1

1 Re Cristo jare' re Ch'abal re nisekresan chin re Dios. Tak xtiquir-pa ronojel, can c'o-va reja'. Reja' can c'o-va riq'uin re Dios y reja' chuka' can Dios-va. 2 Reja' can c'o-va-pa riq'uin re Dios tak xban re ruch'ulef. 3 Y roma chuka' re Cristo tak c'o ronojel. Roma re Dios pa ruk'a' reja' xuya-va chin xuban ronojel cosas. 4 Riq'uin reja' c'o-va re c'aslen. Y re c'aslen re', jare' re sakil quichin re vinak. 5 Y re jun sakil re', nusekresaj re quic'aslen re vinak re jec'o pa k'oko'm. Y re k'oko'm chin re c'aslen re', can man nitiquir-ta nuchup re jun sakil re'. 6 Y xc'ue' jun ache re xtak-pa roma re Dios, y re' ja re Juan Bautista. 7 Re Juan Bautista xpa chin xutzijoj re Cristo re sakil, chin quire' conojel vinak tiquinimaj re nuya' rutzijol reja' chique. 8 Y mana-ta reja' re sakil. Reja' xaxe chin xuya' rutzijol re sakil re'. 9 Y jare' tak xbeka re sakil re' chach re ruch'ulef. Jare' re katzij sakil re nisekresan quichin re vinak. 10 Can xbeka-va chach re ruch'ulef re banon roma reja', pero re jec'o chach re ruch'ulef, xa man xquitamaj-ta rach tak xbeka. 11 Can chupan-va re ruch'ulef chin reja' xbeka-va, pero re vinak re je richin reja', xa man xquic'ul-ta. 12 Jac'a re xe'c'ulu y xe'niman richin, can xuban chique che xe'oc rajc'ual re Dios. 13 Re vinak re xe'oc rajc'ual re Dios can xa'lax-va chic, pero man ancha'l-ta tak xa'lax riq'uin re quite', tak xa ja re te'ej-tata'aj xe'jovan che xalax re ac'ual. Roma re c'ac'a alaxbal jare' re nurayij re Dios, y mana-ta re nurayij jun ache. 14 Y re Cristo re Ch'abal re nisekresan chin re Dios, xbeka chach re ruch'ulef y can xoc chuka' ancha'l yoj re yoj vinak. Y xkatz'at che can xe-va reja' re Ruc'ajol re Dios, roma c'o ruk'ij y camas otz runa'oj kaq'uin y can xe-va re katzij ch'abal c'o riq'uin. 15 Y re Juan Bautista can xuya-va rutzijol re Cristo. Can riq'uin ruchuk'a' tak xubij: Jare' re ntzijon chiva, tak ximbij che re xte'ka chuij can yen, jare' re m'as c'o ruk'ij que chinoch yen. Y can c'o-va tak yen c'amaje-na quinalax chach re ruch'ulef, xcha' re Juan. 16 Can konojel c'a yoj re kaniman chic re Cristo kac'ulun re utzil. Can man xe-ta c'a jun bey re ruyi'om-pa chaka, xa can ruc'amom-pa-ri' re utzil re ye'ruya-pa chaka. 17 Re Dios jac'a re Mois'es re xucusaj chin xuya' re ley. Pero chin che xbeka re utzil y re katzij, ja re Jesucristo re xucusaj. 18 Can man jun vinak re tz'eteyon chin re Dios, xa can xe re Ruc'ajol re tz'eteyon richin. Re Dios xa can xe c'a jun Ruc'ajol c'o y camas nrajo'. Y jare' re xbesekresan-ka re Dios chakavach vova' chach re ruch'ulef. 19 Y re achi'a' c'o quik'ij chakacojol yoj re yoj israelitas chire' pa tenemit Jerusal'en, jec'o achi'a' re xe'quitak-a riq'uin re Juan Bautista. Xe'quitak-a sacerdotes y achi'a' re nibex levitas chique, chin che xbequic'utuj cha re Juan Bautista che tubij vo xa ja reja' re Cristo re bin che nitak-pa roma re Dios. 20 Y re Juan Bautista choj xubij: Mana-ta yen re Cristo. 21 Y c'are' re achi'a' re je'takon-a, xquic'utuj chic cha: ??Yat anchique c'a rat c'a? ??O xa ja rat re El'ias re rusamajel re Dios re xc'ue' ajuer can, re xbex profeta cha? xe'cha' cha. Pero re Juan Bautista xubij chique: Mana-ta yen. C'are' re achi'a' re' xquic'utuj chic jun bey cha re Juan Bautista: ??Ja rat re profeta re bin che nipa? xe'cha' cha. Pero re Juan Bautista xubij: Mana-ta yen. 22 Y c'are' re achi'a' re' xquic'utuj cha: ??Yat anchique c'a rat c'a? Roma yoj nakajo' nakatamaj-a yat anchique rat, y jare' re nakabij chique re je'takayom-pa kachin. Tasekresaj c'a-avi' chakavach, xe'cha'. 23 Y reja' xubij chique re achi'a' re': Ja yen re jun ache re yi'on can nutzijol roma re Isa'ias re rusamajel re Dios re xc'ue' ajuer can, re xbex profeta cha. Y jare' re xutz'ibaj can reja': Xtic'ue' c'a jun ache chupan jun lugar re anche' manak vinak re nibex desierto cha, y ja reja' re xtitzijon re ruch'abal re Dios chiquivach re vinak re xque'bapon riq'uin. Y xtubila' chique: Tichojmersaj rubey re ic'aslen, roma re Ajaf xa can nipa-yan, xcha' re Juan. 24 Y re achi'a' re xe'bapon riq'uin re Juan, ja re achi'a' re je'takon-a coma re fariseos. 25 Y re achi'a' re' xquic'utuj chic cha re Juan: ??Anchique roma rat ya'ban bautizar re vinak? Tak xa mana-ta rat re Cristo, y mana-ta chuka' rat re El'ias y mana-ta rat re profeta re bin che nipa, xe'cha' re achi'a' re' cha re Juan. 26 Y re Juan xubij chique: Yen riq'uin ya' ye'mban bautizar re vinak, pero chi'icojol yex c'o Jun re xte'ka re man itaman-ta rach, 27 y reja' chuij can yen xte'ka-va, pero ja reja' re m'as c'o ruk'ij que chinoch yen, mare' yen can man ruc'amon-ta che ninsol re ximibal-rach re ruxajab. 28 Y ronojel re', ja chupan re jun lugar rubini'an Bet'abara xbanataj-va, re lugar re' c'o-apo juc'an ruchi' re rakan-ya' Jord'an, re anche' ye'ruban-va bautizar re Juan. 29 Y pa ruca'n k'ij tak re Juan Bautista xutz'at che choj pitinak re Jes'us riq'uin, xubij: Ja xbeka re ache re nibex ru-Cordero re Dios cha. Reja' takom-pa roma re Dios, chin nulisaj quimac re vinak re jec'o chach re ruch'ulef. 30 Y jare' re nbin chiva, tak ximbij che chuij yen xte'ka jun ache re c'o m'as ruk'ij que chinoch yen, y can c'o-va tak yen xinalax chach re ruch'ulef. 31 Y yen man ntaman-ta anchique che ache reja'. Pero chin che nisekresas chiquivach re nuvinak israelitas, mare' tak ximpa chubanic bautizar riq'uin ya'. 32 Y re Juan can xusekresaj chuka' y xubij: Yen can xintz'at re Esp'iritu Santo tak xka-pa chila' chicaj ancha'l jun paloma y xbec'ue-ka pa rue' reja'. 33 Y yen man ntaman-ta anchique re Jun re'. Pero re Dios re ya'yom-pa re jun samaj re' chua, can rusekresan-va chic chinoch che tak xtintz'at che nika-pa re Esp'iritu Santo y ne'c'ue-ka pa rue' jun ache, jare' re nibano bautizar riq'uin re Esp'iritu Santo y man riq'uin-ta ya'. 34 Vocame xintz'at-yan. Y mare' ninya' rutzijol che ja reja' re Ruc'ajol re Dios. 35 Y pa ruca'n k'ij, re Juan y je ca'e' chique re ye'tzekelben richin, jec'o chic jun bey chire'. 36 Y jare' tak reja' xutz'at che re Jes'us nak'ax chire'. Reja' xubij: Titzu', ja ache la' re nibex ru-Cordero re Dios cha. 37 Y re je ca'e' re ye'tzekelben chin re Juan, tak xquic'axaj re xubij, reje' xe'ba chij re Jes'us. 38 Y tak re Jes'us xtzu'un can chij, xe'rutz'at re je ca'e' achi'a' re' che je'tzakatal chij, mare' reja' xuc'utuj chique: ??Andex nicanoj? Y reje' xquibij cha re Jes'us: Yoj nakajo' nakatamaj anche' c'o-va avachoch rat Rab'i. Re ch'abal Rab'i ndel che tzij Maestro. 39 Y re Jes'us xubij chique: Jo', y te'itz'eta'. Y reje' can xe'bo-va y xbequitamaj can anche' c'o-va re rachoch. Y xe'c'ue-ka riq'uin re jun k'ij re', roma c'o la'k a las cuatro re tak'ak'ij che'. 40 Re jun chique re je ca'e' re xe'c'axan re andex xubij re Juan Bautista ja re Andr'es ruch'alal re Sim'on Pedro. 41 Y c'are' re Andr'es nabey xbo'rcanoj re Sim'on re ruch'alal y xbo'rbij cha: Kataman chic anchique re' re Mes'ias. Y re ch'abal Mes'ias ndel che tzij Cristo. 42 C'are' re Andr'es xuc'uaj re Sim'on re ruch'alal riq'uin re Jes'us. Y tak re Jes'us xutz'at, xubij cha: Ja rat re Sim'on ruc'ajol re Jon'as. Vocame xtabini'aj chuka' Cefas. Y re be'aj re' ndel che tzij Pedro. 43 Jac'a re pa ruca'n k'ij, re Jes'us can runojin-va che niba pa Galilea. Y chupan re k'ij re' re Jes'us xbo'rc'ulu-pa re jun ache rubini'an Felipe y xubij cha: Catzake' chuij. 44 Y re Felipe aj pa tenemit Betsaida, re tenemit re anche' c'o-va cachoch re Andr'es y re Pedro. 45 Re Felipe xuvel re jun ache rubini'an Natanael y xubij cha: C'o chic re Jun re rubin can re Mois'es chupan re ru-ley y re quibin can chuka' chupan re qui-libros re rusamajela' re Dios re xe'c'ue' ajuer can, re xbex profetas chique. C'aja nakatz'at can rach. Reja', ja re Jes'us re ruc'ajol re Jos'e aj-Nazaret. 46 Y re Natanael xubij: Yen can man ninimaj-ta che chire' pa tenemit Nazaret xtel-pa jun namalaj ache, xcha'. Pero re Felipe xubij cha: Vo xa man nanimaj-ta, jo' chutz'etic. 47 Y tak re Jes'us xutz'at che re Natanael napon-yan-apo riq'uin, xubij: Titzu' la jun ache la'. Reja' can chin-va re rutenemit re Dios, reja' jun katzij israelita. Can man jun tz'ucuj-tzij riq'uin, roma quire' nuc'ut re ruc'aslen. 48 C'are' re Natanael xuc'utuj cha re Jes'us: ??Anche' xatamaj-va noch? Y re Jes'us xubij cha: Yen xatintz'at tak c'a yatc'o chire' chuxe' re jun che' rubini'an higuera, tak c'amaje-na tapon re Felipe aviq'uin, xcha' re Jes'us cha. 49 Re Natanael can jare' xubij: Maestro, can ja-va rat re Ruc'ajol re Dios. Y can ja rat re Rey chin re naci'on Israel, xcha'. 50 Y re Jes'us xubij cha re Natanael: Rat can xanimaj che ja yen re Ruc'ajol re Dios, xaxe roma ximbij chava che chuxe' re juvi' higo yatc'o-va tak c'amaje-na tac'ul re Felipe. Can xtatz'at cosas m'as je nima'k chin quire' m'as nanimaj. 51 Y re Jes'us xubij chuka': Can tinimaj re xtimbij chiva: Yex can xtitz'at che re rocaj xtijakataj, y re 'angeles chin re Dios xque'xule-xque'jote' chinuto'ic yen re xinalax chi'icojol.

2

1 Y pa rox k'ij, pa tenemit rubini'an Can'a chire' pa Galilea, c'o jun c'ulubic xban. Y re Mar'ia rute' re Jes'us, c'o chuka' chire' chupan re c'ulubic re'. 2 Y re Jes'us y yoj re yoj ru-disc'ipulos, xojban invitar chuka' chupan re c'ulubic re'. 3 Jac'a re ruyi'al-uva xa cha'nin xq'uis chupan re c'ulubic. Y re rute' re Jes'us xubij cha: Manak chic ruyi'al-uva quiq'uin. ??Vocame andex nakaban? 4 Pero re Jes'us xubij cha: ??Andex najo'? Roma re nu-hora xa c'amaje-na tapon, xcha' reja'. 5 Y re rute' re Jes'us xubij chique re aj-ic'a': Vo xa c'o jun cosa re xtubij re Jes'us chiva, can tibana', xcha' chique. 6 Y chire' c'o vaki' cucu' chavon, je'banon riq'uin aboj. Yoj re yoj israelitas camas ye'kacusaj cucu' quire', roma chupan cucu' quire' nakaya-va re kaya' re ndoc chaka chin nakajosk'ij-ki', can ancha'l re nichalabex chaka roma re ka-ley. Y re cucu' re', cuatro cientos vasos ya' niba chupan jun. 7 Y re Jes'us xubij chique re aj-ic'a': Que'inojsaj re cucu' re' che ya', xcha' chique. Y re aj-ic'a' can quire-va xquiban, can xe'quinojsaj re cucu'. 8 C'are' re Jes'us xubij chique re aj-ic'a': Vocame tipaja-a ba' y tic'uaj cha re ache pa'al chij re namak'ij re', chin tutija' retal. Y re aj-ic'a' can xquiban-va re xubij re Jes'us chique. 9 Y re ache pa'al chij re namak'ij re', tak xuna' che camas jabal re ruyi'al-uva, xrayoj re ala' xc'ule'. Roma re ache pa'al chij re namak'ij, man rutaman-ta anche' pitinak-va re ruyi'al-uva, xa can xe c'a re aj-ic'a' re xe'pajo, re je'atamayon. 10 Y tak xapon re ala' re xc'ule', re ache pa'al chij re namak'ij chin re c'ulubic xubij cha: Tak c'o jun namak'ij quire', conojel vinak ja re ruyi'al-uva re otz jare' re niquiya' nabey, y tak re jec'o pa namak'ij q'uiy chic quikumun, c'are' niquiya' re jun ruyi'al-uva re man can-ta otz. Pero rat xa man quire-ta xaban. Rat xa c'aja xbalisaj-pa re utzulaj ruyi'al-uva, xcha'. 11 Re Jes'us xuban cha re ya' che xoc ruyi'al-uva chupan re c'ulubic pa tenemit Can'a chire' pa Galilea, y jare' re nabey milagro re xuban. Y riq'uin re jun milagro re', xk'alajin che reja' c'o ruk'ij y ru-poder. Y yoj re yoj ru-disc'ipulos m'as xkaban confiar-ki' riq'uin re Jes'us. 12 Tak k'axnak chic re c'ulubic, re Jes'us chibil re rute', re je ruch'alal y yoj re yoj ru-disc'ipulos xojba pa tenemit Capernaum. Y xojc'ue-ka ca'e-oxe' k'ij chire'. 13 Y nakaj chic c'o-va re pascua re kanamak'ij yoj re yoj israelitas. Mare' re Jes'us xba-a pa tenemit Jerusal'en, chin re namak'ij re'. 14 Y chire' pa rachoch re Dios re c'o pa Jerusal'en, re Jes'us xe'bo'rvila' re ye'c'ayin vacx, ovejas y palomas. Y xe'bo'rvila' chuka' re ye'jalo rach mero re je'tz'uyul chire'. 15 Re Jes'us, can xe xe'rutz'at, xuban jun ruch'ayibal cha colo' y xe'rukotaj-pa conojel, chibil re qui-ovejas y re quivacx chire' pa rachoch re Dios. Y chique re ye'jalo rach mero, xuch'akela' can re qui-mero chiquivach y xe'rutiquimila' can re qui-mesas. 16 Y xubij chique re ye'c'ayin palomas: Que'ilisaj-a re' vova'. Y man tiban cha re rachoch re Nata' Dios jun q'uiybal, xcha' re Jes'us. 17 Mare' yoj re yoj ru-disc'ipulos, cha'nin xbeka chakac'o'x re jun tzij re tz'iban can chupan re ruch'abal re Dios. Re tzij re' nubij: Re v'anma can nik'axo roma re itzel tak cosas re ye'tajin chubanic re vinak chupan re avachoch, nicha'. 18 Y jare' tak re achi'a' re c'o quik'ij chakacojol yoj re yoj israelitas, xquibij cha re Jes'us: ??Andex che se~nal yatiquir nac'ut chakavach chin quire' nakatamaj che c'o autoridad pan ak'a' chin xa'kotaj-a re vinak vova'? xe'cha'. 19 Y re Jes'us xubij chique: Tivulaj re rachoch re Dios re', y yen pan oxe' k'ij xtimban chic jun bey, xcha'. 20 Y jare' tak re achi'a' re c'o quik'ij chakacojol yoj re yoj israelitas, xquibij cha re Jes'us: Re jun jay re', cuarenta y seis juna' xquiban re kate-karta' chin xquipoba'. Y rat nabij che pan oxe' k'ij napoba' chic jun bey, xe'cha' cha. 21 Pero re jay re xubij re Jes'us chique re vinak re', ja re mismo ru-cuerpo. 22 Y tak re Jes'us xquimisas cho cruz, y pa rox k'ij xbec'astaj-pa chiquicojol re anama'i', c'ajare' tak yoj re yoj ru-disc'ipulos xbeka chakac'o'x re jun tzij re xubij chique re achi'a' re c'o quik'ij chakacojol yoj re yoj israelitas. Y xkanimaj re nubij chupan re ruch'abal re Dios re tz'iban can ajuer, y re tzij re je'rubin can re Jes'us chaka. 23 Y chupan re k'ij tak c'o re Jes'us pa Jerusal'en roma re namak'ij rubini'an pascua, je q'uiy vinak re xquinimaj. Re vinak re' xquinimaj tak xe'quitz'at re milagros xe'ruban chiquivach. 24 Pero re Jes'us man xuban-ta confiar-ri' quiq'uin re vinak re', roma reja' can rutaman-va re niquinojij pa tak c'anma conojel. 25 Y man nic'atzin-ta cha reja' che c'o-ta jun re nibim-pa cha re andex rubanic re quic'aslen che ja'jun re vinak, roma reja' can rutaman-va andex re c'o pa tak c'anma.

3

1 Y c'o jun ache chiquicojol re fariseos rubini'an Nicodemo, y re ache re' can c'o-va ruk'ij chakavach yoj re yoj israelitas. 2 Y pa jun tok'ok'a', reja' xapon riq'uin re Jes'us y xubij cha: Can k'alaj-va che yat jun Maestro re takom-pa roma re Dios, roma re milagros re ya'banala', xaxe re c'o Dios riq'uin re nitiquir nibano. 3 Y re Jes'us xubij cha re Nicodemo: Yen can katzij nimbij chava: Re anchique re man xtalax-ta chic jun bey, man xtoc-ta pa ruk'a' re Dios, xcha' cha. 4 Pero re Nicodemo xubij cha re Jes'us: Jun ache re'j chic, manak modo nalax chic jun bey. Roma re rute' manak modo nralaj chic jun bey, xcha'. 5 Re Jes'us xubij: Yen can katzij-va nimbij chava: Re c'ac'a alaxbal re xinataj, jare' re niban roma ya' y re Esp'iritu Santo. Y re man xtiquiban-ta re jun c'ac'a alaxbal re', man xque'oc-ta pa ruk'a' re Dios. 6 Re vinak re ruc'uan xaxe re alaxbal chin re ruch'ulef, can chin-va re ruch'ulef. Jac'a re vinak re ruc'uan re alaxbal chin re Esp'iritu Santo, can chin-va re Esp'iritu Santo. 7 Y man tisatz ac'o'x riq'uin re nimbij chava, roma can quire-va: Conojel nic'atzin che niquic'uaj jun chic c'ac'a alaxbal. 8 Re ye'c'uan re alaxbal chin re Esp'iritu Santo, nijalataj re quic'aslen. Y ja re Esp'iritu Santo re nijalo re quic'aslen, y re' man c'a natz'at-ta. Xa can ancha'l re cak'ik' re xabanche' ne'c'ulun-va-pa. Roma xaxe nac'axaj, pero man ataman-ta anche' pitinak-va y man ataman-ta chuka' anche' nibo-va, xcha' re Jes'us. 9 Y re Nicodemo xuc'utuj cha re Jes'us: ??Andex c'a rubanic re'? 10 Re Jes'us xubij cha: ??Man ataman-ta andex rubanic re' y can yat jun maestro chiquicojol re kavinak israelitas? 11 Can katzij nimbij chava: Yen ja re ntaman y ntz'eton jare' re nintzijoj, jac'a yex re yix vinak man nijo-ta ninimaj. 12 Yex man ninimaj-ta re cosas chin re ruch'ulef re nintzijoj chiva, c'alapa' xe-ta nintzijoj chiva re cosas chin chila' chicaj. 13 Re chila' chicaj man jun re aponak-ta, xa can xe re Jun re kejnak-pa chila'. Can xe reja' re aponak. Xaxe re Jun re xalax chi'icojol y chila' chicaj riq'uin re Dios pitinak-va. 14 Y ajuer can tak re Mois'es xc'ue' chupan re jun lugar re anche' manak vinak re nibex desierto cha, reja' xutic jun che' nem rakan y xuya' jun ru-imagen cumatz pa rue'. Y ancha'l xban cha re ru-imagen re cumatz pa rue' re che' re', quire' chuka' nic'atzin che niban cha re Jun re alaxnak chi'icojol. 15 Chin quire' anchique vinak re xtiniman richin, man c'a xtapon-ta chupan re camic chin jumul, xa xtic'ue' ruc'aslen re man niq'uis-ta. 16 Re Dios camas ye'rajo' re vinak re jec'o chach re ruch'ulef, y mare' xutak-pa re Ruc'ajol vova' chach re ruch'ulef. Astapa' reja' xe jun Ruc'ajol c'o, pero xutak-pa chin che xabanchique vinak re xtiniman richin, man xtapon-ta chupan re camic chin jumul, xa xtic'ue' ruc'aslen re man niq'uis-ta. 17 Roma re Dios man xutak-ta-pa re Ruc'ajol vova' chach re ruch'ulef, chin che nuya' re castigo chin jumul pa quive' re vinak. Re Dios xutak-pa re Ruc'ajol, chin che ye'rucol re vinak chach re quimac. 18 Y anchique vinak xtiniman richin, man xtika-ta re castigo pa rue'. Jac'a re vinak re man xtiniman-ta richin, re castigo chin nojel tiempo xa c'o chic pa rue', roma xa man xunimaj-ta re 'unico Ruc'ajol re Dios. 19 Conojel re man ye'niman-ta, c'o chic re castigo pa quive', roma re sakil can xbeka-va chach re ruch'ulef, pero reje' xa m'as xquijo' re k'oko'm que chach re sakil, roma reje' can xe-va re itzel tak banabal re ye'quibanala'. 20 Y conojel re ye'bano re itzel tak banabal, man nika-ta re sakil chiquivach, ni xe-ta chuka' ye'jelon-apo riq'uin, roma re sakil re' nuban che ye'bek'alajim-pa ronojel re itzel tak quibanabal re ye'tajin chubanic. 21 Jac'a re vinak re can ye'quibanala' re otz tak banabal ancha'l re nrajo' re Dios, can ye'bo-va-apo chupan re sakil, chin jabal ye'k'alajin che ye'tiquir niquiban quire'. Roma je rajc'ual chic re Dios. 22 Y tak k'axnak chic ronojel re', re Jes'us y yoj re yoj ru-disc'ipulos xojba pa Judea, y chire' xojec'ue-va. Y xe'bapon vinak re aj-chire' chin xe'ban-a bautizar. 23 Chupan chuka' re tiempo re', re Juan Bautista c'o chire' pan En'on re c'o-apo chunakaj re tenemit rubini'an Salim. Reja' chire' ye'ruban-va bautizar re vinak, roma chupan re lugar re' q'uiy ya' c'o. Re vinak ye'bapon riq'uin chin ye'ban-a bautizar. 24 Chupan re tiempo re' re Juan c'amaje-na tiya' pa c'arcel, mare' c'a nuban bautizar. 25 Y jec'o kavinak israelitas re xquibila' chiquivach quiq'uin re ye'tzekelben chin re Juan chij re andex che bautismo re m'as otz. 26 Xe'pa re ye'tzekelben re Juan xe'ba riq'uin y xbequibij cha: Maestro, xe'cha'. Re Jun re xapon aviq'uin re juc'an chic-apo ruchi-ya' Jord'an, re xabij che ja reja' re natzijoj rube', xa conojel re vinak ye'bapon riq'uin chin che ye'ruban bautizar. 27 Re Juan xubij chique re ye'tzekelben richin: Ja re Dios xtibin anchique re xtic'ue' ruk'ij. 28 Y yex mismo yixtiquir yixbin andex re nbin yen, che xa mana-ta yen re Cristo re bin che nitak-pa roma re Dios. Yen xaxe nbin che xintak-pa chin che ne'nya' rutzijol re anche' xte'ka-va reja'. 29 Yen camas niqui'cot re v'anma vocame, roma xinc'axaj che camas je q'uiy vinak ye'bapon riq'uin re Jesucristo, can ancha'l nibanataj riq'uin jun ala' re ru-amigo jun chic ala' re c'a ba' tic'ule-va, mare' re ru-amigo niqui'cot che ye'ruc'axaj re je ca'e' ye'tzijon y quic'uan chic-qui'. Can rutaman che re xtan c'o chic-apo riq'uin re ruchijil. 30 Can xe-va re Jesucristo re ruc'amon che c'o m'as ruk'ij, jac'a yen m'as otz che manak nuk'ij. 31 Re Jun re kejnak-pa chila' chicaj, jare' re m'as nem ruk'ij que chakavach konojel yoj re yoj vinak. Roma yoj re yoj vinak, re kana'oj can xe-oc re vova' chach re ruch'ulef niq'uis-va-ka. Can xe-oc re' re yojtiquir nakatzijoj. Jac'a re Jun re kejnak-pa chila' chicaj, man ancha'l-ta-oc yoj, roma reja' can c'o pa rue' ronojel. 32 Re Jun re kejnak-pa chila' chicaj can jac'a re ruc'axam-pa y re rutz'eton can, jare' re no'rsekresaj-ka chakavach. Pero re vinak man niquijo-ta niquic'ul re no'rsekresaj-ka chakavach. 33 Y re vinak re nunimaj re no'rsekresaj-ka re Jun re kejnak-pa chila' chicaj, can nunimaj che re rubin can re Dios can katzij-va. 34 Roma re Jun re xutak-pa re Dios chach re ruch'ulef, can ja-va re ruch'abal re Dios re nutzijoj. Y re Dios can ruyi'om-pa re Esp'iritu Santo cha. Y re Esp'iritu Santo re nuya-pa cha reja', man jun re nitiquir nibin jenipa'. 35 Y re Dios camas nrajo' re Ruc'ajol, y pa ruk'a' reja' xujach-va ronojel. 36 Y re vinak re xtiniman chin re Ruc'ajol re Dios, xtic'ue' ruc'aslen re man niq'uis-ta. Jac'a re vinak re man nunimaj-ta re Ruc'ajol re Dios, man c'a xtic'ue-ta ruc'aslen re man niq'uis-ta. Roma re vinak re man nunimaj-ta, can c'o chic re ruyoval re Dios pa rue'.

4

1 Re achi'a' fariseos quic'axan che re Jes'us c'o m'as q'uiy vinak re ye'ruban bautizar y m'as je q'uiy ye'tzake' chij, que chiquivach re vinak re ye'ban bautizar y re ye'tzake' chij re Juan Bautista. Y re Ajaf Jes'us xunabej ronojel re'. 2 Pero re Jes'us man can-ta ja reja' re nibano bautizar quichin re vinak. Xa ja yoj re yoj ru-disc'ipulos re yojbano bautizar. 3 Y re Jes'us xel c'a-a chire' pa Judea, roma man nrajo-ta che re achi'a' fariseos ye'yacataj chij, mare' xtzolaj chic jun bey pa Galilea chibil chuka' yoj re yoj ru-disc'ipulos. 4 Xa jac'a chin che yojapon pa Galilea, tiene que yojak'ax pa Samaria. 5 Re Jes'us y chuka' yoj re yoj ru-disc'ipulos xojapon pa tenemit Sicar. Y re tenemit re' chin re Samaria. Re tenemit Sicar c'o-apo chunakaj re jun juyu' re xuya' re Jacob cha re Jos'e re ruc'ajol. 6 Y jac'a chire' c'o-va re jun pozo re rubini'an Pozo de Jacob. Chire' xtz'uye-va-ka re Jes'us, roma reja' camas cosnak-pa roma re bey kabanom-pa, y roma chuka' nuban-yan pak'ij. 7 Y tak yojbinak yoj re yoj ru-disc'ipulos pa tenemit chulok'ic cosas chin nakataj yoj y re Jes'us, chire' chuchi' re pozo xapon jun ixok aj-chire' pa Samaria chulesasic ruya'. Y re Jes'us xubij cha re ixok re': Taya' ba' nuya' chin ninkum, xcha'. 9 Pero re ixok aj-Samaria xubij cha re Jes'us: Rat yat jun israelita, ??y anchique roma tak nac'utuj aya' chua yen? Man ruc'amon-ta che jun aj-Samaria nuya' ruya' jun israelita, xcha' re ixok. Reja' xubij quire' roma yoj re yoj israelitas y re aj-Samaria can man otz-ta nakatz'at-ki'. 10 C'are' re Jes'us xubij cha re ixok re': Xe-ta rat ataman andex re nusipaj re Dios, y ataman-ta chuka' anchique re' re nuc'utuj ba' ruya' chava, xa ja-ta rat re yac'utun aya' cha, y reja' nuya-ta aya' re nuya' c'aslen, xcha' re Jes'us. 11 Y re ixok xubij cha re Jes'us: Re pozo naj kejnak-ka, y rat man jun anchok cha nac'am-va-ka re ya'. ??Anche' nac'am-va re ya' re niyi'o c'aslen re nasuj? 12 Roma chupan re jun pozo re' xuc'am-va ruya' re kamoma' Jacob, re rajc'ual y quichin chuka' nojel re chicop xe'c'ue' quiq'uin. ??Anche' xtac'am-va re ya' re nasuj? Roma rat manak m'as ak'ij que chach re kamoma' Jacob, roma nabij che re ya' re nuya' c'aslen man vova-ta nalisaj-va, xcha' re ixok. 13 Y re Jes'us xubij cha re ixok: Re ye'kumu re ya' re ndel chupan re pozo re', man nak'ax-ta-a re nichake'j quichi'. Xa nic'atzin che niquikum m'as ya' chin che nich'uch'o-ka ba' re nichake'j quichi'. 14 Jac'a re ye'kumu re ya' re niyi'o c'aslen re ninya' yen chique, xtuban chique che man chic xtichake'j-ta quichi'. Xa can xtuban chique che quiq'uin reje' nalax-va re ya' re', y can ancha'l nuban re ya' anche' ndel-va-pa, can quire' xtuban re quic'aslen re man xtiq'uis-ta. 15 Y re ixok can jare' xubij cha re Jes'us: Taya' c'a re ya' re' chua yen, chin quire' man jun bey chic xtichake'j nuchi', y chin che man chic yimpa-ta vova' chuchi' re pozo chulesasic ya', xcha' re ixok. 16 Pero re Jes'us xubij cha re ixok: Cabiyin y ta'vayoj-pa re avchijil. 17 Re ixok xubij: Yen manak vichijil. Y re Jes'us xubij cha: Can katzij nabij che manak avchijil. 18 Roma je vo'o-yan avchijil que'c'ue'. Y re ache re c'o aviq'uin vocame, xa man avchijil-ta. Can katzij xabij che manak avchijil. 19 Y jare' tak re ixok xubij cha re Jes'us: Yen ninojij che rat yat jun rusamajel re Dios re nibex profeta cha. 20 ??Anche' ruc'amon che nakaya-va ruk'ij re Dios? Roma re kavinak re xe'c'ue' ajuer can, pa rue' re jun loma re' xquiya-va ruk'ij re Dios. Jac'a yex israelitas nibij che conojel vinak tiene que pa Jerusal'en niquiya-va ruk'ij re Dios, xcha' re ixok. 21 Jac'a re Jes'us xubij cha re ixok re': Tanimaj re xtimbij chava. Can xte'ka-va jun k'ij tak conojel vinak mana-ta chic pa rue' re loma re', y ni xe-ta chuka' pa Jerusal'en xtiquiya-va ruk'ij re Karta' Dios re c'o chila' chicaj. 22 Yex aj-Samaria man can-ta itaman chij re anchique niya' ruk'ij. Jac'a yoj re yoj israelitas can kataman-va re anchique nakaya' ruk'ij, roma can kaq'uin yoj pitinak-va re utzulaj ch'abal re nubij che nipa Jun chin ye'rucol re vinak chach re quimac. 23 Re jun k'ij re ximbij chava che can nipo-va, xbeka-yan, chin che conojel vinak man chic niquiya-ta ruk'ij re Karta' Dios xaxe pa rue' re loma re', y ni xe-ta chuka' xaxe pa Jerusal'en. Re katzij xque'yi'o ruk'ij re Karta' Dios, ja re c'o re Esp'iritu Santo quiq'uin, y chuka' can riq'uin ronojel c'anma xtiquiya' ruk'ij. Y re Dios nrajo' che re vinak quire' niquiban. 24 Re Dios can Esp'iritu-va. Mare' re vinak re ye'yi'o ruk'ij, can nic'atzin che c'o re Esp'iritu Santo quiq'uin y riq'uin ronojel c'anma tiquiya' ruk'ij. 25 Y re ixok xubij cha re Jes'us: Yen ntaman che c'o jun k'ij tak re Mes'ias xte'ka chach re ruch'ulef, re nibex chuka' Cristo cha, re bin che nitak-pa roma re Dios. Y re k'ij tak xte'ka reja', ronojel xtusekresaj chakavach, xcha' re ixok. 26 Re Jes'us xubij cha: Re Mes'ias re nibij chuka' Cristo cha, ja yen. Ja yen re yintzijon aviq'uin, xcha'. 27 Y jare' tak xojapon yoj re yoj ru-disc'ipulos, y yoj ju-va ba' xkatz'at roma nitzijon riq'uin jun ixok aj-chire' pa Samaria. Pero yoj man jun andex xkabij cha re Jes'us: ??Andex nac'utuj cha? o ??Andex re natzijoj riq'uin? Cama-va jun cosa xkac'utuj cha. 28 Y re ixok re' xuya' can re rucucu' y xba pa tenemit. Y xbo'rbij chique re vinak: 29 C'o jun ache xch'o viq'uin y xubij chua ronojel re je'mbanalon. ??Mana-ta como re' re Cristo re bin che nitak-pa roma re Dios? Jo', y te'itz'eta', xcha' chique. 30 Y re vinak re xe'c'axan re', xquiya' can re tenemit y xe'ba anche' c'o-va re Jes'us. 31 Y tak c'amaje-na que'bapon re vinak, yoj re yoj disc'ipulos xkabij cha re Jes'us: Maestro, cava', xojcha' cha. 32 Pero reja' xubij chaka: Yex man itaman-ta che yen c'o nuay chin nintaj, xcha'. 33 ??C'o como xc'amo-pa ruay? xojcha-ka chakavach. 34 Y re Jes'us xubij chaka: Re nuay yen ja re nimban re nurayij re takayom-pa vichin y ninq'uis can rubanic ronojel re rusamaj re ruchalabem-pa chua. 35 Yex nibij che c'a caje' ic' nrajo' che niban cosechar ronojel rach re tico'n. Jac'a yen nimbij chiva: Quixtzu'un chila' y que'itz'eta' la vinak. Reje' je ancha'l jun tico'n re k'an chic. Quiyaben chic che nitzijos re ruch'abal re Dios chique, chin niquinimaj. 36 Re xque'samaj riq'uin la cosecha la', can c'o rajal-ruq'uixel xtiquic'ul, y re rajal-ruq'uixel re xtiquic'ul, ja re vinak re xque'niman re Dios y re ruch'abal, xtiquic'ul c'a quic'aslen re man xtiq'uis-ta. Y riq'uin re', re je'tiquiyon can re ruch'abal re Dios, can xtiqui'cot c'anma quiq'uin re ye'bano cosechar rach re jun tico'n re'. 37 Vova' can katzij-va ndel re tzij re nubij: Jun-va re nitico can y jun-va chic re nibano-a cosechar re tico'n. 38 Yen xixintak chin che yex xaxe chic niban cosechar re man yix-ta re xixcos chusamajesic. Roma re ruch'abal re Dios xa juley-va samajela' je'tiquiyon can pa tak c'anma re vinak, y yex xaxe chic ba' samaj re ne'ibanala' chin niquinimaj re ruch'abal re Dios, xcha' re Jes'us chaka yoj re yoj ru-disc'ipulos. 39 Y chupan re k'ij re', camas je q'uiy vinak xe'niman richin re Jes'us chire' pa tenemit Sicar, re c'o chire' pa Samaria. Y re' xbanataj roma re ixok xbo'rbij chique che re Jes'us xubij cha ronojel re je'rubanalom-pa. 40 Y re samaritanos xbequic'utuj utzil cha re Jes'us che tic'ue-ka quiq'uin. Y reja' xc'ue-ka ca'e' k'ij quiq'uin. 41 Y jec'o je q'uiy m'as re xe'niman, pero c'aja tak quic'axan chic re ch'abal re nubij re Jes'us. 42 Re vinak re' niquibila' cha re ixok re xbeyi'o rutzijol chique: Vocame can kataman chic y nakanimaj chuka', man xe-ta roma re xabij rat chaka, xa can nakanimaj chuka' roma xkac'axaj yoj mismo. Xkatamaj che can katzij-va che ja reja' re Cristo re bin che nitak-pa roma re Dios, re nicola quichin conojel vinak re jec'o chach re ruch'ulef. 43 Tak k'axnak chic ca'e' k'ij, re Jes'us xuya' can re tenemit Sicar re c'o chire' pa Samaria y xutz'am chic-a rubey chin niba pa Galilea. 44 Chire' xbo-va re Jes'us roma reja' mismo nibin che pa rutenemit jun rusamajel re Dios re nibex profeta cha, xa man jun ruk'ij chiquivach re ruvinak. 45 Pero tak re Jes'us xapon pa Galilea, jabal ruc'ulic xban coma re vinak aj-chire', roma re vinak re' xe'c'ue' pa Jerusal'en chin re namak'ij y xquitz'at re milagros re xe'rubanala' re Jes'us chire'. 46 C'are' re Jes'us xba chic jun bey pa tenemit Can'a re c'o chire' pa Galilea, re anche' xuban cha re ya' che xoc ruyi'al-uva. Y chire' pa tenemit Capernaum c'o jun namalaj ache re niyavaj jun ruc'ajol, y re namalaj ache re' rusamajel re Rey. 47 Re ache rusamajel re Rey, tak xuc'axaj che re Jes'us pitinak c'a quila pa Judea y xapon chire' pa Galilea, xba riq'uin. Reja' xbo'rc'utuj utzil cha chin che nuc'achojsaj-ta re ruc'ajol, roma nicom-yan. 48 C'are' re Jes'us xubij cha re rusamajel re Rey: Man-ta nitz'at yex re milagros re nimban yen, man-ta yininimaj. Y chuka' vo xa man-ta nik'alajin re se~nales che can ja re Dios re takayom-pa vichin, man-ta chuka' yininimaj. 49 Pero re ache re rusamajel re Rey xubij cha re Jes'us: Ajaf, tabana' utzil che yaxule-ta-ka pa tenemit Capernaum, roma re nuc'ajol nicom-yan. 50 Y re Jes'us xubij cha: Catzolaj. Re ac'ajol c'o ruc'aslen, xcho'x-a. Y re ache re' can xunimaj-va re xubij re Jes'us, y xba. 51 Tak re ache rusamajel re Rey tzolojnak-ka, jec'o c'a ru-mozos xe'pa chuc'ulic y xquibij cha: Re ac'ajol c'as. Man xcom-ta. 52 Y reja' xuc'utuj chique re xe'pa chuc'ulic: ??Anchique hora tak re nuc'ajol xk'alajin che xc'achoj-a? Y reje' xquibij: Ja re tak'ak'ij ivir. La una chire' tak xq'uis-a re c'atan chij, xe'cha'. 53 Re rutota' re ala' re niyavaj, cha'nin xbeka chuc'o'x che ja hora re' tak re Jes'us xubij cha che re ruc'ajol man xticom-ta. Y mare' reja' y re jec'o pa rachoch can xquinimaj re Jes'us. 54 Y jare' re ruca'n milagro re xuban re Jes'us chire' pa Galilea, re milagro re' ndoc chuka' se~nal che reja' can ja-va re Dios takayom-pa richin. Y jare' re milagro re xuban tak tzolojnak-pa quila pa Judea.

5

1 Y tak banatajnak chic ronojel re', jare' tak ne'ka-yan jun kanamak'ij yoj re yoj israelitas, y mare' tak re Jes'us xba-a pa tenemit Jerusal'en. 2 Chire' pa tenemit Jerusal'en, chunakaj-apo re puerta re rubini'an Puerta de las Ovejas, c'o jun ya' chin ye'ratin chupan. Y chire' chuchi' re ya' c'o vo'o' corredor. Y yoj re yoj israelitas nakabij Betesda cha re lugar re'. 3 Y chire' chach re corredor camas je q'uiy yava'i' je'cotz'al. Jec'o je moyi', jec'o cojos y jec'o je siquirnak. Y jec'o re jun-va chic che yabil ndoc chique. Y conojel re yava'i' re', can quiyaben che nisilom-pa re ya'. 4 Roma re ya' re' can c'o-va k'ij tak nisilos can roma jun 'angel re nika-pa chila' chicaj riq'uin re Dios. Y jac'a re yava' re nika-ka nabey chupan re ya' tak silon chic, ja yava' re' re nic'achoj. Y xabanchique yabil ndoc cha, nic'achoj-a. 5 Y chire' chuchi' re ya' c'o c'a jun ache treinta y ocho juna' tutz'am-va yabil. 6 Y jun k'ij tak re Jes'us nak'ax chire', xutz'at re ache cotz'al chire'. Y reja' can rutaman-va che re ache re' q'uiy juna' re tuc'alvachij-va quire'. Y c'are' reja' xuc'utuj cha re ache re': ??Najo' yac'achoj? 7 Y re yava' re' xubij cha re Jes'us: Tak nisilom-pa la ya', man jun nibano utzil chua che yinruto-ta chin yinapon-apo c'a chupan. Mare', astapa' nintaj nuk'ij che yimba-ta-apo, c'amaje-na quinapon tak ja-yan jun chic napon nabey chinoch, xcha' cha re Jes'us. 8 Y re Jes'us xubij cha re ache: Cayacataj, tac'uaj-a la a-camilla y cabiyin. 9 Can xe xubij quire' re Jes'us cha re yava', can jare' xc'achoj cha re ruyabil. Xuc'uaj-a re ru-camilla y can ja xbiyin-a. Pero re k'ij re', k'ij chin uxlanen. 10 Y re achi'a' re c'o quik'ij chakacojol yoj re yoj israelitas, xquibij cha re ache re xc'achojsas cha re ruyabil: Vocame k'ij chin uxlanen, xajan che rat ac'uan-a la a-camilla, quire' nubij re ka-ley. 11 Pero reja' xubij chique re achi'a': Re xc'achojsan vichin xubij chua: Tac'ola-a la a-camilla y cabiyin. 12 Y re achi'a' re' xquic'utuj cha re ache: ??Anchique re xbin chava che tac'ola' re a-camilla y cabiyin? xe'cha' cha. 13 Pero re ache re xc'achojsas, man rutaman-ta anchique re xc'achojsan cha re ruyabil, roma re Jes'us xa man xc'ue-ta-ka chire' chiquicojol re vinak. Reja' xa xba. 14 C'are' re Jes'us xuvel chic re ache re' pa rachoch re Dios, y xubij cha: Vocame yat otz chic. Man chic camacun, chin quire' man tika jun cosa m'as c'ayef chavij, xcha' cha. 15 Y re ache xtzolaj, y xapon quiq'uin re achi'a' re c'o quik'ij chakacojol yoj re yoj israelitas, y xubij chique: Re xc'achojsan vichin, ja re Jes'us. 16 Mare' tak re achi'a' re c'o quik'ij chakacojol yoj re yoj israelitas, xe'yacataj chij re Jes'us, y niquinojela' andex niquiban chin niquiquimisaj, roma re Jes'us c'o milagros ye'rubanala' chupan re k'ij chin uxlanen. 17 Pero re Jes'us xubij: Re Nata' Dios can nisamaj-va re k'ij re', y quire' chuka' yen, yinsamaj. 18 Y jare' tak re achi'a' re c'o quik'ij chakacojol yoj re yoj israelitas, m'as xquinojij andex niquiban chin niquiquimisaj re Jes'us, roma chiquivach reje', xajan re ye'rubanala' chupan re k'ij chin uxlanen. Y chuka' man xe-ta roma re', xa roma chuka' re Jes'us nubij Rutota' cha re Dios, roma chiquivach reje', re Jes'us can nuban che reja' junan riq'uin re Dios. 19 Y jare' tak re Jes'us xubij: Can katzij re nimbij chiva, che yen re Ruc'ajol re Dios can man nimban-ta re samaj riq'uin nuna'oj yen, xa nic'atzin che ninyabej-na re nubij re Nata'. Roma ja re samaj re nrajo' reja', jare' re nimban yen. 20 Y roma re Nata' Dios camas yinrajo' yen re Ruc'ajol, mare' tak reja' nuc'ut chinoch ronojel re rusamaj reja'. Y chakavach-apo c'o samaj m'as je nima'k re xtuc'ut chinoch. Y tak xtimban re samaj re', yex can xtisatz ic'o'x tak xtitz'at. 21 Y can ancha'l nuban re Nata' Dios tak nuya' quic'aslen re je quiminak y ye'ruyac-pa, can quire' chuka' nimban yen. Yen can ninya' chuka' quic'aslen re ye'njo'. 22 Re Nata' Dios, pa nuk'a' chuka' yen re Ruc'ajol rujachon-va re poder chin xtimban juzgar y mana-ta reja' re xtibano. 23 Chin quire', coma conojel yen xtinc'ul chuka' nuk'ij ancha'l re nuc'ul re Nata' Dios. Roma anchique vinak re man xtiyi'o-ta nuk'ij yen re Ruc'ajol re Dios, man nuya-ta chuka' ruk'ij re Nata', re takayom-pa vichin. 24 Roma can katzij-va nimbij chiva, che re nic'axan re nuch'abal y nunimaj re takayom-pa vichin, nuvel ruc'aslen re man niq'uis-ta. Y man xtapon-ta chupan re lugar re anche' camas tijoj-pokonal, roma colotajnak chic chach re camic, chin xk'ax-apo chupan re c'aslen re'. 25 Y can katzij nimbij chiva, che c'o jun k'ij re yaben y ja re xbeka-yan, che re je quiminak xtiquic'axaj re nuch'abal yen re Ruc'ajol re Dios. Y jac'a re xquinquic'axaj y xquinquinimaj, xtiquivel quic'aslen. 26 Roma re Dios ruyi'on k'ij chua chin che ninya' c'aslen, ancha'l nuban reja'. 27 Y chuka' ruyi'on autoridad chua chin nimban juzgar, roma reja' rutaman che ja yen re xinalax chi'icojol. 28 Y chuka' man tinojij che re ximbij-yan-ka chiva, xe-oc re' re yintiquir nimban, man quire-ta. Roma can xtapon re k'ij che re je quiminak chic-a tiene que xtiquic'axaj re nuch'abal. 29 Y jac'a re xe'c'uan jun c'aslen otz chach re Dios, xque'beyacataj-pa chin xtiquivel quic'aslen re man niq'uis-ta. Y re xquic'uaj jun itzel c'aslen chach re Dios, xque'beyacataj-pa chin xque'beka pa tijoj-pokonal. 30 Yen can man nimban-ta re samaj riq'uin re nuna'oj, roma xa can ancha'l re bim-pa chua, can quire' chuka' nimban juzgar. Tak nimban juzgar, can pa rubiyal-va, roma mana-ta re ninrayij yen re nimban, xa can ja re nurayij re Nata' Dios re takayom-pa vichin, jare' re nimban. 31 Y xe-ta nayon yen otz yinch'o-ka chuij, can otz che nibex chua che man katzij-ta re nimbij-ka chuij yen. 32 Pero c'o chic Jun re otz nich'o chuij. Y re nubij reja' chuij yen, can katzij-va. 33 Y yex can xitak ruc'utuxic cha re Juan Bautista chij re Cristo, y reja' xubij-pa re katzij chiva. 34 Yen ninataj-apo re' chiva, chin che yex yininimaj y yixcolotaj. Roma c'o chic Jun re m'as nem ruk'ij re niyi'o testigo chuij, que chach re Juan Bautista o sea jun chic vinak. 35 Y re Juan Bautista can xuya' re sakil chiva. Can xuban-va ancha'l nuban jun antorcha tak nic'at, nusekresaj re anche' nic'ue-va. Y yex xirayij y xixqui'cot riq'uin re sakil re', jun ca'e-oxe' k'ij. 36 Y roma re xusekresaj re Juan chuij, can otz-va che yininimaj. Pero m'as nic'atzin che yininimaj, roma ronojel re milagros re ye'mban yen chivach, jare' re nisekresan che ja re Nata' Dios re takayom-pa vichin. Y ja reja' re biyom-pa chua che nimban ronojel re'. 37 Y chuka' re Nata' Dios re xintako-pa, otz nich'o chuij. Y yex man jun bey ic'axan-ta andex nuban nich'o, y man jun bey chuka' itz'eton-ta rach. 38 Y re ruch'abal reja' camanak-va pa tak iv'anma, roma yex xa man yininimaj-ta yen re xintak-pa chi'icojol. 39 Can tinic'oj jabal re ruch'abal re Dios re tz'iban can, roma can itaman che chupan re' nivel-va re c'aslen re man niq'uis-ta. Y re ruch'abal re Dios jac'a chuij yen nich'o-va. 40 Jac'a yex man nijo-ta niban confiar-ivi' viq'uin, chin quire' nivel-ta re ic'aslen re man niq'uis-ta. 41 Y ronojel re ximbij-ka chiva, man roma-ta che yen ninjo' niya' nuk'ij coma re vinak. 42 Yen can ntaman ivach, mare' ntaman che xa man nijo-ta re Dios pa tak iv'anma. 43 Roma yen can pa rube' re Nata' Dios yimpitinak-va y xa man xinic'ul-ta. Pero xe-ta c'o jun re nipa pa rube' reja' mismo, jare' s'i can chiyixnojel yixba chuc'ulic y ninimaj. 44 Yex xa man nicanoj-ta ik'ij riq'uin re katzij Dios, xa ja quiq'uin re vinak nicanola-va ik'ij, mare' manak modo xquininimaj yen. 45 Y man tinojij pa tak iv'anma che ja yen re xquinsujun chivij chach re Nata' Dios. Re xtisujun ivichin chach re Dios ja re Mois'es roma mana-ta re yixtajin chubanic, y nibij che can c'o i-esperanza riq'uin re ru-ley. 46 Roma xe-ta can katzij che yex ninimaj re je'rutz'iban can re Mois'es, can yininimaj-ta chuka' yen, roma re je'rutz'iban can reja' can chuij-va yen ye'ch'o-va. 47 Y vo xa man ninimaj-ta re je'tz'iban can roma re Mois'es, c'alapa' c'a re ch'abal re nc'amom-pa yen chiva, re xtinimaj-ta, xcha' re Jes'us.

6

1 Y tak xe'banataj-yan ronojel re', re Jes'us y yoj re yoj ru-disc'ipulos xojba c'a juc'an chic-apo ruchi' re lago rubini'an Galilea, y chuka' nibex Tiberias cha. 2 Camas je q'uiy vinak re xe'tzake-a chij, roma re vinak re' quitz'eton chic re milagros re ye'rubanala' chique re yava'i', milagros re nisekresan che can ja-va re Dios takayom-pa richin. 3 Re Jes'us y yoj re yoj ru-disc'ipulos xojote-a pa rue' jun loma, y chire' xtz'uye-va-ka reja' chakacojol. 4 Y nakaj chic c'o-va re pascua, re kanamak'ij yoj re yoj israelitas. 5 Y tak re Jes'us xtzu'un-ka, xutz'at che camas je q'uiy vinak re je'tzakatal chij. Mare' reja' xubij cha re Felipe re jun ru-disc'ipulo: ??Anche' xtakalok'o-va-pa vay chin che ye'katzuk conojel re vinak re'? 6 Quire' xubij re Jes'us cha re ru-disc'ipulo, chin che nutamaj andex nunojij reja', vo xa ne'ka chuc'o'x che re Jes'us ronojel nitiquir nuban. Pero re Jes'us rutaman chic andex nuban chin ye'rutzuk re vinak re'. 7 Y re Felipe xubij cha re Jes'us: Xe-ta nakalok' ca'e' ciento denarios vay, man xque'ruban-ta. Can man xtel-ta-apo chiquivach, astapa' ba-oc re nakaya' chique. 8 C'are' jun chaka yoj re yoj ru-disc'ipulos, re rubini'an Andr'es ruch'alal re Sim'on Pedro, xubij: 9 Vova' c'o jun ala' re c'o vo'o' vay riq'uin, banon che cebada y ca'e' car. ??Pero xaxe-ta-oc re' re xtakaya-apo chiquivach conojel re vinak re'? xcha' re Andr'es. 10 C'are' re Jes'us xubij: Tibij chique la vinak che que'tz'uye'. Y re lugar re' otz chin ye'tz'uye', roma q'uiy sabana c'o. Conojel re vinak quimalon-qui' chire' xe'tz'uye'. Je vo'o' mil la'k xaxe re achi'a'. 11 Re Jes'us xe'ruli'ej re vo'o' vay re' y xutioxij cha re Dios. C'are' xujachala-a chaka yoj re yoj ru-disc'ipulos chin che nakajach chiquivach re vinak re je'tz'uyul. Y re Jes'us can quire' chuka' xuban cha re ca'e' car. Re vinak can xquic'ul re jenipa' vay y car re xquijo'. 12 Y tak je'viynak chic jabal re vinak re', re Jes'us xubij chaka yoj re yoj ru-disc'ipulos: Timola-pa ronojel vay y car re man xquiq'uis-ta, roma man ninjo-ta che nitz'elas can. 13 Y xbakamola-pa re man xquiq'uis-ta re vinak y doce chacach che nojel re xkamol. Ja nojel re' xmolotaj can cha re car y re vo'o' vay banon che cebada. 14 Y re vinak re', tak quitz'eton chic re milagro re xuban re Jes'us, re nisekresan che can ja re Dios re takayom-pa richin, reje' xquibij: Can katzij-va che ja ache re' re jun rusamajel re Dios re nibex profeta cha, y q'uiy-yan tiempo yaben che nipa chach re ruch'ulef, xe'cha'. 15 Y re Jes'us xunabej che re vinak xque'pa chuc'amic chin che niquiban qui-Rey cha y astapa' man nrajo-ta reja', mare' rion xtzolaj pa rue' re loma. 16 Y tak xkatz'at che xk'ak'ij-ka, yoj re yoj ru-disc'ipulos re Jes'us xojtzolaj-ka chuchi' re lago. 17 Yoj xojoc-a pa jun canoa y xkatz'am-a bey chin che xojba pa tenemit Capernaum, re c'o c'a juc'an chic-apo ruchi' re lago. Camas chic k'oko'm y re Jes'us man aponak-ta kaq'uin. 18 Y jare' tak xbetiquir-pa jun namalaj cak'ik' pa rue' re lago, jun cak'ik' re camas ruchuk'a'. Y mare' re ya' camas nisilon. 19 Y tak xojbiyin-yan jun vo'o' o vaki' kil'ometros, xkatz'at re Jes'us pitinak charakan pa rue' re lago y ne'copej-pa kaq'uin. Y yoj camas xkaxibij-ki'. 20 Pero re Jes'us xubij chaka: Man tixibij-ivi'. Ja yen re Jes'us, xcha' reja'. 21 Y tak re Jes'us xubij quire', otz xkana-ka y yojqui'cot xkac'ul-apo re Jes'us chupan re canoa. Y can jare' tak xojapon chupan re lugar re anche' tiene que yojapon-va. 22 Pa ruca'n k'ij, re vinak re c'a xe'c'ue-na can juc'an-apo ruchi' re lago, can quitaman che xaxe yoj re yoj ru-disc'ipulos re Jes'us re xojtzolaj chupan re jun canoa re c'o chire'. Pero re Jes'us c'a xc'ue-na can. 23 Re k'ij re', jec'o canoas re je'pitinak pa tenemit Tiberias y xe'bapon chunakaj re lugar anche' tak re Ajaf Jes'us xutioxij cha re Dios, roma re vay chin xe'rutzuk re vinak. 24 Y re vinak re', roma xquitz'at che re Jes'us xa man c'o-ta chic chire' y yoj re yoj ru-disc'ipulos xa xojtzolaj-yan, reje' chuka' xe'oc-a pa tak canoas y xe'ba pa Capernaum chucanoxic re Jes'us. 25 Tak re vinak re' xbequivila' re Jes'us juc'an chic-apo ruchi' re lago, xquibij cha: ??Jampa' cateka-va vova' y anchok chupan xapo-va? 26 Pero re Jes'us xubij chique re vinak re': Katzij nimbij chiva, che yex yinicanoj xaxe roma xivel ivay viq'uin y jabal xnoj ipan, y man roma-ta che xitz'at re milagros re nisekresan che yen can ja-va re Dios re takayom-pa vichin. 27 Can quixsamaj, pero man chin-ta che nich'ac re vay re xa niq'uis. Xa can quixsamaj chin nich'ac re vay re c'o nojel tiempo y nuya' ic'aslen re man niq'uis-ta. Ja vay re' re xtinya' chiva yen re xinalax chi'icojol, roma ja yen re xinrutak-pa re Nata' Dios, chin nimban re samaj re', y can xuban che xk'alajin che ja reja' re xtako-pa vichin, xcha'. 28 Y re vinak re' xquibij cha re Jes'us: ??Andex re nika chach re Dios che nakaban? 29 Y re Jes'us xubij chique: Re nika chach re Dios che yex niban, ja re quininimaj yen re xintak-pa roma reja'. 30 Y re vinak xquibij cha re Jes'us: ??Andex che se~nal yatiquir naban? Tabana' jun milagro, chin quire' nakatz'at y yatkanimaj. 31 Roma re kavinak xe'c'ue' ajuer can, tak xe'k'ax chupan re jun lugar re anche' manak vinak re nibex desierto cha, jac'a vay re xubini'aj man'a re xuya' re Mois'es chique chin xquitaj. Can ancha'l-va re nubij re ruch'abal re Dios re tz'iban can: Vay re pitinak chila' chicaj re xuya' chique chin xquitaj. Y rat ??yatiquir como naban ancha'l xuban re Mois'es? 32 Y re Jes'us xubij chique: Tic'axaj jabal re xtimbij chiva: Re vay re xka-pa chila' chicaj, mana-ta re Mois'es xyi'o. Xa ja re Nata' Dios re xyi'o y ja chuka' reja' re niyi'o chiva re katzij vay chin chila' chicaj. 33 Roma re vay chin re Dios, ja re Jun re pitinak chila' chicaj. Y jare' re c'amayom-pa c'aslen chique re vinak, xcha' chique. 34 Tak xquic'axaj quire' re vinak, xquibij cha re Jes'us: Nojel tiempo taya' re vay re' chaka, rat Maestro, xe'cha'. 35 Y re Jes'us xubij chique: Ja yen re vay re niyi'o c'aslen. Re xtiniman vichin, man chic xtich'umun-ta rupan, roma ja yen re yinoc ruay y ninlisaj-a re ruch'umunic rupan. Y chuka' re xtuban confiar-ri' viq'uin, man xtichake'j-ta chic ruchi', roma ja yen re yinoc ruya'. 36 Pero ancha'l nbin chiva, che yex man yininimaj-ta astapa' can xic'axaj y xitz'at re samaj re ximban. 37 Conojel re xque'pa chinucanoxic, ye'nc'ul, y man jun bey xque'ntzelaj-ta-a. Roma jare' re je'rucha'on chic re Nata'. 38 Roma yen re xinka-pa chila' chicaj man nusamaj-ta yen re nc'amom-pa. Yen xinka-pa chila' chicaj chubanic re samaj re nurayij re takayom-pa vichin. 39 Y re samaj rubim-pa re Nata' Dios re takayom-pa vichin, ja che conojel re je'rucha'on reja', re ye'canon vichin yen, man-ta c'a xque'satz can, y pa ruq'uisibal k'ij xque'nc'asoj-a chiquicojol re anama'i'. 40 Re samaj re bim-pa chuka' chua roma re Nata', re takayom-pa vichin, ja che conojel re ye'tz'eto re nusamaj y yinquinimaj, tic'ue' c'a quic'aslen re man niq'uis-ta, y ye'nc'asoj-a chiquicojol re anama'i' re pa ruq'uisibal k'ij, xcha' re Jes'us. 41 Jac'a re kavinak israelitas xe'xibixot-ka chij re Jes'us, roma reja' xubij: Ja yen re vay re kejnak-pa chila' chicaj. 42 Y xquibij: Pero jare' re Jes'us re ruc'ajol re Jos'e, roma re rute-rutota' yoj kataman quivach. ??Anchique roma nubij chaka che reja' kejnak-pa chila' chicaj riq'uin re Dios? ye'cha'. 43 Pero re Jes'us xubij chique: Man quixibixot-pa chuij. 44 Roma re Nata' Dios re takayom-pa vichin, ja reja' re samajenak chic pa tak c'anma re xque'niman vichin. Y yen can xtimban chique re ye'niman vichin che xque'c'astaj-a chiquicojol re anama'i' re pa ruq'uisibal k'ij. 45 Y can tz'iban-va can coma re rusamajela' re Dios re xe'c'ue' ajuer can, re xbex profetas chique, che conojel c'o xtic'ut chiquivach roma re Dios. Y re anchique nuc'axaj re ruch'abal re Nata' Dios y nutamaj, can xtipa chinucanoxic yen. 46 Pero man roma-ta che c'o jun vinak re tz'eteyon rach re Dios. Xaxe yen re yimpitinak chila' chicaj riq'uin reja' re yintz'eteyon rach. 47 Tic'axaj-na-pa' jabal re xtimbij chiva: Re niniman vichin, can c'o-va ruc'aslen chin jumul. 48 Re vay re niyi'o c'aslen, ja yen. 49 Roma re vay re xubini'aj man'a, re xquitaj re ivinak xe'c'ue' ajuer can, re xe'k'ax chupan re lugar re anche' manak vinak re nibex desierto cha, man xtiquir-ta xuban chique che xc'ue-ta quic'aslen chin jumul. 50 Jac'a re katzij vay re kejnak-pa chila' chicaj, nuban chique re ye'tijo richin che man xque'bapon-ta chupan re camic chin jumul. 51 Ja yen re vay re niyi'o c'aslen, re xka-pa chila' chicaj. Re xque'tijo re vay re', xque'c'ase' nojel tiempo. Re vay re xtinya' yen chique can ja re nu-cuerpo. Can xtapon-va pa camic chin nuc'am-pa c'aslen chique re vinak re jec'o chach re ruch'ulef. 52 Y re kavinak israelitas re', tak xquic'axaj re xubij re Jes'us, xquic'utula' chiquivach-ka reje': ??Andex como re' che reja' nuya' re ru-cuerpo chaka chin nakataj? ye'cha'. Pero re vinak re' xe'jalajo' roma jun-va nubij la jun y jun-va nubij la jun. 53 Y re Jes'us xubij chique: Can katzij-va, vo xa man nitaj-ta re nu-cuerpo y man nikum-ta chuka' re nuq'uiq'uel yen re xinalax chi'icojol, re c'aslen chin nojel tiempo can man xtoc-ta ivichin. 54 Re can xtiquitaj re nu-cuerpo y xtiquikum chuka' re nuq'uiq'uel, can c'o-va re quic'aslen re man xtiq'uis-ta. Y yen can xtimban chique che xque'c'astaj-a chiquicojol re anama'i' re pa ruq'uisibal k'ij. 55 Roma re nu-cuerpo yen, jare' re katzij vay, y re nuq'uiq'uel, jare' re katzij ya' re nuc'am-pa c'aslen. 56 Re ye'tijo re nu-cuerpo y ye'kumu chuka' re nuq'uiq'uel, xa jun xtakaban quiq'uin. Reje' xque'c'ue' viq'uin yen y yen quiq'uin reje'. 57 Roma ja re Nata' re takayom-pa vichin y reja' can c'o-va re c'aslen riq'uin, yen chuka' c'o re c'aslen re' viq'uin. Y quire' chuka' re xquinquic'ul yen, can xque'c'ase-va voma yen. 58 Re Jun re katzij vay, ja re kejnak-pa chila' chicaj, y re vay re' can man junan-ta riq'uin re vay re xubini'aj man'a re xquitaj re ivinak xe'c'ue' ajuer can, roma re vay re xquitaj reje' man xtiquir-ta xuban chique che xc'ue-ta quic'aslen chin jumul. Jac'a re niquitaj re katzij vay re kejnak-pa chila' chicaj, xtic'ue' quic'aslen re man niq'uis-ta. 59 Jare' xubij re Jes'us chique re kavinak israelitas re quimalon-qui' chupan re nema-jay re nibex sinagoga cha, re c'o chire' pa tenemit Capernaum. 60 Y re je'tzakatal chij re Jes'us, tak quic'axan chic-ka re xubij, je q'uiy chique reje' xquibij: Camas c'ayef che nac'ul re xubij. Man k'alaj-ta vo xa jec'o re xque'niman. 61 Y tak re Jes'us xutz'at re niquinojij pa tak c'anma re je'tzakatal chij, reja' xubij chique: ??Anchique roma tak yex ninojij che c'ayef xtinimax re ximbij? 62 Xe-ta yinitz'at yen re xinalax chi'icojol che yintzolaj chila' riq'uin re Dios re anche' yimpitinak-va, ??la yininimaj-ta coma? 63 Re esp'iritu jare' re niyi'o c'aslen. Re i-cuerpo xa can man jun rajkalen, roma man nitiquir-ta nuya' c'aslen. Y re Esp'iritu re niyi'o re katzij c'aslen, ja re ch'abal re je'mbin chic-ka chiva. 64 Pero je q'uiy chiva yex re man xquinquinimaj-ta, xcha' re Jes'us. Roma reja' can rutaman-va-pa anchique che vinak re man xque'niman-ta, y re anchique xtijacho richin. 65 Y re Jes'us xubij: Roma jec'o chiva yex re man xquinquinimaj-ta, mare' tak yen nbin chic chiva che ja re vinak re je'cha'on roma re Nata' Dios, jare' re xque'pa viq'uin chinucanoxic, xcha'. 66 Roma quire' xubij re Jes'us, camas je q'uiy chique re can que'tzake-va chij, man chic xe'tzake-ta chij. Xa xe'tzolaj can. 67 Y re Jes'us xuc'utuj chuka' chaka yoj re yoj doce ru-disc'ipulos: ??Yex chuka' nijo' yixba? 68 Y re Sim'on Pedro xubij cha re Jes'us: Ajaf, man jun chic ancha'l rat chin yojtzake-ta chij, roma re ach'abal rat can nuya' c'aslen re man niq'uis-ta. 69 Yoj kaniman y kataman che ja rat re Cristo, re Ruc'ajol re c'aslic Dios. 70 Y re Jes'us xubij: Man riq'uin re' che can ja yen re xincha'o ivichin yex re yix doce, can c'o jun re itzel xel chi'icojol, xcha'. 71 Tak re Jes'us xubij-ka quire', xa chij re Judas Iscariote xch'o-va, re Judas re ruc'ajol re jun ache rubini'an Sim'on. Re Jes'us xunataj re jun re', roma jare' re xtic'ayin richin. Y reja' jun c'a chaka yoj re yoj doce ru-disc'ipulos.

7

1 Y tak xe'banataj-yan ronojel re', re Jes'us xba pa tak tenemit re jec'o pa Galilea. Man c'a rujovan-ta binak tzijoy ruch'abal re Dios pa Judea, roma re achi'a' re c'o quik'ij chakacojol yoj re yoj israelitas, niquicanola' andex xtiquiban chin niquiquimisaj. 2 Y roma ne'ka-yan jun chique re kanamak'ij yoj re yoj israelitas, namak'ij chin nakanataj re tiempo re xquik'asaj re kavinak ajuer can chupan re lugar re anche' manak vinak re nibex desierto cha, 3 mare' re ruch'alal re Jes'us xquibij cha: Taya' can re Galilea y cabiyin pa Judea, chin quire' re vinak re can yatquiniman-va y ye'tzake' chavij re jec'o chire', tiquitz'eta' re asamaj. Tiquitz'eta' re milagros re ya'banala'. 4 Roma anchique re nrajo' nuc'ut-ri' chiquivach re vinak, man ruc'amon-ta che nuvovaj-ri'. Can nic'atzin che nuc'ut-ri' che can c'o-va re nitiquir nuban, xe'cha' re ruch'alal cha. 5 Reje' quire' xquibij roma can man niquinimaj-ta re Jes'us, astapa' can quich'alal-va. 6 Y c'are' re Jes'us xubij chique: Yex xabanchique k'ij otz yixapon chupan re namak'ij. Jac'a yen man quire-ta. Yen c'amaje-na otz chin che yinapon. 7 Yex xa man itzel-ta yixtz'et coma re vinak re man quiniman-ta re Dios. Jac'a yen can yinquitzelaj-va. Yinquitzelaj roma yen can ninlisaj pa sakil re itzel tak quibanabal re ye'quibanala'. 8 Quixbiyin iyon yex. Yen xa c'amaje-na yimba-a pa namak'ij. Re hora chin che ninc'ut-vi', c'amaje-na tapon, xcha' re Jes'us chique. 9 Y tak re Jes'us rubin chic ronojel re' chique re ruch'alal, reja' can xc'ue-va can chire' pa Galilea. 10 Y tak je'binak chic re ruch'alal pa namak'ij, c'are' xba reja'. Pero pan eval xba. 11 Jac'a re pa namak'ij, re achi'a' re c'o quik'ij chakacojol yoj re yoj israelitas, ye'xule-ye'jote' chucanoxic re Jes'us y niquibila': ??Anche' como c'o-va re jun ache re'? ye'cha'. 12 Y chiquicojol re vinak chupan re namak'ij re', q'uiy re nibilox chij re Jes'us. Jec'o niquibij che re Jes'us, jun utzulaj ache. Jec'o re man quire-ta chiquivach, xa niquibila' che re Jes'us xa ye'ruk'ol re vinak. 13 Pero man jun chique re vinak re ye'bin quire' nipa'e-ta-pa y nich'o-ta chij re Jes'us, roma niquixibij-qui' chiquivach re achi'a' re c'o quik'ij chakacojol yoj re yoj israelitas. 14 Y jac'a tak binak pa nic'aj re namak'ij, jare' tak re Jes'us xapon pa rachoch re Dios re c'o chire' pa tenemit Jerusal'en, anche' ntajin-va re namak'ij. Y reja' nutzijoj re ruch'abal re Dios chiquivach re vinak re quimalon-qui' chire'. 15 Mare' re achi'a' re c'o quik'ij chakacojol yoj re yoj israelitas, niquibij chij re Jes'us: ??Anchique roma re ache re' camas rutaman chij re ruch'abal re Dios y xa man jun bey xkatz'at-ta che ntajin-ta ruc'utic chach? ye'cha'. 16 Pero re Jes'us xubij: Re ense~nanza re ninc'ut yen man vichin-ta yen, xa chin re takayom-pa vichin. 17 Y re vinak re nurayij nuban re nrajo' re Dios, can xtuya' cuenta cha re ense~nanza ninc'ut yen, vo xa riq'uin re Dios pitinak-va o xa nayon yen re yintz'ucuyun-ka. 18 Anchique vinak rion reja' nutz'uc-ka re ense~nanza nuc'ut, can nrajo' che re vinak niquiya' ruk'ij. Jac'a yen ninjo' che yex niya' ruk'ij re Dios re takayom-pa vichin. Y mare' nik'alajin che yen ja re katzij nimban y man jun bey nimban re man otz-ta. 19 Yex nicanoj andex rubanic niban chin yiniquimisaj. Xa man niban-ta re andex nubij re ley chin re Mois'es, y re ley re' xa pan ik'a' c'o-va, xcha' re Jes'us. 20 Y re vinak xquibij: Xa xach'ujer. ??Anchique re nijovan niquimisan avichin? 21 Pero re Jes'us xubij chique: Yex can anchique-la xuna' re iv'anma tak xitz'at che yen pa jun k'ij chin uxlanen xinc'achojsaj re jun ache. 22 Y re Mois'es tak xuya' re ley xubij che tiban re circuncisi'on. Pero xa mana-ta reja' re xtz'ucu-pa, xa ja re kavinak xe'c'ue' ajuer can re xe'tz'ucu-pa. Y mare' yex, tak napon re vakxaki' k'ij talax-va jun ac'ual ala', astapa' pa jun k'ij chin uxlanen, can niban-va re circuncisi'on cha. 23 Yex nibij che can nijo' niban ronojel re nubij chupan re ley re ruyi'on can re Mois'es, y mare' astapa' pa jun k'ij chin uxlanen yex can niban-va re circuncisi'on, y re' samaj chuka'. Y vo xa quire' niban, ??anchique roma xpa iyoval chua yen roma xinc'achojsaj jun ache chupan jun k'ij chin uxlanen? 24 Man tibij che man otz-ta re nubanabal, roma quire' nik'alajin chivach yex. Xa can titamaj jabal vo xa quire' o man quire-ta, chin quire' man quixsatz, xcha' re Jes'us chique. 25 Y jec'o chique re vinak aj-chire' pa tenemit Jerusal'en re niquibila': Jare' re Jes'us re nicanox chin niquimisas. 26 Reja' man ruvovan-ta-ri'. Titzu' la', reja' nich'o chiquivach la vinak y man jun nibin cha che man chic tuban quila. Q'uiba' re achi'a' re c'o quik'ij re jec'o chakacojol xa xquitz'at-yan che can ja-va reja' re Cristo. 27 Pero can nik'alajin che xa mana-ta reja' re Cristo, roma xa can kataman anche' tipo-va. Y tak xte'ka re can katzij-va Cristo, xa man xtik'alajin-ta anche' xtipo-va, ye'cha' re vinak aj-Jerusal'en. 28 Y re Jes'us nich'o chiquivach re vinak chire' pa rachoch re Dios. Y jun pa ruchi' xch'o y xubij: Yex can itaman-va noch y itaman chuka' anche' quimpo-va. Jac'a re takayom-pa vichin man itaman-ta rach, y reja' can katzij. Man c'a nayon-ta yen ximbano-ka che ximpa chach re ruch'ulef. 29 Yen can ntaman-va rach re man itaman-ta rach yex, roma riq'uin reja' yimpitinak-va, y ja chuka' reja' re takayom-pa vichin, xcha' reja'. 30 Y can jec'o re xe'jovan che xquitz'am-ta-a, pero man xquitz'am-ta-a, roma re hora chin re Jes'us c'amaje-na tapon. 31 Y camas je q'uiy chique re vinak re xe'niman chin re Jes'us chupan re k'ij re'. Re vinak re' niquibij che ja reja' re Cristo, roma re milagros man jun chic nitiquir nibano. Xa can xe-va re Cristo re nitiquir nibano quire', xe'cha' reje'. 32 Y re achi'a' fariseos xquic'axaj che quire' re ye'quibila' re vinak chij re Jes'us. Mare' re achi'a' fariseos y re principal tak sacerdotes, xe'quitak-a polic'ias chin ne'quitz'ama' re Jes'us. 33 Jare' tak xubij re Jes'us: C'a c'o chic ba' tiempo re yinc'ue-a iviq'uin. C'are' xquintzolaj riq'uin re anchique takayom-pa vichin. 34 Yex xquinicanoj, y man xquinivel-ta chic, roma re lugar re anche' xquinec'ue-va yen, man xquixtiquir-ta xquixapon chinucanoxic, xcha' re Jes'us. 35 Y re achi'a' re c'o quik'ij chakacojol yoj re yoj israelitas niquibila' chiquivach: ??Anche' como xtibo-va re Jes'us re'? Roma nubij che man xtakavel-ta chic. ??Niba como quiq'uin re kavinak israelitas re jec'o nic'aj chic lugares, o q'uiba' quiq'uin re man je israelitas-ta, chin nutzijoj re ruch'abal chique? ye'cha'. 36 Man kataman-ta anche' xtibo-va, roma man kataman-ta andex ne'c'ulun-va che tzij re xubij: Xquinicanoj y man xquinivel-ta. Re lugar re anche' xquinec'ue-va, man xquixtiquir-ta xquixapon yex, ye'cha' chiquivach reje'. 37 Re ruq'uisibal k'ij chin re namak'ij ja k'ij re' re c'o m'as rajkalen. Jare' tak re Jes'us xyacataj y jun pa ruchi' tak xubij: Vo xa c'o jun re nichake'j ruchi', tipa viq'uin yen, chin nich'uch'o-a r'anma riq'uin re ya' re xtinya-a cha. 38 Re xtipa viq'uin chin yinrunimaj, can xtic'ue' re ya' chin c'aslen pa r'anma, y re ya' re' can ancha'l nuban re ya' anche' nalax-va, quire' xtuban pa ruc'aslen. Quire' re nubij chupan re ruch'abal re Dios re tz'iban can. 39 Re ya' re xunataj re Jes'us, ja re Esp'iritu Santo, roma jare' re xtiquic'ul re vinak re ye'niman chin re Jes'us. Y re Esp'iritu Santo c'amaje-na tika-pa, roma c'amaje-na chuka' titzolaj-a re Jes'us chila' chicaj. 40 Y jec'o chique re vinak, tak xquic'axaj-ka re tzij re xe'rubij re Jes'us, xquibij: Can katzij-va che re Jes'us jare' re jun rusamajel re Dios re nibex profeta cha, y q'uiy-yan tiempo yabem-pa. 41 Y jec'o chuka' nic'aj chic niquibij: Jare' re Cristo re bin che nitak-pa roma re Dios. Pero jec'o nic'aj chic niquibij: Re Cristo man aj pa Galilea-ta. 42 Roma re ruch'abal re Dios re tz'iban can nubij che re Cristo rey-rumam re Rey David. Y chire' pa tenemit Bel'en re anche' xalax-va re David, chire' tiene que nipo-va re Cristo, ye'cha'. 43 Can man junan-ta re niquinojij chij re Cristo, roma jun-va nubij la jun y jun-va nubij la jun. 44 Y jec'o chique re vinak re xquijo' che xquitz'am-ta-a re Jes'us, pero xa man xquiban-ta. 45 Jac'a tak xe'tzolaj-pa re polic'ias re je'takon-a coma re principal tak sacerdotes y coma re achi'a' fariseos, xc'utux chique: ??Anchique roma tak man xitz'am-ta-pa re Jes'us? 46 Pero re polic'ias xquibij: Yoj man xkatz'am-ta-pa, roma re tzij re ye'rubij re ache re', can man jun ache re quire-ta biyon, roma rion utzulaj tak tzij re ye'rubila', xe'cha' reje'. 47 C'are' re achi'a' fariseos xquibij chique re polic'ias: ??Yex chuka' xixk'olotaj-pa? 48 ??Acaso jec'o chique re ka-jefes y fariseos re quiniman-ta reja' ye'tz'at yex? 49 Xa ja re vinak re man jun quitaman chij re ley re ruyi'on can re Mois'es, xa jare' re ye'niman richin. Ja-ta c'a re castigo re xtika pa quive' re vinak re'. 50 Pero re Nicodemo re ache re chak'a' xapon riq'uin re Jes'us, xubij chique re ruchibil: 51 Re ka-ley nubij che man yojtiquir-ta nakaban juzgar jun vinak, vo xa man kayi'on-ta k'ij cha che nubij vo xa katzij je'rubanalon mac o man katzij-ta. 52 Y reje' xquibij cha re Nicodemo: Rat man yat aj-Galilea-ta chin quire' nato' re Jes'us. Tanic'oj-na-pa' jabal re ruch'abal re Dios re tz'iban can. Chire' nik'alajin-va che re pa Galilea man nipa-ta jun rusamajel re Dios re nibex profeta cha, xe'cha'. 53 Y c'are' re achi'a' re quimalon-qui', cada jun xe'ba cho tak cachoch.

8

1 Re Jes'us xba-apo chach re loma rubini'an Olivos. 2 Y namak'a-yan ruca'n k'ij, reja' xapon chic pa rachoch re Dios. Y re vinak xe'bapon riq'uin. Y reja' tz'uyul tak nubij re ruch'abal re Dios chique re quimalon-apo-qui' chire'. 3 Y re achi'a' fariseos y re achi'a' je'atamayon re ley kachin yoj re yoj israelitas xe'bapon riq'uin re Jes'us, quic'uan-apo jun ixok re nimacun riq'uin jun ache xbelitaj-pa. Xbequipoba' chach re Jes'us, pa quinic'ajal. 4 Re fariseos y re achi'a' je'atamayon re ley, xquibij cha re Jes'us: Maestro, xe'cha'. Re jun ixok re kapoban chavach, nimacun riq'uin jun ache xbelitaj-pa. 5 Chupan re ley ruyi'on can re Mois'es, nubij che re ye'bano quire', que'quimisas cha aboj. ??Andex nabij rat? ??Otz o man otz-ta nakaquimisaj cha aboj re jun ixok re'? xe'cha' cha. 6 Re achi'a' re' quire' xquibij xaxe chin niquitojtobej re Jes'us, chin quire' ye'tiquir ye'sujun chij. Pero re Jes'us xa xluque-ka pan ulef, y xtz'iban-ka riq'uin re rue-ruk'a'. 7 Y roma re achi'a' re' can ye'chaca-apo chin niquic'utuj cha re Jes'us, vo xa niquimisas o man niquimisas-ta re ixok re', reja' xpa'e' y xubij: Re man jun bey kejnak pa jun mac quire', tutz'ama' ruq'uiekic re ixok cha aboj, xcha'. 8 Y re Jes'us xluque' chic-ka jun bey pan ulef y xtz'iban chic-ka riq'uin re rue-ruk'a'. 9 Tak reje' xquic'axaj re xubij re Jes'us, re c'anma xubij chique che reje' chuka' je aj-maqui', y che ja'jun che ja'jun xe'el-a chire'. Xe'nabayaj-a re rejeta'k tak achi'a', y c'are' xe'ba re nic'aj chic. Xa can xe chic c'a re ixok xc'ue' can chach re Jes'us. 10 Y tak re Jes'us xpa'e' chic, xutz'at che xaxe chic re ixok c'o can chire'. Mare' xuc'utuj cha re ixok re': ??Y re vinak re je'c'amayom-pa avichin? ??Man jun xc'ue-ka chin yatruquimisaj? xcha' re Jes'us. 11 Y re ixok re' xubij: Ajaf, man jun chic c'o, xcha'. Y re Jes'us xubij cha: Yen chuka' man nimbij-ta che yaquimisas. Vocame catzolaj y man chic camacun. 12 Tak re Jes'us xch'o chic jun bey chiquivach re vinak, xubij: Ja yen re sakil quichin conojel re vinak re jec'o chach re ruch'ulef. Re nitzekelben vichin, can xtic'ue' re sakil riq'uin y xtuvel ruc'aslen viq'uin. Y reja' man chic xtibiyin-ta pa k'oko'm. 13 C'are' re achi'a' fariseos re jec'o chire', xquibij-apo cha re Jes'us: Yoj man nakanimaj-ta che katzij re nabij, roma xa ja rat mismo re otz yach'o-ka chavij. 14 Pero re Jes'us xubij chique re achi'a' fariseos: Astapa' ja yen mismo re otz yinch'o-ka chuij, pero can katzij-va re nimbij-ka chuij. Roma yen can ntaman-va anche' yimpitinak-va, y chire' chuka' xquintzolaj-va. Jac'a yex man itaman-ta anche' quimpo-va, y man itaman-ta chuka' anche' xquimbo-va. 15 Yex xa jac'a re nitz'at chij jun vinak re niban juzgar. Jac'a yen man quire-ta nimban. 16 Y vo xa yen nimban juzgar, can pa rubiyal-va nimban, roma can man nayon-ta yen, xa can vichibil-va re Nata' re takayom-pa vichin. 17 Chupan re i-ley nubij che tak jec'o je ca'e' vinak re can junan niquibij, nik'alajin che katzij re niquibij. 18 Y chuij yen mismo ninya-va-ka testigo y re Nata' re xtako-pa vichin jare' re jun chic testigo, mare' k'alaj che katzij re nimbij, xcha' re Jes'us. 19 Re achi'a' fariseos xquibij cha re Jes'us: ??Anche' c'o-va re Arta'? Y re Jes'us xubij: Yex man itaman-ta rach re Nata', roma man itaman-ta noch yen. Xe-ta itaman noch yen, can itaman-ta chuka' rach re Nata'. 20 Y jac'a tzij re' xe'rubij re Jes'us chique re vinak re quimalon-qui' re anche' ne'yalox-va can mero coma re vinak chire' pa rachoch re Dios. Y man riq'uin re' che xe'rubila' ronojel re tzij re', man jun re xpa-ta chutz'amic, roma re ru-hora c'amaje-na tapon. 21 Y re Jes'us xubij chic jun bey chique: Yen can xquintzolaj-va, y jare' tak yex xquinicanoj, pero man xquinivel-ta. Xa can chupan re imac xquixcom-va. Y re anche' yimbo-va yen, yex man yixtiquir-ta yixapon, xcha' re Jes'us. 22 Y jare' tak re achi'a' re c'o quik'ij chakacojol yoj re yoj israelitas, niquibila' chiquivach: ??Xtuquimisaj como-ri' re Jes'us? Roma nubij: Re anche' xquimbo-va yen, yex man yixtiquir-ta yixapon. 23 Pero re Jes'us xubij chique: Yex can yix aj-vova' chach re ruch'ulef y yen yin aj-chila' chicaj. Can yix richin-va re ruch'ulef y yen man quire-ta. 24 Y mare' ximbij chiva che chupan re imac yixcom-va. Y vo xa man ninimaj-ta yin anchique yen, can xquixcom-va chupan re imac, xcha'. 25 C'are' re achi'a' re' xquibij chic cha re Jes'us: ??Yat anchique c'a rat c'a? Y re Jes'us xubij chique: Yen can ja tak ntz'amom-pa tzij iviq'uin, jare' tak nbim-pa chiva re yin anchique yen. 26 Q'uiy re nimbij chivij, roma re itzel ibanabal. Pero re nimbij chiva yex y chique conojel vinak, xaxe re nc'axam-pa riq'uin re takayom-pa vichin, y reja' ja re katzij nubij, xcha' re Jes'us. 27 Pero reje' man xk'ax-ta pa quive' re xbex chique roma re Jes'us, mare' man xquinabej-ta che chij re Dios re Rutota' reja' xch'o-va. 28 Re Jes'us nubij chuka': Re k'ij tak xquinijotoba' cho cruz yen re xinalax chi'icojol, c'ajare' tak xtitamaj yin anchique yen. Y xtitamaj chuka' che ronojel re nimban yen, xa man nayon-ta yen yinojin-ka. Xa can ancha'l re rubim-pa re Nata' chua, can quire' chuka' nimbij chiva. 29 Re Nata' re takayom-pa vichin, can c'o viq'uin. Man yinruya-ta can nayon, roma yen can nimban-va re nika chach, xcha' re Jes'us. 30 Y roma re tzij re xe'rubij-ka re Jes'us chiquivach re vinak, je q'uiy re xe'niman richin. 31 C'are' re Jes'us xubij chique re achi'a' re c'o quik'ij chakacojol yoj re yoj israelitas re xe'niman richin: Vo xa yex jabal ruc'uaxic niban cha re nuch'abal, can xquixoc katzij tak nu-disc'ipulos. 32 Xtitamaj chuka' anchique re katzij y re katzij ja yen, y re katzij xtuban chiva che yixel libres. 33 Y re nic'aj chic re man quiniman-ta xquibij: ??Anchique roma tak nabij che xkojel libres? Roma re kamoma' Abraham can libre-va, y yoj, yoj rey-rumam can reja', man yoj ancha'l-ta re esclavos, sino can yoj libre-va. 34 Pero re Jes'us xubij chique: Tic'axaj-na-pa' jabal re xtimbij chiva vocame: Conojel vinak re ye'macun, can nik'alajin che chuxe' rutzij re mac jec'o-va y jare' re ac'ayon quichin. 35 Y re vinak xa chuxe' rutzij re mac c'o-va, man xtic'ue-ta riq'uin re Dios. Jac'a re jun re can rajc'ual-va re Dios, can xtic'ue-va riq'uin jumul. 36 Mare' vo xa yen re Ruc'ajol re Dios yincola ivichin, can katzij-va xquixel libres. 37 Y chinoch yen, re nibij yex che yix rey-rumam can re Abraham, can quire-va, xa jac'a re ibanabal man nuc'ut-ta che quire', roma yex xa nicanola' andex niban chin yiniquimisaj. Re' nuc'ut che yex man iyi'on-ta k'ij cha re nuch'abal che aconak-ta pa tak iv'anma. 38 Ronojel re nintzijoj yen, ja re Nata' c'utuyum-pa chinoch. Y quire' chuka' yex, re nic'axaj riq'uin re jun aconak irta', jare' re yixtajin chubanic. 39 Y reje' xquibij cha re Jes'us: Re Abraham jare' re karta' yoj, xe'cha'. Y re Jes'us xubij chique: Xe-ta ja re Abraham re irta', nik'alajin-ta, roma ja-ta re otz tak banabal re xe'rubanala' reja', ja-ta chuka' re' re ye'banala' yex. 40 Pero yex man quire-ta niban. Yex xa nicanoj andex niban chin yiniquimisaj yen re nintzijoj re katzij chiva, katzij re nc'axam-pa riq'uin re Dios. Re Abraham man xuban-ta ancha'l re niban yex, y yex nibij irta' cha. 41 Yex can jac'a re nuban re jun aconak irta', xa jare' niban, xcha' re Jes'us chique. Y reje' xquibij cha: Yoj can xe c'a jun Karta', y re' ja re Dios y kataman che can xe reja' y man jun chic, xe'cha'. 42 C'are' re Jes'us xubij chique re vinak: Xe-ta ja re Dios re Irta', can k'alaj-ta, roma camas-ta yinijo' y yinic'ul-ta, roma yen can riq'uin re Dios yimpitinak-va. Roma can ja-va re Dios re takayom-pa vichin y man nayon-ta yen xinojim-pa che ximpa chach re ruch'ulef. 43 ??Anchique roma tak yex man nijo-ta che nak'ax pan ive' re nimbij chiva? Xa roma man nika-ta chivach. 44 Re irta' yex xa ja re itzel y can yix richin reja', y ja re nika chach reja', jare' re yixtajin chubanic. Roma re itzel can antes je'rubanalom-pa camic. Man xc'ue-ta chic chupan re katzij, roma can nutzelaj re katzij. Xa can jun aj-tz'ucuy-tzij y ja reja' re quirta' conojel re ye'tz'ucu tzij. 45 Y yen man yininimaj-ta roma ja re katzij re nimbij chiva. 46 ??C'o como jun re nibim-pa chua vocame andex che mac je'mbanalon? Y vo xa jabal nik'alajin che man jun mac pa nuc'aslen y can rion katzij re nimbij, ??anchique roma tak man yininimaj-ta? 47 Roma re can richin chic re Dios, can ja re nubij re ruch'abal re Dios re nuban. Jac'a yex man quire-ta niban, roma man yix richin-ta re Dios, xcha' re Jes'us. 48 Y re achi'a' re c'o quik'ij chakacojol yoj re yoj israelitas, xquibij cha re Jes'us: Can katzij-va re kabin chavij che rat xa yat jun vinak re yatpitinak pa Samaria y c'o itzel esp'iritu aviq'uin, xe'cha' cha. 49 Pero re Jes'us xubij chique re achi'a' re': Yen man jun itzel esp'iritu c'o viq'uin. Yen can ja re Nata' re ninya' ruk'ij, y yex xa man quire-ta chivach. Yex xa niban chua che yen yin itzel. 50 Yen man nuk'ij-ta re nincanoj chi'icojol, pero c'o c'a Jun re nijovan che conojel vinak niquiya-ta nuk'ij. Y jac'a chuka' reja' re xtibano juzgar quichin re man xtiquiban-ta quire'. 51 Can tic'axaj-na-pa' jabal re xtimbij chiva: Anchique vinak re nunimaj re nuch'abal, man xtutz'at-ta re camic chin jumul, xcha' re Jes'us. 52 Y re achi'a' re c'o quik'ij chakacojol yoj re yoj israelitas xquibij cha re Jes'us: Vocame can kataman chic che can c'o-va itzel esp'iritu aviq'uin, roma nabij che anchique re ye'niman re ach'abal, man xque'com-ta. Tatz'eta-na-pa' re karta' Abraham y re rusamajela' re Dios re xe'c'ue' ajuer can, re xbex profetas chique, xe'com. 53 ??M'as como c'o ak'ij rat que chach re karta' Abraham? Reja' xcom, y quire' chuka' re rusamajela' re Dios re xe'c'ue' ajuer can, re xbex profetas chique, xe'com. ??Yat anchique c'a rat c'a? Roma nabij che re ye'niman re ach'abal man xque'com-ta. 54 Y re Jes'us xubij: Vo xa nayon yen ninya' nuk'ij, xa man jun nic'atzin-va. Pero re nuk'ij yen, can ja re Nata' niyi'o. Re Nata' jare' re nibij i-Dios cha. 55 Y astapa' yex quire' nibij cha, pero man itaman-ta rach. Jac'a yen can ntaman-va rach. Y yinoc jun aj-tz'ucuy-tzij ancha'l yex, xe-ta nimbij che man ntaman-ta rach re Dios. Pero yen can ntaman-va rach re Dios y can nimban-va re nubij re ruch'abal reja'. 56 Re Abraham camas xqui'cot r'anma, roma nrajo' xtutz'at re k'ij tak xquimpa chach re ruch'ulef. Y reja' can xutz'at-va can, y camas xqui'cot r'anma roma re', xcha' re Jes'us. 57 Jare' tak re achi'a' re c'o quik'ij chakacojol yoj re yoj israelitas xquibij cha re Jes'us: Rat nabij che atz'eton chic re karta' Abraham, pero rat xa c'a yat ac'ual. Xa c'amaje-na titz'akater nic'aj ciento ajuna'. 58 Pero re Jes'us xubij chique re achi'a' re': Can katzij nimbij chiva che yen can yinc'o-va-pa, tak c'amaje-na rutzijol che nalax re Abraham, xcha'. 59 Y re achi'a' re' can jare' xbequisiq'uila-pa aboj chin niquiq'uiak re Jes'us. Pero re Jes'us xel-pa chire' pa rachoch re Dios. Xrevala-pa-ri' chiquicojol re vinak.

9

1 Re Jes'us nak'ax anche' c'o-va jun ache re can moy-va tak xalax. Re Jes'us xutz'at re ache re'. 2 Y yoj re yoj ru-disc'ipulos xkac'utuj cha re Jes'us: Maestro, ??anchique como xmacun, mare' quire' xalax re ache re'? ??Ja re rute-rutota' o ja reja'? 3 Pero re Jes'us xubij: Man jun chique reje' c'o-ta rumac, chin quire' xuc'alvachij re ache re'. Ni xe-ta reja', ni xe-ta re rute-rutota'. Reja' can moy-va tak xalax, chin che nik'alajin re ru-poder re Dios riq'uin. 4 Pak'ij, can otz-va che niban samaj. Jac'a tak ndoc-pa re ak'a', conojel man otz-ta chic ye'samaj. Y quire' chuka' yen, vocame nic'atzin chin nimban re samaj re bim-pa chua roma re takayom-pa vichin, roma tak man xquinc'ue-ta chic, man chic xquintiquir-ta xtimban re samaj re'. 5 Y re k'ij re c'a yinc'o-na chach re ruch'ulef, jac'a yen re yinsekresan quic'aslen conojel vinak, xcha'. 6 Tak re Jes'us je'rubin chic-ka re ch'abal re', reja' xchuban-ka pan ulef. Y riq'uin re ruchub re xka pan ulef, xuban ba' ch'abak. C'are' re ch'abak re' xuquil-a chuchi' tak nak'arach re ache moy. 7 Y xubij cha: Vocame cabiyin, y ta'ch'aja' re anak'avach pa jun ya' rubini'an Silo'e. Re be'aj Silo'e ndel che tzij, Takom-pa. Re ache re' can xbo-va, xe'ruch'aj re nak'arach, y tak xtzolaj-pa, nitzu'un chic. 8 C'are' re vinak re je ru-vecinos re ache re' y re nic'aj chic vinak re can je'tz'eteyon-va che moy, niquibila': Ja ache re' re nic'utun limosna re katz'etom-pa, ye'cha'. 9 Y jec'o vinak re ye'bin: Ja', ja reja'. Nic'aj chic niquibij: Junan titzu'un riq'uin re ache re', pero mana-ta reja'. Pero re ache nubij: Ja'. Ja yen re quintz'uye' chin ninc'utuj limosna chique re vinak, xcha'. 10 Y re vinak niquic'utuj cha re ache re': ??Ancha'l c'a tak yatzu'un chic? ??Andex xban chava chin che yatzu'un chic vocame? xe'cha' cha. 11 Re ache xubij chique: Re jun ache rubini'an Jes'us xuban ba' ch'abak y jare' re xuquil chuchi' tak nuk'onach, y c'are' xubij chua: Cabiyin y ta'ch'aja' re anak'avach pa Silo'e. Y yen can ximbo-va chuch'ajic re nuk'onach y can jare' tak xintzu'un. 12 Pero re vinak xquic'utuj cha: ??Anche' c'a c'o-va re Jes'us vocame? xe'cha'. Y reja' xubij chique: Man ntaman-ta. 13 Y re vinak xquic'uaj-a re ache moy rubanon can chiquivach re achi'a' fariseos. 14 Pero tak re Jes'us xuban re ba' ch'abak y xuban cha re ache moy che nitzu'un, xa chupan jun k'ij chin uxlanen. 15 Tak re ache moy rubanon can c'o chic-apo chiquivach re achi'a' fariseos, re achi'a' re' xquic'utuj cha: ??Ancha'l tak yatzu'un chic vocame? Y reja' xubij: Re xbano chua chin yintzu'un chic vocame, xuquil ba' ch'abak chuchi' tak nuk'onach, y xinch'aj, y ja xintzu'un, xcha' chique. 16 Y jec'o achi'a' fariseos re xquibij: Re ache re rubini'an Jes'us man riq'uin-ta re Dios pitinak-va, roma can man nuchajij-ta re k'ij chin uxlanen, ye'cha'. Pero jec'o nic'aj chic fariseos re xquibij: Jun ache aj-mac man nitiquir-ta ye'ruban milagros, ancha'l xuban re Jes'us riq'uin re ache moy. Re achi'a' fariseos man junan-ta re niquinojij chij re Jes'us. 17 C'are' re achi'a' fariseos xquic'utuj cha re ache, re moy rubanon can: ??Anchique che ache re Jes'us nanojij rat re xbano chava che yatzu'un? Y re ache re' xubij: Yen ninojij che re Jes'us jun rusamajel re Dios re nibex profeta cha, xcha' chique. 18 Jac'a re achi'a' re c'o quik'ij chakacojol yoj re yoj israelitas, man niquinimaj-ta che re ache re' can moy-va tak xalax. Mare' man niquinimaj-ta che jun milagro re xban che nitzu'un vocame. C'a xe'cayoj-na re rute-rutota' re ache re nitzu'un chic vocame. 19 Y re achi'a' re' xquic'utuj chique re rute-rutota' re ache: ??Ja ivajc'ual re', re nibij che can moy-va tak xalax? Vo xa can moy-va tak xalax, ??anchique roma tak nitzu'un vocame? xe'cha'. 20 Y re rute-rutota' re ache xquibij chique re achi'a' re': Ja', ja kajc'ual re' re can moy-va tak xalax. 21 Jac'a re man kataman-ta yoj, ja re andex xuban che nitzu'un chic vocame. Y vo xa c'o jun re xbano cha chin nitzu'un chic vocame, re' man kataman-ta yoj. Tic'utuj cha reja', roma reja' xa nema-vinak chic, y nitiquir nubij chiva re andex xbanataj, xe'cha' reje'. 22 Quire' xquibij re rute-rutota' re ache chique re achi'a' re c'o quik'ij chakacojol yoj re yoj israelitas, roma quixibin-qui' chiquivach. Re achi'a' re c'o quik'ij, can quilisan chic rutzijol che xabanchique vinak re xtibin che re Jes'us jare' re Cristo re bin che nitak-pa roma re Dios, can nikotax-pa chupan re nema-jay re anche' nitzijos-va re ruch'abal re Dios re nibex sinagoga cha. 23 Xa roma re' tak re rute-rutota' re ache re nitzu'un chic, xaxe xquibij che tiquic'utuj cha reja' roma xa nema-vinak chic. 24 Y re achi'a' re' xcayoj chic jun bey re ache re man moy-ta chic, y xquibij cha: Cha re Dios tatioxij-va. Yoj kataman che re ache rubini'an Jes'us, jun ache aj-mac, xe'cha'. 25 Y re ache xubij chique re achi'a' re': Yen man ntaman-ta vo xa re Jes'us aj-mac o man aj-mac-ta. Re ntaman yen chij reja', ja che xinruc'achojsaj, roma tak rubanon can man yintzu'un-ta, y vocame yintzu'un chic, xcha'. 26 Y re achi'a' re' xquic'utuj chic cha re ache: ??Andex re xe'ruban chava chin quire' xatiquir xatzu'un? 27 Reja' xubij chique re achi'a' re': Pero re' xintzijoj-yan chiva y xa man xinic'axaj-ta. ??Anchique roma tak yex nijo' che yen nincamaluj chic rubixic chiva? ??Nijo' nitzekelbej re Jes'us? xcha' chique. 28 Pero re achi'a' re' xyacataj quiyoval y xquibij: Ja rat s'i can atzekelben-va reja', jac'a yoj can yoj tzekelbey chin re Mois'es. 29 Yoj can kataman-va che re Dios can xch'o-va riq'uin re Mois'es, jac'a re Jes'us re' man kataman-ta anche' tipo-va, xe'cha'. 30 Y re ache xch'o-apo y xubij chique: Yen camas ninojij re nibij yex, roma nibij che man itaman-ta anche' tipo-va y nibij che q'uiy itaman chij re ruch'abal re Dios, ??y aroma reja' xtiquir xuban jun milagro viq'uin y yintzu'un chic? 31 Can nik'alajin c'a che re Jes'us man aj-mac-ta, roma kataman che re Dios man nuban-ta re niquic'utuj re aj-maqui' cha. Pero re jun re can nuya-va ruk'ij re Dios y nuban chuka' re nrajo' reja', can nic'axax-va roma re Dios, y niya' cha re nuc'utuj. 32 Man jun bey tz'eton o c'axan-ta che c'o-ta jun re nibano cha jun vinak re can moy-va tak xalax che nitzu'un-ta. 33 Y xe-ta re ache rubini'an Jes'us man-ta riq'uin re Dios pitinak-va, man-ta xtiquir xuban re milagro viq'uin yen, xcha' reja'. 34 Pero re achi'a' re' xquibij cha re ache re nitzu'un chic: Rat can yat aj-mac-va tak xatalax, ??y najo' yojatijoj yoj? xe'cha'. Y xquilisaj-pa re ache re', chire'. 35 Re Jes'us xuc'axaj che re ache re' xlisas-pa. Mare' xbo'rcanoj, y tak xuvel, xubij cha: ??Nanimaj como rat re Ruc'ajol re Dios? xcha' re Jes'us cha. 36 Y re ache re nitzu'un chic xubij cha re Jes'us: Yen ninjo' ninimaj re Ruc'ajol re Dios, xa ja re man ntaman-ta anchique reja'. Tabij chua, xcha' re ache. 37 Y re Jes'us xubij cha: Rat can atz'eton chic re Ruc'ajol re Dios. Jac'a yen re yinch'o aviq'uin, xcha'. 38 Re ache can jare' xubij: Ajaf, yen yatinimaj. Y re ache can xuya' ruk'ij re Jes'us. 39 Y re Jes'us xubij: Yen ximpa chach re ruch'ulef chiquitz'etic re vinak andex quibanon, vo xa otz o man otz-ta. Y re vinak re man ye'tzu'un-ta espiritualmente, xtimban chique che xque'tzu'un. Jac'a re niquina' che ye'tzu'un espiritualmente, xa man chic xque'tzu'un-ta. 40 Y jec'o achi'a' fariseos re jec'o-apo chire' anche' c'o-va re Jes'us, tak xquic'axaj re', xquibij: ??Acaso yoj moyi' chuka' yoj? 41 Y re Jes'us xubij chique: Xe-ta yix moyi', jabal-ta, roma manak-ta imac. Xa roma yex nibij che man yix moyi-ta, mare' tak can c'o-va imac.

10

1 Y tic'axaj jabal re xtimbij chiva: Re qui-corral re ovejas can c'o jun ruchi'. Y re man nicusan-ta re ruchi' re corral chin ndoc-apo y xa niropin pa rue' re corral, re nibano quire' xa jun elek'om. 2 Jac'a re nicusan re ruchi' re corral chin ndoc-apo, can ja-va re' re chajinel quichin re ovejas. 3 Y re nichajin re ruchi' re corral nujak-pa chach re chajinel quichin re ovejas, y re ovejas can quitaman chic re ruch'abal re quichajinel. Reja' ye'rayoj che ja'jun riq'uin quibe' y ye'rulisaj-a. 4 Tak re chajinel je'rulisan chic-a conojel re ru-ovejas, ninabayaj-a chiquivach y re ovejas ye'tzake-a chij. Re ovejas can quire-va niquiban, roma can quitaman ruch'abal re nichajin quichin. 5 Jac'a re man quitaman-ta rach, man xtiquitzekelbej-ta. Xa ye'numaj chach, roma man quitaman-ta ruch'abal, ch'abal re man jun bey quic'axan. 6 Ja ejemplo re' re xubij re Jes'us chique re achi'a' fariseos, xa jac'a reje' man xk'ax-ta pa quive' andex re xrajo' xubij chique. 7 C'are' re Jes'us xch'o chic jun bey y xubij chique re achi'a' fariseos: Tic'axaj jabal re xtimbij chiva: Ja yen re ruchi' re corral re anche' ye'oc-va-apo re ovejas. 8 Y je q'uiy re xe'c'ue-yan nabey que chinoch yen y xquibij che je'takom-pa roma re Dios, pero xa man quire-ta, xa je junan quiq'uin re elek'oma'. Matiox che man xe'tzekelbes-ta coma re ovejas re je vichin yen. 9 Ja yen re ruchi' re corral. Re xtoc viq'uin yen, can xticolotaj y nuvel ronojel re ndoc cha. 10 Jun elek'om tak napon, can xe chin no'rbana-pa elak' y ne'quimisan can. Can ronojel re nuban can, man pa rubiyal-ta. Jac'a yen, nicha' re Jes'us, ximpa chin ninya' re c'ac'a c'aslen, jun c'aslen camas otz. 11 Y jac'a yen re utzulaj Chajinel. Re utzulaj Chajinel can nuya-va ruc'aslen coma re ru-ovejas. 12 Jac'a re xa man katzij-ta chajinel, re nichajin roma tajon y chuka' man rajaf-ta re ovejas, re' tak nutz'at che nipa re utif, xa ja reja' re ninumaj-a nabey y ye'rumalij can re ovejas re ye'ruchajij. Y re utif ye'ruc'uaj-a re ovejas, y re nic'aj chic niquitaluj-a-qui'. 13 Re man katzij-ta chajinel, re xa tajon, ninumaj. Y quire' nuban roma xa mana-ta reja' cajaf re ovejas. Man jun pena cha reja' vo xa c'o niquic'alvachij re ovejas. 14 Jac'a yen re utzulaj Chajinel, y ntaman quivach re ovejas re can je vichin yen, y reje' can quitaman chuka' noch yen. 15 Can quire' chuka' nbanon yen riq'uin re Nata'. Reja' rutaman noch yen, y yen ntaman rach reja'. Yen ninya' nuc'aslen coma re nu-ovejas. 16 Y yen man xe-ta re' re nu-ovejas jec'o, xa can jec'o chuka' nic'aj chic re man jec'o-ta vova' chupan re jun corral re'. Y yen can xque'nc'am-pa y xtiquic'axaj chuka' re nuch'abal. Y ja yen xquinchajin quichin conojel y xa jun c'a xtiquiban. 17 Re Nata' Dios can yinrajo-va. Can nika chach che yen ninya' re nuc'aslen coma re nu-ovejas, y chuka' roma nic'ue' chic-a nuc'aslen jun bey, 18 roma re nuc'aslen yen, can man jun xtilisan, xa c'aja-na yen re yinyi'o. Can pa nuk'a' yen c'o-va chin che ninya' y pa nuk'a' chuka' yen c'o-va chin che nic'ue' chic-a nuc'aslen jun bey. Quire' rubim-pa re Nata' chua, xcha' re Jes'us. 19 Y jare' tak re achi'a' re c'o quik'ij chakacojol yoj re yoj israelitas, man junan-ta xquinojij chij re ch'abal re xe'rubij re Jes'us, y jare' tak xquiban chic jun bey che man junan-ta quivach. 20 Je q'uiy chique reje' xquibij chij re Jes'us: Xa xch'ujer. Xa itzel esp'iritu re c'o riq'uin, y yex can ninimaj-ka re nubij. 21 Jac'a re nic'aj chic xquibij: Jun re c'o itzel esp'iritu riq'uin, man nitiquir-ta nubij utzulaj tak ch'abal ancha'l re xe'rubij re Jes'us, y chuka' man nitiquir-ta nuban cha jun moy che nitzu'un, ye'cha'. 22 Y pa ru-tiempo re tef, jare' tak yoj re yoj israelitas nakaban re namak'ij rubini'an Dedicaci'on, namak'ij chin nakanataj re k'ij tak xjosk'es re rachoch re Dios re c'o chire' pa tenemit Jerusal'en. 23 Y re Jes'us c'o-apo pa jun corredor chin re rachoch re Dios. Y re corredor re' ja re Rey Salom'on banayon can. 24 Re achi'a' re c'o quik'ij chakacojol yoj re yoj israelitas xe'bapon riq'uin re Jes'us, xquimol-qui' chij, y c'are' xquibij cha: ??Anchique roma tak man jun bey najo' nasekresaj-avi' chakavach? Vo xa can ja rat re Cristo, tabij c'a chaka. 25 Y re Jes'us xubij chique re achi'a' re': Nbin chic chiva y man iniman-ta. Y ronojel re milagros re nimban, can pa rube' c'a re Nata' Dios ye'mbanala-va. Y re milagros re' can niquisekresaj-va c'a yin anchique yen. 26 Xa jac'a yex can man yininimaj-ta, roma yex xa man yix nu-ovejas-ta, can ancha'l-va re ximbij-yan chiva. 27 Re nu-ovejas yen can quitaman y niquic'axaj re nuch'abal, y chuka' can yinquitzekelbej. Yen ntaman chuka' quivach reje'. 28 Man c'a xque'satz-ta can, xa can xtiquivel-va quic'aslen re man niq'uis-ta viq'uin yen. Y man jun chuka' xtitiquir xque'lisan-a pa nuk'a'. 29 Y chuka' can pa ruk'a' re Nata' Dios jec'o-va, roma ja reja' re xcha'o quichin. Y reja' jare' re m'as nem ruk'ij que chiquivach conojel. ??La c'o como jun re nitiquir ye'lisan-a pa ruk'a' reja'? Man jun. 30 Yen y re Nata', can jun c'a kabanon riq'uin, xcha' re Jes'us. 31 Y jare' tak re achi'a' re c'o quik'ij chakacojol yoj re yoj israelitas xe'bequisiq'uila' chic-pa aboj, chin niquiquimisaj re Jes'us cha aboj. 32 Pero re Jes'us xubij chique re achi'a' re': Can q'uiy c'a utzulaj tak samaj re je'mbanalon chivach, roma re poder re ruyi'om-pa re Nata' chua. ??Anchique c'a chique re utzulaj tak samaj re je'mbanon re man nika-ta chivach, y mare' nijo' yiniquimisaj cha aboj? xcha' re Jes'us chique. 33 Y re achi'a' re c'o quik'ij chakacojol yoj re yoj israelitas xquibij cha re Jes'us: Yoj man yatkaq'uiak-ta cha aboj roma jun utzulaj samaj. Yoj yatkaq'uiak cha aboj roma nabij che yat junan riq'uin re Dios. Roma jun ache nibin quire', xa nuyok' rube' re Dios, xe'cha'. 34 Pero re Jes'us xubij chique: Chupan re i-ley, re Dios nubij: Yen nbin che yex can yix dios chuka'. 35 Can kataman c'a che man jun bey yojtiquir nakabij che re nubij re ruch'abal re Dios man katzij-ta. Reja' can xubij dios chique re anchok chique xuya-va re ruch'abal. 36 Vo xa quire' xubij re Dios, ??anchique roma yex nibij che yen xinyok' rube' re Dios roma ximbij che ja yen re Ruc'ajol re Dios? Y yen can xinrucha' c'a re Dios chin xinrutak-pa chach re ruch'ulef. 37 Y vo xa man nimban-ta re milagros re nrajo' re Nata' Dios che nimban, man c'a quininimaj. 38 Jac'a vo xa can nimban re milagros re nrajo' re Dios, quininimaj, astapa' man ninimaj-ta ronojel re nbin chiva chuij yen. Can 'ala-ta re milagros re ye'mban nitz'at chin quire' ninimaj y nitamaj che re Nata' Dios can c'o-va viq'uin, y yen chuka' quire' nbanon riq'uin reja', xcha' re Jes'us chique re achi'a' re c'o quik'ij. 39 Camas c'a xquijo' re achi'a' re' che xquitz'am-ta-a re Jes'us, pero xa man xe'tiquir-ta chic jun bey, roma xa xba chiquivach. 40 Y re Jes'us xba chic jun bey c'a juc'an chic-apo ruchi' re rakan-ya' Jord'an y xc'ue-ka q'uiy k'ij chire', re anche' xubanala-va bautismos re Juan Bautista nabey. 41 Y camas je q'uiy vinak xe'bapon riq'uin re Jes'us chire'. Y re vinak re' niquibila': Re Juan Bautista can katzij-va che man jun milagro xuban chin che xusekresaj-ta-ri' che takom-pa roma re Dios, pero ronojel re tzij re xe'rubij can chij re ache re', can katzij-va, ye'cha' re vinak re'. 42 Y je q'uiy vinak re xe'niman chin re Jes'us chupan re jun lugar re'.

11

1 Chupan re aldea rubini'an Betania c'o c'a jun ache niyavaj rubini'an L'azaro y jec'o je ca'e' rana' quibini'an Mar'ia y Marta, y re je oxe' re' je aj-chire' chupan re mismo aldea rubini'an Betania. 2 Re Mar'ia re', jare' re xyi'o re jun ak'om jubul-oc ruxla' chij rakan re Ajaf Jes'us y xe'ruchakejsaj riq'uin re rusumal-rue'. Y ja ruxibal reja' re L'azaro, re niyavaj. 3 Y re Mar'ia y re Marta re je rana' re L'azaro, xquitak rubixic cha re Jes'us: Ajaf, vocame nakaya' rutzijol chava che re kaxibal L'azaro, re camas najo' rat, niyavaj. 4 Y tak re Jes'us xuc'axaj re tzij takon-a rubixic cha, reja' xubij: Re L'azaro niyavaj, roma nic'atzin che nik'alajin re ru-poder re Dios. Re yabil ndoc cha, man xtitiquir-ta xtuc'uaj-a pa camic. Xa can xtik'alajin-va re ru-poder re Dios, chin quire' yen re Ruc'ajol re Dios xtinc'ul nuk'ij, xcha' re Jes'us. 5 Re Jes'us camas ye'rajo' re Marta, re Mar'ia y re L'azaro re quixibal. 6 Y tak reja' xuc'axaj che re L'azaro niyavaj, c'a pa rox k'ij xba chutz'etic, roma c'a xc'ue-na chic-a ca'e' k'ij chupan re lugar re anche' c'o-va. 7 Y jac'a tak k'axnak chic ca'e' k'ij, re Jes'us xubij chaka yoj re yoj ru-disc'ipulos: Vocame kojtzolaj c'a pa Judea. 8 Y yoj re yoj ru-disc'ipulos xkabij cha: Maestro, xa c'a ba' tiempo can re' tak re achi'a' re c'o quik'ij chakacojol yoj re yoj israelitas quic'ualon chic aboj chavij chin yatquiquimisaj. ??Y vocame can najo' chic yaba chire'? xojcha' cha re Jes'us. 9 Pero re Jes'us xubij jun ejemplo chaka chin nuc'ut chakavach che reja' c'amaje-na tapon re ru-hora chin nicom, mare' xubij che re k'ij ruc'uan doce horas. Re nibiyaj pak'ij, man xtupak'ela-ta rue' tak rakan, roma can c'o re nisekresan chin re ruch'ulef. Can ronojel-va nutz'at roma re sakil re'. 10 Jac'a re nibiyaj pa k'oko'm, can nupak'ela-va rue' tak rakan, roma manak sakil pa rue'. 11 Y tak re Jes'us rubin chic-ka ronojel re', xch'o chic jun bey chaka y xubij: Re ka-amigo L'azaro nivar. Mare' ja yimba chuc'asosic, xcha'. 12 Y jare' tak yoj xkabij cha: Ajaf, vo xa re L'azaro nivar, xa xtic'achoj, xojcha' cha. 13 Y re Jes'us xa chij c'a rucamic re L'azaro xch'o-va tak xubij che nivar, pero chakavach yoj xk'ax che can katzij-va varan. 14 C'are' re Jes'us can jabal k'alaj re xubij chaka, roma xubij: Re L'azaro xcom. 15 Y camas c'a yinqui'cot, xcha' re Jes'us, roma man pa Betania-ta yinc'o-va tak xcom re L'azaro, chin che yex m'as niban confiar-ivi' viq'uin. Vocame jo' c'a pa Betania, anche' c'o-va re L'azaro, xcha' re Jes'us chaka. 16 Jac'a re jun chaka yoj re rubini'an Tom'as, y nibex chuka' D'idimo cha, reja' xubij chaka yoj re yoj ruchibil: Jo' chij re Jes'us, vo xa reja' xtiquimisas, can jac'a chuka' quire' xtakac'alvachij yoj, xcha'. 17 Re Jes'us y yoj re yoj ru-disc'ipulos xojapon c'a pa Betania. Y caje-yan k'ij timuk-va re L'azaro tak xojapon yoj. 18 Re aldea Betania man naj-ta nicanaj-va can cha re tenemit Jerusal'en. Re quicojol xa ba' rue' che nic'aj legua. 19 Y je q'uiy re kavinak israelitas re xe'pa chire' y xe'bapon quiq'uin che xquicukuba' can quic'o'x re Marta y re Mar'ia, roma xcom re quixibal. 20 Tak re Marta xapon rutzijol riq'uin che pitinak re Jes'us, jonanin xel-a chin xba chuc'ulic. Y re Mar'ia xa man c'a xunabej-ta, xa xc'ue' can chire' pa jay. 21 Y re Marta tak xapon riq'uin re Jes'us, reja' xubij cha: Ajaf, re nuxibal xcom. Xe-ta vova' yatc'o-va, man-ta xcom. 22 Pero yen ntaman che re xtac'utuj cha re Dios vocame, re Dios can xtuya-va chava, xcha' re Marta cha re Jes'us. 23 Jare' tak re Jes'us xubij cha re Marta: Re axibal L'azaro xtic'astaj, xcha' re Jes'us. 24 Y re Marta xubij cha re Jes'us: Ja', yen can ntaman che xtic'astaj, roma tak xtapon re ruq'uisibal k'ij, can conojel c'a re anama'i' xque'c'astaj, xcha' reja'. 25 Re Jes'us xubij cha re Marta: Yen can yintiquir-va ye'nc'asoj re je quiminak chic-a, y can yintiquir-va ninya' c'aslen. Mare' re niniman vichin, man jun rubanon vo xa quiminak chic, roma xtic'ue' ruc'aslen. 26 Y xabanchique vinak re c'a c'o ruc'aslen chach re ruch'ulef y yinrunimaj yen, man xtapon-ta chupan re camic chin jumul. ??Nanimaj c'a rat re'? xcha' re Jes'us cha re Marta. 27 Y re Marta xubij cha re Jes'us: Ja', Ajaf. Can ninimaj ronojel re nabij, roma can ntaman-va che ja rat re Cristo re Ruc'ajol re Dios, re bin che nipa chach re ruch'ulef, xcha' re Marta. 28 Tak re Marta rubin chic can re tzij re' cha re Jes'us, xba chuyoxic re Mar'ia re ruch'alal. Y tak xapon, re Marta xubij pa ruxquin re Mar'ia: Re Ajaf xbeka y vocame yarayoj, xcha' cha. 29 Re Mar'ia, can xe c'a xuc'axaj-a quire', can jare' xyacataj-a re anche' tz'uyul-va y jonanin xba. Reja' xba c'a anche' c'o-va re Jes'us. 30 Re Jes'us can c'amaje-na toc-apo chupan re aldea rubini'an Betania, xa can c'a c'o re anche' xbec'ul-va roma re Marta. 31 Y re kavinak israelitas re jec'o chire' pa jay, re ye'cukuban ruc'o'x re Mar'ia, tak xquitz'at che jonanin xyacataj-a, xel-a y xba, re vinak re' jonanin chuka' xe'ba chij, roma reje' xquinojij che re Mar'ia niba chuchi-jul chin ne'rok'ej re ruxibal. 32 Jac'a tak re Mar'ia xapon anche' c'o-va re Jes'us y xutz'at, xuque-ka charakan y xubij cha: Ajaf, re nuxibal xcom. Xe-ta vova' yatc'o-va, man-ta quiminak vocame, xcha'. 33 Jac'a tak re Jes'us xutz'at che re Mar'ia ndok' y quire' chuka' ye'ok' conojel re kavinak israelitas re xe'bapon che niquicukuba' ruc'o'x re Mar'ia, re r'anma re Jes'us can ju-va xuban xuna' reja' y xpa c'a bis riq'uin. 34 Y c'are' xuc'utuj: ??Anche' ximuk-va re L'azaro? xcha'. Y reje' xquibij: Ajaf, jo' y nakac'utu' chavach anche' xkamuk-va, xe'cha' cha. 35 Y re Jes'us xok'. 36 Jare' tak re kavinak israelitas re ye'cukuban quic'o'x re Marta y re Mar'ia, xquibila': Titzu' la Jes'us, nrok'ej re L'azaro. Nik'alajin che camas xrajo', xe'cha'. 37 C'are' jec'o c'a chique re vinak re' xquibila' chij re Jes'us: Reja' can xtiquir xuban cha re moy che xtzu'un. ??Y anchique roma man xtiquir-ta xuban cha re L'azaro che man-ta xcom? xe'cha'. 38 Tak re Jes'us xapon chuchi' re jul, xtzolaj chic-pa re bis riq'uin. Re jul re mukun-va can re L'azaro, jun jul c'oton chach jun pe~na, y tz'apal can ruchi' riq'uin jun aboj. 39 Y jare' tak re Jes'us xubij: Tilisaj-a la aboj re anchok cha tz'apin-va can ruchi' la jul, xcha' reja'. Jac'a re Marta, re rana' can re L'azaro re xcom, xubij cha re Jes'us: Ajaf, caje-yan k'ij ticom-va. Xa pitinak chic ruchuvil ninojij yen, xcha'. 40 Pero re Jes'us xubij cha re Marta: Yen can nbin chic chava che vo xa xtanimaj, can xtatz'at c'a re nuban re ru-poder re Dios, xcha' cha. 41 Y jare' tak xquilisaj-a re aboj re anchok cha tz'apin-va can ruchi' re jul anche' c'o-va re quiminak. C'are' re Jes'us xtzu'un chicaj y xubij: Nata', nintioxij c'a chava, roma can xinac'axaj-pa. 42 Yen ntaman che can nojel tiempo yinac'axaj. Y ronojel re ximbij-yan-ka, can ximbij coma re vinak re quimalom-pa-qui' viq'uin vocame, chin che tiquinimaj che can ja rat re xatako-pa vichin chach re ruch'ulef. 43 Tak re Jes'us rubin chic-ka re tzij re', cof xch'o y xubij: L'azaro, cayacataj y catel-pa, xcha'. 44 Y re L'azaro re quiminak chic-a, xbe'el-pa, y tak xel-pa, je'baron ruk'a-rakan che tziak y re rupalaj pison riq'uin jun tziak. C'are' re Jes'us xubij: Que'isola' can la tziak chij, che otz nibiyin y nitiquir nitzolaj-a, xcha' re Jes'us. 45 Y je q'uiy kavinak israelitas re ye'cukuban quic'o'x re Mar'ia, xquinimaj re Jes'us tak xquitz'at re xuban, che xuc'asoj re quiminak. 46 Pero jec'o nic'aj re xe'ba quiq'uin re achi'a' fariseos y xbequitzijoj chique re andex xuban re Jes'us. 47 Y can jare' re principal tak sacerdotes y re achi'a' fariseos xquimol-qui' y xe'cayoj chuka' re nic'aj chic achi'a' re junan ye'bano juzgar quiq'uin, y xquibij chique: ??Andex c'a nakaban? Roma re ache rubini'an Jes'us rutz'amon samaj y q'uiy milagros ye'rubanala' chiquivach re vinak chin tiquinimaj. 48 Y vo xa can xtakaya' k'ij cha, can conojel re vinak xque'niman richin, y can xtiquiban cha che xtoc qui-Rey. Y tak xtiquinabej-pa re vinak romanos, xtiquivulaj can re jay re anche' nakaya-va ruk'ij re Dios y xkojquiq'uis can chuka' yoj re yojc'o chupan re naci'on re', ye'cha' reje'. 49 C'are' c'o jun xch'o, y re xch'o ja re Caif'as re namalaj sacerdote chupan re tiempo re'. Reja' c'o chire', roma reja' jun chique re c'o quik'ij. Y tak reja' xch'o, xubij: Xa man jun itaman yex. 50 Can man ninojij-ta ba' che xa m'as otz chaka yoj che xaxe jun nicom pa kaq'uixel konojel y man yojcom-ta konojel xaxe roma re jun re', xcha'. 51 Re Caif'as tak xch'o y xubij quire', can mana-ta runa'oj reja' xucusaj. Re xe'rubij reja', can jac'a re Dios xyi'o cha. Roma can ja reja' re namalaj ru-sacerdote re Dios re tiempo re', mare' re Dios xuya' k'ij cha che xubij-yan che re Jes'us tiene que nicom pa kaq'uixel yoj re yoj israelitas. 52 Y re Jes'us can man xe-ta pa kaq'uixel yoj re yoj israelitas tak xticom, xa can xticom chuka' pa quiq'uixel conojel re vinak re can je rajc'ual-va re Dios re quiquiran-qui' chach re ruch'ulef, y mare' xa jun xtakaban quiq'uin. 53 Y can jac'a k'ij re' tak re achi'a' re c'o quik'ij xquiya-yan can chiquivach che xtiquiquimisaj re Jes'us. 54 Mare' re Jes'us man chic xtz'et-ta coma re achi'a' re c'o quik'ij chakacojol yoj re yoj israelitas. Reja' xa xba c'a pa jun chic tenemit. Xba pa jun tenemit re rubini'an Efra'in, y re tenemit re' chunakaj-apo re lugar re anche' manak vinak re nibex desierto cha, c'o-va. Y xc'ue' c'a-ka chire' y chibil yoj re yoj ru-disc'ipulos. 55 Y jare' tak napon-yan re k'ij chin re pascua, re jun chique re kanamak'ij yoj re yoj israelitas. Mare' camas je q'uiy vinak re xe'el-pa pa tak quitenemit, chin xe'ba pa tenemit Jerusal'en. Can xe'ba roma reje' tiene que niquijosk'ij-qui' chin niquichajij re k'ij chin re pascua. 56 Y re vinak niquicanola' re Jes'us. Reje' je'pa'al chupan re rachoch re Dios y niquic'utula' chiquivach: ??Andex ninojij yex? ??Xtipa como chupan re namak'ij? ye'cha' re vinak re'. 57 Jac'a re principal tak sacerdotes y re achi'a' fariseos, can quilisan chic rutzijol che xabanchique vinak atamayon anche' c'o-va re Jes'us, tubij chique reje' chin niquitz'am.

12

1 Vaki' k'ij antes che man tapon re namak'ij rubini'an pascua, re Jes'us xba chupan re aldea Betania, re ru-aldea re L'azaro, re L'azaro re xc'asos chiquicojol re anama'i' roma re Jes'us. 2 Y chire' xban jun namalaj va'in, chin xe'va' chin tak'ak'ij, roma xapon re Jes'us. Y jac'a re Marta re nibano-apo servir re mesa, y re L'azaro jun chique re je'tz'uyul-apo chach mesa riq'uin re Jes'us. 3 Xpa re Mar'ia re ruch'alal re Marta re je rana' re L'azaro, xbo'rc'ama-pa jun libra ak'om jubul-oc ruxla' rubini'an nardo, re ak'om re' camas caro rajal. Y jare' xuya' chij rakan re Jes'us y xe'rusula' riq'uin re rusumal-rue' reja'. Y re jay re' can xnoj riq'uin re ruxla' re ak'om re'. 4 Y c'o jun chaka yoj re yoj ru-disc'ipulos re Jes'us re man xka-ta chach che quire' xban cha re ak'om, y re' ja re Judas Iscariote ruc'ajol re jun ache rubini'an Sim'on, re disc'ipulo re xtijacho chin re Jes'us. Reja' xubij: 5 ??Anchique roma tak man xc'ayex-ta re ak'om? Re ak'om re' xa xba-ta che oxe' ciento denarios, y re mero xjach-ta chiquivach re vinak re camas je meba', xcha'. 6 Tak reja' xubij quire', man roma-ta che camas ye'rajo' re vinak camas je meba', y nrajo-ta ye'ruto', man quire-ta. Xa roma ja reja' re niyaco re mero y c'o mero nulek'aj, xa mare' tak quire' xubij. Reja' can jun elek'om. 7 Y jare' tak re Jes'us xubij cha re Judas: Taya' k'ij cha re xtan re' che tubana-na re nrajo' re r'anma. Astapa' c'amaje-na quincom, reja' can xuban-yan-apo re nrajo' nuban viq'uin tak xquimuk, roma can vichin-va yen ruyacom-pa re ak'om re'. 8 Roma re vinak re camas je meba', can nojel tiempo jec'o iviq'uin y xabanchique k'ij nijo' niban utzil chique. Jac'a yen man nojel-ta tiempo xquinc'ue' iviq'uin, xcha' re Jes'us. 9 Tak re Jes'us xnabex-pa coma re kavinak israelitas che c'o pa Betania, can je q'uiy xe'pa. Re kavinak re' xe'pa man xe-ta roma re Jes'us, xa can xe'pa chuka' roma can niquijo' niquitz'at re L'azaro re xc'asos roma re Jes'us chiquicojol re anama'i'. 10 Mare' re principal tak sacerdotes xquiya' chiquivach che chuka' re L'azaro xtiquiquimisaj. 11 Roma chij re L'azaro xquiya-va che je q'uiy kavinak israelitas re ye'yi'o can quichin reje' y niquinimaj-a re Jes'us. 12 Pa ruca'n k'ij, chire' pa tenemit Jerusal'en, camas je q'uiy vinak jec'o. Conojel re vinak re' quic'ulun-qui' chire' roma re namak'ij. Y tak xquic'axaj che binak-apo re Jes'us, 13 je'quic'uan ruk'a' tak che' re nibex palma cha, xe'ba chuc'ulic y niquibila': !!Matiox che pitinak re Jun re'! !!Jare' re ka-Rey yoj re yoj israelitas! !!Reja' can banom-pa bendecir y pitinak pa rube' re Ajaf Dios! ye'cha'. 14 Y re Jes'us xuvel jun alaj burro chin xch'oque-a chij. Can ancha'l-va nubij chupan re ruch'abal re Dios re tz'iban can, tak nubij: 15 Man tuxibij-ri' re iv'anma yex re yix richin chic re tenemit rubini'an Sion, roma re i-Rey ja re pitinak, ch'ocol-pa chij jun alaj burro. Quire' nubij re tz'iban can. 16 Y nabey, ronojel re' man xk'ax-ta pa kave' yoj re yoj ru-disc'ipulos re Jes'us. Y xk'ax pa kave' can c'aja tak re Jes'us c'astajnak chic-a chiquicojol re anama'i' y c'o chic ruk'ij. C'are' tak xbeka chakac'o'x che ronojel re' can tz'iban-va chupan re ruch'abal re Dios che tiene que xtibanataj, y can quire-va, roma can ancha'l re tz'iban can, can quire' xbanataj. 17 Y re vinak re xe'tz'eto chin re Jes'us tak xrayoj re L'azaro re quiminak chic-a chin xc'astaj-pa chiquicojol re anama'i', can niquitzojola' chique nic'aj chic vinak. 18 Y mare', tak re Jes'us nakaj chic c'o-va cha re tenemit Jerusal'en, can xe'pa chin ne'quic'ulu'. Re vinak re' can quic'axan chic re milagro xuban riq'uin re L'azaro. 19 Jac'a re achi'a' fariseos niquibila' chiquivach: Titzu', conojel re vinak je'binak chij. Man jun chic xkojtiquir xtakaban chique chin che man-ta ye'tzake' chij. 20 Y chiquicojol conojel re vinak re je'aponak pa tenemit Jerusal'en chupan re k'ij re', chin niquiya' ruk'ij re Dios chupan re namak'ij re', jec'o chuka' je ca'e-oxe' vinak griegos. 21 Re ca'e-oxe' vinak re' xe'bapon-apo riq'uin re Felipe re aj-Betsaida, y re Betsaida re' chin re Galilea, chin niquic'utuj jun utzil cha, roma reja' jun ru-disc'ipulo re Jes'us. Re vinak re' xquibij cha: Yoj nakajo' yojch'o ba' riq'uin re Jes'us, ye'cha'. 22 Re Felipe xba y xbo'rbij cha re Andr'es re can disc'ipulo chuka'. C'are' che je ca'e' xe'ba-apo c'a riq'uin re Jes'us y xquibij cha: Jec'o ca'e-oxe' vinak griegos niquijo' ye'ch'o aviq'uin. 23 Y re Jes'us can jare' xubij chique re je ca'e' disc'ipulos re': Ja k'ij xbeka, che yen re xinalax chi'icojol xtic'ue' nuk'ij y xquintzolaj-a chila' chicaj. 24 Y tic'axaj re xtimbij chiva vocame, che can katzij-va: Vo xa nakapokonaj nakatic-ka jun ch'et rach-trigo pan ulef, re ch'et rach-trigo re' xa choj c'a quire' xtic'ue'. Jac'a vo xa man nakapokonaj-ta nakatic-ka, astapa' xtic'ue' can chuxe' ulef re ch'et rach-trigo re', xtel-pa y xtuya' rach. 25 Quire' chuka' re vinak re camas nupokonaj ruc'aslen vova' chach re ruch'ulef, man xtuvel-ta ruc'aslen re man niq'uis-ta. Jac'a re man nupokonaj-ta ruc'aslen nutzij yen, can chin nojel tiempo nuyac-apo. Can ne'c'ue-va ruc'aslen re man niq'uis-ta. 26 Vo xa can c'o jun nrajo' nuban re nusamaj, tipa viq'uin. Y re anche' yinc'o-va yen, can chire' chuka' xtic'ue-va reja'. Re can xtibano re nusamaj, xtinimersas ruk'ij roma re Nata' Dios re c'o chicaj. 27 Yen camas nik'axo re v'anma vocame. Pero man nimbij-ta cha re Nata' che quinacola' chach re k'axomal re', xa roma re' tak xineka, y xa mare' tak yinc'o vocame. 28 C'are' reja' xubij: Nata', can tabana' che nik'alajin-ta re ak'ij, xcha' re Jes'us. Y can jare' tak re Dios xch'o-pa chila' chicaj y xubij: Can nbanon chic quire'. Y xtimban chic jun bey, che can nik'alajin-va re nuk'ij. 29 Y camas chique re vinak re jec'o chire' xe'bin che xa jun tempestad re xquic'axaj tak xch'o-pa re Dios chila' chicaj. Jac'a re nic'aj chic niquibij: Jun 'angel re xch'o-pa cha, ye'cha'. 30 Y re Jes'us xubij chique: Re Jun xic'axaj che xch'o-pa chila' chicaj, man nutzij-ta yen tak xch'o-pa, xa itzij yex tak xch'o-pa chin che yex nitamaj yin anchique yen. 31 Vocame ne'ka-yan re k'ij tak re Dios xtuban juzgar re ruch'ulef, y ja chuka' k'ij re' tak re itzel re tz'amayon re ruch'ulef, can xtich'acataj-va. 32 Y tak yen xquinjotobax cho cruz, re vinak can xque'pa viq'uin yen, roma can xquinsamaj pa tak c'anma, xcha' reja'. 33 Re Jes'us xubij quire', chin xusekresaj andex che camic xtoc cha. 34 Y re vinak xquibij: Rat abin che ja rat re Jun re xalax chakacojol, pero xa nabij chuka' che xcajotobax cho cruz. Can man nak'ax-ta pa kave' anchique roma quire' nabij. Roma yoj kataman re nubij chupan re ruch'abal re Dios che re Cristo tak xtipa, xtic'ue' chin nojel tiempo. Can tabij c'a chaka vo xa re xalax chakacojol, can jare' re Cristo o mana-ta, xe'cha' reje'. 35 Jare' tak re Jes'us xubij chique: Yen re sakil re c'a yinc'o chic ba' iviq'uin. Can chupan c'a re sakil re' quixbiyin-va, roma c'a c'o. Y vo xa man xtiban-ta quire', c'aja xtina' xte'k'ukumar chivach, y re pa k'oko'm nibiyin-va, man rutaman-ta anchique lugar binak-va. 36 Mare', re k'ij tak c'a c'o re sakil iviq'uin, can tinimaj, chin che yixoc rajc'ual re sakil re'. Quire' xubij re Jes'us chique re vinak. C'are' xe'ruya' can, y reje' man xquitz'at-ta anche' xbo-va. 37 Re Jes'us can q'uiy milagros xe'rubanala' chiquivach re vinak. Pero man riq'uin re' reje' cama-va xquinimaj-ta. 38 Y quire' xbanataj, roma tiene que nibanataj re rutz'iban can re Isa'ias re jun rusamajel re Dios re xc'ue' ajuer can, re xbex profeta cha. Y ja quire' nubij re rutz'iban can reja': Ajaf, tak xkatzijoj re ach'abal chique re vinak, man je q'uiy-ta re xe'niman. Y chuka' man je q'uiy-ta re xk'ax pa quive' y man riq'uin re' che can xquitz'at-yan re a-poder. Quire' nubij re rutz'iban can re Isa'ias. 39 Re vinak re' can man ye'tiquir-ta niquinimaj, can ancha'l nubij chupan re rutz'iban can re Isa'ias: 40 Can banon chique reje' che man ye'tzu'un-ta y covernak re c'anma, mare' man niquitz'at-ta re niquitzu', man nika-ta-ka pa tak c'anma, y man nitzolaj-ta-pa quic'o'x chin che yen ninchojmersaj re quic'aslen, nicha' re Ajaf. Quire' nubij re tz'iban can roma re Isa'ias. 41 Re profeta Isa'ias xubij quire' ja tak xutz'at ruk'ij re Cristo pa jun ancha'l achic', y chij c'a reja' ch'ovenak-va can. 42 Pero chiquicojol re vinak re xe'niman chin re Jes'us, je q'uiy re can je quichibil-va re achi'a' re pa camon ye'bano juzgar chakacojol yoj re yoj israelitas. Xa jac'a man xquilisaj-ta rutzijol che xquinimaj re Jes'us, roma niquixibij-qui' chiquivach re achi'a' fariseos. Xa can niquixibij-qui' che ye'kotax-pa chupan re nema-jay re anche' nitzijos-va re ruch'abal re Dios re nibex sinagoga cha. 43 Reje' xa m'as xquinojij andex xtiquibij re vinak, y man xbeka-ta chiquic'o'x che re Dios c'o m'as ruk'ij que chiquivach re vinak re'. 44 Y re Jes'us cof xch'o y xubij: Re niniman vichin yen, man xe-ta yen re xquinrunimaj, xa can xtunimaj re Dios re takayom-pa vichin. 45 Re nitz'eto vichin, can nutz'at chuka' re Dios re takayom-pa vichin. 46 Roma yen re sakil, ximpa chach re ruch'ulef chin che xabanchique re xtiniman vichin, man xtic'ue-ta can chupan jun c'aslen k'oko'm. 47 Y jac'a re vinak re nuc'axaj re nuch'abal y xa man nika-ta chach nuban re nuc'axaj, mana-ta yen re xquimbano juzgar richin. Roma re nusamaj re nc'amom-pa tak ximpa chach re ruch'ulef, man chin-ta che ye'mban juzgar re vinak. Man tinojij quire'. Re nusamaj yen ja re ye'ncol re vinak chach re quimac. 48 Pero pa ruq'uisibal k'ij chin re ruch'ulef, can xque'ban-va juzgar re ye'tzelan vichin y re man niquic'ul-ta re nuch'abal pa tak c'anma. Y ja re ch'abal re xintzijoj re xtibano juzgar quichin. 49 Roma re ch'abal re xintzijoj chivach, can jac'a re Nata' biyom-pa chua, y man xe'ntz'ucula-ta-ka. Can jac'a reja' re takayom-pa vichin y rubim-pa chua andex che ch'abal re xtinc'ut y xtintzijoj chivach. 50 Y can ntaman che re rubim-pa re Nata' Dios chua, can nuya-va c'aslen re man niq'uis-ta. Mare' re ch'abal nimbij chiva, can ancha'l c'a rubixic rubanom-pa re Nata' chua yen, quire' rubixic xbembana-ka chivach yex.

13

1 Y tak ne'ka-yan re k'ij chin re namak'ij rubini'an pascua, re Jes'us rutaman chic che ne'ka-yan re hora chin che reja' ndel-a vova' chach re ruch'ulef y nitzolaj chila' chicaj riq'uin re Dios re Rutota'. Re Jes'us camas je'rujovam-pa conojel re can je richin chic reja' re jec'o vova' chach re ruch'ulef, y can c'a quire' nuban chupan re k'ij re', tak napon-yan chach re camic. 2 Re Jes'us y yoj re yoj ru-disc'ipulos katz'amon va'in. Y jac'a re jun kachibil rubini'an Judas Iscariote, re ruc'ajol re jun ache rubini'an Sim'on, nisamaj chic re itzel pa r'anma, y jare' re nibin cha che tujacha' re Jes'us. 3 Y astapa' re Jes'us can rutaman-va che ronojel jachon pa ruk'a' roma re Dios re Rutota', y chire' riq'uin re Dios pitinak-va y chire' chic nitzolaj-va-a, 4 pero man riq'uin re' reja' can xyacataj-pa y xutanaba' can ruva'in. Y xulisaj can re tziak c'o chij, xbo'rc'ama-pa jun toalla, y xuxim xe-rupan. 5 C'are' xuya' chuka' ya' chupan jun palangana y che ja'jun che ja'jun yoj re yoj ru-disc'ipulos xutz'am ruch'ajic kakan, y nusula' re kakan riq'uin re toalla re ruximon xe-rupan. 6 Jac'a tak xapon riq'uin re Sim'on Pedro chin nuch'aj rakan, re Pedro xubij cha re Jes'us: Ajaf, can man ruc'amon-ta che nach'aj chuka' vakan yen, xcha'. 7 Y re Jes'us xubij cha re Pedro: Re ntz'amon rubanic vocame che ninch'aj re ivakan, c'amaje-na tak'ax pan ive'. Pero can xtak'ax pan ive' despu'es. 8 Jac'a re Pedro xubij: Man ruc'amon-ta chua yen che can ja rat yach'ajo vakan. Man xtinya-ta k'ij che xtach'aj re vakan. Y re Jes'us xubij cha: Vo xa man naya-ta k'ij, can man yac'ue-ta viq'uin, xcha' cha. 9 Mare' re Sim'on Pedro xubij cha re Jes'us: Ajaf, vo xa quire', can man xe-ta c'a re vakan nach'aj, xa can tach'aja' chuka' re nuk'a' y re nujalom, xcha' re Pedro. 10 Pero re Jes'us xubij cha: Re xa c'a ba' tiratin-va, xaxe c'a re rakan ruc'amon che nuch'aj roma re pokolaj, roma reja' can ch'ajch'oj chic. Yex can ch'ajch'oj chic re iv'anma. Astapa' man yixnojel-ta, pero can yix ch'ajch'oj chic, xcha' re Jes'us. 11 Reja' xubij quire', roma can rutaman anchique re xtijacho richin. Y mare' tak xubij: Man yixnojel-ta yix ch'ajch'oj. 12 Y tak re Jes'us ruch'ajon chic kakan yoj re yoj ru-disc'ipulos, xbo'rc'ama' chic-pa re tziak re rulisan can chij, xbetz'uye' chic chach mesa y xubij: ??Xk'ax como pan ive' anchique roma tak yen xinch'aj ivakan? 13 Ka-Maestro y Kajaf, yixcha' c'a chua. Can otz-va roma can ja-va quire'. 14 Y roma yen re i-Maestro y re Ivajaf man xinq'uex-ta chin xinch'aj ivakan, can quire' c'a chuka' tibana' yex. Man quixq'uex che nich'ajla' cakan re nic'aj chic ivchibil. Can quire' tibana'. 15 Yen can xinc'ut can chivach. Y ancha'l c'a ximban yen iviq'uin, quire' chuka' tibana' yex quiq'uin re nic'aj chic. 16 Yen can c'o-va nuk'ij y ximban re samaj re'. Can quire' c'a chuka' tibana' yex. Man tipokonaj niban re samaj re'. Roma chach re ruch'ulef, mana-ta re mozo re c'o m'as ruk'ij que chach re patr'on, y ni xe-ta chuka' jun re nitak re m'as c'o ruk'ij que chach re takayon-a richin. 17 Otz-ibanoj vo xa yex can xitamaj can ronojel re' y can niban re xitamaj. 18 Can nimbij c'a che man yixnojel-ta quire' xquixel, roma yen can ntaman ivach chiyixnojel re xixincha'. Y chuka' re tz'iban can, tiene que nibanataj. Y ja quire' nubij: Re jun can xva' viq'uin, xyacataj c'a chuij. Quire' nubij chupan re ruch'abal re Dios. 19 Re jun banabal re', can ninya-yan-apo rutzijol chivach re c'amaje-na tibanataj, chin quire' tak xtapon re k'ij tak xtibanataj, xtinimaj che can ja-va yen re Cristo. 20 Can katzij-va nimbij chiva, che re xtic'ulu richin re nintak-a yen, can ja yen re yinruc'ul. Y re xtic'ulu vichin yen, xa can xtuc'ul chuka' re takayom-pa vichin. 21 Y tak re Jes'us rubin chic ronojel re', re r'anma can anchique-la xuban xuna' reja', roma re bis. Reja' can xutzijoj anchique roma tak camas bis pa r'anma y xubij: Can katzij nimbij chiva, che jun chiva yex nu-disc'ipulos re xquinjacho-a pa quik'a' re vinak re ye'tzelan vichin. 22 Can jare' tak yoj xkatzula' kavach, y man nakavel-ta andex nakanojij, roma man kataman-ta anchok chij xch'o-va re Jes'us. Can man kataman-ta anchique xtijacho richin. 23 Jac'a yen re disc'ipulo re camas yinrajo' re Jes'us, yinrak'al-apo chuc'o'x. 24 Y jac'a chua yen xuban-va-pa se~na re Sim'on Pedro. Reja' xubij-pa chua che tinc'utuj-apo cha re Jes'us che anchique re jun xtijacho richin, re c'a ba' tubij-va-ka chaka. 25 Y yen tak yinrak'al-apo chuc'o'x re Jes'us, xinc'utuj cha: Ajaf, ??anchique c'a re jun re xtijacho avichin? 26 Re Jes'us can jare' tak xubij chua: Re xtinya' re xcana-vay muban cha, jare' re xtijacho vichin. Y reja' xumuba' re xcana-vay y xuya' cha re Judas Iscariote re ruc'ajol re jun ache rubini'an Sim'on. 27 Y tak re Judas Iscariote ruq'uison chic-ka re jun pedazo xcana-vay re', can xoc-va re Satan'as pa r'anma. C'are' re Jes'us xubij cha: Re anojin chic che naban, tabana' c'a cha'nin, xcha-a cha. 28 Jac'a yoj re yojc'o-apo chach mesa riq'uin, man xk'ax-ta pa kave' anchique roma tak xubij-a quire' cha re Judas. 29 Jec'o chaka yoj xquinojij che xtak-a roma re Jes'us chulok'ic ronojel re ndoc chaka chupan re namak'ij re'. Y re nic'aj chic kachibil xquinojij che xtak-a chin c'o cosas no'ryala' can chique re vinak camas je meba', roma yoj can kataman-va che ja re Judas re niyaco re mero. 30 Re Judas can xe c'a xuq'uis-a re jun pedazo xcana-vay, can jare' tak xel-a. Y tak reja' xel-a, xa can chak'a' chic. 31 Y tak re Judas elinak chic-a, c'are' re Jes'us xubij: Jac'a xbeka-yan re k'ij che yen re xinalax chi'icojol xtik'alajin che can c'o-va nuk'ij. Y can quire' chuka' re Dios, can xtik'alajin re ruk'ij voma yen. 32 Y roma re Dios can xtik'alajin re ruk'ij voma yen, reja' can xtuban che nik'alajin re nuk'ij yen. Y re' xa man c'a jampa-ta, xa can ja re k'ij re'. 33 Xa ba' chic-oc tiempo xquinc'ue' iviq'uin yex re can ancha'l ch'utak vajc'ual nbanon chiva. C'are' xquinicanoj. Pero vocame can nimbij can chiva, ancha'l re nbin chique nic'aj kavinak israelitas, che re anche' xquinec'ue-va yen, man xquixtiquir-ta xquixapon viq'uin chinucanoxic. 34 Mare' can tijo' c'a-ivi'. Yen can yixinjo-va. Can quire' chuka' tibana' yex. Can tijo-ivi'. Jare' nimbij can chiva vocame, y re' can jun c'ac'a mandamiento. 35 Y vo xa can xtijo-ivi', re vinak can xtiquitamaj che yex can yix nu-disc'ipulos-va, xcha' re Jes'us. 36 Jare' tak re Sim'on Pedro xubij cha re Jes'us: Ajaf, ??anche' c'a yabo-va? Y re Jes'us xubij cha: Vocame c'amaje-na yatiquir yinatzekelbej re anche' xquimbo-va yen. Jac'a tak xtapon re k'ij, can xquinatzekelbej-va, xcha' cha re Pedro. 37 Y re Pedro xubij cha: Ajaf, ??anchique roma tak man yintiquir-ta yatintzekelbej-a vocame? Roma vo xa nic'atzin, can ninya' re nuc'aslen avoma rat, xcha'. 38 Y re Jes'us xubij cha: ??Naya' como re ac'aslen voma yen? Yen can katzij nimbij chava, che chupan re ak'a' re' oxe' bey xtabij che man ataman-ta noch chique re xque'c'utun chava. Y c'are' xte'tzirim-pa re moma', xcha' re Jes'us cha re Pedro.

14

1 Man tisatz ic'o'x, xcha' re Jes'us chaka yoj re yoj ru-disc'ipulos. Yen can ntaman che yex ibanon confiar-ivi' riq'uin re Dios. Can quire' chuka' tibana' viq'uin yen. Can tibana' chuka' confiar-ivi' viq'uin. 2 Re chila' chicaj anche' c'o-va re Nata', c'o lugar re anche' xque'c'ue-va re ye'bapon riq'uin. Vo xa man-ta katzij che quire', yen jun-ta chic-va rubixic ximban-ta-apo chiva. Yen yimba chin ne'mbana' rubanic re i-lugar chila' chicaj riq'uin re Nata'. 3 Chubanic re' tak yimba, y can xquimpa chic jun bey, y yixinc'uaj viq'uin, chin che anche' yinc'ue-va yen, chire' chuka' xquixc'ue-va yex. 4 Y can itaman-va re bey re nic'uan ivichin re anche' yimbo-va yen, xcha' re Jes'us chaka. 5 Jac'a re jun kachibil rubini'an Tom'as xubij cha re Jes'us: Ajaf, yoj man kataman-ta anche' yabo-va rat. ??Ancha'l tak xtakatamaj anchique bey nakac'uaj-a yoj? 6 Y re Jes'us xubij: Ja yen re bey, yen re katzij, y ja yen chuka' re c'aslen. Xaxe c'a re xtiniman vichin, xtapon riq'uin re Nata'. 7 Vo xa can itaman noch yen, can itaman chuka' rach re Nata'. Re vocame can itz'eton chic, y chuka' itaman chic rach reja', xcha' chaka. 8 Y can ja chuka' re' tak jun chic chaka yoj, re rubini'an Felipe xubij cha re Jes'us: Ajaf, tac'utu' c'a re Arta' chakavach, xaxe riq'uin re' can xkojqui'cot, xcha'. 9 Y re Jes'us xubij cha: Felipe, ??la man como ataman-ta noch? Yen can q'uiy-yan tiempo quinc'ue-va iviq'uin. Re tz'eteyon vichin yen, rutz'eton chuka' re Nata'. ??Anchique roma tak rat nabij che ninc'ut re Nata' chivach? 10 ??Man nanimaj-ta rat che re Nata' c'o viq'uin yen, y yen yinc'o riq'uin reja'? Re ch'abal re xintzijoj chivach, can riq'uin re Nata' pitinak-va, roma can viq'uin yen c'o-va. Can ja reja' re nibano re samaj re'. 11 Can quininimaj che yen yinc'o riq'uin re Nata' y reja' c'o viq'uin yen. Y vo xa man yininimaj-ta roma re nimbij chiva, titzu' c'a re nusamaj y quininimaj. 12 Tic'axaj jabal re xtimbij chiva: Re can xtuban confiar-ri' viq'uin, can xque'rubanala' chuka' re samaj xe'mban yen, y camas c'a nima'k tak samaj xque'rubanala'. Roma jare' tak yinc'o chic chila' chicaj riq'uin re Nata', 13 y ronojel re xtic'utuj pa nube' yen, can xtinya-va. Chin quire' nik'alajin ruk'ij re Nata', voma yen. 14 Vo xa c'o jun cosa xtic'utuj pa nube' yen, can xtinya-va-pa chiva. 15 Vo xa can yinijo', can tibana' re nubij re nu-mandamientos re ye'mbij chiva. 16 Y yen xtinc'utuj cha re Nata', y reja' can xtutak-pa jun chic re nita'o ivichin, Jun re can xtic'ue-va iviq'uin chin nojel tiempo. 17 Y re' can ja re Esp'iritu Santo, re nitijon ivichin cha re katzij. Y re vinak re man quiniman-ta re Dios, man ye'tiquir-ta niquic'ul re Esp'iritu Santo. Roma re Esp'iritu Santo xa man nitz'et-ta y man quitaman-ta chuka' rach. Jac'a yex re can iniman chic, man quire-ta. Yex can itaman chic rach, roma c'o chic chi'icojol. Y reja' can xtoc pa tak iv'anma. 18 Yen man xquiximalij-ta can astapa' xquimba, man xquixc'ue-ta can ancha'l jun re manak rute-rutota', roma xa can yimpa chic iviq'uin. 19 Jac'a re vinak re man quiniman-ta re Dios, xa can ba' chic-oc re xquinquitz'at. Pero yex can xquinitz'at-va, roma can xtic'ue' chic jun bey nuc'aslen. Y yex can xtic'ue' chuka' ic'aslen quire'. 20 Y chupan re k'ij re' tak xtik'alajin jabal chivach che yen can yinc'o-va riq'uin re Nata', yex yixc'o viq'uin yen y yen iviq'uin yex. 21 Re c'o re nuch'abal pa r'anma y can nuban re nubij ronojel re nu-mandamientos, can yinrajo-va. Y re nijovan vichin yen, can xtijovax roma re Nata', y yen chuka' can xtinjo' y xtinc'ut-vi' chach, xcha' re Jes'us. 22 Jare' tak re Judas re jun kachibil, pero mana-ta re Judas Iscariote, xuc'utuj cha re Jes'us: Ajaf, ??anchique roma che xaxe chakavach yoj xtac'ut-va-avi'? ??Y anchique roma tak man nac'ut-ta-avi' chiquivach re vinak re man quiniman-ta re Dios? 23 Y re Jes'us xubij cha: Re can yinrajo-va, can nuban re nubij re nuch'abal cha. Re jun re xtibano quire', can xtijovax-va roma re Nata' chuka'. C'are' re Nata' y yen can xkojpa riq'uin y xtakaban kachoch pa r'anma. 24 Jac'a re man nijovan-ta vichin, man nuban-ta re nubij re nuch'abal cha. Y re ch'abal re ic'axan viq'uin yen, man xe-ta c'a vichin yen. Can jac'a re Nata' re takayom-pa vichin, ja reja' re ya'yom-pa re ch'abal re' chua. 25 Y ronojel re ch'abal re', can xe'mbij c'a chiva. 26 Y tak yen man chic yinc'o-ta iviq'uin, re Nata' xtutak-pa re Esp'iritu Santo chin yixruto'. Y ja reja' re xtic'ue' iviq'uin pa nuq'uixel. Y can jac'a chuka' reja' xquixtijon y xtunataj ronojel re ch'abal re je'mbin can yen chiva. 27 Y can ancha'l nuna' re v'anma yen che otz c'o, can quire' chuka' nimban can cha re iv'anma yex. Y can katzij otz xtuna' re iv'anma, roma yen man nimban-ta ancha'l niquiban re vinak re man quiniman-ta re Dios, tak niquibij che re iv'anma otz nuna', y xa man katzij-ta. Man tisatz ic'o'x y chuka' man tixibij-ivi'. 28 Xa can ic'axan viq'uin che nbin: Yen can xquimbo-va, pero yimpa chic iviq'uin. Y vo xa yex camas-ta yinijo', niqui'cot-ta re iv'anma, roma yen can riq'uin re Nata' yintzolaj-va-a. Reja' camas-va ruk'ij que chinoch yen. 29 Re' ninya-yan can rutzijol chiva, chin quire' tak xtapon re k'ij che xquixinya' can, man-ta jun cosa xtinojij, xa can xtinimaj-va re nbin can chiva. 30 Y re vocame xa man q'uiy-ta chic tzij re xtimbij can chiva, roma re tiempo xa man q'uiy-ta chic. Re itzel re tz'amayon re ruch'ulef xa nipa-yan. Pero astapa' can ja reja' re tz'amayon re ruch'ulef, man jun ruk'a' chua yen. 31 Re nimban yen, can jac'a re Nata' Dios re xintako-pa chubanic. Y quire' nimban chin che re vinak re man quiniman-ta reja', tiquitamaj che yen ninjo' re Nata' Dios. Kojyacataj y kojel-a vova', xcha'.

15

1 Y c'are' re Jes'us xubij: Ja yen re katzij ancha'l juvi' uva, y re Nata' jare' re nisamajin re uva re'. 2 Roma juvi' uva jec'o ruk'a' re xa man ye'vachin-ta, ye'lisas-a. Jac'a re ruk'a' re can ye'vachin, ye'josk'es jabal, chin m'as otz ye'vachin. Can quire' chuka' yen. Re Nata' ye'rutz'at conojel re jec'o viq'uin y ye'rulisaj-a re man nivachin-ta quic'aslen. Jac'a re nivachin quic'aslen, ye'rojosk'ij m'as, che re quic'aslen m'as nivachin. 3 Yex re can nc'utun-va-pa re ch'abal chivach, can xixch'ojch'ojer-yan roma re ch'abal re'. 4 Can nojel tiempo c'a quixc'ue' viq'uin, chin quire' yen can yinc'ue' chuka' iviq'uin. Roma vo xa c'o jun ruk'a' uva re man chach-ta re rakan ndel-va-pa, man nivachin-ta. Xa can nic'atzin che jun ruk'a' uva chach re rakan ndel-va-pa, chin quire' nivachin. Can quire' chuka' yex, can nic'atzin che nojel tiempo quixc'ue' viq'uin. 5 Ja yen re juvi' uva, y yex re ruk'a'. Re can nojel tiempo c'o viq'uin y yen riq'uin reja', re ruc'aslen can xtivachin-va. Roma re man c'o-ta viq'uin, man jun xtitiquir xtuban. 6 Re anchique man nic'ue-ta viq'uin, xtuc'alvachij ancha'l niquic'alvachij re ruk'a' tak uva re xa man ye'vachin-ta. Ye'lisas-a roma man ye'vachin-ta, y tak je chake'j chic, ye'bemol-pa, ye'torix pa k'ak', y chire' ye'c'at-va. 7 Jac'a yex can quixc'ue' viq'uin, y tic'ue' re nuch'abal iviq'uin. Vo xa quire' xtiban, can tic'utuj cha re Dios andex nurayij re iv'anma, y can quire' xtibanataj. Can xtuya-va-pa chiva re nic'utuj. 8 Vo xa can nivachin jabal re ic'aslen, can nik'alajin che yixtzakatal chuij. Y mare' re xquixtz'eto, can xtiquiya' ruk'ij re Nata'. 9 Can ancha'l como yen camas yinrajo' re Nata', can quire' chuka' nimban yen chiva yex. Y mare' nojel tiempo quixc'ue' viq'uin y siempre yixinjo'. 10 Y chin che yixc'ue' viq'uin y yixinjo', yex can niban re ye'mbij chiva. Ancha'l nbanon yen riq'uin re Nata', can ye'mban re nubij chua, y mare' yinc'o riq'uin reja' y yinrajo'. 11 Y ronojel re nbin chic chiva, can chin che yixqui'cot pa tak iv'anma, can ancha'l yinqui'cot yen pa v'anma. Y re iv'anma camas-ta xtiqui'cot. 12 Y yen ninchalabej chiva che can tijo-ivi', can ancha'l yixinjo' yen. 13 Roma re jun re can nuya-va ruc'aslen pa quiq'uixel re ru-amigos, can k'alaj che camas ye'rajo' y man jun chic re xtijovan m'as que chach reja'. 14 Y yex can yix nu-amigos, vo xa niban ronojel re nimbij chiva che tibana'. 15 Roma yen can amigos chic nbanon chiva, roma can ronojel re rubim-pa re Nata' chua yen, can xintzijoj chuka' chiva yex. Man xe-ta chic yix nusamajela'. Roma jun samajel man rutaman-ta andex nunojij re ru-patr'on. Yen man quire-ta chic nbanon chiva. 16 Re xcha'o ivichin yex, ja yen, y mana-ta yex re xixcha'o vichin yen. Y yen xixincha' chin che yixintak chubanic re nusamaj y chin chuka' che nivachin jabal re ic'aslen, y re' can chin nojel tiempo, chin quire' re andex xtic'utuj cha re Nata' pa nube' yen, can xtuya-va-pa chiva. 17 Can ninchalabej c'a chiva, che tijo-ivi'. 18 Y vo xa yixtzelas coma re vinak re man quiniman-ta re Dios, te'ka chi'c'o'x che ja yen re xinquitzelaj nabey que chivach yex. 19 Xe-ta yix quichibil-ta re vinak re man quiniman-ta re Dios, yixquijo-ta. Pero vocame yixquitzelaj, roma man yix quichibil-ta chic reje'. Can jac'a yen re xinlisam-pa ivichin chiquicojol. 20 Can te'ka chi'c'o'x che mana-ta re mozo c'o m'as ruk'ij que chach re patr'on. Y vo xa yen re Ivajaf yintzelas coma re vinak, yex chuka' xa can quire' xtiban chiva, y vo xa re vinak man niquiban-ta re nubij re nuch'abal yen, man xtiquiban-ta chuka' re nibij yex chique. 21 Y quire' xtiquiban, roma man quitaman-ta rach re Dios re takayom-pa vichin, y mare' yixquitzelaj, roma viq'uin yen ibanon-va confiar-ivi'. 22 Y man-ta ximpa yen chach re ruch'ulef chutzijosic re nuch'abal, man-ta xinquitzelaj y man-ta xe'k'alajin che je aj-maqui'. Jac'a vocame, roma yen ximpa-yan chach re ruch'ulef, mare' reje' man xque'tiquir-ta xtiquibij che man jun quimac. 23 Re ye'tzelan vichin yen, can man xe-ta c'a yen re yinquitzelaj, xa can quire' chuka' niquiban cha re Nata'. 24 Yen je'mbanalon nima'k tak samaj re man jun banayon chiquivach. Y reje' xquitz'at re samaj re', pero man yinquiniman-ta. Xa yinquitzelaj y niquitzelaj chuka' re Nata'. Y mare' man jun xtibin che manak rumac. 25 Ronojel re', can ntajin chic rubanic, roma can quire' tz'iban can chupan re ruch'abal re Dios re yi'on chique. Chupan re ruch'abal re Dios nubij: Yinquitzelaj y xa man k'alaj-ta anchique roma. Quire' nubij chupan re ruch'abal re Dios. 26 Jac'a tak yen xquintzolaj chic chila' riq'uin re Nata', xtintak-pa re xtito'o ivichin, y reja' can xquinrutzijoj-va. Y re Jun re' ja re Esp'iritu Santo, re nitijon ivichin cha re katzij. Y reja' riq'uin re Nata' nipo-va. 27 Y yex can xquinitzijoj chuka', roma can ja tak xintz'uc-pa re nusamaj, jare' tak yixc'o viq'uin.

16

1 Y ronojel re', can ximbij chiva chin che yex nitamaj can y man-ta jun nibano chiva che yixtzak. 2 Xquixkotax chire' pa tak nema-jay re anche' nitzijos-va re ruch'abal re Dios re nibex sinagoga cha. Y can xtapon-va chuka' re k'ij tak re vinak xtiquinojij che rusamaj re Dios niquiban reje' tak yixquiquimisaj. 3 Quire' re xque'quibanala' re vinak, roma man quitaman-ta rach re Nata' y man quitaman-ta chuka' noch yen. 4 Y ronojel re' nimbij can chiva, chin che tak xtapon re k'ij tak xquixquikotaj-pa y xquixquimisas man c'a xtibij-ta che yen man xinya-ta can rutzijol chiva. En lugar che quire-ta xtinojij, xa can jare' tak xte'ka chi'c'o'x che can katzij re rutzijol nyi'on can chiva. Ronojel re' can man xinya-ta rutzijol chiva tak xintz'uc-pa re nusamaj, roma can yinc'o-va-pa iviq'uin. 5 Y vocame yintzolaj riq'uin re takayom-pa vichin. Anchique roma tak man jun chiva yex re yix nu-disc'ipulos re nic'utun-ta-pa chua: ??Anche' c'a xcabo-va? 6 Pero en lugar che quire-ta nic'utuj chua, re iv'anma xa nojnak che bis, roma re ximbij-ka chiva. 7 Pero yen can ja re katzij nimbij chiva: Jabal nuban chiva vo xa yen xquimba-yan, roma vo xa man xquimba-ta, man nika-ta-pa re Esp'iritu Santo re nita'o ivichin. Jac'a vo xa xquimba-yan, can xtintak-va-pa. 8 Y tak xte'ka re Esp'iritu Santo, can xtutzijoj chiquivach re vinak re man quiniman-ta re Dios che can je aj-maqui-va, che c'o jun bey choj chin c'aslen, y re Dios can xtuban-va juzgar pa quive' re vinak. 9 Reja' xtutzijoj chiquivach re vinak che je aj-maqui', roma man yinquinimaj-ta. 10 Can xtutzijoj chuka' chiquivach re vinak re choj bey chin c'aslen, roma yen riq'uin re Nata' yinapon-va. Y jare' tak yex man xquinitz'at-ta chic. 11 Y chuka' reja' can xtutzijoj che re Dios can xtuban-va juzgar pa quive' re vinak, roma vocame can xban-yan juzgar pa rue' re itzel re tz'amayon chin re ruch'ulef. 12 Y can c'a q'uiy cosas re man nimbij-ta can chiva, roma vocame c'ayef chin che ye'k'ax pan ive' y can c'ayef chuka' nuban chiva che nic'uaj. 13 Jac'a tak xtipa re Esp'iritu Santo, can xquixrutijoj y xquixruc'uaj chupan re katzij. Reja' can man rion-ta xtisamaj, roma re ch'abal re xtuyala' chiva, can ja re je'bim-pa cha chila' chicaj. Y mare' tak reja' xque'rusekresaj-yan-apo chivach re xque'banataj re chakavach-apo. 14 Y reja' can xtuya' nuk'ij yen, roma ronojel re xtubij chivach, can chuij yen y re nusamaj. 15 Can ronojel re c'o riq'uin re Nata' Dios, can vichin chuka' yen, y mare' tak yen ximbij-yan che ronojel re xtubij re Esp'iritu Santo chivach, can chuij yen y re nusamaj. 16 Xa ba' chic c'a xquinitz'at. Y c'are' xquinel-a jun ca'e-oxe' k'ij chi'icojol, c'are' xquinitz'at chic ba', y c'are' yen yintzolaj chic chila' riq'uin re Nata' Dios, xcha' re Jes'us. 17 Y nic'aj chaka yoj re yoj disc'ipulos tak xkac'axaj re xubij re Jes'us, xkac'utula' chakavach. Yoj xkabij: ??Andex xrajo' xubij chaka riq'uin re ch'abal re'? Roma xubij: Xa ba' chic c'a xquinitz'at. Y c'are' xquinel-a jun ca'e-oxe' k'ij chi'icojol, c'are' xquinitz'at chic ba'. Y c'are' yen yintzolaj chic chila' riq'uin re Nata' Dios, xcha', quire' xkabila' chakavach. 18 Yoj nakabila' chakavach: ??Andex nrajo' nubij re rutzij: Xa ba' chic c'a? Xa man ye'k'ax-ta pa kave' re rutzij, yojcha'. 19 Y re Jes'us can cha'nin xunabej che yoj c'o jun cosa nakajo' nakac'utuj cha, mare' reja' xubij: Yex nijo' nitamaj andex re ximbij, che xa ba' chic c'a xquinitz'at, y c'are' xquinel-a jun ca'e-oxe' k'ij chi'icojol, c'are' xquinitz'at chic ba'. 20 Mare' can katzij nimbij chiva: Yex can xquixok' y xquixbison roma re xtinc'alvachij yen. Jac'a re vinak re man quiniman-ta re Dios, xque'qui'cot roma re xtibanataj. Y man riq'uin re' che yex can c'o-va re bis pa tak iv'anma, re bis re' xtijalataj. Re bis xa xtuban chiva che xquixqui'cot. 21 Re bis re' junan riq'uin re k'axomal nuk'asaj jun ixok tak napon ruk'ij chin nralaj jun ac'ual. Tak re ac'ual xalax-yan, re te'ej re' man ne'ka-ta chic chuc'o'x andex che k'axomal xuk'asaj, roma camas niqui'cot r'anma che xalax chic jun ac'ual chach re ruch'ulef. 22 Can quire' chuka' yex, vocame c'o bis pa tak iv'anma, pero can yimpa chic jun bey chi'itz'etic. Y jare' tak re iv'anma xtiqui'cot chic jun bey, y man jun chic xtibano cha re iv'anma che man chic xtiqui'cot-ta. 23 Y chupan re k'ij re', man chic chua-ta yen xtic'utuj-va re nurayij re iv'anma. Pero can katzij nimbij chiva, che ronojel re xtic'utuj cha re Nata' pa nube' yen, can xtuya-pa chiva. 24 Jac'a vocame can man jun ic'utun-ta cha re Nata' pa nube' yen. Can tic'utuj, y xtic'ul. Y chin quire' camas-ta xtiqui'cot re iv'anma. 25 Can ronojel re nbin chic-ka chiva, can c'ayef-va chin che ye'k'ax pan ive', pero xte'ka re k'ij tak man chic quire-ta rubanic xquinch'o iviq'uin. Xa can k'alaj rubixic xtimban chiva chij re Nata' Dios. 26 Y chupan re k'ij re', can pa nube' yen xtic'utuj-va cha re Nata', y reja' can xtuya-pa chiva re nic'utuj cha. Y xtuya' chiva, man roma-ta che can ja yen re yinc'utun pan i-cuenta yex. Man quire-ta. 27 Re Nata' nuya' chuka' chiva re nic'utuj cha, roma yixrajo'. Y reja' yixrajo', roma yex yinijo' yen y ninimaj che yen riq'uin reja' yimpitinak-va. 28 Can riq'uin-va re Nata' Dios yimpitinak-va, chin xineka chach re ruch'ulef. Y vocame can riq'uin chuka' reja' yintzolaj-va-a, y ninya' can re ruch'ulef, xcha' re Jes'us. 29 Y yoj re yoj ru-disc'ipulos xkabij cha: Can katzij-va che vocame man chic c'ayef-ta chin ye'k'ax pa kave' re nabij, xa can k'alaj re ya'bij. 30 Vocame nak'ax pa kave' che rat can ronojel natz'at y ronojel chuka' ataman. Can man nic'atzin-ta che nakac'utuj chava chin natamaj re nakanojij. Y mare' yoj can nakanimaj che riq'uin re Dios yatpitinak-va, xojcha' cha. 31 Y re Jes'us xubij chaka yoj: ??Can yininimaj como vocame? 32 Roma can katzij nimbij chiva che re jun k'ij re' can nipo-va, y can hora chic, che xtibanataj che yex xa xtitaluj-a-ivi' y xa xquiniya' can nayon. Pero man nayon-ta chuka' xquinc'ue' can, roma re Nata' can c'o-va viq'uin. 33 Y ronojel re', can nintzijoj can chiva, chin che re iv'anma can otz nuna', y can quire' xtuna' re iv'anma roma ibanon confiar-ivi' viq'uin. Y nimbij can chuka' chiva, che can xtivel-va tijoj-pokonal vova' chach re ruch'ulef. Pero can xtic'ue-a ivuchuk'a' roma yen xinch'ac-yan re itzel re tz'amayon chin re ruch'ulef.

17

1 Y tak re Jes'us rubin chic ronojel re', reja' xtzu'un chicaj chin nuban orar y nubij: Nata' Dios, re nu-hora can ja xbeka. Vocame can tabana' chua yen re Ac'ajol che nik'alajin re nuk'ij, chin quire' yen re Ac'ajol can ja chuka' xtimban aviq'uin rat, che can xtik'alajin re ak'ij. 2 Roma can ajachon-va-pa poder pa nuk'a' chin che can yinc'ue-va pa quive' conojel vinak. Y re poder re' nic'atzin che yen ninya' re c'aslen re man niq'uis-ta chique conojel re can je'ayi'on chic chua. 3 Y re c'aslen re man niq'uis-ta, ja re niquitamaj avach rat Nata' Dios y niquitamaj chuka' noch yen. Roma ja rat re katzij Dios y man jun chic Dios c'o, y yen re Jesucristo re xinatak-pa chach re ruch'ulef. 4 Riq'uin re samaj re ximban vova' chach re ruch'ulef, xk'alajin re ak'ij. Y xinq'uis-yan chuka' ronojel re samaj re achalabem-pa chua chin nimban. 5 Vocame, Nata' Dios, can taya' chic c'a re nuk'ij tak xinc'ue' aviq'uin rat. Can ancha'l re nuk'ij re xc'ue' tak c'amaje-na tic'ue' re ruch'ulef che'. 6 Roma re achi'a' re can je'acha'on chic-pa rat chiquicojol re man yatquiniman-ta, chua yen xa'ya-va vocame, y yen can xinsekresaj re abe' chiquivach. Re achi'a' re' can je avichin rat, y xa'ya' chua yen. Y reje' can quibanon y quichajin re ach'abal. 7 Chuka' re achi'a' re' can quitaman chic che ronojel re ayi'om-pa chua yen, can xk'ax-yan pa quive' che ja rat re yatya'yom-pa chua. 8 Roma can ja re ch'abal re ayi'om-pa chua yen chin nitzijos, can jare' re xintzijoj chiquivach re achi'a' re'. Y reje' can quic'ulun-va re ach'abal pa tak c'anma, y can quitaman-va che katzij che aviq'uin rat Nata' Dios yimpitinak-va. Can quiniman che ja rat re yatakayom-pa vichin. 9 Can ninc'utuj chava rat che taya' re ak'a' pa quive' reje', y mana-ta pa quive' re vinak re man yatquiniman-ta. Can pa quive' re achi'a' re xa'ya' chua ninc'utuj che taya' re ak'a' pa quive', roma can je avichin chuka' rat. 10 Y conojel re je vichin yen, can je avichin chuka' rat, y re je avichin rat, je vichin chuka' yen. Y yen can xk'alajin-yan re nuk'ij, coma re achi'a' re xa'ya' chua. 11 Lok'olaj Nata' Dios, pan ak'a' c'a ye'njach-va can re achi'a' re xa'ya' chua, can ca'chajij riq'uin re a-poder, chin quire' can junan-ta quivach y xa jun-ta c'a niquiban. Can niquiban-ta ancha'l kabanon yoj. Yoj can jun kabanon. Can ca'chajij, roma reje' can c'a ye'c'ue-na can chach re ruch'ulef, y yen man quire-ta. Yen xa yintzolaj-yan-a aviq'uin. 12 Y yen can je'nchajin-va-pa re achi'a' re xa'ya' chua. Jenipa' tiempo re xinc'ue-pa quiq'uin chach re ruch'ulef, can xe'nchajij riq'uin re a-poder rat. Y can man jun chic re xsatz-ta can chique, xa can xe re jun re xe itzel tak banabal nubanala' y nucanoj rucamic. Can quire' c'a re tz'iban can, che c'o jun re nisatz can. 13 Yen can ja yintzolaj-yan aviq'uin, Nata' Dios, pero riq'uin re c'a yinc'ue-na ba' chic chach re ruch'ulef, ninc'utuj chava che taya' re ak'a' pa quive', roma ninjo' che camas-ta ye'qui'cot pa tak c'anma. Can ancha'l yinqui'cot yen. 14 Re achi'a' re xa'ya' chua, can nyi'on-va re ach'abal chique. Mare' re vinak re man yatquiniman-ta xe'quitzelaj, roma re achi'a' re xa'ya' chua man je richin-ta chic re ruch'ulef. Can je ancha'l chic yen, roma yen man yin richin-ta chuka' re ruch'ulef. 15 Man ninc'utuj-ta chava Nata' Dios che ca'lisaj-yan-a chach re ruch'ulef chin ya'col. Re ninc'utuj chava, ja che ca'to'. Man taya' k'ij che re itzel nich'acon chiquij. 16 Re achi'a' re xa'ya' chua, man je richin-ta re ruch'ulef. Can je ancha'l yen. Yen man yin richin-ta chuka' re ruch'ulef. 17 Can tabana' chique che tiquijacha-qui' chupan re ach'abal. Re ach'abal ja re katzij. 18 Y can ancha'l rubanic re xabam-pa chua yen chin xinatak-pa chubanic re asamaj chach re ruch'ulef, can quire' chuka' nimban yen chique re achi'a' re xa'ya' chua. Can je'ntakon-va chubanic re asamaj chach re ruch'ulef. 19 Coma reje' yen can ninjach c'a chuka-vi' chin re samaj, che quire-ta chuka' niquiban reje'. Can tiquijacha-qui' y que'c'ue' chupan re katzij. 20 Nata' Dios, yen man xe-ta pa quive' re achi'a' re xa'ya' chua ninc'utuj che taya' ak'a' pa quive', xa can quire' chuka' ninc'utuj chava pa quive' conojel re xque'niman vichin, re can xquinquinimaj roma re ch'abal xtitzijos chiquivach, 21 chin che conojel can junan-ta quivach. Xa can jun-ta xtiquiban. Can-ta xtiquiban ancha'l re kabanon yoj, che xa jun kabanon. Roma rat Nata' Dios can yatc'o viq'uin yen, y yen can yinc'o chuka' aviq'uin rat. Quire' ninjo' che niquiban-ta reje' kaq'uin yoj. Can-ta nik'alajin chiquivach re vinak re man yatquiniman-ta, che yen, can ja rat re xatako-pa vichin, roma niquitz'at che can junan quivach quibanon re jec'o kaq'uin yoj. 22 Yen xinya-yan chique re ayi'om-pa rat chua yen. Reje' can c'o chic quik'ij chuka', ancha'l re abanom-pa chua yen. Chin quire' xa jun-ta xtiquiban, ancha'l kabanon yoj xa jun kabanon. 23 Can xquinc'ue-va quiq'uin reje' y rat viq'uin yen, chin quire' reje' can jun-ta xtiquiban. Y mare' xtitamax coma re vinak re man yatquiniman-ta, che ja rat Nata' Dios re xatako-pa vichin. Y mare' chuka' xtitamax coma re vinak che can ya'jo-va, ancha'l yinajo' yen. 24 Nata' Dios, yen ninjo' che conojel re je'ayi'on chua xque'bec'ue-ta viq'uin chila' chicaj, chin che niquitz'at-ta re nuk'ij re ayi'on, roma xinajo' tak c'amaje-na tic'ue' re ruch'ulef che'. 25 Nata' Dios, rat re yat choj riq'uin ronojel, re vinak re man yatquiniman-ta man c'a quitaman-ta avach. Pero yen can ntaman-va avach, y re achi'a' re xa'ya' chua, can xquitamaj chuka' che ja rat re xatako-pa vichin. 26 Y yen can ximban che xinsekresaj re abe' rat chiquivach, y can xtimban che xtinsekresaj m'as chiquivach, chin quire' can-ta xca'jo' ancha'l yinajo' yen. Y xquinc'ue-ta chuka' yen quiq'uin reje'.

18

1 Y tak re Jes'us rubin chic ronojel re', reja' y chibil yoj re yoj ru-disc'ipulos xojel-pa. C'are' xojba c'a juc'an chic-apo ruchi' re ch'et rakan-ya' rubini'an Cedr'on, chupan jun ulef nibex huerto cha, y chire' c'a xoc-va-apo re Jes'us y chibil yoj re yoj ru-disc'ipulos. 2 Re Judas re nijacho chin re Jes'us, can rutaman chuka' re lugar re anche' xojapon-va, roma re Jes'us q'uiy chic bey yojruc'uan-a chire'. 3 Mare' re Judas can choj chupan re lugar re' xe'ruc'uaj-va-a re jun grupo soldados y re polic'ias re xe'quiya-a re principal tak sacerdotes y re achi'a' fariseos. Re soldados y re polic'ias quic'ualon antorchas y l'amparas y chuka' quic'ualon armas. 4 Y re Jes'us can rutaman andex re pitinak chij y andex re xtuc'alvachij. Mare' tak xba chiquic'ulic re je'pitinak tz'amoy richin y xuc'utuj chique: ??Anchique nicanoj? 5 Reje' xquibij: Yoj ja re Jes'us aj-Nazaret nakacanoj. Y re Jes'us jare' tak xubij chique: Ja yen re', xcha'. Y re Judas re nijacho chin re Jes'us, can c'o-apo chuka' quiq'uin re vinak re'. 6 Y jac'a tak re Jes'us xubij chique: Ja yen re', jare' tak re vinak re' xe'tzolaj chiquij, y can xquivarabej-qui' xe'tzak pan ulef. 7 Jare' tak re Jes'us xuc'utuj chic jun bey chique: ??Anchique nicanoj? Y re vinak re' xquibij chic jun bey: Yoj ja re Jes'us aj-Nazaret nakacanoj. 8 Y re Jes'us xubij chique: Can xic'axaj-yan che ximbij chiva che ja yen re'. Y vo xa ja yen re yinicanoj, man que'itz'am re jec'o viq'uin, xa tiya' k'ij chique che ye'ba. 9 Re Jes'us quire' xubij, chin quire' can nibanataj ancha'l re rubin. Reja' can rubin-va: Nata' Dios, re achi'a' xa'ya' chua, can man jun c'a chique reje' re xsatz-ta chic can. 10 Pero re Sim'on Pedro ruc'uan jun espada, y jare' re xulisaj chin xuya' cha re jun ru-mozo re namalaj sacerdote. Re Sim'on Pedro can xutzaq'uij-va jun ruxquin re ache rubini'an Malco. Re ruxquin re xtzaq'uis-a ja re c'o pa rajquik'a'. 11 Pero re Jes'us xubij cha re Sim'on Pedro: Tayaca-ka la espada, roma yen tiene que nink'asaj re tijoj-pokonal re rubim-pa re Nata' y cama-va xquincolotaj-ta chach, xcha' re Jes'us cha re Sim'on Pedro. Roma re Pedro nrajo' nuto' re Jes'us che espada. 12 Y jare' tak xe'pa re jun grupo soldados y re je ec'uay quichin, y re polic'ias re je'quiyi'om-pa re achi'a' c'o quik'ij chakacojol yoj re yoj israelitas, xquitz'am-a re Jes'us y xquixim-a. 13 Nabey xquic'uaj-a re Jes'us chach re jun ache rubini'an An'as, roma re An'as re' rujenam re Caif'as. Y re tiempo re' jac'a re Caif'as re namalaj sacerdote. 14 Y can jac'a re Caif'as biyon chique re achi'a' re c'o quik'ij chakacojol yoj re yoj israelitas, che m'as otz che xaxe jun nicom pa quiq'uixel conojel vinak y no que conojel ye'com xaxe roma re jun re'. 15 Yen Juan y chuka' re Sim'on Pedro, can yojtzakatal-a chiquij re je'tz'amayon-a chin re Jes'us, roma ja re Jes'us re katzekelben-a yojbinak. Yen ataman noch roma re namalaj sacerdote, mare' can choj xinoc-apo chach rachoch. 16 Jac'a re Pedro xa man xoc-ta-apo. Reja' xc'ue' can chire' pa puerta. Y yen re ataman noch roma re namalaj sacerdote, xinel chic-pa y xinch'o riq'uin re ixok re nichajin chire' pa puerta, y xincusaj-apo re Pedro. 17 Y can jare' tak re ixok re nichajin chire' pa puerta xubij cha re Pedro: Rat chuka' yat ru-disc'ipulo re ache tz'amom-pa, xcha'. Pero reja' xubij: Yen man yin disc'ipulo-ta chin re ache re', xcha'. 18 Jac'a re mozos chupan re jay re' y re polic'ias re xe'betz'amo-pa re Jes'us, quibaxon jun k'ak' y je'pa'al-apo chach chin niquimak'-qui', roma camas tef nuban. Y re Pedro pa'al-apo chuka' quiq'uin, rumek'on-apo-ri' chuchi-k'ak'. 19 Y re An'as re jun namalaj sacerdote re rujachon chic can re rusamaj, tak xbepobax re Jes'us chach, c'o preguntas xubanala' cha. Reja' xuc'utuj cha re Jes'us chiquij re ye'tzekelben richin y chuka' xuc'utuj cha andex che ense~nanza xuc'ut. 20 Xpa re Jes'us xubij: Man ntaman-ta anchique roma tak man ac'axan-ta, roma yen can pa sakil yinch'ovenak-va chique conojel vinak. Yinch'ovenak chiquivach pa rachoch re Dios y pa tak nema-jay re anche' nitzijos-va re ruch'abal re Dios re nibex sinagoga cha, re anche' niquimol-va-qui' conojel re kavinak israelitas chin niquic'axaj re ruch'abal re Dios. Can pa sakil yinch'ovenak-va chiquivach. 21 ??Anchique roma tak rat xa chua yen nac'utuj-va? Tac'utuj chique re je'c'axayon vichin. Tac'utuj chique andex re je'mbin. Y tatz'eta-na-pa', reje' jabal quitaman andex re nbin yen chique. 22 Y jac'a tak re Jes'us je'rubin chic-ka re tzij re', jun chique re polic'ias re c'o-apo chire' chunakaj re Jes'us xuya' jun bic k'a' cha y xubij: ??Anchique roma tak quire' xach'o-apo cha la namalaj sacerdote? 23 Pero re Jes'us xubij cha re polic'ia re': Vo xa c'o ch'abal re mana-ta rubixic ximban-apo cha, tabij c'a-pa andex che ch'abal re man pa rubiyal-ta ximbij-apo. Y vo xa ronojel re ximbij-apo, otz, ??anchique roma tak xaya' jun bic k'a' chua? xcha' re Jes'us. 24 C'are' re An'as xutak-apo re Jes'us chach re Caif'as re namalaj sacerdote chupan re tiempo re'. Y re Jes'us ximil tak xc'uax-a. 25 Jac'a re Pedro pa'al-apo chuchi-k'ak' rumek'on-ri'. Y jec'o xe'c'utun cha: Rat yat ru-disc'ipulo re jun ache tz'amon, xe'cha' cha. Y re Pedro xa xutz'uc tzij roma reja' xubij: Yen man yin disc'ipulo-ta chin re jun ache re', xcha'. 26 Y jun chique re ru-mozo re namalaj sacerdote, ruch'alal ba' re ache re xlisas ruxquin roma re Pedro, xuc'utuj cha re Pedro y xubij: Ja rat re xatintz'at che yatc'o riq'uin re Jes'us chire' anche' xbakatz'ama-va-pa, xcha' cha. 27 Jac'a re Pedro xutz'uc chic tzij jun bey y xubij, che mana-ta yen. Y can jare' tak xbetzirim-pa re moma'. 28 Y chire' pa rachoch re Caif'as c'o-va re Jes'us chin niban juzgar. Reja' can poban-apo chach re Caif'as. Y chire' c'a xel-va-a chin che ne'jach pa ruk'a' re gobernador rubini'an Pilato, re c'o chire' pa ru-palacio. Y namak'a' tak xbanataj re'. Y re je'ac'ayon-apo chin re Jes'us man xe'oc-ta-apo pa palacio, roma chiquivach reje' xajan. Y chuka' chin quire' reje' ye'tiquir niquitaj re andex nitij chupan re kanamak'ij rubini'an pascua. 29 Y re Pilato re gobernador xbe'el-pa y xuc'utuj chique re je'ac'ayon-apo chin re Jes'us: ??Andex che mac rubanon re jun achel re', mare' ic'amom-pa chinoch chin nisujuj? xcha' chique. 30 Y re vinak re je'ac'ayon-apo chin re Jes'us chach re gobernador, xquibij cha: Vo xa re ache re' man-ta banoy-ch'a'oj, man-ta kapoban chavach chin naban juzgar, xe'cha' cha. 31 Jare' tak re Pilato xubij chique: Tic'uaj chic-a yex re ache re' y tibana' juzgar yex can ancha'l nubij re i-ley, xcha' re Pilato chique. Pero re achi'a' re c'o quik'ij chakacojol yoj re yoj israelitas, xquibij cha: Yoj man jun ley pa kak'a' chin nakabij che nakaquimisaj jun vinak cho cruz, xe'cha'. 32 Y can jare' nibanataj re rubin chic re Jes'us, che andex che camic xtoc-a cha. 33 Y re Pilato, re gobernador xoc chic-apo pa ru-palacio. Y xrayoj re Jes'us y c'are' xuc'utuj cha: ??Ja rat re qui-Rey re israelitas? 34 Pero re Jes'us xubij cha re Pilato: ??Re xac'utuj chua, can aviq'uin como rat pitinak-va, o xa nic'aj chic vinak re je'biyom-pa chava? xcha'. 35 Jare' tak re Pilato xubij cha re Jes'us: Yen can man jun otz nuc'am-pa chua, roma yen man yin israelita-ta. Re xe'jacho avichin pa nuk'a' ja re avinak y re principal tak sacerdotes. ??Andex c'a che mac abanon? 36 Y re Jes'us xubij cha re Pilato: Yen can yin Rey-va, pero man ancha'l-ta chin re ruch'ulef. Roma xe-ta yin ancha'l re Rey chin re ruch'ulef, conojel-ta re samajela' jec'o viq'uin ye'tajin-ta chic che ayoval, che man quinjach-a pa quik'a' re achi'a' re c'o quik'ij chiquicojol re nuvinak israelitas. Yen man yin Rey-ta ancha'l chin re ruch'ulef. 37 Pero re Pilato xubij cha re Jes'us: ??Entonces rat can yat Rey-va? xcha'. Y re Jes'us jare' tak xubij cha: Ja', quire'. Yen can yin Rey-va ancha'l re xabij. Can chin-va re' tak xinalax chach re ruch'ulef y chin che nintzijoj re katzij ch'abal chiquivach re vinak. Y conojel c'a re ye'niman y je richin chic re katzij ch'abal, can niquiban-va re nimbij yen chique, xcha'. 38 Y re Pilato xuc'utuj cha re Jes'us: ??Andex re' re katzij? Y tak rubin chic can quire' cha re Jes'us, re Pilato xa xel chic-a chire' pa ru-palacio chin xbech'o chiquivach re kavinak israelitas y xubij chique: Yen man jun ch'a'oj ninvel chij re jun ache re'. 39 Pero ronojel juna' chupan re k'ij chin re pascua, yex nic'utuj che yen ninlisaj-a jun chique re ivinak re jec'o pa c'arcel. ??Re vocame, yex nijo' che yen ninlisaj-a libre re Rey ivichin yex re yix israelitas? xcha' chique. 40 Jac'a re vinak re', jun pa quichi' xe'ch'o-apo cha re Pilato y xquibij: Ja re Barrab'as talisaj-a libre y mana-ta re ache re', xe'cha'. Y re ache rubini'an Barrab'as xa jun ache elek'om.

19

1 Y mare' re Pilato re gobernador xubij che tich'ay re Jes'us. 2 Jac'a re soldados xquipach'uj jun k'ayis re camas ruq'uixal. Y xquiban jun corona cha y c'are' xquiya' pa rujalom re Jes'us. C'are' xquiya' chuka' jun tziak morado chij re Jes'us, can ancha'l-va re ye'quicusula' re reyes. 3 Y re soldados re' niquibila-apo chach re Jes'us: !!Camas c'a caqui'cot rat re qui-Rey re israelitas! ye'cha'. Y niquiyala' chuka' k'a' cha. 4 Jare' tak re Pilato xel chic-pa jun bey pa ru-palacio chin xch'o chiquivach re vinak, y reja' xubij chique: Titzu', jac'a ache re' ninlisaj-pa chivach, chin titamaj che reja' man jun ch'a'oj ninvel chij, xcha'. 5 Y tak re Jes'us xbe'el-pa, can rucusan chic re corona re banon cha q'uix y chuka' rucusan chic re tziak morado. Y jare' tak re Pilato xubij: Jac'a ache re c'o re', xcha' chique. 6 Can xe xquitz'at re Jes'us, re principal tak sacerdotes y re polic'ias jun pa quichi' xe'ch'o y xquibij: !!Tataka' ruquimisasic cho cruz! !!Tataka' ruquimisasic cho cruz! xe'cha'. Y jare' tak re Pilato xubij chique: Yen man jun ch'a'oj ninvel chij, chin quire' nintak-ta ruquimisasic cho cruz. Y vo xa yex ninojij che c'o ley pan ik'a' chin nitak ruquimisasic cho cruz, te'ic'ama-a, xcha' reja' chique. 7 Pero re achi'a' re c'o quik'ij chakacojol yoj re yoj israelitas, xquibij-apo cha re Pilato: Reja' nubij che Ruc'ajol re Dios, y mare' tiene que nika re camic pa rue', roma quire' nubij re ka-ley, xe'cha'. 8 Re Pilato can ruxibin-va-ri', y tak xuc'axaj re xquibij re vinak, che re Jes'us nubij che Ruc'ajol re Dios, xpa c'a m'as ximbire' riq'uin. 9 C'are' reja' xoc chic-apo pa ru-palacio y xuc'utuj cha re Jes'us: ??Anche' c'a capo-va rat? xcha' cha. Y re Jes'us man jun tzij xubij cha. 10 Jare' tak re Pilato xubij cha re Jes'us: ??Anchique roma tak man jun tzij nabij-pa chua yen? ??Man ataman-ta c'a che yen c'o autoridad pa nuk'a' chin yatinquimisaj cho cruz y chin yatinlisaj-a chuka'? xcha' re Pilato cha re Jes'us. 11 Y re Jes'us xubij: Rat man jun a-autoridad c'o pa nue' yen, xe-ta man-ta ja re Dios re c'o chila' chicaj re ya'yon chava. Roma can ja reja' ya'yom-pa autoridad pan ak'a'. Y vo xa xtatak nuquimisasic, can c'o amac, pero re m'as c'o rumac ja re xinjacho pan ak'a', xcha' re Jes'us. 12 Can jare' tak re Pilato xutaj ruk'ij chin nulisaj-ta-a. Pero re kavinak israelitas jun pa quichi' xe'ch'o, y xquibij: Vo xa xtalisaj-a, man junan-ta avach riq'uin re C'esar. Roma xabanchique nibin che reja' jun Rey, can nutzelaj re C'esar, roma yoj kataman che ja re C'esar re c'o m'as ruk'ij. 13 Tak re Pilato xuc'axaj re tzij xquibij re vinak cha, xuxibij-ri'. Y c'are' reja' xubij che tilisas-pa re Jes'us. Y re Pilato xbetz'uye-pa re anche' can tuban-va juzgar, re jay re nibex Enlosado cha y re pa kach'abal yoj re yoj israelitas nibex Gabata cha. 14 Re k'ij re', jare' tak nitiquir re jun kanamak'ij yoj re yoj israelitas, jun namak'ij rubini'an pascua, y mare' tak conojel vinak niquibanala' chic utzil ronojel re xtoc chique. Y pa nic'aj-k'ij la'k cha re k'ij re' tak re Pilato xubij chique re vinak re je'aponak chire': Jac'a i-Rey re', xcha' chique. 15 Pero re vinak re quimalon-apo-qui', jun pa quichi' xe'ch'o-apo y xquibij: !!Tiquimisas! !!Tiquimisas! !!Tiquimisas cho cruz! xe'cha-apo. Y re Pilato xubij chique: ??Ja re i-Rey re nijo' che nintak ruquimisasic cho cruz? Pero re principal tak sacerdotes xquibij-apo: Xaxe re C'esar re c'o m'as ruk'ij chakavach yoj, xe'cha'. 16 Y jare' tak re Pilato xuban re niquic'utuj re vinak cha. Xujach-a re Jes'us pa quik'a' re xque'quimisan richin cho cruz, y reje' xquic'uaj-a. 17 Y re Jes'us ruc'uan-a re ru-cruz binak, chin ne'bajex cho cruz pa jun lugar rubini'an Calavera. Y re pa kach'abal yoj re yoj israelitas G'olgota yojcha' cha re lugar re'. 18 Tak xe'bapon-a chire', xquibajij re Jes'us cho cruz. Y chupan re hora re', quire' chuka' xban chique je ca'e' chic achi'a'. Y pa quinic'ajal re je ca'e' achi'a' re je'bajin chach re qui-cruz, chire' xc'ue-va re cruz re anche' bajin-va re Jes'us. 19 Y re Pilato re gobernador, c'o jun tzij xutz'ibaj-a chach jun tz'alam y jare' xc'ue' pa rue' ru-cruz re Jes'us. Re tzij re c'o-a chach re tz'alam nubij: Jes'us aj-Nazaret, qui-Rey re israelitas, nicha'. 20 Re tzij re', can conojel re vinak ye'tz'eto can, roma re lugar anche' xbajex-va re Jes'us cho cruz, xa can nakaj c'o-va cha re tenemit Jerusal'en. Y re tzij re', pan oxe' c'a ch'abal tz'iban-va-a. Can tz'iban pa kach'abal yoj re yoj israelitas, pa quich'abal re aj-Grecia y pa quich'abal chuka' re vinak aj-Roma. 21 Jac'a re principal tak sacerdotes chakacojol yoj re yoj israelitas xbequich'ojij cha re Pilato: Man-ta xatz'ibaj re tzij: Qui-Rey re israelitas, roma man quire-ta. Xa ja reja' xbin. Mare' tajala' c'a rubanic y tatz'ibaj: Xa ja yen yimbin che yin qui-Rey re israelitas, xe'cha'. 22 Pero re Pilato xubij chique re principal tak sacerdotes: Re xintz'ibaj-yan, can ntz'iban chic. Man nic'atzin-ta che ninjal chic rubixic, xcha' chique. 23 Jac'a re soldados xe'bajin chin re Jes'us cho cruz. Y tak xquibajij-yan re Jes'us cho cruz, re soldados re' xbequic'ama-pa re rutziak re Jes'us re je'quilisan can chij. Re tziak re' xquijach chiquivach reje'. Caje' xquiban cha, roma je caje' reje'. Jac'a re jun tziak re nibex t'unica cha man t'ison-ta, xa can pa rubanic-va quire'. 24 Mare' tak reje' xquibila' chiquivach: Man takaratz re jun tziak re'. Xa takabana' sortear, chin quire' xa jun nic'uan-a, xe'cha' reje'. Re xbanataj riq'uin rutziak re Jes'us, can tz'iban-va can chupan re ruch'abal re Dios. Roma chupan re ruch'abal re Dios nubij: Xe'quijachala' re nutziak chiquivach y chuka' xquiban sortear. Y can quire-va xquiban re soldados. Can xbanataj-va ancha'l re tz'iban can. 25 Chire' chuxe' re cruz re anche' bajin-va re Jes'us c'o-apo re Mar'ia re rute' re Jes'us y chuka' re ru-t'ia re Jes'us. Re Mar'ia re ruxayil re ache rubini'an Cleofas y re Mar'ia Magdalena jec'o-apo chuka'. 26 Y tak re Jes'us xutz'at-pa re rute' y yen re yin ru-disc'ipulo re camas yinrajo', xubij cha re rute': Vocame ja re nu-disc'ipulo re' re xtichajin avichin, y can ancha'l aval xtuban aviq'uin, xcha' cha. 27 C'are' xubij chuka' chua yen: Vocame ja rat re xcachajin chin re nte', y can ancha'l chuka' ate' tabana' riq'uin, xcha' chua. Y yen can xinimaj-va, roma can jare' tak xinc'am rach re Mar'ia pa vachoch. 28 Y roma re Jes'us can rutaman chic che ronojel re samaj yi'om-pa cha roma re Dios xc'achoj-yan, y tiene que nibanataj ronojel re tz'iban can chupan re ruch'abal re Dios, xa mare' tak reja' xubij che nichake'j nuchi'. 29 Y chire' c'o-apo jun lak re nojnak che vinagre. Y re soldados chupan re' xquimuba-a jun ancha'l bo'j re nibex esponja cha, xquiya-a chutza'n jun ch'et che' rubini'an hisopo, y c'are' xquiya-apo chuchi'. 30 Y tak re Jes'us rukumun chic can re vinagre, reja' xubij: Xc'achoj ronojel re nusamaj, xcha'. Y jare' tak xujach re r'anma, roma jare' tak xulucuba-pa rujalom y man chic xsilon-ta. 31 Re k'ij re', conojel kavinak israelitas niquibanala' chic utzil ronojel, roma nitiquir-yan re jun namalaj k'ij. Y mare' tak re achi'a' re c'o quik'ij xe'ba riq'uin re Pilato y xbequic'utuj cha chin tik'ajlox cakan re jec'o cho cruz, chin quire' ye'lisas-a. Roma man ruc'amon-ta che re achi'a' re' ye'c'ue' can chach re qui-cruz chupan re namalaj k'ij, roma can pascua-va y chuka' k'ij chin uxlanen. 32 Y re soldados xe'bapon quiq'uin re jec'o chach re qui-cruz, reje' xquik'aj rakan re nabey y can ja chuka' quire' xquiban cha re jun chic. Can che je ca'e' xk'ajlox cakan. 33 Jac'a tak xe'bapon riq'uin re Jes'us, xa man xquik'aj-ta chic rakan, roma xquitz'at che quiminak chic. 34 Astapa' xquitz'at che re Jes'us quiminak chic, jun chique re soldados xuju' rutza'n re ru-lanza chuc'alc'a'x re Jes'us, y jare' tak xbe'el-pa quic' y ya'. 35 Y yen re xintz'eto che quire' xbanataj, nimbij quire', y re nimbij yen can katzij-va. Can xintz'at y ntaman, y mare' can katzij-va re nintzijoj chupan re libro re', chin chiyixnojel-ta yex ninimaj chuka'. 36 Roma re xbanataj, can xbanataj chin quire' katzij ne'el-va re nubij chupan re ruch'abal re Dios. Roma re tz'iban can nubij: Man jun rubakil reja' re xtiquik'aj-ta. 37 Y chupan re ruch'abal re Dios, c'o chic jun tzij re tz'iban can chij re Jes'us, re nubij: Can xtiquitz'at re Jun xsocotaj pa quik'a', re Jun re ac'ayon re socotajic re xban cha riq'uin jun lanza. 38 C'are' c'o jun ache rubini'an Jos'e re aj pa tenemit Arimatea, y astapa' man jun bey xubij che reja' jun tzekelbey chin re Jes'us. Reja' man c'a rutzijon-ta che runiman re Jes'us, roma nuxibij-ri' chiquivach re achi'a' re c'o quik'ij chakacojol yoj re yoj israelitas. Y jac'a reja' re xapon riq'uin re Pilato re gobernador, chin che xbo'rc'utuj utzil cha che tuya' re ru-cuerpo re Jes'us cha chin numuk. Y re Pilato xuya' k'ij cha. Xpa re Jos'e, xbo'rkasaj-pa re ru-cuerpo re Jes'us y xuc'uaj-a. 39 Y chuka' jun ache rubini'an Nicodemo, re xapon pa jun tok'ok'a' riq'uin re Jes'us tak c'a c'as reja' che', y jac'a chuka' reja' xapon chupan re k'ij re' tak xcom-yan re Jes'us, ruc'uan-apo mirra xalon riq'uin nic'aj chic ak'om jubul-oc ruxla'. Che nojel re ak'om ruc'uan la'k-apo jun quintal. 40 Xe'pa re Jos'e y re Nicodemo, xquipis re ru-cuerpo re Jes'us pa tak tziak re c'o ak'om jubul-oc ruxla' chij. Reje' quire' xquiban riq'uin re ru-cuerpo re Jes'us, roma re kavinak israelitas can quire-va niquiban quiq'uin re vinak ye'com. 41 Y chire' chupan re lugar re anche' xbajex-va re Jes'us cho cruz, c'o jun ulef ticon rach re nibex huerto cha. Y chire' c'o jun jul c'oton quichin anama'i' y man cusan-ta. Can man jun c'a 'anma re yi'on-ta chupan re jul re'. 42 Y chire' chupan re jul re' xquiya-va re ru-cuerpo re Jes'us, roma xk'ak'ij-yan-ka chiquivach y re jul re' nakaj c'o-va. Y re kanamak'ij yoj re yoj israelitas re namalaj k'ij nitiquir-yan, mare' re kavinak niquibanala' chic utzil ronojel.

20

1 Y chupan re domingo re nabey k'ij chin re semana, re Mar'ia Magdalena xba chuchi' re jul re anche' xmuk-va re Jes'us. Y cumaj-yan tak c'a k'oko'm che' jare' tak xba. Y jare' tak xutz'at re aboj re anchok cha tz'apin-va can ruchi' re jul, xa elisan chic-a. 2 Mare' jonanin xtzolaj y xapon anche' c'o-va re Sim'on Pedro y yen Juan re disc'ipulo camas xinjovax roma re Jes'us. Re Mar'ia Magdalena xbo'rbij chaka, che jec'o xe'lisan-a re ru-cuerpo re Ajaf Jes'us pa jul, roma manak chic. Y vocame man kataman-ta anche' xbequiya-va can, xcha' chaka. 3 Re Pedro y yen, can xe xkac'axaj re xubij re Mar'ia Magdalena chaka, can jare' xojel-a y xojba chuchi' re jul. 4 Jonanin xojba che yoj ca'e'. Xa jac'a yen yimbiyin ba' m'as que chach re Pedro, mare' xinya' can, y ja yen re xinapon nabey chuchi' re jul. 5 Y tak xinapon, xinluque-ka chin yinachan-apo pa jul, y xe'ntz'at re tziak re jec'o can chire', pero man xinoc-ta-apo pa jul. 6 Y c'are' xapon-apo re Sim'on Pedro roma can tzakatal-apo chuij, y reja' choj xoc-apo pa jul, y xutz'at re tziak re jec'o can chire'. 7 Jac'a re tziak re pison-a rujalom re Jes'us, c'a juc'an chic c'o-va can, banon can rubanic. Can man junan-ta c'o can quiq'uin re nic'aj chic tziak. 8 C'are' xinoc-apo chuka' yen, re xinapon nabey chuchi' re jul. Y tak yin-aconak chic-apo, xintz'at ronojel y xinimaj che re Jes'us xc'astaj-yan-a. 9 Yoj xa can c'aja tak xkatz'at, c'are' xkanimaj, y man k'axnak-ta pa kave' re nubij chupan re ruch'abal re Dios re tz'iban can chij re Jes'us, che tiene que nic'astaj-pa chiquicojol re anama'i'. 10 Y re yoj ca'e' disc'ipulos, can jare' tak xojtzolaj-a chakachoch. 11 Jac'a re Mar'ia Magdalena ndok' xc'ue' can chire' chuchi-jul. Y tak reja' camas ndok', xluque-ka chin xnachan-apo chupan re jul. 12 Y jare' tak xe'rutz'at je ca'e' 'angeles re je'quicusalon sak tak tziak. Re je ca'e' 'angeles re' je'tz'uyul. Re jun tz'uyul re anche' xc'ue-va rujalom re Jes'us y re jun chic anche' xc'ue-va re rakan. 13 Y re je ca'e' 'angeles re' xquic'utuj-pa cha re Mar'ia Magdalena: ??Anchique roma tak yatok'? xe'cha' cha. Y reja' xubij chique: Yen yinok', roma jec'o xe'lisan-a re ru-cuerpo re Vajaf Jes'us y man ntaman-ta anche' xbequiya-va can chinoch, xcha' chique. 14 Y tak reja' rubin chic-ka re tzij re', xtzu'un can chij. Reja' can xutz'at che c'o jun pa'al-apo chij can, pero man xutamaj-ta rach che ja re Jes'us re c'o-apo chij can. 15 Jare' tak re Jes'us xuc'utuj cha re Mar'ia Magdalena: ??Anchique nacanoj y anchique roma chuka' tak camas yatok'? xcha' cha. Y re Mar'ia Magdalena xunojij che re nich'o riq'uin xa ja re nisamajin re ulef re', re ticon rach, mare' tak reja' xubij cha: Vo xa ja rat re xac'uan-a re ru-cuerpo re Vajaf Jes'us, tabij c'a chua anche' xbaya-va can, y yen xtincanoj anche' xtinya-va, xcha' cha. 16 Pero re Jes'us xch'o chic-apo cha y xubij: Mar'ia, xcha'. Y re Mar'ia Magdalena can jare' xutamaj ruch'abal re Jes'us, xuposcolij-ri' y xubij cha: Raboni, xcha'. Roma yoj re yoj israelitas quire' nakabij cha jun maestro. 17 Re Mar'ia Magdalena xrajo' xuk'etej re Jes'us, pero re Jes'us xubij cha: Man quinak'etej. Yen c'amaje-na quimba riq'uin re Nata' chila' chicaj. Xa cabiyin chubixic chique re hermanos, che yen can yimba riq'uin re Nata', re can Irta' chuka' yex. Can yimba c'a riq'uin re nu-Dios, re i-Dios chuka' yex, xcha' cha. 18 Y re Mar'ia Magdalena can xapon-va kaq'uin yoj re yoj disc'ipulos, chin xbo'rbij chaka che xutz'at re Ajaf Jes'us, y chin chuka' xbo'rbij chaka re bin-a cha. 19 Y tak xk'ok'a-ka chupan re k'ij re', re domingo re nabey k'ij chin re semana, yoj re yoj disc'ipulos kamalon-ki', pero can je'katz'epelom-pa re ruchi' tak jay re anche' yojc'o-va, roma yoj can nakaxibij-ki' chiquivach re kavinak israelitas. Y jac'a tak katz'apin kachi', jare' tak xkatz'at che c'o re Jes'us pa kacojol y xubij chaka: Re iv'anma can-ta otz nuna' roma yininiman chic, xcha' chaka. 20 Tak reja' xubij-yan-ka re ch'abal re' chaka, can xuc'utula' chakavach re rusocotajic. Can xuc'utula' re ruk'a' y re chuc'alc'a'x. Y yoj camas xojqui'cot, roma xkatz'at che can ja-va re Ajaf Jes'us. 21 C'are' re Jes'us can xubij chic jun bey chaka: Re iv'anma can-ta otz nuna' roma yininiman chic. Vocame can yixintak-a, ancha'l tak xinrutak-pa re Nata' chubanic re rusamaj. 22 Y tak rubin chic-ka re tzij re', reja' xuxipuj pa kave' y xubij chaka: Can tic'ulu' c'a re Esp'iritu Santo. 23 Y roma re Esp'iritu Santo c'o iviq'uin, yex can yixtiquir nibij chique re vinak re yinquinimaj che xe'cuyutaj-yan re quimac. Y chuka' yixtiquir nibij chique re man yinquinimaj-ta che man cuyutajnak-ta re quimac, xcha' re Jes'us chaka. 24 Jac'a re Tom'as re jun chaka yoj re yoj doce ru-disc'ipulos re Jes'us, re nibex chuka' D'idimo cha, xa man c'o-ta-pa kaq'uin tak re Jes'us xbec'ulun chakacojol. 25 Y mare' yoj re yoj ruchibil re Tom'as xkabij cha: Yoj xkatz'at re Ajaf Jes'us, xojcha' cha. Pero reja' man xunimaj-ta, xa xubij chaka: Yen can c'aja tak ntz'eton chic re socotajic re xe'ruc'uaj re ruk'a' coma re clavos, c'ajare' tak xtinimaj. Can c'aja tak nju'un chic-apo re rue' tak nuk'a' pa tak socotajic re pa ruk'a' re Jes'us, y nju'un chic-apo re nuk'a' chuc'alc'a'x chupan re socotajic re xuban re lanza cha, c'ajare' xtimbij che ja reja', xcha' re Tom'as chaka. 26 Vakxaki' k'ij tak'ax-va re' tak yoj re yoj disc'ipulos xkatz'at re Jes'us. Yoj can kamalon chic-ki' jun bey, katz'apin kachi' pa jay y c'o re Tom'as kaq'uin. Y jare' tak xbec'ulun chic jun bey, y re ruchi' tak jay can je'tz'apal. Re Jes'us xbec'ulun chakacojol y xubij chaka: Re iv'anma can-ta otz nuna' roma yininiman chic, xcha' chaka. 27 Y can jare' xubij cha re Tom'as: Taju-pa re rue' tak ak'a' vova' y ca'tzu' re nuk'a' je'socotajnak. Taya-pa la ak'a' chinuc'alc'a'x y taju-pa chupan re socotajic re xuban re lanza chua. Can tanimaj y man taban ancha'l niquiban re nic'aj chic vinak, re xa man yinquiniman-ta. 28 Y re Tom'as xubij cha re Jes'us: Can jac'a rat re nu-Dios yen y Vajaf yen, xcha'. 29 Pero re Jes'us xubij cha re Tom'as: C'aja vocame nanimaj roma xinatz'at. Otz-quibanoj re yinquinimaj, astapa' man yinquitz'eton-ta, xcha' re Jes'us. 30 Re Jes'us camas q'uiy milagros xe'rubanala', chin che tik'alajin che can ja-va re Dios takayom-pa richin, pero xa man ronojel-ta c'a je'ntz'iban can chupan re libro re'. Y ronojel re', can chakavach yoj re yoj ru-disc'ipulos xubanala-va. 31 Jac'a re je'ntz'iban can chupan re libro re', can je'ntz'iban can chin che yex tinimaj che re Jes'us can jare' re Cristo re Ruc'ajol re Dios. Y tak xtinimaj, xtic'ul re ic'aslen re man niq'uis-ta, roma can xiban confiar-ivi' riq'uin reja'.

21

1 Despu'es de que xbanataj ronojel re', re Jes'us xuc'ut chic-ri' jun bey chakavach yoj re yoj ru-disc'ipulos. Reja' ja chuchi' re lago rubini'an Tiberias, chire' xuc'ut-va-ri' chakavach. Y ja quire' rubanic tak reja' xuc'ut-ri' chakavach chuchi' re lago. 2 Re Sim'on Pedro, re Tom'as re nibex chuka' D'idimo cha, re Natanael re aj pa tenemit Can'a re tenemit re' chin re Galilea, y re yoj ca'e' yoj re yoj ruc'ajol re Zebedeo yen Juan y re Jacobo, y je ca'e' chic disc'ipulos, can kac'uan-ki'. 3 Y jare' tak re Sim'on Pedro xubij: Yen yimba chutz'amic car, xcha' chaka, y yoj xkabij cha: Yoj yojba chuka' chavij. Y can konojel-va xojba y xojoc-a pa jun canoa. Yoj can jun ak'a' xojc'ase', pero man jun car xkatz'am. 4 Jac'a tak xsakar-ka, re Jes'us xapon y xbepa'e' c'a chire' chuchi' re lago. Pero yoj re yoj disc'ipulos man c'a xkatamaj-ta-pa rach anchique pa'al chuchi-ya'. 5 Y reja' xch'o-apo chaka y xubij: ??La manak como jun car iviq'uin chin che niya-ta chua? xcha-apo chaka. Y yoj xkabij-pa cha: Man jun car c'o kaq'uin chin che nakaya-ta chava, xojcha-pa cha. 6 Xpa re Jes'us xubij-apo chaka: Tiya-ka la iya'l chin nitz'am car chire' pa rajquik'a' la canoa y can jec'o car xque'itz'am, xcha' chaka. Y jare' tak yoj xkaya-ka re ya'l chin nakatz'am car pa ya'. Y c'are' man chic yojtiquir-ta nakalisaj-a, roma camas q'uiy car xe'oc-pa chupan re ya'l. 7 Y yen re disc'ipulo re camas xinjovax roma re Jes'us, can jare' tak xinch'o-apo cha re Pedro y ximbij cha: La xch'o-pa chaka, ja re Ajaf Jes'us, xincha' cha. Y re Sim'on Pedro, can xe xuc'axaj re ximbij cha, can jare' tak xucusaj-pa re jun chic rutziak re rulisan can chij y xutorij-pa-ri' pa ya' chin ndel-pa. 8 Jac'a yoj can c'aja-na pa canoa xojpo-va, y kakararem-pa re ya'l nojnak che car. Man can-ta naj re yoj-aconak-apo pa rue' re lago. Xa jun la'k oxe' rakan-c'am. 9 Y tak xojeka y xojel-pa pa canoa chin xojka can pan ulef, xkatz'at c'a che c'o jun k'ak' baxon y jabal chic rachak kejnak. Y pa rachak-k'ak' c'o jun car sa'on-ka, y vay chuka'. 10 Re Jes'us xubij chaka: C'o car re c'a ba-oc que'itz'am-va-pa. Que'ic'ama-pa ca'e-oxe', xcha' chaka. 11 Re Sim'on Pedro xba y xjote' pa canoa. Can c'a pa ya' c'a c'o-va can re canoa re', y xbo'rkararej-pa re ya'l nojnak che car. Can je q'uiy c'a nima'k tak car jec'o chupan re ya'l. Jec'o ciento cincuenta y tres. Xa matiox che man xrokch'itaj-ta rach re ya'l, roma camas je q'uiy car jec'o-pa chupan. 12 Y re Jes'us xubij: Quixampa y quixva', xcha' chaka. Y konojel can kataman c'a che ja reja' re Ajaf Jes'us. Y mare' man jun chaka yoj xc'utun-apo cha: ??Yat anchique c'a rat? 13 Jare' tak re Jes'us xjelom-pa kaq'uin y xutz'am rujachic re vay chakavach, y can quire' chuka' xuban riq'uin re car. Xujachala' chakavach, che kojva'. 14 Y jare' re rox bey che re Jes'us xuc'ut-ri' chakavach yoj re yoj ru-disc'ipulos, tak c'astajnak chic-pa chiquicojol re anama'i'. 15 Y tak xojva-yan konojel, re Jes'us xuc'utuj cha re Sim'on Pedro: Rat Sim'on re ruc'ajol re Jon'as, ??yinajo' como m'as que chiquivach conojel re'? xcha' cha. Y re Sim'on Pedro xubij: Ajaf, can quire-va. Rat ataman che yatinjo'. Y re Jes'us xubij cha: Vo xa can yinajo', can ca'chajij c'a ch'utak nu-ovejas, xcha'. 16 C'are' re Jes'us xuc'utuj chic jun bey cha: Rat Sim'on ruc'ajol re Jon'as, ??can yinajo'? xcha' cha. Y re Pedro xubij: Ajaf, can quire-va. Rat ataman che yatinjo', xcha'. Y re Jes'us xubij: Vo xa can yinajo', ca'chajij c'a re nu-ovejas. 17 Y pa rox bey re Jes'us xubij cha: Rat Sim'on ruc'ajol re Jon'as, ??can yinajo'? xcha' cha. Y re Pedro can k'alaj c'a che xpa bis pa r'anma, roma ja-yan rox bey re' re xc'utux cha roma re Jes'us vo xa can nrajo'. C'are' re Pedro xubij: Ajaf, rat can ronojel ataman. Can ataman che yatinjo'. Y re Jes'us xubij chic cha: Can ca'chajij c'a re nu-ovejas. 18 Can katzij c'a nimbij chava: Tak can c'a yat c'ajol, can ayon c'a rat nabatz' apan y xabanche' c'a najo' yabo-va, yaba. Jac'a tak xcarajex, xcarec' re ak'a' chach jun chic chin che nubatz' apan y xcatruc'uaj re anche' man nika-ta chavach, xcha' cha. 19 Re xubij re Jes'us, can chin c'a xusekresaj re andex che camic xtoc-a cha re Pedro, chin che nuya' ruk'ij re Dios. Y tak re Jes'us rubin chic ronojel re', xubij chuka' cha re Pedro: Catzake' chuij, xcha' cha. 20 Y tak re Jes'us y re Pedro je'binak, re Pedro xtzu'un can chij y xutz'at che yimbinak-apo yen chiquij. Y ja yen re disc'ipulo re camas xinjovax roma re Jes'us y ja chuka' yen re xinrak'e-apo chuc'o'x re Jes'us tak xkaban re jun va'in, y ja yen re xinc'utun cha re Jes'us: Ajaf, ??anchique c'a re xtijacho avichin? 21 Tak re Pedro xinrutz'at, xuc'utuj cha re Jes'us: Ajaf, y reja' ??andex c'a xtuc'alvachij? xcha' cha re Jes'us. 22 Y re Jes'us xubij cha re Pedro: Vo xa ninjo' che reja' c'a c'as tak xquimpa chic jun bey, man jun ndoc-va che jare' re nanojij. Re ruc'amon che naban rat, ja re catzake' chuij, xcha' re Jes'us cha. 23 Re jun tzij re xubij re Jes'us, can xtamax c'a coma re hermanos. Y re hermanos xquinojij che yen cama-va xquincom-ta. Pero re xubij re Jes'us xa man quire-ta ndel-va che tzij, roma reja' xa xubij: Vo xa ninjo' che reja' c'a c'as tak xquimpa chic jun bey, man jun ndoc-va che jare' re nanojij, xcho'x re Pedro. 24 Y ja yen re disc'ipulo re xintz'iban ronojel re c'o chupan re jun libro re'. Yex itaman che katzij ronojel re nimbij chupan re libro re', roma yen can xintz'at ronojel. 25 Y c'a c'o q'uiy samaj re xe'rubanala' re Ajaf Jes'us re man je'ntz'iban-ta can chupan re libro re'. Roma vo xa can-ta che ja'jun re samaj xe'rubanala' re Jes'us ye'tz'ibas, ninojij yen che re ruch'ulef man nuban-ta chin ye'yac ronojel re libros re anche' xe'tz'ibas-va re samaj re', roma camas-ta q'uiy libros re xe'tz'ibas can. Am'en.