 Muinga geru Jesu giti tragu kwian geru jwannga ulita ole, muinga tanre e ulitaske muinga gdaite kada María-Magdalena, gdaite na kada María, María e Santiago chebia, gdaite na kada Juana, muinga e gdamai kledu chage ule muinga na tanre ole geru Jesu chkuni gwade giti trage. 11 Muinga gwagedudi boi ulita gerua tragu kwian geru jwannga Jesuge ole, kwian geru jwannga tañachugu muinga ulita sodu, ama me muinga gerua Jesu giti gau ulia. 12 Pedro geru e keruchugu gire Pedro jo jrite tienda Jesu jaba ogle ngwadi, Pedro jo chke llani, tiunda dbige keugage gire gwagedu ñometra alin kle, Jesu jaba me kle. Pedro joni gudegu tañachuge tanre mo tale boidu ulita giti, ama tañachugu: “¿Agedre mine Jesu jaba ole? ¿Jesu jaba kle baini?” 13 Chui amañage kwian boke jo chage una kada Emaús ngnagu, una e chege kilómetro gdataboko giti gdaite una Jerusalénge. 14 Kwian boke e kle chage jonkare geru trage gdabonate Jesu boidu ulita giti. 15 Ama kle geru trage jonkare Jesu giti gire Jesu amaña chiu amadige, Jesu chagedu ule ama ole. 16 Kwian boke gwagedu kwian na kledu chage ule ama ole, agwa me chku uñale ama bokege chema kle chage ule, me sugedu amage Jesu amaña kledu chage ule ama ole. 17 Jesu geru kadu amage: —¿Llema giti ba kle geru trage jonkare? ¿Mineade ba kle ta olire? Jesu geru kadu ene gire kwian boke e jagedunga gdate jonke, ama ta olire tanre, 18 ama gdaite kada Cleofas jaindunga Jesu kalen: —Kwian ulitage uñale boidu mine una Jerusalénge chui jo tangle aige. ¿Agwa bage geru e me chku uñale boidu giti una Jerusalénge? 19 Jesu geru kadu: —¿Boidu mine? Kwian jaindunga: —Cha kle gerule Jesu giti, Jesu una Nazaremu. Ama kwian Chube gerua ketanga dabage, Chube gwage kaire kwian gwage ama gerudu no ulita kiraske lle bo no ulita kiraske. 20 Kwian gerunga Chube ole daba alin chugagwalla ulita kaire che chugagwalla na ulita, ama ulita Jesu ketu gwadaleda kruge kwian jiskenga kare. 21 Cha tañachugu Chube nu ama kagaba cha chudalla israelita chugagwallale cha chudalla ulita chudaboi jwen siere kwian cha dollale ulitage, agwa gire me boidu ene cha tañachugu kare, ama guleda kruge, bogleriga Jesu jo gwabada. 22 Muinga tanre kledu chage cha ulita mneitella ole Jesu nate, muinga e gweale jo nege ngabebitabi Jesu jaba jo ogaba ngwadi keugage, Jesu jaba me su skwen muingage gire muinga chiuni gudegu, muinga e ulita cha kwajun gerudu ama gwagedu lle boanga Chube alin nga ngaña giti bokedi, agwa Jesudi ama me su gwage, lle boanga Chube alin gerudu muinga e ole Jesu kle gwadeni. 24 Bigwa daba cha chagemanalla gweale jo tienda agali Jesu jaba jo ogaba ngwadi keugage, cha chagemanalla gwagedu lle ulitadi muinga gerudu kare, agwa Jesudi ama me su gwage. 25 Kwian e gerudu ene Jesu ole gire Jesu gerudu ama ole: —Ba me ta molen. Unsuialin kwian Chube gerua ketanga ulita gerudu tanre Cristo giti, ba ama gerua e Cristo giti keruchugu trate Cristo boidale ene, agwa ba me geru e gau ulia. ¿Mangire ba be mo ta gbe geru e gai ulia? 26 Chube nu Cristo kagaba nga dba ai giti, bage sugedale trate ama boidale daga ngwale ene ulita ngeru gire be jogeni nga ngaña giti Chube kle ngwadi. ¿Mangire ba be geru e gai ulia? 27 Jesu gerudu ene kwian boke ole gire ama gdamai jo chage dare una Emaús ngnagu, jonkare Jesu geru ñeu tanre kwian bokege, Jesu geru ñeu Moisés nu Chube gerua degaba unsuialin giti, kaire Jesu geru ñeu kwian Chube gerua ketanga nu Chube gerua degaba ulita giti, chada e ulita gerule tanre Jesu be boi giti ulita nga dba ai giti. 28 Kwian boke jo chke unaske ule Jesu ole, unage ama gwagedu Jesudi Jesu be joge dare. 29 Agwa ama boke gerudu Jesu ole: —Ba chegeda cha ole aini, ba me joge dare, nga jere. Ama gerudu ene Jesu ole agwa Jesu jo gudegu chegedaleda ama ole. 30 Jesu jo chke gwa kwian boke ole gire boidu ene: Jesu toidu dba blingwage ule kwian boke ole, Jesu pan gau kote, gerudu pan giti Chube ole: “Cha Ñenua, noare ba ai ketu chage gutadale.” Gerudu ene Chube ole gire Jesu pan skutunga, Jesu pan ketu kwian bokege, gire sugeti ngwale chku uñale trate kwian boke ege Jesu amaña kle ule ama ole. Boidu ene gire blike Jesu jongwa kwian boke gwage ne ngwadi blingwage. 32 Kwian boke gerudu modi: —Ulia ama chagedu jonkare che ole geru trage, ama geru ñeu Chube gerua degaba unsuialin giti, gire che tadi sugedu no ama kledu gerule giti che ole, agwa che me chku ama uñe nate chema tra no kledu gerule che ole, nege sugedu chege e Jesu amaña. 33 Kwian boke me manadu dare eni, ama joni blike una Jerusalénge, una ege kwian geru jwannga Jesuge gdataboko giti gdaite skwendu mo litaba kwian na tanre ole. 34 Kwian ulita kle mo litaba ole una Jerusalénge gerudu kwian boke ole: —Che Chugagwalla Jesu chkuni gwade, ama medu Simónge. 35 Gire kwian boke kaire geru tragu kwian ulita kle mo litaba ole ama boidu mine ulita jonkare, Jesu geru unsuialin tanre ñeu ama bokege jonkare, kaire unaske gwa Jesu pan skutunga pan ketu ama bokege gire chku Jesu uñe nate Jesu amaña, kwian boke geru e ulita tragu kwian kle mo litaba ole. 36 Kwian boke kle geru e trage kwian ulita kle mo litaba ole gire Jesu me chiu gda uñale kwiange Jesu chku kwian e ulitaske, Jesu gbi kadu kwian ulitage. 37 Kwian ulita kwachiu tanre, tañachugu ama kle gwage oñakwadi. 38 Jesu geru kadu kwiange: —¿Mineade ba kle kwachie? ¿Mineade ba kle tañachuge mo tale cha me amaña? Jesu geru kadu ene kwiange gire Jesu ko kaitu sera kaitu kwiange, Jesu gerudu: —Gwagede cha kodi, gwagede cha seradi, mo ta gbege cha gai ulia cha amaña kle ba ulita gwa giti. Cha chugedi mo kodi, ene chke uñale bage cha me oñakwa, oñakwa me uda molen me gda molen, cha uda molen cha gda molen ba ulita kle gwage chadi kare. 41 Kwian ulita Jesu keruchugu gerule ene gire kwian ulitadi nga suga noare, ama tadukalin Jesu gerua gai ulia, agwa chegu tañachuge tanre mo tale Jesudige: “¿Ama gerudu ulia o me?” Kwian kledu tañachuge ene gire Jesu geru kadu ama ulitage: —¿Ba bligda molen aini gutadale? Cha ta blikalin. 42 Kwian ngwe lingu bitaite ketu, 43 Jesu ngwe gutu kwian e ulita gwa giti, 44 gire Jesu gerudu ama ulita ole: —Ngeru cha kledu ba ole gire cha gerudu tanre ba ole Chube gerua degaba unsuialin giti, Moisés nu Chube gerua degaba, kwian Chube gerua ketanga dabage nu Chube gerua degaba, kaire chada kada Salmos, chada e ulita gerule cha giti cha boidale ulita ene ba gwagedu kare chadi boi. 45 Jesu ama ulita ta gbu ene, gire ama ulita tachku Jesu gerudu ngeru ama ole giti, ene Chube gerua degaba unsuialin Jesu giti sugedu ama ulitage. 46 Jesu gerudu ama ulita ole: —Chube gerua degaba unsuialin gerule ene: “Chube nu Cristo gaba kagadale nga dba ai giti, Cristo boidale daga ngwale, ama jogedaleda, mongike gire ama be chkeni gwade. 47 Geru e Cristo giti tragadale ngerule kwian una Jerusalénmuge ole, bigire geru tragadale kwian nga ulitage ole, geru tragadale kwian ulita kle age me no kwian ta jwlitedale Chube ole me age me no dare, gire kwian agedu me no ulita ngeru Chube be talla mlienga.” Chube gerua degaba unsuialin gerule ene. 48 Nege ba gwagedu agali chadi cha boidu ulia Chube gerua degaba unsuialin gerule kare, ba geru e tragadale kwian ulita ole. 49 Ba ulita cha keruchuge no, ulia cha be Chube Oña kage ba alin cha Ñenua gerudu kare. Ba manade aini una Jerusalénge gire Chube Oña be chie nga ngaña giti Chube ngwadi, Chube Oña be chke badi mo kira kete bage, ba be kira e gai gire ba be joge geru cha giti trage kwian ulita ole nga ulitage Chube Oña kiralla giti. 50 Jesu gerudu ene kwian ulita kle mo litaba ole gire Jesu kwian e ulita du una kada Betania ngnagu, jo chke kodi una ege gire Jesu ko gau ngaña gdabonate gerudu ama ulita ole: —Cha takalin Chube age no ba ulita alin ba ulita manade no diali, Chube ba ta gbe nga suga noare ole. 51 Jesu kle gerule ene ama ulita ole gire Jesu jo chkenga ngaña kote siere ama ulitage, Jesu dule nga ngaña giti Chube kle ngwadi. 52 Kwian ulita chegu gerule noare Jesu giti gire ama joni una Jerusalénge ta noare ole Jesu giti. 53 Ama ulita jo chkeni una Jerusalénge gire ama kledu diali u gerungwa Chube olege gerule noare Chube giti diali.
1 Gwangea nga ulita bebi dodadale Cristo klebi enebi, ama klebi Chube ole, ama Chube, 2 gwangea ama klebi enebi Chube ole. 3 Ama giti Chube nga ulita dodadu lle ulita dodadu, Chube ni lle gdaite dodadu sugekare amage. 4 Cristo alin giti lle ulita gwade kwian ulita gwade. Ama kwian ta gbe suge kwian chagedale mine Chube takalin kare, ama jichra kare kwian ulita alin, ama kwian ta gbe suge salengwli jichra kle kwian gbe ten nga jereske kare. 5 Kwian me Chube uñe chage nga jereske kare, Cristo chku jichra kare kwian ene alin, jichra chku chratigenga nga jere dbiguske, nga jere dbigu tadu jichra chra gwakalinda ene jichra me chratigenga dare, nga jere dbigu me ñadu jichra gweda. 6 Chube kwian onbre gdaite kada Juan-Bautista kagu gerule no jichra giti kwian ulita ole. Juan-Bautista gerudu no trate jichra giti, ene kwian geru e keruchuge, ene kwian ulita ñage jichra uñe jichra gai ulia Juan-Bautista giti. 8 Juan-Bautista me jichra, ama gerunga alin jichra giti kwian ole. 9 Jichra ulia chiu nga dba ai giti kwian ulita alin, ama kwian ta gbe Chube giti, ene suge kwiange Chube mine, jichra e Cristo. 10 Cristo nga ulita lle ulita kwian ulita dodadu, Cristo ulita mauña. Ama chku nga dba ai giti kwianske agwa me chku uñale kwian ulitage ama chema. 11 Ama chagedu mo jwiage mo bitallanuske, ama bitallanu ulita me ama gau ngwange no. 12 Agwa kwian bai kaire ama gau ngwange no kwian ama gau ulia, ama kwian ene gbu Chube oliale. 13 Kwian chege Chube oliale me salengwli kwian ulita nga dba ai giti menga chebia kote kare, kwian nga dba ai giti age mau tale ama takalin kare ene ama kirogwa molen, agwa Chube kwian ta blite age Chube takalin kare, kwian ene chege Chube oliale, Chube ama ulita Ñenua. 14 Chube Cristo kagu nga dba ai giti, ama chku kwian kare, ama toidu chagedu kwianske ama ta du no diali kwian ulita ole, ama agedu tanre no kwian alin, ene kwian gwage amadi chkedale uñale ama Ñenua mine ulia. Ama kledu kwianske agedu no ulita kwian alin gire cha chada ai deganga, cha ule cha chagemanalla ulita ole gwagedu amadi, ama agedu ulita uñale cha ulitage, uñale cha ulitage ama ulia Chube Kirolla gdaitre alin, ama mo Ñenua kirallaske agedu no ulita. 15 Juan-Bautista gerudu no no kwian ole Cristo giti, Juan-Bautista gerudu ene: “Ai cha geruadu kwian ole be chie cha nate ama ma kweri chage, ama kledu ngeru chage, gwangea ama klebi enebi Chube ole.” 16 Cristo diali age no che amanu ulita alin, diali ama kle age ma no dare che alin, ama ole age no ene diali me bidege. 17 Chube Moisés ta gbu chada dege kwian ulita alin, ene suge kwiange kwian chagedale mine Chube gwa giti nga dba ai giti, agwa chada e giti me sugedu ulia kwiange Chube mine, geru ma trate ulia Chube giti Jesucristo chiu dbe kwian alin, ene nege Jesucristo giti suge kwiange Chube no kwian ulita ole Chube agedu no kwian ulita alin. 18 Ni kwian gdaite nu gwageba Chubedi, Chube Kirolla alin giti kwian Chube uñe, Chube Kirolla gdaitre alin ama kaire Chube, ama talla kle ule diali mo Ñenua ole. 19 Kwian israelita chugagwalla ulita una Jerusalénmu kwian gau mne gdaite kagu geru kade Juan-Bautistage, kwian mne gdaite e gweale gerunga Chube ole daba alin, kwian na gerunga Chube ole daba alin chudaboanga, kwian e ulita jo chke Juan-Bautista kle ngwadi geru kadu Juan-Bautistage: —¿Ba chema? 20 Juan-Bautista gerudu trate mau giti kwian ole: —Sbali Chube gerudu be kwian jwannga siere kage kwian alin, e Cristo, ba tañachuge cha Cristo, me ene, cha me Cristo. 21 Kwian geru kadu nabitaite Juan-Bautistage: —Ba me Cristo, ¿ba chema? ¿Ba kwian Chube gerua ketanga dabage unsuialin kada Elías amaña chkuni? Juan-Bautista jaindunga: —Me ene, cha me ama. Kwian ulita jogeba chke Juan-Bautista ngwadi me ta chugu geru kade Juan-Bautistage, kwian gerudu Juan-Bautista ole: —Kwian Chube gerua ketanga dabage be chie, ¿ama ba? Juan-Bautista jaindunga: —Me dale, cha me ama. 22 Kwian gerudu Juan-Bautista ole: —Ba me ama, ¿ba chema? Ba gerule cha ole ba chema ulia. Cha geru ba giti dbadale, cha geru ba giti ketadale cha kagangage, ¿ba agali gerule mine mau giti? 23 Juan-Bautista jaindunga: —Cha kle age kwian Chube gerua ketanga dabage kada Isaías chada jigu degaba unsuialin cha giti gerule kare, cha gerunga kwian ole nga gballage Chugagwalla be chie giti, cha gerule kwian ole: “Kwian mo ta gbadale biale trate no Chugagwalla ngwange kwian kle jon lite trate biale chugagwalla ngwange kare.” Cha kle gerule ene kwian ulita ole. 24 Kwian fariseo ulita nu kwian mneite kagaba tienda Juan-Bautistadi, 25 ama geru kadu dare Juan-Bautistage: —Ba ulia me Cristo, ba me Elías, ba me kwian Chube gerua ketanga dabage be chie, ba me kwian e, ¿mineade Chube kalla giti ba kle daba ñe chiske gai ngaña chigage? 26 Juan-Bautista jaindunga: —Cha kle daba ñe chiske alin Chube kalla giti, agwa kwian gdaite kle cheske ma kweri chage, ba ulita bebi ama uñe, 27 ama be chie cha nate ama ma no ma kweri ulita chage, cha me ñanaske ama chudaboangale ama zapatolla jwennga ama serage —Juan-Bautista gerudu ene mau giti kwian una Jerusalénmu kagaba ole. 28 Boidu ene ulita una kada Betaniage, una e chege una Jerusalénge tanglegu chi Jordánge chkagu Juan-Bautista kledu kwian ñe chiske ngwadi, ne ngwadi kwian una Jerusalénmu geru kadu ene ulita Juan-Bautistage. 29 Nagbietege Juan-Bautista gwagedu Jesudi chie ama ngnagu, gire Juan-Bautista gerudu Jesu giti kwian ulita kledu ne ngwadi ole: —¡Gwagede, kwian e cha geruadu! Ama be mo chuge ngwadi jogeda kwian ulita alin bda cordero gwakle kwian kle age me no giti alin kare, Chube ama kagu nga dba ai giti kwian jwen siere ji chugege kwian age me no gdale. Cha gerudu ama giti kwian ole: “Be chie cha nate ama ma kweri chage, ama kledu ngeru chage, gwangea ama klebi enebi Chube ole.” Cha gerudu ene ama giti, nege ama kle chie che ngnagu. 31 Ngeru cha agalige me chku uñale be chie cha nate ama chema, agwa cha agedu cha kaganga Chube gerudu kare, Chube cha kagu cha kwian ñe chiske Chube kalla giti ene cha giti ñage chke uñale kwian israelitage chema be chie ama jwanngale siere. 32 Cha agali me ama uñu agwa cha kaganga Chube gerudu cha ole: “Ba be kle kwian ñe chiske cha kalla giti, gire kwian gdaite be chie mo ñeange chiske bage, ama gití ba be gwage cha Oñadi chie, cha Oña be chege ama gití. Be boi ene gire be chke uñale bage kwian e amaña be cha Oña gbe kwian tale, ene kwian be chage cha Oña ole diali.” Chube gerudu ene cha ole, boidu ene ulita Chube gerudu kare, cha ama ñeu chiske gire cha gwagedu Chube Oñadi chie ngaña ama gití beusi kare, beusi e chegu jageba ama giti ngaña. 34 Cha gwagedu Chube Oñadi chie ama gití Chube gerudu kare cha ole, e giti chku uñale chage trate ama Chube Kirolla —Juan-Bautista gerudu ene ulita Jesu giti. 35 Nagbietege Juan-Bautista kledu nabitaite kwian ñe chiske gai ngaña chigage ngwadi, kwian gdaboke geru jwannga Juan-Bautistage kledu Juan-Bautista ole, 36 gire Juan-Bautista gwagedu Jesudi joge tangle kodi amage, Juan-Bautista gerudu Jesu giti: —¡Gwagede amadi! Chube ama kagu nga dba ai giti jogedaleda che ulita agedu me no giti alin bda cordero gwakle kwian kle age me no giti alin kare. 37 Kwian boke geru jwannga Juan-Bautistage Juan-Bautista keruchugu gerule ene Jesu giti, gire geru jwannga Juan-Bautistage jo Jesu ole. 38 Geru jwannga Juan-Bautistage chagedu Jesu nate, Jesu tiunda mo nate, Jesu gwagedu kwian geru jwannga Juan-Bautistage boke kle chage Jesu nate, Jesu geru kadu ama bokege: —¿Ba kle chage llema nate cha nate? Ama gerudu: —Kwian tkanga tangle geruge, ¿ba kle toi baini? 39 Jesu gerudu: —Bai cha ole tienda cha kle toi ngwadi. Ama boke jo ule Jesu ole, jo chke Jesu kle toi ngwadi, ngabi chui jo chege bate no dbi giti, nga jere malen geru jwannga Juan-Bautistage boke me joni, ama chegu Jesu ole, nagbietege ama joni. 40 Kwian boke e geru jwannga Juan-Bautistage Juan-Bautista keruchugaba gerule Jesu giti gire boke jogeba Jesu ole, gdaite kada Andrés, ama Simón-Pedro daballa. 41 Andrés jo siere Jesu kledu ngwadige gire blike Andrés jo mo daballa Simón jwen, ama takalin Jesu kaite daballage, Andrés gerudu daballa ole: —Sbali Chube gerudu be kwian jwannga siere kage kwian alin, e Mesías, nege ama kle cheske, ama skwendu chage. (Mesías amaña kada Cristo.) 42 Andrés gerudu ene Simón ole gire Andrés mo daballa Simón du Jesu kle ngwadi, Jesu gwagedu Simóndi Jesu gerudu Simón ole: —Ba kada Simón, ba ñenua kada Juan, agwa nege gwangerugu ba ka be chege jwandale Cefas, ka e amaña Pedro. 43 Nagbietege Jesu mo ta gbu joge nga kada Galileage, nga ege Jesu tendu Felipe ngwange, Jesu gerudu Felipe ole: —Bai chagé cha ole geru jwen chage. 44 Felipe ai toinga una kada Betsaidage, Andrés kaire Pedro una Betsaidamu. 45 Felipe jo Natanael jwen Jesu kaitadale amage, Natanael skwendu Felipege undege gli kada higuera gdoge, Felipe gerudu: —Kwian gdaite skwendu chage, kwian e giti Moisés chada jigu degaba unsuialin kaire kwian Chube gerua ketanga dabage chada jigu degaba unsuialin kwian e giti, kwian e Jesu, ama José kirolla una Nazaremu. 46 Natanael gerudu: —¿Ba tañachuge una Nazaremuge kwian gweale no chada kle degaba giti kare ñage chie? Felipe me ta chugu gerule Natanael ole, Felipe gerudu: —Bai gwage cha kle kwian geruadedi, ene suge bage chema cha kle geruade. 47 Natanael jo Felipe ole tienda Jesudi, Jesu gwagedu Natanael chie kodi Jesu ngnagu, Jesu gerudu Natanael giti: —Ai ulia kwian israelita no, ama kle gerule ulia diali no daba ole, ama me chage sole daba ole. 48 Natanael Jesu keruchugu gerule ene gire Natanael gerudu Jesu ole: —¿Baini ba cha uñe? Jesu gerudu Natanael ole: —Felipe bebi gerule ba ole cha giti gire cha gwagedu badi ba kledu undege gli kada higuera gdoge. 49 Gire Natanael gerudu Jesu ole: —Kwian tkanga tangle geruge, ¡ulia ba Chube Kirolla ba kwian israelita ulita Chugagwalla! 50 Jesu gerudu Natanael ole: —Cha gwagedu badi undege gli kada higuera gdoge, e giti alin ba cha gai Chube Kirolla, suge bage ulia cha me jo badige ba kledu ngwadi, agwa uñadu bage cha kle gerule kare e ulia, chui aige gwangerugu Chube kiralla giti cha be age tanre ma no aige ba gwa giti, ba me gwagebadi ba be gwagé. 51 Kaire Jesu gerudu: —Cha gerule ulia ulia ba ole, aige gwangerugu cha giti ba ulita be gwage nga ngañadi be kle tigebanga kare, kaire ba be gwage lle boanga Chube alindige chage gwabdugu gwadbigu cha Chube Kirolla chieba kwian kare be kle ngwadi nga dba ai giti —Jesu gerudu ene ulita Natanael ole.
1 Gire maikege kwian mo jwen chuia chku, kwian tanre kledu daba mo jwen chuia ollade una Caná nga kweri Galileage. 2 E suiale Jesu chebia kledu ule mo jwen chuiadi, Jesu kaire geru jwannga Jesuge jo kadaba mo jwen chuiadi. 3 Kwian ngle kledu mo jwen chuia ollade gire uva chia gage bidu. Jesu chebia chegu tañachuge tanre uva chia gage bidu giti kwian kle mo litaba chuia ollade be llema jai, gire Jesu chebia gerudu Jesu ole: —Uva chia ulita bidu, uva chia me jale kwian alin. 4 Jesu gerudu: —Cha chebia, ¿mineade ba gerule cha ole uva chia bidu? Chui be chke gire cha be lle no no boi Chube kiralla giti kwian gwa giti, ene kwiange be suge cha Chube Kirolla ulia. Agwa chui e bebi chke. 5 Jesu gerudu ene chebia ole gire chebia gerudu kwian lle boanga mo jwen chuiage ulita ole: —Jesu ba kage age ba age ulita ama gerule kare. 6 Ke dodaba kantro kare, chi ogangwa ke kantrolla ege gbaite gbaitege chi joge chke litro ngle litro cincuenta. Ke kantrolla ege kwian israelita chi ogo ko gligagda diali, ene kwian israelita tañachuge ama mo ko glige ene ama no trate Chube gwa giti. Ke kantrolla gbadereke kledu ngwale chui ege kwian mo jwen chuiage. 7 Jesu gwagedu ke kantrolla edi kle ngwale, Jesu gerudu kwian lle boanga ulita ole: —Ke kantrolla ai ulita gbe ete chi ole. Kwian lle boanga chi tku ke kantrollage gbadereke gbaite gbaite ulita gbu ete. 8 Gire Jesu gerudu kwian lle boanga ole: —Ne gire ba chi jwen sidri ba kete kwian lle gbanga biale chui ollade alinge. Kwian lle boanga agedu ene Jesu gerudu kare. 9 Jesu chi blitu uva chia gagere, kwian lle gbanga biale chui ollade alin chi e jau sidri, amage sugedu uva chia gage no, me uñadu amage uva chia e no kledu ogaba baini, agwa kwian lle boanga alinge uñadu, ama ulita chi jun chi tku ke kantrollage, chi e Jesu blitu uva chia gagere. Kwian lle gbanga biale chui ollade alin ta me chegu suga no, ama kwian onbre mo jwannga chui ege kadu, ama gerudu kwian mo jwannga ole: —Kwian kle chui ollade, diali chui ollade mauña kle uva chia gage no kete jondege daba kadaba ulitage, daba kadaba ulita kle uva chia no jai ngle gire chui ollade mauña kle uva chia me no kete bdagli jadale, agwa ba me agedu ene, ba uva chia ma no jigu ogaba jadale bdagli. 11 Jesu chi blitu uva chia gagere una Caná nga kweri Galileage, e gwangea Jesu agedu Chube kirallaske kwian gwa giti, e giti Jesu takalin suge trate kwiange ulia ama Chube Kirolla. Kwian geru jwannga Jesuge ama ulita Jesu gau ma no ulia Jesu chi blitu giti. 12 Boidu ene ulita una Caná nga Galileage gire Jesu jo una Capernaumge, chebia, daballa ulita, kaire geru jwannga Jesuge ulita jo ule Jesu ole chegedale una ege chui gwealege alin. 13 Kwian israelita ulita kle tachke Chube kwian israelita enusulian unsuialin jun siere nga kweri Egiptoge giti, e Pascua chuia, e chuia ollade chegu kodi gire Jesu jo una Jerusalénge kwian israelita ulita be chui ollade ngwadi. 14 Jesu kledu una Jerusalénge gire ama jo u gerungwa Chube olege, u ege kwian chbi lle boagda chbadanga tanre kle, kwian bda oveja chbadanga tanre kle, kwian beusi chbadanga tanre kle, kaire kwian tanre kle toiba dba nga igi blitangwage kle igi blite daba na ole, kwian ene ulita skwendu Jesuge age ene u ege. 15 Jesu gwagedu kwiandi bda chbade u ege Jesu giska jun giska gwliu daba jegwale, giska e giti Jesu chbi, oveja ulita kagu siere u gerungwa Chube olege ule kwian bda chbadanga ole, kaire Jesu kwian igi blitanga kagu siere, Jesu igi ulita mliudba tangle kaire mesa igi blitangwa Jesu mesa e blitunga ulita. 16 Jesu gerudu beusi chbadangage: —Ba beusi ulita jwen siere u aige. U ai me bda chbadangwa, u ai me bda gigangwa, u ai me igi gangwa bda ñanale, u ai gerungwa cha Ñenua ole alin allabi. 17 Kwian geru jwannga Jesuge gwagedu Jesudi age ene, kwian geru jwannga tachku geru kle degaba sbali Jesu giti gerule ene: “Chube cha Ñenua, cha takalin u gerungwa ba ole kwian gai gerudale ba ole alin allabi, u e me lle na boangwa, cha mi kwian chuge ngwadi age dare ama be ta agekalin kare, e giti cha be tañachuge tanre, cha be ta lle boakalin no kwianske ba takalin kare.” 18 Jesu agedu ene kwian bda chbadanga ole u gerungwa Chube olege gire kwian israelita chugagwalla ulita kledu eni geru kadu Jesuge: —¿Chema ba kagu age ene aini u aige? ¿Bage suge Chube ba kagu? E ene ulia ba lle gweale daga ngwale no dodade Chube kirallaske cha gwa giti ene chke uñale cha ulitage ulia Chube ba kagu. 19 Jesu jaindunga ama kalen: —Noare, cha be age ene ba gwa giti, ba u ai skiendba ulita gire chui gbamaire alin cha be u gbeni naskuni no biale. 20 Kwian israelita gerudu Jesu ole: —U ai jo dodaba chura ngle chura cuarenta y seis gire u ai kweri dodadre ulita. U ai be kle skianbada gire ¿ba be u gbeni naskuni biale chui gbamaire alin allabi? 21 Kwian israelita gerudu ene ama tañachugu ulia Jesu kledu gerule u gerungwa Chube ole giti, agwa Jesu me gerudu ama ole u e giti, Jesu gerudu mau giti kwian israelita ole, gerudu ama be jogeda giti kaire ama jaba be chkeni gwade giti. 22 (Chui chku gire Jesu boidu ulia Jesu gerudu kare, Jesu jokeda, Jesu jaba chkuni gwade mongikege, boidu ene ulita gire kwian geru jwannga Jesuge ulita tachku Jesu gerudu mau giti kwian israelita ole, e giti kwian geru jwannga ulita Chube gerua degaba unsuialin Jesu giti gau ma no, kaire ama ulita Jesu gerua mau giti gau ulia.) 23 Jesu kledu Pascua chuia ollade ule kwian israelita ulita ole una Jerusalénge, chui ege Jesu lle tanre daga ngwale no dodadu Chube kiralla giti kwian me ñage dodade kare mo kiralla giti, e giti kwian tanre Jesu gau ulia, kwiange sugedu Chube ama kagu ama Cristo. 24 Jesuge sugedu trate kwian ulita me kle mo ta gbe ulia Jesu gai mo tale, agwa kwian Jesu gau ulia mo chugale alin Jesu lle daga ngwale no dodadu alin giti kwian gwa giti, malen Jesu kledu ta giti kwian eske, chku uñale ulita Jesuge kwian ulita talla mine. Ni kwian gdaite gerudu Jesu ole kwian ta mine, agwa Jesu tale Jesu agali kwian ulita ta uñe trate.
1 Kwian fariseo ulitaske onbre gdaite kada Nicodemo, onbre e daba israelita chugagwalla gdaite. 2 Chui gbaite ngajrege Nicodemo e jo tienda Jesudi gerule Jesu ole, Nicodemo gerudu: Nicodemo geru trage Jesu ole —Kwian tkanga tangle geruge, chage uñale kaire kwian na tanrege uñale Chube ba kagu cha ulita tke tangle Chube giti. Diali ba kle lle daga ngwale no dodade kwian gwa giti, e giti suge trate chage ba kle age Chube kiralla giti, Chube me kle ba ole ba me ñage age ene ba kle age kare. 3 Jesu gerudu Nicodemo ole: —Cha gerule ulia ulia ba ole, kwian me menga nabitaite me ñage joge Chube ngwadi, kwian ene me Chubenu. 4 Nicodemo geru kadu Jesuge: —¿Mine che be menga nabitaite? Che juma me ña mo blite soli menga nabitaite kirogwa kare. ¿Che juma mine ña jogeni nabitaite chebiadíge gire menga chebia kote kwaite? 5 Jesu jaindunga: —Cha gerule ulia ulia ba ole, kwian ulita menga nge jondege soli chebia kote, menga ene alin allabi giti kwian me Chubenu me ñage toi Chube ole, agwa kwian ulita mo ta chugadale ngwadi Chube Oñage mo ta blite, ene ama Chubenu, be toi Chube ole, e salengwli kwian menga nabitaite kare. 6 Kwian menga chebia kote nge jondege soli che ña gwage kwian soli mine, che ñage gwage amadi. Agwa kwian menga nabitaite Chube Oña giti Chube Oña kwian ta blite, edi che me ten mo gwagwa giti. 7 Ba me chege tañachuge mineade cha gerudu ene ba ole: “Kwian ulita medalenga nabitaite.” 8 Mledi ba me ten, agwa ba jegwalege mle suge, kaire ba mle keruchuge, agwa me uñale bage mle kle chie nga bainige kle joge nga bainige, mle tiennga ngage ulita baini kaire ta tienkalinnga ama joge. Ene kaire Chube Oña kwian ta gbe menga nabitaite kare, Chube Oña kwian ta blite Chube ole, edi kwian me ten, agwa suge kwiange mo tale kwian ta me nge kare. 9 Nicodemo geru kadu dare: —¿E ñage boi mine ene ba kle gerule kare? 10 Jesu gerudu Nicodemo ole: —Ba daba israelita tkanga tangle no geru ulita giti, ¿mineade geru ai kare cha gerudu giti me suge bage? 11 Cha ule kwian geru jwannga chage ulita ole gerule no no Chube Oña kwian ta blite giti, uñale cha ulitage Chube Oña kwian ta blite ulia, Chube Oña kwian ta blitabadi cha ulita gwagedu, kwian ene kle chage Chube takalin kare, e giti cha ulita kle gerule ba ole kaire ba bitalla ole, agwa ba, ba bitalla me kle cha ulita kerua gai ulia cha ulita kle gerule giti. 12 Cha geru ñachuge ba alin lle nga dba ai giti ba kle gwagedi gire geru e me suge bage, cha geru ñachuge giti ba me cha kerua gai ulia ba mi ñage cha kerua gai ulia cha gerule Chube giti ba ole, edi ba me kle gwagé. 13 Ni kwian gdaite nga dba ai giti jo nga ngaña giti Chube kle ngwadi gire chiuni nga dba ai giti geru kete kwian ulitage Chube giti, cha alin allabi kledu nga ngaña giti chiu nga dba ai giti gerule kwian ole Chube giti, cha ama Kirolla, ama cha kagu nga dba ai giti kwian kare. 14 Unsuialin Moisés hierro dodadu jorisire, Moisés gli dagu dbige jorisi oña e gbangwa ngaña, ene kwian lentigeba jorisige gwage jorisi oñadi ngaña ama joge chke noni. Moisés agedu jorisi oña ole kare, ene kwian be age cha ole, kwian be cha gbe kruge ngaña, 15 ene kwian ulita bai kaire cha gai ulia be toi no chui tangle diali Chube ole nga ngaña giti. 16 Chube no no kwian ulita ole, malen ama mo Kirolla gdaitre alin kagu nga dba ai giti kwian ulita alin, ene kwian ulita bai kaire Chube Kirolla gai ulia mi chege sugekare Chubege ji chuge, be toi no chui tangle diali Chube ole nga ngaña giti. 17 Chube me mo Kirolla kagu nga dba ai giti kwian ulita gbe jiske age me no giti gdale, Chube mo Kirolla kagu kwian ulita jwen siere ji chugege kwian age me no gdale. 18 Kwian ulita bai kaire Chube Kirolla gai ulia me chege jiske dale age me no giti gdale, agwa kwian ulita bai kaire me Chube Kirolla gai ulia kwian ene chege jiske age me no giti diali, ama me Chube Kirolla gdaitre alin gai ulia Chube Kirollale mo jwanngale siere ji chugege age me no gdale, 19 kwian ene chege jiske diali age me no gdale. Kwian kle age me no kle age nga jereske kare, Chube Kirolla chku nga dba ai giti jichra kare kwian ene ulitaske, agwa kwian mo ta gbaba age me no diali kwian ene me no jichra ole, me ta jogekalin jichra kle ngwadi, ene ama kle age giti me no me chke uñale, ama ta chegekalin nga jereske kare age me no diali ama ta agekalin kare. 21 Agwa kwian bai kaire kle chage Chube takalin kare, ama no jichra ole, ama joge jichra kle ngwadi, ene ama kle age ulita chke uñale ama kle age no Chube takalin kare. 22 Jesu gerudu ene ulita Nicodemo ole gire Jesu jo kwian geru jwannga Jesuge ulita ole nga kweri Judeage, nga Judeage Jesu chegu chui sbali ule kwian geru jwannga ole, nga ege Jesu kwian geru jwannga amage ulita gbu kwian ñe chiske gai ngaña chigage Jesu kalla giti. 23 Kaire Juan-Bautista kledu kwian ñe chiske una na kada Enónge kodi una Salimge, una ege chi tanre kle, kwian ngle jo Juan-Bautista kle ngwadi mo ñeange chiske Chube kalla giti. 24 Juan-Bautista kledu kwian ñe chiske ene, e suiale Juan-Bautista bebi joge skage. 25 Chui gbaite kwian geru jwannga Juan-Bautistage ulita kira batu kwian israelita gdaite ole kwian ñe chiske giti, kwian geru jwannga Juan-Bautistage gerudu Juan-Bautista giti Juan-Bautista kwian ñe chiske kwian chege ma trate, kwian israelita gerudu Jesu giti kwian geru jwannga Jesuge kwian ñe chiske kwian chege ma trate. 26 Kwian geru jwannga Juan-Bautistage ulita jo gerule Juan-Bautista ole: —Cha tkanga tangle geruge, cha gerule ba ole kwian gdaite giti kledu ba ole chi Jordánge tanglegu, ama giti ba gerudu no cha ole, ama ngwadi kwian ulita kle joge, ama kle kwian geru jwannga amage ulita gbe kwian ñe chiske, nege kwian ulita kle chage ama nate. 27 Juan-Bautista gerudu kwian geru jwannga amage ole: —Chube me kle kwian ole kwian me ñage age Chube kiralla giti. 28 Cha gerudu kwian ole ba gwa giti, ba ulita cha keruchugu gerule trate mau giti cha me Cristo, Chube cha kagu Cristo ngeru kwian ulita ta gbe ama gai ngwange no. 29 Nege ama chku, kwian kle chage ule ama ole, e giti nga chege suga no no chadi. E salengwli kwian onbre be mo jwen chuialla gbe, ama be skatemanalla gdaite gbe lle ulita gbe biale mo jwen chuiage alin. Mo jwen chuia chke gire onbre, muire kle ule, ulita kle no. E giti skatemanalladi nga be chege suga no no. Ene kaire nga suga no chadi Cristo chku kwian kle chage ule ama ole. 30 Cha takalin Cristo chege ma kweri chage kwian gwa giti, cha chege soli kwian gwa giti. 31 Cristo chiu nga ngaña giti Chube kle ngwadi chku nga dba ai giti, ama kwian ulita mauña. Kwian nga dba ai giti nga dba aimu, ama gerule lle nga dba ai giti alin giti. Cristo chiu nga ngaña giti Chube kle ngwadi, ama kwian ulita mauña nga ulita mauña, ama geru nga ngaña giti alin trage kwian ole, 32 amage ulita uñale ama gwagedudi ama keruchugu nga ngaña giti Chube kle ngwadige, ama geru e alin trage kwian ole, kwian bedre alin ama kerua gai ulia ama kle gerule kare. 33 Kwian bai kaire mo ta gbe Cristo kerua gai ulia ama gerule kare, kwian ene kle Chube gai ulia kaire. 34 Chube mo Kirolla kagu nga dba ai giti, Chube Kirolla kle Chube gerua trage kwian ole, Chube kle mo Oña kage diali Kirolla alin, me kle Kirolla chuge ngwadi ama gerua trage gballa. 35 Ñenua Chube no mo Kirolla ole, ama lle ulita gbu mo Kirolla kote. 36 Kwian ulita bai kaire mo ta gbe Chube Kirolla gai ulia mo alin be toi diali chui tangle Chube ole nga ngaña giti, agwa kwian ulita bai kaire me Chube Kirolla gai ulia mo alin, kwian ene be chege sugekare Chubege chui tangle diali, Chube be ji gbe mno kwian ene alin diali —Juan-Bautista gerudu ene ulita kwian geru jwannga amage ole Jesu giti.
1 Geru chku uñale kwian fariseo ulitage kwian ngle kledu chage Jesu nate Jesu gerua jwen kaire mo ñeange chiske Jesuge (Jesu agali me kwian ñeu chiske, agwa Jesu kwian geru jwannga amage ulita gbu kwian ñe chiske). Kwian geru jwannga Jesuge kledu kwian ma ngle ñe chiske Juan-Bautista kledu kwian ñe chiskege, e me skwendu no kwian fariseoge. 3 Kwian fariseo me ta chegu no Jesudi chku uñale Jesuge, malen Jesu jo siere nga kweri Judeage Jesu kledu ngwadi, Jesu joni chage naskuni nga kweri Galilea ngnagu ule kwian geru jwannga amage ulita ole. 4 Jon joge nga Galileage joge nga kweri Samaria sketangle, 5 malen Jesu jo chke nga Samariage una kada Sicarge, una e chege kodi José dbiage, unsuialin Jacob dbi e ketu mo kirolla Josége, 6 dbi ege Jacob nu chi gwagwa dbiugalla dodaba. Chui jo chke bduke Jesu jo chke chi gwagwa e amañage, Jesu skwatigu tanre chagege jonkare, malen chi gwagwa edi Jesu toidu dba undege chi gwagwa kagdage. 7 Jesu chegu undege ne ngwadi gire kwian geru jwannga amage ulita jo unaske bligda gige gutadale, kwian geru jwannga ulita jo skate bligda gige gire muinga gdaite nga Samariamu chku chi gwagwadi chi jwanle, gire Jesu gerudu muinga e ole: —Cha siechie, cha takalin ba chi jwen cha alin jadale. 9 Uñadu muingage kwian israelita me no kwian nga Samariamu ole, malen muinga nga Samariamu gerudu Jesu ole: —Ba kwian israelita, ¿mineade ba chi kade chage cha muinga nga Samariamuge? 10 Jesu jaindunga: —Noare bage suge chema kle gerule ba ole, cha giti Chube ta chi no ketakalin bage. Suge trate ene bage, ba chi kade chage blike, ene cha chi gwade kete bage. 11 Muinga gerudu: —Ba ole chi jwanngwa me, dbiuga jere chi jwanngwa, ¿ba be chi jwen mine ketadale chage? ¿Ba chi gwagwa gwade molen baini? 12 Cha enusulian unsuialin Jacob kledu gwade ama chi ai jau, ama kirolla ama bdadalla kaire chi jun aini jadale, Jacob chi gwagwa ai jigu bdadalla oindalla ulita bdagli alin jadale. Cha enusulian alin ñadu chi gwagwa ai dodade, ¿ba tañachuge ba ma kweri cha enusulian Jacobge chi na ma no kete chage? 13 Jesu jaindunga: —Kwian ulita kle chi gwagwa ai Jacob nu jigaba jwen, kwian ulita chi ai jai sie ole, diali kwian be siechie nakwaite, kwian be ta chi ai jakalin diali. 14 Agwa cha chi kete kwiange jadale kwian mi siechie dare, chi e chege diali jrite ama tale, chi gwade no trate ngaintra diali, e giti kwian be toi diali chui tangle. 15 Muinga gerudu: —Ba gerule noare chi giti, ba chi e kete chage, ene cha chi e ba kle geruade jai cha mi siechie dare ni cha be chie chi jwen dare chi gwagwa aige jadale. 16 Jesu gerudu dare muinga ole: —Joga ngeru ba ñengula jwen ba chieni ama dbe ule aini. 17 Muinga jaindunga Jesu kalen: —Cha me mo ñengulallage. Jesu gerudu: —Ba kle gerule trate ulia cha ole ba me mo ñengulallage, ba mo jun onbre gdatiga ole gdaite gdaite, ba ama ulita gdaite gdaite chugu ngwadi, nege ba kle chage onbre na gdaite ole, onbre e ba kle chage ole me banu. 19 Muinga Jesu keruchugu gerule ene ulia muinga kle age giti, gire muinga gerudu Jesu ole: —Chage suge ba kwian kweri Chube gerua ketanga dabage. 20 Muinga gerudu ene Jesu ole gire muinga jwichuga kle kodi ama kledu ngwadi kaitu Jesuge: —Gwagede jwichuga edi, jwichuga e giti ngaña diali cha enusulian nga Samariamu unsuialin Chube olladu, kaire nege cha cha bitalla ole kle joge jwichuga e giti eni alin Chube olladadale. Agwa ba kwian israelita ulita kle gerule kwian ulita jogedale una Jerusalénge, llani alin u gerungwa Chube ole kwian ñage Chube ollade. 21 Jesu gerudu muinga ole: —Ba cha keruchuge ba cha kerua gadale ulia, chui be chke gire ba kwian nga Samariamu ulita be ñage Ñenua Chube ollade nga baini kaire ba be kle ngwadi, ba mi tañachuge dare joge jwichuga ege ni tañachuge joge una Jerusalénge Chube olladadale. 22 Nege ba ulitage me uñale trate ba kle chema ollade, agwa cha kwian israelita ulitage uñale cha kle chema gai ulia mo Chubeale cha kle chema ollade, uñale kwian israelita ulitage kwian jwannga siere be chie kwian israelitaske. 23 Nege gwangerugu kwian ulita bai kaire ta Ñenua Chube olladakalin ulia ulia, ama ulita mi tañachuge joge nga gwealege Chube ollade, amage be suge Chube Oña kle ama tale, nga baini kaire ama be kle ngwadi ama be Chube ollade be gerule no Chube ole mo tale Chube Oña ama ta gbe kare. Chube takalin kwian mo ta gbe ulia ulia Chube ollade no mo tá giti ene kare. 24 Chubedi kwian me ten, kwian tale alin suge ulia Chube kle, kwian ulita bai kaire mo ta gbe Chube ollade gerule no Chube giti ulia ulia, kwian ene gerudale mo tá giti Chube Oña kwian ta gbe kare. 25 Jesu gerudu ene gire muinga gerudu: —Unsuialin Chube gerudu be kwian jwannga siere kage kwian ulita alin, ama kada Cristo, uñale chage Cristo be chie ulia Chube gerudu kare, Cristo be chke gire ama be cha ulita tke tangle no ulita Chube giti. 26 Jesu gerudu muinga ole: —E cha ba kle gerule giti, cha amaña kle gerule ba ole. 27 Jesu kle gerule ene muinga ole gire kwian geru jwannga ulita nu jogeba bligda gige chkuni Jesu kle ngwadi, kwian geru jwannga ulita gwagedu Jesudi geru trage muinga ole, ama ulita tañachugu mineade Jesu kledu geru trage muinga nga Samariamu ole, agwa ni kwian geru jwannga gdaite su geru kade Jesuge Jesu takalin llemage o llema giti kle gerule muinga ole. 28 Jesu gerudu muinga ole ama Cristo gire muinga chi jwanngwa jigu chi jwankle ngwadi, ama jo unaske gerule kwian ngle ole Jesu gerudu giti ama ole. Muinga kwian ta gbu chie Jesu kle ngwadi, muinga gerudu kwian ole: 29 —Bai cha ole gwage onbre gdaitedi skwendu chage, ama gerudu cha ole trate cha mo ta gbu chage age me no ulita giti, suge chage ama Cristo. 30 Muinga geru ketu kwian unaskege Jesu giti, gire kwian tanre jo ule muinga ole tienda Jesudi. 31 Kwian unaske bebi chke Jesudi gire kwian geru jwannga ulita gerudu Jesu ole: —Cha tkanga tangle geruge, cha chiuni bligda dbe ba alin gutadale, cha takalin ba blire. 32 Jesu gerudu kwian geru jwannga ole: —Cha alin lle gweale kle gutale ba ulitage me uñale. 33 Kwian geru jwannga ulita gerudu modi: —¿Kwian gweale chku bligda kete amage gutale? 34 Jesu gerudu kwian geru jwannga ole: —Chube cha kagu lle boi ama alin, cha ta lle boakalin ulita ama takalin kare, lle e be kle boaba ulita gire nga be suga no chadi, cha tale be suge no salengwli che kle suge che kle unchke bligdadi kare. 35 Ba ulita kle tañachuge ba be manade gire bigwa ba be lle boi Chube alin, agwa cha gerule ba ulita ole ba me manadale, ba lle boadale Chube alin nege nege. Gwagede kwian ngle kle chie che ngnagudi, ama ulita ta kle biale Chube gerua gai, ba ulita geru Chubenu ketadale amage blike, ene ama ta blite Chube geruadi, kwian e ulita ta kle biale salengwli chude kle biale skutadale kare, ba geru ketadale blike kwian ege chude skutakle blike kare. 36 Kwian bai kaire Chube gerua kete kwiange daba nate kwian ta blite Chube geruadi, kwian ene alin Chube be age no kwian na ta blite Chube geruadi ñanale. Chube gerua ketanga ngeru ule Chube gerua ketanga daba nate ole, nga be suga no gdabonatedi kwian na Chube gerua gau ulia be toi diali chui tangle Chube ole giti. 37 Kwian gerua gerule ai kare gerule ulia: “Kwian gdaite chude tke, kwian na chude skute.” 38 Ene kaire cha ba ulita gau kagadale daba na Chube gerua ketanga nate Chube gerua kete kwian ta gbaba biale Chube geruageske, ba alin me mno geru dbadale kwian eneske, kwian ene ulita kle mo ta gbaba biale blite Chube geruadi, daba Chube gerua ketu ngeru kwiange, ba Chube gerua ketu daba e nate kwian amañage, ene daba Chube gerua ketanga kwiange ngeru giti kaire ba giti kwian tanre kle mo ta blite Chube geruadi. 39 Jesu gerudu ene kwian geru jwannga amage ulita ole gire kwian nga Samariamu tanre unaske chku Jesu ngwadi ule muinga ole, kwian tanre kwian e ulitaske nu Jesu gaba ulia muinga gerudu kare Jesu giti, muinga gerudu: “Ama gerudu cha ole trate cha mo ta gbu chage age me no ulita giti.” Muinga gerudu ene giti kwian tanre nu Jesu gaba ulia, kwian e ulita chku Jesudi, ama ulita gerudu Jesu ole: —Cha takalin ba chegeda cha ulitaske aini. Jesu chegu una ege chui gbaboke. 41 Kwian ngle una ege Jesu agali keruchugu kwian tke tangle Chube geruage, geru e giti kwian ma ngle ama gau ulia. 42 Kwian Jesu ganga ulita gerudu muinga ole: —Nege cha geru gai ulia ma no Cristo giti me ba gerudu alin allabi gai ulia Cristo giti, agwa nege che ulita agali Cristo keruchugu gerule no Chube giti, nege uñale chege ulia Cristo kwian ulita jwannga siere ji chugege age me no gdale. 43 Jesu chegu chui gbaboke nga Samariage gire ama chagedu dare nga Galilea ngnagu. 44 (Jesu agali geruba mau giti: “Kwian Chube gerua ketanga ama jwiage bitalla me ama gai ngwange kwian Chube gerua ketanga ulia kare.”) 45 Jesu jo chke nga ege, kwian ulita nga ege Jesu gau dage gau ngwange no, kwian nga Galileage jogeba una Jerusalénge ama enusulian nge Chube jun siere nga Egiptoge chuia ollade, chui e Pascua chuia, chui ege kwian nga Galileage gwagedu Jesudi age tanre no. 46 Jesu jo chke nakwaite una Canáge nga Galileage, eni ngeru ama chi blitu uva chia gagere. Kwian chugagwalla gdaite toinga una Capernaumge nga Galileage, ama kirolla gdaite oga, 47 chugagwalla ege chku uñale Jesu chiu nga Judeage chku una Canáge nga Galileage, gire chugagwalla jo una Canáge tienda Jesudi gerule Jesu ole mo kirolla oga giti, ama gerudu: —Cha takalin ba joge cha ullage cha kirolla oga dodade, cha kirolla oga kirale chege bedre ama ngeru ama jogeda. 48 Jesu jaindunga: —Ba kaire kwian na ulita diali takalin cha lle gweale daga ngwale no dodade Chube kiralla giti cha dodadale ba gwa giti, ene ba be cha gai ulia, ba ulita gerule ene, agwa ba ulita me ta cha gakalin ulia mo tale, ba ulita kle cha gai ngwale. 49 Agwa chugagwalla me ta chugu gerule Jesu ole: —Jesu, ¡bai blike cha ole ngeru cha kirolla bebi jogeda gire! 50 Jesu gerudu chugagwalla ole: —Jogani ba ullage, ba kirolla mi jogeda, ama kleni noni. Chugagwalla Jesu keruchugu gerule alin ene ama ole, ama Jesu kerua gau ulia, chugagwalla joni mo ullage oga kle ngwadi ngnagu. 51 Chugagwalla kle chage jonkare gudegu ngnagu gire lle boanga chugagwalla alin gweale chku ten mo chugagwalla ngwange jonke, lle boanga gerudu: —Ba kirolla jo chkeni, ama kleni noni. 52 Chugagwalla geru kadu lle boanga kledu kirolla oga olege: —¿Ngaminegire cha kirolla jo chkeni noni? Gire lle boanga gerudu mo chugagwalla ole: —Beigliga ngabi chui jwlite dbigu gire nganagda jo siere amage, ama chegu no. 53 Kirogwa oga ñenuage sugedu chui jwlite dbigu gire Jesu gerudu ama ole: “Ba kirolla mi jogeda, ama kleni noni.” Chugagwalla Jesu gerua tragu kwian gwa ulita ole Jesu agedu mine, ama kaire kwian gwa ulita Jesu gau ulia. 54 Nga Galileage lle daga ngwale no Jesu dodadu bitaboke Chube kiralla giti. Ngeru ama kledu nga Galileage lle daga ngwale no Jesu dodadu gwangea gire ama jo nga Judeage. Jesu joni siere nga Judeage jo chkeni nga Galileage gire lle daga ngwale no Jesu dodadu nabitaite, e chugagwalla kirolla oga Jesu ama dodadu.
1 Jesu kirogwa oga dodadu ene nga Galileage, chui jo tangle gire kwian israelita chui ollade una Jerusalénge chku, Jesu jo una Jerusalénge chui ollade. 2 Gere una Jerusaléndi tangle, gereka gdaite kada Oveja Ugakalla, ugaka ege kodi chi tan kle, kwian israelita kwirale chi tan e kada Betzata, chi tan e kagda giti u soli gbatiga kle. 3 U soli e ulitage gwa kwian oga tanre kle manade, kwian me ten, kwian me ña chage, kwian kwenga, kwian ene ulita kle chi onngenga manade ngwange. 4 Chui sbali sbali lle boanga Chube alin nga ngaña giti kle chke chi tan kle ngwadi chi gbe onngenga, chi kle onngenga kwian oga bai kaire joge chke ngeru chiske joge chke noni chi onngengadi. 5 Oga ngleaske onbre oga gdaite kle, chura ngle treinta y ocho ama kledu oga. 6 Jesu gwagedu amadi gbeba dba, Jesu tale uñadu oga e manadu sbali sbali eni ngwale, Jesu gerudu ama ole: —¿Ba takalin joge chkeni noni? 7 Onbre oga jaindunga Jesu kalen: —Ima, agwa cha alin cha chudaboanga me cha gbale chiske chi kle onngenga gire, chi kle onngenga cha me kle ñage joge chke blike chiske, llagire kwian na kle ñage joge chke cha ngeru chiske, ene kwian e joge chkeni agwa cha me dale. 8 Jesu gerudu ama ole: —Chke bduge, chkede gdate, gbengwa blinga, chagede gbengwa ole. 9 Jesu gerudu ene onbre oga ole gire sugeti onbre oga jo chkeni noni trate me oga. Ama mo gbengwalla gau, du, chagedu mo gbengwalla ole. Jesu kwian e dodadu kwian israelita undege chuiage. 10 Kwian israelita ulita gwagedu onbre jo chkeni nonidige chage gbengwa ole, kwian israelita gerudu onbre jo chkeni noni ole: —Nege che undege chuia, ba me ñage chage mo gbengwalla dbe chui aige. 11 Onbre jo chkeni noni jaindunga: —Onbre cha jingmea dodadu, ama gerudu cha ole: “Gbengwa blinga, chagede gbengwa ole.” 12 Kwian israelita geru kadu amage: —¿Chema gerudu ba ole: “Gbengwa blinga, chagede gbengwa ole”? 13 Kwian onbre dodadrege me uñadu chema ama dodadu, ama me ñadu Jesu kaite kwian geru kaduge, kwian tanre kledu, Jesu jonga ama gwage kwianske. 14 Bigwa Jesu tendu kwian Jesu nu dodaba ngwange u gerungwa Chube olege, Jesu gerudu ama ole: —Ba cha keruchuge, nege ba jo chkeni noni ba me oga, ba mo ta gbadale me age me no ba agedu nge kare. Ba me mo tallade ba be boi nabitaite ma tirare age naskuni e kare giti. 15 Chku uñale onbrege Jesu ama dodadu gire onbre e jo gerule kwian israelita ole: —Kwian onbre cha dodadu, ama kada Jesu. 16 Jesu kwian oga dodadu undege chuiage gdale kwian israelita ulita skochiu tanre Jesudi, e giti kwian israelita mo ta gbu age me no Jesu dollale chage Jesu nate gwaleda. 17 Jesu gerudu kwian israelita ole: —Cha Ñenua Chube kle lle no boi kwian alin chui ulitage kaire undege chuiage, cha age cha Ñenua kle age kare. 18 Jesu gerudu ene giti gdale kwian israelita ulita mo ta gbu ma kiraske chage Jesu nate gwaleda, kwian israelita gwage Jesu me kle chada kle degaba undege chuia giti gbe gdadi, kaire Jesu kle mo gbe salengwli Chube kare Jesu kle gerule ama Ñenuanu Chube, e kwian israelita alin Jesu kle gerule me no me no. 19 Jesu gerudu kwian israelita ulita ole: —Cha gerule ulia ulia ba ulita ole, cha Chube Kirolla me kle age gballa mo talla giti, cha kle age ulita cha Ñenua cha ta gbe age kare, cha Ñenua kle age ulita cha gwa giti, cha age ulita ama kle age kare. 20 Cha Ñenua no no cha ole, cha ama Kirolla, ama kle lle no boi cha gwa giti, ene cha kle lle no ene kare boi kaire kwian gwa giti. Cha Ñenua be lle ma no ma kweri boi cha gwa giti, ene kaire cha be lle ma no boi ba ulita gwa giti cha agedu ngeruge, ba ulita be chege tañachuge tanre e giti. 21 Cha Ñenua kwian jaba gbeni gwade, ene kaire cha kwian jaba gbeni gwade kwian jaba bai kaire cha ta gbakalin gwadeni kare, kaire cha Ñenua, cha kwian gbe toi diali chui tangle cha ole cha Ñenua ole. 22 Cha Ñenua agali mi kwian gdaite gbe jiske age me no gdale, agwa cha Ñenua cha gbu gerule kwian ulita giti bai jiske bai me jiske agedu giti. Cha Ñenua cha gbu age ene, 23 malen kwian ulita cha gadale dage no kwian kle cha Ñenua gai dage no kare, cha Ñenua cha kagu nga dba ai giti, kwian me cha gai dage no kwian me kle cha Ñenua gai dage no kaire. 24 Ulia ulia cha gerule ulita no trate geru ai cha kle gerule giti, kwian bai kaire geru ai gbe gdadi cha kle gerule kare, kwian bai kaire cha Ñenua cha kaganga gai ulia, kwian ene ulita be toi chui tangle diali cha ole cha Ñenua ole, kwian ene ulita mi joge ji chuge daga ngwale ngwadi sugekare chage ni cha Ñenuage, e salengwli kwian jogebada jaba chkeni gwade kare. 25 Cha gerule ulia ba ulita ole, kwian bai kaire me Chube uñe kle toi sugekare Chubege, kwian ene ulita salengwli kwian jogebada kare, chui be chke, kaire chui kle nege gire kwian ene be cha kerua keruchuge, cha Chube Kirolla be kwian tke tangle cha Ñenua giti, kwian ulita bai kaire cha kerua gai ulia ama be toi chui tangle diali cha Ñenua ole cha ole. 26 Cha Ñenua ta gwade agali molen malen ama kwian gbanga gwade, ene kaire cha ama Kirolla ama cha gbu ta gwade mauña, cha ñage age cha Ñenua age ulita kare, cha ñage kwian jogebada jaba gbeni gwade, kaire kwian me Chube uñe kle chage jogebada kare cha ñage kwian ene ta blite Chube ole, ene kwian toi chui tangle diali cha ole cha Ñenua ole. 27 Kaire cha Ñenua cha gbu gerule kwian ulita giti bai jiske bai me jiske agedu giti, cha Chube Kirolla chku nga dba ai giti kwian kare, cha ulia kwian, suge chage ulita kwian tañachuge mine, malen chui bdaglige cha be ñage gerule kwian ulita giti chema chema jiske. 28 Ba ulita me kledale alenske cha kle gerule giti, chui be chke, chui ege gire cha be gerule jaba dbia ulita ole, kwian jogebada oña ulita be cha keruchuge gerule: “¡Chkede gwadeni, bai!”, 29 gire ama jaba ulita be chkeni gwade. Kwian ene bai kaire cha gau ulia ama kledu toi gwade nga dba ai giti gire, chagedu no cha Ñenua takalin kare, kwian ene ulita be toi chui tangle diali cha ole cha Ñenua ole. Agwa kwian bai kaire me cha gau ulia me chagedu no cha Ñenua takalin kare, kwian ene ulita be chege sugekare chage cha Ñenuage chui bdaglige ji chuge chui tangle diali. 30 ’Cha me kle age ulita mo talla giti gballa, agwa cha Ñenua cha kagu, cha Ñenua kle cha ta gbe age, ulita cha age ama takalin kare, cha me kle age cha takalin kare. Kaire cha Ñenua kle cha ta gbe kwian ulita agedu giti bai jiske bai me jiske, malen cha gerule trate ulia chema chema jiske. 31 Cha alin allabi gballa gerule mau giti kwian ole cha Chube Kirolla, na me kle gerule cha giti cha kle gerule kare, ene cha kle gerule ngwale, kwian mi cha gerua mau giti gai ulia. 32 Agwa cha me kle gerule gballa mau giti cha Chube Kirolla, cha Ñenua Chube gerule kaire cha giti cha ulia ama Kirolla, uñale chage ama gerule ulia cha giti, suge ulia cha kle gerule kare. 33 Juan-Bautista kaire kledu gerule cha giti kwian ole gire ba ulita kwian mneite kagu tienda Juan-Bautistadi geru kade Juan-Bautistage cha giti, Juan-Bautista gerudu ulia trate kwian mneite e ole cha giti. 34 Cha me kle kwian onbre gweale kerua manade gerule no cha giti ene chage suge trate cha ulia Chube Kirolla, me ene, uñale chage cha ulia Chube Kirolla, agwa ba ta kwian gweale kerua keruchugakalin gerule cha giti, malen cha kle gerule ba ole ba tachkedale Juan-Bautista gerudu mine cha giti, ba Juan-Bautista gerua cha giti gai ulia, ene ba tien gitiru ji chugege ba agedu me no gdale. 35 Juan-Bautista chagedu gerule cha giti kwian ole, kwian ulita kledu nga jereske kare me geru cha giti uñu, Juan-Bautista chagedu kwian eneske jichra gwadegaba kare gerule no cha giti kwian ole, ene kwian tale sugedu age Juan-Bautista gerule kare. Kwian tanre geru e keruchugu, kaire ba, ba ulitadi nga chegu suga no Juan-Bautista gerudu giti chui bedre alin allabi. 36 Cha kle age cha Ñenua cha gbu age kare lle boi ama alin, me kwian kle age kare ni tañachuge kare, ene cha kle age giti ñage suge kwian ulitage ulia cha Ñenua cha kagu, e ulita gerule ma trate cha giti Juan-Bautista geruduge cha giti kwian ole. 37 Ba me cha Ñenua kerua keruchugaba kaire ba me gwageba amadi, agwa cha Ñenua gerua jo degaba unsuialin gerule no trate cha giti, ba ulita cha Ñenua gerua uñe gerule cha giti, geru e me kle ba ulita tale, ba geru batenga alin allabi mo chugale alin, agwa ba me kle cha Ñenua gerua cha giti gai ulia, kaire ba ulita me tañachuge ulia cha Ñenua cha kagu nga dba ai giti ama gerua jo degaba unsuialin gerule kare, ba ulita alin suge me ene. 39 Ba ulita kle geru jwen no trate ta gude cha Ñenua gerua kle degaba giti, ba ulita tañachuge chada batenga alin ene ta gude lle gweale skwen bage geru kle gerule giti ene ba ulita toi diali chui tangle cha Ñenua Chube ole. Chada e cha Ñenua gerua, geru e gerule cha giti, 40 geru e gerule cha gai ulia giti alin allabi kwian toi diali chui tangle Chube ole. Cha kle ba ulitaske, agwa ba ulita me ta mo ta gbakalin cha gai ulia ba gbagda toi diali chui tangle. 41 ’Kwian gerule no cha giti kwian gerule me no cha giti cha me tallade. 42 Uñale chage ba ulita ta mine, ba ulita me kle mo ta dbe no Chube ole. 43 Cha chiu cha Ñenua kalla giti nga dba ai giti ba ulita alin, ba ulita me cha gai ngwange no, ba age cha ole cha kwian ngwale kare. Agwa kwian gweale mau tale mo gbe gerule agali ba ulita ole Chube giti gire ba ulita mo ta gbe no ama ole ba ama gai ngwange no. 44 Ba ulita kle tañachuge ma no age no daba na gwa giti, ene daba gerule no ba giti daba ba gbe kweri mo gwage, ba ulita kle tañachuge ene, ba me kle tañachuge Chube giti age Chube takalin kare. Chube gdaitre alin ulia kle, ba age no ama takalin kare ene bdagli ama be gerule no ba agedu no ulita giti. Agwa ba ulita me kle tañachuge no, malen ba me ñage cha gai ulia. 45 Ba me tañachugadale chadige cha be gerule cha Ñenua ole ba ulita giti ba me cha gau ulia malen ba jiske. Cha mi gerule ene ba giti ba gbe jiske, agwa Moisés chadalla degaba be ba gbe jiske cha Ñenuage, ba ulita kle gerule ba Moisés gerua gai ulia, ba tañachuge geru e alin giti ba ñage toi diali chui tangle Chube ole. 46 Ba ulita kle gerule ene ba kle gerule ngwale mo kate alin, ba tale ba me kle mo ta gbe ulia Moisés gerua gai ulia, malen ba me ñage cha gerua gai ulia cha kle gerule kare. Moisés gerua gerule trate cha giti, ulia ba Moisés gerua gai ulia ene kaire ba cha gerua gai ulia, agwa ba me ta cha gerua gakalin —Jesu gerudu ene ulita kwian israelita ulita ole.
1 Chui gweale na Jesu kledu chibita kweri kada Galilea kagda giti, chibita amaña kada Tiberias, eni Jesu lle daga ngwale no tanre dodadu kwian ulita gwa giti, Jesu kwian oga tanre dodadu. Jesu agedu ene gire ama jo tanglegu chibita kweri ege ule kwian geru jwannga amage ulita ole, kwian ngle chagedu Jesu nate, kwian e ulita gwageba Jesudi kwian tanre oga dodade malen kwian e chagedu Jesu nate. 3 Jesu jo chke chibita kagda giti ongoru gire Jesu jo jwichuga giti toidu dba geru jwannga amage ulita ole. 4 E suiale Chube kwian israelita ulita enusulian unsuialin jun siere nga kweri Egiptoge chuia ollade chegu kodi, e Pascua chuia. 5 Jesu kledu jwichuga giti ule geru jwannga amage ole gire Jesu gwagedu kwian ngledi chie jwichuga ama kle giti ngnagu, Jesu jo dbige jwichugage ten kwian ngle ngwange ule geru jwannga amage ulita ole, Jesu gerudu Felipe ole: —¿Che be joge bligda ngle gige baini kwian e ulita alin? 6 Jesuge uñale ulita trate Jesu be age mine no kwian ngle alin, agwa Jesu geru kadu Felipege bligda giti, ene chke uñale nate Felipe Jesu gai ulia mo tale Jesu ñage age no kwian ngle ulita alin o ulia ama bligda gigadale kwian ulita alin. 7 Felipe jaindunga Jesu kalen: —Igi kwangle giti che bligda gige kwian e ulita alin gutadale, ni bligda e ulita ñage kwian ulitage jalin jalin gutadale. 8 Gire kwian geru jwannga Jesuge na kada Andrés, Simón-Pedro daballa, gerudu Jesu ole: 9 —Kirogwa gdaite kle aini, ama cebada panlla gdatiga molen ngwe gdaboke agwa bligda e me ña kwian ulita alin gutadale. 10 Jesu gerudu kwian geru jwannga amage ulita ole: —Gerule kwian ulita ole toi dba ulita. Nga Jesu kle ngwadi ngauda tanre kledu, kwian ulita toidu dba ngauda giti, kwian e ulitaske kwian onbre ngle cinco mil kledu, kaire muinga ngle kirogwa ngle kledu ule kwian onbre ngle eske agwa muinga, kirogwa me jo teanba. 11 Kwian ngle ulita toidu dba ngauda giti gire Jesu pan gdatiga ngwe gdaboke gau kote, Jesu gerudu Chube ole bligda giti: “Cha Ñenua, noare ba bligda ai ketu kwian ai ulita alin gutadale.” Jesu gerudu ene Chube ole gire Jesu bligda girabatangu kwian ulita toiba dba ole, Jesu bligda ulita ketangu kwian ngle ulitage unchkegda kwian takalin kare, Jesu bligda gbu jriennga kwian ngle ulita alin gutadale. 12 Kwian ulita blidu kwian ulita unchku no bligdadi gire bligda bita ngle cheguda, kwian me ñadu bligda gute ulita. Gire Jesu gerudu kwian geru jwannga amage ulita ole bligda cheguda giti: —Ba bligda bita cheguda lite ole, ba oge, ba me bligda e kagenga ngwale. 13 Jesu gerudu ene gire kwian geru jwannga Jesuge bligda bita ulita litu ole ski kweri gbataboko giti gbaboke, ski e ulita chku ete bligda cheguda ole. 14 Jesu lle daga ngwale no ene dodadu kwian ngle e gwa giti, gire kwian e ulita gerudu modi Jesu giti: —Ulia ama kwian Chube gerua ketanga dabage be chie cheske aini, Chube gerudu ama giti unsuialin, ama e. 15 Jesuge kwian ulita talla chku uñale, kwian ulita tañachugu Jesu gbe mo chugagwallale, malen kwian ulita tadu kira batakalin Jesuge una ngnagu, gire Jesu jo siere kwian ulitage, Jesu joni nabitaite jwichuga giti. 16 Nga jeredu gire kwian geru jwannga Jesuge ulita joni chibita ngnagu, jo chke chi kagda giti dudi. 17 Gire Jesu nate nga chegu ta, me chieni uñale kwian geru jwannga amage nate, nga jeredu ulita, nga train giti geru jwannga Jesuge ulita jo duge chiga giti chage una Capernaum ngnagu. 18 Geru jwannga Jesuge ulita kledu chage duge chiga giti gire mle kweri chku dudi chiga giti, chi jo chite juga juga mle kwerige. 19 Gire kwian geru jwannga Jesuge ulita kledu duge me chegu ta chuge chi bage duge chiga giti mleske, ama jo bate chiga giti duge, kle chage chi bage duge mleske gire ama ulita kle chage duge gwagedu kwian gdaitedi chage seradi chiga giti du ngnagu, ama ulita kendunga tanre, ama me nu gwagebale bitaite kwiandige chage seradi chiga giti. 20 Jesu gerudu: —Ba me kennga chadi, cha amaña kle chage. 21 Jesu gerudu ene gire sugedu geru jwannga ulitage Jesu amaña kle chage, ama ulita Jesu gau ngwange no duge nga suga no ole, gire sugeti ngwale du jo chke chi kagda giti ama tadu jogekalin ngwadi ama jo chke, ama jo chke Jesu ole. 22 Kwian geru jwannga Jesuge ulita jo ene una Capernaumge, kwian ngle ulita Jesu nu ullaba chegu kwian geru jwannga tane giti nga amañage Jesu ama ulita ullu ngwadi, ama tadu gwagekalin dare Jesudi. Kwian geru jwannga Jesuge ulita bebi joge siere nga ege gire kwian ngle e ulita gwagedu du gdaitre alin kledu chi kagdage, kwian ulita gwagedu kwian geru jwannga Jesuge alin joge du ege, kwian me gwagedu Jesudi joge ule kwian geru jwannga ole, malen kwian ngle ulita tañachugu Jesu cheguda ngmadi. Nagbietege Jesu bebi skwen nate kwian nglege, malen ama ulita chegu tañachuge tanre Jesu giti ama kle baini. 23 Kwian kledu Jesu jinade nate gire gwagedu du na tanredi chie una Tiberiage, du e ulita chku kodi Jesu kwian ngle ullu ngeru ngwadi. 24 Uñadu kwian nglege kwian geru jwannga Jesuge ulita jo, kaire Jesu me skwendu ama ulitage ama ulita kle ngwadi, malen ama ulita jo du tanre una Tiberiamuge, jo una Capernaumge Jesu jinade nate. 25 Ama ulita jo tangle chkagu chibitage, jo chke chkagu gire Jesu skwendu amage, ama geru kadu Jesuge: —Kwian tkanga tangle geruge, ¿ba chiu ngaminegire aini? Cha me gwagedu badi joge ule kwian geru jwannga bage ole. 26 Jesu gerudu kwian ngle ulita ole: —Cha gerule ulia ba ulita ole, ba ulita ta chagekalin cha nate ba takalin cha bligda na kete bage gutadale, cha bligda ketu bage ngeru, ba blidu, ba unchku. Ba kle tañachuge bligda giti alin allabi, agwa ba me kle tañachuge cha lle daga ngwale no dodadu Chube kirallaske giti ba ulita alin, ba me kle tañachuge trate cha giti, me suge bage cha chema. 27 Ba me tañachugadale lle boi bligda alin giti bligda gai mau alin gutadale ene ba blire ba me chage bli ole, bligda e bidege me chege diali. Agwa ma no ba ulita tañachuge bligda me bidege giti kaire, bligda e chege chui tangle diali ba tale, cha bligda e kete bage, ene ba be toi chui tangle diali cha Ñenua Chube ole, ama cha kagu nga dba ai giti kwian kare, ama mo kiralla ketu chage age no ba ulita alin. 28 Kwian geru kadu Jesuge: —¿Cha ulita agedale mine ene suge chage cha kle lle boi Chube takalin kare? 29 Jesu gerudu kwian ulita ole: —Chube takalin ba ulita mo ta gbe ene: Chube nu cha kagaba, ba ulita cha gadale ulia mo tale, ene ba kle age Chube takalin kare. 30 Kwian gerudu Jesu ole: —Ba kle gerule mau giti Chube ba kagu, ulia Chube ba kagu cha takalin ba lle gweale daga ngwale no dodade Chube kiralla giti cha ulita gwa giti, ene cha ulita be gwage badi age ene, gire cha be ba gai ulia. 31 Unsuialin cha enusulian ulita kledu chage nga gballage bligda me gutale ngwadi, gire Moisés bligda kadu nga ngaña giti enusulian ulita alin gutadale, chada kle degaba gerule Moisés giti: “Ama bligda nga ngaña giti kadu ketu kwian ulita alin gutadale.” Ene kaire cha takalin ba age ma no ama ageduge cha ulita alin. 32 Jesu gerudu: —Cha gerule ulia ba ulita ole, ba kle tañachuge Moisés gballa bligda nga ngaña giti ketu ba enusulian ulitage gutadale, me ene ba kle tañachuge kare, cha Ñenua bligda kagu ba enusulian unsuialin ulita alin gutadale, bligda e kira alin gbagda. Agwa kaire cha Ñenua bligda na ma no nga ngaña giti kete kwian ulitage, bligda e chiu nga ngaña giti chku nga dba ai giti, bligda e kwian ulita gbagda gwade toi diali chui tangle cha Ñenua ole. 34 Kwian ulita gerudu Jesu ole: —Ba kle gerule noare bligda giti cha ulita ole, cha takalin ba bligda e ba kle gerule giti kete chage diali gutadale. 35 Jesu gerudu kwian ole: —Ba takalin cha bligda cha kle gerule giti kete ba ulitage, bligda e cha amaña, cha bligda kare kwian gbagda gwade toi diali chui tangle. Kwian bligda gute gire bigwa ama bli ole ta bligda na gutakalin, kwian chi jai gire bigwa ama siechie ta chi na jakalin, agwa kwian bai kaire cha gai ulia mo tale, cha kwian ene ta gbe suge no diali. 36 Cha gerudu kare ba ulita ole ba kle gwage chadíge lle daga ngwale no dodade Chube kiralla giti ba ulita gwage, ni e giti ba kle cha gai ulia. 37 Cha Ñenua kwian ta gbe no cha ole, kwian ene ulita be cha gai ulia, kwian ulita bai kaire cha gai ulia cha mi ama kage siere, agwa cha be ama gai ngwange no. 38 Cha chiu nga ngaña giti cha chku nga dba ai giti, cha me ta agekalin cha takalin kare, agwa cha ta agekalin ulita cha Ñenua takalin kare, ama cha kagu. 39 Cha Ñenua cha kaganga ama takalin cha age ai kare: Cha Ñenua kwian bai ulita ta gbu no cha ole cha gai ulia, cha Ñenua takalin kwian ene ulita me jogedalenga ni gdaite chage, cha Ñenua takalin cha kwian ene ulita manade no, ene chui bdaglige cha ama ulita jaba gbadaleni gwade. 40 Cha Ñenua takalin ai kare kaire: Kwian bai ulita cha gai Chube Kirollale cha gai ulia mo tale, cha be kwian ene jaba gbeni gwade chui bdaglige toi ule cha ole cha Ñenua ole chui tangle diali. 41 Jesu gerudu ene kwian ulita ole gire kwian israelita mneite kledu chage Jesu nate ta me no ole, ama ulita Jesu keruchugu Jesu gerudu mau giti: “Cha bligda kare chiu nga ngaña giti chku nga dba ai giti.” Geru e giti kwian israelita ulita skochiu, 42 gire ama ulita gerudu jalin jalin modi Jesu giti: —¿E me José kirolla kada Jesu? Che ulita ama ñenua uñe, ama chebia kaire. Ama medunga chebia kote nga dba ai giti, ama me ña gerule che ole ama chiu nga ngaña giti. 43 Sugedu Jesuge kwian israelita ulita kle tañachuge me no ama giti, gire Jesu gerudu ama ulita ole: —Ba me gerule me no dare modige cha giti. 44 Kwian gdaite me ñage cha gai mau tale gballa, cha Ñenua cha kaganga, ama alin allabi ñage kwian ta gbe no cha ole ene kwian cha gai ulia, cha be kwian ene jaba gbeni gwade chui bdaglige toi diali chui tangle ule cha ole cha Ñenua ole nga ngaña giti. 45 Unsuialin kwian Chube gerua ketanga Chube gerua degu, chada e gerule: “Chube be kwian ulita ta gbe, ulita Chube gerua gerule kare be suge kwiange.” Kwian bai ulita cha Ñenua gerua keruchugu cha Ñenua gerua gau ulia, kwian ene cha gai ulia kaire. 46 Ni kwian gdaite gwageba cha Ñenua Chubedige, cha alin allabi gwageba amadi, cha chiu ama ngwadi cha chku nga dba ai giti. 47 Cha gerule ulia ba ulita ole, kwian bai kaire cha gai ulia kwian ene be toi chui tangle diali cha ole cha Ñenua ole. 48 Cha bligda kare kwian gbagda gwade toi diali chui tangle. 49 Unsuialin bligda chiu nga ngaña giti ba enusulian ulita alin gutadale nga gballage bligda me gutale ngwadi, bligda e kira alin gbagda sugeti alin, malen ba enusulian unsuialin me chegu toi diali chui tangle bligda e giti, agwa ama ulita bligda e gutu, ama me chegu toi gwade diali, ama jokeda, bligda e me ama gbu toi gwade diali. 50 Cha gerudu ba ulita ole cha bligda kare cha me kledu gerule ba enusulian bligda gutu kare giti, cha kle gerule bligda na giti, bligda cha kle gerule giti kwian gbagda toi diali chui tangle, bligda e chiu nga ngaña giti chku nga dba ai giti, kwian bai kaire bligda e gute mi chege sugekare Chubege, ama ulita be toi diali chui tangle Chube ole. 51 Cha kle gerule bligda giti, bligda e cha, cha chiu nga ngaña giti chku nga dba ai giti kwian kare kwian ulita alin, cha be mo jegwale kete gwaleda, kwian ulita bai kaire cha gai ulia mo tale be toi chui tangle diali cha Ñenua ole. 52 Jesu gerudu ene gire kwian israelita ulita ta skole ole mo ka dodadu ongoru ongoru Jesu gerudu giti: —¿Ama be age mine gire ama be mo jegwale agali kete chege gutadale? 53 Gire Jesu gerudu: —Cha gerule ulia ba ulita ole, cha chiu kwian kare nga dba ai giti, ba me cha jegwale gai ba kle bligda gute kare mo kiragda, ba me cha bea gai ba kle chi jai kare mo kiragda ba me ñage toi diali chui tangle cha Ñenua Chube ole. 54 Agwa kwian ulita bai kaire cha jegwale gai mau alin cha bea gai mau alin, suge kwian enege e ulita boidu ama alin, e giti alin allabi kwian be toi diali chui tangle cha Ñenua ole, cha be kwian ene jaba gbeni gwade chui bdaglige toi ule cha ole cha Ñenua ole. 55 Bligda ulia toigda diali chui tangle, e cha jegwale. Chi ulia toigda diali chui tangle, e cha bea. 56 Kwian bai kaire cha jegwale gai mau alin cha bea gai mau alin, kwian ene chanu, cha kwian enenu, kwian ene ta be kle cháge diali, cha ta be kle amage diali. 57 Chube cha Ñenua, ama cha kagu nga dba ai giti, ama gwade, ama gwade agali molen, cha toi ama giti gwade, ene kaire kwian bai cha gai mo tale kwian ene be toi cha giti chui tangle diali cha Ñenua ole. 58 Cha kle gerule bligda giti bligda e chiu nga ngaña giti chku nga dba ai giti, cha me kle gerule ba enusulian unsuialin bligda gutu kare giti, ama bligda kira alin gbagda sugeti alin gutu, ama toidu gire jokeda. Cha me kle gerule bligda e giti, cha kle gerule bligda na giti, bligda na kwian gbagda toi diali chui tangle, kwian bai kaire bligda e gute be toi chui tangle diali Chube ole, bligda e cha. 59 Jesu kwian ngle tku tangle ene ulita mau giti u mo litangwa Chube gerua jwanngwage una Capernaumge. 60 Kwian ngle chagedu Jesu nate geru jwanle Jesuge, baini kaire Jesu kle ngwadi ama kle Jesu ole, ama ulita Jesu keruchugu kwian tke tangle ene mau giti, gire ama ulita gerudu modi: —Mnoare che alin age ama kle gerule kare, ¿chema be ama gai ulia ama kle gerule kare? 61 Jesuge uñadu kwian kle gerule modi ta skole ole Jesu gerudu giti, gire Jesu gerudu ama ole: —¿Ba ulita ta kle skochie chadi cha gerudu giti? ¿Ba me cha gerua gai ulia? 62 Chube cha kagu nga dba ai giti kwian kare, ¿ba ulita ta chege sugamne chadi ba ulita gwa giti cha jogeni nga ngaña giti cha chiu ngwadi? ¿Ene ba be cha gai ulia o me? 63 Cha gerudu ba ole cha me gerudu ba ulita cha jegwale gutadale ulia ene ba be toi diali chui tangle, me ene dale, ba ulita tañachugadale ba ta giti ba ta mine cha ole, ba cha gadale ulia mo tale, e alin allabi giti ba ulita ñage toi diali chui tangle cha Ñenua ole. 64 Agwa ba gweale kle chage cha ole me kle cha gai ulia mo tale, malen cha gerudu ba ole ni kwian gdaite ñage cha gai mo tale gballa, cha Ñenua alin ñage kwian ta gbe no cha ole, ene kwian cha gai ulia. (Diali uñadu Jesuge chema mi ama gai ulia chema be ama kete gwaleda kwian me noge.) 66 Jesu gerudu ene kwian ulita ole bai kle chage ama ole, gire kwian e gweale tanre mo ta gbu joge siere Jesuge, ama Jesu chugu ngwadi me chagedu dare Jesu ole. 67 Jesu gwagedu kwian tanre kledu chage ama ole joge siere amage, gire Jesu geru kadu kwian geru jwannga amage gdataboko giti gdabokege: —¿Ba ulita kaire ta jogekalin siere chage? 68 Simón-Pedro jaindunga Jesu kalen: —Cha Chugagwalla, cha ulita gdataboko giti gdaboke mi joge siere bage dale, cha joge siere bage ¿cha be chema gai cha Chugagwallale? Chugagwalla na me ba kare, ba gerua ulita ulia, geru e kwian ta gbagda toi diali chui tangle Chube ole. 69 Cha ulita mo ta gbaba ba gerua ulita gai ulia diali, uñale trate cha ulitage ba Cristo ba Chube Kirolla. 70 Jesu gerudu geru jwannga amage ole: —Cha agali ba ulita gdataboko giti gdaboke gau, agwa baske gdaite me kle cha gai ulia, ama kle chage che dolla Satanás talla ole. 71 Jesu gerudu ene kwian geru jwannga amage gdataboko giti gdaboke ole Jesu kledu gerule Simón-Iscariote kirolla kada Judas giti, Jesuge uñale Judas-Iscariote be ama kete gwadaleda kwian me noge. Judas-Iscariote kwian geru jwannga Jesuge ule kwian na ole, agwa ama me ta du no Jesu ole.
1 Jesu kwian tku tangle ulita ene una Capernaumge, Jesu me jo nga nage, ama chegu ngmadi nga kweri Galileage chage una kaire kairege nga Galileage. Jesu me tadu jogekalin nga kweri Judeage, uñadu Jesuge nga Judeage ama joge chke nga ege kwian ulita israelita be ama jinade nate gwadaleda. 2 Unsuialin kwian israelita enusulian ulita chagedu nga gballage, u dodadu toingwa sugeti alin, e kwian israelita ulita kle chuia ollade chege kodi, 3 gire Jesu daballa ulita gerudu Jesuge: —Ba me chegedaleda aini, ma no ba joge nga Judeage, llani kwian tanre ba gaba ulia be kle mo litaba chui ollade, ama ulita gwa giti ba ñage lle no dodade llani ba lle no dodadu aini kare. 4 Uñale che ulitage kwian gweale ta mo gbakalin kweri daba na ulita gwa giti, takalin kwian na ulita ama uñe, ama me ñage chege age skwlenre alin nga gweale solige alin. Ba kle mo gbe kweri, ba takalin kwian ulita ba uñe, ba me ñage chege lle no dodade nga ainige alin, ma no ba jogedale age kwian ulita nga ulitamu gwa giti. 5 Jesu daballa gerudu ene Jesu ole ama tale ama ulita agali me kle Jesu gai ulia, ama kle Jesu gai ngwale kwian na tanre kle Jesu gai ngwale kare. 6 Jesu gerudu daballa ulita ole: —Cha chuia bebi chke jogedale nga Judeage chui ollade, agwa ba ulita alin chui ulita no jogedale baini kaire ba ulita takalin kare. 7 Kwian ulita me Chube uñe me kle mo ta dbe me no ba ole, ama ulita gwa giti ba age salengwli ama age kare. Agwa cha ole kwian ene ulita me no, cha kle gerule ama ole ama age me no giti ene ama ta suge ama kle age me no giti, me no ama alin cha gerule ene, gire ama ulita skochie chadi. 8 Ba ulita ta jogekalin, joga ngeru chui ollade nate, nege nege cha me joge, cha chuia bebi chke jogedale nga Judeage chui ollade. 9 Jesu gerudu ene daballa ole ulita, daballa jo, Jesu cheguda nga Galileage. 10 Jesu daballa ulita jo ngeru kwian ngle ulita ole chui ollade nate una Jerusalénge nga Judeage. Jesu jo kwian e ulita tane giti, Jesu me takalin kwian ulitage chke uñale Jesu kle joge kaire chui ollade ama ole, malen ma no Jesu tañachugu joge bdagli sugekare kwian ngleage. 11 Chui ollade chuiage kwian israelita mneite kledu chage Jesu jinade nate kwian nglea ulitaske, kwian israelita e ulita kledu chage kwian ngleaske geru kade Jesu giti ta me no ole, ama geru kadu: —Cha kle Jesu jinade nate, ama me skwen cha mneitege, ¿ba gwealege uñale ama kle baini? 12 Kwian me jaindu gerule Jesu giti ama kalen agwa kwian nglea ulitaske kwian gerudu tanre jalin jalin modi Jesu giti kwian israelita mneite gwa skwlenre, gweale gerudu Jesu giti: “Ama kwian no no.” Agwa na gerudu: “Ama kwian me no me no, ama kwian ulita anblitanga geru ngwaledi.” 13 Kwian tanre ulita gerudu ene modi jalin jalin Jesu giti, ama ulita kwachiu kwian israelita mneite kle Jesu jinade natedi malen kwian e ulita ni gdaite gerudu kweri Jesu giti kwian israelita mneite gwa giti. 14 Chui ollade semanalla bonga gire Jesu jo chke una Jerusalénge kwian ulita kle mo litaba chui ollade ngwadi, Jesu jo u gerungwa Chube olege kwian ngle gwa giti gire Jesu kwian ulita tku tangle Chube geruage. 15 Jesu kle kwian ngle tke tangle ene u gerungwa Chube olege gire kwian israelita chugagwalla ngle chegu tañachuge tanre Jesudi, kwian e gerudu: —¿Mineade ama ñage gerule trate Chube giti, ama me geru jwanba che kare? 16 Jesu kwian e keruchugu gire Jesu gerudu: —Cha kle kwian tke tangle gire cha me kle kwian tke tangle mó talla giti gballa, cha kle kwian tke tangle cha kaganga talla giti ama takalin kare, cha kle kwian tke tangle ama geruage. 17 Bai kaire mo ta gbakalin age Chube takalin kare, kwian ene ulitage be suge cha kle gerule Chube talla giti ulia o cha kle gerule mo talla giti. 18 Bai kle gerule mo talla giti agali, kwian ene kle age no daba na gwa giti ulita, ama takalin daba na ulita gerule no ama giti. Agwa cha me kwian ene kare, cha alin ma no kwian ulita gerule no cha kaganga giti, cha kle gerule ama talla giti, cha kle gerule ulia cha kaganga takalin kare, cha me kle sole. 19 Moisés Chube gerua degu unsuialin ba ulita alin, agwa ba ulita me kle geru e gai dage no ulita. ¿Mineade ba ulita ta cha gwakalinda cha kle age no undege chuiage gdale? Bage suge cha kle age me no Moisés chadalla dollale. Kwian israelita ngle gerudu Jesu ole: —Dolla kle ba tale, malen ba kle gerule ene. ¿Chema takalin ba gweda? Jesu gerudu kwian e ulita ole: —Ba ulita chege tañachuge tanre lle gdaitre alin cha bo undege chuiage, e giti suge bage cha agedu me no, 22 agwa ba kle lle boi undege chuiage kaire. Moisés Chube gerua degu ba ulita alin, chada e gerule kirogwa soli onbrege chuiapa chke ba kirogwa soli kwara tkadalenga sidri, age ene me Moisés e gbu, ba enusulian unsuialin ngeru Moisége agedu ene Chube gerudu kare, Moisés e degu ba ulita alin. Nege tangle ba kle kirogwa onbre soli kwara tkangenga kaire, me undege chuiage chui taneke chke kirogwage ba kirogwa kwara tkadalenga, chui e no ba alin kirogwa kwara tkangenga. Agwa chui taneke chke kirogwage undege chuiage ba kirogwa kwara tkadalenga, ba me chui taneke tke tangle kirogwa chuiage, undege chuia me no ba alin age ene, agwa chui taneke chke kirogwage undege chuiage ba agedale, ene ba kle tañachuge age diali Moisés chadalla kle gerule kare. E giti ba me kle tallade, ¿gire mineade ba skochie chadi cha kwian onbre gdaite jingmea jegwale ulita dodadu undege chuiage? 24 Ba ulita me ñage cha gbe jiske blike gwage alin allabi chadi, ba mo ta gbadale tañachuge trate no cha kle age giti, ene be suge bage cha jiske ulia o me. 25 Jesu gerudu ene kwian ngle ulita ole, gire kwian gweale toinga una Jerusalénge gerudu modi Jesu giti: —¿Onbre e me onbre amaña che chugagwalla mneite kle jinade nate gwadaleda? 26 Nege ama kle gerule kwian ulita gwa giti aini, ¿ne gire che chugagwalla ta ama gwakalinda kle llema boi? ¿Mineade ama gdaite me kle ka boi onbre e ole? ¿Nege che chugagwalla ulita kle onbre e gai ulia? ¿Suge amage onbre e Cristo Chube ama kagu ulia? 27 Che ulita onbre e uñe, chege uñale trate onbre e me Cristo, kaire uñale trate chege ama chiu baini, agwa Cristo be chie, ulia ni kwian gdaitege uñale ama chie baini. 28 Jesu kle kwian tke tangle u gerungwa Chube olege, gire Jesu kwian keruchugu gerule ama Jesu uñe gire Jesu gerudu kweri kwian ulita ole: —Ba kle gerule chadi ba cha uñe, kaire ba kle gerule chadi uñale bage cha chiu baini. Cha gerule ba ulita ole, cha me chiu mo talla giti agali, cha kaganga cha kagu, ama ulia, ba ulita ñage ama gai ulia. Agwa ba ulita me cha kaganga uñe, 29 cha ama uñe trate, cha chiu ama ngwadi, ama cha kagu. 30 Jesu gerudu ene kwian ulita gwa giti gire kwian tadu Jesu gakalin blike dbale skadi, agwa Jesu gai gwaleda chuia bebi chke malen kwian me ñadu Jesu gai. 31 Kwian tanre skochiu Jesudi Jesu gerudu giti, agwa kaire kwian na tanre Jesu gau ulia, sugedu ama ulitage Jesu e amaña Cristo, ama ulita gerudu no Jesu giti: —Uñale chage onbre e ulia Cristo, na me ñage lle daga ngwale ma no dodade onbre e kle dodadege. 32 Kwian fariseo ulita kledu eni kwian keruchugu gerule no ene Jesu giti Jesu gai ulia Cristole, gire ama ulita ule kwian gerunga Chube ole daba alin chugagwalla ulita ole guardia donga gweale kagu Jesu gai gbe skadi. 33 Guardia donga e ulita jo chke Jesudi Jesu gadale gire Jesu gerudu guardia donga ole kaire kwian kle mo litaba ulita ole: —Cha be kle aini ba ulitaske chui gwealege alin gire bigwa cha be jogeni cha kaganga kle ngwadi. 34 Chui e be chke gire ba ulita be cha jinade nate mo chudaboale, agwa chui ege ba ulitage cha mi skwen, ba mi ñage joge baini cha be kle ngwadige. 35 Kwian israelita chugagwalla ulita Jesu keruchugu gerule ene gire ama ulita geru kadu modi: —¿Ama be joge baini ama kle gerule ama be kle ngwadi che me ñage joge chke? ¿Ama kle tañachuge joge bate kwian israelita kle toi kwian nga namuske ngwadi? ¿Kaire ama be kwian me israelita tke tangle llani? 36 ¿Mineade ama gerudu: “Cha jinabe nate cha mi skwen kwiange, cha be kle ngwadi kwian mi ñage joge chke”? —kwian israelita chugagwalla ulita geru kadu ene modi Jesu giti. 37 Chui ollade chuia bdagli, chui e ma no chui ollade jo tangle ulitage, chui ege Jesu kle mo gbaba gdate kwian kle mo litaba ngwadi gire Jesu gerudu kweri kwian ngle ulita ole: —Bai kaire me ta suga no molen ba cha gai ulia, cha ba ta gbe suga no diali. Kwian siechie tanre kwian chi jai gire kwian sie joge tangle, ene kaire cha kwian ta gbe suga no chi gwade no jrite diali ngaintra kare, ene cha kwian ta gbe chege suga no diali. Chube gerua degaba unsuialin gerule cha giti kwian bai cha gai ulia ta chege suga no diali. 39 Jesu gerudu ene kwian ole ama kledu gerule Chube Oña giti, Chube be mo Oña kage toi diali kwian tale kwian bai kaire Jesu gai ulia, ene kwian Jesu gau ulia ta be chege suga no diali. Agwa Chube bebi mo Oña kage kwian alin, ngeru Jesu be age ulita ama agedale kare nga dba ai giti, ama be jogeni nga ngaña giti Chube kle ngwadi gire Chube be mo Oña kage kwian Jesu gau alin. 40 Kwian gweale kledu kwian ngleaske, ama Jesu keruchugu gerule no mo giti gire kwian e gerudu Jesu giti: —Kwian gdaite Chube gerua ketanga dabage no no be chie, ama e. 41 Na gerudu: —Onbre e Cristo, Chube gerudu be Cristo kage che alin, ama e. Na gerudu: —Me dale, ama me Cristo, Cristo mi chie nga Galileage. 42 Chube gerua degaba unsuialin gerule Cristo giti Cristo be chie chugagwalla rey David oña oindallaske una Belénge David toidu ngwadi unsuialin. 43 Kwian ulita me gerudu salengwli Jesu giti, gire ama mo tku dole modi Jesu giti. 44 Kwian gweale tadu Jesu gakalin dbale skadi, agwa ni kwian gdaite Jesu gau dbale skadi. 45 Guardia donga ulita kagle Jesu gadale chkuni kole kwian fariseo ulita kaire kwian gerunga Chube ole daba alin chugagwalla ulita kle manade ngwadi, gire kwian e ulita geru kadu guardia donga ulitage: —¿Mineade ba ulita me Jesu gau ba me chiu ama dbe aini? 46 Guardia donga ulita jaindunga: —Cha me gwageba kwian gdaitedi gerule ta ngle ole onbre e kle gerule kare. 47 Kwian fariseo gerudu guardia donga ulitage: —¿Ba ulita kaire mo chugu ngwadi mo anblitange amage ama gai ulia? 48 ¿Suge ba ulitage che chugagwalla israelita ulita, kaire cha ulita kwian fariseo Moisés chadalla uñanga ulia, gweale kle ama gai ulia? ¿Mineade ba kle mo chuge ngwadi mo anblitange amage kwian ngle ulita kare? 49 Kwian me geru jwanba Moisés chadalla giti sidri ama ulita kle chage mo anblitange amage ama gai ulia, kwian e ulita kle age me no me no Moisés chadalla dollale, kwian ene alin Chube be ji gbe. 50 Kwian fariseo chugagwalla gdaite kada Nicodemo nu jogeba chui gbaitege geru trage Jesu ole, Nicodemo e amaña daba fariseo keruchugu gerule guardia dongage me no Jesu giti gire Nicodemo gerudu daba fariseo ulita ole: 51 —Moisés chadalla kle degaba che ulita alin gerule che me ñage kwian gai blike gbe jiske agedu gweale giti, ngeru che kwian chugadale ngwadi gerule mo giti ama agedu giti, che kwian keruchuge gerule mo giti ulita ene suge trate chege ama jiske ulia o me, ama jiske ulia gire che ñage ama gbe ji chuge. 52 Nicodemo gerudu ene daba fariseo ole gire ama ulita gerudu Nicodemoge: —¿Ba ta mo gbakalin kwian nga Galileamu, ba ta gerukalin no ama giti, kaire ba ama gakalin ulia? Ma no ba Chube gerua degaba unsuialin batenga, ba geru e jwen nabitaite, ene be chke uñale bage trate ulia kwian Chube gerua ketanga dabage ni gdaite ñage chie nga Galileage. 53 Kwian fariseo gerudu mno ene ulita Nicodemoge, gire ama ulita kaire kwian na ulita kledu ne ngwadi joni gdaite gdaite mo ullage.
1 Kwian e ulita joni mo ullage, agwa Jesu jo Ngwiskinro Jwichugallage. 2 Nagbietege nga chku ju Jesu chiuni chkuni u gerungwa Chube olege gire kwian ngle mo litu Jesudi, Jesu toidu dba gire ama kwian ngle tku tangle Chube geruage. 3 Jesu kle kwian tke tangle gire kwian gweale daba tkanga tangle Moisés chadalla giti ule kwian fariseo mneite ole jo chke muinga mo jwanba skatedu mo chuge ke giti onbre na ole dbe Jesu kle ngwadi, ama muinga e gbu kwian ngle gwa giti, 4 gire gerudu Jesu ole: —Kwian tkanga tangle geruge, cha gerule ba ole muinga ai giti, muinga ai skatedu mo chuge ke giti onbre me amanu ole. 5 Moisés Chube gerua degu unsuialin, chada e gerule muinga age muinga ai agedu kare che muinga skiadale ke giti che muinga gwadaleda. Ba kwian tkanga tangle geruge, ¿ba gerule mine muinga ai giti? ¿Che age mine ama ole? 6 Ama ulita geru kadu ene Jesuge muinga giti ama ulita tañachugu Jesu be gerule gweale me no Moisés chadalla degaba dollale, ene ama be ña Jesu gbe jiske ama ulita takalin kare, agwa Jesu me jaindunga, Jesu chegu gwage gwadbiguda dbi chada gbe kobara giti. 7 Kwian fariseo ule daba tkanga tangle Moisés chadalla giti ole me chegu ta chuge geru kade Jesuge, gire Jesu gwa gaunga ngaña Jesu gerudu muinga dbanga ulita ole: —Ba ulita chku aini muinga dbe, ba bai kaire me agenga me no sidri ba takalin ba muinga e skie ngeru ke giti. 8 Jesu gerudu ene gire Jesu chegu gwage gwadbiguda nabitaite dbi chada gbe kobara giti. 9 Kwian muinga dbanga Jesu ngwadi Jesu keruchugu gerule ene ama ulita ole gire ama ulita mo gbu joge gdaite gdaite siere, sugedu ama ulitage me ñage age Jesu gerudu kare, juma ulita mo gbu joge ma ngeru bdale ulitage. Muinga dbanga ulita jo siere muingage, muinga alin chegu gballa Jesu ole. 10 Jesu gwa gaunga ngaña gwagedu muingadi, Jesu geru kadu amage: —Kwian ulita chiu ba dbe aini, ¿ama kle baini? ¿Kwian gdaite me su ba skie ke giti gwaleda? 11 Muinga jaindunga: —Ni kwian gdaite ñadu mo ta gbe cha skie ke giti. Jesu gerudu: —Cha kaire me ba skie ke giti ba agedu me no gdale, ma no ba jogeni gudegu ba me age me no dare nge kare. 12 Jesu gerudu dare kwian ngle kle mo litaba Jesudi ole: —Cha jichra kare kwian ulita alin, kwian me Chube uñe chage nga jereske kare chage age me no Chube dollale, cha kwian ta gbe suge salengwli jichra kle kwian gbe ten nga jereske kare. Kwian bai kaire cha gai ulia mo ta gbe chage cha takalin kare, cha kwian ene ta gbe, ene suge amage Chube mine, kwian ene mi mo ta gbe chage age me no dare Chube dollale. 13 Kwian fariseo gweale kledu kwian ngleaske gerudu Jesu ole: —Ba kle gerule no mau giti agali naskuni e ngwale, ni kwian na kle gerule salengwli ba giti ba kle gerule kare. 14 Jesu gerudu kwian fariseo e ulita ole: —Cha kle gerule mau giti cha me kle gerule ngwale, ulita uñale chage cha mine, kaire uñale chage cha chema, kwian na me gerudale cha giti, uñale chage cha chiu baini kaire cha be jogeni baini, agwa ba ulitage me uñale cha chema cha chiu baini cha jogeni baini. 15 Ba ulita kle cha gbe jiske, ba kle age mo tale alin ba kle tañachuge kare, me uñale bage ulia cha mine. Cha me kwian gbe jiske ba ulita kle age kare. 16 Cha ñage gerule ulia trate kwian ulita giti, cha kwian gbe jiske cha me kwian gbe jiske gballa mo talla alin giti, cha Ñenua cha kagu nga dba ai giti, ama talla giti ule cha gerule kwian bai jiske bai me jiske, kwian ta ulita uñale chage cha Ñenuage. 17 Ba ulita alin Moisés Chube gerua degu unsuialin, chada e gerule kwian gdaboke gerule salengwli daba gweale na giti daba e jiske o me jiske, ene ñage suge trate kwian na ulitage kwian e boke kle gerule ulia daba giti. 18 Ene kare kaire cha agali gerule no mau giti, cha Ñenua cha kagu ama gerule no cha giti kaire, cha cha Ñenua ole boke gerule no salengwli cha giti, ene e giti sugedale ba ulitage cha kle gerule ulia mau giti. 19 Jesu gerudu ene kwian fariseo ole gire kwian fariseo gerudu Jesuge: —Ba kle gerule ba Ñenua giti, ¿ama kle baini? Jesu jaindunga: —Ba ulitage me suge cha giti cha chema ulia, ene kaire me suge ba ulitage cha Ñenua giti chema cha Ñenua. Agwa suge ba ulitage tale suge cha chema, ene kaire uñale ba ulitage chema cha Ñenua, ba ulita me cha gai ulia ni bage be suge chema ulia cha Ñenua. 20 Jesu gerudu ene kwian fariseo ole Jesu kle kwian nglea ulita tke tangle ngwadi, Jesu kledu u gerungwa Chube olege eni lle igi tkakle ngwadi Chube alin, eni kwian ulita Jesu keruchugu gerule kwian fariseo ole agwa ni kwian gdaite su Jesu gai dbale skadi, chui bebi chke kwiange agedale me no Jesu ole. 21 Jesu gerudu nakwaite kwian ulita ole: —Cha be jogeni gire ba ulita cha tane giti be cha jinade nate mo chudaboale, agwa ba ulitage cha mi skwen, ba ulita be jogeda age me no talla ole, gire ba be chege sugekare Chubege diali, cha be joge ngwadi ba ulita me ñage joge chke cha nate. 22 Jesu gerudu ene kwian ulita ole gire kwian israelita chugagwalla ulita gerudu modi Jesu giti: —¿Ama kle tañachuge mo gweda agali sugekare chege, malen ama kle gerule ama be joge ngwadi che me ñage joge? 23 Jesu gerudu dare: —Ba ulita nga dba aimu, cha nga ngañamu, ba ulita ta nga dba aimu, cha ta me nga dba aimu ba ulita talla kare. 24 Cha gerudu ba ulita ole ba be jogeda age me no talla ole, kaire cha gerudu tanre ba ulita ole cha chema, chema cha kagu, agwa ba me ta cha gerua gakalin ulia. Ba me cha gerua gai ulia ba be jogeda age me no talla ole, ba be chege sugekare Chubege diali. 25 Kwian israelita chugagwalla ulita geru kadu Jesuge: —¿Ba chema ulia? Jesu jaindunga: —Ngeru ulita cha gerudu tanre ba ole, ene sugedale bage cha chema. 26 Chage uñale ba ulita kwian mine, cha agali ñage gerule tanre dare ba giti, cha ñage ba gbe jiske age tanre me no gdale, agwa cha me age ene cha talla alin giti, cha kaganga gerule ulia trate diali, cha kaire, cha ama keruchuge gerule, gire cha geru amanu kete ba ulitage, ene ba ulita ñage ama gerua gai ulia cha giti ene ba me chege jiske talla me no kle ba tale giti cha kaganga gwa giti. 27 Jesu gerudu ene kwian ulita ole, agwa me sugedu kwiange Jesu kledu gerule mo Ñenua Chube giti, 28 malen Jesu gerudu kwian ulita ole: —Nege me suge bage cha chema, agwa chui be chke gire ba be cha gbange kruge ngaña, chui ege be chke uñale bage cha ulia Chube Kirolla chiu nga dba ai giti kwian kare, kaire be suge bage cha me gerudu mo talla giti gballa, cha gerudu ulita cha Ñenua cha ta gbu gerule kare. 29 Cha kaganga kle diali cha ole ule, ama cha Ñenua, ama me cha chuge ngwadi gballa dale, cha kle age ulita no diali ama gwa giti ama takalin kare. 30 Jesu gerudu ene ulita kwian ole gire kwian tanre kledu Jesu keruchuge Jesu gau ulia, sugedu Chube nu Jesu kagaba. 31 Kwian israelita nu Jesu gaba ulia, ama ulita ole Jesu gerudu: —Ba me ñage gerule alin allabi ba cha gai ulia, kaire ba mo ta gbadale trate chage diali cha gerua gerule kare, ene ulia ba geru jwannga cháge ba cha gerua ganga ulia, 32 cha gerua ulia giti be chke uñale ba ulitage mo ta gbe chagé giti geru uliage, ene geru ulia be ba jwen siere mo mauña me no ngeruge, ene ba chege ngwale mo mauña no na alin agedale no. 33 Kwian israelita ulita gerudu Jesu ole: —Cha ulita Abraham oindalla, kwian na me cha ulita gau gbu lle boi mau alin. Cha ulita me mo mauña molen, lle boanga mo mauña alin me ñage joge siere mo mauñage, ¿mineade ba kle gerule cha ole geru ulia be cha jwen siere mo mauña me noge, ene cha chege ngwale mo mauña na no alin? 34 Jesu jaindunga: —Cha gerule ulia ulia ba ulita ole, ba ulita bai kaire kle chage age me no diali age me no ba kaganga age me no ba mauña, ba ene me ñage mo jwen siere age me noge, ba chege age me no diali kwian lle boanga chege lle boi mo mauña alin kare. 35 Kwian bai kaire chege age me no diali, kwian ene me Chube uñe dale, ama me Chubenu, ama me ñage chage diali chui tangle Chube ole. Agwa kwian Chubenu ulia ama mo ta gbe chagé diali chui tangle Chube ole. Ba ulita kle age me no diali, ba ulita me Chubenu. Cha Chube Kirolla, cha ñage ba ulita jwen siere ba kle mo ta gbe age me noge ene ba me chege mo ta gbe age me no dare, ene ba mo ta gbe chege age no sugekare age me noge, ene ba Chubenu, ene ba be ñage mo ta gbe chagé diali chui tangle Chube ole. 37 Uñale chage ba ulita Abraham oindalla, agwa ba ta mo ta gbakalin cha gweda, ba me mo ta gbakalin ulia cha gerua gai, ba alin geru e me no cha kle gerule kare, malen ba kle mo ta dbe me no cha ole. 38 Cha kle gerule ba ulita ole cha Ñenua cha tku tangle kare, agwa ba ulita kle mo ñenua keruchuge ba kle age ama ba tku tangle kare ama kle gerule kare. 39 Kwian israelita gerudu Jesuge: —¡Abraham cha ulita ñenua! Jesu gerudu: —Ulia ba ulita Abraham kirolla ba kle gerule kare, ene ba ulita agedale ama agedu kare, agwa ba me kle mo ta gbe age ama kare. 40 Agwa cha kle gerule ulia ba ulita ole Chube cha tku tangle kare gire ba ulita takalin cha gweda cha kle gerule giti ba ole, Abraham me su age ene ba kle age kare. 41 Ba me kle age Abraham agedu kare, ba ulita kle age salengwli ba ulita ñenuanu kle age kare. Jesu gerudu ene gire kwian israelita ulita gerudu: —Cha ñenua me cha jun ke giti, uñale cha ulitage cha ñenua gdaitre alin, e Chube, ama cha ulita ñenuanu. 42 Jesu gerudu: —Ulia Chube ba ulita ñenua ba kle gerule kare, ene ba ulita mo ta dbadale no cha ole cha gai dage, agwa ba ulita me kle mo ta dbe no ene cha ole. Cha chiu ulia Chube ngwadi, cha kle aini ba ulitaske, cha me chiu mo ta giti agali, agwa Chube cha kagu nga dba ai giti. 43 ¿Mineade ba ulita ole cha kle gerule ba me kle geru e gbe gdadi mo alin? Ba kle mo ta gbe tañachuge ma no ba me cha gerua keruchuge no, ba me kle mo ta gbe no geru ole cha kle gerule kare, 44 ba kle mo ta gbe tañachuge ma no age ba ñenua kle age kare, ama geru jinanga tanre ngwale, ba ñenua che dolla kada Satanás, ba ulita ama kirolla. Gwange jondege alin Satanás kwian gwangada, kaire ama geru jinganga tanre ngwale, ama me mo ta gbu no Chube gerua ulia ole, malen ama ni gerule sidri ulia, ama tale geru ulia me kle, malen ama me ñage gerule ulia, ama geru jinanga ngwale mauña, ama kwian ulita ta gbe geru jinade ngwale ama kare. 45 Agwa cha gerunga ulia diali, cha me geru jinade ngwale ni sidri Satanás kare, ba Satanánu malen ba ulita me mo ta gbe cha gerua gai ulia. 46 Ni ba gdaite ñage cha gbe jiske gerule cha giti cha agenga me no, cha diali kle age no kle gerule ulia, ¿mineade ba me kle mo ta gbe cha gai ulia? 47 Kwian bai kaire ulia Chubenu, ama ulita no Chube gerua ole, ama diali mo ta gbe Chube gerua keruchugakalin no. Agwa ba ulita me Chubenu, malen ba me kle mo ta gbe ulia Chube gerua keruchuge no jumale, agwa ba kle Chube gerua keruchuge alin allabi, ba me kle mo ta gbe Chube gerua gai ulia mo alin. 48 Kwian israelita gerudu Jesuge: —Nege suge cha ulitage cha kle gerule trate ulia ba giti, ulia ba kwian me no nga Samariamu, dolla kle ba tale ama kle ba gbe gerule ulita ngwale ama takalin kare. 49 Jesu gerudu: —Dolla me kle cha tale ni dolla kle cha gbe gerule, cha kle gerule no ulia trate cha Ñenua giti, cha ama gai dage no, agwa ba ulita kle mo ta gbe gerule cha dollale, ba me kle cha gai dage. 50 Kwian gerule cha dollale kwian me cha gai dage, cha me e tallade kwian kle age giti cha ole, agwa cha Ñenua takalin kwian ulita gerudale no cha giti cha gai dage no, kwian bai kaire me gerule no cha giti me cha gai dage no, cha Ñenua be kwian ene gbe ji chuge agedu cha ole gdale. 51 Cha gerule ulia ulia ba ulita ole, kwian bai kaire cha gerua gbe gdadi cha gerua gai dage no, kwian ene be toi diali chui tangle cha Ñenua ole cha ole, ama mi chege sugekare cháge cha Ñenuage. 52 Kwian israelita ulita Jesu keruchugu gerule ene, gire gerudu: —Nege trate uñale chage dolla kle ba tale, dolla kle ba ta gbe gerule, uñale cha ulitage cha enusulian Abraham toidu, kaire kwian Chube gerua ketanga dabage toidu, ulita jo juma gire ama ulita jokeda. Ba kle gerule kwian bai kaire ba gerua gbe gdadi ba gerua gai dage no, kwian ene be toi diali chui tangle. 53 ¿Ba kle tañachuge ba ma kweri che enusulian unsuialin Abrahamge? Che enusulian Abraham ma kweri agwa ama me chegu toi diali, ama toidu gire ama jokeda, kaire kwian Chube gerua ketanga dabage ulita, ama kaire kweri agwa ulita me chegu toi gwade diali, ama ulita jokeda, ¿ba chema gerudale ba kle gerule kare? ¿Chema be ba kle gerule kare gai ulia? Cha me ba gerua gai ulia ba kle gerule kare, ba me ma kweri cha enusulian unsuialin ulitage, cha me ba gai ulia ni ba gerua gai ulia. 54 Jesu gerudu kwian israelita ole: —Cha kle age ulita cha me kle age mo ta giti ene kwian gerudale no cha giti cha kweri, me ene, cha mo gbe ene kweri mo ta giti, e ngwale, ngwale cha agali mo ta gbe kweri kwian gwa giti, e me trate. Agwa cha gbanga kweri, ama gerunga no cha giti, ama cha Ñenua Chube. Cha Ñenua e amaña ba ulita kle gerule ba Chubea, 55 agwa ba ulita kle sole, ba me ama uñe ulia, agwa cha ama uñe trate. Cha gerule gweale ba ole cha me ama uñe, ene cha kle age ba ulita kare ba ulita kwian songa ngwale kare. Agwa cha gerule ulia ba ole, ulia ulia cha ama uñe trate, cha kle age ulita ama kle gerule kare cha ole. 56 Ba ulita enusulian unsuialin Abraham, Chube ama ta gbu cha chuia giti, uñadu trate Abrahamge cha be chke nga dba ai giti, Abraham cha chuia e manadu nga suga no ole, ama gwagedu cha chuiadi gire nga sugedu no no ama tale cha giti, ama cha uñu cha gwagedu amadi. 57 Kwian israelita gerudu Jesuge: —Abraham enusulin, e unsuialin unsuialin, gire ba kle gerule ba gwagedu amadi, ba ni chura cincuenta molen, ba me ñage gerule ba gwagedu enusulin Abrahamdi. 58 Jesu gerudu: —Cha gerule ulia ulia ba ulita ole, cha gwagedu Abrahamdi Abraham gwagedu chadi, Abraham bebi menga chebia kote gire cha klebi enebi ngeru Abrahamge. 59 Jesu gerudu ene gire kwian israelita ulita skochiu jabale Jesudi, ama ulita ke jun Jesu skiagda ta sko ole Jesu gerudu giti, agwa Jesu jwlituda kwian ngleske tangle, Jesu jongwa kwian Jesu dollale ulita gwage, Jesu jo siere u gerungwa Chube olege.
1 Jesu kle chage nga gwealege jonkare ule kwian geru jwannga amage ulita ole Jesu gwagedu onbre gdaitedi mebanga gwagwa me. 2 Kwian geru jwannga Jesuge ulita geru kadu Jesuge onbre e gwagwa me giti: —Cha tkanga tangle, ¿mineade onbre e medunga gwagwa me? ¿Ama ñenua ama chebia agedu gweale me no malen ama medunga ene? ¿O ama agali agedu gweale me no malen ama chegu ene? 3 Jesu gerudu kwian geru jwannga ole: —Onbre e ene gwagwa me, ni ama ñenua ni ama chebia ni ama agali agedu gweale me no gdale malen ama chegu ene, me ene, ama medunga chebia kote ene gwagwa me, ene Chube ñage age no ama alin mo kiralla giti, Chube ama gwagwa dodade ene kwian ulita ñage gwage Chube kiralladi ama gwagwa dodade giti. 4 Nege cha kle nga dba ai giti che lle boadale blike cha kaganga cha kagu lle boi ama alin kare, chui kle kodi gire cha be jogeda che mi ñage lle boi dare. 5 Cha kle nga dba ai giti cha jichra kare kwian ulita alin, cha kwian ta gbe chke Chube uñe salengwli jichra kle kwian gbe ten nga jereske kare, ene cha kwian ta gbe suge chage Chube ole. 6 Jesu gerudu ene ulita geru jwannga amage ole gire Jesu jolo tku dba dbi giti, Jesu dbiuda tugu jolodi, kobara giti Jesu dbiuda e gbu onbre me gwagwa molen gwagwage. 7 Gire Jesu gerudu onbre e ole: —Joga mo gwagwa glige chi tan obengwa kada Siloége —ka Siloé e gerule: “kwian kagle”. Onbre me gwagwa molen jo mo gwagwa glige chi tan Siloége Jesu ama kagu age kare, ama mo gwagwa gligu gire ama ñadu ten, ama joni gudegu. 8 Ama chkuni ama kledu toi ngwadi gire kwian kle toi ama ullage kodi kaire kwian na tanre gwageba amadi ngeru ama me ten diali ama kle igi kade kwian nage, kwian e ulita nu gwageba amadi ene ngeru, kwian e ulita geru kadu modi: —¿Onbre e me amaña me ten kledu diali toiba dba jonke igi kade che ulitage? 9 Kwian gweale gerudu: —Ima, onbre e amaña gwagwa me. Gweale na gerudu: —Me dale, onbre e me amaña, onbre chege salengwli ama kare, agwa me amaña. Gire onbre agali gerudu mo giti: —Ima, cha amaña, ba gwagedu chadi cha me ten, agwa nege cha ñage ten no. 10 Kwian ulita geru kadu onbre ege: —¿Ba agedu mine gire nege ba ñage ten? 11 Onbre jaindunga mo giti: —Onbre gdaite kada Jesu, ama dbiuda tugu jolodi gbu cha gwagwage gire gerudu cha ole: “Joga mo gwagwa glige chi tan obengwa kada Siloége.” Cha jo Jesu gerudu kare cha ole, cha jo chke chi tange, cha mo gwagwa gligu gire cha ñadu ten. 12 Kwian ulita geru kadu dare amage: —Onbre ba dodadu, ¿ama kle baini? Ama jaindunga: —Me uñale chage ama kle baini nege. 13 Jesu dbiuda tugu jolodi gbu onbre me gwagwa molen gwagwage gire onbre ñadu ten, Jesu onbre e dodadu kwian israelita undege chuiage, malen kwian ulita kledu geru kade onbre ege kwian e ulita onbre du kwian fariseo ulita ngwadi gbale jiske. 15 Kwian fariseo geru kadu onbre amañage: —¿Ba agedu mine gire nege ba ñage ten? Onbre jaindunga kwian fariseo kalen: —Onbre gdaite dbiuda tugu jolodi gbu cha gwagwage gire cha mo gwagwa gligu, ene cha ñadu ten. 16 Onbre gerudu ene kwian fariseo ole gire kwian fariseo ulita gerudu modi mo kaire kaire, gweale gerudu: —Onbre kwian gwagwa me dodadu, ama kle age che undege chuiage, malen suge chage ulia Chube me ama kagu, ulia Chube ama kagu ene ama me e dodadu che undege chuiage. Kwian fariseo gweale na gerudu: —Onbre e onbre gwagwa dodadu, e me chiu Chube ngwadi ene ama me ñage lle daga ngwale no e kare dodade, kwian agenga me no me ñage gwagwa dodade ama agedu kare. Kwian fariseo ulita me gerudu salengwli Jesu giti gire ama mo tku dole modi Jesu giti, 17 geru kadu dare kwian onbre gwagwa dodabage: —Onbre gdaite ba gwagwa dodadu, nege ba ten, ¿ba tañachuge mine ama giti? ¿Bage suge ama chema? Onbre e jaindunga Jesu giti: —Cha gerule ama giti ama kwian Chube gerua ketanga dabage. 18 Onbre gerudu no ene Jesu giti agwa kwian fariseo ulita bai Jesu dollale me tadu kwian gwagwa dodaba kerua gakalin ulia ama medunga gwagwa me nege ama ñage ten, me chegu no alin kwian fariseoge, kwian fariseo onbre gwagwa dodaba ñenua, chebia kadu geru kadadale ñenuage chebiage ulia onbre medunga chebia kote gwagwa me, 19 kwian fariseo geru kadu ñenuage ene: —¿Onbre ai ulia ba kirolla? Cha takalin ba gerule cha ole, ¿ulia ama medunga gwagwa me? Ulia ama medunga gwagwa me, ¿gire mineade ama ñage ten nege? 20 Ñenua gerudu mo kirolla gwagwa dodaba giti: —Cha ama ñenua, cha muira ama chebia, uñale cha bonatege ama medunga gwagwa me, ama cha kirolla ulia, cha ama manadu, jo juma me gwagwa molen. 21 Agwa nege cha bonatege me uñale mineade ama ñage ten, kaire me uñale cha bonatege chema ama gwagwa dodadu. Ma no ba geru kade amage agali, ama juma, ama agali ñage gerule mo giti boidu mine gire ama ñage ten. 22 Ñenua, chebia gerudu ene kwian fariseo chrullale, uñadu ama bonatege kwian fariseo mneite nu mo ta gbaba ule salengwli kwian mlienga siere u mo litangwa Chube gerua jwanngwage kwian ulita bai kaire gerule no Jesu giti Jesu ulia Cristo Chube ama kagu kwian ulita alin. Kwian ulita bai kaire gerule ene kwian fariseo mneite gwa giti kwian fariseo be kwian ene mlienga siere, kwian ene me ñage mo lite dare ule ama kle mo lite ngwadi. 23 Malen ñenua gerudu kwian fariseo ole mo kirolla giti: “Ma no ba geru kade amage agali, ama juma, ama agali ñage gerule mo giti.” 24 Onbre gwagwa dodaba, kwian fariseo ama kadu nakwaite geru kadadale Jesu giti, kwian fariseo gerudu onbre gwagwa dodaba ole: —Ba gerudale no Chube giti Chube ba gwagwa dodadu, me onbre e ba kle tañachuge ama ba gwagwa dodadu, uñale cha ulitage onbre e agenga me no. 25 Onbre gwagwa dodaba gerudu fariseo ole: —Chage me uñale ama agenga me no o ama agenga no, agwa uñale chage trate cha tigedu gwagwa me cha me ñadu ten, agwa nege cha ten no, ama cha gbu ten. 26 Kwian fariseo geru kadu dare: —Onbre ba gwagwa dodadu, ¿ama agedu mine ba ole gire ama ba gbu ten? 27 Onbre gwagwa dodaba jaindunga: —Cha gerudu tanre ba ole onbre e giti onbre agedu mine cha ole, agwa ba me ta cha kerua gbakalin gdadi ulia. ¿Lledale ba takalin cha gerule nabitaite amaña giti? ¿Ba ta mo ta blitakalin ama ole ama gai ulia? 28 Kwian fariseo ulita skochiu onbre gwagwa dodaba ole ka bo ama ole: —Ba mo ta gbakalin onbre ba gwagwa dodadu gai dage, e ba mo ta gbakalin ama gai dage, agwa cha me dale, cha ulita diali be chage Moisés nu Chube gerua degaba alin gai dage. 29 Uñale cha ulitage Chube gerudu Moisés ole, malen cha Moisés chadalla degaba gai dage, cha age ama chadalla alin gerule kare. Agwa onbre e ba gwagwa dodadu me uñale cha ulitage ama chiu baini ama chema. 30 Onbre gwagwa dodaba gerudu kwian fariseo ole: —Me suge chage mineade me uñale bage ulia onbre cha gwagwa dodadu chiu baini. 31 Uñale che ulitage Chube me kwian agenga me no keruchuge, agwa kwian ulita bai kaire Chube gai dage age Chube takalin kare, Chube kwian ene alin keruchuge. 32 Ni kwian gdaite jo keruchugaba gerule kwian na giti, kwian medunga gwagwa me kwian na ngwale ñage ama gwagwa gbe ten. 33 Onbre cha gwagwa dodadu, onbre e me chiu Chube ngwadi Chube me ama kagu, ene ama me ñadu age no ene cha alin cha gwagwa gbe ten, kwian ngwale me ñage age no ene daba alin, ama cha gwagwa dodadu giti suge chage Chube ama kagu. 34 Kwian fariseo ulita gerudu ta sko ole onbre gwagwa dodabage: —Ba medunga me gwagwa molen, ba kwian agenga me no, ¿nege ba ten gire ba ta cha ulita tkakalin tangle onbre e giti? ¿Ba chema gerudale ene cha ole? Ba me mo lite dare cha ole cha kle mo litege ngwadi, ba kwian me no, ¡joga siere u aige cha ulitage, cha me gwagekalin badi dare aini! Ama jo kagaba siere u kwian ulita kle mo lite ngwadige. 35 Kwian fariseo ulita onbre e kagu siere u mo litangwa Chube gerua jwanngwage chku uñale Jesuge, Jesu tendu onbre e amaña ngwange gire Jesu geru kadu amage: —Chube mo Kirolla kagu nga dba ai giti kwian kare, ¿ba ama gai ulia? 36 Onbre gerudu: —Gerule cha ole chema ba kle gerule giti, cha ta ama gakalin ulia. 37 Jesu gerudu: —Ba kle gwagedi, ba kle gerule ole, e cha amaña, cha giti cha kle gerule ba ole. 38 Sugedu onbre ege Jesu Chube Kirolla Chube nu Jesu kagaba nga dba ai giti kwian kare, gire onbre e jo chke dba jongnagwa giti Jesu gwangnagu Jesu gai dage gerudu Jesu ole: —Cha Chugagwalla, cha ba gai ulia, ba Chube Kirolla. 39 Jesu gerudu: —Cha chiu nga dba ai giti, ene cha giti be chke uñale trate trate chema Chube gai ulia chema me Chube gai ulia. Kwian me Chube gerua uñe, Chube gerua me suge kwian enege, cha kwian ene ta gbe suge salengwli cha ba gwagwa gbu ten kare, ene Chube gerua suge trate amage. Agwa kwian bai kle gerule ama Chube gerua uñe ulita gire me age Chube gerua gerule kare, kwian enege Chube gerua me suge ama tale, cha me kwian ene ta gbe suge, ama ta be chege kwian gwagwa me ten kare, Chube gerua me suge amage. 40 Kwian fariseo gweale kledu Jesu keruchuge gerule ene, kwian fariseo e geru kadu Jesuge: —¿Kaire ba kle tañachuge cha giti cha me Chube gerua uñanga trate no kwian gwagwa me kare? Cha ten cha ta molen, uñale chage cha Chube gerua uñe. 41 Jesu gerudu kwian fariseo ole: —Ma no ba ulita gerule mo giti ba me Chube gerua uñe, ene ba me chege jiske kweri Chube gwa giti ba kle age me no gdale, agwa ba kle gerule ba Chube gerua uñe trate gire ba age me no Chube dollale, e giti ba jiske kweri Chube gwa giti ba kle age me no gdale.
1 Jesu geru ñachugu kwian fariseo ulita alin: —Cha gerule ulia ulia ba ulita ole, kwian bai kaire me joge bda oveja nate gerege oveja gerea ugakallage gudegu agwa joge oveja gerea gití bdugu oveja nate oveja gai, kwian ene skwe boanga kwian me no. 2 Agwa kwian oveja mananga ulia ama diali joge oveja gerea ugakallage gudegu oveja nate. 3 Oveja mananga joge chke oveja gerea ugakallage gire kwian oveja gerea ugakalla mananga oveja gerea ugakalla degenga oveja mananga alin, gire oveja mananga oveja ulita kaire kaire ka jwen ka giti, oveja mo mananga keruchuge uñale ama ulitage ama mananga kle ama kade, ama ulita joge gdaite gdaite mananga kle ngwadi gire oveja mananga oveja ulita jwen jondoi gerege. 4 Oveja ulita tien jondoi gerege gire oveja mananga joge chage oveja ulita ngeru ngaute ovejage, oveja ulita mo mananga kerua uñe, ama me nga tallade, ama chage mo mananga nate baini be joge ngwadi. 5 Agwa kwian na oveja kade, oveja me kwian e kerua uñe, oveja mi joge kwian e kle ngwadi, uñale ovejage ama mananga me kle ngaute ovejage, oveja kwian ene keruchuge oveja kige kwian ene ngeru, oveja mi jain ama gitigu. 6 Jesu geru ñachugu ene kwian fariseo alin, agwa ama ulitage me sugedu Jesu gerudu giti ama ulita ole. 7 Jesu gerudu nabitaite dare kwian ulita ole: —Cha gerule ulia ulia ba ulita ole, cha ugaka kare kwian alin oveja gerea ugakalla oveja kle joge tangle ngwadi gudegu kare. 8 Kwian ngle chiu cha ngeru, ama daba tku tangle geru me uliage, ama ulita gerudu ama Chube uñe, agwa ama me gerudu ulia daba na ole, ama kwian skwe boanga kare, kwian me no. Kwian Chubenu ulia, ama oveja kare, ama me kwian me no kerua gbu gdadi salengwli oveja me kwian me ama mananga kerua gbe gdadi kare. 9 Cha ugaka kare kwian ulita alin, cha giti alin allabi kwian ñage Chube uñe ulia, kwian bai kaire cha gai ulia kwian ene be tien gitiru ji chugege ama age me no gdale, cha kwian ene manade no ama gbe toi no oveja mananga kle oveja manade no kare, ene oveja me boi daga ngwale oveja toi no. Oveja mananga kle oveja jwen ugakage kle dbe blire chi jai gire oveja mananga kle oveja tke naskuni ugaka amañage. 10 Kwian skwe boanga joge ovejaske skwe boi ovejage oveja gai gweda age me no oveja ole ulita, ama chage ta e kare alin ole oveja nate diali, agwa cha me ene, cha chiu nga dba ai giti kwian alin age no kwian alin ene cha giti kwian ñage toi diali chui tangle nga suga no ole, cha kwian ta gbe ene. 11 Cha kwian bda oveja mananga no kare, cha age no kwian chanu alin, cha ama manade no kwian oveja mananga oveja maunu manade no kare, oveja mananga no oveja ole ama mo ta gbe jogeda oveja dolla kote oveja giti. 12 Agwa kwian lle boanga oveja mauña alin, kwian ene tañachuge igi alin gai oveja mauñage oveja manade giti, ama gwage oveja dolla gudedi chie oveja gitigu oveja gadale gire ama kige gude ngeru oveja jige gballa, kwian ene me oveja mananga ulia, ama kle tañachuge oveja me amanu ma no ama alin oveja chuge ngwadi dolla gudege. Ama age ene oveja ulita ole gire gude ñage chke ovejadi oveja gweda gute, oveja kige gdaite gdaite gballa bate gire oveja ulita jogenga gballa. 13 Onbre kige oveja dolla gudedi ama oveja chuge ngwadi gutadale dollage, ama kle tañachuge igi alin gai oveja manade giti, agwa ama me no oveja ole, ama me mo ta gbe kira bate oveja dolla ole oveja giti oveja mananga ulia no kare. 14 Cha kwian oveja mananga ulia no kare. Salengwli cha Ñenua cha uñe cha cha Ñenua uñe, ene kaire cha kwian chanu ulita uñe ama cha uñe kaire, cha mo ta gbe jogedaleda ama giti. 16 Kwian na ngle chudalla me israelita chanu kaire kle, ama bebi cha Ñenua Chube uñe, cha gerua jogedale chke amage gire ama be cha gai ulia, cha giti kwian israelita kaire kwian me israelita be cha Ñenua uñe, gire kwian israelita kwian me israelita be chege mneitre alin, cha ama ulita mananga. 17 Cha be mo chuge ngwadi jogeda kwian chanu ulita alin, kaire cha be mo gbeni gwade, kwian gdaite me ñage cha gai cha gweda agali, agwa cha mo tale cha be mo chuge ngwadi mo gwadaleda. Cha ñage mo chuge ngwadi mo gwadaleda, kaire cha ñage mo gbeni gwade, cha Ñenua cha kagu age ene ulita, cha kle age ama takalin kare, malen ama no cha ole. 19 Kwian israelita ulita kle mo litaba Jesu kle ngwadi, ama Jesu keruchugu gerule ene gire ama ulita mo tku dole modi nabitaite Jesu gerua giti. 20 Kwian israelita mne gdaite gerudu mne gdaite nadige Jesu giti: —¿Mineade ba kle ama gerua keruchuge ba kle ama kerua gai ulia? ¿Me suge bage kwian e jwligebanga, dolla kle ama tale ama gbe gerule? 21 Agwa kwian israelita mne gdaite na jaindunga: —Ni kwian gdaite jwligebanga dolla kle ama tale ñage gerule ene ama kle gerule kare. Kaire kwian jwligebanga me ñage kwian gwagwa dodade ama kle age kare. Kwian israelita mne boke kira batu ene Jesu giti. 22 Noi boi suiale, e suiale una Jerusalénge kwian israelita ulita kle tachke enusulian unsuialin u gerungwa Chube ole dodadu giti chuia ollade. 23 Chui e ollade chuiage Jesu jo chke u gerungwa Chube olege, kwian israelita Jesu dollale gwagedu Jesudi chage u e skada kada Salomónnuge, eni kwian israelita Jesu dollale ulita mo litu Jesudi tangle geru kadu Jesuge. —¿Mangire ba be kle chage cha ta gbe tañachuge ba giti ba Cristo o me Cristo? Ba Cristo ulia Chube nu ba kagaba ba gerule blike cha ole trate mo giti, ene suge chage ba ulia Cristo. 25 Jesu gerudu kwian israelita ole: —Cha gerudu trate mo giti ba ulita ole, agwa ba ulita me cha kerua gau ulia. Kaire cha kle lle daga ngwale no tanre dodade cha Ñenua kiralla giti ba ulita gwa giti, e giti sugedale bage cha chema ulia, 26 agwa ba ulita me kwian chanu, malen ba me cha gai ulia. 27 Kwian chanu cha kerua gbe gdadi, ama cha gai dage, ama ulita chage cha gerule kare, cha ama ulita uñe. 28 Cha kwian ene gbe toi diali chui tangle Chube ole, ama mi chege sugekare Chubege ji chuge, kwian ene chanu diali, ni kwian me no gdaite ni dolla ñage kwian chanu jwennga cha ngeru. 29 Cha Ñenua kwian ta gbu cha gai ulia, kwian ene ulita chanu, cha Ñenua kweri, ama kira molen tanre, malen kira na me ñage kirachke ama kiralladi, kira na me ñage kwian chanu jwennga cha Ñenua ngeru. 30 Cha Ñenua talla kle cha ole, cha talla kle cha Ñenua ole, cha Ñenua cha ole gdaitre alin. 31 Jesu gerudu ene gire kwian israelita ulita skochiu nabitaite Jesu gerudu giti ama ulita ke jun Jesu skiagda. 32 Gire Jesu gerudu ama ulita ole: —Cha Ñenua kiralla giti cha lle daga ngwale no tanre dodadu ba ulita gwa giti, ¿lle bai no cha dodadu cha Ñenua kirallaske gdale ba be cha skie ke giti? 33 Kwian israelita jaindunga Jesu kalen: —Cha ulita mi ba skie ba lle ulita no dodadu gdale, agwa ba kle gerule Chube dollale gdale cha ta ba skiakalin, cha ulitage uñale ba cha kwian onbre ulita kare gire ba agali ta mo gbakalin Chube kare cha ulita gwa giti. 34 Jesu gerudu: —Chube gerua jo degaba unsuialin ba ulita alin, uñale ba ulitage chada e gerule ulia diali, Chube gerua kle degaba chada ege gerule: “Cha gerudu ba ulita giti ba chube kare.” Chube gerudu ene Chube kledu gerule kwian ulita giti bai kairege Chube gerua jo ketaba unsuialin ngasuialin. 36 Chube gerudu ene ba enusulian unsuialin giti ama ulita chube kare, gire geru e giti ba me mo ta dbe skochie, ba kle geru e gai ulia. ¿Mineade nege cha gerule ba ole cha Chube Kirolla gire ba ta skochie? ¿Mineade suge bage cha kle gerule Chube dollale? Cha Ñenua Chube cha gau cha kagu nga dba ai giti, ba me ñage gerule cha ole cha kle age me no Chube dollale. 37 Ba gwa giti cha gerule alin cha Chube Kirolla cha me age ama age kare, ba me cha gadale ulia cha ama Kirolla, 38 agwa ba gwa giti cha lle daga ngwale no dodade Chube kiralla giti, e giti ba cha gadale ulia Chube Kirollale, sugedale bage Chube kle cha gbe e dodade. Ba me cha kerua gakalin ulia gerule mau giti cha Chube Kirolla, ma no ba cha gai ulia Chube Kirollale cha lle daga ngwale no dodade giti, e giti sugedale ba ulitage ulia cha Ñenua kle cha ole cha kle cha Ñenua ole, cha gdabonate gdaitre alin. 39 Kwian israelita ulita Jesu keruchugu gerule ene gire ama ulita mo ta gbu nabitaite Jesu gai dbale skadi, agwa ama me ñadu Jesu gai, Jesu kigedu ama ulita ngeru. 40 Jesu joni chi Jordánge tangle chkagu Juan-Bautista kwian ñeu chiske gau ngaña chigage ngwadi, eni Jesu chegu toi chui gwealege. 41 Kwian ngle jo chke Jesu kle ngwadi, kwian e ulita gwagedu Jesudi, kwian e ulita Jesu keruchugu gire gerudu Jesu giti: —Juan-Bautista ni lle daga ngwale no gdaite dodadu Chube kiralla giti kwian gwa giti, agwa Juan-Bautista gerudu onbre gdaite be chie Juan-Bautista nate giti onbre e be lle daga ngwale no dodade Chube kiralla giti, ulia nege che gwa giti onbre ai kle age Juan-Bautista gerudu kare, onbre ai amaña giti Juan-Bautista kledu gerule che ole. 42 Gire chui ege kwian ngle Jesu gau ulia Chube Kirollale nga ege Juan-Bautista kwian ñeu chiske ngeru ngwadi.
1 Onbre gdaite oga kada Lázaro, ama ibotea boke kada Marta, María, ama ulita una Betaniamu. 2 (Lázaro ibotea María e amaña lle ñachke no tku Jesu sera giti Jesu sera unbatu mo chugaga giti.) Lázaro oga gire Lázaro ibotea gdabonate kwian kagu geru jige Jesuge, Lázaro ibotea gerudu kwian be geru kete Jesuge ole: —Ba joge chke llani ba gerule ene: “Cha Chugagwalla, ba skatemanalla no no oga kirale kirale.” 4 Kwian jritenga Lázaro chada ole jo chke Jesu kle ngwadi, gerudu Jesu ole: —Cha Chugagwalla, ba skatemanalla no no oga kirale kirale. Jesu ama keruchugu gerule ene Lázaro giti, Jesu gerudu: —Lázaro jingmea kote Lázaro mi chege jogebada diali, Chube be age no ama alin mo kirallaske, ene kwian ulita ñage gerule no Chube giti kaire gerule no cha Chube Kirolla giti. 5 Jesu no no Marta ole Marta daballa María ole, kaire Lázaro ole, agwa ama me tañachugu joge blike Lázaro oga nate. 6 Jesu geru keruchugu Lázaro giti gire Jesu chegu chui boke dare ngmadi kledu ngwadi. 7 Chui boke jo tangle gire Jesu gerudu kwian geru jwannga amage ulita ole: —Aleni naskuni nakwaite nga Judeage Lázaro kle ngwadi. 8 Kwian geru jwannga gerudu Jesu ole: —Cha tkanga tangle geruge, me sbali nga Judeage kwian israelita ba dollale tadu ba skiakalin ke giti tadu ba gweda, ¿mineade ba ta jogekalin nakwaite nga ege? 9 Jesu jaindunga: —Ba me tallade e giti, chui gbaite ulita nga chra che alin, che chage ngajudi che me lentige che me joge chke dba, nga chra giti che chage no, agwa che chage nga jereske che lentige che joge chke dba, nga jere dbigu nga chra me chagegda no. Kwian age me no cha ole chuia bebi chke salengwli che kle chage ngajudi kare uñale chege che ñage chage baini kaire ene che me lentige. Kwian be age me no cha ole salengwli nga jere chke kare gire kwian ulita be age cha ole ama takalin kare, agwa nga kle ju kare nege, cha ñage chage kwian me noske kwian me ñage age me no cha ole. 11 Jesu gerudu ene kwian geru jwannga ulita ole gire Jesu gerudu dare: —Che skatemanalla Lázaro kle gbe, cha be joge ama gai gdate. 12 Kwian geru jwannga Jesuge geru kadu amage: —Cha Chugagwalla, ba kle gerule Lázaro kle gbe, ¿e me gerule ama kle joge chkeni? 13 Kwian geru jwanngage me sugedu Jesu kle gerule mine ama ole, kwian geru jwanngage sugedu Lázaro kle gbe ulia, kwian geru jwannga tañachugu ulia Lázaro kle undege alin, agwa Jesuge uñadu Lázaro me kle gwade, Lázaro nu jogebada. 14 Uñadu Jesuge kwian geru jwannga kle tañachuge Lázaro kle gbe alin allabi, malen ama gerudu ma trate kwian geru jwannga ole: —Lázaro jaba giti cha kle gerule, ama me chegu. 15 Nga suga no chadi cha me kledu ama ole, e ma no ba alin, ene cha be age ama jaba ole ba ulita gwa giti, ene ba be mo ta gbe cha gai ulia ma no. ¡Ale llani Lázaro jaba kle ngwadi! 16 Jesu gerudu ene gire Tomás amaña kada Gemelo gerudu kwian geru jwannga na ulita ole: —Ale ulita mo gwangeda ule Jesu ole. Kwian geru jwannga ulita jo ule Jesu ole. 17 Jesu jo chke kodi una Betaniage gire kwian geru ketu Jesuge Lázaro jaba ogle chuia bagake chkeba. 18 Una Betania chege kodi una Jerusalénge kilómetro gdamaire alin. 19 Kwian israelita tanre una Jerusalénmu nu jogeba una Betaniage Marta, María oli gatedi. 20 Martage chku uñale Jesu chku kodi una Betaniage gire Marta jo ten Jesu ngwange jonke, agwa Marta daballa María chegu toiba dba gwa. 21 Marta jo chke Jesu kle ngwadi, Marta gerudu olire Jesu ole: —Cha Chugagwalla, ba kledu aini cha ole ene cha kobatea me jokeda. Ba me kledu, malen cha kobatea jokeda, 22 agwa uñale chage nege Chube be age ulita ba alin ba gerule kare ama ole. 23 Jesu gerudu Marta ole: —Ba kobatea jaba be chkeni gwade. 24 Marta gerudu Jesu ole: —Ima, uñale chage ama jaba be chkeni gwade, e chui bdaglige, chui ege kwian jaba ulita be chkeni gwade. 25 Jesu gerudu Marta ole: —Cha kwian jaba gbanga gwadeni, cha kwian gbanga toi diali chui tangle. Kwian bai kaire cha gai ulia, kwian ene jogeda gire ama be toi diali chui tangle Chube ole. 26 Kaire kwian ulita bai kaire kle gwade, bebi jogeda, ama cha gai ulia, ama be chege toi diali chui ulita, ama mi chege sugekare Chubege. ¿Ulita cha kle gerule kare ba gai ulia? 27 Marta gerudu: —Ima cha Chugagwalla, ba kle gerule kare cha gai ulia, uñale chage ba Cristo ba Chube Kirolla, sbali Chube gerudu Chube be gdaite kage nga dba ai giti, e ba amaña Chube gerudu giti, cha ba gai ulia. 28 Marta gerudu ene ulita Jesu ole gire Marta joni daballa María kle ngwadi, gerudu María alin ole gballa sugekare: —Che tkanga tangle geruge kle kodi aini chege, ama ta gerukalin ba ole, ¡bai, ale ama kle ngwadi! 29 María Marta keruchugu gerule ene Jesu giti María chku gdate, blike ama jo tienda Jesudi Jesu kle ngwadi. 30 Unaske Betaniage Jesu bebi joge chke, ama kle kodi una Betaniage ama skwendu Martage ngeru ngwadi, nga amañage María jo tienda Jesudi. 31 Kwian israelita ulita kledu María oli gatedi María ullage gwagedu Maríadi chke gdate blike joge jonkare, ama ulita chagedu María nate, ama ulita tañachugu María be joge olire Lázaro jaba ogle ngwadi. 32 María jo chke Jesu kledu ngwadi, María gwagedu Jesudi ama toidu dba jongnagwa giti Jesu sera ngena, María gerudu olire Jesu ole: —Cha Chugagwalla, ba kledu aini cha ole ene cha kobatea me jokeda. Ba me kledu, malen cha kobatea jokeda. 33 Jesu gwagedu Maríadi olire tanre mo kobatea oña nate, kaire kwian israelita ulita jo chke Jesu kle ngwadi ule María ole Lázaro oña suia jwennga, María talla sugedu dage Jesuge kaire kwian israelita ulita talla sugedu dage Jesuge, Jesu ta chiu olire kwian ole gwage kwian ulitadi sui jwennga Lázaro oña nate. 34 Jesu geru kadu: —¿Lázaro jaba ogle baini? Marta, María jaindunga: —Cha Chugagwalla, ¡bai! Ale tienda Lázaro jaba ogle ngwadi. 35 Jesu jo jonkare chage Lázaro jaba ogle ngwadi ngnagu Jesu olidu. 36 Kwian israelita ulita gwagedu Jesudi olire gire gweale gerudu modi Jesu giti: —Gwagede amadi, ulia ama no Lázaro ole, ama kle olire Lázaro oña nate. 37 Kwian israelita gweale na gerudu modi: —Ama kwian me ten gbu ten, ¿mineade ama me ñadu age Lázaro alin Lázaro dodade, ene Lázaro me jokeda? 38 Jesu jo chke Lázaro jaba ogle ngwadi, Jesu ta olire ole jo chke kodi Lázaro jaba ogle ngwadige, Lázaro jaba ogaba ngwadi e keuga, keuga ugakallage kle jegaba kejre ke kweri gbaite giti. 39 Jesu gerudu kwian kledu eni ulita ole: —Ke kle keugage jwennga. Marta Lázaro oña ibotea gerudu Jesu ole: —Cha Chugagwalla, cha tañachuge ama jaba ñachke me no, chui bagake nege ama jokeda. 40 Jesu gerudu Marta ole: —¿Ba me tachke cha gerudu ba ole giti? Cha gerudu ba ole ba cha gai ulia gire Chube be age no no ba gwa giti ba be gwage ama kiralladi. 41 Kwian kledu eni Jesu ole ke junnga gire Jesu gwagedu nga ngaña giti, Jesu gerudu Chube ole: —Cha Ñenua, cha gerule no ba giti, noare ba kle cha keruchuge diali, kaire uñale chage ba kle cha keruchuge nege gerule ba ole Lázaro oña giti, nege cha gerule ba ole ba age kwian kle mo litaba aini ulita gwa giti, ene ama ñage cha gai ulia, ñage suge ama ulitage ulia ba cha kagu. 43 Jesu gerudu ene ulita mo Ñenua ole gire Jesu ngautu kira giti Lázaro jabage: —¡Lázaro, bai jondoi! 44 Lázaro jaba chkuni gwade chiu jondoi mo jegwale ulita bliaba ñometraske, kaire chuga bliaba ulita ñometraske, ama ko ama sera ulita kle lugaba kejre, Jesu gerudu kwian na ulita ole: —Ba Lázaro skatrennga, Lázaro kleda jogeni gudegu. 45 Kwian israelita ulita kledu María oli gatedi gwagedu Jesudi Jesu agedu no ama ulita gwa giti, kwian israelita e ulitaske kwian israelita tanre Jesu gau ulia Jesu Lázaro gbuni gwade giti, 46 agwa kwian israelita na tanre me Jesu gau ulia, kwian israelita e jo kwian fariseo ulita ngwadi geru kete kwian fariseoge Jesu agedu giti ulita Lázaro ole. 47 Gire kwian fariseo ulita kaire kwian gerunga Chube ole daba alin chugagwalla ulita mo litu kwian israelita chugagwalla ma kweri ulita ole u mo litangwa Chube gerua jwanngwage, ama ulita geru tragu modi Jesu giti: —¿Che ulita be age mine onbre e ole? Onbre e kle chage lle daga ngwale no tanre dodade che bitalla israelita ulita gwa giti, kwian ulita be mo ta gbe chage ama nate. Che onbre e chuge ngwadi age, che bitalla israelita ulita be ama gai ulia be ama gbe kweri mo chugagwallale, 48 ene chugagwalla ulita nga Romamu be mo tke dole che ole, ama be u kweri chenu gerungwa Chube ole skienda ulita, kaire ama be che jwia ulita jwennga mo alin che ulita ngeru. 49 Kwian israelita chugagwalla ngleaske chugagwalla gdaite kada Caifás, chura ege ama kwian gerunga Chube ole daba alin chugagwalla ma kweri, chugagwalla e gerudu chugagwalla na ulita ole: —Ni ba ulita gdaitege uñale che agedale mine, 50 ni suge bage ba tañachugadale mine, cha gerule ba ulita ole ma no che kwian israelita ulita alin onbre gdaitre alin jogeda kwian israelita ulita giti, ene kwian nga Romamu me mo tke dole che ole me che jwia jwennga che ulita ngeru. 51 Caifás gerudu ene ulita daba chugagwalla na ole me gerudu mo ta giti, ama gerunga Chube ole daba alin chugagwalla ma kweri chura ege, malen Chube ama ta gbu gerule Jesu be jogeda kwian israelita chudalla ulita alin, 52 me kwian israelita chudalla alin allabi, kaire Jesu be jogeda kwian chudalla na ulita alin kle toi bate nga nage kaire kaire, ene Jesu giti kwian e ulita be chege mneitre alin bai kaire Jesu gai ulia. 53 Kwian israelita chugagwalla ulita mo litu chuiage chugagwalla ulita mo ta gbu salengwli Jesu gweda. Chui ege gwangerugu chugagwalla ulita chagedu Jesu nate gadale gwaleda, 54 malen Jesu me chagedu dare kwian israelita ngleaske, Jesu jo siere nga Judeage, ama jo una kada Efraínge, una e chege kodi nga gballa kwian me kle toi ngwadige, una ege Jesu chegu toi chui gwealege kwian geru jwannga amage gdataboko giti gdaboke ole. 55 Kwian israelita ulita kle tachke Chube enusulian unsuialin jun siere Egiptoge giti, e kada Pascua chuia, Pascua chuia ollade chegu kodi gire kwian israelita ngle una soli gdaite gdaitemu jo una Jerusalénge, ngeru chui e olladege kwian e ta chegekalin trate Chube gwa giti, malen ama jo bda guge ama jo mo jegwale glige kwian israelita ulita diali kle age kare, ene amage suge ama chege trate Chube gwa giti ama kle biale chui olladadale. 56 Kwian fariseo ulita kaire kwian gerunga Chube ole daba alin chugagwalla ulita gerudu Jesu giti kwian israelita ngle ulita ole kle mo litaba u gerungwa Chube olege chui ollade manade ngwange, ama gerudu: —Ba gwealege chke uñale Jesu kle baini ba geru ketadale chage, ene cha ñage ama gai dbale skadi. Kwian israelita chugagwalla ulita gerudu ene kwian nglea kle mo litaba ole, malen kwian nglea e ulita kledu Jesu jinade nate ama ulita geru kadu moge Jesu giti: —¿Ba tañachuge mine? ¿Ama be chie aini chui ollade o me?
1 Pascua chuia ollade chegu chui dereke chkedale gire Jesu jo una Betaniage, una ege Lázaro toidu, Lázaro e amaña Jesu nu gbaba gwadeni. 2 Jesu jo chke una Betaniage gire bligda no jinadre Jesu alin. Lázaro kaire kwian geru jwannga Jesuge gdataboko giti gdaboke kledu toiba dba blingwage ule Jesu ole blire, Marta bligda dodadu ketu ama ulitage gutadale. 3 Kwian ulita kle blire gire María chiu lle ñachke no kada nardo chia dbe litro bonga tangle tkadale Jesu sera giti, nardo chia e kwangleare. María nardo chia e tku Jesu sera giti ulita, gire María Jesu sera unbatu mo chugaga giti. María nardo chia tku Jesu sera giti ene, gire u ulita gwa chegu ñachke no no nardo chia ñale. 4 Judas-Iscariote, e geru jwannga Jesuge, e amaña be Jesu kete gwadaleda, ama gwagedu Maríadi age ene, ama gerudu: 5 —¿Mineade me jo nardo chia e chbadaba kwangleare trescientos kwian bai gweale me lle molen chudaboagda nardo chia ñanalla giti? 6 Judas-Iscariote gerudu ene agwa ama me kle tañachuge ulia no kwian me lle molen giti, ama kle tañachuge igi gai mo alin giti, ama igi gdea mananga Jesu alin kaire kwian geru jwannga Jesuge ulita alin, agwa ama me igi gdea manadu no, igi gdea ege diali kwian igi tku, Judas-Iscariote kle igi e gweale jwen mo alin skwlenre Jesu ngeru kaire kwian geru jwannga na ulita ngeru, ama kwian skwe boanga. 7 Jesu gerudu Judas-Iscariote ole: —María kleda nardo chia tke cha giti nege, María kledu e oge cha alin cha jaba ogabe chuia alin, agwa ma no ama alin age ene nege cha kle gwade chuiage cha gbe biale cha jaba ogabe chuia ngwange. Kwian me lle molen be kle toi diali ba ulitaske, chui ngle kle ba ulita alin kwian me lle molen chudaboale, agwa cha mi chege toi diali aini baske, malen ma no María kle age ene cha alin nege —Jesu gerudu ene ulita Judas-Iscariote ole, Judas-Iscariote me gerudu dare. 9 Kwian israelita tanrege chku uñale Jesu kle una Betaniage, gire kwian e ulita jo una Betaniage tienda Jesudi, me Jesu alindi kwian israelita ulita jo tienda, agwa kwian israelita kaire jo tienda Lázarodi, Lázaro e amaña Jesu nu gbaba gwadeni. 10 Jesu Lázaro gbuni gwade giti kwian israelita tanre Jesu gau mo Chugagwallale, kwian israelita ene ulita jo siere mo chugagwalla israelitage, ama mo ta gbu chage Jesu ole, malen kwian gerunga Chube ole daba alin chugagwalla ulita mo ta gbu salengwli me Jesu alin gweda agwa kaire Lázaro gweda. 12 Boidu ene ulita una Betaniage gire nagbietege kwian ngle nga tanrege jogeba una Jerusalénge Pascua chuia ollade manade, ama ulitage geru chku uñale Jesu be joge chke una Jerusalénge. 13 Gire kwian ngle ulita ugananga tkunga, jo Jesu gai ngwange jonke ugananga gainga kote gbi kade Jesuge nga suga no ole, ama ulita ngautu Jesu ngwange nga suga no ole ene: —¡Nga suga no chadi ba giti! Noare ba chiu cha ulita Chugagwallale nga dba ai giti. Noare Chube ba kagu nga dba ai giti cha ulita alin, noare Chube be ba gbe cha kwian israelita ulita Chugagwallale kweri —kwian tanre ngautu ene jonkare Jesu gai ngwange no Jesu gai mo Chugagwallale kweri. 14 Jesuge burro soli nu skwenba, burro soli e giti Jesu chagedu una Jerusalén ngnagu Chube gerua degaba unsuialin gerule kare, chada e gerule: 15 “Kwian una Siónmu (una amaña kada Jerusalén), ba ulita me mo ta dbadale kennga, gwagede mo Chugagwalla kweridi chie ba ulitaske burro soli giti.” Chube gerua degaba unsuialin gerule ene Jesu giti. 16 Kwian geru jwannga Jesuge gdataboko giti gdaboke chagedu Jesu ole, ulita kle boi Jesu ole chui ege ama gwa giti, e ulita me sugedu trate amage chui e amañage, agwa Jesu joni nga ngaña giti chuiage gire kwian geru jwannga Jesuge tachku boidu ulita Jesu ole Chube gerua degaba unsuialin Jesu giti gerule kare, ulita boidu ene ulia Jesu ole. 17 Kwian ulita bai kledu Jesu ole gwage Jesudi Jesu Lázaro kadu chie jondoi keugage Lázaro gbuni gwade gire, kwian e ulita gwagenga Jesudi age ene Lázaro ole, ama ulita geru e tragu kwian na ole, 18 ene chku uñale kwian na tanrege ulia Jesu lle daga ngwale no ene dodadu Chube kiralla giti, kwian geru e keruchugu Jesu Lázaro gbuni gwade giti, malen ama ulita mo ta gbu joge Jesu gai ngwange no nga suga no ole jonkare ule kwian na ulita ole. 19 Kwian fariseo ulita gwagedu kwian ngleadi ulita joge chage Jesu nate gire kwian fariseo gerudu modi: —Gwagede kwian ulitadi, kwian ulita kle joge ama nate ene che me ñage ama gai gwadaleda. 20 Kwian ngle jogeba chke una Jerusalénge Pascua chuia ollade manade, kwian ngleaske kwian gweale griego kledu, kwian griego e kaire jogeba chke una Jerusalénge chui ollade gerule no Chube giti ule kwian israelita ole. 21 Felipe una Betsaidamu nga Galileage, Felipe edi kwian griego jo chke gerule Jesu giti: —Cha ta Jesu uñakalin, cha ta gerukalin ama ole. 22 Felipe geru e ketu Andrége gire ama gdabonate jo geru kete Jesuge, ama gerudu Jesu ole: —Kwian griego gweale ta ba uñakalin ta gerukalin ba ole. 23 Jesu gerudu Felipe, Andrés ole: —Chube nu cha kagaba nga dba ai giti kwian kare, cha be jogeda chuia kle kodi gire cha be jogeni nga ngaña giti cha Ñenua Chube kle ngwadi. 24 Cha gerule ulia ulia ba ole, trigo chudea gbaite me joge tkaba dbiske, chude e me tugeda, diali trigo chudea chege gbaitre alin. Agwa trigo chudea gbaite joge tkaba dbiske, trigogba giti tangle tugeda gire numachie tige gbachie ngle, chude na gbachie ma ngle chude nge gbaitre alinge. Be boi ene cha ole, cha be jogeda, cha jogeda giti kwian tanre be jrienda cha gerua gai ulia giti, kwian ene be toi diali chui tangle Chube ole. 25 Kwian bai tañachuge mo giti alin allabi toi no nga dba ai giti kwian ene mo manade no ama me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole. 26 Kwian bai ta lle boakalin no cha alin, kwian ene mo ta gbadale diali chage cha ole age cha takalin kare, kwian ene mo ta gbadale biale boi daga ngwale cha boi daga ngwale kare. Kwian lle boi cha alin ta ene ole, kwian e alin cha Ñenua be age no no diali. 27 ’Nege nege cha kle ta olire tanre tañachuge cha be jogeda giti, chui e kle kodi cha ngeru. ¿Cha be gerule mine cha Ñenua ole cha kle ta suge olire e giti? Cha me ñage gerule ai kare cha Ñenua ole: “Cha Ñenua, cha me ta boikalin daga ngwale, cha me takalin ba kwian me no chuge ngwadi cha gweda, ma no ba cha jwen siere cha be boige.” Cha me ñage gerule ene cha Ñenua ole, cha chiu nga dba ai giti boidale daga ngwale kwian alin. 28 Ma no cha gerule cha Ñenua ole: “Cha Ñenua, cha takalin ba age mo kiralla giti cha ole ba takalin kare, ene ba be chege no kweri kwian ulita gwa giti, kwian be gerule no no ba giti cha Ñenua.” Jesu gerudu ene gire Chube gerudu nga ngaña giti sugedu nga dba ai giti, Chube gerudu Jesu ole: “Cha ba gbu age cha kiralla giti, kwian tanre gerudu no no cha giti ba agedu giti, cha be ba gbe age dare cha kiralla giti nabitaite, ene kwian be gerule no no cha giti dare.” 29 Chube gerudu ene Jesu ole gire kwian ngle kledu eni geru e keruchugu, Chube kerua sugedu kwian gweale ologe enusulindrale, kwian gweale na gerudu: —Lle boanga Chube alin nga ngaña giti gerudu Jesu ole. 30 Kwian ulita gerudu ene modi gire Jesu gerudu kwian ole: —Cha Ñenua Chube gerudu kweri ama me gerudu cha alin ene ama kerua sugedale chage, ama gerudu kweri ba ulita alin ene chke uñale ba ulitage ulia Chube cha Ñenua, ama cha kagu nga dba ai giti. 31 Chui kle kodi gire cha Ñenua be ji gbe kwian ulita alin bai me cha gai ulia Chube cha kagu, kwian ene be chege sugekare cha Ñenuage diali, cha be jogeda giti che dolla Satanás mi chege nga ulita chugagwallale dare. 32 Cha be kwian me no chuge ngwadi cha gbe kruge ngaña, cha be mo chuge ngwadi jogeda kwian ulita agenga me no alin, cha jogeda giti cha be kwian tanre nga ulitage ta gbe mo ta blite cha ole cha gai mo Chugagwallale. 33 Jesu gerudu ene kwian ulita ole, ene chke uñale kwiange Jesu gwabeda mine. 34 Kwian ulita Jesu keruchugu gerule ene gire kwian gerudu Jesu ole: —Ulia Chube ba kagu nga dba ai giti kwian kare ba gerudu kare, ¿mineade ba kle gerule ba gwabeda kruge? Moisés nu Chube gerua degaba unsuialin gerule Chube be Cristo kage Cristo be chege diali chui tangle mi jogeda. ¿Ba me Cristo, malen ba be jogeda? 35 Jesu gerudu: —Cha mi chege toi ba ole sbali dare nga dba ai giti, agwa nege cha kle aini ba ulitaske, nege chui kle ba ulita alin cha gai ulia. Cha kle chage nga dba ai giti jichra kare kwian ulitaske, kwian bai cha gai ulia cha kwian ene ta gbe suge cha giti ene ama me chege age me no salengwli jichra kwian gbe ten nga jereske kare ene ama chagedale mine jichra giti nga jereske. Kwian kle chage nga jereske ama me ten ama jogenga, ni uñale amage ama joge baini. Ene kaire ba bai me cha gai ulia, ba be chege chage sugekare Chubege nga jereske kare. Agwa ba cha gai ulia, ene ba be chage nga chra no ngajudi kare giti, ene ba mi jogenga Chubege ba mi chege sugekare Chubege. Jesu gerudu ene ulita mo giti kwian ole gire Jesu jo siere kwian ngle ulitage, kwian ngle ulitage me uñadu Jesu jo baini. 37 Lle daga ngwale no tanre Jesu dodadu kwian israelita ulita gwa giti, agwa ni lle e ulita giti kwian Jesu gau ulia Chube ama kagu. 38 Boidu ene ulita kwian Chube gerua ketanga dabage kada Isaías chada degu unsuialin gerule kare, Chube Isaías ta gbu chada dege be boi mine Jesu ole giti, chada e gerule: “Cha Chugagwalla Chube, cha geru ulia ba giti trage kwian ole, kwian me geru e gai ulia. Cha lle daga ngwale no tanre dodade kwian ulita gwa giti gire me suge kwiange cha kle lle e dodade ba kirallaske.” 39 Isaías chada degu ene, kaire Isaías chada na degu, chada e gerule kwian agali me ñage mo ta gbe Jesu gai ulia giti, chada e gerule: 40 “Kwian gwage amadi, kwian ama keruchuge, agwa ulita me suge kwiange, kwian ta chege bate amage. Chube kwian ta gbu ene me suge salengwli kwian me gwagwa molen me ñage ten kare. Suge kwiange ama kle age giti ama kle gerule giti e me no, kwian age me no chuge ngwadi kwian mo ta gbe ama gai ulia, ene ama kwian ta blite ama uñe trate.” 41 Isaías chada degu ene Jesu giti, Isaías gwagedu mo gwagwa giti Jesu kiralladi, malen ama ñadu chada dege Jesu giti Jesu be boi bdagli giti. 42 Kwian israelita ulita me Jesu gau ulia, agwa gweale Jesu gau ulia mo tale. Kwian israelita chugagwalla tanre Jesu gau ulia agwa ama ulita mo ogoda me su mo trage ama Jesu gai ulia giti kwian na me Jesu gaba ole, ama chke uñale nate kwian fariseoge kwian fariseo ñage ama mlienga siere u mo litangwa Chube gerua jwanngwage. 43 Kwian ene tañachugu ma no ama chege no mo salengwli ole me tañachuge chege no Chube ole giti. 44 Jesu gerudu kweri kwian ole: —Kwian cha gai ulia me kle cha alin gai ulia gballa, kaire kle cha Ñenua gai ulia, ama cha kagu nga dba ai giti. 45 Kwian kle gwage chadi me kle gwage chadi alin, kaire kwian kle gwage cha kagangadige cha giti. 46 Cha jichra kare kwian ulita alin chiu nga dba ai giti, cha giti kwian ñage Chube uñe trate, kwian ulita bai kaire cha gai ulia cha kwian ene ta gbe suge Chube mine, ene ama me chege nga jereske kare sugekare Chubege. 47 Agwa kwian gweale cha keruchuge me cha kerua gai ulia me cha gerua gai dage, cha mi kwian ene gbe jiske, cha me chiu nga dba ai giti kwian gbadale jiske ama kle age me no giti gdale, cha chiu kwian alin kwian jwen siere ji chugege ama kle age me no gdale. 48 Kwian me takalin cha gai me cha gerua gakalin ngwange me cha gerua gbe gdadi cha kle gerule kare, cha agali mi kwian ene gbe jiske, agwa geru cha kle kete kwiange nege, geru e be kwian gbe jiske chui bdaglige. 49 Cha me kle gerule mo ta giti gballa agali, cha Ñenua cha kagu nga dba ai giti, ama cha ta gbu gerule ama takalin kare, ama talla giti cha kle kwian tke tangle ulita ama geruage. 50 Uñale chage cha Ñenua gerua gai ulia giti kwian ñage toi diali chui tangle cha ole cha Ñenua Chube ole, malen diali cha mo Ñenua gerua trage kwian ole cha Ñenua cha kagu kare gerule kwian ole —Jesu gerudu ene ulita kwian ole.
1 Chui ngeru Pascua ollade chuiage, chui ege ngabi Jesu kle blire ule kwian geru jwannga amage gdataboko giti gdaboke ole, kwian geru jwannga e gdaite kada Judas-Iscariote, ama Simón-Iscariote kirolla, che dolla Satanás nu Judas-Iscariote ta gbaba biale Jesu kete kwian Jesu dollalege gwadaleda. Uñadu Jesuge ama Ñenua Chube lle ulita kwian ulita gbu ama kote, ama chiu Chube ngwadi be jogeni naskuni Chube ngwadi. Jesuge uñadu Jesu mi chege dare nga dba ai giti kwianske chuia chku, ama be jogeni nga ngaña giti toi ama Ñenua ole, Jesu chagedu nga dba ai giti kwian amanu ole Jesu diali ta du no no ama ulita ole, Jesu mi kle dare kwian amanu ole nga dba ai giti, agwa Jesu talla be chege no no kwian ene ulita ole diali chui tangle. 4 Jesu kledu blingwage ama chku gdate, Jesu mo ñometralla gitiru junnga modi chegu ñometra mo ngnaru alinske, gire toalla gau bliu mo bonga tangle. 5 Ama chi tku lle gwealege gbu kwian geru jwannga sera ngena sera gligadale gire ama kwian geru jwannga gdaite gdaite sera gligu sera unbatu toalla bliabale mo bonga tangle giti. 6 Ama jo chke Simón-Pedrodi Simón-Pedro sera gligadale gire Simón-Pedro gerudu ama ole: —Ba cha Chugagwalla, ¿ba be cha sera glige? Cha alin me no ba cha sera glige. 7 Jesu gerudu Simón-Pedro ole: —Cha kle age ba alin, nege ulita me suge bage, bigwa be suge bage mineade cha ba sera gligu, nege ba mo chuge ngwadi cháge mo sera glige. 8 Pedro gerudu Jesu ole: —Cha mi mo sera chuge ngwadi gligale bage. Jesu gerudu: —Ba mi mo sera chuge ngwadi gligale chage ba me chanu ba be chege sugekare chage. 9 Simón-Pedro gerudu: —Cha Chugagwalla, ba me cha sera alin glige allabi, cha takalin ba cha ko glige kaire cha chuga glige. 10 Simón-Pedro gerudu ene Jesu ole gire Jesu gerudu Simón-Pedro ole: —Kwian bai obeba sugeti me mo gligadale blike nabitaite ulita, agwa sera alin gligale, jegwale ulita kle trate. Ba ulita ta kle trate biale salengwli kwian obeba sugeti kare, agwa ba gdaite ta me kle trate. 11 Uñadu Jesuge chema be ama kete gwadaleda, malen ama gerudu: “Ba gdaite ta me kle trate.” 12 Jesu kwian geru jwannga ulita sera gligu ulita gire Jesu mo ñometralla gitiru gbuni naskuni modi, Jesu toiduni dba blingwage, Jesu gerudu: —¿Suge ba ulitage mineade cha ba sera gligu? 13 Ba ulita kle cha kade ba tkanga tangle geruge, kaire ba kle cha kade ba chugagwalla, e ulia, cha ba chugagwalla cha ba tkanga tangle ba kle cha kade kare. 14 Cha ba tkanga tangle geruge, cha ba chugagwalla, cha ba ulita sera gligu agali, ene kaire ba ulita daba sera gligadale, ba daba na sera gligadale daba na ba sera gligadale, ene ulita. Ba ulita me ñage mo gbe ma kweri daba nage, ba ulita mo ta gbadale diali mo chudaboi ongoru ongoru. 15 Cha ba chugagwalla, cha mo ta gbu ba ulita chudaboi cha ba ulita sera gligu, ba ulita mo ta gbadale no ene kaire, ba ulita agedale cha agedu kare ba ole. 16 Cha gerule ulia ulia ba ulita ole, kwian lle boanga me ma kweri mo chugagwallage, kwian geru dbanga me ma kweri mo kagangage. 17 Uñale ba ulitage cha ba chugagwalla agedu mine ba gwa giti, ba agedale ene kaire, ba age ene cha agedu kare nga be suga no no badi diali. 18 Jesu gerudu dare kwian geru jwannga amage ulita ole: —Cha me kle gerule ba ulita be mo ta gbe age no cha agedu kare, me ene, uñale chage ba ulita mi age no cha agedu kare. Cha ba ulita gau chage cha ole, cha ba ulita ta uñe trate, uñale chage ba gdaite kle mo ta dbe cha dollale, be boi Chube gerua degaba unsuialin gerule kare cha giti, chada e gerule: “Cha skatemanalla gdaite blire ule cha ole, amaña mo blite cha dollale.” 19 Cha kle geru ai kete ba ulitage ngeru be boige, ene be boi cha ole chuia be chke gire be suge bage kle boi ulita cha gerudu kare, e giti ba ulita be cha gai ulia ma no dare cha Cristo cha Chube Kirolla. 20 Cha kwian chanu kage cha gerua dbe kwian nage, kwian na bai kwian chanu gai ngwange no, kwian ene me kle kwian chanu alin allabi gai ngwange no, kaire ama kle cha gai ngwange no agali kare kwian chanu giti. Kwian bai cha gai ngwange no kwian ene me kle cha alin allabi gai ngwange no, kaire ama kle cha kaganga gai ngwange no agali kare cha giti. 21 Jesu gerudu ene ulita gire Jesu ta chegu ta olire tanre Judas-Iscariote giti, Jesu gerudu trate geru jwannga amage gdataboko giti gdaboke ole: —Cha gerule ulia ulia ba ulita ole, ba ulita kle aini ule cha ole gdaite be cha kete kwian cha dollalege gwaleda. 22 Jesu gerudu ene gire kwian geru jwannga gdataboko giti gdaboke ulita chegu gwage modige, ulita gerudu modige: —¿Chema be age me no ene Jesu ole? Me uñadu ama ulitage chema giti Jesu kle gerule. 23 Kwian geru jwannga Jesuge ulita kle toiba dba blingwage blire ule Jesu ole, kwian geru jwannga gdaite kle Jesu ngena blire geru trage Jesu ole, Jesu no no ama ole, 24 kwian geru jwannga ege Simón-Pedro ko ñachugu, Simón-Pedro takalin geru jwannga gdaite e geru kade Jesuge chema giti Jesu kle gerule be age Jesu gerudu kare. 25 Gire kwian geru jwannga kle Jesu ngena jo ma Jesudige geru kadadale Jesuge, ama gerudu Jesu ole: —Cha Chugagwalla, ba gerule cha ole, ¿chema be age ba ole ba kle gerule kare? 26 Jesu jaindunga: —Cha be pan bita gbe date bligda chiaske, kwian gdaite baige cha be pan bita e kete ama be gai ngwange be gute, kwian e be cha kete gwaleda. Jesu gerudu ene gire ama pan bita gbu date bligda chiaske ketu Judas-Iscariotege, ama Simón-Iscariote kirolla. 27 Judas-Iscariote pan bita gau ngwange pan bita gutu gire blike dolla Satanás talla chku Judas-Iscariote tale age ulita Satanás takalin kare. Jesu gerudu Judas-Iscariote ole: —Ba mo ta gbaba age cha ole, agede ene blike. 28 Jesu gerudu ene Judas-Iscariote ole gire kwian geru jwannga na ulita kledu blingwage amage me sugedu mineade Jesu kle gerule ene Judas-Iscariote ole. 29 Uñadu kwian geru jwannga ulitage Judas-Iscariote ama igi gdea mananga, malen ama gweale tañachugu Jesu kle gerule Judas-Iscariote ole lle gweale gige chui ollade chuia alin gutadale, na tañachugu Jesu kle gerule Judas-Iscariote ole lle gweale gige ketadale kwian bai me igi molenge. 30 Judas-Iscariote pan bita gau ngwange pan bita gutu ene, gire blike Judas-Iscariote jo siere Jesuge, ngabi ngajrege ama jo siere Jesuge. 31 Judas-Iscariote jo siere Jesuge ene, gire Jesu gerudu kwian geru jwannga na ulita cheguda eni ole: —Cha Chube Kirolla chiu nga dba ai giti kwian kare, nege chui chku gire kwian be gwage cha kiralladi, kaire cha giti kwian be gwage Chube kiralladi be gerule no Chube giti, Chube kira be kle cha ole, ene kwian be gwage chadi be gerule no cha giti kaire, be boi ene sugeti. 33 Ba ulita kwian chanu, cha no no ba ole, nege cha mi chege dare ba ole nga dba ai giti, cha gerudu kwian israelita ole kare cha be joge ngwadi kwian israelita me ñage joge, nege kaire cha gerule ba ulita ole ba be cha jinade nate, bage cha mi skwen, cha be joge ngwadi ba me ñage joge nege. 34 Cha be geru ai jagere kete ba ulitage, ba geru ai gbe gdadi: Ba ulita mo ta dbadale no modi cha ta dbe no ba ulita ole kare, ulia ba mo ta dbadale ulita no modi daba ole. 35 Ba mo ta dbe no ene ulita modi, kwian na gwage badi age no be chke uñale nate ulia ba kwian chanu ba kwian geru jwannga chage. 36 Jesu gerudu ene ulita kwian geru jwannga amage ulita ole gire Simón-Pedro geru kadu Jesuge: —Cha Chugagwalla, ba kle gerule ba be joge ngwadi cha ulita me ñage joge, ¿ba be joge baini? Jesu jaindunga Pedro kalen: —Cha be joge ngwadi, nege nege ba mi ñage joge cha ole, chui na ba be ñage joge cha be joge ngwadi. 37 Pedro gerudu dare Jesu ole: —Cha Chugagwalla, ¿mineade ba gerule cha ole cha me ñage joge ba ole nege? Cha kle biale joge ule ba ole baini kaire ba be joge ngwadi, kaire cha tale cha kle mo ta gbaba biale jogeda ba giti. 38 Jesu gerudu Pedro ole: —¿Ba tañachuge ba ñage jogeda cha giti ulia ba kle gerule kare? Uñale chage trate ba mi ñage age ene ba kle gerule kare, nege ngakamalin bdugu antalan bebi ngwane gire ba agali be gerule bitamai kwian na ole ba me cha uñe.
1 Jesu gerudu ene Pedro ole gire Jesu gerudu dare kwian geru jwannga gdataboko giti gdaite ole: —Ba ulita me chegedale tañachuge tanre be boi giti, ba me ta dbadale kennga, ba me ta dbadale olire, ba mo ta gbadale Chube gai ma no, kaire ba mo ta gbadale cha gai ma no diali. 2 Nga ngaña giti cha Ñenua ngwadi nga tanre kle toingwa, cha be jogeni nga e gbe biale ulita ba ulita alin ba ngwange, nga e me cha me gerule ba ole cha jogeni nga e gbe biale ba ulita alin. Cha kle gerule ulia ba ulita ole, nga e be kle biale ulita gire cha be chieni ba ulita jwen dbe ule toi cha be kle ngwadi ule cha ole. 4 Uñale ba ulitage cha be joge baini, kaire uñale ba ulitage ba ñage joge mine cha be joge ngwadi. 5 Jesu gerudu ene kwian geru jwannga ulita ole gire Tomás gerudu Jesu ole: —Cha Chugagwalla, me uñale ni cha gdaitege ba be joge baini, ¿mine be chke uñale cha ulitage ba be joge jon mine giti ene cha ulita ñage joge chke kaire ba be kle ngwadi? 6 Jesu jaindunga: —Cha agali jonkare kwian ulita alin, cha giti alin allabi kwian ñage joge chke cha Ñenua ngwadi, cha giti geru ulia cha Ñenua giti chke uñale kwiange, kaire cha giti kwian ñage toi diali chui tangle cha Ñenua ole. 7 Sugedu trate ba ulitage cha chema ulia, ene ba cha Ñenua uñe kaire, nege gwangergu cha be boi giti ba ulita gwage ba be cha Ñenua uñe ulia, ba kle gwage amadi cha giti. 8 Felipe gerudu Jesu ole: —Cha Chugagwalla, ba mo Ñenua kaite cha ulitage, cha ulita ta gwagekalin amadi, cha ulita be gwage ba Ñenuadi gire be suge ulia ulia cha ulitage ba alin allabi giti cha ñage joge chke ba Ñenua ngwadi. 9 Jesu gerudu Felipe ole: —Felipe, sbali cha kle chage ba ole cha kle ba ulitaske, ¿gire ba bebi cha uñe ulia cha chema? Kwian bai kle gwage chadi me kle gwage chadi alin, kle gwage cha Ñenuadi kaire. ¿Mineade ba kle geru kade cha mo Ñenua kaitadale bage? 10 ¿Ba me cha gai ulia cha kle cha Ñenua ole cha Ñenua kle cha ole, cha gdabonate gdaitre alin? Ulita cha kle gerule ba ole cha me kle gerule gballa mo tale, cha Ñenua kle cha ole diali, ama kle cha ta gbe gerule kle cha ta gbe age ulita ama takalin kare. 11 Ba me cha gai ulia cha kle gerule kare ba ole gire ba ulita cha gadale ulia cha lle daga ngwale no dodadu giti, cha lle daga ngwale no tanre dodadu cha Ñenua Chube kiralla giti ba ulita gwa giti, e giti ba ulita cha gadale ulia, sugedale trate ulia ba ulitage cha kle cha Ñenua ole cha Ñenua kle cha ole, cha gdabonate gdaitre alin. 12 Cha gerule ulia ulia ba ulita ole, kwian ulita bai kaire cha gai ulia cha kle gerule kare be lle daga ngwale no dodade cha Ñenua kiralla giti kwian gwa giti cha kle age kare. Cha be jogeni cha Ñenua ngwadi gire kwian ene be chege kwian na tanre ta gbe cha gai Chube Kirollale. 13 Lle ulita bai kaire ba ulita kade cha Ñenuage cha giti, cha be age ba alin ba gerule kare cha ole, ene cha giti kwian be gwage cha Ñenua Chube kiralladi, be gerule no cha Ñenua giti. 14 Ba lle bai kaire kade cha Ñenuage cha giti, cha be age no ba alin ba lle kade kare cha giti cha Ñenuage. 15 Jesu gerudu dare kwian geru jwannga amage ulita ole: —Ba no cha ole ulia ene ba be cha gerua gbe gdadi ba be age ulita cha gerule kare. 16 Ba age ene gire cha be Chudaboanga na kade cha Ñenuage kagadale ba ulita alin cha tanege, gire cha Ñenua Chube be mo Oña kage, Chube Oña diali no, ama be kle diali ba ulita ole ba chudaboi, 17 ama giti geru ulia Chube giti be suge trate bage. Kwian me Chubenu mi ñage Chube Oña gai ngwange mo tale, me suge amage Chube Oña mine, kwian ene me Chubenu. Ba ulita Chubenu, Chube Oña be kle ba ulita tale be ba ulita ta gbe diali. 18 Cha mi ba jige gballa kwian oli kare, cha be chieni cha be kleni ba ulita ole. 19 Chui chege kodi cha ngeru kwian me chanu mi ñage gwage chadi dare nga dba ai giti, agwa ba ulita chanu, bage be suge mo tale cha kle ba ole, cha toi diali chui tangle, kaire cha giti ba be toi diali chui tangle. 20 Cha Ñenua be mo Oña kage ba alin chuiallage, chui ege be suge trate ba ulitage cha kle cha Ñenua ole, ba ulita kle cha ole, cha kle ba ulita ole. 21 Kwian bai kaire age ulita cha gerule kare cha gerua gai dage, kwian ene ulia no cha ole, kwian no cha ole cha Ñenua be no kwian ene ole, kaire cha be no kwian ene ole, cha be kwian ene ta gbe suge cha kle ama ole. 22 Jesu gerudu ene gire Judas geru kadu Jesuge (Judas e me Judas-Iscariote), Judas geru kadu: —Cha Chugagwalla, ¿mineade ba be cha ulita banu alin ta gbe suge ba kle cha ole, agwa kwian na me banu ba mi ama ta gbe? 23 Jesu jaindunga: —Kwian bai kaire no cha ole be cha gerua gbe gdadi be age ulita cha gerule kare, cha Ñenua be no kwian ene ole, cha Ñenua ule cha ole be chieni toi kwian ene tale diali. 24 Agwa kwian bai kaire me no cha ole, kwian ene me cha gerua gbe gdadi me age cha gerule kare, mi suge kwian enege cha Ñenua takalin age no ama alin. Ba ulita kle cha keruchuge gerule cha me kle gerule gballa mo ta giti, cha Ñenua cha kagu nga dba ai giti, ama kle cha gbe gerule. 25 Cha kle gerule ene ulita ba ulita chanu ole nege cha kle aini ba ulita ole ule gire, cha bebi jogeni cha Ñenua ngwadi. 26 Cha be jogeni cha Ñenua ngwadi gire cha Ñenua be mo Oña ba Chudaboanga kage cha giti ba ulita alin, ama be ba tke tangle ulita be ba ta gbe tachke ulita cha gerudu giti ba ole. 27 Cha be jogeni cha Ñenua ngwadi gire cha be ba ulita ta jige suga no, cha ba ta gbe suga no me salengwli kwian kle ta dbe suga no sugeti alin lle gweale giti, cha ta suga no kete, e chege diali ba tale. Malen ba me chegedale tañachuge tanre be boi giti, ba me ta dbadale olire, ba me ta dbadale kennga. 28 Ba ulita cha keruchugu gerule cha be jogeni cha Ñenua ngwadi, bigwa cha be chieni cha be kleni ba ulita ole. Cha Ñenua ma kweri chage, noare cha be jogeni ama ngwadi, ulia ba no cha ole ene ba ta dbadale suga no cha be jogeni cha Ñenua ngwadi giti. 29 Cha gerule ene ba ole ngeru bebi boi cha kle gerule kare, be boi ene cha kle gerule kare gire be suge bage kle boi ulita cha gerudu kare, e giti ba ulita be cha gai ulia ma no dare. 30 Cha me ñage chege gerule tanre dare ba ulita ole, kwian me chanu ulita chugagwalla Satanás kle kwian amanu ta gbe biale chie age me no cha ole. Satanás me ma kweri chage, cha me mo chuge ngwadi amage ama me ñage age cha ole, 31 agwa cha be ama chuge ngwadi age cha ole, ene kwian ulita me chanuge be chke uñale ulia cha no cha Ñenua ole cha kle age cha Ñenua takalin kare. ¡Chkede gdate ulita, che jogedale siere aini!
1 Jesu gerudu dare ngmadi kwian geru jwannga amage gdataboko giti gdaite ole: —Cha giskagba kada uva gira no no kare, cha Ñenua uva ngama gbanga kare, 2 kwian ulita chanu uva girananga kare. Uvananga me gbachie no uva ngama gbanga be uvananga tkenga be mlienga, agwa uvananga gbachie no uva ngama gbanga be uvananga litenga trate, ene uvananga gbachie ma ngle. 3 Ba ulita uvananga gbachie no kare, cha gerudu ba ulita ole, ba cha gerua gau ulia, malen cha Ñenua ba ta litu, ba ta chegu trate. 4 Ba mo ta gbadale diali chege cha gai ulia, ba ta chegedale ule cha ole cha ta ba ole kare. Uvananga sugekare uva girage me ñage gbachie, ene kaire ba ulita ta chege sugekare chage ba ulita agali me ñage age no cha Ñenua takalin kare. 5 Cha uva gira kare, ba ulita uvananga kare. Ba mo ta gbe cha gai ulia diali, ba ta chege ule cha ole diali cha ta ba ole kare, ene ba be age tanre no cha Ñenua takalin kare. Ba ta chege sugekare chage ba me ñage age sidri no. 6 Bai kaire me ta chege ule cha ole, kwian ene be chege sugekare cháge ji chuge, ama me no me ñage age no salengwli uvananga chege sugekare girage me ñage gbachie kare, uvananga ene lita ole ama mlianga sugekare uva girage, uvananga be junbate gire uvananga draba guga. 7 Ba ulita ta chege diali ule cha ole, kaire ba ulita mo ta gbe diali age ulita trate cha ba tku tangle kare, ene ba lle gweale kade cha Ñenuage cha Ñenua be age ba alin. 8 Ba ulita age tanre no cha Ñenua takalin kare gire kwian na gwage badi age no ene be gerule no no cha Ñenua giti, be suge kwiange ba ulia chanu. 9 Cha no ba ulita ole cha Ñenua no cha ole kare, sugedale bage cha no ba ole, ba ulita me ta jogedalenga ege. 10 Ba cha gerua gai dage age cha gerua gerule kare, ene be suge trate bage cha no ba ole diali cha Ñenua no cha ole kare, cha kle ama gai dage, cha kle age ama takalin kare, suge chage ulia ama no cha ole diali. 11 ’Cha kle gerule giti ba ulita ole, e giti cha takalin nga suga no chege ba tale, ene diali ba ulita be chege nga suga no no ole. 12 Cha geru ai gbu ba alin: Ba ulita mo ta dbadale no modi cha ta dbe no ba ulita ole kare. 13 Kwian no no ulia mo skatemanalla ole, ama me takalin skatemanalla jogeda, ama mo chuge ngwadi jogeda agali mo skatemanalla giti. Mo ta gbe age ene mo skatemanalla giti e ulia ta dbe no no mo skatemanalla ole, agwa kwian me ñage mo ta dbe age ma no ege mo skatemanalla alin. 14 Ba ulita mo ta gbadale age ulita diali cha gerule kare, ene ulia ba cha skatemanalla. 15 Cha me ba kade dare lle boanga alin cha alin, me uñale lle boangage ama mauña kle tañachuge mine be llema boi, cha ba ulita kade cha skatemanalla, cha Ñenua geru ketu chage, cha geru e ulita tragu ba ulita ole. 16 Cha ba ulita gau mau alin, ba ulita me mo ta gbu cha gai mau alin, cha ba ulita gau gbu cha Ñenua gerua dbe kwian nage age tanre no cha Ñenua takalin kare, ene ba giti kwian tanre be cha Ñenua uñe, cha Ñenua gerua be chege diali kwian tale. Ene cha Ñenua be age no ba ulita alin, ba ulita lle bai kaire kade ba takalin kare cha Ñenuage cha giti ama be age ba alin. 17 Cha takalin ba age diali ai kare: Ba ulita mo ta dbadale no modi diali. 18 Jesu gerudu dare kwian geru jwannga amage ulita ole: —Kwian me chanu be jainchke tanre ba ulitadi, ba tachkedale cha giti, kwian jainchku chadi ngeru. 19 Ba ulita chanu age kwian me chanu kle age kare ene kwian ulita me chanu be no ba ole, ba age salengwli ama kle age kare. Agwa cha ba gau kwian ulitaske mau alin, malen kwian me chanu me no ba ole, kwian ene me chanu ulita be jainchke badi, kwian ene gwage ba me kle age ama kle age kare. 20 Ba ulita tachkedale cha gerudu kare ba ole: “Lle boanga me ma kweri mo chugagwallage.” Cha ba Chugagwalla, cha kledu toi kwianske kwian mo ta gbu age me no tanre cha ole, ene kaire kwian be mo ta gbe age me no tanre ba ole, kwian be chage ba nate age me no ba dollale. Kwian bai cha keruchugu cha gerua gbu gdadi mo alin, kwian ene kaire be ba kerua gbe gdadi cha giti. 21 Ba ulita chanu, malen kwian ulita me chanu be chage ba nate age me no ba dollale, ama me cha kaganga uñe, malen ama be age me no ba ole. 22 Cha me chieba aini nga dba ai giti gerule cha Ñenua giti kwian ole, ene kwian me jiske, geru me uñale amage. Agwa cha chiu, cha gerudu ama ulita ole, ama me cha gerua gakalin, malen ama chege jiske ama age me no giti. 23 Kwian jainchke chadi, kaire kwian jainchke cha Ñenuadi. 24 Cha me nu lle daga ngwale no tanre dodaba ama ulita gwa giti, ene ama me jiske, me uñale amage. Agwa cha lle daga ngwale no tanre dodadu ama ulita gwa giti, kwian na me ñadu age cha agedu kare ama gwa giti, e giti sugedale amage cha chema, ama cha gadale ulia, agwa ama ulita me cha gai ulia, ama diali chege ta jainchke chadi kaire cha Ñenuadi, e giti kwian ulita chege jiske kweri cha Ñenua Chube gwa giti. 25 Boidale ene ulita Chube gerua jo degaba unsuialin cha giti gerule kare ama ulita alin, chada e gerule: “Cha me jiske, agwa kwian jainchke chadi ngwale mo tale.” 26 ’Cha be jogeni cha Ñenua ngwadi gire cha be Chudaboanga kage ba ulita alin, e Chube Oña, Chube Oña diali no, ama gerule ulia diali, ama be gerule ba ulita tale cha giti diali, be ba ta gbe geru cha giti trage kwian na ole kaire. Gwangea cha chagedu kwian tke tangle cha Ñenua giti ba ulita chagedu ule cha ole, ba me cha chugu ngwadi chage gballa, nege che kle chage kaire ule, uñale bage cha agedu mine ulita ba gwa giti, e giti ba ñage gerule, Chube Oña be ba ulita ta gbe chke gerule kwian na ole cha gerudu ba ulita ole giti.
1 Jesu gerudu dare: —Cha gerule ene ulita ba ole ba ta gbagda, ene ba boi daga ngwale cha giti ba mi joge siere cha geruage, ba be cha gai ulia diali. 2 Kwian ba dollale be ba mlienga siere u mo litangwa Chube gerua jwanngwage, kaire chui be chke gire kwian be ba gweda cha gerua dbe gdale, kwian ba gweda ene tañachuge ama kle age no Chube alin. 3 Kwian be age ene cha kle gerule kare, kwian ene me cha uñe, kaire kwian ni cha Ñenua uñe, malen ama mo ta gbe age me no ba dollale cha gerua giti. 4 Nege cha kle gerule ba ole be boi giti ulita, chui be chke be boi ene cha kle gerule kare gire ba tachkedale cha gerudu giti ulita ngeru ba ole be boi giti. Jesu gerudu dare: —Ngeru cha kledu chage ba ulita ole, cha chegu baske, malen cha me gerudu ai kare ba ole. 5 Agwa nege cha jogedaleni toi cha kaganga ngwadi, cha mi kle baske dare, malen cha kle gerule ai kare ba ole. Ni ba gdaite kle geru kade chage cha be jogeni baini, 6 ba ulita kle tañachuge tanre alin ta olire ole cha gerudu giti. 7 Cha gerule ulia ba ulita ole, ma no ba alin cha jogedaleni cha chiu ngwadi. Cha mi jogeni, ene Chube Oña mi chie ba ulita alin ba Chudaboangale, ene ama mi kle ba ole, agwa cha jogeni, ene ama be chie, cha be ama kage ba ulita alin. 8 Chube Oña be chke, gire ama be kwian me chanu ta gbe suge trate kwian ene kle age me no giti, Chube Oña be kwian ene ta gbe suge chagé no trate Chube takalin kare cha chagedu no trate kwianske kare, kaire Chube Oña be kwian ene ta gbe suge Chube ji gbe kwian agenga me no ulita alin. 9 Chube Oña be kwian ta gbe suge moge kwian agenga me no malen kwian me mo ta gbe cha gai ulia Chube Kirollale. 10 Chube Oña giti be suge kwiange cha chagedu no trate ulita kwianske, cha be jogeni cha Ñenua ngwadi, ba ulita mi gwage dare chadi, cha be jogeni gire Chube Oña be chke be kwian ta gbe suge kwian kaire ñage chage no trate Chube kiralla giti cha chagedu kare. 11 Chube Oña be kwian ta gbe suge che dolla Satanás be ji chuge tirare bdagli, Satanás kwian ulita me chanu chugagwalla, Satanás jiske kweri cha Ñenua gwa giti, cha Ñenua be ji gbe kweri ama alin, ene kaire cha Ñenua be ji gbe kwian ulita me chanu alin. 12 Geru na tanre kle cha tale tragadale ba ulita ole, agwa cha mi geru e kete bage, e ulita mi suge bage nege. 13 Agwa Chube Oña be chie be chke ba tale, ama gerule ulia diali, ama be ba ta gbe ulita geru uliage, ene geru ulia ulita suge trate bage, ama mi gerule ba tale mo ta giti gballa, ama cha Ñenua keruchuge gire ama gerule ulita cha Ñenua gerule kare, ama be ba tke tangle ulita be boi giti. 14 Chube Oña cha Ñenua gerua keruchuge, ene kaire Chube Oña geru e amaña keruchuge chage, cha Ñenua geru ulia mauña, ene kaire cha geru ulia mauña. Chube Oña be gerule no no cha giti ba tale, ama geru ulia cha giti uñe trate, ama be ba ta gbe suge, ene geru ulita cha giti be chke uñale ba ulitage. 16 Nege cha mi chege sbali ba ulitaske gire ba mi gwage dare chadi. Chui gweale be joge tangle gire ba be gwageni chadi nakwaite. 17 Jesu gerudu ene gire kwian geru jwannga Jesuge gweale geru kadu modi: —¿Ama kle gerule mine che ole? Ama kle gerule ama mi chege dare che ulitaske che mi gwage amadi dare gire chui gweale be joge tangle che be gwageni amadi. Ama kle gerule ama be jogeni ama Ñenua ngwadi, ¿mineade ama kle gerule be meni nakwaite chege? 18 Me suge chege mineade ama kle gerule chui gweale be joge tangle gire che be gwageni amadi. ¿E kle gerule mine? Me suge chege. 19 Kwian geru jwannga gerudu ene modi, Jesuge sugedu kwian geru jwannga ta geru kadakalin Jesuge, Jesu gerudu kwian geru jwannga ole: —Cha gerudu ba ole cha mi chege sbali ba ulitaske gire ba mi gwage dare chadi, chui gweale be joge tangle gire ba be gwageni chadi nakwaite. ¿Ba ulita ta geru kadakalin chage e giti? 20 Cha gerule ulia ulia ba ulita ole, ba ulita chanu be kle olire be chege ta olire tanre cha nate gire kwian me chanu ulitadi nga be chege suga no, agwa ba ulita be chege ta olire tanre cha nate bigwa ba ta olire be jwlite nga suga no no ole. 21 Muinga be kirogwa molen, oga chuia chke muingage gire muinga skibachie tanre mi kle nga suga no ole, kirogwa soli chke muinga kote gire nga suga no muingadi kirogwa jagere giti, muinga ta jogengwa ulita ama ogadu giti kirogwa suiale. 22 Ene kaire ba ulita mi kle nga suga no ole be kle ta olire tanre cha nate, cha be chieni gire ba be gwageni chadi cha be kleni ba ole, ba tale be nga suga no tanre molen, nga suga no ba ulita tale cha giti kwian na me ñage e jwennga, nga suga no e be chege ba tale diali. 23 Cha be jogeni cha Ñenua ngwadi, chui ege gire ba mi geru kade chage dare. Cha gerule ulia ba ole, ba ña gerule cha Ñenua ole agali, cha giti ba lle kade cha Ñenuage ama be age ba alin. 24 Sbali ba chagedu ule cha ole, ba me kle lle kade cha giti cha Ñenuage, agwa nege gwangerugu ba lle kadadale cha giti cha Ñenuage lle bai kaire ba takalinge, ene cha giti cha Ñenua be age ba alin, ene nga be suga ma no badi cha giti. 25 Cha geru ñachugu ba ulita ole tanre, e me sugedu bage cha kle gerule llema giti ulia ba ole, agwa chui be chie gire cha mi geru ñachuge ba alin cha kle geru ñachuge nege kare, chui ege cha be geru cha Ñenua giti gbe chke uñale trate ulita bage, ene be suge trate ba ulitage cha ta gerukalin mine ulia ba ole. 26 Chui be chke gire cha mi kle ba ole, chui ege ba ulita gerudale cha Ñenua ole lle kade mo alin cha giti. Cha me kle gerule ba ole ba be gerule cha ole gire cha be gerule cha Ñenua ole, me ene, ba ulita lle kadadale agali cha Ñenuage cha giti. 27 Uñale cha Ñenuage ba ulita no cha ole, uñale amage kaire ba kle cha gai ulia cha chiu ama ngwadi, malen cha Ñenua no ba ulita ole. 28 Cha kledu cha Ñenua ole gire cha chiu cha chku nga dba ai giti, nege cha be joge siere nga dba ai gitige, cha be jogeni naskuni cha Ñenua ngwadi. 29 Jesu gerudu ene kwian geru jwannga ole gire kwian geru jwannga gerudu Jesu ole: —Nege ba kle geru ba Ñenua giti gbe chke uñale trate chage, nege ba me kle geru ñachuge cha ole ngeru kare, nege suge chage ba kle gerule giti cha ole. 30 Nege suge cha ulitage ulita uñale bage, ba me geru kadu ni cha gdaitege cha kle tañachuge giti agwa ba cha ulita talla uñe, bage uñale cha ulita kle tañachuge mine, e giti cha ba gai ulia nege, suge trate chage ba chiu Chube ngwadige. 31 Kwian geru jwannga gerudu ene Jesu ole gire Jesu gerudu ama ole: —Nege ba kle gerule ba cha gai ulia, 32 agwa chui kle kodi kodi gire ba ulita gdaite gdaite be joge siere chage mo kaire kaire sugekare, ba ulita be cha chuge ngwadi gballa, agwa cha mi chege gballa ulia, cha Ñenua kle cha ole diali. 33 Cha gerudu ulita ba ole, ba tachkedale e giti ulita, ene cha giti ba be ta dbe suga no diali. Ba ulita chanu be boi daga ngwale nga dba ai giti kwian me chanuske, agwa ba me tallade e giti, ba me ta dbe kennga, ba mo ta gbadale diali cha kirallaske, cha kirachku ulita me no kiralladi.
1 Jesu gerudu ene ulita kwian geru jwannga amage gdataboko giti gdaite ole, ama gwagedu nga ngaña giti gire ama gerudu Chube ole: “Cha Ñenua, nege cha mi chege dare nga dba ai giti, cha ba Kirolla, ba age no cha alin, ba cha gbe kweri kwian ulita gwa giti, ene kwian be gwage chadi be gerule no no ba giti. 2 Ba kira ketu chage, ba cha gbu ma kweri kwian ulitage, ene kira e giti cha kwian gbe toi diali chui tangle kwian bai kaire ba ta gbu cha gai ulia. 3 Kwian ba gadale Chube gdaitre alin ulia, kaire kwian cha gadale ulia ba Kirolla Jesucristo, ba cha kagu nga dba ai giti, kwian cha uñe ene kaire kwian ba uñe, e giti kwian toi diali chui tangle. 4 Cha agedu ulita ba takalin kare kwian ulita gwa giti, ba cha kagu nga dba ai giti lle boi ba alin, cha lle e bo ulita, uñale chage nga suga no badi cha agedu giti ulita. 5 Cha Ñenua, nege cha be jogeni ba ngwadi, cha takalin ba cha gbeni naskuni kweri cha kledu ba ole unsuialin nga ulita bebi dodadale gire cha kledu ba ole, cha klekalinni naskuni eni ba ole. 6 Ba kwian ai gdataboko giti gdaite ulita gau kwian ulitaske mau alin, kwian ai ulita banu, ba ama ta gbu chage cha ole cha gai ulia, cha giti sugedu amage ba mine, cha gerudu ulita ama ole ba giti, ama ba gerua gbu gdadi ba gerua gau dage cha gerudu kare ama ole. 7 Nege uñale ama ulitage cha kle age ulita ba kirallaske cha kle gerule ulita ba kirallaske. 8 Ba geru ketu chage, cha geru e ketu ama ulitage, ama geru e ulita gau ulia, suge ama ulitage ulia cha chiu ba ngwadige, ama ulita cha gai ulia ba cha kagu. 9 Cha kle gerule ba ole ama ulita giti, ba ama ta gbu chage cha ole, ama ulita banu, ba ama manade no, ba ama chudaboi no. Kwian e alin giti cha kle gerule ba ole, cha me kle gerule ba ole kwian me banu giti. 10 Kwian banu ulita, kwian ene kaire chanu. Kwian chanu ulita, kwian ene kaire banu. Ba kwian ene ulita gbe chage no ba takalin kare kwian ulita me chenuske, ene kwian chenu giti kwian na ñage che uñe, be suge trate kwian nage cha no no. 11 Cha mi chege dare nga dba ai giti kwianske, cha be jogeni toini ba ole, agwa kwian ai kle chage cha ole ama be chege toi nga dba ai giti. Cha Ñenua, ba no trate, ba kwian ai ta gbu chage cha ole, ba ama ulita manade no ba kiralla giti, ba ama ta gbe diali chage ba geruage, ene ama ulita be tañachuge kwian gdaitre alin kare che boke kle tañachuge kare, che boke gdaitre alin. 12 Nege cha kle ama ulita ole nga dba ai giti chage ule ama ole, ba ama ulita gbu chage cha ole, cha ama ulita manadu no ba kiralla giti, ene cha ama ulita ta gbu chage no ba geruage. Ba ama ulita ta gbu chage cha ole, ama ulita mo ta gbu cha gai ulia, ama kle chage cha ole diali, ni gdaite jonga chage, agwa ama gdaitre alin me mo ta gbu cha gai ulia, ama chagedu alin cha ole agwa ama ta me kledu ule cha ole, ama jonga sugekare chage, ama gdaite e boidale ene ba gerua degaba unsuialin gerule kare. 13 Nege cha be jogeni ba kle ngwadi, agwa cha bebi joge siere nga dba ai giti cha kle kwian ai kle chage cha ole tke tangle no ba geruage, ama cha keruchuge cha kle gerule giti, ene ama ta chege nga suga no ole cha giti. 14 Kwian ai ulita kle chage cha ole, cha geru banu ketu kwian ai ulitage ba gerua gerule kare, ama kle chage cha geru banu ketu gerule kare, ama kle chage cha chage kare kwian ulitaske me kwian me chanu kle chage kare, e giti kwian me chanu jainchke amadi kwian jainchke chadi kare. 15 Cha me kle gerule ba ole ba ama jwen siere nga dba aige, agwa ba ama manade no mo kiralla giti nga dba ai giti ene ama me mo chuge ngwadi age me no che dolla Satanás takalin kare. 16 Cha me tañachuge cha me age kwian ulita nga dba ai giti kle tañachuge kle age kare, ene kaire kwian ai chanu kle chage cha ole me tañachugadale me agedale kwian ulita nga dba ai giti kle tañachuge kle age kare. 17 Cha takalin ba ama ulita ta gbe chage no trate ba gerua alin giti, ba gerua ulita geru ulia. 18 Ba cha kagu nga dba ai giti kwian me ba uñeske ba gerua dbe kwiange, ene kaire cha be kwian ai chanu kle chage cha ole jige nga dba ai giti kage ba gerua dbe dare kwian me ba uñeske. 19 Cha mo ta gbu lle boi no ba alin diali ba takalin kare nga dba ai giti, ene cha giti kwian ai ba uñu, ama banu ulia, ene nege gwangerugu ama be mo ta gbe ulia lle boi ba alin diali cha lle bo ba alin kare. 20 Cha me kle gerule kwian ai alin allabi giti ba ole, kwian ai giti kwian na tanre be cha gerua keruchuge be cha gai ulia biale, ba kwian e ulita manade no kaire, ba ama chudaboi. 21 Cha gerule ba ole kwian be cha gai ulia giti, kwian e cha gai ulia gire cha takalin ba ama ulita ta gbe ule gdaitre alin, ene ama ulita tañachuge kwian gdaitre alin kare, ene no cha Ñenua. Ba kle cha ole cha kle ba ole, che boke gdaitre alin, cha takalin ama ulita ta chege che ole ule, ene kwian me chenu gwage ama ulitadi, ama giti kwian me chenu be che gai ulia, ene be suge kwian ege ulia ba cha kagu aini nga dba ai giti. 22 Ba mo kiralla ketu chage, ene kaire cha mo kiralla kete kwian chanuge, ene kwian chanu ulita tañachuge kwian gdaitre alin kare che boke kle tañachuge kare, che boke gdaitre alin. 23 Cha kle ama ulita ole ba kle cha ole kare, cha giti ama ulita tañachuge no ulia kwian gdaitre alin kare, ene ama giti kwian me chanuge suge ulia ba cha kagu aini nga dba ai giti, kaire suge amage ulia ba no kwian chanu ole ba no cha ole kare. 24 Cha Ñenua, ba no cha ole diali, ba nodu cha ole unsuialin nga ulita bebi dodadale, malen ba cha gbu kweri ba kle ngwadi. Ba kwian ai ulita ta gbu chage cha ole, cha takalin ama ai ulita joge cha ngwadi cha be kle ngwadi, ene ama ulita be gwage chadi cha noare kweri. 25 Cha Ñenua, ba no trate, cha gerule ba ole, kwian me banu me ba uñe, me uñale ama ulitage ba mine, agwa cha ba uñe, kaire kwian ai ba ta gbu chage cha ole, amage uñale ba cha kagu, 26 cha giti ama ulita ba uñe, cha gerudu ama ole ba giti, ene chku uñale ama ulitage ba mine, cha be kle ama ole diali, cha be ama ta gbe ma no ba uñe dare. Ba noare cha ole, ta e kare cha takalin chege kwian ai ulita chanu tale, ene cha be kle ama ulita ole diali. Ene nobi cha Ñenua.”
1 Jesu gerudu ene ulita Chube ole gire Jesu jo siere Jesu kledu ngwadi ule kwian geru jwannga amage gdataboko giti gdaite ole, jo tangle chi ulen kada Cedrónge, jo chke chi ulen kagda giti chkagu, eni gli gbachie no ngamalla gbaba, nga ege Jesu jo chke geru jwannga ole. 2 Judas-Iscariote Jesu ketanga gwaleda, ama nga e uñe, bitangle Jesu jogeba nga ege ule kwian geru jwannga gdataboko giti gdaboke ole, Judas-Iscariote chagedu ule Jesu ole nga ege ngeru, malen uñadu Judas-Iscariotege Jesu be joge nga ege. 3 Judas-Iscariote jo kwian ngle dbe Jesu gai nate nga ege, kwian gerunga Chube ole daba alin chugagwalla mneite kaire fariseo chugagwalla mneite, kwian e ulita kwian guardia donga ngle kaire kwian guardia u gerungwa Chube ole mananga ngle kagu ule Judas-Iscariote ole. Judas-Iscariote jo kwian e ulita dbe Jesu gai nate, ama ulita jo dogda dbe biale, jo jichra kaire jita gwagwa dbe kote nga gbagda chra jonkare chagegda, ene ama ulita ñage Jesudi Jesu gai. Kwian e ulita jo chke Jesu kle ngwadi. 4 Ulita kwian be age Jesu ole uñadu Jesuge, Jesu gwagedu kwian ulitadi kle chie Jesu kle ngwadi gire Jesu jo kwian chie Jesu gitigu ngwange, Jesu geru kadu: —¿Ba kle chage chema nate? 5 Kwian mneite kle chage ulita jaindunga: —Cha ulita kle chage Jesu una Nazaremu nate. Jesu gerudu: —E cha ba kle chage nate. Jesu gerudu ene gire kwian ulita kle chage modi Jesu nate mo linguda gwanaskuda, kwian ulita jo chke dba. Judas-Iscariote Jesu ketanga kwian me no e ulitage kledu ule kwian e ole ulita eni. 7 Gire Jesu geru kadu nabitaite ama ulitage: —¿Ba kle chage chema nate? Ama ulita jaindunga nabitaite: —Cha kle chage Jesu una Nazaremu nate. 8 Jesu gerudu nabitaite dare ama ulita ole: —Cha gerudu ba ole agali ba kle chage cha nate, ulia ba kle chage cha nate ba cha alin allabi gai, agwa kwian ai kle chage cha ole, ba me ama chugedi, ba ama chuge ngwadi. 9 Boidu ene ulita salengwli Jesu agali gerudu kare ngeru Ñenua ole: “Cha Ñenua, ba kwian ulita ta gbu chage cha ole cha gai ulia, ni gdaite jonga chage.” 10 Simón-Pedro kle chage sbadi dbe kwarage, ama sbadi junnga kwarage, gire ama kwian onbre kada Malco ologa taingwli tkunga ulita sbadi giti, Malco kwian lle boanga kwian gerunga Chube ole chugagwalla ma kweri alin. 11 Pedro Malco ologa tkunga ene gire Jesu gerudu Pedro ole: —Ba sbadi gbe naskuni sbadi kwarage. Ba kle tañachuge ba kira bate cha gdale ene kwian mi cha gai boadale daga ngwale, me ene, ba me ñage dole sbadi giti cha gdale, cha mo chugadale ngwadi boi cha Ñenua takalin kare kwian me noge. 12 Guardia donga ngle ule ama chugagwalla ole, kaire kwian guardia u gerungwa Chube ole mananga ngle, guardia e ulita Jesu gau Jesu ko lugu dbale skadi. 13 Guardia e ulita Jesu du Anás ngwadi, Anás Caifás bagalla, e suiale Caifás kwian gerunga Chube ole daba alin chugagwalla ma kweri. 14 Caifás ai amaña gerudu kwian israelita chugagwalla ulita ole: “Ma no che kwian israelita ulita alin onbre gdaitre alin jogeda kwian israelita ulita giti.” 15 Kwian jo Jesu dbe Anás ngwadi gire Simón-Pedro ule kwian geru jwannga Jesuge gdaite na ole chagedu kwian ngle jo Jesu dbe nate. Kwian gerunga Chube ole daba alin chugagwalla kwian geru jwannga gdaite e uñe, malen muinga ugaka mananga kwian geru jwannga gdaite e chugu ngwadi joge gudegu Jesu nate, agwa Pedro chegu goga gere ugakalla gití. Geru jwannga gdaite gerudu muinga ugaka mananga ole Pedro tke gere skieru goga, gire muinga ugaka mananga Pedro tku gere skieru goga, 17 muinga e geru kadu Pedroge: —¿Ba me geru jwannga onbre dule gudegu ege? Pedro gerudu: —Me dale, cha me geru jwannga amage. 18 Kwian lle boanga ulita kwian gerunga Chube ole chugagwalla ma kweri alin kaire guardia u gerungwa Chube ole mananga, nga skeke alin ama ulita nu jita teanba goga mo ngwachugagda, Pedro kaire kle ule kwian e ulita ole jita ngwachuge goga. 19 U amañage gwa kwian gerunga Chube ole daba alin chugagwalla ma kweri geru kadu Jesuge kwian geru jwannga Jesuge ulita giti, kaire geru kadu Jesuge Jesu kle kwian ulita tke tangle llema giti. 20 Jesu gerudu: —Cha gerudu kwian tanre gwa giti, diali cha kwian tku tangle u mo litangwa Chube gerua jwanngwage, kaire cha kwian tku tangle u gerungwa Chube olege kwian ulita kle mo lite ngwadi, cha gerudu ulita me skwlenre kwian ulitage, uñale kwian ulitage cha gerudu cha kwian tku tangle llema giti. 21 ¿Mineade ba geru kade chage? Geru kade kwian cha keruchuguge, kwian cha keruchugu ñage gerule ulita ba ole cha gerudu mine, ama ulitage uñale cha gerudu giti. 22 Jesu gerudu ene gerunga Chube ole daba alin chugagwalla ma kweri ole gire guardia gdaite u gerungwa Chube ole mananga Jesu batu gwage gerudu Jesu ole: —¿Ba kle tañachuge ba kle gerule ene no chugagwalla ole? 23 Jesu gerudu guardia e ole: —Bage suge cha kle gerule me no chugagwalla ole, gerule cha ole cha kle gerule mine me no chugagwalla ole. Bage me uñale cha kle gerule mine me no, ¿mineade ba kle cha bate? 24 Jesu gerudu ene gire Anás me gerudu dare, Anás Jesu kagu kaire ene ko lugaba Caifás ngwadi u amañage, Caifás kwian gerunga Chube ole daba alin chugagwalla ma kweri. 25 Jesu kle boi ene ulita gire Pedro kledu ngmadi goga jita ngwachuge ule kwian na ole, kwian gweale geru kadu Pedroge: —¿Ba me geru jwannga onbre dule gudegu ege? Pedro gerudu: —Me dale, cha me geru jwannga amage. 26 Bigwa kwian lle boanga gdaite gerunga Chube ole chugagwalla ma kweri alin, kwian lle boanga e bitalla Pedro ama ologa tkunga, e geru kadu Pedroge: —¿Cha me gwagedu ba amañadi llani ba tkanga tangle gale ngwadi? 27 Pedro gerudu nabitaite: —Me dale, cha me ama uñe. Pedro gerudu ene gire blike antalan ngwanedu. 28 Jesu kledu Caifás ullage, nga chku ju gire kwian israelita chugagwalla ulita Jesu du kwian chugagwalla gobernador nga Romamu ullage, ama kada Pilato. Kwian israelita chugagwalla ulita me jo gwa chugagwalla Pilato ullage ule Jesu ole, kwian israelita chugagwalla joge gwa u e kwian Romamuge ama ulita tañachuge ama chege sugaska Chube gwa giti, ene ama mi ñage Pascua chuia ollade mi ñage Pascua bligdalla gute, malen ama ulita Jesu dbangu chugagwalla Pilato ngwadi gwa, agwa ama ulita chegu manade goga, Pilato jo goga gerule kwian israelita chugagwalla ulita e ole Jesu giti: —¿Ba ulita kle onbre ai gbe jiske llema giti? 30 Kwian israelita chugagwalla jaindunga: —Ama me agenga me no cha me chie ama dbe aini kete bage gbale jiske, ama agenga me no malen cha ulita kle chie ama dbe aini gbe jiske bage. 31 Pilato gerudu: —Ma no ba ulita ama dbe siere nga aige, ba ama gbe ji chuge geru kle gbaba ba kwian israelita alin kle gerule kare. Kwian israelita chugagwalla ulita gerudu Pilato ole: —Cha ulita me ña ama gweda gballa, ba kwian Romamu me cha kwian israelita chugu ngwadi ni kwian gdaite gweda gballa. 32 (Ulita boidu salengwli Jesu gerudu ngeru kare ama be jogeda giti kwian be age ama ole giti.) 33 Pilato joni gwa, Pilato Jesu dbangu ama ulita gwa giti Pilato geru kadu Jesuge: —¿Ba kwian israelita ulita chugagwalla kweri? 34 Jesu gerudu Pilato ole: —E ba kle gerule kare cha ole, ¿ba kle gerule mo tale gballa o ba kwian na keruchugu gerule ene cha giti cha kwian israelita chugagwalla kweri? 35 Jesu gerudu ene gire Pilato gerudu Jesu ole: —¿Ba kle tañachuge cha kwian israelita, ulita kle boi ba ole uñale chage? Kwian gerunga Chube ole daba alin chugagwalla ulita ule ba chudalla israelita ulita ole, kwian e ulita kle ba gbe jiske chage. ¿Ba llema me no bo ba bitalla ulitaske ade ama kle ba gbe jiske chage? 36 Pilato gerudu ene Jesu ole gire Jesu gerudu Pilato ole: —Cha me kwian chugagwalla kwian chugagwalla nga dba ai giti ulita kare, cha kwian chugagwalla nga ngaña giti, cha kwian chugagwalla nga dba aimu alin ene kwian tanre chanu kira batadale tanre cha giti ene kwian israelita me ñage age cha ole. Agwa cha me kwian chugagwalla kwian chugagwalla nga dba ai giti kare, malen kwian chanu me kle kira bate cha giti. 37 Jesu gerudu ene Pilato ole gire Pilato geru kadu Jesuge: —Ba gerule ene, ¿e kle gerule ba ulia kwian chugagwalla? Jesu gerudu: —Ima, cha kwian chugagwalla ba kle gerule kare. Cha medunga nga dba ai giti, cha chiu geru ulia kete kwian ulitage, kwian ulita bai kaire mo ta gbe no geru ulia ole ama cha kerua gbe gdadi. 38 Jesu gerudu ene gire Pilato geru kadu Jesuge: —¿Llema geru ulia? Pilato geru kadu ene Jesuge gire blike ama jo nabitaite goga kwian israelita chugagwalla ulita ule kwian israelita tanre ole kledu manade ngwadi, Pilato gerudu kwian e ulita ole: —Cha geru tragu tanre onbre ai ole, suge chage trate ama me jiske dale. 39 Ma no ba ulita kle age kare diali Pascua chuiage chura kaire kaire ba kle kwian kle skage gweale gdaite skajwanngenga chage, ¿ba ulita takalin cha ba kwian israelita chugagwalla kweri ai skajwanngenga jige gbale nege? 40 Pilato gerudu ene Jesu giti gire kwian ulita ngautu kweri Jesu dollale: —Onbre e me skajwanngenga, ma no ba Barrabás skajwanngenga chui aige. Kwian ulita gerudu ene Pilato ole Barrabás skajwanngenga giti, Barrabás kwian agenga me no me no, ama kwian skwe boanga.
1 Kwian ulita gerudu ene Pilato ole gire Pilato joni gwa Jesu kle ngwadi, Pilato Jesu kwabatangu. 2 Guardia donga Pilatonu ulita Jesu kwabatu gire ama giska kobaske bliu Jesu chuga batreti gire batu Jesu chugaske, kwian e Jesu ngama tku kwian chugagwalla kweri nga dba aimu kle mo ngama tke kare ñometra chada dabere, ñometra e kareske Jesu jo ngama tkaba. 3 Gire guardia donga Pilatonu ulita chiu Jesudi, ama ngautu kweri Jesu gbe gidagda, ama gerudu Jesu ole kidere: —¡Nege ba kwian israelita ulita chugagwalla kweri, ba chege no kwian chugagwalla kweri kwian ulita gwa giti! Guardia donga ulita gerudu ene Jesu ole ta me no ole, kaire ama Jesu batu gwage kodi. 4 Kle boi ene ulita gwa Jesu ole Pilato jo goga kwaite gerule kwian israelita ulita ole Jesu giti, Pilato gerudu kwian nglea ulita ole: —Cha be ama gbe aini goga ba ulita gwa giti, ene cha takalin suge bage, chage ama me skwen jiske dale. 5 Gire Jesu dbachiu gbale kwian ulita gwa giti, Jesu chiu goga giska kobaske bliaba bataba ama chugaske, ama jo ngama tkaba ñometra chada dabereske, ama chku goga kwian israelita ulita gwa giti gire Pilato ama kaitu kwian ulitage, Pilato gerudu kwian ulita ole: —¡Gwagede onbre aidi, ama kle aini ba ulita gwa giti! 6 Kwian gerunga Chube ole daba alin chugagwalla ulita kaire guardia u gerungwa Chube ole mananga ulita, kwian e ulita gwagedu Jesudi gire ama ulita ngautu kweri Jesu dollale: —¡Ama gwangeda kruge! Pilato gerudu kwian ulita ole: —Ba ta ama gwakalinda joga ama dbe, ba ulita agali ama gweda kruge ba takalin kare, agwa chage ama me skwen jiske dale. 7 Kwian israelita ulita gerudu Pilatoge: —Cha kwian israelita ulita alin geru kle gbaba, geru e gerule kwian gweale mo gbe Chubere ama gwadaleda, onbre e kle gerule mau giti ama Chube Kirolla, malen cha ulitage suge ama jogedaleda ama kle mo gbe Chube Kirollale gdale. 8 Pilato kwian keruchugu gerule “Chube Kirolla” gire Pilato ta kendunga tanre. 9 Pilato joni gwa ule Jesu ole gire geru kadu Jesuge: —¿Ba nga bainimu? Agwa Jesu me jaindunga Pilato kalen. 10 Pilato gerudu Jesu ole: —¿Mineade ba me jainnga cha kalen? ¿Me uñale bage cha kwian chugagwalla kira molen, cha ñage kwian kage ba gweda kruge kaire cha ñage kwian gbe ba skajwennga? 11 Gire Jesu gerudu Pilato ole: —Chube kle ba chuge ngwadi age cha ole, malen ba ñage age cha ole, ba gballa me ñage age cha ole. Malen kwian ulita cha ketanga bage gwaleda, ama jiske kweri kweri age me no cha ole giti, ama ulita jiske ma kweri bage. 12 Jesu gerudu ene Pilato ole gire Pilato mo ta gbu ma dare age gweale Jesu alin Jesu chuge ngwadi gbale me Jesu kete gwaleda, agwa kwian israelita ulita gerudu kweri Pilato ole: —Ba be onbre ai chuge ngwadi gbale ba me ama kete gwaleda ba mi chege kwian chugagwalla kweri kada César skatemanalla, kwian bai mo gbe kweri kwian chugagwallale onbre ai kle mo gbe kare, kwian ene chugagwalla kweri César dollale. 13 Pilato kwian ulita keruchugu gerule ene Jesu giti gire Pilato Jesu jwanngu siere gwa dbadale goga kwian ulita gwa giti, Pilato jo goga nga ama gerule kwian giti kwian jiske o me jiske ngwadige, nga e keuda dodaba bate ngaña, keuda e kada Gabata kwian israelita kwirale. Ne ngwadi Pilato toidu dba geru bdagli ketadale kwian ulitage Jesu giti, ama gerudu kwian israelita ulita ole Jesu giti: —¡Gwagede ba chugagwalla kweri aidi, ama kle aini ba ulita gwa giti! Pilato gerudu ene kwian ole chui bduke chuiete ngeru Pascua chuiage. 15 Gire kwian ulita ngautu kweri: —¡Ama dbange blikare gwaleda! ¡Ama gwangeda kruge! Pilato geru kadu kwian ulitage: —¿Ba kle tañachuge cha be ba chugagwalla kweri gwangeda kruge? Pilato gerudu ene kwian ulita ole gire kwian gerunga Chube ole daba alin chugagwalla ulita gerudu Pilatoge: —Cha ulita chugagwalla na me, chugagwalla kweri gdaitre alin, ama kada César, cha chugagwalla na me cha alin César kare. 16 Kwian gerudu ene mno Pilato ole gire Pilato me ñadu gerule dare Jesu giti, Pilato Jesu ketu kwian israelita ulitage gwaleda kruge, kwian israelita jo Jesu dbe agedale dagale me no Jesu ole ama ulita takalin kare. 17 Kwian israelita ulita Jesu du nga kada Calaverage, kwian israelita kwirale nga e kada Gólgota, nga e ngnagu Jesu jo mo krulla dbe, 18 jo chke nga ege gire kwian guardia donga Pilato alin Jesu gbu kruge ngaña. Kaire kwian na gdaboke gbere kru na gdabokege ule Jesu ole, kru gdaite Jesu ko taingwli ngnagu giti kru gdaite Jesu ko jole ngnagu giti, Jesu gbere kruge kwian boke e krulla kaskwada. 19 Pilato chada degu chada gbangu kruge ngaña Jesu chuga giti, chada e gerule: “Ai Jesu una Nazaremu, ama kwian israelita ulita chugagwalla kweri rey.” 20 Chada kle degaba gbaba kruge ngaña Jesu chuga giti, kwian israelita ngle chada e batunga, chada e kle degaba kwian israelita kwirale, kwian nga Romamu kwirale, kaire kwian griego kwirale. Jesu jo gbaba kruge ngwadi, nga e chege ngmadi una Jerusalénge, malen kwian ngle joge llani ñadu chada e batenga mo kwirale. 21 Kwian gerunga Chube ole daba alin chugagwalla ulita jo gerule Pilato ole chada kle gbaba kruge giti, kwian e ulita gerudu Pilato ole: —Ba me chada jige degaba ba chada degu kare: “Ama kwian israelita ulita chugagwalla kweri rey”, agwa ma no ba chada jige degaba gerule ai kare: “Ama agali gerudu mau giti ama kwian israelita ulita chugagwalla kweri rey.” 22 Pilato gerudu: —Cha chada degu ene, chada e chegedale ene cha chada degu kare. 23 Guardia donga Jesu gbanga kruge kwian baga, ama ulita Jesu gbu kruge ngaña gire ama Jesu ñometralla jo jwanbanga Jesudige ñometra e ulita guardia donga gdabaga girabatu modi ñometra bitaite guardia donga gdaite gdaite alin. Ñometra bitaite Jesu kle dbe ñometra na giti tangle, guardia donga ñometra e bitaite gau kaire girabatadale modi, agwa ñometra e skiaba jeike llagli, guardia donga me ñadu ñometra e girabate modi ama tañachugu kare, 24 malen guardia donga gerudu modi: —Che me ñometra ai gagenga, ma no che blachke gbe ñometra giti gire che gdaite bai blachke be chege ñometra mauñale. Boidu ene Chube gerua degaba unsuialin gerule kare Jesu giti, chada e gerule: “Cha ñometralla jo girabataba modi, cha ñometralla jeike llagli giti blachke jo gbaba.” Chube gerua degaba unsuialin gerule ene kwian be age giti, chui e chku gire guardia donga agedu ene ulita Jesu ñometralla ole chada e gerule kare. 25 Kodi Jesu krullage Jesu chebia kledu manade ule mo daballa kada María ole, María e Cleofas muiralla. Kaire María na kada María-Magdalena kledu ule. 26 Jesu gwagedu mo chebiadi, ule chebia ole kwian geru jwannga Jesuge gdaite kledu, geru jwannga e ole Jesu no no, Jesu gerudu chebia ole: —Cha chebia, ba geru jwannga e gai mo kirollale. 27 Jesu gerudu ene chebia ole gire gerudu kaire geru jwannga e gdaite ole: —Ba cha chebia gai mo chebiale, ba ama manade no no. Chui ege gwangerugu geru jwannga e Jesu chebia gau mo chebiale, ama Jesu chebia du mo ullage manadale diali. 28 Boidu ene ulita gire Jesuge sugedu ama lle boadale Chube alin nga dba ai giti ama dodadu ulita. Boidale Chube gerua degaba unsuialin gerule kare, malen Jesu gerudu: —Cha siechie. 29 Uva chia gage tkaba ngama gdaitege kledu eni, guardia donga lle dagli kare kagu date uva chia gageske gbu glita gwagdage gire gbu Jesu kate ngaña kruge. 30 Jesu uva chia gage junnga kate daglige Jesu jau gire Jesu gerudu: —Cha lle dodadu ulita cha Ñenua takalin kare nga dba ai giti. Jesu gerudu ene gire ama chuga gbu gwadbigu ama jokeda. 31 Jesu jokeda chuia, chui e chege chuietre alin kwian israelita undege chuia, me undege chuia alin allabi, kaire Pascua chuia. Kwian israelita me takalin kwian jaba chege gbaba ngaña kruge undege chuiage alin, malen kwian israelita chugagwalla ulita jo gerule Pilato ole: —Cha takalin ba guardia donga kage kwian gdamai kle kruge seragda skutenga, ene ama jogeda blike gire ama jaba jwanle siere kruge ogale ngeru cha kwian israelita undege chuiage. 32 Kwian israelita chugagwalla ulita gerudu ene Pilato ole gire Pilato guardia donga kagu kwian gdamai kle kruge seragda skutenga, guardia e kwian gdaite kle kruge Jesudi ongoru seragda skutunga gire ama kwian na kle kruge Jesudi ongoru seragda skutunga. 33 Guardia jo chke Jesu krulladi Jesu seragda skutalenga, guardia gwagedu Jesudi Jesu jaba alin chegeba, malen guardia me su Jesu seragda skutenga, 34 agwa guardia gdaite Jesu dagu jigwaru tangle lanza giti, lanza tanege blike be chiu kaire chi chiu. 35 Cha Juan chada ai deganga, boidu ulita Jesu ole cha gwagedudi mo gwagwa giti, cha kle gerule ulia cha gwagedudi, chage uñale trate ulia cha gwagedudi boidu ene ulia, ene ba ulita bai kaire chada ai batenga cha kle gerule giti ba ulita geru ai gai ulia. 36 Boidu ene Jesu ole Chube gerua degaba unsuialin gerule kare, chada e gerule Jesu giti: “Kwian mi ama gda jegwale gdaite skutenga.” 37 Chube gerua degaba amaña na gerule Jesu giti: “Kwian ama dagangu kwian na ule ulita ole be gwage ama jo dagabadi.” 38 Jesu jaba jo boaba ene gire José una Arimateamu Jesu jaba kadu Pilatoge jwanlenga kruge ogadale keugage, José e Jesu gaba ulia mo tale skwlenre kwian israelita chugagwalla ulitage kwian israelita chugagwalla chrullale, Pilato gerudu José ole: —Ba ñage Jesu jaba jwen dbige kruge dbe nga ogangwage. José jo Jesu jaba jwen dbige kruge, José Jesu jaba du ogadale. 39 Nicodemo jogeba chui gbaitege ngajrege geru trage bitaite Jesu ole, Nicodemo e amaña jo chke José kle ngwadi Jesu jaba ole, Nicodemo lle ñachke no ngle kilo treinta du tkale Jesu jaba giti, e kada mirra tugaba áloeske. 40 José ule Nicodemo ole Jesu jaba bliu ñometra glitaleske, ñometra Jesu jaba jo bliabaske lle ñachke no jo tkaba ngle Jesu ñometralla jaba bliabaske giti kwian israelita suiale kle age diali kare jaba gbe biale ogadale. 41 Jesu gbere kruge ngwadi, kodi nga ege gli gbachie no gutadale ngamalla gbaba, eni keuga jaba ogangwa kle, keuga ege ni kwian jaba ogaba gdaite. 42 Eni keuga ege José Nicodemo ole Jesu jaba ogo blike, nga e chege ngmadi Jesu gbere kruge ngwadi, malen José, Nicodemo Jesu jaba ogo eni gire ama joni mo ullage, ngabi, lle boi chuia dare me, chui na be chie undege chuia kwian israelita ulita alin gire ni kwian gdaite ñage lle boi.
1 Undege chuia jo tangle gire nagbietege chui domingoge ngabebitabi nga bebi chra chke dba no gire María-Magdalena jo Jesu jaba ogle ngwadi, jo chke Jesu jaba ogle ngwadi, gwagedu ke kweridi ke e gbaba keugage me kle kaire, ke jwanbanga keuga ugakalla chegeba ka ngwale. 2 María-Magdalena gwagedu edi gire ama jo jrite Simón-Pedro ngwadi gerule Simón-Pedro ole kaire kwian geru jwannga Jesuge gdaite na ole, geru jwannga na e Jesu no no ole, María-Magdalena gerudu ama boke ole: —Che Chugagwalla jaba dule, ama jaba me kle jaba ogle ngwadi, me uñale cha ulitage ama jaba jo gbaba baini. 3 Pedro kaire geru jwannga gdaite na María-Magdalena keruchugu gire ama gdabonate jo tienda agali Jesu jaba jo ogaba ngwadi, 4 gdabonate jo jrite ule, geru jwannga gdaite jritedu ma blike Pedroge, jo chke ngeru keugadi. 5 Jo chke ngeru, ama tiunda dbige keugage, Jesu jaba tanege gwagedu ñometra Jesu bliabadi alin, gwagedu ene, agwa ama me jo dbige. 6 Ama nate Simón-Pedro jo chke keugadi, Simón-Pedro jo dbige, ama kaire gwagedu ñometra alindi, 7 kaire ama gwagedu ñometra jo Jesu chuga bliabadi me kle ule ñometra Jesu jaba jo bliaba jegwale ole, kaire ñometra jo Jesu chuga bliabadi kle bliaba gbaba sugekare ñometra nage. 8 Gire geru jwannga jo chke ngeru Pedroge jo dbige kaire Pedro nate, gwagedu dbige, Jesu jaba me skwendu amage, sugedu amage ulia Jesu chkuni gwade. 9 Geru jwannga boke ege Chube gerua degaba unsuialin me sugeba amage, Chube gerua degaba gerule Jesu jaba chkedaleni gwade agwa geru e bebi chke uñale amage. 10 Jesu jaba me skwendu geru jwannga gdabonatege gire ama joni gudegu. 11 María-Magdalena jogeba chkeni Jesu jaba ogle ngwadi, María-Magdalena chegu goga olire Jesu jaba jo ogaba keugalla ngena, ama kle olire gire tiunda dbige keugage gwagedu lle boanga Chube alin nga ngaña giti bokedi toiba dba Jesu jaba jo gbaba ngwadi, ama boke mo ngama tkaba ñometra jutreske, gdaite kle Jesu chuga tanege gdaite kle Jesu sera tanege. 13 Lle boanga Chube alin nga ngaña giti geru kadu María-Magdalenage: —¿Mineade ba kle olire? María-Magdalena jaindunga: —Cha kle olire cha Chugagwalla jaba nate, ama jaba dule, me uñale chage ama jaba jo gbaba baini. 14 María-Magdalena gerudu ene lle boanga Chube alin kle dbige ole gire María-Magdalena tiunda mo giti, María-Magdalena gwagedu Jesudi Jesu kle jagebanga gdate ngmadi ama ngena, María-Magdalena gwagedu Jesudi, agwa María-Magdalena me chku Jesu uñe nate. 15 Jesu geru kadu María-Magdalenage: —¿Mineade ba kle olire? ¿Ba kle chema jinade? María-Magdalena tañachugu kwian kle gerule ama ole kwian e gli gbachie no ngamalla mananga kle gerule ama ole, María-Magdalena gerudu: —Ba nga ai mananga, jaba jo gbaba aini, ba jaba e du gbale nga nage ba gerule cha ole ba jaba gbu baini, cha ta jogekalin jaba jwen nate ogadale. 16 Jesu gerudu: —¡María! María-Magdalenage sugedu blike Jesu kerua gire María-Magdalena jwlituda gdate, María-Magdalena gerudu Jesu ole kwian israelita kwirale: —¡Rabuni! —geru e gerule kwian israelita kwirale “cha tkanga tangle geruge”. 17 María-Magdalena chku Jesu uñe nate, María-Magdalena be Jesu gai kodi gire Jesu gerudu María-Magdalena ole: —Ba me cha chugedi, cha bebi jogeni cha Ñenua ngwadi, agwa cha takalin ba joge kwian geru jwannga chage ulita ta gbe cha giti, ama ulita cha daballa kare, ba gerule ama ulita ole cha be jogeni cha Ñenua ngwadi, ba ulita chagedu cha ole, cha Ñenua ama ba Ñenua kaire, ama cha Chubea, kaire ama ba ulita chagedu cha ole Chubea. 18 Jesu gerudu ene María-Magdalena ole gire María-Magdalena jo geru kete kwian geru jwannga ulitage Jesu gerudu kare, María-Magdalena gerudu kwian geru jwannga ulita ole: —¡Cha gwagedu che Chugagwalladi mo gwagwa giti gwadeni! Kaire María-Magdalena geru ketu geru jwanngage Jesu gerudu ulita giti ama ole. 19 Jesu medu María-Magdalenage chuia, e chui domingoge, chui amañage ngabi nga train giti kwian geru jwannga kledu mo litaba ugaka jegaba mo giti kejre kwian israelita chugagwalla ulita chrullale, geru jwannga ulita kle gwa Jesu me chiu gda uñale gire ama chku gwa geru jwannga kle mo litabaske, Jesu gbi kadu geru jwannga ulitage: —¿Che kle mine? Cha takalin ba ulita ta dbe suga no. 20 Jesu gbi kadu ene geru jwanngage gire Jesu mo ko kaitu mo jigwaru tangle kaitu geru jwanngage. Gire geru jwannga ulita gwagedu Jesudi Jesu amaña, ama ulitadi nga chegu suga noare gwageni mo Chugagwalladi. 21 Jesu mo kaitu ene kwian geru jwanngage gire Jesu gerudu nabitaite: —Cha takalin ba ulita ta dbe suga no. Jesu gerudu dare kwian geru jwannga ulita ole: —Cha Ñenua cha kagu lle boi ama takalin kare kwianske, ene kaire cha ba ulita kage lle boi cha takalin kare kwian me cha gerua uñeske. 22 Jesu gerudu ene geru jwannga ulita ole gire Jesu juli batu ama giti ulita gire gerudu: —Ba Chube Oña gai ngwange ba tale. 23 Chube Oña kiralla giti ba be ñage gerule kwian agenga me no gweale ole: “Chube ba agedu me no talla mliunga, ba chege trate Chube gwa giti.” Kaire ba be ñage gerule kwian agenga me no na ole: “Chube me ba agedu me no talla mliunga, ba chege jiske Chube gwa giti.” Jesu gerudu ene gire Jesu jonga ama ulita gwage gwa. 24 Jesu chku ngeru chuiage kwian geru jwannga gdaite kada Tomás me kledu ule kwian geru jwannga na ulita ole, Tomás amaña kada Gemelo. 25 Geru jwannga kledu mo litabage Jesu medu, geru jwannga e ulita gerudu Tomás ole: —Cha ulita kledu mo litaba gire che Chugagwalla chku, cha gwagedu amadi mo gwagwa giti. Agwa Tomás me geru e gau ulia, Tomás gerudu: —Cha agali mo gwagwa giti me gwage ama ko lentigebadi clavo kote, cha agali me kobara chuge ama ko lentigu tanege, cha agali me ko chuge ama jo dagabale jigwaru tanglege, cha me ba gerua gai ulia ba kle gerule kare Jesu chkuni gwade giti. 26 Jesu medu chuiage jo tangle, chui apakege gire kwian geru jwannga ulita kledu mo litaba nakwaite gwa, chui ege Tomás kledu ule mo litaba, ama ulita kledu mo litaba ugaka jegaba kejre gire Jesu me chiu gda uñale Jesu chku gwa ama ulitaske, Jesu gbi kadu ama ulitage: —¿Che kle mine? Cha takalin ba ulita ta dbe suga no. 27 Jesu gbi kadu ene gire gerudu Tomás ole: —Tomás, kobara chúge aini cha koge clavo taneage, kaire ba ko du aini ko chuge cha jigwaru tangle jo dagaba taneage, ba me tañachugadale cha me chkuni gwade, mo ta gbége cha gai cha chkuni gwade ulia, ba me tañachugale cha me chkuni gwade. 28 Tomás gerudu no Jesu ole: —¡Ba amaña ulia cha Chugagwalla, ba ulia cha Chubea! 29 Jesu gerudu Tomás ole: —Nege ba cha gai ulia ba gwagedu chadi mo gwagwa giti lentigeba taneadi, agwa noare kwian alin bai kaire me gwage chadi mo gwagwa giti agwa geru cha giti gai ulia mo tale, kwian enedi nga be suga no cha giti kwian tale. Jesu gerudu ene ulita Tomás ole gire Jesu jo siere ama ulitage. 30 Jesu lle daga ngwale no tanre dodadu Chube kiralla giti kwian geru jwannga gwa giti, Jesu lle daga ngwale no tanre ulita dodadu me kle degaba chada ai giti. 31 Agwa chada ai chege degaba Jesu giti kwian ulita alin, kwian chada ai batenga ene chke uñale chada ai giti ulia Jesu Chube Kirolla, amaña kada Cristo kwian ulita jwannga siere ji chugege age me no gdale, kaire chke uñale kwiange chada ai giti kwian ulita bai kaire Jesu gai ulia kwian ene toi diali chui tangle Chube ole Jesu gai ulia giti.
1 Jesu mo kaitu Tomáge ene gire chui jo tangle Jesu medu geru jwanngage nakwaite chibita kada Tiberias kagdage, e suiale boidu ene: 2 Geru jwannga gweale kledu ule: Simón-Pedro, Tomás, amaña kada Gemelo, Natanael, Natanael e kwian toinga una kada Canáge nga Galileage, kaire Zebedeo kirolla boke, kaire geru jwannga Jesuge na boke kledu. Kwian e ulita gdaguke kledu ule, 3 gire Simón-Pedro gerudu: —Cha be joge ngwe jwen. Geru jwannga na ulita gerudu Simón-Pedro ole: —Cha ulita be joge ule ngwe jwen ba ole. Gire ama ulita jo du tadi, jo ngwe jwen duge, ngajrege ulita kledu ngwe jwen agwa e suiale ama ulita me ko toidu ngwege ni gdaite. 4 Ngabebita nga train giti Jesu medu chibita Tiberias kagdage geru jwannga ulitage, agwa ama ulita me chku Jesu uñe nate tañachugu kwian na kledu eni chi kagdage. 5 Jesu gerudu geru jwannga ulita ole: —Cha skatemanalla, ¿ba me ko toidu ngwege gdaite? Ama ulita jaindunga: —Ni cha ko toidu gdaite ngwege. 6 Jesu gerudu ama ulita ole: —Ba gdeba ulita tke du kagda taingwli ngnagu giti, ene ba be ngwe gai. Ama ulita agedu Jesu gerudu kare, bigire ama gdeba jun kedagu ama me ñadu gdeba jwen keda, ngwe tanre kledu gdeba tadi. 7 Jesu no no geru jwannga gdaite ole, ngwe ngle giti sugedu geru jwannga gdaite ege e Jesu kle gerule ama ole, ama gerudu Pedro ole: —E che Chugagwalla amaña. Pedro geru jwannga gdaite keruchugu gerule ene “che Chugagwalla”, gire Pedro kledu ñometra mo ngnaru buliske, ama me kledu ñometra jeikeske, ama me manadu dare duge ama mo ta gbu blike joge Jesu kle ngwadi chi kagdage, gire ama mo ngama tku blike skwendu chiske jo blike kedagu Jesu nate. 8 Pedro skwendu chiske du kle ngwadi joge keda Jesu kle ngwadi bateno metro cien batre, geru jwannga na ulita chegu duge, ama ulita kira batu ngwe tanrege gdebage llagli chiga giti duge, ama ulita jo chke du ole chi kagdage, 9 gire ama ulita chiu dbige duge gire gwagedu jita teanbadi, kaire Jesu nu ngwe gbaba jita e giti ngwe kle biale gutale, gwagedu pandi kaire jita ngena. 10 Jesu gerudu geru jwannga ulita ole: —Ba ngwe jun sugeti gweale dú aini jitadi gugale. 11 Jesu gerudu ene gire Simón-Pedro jo ngwe nate jo chke duge ngwe gdeballa skatrennga du kagdage gire kira batu gdebage kedagu ngwe kweri ngle ole, gdeba gdaite, ngwe ulita ciento cincuenta y tres, ngwe ngle ngle kledu gdeba tadi, agwa gdeba me su dretenga ngwe ole, ngwe ulita chku keda gdebage. 12 Simón-Pedro chkuni geru jwannga na ulita kle Jesu ole ngwadi gire Jesu gerudu geru jwannga ulita ole: —Bai blire, bligda kle biale ba ulita alin gutale. Geru jwannga ulitage sugedu trate trate kwian kle gerule ama ole e ama Chugagwalla amaña, malen ama ulita me su geru kade Jesuge ama chema. 13 Jesu jo jitadi, Jesu pan gau kote ketu geru jwannga ulitage, kaire ama ngwe ketu geru jwannga ulitage gutadale, geru jwannga ulita blidu. 14 Jesu chkebani gwade, ai bitamaikedale Jesu medu kwian geru jwannga ulitage. 15 Geru jwannga ulita blidu ulita gire Jesu gerudu Simón-Pedro ole: —Simón, ba Juan kirolla, ¿ba ta dbe ma no ulia cha ole geru jwannga na ulitage? Pedro jaindunga: —Ima cha Chugagwalla, uñale bage cha no ba ole. Jesu gerudu Pedro ole: —Ulia ba no cha ole ba kle gerule kare gire ba kwian cha gerua gaba me sbali ba kwian ene manade no cha geruadi. 16 Jesu geru kadu nakwaite Pedroge: —Simón, ba Juan kirolla, ¿ulia ulia ba no cha ole? Pedro jaindunga: —Ima cha Chugagwalla, uñale bage cha no ba ole. Jesu gerudu: —Gire ba kwian chanu manade no cha geruadi. 17 Bitamaidale Jesu geru kadu Pedroge: —Simón, ba Juan kirolla, ¿ulia ba no no cha ole? Jesu geru amaña alin kadu bitamai Pedroge malen Pedro chegu tañachugu tanre ama ta olidu, Pedro gerudu Jesu ole: —Cha Chugagwalla, ulita uñale bage, ba cha ta uñe trate, uñale bage ulia cha no ba ole. Jesu gerudu Pedro ole: —Gire ba kwian chanu manade no no cha geruadi. 18 Cha gerule ulia ulia ba ole, ba biale gire ba mo ngama tku agali jogedale baini kaire ba tadu jogekalin ngwadi, agwa ba joge juma juma ba mi ñage age ba kledu biale kare, ba be mo chuge ngwadi mo ko lugange kwiange, kwian na be ba dbe baini ba me ta jogekalin ngwadi. 19 Jesu gerudu ene Pedro ole Jesu kle Pedro ta gbe suge Pedro be jogeda mine kaire Pedro jogeda giti kwian na be gerule no Chube giti. Jesu gerudu dare Pedro ole: —Ba mo ta gbadale chage diali cha ole. 20 Pedro jo chage Jesu ole, Pedro tiunda mo nate gwagedu geru jwannga gdaitedi kle chage ama nate, geru jwannga e ole Jesu no no, Jesu blidu ule bdagli geru jwannga ulita ole kwian bebi Jesu gai gwaleda gire, geru jwannga e gdaite blidu Jesu ngena, geru jwannga e geru kadu Jesuge chema be Jesu kete gwaleda. 21 E amañadi Pedro gwagedu chie Pedro nate gire Pedro geru kadu Jesuge geru jwannga e giti: —Cha Chugagwalla, agwa geru jwannga kle chie cha nate ai, ¿be boi mine ama ole bdagli? 22 Jesu jaindunga: —Cha takalin cha ñage ama jige gwade toi aini cha chieni chuiage alin, e giti ba me tañachugadale, ba tañachugadale mo alin giti mo ta gbe chage cha ole diali. 23 Jesu gerudu ene Pedro ole, Pedro tañachugu Jesu kle gerule geru jwannga gdaite e mi jogeda, gire geru e chagedu kwian ulita Jesunuske gerule geru jwannga gdaite e mi jogeda. Agwa Jesu me kledu gerule ene Pedro ole Pedro kle tañachuge kare, agwa Jesu gerudu alin allabi: “Cha takalin cha ñage ama jige gwade toi aini cha chieni chuiage alin, e giti ba me tañachugadale.” 24 Geru jwannga gdaite e, e cha kada Juan, cha chada ai deganga, cha gwagedudi boidu Jesu ole cha gwa giti cha kle e trage kwian na ole, kaire Jesu agedu giti cha degu chada ai giti, uñale chage kaire uñale kwian na tanrege cha kle gerule ulia Jesu giti. 25 Jesu lle tanre dodadu nga dba ai giti, lle e ulita me kle degaba chada ai giti, chada e ulita dege gdaite mo kaire kaire Jesu agedu giti ulita cha tañachuge chada e ulita me joge chke no nga dba ai giti. Lle tanre tanre Jesu bo nga dba ai giti, e ulita me kle degaba chada ai giti agwa geru no trate tanre Jesu giti kle degaba chada ai giti kwian ulita alin.
1 Cha skatemanalla Teófilo, cha chada degu ulita ngeru ba alin Jesu giti Jesu agedu giti kaire Jesu kwian tku tangle giti ngeru, 2 gire chui chku ama joni nga ngaña giti. Jesu bebi jogeni gire ama gerudu kwian geru jwannga amage gdataboko giti gdaite ole Jesu nu gaba geru kete ama alin dabage. Chube Oña Jesu ta gbu gerule kwian e ole kwian e ulita agedale mine Jesu mi kle nga dba ai giti ama ole gire, kwian e ulita be chege nga dba ai giti ama ulita me ta jogedalenga Jesu gerudu giti ama ole. 3 Jesu jokeda kruge, ama jaba chkuni gwade kledu gwadeni gire Jesu mo kaitu kwian geru jwannga gdataboko giti gdaite ulitage, kwian e ulita gwagedu Jesudi gwadeni, kwian e ulita gwa giti Jesu ageduni no tanre chke gda uñale ulia amaña kle gwadeni. Jesu chegu toi dare nga dba ai giti chui cuarenta, e suiage tangle Jesu medu bitangle kwian geru jwannga amage ulitage, diali Jesu gerudu ama ole Chube takalin kwian ulita Chube gerua Jesu giti uñe ene kwian ñage mo ta blite Chube ole Chube gai ulia mo Chugagwallale. 4 E suiale bitaite Jesu kledu mo litaba ule kwian geru jwannga amage ulita ole, gire Jesu gerudu: —Ba ulita chegedale manade aini una Jerusalénge, ba manadale aini gire Chube be mo Oña kage ba alin Chube geru gbu egdage ama be age kare. Chube Oña be age giti cha gerudu ba olebi, bage uñale ama giti. 5 Juan-Bautista kwian ñeu chiske gau ngaña chigage, ama agedu ene alin allabi kwian alin, agwa ama me ñadu kwian ta blite age Chube takalin kare, chui me sbali gire Chube be mo Oña gbe ba ulita tale ba kira gbagda age Chube takalin kare —Jesu gerudu ene kwian geru jwannga amage ulita ole. 6 Chui nage kwian geru jwannga Jesuge ulita kledu nga kada Ngwiskinro Jwichugallage mo litaba nakwaite Jesu ole, ama geru kadu Jesuge: —Cha Chugagwalla, ¿ba be che bitalla ulita israelita jwennga skage nege kwian nga namuge? ¿Ngaminegire ba be mo gbe kwian israelita ulita chugagwallale? 7 Jesu jaindunga: —Ba me geru kade chage chui giti ngaminegire cha Ñenua be age, cha Ñenuage alin allabi uñale, ama be age mo kiralla giti ama takalin kare. 8 Chui e giti ba me chegedale tañachuge tanre, ma no ba mo ta gbe lle boi no Chube alin Chube gerua cha giti kete daba nage. Chube Oña ama noare, ama be chke ba ulita tale gire ba be kira gai ba be joge gerule no cha giti kwian ulitaske una aini Jerusalénge kaire nga na ulita nga kweri Judeage kaire nga Samariage kaire ba giti geru e be joge tragaba bate kwian nga ulitamu ole, ba be chege kwian cha gerua ketanga daba na ulitage. 9 Jesu gerudu ene kwian geru jwannga amage ole, gire kwian ulita gwagedu Jesudi chkenga ngaña kote, Jesu jongwa bogakwaske nga ngaña giti kwian gwage. 10 Kwian chegu gwage Jesu nate joge nga ngaña giti gire lle boanga Chube alin nga ngaña giti gdaboke mo ngama tkaba jutre ulita kwian kare me chiu gda uñale chku gerule ama ulita ole, 11 lle boanga Chube alin boke gerudu: —Ba kwian nga Galileamu, ¿mineade ba kle chege gwage Jesu nate joge nga ngaña giti? E Jesu amaña kledu toi ba ole chagedu ba ole, nege ama joni nga ngaña giti Chube kle ngwadi, amaña be chieni nabitaite, ama jo kaire be chieni ene kaire bdagli nga ngaña giti ama jo kare —lle boanga Chube alin boke gerudu ene kwian geru jwannga Jesuge ulita ole. 12 Kwian be geru dbe Jesu alin gdataboko giti gdaite Jesu kwian e ulita jigu nga kada Ngwiskinro Jwichugallage, gire Jesu joni nga ngaña giti gire kwian e ulita joni chage naskuni gballa una Jerusalénge. Nga e ama kledu ngwadi me bate una Jerusalénge, gire ene kwian Jesu gerua ketanga me chagedu bate chui undegangwa kwian israelita alinge Moisés chadalla kle gerule kare. 13 Kwian Jesu gerua ketanga e ulita chkuni unaske jo chkeni u amaña ngeruge, jo ngaña ama ulita kle toi ngwadi. Kwian Jesu gerua ketanga ulita gdataboko giti gdaite kada ene: Pedro, Juan, Santiago, Andrés, Felipe, Tomás, Bartolomé, Mateo, Santiago na (ama Alfeo kirolla), Simón (ama kira batanga mo jwia gdale), Judas (e Santiago na kirolla). Kwian e ulita chagedu ule Jesu ole geru jwen Jesuge, gire Jesu ama ulita jigu geru Jesunu kete kwian na ulitage. 14 Una Jerusalénge ama ulita kledu mo lite ule diali gerule Chube ole, kaire Jesu daballanu ulita kaire Jesu chebia kadakle María kaire muinga na kledu mo lite diali ule gerule Chube ole. 15 Chui e suiale kwian ngle ciento y veinte nu Jesu gerua gaba kledu mo litaba ule kwian Jesu gerua ketanga gdataboko giti gdaite ole. Kwian ngle e ulita gwa giti Pedro gerudu: —Cha daballa cha ibotea Jesu giti, cha gerule ba ulita ole, boidu ulita David Chube gerua degu unsuialin gerule kare, unsuialin Chube Oña David gbu chada dege Judas-Iscariote be boi ulita giti. Judas-Iscariote kwian Jesu dollale jonlla dbanga Jesu ngwadi Jesu gai tkadale skage. 17 Judas-Iscariote ama geru jwannga Jesuge ama lle boanga Chube alin cha ulita gdataboko giti gdaite ole ule. 18 Judas-Iscariote agedu me no Jesu ole ñanale igi ketre Judas-Iscariotege, igi e giti ama dbi gigu. Bigwa ama kledu dbi e ngwadi gire ama jo chke dba chuga giti ama jegwale skiendunga jengra ulita chiu jondoi. 19 Geru chku uñale kwian toinga una Jerusalénge Judas-Iscariote boidu giti malen nga Judas-Iscariote jokeda ngwadi kwian una Jerusalénmu nga e ka gbu Acéldama, kwian israelita kwirale e gerule “Be Ngalla”. 20 Unsuialin David Chube gerua degu Judas-Iscariote be boi giti, chada e kada Salmos gerule: “Ama ngalla be chege ngwale kwian me kle toi ngwadi kare, ni kwian gdaite be toi nga ege.” Kaire chada amaña gerule: “Na be chege ama tanege lle boi ama lle bo ngeru kare.” David Chube gerua degu unsuialin ene Judas-Iscariote giti. 21 Pedro gerudu dare: —David Chube gerua degu ene malen che kwian gdaite gadale gbe Judas-Iscariote tanege. Nege aini daba gweale kle che ole ama chagedu ule che ulita ole chui gdale Chugagwalla Jesu ole Jesu kledu chage cheske aini gire. Juan-Bautista Jesu ñeu chiske suiage daba gweale kledu chage ule che ole kaire daba gweale aini gwa giti Jesu joni nga ngaña giti. Noare che daba gdaite e kare chagedu ule diali Jesu ole gai, gbeni taneke gdataboko giti gdaboke ule che ole gerule Jesu chkuni gwade giti kwian na ulita ole. 23 Pedro gerudu ene gire kwian ulita kledu mo litaba ule mo ta gbu daba boke gai, daba boke kada Matías kaire José-Barsabás (amaña kadakle Justo). 24 Kwian e boke giti Pedro gerudu Chube ole: “Cha Chugagwalla, daba boke ai talla ulita uñale bage. Daba boke ai gdaite ba gai cha ulita alin cha ulita Jesu gerua ketangale gbeni taneke. 25 Daba boke ai ba gdaite gai ene ama chege lle boi Jesu gerua ketangale cha ole Judas-Iscariote tanege. Judas-Iscariote me agedu no Jesu ole malen Judas-Iscariote me ñadu lle boi dare Chube alin, Judas-Iscariote oña jo nga ji chugangwage nga dbigu giti.” 26 Pedro gerudu ene ulita Chube ole, gire kwian ulita kle mo litaba ule ne ngwadi blachke gbu, gire onbre gdaite bai blachke be chege Jesu gerua ketangale Judas-Iscariote tanege. Onbre gdaite Matías blachku, gire Matías ole kwian Jesu gerua ketanga chkuni taneke naskuni kwian gdataboko giti gdaboke ulita.
1 Bli skute chuia ollade kada Pentecostés, chui e chku gire kwian Jesu gerua gaba ciento y veinte kledu mo litaba ule, 2 ama ulita kle geru trage alenske Jesu giti gire nga gdadu tirare mleuda tiennga kweri kare chku u gbe gdade ulita kwian Jesu gerua gaba ulita kle ngwadi. 3 Kwian e ulita giti jita kwira kare chku ama ulita gdaite gdaite giti. 4 Kwian e ulita tale Chube Oña chku gire kwian gerudu kwira nale me jwanba, Chube Oña kwian ulita ta gbu gerule kwira nale Chube Oña takalin kare. 5 E suiale kwian israelita tanre kle chage age ama enusulian unsuialin suia Chube giti gerule kare, nga ulitage una kaire kairege kwian israelita nu chieba chkeba una Jerusalénge mo lite Pentecostés chuia ollade ama kle age diali kare. 6 Kwian israelita e ulita me kle gerule salengwli kwira gdaitre alin kledu mo litabale chui ollade una Jerusalénge, ama nga gdadu tirare keruchugu gire ama ulita jo tienda nga gdadu ngwadi. Ama ulita jo chke u ege nga gdadu ngwadi gire ama ulita gdaite gdaite geru keruchugu mo kwirale, ulitage sugedu kwian ulita kle mo litaba u ege gdaite gdaite kle gerule kwira na ulitale, kwian nga ulitamuge sugedu bai kle gerule ama kwirale, ni chku uñale amage kle boi giti. 7 Kwian israelita e ulita ta me jo sugano, ama gerudu modi gdaite gdaite ulita: —Me suge chage mineade kwian e ulita ñage gerule trate che kwirale ulita. Ama ulita kwian nga Galileamu ama me kwian nga ulitamu kwira uñe. ¿Mineade ama kle gerule kwian nga ulitamu kwirale gdaite gdaite? Ama me geru jwanba che kwirale, gire ¿mineade ama ñage gerule trate che kwirale? 9 Aini che ulita nu chieba nga tanrege gerule mo kwira kaire kairere, che gweale nu chieba nga Partiage, nga Mediage, nga Elamge, nga Mesopotamiage, nga Judeage, nga Capadociage, nga Pontoge, nga Asiage, nga Frigiage, nga Panfiliage, nga Egiptoge, nga Libiage kodi una Cirenege. Kaire che gweale nu chieba una kweri Romage, nga Cretage kaire nga Arabiage. Che gweale israelita ulia chuda giti, gweale me israelita chuda giti agwa ama kwian israelita suia jun gau mo alin. Che ulitage kwian kerusuge kwian kle gerule che kwirale gdaite gdaite Chube giti, Chube kle age no che ulita alin Chube kle kwian e ulita gbe gerule no che ulita alin che kwirale —kwian gerudu ene kwian Jesu gerua gaba ulita giti. 12 Kwian e ulita ta me jo sugano kaire ni chku uñale amage kle boi giti, ama ulita geru kadu dare modi: —¿Ulita kle boi che gwa giti e gerule mine? 13 Kwian tanre gerudu ene, agwa gweale gidedu me no kwian Jesu gerua gabadi, ama gerudu kwian e giti: —Ama ulita jo llale, malen ama kle boi ene. 14 Pedro chku gdate ule kwian Jesu gerua ketanga ulita na gdataboko giti gdaite ole, gire Pedro gerudu kweri kiraske: —Cha bitalla israelita ulita bai kle toi aini una Jerusalénge kaire bai kle basale una aige, cha gerule ba ulita ole, chkedale uñale trate ba ulitage kle boi giti aini nege. Ba ulita cha keruchuge no cha be gerule giti. 15 Daba ai ulita me jo llale ba gweale kle tañachuge kare. Chui bebi nga bonga ngaña allabi, che me kle lle jai ngabebitabi. 16 Me kle boi ba kle gerule kare, aini kle boi ulita kwian Chube gerua ketanga kada Joel Chube gerua degu unsuialin kare, chada e gerule: 17 “Chube gerudu: ‘Chui bdagli ngwange cha be age ene: Cha be mo Oña kage kwian ulita giti, gire cha Oña kirallaske kwian bdadalla nabitaite mudalla nabitaite be cha gerua kete kwian nage. Kaire cha Oña be cha gerua gbe chke uñale trate kirogwa bialege gbire, kaire kwian juma be gbi chuge cha ole. 18 Kaire kwian lle boanga cha alin onbre muire giti cha be mo Oña kage ulita ama giti, chui bdagli ngwange ama ulita be cha gerua kete kwian nage. 19 Nga ngaña giti cha be lle tanre tirare gbe, e ulita be meñe kwian gwage, kaire nga dba giti be boi tirare, kwian tanre be daba gweda, lle tanre be kuge, jiangwa be chege skateda bogakwa kare nga dba giti. 20 Chui be gwajoge kaire dai be chratigenga be kare. Be boi ene ulita ngeru kwian Chugagwalla kweri chieni chuiage. Chui ege kwian Chugagwalla kweri chieni chuia ama be meñe kwian ulita gwage noare kweri. 21 Chui ege kwian ulita bai chudaboi kade Chugagwalla kwerige, Chugagwalla be kwian ene jwen siere boi tirare ulitage.’ ” Joel Chube gerua degu ene unsuialin. 22 Pedro gerudu dare kwian ulita ole: —Ba kwian israelita ulita cha keruchuge no, uñale ba ulitage Jesu una Nazaremu toidu mine ulita baske. Chube Jesu gbu ba ulita gwa giti kwian oga dodade kaire lle na daga ngwale no tanre dodade Chube kiralla giti. 23 Ba ulita gwagedu tanre Jesu agedu no ba gwa giti, agwa e giti ba me talladu. Chube bebi Jesu kage, Chubege uñadu be boi ulita nga dba ai giti Jesu ole, e ulita uñadu amage. Gire Chube Jesu kagu nga dba ai giti ba ulita alin, ba ulita Jesu ketu ama dollage gwaleda kruge kwian jiskenga kare. 24 Kwian me no Jesu guda, Chube Jesu jaba gbuni gwade. Chube Jesu jun siere chege jogebada dialige, Chube Jesu kagu nga dba ai giti jogeda kwian alin kaire chkeni gwade malen Jesu me ñadu chege jogebada diali. 25 Unsuialin Chube David ta gbu chada dege Jesu jogeda gire chkeni gwade giti, chada e gerule: “Chage diali sugedu Chube kle cha ole ule, diali ama kle chage cha ole ule, ama kle cha kira gbe kle cha chudaboi. 26 Malen diali cha tale nga suga noare kaire cha mo gate tanre no Chube giti nga suga noare ole, uñale chage Chube be cha manade no. 27 Cha be jogeda, ama mi cha jaba chuge ngwadi keugage, kaire ama mi cha jaba chuge ngwadi tuge. Cha lle boanga Chube alin cha no trate Chube gwa giti. 28 Cha be jogeda ama be cha gbeni gwade gire cha be kle diali ama ole, ama be cha ta gbe nga suga no ole.” Chube David ta gbu chada dege ene Jesu be boi giti. 29 Pedro gerudu dare: —Cha bitalla, ba cha keruchuge, cha gerule ba ole ulita che chugagwalla rey unsuialin David giti. David jokeda, jo tkabale keugage, ama dbia kle kaire cheske nege. 30 David chada degu kare suge chege David kle gerule mau giti agwa me ene. Ama daba nga dba ai giti chugagwalla ama kwian Chube gerua ketanga. Uñadu amage Chube be age ulita Chube gerudu kare. Chube gerudu no ulia ama ole Chube be David oindalla gdaite gbe kwian ulita Chugagwallale kweri. 31 David gerudu Jesu giti David kledu gwage Jesudi kare, Chube David ta gbu gerule Jesu chuia giti Jesu be boi ulita giti, David gerudu Jesucristo giti: “Ama jaba mi chege diali ogaba ngwadi kaire ama jegwale ulita mi tugeda, Chube be ama gbeni gwade.” Chube David ta gbu gerule ene Jesu giti. 32 Gire Jesu amaña chku nga dba ai giti, Jesu guleda, Chube Jesu gbuni gwade. Cha ulita chagedu modi Jesu ole ama chagedu ama boidu uñale cha ulitage, ulia boidu David chada degu unsuialin gerule kare. 33 Chube Jesu gbuni gwade gire Jesu joni nga ngaña giti ama Ñenua Chube kle ngwadi, Chube ama gbu toi dba mo ngena mo ko taingwli giti, Chube ama gbu kweri kwian nga ulitamu Chugagwallale. Gire Chube mo Oña ketu Jesuge kagadale kwian alin Chube gerudu sbali kare Jesu ole. Gire Jesu Chube Oña kagu kwian kle ama Oña manade ngwange tale, e kle boi ulita ene nege aini ba ulita gwa giti. Chube Oña kle cha ulita gbe gerule ba ulita kwirale. 34 Cha gerule dare ba ole David giti, ama chada degu Jesu giti ama me kledu chada dege mau giti, ulia David me jo nga ngaña giti agali jegwale ole, agwa Chube ama ta gbu chada dege Jesu giti, chada e gerule: “Chube gerudu cha Chugagwalla ole: ‘Toi dba cha ngena cha ko taingwli giti, chui be chke gire cha be ba gbe kirachke ba dolla ulitadi ba be chege dolla ulita Chugagwalla kweri.’ ” David chada degu ene unsuialin Jesu giti. 36 Ba kwian israelita, cha gerule ba ulita ole, sugedale trate ba ulitage, Chube Jesu gau kagu nga dba ai giti ba ulita Chugagwallale ba ulita jwanngale siere ji chugege ba agedu me no gdale, Chube Jesu kagu ba ulita alin Chube gerudu kare unsuialin, ba Jesu amaña guda kruge —Pedro gerudu ene ulita kwian ngle kledu mo litaba amadi tangle ole. 37 Kwian e ulita Pedro keruchugu gerule ulita, amage sugedu ama jiske tanre Jesu gdale gire ama ulita ta olidu tanre Pedro gerudu kare Jesu giti, ama ulita geru kadu Pedroge kaire geru kadu kwian na ulita Jesu gerua ketangage: —Cha daballa ulita, cha geru kade bage, ¿cha ulita agedale mine nege ene cha chege no trate me jiske Chube gwa giti? 38 Pedro jaindunga: —Ba ulita mo ta blitadale Chube ole mo ta gbadale Chube gai ulia ba mo ta gbadale ba kle age me no ulita chuge ngwadi, ene Chube be ba agedu me no ulita talla mlienga, ene Chube be mo Oña gbe ba tale. Kaire ba ulita mo chugale ngwadi mo ñeange chiske gdaite gdaite ulita Jesucristo kalla giti, ene be suge ba Chubenu ulia. 39 Chube be mo Oña kage Chube gerudu kare, e ba ulita alin ba kirogwalla alin kaire kwian na ulita alin, Chube kwian bai kaire gai mau alin Chube mo Oña gbe kwian ene ulita tale. 40 Pedro gerudu ene kwian ole kaire gerudu tanre dare, bdagli Pedro gerudu ama ulita ole: —Ba ulita bai ta agekalin cha gerudu kare, ba mo ta gbadale joge siere ba agedu me no ulita ngeruge kaire ba chegedale sugekare kwian agenga me no ulitage me age ama kle age kare, ba mo ta gbadale chage no Chube ole Chube takalin kare —Pedro gerudubi ene ulita. 41 Chui ege kwian ngle Pedro keruchugu gerule Jesu giti, kwian e ngle tres mil Jesu gerua gau ulia Pedro giti, kwian e ulita mo ñeangu chiske Jesu kalla giti. 42 Chui ege gwangerugu kwian ulita bai nu Jesu gerua gaba ulia mo ta gbu chage diali Chube gerua Jesu giti jwen kwian Jesu gerua ketanga gdataboko giti gdabokege, kwian Jesu gerua ketanga ulita kwian Chubenu ulita tku tangle diali Jesu geruage. Kwian Chubenu ulita kledu mo chudaboi, bai lle molen ama daba me lle molen chudabo no ulita. Kaire ama ulita kledu mo lite ule diali gerule Chube ole kaire diali ama kledu mo lite ule blire uva chia jai tachkegda Jesu jokeda giti. 43 Diali Chube kwian Jesu gerua ketanga gbu age no kwian na gwa giti ama kwian oga dodadu kaire lle na daga ngwale no tanre dodadu Chube kiralla giti, kwian tanre gwagedu Jesu gerua ketangadi age ene gire ama ulita ta me jo sugano e giti. 44 Kwian ulita Jesu gerua gau ulia ama ulita diali kledu ule ama tañachugu kwian gdaitre alin kare Jesu giti, kaire lle tanre monu ulita girabatu modi. Lle gweale monu chbadu daba na me lle molen chudaboagda, kaire lle gweale ketu daba bai me lle molenge, gweale igi ketu daba gdaite gdaitege bai me igi molen. 46 Diali chui ulita ama ulita kledu mo lite ole u gerungwa Chube olege. Kaire mo ullage ama diali kledu bligda girabate modi ulita gute ule nga suga no ole ta trate no mo tale daba na ole tachke diali Jesu jokeda giti. 47 Kwian Jesu gerua gaba kledu gerule no diali Chube giti: “Chube no no, ama cha Chugagwalla kweri, ama kle age no cha alin diali.” Kwian ulita na gwagedu kwian Chubenudi ama kwian no ulia. Chui kaire kairege Chube kwian na ta blitu Jesu gerua gai ulia, ene gire kwian na tanre mo litu ule daba Chubenu ulita ole Jesu geruadi.
1 Chui nga bonga dbige gwangerugu diali kwian israelita kle mo lite gerule Chube ole u gerungwa Chube olege. Chui gbaite chui jo chege nga bonga dbige gire Pedro jo Juan ole u gerungwa Chube olege. 2 U gerungwa Chube ole ugakalla gdaite kada Ugaka Noare, ugaka ege Pedro kaire Juan gwagedu kwian onbre seragda kwebangadi, onbre e mebanga ene seragda kwebanga soli bebitrabi unalla giti ama me ñadu chage, kwian na diali kle ama dbe kle joge ama gbe ugakage igi kade mau alin kwiange kwian bai kaire kle joge tangle gudegu u ege. 3 Kwian seragda kwebanga gwagedu Pedrodi Juandi joge tangle gudegu kodi amage u gerungwa Chube ole ugakallage gire kwian seragda kwebanga igi kadu mau alin Pedroge Juange. 4 Pedro kaire Juan gwagedu trate onbre edige, Pedro gerudu ama ole: —Gwage chadíge, cha gerukalin ba ole. 5 Gire kwian seragda kwebanga gwagedu Pedrodi Juandi, chegu manade biale igi ngwange, ama tañachugu Pedro, Juan be igi kete amage. 6 Agwa Pedro gerudu ama ole: —Cha me igi molen ketale bage, agwa cha be lle na ma no igige kete bage, cha be age no ba alin Jesucristo kiralla giti. Jesucristo una Nazaremu kiralla giti cha gerule ba ole, ¡chkede gdate, chagede! 7 Pedro gerudu ene gire Pedro onbre gau ko taingwli giti onbre chudaboale chke gdate gire sugeti onbre seragda kira gau. 8 Ama mo degu bdugu gire ama seragda chegu no trate ama chku gdate ama chagedu. Gire ama jo gudegu ule Pedro ole Juan ole agali mau seragda giti u gerungwa Chube olege. Amadi nga chegu suga noare Chube ama seragda dodadu giti, ama jo chke gwa ama skwendu ngaña nga suga no ole gerule no no Chube giti, ama gerudu: “Chube agedu no no cha alin, ama no cha ole ama cha dodadu.” 9 Kwian ulita kledu gwa mo litaba gerule Chube ole gwagedu onbredi chage no mo seragda giti kaire gerule no Chube giti, 10 kwian e ulita ta me jo sugano, kwian chegu tañachuge tanre boidu onbre ole giti. Chku uñale nate kwian ulitage onbre e amaña igi kadanga kwian nage mau alin u gerungwa Chube ole ugakalla kada Ugaka Noarege. 11 Pedro onbre seragda kwebanga dodadu Jesu kiralla giti onbre e me tadu jogekalin sugekare Pedroge ni Juange. Ama gdamainate jo ule u skada kada Salomónge u gerungwa Chube olege. Kwian ulita gwagedu onbre seragda kwebangadi chage no gire kwian ta me jo sugano tañachuge amadi Pedro ama dodadu giti, kwian ulita jo jrite jo tienda ama gdamaidige. 12 Pedro gwagedu kwian ngledi chie Pedro kle ngwadi tañachuge tanre onbre jo chkeni giti, gire Pedro gerudu ama ulita ole: —¿Mineade ba kwian israelita ulita kle chege tañachuge tanre onbre e jo chkeni giti? ¿Mineade ba kle gwage cha ulitadige tanre? ¿Ba tañachuge cha agali kiralla giti cha ama dodadu cha ama gbu chage? ¿Ba tañachuge cha alin no Chube gwage malen Chube cha chudabo ama dodade? Me ene dale ba kle tañachuge kare. Cha me onbre dodadu mo kiralla giti, agwa Jesu kiralla giti cha onbre e dodadu. 13 Chube che enusulian unsuialin Abrahamnu Isaacnu Jacobnu Chube che enusulian ulitanu amaña mo Kirolla Jesu gbu kweri kiraske. Jesu e amaña kledu lle boi nga dba ai giti Ñenua alin ba ulitaske. Ba ama ketu kwian ba chugagwalla nga dba ai gitige gwaleda. Agwa Pilato me tadu agekalin Jesu ole ba ulita tadu agekalin kare, Pilato tadu Jesu skajwennga. Gire ba ulita me tadukalin Pilato Jesu chuge ngwadi gbale. 14 Jesu no trate agwa ba me ama gau ulia, ba me tadukalin Pilato ama skajwennga, ba ulita gerudu ma no kwian daba gwangada jwen siere skage, 15 gire ba ulita Jesu chugu ngwadi gwadaleda. Jesu alin allabi giti che toi diali chui tangle, ba ulita ama guda agwa Chube ama jaba gbuni gwade naskuni. E ulia cha kle gerule kare ba ole, cha ulita gwagedu mo gwagwa giti Jesudi boi ene ulita. 16 Ba onbre seragda kwebanga ai uñe, ba ulita kle gwage amadi ama ñage chage no trate mo seragda giti. Ama mo ta gbu Jesu gai ulia, malen Jesu kiralla giti ama seragda kira gau seragda jo chkeni. Cha mo ta gbu Jesu gai ulia kaire, uñadu chage Jesu kiralla giti Jesu ñage age no ama alin. Ulia Jesu agedu no ama alin Jesu ama dodadu, ba ulita ñage gwage amadi ama ñage chage no mo seragda giti nege ba ulita gwa giti. 17 ’Cha bitalla ulita, cha gerule ba ulita ole, uñale bage ba ulita ule ba chugagwalla nga dba ai giti ole Jesu guda. Ba agedu nga jereske kare, me uñadu bage Jesu chema. 18 Chube agedu Chube gerudu kare ulita unsuialin. Kwian Chube gerua ketanga unsuialin Chube kwian e ulita ta gbu chada dege Cristo giti, Chube be Cristo kage nga dba ai giti kwian alin, agwa Cristo boadale tanre daga ngwale kwian kote. Gire boidu ulita Jesu ole Chube gerua degaba unsuialin gerule kare. 19 Jesucristo chiu nga dba ai giti ba ulita alin ama jokeda ba ulita alin malen nege ba mo ta blitadale Chube ole, ba mo ta gbadale joge siere ba kle age me no ulitage, ene Chube be ba agedu me no ulita talla mlienga, kaire ene Chube be ba ta gbe suga no diali. Chube Jesu gau Chube Jesu kagu ba ulita jwanngale siere, chui be chke gire Chube be Jesu kageni nabitaite ba ulita alin ba ulita Chugagwallale. 21 Nege Jesu kle nga ngaña giti Chube ngwadi chui e manade, chui e be chke gire Chube be lle ulita gbeni naskuni no trate nge kare ama nga dodadu kare, Chube gerudu chui e giti unsuialin kwian Chube gerua ketanga ole, gire kwian e giti geru Chubenu chku uñale kwian ulitage. 22 Moisés Chube gerua Jesu giti ketu che enusulian unsuialinge, Moisés gerudu: “Chube be kwian gdaite gbe Chube gerua ketangale ba ulitaske cha kle geru Chubenu kete ba ulitage kare. 23 Ba ama gadale dage ulita no ama gerule kare. Agwa kwian ulita bai me ama kerua gbe gdadi ama gerule kare, kwian ene be chege sugekare kwian Chubenuge.” Moisés gerudu ene che enusulian unsuialin ole. 24 ’Kaire kwian Chube gerua ketanga unsuialin kada Samuel, amage gwangerugu kwian na ulita Chube gerua ketanga gerudu salengwli ulita chui ai kle boi giti nege tangle ba ulita ole. 25 Ba ulita kwian unsuialin Chube gerua ketanga oindalla. Unsuialin Chube gerudu kwian Chube gerua ketanga e ulita ole Chube be kwian gdaite kage ama oindalla ulita alin. Kaire Chube gerudu enusulin oña unsuialin Abraham ole: “Ba oindalla gdaite giti cha be age no kwian nga ulitage alin.” Chube gerudu ene unsuialin, nege ama kle age ba ulita alin ama gerudu kare. 26 Chube Jesu kagu age no ba kwian israelita ulita alin. Jesu jo gwabada, Chube ama gbuni gwadeni, ene Jesu giti ba gdaite gdaite ulita ñage mo ta blite Chube ole joge siere ba kle age me no ulitage mo ta gbe age no Chube takalin kare alin allabi —Pedro gerudu ene ulita kwian kle mo litaba amadi tangle ole.
1 Pedro, Juan kle gerule kwian ole Jesu giti gire kwian gerunga Chube ole daba alin mneite kaire kwian u gerungwa Chube ole mananga ulita chugagwalla kaire kwian saduceo mneite, kwian e ulita chku Pedrodi Juandi. 2 Pedro, Juan kledu daba tke tangle Jesu giti, kledu gerule kwian ole Jesu chkuni gwade giti, ene chkedale uñale kwiange kwian jaba ulita be chkeni gwade Jesu jaba chkuni gwade kare. E gdale kwian chugagwalla e ulita skochiu Pedrodi Juandi, 3 malen kwian e ulita Pedro kaire Juan gau tkale skage. Nga jere gire kwian e ulita me ñadu age Pedro ole Juan ole ama takalin kare malen ama Pedro kaire Juan jigu skage nagbietege dale. 4 Agwa kwian tanre Jesu gerua keruchugu Jesu gerua gau ulia Pedro giti Juan giti, kwian Jesu gerua ganga ulita chku ngle ngle, kwian onbre alin jo teanba ulita chku cinco mil. 5 Nga chku ju gbietege gire kwian israelita chugagwalla ulita mo litu ole una Jerusalénge, 6 Anás kaire mo litu ule, ama kwian gerunga Chube ole daba alin chugagwalla ma kweri, kaire Caifás kaire Juan kaire Alejandro ama ulita kwian gerunga Chube ole daba alin chugagwalla ma kweri bitalla, ama ulita kledu eni kaire. 7 Kwian israelita chugagwalla e ulita Pedro kaire Juan kadu chie ama kle ngwadi, Pedro, Juan dbajo chke kwian chugagwalla ulita kle ngwadi. Kwian e ulita gwa giti geru kadre Pedroge Juange: —¿Chema ba gbu kwian seragda kwebanga dodade? ¿Chema kiralla giti ba kwian e dodadu? 8 Pedro gerudu Chube Oña kirallaske kwian israelita chugagwalla kweri e ulita ole: —Ba ulita kwian israelita chugagwalla, ba geru kade chage cha kwian dodadu giti ba takalin chke uñale bage cha ama dodadu mine gire ama ñadu chage. 10 Cha be gerule ba ulita gwa giti ene chke uñale trate ba ulitage kaire kwian israelita na ulitage onbre gdaite ai kle ule cha ole ba ulita gwa giti ama me ñadu chage, nege ama ñage chage, Jesucristo una Nazaremu kiralla giti ama ñage chage no nege. Jesucristo amaña ba ulita ama guda, Chube Jesucristo gbuni gwadeni. Chube gerua degaba unsuialin gerule Jesu be boi ene giti, chada e gerule: “Kwian u dodanga ke gbu gerere, ke gbaite ama mliunga, ama gerudu ke e me no dale, agwa ke e ama mliunga, ke e ma no ke na ulitage.” Chube gerua degaba unsuialin gerule ene Jesu giti, boidu ene chada e gerule kare, Jesu no Jesu kweri agwa ba ulita me ama gau dage no kweri, ba ama gau kwian ngwale kare, ba ama guda kruge, agwa Chube ama jaba gbuni gwadeni. 12 Chube Jesu kagu kwian ulita alin, Jesu giti alin allabi kwian ñage tien gitiru ji chugege age me no gdale, ni kwian na gdaite nga dba ai giti ñage kwian jwen siere ji chugege age me no gdale kwian gbe no trate Chube gwa giti —Pedro gerudu ene kwian israelita chugagwalla ulita ole. 13 Kwian israelita chugagwalla ulita gwagedu Pedrodi Juandi gerule no Jesu giti me ta kennga ole ama ngeru gerule trate ama ulita kle mo litaba gwa giti. Kwian e ulita chegu tañachuge tanre Pedrodi Juandi, ama boke me geru jwanba mineade ama ñage gerule no trate kwian geru jwanba tanre kare. E giti chku uñale kwian israelita chugagwalla ulitage Pedro kaire Juan geru jwannga Jesuge chagedu diali ule Jesu ole Jesu kledu nga dba ai giti gire. 14 Kwian seragda kwebanga Pedro nu dodaba Jesu kiralla giti kledu eni ule Pedro ole Juan ole, kwian israelita chugagwalla ulita gwagedu onbre edi ulia ama jo chkeni noni, malen kwian israelita chugagwalla me ñadu gerule Pedro dollale Juan dollale. 15 Kwian israelita chugagwalla ulita mo ta gbu Pedro, Juan kage siere sugeti ama ulita kle mo litaba ngwadige manade goga. Gire ama ulita chegu geru trage modi mo ten Pedrodi Juandi, 16 ama ulita geru tragu modi: —¿Che be age mine Pedro ole Juan ole? Uñale kwian ulitage una Jerusalénge ama kwian dodadu Jesu kiralla giti. Che me ñage gerule kwian una Jerusalénmu ole Pedro, Juan me kwian seragda kwebanga dodadu ulia, che me ñage gerule ene kwian ole. 17 Agwa che me takalin Pedro kwian dodadu giti chke nate uñale kwian na darege, kwian ulitage che me takalin kwian enege geru chke uñale, ma no che ka boi ama ole ama kwajige. Ale ama oña tke skage, ene chui aige gwangerugu ama be kwachie gerule dare daba na ole Jesu giti —ama ulita mo teun ene modi. 18 Gire kwian israelita chugagwalla ulita Pedro, Juan kadu naskuni ama ulita kledu mo litaba ngwadi gire ka bo Pedro ole Juan ole: —Cha gerule ba ole, cha ulita me takalin ba gerule kwian ole Jesu giti ni kwian tke tangle dare Jesu gerua giti. Ba chage gerule dare kwian ole Jesu giti, cha be ba tke skage Jesu gerua kete kwiange giti gdale. 19 Agwa Pedro, Juan gerudu kwian israelita chugagwalla ole: —Ba ulita tañachugadale no no mine ma no Chube gwa giti, ¿ma no cha ba ulita gadale dage age ba ulita takalin kare o ma no cha Chube gadale dage age Chube takalin kare? 20 Cha me ñage chege kamne me gerule sidri Jesu agedu no giti, cha me ñage age ene. Mo gwagwa giti cha gwagedu amadi age no ulita kaire mo ologe cha ama keruchugu gerule no ulita, e giti cha me ñage chege kamne, cha geru e ulita tragadale kwian na ole. 21 Pedro kaire Juan gerudu kwian israelita chugagwalla ulita ole ene gire chugagwalla ulita skochiu Pedrodi Juandi, gerudu: —Cha be ba tke skage. Kwian israelita chugagwalla ulita gerudu ene agwa ama me ñadu Pedro, Juan tke skage, me chku boale age mine Pedro ole ni Juan ole, kwian israelita chugagwalla ulita Pedro, Juan chugu ngwadi gbale. Kwian na ulita kledu gerule no Chube agedu giti Pedro giti Juan giti, malen kwian israelita chugagwalla me ñadu Pedro, Juan tke skage kwian israelita chugagwalla tadukalin kare age. 22 Pedro, Juan kwian seragda kwebanga dodadu Jesucristo kiralla giti, kwian ege chura ma ngle cuarentage chkeba, malen kwian tanre gerudu no Chube giti noare Chube onbre e dodadu. 23 Kwian israelita chugagwalla ulita Pedro, Juan chugu ngwadi gbale, gire Pedro, Juan jo mo lite ule daba na Jesu gerua ganga ole, Pedro, Juan geru tragu daba e ulita ole kwian israelita chugagwalla gerudu giti ulita ama ka bo Pedro ole Juan ole me gerule Jesu giti dare kwian na ole. 24 Daba Jesu gerua ganga ulita Pedro, Juan keruchugu gerule kwian israelita chugagwalla ulita agedu mine ama ole giti gire kwian Jesu gerua ganga ulita gerudu ule modi Chube ole ene: “Cha Chugagwalla Chube, ba nga dodadu ulita nga ngaña dodadu nga dba dodadu ba cha ulita dodadu ba ble jigu kaire lle ulita na kle nga ulitage ba dodadu. 25 David lle boanga ba alin unsuialin Chube, ama cha ulita enusulian, ba mo Oña gbu David tale. Ba Oña kirallaske cha enusulian David gerudu ba Kirolla be boi giti ulita nga dba ai giti, David gerudu: ‘¿Mineade kwian nga ulitamu skochie Chubedi? ¿Mineade kwian ta agekalin mo chugale ngwale Chube dollale? 26 Kwian chugagwalla una kaire kairege nga dba ai giti mo lite ule age me no Chube dollale kaire age Cristo dollale, Chube Cristo gau kagadale nga dba ai giti.’ Chube, ba David ta gbu chada dege ene unsuialin gire kle boi ene ulia nege tangle. 27 Cha gerule ba ole Chube, Herodes ule Poncio-Pilato ole mo litu una ai Jerusalénge kwian israelita ole kaire kwian me israelita ole. Jesu lle boanga no trate ba alin Chube, agwa kwian e ulita mo litu Jesu dollale agedu me no Jesu ole. Ba Jesu gau gbu kwian Chugagwalla kweri, Jesu amaña Cristo, ba ama kagu nga dba ai giti. 28 Unsuialin ba mo ta gbu age no kwian ulita alin Jesu giti, unsuialin mo kiralla giti ba mo ta gbu Jesu kage nga dba ai giti boi tanre daga ngwale kwian ama dollale kote. Kwian agedu ulita Jesu dollale ba mo ta gbu unsuialin be boi kare ulita, bage uñadu kwian be age Jesu ole kwian tadukalin kare age. 29 Cha Chugagwalla Chube, cha gerule ba ole nege, ba cha keruchuge, nege kwian kle chage age dare cha ulita Jesu gerua dbanga oña boi Jesu gerua dbe giti gdale. Cha ulita Jesu gerua dbanga kwiange cha kle mo chudaboi kade bage, ba cha ulita chudaboi, ba cha kira gbe geru Jesu giti kete kwiange ba kiralla giti ene cha me ta kennga geru kete kwian ulitage. 30 Kaire ba kira kete chage kwian oga dodade ba kiralla giti, ba cha ulita gbe age no kwianske lle daga ngwale tanre no dodade ba Kirolla no trate Jesu kiralla giti kwian ngle gwa giti. Ene nobi Chube.” 31 Kwian Jesu gerua ganga gerudubi ene Chube ole, gire nga ama ulita kle mo litaba ngwadi nga e jwliendu ulita gire kwian ulita kle mo litaba Chube Oña kiralla gau, ama ulita ta chegu kiraske gire ama me mo ta gbu kennga Chube gerua Jesu giti dbe kwian ulitage. 32 Kwian Jesu gerua ganga ulia ngle ama ulita tañachugu salengwli kaire sugedu amage ama ulita kwian gdaitre alin kare Jesu gerua giti. Ni ama gdaite mo ta gbu kibale, agwa ama ulita tañachugu lle amanu kaire daba nanu, lle ulita ama ulita alin salengwli. 33 Kwian Jesu gerua ketanga ulita chagedu mo ta gbe dare gerule ulita kira giti kwian ole Jesu chkuni gwade giti. Kwian bai geru Jesu giti gau ulia Chube agedu no tanre ama ulita alin. 34 Kwian Jesu gerua ganga ulitaske ama ulita mo ta gbu mo chudaboi, ene ama ulita lle molen toigda, bai dbi molen u molen gweale chbadu igi ketu kwian Jesu gerua ketangage girabatadale daba ulita Jesu gerua gaba ole bai me lle molen, girabatu mo kaire kaire. 36 Leví oindalla gdaite kada José agedu no daba alin bai me lle molen lle ketu kwian Jesu gerua ketangage girabate daba e ole. José medunga ngadrega bleske kada Chiprege, kwian Jesu gerua ketanga ulita José e ka na gbu ama ka jun Bernabé, ka e gerule “ama daba ta gbanga suga no”. Bernabé diali daba me lle molen chudabo, 37 Bernabé dbi molen ama dbi e chbadu, ama dbi igia ketu kwian Jesu gerua ketangage daba na me lle molen chudaboagda.
1 Kwian gdaite kada Ananías ule mo muiralla kada Safira ole dbi chbadu igia gau ketadale kwian Jesu gerua ketangage daba na chudaboagda. 2 Ananías mo muiralla ole mo ta gbu age salengwli. Ananías igi gau dbi ñanale igia gweale Ananías gau mau alin gire Ananías jo gballa igi dbi ñanalla kete kwian Jesu gerua ketangage. Ananías igi ketu gire Ananías gerudu: —Igi ai ulita cha dbi chbadu ñanalla. 3 Chku uñale Pedroge Chube Oña giti Ananías kle sole ama me kle gerule ulia, ama igi gweale gau mau alin, gire Pedro gerudu Ananías ole: —¿Mineade ba mo ta chugu ngwadi age dolla Satanás takalin kare sole Chube Oña dollale? Igi jo ketaba bage dbi ñanale gweale ba gau mau alin, ba tañachugu ba agedu skwlenre Chube gwage. 4 Dbi banu ba chbadu, dbi ñanalla e banu. Agwa ba takalin ba igi kete mangire batre, gweale chege bage, ene no. Ba me dbi ñanalla ulita ketadale chage, agwa ba me gerudu ulia cha ole igi e ulita ba me chiu dbe, ¿mineade ba gerudu cha ole ba kle igi ulita kete chage? Ba me sodu daba ole alin allabi agwa ba sodu Chube ole. Ba gerudu ba dbi ñanalla ulita ketu chage, me ene ulia. 5 Ananías Pedro keruchugu gerule ene gire blike Ananías jaba alin jo chke dba, ama jokeda sugeti ngwale. Kwian ulita kle Pedro ole Pedro keruchuge gerule Ananías ole, kwian e ulita gwagedu Ananíadi boi ene gire kwian ulita kwachiu Ananías boidu giti. Ene sugedu kwian ulitage me ñage sole Chube ole. 6 Kwian gweale biale kle ne ngwadi ama Ananías jaba bliuda jo jaba dbe ogale keugage. 7 Hora gdamai jo tangle Ananías jokedage gire Ananías muiralla jo chke Pedro kle ngwadi Ananías tane giti. Muingage me uñadu boidu mine ama ñengula Ananías ole. 8 Pedro gerudu Safira ole: —Cha geru kade bage, ¿Ananías igi ketu kwa e batre chage, e dbi ñanalla ulita? Safira jaindunga: —Ima, e dbi ñanalla ulita. 9 Pedro gerudu Safira ole: —¿Mineade ba gdabonate mo ta gbu age salengwli mo chuge Chube Oña dollale? Kwian biale jo ba ñengula jaba tke dbige keugage ama ulita chiuni e, nege ama be ba jaba dbe kaire tkale dbige keugage ule ba ñengula jaba ole. 10 Pedro gerudu ene Safira ole gire Safira jokeda blike, ama jaba jo chke dba Pedro sera ngena. Kwian onbre biale ulita bai kaire jo Ananías jaba oge ama chkuni Pedro kle ngwadi, gwagedu Safira jabadi, gire kwian biale e ulita jo Safira jaba dbe tkale dbige keugage ule ama ñengulalla ole keuga amañage. 11 Safira kaire Ananías boidu ene, geru e chku uñale kwian Jesu gerua ganga ulitage kaire kwian na ulitage chku uñale boidu Safira ole kaire Ananías ole giti, kwian ulita kwachiu tanre. 12 Kwian Jesu gerua ketanga ulita lle daga ngwale no tanre dodadu Chube kiralla giti kwian ulita gwa giti. Kwian Jesu gerua ganga ulita diali mo litu ole Jesu geruadi u skada kada Salomónge u gerungwa Chube olege. 13 Kwian na ulita me Jesu gerua gaba mo ta gbu kwian Jesu gerua ganga ulita gai dage, agwa boidu Ananías, Safira ole gdale kwian e kwachiu mo lite ule kwian Jesu gerua ganga ole. 14 Agwa chui kaire kairege kwian na ngle onbrenu muirenu Jesu gerua gau ulia gire kwian jo chke ma ngle Jesu geruadi. 15 Geru chku uñale kwian tanrege kwian Jesu gerua ketanga ulita kle lle daga ngwale no tanre dodade Chube kiralla giti, malen kwian tanre daba oga du ankwage baini Pedro be joge tangle ngwadi. Kwian jo chke daba oga dbe jon kagdage ene Pedro be joge tangle Pedro oñalla chui chrage be joge chke amadige, e giti kwian oga be joge chkeni no. 16 Una ulita kle chege kodi una Jerusalénge kwian una ege tanre chiu kwian oga tanre dbe Pedro ngwadi una Jerusalénge, kaire kwian jwligebanga dule Pedro ngwadi, kwian oga kaire kwian jwligebanga Pedro kwian ene ulita dodadu. 17 Kwian gerunga Chube ole daba alin chugagwalla gdaite ma kweri chugagwalla na ulitage, kaire kwian saduceo mneitella kle ule chugagwalla kweri e ole, ama ulita ule ta me chegu no ama ta skochiu tanre Jesu gerua ketanga ulitadi age giti. 18 Ama ulita kwian na gweale ama skatemanalla gau kagu kwian Jesu gerua ketanga gdataboko giti gdaboke kle ngwadi ama ulita dbe tkale skage. Kwian e agedu chugagwalla ama kagu age kare, ama kwian Jesu gerua ketanga ulita gau tku skage kwian agenga me no ulita tkakle skage ngwadi. 19 Kwian Jesu gerua ketanga ulita kledu skage gire lle boanga Chube alin nga ngaña giti gdaite chku ngajrege kwian skage ugakalla degenga. Ama kwian Jesu gerua ketanga ulita junnga skage, ama gerudu kwian Jesu gerua ketanga ole: 20 —Ba jogedale u gerungwa Chube olege, ba mo gbe kwian gwa giti. Ba geru Jesu giti tragadale kwian ulita ole kle mo litaba u gerungwa Chube olege. Ba geru Jesu giti tragadale no kwian ulita ole, ba geru ketadale kwiange Jesu giti ba gerudale kwian ole Jesu giti kwian chege no Chube gwa giti. 21 Kwian Jesu gerua ketanga agedu lle boanga Chube alin gerudu kare. Nagbietege ngabebitabi kwian Jesu gerua ketanga ulita jo u gerungwa Chube olege, jo chke u ege gwa gire ama kwian tku tangle Jesu gerua giti. Kaire chui e amañage ngabebitabi kwian gerunga Chube ole daba alin chugagwalla ma kweri kle ule kwian saduceo mneite ole, ama ulita kwian israelita chugagwalla juma ulita kadu mo lite ule ama ole kaire, gire ama ulita mo ta gbu biale ka boi mno nabitaite kwian Jesu gerua ketanga ulita ole, chugagwalla ulita tañachugu Jesu gerua ketanga ulita kle kaire skage. Gire chugagwalla ulita guardia u gerungwa Chube ole mananga mneite kagu gerule kwian skage mananga ole kwian skage mananga chiedale Jesu gerua ketanga ulita dbe chugagwalla ulita kle mo litabale ngwadi. 22 Guardia e ulita jo chke llani kwian skage kle ngwadi agwa kwian Jesu gerua ketanga me skwendu guardiage. Guardia ulita chiuni geru kete ama chugagwallage, 23 ama gerudu chugagwalla ole: —Kwian Jesu gerua ketanga ulita kigedu. Cha jo chke llani, kwian Jesu gerua ketanga me kle skage. Kwian skage ugakalla kle jegaba, kwian skage mananga kledu ugakage kwian skage manade ngajrege ulita. Cha jo chke llani gire kwian skage mananga ska ugakalla degunga, jo gwa kwian Jesu gerua ketanga ulita jwen cha alin, agwa ni kwian Jesu gerua ketanga gdaite skwendu, me uñale chage boidu mine. 24 Kwian gerunga Chube ole daba alin chugagwalla ma kweri kaire guardia u gerungwa Chube ole mananga ulita chugagwalla kaire kwian gerunga Chube ole daba alin ulita, kwian e ulita guardia keruchugu gerule ene gire ama ulita gerudu modige: —¿Che agedale mine kwian Jesu gerua ketanga ole gire ama mi chage dare age ulita ama kle age kare? 25 Chugagwalla ulita kle gerule ene modi ulita gire kwian gdaite chku ama ulita kle mo litaba ngwadi kwian Jesu gerua ketanga chadalla kete chugagwalla mneite ulitage, kwian e gerudu: —Ba ulita kwian Jesu gerua ketanga ulita tku skage ama kle nege u gerungwa Chube olege kwian tke tangle Jesu giti nakwaite. 26 Kwian chugagwalla ulita geru e keruchugu gire guardia u gerungwa Chube ole mananga ulita chugagwalla jo ule guardia na tanre ole kwian Jesu gerua ketanga jwen u gerungwa Chube olege. Guardia chugagwalla ule guardia ulita ole kwian Jesu gerua ketanga ulita gau du taingwli chugagwalla ulita kledu ngwadi, guardia kendunga kwian ngleadi malen ama me kira batu kwian Jesu gerua ketanga ole. Ama kira bate gire kwian ulita be guardia skie ke giti Jesu gerua ketanga kbiale. 27 Guardia chugagwalla ule guardia ulita ole jo chke kwian Jesu gerua ketanga dbe chugagwalla mneite ulita kle ngwadi gwa giti. Kwian gerunga Chube ole daba alin chugagwalla ma kweri gerudu kwian Jesu gerua ketanga ulita ole: 28 —Cha ulita gerudu ba ole ba kle geru dbe kwiange Jesu giti ba e chugadale ngwadi, ba me kwian tke tangle dare Jesu gerua giti. ¿Nege ba kledu llema boi u gerungwa Chube olege? ¿Cha keru me kle suge bage ade ba kle chage geru Jesu giti dbe gwangerugu? Ba kwian tanre tku tangle una ulita Jerusalénge Jesu giti, ma giti dare ba kle cha gbakalin jiske ba kle gerule cha ulita Jesu guda. 29 Pedro ule kwian Jesu gerua ketanga na ulita ole jaindunga: —Cha ulita kle Jesu gerua dbe, ma no cha alin cha Chube gai dage age Chube takalin kare, agwa cha me ñage age ba takalin kare cha age, cha Jesu gerua tragadale daba na ole. 30 Ba ulita Jesu guda kruge, Chube che enusulian unsuialinnu ama Jesu e amaña gbuni gwade. 31 Chube Jesu duni nga ngaña giti, Chube Jesu gbu mo ngena ko taingwli giti, Chube Jesu gbu kwian ulita Chugagwallale, Chube Jesu gbu kwian Jesu gerua gaba jwanngale siere ji chugege agedu me no gdale. Kwian israelita ulita mo ta blitadale Chube ole, ulita Jesu gerua gadale, ene Jesu ama ulita jwen siere ji chugege agedu me no gdale, ene kwian agedu me no ulita Chube talla mlienga. 32 Ulita Jesu boidu mine uñale cha ulitage kaire Chube Oñage uñale Jesu boidu mine, Chube mo Oña kete kwian ulitage bai mo ta gbe Chube gai dage age Chube takalin kare —Pedro gerudu ene kwian chugagwalla ulita ole. 33 Chugagwalla ulita Pedro keruchugu gerule ene gire ama ulita skochiu tanre Pedrodi kaire kwian na Jesu gerua ketangadi, tadu kwian Jesu gerua ketanga ulita gwakalinda. 34 Chugagwalla e ulitaske kwian gdaite kledu, kwian fariseo e kada Gamaliel, ama daba tkanga tangle Moisés chadalla giti, kwian na ulita ama gai dage. Gamaliel chku gdate ama gerudu chugagwalla na ulita ole ma no kwian Jesu gerua ketanga kage siere sugeti ama ulita kle ngwadige, kwian Jesu gerua ketanga ulita kagle siere Gamaliel gerudu kare, 35 gire Gamaliel gerudu chugagwalla na ulita ole: —Ba cha bitalla ulita israelita, che agedale ta giti kwian Jesu gerua ketanga ai ole. 36 Che tachkedale boidu mine kwian kadakle Teudas ole chuia gweale jo tanglege. Teudas gerudu mau giti no trate ama mo gbu kweri kwian chugagwale dabaske. Kwian ngle cuatrocientos chagedu Teudas nate kwian ama gerua gau ulia ama gerudu kare. Agwa Teudas guleda, gire kwian ulita chagenga Teudas nate Teudas gerua gai ama ulita chegu gballa, gire ama ulita jo kige gdaite gdaite Teudas dolla ngeru. Kwian Teudas gerua chugu ngwadi, geru ulita Teudanu bidu. 37 Ma bdagli kwian ulita mo ka gbe chada giti chuiage, chui ege kwian na kada Judas mo gbu kwian chugagwale, Judas kwian nga Galileamu. Chui ege Judas kwian ngle gau mau alin kwian ama gerua gadale ama gerule kare. Judas guleda kaire Teudas kare, gire kwian Judas gerua ganga chegu gballa, ama ulita kaire kigedu gdaite gdaite, Judas gerua bidu. 38 Cha gerule ba ulita ole, ma no ba Jesu gerua ketanga chuge ngwadi, ba me agedale me no ama ole ama kle geru dbe giti. Geru e kwian ngwale gerua alin allabi, me sbali geru e be jogenga. 39 Agwa geru e ulia Chube gerua, ba ulita mi ñage kwian kage siere geru ege. Kwian Jesu gerua ketanga e ulia Chubenu, ngwale ba kira bate ama dollale. Ba kira bate ama ole, ba be kle kira bate Chube ole. 40 Chugagwalla ulita Gamaliel keruchugu gerule ene, ama Gamaliel kerua gbu gdadi. Gire kwian chugagwalla ulita Jesu gerua ketanga ulita kaduni ama kle ngwadi gire chugagwalla kwian Jesu gerua ketanga ulita kwabatangu obere giska giti chugagwalla ulita gerudu nakwaite kwian Jesu gerua ketanga ole: —Cha gerule ba ulita ole, ba me ñage gerule dare Jesu giti. Chugagwalla ulita ka bo ene kwian Jesu gerua ketanga ole gire kwian Jesu gerua ketanga ulita skajunlenga, ama kagleni. 41 Kwian Jesu gerua ketanga ulita jo siere chugagwalla ulitage, kwian Jesu gerua ketangadi nga chiu suga no ama ulitadi, ama ulita gerudu modi: —Che alin noare Chube che ulita gbu boidale daga ngwale ene Jesu gerua giti. Chubege uñale che mi Jesu gerua mlienga mo tale, che mo ta gbe suga no diali geru Jesu giti dbe, che ulita mi ka chite gerule Jesu giti. 42 Kwian Jesu gerua ketanga ulita diali chui gdale daba tku tangle Jesu giti ulita, diali gerudu: “Jesu amaña Cristo, Chube ama kagu che Chugagwallale.” E giti kwian Jesu gerua ketanga kwian na tanre tku tangle u gerungwa Chube olege kaire ama ulita jo geru e dbe kwiange u kaire kairege.
1 E suiale gwangerugu kwian tanre Chube gerua Jesu giti gau ulia gire kwian Jesu gerua ganga chku ma ngle. Kwian israelita gerunga kwira griego gerudu me no kwian israelita gerunga kwira hebreodi kwian gerunga hebreo me kle muinga gerunga griego chegeba oli ñengulage chudaboi no muinga gerunga hebreo chudaboakle kare chui gdale no igi giti kaire lle na tanre giti. 2 Kledu boi ene kwian Jesu gerua gangaske malen kwian Jesu gerua ketanga gdataboko giti gdaboke mo litu ule kwian na Jesu gerua ganga ulita ole, kwian Jesu gerua ketanga gerudu: —Me no cha gdataboko giti gdaboke ulita Chube gerua Jesu giti kete kwiange chuge ngwadi gire chege lle na boi, lle girabate alin daba Chubenu ole. 3 Malen noare ba daba Chubenu ulita daba na gweale kle baske ba gadale gdaguke, kwian bai gakle dage, kwian ta ole kaire kwian bai Chube Oña kle ama ta gbe age Chube takalin kare, kwian ene kare ba gadale gdaguke. Cha Jesu gerua ketanga ulita daba ene kote cha lle girabate jige, ama be lle girabate ba daba Chubenu ulita ole, ama be ba daba Chubenu chudaboi lle ulita giti toigda. 4 Ene cha ulita gdataboko giti gdaboke be mo ta gbe kwian tke tangle geru Jesu gitige alin allabi, kaire cha ulita be mo ta gbe gerule Chube ole lle ulita giti kaire ba ulita giti diali ngerugu. 5 Kwian Jesu gerua ketanga gerudu ene gire kwian ulita Chubenu kledu mo litabale mo ta gbu salengwli kwian Jesu gerua ketanga gerudu kare, kwian Chubenu onbre Chubenu ai kare gau gdaguke: Esteban (ama mo ta gbe diali no Chube ole, diali Chube Oña kle ama gbe age Chube takalin kare), Felipe, Prócoro, Nicanor, Timón, Parmenas, Nicolás (ama una Antioquíamu, ama me kwian israelita agwa ama mo blitu age kwian israelita suia kare, ama kwian israelita suia gau mo alin). 6 Kwian kle mo litaba ulita daba gdaguke e gau du kaitadale kwian Jesu gerua ketangage. Gire kwian Jesu gerua ketanga ko gbu daba gdaguke e chuga giti gerudu Chube ole ama ulita giti: “Chube, nege gwangerugu ba onbre ai ulita gdaguke gbe daba chudaboangale ba kiralla giti lle girabatangale daba me lle molen ole. Ba ama kira gbe age ulita ba takalin kare Chube. Ene nobi.” 7 Chube gerua Jesu giti chagedu dare kwian ngleske, kwian ngle Jesu gerua gau ulia una Jerusalénge. Kaire kwian israelita gerunga Chube ole daba alin ngle mo ta gbu ulia Chube ole Jesu gerua gai ulia. 8 Chube agedu no Esteban alin, Chube kiralla giti Esteban lle daga ngwale no tanre dodadu kwian ulita gwa giti. 9 E suiale kwian gweale mo ta gbu kira bate kwian Jesu gerua ganga ulita ole. Kwian israelita tanre lle boanga mo chugagwalla alin kwian skage kare, chugagwalla nu ama skajwanbanga ama ulita kle mo lite u mo litangwa Chube gerua jwanngwage, kwian e ulita kira batu Esteban ole Jesu gerua gdale. Kwian skajwanbanga e ulita ule kwian gweale una Cirenemu kaire kwian gweale una Alejandríamu kwian na gweale nga kweri Ciliciamu kaire kwian nga na kweri Asiamu, kwian e ulita kledu gerule ta skochie tanre Esteban ole Esteban kle gerule giti. 10 Kwian e ulita ta skochiu tanre Estebandi Esteban kle gerule giti agwa Chube Oña Esteban gbu gerule tanre trate ta ole kwian ulita gwa giti, malen ama me ñadu age Esteban ole ama takalin kare Esteban tke skage. 11 Kwian e me kirachku Estebandi tke skage, malen ama ulita daba na gau igi kete daba ege, ene daba e igi gau ñage geru jinade Estebandi, gerule Esteban nu geruba daba e ologe me no Moisés chadalla dollale kaire Chube dollale. 12 Geru jinadre ngwale ene Estebandi giti, kwian ulita mo ta gbu skochie Estebandi, kwian tañachugu Esteban gerudu ene ulia Moisés chadalla dollale kaire Chube dollale. Gire kwian israelita chugagwalla juma kaire kwian daba tkanga tangle Moisés chadalla giti, kwian e ulita Esteban tku mo kaskwada Esteban gau Esteban du kwian israelita chugagwalla kweri ulita gwa giti Esteban gbale jiske. 13 Kaire ma giti dare kwian daba tkanga tangle Moisés chadalla giti kaire kwian israelita chugagwalla juma kwian na gau gerule ngwale Esteban dollale, kwian e gerudu: —Onbre e kada Esteban kle gerule me no diali u gerungwa Chube ole dollale kaire Moisés chadalla dollale. 14 Kwian gerunga ngwale e gerudu dare Esteban dollale: —Cha Esteban keruchugu gerule Jesu una Nazaremu giti Jesu be u gerungwa Chube ole skiendba kaire Jesu be Moisés nu Chube gerua degaba unsuialin blite, ene che me agedale geru e kle gerule kare. 15 Kwian israelita chugagwalla ulita kaire kwian na ngle kledu toiba dba kwian gerunga ngwale keruchuge gerule Estebandi, gire kwian e ulita gwagedu Estebandi Esteban gwa chegu chrachietranga lle boanga Chube alin nga ngaña giti gwa kare.
1 Kwian gerunga Chube ole daba alin chugagwalla ma kweri geru kadu Estebange: —¿Ulia ba gerudu kwian ba gbanga jiske kle gerule kare? 2 Gire Esteban gerudu: —Cha me gerudu u gerungwa Chube ole dollale ni Chube dollale ama kle gerule kare. Nege ba cha bitalla ulita ole cha be gerule Chube agedu mine che enusulian unsuialin ole. Che Chubea no kweri, ama chku gerule che enusulian oña Abraham ole Abraham kledu nga Mesopotamiage gire. Abraham bebi joge toi una kada Haránge, 3 gire Chube gerudu ama ole: “Nga ba kle ngwadi aini ba chuge ngwadi ba mo bitalla chuge ngwadi, ba jogedale nga nage, cha be nga kaite bage toingwa.” 4 ’Abraham agedu Chube gerudu kare. Ama jo siere nga Caldeage nga e chege nga Mesopotamiage, gire Abraham jo ule ñenua ole toi una kada Haránge. Una Haránge Abraham ñenua jokeda gire Chube jon kaitu Abrahamge Abraham chagedu nga ai ngnagu, Abraham chku aini nga aige, nege che ama oindalla ulita kle toi nga aige. 5 Chube nga ai kaitu Abrahamge toingwa Abraham bebi kirogwa molen gire, Chube nga ai kaitu ene Abrahamge agwa Abraham me chegu toi jwire nga aige. Abraham toidu sugeti nga aige gire Chube Abraham kagu joge toi nga nage, agwa Chube gerudu Chube be nga ai kete Abraham oindallage toingwa. 6 Chube gerudu dare Abraham ole Abraham oindalla giti: “Ba oindalla be toi nga nage me ba jwiage, ba oindalla be chege lle boangale kwian na alin ngwale kwian skage kare, kwian na me ba bitalla be age me no ba oindalla ole ama takalin kare chura ngle cuatrocientos.” 7 Kaire Chube gerudu Abraham ole: “Kwian nga emu be ba oindalla ulita kage lle boi mno be ama gbe boi tanre daga ngwale, cha be ji gbe kwian e alin ama agedu me no ba oindalla ole gdale. Cha be ba oindalla jwen siere kwian me noge gire ba oindalla be chie nga aige be gerule no cha giti aini be mo lite cha geruadi.” Chube gerudu ene Abraham ole Abraham oindalla giti. 8 Esteban gerudu dare kwian israelita chugagwalla ole Abraham giti: —Kaire Chube gerudu Abraham ole: “Ba agedale cha gerule kare.” Gire Chube Abraham gbu mo kwara tkangenga sidri, ene chke uñale kwian na ulitage ama kwian Chubenu. Malen Abraham kirolla Isaac kledu bebitra, chui gbapa chkeba kirolla solige, Abraham mo kirolla kwara tkunga sidri. Isaac jo juma Isaac agedu kaire mo kirolla Jacob ole. Jacob jo juma Jacob agedu kaire mo kirolla gdataboko giti gdaboke ulita ole, Jacob kirolla e gdataboko giti gdaboke ama ulita kwian israelita mne gdataboko giti gdaboke chugagwalla unsuialin. 9 ’Jacob kirolla ulita gdataboko giti gdaboke e ulita che enusulian unsuialin. Jacob ma no mo kirolla José ole kirolla na ulita olege, e giti José daballa ulita semadu José ole. Malen José daballa ulita José chbadu kwiange kwian e José du nga Egiptoge, kwian José chbadu kwian nga Egiptomuge, José daballa agedu ene José ole, agwa Chube kledu José ole José manade, 10 Chube José jun siere boi ulita daga ngwalege. Chube ta ngle ketu Josége kaire Chube José chudabo, ene kwian nga Egiptomu chugagwalla kada Faraón mo ta du no José ole, sugedu Faraónge José kwian no ta molen tanre malen Faraón José gbu lle boi mo tanege Faraón kare daba chugagwalla kweri nga Egiptoge u kweri Faraón kle lle boi ngwadige. 11 ’E suiale bli chuge kweri chuia chku, kwian ngle boidu daga ngwale bli chuge suiale nga ulita kweri Egiptoge, kaire nga Canaánge che enusulian unsuialin me chegu bligda molen gutadale. 12 Jacobge chku uñale nga kweri Egiptoge trigo gweale kle gigadale gire Jacob mo kirolla gdataboko kagu nga Egiptoge trigo gige gutadale. 13 Chui jo sbali trigo e ulita bidegu gire Jacob mo kirolla kagu nga Egiptoge nabitaite trigo na gige, gire José mo kaitu daballa ulitage, ene José daballa ulita chku José uñe José ama ulita daballanu, kaire Faraónge chku uñale José kwian mine bitalla. 14 José mo kaitu nate ene daballage gire José gerudu daballa ole ñenua giti bitalla ulita giti, José gerudu: “Ba chie che bitalla ulita dbe aini nga Egiptoge.” Ama bitalla ulita ngle kwian setenta y cinco. 15 José giti Jacob ule Jacob kirolla ole Jacob bdadalla ulita ole jo toi nga Egiptoge. Eni che enusulian unsuialin e ulita chegu toi nga Egiptoge, Jacob jokeda nga ege. Sbali Jacob kirolla Jacob bdadalla ulita toidu nga ege kaire ama ulita jokeda eni, ama ulita jaba duleni naskuni mo jwiage nga Siquemge, nga Siquemge ama jaba ulita ogle keugage, keuga e Abraham gigabale sbali igi ngle giti kwian kada Hamor kirollage. 17 Esteban gerudu dare kwian ole Chube agedu giti kwian israelita enusulian unsuialin ole, Esteban gerudu: —Chura tanre jo tangle gire chura ngle cuatrocientos chegu kodi be boi Chube gerudu kare Abraham ole. Kwian israelita Jacob oindalla jrienduda ngle ngle nga Egiptoge. 18 E suiale chugagwalla na chegu kwian nga Egiptomu chugagwalla, chugagwalla e me José uñu me uñadu amage José agedu no giti kwian nga Egiptomu alin. 19 Chugagwalla e agedu me no me no che bitalla unsuialin ulita ole, chugagwalla gerudu che bitalla ole che bitalla kirogwa onbre bebitra amanu ulita chugadale ngwadi jogeda. 20 E suiale Moisés medunga bebitra kote, Chube no kirogwa soli e ole kirogwa medu no Chube gwage. Kirogwa ñenua ule chebia ole kirogwa soli manadu skwlenre dai gdamai mo ullage, me ama chugu ngwadi jogeda chugagwalla gerudu kare. 21 Chebia ñenua me ñadu kirogwa manade dare skwlenre gwa malen chebia ule ñenua ole lle ski kare dodadu no kejre, ski e tadi ama kirogwa soli gbu gire tku chiga giti chugu ngwadi chigage. Chugagwalla Faraón jian tendu ski edi, ama ski jwanngu kedagu gire kirogwa soli skwendu ski tadi. Faraón jian kirogwa soli e du mo ullage, ama kirogwa soli e manadu no no mo kirolla kare. 22 Moisés tigedu, jo kweritra, Moisés jo tkaba tangle lle ulita giti kwian Egiptomu kle geru jwen kare. Geru jun ene, jo juma ama gerudu no ta ole kaire ama agedu no ta ole, kwian ulita ama keruchugu, kwian ama keru gau dage. Moisés tigedu sugekare bitalla israelita ulitage. 23 Moisés medunga churalla cuarenta chku Moisége gire Moisés mo ta gbu joge basale bitalla kwian israelitadi, kwian israelita oindalla e ulita Moisés bitalla. 24 Moisés jo chke mo bitallaske gire gwagedu kwian nga Egiptomu gdaite kle age me no kle kira bate kwian israelita gdaite ole. Moisés gwagedu kwian kle kira batedi gire Moisés jo ama gitigu daba israelita chudaboi. Moisés kwian Egiptomu guda mo bitalla israelita gdale. 25 Age ene giti Moisés tañachugu ama bitalla israelita be tachke Moisés giti Chube Moisés kagu kwian israelita ulita jwen siere kwian Egiptomuge. Agwa ama bitalla ulita israelita me tachku Moisés agedu giti me sugedu bitallage Moisés kledu age no ama ulita alin. 26 Nagbietege Moisés jo chage mo bitalla israelitaske gire kwian israelita gdaboke skwendu Moisége kira bate modi. Moisés gwagedu kwian israelita boke kle kira bate, Moisés jo ama gitigu, Moisés tadukalin daba boke gbe siere taingwli dabage, Moisés me takalin ama kira bate dare modi, malen Moisés gerudu kira batanga boke ole: “Ba cha keruchuge, ba kle kira bate mo daballa ole, ¿mineade ba kle mo bate ongoru ongoru? Me no mo bate mo bitallanu ole.” 27 Moisés gerudu ene gire ama kle mo bate modi gdaite Moisés mliunga gwasieru jondoi, ama gerudu Moisége: “¿Chema ba gbu cha chugagwallale gerule cha boke ole chema jiske chema me jiske? 28 ¿Ba kle tañachuge ba ñage cha gweda ba kwian Egiptomu guda beigliga kare?” 29 Kwian kle mo bate modi gdaite gerudu ene Moisés ole, Moisés ama keruchugu, Moisés kendunga, ama tañachugu ni kwian gdaitege chku uñale ama agedu giti kwian nga Egiptomu ole, malen Moisés kigedu Moisés jo nga kada Madiánge. Nga Madiánge Moisés toidu ne ngwadi kwian me ama bitallaske. Eni Moisés mo jun, Moisés muingalla kirogwa onbre manadu boke. 30 Esteban gerudu dare Moisés giti kwian israelita chugagwalla ulita ole: —Moisés chegu toi nga Madiánge chura cuarenta. Chura e ulita jo tangle gire chui gbaite Moisés jo chage nga gballage kwian me kle toi ngwadi kodi jwichuga Sinaíge. Eni Moisés gwagedu gli bugdudi kuge agwa gli e me su kuge jita kote, gli chegu no jitaske, lle boanga Chube alin nga ngaña giti gdaite medu jita gwadeririske. 31 Moisés chegu tañachuge tanre gwage jita gwaderiridige gire Moisés jo ma kodi tienda no jitadige. Moisés Chube kerua keruchugu gerule Moisés ole: 32 “Cha ba enusulian unsuialin Abraham Chubea kaire Isaac Chubea kaire Jacob Chubea, ai cha amaña.” Chube gerudu ene Moisés ole gire Moisés jo jirenga trate jegwale chru ole, Moisés me tadu gwagekalin dare jita gwaderiridige. 33 Gire Chube gerudu Moisés ole: “Zapato jwennga mo serage, ba cha gai dage. Ba kle nga aige cha kle ngwadi, nga no trate, cha ba Chubea no trate kle aini nga aige.” 34 Chube gerudu dare Moisés ole: “Moisés, cha gwage kwian chanudi kle nga Egiptoge, ama ulita kle boi daga ngwale kwian nga Egiptomu kote. Ama kle sui jwennga chadi ama kagakle lle mno boi chui gdale, ama ulita ta jogekalin siere kwian ege. Diali cha ama keruchuge ene, malen cha chku aini nga dba ai giti ama jwen siere boi daga ngwalege. Cha gerule ba ole, ba cha keruchuge no Moisés, cha be ba kage nga Egiptoge kwian chanu ulita jwen siere kwian nga Egiptomuge.” Chube gerudu ulita ene Moisés ole. 35 ’Moisés amaña ole kwian israelita kira batanga ka boabale ene: “¿Chema ba gbu cha chugagwallale gerule cha boke ole chema jiske chema me jiske?” Kwian kira batanga boke e me tadu mo chugakalin ngwadi mo gbe siere taingwli Moisége gire Moisés kigedu. Gire Chube Moisés amaña gau, kaguni naskuni kwian israelita chugagwale kwian israelita ulita jwanngale siere kwian nga Egiptomuge. Jita gwaderiri gli bugduske Moisés gwagedu lle boanga Chube alindige, lle boanga e amaña jo Moisés chudaboi kwian israelita jwen siere nga Egiptoge. 36 Nga Egiptoge Moisés lle daga ngwale no tanre dodadu Chube kiralla giti kwian ulita gwa giti, ene Moisés kwian israelita ulita jun siere nga Egiptoge, kwian israelita e che enusulian unsuialin. Moisés kwian israelita ulita du siere nga Egiptoge, jo chke ble kada Mar Rojoge, eni Moisés lle daga ngwale no na dodadu Chube kiralla giti ene kwian israelita ulita jo tangle no ble ege. Kaire kwian israelita ulita chagedu nga gballage kwian me kle toi ngwadi chura cuarenta, kaire ne ngwadi Moisés lle daga ngwale no tanre dodadu Chube kiralla giti. 37 Chube Moisés ta gbu gerule kwian israelita ulita ole, Moisés gerudu: “Ba bitalla giti Chube be kwian na gdaite gbe baske geru Chubenu kete ba bitalla ulitage cha kle geru Chubenu kete ba ulitage kare.” 38 Moisés amaña kledu kwian israelita ulita ole nga gballage gire lle boanga Chube alin nga ngaña giti geru ketu Moisége jwichuga Sinaíge. Geru e Moisés ketu che enusulian unsuialin ulitage, Chube gerudu Moisés ole gire Moisés geru e degu kwian ulita toidale mine Chube gwa giti, ene geru e amaña chegu kaire che ulita alin nege tangle. 39 ’Che enusulian unsuialin ulita me Moisés gau dage no mo chugagwallale, ama ulita tañachugu ma no jogeni naskuni nga Egiptoge. 40 Chube kledu gerule Moisés ole jwichuga Sinaí giti, gire kwian israelita ulita gerudu Moisés dollale Moisés daballa Aarón ole: “Me uñale cha ulitage nege Moisés boidu mine, ama kle baini, ama che ulita jun siere nga Egiptoge agwa nege ama kle che ulita chuge ngwadi gballa aini. Malen cha ulita takalin ba lle oña dodade chubere cha ulita alin cha chudaboangale cha jonlla dbangale naskuni nga Egiptoge.” 41 Kwian gerudu ene Aarón ole gire Aarón agedu kwian gerudu kare ama ole. Aarón lle oña dodadu chbi ñenua soli kare, gire kwian ulita bda guda chbi soli oña gwangnagu salengwli ama agedu ngeru Chube alin kare. Gire kwian ulita chbi soli oña chuia olladu, lle oña e kwian dodadu agali mo kodi ama tañachuge lle oña e no be ama ulita chudaboi, ama lle oña e gau dage mo chubeale. 42 Kwian ulita lle oña ngwale e gau mo chubeale malen Chube ulia chegu sugekare kwian ege, Chube kwian chugu ngwadi age kwian takalin kare, gire kwian ulita beu nga ngaña giti gau kaire chubere. Kwian Chube gerua ketanga dabage kada Amós Chube gerua degu kwian ta chegu sugekare Chubege giti, chada e gerule ene: “Chube gerudu: ‘Ba kwian israelita ulita, ba ulita kledu chage nga gballage chura cuarenta, ba ulita me agedu cha gerudu kare. Ba kledu nga gballage ba me bda guda cha alin cha tadukalin kare, ba ulita me tañachugu cha giti. 43 Agwa ba ulita tale ba agedu ba tadukalin kare. Ba lle oña ngwale kada Moloc gau chubere, ba u soli dodadu Moloc alin, ba chagedu u e dbe ba chubea Moloc ole llagli. Kaire ba beu gbaite kada Refán gau mo chubeale, ba Refán oña dodadu, ba chagedu oña e dbe kaire. Kaire lle oña na tanre ba ulita dodadu mo kodi ba gau mo chubeale ba gerudu no ama giti. Malen e gdale cha be ba ulita kage bate nga me ba jwiage ma bate nga Babiloniage, kwian nga namu be ba tke skage nga ege.’ ” Chube Amós gbu chada dege ene unsuialin che enusulian unsuialin ulita giti. 44 Esteban gerudu dare kwian ole Chube agedu giti kwian israelita enusulian unsuialin ole, Esteban gerudu: —Che enusulian oña unsuialin tangle bda kwara ulla dodadu nga gballage Chube gerudu kare. Chube u oña kaitu Moisége kare kaire Moisés bda kwara ulla dodangu. Che enusulian oña unsuialin tangle diali chagedu bda kwara ulla e ole u e gerungwa Chube ole. 45 Che enusulian ngeru ulita jokeda kaire enusulian chugagwalla Moisés jokeda gire che enusulian na chegu bda kwara ulla mauñale. E suiale Josué chegu Moisés tanege kwian israelita chugagwallale. Josué chiu ule kwian israelita ulita ole nga ai Canaánge gire chiu bda kwara ulla gerungwa Chube ole dbe mo ole llagli. Chube kirallaske Josué ule kwian israelita ulita ole kwian nga Canaánmu kagu jondoi ulita, gire dbi chegu che enusulian unsuialin ulita alin toingwa. Ege gwangerugu kwian chegu gerule Chube ole bda kwara ulla gerungwa Chube olege, u e jagedu ene ñadu chugagwalla rey David suiage tangle. 46 Chube no David ole Chube agedu no David alin. David tadu u jagere dodakalin Chube alin Chube amaña Jacob Chubea kaire Jacob oindalla Chubea. 47 Chube me David chugu ngwadi u jagere dodade agwa David kirolla kada Salomón u dodadu Chube alin. 48 Chube kweri nga ngaña giti me kle toi u kwian kle dodadege, u ege Chube me kle toi. Chube kwian Chube gerua ketanga kada Isaías gbu chada dege unsuialin e giti, chada e gerule: 49 “Che chugagwalla Chube gerudu ene: ‘Nga ngaña giti cha toingwalla dba kare, nga dba giti e cha sera gbangwa kare. ¿Ba be u dodade mine cha alin? ¿Ba be u gbe baini cha alin cha be toige? ¿Baini ba be nga gai undegangwa cha alin? Cha me kle toi gwa kwian kle u dodadege. 50 Cha agali lle ulita dodadu nga ulita dodadu cha toingwalla, cha me kle toi uge kwian kle toi kare.’ ” Isaías chada degu ene unsuialin tangle Chube giti. 51 Esteban gerudu dare kwian israelita chugagwalla ulita ole: —Ba ulita diali agekalin ba takalin kare. Ba me kle age Chube alin Chube gerule kare, ba kle age salengwli kwian me israelita me Chubenu kle age kare. Ba me olo gbakalin Chube gerua keruchuge. Ba kle mo ta gbe sugekare Chubege, ba ulita tañachuge ba kle Chube gai ulia agwa ba me kle Chube gai ulia Chube takalin kare. Diali ba kle mo ta gbe Chube Oña dollale salengwli che ulita enusulian oña unsuialin tangle mo chuga gbu mno kare, ama me mo ta gbu age Chube gerudu kare. 52 Che enusulian unsuialin agedu me no daga ngwale kwian ulita Chube gerua ketanga ole. Kwian Chube gerua ketanga gerudu che enusulian unsuialin ole: “Kwian gdaite no trate be chie bdagli”, gerudu ene unsuialin che enusulian ole. Nege kwian gdaite chku jo geruba unsuialin kare, gire ba ulita ama tku mo gdeage, ba ulita ama guda. 53 Unsuialin lle boanga Chube alin nga ngaña giti Chube gerua ketu Moisége che enusulian ulita alin kaire che enusulian oindalla ulita alin. Che enusulian ulita me geru e gau dage kaire nege ba ulita me Chube gakalin dage ni ba kle Chube gerua degaba unsuialin gai dage Chube geru gbu kare Moisés giti. Ba kle gerule me no chadi, ba kle gerule cha gerudu Moisés chadalla dollale, ba kle gerule ene chadi agwa ba amaña me kle Moisés chadalla gai dage —Esteban gerudubi ene ulita kwian israelita chugagwalla ulita ole. 54 Kwian israelita chugagwalla ulita Esteban keruchugu gerule ene gire kwian israelita chugagwalla ulita skochiu jabale tanre Estebandi. 55 Agwa Esteban ole Chube Oña kledu, Chube Oña kirallaske Esteban gwagedu nga ngaña giti, tendu Chube chralladi gire Jesu kledu jagebanga gdate Chube chrallaske Chube ko taingwli giti. 56 Esteban gwagedu Jesudi ene gire Esteban gerudu kwian ulita ole: —¡Gwagede nga ngaña giti! Cha ten nga ngañadi nga kle degabanga. ¡Gwagede Chube Kirolladi! Ama chku nga dba ai giti kwian kare amaña kle nga ngaña giti Chube ngena Chube ko taingwli giti. 57 Esteban gerudu ene gire kwian ulita ko gatu mo olo giti ama me tadu Esteban keruchugakalin dare. Kaire kwian ulita ngautu kweri, kwian Esteban dollale jo ulita Esteban ngnagu Esteban gau. 58 Kwian Esteban du siere unage gwadaleda, jo ama dbe nga kwian me kle toi ngwadige. Ne ngwadi Esteban dolla geru ulita jinanga ngwale Esteban dollale ama ñometra ngañaru amanu junnga modi ketu kwian kada Sauloge manadale, gire Esteban dolla ulita Esteban skiu ke giti. 59 Esteban dolla kledu Esteban skie ke giti, gire Esteban gerudu Jesu ole: “Cha Chugagwalla Jesu, nege nege cha be jogeda cha mo oña jige ba kote, ba cha oña gai ngwange no nga ngaña giti.” 60 Esteban dolla me chegu ta chuge Estebandi skie ke giti, gire Esteban toidu dba jongnagwa giti, Esteban gerudu kweri Jesu ole: “Cha Chugagwalla Jesu, kwian kle age me no cha ole ai ba gwa giti, cha takalin ama kle age giti ba me tallade, ba me ama gbe jiske cha gdale.” Esteban gerudu ene Jesu ole gire Esteban jokeda.
1 Saulo kledu ule gwage Esteban dolladi Esteban gweda, Saulo alin no kwian Esteban guda. Kwian gweale bai Chube gai dage bai no Chube ole, kwian ene Esteban jaba ogo kaire kwian tanre talla chegu dage olire Esteban nate. Esteban guleda chuia gwangerugu kwian me Jesu gerua ganga agedu tanre me no kwian Jesu gerua ganga dollale Jesu gerua giti una Jerusalénge, malen kwian ulita Jesu gerua ganga kigedu dolla ngeru, gweale jo toi una tanrege nga Judeage, na jo toi una tanrege nga Samariage, kwian Jesu gerua ketanga gdataboko giti gdaboke, ama alin chegu una Jerusalénge. 3 Saulo chagedu kwian Chubenu Jesu gerua ganga ulita nate gadale, ama jo u kaire kairege kwian Chubenu muirenu onbrenu gai lugeda tkadale skage. 4 Kwian Jesu gerua ganga ulita una Jerusalénge kigedu jo nga nage, ama Jesu gerua ketu kwiange nga baini kaire ama jo chke ngwadi chagedu geru Jesu giti trage kwian ole. 5 Felipe kigedu gire ama mo ta gbu joge una Samariage, ama jo chke una ege ama gerudu kwian una emu ole Cristo giti, 6 kaire una Samariage Felipe lle daga ngwale no tanre dodadu Chube kiralla giti. Kwian una Samariamu gwagedu Felipedi age ene kaire ama Felipe keruchugu gerule Cristo giti gire ama ulita mo ta gbu Felipe gerua Cristo giti gbe gdadi. 7 Felipe lle daga ngwale no ai kare dodadu una ege: Kwian tanre jwligebanga dolla kote Felipe kwian ene dodadu, Felipe gerudu dolla ole Jesu kalla giti gire dolla jo siere kwiange ngwanenga sugekare kwiange. Kaire kwian tanre oga skliebadba trate jegwale kaire kwian seragda kwebanga, Felipe kwian e ulita dodadu Chube kiralla giti. 8 Felipe kwian tanre oga dodadu ene Chube kiralla giti gire e giti kwian ulita una Samariamu nga du suga no no Chube giti gerudu no Chube giti. 9 Kwian gdaite kledu una Samariage kada Simón ama ta me no gbaboke molen, ama agedu tanre dolla Satanás kiralla giti kwian ulita gwa giti, kwian ulita una ege mo anblitangu Simónge. Simón mo gbu kwian agenga kweri kiraske kwian na ulita gwa giti. 10 Kwian una emu ulita kirogwanu kwian jumanu ulita olo gbu no Simónge Simón gerule giti kaire Simón age ama gwa giti, ama ulita e gbu gdadi, kwian gerudu Simón giti: —Kwian e agenga no Chube kirallaske. 11 Kwian ulita Simón gau dage kwian kweri ulia kare, dolla kiralla giti Simón kwian anblitu tanre chura ngle. 12 Felipe geru no ulita Jesucristo giti tragu kwian ole, Felipe geru ketu kwiange kwian bai mo ta gbe Jesucristo gai ulia mo Chugagwallale kwian ene chege Chubenu. Kwian tanre Felipe keruchugu geru ene Jesucristo giti trage, kwian geru Jesucristo giti gau ulia gire ama ulita kwian muirenu kwian onbrenu mo ñeangu chiske Jesu kalla giti, ene chke uñale kwian nage kwian e Jesucristo gau ulia. 13 Simón amaña kwian ulita anblitanga ama kaire Jesucristo gerua gau ulia, gire ama mo ñeangu chiske Jesucristo kalla giti. Gire Simón chagedu Felipe gatedi, Simón gwa giti Felipe lle daga ngwale no tanre dodadu Chube kiralla giti, Simón ta me jo sugano Felipedi age ene Chube kiralla giti. 14 Kwian Jesu gerua ketanga gdataboko giti gdaboke chegu una Jerusalénge amage chku uñale kwian una Samariamu tanre geru Jesu giti gau ulia. Gire kwian Jesu gerua ketanga gdataboko giti gdaboke daba gdaboke gau kagu una Samariage, Pedro kaire Juan jo una Samariage kwian Jesu gerua gaba ta gbe kiraske Jesu giti. 15 Kwian tanre una Samariage Jesu gerua gaba ulia agwa Chube Oña bebi joge chke kwian e ulita tale. Ama geru Jesu giti gau kaire mo ñeangu chiske Chugagwalla Jesu kalla giti, gire Pedro kaire Juan kagle daba Chubenu una Samariamu chudaboi. Pedro, Juan jo chke kwian Jesu gerua gangaske una Samariage gire ama boke ko gbu kwian e chuga giti gdaite gdaite ulita, gerudu Chube ole kwian e giti: “Chube, daba ai ulita Jesu gerua gaba ulia, ba mo Oña kete amage gdaite gdaite ama ulita kira gbangale.” Pedro, Juan gerudu ene Chube ole gire Chube Oña chku kwian Jesu gerua gaba e ulita tale. 18 Simón gwagedu Pedrodi Juandi age ene gire chku uñale Simónge Chube Oña chku kwian Jesu gerua gaba ulita tale, Simón gerudu Pedro ole Juan ole: —Kira ba kle age giti ba e chbade chage cha igi kete bage kira e ñanale, cha kira gai ene cha ko gbe kwian giti ba kle age kare ene Chube Oña ñage chke kaire kwian tale cha giti. 20 Pedro gerudu Simón ole: —Ba ule ba igia ole, joga nga dbigu giti nga ji chugangwage sugekare Chubege. Ba kle tañachuge Chube kiralla gige igire giti, cha gerule ba ole ba me kle tañachuge no, ba talla kle sugekare Chubege. Chube mo kiralla kete kwian bai kairege ama takalin mo kiralla kete, e che me ñage gige igire. 21 Ba me ñage e gige ba kle tañachuge kare, igi giti ba me ñage kira gai lle boi Chube alin. Ba ta me trate Chube ole. 22 Ba ta me no ba kle tañachuge kare ba mlienga nege blike, ba mo ta blite Chube ole ba gerule blike Chube ole mo chudaboi, ene Chube be ba tañachugu age me no talla mlienga, ene ba chege no Chube gwage. Chke uñale chage age me no tanre talla kle ba tale, ba ta agekalin cha kle age kare, agwa ba me ñage malen ba kle tañachuge me no chadi, ene ba me ñage tañachuge no ni ba be ñage age no Chube alin, Chube ji gbe kweri ta ene gdale. 24 Simón geru e keruchugu gire gerudu mo giti: —Cha takalin ba boke gerule cha giti Chube ole, cha me ta boikalin ba gerudu kare cha ole —Simón gerudu ene Pedro ole Juan ole. 25 Pedro kaire Juan gerudu kwian una Samariamu ulita ole: —Chube kle age no cha alin, ama kle kira kete chage ene cha ñage age Chube takalin kare ba ulita alin. Pedro, Juan gerudu tanre ene kare kwian una Samariamu ole, kaire ama Chube gerua Jesu giti ketu ulita kwian una emuge. Gire Pedro kaire Juan joni una Jerusalén ngnagu, ama chagedu gerule no Jesu giti kwian ole una tanrege nga kweri Samariage. 26 Boidu ene ulita una Samariage gire lle boanga Chube alin nga ngaña giti gdaite gerudu Felipe ole: “Mo gbe biale, joga jon una Jerusalénge kle joge una Gazage jegwale. Jon e joge nga gballaske tangle.” 27 Felipe lle boanga Chube alin nga ngaña giti kerua keruchugu gire Felipe mo gbu biale, ama jo jon jegwale lle boanga Chube alin gerudu kare. Jon e jegwale Felipe tendu kwian gdaite nga Etiopíamu ngwange. Kwian onbre e lle boanga gobierno nga Etiopíage alin, ama kwian igi oganga muinga kada Candace alin, muinga e kwian chugagwalla nga Etiopíamu. Kwian onbre e jogeba una Jerusalénge gerule no Chube giti kwian israelita ulita kle age kare. 28 Kwian onbre e kle jogeni nga ama jwia ngnaguge lle carrole lugaba jadige giti, ama kledu toiba dba lle carrole tadi Chube gerua degaba batenga, kwian Chube gerua ketanga kada Isaías nu geru e degaba unsuialin. 29 Gire Chube Oña gerudu Felipe ole: “Joga kodi lle carrole edi.” 30 Felipe jo jrite jo chke lle carroledige gire Felipe kwian nga Etiopíamu keruchugu Chube gerua Isaías nu degaba batenga, Felipe geru kadu kwian ege: —¿Ba kle chada e batenga, geru e suge bage? 31 Kwian nga Etiopíamu jaindunga: —¿Chada ai be suge mine chage kwian me geru trennga chage chada ai giti? Bai cha ole, ale ule lle carrolege. 32 Kwian nga Etiopíamu kle Chube gerua degaba unsuialin batenga, chada e gerule: “Ama dule nga kwian gwangwage bda cordero dbakle bda gwangwage kare. Ama chegu kamne kwian ama gwangada ngeru, ama me nga talladu mo giti ama chegu ngwedi bda oveja soli chege ngwedi kare kwian ama boligda gite gire. 33 Kwian ama gau kwian ngwale kare agedu tanre me no ama ole ama ibu gbagda. Ama no trate agwa kwian ama dollale ama gbu jiske kwian agenga me no kare. Ni kwian gdaite ñage gerule ama olia giti, ama olia me, bdagli ama guleda gballa.” 34 Chube gerua degaba unsuialin gerule ene, geru e giti kwian nga Etiopíamu geru kadu Felipege: —Gerule cha ole, ¿Isaías chada ai jigu degaba kle gerule mau giti o kle gerule daba na giti? 35 Kwian nga Etiopíamu kle chada batenga chada e gerule Jesu giti. Chada e giti Felipe geru treunnga no trate kwian Etiopíamu ole, Felipe geru Jesu giti ketu amage. 36 Bdagli ama jo tangle nga gwealege chi kledu jonkare gire kwian nga Etiopíamu gerudu Felipe ole: —Aini chi kle cha alin mo ñeangwa chiske. ¿Ba ña cha ñe chiske aini Jesu kalla giti? 37 Gire Felipe gerudu: —Ba Jesucristo gerua gai ulia mo tale, gire cha ñage ba ñe chiske. Kwian nga Etiopíamu jaindunga: —Cha Jesucristo gerua gai ulia, chage suge trate ama Chube Kirolla. Cha takalin ba cha ñe chiske ama kalla giti. 38 Lle carrole kle chage ama gwaru jonkare gire ama lle carrole gbangu jage gdate. Felipe kaire kwian nga Etiopíamu chiu dbige, jo chi kle ngwadi ngnagu gire Felipe kwian nga Etiopíamu ñeu chiske gau ngaña chigage Jesu kalla giti. 39 Ama gdabonate chiu kedagu gire Chube Oña Felipe du nga nage, kwian nga Etiopíamu me gwagedu Felipedi dare, Felipe me medu ama gwage. Agwa kwian nga Etiopíamu jo dare jonkare ta suga no ole Jesu giti. 40 Chube Oña Felipe du una kada Azotoge, gire Felipe chagedu una kaire kairege jonkare geru Jesu giti kete kwiange, ene gire ama ñadu una Cesareage.
1 E suiale gire Saulo me chegu ta chuge kwian Jesu gerua gaba oña gbe gwaleda geru Jesu giti gdale, Saulo mo ta gbu chage kwian Jesu gerua gaba nate gadale diali. Chui gbaite Saulo mo ta gbu joge una Damascoge, malen ama jo kwian gerunga Chube ole daba alin chugagwalla ma kweri ngwadi chada kade chugagwallage jogedale una Damascoge, ene ama joge chke una Damascoge gire ama ñage chada e kaite kwian u mo litangwa Chube gerua jwanngwa chugagwallage, chada e gerule Saulo ñage kwian Jesu gerua ganga kwian muire onbre gai nate dbadale tkale skage Jesu gerua giti una Jerusalénge. 3 Saulo kle chage jonkare una Damasco ngnagu, Saulo jo kodi una Damascoge gire jonke jichra chra chiu nga ngaña giti chratigunga blike Saulodi tangle. 4 Jichra chralla kote Saulo jo chke dba gire Saulo geru keruchugu gerule: —Saulo, Saulo, ¿mineade ba kle age cha dollale cha gbe boi tanre daga ngwale? 5 Saulo jaindunga: —¿Ba chema kle gerule cha ole? Saulo geru keruchugu gerule kwaite: —Cha Jesu, cha amaña nate ba kle chage age cha dollale cha gbe boi tanre daga ngwale. 6 Cha gerule ba ole, chkede gdate, chagede gwangerugu una Damasco ngnagu, una ege geru ketabe bage ba agedale giti ulita chui aige gwangerugu. 7 Kwian kledu chage Saulo ole ule gwagedu Saulodi boi ene ama gwa giti ama kwachiu tanre Saulo giti. Ama geru keruchugu gerule Saulo ole, agwa ama me gwagedu kwiandige, ama geru alin keruchugu gerule Saulo ole. 8 Saulo chku gdate, ama gwagwa jraunnga agwa me ñadu ten. Kwian kle chage Saulo ole Saulo gau koge Saulo du una Damascoge. 9 Saulo jo chke una Damascoge, chui gbamai Saulo me ñadu ten ni Saulo blidu ni chi jau. 10 Una Damascoge kwian Jesu gerua gaba gdaite kada Ananías kle toi, Jesu chku gerule Ananíage gbire, Jesu ama ka jun: —¡Ananías! Ananías jaindunga: —¿Llema cha Chugagwalla? 11 Jesu gerudu Ananías ole: —Mo gbe biale, joga chage jon kada Tainkwlige jegwale, eni kwian kada Judas ulla kle, ba geru kade Judage kwian una Tarsomu giti kadakle Saulo, Saulo kle Judas ngwadi gerule Chube ole. 12 Saulo gbi chugu ba jo chke ama ngwadi ba ko gbu ama chuga giti, ene ama ñadu tenni naskuni. Saulo gbi chugu ene ba ole, Sauloge uñale ba kada Ananías. 13 Ananías Jesu keruchugu gerule ene, gire Ananías gerudu: —Cha Chugagwalla, kwian tanre gerudu cha ole Saulo giti, ama kwian me no, ama agedu me no kwian ba gerua gaba ole una Jerusalénge. 14 Nege ama kle chage aini kwian banu gai nate. Kwian gerunga Chube ole daba alin chugagwallage ama chada kadu, chada e gerule ama ñage kwian ba gerua gaba gai nate dbale skadige. 15 Jesu gerudu Ananías ole: —Joga, ba kle gerule kare ama giti e ulia, agwa nege cha ama gau mau alin kagadale cha gerua dbe kwian tanrege, ama be cha gerua kete kwian israelitage kwian me israelitage kaire ama be cha gerua kete kwian nga ulitamu chugagwallage, cha be ama kage cha gerua trage kwian ene ole. 16 Cha gerua dbe gdale ama be boi tanre daga ngwale kwian cha gerua dollale kote. 17 Jesu gerudu ene Ananías ole, gire Ananías mo ta gbu joge Judas ullage Saulo kle ngwadi. Ananías jo chke gwa Saulo kle ngwadi gire Ananías ko gbu Saulo chuga giti, Ananías gerudu: —Daba Saulo, Chugagwalla Jesu medu bage jon ba chiu kare giti, Jesu amaña cha kagu aini ba chudaboi, ene cha giti Jesu be ba gwagwa gbeni naskuni kaire Jesu be Chube Oña kete bage, ene ba be chege ama kirallaske geru Jesu giti dbangale. 18 Ananías gerudu ene Saulo ole gire sugeti Saulo gwagwa kea kwara jwatunga gwagwage gire Saulo ñadu ten naskuni. Saulo chku gdate, ama jo chi ngwadi, eni Ananías ama ñeu chiske gau ngaña chigage Jesu kalla giti. 19 Gire Saulo joni gudegu, blidu, ama kira chkuni naskuni. Saulo mo ta gbu chege toi chui gweale ule kwian Jesu gerua gaba ole una Damascoge, 20 eni Saulo chagedu gerule no Jesu giti u mo litangwa Chube gerua jwanngwa ulitage una Damascoge, Saulo gerudu kwian israelita ulita ole Jesu giti Jesu ulia Chube Kirolla. 21 Kwian israelita ulita bai Saulo keruchugu gerule Jesu giti chegu tañachuge tanre Saulo kle gerule no Jesu gitidi, kwian e ulita gerudu modi Saulo giti: —¿Saulo e me onbre amaña chagedu kwian Jesu gerua ganga gai nate una Jerusalénge dbale skadige? ¿Onbre e me amaña chiu aini una Damascoge kwian Jesu gerua gaba gai nate ketadale kwian gerunga Chube ole daba alin chugagwallage tkale skage? —kwian israelita ulita gerudu ene modi Saulo giti. 22 Agwa Saulo gerudu Jesu giti dare ma no kira ole diali, ama gerudu no trate Jesu e amaña Chube gerudu sbali be kage kwian alin kwian jwanngale siere, e Jesu amaña. Kwian israelita ulita kle toi una Damascoge Saulo keruchugu gerule ene Jesu giti, sugedu ama ulitage Saulo kle gerule ulia, malen ama ulita chegu kamne me ñadu gerule dare. 23 Saulo Jesu uñu chuia jo tangle sbali gire kwian israelita ulita me Jesu gerua gaba mo ta gbu Saulo gweda Jesu gerua trage gdale. 24 Agwa Sauloge chku uñale kwian ta ama gwakalinda, kwian kle ama manade ngwange una ugakallage nga ju nga jere, ama manakle ngwange gwadaleda. 25 Kwian Jesu gerua ganga gweale Saulo chudabo, ama Saulo gbu ski kweri toli gire ama Saulo tku dbige skige ngajrege una gerea gití dbige kwian me kle Saulo manade ngwadi. Ene Saulo tiendu gitiru kwian tadu Saulo gwakalindage una Damascoge, joni una Jerusalénge. 26 Saulo jo chkeni una Jerusalénge, gire diali Saulo tadu mo litakalin kwian Jesu gerua gaba ole, agwa kwian ulita kendunga mo lite Saulo ole. Uñale kwian e ulitage Saulo kwian agenga me no kwian Jesu gerua gaba dollale, ama ulita tañachugu Saulo me nu Jesu gerua gaba ulia, malen kwian kendunga Saulodi. 27 Kwian Jesu gerua ganga ulita tañachugu ene Saulodi agwa ama gdaite kada Bernabé Saulo chudabo, ama Saulo du kwian Jesu gerua ketanga gdataboko giti gdaboke kledu ngwadi. Bernabé gerudu Saulo giti kwian Jesu gerua ketanga ole, Bernabé gerudu: —Saulo jo chage jonkare una Damasco ngnagu, gire Chugagwalla Jesu medu Sauloge, gerudu Saulo ole jonke, Jesu Saulo ta blitu, Saulo jo chke una Damascoge gire eni Saulo geru Jesu giti ketu kwiange trate no ulita kira giti. Bernabé gerudu ene Saulo giti kwian Jesu gerua ketanga ulita ole. 28 Bernabé gerudu giti kwian ulita Jesu gerua gaba una Jerusalénge me kwachiu dare Saulodi, ama ulita Saulo gau ngwange no ama daballale Jesu giti, gire Saulo chegu una Jerusalénge toi ule kwian Jesu gerua ganga ole, ama chagedu geru Jesu giti trage trate no kira giti kwian tanre ole una ege. 29 Saulo geru Jesu giti tragu kwian israelita gerunga griego ole, kwian e mo ka dodaduda Jesu gerua giti Saulo ole, Saulo gerudu no Jesu giti, agwa kwian israelita gerunga griego gerudu me no Jesudi Jesu dollale, kwian e mo ta gbu ule Saulo gweda Jesu gerua gdale. 30 Kwian Jesu gerua ganga ulitage chku uñale kwian ta Saulo gwakalinda, gire ama ulita Saulo du una Cesareage, una ege Saulo kagle duge una Tarsoge Saulo jwiage. 31 Gire chui sbali kwian Jesu gerua dollale me chagedu dare kwian Jesu gerua ganga nate tkale skage Jesu gerua gdale, kwian Jesu gerua ganga ulita nga Judeage nga Galileage nga Samariage chegu toi no me boi daga ngwale Jesu gerua gdale. Chube Oña kwian Jesu gerua ganga ulita chudabo tanre, ene kwian kira gau toi ma no Jesu takalin kare, kaire kwian mo ta gbu Jesu gai dage ma no ulia mo Chugagwallale. Diali kwian na dare Jesu gerua gau ulia, gire ama ulita mo litu ule kaire daba na ulita ole Jesu geruadi. 32 E suiale Pedro kledu chage basale kwian Jesu gerua gabadi nga gweale Judeage gire Pedro jo tienda kwian nu Jesu gerua gaba kle toi una Lidagedi. 33 Una Lidage onbre gdaite kada Eneas skwendu Pedroge oga, onbre e kledu oga chura gdapa ama me ñage chage, ama kle ankwa giti chui gdale, ama skliebadba trate jegwale ama me ñage chage. 34 Pedro gerudu onbre e ole: —Eneas, Jesucristo kiralla giti cha ba dodade. ¡Chkede gdate, gbengwa blinga, chagede! Pedro gerudu ene Eneas ole gire Eneas chku bduge blike chku gdate, ama jo chkeni no ulita trate Jesucristo kiralla giti. 35 E chku uñale kwian ulitage kle toi una Lidage kaire kwian kle toi nga kada Sarónge, kwian e ulita gwagedu Eneadi chage no trate, kwian ulitage sugedu Pedro ama dodadu Jesucristo kiralla giti, gire kwian ulita nga e ulitage Jesu gerua gau ulia. 36 E suiale una Jopege muinga gdaite Jesu gerua gaba kada Tabita kledu toi, muinga amaña kwira griegole kada Dorcas. Muinga e diali tañachugu age no daba na alin daba na bai me lle molen chudaboi no diali. 37 Chui gbaite gire Dorcas ogadu Dorcas jokeda. Kwian Dorcas jaba gligu gire Dorcas jaba gbu uge ngaña gbengwage ama suiale kle age kare. 38 Una Jope chege kodi una Lidage, una Lidage Pedro kledu. Chku uñale kwian Jesu gerua gabage toinga una Jopege Pedro kledu una Lidage, gire kwian boke una Jopenu kagle joge gerule Pedro ole una Lidage: “Ba kadákle una Jopege ba joge blike, me manade.” Kwian boke e jo chke Pedro ngwadi gerudu ene Pedro ole, 39 gire Pedro jo kwian boke ole una Jopege. Pedro jo chke gwa Pedro dule uge ngaña Dorcas jaba kle gbaba ngwadi. Muinga tanre chegeba oli ñengulallage kledu eni olire Dorcas jabadi. Dorcas kledu gwade gire Dorcas nu ñometra jegaba tanre daba chudaboagda, muinga chegeba oli ñengulallage ñometra gweale e Dorcas nu jegaba ama alin kaitu Pedroge olire tanre Dorcas nate. 40 Pedro kwian ulita kle Dorcas jabadi tangle kagu jondoi gire Pedro jongnagwa skutu dba Pedro gerudu Chube ole Dorcas jaba gbeni gwade giti. Pedro gerudubi Chube ole Dorcas jaba giti gire Pedro gwagedu Dorcas jabadi, Pedro gerudu: —Tabita, ¡chkede bduge! Pedro gerudu ene gire Dorcas jaba chkuni gwade naskuni ama gwagwa jraunnga, ama gwagedu Pedrodi gire ama chku bduge. 41 Pedro Dorcas gau koge Dorcas chudabo chke gdate. Gire Pedro muinga oli ñengulallage kaire kwian na ulita Jesu gerua ganga kledu ne ngwadi, Pedro kwian e ulita kaduni, Pedro Dorcas kaitu ama ulitage Dorcas kleni gwadeni. 42 Pedro Dorcas jaba gbuni gwade ene gire e chku uñale kwian una Jopemu ulitage, e giti kwian tanre una ege mo ta gbu Jesu gerua gai ulia. 43 Pedro chegu chui ngle una Jopege Jesu gerua trage kwian ole, Pedro toidu kwian kada Simón ullage Simón bda kwara dodanga.
1 Una Cesareage kwian gdaite kadakle Cornelio kle toi, ama guardia donga nga Italiamu chugagwalla. 2 Cornelio diali mo ta gbu chage trate no Chube gwa giti Chube gai dage, ama ule mo muiralla ole mo olia ulita ole Chube gau dage, ama igi ketu ngle kwian israelitage bai me lle molen chudaboi kaire ama diali mo ta gbu no gerule Chube ole. 3 Chui gbaite ngabi chui jo chege nga bonga dbige gire lle boanga Chube alin nga ngaña giti gdaite medu Cornelioge gbire, Cornelio gwagedu mo gwagwa giti lle boanga Chube alin chie Cornelio gitigu Cornelio kle ngwadi, lle boanga Chube alin Cornelio ka jun ka giti: —¡Cornelio! 4 Cornelio chegu gwage lle boanga Chube alindige ta kennga tanre ole gire Cornelio jaindunga: —¿Llema giti ba ta gerukalin cha ole? Lle boanga Chube alin gerudu Cornelio ole: —Cha geru kete bage, diali ba kle gerule Chube ole tanre mo chudaboi kade amage, Chube ba keruchugu. Kaire uñale Chubege ba kle daba me lle molen chudaboi tanre, malen nege Chube be ba chudaboi. 5 Cha gerule ba ole, ba kwian gweale kage una Jopege gerule Simón amaña kada Pedro ole ama chiedale aini ba ngwadi. 6 Pedro kle kwian na kada Simón ullage Simón bda kwara dodanga kle toi kodi ble kagdage. 7 Lle boanga Chube alin gerudu ene ulita Cornelio ole gbire gire lle boanga joni. Gire Cornelio kwian lle boanga boke ama alin kadu kaire guardia donga gdaite Chube gai dage kadu kagadale Pedro ngwadi. 8 Cornelio lle boanga Chube alin gerua tragu kwian e gdamai ulita ole gire Cornelio kwian e kagu Pedro nate una Jopege. 9 Nagbietege chui bduke Cornelio kwian kagu kwian e kle chage jonkare kodi una Jope ngnagu. Gire Pedro kledu ngwadi Pedro jo ngaña u giti nga ngwalege gerule Chube ole. 10 Pedro bli ole gire kwian gweale na kledu bli jinade Pedro alin. Pedro kledu manade ngaña u giti, gire lle medu ama gwage gbire, ama gwagedu nga ngaña giti nga tigedunga, ñometra glitale kweri lugaba jamaka kare chiu gwadbiguda nga dba ai giti. 12 Lle jamaka kare tadi lle ko gdabaga giti kaire lle chage dba kde kwara giti kaire lle ji giti tanre kledu, lle e ulita chku dba lle jamaka kare tadi Pedro kle ngwadi. Pedro gwagedu bda ulita chke dba lle jamaka karege ni lle gdaite e no gutadale kwian israelita alin, 13 gire Pedro geru keruchugu gerule Pedro ole: —¡Pedro! ¡Chkede gdate! Ba bda e gweda, ba bda dodade, ba bda gute. 14 Pedro gerudu: —¡Me dale! Ni cha bda e kare gutaba bitaite, bda e me gutadale cha alin, cha israelita gwage bda e ulita sugaska, cha bitalla israelita me kle bda e kare gute, Moisés nu Chube gerua degaba unsuialin kle gerule me ñage bda ene gute, bda e me no. 15 Pedro geru keruchugu nabitaite gerule: —Chube bda e ulita gbu trate ba alin gutadale, Chube gwage bda e me sugaska ba ñage bda e gute. 16 Gerudre ene Pedro ole bitamai gire lle jamaka kare duleni naskuni nga ngaña giti. 17 Pedro chegu tañachuge tanre mo tale: “¿Mineade lle e medu chage?” Pedro kledu tañachuge ene ama gwagedudige giti gire Cornelio nu kwian kagaba kwian e kledu chage geru kade u Simónnu giti Simón kle toi baini. 18 Kwian kledu chage Pedro jinade nate jo chke Pedro kle ngwadi geru kadu Pedro giti kweri: —¿Aini kwian gweale kada Simón amaña kada Pedro kle u aige? 19 Pedro kledu ngaña u giti tañachuge gwagedu lledige giti, gire Chube Oña gerudu Pedro ole: “Ba cha keruchuge, onbre gdamai kle chage ba jinade nate. 20 Ba mo gbe biale, joga dbigu, ba jogedale kwian kle chage ba jinade nate ole, ba me mo ta dbe chkenga joge ama ole. Cha Cornelio ta gbu kwian gdamai e kage ba jwen, nege ba jogedale Cornelio ngwadi kwian e ole.” 21 Pedro jo dbigu uge jo dba gire tendu onbre gdamai kledu ama jinade natedi, Pedro gerudu: —Cha amaña ba kle chage jinade nate. ¿Mineade ba chiu aini cha jinade nate? 22 Kwian gdamai jaindunga Pedro kalen: —Cha chugagwalla Cornelio cha kagu, ama guardia donga chugagwalla, ama kwian no chage trate Chube gwa giti kaire ama gerule no Chube giti. Kwian israelita ulita kle toi una Cesareage ama gai dage, kwian e ulita no ama ole. Lle boanga Chube alin nga ngaña giti chku gerule ama ole: “Ba kwian kage Pedro jwen dbadale aini ba kle ngwadi, ba Pedro keruchuge ulita no trate Pedro be gerule giti ba ole.” Lle boanga Chube alin gerudu ene Cornelio ole gire cha chugagwalla Cornelio cha kagu ba jwen, nege che joge ule Cornelio ngwadi. 23 Kwian gdamai gerudu ene Pedro ole gire Pedro ama kadu gudegu, kwian gdamai gbedu Pedro kledu ngwadi Simón ullage. Gire nagbietege nga chku ju Pedro jo ule ama gdamai ole, kaire kwian na nu Jesu gerua gaba gweale toinga una Jopege jo ule Pedro gatedi. 24 Chui ege Pedro me ñadu gude Cornelio ngwadi, ama gbedu jonke. Chui nagbietege Pedro jo chke ule kwian kle chage modi ole una Cesareage, Cornelio kledu manade ule skatemanalla tanre ole bitalla tanre ole ama nu kadaba Pedro manade ngwange. 25 Pedro jo chke Cornelio ngwadi Cornelio ama gau ngwange no, Cornelio toidu jongnagwa giti Pedro ngnagu Pedro gai dage. 26 Agwa Pedro Cornelio gau koge Pedro gerudu Cornelio ole: —¡Chkede gdate! Ba me cha gai ngwange ene, cha kwian onbre salengwli ba kare. 27 Cornelio chku gdate, Pedro jo chage gwagudeguda Cornelio ole Pedro jo chke gwa gire kwian tanre skwendu Pedroge mo litaba Pedro ngwange. 28 Pedro gerudu kwian ulita ole: —Ba ulitage uñale cha bitalla kwian israelita me ñage chege ule geru trage kwian me israelita ba kare ole. Cha bitalla kle gerule kwian israelita me ñage joge gwa kwian me israelita ullage. Kwian me israelita sugaskare kwian israelita gwage, agwa Chube cha ta gbu cha me ñage kwian me israelita gai kwian sugaska kare. 29 Chube cha ta gbu ene malen geru jo chke cha kote ba takalin cha chie aini ba kwian me israelita ngwadi, cha chiu blike ba nate aini me tañachuge gweale me no ba giti. Nege cha kle aini cha takalin ba gerule cha ole, ¿mineade ba kwian kagu cha jwen chie aini? 30 Cornelio jaindunga: —Cha ba kadu chie Chube gerua trage cha ole. Gbi bagaliga ngabi chui jo chege nege nga bonga dbige kare gire cha kledu aini gwa, cha chui e gau me blire chuia, cha kledu gerule alin Chube ole chui ege. Gire ngabi lle boanga Chube alin nga ngaña giti gdaite me chiu gda uñale, cha gwagedu amadi cha gwangnagu ama mo ngama tkaba ñometra gwadetrangaske. 31 Lle boanga Chube alin nga ngaña giti e gerudu cha ole: “Cornelio, diali ba kle gerule Chube ole tanre no chudaboi kade amage, Chube ba keruchugu. Kaire uñale Chubege ba kle daba me lle molen chudaboi tanre, malen nege Chube be ba chudaboi. 32 Ba kwian gweale kage una Jopege gerule Simón amaña kada Pedro ole ama chiedale aini ba ngwadi. Pedro kle kwian na kada Simón ullage Simón bda kwara dodanga kle toi kodi ble kagdage.” 33 Lle boanga Chube alin gerudu ene cha ole ba giti malen cha kwian kagu blike ba nate ba jwen. Noare ba chiu blike aini. Nege che kle aini Chube gwa giti, cha ulita kle biale ba keruchuge gerule Chube giti Chube ba kagu aini gerule mine cha alin ulita. 34 Cornelio gerudu ene ulita Pedro ole gire Pedro gerudu: —Nege suge chage trate ulia Chube alin kwian me mo kaire kaire, Chube takalin kwian nga ulitage ama gai ulia, Chube alin kwian chudalla ulita salengwli. 35 Kwian ulita nga bai kairemu kle Chube gai dage kle age no Chube takalin kare, kwian ene no Chube gwa giti, Chube age no kwian ene ulita alin, Chube me tallade ama chudalla mine. 36 Kwian israelita ole Chube gerudu Jesucristo giti Chube be Jesucristo kage nga dba ai giti kwian alin, Jesucristo kwian ulita Chugagwalla, Jesucristo giti alin kwian ñage mo ta gbeni suga no Chube ole. 37 Ba ulitage uñale trate boidu giti kwian israelita ulitaske nga Judeage. Gwangea nga Galileage Juan-Bautista kledu gerule kwian ole kwian mo ta blitadale Chube ole joge siere age me noge gire mo ñeange chiske Juan-Bautistage. 38 Uñale bage e suiale Jesu una Nazaremu mo chugu ngwadi Juan-Bautistage mo ñeange chiske gire Chube kira ketu Jesuge age ulita kwianske Chube Oña kirallaske. Gire chui ege gwangerugu Jesu chagedu age no ulita kwian oga dodade jingme ulitage kaire kwian jwligebanga dolla Satanás kote dodade. Chube kle Jesu ole diali malen Jesu ñadu age no ene ulita kwian alin. 39 Pedro gerudu dare kwian ole: —Cha ulita chagedu Jesu ole uñale chage ulita Jesu lle tanre no bo ulita cha gwa giti nga kweri Judeage kaire una Jerusalénge, gire bdagli kwian israelita ulita Jesu dollale agedu me no Jesu ole Jesu guda kruge. 40 Agwa Chube Jesu gbuni gwade mongikege, ama chkuni gwade gire ama mo kaitu cha ulitage cha ulita kledu chage ama ole gwagedu amadi gwadeni. 41 Ama me mo kaitu kwian ulitage, ama mo kaitu cha ulita chagedu ama olege. Boidu ene Chube agali cha ulita gbu biale chage Jesu ole ene cháge chege tragale uñale Jesu agedu ulita giti. Ama meduni gwadeni cha ulitage gire cha ulita blidu ule ama ole cha ulita chi jau ule ama ole. 42 Jesu cha ulita kagu geru ama giti kete kwian nga ulitage, ama gerudu cha ulita ole cha gerudale ene: “Chube Jesu gbu kwian ulita Chugagwallale, chui bdaglige Jesu be gerule kwian gwade giti kwian jogebada giti chema agedu no chema agedu me no.” Jesu cha ulita gbu geru e trage kwian nga ulitage ole. 43 ’Cha gerule ba ole, kwian Chube gerua ketanga dabage unsuialin Chube ama ulita ta gbu chada dege Jesu giti, chada e gerule kwian bai kaire Jesu gai ulia, Jesu giti Chube be kwian ene agedu me no ulita talla mlienga —Pedro geru tragu ene ulita Jesu giti kwian ulita kledu mo litaba ole Cornelio ullage. 44 Pedro kle geru trage Jesu giti ene, kwian kle Pedro keruchuge gire Chube Oña chku kwian ulita tale. 45 Kwian israelita nu Jesu gerua gaba gweale chieba Pedro ole una Jopege, ama kwian me israelita keruchugu gerule kwira nale me jwanba gerule no Chube giti gire chku uñale kwian israelita ege Chube Oña chku kwian me israelita tale, kwian israelita e chegu tañachuge tanre e giti, ama tañachugu mo tale: “¿Mineade Chube Oña chku kwian me israelita tale?” 47 Gire Pedro gerudu: —Kwian me israelita ai ulita tale Chube Oña chku salengwli Chube Oña chku che israelita tale kare, malen ¿chema ñage gerule kwian e me ñage mo ñeange chiske Jesucristo kalla giti? 48 Pedro kwian ulita kledu Cornelio ullage ñeangu chiske Jesucristo kalla giti, gire kwian ulita ule Cornelio ole gerudu Pedro ole: —Cha takalin ba chegeda cha ole chuiete dare. Gire Pedro cheguda chui na dare Cornelio ngwadi.
1 Kwian Jesu gerua ketanga ulita kaire kwian ulita nu Jesu gerua gaba kledu nga Judeage, geru chku kwian israelita e ulita kote kwian me israelita Chube gerua Jesu giti gau kaire. 2 Pedro joni una Jerusalénge, kwian israelita Jesu gerua gaba gweale gerudu Pedrodi: —Pedro kwian israelita, ¿mineade ama jo kwian me israelitaske? 3 Geru kadre Pedroge: —¿Mineade ba jo basale kwian me israelita ngwadi blire ama ole? 4 Pedro gerudu kwian ole boidu ulita giti gwangea ama bebi joge kwian me israelitaske gire, kaire boidu ulita giti Pedro kledu kwian me israelitaske gire, Pedro gerudu: 5 —Cha kledu una Jopege, cha kledu gerule Chube ole gire lle medu chage. Cha gwagedu ñometra glitale kweri lugaba jamaka karedi, ñometra e chiu nga ngaña giti chku nga dba ai giti cha kle ngwadi. 6 Cha tiunda no chiga lle jamaka kare tadi, cha tañachugu mo tale: “¿Llema kle chiga lle jamaka kare tadi?” Cha tiunda no chiga cha gwagedu lle ko gdabaga gitidi lle ji gitidi lle chage dba kde kwara gitidi. 7 Gire cha geru keruchugu gerule cha ole: “¡Pedro! ¡Chkede gdate! Ba bda gweda, ba bda dodade, ba bda gute.” 8 Cha gerudu: “¡Me dale! Ni cha bda e kare gutaba bitaite, bda e me gutadale cha alin, cha israelita gwage bda e ulita sugaska, cha bitalla israelita me kle bda e kare gute, Moisés nu Chube gerua degaba unsuialin kle gerule bda e me no gutadale.” 9 Gire cha geru keruchugu nabitaite gerule: “Chube bda e ulita gbu trate ba alin gutadale, Chube gwage bda e me sugaska ba ñage bda e gute.” 10 Gerudre ene cha ole bitamai gire lle jamaka kare duleni naskuni nga ngaña giti. 11 ’Boidu ene ulita cha ole gire sugeti onbre gdamai kagaba una Cesareage nu chieba cha nate chku u cha kledu ngwadige. 12 Gire Chube Oña cha ta gbu cha jogedale ama ole me mo ta dbe chkenga. Daba ai gdadereke una Jopemu Jesu gerua gaba jo ule cha ole. Cha ulita jo chke una Cesareage, cha jo chke gwa kwian gdaite cha kadaba ullage una Cesareage. 13 Gire onbre e geru ketu chage ama kledu gwa mo ullage gire ama gwagedu lle boanga Chube alin nga ngaña gitidige. Lle boanga Chube alin chku amadige gerule ama ole: “Ba kwian gweale kage una Jopege gerule Simón amaña kada Pedro ole ama chiedale aini ba ngwadi. 14 Gire Pedro be gerule ba ulita ole ba ulita agedale mine gire ba tien gitiru ji chugege age me no gdale ba kaire kwian mangire batre kle toi gwa ba ole.” Lle boanga Chube alin gerudu ene ama ole cha giti. 15 Cha jo ama ngwadi, cha gerudu Jesu giti ama ole kaire kwian ulita kle toi gwa ama ngwadi ole gire Chube Oña chku ama ulita tale salengwli Chube Oña chku ngeru che israelita ulita tale Pentecostés chuiage kare. 16 Chube Oña chku kwian me israelita tale gire cha tachku Chugagwalla Jesu gerudu kare: “Ulia Juan-Bautista kwian ñeu chiske gau ngaña chigage, ama agedu ene alin allabi kwian alin, agwa ama me ñadu kwian ta blite age Chube takalin kare, chui me sbali gire Chube be mo Oña gbe ba ulita tale ba kira gbagda age Chube takalin kare.” Cha tachku Jesu gerudu ene giti. 17 Chube mo Oña gbu kwian me israelita e ulita tale salengwli Chube mo Oña gbu che israelita tale kare che che Chugagwalla Jesucristo gau ulia mo tale chuiage. Cha me ñage mo gbe ma kweri Chubege gerule Chube ole: “Ba me ñage mo Oña gbe kwian me israelita tale.” Cha me ñage gerule ene Chube ole, Chube ñage age ama takalin kare. 18 Pedro gerudu ene kwian israelita Jesu gerua gaba una Jerusalénge ole, kwian e ulita Chubenu Pedro keruchugu gerule ene, gire ama ulita chegu kamne. Sugedu kwian israelita e ulitage ulia Chube kle age no kwian me israelitaske, gire ama ulita gerudu no Chube giti: —Ade kwian me israelita Chube ama kaire ta gbu Jesu gai ulia, ene Jesu giti kwian me israelita bai Jesu gai ulia tien gitiru ji chugege agedu me no gdale, ene bdagli ama kaire be toi diali Chube ole chui tangle, Chube no no ulia —kwian israelita Chubenu una Jerusalénge gerudu no ene Chube giti. 19 Esteban guleda chuiage gwangerugu kwian Jesu gerua dollale kwian Jesu gerua gaba jritu nate Jesu gerua gdale. E suiale kwian ulita Jesu gerua gaba kigedu bate nga kaire kairege, gweale jo kige nga Feniciage, gweale jo kige ngadrega bleske kada Chiprege, gweale jo kige una Antioquíage. Nga ulitage baini kaire kwian Jesu gerua gaba jo chke ama gerudu kwian israelita ole alin allabi Jesu giti. Agwa kwian me israelitage kwian Jesu gerua gaba me Jesu gerua ketu. 20 Agwa kwian gweale Jesu gerua gaba chiu nga Chiprege chiu una Cirenege jo chke una Antioquíage, una ege Jesu gerua ganga e geru no no Chugagwalla Jesu giti ketu kwian me israelitage. 21 Kwian Jesu gerua gaba Jesu gerua ketu kwian nage Chube kiralla giti gire kwian tanre mo ta blitu Chube ole, ama agedu me no ngeru tañachugu me no ngeru chugu ngwadi ulita gire ama mo ta gbu Jesu gai mo Chugagwallale. 22 Kwian Jesu gerua ganga una Jerusalénmuge chku uñale kwian tanre me israelita una Antioquíage kle Jesu gerua gai ulia gire Bernabé kagle tienda kwian Jesu gerua gabadige una Antioquíage. 23 Bernabé jo chke llani kwian una Antioquíamu nu Jesu gerua gabadige, gire Bernabé gwagedu Chube ageba no tanre ulia kwian una Antioquíamu alin, e giti Bernabédi nga chegu suga noare kwian Jesu gerua gaba giti. Bernabé kwian Jesu gerua gaba una ege ta gbu, Bernabé gerudu: —Ba mo ta gbe ulia Jesuge chage no diali gwangerugu Jesu geruadi. 24 Bernabé onbre no, ama mo ta gbaba diali Jesu gai ulia, ama diali kle age ulita Chube Oña kiralla giti, Bernabé giti kwian ngle Jesu gerua keruchugu Jesu gerua gau ulia. 25 Bernabé daba ulita Jesu gerua gaba una Antioquíage kira gbu Jesu geruadi gire Bernabé jo una na kada Tarsoge Saulo jwen dbadale una Antioquíage. 26 Bernabé jo chke una Tarsoge, Saulo skwendu amage gire Bernabé Saulo du una Antioquíage. Una Antioquíage Saulo kaire Bernabé chegu chura gdaite, una ege ama diali mo litu daba ulita Jesu gerua gaba ole, ama kwian ngle tku tangle Jesu gerua giti. Una Antioquíage kwian Jesu gerua ganga ka chegu gwangea “kwian Cristonu”. 27 E suiale kwian gweale Chube gerua ketanga dabage una Jerusalénmu jo una Antioquíage, 28 kwian Chube gerua ketanga e gdaite kada Agabo, ama jo chke kwian Jesu gerua gaba una Antioquíamuske ama mo gbu gdate kwian gwa giti gire Chube Oña ama ta gbu geru kete kwiange, ama gerudu: —Bli kweri be chke nga ulitage, kwian ulita be bli chuge. Boidu ene ulia Agabo gerudu kare chugagwalla kweri emperador nga Romage kada Claudio suiale. 29 Bli e kweri suiale gire kwian Jesu gerua gaba nga kweri Judeage me chegu bligda molen, malen kwian Jesu gerua ganga una Antioquíage mo ta gbu igi lite ole kage daba Chubenu nga Judeage chudaboagda, gdaite gdaite igi ketu ama ñage kare. 30 Kwian Jesu gerua gaba una Antioquíage igi gau ene daba alin gire Bernabé gale Saulo gale igi dbe igi kete kwian Jesu gerua ganga chugagwalla nga Judeage girabatadale daba Chubenu ulita ole daba chudaboagda.
1 E suiale kwian israelita chugagwalla rey kada Herodes ama mo ta gbu kwian na kage age daga ngwale kwian Jesu gerua ganga gweale ole. 2 Herodes kwian gbu Santiago chuga tkenga sbadi giti, Santiago Juan daballa. 3 Herodege sugedu kwian israelitadi nga suga noare Santiago kwian Jesu gerua ganga jokeda giti, gire Herodes Pedro gangu kaire tkale skage gwaleda. E boidu pan me dodadre levadura ole gute chuiage. 4 E suiale kwian israelita suiage kwian me ñadu Pedro gweda, malen kwian Pedro gau alin gire Herodes Pedro tkangu skage. Herodes tañachugu Pedro kaite kwian israelita ulitage Pascua chuia tane giti gwadaleda. Herodes guardia kwian skage mananga mne gdabaga gbu Pedro manade skage, guardia gdabaga kle mne e ulita gdaite gdaitege. 5 Pedro tkere skage, guardia kwian skage mananga Pedro manade no ene Pedro me kige. Pedro kle skage gire kwian nu Jesu gerua gaba ulia me chegu ta chuge gerule Chube ole Pedro kle skage giti, kwian ulita kledu gerule Chube ole ene: “Chube, noare ba Pedro chudaboi ba ama jwen siere skage.” 6 Herodes be Pedro gwangeda chuiage, chui ege ngeru ngajrege Pedro kledu gbe guardia kwian skage mananga kaskwada, Pedro ko gdaboke lugaba giska hierrole giti ko gdaite lugaba guardia gdaitege ko gdaite lugaba guardia gdaite nage. Guardia na kle kwian skage ugakalla manade goga ngnagu kledu ta giti ugaka manade, ene kwian skage me ñage kige. 7 Pedro kledu skage gbe gire lle boanga Chube alin nga ngaña giti gdaite me chiu gda uñale gire ama chku blike Pedro kle ngwadi. Ama chralla gwadetranga tigunga ulita kwian ulita skage kle ngwadi, gire lle boanga Chube alin Pedro chugudi bonga tangle Pedro gaú gdate. Pedro chiu tachke gire lle boanga Chube alin gerudu Pedro ole: “¡Chkede gdate blike!” Lle boanga Chube alin gerudu ene Pedro ole gire blike giska hierrole tigunga Pedro koge, guardia boke kle Pedro manade chegu gbe jabale. 8 Lle boanga Chube alin nga ngaña giti gerudu Pedro ole: “Ñometra tke modige, zapato tke mo serage.” Pedro agedu ulita lle boanga Chube alin gerudu kare gire lle boanga Chube alin gerudu dare Pedro ole: “Ñometra mo gitiru mo bliske, chagede cha nate.” 9 Pedro chagedu lle boanga Chube alin nate, me uñadu Pedroge lle boanga Chube alin kle age ulia Pedro alin o me agwa Pedro mo ta gbu chage ama nate, Pedroge sugedu ama kle gbi chuge. 10 Lle boanga Chube alin jo tangle Pedro ole guardia kwian skage mananga ugaka ngeruge, jo tangle guardia kwian skage mananga ugaka daba bongage, lle boanga Chube alin jo chke Pedro ole ugaka bdaglige. Gire ugaka bdaglige hierro ugakalla gda kweri jegaba kejre, ugaka e tigunga gballa gire ama jo tangle ugaka ege. Lle boanga Chube alin chagedu Pedro ngeru jon jwliteda bitaitege tangle gire lle boanga Chube alin Pedro chugu ngwadi gballa, lle boanga jo siere blikare. 11 Gire Pedroge sugedu me kle gbi chuge dale, Pedro gerudu mo ole gballa: “Nege suge chage ulia trate Chube lle boanga kagu cha jwen siere skage Herodes ngeru kaire kwian israelita ulita tadu agekalin me no cha ole ngeru, ege Chube cha jun siere.” 12 Sugedu Pedroge lle boanga Chube alin nga ngaña giti Pedro jun siere skage, gire Pedro jo Juan-Marcos chebia kada María ngwadi, eni kwian ngle kledu mo litaba ule gerule Chube ole Pedro kledu skage giti. 13 Pedro jo chke ugakage ugaka dagunga, Pedro ngautu gire muinga biale kada Rode lle boanga Juan-Marcos chebia alin jo jrite ugakage tienda kwiandi kwian gai ngwange. 14 Rode kwian kle ugakage keruchugu ama me olo jonga Pedro keruage, chku uñale Rodege e Pedro amaña gire nga suga no ole Rode me tachku ugaka degenga, ama joni jrite blike gerule kwian kle mo litaba gwa ole, ama gerudu: —Pedro kle goga ngaute chege, Pedro chiekalin gudegu. 15 Kwian kle mo litaba gwa gerudu Rode ole: —Nga jwlitenga ba chuga giti, ¿chema gerudu Pedro kle ngaute goga chege? Rode mo ta gbu ulia gerule nabitaite kwian kle gwa ole: —Ulia Pedro kle goga, cha me kle sole ba ole, e Pedro amaña. Kwian kle gwa ulita gerudu: —E me Pedro, ba kle choachienga Pedro oñadi, Pedro kle skage. 16 Gire Pedro me chegu ta chuge ngaute ugakage goga, kwian kle gwa ugaka degunga gire Pedro jo chke gwa, kwian gwagedu Pedrodi kwian ulita kendunga kwian tañachugu me Pedro. 17 Pedro chku gwa gire kwian ulita me chegu kamne Pedro ngwange, Pedro ko ñachugu kwian kle gwa ulita ole gire kwian ulita chegu ama kerua manade kamne. Pedro geru tragu kwian ulita kle gwa ole Pedro kledu skage giti, Chube lle boanga kagu Pedro jwen skage Pedro kledu ngwadi. Pedro gerudu dare kwian kle gwa ole: —Cha kledu skage gire lle boanga Chube alin nga ngaña giti cha jun siere skage, cha takalin geru e ba trage Santiago ole kaire kwian na ulita Jesu gerua gaba ole. Pedro gerudu ene ulita gire Pedro jo nga nage. 18 Nga chku ju Pedro me kle skage guardia kwian skage mananga Pedro gbu ngwadi, me uñadu guardia ege Pedro boidu mine, gire guardia ulita chegu skochie tanre mau ole Pedro kigedu giti, me uñadu ama ulitage Pedro me jo gda uñale. 19 Boidu ene ulita guardia kwian skage mananga ole ngabebitabi bebi chke uñale Herodege. Herodes lle boanga ama alin kagu Pedro jwen skage kaitadale kwiange gwaleda. Kwian lle boanga Herodes alin jo chke Pedro nate skage, Pedro me kle skage. E chku uñale Herodege gire Herodes skochiu guardia kwian skage mananga ole guardia kwian skage mananga jiske ama ulita Pedro kagunga, gire Herodes guardia kwian skage mananga kledu Pedro manade ulita gwanguda. Boidu ulita ene tane giti gire Herodes jo siere nga Judeage jo toi una Cesareage. 20 Kwian una Tiroge una Sidónge Herodes gbu skochie geru gweale giti agedu me no Herodes ole malen Herodes skochiu tanre kwian una Tiromudi una Sidónmudi. Kwian una Tiromuge una Sidónmuge sugedu Herodes mi bligda kage chbadale dare una Tiroge una Sidónge gire kwian ulita una emu mi ñage blire. Herodes bebi age Herodes takalin kare me bligda chbade suiage kwian una Tiromuge una Sidónmuge gire kwian una boke emu ulita mo litu ole mne gdaite jo geru trage Herodes ole me bligda chbade giti. Kwian mneite me gerudu Herodes ole agali agwa gerudu kwian kada Blasto kwian Herodes kamanalla ole, Blasto giti kwian mneite ñadu chui kade geru tragangwa Herodes ole. Mneitella geru tragakalin Herodes ole me bligda jonlla skutenga kwian una Tiromuge una Sidónmuge ngeru. Kwian ulita una Tiromu una Sidónmu kle bligda gute, bligda e kle chie Herodes jwiage alin. 21 Herodes chui gbu geru trage kwian una Tiromu ole kwian una Sidónmu ole, chui e chku geru tragadale gire Herodes mo ngama tku no no ñometra gwadetrangaske geru tragadale kwian ole. Ama toidu dba toingwa no giti u kweri kwian kle mo lite geru trage chugagwalla ole ngwadi gire Herodes gerudu lle tanre giti kwian ngle ulita ole. 22 Kwian ngle me chugagwalla gdaite keruchugaba gerule e kare gire ulita gerudu Herodes giti: “Ama me kwian ngwale, ama chube.” 23 Gire sugeti ngwale lle boanga Chube alin nga ngaña giti Herodes gbu oga jabale mo gbe kweri gdale, Herodes mo gbu kweri kwian gwage me tañachugu Chube giti Chube gbe ma kweri amage, malen gwita ama gutu gwade gire ama jokeda gwi kote. 24 Boidu ene ulita Herodes ole gire sugekare ege Jesu gerua kledu joge chke kwian nglege nga ulitage kwian tanre Jesu gerua gau ulia mo ta gbu chage Jesu geruadi. 25 Bernabé ule Saulo ole jogeba una Jerusalénge igi jige kwian Chubenu chugagwallage kwian Chubenu ulita alin chudaboagda bli suiale, Bernabé kaire Saulo ule Juan-Marcos ole kledu una Jerusalénge, gire ama ulita jo siere una Jerusalénge jo chke naskuni una Antioquíageni.
1 Kwian Jesu gerua ganga una Antioquíamu ulitaske kwian Chube gerua ketanga dabage kle kaire kwian daba tkanga tangle Jesu geruage kle. Kwian Chube gerua ketanga kaire daba tkanga tangle Jesu geruage ama ulita kada ai kare: Bernabé, Simón (kaire ama ka junlen Kwian Jere), Lucio (ama kwian una Cirenemu), Manaén (ama Herodes tigemanalla manadre ule chugagwalla Herodes ole), Saulo. 2 Chui gbaite kwian gdatiga e ulita chui gau mo lite ule gerule Chube ole, ama me blidu chui ege, ama kledu gerule Chube ole gire Chube Oña gerudu ai kare: “Bernabé kaire Saulo gai gbe sugekare mo kaire lle boi Chube alin Chube takalin kare Chube ama boke gau Jesu gerua dbangale nga nage.” 3 Kwian gdatiga gerudubi chui ege Chube ole gire kwian gdamai ko gbu Bernabé chuga giti Saulo chuga giti, gerudu: —Ba mo ta gbe no Jesu gerua dbe nga nage, Chube ba chudaboi geru dbe no. Kwian gdamai gbi kadu bdagli Bernabége Sauloge gire kwian gdamai ama boke kagu nga nage. 4 Chube Oña Bernabé kaire Saulo ta gbu joge una Seleuciage, kaire Juan-Marcos jo ule ama chudaboi. Eni Bernabé kaire Saulo Juan-Marcos ole du kweri gau jo ngadrega bleske kada Chipre ngnagu. Bernabé kaire Saulo kaire Juan-Marcos jo chke du tkakle ngwadi keda una kada Salamina kle chege nga Chiprege. Gire Bernabé kaire Saulo Juan-Marcos ole jo u mo litangwa Chube gerua jwanngage, eni ama geru Jesu giti tragu kwian ole. Juan-Marcos Bernabé chudabo kaire Saulo chudabo kwian ta gbe Jesu geruage. 6 Ama gdamainate chagedu nga Chiprege batre ulita Chube gerua Jesu giti dbe jo chke una kada Pafoge. Nga ege onbre gdaite israelita ta me no gbaboke molen skwendu, ama agenga che dolla Satanás kiralla giti, mau kwirale ama kada Barjesús. Barjesús songa tanre ngwale ama gerule kwian ole ama Chube gerua ketanga agwa ama kwian anblitanga tanre. 7 Barjesús agenga dolla kiralla giti kledu lle boi chugagwalla gobernador nga Chipremu kada Sergio-Paulo alin. Chugagwalla e ta molen tanre, chugagwalla e Bernabé jwanngu nate Saulo jwanngu nate, chugagwalla e tadu Chube gerua Jesu giti keruchugakalin. 8 Saulo kaire Bernabé jo chke chugagwalla ngwadi, Saulo, Bernabé geru Jesu giti ketu chugagwallage gire Barjesús amaña griego kwirale kada Elimas amage sugedu chugagwalla be Jesu gerua gai Saulo kaire Bernabé giti gire Barjesús gerudu chugagwalla ole: —Saulo kle chage geru ole geru e me ulia. Barjesús gerudu tanre ene chugagwalla ole Saulo kaire Bernabé gwa giti geru e me ulia. Ama gerudu ene, ama me takalin chugagwalla geru Jesu giti gai ulia. 9 Saulo amaña kada Pablo chegu gwage tanre alin Barjesúdige, gire Pablo gerudu Chube Oña kirallaske Barjesús ole: 10 —Ba me no, ba kwian songa ngwale kwian anblitanga geru me uliadi, ba salengwli che dolla Satanás kare, ba geru ulia ulita dollale. ¿Mineade geru ulia Jesu giti ba kle gai geru ngwalere? 11 Ba gerule me no geru ulia dollale gdale Chube be ji gbe ba alin, Chube be ba gwagwa gbe jogenga ba kle gerule me no geru ulia dollale gdale. Aige gwangerugu chui ngle ba be chege gwagwa jogebanga, ni ba be ñage ten nga chra mi meñe ba gwage. Saulo gerudu ene Barjesús ole gire blike Barjesús gwagwa jonga, Barjesús chegu nga jere dbiguske me ñadu ten. Barjesús kwian gweale jinadu mo dbe koge ama ullage, ama gwagwa jonga ulita ni ama ten sidri. 12 Chugagwalla gwagedu Barjesús agenga dolla Satanás kiralla giti boidu ene chugagwalla gwa giti, gire chugagwalla chegu tañachuge tanre Jesu gerua giti, chugagwalla mo ta gbu Jesu gerua gai ulia. 13 Una Pafoge Pablo ule chagemanalla ole du gau jo una Perge ngnagu nga kweri Panfiliage, jo chke una Pergege gire eni Juan-Marcos jo siere Pabloge kaire Bernabége joni naskuni una Jerusalénge. 14 Gire Pablo, Bernabé jo siere una Pergege ama chagedu seradi una Antioquía ngnagu, una e chege nga kweri Pisidiage. Pablo, Bernabé jo chke una Antioquíage, una ege kwian israelita undege chuia chku, chui ege Pablo, Bernabé jo u mo litangwa Chube gerua jwanngwage, Pablo, Bernabé jo chke gwa u ege toidu dba. 15 Kwian gweale Moisés chadalla batunga kaire kwian Chube gerua ketanga chadalla batunga, chada batrengabi gire kwian u mo litangwa chugagwalla gerudu Pablo ole Bernabé ole: —Cha bitalla, ba ta gerukalin kwian ulita kle mo litaba aini ole ama kira gbagda Chube geruadi, ba gerule. 16 Pablo chku gdate ko ñachugu kwian ulita kle mo litaba ole gbe kamne, gire Pablo gerudu kwian ulita ole: —Ba cha bitalla kwian israelita ulita kaire ba kwian na me israelita ulita bai kle mo ta gbe Chube gai dage, ba ulita cha keruchuge, cha be gerule ba ulita ole cha israelita enusulian unsuialin giti, ene chke uñale bage Chube agedu mine ama ulita alin. 17 Chube cha ulita israelita enusulian unsuialin gau mau alin gbu jriennga ngle nga Egiptoge. Ama ulita kledu toi nga me ama jwiage Egiptoge. Bdagli Chube mo kiralla giti cha bitalla israelita unsuialin ulita jun siere nga Egiptoge. 18 Kwian israelita ngle ulita kledu nga gballage kledu age tanre me no Chube dollale chura ngle cuarenta, chura e ulita Chube kwian e ulita manadu no, Chube me kwian chugu ngwadi gballa. 19 Chube cha israelita enusulian unsuialin kira gbu kwian chudalla namu gdaguke gweda ulita nga Canaánge, ene nga Canaán chegu cha israelita enusulian unsuialin kote. 20 Cha israelita enusulian unsuialin jogeba nga Egiptoge gire jogeba siere nga Egiptoge, chagebanga nga gballage gire ñaduni naskuni mo jwiage nga Canaánge, chura ulita ama jóge chiuni naskuni ama jwiage chura ngle cuatrocientos cincuenta. Pablo gerudu dare kwian ole: —Cha israelita enusulian unsuialin ulita jo chkeni nga Canaánge gire Chube kwian tanre gau daba chugagwallale cha enusulian unsuialin ulita jwen siere ama dolla ulitage chura nglege, boidu ene chku kwian Chube gerua ketanga kada Samuel kledu toi chuiage tangle. 21 Cha israelita enusulian unsuialin mo chugagwalla kadu Chubege mo chudaboale, enusulian takalin mo bitalla gdaite chege ama ulita kagangale. Gire Chube agedu enusulian tadukalin kare, Chube Saúl gbu cha israelita enusulian unsuialin chugagwallale chura cuarenta kwian ulita kagangale, Saúl Cis kirolla ama Benjamín oindalla. 22 Ngeru Chube kledu Saúl kira gbe kwian chugagwallale, bdagli Chube me ama kira gbu dare, Saúl me agedu Chube gerudu kare malen Chube ama chugu ngwadi. Gire Chube David gbu Saúl tanege kwian chugagwallale, Chube gerudu: “Chage uñale David kwian no, ama Isaí kirolla. Cha gwage Daviddi no ulita, ama ta kle biale age ulita cha takalin kare.” Chube gerudu ene David giti. 23 David amaña oindallaske Jesu medunga. Chube Jesu kagu kwian israelita ulita jwanngale siere ji chugege agedu me no gdale, Chube gerudu kare unsuialin David ole kaire Chube agedu. 24 Jesu bebi mo meage kwiange gire Juan-Bautista kledu gerule cha ulita israelita ole Chube giti, Juan-Bautista gerudu: “Ba ulita mo ta blitadale Chube ole joge siere ba kle age me noge, kaire ba chiedale chage cha ba ñeale chiske, ba age ene ulita gire ene ba ña mo ta gbe ulia Chube ole.” 25 Juan-Bautista lle boi ulita Chube alin chuia chegu kodi gire Juan-Bautista gerudu kwian ulita ole: “Ba ulita kle tañachuge cha kwian gdaite be chie ba ulita jwanngale siere, agwa cha me ama, kwian gdaite e be chie cha nate ama ma no ma kweri ulita chage, cha me ñanaske ama chudaboangale ni ama zapatolla jwennga ama serage.” Juan-Bautista gerudu ene Jesu giti. 26 Pablo gerudu dare kwian ole: —Ba cha bitalla ulita enusulian Abraham oindalla kaire ba ulita kwian me israelita bai kle mo ta gbe Chube gai dage, cha gerule ba ulita ole, geru ai Jesu giti che ulita alin che jwangda siere ji chugege agedu me no gdale. 27 Kwian Chube gerua ketanga chada degu unsuialin Jesu giti, Jesu toidu nga dba ai giti suiale kwian chada e degaba Jesu giti batunga. Kwian toinga una Jerusalénge ule mo chugagwalla ulita ole diali mo litu u mo litangwa Chube gerua jwanngwage, ama chada e batunga diali undege chuiage, kwian ulita geru e keruchugu, agwa ulia ama ulitage geru e me sugedu. Ama chada batunga alin allabi, me uñadu amage chada e kle gerule Jesu giti. Malen Jesu chku amaske ama me Jesu uñu gire ama mo ta gbu Jesu gweda. Boidu ene ulita chada degaba unsuialin gerule kare. 28 Kwiange Jesu age me no me skwendu agwa kwian mo ta gbu gerule Pilato ole Pilato kwian kagadale Jesu gweda. 29 Chube gerua degaba unsuialin gerule Jesu giti kwian be age me no ene Jesu ole, boidu ulita chada degaba gerule kare. Kwian Jesu guda kruge gire ama jaba junlen dbige kruge, jaba jo tkaba keugage, 30 agwa Chube ama gbuni gwadeni. 31 Gire bigwa kwian bai Jesu gatudi jonkare nga Galileage joge una Jerusalénge Jesu bebi jogeda gire, kwian e ulitage Jesu medu gwadeni chui tanrege chui cuarenta gire Jesu joni nga ngaña giti. Nege kwian e ulita kle geru Jesu giti kete kwian na ulitage. 32 Pablo gerudu dare kwian ulita ole: —Cha kle chage modi cha geru no Jesu giti ulita ketakalin ba ulitage, ene chke uñale ba ulitage Chube gerudu cha israelita enusulian unsuialin ole Chube be age no ama alin kaire ama oindalla alin. Nege Chube agedu cha enusulian oindalla ulita alin cha amaña alin Chube gerudu kare, Chube Jesu gbuni gwade naskuni Chube gerua degaba unsuialin kada Salmos gerule kare, chada Salmo gdabokedale gerule: “Chube gerudu: ‘Nege cha ba kaite nate kwian ulitage cha Kirollale, ene chke uñale kwiange ulia ba cha Kirolla cha ba Ñenua.’ ” Chube gerua degaba unsuialin gerule ene Jesu giti. 34 Chube gerudu unsuialin tangle cha israelita chugagwalla ole Chube mi Jesu jaba chuge ngwadi tugeda, agwa Chube be ama gbeni gwade. Isaías Chube gerua degu unsuialin gerule Chube be age ene ulia, chada e gerule: “Chube gerudu: ‘Cha be age ulia no trate ulita cha gerudu kare David ole.’ ” 35 David chada degu unsuialin David gerudu kare Chube ole Jesu giti, chada e gerule: “Ba mi lle boanga no trate ba alin jaba chuge ngwadi tugeda.” David chada degu ene unsuialin Jesu giti. 36 Nege cha gerule ba ulita ole, cha takalin geru suge ba ulitage. David chada degu, ¿chada e kle gerule chema giti? Me kle gerule David giti agwa Jesu giti David chada degu. David lle bo no ulita ama kledu toi gwade gire diali Chube ama ta gbu age Chube takalin kare. Bdagli ama jokeda, ama jaba jo tkaba keugage ama bitalla ulita jaba ogakle ngwadi, ama jaba tugeduda ulita. 37 Agwa Chube jaba gbuni gwade jaba e me tugeduda dale, e Jesu. E giti chada degaba unsuialin kle gerule. 38 Ba ulitage chkedale uñale trate Jesu giti alin allabi Chube kwian age me no talla mlienga. Kwian agenga me no ulita bai kaire Jesu gerua gai ulia Chube be kwian ene agedu me no talla mlienga ene kwian be chege trate Chube gwa giti. Age Moisés chadalla alin gerule kare, e giti Chube me kwian age me no ulita talla mlienga dale, kwian ene me chege no trate Chube gwa giti. 40 ’Ba ulita kledale ta giti, ba tañachugadale no, ene ba me boi kwian Chube gerua ketanga chada degu unsuialin kare, chada e gerule: 41 “Cha Chube, sugedale ba ulitage ba kle cha ibade ba me kle cha gai ulia. Ba chuga giti nga chkedale suge ba tañachugadale, ba me cha gau ulia malen ba be jogeda ba ulita be chege sugekare chage. Ba toi suiale cha be age tanre mo kiralla giti, agwa e giti ba mi cha gai ulia. Kwian gweale cha trage ba ole, ni ba be cha gai ulia cha traganga giti.” Chube gerua degaba unsuialin gerule ene kwian me Jesu gai ulia giti, ba me ta boikalin chada degaba gerule kare, ba mo ta gbadale Jesu gerua gai ulia. 42 Pablo kwian ulita tku tangle ene Chube geruage, Pablo, Bernabé kledu joge siere u mo litangwage, gire kwian ulita gerudu Pablo ole: —Ba chie kwaite undege chuia nage cha ulita tke tangle dare geru Jesu gitige. Pablo gerudu: —Ima, ba cha manade ngwange, cha be chieni. 43 Pablo kaire Bernabé jo chage gire kwian israelita tanre chagedu ama nate kaire kwian me israelita sui jwanba israelitage chagedu Pablo nate Bernabé nate. Kwian chagedu ama nate kwian e ulita kle Jesu gerua gai biale gire Pablo, Bernabé ama kira gbu Jesu geruadi gerudu no ama ulita ole: —Mo ta gbadale chage diali no ngerugu ba ta sugedu ba Chube gerua Jesu giti gau gwangea kare, Chube agedu no ba alin ba me talla mlienga. 44 Undege chuia na chku gire Pablo, Bernabé joni u mo litangwage kwian tke tangle kwaite, kwian nglea unaske mo litu Pablodi Pablo keruchuge gerule Jesu gerua giti. 45 Agwa kwian israelita tanre me Jesu gerua gaba kle mo lite u ege gwagedu kwian na tanre kle mo lite ule, ama semadu tanre kwian giti Pablo ole gire kwian israelita e gerudu me no Pablodi kaire ka bo Pablo ole me no. 46 Gire Pablo kaire Bernabé me mo ta gbu kennga kwian israelita me Jesu gabadige, ama gerudu: —Chube cha ulita ta gbu geru amanu Jesu giti kete ngeru ba ulita kwian israelitage, agwa ba ulita israelita me jaindu geru ai gai ngwange, geru e gai ulia giti ba ñage toi chui tangle Chube ole agwa ba tañachugu geru e ngwale ba me geru e gau ulia, malen cha ulita kle Chube gerua Jesu giti kete kwian me israelitage. 47 Chube gerua degaba unsuialin gerule kwian ama gerua dbanga alin, chada e gerule: “Cha ba gbu jichra kare kwian toinga nga ulitage alin ene chke uñale amage ulita cha Chube. Ba cha gerua dbadale kwian nga dba ai giti ulitage, kwian cha gai ulia cha kwian ene jwen siere ji chugege age me no gdale.” Chube gerua degaba unsuialin gerule ene malen cha geru Jesu giti dbadale kwian me israelitage kaire agwe —Pablo gerudu ene kwian ole. 48 Kwian me israelita ulita Pablo keruchugu gerule no ama ulita giti, Pablo be geru kete ama ulitage, nga chegu suga no ama ulitadi Pablo gerudu giti. Gire kwian ulita me israelita gerudu: “Chube gerua Jesu giti geru e no che alin ulita.” Gire kwian me israelita ulita Chube gerua Jesu giti gau ulia bai ulita Chube nu ama ta gbaba Chube gai ulia toigda chui tangle Chube ole. 49 Kwian me israelita Jesu gerua gau ulia, gire ama giti Jesu gerua chagedu kwian kle toi nga ege ulitaske. 50 Agwa kwian israelita chugagwalla ulita gerudu Pablo dollale Bernabé dollale muinga gweale ole muinga e ulita gerule ama kle Chube gai dage. Kaire kwian israelita chugagwalla ulita gerudu Pablo dollale Bernabé dollale onbre ulita daba chugagwalla una ege ole. Kwian ulita toi una ege kle onbre e muinga e gai dage. Kwian israelita chugagwalla ulita gerudu ene muinga e ole onbre e ole gire kaire kwian e ulita gerudu me no Pablodi Bernabédi kwian na ulita ole, ama geru jinadu Pablo dollale Bernabé dollale ama bonate gbadale boi daga ngwale me no. Kwian nga ege Pablo, Bernabé jritu nate kagu siere nga ege. 51 Kwian agedu me no ene Pablo dollale Bernabé dollale gire Pablo, Bernabé dbi mnuña batunga mo serage kwian dollale, ene sugedale kwian nga ege ama jiske me su Chube gerua Jesu giti gai ngwange gdale. Gire Pablo, Bernabé jo una Iconioge. 52 Kwian ulita una Antioquíamu bai nu Chube gerua Jesu giti gaba ama ulitadi ta sugedu nga suga no no ole, ama ulita chegu toi Chube Oña kirallaske.
1 Pablo, Bernabé jo chke una Iconioge gire ama bonate jo gwa u mo litangwa Chube gerua jwanngwage, eni Pablo, Bernabé Chube gerua Jesu giti ketu kwiange ama kle age kare diali. Chube kirallaske Pablo, Bernabé gerudu no Jesu giti kwian ole, kwian kledu mo litabage geru e sugedu gire kwian tanre israelita kaire me israelita Jesu gerua gau ulia. 2 Kwian israelita me Jesu gerua gaba ulia geru jinadu kwian me israelita me Jesu gerua gaba ole kwian Jesu gerua gaba dollale. Kaire kwian israelita me Jesu gerua gaba ulia kwian me israelita me geru gaba ta gbu tañachuge me no kwian Jesu gerua gabadi. 3 Malen Pablo tañachugu ma no chegeda ngmadi una ege chui ngle kwian Chubenu tke tangle. Pablo, Bernabé mo ta gbu chage ma kiraske Chube ole ene ama me ta kennga gerule Jesu gerua giti kwian una emu ole. Chube ama kira gbu lle daga ngwale no tanre dodade Chube kiralla giti kwian gwa giti. Age no ene kwian alin giti chku uñale kwiange ulia Chube no kwian ole Pablo, Bernabé kle gerule kare. 4 Kwian ulita una Iconioge mo tku dole modi, kwian ngle mne gdaite mo litu kwian israelita me Jesu gerua gaba ole, kwian ngle na Chube gerua Jesu giti gaba mo litu Pablo ole Bernabé ole. 5 Kwian una Iconiomu chugagwalla ulita ule kwian israelita kwian me israelita ulita ole bai me Jesu gerua gaba ulia, kwian e ulita mo ta gbu age me no salengwli ule Pablo dollale Bernabé dollale, ama ulita mo ta gbu Pablo, Bernabé skie ke giti. 6 Agwa Pabloge kaire Bernabége chku uñale kwian kle mo ten amadi gire Pablo, Bernabé kigedu jo una Listrage una Derbege, una Listra kaire una Derbe kle chege nga kweri Licaoniage. Pablo, Bernabé chagedu nga Licaoniage ulita geru Jesu giti kete kwiange. 8 Una Listrage onbre gdaite me ñage chage ama medunga soli bebitra seragda kwebanga, onbre e kledu toiba dba Pabloge kodi Pablo keruchuge gerule Jesu giti. Pablo chegu gwage tanre amadi, Pabloge sugedu onbre e tale onbre Jesu gerua gai ulia suge trate Jesu ñage ama seragda dodade. 10 Gire Pablo gerudu kweri onbre seragda kwebanga ole: —¡Chkede gdate mo sera giti! Gire blike onbre e skwendu bdugu chku gdate, ama chagedu mo seragda giti. 11 Kwian ulita gwagedu Pablodi kwian sera kwebanga dodade ene, gire kwian ulita ngautu gerudu mo kwirale nga suga no ole Pablo giti Bernabé giti. Agwa Pabloge Bernabége geru e me sugedu, kwian ulita gerudu Pablo giti Bernabé giti mo kwirale: —E che chubea boke chiu nga ngaña giti kwian kare, nege che chubea kle cheske. 12 Kwian una ege chubea gdaite kada Zeus, kwian Bernabé ka jun chube Zeus. Kwian e chubea na gdaite kada Hermes chube e gerunga chube na ulita alin, Pablo gerule tanre chube e kare, malen kwian Pablo ka jun chube Hermes. 13 U gerungwa chube Zeus ole u e chege una ugakallage, ne ngwadi kwian una ege diali kle gerule ngwale chube Zeus ollade, u ege kwian gerunga chube Zeus ole kwian alin chiu chbi boke dbe chiu glijra dbe Pablo, Bernabé kledu ngwadi ama boke ollade ama chubea kare. Kwian gerunga chube Zeus ole ule kwian na ulita ole tadu gerukalin no Pablo giti Bernabé giti, ama tadu chbi gwakalinda kete Pabloge Bernabége kle age mo chubea alin kare. 14 Kwian kledu tañachuge age ulita ene agwa Pabloge Bernabége chku uñale kwian ulita kle tañachuge me no kle Pablo, Bernabé gai mo chubea Zeus kare Hermes kare, Pablo, Bernabé ta olidu kwian kle age giti, malen ama bonate ñometra modige gagunga ama jo kwianske ngaute: 15 —¿Mineade ba ulita kle cha boke gai mo chubeale? E me no age ene, cha boke kwian ba ulita kare, cha me Chube, cha kwian. Cha boke chiu aini geru ulia Jesu giti dbe bage, geru e giti ñage suge bage lle e ngwale ba kle gai mo chubeale ulita ba chugadale ngwadi. Ba ulita mo ta blitadale Chube ulia gdaitre alin ole, ama gwade, ama nga ngaña dodadu nga dba dodadu ble dodadu lle ulita nga ulitage ama dodadu, ba ama alin gadale ulia mo Chubeale. 16 Unsuialin Chube kwian chudalla ulita chugu ngwadi chage age ulita kwian tadukalin kare, kwian chagedu sugekare Chubege age me no kwian takalin kare. 17 Agwa lle kwian gbagda toi ulita Chube me junnga kwian ngeru, Chube mo ta gbu no diali age no kwian ulita alin, ene suge kwiange ama Chube ulia. Kaire Chube kle age nege che ulita alin no diali, ene chkedale uñale che ulitage Chube kle age no che alin che Chube e ulia gadale dage. Ama kle noi kage che alin kle chude ulita gbe tige gbachie no che alin ene che ñage blire no che ulita toi nga suga no ole bligda ole. 18 Pablo gerudu ene ulita kwian ole Chube giti agwa kwian ulitage me chegu no, ama me takalin chbi chuge ngwadi gwade, ama tañachugu ma no chbi gweda ketadale Pabloge Bernabége kaire Pablo, Bernabé ollade gai dage mo chubeale. Kwian me tadukalin e chuge ngwadi agwa bdagli ama me agedu ama tadu agekalin kare. 19 Pablo kledu gerule kwian una Listramu ole Chube giti gire kwian israelita chiu una Antioquíage nga Pisidiage chiu una Iconioge, kwian e ulita jo chke Pablo nate Bernabé nate una Listrage gire kwian israelita e kwian una Listramu ta blitu me no Pablodi Bernabédi. Una ege kwian tanre mo ta blitu Pablo dollale Bernabé dollale, ama ulita sko ole Pablo skiu ke giti, Pablo jaba alin jo chke dba kwian tañachugu Pablo jokeda, gire ama kira batu Pablo jabage mlialenga sugekare una kagda giti. 20 Kwian ulita nu Jesu gerua gaba ulia una ege mo litu Pablo jabadi tangle gire kwian e ulita gwa giti Pablo chku bduge ama chku gdate gire joni nabitaite unaske. Nagbietege ama jo ule Bernabé ole una Derbege. 21 Pablo, Bernabé geru no Jesu giti ketu kwian una Derbege, una ege kwian tanre Jesu gerua gau ulia gire Pablo jo naskuni dare Bernabé ole una Listrage una Iconioge una Antioquíage nga Pisidiage. 22 Una e ulita gdamaige kwian tanre geru Jesu giti gaba, Pablo, Bernabé kwian e ulita kira gbu Jesu geruadi, gerudu kwian e ulita ole: —Ba mo ta gbadale chage diali tañachuge Jesu geruage, me ama talla mlienga. Che ulita Chubenu boidale daga ngwale nga dba ai giti kwian me Chube uñe kote, gire ene bdagli che be joge Chube kle ngwadi toi diali chui tangle Chube ole. 23 Una kaire kairege Pablo kaire Bernabé gerudu ene kwian Jesu gerua gaba ole kwian kira gbagda, kaire una e kaire kairege ama kwian gweale gau gbu daba ulita Jesu gerua gaba chugagwallale daba chudaboale Jesu gerua giti, gire Pablo, Bernabé chui gau bage bligdage gerudale tanre Chube ole kwian e ulita giti, Pablo, Bernabé gerudu: “Chube, ba kwian ai ulita manade no ba ama ta gbe lle boi no ba alin daba na chudaboi no ba gerua giti diali, ba me ama chuge ngwadi joge siere ba geruage.” Pablo, Bernabé gerudu ene Chube ole kwian giti gire ama kwian e ulita jigu Chube kote jo una nage daba una ege kira gbagda Jesu geruadi. 24 Pablo, Bernabé chagedu kwian ulita Jesu gerua gaba ulia chudaboi ene una Listrage una Iconioge una Antioquíage, gire ama joni naskuni nga kweri Pisidiage tangle jo chkeni nga kweri Panfiliage. 25 Una Perge kle chege nga Panfiliage una ege Pablo, Bernabé geru Jesu giti ketu nabitaite kwian toinga una Pergege gire ama jo una Ataliage ble kagdage du gadale. 26 Una Ataliage ama du gau joni una Antioquíage nga Siriage ngnaguni, una ege Chube nu ama boke gaba Chube gerua no Jesu giti dbe kwian una ulitage. Ama lle e bo ulita Chube ama gbu lle boi kare. 27 Ama jo chkeni una Antioquíage, una ege Pablo, Bernabé mo litu kwian Jesu gerua gaba ulita ole. Pablo, Bernabé geru tragu daba Jesu gerua gaba ulita ole Chube agedu giti ama boke alin ulita, ama gerudu daba ole: —Chube kwian tanre me israelita ta gbu biale Chube gerua Jesu giti keruchuge cha bonate giti kaire kwian e tanre geru Jesu giti gau ulia —Pablo, Bernabé gerudu ene kwian ole. 28 Gire Pablo, Bernabé chegu una ege kwian Chubenu ole chui sbali.
1 Pablo, Bernabé kledu una Antioquíage kwian Jesu gerua ganga chudaboi Jesu geruadi gire chui ege kwian gweale israelita Jesu gerua ganga nga kweri Judeage jo chke una Antioquíage Pablo, Bernabé kledu ngwadi. Kwian israelita e daba na nu Jesu gerua gaba tku tangle, ama gerudu: —Ba me mo ta gbe mo kwara tkangenga sidri kwian israelita ulita kle age kare Moisés chadalla gerule kare, ba me ñage tien gitiru ji chugege agedu me no gdale. 2 Pablo, Bernabé ka bo mno kwian kle daba tke tangle geru e giti ole, Pablo gerudu: —Ba me kle gerule ulia kwian ole mo kwara tkangenga giti, age ene giti che me ña tien gitiru ji chugege, agwa Jesu gai mo tale alin e giti che tien gitiru ji chugege. Gire kwian me Pablo kerua gau dage Pablo kle gerule kare Jesu giti. Bdagli kwian ulita Jesu gerua gaba una Antioquíage Pablo, Bernabé gau kagale una Jerusalénge geru mo kwara tkangenga giti trage no kwian Jesu gerua ketanga gdataboko giti gdaboke ole kaire kwian Chubenu chugagwalla ulita una Jerusalénge ole. Kwian ulita Jesu gerua gaba una Antioquíage Pablo, Bernabé kagu una Jerusalénge, ama kwian na Chubenu una Antioquíamu kagu ule Pablo ole Bernabé ole ama gatedi. 3 Pablo kaire Bernabé kaire kwian ama gatangadi ulita jo chage una Jerusalén ngnagu, ama ulita jo tangle nga Feniciage nga Samariage. Nga ege ulita Pablo, Bernabé geru tragu kwian Jesu gerua ganga nga ege ole, Pablo gerudu: —Nga ulita cha chagedu ngwadi geru Jesu giti trage, kwian me israelita geru ulita ngeru ngwale chugu ngwadi gire ama geru Jesu giti ulia gau, ama mo ta blitu ulita Chube ole. Kwian Chubenu nga Feniciage nga Samariage Pablo keruchugu gerule no kwian me israelita Jesu gerua gau ulia giti, gire nga chegu suga noare ama ulitadi. 4 Pablo, Bernabé kaire kwian ama gatangadi ulita jo chke una Jerusalénge, gire kwian Jesu gerua ketanga gdataboko giti gdaboke kaire kwian Chubenu chugagwalla ulita kaire kwian na ulita Jesu gerua gaba, kwian e ulita Pablo kaire Bernabé gau ngwange no kaire kwian Pablo, Bernabé gatangadi ulita gau ngwange no. Gire Pablo, Bernabé geru tragu daba Chubenu una Jerusalénmu ole Chube agedu giti ama alin ulita, Pablo kaire Bernabé gerudu: —Cha chagedu Jesu gerua trage kwian me israelita tanreske, gire cha giti Chube kwian me israelita tanre ta gbu Jesu gerua gai ulia. 5 Kwian fariseo gweale nu Jesu gerua gaba kledu Pablo keruchuge gerule no kwian me israelita kle Jesu gerua alin gai ulia giti, Pablo me kle gerule mo kwara tkangenga giti malen kwian fariseo gerudu: —No kaire kwian me israelita ulita Jesu gerua gaba mo kwara tkangenga, ene kwian me israelita be age diali Moisés chadalla gerule kare, kwian Jesu gerua gai me ña e mlienga. Gerudale kwian me israelita ole ama Jesu gerua gai kaire ama agedale ulita Moisés chadalla gerule kare. 6 Kwian fariseo e gerudu ene gire kwian Jesu gerua ketanga gdataboko giti gdaboke mo litu kwian Jesu gerua gaba chugagwalla ulita ole geru trage mo kwara tkangenga giti, ama gerudu modi: —¿Che kwian me israelita tkadale tangle age Moisés chadalla gerule kare o me? 7 Kwian israelita ta daba na me israelita gbakalin mo kwara tkangenga kwian israelita kle age kare, e giti kwian Jesu gerua ketanga gdataboko giti gdaboke kaire kwian Jesu gerua gaba chugagwalla ulita geru tragu tanre. Gire Pedro chku gdate, Pedro gerudu kwian kle mo litaba mangire batre ole ene: —Cha daballa Jesu giti, uñale ba ulitage sbali Chube cha gau ba ulitaske cha kagu Chube gerua Jesu giti trage kwian me israelita ole. Ene kwian ulita me israelita Jesu gerua gai ulia gire ama ñage tien gitiru ji chugege agedu me no gdale Jesu giti. 8 Chube kwian ulita talla uñe malen kwian me israelita ama gerua gau ulia gire Chube mo Oña gbu ama tale salengwli ama mo Oña gbu che tale kare. Ene chke uñale kwian ulitage Chube no kwian me israelita ole kaire agwe. 9 Che chudalla israelita kaire kwian na chudalla me israelita, Chube gwage che ulita salengwli. Kwian me israelita Jesu gerua gau ulia gire Chube ama ta blitu Chube che ta blitu kare. 10 ¿Mineade ba mo ta gbakalin ma kweri Chubege? Jesu giti Chube agedu ulita kwian alin, kwian me israelita Jesu alin gadale ulia, ene ama chege no trate Chube gwa giti. Me no che kwian israelita gerule kwian me israelitage ama che suia ulita jwandale mo alin ene ama chege no trate Chube gwa giti. Che kaire che enusulian unsuialin me ñadu age ulita Moisés chadalla gerule kare, malen che me ñage daba na me israelita gbe age che takalin ama agedale kare Moisés chadalla gerule kare. 11 Me ene. Chege sugedale che Jesu alin gai ulia, ama giti che tien gitiru ji chugege, che me tañachugadale daba me israelita lle na gweale boadale, ene ama tien gitiru ji chugege, me dale. Chugagwalla Jesu lle ulita ulita no dodadu che alin kaire kwian na chudalla me israelita alin. Che kwian israelita kaire kwian na chudalla me israelita Jesu giti alin allabi che ulita chege trate Chube gwa giti. 12 Pablo gerudu ene kwian kle mo litaba ole, gire kwian ulita chegu tañachuge kamne, ama ulita chegu Pablo, Bernabé keruchuge gerule dare Chube agedu giti kwian me israelitaske, Chube kiralla giti Pablo kaire Bernabé lle daga ngwale no tanre dodadu kwian me israelita tanre gwa giti. 13 Pablo, Bernabé geru e ulita tragu kwian kle mo litaba ole, gire Santiago gerudu: —Cha daballa Chubenu, ba cha keruchuge. 14 Simón-Pedro geru tragu che ole Chube agedu no no gwangea kwian me israelitaske, kwian me israelita chudallaske Chube kwian gweale gau mo alin. 15 Kle boi ulita Chube gerudu kare unsuialin be boi giti, kwian Chube gerua ketanga dabage kada Amós Chube gerua degu kwian me israelita be Jesu gerua gai ulia giti, chada e gerule: 16 “Chube gerudu: ‘Cha David chudalla chugu ngwadi gire ama oindalla me chegu kwian chugagwallale dare, ama chegu u skianbada kare. Agwa gire chui be chke gire cha be age no nakwaiteni David chudalla alin kwian kle u skianbada gbeni no naskuni kare. David oindallaske cha be kwian gdaite gbe kwian ulita Chugagwallale David kare gire kwian David chudalla be cha gai dage ama cha gau dage David toidu suiale kare. 17 Chugagwalla e giti kwian me David chudalla nga ulitage be cha uñe, cha kwian ene gau mau alin, cha be ama ta gbe no cha ole, ama be cha gai ulia gire ama ulita be chege kwian chanu.’ 18 Chube gerudu ene ulita. Unsuialin uñadu ulita Chubege bdagli giti kle boi nege tangle giti e ulita uñadu Chubege ama be age ene kwian alin.” Chube gerua degaba unsuialin gerule ene. 19 Santiago gerudu dare: —Uñale chage Chube gwage kwian ulita salengwli malen che me ñage kwian me israelita bai kle Jesu gerua gai ulia ta gbe age ulita che suia kare ene ama Chubenu, me ene. Ama Jesu gadale ulia, ene ama Chubenu ulia, ama me agedale che suia kare, ama alin mno age che suia kare, suia e me amanu. 20 Che geru kagadale chada giti kwian me israelita ulita Jesu gerua gaba alin, che gerudale ama ole lle gweale ai kare che kwian israelita suia giti, che chada degale ene: “Kwian gweale me Chubenu kle lle oña dodaba mo kodi gai mo chubeale gire kle samla e kaite lle oña ege, ba me samla e gige, ba me gute. Kaire ba me samla gute be ole llagli, ba me samla be jai. Kaire ba ulita onbrenu muirenu mo ta gbadale me mo chuge ke giti.” Che chada dege ene kare kwian me israelita Chubenu ulita alin. 21 Lle e giti Moisés chada degu unsuialin, geru e bataklenga u mo litangwa Chube gerua jwanngwage chui gdale kwian israelita undege chuiage, che kaire che bitalla israelita ulita una kaire kaire ulitage kle geru e keruchuge diali kle geru e gai dage, malen che kwian me israelita ta gbadale geru e alin giti ene ama ñage chege ule kwian israelita ole diali mo lite geru Jesu gitidi. 22 Santiago gerudu ene ulita gire kwian Jesu gerua ketanga gdataboko giti gdaboke kaire kwian Chubenu chugagwalla ulita ule kwian ulita nu Jesu gerua gaba ulia ole, kwian e ulita mo ta gbu salengwli daba gweale moske gai kagadale una Antioquíage ule Pablo ole Bernabé ole. Judas gale kagadale, Judas amaña kada Barsabás, kaire Silas amaña kada Silvano gale kagadale, daba Chubenu ulita onbre e boke gai dage mo chugagwallale. 23 Kwian Jesu gerua ketanga kaire kwian Chubenu chugagwalla ulita una Jerusalénge chada degu kagale Silas ole Judas ole kwian me israelita Chubenu ulita alin, ama chada degu ene: “Cha ulita aini una Jerusalénge Jesu gerua ketanga gdataboko giti gdaboke kaire kwian Chubenu chugagwalla ulita, cha ulita ba daballa Jesu giti gbi kage ba ulita cha daballa me israelita alin kle toi una Antioquíage kaire nga Siriage kaire nga Ciliciage. 24 Aini cha ulitage geru chku cha kote kwian gweale Jesu gerua gaba aini una Jerusalénmu jo skwlenre mo ta giti geru gweale dbe llani kete bage ba ulita ta gbe tañachuge nganake geru gweale giti. Ama gerudu ba ole ba ulita onbre mo kwara tkangenga kwian israelita kare, ene ba tien gitiru ji chugege agedu me no gdale, agwa me age ene me ñage tien gitiru. Gerudre ba ole ba agedale ulita Moisés chadalla gerule kare. 25 E me ene, malen sugedu cha ulitage ma no cha daba gweale aini kage chada ai ole ba alin ba ulita ta gbagda. Cha kle daba boke kage ule che daballa Pablo ole Bernabé ole, cha ulita aini no no Pablo ole Bernabé ole cha ama gai dage. 26 Ba ulita tachkedale Pablo, Bernabé mo chugu ngwadi boi daga ngwale ba ulita giti kwian me no kote che Chugagwalla Jesu gerua dbe ba ulitage gdale. 27 Daba boke ai Judas kaire Silas cha kle kage ba ngwadi daba boke ai be geru ai amaña kle degaba chada ai giti trage ka giti ba ulita ole agali. 28 Chube Oña cha ulita ta gbu, sugedu cha ulitage cha me ñage gerule ba kwian me israelita ole ba ulita agedale ulita Moisés chadalla degaba unsuialin kwian israelita alin gerule kare. Ba kwian me israelita me agedale ulita Moisés chadalla ulita kle gerule kare kwian israelita alin mo kwara tkangenga giti, agwa ba mo ta gbadale age ai kare: 29 Kwian gweale me Chubenu kle lle oña dodaba mo kodi gai mo chubeale gire kle samla kaite lle oña ege, ba me samla e gige, ba me gute. Kaire ba me samla gute be ole llagli, kaire ba me samla be jai. Kaire ba ulita onbrenu muirenu mo ta gbadale me mo chuge ke giti. Lle ulita ai giti cha kle gerule ba ole, ba ulita mo ta gbadale chege sugekare age ai karege me mo chuge ngwadi age ene, ene ba ñage chege no ule cha kwian israelita Chubenu ole diali mo lite geru Jesu gitidi. Cha gerule ene ulita ba ole chada ai giti, ba chege no llani chage no Chube ole. Che kle meni.” 30 Chada jo degaba ulita ene gire Pablo kaire Bernabé kaire Judas kaire Silas gbi kadu bdagli daba Chubenu una Jerusalénge, ama ulita jo una Antioquía ngnagu chada dbe. Ama jo chke una Antioquíage kwian Jesu gerua gaba ulita kadu mo lite gire chada ketu kwian Jesu gerua ganga chugagwallage. 31 Kwian Jesu gerua ganga ulita chada batunga, ama ulitadi nga chegu suga no chada degaba giti. 32 Judas kaire Silas diali Chube kle ama ta gbe Chube gerua kete kwiange, Judas, Silas daba Chubenu ulita ta gbu suga no kaire ama boke daba kira gbu Jesu geruadi, ama boke chegu eni kwian ulita Jesu gerua ganga chudaboi no geruge. 33 Chui gweale jo tangle gire Judas kaire Silas tadu jogekalinni una Jerusalénge, kwian Jesu gerua ganga una Antioquíamu gbi kadu bdagli Judage Silage, ulita gerudu: —Ba jogeni no Chube gwa giti. Daba Chubenu ulita gerudu ene Judas ole Silas ole gire Judas alin joni gballa una Jerusalénge, 34 agwa bdagli Silage sugedu ma no chegeda una Antioquíage kwian tke tangle dare geruge. 35 Kaire Pablo, Bernabé cheguda una Antioquíage, ama gdamainate chegu daba Chubenu tke tangle Jesu geruage kaire ama Jesu gerua ketu kwian nage. Kwian Chubenu tanre una Antioquíamu mo ta gbu ule Pablo ole Bernabé ole daba Chubenu tke tangle kaire Jesu gerua kete kwian nage dare. 36 Chui gweale jo tangle gire Pablo gerudu Bernabé ole: —Ale tienda daba Chubenudi nabitaite una nga ulitage baini che chagedu ngwadi Jesu gerua kete, ama Jesu gerua gau ulia, che joge ama chada jwen ama kle chage mine Jesu geruadi nege. 37 Pablo gerudu ene Bernabé ole gire Bernabé alin nobi agwa Bernabé tadu Juan-Marcos dbe ule. 38 Agwa Pablo alin me no Juan-Marcos joge ule, ngeru Juan-Marcos jo ule gire ama Pablo kaire Bernabé chugu ngwadi gballa nga Panfiliage, me chagedu ama ole ule gatedi dare Jesu gerua dbe kwiange, 39 malen Pablo me ta jogekalin Juan-Marcos dbe ule nakwaite, Bernabé kira batu Pablo ole Juan-Marcos gdale, Bernabé tadu Juan-Marcos dbe ule, Pablo gerudu me no Juan-Marcos dbe ule. Ama gdabonate me tañachugu salengwli Juan-Marcos giti, malen bdagli Bernabé jo sugekare Pablo jo sugekare. Bernabé jo Juan-Marcos ole blege, ama boke du gau jo ngadrega bleske kada Chiprege. 40 Gire Pablo Silas gau mo kaire ama boke jo sugekare, kwian Jesu gerua gaba ulita gerudu Chube ole Pablo giti Silas giti: “Chube, ba daba boke ai manade no baini kaire ngwadi ama be joge ba gerua trage.” Gire ama boke jo. 41 Ama chagedu nga ulita Siriage nga ulita Ciliciage kwian Jesu gerua gaba ta gbe chage ma no kiraske Jesu geruadi.
1 Gire Pablo, Silas jo dare jo chke una Derbege kwian Jesu gerua gaba ta gbe ma no Jesu geruadi una Derbege, gire jo tangle jo chke una Listrage kwian Jesu gerua gaba una ege ta gbe ma no chage Jesu geruadi dare. Ama boke jo chke una Listrage gire kwian gdaite Jesu gerua gaba kada Timoteo skwendu Pabloge. Timoteo chebia muinga israelita Jesu gerua gaba, ama ñenua kwian griego me Jesu gerua gaba. 2 Kwian Jesu gerua gaba una Listrage una Iconioge ulita gerudu no Timoteo giti, ama ulita kle Timoteo gai dage. 3 Pablo tadu Timoteo dbakalin ule mo gatedi. Pablo bebi Timoteo dbe, ngeru Pablo gerudu Timoteo ole: —Ba mo kwara tkangenga kwian onbre israelita kle age kare, ene che joge ule Jesu gerua dbe. Ene kwian israelita mi tañachuge me no badi, ama ulita be ba gai dage nga ulita baini kaire che be joge ngwadige kwian israelita kle toi ngwadi. Uñale kwian israelita ulitage Timoteo ñenua griego, kwian onbre griego me mo kwara tkangenga, malen Pablo Timoteo gbu mo kwara tkangenga ene kwian israelita mi tañachuge me no Timoteodi. 4 Pablo, Silas, Timoteo jo, ama gdamai chagedu una kaire kairege gerule kwian Jesu gerua gaba ulita ole chada jo degaba giti una Jerusalénge, Pablo gerudu chada e giti kwian ole: —Kwian Jesu gerua ketanga gdataboko giti gdaboke ule kwian Chubenu chugagwalla ulita ole una Jerusalénge chada kagu ba ulita me israelita alin, ba mo ta gbadale age ulita chada e gerule kare. 5 Kwian Jesu gerua gaba nga tanrege mo ta gbu ma no dare Jesu gai ulia kaire geru kete daba nage, chui gdale kwian na tanre me israelita me Jesu uñe Jesu gerua gau ulia, ene kwian Jesu gerua ganga chku ma ngle mo ta gbe Jesu geruadi. Boidu ene nga ulita kaire kairege. 6 Pablo, Silas, Timoteo kwian mainate tadu jogekalin nga Asiage Jesu gerua kete kwian nga emuge, agwa Chube Oña ama ta gbu ma no me joge nga ege. Ama jo tangle nga kaskwada nga Frigiage nga Galaciage, 7 jo nga Misia ngnagu, jo chke kodi nga Misiage, gire eni ama ulita tañachugu joge nga Bitiniage, agwa Chube Oña ama ta gbu me joge nga ege. 8 Jo tangle dare nga Misiage ama jo chke ble kagdage du lugakleda ngwadi una kada Troage. 9 Eni Pablo, Silas, Timoteo chegu gbe una Troage, ngajrege Pablo gbi chugu onbre gdaite nga Macedoniamu ole. Pablo gwagedu gbire onbredi onbre mo gbu gdate gerule Pablo ole: “Pablo, bai aini nga Macedoniage cha ulita chudaboi.” 10 Pablo gbi chugu ene gire cha ulita ko batu biale joge nga Macedoniage. Chube kle gbi gbe Pablo gwage Chube takalin cha ulita geru Jesu giti ketadale kwian nga Macedoniage. Cha chada ai deganga kledu una Troage jo ule Pablo gatedi. 11 Una Troage cha ulita du gau cha jo duge tainkwli una Troage joge ngadrega bleske Samotraciage. Ngajrege cha chegu nga Samotraciage, nagbietege cha ulita jo dare duge cha jo chke una kada Neápolige. 12 Una Neápolige cha ulita jo dare cha jo chke una Filipoge nga Macedoniage, una e kweri kwian nga Romamu una dodaba eni toingwa, cha ulita chegu chui gwealege una ege. 13 Kwian israelita undege chuiage cha ulita jo chage una Filipos gwagda giti cha jo chke chi kweriadi. Chi e kagdage cha ulita tañachugu eni kwian israelita kle mo lite diali gerule Chube ole. Kwian skwendu chi kagdage ulia cha ulita tañachugu kare. Eni cha ulita toidu dba gire Pablo geru Jesu giti tragu muinga kledu mo litaba eni ole. 14 Pablo geru Jesu giti tragu muinga ole muinga ulita kledu mo litaba Pablo keruchuge, muinga gdaite kada Lidia, Lidia una Tiatiramu kle toi una Filipoge ama ñometra glitale no no chra lénrennga chbadanga. Lidia mo ta gbaba no Chube ole Chube gai dage, muinga e Pablo keruchugu gerule Jesu giti gire Chube ama ta gbu geru Jesu giti keruchuge no no, ama geru Jesu giti gau ulia. 15 Kaire Lidia bitalla ulita Jesu gerua gau ulia, gire Lidia mo ñeangu chiske Jesu kalla giti ule mo bitalla ulita ole. Lidia gerudu cha ulita ole: —Bage suge trate cha ulita Jesu gerua gau ulia mo tale, cha takalin ba chie cha ole chege cha ngwadi. Lidia mo ta gbu cha ulita gai ngwange mo ullage gire cha ulita cheguda ama ullage. 16 Chui nage cha ulita joni nabitaite kwian israelita kle mo lite gerule Chube ole ngwadi chi kweria kagdage una Filipoge. Cha jo chage nga e ngnagu gire jonke muinga jwligebanga tendu cha ulita ngwange, diali dolla kle muinga e ta gbe gerule kwian na ole be boi giti, ulita chadalla kete kwian bai geru kade amage be boi giti, e giti muinga kle igi tanre gai kle kete mo mauñage. 17 Muinga e chagedu cha ulita nate ngaute cha giti kwian na ole, ama gerudu: —Onbre ai ulita Chube kweri kiraske gerua dbanga, ama kle chage geru Jesu giti dbe ba ulitage ene ba tien gitiru ji chugege age me no gdale. 18 Muinga e agedu tanre ene chui tangle ngaute cha ulita nate, Pablo skwatigu ama keruchuge ngaute tanre, Pablo me takalin ama ngaute dare, malen Pablo jwlituda mo nate gwagedu muinga jwligebanga dolla kotedi, Pablo gerudu dolla kle muinga ta gbe ole: —¡Jesucristo kalla giti cha gerule ba ole, joga siere muinga ege me chage dare ama ole ama gbe age ba takalin kare! Pablo gerudu ene gire blike dolla jo siere muingage. 19 Muinga e kledu diali igi kete mo mauñage, dolla jo siere muinga ege gire muinga mauñage sugedu muinga me ñage igi jwen dare ama alin, gire mauña e skochiu Pablodi muinga kle igi gai ama alin gdale, muinga mauña Pablo gau Silas gau du kwian chugagwalla ngwadi kwian ulita gwa giti. 20 Pablo, Silas gbere kwian gerunga daba giti jiske o me jiske gwa giti, kwian Pablo, Silas dbanga gerudu: —Kwian israelita ai kle kwian ulita gbe kira bate modi geru ama kle chage ole giti. 21 Ama boke kle che bitalla ulita tke tangle nganake geru kle degaba che alinge. Che kwian Romamu malen che me ñage ama gerua gai ni che agedale ama kle gerule kare. 22 Muinga mauña gerudu ene kwian ulita gwa giti gire kwian ulita mo ta gbu me no Pablo dollale Silas dollale. Kwian gerunga daba giti jiske o me jiske ama kwian na gbu ñometra jwennga Pablodi Siladi Pablo, Silas batale taglale glita giti. 23 Pablo, Silas batre tanre jegwale glita giti gire Pablo, Silas tkere skage, kwian gerunga daba giti jiske o me jiske gerudu kwian skage mananga ole: —Ba kwian skage boke ai manade no no, cha me takalin ama kigeni. 24 Kwian skage mananga agedu kwian gerunga daba giti jiske o me jiske gerudu kare. Kwian skage mananga Pablo, Silas gbu ska bdaglige ugdoge, kwian skage mananga Pablo, Silas sera gbu glidregaske ene kwian skage mananga tañachugu Pablo, Silas mi ñage kige. 25 Pablo, Silas jo tkaba skage chuiage nga jere bduke gire Pablo, Silas kledu gerule Chube ole kaire kledu mo gate Chube giti nga suga no ole, kwian skage na ulita kledu Pablo, Silas keruchuge gerule Chube ole kaire mo gate. 26 Bonate kledu mo gate ene gire blike nga kwian kle skage ngwadi jwliendu mno, kwian skage ulla dbia dba onskagunga erutu, gire ugaka ulita tigunga kaire kwian skage ulita lugabada ska tigunga. 27 Kwian skage mananga kledu gbe, nga jwliendu gire ama chiu tachke gwagedu kwian skage ugakalla kledu ka ngwale, ama tañachugu kwian skage ulita kigedu gire ama sbadi jun mo gwagda agali, uñale kwian skage manangage ama gwabeda kwian skage kigedu gdale. 28 Gire Pabloge chku uñale kwian skage mananga be mo gweda, Pablo ngautu amadi, Pablo gerudu: —Ba me mo gweda, cha ulita kle aini ngmadi. 29 Pablo gerudu ene gire kwian skage mananga ngautu daba nage daba chie jichra dbe, jichra giti kwian skage mananga jo jrite Pablo kle ngwadi, ta kennga ole ama jirenga trate jegwale jo chke Pablodi jongnagwa skutu dba Pablo, Silas gwangnagu ama gadale dage. 30 Gire kwian skage mananga Pablo, Silas du goga kwian skage mananga geru kadu ama bonatege: —Cha ba gai dage, cha gerule ba ole, ¿cha agedale mine gire cha tien gitiru ji chugege cha agedu me no ulita gdale? 31 Pablo, Silas gerudu kwian skage mananga ole: —Ba mo ta gbadale Chugagwalla Jesu gai ulia ene ba kaire ba bitalla be tien gitiru ji chugege ba agedu me no gdale. 32 Pablo, Silas geru Jesu giti ketu amage kaire ama bitalla ulita kle toi gwa ama olege, 33 gire blike Pablo kwian skage mananga kaire ama bitalla ulita ñeu chiske Jesu kalla giti. Chui amañage ngajrege kwian skage mananga e amaña Pablo, Silas sola gligu chidi gdege gbu solage. 34 Kwian e amaña Pablo, Silas du mo ullage, ama Pablo, Silas ullu bligdadi. Ama ulita Jesu gerua gau ulia malen ama ulitadi nga suga no no Jesu giti. 35 Nga chku ju ngabebitabi kwian gerunga daba giti jiske o me jiske guardia donga gweale kagu gerule kwian skage mananga ole kwian skage mananga Pablo skajwennga Silas skajwennga kage. 36 Kwian skage mananga gerudu Pablo ole: —Kwian gerunga daba giti jiske o me jiske geru kagu cha alin cha ba boke skajwennga kage siere, nege ba ñage joge siere aini ta no giti —kwian skage mananga gerudu ene Pablo, Silas ole. 37 Agwa Pablo me tadu jogekalin kwian skage mananga gerudu kare ama ole, malen Pablo gerudu guardia donga kagaba ole: —Cha boke kwian nga Romamu me jo geru kadaba chage taingwli ngeru cha jo kwabatabage glita giti kwian ulita gwa giti, cha bonate tkere skage uñale kwian ulitage, ¿mineade nege ba ta cha skajwankalinnga skwlenre kwian ulitage? Ma no ba me cha skajwennga gballa, kwian bai guardia donga kagu cha tke skage aini ama agali chiedale cha skajwennga. 38 Pablo, Silas me mo chugu ngwadi mo skajwennga guardia dongage, Pablo gerudu ulita guardia donga ole, guardia donga joni Pablo gerudu kare trage kwian gerunga daba giti jiske o me jiske ole. Kwian gerunga daba giti jiske o me jiske geru e keruchugu gire kwachiu tanre, chku uñale amage guardia donga giti Pablo, Silas kwian nga Romamu, malen ama kwachiu, uñadu amage ama me ñage kwian nga Romamu tke skage ngeru ama geru kade ama agedu mine gitige. 39 Kwian gerunga daba giti jiske o me jiske jo Pablo, Silas kle skage ngwadi, ama gerudu Pablo ole Silas ole: —Cha agedu me no ba ole, cha agedu giti ba e talla mlienga. Kwian Pablo, Silas kagu tkale skage ama Pablo, Silas skajunnga, kwian e gerudu ama boke ole: —Ma no ba joge siere una aige. 40 Pablo, Silas skajunlenga gire ama bonate jo muinga kada Lidia kle toi ngwadi, jo chke Lidia ngwadi kwian tanre nu Jesu gerua gaba kledu mo litaba, Pablo, Silas kwian e ulita nu Jesu gerua gaba ta gbu chage gwangerugu Jesu geruadi gire Pablo, Silas jo siere una Filipoge.
1 Pablo, Silas jo tangle una Anfipolige una Apoloniage jo chke una Tesalónicage, una ege u kwian israelita mo litangwa Chube gerua jwanngwa kle. 2 U ege Pablo jo mo lite ama diali kle age kare kwian israelita undege chuiage, semana gdamai undege chuia kaire kairege Pablo jo u ege mo lite geru trage kwian ulita kle mo litaba ole, Pablo gerudu tanre kwian ole Chube gerua degaba unsuialin giti. Pablo geru treunnga Chube gerua degaba kle gerule Cristo jogedaleda gire Cristo jaba chkedaleni gwade, Pablo gerudu: —Cristo e amaña Jesu, cha kle ama gerua kete ba ulitage. 4 Kwian israelita gweale Jesu gerua gau ulia Pablo giti mo litu Pablo ole Silas ole, kaire kwian griego tanre bai ngeru mo ta gbaba Chube gai dage, kwian griego ene geru Jesu giti gau ulia Pablo gerudu kare, kaire muinga tanre bai kwian kle gai dage, muinga ene tanre geru Jesu giti gau kaire. 5 Kwian israelita me Jesu gerua gaba ulia Pablo gerudu kare kwian israelita ene semale tanre ta skochiu tanre kwian toinga una amañage tanre Jesu gerua gau ulia giti. Kwian israelita me Jesu gerua ganga ama kwian na me no chagenga ngwale gbu geru jinade Pablo dollale Silas dollale una gira jegwale kwian ulita ole ene kwian una ege ulita chege skochie Pablodi Siladi. Kwian mo litu ole mne gdaite jo kwian kada Jasón kle toi ngwadi Pablo, Silas gadale gdabonate ketadale kwian ulitage agedale daga ngwale ole. 6 Kwian mne gdaite ege Pablo, Silas me skwendu Jasón ngwadi, gire kwian mne e Jasón gau Pablo, Silas giti tangle kira batuge dbadale ule kwian na gweale Jesu gerua gaba ole, kwian mneite e Jasón du ule kwian na ole chugagwalla una ege gwa giti, gerudu kweri chugagwalla ole: —Kwian ai kle chage Pablo nate ama kle age Pablo, Silas kle gerule kare. Pablo, Silas kle kwian una ai ulitage ta gbe kira bate, Jasón nu ama gaba ngwange mo ullage. Kwian ai ulita kle age chugagwalla kweri emperador nga Romage gerua dollale, ama ulita kle gerule Chugagwalla ma kweri che chugagwalla emperadorge kle, Chugagwalla e kada Jesu, geru Jesu giti ama kle chage dbe ulita kwianske kwian gbe kira bate modi geru giti. 8 Kwian chugagwalla una ege ulita kaire kwian na tanre geru e keruchugu, ulita chegu tañachuge tanre ta skochie ole. 9 Gire kwian chugagwalla ulita igi kadu Jasónge kaire daba na Chubenuge ama ulita skajwangdanga, Jasón kaire daba na igi ketu mo giti gire ama ulita jo skajwanbanga. 10 Chui amaña ngajrege kwian ulita Jesu gerua gaba una Tesalónicamu Pablo, Silas kagu kige blike dolla ngeru una Bereage. Pablo, Silas jo chke una Bereage gire jo u kwian israelita mo litangwa Chube gerua jwanngwage. 11 U ege Pablo geru Jesu giti ketu kwian israelita una Bereamuge, kwian una Bereamu geru Jesu giti keruchugu ma no ta no giti kwian una Tesalónicamuge. Kwian ngle israelita una Bereamu geru Jesu giti gau ngwange no. Kwian israelita una ege Chube gerua degaba unsuialin batunga Chube gerua jun chui gdale, ene suge kwian israelita ege ulia Pablo kle gerule kare kle gerule Chube gerua degaba kare o me. Chku uñale amage Pablo kle gerule geru ulia. 12 Ene kwian israelita una Bereage tanre geru Jesu giti gau ulia kaire kwian me israelita onbrenu muirenu tanre Jesu gerua gau ulia, kwian ulita toinga una Bereage muinga e ulita gai dage muinga e kle toi no ama ulita gwa giti. 13 Geru chku uñale kwian israelita una Tesalónicamuge Pablo kle geru Jesu giti kete kwian una Bereamuge kwian tanre kle geru e gai kle mo ta gbe chage geru e ole, gire kwian israelita mneite una Tesalónicamu jo una Bereage Pablo nate geru jinade me no kwian ulita una Bereamu ta gbale skochie Pablo dollale. 14 Malen kwian Jesu gerua gaba una Bereamu Pablo kagu blike ble kagdage du gadale, agwa Silas kaire Timoteo cheguda ngmadi una Bereage. 15 Kwian Jesu gerua gaba una Bereamu gweale jo ule Pablo gatedi duge una Bereage joge una Atenage. Pablo gatangadi chiuni una Bereageni Pablo gerua dbe Silas alin Timoteo alin Silas, Timoteo jogedale blike Pablo nate ten Pablo ngwange una Atenage. 16 Pablo kledu Silas, Timoteo manade ngwange una Atenage gire Pablo chagedu unaske Pablo gwagedu lle oña ngwale tanredi, Pablo ta skochiunga gwage una ulitage lle oña ngwale tanredi kwian nu dodaba mo kodi gai chubere. 17 Pablo gwagedu lle oña tanre kwian kle gai chuberedige malen Pablo jo u mo litangwa Chube gerua jwanngwage geru ulia tragadale kwian israelita ole kaire kwian me israelita kle mo ta gbe Chube gai dage ole. Pablo gerudu tanre Jesu giti chui gdale kwian ole u mo litangwage kaire nga baini kaire kwian kle mo litaba geru trage ngwadi. 18 Kwian e ulita ole Pablo kle gerule tanre Jesu giti kaire kle gerule tanre Jesu chkuni gwade giti. Kwian epicúreo gerua jwannga gweale kaire kwian estóico gerua jwannga gweale, kwian e ulita Pablo keruchugu gerule tanre ene Jesu giti malen ama mo ta gbu geru trage Pablo ole, ama gweale gerudu Pablo giti: —Kwian e kle gerule tanre ngwale, ¿ama kle gerule llema giti? Gweale na gerudu: —Cha tañachuge ama gerunga chube nga namu giti cheske —kwian gerudu ene Pablo giti. 19 Kwian epicúreo kaire kwian estóico ulita diali kle mo lite geru trage tanre modi nga kada Areópagoge, nga ege kwian e ulita Pablo du Pablo jo chke nga ege gire kwian geru kadu Pabloge: —Ba kle chage kwian tke tangle geru jagerege, cha takalin ba geru e trage cha ole cha ulitage chke gda uñale. 20 Ba kle kwian tke tangle geru e cha me keruchugaba giti, cha me geru e uñe. Geru ba kle kwian tke tangle giti cha uñakalin, ¿llema giti ba kle kwian tke tangle? —kwian geru kadu ene Pabloge. 21 Kwian ulita una Atenamu kaire kwian nga namu kle toi una Atenage kwian e ulita diali kle mo ta gbe geru na jagere keruchuge alin lle ulita giti gire bigwa kle geru e trage modi tanre geru keruchugu giti. Malen ama ulita ta Pablo keruchugakalin Pablo kle gerule giti ulita. 22 Kwian geru kadu Pabloge ama kle llema gerua kete, gire Pablo chku gdate kwian ulita kle mo litaba eni gwa giti nga Areópagoge, Pablo gerudu kwian e ulita ole: —Ba ulita kwian una Atenamu, cha gerule ba ole, ba cha keruchuge, ba ulita gerule ba kwian Chubenu, agwa una aige cha kle gwage lle oña tanredi dodaba mo kodige ba kle gai chubere ba kle gai dage. 23 Cha chagedu una Atenas ulitage, cha gwagedu tanre una ai ulitage lle oña ngle dodaba mo kodi ba kle gai chubere ba ulita kle mo lite ngwadi. Nga gdaitege ba nu nga dodaba lle oña gdaite gbangwa, lle oña e ba kle gai chubere agwa ama kalla me chke uñale nate, malen lle oña e giti ba nu chada degaba gerule: “Chube na kle, che me ama uñe.” Ba me Chube uñe agwa ba diali kle mo lite gerule lle oña dodaba mo kodi ole, agwa lle oña e me Chube ulia. Suge bage Chube na kle agwa Chube e kalla me uñale bage, Chube e giti cha kle gerule kwian ole cha kle kwian tke tangle ama giti. 24 Chube cha kle gerule giti Chube e nga ulita dodadu Chube lle ulita gbu nga ulitage ama nga ngaña ulita mauña nga dba ai ulita mauña, Chube e me toi gwa kwian u dodabage mo kodi. 25 Kaire Chube e me takalin mo chudaboangage, ama ñage age gballa ulita, Chube e che gbu toi gwade, ama kle lle ulita kete chege toigda, ama kle che ulita manade no. 26 Pablo gerudu dare: —Chube kwian onbre gdaite dodadu, onbre e gdaitre alin giti Chube kwian chudalla ulita gbu jrienda nga ulitage, kaire Chube kwian gbu toi nga ulitage. Chube chura gbu kwian alin toi nga dba ai giti Chube takalin kare, kaire Chube kwian ulita chudalla ta gbu toi nga bai kairege Chube takalin kare. 27 Chube agedu ene ulita kwian ulita alin, ene sugedale kwiange kwian chudalla ulita ñage Chube jinade nate mo tale tañachuge ama giti, ene kwian bai mo ta gbe Chube jinade nate, kwian enege Chube skwen ene kwian ñage Chube uñe. Cha gerule ulia ba ole, Chube me kle bate ni che gdaitege ama kle che ole, Chube takalin che ulita ama uñe. 28 Nege cha gerule ba ulita ole, ba bitalla gweale kwian chada deganga mauña gerudu: “Chube giti che ulita kle toi gwade che ulita kle chage che kle lle ulita boi.” Kwian chada deganga mauña na gerudu: “Che ulita Chube olia.” Kwian chada deganga mauña gerudu ene. 29 Ene kaire suge chege Chube che ulita dodadu che ama olia, gire ene che me ñage tañachuge lle oña ngwale gai chubere, oro dodaba lle oña ngwalere gai chubere, igi dodaba lle oña ngwalere gai chubere, ke dodaba lle oña ngwalere gai chubere, kwian lle oña e ulita dodade mo kodi kwian tañachuge e Chube gire kle lle oña e gai mo chubeale, agwa e me Chube ulia kwian lle oña dodanga kle tañachuge kare. 30 Unsuialin kwian tanre agedu me no Chube dollale lle oña dodaba mo kodi gai chubere, kwian agedu ene giti Chube me talladu Chube kwian chugu ngwadi age, e suiale me uñadu kwiange Chube mine. Agwa nege kwian ulita alin nga ulitage Chube gerule kwian ulita mo ta blitadale Chube ulia ole, kwian ulita mo ta gbadale joge siere ama kle age me no ulitage Chube ulia gai mo Chubeale. 31 Chube chui gbu gerungwa trate kwian ulita giti kwian bai jiske kwian bai me jiske Chube gwa giti, Chube Jesu gbu gerule ene kwian ulita giti Chube Jesu kagu nga dba ai giti, Jesu jokeda, Chube mo kiralla giti Jesu jaba gbuni gwade kwian ulita gwa giti. E giti sugedale trate kwian ulitage ulia Chube be Jesu gbe gerule kwian ulita ole bdagli bai jiske bai me jiske. 32 Pablo gerudu ene ulita kwian kle mo litaba nga Areópagoge ole, kwian e ulita Pablo keruchugu gerule jaba chkeni gwade giti, kwian gweale Pablo gidadu Pablo kledu gerule giti, kwian na gweale gerudu Pablo ole: —Chui nale cha ulita ta ba keruchugakalin gerule dare jaba chkeni gwade giti agwa nege cha me ba keruchugakalin dare ba kle gerule kare giti. 33 Kwian gerudu ene Pablo ole gire Pablo jo siere nga ege. 34 Kwian gweale Jesu gerua keruchugu Pablo giti kwian mo ta gbu chage Pablo nate Jesu gerua jwen Pabloge, kwian ene ulita Jesu gerua gau ulia Pablo kle gerule kare. Kwian e ulitaske onbre gdaite kada Dionisio ama kwian kweri diali mo lite nga Areópagoge, onbre e Jesu gerua gau ulia. Muinga gdaite kada Damaris Jesu gerua gau ulia kaire kwian na mo ta gbu geru Jesu giti gai ulia Pablo gerudu kare ama ole.
1 Boidu ene una Atenage, gire Pablo jo siere una ege, Pablo jo una Corintoge. 2 Una Corintoge Pablo tendu kwian onbre israelita ngwange biale, onbre e kada Aquila ama muira kada Priscila amaña kada Prisca, una ege Pablo ama bonate uñu. Aquila nga Pontomu, ama ule mo muira Priscila ole chieba nga kweri Italiage ama chkeba sugeti una Corintoge Pablo ngeru gire Pablo jo chke. Nga Italiage ama bonate jo siere, chugagwalla kweri emperador kada Claudio nga Italiamu geru gbu kwian israelita ulita alin kwian israelita jogedale siere una Romage Aquila, Priscila kledu toi ngwadi, malen Aquila, Priscila jo toi una Corintoge. Una Corintoge chui gwealege Pablo jo basale Aquila kle toi ngwadi. Pablo, Aquila lle amaña boanga salengwli, 3 Pablo bda boligda ulla dodanga kaire Aquila kaire Priscila bda boligda ulla dodanga. Malen Pablo chegu toi Aquila ole bda boligda ulla dodade ule. 4 Chui gdale undege chuiage diali Pablo jo u kwian israelita mo litangwa Chube gerua jwanngwage, eni Pablo gerudu kwian ole kwian israelita kwian me israelita ta gbe suge geru ulita Jesu gitige. 5 Nga Macedoniage Silas, Timoteo chiu, chku una Corintoge Pablo kle ngwadi. Chui ege gwangerugu Pablo mo ta gbu geru Jesu giti alin dbe kwiange kaire gerule kwian israelita ole Jesu amaña Cristo, Pablo lle boi ngeru kare chugu ngwadi. 6 Kwian israelita gweale una Corintomu mo gbu Pablo dollale ama ka bo tanre me no Pablo ole, ama me geru Jesu giti gau ulia Pablo gerudu kare. E gdale Pablo mo ñometralla skiunnga kote kwian israelita ulita dollale, Pablo gerudu kwian israelita ulita e dollale, Pablo gerudu: —Ba ulita chege jiske agali me Jesu gerua gai ulia gdale, e giti ba be jogenga sugekare Chubege diali. Cha geru Jesu giti ketu bage, ba me geru e gau ulia, e giti cha me jiske Chube gwa giti agwa ba chege jiske ba me geru e gau ulia gdale. Chui aige gwangerugu cha me Jesu gerua kete bage dare cha be joge Jesu gerua kete kwian me israelitage. 7 Pablo gerudu ene gire Pablo jo siere u kwian israelita mo litangwa Chube gerua jwanngwage. Pablo jo onbre kada Ticio-Justo ullage, onbre e no Chube ole ama kle Chube gai dage. Onbre e kle toi ngmadi u kwian israelita mo litangwa ngena, Ticio-Justo kle toi ngwadi kwian tanre mo litu Pablodi Jesu gerua keruchuge. 8 Kwian onbre na kada Crispo, ama u kwian israelita mo litangwa mananga, onbre e ule ama olia ulita ole Jesu gerua gau ulia kaire kwian na tanre una Corintomu Pablo keruchugu gerule Jesu giti Ticio-Justo ullage. Kwian ulita bai Jesu gerua gau ulia ama ulita mo ñeangu chiske Jesu kalla giti. 9 Bitaite ngajrege Jesu gerudu gbire Pablo ole: —Ba me kennga geru dbe kwiange, ba mo ta gbadale chage diali geru cha giti kete kwiange, ba me ka chite cha gerua giti. 10 Cha kle ba ole diali ba manade, ene una aige kwian be mo ta gbakalin age gweale me no ba ole me ñage age, ba mo ta gbale gerule kwian ole no cha giti, una aige kwian tanre be cha gerua gai ulia. 11 Jesu gerudu ene gbire Pablo ole gire Pablo chegu eni una Corintoge nga Acayage chura gdaite giti dai gdadereke kwian tke tangle geru Jesu gitige kwian una Corintomuske. 12 Kwian nga Acayamu chugagwalla gobernador kada Galión suiale kwian israelita ngle mo litu ole Pablo dollale, kwian e Pablo du chugagwalla Galión ngwadi Pablo gbale jiske chugagwallage kle geru dbe giti gdale. 13 Kwian ulita Pablo dbanga gerudu chugagwalla Galión ole: —Onbre ai kle chage kwian ulita ta gbe chage Chube nate Chube gai dage ama me gerule salengwli Moisés chadalla degaba cha kwian israelita ulita alin kle gerule kare. 14 Pablo biri gerule gire Galión gerudu ngeru kwian israelita ulita ole: —Pablo skwe bo o ama daba guda, ene cha ba kwian israelita ulita chuge ngwadi gerule ama dollale ama gbe jiske, agwa cha me tallade e giti ba kle gerule giti. Chage suge ama me agedu me no, cha me ba keruchugakalin gerule ngwale Pablo giti. 15 Ba kle gerule Pablo kle kwian tke tangle geru na giti me ba enusulian suia kare ni ba ulita gerua gerule kare, e alin giti cha me ñage ama gbe jiske. Ba ta agekalin ama ole ba ama gbakalin jiske, ba age ama ole agali ba takalin kare, cha mi mo chuge ngwadi age Pablo ole ba ulita takalin kare. 16 Galión gerudu ene kwian israelita ulita ole gire Galión kwian israelita ulita kagu siere u ama kledu geru trage ngwadige. 17 Gire kwian ulita onbre kada Sóstenes gau batu kwian ulita gwa giti ngmadi Galión kle gerule kwian giti ngwadi. Kwian ulita Sóstenes batu ene Galión gwa giti, agwa Galión me talladu me ka bo Sóstenes gdale, Sóstenes ama kwian ulita lle boanga u israelita mo litangwage chugagwalla. 18 Pablo chegu toi una Corintoge chui na ngle kwian Chubenu ole, bdagli Pablo jo siere una Corintoge Pablo gbi jigu kwian Chubenu ulitage, daba Chubenu kada Aquila kaire Aquila muira kada Priscila jo chage ule Pablo ole una Cencreage du gadale jogedaleni nga kweri Siriage. Pablo, Aquila, Priscila kle biale una Cencreage du gadale joge nga Siria ngnagu gire ngeru Pablo mo chuga itu ulita dba nate. Mo chuga itu ene e gerule Pablo lle bo ulita Chube alin una Corintoge ama mo ta gbu age kare Chube alin. 19 Pablo agedu ene una Cencreage gire Pablo jo duge ule Aquila ole Priscila ole jo chke una Efesoge. Una ege Pablo jo sugekare Priscilage Aquilage jo gballa u kwian israelita mo litangwa Chube gerua jwanngwage, u ege Pablo gerudu tanre Jesu giti kwian israelita kle mo litaba ole. 20 Kwian israelita tanre kledu mo litaba u ege, ama Pablo keruchugu gerule Jesu giti gire ama ulita tadukalin Pablo chege ama ole chui na darege ama tke tangle, agwa Pablo me tadu chegekalin una ege. 21 Pablo gbi jigu ama ulitage bdagli, Pablo gerudu: “Chube takalin, cha be chieni chui gwealege aini ba ulita chada jwen nabitaite.” Pablo gerudu ene ulita kwian israelita ole gire Pablo du na gau una Efesoge jogedale una Cesareage. 22 Pablo jo chke una Cesareage gire ama jo una Jerusalénge gbi kade kwian Chubenu ulitage toinga una ege, gire jo dare una Antioquía ngnagu. 23 Pablo jo chke una Antioquíage, eni Pablo chegu chui gwealege gire ama jo chage nga Galaciage nga Frigiage kwian Chubenu ulita una kaire kairege ta gbe nabitaite chage ma no dare Jesu geruadi. 24 E suiale kwian israelita gdaite kada Apolos ama una Alejandríamu chku una Efesoge gerule Jesu giti kwian ole. Apolos Chube gerua degaba unsuialin uñe trate, Apolos gerunga trate no kwian ole Chube gerua giti. 25 Ama geru jwanba Chube gerua degaba unsuialinge chage trate Chube ole giti. Ama kwian tku tangle trate ta suga no ole Chube gerua degaba unsuialin gerule Jesu gitige. Uñadu Apologe Juan-Bautista gerudu Jesu giti Juan-Bautista kwian ñeu chiske Chube gwa giti, agwa geru dare Jesu giti amage me uñadu, Jesu boidu giti nga dba ai giti me uñadu amage kaire me uñadu amage Chube mo Oña kagaba kwian alin kwian kira gbanga. 26 U kwian israelita mo litangwa Chube gerua jwanngwa una Efesoge, u ege kwian ngle kledu mo litaba gire Apolos jo chke u ege, ama geru gweale uñu Chube giti tragu kwian ulita gwa giti. Priscila kaire Aquila ama boke Apolos keruchugu gerule Chube giti kwian ole, Aquilage Priscilage sugedu Apolos me geru Jesu giti ulita uñe trate. Apolos gerudubi kwian ole Chube giti gire Aquila ule Priscila ole Apolos du sugekare geru ketale Apologe ma no trate Jesu giti. 27 Boidu ene ulita gire Apolos tadu jogekalin nga Acayage Jesu gerua dbe, kwian Chubenu una Efesomuge skwendu noare Apolos kle tañachuge joge nga Acayage. Apolos bebi joge gire kwian Chubenu ulita una Efesomu chada degu ama giti kwian Chubenu nga Acayage alin ene chada e giti chkedale uñale kwian Chubenu nga Acayamuge Apolos Jesu gerua dbanga ulia, ene kwian nga Acayamu be Apolos gai ngwange no. Apolos jo, jo chke nga Acayage. Chube agedu no no kwian nga ege alin Chube kwian e ta gbu Jesu gerua gai ulia, Apolos kwian e ulita chudabo ta gbe no no dare Jesu geruadi. 28 Kwian ulita gwa giti Apolos gerudu tanre kwian israelita gweale ole kwian e me kle tañachuge trate no Jesu giti, Apolos tadu kwian israelita e ta gbe suge trate Jesu giti, Apolos Chube gerua degaba unsuialin Jesu giti batunga kwian israelita ulita alin, gire ama geru e treunnga no trate kwiange ene ñage suge kwiange Jesu amaña Cristo Chube gerudu giti sbali Chube be Cristo kage kwian israelita alin. Apolos gerudu ene kwian ole gire kwian israelita bai me kle tañachuge no Jesu giti chegu kamne me su gerule dare.
1 Apolos kledu una Corintoge nga Acayage gire Pablo chiu nga Frigiage chagedu gliske bate una Efeso ngnagu, chku una Efesoge. Eni kwian tanre Jesu gerua gaba skwendu Pabloge. 2 Pablo geru kadu kwian Jesu gerua gabage: —¿Ba ulita Jesu gerua gau gire Chube Oña chku ba tale? Kwian Jesu gerua gaba ulita jaindunga: —Me dale, cha ulita me geru keruchugaba gerule Chube Oña giti. 3 Pablo geru kadu kwiange: —Ba Jesu gerua gau gire ¿ba ulita mo ñeangu chiske chema kalla giti? Gire ama ulita jaindunga: —Cha jo ñeaba chiske Juan-Bautista agedu kare. 4 Pablo gerudu ama ulita ole: —Kwian mo ta blitu Chube ole Juan-Bautista gerudu kare Juan-Bautista kwian ene ñeu chiske Chube gwa giti, agwa kaire Juan-Bautista gerudu kwian na be chie Juan-Bautista nate kwian ama gadale ulia, Juan-Bautista gerudu ene kledu gerule Jesu giti. 5 Kwian ulita Pablo keruchugu gerule ene Jesu giti gire ama ulita mo ñeangu chiske Chugagwalla Jesu kalla giti. 6 Pablo ko gbu kwian e ulita chuga giti gdaite gdaite, Pablo gerudu Chube ole ama ulita giti gire Chube Oña chku kwian e ulita tale, kwian e ulita gerudu kwira nale me jwanba gire Chube ama ulita ta gbu Chube gerua kete kwian nage. 7 Kwian e ulita onbre gdataboko giti gdaboke. 8 Dai gdamai Pablo chegu una Efesoge diali Pablo kledu joge u kwian israelita mo litangwa Chube gerua jwanngwage una Efesoge, eni Pablo me kwachiu ni sidri Chube gerua Jesu giti trage kwian ole. Ama gerudu kwian ole kwian ulita mo ta gbadale geru Jesu giti gai ulia, ene Jesu giti kwian chege Chubenu. 9 Kwian tanre geru e keruchugu, ama gweale mo chuga gbu mno me tadu geru Jesu giti gai ulia, kwian ulita gwa giti kwian e gerudu me no geru jagere Jesu gitidi, gire Pablo jo siere eni kwian ulita gerudu me no Jesu gerua dollalege. Boidu ene gire kwian Jesu gerua ganga Pabloge u na gau mo litangwa Pablo ole Jesu geruadi, kwian e ulita mo litu kwian kada Tirano ngwadi. Eni diali chui gdale Pablo kwian Chubenu tku tangle Jesu giti. 10 Pablo chegu chura gdaboke ngmadi una ege kwian ta gbe Jesu geruadi, ene geru Jesu giti chageduda kwianske kle toi nga kweri Asiage ulita, kwian israelita kaire kwian me israelita ulita toinga nga Asiage geru Chugagwalla Jesu giti keruchugu. 11 Una Efesoge Chube Pablo gbu age tanre Chube kirallaske kwian gwa giti, Pablo lle daga ngwale no tanre dodadu Chube kiralla giti. 12 Ñomedrega Pablo ko chugabadi ñomedrega nu oinbanga Pabloge kwian du kwian ogadi, ene kwian oga ñomedrega e chugedi gire oga joge chkeni noni, jingme joge siere kwian ogage kaire dolla joge siere kwian jwligebangage. 13 Kwian israelita gweale mo gbu dolla kage siere kwian oga jwligebangage una gira jegwale, kwian israelita e tadu Jesu kiralla gai dolla kagagda siere Pablo kle age kare agwa kwian e me Jesu gau ulia, kwian israelita e gerudu dolla ole: —Pablo kle gerule Jesu giti, Jesu amaña kiralla giti cha gerule ba ole dolla, ¡joga siere kwiange! 14 Kwian israelita gerunga Chube ole daba alin chugagwalla kweri kada Esceva ama kirolla gdaguke kledu chage age ene dolla kage siere kwiange. 15 Bitaite Esceva kirolla ulita kledu dolla kage siere kwiange gire dolla gerudu ama ole: —Cha Jesu uñe trate, cha Pablo uñe trate kaire, ¿agwa ba ulita chema cha kagadale siere? 16 Dolla kwian jwligebanga gbu gerule ene gire dolla kwian jwligebanga gbu mo kira chuge Esceva kirolla gdaguke ole, dolla kwian jwligebanga kira gbu tanre, kwian jwligebanga kirachku Esceva kirolla ulitadi. Dolla kwian jwligebanga gbu Esceva kirolla bate age daga ngwale ole, kwian jwligebanga ñometra ulita junnga Esceva kirolla gdagukedi, ama ulita lentigu tanre kwian jwligebanga kote. Esceva kirolla ulita kigedu taglale kwian jwligebanga ngeru, jo siere kwian jwligebanga kle toi ullage. Boidu ene ulita Esceva kirolla gdaguke ole. 17 Kwian ulita kle toi una Efesoge kwian israelita kaire kwian me israelita, ama ulitage geru chku uñale boidu Esceva kirolla ole giti, gire kwian e ulita chegu kwachie tanre. E giti kwian tanre una emu Jesu gau dage ma no, sugedu ama ulitage ulia Jesu kira molen. 18 Gire kwian ngle mo ta gbu Jesu gerua gai ulia, kwian e ulita gerudu kwian na tanre gwa giti ama agedu ulita me no ngeru giti, ama ulita gerudu ama mo ta blitu joge siere agedu me no ulita ngeruge. 19 Kaire kwian ngle ta gbaboke me no ageba tanre kwian ole me no dolla kiralla giti ama Jesu gerua gau ulia, ama ulita chiu chada ngle dbe gugadale kwian gwa giti, chada e giti kwian kle geru jwen age me no kwian na ole che dolla Satanás kiralla giti, chada e mauña chada gugu kwian ulita kle mo litaba gwa giti, chada ulita jo gugaba ñanaske tanre igi cincuenta mil. 20 Kwian e ulita ta gbaboke me no, Chube Oña kwian e ulita ta gbu age ene Jesu gai kwian ngle gwa giti gire e giti kwian na ngle mo ta blitu Chugagwalla Jesu gerua gai ulia. 21 Boidu ene ulita una Efesoge Pablo kledu geru Jesu giti dbe una ege gire, gire Pablo mo ta gbu joge kwian Chubenu chada jwen nga Macedoniage nga Acayage ene joge dare joge chke una Jerusalénge. Pablo gerudu kwian ole ama be joge chke una Jerusalénge gire ama jogedale kaire una Romage. 22 Pablo mo chudaboanga boke kagu ngeru nga Macedoniage, e Timoteo kaire Erasto, Pablo ama boke kagu. Pablo agali chegu ngmadi una Efesoge nga Asiage chui na darege. 23 E suiale una Efesoge kwian tanre kledu mo ta blite Jesu gerua gai ulia Pablo giti, e giti kwian ulita una emu bai me no Jesu gerua ole skochiu tanre. 24 Kwian onbre kada Demetrio ama alin me no geru Jesu giti kle chage kwianske una Efesoge, malen Demetrio kwian gbu kira bate geru Jesu giti dollale. Demetrio kwian igi dodanga lle oña ngwalere, Demetrio kle igi dodade u solire, u soli e tadi igi dodaba muinga oñale kle, kwian una Efesomu alin lle oña e chube muire kada Artemisa. Kwian kle lle boi ulita ule Demetrio ole ama kle igi tanre gai lle oña e kare dodade ñanale. 25 Demetrio ule kwian lle oña dodanga ama chudaboangalla ole kaire kwian na kle lle amaña kare boi una ege ole, kwian e ulita mo litu ule mneitre alin Demetrio ole, Demetrio gerudu kwian e ole: —Ba ulita lle oña dodanga ole cha gerule, uñale ba ulitage che ulita kle igi gai no ngle lle oña dodade giti. Lle oña ñana giti che kle toi, e no che alin. 26 Agwa Pablo kle gerule nganake, ba ulitage uñale Pablo kle gerule kwian ole che kle lle boi dollale, ba ulita gwagedu amadi ba ulita ama keruchugu gerule kwian ole che kle lle boi giti dollale, ama kle chage gerule kwian ulita ole che kle lle oña dodade mo kodi lle oña e me Chube ulia. Ama kle gerule tanre kwian ole ene, kwian tanre kle mo ta blite Pablo kle gerule kare. E me una ai Efesoge alin allabi Pablo kle age, kaire kwian nga ulita Asiage kle geru gai ulia Pablo kle gerule kare. 27 Pablo kle gerule kare kwian ole, e tirare tirare che ulita lle oña dodanga alin. Kwian be mo ta gbe geru na gai, kwian tanre ene mi lle oña gige dare che ulita kle lle oña dodadege ene che mi igi molen tanre che kle igi gai kare. Kaire u chube muire kweri kada Artemisanu kwian mi mo lite dare u ege kwian ulita be u e chuge ngwadi kwian mi mo ta gbe gerule no Artemisa ole, chube muire kweri e giti kwian mi gerule no dare. Nege kwian ulita nga Asiamuge kaire kwian nga na ulitage kle chube muire e gai dage kwian ulita kle gerule no Artemisa giti, agwa kwian ulita be Pablo gerua gai, kwian ene mi chube muire Artemisa gai dage dare mo chubeale. 28 Kwian lle oña dodanga ulita Demetrio keruchugu gerule ene gire kwian ulita mo ta gbu salengwli skochiu tanre Artemisa gdale, kwian ulita ngautu kweri no Artemisa giti, ulita gerudu: —¡Artemisa kwian una Efesomu chubea kweri, kwian ulita chube Artemisa alin gadale mo chubeale me chube na gai mo chubeale! 29 Kwian ulita una Efesoge skochiu kira batu Artemisa giti, kwian tanre me tachku gda uñale mo ta gbe chube bai ole tra no chube bai gai mo chubeale. Kwian ngle kledu mo ta gbe chage una gira jegwale kira bate, onbre boke Pablo chagemanalla skwendu kwian nglege, onbre boke e nga Macedoniamu kada Gayo kaire Aristarco. Kwian ngle Pablo chagemanalla boke e gau kira batuge dba jondoi jo dbe kwian ulita kle mo lite ngwadige geru trage, nga ege Pablo chagemanalla dule kwian ngleaske agedale dagale ole Artemisa gdale. 30 Pablo chagemanalla gale ene sugekare Pabloge, gire Pablo tadu jogekalin chagemanalla nate gerule kwian kle mo litaba chagemanalladi ole. Agwa kwian Jesu gerua gaba me Pablo chugu ngwadi joge kwian kle mo litaba kira bate ngwadiske. 31 Kwian nga Asiamu chugagwalla gweale Pablo uñe ama Pablo skatemanalla ama geru kagu ketadale Pabloge Pablo me ñage joge kwian ngle kle kira bate ngwadi, kwian ngle ñage age me no Pablo ole, ma no Pablo chege sugekare kwian kle kira batege, Pablo me jo. 32 Gire kwian nglea kledu mo litaba ngwadi gweale ngautu gerudu nganake ulita me gerudu salengwli. Kwian gweale kle skochie tanre Pablodi kwian israelita ulitadi lle oña gdale, agwa kwian ngleage ni uñale mineade ama ulita kle mo litaba eni kira bate. 33 Kwian israelita ulita bai kledu eni ama onbre israelita gdaite kada Alejandro gau gerudale kwian ulita kle skochie ole kwian israelita giti kwian anblite kwian me skochie dare kwian israelitadi. Kwian gweale gerudu Alejandro ole Alejandro ta gbe kle boi ulita kwianske giti, gire Alejandro mo ko ñachugu kwian ulita kle skochie mo litaba ole chegedale kamne ene Alejandro ñage gerule kwian israelita ulita giti kwian israelita me jiske. 34 Agwa chku uñale kwian ulitage Alejandro kwian israelita kaire, malen kwian skochieba mo ta gbu skochie ma kweri Alejandrodi kwian me Alejandro chugu ngwadi gerule. Kwian kle skochieba ulita chegu hora gdaboke ngaute dare: —¡Artemisa kwian una Efesomu chubea kweri, kwian ulita chube Artemisa alin gadale mo chubeale me chube na gai mo chubeale! 35 Kwian una Efesomu chugagwalla gweale ama kwian ulita gbu ka chite gire ama gerudu kwian ole: —Ba kwian una Efesomu, cha gerule ba ole, che chubea Artemisa chiu nga ngaña giti, nga ulitage uñale kwiange kwian una aimu u chube muire kweri Artemisanu mananga kaire Artemisa oña mananga. 36 Ni kwian gdaite ñage gerule e me ulia Artemisa oña me chiu nga ngaña giti, uñale kwian ulitage chube e oña chiu nga ngaña giti. Ma no ba ulita ka chite chege kamne. Ba ulita me ñage age ngeru blike ba takalin kare, ngeru ba tañachugadale trate ba be age giti. 37 Kwian ai boke ba ulita chiu dbe aini me agedu sidri me no Artemisa dollale ama me jiske ama me lle gweale Artemisa ullage skwea bo kaire ama me gerudu me no che chubea muiredi. 38 Demetrio geru gweale molen kwian na dollale kaire kwian lle oña dodanga Demetrio ole geru gweale molen kwian na dollale, Demetrioge kaire kwian lle boanga ama olege suge kwian gweale kle age me no ama dollale, ama jogedale chugagwalla ngwadi. Eni kwian gerunga daba giti bai jiske bai me jiske kle biale kwian ulita keruchuge, Demetrio jogedale gerule kwian e ole kwian bai agedu me no Demetrio dollale giti kwian ene gbale jiske. 39 Ba ulita geru gweale na molen daba dollale ba geru e ketadale chugagwalla ulitage ene be chke uñale chugagwallage daba agedu ba dollale giti, ene chugagwalla ñage age gweale ba alin. 40 Ba ulita kle age aini nege e tirare che ulita alin. Che Chugagwalla emperador una Romamu be che gbe jiske che kle age giti. Chugagwalla geru kade chege che kle age giti ¿che gerule mine mo giti ama ole? Che ulita me ñage gerule mo giti, ama ñage ka boi che ole che ulita aini kira batakalin ngwale, ama ñage che gbe jiske che kle age giti. 41 Chugagwalla e gerudu ene ulita gire gbi jigu kwiange, ama kwian ulita kagu siere ne ngwadi, gire kwian jo mo kaire kaire ulita mo ngwadi.
1 Kwian una Efesomu kira batu ene jo tangle gire Pablo mo litu bdagli kwian Jesu gerua gaba una emu ole geru gweale kete ama ulitage ama kira gbagda Jesu geruadi. Gire Pablo gbi jigu bdagli kwian e ulitage, Pablo jo siere una Efesoge jo nga Macedonia ngnagu. 2 Pablo jo chke nga Macedoniage gire ama chagedu nga ulita Macedoniage kwian Chubenu chada jwen kwian Chubenu ulita ta gbe chage gwangerugu Jesu geruadi, gire ama jo nga Greciage. 3 Eni nga ege Pablo chegu dai gdamai. Pablo be du gai jogedale nga Siriage gire Pablo kote geru chku kwian israelita mo ta gbaba biale age me no Pablo dollale, kle Pablo jege ngwange Pablo be du gai ngwadi. Malen Pablo me jo duge ama mo ta gbu joge tangle naskuni seradi una Filipoge nga Macedoniage. 4 Kwian gdaguke Chubenu Pablo gatudi, ama ulita kada ene: Sópater (ama Pirro kirolla una Bereamu), Aristarco (ama una Tesalónicamu), Segundo (ama kaire una Tesalónicamu), Gayo (ama una Derbemu), Timoteo, Tíquico (ama nga Asiamu), Trófimo (ama kaire nga Asiamu). 5 Cha chada ai deganga kledu una Filipoge nga kweri Macedoniage, cha kledu eni gire daba e Pablo gatangadi ulita Pablo jigu una Filipoge cha ole, gire daba e ulita jo cha ngeru cha manade ngwange llani una Troage. 6 Pan me levadura ole gute chuia ollade chui e jo tangle gire cha boke du gau una Filipoge jogedale una Troas ngnagu. Cha chagedu chui tigake duge Pablo ole gire cha ñadu daba jo cha ngeru kledu cha manade ngwadi una Troage, eni cha ulita chegu una Troage chui guke. 7 Undege chuiage ngabi cha ulita mo litu daba Chubenu ole pan gutadale ule tachkegda Jesu jokeda giti. Pablo Jesu gerua tragu daba Jesu gerua gaba ulita kle mo litaba ole. Ngajrege amaña nagbietege Pablo jogedale ngabebitabi malen ngajrege bduke Pablo chegu Jesu gerua trage kwian ole. 8 Cha ulita kledu mo litaba nga gwealege ngaña u jira bitamaige tangle, ngaña cha ulita kle mo litaba ngwadi jichra tanre kle gwadegaba. Kirogwa biale gdaite kada Eutico kle toiba dba nga uga gwagegdage Pablo keruchuge. Pablo geru tragu tanre gire kirogwa biale e skwatigu geru keruchuge ama gbigachiu tanre ama chegu gbe jabale jabale gire ama jwatunga gbeske ngaña u jira bitamaige tangle jo chke dba dbi giti, kirogwa jaba alin junlen nate. 10 Gire Pablo chiu dbigu uge, chku dba Pablo ñedu kaboge kirogwa jaba giti Pablo ko bliu kirogwa jabadi, gire kirogwa jaba chkuni gwade. Pablo gerudu kwian kledu mo litaba ole: —Ba ulita me kwachie, ama jaba chkuni gwade, ama kle no. 11 Gire Pablo joni ngaña uge ama kledu mo litaba ngwadi daba Chubenu ole, Pablo jo chkeni ngaña gire ama pan skutunga pan girabatu daba ulita ole daba ulita pan gutu tachkegda Jesu jokeda giti. Pablo geru tragu dare, Pablo nga tku ju modige Jesu gerua trage gire ngabebitabi Pablo jo una Mileto ngnagu. 12 Kirogwa biale jokeda chkuni gwade ama bitalla ama duni gudegu no, kirogwa me boidu, e giti kwian tanredi nga chegu suga no. 13 Pablo mo ta gbu joge seradi una Troage una Aso ngnagu, gire cha ulita Pablo gatangadi jo duge una Aso ngnagu Pablo jwanle una Asoge. 14 Una Asoge cha ulita jo chke ten Pablo ngwange gire ama du gau, cha ulita jo ule duge una Mitilenege. 15 Una Mitilenege cha ulita jo tangle dare, nagbietege cha jo tangle ngadrega bleske kada Quíoge, chui nagbietege cha jo chke du lugakleda ngwadi ngadrega bleske kada Samoge. Cha chagedu duge chui na gbaite dare gire cha jo chke una Miletoge. 16 Cha ulita jo jon giti tangle jon tainkwli kare Pablo ole. Pablo me tadu chegekalin chui tanre jonkare nga Asiage malen cha ulita me jo una Efesoge ama joge una ege ama mi ña joge blike dare ama chegedale geru trage tanre kwian Chubenu ole, ene ama me ña blike una Jerusalénge. Ama takalin joge chke blike una Jerusalénge ngeru Pentecostés chuiage. 17 Cha ulita kledu una Miletoge Pablo ole gire Pablo kwian gweale kagu geru jige kwian Chubenu chugagwalla ulita una Efesomuge Pablo geru tragadale ama ole. 18 Kwian Chubenu chugagwalla una Efesomu ulita chku Pablo ngwadi gire Pablo geru tragu ama ulita ole: —Uñale ba ulitage cha kledu ba ulitaske geru Jesu giti dbe kwian ulita nga Asiamuge agwa gwangea cha chku ba ngwadi una Efesoge ba ulita gwagedu chadi cha toidu mine ba ulita gwa giti. 19 Cha kledu ba ulitaske gire chui gdale cha kledu lle boi che Chugagwalla Jesu alin ama gerua dbe ba ulitaske, diali cha tañachugu ba ulita giti age no diali ba ulita alin. Una ba kle toi ngwadi kwian israelita tanre me no Jesu gerua ole, ama ulita agedu me no diali cha dollale Jesu gerua gdale ene cha me ñadu Jesu gerua kete kwiange cha tadukalin kare, e giti cha olidu tanre cha kledu baske gire. 20 Agwa cha me ta chugu geru Jesu giti kete ba ulitage, geru e no ba alin ba ta gbagda toi no Chube takalin kare, geru e giti cha ba tku tangle kwian ulita gwa giti kaire cha ba tku tangle ba ullage mo kaire kaire. 21 Kwian israelita ole kaire kwian me israelita ole cha gerudu kwian ulita mo ta blitadale Chube ole kwian che Chugagwalla Jesu gadale ulia. 22 Nege Chube Oña kle cha ta gbe jogeni una Jerusalénge agwa me uñale chage be boi mine cha ole una ege. 23 Suge chage una ulitage cha kle joge ngwadi Chube Oña kle cha ta gbe suge baini kaire cha be joge ngwadi cha gbabe skage kaire cha gbabe boi daga ngwale tanre. 24 Chube lle ketu boale chage nga dba ai giti ama gerua dbe kwian ulitage, malen cha chage ta suga no no ole Chube gerua Jesu giti trage kwian ole nga ulitage, Chube no kwian ole geru amanu kwian ulitage chkedale uñale. Cha toi gwade o cha jogeda e giti cha me tallade, agwa cha Chube gerua ketakalin kwian ulitage, Chube gerua Jesu giti chkedale uñale kwian ulitage. 25 Pablo gerudu dare kwian Chubenu chugagwalla una Efesomu ole: —Nege cha gerule ba ulita ole, ba mi gwageni chadi dare nga dba ai giti. Cha chagedu ba ulitaske ba tke tangle Jesu geruage, geru e giti sugedu bage ba chagedale mine Chube takalin kare. 26 Cha ba tku tangle no ene geruge malen suge trate chage cha me jiske Chube gerua giti ni ba gdaitege. 27 Cha geru Jesu giti tragu ba ulita ole, ene geru e giti suge bage Chube takalin kare ulita ba alin. 28 Ba agali kwian Chubenu chugagwalla ulita chagedale ta giti, kaire ba kwian Chubenu na ulita manadale no ta giti. Chube Oña ba gau ba gbu kwian Chubenu manade, malen ba mo ta gbadale kwian Chubenu ulita manade no Chube gerua Jesu gitidi. Jesu jokeda giti kwian Jesu gau ulia kwian ene ulita Chubenu ba manadale no Chube geruadi. 29 Cha mi chege dare baske cha be joge siere, gire uñale chage trate kwian me no be chie be takalin kwian Chubenu dbe jon na giti ta blite nganake, ama be age me no kwian Chubenu ole salengwli gude ngaske kle age me no bda soli ole kare. 30 Kaire ba kwian Chubenu ulitaske kwian gweale me geru uñe trate be mo gbe daba Chubenu tke tangle geru me uliage, ene kwian Chubenu be chage kwian daba tkanga tangle geru me uliage nate. 31 Ba kledale ta giti diali daba Chubenu giti. Ba tachkedale cha giti chura gdamai cha kledu toi baske Jesu gerua dbe ta giti ba ulita Chubenu manade ta giti, nga ju nga jere diali cha mo ta gbu ba ulita gdaite gdaite chudaboi Jesu geruadi, cha olidu tanre ba ulita giti, cha no no ba ole. 32 Pablo gerudu dare kwian ole: —Nege cha gerule bdagli ba ulita ole, cha ba jige Chube kote Chube ba manade no ama geruadi, ene ba me joge siere ama geruage. Ba ulita mo ta gbadale kiraske chage Chube geruadi diali gwangerugu, gire bdagli Chube be age no ba ulita alin ama gerudu kare ba be toi diali Chube ole ule kwian ulita nu Chube gerua Jesu giti gaba ole. 33 Cha kledu toi baske cha me lle kadu bage mo alin mo managda ni cha igi kadu ni cha ñometra kadu ba gwealege mo alin geru dbe ñanale. 34 Cha me daba gweale ko manadudi agwa ba ulitage uñale cha lle bo agali mo kodi ene cha igi gau mo alin kaire daba kledu cha ole alin toigda. 35 Cha kledu toi ba ulitaske gire diali cha ba tku tangle lle boi ene mo kodi ma no, ene ba ñage kwian na chudaboi bai kaire me lle molen. Che tachkedale che Chugagwalla Jesu gerudu giti, ama gerudu: “Daba na ba chudaboi nga suga no badi e giti, agwa ba daba na chudaboi, ene nga suga ma no badi daba ba chudaboi gitige.” Jesu gerudu ene ama kledu toi nga dba ai giti gire. 36 Pablo gerudu ene ulita gire Pablo jongnagwa skutu dba kwian Chubenu ulita ole gerudu Chube ole daba giti: “Chube, ba kwian ai ulita lle boanga ba alin manade no chui gdale.” 37 Pablo gerudubi Chube ole, gire kwian Chubenu una Efesomu chugagwalla ulita olidu tanre Pablo giti Pablo be joge bate amage, ama ulita ko bliu Pablodi Pablo sobadu gbi kete bdagli Pabloge. 38 Kwian e ulita chegu ta olire tanre Pablo nate, Pablo gerudu Pablo be joge Pablo mi chieni dare, e giti kwian ulita ta olidu Pablo nate. Gire ama ulita jo Pablo gatedi Pablo be du gai ngwadi jogedale.
1 Pablo kaire cha ulita Pablo gatangadi gbi kadu bdagli daba e ulitage gire cha ulita jo, cha ulita chagedu Pablo ole duge ngadrega bleske kada Cosge ngadrega ege cha jo chke. Nagbietege cha jo ngadrega bleske kada Rodage ngadrega ege cha jo tangle cha jo una Pátara ngnagu, cha jo chke una Pátarage. 2 Una ege du gdaite joge una Feniciage nga Siriage skwendu cha ulitage, du ege cha ulita jo. 3 Cha kledu chage duge gire cha gwagedu ngadrega bleske kada Chipredi, cha jo tangle duge Chipre chegu ko jole giti. Cha chagedu dare duge cha jo chke una Tiroge nga Siriage, eni du jo teru jigadale una Tiroge du tkere kedagu teru ole. Gire cha ulita chiu dbige duge cha chegu eni una Tiroge. 4 Eni kwian tanre geru Jesu giti gaba skwendu cha ulitage, cha ulita chegu chui guke kwian e ulita ole. Kwian Jesu gerua gaba e Chube Oña nu ama ta gbaba Pablo ta gbe chke kwian Pablo dollale giti, kwian gweale una Jerusalénge kle mo ta gbaba biale age me no Pablo ole. Daba Jesu gerua gaba e ulita Pablo ta gbu Chube Oña kirallaske ene: —Ba me ñage joge una Jerusalénge, kwian tanre ba dollale kle ba ngwange. 5 Pablo me geru e talladu gerudre ama ole giti, malen chui guke jo tangle gire cha ulita jo siere una Tiroge, kwian Chubenu ulita muirenu onbrenu kirogwanu cha ulita gatudi joge ble kagda giti, eni ble kagda giti cha ulita ule daba Chubenu ole jongnagwa skutu dba gerule Chube ole. 6 Gire cha ulita gbi jigu bdagli daba Chubenu ulitage gire cha jo du tadi. Daba Chubenu ulita joni naskuni gudegu. 7 Cha ulita chagedu dare duge una Tiro joge una Tolemaidage. Cha ulita jo chke una Tolemaidage, eni cha ulita tendu daba Chubenu ngwange, cha ulita chegu daba Chubenu una Tolemaidamu ole chui gbaite. 8 Nagbietege cha ulita jo dare, cha jo chke una Cesareage, gire cha jo onbre kada Felipe ngwadi Felipe Chube gerua Jesu giti traganga, ngeru una Jerusalénge Felipe gale kwian na gdadereke ole kwian Jesu gerua ketanga ulita chudaboale, Felipe e ngwadi cha ulita chegu. 9 Felipe jian gdabaga molen kle gballa, Felipe jian gdabaga e Chube gerua ketanga dabage. 10 Cha ulita kledu eni chui ngle Felipe ngwadi gire kwian chiu nga Judeage jo chke Pablo kle ngwadi Felipe ullage, ama Chube gerua ketanga kada Agabo. 11 Agabo jo chke cha ulita kle ngwadi gire ama ñometra skalla mo lugagda bonga tangle Pablonu gau, ama giti mo sera lugu mo ko lugu, ama gerudu: —Chube Oña gerudu cha ole kwian be age Pablo ole giti una Jerusalénge, kwian israelita be ñometra skalla ai mauña luge ene cha mo lugu kare gire kwian be ama kete ene lugaba kwian me israelitage boadale daga ngwale —Agabo gerudu ene kwian be age Pablo ole giti una Jerusalénge. 12 Cha kle chage modi Pablo ole Agabo keruchugu kaire kwian Chubenu una Cesareamu Agabo keruchugu ene, gire cha ulita kaire daba una Cesareamu ulita gerudu Pablo ole: —Ma no me joge una Jerusalénge, cha ulita ta olire tanre ba giti. 13 Pablo gerudu cha ulita ole: —¿Mineade ba ulita kle mo ta dbe olire cha giti? ¿Ba ta cha ta gbakalin olire kaire? Cha me kle tañachuge e giti, cha kle mo ta gbe biale me kennga kwian cha ko lugedi, kaire me ko luge giti alin cha mo ta gbe me kennga agwa kaire cha mo ta gbe biale mo gwangeda kwian una Jerusalénge Jesu gerua dbe giti, e giti cha me tallade —Pablo gerudu ene cha ulita ole. 14 Pablo me cha ulita kerua gbu gdadi, cha ulita ama chugu ngwadi ama kle mo ta gbe kare joge, cha gerudu Pablo ole: —Cha ba jige Chube kote, Chubege uñale Chube takalin mine ba alin. 15 Cha gerudu ene ulita Pablo ole gire cha ulita mo gbu biale joge ule Pablo ole una Jerusalénge. 16 Kwian Chubenu gweale una Cesareamu jo ule cha ole Pablo gatedi. Pablo ole cha ulita jo chke una Jerusalénge gire kwian Chubenu una Cesareamu cha ulita du onbre gdaite nga Chipremu kada Mnasón ullage. Mnasón kwian Jesu gerua gaba sbali ama Chubenu, Mnasón tadu u ketakalin cha ulitage gbengwa. 17 Daba Jesu gerua gaba una Jerusalénge cha ulita gau ngwange nga suga no ole. 18 Nagbietege Pablo cha ulita ole ule jo Santiago ngwadi, Santiago ngwadi kwian Chubenu chugagwalla ulita kledu. 19 Cha ulita jo chke, cha ulita gbi kadu ama ulitage gire Pablo geru tragu ulita trate Chube agedu no no ama giti kwian me israelitaske, Chube agedu no kwian me israelita e ulita alin. 20 Kwian Chubenu chugagwalla ulita Pablo keruchugu gerule Chube agedu no ama giti kwianske, gire kwian Chubenu chugagwalla ulita gerudu no Chube giti. Kwian Chubenu chugagwalla gdaite gerudu Pablo ole: —Cha daballa Jesu giti, uñale bage agali kwian israelita ngle geru Jesu giti gau ulia, ama ulita Jesu gerua gaba agwa kaire ama kle gerule no age kaire Moisés chadalla kle gerule kare. 21 Kwian israelita aini una Jerusalénge nu Jesu gerua gaba, amage geru chku uñale ba kle kwian israelita kle toi chudalla naske ba kle tke tangle me Moisés gerua gbe gdadi, kaire ba kle gerule ama ole kwian israelita me mo kirolla kwara tkadalenga ni age sidri kwian israelita suia kle age kare. Una aige kwian israelita Chubenuge suge ba kle chage kwian israelita Chubenu nga nage tke tangle ene. 22 Nege ba kle aini ¿che be age mine? Be chke uñale kwian israelita Chubenu ainige ba kle aini una Jerusalénge. Che agedale gweale no ene kwian israelita aini me tañachuge ba kle age Moisés chadalla dollale ama kle geru keruchuge kare. 23 Cha tañachuge ma no ba age ene: Aini daba Jesu gerua gabaske daba gdabaga chui gbu lle boi Chube alin, chui e chku daba ege. 24 Cha tañachuge no ba joge ule daba e ole u gerungwa Chube olege gire kwian gerunga Chube ole daba alin be chi drennga ba giti, ene be suge kwian israelita ulitage ba kle chege trate Chube gwa giti kwian israelita kle age kare kle tañachuge kare. Daba gdabaga mo chuga itadale kaire bda gigadale ketadale gwaleda Chube gwa giti, ba igi ketale chuga ite ñanale bda ñanale daba giti. Ba age ene gire kwian israelita Chubenu aini ulita be gwage badi be suge ama ulitage ba me kle Moisés chadalla mlienga geru chku ama ulita kote gerule kare ba giti, be suge amage ba kle Moisés chadalla gai dage kaire. 25 Agwa kwian me israelita nu Jesu gerua gaba ama ulita alin cha chada kagu ama ta gbadale ama me agedale ulita Moisés chadalla gerule kare, agwa ama mo ta gbadale age ai kare: Kwian gweale me Chubenu kle lle oña dodaba mo kodi gai mo chubeale, gire kle samla kaite lle oña ege, kwian Chubenu me israelita me ñage samla e gige, ama me ñage gute. Kaire ama me ñage samla gute be ole llagli, ama me ñage samla be jai. Kaire ama ulita onbrenu muirenu mo ta gbadale me mo chuge ke giti. Cha chada degu ene cha kagu kwian me israelita alin —kwian Chubenu chugagwalla gerudu ene Pablo ole. 26 Nagbietege Pablo agedu ulita kwian Chubenu chugagwalla gerudu ama ole kare, Pablo daba gdabaga du jo chke goga u gerungwa Chube olege gire ama ulita mo ta gbu age kwian israelita kle age kare mo gbale trate Chube gwa giti. Ama agedu ene ulita gire Pablo jo gwa u gerungwa Chube olege geru kete kwian bda gwangadage, Pablo gerudu: —Chui guke be chke gire cha ulita be chie bda dbe mo kaire kaire jige bage, ba bda e gweda Chube gwa giti, gire ene daba gdabaga ai gerudu kare Chube ole lle boi Chube alin chuia bidege —Pablo gerudu ene kwian bda gwangada ole. 27 Chui chegu gbaitre alin chkedale taneke chui guke Pablo joni u gerungwa Chube olege, gire kwian israelita gweale nga Asiamu gwagedu Pablodi u gerungwa Chube olege gwa. Kwian israelita e kwian ngle ulita gbu ta skochie Pablo dollale, kwian israelita nga Asiamu Pablo gau, 28 ama ngautu: —¡Cha bitalla israelita, cha chudaboi onbre ai gai! Onbre ai kle chage nga ulitage kwian tke tangle geru nganakege, ama kle gerule che suia dollale ama kle gerule Moisés chadalla dollale ama kle gerule u gerungwa Chube ole dollale. Kaire ama me agedu no ama kwian gdaite me israelita du gwa u gerungwa Chube olege ene u chegu sugaska Chube gwa giti, ama me kle u ai gai dage, u aige kwian israelita alin ñage joge gwa gerule Chube ole. 29 Kwian israelita nga Asiamu gerudu ngwale ene Pablo dollale kwian ole, ngeru kwian israelita gweale gwageba Pablodi chage unaske kwian me israelita una Efesomu kada Trófimo ole. Kwian israelita e tañachugu Pablo Trófimo du u gerungwa Chube olege chui gweale, malen gerudu ene Pablo dollale, agwa ni uñadu amage kle gerule ulia o me, Pablo me agedu kwian kle tañachuge kare. 30 Kwian una Jerusalénge ngle skochiu Pablodi kwian ulita chku mo lite Pablodi kwian Pablo gau kira batuge dba jondoi du goga sugekare u gerungwa Chube olege gire u gerungwa Chube ole ugakalla jegleda blike Pablo nate ene Pablo me ñage joge dare gwa. 31 Kwian ulita kle kira bate Pablo ole mo ta gbu biale Pablo gweda, kwian tanre una Jerusalénge ta skochie tanre Pablo giti, malen kwian ulita kledu chage kira bate. Geru e ulita chku uñale guardia donga chugagwalla kweri una Romamuge. 32 Guardia donga chugagwalla kweri guardia donga ngle litu ole, guardia donga chugagwalla kweri jo donga e ulita dbe ule jrite blike kwian kle kira bate ngwadi. Kwian israelita bai kle kira bate Pablo ole kle Pablo bate ama ulita gwagedu guardia donga chugagwalladi chie donga na ngle ole gire ama me Pablo batu dare. 33 Guardia donga chugagwalla jo chke Pablodi ama donga na gbu Pablo ko luge giska hierrole boke giti dbale skadi, gire guardia donga chugagwalla geru kadu kwian ulitage: —¿Onbre ai chema? ¿Ama agedu mine? 34 Gire kwian gweale gerudu kweri Pablo dollale, kwian na gerudu kweri Pablo dollale nganake. Kwian ulita me gerudu salengwli, guardia donga chugagwallage me chku boale kwian tanre ngauteske, guardia donga chugagwallage me sugedu kwian kle kira bate Pablo ole llema gdale. Guardia donga chugagwalla me ñadu age kwian ngle ngauteske, malen ama Pablo dbangu dongage donga ulita kle toi ngwadi. 35 Donga ulita jo chke Pablo ole donga kle toi ngwadi ugakallage, donga Pablo du gudegu kwligage blike kwian skochie Pablodi ngeru. 36 Kwian ngle ulita chagedu Pablo nate ngaute: —¡Pablo guda! 37 Donga be Pablo tke gwa donga kle toi ngwadi gire Pablo geru kadu guardia donga chugagwallage: —¿Cha ñage gerule sidri ba ole? Sugedu guardia donga chugagwallage Pablo kle gerule ama ole kwian griego kwirale gire guardia donga chugagwalla jaindunga: —¿Ba kle ñage gerule kwian griego kwirale? 38 Cha kle tañachuge ba kwian nga Egiptomu, amaña kira batu chui gwealege sbali gobierno dollale gire jo nga gballage kwian kira batanga ngle cuatrocientos ole. ¿Me ba amaña? 39 Pablo gerudu guardia donga chugagwalla ole: —Cha me kwian nga Egiptomu, cha kwian israelita. Cha medunga una Tarsoge nga Ciliciage, una e kweri kwian tanre kle toi una ege. Cha takalin ba cha chuge ngwadi gerule kwian kle chie cha nate ole. 40 Guardia donga chugagwalla gerudu: —Ba ñage gerule kwian kle ba jrite nate ole. Pablo chku gdate ugakage Pablo ko ñachugu kwian ulitage chegedale kamne. Kwian ulita chegu kamne gire Pablo gerudu mo kwirale kwian israelita kle gerule kare.
1 Pablo gerudu: —Ba cha bitalla ulita, cha gerule ba ole mo giti, ba ulita cha keruchuge no, cha me jiske ba ulita kle tañachuge kare, cha me agedu che kwian israelita suia dollale. 2 Kwian ulita Pablo keruchugu gerule kwian israelita kwirale gire kwian ulita Pablo keruchugu ma no kamne, Pablo gerudu dare: 3 —Cha kwian israelita, cha medunga una Tarsoge nga Ciliciage, cha tigedu una ai Jerusalénge, cha geru jun geru mauña kweri kada Gamalielge, Gamaliel cha tku tangle trate Moisés nu Chube gerua degaba che enusulian unsuialin alin giti. Diali cha mo ta gbu lle boi ma no Chube alin, cha tañachugu cha agedu salengwli ba ulita kle age kle tañachuge nege kare. 4 Ngeru cha chagedu kwian Jesu gerua ganga nate, cha kwian e ulita gbu boi tanre daga ngwale Jesu gerua gdale, cha ama gweale guda, cha ama gweale tku skage, cha agedu ene kwian Jesu gerua ganga onbrenu muirenu ole. 5 Kwian gerunga Chube ole daba alin chugagwalla kaire kwian israelita chugagwalla juma, ama ulitage uñadu cha kledu age giti e suiale kaire ama chada ketu chage daba israelita una Damascomu alin, chada e giti cha ñage kwian Jesu gerua ganga gai nate una Damascoge. Cha jo llani kwian Jesu gerua ganga nate gadale dbale chie aini boale daga ngwale una Jerusalénge. 6 ’Cha kledu chage jonkare una Damasco ngnagu, chegu kodi jogedale chke una ege gire chui tainkwli bduke jichra chra gwadetranga chiu nga ngaña giti chratigunga blike chadi tangle. 7 Jichra chralla kote cha jo chke dba, gire cha geru keruchugu gerule cha ole: “Saulo, Saulo, ¿mineade ba kle age cha dollale cha gbe boi tanre daga ngwale?” 8 Cha geru keruchugu ene gire cha geru kadu: “¿Ba chema kle gerule cha ole?” Gire cha geru keruchugu gerule kwaite: “Cha Jesu una Nazaremu, cha amaña nate ba kle chage age cha dollale cha gbe boi tanre daga ngwale.” 9 Kwian chagedu cha ole jonkare una Damasco ngnagu gwagedu chadi boi ene, ama gwagedu jichra chradi, ama geru keruchugu agwa geru me sugedu amage. 10 Cha geru kadu: “¿Ba takalin cha age mine cha Chugagwalla?” Gire Jesu gerudu cha ole: “Chkede gdate, chagede gwangerugu una Damasco ngnagu, una ege geru ketabe bage ba agedale giti ulita chui aige gwangerugu.” 11 Jichra chra gwadetranga kote cha gwagwa jonga cha me ñadu ten. Daba kle chage ule cha ole jonkare ama ulita cha du koge una Damascoge. 12 ’Una Damascoge onbre gdaite kada Ananías kle toi, ama mo ta gbanga chage trate Chube gwa giti kaire ama chada Moisés nu degaba ganga dage. Kwian israelita na ulita kle toi una Damascoge kle gerule no Ananías giti Ananías kwian no. 13 Ananías chiu cha kle ngwadi tienda chadi, chku cha kle ngwadi ama gerudu cha ole: “Daba Saulo, ba gwagwa chege no naskuni tendale.” Ama gerudu ene cha ole gire blike cha gwagwa jo chkeni cha ñadu ten Ananíadi. 14 Ananías gerudu dare cha ole: “Chube che enusulian unsuialinnu ama ba gau, ama takalin ba ama uñe, kaire ama takalin chke uñale trate bage ba chagedale mine ama takalin kare, nege ama ba gbu gwage Jesudi, Jesu no trate ulita, ba ama keruchugu gerule agali ba ole nege. 15 Boidu ba ole jonke nege, ba gwagedu Jesudi ba Jesu keruchugu e ba be trage kwian nga ulitage ole, ba be chege gerungale kwian ulita ole Jesu giti. 16 Nege gwangerugu ba me manadale dare agwa ba mo gbadale biale geru Jesu giti dbe, chkede gdate, ba gerudale che Chugagwalla Jesu ole ba agedu me no giti ene Chube be ba jwen siere ji chugege ba agedu me no gdale, ba mo ñeange chiske Jesu kalla giti.” Ananías gerudu ene cha ole gire cha agedu ama gerudu kare. 17 ’Cha kledu una Damascoge gire cha joni una Jerusalénge, cha jo chkeni una Jerusalénge cha jo u gerungwa Chube olege, cha kledu eni gerule Chube ole gire Chube gbi gbu cha gwage. 18 Cha gwagedu Chugagwalla Jesudi ama gerudu cha ole: “Ba mo gbe biale blike, joga siere blike una Jerusalénge. Kwian aini una Jerusalénge ba keruchuge gerule ama ole cha giti ama mi ba kerua gbe gdadi cha gerua giti.” 19 Gire cha gerudu Jesu ole: “Cha Chugagwalla, kwian ulita ainige uñale cha chagedu kwian ba gerua gaba nate ulita, cha jo u tanre kwian israelita mo litangwa Chube geru jwanngwage kwian ba gerua gaba gai tkale skage kaire cha kwian ba gerua gaba batangu. 20 Kaire ba gerua traganga kada Esteban guleda ba gerua gdale, chui ege cha agali kledu gwage amadi, cha alin nobi kwian ama gweda, kwian kledu Esteban gweda cha kledu kwian Esteban gwangada ñometralla manade.” 21 Cha gerudu ene cha Chugagwalla Jesu ole, cha tañachugu ama be cha chuge ngwadi ama gerua trage kwian e amaña ole, agwa ama gerudu cha ole: “Ba me ñage chege geru chanu dbe kwian ainiske, ba gerule cha giti aini, kwian mi ba keruchuge. Ba mo gbe biale jogedale nga nage, cha be ba kage cha gerua dbe kwian chudalla nga na bateske.” Jesu gerudu ene cha ole. 22 Pablo gerudu mo giti ene kwian ulita ole, kwian chegu kamne sugeti Pablo keruchuge gerule ene, agwa Pablo gerudu Chube ama kagu geru Jesu giti dbe kwian chudalla naske gire kwian ulita skochiu Pablodi joge geru dbe kwian me israelitaske gdale, kwian ngautu kweri Pablo dollale, ama gerudu: —Onbre e me ñage chege toi gwade, ma no ama gweda. 23 Kwian ulita kledu ngaute ene Pablo dollale, sko ole kwian ulita ñometra modi mliunga kote kaire sko ole kwian dbi mnuña mliunga ngaña kote. 24 Guardia donga chugagwalla gwagedu kwian tanre kle skochie chie Pablo nate, gire guardia donga chugagwalla donga kagu Pablo dbe gudegu kwabatale ene Pablo gerule mo giti mineade kwian ngle kle ngaute ama dollale. Kle boi ulita Pablo ole me sugedu guardia donga chugagwallage. 25 Donga jo gwa Pablo ole donga Pablo ko lugu Pablo gbale biale kwabatale gire Pablo geru kadu guardia daba chugagwalla gdaite kle enige: —¿Chema gerudu ba ole ba ñage kwian una Romamu bate ngeru me ama dbe kwian gerunga daba giti jiske o me jiske gwa giti? Cha kwian una Romamu. 26 Guardia daba chugagwalla Pablo keruchugu gerule ene Pablo kwian una Romamu gire guardia daba chugagwalla jo blike gerule guardia donga chugagwalla kweri ole, ama gerudu: —¿Ba be age mine onbre e ole? Nege nege chku uñale chage onbre e kwian una Romamu, che me ñage age ama ole che ta agekalin kare. 27 Guardia donga chugagwalla kweri jo Pablodi, geru kadu Pabloge: —Pablo, ¿ulia ba kwian una Romamu? Pablo jaindunga: —Ima, cha kwian una Romamu. 28 Gire guardia donga chugagwalla kweri gerudu Pablo ole: —Cha igi ketu ngle kwian una Romamu chugagwalla emperadorge gire cha chegu kwian una Romamu. ¿Ba agedu mine gire ba chegu kwian una Romamu? Pablo jaindunga: —Cha me igi ketu, cha medunga solibi kwian una Romamu. 29 Donga be Pablo kwabatege chku uñale Pablo kwian una Romamu gire donga e jo siere Pabloge me Pablo kwabatu, guardia donga chugagwalla kwerige chku uñale kaire Pablo kwian una Romamu gire guardia donga chugagwalla kwachiu mo giti ama Pablo ko lugangu giska hierrole giti gdale. 30 Guardia donga chugagwalla kweri geru uñakalin trate Pablo giti mineade kwian israelita kle kira bate Pablo ole, malen nagbietege guardia donga chugagwalla kweri Pablo skajunnga gire guardia donga chugagwalla kweri kwian gerunga Chube ole chugagwalla ulita kagu mo lite ule kwian israelita chugagwalla na ulita ole. Kwian e ulita kledu mo litaba gire guardia donga chugagwalla kweri Pablo du kwian e ulita gwa giti.
1 Pablo dbajo chke kwian israelita chugagwalla ulita ngwadi, Pablo gwagedu kwian israelita chugagwalla ulita kle mo litabadi, gire Pablo gerudu: —Ba ulita cha bitalla, cha gerule ba ulita ole, cha Jesu uñuge gwaingnagu cha toidu ta trate ta ngwedi ole Chube gwa giti, kle kaire nege cha tale cha me suge jiske moge. 2 Pablo gerudu ene gire kwian gerunga Chube ole daba alin ma kweri kada Ananías skochiu tanre Pablodi. Kwian gweale kle kodi Pabloge Ananías kwian e gbu Pablo bate káge Pablo gerudu giti. 3 Pablo gerudu Ananías ole: —Ba kle age me no me no cha ole, e gdale Chube be ji gbe tirare ba giti. Ba ta me no, ba me kle age ba kle gerule kare no Chube giti. Ba kle toiba dba eni gerule cha giti cha jiske, ba gerule ba kle age Moisés chadalla gerule kare, e ulia ¿mineade ba cha batangu? Ba agedu ene e age Moisés chadalla dollale. 4 Kwian ngle kledu eni ama geru kadu Pabloge: —¿Ba me kwachie gerule mno me no kwian gerunga Chube ole chugagwalla ma kweri ole? 5 Pablo gerudu: —Ba cha bitalla, chage me uñadu ama kle gerule cha ole ama kwian gerunga Chube ole chugagwalla ma kweri, me no gerule chugagwallage ene. Chube gerua degaba gerule: “Kwian me ñage gerule me no chugagwalla dollale.” 6 Pabloge chku uñale kwian israelita chugagwalla ulita kle mo litaba me chugagwalla mne gdaitre alin kle. Chugagwalla mne gdaite kada kwian saduceo, chugagwalla mne gdaite kada kwian fariseo. Mne gdaboke e kledu mo litaba ule, kwian israelita chugagwalla mne boke ole Pablo gerudu kweri: —Cha bitalla ulita, cha takalin chke uñale bage cha kwian fariseo cha enusulian ulita kare, malen bage uñale cha kle geru kwian jaba chkeni gwade giti gai ulia, e giti ba ulita kle cha gbe jiske. 7 Pablo gerudu ene kwian ole, gire kwian fariseo skochiu kwian saduceodi, kwian saduceo skochiu kwian fariseodi, gire kwian saduceo mo litu mne mo kaire kwian fariseo mo litu mne mo kaire. 8 Kwian saduceo gerule kwian jogebada mi chkeni gwade chui bdaglige, kwian saduceo alin lle boanga Chube alin nga ngaña giti me, che dolla me. Agwa kwian fariseoge suge kwian jogebada be chkeni gwade chui bdaglige, lle boanga Chube alin nga ngaña giti kle, che dolla kle. 9 Geru e ulita giti kwian saduceo kwian fariseo ulita kle skochie kira bate kle ngaute kweri, gire kwian ngleaske kwian gweale daba tkanga tangle Moisés chadalla giti ama kwian fariseo mnella, kwian e ulita chku gdate gerudu kwian na ulita gwa giti Pablo giti: —Onbre ai me jiske me agedu me no ni sidri. Che ñage tañachuge ulia lle boanga Chube alin nga ngaña giti chku amadi jonke. 10 Kwian daba tkanga tangle Moisés chadalla giti e ulita gerudu ene Pablo giti, gire kwian kira batu ma kweri modi dare, guardia donga chugagwalla kweri gwagedu kwian ulita kira bate ene, gire guardia donga chugagwalla kwachiu tanre Pablo giti kwian ulita ñage Pablo gweda. Guardia donga chugagwalla donga gweale kadu Pablo jwen siere kwian ngleaske Pablo dbale naskuni gwa donga ulita kle toi ngwadi. 11 Chui amañage ngajrege Chugagwalla Jesu medu Pabloge, Jesu gerudu Pablo ole: —Pablo, ba me ta dbadale kwachie. Cha medu bage jonke ba e tragu kwian aini una Jerusalénmu ole, ene kaire ba gerudale cha medu bage giti llani una Romage kwian una Romamu ole —Jesu gerudu ene Pablo ole. 12 Nagbietege kwian israelita cuarenta mo litu ule mo ta gbu salengwli Pablo gweda, gerudu modi: —Chube gwa giti che mo ta gbe ule Pablo gweda, chui aige gwangerugu che mi blire ni chi jai, che be Pablo gweda gire che be blireni che be chi jaini. Kwian israelita ulita cuarenta mo litu gerudu modi ene ama kle mo ta gbe biale age Pablo ole. 14 Kwian e ulita jo kwian israelita chugagwalla ulita ngwadi gerule chugagwalla ole, gerudu: —Cha ulita cuarenta mo ta gbu salengwli Pablo gweda. Ngeru cha Pablo gwedage cha mi blire sidri cha mi chi jai. Cha be ko toi Pabloge gwaleda, cha be Pablo gweda gire cha be blireni cha be chi jaini. 15 Nege cha takalin ba ulita kwian israelita chugagwalla Pablo kade guardia donga chugagwalla kwerige dbale chie aini suialin ba ulita gwa giti. Ba gerudale guardia donga chugagwalla kweri ole ba ulita be geru kade ma no trate ta gude Pabloge kle boi giti Pablo ole. Pablo dbabe chie gire cha ulita be kle biale Pablo jege ngwange jonke gwaleda ngeru ama chke aini ba ngwadige. 16 Kwian israelita cuarenta mo teun Pablodi gwaleda chku uñale Pablo teallage, Pablo tealla tañachugu gerule blike Pablo ole kwian kle mo ten Pablodi, Pablo tealla jo Pablo kle ngwadi donga ullage Pablo ta gbe. 17 Pablo tealla geru ketu trate Pabloge kwian kle mo ta gbe age Pablo dollale giti, gire Pablo guardia daba chugagwalla gdaite kadu mo gitigu, Pablo gerudu ama ole: —Ba cha tealla ai dbe ba chugagwalla ngwadi, ama ta gerukalin lle gweale giti ba chugagwalla ole. 18 Guardia daba chugagwalla Pablo tealla du guardia donga chugagwalla kweri ngwadi, gerudu chugagwalla e ole: —Pablo kle skage cha kadu mo gitigu geru kete chage, ama gerudu cha ole cha chiedale ama tealla ai dbe ba ngwadi, ama tealla gerukalin ba ole lle gweale giti. 19 Guardia donga chugagwalla kweri Pablo tealla gau koge du sugekare gire guardia donga chugagwalla kweri geru kadu Pablo teallage: —¿Ba ta gerukalin mine cha ole? 20 Pablo tealla gerudu guardia donga chugagwalla kweri ole: —Kwian israelita gweale mo teun modi ama be mo chugagwalla gbe cha jrulla Pablo kade bage, kwian israelita chugagwalla e ulita be kwian gweale kage aini geru jige bage kwian israelita chugagwalla takalin suialin ba Pablo kagadale ama ulita ngwadi, ba anblitagda kwian israelita chugagwalla gerua dbanga be gerule ba ole kwian israelita chugagwalla geru kadakalin ma no trate ta gude Pabloge kle boi giti Pablo ole. 21 Agwa ba me kwian israelita chugagwalla gerua dbanga kerua gai ulia, ama be gerule kare ba ole be geru kade ma no Pabloge, e me ulia, Pablo kadabe bage gwaleda, kwian cuarenta be kle Pablo jege ngwange jonke skwlenre. Kwian mo teun modi Pablo gweda ama ulita gerudu: “Chube gwa giti che mo ta gbe ule Pablo gweda, chui aige gwangerugu che mi blire ni chi jai, che be Pablo gweda gire che be blireni che be chi jaini.” Kwian ulita kle mo teanba biale ulita ama kle ba kerua manade ba be Pablo kage kwian israelita chugagwalla ngwadi o me. 22 Pablo tealla gerudu ene ulita guardia donga chugagwalla kweri ole kwian mo teun Pablodi be age Pablo ole giti, gire guardia donga chugagwalla kweri gerudu: —Joga, ba me gerule ni sidri kwian gweale ole ba cha ta gbu kwian be age Pablo ole giti. 23 Guardia donga chugagwalla kweri guardia daba chugagwalla boke kadu gerudu ama ole: —Ba donga ngle gbadale biale joge Pablo gatedi joge una Cesarea ngnagu nege nga jere bonga, ba donga doscientos gbadale biale joge seradi, ba donga setenta gbadale biale joge ja giti, ba donga doscientos gbadale biale joge lanza dbe dogda, 24 kaire ba ja gbe biale Pablo alin chagegda. Ba gerule donga e ulita be joge Pablo gatedi ole ama Pablo manadale no no jonkare, ama Pablo ketadale no chugagwalla gobernador kada Félige una Cesareage. 25 Guardia donga chugagwalla kweri gerudu ene guardia daba chugagwalla boke e ole gire guardia donga chugagwalla kweri chada degu kagadale ama chugagwalla kweri Félix alin, ama chada degu ai kare: 26 “Cha guardia donga chugagwalla kweri kada Claudio-Lisias cha chada ai dege ba alin Félix, ba kwian chugagwalla kweri. ¿Che kle mine Félix? 27 Cha kle onbre ai kage ba ngwadi, kwian israelita ama gau tku skage, kwian israelita biri onbre ai gweda, gire chage chku uñale onbre ai kwian una Romamu malen cha jo donga chanu ole onbre ai jwen siere kwian israelitage, cha ama du donga kle toi ngwadi manadale. 28 Cha tadukalin chke uñale chage mineade kwian israelita kle onbre ai gbe jiske, malen cha onbre ai du kwian israelita chugagwalla ulita ngwadi ene chke uñale chage kwian kle ama gbe jiske llema giti. 29 Chku uñale chage kwian israelita alin onbre ai kle age me no kwian israelita enusulian unsuialin gerua dollale, e giti kwian israelita kle onbre ai gbe jiske. Che kwian una Romamu alin kwian israelita kle kira bate lle ngwale giti onbre ai ole, onbre ai me agedu me no che kwian una Romamu gerua dollale, che alin me no onbre ai gweda onbre ai tke skage. 30 Agwa chku uñale chage kwian israelita ulita kle mo ta gbe onbre ai gweda, malen cha onbre ai kagu ba ngwadi blike, cha gerudu kwian ama dollale ole ma no joge gerule onbre ai dollale onbre ai gbe jiske ba gwa giti ama ulita takalin kare. Cha chada ai degu ulita ba alin. Che kle meni.” 31 Guardia donga chugagwalla kweri chada degu ene kagadale chugagwalla Félix alin. Guardia donga ulita agedu guardia donga chugagwalla kweri gerudu kare, donga ulita jo Pablo dbe ngajrege una Cesarea ngnagu, jo chke una Antípatrige gbedu una ege. 32 Gire nagbietege donga bai jo seradi una Antípatrige ama ulita chiuni naskuni donga kle toi ngwadi una Jerusalénge. Donga bai jo ja giti ama ulita jo gwangerugu Pablo ole una Cesarea ngnagu. 33 Donga ulita jo chke una Cesareage jo kwian nga Judeamu chugagwalla kweri kada Félix ngwadi, gire donga chada ketu kaire Pablo ketu chugagwalla Félige. 34 Chugagwalla Félix guardia donga chugagwalla kweri chadalla batunga ulita, gire Félix geru kadu Pabloge: —¿Pablo, ba kwian nga bainimu? Pablo jaindunga: —Cha kwian nga Ciliciamu. 35 Félige chku uñale Pablo nga Ciliciamu, gire ama gerudu Pablo ole: —Cha kwian nga Ciliciamu chugagwalla kaire agwe, cha ñage gerule ba giti ba jiske o ba me jiske. Kwian ulita ba gbanga jiske be chke aini, cha be ama keruchuge kaire cha be ba keruchuge gerule kle boi mine ulita giti. Chugagwalla Félix gerudu ene Pablo ole gire ama Pablo ketangu kwian skage manangage manadale no chugagwalla oña Herodes toidu ngwadi ullage ene Pablo mi kige.
1 Pablo dbajo chke una Cesareage chui tigake gire kwian Pablo dollale gweale jo chke Pablo nate, kwian gerunga Chube ole daba alin chugagwalla ma kweri kada Ananías kaire kwian israelita chugagwalla juma gweale kaire kwian gerunga daba giti kada Tértulo, kwian e ulita Pablo dollale jo chke una Cesareage Pablo nate. Kwian mneite e jo chugagwalla Félix ngwadi gerule Félix ole Pablo gbale jiske chugagwalla Félige. 2 Kwian mneite e kledu chugagwalla Félix ngwadi gire Félix Pablo dbangu kwian mneite Pablo dollale gwa giti. Pablo dbachku gire Tértulo gerudu chugagwalla Félix ole Pablo gbe jiske chugagwalla Félige, Tértulo gerudu Félix ole: —Cha ba gai kweri mo chugagwallale, ba kwian chugagwalla no no, malen kwian ulita kle toi no modi me kle kira bate, ba lle tanre no dodadu kwian alin nga aige, ba giti kwian kle toi no. 3 Ba kwian nga ai ulitage chudabo tanre, ulia ba cha chugagwalla no no, cha ba gai dage no ba agedu giti kwian ulita alin. 4 Cha mi gerule dare e giti tanre ba ole agwa cha ta geru tragakalin sidri ba ole lle na giti, cha takalin ba mo ta gbe cha keruchuge sugeti. Cha be gerule ba ole onbre ai giti ama kle age mine cha ulitaske. 5 Onbre ai kle chage kwian israelita tanre ta gbe chage age nganake kle chage kwian israelita na ta blite chage nganake, ene kwian israelita ulita nga ulitage kle kira bate tanre modi. Onbre ai kle kwian israelita nga ulitage tke tangle geru ngwale giti, gerukle ama kwian Jesu una Nazaremu gerua dbanga ulita chugagwalla. 6 Kaire ama tadukalin kwian me israelita dbe u gerungwa Chube olege, e giti cha ulita ama gau tkale skage ji gbe ama alin, cha tadu ama gbakalin ji chuge Moisés chadalla degaba unsuialin gerule kare. 7 Agwa guardia donga chugagwalla kweri kada Claudio-Lisias ama jo donga tanre ole Pablo jwennga cha ulita kote, ama Pablo du ama ngwadi cha ngeru. Claudio-Lisias gerudu cha ulita Pablo gbanga jiske ole cha ulita chiedale ba ngwadi Pablo gbe jiske ba gwa giti. 8 Nege cha kle aini, ene ba agali ñage geru kade Pabloge mineade cha ama gbakalin jiske, ene ama be gerule ba ole, gire bage be chke uñale cha kle ama gbe jiske ulia llema giti. 9 Kwian israelita ulita kledu Félix ngwadi Tértulo ka chudaboi gerule salengwli Pablo giti Tértulo gerudu kare. 10 Gire chugagwalla Félix gerudu Pablo ole: —Ba gerule cha ole mineade kwian ai ulita kle kira bate ba ole. Gire Pablo gerudu chugagwalla Félix ole: —Noare cha ñage gerule ba ole mo giti aini ba gwa giti. Uñale chage me nege alin ba kwian nga aimu chugagwalla agwa chura ngle ba kwian nga aimu chugagwalla. 11 Nege chui gbataboko giti gbaboke chku chage gire cha jo chke una Jerusalénge gerule no Chube giti, ba agali ñage geru kade kwiange ba takalin kare ene chke uñale bage cha kle gerule ulia o me. 12 Chui ege kwian israelita ai ulita cha gbanga jiske me gwagedu chadi ka boi ni kira bate kwian gdaite ole u gerungwa Chube olege, kaire cha me su kira bate kwian una Jerusalénmu ole u kwian israelita mo litangwa Chube gerua jwanngwage, cha me su kira bate kwian ole geru giti ni nga gdaitege una Jerusalénge. 13 Kwian mneite kle gerule ba ole cha giti cha gbe jiske ama ulita me ñage cha gbe jiske ama takalin kare, ama me gwagedu chadi age ama kle gerule kare, ama kle geru jinade ngwale. 14 Agwa cha gerule ulia mo giti agali cha kle age Chube takalin kare, Chube e cha kwian israelita enusulian unsuialin Chubea. Chube gerua Moisés nu degaba cha kle geru e ulita gai dage, kaire kwian Chube gerua ketanga Chube gerua degu unsuialin cha kle geru e gai dage. Kaire cha kle Chube gerua jagere Jesu giti gai ulia mo ta gbe chage geru jagere e ole, kwian e cha gbanga jiske kle geru e gai geru ngwalere. 15 Chage uñale trate Chube be kwian jaba gbeni gwade salengwli kwian e ulita kle tañachuge kare, Chube be kwian no kwian me no gbeni gwadeni. 16 Malen cha diali mo ta gbakalin age trate no Chube ole kaire kwian ole. 17 ’Chura gwealege cha kledu chage nga nage me cha jwiage gire cha joni una Jerusalénge igi dbe, igi e cha bitalla Chubenu kagu kwian israelita Jesu gerua gaba me lle molen alin, cha kledu una ege gire cha joni u gerungwa Chube olege bda kete gwaleda Chube gwa giti. 18 Ngeru cha mo chugu ngwadi chi dreanngenga mo giti mo gbe trate Chube gwa giti ule daba gdabaga ole kwian israelita kle age kare chegedale trate Chube gwa giti. Cha agedu ene ulita gire cha kledu chui gbe bda ketangwa gwaleda Chube gwa giti daba gdabaga alin u gerungwa Chube olege, chui ege kwian ngle me kledu u ege ni cha kledu kira bate kwian ole, cha kledu age ulita ta no ole gire kwian israelita gweale nga Asiamu chku gwagedu chadi age ene u gerungwa Chube olege. Kwian e ulita kledale aini nege cha gbale jiske, amage suge ulia cha jiske gire ama agali gerudale cha giti ba ole. Kwian e ulita gwagedu chadi age ene, agwa ama me kle aini cha gbe jiske bage agali, kwian na kle aini cha gbe jiske, ama ulita kle aini me ñage gerule ulia cha giti ba ole. 20 Kwian mneite ai kle cha gbe jiske ba geru kade amage, ama gwa giti cha kledu kwian israelita chugagwalla ulita ngwadi una Jerusalénge, ama ñage gerule ba ole suge amage cha skwendu jiske llema giti me no kwian israelita chugagwalla ulita ngwadi, cha me agedu me no eni. 21 Ama ñage cha gbe jiske geru gbaitre alin cha gerudu giti, cha kledu amaske kwian israelita chugagwalla ulita gwa giti gire cha gerudu: “Chui bdaglige kwian jaba be chkeni gwade, e gai ulia gdale nege ba ulita kle cha gbe jiske.” Geru e giti alin allabi ama ñage cha gbe jiske, cha me jiske lle na giti —Pablo gerudu ene ulita chugagwalla Félix ole. 22 Chugagwalla Félix Pablo keruchugu gerule ene, Félix me mo ta gbu age agwa ama geru e jigu chui na alin, ama gerudu: —Cha be Claudio-Lisias manade ngwange, ama be chke aini ama be geru kete ma trate chage ba ulita giti gire cha be age, agwa nege cha me ñage. Uñadu trate Félige kwian Jesu gerua gaba kle Jesu gerua dbe mine, amage sugedu kwian me Jesu gerua gai kle kira bate Pablo ole Pablo kle kwian tke tangle Jesu gerua giti gdale. 23 Félix guardia daba chugagwalla kagu Pablo manade ama kle kwian skage manade kare me Pablo chuge ngwadi jogeni siere agwa ñage Pablo chuge ngwadi manade gbale ene Pablo ñage age ama takalin kare. Kaire kwian na Pablo skatemanalla ñage chie Pablo ngwadi Pablo chudaboi lle dbe Pablo alin toigda. 24 Chui gweale jo tangle gire Félix jo mo muira kada Drusila ole guardia daba chugagwalla kle Pablo manade ngwadi, Drusila muinga israelita, ama bonate jo chke Pablo kle skage ngwadi, gire Félix gerudu Pablo mananga ole: —Ba chie Pablo dbe cháge cha ta gerukalin ama ole. Pablo dbachku Félidi gire Pablo geru tragu Félix ole Jesucristo gerua gai ulia giti. 25 Kaire Pablo geru ketu Félige Chube takalin kwian toi no trate Chube gwa giti Chube takalin kare, kwian me mo chugadale ngwadi age me no Chube dollale. Kaire Pablo geru ketu Félige ji chuge chuia giti, chui ege Chube be ji gbe tirare kwian ulita giti bai agedu me no ama dollale me mo ta gbu Jesucristo gerua gai ulia. Félix Pablo keruchugu gerule ene ulita gire Félix kwachiu tanre, ama me tadu geru keruchugakalin dare gire ama gerudu Pablo ole: —Cha ba keruchugu nobi, agwa ba me gerule dare. Chui nale cha ba kade geru trage cha ole nakwaite cha be kle ngwale gire ba ñage gerule cha ole. 26 Félix agedu Félix gerudu kare, Félix Pablo kadu bitangle agwa ama me geru keruchugakalin ulia. Félix Pablo kadu bitangle geru tragadale, Félix tadukalin Pablo igi kete Félige ene Félix Pablo skajwennga. 27 Chura gdaboke Félix kledu age ene Pablo ole agwa Pablo me su igi kete. Félix me tadu agekalin Pablo ole kwian israelita tadukalin kare, malen ama kledu Pablo manange skage sbali. Gire bdagli Félix me chegu kwian nga Judeamu chugagwallale dare, kwian na kada Porcio-Festo chegu kwian nga Judeamu chugagwallale Félix tanege. Félix tañachugu ma no Pablo chuge ngwadi skage me su Pablo skajwennga, ama tadu chegekalin no kwian israelita ole malen Félix Pablo jigu skage, ene chugagwalla ama tanege ñage age Pablo ole.
1 Festo chiu una Romage chku una Cesareage nga Judeage chege kwian nga Judeamu chugagwallale Félix tanege. Chui maikege Festo kledu una Cesareage gire ama jo una Jerusalénge tienda kwian israelita chugagwalla ulitadi. 2 Festo jo chke una Jerusalénge, gire kwian gerunga Chube ole daba alin chugagwalla ulita kaire kwian israelita chugagwalla na ulita chku Festo kledu ngwadi Pablo gbe jiske Festoge. 3 Kwian israelita chugagwalla ulita gerudu Festo ole: —Cha takalin ba Pablo dbangeni aini una Jerusalénge. Ama ulita gerudu ene ama ulita takalin kwian chieni Pablo dbeni jon Jerusalén ngnagu giti ene ama ñage Pablo jege ngwange jonke Pablo gweda. 4 Kwian israelita chugagwalla ulita gerudu ene Festo ole gire Festo gerudu ama ulita ole: —Pablo kle skage una Cesareage, cha agali kle tañachuge jogeni llani blike. 5 Malen ma no ba kwian israelita chugagwalla aini gweale joge cha ole una Cesareage. Che mo litadale llani geru trage Pablo giti, bage suge ama jiske ulia, ba ñage gerule ama gwa giti ama gbe jiske chage llani. 6 Festo gerudu ene kwian israelita chugagwalla ulita ole gire ama chegu ngmadi chui na gbataboko una Jerusalénge. Chui gbataboko jo tangle gire Festo joni una Cesareage, Festo jo chke una Cesareage, gire nagbietege Festo jo nga gerungwa bdagli kwian jiske kwian me jiske giti ngwadi, Festo toidu dba gire ama Pablo jwanngu dbangu ama ngeru kwian ulita gwa giti. 7 Pablo jwanjo Pablo dbachku Festo ngeru kwian ulita gwa giti gire kwian israelita chugagwalla Pablo dollale nu chieba una Jerusalénge ama kle ne ngwadi, kwian e ulita mo litu Pabloge kodi Pablo gbe jiske, ama ulita gerudu tanre me no Pablo dollale, agwa geru e ulita ngwale malen kwian Pablo dollale me ñadu Pablo gbe jiske ulia kwian gerudu kare giti. 8 Gire Pablo gerudu mo giti mo kaire kwian ulita gwa giti Festo ole: —Cha me agedu me no ni sidri Moisés chadalla degaba unsuialin kwian israelita alin dollale, cha me su age me no u gerungwa Chube ole dollale, cha me su age me no chugagwalla kweri emperador una Romamu dollale. 9 Pablo gerudu ene gire Festo takalin chege no kwian israelita ole, kwian israelita takalin Pablogeni una Jerusalénge malen Festo geru kadu Pabloge: —¿Ba ta jogekalinni una Jerusalénge? Llani kwian be ba gbe jiske chage, cha be gerule ba giti bdagli llani ba jiske o me jiske. 10 Pablo jaindunga Festo kalen: —Cha kle aini ba ngwadige ba kwian una Romamu gerunga bdagli kwian jiske o me jiske, ¿lledale cha jogeni una Jerusalénge? Ba gerudale aini cha ole cha jiske o cha me jiske kwian kle gerule kare. Uñale bage trate cha me su age ni sidri me no kwian israelita dollale. ¿Mineade ba kle geru kade chage cha ta jogekalinni? Aini ba gerudale bdagli cha giti, agwa cha me gerudale ba ole. 11 Suge chage ulia ulia cha agedu me no kwian israelita dollale, cha me ñage ka boi mo gdale, ene kwian ta cha gwakalinda ñage cha gweda cha jiske gdale. Agwa ulia ulia cha me skwen jiske kwian kle gerule kare cha dollale, gire chugagwalla me ñage cha kete kwian kle gerule cha dollalege gwaleda. Agwa cha gerule ba ole, kwian cha dollale me kle gerule ulia cha giti cha jiske, malen ba cha kagadale una Romage chugagwalla kweri emperador una Romamu ngwadi ene ama gerudale bdagli cha giti cha jiske o cha me jiske. 12 Pablo gerudu ene chugagwalla Festo ole gire Festo jo gerule sugekare Festo chudaboanga ulita ole Pablo ta jogekalin una Romage giti, chudaboanga gerudu Festo ole: —Ama ta jogekalin, ba ama kagadale chugagwalla kweri ngwadi. Chudaboanga gerudu ene Festo ole gire Festo chiuni Pablo kle ngwadi Festo gerudu Pablo ole: —Ba takalin chugagwalla kweri una Romamu gerule agali ba ole ba jiske o ba me jiske, ba takalin ene, cha be ba kage llani una Romage ama ngwadi. 13 Chui gweale jo tangle gire chugagwalla rey nga namu kada Agripa chku mo muiralla kada Berenice ole basale Festodi una Cesareage. 14 Agripa Berenice ole chegu eni una Cesareage Festo ngwadi chui ngle gire Festo geru tragu Agripa ole Pablo giti: —Aini onbre gdaite kle skage, chugagwalla Félix ama jigu skage gire cha chegu kwian nga aimu chugagwallale Félix tanege. 15 Bitaite cha jo una Jerusalénge, cha jo chke llani gire kwian gerunga Chube ole daba alin chugagwalla ulita kaire kwian israelita chugagwalla juma ulita Pablo gbu jiske chage, ama ulita gerudu cha ole cha Pablo gwangeda, kwian ulita gerudu Pablo nu ageba me no. 16 Ama ulita gerudu ene cha ole gire cha gerudu ama ole kwian una Romamu me kle kwian jiske gweda sugekare kwian daba gbanga jiskege, agwa ngeru kwian daba gbanga jiske gerudale mo gwale daba jiske ole kaire kwian jiske gerudale mo giti gbanga jiske ole, ene uñale kwian jiske ulia o me jiske. Cha gerudu ene ama ole che una Romamu suia giti, 17 gire chku uñale amage kwian una Romamu suia giti malen ama chiu aini una Cesareage cha ngwadi Pablo gbale jiske agali chage. Nagbietege cha jo nga gerungwa bdagli kwian jiske o me jiske giti ngwadi cha toidu dba toingwa giti gire cha Pablo dbangu cha ngeru kwian ulita gwa giti. 18 Kwian ulita Pablo gbanga jiske gerudu cha ole Pablo giti Pablo gbale jiske chage, ama gerudu ulita Pablo dollale. Cha tañachugu ama be gerule Pablo kwian gweale gwabada o lle na tanre me no tirare dodadu, agwa kwian Pablo gbanga jiske me Pablo gbu jiske lle me no e kare giti cha tañachugu kare. 19 Kwian israelita e Pablo gbu jiske mo suia giti gdale, kaire kwian israelita Pablo gbu jiske Jesu gerua gdale. Pablo kle gerule Jesu jokeda kle gerule Jesu amaña kle gwadeni, e giti alin kwian kle Pablo gbe jiske. 20 Me uñadu chage cha agedale mine Pablo gbakle jiske giti, malen cha geru kadu Pabloge ama ta jogekalinni una Jerusalénge, cha gerudu ama ole llani cha be gerule bdagli ama giti ama jiske o me jiske ama gbakle jiske giti. 21 Agwa Pablo me tadu jogekalinni una Jerusalénge, ama tadu jogekalin kwian chugagwalla ma kweri una Romamu ngwadi una Romage, ene chugagwalla una Romamu gerudale ama giti ama jiske o me jiske. Malen cha ama chugu ngwadi aini skage, chui gweale cha ama kagakalin gire cha be ama kage chugagwalla kweri una Romamu ngwadi. 22 Festo geru tragu ene Agripa ole Pablo giti gire Agripa gerudu Festo ole: —Cha ta onbre e keruchugakalin ama kle gerule mine tra no. Festo gerudu Agripa ole: —Ba ama keruchugakalin, suialin cha be ama kade gire ba be ama keruchuge agali. 23 Nagbietege Agripa mo muiralla Berenice ole mo ngama tkaba no mo dodaba no no jo chke nga chugagwalla kle kwian keruchuge ngwadi, kaire guardia donga chugagwalla ulita kaire kwian na daba chugagwalla una Cesareage kwian e ulita jo chke ne ngwadi, gire Festo Pablo dbangu kwian ulita kle mo litaba ngwadi. 24 Festo gerudu kwian ulita kle mo litaba ole: —Chugagwalla Agripa kaire kwian na daba chugagwalla una aige kaire kwian na ulita una aige kle mo litaba nege aini ule, cha gerule ba ulita ole, ba ulita cha keruchuge. Nege cha onbre ai gbe ba ulita gwa giti, kwian ulita israelita gerudu cha ole onbre ai jiske tanre. Cha jo una Jerusalénge gire kwian e ulita Pablo gbu jiske chage kaire kwian amaña chiu aini una Cesareage gerudu geru amaña giti Pablo dollale. Ama me ka chite gerule cha ole Pablo giti, ama gerule Pablo gwaleda. 25 Agwa chage suge Pablo me jiske, cha me ama ketakalin gwaleda. Pablo tale agali ta jogekalin chugagwalla kweri una Romamu ngwadi, ene chugagwalla kweri gerule ama giti ama jiske o me jiske. Ama takalin ene, cha kle tañachuge ama kage una Romage. 26 Agwa chage me uñale trate cha chada dege mine chugagwalla kweri una Romamu alin Pablo giti, cha me ña ama kage ene me chada kage ule. Nege cha ama gbe ba gwa giti chugagwalla Agripa, ba ña geru kade Pabloge kwian ulita kle mo litaba aini gwa giti, Pablo be gerule ba ole ene suge bage ama jiske mine, gire ba ñage gerule cha ole gire cha ñage chada dege chugagwalla kweri una Romamu alin Pablo jiske giti. 27 Cha alin me no kwian skage kage chugagwalla ngwadi gballa chada me joge kwian skage ole ule gerule kwian skage giti ama jiske mine ulia llema giti.
1 Festo gerudu ene ulita Agripa ole Pablo giti gire Agripa gerudu Pablo ole: —Ba ñage gerule cha ole mo giti kle boi mine ba ole. Pablo gbi kadu Agripage ngeru gire Pablo gerudu Agripa ole: 2 —Ba Agripa kwian chugagwalla no no, chadi nga suga noare cha ñage gerule mo giti cha gbakle jiske giti nege aini ba gwa giti. Kwian israelita cha gbu jiske, ama gerudu cha giti cha jiske tanre. 3 Kaire nga suga noare chadi ba giti ba kwian israelita suia ulita uñe, uñale bage llema giti kwian israelita kle kira bate modi malen cha takalin ba mo ta dbe no cha keruchuge. 4 ’Cha toidu cha bitalla kwian israelitaske cha jwia una Tarsoge, kaire cha toidu cha bitalla kwian israelitaske una Jerusalénge, cha kledu tige gwangerudba cha llema bo amaske ulita uñale amage. 5 Kwian israelita ulita ñage gerule cha toidu kwian fariseo suiale agwa me gerukalin. Uñale amage kwian fariseo kle age ulita Moisés chadalla degaba unsuialin gerule kare ma no trate kwian israelita na ulitage, cha toidu geru eske, cha kwian fariseo. 6 Chube gerudu cha enusulian unsuialin ole Chube be age no kwian alin ama be kwian jaba gbeni gwade. Cha kle mo ta gbe geru e gai ulia Chube gerudu kare, e giti ama ulita kle cha gbe jiske nege. 7 Cha bitalla kwian israelita mne gdataboko giti gdaboke ulita takalin Chube ama gbeni gwade chui bdaglige malen ama ulita Chube gai dage gerule no Chube giti kle mo ta gbe lle boi Chube alin diali. Cha gerule ba ole chugagwalla Agripa, Chube gerudu unsuialin Chube be jaba gbeni gwade, geru e cha kle gai ulia, geru e giti cha bitalla kle cha gbe jiske. 8 Pablo gerudu ene Agripa ole gire Pablo gerudu kwian ulita kle mo litaba ole kaire: —¿Mineade ba ulita me geru gai ulia Chube kwian jaba gbeni gwade giti? ¿Ba ulita tañachuge Chube me ñage kwian jaba gbeni gwade chui bdaglige? Ba me geru e gai ulia, malen ba kle cha gbe jiske geru e giti. 9 Pablo geru tragu dare Agripa ole: —Ngeru cha tañachugu lle tanre dodade Jesu una Nazaremu gerua dollale, cha mo ta gbu kwian ulita Jesu una Nazaremu gerua gaba ulia gbe boi tanre daga ngwale. 10 Cha agedu cha mo ta gbu age kare kwian Jesu gerua ganga ole una Jerusalénge. Cha mo ta gbu age kwian Jesu gerua ganga dollale, gire kwian gerunga Chube ole daba alin chugagwalla ulita chada gweale ketu chage, ene cha ñadu age kwian Jesu gerua ganga dollale. Kwian tanre Jesu gerua gaba cha ama tku skage Jesu gerua gai gdale, Jesu gerua ganga tanre guleda cha gwa giti, cha alin e no kwian ene gweda. 11 Cha kwian tanre Jesu gerua gaba gbu ji chuge skage Jesu gerua gai gdale, ene cha tañachugu ama be mo ta blite me geru Jesu giti gai ulia, cha chagedu age ene ulita u tanre kwian israelita mo litangwage chage kwian Jesu gerua ganga nate. Cha skochiu tanre kwian ulita kle Jesu gerua gai ole, cha chagedu kwian kle Jesu gerua gai ulia nate una Jerusalénge kaire nga na me cha jwiage. 12 ’Kwian gerunga Chube ole daba alin chugagwalla ulita cha kagu una Damasco ngnagu, kwian Jesu gerua ganga gai nate talla ole cha jo. 13 Cha gerule ba ole chugagwalla Agripa, cha jo chage jonkare una Damasco ngnagu, chui tainkwli bduke cha gwagedu jichra chra chie nga ngaña gitidi, jichra chra e gwadenga ma no chui chrage. Jichra chra chku dba chadi ule cha chagemanalladi tangle. 14 Cha ulita jo chke dba jichra chra kote gire cha geru keruchugu gerule cha ole mo kwira hebreole: “Saulo, Saulo, ¿mineade ba kle age cha dollale cha gbe boi tanre daga ngwale? Ba kle age me no cha dollale ba kle age kaire mo dollale naskuni bda kai dage dbe ska giti kare.” 15 Cha geru keruchugu ene gire cha geru kadu: “¿Ba chema kle gerule cha ole?” Gire cha geru keruchugu gerule kwaite: “Cha Jesu una Nazaremu, cha amaña nate ba kle chage age cha dollale cha gbe boi tanre daga ngwale. 16 Chkede gdate mo gbe biale, nege cha kle meñe bage agali ene suge bage cha chema, nege cha ba gbe lle boi cha alin cha gerua dbe kwian tanreske, ba be gerule cha giti kwian na ole ba kle cha keruchuge nege giti, kaire cha be meñe bage dare e ba tragadale kwian ole kaire. 17 Cha be ba manade no kwian israelita be ba dollaleske kaire kwian me israelita be ba dollaleske, ene ama me ñage age ba ole blike ama takalin kare, cha kle ba kage ama ulitaske cha gerua trage ama ole. 18 Kwian e ulita me Chube uñe kle chage nga jereske kare, ba ama ulita ta gbadale cha geruage ene amage suge cha mine ene ama mi chage nga jereske kare. Cha gerua giti ama ñage Chube uñe ñage chage no Chube takalin kare kwian chage no jichra giti kare, ene kwian mi chage dare dolla Satanás kle kwian ta gbe age kare. Kwian cha gerua gai ulia, ene ama agedu me no ulita Chube talla mlienga, kwian ene Chubenu, Chube be age no ama alin Chube kle age no kwian ulita bai cha gerua gai ulia alin.” Jesu gerudu ene cha ole jonke joge una Damasco ngnagu. 19 ’Chugagwalla Agripa, cha gerule ba ole ulia Jesu gerudu ene cha ole, cha ama gau dage, cha agedu ama gerudu kare cha ole. 20 Cha jo ngeru Jesu gerua dbe kwian toinga una Damascoge gire cha jo geru dbe kwian toinga una Jerusalénge kaire cha jo nga nage chage ulita nga kweri Judeage geru dbe kaire cha geru e Jesu giti du ulita kwian me israelitage. Cha kwian e ulita ta gbu suge ama mo ta blitadale Chube ole joge siere ama kle age me noge, ama mo ta gbadale age trate Chube takalin kare kwian gwa giti ene suge kwian nage ulia Jesu ama ta blitu. 21 Cha gerudu ene giti kwian israelita cha gau u gerungwa Chube olege tkale skage kaire, ama tadu cha gwakalinda cha gerudu Jesu giti gdale. 22 Kwian israelita kle age ene cha ole Jesu gerua dbe gdale agwa Chube kiralla giti cha mo ta gbu chage diali Jesu gerua dbe kaire cha kle chage gerule dare Jesu giti kwian ulita ole kwian chugagwallaske kaire kwian na ngwaleske. Kwian Chube gerua ketanga gerudu unsuialin kare kaire Moisés gerudu unsuialin kare cha me kle gerule sugekare ama geruduge Chube be age giti. 23 Chube kwian e ulita unsuialin ta gbu chada dege gerule Cristo be chie ama jogedaleda, Cristo be jogeda gire mongikege Chube be ama jaba gbeni gwade ngeru kwian jabage ulita. Cristo jaba chkeni gwade giti kwian israelitage kaire kwian me israelitage be suge trate Chube be kwian gbeni gwade kaire chui bdaglige. 24 Pablo kle geru trage ene Agripa ole mo giti gire Festo gerudu kweri Pablo ole: —Pablo, ba geru jun tanre, tañachuge geru e alin giti ba gerule kwian jwligebanga kare, me uñale bage ba kle gerule llema giti. 25 Pablo gerudu Festo ole: —Cha ba gai dage Festo, ba kwian chugagwalla, cha me kwian jwligebanga geru jwen tanre giti ba kle tañachuge kare, agwa cha kle gerule trate no, cha me kle gerule kwian jwligebanga kare. 26 Chugagwalla Agripa kle aini uñale amage cha kle gerule giti e ulia, malen cha me kwachie geru trage ama ole ulita chada kle degaba unsuialin giti, uñale chage trate boidu ulita Jesu ole uñale amage, boidu Jesu ole me boidu sugekare kwian ulitage, boidu ulita Jesu ole kwian ulita gwa giti. 27 Pablo gerudu ene Festo ole gire gerudu dare Agripa ole: —Ba Agripa kwian chugagwalla kweri, cha geru kade bage, kwian Chube gerua ketanga Chube gerua degu unsuialin, ¿ba geru e gai ulia? Uñale chage ba kle geru e gai ulia. 28 Agripa gerudu Pablo ole: —Chege bedre cha alin ba cha ta gbu Jesu gerua gai ulia. 29 Pablo gerudu Agripa ole: —Noare, nga suga no chadi ba keruchuge gerule ene, ba Jesu gerua gai ulia nege nege o ba manade sbali Jesu gai ulia, e giti cha me tallade agwa cha takalin chui chke gire ba mo ta gbe geru Jesu giti gai ulia mo tale, me ba alin allabi agwa kaire kwian ulita kle aini cha keruchuge, cha takalin ba ulita mo ta gbe geru Jesu giti gai ulia cha kare, agwa cha takalin ba ulita me jogedale skage cha kare Jesu gerua giti. 30 Pablo gerudu ene ulita gire chugagwalla Agripa ule mo muiralla Berenice ole kaire chugagwalla Festo kaire kwian na kledu mo litaba eni, kwian e ulita chku gdate jo geru trage sugekare modi Pablo giti, ama gerudu modi: —Onbre e me ageba sidri me no, cha me ñage ama kage gwaleda kaire ni ama kledale skage. 32 Agripa gerudu Festo ole: —Ama agali gerudu che ole ama takalin che ama kage chugagwalla kweri una Romamu ngwadi ene chugagwalla e gerudale bdagli ama jiske o me jiske, malen che ama kagadale. Ama takalin che ama kage una Romage, agwa ama me gerudu che ole ene, che ñage ama skajwennga aini —Agripa gerudu ene Festo ole.
1 Festo chui gbu Pablo kage una Romage nga Italiage, gire Festo Pablo kaire kwian skage na ketu guardia daba chugagwalla kada Julioge dbadale una Romage, Julio guardia donga lle boanga kwian chugagwalla kweri una Romamu alin mneite chugagwalla. Cha chada ai deganga jo ule Pablo ole. 2 Cha ulita du kweri gau una Cesareage, du e nu chieba una Adramitioge, du e kle biale jogeni nga Asiage du ulita kle joge chke ngwadi una kaire kairege tangle. Daba kada Aristarco una Tesalónicamu nga Macedoniage kledu kaire cha ulita ole joge ule, cha ulita jo du giti. 3 Nagbietege cha ulita jo chke una Sidónge, eni Julio agedu no Pablo alin, ama Pablo chugu ngwadi basale kwian ama skatemanalladi, skatemanalla Pablo gau ngwange no Pablo ko gatu bligda giti. 4 Cha ulita jo tangle una Sidónge gire mleuda kweri kledu du ngwange malen du dbanga jo du dbe ko taingwli giti mleuda kweri me batre ngadrega bleske kada Chipredi tangle. 5 Cha ulita chagedu bate duge jo nga Ciliciage nga Panfiliage kodi tangle, cha ulita jo chke una Mirage nga Liciage. Cha ulita chegu una ege, du jo tangle dare. 6 Una Mirage guardia daba chugagwalla Julio du na jinadu jogengwa una Romage, du nu chieba una Alejandríage skwendu Julioge, du e be joge una Romage nga Italiage. Julio gerudu cha ulita ole: “Che be joge du aige.” Cha ulita du e gau joge dare una Roma ngnagu. 7 Chui ngle cha ulita kledu chage duge eruda taleda blega giti, mleuda kweri kledu du jonllage malen mnoare kwian du dbanga alin du dbe blike, cha ulita chagedu ene gire cha ulita jo una Gnidoge kodi tangle. Du dbanga me tadu jogekalin du dbe nga nage tangle agwa mleuda ngeru nga bliu giti diali gire jo ngadrega bleske kada Salmónge kodi tangle jo ngadrega kweri bleske kada Cretage. 8 Du dbanga jo du dbe kodi ble kagda jegwale nga Cretage, du dbanga jo du dbe ene mleuda ngeru gire bdagli du ñadu una kada Buenos-Puertoge, una e chege kodi una Laseage. 9 Mleuda tirare kote cha ulita me ñadu chage blike blega giti duge, cha jo chke una Buenos-Puertoge e suiale noi kle chke dba mleuda giti suia, chui e suiale tirare chage blega giti duge, malen Pablo kwian ta gbu e giti, Pablo gerudu kwian ole: 10 —Che ulita kle chage du aige ole cha gerule, chage suge che chage dare nga tiraske che mi chage no. Nga tiraske du ñage skloge kaire teru ulita chenu ñage jogenga ulita bleske kaire che ulita ñage jogenga bleske, chage suge ene, ma no che chege manade aini che kle ngwadi, nga boi bedre gire che ñage joge ngerugu. 11 Pablo gerudu ene agwa du kaganga kaire du dbanga gerudu: —Ma no che joge dare, che me ñage chegeda aini. Guardia daba chugagwalla Julio me Pablo gerua gbu gdadi, ama du kaganga kaire du dbanga gerua gbu gdadi. 12 Cha ulita kledu ngwadi du kle chke ngwadi una Buenos-Puertoge, nga e chege mleuda kweri gwangegudba, me no chege nga ege noi boi tira suiale, malen kwian ulita tañachugu ma no joge siere nga ege ta jogekalin chke una Fenicege du kle joge chke ngwadi ngadrega amaña Cretage. Una Fenicege mleuda kweri me kle joge chke dba noiske tirare chui joge nate ngnagu, eni ama ulita ta chegekalin nga tira suia tke tangle eni. 13 Kwian du dbanga tañachugu ñage joge dare, amage sugedu mleuda me chke dba kiraske me kle chie mno, cha ulita jo siere una Buenos-Puertoge, du dbanga jo du dbe kodi ngadrega bleske kada Cretage kagda jegwale una Fenice ngnagu. 14 Du jo suge blega giti gire mleuda kweri chiu ngadrega bleskege. 15 Mleuda kledu du dbe gwangaseguda jondoi du joge ngwadige. Du dbanga me ñadu du gateda du dbanga du chugu ngwadi mleuda du dbe. 16 Mleuda jo du dbe cha ulita ole llagli, du jo ngadrega soli bleske kada Caudage nate ngnagu tangle, eni mleuda me kle tiennga kiraske. Du soli jogengwa kedagu kledu lugaba du kweridi cha ulita mo kira chugu tanre du soli ole jwen bdugu gbale ngaña du kwerige. 17 Cha ulita du soli jun bdugu, gire du dbanga lle boanga gbu du kweri luge jegwale giska giti ene du me skiendba ulita. Du dbanga kendunga du giti ama me takalin du joge sklie ubaudaske nga ble arale batre nga kada Sirtege. Glibita kle duge kwian lugu giska giti mliu chiske giskalla lugu du kagdage ene glibitage mleuda me ñage du dbe blike Sirte ngnagu mleuda du du eruda taleda. 18 Nagbietege mleuda kweri kledu chke dba mno gire kwian lle boanga duge ulita mo ta gbu teru ama kle chage dbe duge mlienga bleske ene ama tañachugu du be chege kwangi du mi skiendba. 19 Maikege kwian lle boanga duge lle du dodagda mliunga bleske, ene ama tañachugu du chege ma kwangi. 20 Chui tanre jo tangle nga ju nga jere, cha ulitage chui me medu ngajudi, beu me medu ngajrege, ene me uñadu cha ulitage mleuda kle cha dbe bai ngnagu noi boi tanre kweri mleuda giti. Nga eneske cha ulita kledu chage duge cha ulita tañachugu cha mi tien keda, ulita kle chage duge tañachugu be jogenga bleske mleuda kote noi kote. 21 Kwian ulita kle chage duge me blidu chui tanrege kwachieske gire Pablo gerudu kwian ulita ole: —Cha gerule ba ulita ole, ma no ba cha kerua gau dage, llani nodale ngadrega Cretage che cheguda llani, ene che me nga ai tira chuge, ene che me lle mliadalenga ngwale. 22 Agwa ba me cha kerua talladu, cha gerule ulia ba ole, ba me ta dbe kwachie, ba mo ta klie nga tira ngeru. Kwian ulita kle chage du aige ni gdaite be jogenga noiske chi kote. Agwa du mi chege no, du be skiendba ulita bleske nga tira kote. 23 Cha Chubenu cha Chube gerua Jesu giti dbanga, ngajrege Chube lle boanga ama alin nga ngaña giti kagu gerule cha ole. Lle boanga chku chadi, 24 gerudu cha ole: “Pablo, ba me mo ta dbale kwachie nga tira ngeru. Ba jogedale chke kwian chugagwalla kweri emperador una Romamu gwa giti. Kwian ulita kle chage ule ba ole du aige, ba giti Chube mi kwian gdaite chuge ngwadi jogenga.” Lle boanga Chube alin gerudu ene cha ole ngajrege. 25 Malen cha gerule ba ulita ole kle chage du aige, ba ulita mo ta klie me kwachie. Cha Chube gai dage, uñale chage trate ulia ulita be boi che ole duge lle boanga Chube alin nga ngaña giti gerudu kare cha ole. 26 Du mi chege no agwa che ulita tiendale keda ngadrega bleske gwealege —Pablo gerudu ene kwian ulita ole. 27 Chui gbataboko giti gbabaga jo tangle chage blega giti mleuda kweriske nga tiraske cha ulita kledu chage ble kada Adriáticoge. Ngajrege nga jere bduke lle boanga duge ama ulitage chku uñale du kle joge kodi dbi ngnagu. 28 Kwian lle boanga duge ble ñachugu giska giti dba ble jere mangire, ble jo ñachugaba ble nganá veinte ga giti joge dba uba giti. Du jo ma ngeru dare, lle boanga duge ble ñachugu nabitaite, ble ma arale nganá quince ga giti joge dba uba giti. 29 Kwian lle boanga duge kwachiu du giti, ama tañachugu du be joge jwate kechugage gire lle boanga duge hierrogda gaba kada ancla lugu gdabaga mliu chiske du nate ngnagu ene du mi chage dare mi joge jwate kege. Kwian ulita gerudu mo chubea ole nga gbe ju blike cha ulita alin ene cha ñage ten ma no. 30 Kwian lle boanga duge ulita tadu kigekalin du soli giti du kweri chuge ngwadi blega giti. Ama ulita mo gbu du soli jwen dbige du kwerige skwlenre, ama me takalin kwian na tendi ama mo gbu age lle ancla mlie chiske du ngeru ene mi chke nate uñale, tañachugu ene. 31 Agwa Pabloge chku uñale kwian lle boanga duge be kige du soli giti, guardia daba chugagwalla Julio ole kaire donga ulita ole Pablo gerudu: —Kwian lle boanga duge be joge kige ulita, gire kwian ulita be chege aini duge mi tien keda be jogenga ulita, lle boanga ulita me ñage du chuge ngwadi. 32 Pablo gerudu ene gire guardia donga me tadukalin kwian lle boanga duge ni gdaite kige, guardia donga du soli skalla tkunga du kwerige du soli chugu ngwadi joge blega giti gballa, ene kwian lle boanga duge me ñadu kige. 33 Nga ju ngwange Pablo gerudu kwian ulita ole: —Ma no ba ulita lle gweale gute mo kira gagda. Chui gbataboko giti gbabaga jo tangle, chui e ulitage ba kledu tañachuge ulita be boi giti, e giti alin ba kledu tañachuge ba me blidu, nege ba ulita blidale. 34 Cha takalin ba ulita lle gweale gute, ene ba be kira gai. Ba toikalin ba blidale, ba me mo gweda ngwale bli ole, ba ulita mi jogeda chi kote ni gdaite. 35 Pablo gerudu ene kwian ulita kle duge ole gire Pablo pan gau kote gerudu Chube ole: “Chube, noare ba bligda ai ketu gutadale cha ulita alin.” Pablo gerudu ene ulita Chube ole gire Pablo pan skutunga, pan gutu. 36 Pablo kwian ulita ta gbu suga no ole gire kwian ulita blidu. 37 Kwian ulita blidu takalin kare unchku ulita gire kwian trigo ulita mliunga bleske ene du chege kwangi chagedale blike. Cha ulita ngle kledu chage duge kwian doscientos setenta y seis. 39 Nga chku ju nga chra bebitabi kwian lle boanga duge nga gbu gdadi gire amage me sugedu kle nga bainige agwa tendu ble dregadi kagda ble ngwedi ngnagu, du dbanga mo ta gbu joge ble drega e ngnagu. 40 Gire lle boanga duge ancla ulita skatkunga chugu ngwadi bleske, gire du dbanga du dbagda ko degunga jogedale. Ñometra du dbagda mleske gale ngaña jondoi glita giti du chuga giti, gire mleuda du du ble drega ngnagu. 41 Du jo chke kodi ble drega kagda ngnagu du ngwange ubauda jwichugale kledu chiske, du jo chke sklie ubauda jwichugaleske. Du chuga ngeru chegu sklieba ubauda jwichugaleske, du me ñadu joge gwangeruda ni gwanaskuda gire du nate ble chitedu kiraske du sklogedu bitage bitage. 42 Gire guardia donga ulita tadu kwian skage ulita gweda ene guardia donga tañachugu kwian skage ni gdaite ñage joge obe tien keda gire kige. 43 Agwa guardia daba chugagwalla Julio me takalin donga Pablo gweda, malen Julio me donga ulita chugu ngwadi kwian kle chage skadi gdaite gweda, ama gerudu donga ulita ole: —Ba me ñage kwian kle chage skadi gdaite gweda. Julio gerudu ene donga ulita ole gire gerudu kwian na ulita ole: —Kwian ulita bai kaire ñage obe ñage joge ngeru obe tiendale keda ble kagda giti. 44 Kwian bai me ñage obe ñage joge obe glidrega giti du drega giti, ene ulita ñage joge chke no keda. Kwian ulita agedu guardia daba chugagwalla Julio gerudu kare ene kwian ulita tiendu keda ble kagda giti, ni kwian gdaite jonga chi kote.
1 Cha ulita kledu keda dbi giti gwade, gire chku uñale cha ulitage ngadrega e kada Malta, 2 kwian toinga nga ege cha ulita gau ngwange no. Noi boi suiale nga skeke tanre, kwian nga emu jita kweri teun gire kwian nga emu cha ulita kadu jita ngwachuge. 3 Pablo jo ji ulen kle litabadba jwen ko gbaite mliale jige, ama ji du ji gbu dba kodi jita kle teanbage, ama kledu ji e mlie jige gire ji eske jorisi skochiu jita ngwage, Pablo lentigu koge jorisi ege. 4 Kwian nga emu tanre gwagedu Pablodi lentige jorisige, jorisi chegu jwlieba Pablo koge gire kwian gerudu modi: —Chage suge onbre e ageba me no me no, ama nu daba gweale gwabada. Ama tiun gitiru nga tirage blega giti ama me su jogeda nga tira kote malen che chubea kle ji gbe nga aige ama agedu me no giti, che chubea me takalin ama chege toi gwade. 5 Kwian kledu gerule ene modi gire Pablo ko mliunga jita ngnagu, jorisi jwatunga jorisi jo jige, Pablo chegu no me boidu. 6 Kwian ulita gwagedu Pablodi lentige kwian ulita chegu manade gwage Pablodi, kwian ulita tañachugu Pablo be lute be jogeda blike, uñadu kwiange jorisi kwian gbe jogeda blike jorisi e muña tirare. Kwian kledu gwage manade tanre, Pablo lentigu me boidu Pablo chegu no gire kwian mo ta blitu tañachuge nganake Pablodi. Ama ulita kle gwage Pablodi gerudu modi: “Pablo chube malen me boidu.” Kwian nga emu tañachugu ene Pablodi. 7 Pablo lentigu ngwadige kodi kwian chugagwalla nga emu kada Publio kle toi ngwadi, Publio cha ulita du mo ullage ama cha ulita gau ngwange no, cha chegu chui gbamai ama ngwadi, ama cha ulita chudabo tanre. 8 Chui ege Publio ñenua kledu oga jabale nganagda kote kaire tige tangle kote. Pablo jo Publio ñenua oga kle ngwadi, Pablo gerudu Chube ole Publio ñenua oga giti, Pablo ko gbu oga giti gire Publio ñenua jo chke noni. 9 Publio ñenua jo chkeni no giti geru chageduda kwianske, kwian na ulitage chku uñale Pablo kwian oga dodanga, gire kwian oga ulita nga ege chiu Pablo ngwadi mo dodange. Kwian oga ulita chku Pablo ngwadi, Pablo kwian oga e ulita dodadu. 10 Dai gdamai cha ulita chegu nga e Maltage, chui dai gdamaige ulita kwian nga ege cha chudabo lle ulita giti toigda. Dai gdamai e jo tangle gire cha ulita mo gbu biale joge dare una Roma ngnagu, kwian nga ege lle tanre ketu cha ulitage dbale. Du nu chieba una Alejandríage kledu manade eni nga tira tke tangle nga ege. Kwian una Alejandríamu lle oña boke dodaba mo kodi gau mo chubeale, lle oña ngwale e kada Cástor kaire Pólux gbaba du chuga giti. Du ege cha ulita jo una Siracusa ngnagu. 12 Du jo chke una Siracusage, eni cha ulita chegu chui gbamai manade duge. 13 Una Siracusage du jo dare ble kagda jegwale, du jo chke una Regíoge. Nagbietege mleuda kledu tiennga una Puteoli ngnagu du joge kare, chui ege mleuda eske du dbanga du du dare una Puteoli ngnagu, kaire na nagbietege du jo chke una Puteolige. 14 Una Puteolige daba Jesu gerua gaba gweale kledu, daba e cha ulita gau ngwange no, daba Jesu gerua gaba gerudu cha ulita ole cha chegedaleda nga ege daba e ole chui guke. Cha ulita cheguda ama ole cha ulita chui guke tku tangle gire cha ulita jo dare seradi una Roma ngnagu. 15 Daba Jesu gerua gaba una Romamuge chku uñale cha ulita be joge chke, gire daba Jesu gerua gaba tanre una Romage chiu ten cha ulita ngwange jonkare. Daba gweale tendu cha ulita ngwange ngeru una Foro-de-Apioge, daba gweale na tendu cha ulita ngwange una Tres-Tabernage. Pablo gwagedu daba Jesu gerua gaba ulita una Romamudi ten ama ngwange jonkare gire nga chegu suga no Pablodi daba Jesu gerua gaba giti ten Pablo ngwange. Pablo gerudu Chube ole daba e ulita giti, Pabloge sugedu ama me kle gballa. 16 Cha ulita jo chke una Romage gire guardia daba chugagwalla Julio kwian skage ulita ketu chugagwalla una Romamuge. Chugagwalla una Romamu Pablo gbu toi sugekare mo kaire kwian skage na ulitage, chugagwalla una Romamu donga gdaite gbu Pablo manade. 17 Pablo jo chke una Romage chui maike chku gire Pablo kwian israelita chugagwalla ulita una Romamu kadu geru tragadale. Kwian israelita chugagwalla e ulita mo litu Pablodi, gire Pablo gerudu ama ulita ole: —Cha bitalla ulita israelita, cha me agedu sidri me no che bitalla na kle toi nga nage ni gdaite dollale, ni che enusulian suia dollale cha agedu me no. Cha kledu una Jerusalénge gire che bitalla israelita chugagwalla ulita cha gau cha ketu kwian una Romamu kwian nga Judeamu chugagwallage. Kwian israelita chugagwalla ulita gerudu chugagwalla e ole cha jiske tanre. 18 Gire chugagwalla e geru kadu tanre chage kwian israelita chugagwalla ulita kle gerule giti ama ole. Cha geru tragu tanre kwian una Romamu kwian nga Judeamu chugagwalla ole gire sugedu chugagwallage cha me jiske kwian israelita chugagwalla kle gerule kare, ama tadu cha skajwankalinnga cha me jogedaleda kwian israelita chugagwalla ulita takalin kare. 19 Kwian una Romamu kwian nga Judeamu chugagwalla tadu cha skajwankalinnga agwa kwian israelita chugagwalla ulita kira batu chugagwalla e ole me ña cha skajwennga. Kwian israelita chugagwalla ulita tadukalin kwian una Romamu kwian nga Judeamu chugagwalla cha kete amage gwaleda, gire cha gerudu mo giti ma no cha jogedale chugagwalla kweri emperador una Romamu ngwadi ene ama gerudale bdagli cha giti cha jiske o cha me jiske. Cha tadu chiekalin una Romage gerule mo giti, cha me mo ta gbu chie aini gerule me no mo bitalla israelita ulitadi cha ta gerukalin no trate ulita kle boi giti cha ole. 20 Nege cha kle aini malen cha ba ulita daba israelita aini una Romage chugagwalla kadu, ene cha ñage ba uñe kaire geru trage ba ole kle boi cha ole giti. Unsuialin Chube gerudu be kwian jwanngale siere kage kwian israelita alin, ama chku, jokeda, ama jaba chkuni gwade, e giti cha kledu gerule gire kwian israelita chugagwalla ulita cha gbu jiske geru e gdale. 21 Pablo gerudu ene gire kwian israelita chugagwalla una Romamu ulita gerudu Pablo ole: —Aini me uñale cha ulitage ba giti, ni che bitalla israelita nga Judeage chada degu cha alin ba giti. Daba gweale chiu llani nga Judeage, ni gdaite su gerule sidri me no cha ole ba giti. Cha ulitage me uñale kle boi ba ole giti. 22 Agwa cha kle mo litaba nege aini ba ole cha ta ba keruchugakalin ba kle tañachuge mine geru Jesu gitidi, uñale cha ainige nga ulitage kwian kle gerule geru jagere Jesu giti dollale. 23 Gire Pablo ule kwian israelita chugagwalla una Romamu ulita ole chui gbu geru tragangwa geru jagere giti, chui chku kwian tanre litedu Pablodi Pablo kledu ngwadi. Pablo kledu geru trage ngmadi ngabebitabi nga jeredu kaire kwian ole, Pablo gerudu Jesu gerua gai ulia giti alin allabi kwian chege Chubenu. Pablo takalin kwian ulita geru Jesu giti gai ulia malen ama Moisés chadalla degaba unsuialin Jesu giti tragu kaire ama kwian Chube gerua ketanga chadalla degaba unsuialin Jesu giti tragu chke gda uñale kwian kle mo litabage. 24 Kwian gweale geru Jesu giti gau ulia Pablo gerudu kare, kwian gweale na me geru Jesu giti gau Pablo gerudu kare. 25 Kwian kle mo litaba gweale geru gau ulia gweale na me geru gau ulia gire ulita kle mo litaba me mo ta gbu tañachuge salengwli. Kwian me geru gau mo gbu joge siere Pabloge ta skole ole gire Pablo gerudu kwian kle joge siere ole: —Chube Oña kwian Chube gerua ketanga kada Isaías ta gbu gerule trate che enusulian unsuialin ole. Che enusulian unsuialin mo chuga gbu mno kaire nege ba kle age salengwli che enusulian unsuialin agedu kare. Unsuialin Chube Oña Isaías ta gbu Chube gerua dege, chada e gerule: 26 “Joga gerule kwian israelita ulita ole Chube kle gerule ene: ‘Cha gerua tragabe bage, ba be cha gerua keruchuge agwa cha gerua mi suge bage. Lle tanre no dodabe ba gwa giti, ba be gwagedi agwa mi suge bage chema kiralla giti lle dodakle. 27 Ba kwian israelita ulita mo ta gbu mnoare, ba me takalin cha gerua gbe gdadi. Ba kle mo olo jege cha gerua ngeru, ene geru me suge bage. Mo gwagwa giti ba kle ten lle no dodakledi, agwa me gbakalin gdadi mo tale. Ba kle mo ta gbe ene ulita malen ba me ñage mo ta blite cha ole. Cha ta ba chudaboakalin mo ta blite chage cha ole agwa ba me takalin mo ta gbe siere ba kle age me no gitige.’ ” Isaías Chube gerua degu ene unsuialin kwian israelita alin. 28 Gire Pablo gerudu dare: —Ba me geru Jesu giti keruchugakalin, ba me geru Jesu giti gakalin, ba me takalin geru Jesu gitige, malen chkedale uñale ba ulitage nege gwangerugu Chube be geru Jesu giti dbange kwian me israelitage, kwian me israelita be geru e gai ulia, gire Chube be ama ta gbe siere age me no gitige. 29 Pablo gerudu ene kwian israelita ulita kle mo litaba ole, gire kwian israelita kle joge siere Pabloge ulita jo ka boi modi gwasieruda Pablo ole Pablo gerudu giti. 30 Gire Pablo chegu dare una Romage chura gdaboke ulita igi kete u giti toingwa. Kwian tanre jo Pablo ngwadi geru trage ama ole, kwian ulita jo chke Pablo ngwadi Pablo kwian e ulita gau ngwange ta no ole. 31 Diali kwian ngle mo litu geru nate Pablodi, Pablo gerudu no no kwian ulita ole Jesucristo gerua gai ulia giti, Jesucristo giti alin allabi kwian chege Chubenu, Pablo kwian ta gbu Jesucristo gai ulia, kaire Pablo kwian tku tangle geru ulita Chugagwalla Jesucristo gitige ene chke uñale kwiange ama mo ta gbadale toi no trate Chube takalin kare. Pablo me kwachiu gerule ene Jesucristo giti kwian ulita ole, ni kwian gdaite Pablo chugudi age geru Jesucristo giti dollale, kwian ulita Pablo gau dage Jesu gerua trage giti kwian ole.
1 Cha Pablo lle boanga Jesucristo alin chada ai degange ba kwian Chubenu ulita una Romage alin: Chube cha gau Chube cha gbu geru amanu ketangale kwian ulitage, geru e kwian jwangda siere ji chugege age me no gdale. 2 Unsuialin Chube geru e tragu kwian Chube gerua ketanga ole, Chube gerudu Chube be kwian jwannga siere kage kwian ulita alin, kwian Chube gerua ketanga Chube gerua e degu. 3 Kwian jwannga siere e Jesucristo che Chugagwalla, ama Chube Kirolla, ama medunga nga dba ai giti kirogwa kare kwian israelita chugagwalla unsuialin kada David oindalla giti. Jesucristo kwian ulia, 4 agwa kaire ama Chube, ama no trate ulita. Kwian gwagedu amadi jogeda, kaire kwian gwagedu amañadi chkeni gwadeni, e giti sugedu trate kwiange ulia ama Chube Kirolla ama kira molen tanre. 5 Jesucristo giti Chube agedu no cha alin, ama cha gau geru Jesucristo giti ketangale kwian ulitage, ene geru Jesucristo giti ñage joge kwian me israelita ulitaske, ene kwian me israelita tanre be geru Jesucristo giti gai ulia be Jesucristo gai dage be age Jesucristo takalin kare. 6 Ba ulita me israelita kle toi una Romage bai kaire nu geru Jesucristo giti gaba ulia, ba Jesucristonu, Chube ba ulita ta gbu Jesucristo gai ulia ene ba ulita chege kwaitre alin amanu. Ba ene ulita alin cha kle chada ai degange, kaire ba kwian israelita ulita Jesucristonu kle una Romage alin cha kle chada ai degange, cha gbi kage chada ai giti ba ulita alin. Ba ulita israelita kaire me israelita, Chube no no ba ulita ole, Chube ba ulita gau mau alin, Chube takalin ba ulita chage trate Chube ole. Cha takalin Chube che Ñenua kaire Jesucristo che Chugagwalla age no no ba ulita alin, ama nga gbe suga no ba ulita tale. 8 Ngeru cha geru ai kete ba ulita kwian Chubenu una Romamuge: Jesucristo giti ba Chube gau ulia mo tale, ba kle mo ta gbe chage diali ama ole, geru e ba giti kle chke uñale kwiange nga kweri ulitage, e giti nga suga no chadi malen cha kle gerule no no Chube ole ba ulita giti. 9 Cha kle mo ta gbe no no ulita lle boi Chube alin Chube takalin kare, cha geru Chube Kirolla giti traganga kwian ole. Chubege uñale diali cha kle gerule Chube ole gire cha kle tachke ba ulita giti, cha gerule ba ulita giti Chube ole: “Chube, cha takalin ba kwian banu una Romamu chudaboi, ba ama manade no. 10 Sbali cha tadu jogekalin tienda ama ulitadi, ba takalin ba ñage cha kage ama ngwadi, cha alin e no Chube.” Cha kle gerule tanre ene Chube ole joge ba ngwadi giti, cha tañachuge bdagli cha be ñage joge chke ba ngwadi. 11 Cha ta jogekalin ba ngwadi ba chudaboi, cha ta ba ulita tkakalin tangle ma no Jesucristo giti, ene ba ulita chege mo ta gbaba Jesucristo alin gai ulia diali. 12 Cha mo ta gbu Jesucristo gai ulia, ba ulita kaire mo ta gbu Jesucristo gai ulia, cha ta klekalin ule ba ole e ma no cha alin, ene che kira gai moge ule geru giti, ba cha ta gbe chage ngerugu Jesucristo ole cha ba ulita ta gbe chage ngerugu Jesucristo ole. 13 Cha takalin chke uñale ba ulita cha daballa cha ibotea Jesucristo gitige, bitangle cha mo ta gbu joge ba ngwadi tienda badi, sbali kledu boi ene cha ole, nege kle boi ene kaire, diali lle gweale kle cha jonllage gire cha me ñage joge chke. Cha klekalin ba ulita ole llani baske ba ulita Jesucristonu tke tangle Jesucristo giti, ene kwian gweale na kle toi baske ña geru Jesucristo giti keruchuge geru Jesucristo giti gai ulia kwian me israelita nga nage geru Jesucristo giti gau ulia kare. 14 Suge chage Chube cha gau cha kagu geru Jesucristo giti tragadale kwian ulita ole, cha me tañachuge kwian giti kwian kwira mine kwian suia mine, cha me tañachuge kwian giti kwian geru jwanba tanre o me geru jwanba, agwa cha Chube gerua Jesucristo giti tragadale kwian ulita ole Chube cha kagu age kare. 15 Cha ta jogekalin blike ba ngwadi geru Jesucristo giti trage ba ulita Chubenu ole kle toi una Romage, kaire cha ta geru Jesucristo giti tragakalin kwian na me Jesucristo uñe ole kle toi una Romage. 16 Cha no no geru Jesucristo giti ole, nga suga no chadi geru e trage kwian ulita ole, cha me ibule geru Jesucristo giti trage kwian ulita ole, e Chube gerua kiraske, geru e no, kwian ulita bai kaire geru Jesucristo giti gai ulia Chube kwian ene ulita jwen siere ji chugege age me no gdale. Geru Jesucristo giti chku kwian israelitaske ngeru agwa kaire geru e kle chage nege kwian me israelitaske, ene kwian ulita israelita me israelita bai kaire Jesucristo gai ulia kwian ene tien gitiru ji chugege age me no gdale. 17 Chube gerua Jesucristo giti che ta be suge Chube che jwen siere mine che agedu me no giti ene che chege no trate Chube gwage. Che mo ta gbe Jesucristo alin gai ulia, e giti alin allabi che me chege jiske Chube gwage che chege no Chube gwage. Chube gerua degaba unsuialin gerule: “Kwian bai kaire mo ta gbe Chube gerua gai ulia mo tale, kwian ene no trate Chube gwage, kwian ene be toi chui tangle Chube ole.” 18 Chube agali nga ngaña giti ji gbe mno kwian ulita agenga me no alin. Kwian mo ta gbe age Chube dollale mo ta gbe age me no alin diali, age me no talla tanre kle kwian ene tale malen kwian me Chube gerua gai dage ulia, kwian ene me tachke geru ulia gbe gdadi, ulita tañachuge age me no alin allabi. Chube ji gbe mno kwian ene ulita alin. 19 Kwian agenga me no me ñage gerule: “Chube me kle”, ama me ñage gwage Chubedi agwa ñage gwage Chube nu nga ulita dodabadi. Chube nga ulita dodadu, ege gwaiguda kwian ulita ñadu gwage edi ñadu suge trate trate kwiange Chube kle Chube nga ulita dodadu mo kiralla giti. Chube kiralla me bidege, Chube kiralla chege diali chui tangle, e giti ñage suge trate trate kwian ulitage Chube mine malen ni kwian gdaite ñage gerule: “Chube me kle”. Kwian agenga me no ulita jiske Chube gwa giti. 21 Uñale kwiange Chube kle, agwa me gerule no Chube giti me Chube gai no kweri mo Chugagwallale me gerule no Chube ole Chube agedu no no giti ulita. Kwian tañachuge nganake Chube agedu no gitige, kwian mo ta gbe tañachuge age lle ngwale giti. Kwian tañachuge lle ngwale giti, malen tañachuge tanre age me no giti ta chege nga jereske geru uliage, geru ulia me suge me ñage age geru ulia gerule kare. 22 Kwian ene gerule mau giti: “Cha geru ulia uñanga tanre.” Ama gerule ene ama kle gerule ngwale, ama me geru ulia uñanga. 23 Chube gwade, ama me jogeda, ama me boi. Agwa kwian boi, bda boi, ulita me chege gwade diali, ama ulita jogeda. Kwian lle e kare ngwale oña dodade mo kodi gai mo chubeale, kwian mo salengwli oña dodade, kwian bda ji giti oña dodade, kwian bda ko giti oña dodade, kwian bda chage dba kde kwara giti oña dodade. Lle oña e ulita ngwale me gwade, lle oña e kare ole kwian mo ta gbe no, kwian lle oña e kare gai mo chubeale, agwa Chube gwade ulia ole kwian me mo ta gbe, kwian me Chube ulia gwade gai mo Chubeale me gerule no Chube ulia gwade giti. 24 Kwian ene ulita me mo ta blitakalin Chube ole malen Chube kwian ene ulita chuge ngwadi age me no ulita ama ulita takalin kare, ene kwian chege age ta me no tanre ole ulita diali kwian takalin kare, ta tanre me no ene ole kwian mo ta gbe jrite mo salengwlidi age me no tanre sugaska. 25 Kwian ulita mo ta dbadale no Chube ulia ole gerudale no no ama alin giti diali, ene nobi Chube alin. Agwa kwian ta me no tanre me tañachuge ene Chube giti, ama geru ulia blite nganake Chube nu lle dodaba gai mo chubeale, ama gerule no lle e giti, agwa ama me Chube agali gai ulia mo Chubeale, ama me Chube gai dage, ama me gerule no Chube giti. 26 Chube nu lle dodaba kwian lle ene gai mo chubeale, kwian me mo ta blitakalin Chube ulia ole malen Chube ama chuge ngwadi age ulita kwian takalin kare. Kwian onbre mo ta gbe age nganake, muire mo ta gbe age nganake, muinga me takalin onbrege, muinga jrite mo muire salengwlidi. 27 Kaire kwian onbre me takalin muingage, kwian onbre jrite mo onbre salengwlidi, onbre salengwli mo ta gbe ule jrite modi. Kwian onbre kaire muinga age me no tanre ene modi, ene ama agali mo gbe jingme chienga ama age tanre me no giti, jingme e kote ama chege toi oga kaire jogeda. 28 Kwian agenga me noge uñale Chube kle, agwa kwian ene me tañachuge Chube giti me Chube gai dage me mo ta blite Chube ole. Chube kwian ene chuge ngwadi chege tañachuge me no me no diali, ene kwian chege age me no tanre ama kle tañachuge kare. 29 Kwian ene ulita agenga tanre daga ngwale me no ai kare: Muire onbre mo chuge ke giti. Kwian chage ta me no ole age me no diali. Kwian mo ta dbe lle tanre gai mau alin. Kwian mo ta gbe age tanre me no daba dollale. Kwian takalin lle dabanuge mau alin. Kwian daba gwangada. Kwian mo ta dbe kira bate daba na ulita ole diali. Kwian daba anblitanga agedale me no daba ole. Kwian me tañachuge no ni sidri. Kwian geru jinanga ngwale dabadi daba na ulita ole. 30 Kwian gerunga tanre ngwale me no daba ulitadi. Kwian me no me no Chube ole. Kwian gerule me no daba gwaske. Kwian tañachuge mo giti ma no daba nage. Kwian mo gai dage mo giti daba na ole. Kwian mo ta gbe age me no dare diali. Kwian me mo ñenua mo chebia kerua gbe gdadi me age ñenua chebia gerule kare. 31 Kwian me ta suge age no. Kwian me age ulia gerule kare. Kwian me mo ta dbe no daba ole, me uñalege daba ta ñedba ni tachke gerule taingwli daba ole agedu giti. Kwian me mo ta dbe tai dage dabage age no daba alin. 32 Kwian mo ta dbe age me no ai kare ulita, kwian ene tale suge amage Chube me no ama kle age giti ole agwa gire ama kle age gwangerugu, kwiange suge chegé age me no ulita giti ama be chege sugekare Chubege diali chui tangle. E uñale trate kwiange agwa kwian me tañachuge Chube be ji gbe ama alin age me no giti, kwian mo ta gbe diali age dare me no, kaire nga suga no amadi kwian na giti kle age me no kaire.
1 Ba ulita bai kaire kle gwage daba nadi age gweale me no gire ba kle gerule daba e giti: “Daba e kle age me no me no, ama jiske Chube gwage”, ba gerule ene ba kle mo agali gbe jiske kaire, ba agali kle age me no kaire salengwli daba kle age kare, ba me ñage gerule mau giti: “Cha me agenga me no, cha me jiske Chube gwage.” 2 Uñale kwian ulitage Chube kwian ulita talla uñe trate, Chubege uñale kwian kle age me no ulita mine malen Chube alin ñage gerule trate ulia kwian kle age me no giti, Chube kwian ene gbe ji chuge kwian kle age giti. 3 Ba bai kaire gerule daba agenga me nodi daba gbe jiske daba nage ba kaire agenga me no daba agenga me no kare, ba me ñage tañachuge Chube be ji gbe daba alin allabi giti gire ba be chege gitiru Chube be ji gbege. Agwa me ene, Chube be ji gbe ba alin kaire ba age me no giti. 4 Chube no no ba ole malen ama me kle age blike ba kle age me no giti. Chube kle manade tanre, ama me kle ji gbe ba alin blike, ene ama takalin suge bage ama no ba ole ba mo ta blitadale ama ole ba jogedale siere ba kle age me noge. Chube ta ene no ba ole, agwa kaire chui be chke gire Chube mi manade dare ji gbale kweri ba alin, malen tirare ba alin chege age me no Chube gwage ba kle age kare. Agwa ba ulita me kle e tallade, 5 ni ba ta mo ta blitakalin Chube ole, ba ta chegekalin age dare mo ta gbe age me no. Ba me mo ta blite joge siere age me noge Chube be ji chuge kweri gbe ba kle age me no tanre giti chui bdaglige, chui ege Chube be ji gbe kwian agenga me no ulita alin. 6 Chui bdagli ege Chube be kwian gdaite gdaite gbe jiske agedu kaire kaire giti. Chubege uñale kwian ulita ta mine, Chube be gerule trate ulia bai mo ta gbu age no Chube takalin kare bai me mo ta gbu age no Chube takalin kare. 7 Kwian ulita bai kaire nu mo ta blitaba Chube ole, kwian ene toikalin no diali chui tangle Chube ole nga noge, takalin Chube gerule no ama giti, malen kwian e mo ta gbe chage no Chube ole age no Chube takalin kare diali. Bdagli Chube be kwian ene ulita gbe toi diali chui tangle mo ole ule. 8 Agwa kwian ulita me nu mo ta blitaba Chube ole, kwian ene me Chube gerua gbe gdadi me age no geru e gerule kare, mo ta gbe ma no age me no ole, mo ta gbe age me no Chube dollale ulita kwian takalin kare. Kwian ene me mo ta blite Chube ole, bdagli Chube be skochie tanre kwian enedi be ji gbe tirare ama ulita alin. 9 Chube be ji gbe kwian israelita kaire kwian me israelita agenga me no alin, kwian agenga me no ulita be boi tanre daga ngwale be ta olire tanre ni be takalin chege Chube be ji gbeske. Kwian israelita be ji chuge ngeru, bigire kwian me israelita be ji chuge kaire ule. 10 Agwa kwian israelita kwian me israelita bai kaire ulita agenga no Chube takalin kare Chube gerua gbanga gdadi, bdagli Chube be kwian ene ulita gbe toi no nga noge, Chube be gerule no kwian ene giti, Chube be kwian ene ta gbe suga no. Chube be age no ene kwian israelita alin ngeru, gire Chube be age no kwian me israelita alin kaire ule. 11 Chube gwage kwian israelita me ma no kwian me israelitage, kwian israelita kwian me israelita salengwli Chube gwage, Chube age salengwli kwian israelita kwian me israelita alin. 12 Kwian israelita Moisés nu Chube gerua degaba unsuialin molen, kwian me israelita me Moisés nu Chube gerua degaba unsuialin molen, agwa Chube me tallade e giti, Chube kwian israelita me israelita agenga me no gbe jiske salengwli, kwian israelita me israelita age me no giti ulita be chege sugekare Chubege. 13 Kwian israelita me ñage tañachuge: “Cha Moisés chadalla molen, cha geru e keruchuge alin, ene cha no trate Chube gwage, cha me agedale no ulita.” Agwa me ene, geru e keruchuge alin e me kwian ta blite no Chube ole me kwian ta gbe no trate Chube gwage. Kwian Moisés chadalla gai dage age no geru e gerule kare, kwian ene no trate Chube gwage, Chube mi ama gbe jiske. 14 Kwian me israelita me Moisés chadalla molen, agwa mo tale kwian me israelita gweale kle age salengwli geru kle degaba kwian israelita alin kare, kwian me israelita ulita bai kaire kle age ene, e salengwli ama kle gwage chadadige degabale batenga kare, amage agali suge mo tale ama agedale mine Chube gwage Chube takalin kare. 15 Ama me geru degaba kwian israelita alin molen agwa agalige suge mo tale ama agedale no Chube takalin kare. Ama age no, age me no, agalige suge mo tale bai no bai me no. Chui bdaglige Chube be Jesucristo gbe gerule kwian ulita giti bai jiske bai me jiske Chube gwage, chui ege kwian me israelita agali be ta suge ama agedu ulita giti, chui ege Jesucristo giti be chke nate uñale kwian agedu me no ulita skwlenre giti, kwian ene be chege jiske Chube gwage. Chube be age ulita Jesucristo giti cha kle geru Jesucristo giti trage kare kwian ole. 17 Ba kwian israelita ulita ole cha gerule: Ba kwian israelita, Moisés nu Chube gerua degaba unsuialin ba israelita ulita alin, ba geru e molen, e giti ba tañachuge ba no trate Chube gwage, bage suge ba kwian israelita alin Chube uñe trate. 18 Ba geru jun no trate Chube gerua kle degabage, ene uñadu bage Chube takalin mine, geru e ñage ba ta gbe suge bai no bai me no Chube gwage. 19 Ba Chube gerua degaba molen, e giti geru ulia Chube giti chku uñale bage, ba geru e jwanba giti suge bage ba ña kwian me Chube gerua uñe tke tangle Chube geruage, ba tañachuge ba ñage kwian kle chage sugekare Chubege ta gbe chage Chube takalin kare, kwian me ta molen me suge amage bai no bai me no Chube gwage, ba kle kwian ene tke tangle chage no. 21 Ba kle kwian na tke tangle chage no Chube gerua gerule kare, ¿mineade ba agali me kle mo ta gbe age ba kle kwian na tke tangle kare? Ba kle gerule kwian na ole me no skwe boi, ¿mineade ba agali kle skwe boi? 22 Ba kle gerule me no ko chuge muinga dabanudi, ¿mineade ba agali kle age ene? Kwian me israelita lle oña dodaba mo kodi gai mo chubeale, ba me no lle oña e ole, bage suge e me Chube ulia. Ba kle gerule ba Chube ulia uñe, agwa ba me kle age Chube takalin kare, ene ba kle age salengwli kwian me israelita kle age kare, mo tale ba agali me kle Chube ulia gai mo Chubeale. 23 Chube gerua degaba, ba geru e uñe trate, diali ba kle gerule no no geru e giti, agwa ba me kle Chube gai dage, ba me kle age Chube gerua gerule kare. 24 Age ene giti Chube gerua degaba unsuialin gerule trate, chada e gerule: “Ba kwian israelita ulita age me no giti kwian ulita na me israelita gerule me no Chube dollale ba ulita kle age giti.” 25 Ba kwian israelita ulita bai kaire Moisés nu Chube gerua degaba gai dage ulia, ba mo kwara tkangenga sidri, e no ba alin, ba kle Moisés chadalla gai dage. Agwa ba kwian israelita ulita bai kaire me Moisés chadalla gai dage me age geru e gerule kare, ba ene kle age ngwale, ba mo kwara tkangenga sidri gire ba me age geru gerule kare, ngwale ba mo kwara tkangenga sidri, ba me kle mo ta gbe geru gai dage ulia, e salengwli me mo kwara tkabanga kare. 26 Agwa kwian me israelita me mo kwara tkabanga, kwian e kle mo ta gbe age ulita mo tale Moisés chadalla gerule kare, kwian e ulia nu mo kwara tkabanga kare, kwian me israelita me mo kwara tkabanga ulia agwa mo tale ama mo ta gbe geru gai dage ulia, kwian ene kle age ulita geru degaba kle gerule kare, kwian ene ulia salengwli mo kwara tkabanga kare. 27 Moisés nu Chube gerua degaba ba kwian israelita alin, kwian me israelita me Chube gerua degaba molen agwa ama mo tale kle mo ta gbe age Moisés nu Chube gerua degaba gerule kare, kwian e me mo kwara tkabanga ba kwian israelita mo kwara tkangenga kare, agwa ama kle mo ta gbe age ulita Moisés nu Chube gerua degaba gerule kare, ama me geru e molen agwa ama kle mo ta gbe age ama geru e uñe kare, ba geru molen ba me kle geru gai dage ba me kle age geru gerule kare, malen ba be jiske kweri Chube gwage chui bdaglige. Kwian me israelita me Chube gerua degaba molen ba ulita kwian israelita geru degaba molen kare, agwa ama mo ta gbe ma no ba kwian israelita geru molenge. 28 Moisés nu Chube gerua degaba, ba kwian israelita geru e molen, kaire ba mo kwara tkangenga sidri, ba age ene ba tañachuge ba kwian Chubenu ba kwian israelita ulia, agwa kwian israelita ulia me mo ka jwen israelita alin allabi, agwa kwian israelita ulia ama mo ta gbe ulia Chube ole. Chube gwage kwian ulita tadi, Chubege kwian ulita talla uñale, kwian ulita bai kaire Chube Oña chuge ngwadi ama ta blite no Chube ole, kwian ene ulia israelita Chubenu, kwian ene giti kwian salengwli me gerule ama no, Chube alinge suge kwian ene no kle age no ulia, kwian ene giti Chubedi nga suga no.
1 Cha ba kwian israelita ulita ta gbe chke ai giti: Ba kwian israelita suia mo kwara sidri tkangenga, agwa e giti ba me chege Chubenu, Chube gwage kwian israelita me israelita ulita talladi kwian ulita talla mine Chube ole, e giti ba ulita israelita ñage geru kade moge: “¿Lledale cha mo kwara sidri tkangenga? ¿Mineade ma no cha kwian israelita chudalla alin kwian me israelita chudallage?” 2 Sugedale ba ulitage Chube agedu tanre no kwian israelita ulita alin, ngeru Chube kwian israelita gau Chube mo gerua ketu kwian israelitage, geru e jo degaba, kwian israelita geru e molen, kwian me israelita me geru e molen, geru e giti ñage suge trate kwian israelitage chagedale mine Chube ole. 3 Kwian israelita Chube gerua molen agwa kwian israelita ulita me Chube gerua gai ulia me age Chube gerua gerule kare, ¿e giti Chube be mo ta blite nganake Chube mi age Chube gerule kare? 4 Me dale, Chube be chege diali ama gerule kare. Kwian ulita ñage sole agwa Chube gerule ulia diali. Chube gerua degaba unsuialin gerule Chube me sole giti, chada e gerule: “Chube diali chege trate, ama age ulita ama gerule kare, ama me sole. Kwian gweale gerule: ‘Chube me gerule ulia’, kwian gerule ene kwian kle gerule ngwale, kwian me ñage Chube gbe jiske, Chube no trate, Chube gerule ulia diali.” Chube gerua degaba gerule ene Chube giti. 5 Che age me no Chube dollale gire suge trate che tale Chube no Chube age no ulita diali, e giti kwian tañachuge mo tale: “Cha age me no giti suge kwian nage Chube alin allabi no Chube age no ulita diali, e no malen Chube me ji gbadale cha alin cha age me no ulita gdale.” Me no tañachuge ene, Chube me ji gbe che alin che age me no gdale, ñage suge chege kaire kwian nage Chube no che kle age me no ole, Chube ene ama mi ñage gerule chui bdaglige kwian ulita giti bai jiske bai me jiske, agwa Chube me ene, Chube diali trate, Chube me age me no ni sidri, malen ama kwian agenga me no gbe jiske. 7 Kaire kwian tañachuge mo giti mo tale: “Cha diali me gerule ulia, cha diali sole, ene cha giti suge kwian nage Chube alin allabi gerule ulia diali, kwian enege suge Chube ene malen ama gerule no no Chube giti, e ene ¿mineade Chube kle cha gbe jiske sole gdale?, ¿mineade Chube gwage cha agenga me no?” 8 Kwian tañachuge ene ama kle tañachuge ama age me no giti ama kle Chube chudaboi, ama tañachuge ama age me no giti kwian na kle mo ta gbe ma no Chube ole, e ulia kwian e tañachuge kare ¿mineade che ulita me age ulita me no diali? Agwa me ene, kwian e me kle tañachuge no, kwian e me tañachuge geru ulia gerule kare. Kwian ene ulita alin Chube be ji gbe, kaire Chube be ji gbe kwian alin kwian kle geru jinade ngwale cha dollale, kwian e kle gerule me no kwian na ole cha giti kle gerule cha kle kwian tke tangle kwian ai kle tañachuge kare. 9 ¿Che kwian israelita mine Chube gwage? ¿Che ñage tañachuge che ma no kwian na me israelitage? E me ene, cha gerudu kare ngeru, Chube gwage che kwian israelita me israelita ulita agenga me no, ulita jiske age me no giti, ni gdaite agali gballa ñage joge siere age me noge. 10 Chube gerua degaba unsuialin gerule kwian ulita giti, chada e gerule: “Kwian ulitaske kwian agenga no me, ni malen kwian gdaite age no, ulita agenga me no. 11 Kwian ulita me Chube uñe, ni gdaitege suge Chube mine, ni gdaite tañachuge chage Chube ole age Chube takalin kare. 12 Kwian ulita mo ta gbu chage age me no sugekare Chubege. Kwian ulitaske kwian agenga no me, ni malen gdaite age no, ulita agenga me no. 13 Diali kwian gerule me no sugaska, diali kwian gerule sole, ka me skate gerule me no dabadi. 14 Kwian ta skochie tanre, ta skochie ole ama daba oña boi tanre me no. 15 Kwian me no daba na ole, diali ama kle biale daba na gweda. 16 Baini kaire kwian joge ngwadi kwian ene age me no daba na ole, kwian ene daba na gbe ta olire tanre boi daga ngwale. 17 Kwian ene diali tañachuge age me no alin giti daba na ole, kwian ene ni tañachuge sidri daba na ta gbe nga suga no giti. 18 Kwian ulita age me no ene, kwian ulita ene me mo ta dbe kwachie Chube ngeru ama kle age giti.” 19 Chube gerua degaba unsuialin gerule ene kwian ulita giti, geru e jo degaba che kwian israelita ulita alin, geru e giti chke uñale che kwian israelitage kwian israelita me israelita ulita agenga me no, ulita jiske Chube gwage, ene ni kwian gdaite ñage gerule: “Cha me agenga me no, cha me jiske Chube gwage.” Ulia kwian ulita agenga me no, kwian ulita jiske Chube gwage. 20 Moisés nu Chube gerua degaba kwian geru e gai dage, kwian age geru e gerule kare, e alin allabi giti ni kwian gdaite be chege no trate Chube gwage, e giti kwian mi tien gitiru ji chugege ama age me no gdale, geru e jo degaba che ulita alin ta gbagda, ene chke uñale chege che kwian ulita agenga me no. 21 Nege uñale trate che ulitage Chube kwian jwen siere mine ji chugege kwian agedu me no gdale, ene kwian chege no trate Chube gwage. Moisés nu Chube gerua degaba gerule no e giti, kaire kwian Chube gerua ketanga nu Chube gerua degaba gerule no e giti, geru e ulita no, agwa uñale trate chege kwian me chege no trate Chube gwage age Moisés chadalla alin gerule kare giti, me ene, 22 Jesucristo alin giti Chube kwian jwen siere ji chugege kwian agedu me no gdale, kwian ulita bai kaire mo ta gbe Jesucristo gai ulia mo tale, kwian ene ulita israelita me israelita chege no trate Chube gwage. 23 Kwian israelita kwian me israelita ulita agenga me no, ni kwian gdaite age no trate ulita diali Chube takalin kare. 24 Kwian agenga me no agali me ñage age lle gwealege ene ama tien gitiru ji chugege ama agedu me no gdale ene ama no trate Chube gwage. Chube ta du no kwian ulita alin, malen Chube Jesucristo kagu kwian ulita alin, Jesucristo jokeda kwian ulita alin kwian agedu me no giti, ene kwian mo ta gbe Jesucristo gai ulia kwian ene tien gitiru ji chugege ama agedu me no gdale, kwian ene chege no trate Chube gwage, Jesucristo giti Chube gwage kwian enedi kwian me agedu me no kare. E giti ñage suge kwiange Chube kwian ulita gbe jiske kwian agedu me no gdale, agwa kwian bai kaire Jesucristo gai ulia, Chube kwian ene jwen siere ji chugege age me no gdale. Unsuialin nga unsuialin Jesucristo bebi chie chuiage Chube ta du no kwian toidu e suiale ole kaire, kwian e agedu me no Chube me skochiu blike ama ole, Chube taidu dage amage malen Chube me ji gbu blike kwian alin kwian agedu me no gdale. 26 Chube trate ulita, unsuialin nga unsuialin Chube mo ta gbu no kwian agenga me no ole, Chube amaña kle nege, ama gwage kwian agenga me no bai kaire Jesucristo gai ulia kwian ene chege trate Jesucristo giti. 27 Kwian ulita bai kaire Jesucristo gai ulia, kwian ene alin allabi chege trate Chube gwage Jesucristo alin giti, malen ni kwian gdaite ñage tañachuge mo tale mo giti: “Cha agali kle age no, cha kle age ulita Moisés chadalla gerule kare, malen cha no trate Chube gwage.” 28 Me no tañachuge ene, uñale chege kwian Jesucristo gai ulia, Jesucristo giti Chube kwian ene jwen siere ji chugege kwian agedu me no gdale, ene kwian chege no trate Chube gwage, Moisés chadalla alin giti kwian me ñage tien gitiru ji chugege agedu me no gdale. 29 Che kwian israelita ulita me ñage tañachuge: “Chube che kwian israelita alin allabi Chubea, Chube me kwian me israelita Chubea.” Me ene, Chube kwian me israelita Chubea kaire, Chube amaña kwian ulita chudalla Chubea, 30 Chube na me kle, Chube gdaitre alin kle, Chube e kwian jwen siere ji chugege age me no ulita gdale bai kaire mo ta gbe Jesucristo gai ulia. Kwian israelita, me israelita, Chube me tallade e giti, ulita bai kaire mo ta gbe Jesucristo alin gai ulia chege no trate Chube gwage. 31 Che kwian israelita mo ta gbe Jesucristo gai ulia, e me gerule che kle Moisés chadalla gai ngwale me ñanaske che me age dare chada e gerule kare, me ene, che mo ta gbe Jesucristo gai ulia, ene kaire che ñage mo ta gbe age ma no Chube takalin kare Moisés chadalla gerule kare.
1 Ale tañachuge Abraham che enusulian unsuialin giti, ama kwian israelita che kare, agwa ama me chegu no trate Chube gwage ama agedu no giti, Abraham agedu no giti Abraham chegu no trate Chube gwage ene Abraham ñadu gerule no mo giti Abraham agedu giti, agwa me boidu ene, Abraham agedu no giti Abraham me chegu no trate Chube gwage, Abraham chegu no trate Chube gwage Abraham mo ta gbu Chube gai ulia giti. 3 Chube gerua degaba unsuialin gerule e giti, chada e gerule: “Abraham mo ta gbu Chube alin gai ulia mo tale, e alin giti Chube gwagedu Abrahamdi Abraham no trate.” Chube gerua degaba unsuialin gerule ene Abraham giti. 4 Kwian gweale lle boi daba alin, daba e igi kete lle boangage, kwian lle boanga me kle igi gai ngwale, kwian e igi gai ko ñanale lle bo giti. 5 Me boi ene kwian ole Chube gai ulia giti, kwian me lle gweale no boi Chube alin ngeru gire kwian chege no trate Chube gwage kwian lle no bo ñanale, me ene, kwian mo ta gbe Chube gai ulia, e alin allabi giti kwian chege no trate Chube gwage, Chube kwian ene jwen siere ji chugege kwian agedu me no ulita gdale, kwian ene mo ta dbe nga suga no ole. Unsuialin David gerudu kwian ene giti, 7 David gerudu: “Nga suga no kwiandi Chube giti, Chube kwian agedu me no ulita talla mliunga, kwian ene chege no trate Chube gwage, Chube me tañachuge kwian e agedu me no ulita giti dare. 8 Chube kwian ene jwen siere ji chugege kwian agedu me no ulita gdale, kwian enedi nga suga no diali.” 9 David gerudu kare e ulia, Chube age no me kwian ulita israelita mo kwara tkabanga alin allabi, me ene, kwian me israelita me mo kwara tkabanga alin Chube age no kaire. Chube age no kwian ulita alin kwian israelita kwian me israelita bai kaire mo ta gbe Chube gai ulia, Chube kwian ene ulita jwen siere ji chugege kwian agedu me no gdale. Cha gerudu kare Abraham giti Abraham mo ta gbu Chube gai ulia, e alin giti Abraham chegu no trate Chube gwage Abraham me jiske kare. 10 Abraham me chegu no trate Chube gwage Abraham mo kwara tkangunga giti, me ene, Abraham chegu no trate Chube gwage ngeru mo kwara tkangengage, Abraham mo ta blitu Chube gai ulia ma ngeru ama mo kwara tkangungage, Abraham Chube gau ulia giti Chube gwagedu Abrahamdi Abraham no trate me jiske kare, gire e nate Chube gerudu Abraham ole mo kwara tkangenga. Abraham mo kwara tkangunga, ene ama chegu egdage chke gda uñale amage ama Chubenu ama mo ta gbu Chube gai ulia giti. Ene Abraham chegu kwian ulita ñenua bai kaire mo ta gbe Chube ole mo tale Chube gai ulia kwian bai ulita me mo kwara tkabanga mo ta gbe Chube gai, kwian ene ulita chege no trate me jiske Chube gwage Abraham chegu no trate Chube gwage kare. 12 Kaire Abraham kwian ulita mo kwara tkabanga ñenua kwian kle mo ta gbe age Abraham agedu kare, Abraham mo ta gbu Chube gai ulia, kwian mo kwara tkabanga ulita bai kaire mo ta gbe Chube gai ulia Abraham Chube gau ulia kare, kwian ene kaire chege no trate me jiske Chube gwage Abraham chegu no trate Chube gwage kare. 13 Chube gerudu Abraham ole nga kweri ulita giti Abraham oindalla alin: “Cha be nga ai ulita kete bage ba alin kaire ba oindalla alin toingwa.” Chube gerudu ene Abraham ole Chube be age giti Abraham alin kaire Abraham oindalla alin. E suiale Moisés chadalla me, Abraham mo ta gbu Chube alin gai ulia mo tale, ene Chube gwagedu Abrahamdi Abraham no trate me jiske, e giti Chube agedu ulita Abraham alin Chube gerudu kare. Abraham mo ta gbu age kwian mo ta gbu Moisés chadalla kledu degaba chuiage tangle kare age geru e gerule kare, age ene me Abraham chudabo Chube gwa giti, Abraham Chube gau ulia mo tale giti Chube gwagedu Abrahamdi Abraham no trate, e giti Chube agedu no Abraham alin kaire Abraham oindalla alin. 14 Kwian tañachuge Moisés chadalla alin gai dage age Moisés chadalla gerule kare, e alin giti kwian tañachuge Chube age no kwian ulita alin, e ulia kwian kle tañachuge kare, gire ngwale Abraham mo ta gbu Chube gai ulia ngeru Moisés chada deguge kwian alin, ngwale Chube gerudu ngeru Abraham ole Chube be age no giti Abraham alin kaire Abraham oindalla alin. Agwa me ene, Chube me age no kwian alin kwian Moisés chadalla alin gai dage giti, ni kwian gdaite ñage age no ulita diali Moisés chadalla gerule kare, malen Chube gerudu Abraham ole Chube be age no Abraham alin kaire Abraham oindalla alin Abraham mo ta gbu Chube alin gai ulia giti ngeru Moisés chada degu kwian ulita alinge. 15 Geru gbaba kwian ulita alin kwian agedale no ulita, agwa diali kwian kle age gweale me no geru e dollale, ni kwian gdaite ñage age no ulita diali geru e gerule kare. Ene kaire kwian me ñage age no ulita diali Moisés nu Chube gerua degaba kwian israelita alin gerule kare, geru e kwian gbe jiske Chube gwage kwian bai kaire age me no geru e dollale agwa geru e me ña kwian chudaboi ta gbe chke. 16 Malen ma no kwian ulita mo ta gbe Chube gai ulia mo tale ta blite Chube ole Abraham agedu kare, Abraham Chube gau ulia giti Chube agedu no ulia diali Abraham alin kaire Abraham oindalla ulita alin Chube gerudu kare. Ene kaire Chube age no kwian ulita alin israelita me israelita bai kaire mo ta gbe Chube gai ulia mo tale Abraham Chube gau ulia kare, kwian ene ulita chege no trate me jiske Chube gwage Abraham kare, kwian mo ta gbe mo ta blite Chube ole Abraham kwian ene ulita ñenua kare. 17 Chube gerua degaba unsuialin gerule e giti, chada e gerule: “Chube gerudu Abraham ole: ‘Cha ba gbu kwian ngle nga ulitage ñenua kare.’ ” Chube gerudu ene Abraham ole Abraham Chube gerua e gau ulia, uñadu Abrahamge Chube kwian jaba gbanga gwade, kaire lle me boale dodadale Chube lle ene dodade. Uñadu Abrahamge Chube kira ene molen, malen sugedu trate trate Abrahamge Chube ñage kirogwa kete ama kwian juma jumage Chube gerudu kare. 18 Abraham juma juma, kodi chura cien chke Abrahamge, ama muingalla Sara kaire juma juma, Sara me kirogwage, ama bonate juma agwa Abraham me tañachugu e giti, uñadu Abrahamge Chube be kirogwa kete amage Chube gerudu kare, Abraham Chube keruchugu gerule: “Cha ba gbu kwian ngle nga ulitage ñenuale, cha be ba oindalla gbe jriennga ngle nga ulitage.” Abraham mo ta gbu Chube gai ulia diali Chube gerudu kare Abraham ole. 20 Abraham me mo ta du chkenga, ama me Chube kerua gau ngwale Chube gerudu kare be age, agwa Abraham mo ta gbu Chube gai ma no ulia diali, uñadu Abrahamge Chube be age ulita ama alin Chube gerudu kare, e giti Abraham gerudu no no Chube ole. 21 Kaire sugedu trate Abrahamge Chube kira molen age ulita Chube gerudu kare ama ole. 22 Abraham Chube gau ulia, e giti Abraham chegu no trate me jiske Chube gwage. 23 Chada jo degaba Abraham giti gerule Abraham chegu no trate me jiske Chube gwage Abraham Chube gau ulia giti, chada e me jo degaba Abraham alin giti allabi, 24 kaire chada e jo degaba che ulita alin che ta gbagda chke uñale Chube agedu giti Abraham alin, ene kaire che ulita mo ta gbadale Chube gai ulia Abraham Chube gau ulia kare. Chube che Chugagwalla Jesu kagu nga dba ai giti kwian ulita alin, Jesu jokeda che agedu tanre me no giti. Jesu jokeda che agedu me no ulita giti gire Chube ama jaba gbuni gwade, e giti che Chube gadale ulia, ene Jesu jokeda chkuni gwade giti che chege no trate Chube gwage che mi ji chuge che agedu me no ulita gdale.
1 Mo ta gbe Jesucristo gai ulia giti mo tale che me chege jiske Chube gwage che agedu me no ulita giti, noare Chube che ta gbu ene no Jesucristo ole, che Chugagwalla Jesucristo giti che ta chege no Chube ole. 2 Che Jesucristo gau ulia, ene Jesucristo giti che chege no trate Chube gwage, kaire Jesucristo giti Chube kle age no che alin diali, che kle toi nga dba ai giti gire Chube kle che ulita ole diali, kaire chui bdagli che be joge toi Chube ole nga noge, che kle chui e manade nga suga no ole. 3 Nga suga no chedi me chui e manade alin giti, kaire nga suga no chedi che kle boi nege giti, nege che kle boi daga ngwale Jesucristo gai ulia giti kwian me Jesucristo gaba ulia kote, uñale chege boi daga ngwale giti che mo kira gbaleda ma no boi daga ngwale na darege, ene bdagli che boi daga ngwale tanre che mi tallade, che be mo ta gbe jage boi daga ngwale ulitage. 4 Che boi daga ngwale Jesucristo gai ulia giti, che mo ta gbe jage boi daga ngwale e ulitage, ene Chube gwage che kle age no Chube takalin kare, ene kaire che be kle chui manade diali nga suga no ole, chui ege che be joge toi Chube ole nga noge. 5 Uñale chege che me kle chui e manade ngwale, Chube mo Oña ketu chege, Chube Oña kle che tale kle che ta gbe diali suge Chube no no che ole Chube be age no che alin be che dbe toi ama ole chui gwealege. 6 Che ulita agali ngeru me ñadu mo jwen siere ji chugege che agedu me no gdale, Cristo chuia chku jogedaleda gire ama jokeda che agedu me no ulita giti. 7 Kwian gdaite me mo chuge ngwadi jogeda daba na giti ni malen daba agenga no giti, daba no no me jiske giti kwian gweale ñage mo ta gbe jogeda, agwa e mno, kwian no daba na ole me age ene daba na alin, kwian me mo ta dbe no no ene daba na ole. 8 Agwa Chube ma no che ole ulia, che ulita agenga me no gire Chube Cristo kagu jogedaleda che ulita giti, e giti suge chege Chube no che ole ulia. 9 Cristo jokeda che ulita agedu me no giti, ene Cristo gai ulia giti nege gwangerugu che ulita chege no trate me jiske Chube gwage, ene kaire Cristo giti bdagli che ulita mi ji chuge Chube be ji gbe chuiage. 10 Ngeru che kledu age me no ulita Chube dollale, che ene gire Chube mo ta gbu no che ole, Chube agali mo Kirolla Cristo kagu jogedaleda che giti, Cristo jokeda giti Chube che gbu ama skatemanallale, ene nege Cristo giti che ta chege no Chube ole. Cristo jokeda che agedu me no giti gire ama chkuni gwade, e giti che ulita tiun gitiru ji chugege che agedu me no gdale, suge chege che me Chube dollale nge kare, nege che Chube skatemanalla. 11 Nga suga no no chedi Chube ole che Chugagwalla Jesucristo giti, Jesucristo giti che me Chube dollale nge kare, nege Jesucristo giti che Chube skatemanalla. 12 Ngeru kwian onbre gdaitre alin kada Adán kledu, onbre e agedu me no Chube dollale, ene ama chegu sugekare Chubege kaire ama jokeda. Adán giti kwian ulita chegu agenga me no Adán kare, kwian ulita chegu sugekare Chubege kaire kwian ulita jogeda age me no gdale. 13 Chube agali geru ketu Adánge Adán me agedale lle gwealege, Adán mo ta gbu age Chube gerudu kare dollale, e giti Adán chegu jiske chegu sugekare Chubege kaire jokeda. Adán chuiage gwaiguda Adán chudalla tanre kledu ngeru Moisés chuiage, Adán chudalla e ulita me agedu me no Chube gerua dollale Adán agedu kare, Chube me gerudu kwian e ole Chube gerudu Adán ole kare ni Chube gerua degaba kledu, agwa kwian e ulita tale age me no kledu. Kwian e me chegu jiske Moisés nu Chube gerua degabage, Moisés bebi geru e dege, Chube gerua degaba me kledu kwian ta gbagda agwa kwian ulita tale age me no kledu, e giti kwian ulita chegu jiske kwian ulita chegu sugekare Chubege age me no gdale, kwian ulita jokeda Adán jokeda kare. Kwian ulita chegu agenga me no onbre gdaitre alin Adán giti, ene kaire onbre gdaite be chie be age giti kwian ulita alin kwian be chegeni no trate Chube gwage, onbre gdaite e Jesucristo. 15 Che me ñage tañachuge Jesucristo agedu me no salengwli Adán agedu kare, me ene, Adán agedu me no, ama alin giti kwian ulita chegu agenga me no chegu sugekare Chubege age me no gdale. Adán agedu me no kwian ulita alin, agwa Chube agedu no no kwian ulita alin kwian gdaitre alin giti, e Jesucristo, Chube no kwian ulita ole malen Chube Jesucristo kagu nga dba ai giti kwian alin. 16 Chube agedu no kwian ulita alin Jesucristo giti, e me salengwli Adán agedu kwian alin kare, Adán agedu me no gdaitre alin giti kwian ulita chegu jiske Chube gwage, agwa Jesucristo agedu giti kwian chege no trate me jiske Chube gwage, Jesucristo giti Chube kwian jwen siere ji chugege kwian agedu tanre me no gdale. 17 Onbre gdaite kada Adán agedu me no giti kwian ulita chegu jiske chegu sugekare Chubege age me no gdale, kaire Adán giti jogeda chegu kwian ulita alin. Ene kaire Jesucristo onbre gdaitre alin, agwa ama ma kweri Adánge, Jesucristo alin giti Chube agedu no no tanre kwian ulita alin, kwian ulita bai kaire Jesucristo gai ulia kwian ene chege no trate Chube gwage me jiske, kwian ulita ene me chege sugekare Chubege, kwian ene be toi diali chui tangle Chube ole. 18 Onbre gdaitre alin agedu me no giti kwian ulita chegu jiske Chube gwage, ene kaire onbre gdaite agedu no kwian ulita alin, ama jokeda kruge kwian ulita agedu me no giti, e Jesucristo, Jesucristo giti kwian chege no trate me jiske Chube gwage, Jesucristo agedu giti kwian ulita tien gitiru ji chugege agedu me no gdale, Jesucristo giti kwian ene toi diali chui tangle Chube ole. 19 Adán kwian gdaitre alin, ama me Chube kerua gbu gdadi, ama agedu me no Chube dollale, age ene giti kwian ulita chegu agenga me no. Ene kaire Jesucristo kwian gdaitre alin, ama agedu ulita Chube takalin kare, ama jokeda kwian ulita alin Chube takalin kare, ene Jesucristo agedu giti kwian e gai ulia, ene kwian chege no trate me jiske Chube gwage. 20 Chube Moisés gbu chada dege kwian alin, ene Chube gerua degaba giti chku uñale kwiange ama kle age me no Chube dollale, agwa kwian me talladu e giti, kwian mo ta gbu age ma me no dare, ene age me no jrienduda ngle, age me no giti kwian ulita chegu sugekare Chubege, ene kaire kwian jogeda sugekare Chubege. Kledu ene gire Chube mo ta gbu age ma no kwian ulita alin Jesucristo giti, che Chugagwalla Jesucristo giti Chube agedu no no che ulita alin, Chube che ulita jun siere ji chugege che agedu me no gdale, Jesucristo giti che ulita toi diali chui tangle Chube ole.
1 Chube agedu no ene che ulita alin, Jesucristo giti Chube che jun siere ji chugege che agedu me no gdale, agwa e me gerule nege che mo ta dbale age me no ngeru dare, ene Chube ñage mo ta gbe age ma no diali che alin. 2 ¡Me ene dale! Ngeru che ulita mo ta du diali age me no, nege Jesucristo gai ulia giti che ulita mo ta ene age me no diali chugu ngwadi, nege che me mo ta dbale toi dare age me no. 3 Che ulita Jesucristo gaba ulia che mo ñeangu chiske mo gangu ngaña chigage, e giti suge che Jesucristonu ulia che mo ta blitu ama ole. Che mo ñeangu chiske, e salengwli che jokeda ule Cristo ole che jaba ogle ule ama jaba ole kare, e gerule che age me no talla chugu ngwadi che me kle mo ta dbe toi dare age me no che agedu ngeru kare. Che chku ngaña chigage, e salengwli che jaba chkuni gwade Chube kiralla giti ule Cristo ole kare, ene kaire Chube kiralla giti Chube che ta gbu chage nganake ta no jagere ole. 5 Ulia che Cristonu che age me no talla chugu ngwadi che mo ta gbu me age me no dare ngeru kare, e salengwli che jokeda ule Cristo ole kare, ene kaire Chube che ta gbu chage nganake ta jagere ole e salengwli Chube Cristo jaba gbuni gwade kare. 6 Uñale che ulitage Cristo jokeda kruge che ulita age me no ulita giti, che e gau ulia mo alin, e salengwli che agali jokeda ule Cristo ole kare. Che Cristo jokeda gau ulia mo alin, e giti Chube che ta blitu jagere, ene nege che me mo ta dbe age me no dare che diali tadu agekalin ngeru kare, nege che tachke age no Chube takalin kare. 7 Che age me no talla chugu ngwadi, e salengwli che jokeda ule Cristo ole kare, Cristo giti Chube che jun siere ji chugege che agedu me no gdale, ene che me chege jiske Chube gwage che agedu me no giti. 8 Uñale chege che Cristo gau ulia che age me no talla chugu ngwadi e salengwli che jokeda ule Cristo ole kare, ene kaire uñale chege salengwli Chube Cristo gbuni gwade kare Chube che ta gbe toi nganake diali age no ama takalin kare. 9 Uñale chege Cristo jokeda bigire chkuni gwade, Cristo jokeda bitaitre alin che ulita alin che agedu me no giti gire chkuni gwade toidale ule Chube ole, ama mi jogeda dare, ama kle toi gwade diali chui tangle ule Chube ole. 11 Jesucristo jokeda bitaitre alin kare mi jogeda dare, ene kaire ba ulita age me no talla chugu ngwadi, diali ba mo ta gbadale me jogeni naskuni age me no dare. Ba ulita Jesucristonu, Jesucristo giti ba mo ta gbadale diali toi age no Chube takalin kare. 12 Ba me agedale me no dare ba agedu diali ngeru kare, ba mo ta gbadale chege siere age me noge diali, ba me mo chugadale ngwadi age me no ba agali ta agekalin kare. 13 Ba age me no talla chugu ngwadi gire Chube ba ta gbu toi nganake age no ama takalin kare, ba me ta ene jagere chugadale ngwadi, ba me mo ta chugadale ngwadi age me no diali ba ta agekalin kare, ma no ba mo ta chugadale ngwadi age no diali Chube takalin kare, ba mo ta gbadale diali Chubege, ene Chube be ba ta gbe age no ama alin diali, 14 ene Chube kirallaske ba mi mo ta dbe diali age me no ba ta agekalin kare. Ba ulita me ñage tañachuge ba ñage chege siere age me noge Moisés nu Chube gerua degaba giti, me ene, Chube agedu no ba alin Jesucristo giti, e alin giti ba ñage chege siere age me noge. 15 Nege che me kle toi Moisés chadalla giti, nege che kle toi Chube talla no che ole giti, e me gerule che agedale ma me no dare, ene Chube mo ta dbe age ma no che alin, me ene dale. 16 Ba ulitage uñale ba mo gbe lle boi no mo mauña alin ba agedale ulita mo mauña alin ama takalin kare. Boi ene kaire ba mo ta gbe age diali me no Chube dollale o ba mo ta gbe age diali no Chube takalin kare, e salengwli ba kle lle boi mo mauña alin kare. Ba mo ta gbe age me no Chube dollale ba takalin kare, ene ba jogeda ba be chege sugekare Chubege diali, ba mi ñage joge toi Chube ole nga ngaña giti. Agwa ba mo ta gbe age no Chube takalin kare ba mo ta gbe Chube gai dage, ba be toi Chube ole nga ngaña giti diali chui tangle. 17 Cha gerule no no Chube ole ba ulita kle mo ta blite Chube ole Chube gai dage giti. Ngeru ba ulita mo ta gbu age me no tanre, ba mo ta gbu age me no ole alin allabi, agwa nege ba ta ngeru ulita chugu ngwadi ba mo ta blitu geru ulia gai ba ulita jo tkaba tanglege geru ulia gerule kare. 18 Ba ulita kledu age me no diali ba tadu agekalin kare, ba agali gballa me ñadu joge siere age me no enege, agwa ba Jesucristo gau ulia giti ba mo ta blitu, Jesucristo ba gbu age nganake, ene ba me chege age me no ba agedu diali ngeru kare, nege ba ulita kle mo ta gbe no trate Chube ole toi trate Chube gwa giti Chube takalin kare. 19 Ba ulita kwian, cha gerule ba ole Chube gerua alin giti geru e me suge blike bage, malen cha gerule lle gweale ba uñe giti, ene suge trate bage cha kle gerule mine. Ngeru ba ulita mo chugu ngwadi age me no diali ba tadu agekalin kare, ba mo ta gbu diali age tanre me no, nege ba mo ta blitu age no Chube takalin kare malen ba mo ta gbadale diali Chubege, ene ba be ta dbe age no trate Chube gwage ama takalin kare diali. 20 Ngeru ba ulita kledu mo ta dbe age me no me no diali, ba agali gballa me ñadu joge siere age me no enege, ba ulita kledu ene, e suiale ba ulita me Chube uñu, ba me tachku age no Chube takalin kare. 21 Ba ulita kledu age me no tanre giti ¿llema no ba ulita gau age me no ene ñanale? Age me no ulita ñanalla gdaite no me. Nege suge ba ulitage age me no ulita kwian gbe sugekare Chubege, ene kwian me ñage joge toi Chube ole nga ngaña giti. Ba ulita tachke ba agedu me no ulita ngeru giti, nga chie ibule tanre ba ulitadi ba agedu giti. 22 Nege ba me kle mo ta dbe age me no ba agedu ulita ngeru kare, ba jo siere age me no tallage, nege ba kle mo ta gbe Chubege, Chube kle ba ta gbe age no trate ama takalin kare, mo ta dbe trate giti ba be toi diali chui tangle Chube ole. 23 Age me no ñanale kwian be chege ji chuge diali chui tangle sugekare Chubege, agwa Chube Jesucristo kagu kwian ulita alin, kwian che Chugagwalla Jesucristo gai ulia giti Chube kwian gbe toi diali chui tangle ama ole ule.
1 Ba ulita cha daballa cha ibotea Jesucristo giti, ba ulita Moisés nu Chube gerua degaba uñe, uñale ba ulitage kwian kle toi gwade Moisés chadalla ñage kwian ene alin kage age chada e gerule kare, kwian jogeda gire Moisés chadalla me ñage ama kage ama me kle gwade. 2 Ale gerule sidri muinga mo jwanba giti, geru kle degaba gerule muinga ene alin muinga me ñage mo onbrella chuge ngwadi mo onbrella kle toi gwade gire, ni ñage chage onbre na ole. Agwa muinga mo jwanba onbrella jogeda geru kle degaba me ñage muinga gbe jiske muinga chege sugekare onbrella jogebadage, muinga ña onbre na gai mo alin. 3 Muinga joge onbre na nate gai mo alin onbre ngeru mo jwanba kle toi gwade gire, muinga e kle age me no, e salengwli muinga kle mo chuge ke giti onbre na ole kare, muinga onbrella ngeru kle gwade muinga ene kle age me no geru kle degaba dollale. Agwa muinga mo jwanba onbrella jogeda gire muinga ña mo jwen onbre na ole, geru me muinga ene alin, e me mo chuge ke giti kare, muinga onbrella ngeru me kle gwade ama ñage mo jwen toi onbre na gdaitre alin ole diali. 4 Ene kaire ba ulita cha daballa cha ibotea Jesucristo giti, ngeru ba kledu Moisés chadalla alin gai mo alin, ba me ñadu joge siere ege salengwli muinga mo jwanba me ñage joge siere mo onbrella kle toi gwadege. Cristo jokeda gire chkuni gwade, Cristo giti ba me chege tañachuge age Moisés chadalla alin gerule kare, nege ba Cristonu, Cristo giti ba chege siere Moisés chadallage, nege ba kle Chube chuge ngwadi ba ta gbe age no ama takalin kare. 5 Ngeru che me Cristonu, che ene gire che ulita mo ta du age me no tanre diali che takalin kare, Moisés chadalla me che chudabo age no, Moisés chadalla gerudu che ole che me agedale me no, agwa che mo ta gbu age me no chada e dollale, che agedu ene giti che chegu sugekare Chubege. 6 Agwa Cristo chku che alin, nege Cristo giti Moisés chadalla me kle che kage dare ngeru kare, nege Cristo giti Chube ta jagere ketu chege toigda age Chube takalin kare me toi geru juda kle gbaba kare alin giti. Malen nege che ta me nge kare tañachuge Moisés chadalla alin giti, nege Chube Oña kle che tale, ama kle che ta gbe diali che chagedale mine, ene che ña age no Chube takalin kare. 7 Che me ñage gerule Moisés nu Chube gerua degaba unsuialin giti geru e me no, me ene dale, geru e no che alin, Moisés me geru jigu degaba, ene me chke uñale chege che kle age mine me no. Geru e me, ene me chku uñale chage cha kledu age me no tañachuge lle dabanu nate mo alin, agwa geru e kle degaba, geru e cha ta gbu suge, geru e gerule: “Me no tañachuge lle dabanu nate mo alin: ‘¿Mineade cha me e molen?’ ” 8 Geru e giti sugedu trate chage cha me agedale me no, agwa cha tale cha tachku age ma me no. Geru e me, ene me sugedu chage cha kledu age me no tañachuge lle dabanu nate mo alin. 9 Ngeru cha me geru e uñu trate, cha kledu age ulita cha tañachugu cha kledu age trate Chube gwa giti, agwa me ene, geru e chku uñale trate chage gire sugedu chage cha kledu age me no cha chegu jiske sugekare Chubege cha kledu age me no gdale. 10 Chube geru e ketu Moisége degadale kwian ulita alin, ene chke uñale kwiange kwian chagedale mine Chube takalin kare, geru kle degaba ene agwa cha me ñadu age no trate ulita geru e gerule kare, malen cha chegu jiske sugekare Chubege cha kledu age me no gdale. 11 Ngeru cha tale cha tañachugu cha ñadu age no ulita Moisés nu Chube gerua degaba gerule kare, cha tañachugu cha chegu no trate Chube gwage cha kledu age giti, agwa me ene, cha chegu mo anblitaba kare, cha me kledu age no ulia Chube takalin kare, Chube gwage cha kledu age me no, e gdale cha chegu jiske sugekare Chubege. 12 Moisés nu Chube gerua degaba, geru e no trate ulita, geru e ni gbaite me no, geru e gbaite gbaite ulita gerule no trate Chube takalin kare. 13 Geru e no me cha gbu age me no, cha agali agedu me no, cha ta age me no molen, cha mo ta ene gbu age me no geru e dollale, age me no cha gbu jiske sugekare Chubege, Moisés nu Chube gerua degaba me cha gbu jiske sugekare Chubege. Geru e cha ta gbu chkedale uñale cha me kledu age no Chube takalin kare, ene sugedu chage cha chegu jiske sugekare Chubege cha kledu age me no gdale. Moisés nu Chube gerua degaba me cha ta gbu age me no, geru e cha ta gbu suge trate cha kledu age me no me no tanre giti. 14 Chube agali Moisés ta gbu mo gerua dege kwian ulita alin, malen uñale che ulitage geru e no trate ulita, e Chube gerua. Cha kwian, cha me no, cha me ñage age no Chube gerua gerule kare, cha tale cha kle mo gbe age me no diali, cha agali me ñage joge siere cha kle age me noge. 15 Me suge chage mineade cha kle age me no, cha ta agekalin no Chube takalin kare agwa cha me kle age ene, cha me ta mo ta gbakalin age me no agwa cha kle age me no. 16 Cha me ta agekalin me no Moisés nu Chube gerua degaba kle gerule kare dollale, agwa cha kle age me no geru e dollale. E me gerule cha me no geru e ole, me ene dale, cha no geru e ole, uñale chage geru e no ulita malen cha me ta agekalin geru e dollale agwa cha kle age me no geru e dollale. 17 Cha kle age me no, e me gerule cha ta agekalin me no, agwa cha tale talla me no kle, talla e kle cha gbe age me no. 18 Uñale chage cha tale cha kwian onbre agenga me no diali, age no talla me kle cha tale, cha ta agekalin no agwa cha me ñage age no cha tañachuge age no kare. 19 Diali cha kle age me no cha me ta agekalin kare, cha ta agekalin no agwa cha me kle age no. 20 Cha kle age me no ene, e me gerule cha ta agekalin me no, agwa cha tale talla me no kle, talla e kle cha gbe age me no. 21 Cha ta agekalin no agwa cha tale cha talla me no kle, cha mo ta gbe age no ulita, gire talla me no me cha chuge ngwadi age no cha ta agekalin kare, mnoare cha alin age no. 22 Cha tale suge chage Chube gerua ulita no, cha geru e keruchuge nga suga no chadi geru e giti, cha ta agekalin no ulita geru e gerule kare, 23 agwa cha me ñage age no ulita cha tañachuge kare, age me no talla kle cha tale kaire, talla e kle cha ta gbe tañachuge nganake, talla me no diali kle kira bate talla no ole, ene cha me ñage mo ta gbe age no cha ta agekalin kare Chube gerua gerule kare. 24 Cha tale suge trate chage cha agedale no Chube gerua gerule kare, cha ta agekalin ene agwa diali cha kle nga dba ai giti talla me no be kle cha tale cha ta gbe age me no. Cha tañachuge tanre mo giti, diali cha talla me no kle cha ta gbe age me no, cha me ñage age no cha ta agekalin kare, cha ta olire tanre e giti, ni kwian gdaite ñage cha ta blite cha chudaboi Chube kare. Chube alin ñage cha chudaboi che Chugagwalla Jesucristo giti, Jesucristo giti Chube cha jun siere ji chugege cha kle age me no gdale, ene Jesucristo giti cha me chege jiske Chube gwage, cha gerule no no Chube ole e giti.
1 Nege kwian ulita bai kaire Jesucristonu, Jesucristo giti kwian ene me chege jiske Chube gwage kwian agedu me no gdale, kwian ene mi ji chuge Chube be ji gbe gire. 2 Chube Oña che ta gbu Jesucristo gai ulia, ene che Jesucristonu, Jesucristo che jun siere ji chugege che agedu me no gdale, nege Jesucristo giti che me chege sugekare Chubege, Jesucristo giti che me chege mo ta dbe age me no diali che agedu nge kare. 3 Che kwian, che agali gballa me ñadu age ulita Moisés nu Chube gerua degaba gerule kare, malen che chegu jiske Chube gwage, geru degaba me ñadu che jwen siere ji chugege che agedu me no gdale. Chube mo Kirolla Jesucristo kagu nga dba ai giti kwian kare, ene Jesucristo ñadu kwian age me no ulita dbe mo ole llagli jogedaleda, Jesucristo jokeda giti ene che me chege jiske Chube gwage. 4 Chube agedu Jesucristo giti che alin ene che ulita ñage age Chube gerua gerule kare, Jesucristo giti Chube Oña kle che tale. Che me mo chugale ngwadi age me no dare talla age me no diali che ta gbu age ngeru kare, ma no che Chube Oña chugale ngwadi che ta gbe, ene che ñage age no Chube gerua gerule kare. 5 Kwian talla age me noge, kwian mo chuge ngwadi mo kage talla me noge, kwian ene be tañachuge age me no alin diali, agwa kwian Chube Oña chuge ngwadi mo ta gbe, kwian ene be tañachuge age no Chube takalin kare. 6 Kwian Chube Oña chuge ngwadi mo ta gbe tañachuge age no Chube takalin kare, kwian ene ta chege no Chube ole ule diali, ama toi nga suga no ole mo tale diali, agwa kwian mo chuge ngwadi tañachuge age me no giti talla me no kwian gbe tañachuge kare, kwian ene chege sugekare Chubege diali jogebanga. 7 Kwian mo ta gbe age talla me no kle ama gbe age kare, kwian ene talla kle age me no Chube dollale, kwian ene ni takalin mo ta gbe Chube ole ni ñage mo ta gbe age Chube gerua gerule kare. 8 Kwian ene diali talla age me no ole toi ama takalin kare, kwian ene me ñage age no Chube takalin kare, ta me suga no Chubedi kwian ene giti. 9 Agwa ba ulita me kle toi mo ta gbe age me no ngeru kare, nege ba ulita kle mo ta gbe age Chube takalin kare, Chube Oña kle ba ta gbe age no, Chube Oña kle toi ulia ba tale ba Cristonu. Chube Oña me kle kwian tale kwian me Cristonu. 10 Jogeda chegu kwian ulita alin age me no gdale, chui gwealege ba be jogeda agwa ba ulia Cristonu ba oña mi chege sugekare Chubege, ba oña be chege diali Chube ole, ba Cristo gau ulia giti ba no trate Chube gwage. 11 Chube Jesucristo jaba gbuni gwade, Chube e amaña Oña kle toi ba tale, ama giti Chube be ba jaba gbeni gwade kaire. 12 Cha daballa cha ibotea ulita Jesucristonu, che ulita Chube Oña molen mo tale malen che me mo ta gbadale tañachuge age me no diali che tañachugu ngeru kare. 13 Ba ulita mo ta gbe chage talla me no ole age ba takalin kare, ba me mo ta gbe chage Chube ole ulia, ene ba ulita be chege sugekare Chubege, agwa ba ulita mo ta gbe age Chube takalin kare, Chube Oña ba ulita ta gbe talla me no ulita chuge ngwadi, ene ba ulita toi diali Chube ole age Chube takalin kare. 14 Kwian ulita bai kaire mo ta chuge ngwadi Chube Oñage, Chube Oña kwian ene ta gbe age Chube takalin kare, kwian ene Chube olia. 15 Ba Chube olia, Chube Oña me ba ta gbe kennga ba mo ta du kennga ngeru kare tañachuge Chube be ji gbe ba alin, me ene, Chube Oña ba ta gbe no Chube ole, ene Chube Oña giti suge trate bage Chube no ba ole Chube ba gau mo oliale, ene ba gerule Chube ole ta me kennga ole: “Chube, ba cha Ñenua.” 16 Chube Oña kle che tale, diali ama kle che ta gbe suge trate trate che ulia Chube olia. 17 Che Chube olia, malen Chube age no che alin Chube age no mo Kirolla Cristo alin kare, Cristo kle toi nga ngaña giti Chube kle ngwadi, kaire bdagli che ulita Chube olia be toi diali chui tangle Cristo ole nga ngaña giti Chube kle ngwadi. Cristo boidu tanre daga ngwale nga dba ai giti, che kaire boi daga ngwale nga dba ai giti Cristo gerua giti, che me talladale, bdagli che be kle ule Cristo ole nga ngaña giti, Chube be gerule no che giti Chube gerule no mo Kirolla Cristo giti kare. 18 Ulia che kle boi daga ngwale Jesucristo gerua giti nga dba ai giti, e sugeti alin me salengwli che be kle ule Jesucristo ole kare, malen cha me tañachuge tanre boi daga ngwale giti. Ma no diali cha kle tañachuge chui be chie giti gire che be kle ule Jesucristo ole diali chui tangle nga ngaña giti Chube kle ngwadi, chui ege che mi boi daga ngwale dare, che be kle no ulita Jesucristo ole. 19 Chube nu nga ulita dodaba lle ulita dodaba, nga e ulita lle e ulita kle chui manade gire Chube be kwian maunu ulita dbe siere boi daga ngwale ulitage toi diali chui tangle ama ole nga ngaña giti. 20 Nga ulita lle ulita kle chui e manade, uñale amage chui ege ama be chege no ulita ngeru kare Chube ama dodadu no no jondege kare. Nga ulita lle ulita tadu chegekalin diali no Chube ama dodadu kare, agwa Adán agedu me no Chube dollale, e giti Chube nga ulita lle ulita gbu boi daga ngwale. Nga ulita lle ulita kle chui manade gire Chube be kwian maunu ulita dbe nga ngaña giti toi no ama ole, uñale nga ulitage lle ulitage chui ege Chube be age no ama ulita alin kaire, Chube be ama ulita gbe no naskuni Chube ama dodadu kare. 22 Uñale chege nege nga ulita lle ulita kle sui jwennga kle skibachie boi tanre daga ngwale kote, kle chui manade, chui e be chke gire Chube be ama ulita gbe no naskuni, ene ama ulita mi boi dare salengwli muinga sui jwennga skibachie kirogwa jingmea kote kare kirogwa menga chebia kote gire muinga me boi dare. 23 Me nga ulita lle ulita alin allabi kle boi ene chui manade, che kwian Chubenu kaire kle chui e manade, che ta klekalin blike Chube ole. Chube Oña kle che tale che ta gbe suge chui be chie giti, chui e be chke gire che be kle ule Chube ole ama oliale, chui ege jogeda mi kle che alin, Chube be che jaba gbeni gwade, che be joge toi diali chui tangle Chube ole nga ngaña giti. 24 Chube che jun siere ji chugege che agedu me no gdale agwa che bebi joge siere boi daga ngwalege nga dba ai giti. Joge toi nga ngaña giti Chube ole, che kle chui e manade, chui ege Chube be che jwen siere boi daga ngwalege ulita. Joge siere boi daga ngwalege chuia be chke gire che mi chegedale chui e manade dare, agwa chui e bebi chke malen che kle chui e manade diali, che me ñage skwatige chui e manade, che mo ta gbadale chui e manade diali nga suga no ole. 26 Chui gweale che kle skwatige boi tanre daga ngwale, che ta olire, che kira me, ni ñage chudaboi kade no Chubege mau alin che takalin kare. Che ene gire Chube Oña che chudaboi, uñale Chube Oñage che kle tañachuge mine, ama agali che talla ulita trage Chube ole. Suge Chube Oñage che talla mine, kaire suge amage Chube takalin mine che kwian Chubenu alin, malen ama ñage gerule trate Chube ole che giti. Chube gwage che ulita talladi, uñale amage ama Oña kle gerule trate che giti. 28 Chube nu kwian ulita bai kaire gaba mau alin, kwian mo ta dbe no Chube ole, kwian ene boi daga ngwale ñage tañachuge me no kle boi ulita giti. Agwa me ene, uñale chege boi daga ngwale ulitaske Chube diali age no kwian amanu alin. 29 Gwangea unsuialin Chube bebi kwian dodade gire uñadu Chubege kwian bai ulita be ama gai ulia, Chube kwian ene gau mau alin mo kirollale mo jianle, ene kwian e talla chege salengwli Chube Kirollanu Jesucristo talla kare, ene Chube Kirollanu chege kwian na tanre ulitage daballa juma kare. 30 Kwian me kledu gire Chube kwian gau mau alin unsuialin Chube mo ta gbu kwian gai kare, kwian ene kle gire Chube kwian ta gbe suge ama gai, gire kwian ama gai Chube kwian ene jwen siere ji chugege agedu me no gdale, ene kwian chege trate Chube gwage, ene kwian ñage toi ama ole ama kle ngwadi. 31 Chube agedu no tanre ene che alin, Chube no che ole, malen che me tañachugadale dare kle boi mine che ole. Lle na me salengwli kiraske Chube kare, Chube kle che ole, Chube kle che manade malen ni kwian gdaite ñage age me no che ole che gbe siere Chube agedu che alinge. 32 Chube mo ta du no che ulita alin, ama mo Kirollanu gdaitre alin Jesucristo ketu gwadaleda che agedu me no giti, Chube agedu no tanre ene che ulita alin Jesucristo giti, ene kaire Chube be age no dare che alin, che me ñage tañachuge Chube be che jige gballa Chube mi che chudaboi dare. 33 Che me kledu gire Chube che ulita gau mau alin, che amanu, ama che jun siere ji chugege che agedu me no gdale, ama gwage chedi che no trate. Chube agedu no ene che alin, ¿chema ñage che gbe jiske Chube gwage?, 34 ¿chema ñage che gbe ji chuge che agedu me no gdale? ¡Ni gdaite! Jesucristo jokeda che agedu me no ulita giti, chkuni gwade, joni nga ngaña giti Chube kle ngwadi, nege ama kle Chube ole Chube ko taingwli giti gerule Chube ole che giti. 35 Jesucristo agedu no che alin ama no che ole, ¿chema ñage che gbe siere amage? Che boi tanre daga ngwale, che ta olire tanre boi daga ngwale giti, kwian na age me no che ole che Jesucristo gerua dbe giti, che bli ole, che me ñometra molen, che chage boi tirarege, che jogeda, e ulita me ñage che gbe siere Jesucristoge, Jesucristo no che ulita ole diali, ama me ta jogenga chege. 36 Chube gerua degaba unsuialin gerule che kwian Chubenu ulita giti, chada e gerule: “Che Chubenu malen kwian me Chubenu me no che ole, diali ama chage che nate gwadaleda. Kwian ene tañachuge che giti che me ñanaske, ama che gweda ngwale bda kare.” Chube gerua degaba unsuialin gerule ene che giti. 37 Che me tallade boi tanre daga ngwale giti, uñale chege che Jesucristonu Jesucristo no no che ole ama agedu tanre no che alin, e giti che mo ta gbe no ama ole, boi daga ngwale me ñage che ta gbe siere amage. 38 Uñale chage trate trate Chube kle che ulita monu manade diali, ni ulita kle boi che ole ñage che gbe siere amage, kwian che gwakalinda, kwian che gbe boi daga ngwale, che chugagwalla nga dba ai giti age me no che ole, dolla Satanás mo chudaboangalla ulita ole age me no che ole, lle kle boi nege, lle be boi chui chiege, 39 lle nga ngaña giti, lle nga dba ai giti, lle na ulita Chube nu dodaba, ni e ulita gdaite ñage che gbe siere Chubege. Chube no che ulita ole, Chube agedu no tanre che alin che Chugagwalla Jesucristo giti, Jesucristo giti Chube kle che ole diali Chube no che ole diali.
1 Cha gerule ba ulita ole, cha tale cha suge moge ta olire tanre cha bitalla israelita giti bai ulita me Cristo gau ulia, cha me ñage ta chege suga no e giti, kwian e ulita cha bitalla, cha no no ama ole malen cha agali takalin mo gbe ji chuge sugekare Cristoge ama ulita jiale me Cristo gai giti, cha age ene giti ama ulita alin ene ama me ji chuge Chube be ji gbege, agwa cha me ñage age ene. Ulia cha no no cha bitalla israelita ulita ole, cha kle ta olire tanre ama me Cristo gau ulia giti, cha gerule ene ba ole cha me kle sole, cha Cristonu malen cha gerule ulia diali, kaire Chube Oña kle cha tale cha ta gbe suge cha kle gerule ulia ba ulita ole. 4 Cha bitalla kwian israelita chudalla, unsuialin Chube kwian israelita gbu mo oliale, Chube kledu ama ole ama manade mo kiralla giti, Chube gerudu Chube be age no ama alin, Chube geru ketu Moisége degadale ama alin, Chube gerudu ama ulita mo litadale gerule no Chube giti, Chube gerudu Chube be kwian gdaite kage amaske kwian jwanle siere ji chugege kwian agedu me no gdale. 5 Kwian israelita ulita enusulian kada Abraham kada Isaac kada Jacob oindalla, ama ulitaske Cristo chiu, Cristo Chube Kirolla, Cristo amaña Chube, ama kweri, ama lle ulita nga ulita kwian ulita Chugagwalla, kwian ulita gerudale no ama giti diali, ene no no gerule no ama giti. 6 Chube gerudu Chube be age, e me Chube gerudu alin allabi, me ene, Chube agedu ulita Chube gerudu kare, Chube Cristo kagu kwian israelitaske Chube gerudu kare agwa kwian israelita ulita me Cristo gau ulia mo jwanngale siere, malen kwian ene me Chubenu ulia. 7 Kwian israelita ulita me kwian Chubenu ulia mo chuda giti, ni enusulian Abraham oindalla ulita kwian Chubenu mo chuda giti, me ene, ni kwian gdaite Chubenu mo chuda giti. Chube gerua Cristo giti, kwian geru e gai ulia, e giti kwian chege Chubenu ulia, Cristo alin giti kwian chege Chubenu ulia. Unsuialin Chube gerudu Abraham ole: “Ba kirolla Isaac alin giti ba chudalla ngle be jriennga.” 9 Kaire Chube gerudu Abraham ole Isaac be menga chebia kote giti, Chube gerudu: “Cha be age no ba alin ba muira Sara alin, chura be chiege Sara be kirogwa molen.” 10 Isaac medunga Sara kote Chube gerudu kare, Isaac tigedu jo juma mo jun Rebeca ole, Rebeca chagedu gaba kirogwa bolo suiale. 11 Kirogwa boke bebi chke Rebeca kote, kirogwa boke bebi age no o me no gire Chube gerudu Rebeca ole kirogwa boke giti: “Kirogwa juma be chege lle boangale mo daballa nate alin, daballa nate be chege daballa juma chugagwallale.” Isaac kirolla Rebeca giti kirolla daba nate kada Jacob Chube ama gau gbu daballa juma kada Esaú chugagwallale, Chube agedu no ene Jacob alin me Jacob agedu gweale no giti malen Chube agedu Jacob alin, me ene, Jacob kle Rebecadíge bebi age no o me no, Chube tale Chube Jacob gau Chube takalin kare. Chube gerua degaba unsuialin gerule Chube agedu Jacob alin giti, chada e gerule: “Cha no no Jacob ole, cha agedu ma no Jacob alin me salengwli cha agedu Esaú alin kare.” Chube agedu ene unsuialin Jacob ole Esaú ole, e giti suge chege Chube me kwian gai kwian age gweale no giti ngeru gire Chube kwian ene gai mo alin, me ene. Chube kwian gai mo alin Chube me tañachuge kwian ageba ulita giti, Chube age kwian alin no Chube takalin kare. 14 Chube kwian gai me tañachuge kwian ageba no o me no, agwa Chube ama gai, e giti che me ñage tañachuge Chube kle age me no, me ene, 15 ama Chube, ama ñage age ama ta agekalin kare. Unsuialin Chube gerudu Moisés ole: “Cha me age kwian tañachuge kare, cha age cha tañachuge kare, cha kwian gai cha takalin kare, cha tai dage amage cha age no ama alin.” Chube gerudu ene Moisés ole. 16 Chube tai dage kwiange me kwian tañachuge kare me kwian age no giti, kwian me ñage tañachuge ama age no giti Chube be tai dage amage, me ene, Chube tale Chube tai dage mo tale kwiange age no kwian alin. 17 Chube ñage age kwian ole Chube takalin kare, kwian bai kairege Chube takalin Chube tai dage kwian enege. Kaire kwian mo chuga gbe mno Chubege, Chube takalin Chube kwian ene chuga gbe ma mno me jain age no Chube takalin kare. Boidu ene unsuialin kwian nga Egiptomu chugagwalla kada Faraón ole, Chube gerua degaba unsuialin gerule e giti, chada e gerule: “Chube gerudu Faraón ole: ‘Ba kle age cha dollale, e gdale cha ñage ba gweda agwa cha ba jige kwian Egiptomu chugagwallale, ene ba age cha dollale giti cha age mo kirallaske ba ole, ene ulita boi ba ole giti chkedale uñale kwian nga ulitage ulia cha Chube kira molen tanre.’ ” Chube gerua degaba unsuialin gerule ene. 19 Chube Faraón chuga gbu ma mno Chube dollale, e giti ba gweale ñage geru kade: “Chube kwian chuga gbe mno agedale me no, ¿mineade Chube kwian ene gbe jiske kwian kle age giti? Kwian ene kle age Chube agali kle kwian gbe age kare.” 20 Ba geru kade ene Chube giti, e me no, ama Chube, ba kwian, ba me ñage geru kade Chube kle age kwian ole giti, Chube kwian dodadu Chube age kwian ole Chube takalin kare. Dbi unlla me ñage gerule mo dodanga ole: “¿Mineade ba cha dodadu ene?” 21 Kwian dbi unlla dodanga age dbi ole ama takalin kare, dbi unlla dodanga dbi gweale dodade únle no trate un manade no me lle boi ege, dbi unlla dodanga dbi amaña dodade únle lle tanre boangwa. Ene kaire Chube age kwian ole Chube takalin kare, ba me ñage geru kade Chube kle age giti. 22 Chube age kwian ole giti Chube takalin suge kwiange Chube mine, Chube takalin suge kwiange Chube kira molen kaire Chube me no age me no ole be ji gbe mno kwian agenga me no alin. Agwa Chube me kle age ene blike kwian ole, Chube kle manade tanre ta no ole, kwian me mo ta blite Chube ole, bdagli kwian ene be ji chuge sugekare Chubege diali kwian agedu me no gdale. 23 Kaire Chube takalin suge kwiange Chube no kwian ole Chube age no no kwian alin, malen Chube tai dage chege bai kaire Chube nu che gaba ngeru gwangea mau alin, chui bdaglige che be joge toi ama ole nga ngaña giti. 24 Chube che ta gbu suge ama gai ulia, che Chubenu, Chube kle tai dage chege Chube kle age no no che alin. Chube kle age no ene che kwian israelita alin, kaire Chube kle age no no kwian me israelita alin bai kaire Chube nu kwian me israelita ta gbaba ama gai ulia, kwian me israelita ene Chubenu kaire. 25 Unsuialin Chube kwian kada Oseas gbu chada dege Chube talla mine unsuialin kwian me israelita ole, chada e gerule ene kwian me israelita giti: “Kwian me chanu cha be kwian ene gai chanu. Cha me ta du no kwian ole, kwian ene ole cha be mo ta dbe no. 26 Kwian ene lle ngwale gau mo chubeale, cha gerudu ama ole: ‘Ba me kwian chanu.’ Chui be chke gire cha be kwian ene ta blite cha ole, ama be tachke cha Chube ulia gwade, ama be cha gai mo alin, cha be ama ulita ene gai mo oliale.” Chube Oseas ta gbu chada dege ene kwian me israelita giti. 27 Kwian israelita giti Isaías gerudu unsuialin: “Jacob chudalla be jriennga ngle ble ubaudalla kare, agwa Jacob chudalla bedre dare be Chube gai dage be tien gitiru Chube be ji gbege, Jacob chudalla ngle me Chube gai giti jogenga sugekare Chubege. 28 Ji gbe chuia be chke gire Chube che Chugagwalla mi manade dare, ama be age kwian me ama gai ulia ole ama gerudu kare sbali, ama be ji gbe mno blike kwian ene ulita alin me Chube gai ulia gdale, ene kwian ene ulita be chege ji chuge diali mi ñage joge siere ege.” 29 Kaire Isaías gerudu mo bitalla israelita giti: “Chube che Chugagwalla kweri, ama kira molen tanre, ama tadukalin ama ñadu che chudalla ulita kagenga, ene che chudalla ni gdaite chegu salengwli boidu una Sodomage una Gomorrage kare, Chube kwian toinga una e bokege kagunga ulita, ni gdaite chegu. Agwa Chube me agedu ene che ole, ama taidu dage che chudalla gwealege malen ama me che chudalla ulita kagunga.” Isaías gerudu ene kwian israelita chudalla giti. 30 Geru ai ulita cha kle gerule kare, geru e gerule kwian chege trate Chube gwage Cristo alin giti. Kwian me israelita me tañachugu chege no trate Chube gwage age gweale no giti kwian israelita tañachuge kare, agwa kwian me israelita bai kaire mo ta gbe Cristo gai ulia, e alin giti kwian ene chegu no trate me jiske Chube gwage agedu me no gdale. 31 Agwa kwian israelita, diali ama tañachugu ta dbe age Moisés nu Chube gerua degaba unsuialin gerule kare, ene ama tañachugu ama me chegu jiske Chube gwage ama agedu me no gdale, agwa me ñadu age no ulita Chube gerua degaba gerule kare, malen me boidu ene ama tañachugu kare. 32 Kwian israelita me mo ta gbu ulia Chube ole mo tale ene ama me chege jiske Chube gwage, ama me tañachugu ene, ama tañachugu age alin giti, ene ama tañachugu ama chege trate Chube gwage. Chube Cristo kagu kwian alin agwa kwian israelita me Cristo gbu gdadi me Cristo gau mo jwanngale siere ji chugege age me no gdale ene ama chege trate Chube gwage, ama me Cristo alin gau ma kweri lle na ulitage malen kwian israelita ene chege sugekare Chubege. 33 Chube gerua degaba unsuialin gerule Cristo giti, kwian me mo ta gbe Cristo gbe gdadi kwian ene be boi daga ngwale be chege sugekare Chubege ta olire, agwa kwian bai kaire mo ta gbe Cristo ole Cristo gbe gdadi, kwian ene be chege no diali, Chube gerua degaba unsuialin gerule e giti, chada e gerule: “Cha ke kweri gbe una Jerusalénge, kwian ke e gbe gdadi kwian me lentige, kwian me ke e gbe gdadi kwian tanre be lentige ke ege. Kwian bai kaire mo ta gbe ama ole ama gai ulia, kwian ene be kle no diali, nga be suga no kwian enedi, kwian ene mi ta chege olire.”
1 Cha daballa cha ibotea Cristo giti, cha gerule ba ole, cha no no cha bitalla israelita ulita ole, cha takalin cha bitalla ulita Cristo gai ulia ene ama tien gitiru ji chugege age me no gdale, diali cha gerule ene Chube ole cha bitalla israelita me Chubenu ulita giti. 2 Uñale chage cha bitalla israelita me Chubenu kle mo ta gbe age no Chube alin, agwa ama me kle age no ulita Chube takalin kare, ama kle mo ta gbe nganake geru ulia Cristo gitige. 3 Ama geru Cristo giti uñe, agwa ama me geru e gbe gdadi ama me mo ta gbe Cristo gai ulia Chube takalin kare, kwian tañachuge ma no age agali kwian tañachuge kare ene ama tañachuge ama chege no trate Chube gwage. Kwian ene me tañachuge Cristo gai ulia giti, ama tañachuge age Moisés nu Chube gerua degaba gerule kare ene ama tañachuge ama chege no trate Chube gwage, agwa kwian me ñage age no ulita chada e gerule kare. Kwian mo ta gbe Cristo gai ulia mo tale, kwian ene alin allabi chege no trate me jiske Chube gwage, Chube kwian ene jwen siere ji chugege age me no gdale. 5 Chube geru gbu kwian alin Moisés giti, kwian kle tañachuge age geru e alin gerule kare ene ama tañachuge ama chege no trate Chube gwage, Moisés Chube gerua degu, chada e gerule: “Kwian ulita bai kaire age ulita diali Chube nu geru gbaba gerule kare, kwian ene alin be toi no diali chui tangle Chube ole.” Moisés chada degu ene, agwa kwian me ñadu age no ulita diali chada e gerule kare, 6 malen Chube Cristo kagu kwian alin, ene Cristo gai ulia giti kwian chege no trate me jiske Chube gwage. Ba me ñage tañachuge mo tale: “¿Chema be joge nga ngaña giti Cristo jwen dbadale nga dba ai giti che jwanle siere?” Me ñage tañachuge ene, Cristo chku nga dba ai giti, ama jokeda che agedu me no giti. 7 Ni ñage tañachuge mo tale: “¿Chema be joge nga dbigu giti Cristo jaba gbeni gwade?” Me ñage tañachuge ene, Cristo jaba me kle nga dbigu giti, Cristo chkuni gwade. 8 Geru ulia Cristo giti chku uñale trate ba ulitage, nege ba kle gerule geru e giti, kaire geru e kle ba tale. Cha kle geru Cristo giti trage ba ole kaire kwian na ole diali, uñale bage Cristo agedu giti che ulita alin, che mo ta gbadale geru Cristo giti gai ulia diali, geru e alin giti che tien gitiru ji chugege che agedu me no gdale. 9 Ba agali gerule kwian na ole Jesu ba Chugagwalla, kaire ba geru gai ulia mo tale Jesu jokeda Chube Jesu gbuni gwade, ene Chube ba jwen siere ji chugege age me no gdale. 10 Mo tale kwian Jesu gai ulia, e giti kwian chege no trate me jiske Chube gwage, kwian ene gerule no Jesu giti kwian na ole, ama gerule: “Cha Jesu gau ulia, ama cha Chugagwalla.” Chube kwian ene jwen siere ji chugege agedu me no gdale. 11 Chube gerua degaba unsuialin gerule kwian bai Jesucristo gai ulia giti, chada e gerule: “Kwian bai kaire mo ta gbe ama ole ama gai ulia, kwian ene be kle no diali, nga be suga no kwian enedi, kwian ene mi ta chege olire.” 12 Geru e jo degaba kwian israelita kaire kwian me israelita ulita giti, Jesucristo giti kwian ulita israelita me israelita salengwli Chube gwage, Jesucristo kwian ulita Chugagwalla, kwian ulita israelita me israelita bai kaire Jesucristo gai ulia mo Chugagwallale gerule no ama giti, kwian ene ulita alin Chube age no no. 13 Chube gerua degaba unsuialin gerule Jesucristo giti, chada e gerule: “Kwian ulita bai kaire ama gai ulia mo Chugagwallale gerule no ama giti, kwian ene be chege sugekare ji chugege agedu me no gdale.” 14 Chube gerua degaba unsuialin gerule ene. Ulia geru Jesucristo giti kwian ulita alin, agwa me uñale kwian ulitage Jesucristo gai ulia mine. Kwian me Jesucristo gai ulia ngeru, kwian me ñage ama gai mo Chugagwallale gerule no ama giti. Kwian me geru Jesucristo giti keruchuge ngeru, kwian me ñage ama gai ulia. Kwian geru uñanga me joge geru Jesucristo giti trage kwian ole ngeru, kwian me ñage geru keruchuge me ñage geru Jesucristo giti uñe. 15 Chube me kwian geru dbanga kage ngeru geru Jesucristo giti dbe kwian me geru uñege, geru dbanga me ñage joge geru dbe, ama kaganga me. Chube gerua degaba unsuialin gerule Jesucristo gerua dbanga giti, chada e gerule: “Kwian bai kaire mo ta gbe no geru no kwian jwannga siere giti gbe chke uñale kwianske, kwian ene no no lle no boanga.” Chube gerua degaba unsuialin gerule ene. 16 Kwian geru Jesucristo giti trage kwian ole, agwa kwian ulita me geru e gbe gdadi me geru e gai ulia mo alin. Boidu ene kaire unsuialin Isaías ole, Isaías Chube gerua ketanga, Isaías gerudu Chube ole: “Cha Chugagwalla, ba cha gbu kaire ba kwian na gbu ba gerua kete kwiange, kwian tanre ba gerua keruchugu, agwa kwian ulita me ba gerua gau ulia.” 17 Isaías gerudu ene Chube ole unsuialin, ene kaire nege kwian ulita me geru Cristo giti gai ulia, agwa kwian geru ketanga kwian nage mo ta gbadale geru trage gwangerugu kwian ulita ole, ene kwian geru Cristo giti keruchuge, ene kwian ñage mo ta gbe Cristo gai ulia, kwian me geru Cristo giti keruchuge me ñage mo ta gbe Cristo gai ulia, kwiange me uñale Cristo giti, Cristo gerua me uñale kwiange. 18 Kwian israelita me Cristo gau ulia giti cha geru kade: “¿Ama me geru Cristo giti keruchugu malen ama me Cristo gau ulia mo jwanngale siere?” Me dale, kwian israelita nga ulitage geru keruchugu. Chube gerua degaba unsuialin gerule e giti, chada e gerule: “Kwian Chube gerua dbanga jo Chube gerua trage kwian israelitaske nga ulitage, nga ulitage kwian israelita kle toi ngwadi geru jo chke kwian israelitage.” Chube gerua degaba unsuialin gerule ene kwian israelita giti. 19 Kwian israelita ulita geru Cristo giti keruchugu, agwa ama me Cristo gau ulia, ¿e gerule geru Cristo giti me sugedu trate amage? Me dale, e gerule kwian israelita geru keruchugu, geru sugedu amage, agwa ama agali mo ta gbu me Cristo gai ulia. Kwian israelita mo ta gbu ene me Cristo gai ulia mo jwanngale siere, malen Chube mo ta gbu kwian me israelita chudaboi, Chube kwian me israelita ta gbu Cristo gai ulia, unsuialin Chube Moisés ta gbu gerule e giti kwian israelita ole: “Chube gerudu: ‘Cha be kwian chudalla na kwian me chanu ta gbe cha gai ulia mo Chubeale, ba tañachuge kwian chudalla na ulita me no ama ta me ama me Chube ulia uñe. Cha be age no kwian e alin, cha be ama ta gbe no cha ole, e giti ba be mo ta dbe skochie tanre, ba be takalin cha me age no ene dare kwian e alin, ba be tañachuge ma no cha age no naskuni ba alin allabi me age no kwian na alin.’ ” 20 Chube Moisés ta gbu Chube gerua ene kete kwian israelitage kwian me israelita giti, gire ma bdagli Chube Isaías ta gbu chada dege trate kwian me israelita giti, chada e gerule: “Chube gerudu: ‘Kwian lle na gau mo chubeale, ama me cha gau mo Chubeale ni tañachugu cha giti, cha kwian ene ta gbu suge trate cha Chube ulia, kwian ene cha gau ulia mo Chubeale.’ ” 21 Chube Isaías ta gbu chada dege ene kwian me israelita giti, kaire Chube Isaías ta gbu chada dege kwian israelita giti, chada e gerule: “Chube gerudu: ‘Diali chui tangle cha kledu ama ulita manade ngwange mo ta blite cha ole, agwa ama ulita me mo ta gbu age cha gerudu kare, ama mo ta gbu age me no cha dollale.’ ” Isaías Chube gerua degu ene unsuialin kwian israelita giti.
1 Kwian israelita mo ta gbu age me no Chube dollale, ¿e giti Chube kwian israelita ulita chugu ngwadi sugekare? Me ene dale. Cha kwian israelita, cha kwian kada Benjamín mnealla, cha kwian israelita enusulian unsuialin Abraham oindalla, cha ene Chube me cha chugu ngwadi sugekare. 2 Chube kwian israelita chudalla gau gwangea mo alin, Chube no, Chube me ta jogenga kwian amanu chudallage, Chube me kwian ene amanu chudalla chuge ngwadi sugekare. Uñale ba ulitage boidu mine unsuialin Elías suiale, e suiale kwian israelita agedu me no tanre Chube dollale, Elías gerudu Chube ole kwian e giti kwian e gbale jiske Chubege, Chube gerua degaba unsuialin gerule Elías gerudu Chube ole kwian israelita giti, chada e gerule: 3 “Cha Chugagwalla, cha bitalla israelita ulita agedu tanre me no, ama lle bda gugangwa ba alin ulita skiundba, ama kwian ba gerua ketanga guda ulita, cha alin allabi chegu gwade, kaire kwian kle chage cha nate cha gwaleda.” 4 Elías gerudu ene Chube ole kwian israelita ulita giti gire Chube jaindunga Elías kalen: “Elías, ba me kle tañachuge trate, cha takalin chke uñale bage ba me kle gballa, cha ba bitalla israelita kwian siete mil manadu no mo alin, kwian e ulita kle mo ta dbe no cha ole ba no cha ole kare, kwian e ulita me nu Baal gaba mo chubeale ni ama jongnagwa skutaba dba amadi gale dage mo chubeale.” Chube gerua degaba unsuialin gerule ene Elías giti. 5 Unsuialin Elías suiale Chube kwian israelita mneite manadu no mo alin, kwian mneite e mo ta du no Chube ole, ene kaire nege tangle kwian israelita mneite kle mo ta dbe no Chube ole, Chube mo ta gbu no mneite e manade no ama nu kwian mneite gaba mo alin, kwian ene kle mo ta gbe diali ama ole. 6 Kwian israelita mneite e me agedu gweale no gire e giti Chube ama gau manadu mo alin, me ene, Chube taidu dage amage, Chube ta no ole tadu agekalin no ama alin, malen Chube ama gau mo alin. Chube kwian gai kwian age no giti ene Chube kle age kwian alin kwian age ñanale, ene Chube me kle tai dage kwiange me kle age no kwian alin. Agwa me ene, Chube ta no ole taidu dage kwiange kwian gau mo alin, ama me kwian gau kwian agedu gweale no giti. 7 Chube nu kwian israelita mneite gaba mo alin, kwian ene mo ta blitu Chube ole, kwian ene ulita chegu trate Chube gwage. Agwa kwian israelita na ulita tañachugu ama age gweale no, e giti ama chege no trate Chube gwage, agwa me ñadu chege no trate ama tañachugu kare, ama ulita ta kledu bate Chubege, ama mo chuga gbu mno me mo ta blite Chube ole. 8 Chube gerua degaba unsuialin gerule kwian ene giti, chada e gerule: “Kwian me tadu mo ta blitakalin Chube ole, malen Chube ama ta gbu me suge geru ulia giti, ene geru ulia chku ama ologe agwa ama me ñadu geru keruchuge no, geru me ñadu suge trate ama tale, ama chegu kwian olo me kare kwian gwagwa me kare.” Boidu ene unsuialin Chube gerua degaba unsuialin gerule kare, kaire kle boi ene nege tangle kwian israelita ole. 9 Unsuialin Chube David ta gbu gerule kwian israelita me mo ta blite Chube ole giti: “Kwian lle tanre molen, kwian kle toi no kle tañachuge lle ngle molen alin giti, kwian me kle tañachuge Chube giti, malen cha takalin Chube ji gbe kweri ama alin. 10 Cha takalin kwian ene ta chege me suge geru ulia giti, kaire cha takalin kwian ene chege boi tanre daga ngwale ta olire ole diali chui tangle.” David geru e degu unsuialin kwian israelita giti. 11 Kwian israelita agedu tanre me no Chube dollale, ¿e giti Chube ama chugu ngwadi sugekare diali? Me ene ulia, Chube ama chugu ngwadi sugeti alin ene Chube mo ta gbu kwian me israelita chudaboi, Chube takalin geru Jesucristo giti chke uñale kwian me israelitage ene kwian me israelita ñage Jesucristo gai mo jwanngale siere. Ene chke uñale kwian israelitage Chube kle age no kwian me israelita alin, ene kwian israelita be takalin Chube age no ama alin naskuni Chube kle age no kwian me israelita alin kare, ene kwian israelita be ta mo ta blitakalin Chube ole. 12 Kwian israelita agedu tanre me no Chube dollale, ama me geru mo jwannga siere Jesucristo giti gau ulia, kwian israelita me geru e gau ulia, malen geru e jo chke nga na ulitage kwian me israelitaske, ene kwian me israelita ñadu Jesucristo gai ulia mo jwanngale siere. E no no, agwa ma no chui be chke gire kwian israelita ulita be mo ta blite Jesucristo ole be Jesucristo gai ulia mo jwanngale siere kwian me israelita Jesucristo gau ulia kare. 13 Cha gerule ba kwian me israelita ulita ole, Chube cha gbu geru amanu dbe ba ulita kwian me israelitaske, Chube gerua dbe giti ba ulitaske e giti nga suga no no chadi lle boi ene, cha ta mo ta gbakalin lle e boi no diali. 14 Cha kwian israelita, geru dbe giti kwian me israelitaske e giti cha takalin cha bitallage suge me no ama alin cha kle geru dbe ba ulita kwian na me israelitaske, ene ama be ta geru Jesucristo giti keruchugakalin, ene ama ñage Jesucristo gai ulia mo jwanngale siere ba kwian me israelita Jesucristo gau ulia kare. 15 Kwian israelita geru Jesucristo giti keruchugu, agwa ama me geru gau ulia, e giti Chube kwian ene chugu ngwadi sugekare moge sugeti alin, ene geru Jesucristo giti jo kwian na nga ulitageske, ene kwian na nga ulitage mo ta gbu no Chube ole Jesucristo giti. Chui be chke gire kwian israelita bai kaire kle bate Chubege be tachke Chubege be mo ta blite Jesucristo gai ulia, kwian kle bate Chubege ama jaba kare, gire ama tachkeni Chubege, e salengwli jaba chkeni gwade kare. 16 Unsuialin Chube kwian israelita enusulian Abraham gau mo alin Chube Abraham gbu lle boi mo alin, Abraham mo ta gbu Chube gai ulia ene Abraham chegu no trate Chube gwage, Abraham giti kwian israelita chudalla chegu Chube alin. E ulita gli kare, Abraham glichuga dbige no kare, Abraham chudalla israelita ulita glinanga no kare. Abraham kwian no, ama mo ta gbu Chube gai ulia no, ene kaire ama chudalla israelita ulita mo ta gbadale Chube gai ulia Abraham Chube gau ulia kare. 17 Agwa Abraham chudalla israelita gweale me Chube gau ulia, Chube kwian israelita ene chugu ngwadi sugekare, gire Chube ba kwian me israelita gau gbu israelita tanege mo alin. E salengwli kwian gli mananga glinanga me no me gbachie tkenga mlienga kare, gire kwian gli mananga glinanga chudea na gai gbe glinanga tkunga taneage, ene gli chege gdaitre alin. Chube agedu ene ba alin, ba kwian na chudalla me gaba mo alin, Chube ba gau mo alin ene ba chegu Chubenu. 18 Chube ba gau kwian israelita taneage mo alin, ba me tañachugadale mo giti ba ma no kwian israelitage ba Chube gau ulia giti, ba tañachuge ba ma no kwian israelitage ba Chube gau ulia giti ba tachkedale e me ba enusuliannu giti ba Chubenu, kwian israelita enusulian giti ba Chubenu. E salengwli glinanga tkabanga taneage glinanga chudea na jo gbaba gli ege, glinanga chudea na e me ma no glinanga jo tkabangage, me ñage suge glinanga e ulita me kle gli ulita gbe tige, glichuga dbige giti kle gli ulita gbe tige. 19 Ba gweale tañachuge mo tale mo giti: “Cha ma no kwian israelitage, malen Chube kwian israelita chugu ngwadi sugekare gire Chube cha gau mo alin israelita tanege.” 20 Ba kle tañachuge ene ba me kle tañachuge no, Chube kwian israelita chugu ngwadi sugekare glinanga tkabanga mliabanga kare kwian israelita me mo ta gbu Chube ole Chube gai ulia giti. Ba mo ta gbu Chube gai ulia, e alin giti Chube ba gau mo alin, e me gerule ba kwian no age no giti, me ene, Chube ba gau ba mo ta gbu ama ole gai ulia giti. Ba me ñage tañachuge mo gai dage mo giti kwian israelitage, ma no ba mo ta gbe chage ta giti Chube ole Chube gai ulia diali. 21 Chube kwian israelita chudalla ulita gaba mo alin, kwian e me mo ta gbu Chube ole Chube gai ulia, e giti Chube kwian e chugu ngwadi sugekare, ene kaire ba kwian na chudalla Chube me gaba ngeru mo alin, ba me mo ta gbe ama gai ulia diali Chube be ba chuge ngwadi sugekare ma blike ama kwian israelita chugu ngwadige. 22 Suge bage Chube no kwian ulita ole, agwa kaire Chube me no age me no ole, Chube takalin kwian mo ta dbadale ama gai ulia ama gai dage diali. Kwian israelita me agedu ene, malen Chube ama chugu ngwadi sugekare. Agwa ba kwian me israelita mo ta gbu Chube ole ama gai ulia, e giti Chube agedu no ba kwian me israelita alin, ba mo ta gbadale chage no ama ole diali age ama takalin kare, ene ama be age no ba alin diali, agwa ba mo ta gbe chage nganake sugekare amage ama be ba chuge ngwadi sugekare ama kwian israelita chugu ngwadi kare. 23 Kwian israelita me Chube gau ulia, agwa ama ulita bai kaire mo ta bliteni Chube ole Chube gai ulia, Chube be kwian ene gai ngwangeni naskuni mo alin, ama Chube, ama ñage age ene. 24 Ba me kwian israelita chudalla, Chube ba gau mo alin gbu kwian israelita me Chube gau tanege salengwli gli mananga glinanga chudea na gbe glinanga na tkabanga taneage kare, Chube agedu ene ba kwian me israelita alin, kaire me mno Chube alin kwian amanu ama nu chugaba ngwadi sugekare gai naskuni mo alin, ene Chube age kwian israelita ole kwian israelita bai kaire mo ta gbe no naskuni Chube ole. 25 Cha daballa cha ibotea Jesucristo giti, cha takalin Chube mo ta gbabage unsuialin chkedale uñale trate bage nege, ene ba me ñage tañachuge mo giti ba ma no kwian israelitage malen Chube ba gau, me ene, kwian israelita me Chube gau ulia giti Chube kwian israelita chugu ngwadi sugeti, ene geru ulia amanu Jesucristo giti ñadu chke ba kwian me israelita ulitaske. Kwian me israelita ulita bai kaire be geru Jesucristo giti gai ulia, 26 kwian ene geru gai ulia gire Chube be kwian israelita gaini naskuni, ene geru Jesucristo giti be joge naskuni kwian israelitaske, ene kwian israelita be ñage mo ta blite Jesucristo gai ulia mo jwanngale siere, Chube mo ta gbu ene unsuialin kwian israelita alin, Chube gerua degaba unsuialin gerule e giti, chada e gerule: “Chube gerudu unsuialin kwian israelita enusulian ole: ‘Cha be kwian jwannga siere gdaite kage kwian israelita alin, ama giti cha be kwian israelita jwen siere ji chugege age me no gdale. Kwian jwannga siere e be chie kwian israelita chudallaske, ama be kwian israelita ta gbe joge siere kle age me noge.’ ” Chube gerua degaba unsuialin gerule ene. 28 Kwian israelita me geru Jesucristo giti gau ulia, e giti ama Chube dollale, e giti Chube mo ta gbu no ba kwian me israelita ole, ene geru Jesucristo giti chku ba kwian me israelitaske ene ba ñage geru e gai ulia. E me gerule Chube mo ta blitu me no kwian israelita chudalla ole, me ene, unsuialin Chube israelita enusulian gau mo alin, e giti Chube no kwian israelita chudalla ulita ole. 29 Unsuialin Chube gerudu kwian israelita enusulian ole: “Cha ba oindalla ulita gau mo alin, ba kwian chanu, cha be age no ba alin kaire ba oindalla ulita alin.” Chube gerudu ene, Chube age ulita ama gerudu kare, Chube me mo ta blite ama gerule kare. 30 Ngeru ba kwian me israelita bebi Chube uñe gire ba ulita me Chube gau dage me agedu Chube tadukalin kare, agwa nege kwian israelita mo ta blitu me Chube gai dage salengwli ba kledu age ngeru kare. Kwian israelita me kle Chube gai dage giti Chube mo ta gbu no ba kwian me israelita ulita ole Chube taidu dage ba ulitage, Chube ba ta gbu ama gai ulia. 31 Nege kwian israelita me kle Chube gai dage me kle age Chube takalin kare salengwli ba kledu age ngeru kare, ba ene gire Chube taidu dage bage Chube ba ta gbu ama gai ulia, ene kaire Chube be tai dage kwian israelitage, Chube be kwian israelita ta gbe Chube gai naskuni Chube taidu dage ba kwian me israelitage kare. 32 Kwian ulita israelita me israelita chagedu age me no Chube dollale me Chube gau ulia, e giti ama ulita chegu jiske Chube gwage, ama agali me ñadu mo ta gbe trate Chube gwage. Kwian ulita ene, Chube tai dage ama ulitage israelita me israelita. 33 Chube agedu tanre no kwian agenga me no alin, kwian me ama gau ulia agwa Chube taidu dage amage, ni kwian gdaitege suge mineade Chube mo ta gbu no ene kwian agenga me no ole. Ulia Chube no no, ama ta ngle molen, ulita uñale amage, ni kwian gdaitege suge Chube talla mine ulita, ni kwian gdaite ñage Chube talla ulita trage, Chube age no ulita me suge ni kwian gdaitege. 34 Chube gerua degaba unsuialin gerule e giti, chada e gerule: “¿Chema che Chugagwalla Chube talla ulita uñe? ¿Chema ama ta gbe ama age giti? Ni kwian gdaite. 35 ¿Chema lle gweale ketu Chubege ngeru, ene Chube lle ketadaleni kwiange gau ñanale? Chube me jiske ni kwian gdaitege lle giti.” Chube gerua degaba unsuialin gerule ene Chube giti. 36 Chube mo kirallaske kwian ulita lle ulita nga ulita dodadu, Chube kle e ulita gbe tige kle e ulita manade, Chube e ulita dodadu mo alin. Chube no no, ama alin kweri, ama alin ñage age kwian alin no, ama alin giti kwian gerudale nobi diali chui tangle, enebi no ama alin.
1 Cha daballa cha ibotea Jesucristo giti, ba ulita Chubenu, Chube taidu dage bage agedu tanre no ba alin Jesucristo giti, malen cha gerule ba ole ba ulita agali mo ta gbadale lle boi no ulita Chube alin, ba mo ta gbadale joge siere age me no ulitage mo ta gbe Chube alinge lle boi no ama alin ama takalin kare. Age ene, Chube gwage ba kle age no ulia ama alin ama takalin kare. 2 Ba ulita Chube uñe me toidale dare ba toidu ngeru kare kwian me Chube uñe kle toi kare, ma no ba mo ta gbadale tañachuge diali nganake Chube takalin kare, ene ba be toi Chube takalin kare, ene kaire be suge trate bage Chube takalin mine, ene ba ñage age no ama alin ulita no trate ama takalin kare ama gwage. 3 Chube mo ta gbu no cha ole, ama cha gbu ama gerua ketangale. Cha gerule ba ulita ole, ba gweale me ñage tañachuge mo tale mo giti: “Cha ma no daba nage, cha kle lle boi Chube alin ma no daba na ulitage.” Me no tañachuge ene mo giti, agwa ma no gdaite gdaite tañachuge trate mo kaire kaire Chube ba ta gbu kare ba mo ta gbu Chube gai kare, ba gdaite gdaite mo kaire kaire tachkedale lle boi no Chube alin, gweale lle ma kweri boi, gweale lle soli boi Chube ba ta gbe lle boi kare, Chube ba ta gbe mo kaire kaire lle boi ama alin ama takalin kare. 4 Che tañachuge mo jegwale giti, che jegwale mo jegwale tanre molen, che jegwale ulita me ñage age che ko kare che sera kare, agwa jegwale ulita kle no ule gdaitre alin. 5 Ene kaire che ulita Chube gaba ulia, che ngle Cristonu, agwa Cristo giti che ulita mo kaire kaire kle ule kwaitre alin kwian jegwale ulita kle ule gdaitre alin kare. 6 Chube ta ketu che ulita gdaite gdaitege lle kaire kaire boadale ama alin ama takalin kare, che mo ta gbadale lle boi no ama alin ama ta ketu chege kare. Chube ta kete che gwealege ama gerua kete daba nage che Chube gerua ketadale no trate daba nage, che mo ta gbe Chube gai kare che gerudale ta ene giti daba na ole. 7 Chube ta kete che gwealege daba na chudaboi che mo ta gbadale daba na chudaboi no. Chube ta kete che gwealege daba na tke tangle Chube geruage che mo ta gbadale daba na tke tangle no. 8 Chube ta kete che gwealege daba na ta gbe suge chage no Chube takalin kare che mo ta gbadale no diali daba na ta gbe suge chage no Chube takalin kare. Chube ta kete che gwealege lle gweale monu kete daba nage chudaboagda che mo ta gbadale lle kete ta no ole dabage. Chube ta kete che gwealege lle boi daba Chubenu chugagwallale che mo ta gbadale lle boi ulita no ta giti. Chube ta kete che gwealege ta gbe suge daba na giti daba oga daba me lle molen daba ta olire che mo ta gbadale daba ene ulita chudaboi daba kira gbe nga suga no ole ta no giti. Che ulita mo ta gbadale lle boi no Chube alin Chube ta kete chege kare lle boi. 9 Ba me gerule alin ba no daba na ole, ba mo ta dbadale ulia no daba na ulita ole. Ba jogedale siere me no ulitage mo ta gbadale chege age no diali. 10 Ba mo ta dbadale no modi mo daballanu kare daba ulita ole. Ba daba na gadale dage ma kweri moge salengwli ulita. 11 Ba mo kira gbadale lle boi no diali me mo ta dbe kianchie sidri lle boi mo Chugagwalla Jesucristo alin. 12 Chui be chke gire Jesucristo be ba dbe ule ama ole toi ama kle ngwadi diali chui tangle, ba mo ta dbadale nga suga no ole e giti chui e manade ngwange. Ba mo ta gbadale jage boi daga ngwalege. Ba gerudale Chube ole diali. 13 Daba gweale me lle molen toigda no, ba daba ene Chubenu chudaboadale lle monu girabate ama ole ene ama ñage lle molen toigda. Ba daba na gadale ngwange no ba ullage. 14 Ba Jesucristo gerua gai ulia giti kwian age me no ba dollale, ba gerudale no kwian ene giti Chube ole me ama oña boi daga ngwale. 15 Ba sugedale daba na kle ta suge kare, ama kle nga suga no ole ba mo ta gbadale nga suga no ole ule ama ole, daba na kle ta olire boi daga ngwale giti ba mo ta gbadale ta olire ule ama ole. 16 Ba mo ta gbadale tañachuge salengwli daba na ulita ole kwian gdaitre alin kare. Ba me tañachugadale mo giti mo tale: “Cha kwian no, cha kwian kweri, cha ta suge ma ngle daba nage malen cha me ñage mo ta gbe ule daba na ole daba me kweri daba me ta molen cha kare ole.” Me no tañachuge ene, ma no mo ta gbe ule daba na ulita ole me tañachuge mo giti ma no daba nage. 17 Daba na age me no ba ole ba me agedale me no ama ole ama age kare, ma no ba age no ulita kwian ulita gwa giti, kwian kle age no ba ole kwian kle age me no ba ole ba mo ta gbadale age no diali. 18 Ba me mo ta gbadale kira bate ni daba gdaite ole, agwa ba mo ta gbadale toi no taingwli daba na ulita ole ta no giti. 19 Cha daballa cha ibotea Jesucristo giti, cha no ba ulita ole, cha gerule ba ole ba ulita agali me daba gbadale ji chuge daba age gweale me no ba dollale giti, ma no kwian ene jige Chube kote Chube kwian ene gbe ji chuge, Chube gerua degaba unsuialin gerule e giti, chada e gerule: “Cha alin allabi ñage ji gbe trate kwian agenga me no alin, cha be age kwian ene ole, kwian ene chege cha kote gbale ji chuge.” 20 Kaire Chube gerua degaba unsuialin gerule: “Bage suge kwian agenga ba dollale bli ole ba taidale dage amage ba ama ulladale, kwian ene siechie ba chi ketadale amage jadale, ba mo ta dbadale age no kwian agenga ba dollale ole, ene ba dolla be ibule tanre mo giti ba ngeru ba kle age no giti ama alin.” Chube gerua degaba unsuialin gerule ene. 21 Ba me mo ta gbadale mo ta chuge ngwadi mo tke dole kwian bai kle age ba dollale ole, agwa ma no ba mo ta gbadale age no ulita kwian bai kaire kle age me no ba ole, ba agedale no diali mo dollale alin.
1 Kwian chugagwalla nga dba ai giti, Chube ama ulita chuge ngwadi chege kwian chugagwallale, ni kwian gdaite mo gbu kwian chugagwallale gballa, Chube kle kwian chuge ngwadi chege kwian na ulita chugagwallale. Ulia Chube kwian chugagwalla e ulita chuge ngwadi chege malen ba mo chugagwalla ulita nga dba ai giti gadale dage age ama gerule kare. 2 Kwian mo ta gbe mo chugagwalla nga dba ai giti dollale me mo chugagwalla gai dage me age chugagwalla gerule kare, kwian ene me kle age mo chugagwalla nga dba ai giti alin dollale, kle age Chube dollale, Chube kwian chugagwalla e ulita chuge ngwadi chege, kwian bai kaire me mo chugagwalla nga dba ai giti gai dage, kwian ene be ji chuge age ene giti. 3 Chugagwalla ulita nga dba ai giti kwian kaganga, kwian age no ama me kwachie chugagwalla ngeru, chugagwalla me kwian ene gbe jiske. Agwa kwian me age no ama kwachie chugagwalla ngeru, chugagwalla kwian ene gbe jiske, kwian ene kwachie chugagwalla ngeru. Ba toikalin no me kwachie chugagwalla nga dba ai giti ngeru ba mo ta gbadale toi no chugagwalla gerua gai dage me age me no chugagwalla dollale, ene chugagwalla me ba chugedi, 4 Chube ama gbu ba chudaboangale, ene suge bage ba toidale age no. Agwa ba mo ta gbe toi me no age me no, age ene giti ba mo ta gbale kwachie chugagwalla ngeru ba agedu giti, me ngwale dale chugagwalla kle, Chube ama gbu kwian agenga me no ulita gbangale ji chuge kwian age me no gdale. 5 Ba ulita mo chugagwalla nga dba ai giti gadale dage ta boke giti: Gdaite, ba chugagwalla gai dage, ene ama me age ba ole me ba gbe jiske. Na, bage sugedale ama ba chugagwalla, ba ama gadale dage nga dba ai giti. 6 Chube kwian chugagwalla gbu ba alin nga dba ai giti, chugagwalla e kle ba kage kle ba chudaboi, ba agedale chugagwalla gerule kare, ama ba chugagwalla malen lle gweale giti chugagwalla geru gbe ba igi ketadale, ba igi ketadale lle giti chugagwalla gerule kare. 7 Chugagwalla igi kade mangire batre ba igi ketadale, ba mo chugagwalla ulita gadale dage mo chugagwallale, ama ba chugagwalla malen ba agedale ene chugagwalla kaire kaire alin. 8 Ba me chegedale jiske ni daba gdaitege lle gweale giti. Ba ulita mo ta gbadale ta dbe no diali daba na ulita ole, ba ulita bai kaire kle mo ta dbe no ene daba na ole ba kle age no ulita Moisés nu Chube gerua degaba unsuialin gerule kare, 9 chada e gerule: “Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole. Ba me daba na gweda. Ba me skwe boi daba ngeru. Ba me tañachuge lle dabanu giti mo alin.” Chube geru gbu ene, kaire Chube geru na tanre gbu kwian alin, geru e ulita no, agwa geru gbaite gerule ma no ma kweri kwian ulita alin geru na gbaba ulitage, geru e gerule: “Ba mo ta dbadale no daba na ulita ole salengwli ba no mo ole naskuni kare.” Chube geru gbu ene kwian ulita alin. Ba age geru e gbaite gerule kare, ba mo ta dbe no ulia daba na ole ba mi age ni sidri me no ama ole, malen che ña gerule kwian bai kaire mo ta dbe no ulia daba na ole kle age Chube nu geru gbaba ulita gerule kare. 11 Ba ulita mo ta gbadale ta dbe no ene daba na ulita ole, uñale bage chui kle kodi gire Jesucristo be chieni che kwian amanu dbadale ama kle ngwadi, ba me kledale alenske me tañachuge mo giti kwian kle gbe kare, ba ulita mo ta gbadale chage no trate Chube takalin kare Jesucristo chieni manade ngwange, Jesucristo chieni chuia kle ma kodi ba Jesucristo gau chuiage. 12 Age me no tanre kle nga dba ai giti, agwa chui be chke gire Jesucristo be chieni che jwanle siere age me no ulitage che dbale toi ama ole nga ngaña giti, chui e kle kodi malen che mo ta gbadale siere age me noge chage no Jesucristo chagedu kare nga dba ai giti, ene che kle biale trate Jesucristo alin Jesucristo chieni chuiage. Che kledale biale Jesucristo chieni ngwange salengwli guardia donga kle mo gbe biale ama dolla ngwange kare. 13 Che mo ta gbadale chage no trate diali Chube takalin kare kwian ulita gwa giti, che me chagedale ai kare: Che me chagedale llale lle gage kote. Che me nga olladale lle gage giti. Me no muinga onbre mo chuge ke giti mo ta gbe diali chege age me no ene. Me no mo ta gbe chage kira bate daba na ole. Me no tañachuge lle dabanuge mo alin. 14 Che me chagedale age me no ene, agwa ma no che ulita mo ta gbe chege sugekare age me no ulitage chage no che Chugagwalla Jesucristo chagedu kare kwianske nga dba ai giti, che ulita tale che talla me no kle, che me mo chugadale ngwadi age me no che ta agekalin kare.
1 Kwian Chubenu gweale me Chube gerua uñe trate, me uñale trate amage bai no age bai me no age Chube gwage, ba geru uñe ma gití dare daba enege, daba e me geru uñe ene, daba ene ole ba me ka boi daba kle tañachuge kare, ma no ba ama gai ngwange no ta no ole ba daba ene chudaboale mo daballanu kare. 2 Kwian Chubenu gweale tañachuge lle ulita no gutadale, agwa kwian Chubenu gweale nage me suge ene trate, ama me Chube gerua uñe trate, ama tañachuge me no samla gute, amage suge ama samla gute ama kle age me no Chube dollale, malen ama mo ta gbe bligda me samla ni sidri ole gute. 3 Kwian bai kaire samla gute me ñage gerule daba nadi daba me samla gute giti, ene kaire kwian bai kaire me samla gute me ñage gerule daba nadi daba samla gute giti. Me no gerule dabadi ongoru ongoru blire giti, sugedale ba ulitage ba ulita Chubenu, Chube ba ulita gau mo alin, ba ulita salengwli Chube gwage. 4 Jesucristo ba ulita Chubenu Chugagwalla, ba ulita kwian salengwli malen ni ba gdaite gerudale me no daba na Chubenudi daba kle samla gute giti o daba me kle samla ene gute giti. Che salengwli me ñage gerule dabadi chugagwalla kare, daba kle age no kle age me no giti Chugagwalla Jesucristoge alin allabi uñale, Jesucristo kira molen kwian ta gbe age no mo gwage. 5 Kaire kwian na gweale tañachuge chui giti chui gweale ma no chui nage mo litangwa gerule Chube ole, kwian na tañachuge chui ulita salengwli no mo litangwa gerule Chube ole, kwian ene ulita kle gerule dabadi ongoru ongoru chui giti. Ma no kwian ulita gdaite gdaite mo kaire kaire mo ta gbe suge chui bai no mo litangwa gerule Chube ole, mo kaire kaire ñage age tañachuge kare. 6 Kwian gwealege suge trate Chube takalin ama chui gweale gai ma no chui nage mo litangwa gerule Chube ole, kwian e chui gweale ene gai gerungwa no Chube giti kwian ene kle Chube gai dage kle age Chube takalin kare mo alin. Ene kaire kwian nage suge trate chui ulita no salengwli Chube gwage mo litangwa gerule Chube ole, kwian e chui ulita gai salengwli gerungwa no Chube giti kwian ene kle Chube gai dage kle age Chube takalin kare mo alin. Kwian gwealege suge trate Chube lle ulita ketu amage gutadale, agwa kwian nage suge lle gweale me no ama alin gutadale, kwian ene ulita blire ama gerule no Chube ole bligda bai ama kle gute giti, kwian e ulita kle Chube gai dage kle age Chube takalin kare. 7 Che ulita Chubenu me ñage toi mo alin che takalin kare, che mo ta gbadale toi Chube takalin kare diali, che ulita kle toi Chube giti, Chube kle che manade toi gwade, Chube takalin gire che be jogeda, che me ñage chui gbe mo alin toi gwade chui gbe mo alin jogeda. Cristo che Chugagwalla, che kle toi nga dba ai giti che mo ta gbadale toi age che Chugagwalla Cristo takalin kare diali, kaire che me talladale jogeda giti, che Chugagwalla takalin gire che be jogeda, ama me takalin gire che mi jogeda, che toi gwade kaire che jogeda che mo Chugagwalla Cristonu diali. 9 Cristo jokeda gire chkuni gwade, malen ama chegu kwian gwade kaire kwian jogeda oña Chugagwallale, che me tañachugale mo giti, ma no che tañachugale ai kare: Che toi gwade che Cristonu ama che Chugagwalla, che jogeda che Cristonu ama jogeda oña Chugagwalla. 10 Cristo che Chugagwalla, ama alin gerule trate ulia kwian kle age giti bai no bai me no, ¿mineade ba kle gerule daba nadi daba kle age giti? ¿Mineade ba kle mo ta dbe me no daba ene ole? Che salengwli me ñage gerule dabadi chugagwalla kare. Chui bdaglige che ulita be kle Chube ngwadi Chube gwa giti ama be gerule che ole che agedu giti ulita nga dba ai giti. 11 Chube gerua degaba unsuialin gerule chui bdagli giti, chada e gerule: “Chugagwalla gerudu: ‘Cha gerule ulia ulia chui be chke gire kwian ulitage be suge cha kweri cha ama Chugagwalla, gire kwian be joge chke dba jongnagwa giti cha ngeru be gerule no cha ole: Ulia ba no ba kweri ba kwian ulita Chugagwalla.’ ” Chube gerua degaba unsuialin gerule ene. 12 Cha gerule ulia ba ulita ole, bdagli che ulita be kle Chube gwa giti gerule Chube ole che ulita mo kaire kaire be gerule mo giti che agedu giti nga dba ai giti. 13 Bdagli che agali mo kaire kaire be gerule Chube ole mo giti che agedu giti, malen nege che me chagedale gerule dare ongoru ongoru modi kle age giti, ma no ba mo ta gbadale daba na ulita chudaboi, ba chagedale age ta giti daba na gwage, ba age gweale giti ñage suge daba nage e me trate ama alin, daba gwage badi age ene ama ñage joge siere geru uliage ba kle age giti, malen ba mo ta gbadale age trate daba na gwa giti. 14 Cha che Chugagwalla Jesu gaba ulia, chage mo tale suge trate trate bligda ulita no cha alin gutadale, chage suge ni bligda gdaite me no cha alin gute Chube gwa giti. Agwa daba gweale Chubenuge suge mo tale bligda gweale me no ama alin gutadale, suge amage ene agwa ama bligda e gute ama kle age me no Chube dollale, ulia daba e alin e me no gutadale. 15 Ba bligda gweale gute daba na gwage, daba e alin bligda e me no gutadale, suge amage ama bligda e gute gire ama kle age me no Chube dollale. Bligda e gute giti daba na ta me chege no, uñale bage daba na alin me no agwa ba lle ene gute dare daba gwage, ba age ene diali, amage suge ba me kle mo ta dbe no ama ole. Daba e Cristonu, Cristo jokeda ama alin, me no daba ene ta gbe siere Cristoge ba kle blire giti daba me kle blire kare. 16 Suge bage age gweale no ba alin agwa uñale bage daba nage suge me no age ene, ba me agedale daba gwa giti, ene daba me gerule me no ba giti ba kle age giti. 17 Me no tañachuge kwian Chubenu ulita bligda salengwli gutadale lle amaña jai, ene kwian Chubenu, ene Chube ama Chugagwalla. Me ene, me no tañachuge lle e kare giti, ma no mo tale mo ta gbe chage no trate Chube takalin kare, mo ta gbe toi trate daba na ulita ole, mo ta gbe toi nga suga no ole Chube Oña ba ta gbe kare. 18 Ba ulita bai kaire mo ta gbe no ene lle boi Cristo alin ta no ene ole kle age no Chube gwage, nga suga no Chubedi ba kle age giti, kaire kwian na be gwage badi ba kle age no. 19 Ma no che ulita Chubenu mo ta gbadale age no daba ulita ole, ta ene giti che ulita ñage mo chudaboi ongoru ongoru salengwli ta gbe suge ma ngle geru Cristo gitige, ene che ulita ta chege ule kwaitre alin. 20 Daba na me lle gute ulita, ama tañachuge lle gweale me no ama alin gutadale agwa bage suge lle ene no gutadale, ba me daba ene ta gbe joge siere geru Cristo gitige me blire salengwli giti, daba e Chubenu, bedre bedre Chube kle ama ta gbe suge ma trate agwa daba bebi geru ulita uñe trate, me no daba ene ta gbe joge siere geruge ba kle blire giti, ba tachkedale daba na giti ba kle lle ulita gute giti, ulia lle ulita no gutadale agwa bage suge daba me no lle ene ole ma no me lle ene gute daba bai me kle lle gute gwa giti. 21 Daba gweale Chubenuge suge mo tale Chube me takalin ama bligda gweale gute, suge amage Chube me takalin ama lle gage jai, suge amage Chube me takalin ama age gwealege, uñale bage daba ta suge ene ba ta chkedale daba e giti ba mo ta gbadale me bligda e gute me lle gage jai, ba mo ta gbadale me age gweale daba ta suge dollale, ene ba me kle daba ta gbe joge siere geruge me kle daba ta gbe age me no ama ta suge dollale. 22 Bage suge trate mo tale lle ulita no ba alin gutadale, ba ta suge ba ñage lle ulita gute Chube gwa giti, agwa ba ta suge ene manadale mo alin Chube gwa giti me gerule daba na me lle ulita gute ole: “Ba me kle tañachuge trate, uñale chage Chube gwa giti lle ulita no che alin gutadale.” Ba me gerudale ene daba ole, ma no ba mo ta gbadale age no daba ene ole me lle gweale gute daba ta suge dollale, ene nga be suga no badi, be suge trate bage mo tale ba agedu no Chube gwage daba na alin. 23 Kwian Chubenu gwealege me suge trate mo tale Chube gwa giti ama ñage lle gweale gute o me lle gweale gute, ma no me gute, kwian ta suge ene ma no me gute, kwian lle gute ta ene ole me kle lle gute Chube talla giti. Me lle gute Chube talla giti, ta ene me no Chube gwage. Kwian me age ulita Chube talla giti, kwian ene kle age me no mo ole Chube gwage.
1 Che ulita Chubenu bai kaire Chube gerua uñe ma trate gití dare daba Chubenu nage, daba na me geru uñe taneke geru uliage, che geru uñe ma trate daba na me geru uñe tanekege, che mo ta gbadale daba ene chudaboi no no, che me tañachugadale mo giti age che ta agekalin kare, ma no diali che tañachugadale daba me geru uñe taneke giti age no daba ene alin me age gweale daba ene gwa giti daba ta gbe joge siere geru uliage. 2 Che ulita mo ta gbadale age no daba na me geru uñe taneke alin me tañachuge mo giti che ta agekalin mine mo alin, ene che giti geru ulia ñage suge ma trate dabage, ene daba ñage mo ta gbe ma no diali geru uliage. 3 Ba ulita mo ta gbadale suge Cristo giti Cristo agedu mine nga dba ai giti kwianske, Cristo mo ta gbu age kwian ulita alin Chube takalin kare, Cristo me tañachugu mo giti age no mo alin, agwa kwian ulita me agedu no Cristo ole, kwian Chube dollale agedu me no tanre Cristo ole, Cristo gerudu e giti Chube ole, Cristo gerua e jo degaba unsuialin, chada e gerule: “Kwian gerudu me no badi ba dollale, kwian ene agedu me no cha ole kaire.” 4 Ulita Chube gerudu unsuialin Chube gerua e jo degaba che alin, ene che geru e jwen, e giti che tachke Chube takalin mine che ulita alin, kaire geru e giti suge chege chui be chke gire che be joge siere boi daga ngwale ulitage che be toi ule Cristo ole diali chui tangle, geru e che ta gbe kiraske nga suga no ole, ene che boi daga ngwale che ñage jage che me joge siere Cristoge. 5 Chube agali che ta gbe jage boi daga ngwaleske, ene che me joge siere Cristoge boi daga ngwale giti, kaire Chube che ta gbe kiraske nga suga no ole, cha takalin ama age ene ba ulita alin, kaire cha takalin ama ba ulita ta gbe toi no no modi daba ole, ba ulita mo ta dbadale no ene daba na ulita ole Cristo agedu kare, Cristo kledu nga dba ai giti ama mo ta du no kwian ulita ole, ene kaire ba ulita mo ta dbadale no kwian ulita ole. 6 Ba ulita mo ta dbe no modi ene ba ulita ta kle ule gerule no no Chube che Chugagwalla Jesucristo Ñenua agedu giti. 7 Ba ulita mo ta gbadale no daba ole daba gai ngwange no ta no ole mo daballanu kare modi salengwli Cristo mo ta dbe no ba ulita ole kare, Cristo no ba ulita ole, Cristo ba ulita gau mo alin ene ba ulita ñage gerule no no Chube giti. 8 Cha gerule ba ole trate Cristo giti, Cristo chiu nga dba ai giti agedale cha kwian israelita ulita alin agedale ulita Chube gerudu kare unsuialin, unsuialin Chube gerudu cha enusulian ole ama be kwian jwannga siere kage kwian israelita ulita alin, Cristo chku, Cristo agedu ulita Chube gerudu kare unsuialin, e giti suge chege Chube gerule ulia ama age ulita ama gerule kare. 9 Cristo chiu nga dba ai giti cha kwian israelita ulita alin kaire kwian me israelita ulita alin, ene Cristo giti kwian me israelitage suge Chube no ama ole, ene Cristo giti kwian me israelita ulita gerule no Chube ole Chube taidu dage amage giti. Unsuialin Chube David ta gbu chada dege Cristo be gerule no Chube giti ule kwian me israelita ole, chada e gerule: “Cha be gerule no no ba giti ule kwian me israelita ole, cha be mo gate no ba giti.” 10 Kaire Moisés nu Chube gerua degaba, chada e gerule: “Kwian me israelita mo ta gbadale nga suga no ole gerule no ule kwian israelita ole Chube giti.” 11 David nu Chube gerua degaba unsuialin, chada e gerule: “Kwian israelita chudalla kwian me israelita chudalla nga ulitage gerudale no no Chugagwalla Chube giti, kaire mo gatadale no no ama giti.” Chube gerua degaba unsuialin gerule ene. 12 Chube kwian jwannga siere kagu kwian israelita alin agwa kaire kwian me israelita alin, Chube kwian jwannga siere kagu, Isaías nu Chube gerua degaba unsuialin gerule e giti, chada e gerule: “Isaí oindalla giti kwian jwannga siere gdaite be chie, ama be chege kwian me israelita Chugagwalla, ama giti kwian me israelita be ñage Chube uñe be Chube gai mo jwanngale siere.” 13 Isaías Chube gerua degu ene unsuialin Cristo giti, Chube kwian jwannga siere Cristo kagu nga dba ai giti kwian alin, ba ulita Cristo gau ulia mo jwanngale siere, cha takalin Chube ba ulita ta gbe nga suga no ole diali e giti, kaire Chube ba ulita ta gbe no modi daba bai ulita nu mo ta gbaba Cristo gai ole. Cha takalin Chube mo Oña kiralla giti ba ulita ta gbe tachke diali ma ngle ba jwannga siere giti, ene diali ba be chege chui manade nga suga no ole, chui ege ba jwannga siere be ba gbe siere boi daga ngwale ulitage. 14 Cha daballa cha ibotea Jesucristo giti, uñale chage trate ba giti ba ulita kle mo ta gbe age no modi ulita daba alin, ba geru ulia uñe trate, uñale bage trate ba chagedale mine Chube takalin kare, ba ñage tachke ngle daba tke tangle modi ongoru ongoru chage no Chube takalin kare. 15 Uñale chage trate ba giti ba kwian ene, agwa cha kle chada ai dege trate ulia ba alin ba ulita ta gbadale tachke e giti, ene ba me ta jogenga ba mo ta gbadale chage ene diali gwangerugu. Cha kle chada ai dege ene ba alin Chube cha ta gbu kare, Chube agedu no cha alin, ama cha gau cha gbu lle boangale Jesucristo alin kwian me israelitaske, Jesucristo kwian jwannga siere ji chugege kwian age me no gdale, Chube cha gbu geru ene Jesucristo giti trage kwian me israelitaske, ene cha giti kwian me israelita Jesucristo gai ulia mo jwanngale siere ji chugege age me no gdale, Chube Oña kwian ene ta lite kwian ene ta gbe trate Chube alin, chui bdaglige kwian ene be kle ule cha ole toi nga ngaña giti Chube gwa giti Chube kle ngwadi, nga be suga no Chubedi kwian be kle ule cha ole giti. 17 Cha Jesucristo gau ulia giti nga suga no chadi lle boi no Chube alin kwianske. 18 Cha tale suge cha me ñage gerule kwian na agedu Cristo kare cha alin giti, Cristo agedu no cha alin agali, ama cha gbu geru ama giti dbe kwian me israelitage ene chke uñale kwian me israelitage kwian me israelita Chube gai dage Chube gai ulia Cristo giti. Cha geru Cristonu tragu giti kwian me israelita tanre Chube gau ulia. Cha geru Cristo giti ketu kwian me israelitage, cha agedu no kwian gwa giti, 19 kaire cha lle daga ngwale no tanre dodadu Chube Oña kiralla giti kwian gwa giti. Cristo cha ta gbu geru ama giti dbe nga ulitage, cha geru Cristo giti du ngeru una Jerusalénge gire cha jo geru dbe nga na ulitage cha jo chke bdagli nga kweri Iliriage, ene cha giti kwian nga e ulitage geru Cristo giti keruchugu, ene chku uñale kwiange Cristo kwian jwannga siere ji chugege kwian age me no gdale. 20 Cha mo ta gbu ene geru Cristo giti dbe kwian nga ulitage baini kwian gdaite me geru Cristo giti keruchugaba ngeru baini kwian na geru dbanga bebi joge chke ngwadi, ene cha me kle geru dbe daba na nate. 21 Cha kle geru Cristo giti dbe gwangea kwian ni geru keruchugabage, ene cha geru dbe giti kle boi Chube gerua degaba unsuialin gerule kare, chada e gerule: “Kwian me geru keruchugaba ama giti ni bitaite, kwian ene be geru ama giti keruchuge, geru e be suge kwiange kwian be ama gai ulia.” 22 Cha chagedu tanre geru Jesucristo giti dbe kwian nga ulitage baini kwian me geru keruchugaba, kwian enege cha geru Jesucristo giti du, malen cha me ñadu joge tienda badi blike, cha mo oña gbu joge tienda badi sbali agwa e suiale lle tanre kledu cha alin boale Jesucristo alin. 23 Agwa nege cha geru Jesucristo giti du kwian ulitage nga aini cha kle ngwadige, lle na me cha alin boale Jesucristo alin aini cha kle ngwadi, malen nege cha kle tañachuge joge ulia ulia baske cha mo oña gbu sbali chura ngle joge kare. 24 Noare cha joge nga kweri na kada España ngnagu cha kle tañachuge joge badi jonle tangle una Romage, ene cha ñage gwage ba ulitadi. Cha ñage chege chuiete baske jendalenga geru Jesucristo gitidi, gire cha joge dare cha takalin ba cha chudaboi, ba gweale ñage cha gatedi joge dare nga España ngnagu. 25 Agwa nege cha be joge ngeru una Jerusalénge igi dbe kwian Chubenu gweale una ege alin. 26 Kwian Chubenu nga kweri Macedoniage nga kweri Acayage mo ta gbu ule daba me lle molen una Jerusalénge chudaboi, malen ama mo ta gbu ule igi lite ole daba Chubenu una Jerusalénmu gweale me lle molen alin. 27 Daba Chubenu nga kweri boke emu me israelita, noare ama mo ta gbu daba Chubenu israelita una Jerusalénmu chudaboi igi giti, kwian israelita giti geru Jesucristo giti chku uñale kwian me israelitage, ene kwian me israelita chegu Chubenu Jesucristo gai ulia giti, malen noare kwian Chubenu me israelita daba israelita bai Chubenu me lle molen chudaboadale no igi giti kwian israelita agedu no ama alin ñanale kare. 28 Cha joge una Jerusalénge, cha be daba Chubenu nga Macedoniamu daba Chubenu nga Acayamu igia kete daba Chubenu una Jerusalénge gire cha be joge tangle dare nga kweri España ngnagu cha be joge badi jonle tangle, cha be chege chuiete baske. 29 Uñale chage Cristo be age no cha alin kaire ba ulita alin cha kle baske gire. 30 Jesucristo che Chugagwalla kaire Chube Oña che ulita ta gbanga mo ta dbe no modi, che ta ene no molen modi, ta no ene giti cha takalin ba ulita cha daballa cha ibotea Jesucristonu mo ta gbe ule cha ole gerule Chube ole cha giti cha kle geru dbe giti kwianske, ene cha ñage geru dbe no kwianske. 31 Ba gerudale Chube ole cha be joge ngwadi nga kweri Judeage giti, ene Chube be cha manade kwian Jesucristo gerua dollale ngeru nga kweri Judeage, ene kwian geru dollale me ña age me no cha ole Jesucristo gerua dbe giti. Kaire ba gerudale Chube ole kwian Chubenu una Jerusalénge giti, ene daba Chubenu israelita una emu daba me israelita igia gai ngwange no. 32 Ba ulita gerudale ene Chube ole, ene Chube takalin cha me boi jonkare cha be ñage joge chke nga suga no ole baske, cha be chege chui gweale baske undege, ene no cha alin, ene cha ña chege ba ulita ole, ene che ñage kira gai modi geru giti. 33 Chube ta suga no mauña, diali cha gerule ama ole ba ulita giti cha takalin ama ta suga no ene kete ba ulitage ama ba chudaboi ama age no ba alin diali. Ene nobi.
1 Muinga kada Febe che ibotea Jesucristo giti, ama kwian Chubenu ulita chudaboanga una Cencreage, ama be joge chke baske. 2 Cha takalin ba ama gai ngwange no che Chugagwalla Jesucristo giti, ama no Jesucristo ole. Ba daba na nu Jesucristo gaba ulia gai ngwange no kare ba muinga ai gai ngwange no ta ene ole, ba ama chudaboi no ulita ama takalin kare, ama daba na chudaboanga tanre no, kaire ama cha chudabo tanre, ene ba ama chudaboale kaire. 3 Ba gbi kade cha alin onbre kada Aquilage kaire ama muiralla kada Priscage, ama boke cha chudaboanga no no lle boi Jesucristo alin, 4 ama biri jogeda cha giti age cha alin, malen cha gerule no no ama ole ama agedu giti cha alin, me cha alin gerule no ene ama ole, kaire daba Chubenu ulita me israelita gerule no ama ole, nga suga no daba me israelitadi Prisca giti Aquila giti ama agedu giti cha alin, ene cha giti Jesucristo gerua ñadu joge chke kwian me israelitaske. 5 Daba ulita Chubenu kle mo lite Jesucristo geruadi Prisca Aquila ullage, ba gbi kade cha alin ama ulitage. Ba gbi kade cha alin Epenetoge, ama cha skatemanalla no no, cha no no ama ole, ama kledu nga kweri Asiage, cha jo chke geru Cristo giti dbe nga ege ama Cristo gerua gau ngeru kwian na ulitage. 6 Ba gbi kade cha alin Maríage, ama lle bo tanre agedu tanre no che ulita alin. 7 Ba gbi kade cha alin Andrónicoge kaire Juniage, ama boke cha bitalla chuda giti, ama kledu skage ule cha ole, ama kle mo ta gbe no diali Cristo gerua ole malen kwian Jesucristo gerua ketanga ulita gerule no no ama boke giti, ama geru Cristo giti gau ulia ma ngeru chage. 8 Ba gbi kade cha alin Ampliatoge, ama cha skatemanalla no no che Chugagwalla Cristo giti, cha no no ama ole. 9 Ba gbi kade cha alin Urbanoge, ama lle boanga ule che ole Cristo alin. Ba gbi kade cha alin Estaquige, ama cha skatemanalla no no, cha no no ama ole. 10 Ba gbi kade cha alin Apelege, ama boidu tanre daga ngwale Cristo gerua giti agwa ama mo ta gbu no chage ngerugu Cristo ole. Ba gbi kade cha alin kwian ulitage kle toi Aristóbulo ullage. 11 Ba gbi kade cha alin Herodiónge, ama cha bitalla chuda giti. Ba gbi kade cha alin Narciso bitalla ulitage bai kaire nu mo ta gbaba che Chugagwalla Cristo gai ulia. 12 Ba gbi kade cha alin Trifenage kaire Trifosage, ama bonate lle boanga che Chugagwalla Cristo alin. Ba gbi kade cha alin Pérsidage, muinga e lle boanga no no che Chugagwalla Cristo alin, cha no ama ole. 13 Ba gbi kade cha alin Rufoge, ama kle mo ta gbe no no diali age no che Chugagwalla Cristo takalin kare daba Chubenu na gwa giti. Ba gbi kade cha alin Rufo chebiage, Rufo chebia cha alin cha chebia kare, cha no no ama ole mo chebia kare, ama no no cha ole mo kirolla kare. 14 Ba gbi kade cha alin Asíncritoge Flegontege Hermege Patrobage Hermage kaire kwian Chubenu na kle ama ulita ole ba gbi kade cha alin ama ulitage. 15 Ba gbi kade cha alin Filólogoge Juliage Nereoge Nereo iboteage Olimpage kaire kwian Chubenu na kle ama ulita ole kle mo ta gbe Jesucristo geruadi, ba gbi kade cha alin ama ulitage. 16 Ba ulita gbi kade no no moge ta no ole dabage ulita. Daba ulita Cristo gerua gaba aini tanre gbi kage ba ulita alin. 17 Cha daballa cha ibotea Jesucristo giti, ba geru ulia jun tanre, kwian Jesucristo gerua ketanga ba tku tangle no geru ulia Jesucristo gitige, ba ulita geru e gau ulia, nege kwian gweale kle chage baske geru nganake dbe, ba mo lingadale siere kwian enege, ama takalin ba ulita kira bate modi geru giti kaire ama takalin ba joge siere geru uliage, cha gerule trate trate ba ulita ole cha takalin ba kledale ta giti kwian ene ulitage. 18 Kwian ene chage geru nganake ole me kle mo ta gbe che Chugagwalla Jesucristo ole me kle age che Chugagwalla Jesucristo takalin kare, agwa ama kle age me no ama agali tañachuge kare, ama tale ama kwian me no me no ama kwian anblitanga agwa ama gerule no kwian na ole ta no giti, ene kwian na tañachuge ama gerule ulia, ene kwian na me tachke mo giti mo anblitange amage. 19 Uñale chage kwian ulita Chubenu nga na ulitage kle gerule no ba ulita giti ba kle mo ta gbe giti chage no Chube ole diali ba ulita kle age Chube takalin kare, e giti chadi nga suga no no ba ulita giti, cha takalin ba ulita mo ta gbe suge age no diali Chube takalin kare, agwa ba me mo ta gbale nganake age me no. 20 Ba ulita mo ta gbadale chege Chube gai ulia diali age no ama takalin kare, ene Chube ta suga no mauña be ba gbe kirachke blike Satanádi, ene dolla Satanás me ñage ba ta gbe age nganake me no. Cha takalin che Chugagwalla Jesu ba ulita manade no age no ba ulita alin diali. 21 Timoteo lle boanga Jesucristo alin ule cha ole gbi kage chada ai giti ba ulita alin, kaire Lucio kaire Jasón kaire Sosípater ama gdamai kle cha gatedi, ama cha bitalla chuda giti, ama gbi kage chada ai giti kaire ba ulita alin. 22 Cha kada Tercio, cha chada ai degu Pablo alin Pablo kle gerule kare kagadale ba ulita alin, cha kaire che Chugagwalla Jesucristo gau ulia, Chugagwalla Jesucristo giti cha gbi kage chada ai giti ba ulita alin. 23 Cha Pablo kle toi daba kada Gayo ullage, daba Gayo gbi kage chada ai giti ba ulita alin, ama kle daba Chubenu ulita gai ngwange no mo ullage kle daba Chubenu ulita chudaboi no. Kaire daba Erasto ama igi mananga una aige, ama gbi kage chada ai giti ba ulita alin. Kaire daba kada Cuarto gbi kage chada ai giti ba ulita alin. 24 Cha takalin che Chugagwalla Jesucristo ba ulita manade no no age no ba ulita alin diali. Ene nobi. 25 Cha kle ba jige Chube kote, ama ñage ba kira gbe mo ta gbe kiraske diali geru uliage cha ba tku tangle kare Jesucristo giti. Chube me boi, ama chege gwade diali chui tangle, unsuialin Chube kwian tanre Chube gerua ketanga ta gbu chada dege be boi Jesucristo ole giti, boidu ene ulita Chube kwian ta gbu mo gerua dege kare. Ngeru Chube nga dodaduge Chube mo ta gbu Jesucristo kage nga dba ai giti kwian jwanle siere ji chugege age me no gdale, geru e chegu ogaba kare skwlenre ba kwian me israelitage, agwa nege geru e chku uñale bage kaire kwian na nga ulitage, ene kwian nga ulitage ñage mo ta gbe Chube gai ulia mo Chubeale Jesucristo giti age Chube takalin kare. 27 Chube alin allabi gdaitre alin, ama ta ngle molen, ama agedu tanre no che ulita alin Jesucristo giti, che ulita gerudale no no Chube ole e giti diali chui tangle. Ene nobi. Geru ai ene ulita cha Pablo chada degangu ba ulita kwian Chubenu una Romage alin. Che kle meni.
1 Cha Pablo chada ai degange ba ulita Chubenu alin kle mo lite Chube geruadi una Corintoge: Chube tale Chube cha gau cha gbu Jesucristo gerua ketangale. Jesucristo gai ulia giti mo alin ba ulita chegu trate Chube gwage, Jesucristo giti ba ulita chegu Chubenu, kaire kwian tanre nga na ulitage chegu Chubenu Jesucristo giti, kwian ene ulita kle mo ta gbe ba kle mo ta gbe kare Jesucristo gai mo Chugagwallale gerule no no modi Jesucristo giti, Jesucristo che Chugagwalla, kaire Jesucristo ama ulita Chugagwalla. Cha Pablo ule daba Sóstenes ole gbi kage chada ai giti ba kwian Chubenu ulita una Corintomu alin. 3 Cha takalin Chube che Ñenua kaire Jesucristo che Chugagwalla age no ba ulita alin ba ulita ta gbe suga no diali. 4 Uñale chage Chube agedu no no ba ulitaske Jesucristo giti, Chube agedu no no ba ulita alin, Chube ba ta blitu, Chube ba ulita ta gbu suge age Chube takalin kare, e giti cha gerule no no Chube ole ba ulita giti diali. 5 Jesucristo giti Chube ta ngle ketu ba ulitage lle boi no no kwianske Chube alin Chube takalin kare, Jesucristo giti geru ulia suge trate ba ulitage, kaire Jesucristo giti ba ulita ta molen geru e trage no no daba na ole. 6 Cha geru Cristo giti tragu ba ulita ole, geru e jo chke ba ulita tale, geru e ba ulita ta blitu, nege ba me kle mo ta gbe chage ba chagedu ngeru kare. Nege ba kle mo ta gbe chage me ngeru kare, e giti chke uñale trate kwian nage geru e me geru ngwale, geru e ulia kiraske, geru kwian ta blite chage nganake Chube takalin kare. 7 Chube ta ngle ketu ba ulitage, ene diali ba ñage chage gwangerugu geru uliadi lle boi no kwianske Chube takalin kare ba kle che Chugagwalla Jesucristo chieni chuia manade gire. 8 Chube be ba ulita ta gbe no diali gwangerugu ama geruadi, ene ba be kle biale chui bdagli alin, ene che Chugagwalla Jesucristo chieni chuia chke ba me skwen jiske Chube gwage. 9 Chube ba ulita gau ba ulita ta gbu mo Kirolla Jesucristo uñe, Chube ba ta gbu Jesucristo ole, Chube me takalin ba ta chege sugekare Jesucristoge. Chube agedu no ene ba ulita alin, Jesucristo giti ba ulita Chubenu malen ñage suge trate ba ulitage Chube be ba ulita manade no chui bdagli alin Chube gerudu kare, Chube gerudu be kwian amanu ulita manade no chui bdagli alin, Chube age ama gerule kare. 10 Cha bitalla ulita Jesucristo giti, cha gerule ba ulita ole Jesucristo kiralla giti cha takalin ba ulita mo ta gbadale ule salengwli, ba me kira batadale modi geru giti, ba nodale daba ole, ba mo ta gbadale toi taingwli modi, ba mo ta gbadale tañachuge salengwli modi, ba mo ta gbadale gerule salengwli modi geru ulia giti. 11 Che kle gerule ene ba ole, ulia geru chku uñale chage daba Cloé bitalla giti ba ulita kle mo ta gbe kira bate modi geru giti me kle tañachuge salengwli. 12 Cha gerule ba ulita ole trate trate ba kle tañachuge kare giti, cha alin me no ba gweale kle tañachuge ai kare, ba gweale kle gerule: “Pablo alin gerule ulia, cha Pablo alin gerua gai ulia.” Gweale na kle gerule: “Apolos alin gerule ulia, cha Apolos alin gerua gai ulia.” Gweale na kle gerule: “Pedro alin gerule ulia, cha Pedro alin gerua gai ulia.” Gweale na kle gerule: “Cha alin allabi kle Cristo gerua gai ulia, cha alin allabi Cristonu ulia.” 13 ¿Ba ulita tañachuge Cristo ba jwannga siere ngle kle mo kaire kaire ba ulita alin? Ba kle tañachuge ene ba me kle tañachuge no, Cristo ba jwannga siere gdaitre alin kle ba ulita alin. Ba gweale kle gerule ba Pablo alin gerua gai ulia, ¿ba kle tañachuge cha Pablo jokeda ba ulita agedu me no giti? ¿Ba jo ñeaba chiske gaba ngaña chigage cha kalla giti? Me ene ulia ba kle tañachuge kare. 14 Nga suga no chadi cha me ba ulita ñeu chiske gau ngaña chigage, ene ni ba gdaite ñage gerule cha ba ñeu chiske mo kalla giti. Cha daba boke kada Crispo kaire Gayo alin ñeu chiske, cha agedu ene cha agedu Cristo kalla giti agwa cha me agedu mo kalla giti. 16 Kaire cha Estéfanas Estéfanas bitalla ñeu chiske Cristo kalla giti, daba e alin allabi cha ñeu chiske agwa cha me tachke daba na giti, cha tañachuge kwian dare cha me su ñe chiske. 17 Cristo me cha gbu chage kwianske kwian ñe chiske, Cristo me lle e kare ketu chage boadale, agwa ama cha gbu geru ama giti kete kwiange, cha kle geru Cristo giti trage kwian ole cha me kle gerule mo ta giti sugekare cha tañachuge kare, me ene, cha kle gerule no trate Cristo jokeda kruge giti Chube cha ta gbe gerule kare, ene geru Cristo giti ñage suge trate kwiange ñage kwian ta blite. Cha gerule mo ta giti cha tañachuge kare cha kle gerule ngwale, ene geru ulia Cristo giti me ñage suge kwiange me ñage kwian na ta blite. 18 Che ulita Chubenuge suge geru Cristo jokeda kruge giti geru e no geru kiraske, uñale chege Cristo jokeda kruge giti Chube che jwen siere ji chugege che agedu me no gdale. Agwa kwian me Chubenu ama Cristo jokeda kruge gerua gai ngwale, kwian ene kle jogebanga geru uliage, kwian ene be joge sugekare Chubege ji chugale. 19 Kwian ene geru nga dba ai giti alin uñanga, ama giti Chube gerua degaba unsuialin gerule: “Kwian mo ta gbanga no diali geru nga dba ai giti alin jwen tanre, kwian ene tachke ngle blike geru giti, kwian ene ta molen tanre geru nga dba ai giti ole, agwa chui be chke gire Chube be kwian ene ulita ta gbe suge e ulita ngwale Chube gwage.” Chube gerua degaba unsuialin gerule ene. 20 Kwian geru nga dba ai giti uñanga trate no ulita, kaire kwian geru nga dba ai giti jwannga tanre diali ama takalin kare, kaire kwian geru nga dba ai giti traganga daba na ole diali, kwian ene ulita ta molen tanre geru nga dba ai giti alin ole, agwa ama me Chube gerua Cristo giti gai ulia, Chube gwage kwian ene me ta molen dale, kwian ene ulitage Chube gerua me suge. 21 Kwian ta ngle molen geru nga dba ai giti alin ole, ta ene giti kwian kle tañachuge ama ñage Chube uñe, agwa me ene kwian kle tañachuge kare, Chube talla ngle ole Chube mo ta gbu age nganake kwian kle tañachuge karege, Chube mo ta gbu kwian jwen siere ji chugege age me no gdale geru Cristo jokeda kruge giti me kwian ta ngle molen giti. Kwian me geru Cristo giti gai ulia, kwian ene alin geru e ngwale, agwa kwian geru e gai ulia, geru e ñanaske kwian ene alin, Cristo alin giti kwian Chube uñe, Cristo alin giti Chube kwian jwen siere ji chugege age me no gdale. 22 Kwian israelita tanre me geru Cristo giti gai ulia, ama takalin Chube lle daga ngwale no tanre dodade mo kiralla giti ama gwa giti, ene e giti ama tañachuge be Chube gerua Cristo giti gai ulia. Kaire kwian griego tanre me geru Cristo giti gai ulia, ama ulita kle mo ta gbe ma no diali geru gweale jagere jinade jwandale, ene kwian griego tañachuge ama ñage Chube uñe. 23 Agwa che ulita Chubenu kle geru Cristo jokeda kruge giti gai ulia, uñale chege Cristo alin giti che Chube uñe, che ulita kle geru e trage kwian na ulita ole. Geru Cristo jokeda kruge giti kwian israelita tanre me ta chege no, ama me no geru e ole. Kaire kwian me israelita tanre tañachuge geru Cristo jokeda kruge e ngwale, ama tañachuge: “¿Chema ñage Chube uñe jogeda ene giti?” 24 Agwa kwian gweale israelita, kaire griego, Chube nu kwian ene gaba mo alin, Chube kwian ene ta gbu geru Cristo giti gai ulia, kwian ene ulitage uñale trate trate Cristo giti ama Chube uñe, suge ama ulitage Chube kira molen Cristo kira e amaña molen, Chube ta molen Cristo ta e amaña molen. 25 Kwian me Chubenuge ñage suge Chube agedu Cristo giti e ngwale e me kiraske, agwa me ene, Chube ta ma ngle molen kwian ulitage, Chube kira ma kweri molen kwian ulitage, ta ngle ene giti kira kweri ene giti Chube agedu Cristo giti kwian ulita alin, Chube agedu ene Chube me agedu ngwale. 26 Ba cha bitalla Cristo giti, ba ulita tachkedale mo giti, ngeru Chube bebi ba ulita ta gbe Cristo gai ulia uñale bage ba ulita me kwian kweri kwian na gwage kwian tañachuge kare, ba ulita me kwian ta ngle molen kwian na gwage kwian tañachuge kare, ba ene gire Chube ba gau mo alin. Ba bedre alin kwian ta ngle molen kwian na gwage kwian tañachuge kare, ba bedre alin daba chugagwalla, ba bedre alin daba chugagwalla bitalla. 27 Kwian me ta ngle molen kwian na gwage kwian tañachuge kare, Chube kwian ene gau mo alin, Chube kwian ene ta gbe ngle Chube geruadi, ene kwian talla ngle geru nga dba ai gitige be ibule mo giti, be suge amage kwian me talla ngle gerule ma kweri ma ngle Chube giti kwian talla ngle nga dba ai gitige. Kwian me kweri me kira molen kwian na gwage kwian tañachuge kare, Chube kwian ene gau mo alin, ene kwian kweri kwian geru mauña nga dba ai giti be ibule mo giti, be suge amage ama soli Chube gwage. 28 Kwian me ñanaske kwian na gwage, Chube kwian ene gau mo alin, ene kwian kle mo gai ma kweri daba na ulitage be ibule mo giti, be suge amage ama kle age ulita mo kirallaske e ngwale Chube gwage, Chube me kwian gai mo alin kwian kle age no giti. 29 Chube kle age ene kwian ole, ene ñage suge kwian ulitage ni kwian gdaite ñage mo gbe ma kweri Chubege ni kwian gdaite kwian Chubenu mo kira giti. 30 Chube agali che ulita gau che ta gbu Jesucristo gai ulia, ene che talla chege diali Jesucristo ole. Jesucristo giti Chube che ta gbe ngle, kaire Jesucristo giti Chube che jun siere ji chugege che agedu me no gdale, Jesucristo giti che chege trate Chube gwage, Jesucristo giti che kle biale joge toi Chube ole bdagli. 31 Chube agali agedu ene ulita ba ulita alin Jesucristo giti, malen ba ulita agedale Chube gerua degaba unsuialin gerule kare, chada e gerule: “Kwian ta mo ta dbakalin gerule no kweri trate kle age mo kiralla giti, ma no kwian ene mo ta dbadale gerule no kweri Chube giti Chube kle ama ta gbe age, me ama agali kle mo ta gbe age.” Chube gerua degaba unsuialin gerule ene.
1 Ba ulita cha bitalla Jesucristo giti, uñale ba ulitage cha kledu baske geru Jesucristo giti dbe cha geru Jesucristo giti tragu ba ulita ole, geru e kledubi Chube ole unsuialin, ni kwian gdaite e uñu. Cha gerudu ba ole geru e giti ta gude che ulita kle gerule kare, cha me gerudu ba ole kwian geru uñanga kweri kle gerule kare. 2 Cha kledu ba ulitaske cha mo ta gbu geru Jesucristo giti alin trage ba ulita ole, cha mo ta gbu trate Jesucristo jokeda kruge trage ba ole, cha tadukalin Jesucristo jokeda kruge gerua chke uñale trate ba ulitage. 3 Cha jo chke geru dbe ba ulitaske ta kwachie ole, cha ta jwatu mo giti geru Jesucristo giti dbe baske, sugedu chage cha me kira molen, sugedu chage cha me ñage Chube gerua Jesucristo giti trage trate ba ole. 4 Agwa cha mo ta gbu geru Jesucristo giti trage ba ulita ole, cha geru Jesucristo giti du ba ulitaske cha me gerudu ba ole kwian geru uñanga kweri gerule kare ene ba ta jwlitedale gerudi. Agwa cha me agedu ene, cha mo ta chugu ngwadi Chube Oñage, ene cha ñadu gerule ba ole Chube Oña kiralla giti me mo kiralla giti, ene Chube Oña ba ta blitu gerudi, 5 ene Chube Oña kiralla giti suge trate bage geru Jesucristo giti e Chube gerua ulia, geru e me geru ngwale kwian nga dba ai giti gerua, me ene dale, ba kle mo ta gbe geru Jesucristo giti gai ulia mo alin, geru e Chube gerua no kiraske. 6 Kwian nu mo ta gbaba sbali geru Jesucristo giti gai ulia, kwian ene ulita nu ta jogeba chke Jesucristo geruadi, kwian ene ole cha geru ma mno Jesucristo giti trage, geru Jesucristo giti me che mo salengwli gerua ni kwian chugagwalla nga dba ai giti gerua, kwian chugagwalla ulita nga dba ai giti gdaite gdaite be joge tangle, ama me chege kwian chugagwallale diali chui tangle. 7 Geru Jesucristo giti, e Chube gerua, geru e kledu Chube ole Chube bebi nga dba ai dodade gire, sbali geru e kledu skwlenre Chube ole kwiange, agwa nege cha kle geru e trage kwian Chubenu ulita ole, Jesucristo giti che ulita Chubenu be toi Chube ole bdagli nga ngaña giti Chube kle ngwadi. 8 Kwian chugagwalla nga dba ai giti ni gdaitege sugedu Jesucristo ulia kwian Chugagwalla ma kweri Jesucristo ulia Chube Kirolla kagaba nga dba ai giti. Sugedu kwian chugagwallage Jesucristo Chube Kirolla, ene ama me Jesucristo gbu kruge ngaña gwadaleda, agwa kwian chugagwalla nga dba ai giti me sugedu amage Jesucristo giti. 9 Me sugedu kwian enege Chube agedu no ngle kwian alin Jesucristo giti, Chube gerua degaba unsuialin gerule be boi ene giti, chada e gerule: “Chube be age no ngle kwian alin bai kaire mo ta dbe no ulia Chube ole, agwa mi suge kwian me Chubenu gdaitege Chube kle age ulita giti, kwian talla giti kwian tañachuge kare ni suge trate kwian gdaitege Chube age giti.” Chube gerua degaba unsuialin gerule ene. 10 Me sugedu kwian chugagwalla nga dba ai gitige Jesucristo giti, agwa che ulita Chubenuge suge Jesucristo giti, Chube Oña che ulita ta gbu suge Chube kle age no ngle che ulita alin Jesucristo giti, uñale trate Chube Oñage Chube kle age ulita giti, Chube Oña Chube talla uñe trate ulita. 11 Kwiange kwian na talla me uñale, kwian agalige alin mo talla uñale, ene kaire kwiange Chube talla me uñale, agwa Chube Oñage alin Chube talla uñale trate. 12 Chube mo Oña ketu che ulita Chubenuge, ene Chube Oña giti suge trate chege Chube kle age no no che alin Jesucristo giti, che salengwli me kle che ta gbe suge ene, Chube Oña alin che ta gbe suge Chube giti. 13 Geru ai cha kle gerule kare ba ole geru e me cha talla me cha gerua, cha me geru e gweale jun mo ta giti gballa cha tañachuge kare, me ene, geru e Chube Oña kle kete chage, Chube Oña kle cha ta gbe geru e trage ba kwian ulita Chubenu ole, Chube Oña kle ba tale Chube Oña kle cha tale kare, ene geru Chube giti cha kle gerule kare suge bage ulita. 14 Kwian me Chubenu, Chube Oña me kle kwian ene tale, kwian enege geru Chube giti me suge ama me geru Chube giti gai ulia, kwian ene kle geru Chube giti gai geru ngwale kare, Chube Oña alin kwian ta gbe suge Chube giti, kwian me Chube Oña molen me ñage suge kwian enege Chube giti. 15 Agwa kwian Chubenu Chube Oña molen ama tale, Chube Oña kwian ene ta gbe suge ulita trate Chube giti, kwian Chubenu talla ene me suge kwian me Chubenuge. 16 Chube gerua degaba unsuialin gerule: “¿Chema che Chugagwalla Chube talla ulita uñe? ¿Chema ñage ama tke tangle? Ni kwian gdaite.” Chube gerua degaba unsuialin gerule ene Chube giti. Ulia kwian gballa me ñage Chube talla uñe, agwa Cristo giti Chube Oña che ulita Chubenu ta gbe Cristo mine, ene che tañachuge Cristo tañachugu kare chagedu kare nga dba ai giti.
1 Cha bitalla Cristo giti, Chube Oña kle ba tale agwa ba me ama chugu ngwadi ba ta gbe kiraske Chube geruadi, malen cha me ñadu gerule ba ole kwian Chube gerua uñanga sbali ole kare, cha gerudu ba ulita ole ta gude cha gerule kirogwa ole kare, ba bebi ta joge chke trate Chube geruadi, ba ulita ta kirogwa kare kirogwa kle tañachuge kare, ene ba ta Cristo geruadi. 2 Kirogwa soli me ñage bligda mno gute, kirogwa soli jusuli alin jai. Ene kaire ba ta kirogwa kare Chube geruadi, ba ta me kledu biale Chube gerua ulita keruchuge, e me ñadu suge bage malen cha me Chube gerua mno tragu ba ole, cha gerudu ba ole geru me mno giti ene geru suge bage, Chube gerua mno me sugedu bage, ni nege Chube gerua mno suge bage dare. 3 Ba me kle Chube Oña chuge ngwadi ba ta gbe suge, ba Chubenu agwa ba kle mo ta gbe tañachuge kwian me Chubenu kle tañachuge kare. Ba ulita Chubenu me kle mo talla me no mlienga, talla me no kle diali ba ulita tale, ba kle kira bate modi, ba kle mo ta dbe me no dabadi daba lle molendi daba kle age no giti. Ba age ene ba kle age kwian me Chubenu kle tañachuge kare kwian me Chubenu ta agekalin kare, ba kle age ene ba me kle mo ta gbe tañachuge age Chube Oña ba ta gbe age kare, malen ba gdaite gdaite kle tañachuge nganake. 4 Ba gweale kle gerule: “Pablo alin gerule ulia, cha Pablo alin gerua gai ulia.” Ba gweale na kle gerule: “Apolos alin gerule ulia, cha Apolos alin gerua gai ulia.” Ba gerule ene ba kle age kwian ulita me Chube uñe kle tañachuge kare kle age kare. 5 Cha Pablo kaire Apolos bonate salengwli lle boanga Chube alin, cha Pablo me ma kweri Apologe, Apolos me ma kweri chage, cha boke lle bo mo kaire kaire Chube gerua amaña dbe Chube cha ta gbu lle boi kare, cha giti Apolos giti ba Chube gerua keruchugu ba geru gau ulia. 6 Cha jo Chube gerua dbe ngeru baske, Apolos jo cha nate geru amaña trage ba ole ene geru sugedu ma no bage, agwa Chube ba ulita ta blitu gerudi, Chube ba ta gbu ene geru sugedu trate ulita bage. E salengwli cha chude tku kare, Apolos chi dreunnga chude giti kare, agwa Chube chude ulita gbu tige kare. 7 Cha Chube gerua dbanga ngeru baske, Apolos ba ta gbanga geru e uñe ma trate. Ni cha boke gdaite ma kweri dabage ba ta gbanga, agwa Chube alin ba ta gbanga suge trate trate ulita geru giti ene ba mo ta blitu gerudi geru gai ulia. 8 Cha Pablo kaire Apolos cha boke salengwli, gdaite me ma no nage Chube gwage, cha boke Chube gerua dbe giti Chube be e ñanalla kete cha bokege lle boi no mo kaire kaire ñanale. 9 Cha gdabonate lle boanga Chube alin Chube gerua amaña dbanga baske, ene cha boke giti Chube gerua jo chke ba ulita tale. Ba ulita Chubenu ba ta dbi kare, Chube gerua chude kare, Chube gerua jo chke ba tale salengwli chude joge chke dbiske kare. Kwian chude ngama mananga chude manade no ama chude juge nate, ene chude ñage tige ma no. Ene kaire cha boke kle ba ulita chudaboi Chube geruage ene Chube age no ba tale, ene bedre bedre Chube ba ta gbe ma trate ama geruadi. Kaire ba ulita Chubenu ba ta u kare. 10 Kwian u dodanga no noge uñale u dodade no, ngeru ama bubita no tke kejre dbige u dodangwa. Ene kaire cha Chube gerua dbanga no, Chube cha gau Chube ta ketu chage, ta e amaña giti cha ba ulita ta gbu chke trate Jesucristo giti, e salengwli kwian u dodanga no bubita no tkanga kejre dbige kare. Nege kwian daba tkanga tangle kle baske ba chudaboi geru giti, ene geru kle suge ma trate bage, ene ba ta ñage chege ma kiraske Chube geruadi salengwli u chege dodaba no kare. Kwian ulita bai kaire kle ba tke tangle geru giti mo ta gbadale geru no ulia alin trage ba ole. 11 Kwian geru amaña kete bage Jesucristo giti cha geru ketu bage kare, kwian ene kle age no kle gerule ulia, Jesucristo alin giti kwian chege Chubenu. 12 Kwian geru nganake dbe bage, geru e ngwale, e me jage, e me ba ta gbe suge Chube giti. Agwa kwian geru ulia Jesucristo giti dbe bage trage ba ole, geru e jage diali chui tangle, geru e ba ta gbe suge ma no Chube giti. 13 Jesucristo chieni chuiage be chke uñale trate trate kwian Chube gerua dbanga ulitage ama geru Jesucristo giti du no kwiange Chube takalin kare o me, chui ege Chube be gerule trate trate ama gerua dbanga ulita ole bai geru Jesucristo giti du no ama alin nga dba ai giti bai me geru Jesucristo giti du no ama alin. 14 Kwian Chube gerua dbanga bai kaire Chube gerua du no Chube alin nga dba ai giti daba na ta gbe suge Jesucristo giti, geru dbanga ene giti daba na geru Jesucristo giti gau ulia, daba ene chege Chubenu diali chui tangle, chui bdaglige geru dbanga no ene be geru Jesucristo giti du no ñanalla gai. 15 Agwa kwian Chube gerua dbanga me Chube gerua du no Chube alin nga dba ai giti, geru dbanga ene Chube gerua du ngwale, geru dbanga e giti daba na me Jesucristo uñu, chui bdaglige ama agali be chege toi Chube ole diali, agwa Chube mi gerule no ama giti, ama mi Chube gerua du ñanalla gai. 16 Uñale ba ulita Chubenuge Chube alin ba ulita talla Chube toingwalla, Chube Oña kle toi ba tale, ba tachkedale e giti. 17 Kwian gweale ba Chubenu ta gbe siere Jesucristoge ba ta gbe age me no Chube dollale, Chube be ji gbe kweri kwian ene alin. Chube toingwalla no trate, ba ulita Chubenu ba talla Chube toingwalla, malen ba agali mo ta manadale no trate diali Chube alin. 18 Ba ulita gdaite me mo anblitadale agali, ba ulitaske gweale gdaitege suge moge geru nga dba ai giti uñanga tanre, geru e uñe giti kwian tañachuge ama ta ngle molen, ma no kwian ene mo gbe me geru uñanga kare, ene ama ñage tachke ma ngle Chube gerua giti, ene kwian ta molen ulia. 19 Kwian ta ngle molen geru nga dba ai giti alin ole, Chube gwage e ngwale e me ñanaske. Chube gerua degaba unsuialin gerule kwian ta ngle ole giti, chada e gerule: “Kwian ta ngle molen geru nga dba ai giti alin ole tañachuge ama ñage age ulita tañachuge kare, agwa Chube me kwian ene chuge ngwadi age kwian ta agekalin kare.” 20 Kaire Chube gerua degaba unsuialin gerule: “Kwian ta ngle molen geru nga dba ai giti alin ole, kwian ene talla Chube gwage ngwale.” Chube gerua degaba unsuialin gerule ene kwian ta ngle ole giti. 21 Chube alin kwian ta gbe chke ngle, malen ni kwian gdaite gerudale no mo salengwli giti, ma no gerule no Chube giti, Chube alin kwian ta gbe chke ngle no. Ba ulita Chubenu ni ba gdaite gerudale dare no kwian gweale giti, ba me gerudale dare: “Pablo alin gerule ulia, cha Pablo alin gerua gai ulia.” Me gerudale: “Apolos alin gerule ulia, cha Apolos alin gerua gai ulia.” Me gerudale: “Pedro alin gerule ulia, cha Pedro alin gerua gai ulia.” Ba ulita me gerudale ene cha gdamai giti ni kwian Chube gerua dbanga na gweale giti: “Ama alin geru ulia dbanga, malen cha ama alin gai ulia.” Ba me ñage gerule ene. Ba ulita Cristonu, Cristo Chubenu, Cristo alin giti Chube kle age tanre no ba ulita amanu alin. Cha Pablo kaire Apolos kaire Pedro cha gdamai salengwli, cha me ma kweri Apologe ni Pedroge, ni gdaite ma no daba nage, Chube cha gdamai gau Cristo cha gdamai kagu ama gerua amaña dbe ba ulitaske, Cristo giti cha gdamai lle boanga Chube alin ba ulitaske. Kaire Cristo giti lle ulita no kle nga dba ai giti ba ulita alin toigda. Cristo giti ba ñage toi no nga suga no ole nga dba ai giti. Cristo giti ba me tañachugadale jogeda giti, uñale bage ba jogeda ba be joge toi Chube ole. Cristo giti ba ñage toi no Chube takalin kare nga dba ai giti. Cristo giti ba ñage kle biale chui manade gire ba be kle Chube ole diali chui tangle.
1 Ba ulita tachkedale cha ulita Jesucristo gerua dbanga bage giti, ba cha ulita gadale ulia Jesucristo gerua dbangale lle boangale Cristo alin. Chube cha ulita gau gbu lle boi mo alin daba tke tangle Chube gerua Cristo gitige, ene cha ulita giti geru Cristo giti ñage chke uñale kwian me geru uñege. 2 Suge trate cha ulitage Chube kwian gai lle boi mo alin, kwian ene ulita mo ta gbadale lle boi no ulita diali Chube alin Chube takalin kare. 3 Ba gweale gerule cha giti cha kle lle boi no o cha me kle lle boi no Chube alin, cha me tallade e giti, ni cha tallade kwian na ulita gerule no o gerule me no cha kle age giti Chube alin, ni cha agalige ñage suge trate mo giti cha kle lle boi no o cha me kle lle boi no Chube alin. 4 Cha tale cha suge cha me jiske cha kle lle boi no Chube alin, e me gerule Chube gwage cha kle age no trate, uñale chage che Chugagwalla Cristo alin allabi ñage gerule cha ole cha kle lle boi no Chube alin o cha me kle lle boi no, ama alinge uñale trate. 5 Cristo alinge uñale trate kwian lle boanga Chube alin talla mine, Cristo alin ñage gerule trate kwian ene ulita kle age giti kwian kle lle boi no Chube alin o me kle lle boi no, ni kwian gdaite ñage gerule trate daba na giti kle lle boi no Chube alin o me kle lle boi no. Malen cha gerule ba ulita ole, ba me gerudale cha ulita lle boanga Chube alin giti blike kle lle boi no o me kle lle boi no Chube alin, ba manadale, nege cha ulita lle boanga Chube alin talla ulita kle skwlenre bage agwa che Chugagwalla Cristo chieni chuiage kwian lle boanga ulita talla ulita be chke uñale nate, chui ege Cristo be gerule trate ulita kwian lle boanga Chube alin ulita giti bai lle bo no Chube alin bai me lle bo no Chube alin, chui ege Chube be gerule no no lle boanga no ulita ole lle boanga lle bo no ama alin giti. 6 Cha bitalla ulita Cristo giti, cha gerudu tanre ngeru ba ole mo giti kaire Apolos giti, e giti cha ta ba chudaboakalin suge trate ba me ñage daba Chubenu chugagwalla gdaite gai ma no daba Chubenu chugagwalla nage. Cha takalin suge trate bage ba ulita agedale Chube gerua degaba unsuialin gerule kare, ba mo ta gbadale age chada e alin gerule kare, ene ba gdaite gdaite me daba Chubenu chugagwalla gdaite gai ma no daba Chubenu chugagwalla nage, ene ba ulita Chubenu chege tañachuge salengwli, ba ulita chege mo ta dbe no daba na ulita ole. 7 Ni ba gdaite tañachugadale mo giti ma no ma kweri daba na ulitage, ba agali me mo dodadu, ba agali me ta ketu moge age ba kle age kare, Chube ba dodadu Chube ba ta gbu mo kaire kaire ama takalin kare. Chube ta ngle ketu bage age gweale ma no daba nage e me gerule ba ma no daba nage, me ene, e gerule Chube ta no ole agedu no ba alin, ba gerudale no no Chube alin giti allabi. 8 Agwa ba ulita me kle mo ta dbe ene gerule no Chube alin giti, ba gweale kle tañachuge no kle gerule no mo alin giti, bage suge ba alin allabi no kweri ta ngle molen, bage suge ba Chube gerua ulita uñe trate, bage suge ba Chube gerua ulita mauña, ba tañachuge ba alin allabi ñage kwian ta gbe geru e giti, bage suge cha ulita Jesucristo gerua ketanga kwiange cha ulita kwian ngwale, ba me takalin cha ulita ba chudaboi dare geru giti. Ulia ba Chube gerua ulita uñe trate ba geru e ulita mauña, cha alin e no, ba ene gire cha ñage mo ta dbe nga suga no ole Chube gerua dbe kwianske ule ba ole, agwa me ene, kwian Chube gerua uñanga ulia ama me kwian ene ba kle tañachuge kare. 9 Chage suge Chube kle cha ulita gbe Jesucristo gerua ketanga ba nate. Cha ulita Jesucristo gerua ketanga bebi toi no ba kle toi kare, kwian kle ba gai kwian no kweri kare, agwa kwian me kle cha ulita gai ene. Cha kle geru Cristo giti trage kwian ole, kwian kle cha ulita gbe boi daga ngwale geru e dbe giti, kwian ta cha ulita gwakalinda, kwian nga dba ai giti kaire lle boanga Chube alin nga ngaña giti gwage cha ulitadi cha kwian me no kare. 10 Ba ulitage suge ba ta ngle molen, ba tañachuge ba geru ulita Cristo giti uñanga trate, agwa cha ulita geru Cristo giti traganga, cha geru Cristo giti dbe giti ba tanre gwage chadi cha kwian ngwale me ta molen kare. Ba ulita kiraske kwian na gwage, agwa cha ulita kira me ba gwage. Kwian na gerule no ba giti ba gai dage, agwa cha ulita me ene ba gwage, ba gerule me no cha ulita giti cha ulita gai kwian ngwale kare. 11 Cha ulita kle boi tanre daga ngwale, diali cha ulita bli chuge tanre, sie chuge tanre, ñometra me kaire mo ngama tkagda, u me toingwa, kwian age me no tanre cha ulita ole, 12 cha ulita mo kira giti skwatige sketangle lle boadale mo kodi ene cha ñage bligda molen. Kwian cha ulita oña boi daga ngwale, gwangoguda cha gerule no kwian ene ole me ama oña boi. Kwian chage cha ulita nate cha ulita gbale boi daga ngwale, cha ulita mo ta gbe jage, cha me tallade kwian kle age me no cha ole giti. 13 Kwian gerule me no cha ulitadi, cha ulita jainnga kwian ene kalen ta no ole, cha ulita gerule no gwangoguda. Kwian ulita cha ulita gai lle me no mliabanga kare, cha ulita ngwale kwian ulita gwage, cha me ñanaske kwian ulita alin. Cha ulita ole sbali kledu boi ene, kle boi kaire nege tangle cha ulita ole. 14 Cha kle chada ai degange ba ulita alin cha kle gerule kare ba ulita ole, cha me kle ba ta gbe ibule ba kle age giti, agwa cha kle ba chudaboi ba ta gbe suge tachke gwangerugudba Chube takalin kare, cha kle gerule kare ba ole mo kirogwallanu kare, cha no no ba ulita ole. 15 Kwian ngle ngle kle ba tke tangle Cristo giti, agwa cha geru Jesucristo giti du baske ma ngeru kwian daba tkanga tangle ulitage, malen cha alin allabi ba ñenua kare ba ulita ta gbanga geru Jesucristo giti gai ulia. 16 Ba ulita cha kirogwalla kare Jesucristo giti, cha ba ulita ñenua kare, cha takalin ba ulita mo ta gbe chage Jesucristo ole cha kle chage kare. 17 Ba ulita chagedale cha kle chage kare mo ta gbe Jesucristo ole mo ta gbe age Jesucristo takalin kare. Nege cha me kle baske ba me ñage gwage chadi cha kle chage mine ulita, malen cha Timoteo kagu ba ngwadi ba ulita ta gbe chke cha giti, Timoteo cha kirolla kare che Chugagwalla Jesucristo giti, cha no no ama ole, ama diali kle mo ta dbe no cha ole kaire Chube ole. Timoteo be gerule ba ulita ole cha kle gerule mine kwian Jesucristo gaba ole nga ulitage, baini kaire cha kle joge chke ngwadi cha kle kwian Jesucristo gaba tke tangle Jesucristo giti, Timoteo be gerule e giti ba ulita ole. 18 Ba ulitaske gweale kle tañachuge ba kle age no ulita, ba gweale ene suge kweri moge gerule no mo giti, ba ene kle tañachuge cha kennga joge chke agali baske gerule ba ole ba kle age giti malen cha Timoteo kagu. Agwa me ene ba gweale kle tañachuge kare. 19 Chube takalin, me sbali cha be joge llani ba ulitaske, mo gwagwa giti cha be ba kwian kle tañachuge ene uñe, ene be chke uñale chage ulia ba kle gerule Chube kiralla giti o ba kle gerule alin ba kle tañachuge kare gballa mo ta giti. 20 Kwian kle mo ta gbe Chube ole Chube gai mo Chugagwallale ulia, kwian ene me gerule alin no mo giti kle age giti, kwian ene kle Chube kiralla gai mo ta gbe age no diali Chube takalin kare. 21 ¿Ba ulita alin bai ma no? ¿Ma no ba alin cha joge chke llani baske ka boi mno ba ole ba kle age giti? ¿O ma no ba alin cha joge chke llani gerule ba ole taingwli ta no giti ba kle age giti?
1 Chku uñale chage daba gweale giti, daba e geru tragu cha ole ba ulita Chubenuske kwian gdaite kle toi mo ñenua muiralla ole mo muiralla kare, e me no me no, ni kwian me Chube uñe mo ta gbe age toi ene ama kle toi kare. 2 Ba ulitaske kwian gdaite kle age ene me no me no, ni ba gdaite kle tallade e giti, ba ulita kle mo ta dbe tañachuge ulita kle chage no, agwa me ene. Sugedale ba ulitage ulita me kle chage no, ba ulita mo ta dbadale olire tanre kle boi giti baske. Gdaite kle toi mo chebigdalla ole mo muiralla kare kle mo lite ule ba ulita ole Chube geruadi, ba ama kagadale siere blike ba ulita kle mo litege. 3 Ulia cha me kle ba ole ule llani ba ulita kle ngwadi, agwa chage suge mo tale cha kle ba ulita ole llani kare, cha kle tañachuge tanre kle boi baske giti. Cha gerule ba ole chada ai giti cha kle ba ole ule llani kare, che Chugagwalla Jesucristo kiralla giti cha gerule trate ba ulita ole onbre gdaite giti kle toi mo chebigdalla ole mo muiralla kare, onbre e jiske Chube gwage, ba mo lite chuia gbadale gerudale onbre jiskenga e ole, chui ege cha talla be kle ba ole, che Chugagwalla Jesucristo kiralla giti ba onbre e kagadale siere ba ulita Chubenuge, 5 ba ama chugale ngwadi sugekare toi dolla Satanás takalin kare. Gire onbre e be age tanre me no Satanás takalin kare, e giti ama be boi tanre daga ngwale, boi daga ngwaleske ama ñage tachke Chube giti mo ta blite Chube ole joge siere ama kle age me noge, ene che Chugagwalla Jesucristo chieni chuiage ama oña be joge toi Chube ole diali chui tangle. 6 Ba ulitage suge ba kle age no ulita, ba kle tañachuge ba ulita kwian no trate, agwa me ene ba kle tañachuge kare, baske kwian agenga me no kle. Uñale ba ulitage levadura sidri harina ngleske harina ngle ulita gbe sie kweri, ene kaire kwian gdaite agenga me no kle baske, bedre bedre kwian ene talla me no joge chke ba tale, ene bdagli ba ulita chege ta me no ole age salengwli kwian ene kare. 7 Ba ulita bebi Chube uñe gire ba ulita talla sugaska, ba agedu me no diali ba talla sugaska ba ta gbu age kare. Jesucristo jokeda che ulita agedu me no giti, malen nege che ñage toi nganake age no Chube takalin kare. Cha gerule ba Chubenu ulita ole, Jesucristo agedu ba alin giti ni lle gweale me no kledale ba tale, ba ulita mo ta gbadale ta jogenga mo talla sugaska ulitage, ba ulita mo ta gbadale age no diali Chube takalin kare. Ba mo ta gbe ene gire nga be suga no badi, ba mi chage dare tañachuge me no age me no tanre ba agedu ngeru kare, ba be chege age no gerule no ta no trate ole Chube takalin kare. 9 Cha chada degangu ba alin ngeru, chada e giti cha geru gbu ba ulita alin ba me chegedale ule ni sugeti alin kwian agenga me no ai kare ole: muinga onbre kle mo chuge ke giti, onbre toi mo chebigdalla ole mo muiralla kare. Cha geru gbu ba ulita alin ba chegedale sugekare kwian ene kare ulitage diali. 10 Cha gerudu kare ba ole cha me kledu gerule kwian me Chube gaba giti, mo chuganga ke giti, mo ta gbanga takalin lle ulitage mo alin, skwe boanga daba ngeru, lle oña ngwale ganga mo chubeale. Cha me kledu gerule ba ole ba chegedale siere kwian ene ulitage, me ene, ba joge siere kwian agenga me no ene ulitage ba me ñage chege toi nga dba ai giti, kwian agenga me no ene diali be kle. 11 Cha me kledu gerule ba ole kwian ene giti, agwa cha kledu gerule kwian kle mo gai dabale Jesucristo giti gire ama chage nganake age me no ulita tanre, mo chuganga ke giti, mo ta gbanga takalin lle ulitage mo alin, lle oña ngwale ganga mo chubeale, geru jinanga dabadi, lle gage janga diali, skwe boanga daba ngeru. Kwian ene kle mo lite ba ole, kwian ene giti cha kle gerule, ba ulita kle mo ta gbe chage ulia Chube ole me chegedale ule kwian ene ole ni blire ule. 12 Kwian me Chubenu kle age me no me kle mo lite ule ba ole Chube geruadi, kwian ene giti che Chubenu me talladale, Chube be ji gbe kwian ene ulita alin. Agwa kwian kle mo lite ule ba ole diali Chube geruadi, kwian ene bai kaire kle mo ta gbe age me no diali me mo ta gbe joge siere age me noge kle ba ulitaske kle mo lite diali ba ole, kwian agenga me no ene, ba ama kagadale siere ba ulita kle mo ta gbe chage ulia Chube olege.
1 Ba ulita Chubenu ba gweale ta daba gbakalin mo gwallaske daba agedu ba dollale giti, ba daba ene dbadale daba Chubenu chugagwalla ngwadi gbale mo gwallaske. ¿Mineade ba kwian Chubenu me kle tachke e giti? ¿Mineade ba kwian Chubenu kle daba na Chubenu dbe gbale mo gwallaske chugagwalla me Chubenu gwa giti? 2 Bdagli che ulita Chubenu be kle ule Chube ole Chube be che gbe gerule kwian me Chubenu ulita giti ama agedu me no giti, ¿ba me tachke e giti? Ba ulitage uñale Chube be ba gbe gerule kwian me Chubenu ulita giti bdagli, e ma kweri agwa Chube be ba gbe age. Kle boi ba ulitaske nga dba ai giti, e soli, ¿mineade ba me tachke geru trage modi mo gwallaske daba age ba dollale ole? 3 Kaire uñale ba ulitage bdagli che Chubenu ulita be chege ma kweri lle boanga Chube alin nga ngaña giti ulitage, che be chege ama kaganga. Chube be kwian amanu gbe age ene chui bdaglige, nege ulita kle boi nga dba ai giti daba Chubenuske che ña e trage modi taingwli. 4 E ulita uñale ba ulitage ¿lledale ba gweale kle daba Chubenu dbe chugagwalla me Chubenu ngwadi gbale mo gwallaske daba agedu ba dollale giti? E me no age ene, chugagwalla ene me ñage daba Chubenu chudaboi age no modi Chube takalin kare. 5 Ba ibudale tanre ba kle age giti daba Chubenu ole daba dbe chugagwalla me Chubenu ngwadi. Ba ulitaske daba gweale ta molen ñage gerule daba agedu ba dollale ole geru trage no modi daba ole daba kle age giti, daba e kare kle ba ulitaske, daba age gweale ba dollale ba daba e dbadale daba Chubenu ta molen ngwadi geru tragadale ta no giti ama gwa giti daba agedu ba dollale giti. ¿Mineade ba me kle mo ta gbe tañachuge age ene? Cha gerule ba ole, ba agedale moske no, agwa ba me kle age. 6 Ba gweale kle kira bate modi moske daba na Chubenu ole, ba me kle mo ta gbe geru trage modi taingwli geru e chuge ngwadi ngwedi dabage mo ta gbe no daba ole. Ba me kle kira bate modi moske alin ngmadi, agwa ba Chubenu kle joge daba Chubenu gbe jiske chugagwalla me Chubenu gwa giti. ¡Ba me ñage age ene! 7 Ba ulita Chubenu gweale kle kira bate modi moske e me no, ene ba ulita mi ñage chage no gwangerugu kwian gwage Chube takalin kare. Daba kle age gweale ba dollale, ba me talladale e giti, daba skwe boi ba ngeru ba me daba e gbadale mo gwallaske ni chugagwalla Chubenu ngwadi, ma no ba mo ta gbe chege kamne me kira bate daba ene ole me mo ta gbale blike skochie daba ene ole, ba mo ta gbadale age no ama alin diali. 8 Agwa ba me kle mo ta gbe age no ene, ba agali kaire kle age ba daballanu Jesucristo giti dollale, ba agali kle skwe boi ba daballanu Jesucristo giti ngeru. 9 Ba ulitage uñale trate kwian agenga me no daga ngwale me ñage joge toi Chube ole nga ngaña giti, ba ulita me mo chugadale ngwadi age me no, ba me ñage tañachuge ba chege age me no diali ba be ñage toi Chube ole, me ene, ba be tañachugale ba tañachuge kare, cha gerule ba ulita ole, kwian age ai kare ulita me ñage joge toi Chube ole bdagli: Onbre muinga mo chuganga ke giti. Kwian lle oña ngwale dodaba mo kodi gai mo chubeale. Muinga onbre nu mo jwanba mo chuge ke giti. Onbre chage mo salengwli ole onbre kle chage muinga ole kare, muinga chage mo salengwli ole muinga kle chage onbre ole kare. 10 Kwian skwe boanga daba ngeru. Kwian mo ta dbanga no igi alin ole, ama takalin lle tanrege mo alin. Kwian lle gage janga diali. Kwian geru jinanga dabadi daba na ole. Kwian daba na anblitanga agedale me no daba ole. Kwian ulita agenga me no ene diali, ni gdaite ñage joge toi Chube ole nga ngaña giti. 11 Ba gweale kledu age ene ngeru ba bebi Jesucristo gai suiale, agwa nege tangle Jesucristo gai giti ba agedu me no ene ulita Chube talla mliunga, ba chegu no trate Chube gwage, ba tiun gitiru ji chugege ba agedu me no ulita gdale che Chugagwalla Jesucristo giti, kaire mo Oña giti Chube ba ta gbe toi no gwangerugu trate Chube alin. 12 Ba ulita Chubenu agwa ba ulita me kle age Chube alin Chube takalin kare diali, ba gweale kle gerule mo giti: “Cha ñage age ulita cha takalin kare.” Ba gweale kle tañachuge e no agwa suge chage ulita me no cha alin age, ulita me cha ta gbe no Chube ole. Cha mo chuge ngwadi age ulita cha ta agekalin kare cha be chege age me no diali, cha mi ñage joge siere age me noge, malen cha me mo chuge ngwadi age cha takalin kare. 13 Che ñage gerule bligda giti kaire che kde giti: “Bligda kle che alin gutadale, che bligda gute gire bligda joge che kdege.” Ulia bligda che kde alin che kde bligda alin, e ulita ene agwa lle e boke mi chege diali alin, chui be chke gire Chube be bligda ulita kagenga be che kde ulita kagenga. Che ñage gerule ulia che kde giti che kde bligda alin, agwa che me ñage gerule che jegwale giti che jegwale mo chuge diali ke giti alin. Me ene, che me mo jegwale chugadale ngwadi mo chuge ke giti, che jegwale me mo chugadale ke giti alin, che jegwale che Chugagwalla Jesucristo alin. Jesucristo che jegwale dodadu mo alin lle boadale no ama alin, Jesucristo kira kete chege lle boi no ama alin ama takalin kare. 14 Chube mo kiralla giti che Chugagwalla Jesucristo gbuni gwade, Chube be age ene kaire che ulita amanu mi kle gwade ole, chui bdaglige ama be che ulita gbeni gwade. 15 Ba ulita Cristo gaba ulia, uñale ba ulitage ba jegwale Cristo jegwalenu kare, ¡ba ulita tachkedale e giti! Ba kwian onbre Cristonu me ñage tañachuge ba ñage tien ule muinga chagenga onbre na na nate mo chbadanga ole, ba kwian onbre Cristonu me ñage tien ule muinga ene ole, ¡e me no me no! 16 Uñale ba ulitage Chube gerua degaba unsuialin gerule onbre tien ule muinga ole giti, chada e gerule: “Onbre muire, ama gdabonate chege kwian gdaitre alin kare.” Ba tachkedale e giti. Muinga chagenga onbre na na nate mo chbadanga, ba kwian onbre Cristonu tien ule muinga ene ole ba chege gdaitre alin kare ama ole, ba me ñage age ene, ba Cristonu, ba mo ta gbale chege chage trate Cristo ole. 17 Kwian ulita bai kaire Chugagwalla Cristo gai ulia, kwian ene Cristonu, kwian mo ta gbe ule Cristo ole kwian ene chege gdaitre alin Cristo ole, 18 kwian ene mo ta gbadale age no diali Cristo takalin kare me mo chugale ngwadi age me no. Ba ulita muirenu onbrenu mo ta gbadale chege sugekare diali mo chuge ke gitige. Kwian age me no ulita sugekare mo chuge ke gitige, e me no agwa e me kwian jegwale gbe me no salengwli mo chuge ke giti kare, kwian mo chuge ke giti kwian jegwale gbe chege me no, kwian ene ta gbe chege me no sugaska agali Chube gwage. 19 ¿Me uñale ba ulita Chubenuge ba jegwale kaire ba talla u kare Chube Oña alin? Chube mo Oña ketu bage toi ba ulita tale, ba mo jegwale mo talla manadale no trate Chube Oña alin. Jesucristo giti ba Chubenu, ba me mo mauña agali, 20 ba jegwale ba talla ulita Chubenu, Chube Cristo ketu gwaleda ba agedu me no ulita giti malen ba ulita me mo jegwale mo talla chugadale ngwadi age me no dare, ba mo ta gbadale diali age no trate Chube takalin kare.
1 Nege cha jainnga ba kalen ba chada degu giti, ba chada degu geru kadadale chage geru tanre giti. Ngeru cha gerule ba ole mo jwen giti: Ma no kwian onbre alin onbre ulita me mo jwen muinga ole. 2 Agwa ulia mno muinga alin onbre alin toi gballa, diali onbre muinga takalin mo chuge ke giti malen ma no muinga onbre mo jwandale, onbre gdaite gdaite muinga monu alin toidale ole mo kaire, muinga gdaite gdaite onbre monu alin ole toidale mo kaire. 3 Muinga mo jwanba onbre ole muinga jegwale ulita me muinganu gballa, muinga jegwale mo ñengulallanu, ene kaire onbre jegwale ulita mo muingallanu. Muinga me monu gballa, onbre me monu gballa, muinga mo ñengulallanu, onbre mo muingallanu. Malen onbre mo ta gbadale tien ule mo muingalla alin ole, ene kaire muinga mo ta gbale tien ule mo onbrella alin ole. 5 Me no onbre me mo muingalla chuge ngwadi tien ule mau ole, me no muinga me mo ñengulalla chuge ngwadi tien ule mau ole. Onbre muinga gdabonate gdaitre alin kare, ama gdabonate ña mo ta gbe me tien ule ene chui gai gerungwa Chube alin ole, chui e joge tangle ñage tienni ule, onbre me ñage chege sugekare diali mo muingallage, onbre chege sugekare mo muingallage dolla Satanás ñage ama boke ta gbe age me no, malen onbre muinga chegedale ule diali. 6 Cha me kle gerule ba ulita mo jwandale, agwa ba ñage mo jwen ba takalin kare bai ma no ba alin. 7 Cha alin suge ma no kwian ulita me mo jwen, ma no kwian ulita chege cha kare gballa me mo jwen, agwa Chube kwian gdaite gdaite talla jigu mo kaire kaire, gdaite tañachuge nganake, na tañachuge nganake, malen kwian ñage age kwian tañachuge kare bai ma no mo alin. 8 Kwian biale muire onbre me mo jwanba, kaire muinga chegeba oli mo onbrellage onbre chegeba oli mo muingallage, cha alin ma no kwian ene ulita chege gballa cha kare. 9 Agwa onbre diali tañachuge muinga nate mo alin, muinga diali tañachuge onbre nate mo alin, ma no mo jwen me chege tañachuge alin onbre muire nate muire onbre nate. 10 Agwa muinga nu mo jwanba onbre ole, onbre nu mo jwanba muinga ole, kwian ene ulita alin cha geru gbe, geru e me cha gerua e Jesucristo gerua, Jesucristo kledu nga dba ai giti ama geru e jigu kwian alin, Jesucristo takalin muinga mo jwanba me mo ñengulalla chuge ngwadi. 11 Agwa muinga mo ñengulalla chuge ngwadi, muinga ene me mo jwandale onbre na ole, chegedale toi gballa, kaire ñage mo ta gbeni no naskuni mo ñengulalla ole. Ene kaire onbre me mo muingalla chugadale ngwadi. 12 Cha ta gerukalin gweale ba ulita ole, ai me Chugagwalla Jesucristo gerua, ai cha kle tañachuge kare: Daba gweale Chubenu muingalla me Chubenu me ta mo ta blitakalin Chube ole agwa muinga mo ta gbe toi ñengulalla ole gwangerugu, onbre Chubenu me ñage muinga ene chuge ngwadi. 13 Kaire muinga Chubenu ñengulalla me Chubenu me ta mo ta blitakalin Chube ole agwa onbre mo ta gbe toi muingalla ole gwangerugu, muinga Chubenu me ñage onbre ene chuge ngwadi. 14 Muinga Chubenu ñengulalla me Chubenu, muinga giti Chube age no onbre alin onbre ñage Chube uñe muinga giti, kaire onbre Chubenu muingalla me Chubenu, onbre giti Chube age no muinga alin muinga ñage Chube uñe onbre giti. Malen muinga Chubenu chegedale toi mo ñengulalla me Chubenu ole, onbre Chubenu chegedale toi mo muingalla me Chubenu ole, ama boke chege ule giti Chube age no ama olia alin kaire, ama olia ñage Chube uñe. 15 Agwa onbre me Chubenu ama ta jogekalin siere mo muingalla Chubenuge, muinga me Chubenu ta jogekalin siere mo ñengulalla Chubenuge, me ta toikalin ule, muinga Chubenu mo ta gbadale mo ñengulalla me Chubenu chuge ngwadi joge, onbre Chubenu mo ta gbadale mo muingalla me Chubenu chuge ngwadi joge, ma no age ene me chege kira bate toi ule giti, Chube ba ulita gau mo alin toidale no modi me kira batadale modi. 16 Cha gerule ba muinga Chubenu ulita ole bai kaire mo ñengulalla me Chubenu, bage me uñale ba ñengulalla me Chubenu be Chube uñe ba giti o me, malen ba ñengulalla ta jogekalin siere bage ma no ba ama chuge ngwadi joge me chege kira bate toi ule giti. Kaire cha gerule ba onbre Chubenu ulita ole bai kaire mo muingalla me Chubenu, bage me uñale ba muingalla me Chubenu be Chube uñe ba giti o me, malen ba muingalla ta jogekalin siere bage ma no ba ama chuge ngwadi joge me chege kira bate toi ule giti. 17 Onbre me Chubenu muinga me Chubenu mo jwanba kle toi ule gire Chube onbre e ta gbe Chube gai ulia, onbre e Chubenu me mo ta gbadale joge siere mo muingalla me Chubenuge, onbre e chegedale toi mo muingalla ole mo ta gbe age no diali gwangerugu Chube takalin kare Chube ta ketu amage age kare. Ene kaire muinga me Chubenu onbre me Chubenu mo jwanba gire Chube muinga e ta gbe Chube gai ulia, muinga e Chubenu me mo ta gbadale joge siere mo ñengulalla me Chubenuge, muinga e chegedale toi mo ñengulalla ole mo ta gbe age no diali gwangerugu Chube takalin kare Chube ta ketu amage age kare. Cha kle gerule kare, cha kle geru e gbe kwian Chubenu ulita alin kle mo lite Chube geruadi una kaire kaire nga ulitage. 18 Kwian gweale mo kwara tkabanga kwian israelita suia kare, Chube kwian ene gai mo alin Chube ta kete amage age no Chube alin, kwian ene me tañachugadale mo giti: “Me no cha mo kwara tkabanga, cha mo kwara dodadale naskuni ene cha ñage age ma no Chube alin Chube takalin kare.” Kwian me tañachugadale ene. Ene kaire kwian me mo kwara tkabanga, Chube kwian ene gai mo alin Chube ta kete amage age no Chube alin, kwian ene me tañachugadale: “Cha me mo kwara tkabanga, cha mo kwara tkadalenga, ene cha ñage age ma no Chube alin Chube takalin kare.” Kwian me tañachugadale ene, kwian ulita chegedale Chube kwian ta gbu Chube gai ulia suiage mo ta gbe age Chube takalin kare, me tañachugadale age gweale mo alin ene suge trate Chube gwa giti, me ene dale. 19 Kwian Chubenu me tañachugale mo kwara tkangenga me mo kwara tkangenga giti, agwa ma no kwian Chubenu mo ta gbe tañachuge Chube alin giti Chube gerua gbe gdadi Chube gai dage. 20 Kwian Chubenu ulita chegedale Chube kwian ta gbe Chube gai ulia suiage mo ta gbe age Chube takalin kare. 21 Ba gweale lle boanga mo mauña alin gire Chube ba ta gbu Chube gai ulia ene ba chegu Chubenu, ba me tañachugadale ba tiendale gitiru mo mauñage ene ba ñage mo ta gbe lle boi ma no Chube alin, me ene. Ba me ñage tien gitiru mo mauñage ba me talladale e giti, ba Chubenu. Chui gwealege ba ñage tien gitiru mo mauñage, e no ba alin, ene ba chege sugekare mo mauñage lle boale Chube alin allabi. 22 Kwian bai kaire lle boanga mo mauña alin gire Chube kwian ta gbe Chube gai ulia, Cristo giti Chube kwian ene ta gbe joge siere age me noge, agwa ama chege lle boi mo mauña alin kaire Cristo alin. Kwian na me lle boanga mo mauña alin gire Chube kwian e ta gbe Chube gai ulia, Cristo giti Chube ama ta gbe joge siere age me noge kaire, kwian ene chege lle boangale Cristo alin. 23 Chube Cristo ketu gwaleda ba ulita agedu me no ulita giti, Cristo giti ba Chubenu, Cristo giti Chube ba ta gbu joge siere age me noge. Ba ene, malen ba me mo chugadale ngwadi age naskuni me no kwian takalin kare, ma no ba agedale Chube takalin kare, Chube ba ulita Chugagwalla. 24 Cha gerule ba ulita ole cha daballa cha ibotea Jesucristo giti, ba ulita chegedale Chube ba ta gbu Chube gai ulia suiage mo ta gbe age Chube takalin kare. Baini kaire ba gdaite gdaite Chubenu kle ngwadi kle lle kaire kaire boi, ba ulita mo ta gbadale tañachuge Chube giti diali toi ama takalin kare. 25 Nege cha gerule dare ba ulita ole cha kle tañachuge kare mo jwen giti, Chugagwalla Jesucristo me su geru ai kete chage agwa uñale bage cha ñage gerule ulia Jesucristo takalin kare, sbali Jesucristo agedu no cha alin ama cha gbu lle boangale ama alin, malen e giti ba ñage cha gerua ai gai ulia gbe gdadi. Cha gerule kwian biale onbre muire me mo jwanba giti, 26 chage suge kwian ene chegedale gballa me mo jwen, toi suiale nege tangle kwian Chubenu kle boi tanre daga ngwale Jesucristo gai ulia giti, mnoare toi nege tangle malen ma no me mo jwen. 27 Bai kaire mo jwanba me ñage mo muingalla chuge ngwadi, bai kaire me mo jwanba ma no me muinga jwen. 28 Ba mo jwen e me gerule ba kle age me no, muirenu onbrenu mo jwen e me gerule kle age me no, agwa kwian mo jwanba, lle ma tanre mno boadale kwian ene alin kwian gballage, cha takalin e me boi bai kaire me mo jwanba ole malen cha kle gerule ma no me mo jwen. 29 Cha bitalla Jesucristo giti, cha kle gerule kare ba ulita ole, e giti cha takalin chke uñale bage Jesucristo chieni chuia kle kodi malen ba ulita mo ta gbadale tañachuge ma ngle Chube giti lle boi ma no ama alin. Onbre bai kaire mo jwanba me ñage tañachuge mo muingalla alin giti, kaire onbre mo jwanba mo ta gbadale lle boi Chube alin. 30 Kwian bai kaire kle ta olire me ñage chege mo ta gbe ta olire alin ole, ma no mo ta gbe lle boi ma no Chube alin. Kwian bai kaire kle toi nga suga no ole me ñage chege toi mo ta gbe nga suga no alin ole, ma no mo ta gbe toi nga suga no ole lle boi Chube alin. Kwian bai kaire kle mo ta gbe lle tanre gige mo alin diali, ma no kwian ene mo ta gbe suge me lle molen kare, ma no mo ta gbe lle boi no Chube alin. 31 Che ulita kle toi nga dba ai giti, agwa che me ñage mo ta gbe chege tañachuge mo llea ulita nga dba ai alin giti, lle nga dba ai giti me chege diali chui tangle, malen ma no che ulita mo ta gbe tañachuge Chube giti lle boi no ama alin nga dba ai giti. 32 Ba ulita me mo jwanba ole cha gerule, cha ta ba ta gbakalin suge ma no ba chege gballa me mo jwen, ene ba me chege tañachuge kwian mo jwanba kle tañachuge kare. Kwian onbre gballa me mo jwanba, onbre ene me tañachuge salengwli onbre mo jwanba kare, onbre gballa mo ta gbe lle boi no diali Chube alin Chube takalin kare me tañachuge lle na giti. 33 Agwa kwian onbre mo jwanba me ñage tañachuge lle gdaitre alin giti, ama tañachuge lle boke giti, tañachuge Chube giti agwa kaire tañachuge lle nga dba ai giti nate age no mo muingalla alin. Ene kaire muinga gballa me mo jwanba ni mo jun bitaite onbre ole, muinga ene mo ta gbe lle boi no diali Chube alin Chube takalin kare me tañachuge lle na giti, ta mo ta gbakalin chege lle boi Chube alin ole diali. Agwa muinga mo jwanba me ñage tañachuge lle gdaitre alin giti, ama tañachuge Chube giti, kaire ama tañachuge lle nga dba ai giti nate age no mo ñengulalla alin. 35 Cha kle gerule ai kare ba ulita me mo jwanba ole, e me gerule ba me mo jwandale, me ene, agwa cha ta ba chudaboakalin, cha kle gerule ba ulita ole ba mo ta gbadale toi no trate Chube takalin kare, ene ba ñage mo ta gbe lle boi ma no diali Chube alin. 36 Ñenua gweale tañachuge mo jian biale giti jian mo jwandale, suge ñenuage jian jo juma sbali ama mo jwandale, ñenua kle tañachuge no ene, ñenua mo jian gbe ule onbre ole e me gerule ñenua kle age me no, no mo jian gbe ule. 37 Agwa ñenua na gweale tañachuge mo jian giti me no mo jian mo jwen, ñenua mo ta gbe me mo jian gbe ule onbre ole ñenua kle age no mo jian alin kaire. 38 Ñenua bai kaire mo jian gbe ule onbre ole, ñenua e age no, agwa ñenua bai kaire me mo jian gbe ule onbre ole, ñenua ene age ma no. 39 Muinga Chubenu mo jwanba, muinga ene ñengulalla kle gwade muinga chegedale toi mo ñengulalla ole, muinga me ñage joge siere mo ñengulallage mo jwen onbre na ole. Agwa muinga ñengulalla jogeda, muinga ene ta mo jwankalin onbre na ole ama ñage mo jwen ama takalin kare, ama mo jwandale onbre Chubenu ole. 40 Cha tañachuge muinga ñengulalla jogeda ma no muinga ene me mo jwen, ene nga suga ma no muingadi. E cha kle tañachuge kare, kaire suge chage Chube Oña kle cha ta gbe gerule ene ulita.
1 Ba chada degu cha alin ba ulita geru kadu chage bligda giti ba ñage bligda kaitaba lle oña kwian kle gai chuberege gute o me. Uñale trate che ulitage che ñage bligda ene gute, bligda ene me age me no che ole, bligda ene gute me che gbe me no jiske Chube gwage. E uñale trate chege, e giti che chege tañachuge mo giti che ma no ma kweri Chube gwage daba nage baige suge bligda ene me no ama alin gutadale, che tañachuge ene che me kle tañachuge no daba na alin. Ma no ba ulita mo ta dbe no daba na ulita ole bai kaire bligda ene gute bai kaire me bligda ene gute, ba mo ta dbe ene daba na ulita ole ba kle mo ta gbe age no diali Chube takalin kare. 2 Ba gweale bligda ene gute giti ba tañachuge ba geru uñanga ma no giti dare, ba gweale na me bligda ene gute giti ba tañachuge ba geru uñanga ma no giti dare, agwa ulita tañachuge ba me geru ulia uñe trate. 3 Ma no ba ulita mo ta dbe no salengwli daba na Chubenu ole kaire mo ta dbe no Chube ole, Chube alinge uñale ba talla mine. 4 Ba ulita kle tañachuge bligda kaitaba lle oña kwian kle gai chuberege giti ba ñage bligda ene gute o me. Uñale trate che ulitage lle oña e lle ngwale, lle oña me ñage bligda blite me ñage age bligda ole, malen che me tañachugadale bligda ene giti, uñale chege lle oña e ngwale, me Chube ulia, Chube ulia gdaitre alin. 5 Kwian me Chube ulia uñe kle gerule chube na tanre kle nga ngaña giti kaire nga dba ai giti, kwian ene alin chube ngle kle, kwian ene kle lle tanre ngwale gai mo chubeale, agwa lle e me Chube ulia. 6 Uñale trate che ulita Chubenuge Chube gdaitre alin kle, Chube e che Ñenua. Kaire che ulita Chubenu alin Chugagwalla gdaitre alin kle, e Jesucristo. Chube kaire Jesucristo nga ulita dodadu lle ulita dodadu kwian ulita dodadu, ama giti che ulita kle toi gwade. 7 Chege suge trate Chube gdaitre alin kle, uñale chege lle oña ulita kwian kle gai chubere lle oña e ulita ngwale me kle gwade me ñage age. Agwa che bitalla Chubenu ulitage me suge ene trate, daba gweale me Chube ulia gaba sbali, ama me Chube gerua uñe trate. Daba ene bebi Chube ulia uñe ama lle oña e gau mo chubeale, nege ama kle Chube ulia gai mo Chubeale agwa suge amage lle oña e kiraske ñage age bligda ole, malen ama tale suge me no bligda kaitaba lle oña ege gute, ama bligda ene gute ama agali tañachuge chege me no Chube gwage. 8 Sugedale trate che Chubenu ulitage bligda ene gute o me bligda ene gute e salengwli Chube gwage, Chube me tañachuge e giti. Che geru gaba sbali chege suge che ñage bligda kaitaba lle oña ngwalege gute, e me gerule che ma no Chube gwage daba na me bligda ene gutege, kaire e me gerule daba me bligda ene gute ama chege me no Chube gwage, e me ene dale, che chege no trate Chube gwage che mo ta gbe ama gai ulia giti. 9 Ba ulita Chube gerua gaba sbali ba ta suge ba ñage lle ulita gute agwa daba na me Chube gerua gaba sbali ta me suge ene, ama tale suge me no Chube gwage lle ulita gute. Bage suge ba ñage age ulita agwa ba me agedale daba me geru gaba sbali gwa giti, ba age daba ene gwa giti daba e ñage age ba kle age kare, ba giti daba e kle age mo ta suge dollale naskuni, ama tale suge me no age agwa ama age, ene ba giti daba e ñage mo ta gbe siere Chubege age me no naskuni. 10 Bage uñale bligda kaitaba lle oña ngwalege no gutadale, e bligda no, lle oña me ñage age bligda ole. Bage suge ene agwa daba na me Chube gerua gaba sbalige me suge ene, amage suge me no bligda kaitaba lle oña ngwalege gute, suge amage ama bligda ene gute ama kle age me no Chube dollale. Daba ene gwa giti ba blire bligda kaitakle lle oñage ngwadi, daba gwage badi age ene, ama tale ama be chege tañachuge tanre ba kle blire giti gire ama be age ba kle age kare, ama tale suge ama bligda ene gute ama kle age me no Chube dollale malen ama mi bligda ene gute ta trate ole, ene ba kbiale daba ene kle age mo ta suge dollale naskuni. 11 Ba kle tañachuge kare ba age daba na gwa giti, daba e ñage tañachuge me no, ama ñage mo ta gbe siere Chube geruage ba kle age giti, ma no ba me agedale, daba e alin Cristo jokeda, ama Cristonu, Cristo agedu no daba e alin kaire, me no ba daba ta gbe tañachuge me no joge siere Chube geruage bligda gute giti. 12 Uñale bage daba na alin me no bligda kaitaba lle oñage gute agwa ba lle ene gute dare daba gwage, ba age ene ba kle daba e ta gbe mo ta suge dollale naskuni, ba kle age ene ba me kle age me no daba ene alin ole ba kle age me no Cristo dollale. 13 Ulia suge chage ene: Cha kle blire giti cha daba gbe siere Chube geruage, suge chage cha kle age me no ama ole bligda giti, ma no cha me bligda ene gute dare, ene daba me geru gaba sbali me tañachuge me no, ene ama mi joge siere geru uliage cha blire giti. Che gdaite gdaite tañachugadale no no ene ulita daba me Chube gerua gaba sbali alin.
1 Cha Jesucristo gerua ketanga, kwian ngwale me cha gau geru Jesucristo giti ketangale kwian na ulitage, ni kwian gdaite kle cha kage, che Chugagwalla Jesucristo kle cha ta gbe gerule ama giti. Jesucristo agalidi mo gwagwa giti cha gwagedu, ama cha gau geru amanu ketangale kwian ulitage malen cha ñadu geru amanu kete ba ulitage, ene cha giti ba mo ta blitu Jesucristo gai ulia. 2 Kwian gweale kle gerule me no cha giti, kle gerule cha me Jesucristo gerua ketanga ulia agwa ba ulitage sugedale trate trate cha Jesucristo gerua ketanga ulia, cha giti ba ulita geru ulia Jesucristo giti uñu malen ba ulitage bai kaire nu geru gabage sugedale cha me kwian ngwale kwian na kle tañachuge kare. 3 Kwian kle gerule cha dollale cha kwian ngwale cha me Jesucristo gerua ketanga ulia, kwian kle tañachuge ene giti cha gerule, 4 geru dbe giti ñanale cha tadukalin cha ñadu bligda kade chi kade bage mo alin toigda. 5 Kaire cha tadukalin cha ñadu mo jwen muinga ole muinga dbe ule geru dbe baske kwian Jesucristo gerua ketanga na ulita agedu kare, Pedro agedu ene, kaire che Chugagwalla Jesucristo daballa ulita agedu ene. 6 Kaire Jesucristo gerua ketanga ulita kle igi kade ba Chubenuge mo alin toigda geru dbe ñanale, cha tadukalin cha ñadu age ene kaire, agwa cha me mo ta gbu age ene, cha ule Bernabé ole geru du baske kaire mo ta gbu lle boi mo kodi igi gadale mo alin toigda. 7 Guardia donga lle boi mo chugagwalla alin chui gdale, ¿ama kle lle boi ngwale? Me ene, guardia donga igi gai lle boi ñanale, ene ama ñage lle gige mo alin toigda. Kwian chude ngama gbe, bligda suiage kwian chude ngama gbanga ñage bligda e gai ama takalin kare, ama bligda mauña. Ni kwian gdaite ñage gerule bligda mauña me ñage bligda gai mo alin. ¿Kwian gweale ñage gerule bda oveja mananga me ñage oveja jusulia jai? Me ene, ama oveja mananga, ama ñage oveja jusulia gai mo alin jadale. 8 Ba me ñage tañachuge chadi cha kle gerule mo chugale gballa, me ene, Moisés nu Chube gerua degaba unsuialin gerule ene kaire, 9 chada e gerule: “Chbi lle boagda gbe trigo mongenga sulikwage, ba chbi gbe chage tangle trigo giti ba me chbi ka lugadale, ene chbi bli ole ama ñage trigo gute ama trigo mongenga ñanale.” Chube gerua degaba e me kle gerule Chube tañachuge ulia chbi alin giti, 10 agwa kaire Chube tañachuge ma kwian ulita Jesucristo gerua ketanga giti, kwian lle ketadale geru ketangage geru dbe ñanale, ene geru ketanga ñage toi salengwli kwian chude ngama gbanga bligda suia bligda gai ko ñanale, kaire chude skutanga chude skute bligda gai ko ñanale, ene ama ñage bligda gute toidale. 11 Cha geru Jesucristo giti du ngeru ba ulitaske, cha giti ba Jesucristo uñu, e giti cha ñage chudaboi kade ba ulitage, bligda, u, igi kade. 12 Kwian gweale na geru dbanga kle mo ko ñana gbe bage geru dbe giti cha kaire ñage mo ko ñana gbe bage ma kweri, cha geru dbanga ngeru baske. Agwa cha me mo ta gbu age ene ba ole, cha mo ta gbu jage cha lle molen cha me lle molen cha me talladu e giti, cha me mo ko ñana gbu ba ulitage geru dbe giti, cha mo ko ñanalla ulita chugu ngwadi ngwale, cha tadukalin ba geru Cristo giti keruchuge me ta gbe tañachuge lle na giti me ta gbe joge siere geru uliage. 13 Uñale ba ulitage bligda dbakle chke u gerungwa Chube olege una Jerusalénge, kwian lle boanga u ege ñage bligda e gweale gute. Ene kaire bda dbakle chke u ege, kwian lle boanga u ege bda gwangada, ama bda gweda bda guge bda gugangwa giti, ama kle lle ene boi ama ñage samla bita gweale gai mo alin gutadale. 14 Ene kaire che Chugagwalla Jesucristo nu geru gbaba kwian bai kaire ama gerua dbanga lle gweale gadale ko ñanale geru dbe giti, ene ama ñage toi geru dbe dare. 15 Agwa cha ni kle tañachuge age ene, ma no cha alin cha me mo ko ñanalla gai bage Jesucristo gerua dbe giti, ni cha kle tañachuge cha chada ai degange giti ba agedale cha alin ba lle gweale ketadale chage geru dbe baske giti ñanale, me ene. Nga suga no no chadi Jesucristo gerua dbe me mo ko ñana gbe kwiange geru dbe giti, ma no cha alin jogeda ta suga no giti bli ole me lle kade kwiange toigda. 16 Cha me kle geru Jesucristo giti dbe kwianske mo tale malen cha me ñage mo gai dage Jesucristo gerua dbe giti, Chube cha gbu malen cha geru dbadale, cha mi geru dbe gdale Chube be ji gbe cha alin. 17 Cha ta lle boakalin no Chube alin geru dbe ama takalin kare, e no Chube gwage, cha lle boi Chube alin ta ene giti Chube be age no cha alin. Agwa kaire cha me ta ene molen cha mo ta gbadale geru dbe, Chube cha gbu geru dbe malen cha mo ta gbadale geru dbe no ama takalin kare. 18 Cha Jesucristo gerua traganga kwian ole, e giti cha ñage mo ko ñanalla gbe kwiange agwa cha alin ma no me lle kade kwiange toigda geru dbe ñanale, nga suga no no chadi Jesucristo gerua dbe me mo ko ñana gbe kwiange geru dbe giti, nga suga no ene cha alin e salengwli cha kle lle gweale gai geru dbe ñanale kare. 19 Cha me lle boanga ni kwian gdaite alin ni kwian gdaite cha gau lle boale mau alin, agwa cha agali mo chugu ngwadi lle boangale kwian ulita alin, ene cha takalin kwian ngle Cristo gai ulia. 20 Cha kle chage kwian israelitaske cha kle mo ta gbe kwian israelita kare chage kwian israelita suia kare, kwian israelita kle mo ta gbe Moisés nu Chube gerua degaba alin ole, cha kle chage kwian eneske cha kle mo gbe age geru e gerule kare. Chage suge mo tale ulia cha me agedale ulita geru e gerule kare ene cha chege no Chube gwa giti, agwa cha mo gbe chage ene kwian israelitaske ene cha ña kwian israelita ta gbe suge Cristo gai ulia. 21 Ene kaire cha kle chage kwian me israelitaske cha kle mo ta gbe kwian me israelita kare chage kwian me israelita suia kare, cha kle chage kwian eneske cha kle mo gbe age kwian ene kle age kare me tañachuge Moisés nu Chube gerua degaba kwian israelita alin giti. E me gerule cha me kle Chube gai dage cha me kle age Chube takalin kare, me ene, diali cha kle mo ta gbe age Cristo geru gbu kwian ulita alin gerule kare. Cha kle mo gbe chage kwian me israelita suia kare ene cha ña kwian me israelita ta gbe suge Cristo gai ulia. 22 Daba me Chube gerua gaba sbali, daba ene me geru uñe trate, daba eneske cha me chage kwian geru uñanga kweri kare, cha kle amaske cha mo gbe chage ama suia kare, ene cha ña ama ta gbe suge Jesucristo gai ulia ma no gwangerugu. Kwian suia kaire kaireske cha kle chage cha mo gbe chage ama suia kare, ene cha ña Jesucristo gerua dbe ma no kwian ulitaske kwian gweale mne kaire kaire ta gbe Jesucristo gai ulia. 23 Cha kle age ene cha takalin Chube gerua Jesucristo giti chke uñale kwian ulitage ama ulita geru Jesucristo giti gai ulia, ene chadi nga chege suga no ule kwian Jesucristo gerua gai ole. 24 Cha ta mo ta gbakalin chage no ta giti Chube ole Chube takalin kare diali kwian ulita bai kaireske cha kle chage geru Jesucristo giti dbe, e salengwli kwian jritenga kare, kwian mneite jritenga, gdaitre alin jrite ma blike ta giti kwian jritenga ulitage, jritenga gdaite e lle no gai jrite ñanale. Ene kaire ba ulita mo ta gbadale chage no ta giti Chube ole Chube takalin kare, ene ba agedu no ama tadukalin kare ñanale Chube be ñanalla kete bage bdagli nga ngaña giti Chube kle ngwadi. 25 Kwian kolanga boladi ta kolakalin no trate ama me ñage mo chuge ngwadi age ama ta agekalin kare, ama mo gbadale biale kolale no. Kolanga age ene ama takalin kolagda ñanalla gai mo alin, agwa ama mo chuge ngwadi age nganake me ñage kolagda ñanalla gai. Kolanga kolagda ñanalla e gai agwa e me jage diali. Ene kaire che ulita Chubenu me ñage mo chuge ngwadi age che ta agekalin kare, che mo ta gbadale biale chage no Chube ole age Chube takalin kare, che age no ama takalin kare ñanale Chube be ñanalla kete chege, ñanalla e mi jogenga dale, e jage diali. 26 Uñale trate chage cha age no Chube takalin kare Chube be ñanalla kete chage, malen cha agali kle mo ta gbe chage no ta giti Chube ole Chube takalin kare, cha kle mo ta gbe lle boi no ama alin ama takalin kare, 27 cha me kle mo chuge ngwadi age cha agali ta agekalin kare, ma no diali cha kle mo ta gbe no trate age Chube takalin kare, ene cha ñage daba na tke tangle no Chube geruage. Cha me age Chube takalin kare, ene cha me ñage daba tke tangle no Chube geruage, Chube mi gerule no cha giti, Chube mi ñanalla kete chage age giti.
1 Cha bitalla Jesucristo giti, cha gerule ba ulita ole, cha takalin ba ulita tachke boidu che enusulian unsuialin ole giti, che enusulian unsuialin jo siere nga Egiptoge gire Chube bogakwa gbu ama ulita jonlla dbe, bogakwa e jo che enusulian unsuialin dbe ble kada Mar Rojoske tangle, ulita jo tangle seradi. 2 Che enusulian unsuialin ulita Moisés gau mo chugagwallale, ama ulita chegu ule Moisés ole, ama ulita chagedu ule Moisés ole baini kaire bogakwa jo ama jonlla dbe, ene bogakwa ama jonlla du bleske tangle, ama ulita jo tangle seradi ule Moisés ole, Chube che enusulian unsuialin ulita chudabo ene. 3 Kaire Chube bligda dregaitre alin kagu che enusulian unsuialin ulita alin gutadale, bligda e chiu nga ngaña giti, che enusulian unsuialin ulita bligda e gutu. 4 Che enusulian unsuialin chagedu chi me jwiage, nga ege chi me ama alin jadale, Chube chi gbu chie kege kwian alin jadale, ulita chi e jau, chi ama kira gbu. Che enusulian unsuialin me toidu chi e alin giti, me ene, Cristo agedu no ama alin diali, che enusulian unsuialin me ñadu gwage Cristodi agwa Cristo kledu ama ole diali, Cristo ama ulita manadu baini kaire ama jo ngwadi ene ama ñadu toi. 5 Cristo che enusulian unsuialin chudabo tanre agwa ama ulita me mo ta gbu age no Chube takalin kare, che enusulian unsuialin ngle agedu me no Chube gwage malen Chube ama chugu ngwadi jogeda nga gballage kledu chage ngwadi. 6 Boidu ene che enusulian unsuialin ulita ole ama agedu me no gdale, che ulita tachkedale e giti ene suge chege che me mo ta gbale mo chuge ngwadi age me no che enusulian unsuialin agedu kare. 7 Cha gerule ba ulita ole, ba me lle oña dodaba mo kodi ollade, ba me agedale che enusulian unsuialin gweale agedu kare, Chube gerua degaba unsuialin gerule che enusulian agedu giti, chada e gerule: “Ama mo litu ule chui ollade blire lle jai, bligda kdeale ama ulita skwendu gdate tanre lle oña dodaba mo kodi gai mo chubeale ollade, kaire onbrenu muirenu tanre mo chugu ke giti.” Chube gerua degaba unsuialin gerule ene che enusulian unsuialin agedu giti, ba ulita me lle oña olladale ama agedu kare. 8 Kaire che ulita onbre muire me mo chugadale ke giti che enusulian unsuialin gweale agedu kare, che enusulian unsuialin agedu tanre me no, e giti Chube ji gbu ama alin, kwian veintitres mil jokeda chui gbaitre alin. 9 Che me mo ta gbadale mo chuge Chube ole tañachuge che ñage age tanre me no Chube me tallade e giti Chube no che ole malen Chube mi ji gbe che alin che age tanre me no ene gdale, che me mo ta gbale age ene Chube dollale. Che enusulian unsuialin gweale tañachugu ene age tanre me no, ama tañachugu Chube no Chube me ji gbe ama alin, agwa age me no ene giti Chube ji gbu kwian ene ulita alin, kwian tanre lentigu jorisige, ama ulita jokeda. 10 Ba me gerudale kwian Chube gerua dbanga baskedi Chube gerua dbanga dollale, ama ba ulita Chubenu chugagwalla Chube geruadi, ba gerule amadi ama dollale Chube be ji gbe ba alin. Boidu ene che enusulian unsuialin ole, ama gweale gerudu ene chugagwalladi ama chugagwalla dollale, age me no ene giti Chube lle boanga mo alin nga ngaña giti kagu ji gbe kwian ene ulita alin, lle boanga Chube alin kwian ene ulita guda. 11 Boidu ene ulita che enusulian ole unsuialin, e jo degaba che alin che kle toi nege tangle chui bdagli ngnagu alin, ene chke uñale che ulitage chada jo degaba boidu ene enusulian oña ole giti, sugedale chege che me mo ta gbadale age che enusulian unsuialin agedu kare. 12 Ba gweale tañachuge ai kare mo giti: “Cha kwian no trate, cha kle age no trate diali ulita, cha me kle age me no sidri.” Ba kle tañachuge ene mo giti ba chagedale ta giti, ba kwian, kwian ulita ñage mo ta gbe age me no ba enusulian unsuialin agedu kare, malen ba mo ta gbadale chage ta giti me mo chuge ngwadi age gweale me no. 13 Ba tale suge age gweale me no ba tachkedale ai giti: Kle boi ene kaire daba na ulita ole, daba ulita ta suge ba ta suge kare. Ba talla ene molen ba tachkedale Chube giti, Chube kle ba ole diali, ama ba chudaboi ba kira gbe ene ba me age me no ba ta agekalin kare. Ba tale ba ta agekalin gweale me no ba Chube chuge ngwadi ba chudaboi, ene Chube be ba ta gbe joge siere talla enege ene ba mi age me no ba takalin kare. 14 Cha daballa cha ibotea Jesucristo giti, cha no no ba ulita ole, uñale chage Chube kle ba ole ba chudaboi, malen cha gerule trate ba ulita ole, ba mo ta gbadale chege sugekare lle oña kwian kle gai mo chubealege. 15 Cha kle gerule ba kwian ulita chuga molen ta molen ole, cha kle gerule kare giti ba ñage tañachuge e giti cha kle gerule ulia o me. 16 Che Chubenu kle mo lite ule tachkedale Cristo jokeda giti che ulita kle pan gute uva chia jai. Che kle uva chia jai, ngeru che gerule no Chube ole uva chia giti gire che e jai, uva chia jai giti che kle mo ta gbe tachke Cristo bea giti. Kaire che kle pan gute, ngeru che gerule no Chube ole pan giti gire che e gute, pan gute giti che kle mo ta gbe tachke Cristo jaba giti. Che pan gute uva chia jai ule daba na Cristo jokeda ganga ulia ole e gerule che kle mo ta gbe ule Cristo ole kaire daba na Cristo ganga ulia ulita ole. 17 Che Chubenu kwian ngle, agwa pan gute ule modi giti che ta suge che kwian gdaitre alin kare. 18 Ba tachkedale kwian israelita ulita giti, ama mo lite samla guge samla gugangwa giti u gerungwa Chube olege, gire ama samla e gweale gute ule, ama age ene ama kle mo ta gbe ule daba na ole Chube olladale, ene ama ulita kle Chube gai mo Chubeale. 19 Ene kaire kwian chudalla na me israelita kle lle oña dodaba mo kodi gai mo chubeale, lle oña ngwale ege ama bligda kaite gire ama ulita bligda ene gweale gute, ama age ene ama kle mo ta gbe ule lle oña e gai mo chubeale. Kwian ene kle lle oña e gai lle oña gwade kare tañachuge lle oña kle bligda gbe ma no ama alin gutadale, agwa che Chubenuge uñale e me ulia, che alin lle oña e ngwale me ñage age bligda ole. 20 Kwian bligda kaite lle oñage, kwian ene me Chube ulianu, ama kle lle oña gai mo chubeale, ama kle bligda kaite lle oñage, ama me kle age Chube ulia alin agwa ama kle age che dolla Satanás alin kaire Satanás chudaboangalla ulita alin. Cha takalin ba chege sugekare age enege, cha me takalin ba mo ta gbe ule kwian ene ole age che dolla Satanás ule Satanás chudaboangalla ulita alin. 21 Ba me ñage mo ta gbe mo lite ule daba Chubenu ole pan gute uva chia jai tachkedale Jesucristo giti gire kaire mo ta gbe mo lite ule kwian me Chubenu ole bligda kaitaba lle oña ngwalege gute lle oña gai mo chubeale. Ba me ñage ta boke gai age Chube alin kaire dolla Satanás ule Satanás chudaboangalla ulita alin. 22 Chube takalin che ulita Chube alin gai mo Chubeale, che lle na gai mo chubeale Chube skochie, Chube me takalin che lle na gai mo chubeale. Chube skochie chedi age ene giti Chube ji gbe mno che mi ña jage e kote. 23 Che ulita Chubenu mo ta gbadale age Chube alin Chube takalin kare diali, ene che be ñage mo ta gbe ma no Chube ole diali, kaire che be ñage daba na Chubenu chudaboi mo ta gbe ma no Chube ole. Che ulita ñage gerule mo alin: “Cha ñage age ulita cha takalin kare me tañachuge daba na giti.” Che ñage gerule ene agwa age ulita me no che alin, ulita me che ta gbe no Chube ole, kaire ulita me daba na chudaboi mo ta gbe Chube gai ma no Chube takalin kare. 24 Che me ñage tañachuge mo giti alin age che takalin kare ulita no che alin, che me ñage tañachuge ene, agwa kaire no mo ta gbe tañachuge daba na ulita giti che kle age e no o me no daba na alin. 25 Ba ulita joge samla gige samla chbadakle ngwadi, ba samla gige ba me geru kadadale samla e jo kaitaba o me jo kaitaba lle oña kwian kle gai chuberege, ene ba ñage samla e ulita gute me tañachuge samla giti. 26 Chube nga ulita dodadu, Chube lle jigu gutadale kwian alin, che ñage lle e ulita gute, lle oña ngwale me ñage age e ole. 27 Kwian me Chubenu ba gweale Chubenu kade blire ule, ba ta jogekalin ba ña joge kwian ene ngwadi blire, ba ulla bligdadi ba bligda gutadale kamne, ba me geru kadadale samla bligdalla giti: “¿Samla e me jo kaitaba lle oñage?” Ba me geru kadadale ene, ene kwian na gweale Chubenu kle eni me tañachuge samla bligdalla giti. 28 Agwa daba na gweale Chubenu kle eni blire ule kaire, ama me geru gaba sbali, amage chke uñale kwian na giti samla e jo kaitaba lle oñage gire ama gerule ai kare ba ole: “Samla e jo kaitaba lle oña kwian kle gai chuberege, che kwian Chube ulianu me ñage samla e gute.” Daba ene ole ba me samla ene gutadale, daba ege tale suge me no samla ene gute, amage suge ama samla ene gute ama kle age me no Chube dollale, ba me samla ene gute ene ba me kle age daba ta suge dollale, ba mo ta gbadale age no daba ene alin me mo alin. 29 Cha kle gerule ba ole kwian na me kle tañachuge ba kle tañachuge kare giti, ba tale suge ba ñage bligda ulita gute agwa daba na tale suge me ñage bligda jo kaitaba lle oñage gute, ama alin e me no. Ba gweale ñage geru kade e giti, ba gerule: “Cha tale suge cha ñage bligda ulita gute, ulita no cha alin, cha tale suge ene, ¿lledale cha tañachuge daba na giti mo ta gbe me age ama ta suge dollale? 30 Cha blire, cha gerule no Chube ole bligda giti, cha bligda gute, e no cha alin, ¿lledale daba na me bligda ene gute be gerule me no chadi bligda giti? Daba me kle e gute.” 31 Ba ulita tachkedale ai giti: Ba kle age ulita giti kaire blire giti chi jai giti mo ta gbale age no diali kwianske me tañachuge mo alin giti age ba takalin kare, ma no mo ta gbale age no ulita Chube takalin kare kwian ulitaske, ene kwian gwage badi suge amage Chube kle age no ba tale kle ba ta gbe age, ene kwian gwage badi gerule no no Chube giti. 32 Kwian israelita gwa giti kwian me israelita gwa giti kaire kwian Chubenu ulita gwa giti ba mo ta gbadale age trate ene Chube takalin kare, ene ba mi kwian gdaite ta gbe age me no Chube dollale ba kle age giti. 33 Cha kle gerule kare ba ulita ole cha kaire kle mo ta gbe age ene diali tañachuge ngeru no kwian na ulita alin, cha me tañachuge ngeru mo giti age mo alin cha takalin kare, me ene, cha kle mo ta gbe tañachuge kwian na giti. Cha kle age ene kwianske cha takalin kwian na tanre ñage mo ta gbe Cristo gai ulia cha giti.
1 Cha kle mo ta gbe gwage Cristo nate Cristo chagedu kare kwianske nga dba ai giti, ene kaire ba ulita mo ta gbadale gwage cha nate cha kle chage kare kwianske. 2 Uñale chage ba ulita me kle ta jogenga chage, no ba kle tachke cha giti, kaire noare ba kle age cha ba tku tangle kare geru ulia Cristo gitige, chadi nga suga no no ba kle mo ta gbe age ene giti. 3 Agwa cha takalin kaire geru ai kare suge ba ulitage: Chube Cristo Chugagwalla, ene kaire Cristo kwian onbre ulita Chugagwalla, onbre mo jwanba mo muingalla chugagwalla. 4 Kwian kle mo litaba Chube geruadi, kwian onbre mo litaba eneske bai kaire kle gerule Chube ole o kle Chube gerua kete kwian mo litabage Chube ama ta gbe gerule kare, onbre ene me ñage gerule sombrero ole chugage, onbre gerule sombrero ole chugage me kle mo Chugagwalla Cristo gai dage me kle Cristo gai mo Chugagwallale. 5 Ene kaire muinga bai kaire kle gerule Chube ole o kle Chube gerua kete kwian mo litabage Chube ama ta gbe gerule kare, muinga ene me ñage gerule chuga ngwale, ama ñometra gweale gbale chuga giti, muinga me age ene me kle mo ñengulalla gai mo chugagwallale me kle mo ñengulalla gai dage, muinga ene kle mo gbe ma kweri mo ñengulallage kwian ulita gwa giti, muinga ene giti ñengulalla mo ta dbe ibule tanre. Muinga me ñometra gweale gbe mo chuga giti, kwian na gwa giti muinga ene salengwli muinga nu chugaga itaba kare ama chuga taglale kare. 6 Muinga me ta ñometra gweale gbakalin mo chuga giti, ma no muinga ene mo chugaga ite ulita, ene ama chege onbre kare kwian na gwage, ma no muinga ene chuga chege taglale, agwa muinga me no ene ole, amage suge ama ibule chage chuga taglale, ma no muinga ene ñometra gweale gbe mo chuga giti mo ñengulalla gai dage mo chugagwallale. 7 Ngeru Chube onbre dodadu salengwli mo kare, Chube me muinga dodadu ngeru, onbre giti Chube muinga dodadu, ene onbre chegu muinga chugagwallale, malen onbre gerudale Chube ole chuga ngwale mo litangwa Chube geruadi ngwadi, muinga onbre gadale dage malen me ñage gerule Chube ole chuga ngwale mo litangwa Chube geruadi ngwadi. Chube onbre dodadu salengwli mo kare, Chube onbre chugagwalla onbre Chube gadale dage. Muinga gda gweale me jo dodaba onbrere, agwa onbre gda gweale jo dodaba muingale, onbre giti Chube muinga dodadu, malen onbre muinga chugagwalla muinga onbre gadale dage. 9 Chube onbre dodadu ngeru, chudaboanga me ama alin malen Chube muinga dodadu onbre alin, Chube me onbre dodadu muinga alin, 10 malen muinga ñometra gweale gbadale mo chuga giti mo litangwa Chube geruadi ngwadi, ene ama kle mo ñengulalla gai mo chugagwallale gai dage, e giti nga suga no lle boanga Chube alin nga ngaña giti ulitadi. 11 Che ulita Jesucristonuge sugedale Chube onbre kaire muinga dodadu, Chube gwage gdaite me ma no gdaitege, onbre giti muinga jo dodaba onbre alin, ene kaire onbre ñage toi muinga ole, muinga giti onbre jrien, Chube kle onbre muire ulita gbe jrien. 13 Uñale ba ulitage ba suiale muinga kle gerule Chube ole mo litangwa Chube geruadi ngwadi, muinga ene ñometra gweale gbadale mo chuga giti, ba suiale muinga me age ene ama me kle mo ñengulalla gai dage mo chugagwallale. 14 Chube che onbre kaire muire jigu chugaga manade mo kaire kaire, ba suiage onbre chugaga manade jeike, suge me no onbre alin chugaga manade jeike muinga kare. 15 Agwa ba suiage muinga chugaga dbe onbre kare muingage me suge no ene, muingage suge ama chugaga jeike e no ama alin, Chube muinga jigu ene chugaga tige jeike, ene ama me chugaga dbe onbre chugaga kare, ene ama me tañachuge lle na gbe mo chuga giti, agwa ama chuga kle chugagaske. 16 Ba gweale tañachuge me ene cha kle gerule kare muinga giti, ba ta kira batakalin geru ene giti, chkedale uñale bage cha ulita kwian Jesucristo gerua ketanga kle kwian ulita tke tangle muinga ulita bai kaire kle gerule Chube ole mo litangwa Chube geruadi ngwadi muinga ene ñometra gweale gbadale mo chuga giti, daba Chubenu nga na ulitage kaire tañachuge cha kle tañachuge kare. 17 Nege cha gerule ba ulita ole lle na kle boi baske giti, nga me suga no chadi ba kle age giti. Chage suge ba ulita kle mo lite ba ulita mo ta gbadale no mo chudaboi modi, agwa me kle boi ene baske, ba kle mo ta gbe age nganake. 18 Ngeru cha gerule ba ole ai giti: Geru chku cha kote ba ulita giti, kwian gerudu cha ole ba kle mo lite Chube geruadi ba ulita me kle tañachuge salengwli kwaitre alin ba ulita kle kira bate modi moske, cha tañachuge kle boi ene ulia baske daba gweale kle gerule cha ole kare. 19 Ba ulita kle mo lite ngwadi Chube geruadi diali ba gweale kle geru ulia Jesucristo giti gai, na kle geru nganake gai, malen baske kwian ulita mo gbadale mneite kaire kairege, ene be chke uñale trate ulia kwian bai kle Jesucristo gerua gai ulia bai kle joge siere geru uliage geru nganake gai. 20 Kle boi ene baske malen ba ulita me kle mo lite no ule tañachuge salengwli kwaitre alin. Ba ulita kle mo lite ule blire tachkegda Jesucristo jokeda giti agwa ba me kle mo ta gbe ule tachke ulia Jesucristo agedu giti, ba kle age ba takalin kare, ba age ene ba ta chege sugekare Jesucristo ageduge. 21 Ba gweale kle bligda dbe mo litangwage agwa ba me kle bligda gute ule salengwli modi daba na ole, ba kle mo ta gbe kibale bligda giti, ba kle blire ngle kle lle jai ngle joge llale, ba gweale kle age ene, daba me bligda ene kare molen kle mo lite ule, daba ene chege bli ole. 22 Ba bai kle blire ene daba na gwage, ¿mineade ba me kle blire mo ullage ngle lle jai ngle ba takalin kare? ¿O ba ulla me agengwa ene? Ba me ñage age me no ene daba na ole mo litangwa Chube geruadi ngwadi, kaire ba me ñage age ene ibu gbe daba na Chubenu me bligda molendi. ¿E giti ba tañachuge cha gerudale no ba kle age giti? Ulita ba kle age giti ba takalin kare sugekare Jesucristo agedu gitige, cha me gerule sidri no ba ole e giti. 23 Chage che Chugagwalla Jesucristo geru ketu blire giti tachkegda ama agedu giti, cha ba tku tangle geru e amaña giti Jesucristo ketu chage kare, cha geru e amaña kete bage nege nakwaite, Jesucristo geru e jigu ene: Chui amañage ngajrege Jesu bebi mo gange kwian me noge, ngeru ege Jesu mo litu ule blire geru jwannga amage gdataboko giti gdaboke ole. Jesu pan gau kote gerudu Chube ole pan giti: “Cha Ñenua, noare ba pan ai ketu cha ulitage gutadale.” Jesu gerudu ene Chube ole pan giti gire Jesu pan skutunga ketu kwian geru jwannga kaire kairege gutale, Jesu gerudu geru jwannga ulita ole: “Pan ai cha uda kare, cha ketabe gwaleda ba ulita giti, ba blire ai kare cha talla ole diali, ene ba tachke chage, ene ba mi ta jogengwa cha agedu giti ba alin.” 25 Jesu gerudu ene pan giti gire blidu ulita geru jwannga ole. Gire Jesu agedu pan ole kare ene kaire Jesu agedu giskagba uva chia ole, Jesu chi jangwa gau kote uva chia ole gerudu geru jwannga ulita ole: “Uva chia ai cha be kare, ba uva chia ai jai cha talla ole diali, ene ba ulita be tachke cha bege cha jogeda giti ba ulita alin, cha jogeda giti be suge trate ba ulitage Chube kle geru jagere gbe ba ulita alin.” 26 Jesu geru jigu ene kwian monu alin, malen cha gerule ba ulita ole, ba ulita mo ta gbadale age Jesu geru jigu kare, ba ulita age ene mo ta gbe pan gute uva chia jai ba kle tachke Jesu jokeda giti, ba agedale diali ene Jesu chieni chuia manade ngwange. 27 Ba ulita kle mo lite pan gute uva chia jai tachkegda Jesucristo jokeda giti bai kaire me tañachuge Jesucristo agedu giti ba alin ni mo ta gbe e gai dage ni mo ta gbe age Jesucristo geru jigu gerule kare, ba kle age ene ba kle mo gbe jiske Chube gwage kle age me no Jesucristo agedu dollale kle Jesucristo jokeda gai ngwale. Me no age ene ta ene giti, 28 malen ba ulita Chubenu gdaite gdaite tañachugale mo ta giti ngeru ta suge mine moge kle no o me no Jesucristo ole kle mo ta gbe age no Jesucristo takalin kare o age me no gweale kle ba tale, tañachugale ene ngeru pan gute uva chia jaige tachkegda Jesucristo jokeda giti. 29 Bai kaire pan gute uva chia jai me tañachuge mo giti ni tachke Jesu agedu giti ba alin, bai kaire kle blire ta ene giti ba agali kle mo gbe jiske Chube gwage, ba kle age ene ba kle Jesucristo jokeda gai ngwale kare. 30 Blire ta ene giti gdale ba tanre oga jingme kote, kira me, kaire gweale jokeda, Chube kle ji gbe ene ba alin ba kle age giti, ene ba tachke ba me kle age no Chube gwage. 31 Che Chubenu gdaite gdaite mo ta gbe tañachuge mo ta giti ta suge mine moge Jesucristo ole, mo ta gbe biale ene ngeru, ene Chube me ji gbadale che alin. 32 Ama ji gbe che alin e me gerule ama kle age me no che ole, agwa ama ta che tkakalin tangle che ta gbe suge chage mine ma no ama ole, ene che me chege jiske ji chugadale ule kwian ulita me Chubenu agenga me no ole. 33 Cha daballa cha ibotea Jesucristo giti, cha gerule ba ulita ole ba kle mo lite giti blidale tachkegda Jesucristo giti, ba mo lite ule blidale ma no ba ulita mo ta gbe salengwli blidale, ba daba ulita manadaledi blidale kwaitre alin ule, ba me blidale blike ngeru daba Chubenu na ulitage. 34 Ba gweale bli ole ma no blire no mo ullage, ene me tañachuge chie blire unchkedale ba takalin kare mo litangwage tachkegda Jesucristo giti, ba age ene Chube me ji gbe ba alin mo lite ene giti. Kaire lle na tanre kle gerudale ba ole, agwa cha mi chada degange e giti, cha be joge chui gwealege baske geru trage agali ba ole geru gweale cha me degangu chada aige.
1 Cha daballa cha ibotea Jesucristo giti, ba geru kade na degu cha alin, nege cha gerule ba ole e giti. Cha takalin suge trate ba ulitage ai giti: Chube Oña kle ta kete kwian Chubenuge lle kaire kaire boadale no mo kaire kaire Chube alin. 2 Uñale ba ulitage ngeru ba bebi Jesucristo gai ulia, e suiale che dolla Satanás kledu ba ta gbe lle oña dodaba mo kodi me ñage gerule ba ole gai mo chubeale, chui ege ba me Jesucristo uñu, nege ba Jesucristo uñe ba me kle lle oña gai dare mo chubeale, nege Jesucristo kle ba ta gbe. 3 Malen chkedale uñale ba ulitage kwian bai kle gerule Chube Oña kiralla giti, kwian ene gerule no Jesucristo giti: “Jesu ulita Chugagwalla.” Agwa kwian bai gerule me no Jesucristodi, kwian ene me kle gerule Chube Oña kiralla giti, kwian kle gerule Chube Oña kiralla giti me gerule ni sidri me no Jesudi, kwian me kle gerule Chube Oña kiralla giti gerule me no Jesudi, ba me kwian ene keruchuge, kwian Jesu gai ulia mo Chugagwallale, ba kwian ene alin keruchuge. 4 Chube Oña kle ta kete kwian Chubenu ulitage gdaite gdaite lle kaire kaire boadale Chube alin, malen kwian Chubenu ulita me kle lle amaña boi Chube alin, agwa Chube Oña amaña gdaitre alin kle ta ene kete kwian Chubenu ulitage lle boadale mo kaire kaire. 5 Kwian Chubenu ulita me kle lle amaña boi Chube alin, agwa ulita kle Jesucristo amaña gai mo Chugagwallale kle lle boi Jesucristo takalin kare. 6 Kwian Chubenu ulita me kle lle amaña boi Chube alin, agwa Chube amaña kle kwian monu ulita ta gbe kiraske lle boi no Chube alin Chube Oña ta ketu kwiange lle boi mo kaire kaire kare. 7 Kwian Chubenu gdaite gdaitege Chube Oña ta kete lle kaire kaire boi daba na Chubenu ulita chudaboagda ta gbe ma no Chube geruadi, Chube Oña kiralla giti kwian Chubenu ñage age ene daba chudaboi. 8 Chube Oña ta kete kwian gwealege gerule ta ngle ole. Chube Oña amaña ta kete kwian gweale nage Chube gerua uñe trate Chube gerua trage trate kwian ole. 9 Chube Oña amaña ta kete kwian gweale nage Chube gai ulia ma no daba na ulitage, kwian ene lle kade Chubege suge trate amage Chube be age ama alin. Kwian nage Chube Oña ta kete kwian oga dodade. 10 Kwian nage Chube Oña ta kete lle daga ngwale no tanre dodade Chube kiralla giti. Chube Oña ta kete kwian nage Chube gerua kete kwian nage. Chube Oña ta kete kwian nage chke uñale daba na giti bai kle gerule ulia Chube Oña kiralla giti bai me kle gerule ulia Chube Oña kiralla giti. Chube Oña ta kete kwian nage gerule kwira nale me jwanba. Chube Oña ta kete kwian nage daba keruchuge gerule kwira nale me jwanba geru e blite tragale kwian ole kwian e kwirale. 11 Kwian Chubenu ulita boi ene gdaite gdaite tale, Chube Oña gdaitre alin kle age kwian gdaite gdaite tale, Chube Oña e amaña ta kete kwian ulitage age mo kaire kaire Chube Oña takalin kare. 12 Che gdaite jegwale ngle molen, agwa ulita gdaitre alin ule. Ene kaire kwian ngle Cristo giti kwian gdaitre alin kare. 13 Che ulita me chudalla gdaitre alin agwa Chube Oña che ulita ta gbu ule kwian gdaitre alin kare, che gweale israelita gweale me israelita, che gweale lle boanga mo mauña alin gweale me lle boanga mo mauña alin. Che ulita mo kaire kaire kwian ene agwa Chube Oña che ulita ta gbe kwian gdaitre alin kare Jesucristo giti, Chube Oña amaña gdaitre alin kle toi che ulita tale, Chube Oña kle che ulita ta gbe ule. 14 Che jegwale me gdaitre alin kle, che jegwale ngle molen, agwa ulita gdaite gdaite me ñage age gballa sugekare, ulita kle ule moge, ene kle no ulita. 15 Che sera me gerule che ko giti: “Cha me ko kare, ko ma no cháge, malen cha me jegwalenu.” E me gerule ulia sera me jegwalenu, diali sera chege jegwalenu, ko me ma no serage, ama boke salengwli. 16 Kaire che olo me gerule che gwagwa giti: “Cha me gwagwa kare, gwagwa ma no cháge, malen cha me jegwalenu.” E me gerule ulia olo me jegwalenu, diali olo chege jegwalenu, gwagwa me ma no ologe, ama boke salengwli. 17 Che ulita jegwale gwagwa alin kle, e kle ene che olo me, che me ñage nga keruchuge. Kaire che ulita jegwale olo alin kle, e kle ene che se me, ñalla me suge chege. 18 Agwa Chube me che dodadu ene, Chube che jegwale tanre gbu ule mo kaire kaire ama tadukalin kare ulita chege no. 19 Chube che olo alin dodadu jegwale ulita, e ene che me kwian. 20 Chube che jegwale tanre ulita dodadu, ene ulita kle no ule gdaitre alin. 21 Gwagwa me ñage gerule ko ole: “Ba me no cha kare, ba ngwale, cha me takalin bage.” Kaire chuga me ñage gerule sera ole: “Ba me no cha kare, ba ngwale, cha me takalin bage.” 22 Ulia jegwale tanre ulita no che alin, jegwale tanre ulita me kle che ole che me ñage toi no. Che me tañachuge jegwale tanre gdaite giti: “Jegwale e gdaite soli ngwale me no, cha me takalin jegwale ege, ma no cha jegwale e jwennga.” Che me tañachuge ene, che no jegwale gdaite soli e ole, suge chege jegwale soli e me che me ñage toi. 23 Jegwale gweale giti che me tañachuge, agwa che kle mo ngama tke ma no chegedale ma no kwian na gwa giti. Che jegwale gweale kwian ni gwage edi, che me e ngama tke che ibule tanre, malen che e ngama tke ma no ñometraske jegwale na ulitage, ene che me ibule. 24 Agwa jegwale gweale na, kwian ulita ñage gwage edi, ni che tañachuge e ngama tke. Chube che jegwale tanre ulita dodadu gbu ule no mo kaire kaire jegwale ulita ole, jegwale gweale me ma no jegwale na ulitage, ulita salengwli no che alin malen che jegwale ulita manade no, 25 ene jegwale gweale me suge sugekare jegwale nage, boi gweale, ulita suge salengwli. 26 Jegwale gweale skibachie jegwale ulita suge skibachie moge kaire. Kaire che jegwale gweale manade no, e no jegwale ulita alin. 27 Ene kaire ba ulita Chubenu, ba Cristo jegwalenu kare, ba ulita gdaite gdaite Cristo jegwale gwealenu kare. 28 Kwian Chubenu ulitaske Chube ta kete kwian monu gdaite gdaitege age mo kaire kaire Chube takalin kare, ene kwian Chubenu chege Cristo jegwalenu gdaitre alin kare. Chube kwian gweale gbu ma kweri daba nage, Chube ta kete kwian enege Jesucristo gerua kete, Chube ta kete kwian gweale nage Chube gerua kete kwian nage Chube Oña kle geru kete amage kare, Chube ta kete kwian na gwealege daba tke tangle Chube geruage. Lle e kare gdamai boi, e ma no Chube gwage. Ege dare Chube ta kete kwiange lle ai kare boi: lle daga ngwale no dodanga Chube kiralla giti, oga dodanga Chube kiralla giti, daba chudaboanga, daba kaganga, gerunga kwira nale me jwanba. Chube ta ketu kwian ene ulita gdaite gdaitege age mo kaire kaire Chube takalin kare. 29 Agwa Chube me ta ketu kwian ulitage lle amaña boi Chube alin dabaske, Chube me ta kete kwian ulitage Jesucristo gerua kete, Chube me ta kete kwian ulitage Chube gerua kete kwian nage Chube Oña kle geru kete amage kare, Chube me ta kete kwian ulitage daba tke tangle Chube geruage, Chube me ta kete kwian ulitage lle daga ngwale no dodade Chube kiralla giti, 30 Chube me ta kete kwian ulitage oga dodade Chube kiralla giti, Chube me ta kete kwian ulitage gerule kwira nale me jwanba, Chube me ta kete kwian ulitage daba keruchuge gerule kwira nale me jwanba gire geru e blite tragale kwian ole kwian e kwirale. Chube me ta kete kwian ulitage lle amaña boi dabaske, Chube ta kete kwian mo kaire kairege lle boi Chube alin Chube takalin kare. 31 Chube ta kete kwian gwealege Jesucristo gerua kete, Chube ta kete kwian gweale nage Chube gerua kete kwian nage Chube Oña kle geru kete amage kare, Chube ta kete kwian na gwealege daba tke tangle Chube geruage. Lle e kare gdamai boi e ma no Chube gwage, no ba ulita mo ta gbe lle e kare kade Chubege boadale Chube alin, e no, agwa kaire cha ba ta gbe suge lle ma no e ulitage giti: Mo ta dbe no ulita daba ulita ole, e ma no Chube gwage.
1 Chube ta kete chege gerule kwira nale me jwanba, agwa che me no daba na ole, ngwale che ñage gerule kwira nale me jwanba. Che me gerule ta no ole daba na ole che kerusuge daba nage lle dagaklenga kle gdade me no kare lle gdade sugaska ologe kare. Che kerusuge ene daba nage, ngwale che kle gerule kwira nale. 2 Chube ta kete chege Chube gerua kete kwiange Chube Oña kle geru kete chege kare, chege Chube talla ulita suge trate, che geru ulita tanre uñanga Chube giti, che kwian ene agwa che me no daba na ole che kle age ngwale. Diali che Chube gai tanre ulia, ta ene ole che lle kade Chubege, uñale chege che gerule jwichuga giti Chube ole jwichuga jwen gbe nga nage, Chube age, che kwian ene agwa che me no daba na ole ngwale che kle ta dbe ene. 3 Che lle monu ulita girabate kwian me lle molen ole, kaire che mo chuge ngwadi mo gugange gwade geru dbe giti kwian geru dollale kote, che kwian ene agwa che me no daba na ole che kle age ulita ngwale. 4 Ulia che no daba na ole che mo ta dbale ai kare daba ole: Mo ta gbe jage me skochie dabadi. Age no daba alin. Me tañachuge me no dabadi daba lle no tanre molen giti. Me mo gai dage dabadi, me tañachuge mo giti ma kweri dabage. 5 Mo ta gbe daba gai dage. Me tañachuge mo giti alin age no mo alin. Me mo ta gbe skole daba ole. Daba age me no ole me oge mo tale. 6 Me nga dbe suga no daba kle age me no giti, agwa nga dbe suga no daba e amaña kle age no Chube takalin kare giti. 7 Ta dbe olire daba giti daba kle age me no giti agwa diali no daba ole, diali mo ta gbe tañachuge no daba ene giti, mo ta gbe no daba manadedi chui gwealege daba ñage mo ta blite nganake no, ta dbe no daba ole diali ni mo ta blite sidri me no daba ole. 8 Ta dbe no diali daba ole, e me joge tangle, nege kaire chui bdaglige be chege diali. Chui gweale be chke, chui ege kwian me Chube gerua ketadale dare ni kwian gerudale kwira nale me jwanba ni kwian tañachugadale dare Chube gerua uñe trate giti. Geru kete, gerule kwira nale me jwanba, kaire Chube gerua uñe trate, e ulita no nege alin, e mi chege diali, e ulita be joge tangle chui bdaglige, agwa ta dbe no daba ole e chege no diali chui tangle. 9 Nege nga dba ai giti che me ñage Chube gerua ulita uñe trate no, che me kwian trate, Chube gerua ulita me ñage suge trate chege, malen che me ñage geru e ulita kete daba nage. 10 Agwa Jesucristo chieni chuia be chke gire che ulita be geru Chubenu ulita uñe trate, chui ege Chube gerua ulita be suge trate trate che ulitage, malen che mi daba na Chubenu tkadale tangle dare geru e giti. 11 Cha kledu soli cha ta me kledu kwian juma talla kare, cha gerudu cha tañachugu kirogwa ulita gerule tañachuge kare, cha tigedu cha jo juma cha me tañachugu dare kirogwa soli kle tañachuge kare, cha kirogwa talla ulita chugu ngwadi. 12 Ene kaire nege che ta kirogwa talla kare Chube gerua ole, Chube gerua ulita me suge trate chege, che talla ulita nege Chube geruadi bebi kle trate, nege che ta suge Chube geruadi salengwli che gwage mo oñadi chi oña juda me noge kare, me gwage trate mo gwadi. Agwa chui gwealege che be gwage mo gwagwa giti Jesucristodi, chui ege be suge chege trate Chube gerua giti, chui ege che be Chube gerua uñe trate trate Chube che ta uñe nege kare. 13 Che mo ta gbadale age gdamai aige: Che mo ta gbadale Chube gai ulia diali. Che mo ta gbadale tañachuge diali Chube be age che alin bdagli giti, che chui e manadale nga suga no ole. Che mo ta gbadale no daba na ulita ole. Ai gdamai ulita no, e chege diali chui tangle, agwa gdaite ma no gdabokege, e mo ta dbe no daba ole diali.
1 Cha gerule ba Chubenu ulita ole, diali ba ulita mo ta dbadale chege no daba na ulita ole, kaire ba ulita gdaite gdaite mo ta gbale diali gerule Chube ole mo giti Chube ta kete bage lle gweale boi no Chube alin daba Chubenu ulitaske Chube takalin kare. Ba ta gerukalin Chube ole Chube ta kete bage gerule Chube Oña kiralla giti kwira nale ba me jwanba, e no, agwa ma no ba mo ta gbale gerule Chube ole Chube ta kete bage Chube gerua kete daba nage Chube Oña kiralla giti daba kle gerule kare kwirale. 2 Chube Oña kiralla giti kwian gerule kwira nale kwian me jwanba, e no, agwa me suge daba nage, kwian gerule kwira nale suge Chube alinge allabi kwian kle gerule mine, gerule kwira nale me jwanba e me daba na chudaboi. 3 Agwa Chube Oña kiralla giti kwian Chube gerua kete dabage daba kle gerule kare kwirale, geru e ñage suge daba nage, geru e daba chudaboi, daba kira gai geru ege, daba tige gerudi, geru e daba ta gbe suga no. 4 Daba Chubenuske bai kaire kle gerule kwira nale kle age mo alin allabi kle mo alin allabi chudaboi Chube geruadi, agwa bai kaire kle Chube gerua kete daba ulitage daba kle gerule kare kwirale, geru ketanga ene daba Chubenuske kle age no daba Chubenu ulita alin kle daba Chubenu ulita chudaboi ta gbe no chage Chube geruadi. 5 Cha alin no ba ulita ñage gerule kwira nale me jwanba, agwa kaire ma no cha alin ba ulita geru Chubenu kete trate kwian kle gerule kare kwirale Chube kle ba ta gbe kare geru kete, e ma no gerule kwira nalege. Geru kwira nale kwian na ñage geru e blite tragale kwian ole kwian kle gerule kare kwirale, ene kwian Chubenu ulitage suge kle gerule mine, ene kwian Chubenu ulita ñage mo ta gbe ma no dare Chube geruadi. 6 Ba cha daballa cha ibotea Jesucristo giti, cha gerule ba ulita ole, cha joge baske geru Chubenu trage kwira nale me ba kle gerule kare kwirale, ngwale cha geru Chubenu trage baske, geru kwira nale me ba gerule kare me ba chudaboi. Agwa cha joge baske geru Chubenu trage ba kle gerule kare kwirale, cha gerule trate trate ba kle gerule kare kwirale Chube giti geru kete trate bage Chube cha ta gbe gerule kare, cha ba tke tangle geru uliage Chube cha tku tangle kare ba kle gerule kare kwirale, ene geru ulita ñage suge bage. 7 Kwian kle ngwanegda gbe ngwane me mo kobara gbe no ngwanegda uga giti, ene ngwanegda kerua me suge no trate kwian nage, me uñale kle ngwanegda gbe ngwane mo gate mine giti. Kaire kwian kle gitara dagenga me mo kobara gbe no giskalla kaire kaire giti, ene gitara kerua me suge no trate kwian nage, me uñale kle mo gate mine dagenga. 8 Kaire kwian trompeta daganganga ngwane trompetage guardia donga alin guardia donga gbale ta gbe biale dole, kwian trompeta daganganga me trompeta kerua gbe no trate guardia donga alin guardia dongage mi suge ama dódale, ama mi mo gbe biale dole. 9 Ene kaire kle boi kwira nale giti ba ulita Chubenuske, ba gweale kle gerule Chube giti daba Chubenuske kwira nale me daba kle gerule kare, ¿ene ba kle gerule kare be suge mine dabage? Me suge dale, ngwale ba kle gerule daba ole. 10 Uñale chage kwira ngle kle nga dba ai giti, kwira e ulita kaire kaire mo kwirale suge trate. 11 Kwian gerule kwira nale cha ole, chage geru me suge, cha me ama bitalla ama me cha bitalla, cha nga namu kare ama alin, ama nga namu kare cha alin, ni cha ña geru trage modi. 12 Malen cha gerule ba ulita ole, ba ulita takalin Chube Oña ta kete bage lle gweale boi Chube alin daba Chubenuske, ma no ba ta kade Chube Oñage daba Chubenu na tkale tangle Chube geruage daba kle gerule kare kwirale, ene ba daba na Chubenu ulita chudaboi ta gbe ma no chage Chube geruadi. 13 Bai kaire kle gerule daba Chubenuske kwira nale me jwanba Chube Oña kiralla giti, kwian e gerudale Chube ole Chube Oña ta kete amage suge kwira nale e blite tragale daba ole daba e kwirale, ene suge daba ulitage ama kle gerule mine kwira nale. 14 Cha gerule Chube ole daba Chubenuske kwira nale me daba kle gerule kare kwirale ni cha kle gerule kare kwirale, cha gerule Chube ole kwira enere Chube Oña cha ta gbe kare, cha kle gerule Chube ole agwa geru e me suge dabage ni suge chage, cha kle gerule ene alin e me daba chudaboi. 15 E boi ene cha ole, ¿cha agedale mine ene geru suge dabage? Ma no cha kle gerule Chube ole daba Chubenuske cha mo ta gbale no diali gerule Chube ole daba kle gerule kare kwirale, ene geru suge dabage daba chudaboi ta gbe suge no Chube ole. Kaire cha kle mo gate Chube giti daba Chubenuske, ma no cha mo ta gbale no diali mo gate daba kle gerule kare kwirale, ene mo gate gerua suge dabage daba chudaboi ta gbe suge no Chube ole. 16 Ene kaire ba ulita mo ta gbadale gerule no Chube ole daba Chubenuske Chube kle age giti daba kle gerule kare kwirale, ene geru suge dabage, ene daba ñage mo ta gbe ule ba ole gerule Chube ole. Ba kle gerule no Chube ole daba Chubenuske kwira nale me daba kle gerule kare kwirale, geru e me suge dabage, ene daba me ñage mo ta gbe ule ba ole ba kle gerule kare Chube ole. 17 Ba gerule no Chube ole daba Chubenuske Chube kle age giti kwira nale me daba kle gerule kare kwirale, e no ba alin agwa e me suge daba nage, e me daba na ta gbe chke ma no Chube geruadi. 18 Cha gerule no no Chube ole Chube kle cha ta gbe gerule kwira na tanrere ma ngle ba ulita Chubenu kle gerule kwira nalege. 19 Cha ñage gerule kwira nale tanre daba Chubenuske agwa suge chage geru e me suge dabage, ma no cha gerule bedre daba kle gerule kare kwirale daba tke tangle Chube geruage, ene daba Chubenuge geru suge. E ma no cha gerule tanre kwira nalege me daba kwirale ni geru gbaite suge dabage. 20 Cha daballa cha ibotea Jesucristo giti, ba ulita mo ta gbadale tañachuge kirogwa kare age me no giti, kirogwa bebi ni tachke mine age me no kwian juma kare. Noare ba ulita mo ta dbadale tañachuge kirogwa talla kare age me noge, agwa cha kle Chube gerua trage ba ole nege kare, geru ege ba mo ta gbadale tañachuge no kwian juma talla kle tañachuge kare. Noare ba chege diali tañachuge kirogwa talla kare age me no gerua ole, agwa Chube gerua ole ba me ñage chege tañachuge dare kirogwa talla kare, ba me ñage chege tañachuge dare gerule kwira nale alin giti. 21 Chube gerua degaba unsuialin gerule kwian israelita me Chube gau ulia kwira nale giti, chada e gerule: “Chube gerudu, ‘Cha be kwian chudalla na me israelita gbe cha gerua kete kwian israelita me cha gabage kwian me israelita kwirale, ni ene kwira na ene giti kwian israelita be mo ta gbe cha ole cha gai ulia.’ ” Unsuialin Chube agedu ene kwian israelita me ama gaba ulia ole. 22 E giti suge kwian me Chube gaba ulia me mo ta blite Chube ole geru kwira nale giti, geru e me suge kwiange, kwian me Chube gaba Chube gerua keruchuge kwira nale me kwian kle gerule kare kwirale, kwian ene chege sugekare Chubege. Agwa Chube kwian ta gbe geru amanu kete kwian monuge kwian kle gerule kare kwirale, kwian Chube gaba geru e keruchuge, kwian ene ta chege ma no Chube ole geru e giti. 23 Kwian me Chubenu kaire kwian gweale na me Chube gerua gaba sbali joge chke ba kwian Chubenu ulita kle mo litaba ngwadiske, ba kwian Chubenu ulita kle gerule kwira nale, kwian ene ba ulita keruchuge ama be tañachuge ba ulita kwian jwligebanga. 24 Agwa kwian me Chubenu kaire kwian gweale na me Chube gerua gaba sbali joge chke ba kwian Chubenu ulita kle mo litaba ngwadiske ba ulita keruchuge gerule Chube kle ba ta gbe kare gerule Chube giti mo kwirale, geru e Chube giti suge amage, ama tachke mo giti, suge amage ama agenga me no Chube gwage, ene ama agali chege tañachuge mo tale ulita kle age giti, 25 suge trate amage Chube ama talla me no ulita uñe trate, ene ama mo ta gbe no Chube ole jongnagwa skute dba Chube gai dage, suge amage Chube kweri, ulia Chube kle ba ulita tale malen ba ñage Chube gerua trage trate. 26 Cha daballa cha ibotea Jesucristo giti, cha takalin suge ba ulitage cha kledu gerule kare, ba ulita mo lite ule Chube geruadi, gweale ñage mo gate Chube giti, na gweale ñage daba tke tangle, na gweale ñage Chube gerua kete dabage Chube ama ta gbe gerule kare, gweale na ñage gerule kwira nale me jwanba, gweale na ñage kwira nale blite tragale daba ole daba e kwirale. Ba ulita gdaite gdaite kle lle ene kare boi kaire kaire daba Chubenuske, ba mo ta gbale tañachuge daba Chubenu na giti Chube gerua gbe chke ma ngle daba tale, ene daba mo ta gbe chage ma no Chube geruadi. 27 Ba ulita kle mo litaba, gweale ta gerukalin kwira nale me jwanbale, gdaboke gdamai alin ñage gerule kwira nale, ama daba manadaledi, gdaite gerule ngeru gire na ñage gerule, me ñage gerule ule kwaitre alin, kaire gweale kwira e blitadale tragale daba ulita kle mo litaba gerule kare kwirale. 28 Kwian gweale ta gerukalin kwira nale ba Chubenu ulita kle mo litabaske agwa daba na geru e blitanga me geru e tragadale ba ulita ole ba ulita kle gerule kare kwirale, ene ma no kwian gerunga kwira nale me gerule ba ulita kle mo litabaske gerule kweri, ma no kwian ene chege gerule gballa kamne mo tale Chube ole. 29 Kaire ba Chubenu ulita kle mo litabaske kwian gweale Chube gerua ketanga dabage Chube ama ta gbe gerule kare, kwian ene gdaboke gdamai alin ñage geru kete daba Chubenu ulita kle mo litabage, ulita kle mo litaba geru e keruchugadale ta giti mo ta gbale tañachuge trate kwian kle gerule giti geru e ulia Chube gerua o me. 30 Kwian Chube gerua ketanga gdaite bebi gerule ulita gire Chube kwian na ta gbe geru monu ketadale kwian kle mo litaba alin kaire, kle gerule ngeru chegedale kamne daba na e Chube ama ta gbu gerule chuge ngwadi Chube gerua kete Chube ama ta gbu gerule kare. 31 Age ene gdaite gdaite Chube gerua ketanga kwiange mo kaire kaire ñage Chube gerua trage Chube ama ta gbe gerule kare, ene kwian ulita kle mo litaba geru keruchuge no geru uñe trate Chube gerua keruchuge giti, ene kwian ulita ñage kira gai modi Chube geruage mo ta gbe chage ma no. 32 Chube kwian ta gbe geru monu kete kwiange, kwian ene Chube gerua ketanga ulita mo ta gbale no no geru kete kwiange me ulita gerule ule kwaitre alin, ma no daba manadedi gerule gdaite gdaite, ene geru ulita suge kwian ulita kle mo litabage. 33 Chube me takalin kwian Chube gerua ketanga ulita gerule ule kwaitre alin, kwian Chube gerua ketanga ulita gerule ule kwaitre alin geru me ñage suge kwian kle mo litabage, Chube me takalin boi ene kwian kle mo litabaske, Chube takalin kwian ulita kle mo litaba ñage Chube gerua keruchuge no, ene geru suge kwian ulitage kwian ulita ta suge no geru giti. Ba Chubenu ulita una Corintomu mo ta gbale age daba Chubenu nga na ulitage kle age kare, 34 ba ulita kle mo lite Chube geruadi gire muinga ulita chegedale kamne Chube gerua keruchuge alin, muinga ulita mo ñengulalla gadale mo chugagwallale Moisés nu Chube gerua degaba unsuialin gerule kare malen muinga ulita chegedale kamne daba Chubenu kle mo litaba ngwadi. 35 Muinga ta geru kadakalin Chube gerua gweale giti, ma no geru kade mo ullage mo ñengulallage, me no muinga alin gerule Chube gerua gweale giti kwian ulita gwa giti kle mo litaba ngwadi. 36 Ba ulita tachkedale mo giti, baske Chube gerua me jo chke ngeru, ba ulita me tañachugadale ba alin allabi Chube gerua uñe daba nage malen ba ulita agekalin moske ba takalin kare, cha gerule ba ole ba me ñage tañachuge ene, e me ulia. 37 Ba gweale ta suge moge Chube kle ta kete bage geru kete daba ulita mo litaba Chubenuge daba kle gerule kare kwirale, gweale na ta suge moge Chube kle ta kete bage gerule Chube Oña kiralla giti kwira nale me jwanbale, ba kwian ene ulia be suge trate bage Chube kle cha ta gbe chada ai degange ba alin, ba be age chada ai kle gerule kare 38 Bage chada ai me suge ene, ba me age chada ai Chube cha ta gbu degange kare, ba tañachuge geru ai cha agali gerua me Chube gerua, ba tañachuge ene, Chube gwage ba me Chube gerua ketanga ulia daba ulita mo litaba Chubenuge ba me gerunga kwira nale ulia Chube Oña kiralla giti, Chube gwage ba kwian ngwale, Chube me ta ketu bage ama gerua kete daba nage Chube me ta ketu bage gerule kwira nale me jwanba. 39 Cha daballa cha ibotea Jesucristo giti, cha gerule trate ba ulita ole, diali ba ulita gerudale Chube ole mo giti Chube ta kete bage ama gerua kete daba nage daba kle gerule kare kwirale, e no ba ulita alin. Daba gweale ta gerukalin kwira nale ba ulita kle mo litabaske, ba me ñage gerule daba ene ole ni gdaite ñage gerule kwira nale. Agwa ba ulita bai kaire kle gerule kwira nale bai kaire kle Chube gerua kete dabage Chube ta kete bage kare daba kle gerule kare kwirale, 40 ba ulita mo ta gbadale age modi Chube takalin kare. Ba ulita me gerudale ule kwaitre alin, agwa ba daba manadaledi gerule gdaite gdaite, ene ba ulita ñage mo lite no ule tañachuge salengwli Chube gerua giti, ene ba ulita ñage gerule no Chube giti.
1 Cha daballa cha ibotea Jesucristo giti, cha takalin ba ulita tachkedale cha geru Cristo chkuni gwade giti ketu bage kare, ba ulita geru e Cristo chkuni gwade giti gau ulia kaire ba kle mo ta gbe gwangerugu geru edi. 2 Cristo gerua e gai ulia giti ba tiendu gitiru ji chugege ba agedu me no gdale. Ulia ba geru e gau ulia mo alin diali, ene ba me geru gau ngwale. Agwa ba me kle geru gai ulia ene, ba geru e gau ngwale me kle mo ta dbe ulia gerudi. Agwa ba ulita mo ta gbu geru e gai ulia. 3 Cha kledu baske cha ba tku tangle ngeru Cristo giti Cristo cha ta gbu kare, cha ba tku tangle Cristo giti Cristo jokeda che ulita alin che agedu me no giti, Cristo jaba jo ogaba keugage, chui maike chku Cristo chkuni gwade, boidu ene ulita Cristo ole Chube gerua degaba unsuialin gerule kare. 5 Cristo chkuni gwade ama medu Pedroge, kaire chui nage Pedro kledu kwian Jesucristo gerua ketanga na ulita ole ama gdataboko giti gdaboke ulita gwagedu Cristodi gwadeni mo gwagwa giti. 6 Chui nage kwian nu Cristo gaba ulita quinientos kledu mo litaba Cristo medu gwadeni ama ulitage, kwian ene ulita gwagedu Cristodi gwadeni, nege kwian ene gweale jogebada agwa ngle kle toi gwade bebi jogeda ñage gerule ulia ama gwagedu Cristodi gwadeni mo gwagwa giti. 7 Kaire Cristo medu Santiagoge, chui nage kwian Jesucristo gerua ketanga ulita kledu mo litaba ama ulita gwageduni Cristodi gwadeni. 8 Bdagli cha Pablo gwagedu amadi mo gwagwa giti, chui ege Cristo cha ta blitu ama ole, ama cha gbu ama gerua ketangale, Cristo cha gau bdagli kwian Jesucristo gerua ketanga na ulitage, 9 cha ma soli ama ulitage ni cha ka chegedale kwian Jesucristo gerua ketangale. Ngeru cha bebi Cristo gai ulia cha chagedu age me no tanre kwian nu Cristo gaba ulia dollale, cha ene gire Cristo cha gau mo alin, Cristo cha ta blitu ama gai ulia, ama cha gbu ama gerua ketangale. 10 Chube agedu no no cha alin, ama cha gau lle boi ama alin, ama ta ketu chage lle boi ama alin ama takalin kare. Chube me cha gau ngwale dale, me ene, cha kle lle boi no no, cha kle lle boi ma giti dare kwian Jesucristo gerua ketanga na ulitage. Cha kle lle boi ene cha me kle age mo kiralla giti, Chube no no cha ole, Chube mo kiralla giti cha chudaboi lle boi no. 11 Ba me tañachugadale bai lle bo ngle bai me lle bo ngle Chube alin, cha lle bo ma no ma ngle o Jesucristo gerua ketanga ngeru lle bo ma no ma ngle. Cha ulita Jesucristo gerua ketanga kle geru amaña kete kwiange Cristo jokeda chkuni gwade giti, ba ulita geru e gau ulia, e giti ba mo ta gbadale diali. 12 Cha ulita geru dbanga Cristo giti Cristo jokeda chkuni gwade, e uñale ulia cha ulita geru dbangage, ba ulita geru e gau ulia, ¿mineade ba gweale kle gerule jaba mi chke gwadeni? 13 Ba gweale kle gerule kare jaba mi chkeni gwade, e ene ulia e suge Cristo jokeda ama me chkuni gwade. 14 Cristo me chkuni gwade ba gweale kle tañachuge kare, e ene ulia ene cha kle gerule kare Cristo giti ba ole cha kle gerule ngwale, ba mo ta gbu geru gai ulia cha gerudu kare, e ngwale kaire. 15 Cha ulita Cristo gerua dbanga kle gerule ulia Chube Cristo jaba gbuni gwade, agwa ba gweale kle gerule jaba me chkeni gwade, e ene ulia ba kle gerule kare ene Chube me Cristo jaba gbuni gwade cha ulita kle gerule kare, ene kaire Chube mi che Chubenu jaba gbeni gwade, e ene ulia ba kle gerule kare ene cha ulita kle sole, ene cha me kle gerule ulia Chube giti. 16 Ba gweale kle tañachuge jaba mi chkeni gwade, e ene ulia e suge Cristo jokeda Cristo me chkuni gwade. 17 Cristo me chkuni gwade, ngwale ba ulita kle mo ta gbe Cristo gai ulia. Cristo me chkuni gwade, ni ba gdaite tien gitiru ji chugege ba agedu me no gdale. 18 Cristo me chkuni gwade, kwian Cristo gau ulia kledu gwade gire jokeda mi chkeni gwade, ama jonga ulita, ama chege sugekare Chubege diali chui tangle. 19 Cristo me chkuni gwade, ene che Cristo gai ulia toigda no nege alin nga dba ai giti alin allabi, e ene alin allabi, ene che jogeda giti che be kwachie tanre, nga na me che alin, ni nga be suga no chedi nga dba ai giti tañachuge mo giti. 20 Agwa Cristo jokeda, ama me chegu jogebada, agwa ulia ama chkuni gwade, ama ngeru chkenga gwadeni jondege, ene ama giti kwian ulita bai kaire ama gaba ulia jogeda be chkeni gwade toi ule ama ole. 21 Kwian gdaitre alin kada Adán giti jogeda chegu kwian ulita alin, ene kaire kwian gdaitre alin kada Cristo giti chkeni gwade chegu kwian ulita alin. 22 Adán agedu me no giti kwian ulita chegu sugekare Chubege kaire jogeda, ene kaire Cristo jokeda chkuni gwade giti kwian ulita bai kaire Cristo gai ulia, kwian ene jogeda ama me chege sugekare Chubege, ama be chkeni gwade toi gwadeni ule Chube ole. 23 Ngeru Cristo jokeda chkuni gwade, e giti suge trate chege kwian Cristonu jogebada be chkeni gwade Cristo chkuni gwade kare. Cristo chkuni gwade gire joni nga ngaña giti, ama be chieni kwian amanu jwen, chui ege kwian amanu jogebada be chkeni gwade be joge toi ama ole nga ngaña giti. Be boi ene chui bdaglige. 24 Chube Cristo kagu nga dba ai giti, gire Chube kwian ulita nga ulita lle ulita jigu Cristo kote, Cristo chegu e ulita Chugagwallale. Nege Cristo kle nga ngaña giti ama chege kaire kwian ulita nga ulita lle ulita Chugagwallale, agwa ama bebi mo gbe kirachke Chube dollaledi ulita. Nege Cristo kle manade, chui bdaglige Cristo be chieni kwian amanu gbaleni gwade dbale toi nga ngaña giti Chube kle ngwadi, chui ege Cristo be kirachke dolla Satanádi be kirachke chugagwalla ulita Chube dollaledi nga ngaña gitidi nga dba ai gitidi, kaire be kirachke lle ulita me no Chube dollaledi. Cristo be kirachke e ulita me nodi gire Cristo be kwian amanu ulita kete ama Ñenua Chubege, ulita be chege Chube kote, Chube be chege ulita Chugagwallale. 26 Nege nga dba ai giti jogeda kle kwian ulita alin, agwa chui bdaglige kwian Cristonu ulita mi chege jogebada, Cristo be kwian monu ulita gbeni gwade toidale ule Chube ole, kwian mi jogeda dare. 27 Chube gerua degaba unsuialin gerule Cristo giti, chada e gerule: “Chube ama gbu ma kweri lle ulitage kwian ulitage, Chube lle ulita kwian ulita jigu ama kote, ama chege ulita Chugagwallale.” Chube gerua degaba unsuialin ene me gerule Cristo ma kweri Chubege, me ene, Chube lle ulita kwian ulita jigu Cristo kote. 28 Chui bdaglige be suge trate trate kwian ulitage Cristo ma kweri lle ulitage kwian ulitage, Cristo ulia lle ulita kwian ulita Chugagwalla, chui ege Cristo be lle ulita kwian ulita keteni naskuni Chubege, Chube be chege Cristo Chugagwallale kwian ulita Chugagwallale kaire lle na ulita Chugagwallale, ene Chube be chege ma kweri ulia lle ulitage kwian ulitage, Chube be chege kwian ulita Chugagwalla kaire lle ulita Chugagwalla. 29 Kwian me mo ñeaba chiske jogeda, ba kle gwade mo ñeange chiske kwian jaba ene giti ene tañachuge jaba chege mo ñeaba chiske kare kwian jaba agali kle gwade kare, ulia suge bage jaba mi chkeni gwade, ¿lledale ba kle age ene? Ba kle age ngwale. 30 Ulia jaba mi chkeni gwade, ¿lledale cha kaire Cristo gerua dbanga na ulita kle mo chuge ngwadi diali chui kaire kaire boi daga ngwale jogedaleda geru dbe giti? Ulia jaba mi chkeni gwade cha ulita kle age ene ngwale. 31 Diali chui kaire kaire kwian kle age me no cha dollale kwian kle chage cha nate cha gwaleda geru dbe giti, agwa cha me tallade e giti, suge trate chage cha me kle boi ene ngwale cha kle boi geru dbe bage gdale, malen nga suga no chadi geru dbe giti, kaire nga suga no chadi ba giti, ba geru Cristo giti keruchugu cha giti, geru e giti ba Cristo che Chugagwalla gau ulia mo alin. 32 Cha boidu tanre daga ngwale una Efesoge kwian Cristo gerua dollale kote, kwian una Efesomu agedu tanre me no cha dollale. Ulia jaba mi chkeni gwade, ¿lledale cha mo chugu ngwadi boi tanre daga ngwale ene kwian ene kote? Ulia jaba mi chkeni gwade ma no cha chage nga dba ai giti age kwian gweale kle gerule kare, ama gerule: “Me sbali che be jogeda malen nege ma no che nga ollade blire ngle lle gage jai ngle ngeru che jogedage.” Agwa cha me tañachuge ene, suge trate chage jaba be chkeni gwade malen cha mo chuge ngwadi boi daga ngwale Cristo gerua dbe giti, uñale chage cha me kle boi ene ngwale geru dbe giti. 33 Ba ulita me mo chugadale ngwadi mo anblitange tañachuge kwian gweale me geru gai ulia kle gerule kare jaba mi chkeni gwade giti, ba chegedale siere kwian kle gerule enege, ba chage kwian ene ole ama be ba ta gbe siere ba nu geru ulia gabage. 34 Ba ulita bai kaire kle mo ta gbe geru me ulia ole, ba mo ta gbadaleni naskuni tañachuge no geru ulia giti me age me no dare, ba gweale me Chube uñe ulia malen ba kle mo ta gbe joge siere geru uliage, nga chiedale ibule badi cha kle gerule kare ba ole. 35 Cha tañachuge ba gweale ta geru kadakalin ai kare chage jaba chkeni gwade giti: “¿Jaba tugebada be chkeni gwade mine? ¿Be jegwale mine molen?” 36 ¡Nga ngwale chuga giti me tachke jaba chkeni gwade giti! Ba tachkedale chude giti, chude tke dbiske, chudegba giti tangle e tugeda, chudenuma na chie, ene tige. 37 Chudegba tke, chude amaña mi chke ngaña jegwale amaña ole, be jegwale nganake molen, chude chke ngaña jegwale na ole. Chude gbaba ai kare: aro, eu, chude gba chudea na. Chude ene tke, chude gwatige, 38 Chube chude kaire kaire gbe tige jegwale ole mo kaire kaire Chube takalin kare. 39 Chude chudalla mo kaire, kwian chudalla mo kaire, bda chudalla mo kaire, bdada chudalla mo kaire, ngwe chudalla mo kaire, ulita chudalla jegwale mo kaire kaire molen, Chube e ulita kaire kaire dodadu Chube takalin kare. 40 Lle ulita nga ngaña giti jegwale nganake molen lle ulita nga dba ai giti jegwale molenge, lle nga ngaña giti meñe no no, kaire lle nga dba ai giti meñe no no, agwa lle nga ngaña giti me meñe salengwli lle nga dba ai giti kare, lle nga ngaña giti meñe nganake. 41 Chui, dai, beu ulita chrachienga no, agwa ulita me chrachienga salengwli, chui chra nganake dai chrage, dai chra nganake beu chrage, beu ulitaske beu chra gweale nganake beu chra nage, Chube e ulita kaire kaire gbu chrachienga Chube takalin kare. 42 Che ñage gerule ene kaire mo jegwale giti, che kle toi nga dba ai giti che jegwale boi, che jegwale jogeda tugeda, che jegwale nege nga dba ai giti me chege diali, agwa che jaba chkeni gwade chuia be chke, chui ege che jaba be chkeni gwade che jegwale be nganake, jegwale e mi boi be chege diali. 43 Nga dba ai giti che jogeda, che jaba joge dbiske, jaba jogenga ngwale trenmalin, agwa che jaba chkeni gwade, ene che be jegwale no no molen diali chui tangle. Che jaba joge dbiske jaba me kira molen me ñage age mo alin, agwa che jaba chkeni gwade, ene che be jegwale kiraske molen diali chui tangle, kira me salengwli toidu nga dba ai giti kiralla ole kare. 44 Che jegwale nga dba ai giti me ñage toi diali chui tangle, e jogeda, agwa che jaba chkeni gwade jegwale na ole, jegwale e me boi me jogeda, e chege diali. Che ulita jegwale molen toidale nga dba ai giti, jegwale e boi. Ene kaire jegwale na me boi kle che ulita alin che jaba be chkeni gwade gire. 45 Chube gerua degaba unsuialin gerule Chube kwian ngeru dodadu giti, chada e gerule: “Chube dbi dodadu gbu gwade, e kwian ngeru toidu nga dba ai giti kada Adán.” Chube gerua degaba unsuialin gerule ene Adán giti. Adán toidu jokeda, Adán giti kwian ulita jegwale nga dba ai giti molen, jegwale e boi jogeda. Agwa Cristo chiu Adán nate, Cristo giti kwian jaba be chkeni gwade jegwale na ole, jegwale e me boi chege diali. 46 Kwian ulita jegwale molen nga dba ai giti, jegwale e boi jogeda, agwa bdagli kwian be jegwale na molen, jegwale e me boi me jogeda chege toi diali chui tangle nga ngaña giti ule Chube ole. 47 Dbi jo dodaba kwianle chegu kwianle gwangea nga dba aimu, e Adán, agwa Cristo chiu nga ngaña giti Chube kle ngwadi. 48 Dbi jo dodaba Adánle, Adán jokeda gire Adán joni dbiske, che ama kare malen che ulita jogeda joge dbiske kaire Adán kare. Agwa kaire Cristo be jaba gbeni gwade chuiage, chui ege che Cristonu be jegwale na gai, Cristo be e kete chege ama jegwalenu kare toidale ule ama ole. 49 Nege che ulita kle toi nga dba ai giti che jegwale Adán kare, Cristo chagedu nga dba ai giti ama kwian Adán kare kaire, Cristo jokeda chkuni gwade gire Cristo jegwale jagere nganake gau, ene kaire che Cristonu, bdagli che be chkeni gwade che be Cristo kare. 50 Cha daballa cha ibotea Cristo giti, cha gerule ba ulita ole, che jegwale nga dba ai giti me ñage joge jegwale e ole llagli toi nga ngaña giti Chube kle ngwadi, che jegwale nga dba ai giti me ñage toi diali chui tangle, che jegwale nga dba ai giti boi jogeda me chege diali, malen me ñage joge toi nga ngaña giti diali chui tangle. 51 Cha geru no kete ba ulitage Chube be age giti che ulita ole, geru ai ni uñale ba gdaitege, che Chubenu ulita mi kle jogebada Cristo chieni chuiage, agwa bai kaire be kle gwade chui ege jegwale ulita be jwlite nganake. 52 Ulita be boi blike gwagwa gwe gwagwa jrainnga kare, trompeta be gdade kweri gire che Chubenu ulita jogebada Chube be che jaba gbeni gwade jegwale na me jogeda ole, ene kaire che Chubenu ulita kle gwade Chube be jegwale nganake gbe che alin, jegwale e mi jogeda. 53 Che jegwale ulita nga dba ai giti boi jogeda me chege diali, malen che jegwale ulita be jwlite nganake jogedale toi nga ngaña giti Chube kle ngwadi, jegwale e mi boi mi jogeda be chege diali chui tangle. 54 Che jegwale nga dba ai giti be jogeda, agwa chui bdaglige che jegwale ulita be jwlite jegwale na me jogeda ole be joge toi nga ngaña giti Chube kle ngwadi diali chui tangle. Chui ege be boi Chube gerua degaba unsuialin gerule kare, chada e gerule: “Jogeda mi chege dare che alin, 55 che jaba chkeni gwadege gwangerugu che mi jogeda kwaite, malen nege che me kwachiedale jogeda giti.” Chube gerua degaba unsuialin gerule ene jogeda giti. 56 Kwian age me no giti kwian chege sugekare Chubege, malen kwian kwachie jogeda giti. Moisés nu Chube gerua degaba giti suge kwiange kwian agali gballa me ñage mo jwen siere ji chugege age me no gdale, malen kwian chege kwachie ta olire tanre jogeda giti. 57 Agwa che gerudale no no Chube ole Chube agedu no che alin che Chugagwalla Jesucristo giti, jogeda Jesucristo talla gai ulia ole che me kwachie, ama chkuni gwade malen che jogeda che mi chege jogebada diali. 58 Cha daballa cha ibotea Jesucristo giti, cha no no ba ulita ole. Uñale ba ulitage bdagli ba be chkeni gwade toi diali chui tangle ule Chube ole, malen cha gerule ba ole, ba ulita mo ta gbadale diali gwangerugu Chube ole me mo chuge ngwadi ta gbe joge siere sidri Chubege. Ba ulita mo ta gbadale ma no dare lle boi Chube alin che Chugagwalla Jesucristo gerua kete kwiange, uñale ba ulitage ba mo ta gbe Jesucristo gerua dbe kwiange, lle ene boi Chube alin Chube takalin kare ba me kle lle boi ngwale.
1 Ba geru kadu chage igi lite ole giti daba Chubenu una Jerusalénmu alin malen nege cha gerule ba ulita ole igi giti cha gerudu daba Chubenu kle mo lite Chube geruadi nga kweri kada Galacia ole kare. 2 Ba ulita gdaite gdaite kle igi gai mo alin mangire batre, domingo kaire kairege ba ulita mo ta gbadale igi gweale oge ketadale gbale ule daba Chubenu nga namu alin, ba igi ulita gbe biale, ene cha joge chke igi kle biale litaba ole. 3 Cha be joge chke ba ngwadi gire ba be daba gai igi dbadale daba Chubenu una Jerusalénge alin, cha be chada dege ba igi litu ole giti kagadale ule daba e ole. 4 Chage suge no cha alin joge ule gire cha agali be joge ule daba gatedi igi dbe. 5 Cha be jogeni una Corintoge ba ulita kle ngwadi tienda ba ulitadi, agwa ngeru cha kle tañachuge joge nga Macedoniage tienda daba Chubenudi nga ege, chegé sugeti nga ege gire cha be joge dare, cha kle tañachuge joge chke ba ngwadi una Corintoge. 6 Cha kle tañachuge cha joge chke ba ngwadi cha ta chegekalin chui tanre ba ole baske noi suia tke tangle, gire cha be joge dare. Cha takalin ba ulita cha chudaboi joge dare baini kaire cha be joge ngwadi geru Jesucristo giti dbe, ba cha chudaboi gerule Chube ole cha giti, kaire gweale cha gatedi joge dare nga na bai kairege. 7 Cha joge chke baske cha me ta gwagekalin alin ba ulitadi gire blike joge tangle, agwa ma no cha alin cha chege chui tanre ba ulita ole, Chube takalin cha chege baske chui ngle cha be chege ba ulita ole chui ngle. 8 Agwa nege cha kle aini una Efesoge, cha be chege aini chui Pentecostés manade ngwange olladadale. 9 Aini una aige kwian tanre kle age me no cha dollale Jesucristo gerua dbe gdale, agwa kaire kwian tanre Jesucristo gerua uñakalin, kwian ene ta kle biale Jesucristo gerua keruchuge, malen cha chege aini chui dare Jesucristo gerua ketadale kwiange no no, ene kwian tanre una aige ñage Jesucristo gai ulia. 10 Timoteo joge chke ba ngwadi ba mo ta gbadale ama gai ngwange no, ene ama be suge moge ama kle mo bitallaske kare. Timoteo Jesucristo gerua traganga kwian ole cha Jesucristo gerua traganga kare, 11 malen ni ba ulita gdaite tañachugadale me Timoteo gai ngwange no, ba me tañachuge ene agwa ma no ba age no ama alin ama chudaboi ama be kle baske gire, kaire ba ulita ama chudaboale chieni nga suga no ole aini cha kle ngwadi, aini cha kle daba Chubenu ulita ole Timoteo manade ngwange. 12 Uñale chage ba kledu Apolos manade ngwange agwa ama me su joge nege, cha tañachugu noare Apolos joge ule Timoteo ole daba na ole ule tienda badi, cha gerudu tanre tanre ama ole joge giti, agwa ama me tadu jogekalin ule ai suiale, cha tañachuge ama be joge chui gweale nage ama be kle biale gire be joge. 13 Ba ulita Chubenu kledale ta giti mo ta gbe ma no diali Jesucristo gerua ulitage. Ba ulita me mo ta dbale kwachie ba kle geru gai giti, ba me ta dbale kwachie gerule kwian na ole geru ba kle gai giti, ba ulita mo ta gbale gwangerugu kiraske gerudi, ene ba me mo anblitange, ene kwian geru dollale me ñage ba ta blite nganake. 14 Diali ba ulita mo ta dbadale no Chube ole kaire ba mo ta dbadale no kwian na ulita ole, ba agedale ulita ta no ole ta giti Chube alin kaire kwian na alin. 15 Cha bitalla Jesucristo giti una Corintoge, uñale ba ulitage cha jo chke ba jwiage nga kweri kada Acayage geru Jesucristo giti dbe ba ulitaske daba gdaite kada Estéfanas ule mo muingalla ole mo olia ulita ole gwangea Jesucristo gau ulia, chui ege gwangerugu ama ulita mo ta gbu diali lle boi daba Chubenuske daba Chubenu manade Jesucristo geruage daba chudaboi ta gbe chage Jesucristo geruadi. 16 Cha takalin ba Chubenu ulita daba e gai dage age ama gerule kare Jesucristo gerua giti. Kaire daba na ulita kle lle boi ene baske kle ba chudaboi, ba ama gai dage kaire. 17 Nga suga no no chadi Estéfanas chku aini cha kle ngwadi tienda chadi ule Fortunato ole Acaico ole, ba ulita me ñadu chie ule tienda chadi, agwa daba e gdamai giti cha suge moge ba ulita kle aini cha ole kare. 18 Ama gdamai kle cha ole kle cha ta gbe suge tanre kiraske Jesucristo gerua giti ama kle ba ulita ta gbe diali gerudi ama kle ba ole kare. Daba e kare na ulita kle lle boi baske no Chube alin, ba ulita daba ene gadale dage, ba gerudale no ama ole ama kle lle boi no Chube alin baske giti. 19 Daba ulita aini Chubenu nga kweri Asiage gbi kage ba ulita alin. Daba Aquila ule Prisca ole, kaire daba Chubenu na ulita kle mo lite Aquila ngwadi Chube geruadi gbi no tanre kage ba ulita alin che Chugagwalla Jesucristo giti. 20 Daba ulita Chubenu aini nga kweri Asiamuge gbi kage ba ulita Chubenu toinga una Corintomuge. Ba ulita gbi kade no no moge ta no ole dabage ulita. 21 Cha Pablo kle gbi ai bdagli dege agali mo kodi chada ai giti kage ba ulita alin. 22 Kwian gweale me mo ta dbe no che Chugagwalla Jesucristo ole, ulia ma no bdagli kwian ene chege sugekare Chubege chui tangle diali ji chugadale kweri. Cha takalin che Chugagwalla Jesucristo chieni blike. 23 Cha takalin che Chugagwalla Jesucristo age no no ba ulita alin. 24 Cha takalin suge trate ba ulitage cha no no ba ulita ole Jesucristo giti. Geru ai ene ulita cha Pablo chada degangu ba ulita kwian Chubenu una Corintoge alin. Che kle meni.
1 Cha Pablo chada ai degange ba ulita Chubenu alin kle mo lite Chube geruadi una Corintoge kaire daba Chubenu na ulita alin kle toi una na kaire kairege nga kweri Acayage: Chube tale Chube cha gau cha gbu Jesucristo gerua ketangale, cha ule daba Timoteo ole gbi kage chada ai giti ba ulita Jesucristo gerua gaba alin. 2 Cha takalin Chube che Ñenua kaire Jesucristo che Chugagwalla age no no ba ulita alin ama ba ulita ta gbe suga no. 3 Che ulita gerudale no no Chube giti, ama che Chugagwalla Jesucristo Ñenua, ama tai dage chege diali ama che chudaboi ama che ta gbe suga no. 4 Che kle boi daga ngwale gire Chube che chudaboi, ama che kira gbe ama che ta gbe suga no, ene kaire daba na kle boi daga ngwale che ñage daba ene chudaboi ta gbe suga no Chube che chudabo kare ta gbe suga no che kle boi daga ngwaleske. 5 Cristo chagedu nga dba ai giti, ama boidu tanre daga ngwale kwian ama dollale kote, che boi ene kaire daga ngwale Cristo gerua dbe giti Cristo che chudaboi ta gbe nga suga ma no ole boi daga ngwaleske. 6 Cha ule Timoteo ole kle boi tanre daga ngwale Cristo gerua dbe giti, kaire cha boidu daga ngwale Cristo gerua dbe giti ba ulita alin ba ulitaske, ene ba geru Cristo giti keruchugu ba geru Cristo giti gau ulia ene ba ulita ta chegu suga no geru e ole, ba tiendu gitiru ji chugege ba agedu me no gdale, geru Cristo giti no no ba ulita alin. Kaire Cristo cha chudaboi ta gbe suga no boi daga ngwaleske, ene suge chage cha ba chudaboi mine ta gbe suga no ba kle boi daga ngwale Cristo gerua dbe giti cha kle boi daga ngwale kare, cha ba chudaboi ta gbe suga no boi daga ngwaleske Chube kle cha chudaboi ta gbe suga no kare, ene ba boi daga ngwale ba ñage jage ba mi joge siere Cristo geruage. 7 Geru chku uñale chage ba ulita giti ba kle boi daga ngwale Cristo gerua dbe giti, e giti chke uñale chage ba kle mo ta gbe no Cristo ole, kaire boi daga ngwaleske Chube kle ba chudaboi ba ta gbe nga suga no ole ene ba kle ñage ta chege kiraske Cristo geruage diali, e giti nga suga no chadi ba ulita giti. 8 Cha bitalla Jesucristo giti, cha ta ba ta gbakalin chke boidu cha ole nga kweri Asiage giti, nga Asiage Jesucristo gerua dbe giti cha boidu tanre daga ngwale kwian geru dollale kote, kwian Jesucristo gerua dollale nga ege agedu tanre me no cha ole, e kote cha kira ulita jonga, cha tañachugu kwian e be cha gweda geru gdale, ulia cha tañachugu cha mi tien gitiru gwade, agwa uñadu chage Chube kwian jaba gbanga gwadeni kledu cha ole, sugedu trate chage boi tirare eneske cha agali me ñage age no mo alin agali agwa Chube alin ñage age no cha alin cha chudaboi, cha gballa me ñage mo gbe siere kwian kle age tirare me no cha olege, cha mo jigu Chube kote, Chube agedu no cha alin. 10 Chube cha chudabo tanre nga Asiage, ama cha jun siere kwian tadu agekalin tirare cha olege nga ege, ene kwian me ñadu cha gweda. Chube cha chudabo nga Asiage kare, ene kaire uñale trate chage Chube be cha chudaboi diali cha be boi tirareske ulita, Chube be cha jwen siere diali kwian ta agekalin tirare cha olege. 11 Noare ba ulita mo ta gbe gerule Chube ole cha giti, ba ulita chudaboi kade Chubege cha alin cha kle boi tirareske. Ba ulita gerule ene Chube ole cha giti, Chube be cha chudaboi gire be suge ba ulitage Chube kle age no cha alin, e giti ba ulitadi nga be suga no gire ba ulita be gerule no no Chube ole ama kle age giti. 12 Nga suga no chadi cha tale cha suge moge ulia nga ulita baini kaire cha jogeba ngwadi cha chagedu kwian ulitaske age no trate Chube takalin kare, cha kledu ba kwian una Corintomu ulitaske cha chagedu age no ene kaire. Cha agali mo talla giti me mo ta gbu chage ene, me ene, agwa Chube agedu no cha alin, ama cha ta gbu, ama cha kira gbu diali, ene cha ñadu chage age no trate ama takalin kare. 13 Diali geru cha kle degange kare ba ulita alin, geru e me mno ba alin ñage suge trate ba ulitage, agwa ba ulita gwealege me suge trate, ba gweale kle tañachuge me no cha giti kle tañachuge cha me kle age ulia cha kle chada degange kare, cha takalin ba ulita baige kle tañachuge ene cha giti chke uñale trate trate geru cha kle degange kare ba ulita alin geru e ulia ulita, cha me kle sole chada giti ni cha kle ba anblite. Cha takalin suge trate ba ulitage cha kle mo ta gbe chage no Jesucristo gerua dbe no kwian ulitaske Chube takalin kare, ene bdagli che Chugagwalla Jesu chieni chuiage nga be suga no ba ulitadi cha giti kaire nga be suga no chadi ba ulita giti. 15 Ngeru cha tañachugu ba ulita kle mo ta dbe no cha ole ba ulita be cha gaini ngwange no diali, malen cha tañachugu joge chke bitaboke baske tienda ba ulitadi, ene bitaboke ba ña kira gai cháge Jesucristo gerua giti. 16 Cha tañachugu joge nga kweri Macedoniage agwa ngeru cha be joge chke ba ngwadi, gire cha be joge dare nga Macedoniage, gire nga Macedoniage cha chieni ba ngwadi nakwaite, cha chege sugeti ba ole ene ba gweale be ñage cha chudaboi cha gatedi joge dare nga kweri Judea ngnagu. 17 Cha tañachugu joge chke ba ngwadi ene, agwa cha me ñadu, ¿e giti ba gweale kle tañachuge chadi cha mo ta gbu joge agwa ulia cha me tadu jogekalin cha mo ta gbu kare? Cha geru ketu bage cha be joge tienda ba ulitadi, gire cha me jo, ¿e giti ba gweale kle tañachuge chadi cha gerudu ta boke ole sole ba ole? 18 Uñale trate Chubege cha ta mine giti cha gerule ba ole, uñale Chubege cha kle mo ta gbe gerule ulia ba ole diali, cha me kle gerule ta boke ole sole ba ole. 19 Cha ta chagekalin age no ulita Chube Kirolla Jesucristo agedu kare nga dba ai giti, malen cha me sole ba ole. Cha kaire Silvano kaire Timoteo cha gdamai chagedu ba ulitaske Jesucristo gerua trage ba ulita ole cha me sodu ba ole, cha gerudu ulia ba ole Jesucristo giti. Jesucristo diali gerudu ulia ni sodu sidri, Jesucristo agedu ulia diali ama gerudu kare. 20 Kaire Jesucristo agedu ulita kwian alin Chube gerudu unsuialin Chube be Jesucristo gbe age kare, Jesucristo agedu no ene ulita giti che ulita gerule no no Chube ole. 21 Chube ba ulita kaire cha ulita ta gbu Cristo gai ulia, ama che ulita ta gbu chage kiraske Cristo geruage, Chube che ulita gau mo alin geru dbe ama alin kwianske. 22 Che ulita Chubenu ulia, ama mo Oña gbu che tale, Chube Oña diali kle che ole kle che ta gbe suge trate che Chubenu bdagli che be toi diali chui tangle Chube ole. 23 Ulia ngeru cha tañachugu joge una Corintoge tienda ba ulitadi gerule ba ulita ole agali, agwa bdagli cha tañachugu ma no ba ulita alin cha me joge ba ngwadi cha tañachugu ngeru kare, malen cha mo ta blitu cha me jo. Ba ñage tañachuge cha me kle gerule ulia, agwa uñale Chubege cha kledu tañachuge mine ba ulita giti, cha me kle gerule ene ulia ba ole Chube be cha gbe jiske cha kle gerule giti ba ole. 24 Cha me ta jogekalin llani gerule mno ba ole mo ta gbe Jesucristo gai ma no giti, me ene, uñale chage ba ulita mo ta gbu no Jesucristo ole Jesucristo gai ulia, cha ta jogekalin llani cha ta ba ulita chudaboakalin kira gai ma dare Jesucristo giti, ene ba ulita chege kiraske nga suga no ole Jesucristo geruadi.
1 Cha joge ba ngwadi tienda badi cha ka boadale mno ba ulita ole agali ba kle age giti, cha ka boi ene ba ole ba be chege ta olire tanre, malen cha mo ta blitu me joge tienda badi nakwaite, cha me ta ba ta gbakalin olire ibule cha ka boi ba ole giti. 2 Cha ka boi mno ba ole cha ba ta gbe olire cha kaire be chege ta olire ba ulita giti, cha kle ba ulita gbe chege ta olire e giti cha be chege ta olire kaire, chadi nga suga no ba ulita ta kle nga suga no ole. 3 Sugedu chage ene malen cha chada degangu ba ulita alin, cha geru gbu chada giti alin kagu ba ulita alin, ene cha me ka boadale ba ole agali. Cha me tadu jogekalin agali gwage badi chege ta olire ba ulita kle age giti, cha tañachugu ma no chada degange ba alin, ene ba ulita agali ñage mo ta gbe ba kle age giti chuge ngwadi mo ta gbe ma no age no Chube takalin kare, ba age ene, chadi nga be suga no, kaire ba ulitadi nga be suga no. 4 Cha kledu chada e degange kagadale ba ulita alin cha tañachugu tanre ta olire ole ba ulita giti, cha olidu tanre, cha chada e degangu ba ulita alin me ba ta gbagda olire agwa cha tadukalin suge trate ba ulitage ulia cha no no ba ole cha ta ba ta gbakalin suge ulita ba kle age giti ba chudaboi. 5 Cha chada degangu ngeru cha kagu ba ulita alin, chada e giti cha ba ta gbu age onbre gdaite ole ama kledu age me no me no ba ulitaske, onbre e cha ta gbu olire ama kledu age me no baske giti, me cha alin allabi ta olidu ama kledu age giti, kaire ba ulita gweale ta olidu tanre ama kledu age giti. 6 Ba ulita kwian onbre ene gbu ji chuge nobi, ba me ama gbe ji chuge dare. 7 Ma no ba ulita mo ta gbe no ama ole ama chudaboi ama agedu ulita talla mlienga, ba me ama jige ta olire ole, ama chege ta olire ole ama ta ñage chege bate Chubege ama ña joge siere Chubege ta olire ole. 8 Ba me ama chugale ngwadi ta olire ole, malen cha takalin ba ulita ama gaini naskuni baske ba age no ama alin, ene be suge trate amage ba kle mo ta dbe no ulia ama ole. 9 Cha geru gbu ngeru ba alin chada giti ba ulita agedale mine kwian onbre ene ole, ene ba be age kwian ene ole giti be chke uñale chage ba ta agekalin cha gerule kare cha gai dage ulia o me. Ba agedu cha gerudu kare kwian ene ole, ba ji gbu ama alin. 10 Ba ulita onbre gdaite ene agedu me no ene talla mliunga, cha kaire mo ta gbe daba ene agedu me no ene talla mlienga Cristo gwa giti Cristo takalin kare. Che ulita Chubenu mo ta gbe ule ene daba age me no talla mlienga, 11 ene dolla Satanás me ñage age che ulita Chubenuske ama takalin kare, uñale che Chubenuge dolla Satanás takalin age mine kwian ole. 12 Cha jo chke una Troage geru che Chugagwalla Cristo giti tragadale kwian una emu ole, cha kledu eni kwian tanre ta kle biale geru Cristo giti gai ulia, cha geru Cristo giti ketu amage, ama cha keruchugu no ama geru gau ulia. 13 Cha jo chke una Troage cha tañachugu cha daballa Cristo giti kada Tito be skwen chage una ege ene Tito giti geru ba giti be chke uñale chage ba ulita kle mine, agwa Tito me kledu eni bebi chke. Cha kledu una ege cha ta olidu tanre chege tañachuge tanre ba ulita giti, cha tadukalin Tito chke blike geru trage cha ole ba ulita giti, malen cha me chegu manade sbali eni, cha jo siere kwian ulita una emuge, cha jo nga kweri Macedoniage Tito manade ngwange. 14 Cha gerule no no Chube giti, diali ama kle cha chudaboi tanre nga ulitage baini kaire cha joge ngwadi, diali ama kle cha ta gbe chage no mo ta dbe no Cristo ole gerule no trate Cristo giti kwian ulita ole, ene cha giti geru Cristo giti ñage chke uñale kwian nga ulitamuge. Cristo gerua kle chage kwianske nga ulitage lle ñachke no ñalla kare, geru kle skwen no kwiange. 15 Cha kle chage geru Cristo giti trage kwian ulita ole, e giti nga suga no no Chubedi, ene geru Cristo giti ñage chke uñale kwian ulitage, ene kwian ulita ñage geru amaña keruchuge ñage mo ta gbe geru gai ulia mo alin. Kwian gweale geru gai ulia agwa gweale me geru gai ulia, 16 kwian bai me geru gai ulia, kwian ene chege diali sugekare Chubege, geru me skwen no kwian enege, agwa kwian bai geru gai ulia, geru skwen no amage, geru kwian ene ta gbe Chube ole, kwian ene Cristo gerua gai ulia giti be toi diali chui tangle Chube ole. Cha agali gballa me kledu biale mo ta gbaba geru ene Cristo giti dbe kwian ulitaske Chube takalin kare, 17 agwa Chube cha gau cha kagu geru Cristo giti dbe kwian ulitaske, cha kle geru kete kwiange Chube cha ta gbe kare Chube kirallaske me mo kirallaske. Cha me kle geru dbe kwian na tanre kle geru dbe kare, kwian ene kle chage geru dbe gire kle igi kade mo alin geru dbe giti, cha me kle mo ta dbe age ene kwian geru ganga ole.
1 Cha gerule ene ba ole ene ñage suge bage cha kle lle boi giti no Chube alin, ¿e giti ba tañachuge cha ta mo gbakalin ma no ma kweri ba ulita gwage? Me dale, ba ulita cha uñe, ba ulitage uñale cha kwian mine. ¿Daba nu chada degaba gerule no cha giti ole cha chagedale? ¿Cha chada e kaitadale ba ulitage kwian gweale kle age kare ene ba ulita cha gai ngwange no moske? ¿Cha chada kadadale bage gerule no cha giti ene cha ña chage chada e ole nga na ulitage Cristo gerua dbe, ene kwian nga na ulitamu cha gai ngwange no? 2 Me ene dale, cha me chagedale chada e kare ole. Ba me tañachugadale kwian gweale chada degadale cha giti ene suge bage cha kwian mine, me ene, ba ulita bai nu Cristo gerua gaba ulia tachkedale mo giti, ene be suge trate bage cha chagedu geru dbe no baske, geru e agedu tanre no ba tale, geru e ba ta blitu, ba me kle chage nge kare. Diali cha kle tachke ene ba ulita giti, ba kle cha tale diali cha kle tachke ba ulita giti. Boidu ba ulita tale Cristo gerua giti kle chke uñale kwian tanrege baini kaire cha kle chage ngwadi, ene e giti suge kwian nga ulitamuge cha kle chage Cristo gerua dbe no ulia, e ma no chagé chada olege nga kaire kairege. 3 Cristo agedu tanre no ba ulita tale cha Cristo gerua du baske giti, cha chage nga kaire kairege e trage kwian ole, e salengwli cha kle chada degaba gerule no ba giti dbe kaite kwian ulitage kare, agwa e me chada ulia degaba mo kodi chada degagda giti ni chada jo degaba ke kwale giti kare, me e kare, Cristo agedu ba ulita tale Chube Oña giti, Chube gwade, kaire Chube Oña gwade, Chube Oña agedu ba ulita tale e chege diali ba tale me chada degaba batenga alin kare. 4 Cristo giti uñale trate trate chage cha kle lle boi no Chube alin Chube takalin kare. 5 E me gerule cha agali gballa mo talla giti kle mo ta gbe lle boi no Chube alin Chube takalin kare, me ene, Chube kle cha ta gbe kle kira kete chage kle cha chudaboi, ulita cha kle age no Chube kle ta e kete chage age ama takalin kare ene cha ñage chage Cristo gerua dbe kwianske. 6 Unsuialin Chube Moisés ta gbu Chube gerua dege kwian israelita alin, Moisés geru e degu kwian alin, kwian me ñadu age geru e ulita gerule kare, malen geru e giti kwian chegu jiske sugekare Chubege. Agwa nege tangle Chube cha gau Chube cha gbu geru no jagere trage kwian ulita ole, Chube kle kira kete chage kle ta kete chage geru e jagere dbe kwianske, Chube Oña giti geru e suge kwiange, kwian geru e gai ulia giti kwian chege toi diali chui tangle ule Chube ole. 7 Chube agali mo gerua unsuialin ketu Moisége, Moisés geru e degu ke kwale giti Chube ama ta gbu chada dege kare, gire Moisés joni kwian israelitaske Chube chralla ole geru degaba dbe, Moisés gwa chrachiunga chui chrachienga kare, kwian israelita ulita me ñadu gwage ama gwadi chra kote. Agwa Moisés gwa me chegu chrachiedalenga diali, Moisés gwa chrachienga e jo tangle. Chube nu geru gbaba ene kwian alin Moisés giti geru no no, agwa kwian agali me ñadu mo ta gbe age ulita geru e gerule kare, malen kwian chegu jiske sugekare Chubege. 8 Geru e chku kwianske Moisés giti Chube chralla ole, geru e no, agwa ulia Chube gerua jagere ma no ma kiraske ulita, geru jagere joge chke kwian tale Chube Oña kiralla giti, geru jagere giti Chube Oña kwian ta blite Chube ole ene kwian ñage age no ulita Chube takalin kare. 9 Moisés Chube gerua unsuialin ketu kwiange Chube kirallaske, ulia geru e no, agwa geru e me kwian ta blitu Chube ole age Chube takalin kare, malen kwian ulita chegu sugekare Chubege jiske Chube gwage, Chube gerua unsuialin me kwian ta gbu trate Chube ole, agwa Chube gerua jagere ma no ma kiraske Chube gerua unsuialinge, kwian Chube gerua jagere gai ulia giti kwian me chege jiske Chube gwage, Chube gerua jagere kwian ta blite Chube ole age Chube takalin kare, ene kwian chege no trate Chube gwage. 10 Unsuialin Moisés Chube gerua degu kwian alin, geru e alin allabi kledu kwian alin, e geru no kwian alin, agwa nege Chube gerua jagere chku kwianske, geru e ma no ulita Chube gerua unsuialinge, Chube gerua unsuialin me Chube gerua jagere nege kare, 11 Chube gerua unsuialin chegu sugeti alin, agwa Chube gerua jagere ma kiraske ma kweri be chege diali chui tangle. 12 Uñale chage trate trate Chube gerua jagere geru no no kwian ulita alin geru e be chege diali chui tangle, malen cha kle mo ta gbe diali geru e ulita trage no trate kiraske kwian ulita ole, cha takalin geru e no chke uñale kwian ulitage. 13 Nege Chube gerua jagere giti cha me kle age salengwli Moisés agedu kare, nege Chube gerua chege che tale diali, che ña geru e kete diali kwian ulitage, agwa unsuialin me boidu ene. Unsuialin chui gwealege kaire kairege Chube mo gerua ketu Moisége tragadale kwian israelita ole gire Moisés joni kwian israelitaske Chube chralla ole, Moisés kledu Chube gerua kete kwian israelitage Moisés gwa chegu chrachienga Chube chralla ole, agwa Moisés gerudubi ulita gire bedre bedre gwa chra jongwa, malen Moisés ñomedrega gbu mo gwa giti ene kwian me gwage gwa chra jogenga. 14 Unsuialin Moisés Chube gerua tragu kwian israelita ole, geru e me sugedu trate ulita kwiange, kaire kle boi ene kwian israelita ole nege tangle Chube gerua Moisés degu unsuialin giti, nege tangle kwian israelita kle Moisés nu Chube gerua unsuialin degaba batenga, geru me sugekalin amage, ama me ta Cristo gakalin ulia, Cristo gai ulia alin giti geru ñage suge kwiange, kwian ulita bai kaire Cristo gai ulia Cristo kwian ene ta gbe chke suge Chube gerua unsuialinge. 15 Unsuialin tangle Chube gerua me sugedu kwian israelitage kle kaire kwian israelita ulita nege tanglege, kwian israelita ulita nege tangle Chube gerua unsuialin Moisés nu degaba batenga, geru e me suge trate ulita amage. 16 Agwa nege bai kaire mo ta gbe Chugagwalla Jesucristo gai ulia mo tale, Jesucristo kwian ene ta gbe chke suge Chube geruage. 17 Chugagwalla Jesucristo ule Chube Oña ole gdaitre alin, kwian bai kaire Jesucristo gai ulia kwian ene tale Chube Oña kle toi, kwian ene me chege dare tañachuge Moisés nu Chube gerua degaba alin giti age geru e alin gerule kare, Chube Oña kle kwian ene ta gbe suge age Chube takalin kare. 18 Che ulita Jesucristo gau ulia, e giti che ulitage suge trate che Chugagwalla Jesucristo no no Jesucristo kweri, bedre bedre suge ma no ma trate che ulitage Jesucristo mine, chui kaire kairege Chube Oña kle che ta gbe ma no age Jesucristo kare, ene kwian na gwage Jesucristodi che giti.
1 Chube taidu dage chage agedu no cha alin, ama agali cha gau cha gbu ama gerua jagere Jesucristo giti dbe kwianske, malen cha me skwatige cha me e chuge ngwadi, cha mo ta gbe gwangerugu geru dbe Chube alin. 2 Cha me mo ta gbe chage age me no sugaska skwlenre dare, cha age me no ulita chugu ngwadi cha kle mo ta gbe chege sugekare age me no ulita sugaskage. Nege cha kle mo ta gbe chage age no ulita Chube gwa giti kaire kwian ulita gwa giti, cha me kle chage geru ngwale me ulia trage kwian ole ene kwian anblite geru me uliage, cha me kle Chube gerua blite nganake tragadale kwian ole cha takalin kare, me ene, cha kle mo ta gbe geru ulia Jesucristo giti alin trage no trate diali kwian ulita ole Chube takalin kare, ene ñage suge kwiange cha kle geru no ulia trage ama ole. 3 Cha kle geru ulia Jesucristo giti dbe kwianske, cha kle geru e trage no trate ulita kwian ulita ole, kwian bai kairege geru me suge kwian ene kle sugekare Chubege jiske Chube gwage. 4 Che dolla Satanás kle ko gate kwian ene ta giti, malen kwian ene ta kle nga jereske kare sugekare Chubege, kwian ene kle age Satanás takalin kare, malen kwian me Cristo gai ulia, me suge kwian enege Cristo no kweri Cristo Chube Cristo giti ama ñage Chube uñe. 5 Diali cha kle chage geru dbe kwianske cha geru Jesucristo giti trage no kwian ulita ole, cha me chage kwianske gerule no mo giti: “Cha kwian no no, cha ba jwannga siere ji chugege age me no gdale.” Me ene, cha me gerule ene mo giti, agwa cha gerule ene Jesucristo giti, ulia Jesucristo no no, ama che Chugagwalla ama che jwannga siere ji chugege che age me no gdale, cha geru e dbanga alin, cha lle boanga alin allabi Jesucristo alin ba ulitaske ba ulita ta gbe Jesucristo geruadi. 6 Unsuialin nga ulita kledu nga jereske gire Chube nga gwangea dodadu, Chube nga chra gbu gire nga jere chegu sugekare nga chrage, nga chra chegu sugekare nga jerege. Chube e amaña Jesucristo kagu nga dba ai giti chage kwianske kwian ta gbe Chube uñe, kwian me Chube uñe kle chage nga jereske kare, Jesucristo kwian ta gbe suge salengwli jichra kwian gbe ten nga jereske kare, Jesucristo giti che Chube uñe, Jesucristo giti suge trate chege Chube noare kweri. 7 Chube gerua Jesucristo giti geru no no ma no geru na ulitage, Chube geru e ketu chage dbadale kwian ulitaske. Cha ngwale, cha agali gballa me ñage Chube gerua no ene trage no kwian ole, agwa Chube kle kira kete kle ta kete chage geru e trage no ama takalin kare, ene kwian cha keruchuge geru Jesucristo giti trage ama ole, suge amage cha kle gerule Chube kirallaske me mo kirallaske. 8 Cha kle geru dbe giti cha kle boi tanre daga ngwale, cha me ña kige boi daga ngwale ege, agwa cha me kle mo ta dbe olire tanre e giti. Chui gwealege cha kle tañachuge tanre cha agedale mine boi daga ngwaleske, agwa cha me mo ta gbe blite geruge. 9 Kwian tanre kle age cha dollale kle chage cha nate age me no cha ole geru dbe giti, agwa cha tale suge cha me kle gballa Chube kle cha ole kle cha manade diali. Kwian kle age tanre dagale cha ole ta cha gwakalinda agwa me ñadu cha gweda, malen cha kle gwade chage gwangerugu geru Jesucristo giti dbe kwianske. 10 Baini kaire cha joge ngwadi cha chage gwangerugu geru Jesu giti dbe, geru dbe ene giti diali kwian ta cha gwakalinda, agwa cha me kle tañachuge tanre e giti, cha tañachuge Jesu giti, Jesu bole ene kaire, cha takalin kwian tanre Jesu uñe cha giti malen cha kle mo ta gbe chage gwangerugu geru Jesu giti trage kwian ole me tañachuge kwian kle age giti cha ole. 11 Cha kle toi nga dba ai giti cha kle Jesu gerua dbe kwianske, Jesu gerua dbe giti cha kle boi tanre daga ngwale tirare kwian Jesu gerua dollale kote, kwian me geru uñe ta cha gwakalinda Jesu gerua dbe giti, agwa cha kle mo ta gbe biale jogeda Jesu gerua dbe giti diali baini kaire cha chage ngwadi, ene suge kwian nage ulia Jesu kle gwadeni Jesu kle cha kira gbe geru dbe gwangerugu malen cha me kwachie. 12 Cha mo ta gbu ene mo chuge ngwadi jogengaleda geru dbe giti ba ulitaske, ene cha giti ba ulita geru Jesu giti keruchugu ba ulita geru gau ulia ba ulita ta sugedu toi Jesu gerua ole ene ba be toi diali Chube ole chui tangle. 13 Kwian unsuialin ta du no Chube ole, ama chada degu talla suge Chube ole giti, chada e gerule: “Cha Chube gai ulia, malen cha gerule no Chube giti kwian ole.” Kwian unsuialin chada degu ene, ama Chube gau ulia, ene kaire cha Chube gerua Jesu giti gai ulia, malen cha kle mo ta gbe gerule no trate Jesu giti kwian ulita ole. 14 Chube che Chugagwalla Jesu jaba gbuni gwade, ene kaire uñale chage cha Jesu gai ulia giti Chube be cha jaba gbeni gwade kaire ama Jesu jaba gbuni gwade kare, uñale chage bdagli Jesu be cha dbe ule ba ulita ole nga ngaña giti Chube kle ngwadi toidale diali ule ama ole, malen cha me kwachie jogeda geru dbe giti nga dba ai giti kwianske. 15 Cha me ta chugu geru Jesu giti dbe cha kle boi daga ngwaleske, boi daga ngwale sketangle cha geru du ba alin cha geru ketu bage, ene geru ñadu joge chke ba tale, ba ulita geru gau ulia, baske kwian na tanre ñage Jesu gai ulia ba giti, ene kwian nglege suge Chube noare kweri Chube agedu tanre no ama alin Jesu giti, ene kwian ngle ñage gerule no no Jesu giti Chube ole. 16 Malen cha me ta chuge geru dbe gwangerugu, cha me kwachie boi daga ngwale geru dbe giti. Cha kle toi nga dba ai giti, diali chui kaire kairege bedre bedre cha kle joge ma juma, kira me chege, agwa cha tale chui kaire kairege cha ta chege ma no ma kiraske Chube ole, cha ta suge moge cha kwian jagere kare Chube gerua ole. 17 Nege toi nga dba ai giti boi daga ngwaleske cha kle tañachuge diali bdagli giti cha be joge toi nga ngaña giti Chube kle ngwadige, tañachuge e giti cha kira gbeda jage boi daga ngwaleske nga dba ai giti, uñale chage cha kle boi daga ngwale nege e me chege diali, e be joge tangle, malen suge chage e sugeti alin. Agwa cha joge toi nga ngaña giti gire cha be joge siere boi daga ngwale ulita nga dba ai gitige, nga ngaña giti cha be toi no diali nga suga no ole chui tangle Chube ole, e me joge tangle, e chege diali cha alin. 18 Malen cha me mo tallade tanre kle boi cha ole nga dba ai giti, boi cha ole nga dba ai giti ulita joge tangle, agwa Chube be age no ulita cha alin chui bdaglige mi joge tangle, e be chege diali cha alin malen cha kle mo ta gbe diali tañachuge me kle boi nege giti agwa cha kle mo ta gbe tañachuge Chube giti, bdagli cha be kle toi no nga ngaña giti Chube ole diali chui tangle, uñale chage toi Chube ole e chege diali chui tangle.
1 Nege che ulita kle toi nga dba ai giti, agwa che mi chege toi diali, che ulita be jogeda che jegwale be tugeda, agwa chui gwealege che be joge toi nga ngaña giti Chube kle ngwadi, chui ege Chube agali be jegwale na me boi kete chege ene che be ña toi diali chui tangle Chube ole nga ngaña giti. 2 Nege nga dba ai giti che tañachuge tanre mo jegwale me jage giti malen che kle jegwale jwlite chuia manade, chui ege che be jegwale na jagere me boi gai toi nga ngaña giti Chube ole diali chui tangle, che takalin chui e chke blike, 3 ene che mi tañachuge dare che jegwale me jage jegwale jogeda giti, uñale chege che be chege toi no jegwale na jagere me boi ole diali chui tangle. 4 Nege nga dba ai giti che jegwale boi daga ngwale diali, che chege tañachuge tanre che jegwale me jage jegwale jogeda giti, che me no jogeda ole, malen che takalin jegwale jwlite chuia chke blike, ene che be jegwale na jagere gai, ene che me chege tañachuge dare jogeda giti, che jegwale na jagere mi jogeda be chege toi diali chui tangle Chube ole. 5 Che bebi jegwale ene gai, che kle aini jegwale nga dba ai giti ole agwa Chube Oña kle che tale che ta gbe suge trate jegwale na jagere giti chui be chke gire Chube be che jegwale me jage blite jegwale na jagere jage diali ole, Chube agali mo Oña ketu chege che ta gbe suge ene. 6 Nege che kle toi nga dba ai giti jegwale nga dba ai giti ole che me kle ule che Chugagwalla Jesucristo kle ngwadi, che kle nga dba ai giti che me ñage gwage Jesucristodi, che kle bate amage, agwa che tale che kle toi ama gai ulia diali, che tale suge trate che be jegwale jagere molen toi ule Jesucristo ole diali chui tangle, malen nege nga dba ai giti che kle mo ta dbe kiraske nga suga no ole, ulia che be kle ama ole. 8 Ma no che alin che jogeda blike, ene che joge siere nga dba ai gitige che ñage toi nga ngaña giti ule che Chugagwalla Jesucristo ole, agwa nege che kle toi nga dba ai giti nga suga no ole che jogeda chuia manade ngwange, uñale chege che be joge toi Jesucristo ole chui ege. 9 Che jogeda o che toi gwade che kle mo ta gbe diali age no Jesucristo takalin kare. 10 Chui be chke che ulita be joge chke Cristo kle ngwadi che ulita be kle ama gwa giti ama be gerule che ulita ole che agedu giti nga dba ai giti agedu no o me agedu no, kaire kaire be ñanalla gai agedu no giti ñanale malen che kle toi nga dba ai giti che mo ta gbadale age no diali Cristo takalin kare. 11 Uñale chage chui bdaglige che Chugagwalla Jesucristo be gerule cha ole cha agedu giti nga dba ai giti malen suge chage cha ama gadale dage no diali age no ama takalin kare. Kaire cha takalin chke uñale kwian ulitage kwian Jesucristo gadale dage, malen cha kle geru Jesucristo giti trage kwian ulita ole ene kwian ñage Jesucristo gai kweri Jesucristo gai dage. Uñale trate Chubege cha chage ta mine giti ama gerua dbe, cha takalin ba ulitage suge kaire ba tale cha geru du ba ulitaske ta no giti. 12 Cha kle gerule no ene mo giti ba ulita ole cha me kle gerule cha takalin ba cha gai ma no ma kweri kwian na ulitage, me ene, agwa cha takalin suge trate ba ulitage cha geru ulia dbanga ta no giti, ene kwian geru dbanga gweale na gerule ba ole cha dollale cha giti ene ba ñage mo ta gbe gerule no ulia cha giti geru dbanga ene ole, geru dbanga ene diali ta mo gbakalin kweri daba na gwage, kwian ene geru dbe ta me no ene ole agwa geru ulia me kle ama tale ni ama kle geru ulia dbe. 13 Diali cha kle chage geru Jesucristo giti trage tanre kwian ulita ole, e giti kwian gweale kle tañachuge me no chadi kle gerule cha kwian jwligebanga, agwa cha kle mo ta gbe diali lle boi Chube alin Chube takalin kare me tallade kwian kle gerule kare cha giti. Agwa cha takalin suge trate ba ulitage ulia cha kwian mine cha chagedu baske geru kete ba ulitage ta no giti, ene cha agedu no ba ulita alin. 14 Suge trate chage Cristo no no cha ole malen cha me ta agekalin dare cha agali agekalin kare, me ene, cha ta mo ta gbakalin diali age no Cristo alin Cristo takalin kare ama gerua dbe kwian na ulitaske. Uñale chage Cristo jokeda kwian ulita jwanle siere ji chugege age me no gdale, Cristo jokeda giti kwian ulita bai kaire ama gai ulia chege jogebada kare mo talla age ngeruge. 15 Cristo jokeda kwian ulita alin ene kwian ulita bai kaire Cristo gai ulia kwian ene ulita me toidale tañachuge mo giti age ngeru kare mo alin ama takalin kare, me ene, kwian ene ulita mo ta gbale age Cristo takalin kare tachkedale diali Cristo agedu ama alin giti, Cristo jokeda chkuni gwade kwian ene ulita giti malen ama toidale age no diali Cristo alin. 16 Nege cha Cristonu malen cha me tañachuge cha tañachugu ngeru kare, ngeru cha bebi Cristo gai ulia cha tañachugu kwian ulita nga dba ai giti tañachuge kare daba na giti, diali cha chegu tañachuge daba na ulita giti bai ma no bai ma kweri bai gerule ma no, e suiale cha tañachugu ene kare daba ulita giti diali. Ene kaire ngeru cha tañachugu Cristo giti, chage sugedu ama me kweri, cha ama gau kwian ngwale kare, agwa nege cha me tañachuge ene kare dare, nege suge trate chage Cristo chema ulia, ama cha ta blitu nganake. 17 Ene kaire kwian Cristo gai ulia kwian ene kwian jagere kare, kwian ene tañachuge nganake tañachugu ngeruge, ta agekalin nganake agedu ngeruge, kwian ene ta suge nganake ulita jagere. 18 Chube alin ñage age ene kwian tale Cristo giti. Ngeru cha kledu tañachuge ulita age ulita Chube dollale, agwa Cristo giti Chube cha gbu ama skatemanallale, ene nege Cristo giti cha ta chege no Chube ole, nege Chube kle cha kage geru Cristo giti kete kwian nage, ene kwian na kaire ñage chege Chube skatemanallale Cristo gai ulia giti. 19 Cristo giti Chube agali kwian ulita gbu mo skatemanallale ni tañachuge kwian ulita kledu age me no ama dollale giti. Geru e chkedale uñale kwian ulitage malen Chube cha gbu geru Cristo giti kete kwian ulitage, ene kwian ñage geru e gai ulia mo alin, ene ama ta chege no Chube ole. 20 Cha kwian chagenga Chube gerua Cristo giti dbe kwian ulitaske, me cha tale cha kle gerule kwian ole agwa cha kle gerule Chube takalin kare Chube cha ta gbe gerule kare. Cristo kalla giti cha gerule kwian bai me Cristo gai ulia ole ama mo ta gbadale no Chube ole Cristo giti, Cristo gai ulia giti ama me chege dare Chube dollale agwa Cristo giti Chube ama ta blite Chube ama gbe mo skatemanallale. 21 Cristo chagedu nga dba ai giti kwianske Cristo agedu no trate ulita ni agedu me no sidri, agwa Chube ama gbu che agedu me no ulita jia chuge, ene che Cristo gai ulia giti che me chege jiske Chube gwage agwa che chege no trate Chube gwage Cristo giti.
1 Cha lle boanga Chube alin, Chube ta du no ba ulita ole cha kage baske geru Jesucristo giti kete bage, nege cha gerule ba ulita ole cha me takalin ba geru Chube agedu no ba alin Cristo giti gai ngwale, ba mo ta gbadale geru e gai no no diali. 2 Chube gerudu kwian unsuialin ole, Chube gerua e chegu degaba gerule ene: “Ba mo chudaboi kadu chage, blike cha ba keruchugu, cha tadukalin ba chudaboi malen cha ba jun siere.” Chube gerudu ene kwian unsuialin ole, ene kaire nege Chube kle gerule ene ba ulita ole, nege Chube ta ba jwankalin siere ji chugege ba agedu me no gdale, ba me ñage manade dare ba chudaboi kadadale Chubege, nege nege ba Chube gadale ulia ba mo chudaboi kadale Chubege, ene Chube be ba keruchuge blike, Chube be ba chudaboi be ba jwen siere ji chugege age me no gdale. 3 Cha kle lle boi Chube alin geru Jesucristo giti dbe kwian ulitaske, diali cha kle mo ta gbe chage ta giti trate me age sidri me no kwian ulita gwa giti, ene kwian gdaite me ñage gerule me no Jesucristo geruadi cha kbiale. 4 Diali cha kle mo ta gbe age no ulita kwianske, ene ñage suge trate kwian ulitage cha agali me kle mo gbe gerule Jesucristo giti agwa ulia cha lle boanga Chube alin, ene cha giti kwian ñage geru Jesucristo giti uñe. Geru dbe giti cha kle boi tanre daga ngwale, agwa diali boi daga ngwaleske cha diali kle mo ta gbe chege jage geru dbe gwangerugu. Cha me lle molen toidale no, kwian age tanre me no cha dollale, 5 kwian cha kwabate tanre mno, kwian cha tke skage, kwian mo lite mo tke dole cha ole, cha kira me lle boi chui gdale, cha me ña gbe no lle tanre kle cha alin boadale, chui gwealege cha kle toi bli ole. E ulitaske cha kle mo ta gbe jage geru dbe, cha takalin kwian ulita geru Jesucristo giti uñe. 6 Kaire cha mo ta dbe toi no trate kwian gwa giti, cha Chube gerua Jesucristo giti uñe trate tragadale kwian ole, kwian gweale age me no cha dollale cha me ta dbe me no skochie amadi, cha age no kwian ulita alin kwian chudaboi no, Chube Oña kle cha tale cha ta gbe age no Chube takalin kare, cha mo ta dbe no ulia daba ulita ole, 7 diali cha geru ulia trage kwian ole, cha me sole kwian ole, cha kle age ulita Chube kirallaske me mo kirallaske, cha mo ta gbe kiraske age no diali ene cha me mo chuge ngwadi age me no sidri, ene diali cha chege kira ole chage trate gwangerugu geru ulia dbe. 8 Kwian gweale cha gai dage gerule no cha giti, gweale me cha gai dage gerule me no chadi cha dollale. Kwian tanre gerule chadi cha kwian me no cha kwian songa ngwale cha kwian anblitanga, agwa uñale chage cha kle geru ulia kete kwian ulitage. 9 Uñale trate kwiange cha lle boanga ulia Chube alin agwa ama kle cha gai kwian ngwalere. Bitangle cha tañachugu cha be jogeda agwa cha kle chage toi gwade. Cha gbere boi tanre daga ngwale gwaleda agwa cha me jokeda. 10 Cha tañachuge boi daga ngwale alin giti cha ta chege olire agwa eske cha tañachuge Jesucristo giti chadi nga suga no mo tale diali geru dbe giti. Cha me lle molen ketadale kwiange agwa geru kete giti ene kwian tanre geru ulia gai mo alin, e no. Cha me lle molen sidri mo alin nga dba ai giti agwa cha Jesucristo uñe, cha alin Jesucristo ma no ulitage. 11 Cha bitalla ulita Jesucristo giti una Corintomu, cha kle gerule ulia trate ba ulita ole chada ai ulita giti, ene ñage suge trate bage cha kle tañachuge mine ulita ba giti. Cha gerule ulia ba ole cha no no ba ulita ole, 12 cha me kle mo ta dbe me no ba ulita ole, cha me kle mo ta gbe tañachuge sugekare bage agwa ba ulita kle mo ta gbe tañachuge nganake chage mo ta gbe sugekare chage cha dollale. 13 Cha gerule ba ulita ole, cha no ba ulita ole ñenua no mo kirolla ole kare, ñenua gerule no trate mo kirolla ole kare ene kaire cha gerule ba ulita ole trate, cha takalin ba ulita mo ta dbe no cha ole cha kle mo ta dbe no ba ulita ole kare. 14 Ba ulita Cristo ganga ulia me mo chugadale ngwadi mo gbe chage ule gdaitre alin kare kwian me Cristo ganga ulia ole, ba ulita kle mo ta gbe Cristo gai ulia ta gdaitre alin ole me ñage mo ta gbe ule kwian na me Cristo gai ulia ole, kwian Cristo ganga ulia me chage age salengwli me tañachuge salengwli kwian me Cristo ganga ulia kle age kle tañachuge kare, kwian Cristo ganga ulia ta chagekalin age no Chube takalin kare agwa kwian me Cristo ganga ulia chage age me no Chube dollale. 15 ¿Cristo talla salengwli dolla Satanás talla ole? Me dale, Satanás tañachuge nganake Cristo tañachuge nganake. Ene kaire kwian Cristo ganga ulia talla me salengwli kwian me Cristo ganga ulia talla ole. 16 Lle oña dodaba mo kodi kwian kle gai mo chubeale, ¿lle oña e talla tañachuge mine ule kwian talla ole? Lle oña e jaba, che talla me ñage tañachuge ule e ole. Che Cristo ganga ulia me kle lle oña jaba gai mo chubeale, che talla Chube gwadenu, che talla Chube gwade toingwalla, Chube gerua degaba unsuialin gerule e giti, chada e gerule: “Chube gerudu: ‘Kwian bai kaire cha gai dage, cha be toi kwian ene tale diali, baini kaire ama joge ngwadi cha be kle ama ole, cha ama Chubea, ama kwian chanu.’ 17 Kaire Chube gerudu: ‘Ba ulita jogedale siere kwian me kle cha gai uliage kwian kle lle oña dodaba mo kodi gai mo chubealege, ba me tañachugadale ama kle tañachuge kare, ba me mo chugadale ngwadi age me no cha dollale ama kle age kare, ba chegedale sugekare e ulitage, ene cha be ba gai mo alin ba be chege chanu, 18 ba ulita be chege cha kirollale cha jianle, cha be chege ba ulita Ñenuale.’ Chube che Chugagwalla kiraske kweri gerudu ene ulita kwian monu ole.” Chube gerua degaba unsuialin gerule ene.
1 Cha bitalla Cristo giti, cha no no ba ulita ole, cha gerule ba ulita ole ulia Chube age ene ulita che alin ama gerudu kare, malen che ulita Chubenu mo ta gbadale chege sugekare age me no ulitage tañachuge me no ulitage, che mo ta gbadale Chube gai dage, ene che be age ma no tañachuge ma no trate diali Chube takalin kare. 2 Cha gerule ba ulita ole, cha takalin ba ulita mo ta dbe no cha ole me chege tañachuge dare me no chadi, cha me agedu me no sidri ba ulita ole, cha me gerudu me no ba ole ni agedu me no ba gwa giti ba ta gbale age me no, cha me ba anblitu ene cha lle jwandalenga ba ngeru mo alin, cha me agedu ene ba ulitaske, cha agedu no ba ulita alin malen ba ulita mo ta gbadale no cha ole. 3 Cha kle gerule kare ba ole cha me kle gerule badi me no, me ene, uñale bage cha ta mine ba ole, cha gerudu kare ba ole ngeru cha no no ba ole, cha be chege mo ta dbe no ene ba ole diali, cha be jogeda mo ta dbe no ene ba ole. 4 Cha kle gerule ulia trate ba ulita ole cha kle tañachuge mine ulita ba giti, cha tale nga suga no no chadi ba giti, kaire cha kle gerule no ba giti daba na ulita ole. Cha kle boi tanre daga ngwale Cristo gerua dbe giti agwa eske cha kle tañachuge ba giti, ene chadi nga suga no no tanre, kaire cha kira gai chage gwangerugu geru dbe. 5 Cha chku aini nga kweri Macedoniage cha tañachugu kwian me cha chugedi agwa me boidu ene, kwian me cha chugu ngwadi geru dbe taingwli, kwian tanre agedu me no cha dollale, boi daga ngwaleske kaire cha tale cha tañachugu tanre ba ulita giti, cha tadukalin ba me joge siere geru uliage. 6 Cha kledu tañachuge tanre ene ta olire ole gire Chube cha ta gbu nga suga no ole Chube kle age no diali kare kwian ulita kle ta olire alin, Chube cha ta gbu nga suga no ole Tito giti, Tito chku aini cha kle ngwadi. 7 Tito kleduni ule cha ole e cha ta gbu nga suga no ole, me e alin agwa Tito chiu geru ba giti dbe, e giti nga sugedu ma no chadi. Tito gerudu cha ole nga suga no no amadi ba ulita giti ba kle age giti Chube takalin kare, kaire ama gerudu cha ole ba ulita no cha ole takalin gwage chadi mo gwagwa giti, kaire ama gerudu ba ulita ta suge olire cha giti cha kle ta olire giti ba agedu giti cha dollale. Geru e ulita chku cha kote Tito giti, e cha ta gbu nga suga no no ole. 8 Cha chada degangu kagadale ba ulita alin cha ta olidu tanre chada e degange giti, uñadu chage ba chada e batenga giti ba be ta olire tanre. Tito giti chku uñale chage ba ta olidu ulia cha tañachugu kare chada e giti, agwa cha me tañachuge e giti, e sugeti alin. 9 Nege nga suga no no chadi, suge chage chada e giti Chube ba ta gbu tachke ba kledu age me no Chube dollale giti, ba ta olidu ba kledu age giti ba mo ta blitu naskuni Chube ole age Chube takalin kare, suge chage cha me agedu me no ba ole chada e degange giti agwa cha ba ulita chudabo, malen nga suga no chadi. 10 Chube kwian ta gbe suge olire kwian kle age me no giti, kwian ene tachke Chube giti, suge amage ama kle age Chube dollale gire kwian mo ta blite age me no chuge ngwadi ulita mo ta gbeni Chube ole age no Chube takalin kare, kwian ene tien gitiru ji chugege ama agedu me no gdale, bdagli ama chege nga suga no ole. Agwa kwian ta olire lle kle boi nga dba ai alin giti, kwian ene ñage mo ta gbe skochie Chubedi kle boi giti, ta e me kwian ta gbe tachke no Chube giti, ene kwian me mo ta gbe Chube ole, kwian ene chege ta olire diali sugekare Chubege. 11 Nege ñage suge trate ba ulitage Chube me ba ulita ta gbu suge olire ngwale cha chada degangu giti ba alin, me ene, e ba ulita chudabo, chada e giti Chube ba ta gbu suge olire, ene sugedu trate ba ulitage ba kledu age me no Chube dollale ba kledu daba gdaite baske chuge ngwadi age me no me no, Chube ba ta gbu suge olire e giti gire blike ba tadu e ulita dodakalin. Ba skochiu mo ole ba kledu age giti, kaire ba tale kwachiu mo giti Chube gwa giti, sugedu bage ba me ñage daba gdaite ene kle age me no baske chuge ngwadi age dare ama kle age kare, malen ba mo ta gbu age daba ene ole cha gerudu kare ba ole chada ngeru giti, ba daba ene gbu ji chuge ama kle age giti. Nege suge chage ulia ba me no age me no ole ba ta agekalin Chube takalin kare, kaire suge chage ba mo ta gbu no cha ole malen ba ta gwagekalin chadi mo gwagwa giti. 12 Cha chada degangu ngeru ba ulita alin, cha gerudu ba ole ba daba gdaite gbadale ji chuge ama kle age me no mo ñenua ole giti, cha chada e degangu cha kledu tañachuge daba ene gdaite giti kaire ama ñenua giti, agwa cha kledu tañachuge ma ngle ba Chubenu ulita una Corintomu giti, cha tadu ba ulita chudaboakalin mo ta gbe ma no Chube ole age ma no Chube takalin kare, cha tadukalin ba ulita cha gerua gbe gdadi age Chube gwa giti cha gerudu kare chada e giti. 13 Ba ulita cha gerua gbu gdadi agedu cha gerudu kare, malen nege nga suga no cha tale ba agedu giti cha chada degangu ba ta gbu kare, me e alin, kaire cha ta suge ma no gwage Titodi nga suga no no ole ba ulita giti, Tito kira jagere gau ba ulitage. 14 Uñale ba ulitage cha kledu baske cha gerudu ulia diali ba ulita ole, cha me sodu, ene kaire cha gerudu ulia Tito ole ba ulita giti. Tito bebi joge chke baske gire cha gerudu ama ole ba ulita giti nga suga no chadi ba ulita giti ba kwian no ba kle cha gai ngwange no, ene kaire agwe Tito joge chke ba ulitaske gire ba ulita Tito gai ngwange no kaire. Cha gerudu ene Tito ole ba giti, boidu ene Tito ole ama jo chke baske giti cha gerudu kare, sugedu Titoge cha me gerudu ngwale ama ole ba kwian no, e giti nga suga no no chadi. 15 Nege Tito ma no ba ulita ole ngeruge, ama kledu baske ba agedu ulita no ama alin, ba ulita ama gau ngwange no moske, ba me ama gau kwian ngwale kare, ba ama gau dage no no, ba ama kerua gbu gdadi ba agedu ama gerudu kare. 16 Uñale trate chage nege ba ulita kle mo ta gbe chage age Chube takalin kare, kaire ba ulita kle mo ta dbe no cha ole, malen nga suga no chadi ba ulita giti, nege cha ñage tañachuge ma no dare ba ulita giti.
1 Cha bitalla Jesucristo giti, nege cha ta gerukalin ba ulita ole Chube kle age giti daba Chubenu ulitaske nga tanre Macedoniage, Chube kle kwian amanu ulita nga ege ta gbe age Chube takalin kare. 2 Kwian Chubenu ulita nga Macedoniage kle boi tanre daga ngwale Jesucristo gai ulia giti, agwa eske nga suga no amadi diali. Ama me igi tanre molen agwa ama igi gweale sidri gai mo alin gire diali ama ulita daba na me lle molen chudaboi igi e giti, ama me tañachuge igi ngle igi me ngle agwa ama daba na chudaboi ama igi tanre molen kare. 3 Diali ama ulita kle igi kete daba na chudaboagda ama ñage kare, kaire kle mo ta gbe igi kete ma ngle ta no giti ama kle ketege, uñale chage trate ama ulita kle age ene. 4 Ama ulita tadu mo ta gbakalin ule daba Chubenu nga namu ole daba Chubenu una Jerusalénmu chudaboale, malen ama gerudu tanre cha ole ama ta igi litakalin ole daba Chubenu una Jerusalénmu alin. 5 Ama igi litu ole ma ngle cha tañachugege, ama me igi alin ketu agwa ngeru ama ulita agali mo ta gbu Chube ole age Chube takalin kare me age ama agali takalin kare, kaire ama ulita mo ta gbu cha gai dage cha chudaboale geru Cristo giti dbe kwianske. 6 Cha takalin ba ulita age ene kaire mo ta gbe igi lite ole ta no giti kwian Chubenu nga Macedoniamu kle age kare, malen cha gerudu Tito ole noare ama jogeni nakwaite ba ulita kle ngwadi ba ta gbale tachke igi na lite ole, Tito jogeni Tito ñage igi gai ulita ama agedu ngeru kare, ene igi ulita chke kwaitre alin dbadale kwian Chubenu una Jerusalénmu alin. 7 Ulia ba ulita kwian no kle age tanre no, ba kle mo ta gbe kiraske Jesucristo gai ulia diali, ba geru Jesucristo giti uñe no, ba ñage geru e trage no trate kwian ole, ba kle biale diali cha chudaboi, ba kle mo ta dbe no cha ole. Ba ulita kwian no ene, agwa kaire cha takalin ba ulita mo ta gbe igi lite ole no diali ta no giti daba na chudaboagda. 8 Cha me kle gerule ba ole ba kage age cha takalin kare igi lite ole giti, me ene, agwa cha takalin chke uñale ba ulitage daba Chubenu nga Macedoniamu kle mo ta gbe age giti no daba na chudaboi igi giti, cha kle geru e kete bage ene ba ulita ñage tañachuge mo giti, ene be suge bage ba kle mo ta dbe no ulia daba na ole kaire Chube ole ba be mo ta gbe age no ene daba Chubenu alin daba chudaboagda daba Chubenu nga Macedoniamu agedu kare. 9 Uñale ba ulitage che Chugagwalla Jesucristo agedu no no ba ulita alin ta no giti, ba chegu sugekare Chubege gire Jesucristo mo ta gbu ba chudaboi chie nga dba ai giti, Jesucristo kledu nga ngaña giti, ama lle no no tanre molen nga ngaña giti, ama e ulita chugu ngwadi chiu nga dba ai giti me lle molen, ama jokeda ba ulita alin, ene ama agedu giti ba alin ba me chege sugekare Chubege dare, Jesucristo gai ulia giti ba chege Chubenu. 10 Igi lite ole giti cha gerule ba ulita ole, chura jo tangle giti ba ulita mo ta gbu igi lite ole daba Chubenu una Jerusalénmu alin, kwian gweale me ba gbu age ene igi lite ole agwa ba agali mo ta gbu igi lite ole ta no giti. 11 Cha takalin ba mo ta gbe igi lite ole kwaite ba ulita gdaite gdaite igi gbe ule ba ulita ñage kare, ba ulita mo ta gbu ngeru igi lite ole ta no giti, ene kaire ba mo ta gbale ta amaña ole igi lite ole kwaite, ene igi ulita chke kwaitre alin kagadale daba Chubenu una Jerusalénmu alin. 12 Ba tale ba gdaite gdaite agali igi kete ta no giti ba ñage kare, e no Chube gwage, ba bai igi kete ta no giti ba ñage kare Chube ba ta gbe kare, ba age ene ba kle age no Chube gwage kle igi kete Chube takalin kare, Chube me ba ta gbe igi kete ma ngle ba me igi molen batre, me ene, Chube ba ta gbe ba igi molen batre gweale kete daba chudaboagda. 13 Cha me kle gerule ba igi ulita monu kete daba me lle molenge chudaboagda bigwa ba ulita be chege me lle molen. 14 Cha me kle gerule ene, agwa cha takalin daba ulita Chubenu toi lle salengwli molen ulita toigda, malen noare ba ulita daba me lle molen chudaboi lle gweale monu kete dabage, ene daba na me lle molen ñage toi no. Nege ba ulita lle tanre molen mo alin, daba na me lle ene molen mo alin toigda, malen ba daba chudaboale, ene chui gwealege ba ulita me chege lle molen, ene daba na ulita ñage ba ulita chudaboi, age ene ba ulita ñage chege lle salengwli molen ulita toigda diali. 15 Unsuialin Moisés suiale kwian ulita daba chudabo ene modi ongoru ongoru, ene kwian ulita ñadu toi no, Chube gerua degaba unsuialin gerule e giti, chada e gerule: “Kwian bligda litu ole ngle mo alin bligda me cheguda sidri, ama bligda monu ulita girabatu daba na ole. Daba gweale me ñadu bligda lite ole ngle agwa kwian bligda litu ole ngle bligda ketu daba enege gutadale, ene ama me chagedu bli ole.” Chube gerua degaba unsuialin gerule ene. 16 Chube Tito ta gbu suge salengwli Chube cha ta gbu suge ba ulita giti kare, cha no no ba ulita ole, cha ta ba chudaboakalin suge ma no Chube takalin kare, ene kaire Tito ta suge ba ulita giti. E giti cha gerule no Chube ole Chube Tito ta gbu suge ene ba ulita giti. 17 Cha gerudu Tito ole ama kage nakwaite baske giti, ama gerudu no ama alin, kaire mo tale ama agali ta jogekalin ba ulita ngwadi, ama agali no no ba ulita ole ta jogekalin ba ngwadi ba ulita chudaboale ta suge ma no age Chube takalin kare. 18 Tito be jogeni ba ngwadi cha be daba na gdaite kage ule, daba e geru Jesucristo giti dbanga no no daba Chubenuske kle geru Jesucristo giti trage trate kwianske, daba Chubenu ulita nga kaire kairege aini kle gerule no daba e kle geru dbe giti. 19 Kaire daba ulita Chubenu nga aige daba e gdaite amaña gau kagale ule cha gatedi igi dbe daba Chubenu una Jerusalénmu alin, ama ole ule cha be igi ulita kete daba una Jerusalénmuge ene cha ta kwian ta gbakalin gerule no Jesucristo giti che kle age giti ama alin, ene suge amage ulia che no ama ole che kle ama chudaboi. 20 Cha mi joge igi ngle dbe gballa kwian una Jerusalénmu alin, ene daba gweale me ñage gerule me no chadi igi giti me ñage tañachuge cha kle igi lite ole ngle igi e gweale gai mo alin. 21 Uñale Chubege cha be igi ulita kete agwa cha takalin suge trate daba ulitage ulia cha be igi ulita kete, malen daba e gdaite no no be cha gatedi igi dbe daba una Jerusalénmu alin, ene daba gweale me ñage tañachuge cha igi ngle gweale gai mo alin. 22 Daba e amaña be joge ule Tito ole ba ngwadi, kaire daba na gdaite be joge ule, daba na gdaite e kledu chage tanre cha ole, diali ama mo ta gbu age no ulita Chube takalin kare, malen uñale chage ama kwian no, cha kle ama kage ule kaire. Nege geru ulita ba giti chku uñale amage malen nga suga no amadi ba ulita giti, ama ta jogekalin baske ba kira gbe ma no Chube giti. 23 Kwian gweale baske geru kade bage Tito giti ba gerule Tito cha chudaboanga geru Cristo giti dbe, ama lle boanga cha ole Cristo gerua dbanga ba ulita alin. Kaire kwian gweale baske geru kade bage daba boke kle chage Tito ole giti ba gerule kwian Chubenu nga aimu daba e boke kagu ule Tito ole, daba e boke no no Cristo ole lle boanga Cristo alin kaire. 24 Tito joge chke ba ngwadi ule daba boke e ole ba ama gdamai gai ngwange no ba age no ama gdamai alin mo ta dbe no ama ole, ba age ene, ene kwian Chubenu ulita ama kagangage be suge trate ba ulita kwian no ba ulita agenga no daba alin, ene nga be suga no chadi ba giti ene cha me gerudu no ba giti ngwale daba Chubenu ulita nga aimu ole.
1 Uñale chage ba ulita ta no giti kle mo ta gbe daba na Chubenu me lle molen chudaboi igi giti malen cha me ñage chada degange dare ba ulita alin ba ta gbale igi lite ole giti daba na Chubenu chudaboagda. Nga kweri aini Macedoniage baini kaire cha kle chage ngwadi diali cha kle gerule no no ba kwian Chubenu ulita nga kweri Acayamu giti, cha kle gerule chura jo tangle ba ulita mo ta gbu igi lite ole daba Chubenu nga namu alin daba chudaboagda, daba Chubenu nga aimu Macedoniage cha keruchugu gerule ba giti, ba kle age giti ama tanre mo ta gbu age ene kaire ba kle age kare igi lite ole daba na chudaboagda. 3 Cha kle daba gdamai kage baske ngeru chage ba ulita ta gbale biale age igi gbe ulita biale, ene cha joge chke ba ngwadi ule daba gweale nga Macedoniamu ole ba ulita be skwen biale age no cha gerudu kare ba giti. Cha joge chke ba ngwadi ule daba gweale nga Macedoniamu ole ba ulita me kle igi gbaba biale nga be chie ibule tanre chadi, be suge daba nga Macedoniamuge cha kle gerule ngwale ba ulita giti no. Kaire nga be chie ibule tanre ba ulitadi cha ngeru daba nga Macedoniamu ngeru, uñale bage cha kle gerule no ba giti daba nga Macedoniamu ulita ole. 5 Cha me takalin boi ene malen cha kle daba gdamai kage ba ngwadi ba ulita ta gbe biale kwaite ngeru cha be joge chkege, kwian e gdamai ñage ba ulita chudaboi igi lite ole ba ulita gdaite gdaite ñage kare igi kete mo ta giti ta no ole igi gbe biale ba igi oña gbu kare kagale daba Chubenu una Jerusalénmu alin, ene suge ulia ba ulita mo ta gbu no ta no giti igi gbe biale me sugedale ba kle igi kete ta me no giti daba alin. 6 Ba ulita tachkedale ai giti kwian ta igi ketakalin daba na chudaboagda, kwian ene igi kete mo ta giti ta no ole kwian ñage kare me tañachuge me no sidri igi e kete giti, Chube be age no tanre kwian ene alin. Agwa kwian igi sidri alin kete ta me no ole me ta igi ketakalin, kwian ene alin Chube be age no sidri alin. E salengwli kwian chude ngama gbe kweri kwian ene chude gai ngle, agwa kwian chude ngama gbe soli kwian ene chude bedre gai. Ene kaire ba ulita Chubenu gdaite gdaite mo ta gbe igi kete mo ta giti no ñage kare agwa me igi kete ta me no giti me ta igi ketakalin kare, ba igi kete ta no giti, ene kaire Chube be age no ba gdaite gdaite alin ulita, age ta ene giti Chubedi nga suga no kwian igi kete nga suga no ole ta no giti. 8 Ba igi kete ta ene giti Chube be age no no ba alin, Chube be ba manade no ene ba be lle molen toigda no, Chube be ba chudaboi ene ba be lle ma ngle molen ene ba ña daba chudaboi ma no dare, kaire ba be lle molen toigda mo alin. 9 Chube gerua degaba unsuialin gerule e giti, chada e gerule: “Kwian bai age no ta no giti daba me lle molen alin daba chudaboagda, kwian ene be lle ma ngle molen diali daba chudaboagda ma no dare kaire toigda no mo alin.” Chube gerua degaba unsuialin gerule ene. 10 Chube chude dodadu kwian alin tkale, Chube chude e gbe jrien ma ngle, ene bligda ngle kle, kwian bligda gai mo alin ama takalin kare gutadale. Ene kaire ba age no ta no giti daba me lle molen alin daba chudaboagda, Chube e amaña chude gbanga jrien ma ngle be lle ulita gbe jrien ba alin, Chube be ba chudaboi, ene ba be lle tanre molen ba lle molen ngeruge, ene ba be ñage toi no, kaire ba be ñage daba na chudaboi. Ba ulita kle igi lite ole kage cha ole daba alin, igi e joge chke ama kote gire ama ulita ñage gerule no no Chube ole cha kle ba igia dbe giti ama alin. 12 Ulia daba e me lle molen toigda no, ba kle ama ulita chudaboi tanre ba igia giti, kaire igi dbe giti ama alin ama ulitage mo tale be suge nga suga no ole, amage be suge Chube agedu no ama ulita alin ba ulita giti gire ama be gerule no no Chube ole e giti. 13 Igi e be joge chke daba e kote be chke uñale ama ulitage ba ulita igi e kagu ama alin ta no giti, ba ama chudaboi ene giti be suge ama ulitage ba ulita kle Cristo gai ulia ba kle age no Cristo takalin kare, gire ama be gerule tanre no Chube ole ba ulita giti ba mo ta gbu age no giti ama alin kaire daba Chubenu nga namu ulita alin. 14 Age ene giti daba e ulita be mo ta dbe no no ba ulita ole, ta ene giti ama ulita be gerule Chube ole ba ulita giti diali, be chudaboi kade Chubege ba ulita alin, kaire ama be gerule no Chube ole Chube ba ulita ta gbu age no ama alin ama chudaboi giti. 15 Che ulita gerudale no no Chube giti Chube mo Kirolla ketu che alin, e giti geru me che alin gerudale no mine Chube ole Chube Kirolla giti, Chube Kirolla giti che ulita ta suge no gdaitre alin malen che ulita ñage mo ta gbe no daba na chudaboi.
1 Cha takalin suge trate ba ulitage cha kle gerule ba ulita ole cha kle baske o cha kle bate bage diali cha kle mo ta gbe gerule ta no no giti Cristo talla ole. Ba gweale kle gerule me no chadi kle gerule: “Pablo kle che ulitaske ama kle gerule nganake, ama kle bate ama kle gerule nganake, ama kle che ulitaske ama kle chage ta kwachie ole gerule che ulita gwa giti, agwa ama kle bate gire ama me kennga ama kle mo gbe gerule kiraske mno che ole chada giti.” Ba gweale kle gerule ene me no chadi. 2 Cha gerule ulia ba ulita ole, cha be joge chke baske cha me kennga gerule kiraske ba ole ka boi mno ba ole, agwa cha me ta gerukalin ene ba ole, malen cha gerule ba ulita ole chada ai giti ba ulita mo ta gbe age no joge siere ba kle age me noge, ene cha joge chke baske cha be ñage gerule no ba ulita ole. Agwa cha joge chke ba ulitaske ba gweale skwen chage gerule me no chadi gerule cha giti cha agali kle mo gbe geru dbe mo talla giti cha takalin kare me Chube talla giti, ba gweale skwen chage gerule ene cha be gerule mno ba ole me ta kennga ole. 3 Cha kwian agwa cha me kle mo ta gbe age kwian ta agekalin kare, cha kle mo ta gbe age Chube takalin kare Chube gerua Cristo giti dbe kwianske, cha kira gbagda me kwian kiralla agwa e Chube kiralla, 4 Chube kira e kete chage, kira e giti che dolla Satanás kiralla me kirachke kira Chubenudi, Chube kiralla kwian kle gerule me no Chube dollale ta blite. 5 Kwian gweale mo ta gbe Chube dollale mo ta gbe ma kweri Chubege gerule Chube gerua Cristo giti geru ngwale, kwian ene me no geru Cristo giti ole, Chube kle kira kete chage gerule no trate Cristo giti kwian ene ole, ene gerule Chube kiralla giti kwian ole cha kwian Cristo dollale ta gbe mo ta blite Cristo ole, kwian ene Cristo gai ulia mo ta gbe chage tañachuge diali Cristo giti age Cristo takalin kare. 6 Chage suge ba ulita Chubenu una Corintomu be cha gerua gbe gdadi cha kle gerule kare chada ai ulita giti, chage suge ba ulita be joge siere ba kle age me noge ba be mo ta gbe age ulita Chube takalin kare cha kle chada degange ba alin kare, ene cha joge chke baske ba ulita be skwen chage age no ulita Chube takalin kare. Agwa ba ulitaske ba gweale me cha gerua gbe gdadi skwen chage age me no Chube dollale, Chube be kira kete chage ka boi mno ba ole ba kle age giti, Chube kiralla giti cha be ba gbe ji chuge ba kle age me no Chube dollale giti. 7 Kwian gweale baske kle gerule me no chadi cha dollale me kle cha gai lle boangale ulia Cristo alin, kwian ene kle gerule me no chadi ama kle tañachuge kare agwa me suge amage cha tale cha ta suge mine. Kwian ene kle gerule ama Cristonu ama lle boanga Cristo alin, e ulia ama kle gerule kare ene sugedale trate amage kaire cha Cristonu cha lle boanga ulia Cristo alin, ama me ñage tañachuge mo giti alin ama alin Cristonu ama alin lle boanga Cristo alin. 8 Cha gerule ulia ba ulita ole cha lle boanga ulia Cristo alin, cha kle lle boi no Cristo alin Cristo takalin kare Cristo cha ta gbu kare, cha me ibule gerule no ene mo giti, suge chage cha me kle age no ene mo talla giti mo kiralla giti, me ene, Cristo cha gau cha gbu lle boi ama alin baske, ama mo talla mo kiralla ketu chage ene cha ba chudaboale mo ta gbe ma no Cristo ole diali age ma no diali Cristo takalin kare, Cristo me kira ketu chage agedale me no ba ole ba ta gbe tañachuge sugekare amage. 9 Cha me takalin suge bage cha kle chada degange ba alin cha ta ba kwa jigakalin ka boi ba ole cha kle chada degange giti ba alin, me ene, diali cha kle chada degange ta no ole ba ulita chudaboagda mo ta gbe age ma no diali Cristo takalin kare. 10 Kwian gweale baske cha dollale kle gerule me no chadi, ama kle gerule: “Pablo kle bate chége ñage gerule kiraske mno che ole chada giti agwa chke cheske gire ama me gerule ene che ole kwian geru mauña kare, ama mo ta dbe kwachie gerule mno che ulita gwa giti, malen che me ama gadale dage, ama me geru mauña ulia, ama kwian ngwale.” 11 Kwian gweale kle gerule me no ene chadi, cha takalin suge kwian enege cha kle baske cha kle gerule ta amaña ole kaire cha kle bate bage cha kle gerule ta amaña ole. Cha kle chada degange ta no giti, cha me kle mo ta blite, ba me ñage tañachuge cha kle baske cha gerule nganake gire cha joge bate cha chada degange ta nganake ole, me ene. 12 Kwian gweale baske kle mo gbe ma kweri daba na ulitage, kwian ene agali kle gerule no kweri diali mo giti daba na ulita ole, daba ene kle tañachuge no no mo tale mo giti: “Ulia cha geru uñe ma ngle daba nage, diali cha kle age ma no ulita daba na ulitage, ulia cha kwian ma no ma kweri daba na ulitage.” Kwian ene ulita kle tañachuge ene mo giti kle tañachuge ngwale, ama ta me. Cha me tañachuge ene mo giti kwian e tañachuge kare, cha me toi tañachuge chema geru uñanga ma ngle ulia chema agenga ma no ulia daba nage. 13 Ma no diali cha kle mo ta gbe tañachuge mo giti cha kle lle boi no Chube alin Chube takalin kare o me, diali cha kle Chube chuge ngwadi cha ta gbe joge nga kaire kairege baini kaire Chube ta cha kagakalin ngwadi ama gerua dbe kwianske, cha agali me kle mo ta gbe joge geru dbe cha takalin kare. Chube cha ta gbu joge ba ulitaske malen cha ñadu joge chke baske Chube gerua dbe ba ulitaske una Corintoge. 14 Ulia Chube cha ta gbu joge ba ngwadi ama gerua dbe ba ulitaske, cha agali me mo ta gbu geru e dbe baske, Chube cha kagu malen cha ñadu baske. Kwian gdaite me ñage gerule cha me jo geru dbe baske, e me ulia, cha jo chke geru Cristo giti dbe ba ulitaske ngeru geru dbanga na ulitage. 15 Nege daba gweale na kle lle boi Chube alin ba ulitaske, cha me lle boaba nobi e gai mo alin gire gerule no mo giti daba na nu lle boaba baske giti. Cha me kle tañachuge daba bai lle bo giti Chube alin, cha kle tañachuge ba ulita ta mine Cristo ole giti, cha takalin ba ulita mo ta gbe Cristo gai ulia ma no diali, cha geru Cristo giti du baske, cha takalin ba ulita mo ta gbe geru e gai ulia ma no diali, ene ba ulita chege mo ta gbaba diali gerudi. Cha takalin geru Cristo giti chke uñale kwian ulitage malen cha takalin ba ulita mo ta gbe chage ma no geru e gerule kare, ene ba ñage cha chudaboi geru dbe baske, ene ba giti kwian na ñage Cristo gai ulia mo alin. 16 Ba ulita ta chege ta gbaba kiraske Cristo geruage, ene cha ba jige lle boi gballa Chube alin cha joge nga suga no ole geru Cristo giti dbe nga na batege baini kwian geru dbanga me kle geru dbe ngwadi, ene kwian me gerule chadi cha kle joge geru dbe daba na nu lle boaba Chube alin taneage daba Chubenu nga ege gai mo alin. 17 Kwian geru dbanga bai kaire ta gerukalin no kweri mo giti, geru dbanga ene tachkedale Chube gerua degaba unsuialin gerule kare, chada e gerule: “Kwian ta mo ta dbakalin gerule no kweri trate kle boi mo kiralla giti, ma no kwian ene mo ta dbadale gerule no kweri Chube giti Chube kle ama ta gbe age me ama agali kle mo ta gbe.” 18 Kwian lle boanga no ulia Chube alin me gerule blike agali daba na ole ama lle boanga ma no Chube alin, ama agali me ñage gerule ulia ama lle boanga no, Chube alin gwage kwian bai lle boanga no ulia, Chube alin ñage gerule no kwian ene giti, agwa kwian agali me ñage gerule no mo giti ama lle boanga no.
1 Cha be gerule kare ba ulita ole chada ai giti nege ba gweale ñage tañachuge cha kle gerule tanre ngwale, agwa chada ai giti cha be gerule ba ole cha ta suge ba ulita giti trage ba ole, cha takalin ba ulita mo ta gbe geru ai keruchuge no. 2 Cha tañachuge tanre ba ulita giti, cha tañachuge ba giti me cha talla, Chube kle cha ta gbe tañachuge ba ulita giti. Cha geru Cristo giti du ngeru baske, cha giti ba Cristo gau ulia malen cha ta ba manakalin no Cristo geruadi, cha takalin ba ulita mo ta gbe cha geru ketu bage kare Cristo giti e alin gai mo alin diali me kwian geru nganake dbanga chuge ngwadi ba ta gbe joge siere geru uliage joge geru na nate, cha takalin ba mo ta gbe diali geru uliage ba ulita mo ta gbaba geru gbaitre alin Cristo giti gai ulia mo alin. 3 Cha kwachie ba ulita nu geru ulia gaba giti, kwian na me geru ulia dbanga ñage ba anblite ñage ba ta gbe tañachuge nganake geru me uliage giti, ene ba joge siere geru uliage joge geru me ulia nate. Cha me takalin boi ene ba ulita ole salengwli boidu unsuialin Eva ole kare, dolla Satanás Eva anblitu ene Eva jo siere Chube geruage Eva Satanás gerua gau ulia agedu Satanás gerudu kare. Ene kaire cha me takalin ba ulita mo chuge ngwadi mo anblitange kwian geru me ulia dbangage mo ta gbe tañachuge nganake ene ba ulita me mo ta gbe geru gbaitre alin Cristo giti gai ulia mo alin me age Cristo takalin kare. 4 Kwian gweale joge chke ba ulitaske geru nganake kete ba ulitage cha geru ketu bage kare ba ulita kle kwian ene kerua gbe gdadi, kwian ene geru nganake Jesu giti kete bage geru nganake Chube Oña giti kete bage geru nganake kwian tien gitiru ji chugege age me no gdale giti kete bage, geru e ulita nganake cha geru ketu bage kare, cha geru ketu bage ba geru e gau ulia, agwa nege ba kle mo ta blite geru nganake me ulia ole. 5 Kwian kle geru dbe baske kwian enege suge ama ma kweri ama mo gbe geru uñanga ma kweri chage, ba kle kwian ene kerua gbe gdadi ama gai dage, ba no ama ole, ba tañachuge ama geru uñanga ma no chage ama gerunga ma no trate, ba kle chage ama nate, agwa cha alin kwian ene me ma kweri chage me geru uñanga ma giti dare chage. 6 Ba gweale ñage tañachuge chadi cha gerule kwira gaba kwian me gerunga ulleke kare, agwa e me gerule cha me geru uñanga, cha geru Jesucristo giti uñanga no trate, uñale ba ulitage cha kledu baske cha gerudu ba ole geru ulia giti kaire cha toidu geru ulia gerule kare baske, e giti ñage suge trate ba ulitage cha geru ulia uñanga, cha me gerudu alin ba ole gire toidu nganake kwian me geru ulia uñe kare. 7 Ba gweale tañachuge cha agedu me no geru Jesucristo giti dbe ngwale ba ulitaske me igi kade bage geru dbe ñanale kwian geru dbanga na ulita kle igi kade kare, agwa cha tañachugu ma no ba ulita alin cha ba ta gbe tañachuge Jesucristo gerua alin giti me igi giti, malen cha mo ta gbu lle boi mo kodi, ene cha agali igi gau lle boi ñanale toigda baske, ene cha me igi kadu bage mo alin toigda. 8 Kaire daba Chubenu nga namuge mo tale ama cha chudabo igi giti ene cha ñadu toi baske geru Jesucristo giti dbe bage me igi kade bage geru dbe giti. 9 Cha kledu toi geru dbe baske cha tadu igige mo alin toigda, chui gwealege cha toidu bli ole cha tadu llege mo alin gutadale, agwa cha me mo ta gbu igi kade bage toigda ni lle gweale na kade bage mo alin, cha me tadukalin ba llea gai mo alin toigda ene ba me cha chudaboale diali. Mo tale daba Chubenu nga Macedoniamu cha chudabo igi giti, sugedu amage cha me lle molen mo kaire toigda no malen ama chiu igi dbe cha alin, mo tale ama cha chudabo ene. Agwa ba ulitaske cha me mo chugu ngwadi lle banu kade mo alin, cha mo ta gbu age ene toi baske cha be mo ta gbe age ene toi dare cha mo ta gbu kare toi baske kare. 10 Cha Cristo gai ulia, Cristo talla kle cha tale malen cha kle mo ta dbe gerule ulia diali, cha gerule ulia ba ulita ole cha mi igi kade dale mo alin ba daba Chubenu ulitage nga kweri Acayamu, e giti nga suga no chadi geru dbe giti ba ulitaske. 11 ¿Mineade cha mo ta gbe ene ba ole? ¿E gerule cha me no ba ole? Chubege uñale cha ta mine ulita ba ole, uñale amage cha no ba ulita ole. 12 Diali cha be mo ta gbe chage gwangerugu geru Cristo giti dbe me igi kade bage geru dbe baske giti, ene kwian na kle geru dbe baske kle igi kade ba ulitage geru dbe giti ama me ñage gerule ama kle lle boi Chube alin baske salengwli cha kle lle boi Chube alin kare, kwian ene takalin ba ulita ama gai dage gerule no ama giti ama kwian lle boanga no Chube alin, 13 ama kle gerule no mo giti ba ulita ole kle mo gbe suge ba ulitage Jesucristo gerua ketangale kare, agwa kwian ene me kle gerule ulia mo giti ba ole, ama kle ba anblite, ama me Jesucristo gerua ketanga ulia, ama geru me ulia dbanga, ama me lle boanga ulia Chube alin ama lle boanga dolla Satanás alin. 14 Kwian ene ulita kle age dolla Satanás age kare, dolla Satanás agali agenga me no Chube dollale agwa diali ama kle mo gbe suge kwiange agenga no trate lle boanga no no ulia Chube alin kare. 15 Ene kaire kwian lle boanga Satanás alin age salengwli Satanás age kare, kwian lle boanga Satanás alin diali kle mo gbe suge kwiange agenga no no kare, agwa ama tale ama kwian me no me no, bdagli Chube be ji gbe kweri kwian ene alin kwian agedu me no ulita giti. 16 Cha gerule nakwaite ba ulita ole, ba me tañachuge chadi cha kle gerule tanre ngwale mo giti, agwa gweale tañachuge chadi cha kle gerule tanre ngwale mo alin cha chugene gerule ngwale mo giti, ene kaire cha ñage age sidri kwian me geru ulia dbanga kle gerule no mo giti kare mo gbe kweri baske kle age kare. 17 Kwian geru me ulia dbanga baske kle gerule tanre no mo giti ba ole ama kle age giti, ene kaire cha ñage gerule no mo giti cha kle lle boi Cristo alin giti, cha kle gerule kare mo giti Cristo me kle cha ta gbe gerule ene, agwa suge chage cha ñage gerule no mo giti. 19 Ba ulita kle kwian ulita geru me ulia dbanga baske chuge ngwadi gerule tanre no mo giti ba ole, ba ulita kle ama kerua gbe gdadi ba kle ama gai dage. Ulia ba ulita ta ngle molen geru uñanga gire ¿mineade ba kle mo ta gbe tañachuge no kwian ene ulita kle gerule giti agwa cha gerule sidri no mo giti ba tañachuge cha kle gerule tanre ngwale? 20 Kwian ene ulita kle age tanre me no ba ulita ole, ama mo gbe ba chugagwallale ama ba gbe lle boi mo alin, ama ba llea ba igia kade bage mo alin, ama ba anblite mo gai ulia, ama age ba ole me no ama takalin kare, amage suge ama kweri ba chugagwalla malen ama ñage age ene ba ole, ama ba bate gwage, ama ulita age ene me no ba ulita ole agwa ba kle mo ta dbe no jage ulita ta no giti kwian ene ulita kote. 21 Cha kledu baske cha me agedu ba ole kwian nege kle baske kle age dagale ba ole kare, kwian kle age dagale ba ole sketangle ba kle ama gai no ba chugagwallale, cha me agedu me no ene ba ole, ¿e giti ba me kle cha gai no? Kwian kle age me no ba ole agwa amage suge ama kle age no, ama gerule no mo giti diali ama kle age giti, cha kaire ñage gerule no mo giti cha kle age ulita giti, ñage suge bage cha kle gerule ngwale agwa cha kle gerule ulia cha kle age giti. 22 Kwian geru me ulia dbanga baske ama ulita kle gerule no mo giti: “Cha alin ulia kwian hebreo chudalla, cha gerunga hebreo.” Cha ene kaire hebreo chudalla, cha gerunga hebreo. Ama ulita gerule no mo giti: “Cha kwian israelita ulia Chube nu cha chudalla gaba mo alin.” Cha kaire kwian israelita Chube nu kwian gaba mo alin bitalla. Ama ulita gerule no mo giti: “Cha ulia Abraham chudalla.” Cha kaire Abraham chudalla. 23 Ama ulita gerule no mo giti: “Cha alin lle boanga Cristo alin no no ulia.” Cha kaire lle boanga Cristo alin. Ba ulita ñage tañachuge chadi cha kle gerule ulita no ene ngwale mo giti agwa cha kle gerule ulia, cha lle boanga Cristo alin ma no ama ulitage, cha lle bo ma ngle Cristo alin ama ulitage, kaire cha boidu daga ngwale ma ngle ma tirare ama ulitage Cristo gerua dbe giti, cha jo tkaba skage geru dbe giti bita ma ngle ama ulitage, kwian geru ulia dollale cha kwabatu ma ngle ama ulitage, bitangle kwian geru ulia dollale tadu cha gwakalinda geru dbe giti. Agwa kwian ulita geru me ulia dbanga kle gerule no mo giti alin, ama kle gerule alin mo giti agwa me kle boi dagale cha kle boi kare. 24 Bitatiga kwian israelita cha kwabatu ji chugale tanre bita kaire kairege kwian israelita cha kwabatu treinta y nueve. 25 Bitamai cha jo bataba tanre glita giti. Bitaite cha jo skiaba ke giti. Bitamai cha chagedu duge du jonga bleske. Bitaite cha biri jogeda chi kote, chui ege du jonga bleske cha chegu blega giti chui gbaite ngajrege chui gbaite ngajudi. 26 Cha chagedu tanre nga tanrege geru Cristo giti dbe kwianske diali cha chi tira chugu, cha kwian skwe boanga tiralla chugu, cha mo bitalla israelita tiralla chugu, cha kwian me israelita tiralla chugu, cha kwian toinga ngle ngwadi tiralla chugu, cha kwian toinga me ngle ngwadi tiralla chugu, cha ble tira chugu, kaire cha daba me geru ulia uñanga tiralla chugu, diali cha chagedu boi tirare eneske. 27 Cha kira ulita jonga lle boi tanre kote, kaire boi tanre daga ngwale kote bitangle cha me ñadu gbe no, cha bli chugu tanre kaire cha sie chugu tanre bitangle cha chagedu bliage, kaire cha nga skeke tanre chugu ñometra me mo ngama tkagda no nga skeke alin. 28 Boi daga ngwale ene ulitaske cha kle mo ta dbe tañachuge diali tanre kwian Chubenu nga ulitage giti, cha takalin daba Chubenu ulita mo ta gbe no diali geru uliadi age no diali Chube takalin kare. 29 Suge chage kwian Chubenu gweale me kle mo ta gbe no kiraske geru uliadi, cha mo ta dbe olire tanre daba ene giti. Kaire suge chage kwian gweale daba Chubenu gweale ta gbe age me no ta gbe joge siere geru uliage, cha skochie tanre kwian enedi daba gdale. 30 Kwian geru me ulia dbanga kle gerule me no chadi ba ulita ole malen cha gerudale no sidri mo alin chada ai giti ba ulita ole, agwa cha kle gerule kare mo giti chada aige giti cha takalin suge trate ba ulitage cha agali gballa me kira molen lle boi no Cristo alin. 31 Cha kle gerule kare mo giti ba ulita ole chada ai giti uñale Chubege cha kle gerule ulia ulita, Chube che Chugagwalla Jesucristo Ñenua, noare che ulita gerudale no diali Chube alin giti. Cha gerule no Chube giti ama agedu no no cha alin una Damascoge giti, 32 cha kledu una Damascoge, e suiale chugagwalla gdaite lle boanga chugagwalla rey kada Aretas ole, chugagwalla gdaite e guardia donga gbu cha jege ngwange una ugakallage cha gadale agedale me no cha ole, 33 agwa Chube daba gweale una Damascomu ta gbu cha chudaboi, una keuda gerea uga gwealege daba cha tku jondoi una gerea gití dbige skige, ene cha tiun gitiru guardia dongage.
1 Uñale chage cha agali gerule no mo giti e ngwale cha alin agwa cha gerudale ba ulita ole che Chugagwalla Cristo kle age giti cha alin, cha gerule Cristo kle cha ta gbe chke suge giti Cristo kle cha gbe gwage amadi giti. 2 Chura gdataboko giti gdabaga jo tangle e suiale cha jo dbaba bate nga ngaña giti Cristo kle ngwadi, me uñale chage cha jo jegwale ole o cha oña alin jo, Chube alinge uñale cha jo mine, agwa uñale chage ulia cha jo dbaba bate nga ngaña giti Cristo kle ngwadi. 4 Cha kledu nga ngaña giti cha geru tanre no keruchugu ni cha ñage geru e jwen kate gerule, kaire geru e Chube me takalin cha e trage kwian ole. 5 Boidu ene cha ole giti cha ñage gerule no mo alin giti agwa cha me ta mo ta gbakalin gerule no mo giti cha agali kle boi mo kira giti kare, nga suga no chadi cha kwian mo kira giti cha me ñage age agwa Chube ñage age cha ole cha gbe age ama takalin kare ama alin, cha takalin suge bage ene ulita kle boi cha ole me cha kiralla giti. 6 Cha takalin cha ñage mo ta gbe gerule no mo giti tanre cha kle age no giti, ñage suge kwiange cha kle gerule ngwale agwa me ene, ulita cha kle gerule kare e ulia. Agwa cha me mo ta gbakalin gerule tanre no mo giti kwian ta gbadale tañachuge no cha giti cha gai dage no, ma no cha chage toi no geru Cristo giti dbe kwianske ene kwian gwage chadi cha kle toi mine, kwian cha keruchuge cha kle gerule mine, ene kwian agalige ñage chke uñale cha kwian no cha kwian me no. 7 Cha kledu nga ngaña giti Cristo kle ngwadi cha gwagedu lle tanre nodi cha geru tanre no keruchugu, Chube me tadukalin cha boidu ene giti cha tañachuge mo giti cha ma no ma kweri Chube gwage daba nage, Chube me tadukalin cha tañachuge ene mo giti malen Chube Satanás chugu ngwadi age me no cha ole, Satanás cha gbu toi oga skibachie diali. 8 Cha Chugagwalla Cristo ole cha gerudu bitamai cha skibachie jwennga, 9 agwa Cristo gerudu cha ole: “Cha no no ba ole agwa cha me ba skibachie jwennga, ma no cha be kira kete bage diali jage skibachiege chage gwangerugu cha gerua dbe, ene kwian gwage badi ba skibachieske be chke uñale trate amage ba agali me kle mo kira gbe lle boi cha alin cha gerua dbe, kwiange be suge trate cha kle mo kiralla kete bage diali malen ba ñage chage gwangerugu cha gerua dbe.” Cristo gerudu ene cha ole malen cha mo ta gbu nga suga no ole toi oga skibachieske, ene cha agali me kira molen giti ñage suge kwiange Cristo kle mo kiralla kete chage. 10 Cha toi oga skibachie. Kwian ka boi cha ole Cristo gerua dbe giti. Lle me cha ole toigda. Kwian cha jrite nate Cristo gerua dbe gdale. Cha boi dagale tanre Cristo gerua dbe giti kwian kote. E ulitaske cha me tallade, nga suga no chadi toi boi ene Cristo gerua dbe giti, boi ene ulitaske cha skwatige cha kira ulita jogenga agwa Cristo cha gbe kiraske ma no boi ene ulitaske gire cha chege ma kiraske Cristo giti Cristo gerua dbe gwangerugu. 11 Ba ulita ñage tañachuge cha kle gerule no ngwale mo giti ba ole chada ai giti agwa ba ulita cha uñe, sugedale trate bage cha kwian mine. Kwian geru me ulia dbanga gerule me no chadi cha gbe kwian me no ngwalere ba gwage, ba gerudale no ama ole cha giti agwa ba me kle age ene, malen cha agali gerudale no sidri mo giti ba ulita ole chada ai giti ba ta gbale suge cha giti. Kwian geru me ulia dbanga kle gerule no mo giti ama alin Jesucristo gerua ketanga no ulia, agwa cha gerule trate ba ulita ole ama me ma kweri chage, cha Jesucristo gerua ketanga ulia. 12 Cha kledu baske Cristo gerua dbe, boi daga ngwaleske cha mo ta nodu age baske, cha lle daga ngwale no tanre dodadu Chube kiralla giti ba ulita gwa giti malen e giti sugedale trate ba ulitage cha Jesucristo gerua ketanga ulia. 13 E giti cha ñadu igi kade bage toigda agwa cha me agedu ene, kwian Chubenu nga namu igi ketu chage toigda, ene cha ñadu chage gwangerugu Cristo gerua dbe, cha igi e gau mo alin agwa cha kledu geru dbe baske sugedu chage ma no cha me lle kade igi kade bage mo alin toigda. Cha igi gau daba nga namuge toigda agwa cha me igi gau bage, e giti ba gweale kle tañachuge cha agedu me no ba ole me igi kade bage cha takalin ba e talla mlienga. 14 Nege bitamaigedale cha kle biale joge kwaite baske, cha be jogeni baske cha mi mo chuge ngwadi mo manange ba ulitage igire bligdale toigda no baske diali cha agedu ngeru kare, cha kle chage ba ulitaske geru dbe, e giti cha me kle mo ta gbe lle banu gai mo alin geru dbe ñanale, me ene, cha kle age no ba ulita alin geru ulia kete bage ene ba geru ulia uñe. Chkedale uñale trate bage ñenua ta molen age no mo kirolla alin me kirogwa age no mo ñenua alin, ñenua igi lite ole mo kirogwalla managda, kirogwalla me agedale ene mo ñenua alin, cha ene kare geru ulia dbe baske giti, cha kle geru kete bage ñenua kle age mo kirogwalla alin kare. 15 Cha kle mo ta dbe no ba ulita ole malen igi monu giti cha kle mo kira gbe ba chudaboale, cha kle lle gige mo alin, cha igi ulita monu mlienga geru ulia dbe giti ba ulitaske, kaire cha agali kiralla cha gbe ba alin lle boagda baske, cha kira be bidege chui gwealege agwa nege cha kira kle cha kle mo ta gbe age no ba ulita alin ba ta gbagda ma no geru uliadi dare, cha kle mo ta gbe ene ba ulita ole, ba kle mo ta gbe tañachuge nganake, suge chage cha kle mo ta gbe ma no ba ulita ole diali agwa ba ulita me kle mo ta gbe no cha ole, diali ba kle mo ta gbe tañachuge sugekare chage. 16 Cha me mo chugu ngwadi mo manadale ba ulitage igire bligdale, cha lle bo mo kodi giti cha toidu. Agwa gweale kle gerule chadi cha ba anblitu igi lite ole daba nga namu chudaboagda agwa me ene ulia cha gerudu kare, kle tañachuge cha igi e gau mo alin. 17 ¿Ba kle tañachuge cha daba gweale gau kagu baske ba ulita anblitadale ene cha ña igi gai mo alin daba e giti? 18 Cha Tito kagu joge tienda badi, Tito ole cha daba Chubenu na kagu ule kaire. ¿Ba kle tañachuge Tito ba anblitu igi gai mo alin kaire cha alin? Me ene, Tito kaire cha ta salengwli no ba ulita ole, cha kle baske cha age no ba alin cha gerule ulia ba ole, kaire Tito kle baske Tito age no ba alin Tito gerule ulia ba ole. 19 Ba gweale ñage tañachuge chadi cha kle chada ai degange ba ulita alin ba ta blitagda tañachuge no cha giti me tañachuge dare cha agedu ulia me no ba kle tañachuge kare, me ene, ulita cha kle gerule kare ba ole ba ulita chudaboagda ta suge ma no gwangerugu Cristo giti, suge chage cha kle gerule Chube gwa giti ba ole cha Cristo uñanga ulia age Cristo takalin kare. Ba ulita cha bitalla kare Cristo giti, cha no no ba ulita ole malen cha gerule ene ba ole, cha takalin ba ta chege no Cristo ole me tañachuge nganake. 20 Cha joge baske cha me takalin ba skwen ta nganake ole cháge, ba skwen ene cha ka boi ba ole, cha me takalin age ene ba ole, bage e mi skwen no kaire cha age ene ba ole. Cha me takalin baske talla ai kare kle ba gweale tale: Ta kira bate modi talla kle tale. Ta daba llenuge mo alin talla kle tale. Ta skochie talla kle tale. Tañachuge lle ngle gai mo alin allabi, me tañachuge daba na giti talla kle tale. Gerunga tanre ngwale dabadi talla kle tale. Gerule dabadi me no talla kle tale. Tañachuge mo giti ma kweri daba nage talla kle tale. Me tañachuge salengwli modi talla kle tale. 21 Cha be joge chkeni baske tiendaleda ba ulitadi, cha me takalin Chube cha ta gbe suge olire ibule ba ulita giti. Ba gweale muinga onbre skwen cháge mo ta gbe mo chuge ke giti, gweale skwen cháge mo ta gbe age me no ba kledu age me no tanre sbali kle age kaire nege, ba gweale skwen cháge age me no ene me ta mo ta blitakalin joge sugekare ba kle age me no ulitage cha be ta olire tanre ba ulita kle age me no giti.
1 Nege bitamaigedale cha be joge kwaite baske cha kledu baske cha jo bdagli bitabokege eni, chui ege cha gerudu ba ulita ole bai kaire kledu chage age me no ba mo ta blitadale joge siere age me noge, nege kaire cha gerule ene ba amaña ulita ole kaire kwian na ole cha me su gerule ole ngeru, ba kwian ene ulita ole cha gerule chada ai giti ba mo ta blitadale kaire joge siere age me noge. Ba ulita mi age ene cha kle gerule kare, nege cha be joge bitamai aige cha be joge mo ta gbaba biale ba ulita bai me mo ta blitaba joge siere age me noge gbe ji chuge mno mno agedu me no giti, cha mi tai dage ba ene ulitage. Kwian agenga me no gbe jiske giti Chube gerua degaba unsuialin gerule: “Sugedale ba ulitage daba gweale kle age me no, kwian gdaitre alin me ñage daba ene gbe jiske gballa, agwa kwian gdaboke gdamai gerule salengwli daba jiske giti, ene suge daba jiske ulia, ñage ji gbe daba alin ama agedu me no giti.” Chube gerua degaba unsuialin gerule ene. Cha be kle baske, ba bokege o ba kwian maige suge daba na kle age me no ñage trage cha ole mo gwallaske, bai kaire agedu me no cha be ama gbe ji chuge. 3 Ba takalin cha age gweale ba ole chkekalin uñale bage cha gerunga Cristo kiralla giti ulia o me, Cristo be cha ta gbe age ba ole be cha ta gbe gerule kiraske mno ba ole gbale ji chuge. Ba me ñage tañachuge Cristodi Cristo me ñage age cha giti ba ulita ole, me ene, Cristo kira molen, Cristo kiralla giti Cristo cha gbe age ba ulita ole ba gbale ji chuge ba age me no giti. 4 Cristo jokeda kruge ama mo chugu ngwadi ama me kira molen kare agwa nege ama kleni gwade toi Chube kirallaske ule Chube ole. Ene kaire cha kwian, cha kaire me kira molen Cristo mo chugu ngwadi me kira molen kare kledu nga dba ai giti, mo kira giti cha me ñage age gballa Cristo alin baske agwa cha mo ta gbe Cristo ole toi Cristo takalin kare ene cha toi Chube kiralla ole Cristo kle toi kare, ene cha ñage joge baske gerule kiraske mno ba ole Cristo kiralla giti. 5 Ba ulita agali mo ta gbadale tañachuge trate mo giti ba ta mine Jesucristo ole ene be suge ba agalige ulia ba Jesucristo gau ulia mo tale o me, suge bage ulia ba Jesucristo gau ulia mo tale ene uñale bage ba Jesucristonu Jesucristo kle ba ole, agwa suge bage ba me kle mo ta gbe Jesucristo ole ulia, ene ba me Jesucristonu ene Jesucristo me kle ba ole. 6 Cha takalin suge bage cha giti cha kle chage baske giti cha ulia Jesucristonu cha ulia mo ta gbaba Jesucristo gai ulia mo tale. 7 E me gerule ba ulita gerudale no cha giti cha kle lle boi no Chube alin no baske malen ba kle mo ta gbe age no Chube takalin kare, cha me kle tañachuge kwian gerule mine cha giti, me ene, cha kle tañachuge ma no ba ulita giti ba ulita kle chage mine, cha takalin ba ulita mo ta gbe toi ma trate sugekare age me noge diali, cha ta mo ta dbakalin age no ba alin ba chudaboagda chage ene, agwa kaire uñale chage ñage suge ba gwealege cha me ñage age ene ba alin, cha me tallade kwian tañachuge ene cha giti, cha ta ba ulita chudaboakalin. 8 Diali cha ba chudaboadale geru ulia giti ba kira gbe geru uliage age ulita trate baske geru ulia gerule kare, cha me ta agekalin sidri geru ulia dollale baske cha ta mo ta gbakalin diali age no geru ulia gerule kare. 9 Nga suga no no chadi joge chke baske me ka boi ba ole me gerule mno kiraske ba ole ba gbe ji chuge ba kle age me no giti. Cha me gerule mno kiraske ba ulita ole kwian gweale ñage tañachuge cha giti cha kwian ngwale cha me kle gerule Jesucristo kiralla giti, cha me tallade kwian kle tañachuge ene cha giti, ma no cha alin ba ulita skwen cháge mo ta gbaba age no ulita joge siere age me no ulitage, ene nga suga no chadi ba ulita giti. Diali cha kle gerule Chube ole ba ulita giti cha takalin Chube ba ta gbe ma no ama ole diali age ma no diali ama takalin kare. 10 Cha kle chada ai degange ba ulita alin ba ta gbagda ngeru, ene ba be kle biale cha ngwange cha geru gbu ba alin kare chada giti, ene cha mi gerudale mno ba ole ba kle age giti ulita. Ba me age cha kle gerule kare chada giti cha be gerule mno ba ole cha Chugagwalla Jesucristo kiralla giti cha be ba gbe ji chuge ba kle age me no gdale. Jesucristo cha gau kira ketu chage agedale ene e ba chudaboagda ta gbe chke ma no Jesucristo ole, Jesucristo me kira ketu chage agedale me no ba ole agwa Jesucristo kiralla giti cha ba ta gbe chke joge siere age me noge chage gwangerugu ma no Jesucristo geruadi. 11 Bdagli cha gerule ba ole chada ai giti ba ulita cha bitalla kare Jesucristo giti, cha takalin ba ulita toi ta suga no ole, cha takalin ba ulita mo ta gbe toi trate Chube gwa giti Chube takalin kare ba ulita mo ta gbale kira gbe modi ongoru ongoru chage gwangerugu Jesucristo geruadi ba ulita toidale ta suge salengwli modi ta taingwli ole me kira bate modi, ba ulita toi ene Chube che ta gbanga no daba na ole che ta gbanga nga suga no ole, ama be kle ba ulita ole diali. 12 Ba ulita gbi kade no no moge ta no ole dabage ulita. 13 Daba aini ulita nu mo ta gbaba Jesucristo gai ulia, ama ulita gbi kage no no ba ulita alin. 14 Cha takalin che Chugagwalla Jesucristo age tanre no no ba ulita alin, cha takalin suge trate ba ulitage Chube no no ba ulita ole, kaire cha takalin suge trate ba ulitage Chube Oña kle ba ulita ole diali, ama me ba chuge ngwadi gballa sugeti ama chege ba ulita ole, cha takalin geru ai suge trate ba ulitage Chube Oña geru ai ulita gbe suge ba tale. Geru ai ene ulita cha Pablo chada degangu ba ulita kwian Chubenu una Corintoge alin. Che kle meni.
1 Cha Pablo chada ai degange ba ulita nga kweri Galaciage Jesucristo gaba ulia alin: Cha Jesucristo gerua ketanga, che salengwli me cha gau, che salengwli me cha gbu Jesucristo gerua ketangale. Chube che Ñenua Jesucristo jaba gbuni gwade, Jesucristo e amaña ule Chube ole cha gbu geru amanu ketadale kwiange. Daba Jesucristo gaba ngle kle aini cha ole, cha ule ama ulita ole gbi kage ba Jesucristo gaba ulita alin bai kle toi una kaire kairege kle mo lite Jesucristo geruadi nga kweri Galaciage. 3 Cha ulita takalin Chube che Ñenua kaire Jesucristo che Chugagwalla age no no ba ulita alin kle toi una kaire kairege nga Galaciage, kaire ama ba ulita ta gbe suga no. 4 Jesucristo mo ketu gwaleda che agedu me no giti, ene che me ji chuge che agedu me no gdale. Nege che Chubenu, che Chube uñe, che me chegedale age me no dare kwian me Chube uñeske kwian ulita me Chube uñe kle age kare. Jesucristo agedu che alin Chube che Ñenua takalin kare. 5 Che ulita gerudale no Chube giti chui tangle. Ene nobi Chube alin. 6 Me suge chage mineade ba ulita kle mo ta gbe joge siere blike Chubege, Chube ba gau mau alin Cristo giti, Cristo agedu no ba ulita alin. Cristo alin giti ba ñage tien gitiru ji chugege ba agedu me no gdale, ¿mineade ba kle mo ta gbe geru na nganake Cristo gitige gai? 7 Cha gerudu ulia ba ulita ole no Cristo giti, geru ulia na me. Kwian gweale na kle ba tke tangle me cha ba tku tangle kare Cristo giti, kwian ene kle ba ulita ta gbe tañachuge nganake geru ulia Cristo gitige, ama ta geru ulia Cristo giti blitakalin nganake. Kwian na gweale geru Cristo giti trage nganake ba ole cha gerudu giti ba ole, kwian ene ulita chege ji chugadale sugekare Chubege. Cha agali o lle boanga Chube alin nga ngaña giti geru Cristo giti ulia blite nganake kwian ole kaire be chege ji chugadale sugekare Chubege. 9 Ba ulita geru ulia Jesucristo giti keruchugu, ba geru e gau ulia. Cha gerudu kare ba ole ngeru nege cha gerule nakwaite, kwian bai kaire kle geru na me ulia Jesucristo giti trage ba ole ama be chege ji chugadale sugekare Chubege. 10 Cha me kle kwian kerua manade gerule no cha age no giti, cha ta agekalin Chube takalin kare. Cha mo ta gbe age kwian takalin kare ene cha me kle age Chube takalin kare, ene cha me lle boanga no Cristo alin ulia. 11 Cha takalin chke uñale ba ulita cha daballa cha ibotea Jesucristo gitige, geru ulia Jesucristo giti cha kle trage kwian ole geru e me kwian talla ni kwian tañachuge kare, geru e me chiu kwian gweale tale. 12 Kwian gweale me geru e ketu chage dbale kwian nage ni cha geru e jun kwian gwealege, Jesucristo agali cha ta gbu geru ulia amanuge, ama cha ta gbu geru amanu uñe. 13 Ba geru keruchugu cha giti ngeru cha bebi Cristo gai ulia cha kwian mine, ngeru cha chagedu cha bitalla israelita kle age kare suiage, e suiale cha mo ta gbu chage me no kwian ulita Cristo gerua gaba ulia dollale, cha tadu kwian ulita Cristo gerua gaba gwakalinda ene geru Jesucristo giti me chage dare. 14 Cha bitalla israelita suia giti cha geru e uñu ma no trate cha tigemanalla ulitage, cha mo ta gbu diali cha enusulian unsuialin suia ulita manade no, cha tañachugu geru e alin giti diali, cha tañachugu geru e ma no geru na ulitage. 15 Cha bebi menga cha chebia kote gire ngeru Chube cha gau mau alin, Chube mo ta gbu no cha ole ngeru, malen ama cha gau geru Jesucristo giti tragadale kwian ole. Cha tigedu cha tañachugu cha enusulian israelita alin suia giti, 16 agwa Chube tadukalin cha ama uñe ulia gire ama cha ta gbu ama Kirolla uñe ene cha geru ama Kirolla giti tragadale ba kwian me israelita ulita ole. Chube cha ta gbu ene ulita no ama Kirolla giti gire cha me jo geru kade Jesucristo giti kwian gwealege, 17 ni cha jo una Jerusalénge blike geru kade kwian Jesucristo gerua ketanga ngeruge, cha cheguda una Damascoge sugeti alin tañachuge ulita Jesucristo gerudu giti cha ole gire cha jo nga kweri Arabiage gire cha chiuni una Damascoge. 18 Cha Jesucristo uñu chura gdamaige gire cha jo una Jerusalénge tienda Pedrodi, cha chegu Pedro ole semana boke. 19 Cha kledu una Jerusalénge Pedro ole gire cha gwagedu Santiago che Chugagwalla Jesucristo daballa alindi, agwa cha me su gwage kwian Jesucristo gerua ketanga nadi. 20 Cha kle chada ai degange kare ba alin cha me kle sole, uñale Chubege cha kle gerule ulia ba ulita ole. 21 Cha kledu una Jerusalénge, gire cha jo geru Jesucristo giti dbe nga kweri Siriage kaire nga kweri Ciliciage. 22 Kwian Cristo gerua ganga nga ege gwagedu chadi mo gwagwa giti, agwa kwian Cristo gerua ganga kle mo lite Jesucristo geruadi una kaire kaire nga kweri Judeage me gwagedu chadi mo gwagwa giti, 23 ama ulita geru cha giti keruchugu alin allabi, geru ai chku ama ulita ologe: “Ngeru ama chagedu che kwian Cristo gerua ganga nate che gadale gwadaleda Jesucristo gerua gdale, ene ama tañachugu geru Jesucristo giti me jriennga dare, ama agenga ene ngeru, nege ama kle gerule kwian ulita ole kwian mo ta gbale Jesucristo gerua gai ulia.” 24 Kwian Cristo gerua ganga ulita nga Judeage geru e keruchugu cha giti gire nga sugedu no amadi, ama ulita gerudu no Chube giti Chube agedu giti cha ole.
1 Chura gdataboko giti gdabaga cha chagedu geru Jesucristo giti dbe nga Siriage nga Ciliciage gire cha joni una Jerusalénge nabitaite, Bernabé kaire Tito jo ule cha ole. 2 Chube cha ta gbu jogeni una Jerusalénge, cha jo chkeni una ege gire cha mo litu kwian Jesucristo gaba una emu chugagwalla ulita ole. Cha kle geru Jesucristo giti dbe mine kwian me israelitaske, cha geru e tragu ulita chugagwalla ulita ole gire chugagwallage chku giti nobi cha kle geru dbe kwian me israelitaske. Cha gerudu ene chugagwalla ole ene chkedale uñale chugagwallage cha kledu geru dbe giti, ene chugagwalla me kwian ta gbe geru dollale. Cha me geru e tragu chugagwalla ole chugagwalla ñadu kwian ta gbe geru dollale, ene cha kledu geru dbe giti ulita chege ngwale. 3 Tito kledu cha ole chugagwalla ngwadi, chugagwalla gwagedu Titodi Tito me kwian israelita Tito kwian griego, chugagwalla me ama gbu mo kwara tkangenga sidri kwian israelita suia kle age kare, chugagwallage uñale age ene e ngwale. 4 Cha kledu mo litaba kwian Jesucristo gaba chugagwalla ulita ole gire kwian gweale ta boke ole chku mau tale cha ulitaske. Kwian e ta me no, ama me no Chube gerua ulia ole, ama gerudu ama Chubenu, agwa me ene ulia. Ta me no ole ama tadu cha ulita keruchugakalin gerule Jesucristo giti, uñadu amage cha kledu gerule Jesucristo alin giti kwian chege Chubenu, me Moisés nu Chube gerua degaba unsuialin kwian israelita alin giti kwian chege Chubenu. Kwian e me no geru Jesucristo alin giti ole, ama tadu cha ulita gbakalin naskuni chage diali Moisés chadalla ulita gerule kare. 5 Cha ulita me kwian e chugu ngwadi gerule tanre ama takalin kare cha agedale, ama me kledu tañachuge trate ama gerudu kare, cha mo ta du geru ulia Jesucristo giti manade no trate ketadale ba ulitage. 6 Kwian Jesucristo ganga ulia mo salengwli gai mo chugagwallale, chugagwalla e ulita kweri kwian ulita gwa giti, agwa cha me tañachuge e giti, Chube gwa giti kwian ulita salengwli, chugagwalla e ulita cha keruchugu gerule geru Jesucristo giti dbe kwianske giti, sugedu amage cha kledu gerule ulita giti trate, ama me geru na ketu chage tragadale kwian na ole. Sugedu trate kwian Jesucristo ganga ulia chugagwalla ulitage Chube cha gau geru Jesucristo giti dbale kwian me israelitaske Chube Pedro gau kare geru Jesucristo giti dbale kwian israelitaske. 8 Chube Pedro gau ta gbu kagu Jesucristo gerua ketangale kwian israelitaske, kaire Chube cha gau, Chube cha ta gbu, Chube cha kagu Jesucristo gerua ketangale ba kwian me israelitaske. 9 Santiago kaire Pedro kaire Juan ama gdamai kwian Jesucristo ganga ulia una Jerusalénmu ulita chugagwalla ma kweri, chugagwalla gdamai ege sugedu trate Chube agedu no cha alin Chube cha gau geru Jesucristo giti dbe, malen ama ko ketu chage kaire Bernabége, ene chku uñale chage ama mo ta gbu lle boi salengwli ule Chube alin geru amaña giti, Santiago kaire Pedro kaire Juan geru Jesucristo giti dbanga kwian israelitaske, cha kaire Bernabé geru Jesucristo giti dbanga ba kwian me israelitaske. 10 Santiago, Pedro, Juan cha ta gbu lle gdaitre alin giti, ama gerudu cha ole cha me ta jogedalenga daba Jesucristo ganga ulia me lle molen chudaboi, e uñale chage cha agedale ene, diali cha kle mo ta gbe age ene daba Jesucristo ganga ulia me lle molen alin, e me jagere cha alin. 11 Chui gbaite Pedro jo chke una Antioquíage, cha kledu una ege, cha gwage Pedro kle age kare me kle age no una ege, malen cha ka bo mno ama ole agali kle age giti gdale. 12 Ama agedu ai kare una Antioquíage: Ngeru ama jo chke kwian me israelita Jesucristo gaba ngwadi ama blidu kwian me israelita Jesucristo gaba ulia ole ule chuia kaire kaire, gire Santiago kwian israelita mneite Jesucristo gaba kagu una Antioquíage, daba e ulita jo chke una ege gire Pedro kwachiu blire dare ule kwian me israelitaske bitalla israelita ngeru. Pedro me takalin suge daba ege ama kle blire kwian me israelita Jesucristo gaba ole ule, uñadu Pedroge daba e kle gerule kwian Jesucristo gaba me israelita ulita mo kwara tkadalenga sidri kwian israelita kle age kare ene kwian me israelita chege kwian Chubenu ulia. Malen Pedroge me chegu no chege blire ule kwian Jesucristo gaba me israelita ole, Pedro mo gbu sugekare daba Jesucristo gaba me israelitage. 13 Pedro agedu ene me no ta boke ole gire kwian israelita Jesucristo gaba na ulita una ege gwagedu Pedrodi age ene, gire ama ulita mo ta gbu age Pedro agedu kare, ene kaire Bernabé gwagedu ama ulitadi gire Bernabé mo ta blitu salengwli age ama ulita agedu kare. 14 Cha gwagedu Pedrodi kaire kwian israelita Jesucristo gaba na ulitadi age ene ama me kledu age trate geru ulia Jesucristo giti gerule kare, malen cha ka bo Pedro ole kwian Jesucristo gaba ulita gwa giti, cha gerudu Pedro ole: “Ba kwian israelita, agwa Jesucristo giti ba me age ulita diali kwian israelita kare, ba toidu kwian me israelita kare kwian me israelitaske, ¿mineade nege ba ta kwian me israelita gbakalin age Moisés chadalla gerule kare kwian israelita ulita kle age kare? 15 Che agali kwian israelita chudalla ñenu giti chebi giti, che me kwian me israelita chudalla, ama ulita me kle chage Moisés nu Chube gerua degaba unsuialin gerule kare. 16 Che kwian israelita ulia, che Moisés nu Chube gerua degaba gai dage, agwa chku uñale chege trate che age ulita Moisés nu Chube gerua degaba gerule kare e giti che me ña tien gitiru ji chuge che agedu me no gdale, e giti Chube me gwage chedi che no trate. Chku uñale chege Jesucristo alin giti allabi ama gai ulia mo tale e giti alin che chege sugekare ji chugege che agedu me no gdale ene Chube gwage chedi che no trate. Che agali Jesucristo gau ulia mo tale, e alin giti che chege sugekare ji chugege che agedu me no gdale ene Chube gwage chedi che no trate, me che age Moisés nu Chube gerua degaba gerule kare giti Chube gwage chedi che no trate, age geru e gerule kare giti ni kwian gdaite ña tien gitiru ji chugege ama agedu me no gdale. 17 Che Cristo gau ulia, sugedu chege Cristo alin giti che no trate Chube gwa giti, gire kwian israelita kle Moisés chadalla alin gai ulia ama gwage che jiske che agenga me no kwian me israelita ulita kare. Ene ulia gire kwian ñage tañachuge Cristo che gbanga age me no ama che ta blitu ama gai ulia gire che Moisés chadalla chugu ngwadi. Agwa me ene ulia kwian tañachuge kare. 18 Cha Moisés chadalla gerule kare chugu ngwadi, cha agali geru e amaña gai naskuni cha age ene cha be chege jiske Chube gwa giti. 19 Cha kledu Moisés chadalla alin gai gire sugedu chage cha me ñadu age no ulita Chube takalin kare, ene Chube gwa giti cha me no trate. Malen cha Moisés chadalla chugu ngwadi cha mo ta gbu Jesucristo gerua gai toi Chube alin. 20 Nege cha kle Chube Kirolla Jesucristo gai ulia mo tale diali, Cristo no cha ole, ama agedu no cha alin, ama mo chugu ngwadi jogeda cha agedu me no giti, ama jokeda kruge cha alin suge chage cha jokeda ule ama ole kare, nege cha me kle chage age me no diali cha chagedu ngeru kare, nege cha kle chage age Cristo takalin kare, Cristo cha Chugagwalla. 21 Chube agedu no cha alin Cristo giti cha gai ulia no, Chube agedu giti cha me gai ngwale. Che tañachuge che Moisés alin chadalla gadale e giti alin che chege sugekare ji chugege che agedu me no gdale, che geru e alin gai dage che me Cristo gai mo alin, ene ama chiu nga dba ai giti ngwale, ngwale ama jokeda.” Cha ka bo ene ulita Pedro ole kwian Jesucristo gaba ulita gwa giti.
1 Ba ulita nga Galaciamu, nga ngwale ba chuga giti, ba me ta molen. ¿Chema nga blitunga ba chuga giti ba ta gbe tañachuge nganake geru uliage? Ba ulita ole cha geru Jesucristo jo gbaba kruge giti tragu trate, geru Jesucristo giti sugedu ba ulitage, ba geru e gau ulia. 2 Cha geru kadakalin ai kare bage, ba ulita kledu Moisés chadalla alin gai dage, ¿Chube Oña chku ba tale geru e giti? ¿O ba geru Jesucristonu keruchugu ba geru gau ulia gire e giti Chube Oña chku ba tale? ¿Ba tañachuge geru bai giti Chube Oña chku ba tale? 3 Ba ulita me ta molen ulia ulia. Ngeru Chube Oña chku ba tale gire ba ama chugu ngwadi ba ta gbe age Chube takalin kare, agwa nege ba mo ta blitu chage Moisés chadalla gerule kare age ulita agali mo kiralla giti, ene ba kle tañachuge ba ñage age ulita diali no Chube gwa giti. 4 Ngeru sugedu ba ulitage Chube Oña kledu age tanre no ba tale, ¿nege ba kle tañachuge e ngwale? ¡Me ngwale ama agedu ba ulita alin! 5 Chube mo Oña gbe ba ulita tale, Chube Oña kle age tanre no ba tale, ba ta me nge kare, ¿mineade Chube Oña kle age ene ba ulita alin? E me kle gerule ba ulita kle Moisés chadalla gai age Moisés chadalla kle gerule kare e giti Chube Oña kle age. ¡Me ene! Ba ulita geru Jesucristo giti keruchugu, ba geru e gau ulia, e giti Chube Oña chku ba ulita tale. 6 Cha ta ba ta gbakalin tañachuge Abraham giti Abraham mo ta gbu mine Chube ole, Abraham Chube alin gau ulia mo tale, e alin giti Chube gwagedu Abrahamdi Abraham no trate. 7 Chkedale uñale ba ulitage kwian bai mo ta gbe Chube alin gai ulia mo tale kwian ene alin allabi Abraham oindalla ulia. 8 Uñadu ngeru ulita Chubege ama be age mine kwian ulita alin, Chube gerua degaba unsuialin gerule e giti. Chada e gerule kwian ulita me israelita bai kaire be Chube alin gai ulia mo tale kwian ene be chege trate Chube gwage, Chube be kwian ene jwen siere ji chugege kwian agedu me no gdale. Chube gerudu Abraham ole Chube be age giti kwian ulita alin, Chube gerudu: “Kwian ulita kle toi nga dba dbi ai giti batre cha be age no ama alin ba giti.” Chube gerua degaba unsuialin gerule ene. 9 Abraham Chube alin gau ulia mo tale gire Chube agedu no ama alin, ene kaire kwian ulita bai kaire Chube alin gai ulia mo tale Abraham kare Chube be age no ama alin Chube agedu no Abraham alin kare. 10 Kwian mo ta gbe Moisés chadalla alin gai dage age chada e alin gerule kare ene kwian tañachuge ama no trate Chube gwage, agwa kwian me ñage age no trate ulita, e giti kwian chege jiske Chube gwage. Chube gerua degaba unsuialin gerule: “Kwian ulita bai kaire me chege diali age no trate ulita Moisés chadalla gerule kare, kwian age sidri me no geru e dollale kwian ene chege jiske Chube gwage.” 11 Uñale chege trate kwian gdaite me ñage chege sugekare ji chugege ama agedu me no gdale age Moisés chadalla alin gerule kare giti, Chube gwage Moisés chadalla giti kwian me chege no trate. Chube gerua degaba unsuialin gerule: “Kwian bai kaire Chube alin gai ulia mo tale kwian ene chege no trate Chube gwage, kwian ene be toi Chube ole.” 12 Moisés chadalla me gerule kwian mo ta gbale Chube gai mine mo tale, Moisés chadalla gerule alin: “Bai kaire age ulita chada Moisénu gerule kare kwian ene chege no trate Chube gwage, kwian ene be toi Chube ole.” 13 Moisés chadalla gerule ene, agwa che gdaite me ñage age ulita no trate diali Moisés chadalla gerule kare, malen che ulita chege jiske Chube gwage che agedu me no giti gdale. Cristo jokeda kruge che ulita alin, e giti Cristo che jun siere ji chugege che agedu me no gdale, Cristo agedu giti che alin che me chege jiske dare Chube gwage. Cristo kledu kruge ngaña gire Chube gwagedu amadi kwian jiskenga kare che agedu me no ulita giti, Chube gerua degaba unsuialin gerule e giti, chada e gerule: “Kwian bai kaire ulita jiske jogedaleda ngaña glige ama jiske Chube gwage.” 14 Jesucristo ji chugu che giti ama jokeda gli dodaba krulege ngaña che giti, ene Jesucristo giti Chube agedu no kwian alin, me kwian israelita alin allabi, agwa kwian me israelita alin kaire. Chube gerudu kare Abraham ole unsuialin, ene kaire che Jesucristo gai ulia mo tale Chube mo Oña gbe che tale ama gerudu kare sbali. 15 Ba daba Jesucristo gaba onbre muire ole ulita cha gerule, kwian kle mo ta gbe kare kwian na alin chudaboale age ai kare: Kwian gdaite be mo ta gbe age kwian gdaite na alin ama mo ka gbe chada giti, ene mi jogenga ama gerudu be age giti, chada e kwian na me ñage jwennga ni ñage na gbe giti dare, me ña blite nganake. 16 Ene kaire Chube agedu Abraham ole, Chube gerudu Abraham oindallaske Chube be kwian gdaite gbe, Chube gerua degaba unsuialin me kle gerule oindalla ulita giti, agwa kle gerule oindalla gdaitre alin giti, e Cristo. 17 Cha takalin suge ba ulitage cha kle gerule giti, Chube gerudu Chube be age no Abraham alin gire Chube gerudu Abraham ole: “Cha be age ulia cha gerudu kare ba ole.” E ene ngeru Chube gerudu Abraham ole, chura ngle cuatrocientos treinta jo tangle gire Chube Moisés ta gbu geru gbe kwian israelita ulita alin, geru e nate Chube gerudu giti Abraham ole, geru e Moisés degu kwian israelita alin me ñage Chube gerudu ngeru Abraham ole jwennga mlienga. 18 Kwian bai kaire kle tañachuge Chube kle age no kwian alin kwian kle Moisés chadalla gai dage alin giti, e me ulia, kwian ene me kle tañachuge no. Chube kle age no kwian alin Cristo alin giti, ngeru Moisés chadallage Chube agali gerudu no Abraham ole Chube be age no kwian ulita alin Chube takalin kare, Abraham oindallaske Chube be gdaite gbe kwian ulita alin, e Cristo. Chube agedu ene ulia ama gerudu kare, e sugekare Moisés chadallage. 19 E ulia che ña chege tañachuge ai kare Moisés chadalla giti: “¿Lledale Chube Moisés ta gbu chada dege kwian alin? ¿Chada e ngwale?” ¡Me dale! Chada e no kwian ta gbagda kwian kle age me no giti, Abraham oindallaske Cristo bebi chke kwian ta gbe Chube takalin kare gire Moisés chadalla kwian ta gbu suge ama chagedale mine Chube takalin kare, kaire chada e giti sugedu kwiange ama kle age mine me no Chube gwage. Chube geru e ketu lle boanga mau alin nga ngaña giti ketale Moisége gire Moisés geru e degu jigale kwian alin. 20 Agwa Chube agali geru ketu Abrahamge Abraham oindallaske Chube be gdaite gbe kwian ulita alin. Chube me geru e kagu lle boanga mo alin nga ngaña giti ole ni kwian na ole Abraham alin, Chube agali geru e ketu Abrahamge. 21 E ulita me kle gerule Moisés nu Chube gerua degaba gerule Chube gerua Cristo giti dollale. Chube gerua degaba unsuialin gerule kwian ulita giti kwian ulita agenga me no, kwian gballa me ñage mo ta blite joge siere age me noge. Chagé Moisés nu Chube gerua degaba alin gerule kare kwian me ñage joge siere age me noge. Agwa Cristo alin giti kwian ñage joge siere age me noge mo ta gbe age no Chube takalin kare. Chube gerudu ama be Cristo kage kwian ulita alin, kwian bai kaire Jesucristo gai ulia Jesucristo kwian ene jwen siere ji chugege age me no gdale. 23 Ngeru chagé Moisés chadalla alin ole che ulita me ñadu mo ta blite joge siere age me noge, e suiale Chube bebi Cristo kage che alin, bebi chke uñale chege Cristo gai. 24 Ngeru Moisés chadalla giti sugedu chege sidri che chagedale mine Chube takalin kare, chada e che chudabo chage sidri no. Nege che me tañachugadale chage Moisés chadalla alin ole, Cristo chku, che ama gau ulia, nege Cristo alin giti che chage ma no trate Chube gwage. 26 Ba ulita Jesucristo gau ulia mo tale, e giti ba ulita chege Chube oliale. 27 Ba ulita Cristonu mo ñeangu chiske giti ba mo ta gbu ule Cristo talla ole age Cristo takalin kare. 28 Cristo giti ba kwian israelita kwian me israelita, kaire ba kwian lle boanga mo mauña alin kwian lle boanga mo alin agali, kaire ba kwian onbre kwian muire, ulita salengwli, ba ulita Cristonu ba kwian gdaitre alin kare Jesucristo giti. 29 Ba ulita bai Cristonu ba Abraham oindalla ulia Cristo giti, Chube gerudu unsuialin Abraham ole Chube be age no Abraham alin kaire Abraham oindalla ulita alin, Chube agedu no ba ulita alin Chube gerudu kare Abraham ole, Chube Cristo kagu.
1 Cha geru ñachuge ai kare bage: Ñenua age mo kirolla soli bebi alin, ama gerule: “Cha kirolla be joge juma gire lle chanu ulita be chege amage.” Ñenua gerule ene gire ñenua llea ulita kirogwanu, agwa kirogwa me ñage lle e ñenuanu gai blike, ama soli, ama chegedale manade tigedale jondege. Ñenua lle boanga mau alin gweale gai kirogwa manade ule gwa, kaire ñenua lle boanga mau alin na gai lle ulita ñenuanu manade kirogwa alin. Kirogwa mananga kirogwa manadale no, kirogwa tige kirogwa bebi joge sugekare mo kira giti kirogwa mananga me ñage kirogwa chuge ngwadi age kirogwa ta agekalin kare lle ulita amanu ole, kirogwa agedale lle boanga gerule kare. Kirogwa joge juma, chui chke ama ñenua chui gbu kare, gire kirogwa ñage lle ulita gai mau alin ñage age ama ta agekalin kare lle amanu ole. 3 Che boidu salengwli kirogwa manakle kare, ngeru che me geru Chube giti uñu trate, malen che gweale chagedu age Moisés chadalla gerule kare, che gweale na chagedu age ulita kwian gweale ngwale nu geru gbaba gerule kare, ene che ulita tañachugu che Chubenu. 4 Che kledu ene gire Chube chui gbaba unsuialin chuia chku Chube mo Kirolla kagu cheske, Chube Kirolla medunga muinga kote nga dba ai giti kwian israelitaske, Chube Kirolla mo ta gbu age ulita Moisés chadalla gerule kare. 5 Chube mo Kirolla kagu kwian ulita alin, ene Chube Kirolla giti suge kwiange kwian me chegedale tañachuge diali Moisés chadalla alin giti. Che age chada e alin gerule kare, e giti Chube me che gai mo oliale, agwa che Chube Kirolla Jesucristo gai ulia giti Chube che gai mo oliale. 6 Nege che Chubenu ulia, malen Chube mo Kirolla Oña kagu che tale, Chube Kirolla Oña che ta gbe gerule Chube ole: “Chube, ba cha Ñenua.” 7 Ba tachke ene ba me mo ta gbadale age naskuni ngeru kare ulita, nege ba ulita chege Chube oliale, lle ulita Chubenu banu kaire Cristo giti. 8 Cha gerule ba kwian Chubenu nga Galaciamu ulita ole, ngeru ba ulita me Chube ulia uñu ba lle gweale nga dba ai giti gau mo chubeale, ba chegu diali age lle ngwale ba gau mo chubeale alin. 9 Ngeru ba kledu ene, agwa nege ba Chube ulia uñe, ba agali me mo ta blitu Chube ulia gai, Chube ba ta gbu ama uñe trate. Chube agedu ene ba alin, malen me suge chage mineade nege ba mo ta blitakalin chege age nge kare naskuni kwian gweale ngwale nu geru gbaba gerule kare, geru e ngwale, geru e giti ba me ñage age ulita Chube takalin kare, ni Moisés chadalla giti. 10 Kwian israelita suiale kwian kle chui gbaite ollade semana kaire kaire, kle chui gbaite ollade dai kaire kaire, kle semana gweale ollade chura kaire kaire, kle chura jagere chuia ollade. Ba ulita kle chui e ulita gai mau alin olladadale, ene ba tañachuge ba no Chube gwa giti Chubedi nga suga no ba giti, 11 agwa ba me kle age no. Cha chagedu tanre baske geru ulia trage ba ulita ole, nege ba kle age naskuni nge kare ba me kle age geru ulia gerule kare. Cha kle tañachuge tanre ba giti, cha me takalin cha chagedu baske geru ulia ole ngwale. 12 Cha daballa cha ibotea Cristo giti, cha gerule ba ulita ole, cha kwian israelita, ngeru cha chagedu kwian israelita suia ulita ole age ulita Moisés chadalla gerule kare, ba me dale, ba me kwian israelita, ngeru ba me chagedu kwian israelita suia ole age Moisés chadalla gerule kare. Cha jo siere kwian israelita suia ulitage gire cha chegu ba kledu ngeru kare. Nege ba kle kwian israelita suia gai mau alin, cha takalin ba joge siere ege, ene ba chege cha kle nege kare ba kledu ngeru kare. Cha me kle gerule ba ole ba agedu gweale me no cha ole, me ene, 13 cha jo chke chege baske ba ulita agedu no cha alin. Uñale ba ulitage cha ogadu malen cha chegu baske mo oga manade, cha kledu eni gire cha geru Jesucristo giti tragu ba ulita ole. 14 Cha chku baske cha kledu oga me no me no, jingme e ngeru ba ñadu cha mlienga sugekare, agwa ba me tañachugu cha mlienga, ba ulita cha gau ngwange no lle boanga Chube alin nga ngaña giti kare, ba cha gau ngwange talla ole ba Jesucristo agali gai ngwange kare, ba ulita cha chudabo no. Ba ulita cha gau ngwange ta suga no ole cha Jesucristo gerua tragu giti. 15 Ngeru cha geru Jesucristo giti tragu ba ulita ole, geru e giti ba ulita nga du suga no no mo tale geru ole, agwa nege ba me ta ene molen. Uñale chage ulia ngeru ba no no cha ole cha Jesucristo gerua tragu ba ole giti, e giti ba tañachugu no cha alin ba tadukalin mo gwagwa no jwennga kete chage, ene cha ña chage gwagwa no ole. 16 Nege cha kle ka boi ba ole ba geru ulia chuge ngwadi gdale, e giti ba me tañachuge cha kle mo ta blite ba dollale cha kle mo ta dbe me no ba ole. Me ene, cha me kle gerule ba ole ta me no ole, cha me takalin ba joge siere geru uliage, e giti cha kle gerule ba ole. 17 Kwian gweale ba tkanga tangle geru me uliage ba ta gbe geru nadi gire ba joge siere geru uliage, kwian ene gerule ba ole: “Cha ta ba chudaboakalin no no geru giti.” Ama gerule ene ba ole ama takalin ba ulitage suge ama no ba ole, agwa ama me no ba ole ulia, ama me kle tañachuge no mo tale ba ulita alin, ama kle tañachuge mau alin giti, ama takalin ba ta gbe joge siere cháge cha geru ulia tragu giti, ene bdagli ba ulita chege mo ta dbe no ama alin ole tañachuge no ama alin giti ama gerule kare. 18 Noare mo ta gbe daba na chudaboi, e ene no, agwa me daba chudaboi anblitadale mo alin. Cha kle baske cha age no ba alin ulita, e alin allabi gire cha joge siere cha ba talla ulita mlienga, e me gerule cha kle chege tañachuge diali ba ulita giti chudaboale diali geru ulia giti. 19 Agwa cha me mo ta dbe ene ba ole, ba ulita cha kirolla cha jian kare Jesucristo giti, cha no ba ulita ole, cha kle tañachuge tanre diali ba ulita giti cha kle ba ole suiale cha me kle ba ole suiale. Ngeru ba me Cristo uñu cha ta olidu tanre ba giti, nege ba Cristo uñe, agwa ba kle joge siere geru ulia Cristo gitige, malen nabitaite cha kle ta olire tanre ba ulita giti muinga kle skibachie tanre kirogwa suiale kare, cha ta ene molen ba ulita giti. Cha takalin ba ulita Cristo gai mo Chugagwallale ene ba chage Cristo takalin kare, e giti nga be chege suga no chadi ba ulita giti, ene cha mi chege ta olire dare ba giti. 20 Cha ta klekalin baske agali nege nege, ene cha ña gerule ma no ba ole agali trate, ene ba ñage cha kerua keruchuge, ene suge bage cha kle gerule ta no ole ba ulita ole. Agwa nege cha kle bate bage cha kle tañachuge tanre ulia ulia ba ulita giti. 21 Ba ulita bai kaire ta agekalin ulita Moisés nu Chube gerua degaba unsuialin gerule kare ene ba tañachuge ba no trate Chube gwa giti, ba me kle geru e ulita gbe gdadi trate no. 22 Geru e amaña kle gerule Abraham giti, geru e gerule: Abraham kirolla muinga boke giti, Abraham kirolla gdaite muinga kada Agar giti, Agar lle boanga Abraham muiralla alin. Abraham kirolla gdaite Abraham muirallanu kada Sara giti, Abraham muirallanu me lle boanga kwian na alin. Abraham toidu lle boanga mo muirallanu alin kada Agar ole gire kirogwa onbre medunga Agar kote. Agar kirogwage malen Agar kirogwa manadu muinga ulita kle kirogwa manade kare. Agwa Abraham muirallanu kada Sara me muinga ene kare, Sara me kirogwage me ñadu kirogwa molen gire Chube agedu Sara alin, ene Abraham ñadu kirogwa molen Sara giti Chube gerudu kare sbali Abraham ole. 24 E ulita boidu sbali unsuialin, nege e kle gerule ai kare che alin: Boidu muinga e boke ole, e salengwli Chube nu mo gerua boke gbaba kwian alin kare. Geru gbaite Chube ketu Moisége jwichuga kada Sinaíge nga kweri kada Arabiage, nege kwian ulita bai kaire kle mo ta gbe age geru e alin gerule kare diali kwian ene salengwli Agar kare, Agar lle boanga kwian na alin, Agar agali me ñadu joge siere ege, ama chegu age ulita mo chugagwalla gerudu kare, Agar kirolla ulita mo chebia kare kaire. Una Jerusalén, una e kwian israelita ulita unalla nga dba ai giti, kwian e ulita kle age Chube nu geru ketaba Moisége kwian israelita alin gerule kare, ene ama tañachuge ama Chubenu, agwa me ene, kwian ulita una Jerusalénmu Agar kirolla kare. 26 Agwa una Jerusalén na nga ngaña giti, una e kwian Chubenu ulia unalla, kwian Chubenu ulita be toi una ege, kwian ene Sara kirolla kare. Kwian Chubenu ulia me kle tañachuge age diali Moisés chadalla alin gerule kare, e salengwli Sara me lle boanga kwian na alin kare. 27 Isaías nu Chube gerua degaba unsuialin gerule Sara giti, chada e gerule: “Muinga bai kle gballa me kirogwage ni kirogwa gdaite mebanga muinga kote, muinga ene mo ta gbadale nga suga no ole, ama gerudale nga suga no no ole Chube giti. Bdagli muinga me kirogwage muinga ene be kirogwa molen ma ngle muinga kirogwa molenge.” Isaías nu Chube gerua degaba unsuialin gerule ulita ene. 28 Nege cha gerule ba ole cha daballa cha ibotea ulita Cristo giti, sbali Chube gerudu Chube be Cristo kage kwian ulita alin, ene kwian ngle Cristo giti be chege Chubenu. Chube agedu ama gerudu kare, nege che ulita Chubenu Cristo giti. E salengwli Chube gerudu Abraham ole kare, Chube gerudu Abraham ole Chube be kirogwa kete Abrahamage Sara giti, Chube agedu ama gerudu kare, Abraham kirolla kada Isaac molen Sara giti. 29 Sara me kirogwage gire Chube agedu Sara alin mo Oña kiralla giti, malen Abraham ñadu kirogwa molen Sara giti, kirogwa e kada Isaac. Agar kirolla me no Sara kirolla Isaac ole, ama diali agedu me no Isaac ole, nege kle boi ene kaire cheske Agar kirolla agedu Isaac ole kare. Chube Oña che ta gbu geru Cristo giti gai ulia, e giti che Chubenu ulia. Kwian bai kle age diali Moisés chadalla alin gerule kare, kwian ene me no che ole, ama kle age me no diali che ole che geru Cristo giti gai gdale Agar kirolla agedu me no Sara kirolla Isaac ole kare. 30 Moisés Chube gerua degu unsuialin Sara giti, chada e gerule: “Sara gerudu Abraham ole Agar giti: ‘Ba muinga lle boanga e mlienga che ullage, ama jogedale siere ule ama kirolla ole, ama kirolla me ñage ba llea gai mau alin cha kirolla kare, ba llea ulita chegedale cha kirolla alin allabi.’ Sara gerudu ene Abraham ole Agar giti Agar kirolla giti.” 31 Che ulita me muinga lle boanga mo mauña alin kada Agar kirolla kare, kwian Agar kirolla kare chege tañachuge age diali Moisés chadalla alin gerule kare ene ama tañachuge ama Chubenu, agwa me dale ene, ama chege sugekare Chubege. Che muinga me lle boanga kwian na alin kada Sara kirolla kare, che geru Cristo giti gau ulia, uñale chege Cristo alin giti che ulia Chubenu, lle ulita Chubenu chenu kaire Cristo giti.
1 Ngeru che ulita chegu tañachuge diali age Moisés chadalla alin gerule kare ene che tañachugu che Chubenu, che chegu age geru e gerule kare kwian lle boanga chege age mo mauña alin kare, che me ñadu joge siere ege. Che ene gire Cristo che jun siere age enege, sugedu chege Cristo alin giti che Chubenu. Nege ba ulita mo ta gbadale diali Cristo ole me mo ta blite chege age nge kare naskuni Moisés chadalla alin gerule kare. 2 Cha Pablo cha gerule ba ulita ole, cha takalin ba tachke geru ai giti cha kle gerule ba ole, ba ulita bai kaire kle mo ta gbe age naskuni mo kwara tkangenga suia gai, e giti ba kle tañachuge ba no trate Chube gwa giti ba ulita Chubenu, ba ulita age ene naskuni, Cristo agedu ulita ba kle chuge ngwadi ngwale ulita, ngwale ama agedu ba ulita alin. 3 Cha gerule ba ole kwaite, ba bai kaire mo kwara sidri tkangenga kwian israelita kle age kare, ba tañachuge e giti ba no trate Chube gwa giti, ba age ene gire ba chegedale age diali ulita Moisés chadalla gerule kare. 4 Ba bai kaire kle mo ta gbe age ulita diali Moisés chadalla alin gerule kare, e alin giti ba kle tañachuge ba Chubenu ba chege no trate Chube gwa giti, ba mo ta gbe ene Moisés chadalla alin ole ba agali kle mo ta gbe joge siere Cristoge ba kle Cristo gai lle ngwale kare, e giti ba ta kle chege sugekare Chubege, me ñage suge bage Chube no ba ole Chube ta agekalin no ba alin. 5 Agwa che ulita bai kaire Chubenu ulia che Cristo gau ulia mo tale, Chube Oña kle che ta gbe suge Cristo alin giti che chege no trate Chube gwa giti ene che me chege jiske Chube gwage che agedu me no giti. 6 Che mo ta gbu Jesucristo gai ulia, che amanu, malen che me tañachugadale mo kwara sidri tkangenga o me mo kwara sidri tkangenga, e giti che me tañachugadale, e ngwale, e me che ta blite joge siere age me noge Chube gwage, agwa Jesucristo alin che ta blite age no Chube takalin kare, che mo ta gbadale ulia Jesucristo gai mo tale diali, ene Jesucristo giti che chege diali mo ta dbe no Chube ole kaire daba ulita ole. 7 Ba ulita geru Jesucristo giti gau gwangea gire ba mo ta gbu chage no no geru e ulia ole, ¿nege boidu mine ba ulita ole? ¿Mineade ba ulita kle mo ta gbe joge siere geru uliage? 8 Chube agali ba ta gbu geru ulia Jesucristo giti gai ulia, nege Chube me kle ba ta gbe joge siere geru e amañage, agwa ba kle geru gweale na nganake keruchuge, e giti ba kle mo ta gbe joge siere geru uliage. 9 Geru ngwale gweale kle chage ba ulitaske salengwli levadura tugenga harinaske kare. Levadura harinaske harina gbe sie ulita, ene kaire ba geru ngwale gweale keruchuge ba mo ta gbe bedre bedre geru ege, gire bdagli ba geru ngwale ulita gai gire ba joge siere geru ulia ulitage. 10 Kle boi ene bedre bedre ba ulitaske geru ngwale giti, agwa chage uñale trate Cristo che Chugagwalla be ba ta gbe naskuni geru uliadi cha kle gerule kare ba ole, ene ba me tañachuge nganake geru ulia giti. Kwian bai kaire kle ba ta gbe geru na nganake me uliadi kwian ene alin Chube be ji gbe. 11 Cha daballa cha ibotea ulita Cristo giti, cha takalin suge bage cha giti, cha me kle chage gerule kwian Cristo gau ulia ole mo kwara sidri tkadalenga kaire kwian israelita ulita kle age kare ene ama Chubenu. Agwa cha me kle geru dbe ene kwiange. Cha chage gerule kwian Cristo gau ulia ole mo kwara sidri tkadalenga kaire, cha gerule ene kwian ole ene kwian israelita me age me no cha ole geru giti. Uñale bage cha me kle gerule ene, cha kle gerule daba ulita ole Cristo agedu kruge alin giti kwian ulita Cristo alin gai ulia ene ama Chubenu. Cha kle gerule ene giti kwian israelita kle ta dbe skochie chadi kle mo ta gbe chage age me no cha ole diali. 12 Kwian bai kle chage geru dbe baske mo kwara sidri tkangenga ene kwian chege Chubenu, ama alin geru mo kwara sidri tkangenga ma kweri geru na ulitage. ¿Mineade kwian ene agali me mo kwara tkenga ulita? 13 Ba ulita cha daballa cha ibotea Chubenu, Cristo giti Chube ba ulita gau mau alin, Cristo alin giti ba Chubenu, ba ene ba me mo ta gbadale age ulita Moisés chadalla gerule kare. E me gerule ba agedale me no ulita ba takalin kare, me ene, ba mo ta gbadale age trate ulita Chube takalin kare ta dbale no daba na Chubenu ulita ole ba mo ta gbale daba na chudaboi diali Chube takalin kare. 14 Chube gerua degaba unsuialin gerule: “Ba mo ta dbadale no daba na ulita ole salengwli ba no mo ole naskuni kare.” Geru e ma kweri che alin Chube gerua degaba na ulitage. Ba age no ene daba na ole ba mo ta gbe age mo ole kare, gire ba kle age ulita Chube gerua ulita kle gerule kare. 15 Ba me mo ta gbe no daba ole Chube gerua degaba unsuialin gerule kare, ba ulita mo ta gbe daba gutenga ongoru ongoru geru giti, gire bdagli ba ulita be chege sugekare daba nage ba mi ñage chege ule diali gerudi. 16 Cha gerule ba ulita ole, Chube Oña kle ba tale, ba chagedale diali Chube Oña ba ta gbe kare, ba ulita chagedale ama takalin kare diali, ba me mo chugadale ngwadi age me no ba takalin kare. 17 Ba age me no ba takalin kare, ene ba me kle age no Chube Oña takalin kare. Ba age no Chube Oña takalin kare, ene ba me kle age me no ba takalin kare. Ba ulita ta e kare boke molen, ta e boke kle kira bate ba tale, gdaite kle kira bate gdaite ole diali. Uñale ba ulitage Chube Oña ta ba ta gbakalin age no, ba ta agekalin no ama takalin kare, agwa kaire ba ta agekalin me no ba takalin kare. Ba ulita ta boke ene molen, malen ba agali gballa me ñage mo ta gbe age no, Chube Oña alin giti ba ñage age no. 18 Ba ulita Chube Oña chuge ngwadi ba ta gbe age no ama takalin kare, ene ba me tañachugadale age Moisés chadalla gerule kare. 19 Kwian ulita bai mo ta gbe age me no diali kle mo ta gbe age ai kare: Muinga onbre mo chuge ke giti. Kwian tañachuge geru sugaska giti, age tañachuge kare. Kwian onbre me ngwedi muinga na na ole, muinga me ngwedi onbre na na ole, kwian ene me ibule mo giti. 20 Kwian lle dodaba kodi gai mo chubeale. Kwian ta gdaboke me no molen age me no diali daba na ole che dolla Satanás kirallaske. Kwian ta chege jainchke diali daba nadi. Kwian ta dbe kira bate diali daba na ole. Kwian semale daba ole lle ulita giti. Geru mebitabi kwian chege ta skochie tanre. Kwian geru jinade daba na dollale daba ole ene daba ta blite, ene ama takalin daba ulita gerule no ama giti alin. Mneite mo gbe sugekare daba na ulitage tañachuge ama alin allabi no, bedre bedre geru me ulia giti ama daba na gai chege ama ole. 21 Kwian ta dbe tañachuge me no dabadi lle dabanu giti, ama takalin lle dabanuge mau alin. Kwian mo ta dbe lle gage jai diali. Kwian chui ollade me no, kwian age ulita me no ama takalin kare. Kaire kwian lle na tanre me no dodade. Cha gerudu ngeru kare ba ole nege cha gerule kwaite ba ulita ole, bai kaire chage diali age ulita ai kare lle ai cha chada degangu giti kare, kwian ene me kle Chube gai mo Chugagwallale, ama mi toi Chube ole diali. 22 Kwian mo chuge ngwadi age kwian takalin kare, kwian ene be age me no diali, agwa kwian Chube Oña chuge ngwadi age ama tale, Chube Oña kwian ene ta gbe ai kare: Chube Oña kwian ta gbe mo ta dbe no daba na ulita ole. Chube Oña kwian ta gbe nga suga no ole. Chube Oña kwian ta gbe suga no me tañachuge boi daga ngwale giti. Chube Oña kwian ta gbe jage ulita boi daga ngwalege me skochie me skwatige. Chube Oña kwian ta gbe gerule ta no ole daba na ole. Chube Oña kwian ta gbe age no daba na alin daba na chudaboi. Kwian gerule be age gweale daba na alin, Chube Oña kwian ene ta gbe age ulia kwian gerudu kare. 23 Chube Oña kwian ta gbe me mo gbe ma kweri daba nage. Chube Oña kwian ta gbe me mo chuge ngwadi age me no kwian takalin kare. Chube Oña kwian ta gbe age no ulita ai kare. Geru kwian nu gbaba kwian ulita alin nga dba ai giti kwian ulita chagedale geru kle gbaba gerule kare, geru e ni gdaite ñage gerule age ulita no ai kare dollale. 24 Kwian bai kaire Jesucristo gau ulia, kwian ene Jesucristonu, kwian ene mo talla ulita ngeru me no mliunga, ama me mo chuge ngwadi age me no dare ulita ama takalin kare ama agedu ngeru kare. 25 Nege Chube Oña kle toi che tale, ama alin ñage che ta gbe chage no, che Chube Oña chugadale ngwadi che ta gbe age ama takalin kare. Che Chube Oña chuge ngwadi che ta gbe age ama takalin kare ama che ulita ta gbe toi no ule modi, ene che me toi sugaska modi. Che me tañachugadale mo tale: “Cha ma no daba na ulitage.” Che me mo ta gbadale geru jinade dabage daba gbagda skochie. Che me ta dbadale tañachuge me no dabadi lle dabanu giti, che me ta dbale che takalin lle dabanuge mau alin, che mo ta dbale tañachuge no daba ulita alin.
1 Cha daballa cha ibotea Chubenu, cha gerule ba ulita ole, chke uñale bage daba gweale Chubenu kle age gweale me no, ba ulita bai kaire kle mo ta gbe Chube Oñage age Chube takalin kare, ba ene ulita gerudale daba e ole ta no giti, ba ama chudaboadale joge siere ama kle age me noge, ene ama joge naskuni age Chube takalin kare. Ba ulita bai kaire mo ta gbe daba chudaboi ene, ba ta sugedale mo giti ba ñage age me no ene kaire, malen ba gerudale ta giti ama ole. 2 Ba kwian Chubenu ulitaske daba gweale boi daga ngwale daba gweale mo ta gbakalin age me no, ba ulita bai kaire kle chage no Chube ole trate ba mo ta gbadale diali daba chudaboi ongoru ongoru ta no giti, ba age ene ba kle ta dbe no daba na ole Cristo geru gbu kwian ulita alin kare. 3 Kwian gweale tañachuge ama ma kweri me ñage daba kle boi daga ngwale chudaboi me ñage daba kle mo ta gbakalin age me no chudaboi, kwian ene me kle tañachuge trate, ama kle mo anblite agali, ama me ma kweri daba nage, Chube gwage ni kwian gdaite ma kweri daba nage. 4 Ma no kwian ulita mo ta gbe tañachuge trate ulia mo giti, ene chke uñale kle mo ta gbe age no o me kle mo ta gbe age no, me tañachugale ama kle age ma no daba nage o me. Suge amage ulia ama kle age no ulita gire nga be suga no amadi mo tale e giti. 5 Uñale Chubege kwian ulita talla mine, malen kwian ulita gdaite gdaite mo ta gbadale chage age no Chube takalin kare. 6 Kwian kle daba tke tangle Chube geruage, daba ulita bai kaire Chube gerua jwannga kwian tkanga tanglege, geru jwannga mo tkanga tangle chudaboadale no lle toigda ulita giti, ene kwian tkanga tangle ñage toi no ñage daba tke tangle dare. 7 Cha takalin geru ai suge trate ulia ba ulitage, ni kwian gdaite ñage tañachuge ama kle age skwlenre me no Chube me tallade e giti, tañachuge Chubege me uñale ama kle age giti, agwa me kle Chube anblite ulia, kwian ene kle mo anblite naskuni, Chubege kwian talla ulita uñale, Chube gwage kwian kle age ulitadi. Kwian age no Chube gwa giti nga dba ai giti, Chube be age no ama alin bdagli. Kwian age me no Chube gwa giti nga dba ai giti, Chube be ji gbe ama alin bdagli. 8 Kwian bai kaire mo ta gbe age me no diali ama takalin kare, bdagli kwian ene be boi daga ngwale be chege sugekare Chubege diali. Agwa kwian bai kaire mo ta gbe age no diali Chube Oña takalin kare, kwian ene be toi no diali chui tangle Chube ole. 9 Malen che ulita me skwatigedale age diali no ulita Chube takalin kare, che chege ta ene kare molen diali, bdagli Chube be age no no che alin, ene be suge trate ulita chege che agedu no Chube takalin kare che me agedu ngwale. 10 Uñale chege che age no Chube takalin kare che me kle age ngwale, malen noare diali che ñage kare che mo ta gbadale age no kwian ulita alin kwian ulita chudaboi, che me ta jogedalenga age no daba Chubenu alin diali, che daba Chubenu Jesucristo giti chudaboadale ngeru kwian na ulitage. 11 Chada gwagwa kweri kweri ai ba batenga, chada ai cha kle dege agali mo kodi ba ulita alin, cha agali geru ai bdagli dege chada giti ba alin. 12 Cha gerule trate trate ba ulita ole kwian giti bai kle ba gbe mo kwara sidri tkangenga, ene ama gerule ba ole ba Chubenu. Ama ta chegekalin no kwian na ulita gwa giti malen ama age ene, ene kwian me chage ama nate age me no ama ole, ama me takalin kwian age me no ama ole gerule Cristo agedu kruge giti alin. Kwian ene me gerule daba na ole kwian Cristo alin gai ulia chege Chubenu, ama kennga gerule Cristo giti daba na ole kwian na ngeru. 13 Kwian israelita kle gerule ba ole ba mo kwara sidri tkadalenga, kwian e amaña ni ñage age no ulita Moisés nu Chube gerua degaba unsuialin kwian israelita ulita alin gerule kare, kwian ene me kle tañachuge no, ama takalin ba age ama gerule kare, ene ama ñage gerule no mo bitalla ole mo giti, ama gerule ene mo giti: “Cha agedu no no, cha kwian me israelita ngle gbu mo kwara sidri tkangenga che ulita kle age kare, nege ama chege che ole.” 14 Kwian e gerule ene no mo giti kwian na ole ama kle age giti, agwa cha me tañachuge ene, cha alin me no gerule mo giti daba na ole cha agedu giti. Cha ta gerukalin no kwian na ole che Chugagwalla Jesucristo agedu kruge alin giti, Jesucristo jokeda kruge cha alin, e giti Jesucristo cha ta ngeru ulita blitu, ene cha ta e ulita chugu ngwadi, nege cha me tañachuge dare cha tañachugu ngeru kare, suge chage Cristo alin giti cha Chubenu cha age Chube takalin kare, nege cha me age cha takalin kare. 15 Che me tañachugadale mo kwara sidri tkangenga o me mo kwara sidri tkangenga, e giti che me tañachugadale, e ngwale, e me che ta blite joge siere age me noge Chube gwage, Cristo alin giti Chube Oña che ta jagere gbe, ene che ta me nge kare. 16 Kwian ulita bai kaire kle mo ta gbe Jesucristo alin gai ulia kle mo ta gbe chage Jesucristo takalin kare, kwian ene kwian Chubenu ulia Jesucristo giti, cha takalin Chube kwian ene ulita ta gbe suga no kaire Chube tai dage ama ulitage. 17 Ba ulita nga Galaciamu, ba gweale kle joge siere geru ulia Jesucristo gitige, ba kle age ene ba kle cha ta gbe olire tanre ba kle cha ta gbe tañachuge tanre ba giti, nege gwangerugu cha me takalin ni ba gdaite age ene dare. Cha batré Jesucristo giti tanea kle cha jegwale, e giti ñage suge ba ulitage cha no Jesucristo ole cha ama gai ulia cha lle boanga no ama alin. 18 Cha daballa cha ibotea ulita Cristo giti Chubenu, cha takalin che Chugagwalla Jesucristo age no no ba ulita alin. Ene nobi. Geru ai ene ulita cha Pablo chada degangu ba kwian Chubenu ulita nga Galaciage alin. Che kle meni.
1 Cha Pablo chada ai degange ba ulita Jesucristo gerua gaba ulia una Efesoge alin: Chube tale Chube cha gau cha gbu Jesucristo gerua ketangale dabage, cha gbi kage chada ai giti ba ulita Chubenu una Efesomu alin, ba ulita kle mo ta gbe diali gwangerugu Jesucristo geruadi toi Chube takalin kare, ba ulita alin cha chada ai degange. 2 Cha takalin Chube che Ñenua kaire Jesucristo che Chugagwalla age no no ba ulita toinga una Efesoge alin, Chube kaire Jesucristo ba ulita ta gbe nga suga no ole. 3 Che Jesucristo gau ulia mo Chugagwallale gire Chube Jesucristo Ñenua diali age tanre no che ulita alin, e giti nga suga noare chadi gerule no Chube ole, cha gerule no ama ole ene: “Chube toinga nga ngaña giti, ba noare ulia, ba kweri, ba diali age no cha ulita Jesucristo gerua gaba ulia alin.” Che gerudale no Chube ole ene. Ulia Jesucristo giti Chube ageba no tanre che alin. 4 Unsuialin Chube bebi nga ulita dodade gire, uñadu Chubege che be Jesucristo gerua gai ulia, Chube che gau ama alin enebi, gire ene che chege no trate che me chege jiske che agedu me no giti Chube gwa giti. Chube mo ta gbu no ene che ole, 5 Chubege ulita uñadu unsuialin tangle che be mo ta gbe no ama ole, ama ta du no che alin, unsuialin tangle ama mo ta gbu che gai Jesucristo giti mau alin nga suga no ole ene che ulita chege ama oliale ama takalin kare. 6 Ulia Chube agedu ene no che alin malen che gerudale no Chube giti nga suga no ole diali, ene chke uñale kwian ulitage Chube no che ole Chube agedu no che alin, ene ama kaire gerule no Chube giti. Chube noare mo Kirolla Jesucristo ole, Jesucristo giti Chube kle age no no che alin. 7 Chube ta no no che ole, ama mo Kirolla Jesucristo kagu nga dba ai giti boi daga ngwale che ulita alin, Jesucristo jokeda kruge che agedu me no giti, Jesucristo jokeda giti Chube che jun siere ji chugege che agedu me no ulita gdale, che agedu me no ulita Chube talla mliunga. 8 Cristo giti Chube che ta gbe ngle, kaire Chube che ta gbe suge che toidale trate ama gwa giti. 9 Chube mo ta gbu gwangea ama be age ulita Cristo giti kwian alin, uñadu Chubege lledale ama be Cristo kage nga dba ai giti, agwa kwian ulitage geru e me chku uñale. Agwa bdagli Chube che ulita amanu ta gbu chke Cristo giti ama mo ta gbu gwangea age giti che alin Cristo giti. 10 Kaire gwangea Chube mo ta gbu kwian gdaite gdaite ulita gbe ule kwaitre alin, lle nga ngaña gitimu lle nga dba ai gitimu kaire kwian ulita Chube be gbeni naskuni Cristo kote lle dodaba no ulita nge jondege alin kare. Chui e chke gire Cristo be chege kweri lle ulita kwian ulita Chugagwallale. 11 Chube kle age ulita ama nu mo ta gbaba age gwangeabi kare. Gwangeabi unsuialin tangle Chube mo ta gbu cha kwian israelita gai ngeru mo oliale cha Cristo gai ulia giti. Malen Chube cha kwian israelita ulita ta gbu ngerutabi mo jwannga siere ji chugege age me no gdale manade ngwange. Cristo chku Chube mo ta gbu kare gire cha kwian israelita gweale Cristo gau ulia, Chube cha israelita ulita Cristo gerua ganga gau mau alin toi Chube takalin kare gire ene diali cha ulita gerudale no Chube giti ene: “Ulia Chube agedu no no cha alin cha ama gerua gau ulia giti, malen cha gerule no ama giti cha no no Chube ole, Chube no trate ulita.” Cha kwian israelita gerudale no ene Chube giti Chube agedu no cha alin giti. Ene kaire cha israelita ulita Cristo gerua ganga giti kwian na be gerule no Chube giti. 13 Kaire ene agwe ba kwian me israelita Chube gerua ulia Cristo giti keruchugu ba geru e gau ulia mo tale, geru e gai ulia giti ba chegu gitiru ji chugege ba agedu me no gdale. Ba Cristo gerua gau ulia gire Chube mo Oña gbu ba tale ama nu gerubabi gwangea be kete bage kare, ene Chube Oña giti ñage suge trate ba Chubenu. 14 Chube Oña kle che ulita Chubenu tale, e giti chke uñale chege Cristo gai giti Chube che jun siere ji chugege agedu me no gdale. Chube Oña giti uñale chege che be joge toi chui tangle diali Chube ole ama nu chui gbaba kare. Chube agedu no ene ulita che alin ama tadukalin kare malen che toidale no trate Chube takalin kare kwian na gwa giti, kaire Chube agedu no che alin giti che Chubenu gerudale no Chube giti ene: “Chube no kweri, ama kle age no no che ulita kwian amanu alin.” Chube agedu no che alin giti chedi nga suga noare, che gerudale no ama giti ama gbe kweri no kwian na gwa giti gire ene kaire agwe kwian na be gerule no Chube giti. 15 Chube agedu ulita no che alin Jesucristo giti malen nga suga noare chadi ba ulita mo ta gbu Jesucristo gai ulia mo tale, chku uñale chage ba ulita una Efesomu kle Jesu gai ulia mo Chugagwallale ba kle ama gerua gbe gdadi, chku uñale chage ba kle mo ta dbe no daba ulita Jesucristo gerua gaba ulia ole. 16 Ba kwian ene malen cha gerule no Chube ole Chube kle ba ta gbe age ene giti, nga suga noare chadige Chube kle age no ba alin ama kle ba ta gbe toi no daba na ole. 17 Che Chugagwalla Jesucristo Ñenua Chube ama noare kiraske, ama ole cha kle gerule ba giti ene: “Chube, ba kwian una Efesomu bai kaire ba gerua Jesucristo giti gaba ulia, ba ama ulita ta gbe ngle diali mo Oña giti, ene be suge amage ba kle age no ama alin ulia, e giti be suge amage ba talla mine. 18 Kaire Chube, ba ama ta gbe suge ama Jesucristo gerua gaba giti ama ñage toi diali no ba ole chui tangle, kaire ba ama ta gbe suge ba kle age no ngle diali ama alin chui negege tangle kaire chui bdagli be chkege, ba be chege ama ole ama manade no no diali. 19 Kaire ba ama ta gbe suge ba kiraske tanre lle ulita giti ba ñage age ulita ba takalin kare cha ulita Jesucristo gerua ganga alin. Ene nobi Chube.” Cha kle gerule ene ulita ba giti Chube ole. Chube agedu no ba alin mo kiralla giti ene kaire kira ai amaña giti Chube Cristo gbuni gwade. Ama Cristo gbuni gwade gire Chube Cristo gbu toi dba mo ngena ko taingwli giti nga ngaña giti kwian ulita nga ulitage Chugagwallale. Chube Cristo gbu ma kweri ma kiraske kwian ulitage nga dba ai giti kaire lle boanga Chube alin nga ngaña gitige kaire che dolla Satanáge kaire dolla Satanás chudaboangallage, Cristo chegu ma kweri ma kiraske ama ulitage chui negege tangle kaire chui tangle diali. 22 Chube kwian ulita kaire lle ulita nga ulita jigu Cristo kote, ene Cristo chege ulita mauñale chege ulita kagangale. Kaire Chube Cristo gbu kwian ulita Cristo gerua gaba ulia Chugagwallale, che ulita Cristo gerua gaba ulia che Cristonu che Cristo jegwalenu kare, Cristo kle mo talla gbe diali che amanu tale, ama kle ule diali che amanu ulita ole.
1 Ngerutabi ba ulita bebi Chube gerua Jesucristo giti gai ulia gire ba toidu sugekare Chubege age me no Chube dollale malen ba ulita chegu kwian jogebakeda kare Chube gerua giti me uñadu bage Chube giti. 2 Ba kledu chage age me no kwian na ulita agenga me no kare, ba kledu chage diali che dolla Satanás takalin kare, dolla Satanás ama dolla na ulita kle nga ngaña ngwalege chugagwalla, ama kle kwian ta gbe diali age me no Chube dollale. 3 Ngeru che toidu kaire kwian agenga me no ulita kle toi kare, che ulita agedu me no diali dolla Satanás che ta gbu age kare. Che ulita medunga gwangea che ta me nobi ulita, che ulita tadu agekalin me no che tañachugu mo tale kare. Che ta me no giti che ulita chegu jiske Chube gwage kwian na ulita me Chubenu jiske kare, Chube ji gbe tirare kwian ulita giti bai chege jiske ama gwage. 4 Agwa Chube mi ji gbe ene che Cristo gerua ganga giti che agedu me no gdale, Cristo giti Chube no no che ole malen ama mi che gbe ji chuge agedu me no giti. 5 Ngeru che ulita chagedu sugekare Chubege age me no tanre diali, che chegu kwian jogebada kare sugekare Chubege che agedu me no kbiale, Chube che jun siere ji chugege che agedu me no gdale, e salengwli Chube che jaba gbuni gwade kare. 6 Jesucristo jokeda kruge Chube ama jaba gbuni gwade mo kiralla giti gire Chube ama duni naskuni toi Chube ole nga ngaña giti. Jesucristo giti Chube che ta blitu no ama ole ene ama gwage che chege no trate me jiske, e salengwli che jo nga ngaña giti ule Jesucristo ole toi dba Chube ngena ko taingwli giti kare. 7 Jesucristo giti Chube agedu no ene che alin ene chui aige gwangerugu be chke nate uñale ulita Chube no no che ole ulia Chube agedu tanre no che alin Jesucristo giti che bai nu Jesucristo gaba ulia. 8 Ba ulita mo ta gbu Jesucristo gai ulia, e giti Chube ba jun siere ji chugege ba agedu me no gdale. Ba me tañachugadale ba gballa mo jun siere ji chugege, me dale ene. Chube ba jun siere ji chugege Jesucristo giti, ama agedu ene mau tale ba alin ama no no ba ole. 9 Ba me tañachugadale mo tale: “Cha agedu no no Chube gwa giti malen Chube cha jun siere ji chugege.” Ba me tañachugadale ene, ba gballa me ñage mo gbe sugekare age me noge, Chube agedu no ba alin mau tale. 10 Chube che ta blitu ulita, ene che me chege age me no che agedu ngeru kare, gwangea Chube mo ta gbu che dodade mau alin age no ama takalin kare, nege Jesucristo giti ama che ta gbe age no daba na alin daba chudaboi ama takalin kare. 11 Ba tachkedale ba toidu ngeru tangle giti sugekare Chubege, ba me kwian israelita chudalla, ba me Chubenu. Nege uñale bage Chube gerudu unsuialin tangle kwian israelita enusulian ole Chube be age no kwian israelita ulita alin be gdaite kage ama jwanngale siere ji chugege age me no gdale. Chube me gerudu ene ba enusulian ole be age no ama oindalla alin jwanle siere ji chugege ama age me no gdale. Ba me kwian israelita chudalla, ba me mo kwara tkangunga kwian onbre israelita mo kwara tkangunga kare, malen kwian israelita ulita gwa giti ba kwian sugaska. Kwian onbre israelita ulita mo kwara tkangunga Chube ama gbu age kare, ene suge amage ama Chubenu ulia. Agwa ba me israelita ba me agedu ene kwian israelita kare, ba ulita chegu sugekare kwian israelita ulitage. Ba me ñadu tañachuge Chube be age no ba alin ba ta gbe no trate Chube gwa giti ama be age kwian israelita ole kare. Ba tachkedale ba bitalla kaire ba ulita me israelita toidu ngeru tangle sugekare Chubege ba bebi Jesucristo gerua gai gire, ne suiale ba me Chubenu dale. 13 Agwa nege tangle ba Jesucristo gerua gau giti ba Chubenu ulia. Ngeru ba kledu sugekare bate Chubege, agwa nege tangle ba Jesucristo jokeda kruge gau ulia mo alin, e giti ba ta kle ule Chube ole. 14 Kaire Jesucristo giti cha ulita kwian israelita ba ulita kwian me israelita chege kwaitre alin mne gdaitre alin kare, ngeru cha kwian israelita chudalla ulita mo ta gbu ba dollale agwa Jesucristo gerua gai ulia giti che ulita me kle tañachuge ngeru kare kira bate modi mo ibade ongoru ongoru ngeru kare. Che Jesucristo gai ulia giti che ta chege ule kwaitre alin, suge chege nege che ulita Chubenu. 15 Unsuialin tangle cha kwian israelita ulita enusulian kada Moisés Chube gerua ketu kwian israelitage kwian israelita toidale trate Chube gwa giti, geru e giti kwian israelita kwian me israelita mo ta gbu diali kira bate modi ongoru ongoru. Agwa Jesucristo jokeda kruge gire geru chegu nganake kwian israelita me agedale dare ulita Moisés chadalla gerule kare kwian ta gbagda trate Chube gwa giti, Jesucristo Chube gerua no jagere gbu kwian ulita alin. Jesucristo giti kwian israelita kwian me israelita toidale no ule chudalla gdaitre alin kare me tañachuge ngeru kare. Ene Jesucristo giti kwian chudalla ulita ñage toi no modi ule ongoru ongoru. 16 Jesucristo jokeda kruge giti kwian ñage Chube uñe ñage chege no trate Chube gwage, kaire Jesucristo kwian israelita kwian me israelita ulita gbu mo skatemanallale me kira bate dare ngeru kare, ene kwian ulita ñage chege tañachuge salengwli kwian gdaitre alin kare. 17 Jesucristo chku nga dba ai giti Chube gerua no dbe kwianske ene geru chke uñale che ulitage ba kwian me israelita ulita cha kwian israelita ulita toidale no modi ulita Chube gwa giti. Ba kwian me israelita kledu sugekare Chubege me Chube gerua uñu, cha kwian israelita ulita Chube gerua uñu, cha ulita geru keruchugu Chube takalin kwian toi mine agwa cha ulita me agedu geru kledu gbaba gerule kare. Malen Jesucristo chku Chube gerua no jagere dbe che ulita alin, 18 che ulita Chube gerua e Jesucristo giti gau ulia gire Chube mo Oña kagu che alin ulita malen nege che ulita ñage gerule Chube che Ñenua ole salengwli Chube Oña gdaitre alin giti. 19 Malen Jesucristo giti nege ba kwian me israelita ulita ñage Chube uñe cha israelita kare. Nege ba me ngeru kare, ba Jesucristo gerua gai ulia giti ba me kle sugekare Chubege, Chube kle ba manade kle ba chudaboi kle age no ba alin salengwli ama kle age no cha israelita alin kare. Che ulita Jesucristo gerua gaba ulia che chege Chube bitalla kare, che ulita Chubenu. 20 Che ulita Chubenu salengwli ke ulla gbaite gbakle kare. Chube Jesucristo kagu nga dba ai giti ke gbaite kweri ma no trate gbakle ngeru kare. Gire Chube kwian gweale gbu Jesucristo gerua ketangale dabage, kwian e ulita Jesucristo gerua ketanga dabage chege salengwli ke ulita gbakle ke gbaite kweri no jegwale ulita dba tangle gerere kare. Che ulita bai kle Jesucristo gerua gai ulia nege tangle che chege salengwli ke na tanre gbakle ke ulita gbakle ngeru giti tangle kare. Gire ene che ulita chege kwaitre alin ke ulla kle chege gbaba ulita no kare. 21 Che ulita Jesucristo gerua ganga che u gbaitre alin gbakle kare. Che Chugagwalla Jesucristo giti Chube che ulita Jesucristo gerua ganga ulia gbe toi no trate ule kwaitre alin ama takalin kare kwian kle u gbe gbaite kare. Ene bdagli Chube gwa giti che amanu ulita ta be chege salengwli no trate ulita. 22 Jesucristo giti ba kwian me israelita chegu no kwaitre alin ule cha kwian israelita ole salengwli u gbaite gbakle kare. Chube mo Oña kagu toi che ulita tale, ene Chube Oña giti Chube kle che ole diali kaire che ta chege ama ole diali.
1 Chube kle kwian israelita kaire kwian me israelita Jesucristo gerua ganga ulita gbe ule kwaitre alin, geru e dbe ba ulitaske giti cha kle skage, geru e Jesucristo giti no ba ulita alin agwa e giti cha kle skage. 2 Bage uñale Chube agedu no ba alin cha giti, Chube cha gbu geru no Jesucristo giti kete bage. 3 Cha chada degangu gwangea sidri chada ai giti Chube mo ta gbu gwangea age kwian ulita alin giti, kwian me geru e uñe trate, geru e chege skwlenre kwiange, Chube cha ta gbu geru e gbe chke uñale kwiange. 4 Ba geru ai cha kle degange kare batenga, ene ñage suge bage Chube cha ta gbu ulia geru ai Cristo giti kete bage. 5 Geru Cristo giti me kledu uñale kwian israelita enusulian oña unsuialin tanglege, agwa nege tangle Chube kwian ulita Chube gerua ketanga kaire kwian Jesucristo gerua ketanga ta gbu geru e gbe chke uñale kwian ulitage mo Oña kiralla giti. 6 Geru ai Chube cha ta gbu giti kle gerule ene: Kwian me israelita bai geru no Jesucristo giti gai ulia ñage tien gitiru ji chugege agedu me no gdale salengwli kwian israelita geru no Jesucristo giti gai ulia kare mi ji chuge ama agedu me no gdale. Chube kle age no kwian israelita Jesucristo gerua gau ulia alin kaire Chube be age no kwian me israelita alin bai Jesucristo gerua gai ulia alin. Chube kwian me israelita gbu ule kwian israelita ole kwaitre alin Jesucristo giti, kaire Chube gerudu kwian israelita ole Chube be age no ama alin kaire ene geru amaña ñage chege kwian me israelita ulita alin kwian bai geru no Jesucristo giti gai ulia alin. 7 Uñale chage cha me ñage geru dbe kwianske gballa mo kiralla giti agwa Chube agedu no cha alin Chube cha gbu geru no amanu Jesucristo giti dbe ama kiralla giti ba ulita me israelitaske. 8 Chage cha suge moge cha kwian ngwale ma soli kwian na ulita Chubenuge agwa Chube agedu no cha alin Chube cha gbu ama gerua Jesucristo giti dbe kwian me israelitage. Nga suga no chadige geru no Jesucristo giti kete kwian ulita me israelitage, geru e gerule Chube diali agekalin no no che ulita alin che kwian bai Jesucristo gerua gai ulia alin. Geru e cha kle kete chkedale uñale kwian ulitage. 9 Sbali geru Chube be age no kwian me israelita alin giti chegu skwlenre kwian ulitage, Chube nga ulita lle ulita dodanga gwangea ama mo ta gbu age no kwian ulita alin Jesucristo giti kwian israelita alin kaire kwian me israelita alin. Chube che gbu geru e gbe chke uñale kwian ulitage. 10 Chube kwian me israelita Jesucristo gerua ganga gau mau alin gbu ule ulita kwaitre alin kwian israelita Jesucristo gerua ganga ole. Chube agedu ene, ene nege tangle ñage suge ma trate lle boanga Chube alin nga ngaña giti ulitage ulia Chube ta ngle ole age no ulita. 11 Chube agedu ene ulita, ama mo ta gbu gwangea kare ama age no kwian ulita alin che Chugagwalla Jesucristo giti. 12 Che ulita Jesucristo gerua gai ulia giti suge chege che ñage gerule ta no ole Chube ole me ta kennga ole, suge trate chege Chube che keruchuge che kerua gai ngwange no. 13 Malen cha gerule ba ulita ole, ba me ta olire cha giti cha kle boi daga ngwale Jesucristo gerua kete bage gdale, ba me sugedale moge jiske chage, agwa ma no ba mo ta gbe nga suga no ole cha kle boi daga ngwale giti ba alin. Sugedale bage cha kle boi daga ngwale Jesucristo gerua dbe giti e no ba alin. 14 Chube agedu no ulita che alin, malen cha jongnagwa skute dba Chube gwa giti Chube gai dage gerule ba giti Chube ole. 15 Chube kwian Cristo gerua ganga ulita Ñenua. Kwian gweale nu Cristo gaba ulia jogebakeda ama oña kle nga ngaña giti Chube ole, kwian gweale nu Cristo gaba ulia kle nga dba ai giti, Chube ama ulita Chugagwalla. 16 Chube ole cha gerule ba giti ene: “Chube, ba kira ulita molen, ba ñage age ulita. Cha gerule ba ole ba kwian una Efesomu Cristo gerua ganga ta kira gbe ma no mo Oña kiralla giti. 17 Ba ama ulita ta gbe Cristo gai ma no dare diali gwangerugu mo Chugagwallale, ba ama chudaboi mo Oña giti, ene suge amage mo tale Cristo kle diali ama ole. Ama no no ba ole kaire ama no daba ole, 18 malen cha gerule ba ole Chube, ba ama ta gbe kaire ba kwian na ulita nu Cristo gaba ulia ta gbe suge trate ulia mo tale Cristo no no ama ole chui tangle diali. 19 Kaire ba ama ta gbe suge moge Cristo diali ta no ama ole diali ta agekalin no ama alin, agwa ulia ni be ñage suge amage trate ulita Cristo no diali ama ole giti, e giti mi suge amage ulita. Agwa noare ba ama ta gbe chege diali Cristo talla ole gire ene ama be kle ta no trate ole ba takalin kare ama be tañachuge diali ba giti nga suga no no ole ba talla be kle ama tale. Chube, cha gerule ba ole ene kwian Cristo gerua ganga una Efesomu giti. Ene nobi.” 20 Cha kle gerule ene Chube ole ba ulita giti, uñale chage che lle ulita kade Chubege ama ñage age ulita mo kiralla giti, ama kira molen lle ulita boi. Kaire Chube age ma ngle che alin ama takalin kare che kle lle kadege kaire che kle tañachuge gitige, che me ñage tañachuge Chube me ñage che chudaboi lle gweale che takalinge giti. Uñale chage Chube Oña kiralla giti Chube ñage age no ma ngle che kle tañachuge karege. Chube Oña kle che tale, ama giti kle suge chege Chube kle age no diali che alin ta no giti. 21 Che ulita nu Jesucristo gerua gaba che gerudale no Chube giti Chube agedu no che alin ulita Jesucristo giti. Che gerudale no ngle Chube giti chui tangle diali, ene suge kwian na ulitage Chube noare Chube kweri. Ene nobi.
1 Cha kle skage Chube gerua Cristo giti dbe gdale, cha gerule ba ulita ole, Chube agedu tanre no ba ulita alin, Chube ba ulita gau mau alin, malen cha takalin ba mo ta gbe chage trate Chube gwa giti Chube takalin kare kwian ulita Chube uñe toidale kare. 2 Ba me sugedale moge ba ma kweri daba nage, ba diali tañachugadale daba na chudaboi ta no giti, ba nodale daba ole ta no giti, ba mo ta gbadale jage ulita boi daga ngwalege me skochie dabadi me skwatige daba chudaboi, daba age gweale me no ba ole, ba mo ta gbadale no ama ole Chube takalin kare me tañachuge ama kle age gweale ba ole giti. 3 Ba Cristo gerua ganga Chube ba ulita gbu ule kwaitre alin nga suga no ole, gire nege ba mo ta gbadale toi no modige me kira bate modi, ba mo ta gbadale toi Chube Oña kirallaske diali. 4 Che ulita Cristo gerua gaba ulia che chege salengwli Cristo jegwalenu kare, che ulita kwian gdaitre alin kare Cristo giti che ulita ta chege salengwli, Chube Oña gdaitre alin kle che ulita Cristo gerua gaba ulia tale, che mo ta gbadale suge moge ulia Chube be age no che alin che be toi ama ole nga ngaña giti chui bdaglige. 5 Cristo alin allabi che jwannga siere ji chugege agedu me no gdale, ama che ulita Chugagwalla kweri. Che ulita geru Cristo giti ulia gau, malen e giti alin allabi che ulita Chubenu. Che ulita mo ñeangu chiske Cristo alin allabi kalla giti. 6 Chube ulia gdaitre alin ama che ulita Cristo gerua gaba ulia Ñenua, ama che Chugagwalla kweri ama kle che ulita ta gbe age ama takalin kare, kaire ama kle mo Oña gbe che ulita tale che chudaboanga. 7 Che ulita mangire batre Cristo gerua gaba Chube kle che ta gbe ule kwaitre alin kaire Cristo kle ta kete che gdaite gdaitege lle boi no kaire kaire Chube takalin kare daba Chubenu chudaboagda. 8 Chube gerua degaba unsuialin gerule e giti, chada e gerule: “Ama kwian junnga siere ji chugege, joni nga ngaña giti gire ama ta ketu kwiange ulita lle gweale boagda ama alin.” Chube gerua degaba unsuialin gerule ene Cristo giti. 9 Geru kle degaba gerule Cristo joni nga ngaña giti, geru e giti sugedale chege ngeru Cristo kledu nga ngaña giti Chube kle ngwadi chku nga dba ai giti bigire joni naskuni nga ngaña gitini. 10 Ama chku nga dba ai giti amaña joni nga ngaña giti Chube kle ngwadi, ene ama ñadu mo Oña kage nga dba ai giti chegedale kwian Cristo gerua ganga tale kwian kira gbangale ene Cristo kle nga ulitage nga dba ai giti kaire nga ngaña giti. 11 Cristo kle ta kete kwian Chubenu gdaite gdaitege lle boi no kaire kaire Chube takalin kare, Cristo ta kete kwian gwealege Jesucristo gerua kete dabage, Cristo ta kete kwian na gwealege Chube gerua kete dabage Chube Oña kle geru kete amage kare, Cristo ta kete kwian na gwealege geru no Cristo giti trage kwian me Cristo gerua uñe ole, Cristo amaña ta kete kwian na gwealege daba Cristo gerua ganga ulita manade Chube geruadi kaire daba tke tangle Cristo gerua giti. 12 Cristo ta kete ene kwian ama gerua gabage gdaite gdaite kaire kaire, ene kwian ñage age Cristo takalin kare daba chudaboi, ñage daba kira gbe lle boi kaire Chube alin. Ene che ulita Cristo gerua ganga ñage kira gai ma ngle ule kwaitre alin, 13 gire bdagli che ulita Cristo gerua ganga be chege mo ta gbaba ule tañachuge salengwli ulita kwaitre alin Cristo giti, che ulita be chke Jesucristo Chube Kirolla gerua uñe ma no trate. Ene che ñage toi ta giti che ñage chege trate no Cristo kare ama gerua giti. 14 Che kle mo ta gbe ulia ulia Cristo geruadi ene che mi chege kirogwa soli anblitakle ngwale kare lle gweale giti. Kwian tanre kle chage geru me ulia ngwale trage kwian ulita ole kle kwian anblite geru ngwaledi. Agwa che bai kle mo ta gbe ulia ulia Cristo geruadi, che mi mo chuge ngwadi mo anblitange kwian ege geru ngwale giti, che mi geru ngwale gai ulia. 15 Che toidale geru ulia ole mo tale, che geru e ulia tragadale ta no ole kwian nage ene che be kira gai chage no ma ngle ene che be ñage chage no Cristo kare, Cristo che ulita ama gerua ganga Chugagwalla. 16 Cristo che ulita gdaite gdaite gbu ule kwaitre alin ama jegwalenu kare, malen che ulita mo chudaboadale ongoru ongoru ene che ñage chege mne gdaite salengwli ule ta no ole. Che ulita gdaite gdaite mo ta gbadale lle boi salengwli Cristo ta kete chege kare daba chudaboagda, ene che ulita ñage kira gai moge ongoru ongoru, che ñage toi no ule ta no ole. 17 Geru ai giti cha gerule ba ole Cristo cha ta gbu gerule ba ole kare: Ba me ñage toi dare kwian me Cristo uñe kare, kwian me Cristo uñe kle toi diali tañachuge ama takalin kare diali tañachuge age me no. 18 Kwian me Chubenu kle mo ta gbe diali Chube gerua dollale kle mo tke dole Chube geruadi gire ene me chke uñale kwian ege kwian kle age me no giti, me kle Chube gerua tallade malen e giti ama kle tañachuge diali age me no tanre, geru ulia me suge amage, Chube talla me kle ama ole. 19 Kwian ene me suge moge jiske dare mo tale ama kle age me no giti ni ibule kwian na ngeru ama kle age me no giti, kwian ene kle mo chuge ngwadi age me no me no ulita diali ama takalin kare, kwian ene takalin age me no ma ngle gwangerugu diali. 20 Agwa ba ulita Cristo gerua gau ulia malen uñale bage ba me ñage toi ene kwian me Cristo gerua gaba kle toi kare. 21 Ba geru ulia Cristo giti keruchugu ba ulita tkere tangle tanre geru ulia giti, ba geru ulia jun giti suge bage ba mo ta gbale toi no trate Chube gwa giti. 22 Ba ulita toidu age me no tanre ba bebi Cristo gerua gai gire, agwa nege ba Cristo gerua gau ulia malen ba me toidale tañachuge age me no dare ba agedu ngeru kare. Ngeru ba chagedu talla me no ole talla e ba ulita gbu nga blite jogengale sugekare Chubege, agwa nege Cristo giti ba mo ta gbale tañachuge no Cristo takalin kare. 23 Ba ulita Chube Oña chugadale ngwadi ba ta blite tañachuge nganake, ba me mo chuge ngwadi tañachuge ba tañachugu ngeru kare, ene ba chege ta jagere ole toi no trate Chube takalin kare. 24 Chube takalin ba ta chege no trate ama kare malen ba mo ta gbadale toi ta jagere ole Chube takalin kare, ene suge ulia ba mo ta blitu toidale no trate Cristo kiralla giti Chube ba ta gbe kare toi trate. 25 Ba ta me ngeru kare malen ba me geru jinadale dare ngwale, ba gerudale diali ulia moge ongoru ongoru. Che ulita Cristo gerua gaba che ulita kwian gdaitre alin kare che ta chege salengwli ulita malen che gerudale ulia no diali daba ole. 26 Ba skochie dabadi daba age gweale me no giti gire ba me mo ta gbadale age me no daba e ole ongoru ongoru. Ba ta skochie chugale ngwadi blikare chui gbaitre alinge me chege tañachuge dare daba agedu me no ba ole giti. 27 Ba ta skochie chuge ngwadi, ene che dolla Satanás me ñage ba ta gbe age me no daba ole. 28 Ba bai skwe bo ngeru ba bebi Cristo gerua gai ulia gire, ba mo ta gbadale me skwe boi dare, ba mo ta gbadale lle boi mo kodi agali ene ba ñage lle molen toigda kaire ba ñage daba me lle molen chudaboi ba llea giti. 29 Ba ulita Chube gerua Cristo giti gau ulia ba me gerudale jain jain sugaska, ba geru no jwandale mo kate diali daba kira gbe geru no ba kle gerule giti kaire ba daba ta gbe nga suga no ole, geru ulita no ba jwandale mo kate daba na ologe, ba gerule no ene giti daba ñage mo ta gbe no Chube ole, ene ba kle age no daba alin Chube gwa giti. 30 Ba me agedale me no ni sidri Chube dollale Chube Oña ta gbagda olire. Chube mo Oña kagu ba tale ene Chube Oña giti suge trate bage ba Chubenu ba be joge toi chui bdaglige nga ngaña giti Chube ole, chui ege ba be chege no trate ulita Chube gwa giti, ba mi age me no dare. 31 Nege tangle Chube Oña kle ba tale malen ba mo ta gbadale age no diali, ba me jainchke mo tale dabadi kaire ba me nga gbe jwlitenga mo chuga giti sko ole, ba me gerule ta skochie daba ole, ba me kira bate daba ole kaire ngautenga daba gwage me no, ba me ka boi daba ole kwian na gwa giti, ba mo lingadale siere lle ulita kle ba gbe age me noge, ba agedu me no ulita chugale ngwadi. 32 Ba mo ta dbadale no daba ole ba mo chudaboadale ongoru ongoru, ba taidale dage dabage. Daba gweale age me no ba ole, ba tale ama agedu me no talla mliadalenga ba chegedale ta no ole ama ole. Ba agedu me no talla Chube mliunga ba Cristo gerua gau ulia gire, ba agedale ene kaire daba na alin.
1 Ba ulita Chube olia kare Cristo giti, Chube no no ba ole, ba mo ta gbadale chage Chube talla ole age ama takalin kare. 2 Ba mo ta dbadale no daba ole diali daba chudaboi salengwli Cristo ta du no che ole kare. Cristo no no che ole, ta ene ole ama mo chugu ngwadi jogeda che agedu me no giti ene ama che jun siere ji chugege che agedu me no gdale. Cristo agedu ene che alin, e giti Chubedi nga suga noare, Chube gwage Cristo agedu no no kwian ulita alin. Che Chubenu mo ta gbadale age no Chube gwa giti ta dbe no daba na ulita ole. 3 Cristo giti Chube gwage badi ba kwian no trate, malen ba ulita Chubenu mo ta gbadale age me no chuge ngwadi, ba muirenu ba onbrenu me mo ta gbadale mo chuge ke giti, kaire ba me mo ta gbadale age me no sugaska ni sidri, kaire ba me mo ta dbadale takalin lle ulitage mau alin. Ba kwian Chubenu me mo ta gbadale age me no ene kare ni ba ñage tañachuge age ene giti. 4 Ba kwian Chubenu me geru jain jain sugaska trage daba ole, kaire ba me geru ngwale mia mé tragale trage daba na ole, kaire ba me kidere jain jain onbre muingadi muinga onbredi. Age ene ai ulita kare e me no kwian Chubenu alin. Ma no ba gerule no Chube giti Chube agedu no ba alin giti, ba mo gate Chube giti daba na ole. 5 Bage chkedale uñale kwian agenga me no ai kare me ñage joge toi Chube ole Cristo ole nga ngaña giti: Kwian onbrenu muirenu mo chuganga ke giti, kaire kwian agenga me no sugaska, kaire kwian mo ta dbanga takalin lle ulitage mau alin kle lle e gbe ngeru mo tale Chubege, kwian e kare ulita me ñage joge toi Chube ole Cristo ole nga ngaña giti. 6 Ba me mo chuge ngwadi mo anblitange ngwale kwian geru ngwale dbangage, ba me age me no kwian e kle age kare, kwian e me kle Chube gerua gbe gdadi me kle age Chube takalin kare, kwian e giti Chube be ji kweri gbe mno ama kle age me no gdale. 7 Ba ulita Chubenu me chegedale ta ule kwian agenga me no ole gai mo skatemanallale. 8 Ba bebi Cristo gai ulia, ba ulita chagedu kwian e kle chage kare nga jereske kare, ba me Chube uñu, ba agedu me no ulita ba toidu talla sugekare Chubege. Agwa ba Cristo gerua gau uliage gwangerugu ba kle chage nga chralege kare, Cristo ba ta gbu suge ba toidale Chube takalin kare. Ba toi ene suge bage kare gire bedre bedre be suge ma trate bage ba chagedale ma no Cristo che Chugagwalla takalin kare. Cristo ba ta gbe suge ba kwian Chubenu mo ta gbadale age no daba na alin, Cristo ba ta gbe suge ba mo ta gbadale toi no trate kwian na gwa giti, kaire Cristo ba ta gbe suge ba mo ta gbadale gerule no ulia diali daba ole. Cristo ba ta gbe suge ene gire ba ñage chage age no ama takalin kare. 11 Me no kwian agenga me no gatedi age me no ama kle age kare, agwa ma no ba kaboadale mno kwian kle age me no ole. Nga chie ibule chedi gerule kwian ulita kle age giti skwlenre ni che tañachugakalin ama kle age me no giti, agwa che gerudale ama ole ene ama mo ta blite. 13 Ba Chube uñe, ba mo ta gbadale toi no trate Chube takalin kare kwian agenga me no gwa giti, ene ba giti kwian kle age me noge be chke uñale ama me kle age no trate, 14 gire ene ama ñage mo ta blite Cristo gerua gai ulia. Geru gweale kle degaba kwian me Cristo uñe giti, chada e kle gerule ene: “Kwian me Cristo gerua uñe kle chege salengwli kwian kle gbe ngajrege kare, kwian ene Cristo gerua gadale. Kwian kle chage sugekare Chubege, ama salengwli kwian jogebakeda kare, kwian ene mo ta gbadale Cristo gerua gai ulia. Gire ene Cristo be ama ulita ta gbe no trate nga suga no ole.” Geru ai kle degaba ene, ba geru ai gbe gdadi mo tale. 15 Ba ulita mo ta gbadale chage ta giti kwian me Chube uñeske, ba me mo chuge ngwadi age me no kwian me Chube uñe kare ba mo manadale toi ta no trate ole diali kwian gwa giti. 16 Chui nege tanglege kwian tanre kle age me no, malen ba kwian Chubenu me ñage chui kagenga ngwale, ba diali mo ta gbadale age no kwian alin kwian chudaboi, ba gerudale no Chube giti kwian ole ba ñage gire. 17 Ba me mo ta gbadale agenga ngwale ngwale kwian ta me no kare agwa ba mo ta gbadale suge moge Chube takalin ba age mine kaire ba agedale Chube kle ba ta gbe age kare. 18 Ba me lle gage jale mo gbe llale, e kle ba gbe age tanre me no. Ba llale ba chege salengwli kwian jwligebanga kare. Ba me mo chuge ngwadi chege lle jai ene, agwa ma no ba nu Cristo gerua gaba ba Chube Oña chuge ngwadi ba kira gbe age no ulita Chube takalin kare. 19 Chube Oña kiralla giti ba agedale ene: Ba geru tragadale daba na ole Cristo giti ongoru ongoru, Chube gerua degaba unsuialin kada Salmos, chada e giti ba gerudale daba ole daba ta gbe nga suga no ole. Ba mo gatadale ule daba ole Chube giti Chube ollade nga suga noare ole. 20 Ba gerudale diali Chube che Ñenua ole ene: “Chube, noare ba kle age no cha alin diali, ba kle cha manade no, ba kle cha chudaboi diali lle ulita giti.” Ba gerudale ene Jesucristo che Chugagwalla kalla giti Chube ole Chube kle age no ba alin giti. 21 Ba onbre ba muire mo ta gbadale salengwli modi age no daba alin. Ba tañachugadale diali daba na Chubenu chudaboi, ba daba gadale dage ba nodale ama ole diali Cristo no kwian ulita ole kare. 22 Ba muinga ulita mo jwanbale, cha gerule ba ole, ba mo ñengulalla gadale dage ama kerua gbe gdadi age ama gerule kare. Ba Cristo gai dage mo Chugagwallale, talla ene ole ba mo ñengulalla gadale dage kaire. 23 Ba muinga mo jwanba, bage chkedale uñale ba ñengulalla chege ba chugagwalla salengwli Cristo chege kwian ulita nu ama gerua gaba ulia Chugagwalla kare. Che kwian Cristo gerua gaba ulia che Cristo jegwalenu kare che chege amanu ulita, Cristo che jun siere ji chugege age me no gdale, Cristo che Chugagwalla. 24 Che kle mo ta gbe Cristo gai dage mo Chugagwallale, che kle age Cristo takalin kare. E kare ene ba muinga mo jwanbale mo ñengulalla gadale dage diali mo chugagwallale ama gerua gbe gdadi ama gerule kare. 25 Ba onbre ulita mo jwanbale, ba nodale mo muira ole salengwli Cristo no kwian amanu ole kare. Cristo no no che ole malen Cristo mo chugu ngwadi boi daga ngwale gwaleda che ulita alin. 26 Cristo agedu no ene ulita che alin ene ama giti che kwian amanu be chege ta no trate ole me jiske Chube gwa giti. Che Cristo gerua gai ulia giti che tien gitiru ji chugege agedu me no gdale gire che mo ñeange chiske mo kaite nate che Chubenu ulia Chube che ta blitu ulia chage no trate ama takalin kare. 27 Diali Cristo kle che ta gbe ma biale ama chieni chuia ngwange, Cristo takalin che kwian amanu ta chege no trate ulita Chube gwa giti chui ege ni tañachuge me no ni age me no sidri, ene Chube gwa giti che be no trate Cristo takalin kare. 28 Cristo no no che ulita ama gerua gaba ulia ole malen ama kle age no che alin diali, ama kle che manade no no, che Cristo jegwalenu kare. E kare ene kaire kwian onbre mo ta dbadale no mo muira ole salengwli Cristo mo ta dbe no kwian amanu ole kare. Kwian onbre mo jwanbale mo ta dbadale no ene mo muira ole, ama toidale no no mo muira ole mo muira manade no, onbre nodale mo muira ole ama no mo ole naskuni kare, onbre no ene mo muira ole e salengwli ama kle mo jegwale manade no kare. Ni kwian gdaite mo ta dbe me no mo ole naskuni, kwian diali kle mo manade no bligda giti kaire lle na ulita giti ene ama ñage toi no. Ene kaire onbre mo ta dbadale mo muira manadale no. 31 Onbre mo jwen muinga ole ama gdabonate chege kwian gdaitre alin kare. Chube gerua degaba unsuialin kle gerule e giti, chada e gerule: “Kwian onbre mo jwankalin muinga ole, ama mo ñenua mo chebia chugadale ngwadi mo ta gbe ule muinga ole gire ene ama gdabonate chege kwian gdaitre alin kare ta salengwli ole.” Chube gerua degaba unsuialin gerule ene onbre muinga mo jwen giti. 32 Chube gerua e no kweri chkedale uñale nate chege, suge chage geru e kle gerule onbre muire mo jwen giti agwa kaire kle gerule Cristo giti kaire kwian Cristonu giti. 33 Cha gerule nakwaite ba ulita ole, ba kwian onbre mo jwanbale, ba mo ta dbadale no mo muira ole diali ba no mo ole naskuni kare. Kaire ba muinga mo jwanbale, ba mo ñengulalla gadale dage diali ama gerua gbe gdadi ba ama gai mo chugagwallale.
1 Cha gerule ba ole, ba kirogwa ulita muirenu onbrenu, ba mo ñenua mo chebia gadale dage diali, ba agedale ba ñenua ba chebia gerule kare Chube gerua degaba gerule kare. Ba age ene, e no trate ba Chugagwalla Chube gwa giti. 2 Moisés nu Chube gerua degaba unsuialin gerule kwian toidale mine Chube gwa giti, geru e ulita gbataboko jigle degaba unsuialin tangle, geru eske geru gbaitre alin kle gerule Chube be age no kwian alin kwian bai geru e gbe gdadi. Geru e gbaite kle degaba ene: “Ba kirogwa ulita, ba nodale mo ñenua mo chebia ole ama gai dage. Ba age ene, ba ñage toi nga suga no ole kaire ba ñage toi juma sbali nga dba ai giti.” Moisés nu Chube gerua degaba unsuialin gerule ene, kaire nege tangle ba kirogwa ulita agedale ene geru degaba gerule kare. 4 Ba kirogwa ñenua kirogwa chebia, ba me ñage ka boi ngwale mo kirogwalla ole kirogwa ta gbe skochie ngwale, kirogwa kle age giti gweale me no, ba ama chudaboadale ta no giti ba ama ta gbadale ama toidale mine Chube takalin kare kaire ba ama tkadale tangle geru ulia giti. 5 Ba ulita lle boanga ba chugagwalla alin, ba mo chugagwalla gadale dage kaire ba mo ta gbadale lle boi ulita ta no giti ama ba gbe lle boi kare. Ba agedale ene ulita salengwli ba lle boi Cristo alin kare ba kle ama gai dage kare. 6 Ba me mo gbadale lle boi no ba chugagwalla kle ba ole ule alin allabi gire, ene ba chugagwalla ñage gerule no ba giti, ba me tañachugadale ene. Ba chugagwalla kle ba ole gwage badi, ba lle boadale no mo chugagwalla alin, ene kaire ba chugagwalla me kle ba ole gwage badi, ba lle boadale no gballa mo chugagwalla alin ama kle gwage badi kare. Ba agedale ulita salengwli ba lle boi Cristo alin kare ta no giti Chube takalin ba age kare. 7 Chkedale uñale bage Chube be age no kwian alin kwian agedu no ñanale ba kwian lle boanga alin kaire kwian ba chugagwalla alin Chube be age salengwli ba ulita alin. Malen ba lle boadale no no nga suga no ole, me tañachuge ba kle lle boi kwian alin allabi agwa kaire ba kle lle boi Cristo alin. 9 Ba ulita kwian lle boanga chugagwalla, ba taidale dage kwian lle boanga ba alinge, ba me ñage gerule me no ama ole ama oña gbe boi daga ngwale. Ba kwian chugagwalla, chkedale uñale bage kaire lle boangage Chube gwa giti ba ulita salengwli, kwian lle boanga ba alin Cristo ama Chugagwalla kaire Cristo ba Chugagwalla, Chube gwa giti ba ulita salengwli. Malen ba me kwian lle boanga ba alin gbe boi daga ngwale. 10 Nege cha gerule ba ulita ole ba Cristo gerua gaba ba ulita Chubenu, ba ulita che Chugagwalla Chube kiralla gadale mo kira gbagda che dolla Satanás ngeru. 11 Che dolla Satanás me takalin ba chage no Chube takalin kare malen ama kle mo chuge ba ole ba gbagda age me no. Che dolla Satanás kle age ene ba ole malen ba mo ta gbadale ngle kiraske Chube geruadi ene ba kle biale Chube kirallaske dolla Satanás ngeru, ene dolla me ñage kirachke badi ba gbe age me no Chube dollale. E salengwli guardia donga nga Romamu kle mo gbe biale no trate dole ama dolla ole kare, ama kle mo ngama tke lle mno giti kle lle dogda gai mo kote kira batagda, ene ama me lentige ama ñage kirachke ama dolladi. Ba mo ta gbadale biale kiraske Chube geruadi dolla Satanás ngeru salengwli guardia donga nga Romamu kle mo gbe biale mo ngama tke kare dole gire. 12 Che Cristo gerua ganga me kle dole kwian che kare salengwli ole, agwa che kle dole dolla Satanás ole kaire dolla na tanre me no ulita kle chage nga ulitage nga dba ai giti kaire nga ngaña ngwalege, ama lle boanga mo chugagwalla Satanás alin ama Satanás chudaboangalla, ama ulita ole che mo ta gbale dole dolla ole. 13 Ba mo ta gbadale ngle kiraske Chube gerua ole ene ba kle mo ta gbaba kirallaske dole dolla Satanás ole, ene dolla Satanás mo chuge ba ole gweale, Chube kiralla giti ba ñage kirachke dolladi ba ñage chege kiraske Chube kiralla giti. E salengwli guardia donga kle mo gbe biale ama dollale ngwange kare, guardia donga kle mo ngama tke lle mno giti dole ama dolla ole, ama mi mo chuge ngwadi dolla kirachke amadi. 14 Ba mo ta gbadale kiraske dolla Satanás ngeru salengwli guardia donga kle mo gbe biale dole kare: Guardia donga kle lle mno luge mo bonga tangle, lle e giti lle na ulita ama kle gbe mo jegwale kle chege kejre ama jegwale. E kare ene geru ulia chegedale ba tale ba gerudale diali ulia daba gwale me sole ni sidri, ene dolla Satanás me ñage age ba ole, ba kle chege Chube geruaske. Guardia donga kle lle gbe mo ta ngnagu mo ta managda, e kare ene ba mo ta gbadale chagé no trate Chube gwa giti, ene dolla Satanás me ñage age ba ole ba mo gbe chage no Chube ole giti. 15 Guardia donga kle lle tke mo serage chagegda ene kle biale dole, e kare ene ba kledale biale joge Chube gerua Jesucristo giti trage kwian na ole ama ta gbe nga suga no ole, ene dolla Satanás me ñage age ba ole Chube gerua kle ba tale, e ba ta gbe chege kiraske. 16 Guardia donga kle lle mno kweri gai mo kote gbe mo ngnagu, ene ama dolla jrogli mlie ama giti, jrogli me ñage joge ama udaske. E kare ene diali ba mo ta gbadale trate Chube ole ama gai ulia kiraske diali, ene Chube be ba manade no, dolla Satanás me ñage mo chuge ba ole ba gbale age me no, ene ba me mo ta dbe kennga dolla Satanádi, ene ba ta chege kiraske kira batale dolla Satanás ole. 17 Guardia donga kle lle gbe mo chugage ene ama mi lentige chugage, e kare ene ba Cristo gerua gai mo jwangda siere ji chugege age me no gdale, ene chke uñale bage ulia dolla Satanás me ñage kirachke badi, ene ba chege kiraske dolla Satanás me kirachke badi. Guardia donga kle chage sbadi ole mo manale, e kare ene Chube Oña kle Chube gerua gbe suge bage mo tale gire ba Chube gerua gadale gbadale no mo chugale ene Chube gerua sbadi kare e giti ba ña dole dolla Satanás ole, geru e ba gbe kirachke dolla Satanádi. 18 Ba ulita Chubenu mo ta gbadale gerule Chube ole diali Chube Oña kle ba ta gbe gerule kare lle ulita kle boi giti ba kira kade Chubege ene ba me age me no Chube dollale dolla Satanás takalin kare. Ba kledale ta giti me skwatige gerule Chube ole, ba mo ta gbe gwangerugu gerule diali Chube ole kwian na ulita Cristo gerua gaba giti. 19 Kaire agwe ba gerudale Chube ole cha giti Chube cha ta gbe gerule trate kwian ole Cristo giti, kaire ama cha ta gbe gerule no trate ama kirallaske kwian ole me kennga gerule kwian ole, ene cha giti kwian ulita israelita kaire me israelita ñage geru Cristo giti keruchuge ñage geru Cristo giti gai ulia, ene ama ñage chege no salengwli kwaitre alin Chube gwa giti. 20 Chube cha kagu nga ulitage ama gerua e kete kwian ulitage, geru e kete kwiange giti cha tkere skage, cha takalin ba gerule Chube ole cha giti diali ene cha me ta kennga gerule Cristo gerua giti kwiange aini cha kle skage ngwadi. 21 Cha kle chada ai kage ba alin Tíquico ole, cha no ama ole ama che daballa Jesucristo giti ama cha chudaboanga no Chube gerua Jesucristo giti dbanga kwian nage. Ama ole cha kle chada ai kage ba alin kaire ama be geru ulita trage ba ole cha giti cha kle boi giti ulita nga ainige. 22 Cha takalin chke uñale ba ulitage cha ulita kle boi giti nga ainige malen cha kle Tíquico kage ba ngwadi, ene ama ñage geru trage ba ole kaire ñage ba ta gbe chege kiraske ene ba me chegedale tañachuge tanre cha kle boi giti. 23 Cha bitalla ulita Jesucristo giti, cha takalin Chube ba ta gbe nga suga no ole kaire ama ba ta gbe chege chage gwangerugu Jesucristo gerua ai gai diali mo tale ene ba toi no nga suga no ole ongoru ongoru daba ulita Jesucristo gerua gaba ole. 24 Cha takalin Chube age no no ba ulita alin ba bai nu mo ta gbaba no diali Jesucristo che Chugagwalla ole. Geru ai ene ulita cha Pablo chada degangu ba kwian Chubenu ulita una Efesoge alin. Che kle meni.
1 Cha Pablo chada ai degange ba ulita Jesucristo gerua gaba ulia una Filipoge alin: Cha ule Timoteo ole lle boanga Jesucristo alin, cha boke gbi kage chada ai giti ba ulita alin. Cha gbi kage ba daba Chubenu chugagwalla alin kaire ba daba Chubenu chugagwalla chudaboanga alin kaire ba na ulita nu Jesucristo gerua gaba alin kle toi una Filipoge, ba ulitage cha gbi kage no no chada ai giti. 2 Cha takalin Chube che Ñenua kaire Jesucristo che Chugagwalla age no ba ulita alin ama ba ulita ta gbe suga no, cha takalin ba ulita toi talla ene ole diali. 3 Cha diali tachke ba ulita giti, cha no ba ulita ole, kaire cha kle gerule no diali Chube ole ba giti, ama kle age tanre no ba ulita tale. Diali cha gerule Chube ole ba ulita giti nga suga no ole ai kare: “Cha Chubea, kwian banu ulita kle toi una Filipoge kle lle boi no ba alin, cha takalin ba ama ulita chudaboi age ma no diali.” 5 Cha tachke ba giti, gwangea cha jo chke Jesucristo gerua trage una Filipoge ba ulita cha chudabo u giti bligda giti igi giti, kaire nege diali ba kle cha chudaboi ngerugu, ene cha ñage chage geru Jesucristo giti trage nga nage. 6 Cha geru Jesucristo giti ketu bage gwangea, ba Jesucristo gerua gau ulia gire Chube ba ulita ta blitu age no Chube takalin kare. Uñale chage bedre bedre Chube be kle ba ta gbe age ma no Chube takalin kare Jesucristo chieni ngwange. 7 Cha tañachuge cha kle tañachuge no ene ba ulita giti, ulia cha no no ba ulita ole. Ba kle bate chage cha kle bate bage agwa cha me kle ta jogenga ba giti. Cha kle skage cha me kle skage baini kaire cha be kle gerukalin no trate Jesucristo gerua ulia giti kwian ole, gerukalin no trate kwian chugagwalla ole Jesucristo che jwannga siere giti. Ba kle gerule Chube ole cha giti, ba kle cha chudaboi, ene che kle ule kare. Chube age no che alin kaire ule, Chube age no ba alin kaire cha alin. 8 Uñale Chubege cha kle ta dbe no ba ulita ole Jesucristo kle ta dbe no ba ole kare. 9 Cha gerule Chube ole ba giti cha takalin chui gdale ba mo ta dbe ma no daba na ole, cha gerule Chube ole ba giti Chube ba ta gbe chke ngle geru uliage, Chube ba ta gbe suge no ulita age no tanre. 10 Ta ene ole be chke uñale bage ba chagedale trate Chube takalin kare, ene ba be ñage chage trate no kwian na gwa giti kwian na mi ñage gerule me no ba giti, Jesucristo chieni chuia ngwange ba skatedale chage trate me age me no. 11 Diali Jesucristo be ba chudaboi chage no trate ama takalin kare, ene ba be ñage age no diali trate. Kwian na be gwage badi age no gire kwian be gerule no Chube giti, be suge kwiange Chube kiralla giti ba kle mo ta gbe chage no ene. 12 Cha daballa cha ibotea Jesucristo giti, cha gerule ba ulita ole cha kle skage geru Jesucristo giti dbe gdale, agwa ba me tañachugadale geru Jesucristo giti mi chage dare cha kle skage giti. Me ene dale. Cha takalin chke uñale ba ulitage cha kle skage geru Jesucristo giti gdale agwa cha me kle chege kamne Jesucristo gerua giti, ene cha giti Jesucristo gerua kle chage ma no kwian ulitaske. Guardia donga ulita kwian skage manangage kaire kwian na ulitage uñale cha kle skage Jesucristo giti, ama ulita kle cha keruchuge tanre gerule Jesucristo giti. 14 Aini kwian Chubenu tanre kle chke gwage chadi cha kle skage gerule no Jesucristo giti kwian ole, suge daba ene ulitage Chube kle cha manade, daba ene ulita kle kira gai cháge, ama ta suge geru Jesucristo giti dbe kwian nage, suge amage Chube che Chugagwalla be ama manade kaire, ene ama kaire me kle kennga gerule Jesucristo giti kwian na ole. 15 Daba e ulita tañachuge no cha giti malen ama tale suge geru Jesucristo giti trage kwian na ole. Daba na gweale kle geru Jesucristo giti dbe me kle geru dbe ta no ene ole, daba e me takalin kwian na tañachuge no cha giti geru dbe giti, ama takalin kwian gerule no ama alin giti. 16 Ama gerule Jesucristo giti suge amage kwian na ama gai kweri, ama me geru Jesucristo giti trage mo tale ta no giti, ama ta cha ta gbakalin olire aini skage, ama tañachuge cha be skochie ama kle geru dbe giti. Na me ene, ama kle geru dbe no ta no giti, uñale amage Chube cha gau geru Jesucristo giti trage kwian ole, ama no cha ole malen ama ta cha chudaboakalin geru Jesucristo giti trage kwian ole. 18 Kwian gweale ta me no chadi, agwa e giti cha me tallade, nga suga noare chadi daba ulita ñage geru Jesucristo giti trage kwian ulita ole. Me uñale chage kwian geru dbanga kle gerule ta no giti kle gerule ta me no giti kwian ole, agwa ma no cha alin kwian ulita me Jesucristo gerua keruchugaba ñage geru Jesucristo giti keruchuge blike daba gweale geru dbanga giti, chadi nga suga no daba ulita bai geru dbe giti. 19 Kaire nga suga noare chadi uñale chage cha be skachienga chui gwealege, ene cha ñage gerule ma no kwian ole Jesucristo giti. Noare ba kle gerule Chube ole cha giti, e cha chudaboi tanre, kaire Jesucristo Chube Oña kagu cha alin, ama kle cha tale kle cha chudaboi. Chube Oña kle cha kira gbe kaire ba kle gerule Chube ole cha giti malen uñale chage cha be skachienga no chui gwealege. 20 Cha me takalin kwian na gerule chadi cha kle skage lle ngwale giti, malen cha ta mo ta gbakalin lle boi ma no diali Chube alin baini kaire cha kle ngwadi, cha kle skage cha me kle skage cha me mo ta gbakalin kennga kwiandi gerule Jesucristo giti. Cha me tallade cha kle gwade cha jogeda cha ta agekalin no Chube takalin kare, ene kwian ñage gwage chadi ama ñage gerule no Jesucristo giti. 21 Cha kle gwade cha tañachuge Cristo alin giti cha lle boi Cristo alin, e no cha alin, kaire ma no cha alin cha jogeda. 22 Cha toi gwade cha jogeda, ulita no cha alin. Cha chege toi, diali cha ñage lle boi ma no Cristo alin. Lle boke kle cha alin gadale, 23 cha alin mnoare lle boke gai, cha tañachuge gdaite cha jogekalinda, ene cha joge toi Cristo ole, ene cha alin ma no. 24 Agwa kaire cha tañachuge na, noare cha chege toi ba ulita alin ba chudaboi. 25 Uñale chage cha be chege toi dare ba ulita ole, e ma no ba ulita alin, ene cha ñage ba chudaboi ma no ngerugu cha ba kira gbe Chube gerua Jesucristo giti gai ma no, ene ba ulita nga dbe ma suga no Chube gerua ole. 26 Chui gweale cha be joge chkeni ba ngwadi gire nga be suga noare badi cha giti, ba be gerule no Jesucristo giti Jesucristo cha manadu no. 27 Ba me tañachuge cha joge chkeni ba ngwadi giti o cha me joge chkeni ba ngwadi giti, ma no ba mo ta gbe toi Jesucristo gerua gerule kare che Chubenu toidale Chube takalin kare. Cha takalin geru ba giti chke cha kote gerule ba ulita kle chage no Chube ole lle amaña alin boi ule diali geru Jesucristo giti dbe kwian nage, 28 me mo ta dbe sidri kennga kwian ba dollale Jesucristo gerua gitidi. Ba me mo ta dbe kennga gerule Cristo giti, ene kwian ba dollale ulita ñage gwage badi ulia ba kle gerule Chube kirallaske, Chube be kwian e ulita ta gbe malen be suge amage kwian bai kaire ulita me geru gai ulia, bdagli Chube be kwian ene gbe ji chuge sugekare Chubege nga dbigu giti, agwa ba me dale, Chube be ba dbe nga ngaña giti toi ule ama ole diali. 29 Noare ba geru Cristo giti gau ulia, me geru gai ulia alin allabi, kaire ba mo ta gbadale biale boi daga ngwale geru e giti. 30 Cha kaire ba ulita kle geru Cristo giti amaña alin dbe, Cristo giti che ulita kle boi daga ngwale. Sbali cha kledu ule ba ole ba gwagedu chadi boi ene, nege cha kle bate ba kle geru keruchuge cha giti cha kle boi ene nege kaire, cha me kle e tallade dale agwa cha kle chage ngerugu gerule Cristo giti kwian ole.
1 Uñale chage Cristo kle ba ulita ta klie ta gbe chage ngerugu Cristo geruadi. Uñale chage Cristo no no ba ole, ba kle ta olire Cristo ba ta gbe suga no, kaire uñale chage Chube Oña kle ule ba ole. Uñale chage ba noare daba na ole kaire ba tai dage dabage. 2 E ulita giti nga suga no chadi, agwa kaire cha takalin ba cha ta gbe suge ma no, ba ulita mo ta gbadale tañachuge salengwli, ba ulita ta dbadale no daba ole ulita, ba ulita chagedale lle amaña alin boi ule Chube alin, ba age ene, chadi nga suga noare ba giti. 3 Ba lle boi Chube alin me tañachuge mo giti: “Cha ma kweri daba nage, daba na gerudale no cha giti.” Ba me tañachugadale ene, ba tañachugadale nganake, ba daba na gadale ma kweri moge. 4 Ba me tañachuge mau alin giti: “Cha takalin lle noarege mau alin gballa, cha toikalin ma no kwian na ulitage.” Ba me tañachugadale ene, ba tañachugadale nganake, ba tañachugadale daba na giti kaire. 5 Ba ulita tañachugadale Jesucristo tañachugu kare, 6 Jesucristo amaña Chube, ama kweri agwa Jesucristo me tañachugu mau giti: “Cha Chube malen cha chegedale kweri cha Ñenua Chube kare aini nga ngaña giti, cha me ta jogekalin nga dba giti kwian kare.” Jesucristo me tañachugu ene, Jesucristo tañachugu nganake. 7 Nga ngaña giti Jesucristo kledu ule mo Ñenua Chube ole kweri kira molen ulita, Jesucristo e ulita chugu ngwadi chiu nga dba ai giti kwian kare me mo gbu salengwli kledu nga ngaña giti kare, ama chagedu nga dba ai giti kwian me kweri kare, ama lle bo ama Ñenua Chube alin kaire kwian ulita alin. 8 Jesucristo me mo gau dage mau giti, ama mo gbu soli kwianske, ama tadu agekalin mo tale ulita ama Ñenua Chube takalin kare, malen ama mo chugu ngwadi mo gwangeda kwian me noge, ama jokeda kruge kwian ngwale jiskenga kare. 9 Jesucristo agedu ene, malen ama Ñenua Chube ama gbuni kweri nga ngaña giti ma kweri lle ulitage nga ulitage kwian ulitage. 10 Chui be chke gire kwian ulita kle gwade kaire kwian ulita jogebada chkeni gwade kaire lle boanga Chube alin ulita nga ngaña giti kaire dolla ulita, ama ulita be Jesu kalla alin keruchuge gire ama be joge chke dba jongnagwa giti, be suge ulitage Jesucristo kweri kiraske ulita, 11 malen ama ulita be gerule Jesucristo giti: “Jesucristo ulia che Chugagwalla.” Chui ege Jesucristo giti ulita be Jesucristo Ñenua Chube gai kweri. 12 Cha daballa cha ibotea Cristo giti, cha no no ba ole diali. Cha kledu baske cha geru tragu ba ole ba chagedale ta giti kwian ulita gwa giti, ba agedu ulita cha gerudu kare. Nege cha kle bate, noare ba ta gbe age diali cha kle chada ai degange ba alin nege gerule kare. Chube ba jun siere ji chugege ba age me no gdale, Chube takalin ba age no diali, ba Chube gadale dage ba agedale no ama takalin kare. 13 Chube ba ta gbe, ene ba ta agekalin ama takalin kare, kaire Chube ba chudaboi lle bai kaire boi ulita no. 14 Ba me lle boi me ta lle boakalin talla giti, me gerule kwian na ole: “Cha me ta lle boakalin.” Kaire ba kle lle boi ule daba na ole ba me skochie ka boi daba ole lle boage giti, 15 ene kwian gwage badi me ñage gerule me no ba giti, ama gwage badi ba trate. Ba kwian Chubenu chagedale no trate kwian me no ulitaske, kwian e ta me no age me no diali, ama kle toi nga jereske kare me Chube uñe. Ba jichra kare kwian eneske, 16 ba geru Cristo giti dbe amage, ene geru e giti ama ñage Chube uñe ñage ta jwlite Chube ole, ene bdagli ama be toi Chube ole diali chui tangle. Ba age ene, bdagli nga be suga noare chadi ba giti Cristo chieni chuiage, be suge chage ba geru Cristo giti gau ulia gwangea ba me geru e chugu ngwadi, malen be suge chage cha me chagedu ngwale geru e dbe bage. 17 Cha geru Cristo giti du bage, ba geru Cristo giti gau ulia ba mo ta ketu Chubege, e giti nga suga noare badi kaire chadi. Kwian cha gweda Cristo gerua giti cha me tallade, nga suga noare chadi, ba ta dbadale ene kaire. Kwian be cha gweda o me, me uñale chage, agwa diali nga suga noare chadi Cristo ole. 19 Che Chugagwalla Jesucristo takalin cha be Timoteo kage me sbali chui gwealege tienda ba ulitadi, ene ama be chieni cha kle ngwadi be chke uñale chage ba kle mine llani, Timoteo be geru trage cha ole ba ulita giti, ene nga be suga noare chadi. 20 Cha alin kwian na Timoteo kare me kagadale ba ngwadi, kwian na me tañachuge salengwli ama kare, diali Timoteo tañachuge no ba ulita giti, ama no no ba ole ama ta ba chudaboakalin Jesucristo geruadi. 21 Kwian na ulita tañachuge mau alin giti lle boi no mau alin allabi, me tañachuge geru Jesucristo giti dbe kwian nage. 22 Ba ulitage uñale Timoteo kwian noare, ama chagedu lle boi ule cha ole kirolla lle boi mo ñenua ole kare, ama me cha chugu ngwadi gballa geru Jesucristo giti dbe kwian nage, 23 malen cha ta ama kagakalin tienda ba ulitadi. Cha be manade, kwian be age mine cha ole skage be uñale chage gire cha be Timoteo kage tienda ba ulitadi. 24 Cha kle skage, cha e jige Chugagwalla Jesucristoge, me sbali ama takalin ama be kwian ta gbe cha skajwennga, gire blike cha joge agali tienda ba ulitadi. 25 Cha tañachuge noare cha che daballa Cristo giti kada Epafrodito kageni ba ngwadi kaire. Sbali ba ama kagu aini cha chudaboi, ulia ama cha chudabo no geru Cristo giti trage kwian na ole. Kwian gweale agedu cha dollale Epafrodito dollale geru e giti, agwa Epafrodito me mo talladu, ama chagedu dare cha ole geru Cristo giti dbe ngerugu kwiange. 26 Epafrodito ta jogekalinni ba ngwadi geru trage ba ulita ole, ama kle tañachuge tanre ba ulita giti, uñale amage ba ulita kle tañachuge tanre ama giti, geru ama giti chku uñale bage ama ogadu, malen ama tañachuge ene ba giti. 27 Ama ogadu, cha ta olidu tanre, cha tañachugu ama be jogeda gire cha ta be olire ma dare. Ulia ama ogadu tirare, chegu bedre gire ama jogeda, noare Chube taidu dage amage Chube ama dodadu. Kaire Chube taidu dage chage ama giti, ene cha mi ta olire dare ama giti. 28 Uñale chage kaire ba kle tañachuge tanre ama giti ama kle mine, malen cha ama kagakalin blike ba ngwadi, ba be gwageni amadi, ene ba ulitadi nga be suga noare ama kleni ba ole, cha mi ta chege olire dare uñale chage ama be kleni ule ba ulita ole. 29 Epafrodito joge chkeni llani ba ulita ngwadi ba nga dbe suga no, ama ba daballa che Chugagwalla Cristo giti, ba ama gai ngwange nga suga noare ole, ba ama gai dage diali. Kaire kwian na ama kare kle ba ulitaske, ba kwian ene gadale dage. 30 Epafrodito mo ta gbu ulia lle boi no Cristo alin, ama cha chudabo mo tale, e giti ama ogadu biri jogeda. Ba agali ulita me ñadu kle aini cha ole cha chudaboi, agwa Epafrodito ñadu age ba alin ulita cha chudaboi.
1 Ba cha daballa cha ibotea Cristo giti, ba che Chugagwalla Jesucristonu malen ba nga dbadale suga no diali. Cha alin cha me skwatige gerule nabitaite cha chada degangu ba alin ngeru kare, noare ba tachke chagé no Jesucristo ole. 2 Ba chagedale ta giti kwian daba tkanga tangle geru me uliageske, ama ulita kwian me no, ama kle gerule kwian ulita mo kwara tkadalenga sidri, ene kwian Chubenu. Geru e me ulia, ba me ama kerua gbe gdadi, ama me Chubenu ulia. 3 Che ulia Chubenu, che gerule noare Chube ole, kaire nga suga noare chedi Jesucristo giti, Chube Oña kle che ta gbe che gerudale noare diali Chube alin ole. Che me tañachuge mo kwara giti che mo kwara tkangenga o me, e ngwale giti tangle me uñale ulia ta kle Chube ole o me. 4 Kwian me ñage gerule mo kwara alin tkangenga, ene ama Chubenu, kaire suge lle boi mau ta giti agali, ene ama Chubenu, e ene ulia ene kare cha Chubenu ngeru, cha mo kwara tkangunga cha kledu soli gire. Chui gdapa chku chage cha kwara tkalenga sidri kwian israelita ulita age kare, agwa cha me chegu Chubenu age ene giti. Cha ñenua cha chebia kwian israelita, cha kwaitre alin israelita bitalla, kwian ulita me ene, cha enusulian unsuialin kada Benjamín oindalla. Moisés nu Chube gerua degaba unsuialin, cha geru e jun jumale kwian fariseo kare, cha agedu kwian fariseo geru gau dage kare, 6 diali cha agedu ulita geru e gerule kare, kwian na me ñadu gerule cha kle age me no, ulia cha chagedu diali e gai jumale. Kwian chagedu geru Cristo giti dbe, cha alin geru e ngwale malen cha chagedu kwian Cristo gerua gaba ulia jrite nate tkadale skage gbale boi daga ngwale Cristo gerua gdale. 7 Ngeru cha tañachugu mau giti: “Cha kwian israelita noare, cha agedu ulita cha bitalla israelita ulita age kare, e alin noare cha alin.” Cha tañachugu cha age ene gire cha Chubenu. Nege suge trate chage lle e ulita ngwale cha alin, nege uñale chage Cristo giti alin allabi cha Chubenu, nege Cristo ma no cha alin. 8 Cha Jesucristo uñu, nege ama cha Chugagwalla, e ma no cha alin lle ulitage, cha lle bo ulita ngerule, nege lle e cha alin lle mliabalenga kare. Cristo alin no cha alin, nege cha kle ama gai ulia diali, 9 ama kle chage ule cha ole diali. Ngeru cha tañachugu Moisés nu Chube gerua degaba unsuialin e alin gai dage gire cha agedu me no Chube talla mliunga. Me ene dale. Cha Cristo gau ulia, ene Cristo giti cha agedu me no ulita Chube talla mliunga, ene Chube gwage chadi cha no. 10 Cha ta Chube uñakalin ma no, cha ta sugekalin Cristo chkuni gwade kiralla kle cha ole diali chui ulita, ene cha ñage age ulita Cristo agedu kare, boi daga ngwale Cristo boidu kare, kaire jogeda ama jokeda kare. 11 Cha jogeda cha takalin Chube cha jaba gbeni gwade toi nga ngaña giti diali Chube ole. 12 Cha me kle gerule cha no trate ulita, cha bebi age no ulita Jesucristo takalin kare, malen cha kle mo ta gbe dare ma no diali age Jesucristo takalin kare ulita. Uñale chage Jesucristo cha gau lle boi ama alin, cha amanu, malen nege gwangerugu cha ta lle boakalin ulita ama takalin kare diali. 13 Cha daballa cha ibotea Cristo giti, ulia cha me kle gerule cha no ulita trate, cha bebi lle boi ulita Jesucristo takalin kare, kaire cha me kle tañachuge cha lle bo ngeru giti cha me lle bo ngeru giti, ma no cha alin tañachuge bdagli giti aige dare mo ta gbe lle boi no Jesucristo alin gwangerugu. 14 Jesucristo alin cha ta lle boakalin no nga dba ai giti, ene nga ngaña giti bdagli Chube be age no cha alin be lle noare kete chage cha lle bo no nga dba ai giti ñanale. 15 Ba ulita bai geru jun no Jesucristo giti bage suge Jesucristo takalin mine, ba tañachugadale mau giti cha tañachuge kare, cha gerudu ba ole cha bebi lle boi ulita no Jesucristo takalin kare, ulita cha me trate. Ba tañachugadale e kare, agwa ba gweale kle tañachuge nganake me suge bage cha kle gerule kare, ba ene Chube be ba ta gbe, ene be chke uñale bage ulita trate. 16 Che geru jwen Jesucristo giti, geru e suge chege bedre bedre, che chagedale geru e gerule kare. 17 Cha daballa cha ibotea Cristo giti, ba chagedale cha chagedu baske kare. Ba gwagedu chadi kaire cha chagemanalladi cha ulita chagedu mine ba gwa giti. Nege ba kle gballa, ba gwage daba nadi bai kaire kle chage cha chagedu kare, ba chage ama kle chage kare. 18 Cha gerudu tanre ba ole kwian gweale kle age Cristo dollale giti, nege cha kle olire gerule nabitaite ba ole kwian e kare giti, ama kle gerule alin: “Cha Cristo gai ulia”, agwa gire ama me Cristo jokeda kruge gai ulia, ama me chage Cristo takalin kare, ama Cristo dollale. Ba me age ama kle age kare. 19 Ama me tañachuge age Chube takalin kare, ama diali age ama ta agekalin kare, ama age me no nga dbale ibule mo giti, agwa ama me nga dbe ibule mo giti ama kle age me no gdale, ama nga dbe suga noare ama kle age me no giti, diali ama kle tañachuge lle nga dba ai giti alin ole, me kle tañachuge ama be boi mine bdagli, bdagli Chube be kwian ene gbe ji chuge tirare nga dbigu giti. 20 Che me tañachuge kwian ene kare, che Chubenu, uñale chege bdagli che be joge toi nga ngaña giti Chube kle ngwadi, diali che kle chui bdagli manade, chui ege che Chugagwalla Jesucristo che jwannga siere ji chugege age me no gdale be chieni nga dba ai giti che jwen. 21 Ama be che ulita jegwale nga dba ai giti blite mo kiralla giti, che jegwale be jwlite ama kare, mo kira giti ama kle lle ulita gbe manade, ama ñage age ulita ama takalin kare.
1 Cha daballa cha ibotea Jesucristo giti, cha ta gwagekalin noare ba ulitadi, ba ulita ole cha no no, nga suga noare chadi ba giti. Diali ba agedale ulita no ba mo ta gbale no Jesucristo ole cha gerudu ba ole kare, diali ba mo ta gbale chage no che Chugagwalla Jesucristo takalin kare. 2 Cha takalin Evodia me kira bate dare Síntique ole, cha takalin muinga e boke me ka boi dare modi daba ole, ma no ama boke mo ta gbeni no nge kare daba ole, ama boke gdaitre alin Jesucristo giti, Jesucristo ama boke Chugagwalla. 3 Cha chudaboanga taingwli, cha takalin ba che ibotea boke e Jesucristo giti chudaboi, ba ama boke ta gbeni no daba ole, ene ama mi kira bate dare modi. Cha kledu baske gire muinga boke e lle bo tanre, ama cha chudabo geru Jesucristo giti dbe kwian nage ule Clemente ole, kaire daba na tanre cha chudabo geru dbe kwiange, ama ulita kalla kle degaba nga ngaña giti Chube kle ngwadi, bdagli ama be toi nga ngaña giti diali ule Chube ole. 4 Ba ulita nu che Chugagwalla Jesucristo gerua gaba ulia, ba Jesucristonu, malen ba nga dbadale suga no diali chui tangle Jesucristo ole. Cha gerule nabitaite ba ole, ba nga dbadale suga no ene diali chui tangle. 5 Ba agedale no kwian ulita alin, ene kwian ulita gwage ba ulitadi suge kwiange Chube kle ba ta gbe noare kwian ulita ole. Ba tañachugadale diali Chugagwalla Jesucristo giti ama be chieni chuia kle kodi. 6 Ba me tañachugadale tanre ba boi daga ngwale giti, ma no ba gerule Chube ole ulita kle boi ba ole giti, ba e ulita jige Chubege. Ba mo chudaboi ulita kade Chubege, ene Chube be ba chudaboi, Chube be age no ba alin. Ba me mo chudaboi alin kade Chubege, kaire ba gerudale Chubege: “Chube, noare ba kle cha keruchuge, noare ba kle cha chudaboi diali.” 7 Ba age ene Chube be ba ta gbe suga no diali, ene ba kle boi daga ngwale ba me ta dbe olire, nga suga noare badi. Kwian na gwage badi ba kle ta dbe ene, e me suge kwiange, Chube alin ba ta gbe suga noare diali. Uñale bage Jesucristo kle ba ole diali kle ba chudaboi diali, kaire ba talla kle Jesucristo ole Jesucristo talla kle ba ole. 8 Cha daballa cha ibotea Jesucristo giti, cha gerule ba ole, ba mo ta gbadale tañachuge diali lle no ai kare giti: Ba tañachugadale geru ulia alinge. Ba tañachugadale age no ulita diali. Ba tañachugadale chage no trate Chube takalin kare. Ba tañachugadale age no Chube gwa giti kaire age no kwian gwa giti, ene kwian ulita gwage badi ba kwian agenga no gire kwian e gerule no ba giti. Ba tañachugadale age no kwian na alin, ene kwian ta dbe no ba ole. Ba ulita mo ta gbadale tañachuge no ene diali. 9 Ba geru jun chage Jesucristo giti, cha ba tku tangle Jesucristo geruage, ba cha keruchugu, diali ba mo ta gbadale age no ba Jesucristo gerua jun chage kare. Cha kledu baske gire ba gwagedu chadi cha chagedu mine kaire cha llema bo ba ulita gwa giti, diali ba mo ta gbadale age cha agedu kare, ene Chube be kle ba ole Chube be ba ta gbe suga no age no kaire. 10 Chadi nga suga noare che Chugagwalla Jesucristo giti, ama ba ulita ta gbu cha chudaboi nabitaite igi giti. Sbali ba me ñadu cha chudaboi, uñale chage ba ulita me cha talla mliunga, ba tadu cha chudaboakalin agwa ba me ñadu cha chudaboi. 11 Ba me tañachuge chadi cha kle gerule cha takalin ba igi na kete chage, cha lle molen cha me lle molen, e giti cha me tañachuge, chadi diali nga suga noare. 12 Uñale chage me toi lle molen, kaire uñale chage toi lle tanre molen, cha unchkebale o cha me unchkebale, bligda kle o bligda me, cha ñage jage ulita baini kaire cha kle ngwadi, nga suga noare chadi lle bedre ole lle tanre ole. 13 Ulita Cristo kle cha chudaboi, ama kle kira kete chage, ene ulita boi cha ole cha ñage jage Cristo kirallaske. 14 Lle cha ole o lle me cha ole, diali nga suga noare chadi, cha gerule ba ulita ole noare ba cha chudabo igi giti. 15 Cha jo chke gwangea geru Jesucristo giti dbe kwian ulita nga kweri Macedoniage, cha chagedu geru Jesucristo giti trage kwian ulita ole, ngeru cha bebi joge siere nga Macedoniage gire ba ulita Chubenu una Filipomu nga Macedoniage igi ketu chage mo tale. Uñale bage ba alin cha chudabo ene, kwian Chubenu una nage me cha chudabo ene dale. 16 Ngeru cha kledu ngmadi geru Jesucristo giti dbe una Tesalónicage nga Macedoniage, ba igi kagu bitaboke cha alin, ene cha ñadu toi no una Tesalónicage. 17 Cha me kle tañachuge mau alin giti ba igi ketadale chage ene cha toi no, me ene, ma no cha alin cha takalin bdagli Chube age no ba alin lle noare kete bage ba cha chudabo ñanale. 18 Ba igi kagu cha alin Epafrodito ole, igi e chku cha kote, igi e ngle cha alin, nege cha lle molen tanre ulita toigda no, ba kle cha chudaboi tanre igi giti, Chube gwage ba kle age no cha alin kaire ama alin, Chubedi nga suga noare e giti. 19 Ba ole lle me toigda no, Jesucristo giti Chube be lle ulita kete bage, lle ulita Chubenu malen Chube ñage lle noare kete bage toigda no. 20 Che ulita gerudale no diali chui ulita che Ñenua Chube giti. Ene nobi. 21 Ba Chubenu toinga una Filipoge ba Jesucristo gau ulia, cha gbi kage ba ulita alin. Kaire cha daballa Jesucristo giti kle cha ole cha chudaboi ama ulita gbi kage ba ulita alin. 22 Kwian Chubenu ulita kle aini gbi kage ba ulita alin, kaire kwian lle boanga chugagwalla una Romamu alin gweale Chubenu, ama gbi kage ba ulita alin. 23 Bdagli cha gerule ba ole cha takalin che Chugagwalla Jesucristo age no ba ulita alin. Geru ai ene ulita cha Pablo chada degangu ba kwian Chubenu ulita una Filipoge alin. Che kle meni.
1 Cha Pablo chada ai degange ba ulita Jesucristo gerua gaba ulia una Colosage alin: Chube tale Chube cha gau cha gbu Jesucristo gerua ketangale dabage, cha ule che daballa Jesucristo giti kada Timoteo ole gbi kage chada ai giti ba ulita alin, ba ulita kle mo ta gbe no Jesucristo gerua gai ulia diali kaire ba kle chage no trate Chube gwa giti mo ta gbe diali gwangerugu Chube geruadi. Cha takalin Chube che Ñenua kaire Jesucristo che Chugagwalla age no no ba ulita alin, kaire Chube nga suga no gbe ba ulita tale. 3 Chage geru chku uñale ba Chube gerua Jesucristo giti keruchugu ba geru e gau ulia ba mo ta gbu ulia ulia gwangerugu geru Jesucristo giti gai mo tale, kaire chku uñale chage ba kle mo ta dbe no daba na ulita Chubenu ole. Geru e ulita ba giti chku uñale chage malen diali cha kle gerule Chube che Chugagwalla Jesucristo Ñenua ole ba giti, Chube ole cha kle gerule no ba giti ai kare: “Chube, noare kwian gweale una Colosamu ba gerua Jesucristo giti gau ulia, ama ulita kle toi no modi ongoru ongoru.” Cha kle gerule ene no ba ulita giti Chube ole. 5 Nge jondege ba geru ulia Jesucristo giti keruchugu, geru e sugedu bage ba geru e gau ulia, e giti ba be tien gitiru ji chugege agedu me no gdale kaire ba ñage toi no diali chui tangle nga ngaña giti Chube ole. Ba geru e no gau ulia mo tale, geru e ba ta gbe suge bdagli nga ngaña giti Chube be age no ba alin, malen e giti ba ta dbe no diali daba na Chubenu ole kaire ba kle mo ta gbe ulia ulia geru no Jesucristo giti gai ulia gwangerugu. 6 Geru Jesucristo giti jo ketaba bage ba geru e gau, geru e ba ta blitu, geru e amaña kle chage nga ulitage kle kwian tanre ta blite Chube ole, geru e kle kwian tanre ta gbe ma ngle diali salengwli geru e kle ba ulita ta gbe kare. Ba ulita geru Jesucristo giti keruchugu gerule Chube talla no che ole giti, chku uñale ba ulitage Chube talla no Jesucristo giti che ole geru e ulia, gire ba geru e gau. 7 Che daballa no Jesucristo giti kada Epafras ama kle lle boi ule cha ole Jesucristo gerua dbe kwian nage, ama geru Jesucristo giti du ngerutabi baske, ama giti ba Jesucristo gerua gau ulia, kaire Epafras amaña kle ba chudaboi kle ba ta gbe gwangerugu Jesucristo geruadi, ama lle boanga no Jesucristo alin ba ulitaske. 8 Epafras chku aini cha ngwadi geru ba ulita giti dbe, ama gerudu cha ole ba ulita kle mo ta dbe no daba Chubenu ole Chube Oña kle ba ulita ta gbe toi kare no modi ongoru ongoru geru Jesucristo gitidi. 9 Geru chku uñale chage ene ba ulita giti, chui ege gwangerugu cha gerule diali Chube ole ba ulita giti, cha takalin Chube ba ulita ta gbe suge no trate ama takalin mine ba alin, kaire cha takalin Chube ba ta gbe suge ma ngle Jesucristo gerua giti, ene chke uñale bage ba toidale mine no Chube takalin kare. 10 Cha takalin Chube ba ta gbe suge no ene, ene ba be ñage toi no kwian na gwa giti ba Chugagwalla Jesucristo takalin kwian amanu toi kare, ba toi no ene gire Chubedi nga be suga noare, ba ulita kle age ama takalin kare. Chube ba ta gbe toi ama takalin kare ene ba be age no daba na ulita alin lle ulita giti diali kaire ba be Chube uñe ma no chui kaire kairege ba ta be chke ma ngle Chubedi. 11 Chube kiraske tanre, ama ñage age ulita mo kiralla giti ba ulita alin, malen cha gerule diali ama ole ama ba ulita kira gbe ngle ba kle boi daga ngwaleske ene ba be ñage jage ta no ole ba be ñage mo ta gbe chage gwangerugu kiraske me mo tallade me skwatige ba kle boi daga ngwaleske, ene ba ñage mo ta gbe diali nga suga no ole Chube kirallaske. 12 Ba diali gerudale no Chube che Ñenua ole Chube agedu no ba alin giti ene: “Chube, noare ba kle age no cha alin diali, cha gerule no ba giti, ba Chube ulia kweri kiraske. Ene nobi Chube.” Ba gerudale ene diali Chube ole nga suga no ole mo tale. Ulia Chube agedu no no ba ulita alin, Chube ba ta gbu Jesucristo gerua gai ulia, Jesucristo giti Chube ba gbu biale no trate toi bdagli Chube ole nga ngaña giti ule kwian na ulita Chubenu ole. Nga ngaña giti Chube be age no no ba ulita alin. 13 Ulia Chube agedu no che ulita alin. Ngeru che kledu age me no Chube dollale dolla Satanás takalin kare, che kledu chage nga jereske kare sugekare Chubege gire che Jesucristo gerua gau ulia giti Chube che jun siere age me no Satanás takalin karege gire ene Satanás me ñage chege che chugagwallale dare ngeru kare. Che Jesucristo gerua gau ulia gire Chube che ta blitu che jun siere ji chugege agedu me no gdale, che agedu me no ama talla mliunga ulita. Chube no no mo Kirolla Jesucristo ole malen Chube che ta gbu Jesucristo gai mo Chugagwallale, ene Jesucristo kiralla giti che ñage age no no diali Chube takalin kare. 15 Cristo Chube Kirolla amaña ulia Chube, Chubedi kwian me ñage ten agwa kwian ñadu ten Cristodi Chube Cristo kagu kwian kare toi kwianske nga dba ai giti, gire ene Cristo giti kwian ulitage ñage chke uñale Chube mine, Cristo Chube kaite nate kwiange. Cristo Chube Kirolla gdaitre alin allabi, lle ulita bebi dodale gire Cristo klebi enebi gwangeabi. 16 Cristo giti Chube lle ulita dodadu lle ulita che ñage tendi nga dba ai giti kaire lle ulita che me ñage tendi nga ngaña giti Chube lle dodadu ulita Cristo giti. Lle boanga Chube alin nga ngaña giti, Chube ama dodadu no ulita, Chube kira ketu amage lle boi Chube alin che me ñage ten amadi. Chube lle ulita dodadu Cristo giti kaire lle ulita e Chube nu dodaba Chube jigu Cristo kote, ene Cristo chege lle ulita mauñale, Cristo ma kweri ma kiraske lle e ulitage, Cristo ma kweri che dolla Satanáge kaire dolla na ulita Satanás chudaboangallage. 17 Chube bebi lle ulita dodade gire Cristo klebi enebi Chube ole, chui tangle diali Cristo kle nga ulita lle ulita manade mo kiralla giti. 18 Lle ulita Chube dodadu Cristo chegu lle e mauñale ulita, ene kaire Cristo kwian ulita Chube gerua Cristo giti ganga ulia Chugagwalla kweri. Cristo kle che kwian ulita ama gerua gaba ta gbe age, che chege Cristo jegwalenu kare ulita, Cristo che ulita ta gbe age Cristo takalin kare ama che Chugagwalla. Kaire Cristo Chube Kirolla gdaitre alin jokeda, Chube ama jaba gbuni gwade toidale chui tangle me jogekedani dare, ama boidu ene ngerutabi kwian ulitage, ene kaire kwian ulita jogeda be chkeni gwadeni ama kare. Chube agedu ene Cristo ole ene Cristo chegu lle ulita Chugagwallale ma kweri kwian ulitage kaire lle ulitage. 19 Chube talla ulita kle Cristo tale, Cristo kiraske ulita salengwli Chube kare, Chube Cristo kagu nga dba ai giti kwian kare toi kwianske gire ene chegu salengwli ulita Chube agali kledu kwianske kare. 20 Nga dba ai giti nga ngaña giti Chube tadu kwian ulita kaire lle na ulita gbeni no naskuni ama ole Cristo giti, malen ama Cristo kagu toi kwianske gerule kwian ole kwian ñage Chube uñe no Cristo giti. Cristo jokeda kruge, Cristo jokeda giti kwian bai Cristo gai ulia Chube kwian e gai mo skatemanallale salengwli Chube kwian dodadu gwangea kare Chube chegu kwian e ole diali ule kare, ene Cristo giti kwian ulita chegeni Chubenu. 21 Ba bebi Cristo gerua gai ulia gire ba kledu mo tke dole Chube ole, ba tale ba kledu tañachuge me no age me no diali Chube dollale, e giti ba chegu sugekare Chubege ni ba Chube uñu sidri. 22 Agwa nege tangle ba Chube uñe ba Cristo gerua gaba giti. Cristo boidu daga ngwale kwian kare jokeda kwian kare malen ba Cristo gerua gau giti Chube ba gbu no trate mo skatemanallale, ene ba ñage chege no trate ama gwa giti me ta ngeru kare me no ni ba chege jiske sidri lle gweale giti Chube gwa giti. 23 Ba ta chegekalin diali Chube ole mo tale Chube skatemanallale, ba mo ta gbadale gwangerugu Cristo gerua gai jumale mo tale diali ni joge siere geru ege. Ba tañachugadale diali Chube be age bdagli ba alin giti. Chube gerua Cristo giti jo ketaba bage ba geru e gau ulia, geru sugedu bage chui bdagli Chube be age no ba alin. Geru ai amaña Cristo giti jo ketaba kwian nga na ulitamuge nga dba ai giti, geru ai amaña cha Pablo kle kwian tke tangle giti. 24 Geru Cristo giti cha kle dbe kwiange, e gdale cha kle boi daga ngwale Cristo gerudu gwangeabi kwian ama gerua ganga be boi kare. Agwa kaire chadi nga suga no cha kle boi daga ngwale giti ba ulita Cristo gerua ganga ulia alin. Chage suge cha kle mo boange daga ngwale Cristo gerua gdale Cristo bole kare che ulita ama gerua ganga alin, ene che ulita ñage chege ama jegwalenu kare kwaitre alin. 25 Chube cha gbu daba Chubenu ulita chudaboi, ama cha gbu Chube gerua ulita Cristo giti trennga ba ulita me kwian israelitage, geru e Chubenu no ba alin. 26 Chube gerua Cristo giti geru e kwian ulita alin kwian israelita alin kwian me israelita alin. Unsuialin tangle Chube me geru gbu chke uñale cha kwian israelita enusulian oñage chui gwealege Chube be geru amanu kete kwian me israelitage, agwa nege tangle Chube takalin geru e chke uñale nate kwian ulita Cristo gerua gangage, unsuialin tangle geru e me chku nate uñale geru ama ai: Chube be age no no kwian ulita me israelita alin, ba kwian me israelita bai Cristo gerua gai ulia ba tale Cristo be chege diali ba ole ba chudaboi, ene Cristo giti bage be suge ba ñage chege no Chube gwa giti, ba be ñage toi no Chube ole nga ngaña giti chui tangle diali. 28 Geru ai amaña Cristo giti cha kle chage dbe kwian ulitaske kwian ulita tke tangle Cristo gerua ulia giti Chube kirallaske kaire cha kle kwian ta gbe ama toidale mine Chube gwa giti, cha kle geru kete ene kwiange ene chui bdaglige Chube gwa giti kwian ulita Cristo ganga ulia ñage chege no trate ta ole Chube gerua giti Chube gwa giti. 29 Cha takalin chege cha kle gerule kare malen cha kle mo ta gbe kiraske lle boi diali Chube takalin kare Chube kirallaske kwian ulita alin.
1 Cha takalin chke uñale ba ulitage cha kle mo ta gbe kiraske ulia gwangerugu ba chudaboi Cristo gerua giti ba ulita ta gbe ma no geru ege. Cha me kle tañachuge cha kle boi daga ngwale giti Cristo gerua dbe gdale, cha me mo tallade e giti agwa cha mo ta gbe ba ulita Chubenu una Colosamu chudaboi kaire kwian Chubenu una Laodiceamu chudaboi kaire kwian Chubenu nga na ulitamu chudaboi. Ulia cha me ba ulita uñe agwa cha kle mo ta gbe kiraske ba chudaboi Cristo gerua giti. 2 Cha kle mo ta gbe ba kwian Chubenu ulita chudaboi Cristo gerua giti ba ulita kira gbagda mo ta gbe gwangerugu nga suga no ole Cristo gerua giti, kaire cha takalin Chube nga suga no kete bage ba ta gbe ule ulita salengwli ulita mo chudaboi ongoru ongoru ta no ole geru giti. Cha takalin Chube ba ulita ta gbe suge no trate ulita Cristo giti Chube kle age no ba alin ba ulita kwian me israelita alin. Unsuialin tangle geru e me chku uñale kwiange agwa nege tangle geru Cristo giti kle chke uñale kwian ulitage bai Cristo gerua gai ulia. 3 Cristo alin allabi ñage ba ta gbe ulia ulia Chube talla ulia trate giti, ama alin allabi ñage Chube gerua ulia gbe suge ulita ba tale. 4 Cha kle geru ai kete bage ene ñage chke uñale bage kwian gweale ñage gerule ba ole Chube giti ba tañachuge ama kle gerule ulia ba ole Chube giti, agwa ama me kle gerule ulia ama kle ba anblite ngwale kle sole ba ole. Cha me takalin kwian ba anblite ngwale geru ngwaledige malen cha kle geru ai kete bage gwangerutabi. 5 Ulia cha me kle ba ole ule llani ba kle ngwadi agwa chage suge mo tale cha kle ba ole llani kare. Nga suga no chadi ba kle toi no modi ulita kaire ba ulita kle mo ta gbe kiraske Cristo gerua gai ulia gwangerugu. 6 Ba Jesucristo gaubi ulia mo Chugagwallale kaire ene ba mo ta gbadale gwangerugu toi no trate Jesucristo kirallaske Chube takalin kare mo ta gbe diali ulia Jesucristo ole. E salengwli che chude gweale tke dbi noske chude tige no sera joge ulita dbiske, e kare ene che chegedale Jesucristoge. Ba mo kira gadale Jesucristo geruage gwangerugu Epafras ba tku tangle kare Chube gerua giti kaire ba gerule no diali Chube ole Chube kle age no ba alin giti. 8 Ba kledale ta giti kwian na me kle chage geru ulia olege, kwian ene ba anblitakalin geru ngwalege, ba me kwian geru ngwale trage keruchuge. Geru ngwale e kwian ngwale nga dba ai giti kle daba tke tangle giti geru e me Chube gerua Cristo giti ulia, geru e ngwale kwian kle tañachuge kare kle age mau tale mo chugale, ama takalin ba geru ulia Cristo giti chuge ngwadi, malen ama chie geru e ngwale trage baske ba anblitagda ngwale. Ba Chubenu ulia mo ta gbadale me mo anblitange geru e ngwalege. 9 Ba me geru e gai ulia kwian geru ngwale dbangage, e me Chube gerua ulia. Cristo giti alin allabi ba ñage Chube gerua ulia uñe. Cristo amaña ulia Chube, Chube talla ulita kle Cristo tale, Cristo klebi Chube ole, Chube Cristo kagu nga dba ai giti, ene Chube chku agali nga dba ai giti kwianske kwian kare, Cristo amaña Chube. 10 Kwian ulita kle mo gbe daba chugagwallale nga dba ai giti, Cristo ma kiraske kwian e ulitage, kaire Cristo ma kiraske lle boanga Chube alin nga ngaña giti ulitage kaire Cristo ma kiraske che dolla Satanáge kaire ma kiraske che dolla chudaboangalla ulitage. Ba Cristo gaubi ulia malen Chube Oña kle ba tale diali, ba Chubenu, Chube kle ba ole diali ba ta gbe kiraske ama takalin kare. 11 Ba Cristo gaubi ulia, e suiagebi Cristo ba ta blitu ba agedu me no ngeruge, ene chui ege dare gwangerugu ba tadu agekalin diali no Chube takalin kare, ba me tadu agekalin me no ngeru kare. Unsuialin tangle Chube kwian israelita gbu kirogwa onbre soli kwara tkenga sidri jwennga kirogwage, kwian israelita agedu ene agali Chube ama gbu age kare, kwara jwennga giti kwian israelita chegu egdage Chube alin, ene sugedu kwian nage ulita kwian israelita e Chubenu. Ba me agedu kwian israelita agedu kare mo ta gbagda no trate Chube gwa giti agwa nege tangle ba Jesucristo gerua gau ulia gire Cristo ba ta blitu Chube ole ama ta me no jun siere bage, gire ta me no jun siere giti Chube agali ba gbu egdage mau alin, ene ba chegu Chubenu. 12 Ba Cristo gerua gau ulia, ba mo ta gbu suge ulia Chube ñadu Cristo gbeni gwade mo kiralla giti gire ba mo ñeangu chiske, e salengwli ba jokeda ule Cristo ole ba jaba ogle ule ama jaba ole kare, e gerule ba age me no talla ulita chugu ngwadi ba me kle mo ta dbe toi dare age me no ba agedu ngeru kare. Ba chku ngaña chigage, e salengwli ba jaba chkuni gwade Chube kiralla giti ule Cristo ole kare, ene kaire ba me kle toi ngeru kare, ba kle toi Chube kiralla giti Chube takalin kare. 13 Ngeru tangle ba bebi Chube gerua Cristo giti gai ulia, Cristo bebi ba ta blite bebi ta me no jwen siere bage gire ba kledu sugekare Chubege age me no Chube dollale ba tadukalin kare, malen ba chegu salengwli kwian jogebakeda kare Chube gwa giti ba agedu me no gdale. Agwa ba Cristo gerua gau, e giti Chube ba ta blitu ama ba jun siere ji chugege agedu me no gdale, ene Cristo giti ba ñage toi nga suga no ole diali nga dba ai giti kaire ba be ñage toi chui tangle nga ngaña giti Chube ole. Ulia Cristo giti che agedu me no ulita Chube talla e mliunga, che ta chegu no trate Chube gwa giti. 14 Ngeru che ulita bebi Cristo gerua gai ulia gire che ulita agedu tanre me no Chube dollale che me agedu Moisés nu Chube gerua degaba unsuialin gerule kare, che chegu jiske tanre diali Chube gwa giti. Agwa Cristo jokeda kruge giti che ama gai ulia gire Chube kle che ta blite che me chege jiske dare Chube gwa giti, che chege trate Chube takalin kare. 15 Cristo jokeda kruge chkuni gwade giti Chube che dolla Satanás kaire dolla Satanás chudaboangalla ulita gwa gbu modige Chube ma kiraske dolla Satanáge. Chube kirachku Satanádi kaire Satanás chudaboangalla ulitadi kwian ulita gwa giti Cristo chkuni gwade gire, Chube me Satanás jigu kira molen ngle Satanás me kweri Chube kare, Chube kiralla chegu ma kweri kiraske dolla Satanáge. 16 Cha gerule ulia ba ole, sugedale bage Cristo ma kweri lle ulitage ama ba Chugagwalla, malen e giti ba me mo anblitange geru ngwalege. Kwian gweale gerule ba ole ba me ñage lle gweale jadale jai kaire bligda gweale gutadale ba me ñage gute, ama kle gerule ba e gute kaire lle gweale e jai gire ba me chege Chubenu dale ba me kle age no Chube gwa giti. Kwian gerule ene ba ole, gire ba me kwian gerua e gbe gdadi. Kaire agwe kwian gerule ba ole ba me kle chui gweale ollade chura kaire kairege kwian israelita kle age kare, kaire ba me kle dai bda chuia ollade kaire ba me kle undege chui undege chuiage kwian israelita kle age kare, ba me kle age ene ulita gire kwian kle gerule ba ole ba me kle age no Chube gwa giti ba kle age Chube dollale. Ama gerule ene ba ole, ba me ama gerua tallade, ama kle gerule ba ole geru ngwale giti. 17 Geru ai kare kledu gbaba sugetidale alin kwian israelita alin unsuialin tangle Cristo bebi chie gire, geru ai unsuialin tangle giti sugedu kwian israelitage sidri Chube tadukalin ama toi mine ne suiage Chube gwa giti, me sugedu amage trate ulita Chube mine kaire Chube takalin mine ama alin, agwa Cristo chku nga dba ai giti gire Cristo geru gbu kwiange diali dale alin, ene Cristo giti ñage suge trate kwiange Chube takalin kwian tañachuge mine kwian toi mine ama gwa giti, Cristo alin giti ñage suge trate kwiange Chube talla mine. 18 Ba Cristo gerua gaba ulia malen ba me mo chuge ngwadi kwian ba gbe tañachuge ba me age ama kle age kare gire ene ba me Chubenu ulia. Kwian e kle mo gbe tangle daba nadi ama kle mo sobade ngwale daba nadi, ama kle lle boanga Chube alin nga ngaña giti gai dage mo chugagwallale salengwli Chube kare. Kwian ngwale e kle gerule ama kle gwage lle gwealedige kwian na me gwagebadige, ama gerule lle e kle meñe amage gbire, gire e giti ama kle suge moge ma kweri daba nage, agwa ama kle gerule ngwale mau tale alin, ama me Chubenu ulia. Malen ama kle gerule giti ba me geru e tallade, geru e ngwale me ulia. 19 Kwian e me kle Cristo gai ulia mo Chugagwallale malen ama kle gerule ngwale mau tale alin. Agwa ba nu Cristo gerua gaba ulia ba mo chugale ngwadi Cristo ba ta gbe no trate ule kwaitre alin daba na Chubenu ole geru ulia giti ene ba be ñage chege no Chube gwa giti Chube takalin kare. Ba ulita Cristo gerua ganga ulia ba Cristo jegwalenu kare, Cristo ba ulita Chugagwalla, Cristo kle ba ulita kira gbe toi ma no chui kaire kairege Chube takalin kare. 20 Cristo jokeda ba jwandale siere ji chugege age me no gdale, ba ulita Cristo gerua gau ulia, gire nege bage uñale Cristo giti alin allabi ba chege ulia Chubenu. ¿Agwa gire mineade ba kle tañachuge ba agedale dare kwian me Chubenu kle gerule kare ene ba ñage chege Chubenu ulia Chube uñe ma no? Ba me agedale kwian na kle gerule ngwale ba ole kare, ama kle gerule ba age ama kle gerule kare gire ba Chube uñe, ba me age ama kle gerule kare gire ba me Chube uñe. Ama kle gerule ba me ñage bligda gweale gute, kaire ama kle gerule ni ba ñage bligda e manachuge sidri ni ba ñage ko chugedi. Ba Chube uñe ulia agwa gire ¿mineade ba kle kwian na kerua gbe gdadi geru ngwale giti ba agedale dare ene ba ñage chege no Chube gwa giti? ¿Mineade ba kle tañachuge ene? 22 Geru e kwian kle gerule giti e ulita ngwale, e kwian gerua me Chube gerua ulia. Kwian kle gerule ba me ñage bligda gweale gute gire ¿mineade? Ulia Chube bligda ulita jigu gutadale, bligda lle ngwale kare sugetidale alin, che bligda gute gire che na jwandale gutadale bligda me jage sbali dale. Kwian e kle gerule lle ngwale giti mau tale alin allabi, geru e ngwale ulita. 23 Kwian kle ba ta gbe me bligda gweale gute kaire lle boanga Chube alin nga ngaña giti gai dage mo chugagwallale salengwli Chube kare, kwian kle gerule ene ba ole ama kle tañachuge age ene giti ama kle chege no trate Chube gwa giti. Kaire kwian na gwage kwian kle age e karedi kwian na tañachuge ama giti ene: “Kwian e kle age no ulia Chube takalin kare.” Kwian kle gwage kwian edi kle tañachuge ene agwa me ulia. Ngwale kwian e kle mo boi jere jere mo tke bage bligdage. Kwian e kle daba na gwa gbe modi ngwale ama kle age giti, ama kle mo sobade daba nadi ama kle age giti. Ama kle age e giti ama me ñage mo ta blite Chube ole ama ta diali me no, ama diali ta agekalin me no. Ba me ñage kwian ene gerua gbe gdadi dale.
1 Cristo jokeda ba ulita age me no giti, ama jaba chkuni gwade, ama kleni nege Chube ole nga ngaña giti Chube ko taingwli giti kwian Chugagwalla kweri. Cha gerule ba ulita ole, ba ulita nu Cristo gerua gaba ulia ba ta chege salengwli ba chkuni gwade Cristo ole ule kare, Chube ba ta blitu ulita ba ta me ngeru kare nege ba ta kle Chube ole. Malen ba diali kledale mo ta gbe age Chube takalin kare, ba mo ta gbu joge siere agedu me no ulitage, ba me ñage mo ta gbe tañachuge lle ngwale nga dba ai giti alin giti kaire tañachuge age me no diali, ma no ba mo ta gbadale tañachuge diali Chube giti. 3 Ba Cristo gerua gau ulia giti ba chege salengwli ba jogebakeda Cristo ole ule kare, ba me agedale ba agedu ngeru kare. Ba me toidale age me no kwian me Chube uñe kle toi age me no kare, nege ba talla kle Cristo ole kaire Chube ole. 4 Ba Cristo gerua gau ulia giti ba ñage toi no Chube gwa giti, Cristo chieni nga dba ai giti chuia be chke gire chui ege ba kaire be meñe kwiange ule Cristo ole ba ama gerua gau ulia giti, ene ba be toi diali ama ole Chube ole nga ngaña giti. 5 Ba ageba me no ulita ba talla mlialenga ulita, ba me ñage toi ba toidu ngeru kare ba bebi Cristo gai ulia gire. Ba mo ta gbadale me age me no ai kare: Ba muirenu ba onbrenu me mo chuge ke giti. Ba me tañachuge geru sugaska giti me age ba tañachuge kare. Ba onbre ulita me tañachuge me no muinga nate mau alin kaire ba muire ulita me tañachuge me no onbre nate mau alin. Ba me mo ta gbe tañachuge mo tale age gweale me no. Ba me tañachuge lle tanre molen kwian na ngle ulitage, uñadale bage ba takalin lle molen tanre giti e salengwli ba kle lle ba takalinge gai chubere, gire ba me kle Chube ulia gai mo Chugagwallale, ba kle tañachuge ma lle ngwale giti ba me kle tañachuge Chube giti. 6 Kwian age me no ulita e kare giti Chube ji gbe mno kwian giti kwian bai me kle Chube gerua gai ulia me kle age Chube takalin kare. 7 Age me no e kare ulita ba agedu ngeru ba bebi Chube uñe gire, ba me agedale ba agedu ngeru kare, 8 ba age ulita me no chugale ngwadi, ba mo ta gbadale me age me no ai kare: Ba me mo ta gbadale skochie. Ba me mo ta gbadale age gweale me no ta sko ole daba ole. Ba me ta chege no ole daba boi gweale me no giti. Ba me geru jinade dabadi daba gbagda me no kwian na gwa giti. Ba me gerule jain jain sugaska daba ole. 9 Ba me sole ongoru ongoru daba ole. Ba mo ta gbadale me age e kare ba agedu ngeru kare. Ba Cristo gerua gau ulia gire Chube ba ta blitu, ba ta me chegu ngeru kare, malen ba agedu ulita me no ngeru chugale ngwadi. 10 Ba mo ta gbadale toi no Chube takalin kare, chui kaire kairege Chube ba dodanga kle ba ta gbe ma no ta chege ama kare gire ene bdagli ba be Chube uñe ma trate. 11 Ba Cristo gerua gau ulia, geru e chegu gbaba kaire kwian na ulita alin, me tallade kwian chudalla mine. Chube gwa giti kwian ulita salengwli, kwian bai kaire Chube gerua Cristo giti gai ulia kwian ene agedale ulita salengwli Chube gerua kle gbaba gerule kare. Chube gwa giti kwian israelita kwian me israelita kaire kwian mo kwara tkabanga kwian israelita kare kwian me mo kwara tkabanga, kaire kwian nga namu gerule kwira nale, kaire kwian me geru uñanga, kaire kwian lle boanga mo mauña alin kwian lle boanga mo alin agali, kwian ulita ai kare salengwli Chube gwa giti. Malen che ulitage sugedale trate Chube gerua kle gbaba che ulita alin, che kaire agwe agedale Chube gerua kle gbaba gerule kare. Che ulita Cristo gerua gai ulia gire Cristo kle che ulita ole diali, che ama gadale mo Chugagwalla kweri ama ma kweri ma kiraske kwian ulitage. 12 Chube no ba ulita ole Chube ba ulita gau mau alin ene ba kwian amanu, malen ba ulita mo ta gbadale toi nganake Chube ba ta blitu gwangeruguge, ba mo ta gbadale toi age no diali ai kare: Ba taidale dage daba ulitage. Ba gerudale ta no giti daba na ole, ba agedale no diali daba alin. Ba me mo gbadale ma kweri daba nage. Ba mo ta gbadale daba chudaboi ta giti ta no ole me skochie daba ole. Ba mo ta gbadale jage ulita boi daga ngwalege me skochie dabadi me skwatige daba chudaboi. 13 Daba age gweale me no ba ole, ba taidale dage dabage ama kle age ba ole giti, ba me ta skochie amadi. Daba age gweale me no ba ole ba talla mliadalenga me tañachuge dare me no amadi ama agedu ba ole giti. Ba tachkedale ba Chube gerua Cristo giti gau ulia gire Chube ba agedu me no Chube dollale talla mliunga ulita ama mi tachke dare ba agedu giti, e kare ene ba tañachugadale daba kle age ba ole giti. 14 Cha gerule ba ole, ba ulita nodale daba na ole ene ba ulita kwian Chubenu ñage chege kwaitre alin kwian gdaitre alin kare Chube takalin kare. 15 Chube ba ta gbu Cristo gerua gai ulia, gire ene Chube ba gbu chege kwaitre alin ule daba na Chubenu ulita ole Cristo giti, malen e giti ba mo ta gbadale ta nga suga no ole daba na Chubenu ole Chube takalin kare, me mo gbe kira bate daba ole. Ba Chubenu diali gerudale no Chube ole lle ulita giti ama kle age ba alin giti. 16 Ba diali mo ta gbadale tañachuge Cristo gerua giti, ba mo ta gbadale ama gerua jwen ma trate. Kaire ba mo tkadale tangle ongoru ongoru Cristo gerua giti Chube kirallaske, ba ongoru ongoru mo ta gbadale kiraske Cristo gerua giti. Chube gerua degaba unsuialin tangle kada Salmos, chada e giti ba mo ta gbadale mo gate nga suga no ole Chube giti Chube agedu no ba alin gdale, ba mo gate no ule daba na ole Cristo giti Chube ollade nga suga no ole Chube Oña ba ta gbe age kare. 17 Ba ulita mo ta gbadale age ulita gerule ulita che Chugagwalla Jesucristo takalin kare. Jesucristo giti ba diali ñage gerule no Chube che Ñenua ole ene: “Chube, cha kle gerule no ba giti ba agedu no cha alin giti, ba kle cha manade no. Noare ba kle cha chudaboi toi daba ole ba takalin kare. Cha no ba ole.” Ba gerudale no ene diali Chube ole Chube kle age no ba alin giti. 18 Cha gerule ba ulita ole, ba toidale no mo bitalla ole gwa u ba kle toi ngwadige. Ba muinga ulita mo jwanbale, cha gerule ba ole, ba mo ñengulalla gadale dage ama kerua gbe gdadi age ama gerule kare, ama ba chugagwalla. Ba age ene Chube gwa giti, e no Chube takalin kare. 19 Ba kwian onbre ulita mo jwanbale, ba nodale mo muira ole, ba me ama gbadale boi jere jere ba takalin kare, ba gerudale mo muira ole ta no ole. 20 Ba kirogwa ulita muirenu onbrenu, ba mo ñenua mo chebia gadale dage chui tangle, ba mo ta gbadale age ba ñenua ba chebia gerule kare. Ba age ene, nga be suga no no Chubedi ba kle age ama takalin kare giti. 21 Ba kirogwa ñenua kirogwa chebia, ba me ka boi ngwale mo kirogwalla ole ngle lle ulita giti kirogwa sko jwen lle ngwale giti, ba age ene diali kirogwa ole, kirogwa be tañachuge ene mo tale: “Cha me ñanaske ulita, cha me ñage lle ulita boi cha ñenua cha chebia takalin kare, lle ulita me no cha alin agedale.” Kirogwa be tañachuge ene mo tale olire, ba me age mo kirogwalla ole ama gbe ta olire ene, ma no ba ama tke tangle chudaboi Chube takalin kare. 22 Ba ulita lle boanga ba chugagwalla alin, ba mo chugagwalla gadale dage kaire ba mo ta gbadale lle boi ulita ta no giti ama ba gbe lle boi kare. Ba me mo gbe lle boi no ba chugagwalla kle ba ole ule alin allabi gire, ene ba chugagwalla gerule no ba giti, ba me tañachuge ene. Ba chugagwalla kle ba ole gwage badi, ba lle boadale no mo chugagwalla alin, ene kaire ba chugagwalla me kle ule ba ole gwage badi, ba lle boadale no gballa mo chugagwalla alin ama kle gwage badi kare. Ba Cristo gai dage ulia ba ama gai mo Chugagwallale, ba mo ta gbadale lle ulita boi ta no giti kwian ba chugagwalla alin. Sugedale bage ba kle lle ulita boi ba chugagwalla alin, ba me kle lle boi ama alin allabi agwa kaire ba kle lle boi che Chugagwalla kweri Cristo alin. 24 Sugedale bage ba kle lle boi no kwian ba chugagwalla alin nga dba ai giti, e giti Chube be age no ba alin nga ngaña giti ba lle bo no ñanale. Sugedale bage ba kle lle boi ba Chugagwalla Cristo alin me kwian alin allabi. 25 Sugedale kwian Cristo gerua gabage Chube gwa giti kwian ulita salengwli, malen kwian ulita bai me age Chube takalin kare, Chube be kwian ene gbe ji chuge agedu me no kbiale. Chube be gerule kwian ulita giti ta salengwli ole, ama be gerule chema jiske chema me jiske ama gwa giti.
1 Ba ulita kwian lle boanga chugagwalla, ba tañachugadale kwian lle boanga monu giti ama kle lle boi giti ba me ñage ama boi jere jere ba takalin kare, ba taidale dage amage ba ama manadale no ba ñage mangire batre, kaire ba gerudale ta no giti ama ole. Chkedale uñale bage ba kaire mo Chugagwalla molen nga ngaña giti, ama kle gwage badi ba kle age giti, ama be gerule ba ole ba agedu no giti ba agedu me no giti. 2 Ba kwian ulita Cristo gerua gaba, ba mo ta gbadale gerule Chube ole diali lle ulita giti. Ba kledale ta giti me skwatige gerule Chube ole me tañachuge lle ngwale alin giti ba kle gerule Chube ole gire. Diali ba gerudale no Chube ole ama kle age ba alin giti. 3 Kaire ba gerudale diali Chube ole cha giti, cha kle Chube gerua Cristo giti dbe kwian me Chube uñeske. Ba gerule Chube ole cha giti, ene Chube chudaboi kete chage ene kwian ta be kle biale Cristo gerua keruchuge. Cristo gerua amaña dbe giti cha kle skage agwa cha ta chegekalin diali gerule trate Cristo giti kwian ole, ene geru suge kwiange trate, ene kwian ñage geru e gai ulia. Malen cha takalin ba gerule diali Chube ole chudaboi kade Chubege cha alin, ene cha chege Chube kirallaske geru dbe gwangerugu. 5 Ba mo ta gbadale me chui kagenga ngwale, ba diali gerudale kwian ole Cristo giti. Ba toidale diali no trate ta giti Chube takalin kare kwian me Chubenu gwa giti, ene ba ñage gerule no Cristo giti kwian ole, ene kwian geru gai ulia ba giti. 6 Kaire ba geru tragadale trate ta giti no kwian ole Cristo giti, ba gerudale ulita no, ene geru suge no kwiange, geru e giti kwian gweale geru kade bage Cristo giti ba jaindalenga trate no ama kalen, ene kwiange geru ñage suge no gire ama geru gai ulia. 7 Cha ba ta gbe ene ulita chada ai giti, cha kle che daballa Cristo giti kada Tíquico kage chada ai dbe ba ulita alin. Cha no Tíquico ole, ama cha chudaboanga no Chube gerua Cristo giti kete kwian nage, malen cha kle ama kage ba ngwadi. Ama be joge chke ba ngwadige ama be geru kete bage ma trate ulita cha giti cha kle boi giti nga ainige kaire ama be ba ta gbe nga suga no ole, ene ba ñage kira gai ta chege no me tañachuge tanre cha giti. 9 Kaire Tíquico ole kwian Cristo gerua ganga ulia kada Onésimo be joge ule, ama che daballa Cristo giti ama toinga ba jwiage una Colosage. Ama gdabonate be geru kete ulita bage kle boi ulita giti aini cha ole. 10 Che daballa Cristo giti kada Aristarco cha gatangadi aini skage ngwadi ama gbi kage ba ulita alin, kaire Bernabé dabagdalla kada Marcos gbi kage ba alin. Cha chada degu ba alin ngeru Marcos giti ama cha chudaboanga, ama joge basale badi ba ama gai ngwange no. 11 Kaire agwe che daballa Cristo giti kada Jesús-Justo gbi kage ba alin. Aristarco kaire Marcos kaire Jesús-Justo ama kwian israelita gdamai alin kle kwian Cristo gerua gabaske kle lle boi ule cha ole Chube gerua Cristo giti dbe kwiange. Kaire ama gdamai ai kle cha ta gbe nga suga no ole diali ama cha chudaboanga no. Kaire daba na Chubenu kle cha chudaboi agwa ama me kwian israelita ama gdamai kare. 12 Epafras gbi kage ba alin kaire agwe, ama kwian ba jwiamu ama Cristo gerua dbanga kwiange, kaire agwe ama kle diali tachke ba giti ama kle mo ta gbe gerule kiraske Chube ole ba ulita giti diali, ama takalin Chube ba ulita ta gbe tañachuge gwangerugu chui tangle diali Cristo gerua giti kaire mo ta chuge ngwadi Chubege ene Chube ba ta gbe lle boi ma no Chube takalin kare, malen ama kle gerule Chube ole ba giti diali. 13 Uñale chage Epafras kwian no malen cha ñage gerule trate ba ole Epafras giti, Epafras kle tañachuge tanre no ba giti ama takalin ba toi no Chube gwa giti baini kaire ba ulita kle ngwadi. Kaire ama kle tañachuge tanre kwian Chubenu toinga una Laodiceage giti kaire kwian Chubenu toinga una Hierápolige giti. 14 Kaire agwe che daballa no no Cristo giti kada Lucas kwian mo dodanga kaire Demas che daballa Cristo giti, ama gdabonate gbi kage ba ulita alin. 15 Ba geru kete cha alin che daballa che ibotea ulita Cristo giti una Laodiceamuge cha gbi kage ama ulita alin no. Kaire agwe ba gbi kete Ninfage cha alin kaire kwian ulita Chubenuge kle mo lite Chube geruadi Ninfa ullage. Cha gbi kage ama ulita alin. 16 Ba chada ai batenga ulita cha degangu ba alin gire ba chada ai amaña kage kwian Chubenu ulitage kle mo lite Chube geruadi una Laodiceage, ene eni kwian una emu ñage chada ai batenga agwe. Kaire agwe cha chada kagu kwian alin una Laodiceage ba chada e batenga. 17 Ba gerudale Arquipo ole cha Pablo kle geru kage ama alin ene: “Ba Arquipo cha daballa Cristo giti, ba diali agedale ulita Chube kle ba ta gbe age ama alin kare. Ba me ñage mo ta blite me lle boi Chube alin, ba diali tañachugadale lle boi Chube alin Chube ba gau kare.” Ba geru ai kete ene cha alin Arquipoge. 18 Cha Pablo chada ai degangu ulita ba alin, nege cha agali kle mo ka dege chada ai giti mo kodi bdagli cha gbi kage dege mo kodi ba ulita alin, ene chke uñale bage ulia cha kle chada ai kage ba ulita alin. Cha gerule ba ole, ba me ta jogenga gerule cha giti Chube ole cha kle skage Cristo gerua dbe gdale giti. Kaire cha takalin Cristo che Chugagwalla age no ba ulita alin. Geru ai ene ulita cha Pablo chada degangu ba kwian Chubenu ulita una Colosage alin. Che kle meni.
1 Cha Pablo chada ai degange ba ulita Jesucristo gerua gaba ulia kle mo lite Chube geruadi una Tesalónicage alin: Cha ule Silvano ole Timoteo ole gbi kage ba ulita alin chada ai giti. Ba ulita kle mo lite Chube geruadi, ba che Ñenua Chubenu kaire ba che Chugagwalla Jesucristonu, cha takalin ama age no ba ulita alin ama ba ta gbe suga no. 2 Cha kle gerule Chube ole gire diali cha tachke ba ulitage, cha gerule no Chube ole ba ulita giti ene: “Chube, noare kwian banu una Tesalónicamu ulita kle chage no ba ole, cha takalin ba ama ta gbe age ene diali. 3 Noare ama ulita kle ba gai ulia kle mo ta gbe lle boi no ba alin diali kwianske. Noare ama kle mo ta dbe no kwian ole kaire ba ole. Ama me skwatige, boi daga ngwale giti me tallade, ama diali kle Chugagwalla Jesucristo chieni chuia manade.” Cha gerule ene ba giti diali chui tangle che Ñenua Chube ole. 4 Cha daballa cha ibotea Jesucristo giti, Chube noare ba ulita ole, uñale chage Chube ba ulita gau mau alin. 5 Cha jo chke geru Jesucristo giti dbe ba ulita una Tesalónicamuge cha me jo chke geru e kete bage gballa, Chube Oña kledu cha ole, ama cha ta gbu geru Jesucristo giti kete ba ulitage kiraske, uñale chage trate trate geru Jesucristo giti geru ulia, malen cha gerudu no trate ba ole Jesucristo gerua giti. Uñale ba ulitage cha chagedu baske geru Jesucristo giti dbe ba ulitage cha mo ta gbu chage no trate ba ulitaske, ene cha giti ba ñage geru ulia gai, cha agedu ene no ba ulita alin. 6 Ba ulita mo ta gbu chage cha chagedu kare kaire Chugagwalla Jesucristo chagedu nga dba ai giti kare. Ba Jesucristo gerua gau ta suga noare ole, e Chube Oña ba ta gbu, ba ulita boidu daga ngwale Jesucristo gerua giti, agwa ba ulita me talladu, ba geru ulia gau ulia diali no. 7 Ba ulita boidu daga ngwale sketangle ba mo ta gbu chage Jesucristo gerua ole diali. E chku uñale kwian Chubenu nga kweri Macedoniage nga kweri Acayage, suge amage ama ulita agedale kaire ba kle mo ta gbe Jesucristo geruage kare. 8 Ba ulita mo ta gbu ene Jesucristo gerua ole, ene ba giti geru Chugagwalla Jesucristo giti chagedu nga ulitage, me kwian nga Macedoniamu alinge me kwian nga Acayamu alinge geru e ulia chku uñale, agwa kaire kwian nga na ulitamuge chku uñale geru ulia kle ba ta blite giti, uñale kwian ulitage ba ulita mo ta gbu Chube alinge. Cha me ba tragadale kwian na ole, kwian ulitage uñale ba kle mo ta gbe Chube alinge. 9 Kwian ulita agali kle gerule cha jo chke baske ngwadi giti, ama kle gerule no ba giti, ba ulita cha gau ngwange no, ba Chube gerua keruchugu, ba mo ta blitu Chube ole, ba lle oña ngwale dodaba mo kodi gai chubere chugu ngwadi ulita gire ba tachku lle boi Chube gwade Chube ulia alin. 10 Kaire kwian ulita kle gerule ba ulita giti ba ulita kle Chube mo Kirolla Jesu gbuni gwade manade ngwange, ba takalin Jesu chieni ba alin, Jesu alin allabi be che ulita jwen siere Chube be ji gbe tirarege kwian me Jesu gau ulia alin chuia be chiege.
1 Cha daballa cha ibotea Jesucristo giti, uñale ba ulitage cha jo chke ba ngwadi cha me jo chke Chube gerua Jesucristo giti dbe bage ngwale, ba ulita geru e gau ulia. 2 Uñale ba ulitage cha jo chke kwian una Filipomuske ama ka bo cha ole geru dbe gdale, gerudu me no agedu me no ulita cha dollale geru dbe giti amaske. Kaire cha jo chke baske una Tesalónicage gire kwian gweale agedu me no cha dollale salengwli kwian una Filipomu agedu cha ole kare, boidu ene ulita agwa cha me ta chugu geru Jesucristo giti dbe ba ulitage, ba geru gau ulia, Chube kledu cha ole, Chube cha chudabo cha kira gbu geru ulia kete bage. 3 Cha me geru ngwale du bage, cha me jogebanga geru uliage, agwa cha geru ulia du bage. Kaire cha me gerudu ta gweale age me no giti ole ba ulita anblitagda, cha me agedu mo tale ba gweale anblite lle gweale giti ene ba geru gadale ulia. 4 Me ene, Chube cha gau geru Jesucristo giti dbe kwiange gerule geru ulia gerule kare, Chube gwage che ulitadi, suge amage che ta mine, amage uñale che mine ulita, malen cha me gerudu kwian takalin kare, cha gerudu Chube takalin kare. 5 Cha jo baske cha me jo ta ai kare ole: Cha me mo ta gbu gerule no kwian ulita giti ene kwian ulitage suge cha kle gerule no ama giti ene ama igi ketadale chage cha gerule no ama giti ñanale. Uñale ba ulitage cha me agedu ene baske, Chube gwa giti cha agedu ulita no Chube takalin kare. 6 Cha me tañachugu ai kare mo tale: “Cha takalin kwian una Tesalónicamu kaire kwian nga nage gerule no cha giti kwian cha gbe kweri mo chugagwalla kare, ene kaire ama igi ketadale chage cha geru dbe amage ñanale.” Cha me tañachugu ene dale. Cristo cha gau cha kagu ama gerua dbe ba ulitage ñanale cha ñage igi kade bage, agwa cha alin ene me no geru dbe bage gire igi kade bage geru ñanale. Noare ba ulitaske cha mo ta gbu no ba ulita ole, cha ba manadu Chube geruage salengwli chebia kle kirogwa manade no kare. 8 Cha noare ba ulita ole, malen cha geru Jesucristo giti du bage, me e alin, kaire cha kledu biale mo ta gbaba jogeda ba ulita giti geru dbe bage giti, cha no no ba ulita ole. 9 Cha daballa cha ibotea Chubenu, ba tachke cha giti cha kledu baske cha lle bo nga ju nga jere, cha lle bo Chube alin ama gerua trage ba ole, kaire cha lle bo mo alin ene cha ñadu igi gai bligda gigagda, cha me tadukalin igi kade ngwale bage. 10 Ba ulita Chubenu gwa giti kaire Chube gwa giti cha chagedu baske trate Chube takalin kare, cha agedu ulita no, cha me agedu me no ni sidri lle gweale giti ene kwian na me ñage gerule cha giti cha agedu me no. 11 Kaire uñale ba ulitage cha agedu no ba ulita alin, cha ba ulita chudabo gdaite gdaite, cha ba ulita ta gbu suga no geru ulia giti. Salengwli ñenua mo kirolla chudaboi age no mo kirolla alin kare, ene cha agedu ba ulita alin, cha ba ta gbu chage ngerugu Chube geruage, cha ba ta gbu suga no, cha ba ta gbu chage trate kwian Chubenu chagedale kare. Chube ba ulita gau mau alin, ene chui bdagli ama be gerule nga ulita giti kwian ulita Chugagwallale gire ba ulita be joge toi ule ama ole nga no noge. 13 Diali cha gerule Chube ole ba ulita giti ta suga noare ole, ba ulita cha keruchugu Chube gerua Jesucristo giti trage, ba Chube gerua keruchugu gire ba Chube gerua gau ulia, sugedu bage ulia e Chube gerua me kwian gerua, ulia ba Chube gerua Jesucristo giti gau, geru e ba ta blitu, nege ba kle mo ta gbe toi Chube gerua gerule kare. 14 Cha daballa cha ibotea Chubenu, ba ulita boidu daga ngwale ba bitalla kote geru Jesucristo giti gdale, boidu ene kaire kwian Chubenu kle Jesucristo geruadi kle toi una kaire kairege nga kweri Judeage jo jritaba nate bitalla israelitage geru ulia gai gdale. 15 Kwian israelita e amaña bitalla che Chugagwalla Jesucristo guda. Ene kaire ngeru ama enusulian kwian ngle Chube gerua ketanga guda. Ene kaire nege kwian israelita me takalin cha chege Jesucristo gerua trage kwian ulita ole, cha kle joge chke nga kaire kairege, kwian israelita kle cha kage siere, ama me takalin geru uliage, kaire kle kwian ulita ta gbe siere geru uliage, ama me takalin kwian ulita geru e gai ulia, Chube gwage kwian ene kle age me no. 16 Cha kle chage kwianske cha ta Jesucristo gerua tragakalin kwian me israelita ole, ene be chke uñale kwian me israelitage Jesucristo giti ama ña tien gitiru ji chugege age me no gdale, agwa kwian israelita me cha chuge ngwadi geru Jesucristo giti trage kwian me israelita ole. Kwian israelita agedu tanre me no kle age me no diali, kwian ene ulita agali chege jiske ama kle age giti, Chube skwatige gwage amadi age me no tanre, age ene gdale Chube kle ji tirare gbe kwian ene ulita alin. 17 Cha daballa cha ibotea Jesucristo giti, cha kledu ba ole gire cha jo siere ba ulitage, ba chegu sugekare chage, me chui sbali agwa diali ba ulita giti cha kle tachke mo tale. Cha no ba ulita ole malen cha tañachuge tanre ba ulita giti cha ta jogekalinni tienda badi blike. 18 Cha Pablo agali chui gbu tanre joge tienda badi agwa cha me ñadu, che dolla Satanás me takalin cha joge baskeni, cha mo ta gbe joge gire Satanás age me no cha ole cha joge chuiage. 19 Che kle tañachuge che Chugagwalla Jesucristo chieni chuia giti, chui ege che be kle ule ama ole, chui ege cha be gwage badi ule Jesucristo ole, nga be suga no chadi ba ulita giti, cha ta be chege no no ba ulita giti, chui ege be suge chage cha me chagedu Jesucristo gerua dbe bage ngwale. 20 Jesucristo geruadi cha ta chege no no badi, noare ba geru gau ulia, ba ulita giti nga suga noare chadi.
1 Cha me ñadu chege tañachuge dare ba giti, ulita me uñale chage ba ulita Chubenu kle toi mine, bdagli cha tañachugu ma no cha chege gballa una Atenage Timoteo kage tienda ba ulitadi. 2 Gire cha Timoteo alin kagu gballa tienda ba ulitadi, Timoteo daba Chubenu lle boanga Chube alin ule cha ole, ama geru Cristo giti traganga kaire. Cha Timoteo kagu ba alin ama ba kira gbe Chube geruage ene ba me geru chuge ngwadi, ama ba ta gbe Chube geruage diali ene nga be suga noare badi geru giti. 3 Timoteo age ene ba alin ba chudaboi ta gbe Jesucristo geruadi ene ba mi joge siere geru Jesucristo gitidi, ba boi daga ngwale tanre ba me tallade, uñale ba agalige ulita che boidale daga ngwale geru Jesucristo giti gdale. 4 Cha kledu ba ole gire cha gerudu chui be chke che boi daga ngwale, uñale ba ulitage e boidu ulia cha gerudu kare. 5 Ba boi daga ngwaleske giti cha tañachuge tanre ba ulita giti, cha me ñadu manade dare, cha takalin ba chada chke uñale chage blike, me uñale chage ba kle mo ta gbe Chube geruadi o ba me kle mo ta gbe Chube geruadi. Cha kwachiu ba ulita giti che dolla Satanás ngeru, che dolla mo chuge ba ole ba ta blite naskuni age nge kare me no, ene ngwale cha jo geru dbe bage, ngwale cha jo gerule ba ole Jesucristo giti. Cha kledu tañachuge ene ulita, malen cha Timoteo kagu tienda ba ulitadi ene chke uñale chage ba kle mo ta gbe chage mine Chube geruadi. 6 Timoteo chiuni ba ngwadige Timoteo chkuni cha ngwadige, Timoteo geru tragu no ba ulita giti cha ole, ama gerudu ba ulita nu Chube gaba kle mo ta gbe diali Chube geruadi kaire ba ulita kle mo ta dbe no daba ole Chube ole. Kaire Timoteo gerudu cha ole ba kle tachke ta no ole cha giti, ba ta gwagekalinni chadi kaire cha kle tañachuge ba giti ba kle tañachuge cha giti kare. 7 Cha gerule ba ole daba Chubenu, cha kle chage geru Jesucristo giti dbe ngerugu kwiange, e giti cha kle boi tanre daga ngwale, cha ta olire e giti agwa nege ba ulita giti chadi cha ta suga noare, geru chku uñale chage ba ulita kle chage ngerugu no mo ta gbaba chage dare Jesucristo geruage ba geru gau ulia kare. 8 Nege uñale chage ba ulita kle mo ta gbe no trate chage che Chugagwalla Jesucristo ole diali, nga suga noare chadi ba ulita giti, kaire ba giti cha kira gai chage ngerugu geru dbe. 9 Chube gwa giti chadi nga suga no no ba ulita giti, cha gerule no no Chube ole ama agedu noare ba ulita alin ama ba ta gbu chage ene no, e giti cha gerukalin no ngle Chube ole ama agedu giti. 10 Chui gdale cha gerule Chube ole joge giti ba ngwadi, cha ta gwagekalinni badi, cha ta jogekalinni ba chudaboi Chube geruadi ba ta gbe geru uliage bai me chku uñale trate bage, e giti cha ta ba ta gbakalin ene chke uñale bage trate geru giti. 11 Cha kle gerule Chube che Ñenua ole kaire che Chugagwalla Jesu ole ama cha chudaboi, ene cha ñage joge tienda badi chui gwealege. 12 Kaire cha takalin che Chugagwalla ta ma no kete bage toi no daba ulita ole, daba Chubenu gdaite gdaite ole ta dbe no diali kaire kwian na ulita ole ba ta dbale no cha ta dbe no ba ulita ole kare. 13 Noare che Chugagwalla ba ta gbe chage no trate ngerugu che Ñenua Chube gwa giti, ene che Chugagwalla Jesu chieni ule kwian ulita amanu jogebada oña ole kaire lle boanga ama alin nga ngaña giti ole chuiage ba mi skate jiske Chubege.
1 Cha daballa cha ibotea ulita Jesucristo giti, cha gerule ba ole, cha geru gbe ba ulita alin che Chugagwalla Jesu kalla giti: Ba ulita kle age kare Chube takalin kare cha ba tku tangle kare, Chube alin e no, ba agedale diali ene ngerugu ma no. 2 Uñale ba ulitage cha ba tku tangle che Chugagwalla Jesu geruage Jesu kiralla giti, uñale bage cha gerudu mine ba ulita ole. 3 Chube takalin ba ulita toidale trate no ama alin, ba ulita me agedale me no, me no onbre mo chuge ke giti muinga ole kaire me no muinga mo chuge ke giti onbre ole. 4 Ma no sugedale ba ulitage kwian onbre Chubenu ulita toidale trate mo muiralla ole, ba toidale no trate Chube gwa giti mo muiralla ole, ene daba na ulita be gwage badi ba kle toi no mo muiralla ole mo muiralla gai dage. 5 Me no tañachuge muinga na nate mau alin kwian me Chube uñe kle age kare. 6 Ba me agedale me no daba ole muinga giti chage daba muingalla ole daba ngeru. Che Chugagwalla Chube ji gbe mno mno age ene gdale kwian alin, uñale bage cha gerudu ngeru ulita e giti ba ole ba ta gbagda. 7 Chube me che gau mo ta dbe toi age me no diali, me ene, ama takalin che toi age no trate ama alin. 8 Kwian bai me geru ai ulita gbe gdadi me daba ta gbe chke me daba tke tangle geru ai ulita giti, kwian ene me kle age mo salengwli dollale, kle age Chube dollale, e Chube gerua me kwian gerua. Geru ai ulita giti chkedale uñale ba ulitage Chube mo Oña ketu ba gdaite gdaitege mo ta gbadale age no Chube Oña takalin kare. 9 Ta dbe no modi daba Chubenu ulita ole, e giti cha me chada degadale, Chube kle ba ta gbe kle ba tke tangle ta dbe no modi daba ulita ole. 10 Ulia ba ulita kle ta dbe no daba Chubenu ulita ole kle toi una kaire kaire nga Macedoniage, noare ba kle mo ta dbe ene modi. Cha gerule ba ole cha daballa cha ibotea Jesucristo giti, ba ta dbadale modi no diali ma ngle daba ole ngerugu. 11 Ba ulita mo gbadale toi ta taingwli modi daba ole, ba mo ta gbale chege lle boi diali mo alin mo kodi toigda cha gerudu kare ba ole, ba me daba na gbadale gdadi daba kle age mine o kle llema boi, ba me chegedale tañachuge ngwale daba kle age giti alin, agwa ma no ba chege mo ta gbe lle boi mau alin mo kodi, ene ba igi molen ba lle molen toigda, ene kwian na me Chubenu gwage badi ama ba gai dage gerule no ba giti. 13 Cha daballa cha ibotea Jesucristo giti, cha takalin ba ulitage chkedale uñale trate trate daba Chubenu jogeda giti, ba ulita me chegedale ta dbe olire daba Chubenu jogeda nate kwian na me Jesucristo uñe kare, kwian me Jesucristo uñe, kwian enege suge ama bitalla jogeda ama tañachuge ama jogenga ulita. 14 Agwa che Chubenu che me tañachugadale ene kwian me Jesucristo uñe kare, che Jesu jokeda giti gai ulia, ulia Jesu jokeda gire chkuni gwade, ene kaire be boi kwian nu Jesu gaba ulia jogebada ole. Jesu giti Chube be kwian ene gbeni gwade Chube agedu Jesu ole kare. 15 Cha geru ai kete ba ulitage che Chugagwalla geru ketu chage kare: Kwian Chubenu ulita kle gwade che Chugagwalla chieni chuiage be chke, chui ege kwian Chubenu kle gwade mi joge ngeru daba Chubenu jogebadage. 16 Chui ege che Chugagwalla Jesucristo agali be chieni nga ngaña giti gerule kweri mo kirallaske, kaire lle boanga Chube alin chugagwalla nga ngaña giti be gerule kweri, lle ngwanegda Chube alin kada trompeta be gdade kweri. Ulita be kle boi ene gire kwian Jesucristo gaba ulia jogebada be chkeni gwade be joge ngeru kwian gwadege Jesucristo kle manade ngwadi. 17 Be boi ene ngeru kwian Jesucristo gaba jogebada jaba ole, gire kwian Chubenu Jesucristo gaba kle gwade be joge jaba chkuni gwade nate Jesucristo kle ngwadi bogakwaske, che ulita be kle ule Jesucristo ole nga ngaña giti Jesucristo ngwadi, ene che ulita be joge toi diali chui tangle che Chugagwalla Jesucristo ole. 18 Ba Chubenu gerudale diali geru ai ulita giti daba na Chubenu Jesucristo gaba ole, ba ulita Chubenu mo ta gbadale chke chage gwangeru daba ole Jesu be chieni chuiage giti.
1 ¿Ngaminegire Jesucristo chieni chuia be chke? ¿Be boi mine ulita ngeru? Cha daballa cha ibotea Chubenu, cha me chada degadale ba alin e giti. 2 Uñale ba ulitage che Chugagwalla Jesucristo be chieni chuia be chke salengwli kwian skwe boanga kle chke kare, kwian skwe boanga chke ngajrege chuia me uñale chege chui baige hora baige, skwe boanga be chke che skate alenske gire skwe boanga chke. Ene Jesucristo be chieni, kwian ulita be kle alenske ni be uñale kwiange Jesucristo be chieni chuia be chke. 3 Chui ege kwian tanre be kle gerule: “Che ulita kle toi no, ulita kle ngwedi, me kle boi tirare cheske.” Kwian be kle gerule ene gire sugeti blike Jesucristo be chieni, kwian me kle Jesucristo chieni chuia manade be chege sugekare Chubege ngwale dale, mi ñage tien gitiru, be boi tirare salengwli muinga kle skibachie kirogwa kle menga chebia kote kare. 4 Kwian be skate alenske che Chugagwalla chieni chuiage, kwian e be kle nga jereske kare, me uñale kwian ene ulitage be boi tirare giti me chke uñale. Cha daballa cha ibotea Chubenu, ba me kledale ta ene ole, ba me kle nga jereske kare, bage uñale che Chugagwalla be chieni, ba me skatedale alenske che Chugagwallage kwian kle ngajrege kare amage me uñale kwian skwe boanga be chke. 5 Ba ulita bebi Jesucristo gai ulia ba chagedu nga jereske kare me Chube uñe, Chube ba ta gbu suge Jesucristo giti salengwli jichra kle kwian gbe ten kare, gire ba Jesucristo gau ulia, ba chegu Chubenu. Che Chubenu me kle nga jereske kwian me Chube uñe kare, Jesucristo chieni chuiage ngwange che kledale biale ta giti, chui ege kwian me Chube uñe be chege sugekare Chubege agwa che ulita Chubenu be joge toi ule ama ole. 6 Che Chubenu mi boi kwian me Chube uñe kare, malen che Chubenu me mo ta chugale ngwadi chage alenske, ma no che mo ta gbadale chage ta giti no chage no trate Chube takalin kare, ene che be kle biale Jesucristo chieni ngwange. 7 Ngajrege kwian ulita kle gbe, me uñale kwiange kle boi mine ama jaba giti. Kaire ngajrege kwian kle lle jai kle joge llale, amage me uñale kle boi mine ulita. Ene kaire be boi Jesucristo chieni chuiage, kwian ulita me Chube uñe be skate alenske kwian kle gbe kare kaire kwian kle llale kare. Che Chubenu me chegedale ene, che ulita kledale Jesucristo manade ngwange, malen che ulita mo ta gbadale chage no trate Chube takalin kare, che mo ta gbadale Chube gai ulia diali, che mo ta dbadale no kwian ole Chube ole, che mo ta gbadale Jesucristo chieni chuia manade ngwange, chui ege Jesucristo giti alin che be tien gitiru be boi tirarege. Che ulita kledale biale mo ta gbaba Jesucristo ole tiendale gitiru ji chugege age me no gdale. 9 Chube me che gau gbale ji chuge, me ene, Chube che gau Jesucristo uñe ene che Chugagwalla Jesucristo giti che tien gitiru Chube be ji gbege. 10 Jesucristo jokeda che ulita alin ama chkuni gwade che ulita alin, ama be chieni chuiage, chui ege che ulita amanu bai kle gwade be joge toi ule ama ole, kaire che ulita bai jogebada jegwalege ama be che gbeni gwade che be joge toi ule ama ole. 11 Malen ba ulita daba ta kliadaleda daba ba ta kliadaleda, ba daba kira gbeda daba ba kira gbeda tañachuge ngerugu Jesucristo chieni chuia manade ngwange ba ulita kle age kare. 12 Cha daballa cha ibotea Jesucristo giti, cha gerule ba ulita ole, noare ba tañachuge no daba giti daba bai kle lle boi modi Chube alin baske, daba ba chugagwale kle che Chugagwalla Jesucristo gerua dbe ba ulitaske kle ba tke tangle che Chugagwalla Jesucristo geruage ene ba Jesucristo uñadale ma no ba chagedale ma no trate. 13 Daba ene kle lle boi no Chube alin baske ba ta dbadale no ama ole diali, ba ama gadale dage no. Kaire ba Chubenu ulita toidale ta no giti daba Chubenu na ulita ole diali. 14 Cha daballa cha ibotea Chubenu, cha gerule ba ulita ole, ba ulita lle boale no modi ule diali Chube alin, daba gweale Chubenu baske me ta lle boakalin ule Chube alin ba gerudale no ama ole ene ama lle boadale. Daba gweale me ta chagekalin dare Chube geruadi ba ama ta gbe chage dare gerudi. Daba gweale kle gerudi me kle chage trate ba ama chudaboi ta dbe chage trate gerudi. Daba ene ole ulita ba me skochiedale ba me skwatigedale ama chudaboi. 15 Kwian gdaite age me no daba ole gire mo jiale age me no kaire daba ole, ba me agedale ene, ma no ba mo ta gbadale age no diali daba ulita ole bai Chubenu bai me Chubenu ole. 16 Ba ulita kledale diali nga suga no ole. 17 Ba ulita gerudale Chube ole diali. 18 Ba kle toi no ba me kle toi no, diali ba ulita gerudale no Chube ole: “Chube, noare ba kle cha ole, noare ba kle cha chudaboi ulita.” Ba ulita Chube uñe Jesucristo giti Chube takalin ba age ene ulita diali. 19 Ba ulita Chube Oña chugadale ngwadi age no Chube Oña takalin kare age ba tale, ba ama chuge ngwadi mo ta gbe. 20 Kwian bai Chube gerua ketanga bage Chube Oña kiralla giti ba ama keruchugadale no Chube gerua giti, me no ba me ama keruchuge. 21 Ma no ba ama gerua gbe gdadi ulita kle gerule ulita Chube giti ulia o me, ene be chke uñale bage bai no ulia ba alin. Ama kle gerule Chube giti trate no ba e gai ba geru e gbe mo tale, 22 agwa geru gweale me ulia ba chugadale ngwadi, ma no ba joge siere geru ulita me noge kaire lle na ulita me noge. 23 Cha takalin Chube ta suga no mauña agali ba ta gbe suga no, kaire ama ba manade no trate ulita mau alin ba oña manade ba ta manade ba jegwale ulita manade no, ama ba ta gbe no, ene ba me mo chuge ngwadi age sidri me no. Chube ba ulita manade no ene, ene che Chugagwalla Jesucristo chieni chuiallage ba kledale biale no trate ama alin jogedale toi ama ole. 24 Chube ba ulita gau mau alin, ama be ba manade no trate Jesucristo chieni chuiallage, Chube me ta jogenga ba ulitage manade no, diali Chube mo ta gbe age ulita ba alin Chube gerule kare. 25 Cha daballa cha ibotea Chubenu ulita, cha takalin ba gerule Chube ole cha giti. 26 Cha takalin ba geru kete cha alin daba Chubenu ulitage cha gbi kage ama ulita alin ta no ole. 27 Cha Pablo chada ai kage daba Chubenu ulita alin, che Chugagwalla Jesucristo kiralla giti cha gerule ba daba Chubenu chugagwalla ulita una Tesalónicage ole ba chada ai batadalenga daba Chubenu ulita alin. 28 Cha takalin che Chugagwalla Jesucristo age no ba ulita alin. Geru ai ene ulita cha Pablo chada degangu ba kwian Chubenu ulita una Tesalónicage alin. Che kle meni.
1 Cha Pablo chada ai degange ba ulita Jesucristo gerua gaba ulia kle mo lite Chube geruadi una Tesalónicage alin: Cha ule Silvano ole Timoteo ole gbi kage ba ulita alin chada ai giti. Ba ulita kle mo lite Chube geruadi, ba che Ñenua Chubenu kaire ba che Chugagwalla Jesucristonu. 2 Cha takalin che Ñenua Chube kaire che Chugagwalla Jesucristo age no ba ulita alin ba ta gbe suga no. 3 Cha daballa cha ibotea Jesucristo giti, cha diali mo ta gbe gerule no Chube ole ba ulita giti ene: “Chube, cha gerule ba ole kwian una Tesalónicamu nu ba gerua gaba ulia giti, nga suga no chadi ba kle ama ulita chudaboi toi no trate ba takalin kare. Ama ulita kle ba gerua gai jumale kle tañachuge chui kaire kairege ma ngle ba giti. Diali ama ulita no daba ole kle tañachuge mo chudaboi ongoru ongoru ta no giti nga suga no ole ma ngle ngeruge, malen nga suga noare chadige daba e kle age giti.” Cha kle gerule diali ene Chube ole ba giti, noare ba kle toi Chube takalin kare. 4 Malen nga suga no chadige joge baini kaire mo lite kwian Jesucristo gerua ganga ole gire cha kachke no ba ulitage ba kwian boinga tanre daga ngwale agwa ba me kle Jesucristo gerua chuge ngwadi e gdale, ba kle boi me no giti ba me kle tañachuge e giti, ulita ba kle jige Chube kote, uñale bage Chube ñage ba chudaboi, ba kle ama gerua gai ulia. Ba kle mo ta gbe chage gwangerugu giti cha kle e trage kwian na Jesucristo gerua ganga ole. 5 Suge chage ba ulita una Tesalónicamu kle boi tanre daga ngwale Jesucristo gerua gai gdale agwa ba kle chage no trate gwangerugudba Chube takalin kare, ba me kle Chube gerua chuge ngwadi dale. Malen uñale chage Jesucristo be chieni gire Chube be gerule no ba ole ene: “Ba boidu tanre daga ngwale cha gerua gdale agwa ba toidu cha takalin kare, malen e giti nege cha be ba gai ngwange no aini toi diali cha ole nga ngaña giti.” Chube be gerule ene ulita ba ulita ole. Uñale chage Chube kle age no trate diali kwian ta no alin malen cha ñage gerule ba ole Chube be age no tanre ba alin. 6 Chube kweri kiraske ama ji gbe kwian age me no giti. Malen cha ñage gerule ba ole, ba kwian Jesucristo gerua ganga kwian na ba gbe boi tanre daga ngwale Jesucristo gerua gdale, kwian kle ba gbe boi daga ngwale giti Chube be ba jia gbe. 7 Chui bdaglige Jesucristo che Chugagwalla be chieni nga ngaña giti nga dba ai giti ule lle boanga Chube alin ngle ole, lle boanga e kiraske tanre ama be chie Jesucristo ole ule jita gwade chralla tigenga kare. Chui ege Chube be ba jwen siere boi daga ngwalege kaire chui ege gwangerugu che ulita Chube gerua Jesucristo giti gaba ulia mi boi dare daga ngwale Jesucristo gerua gdale. 8 Kaire chui ege Jesucristo be ji gbe kwian giti kwian bai me Chube uñe me Chube gerua che Chugagwalla Jesucristo giti gai ulia me geru e gbe gdadi. 9 Jesucristo be kwian e gbe ji chuge diali dale ji chuge daga ngwale ngwadi nga dbigu giti Jesucristo be chieni gire, kaire kwian e be chege sugekare Jesucristoge ni ama be ñage gwage bdagli Jesucristo age no mo kirallaske ngledige. 10 Be boi ene ulita chui bdaglige Jesucristo be chieni chuiage, kaire chui ege kwian Jesucristo gerua ganga be Jesucristo chuia ollade be ama gai ngwange no mo Chugagwallale kweri, kwian ulita bai Jesucristo gerua gaba be chege tañachuge tanre no Jesucristo giti. Kaire chui ege ba be chege Jesucristo ole, ba Jesucristo gerua gau ulia cha geru ketu bage kare, geru e giti ba be chege Jesucristo ole ule kwian na ulita Jesucristo gerua gaba ole chui ege gerule no Jesucristo giti. 11 Cha diali kle tañachuge Jesucristo be chieni chuia giti, uñale chage ba be chege ama ole chui ege malen cha gerule Chube ole ba ulita giti diali, cha kle gerule ene: “Chube, noare ba kwian e gau mau alin, ama kle mo ta gbe toi no diali ba takalin kare agwa ama gballa me ñage chage no mo kiralla giti ba takalin kare, ba alin kiralla giti ama ñage toi no, malen cha takalin ba ama chudaboi toi no ba gwa giti ba takalin kare, ba kira kete amage toigda no trate ba gwa giti. Kaire ama kle ba gai ulia kle mo ta gbe lle boi no ba alin diali kwianske, ba ama chudaboi lle boi no ba kiralla giti ama ulita takalin kare.” Cha kle gerule ene Chube ole ba giti, 12 ene Jesucristo giti Chube be ba kira gbe toi Chube takalin kare kwian na gwa giti, gire be suge kwian e ulitage ulia Jesucristo kle age no ba tale malen ba kle chage no Chube takalin kare, ene kwian be gerule no Jesucristo giti Jesucristo kle age no ba alin giti. Gire Jesucristo be chieni chuiage nga be suga noare Jesucristodi kaire Chubedi ba mo ta gbu toi no Chube takalin kare giti, ama be gerule no ba giti be age no ba ulita alin.
1 Daba Chubenu Jesucristo giti, cha gerukalin dare ba ole Jesucristo che Chugagwalla be chieni chuia giti, chui ege ama be che lite ole chege diali toi ama ole ule. Ba kle geru keruchuge tanre Jesucristo nu chkebani giti, ba geru e keruchuge ene Jesucristo giti gire ba me mo gbe tañachuge geru e gai ulia blikare kaire ba me kwachie dale. Kwian gweale gerule ba ole Chube Oña ama ta gbaba Jesucristo chkebani, kwian na gerule: “Cha Pablo keruchugu gerule Jesucristo chkebani”, kaire kwian na gerule: “Pablo chada degu Jesucristo chkebani.” Ba kwian keruchuge gerule ene, ba me ama gerua tallade, ama kle gerule ngwale, ulia Jesucristo bebi chieni. 3 Ba me mo chuge ngwadi kwian na ba anblite ngwale Jesucristo chieni chuia giti. Uñadale bage Jesucristo bebi chieni gire be boi ene: Kwian tanre be jwlite Chube dollale gire kwian onbre gdaite me no be mo tke dole Chube gerua giti, ama be age ulita che dolla Satanás kirallaske. Kwian onbre e gdaite be mo gbe kweri Chube ulia kare kwianske, kaire ama mi takalin kwian lle na gai chubere, kwian e be takalin kwian na ulita gwage ama alindi kweri Chube kare gerule no ama alin giti. Kaire ama be joge u gerungwa Chube ulia olege una Jerusalénge, ne ngwadi ama be gerule kwian ulita ole: “Cha Chube ulia, cha ba chugagwalla kweri, ba cha gai ba chubeale, ba cha gadale dage.” Ama be gerule ene kwian ulita ole, agwa bdagli Jesucristo be kwian onbre e kage nga dbigu giti ji chuge tanre kwian e agedu me no Chube dollale giti. 5 Ba tachkedale cha kledu ule ba ole una Tesalónicage gire cha ba ta gbu geru ai amaña giti. Ba me mo chuge ngwadi anblitange ngwale Jesucristo chieni chuiage giti. 6 Uñale ba ulitage Chube bebi kwian onbre e chuge ngwadi mo gbe kweri Chube kare kwianske malen onbre e bebi chke age me no kwianske. Nege tanglebi Satanás kle kwian tanre ta gbe age Chube gerua dollale skwlenre agwa onbre gdaite e be age ma tirare Satanás kirallaske. Chube takalin ngaminegirege onbre e chkedale gire Chube be ama chuge ngwadi age ama takalin kare Chube dollale. 8 Kwian onbre e be mo kaite Chube kare kwian gwa giti, agwa Jesucristo be chieni kiraske tanre gire Jesucristo gwa giti onbre e ni ñage chege kira molen dare, Jesucristo be gerule alin allabi kwian onbre gdaite e ole gire onbre e be jogekeda. 9 Bebi boi ene ulita kwian onbre e ole gire onbre e be age ulita Satanás kiralla giti, Satanás be kwian onbre e gbe kwian oga dodade kaire lle daga ngwale no tanre dodade kwian ulita gwa giti kwian ngwale me ñage dodade kare. Kwian ngle be tañachuge onbre e kle age Chube kiralla giti agwa me dale ama kle age ulita Satanás kiralla giti. 10 Ama be age ene kwian gwa gbe modi ngwale, ama kle sole. Kwian bai me Chube gerua Jesucristo giti gaba ulia kwian ene Satanás be onbre gdaite gbe ama anblite ngwale. Kwian e me Chube gerua ulia Jesucristo giti gau tiendale gitiru ji chugege agedu me no gdale, 11 malen Chube be onbre gdaite e chuge ngwadi age tanre me no sole ngwale kwian anblite. Kaire Chube be kwian ulita chuge ngwadi mo ta gbe geru e ngwale gai ulia. 12 Ene kaire kwian ulita bai geru ngwale e gai ulia onbre e giti ama kle tañachuge geru e noare, nga suga noare amadige age me no ama takalin kare diali, kwian e ulita giti Chube be ji gbe tirare ama me geru ulia gau kbiale. 13 Chube be kwian bai me ama gerua Jesucristo giti gai ulia gbe ji chuge tirare, agwa ba kwian una Tesalónicamu mi boi ene, ba kle Chube gerua ulia Jesucristo giti gai mo tale malen cha kle gerule no diali Chube ole ba giti, cha kle gerule ene: “Chube, nga suga noare chadige daba una Tesalónicamu giti. Ba noare ama ole, nge jondege alin ba ama gaubi ba alin ene ama tien gitiru ji chugege age me no gdale. Cha ba gerua ulia Jesucristo giti ketu kwian ege gire ba Oña ama ulita ta gbu ba gerua gai ulia. Nege ama banu ama ta no trate ba gwa giti, ene ama ñage toi ule diali Chugagwalla Jesucristo ole ba ole ba ngwadige nga ngaña giti. Ba Oña kle ama ulita ta gbe toi no diali ba kirallaske age trate no ba takalin kare. Ulia ba noare ama ole.” Cha kle gerule ene ba ulita giti diali Chube ole. 15 Cha daballa cha ibotea Jesucristo giti, cha gerule ba ole, Chube agedu no no ene ba ulita alin malen ba kledale diali Chube gerua uliadi, agwa ba me geru ngwale kle chage baske gai, ba mo ta gbadale tañachuge gwangerugu Chube gerua ulia giti, geru e ulia cha ketu bage cha kledu ba ole gire, kaire cha chada degu ba alin geru ulia e giti, ba me geru ngwale gai dale. 16 Che Ñenua Chube ama noare che ole, diali ama kle age no che alin, Chube che ta gbe, ene uñale chege Chube be che manade chui diali dale alin be age no che alin Jesucristo giti ama gerudu be age kare. Cha takalin Chube che Ñenua ule Jesucristo che Chugagwalla ole ba ulita ta gbe dare nga suga no ole ba kle boi daga ngwale Chube gerua gdale giti. Kaire cha takalin Chube ba kira gbe me kennga gerule no ulita Jesucristo giti kwian na ole age no ulita daba na alin Chube takalin kare.
1 Cha takalin ba ulita gerule cha giti Chube ole, cha takalin Chube gerua Jesucristo giti joge chke kwian nga ulitamuge ene kwian nga ege ñage Chube gerua gai ulia ta suga no ole ba ulita Chube gerua gau gwangea kare. 2 Kaire cha takalin Chube cha jwen siere kwian agenga me no cha dollale kote. Cha takalin kwian ngle Chube gerua Jesucristo giti gai ulia cha giti, agwa uñale bage kwian ulita me kle tañachuge Chube gerua giti me kle Chube gerua Jesucristo giti gai ulia, malen ba gerudale Chube ole cha giti. 3 Chkedale uñale bage ulia Jesucristo che Chugagwalla ama no, Jesucristo kle ba ole ba chudaboi diali ama be ba ta gbe toi no ama kiralla giti, gire che dolla Satanás be ta mo chugakalin ba ole ba gbe age me no agwa Jesucristo be ba chudaboi be ba manade, ama mi ba chuge ngwadi boi daga ngwale che dolla Satanás takalin kare. 4 Chage uñale trate ba Jesucristo gau mo Chugagwallale malen Jesucristo kle ba ta gbe age ulita cha geru ketu bage kare cha kledu ba ole gire, kaire uñale chage ba be age ulita cha gerule ba ole kare chui aige gwangerugu diali. 5 Cha takalin Jesucristo che Chugagwalla ba chudaboi ba ta gbe no daba na ole Chube no ba ole kare, kaire cha takalin Jesucristo ba ta gbe chage gwangerugu Jesucristo geruadi me tallade ba kle boi daga ngwale giti Jesucristo me mo talladu ama boidu giti kare. 6 Cha daballa cha ibotea Jesucristo giti, Jesucristo che Chugagwalla kle cha ta gbe gerule ba ole, ba cha kerua gbe gdadi. Daba gweale Jesucristo gerua ganga kle toi baske me ta lle boakalin, ama kle kianchie, daba enege ba mo lingadale siere, cha me kle gerule ba me ñage gerule daba e ole agwa ba me ñage age me no ama kle age kare, ama me kle toi no trate cha ba tku tangle kare, ba ama chugadale ngwadi sugekare. 7 Ba ulitage uñale kwian Chubenu toidale mine kwian me Chubenuske, ba gwagedu chadi cha toidu mine baske, ba mo ta gbale toi no ene cha toidu cha chagedu kare baske. Cha me toidu baske ngwale, cha kledu baske diali cha lle bo mau alin mo kodi ene cha ñadu toi no, 8 kaire cha me mo manadu daba na llea giti cha me bligda kadu dabage ngwale. Cha me agedu ene agwa cha lle bo diali tanre gire ene cha ñadu mo manade agali cha lle bo ñanale, cha me tadu chegekalin jiske ba ulitage. 9 Cha Chube gerua Jesucristo giti traganga ba ole malen cha ñadu lle kade bage toigda, agwa cha me agedu ene dale. Cha lle bo ba gwa giti ene chkedale uñale ba ulitage che lle boi giti che lle molen me tañachuge daba na alin ñage lle kete chege toigda. Cha lle bo ba gwa giti mo alin ene kaire ba agedale cha agedu kare lle boadale mo managda. 10 Cha kledu baske gire cha geru ketu ba ulitage ene: “Kwian bai me lle boi, kwian ene me blidale.” Cha gerudu ene ba ole. 11 Agwa chage nu chkeba uñale daba gweale baske me ta lle boakalin, diali ama kle chui ulita kagenga ngwale kle chege gerule daba nadi kaire ulita chkekalin uñale amage kwian na kle toi mine. 12 Jesucristo che Chugagwalla kle cha ta gbe gerule ba ole daba bai kle toi ene ma no ama agali mo ta gbe lle boi, ene ama ñage igi jwen maunu sugekare mo managda. 13 Cha daballa cha ibotea Jesucristo giti, ba ulita me mo ta gbe skwatige toi no ba kle toi kare age no kwian na alin, diali ba mo ta gbadale daba chudaboi Chube takalin kare. 14 Daba gweale me cha gerua chada ai giti gbakalin gdadi me ta agekalin cha kle gerule kare, ba bai kle geru chada ai giti gai dage ulia, ba mo lingale siere daba me geru gakalinge, ba me skate amage age ama kle age kare, ene daba e be ibuchie kwian gwa giti me cha gerua gakalin gdale. 15 Cha takalin daba e cha gerua gbe gdadi toi Chube takalin kare, malen ba me skochiedale amadige ba me gerule me no amadige ba me mo tke dole ama ole, agwa ba ama ulladalenga mo daballa kare ama ta gbe ama kle age me trate Chube gwa giti, ene ama ñage mo ta blite toi Chube takalin kare. 16 Cha gerule ba ole, cha takalin Jesucristo che Chugagwalla ta suga no mauña agali ba ta gbe nga suga noare ole diali chui tangle ba ulita kle boi giti, cha takalin suge trate bage Jesucristo kle diali ba ulita ole, cha takalin ama age no ba ulita alin. 17 Cha Pablo chada ai degangu ulita ba ulita alin, nege cha agali kle mo ka dege mo kodi chada ai giti bdagli gbi kage ba ulita alin, diali cha kle chada degange kage kwian alin gire cha kle mo ka dege chada giti bdagli, ene chke uñale kwiange ulia cha kle chada kage ama alin. 18 Cha takalin Jesucristo che Chugagwalla age no no ba ulita alin. Geru ai ene ulita cha Pablo chada degangu ba kwian Chubenu ulita una Tesalónicage alin. Che kle meni.
1 Cha Pablo chada ai degange ba alin Timoteo: Chube che jwannga siere kaire Jesucristo ama cha gbu ama gerua ketangale, Jesucristo che Chugagwalla, ama be chieni, che kle ama chieni chuia manade ngwange nga suga no ole. Timoteo, ba Jesucristo gerua gau ulia giti ba cha kirolla kare, cha takalin Chube che Ñenua kaire Jesucristo che Chugagwalla age noare ba alin ama tai dage bage ama ba ta gbe suga no diali, ene ba tale nga be kle suga no no badi, cha takalin ba toi Jesucristo talla ole diali. 3 Timoteo, che kledu ule una Efesoge, cha bebi joge nga kweri Macedoniage gire cha gerudu ba ole ba chegedale una Efesoge. Nege cha gerule nabitaite ba ole ba chegedale ngmadi una Efesoge daba ulita tke tangle dare geru uliage Jesucristo giti. Kwian gweale kle una Efesoge kle daba tke tangle geru ngwalege, ba me kwian ene chuge ngwadi daba tke tangle dare, ama me kle geru ulia dbe. 4 Ama diali kle tañachuge geru unsuialin alin giti, kaire ama kle tañachuge mo enusulian unsuialin ulita agedu kare, ba me kwian ene keruchuge. Geru unsuialin tanre ngwale kle, kwian tañachuge mo kaire kaire geru e giti, kwian ulita chege geru trage tanre geru ngwale giti, ulita ta me chege salengwli geru giti gire kwian ulita kira bate modi geru giti, ta ene ole ama me ñage daba na tke tangle geru uliage Chube takalin kare. Kwian ulita ene me che chudaboi geru Jesucristo giti dbe kwian nage, Chube takalin kwian ulita Jesucristo gai ulia. Ba gerudale kwian me geru ulia dbanga ole ama me tañachugale dare ama kle tañachuge kare, me ñage daba tke tangle dare geru ngwalege, e me kwian chudaboi geru ulia gai. 5 Ba gerudale ene kwian me geru ulia dbanga ole, ene be suge amage ama mo ta blitadale ene ama ñage age Chube takalin kare, ama me agedale ama agali takalin kare. Chube takalin che mo ta gbe ulia no trate ulita daba ole. Che agedale no ta no giti, che agedale no diali Chube takalin kare ene che me jiske, che mo ta dbadale ulia Chube gai me gerule alin: “Cha Chube gai ulia.” Kwian mo ta gbadale age no diali ulita ene, gire ama ñage ta dbe no ulita daba ole. 6 Kwian gweale me mo ta gbe age no ene malen diali ama kle chege geru trage geru ngwale alin giti. 7 Ama kle mo ta gbe kwian na tke tangle Moisés nu Chube gerua degaba unsuialin giti, ama kle mo ta gbe kwian tke tangle ta giti Moisés nu Chube gerua degaba giti, agwa gire ama agalige geru me suge ni ñage tachke Moisés nu Chube gerua degaba gerule kare me ñage kwian tke tangle no, ama ta kle nga jereske kare geruge. 8 Uñale chage Moisés nu Chube gerua degaba kwian alin geru e no, kwian bai kaire daba tke tangle geru ege Moisés nu Chube gerua degaba sugedale amage lledale Chube geru e gbu kwian alin. 9 Kwian kle age no ulita geru kle gbaba me kwian ene gbe jiske, geru kle gbaba kwian agenga me no ulita alin, geru kle gbaba kwian ai kare gbale jiske: Kwian me ta agekalin geru gbaba gerule kare, ama age me no geru dollale. Kwian me Chube gerua gai ulia, ama age me no alin diali. Kwian alin Chube me kweri, ama ta kle sugekare Chubege. Kwian mo ñenua gweda mo chebia gweda, kaire kwian daba gwangada. 10 Muirenu onbrenu kle mo chuge ke giti. Onbre chage mo salengwli ole onbre kle chage muinga ole kare, muinga chage mo salengwli ole muinga kle chage onbre ole kare. Kwian skwe boi dabage gire daba gbe lle boi ngwale mo alin. Kwian sole daba ole. Kwian daba me jiskenga gbe jiske. Geru kle gbaba kwian ulita alin bai kle age ene Chube dollale, kwian ulita bai kle age ene me kle age geru ulia gerule kare. 11 Geru e Chube gerua noare, Chube cha gau ama gerua noare trage kwian ulita ole, geru e ole kwian mo ta blitadale cha kle geru dbe kare ole. 12 Jesucristo che Chugagwalla diali kira kete chage lle boi ama alin, nga suga noare chadi e giti. Uñale amage cha be lle boi no ama alin, malen ama cha gau ama cha gbu geru amanu trage no diali kwian ulita ole, nga suga noare chadi. 13 Ngeru cha agedu tanre Jesucristo dollale, cha gerudu me no amadi, cha chagedu kwian ama gerua gau ulia nate ka boi kwian ole geru e giti, diali cha tadu kwian ene tkakalin skage. Jesucristo gwagedu chadi lle e boi, cha bebi ama gai ulia, me uñadu chage cha kledu age Chube dollale, ulita sugedu chage age no moge. Cha ene gire Jesucristo taidu dage chage, ama agedu no cha alin, ama cha gau lle boi ama alin, cha agedu me no ama talla mliunga ulita, gire ama cha gbu ama gerua dbe. 14 Nege cha Jesucristonu, malen diali ama kle cha ta gbe Chube gerua gai ulia gwangerugu, kaire ama kle cha ta gbe ma no diali mo ta dbe no daba na ole ulita. Ulia Jesucristo agedu no cha alin. 15 Jesucristo chiu nga dba ai giti kwian ulita jwen siere ta blite age no Chube takalin kare, ene kwian mi ji chuge bdagli agedu me no gdale. E ulia ulia malen kwian ulita geru e gadale ulia. Ñage gwage chadi, cha kwian gdaite agenga me no me no kwian na ulitage. 16 Cha ene Chube taidu dage chage, cha agedu me no ama talla mliunga. Nege kwian agenga me no na ñage gwage chadi, ene suge amage Jesucristo ta no molen kwian alin bai ama gai ulia, Jesucristo ñage age ama alin Jesucristo agedu cha alin kare. Kwian bai Jesucristo gai ulia Chube be ama ta blite, ene Chube be kle ama ole diali. 17 Che Chugagwalla Chube gdaitre alin allabi, ama me jogeda, amadi che me ñage gwage. Chube kwian ulita Chugagwalla unsuialin, nege, kaire diali gwangeruda alin. Che ama gadale dage, che gerudale noare ama giti diali chui ulita. Ene nobi. 18 Timoteo, ba cha kirolla Jesucristo giti, cha gerudu ba ole ba me kwian kle daba tke tangle geru ngwalege chuge ngwadi daba tke tangle dare, ba daba ulita tke tangle geru ulia Jesucristo gitige. Me cha alin allabi kle gerule ene ba ole, sbali kwian Chube gerua ketanga gerudu ba ole: “Chube ba gau ama gerua dbe kwian nage.” Ba tachkedale geru e giti Timoteo, ene ba be kira gai lle boi no Chube alin, kwian ba dollale Chube gerua giti ba me tallade, ba chage gwangerugu lle boi Chube alin. 19 Ba Chube gerua gadale ulia diali, ba me geru e chuge ngwadi, kaire ba agedale no diali, ene ba ta suge bage ba me jiske. Kwian gweale Chube gerua gau ulia, uñale amage me no age me no agwa ama agedu me no tanre, diali ama agedu ene malen bdagli ama Chube gerua chugu ngwadi. 20 Kwian kada Himeneo, na kada Alejandro agedu ene, ama gerudu tanre Chube dollale malen cha ama chugu ngwadi age me no che dolla Satanás kirallaske, ene ama be age tanre me no gire bdagli be suge amage ama kle age me no, ama me ñage gerule dare Chube dollale.
1 Cha gerule ba ole, ba ulita bai kaire Chube gaba ulia gerudale Chube ole kwian nga ulitage giti, ba chudaboi kade Chubege kwian ulita alin diali. Chube age no kwian ene alin gire ba gerudale: “Chube, noare ba kle kwian ulita chudaboi, noare ba kle ama manade.” 2 Ba me ta jogenga gerule Chube ole che chugagwalla nga dba ai ulitage giti, ba chudaboi kade Chubege che chugagwalla nga dba ai giti alin, ene Chube che chugagwalla nga dba ai giti ta gbe kwian kage no ta gbe kwian chudaboi, ene che ulita ñage toi no. 3 Gerule ene chugagwalla nga ulitage giti, kaire gerule kwian nga ulitage giti Chube ole, e no. Ba age ene giti Chubedi nga suga noare. Chube che jwannga siere, 4 ama takalin kwian ulita geru amanu ulia uñe kwian ama gai ulia, ene bdagli kwian ñage tien gitiru ji chugege agedu me no gdale. 5 Chube gdaitre alin allabi kwian ulita alin, ngeru kwian ulita Chube dollale, Jesucristo alin ñage kwian ta gbe no Chube ole. 6 Jesucristo chiu nga dba ai giti kwian kare, ama mo chugu ngwadi kwiange mo gweda, ama jokeda kwian ulita agedu me no Chube dollale giti, ene kwian me ji chugadale bdagli. Chube chui gbu Jesucristo kage, Jesucristo boidu ulita Chube gerudu kare, ene chke uñale kwian ulitage ulia Chube ta kwian ulita jwankalin siere ji chugege age me no gdale. 7 Chube cha gau geru Jesucristo giti dbe kwian me israelita alin, Chube takalin cha ama gerua kete kwian me israelita ulitage, ama takalin cha kwian me israelita ta gbe ama geruadi. Cha kle gerule ulia cha me kle sole, cha me kle age mau tale, Chube cha gbu ama gerua trage, cha ama gerua gai ulia diali. 8 Kwian nga ulitage bai nu Chube gerua Jesucristo giti gaba ulia nga bainige kaire kle mo lite geru trage Chube giti, kwian onbre kwian muire kle mo lite ene Chube geruadi cha takalin kwian onbre ulita gerudale ta no trate giti Chube ole, me gerule ta skole dabadi ole, me gerule tañachuge me no dabadi ka boi me no daba ole. 9 Kaire cha takalin muinga ulita mo ngama dbadale no trate modi. Muinga me tañachugadale mo tale: “Cha ta toikalin lle no noske alin, cha takalin sarsia kwanglege, cha takalin igigwa kwanglege, cha ta mo ngama tkakalin ñometra kwangleske, cha mo chugaga dodade lite trate cha ta lle tanre kwangle gbakalin mo chugagage. Cha mo dodade ene kwian ulita be gwage chadi cha noare.” Muinga Chube uñe me tañachugadale ene, ma no muinga tañachuge mo tale muinga ta mine Chube ole, ma no muinga nu Chube gerua gaba Jesucristo giti ulia age no trate ulita Chube takalin kare, diali ama mo ta gbe age no kwian na gwage, ene kwian gerule ama giti ama muinga no ama kle mo ta gbe chage Chube ole. 11 Muinga kaire onbre mo lite ole Chube geruadi, muinga ulita chegedale kamne Chube gerua keruchuge alin, muinga ulita kwian tkanga tangle gadale dage. 12 Cha me takalin muinga kwian mo litaba Chube geruadi ulita tke tangle, muinga ulita chegedale kamne. Kaire cha me takalin muinga mo gbe ma kweri onbrege onbre kage. 13 ¿Mineade gerule muinga me ñage mo gbe ma kweri onbrege? Chube Adán dodadu ngeru, Adán kwian onbre. Bigwa Chube Eva dodadu, Eva kwian muire. 14 Adán me mo anbligu che dolla Satanáge, Eva mo anbligu Satanáge gire Eva agedu me no Chube dollale, ama me agedu Chube gerudu kare, ama agedu Satanás gerudu kare. Eva agedu me no ene, malen cha me takalin muinga mo gbe ma kweri onbrege onbre kage. 15 Chube muinga dodadu kirogwa manade. Chube noare muinga ulita ole. Muinga bai mo ta gbe Chube gerua Jesucristo giti gai ulia diali bai mo ta gbe age no trate mo onbrella gdaitre alin ole onbre gai dage no, muinga ene kle toi Chube takalin kare ama be joge toi Chube ngwadi, ama mi ji chuge agedu me no gdale.
1 Geru ai ulia: Kwian gweale tañachuge mo tale: “Cha ta lle boakalin Chube alin, cha takalin kwian Chubenu ulita cha gai mo chugagwallale lle boi ama ole”, kwian tañachuge ene ama kle tañachuge no, lle e noare ama alin boadale. 2 Kwian Chubenu daba gai mo chugagwallale onbre ai kare gadale: Kwian Chubenu chugagwalla chagedale no trate diali kwian ulita gwa giti, ene kwian na me ñage gerule me no amadi. Ama toidale mo muingalla gdaitre alin ole. Ama me mo chugadale ngwadi age me no. Ama me mo chugadale ngwadi age ulita ama ta agekalin kare. Ama mo gadale dage kwian ulita ole. Ama kwian na gadale ngwange no mo ullage. Uñale amage kwian tke tangle mine Chube geruage. 3 Ama mo ta gbe me lle gage janga me chage llale. Ama me mo ta gbanga kira bate daba ole, ama toi taingwli daba ole. Ama agenga no kwian alin. Ama me tañachuge igi alin giti. 4 Mo ullaske ama mo gbadale chugagwallale no mo kirogwalla gbe mo gai dage age ama gerule kare, 5 mo ullaske ama me mo gbe mo kirogwalla chugagwallale no, gire ene kaire mi ñage mo gbe kwian Chubenu chugagwallale no. 6 Kwian Chubenu me Chube gaba ulia sbali me ñage chege kwian Chubenu chugagwallale. Kwian Chubenu daba me Chube gaba ulia sbali gbe chugagwallale daba e be ñage tañachuge mau giti: “Cha kweri kwian no, malen kwian cha gau ama chugagwallale.” Che dolla Satanás tañachugu ene, amage sugedu ama kweri, malen Chube ama gbu jiske Chube ama mliunga sugekare. Kwian age Satanás kare Chube be age kaire kwian ene ole. 7 Kwian Chubenu chugagwalla chagedale no trate diali kwian me Chubenu gwa giti, ene kwian me Chubenu gwage amadi ama no. Kwian Chubenu chugagwalla age me no, ene kwian me Chubenu ñage gerule me no kwian Chubenu chugagwalladi, e dolla Satanás takalin kare. 8 Ene kaire kwian Chubenu chugagwalla chudaboanga ai kare gadale: Ama agedale no diali, ene ama no kwian na gwage, kwian na ama gai dage. Kwian ulita ole ama gerudale diali ulia. Ama mo ta gbe me lle gage janga me chage llale. Ama me tañachugadale igi gai lle giti ngwale daba ngeru. 9 Ama Chube gerua Jesucristo giti gadale ulia diali, me tañachugadale sidri geru e me ulia, Chube ama ta gbe, ene chke uñale amage Chube gerua ulia. 10 Kwian be chege kwian Chubenu chugagwalla chudaboangale, ngeru kwian Chubenu ulita gwagedale amadi chui gwealege ama be chage mine, ama chage no Chube takalin kare, gire kwian Chubenu ñage ama gbe chugagwalla chudaboangale. 11 Kaire muinga agedale diali no mo onbrella kare, ene ama no kwian na gwage, kwian na ama gai dage. Ama me gerudale ngwale kwiandi. Ama me mo chugadale ngwadi age me no. Ama mo ta dbadale lle boi no diali. 12 Kwian Chubenu chugagwalla chudaboanga toidale muinga gdaitre alin ole. Ama mo gbadale mo kirogwalla chugagwallale no mo ullage, kaire mo gbadale kwian na kle toi mo ullage chugagwallale. 13 Kwian chege kwian Chubenu chugagwalla chudaboangale, ama lle boi no ama no kwian na gwage, kwian be ama gai dage. Kaire ama gerule Jesucristo giti kwian be ama keruchugakalin, ene ama be ta gbe ma no gerule Jesucristo giti kwian ole. 14 Cha kle tañachuge joge tienda blike badi, me uñale chage cha ñage joge blike ba ngwadi o me, malen cha kle chada ai ulita degange ba alin. Cha ba ta gbe chada ai giti, ba kwian Chubenu ulita mo ta gbadale chage no Chube takalin kare. Chube gwade, ama gerua ulia, kwian ulita bai Chube gerua gaba ulia ama Chubenu. Kwian Chubenu ulita geru tragadale no Chube gerua giti daba na ole, Chube gerua manadale diali no me kwian na chuge ngwadi geru ulia blite nganake. 16 Ulia Chube geru noare ketu chege, geru e kweri che alin, geru e gerule Jesucristo giti: Jesucristo chku nga dba ai giti kwian kare. Chube Oña giti chku uñale kwiange Jesucristo agedu no trate ulita nga dba ai giti. Lle boanga Chube alin nga ngaña giti gwagedu Jesucristodi age no ulita. Geru Jesucristo giti no chagedu nga ulitage, kwian nga ulitage geru e keruchugu, kwian nga ulitage gweale geru Jesucristo giti gau ulia. Chube Jesucristo duni nga ngaña giti, Chube Jesucristo gbuni Chube kle ngwadi. Ulia geru e noare, geru ulia, kwian Chubenu ulita geru e manadale no.
1 Kwian Chube gerua ketanga, amage Chube Oña geru ketu, Chube Oña gerudu trate ama ole: “Chui bdagli ngwange kwian gweale Chube gaba ulia be Chube talla mlienga be joge siere Chube geruage gire be chage geru na me ulia nate. Kwian ene ulita be chage kwian kle daba tke tangle che dolla geruage keruchuge, geru e geru ngwale ulita, kwian be geru ngwale gai ulia be Chube gerua ulia chuge ngwadi.” 2 Cha gerule ba ole Timoteo, kwian e be takalin kwian daba tkanga tangle geru ngwalege keruchuge, daba tkanga tangle e me gerule ulia me daba tke tangle geru uliage. Ama age diali tanre me no, me suge dare amage ama kle age me no, ama tañachuge ama no. 3 Kwian daba tkanga tangle geru ngwalege gerule: “Kwian me ñage mo jwen kaire me ñage bligda ulita gute, bligda gweale me no gutadale.” Kwian e me kle gerule ulia. Chube bligda ulita dodadu kwian alin gutadale. Kwian bai kaire Chubenu Chube gerua gaba ulia ñage bligda ulita gute, ama gerudale no Chube ole bligda giti uñale amage Chube lle ulita dodadu ama alin. 4 Chube nu lle ulita dodaba, lle e ulita no. Chube bligda ulita dodadu gutadale kwian alin, e ulita no, che me ñage gerule bligda gweale me no sugaska gutadale. Ulia Chube bligda ulita dodadu che alin, che ñage bligda ulita gute, 5 Chube gerua gerule ene. Che gerule no Chube ole bligda giti gire che bligda ulita gute, e noare Chube alin. 6 Timoteo, ba kwian Chubenu ulita tkadale tangle no cha gerudu kare bligda giti. Ba kwian tke tangle ene ulita, ene ba kwian Chubenu chudaboanga no Jesucristo alin, ene be suge kwian ulitage ba nu Chube gerua jwanba no, ba mo ta gbaba Chube gerua gai dage, ba kle age Chube gerua gerule kare. 7 Kwian gerule ba ole geru gweale me no unsuialin giti ba me ñage geru e keruchuge geru e gbe gdadi, geru e me gerule ulia Chube giti. Ma no ba mo ta gbe tañachuge diali Chube gerua giti ta gbe age no diali Chube takalin kare. 8 Che kolale, che jrite, ene che kwangitra jrite no kira giti. E ulita no che alin, agwa e sugeti alin. Kaire che mo ta gbadale tañachuge diali Chube gerua giti ta gbe age ulita ama takalin kare, ene che chege Chube kirallaske. E no che alin nege nga dba ai giti kaire chege che alin diali chui na ulita bdagli nga ngaña giti Chube ngwadi. 9 Cha gerudu kare, e ulia, kwian ulita ñage e gai ulia. 10 Uñale chege e ulia, malen che mo ta gbe diali lle boi no Chube alin. Kwian tanre ka boi che ole Chube gerua giti, che me tallade, che mo ta gbaba Chube alinge. Chube gwade, ama alin ñage kwian jwen siere bai kaire Jesucristo gai ulia, ene kwian me ji chuge bdagli agedu me no gdale. 11 Ba gerudale kwian Chubenu ulita ole, ba ama tkadale tangle Chube geruage, kwian nu Chube gerua gaba me ñage tañachuge geru ngwale giti. 12 Ba kwian Chubenu ulita tke tangle Chube geruage, ama gweale gwage badi gerule ba me ñage kwian tke tangle ba biale me geru uñe. Kwian gerule ene ba me talladale, ma no ba age no ulita ama gwa giti, ba gerule no diali ama ole, ba ama ulita gai dage, ba ta dbe no ama ulita ole, ba Chube gai ulia diali, ba age no trate ulita diali Chube takalin kare. Ba chage ta age no ene ole, kwian Chubenu ulita gwage badi be suge amage ama chagedale ba kle chage kare, ba kwian biale no, ama me ñage gerule me no badi. 13 Cha bebi joge chkeni ba ngwadi, diali ba mo litadale kwian Chubenu ulita ole, ba Chube gerua degaba batadalenga kwian Chubenu ulita alin, ba kwian Chubenu ulita ta gbe Chube geruadi, kaire ba ama tke tangle no Chube geruage. 14 Sbali kwian Chube gerua ketanga gerudu ba ole: “Timoteo, Chube geru ketu chage ba giti Chube ba gau ama gerua Jesucristo giti dbe kwian ulitage, nege joga lle e boi Chube gerudu kare, Chube be kira kete bage ama gerua dbe.” Kwian Chube gerua ketanga gerudu ene ba ole, kaire chui amañage kwian Chubenu chugagwalla ulita ko gbu ba giti gire Chube ba ta gbu lle boi ama alin. Cha gerule ba ole ba me ñage e kagenga ngwale, Chube ba gbu lle boi ama alin. 15 Ba mo ta dbadale diali lle boi no Chube takalin kare, ba lle boi ene gire kwian ulita ñage gwage edi diali ba kle lle boi ma no. 16 Ba kwian Chubenu tkadale tangle no Chube geruage, ba chagedale no Chube takalin kare. Ba mo ta gbe age ene ulita diali, ene ba mi joge siere Chube geruage, kaire kwian bai kle ba keruchuge mi joge siere Chube geruage, ba age ene diali ba ulita be tien gitiru geru ngwalege.
1 Kwian onbre juma Chubenu gweale age me no, ba me ka boi ama ole, ba mo ta dbale no ama ole ba mo ta dbe mo ñenua ole kare, ba gerudale no ama ole ta giti ama agedu me no giti. Ba mo ta dbale no onbre biale ole ba mo ta dbe mo daballanu ole kare. 2 Ba mo ta dbale no muinga juma ole ba mo ta dbe mo chebia ole kare. Ba mo ta dbale no muinga biale ole ba mo ta dbe mo iboteanu kare, mo tale me tañachuge me no sidri ama ulitadi. 3 Ba gwage muinga gwealedi muinga onbrella jogebada muinga chegeba gballa ama chudaboanga me, ba ule kwian Chubenu ulita ole muinga ene chudaboadale. 4 Muinga gweale me chege ñengulage, ama chege kirollage bdadallage, kirolla ñage mo chebia chudaboi kaire bdadalla ñage mo sulian chudaboi, kirolla kaire bdadalla me ñage chudaboi kade kwian nage mo chebia alin mo sulian alin. Chebia, sulian ama manadu no ulita jo juma, malen kirolla mo chebia chudaboadale bdadalla mo sulian chudaboadale, Chube gwage age ene e ulita no, Chubedi nga suga no kwian age ene mo bitalla alin. 5 Muinga me chege ñengulage, ama me kirolla molen me bdadalla molen me bitallanu molen, muinga ene mo chugadale ngwadi Chube kote, ama mo ta gbadale gerule Chube ole diali nga ju nga jere chudaboi kade Chubege. 6 Muinga me chege ñengulage ama me tañachuge Chube giti ama ta agekalin ama takalin kare, chagenga ngwale sugekare Chubege, muinga ene ta kle bate Chubege jaba kare, ama ta me kle Chube ole ni age Chube takalin kare. 7 Timoteo, ba gerule kwian Chubenu ulita ole ama muinga me chege ñengulage chudaboadale ene cha gerudu kare. Kwian Chubenu age ene ama kwian no, ama kle age no Chube takalin kare. 8 Kwian Chubenu gweale gwage mo bitalladi, mo bitalla me kle toi no, kaire chebialla, sulianlla, kwian Chubenu me tañachuge mo bitalla ene giti chudaboi, kwian Chubenu ene me kle age Chube takalin kare, ama me kle Chube gerua gai dage. Kwian me Chube uñe age ma no kwian e Chube uñege, kwian me Chube uñe tai dage mo bitallage, ama age no mo bitalla alin. Kwian Chube uñe me mo ta dbe no mo bitalla chudaboi ama ta me kle Chube ole ni kle Chube gai ulia. 9 Ba kwian Chubenu ulita agedale ene: Muinga me chege ñengulage ulita ba me kalla gbe chada giti, ba muinga ai kare alin kalla gbe chada giti: Muinga churalla chku sesenta alin gwangerugu, muinga toidu onbre gdaitre alin ole, 10 uñale kwian Chubenu ulitage muinga toidu ulita no lle no bo, muinga mo kirolla manadu no, muinga noare kwian basanga ole mo ullage kle kwian basanga gai ngwange no mo ullage, muinga ta dbe daba Chubenu na chudaboi diali, muinga daba kle boi daga ngwale chudaboi no ama kira gbe, kaire muinga kle lle na tanre noare dodade. 11 Ba muinga juma ene kare kalla gbe chada giti, muinga kle biale me chege ñengulage me churalla sesenta molen, ba me muinga ene kalla gbe chada giti. Muinga ene ñage gerule: “Cha mi mo jwen nabitaite, cha be chege toi gballa lle boi Jesucristo alin.” 12 Ñage gerule ene gire chui gwealege ama be takalin mo jwen nabitaite be age ama takalin kare me Jesucristo takalin kare. Ama be chege jiske, ama gerudu alin gire me mo ta gbu age ama gerudu Chube gwa giti kare. 13 Ñage boi ene kaire muinga kle biale me chege ñengulage ñage kianchienga, ama chui chuge chagenga alin, kaire chui chuge ngwale gerule dabadi daba na ole, ama takalin kwian ulita kle boi chke uñale amage, geru mau me tragale ama geru trage daba na ole. 14 Malen cha takalin muinga kle biale me chege ñengulage ama mo jwandale, ene ama kirogwa molen ama kirogwa manade no ama lle boi no mo ullage. Ene kwian me Chube uñe me ñage gerule sidri me no muinga enedi kaire kwian Chubenu ulitadi. 15 Cha gwagedu muinga Chubenu gwealedi kle biale me chegu ñengulage, ama jo siere Chube geruage, ama agedu che dolla Satanás takalin kare. 16 Onbre Chubenu gweale, muire Chubenu gweale bitalla chege gballa, ñengula jogeda, ama mo bitalla chudaboadale, ama me ñage kwian na Chubenu ulita chuge ngwadi mo bitalla manade, ama agali mo bitalla manadale. Ama age ene mo bitalla alin, ene kwian na Chubenu ulita ñage muinga na chudaboi, ulia muinga me bitallage kwian Chubenu ulita ama chudaboadale. 17 Kwian Chubenu chugagwalla nga ulitage lle boi no kwian Chubenu kaire kaire alin, kwian Chubenu ulita mo chugagwalla kaire kaire chudaboadale no no bligda giti ñometra giti igi giti, chugagwalla Chube gerua trage no kwian ole diali kwian tke tangle no Chube geruage, kwian Chubenu mo chugagwalla ene manadale no. 18 Chube gerua degaba unsuialin gerule: “Chbi lle boagda gbe trigo mongenga sulikwage, ba chbi gbe chage tangle trigo giti ba me chbi ka lugadale, ene chbi bli ole ama ñage trigo gute ama trigo mongenga ñanale.” Kaire Chube gerua degaba unsuialin gerule: “Kwian lle boi ama lle e boi ñanalla gadale.” 19 Timoteo, kwian gdaite chke ba ngwadi kwian Chubenu chugagwalla gbe jiske bage, ama me chie boke kwian mai gerule salengwli ba me ama kerua gbe gdadi. 20 Boke kwian mai chke gerule ulia kwian Chubenu chugagwalla giti ama agedu me no, suge bage ulia ama kle age me no ba ka boi ta no giti chugagwalla ole kwian Chubenu na ulita gwa giti, ene kwian Chubenu na mi age ama age kare. 21 Chube gwa giti Jesucristo gwa giti lle boanga nga ngaña giti Chube alin ulita gwa giti cha kle geru ai gbe ba alin. Ba me talladale kwian ba skatemanalla noare kwian me ba skatemanalla noare, ba agedale salengwli ama ulita ole, cha takalin ba age ene ulita cha gerudu kare ba ka boi kwian Chubenu chugagwalla bai kaire kle age me no ole. 22 Ba me kwian gai blike ko gbe ama giti gerule ama ole ama be chege kwian Chubenu chugagwallale, me uñale bage ama kwian no no o me. Ba kwian gweale gbe blike kwian Chubenu chugagwalla gire bigwa chke uñale ama kwian me no kle age me no, gire kwian Chubenu ulitage be suge ba no ama kle age me no ole ba ama gbu daba chugagwalla. Ba mo ta gbadale age no ulita trate diali, ba me kwian gbe blike mo tale daba chugagwallale. 23 E me gerule ba chi alin jadale ba me vino jadale, chui gweale ba oga kde ole, ma no ba vino jai sidri, ene ba me oga kde ole. 24 Cha gerule nabitaite ba ole ba kwian Chubenu chugagwalla gadale ta giti, me uñale chema no chema me no. Kwian gweale age me no chke uñale nate blike, suge kwian ulitage ama kwian agenga me no. Kwian na age me no me chke uñale nate blike, ama age me no ulita chege skwlenre, agwa chuia nale chke uñale nate ama kwian agenga me no. 25 Ene kaire kwian lle no boanga chke uñale nate blike, suge kwian ulitage ama kwian no. Na lle no boanga me chke uñale nate blike, ama lle no boi ulita chege skwlenre, agwa ulita lle no boi mi chege ogabada, chui gwealege be chke uñale nate.
1 Kwian daba gai gbe lle boi mau alin, kwian e amanu, ama chege diali lle boi mo mauña alin, kwian Chube uñe ama toi ene lle boi mo mauña alin ama mo mauña gadale dage diali, ama age ene kwian na gwage amadi me gerule me no Chubedi kaire me gerule me no Chube geruadi. 2 Kwian Chubenu daba na Chubenu gai gbe lle boi mau alin, lle boanga toi lle boi mo mauña alin ama me tañachugadale mo tale mo mauña giti: “Ama cha daballa Chube giti malen ama me ñage cha kage, cha me ama gadale dage.” Lle boanga me tañachugadale ene dale. Ama boke Chubenu, ma no tañachuge lle boi no no mo mauña alin diali. Mo mauña Chube gerua gau ulia, kaire Chube noare ama boke ole, malen lle boanga Chubenu lle boadale no mo mauña Chubenu alin. Ba kwian ulita tke tangle, ba gerule kwian ole ama agedale cha chada ai ulita degu gerule kare. 3 Kwian gweale daba tke tangle geru ngwalege, me chada ai cha degu gerule kare, ama me gerule che geru jun che Chugagwalla Jesucristo gerua kle gerule trate kare, me gerule che geru gau ulia gerule kare. 4 Kwian ulita daba tke tangle geru ngwalege ene, ama tañachuge mau giti: “Cha noare, cha kwian kweri, cha alin allabi ñage kwian tke tangle no, kwian na me cha kare.” Amage suge ama kwian no, ulia me ene, ama kwian tke tangle geru ege, ama agalige geru me suge. Kwian ene ta kle diali kira batakalin kwian na ole geru ngwale giti, ama gwage kwian nadi gerule ma no amage gire ama ta skochie ama ta gerukalin no ene daba na gerule kare, ama ta daba sko jwankalin, ama ka boi daba ole, ama gballa tañachuge: “Kwian na tañachuge me no chadi.” 5 Kwian ene ta me no, ama me ñage tañachuge no trate malen diali ama kira bate geru ngwale giti, ama me Chube gerua Jesucristo giti gai ulia. Kaire ama gerule kle kwian tke tangle ulia Chube geruage, agwa ulia me ene, ama tañachuge nganake, ama tañachuge mo tale: “Noare cha kwian tke tangle Chube giti, kwian tke tangle ñanale cha igi gai no.” Kwian ta enege ba jogedale siere. 6 Ulia che Chube gerua uñe, chege suge Chube gerua ma ñanaske lle ulitage. Lle ngle lle me ngle, che me tallade lle molen mangire batre ole, che nga dbadale suga no diali lle ngle ole lle me ngle ole. 7 Che tachkedale mo giti che medunga chebia kote che me chiu lle dbe dale, che jogeda che me ñage lle dbe mo ole llagli. 8 Che kle gwade che bligda molen che ñometra molen toigda, che nga dbale suga noare bligda ole ñometra ole ngle o me ngle ole. 9 Kwian ulita me tañachuge ene, kwian gweale tañachuge: “Cha ta igi tanre lle tanre gakalin mau alin.” Kwian tañachuge ene ama takalin igi nglege, ama me gwagedale igidi, ama gwage igidi ta igi gakalin mau alin. Ama tañachuge: “Cha kwian anblite lle gwealedi, ene cha ñage igi tanre gai mau alin.” Diali kwian ene age me no, ama ta me no, me suge amage e giti ama boi tanre me no boi tanre daga ngwale. 10 Igi ole ngle kwian ñage age tanre me no igi giti, kwian igi molen ngle ama takalin igi ma nglege, kwian ene age dagale daba ole ama igi jwennga daba ngeru ngwale lle gweale giti. Kwian gweale jo siere Chube geruage, ama me tañachuge Chube giti, ama tañachuge igi alin giti mau alin, kwian ene boi daga ngwale ama chege ta olire diali ama agali kle age giti. 11 Timoteo, ba Chubenu, ba me agedale kwian kle tañachuge igi alin giti kare, ba agedale nganake diali, ba mo ta gbadale toi ai kare: Ba chagedale no trate. Ba agedale Chube takalin kare diali. Ba mo ta gbadale Chube gai ulia. Ba ta dbadale no kwian ulita ole. Jesu gerua dbe giti ba boi daga ngwale ba me talladale. Ba agedale ta no giti kwian ulita alin. 12 Geru ulia Chube giti ba uñe, ba mo ta dbale chage kiraske diali Chube takalin kare. Chube ba gau toi ama ole diali chui ulita, malen ba gerudu kwian ngle gwa giti: “Cha Chube gai ulia, cha be mo ta gbe chage ama ole diali.” Ba gerudu ene kwian ngle gwa giti, nege ba me ta jogenga ba Chube gerua gau chuiage giti. 13 Ba tachkedale cha talla giti gballa cha me kle chada ai degange ba alin, Chube gwa giti Jesucristo gwa giti cha kle geru ai gbe ba alin. (Chube kweri, ama giti lle ulita gwade kle nga dba ai giti nga ngaña giti kaire. Jesucristo dule Poncio-Pilato ngwadi, Jesucristo gerudu ulia mau giti Poncio-Pilato gwa giti.) 14 Ba mo ta gbadale age no ulita Chube gerua gerule cha degangu kare. Cha geru ai gbe ba alin ba geru ai gadale dage, ba me geru ai blitadale nganake, ene che Chugagwalla Jesucristo chieni chuiage ba be kle biale trate Jesucristo ngwange. 15 Chui gwealege Jesucristo be chieni Chube Jesucristo chuia gbu kare, Chube alin allabi ama noare ama kweri, ama kwian Chugagwalla nga dba ai giti ulita Chugagwalla, ama kwian ulita Chugagwalla kaire ama ma kweri lle ulitage. 16 Chube alin allabi me jogeda. Chube chrallaske kwian me ñage gwage, kwian gwagwa jogenga Chube chralladi malen kwian me ñage joge chke Chubedige, kwian gdaite me gwagedu Chubedi, ni malen kwian gdaite ñage gwage Chubedi mo gwagwa giti, che me ten amadi agwa suge chege ulia Chube noare, ama kweri, kwian ulita gerudale noare Chube giti diali, noare Chube kwian ulita Chugagwalla diali. Ene nobi. 17 Kwian lle tanre molen igi tanre molen, ba gerudale kwian ene ole ama me ñage tañachuge mau giti: “Cha lle tanre molen malen cha ma no kwian na ulitage.” Me ñage tañachuge ene. Kwian lle ulita tanre molen, lle e me ñage ama chudaboi diali, lle ulita tanre me jage diali. Ma no tañachuge Chube giti Chube ñage ama chudaboi diali. Chube gwade, ama lle ulita noare kete chege toi no diali. 18 Kaire ba gerudale kwian ene ole ama agedale no daba na alin, noare ama ta diali lle ketakalin daba nage, diali tañachuge daba na chudaboi bai me lle molen. 19 Ama daba na chudaboadale ene nga dba ai giti, ene nga ngaña giti Chube kle lle noare oge ama alin bai nu Chube gerua gaba ulia, bdagli Chube be ama gbe toi diali chui ulita Chube ole. 20 Timoteo, Chube ba gau ba gbu daba tke tangle ama geruage, noare ba daba tke tangle geru e alin allabige. Kwian gweale kle geru ngwale trage daba ole, ba me geru e gbe gdadi. Kwian geru jun gballa mo chugadi geru tanre degu, kwian gerule geru e alin no, geru e alin ulia. E me gerule ulia, geru e me gerule Chube gerua gerule kare. 21 Kwian gweale geru e keruchuge geru e gai ulia gire ama joge siere geru uliage. Cha takalin Chube age no no ba alin. Geru ai ene ulita cha Pablo chada degangu ba alin Timoteo. Che kle meni.
1 Cha Pablo chada ai degange ba alin Timoteo: Chube tale Chube cha gbu Jesucristo gerua ketangale, sbali Chube gerudu Jesucristo alin giti allabi kwian ñage toi chui tangle diali Chube ole, malen Chube cha gbu geru e trage kwian ole. 2 Timoteo, ba cha kirolla kare Jesucristo giti, cha noare ba ole, cha takalin Chube che Ñenua kaire Jesucristo che Chugagwalla age no ba alin tai dage bage ba ta gbe suga no diali, cha takalin ba toi Jesucristo talla ole diali. 3 Cha kle lle boi Chube alin ta no trate ole cha enusulian unsuialin lle bo Chube alin kare. Cha kle gerule Chube ole gire diali cha tachke bage, cha gerule ba giti Chube ole ai kare: “Chube, noare Timoteo kle ba gerua gai ulia, cha takalin ba ama chudaboi lle ulitage.” Cha gerule ene kare Chube ole ba giti diali. 4 Kaire cha kle tachke chui giti cha jo siere bage suiale cha jo nga nage, e suiale ba chegu olire cha nate. Nege cha kle tachke bage cha ta klekalin ule ba ole nga suga no ole. 5 Cha kle tachke bage ba Chube gau ulia mo tale giti, ba ta salengwli ba sulian Loida kaire ba chebia Eunice kare, ama boke mo ta gbu ngeru Chube gai ulia no mo tale, cha gerule ba ole ulia ba kaire ta ene molen Chube gai ulia mo tale. 6 Malen cha gerule ba ole ba mo ta gbadale lle boi Chube alin diali chui gdale, ba mo ta gbu Chube gai ulia kaire ta amaña giti ba lle boale Chube alin. Cha ko gbu ba giti cha gerudu ba giti Chube ole, chui ege Chube ta ngle ketu bage lle boi ama alin kwianske, ba me ta e mlienga lle boage Chube alin. 7 Chube mo Oña ketu chege lle boadale no Chube alin, Chube me mo Oña ketu chege mo ta dbadale kennga lle boi Chube alin. Diali Chube Oña kle che ole che ta gbe kiraske, ama che ta gbe no Chube ole kwian ole, kaire ama che ta gbe age no ama takalin kare me che ta agekalin kare. 8 Ba me ibule gerule kwian na ole che Chugagwalla Jesucristo giti, kaire me ibule cha giti cha kle skage ama gerua giti. Ba boi daga ngwale cha boakle kare ba me geru Jesucristo giti chugadale ngwadi, ba Jesucristo gerua dbadale ngerugu kwiange, Chube kiralla giti Chube be ba kira gbe. 9 Chube che jun siere ji chugege age me no gdale, Chube che gau chagedale trate siere age me noge. E me gerule che agedu ulita ngeru no malen ama che jun siere ji chugege age me no gdale, me dale ene, che me ñage tien gitiru agali ji chugege che age me no gdale, Chube mo tale agali ta gbu age no che alin, ngeru ngeru nga dba ai ulita bebi dodadale Chube mo ta gbu age no che alin Jesucristo giti. 10 Nege chku uñale chege ulia Chube agedu no kwian ulita alin, ama Jesucristo kagu nga dba ai giti kwian ulita alin, Jesucristo che jwannga siere. Ngeru kwian ulitage jogeda giti ama kennga, nege Jesucristo giti kwian me ta dbadale kennga jogeda giti, kwian geru Jesucristo giti gai ulia, geru e giti chke uñale kwiange ama toi diali chui tangle Chube ole, bdagli ama mi jogeda dare. 11 Chube cha gau geru Jesucristo giti trage kwian ole, Chube cha gbu geru Jesucristo giti dbe kwiange kwian tke tangle geru ege. 12 E giti kwian cha tku skage, malen cha kle boi daga ngwale Jesucristo gerua giti, cha me ibule skage Jesucristo gerua giti kwian ngeru. Uñale chage Jesucristo mine, cha ama gai ulia. Uñale chage Jesucristo kira molen, ama be geru amanu manade no chui bdagli alin, ama geru e ketu chage dbadale kwiange, geru e be chege diali chui tangle ama be chieni gire. 13 Ba chagedale geru trate ulia ole ba geru jun cha ba tku tangle giti. Jesucristo kle che ta gbe ama gerua gai ulia, Jesucristo kle che ta gbe no kwian ole Chube ole, ba chegedale ta ene ole. 14 Chube geru ketu bage dbadale kwiange, Chube Oña che chudaboanga kle che ole, ama be ba chudaboi geru Jesucristo giti manade no, ba me kwian na chuge ngwadi geru ulia blite nganake kwian takalin kare. 15 Uñale bage kwian Chubenu tanre nga kweri Asiage cha chugu ngwadi gballa, Figelo kaire Hermógenes, ama cha chugu ngwadi gballa. 16 Onesíforo me cha chugu ngwadi gballa, cha takalin che Chugagwalla Jesucristo tai dage no Onesíforo bitallage. Onesíforo me ibudu me kendunga cha kle skage giti, ama chku una Romage, ama cha jinadu nate tanre chui gdale, ene gire cha skwendu amage. Ama kledu una Romage gire diali ama chku cha ngwadi cha chudaboi cha ta gbe suga no. 18 Cha gerule no Onesíforo giti, ulita uñale bage no trate, che kledu ule ama ole una Efesoge ama che chudabo tanre una Efesoge. Cha takalin che Chugagwalla Jesucristo tai dage no Onesíforoge chui bdaglige Jesucristo chieni chuiage.
1 Timoteo, ba cha kirolla kare Jesucristo giti, Jesucristo agedu no ba alin kle age tanre noare ba alin, ba ama kiralla gadale, ba chagedale ama kirallaske. 2 Ba cha keruchugu gerule kwian Chubenu tanre gwa giti kwian tke tangle geru ulia Jesucristo gitige, ba geru e ulia keruchugu, ba kwian na tkale tangle geru ege kwian bai ta dbe ulia geru dbe trate, ene ama ña kwian na tke tangle Jesucristo gerua gitige. 3 Ba boi daga ngwale Jesucristo gerua giti ba mo ta gbadale diali lle boi ngerugu Jesucristo alin salengwli guardia donga kle lle boi mo chugagwalla alin kare, 4 guardia donga no kle mo ta gbe dole no, ama me kle tañachuge lle na giti, ama kle biale diali age ama chugagwalla takalin kare. Ene kaire ba kledale biale diali lle boi no Chube alin Chube takalin kare. 5 Kaire kwian kolanga boladi, ama me kolale no kolagda chadalla gerule kare ama me ñage kolagda ñanalla gai. Ene kaire ba me chage Jesucristo gerua alin gerule kare Chube me ñage age no ba alin. 6 Kaire kwian nga datanga chude ngamale, ngeru ama nga date chude tke gire ama manade, ene bligda suiage kwian nga datanga bligda gai no mo alin, nga suga no amadi bligda ole. Ene kaire ba chegedale diali gerule kwian ole Jesucristo giti, kwian me geru gai blike ba me tañachugadale olire, bdagli kwian mo ta blite Jesucristo ole gire badi nga be suga no no kwian geru gau ulia giti. 7 Ba mo ta gbadale tañachuge no geru ai cha kle trage ba ole giti, ene che Chugagwalla Jesucristo be ba ta gbe suge ulita cha kle gerule ba ole giti. 8 Ba tachkedale Jesucristo giti, ama chku nga dba ai giti kwian kare David oindallaske, ama jokeda gire ama jaba chkuni gwade, cha kle geru e ulia Jesucristo giti trage kwian ole. 9 Jesucristo gerua giti cha kle boi daga ngwale skage, kwian me no geru e ole cha tku skage cha kwian jiskenga kare, ama tañachuge ama cha tke skage ene geru Jesucristo giti me chage dare, me dale ene, cha kle skage Jesucristo gerua giti agwa Jesucristo gerua me kle skage, Jesucristo gerua be chage diali kwianske. 10 Malen cha kle mo ta gbe no ulita boi daga ngwale me boi daga ngwale cha lle boakalin no Chube alin, ene Chube nu kwian gaba Chube gerua Jesucristo giti gangale be geru Jesucristo giti keruchuge be geru e gai ulia, ene ama be tien gitiru ji chugege ama agedu me no gdale, ene ama be toi diali no no Jesucristo ole nga ngaña giti. 11 Ai gerule ulia: Che jogeda Jesucristo gerua gdale, kaire che be joge toi ama ole. 12 Che me mo ta gbadale kige boi daga ngwale Jesucristo gerua gitige, ene bdagli che be kle ule ama ole gerule nga ulita giti daba chugagwallale. Che gerule kwian na ole che me Jesucristo uñe, chui bdaglige Jesucristo be gerule Ñenua gwa giti ama me che uñe kaire. 13 Che Chube gerua Jesucristo giti gai ulia gire bigwa che geru e chuge ngwadi che sole ama ole. Chube me ene, ama age ulita ama gerule kare, ama me sole ni sidri. Uñale chage geru ai gerule ulia ulita, malen cha mo ta gbe lle boi no Chube alin gwangerugu me tañachuge boi daga ngwale giti. 14 Timoteo, ba kwian Chubenu ulita ta gbadale cha chada degangu giti ba alin, kaire ba gerudale kwian Chubenu ole Chube gwa giti kwian Chubenu kle kira bate geru ngwale giti me kira bate dare, ama kira bate geru ngwale giti e me no dale, ama kira bate geru giti daba na ama keruchuge, ene ama ña daba na ta gbe geru ngwalege gire daba joge siere Chube geruage, e tirare kwian alin joge siere Chube geruage. 15 Ba agali Timoteo mo ta gbadale lle boi no Chube alin kwian lle boanga no mo chugagwalla alin nga dba ai giti kare, kwian lle boanga no ama me ibule chugagwalla ngeru, chugagwalla gwage ama lle boanga no. Ene kaire ba lle boadale no Chube alin, ba kwian na tkadale tangle no trate Chube gerua uliage, ene Chube gwage ba kle age no. 16 Kwian gweale kle gerule ngwale geru me ulia giti, ba me ama gbe gdadi, ba joge siere amage, geru ngwale giti ama daba na ta gbe bedre bedre tañachuge me no Chube giti gire bdagli daba ta jwlite age me no Chube dollale. 17 Geru ngwale salengwli che uda jingmea kada gangrena kare, jingme e kote che uda tuge bedre bedre, ene tuge ulita gire che jogeda. Himeneo kaire Fileto, geru ngwale giti ama boke kle daba ta gbe jwlite age me no Chube dollale, 18 ama me kle daba tke tangle geru uliage, ama kle gerule Chube be jaba gbeni gwade chuia jo tangle. Himeneo kaire Fileto me kle geru ulia kete dabage, ama daba gweale ta gbe tañachuge nganake, me uñale dabage geru bai ulia. 19 Chube gerua ulia, me jwlite, geru e be chege diali chui tangle, Chube gerua gerule: “Chubege uñale kwian bai Chubenu.” Kaire gerule: “Kwian bai Chube gerua gaba ulia, ama ulita mo ta gbadale joge siere age me noge.” Chube gerua gerule ene. 20 Cha gerule ba ole Timoteo, chkedale uñale bage ai kare giti: U kwerige gwa me oro batekwalla me igi batekwalla alin kle, kaire gli batekwalla dbi batekwalla kle. Oro batekwalla igi batekwalla basangwa no gangwa ngwange, gli batekwalla dbi batekwalla kwian u mauña alin lle boige. 21 Oro batekwalla igi batekwalla kle trate diali ogaba no, ene kle biale kwian gangwa ngwange no. Ene kaire che kwian Chubenu kledale sugekare lle me no ulitage, che chagedale no trate diali, ene che kle biale lle no boi Chube alin. 22 Timoteo, ba chegedale sugekare lle me no ulitage kirogwa biale ulita ta agekalin karege, ba mo ta gbadale chage trate no Chube takalin kare Chube gai dage no, ba mo ta gbadale Chube gai no diali, ba mo ta gbadale no kwian ole Chube ole, ba mo ta gbadale ule daba na ole ta no giti daba bai ta no trate molen Chube ole kle Chube geruadi, daba ene ulita ole ba chegedale ule Chube geruadi. 23 Kwian kle gerule geru ngwale giti, ba me kwian ene gbe gdadi geru giti, kwian ene gerule tanre, amage me suge kle gerule llema giti, uñale bage kwian ene chege gerule geru ngwale giti gire bigwa ama ta kira batakalin geru e giti. Me no gerule kwian ene ole. 24 Kwian lle boanga Chube alin me ñage kira bate geru giti, ma no ama chagedale ta no daba ulita ole ama daba tke tangle no geru uliage, daba age me no ama dollale geru giti ama me skochie me skwatige daba tke tangle, 25 ama gerudale ta no giti kwian Chube gerua dollale ole, ene Chube ñage kwian ta blite, kwian ñage tañachuge nganake gire kwian ñage geru ulia gai mo tale. 26 Geru ulia be kwian ta gbe, ene kwian ña tien gitirule che dolla Satanáge, che dolla kwian gaba mau alin, ene kwian age che dolla alin che dolla takalin kare. Malen che gerudale trate kwian ene ole Jesu giti, ene ama tien gitiru che dollage.
1 Cha takalin geru ai ulita chke uñale bage Timoteo: Chui bdagli Jesucristo chuia chieni ngwange, chui ege kwian tanre me no be kle age Chube dollale, chui ege be mnoare kwian Chubenu alin. 2 Kwian tanre ai kare be kle chui ege: Kwian be tañachuge no diali mau giti alin. Kwian be mo ta gbe no igi alin ole. Kwian be suge moge ama ma no daba ulitage. Kwian be gerule tanre no mau giti: “Cha ma no daba ulitage.” Kwian be gerule Chube dollale. Kirogwa biale mi mo ñenua mo chebia gai dage. Kwian mi gerule no daba ole daba ama chudabo giti: “Noare ba cha chudabo.” Kwian agenga me no Chube dollale. 3 Kwian mi mo ta dbe no daba ole. Kwian mi tai dage dabage. Kwian be gerule ngwale dabadi. Kwian mi mo ta gbe age no, be mo chuge ngwadi age me no ulita. Kwian be age daga ngwale me no daba ole. Kwian be age me no age no ulita dollale. 4 Kwian be age mo bitalla mo skatemanalla dollale. Kwian mi tañachuge ngeru, ama be age blike ama takalin kare. Kwian be suge moge ama ma kweri ma no daba ulitage. Kwian be takalin lle tanre noarege mau alin, ene ama tañachuge toi no lle e giti alin, ama mi tañachuge Chube giti. 5 Kwian ai kare ulita be gerule: “Cha no Chube ole, cha Chubenu.” Ama gerule ene gire ama age nganake, ama me chage Chube takalin kare me chage no trate ulia kwian Chubenu chagedale kare. Kwian e karege ulita ba chegedale sugekare. 6 Kwian e gweale chage uge uge geru ngwale dbe muinga me ta molenge, muinga skate amage gwa uge kaire kaire, ama muinga anblite geru ngwaledi, muinga e agenga tanre me no, muinga tañachuge diali age me no. 7 Muinga e kare tanre be kle biale kwian ulita keruchuge no no, muinga be geru jwen geru e giti gire geru ulita me suge amage geru bai ulia, ene geru ulia me suge amage. 8 Chui sbali Janes kaire Jambres agedu Moisés dollale, ene kaire nege kwian geru ngwale dbanga dabage age geru ulia dollale, kwian ene ta me no, ama me ñage tañachuge trate no, ama me geru ulia gai, malen ama chege sugekare geru uliage. 9 Kwian ene mi ñage kwian tanre anblite dare geru ngwaledi, be chke uñale kwian tanrege ama kwian me no ama me kle geru ulia dbe salengwli kwian boke unsuialin boidu Moisés ole kare, ama boke mo ta gbu ma ngle Moisés dollale agwa ama me ñadu. 10 Timoteo, uñale bage ba gwagedu chadi cha kwian tku tangle mine Chube geruage, ba gwa giti cha toidu cha chagedu mine dabaske, cha mo ta gbu lle boi no Chube alin, cha mo ta gbaba Chube gai ulia, kwian bai me ta geru gakalin blike ole cha me skochiu, cha mo kira gbuda jage ulita, 11 kwian agedu tanre me no cha ole, cha boidu daga ngwale Jesucristo gerua giti. Uñale bage cha boidu ulita ene una Antioquíage una Iconioge una Listrage, una ege ulita kwian me gwagedu ngwaña chadi, ama agedu me no cha ole agwa Chube cha chudabo, ama cha manadu no kwian me no ulitage. 12 Ulia bai kaire ulita toikalin trate no mo ta gbaba Jesucristo geruage, kwian ene be boi daga ngwale Jesucristo gerua giti, kwian na be age me no ama dollale. 13 Kwian me no, kwian daba anblitanga geru ngwalege be tañachuge kle chage no, agwa me ene, chui gdale kwian ene be kle chage ma bate geru uliage, kwian na be mo anblitange kwian daba anblitangage, kaire kwian daba anblitanga be chage mo anblitange kwian nage geru giti, kwian ene be chage mo ta anblitaba ole diali. 14 Timoteo, ba chagedale no trate diali ngerugu geru uliage, ba geru e jun, uñale bage geru e geru ulia, kaire uñale bage chema ba tku tangle no trate geru uliage. 15 Ba soli gire ba Chube gerua degaba uñu, nege ba kle chage mo ta gbaba ngerugu geru e ole, geru e ba ta gbe, ene suge bage mine ba tien gitiru ji chugege age me no gdale mo ta gbaba diali Jesucristo gerua alinge. 16 Chube gerua ulita jo degaba Chube talla giti, geru e no che alin, geru e che tke tangle geru uliage, geru e che ta gbe suge che kle age me no giti, geru e che ta blite age no, geru e che tke tangle chage no trate Chube takalin kare, 17 ene che kwian Chubenu ulita ñage kle biale no diali lle no ulita boi Chube alin.
1 Cha chada ai degange ba alin Timoteo Chube gwa giti kaire che Chugagwalla Jesucristo gwa giti, Jesucristo ama che Chugagwalla kweri, ama be chieni chuiage ama be gerule kwian ulita Chugagwallale be gerule kwian gwade giti kwian jaba giti bai jiske bai me jiske. Cha geru ai gbe ba alin Timoteo, ba agedale no ulita ai kare: 2 Ba gerudale kwian ole Chube gerua ulia giti, kwian ba keruchugakalin kwian me ba keruchugakalin ba gerudale no diali kwian ole Chube giti. Ba gerudale kwian kle age me no Chube dollale ole, ene suge amage ulia ama kle age me no. Ba gerudale mno kwian ole, ene kwian me age me no dare. Ba kwian ta gbadale Chube geruadi, ene ama be ta agekalin no Chube takalin kare. Ba kwian tkadale tangle no geru uliage, ba me skochiedale ba me skwatigedale gerule kwian ole geru ulia giti diali. 3 Ba mo ta gbadale chege geru ulia kete kwiange Timoteo, chui bdagli ngnaguge gire kwian mi mo ta gbe geru ulia gai, kwian me mo ta gbe geru ulia keruchugakalin dare, gire kwian be ta geru na jagere keruchugakalin. Kwian be daba tkanga tangle tanre jinade mau ta giti be mo tkange tangle, ene kwian ulita be ta kwian daba tkanga tangle e alin keruchugakalin. Kwian daba tkanga tangle e be kwian tke tangle kwian takalin kare, 4 gire kwian mi geru ulia keruchuge dare, kwian be geru ulia mlienga be geru unsuialin ngwale me no alin gbe gdadi. 5 Timoteo, ba mo ta gbadale tañachuge no trate geru ulia alinge, ba me mo chuge ngwadi tañachuge nganake. Ba boi daga ngwale Chube gerua giti ba mo ta gbadale diali lle boi ngerugu Chube alin. Ba chagedale ngage kaire kaire gerule kwian ole Jesucristo giti, Chube ba gau ba gbu lle boi ama alin, ba lle e boadale no no diali. 6 Timoteo, cha gerule ba ole, cha be kle toi dare sugeti alin, uñale chage cha be jogeda geru ulia giti, cha be jogeda chuia kle kodi cha ngeru. 7 Cha mo ta gbu chage no ngerugu geru Jesucristo giti dbe kwiange, Chube cha gbu lle boi ama alin cha lle bo no ulita, cha mo ta gbu Chube gerua alinge. 8 Cha lle bobi Chube alin no, nege lle boi ñanalla kle cha manade ngwange nga ngaña giti Chube kle ngwadi. Che Chugagwalla Jesucristo gerunga kwian ulita giti ulia, ama be gerule chema jiske chema me jiske, ama be lle no kete chage chui bdaglige, me chage alin allabi ama be lle no kete, kaire be lle no kete kwian ulitage bai kledu Jesucristo chieni chuia manade ngwange, ama no Jesucristo ole, ama takalin Jesucristo chieni, kwian ene ulita be lle no gai kaire nga ngaña giti. 9 Timoteo, ba mo ta gbe chie tienda chadi blike. 10 Demas me ta boikalin daga ngwale cha ole ule, ama cha chugu ngwadi sugekare, ama jo una Tesalónicage lle na boi mau alin ama takalin kare. Crescente jo nga kweri Galaciage, Tito jo nga kweri Dalmaciage, 11 Lucas alin kle aini cha ole. Timoteo, ba chie ba joge Marcos nate, ba chie Marcos dbe ule, Marcos ñage cha chudaboi lle boi Chube alin aini. 12 Cha Tíquico kagu una Efesoge. 13 Timoteo, cha ba ta gbe lle chanu cha jigu daba Carpo ullage giti, cha kledu una Troage cha mo bliagdalla, cha librolla, kaire chada degaba bda kwara giti, cha lle e ulita jigu daba kada Carpo ullage, ba chie ba chie lle e ulita dbe cha alin. Ba me ta jogenga lle e dbe ulita, kaire bda kwara giti chada kle degaba, e cha takalinge diali, ba me ta jogenga lle e ulita dbe cha alin aini. 14 Alejandro kwian hierro dodanga agedu me no me no cha dollale, uñale Chubege, Chube be ji gbe ama alin cha gdale. 15 Ba kledale ta giti ama ngeru, che kle geru Jesucristo giti dbe kwiange, ama kle age tanre me no geru e dollale. 16 Timoteo, kaire cha gerule ba ole kwian kle age mine cha ole aini. Gwangea cha dule kwian chugagwalla ulita gwa giti kaire kwian na tanre kledu eni gwa giti, chui ege cha gerudu mo giti gballa, kwian ulita Chubenu me cha chudabo, cha chugle ngwadi gballa gerule kwian ngle gwa giti, ni malen kwian gdaite cha chudabo gerule no cha giti gerule no Jesucristo gerua giti. Kwian Chubenu ulita bai kledu cha ole kwian ngle gwa giti ama chegu kamne me gerudu cha chudaboale, cha takalin Chube tai dage amage, ama agedu giti Chube me tallade. 17 Che Chugagwalla Jesucristo alin kledu cha ole, ama cha ta gbu, ama cha kira gbu, ama cha chudabo no, ene cha giti geru ulita Jesucristo giti chku uñale kwian nga na tanrege kledu cha keruchuge. Che Chugagwalla Jesucristo cha manadu no kwian cha dollalege Jesucristo gerua giti, ene kwian cha dollale ulita me ñadu cha gweda, cha tiun gitirule kwian cha dollalege. 18 Cha kle nga dba ai giti, diali Jesucristo be cha manade no age me no ulitage, ene kaire bdagli ama be cha dbe no ama kle ngwadi nga ngaña giti. Chube alin no trate ulita, ama giti kwian gerudale no no chui tangle diali. Ene nobi. 19 Prisca alin Aquila alin cha gbi kage no ama alin, kaire Onesíforo bitalla alin. 20 Erasto chegu una Corintoge, Trófimo chegu oga una Miletoge. 21 Cha takalin ba mo ta gbe chie blike tienda chadi Timoteo, ba chiedale ngeru noi boi nga boi skeke suiale. Eubulo kaire Pudente kaire Lino kaire Claudia kaire kwian Chubenu na ulita aini gbi kage no tanre ba alin Timoteo. 22 Cha takalin che Chugagwalla Jesucristo kle ba ole ba ta kira gbe, kaire cha takalin Chube age no ba alin kaire age no daba Chubenu ulita alin. Geru ai ene ulita cha Pablo chada degangu ba alin Timoteo. Che kle meni.
1 Cha Pablo chada ai degange ba alin Tito: Cha kwian lle boanga Chube alin, cha kwian Jesucristo gerua ketanga. Chube nu kwian gaba Chube gerua gai ulia, Chube cha gau cha gbu kwian ene ta gbe Chube geruadi, Chube cha gbu kwian ene tke tangle Chube geruage, ene kwiange chke uñale ama chagedale mine Chube takalin kare, 2 kaire kwiange chke uñale chui be chke gire kwian Chubenu ulita be toi diali chui tangle Chube ngwadi Chube ole, kwian Chubenu ulita kle chui e manade. Ngeru ngeru Chube bebi nga dba ai ulita dodade Chube bebi kwian dodade gire Chube gerudu: “Kwian ulita bai cha gai ulia be toi diali chui tangle cha ole.” Chube gerudu ene, Chube me sodu, Chube gerule ulia diali. 3 Chube gerudu ngeru chku uñale chege chui gwealege Chube chui gbu kare. Chube che jwannga siere ama tale ama cha gau, ama mo gerua ketu chage gire ama cha kagu ama gerua trage kwian ole ulita. 4 Cha chada ai degange ba alin Tito, che boke Chubenu, cha kaire ba Chube gerua gau ulia mo tale, kaire ba cha alin ba salengwli cha kirolla kare. Cha takalin Chube che Ñenua kaire Jesucristo che jwannga siere ji chugege age me no gdale ama age no no ba alin ama ba ta gbe suga no diali. 5 Tito, che kledu ule nga kweri kada Cretage, che lle bo ule Chube alin, lle gweale me chegu dodaba ulita no, malen cha ba jigu nga ege ba lle ulita boadale no, kaire ba kwian Chubenu chugagwalla gbadale una kaire kaire cha gerudu ba ole kare. 6 Kwian Chubenu chugagwalla ai kare gbadale: Kwian Chubenu chugagwalla chagedale no trate kwian ulita gwa giti, ene kwian me ñage gerule me no amadi. Ama toidale muinga gdaitre alin ole. Ama kirolla Chube gadale ulia, ama kirolla chagedale no trate, kirolla ñenua kerua gadale dage age ñenua gerule kare, ene kwian na me ñage gerule me no kirolladi. 7 Kwian Chubenu chugagwalla, ama kwian lle boanga Chube alin, malen noare kwian ene chage trate no kwian ulita gwa giti. Ama me mo gbadale ma no ma kweri daba nage. Ama me kwian ta skochienga. Ama mo ta gbe me lle gage janga me chage llale. Ama me kira batanga daba ole. Ama me tañachugadale igi gai lle giti ngwale daba ngeru. 8 Ama daba basanga gadale ngwange no mo ullage. Ama kwian agenga no diali, ama no age no ole. Ama me mo chugadale ngwadi age me no sidri. Ama chagedale no trate Chube takalin kare. Ama kwian no Chube gwa giti. Ama mo ta gbadale age no diali me mo chuge ngwadi age me no. 9 Ama geru jwandale no geru uliage, ama mo ta gbadale geru e ulia gai diali, ene ama ñage kwian ulita tke tangle ñage kwian kira gbe geru uliage, kaire ñage gerule no kwian ole kwian bai kle gerule me no geru ulia dollale ene kwian gerule geru ulia dollale me ñage gerule dare. Ba kwian ene kare ulita gai gbe daba Chubenu ulita chugagwallale una kaire kairege nga Cretage. 10 Kwian nga Cretamu ngle gerule me no geru ulia dollale, ama kwian me no me Chube gerua gai dage, ama geru ngwale alin trage daba ole daba anblite geru ngwaledi. Kaire kwian israelita tanre kle daba anblite, ama gerule kwian ulita mo kwara tkadalenga sidri ene kwian chege Chubenu. E me ulia, malen noare kwian Chube uñe no no chege kwian Chubenu chugagwallale ene chugagwalla e ñage kwian ulita tke tangle no geru uliage. 11 Kwian gerunga geru ulia dollale, ama kle age me no, ba me ama chuge ngwadi daba tke tangle dare geru ngwalege. Ama kwian u gbaite tke tangle geru ngwalege gire kwian ulita geru ngwale gai ulia gire kwian ulita u ege joge siere geru uliage. Kwian daba tkanga tangle age kwian tanre ole ene u kaire kairege, ama tañachuge kwian tke tangle ene geru ngwalege ene ama igi gai ngle tke tangle geru ngwale ñanale. 12 Kwian gdaite ta molen nga Cretage, ama gerudu agali mo bitalladi: “Kwian nga Cretamu ulita diali sole, ama age me no diali, ama ulita kianle, ama tañachuge bligda ngle alin gute.” 13 Kwian e ta molen gerudu ulia mo bitalladi, kwian nga Cretamu ulia kwian me no kwian ta molen gerudu kare, malen ba gerudale no trate kwian nga Cretamu ulita ole, ba gerule ama ole ama mo ta gbadale geru ulia alin gai me geru ngwale gai ulia. 14 Ama me kwian israelita gerua unsuialin dodaba mo tale gbadale gdadi, kaire ama me agedale kwian israelita gerua gerule kare, geru e me Chube gerua, geru e kwian israelita gerua, kwian israelita geru e dodadu mo chugadi, kwian me Chube gerua gai ulia, kwian israelita gerua kwian ene gbe siere Chube geruage. 15 Kwian bai ta no trate molen, diali ama tañachuge no ama age no Chube gwa giti. Kwian bai me Chube gerua gai ulia, ama ta me no, diali ama tañachuge me no ama age me no, amage me suge kle age ulita me no, ama tañachuge kle age no. 16 Ama gerule ama Chube uñe, gire ama age nganake, ama age me no Chube dollale. Kwian ene gerule alin allabi me age ama gerule kare. Ama kwian me no, ama me Chube gerua gai dage ama me age Chube takalin kare, ama age me no diali, ama me ñage age no sidri.
1 Tito, ba kwian ulita tkadale tangle geru ulia gerule kare. 2 Ba kwian onbre juma ulita tke tangle chage ene: Ama me mo chugadale ngwadi age me no. Ama agedale no diali, ene kwian na ama gai dage. Ama me mo chugadale ngwadi age ulita ama ta agekalin kare. Ama diali ta gbadale Chube gerua gai ulia. Ama mo ta dbadale no kwian ulita ole. Ama boi daga ngwale Chube gerua giti ama me talladale, ama mo ta gbadale chage ngerugu Chube takalin kare. Ba kwian onbre juma tke tangle chage ene ulita. 3 Kaire ba muinga juma ulita tke tangle chage ene: Ama chagedale no trate diali Chube takalin kare. Ama me gerudale ngwale kwiandi. Ama me lle gage janga. Muinga juma chage no ene muinga biale ñage gwage muinga jumadi, ene chke uñale muinga bialege ama mo ta gbadale chage no Chube takalin kare. 4 Muinga juma chage no trate ñage muinga biale tke tangle muinga biale chagedale ene: Muinga biale mo ta gbadale tañachuge no onbre gdaitre alin ole ta dbadale no mo olia ole. 5 Muinga biale me mo chugadale ngwadi age ulita ama ta agekalin kare. Ama mo ta gbadale age no ulita trate. Ama kirogwa manadale no lle boi no mo ullage. Ama agedale no mo ñengula alin mo kirogwalla alin. Ama mo ñengula kerua gadale dage diali, ama agedale ñengula gerule kare. Muinga biale age no ene ulita kwian na gwage amadi me ñage gerule me no Chubedi me ñage gerule Chube gerua me ulia. 6 Ba gerule no no onbre biale ole, onbre biale mo ta gbadale tañachuge no diali me mo chuge ngwadi age me no. 7 Ba agali chagedale no trate diali onbre biale gwa giti, ba me gerule alin allabi, ene be suge onbre bialege ama chagedale ba kle chage kare. Ba kwian tke tangle ba gerudale no ta giti, ba ama tke tangle no, ba tañachugadale no ba ta gbadale no trate kwian tke tangle. 8 Ba kwian tke tangle no trate geru ulia alinge, ene kwian me ñage gerule me no badi me ñage ba gbe jiske sidri ba kle kwian tke tangle giti. Kwian gweale gerule ba dollale, amadi nga be chie ibule, be suge amage ba kle kwian tke tangle geru uliage, kwian gerule ba dollale me ñage gerule dare badi. 9 Kwian daba gai kwian daba gbe lle boi mau alin, kwian e chege diali lle boi mo mauña alin me igi gai mo alin lle boi ñanale. Tito, ba gerule kwian lle boanga ene ole, ba ama tke tangle chage ene: Kwian lle boanga mo mauña kerua gadale dage, ama lle boadale ulita no no mo mauña gerule kare. Ama me ka boadale mo mauña kalen. 10 Ama me lle jwandalenga mo mauña ngeru, ma no ama mo mauña llea manade no ulita mo mauña alin. Ama lle boadale no no diali mo mauña alin me tañachuge lle boi me no sidri. Kwian lle boanga mo mauña alin Chube uñe lle boi no ulita mo mauña alin kwian ulita gwage lle boanga mauña alin Chube uñedi ama chage no trate ulita, gire kwian ulita be gerule no Chube che jwannga siere giti, kwiange be suge Chube gerua no Chube gerua kle kwian Chubenu ta gbe chage trate. 11 Chube no no kwian ulita ole, ama agedu no kwian ulita alin mo Kirolla giti, Chube tale Chube mo Kirolla kagu nga dba ai giti kwian ulita alin, Chube Kirolla alin giti kwian tien gitiru ji chugege agedu me no gdale. 12 Chube agedu no ene che alin malen sugedale chege che chegedale sugekare age me no ulita Chube dollalege nga dba ai giti, che me mo chugadale ngwadi age me no ni sidri kwian me Chubenu kle age kare, che me mo chugadale ngwadi tañachuge age che takalin kare, che agedale ulita no, che chagedale no trate ulita Chube takalin kare. 13 Che mo ta gbadale age ene no trate Jesucristo chieni chuia manade. Uñale chege Jesucristo be chieni ama gerudu kare, malen che kledale nga suga noare ole ama chieni chuia manade. Ama be chieni mo kirallaske, be chieni mo chrallaske, ama che Chubea kweri ama che jwannga siere ji chugege age me no gdale. 14 Jesucristo mo chugu ngwadi jogeda che ulita alin, ama jokeda alin giti ama che jun siere, ene che amanu. Ama che ta blitu, ama che ta gbu nganake, ene suge chege che me agedale me no dare gire che ta agekalin no diali ama takalin kare. 15 Tito, ba kwian Chubenu tkadale tangle ulita cha gerudu kare. Ba kwian Chubenu kira gbe chage no Chube takalin kare, kwian bai me kle age no Chube gerua gerule kare ba ka boi ama ole kiraske, ba ñage age ene, Chube ba gbu kwian tke tangle Chube geruage, ba kwian tke tangle no, ene kwian ba gai dage, ba gerule ulita kwian ole kwian me ñage ba kerua gai ngwale.
1 Tito, ba gerudale kwian Chubenu ulita ole ama kwian chugagwalla ulita kerua gadale dage, ama agedale chugagwalla gerule kare, ama kledale biale lle boi no ulita chugagwalla gerule kare. 2 Kwian Chubenu me ñage gerule kwian gdaitedi me no, ama me ñage kira bate daba ole, ama toidale taingwli daba ole, ama agedale no kwian ulita alin, ama mo gadale dage kwian ulita ole. 3 Che kaire ngeru kwian me no, che agedu tanre me no malen Chube gerua me sugedu chege, che me Chube gerua gau dage, che geru ngwale gau dage. Diali che tadu agekalin che takalin kare, diali che tadu agekalin ulita me no kwian me Chube uñe kle age kare, che tañachugu age ene giti nga be suga noare chedi chui tangle. Che toidu age me no daba ole daba gbale boi daga ngwale. Daba na lle no no molen, che tadu lle kaire gakalin mau alin. Che jainchku daba nadi ulita, kaire ama ulita jainchku chedi. 4 Che kledu toi age me no ene ulita gire Chube gerua chku uñale chege, geru e gerule Chube che jwannga siere mo ta giti agedu no kwian ulita alin, ama noare kwian ulita ole, 5 ama che jun siere, ene che mi ji chuge bdagli agedu me no gdale. Ngeru che agedu me no tanre Chube dollale, ni che agedu no sidri ama alin gire ama che jun siere ji chugege age me no gdale, ama taidu dage che ulitage, ama noare che ole. Chube Oña che ta blitu, ama ta jagere ketu chege, che me toi ta ngeru kare, che toi ta jagere ole, che chage Chube takalin kare. 6 Chube mo Oña ketu chege Jesucristo che jwannga siere giti, ama mo Oña ketu chege che chudaboi tanre. 7 Chube mo ta giti agedu no che alin, Chube che jun siere ji chugege age me no gdale, ene Chube gwage chedi che no trate me jiske, kaire bdagli che be toi diali ule Chube ole chui tangle, che kle chui e manade. 8 Cha gerudu kare ulita, e ulia ulia, malen cha takalin ba me ka chite geru e trage kwian ulita ole, ba kwian tke tangle geru ege, ene be suge kwian ulitage kwian bai nu Chube gaba ulia ama mo ta gbadale age no diali Chube takalin kare. Geru e no kwian ulita alin, malen ba kwian ulita tkadale tangle no, geru e giti ba be kwian ulita chudaboi. 9 Kwian geru ngwale traganga daba ole, kwian geru unsuialin enusulin oña giti traganga kaire kwian geru traganga Moisés nu Chube gerua degaba unsuialin giti, ama ulita kle kira bate ngwale geru e ulita giti, ba me kira batadale ama ole, ba chegedale sugekare kwian kira bate geru giti daba olege, kira bate geru e giti me no ba alin, e ngwale. 10 Kwian Chubenu mneiteske kwian gweale ta daba tkakalin tangle geru ngwalege me gerule geru ulia gerule kare, gire kwian Chubenu ulita ta me chage salengwli, bonga be chage gdaite nate bonga be chage gdaite na nate. Ba kwian daba tkanga tangle ene kade, ba gerudale no no ama ole bitaite ama me ñage daba tke tangle geru ngwalege, ama me ba kerua gbe gdadi gire ba gerule no no nabitaite ama ole, ama me age ba gerule kare ba ama kage siere kwian Chubenu ulitage. 11 Ama me ba kerua gbe gdadi, ene chke uñale bage ama kwian me no, ama age ama takalin kare me age Chube gerua ulia gerule kare, ama kwian ene malen uñale bage ama be ji chuge bdagli age ene gdale. 12 Tito, cha be kwian kada Artemas kage ba ngwadi, agwa ama mi ñage joge cha be kwian kada Tíquico kage ba ngwadi, ama gweale be joge chke ba ngwadi gire cha takalin ba chie blike tienda chadi una kada Nicópolis, cha chui gbu joge una Nicópolige, noi suiale cha be kle toi llani. 13 Ngeru ba kwian gerunga daba giti kada Zenas kaire kwian kada Apolos, ba ama chudaboi no ulita, ama be joge chagengwage, lle bai ama takalinge ba lle kete amage, ene lle ulita giti ama me tañachugadale, ene ama be chage no ama be joge ngwadi. 14 Che ulita Chubenu daba chudaboadale no ulita ene. Kwian Chubenu gwage daba nadi, ulia daba na me lle molen mau alin, kwian Chubenu daba ene chudaboadale. Kwian Chubenu diali age no ene daba na alin ama me kle age ngwale, ama kle age no Chube gwa giti. 15 Tito, daba ulita kle aini cha ole gbi kage ba alin chada ai giti. Kaire cha gbi kage cha skatemanalla Chube giti ulita alin kle eni ba kle ngwadi, cha noare ama ulita ole. Cha takalin Chube age no ba ulita alin. Geru ai ene ulita cha Pablo chada degangu ba alin Tito. Che kle meni.
1 Cha Pablo chada ai degange ba alin Filemón: Ba cha skatemanalla no no ba cha chudaboanga Jesucristo gerua traganga kwian ole. Aini cha kle skage Jesucristo gerua dbe giti cha chada ai degange ba alin ule che daballa Jesucristo giti Timoteo ole. 2 Cha gdabonate gbi kage kwian ulita Jesucristo gerua gaba ulia alin kle mo lite ba ullage, kaire agwe ene cha gbi kage che ibotea Jesucristo giti kada Apia alin kaire che daballa Jesucristo giti kada Arquipo alin, Arquipo ama lle boanga Jesucristo alin ba boke cha chudaboanga no Jesucristo gerua giti. 3 Cha takalin che Ñenua Chube kaire che Chugagwalla Jesucristo age no ba alin kaire nga suga no gbe ba tale. 4 Chage chku uñale ba kle che Chugagwalla Jesucristo gai dage tañachuge ulia ama ñage age no ba alin kaire ba no Jesucristo ole kaire ba no kwian ulita Jesucristo gerua ganga ole. Malen cha gerule Chube ole gire diali cha tachke bage kaire cha gerule ba giti: “Chube, noare ba Filemón ta gbu age no ba takalin kare. 6 Cha gerule ba ole, ba ama ta gbe ba gerua Jesucristo giti kete dare kwian na gdaite kaire kairege, ene be suge trate mo tale amage Jesucristo giti ba diali kle age no cha ulita alin.” Cha kle gerule ene Chube ole ba giti. 7 Filemón, chadi nga suga noare ba giti ba kle mo ta dbe no diali daba ulita ole, daba Jesucristo gerua ganga ta olire gire ba kle daba e ta gbe nga suga no ole. 8 Nga suga noare chadi ba giti agwa cha geru tragakalin gbaite ba ole. Cha Jesucristo gerua ketanga malen cha ñage ba ta gbe ba agedale giti. 9 Cha kwian juma nege cha kle skage Jesucristo gerua dbe giti. Cha no no ba ole, cha gerule ba ole ta no giti lle boanga ba alin Onésimo giti. Cha Jesucristo gerua tragu Onésimo ole gire Onésimo Jesucristo gerua gau ulia, nege ama cha kirolla kare Jesucristo giti ama Jesucristo gerua gau ulia aini cha kle skage ngwadi. 11 Jondege Onésimo lle boanga ba alin ama agedu me no ba ole agwa nege gwangerugudba Onésimo ta me nge kare, nege ama ñage chege che gdabonate chudaboanga no no Jesucristo gerua giti, ama ta jwlitedu nege ama kle mo ta dbe no Jesucristo ole. 12 Cha Onésimo kageni naskuni ba ngwadi cha takalin ba ama gai ngwange no ba cha gai ngwange kare. 13 Cha kle aini skage Jesucristo gerua dbe giti cha tañachugu ma no cha Onésimo gaida aini ba kle cha ole kare cha tañachugu Onésimo gai ba giti tangle. Agwa cha me ñage tañachuge cha ama gaida aini cha takalin kare ma no cha ama kageni ba ngwadi. 14 Cha me agekalin skwlenre bage, cha takalin geru Onésimo giti chkedale uñale bage ene cha takalin ba age ba takalin kare ba kle cha chudaboi giti, cha me kle ba kage, cha alin no ba age mau tale ba takalin kare cha alin. 15 Uñale chage chui gweale jo tanglege Onésimo kigedu ba ngeru jo siere ba ullage, chage suge e boidu ene, ene nege ama ñage jogeni toini ba ole chui diali dale alin, 16 me lle boanga alin allabi ba alin agwa ba ama gadale mo daballanu kare Jesucristo giti ba nodale ama ole, ene chege ma no ba alin. Cha no Onésimo ole kaire ba mo ta dbadale ma no ama ole, me tai dage amage mo chudaboanga kareni allabi agwa ba mo ta gbale no ama ole, ama ba daballanu Jesucristo giti. 17 Filemón, ba kle gerule ba kle cha gai mo daballale Jesucristo giti, ene kaire ba Onésimo gale ngwange no ba cha gai ngwange kare. 18 Cha gerule ba ole ba tañachuge Onésimo agedu gweale me no ba ole kaire jiske bage lle gweale giti, ba ñage lle e ñanalla kade chage cha be lle e ñanalla kete bage Onésimo giti. 19 Cha Pablo cha geru ai dege agali ba alin Filemón mo ko giti, cha gerule ulia ba ole Onésimo jiske bage lle gweale giti ba lle e ñanalla kade chage cha be kete bage ama giti. Kaire cha ba ta gbe chke ba kaire jiske chage ba Jesucristo gerua gau giti, cha giti ba Jesucristo gerua keruchugu ba Jesucristo gerua gau ulia. 20 Cha daballa Jesucristo giti Filemón, ba Jesucristo gerua gaba cha kare, cha takalin ba cha ta gbe suga no ole, ba cha chudaboadale age no Onésimo alin, ba Jesucristo gerua ganga no malen ba agedale no Onésimo alin. 21 Chage suge ba be age cha gerudu kare malen cha kle chada ai degange ba alin, kaire uñale chage ba be age ma no Onésimo alin cha geruduge. 22 Kaire agwe Filemón, ba nga gweale ba ngwadi gbengwa gbe biale cha ngwange. Uñale chage ba ulita Chubenu kle gerule Chube ole cha giti Chube kwian ta gbe cha skajwennga, ene cha ñage joge basale badige. Ba ulita kle gerule tanre ene Chube ole cha giti, malen uñale chage Chube be cha chudaboi ene cha be jogeni ba ngwadi gwageni ba ulitadi. 23 Che daballa Jesucristo giti kada Epafras kle cha ole ule skage Jesucristo gerua dbe giti ama gbi kage kaire ba alin. 24 Cha chudaboanga Jesucristo gerua traganga kada Marcos kaire Aristarco kaire Demas kaire Lucas ama ulita gbi kage ba alin. 25 Cha takalin che Chugagwalla Jesucristo age no ba alin ba manade no. Geru ai ene ulita cha Pablo chada ai degangu ulita ba alin Filemón. Che kle meni.
1 Cha chada ai dege ba cha bitalla israelita ulita Chubenu alin: Unsuialin tangle Jesucristo bebi menga nga dba ai giti gire Chube kwian ama gerua ketanga ulita gbu Chube gerua kete che enusulian oña ulitage, Chube gerudu diali kwian ama gerua ketanga ole bedre bedre, me geru ulita gbu chke uñale amage chui gbaitre alinge, Chube gerudu kwian ama gerua ketanga ole gbire kaire ama lle boanga nga ngaña giti kagu ama gerua kete kwian ama gerua ketangage kaire ama mo kerua gbu suge kwian ama gerua ketangage. Ai kare ene Chube gerudu kwian ama gerua ketanga ole Chube gerua gbe chke uñale che enusulian oña ulitage. 2 Agwa nege tangle chui ai che kle toige Chube nu gerubabi che ole ama Kirolla Jesucristo giti. Chube mo Kirolla Jesucristo kagu nga dba ai giti geru amanu gbe chke gda uñale chege. Chube nga ulita kwian ulita lle ulita dodadu Jesucristo giti kaire Chube nu lle ulita dodaba ama lle e ulita jigu ama Kirolla Jesucristo kote, Jesucristo chege lle ulita mauñale kwian ulita Chugagwalla kweri. 3 Jesucristo kle lle ulita manade, ama kiraske, ama kle gerule alin allabi gire lle ulita kle chege no. Jesucristo Chube Kirolla amaña Chube, Jesucristo giti che ñage ama Ñenua Chube uñe, che Jesucristo uñe, e salengwli che Chube uñe kare. Jesucristo Chube Kirolla kle Chube noare kiraske kaite nate chege. Jesucristo agedu ulita nga dba ai giti kwian ulita alin kwian jwanle siere ji chugege age me no gdale kwian gbagda trate no Chube gwa giti. Jesucristo agedu ene ulita nga dba ai giti gire ama joni nga ngaña giti ama toidu dba Chube ngena Chube ko taingwli giti kwian ulita Chugagwallale. 4 Chube mo Kirolla Jesucristo gbu lle ulita Chugagwallale ma kiraske lle ulitage. Jesucristo Chube Kirolla, e giti Jesucristo chege ma kweri ma kiraske lle boanga Chube alin nga ngaña giti ulitage. 5 Ulia ni bitaite Chube gerudu lle boanga amanu gdaite ole ama gerudu mo Kirolla ole kare, Chube gerudu: “Ba cha Kirolla, nege cha ba kaite nate kwian ulitage cha Kirollale, ene chke uñale kwiange ulia ba cha Kirolla cha ba Ñenua.” Chube me gerudu ene dale ni lle boanga amanu gdaite ole agwa ama Kirolla Jesucristo ole ima ama gerudu ene. Ni kaire agwe Chube gerudu lle boanga ama alin gdaite giti ene: “Cha takalin chke uñale kwian ulitage cha ama Ñenua, kaire ama cha Kirolla.” Ni Chube gerudu ene bitaite ai kare lle boanga ama alin giti agwa Jesucristo giti ima ama gerudu ene. Geru e giti chke uñale chege ulia Jesucristo ma kweri ma kiraske lle boanga Chube alin ulitage. 6 Chube mo Kirolla gdaitre alin Jesucristo kagu nga dba ai giti gire Chube gerudu mo Kirolla giti ene: “Cha takalin lle boanga ulita cha alin nga ngaña giti cha Kirolla gai dage mo Chugagwallale gerule no ama giti.” Chube gerudu ene mo Kirolla giti. 7 Kaire Chube gerudu lle boanga amanu giti ene: “Cha Chube kle lle boanga chanu nga ngaña giti ulita kage salengwli mleuda kare nga ulitage, kaire cha ama gbe salengwli jita gwade kare age gweale kwian ole cha kiralla giti.” Chube gerudu ene lle boanga amanu giti. 8 Agwa mo Kirolla Jesucristo ole Chube gerudu ai kare: “Ba Chube salengwli cha amaña Chube kare, ba be chege kwian Chugagwalla kweri diali dale alin, ba kle age ulita no trate kwian ole, diali ba kle age ulita ba kle gerule kare. 9 Kwian age no trate, e skwen no no ba gwage, agwa kaire agwe kwian age me no sugaska ba gwa giti, e skwen me no me no bage, malen e giti cha ba Ñenua ba gau ba gbu kwian Chugagwalla kweri, cha ba gbu ma kweri ma kiraske lle boanga chanu ulita nga ngaña gitige ene badi nga suga noare ulita diali.” 10 Kaire Chube gerudu mo Kirolla Jesucristo ole ene: “Ba kwian Chugagwalla kweri, gwangeabi ba nga ulita dodadu no biale nga dba giti, kaire ba amaña nga ngaña dodadu ulita no trate. 11 Ba nga ulita dodadu nga ngaña giti nga dba giti nga e ulita lle e ulita be jogenga ngwale salengwli ñometra jagere kle joge juda me no kare. Ñometra kle joge juda ñometra kle drete gire kwian ñometra juda blite ñometra na jageredi. E kare ene ba be nga gbe jagere nganake ulita, agwa ba mi jwlite dale, ba be chege kwian Chugagwalla kweri diali, ba be kle toi diali dale chui tangle.” Chube gerudu ene mo Kirolla gdaitre alin Jesucristo ole. 13 Ni bitaite Chube gerudu lle boanga amanu gdaitege ene: “Toi dba cha ngena cha ko taingwli giti, chui be chke gire cha be ba gbe kirachke ba dolla ulitadi, ba be chege dolla ulita Chugagwalla kweri.” Chube gerudu ene mo Kirolla Jesucristo ole agwa Chube me gerudu ene ni bitaite lle boanga ama alin nga ngaña giti ole. 14 Ulia lle boanga Chube alin nga ngaña giti ama kle lle boi Chube alin Chube kle ama kage kare, Chube kle ama kage kwian ulita bai kaire Jesucristo gerua gaba manade no kaire kwian e chudaboi, lle e kare alin allabi Chube kle lle boanga amanu nga ngaña giti gbe age, lle boanga Chube alin me kweri kiraske Chube Kirolla Jesucristo kare.
1 Jesucristo ma kweri ma kiraske lle boanga Chube alin nga ngaña giti ulitage, malen che nu geru Jesucristo giti keruchugaba che geru e gadale gwangerugu ulia, geru e giti che mo ta gbadale suge moge ma ngle trate mo tale ene che mi joge siere Chube gerua uliage, che be chege diali ama gerua ole. 2 Chube geru gbu che enusulian unsuialin ulita alin kwian toidale mine Chube takalin kare. Chube lle boanga ama alin kagu geru e amanu kete kwian ulitage. Geru Chubenu e chegu kiraske, kwian bai kaire me agedu Chube geru e gbu kare, kwian e giti jo ji gbaba tirare ama agedu me no gdale. 3 Nege tangle Chube gerua no ma kiraske Jesucristo giti jo ketaba chege che jwangda siere ji chugege age me no gdale. ¿Agwa gire mineade che gweale kle tañachuge che be chege sugekare ji chugege, ji me joge gbaba tirare che giti kwian unsuialin tangle kare che me Jesucristo gerua e gai ulia giti? Che me ñage tañachuge ai kare ene. Kwian ulita bai kaire me kle Chube gerua Jesucristo giti gai ulia me kle geru Jesucristo giti tallade, kwian e kaire agwe ji chugadale kwian unsuialin tangle kare ama agedu me no gdale. Che Chugagwalla Jesucristo amañabi geru gbu gwangea kwian alin kwian ama gerua gai ulia mo tale gire Jesucristo giti kwian e tien gitiru ji chugege ama agedu me no gdale. Kwian ulita bai geru jun Jesucristoge Jesucristo kledu nga dba ai giti gire, kwian e giti geru chku uñale chege geru Jesucristonu geru no trate ulia. 4 Chube Jesucristo kaire kwian Jesucristo gerua ketanga dabage gbu lle daga ngwale no tanre dodade Chube kiralla giti kwian tanre gwa giti, kaire Chube Oña giti Chube ta ketu kwian ulita ama gerua gaba uliage lle gweale boale ama alin ama takalin kare. E giti sugedale chege Chube gerua Jesucristo giti geru e ulia, che geru e gbadale gdadi no trate mo tale me geru e kagenga ngwale. 5 Chube mi lle boanga Chube alin nga ngaña giti gbe kwian ulita chugagwallale ni lle na ulita chugagwallale dale, agwa chui be chke gire ama be mo Kirolla gdaitre alin Jesucristo gbe kwian ulita Chugagwalla chui tangle diali. Jesucristo ma kweri ma kiraske lle boanga Chube alin nga ngaña giti ulitage. 6 Unsuialin tangle kwian chugagwalla David gerudu Chube ole kwian ulita giti, geru e jo degaba ene: “Chube, ba kweri no trate, ba kle tai dage kwian ulitage. Ba kle kwian ulita manade no. Kwian ulita me ñanaske dale, agwa ba no kwian ulita ole. 7 Kwian ulita me chege lle boanga ba alin nga ngaña giti kare, kwian ulita chege ma soli amage agwa ba kwian gbu no trate chege kweri, ba lle ulita ba nu dodaba jigu kwian ulita kote kwian chege lle e ulita chugagwallale.” David chada degu ama gerudu ene Chube ole kwian ulita giti unsuialin tangle, malen chada ai giti suge chege Chube lle ulita ama nu dodaba jigu kwian ulita kote, ama me lle jigu lle boanga ama alin nga ngaña giti kote dale, ni Chube lle gdaite jigu sugekare kwiange, lle ulita chegu kwiange kwian chegu lle ulita chugagwallale. Agwa kaire agwe uñale chege me klebi chegé ulita chada kle degaba kare, nege tangle kwian ulita me kle chege lle ulita chugagwallale dale. 9 Agwa sugedale chege Jesucristo giti lle ulita be chege Chube gerua kle degaba unsuialin tangle gerule kare. Jesucristo ma kweri ma kiraske lle ulitage, bdagli ama be chege lle ulita kwian ulita Chugagwalla kweri. Jesucristo chku nga dba ai giti ama medunga kwian kare ama mo gbu sugetidale ma soli lle boanga Chube alin nga ngaña giti ulitage ama mo gbu salengwli kwian ngwale kare, ene ama ñadu boi daga ngwale kwian kle boi kare. Chube noare kwian ole ulita malen Chube agedu no kwian ulita alin ama mo Kirolla Jesucristo kagu boadalenga daga ngwale jogekeda kwian ulita alin. Jesucristo guleda kwian ulita agenga me no alin, gire e giti Chube ama gbuni naskuni chegeni ma kweri lle ulitage kwian ulita Chugagwalla kweri. 10 Chube nu lle ulita dodaba, lle e ulita kle Chube alin ama gbagda kweri ama ta gbagda nga suga no ole, Chube takalin kwian tanre chege toi ama ole nga ngaña giti ama oliale, malen Chube sugedu moge ama mo Kirolla Jesucristo gbadale boi daga ngwale jogekeda kwian ulita age me no giti, ene Jesucristo ñage chege kwian chudaboanga no kwian jwannga siere ji chugege age me no gdale ene Jesucristo giti kwian chege trate Chube gwa giti ñage toi Chube ole kaire Jesucristo ole nga ngaña giti chui tangle diali Chube takalin kare. 11 Jesucristo kwian gbanga no trate me jiske Chube gwa giti, kwian bai Jesucristo gerua gaba ulia, kwian ene ulita chege trate Chube gwa giti kaire ama ulita chege Chube oliale, Chube chege ama Ñenuale salengwli Chube Jesucristo ole kare. Malen Jesucristo me kle ibule kwian ama gerua ganga gai mo bitallale ulita. 12 Jesucristo gerudu Chube ole kwian chui bdugu ama gerua ganga ulia giti, Chube gerua degaba unsuialin kada Salmos gerule e giti, chada e gerule: “Chube, ba cha Ñenua, cha be gerule no ba giti kwian ulita cha gerua ganga ole, ama cha bitallale, ama ole cha be gerule no ba giti ba mine, ama ole ule cha be mo gate no ba giti cha ulita kle mo litaba ule gire.” 13 Kaire Chube gerua degaba unsuialin gerule Jesucristo kle Chube gai mo chudaboangale salengwli kwian Chubenu ulita kle Chube gai mo chudaboangale kare, chada kle degaba Jesucristo gerudu giti ene: “Cha be mo ta gbe kiraske Chube gai ulia cha chudaboangale.” Kaire chada kle degaba Jesucristo gerudu Chube ole giti ene: “Cha Ñenua Chube, cha kle ai ule kwian ole kwian bai kaire ba nu ta gbaba cha gai ulia chage cha ole, ama ulita chege ba oliale ule cha ole.” Chube gerua degaba unsuialin gerule ene Jesucristo giti. 14 Kwian ulita bai kaire Jesucristo kle gerule giti kwian ene chege Chube oliale Jesucristo ole ule. Salengwli kwian kle toi u gbaitre alinge gwa ulita mo olia ole kare, e kare ene Jesucristo chegu kwianle salengwli kwian ulita kare, ene ama ñadu jogekeda boi ulita daga ngwale kwian kle boi kare. Agwa Jesucristo jokeda ama jaba chkuni gwade gire e giti ama kirachku che dolla Satanádi, che dolla kwian gbanga age me no Chube dollale malen age me no kbiale kwian ulita kle jogekeda. Jesucristo agedu giti che dolla e me chegu kiraske dale ngeru kare che gbe jogekeda age me no kbiale. Jesucristo kirachku che dolladi, malen kwian me kendalenga dare jogekeda giti, diali kwian ulita chru ole tanre ta kle kennga jogekeda giti ni chru e joge tangle amage, diali ama chege tañachuge jogekeda giti, agwa Jesucristo ta chrule junnga kwian ama gerua gangage, che dolla Satanás amaña kada Diablo me chegu kiraske Jesucristoge. 16 Ulia Chube me Jesucristo kagu nga dba ai giti lle boanga Chube alin nga ngaña giti kare lle boanga chudaboale, me ene, agwa Chube Jesucristo kagu nga dba ai giti kwian kare che enusulian oña Abraham oindallaske, Jesucristo ulia kwian malen ama chegu kwian ulita bitallale ene ama ñage kwian ulita chudaboi no. Jesucristo kledu toi kwianske nga dba ai giti gire che dolla Satanás mo chugu ama ole, Satanás tadukalin Jesucristo gbe age me no agwa me ñadu. Jesucristo boidu salengwli daga ngwale nga dba ai giti kwian ulita kle boi kare, ene ñage suge amage kwian kle boi daga ngwale kare gire ama ñage kwian Chubenu ulita chudaboi me age dolla Satanás takalin kare. Jesucristo jokeda kwian ulita jwanle siere ji chugege age me no gdale, ene Jesucristo giti kwian age me no ulita Chube talla mlienga. Ulia ama chegu ulita kwian kare agwa ta no trate ole ene ama ñage chege Chube gwa giti gerunga kwian alin Chube ole ma no trate ma kweri gerunga daba alin na ulitage. Jesucristo tai dage kwian ulitage, Jesucristo kle kwian ulita ama gerua gaba ulia chudaboi diali kwian ta gbe no Chube ole.
1 Cha bitalla ulita Jesucristo giti, Chube che ulita gau mau alin ama che ta gbu Jesucristo gai ulia, malen ba ole cha gerule ene: Ba mo ta gbadale tañachuge ulia Jesucristo giti Jesucristo Chube gerua ulia ketanga kwian ulitage, ama giti suge chege Chube takalin che toi mine, kaire Jesucristo gerunga Chube ole che Chubenu alin che kle age me no giti, ama gerunga che alin Chube ole ma no trate ama ma kweri gerunga na Chube ole ulitage. Gire ene sugedale chege Jesucristo ñage che chudaboi ma no chudaboanga na ulitage. 2 Ulia Jesucristo mo ta gbu age diali no ulita kwian alin Chube tadukalin kare salengwli che enusulian oña unsuialin kada Moisés kare. Unsuialin Moisés agedu ulita Chube tadukalin kare kwian israelita chudaboi, ama lle bo no Chube alin u gerungwa Chube olege. Agwa Jesucristo ma kweri ma kiraske Moisége. 3 Cha geru ai ñachuge bage ene: U ulita kle dodaba, ulita kwian gweale kle u e dodade, kwian u dodade no kwian na gwage u edi noare gire kwian me gerule no u alin allabi giti, me ene, kaire ama gerule ma no kwian bai kaire u e dodadu giti. E kare ene che gerudale ma no Jesucristo giti che gerule Moisés gitige. Ulia Moisés agedu ulita no Chube alin Chube tadukalin kare kwian israelita chudaboi agwa diali che Jesucristo gbadale ma kweri Moisége. Chube lle ulita dodanga, Jesucristo ama Kirolla, Jesucristo agedu ulita kwian alin Chube ama kagu age kare, Jesucristo che ama gerua ganga gbu no trate Chube gwa giti chege kwian Chubenu ulia. 5 Chube Moisés gbu lle boi ama alin kwian israelita chudaboangale, ulia Moisés lle bo no Chube tadukalin kare ulita kwian israelita alin. Moisés diali chegu gerule gweale kwian ole kwian ta gbe Chube be gerule mine bdagli giti Chube Kirolla Jesucristo be chie gire. 6 Agwa ulia Chube Kirolla Jesucristo chku gire ama chegu ma trate ma kweri Moisége salengwli kwian u mauña kirollanu kle chege ma kweri lle boanga gwa ama alinge kare. Jesucristo agedu ulita no trate che kwian Chubenu alin ama Ñenua Chube ama gbu age kare. Ulia che ulita mo ta gbadale kiraske diali Jesucristo gai ulia gwangerugu tañachuge ulia ama ñage che chudaboi lle ulitage chui tangle dale gire ene che chege Chube oliale ulia Jesucristo giti. 7 Jesucristo Chube Kirolla ama ma kweri Chube gerua ketanga unsuialin tangle kada Moisége, e giti che Jesucristo gerua gbadale gdadi no, che me ñage age Jesucristo gerua ole salengwli che enusulian oña ulita unsuialin tangle agedu Moisés gerua Chube giti ole kare. Chube Oña kwian ta gbu unsuialin chada dege e giti, chada e gerule: “Chube gerudu: ‘Nege ba kle cha gerua keruchuge geru suge bage cha kle gerule mine, gire ba ulita me mo ta gbadale mno age me no cha gerua dollale ba enusulian oña agedu unsuialin tangle kare. Ba enusulian oña ulita unsuialin tangle mo ta gbu mno cha Chubege me tadu agekalin cha tadukalin kare, ama mo ta gbu mo chuge cha dollale nga gballage cha Moisés kagu ama ulita jwen siere nga Egiptoge gire, kwian e ni tañachugu cha agedu no ama alin giti. Ama ulita mo chugu cha ole mangire cha ñage skochie amadi jabale ama kle age me no giti. Ama ulita kledu chage nga gballage chura ngle cuarentage, e suiage cha ama chudabo cha ama manadu no cha agedu no tanre ama alin, sugedu amage ulita cha agedu no ama alin agwa ama mo ta gbu gwangerugu mno me agedu cha gerudu kare, ama ulita diali mo tku dole cha ole. 10 Malen e giti cha ta skochiu tanre kwian e ulita kledu chage nga gballagedi ama me cha gau dage gdale. Skole cha tañachugu ene mo tale amadi: Diali kwian e me kle cha gai mo Chugagwallale ama me takalin cha gerua gbe gdadi, ama me takalin cha ama jonlla dbe. 11 Cha tañachugu mo tale amadi ene, gire cha gerudu ene dare skochiege amadi ama mo ta gbu mno chage gdale, cha gerudu: Ulia ulia cha mi ama chuge ngwadi joge toi nga suga no ole nga no ngwadige cha gerudu ama ole nga ama be toige giti. Cha gerudu ene ulita kwian giti.’ ” Chube gerua jo degaba ene chada giti unsuialin tangle che enusulian oña ulita giti. 12 Cha bitalla ulita Jesucristo giti, cha gerule ba ole, ba chagedale ta giti Chube geruage ene ba mi mo ta blite Chube gerua dollale che enusulian tanre agedu unsuialin kare, kaire ba mi chege ta me no ole Chube ulia dollale me Chube gerua gai giti gdale. Ulia cha gerule ba ole, ba mo ta gbadale Chube gerua Jesucristo giti gai ulia kiraske gwangerugu age diali Chube takalin kare. 13 Ba me mo ta gbe age Chube dollale che bitalla unsuialin tangle agedu kare agwa ma no ba mo chudaboi gwangerugu ongoru ongoru kira gai Chube gerua giti chui kaire kairege nga ai kle gire, ene ba ulita ni gdaite be mo ta gbe age me no Chube dollale, ene che dolla Satanás mi ñage ba anblite ba ta blite age me no me Chube gerua Jesucristo giti gai ulia gwangerugu. 14 Che ta chegekalin Chube ole ule Jesucristo ole diali dale alin gire ene che mo ta gbadale ulia kiraske Jesucristo gerua giti chui tangle kaire tañachuge ulia Chube ñage che chudaboi che ama gerua gau gwangea kare gire. 15 Ba tachkedale Chube gerua degaba unsuialin giti, chada e gerule ene: “Nege ba kle Chube gerua keruchuge, geru suge bage Chube kle gerule mine, gire ba ulita me mo ta gbe mno age me no Chube gerua dollale enusulian oña agedu unsuialin tangle kare.” 16 Chube gerua degaba unsuialin gerule ene, nege cha geru kade bage, ¿unsuialin tangle chema Chube gerua keruchugu agwa mo ta gbu mno Chube gerua dollale? Moisés mo bitalla ulita jun siere nga Egiptoge kwian e ulita mo ta gbu mno Chube geruage, Moisés kwian e ulita jun siere boi daga ngwalege nga Egiptoge Chube kirallaske, Moisés chegu kwian e chugagwallale kwian jonlla dbanga Chube nga kaitu amage ngwadi nga gballage. 17 ¿Kaire chema ole Chube kledu ta skochie tanre kwian agedu giti chura cuarentage? Che enusulian oña ulita bai kaire agedu me no Chube gerua dollale nga gballage me agedu Chube gerudu kare, kwian ene ulita ole Chube chegu skochie chura cuarentage kwian e kledu chage nga gballage Moisés ole gire. Kwian juma e ulita giti Chube ji gbu, kwian e ulita jokeda nga gballage. 18 ¿Kaire chema ole Chube gerudu mno kwian mi ñage joge toi nga suga no ole nga no kada Canaánge Chube gerudu amage giti? Che enusulian oña ulita bai kaire me Chube gerua gau dage me mo ta du age Chube tadukalin kare, kwian e ole Chube gerudu ene, kwian e me ñadu joge toi nga suga no ole nga no ngwadi Chube gerudu ama ole giti nga Canaánge. 19 Cha gerule ulia ba ole, Chube gerudu che enusulian oña unsuialin ole kwian Chube gerua gadale ulia mo tale, ene kwian e ñage joge toi nga suga no ole nga no kada Canaánge. Agwa kwian e suiage me Chube gerua gau ulia me agedu Chube tadukalin kare, malen e giti kwian me ñadu joge toi nga suga no ole nga noge, ama ulita chegu chagenga ngwale nga gballage chura ngle cuarentage, ama ulita jokeda ne ngwadi ni ama ñadu joge chke toi nga suga no ole nga Canaánge.
1 Ulia cha gerule ba ulita ole, che nege tangle mo ta gbadale chage ta giti Chube geruage, ene ni che gdaite mo ta gbadalebi boi enusulian oña unsuialin tangle boidu kare. Nege tangle Chube gerua kle gbaba che alin salengwli unsuialin tangle Chube gerua kledu gbaba kwian alin kare. Unsuialin tangle Moisés suiage Chube mo gerua gbu chke uñale kwiange, ama tadukalin kwian ulita ama gerua gai ulia age ama takalin kare, ene kwian ñadu tien gitiru ama kledu boi daga ngwale ulitage ama ñadu joge toi no nga suga no ole nga kada Canaánge Chube tadukalin kare ama alin. Che enusulian oña unsuialin Chube gerua keruchugu Moisés gerudu ama ole kare agwa ama me Chube gerua gau ulia me toidu Chube gerudu kare, malen e giti kwian me ñadu joge toi nga suga no ole nga Canaánge. Kaire agwe nege tangle Chube mo gerua Jesucristo giti gbu chke uñale che ulitage. Che ulita Chube gerua Jesucristo giti gau ulia, gire e giti che tien gitiru ji chugege age me no gdale, kaire che be joge toi diali nga suga no ole ule Chube ole Chube gerudu kare che alin. Ene mi boi che ole boidu che enusulian oña unsuialin tangle ole kare. Chube gerua degaba unsuialin gerule che enusulian oña giti, chada e gerule: “Chube gerudu: ‘Cha gerudu ta skochie kwian ole kwian bai kaire me mo ta gbu age cha takalin kare, kwian ene ulita mi joge toi nga suga no ole nga noge cha gerudu giti ama ole.’ ” Chube gerudu ene che enusulian oña unsuialin giti. Agwa ulia nge jondege alin Chube nga dodadu ulita gire, Chube kledu biale kwian ama nu dodaba ta gbe toi nga suga no ole ule ama ole kwian bai kaire ama gerua gai ulia mo tale. Agwa kaire agwe uñadu Chubege kwian toinga Moisés suiage tangle mi ama gerua gai ulia gire ene uñadu amage ama mi ñage kwian e chuge ngwadi joge toi nga suga no ole nga no kada Canaánge. 4 Nge jondege alin Chube nga dodadu lle ulita dodadu kaire kwian dodadu, ulita jo dodaba chui gbadereke, gire chui gukege chku lle ulita kledu biale dodaba gire Chube undegu. Unsuialin tangle Chube Moisés ta gbu chada dege chui gbagukedale undegangwa giti, chada e gerule: “Chui gukege chku gire Chube undegu nga suga no ole lle ulita dodadege.” Moisés Chube gerua degu ene unsuialin tangle, Chube lle ulita dodadu bigire ama undegu nga suga no ole lle ulita dodadege, e kare ene Chube takalin kwian bai kaire ama gerua gai ulia chege toi diali nga suga no ole. 5 Kaire kwian ulita Moisés suiage alin Chube tadukalin kwian ulita joge toi nga suga no ole nga Canaánge, agwa kwian e me Chube gerua gau dage ulia me tadukalin age Chube tadukalin kare, malen Chube gerudu kwian e giti: “Ama mi ñage joge toi nga suga no ole nga no ngwadige.” Chube gerudu ene che enusulian oña giti che enusulian oña me ama gerua gau ulia gdale unsuialin tangle. 6 Unsuialin tangle che enusulian oña Chube gerua keruchugu agwa ama me Chube gerua gau ulia, malen e giti Chube me ama chugu ngwadi joge toi nga suga no ole nga Canaánge. Chube ji gbu ene ama ulita giti kaire Chube kwian gbu chage ngwale chura cuarentage nga gballage. Kwian chagedu nga gballage chura cuarentage kwian me Chube gerua gau ulia kbiale, kwian juma ulita jokeda kaire agwe Moisés jokeda nga gballage gire Josué chegu Moisés taneage kwian chugagwallale kwian jonlla dbanga. Josué kwian jogebakeda olia nabitaite ulita du nga Canaánge, agwa kaire agwe ni Josué ñadu kwian chudaboi toi nga suga no ole nga Canaánge kwian me Chube gerua gau ulia gdale. Ai ulita boidu ene agwa Chube tadukalin diali kwian gweale toi nga suga no ole ule ama ole malen ama chui na gbu kwian ama gerua gai ulia alin. Chura jo tangle sbali sbali gire Chube kwian chugagwalla David ta gbu chada dege ene cha chada ai deganga gerudubi giti tanre kare, chada e gerule: “Nege ba kle Chube gerua keruchuge, geru suge bage Chube kle gerule mine, gire ba ulita me mo ta gbadale mno age me no Chube gerua dollale.” David Chube gerua degu ene unsuialin. Sugedale chege ulia Chube me kledu gerule che enusulian oña toi nga suga no ole nga kada Canaánge alin allabi giti, sugedale chege chui bebi chke gire kwian ulita bai kaire nu Chube gerua Jesucristo giti gaba ulia mo tale kwian e be ñage joge toi nga suga no ole ule Chube ole salengwli Chube undegu chui gukege nga suga no ole ama lle ulita dodaduge kare. 10 Kwian bai kaire Chube gerua Jesucristo giti gai ulia ama be chege nga suga no ole salengwli Chube undegu nga suga no ole ama lle dodaduge gwangeabi kare. 11 Malen e giti che ulita mo ta gbadale kiraske Chube gerua Jesucristo giti gai ulia gwangerugu age diali Chube takalin kare ene che ñage toi diali nga suga no ole ule Chube ole. Che chagedale ta giti diali me Chube gerua gai ngwale me mo ta gbe mno Chube geruage che enusulian oña unsuialin tangle mo ta gbu kare. Che me mo ta gbadale age me no Chube gerua dollale che enusulian oña unsuialin tangle agedu kare. 12 Che me Chube gerua gadale geru ngwale kare, Chube gerua gwade kiraske, Chube gerua me geru na kare. Chube gerua ulita ulia, Chube diali kle gerule mau ta giti geru e ulita kiraske, Chube diali kle age ulita Chube kle gerule kare. Chube gerua kiraske salengwli sbadi dau no dau degabale ka bonga kare, sbadi e kare giti kwian ñage lle ulita boi no, kwian ñage bda dage blikare tadi ñage bda gweda sbadi e kare giti. E kare ene Chube gerua ñage joge chke kwian ulita tale biale kiraske kwian gbe tañachuge kwian kle age giti. Kaire Chube gerua giti suge kwiange ama mo ta blitadale Chube ole suge kwiange ama me kle tañachuge trate ama me kle age trate Chube gerua kle gerule kare. 13 Chube lle ulita dodadu uñale trate Chubege lle e ulita mine. Chube che ulita ta uñe trate, che me ñage mo ogeda tañachuge chegé sugekare Chubege me chke nate uñale Chubege che ta mine ni che kle age mine. Ulia lle ulita kwian ta ulita kle gbaba Chube gwa giti uñale, kaire lle ulita kle boi Chubege ulita uñale. Kaire chui bdaglige lle ulita che nu ageba giti Chube be gerule che ole giti, ulia ni lle gdaite kle chege ogabada sugekare Chubege, ulita ulita kle chke nate uñale Chubege. 14 Jesucristo Chube Kirolla ama kle nga ngaña giti Chube ole ule, Jesucristo gerunga che alin Chube ole che ka chudaboanga, ama ma kweri ma kiraske kwian gerunga Chube ole daba alin na ulitage. Malen che mo ta gbadale chage gwangerugu diali che Jesucristo gau ulia kare ngeru. 15 Ulia Jesucristo kledu toi nga dba ai giti kwianske gire ama boidu tanre daga ngwale che kwian ulita kle boi kare, che dolla Satanás diali mo chugu Jesucristo ole Jesucristo ta blite age me no Chube dollale me age Chube takalin kare. Agwa ni bitaite Jesucristo agedu me no Chube dollale, ama diali toidu no trate Chube takalin kare. Che dolla Satanás agedu Jesucristo ole salengwli ama kle age che ole kare agwa Jesucristo ni agedu me no bitaite, kaire agwe Jesucristo boidu daga ngwale ulita salengwli che kle boi kare, malen sugedale chege Jesucristo che chudaboanga gerunga no che alin Chube ole, amage suge trate ulita che kle boi daga ngwale giti malen ama ñage che chudaboi no no me age Satanás takalin kare. 16 Jesucristo che ka chudaboanga kle ule mo Ñenua Chube ole nga ngaña giti, malen e giti che me kwachiedale chudaboi kade Chubege, Chube diali ta no che ole ama ta che chudaboakalin, malen che mo ta gbadale gerule Chube ole me ta kennga ole. Ene Chube be tai dage chege ama be che chudaboi be kira kete chege ngle me age me no ama dollale, kaire ama be age no che alin che kle boi daga ngwaleske. Che Jesucristo gerua gai ulia giti Chube diali kle age no che alin, Chube Jesucristo gbu che ka chudaboanga gerunga Chube ole che alin, malen Jesucristo giti Chube kle che chudaboi diali.
1 Unsuialin tangle che enusulian israelita ulitaske Chube kwian gweale gau kwian israelita bitalla ulitaske kwian ene ulita gdaite gdaite chegu daba chugagwallale gerunga Chube ole daba alin. Diali kwian israelita ulita chiu bda dbe ketale kwian gerunga Chube olege, ene kwian gerunga Chube ole bda e ulita guda bda gugu Chube gwa giti daba agedu me no giti ñanale, kwian gerunga Chube ole agedu ene daba alin giti Chube me ji gbe daba giti daba agedu me no gdale. 2 Agwa kwian gerunga Chube ole daba alin ama kaire agwe kwian agenga me no Chube gwa giti, malen kwian e kaire diali bda ketu Chubege bda guda gugu Chube gwa giti mo alin naskuni ama agedu me no ñanale, gire ene ama ñadu chege age daba na alin daba chudaboi ñadu bda gweda Chube gwa giti daba na agedu me no ñanale. Kwian gerunga Chube ole daba alin ulita diali kledu age gweale me no Chube gwa giti, malen ama ñage tai dage daba na ulita agenga me noge kaire daba ulitage bai me suge trate ama kle age me no giti, kwian gerunga Chube ole ñadu daba agenga me no ene ulita chudaboi no diali. 4 Ni kwian gdaite gballa ñadu mo gbe agali daba chugagwallale gerunga Chube ole daba alin, ulia Chube alin kledu kwian gai gerungale Chube ole daba alin. Unsuialin tangle Chube Moisés daballa kada Aarón gau ngeru gerungale Chube ole daba alin gire Aarón suiage gwangerugu Chube kwian na gau gdaite gdaite gerule Chube ole daba alin. 5 E kare ene Chube Jesucristo gau gbu ma kweri ma kiraske kwian gerunga Chube ole daba alin na ulitage. Jesucristo me mo gbu agali chege gerunga Chube ole kwian alin, Chube ama gbu. Sugedale che ulitage Jesucristo gerunga Chube ole kwian alin ma kweri ma no kwian gerunga Chube ole daba alin na ulitage. Chube gerua degaba unsuialin gerule Chube gerudu Jesucristo ole giti, chada e gerule: “Ba cha Kirolla, nege cha ba kaite nate kwian ulitage cha Kirollale, ene chke uñale kwiange ulia ba cha Kirolla cha ba Ñenua.” Chube gerudu ene Jesucristo ole. 6 Kaire Chube gerua degaba unsuialin gerule Chube gerudu Jesucristo ole giti, chada e gerule: “Ba gerunga cha ole kwian alin kweri kiraske diali chui tangle salengwli kwian kada Melquisedec kare.” Chube gerua degaba unsuialin gerule ene Jesucristo giti. 7 Jesucristo kledu toi nga dba ai giti gire ama gerudu kiraske Chube ole ta olire tanre ama bebi jogekeda sugetigebi gire, ama gerudu Chube ole: “Cha Ñenua, uñale chage ba kiraske tanre, cha takalin ba cha jwen siere boi daga ngwalege ene cha me jogekeda. Agwa ulia cha ta agekalin ulita ba takalin cha age kare.” Jesucristo gerudu ene Chube ole chudaboi kade Chubege Chube me ama chuge ngwadi jogeda. Ulia Jesucristo Chube Kirolla, ama tadu agekalin ulita ama Ñenua Chube takalin kare, malen Chube Jesucristo keruchugu ama Jesucristo ta gbu kiraske mo chuge ngwadi boi daga ngwale gwaleda kwian ulita agenga me no giti Chube tadukalin kare. Jesucristo boidu giti sugedu Jesucristoge mnoare Chube gerua gbe gdadi age diali Chube takalin kare, agwa ama mo ta gbu age Chube takalin kare boi daga ngwaleske. 9 Jesucristo agedu ulita Chube takalin kare ama jokeda kwian ulita giti gire Chube Jesucristo jaba gbuni gwade, ene kwian ulita bai kaire Jesucristo gerua gbe gdadi Jesucristo gai dage mo Chugagwalla, kwian ene ulita tien gitiru ji chugege ama agedu me no gdale joge toi ule Chube ole nga ngaña giti chui tangle diali. 10 Chube Jesucristo gbu gerunga Chube ole kwian alin kweri kiraske kwian ka chudaboanga salengwli kwian unsuialin tangle kada Melquisedec kare. 11 Ulia geru na tanre kle tragale Jesucristo chege gerunga Chube ole kwian alin giti, agwa kaire mnoare geru e ulita gbe chke uñale ba ulitage, ba geru keruchuge agwa ba kianchie mo ta gbe geru gbe gdadi malen geru me suge bage. 12 Ulia sbali ba Chube gerua Jesucristo giti gaba ulia gire ene nege tangle ba daba na tkadale tangle Chube gerua giti, agwa ba ta bebi kle biale daba tke tangle, diali kwian gweale kledale ba tke tangle nakwaite Chube gerua Jesucristo giti amaña ba gaubi gwangea giti. Ulia ba salengwli kirogwa soli bebitra me ñage lle mno gute kare, kirogwa soli bebitrage me bligda mno ketakle, diali bligda erutu chiale jusuli kare ketakle kirogwa solige. 13 Ulia Chube gerua giti ba chege kirogwa soli jusuli jai kare, bage me suge trate llema no Chube gwa giti llema me no Chube gwa giti ni suge bage che kwian Chubenu toidale mine Chube takalin kare. 14 Diali bligda mno samla kare lle na tanre kare kwian juma kle gute. E kare ene kwian Chube gerua ganga bai kaire mo ta gbaba ulia Chube gerua jwen jumale amage ulita suge kwian Chubenu toidale mine ulita trate Chube gwa giti, kaire agwe amage suge daba na tke tangle no Chube gerua giti. Agwa ba ta kle kirogwa kare ba me kle tachke daba tke tangle daba geru uña kare.
1 Ma no che ulita chege ene kwian juma bligda ulita gutanga kare. Ulia cha gerule ba ulita ole, ba mo ta gbadale gwangerugu Chube gerua ulita jwen ma no trate. Ba me ñage chege geru amaña ba gau gwangeabi alin jwen diali, ba geru e amaña jigadale mo tale mo nate gire ni chege geru e alin jwen diali, geru e klebi uñale ba tale. Ba mo ta gbadale geru na Jesucristo giti jwen ma ngle diali. Ba me mo ta gbadale tañachuge diali ba agedu me no gire ba mo ta blitu Chube ole giti. Ba me mo ta gbadale tañachuge diali ba Jesucristo gerua gau ulia giti alin allabi. 2 Kaire ba me mo ta gbadale tañachuge geru ai kare alin allabi giti ene: geru mo ñeange chiske giti, kaire geru kwian ko gbe daba chuga giti kira kade Chubege chudaboagda daba alin daba kagakle Chube gerua dbangale giti, kaire geru kwian jogebakeda ulita jaba be chkeni gwadeni giti, kaire geru chui bdaglige Chube be gerule kwian ulita giti kwian bai jiske kwian bai me jiske giti. Geru e giti ulita jo ba tkaba tangle tanre, ba geru e gbe mo tale gire nege gwangerugu ba mo ta gbadale geru na jagere ma ngle jwen geru e che Chubenu toidale no trate giti ba jwandale. Ba me mo ta gbadale tañachuge kwian ba tke tangle geru amaña alin allabi giti diali. 3 Chube takalin gire ene cha be ñage geru na Jesucristo giti gbe chke uñale bage. Kaire che ulita mo ta gbadale suge moge ma ngle Chube takalin che toi mine ama gwage, che mo ta gbadale suge moge llema no llema me no Chube gwa giti. 4 Ulia tirare kwian me mo ta gbe kiraske suge ma ngle Chube gerua giti. Ulia kwian me kle mo ta gbe ene, gire ene kwian nage Chube gerua kle ama tale mlienga ngwale ñage ta jogenga Chube gerua giti kwian me mo ta gbakalin kiraske ma ngle Chube gerua giti gdale. Kwian bai kaire Chube gerua Jesucristo giti keruchuge Chube gerua e skwen no amage gire ama geru e gai ulia, kaire Chube Oña chke ama tale kaire suge amage Chube gerua no ulia, suge amage trate Chube kiraske tanre Chube be chege kwian ulita Chugagwalla kweri chui bdaglige, kwian e kare ene mo ta bliteni naskuni toi ama toidu ngeru kare ama mo tkeni dole ulita Chube gerua Jesucristo giti ole, ama geru Jesucristo giti mlienga mo tale me gai ulia dare, e ulita salengwli ama kle Jesucristo Chube Kirolla gbe Jesucristo me ñanaske kare, ama kle Jesucristo ibade kwian gwa giti ama kle Jesucristo jokeda gai ngwale me ñanaske ama jwanle siere ji chugege age me no gdale, kwian bai kle mo tkeni dole Jesucristo dollaleni ene me ñage mo ta bliteni Chube ole naskuni ama Chube gerua gau gwangea kare. Malen cha gerule ba ole, ba chagedale ta giti me mo tke dole Jesucristo ole. 7 Cha geru ñachuge bage ai kare dbi giti: Kwian kle nga litenga dbi giti kle chude skie dbi ege, gire noi kle boi no diali, chude kle tige no kwian ole, kwian dbi mauñadi nga suga no chude giti. Agwa dbi e giti chude me gwatige no janegda gwatige tanre eni kaire glinuma me no gwatige deage, gire dbi me ñanaske kwian dbi mauñadi, dbi mauña be nga e guge ulita janegda kaire glinuma me no ole llagli. Cha geru ñachuge ene bage dbi giti gire cha gerule ba ole, kwian bai kaire Chube gerua gababi bigire kle Chube gerua mlienga kle mo ta bliteni Chube dollale, kwian ene kle chege dbi me no kare, Chube be ji gbe tirare kwian e giti, kwian e be chege sugekare Chubege. Agwa kwian bai kaire kle Chube gerua gai gwangerugu mo ta gbe ma ngle toi no Chube takalin kare, kwian ene kle chege dbi no kare, kwian e giti Chubedi nga suga noare ulia kwian kle toi no giti Chube gwa giti, Chube be age no ama alin. 9 Ba cha bitalla ulita Jesucristo giti, cha no ba ole. Cha kle ka boi mno sidri ba ole agwa cha kle gerule ta no giti ba ole ba chudaboagda. Chube ba jun siere ji chugege age me no gdale, malen suge chage ulia ba be cha gerua gbe gdadi ene ba mi boi cha kle gerule ba ole dbi me no giti kare, ba mi mo ta bliteni Chube dollale, ba be kle tañachuge diali Chube gerua Jesucristo giti gai gwangerugu ma no. 10 Ulia Chube noare, Chube ta no trate molen, diali ama kle age no kwian alin kwian bai kaire kle ama gai ulia age ama takalin kare. Kaire Chube me ta jogenga ba agedu giti ta no ole daba Chubenu na chudaboi daba ta gbe kiraske Jesucristo giti ba kle age diali kare, gire ene suge Chubege ba noare Chube ole. 11 Cha takalin ba ulita mo ta gbe diali age ba kle age daba alin kare gwangerugu chui tangle diali, ene uñale bage ulia Chube be age no ba alin ama gerudu giti ba ole kare ba agedu no ñanale kaire ba be ñage toi ule ama ole nga ngaña giti. 12 Cha me takalin ba mo ta gbe kianle me age Chube gerua gerule kare, agwa ma no ba mo ta gbe gwangerugu kiraske Chube giti kwian na Chube gerua ganga unsuialin tangle kare. Kwian e Chube gerua gau ulia ulia me mo ta gbu skwatige manade tanre Chube be age Chube gerudu ama ole kare, ama manadu ta no ole, uñadu amage Chube be age ulita Chube gerudu kare ama ole. Ama manadu ta ene ole, malen Chube agedu no ama alin Chube gerudu kare. Ba mo ta gbadale salengwli kwian e agedu kare ulita. 13 Unsuialin tangle Chube gerudu che enusulian oña Abraham ole Chube be age no Abraham alin, mo kiralla giti Chube geru gbu egdage Abraham ole. Ulia Chube kweri kiraske no trate ñage age no ulita, malen Chube gerudu ulia ama be age no Abraham alin, geru chegu gbaba egdage gire ulia boidu Chube gerudu kare. 14 Chube gerudu Abraham ole ene: “Ulia cha be age ba alin tanre no kaire agwe cha be ba oindalla gbe jriennga tanre ngle.” 15 Chube gerudu ene Abraham ole gire Abraham manadu ta no ole sbali me ta skochie ni skwatige manade, gire ene Chube agedu no Abraham ole Chube kirogwa ketu Abrahamge Chube gerudu ama ole kare. Kirogwa gdaite e giti Abraham oindalla jriendunga tanre. 16 Chube ma kweri kwian ulitage malen ama agali mo kiralla giti ñage geru gbe egdage trate ama be age giti gweale kwian alin. Agwa kwian me dale, kwian gweale takalin daba na ama gerua gai ulia kwian be age kwian kle gerule kare daba ole, gire kwian gerudale daba ole diali Chube gwa giti ene: “Ulia cha be age cha kle gerule kare, ene ba cha kerua gai dage. Agwa cha mi age, Chube be ji gbe cha giti cha gerudu ngwale gdale.” Kwian gerudale ene geru gbe egdage daba ole Chube gwa giti, gire ene daba ñage kwian kerua gai ulia kwian be age kwian kle gerule kare. 17 Chube tadukalin chke uñale kwiange ama kle gerule geru gbaitre alin giti ama mi geru blite nganake me age ama gerudu kare, malen Chube gerudu mo kiralla giti geru gbe egdage kwian ole ulia Chube be age no kwian alin, e giti ñage chke uñale trate kwian baige ama gerudu ole Chube be age ulia ama gerudu kare. 18 Ulia ulia ni bitaite Chube ñage gerule ngwale sole. Chube kle gerule Chube be age gweale kwian alin gire Chube kle age ulita Chube kle gerule kare, Chube kle gerule mo kiralla giti geru gbe egdage kwian ole gire ama me kle geru blite dale ama kle age ulita ama kle geru gbe egdage kare. Geru ai giti che bai Chube gaba mo manangale ñage mo ta gbe nga suga no ole, geru no Chube nu gbaba che alin giti, suge trate chege Chube be age ulita che alin ama gerule kare, ulia Chube me sole ni sidri. 19 Che Jesucristo gerua gaba ulia suge chege ulia Chube be age no che alin ama gerule kare kaire suge chege Jesucristo giti che be ñage toi chui tangle Chube ole nga ngaña giti. Geru e giti che ñage mo ta gbe kiraske diali che kle boi daga ngwaleske, ene che chege kiraske salengwli du lugakleda kejre ene chi uda me ñage du dbe kare. Che Chugagwalla Jesucristo joni toi Chube ole ule nga ngaña giti gerule che alin Chube ole, ama kle che manade ngwange llani. Unsuialin tangle kwian gerunga Chube ole daba alin gdaite jo tangle ñometra no ura itabanga gwa nga no no u gerungwa Chube olege, ama jo ne ngwadige gerule Chube ole daba alin chui gbaitre alin chura kaire kairege. Agwa ulia nege tangle Jesucristo kle toi diali Chube ole nga ngaña giti, ama gerunga Chube ole che Chubenu alin chui tangle diali salengwli Melquisedec gerudu Chube ole daba alin diali kwian na me jo gbaba ama taneage kare.
1 Unsuialin tangle Melquisedec ai amaña chegu kwian chugagwallale una kada Salemge kaire ama chegu gerunga daba alin Chube kweri no trate ole. Ka Melquisedec e kle gerule kwian israelita kwirale ene: “Chugagwalla agenga no trate diali.” Kaire una kadakle Salem, una e kalla kle gerule kwian israelita kwirale ene: “Una ege kwian ulita kle toi taingwli modi nga suga no ole.” Melquisedec kwian una ege chugagwalla gire ama kwian e ta gbanga toi taingwli modi nga suga no ole. Ulia Melquisedec giti geru e kle degaba, me chke uñale Melquisedec chebia giti ni ama ñenua giti ni ama enusulian oña ulita unsuialin tangle giti. Kaire agwe ni geru kle degaba sidri Melquisedec medunga chebia kote giti Melquisedec jokeda giti. Agwa Melquisedec chegu gerunga Chube ole daba alin diali chui tangle salengwli Chube Kirolla Jesucristo chege gerunga Chube ole kwian alin diali chui tangle kare. Unsuialin tangle Abraham jo ule ama chudaboanga tanre ole kira bate kwian chugagwalla tanre ama dolla ole kaire chugagwalla e chudaboanga ulita ole. Abraham kirachku ama dolla ulitadi, Abraham kledu chieni naskuni ama kle toi ngwadi gire chugagwalla Melquisedec jo ten Abraham ngwange jonkare. Melquisedec tendu jonke Abraham ngwange gire ama gerudu no Chube ole Abraham giti ene: “Chube, ba kiraske, ba age no no Abraham alin, ba ama chudaboi diali.” Melquisedec gerudu ene Chube ole Abraham giti jonke. Abraham tadu lle gweale ketakalin Melquisedecge Melquisedec gerudu no Chube ole Abraham giti ñanale. Abraham kledu chage lle tanre dbe lle bai ama junnga dolla ngeru, ama lle e ulita laun dba gira giti bitataboko gire bitaite ama ketu ngwale ulita Melquisedecge, lle tanre ene ama ketu Melquisedecge. Abraham Melquisedec gau dage ma kweri moge malen ama agedu ene Melquisedec alin. 4 Ulia e giti sugedale chege Melquisedec kwian chugagwalla kweri. Che enusulian oña Abraham ama daba israelita chugagwalla ma kweri ulitage che kwian israelitaske agwa Abraham Melquisedec gau dage, lle ulita mangire batre Abraham junnga ama dolla ngeru lle gweale ama ketu Melquisedecge gire lle tanre chegu Melquisedec ole. Abraham agedu giti sugedale chege Melquisedec ma kweri Abrahamge. 5 Moisés nu Chube gerua degaba unsuialin gerule Abraham oindalla kada Leví giti, Leví kaire Leví oindalla ulita bai kaire chege kwian gerunga Chube ole daba alin ama ulita lle gweale gadale ama bitalla kwian israelita nage ama lle boi ñanale. Leví bitallanu kwian israelita ulita Abraham oindalla kaire agwe, agwa ama bitalla ege kwian gerunga Chube ole daba alin lle gadale toigda. 6 Melquisedec me Abraham oindalla ni Leví oindalla, agwa Melquisedec gerudu no Abraham giti Chube ole ñanale Abraham lle ketu Melquisedecge. Chube nu gerubabi ngeru Abraham ole Chube be age no Abraham alin Abraham gbe kweri ama oindalla ulita giti, bigire Melquisedec gerudu no kaire agwe Abraham giti Chube ole. 7 Che ulitage uñale kwian kle gerule no Chube ole daba na alin kwian e ma kweri daba bai ama kle gerule alinge. Malen sugedale chege Melquisedec ma kweri Abrahamge. 8 Suge trate chege Leví oindalla ulita bai kaire kle gerule Chube ole daba na alin kaire kle lle gai daba nage ama kle lle boi ñanale ama ulita jogekeda, agwa Melquisedec be chege gerunga Chube ole diali chui tangle, kwian na mi chege ama kare ama taneage. 9 Melquisedec jo ten Abraham ngwangebi ulia Abraham oindalla Leví kledubi Abrahamdige ama kledu kwianlebi kare, ulia Abraham alin kledu Leví me suiale agwa Leví kledubi amadige. E giti che ñage gerule Leví kaire agwe lle ketu Melquisedecge ule Abraham ole. E giti sugedale chege Melquisedec ma kweri Levíge kaire Leví oindalla ulitage bai kaire gerunga Chube ole daba alin. 11 Unsuialin tangle Chube geru ketu Moisége kwian ulita alin kwian toidale mine Chube gwa giti. Chube Moisés daballa Aarón gbu daba chugagwallale gerule Chube ole daba alin, Aarón Leví oindalla. Aarón kaire Aarón oindalla ulita Chube gerua tragu kwian israelita ole kwian agedale mine Chube takalin kare. Geru e giti kwian me ñadu tien gitiru ji chugege age me no gdale diali dale alin, ne suiage kwian gerunga Chube ole daba alin me ñadu daba jwen siere ji chugege age me no gdale dale, malen Chube gerunga Chube ole kwian alin gdaite ma kweri ma kiraske Aarónge kagu kwian alin kwian chudaboanga no. Ulia Chube gerunga Chube ole kwian alin gdaite e kagu ama me Aarón oindalla, ama salengwli Melquisedec kare, ama Chube Kirolla kada Jesucristo. 12 Gire e giti me chegu Moisés chada jigu degaba Chube geru gbu kwian alin ngerutabi kare. Chube Moisés ta gbu chada dege Leví oindalla giti Leví oindalla alin allabi ñage chege gerunga Chube ole daba alin. Agwa che Chugagwalla Jesucristo bai chada Chubenu kle degaba giti ama kwian israelita mne gdaite Judá oindalla, ama me Leví oindalla dale, ni kwian gdaite Judá oindalla ngeru chegu gerunga Chube ole daba alin u gerungwa Chube olege. Agwa Jesucristo Judá oindalla, Chube ama gbu gerunga Chube ole daba alin gire Moisés geru jigu degaba kwian gerunga Chube ole giti me chegu ngeru kare, ulita chegu blitaba nganake Chube Jesucristo gbu gire. 15 Sugedale trate chege Chube ta ketu Moisége chada dege kwian alin kwian gerunga Chube ole daba alin giti, geru e Chube blitu nganakeni. Chube Jesucristo gbu gerunga Chube ole kwian alin gire Jesucristo kle chege Melquisedec chegu kare gerunga Chube ole kwian alin. Jesucristo me Leví oindalla malen ama me chegu gerunga Chube ole kwian alin Moisés chadalla gerule kare, agwa Chube Jesucristo gbu mo kirallaske chege gerunga Chube ole kwian alin. Ulia Chube Jesucristo jaba gbuni gwade gire Jesucristo toi diali chui tangle ama mi jogekeda dare, e giti suge chege Jesucristo chege gerunga Chube ole kwian alin Chube kirallaske diali chui tangle. 17 Unsuialin tangle Chube David ta gbu Chube gerua dege chada giti Chube gerudu Jesucristo ole giti, chada e gerule: “Ba gerunga cha ole kwian alin kweri kiraske diali chui tangle salengwli kwian kada Melquisedec kare.” Chube gerua degaba gerule ene Jesucristo giti. 18 Gire ene geru gbere ngeru kwian gerunga Chube ole daba alin giti, geru e chegu blitaba nganake. Geru ngeru e giti kwian me ñadu tien gitiru ji chugege age me no gdale kwian me ñadu chege trate Chube takalin kare, Chube gwa giti kwian diali chegu jiske geru e giti. Malen Chube geru e gbu nganake, Chube geru ma kweri kiraske Jesucristo giti gbu kwian alin. Jesucristo gerua gai giti che ulita tien gitiru ji chugege age me no gdale. Jesucristo chegu gerunga Chube ole che alin kweri kiraske gire Jesucristo giti che chege trate Chube gwa giti ene che be chege ule Chube ole diali chui tangle. 20 Chube Jesucristo gbu gerunga Chube ole kwian alin kweri kiraske, e chuiagebi Chube gerudu kiraske geru gbe egdage kwian ole diali chui tangle. Agwa kwian na gerunga Chube ole daba alin, kwian e giti Chube me gerudu kiraske ene dale kwian jo gbaba gerunga Chube ole daba alin gire. Jesucristo giti Chube geru gbu egdage ene geru kle degaba chada giti kare, chada e gerule: “Cha kwian Chugagwalla kweri, cha gerule kiraske geru gbe egdage ni cha be geru ai blite nganake, cha kle gerule ene: ‘Ba gerunga cha ole kwian alin kweri kiraske diali chui tangle.’ Cha kle gerule ene ulita.” Chube gerudu ene Jesucristo ole. 22 Geru e giti Jesucristo chegu gerunga Chube ole kwian alin diali chui tangle. Jesucristo giti geru ma kweri kiraske geru ngeruge chegu gbaba kwian alin kwian jwangda siere ji chugege age me no gdale, Jesucristo gerua gai ulia giti kwian ñage chege no trate Chube gwa giti. 23 Geru ngeruge kwian gerunga Chube ole daba alin tanre kledu, ama ulita jokeda gdaite gdaite gire kwian e amaña me ñadu chkeni gwade chege gerunga Chube ole daba alin nakwaiteni, malen kwian na jo gbaba daba taneage. 24 Agwa Jesucristo mi jogekeda dale, ama be kle toi chui tangle diali malen ama kle chege diali gerunga Chube ole kwian alin me kwian gerunga Chube ole daba alin na kare. 25 Jesucristo kle toi diali dale gerule Chube ole diali kwian ama gerua ganga ulia alin, malen e giti ulia Jesucristo ñage kwian jwen siere ji chugege agedu me no gdale diali chui tangle kwian bai kaire kle chudaboi kade Chubege Jesucristo giti. 26 Ulia Jesucristo ma no kwian gerunga Chube ole daba alin na ulitage, Jesucristo che chudaboanga lle ulita giti diali. Chube gwa giti Jesucristo no trate diali, ama me agenga me no, ama me jiske Chube gwa giti ni sidri. Chube ama jun siere sugekare kwian agenga me noge nga dba ai giti, Chube ama gbuni kweri kwian Chugagwallale ule Chube ole nga ngaña giti. 27 Jesucristo me chegu kwian gerunga Chube ole daba alin na kare. Unsuialin tangle kwian gerunga Chube ole daba alin ulita kledu bda gweda guge Chube gwa giti chui kaire kairege, ngeru ama bda gwadaleda gugadale mo alin naskuni ama agali agedu me no giti bigire ama ñadu bda gweda guge Chube gwa giti kwian na ulita agedu me no giti. Agwa Jesucristo me agedu ene, Jesucristo lle bo bitaitre alin, ama mo ketu gwaleda agali kwian na ulita kle age me no giti salengwli kwian gerunga Chube ole daba alin kledu bda gweda Chube gwa giti daba na alin kare. Jesucristo agedu no ene giti kwian me bda gwadaleda dare Chube gwa giti kwian kle age me no ñanale. Jesucristo mo ketu gwaleda bitaitre alin allabi diali dale alin kwian ulita kle age me no ñanale. 28 Moisés nu Chube gerua degaba unsuialin gerule kwian gweale kledale gbaba daba chugagwallale gerunga Chube ole daba alin, agwa kwian e ulita salengwli kwian na ulita kare ama agenga me no Chube gwa giti. Chube Moisés ta gbu ama gerua dege unsuialin, gire geru e nate Chube gerudu mo kiralla giti geru na gbe egdage mo Kirolla Jesucristo giti, Chube Jesucristo gbu gerungale Chube ole kwian alin, Jesucristo chegu no trate diali chui tangle malen Jesucristo alin allabi ñadu age ulita kwian alin Chube tadukalin kare kwian gbale no trate me jiske Chube gwa giti.
1 Cha takalin geru cha kle gerule giti suge bage trate trate, cha kle gerule ai kare ene: Che Chugagwalla Jesucristo ama noare ulita agenga no diali, Chube ama gbu toi dba mo ngena mo ko taingwli giti nga ngaña giti chege kwian ulita Chugagwalla kweri. Jesucristo gerunga Chube ole che alin che ka chudaboanga diali nga no no Chube kle ngwadige nga Chube nu dodaba agalige nga ngaña giti, nga e nga ulia no gerungwa Chube ole ngwadige, nga e Chube agali dodadu nga ngaña giti mo kiralla giti. 3 Unsuialin tangle kwian israelita gerunga Chube ole daba alin ulita nga dba ai giti Chube kledu ama gbe lle gweale daba agenga me no kle chie dbe amage ama lle e ketadale Chubege daba agedu me no giti, kaire kwian gerunga Chube ole bda daba kle chie dbe amage ama bda e gwaleda Chube gwa giti daba agedu me no giti. Malen Jesucristo kaire agali agedale ene kwian bda gwangada Chube alin kle bda kete Chubege kare kwian ulita age me no giti. 4 Gire Jesucristo mo ketu agali Chubege kwian agedu me no giti, Jesucristo agedu giti e chegu ma no trate ma kweri kwian gerunga Chube ole daba alin ulita ngeruge kledu age daba alin Chube gwage. Kwian gerunga Chube ole daba alin na ulita kledu bda alin gweda Chube gwa giti kaire kledu lle na tanre daga ngwale kete Chubege kwian agedu me no giti. Kwian gerunga Chube ole daba alin kledu age ulita salengwli Moisés nu Chube gerua degaba gerule kare. Agwa Jesucristo me bda ketu ene dale geru degaba gerule kare. E giti Jesucristo me ñadu chege lle boi nga dba ai giti gerungale Chube ole kwian alin, ama joni nga ngaña giti chege llani gerunga Chube ole kwian alin ma no trate kwian gerunga Chube ole daba alin na ulitage. 5 Unsuialin tangle Moisés suiale kwian gerunga Chube ole daba alin diali jo u gerungwa Chube olege gerule Chube ole daba alin daba ka chudaboi. E kare ene nege tangle Jesucristo kle nga ngaña giti gerule Chube ole kwian ama gerua ganga alin, Jesucristo gerunga Chube ole kwian alin ma no trate kwian gerunga Chube ole unsuialin tanglege. Kaire unsuialin tangle kwian gerunga Chube ole daba alin ulita kledu lle boi kwian chudaboagda u gerungwa Chube olege, u e chku salengwli nga ulia Chubenu nga ngaña gitidi Jesucristo kle che chudaboi ngwadi. Unsuialin tangle Chube gerudu che enusulian oña Moisés ole u gerungwa Chube ole dodade giti ene: “Moisés, ba cha gerua gbe gdadi, bage uñale cha gerudu ba ole u dodade gerungwa cha ole giti ba kledu jwichuga kada Sinaí giti gire. Cha kle nga ngaña giti agwa ba u dodadale cha alin nga dba giti gerungwa cha ole salengwli cha gerudu ba ole kare.” Chube gerudu ene Moisés ole u giti gire ene geru e giti suge chege u Moisés gbu nga gballage, u e chku nga ulia Chubenu nga ngaña giti kare, agwa u e kledu gbaba sugetidale alin allabi nga dba ai giti. 6 Agwa Chube kwian gdaite gbu gerunga Chube ole ma no daba alin, gerunga Chube ole kwian alin e Jesucristo Chube Kirolla, Jesucristo kle nga ngaña giti Chube ole ule, Jesucristo ñage kwian chudaboi ma no kwian nga dba ai giti gerunga Chube ole daba alinge. Jesucristo giti Chube geru na gbu egdage kwian ulita ole geru e ma no ma kweri kwian ulita chudaboagda kwian jwangda siere ji chugege age me no gdale, geru ngeru Chube gbu egdage kwian ulita ole Moisés giti me ñadu kwian ta blite Chube ole. Jesucristo geru no jagere ulita mauña, ama kwian ta blite Chube ole chage no gerudi. Geru e giti uñale chege Chube be age ma no che geru jagere ganga ulia alin Chube agedu kwian alin geru ngeru gitige. 7 Sugedale chege ulia Chube geru gbu ngeru unsuialin tangle kwian alin, agwa ulia kwian ulita me ñadu age ulita geru kledu gbaba kare, kwian diali chegu jiske Chube gwa giti. Malen geru e giti kwian me ñadu tien gitiru ji chugege age me no gdale diali dale alin. Gire Jesucristo giti Chube geru jagere ma kweri kiraske gbu egdage kwian ole, kwian geru e gai ulia gire ene kwian tien gitiru ji chugege age me no gdale diali dale alin, Jesucristo giti kwian chege trate Chube gwa giti. 8 Agwa ulia geru ngeru giti kwian me chegu trate Chube gwa giti, kwian diali chegu jiske Chube gwa giti. Malen Chube geru degangu kwian alin Chube be geru jagere gbe egdage kwian ole giti, geru e kle degaba ene: “Chube che Chugagwalla kweri gerule ene: ‘Chui gweale be chke gire cha be geru jagere gbe egdage kwian israelita ulita chudalla ole, 9 geru e ma no geru ngeruge. Unsuialin tangle cha kwian jwanngu siere cha kiralla giti nga Egiptoge gire cha geru gbu egdage kwian e ulita ole. Kwian e me agedu ulita cha geru gbu ama alin kare ama me mo ta blitu cha ole, malen e kbiale cha ama chugu ngwadi age ama tadukalin kare. 10 Agwa cha be geru jagere gbe kwian israelita chudalla ulita alin bdagli. Cha be ama ulita ta gbe tañachuge cha gerua e giti gire be suge amage mo tale ama agedale mine cha takalin kare, ama be cha gai mo Chugagwallale ama be gerule no cha giti, cha be chege ama Chubea gdaitre alin. Kaire ama ulita be chege chanu cha be ama ulita manade no. 11 Kaire agwe ni ama be kle mo tke tangle ongoru ongoru cha giti ni kwian be kle gerule mo skatemanalla ole ni mo daballanu ole ene: Ba Chube gadale mo Chugagwallale. Kwian mi gerule ene daba ole. Agwa e suiage kwian ulita jalinnu jumanu be cha uñe, cha gerua be klebi ama ulita tale. 12 Ama ageba ulita me no cha gwa giti cha be talla mlienga, cha mi tañachuge dare ama agedu me no giti, kaire cha mi ama gbe ji chuge boi daga ngwale ama agedu me no giti gdale.’ Chube che Chugagwalla kle gerule ene kwian ama gerua ganga giti.” Chube gerua degaba unsuialin gerule ene. 13 Chada ai giti Chube kledu gerule geru jagere giti, Chube geru jagere gbu geru ngeru taneage, Chube geru ngeru blitu geru jageredini. Geru jagere chegu ma kweri kiraske geru ngeruge kwian jwangda siere ji chugege age me no gdale. Geru ngeru Chube Moisés gbu dege kwian alin jo gbaba nganake ene, ene ulita bdagli geru e be chege ngwale, geru ngeru ulita talla be jogenga kwian tale.
1 Chube geru gbu egdage ngeru kwian ole, geru e kwian ta gbu chke ama agedale giti ulita Chube gwa giti u gerungwa Chube olege nga dba ai giti. 2 Bda kwara ulla jo dodaba gerungwa Chube ole, u ege gwa nga kledu dodaba bitabokege tangle, nga bitaitege kodi ugakage jogengwa gwagudegudage, nga e tra no no ka gbere Nga Santo. Ne ngwadi ngnagu oro dodaba jichra gbangwa kledu, kaire glidrega dodaba pan gbangwa Chube gwa giti kledu gbaba ne ngwadi, kaire ne ngwadi oro dodaba lle ñachke no kada incienso gugangwa Chube gwa giti kledu gbaba. Nga no e nate ñometra no ura kledu itabanga, ñometra itabanga e nate nga bitabokege tangle kledu, nga e nga no no Chubenu ka gbere Nga Santísimo. Ne ngwadi glidrega dodaba lle ogangwa kledu gbaba, glidrega e jegwale oro kledu gbaba ulita. Glidrega e skieru lle kledu ogaba, lle e kwian ta gbagda tachke Chube agedu ama alin giti, lle ulita ogaba lle ogangwage ai kare: Lle gdaite oro dodaba limeta kare kledu, lle e toli lle kada maná kledu ogaba sidri e bligda, Chube bligda e ketu che enusulian oña israelita ulitage unsuialin tangle. Kaire glita chagegda che enusulian Aarónnu kledu ogaba, glita e numachiu unsuialin tangle. Kaire Chube Moisés gbu chada dege kwian alin kechuga giti kwian toidale mine Chube gwa giti, kechuga gbaboke e kledu ogaba kaire glidrega e skieru. 5 Glidrega lle ogangwa e kagda gití oro dodaba lle boanga Chube alin nga ngaña giti kare gdaboke kledu gbaba. Lle oña e jigda gwagda ten giti moge ongoru ongoru glidrega lle ogangwa chegu jiga gwaru. Lle boanga Chube alin oña e giti suge kwiange Chube kle eni kwian ole. Glidrega dodaba lle ogangwa, lle e kagda gití bda guleda bea jo gbaba, ene kwian ulita me chegu jiske Chube gwage. Boidu ene ulita unsuialin, geru tanre kle tragale agwa nege cha me chegekalin gerule lle ulita kledu gbaba u ege alin giti allabi, kaire cha gerudale kwian gerunga Chube ole daba alin u ege giti. 6 Lle ulita kledu gbaba ene u gerungwa Chube olege gire kwian ulita gerunga Chube ole daba alin kledu joge diali chui gbaite kaire kairege nga bitaitege tangle kada Nga Santo lle ulita boi Chube alin geru kle gbaba kare. 7 Agwa nga bitabokege tangle kada Nga Santísimo kwian gdaitre alin gerunga Chube ole daba alin ma kweri na ulitage ama alin ñadu joge nga ege. Ama kledu joge nga ege chura kaire kairege bitaitre alin allabi, ama joge chiga nga ege ama bda bea dbadale ule, bda bea ama gbadale glidrega lle ogangwa kagda gití mau alin agali ama agedu me no giti kaire kwian na ulita alin kwian agedu me no giti, kwian agedu gweale me no, amage me sugedu ama kle age me no, e giti ulita kwian gerunga Chube ole bda bea gbu glidrega lle ogangwa kagda gití kwian alin. 8 U gerungwa Chube ole kledu nga dba ai giti gire, e suiage tangle kwian agedale ulita Chube geru gbu kare ngeru. Nga ege kwian ngwale me ñadu joge Nga Santísimoge gerule Chube ole mo giti agali ama agedu me no giti. E giti Chube Oña kle che ta gbe ulia e suiale kwian ngwale me ñadu joge gerule agali Chube ole mau giti. 9 Sugedale chege Jesucristo bebi chke gire kwian gerunga Chube ole daba alin lle ketu Chubege daba alin kare bda guda Chube gwa giti kwian agedu me no giti geru gbaba ngeru gerule kare, e ulita ama agedu e no agwa me ñadu kwian chudaboi chage trate Chube takalin kare, kwian diali chegu agenga me no ama chegu jiske Chube gwa giti. 10 Che mo ta gbadale tañachuge e giti geru kledu gbaba ngeru ni kle gerule kwian ta giti, agwa kle gerule bligda giti kwian ñage bligda mine gute mine me gute, kaire kle gerule lle gweale jadale giti kaire kle gerule kwian mo gbadale trate mo giti tangle mo glige alin allabi giti. Kwian e kledu age ene sugetidale alin Chube bebi geru jagere Jesucristo giti gbe gire, e ulita tadu gerukalin kwian chui ege kledu age Jesucristo be age giti ulita. 11 Agwa Jesucristo chku nga dba ai giti age no kwian alin kwian chudaboi, ama mo ketu gwaleda kwian agedu me no giti kwian jwangda siere ji chugege age me no gdale, gire nege Jesucristo kle chege kweri no gerunga Chube ole kwian alin nga ngaña giti. Ama kle nga no no Chubenuge nga ngaña giti gerule Chube ole kwian alin, nga e nga ngaña giti Chubenu, kwian me u dodadu gerungwa Chube ole nga ngaña giti u jo dodaba nga dba ai giti kare, Chube agali nu nga e dodaba no nga ngaña giti. 12 Jesucristo joni nga no no Chube kle ngwadige nga ngaña giti gire, Jesucristo me jo bda chivo bea ni chbi soli bea dbe ketadale Chubege kwian age me no giti kwian israelita gerunga Chube ole daba alin kledu age kare. Agwa Jesucristo kledu nga dba ai giti gire ama agali mo ketu gwaleda kwian ulita age me no giti bitaitre alin, ene ama bea giti kwian tien gitiru ji chugege age me no gdale chui diali dale alin, ene Jesucristo giti kwian ñage chege no trate me jiske Chube gwa giti diali chui tangle. 13 Geru kledu gbaba ngeru geru e kwian kledu age ulita geru kledu gbaba kare, kwian israelita gerunga Chube ole daba alin ama ulita chbi ñenua soli guda kaire chivo guda bigire ama bda bea e litu ole jogda solige jo drennga kwian ulita bai agedu me no geru e dollale giti. Kaire ama chbi chebia soli guda chbi soli jaba gugu, ama chbi kugeba tanlla litu ole, gire ama jo chbi soli kugeba tanlla e drennga kwian me kle age geru kle gbaba kare giti. Chbi soli tanlla giti kaire bda bea giti kwian agenga me no kledu chege trate kwian na gwa giti geru kle gbaba kare. Kwian tañachugu kwian chegu trate Chube gwage bda bea giti kaire chbi kugeba tanlla giti, ene kwian ñadu joge u gerungwa Chube olege gerule no Chube giti. 14 Agwa ulia bda bea kledu kwian gbe trate sugetidale alin e suiale, gire ene ulia che mo ta gbadale suge Jesucristo jokeda giti e ma no bda beage, Jesucristo giti che ta chege trate no ulita Chube gwa giti diali chui tangle. Jesucristo noare trate ni ama agedu me no sidri, Chube Oña Jesucristo kira gbu mo kete gwaleda boi daga ngwale Chube gwa giti kwian ulita alin salengwli unsuialin tangle kwian gerunga Chube ole daba alin bda gweale no no trate guda Chube gwa giti daba na kle age me no giti kare. Jesucristo jokeda che agedu me no giti, che ama gerua gai ulia gire Jesucristo che ta lite no trate che ta chege trate Chube gwa giti che me age me no che agedu ngeru kare. Ene che ñage lle no boi Chube alin toi diali Chube takalin kare, Chube ulia no trate ama ulia Chube gwade kiraske. 15 Geru ngeru kledu gbaba egdage kwian ole geru e giti kwian chegu jiske diali Chube gwa giti ama agedu me no giti, ama me ñadu tien gitiru diali dale alin ji chugege age me no gdale bda guleda giti ama alin. Agwa Jesucristo mo ketu gwaleda kwian jwanle siere ji chugege age me no gdale gire Jesucristo jokeda giti Chube geru jagere ma kweri kiraske gbu egdage kwian ole. Gire ene kwian bai Chube nu kwian ta gbaba Jesucristo gai ulia, kwian ene tien gitiru ji chugege age me no gdale kaire kwian e be toi no chui tangle diali dale Chube ole, Chube be age no no ama alin Chube nu geruba kare kwian ole. 16 Cha gerule ulia ba ole, uñale bage che kwian israelita suiale kwian bebi jogekeda gire kwian diali kle chada jige degaba ama llea ulita giti lle e amanu girabatakle ama bitalla ole chada kle degaba kare ama be jogekeda chuiage. Kwian e kle chege toi gwade gire ama bitalla me ñage chege lle kwian enu ole, agwa kwian e jogekeda chkedale uñale nate kwian e jogebakeda gire chada degababi e gbaba egdage chege ñanaske kiraske ama bitalla alin, lle ulita kwian jogebakedanu girabatakle kwian e bitalla ole chada kle degaba kare. E kare ene Jesucristo jokeda giti geru jagere Chube gbu egdage kwian ole chegu kiraske Jesucristo giti. Ulia Jesucristo jokeda gire ene che ama gerua ganga tien gitiru ji chugege age me no gdale kaire che be toi diali Chube ole chui tangle diali. 18 Agwa Chube gerua jo gbaba ngerutabi che enusulian oña israelita ulita alin unsuialin tangle gire kwian bda gwadaleda ene bda e bea giti kwian chege trate Chube gwa giti sugetidale alin geru kledu gbaba gerule kare. 19 Unsuialin tangle Moisés Chube gerua gbu chke uñale ulita kwian ulitage kwian toidale mine Chube gwa giti Chube takalin kare. Bigire Moisés gli kadakle hisoponanga tkunga gdaite, ama bda oveja boli dába dabere gau lugu glinanga e gwagdage. Gire ama chbi soli bea gau jogda solige, ama chi ngalán tku be eske gire ama glinanga dodaba bda oveja boli ole ama chugu chiga be eske gire ama be dreunnga kwian ulita giti kaire ama be dreunnga chada Chubenu Moisés nu degaba giti. 20 Gire Moisés gerudu ene kwian ole: “Sugedale ba ulitage be ai giti Chube geru gbu egdage che ole geru e chegu kiraske, che geru e gbadale gdadi.” 21 Moisés gerudu ene kwian ole gire Moisés kaire agwe bda bea dreunnga u gerungwa Chube ole giti ulita kaire lle ulita kledu u ege gbaba no Chube alin, lle e ulita giti Moisés be dreunnga ene lle ulita chege no trate Chube gwa giti. 22 Chube Moisés ta gbu unsuialin tangle geru dege kare geru e kledu gbaba gerule ene: Kwian gerunga Chube ole daba alin bda gwaleda gire bda bea e giti kwian e ñage lle tanre gbe trate Chube gwa giti, lle bedre alin giti be me joge dreanlenga dale lle gbagda trate Chube gwa giti. Bda gweale jogedaleda gire Chube gwage bda e beadi ene Chube be kwian agedu me no talla mlienga, Chube mi tañachuge dare kwian agedu me no giti. Geru ngeru kledu gbaba giti sugedale chege lle gweale bea alin allabi giti kwian ñage chege no trate me jiske Chube gwage. 23 Unsuialin tangle u gerungwa Chube olege lle ulita kle gwa u ege ama giti ulita Moisés bda bea dreunnga, ene bda bea giti ama lle e ulita gbu trate Chube gwa giti sugetidale alin. Agwa lle ma no trate ma kiraske bdage jogedaleda gire ene kwian agenga me no ñage chege no trate Chube gwa giti diali dale alin kaire kwian ñage joge toi Chube ole nga ngaña giti. 24 Malen Jesucristo mo ketu gwaleda kwian agedu me no giti, ulia Jesucristo ma no trate ma kiraske lle na ulitage, Jesucristo joni nga ngaña giti agali Chube gwa giti chege gerunga Chube ole kwian alin. Ulia Jesucristo me jo gerule Chube ole u gerungwa Chube olege nga dba ai giti dodaba kwian kiralla giti kwian gerunga Chube ole daba alin na ulita agedu kare. Agwa Jesucristo agali joni nga ngaña giti Chube kle ngwadi, nege ama kle diali nga ngaña giti gerule Chube ole kwian ulita ama gerua ganga ulia ka chudaboanga gerule kwian alin Chube ole. 25 Nga dba ai giti kwian israelita gerunga Chube ole daba alin ma kweri na ulitage ama jo u gerungwa Chube olege gerule Chube ole gire ama jo tangle ñometra ura itabangage gwa Nga Santísimoge chura kaire kairege bitaitre alin bda bea dbe jogda solige kaite Chube gwa giti. Kwian gerunga Chube ole daba alin e me jo ama bea agali dbe agwa ama diali bda bea kaitu Chube gwa giti mau giti kaire kwian na giti chura ngle tanrege. Agwa Jesucristo agedu bitaitre alin allabi, me chegu age dare kwian gerunga Chube ole daba alin na ulita agedu kare chura kaire kairege. Jesucristo me agedale dare, ama mo ketu gwaleda bitaitre alin allabi, e chege no diali dale alin kwian ulita alin. 26 Jesucristo jogedaleda bitangle bda kare kwian alin, ene ama kaire ñadu jogeda gwangea nga dodabage gwaiguda ulita bitangle kwian alin. Agwa Jesucristo jogeda giti me salengwli bda jo gwabada kare. Kwian gerunga Chube ole bda bea ketu Chubege kwian alin me mo bea ketu. Agwa Jesucristo agali mo ketu gwaleda kwian agenga me no ulita giti bitaitre alin, e ma trate bda beage. Jesucristo jokeda giti kwian ñage tien gitiru ji chugege age me no gdale diali dale alin. 27 Cha gerule ba ole, ulia kwian ulita jogekeda bitaitre alinbi bigire chui be chke Chube gerule ama giti ama jiske o ama me jiske Chube gwa giti. 28 Ai kare Jesucristo jo boabanga daga ngwale ama mo ketu gwaleda bitaitre alin kwian ulita jwannga siere ji chugege age me no gdale. Gire bdagli Jesucristo be chieni, chui ege ama mi jogekeda nakwaite kwian agedu me no giti agwa ama be chieni age no no kwian ulita alin bai nu ama gerua gaba ulia kle ama manade ngwange. Jesucristo be kwian e ulita dbe ule nga ngaña giti toi ama ole ule Chube kle ngwadi diali chui tangle.
1 Unsuialin tangle Chube geru ketu Moisége gbadale chke uñale che enusulian oña israelita ulitage, geru e kledu gbaba sugetidale alin geru jagere ma kiraske gbabe gire. Chube Moisés ta gbu Chube gerua dege, geru e kledu gbaba geru jagere gbagda egdage Chube be age geru jagere giti kwian ulita alin. Ulia diali kwian israelita bda ketu mo giti gwaleda Chube gwa giti kwian agedu me no giti chura gdaite gdaite kaire kairege diali. Kwian kledu age ene mo gbagda chege trate Chube gwa giti. Ama bda ketu mo giti gwaleda Chube gwa giti, agwa ni bda bea giti kwian ñadu chege trate Chube gwa giti. Ulia Moisés Chube gerua degu kwian ta gbagda bda kete gwaleda mau alin tanre chura kaire kairege, agwa age ene giti kwian me ñadu ta chege trate Chube gwa giti diali dale alin, geru e kledu sugetidale kwian ta gbe age ene, agwa geru jagere ma tainkwli Chube be gbe kwian alin Jesucristo giti. 2 Moisés Chube gerua degu bda gweda kwian alin giti e kwian gbe trate ulia Chube gwa giti gire ¿mineade kwian ulita chegu bda ngle kete gwaleda mo giti diali? Ama bda kete gwaleda bitaitre alin gire ama chege trate Chube gwa giti, e ene ulia gire ama me bda ketadale gwaleda dare ama kle age me no giti dale, kaire agwe ama me sugedale moge jiske Chube gwa giti ama agedu me no giti. 3 Agwa ulia me ene dale. Ulia ulia chbi bea kaire chivo bea me ñage kwian jwen siere ji chugege age me no gdale ene kwian chege trate Chube gwa giti, malen kwian kledu bda kete gwaleda Chube gwa giti kwian age me no giti chura kaire kairege, kwian diali sugedu moge ama jiske tanre Chube gwa giti age me no gdale, malen kwian bda ketu chura kaire kairege agwa ulia e me ñadu kwian gbe trate Chube gwa giti. 5 Malen Jesucristo chiu nga dba ai giti kwian jwen siere ji chugege age me no gdale diali dale alin. Gwangea Jesucristo chku nga dba ai giti gire ama gerudu Chube ole ene: “Cha Ñenua Chube, ba me takalin kwian chege bda kete gwaleda diali ama age me no giti malen ba cha gbu chege kwian kare, cha agali be mo kete gwaleda kwian ulita agenga me no giti kwian jwen siere ji chugege age me no gdale. 6 Bda jo gwabada gugaba ba gwa giti kwian age me no ñanale kwian jwen siere ji chugege age me no gdale, lle e me kwian gbu chege ulita no ba tadukalin kare, badi nga me kledu suga no kwian giti, bda gweda giti kwian me ñadu chege no trate ba gwa giti.” 7 Jesucristo gerudu Chube ole dare: “Cha Ñenua Chube, cha kle biale age ulita ba takalin kare. Cha takalin lle chege boaba ulita Moisés ba gerua degu unsuialin gerule kare.” Jesucristo gerudu ene ulita Chube ole. 8 Jesucristo gerudu lle ketakle Chubege giti, Chube geru gbu kwian alin kwian bda gwaleda kaire lle gugale Chube gwa giti kaire lle na tanre ketadale Chubege kwian agedu me no gdale. Agwa age ene ulita me kwian gbu no trate Chube gwa giti me kwian jun siere ji chugege kwian agedu me no gdale diali dale alin. 9 Malen Jesucristo gerudu Chube ole: “Cha kle biale age ulita ba takalin kare.” Jesucristo gerudu ene Chube ole giti sugedale chege Chube gerua ngeru bda gweda giti tanege Chube geru na ma kiraske gbu kwian alin kwian jwangda siere ji chugege age me no gdale, geru e Jesucristo giti. 10 Jesucristo agedu ulita Chube tadukalin kare ama mo ketu agali gwaleda kwian ulita agenga me no giti. Ama agedu ene ulita bitaitre alin diali dale alin gire ene che ulita bai ama gau ulia chege no trate Chube gwa giti Jesucristo agedu giti. Ene che me tañachugadale dare bda gweda che agedu me no giti. 11 Unsuialin tangle kwian israelita gerunga Chube ole daba alin ulita diali chui kaire kairege kledu bda gweda Chube gwa giti kwian age me no giti geru kle degaba kare. Agwa ulia age ene ulita e ngwale, age ene kare ulita me ñage kwian jwen siere ji chugege age me no gdale kwian gbe no trate Chube gwa giti. 12 Agwa ulia Jesucristo mo ketu agali gwaleda kwian age me no giti salengwli kwian gerunga Chube ole daba alin bda guda Chube gwa giti kwian age me no giti kare. Jesucristo agedu ene ulita kwian alin bitaitre alin chui tangle dale alin kwian jwanle siere ji chugege age me no gdale, e ma ñanaske bda ulitage. Jesucristo jokeda ama jaba chkuni gwade gire ama joni nga ngaña giti Chube kle ngwadige ama toidu dba ama Ñenua Chube ngena ko taingwli giti kwian Chugagwalla kweri. 13 Chui ege gwangerugu Jesucristo kle manade nga ngaña giti, chui be chke gire Chube be Jesucristo gbe kirachke ama dolla ulitadi, Jesucristo be chege dolla ulita Chugagwalla kweri. 14 Jesucristo jokeda kwian agenga me no ulita alin bitaitre alin, ene Jesucristo agedu giti kwian ulita bai Jesucristo gai ulia kwian ene Chubenu, Jesucristo giti kwian ene chege no trate diali me jiske Chube gwa giti. 15 Chube Oña kle che ta gbe suge ene: Jesucristo agedu bitaitre alin giti, e chege nobi ulita che gbagda trate Chube gwa giti. Chube Oña kle che ta gbe Chube gerua degaba giti ai kare: 16 “Chube che Chugagwalla gerule: ‘Cha be geru jagere gbe kwian alin bdagli, cha Chube be mo gerua gbe kwian tale kwian chugale, cha gerua be kwian ta gbe suge mo tale, ene kwian be age cha takalin kare.’ 17 Kaire Chube gerule: ‘Cha mi tañachuge dare kwian agedu ulita me no giti, kaire cha mi ama gbe ji chuge boi daga ngwale ama agedu me no gdale.’ Chube che Chugagwalla gerule ene kwian ama gerua ganga giti.” Chube Oña kle che ta gbe Chube gerua degaba ene giti. 18 Malen geru e giti sugedale chege Jesucristo giti Chube che agedu me no talla mliunga, che chege no trate me jiske dare, ene che me lle na ketadale gwaleda nakwaite che agedu me no giti. 19 Cha bitalla ulita Jesucristo giti, cha gerule ba ole, Jesucristo jokeda giti che ulita Jesucristo gerua gaba ulia ñage gerule Chube ole agali, che me mo ta gdadale kennga Chube ngeru kwian ta du ngeru kare. Nege Jesucristo giti Chube che kerua keruchuge che kerua gai ngwange no diali. 20 Unsuialin tangle Moisés suiale ñometra no ura kledu itabanga Nga Santísimo ngnagu u gerungwa Chube olege, nga ege kwian gerunga Chube ole daba alin gdaitre alin allabi ñadu joge tangle ñometra ege gerule Chube ole nga ege. Agwa Jesucristo jokeda giti Jesucristo chegu salengwli che jonlla dbanga kare, Jesucristo chkuni gwade ama giti che ulita ñage gerule diali Chube ole agali, e salengwli che kle joge tangle ñometra urage gerule Chube ole Nga Santísimoge u gerungwa Chube ole kare. 21 Nege Jesucristo kle nga ngaña giti Chube ole Chube gwangnagu che ka chudaboanga Jesucristo gerunga Chube ole che alin. 22 Chkedale uñale chege che Jesucristo gau ulia giti che ta kle no trate Chube gwa giti, Jesucristo che ta blitu Chube ole ene che suge moge me jiske Chube gwage che agedu me no giti salengwli che suge moge trate che mo glige no trate gire. Ta no trate ene ole che ñage gerule agali Chube ole, Jesucristo giti che ta suge moge Chube kle che keruchuge ama be age che alin che gerule ama ole giti. 23 Sugedale chege Chube mi geru blite nganake, Chube gerudu kare Chube be age ulita che alin Jesucristo giti. Malen che mo ta gbadale Chube gerua Jesucristo giti gai ulia kiraske gwangerugu che geru gau kare tañachuge diali Chube be age no che alin giti ama gerudu kare che ole. 24 Kaire agwe che ulita Chubenu mo ta gbadale no mo chudaboi ongoru ongoru che daba ta gbale no mo ta dbe no diali daba ole kaire daba kira gbe age no diali daba na alin. 25 Che diali mo litadale ule daba na ulita ole kira gai daba nage Chube gerua giti. Che me ñage age kwian na tanre kle age kare me takalin mo lite ule daba ole kle mo gbe sugekare diali daba Chubenu na ulitage kare. Agwa che mo litadale ule diali kira gai moge ongoru ongoru diali no Chube gerua giti. Suge chege Jesucristo che Chugagwalla chieni chuia kle kodi malen che ulita mo ta gbadale ma no daba ole ongoru ongoru Chube gerua giti Chube gerua jwen ma no ule. 26 Jesucristo mo ketu gwaleda che alin che jwangda siere ji chugege age me no gdale, che Jesucristo gerua gai ulia agwa che mo ta gbe chege age me no diali Chube dollale, uñale chege che kle age me no, agwa che kle age, che chege age ta ene ole, e me no. ¿Age ene giti che ñage llema kete ene che tien gitiru ji chugege che kle age me no gdale? Lle na ma no me che chudaboagda che jwanngale siere, Jesucristo agedu ulita che alin. 27 Che chege age ene me no Chube dollale, sugedale chege ulia che be ji chuge jita tirareske che kle age Chube dollale kbiale. Chube ta skochie kwian kle age me no ama dollale giti malen ama be ji gbe kwian giti kwian ulita bai kle mo tke dole ama ole gdale. 28 Geru ngeru Chube Moisés gbu dege unsuialin tangle kwian toidale mine giti, geru e kledu gbaba gerule ene: Daba bai kaire me Moisés nu Chube gerua degaba gau dage daba kledu age me no geru e dollale, kwian na boke o kwian mai gwagedu daba edi age me no, kwian e boke o kwian mai daba agenga me no e gbu jiske kwian na gwa giti gire daba agenga me no ene guleda ni kwian taidu dage daba ege, daba guleda me Chube gerua Moisés nu degaba gau dage gdale. 29 Kwian bai me Chube gerua Moisés nu degaba gau dage boidu ene ulita, e giti ñage suge chege ulia Chube be ji gbe ma tirare kwian giti kwian ulita bai kaire Jesucristo gerua gaba bigire mo ta bliteni Jesucristo Chube Kirolla gai ngwale giti. Jesucristo jokeda kwian gbadale trate no Chube gwa giti agwa kwian e kle Jesucristo ibade kidere Jesucristodi tañachuge Jesucristo jokeda kwian ngwale agenga me no kare. Kaire kwian kle gerule jain jain jere jere Chube Oña kle age no ama alin dollale. Kwian e kare ene ulita giti Chube be ji ma tirare gbe kwian kle age Chube dollale gdale. 30 Uñale chege Chube che Chugagwalla gerudu ene: “Cha Chube cha kwian gbe ji chuge daga ngwale kwian kle age me no ulita batre gdale.” Kaire Chube gerua degaba unsuialin gerule: “Chube kwian Chugagwalla kweri, ama be gerule kwian amanu giti bai mo ta gbu ulia chage no ama ole bai me mo ta gbu chage no ama ole ama takalin kare.” Chube gerua degaba unsuialin gerule ene che ta gbe chke uñale Chube kle ji gbe giti. 31 Chube kweri kiraske malen tirare kwian ulita alin mo ta gbe age Chube dollale joge siere Chubege, kwian age ene giti Chube be ji gbe mno tirare kwian alin. 32 Ba ulita tachkedale chui ngeru giti ba Jesucristo gerua gau ulia gire, e suiage gwangerugu ba mo ta gbu kiraske jage boi ulita daga ngwalege ta no ole. Ba me Jesucristo gerua chugu ngwadi dale ba boidu daga ngwaleske ba me jo siere geruge. 33 Chui gwealege badi ibu gbere kaire ka bole ba ole kwian na tanre gwa giti kaire ba gbere boale daga ngwale Chube gerua gdale. Kaire chui nage ba ñadu daba na chudaboi daba kledu boi ba boidu kare giti, ba skatedu ama ole ule diali ama kira gbe Chube gerua giti. 34 Kaire ba taidu dage kwian kledu tkaba skagege, ba ama chudabo. Kaire lle banu junlennga ba ngeru gire ba me talladu ba lle chugu ngwadi jwanlenga ba ngeru. Uñadu bage lle ma no kle nga ngaña giti ba alin Chube gerudu be kete bage kare, lle e chege ba alin diali dale alin. Ba llea junlennga ba ngeru gire ba me ta skochiu ba mo ta gbu nga suga no ole. 35 Cha gerule ba ulita ole, ba mo ta gbadale kiraske Chube gerua giti ba kle boi daga ngwaleske, boi daga ngwaleske Chube be age no ba alin. 36 Ba mo kira gbadale ma ngle me tañachuge tanre ba kle boi daga ngwale giti ba mo jigadale Chube kote. Ba kle age ai kare, ba kle age ulita Chube takalin kare gire kaire Chube be age no ulita ba alin ama gerua kle gerule kare ba age no ñanale. 37 Ba ulita tachkedale Chube gerua degaba unsuialin kle gerule Jesucristo giti, chada e gerule: “Chube gerudu: ‘Me sbali gdaite be chieni be chke blikare, ama mi manade tanre ama be chieni. 38 Kwian chanu mo ta gbadale kiraske diali cha gerua gbe gdadi age cha takalin kare. Agwa ama mo ta gbe cha uñe gire mo ta bliteni naskuni cha dollale age me no ngeru kare, chadi nga mi suga no ama giti.’ ” Chube gerua degaba unsuialin gerule ene. 39 Cha gerule ulia ba ole, che ulita me kwian kle mo ta gbeni age me no naskuni kwian kle age Chube dollale kare, kwian mo ta gbeni Chube dollale kwian e be ji chuge kweri tirare. Che me kle mo ta gbe joge naskuni agwa che kle mo ta gbe ulia diali chage gwangerugu Chube geruadi, ene Jesucristo giti che be tien gitiru ji chugege age me no gdale, malen che ulita mo ta gbale geru Jesucristo giti gai ulia diali gwangerugu.
1 Kwian bai mo ta gbe ulia Chube ole Chube gai ulia, kwian ene ta suge trate Chube be age ulita Chube gerule kare, kaire kwian ene ta suge trate lle ulita kwian me kle gwagedige lle e ulita kle ulia Chube gerule kare. 2 Che enusulian oña che sulian oña unsuialin mo ta gbu ulia Chube ole Chube gau ulia, gire e giti Chube gwagedu no ama ulitadi, Chubedi nga sugadu no kwian mo ta gbu giti ama ole. 3 Che mo ta gbe ulia Chube ole Chube gai ulia gire suge chege Chube lle ulita dodanga. Chube gerudu alin allabi gwangea nge jondege alin gire lle ulita chegu dodaba no ama kirallaske, Chube lle ulita dodadu mau kirallaske lle ulita me kledu gire. 4 Che enusulian oña che sulian oña unsuialin ulita bai kalla kle degaba chada ai giti mo ta gbu ulia Chube ole, ama ulita Chube gau ulia mo tale. Che enusulian oña kada Abel mo ta gbu ulia Chube ole Chube gai ulia, ama Chube gau mo Chugagwallale agedu Chube tadukalin kare, malen Abel bda no guda Chube gwa giti ta no ole, ama mo ta gbu ma ngle Chube ole ama daballa kada Caínge, malen e giti Chube gwagedu no trate Abeldi me jiske Chube gwage, kaire Chube gwagedu no lle ulita Abel ketu Chubegedi. Ulia Abel me kle gwade nege tangle ama jokeda sbali, agwa geru kle degaba no ama giti ama mo ta gbu ulia Chube ole giti, ene che ñage geru jwen ama giti mo ta gbe ulia Chube ole giti. 5 Chura jo tangle sbali gire kaire agwe Enoc toidu Enoc mo ta gbu ulia Chube ole Chube gai ulia, malen Enoc jo dbaba gwade nga ngaña giti, ene ama me jokeda ama jonga me gda uñale, Chube Enoc du. Geru kle degaba kle gerule Enoc bebi dbale nga ngaña giti gire Chube gwa gitibi Enoc kwian no trate, Chubedi nga sugadu no Enoc Chube gau ulia giti. 6 Ulia che takalin chege no trate Chube gwa giti che ta Chube ta gbakalin nga suga no ole che giti gire ene che mo ta gbadale no Chube ole age ulita ama takalin kare. Che ulitage sugedale Chube kle ulia, Chube agenga no ulita, kaire sugedale chege Chube be che chudaboi che ulita bai kaire chudaboi kade amage, Chube be age no che alin. 7 Chura jo tangle sbali gire kaire agwe Noé toidu, Noé mo ta gbu ulia Chube ole Chube gai ulia, malen Chube gerudu Noé ole be boi daga ngwale tirare giti nga dba ai giti chi kote. Ulia Noé me gwagedu edi Chube gerudu giti blikare agwa ama Chube gerua e gau ulia, gire ama agedu ulita Chube ama ta gbu age kare, ama du kweri dodadu ama olia ulita jwangda siere ji chuge tirarege. Noé mo ta gbu Chube gerua gai ulia malen e giti Noé ñadu tien gitiru kwian ulita agenga me noge me ji chuge chi kote kwian na ulita kare. Chube gwagedu Noédi trate no me jiske, Noé mo ta gbu Chube gerua gbe gdadi malen Chube Noé jun siere chige Chube nga kagunga gire. 8 Kaire agwe Noé oindalla kada Abraham mo ta gbu ulia Chube ole Chube gai ulia, malen ama agedu ulita Chube gerudu kare ama ole. Ama jo siere nga ama kledu toige, ama jo chage Chube ama ta gbu kare nga ketabe amage toingwa ngnagu. Abraham jo siere una ama kledu toi ngwadige gire ni uñadu amage ama be joge nga bai ngnaguge. 9 Abraham mo ta gbu ulia Chube ole malen ama ñadu joge chke toi nga Chube kaitu amage ngwadi agwa ulia ama me chegu toi nga gdaitre alinge jwire nga Chube ketu amage ngwadi, ama toidu kwian chieba nga nage kare, ama u gbu sugetidale alin, ama chagedu nga ulita nga Chube ketu amage ngwadi. Kaire agwe Chube gerudu Abraham kirolla Isaac ole kaire Isaac kirolla Jacob ole Chube be nga e ulita kete amage toingwa, agwa ama ulita kaire agwe kledu chage Abraham kare kwian nga namu kle chage basale kare nga ege. 10 Cha geru kadakalin bage ene: ¿Mineade Abraham kaire ama kirolla ama bdadalla me toidu jwire nga gdaitre alinge nga kweri Chube ketu amage ngwadi? Ulia Chube nga no ketu Abrahamge kaire Abraham oliage toingwalla agwa cha gerule ba ole, Abrahamge sugedu nga ma no nga dba aini ulitage ama ñage toi diali dale alin kledu nga ngaña giti, gire ama tadu toikalin diali dale alin nga no e Chube nu dodabage nga ngaña giti. 11 Kaire agwe Abraham mo ta gbu ulia Chube ole Chube gai ulia malen Abraham ñadu kirogwa molen mo muira Sara ole. Ulia Sara me ñadu kirogwa manade ama kledu biale gire, Sara muinga gballa, gire Sara jo juma juma kaire Abraham jo salengwli juma Sara ole gire ama ñadu kirogwa molen gdaite juma giti Chube kirallaske. Abraham mo ta gbu Chube gai dage gire Chube agedu no Abraham alin Chube gerudu kare Abraham ole. 12 Abraham mo ta gbu ulia Chube ole Chube be ama chudaboi ulia kirogwa kete amage Chube gerudu kare ama ole, malen Abraham jo juma juma me chegu ñage kirogwa molen muira Sara giti agwa Chube kirallaske ama ñadu kirogwa molen gdaite muira Sara giti. Abraham kirolla e giti Abraham oindalla jriendunga tanre ni che ñage ama oindalla ten nate, ama oindalla jriendunga ngle salengwli beu nga ngaña giti kare ama oindalla jriendunga salengwli ubauda kle chege ble kagdage jegwale kare, ama oindalla ulita tanre ni che ñage ulita ten nate. 13 Cha gerule ulia ba ole, kwian ai ulita jo ka gbaba chada ai giti mo ta gbu Chube gerua gai ulia, ama ulita jokedabi ngeru ama ulita me ñadu gwage mo gwagwa giti agali Chube gerudu giti ama ulita ole Chube be age no ama ulita alin. Agwa ulia ama ulita mo ta gbu Chube gerua gai ulia Chube be age Chube gerudu kare ama ole, sugedu ama ulita tale me sbali Chube be age ulita ama alin Chube gerudu kare. E giti ama ulita nga du suga no modi. Ama ulita mo ta gbu tañachuge suge moge nga dba ai giti ama me nga dba ai giti mauña, amage sugedu ulia ama kledu toi sugetidale alin nga dba ai giti ama kledu kwian chagengale daba jwiage kare. 14 Ulia ñage suge chege ama ulita me kledu nga dba ai giti gai mo jwiale chui tangle, agwa ama ulita kledu tañachuge nga no no giti toingwa diali dale alin, e nga ngaña giti Chube kle ngwadi. 15 Ama ulita kledu tañachuge nga ama toidu gwangeage giti gire ene ama ñadu mo ta gbe jogeni naskuni nga ama toidu ngeru ngwadige. 16 Agwa ama me tañachugu dale ene jogeni nga ama toidu ngeru ngwadige giti, ama ulita tañachugu joge nga ma noge Chube kle ngwadige nga ngaña giti. Malen kwian mo ta gbu Chube gerua gai ulia kaire agwe kwian e giti Chube me ibudu gerule kwian e amanu, ama kwian e Chugagwalla, gire ene ulia Chube nu nga no dodababi kwian e alin toingwa diali dale alin jwire nga ngaña giti ule Chube ole. 17 Unsuialin tangle Chube gerudu Abraham ole ene: “Ba kirolla Isaac giti ba be chege oindalla ole tanre.” Chube gerudu ene Abraham ole, gire Abraham mo ta gbu ulia Chube ole Chube gai dage, agwa Chube Abraham ta gbu age kirolla ole chke gda uñale Abraham kle mo ta gbe ulia Chube ole o me. Chube Abraham gbu Abraham kirolla Isaac gweda kete gugaba Chubege bda gwakleduda kare. Uñadu Abrahamge kirolla e giti Chube be Abraham oindalla gbe jriennga agwa Abraham me talladu e giti, Abraham mo ta gbu biale age ulita Chube gerudu kare mo kirolla gdaitre alin allabi gweda kete Chubege. Ulia Abraham me tañachugu Chube be ama anblite ngwale, malen ama mo ta gbu age Chube gerudu kare ama kirolla gweda giti. 19 Ulia ulia Abrahamge sugedu Chube kira molen tanre Chube ñage ama kirolla Isaac jogekeda gbeni gwadeni, malen Abraham mo ta gbu biale Isaac gweda ulia, Chube gwagedu Abrahamdi Abraham kle biale mo kirolla gweda gire Chube bda cordero gbu Abraham jonllage gwadaleda Isaac taneage, gire Isaac chegu gwade toi ngerugu. Agwa Abraham alin chegu salengwli Isaac jokeda ulia chkuni gwadeni kare. 20 Kaire Abraham kirolla Isaac mo ta gbu Chube ole ulia Chube ñage age ulita malen Isaac gerudu no kiraske Chube gwa giti ama kirolla Jacob ole kaire ama kirolla Esaú ole ene: “Cha takalin Chube age no no ba gdabonate alin nege tangle chui gwangeruguge.” Isaac gerudu ene mo kirolla gdaboke ole Chube gwa giti. 21 Kaire Isaac kirolla Jacob mo ta gbu ulia Chube ole Chube be age no Jacob bdadalla alin malen Jacob chegu kodi jogekeda gire ama gerudu no ama bdadalla gdaboke ole Chube gwa giti ene: “Cha takalin Chube age no ba cha bdadalla gdabonate alin, nege tangle chui gwangeruguge.” Jacob gerudu ene ama bdadalla gdaboke ole, gire Jacob mo kliuda glita ama kle chage giti gire ama gerudu no nga suga no ole Chube giti bdagli. 22 Jacob kirolla kada José mo ta gbu kaire agwe ulia Chube ole Chube age ulia Chube gerule kare. José mo ta gbu ene malen ama bebi jogekeda gire ama gerudu ama bitalla israelita ole ene: “Chui be joge tangle ngle gire Chube be che oindalla ulita chudaboi joge siere nga Egiptoge, ama ulita be joge toi nga Chube ketu che enusulian oña Abrahamge ngwadi. Cha gerule ba ole, che oindalla be joge toi nga ege, gire ama cha gdalla dbadale mo ole llagli.” José gerudu ene ama bitalla ole ama gdalla giti, Josége uñadu ulia Chube be age no ama bitalla ulita alin Chube gerudu kare. 23 José toidu suiage chura jo tangle sbali gire José bitalla gdaite medunga chebia kote, e Moisés. E suiage Moisés ñenua Moisés chebia mo ta gbu ulia Chube ole malen ama me kendunga me age me no mo kirolla Moisés ole ama chugagwalla Faraón gerudu kare. Chugagwalla nga Egiptomu kada Faraón nu geru gbababi kirogwa soli onbre israelita gwaleda ulita agwa Moisés medunga chebia kote gire Moisés ñenua Moisés chebia Moisés ogoda sugekare dai gdamaige. Ulia Moisés ñenua Moisés chebia gwagedu Moisédi kirogwa soli noare ta ole malen Moisés ogleda ene, uñadu amage Chube be Moisés manade no ama chugagwalla ngeru. Moisés skwendu Faraón jiange gire Faraón jian Moisés manadu mo kirollale. 24 Moisés tigedu jo onbre gdate kweri gire Moisés mo ta gbu ulia Chube ole Chube gai dage malen ama me tadukalin kwian na ama gai kwian kweri chugagwalla Faraón jian kirollale, uñadu Moisége Chube be ama gbe ama bitalla israelita jonlla dbanga joge siere nga Egiptoge. 25 Moisés mo ta gbu mo boange daga ngwale ule ama bitalla israelita ole. Moisés me tadu chegekalin age me no Chube dollale kwian nga Egiptomu kledu age kare. Kwian nga Egiptomu lle tanre molen, nga suga no amadi ama kle toi age me no giti agwa Moisége sugedu kwian nga Egiptomu kle age kare e ulita ngwale kwian nga Egiptomu nga du suga no modi sugetidale alin allabi, malen Moisés mo ta gbu mo boange daga ngwale me no ama bitalla israelita ole ule. 26 Uñadu Moisége Chube be Cristo kage kwian alin kwian jwanngale siere malen Moisés mo ta gbu age Chube takalin kare, e gdale Moisés boidu tanre daga ngwale kwian nga Egiptomu ama gbu gidagda tanre. Moisés lle no tanre ñanaske chugagwalla nga Egiptomu chugu ngwadi mo ta gbu Chube gerua gbe gdadi, uñadu amage Chube be age no ama alin age ene ñanale. 27 Moisés mo ta gbu suge moge ulia Chube be ama bitalla israelita ulita jwen siere boi daga ngwalege nga Egiptoge. Moisés mo ta gbu ulia Chube ole Chube be ama chudaboi malen ama mo bitalla ulita gbu bda gweda bda e bea drennga ugaka kagda jegwale u kaire kairege kwian israelitanuge, ene lle boanga nga ngaña giti Chube nu kagaba kwian Chube dollale gweda gwage be edi ama me age me no kwian israelita ulita kirolla nu mebanga ngerutabi ole, ama mi kirogwa e gweda. E suiage gwangerugu che kwian israelita chui e ka gbu Pascua chuia. Moisés mo ta gbu ulia Chube ole Chube be ama chudaboi malen ama jo siere nga Egiptoge ama bitalla israelita ulita ole. Ama me kendunga chugagwalla nga Egiptomudi chugagwalla kledu skochie giti, sugedu Moisége Chube kledu ama ole ama kira gbe diali malen Moisés mo ta gbu kiraske jogeni gwangerugu alin me mo ta bliteni joge gwanaskudani nga Egiptoge. 29 Che enusulian oña israelita ulita jo siere nga Egiptoge gire ama mo ta gbu ulia Chube ole Chube be ama chudaboi Chube nu gerubabi ama ole kare, malen ama ulita jo chke ble kada Mar Rojo kagdage, gire Chube ble degunga, nga chegu jon kare ulen ama ulita jo chage nga ulenge. Ama jo tangle ulita ble giti chkagu, gire ama dolla kwian nga Egiptomu tadu jogekalin tangle kwian israelita nate ble eske tangle salengwli kwian israelita kare, ama ulita jo chke ble bonga gire Chube ble ulita gbuni naskuni. Chube ji gbu kwian nga Egiptomu giti ene ulita, kwian nga Egiptomu ulita mangire batre jo ama ulita unjo, ama ulita jokeda ble kote. 30 Kaire agwe che enusulian oña israelita ulita mo ta gbu ulia Chube ole Chube gai ulia malen ama jo chke nga kada Canaánge gire ama chagedu una kada Jericódi tangle chui gbagukege Chube ama gbu age kare, gire una edi tangle gere kweri kledu tkaba gere e ulita jo mliaba dba ulita chegu me no. Che enusulian oña israelita Chube gau ulia giti ama ñadu kirachke ama dolladi kle toi una Jericóge Chube kiralla giti. 31 Gere una Jericódi tangle bebi joge mliaba dba, kaire kwian una ege bebi boi daga ngwale kwian israelita kote gire muinga gdaite chagenga kwian onbre tanre ole toinga una Jericóge kada Rahab ama agedu nobi kwian israelita gweale alin. Kwian israelita gweale jo nga chra ite giti nate una Jericóge gire Rahab kwian israelita e gau ngwange no mo ullage ama chudabo. Rahabge uñadu kwian e Chubenu kaire Rahab Chube gau ulia, malen kwian israelita jo chke kwian una Jericómu gbe boi daga ngwale gire Rahab me jokeda kwian ulita agenga me no nga emu boidu kare Rahab mo ta gbu ulia Chube ole giti. 32 Kwian na tanre mo ta gbu ulia Chube ole agwa ama me jo ka gbaba chada ai giti, chui me cha ole ngle chada dege ama ulita kada ene giti: Gedeón, kaire Barac, kaire Sansón, kaire Jefté, kaire David, kaire Samuel, kaire kwian gerunga Chube ole daba alin tanre kle gerudale giti agwa cha me ñage chada dege nege kwian ulita ai giti. 33 Agwa ulia che enusulian oña israelita unsuialin tangle e kare na tanre mo ta gbu ulia Chube ole Chube gai ulia malen Chube kiralla giti ama gweale ñadu kirachke mo dolla nga namudige, kaire ama mo ta gbu mo bitalla chudaboi no Chube tadukalin ama age kare gire Chube agedu no ama alin Chube gerudu kare ama ole, kaire ama gweale ñadu tien gitiru me boi daga ngwale gude kweria me noge Chube gude ta gbu me ama gute, 34 kaire ama gweale gbere boi daga ngwale jitaske Chube gai ulia gdale agwa Chube kiralla giti ni kugedu sidri, kaire ama gweale ñadu tien gitiru gwabeda sbadi gitige, kaire ama gweale me kira molen Chube ama kira gbu ene ama ñadu kirachke ama dolla kira batanga tanredi, kaire ama ulita bai jo dole mo dolla ole kirachku ama dolladi, ama ñadu ama dolla gweda ulita Chube kiralla giti. 35 Kaire muinga gweale mo ta gbu Chube gai ulia malen muinga e bitalla gweale jogebakeda chkuni gwadeni naskuni. Kaire agwe kwian na tanre mo ta gbu ulia Chube ole agwa ama boidu daga ngwale Chube gerua gai ulia gdale, ama me tiendu gitiru dale boi daga ngwalege. Kwian gweale gbere boi daga ngwale tanre agwa ama me mo ta blitu Chube dollale chege tien gitiru boi daga ngwale ege, malen ama guleda Chube gerua giti, sugedu amage ma no jogekeda Chube gerua giti gire chkeni gwade no trateni toi diali chui tangle Chube ole nga ngaña giti. 36 Kaire kwian gweale boidu tanre daga ngwale ama gbere kidegda Chube gerua gai ulia giti kaire kwian na gweale batre obere giska giti kaire kwian na gweale tkere skage lugleda giska mno hierrogda giti. 37 Kwian gweale skire ke giti gire ke kote ama jokeda, ama gweale bole daga ngwale tkerenga bonga tangle, na gweale guleda sbadi giti. Kaire agwe kwian Chube dollale kwian Chubenu tanre jritu nate chagedu ama nate diali ama gbe boi daga ngwale jere jere, malen kwian Chubenu e kledu chage ngwale gdate ongoru ongoru baini kaire nga gballage ngaske kaire ama kledu toi gbe ngaske keugage dbiugage, ama mo ngama tku bda oveja kwara giti alin allabi kaire chivo soli kwara giti, ama me chegu lle molen dale. Kwian ulita ai kare boidu daga ngwale tanre mo ta gbe ulia Chube ole giti. Ulia kwian agenga me no Chube dollale ama agedu me no kwian Chubenu ole ama tadukalin kare, me sugedu amage kwian Chubenu e ulita ma no ma kweri Chube gwa giti kwian na ulita nga dba ai gitige. 39 Kwian ulita jo geruba giti chada ai giti, ama ulita toidu unsuialin tangle. Ama ulita mo ta gbu ulia Chube ole ama agedu Chube takalin kare malen Chube gwagedu amadi no trate ama Chube gau ulia giti, Chubedi nga sugadu no ama agedu giti. Agwa kaire agwe lle ulita Chube gerudu giti ama ole Chube me ketu amage Chube me agedu ene ama alin ama toidu suiage gire. Agwa Chube kledu tañachuge geru ma no gbe ama alin kaire che ulita nege tangle Chube gerua ganga ulia alin. 40 Chube takalin kwian toidu unsuialin tangle bai Chube gaba ulia ama ulita chege no trate me jiske Chube gwa giti ule kwaitre alin che ulita Chube gerua gaba nege tangle ole, gire ene lle ulita Chube gerudu giti ama ole unsuialin tangle kaire che ole nege tangle Chube be age ene ulita che alin kaire ama alin chui bdaglige che ulita Chubenu be kle ule gire. Chui ege Chube be age no no che alin ulita ama geruba che ulita amanu ole kare.
1 Uñale chege che enusulian oña e ulita unsuialin tangle mo ta gbu ulia Chube ole Chube gai ulia age Chube takalin kare, malen che kaire agwe mo ta gbadale ulia Chube ole Chube gai ulia che enusulian oña e agedu kare. Che mo ta gbadale joge siere lle ulita kle che gbe age me noge, che kle age me no ulita che takalin kare che e ulita chugale ngwadi sugekare chege. Kaire lle ulita bai che ta gbe sugekare Chubege me age ulita Chube takalin kare che lle e ulita chugale ngwadi. Ulia che mo ta gbadale kiraske toi diali no Chube takalin kwian amanu toidale kare. 2 Che mo ta gbadale diali tañachuge Jesucristo giti, Jesucristo amaña kle che ta gbe Chube gai ulia, ama kle che ta gbe suge Chube giti ma ngle, ama kle che chudaboi toi ma no Chube takalin kare. Che tañachugadale diali Jesucristo boidu giti, Jesucristo boidu daga ngwale jokeda kruge ni ama mo talladu mo kete kwian ulita agenga me no giti, ni ama tañachugu mo tale ama be boi ibulla jogekeda kruge giti kwian agenga me no kare. Amage uñadu ulia ama be boi daga ngwale jere jere agwa kaire uñadu amage nga be suga no amadi bdagli ama agedu kwian alin giti, malen ama jagedu boi daga ngwale ulitage me mo talladu. Ama jokeda chkuni gwade, nege ama kle nga ngaña giti toiba dba Chube ngena Chube ko taingwli giti kwian Chugagwalla kweri. 3 Ba mo ta gbadale tañachuge diali Jesucristo boidu daga ngwale giti kwian agenga me no Jesucristo dollale kote. Sugedale bage Jesucristo jagedu boi daga ngwalege ta no ole me skwatigu ni skochiu. Malen ba ulita me ñage Jesucristo talla mlienga, ba me mo chuge ngwadi me Chube gai ulia dare ba kle boi daga ngwaleske, mo ta gbadale Jesucristo kare me skwatige me ta olire ba kle boi giti. 4 Ulia ba mo ta gbu toi Chube takalin kare me age me no kwian na kare gire ba kle boi daga ngwale e giti, agwa ulia ba me mo gwabada kwian Chube dollale kote Jesucristo boidu kare. 5 ¿Gire mineade ba kle ta olire ba kle boi daga ngwale giti? ¿Ba kle ta jogenga ba Chube olia Chube ba Ñenua? Chube ta ba ta gbakalin nga suga no ole ta ba kira gbakalin boi daga ngwaleske, ama gerua degaba unsuialin gerule ba alin ene: “Ba kwian Chubenu age gweale me no ba Chugagwalla Chube ji gbe ba giti Chube ba chuge ngwadi boi daga ngwale ba kle age me no gdale, ene Chube kle ba ta gbe ba kle age me no giti, ene ba suge moge Chube me takalin ba toi dare age me no ene. Chube kle ba chuge ngwadi boi daga ngwale ba kle age me no gdale, e me kle gerule Chube me no ba ole, me dale. Chube no ba ole diali, ba ama olia malen ama ta ba chudaboakalin toi age no diali ama takalin kare. Chube ji gbe ba giti ba kle age me no gdale ba me ta gbe skochie Chubedi e gdale ba me mo ta gbe olire e giti, ma no ba Chube chuge ngwadi ba tke tangle boi daga ngwale eske, ene e giti Chube be ba ta gbe suge ma trate chage no ama takalin kare.” Chube gerua degaba unsuialin gerule ene kwian Chubenu ulita alin. 7 Che kle boi daga ngwale gire che jagedale ta no ole che kle boi giti me skwatige me skochie. Sugedale chege Chube nu che gaba ama alin ama oliale malen che kle boi daga ngwale giti ama kle che tke tangle toi ma no ama gwa giti ama takalin kare. Cha gerule ulia ba ole, ni kirogwa ñenua gdaite bai no ulia mo kirogwalla ole mi kirogwa ta gbe kirogwa kle age me no giti, kirogwa ñenua me ñage kirogwa chuge ngwadi age ulita kirogwa takalin kare, ama ji gbadale kirogwa giti kirogwa tke tangle age no ñenua takalin kare. 8 Diali kirogwa ñenua kle ka boi kirogwa amanu ole kirogwa ta gbale kirogwa kle age me no giti, agwa ñenua mi ka boi ene kirogwa na gitiru sugekare ole. Ama me mo tallade kirogwa na gitiru ole kirogwa e kle toi mine. E kare ene sugedale chege Chube kle che ama oliale ta gbe che kle age me no giti ama kle che gbe ji chuge boi daga ngwalege lle gweale giti kirogwa ñenua kle age mo kirogwalla ole kare, e giti chkedale uñale chege che Chubenu ulia Chube no no che ole. 9 Che ulita kledu soli gire che ñenuanu nga dba ai giti che tku tangle che toidale mine kaire ama ji gbu che giti che agedu me no giti. Ama agedu ene che ole ta no ole che chudaboale gire ene che ama kerua gau dage. ¿Agwa gire mineade che me mo ta gbe Chube che Ñenua nga ngaña giti kerua gai dage age diali ama takalin kare? Ulia Chube ma kweri ma no ma kiraske che ñenuanu nga dba ai gitige, malen che Chube che Ñenua nga ngaña giti gerua gadale dage ama gerua gbe gdadi diali, ene che ñage toi no trate che Ñenua Chube takalin kare, gire ene Chube be che gbe toi no diali chui tangle ama ole ule nga ngaña giti. 10 Che kledu solibi gire che ñenuanu nga dba ai giti kledu che tke tangle kaire ama ji gbu che giti che agedu me no giti, ama agedu ene che ole che chudaboi, ama tañachugu e no che alin. Agwa ulia Chube che tkanga tangle ma no che ñenuanu nga dba ai gitige, Chube kle ji gweale gbe che giti che age me no giti che chudaboagda, ama takalin che chege no trate ama kare. 11 Ulia mnoare che alin suge no moge ji chuge boi daga ngwalege che age me no giti, che alin e giti che kle chege ta olire ole che kle boi giti. Agwa ulia che geru jwen che kle boi giti che be mo ta blite me age e kare dare, kaire che be toi nga suga no ole age ulita no trate Chube takalin che amanu toidale kare. 12 Ba kle boi tanre daga ngwale ulia agwa ba mo kira kadadale Chubege ene Chube ba kira gbe chui kaire kairege ma ngle, ba mo ta gbadale kiraske Chubege ene ba ñage jage ba kle boi daga ngwalege me skwatige me skochie, ba me mo chugale ngwadi ta olire ole, ba mo ta gbadale nga suga no ole ba kle boi daga ngwaleske. 13 Ba mo ta gbadale ulia kiraske Chube ole, ba mo ta gbadale no trate chui gbaite kaire kairege Chube takalin kare ene ba mi mo ta bliteni joge naskuni age me no Chube dollale ba agedu ngeru kare, agwa ba be chege toi gwangerugu no kiraske ma ngle Chube kirallaske. 14 Ba ulita Chubenu, ba mo ta gbadale diali no daba na ulita ole me kira bate ongoru ongoru mo ole, ba mo ta gbadale joge siere age me noge ene ba toi no no trate Chube gwa giti. Agwa kwian me mo ta gbe joge siere age me noge mo ta gbe age no trate Chube takalin kare, ama me ñage toi ule Chugagwalla Chube ole nga ngaña giti diali chui tangle. 15 Ba ulita mo talladale ongoru ongoru mo chudaboi toi ulita Chube takalin kare. Ulia me no ba gweale mo ta bliteni age me no Chube dollale gire ene Chube me ñage ba chudaboi, Chube me ñage age no ba alin ama takalin kare. Chube ta ba ulita chudaboakalin, ama takalin ba ulita toi no ule daba ole, malen ba me ñage ni kwian gdaite kle baske chuge ngwadi ba ulita gbe toi me nga suga no ole age gweale me no. Ulia kwian gdaitre alin allabi age me no giti ba ulita ñage chege toi ta me no ole daba na ole kwian e kle toi kare. E chege salengwli gliga gaite gage mliakle chiske kare gire chi e ulita chege gage ulita sugaska kwian tanre ñage oga chi edi. 16 Kaire agwe cha gerule ulia ba onbrenu ba muirenu ole, ni ba gdaite chagedale muinga ole ke giti, ni muinga chage onbre ole ke giti ba me mo jwanba ulia gire, kaire ba Chube gerua Jesucristo giti gadale dage ba me mo gbe age ngwale me no Chube gerua ole Chube gerua ibade. Ba me age kwian unsuialin tangle kada Esaú agedu kare. Esaú me mo talladu Chube gerua giti, Esaú kirogwa onbre kimule, Chube gwa giti ama chegedale ama daballa na ulita chugagwallale ama ñenua taneage ñenua me chege gire. Agwa Esaú me mo talladu, ama geru e gau geru ngwale kare, Esaú kirogwa kimule, agwa bligda gdaitre alin giti ama mo chbadu mo daballage, gire ene ama daballa solire kada Jacob chegu Esaú kimule taneage. 17 Bage ulita uñale, Esaú bligda gutu ulita ama daballa ketu amage bigire Esaú tadukalin ama ñenua gerule no ama giti Chube gwa giti ama chegeni kirogwa kimule kare, agwa ama ñenua nu gerubabi Esaú daballa solire Jacob giti Chube gwa giti, ama me ñadu gerule no Esaú giti Esaú kaite Chubege kaire agwe. Gire Esaú olidu tanre ama agedu me no kbiale ñenua me ñadu mo ta blite age Esaú tadukalin kare. Geru kle gbaba Esaú giti chke uñale bage, ba me boidale Esaú boidu kare, agwa ba mo ta manadale me mo ta bliteni age me no Chube gerua dollale, ba mo ta gbadale gwangerugu toi no trate Chube takalin kare. 18 Ba ulita ta gerukalin Chube ole gire ba me agedale ba enusulian oña agedu unsuialin tangle kare. Unsuialin tangle Moisés toidu suiale kwian israelita tadu gerukalin Chube ole gire ama ulita jo jwichuga kada Sinaí gdoge dba, jwichuga e giti kwian Chube kerua keruchugu gerule kwian ole, jita kledu gwade tirare ne ngwadi, nga kledu jere dbigu kaire nga kledu gdade tirare ulita, mleuda kaire agwe kledu tiennga tanre. Boi ene giti ulita sugedu kwian israelita ulitage Chube kle jwichuga e giti gerule kwian ole. 19 Kwian lle ngwanegda kada trompeta keruchugu kaire ama ulita Chube kerua keruchugu gerule kwian ole ulita jwichuga giti. Ama Chube keruchugu gerule ene ama ole: “Cha kle aini jwichuga giti malen kwian bai kaire be skite jwichuga ai giti kwian na ama skiadale ke giti gwaleda o kaire ñage kwian e gweda lanza giti. Kaire bda gweale skite jwichuga ai giti gire bda e gwaleda kaire agwe.” Geru ai skwendu mnoare kwiange Chube gerudu kare ama ole, ama kwachiu tanre malen ama ulita gerudu ma no Chube me gerule dare ama ulita ole. 21 Boidu ene jwichuga Sinaíge Chube gerudu ngwadi kwian ole malen Moisés kaire kwachiu tanre, ama gerudu: “Cha kwachie tanre cha jirenga tanre jegwale chru ole.” Moisés gerudu ene kwian ole boidu jwichuga Sinaíge giti. 22 Boidu ene unsuialin kwian israelita ole, agwa nege tangle ba ulita me jogedale jwichuga Sinaí giti gerudale Chube ole kaire Chube keruchuge. Ba me kwachiedale gerule Chube ole kwian israelita kwachiu kare unsuialin tangle. Nege tangle ba ulita agali ñage gerule Chube ole lle ulita giti, Chube gerunga kwian ulita giti kwian bai jiske kwian bai me jiske, Chube no gwade, ama kle toi nga ngaña gitige, nga e kada una Jerusalén nga amaña kada jwichuga Sión, nga ege Chube kle ngwadige ba kerua kle suge amage diali. Kaire ne ngwadi lle boanga Chube alin tanre tanre kle mo litaba nga suga no ole gerule no Chube giti diali. Kaire kwian na ulita Chube gerua gaba ulia ama jogebakeda ama oña kle mo litaba eni ule nga ngaña giti, Chube ama ulita gbubi no trate me jiske Chube gwa giti, ama ulita oña kle toi ule Chube ole nga ngaña giti. Kaire kwian ulita kle toi nga dba ai giti bai nu Chube gerua Jesucristo giti gaba ulia kwian e ulita kalla kle degaba chada giti nga ngaña giti. 24 Che Chugagwalla Jesucristo gerunga Chube ole che alin ama kaire agwe kle nga ngaña giti Chube ole ule. Jesucristo agedu giti Chube geru jagere ma kiraske kwian jwangda siere ji chugege age me no gdale geru ngeruge gbu egdage kwian ole, Jesucristo chegu geru jagere mauña. Jesucristo mo ketu gwaleda kruge kwian jwanle siere ji chugege age me no gdale gire kwian Jesucristo gerua gai ulia giti kwian chege no trate me jiske Chube gwa giti. Jesucristo bole giti e chegu ma trate kiraske Abel boiduge. Unsuialin tangle Caín mo daballa Abel guda gire Chube Abel jia junnga daballa Caínge, Chube Caín gbu ji chuge tanre agedu me no mo daballa ole giti. Agwa Jesucristo boidu kwian alin kruge giti Chube me kle kwian gbe ji chuge kwian age me no giti Chube Caín gbu ji chuge agedu me no mo daballa ole giti kare. Kwian agedu me no Chube dollale Chube talla mliunga kwian Jesucristo gerua gau giti. 25 Malen ba mo ta gbadale no Chube gerua Jesucristo giti ole Chube gerule kare ba ole me geru e kagenga ngwale, ba Chube gerua gbadale gdadi diali. Unsuialin tangle kwian israelita che bitalla me jaindu age Chube Moisés ta gbu gerule kare malen kwian e me cheguda sugekare ji chugege. Chube kwian ulita gbu ji chuge tanre daga ngwale kwian me Moisés gerua gbu gdadi gdale. Che ulita nege tangle me mo ta gbe geru Jesucristo giti ngerule kare me geru e gbe gdadi mo alin che geru e kagenga ngwale, che be ji chuge ma tirare daga ngwale che enusulian oña unsuialin tanglege. 26 Unsuialin tangle Chube gerudu kwian ole jwichuga kada Sinaí giti gire Chube keruage alin allabi nga jwliendu tirare. Agwa kaire agwe nege tangle Chube kle gerule: “Nabitaite cha be nga gbe jwlien nga dba giti kaire cha be nga ngaña giti ulita gbe jwlien.” 27 Geru kle gbaba ene Chube be nga gbe jwlien nabitaite, geru e giti suge chege nga ulita jo dodaba gwangeabi be joge jwanba siere, gire Chube be nga no trate jagere gbagateda, nga e be chege diali, nga e mi joge jwanba siere. 28 Che ulita Chube gerua gau ulia Chube be che gbe toi nga no trate nga ngaña gitige diali chui tangle, nga e ama be kete chege mi joge blitaba ngeru kare, nga e be chege che alin diali toingwa. Malen chedi nga sugadale no diali gerule no Chube kle age no che alin giti kaire che gerudale no Chube giti nga suga no no ole ama gai dage ulia ta no ole ama takalin che ama gai dage kare. 29 Sugedale chege Chube takalin kwian toi ama kle gerule kare me mo ta bliteni Chube dollale, kwian me jain Chube gerua gai dage toi Chube kle gerule kare gire kwian ene giti Chube ji gbe tirare kwian me kle toi Chube takalin kare giti. Chube kiralla salengwli jita kare, jita tirare kle lle ulita gbe kuge, e kare ene Chube be kwian me ama gerua gbe gdadi gbe ji chuge tirare ulita, malen che Chube gerua uñe che mo ta gbadale gwangerugu Chube gerua gbe gdadi diali age ama gerua kle gbaba gerule kare.
1 Ba ulita Chubenu me ta jogedalenga mo ta dbe no diali daba na ulita ole, ba mo ta dbadale no daba ole ongoru ongoru mo bitallanu kare Jesucristo giti. 2 Kwian ulita chagengale kle joge chke ba ullage ba mo ta dbadale no kwian e ole, ba kwian e gale ngwange no lle ulita giti me tañachuge me no kwian edi. Ulia me uñale bage kwian e ngwale o kwian e lle boanga Chube alin nga ngaña giti kle chage basale badi, kwian gweale nu lle boanga Chube alin nga ngaña giti gaba ngwange no mo ullage, ni uñadu amage lle boanga Chube alin kle chage basale, ama tañachugu kwian ama kare kle chage. Malen ma no ba mo ta gbe kwian ulita gai ngwange no mo ullage. 3 Kaire ba tachkedale diali kwian kle skage giti ba ama chudaboadale. Ba mo ta dbadale tai dage daba kle skagege, ba sugedale moge ba kle ule ama ole skage kare. Ba tañachugadale daba bai boaklenga daga ngwale jere jere giti ba mo ta dbadale olire daba ene giti. Cha gerule ba ole, ba mo ta gbadale tai dage daba enege, sugedale moge ba kle boi dagale agali ama ole ule kare. 4 Kaire ba ulita mo jwanba ba mo gadale dage ongoru ongoru, ba toidale trate no ulita mo muira ole kaire muinga mo ñengula ole. Ba onbrenu muirenu me mo chuge ke giti, kwian onbre mo jwanba me chage muinga na ole mo muira kare kaire muinga mo jwanba me chage onbre na ole mo ñengula kare. Age ene kare ulita e me no Chube gwage. Kwian mo jwanba chagedale mo muiranu ole alin allabi kaire muinga mo jwanba chagedale mo ñengula ole alin allabi. Kwian onbrenu muirenu me kle toi Chube takalin kare kle mo chuge ke giti ongoru ongoru muinga na ole onbre na ole, gire kwian age ene giti Chube be ji gbe tirare age me no gdale. 5 Ba me tañachuge diali igi giti alin, me no ba mo ta gbe tañachuge diali ba igi tanre gakalin mau alin. Ba chegedale ta no ole lle mangire batre ba molen ole me tañachuge takalin lle ma ngle ba kle olege. Ulia Chube gerua kle degaba no trate chada giti, Chube gerudu ene: “Cha Chube be kle diali ule ba ole, cha mi ba chuge ngwadi gballa dale boi daga ngwale me lle molen toigda.” Chube gerudu ene kwian ulita amanu ole. 6 Sugedale chege Chube kle diali che ole ule gire che ñage gerule Chube gerua degaba unsuialin gerule kare, chada e gerule: “Chube cha Chugagwalla ama cha chudaboanga malen cha me kendalenga kwian age gweale cha ole giti.” Chube gerua degaba unsuialin gerule ene. 7 Ba tachkedale kwian giti kwian ulita bai ba tku tangle gwangeabi Chube gerua giti. Ba tañachugadale kwian e ba tku tangle ama mo ta gbu mine Chube ole giti kaire ama jokeda mo ta gbe diali Chube ole giti. Ba mo ta gbadale age ulita kwian e mo ta gbu age kare Jesucristo giti, ba Chube gerua Jesucristo giti gadale ulia jumale kwian e Chube gerua Jesucristo giti gau ulia kare. 8 Uñale chege Jesucristo diali kle age ulita ama kle gerule kare, che ñage mo ta gbe ama gerua gai ulia, ama me mo ta blite nganake, ama kle chege nege tangle salengwli ama kledu chui ngeruge tangle kare, kaire ama be chege diali chui tangle ama mi mo ta blite. 9 Ba me mo chugale ngwadi anblitange geru tanre ngwalege, ba mo ta gbadale kiraske Jesucristo gerua gai gwangerugu, ba me mo ta blitadale joge siere geru uliage. Chube no no che ole kaire ama kle age no diali che alin, malen che ñage kira gai amage toi no ulita ama takalin kare. Ma no che mo ta gbe kiraske tañachuge Jesucristo giti Chube agedu no che alin giti agwa me tañachuge age diali geru kledu gbaba unsuialin tangle che enusulian oña israelita alin bligda giti gerule kare. Geru e bligda giti chegu ngwale, age geru e kle gerule kare me kle che ta gbe trate Chube gwa giti, geru e giti che me kira gai toi no Chube takalin kare. 10 Jesucristo jokeda kruge che alin che ama gerua ganga gbagda no trate me jiske Chube gwa giti. Kwian bai kaire kle chage tañachuge age diali Moisés nu Chube gerua degaba unsuialin tangle kle gerule kare alin allabi, kwian e me kle Chube gerua Jesucristo giti gai ulia, kwian e me ñage tien gitiru ji chugege age me no gdale chege trate Chube gwa giti age Moisés nu Chube gerua degaba gerule kare. 11 Ulia unsuialin tangle kwian gerunga Chube ole daba alin ma kweri na ulitage ama diali jo bda gwabada bea dbe Nga Santísimoge u gerungwa Chube olege chura kaire kairege bitaitre alin Moisés kwian tku tangle age kare. Ama jo bda bea e dbe gwa nga ege ama bda bea e gbu Chube gwa giti nga ege kwian na agenga me no alin kaire mo alin agali, ene bda bea e giti kwian ulita agenga me no chegu trate me jiske Chube gwa giti sugetidale alin. Kwian me ñadu bda samlalla e gute dale, agwa bda e guleda, jaba alin ama jo dbaba diali sugekare nga kwian israelita kledu toi ngwadige gugadale ulita. 12 E kare ene kaire Jesucristo jo dbaba nga gballage sugekare una kweri kwian me kledu toi ngwadige, gire eni Jesucristo boidu tanre daga ngwale ama guleda kruge gire ene Jesucristo jokeda giti che agenga me no ulita ama gerua gai ulia che tien gitiru ji chugege age me no gdale, che chege trate Chube gwa giti Jesucristo jokeda giti. 13 Malen che mo ta gbadale ulia Jesucristo gerua gai kiraske gwangerugu, agwa me mo ta gbe geru unsuialin tangle giti gai mo alin allabi. Che mo ta gbadale biale boi daga ngwale Jesucristo boidu kare, kwian gide chedi Jesucristo gerua giti che me talladale, e giti suge chege che kle mo boange Jesucristo kare che kledale biale ta giti boi dagale Jesucristo giti. 14 Ulia che kle boi daga ngwale Jesucristo gerua gai giti nga dba ai giti agwa sugedale chege nga dba ai giti me kle che Jesucristo gerua gaba alin toingwa chui diali dale agwa nga ma no toingwa kle che alin nga ngaña giti Chube kle ngwadige, nga kweri ege che be toi nga suga no ole chui tangle diali che mo ta gbale chui e manade. 15 Unsuialin tangle kwian bda ketu gwaleda mo giti Chubege ene Chubedi nga sugadu no kwian bda ketu Chubege giti. Agwa ulia nege tangle Jesucristo agedu che alin giti che me bda ketadale Chubege dare, nege ma no che mo ta dbale diali gerule no Chube ole Jesucristo giti, mo kwira giti che gerudale no Chube ole che mo gatadale no Chube giti diali, e no Chube alin Chube takalin che age ene diali. 16 Kaire ba ulita me ta jogedalenga mo ta gbe age no diali daba ulita alin daba chudaboi, kaire ba mo ta gbadale lle monu girabate daba na me lle molen ole, age ene daba alin e no no Chube gwage Chube no age ene ole. Age ulita ai kare e salengwli kwian bda ketu Chubege unsuialin tangle kare. 17 Cha gerule ba ulita Chubenu ole, ba mo chugagwalla ba ta mananga Chube geruadi gadale dage ba agedale ama gerule kare, ama kle ba ulita manade no gerudi diali kle tañachuge ba giti kle ba chudaboi chage no Jesucristo geruage, ama me skwatige mo ta gbe ba tke tangle diali no Chube geruage. Ama kle mo ta gbe ene ama kle ba manade no, uñale amage bdagli ama gerudale Chube ole ama lle bo ulita giti ba ulitaske. Ba kwian ene gadale dage ba chugagwallale, ba agedale ulita ba chugagwalla e gerule kare gire amadi nga be suga noare. Agwa ba me ama gerua gbe gdadi gire ama be chege ta olire ole, kaire Chube mi age no ba alin ba tale chugagwalla e giti, malen ba mo ta gbadale ba chugagwalla gerua gbe gdadi Chube takalin kare. 18 Cha gerule ba ulita ole, ba ulita gerudale diali Chube ole cha giti. Cha suge moge cha ta kle no trate Chube gwa giti cha me jiske Chube gwage, agwa kaire agwe cha ta chagekalin ta trate ole diali toi no Chube gwa giti age ulita Chube takalin kare, e giti ba gerudale Chube ole diali cha giti. 19 Kaire cha takalin ba gerule Chube ole Chube cha kageni ba kle ngwadi ene cha ñage jogeni blikare tienda ba ulitadi. 20 Ulia che Chugagwalla Jesucristo mo ketu gwaleda kwian jwen siere ji chugege age me no gdale, gire Jesucristo jokeda giti Chube geru jagere gbu egdage kwian ole chui diali dale alin. Jesucristo jokeda Chube Jesucristo gbu chkeni gwade, nege Jesucristo kle che manade no salengwli kwian bda oveja mananga no kle mo ta gbe oveja manade no kare, Jesucristo che mananga no ama kiraske kweri no trate ama kle tañachuge che giti diali. Cha takalin Chube ta suga no mauña agali ba ta gbe suga no ba ta gbe biale no trate age diali Chube takalin kare, kaire cha takalin Chube age che ulita tale ama takalin kare Jesucristo giti gire ene che ulita ñage age ulita Chube takalin kare Jesucristo kirallaske, ene Chubedi nga be suga no che ulita giti. Cha gerule no Jesucristo giti noare Jesucristo chege kweri kwian ulita gwa giti kwian ulita ama gai dage no Chugagwallale kweri chui tangle. Ene nobi. 22 Cha bitalla Jesucristo giti, cha gerule ba ole, cha chada ai degu ba alin ulita geru na tanre kle tragale ba ole agwa cha be geru ai alin allabi dege ulita. Cha takalin ba ulita geru ai cha degu gai ngwange ta no ole batenga ulita kaire ba mo kira gbe geru ai cha degu ba alin giti. 23 Cha takalin chke uñale bage che daballa Jesucristo giti kada Timoteo junlennga siere skagege, ama be chke blike aini cha kle ngwadige gire cha be ama dbe ule kaire basale ba ngwadi. 24 Kaire ba mo chugagwalla ulita ba tkanga tangle Chube gerua giti kle ba ole ule cha gbi kage no no ama ulita alin, kaire cha gbi kage no no kwian Chubenu ulita alin, cha no ba ulita ole. Kaire che bitalla Jesucristo giti kle toi nga Italiage ama ulita gbi kage ba ulita alin kaire. 25 Cha takalin Chube age no no ba ulita alin Chube kaire Jesucristo ba ulita manade no. Geru ai ene ulita cha chada degu ba kwian israelita Chube gerua Jesucristo giti ganga ulia alin. Che kle meni.
1 Cha Santiago chada ai dege ba ulita kwian israelita mne gdataboko giti gdaboke alin nga baini kaire ba ulita kle toi ngwadige: Cha lle boanga Chube alin kaire cha Chugagwalla Jesucristo alin cha ama gerua dbanga kwiange, cha gbi kage ba ulita kwian israelita Chubenu alin. 2 Cha daballa cha ibotea Jesucristo giti, cha no no ba ulita ole, ba ulita Chube gerua Jesucristo giti gaba ulia, cha takalin suge bage ba kle boi daga ngwaleske ba ulita me mo ta gbadale olire, agwa ba mo ta gbadale nga suga no Chube ole ba ulita kle boi tanre daga ngwaleske. 3 Ba ulita mo ta gbadale jage boi daga ngwaleske mo ta gbe chege chage Jesucristo gerua gai diali gwangerugu, ba ulita mo ta gbe chege ene jage boi daga ngwaleske, be suge bage boi dagaleske Chube kle ba chudaboi diali ba kira gbe, ene ba ulita geru jwen jage ba kle boi dagaleske Chube takalin kare, ene ba mi tañachuge diali tanre ba kle boi giti. 4 Boi daga ngwaleske ba me ta chegedale skwatige ni skochie, ma no ba mo ta gbadale jage diali ta no ole Chube kirallaske, e ba chudaboi chage ma no Chube ole gire ene ba ta be chege ulita no trate Chube takalin kare, ene ba ta be kle biale diali jage ulita ta no ole ba boi ulitaske. 5 Kaire cha gerule ba ulita ole, ba baige me chke uñale nate ba agedale mine lle kle boi gweale giti, bage suge ba ta me chke ngle mine age ma no, ba mo ta gbadale tangle e kade Chubege, ene Chube ta e kete bage, ene ba tachke ba agedale giti ulita, ene Chube be ba ta gbe chke ngle be ba chudaboi ba ta ngle kadu kare amage, ene ba be mo ta gbe age Chube takalin kare. Chube mi tañachuge gweale me no badi ba ta kadu amage giti, Chube me ta skwatige ba chudaboi ta kete bage ba kade amage gire, ama diali takalin ba gerule ama ole chudaboi kade amage. 6 Ba kle chudaboi kade Chubege, ba e kadadale ta giti, ba mo ta gbadale suge ulia Chube be ba chudaboi be lle kete bage ba kle lle kadege kare, agwa ba me tañachugadale Chubedi mo tale: “Cha kle lle kade Chubege agwa me uñale chage Chube be age cha alin o me.” Ba me tañachugadale ene, ba me mo ta gbe tañachuge gwangerugu gwanaskuda ba lle kade giti Chubege. Cha gerule ulia ba ole, kwian bai kaire kle lle kade Chubege me mo ta gbe ta gbaitre alin ole, kwian ene salengwli mleuda kle ble chuga dbe chite ongoru ongoru kare. 7 Kwian bai kaire ta salengwli cha kle gerule ble giti kare, kwian ene diali kle tañachuge nege dale nganake suialin dale nganake diali kle mo ta blite. Kwian me kle mo ta gbe tañachuge lle gdaitre alin giti allabi, kwian e me kle Chube gerua gai ulia ama me kle mo ta gbe Chubege age Chube takalin kare. Ulia ulia kwian e alin Chube me age no, Chube me kwian chudaboi kwian kle tañachuge ta gbaboke kbiale tañachuge gwangerugu tañachuge gwanaskuda giti. 9 Cha gerule ulia ba cha bitalla Jesucristo giti ole, kwian ulita bai kaire me lle molen daba na lle tanre molen kare, kwian ene ulita me mo ta gbale olire ama me lle molen giti, sugedale amage Jesucristo giti Chube kle age no ama alin negege tangle ama kle boi daga ngwaleske Chube ama chudaboi kaire chui bdaglige ama be kle Chube ole chui tangle dale Chube be age no ama alin. Chube gwa giti kwian ene ñanaske tanre, malen e giti kwian ene mo ta gbale toi nga suga no ole diali. 10 Kaire kwian ulita bai kaire lle molen tanre mo ta dbadale nga suga no modi ama kle boi daga ngwaleske. Ama me mo ta dbadale olire lle gweale monu kle chege me no ama ole gire. Sugedale kwian enege lle ulita kle ama ole e kle sugetidale alin nga dba ai giti, lle e me ñanaske Chube gwa giti, agwa kwian ta ma ñanaske Chube gwa giti. Kwian ulita bai kaire lle molen tanre ama chege tañachuge lle e alin giti kwian e salengwli ngaudajralla kare. Ngauda kle jrachie ngaudajralla me ñage chege diali ngauda ole. Chui gbaite chui boi jute chuira kote ngauda kwenga, ngaudajralla kle junbatenga gire jwatenga dba, ngaudajralla e me ñage chege no diali, ngaudajralla tige sugetidale no, sugeti ngaudajralla kwenga me kle chege no ngeru kare. E kare ene kwian bai kaire lle molen tanre me kle tañachuge ama be boi mine giti chui gwealege, me kle mo ta gbe tañachuge Chube giti, gire ama jogeda chuiage ama llea ulita chege ama nate dbia giti, ama llea e ulita chege sugekare amage. 12 Kwian bai kaire nu Chube gerua Jesucristo giti gaba kle mo ta gbe jage ta no ole Chube kirallaske ama kle boi daga ngwale ulitage ama me kle ta jogenga Jesucristo geruage, kwian ene alin Chube age no. Kwian e kle mo ta gbe me skochie me skwatige, agwa ama kle jage ulita ama kle boi gitige ta no ole, kaire ama kle mo ta gbe me age me no gweale ama takalin kare, kwian e kle mo ta gbe ene ñanale Chube be kwian e gbe toi diali chui tangle Chube ole ule nga ngaña giti Chube nu geruba kare kwian bai kaire mo ta gbe Chube ole giti. Malen nga suga noare kwian edi Chube be age giti ama alin. 13 Kwian gweale Chubenu kle boi daga ngwale, boi daga ngwale eske ama me tañachugadale ai kare Chubedi: “Chube kle cha gbe boi daga ngwale, ama kle mo chuge cha ole age me no giti malen cha kle tañachuge age me no.” Kwian me tañachugadale ene Chubedi. Chube me suge moge mo gbe age me no ni sidri, Chube no trate ulita. Malen Chube me takalin kwian amanu age me no, gire che me ñage tañachuge ¿mineade Chube be mo chuge kwian amanu ole age me no giti? Chube me mo chuge kwian ole age me no. Agwa kwian agali kle mo ta gbe age me no mau tale, ama kle tañachuge age me no gire ama age me no ama kle tañachuge kare. Gire e me kle gerule Chube kle kwian ta gbe age me no, me dale, kwian agali talla me no kle tale e kle kwian ta gbe age, Chube me kwian ta gbe age me no malen Chube me takalin ni kwian gdaite amanu age me no ama dollale. 15 Kwian kle tañachuge mo tale age gweale me no, gire bdagli kwian kle age me no Chube dollale ama agali kle tañachuge kare. Age me no e giti ama kle mo gbe jiske agali Chube gwa giti, ama be chege boi daga ngwale sugekare Chubege ama mo ta gbu age me no gdale. 16 Cha gerule ba ulita cha bitalla Jesucristo giti ole, cha no ba ulita ole cha me takalin ba agali mo anblite ngwale tañachuge Chube kle ba ta gbe tañachuge age me no, Chube me age ene. 17 Ulia Chube me kle age ene dale, Chube no trate malen ulita kle boi no che ole, e che Ñenua Chube kle age che alin, lle ulita no bai chke chege, e chie Chubege, diali Chube kle age no che alin kle lle no kete chege. Chube nga ulita dodanga ama nga gbu chrale nga ngaña giti ama dai gbu ama beu gbu ama chui gbu chratigenga nga ulitage nga dba ai giti, Chube agedu ene no che alin ulita. Chube diali no ama me kle mo ta blite nganake, ama kle chege amaña diali, ama diali kle age no che kwian amanu alin. 18 Malen Chube mo gerua ulia Jesucristo giti gbu che alin, che geru e gai ulia gire Chube che gai mo oliale che gbe toi diali chui tangle ule ama ole. Chube takalin che chege amanu ngerutabi lle ulita ama dodaduge, Chube takalin talla no ene che alin malen ama geru ulia amanu jigu che ulita alin. 19 Cha bitalla ulita Jesucristo giti, cha noare ba ole, ba ulita ole cha gerule, ba gdaite gdaite kaire kaire mo ta gbadale me gerule blike daba ole ba kle tañachuge kare, ma no ba kledale biale diali daba keruchuge no ngeru, daba kle ba tke tangle Chube geruage ba ama keruchuge no Chube gerua jwen no amage. Kaire ba me mo ta gbe skochie blike daba na ole, 20 kwian mo ta gbe skochie diali, kwian ene me age no Chube takalin kare, Chube me no kwian talla ene ole. 21 Malen cha gerule ba ulita ole, ba mo ta gbadale age me no ulita chuge ngwadi sugekare bage, ba kle age gweale me no ba e ulita chugadale ngwadi gire mo ta gbadale kiraske ta no ole trate Chube gerua jo ketaba bage kle ba tale giti, ba mo ta gbadale gwangerugu geru e gai ulia, Chube gerua e kle ba tale, geru e ulia kiraske, geru e giti Chube ba jwen siere ji chugege age me no gdale, ama gerua ba ta gbe chage sugekare age me noge. 22 Ba me Chube gerua keruchuge alin allabi, me dale, kaire ba mo ta gbadale age ulita geru e gerule kare. Ba geru e keruchuge alin allabi ba kle tañachuge ba kle age ulita no trate Chube gwa giti, gire ene ba agali kle mo anblite, ba me kle age geru ulia gerule kare. 23 Kwian bai kaire kle geru keruchuge alin allabi me kle age geru e gerule kare, kwian ene salengwli kwian kle gwage mo gwadi chi oñage kare kle joge siere chi oñage gire kle ta jogenga ulita ama gwa mine, e kare ene kwian bai kaire kle Chube gerua keruchuge alin allabi me kle Chube gerua gbe gdadi, ama ta jogenga geru kle gerule mine ama alin. 25 Agwa kwian bai kaire kle Chube gerua keruchuge gire me kle ta jogenga geru e kle gerule giti, ama mo ta gbe age ulita diali geru e no trate kle gerule kare, kwian ene ulita be toi nga suga no ole ama kle mo ta gbe age no Chube gerua kle gerule kare giti, Chube be age no ulita kwian e alin. Chube gerua e kle kwian ta gbe nga suga no ole, geru e kiraske, geru e giti kwian tien gitiru ji chugege age me no gdale. 26 Kwian bai kaire kle suge moge kle age no trate Chube gwa giti Chube gerua kle gerule kare, agwa kwian me kle mo tallade ama kle gerule me no sugaska ama kle gerule me no daba nadi ama takalin kare, kwian kle age ai kare, kwian ene kle mo anblite naskuni agali. Ama me kle age no trate dale Chube gerua kle gerule kare, ama kle mo gbe age me no Chube gwa giti, me kle age no ulia. 27 Che agekalin no trate ulia Chube che Ñenua gwa giti, che agedale ai kare: Kirogwa oli chegeba che ama chudaboadale kaire muinga chegeba oli mo ñengulallage che muinga ene chudaboadale. Che kwian oli ulita chudaboale ta giti ama manadale no, kwian ai kare ulita kle boi daga ngwale che kwian ene ta gbale nga suga no ole ama chudaboi diali ta no ole. Kaire che agali chagedale ta giti nga dba ai giti, che mo manadale no trate me age me no ni sidri kwian me Chubenu kle age me no kare. Che ta agekalin diali Chube takalin kare, gire ene che agedale chada ai kle degaba gerule kare.
1 Cha bitalla Jesucristo giti, ba ulita kle che Chugagwalla kweri Jesucristo gai ulia mo Chugagwallale, ba me ñage mo ta dbe no kwian gweale alin ole gire kwian na ole ba me mo ta dbakalin no, ba me takalin ni sidri mo oinnga amage. Ba me ñage age ene, ba agedale no kwian ulita alin salengwli. 2 Ale gerule ba ulita kle mo lite Chube geruadi gire kwian gdaboke joge chke ba kle mo litaba ngwadi. Kwian gdaite mo ngama tkaba ñometra no noske kaire ama kle chage lle orole ñanaske gwadenga no dbe mo koge. Kwian na gdaite me kle chage mo ngama tkaba no kwian gdaite kare, ama kle chage ñometra judaske ama me lle molen dale. 3 Gire ba kwian mo ngama tkaba noare gai ngwange no, ba gerule ama ole ene: “Ba toi dba aini nga no tratege.” Agwa kwian na me lle molen kle chage mo ngama tkaba ñometra judaske, ama ole ba gerule ene: “Ba chege jagenga gdate aini ugakage o kaire ba ñage toi dba dbiske.” Ba gerule ene gire ba me kle ama gai ngwange no ba kle kwian lle molen gai ngwange kare. 4 Ba age ene ba me kle age Chube takalin kare. Ba kle mo ta dbe no daba lle molen kle chage mo ngama tkaba no ole agwa ba me kle mo ta dbe no daba me lle molen ole. Ba age ene, ba kle age me no Chube gwa giti mo gbe jiske age giti. Ba me mo ta dbe me no daba ole ba gwage amadi giti alin allabi gire. Chube me takalin ene, Chube takalin ba mo ta dbadale no ulita salengwli daba ulita ole me mo gbe ma kweri daba na me lle molenge. 5 Cha bitalla ulita Jesucristo giti, ba ulita cha keruchuge no cha be gerule giti ba ole. Kwian bai kaire me lle molen tanre nga dba ai giti kwian e Chube nu gaba ama alin ama gerua Jesucristo giti gai ulia, kwian e me kle chege dale me lle molen. Chube gwa giti kwian e lle molen ma ngle kwian lle molen tanrege nga dba ai giti. Kwian e me lle molen ñage chege lle molen nga ngaña giti Chube nu geruba kare kwian ulita unsuialin tangle ole kare, kwian bai kaire no Chube ole kaire kle age Chube takalin kare kwian ene alin Chube be age no nga ngaña giti, kwian e be toi Chube ole diali chui tangle. 6 Agwa ba ulita kle age nganake daba Chubenu me lle molen ole ba ulita me kle daba gai dage dale, ba kle kwian me lle molen gbe soli me ñanaske kwian na gwa giti, ba kle ama gbe ibule kwian ngeru. Agwa kwian igi molen tanre me Chubenu ba kle ama gai dage ba diali chegekalin no amage. ¿Mineade me suge bage kwian lle molen tanre me Chubenu kle mo gbe ma kweri bage, ama kle ba gbe boi daga ngwale jiske ba chugagwalla kweri nga dba ai giti gwa giti? ¿Ni suge bage ama kle age ba ole giti? Kwian lle molen tanre kle age diali ba ole ene, agwa ba kle mo ta dbe no diali ama ole ama gai dage, kwian bai kaire me lle molen me kle age me no ba ole ene, agwa ba me kle mo ta dbe no ama ole, ba kle mo ta dbe ama dollale. 7 Kaire sugedale bage kwian lle molen tanre kle mo tke dole che Chugagwalla Jesucristo ole ama kle Jesucristo kalla jwen kate gerugda me no kwian na ole. 8 Ba ulita Chubenu mo ta dbadale no daba ulita ole salengwli, ba age ene ba kle age Chube gerua degaba unsuialin gerule kare, chada e gerule: “Ba mo ta dbadale no daba na ulita ole salengwli ba no mo ole naskuni kare.” Chube gerua degaba unsuialin gerule ene. Ba age no ulita geru e kle gerule kare ba kle age no Chube takalin kare. 9 Agwa ba me mo ta dbe no salengwli daba ulita ole ene ba kle age me no, kaire ba kle mo gbe jiske Chube gwa giti ba me kle age Chube gerua gerule kare. 10 Ulia kwian gweale mo ta gbe age ulita Chube gerua degaba kle gerule kare, agwa ama age me no geru gbaitre alin dollale, kwian ene kle chege jiske, ama age me no geru gbaitre alin dollale agwa e giti ama kle chege jiske geru ulita giti salengwli ama age me no geru ulita dollale kare. 11 Chube agali geru gbu kwian ulita alin ai kare: “Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole.” Kaire Chube geru na gbu ai kare: “Ba me daba na gweda.” Chube geru gbu ene kwian ulita alin. Cha gerule ba ulita ole, ba ulita mo ta gbe me chage ke giti muinga onbre ole onbre muinga ole, agwa ba mo ta gbe daba gweda, ba kle age me no geru ai gbaboke dollale, ba age ene ba chege jiske Chube gwa giti. 12 Ba ulita gerudale ta giti kaire tañachugadale ta giti toi no Chube gerua degaba kle gerule kare. Ba ulita Chube gerua gaba ulia Chube gerua e giti ba tien gitiru ji chugege agedu me no gdale, agwa kaire sugedale bage ba age gweale me no daba na ole Chube gerua dollale gire Chube be ba gbe ji chuge ba agedu giti. Malen ba mo ta gbadale toi no daba ulita ole kaire gerule no trate diali ulia daba ulita ole. Ba age ene daba ulita ole Chube takalin kare gire Chube mi ji gbe ba giti dale. 13 Kwian bai kaire me kle tai dage dabage ama kle daba chuge ngwadi boi daga ngwale gballa, kwian ene giti Chube be ji gbe chui bdaglige, ji chuge chuia chke gire ni Chube be tai dage kwian ege salengwli kwian e me taidu dage daba nage kare, kwian e daba chugu ngwadi boi daga ngwale gballa e gdale Chube be ji gbe ama giti mno. Agwa kwian bai kaire tai dage dabage ama age no daba alin daba kle boi daga ngwale gire, kwian ene be chege nga suga no ole Chube gwa giti chui bdaglige. 14 Cha bitalla ulita Jesucristo giti, cha geru kade bage, ¿ba be llema no gai gerule alin ba kle mo ta gbe ulia Chube ole gire ba me kle age Chube gerule kare? Ba mo ta gbe ulia Chube ole alin agwa me mo ta gbe age no, ¿ba tañachuge ta e ba jwen siere ji chugege age me no gdale? Me dale. Ba kle gerule ba mo ta gbaba ulia Chube ole gire ba me daba chudaboakalin, ene ba kle gerule ngwale ba me age ba gerule kare. 15 Ba gwage daba gweale Jesucristo gabadi me lle molen me ñometra molen mo ngama tkagda ni bligda molen gutale, gire ba me ñometra no kete amage mo ngama tkagda ni ba bligda kete amage gutadale, 16 gire ba gerule alin ama ole: “Ba joge no, ba ñometra no tke modi kaire ba blire no ba toi no.” Ba gerule alin allabi ene ulita ama ole agwa ba me lle kete amage dale ba me takalin ama chudaboi ama gbe toi no, gire ¿lledale ba gerule ba kle mo ta gbe ulia Chube ole? Ba kle gerule ngwale. 17 Ba kle gerule ba mo ta gbe ulia ulia Chube ole agwa gire ba me kle age Chube takalin kare me daba chudaboakalin ene ba kle gerule ngwale alin, ulia ba mo ta gbaba ulia Chube ole, gire ba agedale ulita Chube gerua gerule kare. 18 Ba gweale ñage gerule ai kare daba ole: “Ba kle mo ta gbe ulia Chube alin ole agwa me kle age gweale daba alin. Cha kle mo ta gbe age no daba na alin allabi agwa me kle mo ta gbe ulia Chube ole.” Ba ñage gerule ene, agwa ba kle gerule ngwale. Cha gerule ba ole, cha takalin ba kwian gdaite kaite nate chage ama kle mo ta gbe ulia ulia Chube ole alin allabi agwa me kle age no daba na alin Chube takalin kare. Cha tañachuge ni kwian gdaite e kare kle. Agwa cha kle age no daba na alin giti Chube takalin kare, e giti bage suge trate cha kle mo ta gbe ulia ulia Chube ole. 19 Ba ulita kle gerule Chube gdaitre alin ulia allabi kle, e giti ba kle tañachuge trate, agwa tañachuge e kare giti alin allabi me kle gerule ba kle mo ta gbe ulia Chube gdaitre alin ole. Cha gerule ba ole, che dolla Satanás chudaboangalla ulitage suge trate Chube gdaitre alin ulia kle, ama ulita kle kennga tanre Chubedi ama kle jirenga Chube chrullale ama kle age me no giti, agwa ama me no Chube ole. 20 Cha gerule ba ulita ole, nga ngwale ba chuga giti ba kle tañachuge nga jereske. ¿Ulia ngamangire nga be suge ba chuga giti? Che mo ta gbe ulia Chube ole alin gire che me age no daba alin daba chudaboi gire ene ulia chege salengwli che me kle Chube gai ulia kare mo Chugagwallale. Che me ñage tañachuge che mo ta gbe ulia Chube ole alin allabi gire ene che ta kle no Chube gwa giti. Sugedale chege che kle mo ta gbe ulia Chube ole kaire agwe che agedale no daba na alin Chube takalin kare. 21 Ba tañachugadale che enusulian oña unsuialin tangle Abraham giti, ¿ama agedu mine gire ama chegu no Chube gwa giti? Abraham mo ta gbu age ulita Chube gerudu ama ole kare gire e giti Abraham chegu no trate me jiske Chube gwa giti. Abraham mo gbu biale ama kirolla Isaac gweda Chube gwa giti bda kare Chube gerudu Abraham agedale kare. 22 E giti suge chege Abraham mo ta gbu ulia Chube ole Chube gai ulia kaire agwe Abraham agedu ulita Chube tadukalin kare. Malen Abraham agedu giti Chube Abraham kira gbu Chube gagda ulia ma kiraske gwangerugu. 23 Chube gerua degaba unsuialin gerule Abraham mo ta gbu Chube gai ulia giti, chada e gerule: “Abraham mo ta gbu ulia Chube ole Chube gai ulia malen Chube gwagedu Abrahamdi no trate me jiske Chube gwa giti.” Chube gerua degaba unsuialin gerule ene Abraham giti. Abraham mo ta gbu ulia Chube ole malen Chube Abraham gau mo skatemanallale no. 24 Abraham giti sugedale trate bage Chube kle kwian gbe no trate mo gwa giti kwian kle ama gai ulia giti kaire kwian kle age no Chube takalin kare giti. 25 Kaire agwe ba ñage tañachuge muinga chagenga kwian onbre tanre ole unsuialin tangle kada Rahab giti. Chube gwagedu Rahabdi me jiske kare no trate Chube gwa giti Rahab agedu giti. Rahab kwian israelita gweale jo nga chra ite nate gau ngwange no mo ullage, Rahab kwian e chudabo no ama kwian e ta gbu joge skwlenre jon na kareni ama dolla ngeru. E giti sugedu no Chubege Rahab agedu ene giti. 26 Ulia cha gerule ba ole, kwian jogekeda gire ama kwara alin chege ama ta me ama lle ngwale kare. E kare ene kwian bai gerule ama kle mo ta gbe ulia Chube ole gire me kle age Chube takalin kare, kwian ene chege salengwli kwian jogebakeda ta me chege jwate kare. Ngwale ama kle gerule ama mo ta gbe ulia Chube ole gire me age no daba alin Chube takalin kare, kwian ene me chege trate Chube gwa giti dale.
1 Cha bitalla ulita Jesucristo giti, cha gerukalin ba ole ulita ta no giti ba ta gbe, che me mo gbadale daba na tkanga tangle Chube gerua giti che takalin kare gire me age Chube gerua kle gerule kare. Che me daba na ulladalenga lle gweale ama kle age giti gire che me kle age kaire agwe no trate Chube takalin kare che kle daba na tke tangle kare. E me no. Uñale chege che bai kaire daba tke tangle Chube gerua giti gire me toi no trate age ulita Chube gerua kle gerule kare, che ene giti be joge ji gbaba ma tirare kwian nage chui bdaglige. 2 Sugedale chege che ulita diali kle age gweale me no kle gerule gweale me no, ulia diali che kle boi ene. Agwa cha gerule ulia ba ole, kwian bai me kle gerule me no ni sidri, kwian ene kare ulia no trate Chube gwa giti, kwian ene kare kira molen mo ta gbe age no no ulita me mo chuge ngwadi age me no ni sidri. 3 Cha geru gbamai ñachugeda ai kare bage ba ta gbe geru che gerule giti: Che chage ja giti che takalin ja age ulita che takalin kare gire che kle giska gbe ja kate ene che ñage ja dbe baini kaire che takalin ja joge ngwadi. Ulia giska soli agwa che ñage ja jegwale gateda ulita giska e giti. 4 Che ñage tañachuge kaire agwe du kweri kwian kle chage bleske giti, du e kweri kweri kaire mleuda kle tiennga tanre kira giti kle du e dbe nganake ngnagu gire kwian du dbanga kle du e bliteni gwanaskudani, ama kle du gbe chage lle soli sidri mebi kada timón giti baini kaire ama takalin du joge kare. 5 E kare ene kaire agwe che kle boi che kwira ole. Ulia che kwira sidri mebi agwa che kwira giti che kle mo gbe gerule gweale me no diali, che gerua giti che kle mo gbe jiske tanre Chube gwa giti. Che kwira salengwli jita kare. Jita tan soli sidri mebi giti che ñage nga bataba kweri guge ulita kaire ñage gli kweri guge ulita ni che ñage jita gweda. 6 E kare ene che kwira giti che kle gerule tanre me no daba nadi ene che kle chege jiske tanre Chube gwa giti che gerua e kbiale. Che dolla Satanás kle che ta gbe gerule me no diali, che kle gerule me no giti che agali kle boi daga ngwale che kle chage toi gwade gire, kaire che kle gerule me no giti che kle daba gbe boi daga ngwale, daba chege skochie diali che gerudu giti. Lle ulita kle joge me no che kwira kbiale. 7 Ulia kwian ñage lle bdale tanre kle toi ngaske gbe anleda, bda ko giti, bda ji giti, bda chage dba kde kwara giti, lle ngwere toinga chiske, lle bdale e kare ulita kwian ñage gbe anleda. 8 Agwa ni kwian gdaite ñage mo kwira gbe ngwedi diali me gerule ni geru gbaite me no daba nadi. Chui gwealege kwian ulita kle mo chuge ngwadi gerule me no dabadi, kwian gerule giti kwian kle daba gbe boi tanre daga ngwale tirare salengwli jorisi age kwian ole kare. Jorisige kwian lentige kare, ene kwian daba gbe boi dagale gerule me no dabadi giti. 9 Che kwira giti che kle gerule no che Ñenua Chube che Chugagwalla giti kaire che kle mo gate ama giti. Agwa kaire che kwira e amaña giti che kle gerule me no dabadi, ni che kle tañachuge Chube kwian ulita dodadu mau kare, gire che kle gerule me no kwian edige. 10 Che kle gerule no Chube giti kaire agwe che kle gerule me no daba nadi ama oña tke daga ngwale me no. Ba cha bitalla Jesucristo giti, cha gerule ba ole, che kwian Chubenu me gerudale ene ai kare dabadi, e me no me no Chube gwa giti. 11 Che tañachugadale ai giti, ¿chi no trate kle chie ule chi sugaska me no ole chi gwagwa gbaitre alinge? Me dale, chi gwagwa gbaitre alinge chi no trate me ñage chie ule chi sugaska ole. Kaire gli kada higuera amaña gba kadakle higo, ¿ba tañachuge gli amaña ñage gbachie gligba kada aceitunale? ¿Kaire ba tañachuge uva giskalla ñage gbachie higole? Me dale, gli gdaite kaire kaire kle gbachie. E kare ene che Chube gerua gaba ulia che gerudale no diali Chube giti kaire daba giti, che mo kwira manadale no ene che me gerule me no dabadi. 13 Cha gerule ba cha bitalla ulita Jesucristo giti ole, ba gweale suge moge ba ta ole tanre gire ba mo ta gbadale toi no trate ulita kwian na gwa giti, ba mo gbadale ta no ole suge moge me ma kweri daba nage, bage sugedale ba gballa me ñage mo ta gbe chke uñale age no ulita Chube takalin kare, Chube alin allabi ñage ba ta gbe ngle. 14 Agwa ba mo chuge ngwadi mo ta dbe me no daba nadi lle dabanu giti, ba takalin chege lle dabanu ole mau alin, kaire ba kle mo chuge daba ole ta me no ole kwian gwa gbagda modi alin allabi, ba kle age ene gire ba me ta ole. Ba ene ba me sugedale moge nga suga no ole mo sobade daba nadi gerule ba kwian ta ole, ba gerule ene ba kle sole ngwale ba me kle geru ulia gbe chke uñale. 15 Ba mo ta dbe age ulita ene gire sugedale bage Chube me kle ba ta gbe ene dale ba kle tañachuge kare, ta e ulita ngwale sugetidale alin ba kle nga dba ai giti gire, ba kle tañachuge kwian me Chubenu kle tañachuge diali kare, che dolla Satanás kle ta e kete bage. 16 Kwian Chubenu bai kle mo ta gbe chage kwian me Chube uñe kare Satanás kle ama ta gbe kare, kwian ene kle mo ta dbe me no daba nadi lle dabanu giti, ama takalin lle dabanuge mau alin, kaire ama kle mo chuge daba na ole ta me no ole kwian gwa gbagda modi alin allabi. Kwian Chubenu mo ta dbe ene daba Chubenu na ulitaske gire ama kbiale lle ulita be joge me no kwian Chubenu ulitaske, kwian Chubenu ulita be kle mo tke dole modi ongoru ongoru mi takalin toi no ule modi daba na ole, be age tanre me no daga ngwale. 17 Agwa kwian Chubenu bai kle Chube chuge ngwadi ta kete amage toi trate ta ole Chube takalin kare, kwian ene kle mo ta gbe toi no trate daba na ulita gwa giti Chube takalin kare, me age me no ni tañachuge me no mo tale, kwian ene kle age ai kare: Ama mo ta gbe chege ta no ole daba na ulita ole, me kira bate daba ole. Ama mo ta gbe age no daba na alin diali daba gai dage daba chudaboi no. Ama mo ta gbe suge tai dage daba nage age no diali daba na alin. Ama kle mo ta gbe daba ulita gai dage no salengwli, age no daba ulita alin salengwli. Ama mo ta gbe gerule ulia ta no ole daba ole diali, me gerule sugekare dabadige. 18 Kwian Chubenu bai kaire takalin daba Chubenu ulita toi no modi, kwian ene mo ta gbadale toi no ulita cha kle gerule kare chada ai giti, gire ene daba na be gwage kwian edi kwian e kle toi mine gire daba ulita be mo ta gbe toi no modi ongoru ongoru ta no ole kwian e kle toi kare, gire ene kwian Chubenu ulita be chege toi no modi ule kwaitre alin.
1 Ba Chubenu ulita tachkedale ba kle toi giti, ba ulita tañachugadale ¿mineade ba ulitaske kle toi kira bate modi diali toi ta skochie daba ole? Ba ulita tale talla me no tanre kle, talla e kle ba ta gbe age diali ba takalin kare, talla me no e me ba chuge ngwadi age no daba ulita ole Chube takalin kare. 2 Ba takalin llege agwa me ñage ko toi lle ba takalinge kare, gire ba kle mo ta gbe age me no daba dollale lle e gai mau alin, ba mo ta gbe daba gweda ene ba tañachuge ba ñage lle molen. Ba ulita mo ta gbe age ene me no daba na ole, agwa ba me ñage ko toi llege mo alin. Ba kle mo ta dbe semale daba ole lle gweale dabanu giti, ba kle tañachuge me no dabadi lle gweale gdale, gire ba me ñage lle e gai ba kle tañachuge kare malen ba kle mo kirachuge daba ole kaire mo bate daba ole lle e giti, agwa ba me ñage ko toi lle ba takalinge. Cha gerule ulia ulia ba ole, ¿mineade ba me kle lle kade Chubege ta giti ta no ole? Ba ulita me kle lle kade Chubege mau alin Chube takalin kare malen ba me lle e molen ba takalin kare. 3 Chui gwealege ba kle lle kade Chubege agwa ba me kle lle kade jumale ta ole, ba kle lle kade Chubege ta me no ole malen ba me kle ko toi llege ba takalin kare. Ba takalin lle ege mau alin allabi mo ta gbagda nga suga no ole kaire kwian gwa gbagda modi, Chubege uñale trate ba ta mine malen e giti Chube me kle lle kete bage ba kle kade kare. 4 Cha gerule ba ole, ba ulita kwian Chube gerua ganga ulia agwa ba kle age me no Chube dollale ba kle chage age nganake Chube tallage, ba ta skatekalin kwian me Chube uñe ole, ba ta chegekalin age diali kwian me Chube uñe kle age kare, ba kle age ene ba kle mo tke dole Chube ole. 5 Ba tañachugadale Chube gerua degaba unsuialin giti, geru e me kle degaba ngwale, geru e che ta gbe ulia, chada e gerule: “Chube mo Oña gbu toi che tale, Chube Oña e no che ole, ama me takalin che age ama dollale, ama takalin che mo ta gbe no ulia ama ole.” 6 Chube gerua degaba gerule ene. Chube no che ole ama takalin che age ulita ama takalin kare, malen Chube kle che chudaboi ama talla no giti kle che kira gbe toi no ama takalin kare. Chube gerua degaba unsuialin kaire gerule ene: “Chube kle mo tke dole kwian ole kwian bai kaire kle mo sobade daba nadi ole, agwa Chube kle tai dage kwiange ama kle kira kete kwiange kwian bai kaire me kle mo sobade daba nadi me kle mo gbe kweri daba na gwa giti, kwian e kle mo gbe daba chudaboanga. Kwian e kare alin Chube kle age no.” 7 Chube gerua degaba gerule ene, malen cha gerule ba ole, ba Chube chuge ngwadi age ba tale ba ta gbe age ulita Chube takalin kare. Ba me che dolla Satanás chuge ngwadi ba ta gbe age me no, ba mo tke dole Satanás ole Chube kirallaske gire Satanás me ñage age ba ole, ba chege Chube kirallaske Satanás be kige badi, Chube ma kweri Satanáge. 8 Ba mo ta gbadale diali Chube ole gerule diali Chube ole, ama be ba kira gbe toi no trate ama takalin kare. Ba bai kle age me no ba mo ta gbadale toi no ulita trate Chube takalin kare, ba kle age me no ba e chugale ngwadi salengwli ba kle mo ko sugaska glige jige trate kare. Ba bai takalin chege Chube ole agwa kaire chegekalin toi kwian me Chubenu agenga me no kare, ba ole cha gerule, ba mo ta blitadale Chube ole. Ba bai kaire kle mo ta gbe chege no Chube ole ba mo ta gbadale chege ma no trate ulita Chube ole toi Chube takalin kare. 9 Ba mo ta gbadale ta olire ole ba kle age me no giti. Ba me ñage chege mo ta gbe gide nga suga ole ba kle age Chube dollale giti, ba mo ta dbadale olire ibule Chube ngeru ba kle age giti, ba me chagedale dare me no ngwale ba ulita takalin kare. 10 Ba mo ta gbadale Chube gai mo Chugagwalla kweri ene Chube be tai dage bage be ba chudaboi ba ta gbe nga suga no ole. 11 Cha bitalla ulita Jesucristo giti, cha gerule ba ole, ba me gerudale modi me no ongoru ongoru. Kwian bai kaire kle gerule me no dabadi kaire kle daba gbe jiske gweale daba nage, ama kle age ene kle age me no Chube gerua dollale. Chube gerua kle gerule che nodale daba ole ulita, agwa che geru e gai geru ngwale kare gire ene che kle age me no geru e dollale. Ma no mo ta gbe Chube gerua gai dage ulia age diali ulita geru e kle gerule kare. 12 Chube alin allabi geru jigu gbaba kwian ulita alin kwian toidale mine, kaire ene agwe Chube alin allabi ñage gerule kwian ulita giti kwian bai jiske kwian bai me jiske. Chube alin ñage kwian jwen siere ji chugege age me no gdale, kaire ama alin ñage kwian gbe ji chuge tirare kwian age me no giti. Agwa cha geru kade ba ulitage, ¿chema ba gbu daba gbanga jiske? Ba me mo ta gbale daba gbe jiske dare gerule me no dabadi ngwale. 13 Cha takalin ba ulita cha gerua ai gbe gdadi no no. Ba gweale kle gerule diali ai kare: “Nege o suialin che be joge nga gwealege, ne ngwadi che be chegeda chura gdaite lle boi igi tanre gai mau alin.” Ba gweale kle mo ta gbe gerule ene. 14 Cha gerule ba ole, ¿chemage uñale chui suialinge be joge tangle mine? Chege me uñale chui be chiege be boi mine che ole. Cha gerule ba ole, che salengwli bogakwa kare. Bogakwa ñage chke dba sugeti gire blikare bogakwa ñage jogenga, e kare ene che ulita talla. 15 Malen che me tañachugadale mau tale agali chui gbe che be lle gweale boi che takalin chui be chiege suialinge. Ulia ma no che gerudale ene: “Che Chugagwalla Chube takalin che age ene, gire che be age ama che ta gbe age kare.” 16 Ulia cha gerule ba ole, che ulita tañachugadale Chube giti Chube be che ta gbe age Chube takalin kare, agwa ulia ba me kle mo ta gbe tañachuge age ene. Diali ba kle suge moge kweri ba ñage age gballa ulita, ba kle gerule nga suga no ole mau tale agali gballa ba takalin kare, suge moge ma kweri mau tale, ai ulita me no Chube gwa giti. 17 Cha gerule ba ole, kwian Chubenu bai kaire uñale amage age no trate agwa me kle mo ta gbe age suge amage kare, kwian ene kle mo ta gbe agali age me no me no, ama ta suge agwa me age. Chube me no me no ta ene ole.
1 Cha gerule ba ulita ole kwian lle tanre molen giti, kwian e ulita cha gerua ai keruchugadale no, kwian e mo ta dbale olire sui jwennga ama ulita be boi daga ngwale tirare bdagli giti. 2 Kwian lle molen tanre agwa lle e ulita ngwale, kwian e llea ulita me ñage ama chudaboi ama llea ulita kle boi, lle ulita nga dba ai giti be jogenga ngwale blikare ama ngeru, ama ñometralla no ñanaske ulita loko be kage me no ama ngeru loko be mo ulla gbe kwian e ñometrallaske. Lle ulitage kwian e be chege kole me lle molen dale. 3 Ama igia ulita mi chege ñanaske dale Chube gwa giti, ulita be joge tangle mi chege ama ole diali dale alin. Ama llea ulita be chege ngwale Chube gwa giti, e giti be suge kwian e kledu toi gire ama lle tanre ngwale litu ole ogadale no agwa ama me mo ta gbu ulia jumale Chube ole. Ulia nga dba ai giti bebi joge tangle ulita Jesucristo chieni chuia bebi chke gire chui ege kwian e be ji chuge tirare ulia jitaske ama agedu me no kbiale. 4 Ulia cha gerule ba ole, kwian e me agedu no lle boanga ama alin ole, lle boanga chude skutu kwian e alin deage gire kwian me igi ketu lle boangage ama lle bo ñanale. Geru e kle kwian lle tanre molen giti, Chube che Chugagwalla kweri kiraske ulita kwian lle boanga kwian lle molen alin e keruchugu gerule mo giti kwian me igi ketu amage giti. Chube be kwian lle boanga e keruchuge gerule mo giti gire Chube be lle boanga chugagwalla e gbe ji chuge. 5 Ulia nga dba ai giti kwian kle mo gbe chege lle molen tanre, kwian takalin lle ulitage ene ama chege nga suga no ole, malen ama kle mo ta gbe lle ulita gige mau alin ama takalin kare. Ama lle tanre ulita ama tadukalinge ama litu ole mau alin, lle ngle kle ama ole ni ama kle tañachuge daba na giti ni Chube giti, ama kle toi diali ta kibale tanre ole, agwa chui bdaglige ulia kwian ene be ji chuge boi daga ngwale tirare ama agedu giti gdale. Kwian kle toi ulita ai kare e ulita chege salengwli chbi kle joge blodi kare bigire chbi blodi e gwakleda. E kare ene ulita kwian ene be boi. 6 Kaire cha gerule ba ole, kwian e daba me jiske gbu ji chuge boi daga ngwale, daba e me kledu kira bate kwian e dollale agwa kwian mo ta gbu me no dabadige kwian e daba guda. Kwian agedu ene giti Chube be kwian e gbe ji chuge tirare. 7 Cha bitalla ulita Jesucristo giti, cha gerule ba ole, ba gbakle boi tanre daga ngwale gire ba mo ta gbadale jage ta no ole ba kle boi daga ngwalege me skwatige me skochie, ba manadale ta ngwedi ole eruda taleda che Chugagwalla Jesucristo be chieni chuia manade ngwange. Ba Jesucristo manadale ngwange salengwli kwian kle chude skie kle chude skute chuiage manade ngwange kare. Kwian kle nga bate chude ngama alin kle chude skie, gire ama kle noi chuia manade ngwange ta no ole tañachuge ama be chude no jwen gudegu tanre chude skute suialege. 8 E kare ene ba mo ta gbadale diali gwangerugu kiraske che Chugagwalla Jesucristo chieni chuia manade ngwange ta no ole. Ulia Jesucristo be chieni chuia kle kodi ama be chieni blikareni malen ba mo ta gbadale diali kiraske gwangerugu Jesucristo geruadi. 9 Kaire cha gerule ba ulita ole, ba me ñage mo jwannge giti dabage ongoru ongoru daba na kle age giti ba ole, ene ba giti mi jogeba ji gbaba. Ulia me sbali Chube be gerule kwian ulita giti kwian bai jiske kwian bai me jiske, ama bebi ji gbe kwian giti kwian agedu me no gdale. 10 Daba Chubenu, ba mo ta gbadale tañachuge kwian Chube gerua ketanga unsuialin giti, ama boidu tanre daga ngwale Chube gerua kete kwiange gdale gire ama jagedu ta no ole me skwatigu boi daga ngwale agwa ama diali mo ta gbu nga suga no ole. 11 Ulia uñale chege kwian bai kaire ñadu mo ta gbe jage ta no ole boi daga ngwale ulitaske kwian enedi nga sugadu noare ama mo ta gbu giti ulia age ulita Chube takalin kare. Ama boidu tanre daga ngwale jere jere agwa ama me mo talladu ama chegu ta no ole diali. Bage geru jo tragaba kwian unsuialin tangle kada Job giti, ba geru keruchugaba Job boidu giti ama mo ta gbu jage ta no ole ama boidu tanre daga ngwaleske, kaire uñale bage bdagli Chube agedu no tanre Job alin, ulia Chube diali no, ama kle tai dage chege ama no che ole, ama me takalin che boi me no daga ngwale tanre. 12 Kaire cha gerule ba cha bitalla Jesucristo giti ole, ba cha keruchuge no. Ba gerule daba ole Chube gwa giti ba be age gweale ulia, ba me gerudale lle gweale kalla giti ba ta geru gbakalin egdage gire. Ba me gerudale ni nga ngaña kalla giti ni nga dba ai kalla giti, ni lle na ulita kalla giti. Ulia ba ta geru gbakalin egdage daba na ole ba be age gweale daba alin, ba gerudale daba ole ene: “Ima, cha be age cha kle gerule kare.” Ba gerule ene gire ulia ba agedale ba gerudu kare. Kaire ba ta geru gbakalin egdage daba ole ba me age gweale, ba gerudale ene: “Me dale, ulia cha mi age.” Ba gerule ene gire ulia ba me age nganake. Ba me age ulia ba gerule kare, Chube be ba gbe ji chuge e gdale. 13 Ba ulitaske daba gweale kle boi daga ngwale ta olire tanre, daba e gerudale Chube ole ta no ole ama kle boi giti. Kaire daba gwealedi nga suga noare gire ene ama mo gatadale no Chube giti gerule no ulita Chube giti. 14 Daba gweale oga gire ene ama kwian Chubenu chugagwalla ulita kadadale chie ama kle ngwadige gerule ama oga giti Chube ole, gire kwian Chubenu chugagwalla be kin gbe daba oga chuga giti gire gerule Chube ole che Chugagwalla Jesucristo kalla giti ene daba joge chkeni noni. 15 Kwian Chubenu chugagwalla e mo ta gbe ulia Chube ole Chube ñage daba oga dodade, kwian Chubenu chugagwalla e mo ta gbe gerule no Chube ole ta giti, gire ama mo ta gbu Chube ole giti daba oga be joge chkeni noni. Chube ñage daba oga gbeni noni trate, kaire daba nu ageba me no Chube be ama agedu me no talla mlienga Chube mi tañachuge dare daba oga agedu me no giti, Chube daba oga ene dodade. 16 Che gdaite gdaite kaire kaire gerudale daba ole ongoru ongoru che agedu me no giti ene daba che agedu me no talla mlienga. Kaire che gerudale Chube ole daba giti ongoru ongoru chudaboi kade Chubege ene daba oga be joge chkeni noni kaire daba ta be chege no trate Chube gwa giti salengwli kwian oga kle joge chkeni jingme gwealegeni kare. Kwian bai mo ta gbe ulia age no trate Chube takalin kare, kwian ene gerule Chube ole chudaboi kade Chubege Chube kwian ene keruchuge Chube age kwian e kle mo ta gbe gerule kare Chube ole ene Chube ama chudaboi no no kwian kle mo ta gbe trate ulia Chube ole giti. 17 Unsuialin tangle kwian Chube gerua ketanga kada Elías, ama kwian che ulita kare, agwa ama mo ta gbu Chube gai ulia ama mo ta gbu gerule no no tanre Chube ole Chube noi gateda Elías kle toi ngwadige. Elías gerudu ene Chube ole gire noi me boidu ama kledu ngwadi ama kadu Chubege kare, chura gdamai giti dai gdadereke chku ni noi boidu sidri e suiale. 18 Bigire Elías gerudu nakwaiteni Chube ole noi giti, gire noi boiduni nakwaite ngeru kareni nga ege, nakwaite chude tigeduni no naskuni. 19 Cha bitalla ulita Jesucristo giti, cha gerule ba ole, daba Chubenu gweale baske joge siere Chube gerua uliage mo ta gbe toini me no naskuni kwian me Chubenu kare, gire kwian Chubenu na mo ta gbaba chage trate Chube ole daba e chudaboadale. Kwian mo ta gbaba trate daba kle age me no ta gbadaleni Chube geruadi geru gai naskuni me age dare me no. Daba agenga me no mo ta blite joge siere age me noge ama mo ta bliteni naskuni Chube ole, gire ene chkedale uñale ba ulitage kwian Chubenu mo ta gbaba trate daba na Chubenu kle age me no ta gbeni chage no naskuni Chube ole, kwian ene mo ta gbaba ulia Chube ole kle daba na jwen siere ji chuge tirarege, Chube daba agedu me no talla mlienga ulita, Chube ni be tañachuge daba e agedu me no giti Chube ta dbe no daba ene ole. Geru ai ene ulita cha Santiago chada degu ba ulita kwian israelita nga ulitage alin. Che kle meni.
1 Cha Pedro chada ai degange ba kwian ulita Chubenu alin nu jogeba kige bate kle toi nga nage me mo jwiage: Cha Jesucristo gerua ketanga cha gbi kage chada ai giti ba ulita alin bai kle toi nga Pontoge nga Galaciage nga Capadociage nga Asiage nga Bitiniage, ba ulita alin cha gbi kage. 2 Ba Chubenu ulita kle toi nga e kaire kairege cha gerule ba ole, Chube che Ñenua ba ulita gau gwangea unsuialin mo alin agedale ama takalin kare. Chube mo Oña giti ba ulita ta blitu ta gbu no ama ole ene suge ba ulitage Jesucristo jokeda giti ba chege no trate Chube gwage, ene kaire suge ba ulitage ba Chube gadale dage agedale Chube takalin kare. Cha takalin Chube age no no ba ulita alin diali Chube ba ta gbe nga suga no ole. 3 Che ulita gerudale no no Chube giti, Chube che Chugagwalla Jesucristo Ñenua, ngeru che chagedu age me no diali che kledu chage ta me no ole, che ene gire Chube taidu dage tanre chege, Chube Jesucristo kagu nga dba ai giti che alin, Jesucristo jokeda che agedu me no giti gire ama jaba chkuni gwade, e giti Chube che ta blitu ene che ta me nge kare, Chube che ta gbu no trate age no ama takalin kare. Nege Jesucristo giti che kle chui manade gire che be joge toi ule Jesucristo ole nga ngaña giti Chube kle ngwadi. 4 Chube me jogeda Chube me boi, ama kle nga ngaña giti kle chui manade gire ba ulita amanu be kle nga ngaña giti ama kle ngwadi, chui e be chke gire ba be toi diali chui tangle no Jesucristo ole. Chube kle ngwadi ni lle gdaite me no sugaska kle, ni age me no gdaite kle, ulita no trate nga ngaña giti Chube kle ngwadi, ba joge toi nga ege ba be toi no diali Jesucristo ole chui tangle. 5 Ba ulita kle mo ta gbe Chube gai ulia mo tale diali, ba ta ene molen Chube ole ene Chube ba ulita manade no no mo kiralla giti Jesucristo chieni chuia alin, ene chui bdaglige Jesucristo be chieni ba jwen ba dbe toi ule ama ole nga ngaña giti, chui ege ba be tien gitiru lle ulita me no nga dba ai gitige. 6 Uñale trate ba ulitage be boi ene chui bdaglige malen nga suga no no ba ulitadi chui e manade, nege nga dba ai giti ba kle boi tanre daga ngwale, agwa uñale bage boi daga ngwale nga dba ai giti joge tangle me chege diali. Ba kle chui manade joge toi Jesucristo ole nga ngaña giti, e me joge tangle, e be chege diali. 7 Mo ta gbe Chube ole ulia salengwli oro kare, kwian oro guge jitage ene oro skwen ulia o me, oro ulia mi kuge ulita agwa me oro ulia be kuge ulita, oro ulia jage jitage. Ene kaire ba kwian Chubenu ulia jage boi daga ngwale ulitage ba mo ta gbe Chube gai ulia diali me mo ta gbe joge siere Chubege boi daga ngwale kote. Ba talla ene ma ñanaske ma no oroge, ba talla chege diali chui tangle, agwa oro me ene, oro ñage boi me chege chui tangle diali. Ba ulita mo ta gbe ma no diali ulia jage boi daga ngwale ulitage ba talla ñanaske tanre Jesucristo gwage, ene Jesucristo chieni chuiage ba kle biale joge toi ama ole, chui ege Jesucristo be gerule no no ba giti, ama be gerule ba ole: “Ba kwian no no, ba agedu no, ba mo ta gbu cha gai ulia cha Ñenua gai ulia diali, nga suga no no chadi ba giti.” Jesucristo be gerule ene ba ole chui bdaglige. 8 Ba me gwagedu Jesucristodi mo gwagwa giti ni ñage gwage amadi nege, agwa ba ulita ta kle ama ole ba kle mo ta dbe no ama ole, geru ama giti chku uñale bage, e giti ba kle mo ta gbe ama gai ulia. Nga suga no no badi Jesucristo giti, nga suga no kweri badi ni uñale bage ba gerule mine nga suga no tanre ole. 9 Uñale ba ulitage Chube be ba gai ngwange no nga ngaña giti ba mo ta gbu Jesucristo gai ulia giti nga dba ai giti. 10 Unsuialin Chube Oña kwian Chube gerua ketanga ta gbu gerule kwian ole Chube be age no kwian alin Chube be kwian jwannga siere Cristo kage kwian alin, kaire Chube Oña kwian Chube gerua ketanga ta gbu Cristo be boi giti, Chube kwian e ta gbu ai kare: Ngeru Cristo be boi tanre daga ngwale nga dba ai giti kwian me no kote gire Chube be ama dbeni naskuni nga ngaña giti, bdagli Chube be ama gbe no kweri kwian ulita gwa giti. Chube Oña kwian Chube gerua ketanga ta gbu geru ene Cristo giti kete kwiange, kwian Chube gerua ketanga geru e ketu kwiange, agwa geru e me sugedu trate ulita ama agalige. Malen ama geru kadu tanre mo tale e giti, ama geru kadu chema tra no giti Chube Oña kledu ama ta gbe gerule, kaire geru kadu ngaminegire Chube Oña kledu gerule giti be meñe. 12 Kwian Chube gerua ketanga kledu gerule Chube be age giti kwian alin, Chube kwian Chube gerua ketanga ene ta gbu suge trate Chube kle ama ta gbe gerule ulita Chube be age e me ama alin chui ege dale, agwa Chube ama ta gbu chui ege, chui nege tangle dale ba ulita alin. Chube Oña kwian ta gbu unsuialin, Chube Oña e amaña mo kira giti kle kwian nege gbe geru Cristo giti trage kwian ole, Chube Oña e chiu nga ngaña giti chku nga dba ai giti kwian ta gbe geru Cristo giti tragangale, ba geru e keruchugu Cristo giti, suge trate ba ulitage Chube agedu no ba alin Cristo giti. Lle boanga Chube alin nga ngaña giti ulita tañachuge tanre Chube agedu no giti kwian alin, takalin chke uñale agwa me suge amage. 13 Chube agedu no tanre ba ulita alin Jesucristo giti malen ba mo ta gbadale biale tañachuge no ulita Chube takalin kare, ba me mo chugadale ngwadi tañachuge age me no, ba mo ta gbadale tañachuge diali Jesucristo chieni ba jwenni giti, ba kledale chui e manade diali nga suga no ole, chui ege Jesucristo be ba dbe nga ngaña giti Chube kle ngwadi, nga ngaña giti Chube be age no no ulita ba alin. 14 Kirogwa no mo ñenua gai dage mo ñenua kerua gbe gdadi kare, ene kaire ba Chubege, ba Chube gadale dage mo ta gbe age ama takalin kare diali. Toi aige gwangerugudba ba me tañachugadale age me no dare ba agedu ngeru kare, ngeru ba bebi Chube uñe gire ba kledu age me no ulita ba tadukalin kare. Agwa nege ba Chube uñe, 15 ba me chagedale dare ba chagedu ngeru kare, ba mo ta gbadale toi no trate Chube gwa giti, Chube no trate ba gau mo alin ene ba kaire mo ta gbadale chage no trate Chube ole. 16 Chube gerua degaba unsuialin gerule e giti, chada e gerule: “Chube gerudu: ‘Ba ulita chanu mo ta gbadale toi trate ta trate ole cha kare, cha no trate cha me agenga me no sidri, ene kaire cha takalin ba ulita chanu toi.’ ” 17 Ba ulita Chube kade mo Ñenua, Chube e amaña gerunga kwian gdaite gdaite giti bai jiske bai me jiske. Chube me kwian gweale gbe ma no kwian nage, Chube gwage kwian ulita kle agedi kle age no o kle age me no, kwian ulita bai kle age me no Chube kwian e gbe jiske. Bage suge Chube ene, malen ma no ba ulita mo ta gbadale Chube gai dage age no ama takalin kare chui tangle nga dba ai giti. 18 Ba enusulian ulita unsuialin chagedu geru ngwale nate, ama me Chube uñu me uñadu amage Chube uñe mine, ama chegu jiske Chube gwage ama agedu me no giti. Chube ba ulita jun siere ba enusulian chagedu karege, nege ba Chube uñe Jesucristo giti, nege ba Chubenu. Ba ulitage uñale trate Chube me ba jun siere ji chugege age me no gdale oro giti ni igi giti, oro kaire igi me jage diali, Chube gwage oro kaire igi ngwale. Agwa Chube gwage Cristo no trate ulita ñanaske tanre, Cristo jage diali, Cristo alin giti Chube ba jun siere ji chugege ba age me no gdale. Cristo jokeda bitaitre alin ba age me no ulita giti bda cordero no no gwakle diali kare kwian israelita suiale kwian kle age me no kaire kaire giti. 20 Ngeru Chube bebi nga ulita dodade Chube Cristo gbu biale agedale kwian alin, e kledu biale ene unsuialin chui nege dale alin. Cristo chku ama agedu no ba ulita alin, 21 ama jokeda ba ulita alin gire Chube ama gbuni gwade ama duni nga ngaña giti toini ule diali, ama giti ba ulita Chube uñe ba ulita Chube gai ulia, nege Cristo giti ba ulita kle mo ta gbe Chube ole diali, bage suge Cristo giti ba kle chui manade gire ba be joge toi diali chui tangle Chube ole. 22 Nege ba ulita geru Cristo giti gai dage, ba kle Chube gerua gbe gdadi, geru e ulia giti ba kle mo ta gbe joge siere age me noge mo ta gbe age no geru e gerule kare, ene geru e giti ba no no daba na Chubenu ole. Geru ulia giti ba ulita mo ta gbadale diali gwangerugu mo ta dbe ma no trate daba na ole. 23 Chube gerua ba ta blitu, nege ba kwian Chubenu, e salengwli ba medunga nabitaite kare Chube gerua giti, e me salengwli ba medunga chebia kote ngeru kare ñenua nga dba ai giti ole kare, ba medunga ngeru e me jage, e boi. Agwa Chube ba ta blitu jagere mo gerua giti e ba medunga nabitaite kare, Chube gerua ba ta blitu giti ba be toi diali chui tangle Chube ole, Chube gerua me boi, Chube toi diali chui tangle, Chube me boi. 24 Chube gerua degaba unsuialin gerule kwian giti kaire Chube gerua giti, chada e gerule: “Kwian ulita salengwli ngauda kare, ngauda tige gire ngauda jogeda, kwian ene kaire. Kwian lle tanre no ulita molen nga dba ai giti, lle e ulita salengwli glijra kare, glijra no agwa sugeti alin, glijra me jage chui tangle, glijra ulita jain, ene kaire lle no tanre kwiannu me jage, ene kaire kwian me jage. 25 Agwa Chube gerua me boi, Chube gerua jage diali chui tangle.” Chube gerua e geru Cristo kwian jwannga siere giti, geru e amaña Cristo giti jo tragaba ba ulita ole.
1 Chube gerua Cristo giti ba ta blitu, malen ba ulita mo ta gbadale joge siere age me no ulitage, ba ulita me agedale me no dare. Ba ulita me ñage sole dare. Ba ulita me gerudale alin ba kle age no gire age me no, ba ulita agedale no ba kle gerule kare. Ba ulita me ta dbadale tañachuge me no dabadi lle dabanu giti. Ba ulita me gerudale me no ngwale dabadi. 2 Ba ulita mo ta gbale kirogwa soli bebitra kle mo ta gbe jusuli jai kare diali ene ama tige no ama kira molen ama me oga. Ene kaire ba ulita nu Chube gerua Cristo giti gaba biale gwangea, ba mo ta gbadale geru Cristo giti batenga diali geru jwen geru e uliage diali kirogwa bebitra diali jusuli jakalin kare, ene geru ulia jwen giti ba kira gai ma no diali ba mo ta gbe chage no Chube takalin kare, ene ba kle biale joge toi chui tangle diali bdagli Chube ole sugekare age me no ulitage. Cha gerule ba ole, ba mo ta gbu geru ulia uñe ene suge trate bage ulia Chube no ba ole, ene ama gerua skwendale no bage ene ba takalin diali geru e jwen dare, ene geru e giti ba ñage age ma no diali Chube takalin kare geru e gerule kare. 4 Chube Jesucristo gbu age no kwian ulita alin, Chube gwage Jesucristo no trate ulita ñanaske tanre, agwa kwian ulita me mo ta dbe no Jesucristo ole me ama gai no mo alin, kwian ene gwage Jesucristo ngwale. Ba ulita Chubenu ba Jesucristo gau ulia giti ba mo ta gbadale Chugagwalla Jesucristo ole diali, Jesucristo giti ba ñage mo ta gbe joge siere age me no ulitage mo ta gbe Chube alinge lle boi no no ama alin diali ama takalin kare, ene ba ñage mo ta dbe no trate diali gerudale Chube ole daba na giti, ene ba ulita chege ke ulla dodaba kare kiraske. Kwian ke ulla dodanga ke gbaite ma no kweri ke nage gbe ngeru u dodangwa, gire u dodanga ke gbaite gbaite na gbe ule, ene u joge ulita dodaba no, ene kaire Chube ba kwian ulita amanu gdaite gdaite ta gbe ule kwaitre alin. 6 Jesucristo salengwli ke ma no ke ma kweri kare, Chube gerua degaba unsuialin gerule e giti, chada e gerule: “Cha ke kweri gbe una Jerusalénge, ke e ma no ke na ulitage, cha ke e gau, ke e no no kiraske tanre. Kwian ke e gbe gdadi kwian me lentige, kwian ene be chege no diali, nga be suga no kwian enedi, kwian ene mi ta chege olire.” 7 Ba ulita nu Jesucristo gaba ulia mo alin, ba alin Jesucristo no no, agwa kwian me Jesucristo gai ulia mo alin kwian ene alin Jesucristo ngwale. Kwian me Jesucristo gai ulia giti Chube gerua degaba unsuialin gerule, chada e gerule: “Kwian u dodanga ke gbu gerere, ke gbaite ama mliunga, ama gerudu ke e me no dale, agwa gire ke e ama mliunga, ke e ma no ke na ulitage.” 8 Kaire Chube gerua degaba unsuialin gerule ene: “Kwian me ke e gbe gdadi, kwian tanre be lentige ke ege.” Kwian me Jesucristo gai ulia, kwian ene me kle Chube gerua gbe gdadi me kle age Chube gerua gerule kare, malen kwian ene ole be boi tirare me geru gbe gdadi giti gdale, bdagli kwian ene be boi daga ngwale be chege sugekare Chubege ta olire Chube geru gbu kare unsuialin kwian me Jesucristo gai ulia giti. 9 Agwa ba ulita Jesucristo gau ulia, Chube ba gau mo alin, ba Chube olia, Chube ba gau lle boangale Chugagwalla Jesucristo alin, Chube ba gau toidale no trate mo gwa giti, Chube ba gau mo alin Jesucristo giti, ba Chubenu ulia. Ngeru ba me Jesucristo uñu ba chagedu nga jereske kare, ba chagedu age me no sugekare Chubege, ba kledu ene gire Chube ba ta gbu suge Jesucristo giti salengwli jichra kle kwian gbe ten nga jereske kare, Jesucristo giti Chube ba ta blitu joge siere age me noge. Chube agedu no no ene Jesucristo giti ba alin, ama agedu ulita no ba alin ba tragadale kwian na ole. 10 Ngeru ba ulita me Chubenu ni ba Chube uñu, agwa nege ba ulita Chubenu ba Jesucristo gau ulia. Ngeru ba chagedu sugekare Chubege me uñadu bage Chube tai dage bage Chube ta agekalin no ba alin, agwa nege chku uñale ba ulitage Jesucristo giti, Jesucristo giti suge bage Chube no no ba ole Chube tai dage ba ulitage, ngeru e ulita me uñadu bage malen ba ulita kledu nga jereske kare. 11 Cha daballa cha ibotea Jesucristo giti, cha no no ba ulita ole, cha takalin ba ulita me mo chuge ngwadi talla age me no nga dba ai gitige ba ta gbe age kare, diali talla age me no gbakalin siere age noge. Ba ulita kle toi nga dba ai giti sugeti alin, ba mi kle diali nga dba ai giti chui tangle malen ma no ba ulita tañachugadale Chube giti age no Chube takalin kare. 12 Ba ulita mo ta gbadale toi no trate Chube takalin kare kwian me Chube uñe gwa giti, ba ulita mo ta gbe toi no ene trate kwian me Chube uñe gwa giti kwian me Chube uñe gerule me no badi ba kwian agenga me no kare agwa ba ulita mo ta gbe toi no kwian eneske diali age no kwian ole, ene bdagli Chube be kwian ene gerudu me no badi ta blite, ene be suge kwiange ba kledu age ulita ngeru no Chube takalin kare gire kwian ene be gerule no Chube giti. 13 Ba ulita mo chugagwalla ulita nga dba ai giti gadale dage age ama gerule kare, Chugagwalla Chube takalin ba mo ta gbe age no ene chugagwalla nga dba ai giti ole. Chugagwalla ma kweri chugagwalla na ulitage nga dba ai giti, ba ulita ama gadale dage, 14 chugagwalla ulita ma soli chugagwalla ege, ba ama ulita gadale dage kaire. Chugagwalla kweri nga dba ai giti chugagwalla soli gbe kwian agenga me no gbe ji chuge age me no gdale, kaire chugagwalla kweri amaña chugagwalla soli gbe gerule no kwian bai kle age no giti, ba mo chugagwalla ene ulita gadale dage age ama gerule kare. 15 Chube takalin ba ulita Chubenu mo ta gbe toi age no diali kwian me Chube gerua uñeske, kwian e gweale ni ta Chube gerua uñakalin, ama tañachuge geru e ngwale, ama gerule geru e dollale. Ba toi age no kwian eneske Chube takalin kare, ene ba kle age no giti kwian e ulita mi ñage gerule dare me no Chube gerua dollale. 16 Ba ulita Chubenu tiun gitiru Jesucristo giti ji chugege age me no gdale, agwa e me gerule ba ñage mo chuge ngwadi age me no dare, ba me ñage tañachuge: “Cha ñage age me no, Jesucristo e jia junnga, mi boi cha ole cha age giti.” Me ene, ba tiun gitiru Jesucristo giti mo ta gbadale age no Chube alin Chube takalin kare, ba agedale no diali kwianske Jesucristo takalin kare. 17 Ba ulita mo ta dbadale no daba Chubenu na ulita ole. Ba ulita mo ta gbadale Chube gai dage no no. Ba ulita mo ta gbadale mo chugagwalla ma kweri chugagwalla na ulitage nga dba ai giti gai dage no. Ba kwian ulita gadale dage no. 18 Lle boanga mo chugagwalla alin, ba mo ta gbadale no mo chugagwalla ole mo chugagwalla ba gbe age kare, ba mo chugagwalla gadale dage diali, ba lle boadale no ama alin. Mo chugagwalla age no ba ole ba gbe age no, me e alin giti bage suge mo chugagwalla no kle age no ba ole malen ba lle boadale no ulita mo chugagwalla alin, me ene, mo chugagwalla age me no ba ole ba gbe lle boi mno age dagale ba ole, ba mo ta gbadale no diali mo chugagwalla ole. 19 Kwian gweale me no ba kwian Chubenu ole kwian ene ba gbe boi daga ngwale ba kle age no Chube takalin kare giti, boi daga ngwale eneske ba tachke Chube giti Chube kle ba ole Chube gwage ulita uñale kle boi ba ole, ba tachke ene Chube giti, kaire ba mo ta gbe jage ulita ta no ole, ba age ene Chube be age no no ba alin Chube be ba chudaboi. 20 Agwa kwian gweale ba gbe ji chuge ba agedu gweale me no giti gire ba mo ta gbe jage ji chuge ba agedu me no giti, Chube me age no sidri ba alin ba mo ta gbe jage ene giti, ba agali jiske ba agedu me no ene giti, ba ji chugadale e gdale. Ba mo ta gbe jage ji chuge ba agedu me no giti e me ñanaske Chube gwage, agwa ba boi daga ngwale ba kle age no giti ba mo ta gbe jage ta no ole ulita kle boi giti, e ñanaske Chube gwage. 21 Ba boidale daga ngwale age no giti Cristo agedu kare, Cristo chagedu nga dba ai giti ama boidu tanre daga ngwale age no giti ba ulita alin, e chegu egdage ba ulita alin ba ulita mo ta gbadale ene Cristo agedu kare, ama no kwian ole ama mo ta gbu age no diali kwian ole boi daga ngwaleske nga dba ai giti, ama agedu ene ba ulita alin, ene chkedale uñale bage ba ulita mo ta gbadale Cristo mo ta gbu kare. 22 Cristo me agedu me no sidri, ni ama gerudu me no sidri kwian ole, ni ama sodu sidri kwian ole. 23 Kwian ka bo mno me no Cristo ole, Cristo me kwian ka junnga ka boi mno kwian ole. Cristo kledu ji chuge boi tanre daga ngwale kwian me no kote, Cristo me kwian oña bo dagale kwian kledu age giti ama ole, agwa Cristo mo jigu Chube kote kaire kwian kle age me no ama ole jigu Chube kote, uñadu amage Chube alin be ji gbe trate kwian kle age me no alin, ene chkedale uñale bage ba ulita mo ta gbadale Cristo mo ta gbu kare. 24 Cristo agali mo chugu ngwadi jogeda kruge che ulita alin che agedu me no giti, ama ji chugu che giti ene che ulita me chege jiske dare Chube gwage che agedu ulita me no giti. Cristo giti Chube che ta blitu, ene gwangerugu che age me no talla chugadale ngwadi che mo ta gbadale me jogeni naskuni age me no dare, ma no che mo ta gbadale diali toi age no Chube takalin kare. Ngeru ba ulita mo ta du diali age me no, e giti ba chegu jiske sugekare Chubege, agwa Cristo jokeda giti ba Chubenu ba chege trate Chube gwage. 25 Ngeru ba ulita bebi Cristo gai ulia gire ba me Chubenu ba ulita chagedu sugekare mo mananga Chubege salengwli bda oveja me mo manangage kare, ngeru ba ulita me kledu tañachuge Chube giti ba ulita ta kledu sugekare Chubege, agwa nege ba ulitage uñale Cristo giti ba Chubenu, Cristo ba Chugagwalla ama ba ulita mananga.
1 Ba muinga ulita Chubenu mo jwanba ba mo ñengula kerua gbadale gdadi, ba ulita agedale mo ñengula gerule kare diali. Ba gweale mo ñengula me Chubenu, ba mo ñengula gadale dage, ba agedale no trate mo ñengula alin mo ta dbe no diali mo ñengula ole. Ba me gerudale tanre mo ñengula ole Chube giti ene ba tañachuge ñengula be Chube gerua gai ulia, me ene, ba mo ta gbadale age no diali ta giti mo ñengula gwa giti ene suge amage Chube gerua geru ulia, ene ba ñengula ñage ta jwlite Chube geruadi Chube gerua gai ulia ba mo ta gbe age no giti ama alin ba kle ama gai dage giti. 3 Ba muinga ulita Chubenu me tañachugale mo dodade no trate alin giti mo ñengula gwa giti ene ba tañachuge ama be no ba ole be ba keruchuge gerule Chube giti. Ba mo dodade no trate lle tanre kwangle giti, lle chrachienga no kwangle takalinge mo dodagda, mo chuga dodade no, mo chugaga lite no, ñometra kwangle no mo ngama tkagda, ulita mo dodade no trate, mo dodade no ene alin giti ba me tañachugadale ene ba ñengula be no ba ole be ba keruchuge gerule Chube giti be Chube gai ulia, me ene. 4 Ma no ba ulita muinga Chubenu mo ta gbadale tañachuge mo talla kle mine Chube ole, ba mo ta gbadale no trate age no diali me mo ta dbe skochie, agwa ma no mo ta gbe toi no taingwli mo ñengula ole, ba mo ta dbe no ene ta e mi jogenga, ta ene chege diali chui tangle e no ulita Chube gwa giti. Toi ta ene ole mo ñengula ole, ene ba giti ñage suge mo ñengulage Chube gerua no Chube gerua ulia ene ba ñengula ñage Chube gai ulia mo alin. 5 Unsuialin muinga bai chagedu mo ta gbe no trate Chube gwa giti, ama ulita ta du no mo ñengula ole kaire, ama mo ta gbu no trate age no diali, ama me ta du skochie, ama ta gbu toi taingwli mo ñengula ole. Muinga e Chube gau ulia diali, kaire ama mo ñengula gau dage mo chugagwallale. 6 Sara muinga ene, ama mo ñengula Abraham gau dage agedu ulita Abraham gerudu kare, ama Abraham gau mo chugagwallale. Ba muinga Chubenu ulita agedale no diali mo ñengula ole, ene ba me mo ta dbadale kwachie mo ñenguladi ba diali kle age no ama ole, ba age ene ulita gire ba Sara jian kare, Sara toidu no ene Abraham ole. 7 Cha gerule ba kwian onbre ole, ba ulita Chubenu mo jwanba mo ta dbadale toi no ta giti mo muingalla ole, ba mo muingalla manadale no, ama me kira molen tanre ba kwian onbre kare, ama me salengwli onbre kare, agwa Chube gwage ba gdaboke salengwli, Chube ba gdaboke gau toidale no ule diali chui tangle Chube ole. Ba mo ta dbe no ene mo muingalla ole, ene age me no mo muingalla ole talla me kle ba tale, ene ba gerule Chube ole Chube ba keruchuge, ba gdabonate kle mo ta gbe gdaitre alin e no Chube gwage, ene Chube age no ba gdabonate alin. 8 Cha gerule ba Chubenu ulita ole, ba ulita mo ta gbadale tañachuge salengwli daba Chubenu na ulita ole kwian gdaitre alin kare ta dbe toi no modi, ba ulita ta sugedale salengwli ulita, ba ulita nodale mo bitalla Jesucristo giti ole, ba ulita mo ta dbadale no no age no daba na alin daba na gai ma kweri moge. 9 Daba na age me no ba ole ba me agedale me no ama ole ama age kare, ma no ba age no ama ole. Daba na kira bate ka boi me no ba ole ba me kira bate ka boi gwangoguda ama kle age kare, ma no ba gerule no ama ole ba age no ama alin Chube agedu no ba alin kare. Chube ba gau mo alin agedale no, Chube takalin ba age no daba na ulita ole me tañachuge daba kle age no o kle age me no ba ole, ba agedale no diali daba ulita ole, ene Chube be age no ba alin. 10 Chube gerua degaba unsuialin gerule ene: “Kwian ta toikalin no nga suga no ole chui gdale, kwian ene mo ta gbadale me gerule sidri me no me gerudale sole. 11 Ma no mo ta gbadale joge siere age me noge mo ta gbadale age no mo ta gbadale toi no taingwli daba na ulita ole diali gwangerugu. 12 Kwian agenga no Chube gwage Chube takalin kare, Chube kle kwian ene manade no, kwian ene kle chudaboi kade Chubege, Chube kle ama keruchuge. Agwa kwian agenga me no Chube gwage, Chube skochie kwian ene ole, Chube ji gbe kwian alin kwian age me no gdale, kwian ene me kle age Chube takalin kare.” Chube gerua degaba unsuialin gerule ene. 13 ¿Chema ñage age me no me no ba ole ba ulita kle mo ta gbe diali age no Chube takalin kare? Ba kle age no giti kwian me ñage age me no ba ole. 14 Agwa kwian gweale age daga ngwale ba ole ba kle mo ta gbe age no Chube takalin kare giti, ba me mo ta dbale olire, Chube be age no no ba alin malen ba ñage mo ta dbe nga suga no ole. Ba me kwachiedale kwian ba oña boi dagale ba kle age no giti, 15 ma no ba kle boi daga ngwaleske ba mo ta gbadale diali Cristo gai dage mo Chugagwallale. Kwian agenga me no ba ole, kaire kwian na geru kade bage ba kle Cristo gai giti, kwian ene kalen ba ulita mo ta gbadale biale jainnga no trate ta no ole Cristo giti. 16 Ba ulita Cristonu mo ta gbadale toi no trate Chube takalin kare diali, ene be suge trate trate ba tale ba kle age no Chube takalin kare ba me jiske Chube gwage, ene kwian agenga me no ba ole gerule me no badi ba kle age no giti gire be suge kwian na tanrege kwian kle gerule me no badi kle sole, gire bdagli kwian kle gerule ene badi be ibule tanre mi gerule dare me no badi. 17 Boi daga ngwale daba na kote age no giti, e no, e ñanaske Chube gwage, agwa boi daga ngwale age me no gdale daba na kote, e me salengwli age no giti kare. Chube takalin che boi ene daga ngwale age no giti daba na kote che boidale, che me talladale boi age no giti, che mo ta gbadale age diali no ngerugu. 18 Cristo kaire ji chugu age no giti, Cristo jokeda che ulita agedu me no alin, ama che ulita agedu me no jia junnga bitaitre alin ulita, ene che ulita chege no Chube gwage ama gai ulia giti, ama gai ulia giti che ta chege no Chube ole. Cristo me jiske, ama me agedu me no ni sidri agwa ama jokeda kwian ulita agenga me no giti. Cristo jegwale alin ji chugu tanre daga ngwale kaire ama jokeda, agwa ama oña chegu gwade, 19 gire ama oña jo nga kwian jogebada oña kle ngwadi, nga ege Chube me oña e chuge ngwadi joge siere, nga ege kwian ulita me no oña kledu, oña e ulitage Cristo oña jo gerule Cristo agedu giti kaire Cristo be age giti. 20 Kwian e me Chube gau dage unsuialin Noé chuiage, Chube gerudu Noé ole Chube be kwian agenga me no ulita kagenga chi kote, Chube Noé gbu du dodade. Noé kledu du dodade Chube manadu, Chube me agedu blike, ene Chube tadukalin kwian agenga me no mo ta blite, Noé bebi du dodade ulita kwian tanrege chku uñale Noé kledu du dodade, sbali sbali Noé kledu du dodade, du jo ka giti gire Chube ji gbe kwian agenga me no ulita alin chuia chku, chui ege kwian ulita jonga chi kote, kwian gdapa alin tiun gitiru duge chiga giti. Boidu ene unsuialin Noé chuiage, Noé Chube gau dage malen ama me jonga chi kote, ama chegu no duge chiga giti, e giti Noé tiun gitiru Chube ji gbu kwian agenga me no ulita alinge. 21 E salengwli che Chube gai dage che mo ñeange chiske mo gange ngaña chigage kare, che Chube gai dage giti che tien gitiru ji chugege che agedu me no gdale. E me gerule che mo ñeange chiske giti che jegwale chege no trate chi kote, me ene, che mo ñeange chiske mo gange ngaña chigage, che age ene che kle mo ta gbe ulia Chube ole Cristo jokeda Cristo chkuni gwade giti, che kle chudaboi kade amage, che takalin ama che ta gbe toi no trate ama takalin kare. 22 Cristo jokeda chkuni gwade, gire joni nga ngaña giti Chube kle ngwadi, nege ama kle Chube ngena Chube ko taingwli giti. Lle boanga Chube alin nga ngaña giti, Cristo ama ulita Chugagwalla, kaire Cristo ma kweri ma kiraske dolla Satanáge kaire Satanás chudaboangalla ulitage.
1 Cristo chagedu nga dba ai giti kwian kare ama boidu tanre daga ngwale, ama me talladu e giti, ama jagedu boi daga ngwalege me agedu me no sidri eske. Ene kaire ba boi daga ngwale ba me talladale boi daga ngwale giti, ma no ba mo ta gbadale jage boi daga ngwalege mo ta dbe Cristo mo ta du kare boi daga ngwaleske, ba mo kira gbadale me mo chuge ngwadi age me no boi daga ngwaleske. 2 Ene suge bage ba me toidale dare gwangerudba age me no ba agedu ngeru kare, ene ba mo ta gbe toi no trate Chube takalin kare, ba toi nga dba ai giti dare age Chube takalin kare me kwian takalin kare kwian kle tañachuge kare. 3 Kwian me Chube uñe me age no Chube takalin kare, kwian ene mo ta gbe age tanre me no diali ai kare: Diali muire onbre takalin mo chuge ke giti, diali ama ulita ta agekalin me no. Ama lle gage janga chage llale. Ama nga ollade lle gage giti, ama lle gage jai ngle ngle jogengaleda. Ama age tanre me no ollade ule lle oña dodaba mo kodi ole, ama lle oña e gai mo chubeale. Kwian ulita me Chube uñe age ene, ba ulita kaire kledu age ene ule kwian ene ole, sbali sbali ba chagedu age ulita ene salengwli, agwa nege ba Chubenu ba ulita me kle age me no ba agedu kare ngeru ule. 4 Kwian agenga me no ulitage me suge mineade ba ulita me chege ama ole age dare ama age kare, ba kle age nganake, e giti kwian agenga me no diali kle gerule me no ba ulitadi toi Chube takalin kare giti. 5 Kwian ene ulita agenga me no diali, chui bdaglige Cristo be kle biale ji gbe ama ulita alin ama agedu me no giti, chui ege kwian e be kle Cristo gwa giti be suge trate trate kwian ege ama jiske agedu giti ulita, chui bdaglige Cristo be ji gbe kwian gwade alin kaire kwian jaba chkeni gwade alin. Ba me talladale kwian ene ngeru, ba ama chugale ngwadi Cristoge, Cristo alin ñage ji gbe kwian ene agenga me no ulita alin. 6 Agwa Cristo mi age ene kwian ole bai kaire mo ta gbe age no Chube takalin kare, kwian enege geru Cristo giti jo ketaba, kwian kledu gwade gire geru e jo ketaba kwiange, ama ulita bai kaire Cristo gau mo jwanngale siere ji chugege age me no gdale chegu no trate Chube gwage, kwian ene jokeda kwian ulita jogeda kare agwa ama oña me jo sugekare Chubege, ama be toi no diali chui tangle Chube ole Chube kle toi kare, Cristo mi ji gbe kwian ene alin chui bdaglige. 7 Chui bdagli chege kodi malen ba ulita Chubenu mo ta gbadale tañachuge no trate diali Chube takalin kare me mo chuge ngwadi tañachuge age me no, ene ba ñage gerule no Chube ole ta no trate giti diali. 8 Ba ulita mo ta dbadale no ngle modi daba ole, ene daba na ñage age tanre me no ba dollale ba me skochie dabadi ba me daba mlienga, ta no tanre ole ba ñage daba agedu me no talla mlienga ulita diali, ta dbe age no ene daba ole e no no. 9 Ba ulita Chubenu ba daba basanga Chubenu na gadale ngwange no mo ullage ta no giti, ba ulita agedale ene modi ongoru ongoru, ba daba ulladale, kaire ba gbengwa ketadale gbegda daba alin, ba me gerule sidri me no daba basanga Chubenu gdaite ole u gdale bligda gdale. 10 Chube agedu no no ba ulita alin, Chube ta ketu ba ulitage gdaite gdaite lle kaire kaire boadale Chube takalin kare daba Chubenu chudaboagda, ba ulita mo ta gbadale lle boi no Chube ta ketu bage kare age. 11 Ba bai kaire gerunga Chube giti daba ole ba mo ta gbadale gerule Chube ba ta gbe gerule kare me gerule gballa mo ta giti. Ba bai kaire daba chudaboanga ba daba chudaboadale Chube kiralla giti age Chube ba ta gbe kare me daba chudaboi mo ta giti gballa. Ba ulita kaire kaire mo ta gbadale lle ulita boi no Chube ta ketu bage kare, ba agedale ulita no, ene gire daba na be gwage ba kle agedi be suge amage Chube agedu no no ba alin Jesucristo giti, e giti daba be gerule no no Chube giti. Chube no Chube kira molen, Chube kiralla me bidege, Chube kiralla chege diali chui tangle. Che ulita amanu gerudale no ama giti diali. Ene nobi. 12 Cha daballa cha ibotea Jesucristo giti, cha no no ba ulita ole, cha takalin suge ba ulitage ba me ñage tañachuge tanre mo ta dbe kennga ba kle boi daga ngwale giti, ba alin allabi me kle boi daga ngwale Cristo gai ulia giti, kaire kwian na tanre Chubenu kle boi daga ngwale salengwli ba kle boi kare, ba mo ta gbadale gwangerugu jage boi daga ngwaleske, ene ba ta be chege ma kiraske Chube ole boi daga ngwaleske. 13 Ba boi daga ngwaleske ba mo ta gbadale suga no, sugedale bage Cristo boidu daga ngwale kaire, ene kaire ba amanu boidale daga ngwale, ba mo ta gbe suga no boi daga ngwaleske nege nga dba ai giti, ene kaire nga be suga no no badi Cristo chieni chuiage, chui ege Cristo be chkeni mo kiralla giti, gire be suge ba ulitage Cristo no Cristo kweri. 14 Kwian ba oña boi dagale ka boi ba ole me no Cristo gai ulia giti ba me kwachiedale kwian ene ngeru, sugedale bage Chube Oña kiraske no diali kle ba ulita ole, diali kle ba ulita Chubenu kira gbe. 15 Ba Chubenu me daba gwaleda, ba me skwe boadale, ba me agedale me no sidri daba na ole, boi kle sugekare gire ba me jogedale boiske gerule kle boi ulita giti, ba gweale ji chuge age e kare giti e me no me no, ji chuge ngwale age ene giti gweale boi, ene ba nga dbale ibule tanre mo giti. 16 Agwa ba ji chuge Cristo gai ulia giti Cristo gerua dbe giti ba me nga dbale ibule mo giti, ma no ba mo ta dbe nga suga no ole e giti, ba gerudale no Chube ole: “Chube, nga suga no chadi Cristo giti cha banu, e no no cha alin.” 17 Nege nga dba ai giti kwian Chubenu age me no, Chube kwian ene chuge ngwadi boi daga ngwale age me no e gdale, ene kwian ta mo ta gbakalin ma kiraske chege siere age me noge, ene me ibule Chube gwa giti chui bdaglige. Chui bdaglige Chube be gerule kwian ulita ole kwian agedu giti ulita nga dba ai giti, ngeru be gerule kwian Chubenu ulita giti bigire be gerule kwian me Chubenu ulita giti, chui ege Chube be ji gbe kweri kweri kwian ulita alin bai kaire me Chube gerua ulia no gau mo alin. Kwian Chubenu ole boi dagale nga dba ai giti agwa chui bdaglige ama be tien gitiru Chube ji gbege. 18 Chube gerua degaba unsuialin gerule e giti, chada e gerule: “Kwian Chubenu kle mo ta gbe Chube ole diali, kwian ene me ji chugadale nga dba ai giti, agwa ama kle ji chuge boi daga ngwale gweale, bdagli ama be tien gitiru boi daga ngwale ulitage be toi Chube ole diali chui tangle. Agwa kwian me Chubenu agenga me no Chube dollale, ama be ji chuge ma tirare chui bdaglige, ama chudaboanga me, ama be chege boi daga ngwale sugekare Chubege diali chui tangle.” Chube gerua degaba unsuialin gerule ene. 19 Ba boi daga ngwale nga dba ai giti, Chube takalin ba boi daga ngwale ba boidale daga ngwale, agwa Chube me ba chuge ngwadi sugekare amage. Ba me tañachugale kle boi giti, ma no mo ta gbe diali age ma no ngerugu diali Chube takalin kare mo jige Chube kote, Chube ba dodanga, Chube no no ba ole, Chube mo kiralla giti kle ba manade.
1 Nege cha gerule ba daba Chubenu chugagwalla ulita ole, cha daba Chubenu chugagwalla ba ulita kare. Cha gwagedu mo gwagwa giti Cristodi ji chuge dagale nga dba ai giti, Cristo chieni chuiage che ulita be gwage Cristodi ule, chui ege che ulita be joge toi ule ama ole nga ngaña giti. 2 Agwa nege nga dba ai giti ba daba Chubenu chugagwalla ulita, ba daba Chubenu ulita manadale no Chube geruadi, ba ulita daba Chubenu chugagwalla mo ta gbadale daba Chubenu manade no Chube geruadi ta no ole Chube takalin kare, me tañachuge mo tale: “Cha me ta agekalin agwa cha agedale.” Me ñage tañachuge ene, ni tañachuge ngeru igi gai tanre daba manade Chube geruadi ñanale, ba lle ulita boale no ta no giti daba Chubenuske. 3 Ba ulita daba Chubenu chugagwalla me tañachugadale ba daba Chubenu ulita kaganga, ba me ta sugedale ba daba Chubenu ulita mananga Chube geruadi malen ba ama mauña, ba me tañachugadale ene. Agwa ba ulita daba Chubenu chugagwalla chagedale ta giti ta no ole daba Chubenu ulitaske, ba chagedale age no daba Chubenuske, ene daba Chubenu ulita be gwage badi be ta agekalin no ba kle age kare. 4 Ba ulita daba Chubenu chugagwalla mo ta gbe daba Chubenu manade Chube geruadi ta no ene ole, ene Cristo daba Chubenu ulita mananga ma kweri chkeni chuiage ama be lle no no kete ba ulita daba Chubenu chugagwallage ba daba Chubenu manadu no ñanale, lle e me boi ni jogenga, lle e chege diali chui tangle. 5 Ene kaire cha gerule ba kwian Chubenu ulita ole kle mo lite Chube geruadi, ba ulita mo ta gbale no daba ba chugagwallale ole ongoru kaire ulita mo ta dbe salengwli modi, ba ulita daba ba chugagwallale gadale dage diali. Kaire ba ulita Chubenu mo ta gbadale daba na ulita gai dage ongoru ongoru moske me sugedale mo tale ma kweri daba nage. Chube gerua degaba unsuialin gerule e giti, chada e gerule: “Kwian me ñage tañachuge mo tale: ‘Cha ma kweri daba nage.’ Chube me age no kwian ene alin me kwian ene chudaboi, agwa kwian tale suge soli Chube mo ta dbe no kwian ene chudaboi.” Chube gerua degaba unsuialin gerule ene. 6 Ba ulita Chube gadale ma kweri moge, ba Chube gadale mo Chugagwallale, ba mo chugadale ngwadi Chube kirallage age, ene chui be chke gire Chube be ba ulita gbe kweri. 7 Ba ulita mo ta ulita jigadale Chube kote, boi dagale ba ole ba me mo ta dbale tañachuge tanre kle boi giti, ñage jige ulita Chube kote, uñale Chubege kle boi ulita ba ole, Chube no ba ole, Chube ba chudaboi, ama mo ta gbe age no ba alin, ama diali kle ba manade no no. 8 Ba ulita mo ta gbadale tañachuge no trate ulita me mo chugadale ngwadi tañachuge age me no, ba ulita kledale biale ta giti diali me mo ta chugale ngwadi chage alenske. Gude saingwli kle chage diali lle jinade gutadale, ene kaire che dolla Satanás kle chage kwian nate kwian ta gbale siere Chubege, che dolla Satanás ta agekalin me no kwian Chubenu ole ta kwian Chubenu ta gbakalin siere Chubege. 9 Satanás age gweale me no ba ole ba ta gbale siere Chubege, ba mo ta gbadale kiraske me Satanás chuge ngwadi ba ta gbe siere Chubege, ba mo ta gbadale diali Chube gai ulia ma no gwangerugu, ba boi daga ngwale Chube gai ulia giti sugedale bage me kle boi ene ba alin ole, uñale bage daba Chubenu nga na ulitage kle boi salengwli ba ulita kle boi kare. 10 Chube no no ba ulita ole, ta ene ole ama ba ulita gau mo alin Jesucristo giti, Jesucristo giti chui bdaglige ba ulita be kle ule Chube ole diali chui tangle nga ngaña giti, agwa nege nga dba ai giti ba boi daga ngwale sugeti, boi daga ngwaleske Chube agali be ba ta gbe ma trate ma kiraske ngerugu, ene diali ba ta be chege Chube ole, ene ba mi mo ta blite che dolla Satanás ole. 11 Chube alin allabi no kira molen tanre diali, ama kiralla me bidege, ama kiralla ma kweri na ulitage diali. Ene nobi. 12 Silvano chada ai degu cha Pedro kle gerule kare kagadale ba ulita alin, uñale chage Silvano mo ta gbanga Jesucristo gai ulia diali, ama cha daballa Jesucristo giti. Cha kle Silvano gbe chada ai buli dege ba ulita alin, chada ai giti cha kle gerule ba ulita ole ba kira gbadale chage gwangerugu Chube ole me joge siere Chubege. Chube no no ba ulita ole, Chube kle age no no ba ulita alin, cha gerule ba ole ba ulita tachkedale diali Chube kle age giti no ba alin, ba me jogedale siere Chubege ba kle boi dagale giti. 13 Kwian Chubenu ulita kle mo lite aini una Babiloniage gbi kage ba ulita alin, Chube kwian una aige gau mo alin Chube ba ulita gau mo alin kare. Kaire Marcos gbi kage ba ulita alin, ama cha kirolla kare Jesucristo giti. 14 Ba ulita gbi kade no no moge ta no ole dabage ulita. Ba ulita Cristonu, cha takalin ba ulita gdaite gdaite mo ta dbe nga suga no ole Cristo giti. Geru ai ene ulita cha Pedro chada degangu ba kwian Chubenu ulita alin. Che kle meni.
1 Cha Simón-Pedro chada ai dege ba kwian Chubenu ulita alin: Cha lle boanga Jesucristo alin, cha Jesucristo gerua ketanga, cha chada ai dege ba ulita nu Jesucristo gaba ulia mo tale alin cha kle Jesucristo gai ulia kare, e no no ene mo ta gbe diali Jesucristo gai ulia. Che Chubea kaire che jwannga siere Jesucristo no no trate, ama agedu no che ulita alin, ama ba ulita ta gbu ama cha ta gbu kare, ene ba ulita ama gau ulia cha ama gau ulia kare. 2 Cha takalin Chube age no no diali ba ulita alin Chube nga suga no no gbe ba ulita tale. Ba ulita mo ta gbadale geru jwen ma no diali Chube kaire che Chugagwalla Jesucristo geruage, ene ba ama uñe ma trate tachke ma ngle ama mine, ene diali ba tale be suge ma no nga suga no ole, ene be suge trate bage Chube kle age no ba alin. 3 Jesucristo che ulita gau mo alin, Jesucristo takalin che chege age no trate diali ama chagedu kare Chube takalin kare, che ulita mo ta gbadale Jesucristo gerua uñe ma trate, ene che kira gai mo ta gbe ma no diali chage no ama chagedu kare, Jesucristo kiralla giti che ñage chage nga dba ai giti age no diali Chube takalin kare Jesucristo chagedu kare. 4 Jesucristo giti Chube kle age no no tanre che ulita amanu alin Chube gerudu kare unsuialin, ene Jesucristo giti che ñage joge siere talla ulita age me noge nga dba ai giti, ene che talla chege salengwli Chube talla kare, talla ene giti che age no trate Chube takalin kare. 5 Chube kle age no tanre ene ba ulita alin Jesucristo giti malen ba mo ta gbadale chage ai kare nga dba ai giti: Ba mo ta gbadale Jesucristo gai ulia mo tale gwangerugu. Ba me Jesucristo gadale ulia mo tale alin allabi, agwa kaire ba ulita gdaite gdaite agali mo ta gbadale ulia ulia age no trate Chube takalin kare. Ba mo ta gbadale Chube gerua uñe ma trate, ene suge bage Chube takalin mine ba alin. 6 Ba mo ta gbadale me mo chuge ngwadi age me no ba takalin kare. Ba mo kira gbadaleda jage ulita me joge siere blike. Ba mo ta gbadale chage no trate Chube ole diali. 7 Ba mo ta dbadale no daba Chubenu ulita ole chudaboi ta no ole mo ta dbe mo daballanu ole kare. Ba mo ta dbadale no kwian na ulita ole. 8 Ba kle mo ta gbe age ma no ene diali ba kle che Chugagwalla Jesucristo chuge ngwadi age ba tale ama takalin kare, ene ba me ama uñe ngwale, suge bage diali ma trate Chube takalin mine. 9 Agwa kwian Chubenu me kle mo ta gbe age ma no ene diali, kwian ene Jesucristo gai ulia alin gire me kle tañachuge ege gwangerugu agedale mine Chube takalin kare, kwian ene me kle Jesucristo chuge ngwadi mo ta gbe suge Chube takalin kare me kle tachke Jesucristo ama agedu me no ulita jia junnga, ama me kle tañachuge mo giti dare ama me ñage age me no ngeru kare. 10 Malen cha gerule ba ulita ole cha daballa cha ibotea Jesucristo giti, Chube ba gau mo alin agedale no Chube takalin kare, Chube ba ta gbu Jesucristo gai ulia ene ba chegu Chubenu, Chube agedu no ene ulita ba alin ba ulita agali gdaite gdaite mo ta gbadale ma no dare diali Chube ole age ama takalin kare, ba age ene ba ta mi joge siere Chubege. 11 Ba age ene ulita nga dba ai giti, gire chui bdaglige nga no no be kle ba alin ba gangwa ngwange Chube kaire che Chugagwalla che jwannga siere Jesucristo kle ngwadige, ba be toi diali chui tangle nga ege Chube ole Jesucristo ole. 12 Uñale chage ba kle mo ta gbe no no geru uliage Jesucristo giti kwian geru dbanga ba tku tangle kare, uñale bage ulita trate ba chagedale mine Chube takalin kare, agwa cha ta gerukalin diali ba ole cha kle gerule kare lle ulita giti, cha me takalin ba joge siere geru uliage malen cha ta ba ta gbakalin ma no dare diali geru ulia giti. 13 Cha kle gwade cha tañachuge cha gerudale no diali ene ba ulita ole ba ta gbe tachke diali, ene ba ulita mi ta jogenga. 14 Che Chugagwalla Jesucristo kle cha ta gbe suge cha jogeda chuia kle kodi, 15 nege cha kle gwade cha kle gerule tanre ba ole geru amaña giti, ene geru e cha kle gerule giti chege ba tale diali, kaire cha kle geru jige degaba ba alin, ene cha mi kle gwade ba ñage tachke ulita cha gerudu giti ba ole cha kledu gwade gire. 16 Cha gerudu ba ole Jesucristo kiralla ama mine, cha ba ulita tku tangle Jesucristo agedu giti nga dba ai giti mo kirallaske, kaire cha ba ulita tku tangle che ulita Chugagwalla Jesucristo be chieni giti. Cha ba ulita tku tangle cha gerudu kare ba ulita ole Jesucristo giti, e geru me ngwale, cha me kle geru jinade ngwale mo ta giti cha tañachuge kare, ene ama giti cha kle gerule ba ulita ole, me ene. Cha ba tku tangle kare Jesucristo giti e geru ulia, cha ule cha skatemanalla boke ole mo gwagwa giti gwagedu Chugagwalla Jesucristodi mo kirallaske. 17 Chui gbaitege cha gdamai kledu ule Jesucristo ole ngaske jwichuga giti Chube kiralla chku dba ngwadi, chui ege Chube Jesucristo Ñenua gerudu no no Jesucristo giti, Chube gerudu ene: “E cha Kirolla, cha no no ama ole, nga suga noare chadi ama giti.” Cha gdamai agali geru keruchugu mo olodi, e Chube kerua, keru e chiu nga ngaña giti chku cha ulita kledu Jesucristo ole ngwadi. 19 Cha gdamai gwagedu giti kaire cha geru keruchugu giti suge trate chage kwian Chube gerua ketanga gerudu ulia unsuialin Jesucristo be boi giti, ene kaire suge trate trate chage kwian Chube gerua ketanga chada degu unsuialin Jesucristo be chieni giti e geru ulia, noare ba ulita geru e gbadale gdadi, geru e jichra kare, geru e ba ta gbe suge Jesucristo giti salengwli jichra che gbe ten nga jereske kare, nga joge ju gire che ten ulitadi, ene kaire Jesucristo chieni chuia chke gire ulita be suge trate trate chege kwian Chube gerua ketanga chada ulita degu kare. 20 Cha takalin ba ulita mo ta gbe tañachuge no Chube gerua kle degaba giti, kwian Chube gerua ketanga me chada e degu gballa mo ta giti, 21 kwian Chube gerua ketanga me gerudu sidri mo talla giti talla tañachuge kare gballa, agwa kwian ene Chube gerua ketanga ama mo ta gbu Chubege, Chube Oña kwian ene ta gbu gerule ulita Chube takalin kare, kaire Chube Oña kwian ene ta gbu chada dege ulita Chube takalin kare.
1 Unsuialin kwian israelitaske kwian geru ngwale me ulia ketanga kledu, kwian e me Chube gerua ulia ketu kwiange, kwian e mo gbu geru ngwale me ulia trage kwian ole. Boidu ene unsuialin, kaire nege kwian gweale ene talla daba tkanga tangle tanre geru ngwalege be kle ba ulitaske. Kwian daba tke tangle geru me ulia Jesucristo gitige, kwian tanre ene daba tkanga tangle mo ta gbe skwlenre geru me ulia Jesucristo giti kete bage ene ba ta chege sugekare Jesucristoge, Jesucristo jokeda kwian ene daba tkanga tangle ulita alin kaire, agwa ama me Jesucristo gai mo Chugagwallale, ji kweri be kle kwian ene alin, chui bdaglige Chube mi manade kwian ene ole, Chube be ji kweri gbe blike kwian ene ulita alin, kwian ene mi ñage joge siere ji chugege. 2 Kwian daba tkanga tangle geru ngwalege ama daba tke tangle Chube giti agwa me kle gerule ulia Chube giti, kwian daba tkanga tangle ene ulita agenga me no tanre daga ngwale, kwian e nate kwian na ngle joge chage geru jwen amage, kwian geru jwannga amage mo ta gbe age me no me no tanre kaire daba tkanga tangle kle age kare, ene kwian me Chubenu be gwage kwian edi age giti kwian me Chubenu be gerule me no Chube gerua uliadi, kwian kle age kwian takalin kare, kwian ene me age Chube gerua gerule kare. 3 Kwian daba tkanga tangle geru ngwalege diali ta igi gakalin tanre ngle mo alin, ama be takalin ba ulita Chubenu tke tangle geru gweale me ulia giti ene ama igi kade ba ulitage ama kle ba tke tangle ñanale. Kwian ene ulita kle age me no Chube gwage malen ji chuge kle biale ama ulita alin, sbali Chube gerudu be ji gbe kwian agenga me no ulita alin, chui be chke gire Chube be kwian ene ulita gbe ji chuge Chube gerudu kare sbali. 4 Cha takalin suge ba ulitage Chube agedu mine unsuialin lle boanga monu ole, lle boanga tanre Chube alin nga ngaña giti unsuialin agedu me no Chube dollale, lle boanga e ulitage Chube me taidu dage sidri, Chube lle boanga e ulita mliunga nga dbigu giti nga jereske sugekare Chubege, Chube talla me chegu ule ama ole ama agedu me no giti Chube dollale, Chube ama ulita gbu skage ogabale chui bdagli gbadale boi daga ngwale ji chuge diali. 5 Kaire unsuialin Noé suiale kwian kledu toi nga dba ai ulitage age tanre me no, Chube me taidu dage kwiange, Chube mo ta gbu nga dba ai ulita kagenga kwian ulita ole llagli chi kote kwian kledu age me no tanre gdale. Agwa Chube Noé alin gbu siere chige ule bitalla gdaguke ole, gdapale Noé ole, Noé alin allabi mo ta gbu no Chube ole Chube gerua gai dage, Noé kledu nga dba ai giti Noé Chube gerua tragu kwian ole toidu no trate Chube takalin kare. 6 Kaire unsuialin Lot suiale una kweri gdaboke kada Sodoma kaire una kada Gomorra, una e bokege kwian ulita kledu age tanre me no me no, Chube me taidu dage kwian ege, Chube una e boke gugu ulita, una kweri boke ulita kwiange llagli kugedu jitage, una tan mnuña alin chegu jita kote. Chube agedu ene mo kira giti unsuialin, e chege gda uñale kwian na ulita agenga me no be toi chui bdagli ngnagu alin ta gbagda, sugedale kwian chudalla ulitage age tanre me no gdale Chube una boke kweri ulita gugu. 7 Agwa ngeru Chube bebi una guge Chube kwian gdaite kada Lot gbu kige siere una ege, Lot kwian no, ama mo ta gbu toi Chube takalin kare, ama toidu kwian agenga me no tanreske ta no ole, ama ta olidu tanre kwian kle age me no giti, ama skwatige ta olire ole gwage chui gdale kwian me no ngledi age tanre me no, skwatige ta olire ole kwian keruchuge chui gdale gerule me no. 9 Unsuialin Chube Noé kaire Lot manadu no, ene Noé kaire Lot me boidu daga ngwale kwian agenga me no ulita boidu kare kwian agedu me no gdale, ene kaire nege Chube ñage kwian ulita manade no bai kaire mo ta gbe no ulia Chube ole Noé kaire Lot mo ta gbu Chube ole kare, Chube kwian ene ta gbe toi no trate Chube takalin kare kwian agenga me noske, ene chui bdaglige Chube ji gbe chuiage kwian ene be tien gitiru Chube be ji gbege. Agwa ji chuge chuia chke Chube be kwian agenga me no ulita gbe ji chuge chui tangle. 10 Chube be ji gbe ma kweri kwian ulita alin bai kaire kle mo ta gbe tañachuge diali age me no tanre ama ta agekalin kare bai kaire kle mo ta dbe me no Chube ole me Chube gai dage mo Chugagwallale. Kwian daba tkanga tangle geru ngwalege kwian ene, ama diali mo ta gbe tañachuge age me no, ama age tanre me no giti me ibule, ama kle mo ta gbe diali age me no, kwian ene me kwachie gerule me no me no lle boanga Chube alin nga ngaña gitidi. 11 Lle boanga Chube alin nga ngaña giti ama ulita ma kweri ma kiraske kwian daba tkanga tangle geru ngwalege ñage age me no kwian ene kle gerule me no giti ole, agwa ama me age kwian ene ole, ni kwian gbe jiske Chubege, ama kwian ene jige Chube kote. 12 Kwian daba tkanga tangle geru ngwalege ta bda kare, bda ta me, bda skien bda toi bda chage bda age ulita bda takalin kare agwa me tañachuge mo giti be boi giti bdagli, bda kle toi nga jereske kare me uñale amage kle age no o me kle age no, me uñale amage ngaminegire ama gutabe o gwabeda. Ene kaire kwian daba tkanga tangle geru ngwalege talla, kwian ene me tañachuge mo giti be boi giti bdagli, ama mo chuge ngwadi toi age me no ama takalin kare, ama gerule me no geru uliadi ama takalin kare, ama ta me, ni uñale amage ama kle gerule llema giti, kwian ene be jogeda sugekare Chubege, 13 kwian ene be ji chuge kweri daga ngwale ama agedu me no daba na ole giti. Kwian daba tkanga tangle geru ngwalege, ama kle age giti me no ulita chui kaire kaire amadi nga suga no no age ulita me no giti, kwian ene kle tañachuge nga dbe suga no sugeti alin ngwale, kwian ene me kle tañachuge be boi bdagli giti. Ba ulita Chubenu kle chui ollade gire kwian daba tkanga tangle geru ngwalege kle joge chke baske chui ollade mnalin ba ulita ole, kwian ene ba gatedi chui ollade ta me no ole ene ama tañachuge ba ta jwlite ama ole, nga chie ibule ba ulitadi ama kle age baske giti, ama agenga me no me no, ama ta me no diali, malen ba me ñage chui ollade no kwian ene ole. 14 Baini kaire daba tkanga tangle ene gwage muingadi ama takalin muingage mo alin, diali ama mo ta gbe chage age me no. Ama takalin kwian na age ama kle age kare, kwian Chubenu me mo ta gbaba kiraske Chube geruadi, ama kwian ene anblite age ama kle age kare. Diali ama kle mo ta dbe tañachuge lle me amanu giti takalin lle me amanu ulitage mo alin, ama tachke ngle age ene ama lle me amanu tanre gai mo alin takalin kare, ama mo ta gbe age me no me no diali, kwian ene ulita alin ji chuge kle biale. 15 Ama ulita jo siere geru ulia tratege, ama ulita kle chage sugekare geru uliage age tanre me no, ene ulita kle mo ta gbe age salengwli Beor kirolla kada Balaam agedu kare, Balaam Chube gerua ketanga agwa ama me agedu Chube ama ta gbu age kare, ama agedu kwian na ama ta gbu age kare, e giti ama igi tanre gai age kwian e takalin kare ñanale. Balaam kledu age me no kwian na takalin kare, Balaam ta chugleda bda giti, bda chagegda keru jwlitu gerudu kwian kare Balaam ole Balaam ta gbale me age me no dare ama kledu age kare, agwa Balaam me mo ta blitu, Balaam mo ta gbu age me no gwangerugu. Kwian daba tkanga tangle geru ngwale me uliage mo ta gbe age me no diali Balaam agedu kare. 17 Kwian ene ulita chi gwagwa ulen kare, kwian sie ole joge chi gwagwage chi jadale agwa chi gwagwa skwen ulen amage ama me ñage chi gwagwa ulen jai sie ole, chi me, ene kaire kwian daba tkanga tangle geru ngwalege me ñage kwian na ta gbe suge no. Kwian daba tkanga tangle geru ngwalege kaire salengwli bogakwa kle gwaluge noi ngwange noi gbale boi agwa noi me boi, mleuda bogakwa e dbe gire noi me boi, ene kaire kwian daba tkanga tangle geru ngwalege, ama kle gerule be age gire mo ta blite nganake ama gerule kare. Kwian daba tkanga tangle ene me ñage age no ni ñage daba chudaboi, nga dbigu giti nga jere jere, nga ege ji chuge kweri kle biale kwian ene ulita alin. 18 Ta me no ole kwian daba tkanga tangle geru ngwalege diali takalin daba na age me no ama kle age kare, talla ene ole ama kle gerule ngwale kle gerule kweri no no mo giti ama kle age no kare. Daba na nu mo ta gbaba me sbali Jesucristo gai ulia joge siere age me noge, mo ta gbaba me sbali me chage dare age me no kwian na agenga me no olege, kwian daba tkanga tangle geru ngwale me uliage ñage daba ene ta gbeni naskuni age me no joge siere geru uliage. 19 Kwian daba tkanga tangle geru ngwalege gerule kwian ole: “Ba age cha kle age kare, e no che ulita alin, age ulita che takalin kare e gerulla me.” Ama gerule ene kwian ole agwa ama agali talla me no ulita kle tale, talla e kle ama kage age me no diali, kwian ene ulita ta ngle me no molen. 20 Agwa kwian nu Jesucristo gaba mo Chugagwallale mo jwanngale siere ji chugege age me no gdale, Jesucristo giti kwian ene nu jogeba siere talla ulita age me noge, nga dba ai giti kwian ene ulita bai kaire mo ta bliteni naskuni age me no diali mo chuge ngwadi age talla me no kle ama kage age kare, kwian ene chege mo ta gbe age ma me no dare ngeru bebi Jesucristo gai uliage. 21 Kwian ene ulita geru no ulia Jesucristo giti uñe trate trate, uñale ama ulitage ama chagedale no trate Jesucristo takalin kare diali, agwa ama mo ta bliteni naskuni chage age me no ama chagedu ngeru kare, ma no kwian ene ulita me geru ulia keruchugu gwangea ni geru gau ulia dale. 22 Kle boi salengwli kwian gweale ta molen ngle gerule kare, ama gerule ene: “To allekwa mlienga, to amaña mo allekwalla guteni naskuni. Kaire chunchi gligabada trate gire sugeti ama mo kageni sugaska blebitale naskuni.” Boi ene kwian ole kwian nu mo ta blitaba geru Jesucristo giti gai ulia age no Jesucristo takalin kare gire ama mo ta gbe joge siere geru ege jogeni age me no naskuni tanre ngeru kare.
1 Cha daballa cha ibotea Jesucristo giti, bitabokedale cha kle chada dege ba ulita alin, cha chada degu ngeru, kaire cha kle chada ai na dege, chada e ulita giti cha ta ba ta gbakalin tachke trate geru ulia giti. 2 Unsuialin kwian tanre Chube gerua ketanga gerudu trate Jesucristo be boi giti, ba geru e ulita uñe, cha takalin ba ulita tachke geru e giti. Kaire cha takalin ba ulita tachke geru giti kwian Jesucristo gerua ketanga ba tku tangle ama geru Jesucristonu ketu bage kare, Jesucristo che Chugagwalla che jwannga siere ama ulita gbu geru ulia ama giti kete kwiange, ba mo ta gbale diali chege geru uliadi, ene ba mi mo ta blite. 3 Cha takalin ba ulita tachke ma no ulita cha kle chada ai dege giti, chui bdagli ngwange kwian tanre be mo ta gbe toi age me no kwian takalin kare, kwian ene ulita be tañachuge me no Cristo giti be Cristo gerua Cristo chieni giti gbe gidagda, kwian ene geru kade Cristo be chieni giti be gerule: 4 “¿Boidu mine Cristo be chieni ole? Geru kle ama be chieni agwa ama me chie gda uñale, ama mi chieni dale, kwian kle geru jinade ngwale. Nga ulita jo dodaba nga kle kare kle, nga me boi gda uñale nga jo dodaba suiage gwaiguda, che enusulian unsuialin ulita tigedu, ulita jokeda, kle kaire nege tangle me boi gda uñale Cristo chieni giti, ulita kle salengwli nga jo dodaba suia kare.” 5 Kwian gerule ene, Chube agedu ulita ngeru kwian me ta gbakalin gdadi, kwian me mo ta gbakalin suge unsuialin Chube gerudu nga ole gire nga ngaña chegu dodaba, gire Chube gerudu chi ole gire chi nga jigu ngwale gire chi tanege dbi chegu, Chube nga ulita dodadu unsuialin ene, agwa kwian ene gerule: “E me boidu ene ulia.” 6 Kaire kwian ene me mo ta gbakalin suge Chube ji gbu kwian agenga me no ulita alin Noé suiale, Chube nga dba ai ulita unsuialin kagunga kwian agenga me no ulita ole llagli chi kote. 7 Chube agedu ene unsuialin kwian chudalla nge ulita ole agwa nege Chube kle nga dba ai ulita kaire nga ngaña ulita manade chui bdagli alin, chui e Chube ji gbe chuia kwian agenga me no ulita alin, chui bdaglige Chube amaña be age nakwaite be nga dba ai kaire nga ngaña kagenga ulita jita kote, chui ege kwian agenga me no ulita be kle ji chuge sugekare Chubege jita eske. 8 Cha daballa cha ibotea Jesucristo giti, cha ta ba ulita ta gbakalin dare, cha takalin ba me ta jogenga Chube me chui gbe gdadi salengwli kwian kle chui gbe gdadi kare, chui gbaite Chube alin chura ngle mil kare, chura ngle mil Chube alin chui gbaitre alin kare. 9 Chube alin nga bebi joge sbali malen Jesucristo bebi chieni Chube gerudu kare Jesucristo be chieni giti, kwian gweale kle tañachuge Jesucristo mi chieni blike, agwa kwian ene me kle tañachuge no trate Jesucristo chieni giti, Jesucristo ñage chieni blike agwa Chube kle mo ta dbe no kwian ulita ole, Chubege uñale kwian ulita bebi ama uñe, Chube me takalin ni kwian gdaite jogenga sugekare amage, malen Chube kle manade, ene chui kle kwian alin mo ta blite Chube ole age Chube takalin kare ene kwian ulita be kle biale joge Jesucristo ole Jesucristo chieni chuiage. 10 Che Chugagwalla Jesucristo chieni chuia be chke blike kwian skwe boanga kle chke kle kwian gai alenske kare, ene che Chugagwalla Jesucristo be chkeni, chui ege kwian me kle Jesucristo chieni chuia manade ngwange kwian ene be skate alenske, chui ege nga ngaña ulita nga dba ulita be boi tirare be jogenga ulita jita kote, jita kweri be kle gdade kweri tirare, nga ngaña be jogenga ulita jita e kote, chui, dai, beu ulita be liedba ulita, kaire nga dba ulita be jogenga ulita jita e kote, lle nga dba ai ulita giti be kuge, ni lle gdaite chegeda. 11 Nga ulita be boi ene, nga ulita be jogenga, e suge bage trate be boi ene ulia ma no ba ulita mo ta gbadale chage ma trate ta giti Chube ole diali toi no trate Chube gwa giti age Chube takalin kare. 12 Ba mo ta gbadale manade toi no trate Jesucristo chieni chuia ngwange, ba toi no trate Chube takalin kare, ene ba be kle biale joge Jesucristo ole ama chieni chuiage, ene ba be takalin Jesucristo chieni chuia chke blike. Chui ege nga ngaña Chube be kagenga ulita jita kote, chui, dai, beu, kaire lle na ulita nga ngaña be liedba jita kwira jute kote. 13 Agwa che ulita Chubenu kle nga na jagere manade ngwange Chube gerudu kare, nga ngaña nga dba jagere be kle dodaba, nga ege che be toi, nga ege ni age me no gdaite be kle, ulita be kle no trate. 14 Cha no no ba ulita ole malen cha takalin ba ulita mo ta gbe toi no diali Chube takalin kare ba kle Jesucristo chieni chuia manade gire, ba mo ta gbe age no ene diali, Jesucristo chieni chuia chke gire ba be kle biale ama gai ngwange no ta no trate ole, ba ta be kle no Chube ole, ba me skatedale kwachie amage ta me no ole age me no. 15 Ba tachkedale che Chugagwalla Jesucristo chieni chuia giti, Jesucristo bebi chieni e me gerule ama mi chieni dale, me ene, ama kle manade, uñale amage kwian ulita bebi ama gai ulia, ama kle mo ta dbe no kwian ulita ole, ama takalin kwian ulita ama gai ulia ene kwian ulita tien gitiru ji chugege age me no gdale. Ba me kledale toi ba me geru uñe kare Jesucristo chieni giti, cha kle chada ai dege kare ba ulita alin Jesucristo chieni giti, kaire Chube ta ngle ketu Pabloge chada dege ba ulita alin Jesucristo chieni giti, Pablo che daballa Jesucristo giti, che ulita no ama ole. 16 Pablo chada ngle degu, chada gdaite gdaite giti Pablo geru tanre degu, kaire geru degu Jesucristo chieni giti. Pablo geru degu tanre, geru gweale kle degaba mno, geru me suge blike. Kwian me mo ta gbaba kiraske Chube gerua uliadi, kwian enege geru me suge trate, ama me ta geru e jwankalin no ene geru suge trate amage, Pablo geru degaba kwian ene ulita blite nganake ama tañachuge kare, kaire ama Chube gerua ulita degaba unsuialin blite nganake ama tañachuge kare. Kwian ene agali mo ta gbe joge siere Chube gerua uliage, kwian ene be ji chuge kweri bdagli sugekare Chubege. 17 Kwian ene daba tkanga tangle geru me uliage be joge chke ba ulitaske be gerule geru ngwale giti ama tañachuge kare, malen cha kle ba ulita ta gbe ngeru kwian enege geru ulia giti. Ba ulita cha daballa cha ibotea Jesucristo giti, cha no no ba ole, cha gerule ba ulita ole ba mo ta gbadale chage ta giti Chube gerua ulia gai ma no, ene kwian daba tkanga tangle geru me uliage chke baske ba anblite geru amanudi be suge bage kwian e me kle chage geru ulia ole ama kle chage geru ngwale ole, ene ba mo ta gbaba no geru ulia ole ba mi mo ta blite joge siere geru uliage ba mi geru ngwale gai ulia. 18 Ba ulita gdaite gdaite mo ta gbadale Jesucristo che Chugagwalla che jwannga siere uñe ma no diali chui kaire kaire, ene Jesucristo ba ta gbe suge ma ngle diali Jesucristo no ba ole Jesucristo age no ba alin. Jesucristo che Chugagwalla kweri no no, ama giti che ulita gerudale no nege dale kaire diali chui tangle. Ene nobi. Geru ai ene ulita cha Simón-Pedro chada degu ba kwian Chubenu ulita alin. Che kle meni.
1 Cha chada ai dege Jesucristo giti ba ulita Chubenu alin: Jesucristo klebi enebi Chube nga ulita lle ulita kwian ulita dodadu gwangeabi gire, Jesucristo kwian ta gbanga toi Chube ole, Jesucristo giti cha kle chada ai dege ba ulita Chubenu alin. Chube Jesucristo kagu toi nga dba ai giti kwianske geru gbagda chke uñale kwiange Jesucristo giti kwian ñage toi ule Chube ole diali chui tangle. Jesucristo chku nga dba ai giti, cha ulita geru jwannga amage chagedu ama ole ule cha ama keruchugu gerule mo olodi agali kaire cha ulita gwagedu agali mo gwagwa giti amadi age no kwianske, kaire cha ulita agali ama gau kodi, cha ulitage sugedu Chube ama kagu nga dba ai giti kwian kare, ama chagedu kwian kare nga dba ai giti, ama giti cha kle chada ai dege ba ulita ta gbagda. 2 Gwangeabi Jesucristo klebi enebi mo Ñenua Chube ole nga ngaña giti, bigire Jesucristo chku nga dba ai giti kwian kare toi kwianske, cha ulita gwagedu Jesucristodi age no kwianske kwian alin, cha kle geru e trage kwian ole, kaire cha ba ulita ta gbe chke ama giti kaire ama agedu giti. Cha gerule ba ole, Jesucristo giti che be toi no diali chui tangle ama ole kaire Chube ole nga ngaña giti. 3 Cha ba ulita ta gbe chke Jesucristo giti, cha ulita gwagedudi mo gwagwa giti kaire cha ulita geru keruchugu mo olodi, cha geru e kete ba ulitage chada ai giti, ene ba ulita ta chege ule kwaitre alin mo skatemanallale cha ulita ole Jesucristo giti cha ulita kle mo ta gbe Chube che Ñenua ole kare kaire cha ulita kle mo ta gbe ule Jesucristo ole kare. 4 Cha kle geru ai dege ba ulita alin chada ai giti, ba geru ai ulita gbe gdadi, ene che ulita ta chege diali ule kwian gdaitre alin kare nga suga no ole diali Chube giti. 5 Geru ai ulita Jesucristo giti Jesucristo cha ulita tku tangle kare, geru ai amaña cha kete ba ulitage: Chube no salengwli jichra chratigenga no kle gwade kare, Chube no trate ulita diali, ama ta me nga jereske kare ole ni lle me no gweale kle ama tale, ama no diali ama kwian ta gbanga toi no trate salengwli jichra kle kwian gbe ten kare. 6 Che ulita bai kaire kle gerule che Chube uñe che kle mo ta gbe chage no Chube ole gire che mo ta gbe toi nganake kwian me Chube uñe kle toi kare, age ene me no Chube dollale kwian me Chube uñe kle age kare, ene che kle sole ngwale che kle gerule alin kaire ni mo ta gbe age ulia che kle gerule kare Chube uñe giti, che age ene che kle chage nga jereske kare. 7 Agwa cha gerule ba ole, Chube no trate ulita, che ulita Chubenu toidale age no diali Chube takalin kare, ene che ulita Chubenu ta chege ule kwaitre alin mo skatemanallale Jesucristo giti, ene Chube Kirolla Jesucristo jokeda giti che chege no trate Chube gwa giti age me no ulitage. 8 Che mo ta gbe tañachuge mo tale gerule che me kwian agenga me no age me no me kle che tale, che kle gerule ene che agali kle mo ta gbe mo anblite Chube gwage, che me kle gerule ulia mo giti, che kwian che ta agenga me no. 9 Malen talla me no kle che tale che age gweale me no, che mo ta gbale gerule Chube ole che agedu me no giti, Chube ta no trate molen ama diali mo ta gbe age no diali che alin, malen Chube che agedu me no ulita talla mlienga ama tale ama mi tachke dare che agedu me no giti, ama be che ta lite no trate che mi chege jiske Chube gwa giti che agedu me no giti. 10 Che gerule mo giti che me agenga me no sidri Chube dollale, che kle gerule ene che kle mo gbe Chube ite sole che me mo ta ketaba ulia amage ama gerua gai ulia, ama gerua ulita me kle che tale dale.
1 Cha bitalla ulita Jesucristo giti, ba cha alin ulita salengwli cha olia kare, cha no ba ulita ole, malen cha chada ai dege ba alin ba ta gbagda, ene ba mi age me no gweale. Agwa kaire ba gweale age me no Chube dollale, gire sugedale bage che kwian Chubenu ka chudaboanga gdaite gerunga che alin Chube ole gdaite kle, ama kada Jesucristo ama no trate ulita ama agenga diali no, Jesucristo kle ama Ñenua Chube ngwadi gerunga no che alin Chube ole diali. 2 Jesucristo agali mo ketu gwaleda kruge che ulita agedu me no ulita giti, Jesucristo jokeda giti che ulita chegu trate Chube gwage me jiske, Jesucristo me jokeda che alin allabi agwa kaire Jesucristo jokeda kwian nga ulitamu alin, kwian ulita agenga me no, Jesucristo jokeda giti kwian ulita chege trate Chube gwage me jiske, kwian agedu me no Chube talla e ulita mlienga kwian Jesucristo gai ulia giti. 3 Chube geru gbu kare kwian alin che geru e gai dage geru e gbe gdadi age Chube gerua gerule kare, ene suge chege mo tale geru e giti che Chube uñe ulia. 4 Kwian gweale gerule: “Cha Chube uñe”, kwian gerule ene agwa me Chube gerua gai dage me age Chube gerua gerule kare, kwian ene me Chube gerua uñe ulia, Chube gerua me kle kwian ene tale, kwian ene kle sole mo ole naskuni Chube gwa giti. 5 Agwa kwian bai kaire kle Chube gerua gai dage ulia kle Chube gerua gbe gdadi, kwian ene kle mo ta gbe no Chube ole ulia. Cha gerule ba ole, che Chube gerua gai dage age geru e kle gerule kare, ene suge chege trate ulia che ta kle ule Chube ole che Chubenu ulia. 6 Kwian bai kaire gerule ama ta kle ule Chube ole ama Chubenu, kwian ene mo ta gbale chage no trate toi nga dba ai giti Jesucristo toidu trate no kwianske nga dba ai giti kare. 7 Cha bitalla ulita Jesucristo giti, cha gerule ba ole, ba mo ta dbadale no daba ole ongoru ongoru. Geru ai ulita cha kle dege ba alin geru ai me jagere dale, geru ai amaña sbalibi ba nu keruchugababi gwangeabi ba Jesucristo gerua gau uliabi gire. 8 Agwa nege geru ai cha kle dege ba alin ba ta gbagda geru amaña giti naskuni geru ai geru jagere ba ulita alin kare. Uñale bage Jesucristo toidu suiage tangle kwianske ulia ama mo ta du no kwian ulita ole diali, e kare ene ba kle mo ta dbe no daba ole ongoru ongoru Jesucristo toidu kare. Ulia ba kle mo ta gbe age geru ai kle gbaba kare gire ba me kle chege toi diali me no ba toidu ngeru kare. Ba bebi Jesucristo gerua gai ulia gire ba chagedu age me no diali, ba mo ta gbu Chube gerua gbe gdadi gire ba me chegu toi ba toidu ngeru kare, nege tangle Chube gerua giti ba kle chage age no Chube takalin kare. 9 Kwian bai kaire kle gerule ama kle toi age no Chube gerua kle gerule kare agwa kwian ene me kle mo ta dbe no daba ole ulia, kwian ene me kle toi no Chube takalin kare ama kle chage toi nga jereske kare kle chage age me no Chube dollale salengwli kwian me Chube uñe kle chage age kare. 10 Agwa kwian bai kaire kle mo ta dbe no daba ole ulia, kwian ene kle age no Chube takalin kare. Kwian kle joge chage ngajudige jonkare ama ñage ten jondi no trate, ama me kle sera jwatenga lle gwealege jonkare baini kaire ama chage ngwadige, nga chra giti ama ñage ten no ulita. E kare ene kwian bai kaire kle mo ta dbe no daba ole Chube takalin kare, kwian ene me kle mo gbe age me no Chube dollale. 11 Agwa kwian bai kaire me kle mo ta dbe no daba ole, kwian ene kle age me no Chube dollale, e salengwli ama kle chage toi diali nga jereske kare. Uñale bage che me jichra dbe ngajrege che chage nga jereske, chege me uñale jon che kle chage giti joge bai ngnagu kaire che sera ñage jwatenga lle gwealege nga jeresaske, nga jereske che me ten jondi. E kare ene kwian bai kaire me kle mo ta dbe no daba ole, kwian enege me chke uñale ama agedale no mine Chube takalin kare. 12 Ba ulita cha olia kare, uñale chage ba che Ñenua Chube uñe, uñale chage Jesucristo agedu giti Chube ba agedu me no talla mliunga ulita ama mi tachke dare ba agedu me no giti, ene ba chege trate Chube gwa giti, malen cha chada ai dege ba alin ba ulita ta gbagda. Cha chada ai dege ba kwian juma ulita alin, ba geru Jesucristo giti uñe trate, uñale bage Jesucristo klebi enebi lle ulita gwangeabi, malen cha kle chada ai dege ba alin ba ta gbagda dare. Cha chada ai dege ba ulita kirogwa biale alin, ulia ba mo ta gbaba kiraske Chube gerua giti, ba Chube gerua Jesucristo giti gau ulia mo tale kaire Chube kiralla giti ba kle kirachke che dolla Satanádi, malen cha kle chada ai dege ba alin ba kira gbagda, ene ba ulita chege ma kiraske chada ai batenga giti. 15 Cha gerule ba ulita ole, ba me mo ta gbadale nga suga no ole age me no ulita giti kwian me Chube uñe kle age kare, kwian me Chube uñe diali kle mo ta gbe toi ama takalin kare. Ba kwian Chubenu ulita bai kaire kle mo ta gbe toi kwian me Chubenu kare mo ta gbe lle tanre ngwale gai mau alin, ba kle age ene ba me kle mo ta dbe no Chube che Ñenua ole, ba kle mo gbe Chube che Ñenua dollale. 16 Cha gerule ba ole, kwian me Chubenu agenga me no kle age ulita ai kare ene: Kwian kle mo ta gbe tañachuge age me no giti kaire ama kle age me no ama kle tañachuge kare, kaire agwe kwian kle gwage lle tanredi ama takalin chege lle e ole ulita mau alin, kaire agwe kwian kle tañachuge igi giti alin allabi kwian kle mo sobade daba nadi lle molen tanre ole giti. Cha gerule ba ole, kwian kle tañachuge me no age ai kare ulita, talla ai kare me kle chie dale Chube che Ñenuage, Chube me kle kwian ta gbe age me no ai kare. Che dolla Satanás kle kwian ta gbe tañachuge me no age me no ulita ene. Malen cha gerule ba ole, ba me mo ta dbadale chege age me no kwian me Chubenu kle age kare. 17 Nga dba ai che toige mi chege chui tangle dale nege tangle kare, kwian ulita bai kaire kle age me no Chube dollale kwian ene be chege sugekare Chubege boalenga ngwale diali dale alin, agwa ulia kwian ulita bai kaire age Chube takalin kare mo ta gbe trate no Chube ole kwian ene be toi Chube ole chui tangle diali. 18 Ba ulita Jesucristo gerua gaba ole cha gerule ba cha olia kare Jesucristo giti, cha ba ulita ta gbe chui bdagli ngnagu giti, ba ulita geru keruchugu chui bdagli ngnagu giti chui ege kwian gdaite ta me no Cristo ole be chie be mo tke dole Cristo ole, chui e kle chke bedre bedre kwian tanre me no kle chage ba ulitaske kwian Cristo dollale ama kle gerule me no Cristo giti, e giti chke uñale trate chege chui bdagli kle chie ma dbigu, kwian Cristo dollale tanre kle chage che ulitaske nege. 19 Kwian tanre Cristo dollale kledu che kwian Chubenuske mo lite che ole ule Chube gerua jwen, agwa ulia ama ta me kle Chube gerua gai ulia ama me mo ta du che ta kare geru ulia ole, ama me che bitalla Jesucristo giti dale, ama che bitalla Jesucristo giti ulia, ene ama chegu che ulita ole diali, agwa ama me ulia che bitalla Jesucristo giti malen ama jo siere che ulitage, ama jo siere giti suge trate chege ama me Chubenu, ene ñage suge ma trate chege kwian ene ulita me Chubenu ama geru ngwale traganga. 20 Agwa ba ulita kle geru ulia Jesucristo giti gai ulia, ba ulita tale uñale Jesucristo giti Chube mo Oña kagu ba ulita tale ene geru Jesucristo giti suge trate bage. 21 Cha kle chada ai dege ba ulita alin ba ta gbagda, e me kle gerule ba ulita me geru ulia Jesucristo giti uñe, uñale chage ba ulita geru uñe trate geru ulia giti, agwa cha kle chada dege ba ulita alin nakwaite ene geru ulia suge bage ma trate, Chube Oña kle ba ta gbe suge geru bai ulia giti kaire Chube Oña kle ba ta gbe suge geru bai me ulia giti. 22 Gire cha geru kade bage ai kare: ¿Chema kwian songa ngwale? Kwian bai kaire kle gerule Chube me nu Jesucristo kagaba kwian kare kwian jwanngale siere ji chugege age me no gdale, kwian ene songa ngwale. Kwian ene kle gerule Cristo dollale, kwian ene kle mo ta gbe tañachuge mo tale Chube giti ene: “Chube me che Ñenua dale”, kaire kle tañachuge mo tale Jesucristo giti ene: “Jesucristo me Chube Kirolla dale.” Kwian bai kaire kle tañachuge ene ai kare, kwian ene kle tañachuge me no Chube dollale kaire Jesucristo dollale. 23 Kwian bai kaire me Chube Kirolla Jesucristo gai ulia kwian e me Jesucristo Ñenua Chube gai ulia kaire, agwa kwian bai kaire gerule no kwian na gwa giti ama Jesucristo gerua ganga ulia, kwian ene ulia Jesucristonu kaire kwian ene Chubenu. 24 Malen cha gerule ba ole, ba geru ulia ba nu keruchugababi gwangea ogadale no mo tale, ba tañachugadale geru e giti diali. Geru ulia ba keruchugubi gwangeabi kle ba tale diali, gire ene ba ta be chege ule Chube Kirolla Jesucristo ole kaire Jesucristo Ñenua Chube ole. 25 Jesucristo agali gerudu che ulita amanu mo ta gbale chege ene ule ama ole kaire Chube ole, ene che ulita amanu be toi chui tangle diali Chube ole. 26 Cha kle chada ai dege ba ulita alin ene suge bage kwian agenga Cristo dollale giti ama kle sole ngwale ba ulita anblitanga geru ngwalege. 27 Kaire Chube Oña kle ba tale Jesucristo ama kagu kare ba ta gbanga diali geru ulita ulia giti, gire ba me kwian na gbadale mo tke tangle geru ulia giti. Ulia Chube Oña no agali kle ba tke tangle lle ulita giti, geru e Chube Oña kle ba tke tangle giti geru e ulia, me ngwale dale. Ba ta chegedale ule diali Jesucristo ole Chube Oña ba tkaba tangle kare, ba me mo ta gbale joge siere Chube Oñage. 28 Cha gerule ba ulita ole ba ulita cha olia kare Jesucristo giti, che ulita mo ta gbale ule Jesucristo ole diali, ene suge chege ama chieni chuiage che mi skwen kennga amage ni ibule ama ngeru che ageba me no gdale. 29 Uñale ba ulitage Jesucristo no trate agenga no diali, kaire chkedale uñale bage kwian bai kaire kle chage age ulita trate Chube takalin kare, kwian ene ulia Chube olia.
1 Ulia cha takalin bage suge Chube giti trate, che Ñenua Chube no no che ulita ole, che ama gerua gai ulia gire che ulita chege ama oliale, uliabi Chube che gau ama oliale, malen kwian me Chubenuge me suge che kwian Chubenu mine, kwian ene me Chube uñe malen kwian ege me suge che Chube olia kle toi giti. 2 Ba cha bitalla ulita Jesucristo giti, ba ole cha gerule ulia, che ulita Chube oliale che ama gerua gaba giti. Chege me uñale trate che be chege mine bdagli, agwa uñale chege Jesucristo chieni gire che be gwage amadi agali mo gwagwa giti, chege be suge trate ama giti, chui ege che be chege no trate ama kare. 3 Che ulita bai kaire kle mo ta gbebi biale Jesucristo chieni chuia manade ngwange, che kle mo ta gbe toi no trate salengwli Jesucristo no trate kare. 4 Agwa kwian bai kaire kle age me no, kwian ene kle age Chube dollale, kwian ene me kle Chube gerua tallade kwian ene kle age diali me no. 5 Agwa bage ulita uñale Jesucristo ni agenga me no sidri, ama no trate agenga no diali, ama chku nga dba ai giti che agenga me no ta blite ama ole talla me no jwennga siere chege, ama giti che tien gitiru ji chugege age me no gdale. Jesucristo no trate ulita, 6 malen kwian bai kaire ta kle ama ole kwian ene me mo ta gbe age me no dare ama mo ta gbe age Chube takalin kare. Agwa kwian bai kaire kle chage age me no diali, kwian enege me suge Jesucristo giti ama me kle Jesucristo gerua gai ulia me Jesucristo uñe. 7 Ba ulita cha olia kare, cha gerule ba ole, ba me ni kwian gdaite chuge ngwadi ba ulita anblite ngwale age me noge. Kwian bai kaire kle age no trate diali Chube gwa giti, kwian ene no trate salengwli Jesucristo no trate kare. 8 Agwa kwian bai kaire kle age me no diali ama kle tañachuge kare, kwian ene che dolla Satanánu, che dolla Satanás agedu me no gwangeabi kaire kle age diali, malen Chube Kirolla Jesucristo chku kwianske nga dba ai giti, ama chku kirachke che dolla Satanádi ene che dolla Satanás me chege age ulita Satanás takalin kare. 9 Ulia che Chube oliale che me kle chage age me no diali, che kwian Chubenu ulitage Chube ta jagere ketaba toigda no Chube takalin kare malen che kwian Chubenu me kle chage mo ta gbaba age me no diali, che ulia Chube oliale, Chube che ta blitu toi no Chube takalin kare. 10 Kwian kle mo ta gbe age giti chke nate uñale chege trate ama Chubenu o ama che dolla Satanánu. Kwian bai kaire kle chage age me no, kwian kle age giti chke nate uñale chege ama me Chube oliale dale, ama che dolla Satanás oliale ama kle mo ta gbe agenga diali me no. Kaire kwian bai kaire me kle mo ta dbe no daba ole, e giti chke nate uñale chege ama kaire me Chube oliale dale, ama che dolla Satanás oliale. 11 Ulia geru ai jo ba tkaba tanglebi, geru ai ene: Che mo ta dbadale no daba na ulita ole diali, kaire daba mo ta dbadale no che ole diali, che ongoru ongoru mo ta dbadale no mo ole nga suga no ole diali, geru ai chége uñalebi. 12 Che me mo ta gbadale me no daba ole che enusulian unsuialin kada Caín agedu kare, unsuialin Caín mo ta gbu me no ama mo daballa guda, Caín dolla Satanás olia. Cha geru kade bage ene: ¿Uñale bage mineade Caín mo daballa guda? Ulia cha gerule ba ole, Caín gwagedu ama daballadi age no ulita diali Chube gwa giti, sugedu Caínge Caín me no mo daballa kare Chube gwa giti, ama ta me no agenga me no diali agwa ama daballa agedu no diali Chube gwa giti, sugedu Caínge ene malen ama ta skochiu ama mo daballa guda. 13 Ulia ulia cha gerule ba cha bitalla ulita Jesucristo giti ole, sugedale bage kwian me Chubenu be jainchke badi ama be ba gbe boi daga ngwale Caín agedu mo daballa ole kare, ulia be boi ene ba ole agwa e giti ba me mo talladale. 14 Agwa ulia che Chubenu mo ta dbe no daba na ole gire e giti suge chege ulia che ta me ngeru kare che bebi Chube gerua Jesucristo giti gai ulia gire. Ne suiale che chegu sugekare Chubege che me Chube uñu malen che me mo ta du no daba ole. Agwa che me chegu e kare malen che mi joge boadalenga daga ngwale ji chuge tanre ngwadi che agedu me no kbiale, nege tangle Jesucristo gerua gai ulia giti che ta kle Chube ole, che kle mo ta dbe no daba ole giti suge chege che Chubenu ulia, che be toi chui tangle Chube ole. Suge chege kwian bai kaire me kle mo ta dbe no daba ole kwian e me Chubenu, ama be toi diali sugekare Chubege ama me Jesucristo gerua gai ulita giti. 15 Kwian bai kaire kle jainchke dabadi ene kaire kwian tale kwian kle mo ta gbe me no salengwli kwian daba gwangada kare, bage uñale ni kwian gdaite mo gwangada ñage mo ta gbe no jogedale toi chui tangle Chube ole nga ngaña giti. 16 Ulia Jesucristo mo ketu boalenga daga ngwale mo gwangeda che giti kwian agenga me noge, malen suge trate chege che mo ta dbadale no mine daba ole. Jesucristo mo ketu boalenga daga ngwale che ulita giti, e kare ene agwe che mo chugale ngwadi boi daga ngwale daba chudaboi giti Jesucristo agedu kare, che mo ta gbadale daba chudaboi no diali che ñage mangire batre kare. 17 Kwian gweale Chubenu lle molen tanre gire ama gwage daba nadi me lle molen, kwian lle molen daba ene chudaboadale, agwa kwian lle molen gwage dabadi me lle molen gire kwian me tai dage dabage kwian e me lle kete dabage, ¿ba tañachuge mine kwian ene giti? ¿Kwian e kle mo ta gbe no Chube ole? ¿Chube talla kle ama tale? Me dale. 18 Ba ulita cha olia kare Jesucristo giti, ba ole cha gerule, che Chubenu ulia me mo ta gbadale gerule alin allabi che no daba ole agwa me age no daba alin me daba chudaboi, che me kle mo ta gbe no daba ole ulia, che gerule che no daba ole che daba chudaboadale, ene ulia che kle tai dage dabage. 19 Che age no daba alin che toi ulita Chube gerua kle gbaba kare che alin, gire ene chege suge che kle age Chube takalin kare che Chubenu ulia, kaire agwe chege suge che ta kle no trate Chube gwa giti me jiske Chubege. 20 Che tañachuge mo tale che jiske lle gweale giti Chube gwage, che suge moge ene agwa kaire agwe sugedale chege Chube kiraske ama diali che age me no talla mlienga che chudaboi kade amage gire, amage suge che ta mine ama ole, ama alinge allabi uñale che jiske che me jiske ama gwa giti, ama ñage che ta gbe suge moge me jiske ama gwa giti. 21 Ba ulita cha bitalla Jesucristo giti, cha no ba ole, cha gerule ba ole, ulia che tale che me suge moge jiske lle gweale giti Chube gwa giti gire ene ulia che me mo ta dbalenga kennga gerule Chube ole, uñale chege che kle no trate ama gwa giti ama be che kerua gai ngwange no. 22 Ulia che Chubenu ulita kle Chube gerua Chube gbu che alin gai ulia, kaire che kle age ulita ama takalin kare ama gwa giti, gire ene Chube be lle ulita che kade amage ama be kete chege che kle ama gai ulia ñanale. 23 Chube geru jigu gbaba che alin ulita, geru e kle gerule ene: Che Chube Kirolla Jesucristo gadale ulia mo Chugagwallale kaire agwe che mo ta dbadale no diali daba ole ulita ongoru ongoru Chube che gbu age kare ulita. 24 Che ulita bai kaire kle Chube gerua gai dage ulia age diali Chube takalin kare, gire ene che ta kle Chube ole kaire Chube kle mo Oña gbe che tale che ta gbagda suge che Chubenu ulia.
1 Cha bitalla ulita Jesucristo giti, cha no ba ole, cha ba ta gbe ene: Ba me mo ta gbadale kwian ulita gerua gai ulia kwian gerule ba ole ama kle chage kwian tke tangle Chube gerua ulia giti gire. Ba me ama ulita kerua gai ulia blikare dale, agwa ma no ba kwian ene ta chugeda ulia ama kle chage Chube Oña talla giti o ama kle chage che dolla talla giti. Ba ama ta chugadaleda, ene be suge ma trate bage ama ulia Chubenu o me. Ulia ulia nga dba ai ulitage kwian tanre kle chage daba tke tangle geru ngwale me uliage, kwian e kle gerule ama kle chage geru ulia Chube giti kete kwiange, agwa me ulia dale ama kle kwian anblite ngwale. 2 Ba kwian ulita ta chugaleda ama kle chage geru Chube giti ulia trate dbe Chube Oña kirallaske o me, ba kwian ta chugaleda ene: Kwian bai kaire gerule ulia Chube Kirolla Jesucristo chku nga dba ai giti kwian kare, kwian ene ulia kle gerule Chube talla giti, Chube Oña kle kwian ene tale. 3 Agwa kwian bai kaire kle gerule Jesucristo me chku kwian kare nga dba ai giti, kwian ene tale Chube Oña me kle dale, kwian ene kle chage Jesucristo dolla talla giti, malen ama me kle gerule trate Jesucristo giti. Ba nu geru keruchugababi kwian gdaite be chie mo tke dole Cristo dollale che dolla Satanás kirallaske, agwa bage sugedalebi kwian tanre klebi chage che dolla Satanás talla ole nga dba ai gitibi. 4 Ba ulita cha olia kare Jesucristo giti, ba ulita Chubenu ole cha gerule, Chube Oña kle ba tale, ama ma kiraske che dolla Satanáge malen ba kirachku kwian kle chage geru ngwale me ulia dbe Satanás kiralla gitidi. Che dolla Satanás kle kwian e tale ama me kiraske Chube Oña kare, malen kwian e me ñage ba anblite geru ngwaledi ama takalin kare. 5 Kwian daba tkanga tangle geru ngwalege ulita agenga me no ama ulita kle mo ta gbe tañachuge me no Chube dollale diali gire ama kle geru ngwale me no Chube dollale trage daba tanre ole, kwian na geru me ulia uñe ama daba tkanga tangle geru ngwalege keruchuge no mo anblitange. 6 Agwa che me kwian daba tkanga tangle e kare, che me kle ama kerua gbe gdadi, che Chubenu ulia, kwian bai kaire ulita Chube uñe me kle kwian daba tkanga tangle geru me uliage keruchuge dale ama kle che Chubenu gerua keruchuge, agwa kwian me Chubenu me ta che kwian Chubenu keruchugakalin. Gire ene suge chege trate ulia chema chema kle chage Chube Oña kirallaske Chube talla giti geru ulia trage kaire suge chege trate chema chema kle chage che dolla Satanás talla giti geru ngwale trage kwian ole. 7 Ba ulita cha bitalla Jesucristo giti, cha gerule ba ulita ole, che mo ta dbadale no daba na ulita ole ongoru ongoru, che ulita bai ta suge no daba ole Chube kle ta ene kete chege, ama ta ene no molen. Kwian ulita mo ta dbe no daba ole, kwian ene Chube olia kwian ene Chube uñe ulia. 8 Kwian me mo ta dbe no daba na ole, kwian ene me Chube uñe. Chube ta dbe no diali kwian ulita ole Chube age no kwian ulita alin malen kwian bai Chube uñe ta ene molen kaire daba na ole, kwian ene Chubenu ulia. 9 Chube no no che ulita ole malen ama mo Kirolla gdaitre alin kagu nga dba ai giti che alin, ene che Chube Kirolla gai ulia giti che joge toi diali chui tangle Chube ole nga ngaña giti. Chube agedu no ene che alin gire e giti sugedale chege trate Chube ta no no che ole ulia. 10 Chube talla no no che ole ngeru chege, che bebi mo ta dbe no Chube ole Chube nu mo ta gbaba no che ole ngeru, Chube tale agedu no che ulita alin ama ta no no che ole, malen Chube mo Kirolla gdaitre alin kagu nga dba ai giti mo kete gwaleda kruge che agedu me no giti, ene Chube Kirolla giti che ulita me chegedale jiske che agedu me no giti gdale. 11 Ba ulita cha bitalla Jesucristo giti, ba ole cha gerule, Chube no che ole malen ama agedu no che ulita alin ene kaire che mo ta dbadale no no daba na ole ongoru ongoru Chube mo ta du no che ole kare. 12 Chubedi ni bitaite che nu gwageba agwa che mo ta gbe no daba ole toi no daba ole ongoru ongoru Chube takalin che toi kare, gire ene suge chege ulia Chube Oña kle toi che tale che ta gbe ma no gwangerugu chui kaire kairege, kaire che mo ta gbe no daba ole diali, ene nga suga noare Chubedi ama talla no kle che ta gbe toi age no trate ama takalin kare. 13 Suge trate chege Chube mo Oña gbu che tale malen suge chege trate ulia che kle toi Chube talla ole che Chubenu, suge chege kaire Chube Oña giti che kle toi ama takalin kare, Chube Oña che ta gbe suge Chube kle diali che ole che kira gbanga. 14 Cha ulita gwagedu mo gwagwa giti Jesucristodi nga dba ai giti, cha chagedu ama ole ule, cha ulitage sugedu trate Chube Jesucristo Ñenua Chube ama kagu nga dba ai giti kwian ulita jwanngale siere ji chugege age me no gdale, ene kwian ñage toi Chube ole. 15 Kwian bai kaire gerule Jesucristo giti Jesucristo Chube Kirolla, kwian ene tale Chube Oña kle toi Chube Oña kle ama ta gbe gerule ene no Jesucristo giti, kwian e kle mo ta gbe ulia toi Chube ole Chube kle toi ama tale. 16 Chube Oña giti Chube che ta gbe chke suge trate ulia Chube no che ole. Chube ta dbe no diali kwian ulita ole, kwian bai kaire toi Chube talla giti no daba na ole, kwian ene kle toi Chube talla ole Chube kle toi ama tale, kwian ene Chubenu. 17 Jesucristo Chube Kirolla toidu nga dba ai giti ama mo ta gbu no kwian ulita ole, ene kaire che Chube olia mo ta gbale chege nege tangle toi no kwian ole Jesucristo toidu kare. Ene chui bdaglige ji chuge chuia be chke che me ta dbadale kennga Chube ngeru che ta me sugedale moge jiske Chube gwa giti che agedu me no giti gdale. 18 Che ulita bai kaire Chubenu chége sugedale Chube no trate che ole malen che me mo ta dbadale kennga Chubedi ni tañachuge Chube be ji gbe tirare che giti che nu ageba me no gdale. Chube no no che ole malen Chube kle ta kennga jwen siere chege. Kwian bai kaire kle mo ta dbe kennga Chubedi, kwian enege me suge trate Chube ulia no ama ole Chube ama chudaboanga. 19 Ulia Chube mo ta gbu no che ole gwangerutabi malen che no Chube ole kaire che no daba na ulita ole. 20 Kwian gweale gerule: “Cha mo ta dbe no Chube ole”, gire sugeti ama mo ta dbe jainchke daba na Chubenudi, kwian ene me no Chube ole ama kle sole ama me kle gerule ulia ama no Chube ole, ama me no mo salengwli ole kaire ama me no Chube ole. Mo gwagwa giti kwian kle gwage dabadi, ama kle mo ta dbe me no daba ole ama me ñage gerule ama no Chube ole, ama me ñage gwage Chubedi mo gwagwa giti ama kle gwage dabadi kare, ¿mine kwian ene ñage gerule ama no Chube ole? Che mo ta dbe no Chube ole kaire che mo ta dbadale no daba Chubenu ole. 21 Jesucristo geru jigu gbaba che alin mo ta dbe no daba ole giti, geru e gerule ene: Kwian bai kaire mo ta dbe no Chube ole kwian ene mo ta dbadale no kaire daba Chubenu ole.
1 Kwian ulita bai kaire mo ta gbe Jesucristo gai ulia, suge kwian enege ulia Jesucristo Chube Kirolla Chube nu ama kagaba kwian ulita jwanngale siere ji chugege age me no gdale, kwian ene Chube olia. Kwian Chubenu ulita bai kaire mo ta dbe no Chube ole kwian ene kaire mo ta dbe no kwian na Chube olia ulita ole. 2 Che mo ta dbe no ulia che Ñenua Chube ole che age ulita ama gerule kare, gire ene kaire suge trate chege che kle mo ta dbe no daba na Chubenu ulita ole daba e Chube olia kaire. 3 Che no Chube ole gire ene che agedale ulita diali Chube gerua gbaba gerule kare. Che mo ta gbe age Chube takalin kare gire ama kle che kira gbe age ulita diali ama kirallaske ene me mno che alin toi ama takalin kare, ama kirallaske che Chube olia ñage mo ta gbe me age me no dale kwian me Chubenu kle age kare. Uñale chege che mo ta gbe Jesucristo Chube Kirolla gai mo Chugagwallale che chudaboangale gire ene che ñage chege sugekare kwian me Chubenu kle age me no ulita karege, kwian me Chubenu kle mo ta gbe age me no diali Chube dollale che dolla Satanás kle ama ta gbe age kare, Chube kiralla giti che kirachke che dolla Satanádi. 5 Ulia cha gerule ba ole, kwian ulita bai kaire kle mo ta gbe Jesucristo gai ulia Chube Kirollale, kwian ene kirachke che dolla Satanádi Chube kiralla giti, kwian ene chege kiraske toi no trate Chube takalin kare kwian me Chubenu gwa giti. 6 ¿Mine ñage chke uñale chege Jesucristo ulia Chube Kirolla? Ñage suge trate chege ene ai giti: Chube Jesucristo kaitu nate ama Kirollale Jesucristo ñere chiske gire, Chube kerua nga ngaña giti sugedu kwiange nga dba ai giti chui ege gerule ulia Jesucristo ama Kirolla. Chube me gerudu Jesucristo giti Jesucristo ñeangu chiske chuiage alin allabi, agwa kaire Chube gerudu nabitaite ama Kirolla giti Jesucristo bebi jogekeda kruge gire. Chube Oña gerunga ulia diali ama kaire kle kwian ta gbe suge Jesucristo gai ulia Chube Kirolla. 7 Geru gbamai kle Jesucristo kaite nate ulia Jesucristo Chube Kirolla, geru gbamai ai kle gerule ene: Bitaite Chube kerua sugedu kwiange gerule Jesucristo giti Jesucristo ñeange chiske chuiage kaire bitabokedale Chube gerudu Jesucristo giti Jesucristo kledu bedre jogekeda kruge gire, kaire bitamaidale Chube Oña kle kwian ta gbe suge Jesucristo ulia Chube Kirolla. Geru ai gbamai Jesucristo giti kle gerule salengwli Jesucristo kaite nate Jesucristo ulia Chube Kirolla. 9 Che kle daba na keruchuge geru gweale ama kle trage giti che kle geru e keruchuge che kle geru e gai blikare ulia mo tale, che ñage Chube gerua ulia Chube Kirolla giti gai ma no blikare mo tale, Chube gerua Jesucristo giti ma ñanaske kwian geruage che Chube gerua gadale ma ulia kwian geruage geru e kle gbaba Jesucristo Chube Kirolla giti. 10 Che ulita bai kaire kle Jesucristo gerua gai ulia chege suge trate mo tale Jesucristo ulia Chube Kirolla. Agwa kwian bai kaire me kle Chube gerua Jesucristo giti gai ulia, kwian ene kle Chube gbakalin chege sole kare, kwian e me kle geru no Chube Kirolla giti gai ulia, ama kle Chube gerua Jesucristo giti gai geru ngwale kare. 11 Ai geru ulia Jesucristo giti che ulita alin: Chube che gbe toi diali chui tangle ama ole che Chube Kirolla Jesucristo gai ulia giti. 12 Kwian bai kaire Jesucristo gai ulia mo Chugagwallale kwian ene Chubenu toi diali chui tangle Chube ole, agwa kwian bai kaire me Jesucristo Chube Kirolla gai ulia mo Chugagwallale, kwian ene me Chubenu me ñage toi Chube ole chui tangle. 13 Cha kle chada ai dege ba ulita alin bai kaire Chube Kirolla gai ulia mo Chugagwallale, ene suge trate bage ba ulita Chube Kirolla gaba ulia giti ba be toi diali chui tangle Chube ole nga ngaña giti. 14 Che ta kle ule Chube ole che ta kle biale age ulita Chube takalin kare gire che kle mo ta gbe gerule Chube ole lle gweale giti, sugedale chege ulia Chube be che keruchuge ama be age che alin be che chudaboi ulita che kle kade amage kare. 15 Uñale chege Chube kle che keruchuge che kle gerule ama ole gire, kaire ene agwe uñale chege Chube klebi age no che alin lle bai ulita che kle kade amage giti. 16 Chege chke uñale daba che bitalla Jesucristo giti gweale kle chage age me no gweale Chube dollale che gwage agwa ulia ama me kle mo ta gbe mo tke dole Chube ole chui tangle dale, gire daba e giti che gerudale Chube ole gire ene Chube be daba e ta me no blite be daba e gbe toi no chui tangle diali ama ole. Agwa kaire agwe chke uñale chege daba gweale kle mo tke dole Chube ole chui diali dale alin daba e kle age me no gweale mo gbe sugekare Chubege ama kle Chube gerua gai geru ngwale kare. Cha gerule ba ole, daba e kare giti ba me gerule Chube ole, daba e kle age giti ama kle mo gbe chege sugekare Chubege diali dale alin ama chege salengwli kwian jogebakeda kare Chube gwa giti. 17 Ulia age ulita me no, e diali Chube dollale, e diali me no Chube gwa giti. Agwa kaire age me no gweale giti kwian ñage tien gitiru ama mo ta blite naskuni Chube ole giti, gire ene ama me chege diali sugekare Chubege me chege kwian jogebakeda kare Chube gwa giti. 18 Uñale chage kwian mo ta gbaba Chube gai ulia kwian ene me mo ta gbe age me no Chube dollale, Chube Kirolla Jesucristo kwian ene ta manade no ama kle kwian ene kira gbe diali malen che dolla Satanás me ñage age me no kwian ene ole kirachke kwiandi, Chube ma kiraske che dolla Satanáge. 19 Uñale trate chege che Chubenu Chube che Chugagwalla che Chube gau ulia giti, agwa kwian me Chube gai ulia Satanás kwian ene ulita chugagwalla kwian ene age me no tanre Satanás takalin kare diali. 20 Che ulitage uñale trate Jesucristo Chube Kirolla chiu nga dba ai giti che alin, ama che ta gbu suge trate Chube mine, Jesucristo giti che Chube ulia uñe, Jesucristo giti suge trate chege Chube e Chube ulia. Chube Kirolla Jesucristo giti che Chubenu kaire che Jesucristonu, Jesucristo giti che be toi diali chui tangle Chube ole Jesucristo ole nga ngaña giti. 21 Ba ulita cha olia Jesucristo giti, cha no no ba ulita ole, cha gerule ba ulita ole, ba ulita mo ta manadale no ba me mo ta gbe chage geru ngwale nate ba me lle oña ngwale gai mo chubeale, ba ulita mo ta gbale Jesucristo ole. Geru ai ene ulita cha chada degu ba kwian Chubenu ulita alin. Che kle meni.
1 Cha kwian Chubenu chugagwalla juma cha chada ai dege ba ulita mne gdaite Chube nu gaba alin: Cha no no ba ulita ole, me cha alin no ba ulita ole, kwian na tanre kaire nu Chube gerua gaba ulia, ama ulita no no ba ulita ole. 2 Cha no no ba ulita ole ba Chube gerua ulia gau giti, che geru ulia Jesucristo giti molen mo tale kaire geru e be chege che ole diali chui tangle. 3 Cha takalin Chube che Ñenua kaire Jesucristo Chube Kirolla ama age no ba ulita alin, cha takalin ama tai dage ba ulitage kaire ama ta no kete bage toigda nga suga no ole, ene ba mo ta gbe toi ulia no trate kaire ba mo ta gbe no daba na ole. 4 Nga suga noare chadi ba gweale giti ba gweale kle toi no trate Chube gerua gerule kare, Chube che Ñenua geru ketu chege toi ama takalin kare giti, geru e kle degaba kare ba kle toi, malen e giti nga suga noare chadi ulia. 5 Cha no no ba ulita ole ba cha bitalla ulita Jesucristo giti, cha gerule ulia ba ole, cha takalin che ulita Chubenu mo ta dbe no daba na ole ongoru ongoru. Geru ai cha kle dege ba alin, geru ai me jagere dale, geru ai sbali kledubi gbaba geru ai amaña che keruchugubi gwangea che Jesucristo gerua gau chuiage. 6 Che no Chube ole che agedale ulita ama takalin kare ama gerua kle gbaba gerule kare. Geru e ba nu keruchugababi gwangea, geru e kle gerule che mo ta dbadale no Chube ole kaire mo ta dbe no daba na ole ulita. 7 Ulia cha gerule ba ole, nga ulita nga dba ai gitige kwian tanre daba tkanga tangle geru ngwale me uliage kle chage kwianske kwian anblite geru ngwalege, kwian e ulita kle gerule Jesucristo me chku dale ulia kwian kare nga dba ai giti. Kwian ene kare ulita me kle gerule ulia trate Jesucristo giti ama kle kwian anblite ama kle mo ta gbe age Cristo dollale. 8 Malen cha gerule ba ulita Chubenu ole, ba mo ta gbadale toi ta giti kwian e karege, Chube be age no ba alin ba toidu no ngeru ñanale, agwa ba kwian e kare gerua gai ulia, Chube mi age no ene ba alin. Agwa ba toi no ta giti Chube takalin kare me geru ngwale gai ngwange, gire Chube be age no ulita ba alin ba toidu no ñanale. 9 Agwa ba joge siere Jesucristo geruage gire ene ba kle joge siere Chubege kaire agwe. Ba mo ta gbe no geru ulia Jesucristonu giti, ene ba ta be chege Chube Jesucristo Ñenua ole kaire ba ta be chege Chube Kirolla Jesucristo ole ule. 10 Kwian gweale bai kaire joge basale badi agwa ama me geru ulia Jesucristo giti gai ulia ama me kle Chube gerua ulia Jesucristo giti kete kwian nage, kwian kle chage geru ngwale dbe ba me kwian ene gai ngwange no ba ngwadi gwa ni ba gerudale ama ole: “Noare ba chku aini cha ngwadi.” 11 Ulia cha gerule ba ole, ba bai kaire me geru ai gai ulia cha kle gerule kare ba be mo ta gbe skate kwian kle chage geru ngwale dbege gerule kwian ene ole: “Noare ba chku aini cha ngwadi.” Ba kwian e gai ngwange ene gire ba kle age me no kwian e kle age kare, ba kle ama chudaboi chage geru ngwale dbe. 12 Ulia geru na tanre kle tragadale ba ole, agwa cha me ta geru e degakalin ulita chada giti. Ma no cha kle tañachuge joge agali ba kle ngwadi gerule ba ole, gire ene nga be suga no no chedi ulita salengwli. 13 Ba bitalla ulita Jesucristo giti kle aini Chube nu ama gaba mau alin Chube ba gau kare mau alin, ama ulita kle gbi kage ba alin chada ai giti. Geru ai ene ulita cha chada degu ba cha bitalla Jesucristo giti ulita alin. Che kle meni.
1 Cha kwian Chubenu chugagwalla juma cha chada ai dege ba cha skatemanalla no kada Gayo alin: Cha no ba ole ulia cha daballa Jesucristo giti Gayo. 2 Ba cha daballa no Jesucristo giti, cha diali gerule Chube ole ba giti. Ulia uñale chage ba kle mo ta gbe no Chube ole, e kare ene cha takalin ba toi no, cha takalin ba me oga agwa diali cha takalin ba chege toi no. 3 Ulia cha gerule ba ole, nga suga noare chadi ba giti, che daballa gweale Jesucristo giti chku aini cha kle ngwadi basale chadi gire ama geru tragu ba giti cha ole, ba diali kle mo ta gbe Jesucristo gerua ulia giti, ba kle toi no trate ulita Chube gerua ulia gerule kare, geru ketre chage ene ba giti, e giti nga suga noare ulia chadi ba giti. 4 Geru chke uñale chage cha olia gweale Jesucristo giti kle mo ta gbe toi no ulita Chube gerua ulia gerule kare, e giti nga suga no no chadi, malen e giti nga suga no no chadi ba giti. 5 Ba cha daballa Jesucristo giti, noare ba kle mo ta gbe diali daba ulita Jesucristo gerua dbanga chudaboi, ba kle ama gai ngwange no mo ullage, daba Chubenu bai kaire kle chie nga nage ni ba ama uñe agwa ba kle mo ta gbe daba ene chudaboi no. 6 Daba amaña Jesucristo gerua dbanga chku aini ama gerudu no ba giti daba Chubenu aini ulita gwa giti ba ama gau ngwange no giti, ama gerudu no ba giti cha ulita ole, ama geru ketu cha ulitage ba giti ba kle age Chube takalin kare ba ama gau ngwange no no ba ullage ba ama chudabo, ene ama ñadu joge dare Chube gerua Jesucristo giti dbe. Cha gerule ba ole, ba mo ta gbe gwangerugu daba Jesucristo gerua dbanga chudaboi no diali lle ulita giti Chube kle ba ta gbe age kare daba chudaboi, ene ama ñage joge nga nage Jesucristo gerua dbe baini kaire Chube kle ama ta gbe joge ngwadi. 7 Ulia daba Chubenu e kle chage geru Jesucristo giti kete kwian ulitage ama kle lle boi no Chube alin, kaire ama kle mo ta gbe chudaboi kade lle ulita giti daba Chubenu alinge, ama me kle lle kade kwian me Chubenuge mo alin. 8 Malen e giti cha kle gerule ba ole, che daba Jesucristo gerua dbanga manadale no ama chudaboi diali lle bai kaire ama me molen, che ama chudaboi lle giti igi giti che kle ama gatedi Chube gerua Jesucristo giti dbe ule kare kwian nage, ene daba e ñage joge baini kaire geru ulia dbe kwiange. 9 Cha kaire agwe chada degu kwian Chubenu ulita alin kle mo lite ule ba ole Chube geruadi, cha chada kagu ba ulita alin agwa che daballa Chubenu kada Diótrefes me tadukalin age cha chada degu kare. Ama diali ta kwian ulita kagakalin ama chegekalin kwian ulita chugagwallale malen ama me tadu cha chadalla batakalinnga dale, ama me kle cha chada degu gai dage. 10 Malen e giti cha be joge chke ba ulita ngwadi gire cha be ka boi mno tanre Diótrefes ole ama kle mo ta gbe chagé age giti, ama kle geru jinade ngwale chadi. Ama me kle age ene alin allabi agwa ama kle age tanre me no. Ama me takalin daba na Chubenu gakalin ngwange no ama ngwadi gwa, kaire kwian na bai takalin daba Chubenu gai ngwange no mo ngwadi gire ama me kle daba e chuge ngwadi daba na gai ngwange daba chudaboi. Ama takalin daba chege ama kare ulita age ama kle age kare. Kaire agwe daba gweale me kle Diótrefes kerua gai dage agwa kwian kle age no daba Chubenu chudaboi gire Diótrefes kle kwian daba chudaboanga e mlie siere u mo litangwage, Diótrefes me takalin kwian daba chudaboanga e chege mo lite ule daba Chubenu na ulita ole. 11 Ba cha daballa no Jesucristo giti, ba ole cha gerule, ba me agedale Diótrefes kle age kare. Ba me sui jwen amage age me no ama kle age kare, ma no ba sui jwen daba agenga noge. Kwian bai kaire kle age diali no Chube takalin kare kwian ene Chubenu ulia, agwa kwian bai kaire kle age me no diali Chube dollale kwian ene me Chubenu dale ama me Chube uñe. 12 Agwa cha gerule no ulia daba Chubenu na kada Demetrio giti ama kle toi no trate Chube takalin kare, ene chke uñale daba ulitage Demetrio kwian Chubenu ulia. Kwian Chubenu ulita kle gerule no Demetrio giti kle ama gai dage. Cha kaire agwe kle Demetrio gai dage kle gerule no ama giti, uñale bage cha gerule ulia diali cha me gerule ngwale dale. 13 Cha gerule ulia ba ole, geru kle tanre cha ole ketadale bage, agwa cha me takalin geru e kete bage degaba chada giti. 14 Cha kle mo ta gbe suge moge me sbali cha be gwage badi mo gwagwa giti agali gire chui ege cha ñage gerule ba ole agali ulita. 15 Kaire cha takalin ba chege toi diali nga suga no ole. Ba skatemanalla ulita kle aini ule cha ole ama gbi kage ba alin chada ai giti, kaire ba gbi kade cha alin cha skatemanalla ulitage kle ba ngwadi. Geru ai ene ulita cha chada degu ba alin cha skatemanalla Gayo. Che kle meni.
1 Cha Judas chada ai dege ba kwian Chubenu ulita alin: Cha Santiago daballa, cha lle boanga Jesucristo alin, cha gbi kage ba ulita alin chada ai giti. Chube che Ñenua no no ba ulita ole, ama ba gau mo alin, kaire Jesucristo kle ba ulita ta manade no ene ba ulita me age me no. 2 Cha takalin Chube ba ulita ta gbe suge ma ngle diali Chube tai dage ba ulitage, kaire cha takalin Chube ba ulita ta gbe nga suga no ole Chube ba ulita ta gbe mo ta dbe no Chube ole daba na ole. 3 Ba cha bitalla muirenu onbrenu Jesucristo giti, cha no ba ulita ole, cha ta chada degakalin ba ulita alin Jesucristo agedu giti ba ulita alin kaire cha alin, Jesucristo giti che ulita tiun gitiru ji chugege che age me no gdale. Cha ta chada degakalin e giti ba ulita alin agwa suge chage ma no cha gerule ba ole chada ai giti ba ulita mo ta gbadale kiraske diali geru Jesucristo gitidi. Ba ulita mo ta gbu geru e gai no gwangea ba mo ta gbadale no gwangerugu, ba me mo ta blite. Chube agali geru ulia Jesucristo giti ketu kwian amanuge tragadale kwian na ole, geru e amaña chku uñale bage, geru e me jwlite, geru e chege diali kwian ulita chudalla alin. 4 Nege kwian onbre gweale me no me no kle ba ulita Chubenuske, ama mo ta gbu joge skwlenre baske ba tke tangle, ama age kwian no kare ama gerunga geru ulia giti kare, agwa ama me kwian ene, ama kwian agenga me no me no, ama daba tkanga tangle geru ngwalege, ama gerule Chube no tanre diali kwian ulita ole Chube me ji gbe kwian alin malen kwian ñage age me no kwian takalin kare Chube mi age ama ole. Kaire kwian ene mo ta gbe Jesucristo che mauña che Chugagwalla gdaitre alin dollale, ama me Jesucristo gai mo Chugagwallale. Chube gerua degaba unsuialin gerule kwian ene giti, kwian ene alin ji chuge kweri kle, bdagli kwian ene be chege ji chuge tirare diali chui tangle. 5 Uñale ba ulitage Chube agedu mine kwian unsuialin ole, agwa cha ta ba ta gbakalin tachke suge ma no Chube agedu giti unsuialin kwian ole: Chube kwian unsuialin israelita chudalla ulita jun siere nga Egiptoge, e suiale Chube agedu no kwian e ulita alin agwa kwian gweale me Chube gau ulia, Chube kwian ene ulita kagunga. Ene kaire nege kwian bai kaire me Chube gai ulia Chube be ji gbe kwian ene alin. 6 Lle boanga gweale Chube alin nga ngaña giti me mo ta gbu age Chube takalin kare agwa ama mo ta gbu age agali sugekare Chubege age me no, Chube ama gbu skage ogaba nga jere jereske, chui tangle ama kle nga jereske ogaba chui bdaglidale alin Chube be ji gbe chuiage gbale ji chuge ma kweri diali chui tangle, ama mi ña joge siere ji chugege. 7 Lle boanga Chube alin nga ngaña giti agedu me no me no, ene kaire kwian una Sodomamu una Gomorramu kaire una na tanre kodi una boke kweri ege ulita agedu me no. Kwian ulita una ege mo ta gbu age me no me no diali, muinga tanre kwian onbre tanre mo chugu ngwadi mo chuge ke giti, muinga na tanre me takalin onbrege, muinga jritedu mo muire salengwlidi, kaire kwian onbre na tanre me takalin muingage, kwian onbre jritedu mo onbre salengwlidi. Age ene gdale kwian ji chugu jita kote kwian ulita kugedu jita kote una ege. Chube agedu ene kwian agenga me no ole unsuialin, e chege gda uñale kwian na ulita agenga me no be toi chui bdagli ngnagu alin ta gbagda. 8 Nege kwian daba tkanga tangle geru me uliage kle ba ulita Chubenuske, ama ulita kle age tanre me no salengwli kwian una Sodomamu una Gomorramu agedu kare, ama kle mo chuge ngwadi age me no me no diali, kwian ene gerule tañachuge kare, ama mo ta dbe me no Chube ole me Chube gai dage mo Chugagwallale, ama gerule me no me no lle boanga no Chube alin nga ngaña gitidi. 9 Lle boanga ulita nga ngaña giti Chube alin gdaite kada Miguel, ama lle boanga na ulita chugagwalla, Miguel kira batu che dolla Satanás ole Moisés jaba gdale, Miguel Chube gau dage malen Miguel me ka bo Satanás ole me Satanás oña bo gbale jiske, agwa Miguel gerudu Satanás ole: “Cha ba jige Chube kote Chube age ba ole Chube takalin kare ba kle age giti.” Miguel me mo ta gbu age ama tadukalin kare Satanás ole agwa Miguel che dolla Satanás jigu Chube kote, Miguel kweri ñadu age agwa me agedu, ama Chube gau dage. 10 Agwa kwian daba tkanga tangle geru ngwalege me Chube gai dage Miguel Chube gau dage kare, me ene, kwian daba tkanga tangle geru ngwalege age ama ta agekalin kare ni kwachie gerule me no lle boanga no Chube alin nga ngaña gitidi, kaire ama gerule me no geru ulia ama me uñedi, ama me mo ta gbakalin geru ulia uñe ene suge amage ama agedale mine Chube takalin kare, kwian ene ta me bda ta me kare, kwian ene mo chuge ngwadi toi age diali ama takalin kare salengwli bda toi age bda takalin kare, ni tañachuge mo giti be boi giti bdagli, kwian ene be joge sugekare Chubege ama kle age me no gdale, 11 ama be ji chuge tirare ama kle age giti. Kwian ene kle mo ta gbe salengwli Caín talla kare age diali ama ta agekalin kare. Kaire kwian ene kle age Balaam agedu kare geru me ulia kete dabage, kwian ene kle mo ta gbe age sugekare Chube takalin karege, ama tañachuge Balaam tañachugu kare igi tanre gai ama age ñanale mo alin. Kaire kwian ene kle mo ta gbe age salengwli Coré talla kare, Coré me tadu Moisés gerua gbakalin gdadi, Coré mo ta gbu age ama agali tadu agekalin kare, e gdale Coré kaire kwian ulita kledu ama ole jokeda, ene kaire kwian daba tkanga tangle geru me uliage me ta Chube gerua gbakalin gdadi, ama age ulita ama ta agekalin kare, daba tkanga tangle kle baske talla e kare ulita ole, Chube be ama gbe ji chuge tirare. 12 Kwian daba tkanga tangle geru ngwalege kle age me no me no baske, ba ulita Chubenu kle chui ollade ba kle bligda ngle dodade blidale ule, gire kwian ene kle joge chke baske chui ollade ba ulita ole ule, ama me mo ta dbe no, ama me ibule bligda ngle gai mo alin gutadale gballa, ama agenga me no me no, ama ta me no diali. Kwian ene salengwli bogakwa kare, bogakwa kle gwaluge noi ngwange noi gbale boi agwa noi me boi, mleuda bogakwa e dbe gire noi me boi. Ene kaire kwian daba tkanga tangle geru ngwalege kle gerule be age no gire ama me age. Kaire kwian ene gli kare, gli me gbachie gli gbachie suiage, gli e jwanbakeda, gli e jogebada, me ñage gbachie. Ene kaire kwian daba tkanga tangle geru ngwalege kle age sugekare Chubege me ñage age no, ama be jogeda sugekare Chubege. 13 Kwian daba tkanga tangle geru me uliage, ama mo ta dbe age me no sugaska diali, kwian ene salengwli ble chuga kare, ble chuga kle chite tanre, ble chuga kle jolo sugaska mlienga kedagu ble kagda giti. Kaire kwian ene salengwli beu jogebanga kare, beu ene joge siere beu kle ngwadige gire beu chege sugekare gballa. Ene kaire kwian daba tkanga tangle geru ngwalege, kwian ene mo ta gbu joge siere Chube gerua uliage, kwian ene be ji chuge kweri sugekare Chubege diali chui tangle. 14 Adán oindalla bitagukege tangle kada Enoc Chube ama ta gbu suge gerule mo alin kwian unsuialin ole kwian daba tkanga tangle geru ngwalege ulita be boi bdagli giti, Enoc gerudu: “Ba be gwage Chugagwalla Chubedi, ama be chie ule lle boanga mo alin nga ngaña giti ngle ngle ole, 15 ama be chie gerule kwian ulita giti bai jiske bai me jiske, ama be kwian ulita agenga me no gbe jiske kwian agedu me no ulita gdale, kaire ama be kwian gbe jiske kwian gerudu me no ulita Chube dollale gdale, Chube be kwian ene ulita gbe ji chuge tirare.” Chube Enoc ta gbu gerule ene kwian me no ene giti. 16 Kwian daba tkanga tangle geru ngwalege kle ba ulita Chubenuske, ama ulita kwian gerunga me no diali, ama kwira me ngwedi, diali ama kle gerule lle ulita giti me ta no ole, kwian ene tañachuge mo alin giti age ama ta agekalin kare, ama gerule no kweri mo giti, kaire ama gerule no daba na giti ene daba na ta jwlite ama ole age no ama alin ama takalin kare. 17 Kwian daba tkanga tangle geru ngwalege kle age ene baske talla me no ole, agwa ba ulita me kle age ene. Ba ulita muire onbre cha bitalla Jesucristo giti, cha no no ba ulita ole, ba tachkedale cha ulita kwian che Chugagwalla Jesucristo gerua ketanga gerudu giti, 18 cha ulita gerudu ba ulita ole: “Chui bdagli ngnagu kwian tanre me no be kle, kwian be Chube gai ngwale gidagda, kwian ene be toi age ulita me no ama takalin kare.” 19 Kwian ene me Chubenu, Chube Oña me kle ama tale me kle ama ta gbe age Chube takalin kare malen kwian be age diali ama agali ta agekalin kare, kwian ene be kwian na ta gbe tañachuge nganake, ene kwian na joge siere geru uliage gire age ama gerule kare. 20 Cha gerule no no ba ulita ole cha bitalla Jesucristo giti, ba mo ta gbadale trate diali chage ta giti Chube ole, ba mo ta gbadale ma no diali Chube gerua gai ulia, ba Chube Oña chugale ngwadi ba ta gbe suge, ene ba ñage gerule no Chube ole Chube takalin kare. 21 Ba tachkedale Chube no no ba ole, ba me mo chugale ngwadi joge siere Chube no ba olege. Che Chugagwalla Jesucristo tai dage ba ulitage, chui be chke gire ama be ba ulita dbe toi ama ole diali chui tangle, ba mo ta gbadale chui e manade ngwange diali ta no ole. 22 Daba gweale kle baske ama kle kwian daba tkanga tangle geru ngwalege keruchuge gire me suge dabage geru bai ulia, ba daba ene chudaboadale, ba ama ta gbadale naskuni geru uliadi. 23 Daba gweale na kledu baske gire ama jo siere chagé kwian daba tkanga tangle geru ngwalege nate, ba ka boadale daba ene ole ta no giti ama kle age giti, ene ama mo ta blite geru ulia gaini, ene ama me jogenga sugekare Chubege. Daba gweale na kledu baske gire ama jo siere, ama mo ta gbu geru ulita ulia dollale, daba ene kle mo ta gbe diali age me no ama takalin kare, ba taidale dage ta olidale daba ene giti, ba daba ene chudaboadale ta gbeni naskuni geru uliadi ta giti, ene ama me ñage ba anblite mo ole ama kle age kare. 24 Chube che ulita amanu jun siere ji chugege che agedu me no gdale che Chugagwalla Jesucristo giti, Chube e amaña ba chudaboi ba kira gbe ba manade, ene ba me joge siere amage age me no ba takalin kare, ene ba kle biale joge toi ule ama ole ama kle ngwadi ta no trate nga suga no ole. Chube no no, Chube kweri, Chube kira molen kweri, Chube kiralla me jwlite, Chube kiralla unsuialin, Chube kiralla amaña nege, kaire Chube kiralla amaña chege gwangerugu chui tangle. Che ulita amanu gerudale no ama giti diali. Ene nobi. Geru ai ene ulita cha Judas chada degu ba kwian Chubenu ulita alin. Che kle meni.
1 Geru ai ulita kle degaba chada ai giti kle gerule be boi chui bdagli ngnagu giti, me sbali e be boi ulita. Chube geru ai gbu chke uñale Jesucristoge, Jesucristo tadukalin geru ai chke uñale kwian ulita ama gerua gangage malen Jesucristo lle boanga Chube alin nga ngaña giti kagu gerule cha kada Juan ole cha ta gbe ulita chui bdagli ngnagu be boi giti, lle boanga Chube alin e cha ta gbu chui e ulita giti ene cha Juan ñage geru ai jige degaba kwian ulita Jesucristo gerua gaba ulia alin ene chke uñale kwian ulitage chui bdagli ngnagu be boi giti, lle boanga Chube alin giti Jesucristo geru tanre gbu chke uñale cha tale. 2 Cha Juan chada ai dege cha gwagedudi ulita giti mo gwagwa giti kaire geru Chube gerudu giti cha ole, e ulita giti cha chada dege chada ai giti. Jesucristo cha ta gbu suge geru ulita Chube gerudu cha ole giti geru e ulia. 3 Kwian ulita bai kaire chada ai batenga nga be suga no kwian enedi chada ai giti, kwian ulita bai kaire geru ai keruchuge mo olodi, kwian enedi nga be suga no Chube gerua kle degaba chada ai giti ole. Kaire kwian ulita bai chada ai batenga kaire kwian ulita bai kaire geru ai keruchuge kwian ene ulita Chube gerua ulita degaba chada ai giti gbadale gdadi no diali. Chkedale uñale kwian enege geru ulita kle degaba chada ai giti chuia kle kodi, me sbali be boi ulita geru ai kle degaba gerule kare. 4 Cha Juan kle chada ai ulita dege Chube talla giti ba ulita kwian Chubenu Jesucristo giti mne gdaguke toinga nga Asiamu alin, cha gbi kade ba ulita alin chada ai giti. Cha takalin Chube che Ñenua age no no ba ulita alin kaire cha takalin Chube che Ñenua ba ulita ta gbe nga suga no ole. Chube amaña klebi lle ulita gwangeage, kaire ama kle nege tangle kle chui diali dale alin. Kaire Chube Oña kle Chube ole Chube che Chugagwalla kle toiba dba ngwadi nga ngaña giti, Chube Oña no trate ulita, cha takalin Chube Oña age no ba alin ba ta gbe nga suga no ole. 5 Kaire cha takalin Jesucristo age no ba alin ba ulita ta gbe nga suga no ole. Jesucristo kledu toi nga dba ai giti kwianske gire ama diali gerudu salengwli ulita ama Ñenua Chube ama kagu gerule kare. Jesucristo jokeda gire Chube ama jaba gbu chkeni gwade ngerutabi kwian jaba na darege, ama mi jogekeda dareni ama be chege toi chui tangle diali. Kaire ama kwian chugagwalla ulita nga dba ai giti Chugagwalla kweri. Jesucristo no che ulita ole, malen ama mo chugu ngwadi mo boange daga ngwale ama jokeda kruge che age me no giti. Che ama gerua gai ulia gire ene che tien gitiru ji chugege che agedu me no gdale. 6 Jesucristo che gau mau alin ama chegu che Chugagwalla kweri, Jesucristo che gau gerungale ama Ñenua Chube ole daba na alin lle boi no Chube alin Chube takalin kare. Cha takalin kwian ulita gerule no chui tangle diali Jesucristo giti Jesucristo agedu no ulita giti, cha takalin kwian ulita Jesucristo gai mo Chugagwallale Jesucristo gbe kweri kwian na gwa giti ulita. Ene nobi. 7 Cha gerule ulia ba ole, Jesucristo be chieni bogakwaskeni nga dba ai giti gire kwian ulita be gwage amadi, kwian bai agedu Jesucristo dollale Jesucristo guda Jesucristo kledu nga dba ai giti gire, kwian e kaire be gwage Jesucristodi chieni. Kwian nga ulitamu nga dba ai giti be nga dbe suga olire modi chru ole kennga Jesucristo chuia be chke gire. Ai ulia be boi ulita cha kle gerule kare. Ene nobi. 8 Chube che Chugagwalla kweri ama kiraske ama ñage age ulita, ama klebi lle ulita gwangeabi, kaire ama kle nege tangle be kle chui diali dale alin, Chube ai amaña kle gerule ene: “Cha Chube cha lle ulita Chugagwalla gwangea ngerutabi, kaire cha lle ulita Chugagwalla nege tangle, kaire cha be chege lle ulita Chugagwalla chui bdaglige diali chui tangle.” Chube kle gerule ene mau giti naskuni. 9 Che ulita Jesucristo gau mo Chugagwallale gire ene Jesucristo giti che ulita Chubenu. Cha Juan ba daballa Jesucristo giti kaire agwe kle boi daga ngwale ba ulita Chubenu kle boi kare Jesucristo gerua gai gdale. Jesucristo kle kira kete che ulitage ene che ñage jage boi daga ngwaleske, ene che ñage chege ta no ole che kle boi ulita tanre daga ngwalege. Jesucristo cha ta gbu geru ulia Chubenu giti gire cha Jesucristo gerua du gdale cha dule skadi ngadrega bleske ka jwankle Patmoge. 10 Nga ege chui undege chuia kwian Chubenu Jesucristo giti kle mo lite chuiage, chui ege Chube Oña chku chadige, cha chegu ama kirallaske. Gire cha nate cha geru keruchugu gerule cha ole kweri kiraske salengwli lle ngwanegda ka jwankle trompeta kle gdade kare. 11 Geru e sugedu chage gerule ene: “Ba Juan chada degadale chada giti lle ulita ba kle gwagedi nege kaire lle ulita ba be gwagedi dare ba degadale ulita. Ba chada e kagadale kwian Chubenu kle mo lite Chube geruadi mne gdaguke toinga una gdagukege nga kweri Asiage alin, ba chada kage kwian Chubenu una gdaguke ai kare alin: kwian Chubenu toinga una Efesoge, kwian Chubenu toinga una Esmirnage, kwian Chubenu toinga una Pérgamoge, kwian Chubenu toinga una Tiatirage, kwian Chubenu toinga una Sardige, kwian Chubenu toinga una Filadelfiage, kwian Chubenu toinga una Laodiceage. Kwian Chubenu una e ulita gdaguke alin ba chada degadale lle ulita ba kle gwagedige giti, ba chada dege ba kage kwian Chubenu una emu ulita alin.” 12 Keru sugedu ene chage gerule cha nate gire cha tienduda mo nate chema kle gerule cha ole gire cha gwagedu lle gdaguke orole dodaba jichra gbangwa ngwadi, 13 lle e ulita gdagukeske tainkwli bonga cha gwagedu gdaitedi medu kwian kare cha gwage, ama mo ngama tkaba ñometra jeikeske ngaña joge dba ama serage ñometra bitaitre alin jeike llagli. Bonga tangle ama mo lugaba giska oro kare giti kaire ta giti tangle joge ngaña kudegda batreti lle oro kare kwa kweri kle gbaba. 14 Kaire ama chugaga jutre noare salengwli dagli jutre kare salengwli bogakwa kle chege jutre kare kaire ama gwagwa gwadenga tanre salengwli jita kare. 15 Ama sera gwadedunga no salengwli lle mno kadakle bronce mliakle jige kle gwadenga kare kaire ama kerua sugedu mno kweri kiraske chege salengwli chi kle skwen kekwadi kle gdade kare. 16 Kaire ama ko taingwli giti beu gbaguke kledu ama kote kaire sbadi gaitre alin sbadi dau ka bonga dau degaba no no kledu ama kate. Ama gwa gwadedunga no salengwli chui chratigenga no trate kare. 17 Cha gwagedu kwiandi ene gire cha kendunga cha jo chke dba chru ole ama sera ngena kwian jaba kare, agwa ama mo ko taingwli gbu cha giti gire ama gerudu cha ole ene: “Ba me kennga, cha Jesucristo, cha amaña lle ulita Chugagwalla gwangea ngerutabi kaire cha amaña be chege lle ulita Chugagwalla chui bdaglige diali chui tangle. 18 Cha amaña kle toi gwade nege diali, cha jokeda cha jaba chkuni gwade, nege cha be chege toi diali chui tangle. Kaire cha amaña ñage kwian chuge ngwadi toi gwade nga dba ai giti kaire cha ñage kwian jwen siere nga dba ai gitige kaire cha ñage kwian jogebakeda oña kage chege toi sugekare Chubege nga kada Hadege. Cha kiraske cha ñage age ulita cha takalin kare. 19 Cha gerule ba ole, ba kle gwagedi nege giti ulita ba chada degadale kaire be boi ulita aige dare giti ba chada degadale. 20 Ba kle gwage beu gbagukedi cha kote cha ko taingwli giti, kaire ba kle gwage lle gdaguke orole dodaba jichra gbangwa cha giti tangle. Nege cha geru ñachuge ba ole lle gdaguke giti. Beu gbaguke kle cha kote chege salengwli kwian Chubenu chugagwalla gdaguke kle Chube gerua kete kwian Chubenu mne gdaite gdaite una gdagukege. Kaire agwe lle gdaguke orole dodaba jichra gbangwa chege salengwli kwian Chubenu ulita mne gdaguke toinga una gdaite gdaite kaire kaire gdagukege nga kweri Asiage.” Jesucristo gerudu cha ole ene.
1 Jesucristo gerudu dare cha ole: “Ba chada dege kwian Chubenu chugagwalla daba mananga Chube geruadi una Efesomu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha gerule ai kare ama ole: ‘Cha kle beu gbaguke ole kote mo ko taingwli giti kaire lle orole dodaba jichra gbangwa gdaguke lle eske cha kle chage, cha amaña kle gerule ba ulita kle mo lite Chube geruadi una Efesoge ole, 2 cha gerule: Chage uñale ulita ba ulita kle age giti, chage uñale ba kle mo ta gbe lle boi mno tanre Chube alin ta no ole kaire ba kle boi tanre daga ngwale Chube gerua gai gdale, ba me kle lle ba kle boi Chube alin chuge ngwadi boadale, ba kle chege diali lle boi no Chube takalin kare. Chage uñale ba me no age me no ole malen ba me kle kwian agenga me no chuge ngwadi chege baske geru ngwale dbe. Kwian gerudu ba ole ama Jesucristo gerua dbanga ba mo chugu ama ole geru ulia giti gire chku uñale trate bage ama me geru ulia Chubenu dbanga ama kle chage ta sole ole, kwian e ulitage ba me skatedu dare. Cha gwa giti skwendu no ba agedu giti kwian e ole. 3 Diali ba kle mo ta gbe chage gwangerugu kaire ba kle boi tanre daga ngwale cha gerua giti, ba me kle skwatige ba me kle olire ba kle boi daga ngwaleske, ba kle mo ta gbe chage diali gwangerugu ta no ole. 4 Agwa ulia cha gerule ba ulita ole, lle gweale me skwen no chage ba kle age giti. Ba me ta ngeru kare cha ole, ngeru badi nga sugadu no no cha giti, ba ta du no cha ole diali. Agwa nege ba me kle mo ta dbe no cha ole ba mo ta du ngeru kare. 5 Ba tañachugadale ba mo ta du ngeru kare cha ole ba tachkedale ngeru ba toidu mine cha gwa giti. Ba mo ta blitadale noni naskuni cha ole ngeru kare, ba toidale no ba toidu ngeru kare ba cha gerua gau gwangeabi kare. Agwa ba me takalin age cha kle gerule kare ba ole, cha be mo ta gbe joge ji gbe ba giti, cha be ba gbe me chege kira molen mo lite ule cha geruadi, e salengwli cha jichra jwennga ba ngeru kare. Agwa ba mo ta blite naskuni Chube ole, ene cha mi age ba ole cha kle gerule kare. 6 Agwa kaire chadi nga suga no ba giti ba kle gwage me no me no kwian geru jwannga Nicolágedi kwian ene ulita kle age me no giti ama kle chage geru ngwale nate. Kaire cha gwa giti kwian e kle age me no tanre. 7 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare. Chube Oña kle gerule ene geru ai giti: Kwian bai mo ta gbe kiraske gwangerugu Chube gerua giti me chege age me no agwa diali age Chube takalin kare, kwian ene ulita cha be gbe toi diali chui tangle nga ngaña giti Chube kle ngwadi, nga noare ege kwian e be ñage gli no gba gute, gligba e kwian gbe toi diali dale alin.’ Ba Juan chada degadale ene ulita kagadale kwian Chubenu una Efesomu alin.” Jesucristo gerudu ene ulita cha ole ama cha gbu chada dege ene kwian Chubenu una Efesomu alin. 8 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Esmirnamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha amaña lle ulita Chugagwalla gwangea ngerutabi kaire cha amaña be chege lle ulita Chugagwalla chui bdaglige diali chui tangle. Cha jokeda gire cha jaba chkuni gwade, nege cha kle gwade chui tangle diali. Cha amaña kle gerule ba ulita kle mo lite Chube geruadi una Esmirnage ole, 9 cha gerule: Chage uñale ba kle boi daga ngwale tanre cha gerua gai gdale kaire uñale chage ba me lle molen nga dba ai giti agwa ulia ba lle no no ole cha giti, Chube agedu no no ba alin cha giti. Uñale chage kwian kle gerule me no badige, kwian e kle gerule ama kwian israelita malen ama Chubenu, agwa ama kle sole ngwale, ulia ama kwian israelita agwa ama che dolla Satanánu. 10 Cha gerule ulia ba ole, ba me ta dbe kennga ba kle boi giti kaire ba be boi aige dare giti, cha be kle ba ole diali ba chudaboi. Che dolla Satanás be kwian ta me no ta gbe ba gweale cha gerua gaba tke skage cha gerua gai gdale, Satanás takalin mo chuge ba ole ene ba ta jwlite me chege cha gerua ulia gai dare. Ba be kle boi daga ngwale skage chui gbataboko allabi. Kaire kwian ñage ba gweale gweda cha gerua gai gdale agwa ba ulita mo ta gbadale cha gerua gai ulia gwangerugu kiraske gire ene cha be ba ulita gbe toi chui tangle diali nga ngaña giti Chube ole ba cha gerua gau ulia giti. 11 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare. Chube Oña kle gerule ene geru ai giti: Kwian bai mo ta gbe kiraske gwangerugu Chube gerua giti me chege age me no agwa diali age Chube takalin kare, kwian ene mi boi daga ngwale ji chuge chui bdaglige ama agedu me no gdale, ama mi chege sugekare Chubege ama mi jogekeda bitaboke tangle uñe.’ Ba Juan chada degadale ene ulita kagadale kwian Chubenu una Esmirnamu alin.” Jesucristo gerudu ene ulita cha ole ama cha gbu chada dege ene kwian Chubenu una Esmirnamu alin. 12 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Pérgamomu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha kle sbadi ole, sbadi gaitre alin sbadi dau ka bonga dau degaba no no, sbadi e kle cha kate. Cha amaña kle gerule ba ulita kle mo lite Chube geruadi una Pérgamoge ole, 13 cha gerule: Chage uñale ba ulita kle toi ngwadi che dolla Satanás kle kwian me Chubenu ta gbe age me no me no Chube dollale, Satanás kwian ta me no chugagwalla nga ege ba kle toi ngwadi. Satanás kwian ta gbu kwian gdaite kada Antipas gweda cha gerua gdale, Antipas kwian gerunga no kwian ole cha giti, e giti ama guleda una ba kle toi ngwadige, agwa ba ulita me cha gerua mliunga. Ulia ba kle mo ta gbe gwangerugu cha gai mo Chugagwallale ba kle toi cha takalin kare kwian me no Satanánuske. 14 Agwa ulia cha gerule ba ulita ole, lle gweale me skwen no chage ba kle age giti. Baske kwian gweale kle chage kwian unsuialin ka junlen Balaam gerua nate, kwian e ulita kle age salengwli Balaam kwian tku tangle age unsuialin tangle kare. Balaam kwian ka junlen Balac ta gbu kwian israelita gbe age me no. Balac kwian gbu bligda kaitaba lle oña ngwale kwian kle gai chuberege gute kaire ama kwian muire kwian onbre ta gbu mo chuge ke giti. Balac kwian gbu age ene Chube dollale unsuialin tangle. E kare ene kwian gweale kle baske kle age salengwli Balac kwian gbu age kare. E giti cha gwage ba kle age me no kwian ene chuge ngwadi mo lite ba ole ule Chube geruadi. 15 Kaire baske kwian gweale kle, ama me ta Nicolás gerua ngwale mliakalinnga, e me skwen no chage ba kle skate amage, ama kle ba kwian Chubenuske, ba kle age me no salengwli ama kle age kare. 16 Cha gerule ba ole, ba mo ta blitadale Chube ole me chege kwian Balacnu bale ni kwian Nicolánu bale me chege ama skatemanale. Agwa ba me mo ta bliteni Chube ole, gire ene cha be joge blikare baske ji gbe kwian kle ba gbe age me no giti, sbadi kle cha kate giti cha be kira bate mo tke dole kwian kle ba gbe age me no ole. 17 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare. Chube Oña kle gerule ene geru ai giti: Kwian bai mo ta gbe kiraske gwangerugu Chube gerua giti me chege age me no agwa diali age Chube takalin kare, kwian enege cha be bligda no kada maná kete ama kira gbagda, bligda e kle ogaba nga ngaña giti Chube kle ngwadi. Kaire cha be ke jutre kete amage, ke e giti kwian kalla jagere be kle degaba. Kwian bai be ke gai kwian ene nu Chube gerua keruchugaba, ama alin allabige be suge kwian kalla kle degaba ke e giti kle gerule mine.’ Ba Juan chada degadale ene ulita kagadale kwian Chubenu toinga una Pérgamoge alin.” Jesucristo gerudu ene ulita cha ole ama cha gbu chada dege ene kwian Chubenu toinga una Pérgamoge alin. 18 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Tiatiramu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha Chube Kirolla, cha gwagwa gwadenga tanre salengwli jita kare, kaire cha sera gwadenga no salengwli lle mno kadakle bronce mliakle jige kle gwadenga kare. Cha amaña kle gerule ba ulita kle mo lite Chube geruadi una Tiatirage ole, 19 cha gerule: Chage uñale ulita ba kle age giti ba kle toi mine kwianske ba kle mo ta gbe gwangerugu cha gai ulia mo Chugagwallale, ba ta no daba ole, ba kle mo chudaboi ongoru ongoru ta no giti, ba kle mo kira gbe jage ulita ba kle boi daga ngwale giti kaire uñale chage ba kle age no ulita ma ngle ngeruge. 20 Agwa ulia cha gerule ba ole, lle gweale me skwen no chage ba kle age giti. Ba kle muinga kada Jezabel chuge ngwadi gerule geru ngwale me ulia giti ba kwian Chubenu ole. Muinga e kle gerule ama kle kwian tke tangle Chube gerua ulia giti agwa ama kle kwian Chubenu anblite geru ngwale giti, kaire muinga e kle kwian Chubenu muirenu onbrenu ta gbe chage ke giti Jezabel kle age kare, ama kle kwian Chubenu ta gbe bligda kaitaba lle oña ngwale kwian me Chubenu kle gai chuberege gute. Ama kle sole ngwale kwian ole gire kwian kle mo ta blite age me no Chube dollale. Ba kle muinga e chuge ngwadi age me no ene ulita baske. 21 Cha chui tanre ketu muinga ege ama mo ta blitadale ama kle age giti agwa ama me takalin ama kle age me no chuge ngwadi, ama kle age dare me no cha gwa giti kle chage ke giti onbre ngle ole. 22 Cha gerule ulia ulia ba ole, muinga me takalin ama kle age me no chuge ngwadi malen cha be ama gbe boi daga ngwale tanre. Cha be jingme gbe kwian ulita chagenga muinga e gerua natedi ene ama jogekeda ulita. Kwian onbre bai kle chage muinga e ole ke giti, onbre e be mo ta gbe age salengwli gwangerugu muinga e kle age kare ama mi mo ta blite gire kwian ene giti kaire cha be ji gbe tanre. Cha be age ene ulita cha kle gerule kare gire be suge kwian Chubenu ulitage cha kwian ulita ta uñe, chage uñale kwian ulita kle tañachuge mine, kaire cha be age ba ulita alin ba agedu batre. 24 Ba tanre Chubenu una Tiatiramu kle tañachuge geru e muinga kle dbe geru e no trate, agwa ulia geru e ulita kle chie che dolla Satanás talla giti muinga e tale. Agwa ba gweale Chubenu me kle muinga e gerua ngwale gai ulia malen cha mi gerule ba ole ba agedale ma no gweale dare, ba kle age cha takalin kare. 25 Agwa cha gerule sidri ba ole, ulia ba mo ta gbadale gwangerugu ba kle mo ta gbe nege kare me chage geru ngwale nate, ba kledale mo ta gbe kiraske gwangerugu Chube gerua giti cha be jogeni kaire baske. 26 Kwian bai kaire kle mo ta gbe kiraske cha gerua giti me kle kwian na gerua ngwale gbe gdadi agwa diali kle chege cha geruadi, kwian bai kaire kle age cha takalin kare ama kle gwade gire, gire ene chui bdaglige cha be kwian ene gbe kwian nga ulitamu chugagwallale salengwli Chube cha Ñenua cha jigu kwian nga ulitamu Chugagwalla kare. Cha be kwian ene gbe kiraske kwian na ulita chugagwallale gerunga kwian ulita giti Chube alin, gire kwian chugagwalla ene ulita be ñage kwian ulita kle mo tke dole Chube gerua ole gbe ji chuge, kwian chugagwalla e be ji gbe kwian giti ama be kwian Chube dollale kagenga ulita salengwli kwian kle dbi dodaba ñmale glogenga kare ulita chege me no. 28 Kwian ulita cha gerua gbe gdadi age ulita cha gerule kare, kwian enege cha be beu ngliaña kete, cha be age no no ama alin ama cha gerua gau ulia ñanale. 29 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Tiatiramu alin.” Jesucristo gerudu ene ulita cha ole ama cha gbu chada dege ene kwian Chubenu una Tiatiramu alin.
1 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Sardimu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha beu gbaguke ole kote, kaire Chube Oña kle cha ole ama no trate ulita. Cha amaña kle gerule ba ulita kle mo lite Chube geruadi una Sardige ole, cha gerule: Chage uñale ulita ba kle age giti. Kwian na gwage badi ama tañachuge ba ta no trate Chube gwa giti ba kle toi Chube takalin kare, agwa ulia cha gwa giti ba kwian jogebakeda kare ba kle age me no giti, ba ta kle sugekare Chubege. 2 Cha gerule ulia ba ole, ba mo ta gbadale tañachuge ulita ba kle age giti. Ba bebi geru Chubenu chuge ngwadi ulita ba mo kira gbadale kiraske naskuni blike geru Chubenu ole, ba mo ta gbale chage ta giti geru Chubenu kle ba tale ole. Cha kle gwage ba kle age me no gitidige e ulita me no Chube gwa giti. 3 Ba tachkedale geru Chubenu ba tkere tangle giti, geru e ba gaubi gwangeabi ulia. Ba geru e gadale ngerugu mo tale, ba geru e gbadale gdadi, ba mo ta blitadale naskuni Chube ole me age me no dare ba kle age nege kare. Agwa ba me jain age cha kle gerule ba ole kare, gire ene cha be joge ji gbe ba giti salengwli kwian skwe boanga kle joge skwe boi kwian ngeru me kle chke uñale kwiange kwian skwe boanga be chke ngaminegire ama llea jwen ulita, ene kaire me chke uñale bage ngamangirege cha be joge ji gbe ba giti ba kle age me no gdale. 4 Cha gerule ba ole, kwian Chubenu gweale kle toi una eni Sardige me kle age me no daba Chubenu dare kle age kare cha gwa giti, ama ta kle no trate. Ama kle age Chube takalin kare malen e giti chui bdaglige ama ñage mo ngama tke ñometra jutreske, ama be toi cha ole ule. 5 Kwian bai kaire me kle age me no Chube dollale daba na kare ama kle mo ta gbe gwangerugu age no trate Chube takalin kare, kwian ene be chege mo ngama tkaba ñometra jutreske chui diali dale, kwian ene kalla cha mi jwennga dale chada chanu giti. Ama kalla be kle degaba diali chada chanu giti chui diali dale ama be toi diali cha ole kaire cha Ñenua Chube ole nga ngaña giti. Kaire agwe kwian ene giti cha be gerule no cha Ñenua Chube gwa giti kaire lle boanga Chube alin ulita gwa giti nga ngaña giti. 6 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Sardimu alin.” Jesucristo gerudu ene ulita cha ole ama cha gbu chada dege ene kwian Chubenu una Sardimu alin. 7 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Filadelfiamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha Chube Kirolla cha kle age ulita diali cha kle gerule kare, cha gerule ulia diali, cha no trate ulita. Cha kwian ulita Chugagwalla kweri kwian chugagwalla unsuialin David kare agwa kaire cha chege ma kweri ma kiraske Davige. Cha gerule chema ñage toi Chube ole diali nga ngaña giti chema me ñage toi Chube ole, e salengwli kwian u mauña kle kwian kade gwa kare o kaire kle kwian chuge ngwadi sugekare goga kare, cha ñage age ulita cha takalin kare. Cha amaña kle gerule ba kwian ulita kle mo lite Chube geruadi una Filadelfiage ole, cha gerule: 8 Uñale chage ulita ba kle age giti. Uñale chage ba ta me kiraske agwa ba cha gerua gau ba kle age cha gerua kle gerule kare, kaire ba me kle ibule gerule ba cha gerua gaba ba kwian chanu malen e giti cha be ba gbe cha gerua ketangale kwian nage ni kwian na be ñage ba jwen siere geru chanu dbe kwian nage. 9 Baske ba kle ngwadi kwian tanre agenga me no che dolla Satanás takalin kare kle gerule ama kwian israelita malen ama Chubenu agwa ama kle sole ngwale, ulia ama ulita che dolla Satanánu. Cha be kwian e kare ene gbe mo jongnagwa skute dba ba ngnagu ama be ba gai dage chugagwalla kweri. Be suge ama ulitage ulia cha no ba ole ba cha gerua ganga ole. 10 Ba ulita kle mo ta gbe age diali cha takalin kare ba ulita kle mo ta gbe jage ta no ole ba kle boi daga ngwaleske, malen cha be ba ulita manade no be boi tirage nga ulitage nga dba ai giti, cha mi ba chuge ngwadi boi daga ngwale kwian na me cha gerua gaba be boi kare, cha be boi daga ngwale gbe kwian ene ulita ta chugagda, ene be chke nate uñale kwian ene ulita kwian mine. 11 Cha gerule ulia ulia ba ole, cha chieni chuia kle kodi malen ba ulita mo ta gbadale gwangerugu cha gerua giti lle boi ulia no cha alin diali. Ba mo ta gbale lle boi no cha takalin kare ba mo ta gbale cha gerua manade no, ene kwian na mi ñanalla jwennga ba ngeru, ba mo ta gbe no ñanale cha be lle no kete bage. 12 Kwian ulita bai kaire kirachke che dolla Satanádi ama mo ta gbe kiraske age ulita cha takalin kare, kwian ene be toi diali cha ole kaire cha Ñenua Chube ole nga ngaña giti, kwian e be toi jwire Chube kle toi ngwadi una jagere ka jwankle Jerusalénge una e be chie nga ngaña giti gwadbiguda nga dba ai giti. Una Jerusalén kalla cha be gbe kwian e giti kaire cha Ñenua Chube kalla cha be gbe kwian e giti, ama be chege cha Ñenua Chubenu. Kaire cha be mo ka na jagere gbe kwian e giti. 13 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Filadelfiamu alin.” Jesucristo gerudu ene ulita cha ole ama cha gbu chada dege ene kwian Chubenu una Filadelfiamu alin. 14 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Laodiceamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha Jesucristo gerunga diali ulia cha me geru blite gire age nganake, cha diali geru ulia kete kwiange cha Ñenua Chube giti, kaire lle ulita Chube dodadu gwangeabi unsuialin tangle, cha lle e ulita Chugagwalla. Cha amaña kle gerule ba ulita kle mo lite Chube geruadi una Laodiceage ole, 15 cha gerule: Chage uñale ulita ba kle age giti. Ba me kle mo ta gbe kiraske cha gerua giti cha takalin kare. Ba me kle cha gerua tallade, ba kle toi ba me cha gerua uñe kare. Ba takalin chege cha dollale ba ñage chege, ba takalin chege cha skatemanallale age ulita cha takalin kare, ba ñage chege. Agwa cha me takalin ba mo ta gbe gbaboke ai kare chadi, ma no ba lle gdaitre alin gadale. Ba mo ta gbe gbaboke chadi gire cha be ba jige sugekare chage kaire cha Ñenua Chubege salengwli kwian chi me no jwen kate uneda kare. 16 Agwa ulia cha gerule ba ole, ba chege diali age ba kle age kare, gire cha be ba gbe sugekare chage chui tangle ni cha be tachke ba giti dare. 17 Ba kle gerule ba lle tanre molen, ba diali kle toi no ni lle gdaite me kle ba ole, ulita kle ba ole, ba lle ulita molen. Ba kle gerule ene mo giti no. ¿Agwa mineade ba kle tañachuge mau giti ene? Ulia lle kle ba ole ba kle gerule kare agwa ulia ba ta me trate Chube gwage, malen ba me ñage gerule ba lle ulita molen. Ba me kle mo ta gbe toi Chube takalin kwian amanu toi kare gire e giti ba kwian llea me kare, ba kwian me ñometra ole mo ngama tkagda kare. Chube me ñage age ulita ba alin ama takalin kare, ama me ñage ba chudaboi. Ba me kle tañachuge mo giti naskuni ba ta mine Chube ole malen e giti ba kwian gwagwa me kare. 18 Malen cha gerule ba ole, ba mo ta gbe gwangerugu Chube gerua gai ulia mo tale kiraske gire cha be age no ba alin lle no kete bage, e chege salengwli cha lle ñanaske kada oro kete bage kare. Cha ba ta blite, ene cha kiralla giti ba ñage age no cha takalin kare, ene ba mi ibule ba agedu me no giti, ba be chege mo ngama tkaba ñometra jutre noske kare, Chube be ba ta gbe joge siere ulita ba kle age me noge kaire Chube gerua be ba ta gbe toi trate Chube gwa giti, e chege salengwli cha gdege jrite ba gwagwa ogage ba gbe ten kare. 19 Cha gerule ba ole, kwian bai kaire cha no no ole, kwian e kle age gweale me no cha dollale, gire cha kle ka boi ama ole ama kle age me no giti kaire cha kle ama chuge ngwadi boi daga ngwale, e giti cha kle ama ulita tke tangle ama toidale mine Chube gwa giti, gire ene ama ñage mo ta blite Chube ole Chube takalin kare. Cha gerule ba ole, ba mo ta gbadale diali kiraske gwangerugu Chube geruadi, ba mo ta blitadale Chube ole age Chube takalin kare. 20 Cha diali kle kwian keru manade, cha takalin kwian Chubenu ulita mo ta gbe ule cha ole diali. Kwian Chubenu bai kle mo ta dbe bate chage, cha takalin kwian ene mo ta bliteni naskuni cha ole, ene cha chege kwian e ole, kwian e talla chege cha ole kaire cha talla chege kwian e ole. 21 Cha gerule ba ole, kwian bai mo ta gbe kiraske Chube gerua gai ulia mo tale, cha be kwian ene gbe daba chugagwale daba na kaganga chui bdaglige cha ole ule. Cha be age no ene ama alin salengwli Chube cha Ñenua agedu cha alin kare. Cha kirachku lle ulitadi nga dba ai giti gire cha joni nga ngaña giti Chube ngwadi, Chube cha gbu kwian kaire lle na ulita Chugagwalla kweri. 22 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Laodiceamu alin.” Jesucristo gerudu ene ulita cha ole ama cha gbu chada dege ene kwian Chubenu una Laodiceamu alin.
1 Cha chada degu ene ulita Jesucristo gerudu cha ole kare gire cha gwagedu ngaña bdugu nga ngaña giti, cha gwagedu ugaka degabangadi nga ngaña giti joge Chube kle ngwadi. Cha geru keruchugaba gerule cha ole nga ngaña giti ngeru gdade kweri trompeta kare, amaña gerudu cha ole nakwaite: “Bai aini nga ngaña giti, lle ulita be boi aige gwangerugu ulita cha be kaite bage.” 2 Cha geru keruchugu gerule ene cha ole gire blikare cha chegu Chube Oña kirallaske, cha sugedu moge Chube Oña cha du nga ngaña giti, gire cha gwagedu nga ngaña giti toigda dba no nodi kledu gbaba, toigda e giti cha gwagedu kwiandi gdaite kledu toiba dba. 3 Kwian cha gwagedudi toiba dba ama chegu cha gwage gwadenga noare salengwli kechuga gwadenga no ñanaske ka jwankle jaspe kare kaire salengwli kechuga dabere no ñanaske ka jwankle cornalina kle gwadenga no kare. Kwian e toigdalla nodi tangle cha gwagedu kebita manedi chratigenga no trate kechuga lerere ka jwankle esmeralda chra gwadenga kare. 4 Kaire kwian e toigdalla nodi tangle cha gwagedu toigda na veinticuatrodi. Toigda ulita e giti cha gwagedu kwian daba Chubenu chugagwalla juma kledu toiba dba ama ulita veinticuatro kledu, kaire ama ulita kledu mo ngama tkaba ñometra jutreske. Ama nu lle orole sombrero kare gwadenga no gbaba mo chugage. 5 Toigda gdaite kwian chugagwalla ma kweri kle toiba dba ngwadi nga kledu ko chrachienga enusulindra kledu gdade tirare. Chugagwalla kweri toigdalla dba ngwadi ngerudba jichra gdaguke kledu chratigenga no, jichra gdaguke e Chube Oña kare. 6 Chugagwalla kweri toigdalla ngerudba cha gwagedu lle nodige ble ngwedige kare, ble e chi oña che kle gwage mo gwadi kare, ene ble. Toigda kweridi tangle kodi lle gwade gdabaga kledu, gdaite toigda kweri ngeru, gdaite toigda nate, gdaite toigda ko jole ngnagu giti, gdaite toigda ko taingwli ngnagu giti, lle gdabaga e gwagwa molen ngle mo ngeru mo nate. 7 Lle gwade gdaite kle ngeru ama chege salengwli gude kweri kare, lle na gdabokedale ama chege chbi ñenua kare, lle na gdamaidale gwa chege kwian kare, lle na gdabagadale chege mu kweria kle jichienga kare. 8 Lle gdabaga e gdaite gdaite kaire kaire ama ulita jiga molen gdadereke kaire ama gwagwa ngle molen jegwale ulita. Ama ulita gdabaganate me kle ka chite ngajrege ngajudige gerule no Chube giti diali: “Chube no no trate ulita, Chube agenga no diali ulita, Chube kwian ulita Chugagwalla kweri kiraske tanre. Chube lle ulita Chugagwalla gwangea ngerutabi, kaire Chube amaña lle ulita Chugagwalla nege tangle kaire Chube amaña be chege lle ulita Chugagwalla chui bdaglige diali chui tangle, Chube no trate diali.” Lle gwade gdabaga diali kledu gerule no ene Chube giti Chube gbe kweri. 9 Chube toinga diali chui tangle ama kledu toiba dba toigda kweri giti gire lle gwade gdabaga e kledu gerule no diali Chube giti Chube gbe kweri ama Chugagwalla. Lle gdabaga kledu gerule no diali ene Chube giti gire kwian daba Chubenu chugagwalla juma veinticuatro, ama ulita kledu jongnagwa skute dba Chube gwangnagu Chube gai dage kaire kwian e ulita kledu lle no orole dodaba sombrero kare gbaba mo chugage jwennga, ama kledu lle e gbe ulita Chube gwangnagu, gire ama kledu gerule no Chube ole ene: 11 “Chube, ba cha ulita Chugagwalla, ba no trate kweri, ba giti cha ulita gerule no. Cha gerule ba giti ba cha Chugagwalla kweri ba kira molen tanre, ba mo ta gbu lle ulita dodade unsuialin tangle, ba lle ulita dodadu no trate, ba giti lle ulita ba dodadu kle gwade kle toi no ulita.” Kwian daba Chubenu chugagwalla juma veinticuatro kledu gerule no ene Chube ole.
1 Chube kledu toiba dba toigdalla kweri giti, Chube ko taingwli giti cha gwagedu ama kote chada bliabangadi, chada bliabanga e kledu degaba skieru ngnaru kaire giti ngnaru, chada gáge dba kledu jegaba kejre bitaguke tangle lle chada gatagda giti, ene kwian na me ñage chada e trennga chada batenga. 2 Gire kaire agwe cha gwagedu lle boanga Chube alin nga ngaña giti gdaitedi ama lle boanga no kiraske ama gerudu kweri ene: “¿Chema ta no trate ulita ñage lle chada gatagda gdaguke jwennga chada bliabanga trennga gire chada batenga? ¿Chema no trate ñage age ene?” 3 Lle boanga Chube alin kledu gerule ene gire ni kwian gdaite kledu chada treannganga. Ni kwian gdaite nga ngaña giti ni kwian gdaite nga dba giti ni kwian gdaite jogebakeda oña kle nga kada Hadege ñadu chada e trennga ni gwagedi. 4 Cha gwagedu ene ulita gire cha olidu tanre, cha me ñadu mo ta gate oli ole. Cha me gwagedu ni kwian gdaite ta no trate chada kweri treannganga ni batanga, e giti cha olidu tanre. 5 Cha ta kledu olire gire kwian daba Chubenu chugagwalla juma veinticuatro ama gdaite gerudu cha ole ene: “Ba me olire dare. Gwage kwian edi kwian na kle ama ka jwen Gude chieba kwian israelita unsuialin kada Judá oindallage, kaire kwian gdaite amaña ama kwian unsuialin tangle chugagwalla David oindalla. Ama kira molen, ama ñage age ulita. Ama ñage lle chada gatagda gdaguke jwennga ulita, ama ñage chada ai trennga, kaire ama ñage chada ai batenga. ¿Mineade ba kle olire? Kwian gdaite e ñage age ulita.” Kwian daba Chubenu chugagwalla juma gdaite gerudu ene cha ole gire cha gwagedu kwiandi gdaite bda cordero kare. Ama lentigeba trate jegwale ama gwabada kare, agwa ama kledu jagebanga gdate tainkwli Chube kledu toiba dba ngwadi ngnagu, kaire lle gwade gdabaga kledu amadi tangle kaire kwian daba Chubenu chugagwalla juma veinticuatro kledu amadi tangle. Kuda gdaguke chieba Bda Cordero e chuga giti kaire ama gwagwa gbaguke molen, gwagwa e ulita salengwli Chube Oña no trate ulita kare, Chube kle mo Oña kage nga dba giti ulita kwian ta gbe Chube giti. Cha gwagedu Bda Corderodi e Jesucristo. 7 Bda Cordero e jo Chube gitigu gire ama chada bliabanga gau Chube ko taingwli giti. 8 Bda Cordero chada e gau kote gire lle gwade gdabaga kaire kwian daba Chubenu chugagwalla juma veinticuatro ama ulita jongnagwa skutu dba Bda Corderodi ama gwangnagu Bda Cordero gai dage. Lle gwade gdabaga kaire kwian daba Chubenu chugagwalla juma veinticuatro ama ulita gdaite gdaite kledu lle gitarale kada arpa ole kote dagalenga. Kaire ama ulita kote lle orole dodabale jogdale kledu, lle jogdale e toli lle kinre ñachke no kada incienso tkaba ngle. Lle ñachke no e chege salengwli geru kwian Chubenu kle gerule no giti Chube ole kare. 9 Kwian mangire batre ulita kledu ne ngwadi ama ulita mo gatu biale geru no jagere giti Bda Cordero alin ene: “Cha ulita no ba ole. Ba ulia no trate malen ba ñage chada e gai kote lle chada gatagda gdaguke jwennga. Ba jo boaba daga ngwale gwabada kwian agedu me no giti. Ba boidu daga ngwale ba jokeda kruge kwian ulita alin ene kwian ulita ba gai ulia ñage chege Chubenu, ba agedu ene kwian chudalla ulita alin kaire kwian gerunga kwira ulita alin kaire kwian toinga nga ulitage alin. Ene ba jokeda giti kwian ulita ñage Chube uñe. 10 Ba giti kwian ulita ba gerua ganga chege Chubenu, ba ama ulita Chugagwalla, ba kwian e ulita gbu gerungale Chube ole daba na alin, kaire ba ama gbu kwian lle boangale Chube alin. Gire ama be chege kwian na ulita chugagwallale ba ole ule nga dba giti. Ba kweri trate ba ñage age ulita.” Kwian daba Chubenu chugagwalla juma veinticuatro kaire lle gwade gdabaga ulita mo gatu gerudu no ene Bda Cordero ole. 11 Gire sugetibi allabi cha gwagedu lle boanga Chube alin tanre tanredi lle boanga tanre ma ngle millonge ni cha ñadu ama ulita ten. Lle boanga e ulita kledu mo litaba kwian daba Chubenu chugagwalla juma veinticuatrodi tangle kaire lle gwade gdabagadi tangle kaire toigda kweri gdaitedi tangle ama ulitadi tangle lle boanga tanre tanre kledu. 12 Cha lle boanga ulita keruchugu gerule no kweri kiraske Bda Cordero giti: “Bda Cordero jo gwabada kwian agedu me no giti, cha gerule no ama giti cha no no ama ole. Ama kiraske tanre ulita, ama ñage age ulita, ama ma kiraske lle ulitage, ama lle ulita mauñale, lle ulita amanu, kaire amage kle chke uñale lle ulita giti. Ama no trate ulita malen cha ama gai dage, cha ama gai mo Chugagwallale no, cha gerule no no ama giti.” Lle boanga Chube alin tanre ulita gerudu no ene Bda Cordero giti. 13 Kaire lle ulita Chube nu dodaba cha ama keruchugu gerule, lle ulita kle nga ngaña giti kaire lle ulita kle nga dba giti kaire kwian ulita oña kle nga kada Hadege kaire lle ulita kle bleske, lle ai ulita Chube nu dodaba kledu gerule no ene: “Kwian kle toiba toigda kweri no gdaite giti kaire Bda Cordero kle ama ngena, ama gdabonate giti cha gerule no no diali. Cha no no ama ole, cha ama gai dage, ama kira molen ulita, ama no trate ulita diali. Ama gdaboke chege kweri kiraske lle ulita Chugagwalla chui tangle diali.” Lle ulita Chube nu dodaba kledu gerule no ene Chube giti kaire Bda Cordero giti, 14 gire lle gwade gdabaga gerudu ene: “Cha takalin ulita chege lle ulita kle gerule kare Chube giti kaire Bda Cordero giti. Ene nobi.” Lle gwade gdabaga gerudu ene gire kwian daba Chubenu chugagwalla juma veinticuatro ulita jongnagwa skutu dba Chube kaire Bda Cordero gai dage mo Chugagwallale kweri.
1 Gire sugetibi allabi cha gwagedu Bda Corderodi ama lle chada gatagda gdaite ngerutabi junnga, gire cha ologe lle gwade gdabaga gdaite kerua sugedu, ama gerudu kweri enusulindra kle gdade kare, ama gerudu cha ole ene: “¡Bai aini gwage kle boidi!” 2 Lle gwade gdaite gerudu ene cha ole, cha jo ama gitigu gire cha gwagedu ja jutredige, ja jutre e giti kwian gdaite kledu skwenba, kwian e kledu chage jwategda dbe kote. Kaire amage lle no ketre gbadale mo chugage lle e kada corona salengwli sombrero kare jo ketaba amage ama kirachku ama dolladi ñanale, ama kirachkenga ulita, ama jo chage ja jutre giti kirachkedale dare lle ulitadi. 3 Kwian gdaite e jo chage ja jutre giti gire Bda Cordero lle chada gatagda gdabokedale junnga gire lle gwade gdabokedale ngautu chage: “¡Bai aini gwage kle boidi!” 4 Lle gwade gerudu ene cha ole, gire sugetibi cha gwagedu ja na gdaite daberedi, kwian kledu chage skwenba ja dabere e giti, amage sbadi kweri jeike ketre, ama gbere kiraske tanre ene ama ñage kwian ulita nga dba giti gbe kira bate modi ongoru ongoru mo gweda, kwian nga dba giti mi ñage toi dare ule nga suga no ole, boi tirare ulita nga dba giti. 5 Bda Cordero lle chada gatagda gdamaidale junnga gire lle gwade gdamaidale ngautu chage: “¡Bai aini gwage kle boidi!” Lle gwade ngautu chage ene gire cha gwagedu ja na jereredi, kwian kledu skwenba ja jerere e giti kledu chage lle pesa kare dbe kote, lle e kwian kle bligda ñachugege gire bligda e kle chege egdage bligda e gaba mangire ulita. 6 Cha ologe keru sugedu chage gerule lle gwade gdabagaske: “Kwian bligda sidri gige igi tanre giti. Kwian lle boi chui gbaite, igi ama lle boi ñanale igi e giti ama ñage bligda kada trigo gige lata soli gdaitre alin allabi, o ama ñage bligda na kada cebada gige lata soli gdamaire alin allabi igi ama lle boi chui gbaite ñana giti. Bligda me kle ngle nga dba giti, malen bligda sidri mebi chbadakle kwangleare ulita, kwian ulita kle bli chuge tanre. Agwa lle kinre kaire lle gage me kagadalenga ngwale ene mi bidege.” Keru sugedu chage gerule ene. 7 Bda Cordero lle chada gatagda gdabagadale junnga gire lle gwade gdabagadale ngautu chage: “¡Bai aini gwage kle boidi!” 8 Lle gwade ngautu chage ene gire cha gwagedu ja na gdaitedi, ja e sugaskare chegeba lenrensa jegwale. Ja ne giti kwian kledu skwenba ama ka gbaba Jogekeda, kaire kwian na chagedu seradi ama nate ama ka jwankle Hades. Kwian e gdabonate chugle ngwadi age me no kwian tanre toinga nga dba giti ole. Kwian gdaboke e ole gerudre ama ñage kwian toinga nga dba giti ulita gbaba mne gdabagage ama ñage mne gdaitre alin gweda ama takalin kare agwa kwian na ulita mne gdamai ama me chugale ngwadi age me no kwian mne e ulita ole, malen kwian boke e ñadu kwian mne gdaitre alin gbe jogekeda ulita. Gire ama kwian gweale gbu jogekeda sbadi giti, ama kwian gweale gbu jogekeda bli ole, ama kwian gweale gbu jogekeda jingme tira kote, ama kwian gweale gbu boi daga ngwale bda tirare ngaske ama gute. Ene kwian toinga nga dba giti mne gdaite jokeda ulita. 9 Gire Bda Cordero lle chada gatagda gdatigadale junnga gire cha gwagedu kwian Chubenu tanre guleda oñadi ama ulita kledu lle gugangwa Chube gwa giti ngwadi gwaru, ama nu Chube gerua gaba ulia ama nu Chube gerua tragaba kwian na ole nga dba giti, e gdale ama ulita guleda nga dba giti. 10 Ama ulita ngautu kweri kira giti ene: “Chube, ba cha ulita Chugagwalla, ba kweri trate agenga no ulita, ba diali kle gerule ulia, ba kle age ulita ba kle gerule kare. Cha ulita geru kade bage, ¿ngamangire ba be kwian ulita nga dba giti cha bo daga ngwale cha guda gbe ji chuge cha gdale? ¿Ngaminegire ba be cha jia jwennga kwiange? ¿Mineade ba me ama gbe ji chuge nege ama agedu giti? ¿Mineade ba kle manade tanre?” Kwian Chubenu guleda oña ulita gerudu ene Chube ole. 11 Ama geru kadu ene Chubege gire ñometra jutre ketre amage tkadale modi, gire gerudre ama ole ama mo undegadale kaire manadale chui sugetidale, gire ene kwian na Chubenu nga dba giti kaire gwabeda ama kare Chube gerua Jesucristo giti dbe gdale, kwian gwabeda be joge chke kwian e kle ngwadi nga ngaña giti ule ulita kwataneke Chube takalin kare, kwian ulita kle ene gire Chube ñage kwian ulita nga dba giti bai kaire kwian Chubenu guda gbe ji chuge daga ngwale ama agedu giti. 12 Gire kaire agwe nakwaite Bda Cordero lle chada gatagda gdaderekedale junnga gire sugetibi nga dba giti nga jwliendu tirare kweri kaire kegde chitedu tanre. Kaire chui jwlitu nga jerere ñometra jere jere kare, ngajrege dai chegu dabere be kare. 13 Kaire agwe beu jaindu nga ngaña giti chku nga dba giti salengwli gligba kada higo lere kle jain mle kle tiennga kiraske kote kare, ene beu jaindu. 14 Nga ngaña chegu jwanbanga chada jwanklenga bliaklenga kare, kaire agwe jwichuga kaire ngadrega bleske ama ulita onskiendunga chegu me ngeru kare, ulita me chegu nga amañage ngeru kare. 15 Ai ulita boidu ene nga dba giti gire kwian ulita toinga nga dba giti kendunga tanre, ama ulita mo ogoda dbiugage mo ogoda keugage mo ogoda ngaske chru ole. Kwian daba chugagwalla, kwian ulita bai kle mo gbe kweri, guardia donga chugagwalla ulita, kwian lle molen tanre, kwian kle mo sobade daba nadige ama kira molen, kaire kwian ulita lle boanga chugagwalla alin kaire kwian na ulita mo ogoda ene gire gerudu jwichugage kaire kechugage: “Chitede cha ulita giti cha ógeda, ene Chube kle toiba dba toigda kweri no giti nga ngaña giti mi ñage ten chadige kaire ene Bda Cordero mi ñage ji gbe cha ulita giti cha agedu me no gdale. 17 Uñale chage chui tirare ji chugege chku, Chube kaire Bda Cordero kle ta skochie cha ole cha agedu me no gbale, ¿chema ñage mo jwennga siere agali ama kle ji gbe boi daga ngwale kwian alinge? ¿Chema ñage chege toi gwade ji chuge daga ngwale aige? Ni kwian gdaite ñage kige mo giti.” Kwian ulita gerudu ene jwichuga ole kechuga ole ama kle mo ogabada ngwadi.
1 Boidu ene ulita gire cha gwagedu lle boanga Chube alin nga ngaña giti gdabagadi. Lle boanga e kledu jagebanga gdate nga dba giti kagda giti ongoru ongoru. Chui chie ngwange lle boanga gdaite kledu, chui joge ngwange lle boanga gdaite kledu, ñagu lle boanga gdaite kledu, siagu lle boanga gdaite kledu. Ama ulita mle mauñale ñage mle gbe tiennga nga dba giti ama takalin kare nga ulita gbe me no. Agwa ama ulita gdabaga kledu mle gatedadi, ene mle me ñage tiennga nga dba giti nga gbe boi me no, ni bleske gbe boi me no ni gliske gbe boi me no. Ama bebi mle gbe tiennga age me no gire cha gwagedu lle boanga gdaite nadi chie chui chie ngwangege. Lle boanga e kledu chage lle kwian gbagda egdage Chube alin dbe kote, gire ama ngautu kiraske lle boanga na gdabagage kledu biale nga ulita dba gbe me no ulita, ama gerudu: 3 “¡Manade sugeti! Ba me ñage age me no dbi ole ni ble ole ni gli ole cha bebi kwian Chubenu ulita gbe egdage Chube alin. Cha be chada gbe kwian Chube gerua ganga skadagda giti ama gbe egdage Chube alin gire ba ñage age ba takalin kare lle ulita ole kaire kwian na ulita ole kaire nga dba ulita ole.” 4 Lle boanga Chube alin gdaite gerudu ene lle boanga na gdabaga ole gire sugeti cha ologe geru sugedu gerule ene: “Kwian ngle chegu gbaba egdage Chube alin kwian ngle ngle ciento cuarenta y cuatro mil kwian e ulita chieba kwian israelita chudalla mne gdataboko giti gdabokege.” Geru sugedu ene cha ologe gire kwian israelita gbere egdage Chube alin mne gdaite gdaite kaire kaire ene: 5 Kwian israelita unsuialin kada Judá oindalla, mne e kwian ngle doce mil kledu gbaba egdage. Kwian israelita unsuialin kada Rubén oindalla, mne e kwian ngle doce mil kledu gbaba egdage. Kwian israelita unsuialin kada Gad oindalla, mne e kwian ngle doce mil kledu gbaba egdage. 6 Kwian israelita unsuialin kada Aser oindalla, mne e kwian ngle doce mil kledu gbaba egdage. Kwian israelita unsuialin kada Neftalí oindalla, mne e kwian ngle doce mil kledu gbaba egdage. Kwian israelita unsuialin kada Manasés oindalla, mne e kwian ngle doce mil kledu gbaba egdage. 7 Kwian israelita unsuialin kada Simeón oindalla, mne e kwian ngle doce mil kledu gbaba egdage. Kwian israelita unsuialin kada Leví oindalla, mne e kwian ngle doce mil kledu gbaba egdage. Kwian israelita unsuialin kada Isacar oindalla, mne e kwian ngle doce mil kledu gbaba egdage. 8 Kwian israelita unsuialin kada Zabulón oindalla, mne e kwian ngle doce mil kledu gbaba egdage. Kwian israelita unsuialin kada José oindalla, mne e kwian ngle doce mil kledu gbaba egdage. Kwian israelita unsuialin kada Benjamín oindalla, mne e kwian ngle doce mil kledu gbaba egdage. Kwian e ulita kwian israelita chudalla, ama ulita skadagda giti chada gbere ama gbe egdage Chube alin, ama Chube gerua traganga kwian na ulita ole. 9 Kwian israelita e ulita gbere egdage Chube alin nga dba giti gire cha gwagedu kwian na tanredi nga ngaña giti, ama ngleare ni che ñage ama ten. Kwian gweale chudalla nga ulitamuge kaire kwian gweale gerunga kwira ulita kaire kwian gweale toinga nga ulitage, kwian e ulita kledu mo litaba toigda Chube kle toiba dba giti ngnagu kaire Bda Cordero kle toigda e ngena ngnagu. Kwian e ulita kledu mo ngama tkaba ñometra jutreske kaire ama ulita kledu ugananga dbe kote. 10 Ama ulita ngautu kiraske ene: “Che Chugagwalla Chube kle toiba dba toigda kweri giti kaire Bda Cordero ama gdabonate alin allabi ñage che jwen siere ji chuge daga ngwalege che agedu me no giti. Ama gdabonate kiraske ulita ama ñage age no ulita.” Kwian ngle gerudu no ene Chube giti kaire Bda Cordero giti. 11 Lle boanga Chube alin nga ngaña giti ulita kledu jagebanga gdate kwian daba Chubenu chugagwalla juma veinticuatro giti tangle. Kwian daba Chubenu chugagwalla juma e ulita kledu lle gwade gdabaga giti tangle. Ama ulita bongaske Chube kledu toiba dba toigda kweri no giti. Lle boanga Chubenu ulita jongnagwa skutu dba ama mo gwa ñeu gwadbigu dbidi Chube gai dage nga suga no ole, 12 lle boanga ulita gerudu ene Chube giti: “Che gerudale no che Chubea giti, che no no ama ole, ama ta kle chke uñale lle ulita giti, ama diali agenga no che alin, ama che mananga no. Ama no trate ulita malen che ama gadale dage, ama che Chugagwalla no. Ama kiraske tanre ulita, ama ñage age ulita, ama ma kiraske lle ulitage. Ama be chege lle ulita Chugagwalla kweri diali chui tangle. Ene nobi ulita.” Lle boanga ulita kle Chubedi tangle gerudu no ene Chube giti. 13 Gire kwian daba Chubenu chugagwalla juma veinticuatro gdaite ama geru kadu chage: —¿Kwian ngle kle mo ngama tkaba ñometra jutreske e chema? ¿Uñale bage e chema? ¿Ama chiu baini? 14 Kwian daba Chubenu chugagwalla juma gdaite geru kadu chage ene gire cha jaindunga ama kalen: —Chage me uñale ama chema, agwa bage uñale. Gire kwian daba Chubenu chugagwalla juma gdaite gerudu nakwaite cha ole: —Kwian ai ulita ba kle gwagedi kwian e mo boangu tanre daga ngwale Jesucristo gerua giti ama kledu toi nga dba giti gire, agwa ama chagedu gwangerugu Jesucristo geruadi, ama guleda Jesucristo gerua gai gdale, agwa nege ama kle trate ta no ole Chube gwa giti salengwli ñometra gligakle no kare. Bda Cordero ama Jesucristo ama jokeda salengwli bda cordero gwabada unsuialin tangle kwian age me no giti Chube gwa giti kare. Jesucristo bechiu ama boidu daga ngwale ama jokeda kruge kwian alin. Kwian ñometra jutreske e Jesucristo gerua gau ulia, gire Jesucristo bea giti Chube kwian e ta litu kwian ta gbe trate Chube gwa giti, gire nege ama kle trate ta no ole Chube gwa giti salengwli ñometra gligakle kle chege no trate kare. 15 Malen kwian e ulita kle Chube gwangnagu Chube kle toiba dba toigda kweri no giti ngwadi, ama ulita kle Chube ole gerule no Chube giti chui ulita ngajudi ngajrege, me kle ka chite gerule no Chube giti. Chube kle toiba dba toigda kweri no giti ama be kwian e ulita manade no be kwian e chudaboi kwian mi boi daga ngwale dare, ama be kle diali Chube ole. 16 Kwian e ulita mi bli chuge dare, ama mi jogenga dare sie ole kaire ama mi kuge chuira kote dare kaire nga mi chie jute amadi dare. Ama mi boi daga ngwale ama boidu nga dba giti kare. 17 Bda Cordero kle Chube ngena Chube kle toiba dba ngwadi, Bda Cordero be kwian e ulita manade no salengwli kwian kle bda oveja manade kare. Kwian oveja mananga kle oveja dbe nga noge chi no jai, ene kaire Bda Cordero be kwian e manade no, Chube be kwian e ta gbe nga suga no ole me ta olire dare —kwian daba Chubenu chugagwalla juma gdaite gerudu ene cha ole kwian mo ngama tkaba ñometra jutreske giti.
1 Gire Bda Cordero lle chada gatagda bdagli gdagukedale junnga gire nga ngaña giti Chube kle ngwadi nga chegu ngwedige ni lle ni nga chegu gdade sidri hora bonga. 2 Cha gwagedu lle boanga Chube alin nga ngaña giti gdagukedi jagebanga gdate Chube gwangnagu, lle ngwanegda gdaguke ka jwankle trompeta jo ketaba lle boanga gdagukege gdaite gdaite. 3 Bigire lle boanga na gdaite chku oro dodaba incienso gbangwale giti dbe kote. Lle boanga amaña jagedunga gdate tainkwli oro dodaba lle gugangwale Chube gwa giti kwian age me no giti ngwadi, lle gugangwa e chege tainkwli Chube gwangnagu. Ne ngwadi lle ñachke no kada incienso tanre jo ketaba lle boanga ege. Lle ñachke no e ama gbu lle gugangwa giti gugadale Chube gwa giti. Kwian Chubenu ulita kledu lle gugangwa ngwadi gerule Chube ole gire lle boanga lle ñachke no gbu lle gugangwa giti Chube gwa giti. 4 Gire lle boanga amaña e lle ñachke no gugu gire lle ñachke no jiangwalla jo Chube gitigu ule kwian Chubenu kerua ole kwian Chubenu gerudu suiage kledu boi daga ngwale nga dba giti gire. 5 Bigire lle boanga Chube alin amaña jita tan gau lle gugangwage, lle ñachke no gbangwa ama kle dbe kote ama lle e gbu ete jita tan ole, gire ama lle e mliunga ulita gwadbiguda nga dba giti. Jita tan e jwatedunga nga dba giti gire enusulindra gdadu kweri nga ngaña giti kaire nga ko chrachiunga nga gdadu kaire nga jwliendu kote kegde kweri chitedu tanre nga dba giti. 6 Lle boanga Chube alin nga ngaña giti gdaguke kledu lle ngwanegda ka jwankle trompeta dbe kote, ama gdaguke ulita mo gbu biale gdaite gdaite ngwanedale trompetage. 7 Lle boanga gdaite ngwanedu ngeru trompeta amanuge gire sugeti allabi noi sklieba kweri kweri bialin nga skeke kote kaire jita kledu gwade ule be ole noi eske gire e ulita jo mliaba nga dba giti. Gire nga dba giti nga gweale bonga nate kugedu ngle, kaire gli nga dba giti nga gweale bonga nate kugedu ule ngauda lere ulita ole. 8 Ai bitaite boidu ene ngerutabi gire lle boanga na gdabokedale ngwanedu trompeta amanuge gire sugeti allabi cha gwagedu lle salengwli jwichuga kweri karedi jwichuga e kledu gwade jitaske jo mliaba bleske, gire e giti ble gweale bonga nate chegu bere ulita, 9 gire lle ulita kle toi bleske ama ngle bonga nate jokeda be kote kaire du chagegda bleske ngle bonga nate ulita jo skianbada bleske. 10 Boidu ene ulita nga dba giti gire lle boanga Chube alin nga ngaña giti na gdamaidale ngwanedu trompeta amanuge gire sugeti allabi beu kweri gbaite jaindu nga ngaña giti chrachiunga jichra kare, beu e jo chke dba chi kweri ngle bonga ngnagu ulitaske kaire beu e jo chke chi gwagwa ngle bonga ngnagu ulitaske. 11 Beu e kada Beu Gage, beu e jo chke chi kweri batre chi gwagwa dbige batre chi chegu gage ulita me no, kwian chi gage e jau gire kwian tanre jokeda chi kote. 12 Boidu ene ulita nga dba giti gire lle boanga Chube alin nga ngaña giti na gdabagadale ngwanedu trompeta amanuge gire sugeti allabi chui gwa jo jere ngle bonga ngnagu, chui me chegu chrachienga no chui kle chrachienga kare. Kaire dai gwa jo jere ngle bonga ngnagu, dai me chegu chrachienga no dai kle chrachienga kare. Kaire beu gwa jo jere ngle bonga ngnagu me chegu chrachienga beu kle chrachienga kare. Ngajudi ngle bonga ngnagu chegu jere ni chui chrachiunga sidri. Ngajrege ngle bonga ngnagu chegu jere dbire ngiskinre ni dai chrachiunga sidri. 13 Bigire cha gwagedu mu kweria gbaitedi ji chienga nga ngaña giti sui jwennga kweri kwian be boi giti, mu e gerudu kiraske: “Ay, ay, ay, cha tai dage kwian nga dba giti ulitage. Lle boanga Chube alin na gdamai ulita be ngwane trompetage gdaite gdaite gire be boi tirare ulita nga dba giti.”
1 Mu e ngautu kiraske ene gire lle boanga Chube alin nga ngaña giti na gdatigadale ngwanedu trompeta amanuge gire cha gwagedu beu gbaitedi jainba nga ngaña giti chkeba nga dba giti, beu e kwian kare. Beu ege nga ugaka degagdanga ketre, ene ama ñage ugaka nga tira dbiugage degenga, dbiuga jere ege ni che gwa joge dbiuga ege bdagli. Gire ene beu e ñage chege nga tira dbiugage chugagwallale. 2 Bigire beu ugaka nga tira dbiugage degunga gire ne ngwadi cha gwagedu jiangwa tanredi chie bdugu nga dbiugage, jiangwa tanre chiu jondoi salengwli jita teankle ngle jiangwa kle chie kare. Jiangwa tanre e chui gbu gwajoge kaire jiangwa chegu skateba tanre mleske, nga chegu gwajogeba ngaña. 3 Jiangwa eske sri tanre chiu jo nga dba ulitage, sri e gbere kiraske kwian gbe boi daga ngwale salengwli jebda kle kwian skie kare. 4 Kaire jo geruba sri e ole ama me ñage age me no ngauda ole me ñage ngauda gute kaire lle ulita kle tige dbiske ngaudale kaire glire ama me ñage gute, agwa kwian bai kaire me kle chage mo gbaba egdage Chube alin me chada Chubenu gbaba ama skadagda giti, kwian ene giti jo geruba sri ole sri ñage age me no kwian gbe boi daga ngwale agwa ngauda ole me agedale sidri age me no. 5 Kaire jo geru ñachugaba sri ege ama kwian gbe boi daga ngwale tanre dai gdatigage agwa me kwian gdaite gweda. Kwian ulita bai kaire sri kledu gbe boi daga ngwale kwian enedi nga chiu olire tanre, ama skibachiu tanre sri kote salengwli jebda kle kwian skie kwian kle skibachie jebda kote kare. 6 E suiage kwian tadu jogekalinda blike ama kle ji chugege agwa ama me ñadu jogeda ama tadukalin kare, kwian chegu ji chuge boi daga ngwaleske kwian me jokeda dale. 7 Sri e kwian gbanga boi daga ngwale chegu salengwli ja dogda gbakle biale dole kare, sri chugage sri oro dodaba sombrerole du mo chugage, ama gwa chegu salengwli kwian gwa kare. 8 Kaire agwe ama chugaga jeike salengwli muinga chugaga kare, ama dau tirare salengwli gude kweria dau kare. 9 Kaire sri jegwale ulita lle mno hierro kare giti sri mo ngama tkaba ta ngnagu mo ta managda, sri ulita kledu ji chienga ama jiga gdadu kweri salengwli carro ngle lugakle jadi ja kle kira batege joge dole kle gdade kare ene sri jiga kerua chegenga. 10 Sri sune kweri kweri bialin jebda sune kare, sune e kiraske sune e giti ñage kwian lendege kwian gbe skibachie tanre sune kote, sri kwian gbe boi daga ngwale sune giti dai gdatigage. 11 Beu jainba nga ngaña giti chkeba nga dba giti ama sri ulita chugagwalla, beu e ñadu ugaka nga tirare dbiugage degenga sri ulita alin. Kwian kwira hebreole sri chugagwalla ka jwen Abadón, kwian kwira griegole sri chugagwalla ka jwen Apolión, ka e gerule “lle ulita gbanga me no lle ulita skianngadba”. 12 Boidu ene tirare ngeru bitaitege tangle, kaire bebi na bitabokege tangle boidale tirare. 13 Lle boanga Chube alin nga ngaña giti na gdaderekedale ngwanedu trompeta amanuge gire cha geru gweale keruchugu chie lle dodaba kuda kare gdabaga e kledu oro dodaba lle gugangwale giti, e kledu Chube gwangnagu. 14 Keru e gerudu lle boanga gdaderekedale trompeta ole kote: “Dolla gdabaga kle lugaba chi kweri ka jwankle Eufrates kagda giti ba ama ulita skajwennga.” 15 Gerudre ene lle boanga Chube alin ole gire lle boanga Chube alin dolla e gdabaga skajunnga, ene dolla gdabaga ñadu age me no tanre kwian ngle bonga nate ole nga dba giti kwian e ulita gbe jogekeda ulita. Dolla e kledu ogaba biale age me no kwian ole chui ege dai ege chura ege. 16 Guardia donga tanre chiu chage ja giti dolla gdabaga e nate, gire cha ologe geru sugedu gerule cha ole guardia donga ulita mangire kle chage ja giti, ama ulita ngle ngle ama doscientos millones. 17 Cha gwagedu ja ulitadi kaire kwian nu skwenba ja gitidi, ama ulita ta giti ama kledu chage lle gweale mno lugaba bonga tangle mo ta managda, lle mno mo ta managda e dabere lenrenre moloinre. Kaire agwe ja chuga salengwli gude chuga kare, jita kle chie ja e kate, kaire jiangwa kle chie ja e kate kaire lle mnuñale kada azufre gwatige jita kare kle chie ja e kate. 18 Jita kaire jiangwa kaire azufre, ji gdamai e gbere kwian alin ene nga dba giti, gire kwian ngle bonga nate jokeda jita kote kaire jiangwa kote kaire lle mnuñale kada azufre kote. Ji e ulita jo gbabale kwian alin chiu ja kate. 19 Ai kledu boi tirare ene, kwian tanre kledu lentigeba ji e chiu ja kate giti, ja kate kira tanre kledu, kaire ja skugdage kira tanre kledu. Ja skugda boli giti kwian chegu ji chuge daga ngwale lentigeba, ja skugda salengwli jorisi chuga kare, skugda giti ja kledu kwian gbe lendege salengwli kwian kle lendege jorisige kare. 20 Kwian tanre jokeda ene ja e agedu me no kote, kwian na dare chegu gwade, ama ulita me mo ta blitu age me no chuge ngwadi, ama ulita chegu age dare me no, ulita chegu che dolla Satanás chudaboangalla gai kweri mo chugagwallale kaire ama chegu lle dodaba mo kodi gai dage chubere, oro dodaba igi dodaba bronce dodaba kechuga dodaba gli dodaba lle e ulita dodaba mo kodi ole ama mo ta gbu no gai dage, lle ngwale e ulita ni ña kwian kerua keruchuge ni ña ten kwiandi ni ña chage, agwa kwian kledu chage lle e ulita dodaba mo kodi ngwale gai dage mo chubea kare. 21 Kaire kwian me tañachugu mo ta blite Chube ole, ama kledu mo ta gbe age ma me no tanre ngeruge, ama chegu daba gweda gwangerugu ama chegu daba gbe boi daga ngwale dolla kiralla giti kaire ama ulita chegu mo ta gbe mo chuge ke giti diali muinga onbre ole onbre muinga ole, kaire ama mo ta gbu chege skwe boi daba ngeru. Ni kwian talladu boidu me no kwian na ole giti agwa ama chegu toi gwangerugu me no ama tadukalin kare.
1 Cha gwagedu lle boanga Chube alin na gdaite kiraske tanredi chie nga ngaña giti bogakwaske, ama chuga giti kebita mane kledu chratigenga no ama chuga giti tangle, lle boanga gwa gwadenga chui gwagwa chra kare, ama seragda jita kwira kle urachienga kare. 2 Lle boanga e kledu chada soli gaite treanbanga ole kote, kaire ama mo sera taingwli gbu ble giti ama sera jole gbu dbi giti, 3 gire ama ngautu kweri kiraske gude kweri kle lie siroge kare. Ama ngautu kweri ene gire enusulindra gdadu bitagukege, gerudre enusulindraske, 4 enusulindra gdadu bitaguke e tane giti cha biri chada dege cha geru keruchugu giti gire cha geru keruchugu nga ngaña giti gerule cha ole: “Ba geru keruchugu enusulindra bitagukeske, ba me geru e degadale, ba geru e keruchugu ba geru oge mo tale mo alin.” Gerudre ene cha ole. 5 Cha gwagedu ene lle boanga gdaitedi kledu sera gdaite gbaba ble giti gdaite gbaba dbi giti, lle boanga e amaña ko taingwli ngnagu gaunga nga ngaña ngnagu geru gbe egdage Chube gwa giti, gire ama gerudu: “Chube toinga chui diali dale chui tangle, Chube nga ngaña dodadu ama nga dba dodadu ama ble dodadu, Chube lle ulita kle nga ngaña giti kaire nga dba ai giti dodadu ulita. Cha gerule Chube gwa giti, chui kle kodi boidale ulita Chube takalin kare. Lle boanga Chube alin gdagukedale be ngwane trompetage gwangea, gire sugeti allabi be chege ulita Chube gerudu kwian Chube gerua ketanga unsuialin tangle ole kare, geru e ulita me sugedu trate kwiange unsuialin tangle agwa nege tangle geru e ulita be chke uñale kwian ulitage.” 8 Lle boanga Chube alin gdaite gerudu ene gire keru e amaña gerudu nga ngaña giti cha ama keruchugu gerule cha ole me chada dege giti, gerudu cha ole nakwaite: “Lle boanga kle sera gdaite gbaba ble giti kle sera gdaite gbaba dbi giti kote chada kle treanbanga, joga amadige chada ga kote.” 9 Gerudre ene cha ole gire cha jo lle boanga gitigu, cha chada soli kadu lle boanga ege, gire lle boanga e gerudu cha ole: “Ba chada ai gai kodi, kaire ba chada ai gute. Ba be chada ai gute, ba kate chada be skwen bage bale likin kare, bigwa ba tadi chada ai be chege gage.” 10 Lle boanga gerudu ene cha ole gire cha chada soli gau lle boanga kote, cha chada soli e gutu, gire cha kate chada e skwendu bale likin kare, cha chada e gutu gire bigwa chada e chegu gage cha tadi, cha ta jwlitu chada gagedi. 11 Kaire agwe gerudre cha ole ene: “Ba geru na dbadale nakwaite kwiange Chube be age giti kwian nga tanremu ole kwian chudalla kwira tanremu ole kaire daba chugagwalla nga ulitamu ole. Chube be age kwian e ulita ole giti ba gerudale.” Gerudre ene cha ole ulita.
1 Gerudre ene cha ole gire eskegda gdaite ketre chage nga ñachugagda gire gerudre cha ole ene: “Joga nga ñachugeda u gerungwa Chube olege kaire ba lle gugangwa Chube gwa giti ngwadi ñachugeda kaire ba kwian ten mangire ulita kle mo lite gerule no Chube giti eni u ege. 2 Agwa ba me nga goga tangle u gerungwa Chube ole ugakallage ñachugeda. Nga e jo ketaba kwian me israelitage malen ba me nga e amanu ñachugadaleda. Kwian me israelita e be chage age me no tanre una no Chubenu kada Jerusalénge dai ngle dai cuarenta y doge (dai e salengwli chura gdamai giti dai gdaderekege kare). 3 Kaire cha be kwian gerunga cha giti gdaboke kage mo ngama tkaba kwian oli kle mo ngama tke ñometra jereske kare. Ama gdabonate be cha gerua trage kwian ole una ege chui ngle chui mil doscientos sesentage (chui e salengwli chura gdamai giti dai gdaderekege kare).” Gerudre ene cha ole kwian gdaboke giti. 4 Kwian gerunga Chube giti gdaboke e ama gli kada olivo kare kaire ama chege salengwli lle jichra gbangwa gdaboke kle che Chugagwalla nga ulita mauñale gwangnagu kare. 5 Kaire kwian gdaboke e kate jita kledu, jita e ñadu kwian bai kaire mo tke dole age me no ama ole guge, jita e giti ama gdaboke ñadu mo jia jwennga ama dollage ama dolla ulita gweda. 6 Kwian gerunga Chube giti gdaboke ñadu age kiraske, ama ñadu noi gateda nga ngaña giti ene noi me ñadu boi ama kle Chube gerua trage kwian ole suiage gire. Kaire ama kira molen tanre ama ñadu chi blite bere kaire ama ñadu kwian nga dba giti gbe boi daga ngwale tanre lle tanre me noge ama takalin age kare. 7 Ama gdaboke e lle bo ulita ama kagle kare ama Chube gerua tragu ulita kwian ole gire nga tira dbiugage lle gdaite me no tirare chiu kira bate gerunga Chube giti gdaboke e ole, lle tirare kirachku gerunga Chube giti gdabokedi lle tirare gerunga Chube giti gdaboke e guda. 8 Ama gdaboke e guleda ama jaba chegu jon kweri kwian ulita kle chagege una kweri Jesucristo guleda kruge ngwadige una Jerusalénge, kwian toinga una ege agedu me no tanre, malen e giti una e chegu salengwli una unsuialin tangle kada Sodoma kare kaire una e chegu salengwli nga Egipto kare. Kwian una ege agedu me no me no kwian gdaboke gerunga Chube giti e ole malen e kada una Sodoma kare kaire nga Egipto kare kwian kledu age me no giti. 9 Chui gbamai bongage gire kwian toinga una ege ulita kaire kwian chudalla na ulita kwian gerunga kwira nale ulita nga ulitamuge nga dba ai giti kwian ulita gwagedu kwian gerunga Chube giti gdaboke e jabadi jonke nga ngwalege gire kwian me tadukalin ama gdaboke jaba tkange dbige oge. 10 Kwian ulita kledu toi nga dba ai gitidi nga sugadu no kwian gerunga Chube giti gdaboke jokeda giti, kwian ulita chegu ta no ole gire kwian lle no ketu moge ongoru ongoru nga suga no ole. Kwian gerunga Chube giti gdaboke e guleda ama kledu gerule Chube gerua giti gdale, malen kwian ulita ta chegu no ama gdaboke jokeda giti, kwian ulitage me skwendu no onbre gdaboke kledu gerule Chube gerua giti kwian jainchku tanre kwian boke edi. 11 Agwa chui gbamai jo tangle chui na bonga gire Chube kwian gerunga ama giti gdaboke e gbuni gwadeni, onbre gdaboke e chkuni gdate gire kwian bai kaire ulita gwagedu boidu gitidi kwian ulita e kendunga tanre. 12 Bigire kwian gdaboke gerunga Chube gitige geru sugedu, amage ngautre kiraske nga ngaña giti, geru sugedu amage ene: “¡Bai aini nga ngaña giti!” Gire ama gdabonate jo nga ngaña giti bogakwaske, ama dolla ulita nu ama gbaba boi daga ngwale ama gwagedu onbre gdabokedi jogeni nga ngaña gitini bogakwaske. 13 Kwian gdaboke e joni ene nga ngaña gitini gire sugetibi allabi nga jwliendu kegde chitedu kweri tirare, nga una ege gweale gdaite ulita jo skianbada gire kwian ngle siete mil jokeda nga jwliendu kegde chitedu kbiale. Kwian bai kaire chegu gwade ama ulita chegu ta kennga ole tanre, kaire ama gerudu no Chube giti chru ole ta kenngaske ene: “Chube toinga nga ngaña giti ba kweri kira molen ulia, ba ñage age ulita.” Kwian gerudu no ene Chube ole ta kenngaske. 14 Nga boidu tirare bitabokege tangle agwa kaire sugetibi me sbali gire nga be boi tirare na bitamaidale tangle. 15 Lle boanga Chube alin nga ngaña giti na gdagukedale bdagli ngwanedu trompeta amanuge gire nga ngaña giti keru ngle sugedu gerule kweri kiraske ene: “Nga dba giti ulita kle chege nege Chube che Chugagwalla kote kaire ama Kirolla Jesucristo kote ama kledu gwangea lle ulita dodadubi kare. Chube Jesucristo gbu gwangea kwian ulita nga ulita Chugagwallale ene Chube kaire Jesucristo chege kwian ulita Chugagwalla chui tangle diali.” 16 Geru sugedu chage ene gire kwian daba Chubenu chugagwalla juma veinticuatro kledu toiba dba toigda amanu giti Chube gwangnagu, gire ama ulita mo gwa ñeu kaboge ñage dba dbidi gire ama gerudu no Chube ole nga suga no ole, 17 ama ulita gerudu no Chube ole ene: “Chube, ba cha ulita Chugagwalla kweri, cha gerukalin no ba giti, ba no trate agenga no ulita, ba kiraske tanre. Ba Chube ulia, ba kledu ngeru lle ulita ba dodaduge, kaire ba kle chege diali kira molen lle ulitage. Ba ma kiraske che dollage nege ba kle mo kiralla kweri kaite ba kle chege lle ulita kaire kwian ulita Chugagwalla kweri aige gwangerugu. 18 Kwian toinga nga dba giti me ba gerua ganga ama ulita mo ta gbu skochie badige, agwa kaire chui chku ba mo ta gbe skochie amadige ama kle age me no giti gdale. Nege ba chuia chku ji gbangwa kwian giti, ba be kwian jogebakeda oña bai kaire me ba gerua gaba gbe ji chuge, ba be kwian ulita kagenga kwian bai agedu me no tanre ba dollale ama tadukalin kare nga dba giti, ba be kwian ulita gbe jiske. Agwa kaire kwian bai ulita banu ba be age no ama alin, ama kwian banu ama ulita ba gau dage ulia, ama gweale ba gerua ketanga kaire ama gweale kwian lle boanga no ba alin, kwian e ulita alin kwian juma kaire kirogwa ama ulita alin ba be age no ama agedu no ba takalin kare ñanale.” Kwian daba Chubenu chugagwalla juma veinticuatro ulita gerudu ene Chube ole nga ngaña giti. 19 Gire u gerungwa Chube olege nga ngaña giti u e ugakalla chegu degabanga, gire ne ngwadi gwa u ege cha gwagedu glidrega dodaba unsuialin tangle kwian israelita alin lle ogangwadi, lle ogangwa e toli lle gbaba egdage Chubenu kledu, lle e giti kwian tachke Chube agedu giti ama alin kaire tachke Chube kle diali ama ole. Glidrega dodaba e giti nga kledu ko chrachienga nga gdadu kweri tirare, enusulindra gdadu kaire nga dba giti nga jwliendu kegde chitedu kweri kaire noi boidu tanre noi chegu sklieba mno kweri kweri bialin nga skeke kote chku nga dba giti.
1 Cha gwagedu nga ngaña giti be boi tiraredi, muinga gdaite medu chage mo bliaba chuira chrallaske mo ñometra kare, dai kledu ama sera gwaru, muinga chugage lle sombrero kare kledu gbaba, lle sombrero ga giti tangle beu gbataboko giti gbaboke kledu. 2 Muinga kledu kirogwa suiale ama ole kirogwa be menga, ama kledu ngaute kweri skibachie kote. 3 Gire cha gwagedu nga ngaña giti nabitaite be boi tiraredi, lle kweri dabere jegwale jorisi kare medu chage, lle e jiga molen sera molen, ama chuga gbaguke molen, ama kuda gdataboko molen kaire lle sombrero kare kledu gbaba chuga gbaite gbaitege. 4 Ama skugda giti ama beu nga ngaña giti ngle bonga ngnagu mongonga, beu e ulita jo chke dba nga dba giti ulita. Lle jorisi kare tirare beu mongonga ene gire ama jo chke manade biale muinga gwangerudba, kirogwa be menga muinga kote gire lle jorisi kare be kirogwa gute blike. 5 Muinga e kote kirogwa chku, kirogwa onbre soli, kirogwa e be chege kwian ulita nga dba giti Chugagwalla kiraske tanre. Kirogwa jo jwanbanga muinga kote kirogwa jo dbaba nga ngaña giti Chube kle toiba dba toigda kweri no giti ngwadi Chube alin ene lle jorisi kare tirare me ñadu kirogwa gute ama tadukalin kare. 6 Gire muinga jo kige nga gballage Chube nu nga gbaba biale muinga alin kigengwa eni. Ama manabe ama ullabe bligdadi chui nglege chui mil doscientos sesenta. 7 Bigire lle boanga Chube alin nga ngaña giti kira molen tanre kada Miguel kaire ama chudaboangalla ulita dodu kweri nga ngaña giti lle jorisi kare tirare ole kaire lle jorisi kare tirare chudaboangalla ulita ole dodu lle boanga Chube alin ole. 8 Agwa lle jorisi kare tirare me ñadu kirachke lle boanga Chube alindi, ama me ñadu chege dare nga ngaña giti kaire ni ama chudaboangalla ñadu chege. 9 Gire lle jorisi kare tirare jo mliaba siere nga ngaña gitige chku dba nga dba giti ule ama chudaboangalla ulita ole. Lle jorisi kare tirare e ka jwankle Satanás kaire amaña ka jwankle Diablo. Che dolla Satanás e amaña ama kwian Chube dodadu gwangea anblitu gbu age me no unsuialin tangle, che dolla Satanás kwian nga dba giti ulita anblitanga ama kwian ta gbanga age me no. 10 Lle jorisi kare jo mliabanga nga dba giti gire cha ologe geru sugedu kweri nga ngaña giti, gerudre ene che dolla Satanás giti: “Ngeru che dolla daba Chubenu ulita gbanga jiske Chubege ngajudi ngajrege Chube gwa giti nga ngaña giti. Agwa nege che dolla jo mliabanga siere nga ngaña gitige sugekare gire ama me ñage daba Chubenu gbe jiske Chubege dare. Noare ulia che Chugagwalla Chube kirachku ene che dolladi. E giti nege chku uñale kwian ulitage Chube ma kweri ulitage Chube kiraske tanre, kaire kwian ulitage chku uñale Jesucristo Chube nu kagaba nga dba giti ama kwian Chugagwalla kiraske tanre. 11 Nga dba giti Jesucristo jo gwabada kwian ulita age me no giti salengwli kwian bda cordero guda kare kwian agedu me no giti ene kwian ñage chege trate Chube gwa giti. E kare ene kaire agwe Jesucristo jokeda kruge, e giti daba Chubenu ñadu kirachke che dolladi, daba e Chube gerua ulia tragu kwian na ole Chube tadukalin kare ama me kendunga kwian be age daga ngwale ama ole Chube gerua gdale giti agwa ulia ama ulita mo ta gbu biale kwian ama gwakalinda Chube gerua gdale. Jesucristo giti ama ñadu age ene kirachke che dolladi. 12 Nga ngaña giti lle ulita kaire kwian ulita mangire batre kle toi nga ege Chube ole, ba ulita nga dbadale suga no ba ulita ñage kirachke che dolladi giti. Agwa ba ulita mangire batre kle toi nga dba giti kaire lle ulita kle toi bleske, ba ulita be olire tanre ba be boi daga ngwale giti. Che dolla chku age me no ba ole nga dba giti, uñale amage chui jo tigenga ulita amage ama tkabe skage gire, malen e giti ama skochie tanre tirare ama agekalin me no ulita.” Geru sugedu chage ene ulita. 13 Lle jorisi kare tirarege sugedu ama jo mliabanga siere nga ngaña gitige chku nga dba giti, gire ama chagedu muinga kirogwa soli onbre manadu nate ama gdea gbe age me no ama ole. 14 Agwa muinga ege jo jiga ketaba gdaboke kweri salengwli mu kweria jiga kare. Jo jiga e ketaba muingage, ene muinga e ñage kige bate lle jorisi kare ngeru, ama ñage ji chienga nga gballage Chube nu nga gbaba biale ama alinge, ne ngwadi muinga be chege bate sugekare lle jorisi kare tirarege ama manabe bligda ketabe amage ama ullabe chura gdamai giti dai gdaderekege. 15 Muinga jo kige nga gballage Chube nu gbaba biale ama alin gire lle jorisi kare tirare chi mliunga kate muinga ngnagu ama tadu chi e gbakalin muinga giti, ene chi ñage muinga dbe muinga unjoge chiske. 16 Agwa dbi gbere skiennga, ene lle jorisi kare chi mliunga kate jo dbi eske ulita, gire ene muinga me boidu dale chi kote. 17 E giti lle jorisi kare skochiu tanre muingadi ama me ñadu age ole giti. Gire lle jorisi kare muinga chugu ngwadi jo sko ole kira bate muinga oindalla na ole muinga oindalla ulita mangire batre kle age Chube gerua gai dage kle degaba kare, kaire muinga oindalla e kle Chube gerua ulia Jesucristo giti gai dage ulia, muinga oindalla e ama kle age ulita Chube takalin kare. Kwian e kare nate lle jorisi kare chagedu, ama tadu muinga oindalla e kare jwen siere Chube gerua uliage. 18 Boidu ene ulita gire lle jorisi kare jo jimo ble kagda giti manade.
1 Lle jorisi kare kledu manade ene jimo gire cha gwagedu bleske lle gude karedi chie ama chadale gude ngaskere, lle e chiu ble kagda ngnagu, ama chuga molen gbaguke kaire ama kuda chieba gdataboko. Ama kuda gdaite gdaite kaire kairege ama kledu lle dodaba sombrero kare gbaba gdaite gdaite mo kuda ulitage. Kaire agwe ama chuga gbaguke giti gbaite gbaite ama kledu chage chada gweale gbaba Chube dollale gerule me no Chubedi. Ama jegwale ulita gude chadale kare agwa ama ko bda ngaske ka jwankle oso ko kare, kaire ama ka ulita chegu salengwli gude kweria ka kare. Lle jorisi kare mo kira ketu lle gude chadale kare ege, kaire ama lle gude chadale kare gbu chege kwian chugagwallale kare age ulita me no ama takalin kare. 3 Lle gude chadale kare e chuga gbaguke gbaitege medunga chage solale sugaska salengwli ama lentigeba tirare kare ama chege jogebakeda kare agwa ama chuga sola tirare e jo dodaba jo chkeni. Gire kwian ulita toinga nga dba giti ama ulita chegu tañachuge tanre boidu giti ta kennga ole, gire e giti kwian ulita me Chubenu lle gude chadale kare gau mo chugagwallale chagedu ama gerua nate. 4 Lle jorisi kare lle gude chadale kare gbu chege kweri kiraske age ulita ama kirallaske, malen e giti kwian toinga nga dba giti me Chubenu ulita chagedu lle jorisi kare gai dage gerule no ama giti. Kaire kwian ulita lle gude chadale kare gau dage gerudu no ama giti ene: “¿Chema ñage chege kiraske lle gude chadale e kare? ¿Chema ñage age ulita ama dollale kirachke amadi? Ni kwian gdaite kweri kiraske ama kare.” Kwian ulita lle gude chadale kare gau dage gerudu no ene ama giti. 5 Kaire lle gude chadale kare tirare ama jo chugaba ngwadi mo sobade dabadi gerule me no jain jain sugaska Chube dollale ama tadu mo gbakalin kweri kwian chugagwallale, kaire ama jo chugaba ngwadi chege kwian chugagwallale age ama takalin kare ama chugagwalla lle jorisi kare kirallaske dai ngle cuarenta y doge. 6 Lle gude chadale kare agedu ulita ama gbere age kare. Ama gerudu me no Chube dollale ama Chube kalla jun kate ngwale me no, ama gerudu me no Chube ulla dodadre gerungwa Chube oledige kaire ama gerudu me no kwian Chubenudi kwian bai kaire ulita kle toi nga ngaña giti Chube oledi. 7 Kaire lle gude chadale karege jo kira ketaba age me no mo tke dole kira bate kwian Chubenu ulita toinga nga dba giti ole ama kirachke batre kare, kaire ama chegu kwian chudalla ulita nga ulitamuge kwian gerule kwira na tanrere ulita chugagwallale. 8 Kwian ulita bai kaire me kle kalla gbaba Bda Cordero chadalla giti kwian e ulita lle gude chadale kare kwian anblitanga gai dage. Gwangeabi Chube bebi nga ulita dodade gire Chubege uñadu kwian bai be Bda Cordero gerua gai ulia kwian bai be geru Bda Cordero jo gwabada kwian age me no ñanale giti gai ulia, kwian e kalla gbere chada giti unsuialin tangle, ene kwian e ñage toi chui tangle diali dale Chube ole. 9 Kwian bai kaire geru ai keruchuge, geru sugedale kwiange geru ai kle gerule giti: 10 Kwian bai kaire daba dbe skage, ama bdagli tkabe skage agedu daba ole ñanale. Kwian bai kaire daba gweda sbadi giti, kwian ene bdagli be joge gwabada sbadi giti ama agedu daba na ole kare. Ai giti sugedale kwian ulita Chubenuge Chube be ama jia gbe kwian bai agedu me no ama ole giti. Malen e giti ulia kwian ulita Chubenu diali kledale nga suga no ole ama kle boi giti, kaire ama mo ta gbadale no trate Chube gwa giti ama kle boi giti Chube ñage ama chudaboi, ama tañachugadale diali Chube giti me e chuge ngwadi. 11 Bigire cha gwagedu lle bdale tirare nadi chie bdugu dbiske, ama kuda molen gdaboke ama kuda chke salengwli bda cordero kudadi, agwa ama kerua chegu salengwli lle jorisi kare tirare kerua kare. 12 Lle bdale e chegu age ulita lle gude chadale tirare kare, agwa ama mo gbu ma soli lle gude chadale kare chudaboangale. Lle bdale e kwian nga dba giti ulita ta gbu lle gude chadale kare gai dage kwian chugagwallale, lle gude chadale kare e amaña solale ama jogebakeda kare agwa ama jo chkeni, gire kwian ulita gbere gerule no ama giti ama gai dage mo chugagwallale. 13 Kaire lle bdale tirare chieba dbiske ama mo gbu kiraske age tanre daga ngwale kwian gwa gbe modi kwian anblitagda. Ama jita kweri kadu nga ngaña giti chke nga dba giti kwian ulita gwa giti, ulita boidu ama gerudu kare. 14 Lle gude chadale kare kledu ne ngwadi gire lle bdale tirare jo chugaba ngwadi age tanre daga ngwale ene kwian nga dba giti ulita gwa giti. Lle bdale agedu alin giti allabi ama ñadu kwian ulita anblite ama gerua gai ulia gire ama gerudu kwian ole kwian lle oña dodale mo kodi lle gude chadale oña kare, lle gude chadale kare e kledu lentigeba jabale sbadi kote agwa ama kledu chage toi gwade, kwian lle gude chadale kare e oña dodadale salengwli ama kare ene kwian ulita ñage lle oña e gai chubere gerule no ama giti. 15 Lle bdale tirarege jo kira ketaba, ene ama lle gude chadale kare oña dodaba mo kodige gbu gwade gire lle oña gerudu kwian bai mi jain lle oña e gai dage lle oña kwian e gwanguda. 16 Kaire lle bdale tirare ama gerudu kwian ulita ole kirogwa ole kaire kwian juma ole, kaire kwian igi molen tanre ole kaire kwian igia me ole, kwian lle boanga ole kaire kwian chugagwalla ole, lle bdale tirare gerudu kwian ene ulita ole ama ulita ko taingwli giti o ama skadagda giti ama ulita mo chugale ngwadi chada gbange, ene ama chege gbaba egdage ama chugagwalla lle gude chadale kare alin. 17 Kwian bai kaire mo chugu ngwadi chada gbange mo koge o mo skadagdage kwian ene ñadu lle gige kaire lle chbade. Agwa kwian bai kaire me mo chugu ngwadi chada gbange mo koge ni mo skadagdage ama gbe egdage kwian ene me ñadu lle gige ni lle amanu chbade. Chada gbaba kwian ko giti o kwian skadagda giti chada gdaite e kle gerule lle gude chadale kare kalla mine kaire kle gerule lle gude chadale kare númerolla mine. 18 Lle gude chadale kare númerolla ene kare: seiscientos sesenta y seis (666). Número e chege kwian númerolla kare, ulia kwian mo ta gbadale tañachuge trate lle gude chadale kare númerolla seiscientos sesenta y seis giti, ene be suge kwian ege número seiscientos sesenta y seis kle gerule mine.
1 E ulita boidu ene ngeru bigire cha gwagedu Bda Corderodi, Bda Cordero e kledu jagebanga gdate jwichuga kada Sión giti. Bda Cordero ole kwian ngle ciento cuarenta y cuatro mil kledu ama ole ule, kwian ulita e kledu gbaba egdage skadagda giti Chube alin, ama ulita skadagda giti Bda Cordero kalla kledu kaire Bda Cordero Ñenua Chube kalla kledu gbabale kwian giti. 2 Bigire cha ologe nga keru sugedu chage chie nga ngaña gitige, nga e kledu gdade cha ologe salengwli chi kle ka jwen kare kaire enusulindra kle gdade tirare kare. Kaire kwian tanre kle lle gitarale kada arpa dagenga kare nga kledu gdade salengwli ulita ene lle ai kare. 3 Gire kwian ngle kledu Bda Cordero ole ama ulita kledu mo gate no geru jagere giti Chube kle toiba dba toigda kweri no giti gwangnagu, kaire kwian e kledu mo gate lle gwade gdabaga gwa giti kaire kwian daba Chubenu chugagwalla juma veinticuatro ulita gwa giti. Kwian ngle e ciento cuarenta y cuatro mil alin allabi ñadu geru mo gatakle giti e jagere jwen, ni kwian na gdaite ñadu jwen. Kwian ciento cuarenta y cuatro mil e jo jwanbanga kwian me no nga dba gitiske Jesucristo giti, ama jo dbaba nga ngaña giti Chube kle ngwadi, kwian e alin allabi ñadu mo gate no ene. 4 Kwian ngle e mo gatanga geru no jagere giti ama ulita me chageba muinga ole mo muingalla kare ni bitaite, ama ulita e toiba trate Chube gwa giti, ama ulita kledu chage Bda Cordero gerua nate ama jo baini kaire Bda Cordero jo ngwadi. Ama ulita jo jwanbanga Bda Cordero giti kwian agenga me noske ngerutabi, ene kwian e chegu gbaba egdage Chube alin kaire Bda Cordero alin. 5 Kwian e ni geru jinadu bitaite ngwale dabadi, ulia Chube gwa giti ama ulita trate ni ama jiske sidri Chube gwa giti. 6 Kaire cha gwagedu lle boanga Chube alin gdaitedi ji chienga ngaña tangle, ama kledu chage Chube gerua chui tangle dale kwian jwangda siere ji chuge age me no gdale ole, ama kledu chage geru e dbe ketadale kwian ulita toinga nga dba gitige kwian chudalla nga ulitamuge gerunga kwira na ulitamulege, ama ulitage lle boanga Chube alin kledu Chube gerua e kete. 7 Ama kledu gerule kiraske ene: “Ulia chui ji chugalege chkubi Chube be ji gbe kwian ulita agenga me no giti, malen ba Chube gadale dage ba Chube gerua gbadale gdadi. Ma no ba mo ta blite ba mo gate no Chube giti gerule no Chube giti, ama nga ngaña dodanga ama nga dba dodanga ama ble dodanga ama chi gwagwa dodanga, ama lle ulita dodanga ba ama gadale dage ba gerudale no ama giti.” 8 Lle boanga Chube alin ngeru gdaite gerudu ene, gire lle boanga na gdabokedale lle boanga ngeru ka junnga gerule dare, ama gerudu ene: “Ulia ulia una kweri una Babilonia chegu skianbanga ulita, chegu me no kwian agedu me no kbiale, kwian toinga una ege ama kwian na nga ulitamu gbu boi daga ngwale age me no tanre gire e giti Chube ji gbu kwian una Babiloniamu giti.” 9 Lle boanga gdabokedale gerudu ene gire lle boanga na gdamaidale gerudu kaire agwe kiraske kweri ene: “Kwian ulita bai kaire lle gude chadale kare gai dage gerule no ama giti kaire lle gude chadale kare oña dodadre mo kodi gai dage mo chubeale kaire kwian mo chuge ngwadi gbange egdage lle gude chadale kare alin chada gbe kwian skadagda giti o kwian koge, kwian ene kare ulita be ji chuge me no tirare. Chube skochie kwian kle mo tke dole ama ole giti gire Chube be ji gbe kwiange tirare mno, kwian be ji chuge tirare jitaske kaire lle mnuñale kada azufreske kwian e be chege salengwli kwian kle lle gage jai kle joge llale kare, ama be chege ji chuge tirare ene. Ji be kle gbaba kwian giti ene lle boanga Chube alin ulita gwa giti kaire Bda Cordero gwa giti, ji be kle chui tangle kwian agenga me no giti. 11 Jita tirare be kwian gbe boi daga ngwale jita e jiangwalla be chege bdugu diali chui tangle ni chui gbaite be kle kwian alin undege ji chugege, ni ngajrege ni ngajudi kwian be ñage undege ji chugeske, ji chuge jitaske be chege diali chui tangle kwian alin. Kwian bai kaire be lle gude chadale kare gai dage gerule no ama giti kaire be lle gude chadale kare oña dodadre gale dage mo chubeale kaire kwian mo chuge ngwadi gbange egdage dolla e kalla giti, kwian e ulita giti ji gbabe tirare ene.” Lle boanga gdamaidale gerudu ene ulita. 12 Cha gerule ba ole, be boi ene ulita malen kwian Chubenu ulita bai kaire kle age Chube gerua kle gerule kare kaire kle mo ta gbaba Jesucristo gerua gai gwangerugu diali, kwian ene ulita mo ta gbadale jage ta no ole ama kle boi daga ngwaleske. 13 Gire cha ologe geru sugedu chage nga ngaña giti gerule cha ole kiraske ene: “Ba kle geru keruchuge ba ai degadale: Nga suga nodale kwiandi aige gwangerugu kwian bai kaire Jesucristo gai ulia jogekeda ama be toi no Jesucristo ole.” Cha gbere chada dege ene ulita gire Chube Oña jaindunga gerudre cha ole kalen: “Ima ba gerudu ulia, kwian bai kaire Jesucristo gai ulia jogekeda ama be joge toi nga noge undege ama lle bo no Chube alin giti, kaire Chube be age no ama alin ama lle bo no Chube alin ñanale.” Chube Oña gerudu ene ulita. 14 Cha gerule ba ole, Chube cha ta gbu chada dege chude giti kaire uva giti, geru ai kle gerule Chube be age mine kwian ole ji chuge tirare chuiage bdaglige ene: Cha tienduda ngaña gire cha gwagedu bogakwa jutredige, bogakwa e giti kwian kledu gdaite toiba dba, ama kledu oro dodaba sombrerole gbaba mo chugage, kaire ama kledu sbadi dau degaba no trate dbe mo kote. 15 Gire cha gwagedu nga ngaña giti u gerungwa Chube olege lle boanga Chube alin gdaite chiu jondoi, ama ngautu kweri kiraske kwian kledu bogakwa gitige ene: “Chude skute chuia chku, chude ulita jo dabe nga dba giti, ba mo sbadilla gai, joga chude e skute ulita.” 16 Gerudre ene gire kwian kledu toiba bogakwa giti ama mo sbadilla gau ama chude skutu ulita nga dba giti gire ama chude dabe ulita litu ole. 17 Gire lle boanga Chube alin na nga ngaña giti chiu jondoi u gerungwa Chube olege ama kaire jo sbadi kweri dau degaba trate dbe mo kote. 18 Bigire lle boanga Chube alin na chiu jondoi lle gugangwa Chube gwa giti ngwadige, ama jita mananga ne ngwadi, ama ngautu kweri kiraske gerudu lle boanga na kledu chage sbadi dau degaba trate olege ene: “Uvagba ulita jo dabe nga dba giti, ba uvagba litadale ulita.” 19 Gerudre ene gire lle boanga Chube alin gdaite agedu gerudre ama ole kare, ama uvagba nga dba giti litu ole ulita gire ama uvagba e gbu ule ulita uvagba ugakle ngwadige una kweri gwagda giti, ene uvagba uganga ñadu uvagba uge ne ngwadi gire uva chia ulita chiu ngle. Geru uvagba giti ai kle gerule ene: Chube be ji gbe tirare kwian agenga me no giti salengwli lle boanga uvagba litu ole kare. Uvagba ugle gire uva chia chiu tanre, e salengwli Chube be ji gbe tirare kwian be bechieda tanre ji Chube be gbe kote, be be chege jrite ngle chi kweri kare bega ñage ngaña ja ka ole salengwli, kaire be e be chege jrite kwa kweri jeike jondoi kilómetro trescientos. Chube be ji gbe ene ulita kwian be ji chuge tanre daga ngwale ama agedu me no giti.
1 Bigire cha gwagedu nakwaite nga ngaña giti be boi tiraredi, cha gwagedu lle boanga Chube alin gdagukedi lle boanga e kledu biale ji tirare gdaguke gbe bdagli kwian ulita nga dba giti alin agedu me no giti, ege dare Chube mi mo ta gbe ji tirare gbe kwian giti dare. 2 Kaire cha gwagedu lle nodige ble ngwedige kare e chegu chi oña kare, kaire ble eske jita kledu, lle ble kare e kagda giti kwian ngle kledu jagebanga gdate. Kwian e ulita mo ta gbubi me lle gude chadale kare me no gai mo chugagwallale kaire ama mo ta gbubi me lle gude chadale kare oña ngwale gai dage chubere kaire ama me mo chugu ngwadibi mo gbange egdage lle gude chadale kare chadalla seiscientos sesenta y seis (666) ni lle gude chadale kare kalla gbe mo koge ni mo skadagdage, ama ulita mo ta gbubi Chube giti. Kaire kwian e kledu lle gitarale dagalenga kada arpa Chube nu ketaba amage dbe mo kote. 3 Ama ulita Bda Cordero gerua ganga kledu mo gate no Chube giti Chube ama jun siere ama dollage giti salengwli kwian unsuialin tangle Chube gerua Moisés nu degaba ganga mo gatu no Chube giti Chube ama jun siere ama dollage giti kare, ama ulita kledu mo gate no Chube alin ai kare: “Chube, ba cha ulita Chugagwalla kweri, ulia ba noare ba kweri ba kiraske ba agenga no diali, ba kle age ulita ba kle gerule kare, ba ulia no, cha gerule no ba giti diali. 4 Ba cha Chugagwalla kweri, kwian ulita mo ta dbe kwachie ba ngeru, kwian ulita be tachke ba gai dage, gire kwian be gerule no ba giti ba gai dage, ni kwian gdaite be chege kamne ba ngeru. Cha gerule ulia no ba giti ba alin allabi kweri no trate agenga no diali, kaire kwian nga ulitamuge be mo lite be gerule no trate ba giti.” 5 Kwian mo gatu no ene ulita Chube alin gire cha gwagedu u gerungwa Chube oledi nga ngaña giti, u e ugakalla kledu degabanga ulita, u skieru nga no no kledu, ne ngwadi lle kwian ta gbagda Chube agedu no kwian alin giti kledu gbaba eni. 6 U gerungwa Chube olege lle boanga Chube alin gdaguke chiu, ama gdaite gdaite chiu ji tirare gdaguke dbe gbadale kwian ulita nga dba gitige alin. Ama ulita chiu u gerungwa Chube olege mo ngama tkaba ñometra jutre gwadenga no noske kaire oro dodaba kwa kweri ama giti mo lugabada bonga tangle joge ngaña kudegda giti. 7 Lle gwade gdabaga ama gdaite oro dodaba jogda kare ketu gdaite gdaite lle boanga Chube alin gdaguke ulitage. Chube toinga chui tangle ji amanu tirare gbaba lle jogda kare gbaguke tadi jo ketaba lle boanga gdaite gdaitege kwian boagda daga ngwale kwian agedu me no gdale. 8 Chube jiangwa gbu u gerungwa Chube olege nga ngaña giti gwa, Chube ulia ama kweri kiraske tanre, malen Chube kledu ngwadi jiangwa skatedu tanre uge skieru ama kiralla giti, nga ege ulita chegu jiangwaske, gire ni gdaite ñadu joge nga ege. Lle boanga Chube alin gdaguke be ji tira gdaguke gbe ulita kwian giti, e ulita be bidege gire ulita ñage joge gwa u ege nga ngaña giti.
1 Cha geru keruchugu gerule kweri kiraske, geru e kledu chie u gerungwa Chube olege nga ngaña giti, geru sugedu chage gerule lle boanga gdaguke ole ene: “Ba ulita gdaguke gdaite gdaite jogedale nga dba giti ji gdaguke Chubenu ulita jo gbaba lle jogda kare gbaguke tadi dbe gbale kwian ulita giti.” Cha geru keruchugu gerule ene ulita lle boanga Chube alin gdaguke ole. 2 Gire lle boanga Chube alin gdaite jo nga dba giti ngeru ji tirare Chubenu dbe gbale kwian giti, ji tirare e kledu jogda tadi lle boanga ji e otoda dbi giti. Ama ji Chubenu gbu kwiange kwian bai ulita kaire mo chugaba ngwadi gude chadale kare chadalla gbange ama koge o ama skadagdage, kaire bai lle gude chadale kare oña ngwale gau dage mo chubeale, kwian ulita edi jingme tirare sugaska chku, jingme ama ulita gbu tuge chege solale skibachie tanre. 3 Ngeru boidu ene gire lle boanga Chube alin na gdabokedale jo nga dba giti ji tirare Chubenu dbe gbale kwian giti, ji tirare e kledu jogda tadi, lle boanga ji e otoda bleske gire chi bleske chegu bere kwian jaba kle bechie kare, gire lle bdale ulita kledu toi bleske ulita jokeda be e kote. 4 Boidu ene gire lle boanga Chube alin na gdamaidale jo nga dba giti ji tirare Chubenu dbe gbale kwian giti, ji tirare e kledu jogda tadi, lle boanga ji e otoda chi kweria ulitaske kaire chi gwagwa ulitaske gire chi kweria ulita kaire chi gwagwa dbige ulita chegu bere. 5 Boidu ene nga dba giti gire lle boanga Chube alin chi mananga cha ama keruchugu gerule Chube ole ene: “Chube, ba no trate, ba kledu ngeru lle ulita ba bebi dodadege kaire ba amaña kle nege tangle trate, ba kle age ulita trate ba takalin kare. Ba kle ji gbe kwian ulita giti ama ulita agedu me no ba dollale giti ama ulita ji chugadale nege agedu me no gdale. Kwian me no ba dollale kwian ngle banu guda kaire agwe kwian ba dollale kwian ngle ba gerua ketanga dabage guda agwa nege ba kle kwian banu jia gbe kwian me no ulita giti, nege ba kle kwian me no gbe boi daga ngwale kwian banu jokeda gdale, ba chi ulita gbu jwlite bere kwian age me no alin jadale. Ba kle ji gbe kwian me no giti ene, e no kwian agedu me no ulita alin, nege ba kle kwian banu ulita jia jwennga. Kwian me no agedu me no kwian banu ole e ñanale ama ulita ba kle gbe ji chuge.” 7 Lle boanga Chube alin chi mananga gerudu ene Chube ole, kaire cha geru keruchugu chie lle gugangwa Chube gwa giti ngwadige gerule ene: “Chube cha Chugagwalla, lle boanga ngeru chi mananga gerudu ba ole kare e ulia, cha ama ka chudaboi, cha gerule ama kare ba ole. Chube, noare ba kle age no ene ulita, ba kweri kiraske ba agenga no kwian agenga no alin, ba kle kwian me no gbe ji chuge ama agedu me no ulita giti, ba ulia ñage ji gbe trate kwian ulita giti ama agedu me no ñanale.” Gerudre ene Chube ole. 8 Bigire lle boanga Chube alin na gdabagadale jo ji tirare Chubenu dbe gbale kwian giti, ji tirare e kledu jogda tadi, lle boanga ji e otoda chui giti, chui chratigunga jita kare kwian ulita kugedu chui chralla kote. 9 Gire kwian ulita chegu kugeba tirare jabale jita kote agwa ni kwian mo gbu mo ta blite Chube ole Chube gai dage ni mo ta gbu gerule no Chube giti. Chube ji gbu tirare giti gdale kwian ulita ta skochie tanre gerudu me no Chube dollale sugaska dare. 10 Gire lle boanga Chubenu na gdatigadale jo ji tirare Chubenu dbe gbale kwian giti, ji tirare e kledu jogda tadi, lle boanga ji e otoda lle gude chadale kare kle toi ngwadige giti gire kwian ulita amanu chegu nga jereske ji e kote. Kwian ulita chegu boi daga ngwale skibachie tanre ji e kote, ama mo gutu kwirage skiba kote, 11 kwian e ulita chegu solale skibachie tanre, ulita boidu ene tirare agwa ni kwian mo ta blitu age no, kwian chegu age dare me no, kaire kwian gerudu me no Chube toinga nga ngaña giti dollale, ama ulita gerudu me no Chube dollale Chube ji gbu ama giti gdale. 12 Boidu ene ulita gire lle boanga Chube alin na gdaderekedale jo nga dba giti ji tirare Chubenu dbe gbale kwian giti, ji tirare e kledu jogda tadi, lle boanga ji e otoda chi kweria kada Eufratege, gire chi kweria e chegu junbatebanga. Chi e kledu ngwadi nga chegu ulen chegu tkaba jonle chagegda, ene kwian chugagwalla ulita be chie chui chie ngwange ngnagu ñage joge tangle chi kweria ege mo litadale Chube dolla na ulita ole. 13 Kaire cha gwagedu dolla oña me no gdamaidi, dolla oña me no e ulita chegu salengwli bodrega kare. Dolla oña me no gdaite chiu lle jorisi kare tirare kate, na gdaite chiu lle gudere kate, na gdaite chiu lle bdale kate, lle bdale e ama lle jorisi kare ka chudaboanga ama kwian anblitanga ngwale geru ngwaledi. Dolla oña me no gdaite gdaite chiu bodregale lle gdamai me no e kate. 14 Dolla oña me no gdamai e nu chieba che dolla Satanáge, ama ulita kledu age tanre mo chugagwalla Satanás kirallaske ama ulita lle daga ngwale no tanre dodadu kwian gwa giti. Dolla oña gdamai e jo nga ulitage kwian chugagwalla nga ulitamu ta gbe mo lite ule kwaitre alin mo gbe biale Chube dollale kira batale Chube chuiage Chube ole. Chui ege Chube gdaitre alin kiraske tanre be mo kira kaite nate kwian ulitage Chube kira molen tanre be kirachke dolla kiralla ulitadi. 15 Cha gerule ba ole, ba tachkedale Jesucristo gerudu kare ene: “Ba kledale biale ni be uñale kwiange gire cha be chieni nga dba ai giti blike kwian skwe boanga kle chie kare. Kwian bai kaire be skwen chage gwade me gbeba ama be kle biale cha manade ngwange cha be chieni chuiage, ama kle biale kare mo ngama tkaba ñometraske kare, kwian edi nga be suge noare ama mi chege ibule mo giti kwian kle chage taglale kwian na gwa giti kare.” Jesucristo gerudu ene ulita ama be chieni chuia giti. 16 Dolla oña bodrega kare gdamai kwian chugagwalla nga ulitamu litu ole ulita kwaitre alin nga kadakle kwian israelita kwirale Armagedón. Nga ege kwian chugagwalla ulita litre ole gire lle boanga Chube alin na gdaguke bdaglidale jo ji tirare Chubenu dbe gbale kwian giti, ji tirare e kledu jogda tadi, lle boanga ji e otoda ngaña mleudage, gire u gerungwa Chube ole nga ngaña gitige gerudre kweri kiraske, Chube kle toiba dba ama toigdalla kweri giti amaña gerudu ene: “Cha Chube cha ji ai gdaguke ulita gbu oteda kwian ulita gbe ji chuge.” 18 Chube gerudu ene ulita gire sugetibi nga ko chrachiunga, kaire enusulindra gdadu kweri gire kaire dbi jwliendu kweri tirare kegde chitedu kweri ni nu boiba ngeru ene bitaite Chube kwian gwangea gbu toi nga aige gwaigudage. 19 Chube nga gbu jwlien tirare ene gire una kweri Babiloniage skiendunga bitamaige tangle, Chube me ta jonga una Babiloniage kwian una ege kle age me no me no giti, Chube ta skochiu tanre kwian agedu me no tanre sugaska Chube dollale gdale, gire Chube ji gbu tirare kwian una emu giti ene. Kaire una nga dba giti ulita skiendunga ulita jo dba chegu me no. 20 Gire ngadrega ulita kledu bleske kaire jwichuga ulita jonga me chegu ngeru kare. 21 Kaire nga ngaña giti noi sklieba nga skeke kote tanre bolole kweri kweri jaindu tirare chku dba kwian giti. Noi sklieba gbaite gbaite kweri kweri gaba tanre, ama gbaite gbaite gaba lle quintal gdaite llagli kare. Chube ji gbu tirare ene kwian ulita giti agwa kwian me mo ta blitu Chube ole. Kwian gerudu ma me no gwangerugu Chube dollale Chube noi gbu jain kechuga kare nga ngaña giti gdale. Chube ji e tirare gbu kwian ulita alin, e giti kwian ulita ta skochiu tanre Chubedi.
1 Lle boanga Chube alin gdaguke chagedu lle jogda kare gbaguke dbe kote gdaite gdaite ama agedu ulita ama kagle kare, gire lle boanga e gdaite chiu cha gitigu gerudu cha ole: “Bai aini cha be ji kweri Chubenu kaite bage, ji kweri tirare cha be gbe muinga gdaite chagenga kwian onbre tanre ole giti, muinga e kle toiba dba chi tanre giti nga dba giti, muinga e chege salengwli una kweri gdaite kare kwian chugagwalla kweri ulita una emu chege kwian chugagwalla nga dba giti ulita kaganga kare. 2 Kwian chugagwalla ulita nga ulitamu nga dba giti chageba muinga e ole ke giti mo muira kare, kaire kwian na ulita kle toi nga dba giti ama ulita kle chege kwian llale kare age me no muinga e ole ke giti mo muira kare.” 3 Lle boanga gdaite gerudu ene cha ole, gire Chube Oña chku chadige, cha chegu ama kirallaske. Gire lle boanga gerudu cha ole ngeru amaña cha du nga gballage. Ne ngwadi cha gwagedu muingadi skwenba lle gude chadale dabere kare giti, lle gudere e chuga molen gbaguke kaire ama kuda molen gdataboko, lle gudere e jegwale ulita chada kledu degaba chada e gerule me no sugaska Chube dollale. 4 Muinga cha gwagedudi muinga e kledu mo ngama tkaba ñometra chada drega bokeske ñometra chada lénrenngaske kaire ñometra chada dabereske, muinga e kledu mo gbagataba lle no ulita giti, oro chrachienga no kwangle kaire lle igigwale gba kweri kada perla kaire kechuga soli ñanaske tanre ama nu tkaba mo jegwale ulita, ama kledu mo dodaba no trate ulita ene. Muinga e kote muinga kledu oro dodabale jogdale dbe, lle jogda kare e tadi lle tanre me no sugaska tañachugagda jain jain me no onbre giti muire giti kledu. Muinga e agenga me no tanre mo chuge onbre tanre ole ke giti. 5 Muinga e skadagda giti chada gweale kledu degaba, chada e kwian gbu tañachuge, me sugedu kwian nage chada e kle gerule llema giti, chada kledu degaba muinga e skadagda giti ene: “Muinga ai kada una kweri Babilonia kare. Muinga ai chege muinga na chagenga onbre tanre ole chebiale, kaire muinga ai kwian ulita agenga me no sugaska chebiale age me no giti.” Chada kledu degaba ene muinga e amaña skadagda giti. 6 Bigire sugedu chage muinga agedu me no kwian Jesucristo gerua ganga ulia ole, muinga kwian Jesucristo ganga tanre guda nga suga no ole Jesucristo gerua gdale. Gire muinga e chegu kwian llale kare kwian Jesucristo gerua ganga ulita beadi. Cha gwagedu ulita muinga edi boi ene, gire cha chegu tañachuge tanre muinga giti mineade kle boi ene. 7 Lle boanga Chube alin gwagedu chadi tañachuge tanre gire lle boanga gerudu cha ole ene: “¿Mineade ba kle tañachuge tanre ba gwagedudi giti? Cha be ba ta gbe suge moge muinga e giti chada kle gerule mine ama giti, cha ba ta gbe lle gude chadale kare kle muinga dbe giti, lle gudere e chuga gbaguke molen kaire ama kuda gdataboko molen, e ulita giti cha be ba ta gbe. 8 Lle gude chadale kare ba gwagedudi e amaña kledubi toi unsuialin tangle agwa nege lle gude chadale kare me kle toi, agwa ulia lle gude chadale kare e kle nga tira dbiuga jerege ama be chie bdugu nga ege, gire ama kagabe bdagli boi daga ngwale ma tirare ama gwabeda. Kwian ulita toi nga dba giti bai kaire ama kalla me kle degaba chada Chubenu giti Chube nga ulita dodadu gwangeabi gire, kwian e me Jesucristo gerua ganga me ñage toi chui diali dale chui tangle Chube ole, kwian e kare ulita be chege tañachuge tanre lle gude chadale kare e giti ama toiba ngeru giti, nege ama me kle toi agwa amaña be meñe nate gwade chui bdaglige. E giti kwian me Chubenu be tañachuge tanre. 9 Nege ba geru ai keruchugadale no cha be gerule ba ole giti, geru ai cha be gerule giti ba mo ta gbadale chke uñale trate geru ai giti. Lle gude chadale kare chuga gbaguke molen, chuga e ulita chege jwichuga gdaguke kare muinga kle toiba dba giti. Kaire e amaña chuga gbaguke e chege chugagwalla nga dba giti gdaguke kare. 10 Chugagwalla gdaguke ege gdatiga me kle chege kwian chugagwallale nege tangle ngeru kare agwa gdaite kle chege kwian chugagwallale nege, agwa na gdaite be chke bdagli ama bebi chege kwian chugagwallale, ama be chie agwa ama mi chege kwian chugagwallale chui sbali. 11 Lle gude chadale kare toidu gwade ngeru agwa nege me kle toi, agwa chui bdaglige ama be chkeni gwade chugagwalla gdapadale, ama gdaite be chie chugagwalla na gdagukege. Ama be chege kwian ulita chugagwallale sugetidale alin allabi me chui tangle, gire ama kagabe boi daga ngwale tirare gwabeda bdagli. 12 Agwa kaire agwe lle gude chadale kare tirare kuda gdataboko molen ba gwagedudi, kuda e chege salengwli kwian chugagwalla gdataboko kare nga dba giti, chugagwalla e ulita bebi chege kwian chugagwallale, ama ulita gbabe kwian chugagwallale sugeti hora gbaitre alinge ule lle gude chadale kare ole, ama ulita gbabe kiraske tanre kwian ulita chugagwallale nga dba giti sugetidale alin. 13 Chugagwalla gdataboko ulita e be tañachuge ule salengwli ulita, ama ulita be lle gude chadale kare gai mo chugagwallale ama be lle gude chadale kare gbe ma kweri moge kwian ulita chugagwallale be ama chuge ngwadi age ama takalin kare. 14 Lle gude chadale kare tirare kaire chugagwalla gdataboko ulita ama skatemanallale, ama ulita be kira bate Bda Cordero dollale, agwa ama mi ñage kirachke Bda Corderodi. Bda Cordero kweri kiraske ama kwian Chugagwalla kweri ma no chugagwalla na ulitage, malen lle gude chadale kare kaire lle gude chadale kare skatemanalla ulita mi ñage kirachke Bda Corderodi. Bda Cordero be kirachke lle gude chadale karedi kaire lle gude chadale kare skatemanalladi. Kaire kwian mangire batre bai kaire Chube nu gaba mau alin, ama ulita Jesucristo gerua gau ulia ama kle age Chube takalin kare, ama ulita be kle ule Bda Cordero ole kirachke dolladi.” Lle boanga gerudu ene ulita cha ole. 15 Gire lle boanga gerudu dare chage ene: “Chi ai ulita ba gwagedudi muinga chagenga kwian onbre tanre ole kle toiba dba giti, chi e ulita salengwli kwian ulita toinga nga dba giti kare, kwian chudalla nga ulitamu gerunga kwira na ulitamule, ama ulita chege salengwli chi e muinga kle toiba dba giti kare. 16 Kaire agwe lle gude chadale kare kuda gdataboko ba gwagedudi, kuda e chege salengwli kwian daba chugagwalla kare. Chugagwalla ulita e kaire lle gude chadale kare be mo tke dole muinga e dollale, kaire ama ulita be muinga e chuge ngwadi gballa be lle ulita jwennga ama ngeru kaire muinga e jigabe me ngamaske gire muinga e be chege boadalenga daga ngwale, ama uda jegwale ulita gutabe, ama gugabe ulita jitaske. 17 Chube be kwian chugagwalla gdataboko e ta gbe ule ulita age Chube takalin ama age kare muinga ole, Chube be kwian ta gbe lle gude chadale kare gbe mo chugagwallale ene be chege boiba ulita Chube gerua kle gerule kare. 18 Muinga ba gwagedudi muinga e chege salengwli una kweri gdaite kada Babilonia kare ama chugagwalla na ulita nga dba ai giti kaganga.” Lle boanga Chube alin gerudu chage ene ulita una Babilonia giti.
1 Bigire cha gwagedu lle boanga Chube alin nadi lle boanga e chiu dbige nga ngaña giti chie nga dba ai giti, ama kiraske tanre, ama chralla tiendunga nga ulitage gire nga dba ai giti ulita chegu nga chra no giti lle boanga e chralla giti. 2 Lle boanga e ngautu kiraske kweri ene: “Ulia ulia una kweri Babilonia chegu skianbanga ulita, chegu me no kwian toinga una ege agedu me no kbiale. Una e chegu dolla oña me no ngle che dolla Satanás chudaboangalla toingwallale kaire una e chegu bdada ulita ji giti me no sugaska jwiale. 3 Una bebi joge skianbanga gire kwian toinga una Babiloniage age salengwli muinga chagenga onbre tanre ole kare, kwian una Babiloniamu kwian na nga ulitamu gbu boi daga ngwale age me no tanre ama kledu age kare. Kwian chugagwalla ulita nga ulitamu kwian una Babiloniamu suia jun toidu salengwli ulita ama kare age me no tanre. Kwian una Babiloniamu tadukalin lle tanre ñanaskege ama diali igi kagakalinnga ngwale lle tanre tanre gige gire kwian lle chbadanga lle tanre ñanaske chbadu kwian una Babiloniamuge, e giti kwian lle chbadanga chege igi molen tanre. Kwian una Babiloniamu kwian na nga ulitamu gbu age ene me no ama kledu age kare gire e kbiale Chube ji gbu kwian toinga una Babiloniage giti.” Lle boanga Chube alin e gerudu ene ulita cha ole una Babilonia giti. 4 Kaire cha keru na keruchugu gerule nga ngaña gitige ene: “Ba ulita chanu jogedale siere una Babiloniage, ene ba ulita chanu mi mo ta gbe age me no kwian toinga una ege kle age kare ene ba kwian chanu mi ji chuge age me no kbiale. 5 Kwian una Babiloniamu agedu me no tanre cha dollale, ama agedu me no tanre cha gwa giti, ulita uñale chage. Sugedale bage cha me ta jonga ama ulita agedu me no gitige, malen cha be ji gbe kwian e giti.” 6 Kaire cha geru keruchugu gerule dare gerule lle boanga Chube alin kwian gbanga ji chuge ole, gerudre ene: “Ba agedale kwian una Babiloniamu ole ama agedu kwian na tanre ole kare. Ba ama gbadale boi daga ngwale bitaboke tangle ma ngle tira ama agedu daba olege. Ba lle gage tugenga moske bitaboke tangle ma tirare ama lle gage tugunga kwian na alin jadalege. 7 Kwian ulita toinga una Babiloniage mo gbu kweri mo sobadu kwian toinga nga nagedi, ama toidu lle ñanaske tanre giti lle ulita ama tadukalinge ama gigu, ama mo gbu kweri e giti. Ama mo sobadu mangire batre dabadi ama toidu lle ñanaske tanre ole mangire batre, e batre kaire ene agwe ba ama gbadale boi daga ngwale chege ta olire tanre ole. Diali kwian ulita una Babiloniamu tañachugu mo tale mo giti naskuni ene: ‘Cha ulita una Babiloniamu cha kwian nga ulitamu chugagwalla kweri, cha ulita no trate. Cha me chege dale muinga kle chege gballa kare, cha mi chege ta olire ole, lle ulita kle cha ole, cha mi boi daga ngwale dale.’ Kwian toinga una Babiloniage tañachugu ene mo gbe tangle kwian nadi suge moge kweri. 8 Malen e giti blikare chui gbaitre alinge ji be kle gbaba ama giti ene: Ama gweale be jogekeda, na be chege ama oliade, ama be bli chuge tanre, kaire ama be joge gugaba jitaske. Ulia cha Chube no trate kiraske cha kwian Chugagwalla kweri ji gbanga kwian giti age me no gdale, cha be ji gbe tirare kwian una Babiloniamu giti kwian agedu cha dollale kbiale.” Keru sugedu chage nga ngaña giti gerudu ene ulita lle boanga Chube alin kwian gbanga ji chuge ole. 9 Kwian chugagwalla nga ulitamu kwian una Babiloniamu suia jun toidu salengwli ulita ama kare age me no tanre nga suga no ole mo chuge ke giti onbre muinga ole muinga onbre ole. Kaire kwian chugagwalla ulita e sui jun toi lle tanre ñanaske ole salengwli kwian una Babiloniamu kare. Chube ji gbu kwian una Babiloniamu giti gire kwian chugagwalla nga ulitamu gwagedu una Babiloniadi boi tirare daga ngwale gwagedu una kuge jiangwalladi chie bdugu jitaske, gire kwian chugagwalla nga ulitamu ta olidu tanre kwian una Babiloniamu giti. 10 Kwian una Babiloniamu boidu tirare daga ngwale ene agedu me no gdale gire kwian chugagwalla ulita ama skatemanallale chegu ta kennga gwage amadi bate, ama gerudu ene: “Ulia ulia cha ulita tai dage bage ba ulita toinga una Babiloniage, una Babilonia kweri noare agwa sugetibi allabi hora gdaitre alinge ji chku gbaba ba ulita giti ba agedu me no me no Chube dollale kbiale.” Kwian chugagwalla nga ulitamu kwian una Babiloniamu skatemanallale gerudu ene kwian toinga una Babilonia giti. 11 Kaire kwian ulita lle chbadanga kwian una Babiloniamuge ama olidu mo suia junnga ta olire ole kwian una Babiloniamu kledu boi giti, sugedu kwian lle chbadangage kwian una Babiloniamu me ñadu lle gige amage dare, malen e giti kwian lle chbadanga chegu ta olire tanre. 12 Ama lle ulita chbadu kwian una Babiloniamuge, ama lle ai kare chbadu: Lle ñanaske kada oro, igi dodaba llere, kechuga ñanaske gwadenga no, lle igigwa gba kweri kare kada perla, ñometra noare ñanaske tanre, ñometra chada lénrennga kaire ñometra chada dabere, gli tanre no ñanaske, gli e ñachke no, lle ai ulita chbadre kwian una Babiloniamuge. Kaire bda elefante dau kweri, gli ñanaske, lle mno kada bronce, hierro, kechuga noare kada mármol, lle ai ulita ñanaske jo dodabale lle tanrere. Lle ai ulita ñanaske chbadre kwian una Babiloniamuge. Kaire agwe lle na tanre chbadre kwian una Babiloniamuge lle e ulita kada ene: 13 Lle tanre ñachke no kada canela kaire mirra kaire olíbano kaire lle kinre gugadale ñachke no kada incienso, lle e ulita chbadre. Kaire lle bligdale tanre chbadre ene: Lle gage jadale kada vino, gli kada olivo kin, chude gutale kada trigo, kaire trigo mnuñale. Kaire lle bdale chbadre ene: Chbi, bda oveja, ja kaire carro lugakle jadi ja kle carro e dbe. Kaire kwian lle boanga tanre onbrenu muirenu chbadre kwian una Babiloniamuge. Lle ai ulita kwian lle chbadanga chbadu kwian una Babiloniamuge agwa me ñadu chbade dare. Kwian una Babiloniamu chegu me lle giganga dare. 14 Kwian lle chbadanga ulita gerudu kwian una kweri Babiloniamu giti ene: “Nege ba una Babiloniamu me kle chege toi ngeru kare. Lle ulita ba tadukalinge ba lle tanre ñanaske e gigu chage, agwa lle ulita e jonga ngwale. Nege ba me chegu lle molen ngeru kare, ba chegu kwian me lle molen kare diali chui tangle.” Kwian lle chbadanga gerudu ene ulita kwian una Babiloniamu giti. 15 Kwian lle chbadanga kledu lle tanre ñanaske chbade kwian una Babiloniamuge, lle e ñana giti kwian lle chbadanga ulita chegu igi molen tanre. Kwian una Babiloniamu ji chugu chuiage kwian lle chbadanga chegu batre kwachie, ama ulita olidu ta chegu dage ulita kwian una Babiloniamu kledu boi giti, 16 gire ama ulita gerudu ene: “Ulia ulia una Babilonia una kweri, agwa cha tai dage kwian una emuge ama kle ji chuge giti. Kwian toinga una ege kle chege salengwli muinga mo ngama tke no kare muinga kle mo ngama tke ñometra no kwangleare giti ñometra e chada lénrennga kaire chada dabere, ama kle chage mo gbagataba no oro chrachienga no kwangle giti, kaire ama mo dodaba ulita jegwale lle ñanaske giti lle igigwa gba kweri kare kada perla giti kaire kechuga soli gwadenga no giti. Muinga e kare ene kwian una Babiloniamu ulita kledu toi. 17 Agwa ulita sugetibi allabi hora gdaitre alinge ji gbere una e giti kwian toinga una ege agedu me no kbiale, una e chegu skianbanga ulita, kwian toinga una ege llea ulita jonga ngwale.” Kwian lle chbadanga ulita gerudu ene ulita kwian una Babiloniamu giti. Kwian ulita du dbanga kaire kwian ulita chagenga du e ulitage, kaire kwian ulita du mananga kaire kwian ulita kle lle boi blege ene ama ñage igi gai toigda, ama ulita kaire agwe gwagedu una Babiloniadi bole daga ngwale gugle, gwagedu una jiangwalladi chie bdugu jitaske, gire ama chegu bate una Babiloniage chru ole. Ama ulita gerudu ene: “Ni una na gdaite chege no kweri una Babilonia kledu kare.” 19 Ama ulita gerudu ene, gire ama ulita dbi mnuña batu mo chuga giti ta olire tanre ole, ama mo suia junnga ta olire ole kwian una Babiloniamu giti, gire ama ulita ngautu kweri gwangerugu ene: “Ulia cha tai dage bage ba ulita toinga una kweri ege. Ba ulita kledu lle molen tanre, ba giti kwian du mauña chegu igi molen tanre agwa ulia sugetibi allabi hora gdaitre alinge ji gbere ba giti ba agedu me no Chube dollale kbiale, ba toingwa chegu skianbada ulita chegu me no, ba llea ulita jonga ngwale.” Kwian e ulita gerudu ene una Babilonia giti. 20 Chube ji gbu kweri kwian toinga una Babiloniage giti kwian e agedu me no kwian Chubenu dollale gdale, malen e giti kwian ulita kle toi nga ngaña giti Chube ole kwian Jesucristo gerua ganga ulita, kwian ulita Jesucristo gerua ketanga dabage, kwian ulita Chube gerua ketanga, ama ulitadi nga sugadale no Chube agedu kwian una Babiloniamu ole giti. Chube kwian ulita amanu jia junnga kwian una Babiloniamuge. 21 Lle boanga Chube alin gdaite kiraske tanre ama kechuga gbaite kweri gau ngaña kodi, kechuga e chege salengwli kechuga kweri kweri lle gweale ugagda kare. Lle boanga kechuga e mliu bleske, ama gerudu ene: “Ke ai cha mliu bleske e kare ene una Babilonia be chege skianbada ulita chege me no diali dale alin, ni una e be chege naskuni ngeru kare. 22 Ni una ege dare kwian be lle gitarale kada arpa dagenga, ni kwian be ngwane dare una ege lle ngwanegda gdaite kada flautage ni lle ngwanegda gdaite kada trompetage, ni kwian gdaite be chege lle boanga una ege, ni kwian be chege lle gweale uge kechuga giti dare una ege. 23 Ni jichra be gwadenga dare una ege, ni kwian be mo jwen chuia ollade dare una ege. Kwian lle chbadanga ulita kledu toi una Babiloniage ama chegu ma kweri kwian lle chbadanga nga na ulitamuge, agwa nege ama kle ji chuge daga ngwale. Kwian una Babiloniamu kwian nga na ulitamu anblitu ngwale geru me nodi, ama kwian ta gbu age me no dolla Satanás kirallaske daba na gbe jiske. E giti ama ulita kle ji chuge tirare.” Lle boanga Chube alin kechuga mliu bleske gerudu ene ulita una Babilonia giti. 24 Una Babilonia ege kwian Chube gerua ketanga guleda tanre kaire kwian Chubenu na guleda tanre una ege. Kaire kwian ulita mangire batre jo gwabada nga ulita nga dba ai giti ama ulita guleda ne ngwadi, e kbiale Chube be ji gbe tirare kwian toinga una ege giti.
1 Chube ji gbu kwian una Babiloniamu giti ene, bigire kwian ngle kerua sugedu chage kiraske nga ngaña giti, ama ulita kledu gerule ene: “Alelulla, Chube noare, cha ulita gerule no no Chube giti. Chube cha Chugagwalla kweri kira molen ama ñage age ulita mo kirallaske, Chube no trate agenga no. Chube cha ulita jun siere ji chugege Chube kirachku cha dolladi, e giti cha gerule no no Chube giti. Chube diali gerule trate, ulia Chube kle age kwian ole kwian kle age mangire batre, Chube kle kwian gbe ji chuge kwian kle age me no giti. Chube kweri e amaña ji gbu muinga gdaite giti muinga e chagenga kwian onbre tanre ole, muinga e amaña kwian nga ulitamu gbanga age me no Chube dollale, muinga e kwian Chubenu gbu boi daga ngwale kaire ama kwian Chubenu tanre guda, Chube kwian maunu jia junnga ulita muinga ege, Chube muinga e gbu ji chuge jabale muinga agedu me no ulita giti.” 3 Geru sugedu ene chage gire cha geru keruchugu nakwaiteni gerule ene: “Alelulla, Chube kweri, Chube kira molen tanre. Chube ji gbu kwian una Babiloniamu giti, una e kle gugaba ulita gire una e jiangwalla be kle chie bdugu diali chui tangle.” 4 Kwian ulita kle nga ngaña giti kerua sugedu chage gerule no ene Chube giti gire kwian daba Chubenu chugagwalla juma veinticuatro kaire lle gwade gdabaga ama ulita jongnagwa skutu dba mo ñeu kaboge gwadbiguda skadagda gbu dba Chube kle toiba dba toigda kweri giti gwangnagu, gerudu: “Alelulla, Chube che Chugagwalla kiraske ulita, noare ama ji gbu kwian me no una ege giti ulita.” 5 Kwian daba Chubenu chugagwalla juma ulita kaire lle gwade gdabaga gerudu ene ulita Chube giti, bigire geru chiu Chube che Chugagwalla kweri toigdalla ngwadige, gerudre ene: “Ba mangire batre ulita bai kaire kle mo ta gbe lle boi Chube alin ama takalin kare kle Chube gai dage, ba ulita kwian juma kaire kirogwa ulita gerudale no che Chugagwalla Chube giti, Chube kle age no ulita.” Cha geru keruchugu ene ulita. 6 Gire cha kwian tanre tanre keruchugu gerule, ama kerua sugedunga chage chi kweri kle gdade kare kaire keru sugedu salengwli enusulindra kle gdade kweri kare, gdade eneske cha geru keruchugu gerule ai kare: “Alelulla, Chube che Chugagwalla kle chege nege kwian ulita Chugagwalla, che Chubea noare kweri kira molen tanre. 7 Nga sugadale no che ulitadi, che ta kledale no nga suga no ole kaire che gerudale no Chube giti, che Chube gbadale kweri no kwian na ulita gwa giti. Ulia chui chku Bda Cordero Chubenu kada Jesucristo be mo jwen chuiage, Bda Cordero muingalla e kle gerule kwian Jesucristo gerua gaba ama kle biale mo jwen. 8 Chube ñometra no jutre jagere trate ketu muinga ege mo ngama tkagda mo jwen chuiage alin. Ñometra no jutre jo ketaba muinga ege chege salengwli kwian Jesucristo gerua ganga ulita kle age ulita no trate Chube gwa giti kare. Malen e giti nege che ulita chui olladale nga suga no ole.” 9 Lle boanga Chube alin gerudu nakwaite cha ole ene: “Ba chada degadale ene: ‘Kwian ulita mangire batre jo kadaba Bda Cordero be mo jwen chuia ollade ulita, ama ulitadi nga suga nodale.’ ” Lle boanga gerudu dare ene: “Geru ai ulita Chube gerua ulia.” 10 Lle boanga gerudu ene cha ole gire cha jongnagwa skutu dba lle boanga sera ngena ama gai dage mo chugagwalla kare, agwa lle boanga gerudu chage ene: “Ba me jongnagwa skute dba chadige. Cha lle boanga Chube alin salengwli ba kare salengwli kwian ba daballale ulita Jesucristo gerua ganga ulia kle toi no trate Jesucristo takalin kare, cha ama kare. Che ulita salengwli che ulita lle boanga Chube alin, che Chube alin gadale dage mo Chugagwallale. Geru ulita Jesucristo ketu kwiange, ba kaire kwian ba daballale ulita geru e gau ulia, geru e kle chege salengwli kwian Chube gerua ketanga ulita unsuialin geru ketu kare. Geru e ulita kle boi nege tangle, malen e giti che Chube gadale dage che gerudale no Chube giti.” Lle boanga Chube alin gerudu ene cha ole. 11 Gire cha gwagedu nga ngañadi nga kledu degabanga gire ja jutre gdaite kledu ne ngwadi, kwian kledu chage ja e giti kwian e ka gbere KWIAN GERUNGA ULIA NO TRATE, kaire ama ka gbere KWIAN AGENGA ULITA AMA KLE GERULE KARE. Ama chegu kwian ulita Chugagwalla no, ama kledu age mangire batre kwian ole kwian kle age giti no o me no. Ama kledu kira bate kwian ulita ole kwian bai kaire mo tku dole Chube ole. 12 Kaire agwe ama gwagwa kledu gwadenga salengwli jita teankle kle gwatige kle gwadenga kare. Kaire ama chugage ama kledu lle no tanre sombrerolla kare dbe, kaire ama kledu chage ka gweale dbe, ka e kledu gbaba ama giti, amage alin allabi sugedu geru e kle degaba mine. 13 Kaire ama kledu chage ñometraske ñometra e kledu ulita bere. Ama kledu chage ka na dbe ka e kledu gerule ene: GERU ULIA CHUBENU. 14 Lle boanga Chube alin nga ngaña giti tanre tanre kledu chage ule kwian gdaite kle skwenba ja jutre giti nate. Kaire agwe lle boanga e ulita gdaite gdaite kledu skwenba ja na jutre giti, ama ulita kledu mo ngama tkaba ñometra no trate jutreske. 15 Kwian gdaite kledu skwenba ngeru ja giti ama kate sbadi gaite kledu chie, sbadi e dau degaba no trate, sbadi e ama kledu chage dbe kwian nga ulitamu Chube dollale boagda daga ngwale. Ama be chege kwian e ulita Chugagwalla kweri kiraske ama be chege kwian ulita kaganga gbe boi ama takalin kare. Ama be kwian gbe boi daga ngwale tanre be ji gbe tirare kwian kle age me no Chube dollale giti. Chube ta skochiu tanre kwian kle age me no ama dollale gdale, malen e giti Chube kwian gdaite kle chage ja giti e kagu kwian nga ulitamu gbe ji chuge tirare. Chube kiraske tanre ama ma kiraske ulitage ama kwian gdaite e kagu age kwian ole salengwli kwian kle age uvagba ole kare. Kwian kle skite uvagba giti uvagba chia jwennga ulita kare, gire kwian ñage uvagba chia jwanbanga jai. E kare ene kwian gdaite kle chage ja giti sbadi ole kate be age kwian ole kwian gbe boi daga ngwale kwian kle age me no giti gdale. 16 Kwian gdaite ji gbanga kledu skwenba ja giti, ama ñometralla giti kaire ama skwagda giti ama kledu chage ka degaba ene: CHUGAGWALLA MA KWERI MA KIRASKE CHUGAGWALLA NA ULITAGE. Chada kledu gbaba ene ama ñometralla giti ama skwagda gitige. 17 Gire cha gwagedu lle boanga Chube alin nga ngaña giti gdaitedi jagebanga gdate chuira giti, ama kledu ngaute kiraske junten ulitage ene: “Bai ulita mo lite ole ule, Chube be bligda kete bage gutadale. Ene ba ñage kwian chugagwalla ulita uda gute kaire guardia donga chugagwalla uda gute, kaire kwian kle suge moge kiraske ama uda gute, kaire ja samlalla gute, kaire guardia donga skwenba ja e giti uda gute, kaire kwian lle boanga mo mauña alin ama uda gute, kaire kwian lle boanga igi gai mau alin naskuni ama uda gute, kaire kwian juma kaire kirogwa uda gute ulita.” 19 Lle boanga Chube alin ngautu ene juntenge gire cha gwagedu lle gude chadale karedi kaire ama skatemanalla kwian chugagwalla ulita nga ulitagedi ama ulita kledu chage donga tanre dbe ule kira bate mo giti, ama ulita kledu mo gbaba ule biale kira batadale kwian gdaite skwenba ja jutre giti ole kaire kwian e chudaboangalla ulita ole. 20 Kwian gdaite chage ja jutre giti ama chudaboangalla ulita ole ama kirachku lle gude chadale karedi kaire lle gude chadale kare chudaboangalla ulitadi. Lle gude chadale kare jo gaba ji chugadale ule lle bdale ama ka chudaboanga geru jinanga ngwale ole. Lle gude chadale kare ka chudaboanga e ageba tanre lle gude chadale kare kirallaske kwian na gwa giti kwian gwa gbagda lle gude chadale kare giti. Lle gude chadale kare ka chudaboanga gerunga ngwale, ama agedu giti kwian ulita mo anblitangu kwian bai kaire mo chugu ngwadi mo gbange egdage lle gude chadale kare kalla giti ama ulita lle gude chadale oña dodadre mo kodi gau dage mo chubeale, gire e kbiale lle gude chadale kare kaire ama ka chudaboanga ama gdabonate jo mliaba gwade jitaske, jita e kle gwade chege salengwli lle mnuñale kada azufre kare. 21 Agwa kwian na ulita lle gude chadale kare gatudige mo tke dole kwian kle chage ja jutre giti dollale, ama ulita jo gwabada sbadi giti, sbadi e chiu kwian gdaite kle skwenba ja jutre giti kate, sbadi e giti kwian jo gwabada gire junten ulita kwian gwabada e uda gutu, junten e ulita unchku kwian udadi.
1 Bigire cha gwagedu lle boanga Chube alin gdaitedi ama kledu nga ngaña giti chiu nga dba giti, lle boanga e chiu lle ugaka nga tira dbiugagenu jegagda dbe kaire giska hierrole ama lle boanga chiu dbe kote. 2 Lle boanga Chube alin e lle jorisi kare tirare gatuda, lle jorisi kare amaña e ka jwankle Diablo kaire amaña ka jwankle Satanás. Satanás e amaña mo blitu jorisire gire ama kwian gwangea Chube dodadu unsuialin tangle anblitu gbu age me no Chube dollale. Lle boanga Chube alin lle jorisi kare e luguda giska hierrole giti tku skage chura ngle chura milge. 3 Lle boanga Chube alin lle jorisi kare gbu dbiuga jere tirarege, ne ngwadi ama lle jorisi kare tku chiga, ama dbiuga ka jegu, dbiuga tirare e giti jondoi lle boanga chada gweale gbu ene ugaka e chegu gbaba egdage, ene lle jorisi kare me ñage chege kwian nga ulitamu anblite ulita chura milge. Chura mil be joge tangle ulita gire tane giti lle jorisi kare tirare e skajwanbenga sugetidale me sbali dale. 4 Bigire cha gwagedu toigda no ngledi, toigda e giti kwian kledu toiba dba, kwian e ulitage jo kira ketaba geru gbagda kwian giti bai jiske bai me jiske. Kaire cha gwagedu kwian oña ulitadi kwian bai jo chuga tkabanga Jesucristo gai ulia mo Chugagwallale gdale, ama ulita oñadi cha gwagedu. Ama ulita ni gdaite nu lle gude chadale kare gaba dage kaire ni lle gude chadale kare oña kwian dodadu mo kodi gau mo chubeale ni ama nu mo chugaba ngwadi mo gbange egdage skadagda giti ni koge, agwa ama diali chegu gerule no Jesucristo gerua giti ama kledu gwade gire, malen e giti ama guleda, ama ulitadi cha gwagedu Chube ama ulita jaba gbeni gwade kaire chegu daba chugagwallale ule Jesucristo ole chura ngle chura milge. 5 Ama ulita chkuni gwade ngeru kwian na ulita jogebakedage. Kwian bai ulita jaba me chkuni gwade ule kwian ngeru ole kwian ama jaba be chkeni gwade chura mil joge tangle gire jaba ene be chkeni gwade. 6 Nga suga noare kwian ulitadi bai kaire nu jogebakeda Jesucristo gerua gdale chkuni gwade ngerutabi, ama Chubenu amadi nga suga noare. Ama mi jogekeda bitabokege tangle dale, e kle gerule ama mi joge ji chuge daga ngwale ngwadi age me no gdale. Ama be chege kwian ulita chugagwallale Jesucristo ole ule chura ngle milge, ama be chege gerunga Chube ole kaire Jesucristo ole kwian na alin, ama be toi Chube ole diali nga suga no ole. 7 Chura mil ulita be joge tangle gire Satanás be jogeba skajwanbanga ama kledu skage ngwadige. 8 Ama be joge skajwanbangani gire ama be jogebi kwian nga ulitamu nga dba ai giti anblite tanre, kaire ama be joge nga kada Magogge kwian toinga ne ngwadi anblite kaire kwian chugagwalla nga emu kada Gog anblite, ama be kwian ulita ulita nga dba ai giti me no me Chubenu lite ole mo gbe biale mo tke dole Jesucristo ole, kwian ulita ama be lite ole be chege ngle ni che ñage ten nate, ama be chege ngle salengwli ubauda gbaite gbaite kaire kaire ble kagda giti kare. 9 Ama ulita joge kwian Chubenu ulita kle ngwadi una e Chube no ole una e kada Jerusalénge. Kwian ulita Satanás skatemanalla agenga ama takalin kare ama ulita be mo lite una edi tangle mo tke dole kwian Chubenu ole. Agwa Chube be jita kage nga ngaña giti chke nga dba giti kwian Chubenu dollale alin, gire kwian ulita mo tku dole kwian Chubenu ole chege kugeba boi tirare ji chugege be jogekeda ulita. 10 Satanás amaña kada Diablo kwian e anblitanga, ama joge mliaba jitaske ji chuge ngwadi, jita e gwade tirare kaire jiangwa kle chie salengwli lle mnuñale kada azufre kare. Jita e amañaske lle gude chadale jo mliababi kaire ama ka chudaboanga gerunga ngwale jo tkababi jita eske, ne ngwadi ngajudi ngajrege ama boke ule Satanás ole be kle ji chuge tirare chui tangle diali. 11 Bigire cha gwagedu toigda kweri jutredi toigda e giti Chugagwalla kweri Chube kledu toiba dba. Chugagwalla Chube gwa giti nga ulita jo tangle blikare, nga dba giti kaire nga ngaña giti nga jonga me gda uñale, nga ulita chegu blitaba nganake chui tangle dale alin. 12 Gire cha gwagedu kwian me Chubenu jogebakeda ulitadi kwian jalinnu kwian jumanu kaire kwian ulita bai kaire jogebakeda chi kote ble kote kaire kwian ulita jogebakeda oña kledu nga kada Hadege, ama jaba ulita chkuni gwade kledu jagebanga gdate Chube kaire Jesucristo gwangnagu Chube kerua manade ngwange Chube be ji gbe ama alin giti. Gire chada degaba kweri ngle jo treanbanga ulita, chada e kledu gerule kwian nu ageba ulita giti, kaire chada na gdaite jo treanbanga, chada e Bda Corderonu, chada e giti kwian ulita Jesucristo gerua ganga be toi Chube ole chui tangle diali dale alin kalla kledu degaba. Kwian ulita nu ageba giti mangire batre kledu degaba chada kweri ngle giti, gire Chube ji gbu kwian ulita giti chada kledu degaba ama agedu ulita giti mangire batre. 14 Kwian ulita jogebakeda ama jaba chkebani gwade bai kaire me Jesucristo gerua gaba, ama ulita jo mliaba jita tirareske ji chuge daga ngwale ngwadi, ama chegu sugekare Chubege diali dale alin, kwian e ulita chege salengwli ama jogekeda bitabokege tangle kare agwa ama be chege gwade ji chuge tirare diali dale alin. 15 Kwian ulita bai kaire kalla me kledu degaba chada Bda Corderonu giti kwian e ulita jo mliaba jitaske boi daga ngwale tanre chui diali dale alin.
1 Chube kwian gbu ji chuge boidu ene ulita gire chage sugedu nga ngaña giti nga dba giti ulita jonga me gda uñale kaire ble me kledu dare, nga chegu blitaba jagere. Cha gwagedu nga ngaña giti na jageredi kaire nga dba na jageredi. Cha gwagedu nga ulita chegu blitaba jagere nga me chegu ngeru kare. 2 Gire cha Juan gwagedu una noare Chubenudi una jagere ka jwankle Jerusaléndi. Una jagere e kledu chie nga ngaña giti Chube kle ngwadi gwadbiguda chke nga dba ai giti. Cha gwagedu no una edige, una e chegu cha gwage salengwli muinga kle mo jwen kle mo ngama tke no kare ama skatemanalla onbre ama be mo jwen ole manade ngwange kare, ene una e kare medu chage. 3 Cha kledu gwage ene gire cha geru keruchugu kweri nga ngaña giti Chugagwalla Chube kle toiba dba ngwadige, gerudre ene: “Nege Chube kle toi kwianske kwian e ulita Chube gau no mo Chugagwallale, kwian e ulita chegu kwian Chubenu, Chube be toi ama ole chui diali dale alin. 4 Malen kwian Chubenu ulita boidu daga ngwale ngeruge e ulita be joge tangle, mi kle dare ngeru kare. Chube be kwian amanu ulita ta olire jwennga kwian amanu mi chege ta olire ole dare, Chube be ama ta gbe nga suga no ole, kaire agwe kwian ulita Chubenu mi jogekeda dare ni be kle ta olire ole dare ni kwian be kle mo suia jwennga boi gwealege ni kwian be skibachie ulita be kle nga noge ulita be kle toi nga suga no ole diali Chube ole ule.” Keru e sugedu chage ene ulita. 5 Gire cha gwagedu Chube kledu toiba dba toigda no kweri giti ama gerudu ene: “Cha kle lle ulita gbe jagere.” Kaire Chube gerudu ngerugu ene dare cha ole: “Juan, ba chada degadale cha gerule ba ole giti. Geru ai ulita ulia, ba geru ai gai dage, ba mo ta gbe geru ai giti geru ai ulia no.” 6 Chube gerudu ene cha ole ulita, bigire ama gerudu dare cha ole ene: “Ulita boidu cha geru gbu kare, cha Chube, cha klebi lle ulita gwangeabi, kaire cha be kle chui diali dale alin. Cha lle ulita Chugagwalla gwangea ngerutabi kaire cha be chege lle ulita Chugagwalla chui bdaglige diali chui tangle. Kwian bai cha gerua gakalin ulia, ama ñage geru gai ulia alin allabi me lle ketadale chage geru e ñanale, gire geru gai ulia giti cha be kwian gbe toi nga suga no ole cha ole chui tangle diali. E salengwli kwian siechie gire cha ñage chi gwagwa no kwian gbagda toi chui tangle kete amage jadale sie ole kare. 7 Kwian bai mo ta gbe kiraske gwangerugu cha gerua giti age no diali cha takalin kare, kwian ene ulita cha be gbe toi chui tangle diali cha ole, cha be chege ama Ñenuale kaire agwe ama ulita be chege cha oliale. 8 Agwa kwian bai kaire ta kennga kwian ngeru me mo ta gbe kiraske ulia cha geruadi, kaire kwian bai me kle cha gerua ulia gai dage, kaire kwian bai me kle chage no cha takalin kare kle chage age me no tanre, kaire kwian bai daba gwangada, kaire kwian onbrenu muirenu bai kle mo chuge ke giti, kaire kwian bai kle tañachuge me no daba nadi dolla Satanás kirallaske daba gbe boi gweale, kaire kwian bai batre kle lle oña ngwale gai dage mo chubeale, kaire kwian bai songa ngwale, kwian ai kare ene ulita be joge tkaba jitaske ji chuge daga ngwale ngwadi, jita e gwade tirare kaire jiangwa kle chie salengwli lle mnuñale kada azufre mnuña kare. Kwian e be chege ne ngwadi sugekare chage, kwian e chege salengwli ama jogekeda bitabokege tangle kare agwa ama be chege gwade ji chuge tirare diali chui tangle.” Chube kledu toiba dba toigda kweri amanu giti gerudu cha ole ulita ene. 9 Lle boanga Chube alin gdaguke chagedu ji Chubenu gdaguke bdagli dbe lle jogda kare tadi gbaite gbaitege gbale kwian giti, lle boanga e gdaite chiu cha gitigu gerudu cha ole ene: “Salengwli kwian onbre kle mo jwen muinga ole kare, e kare ene Bda Cordero kada Jesucristo kle kwian maunu jwen dbadale toi mau ole nga noge. Bai, cha be nga e kaite bage.” 10 Lle boanga gerudu ene cha ole, gire Chube Oña chku chadige, cha chegu ama kirallaske. Gire lle boanga amaña cha du jwichuga kweri jeike gwagda giti ngaña gire ama una kweri no Chubenu kada Jerusalén kaitu chage, una e chiu nga ngaña giti gwadbiguda chiu Chube gwa giti nga dba giti. 11 Una e gwadedunga no Chube chrallaske, una e chralla kledu salengwli kechuga no kada jaspe chralla kle gwadenga no chi oña kare. 12 Una kweri edi tangle ulita gere kledu tkaba kweri jeike ngaña, gere e gerekalla gdataboko giti gdaboke kledu, gereka ege gdaite gdaite lle boanga Chube alin gdaite kledu gereka manade. Gereka gdaite gdaitege kwian israelita chudalla mne gdataboko giti gdaboke kalla kledu degaba gdaite, gire ene kwian israelita chudalla mne gdataboko giti gdaboke kalla kledu degaba ulita ugaka kaire kairege. 13 Gereka gdamai kledu chui chie ngwange ngnagu, gereka gdamai kledu chui joge ngwange ngnagu, gereka gdamai kledu siagu ngnagu, gereka gdamai kledu ñagu ngnagu. 14 Kechuga kweri kweri gbataboko giti gbaboke kledu gbaba gbaite gbaite unadi tangle, kechuga e ulita kledu gere ulita una edi tangle gatedi kiraske. Kechuga gbataboko giti gbaboke giti kwian Jesucristo gerua ketanga dabage kalla kledu degaba gdaite gdaite, kwian e ulita chagedu Bda Cordero amaña Jesucristo ole ule Jesucristo kledu toi nga dba ai giti kwianske gire, kwian e kalla gdaite gdaite kledu degaba kechuga gbaite gbaite giti. 15 Lle boanga Chube alin kledu gerule cha ole ama kledu chage oro dodabale lle ñachugagda dbe una no e ñachugagda kaire una e gerella kaire gerekalla ñachugagda. 16 Una medu kwale cha gwage ama sketangle dba monole salengwli ongoru ongoru kaire ama sketangle bdugu chege jeike salengwli ulita ni jeike ni buli. Lle boanga una e ñachuguda lle orole giti, una e kweri kweri ama kilómetro dos mil doscientos una eske tangle dba monole, una e jegwale dba sketangle monole salengwli jeike sketangle bdugu. 17 Kwian lle ulita ñachugebi kare, e kare ene lle boanga Chube alin gere ñachuguda, gere e ama ñachuguda chegu kweri metro sesenta y cinco. 18 Kechuga chrachienga noare kada jaspe kledu dodaba gerere, kaire agwe oro dodaba una e ulitale, oro e chrachienga no salengwli chi oña chrachienga kare. 19 Kechuga gbataboko giti gbaboke kledu gbaba dba una gerella kira gbagda, kechuga e giti kechuga soli na tanre no ñanaske kledu gbaba, kechuga soli e ulita gwadenga no. Kechuga kweri gbataboko giti gbaboke gbaite gbaite kledu gbaba ene: Kechuga gbaite gbaba ngeru kada jaspe, kechuga e gwadenga chi oña kare. Kechuga na gbabokedale kada zafiro gbaba, kechuga e gwadenga lenrenre no. Kechuga na gbamaidale kada ágata gbaba, kechuga e chada gwadenga no tanre. Kechuga na gbabagadale kada esmeralda gbaba, kechuga e gwadenga lerere no. 20 Kechuga na gbatigadale kada ónice gbaba, kechuga e gwadenga no. Kechuga na gbaderekedale kada cornalina gbaba, kechuga e gwadenga dabere no. Kechuga na gbagukedale kada crisólito gbaba, kechuga e gwadenga moloinre no. Kechuga na gbapadale kada berilo gbaba, kechuga e gwadenga lénrennga no. Kechuga na gbainkadale kada topacio gbaba, kechuga e gwadenga moloinnga no. Kechuga na gbatabokodale kada crisoprasa gbaba, kechuga e gwadenga lerere no. Kechuga na gbataboko giti gbaitedale kada jacinto gbaba, kechuga e gwadenga lenrenre no. Kechuga na gbataboko giti gbabokedale kada amatista gbaba, kechuga e gwadenga lénrennga no. Kechuga kweri gere kira gbagda gbataboko giti gbaboke kledu gbaba ene ulita. 21 Ke igigwale gba kweri kada perla gbaite jo dodaba gerekale gdaite gdaite ulita, gereka e ulita gdataboko giti gdaboke kledu una edi tangle. Kaire oro dodaba no jonle ulita kwian kle chage jegwale una ege, oro no e chege salengwli chi oña chrachienga kare. 22 Una ege Chube kaire Bda Cordero amanu amaña Jesucristo kledu kwianske, malen cha me gwagedu u gerungwa Chube oledi, ulia u e kare me kledu una ege. Agwa una e ulitage kwian kledu mo gate no gerule no Chube no kweri giti kaire Bda Cordero giti. 23 Una ege ni chui ni dai chratigenga una ege, Chube chralla kledu chratigenga kaire Bda Cordero jichra kare, Chube chralla kaire Bda Cordero chralla giti kwian ulita una ege kledu toi nga chra Chube agalinu giti. 24 Kwian ulita nga ulitamu nga dba giti bai kaire nu Jesucristo gerua gaba, Chube kaire Bda Cordero kwian e gbu ten mo chrallaske ene kwian ñadu chage no una ege. Kaire agwe kwian chugagwalla nga ulitamu nga dba giti Jesucristo gerua gaba chegu kweri nga dba giti daba chugagwallale, agwa una ege kwian chugagwalla e sugedu moge ama me kweri Chube kare agwa Chugagwalla gdaitre alin allabi ñage chege kweri. 25 Una ege nga jere me kle dale, nga ju alin diali kle malen gereka una ege ni bitaite kle jegaba, gereka e kle degabanga diali. 26 Kwian nga ulitamu mo gatu ulita no Chube giti Chube gai dage, kwian e sugedu moge kweri ulita ngeru nga dba giti agwa e suiage una ege gire Chube kaire Jesucristo chegu ma kweri ama ulitage, ama ulita Chube kaire Jesucristo gbu ma kweri mauge. 27 Kaire una ege ni lle sugaska me no gdaite kle, ni kwian gdaite ta me no agenga me no ni kwian gdaite geru jinanga ngwale ñage joge una ege. Agwa kwian ulita bai kaire kalla kle degaba chada no Bda Corderonu giti ama alin ñage toi ule una no ege chui tangle diali Chube kaire Jesucristo chrallaske ulita.
1 Kaire lle boanga Chube alin chi no trate kaitu chage una ege, chi e kwian gbe toi chui tangle, chi e kle chie toigda no kweri Chubenuge kaire Bda Cordero ngwadige. 2 Chi e kledu jrite tainkwli jon kweri chagegda kaskwada una kweri e bongage, chi e kagda giti ongoru ongoru gli kle kaire, gli e no trate kwian gbe toi chui tangle dale, gli e kle gbachie no dai kaire kairege, kle gbachie bitataboko giti bitaboke tangle chura gdaite kaire kairege, gli e ga no kwian nga ulitamu dodagda. 3 Una ege ni kwian gdaite ni lle gdaite kle boidale daga ngwale. Chube kaire Bda Cordero amaña Jesucristo kledu una ege toiba dba toigda kweri giti kwian ulita Chugagwallale, gire kwian ulita Jesucristo gerua gaba agedu Chube tadukalin kare kwian e kle gerule no Chube giti kaire Jesucristo giti kwian ulita Chube gai kweri Jesucristo gai kweri mo Chugagwallale. 4 Kwian e ulita mangire batre gwagedu mo gwagwa giti mo Chugagwalla Chubedi, kaire kwian ulita kledu chage Chube kalla degaba mo skadagda giti ole. 5 Nga ege nga jere me kle dale. Kwian ulita kledu toi eni ama me jichra gbadale dale kaire me toidu dare chuira chralla giti, Chube kwian ulita Chugagwalla ama kwian ulita gbu toi nga chra Chube agalinu giti. Kaire kwian ulita e chegu chugagwallale Chube ole ule chui tangle diali. Lle boanga Chube alin cha ta gbu ulita ene be boi giti. 6 Kaire agwe lle boanga Chube alin gerudu dare cha ole ene: “Juan, geru ai ulita cha gbu chke uñale bage geru ai ulita ulia, kwian ulita mo ta gbadale geru ai giti, ulia be kle boi ulita geru ai kle gerule kare. Chube che Chugagwalla mo Oña gbu kwian Chube gerua ketanga unsuialin tale ama gerua kete daba nage, Chube e amaña cha kaire lle boanga na gdaite amanu kagu kwian ulita nu ama gerua gaba ta gbe chke uñale lle ulita be boi sugeti giti.” Lle boanga Chube alin gerudu ene cha ole. 7 Jesucristo gerule ene: “Cha be chieni blike. Nga be suga no kwiandi kwian bai kaire kle Chube gerua gbe gdadi Chube gerua kle degaba chada ai giti kare.” Jesucristo gerule ene. 8 Cha Juan geru ai ulita keruchugu kaire cha gwagedu ai ulita be boi gitidi gire cha jongnagwa skutu dba lle boanga Chube alin gerudu cha ole lle ulita kaitu chage sera ngena ama gai dage. 9 Gire lle boanga gerudu cha ole ene: “Ba me jongnagwa skute dba chadi sera ngena. Cha me Chube, cha lle boanga alin Chube alin salengwli ba kare kaire kwian ba daballale ulita Chube gerua ketanga kare, kwian bai ulita kle age geru ulita kle degaba chada ai giti gai dage kwian ene ulita lle boanga Chube alin, che Chube gadale dage mo Chugagwalla ma kweri.” 10 Lle boanga gerudu dare cha ole ene: “Geru ai ulita kle degaba chada ai giti be boi chuia kle kodi, malen ba me ñage geru ai gate mo tale, ba geru ai ketadale gbe chke uñale kwian ulitage be boi giti. 11 Agwa kwian bai agenga me no chugene age gwangerugu me no kaire kwian tañachuge me no sugaska mo tale chugadale ngwadi tañachuge ene dare, kaire agwe kwian ulita kle age no chegedale age ma no gwangerugu, kwian bai kle mo ta gbe lle boi no Chube alin kwian ene mo ta gbadale gwangerugu chage no trate Chube gwa giti age diali Chube takalin kare.” Lle boanga Chube alin gerudu ene cha ole ulita. 12 Gire Jesucristo gerule nakwaite: “Ulia cha be chieni sugeti, cha be chieni lle no dbe kwian ulita alin kwian agedu no ñanale bai kaire cha gau ulia agedu no cha tadukalin kare, kaire cha be ji gbe kwian ulita giti bai kaire me cha gau ulia agedu me no cha dollale ulita giti. 13 Che klebi lle ulita gwangeabi, kaire cha be kle chui diali dale alin. Cha lle ulita Chugagwalla gwangea ngerutabi kaire cha be chege lle ulita Chugagwalla chui bdaglige diali chui tangle. Cha ulia ma kiraske ma kweri lle ulitage.” Jesucristo gerule ene ulita. 14 Cha gerule ba ole, nga be suga noare kwiandi bai kaire kle mo ñometralla gbababi biale trate kare, ene ama ñage gli kwian gbagda toi chui tangle gba gute kaire ama ñage joge una no Chubenu ugakallage tangle ñage joge chiga. 15 Agwa kwian bai kaire agenga me no tanre kaire kwian bai kaire tañachuge me no dabadi che dolla Satanás kirallaske daba gbe boi daga ngwale, kaire kwian onbrenu muirenu ulita bai kaire kle mo chuge ke giti, kaire kwian bai kaire kle daba gweda, kaire kwian bai kaire kle lle oña ngwale gai dage mo chubeale, kaire kwian bai kaire no geru jinade ole kle sole ngwale diali, kwian agenga me no ai kare ene ulita ama mi ñage joge una no Chubenu eske. 16 Jesucristo gerule nakwaite ene: “Cha Jesu, cha lle boanga cha alin nga ngaña giti gdaite kagu geru ulia chada ai giti gbe chke uñale ba kwian ulita cha gerua gangage. Cha amaña kwian israelita chugagwalla unsuialin tangle kada David oindalla kaire cha beu ngliaña kle gwadenga no ngabebita bduge kare.” Jesucristo gerule ene ulita. 17 Chube Oña kaire Bda Cordero muingalla amaña kwian ulita Jesucristo gerua ganga, ama ulita kle gerule kwian me Jesucristo gerua ganga ole ene: “¡Bai Jesucristo gerua gai ulia!” Kaire kwian ulita bai geru Jesucristo giti ai keruchugu geru gbu gdadi, ama gerudale kwian me Chubenu ole geru ai giti: “¡Bai Jesucristo gerua gai ulia mo alin!” Kwian bai kaire agwe siechie ama chiedale chi kwian gbagda toi chui tangle jai, ama chi e jai ama me lle ketadale chi e no ñanale dale. 18 Kwian ulita bai kaire kle Chube gerua kle degaba chada ai giti keruchuge, kwian ene ulitage cha ama ta gbe geru ai giti ene: Ba bai kaire geru kle degaba chada ai giti gbe ma ngle geru kle degabage, gire ene Chube be ji gbe tirare ba giti salengwli kle degaba chada ai giti kare. 19 Kaire agwe kwian bai kaire geru kle degaba chada ai giti jwennga siere sidri me geru kete ulita kwiange kle degaba kare gire ene Chube be ama jwen siere jige sugekare Chubege, kwian e me ñage gli kwian gbagda toi chui tangle gba gute, ama me ñage toi una no Chubenuge. Una ai giti kaire gli ai giti geru kle degaba ulita chada ai giti. 20 Jesucristo lle boanga mo alin nga ngaña giti kagu cha ta gbe geru ulia ai ulita giti, ama kle gerule ene: “Ulia cha be chieni sugeti.” Gire cha jainnga Jesucristo kalen: “Cha Chugagwalla Jesu, cha takalin chege ulita chada ai kle gerule kare. Cha takalin ba chieni blikare ba kle gerule kare. Ene nobi.” Cha gerule ene Jesucristo chieni giti. 21 Cha gerule ulita bdagli ba ole chada ai giti, cha takalin che Chugagwalla Jesucristo age no no ba ulita nu Jesucristo gerua gaba ulia alin.