1

Mark Sizi yanagwetilhnɨg. John deni ˀigwedetilhˀin, Sizi heyash gwech´an danh hadaghini.

1 Su ˀech´an Gudinits´ilˀin beyi Sizi Kri su taˀanaŝt´in banagwetasnɨg. 2 Yedanx danh Isaiah ts´edaghini Gudinits´ilˀin ya deni tuwh xagwelnɨg, ˀeyen destl´es gwech´edeˀezjez gwech´ed nenduwh gagwedinh: "Gudinits´ilˀin nenduwh gadinh: ´Sech´an ˀinlhanx denituwh xaŵeya gweqa gwetl´atastilh, ˀeyen gangu sutsel sa ˀeten xengwedilagh gatanilh.´" 3 "ˀEyen sa tintex ˀegun bejeni bid denilh yatalhtig, Tayalh ˀeyen bedud xenduht´i, gangu ba ˀeten tŝ´idaneŝ gwezelhtsin gaŵehnax.´" 4-6 John deni tubiˀalhˀinsh ˀeyen hayelhdaghini tintes niyah ˀegun tubiˀagubelhˀinsh. ˀEyen guyi nulh camel ts´edinh begha tŝ´eẑtl´on ˀeyi ts´enz yedit´in. ˀEyi bech´ed si ˀeqelh betl´ah jiŝelhcheẑ. Gunlht´osh xutih yelhtsish gant´i belh tsanlhch´inh dzanh yet´ad denilin. Nenduwh gagubelhdenish, Tubiˀanexwets´etalilh hink´ed ˀanananentaht´anx gwech´an nadeẑehyah gagwetat´ilh ˀegu Gudinits´ilˀin guntsen nexwanagwetaˀalh. Deni lhan niyax nen Judea belh qwentex Jerusalem ts´egwedinh xajaghindil. Nenduwh ˀananajenentat´insh ˀeguh Gudinits´ilˀin ts´en xenajegwalnɨg, hink´an niyax yeqox Jordan ts´egwedinh ˀeyed tubiˀagubinlagh. 7 John nenduwh gagubelhnih, "K´adex deni ˀinlhanx sech´a guˀen jid bets´enz nagwedint´i ˀeyen xatayalh. Lha guyax ˀaŝjagh beqitl´ul ch´inadesˀed chuh gwech´ih hestan hast´ih. 8 Sid ˀeguh gan tubiˀanexwesˀinsh gan xeded ˀeguh nadughunt´i gweqa Gudinits´ilˀin bets´enz gunzun nexwetl´axetaˀalh, " gubelhnih.

John Sizi tubiˀayinlagh hink´an Lejab Sizi Gudinits´ilˀin ch´an naduyax qaˀayaghinlhˀin.

9 John nenduwh gat´in ˀegu Sizi nen Galilee qwentex Nazareth ts´egwedinh ˀegwenz xaghinyah. John ˀeyed Jordan yeqox tubiˀayinlagh. 10 Tu xanaghedalh su gughad yat´ax ˀelhch´egwenindlad, ˀegwenz Gudinits´ilˀin bets´enz gangu nulh lhek´el lant´ih gudes xaghet´i, Sizi yenɨghet´i ts´egwenaghilhˀin. 11 ˀEyed hink´an gudes jeni nenduwh gagwedinh, "Nin seyi gunchagh jid nunest´in. Nanisni hast´ih." 12 Nenk´eyed danh Gudinits´ilˀin bets´enz niyax tintex ˀegun tuya qaˀayinlagh. 13 Diny ˀelhch´aẑnan dzin tintes ŝedah, nulh dzanh beghex nalhˀas, ˀegu Lejab ts´edinh, Sizi, Gudinits´ilˀin ch´an naduyax qaˀayaghinlhˀin. Ch´iz ts´egwediẑin gwech´ez liẑanŝ jeyaxaghintan. 14 John nendats´enilht´i ch´iz, Sizi nen Galilee nanjah, ˀEyed Gudinits´ilˀin yanagwalnɨg. 15 Nenduwh gadinh, "Gudinits´ilˀin nexwaˀanadeni ˀeguh nenk´etsel gatŝ´in ˀegweyenentaẑinlh. ˀanananentaht´anx gwech´an nadeẑehdil hink´an Gudinits´ilˀin gwaˀanadeni ˀeyed gwet´ayenuhtan."

Sizi deni diny Ihuy qa ˀajedet´in ˀeyen guqajaghini.

16 ˀEguh ch´iz Sizi, biny Galilee ts´egwedinh tabanx gheyalh. ˀEgu ˀelhcheliqi Simon belh Andrew guts´edinh ˀeyen lhaghembinlh tanajelhdɨlh ˀeguh jid lhuy qaˀajedet´in gubinlhtŝan. 17 Sizi gubeghen nininyah hink´an gagubelhnih, "Nenjan guˀen selhnaŵahˀas. Gangu lhuy qaˀaht´in ch´ih sa deni qaˀaht´in nexusilh." 18 Nenk´eyed belh gulaghembinlh deni ˀeyun ts´en jaghetilax hink´an Sizi belh jaghetiẑnan. 19 Lha niẑex jaghinal ˀegu Zebedee beyiqi James belh John guts´edinh ˀeyen ts´ibid jeẑqih gulaghembinlh saˀanajelax gubinlhtŝan. 20 Gubeghen nininyah nenk´eyed danh ˀeyen chuh, "Nenjan guˀen selhnaŵahˀas, " gubelhnih. Nenk´eyed belh ts´i bixajaghinˀaz hink´an Sizi belh jaghetiẑnan. Guta Zebedee belh jeyenadat´in ˀeyen ts´ibid jedilhtŝ´ih jeyaxetiẑnan.

Deni ˀinlhanx nentsen ˀanayeli.

21 Hink´an qwentex Capernaum ts´egwedinh ˀeyed jagheninan. Jews guba nats´etejish gwadzin ŝelin, gugun xents´agult´i qungh yedanx chets´aghiẑdil ˀeyed nendajagheninan hink´an Sizi ˀigubedetilhˀin. 22 ˀInlhes lha jid gwa xudughunlni guyah ˀeguh gagusun jeyaghinlhtɨg, lha Deni ˀijegwedelhˀanx yajaghinlhtɨg ˀeladinil gwech´ez lha banits´ilil. 23 Nenk´eguh danh deni ˀinlhanx nendaniyah ˀeyen nentsen ˀanayeli hink´an yaˀanadeni, ˀeyi jenidetiztsɨg, 24 "Sizi Nazareth gwet´in ninlin. Didah nexwets´en xuẑint´in? Ch´elenexwetaghanghanlh tesanent´in? Sid ˀeguh nasˀin! Nin Gudinits´ilˀin ba su ˀech´a ninzun ninlin hanint´ih, " nih. 25 Sizi nenduwh gadinh, "Lha tezinjiz chu bech´ananindash, " hadinih. 26 Nenk´eyed belh nentsen deni qwenjih naghinlht´i, delteẑ hink´an ˀelhch´edenog taˀat´in, gughelanz ch´alzel yixaghinqiẑ. 27 Gatŝ´in lha gwanijilil gwech´ez nelhjudelqɨg, "Xugwelt´in hagwet´in? Nenden ˀeyuwh hink´an lha jid gwa xudughunlni guyah ˀegun gagusun jid deni ˀigwedelhˀanx. Nentsen ˀeyi chuh jeyiniljed jeyedataˀanat´in." 28 Gagulhghen nen Galilee gagulhchugh jits´egwedinlhyan.

Sizi deni lhan dada guch´adaxilhchud; belhdan nentsen guch´adanizud.

29 Xents´agult´i qungh tinajaghindan ch´iz James belh John ˀeyen Simon belh Andrew guqungh ˀeyed gulh ts´enindil. 30 Simon bets´eyan yilin ˀeyen denidah, gunchagh jid baxaghinŝil, taŝ ŝetin ˀegu Sizi gwajeyelhgwalnɨg. 31 Sizi yeghen nininyah, yela hinlhchud hink´an ninayedinlhtin. Nenk´eyed belh seˀanajagh. Nenk´egun guba nadetilhni. 32 ˀEguh xelhyiz sa guxiˀan ch´iz deni jedenidah gatŝ´in belh nentsen ˀanagubeli ˀeyen Sizi bets´en guts´enilah. 33 ˀEyed qwentex deni gatŝ´in Simon bequngh nendeten chejaghiẑdil. 34 ˀEgu jelan dada ˀelhaghˀeyuwh taˀadant´i junten ˀeyi guch´adaxilhchud hink´an nentsen gatŝ´i guch´adanizud. Nentsen Sizi jeyaˀin gwech´ez lha yajulhtɨg qaˀagubilil.

Sizi nen Galilee gagulhchugh naŝiyah.

35 ˀEguh ˀegwilhqan lha yelhqex danh Sizi nidinyah hink´an qwentex gweˀanwh tintuwh ˀegun ninyah; ˀeyed xents´agutilht´i. 36 Simon hink´an tes gubit´in ˀeyen jeyeqanentiẑtan. 37 Najeyinlhtin hink´an gajeyelhnih, "Jelan ˀeyen nenqajenetah!" 38 Gan gagubelhnih, "Qwentex ˀets´en gwelex gwetuwh denilh yatastɨg gweqa ˀegun naghudilh. Lha nenjan dzanh hilih gweqa nendin niyah has." 39 ˀEgu gugun nen Galilee ˀegun xents´agult´i qungh gwelex gagulhan najeẑdil. ˀEyed denilh yalhtɨsh hink´an nentsen deni ˀixadanizud.

Sizi deni Hnlhanx beneŝ xadatlax ˀeyen saˀanayinlagh.

40 Deni ˀinlhanx beneŝ xadatlax jid dada xunten ˀeyen niyah. ˀEyen Sizi yenadas natŝilegwedilyah nenduwh gadinh, "Guẑint´in hink´ed sayaˀananenjagh saˀanasughunlax." 41 Sizi yayeˀajagh, yets´en chidilhni yixedaghinax hink´an nenduwh gayelhnih, "Saˀanaghundanx guzest´in." 42 Gagulhghen dada yech´axilchud. Nenk´eguh danh seˀanajagh. 43 Sizi ˀeyed guˀen gwetl´ayelhtish nayeneˀen jid gayelhnih, 44 "Lha deni ˀinlhanx galheẑinih. Gan yaŝalhtɨg bixedenughunlˀin. Yedanx danh Moses ts´edaghini nexwanigughenilah ˀeguh gaghunax. ˀEguh ch´iz deni gatŝ´in gubixedenaghinlˀin ˀeguh jid saˀananenjagh ˀegwets´eyenuẑin." 45 ˀEyed lha gudilhanl gan nenduwh gheyalh ˀeguh deni gatŝ´in belh nagwalnɨg, gwech´ez Sizi lha jid gutuwh naŵeya guyah yelhtsin. Lha natŝ´eŝdilh ˀeguh denilin. ˀEguh chuh ˀelhts´enz xadats´edilh bets´en ts´enindil.

2

Sizi deni ˀinlhanx lha jid beneŝ naxulhnangh guyah ˀeyen seˀanayinlagh.

1 Lha ˀagulhah dzin ghili Sizi qwentex Capernaum bequngh nanjah bits´egwedilhyan. 2 ˀEyed deni lhan jeyets´enindil, qungh jiz belh ts´egwediẑben. Nendeten chuh ˀelhqats´edenindil, guˀanwh chuh deni ganlhan. ˀEguh chuh Gudinits´ilˀin bejeni gwa gubelh yaghinlhtɨg. 3 ˀEgu deni diny, deni ˀinlhanx lha jid beneŝ naxulhnangh guyah ˀeyen jeyets´en jeyalhtilh. 4 Hink´an lha jid nendajeyeŵelhtilh guyal. Gwechugh deni lhan nendeten nendajedenindil gwech´ez gudish benched tejeẑdil ˀeyed bench´ed xajegwedaghinlah ˀegun guyen lha jid beneŝ naxulhnangh guyah ˀeyen betaŝ belh guyax Sizi yenadas gwet´ajeyaghinlhbal. 5 Sizi xugunlhched jid jeyudidlan ˀeguyeniẑin. ˀEgu deni lha jid beneŝ naxulhnangh guyah ˀeyen gayelhnih, "ˀEtinelˀin tsinsh ˀanananentaghint´ish nanats´egughetiẑˀan." 6 Nenk´eyed belh Deni ˀijegwedelhˀanx belhdan gweghex jedilhtŝ´ih ˀeyen nenduwh gajeyeniẑen: 7 "Nenden xugunlht´i gweqa Gudinits´ilˀin yech´an yalhtɨg hadinh? Lha ˀinlhanx ˀananats´enentiŝt´in deni ghanagughetuˀash guyah. Gudinits´ilˀin nenk´eyen dzanh gat´insh hagunt´ih." 8 Nenk´eguh danh Sizi xujeyenelẑen ˀeguh guch´inighiẑed gwech´ez nenduwh gagubelhnih, "Xugunlht´i gweqa nenduwh gayenehẑen haht´ih? 9 Nenden bets´en nenduwh gagwelˀiny jid galhetasnilh, ˀanananentaghint´insh nanagughetasˀalh, k´es, Nidinyash, nentaŝ nachexinlhnish k´an ghinyalh lhetasnilh tesanh? 10 Nenjan nench´ed Deni gudes xaghinyah ˀeyen ˀananats´enentat´insh deni ghanagugheteˀash gweˀanadeni ˀegweyenuhŝin..." gubelhnih. Guyen deni beneŝ lha jid naxulhnagh guyah ˀeyen gayelhnih, 11 "Nidinyash! Nentaŝ nachexinlhnish k´an qungh natughunja!" 12 Nenk´eguh danh nidinyah. Gwanini betaŝ nachexinlhni, deni nalh tinanjah gwech´ez deni gatŝ´in lha gwanijilil. Gudinits´ilˀin jeyedilhti jid nenduwh gajedinh, "Lha ˀinlhed gagunt´ih gwenilˀin haghit´i!" 13 Sizi tinanjah hink´an shunchuwh gugun biny tabanx ˀegun nanjah. ˀEyed deni lhan jeyets´enindil. Nenk´eyed danh ˀigubedetilhˀin. 14 ˀEguh gheyalh ˀegu Alphaeus beyi Levi ts´edinh ˀeyen seneya taks chets´aghenedzɨsh qungh seneya chexenedzash gweqa ˀeyed ŝedah yinlhtŝan belh gayelhnih, "Selhtughunya!" Nenk´eyed danh nidinyah yelhtizah.

Sizi ˀananajenentat´insh ˀeyen dzanh guqajenish.

15 Sizi belh jeyelhnadilh, Levi bequngh ˀeyed nejedan. Deni lhaˀalhah jeyenadelh belhdan seneya chejaghenedzɨsh gwaˀanajedeni, ˀeyen belh gwaghex jid jadelh ˀeyen chuh denilh nejedan. 16 Pharisee jilin Deni ˀijegwedelhˀanx ˀeyen Sizi deni gadajint´en belhneˀedan jeyinlhtŝan, ˀeyed gweqa Sizi jeyelhnadilh ˀeyen guts´udilhqed, "Dideqa deni gadajint´en gulh neˀedan han?" 17 Sizi gubedeẑtŝ´an hink´an nenduwh gagubelhnih, "Deni lha dada jilih ˀeyen lha daxdah jutaŝt´in hajint´ih gan deni jedenidah dzanh daxdah jutat´in hajint´ih. Lha guyen deni tŝ´idaneŝ jadelh jaghedijeyenedẑen qajezesnish, gan ˀananajenentat´insh ˀeyen guqajesnish has."

Sizi jeyelhnadilh ˀeyen xugulhyad lha ˀejetaŝinlh ˀeguh gagubelhnih?

18 Deni belhdan Sizi jeyets´enindil hink´an nenduwh gajedinh jeyudilhqed, "John jeyelhnaŝedil ˀeyen belh Pharisee jeyelhnadilh ˀeyen xenchuh lha did chuh jeŝan jegughilhˀan, Xulht´i jid nin nelh najedilh ˀeyen lha gajeŝt´in?" 19 Sizi gagubelhnih, "Deni ˀinlhanx tŝ´iqi belh tubiˀatanilh gweqa jeyets´enindil, ˀeyen gutuwh xayah danh xulht´i jid lha did chuh jetaŝinlh? Gutuwh xayah danh jetanax hajint´ih. 20 ˀInlhetah dzin guyen deni tubiˀatanilh ˀeyen gubanatadalh, ˀeguh ch´iz hink´an lha did chuh jetaŝinlh hajint´ih. 21 Lha ˀinlhanx, ˀinats´elhqɨg k´an ˀeyi, lha nats´etelhtsad chu ts´enzjed ch´ed jinats´ebedenentalhqalh. Gats´ejagh hink´ed ˀinats´elhqɨg k´an ˀeyi natilhtsad, ts´enzjed guˀen jid tadlelh. 22 Lha ˀinlhanx ˀeẑeẑjed, tu nentsen bits´enɨlh helin gant´i ˀeyi, lha jid tu nentsen k´an binats´unilh guyah hagunt´i. ˀEyed gats´ejagh hink´ed ˀelhch´enentadlelh han, ˀeguh ˀanilht´id tatsanx. Tu nentsen k´an, ˀeẑeẑ k´an bits´eghinel ˀeguh sink´an seˀagwetat´ilh."

Nats´etejɨsh gwadzin nendideqa gats´egunlagh?

23 Jews guba nats´etejɨsh gwadzin ŝelin, Sizi belh jeyelhnadilh ˀeyen tl´ech´ed gwets´enaghindzay gwedenilhyan ˀeguh gwek´abah jeghanalh. Jeyelhnadilh ˀeyen tl´ugh betelhangh gwadenenindzay ˀeyi jeyenez sajeyelgwɨsh jeghanalh. 24 ˀEgu Pharisee gulhts´edinh ˀeyen Sizi gajeyelhnih, "Dideqa guyen nats´etejɨsh gwadzin lha gajetaŝt´inlh jid gwetŝ´enẑ gulih ˀeguh gajet´in?" 25 Gagubelhnih, "Yedanx danh David ts´edaghini belh jelan jeyixudinten ˀeyen gwetuwh jeguŝt´in hink´an guchanyaguẑun, xujelhyad ˀeguh lha gwech´eyaŝelhtɨg teladehnih? 26 Abiathar ts´edaghini Jews guba yaŝalhtɨg ˀaghendes helin ˀegwedanh, David Gudinits´ilˀin bats´elhben ˀegun nendaniyah, lhiz, Jews guba yaŝalhtɨg dzanh jeyeyinsh jigwetŝ´enẑ ˀeyi yaghiyan hink´an ˀeyi belhdan jelan yixudinten ˀeyen chuh gutexayeẑni." 27 Gughelanz gagubelhnih, "Nats´etejɨsh gwadzin ˀeguh deni gha gats´egunlagh hagunt´ih. Deni ˀeyen lha nats´etejɨsh gwadzin gwaˀaguts´ilil. 28 Deni gudes xaghinyah nesdlin ˀeyen dzanh nats´etejɨsh gwadzin ˀeyed chuh gwaˀanadeni hant´ih ˀegweyenuŝin."

3

Nats´etejɨsh gwadzin Sizi deni saˀanalagh.

1 Sizi shunchuwh Jews guba xents´agult´i qungh nendaniyah. ˀEyed deni bela ch´eŝ lha jid naxulhnagh guyah ˀeyen chuh ˀeyed nayah. 2 Jews guba nats´etejɨsh gwadzin deni saˀanaŵelax gweqa deni belhdan sutsel Sizi jeyaxiẑtan. Gajagh hink´ed nats´etejɨsh gwadzin ˀanat´in jeyagulnɨg jeyeniẑen. 3 Sizi guyen deni bela ch´eŝ lha jid naxulhnagh guyah ˀeyen nenduwh gayelhnih, "Nidinyash k´an deni gatŝ´in nadas nininyash." 4 Nenduwh gagubelhnih, "Nats´etejɨsh gwadzin nenduwh telah tŝ´idaneŝ, guzun k´es guntsen taˀanats´etat´in, deni ts´etalhyɨsh k´es ch´ats´edetalilh?" Lha jeyets´enztijish. 5 Sizi xenilch´agh jid gutuwh yetaghinˀin. Gutŝi denaghintŝ´i gwaneŝ guba bedzi deniŝdagh. Guyen deni bela ch´eŝ lha jid naxulhnagh guyah ˀeyen nenduwh gayelhnih, "Chideẑinlnish!" Chidilhni danh bela saˀanajagh. 6 ˀEguh ch´iz Pharisee ˀeyen tinajaghindan. Herod gubixudinten ˀeyen belh ˀelhijaghindil hink´an Sizi ch´ajeyedulax gweqa jegughetiẑˀan.

Deni lhan Sizi jeyech´ih tiẑdil.

7 Sizi belh jeyelhnadilh biny gwets´en najendil. Hink´an deni lhan nen Galilee xadajeẑdil ˀeyen chuh jeyech´ih tiẑdil. 8 Xughelt´in ˀeguh bits´egwedilhyan gwech´ez nen Judea hink´an qwentex Jerusalem, nen Idumea, nen yeqox Jordan gunez, qwentex Tyre belh Sidon ts´egwedinh gweghex, ˀegwenz deni lhan xadaŝedil. 9 Gwechugh deni lhan jeyets´enindil gwech´ez jeyelhnadilh ˀeyen gagubelhnih, Deni lhan sixuŵedilh ch´a ts´i saxenduŝin. (Gughaguẑlid ˀeguh su gajejagh.) 10 Guyen jedenidah ˀeyen deni lhan dada guch´adaxilhchud jeyigwedilhyan gwech´ez gwechugh jeyixutiẑdil hink´an jeyixeduŵenax qaˀajet´in. 11 Deni belhdan nentsen ˀanagubeli ˀinlhanx-liny Sizi jeyulhtŝ´ɨg belh jeyiniljed gwech´ez jeyenadas guyax jedigwen tajaghedetelẑɨg. Nenk´eyed belh nenduwh gajedinh jenijeditsɨg, "Nin Gudinits´ilˀin beyi ninlin hanint´ih." 12 ˀEyed gwech´ez gagubelhnih, "ˀInlhes lha nendan hast´ih gadeẑehnih."

Sizi deni ˀelhch´ aẑnan guˀen nandih denitex xagubaghinlah.

13-15 ˀEguh ch´iz Sizi niyax dilhgwenlh tuwh gwets´en niyah hink´an nendan gubuŝt´in ˀeyen denitex xagubaghinlah, ˀeyen jeyets´enindil, ˀelhch´aẑnan guˀen nandinh jelt´ih. ˀEyen jeyelhdenitalilh, ch´iz Gudinits´ilˀin bedanajegwetalnɨg gweqa nen gagulhchugh gwetl´agubetalilh; hink´an nentsen deni ˀixadajeniyud guts´enz ts´egwetalhtsilh. 16-19 ˀElhch´aẑnan guˀen nandinh jelt´ih ˀetex xagubaghinlah ˀeyen nenduwh gaguts´edinh: Simon ˀeyen Peter jid nayusdzin. Zebedee beyiqi James belh John, ˀeyen "ˀIndiny Beyiqi" jid nagebusdzin. Andrew, Philip, Bartholomew, Matthew, Thomas, Alphaeus beyi James, Thaddaeus, Simon ˀeyen Zealot gulhts´edinh gubixudaghinten. Judas Iscariot ˀeyen gwech´iz Sizi yech´an ninadinjah.

Deni ˀijegwedelhˀanx Sizi yech´an ˀajedinh gweqa Sizi gulh yaghinlhtɨg.

20 ˀEguh ch´iz Sizi qungh ˀananjah. ˀEyed shunchuwh deni lhan jeyandanindil gwech´ez jeyelhnadilh ˀeyen gulh lha jid nejudan guyal. 21 Sizi belhtesiqi xult´in ˀeguh jeyigwedinlhyan."Lha gunih hat´in, " jedinh jeyeqanatiŝdil. 22 Deni ˀijegwedelhˀanx qwentex Jerusalem xajeghindil ˀeyen gajedinh, "Nenguyen nentsen Lejab ˀanayeli hink´an yaˀanadeni. Yeghad ˀanat´in, nentsen ghaˀanadeni chuh ˀant´ih ˀeyi beghad nentsen deni ch´adaneyud han." 23 ˀEyed gweqa Sizi guqajaghini hink´an gwech´inijuẑid jid gulh nagwetilhnɨg, "Xulht´i jid nentsen Lejab xeded tixedenuŵejud? 24 Nen ˀinlhed ˀelhelh jedilhtŝ´ɨsh ˀeyen ˀelhch´an ˀajededinh jeẑlin hink´ed xulht´i guzun jid denijetalilh hajint´ih? 25 Qungh ˀinlhed ˀelhelh ts´edilhtŝ´ɨsh ˀeyen ˀelhijedelnax hink´ed xulht´i guzun jid ˀelhelh jedetaltŝ´ilh hajint´ih? 26 ˀEyed gangu Lejab xedaˀets´en ˀanadedinsh gagunt´ih xungh. 27 Nenduwh chuh gagunt´ih xungh, Xulht´i jid deni nadint´i ˀeyen bequngh nendats´enintsed hink´an bets´enz tits´etalilh? Deni nadint´i ˀeyen ts´elhghil sink´an gats´unax. 28 Sid ˀinlhes tŝ´idaneŝ jid ganexwelhdetasnilh, ˀananats´enentat´insh gatŝ´i belh Gudinits´ilˀin ts´en guntsen ˀats´edinh ˀeyi deni ghanats´egughetaˀalh. 29 Gan nendan Gudinits´ilˀin bets´enz gunzun xagwedaghiˀah ˀeyi bets´en ˀaghelangh gwedetsen jid jeyech´an ˀajedinh hink´ed lha jid gubanats´egughetuˀalh guyah hajint´ih; gan ˀeyi gagulhnaẑ gubelh gatat´ilh hagunt´ih." 30 "Nentsen ts´enz bid ˀanat´in, " jedinh gwech´ez hagubelhdaghini.

Nendan hanh, Sizi belhtesiqi hajint´ih?

31 ˀEgu Sizi beˀinkwel belh becheliqi jenindil. ˀEyed yaˀanxw najedilhyah, Sizi naxuẑit´in jedinh bets´en jeni gwetl´ajaghiˀan. 32 Deni lhan jeyeghex najedilhtŝ´ih ˀeyen gajeyelhnih, "Neˀinkwel belh nencheliqi guˀanwh najedilhyah, nenjuŝt´in." 33 Sizi gagubelhnih, "Nendan hanh seˀinkwel belh secheliqi hajint´ih ganexwelhusni." 34 Hink´an jeyeghex najedilhtŝ´ih ˀeyen gutuwh niˀiz hink´an nenduwh gadinh, "Nenduwh hinla seˀinkwel belh secheliqi gajint´ih. 35 Nendan Gudinits´ilˀin yedataˀanat´in ˀeyen sechel belh sediz belh seˀinkwel hajint´ih."

4

Sizi nagwedɨng bech´initŝ´eẑig gant´i bid denilh nagwelnɨg.

1 Sizi shunchuwh ˀinlhed biny tabanx deni lhan ˀigubedetilhˀin. ˀInlhes gwechugh deni lhan ba nanalẑul gwech´ez ts´i bitl´adadah, nilhdil niŝeqin, deni gatŝ´in ˀeyen biny tabanx nitl´ajediltŝ´ih. 2 Lhaˀagulhah jigubedelhˀanx ˀeyi nagwedɨng bech´initŝ´eẑig gant´i bid gulh nagwetilhnɨg. 3 "ˀUẑuŵelhtŝ´an! Deni ˀinlhanx gwenentadzɨsh gweqa tl´ech´eyah. 4 ˀEguh yenentaghindzish belhdan ˀeten nanaghinguy, ˀeyi nulh xaghindil ts´elejegwelhdil. 5 Belhdan gweltŝi lha gwechugh lhiz gulih ˀeguh nanaghinguy gwech´ez gagulhghen xanaghilhyan. 6 ˀEyi hink´an lha beghed dineŝ gwech´ez sa bid ch´eleˀezts´el, ˀelhenaghelgen. 7 Belhdan xwes tuwh nanaghinguy, ˀeyi gan xwes nen yaxagwent´an, bechen gweẑlin gan lha belangh tenigwɨsh. 8 Hink´an belhdan nen nezun ch´ed nanaghinguy. Bechen xanaghilhyan, ˀeyi bets´enz tad ˀelhch´aẑnan (30), belhdan ˀelhch´antay ˀelhch´aẑnan (60), hink´an belhdan ˀinlhed hunded (100) galhan ba teniẑguy." 9 Hink´an Sizi gadinh, "Nendan ˀedeẑtŝ´an ˀeyen gwech´ighaniŵeŝed."

Sizi nagwedɨng bech´initŝ´eẑig gant´i su xugweldinh ˀeguh jighanagubenilhtan.

10 Xeded belh guyen ˀelhch´aẑnan guˀen nandinh jelt´ih belh guyen bech´ih najenelẑulh belhdan ˀeyen gubanats´adil. Ch´iz nagwedɨng bech´initŝ´eẑig gant´i bid nagwalnɨg ˀeyi gwa jeyudilhqed. 11 ˀEguh hink´an gagubelhnih, "Gudinits´ilˀin xulht´i jid su ˀegun denits´uli guŝt´in ˀeguh deni ghagweˀinz gweẑˀan gwelagunt´ih, ˀeyi gangu nexwats´id nagughitŝid gasjagh. Gan nexwaguˀanxw deni ˀeyen nagwedɨng bech´initŝ´eẑig gant´i dzanh bid gulh nagwasnɨg. 12 ˀEyen gagulhnaẑ jegwenilhˀin gan lha xugunlht´ih ˀegwejeyeneŝanx, ˀelhch´iz ˀejuẑilhtŝ´an gan lha ˀegwejeyeneŝanx; gan jegughintan hink´ed, Gudinits´ilˀin ts´en najedizah chuˀajejagh hink´ed gubets´en tŝ´idaneŝ nats´egwetalhtsilh." 13 Sizi gubets´en gadinh, "Nendid nagwedɨng ˀeyi lha ˀegweyeneẑeŝanx hink´ed xulht´i jid nagwedɨng bech´initŝ´eẑig gant´i gatŝ´i ˀegweyenentaŝinlh haht´ih? 14 Gudinits´ilˀin bejeni denits´en ˀits´egughelhnih ˀeyed gangu deni nen gwenedzash gagunt´ih xungh. 15 Deni belhdan ˀeten gwech´ih nen gajint´ih. Gudinits´ilˀin bejeni gubits´egughilhni gan nenk´eyed belh Lejab, Gudinits´ilˀin bejeni gubech´axelchog. 16 Deni belhdan nen gweltŝi lha gwechugh lhiz gulih gajint´ih. Gudinits´ilˀin bejeni jedeẑtŝ´an, nenk´eyed belh gwajenini; 17 ˀEyen lha gubeghed dineŝ jid gubadanigwedẑed, ˀeyen lha sex ˀejegulil. Gudinits´ilˀin bejeni jegudidlan gwech´ez gubayats´elhtɨg hink´an gubants´etedlux, ˀeyed gwech´ez gagulhghen gwech´ajeltŝ´ɨg. 18 Belhdan ˀeyen xweschen tuwh nen gajint´ih. Gudinits´ilˀin bejeni jeditŝ´ɨnsh, 19 denijuli qaˀajet´in gan lha su ˀegun ˀagwaŝt´inlh, seneya jilyuẑ ˀeguh gagulhnaẑ jenentani jaghedijeyenedẑen, hink´an gwetuwh jegulyuẑ dzanh qaˀajet´in, gajint´ih gwech´ez lha gagulhtsel jid Gudinits´ilˀin bejeni ghadanijeŝed yajilin. 20 Belhdan ˀeyen nen nezun gajint´ih. Gudinits´ilˀin bejeni juẑaghilhtŝ´an, ˀeyed gwet´ajeyenintan, gwet´ad guts´enz guzun gwetalax, gangu tl´ugh belangh lhan teniẑguy ˀeguh jid gubadanɨgwetadẑed, belhdan ˀeyen gangu tad ˀelhch´aẑnan (30), ˀelhch´antay ˀelhch´aẑnan (60) hink´an belhdan ˀinlhed hunded (100) tesanh galhan jid gubets´enz guzun gwetalax."

Gudinits´ilˀin bejeni jeduŵelhti gweqa ˀigubedelhˀanx.

21 Nenduwh chuh gagubelhnih, "Guyi tlagh diẑk´en beqwen ˀeyi chuh Gudinits´ilˀin bejeni gant´ih, nats´edilhk´an qungh nendats´eninqan, gwetuwh bits´edenentalhgwɨsh tesanh k´es ch´edeŝtin yes nits´etaqalh, xulht´i taxeqash gwaˀagunt´i ˀeyed tets´uqalh. 22 Nendid ts´enentinlhˀiny ˀeyi ts´ulhtsax gweqa hat´ish. Hink´an nendid gweˀinz helin ˀeyi ts´id ts´ulhtsilh gweqa hat´ish. 23 Nendan ˀedeẑtŝ´an ˀeyen gwech´ighaniŵeŝed." 24 "Nenduwh gwedeẑehtŝ´an sutsel gwadaniŵehŝed. Gagulhtsel jid ŝuẑilhtŝ´an nenk´eguh gagulhtsel jid gwech´ih taˀanant´in nenk´eguh gagulhtsel jid nelhˀagwetanilh. Guˀen jid ŝuẑilhtŝ´an gwech´ih taˀanant´in, guˀen jid nelh ˀagwetanilh. 25 Nendan gwetuwh gut´in ˀeyi yid ˀanat´in hink´ed guˀen jid lhan betl´ats´etalilh. Nendan yit´in lha yid ˀanaŝt´in hink´ed nendid yit´in ˀeyi yinadetadinh."

Xulht´i jid Gudinits´ilˀin bejeni ˀigubedaghilhˀin?

26 Hink´an nenduwh gadinh, "Deni ˀinlhanx benen gwech´ed ˀenentaghindzɨsh gagunt´ih hagunt´i gugun Gudinits´ilˀin gwaˀanadeni ˀegun. 27 Guyenaghindzay ˀeyi ˀelhˀi netish hink´an ˀabenaneŝ nidiyash gughad xadadenelhˀas gwech´adadenelhyi, ˀeyed xulht´i gagwet´in chuh lha ˀegweyeniẑen. 28 Xedint´ah nen gha xanelhyish, bechen ŝid hink´an belangh tenegwɨsh ˀeyi bigwediltŝish, ˀegun ch´iniyish. 29 ˀEguh hink´an tŝ´edetat´eŝ gwanagughiẑed, ŝay ghetinlh tl´ech´eyash ˀeyi bid nagwedet´ɨsh." 30 Nenduwh chuh gagubelhnih, "Gudinits´ilˀin gwaˀanadeni xugunlht´ih ˀeguh; xugulht´i jid ganexwelhdetasnilh, k´es nagwedɨng bech´initŝ´eẑig gant´i xulht´i bid su nexwelh gwetasnɨg? 31 Meŝded guts´enedzish gagunt´ih xungh; ˀeyi hah su ˀech´a nintsel guts´enedzɨsh hagunt´ih; 32 ˀeyi guts´enaghindzay hink´an ch´idenenilhyan hink´ed, niẑt´an yaz ˀeyuwh ghedex gatŝ´i ch´a dinaẑ helish. Began chen det´ux helish, ˀeyi beẑaqod gha nulh yetex xedeldɨlh." 33 Lha jid guˀen jid gubini ˀigwedutl´id guyah gwets´en nagwedɨng bech´initŝ´eẑig gadant´i ˀelhidalt´ih hilin bid gulh nagwalnɨg;34 nagwedɨng bech´initŝ´eẑig gant´i dzanh bid gubelh nagwelnɨg, gan guyen jeyelhnadilh ˀeyen jadint´ah sul jighanagubeneltinsh.

Sizi nilhts´i naxedaghinlht´i.

35 ˀEguh dzin xelhyiz Sizi jeyelhnadilh guts´en gadinh, "Gunan neghaghuqi." 36 Deni lhan tabanx najedilhyah nenk´egun gajint´ih; ts´ibid ŝedah nenk´egun gant´ih jeyajighindil, gwech´a jeninqin. Deni ˀeyun belhdan ts´i ˀeyuy bid guch´ih gwech´a dajeẑqin. 37 Taniz hilin najaghinqin ˀegu xentsel gunchagh jid gulh taghints´ɨsh, tadetinsh gwech´ez gubets´i bitaneqed, gulh ts´i detiẑben gwech´ez najaghenentiŝdil. 38 Sizi ˀeyen guniz tŝiˀalh ch´ed tenilhˀan belheẑilhghin. Ch´inajeyeneneyud hink´an gajeyelhnih, "Sizi, ch´eleẑiggan ˀeguh chuh nents´en lha ˀelhaghˀeyuwh hilih telanint´ih?" 39 Gubeda nidinyah belh nilhts´i ˀeyi gwechugh jelh yaghinlhtɨg hink´an tadetinsh ts´en gadinh, "Lha tezinjiz! Naxedilt´ax!" Nenk´eyed belh nilhts´i naxedalt´i hink´an taqay nagwediggil! 40 ˀEguh hink´an guts´en gadinh, "Dideqa neẑelhjud haht´ih? Shunk´ah lha Gudinits´ilˀin bet´ayenehtan gwech´ez telaneht´ih?" 41 ˀInlhes jenilhjud hink´an nenduwh gajedinh nelhjudelqed, "Nenden deni xunlht´en hant´ih? Nilhts´i belh tadetinsh ˀeyi hinchuh yedataˀanat´in!"

5

Sizi deni ˀeyen nentsen lhan ˀeyi yixadanizud.

1 ˀEyed biny gunan Gadarene nenz gwets´en naghajeninqin. 2 ˀEyed deni ˀinlhanx nentsen ˀanayeli ˀeyen tŝ´iny gwetŝ´enẑ xaghinyah, gugun neghats´enindil ˀegun gwech´aniyah. 3 Nenden deni tŝ´iny denilin, hink´an lha ts´elhghil ˀegun gaŵet´i gulih. Chain chuh lha jid yuŵeten guyah. 4 Gwelan bela chain bid ts´elhghilh hink´an satsan batish chain jidzanint´i beqichench´ih jits´edilish. ˀEguh chuh chain ˀelhtexaginsh hink´an satsan ˀelhtexalhqɨg. Lha ˀinlhanx ˀinlhes yetalhcholh gwasaˀanadilt´i. 5 Dzindi hink´an teẑ dilhgwenlh tuwh hink´an tŝ´iny tuwh ˀegun xazɨlh hink´an tŝi dinin bid beneŝ ch´adagweggans. 6 ˀEyen niẑaẑ danh Sizi yulhtŝ´id belh yets´en ˀinlhes nilgay nenk´egun yenadas betŝigwed binaghetled. 7-8 Sizi gayelhnih, ´Nentsen ninlin nenden deni bech´ananindash." ˀEyed gwech´ez Sizi yets´en nenduwh gadinh jenidaghintsɨg, "Didah sets´en xuẑint´in? Sizi, Gudinits´ilˀin su ˀech´a yadi helin ˀeyen beyi ninlin hanint´ih. Nenta ts´en lha jinaŝeneẑughulhtanx dughuni." 9 ˀEguh hink´an Sizi yudilhqed, "Xunelhts´edinh hany?" Nenduwh gadinh, "Nidlan gwech´ez Legion selhts´edinh hast´ih." 10 ˀElhch´iz Sizi yets´en ˀetidedlih jid nenduwh gadinh, "Lha ˀets´en nexwenenteẑiyud." 11 Lha gwech´a diẑad ˀeyed gwenen gesugh lhan nagwedeldilh. 12 Guyen nentsen, "Gesugh nɨghudilh gweqa gesugh tuwh nexwidilghalh, " jedinh Sizi bets´en ˀetijededlih. 13 ˀEguh gajunax qaˀagubinlagh, nentsen deni ˀixajaghindil hink´an gesugh ˀinlhed tawzen nad ganilt´ɨsh galhan ˀidanajeŝdil. Nenk´eyed belh biny gwets´en gwedlen gwenixeninan ˀegun tis xeninan, nenk´egun tu gubaghighan. 14 Guyen gesugh ghajaghiẑtan ˀeyen gwatŝijaghetilhnan hink´an qwentuwh belh nen gweghex ts´edilhtŝ´ɨsh ˀeguh nenduwh xugulhyad ˀeguh gwanajegwalnɨg. Hink´an jijegwedilhyan ˀeyen jegwenuŵelhˀin jeyeniẑen gweqa ˀegun jenindil. 15 Sizi jeyanaghindil, guyen deni nentsen Legion ˀanajeyeẑlin ˀeyen ts´enz ˀiŝedah hink´an lha bini xulht´ɨh chu ŝedah jeyinlhtŝan, jeyinilhjud. 16 Guyen xugwalt´in jegwenaghinlhˀin ˀeyen guyen deni nentsen ˀanayeẑlin ˀeyen xuts´ilhad gwanajegwalnɨg; xulht´i gesugh taxaghinan ˀeyed chuh gwanajegwalnɨg. 17 ˀEyed gwech´ez deni chejaghiẑdil ˀeyen gajedinh, "Sizi, nexweduˀaghunax, nexwenen jixanaghunja." 18 Sizi ts´ibi natisdzah ˀegu guyen nentsen ˀanayeẑlin ˀeyen "Nexwelh tusˀas, " yelhdetiẑni. 19 Sizi lha yech´a gut´in gan gayelhnih, "Nenqungh nendaqi ts´en natuŵunjah, ˀeyen xugulhched jid Sizi nelhˀajagh, ˀinlhes gunchagh jid nenchanats´elyagh gwanagughulnɨg." 20 ˀEgu nen Decapolis ts´egwedinh ts´edilhtŝ´ɨsh lhaˀagulha gwetuwh denilh xulht´i jid Sizi yelhˀajagh ˀeguh gwanagwelnɨg helgay, deni gatŝ´in lha gwanijilil. ˀInlhed dzin Sizi tŝ´iqi nandih saˀanagubinlagh. 21 Sizi ˀeyed biny ch´ih neghanajenqin, ˀeyed tabanx deni lhan beghex chejaghiẑdil. 22 Deni ˀinlhanx xents´agult´i qungh gwaˀanadeni Jairus ts´edinh ˀeyen chuh ˀeyed niyah. Sizi yinlhtŝan belh yenadas guyax digwen taxedetilhtŝ´ed, 23 hink´an ˀatidedlih jid gadinh, "Seyats´i nenk´etsel ch´adanilh. Selhnaghint´es, saˀanaghunlax, deniŵeli gweqa bech´idughunlnish." 24 Nenk´eyed belh Sizi yelhnatist´az. Deni lhan belh nentilhẑul, jeyixunax taˀajet´in jeghanalh. 25 ˀEgu tŝ´iqi denituwh ghelgɨsh ˀinlhanx ˀeyen ˀelhch´aẑnan guˀen nad xi gaguŝed tŝ´iqi nadzedlish gagunt´ih jid gwechugh del lhan beˀat´in jid dada helin. 26 Gunchagh jid gwadenildah. Seneya yit´in gatŝ´i nilhnan gwets´en daxdah lhan tuwh niyah, ˀeguh chuh lha saˀanadinl gan guˀen jid gwechugh ˀajagh. 27-28 Sizi yigwedilhyan belh gan bets´enz ˀixedaghinax hink´ed saˀanatadinlh yeniẑen gwech´ez deni lhan tuwh yet´ay nilgay, yets´enz ˀixedaghinax. 29 Nenk´eguh danh del baˀat´in nagughedalt´i hink´an lha gwadenildah jid xedinadiŝdinh. 30 Nenk´eguh danh Sizi, bid deni seˀanalhˀinsh belhdan bech´adeniẑed ˀegweyeniẑin. Deni lhan bech´ih ghedelh guts´en nadizah hink´an gebudetilhqed, "Nendan sets´enz ˀixedaghinax?" 31 Jeyelhnadilh ˀeyen gajeyelhnih, "Deni ganlhan nixudilh ˀegweyeniẑen ˀeguh chuh, ´Nendan sixedaghinax?´ dinih ˀudinlhqed." 32 ˀEguh chuh Sizi nendan hajagh sul ˀegweyenuẑin qaˀat´in. 33 Tŝ´iqi xeded xulhyad ˀeguh ˀegweyeniẑen gwech´ez yeghen nininyah nenk´egun yenadas guyax dig wen taxedetilhtŝ´ed, nilhjud gwech´ez diluteŝ. Dideqa yixedaghinax ˀeguh gagulhchugh ˀalhˀadinh jid yelh nagwalnɨg. 34 Sizi tŝ´iqi gayelhnih, "Set´ayenintan gwech´ez seˀananenjagh, lha gwech´iz banadenenteẑaghanldalh, nendzi nezun gwanini denighunli." 35 Sizi shunk´ah yalhtɨg gan deni belhdan Jairus ts´edinh xents´agult´i qungh gwaˀanadeni ˀeyen bequngh xats´aghindil. Gajedinh, "Nenyats´i yedanx ch´adejagh. Deni ˀigwedelhˀanx ˀeyen lha guˀen jid baniŝiẑid." 36 Sizi gajedinh ˀeguh lha xagubilhˀal. Gan guyen xents´agult´i qungh gwaˀanadeni ˀeyen gayelhnih, "Lha xagubinlhˀah, gan set´ayenintan." 37 Sizi lha deni ˀeyun belh tudilh ˀanil. Peter hink´an ˀelhcheliqi James belh John ˀeyen dzanh gubelh jaghetunalh guŝt´in. 38 Guyen xents´agult´i qungh gwaˀanadeni ˀeyen bequngh tats´ediŝdinh gwanajaghindil Ts´etsagh hink´an ts´ezel jid ts´etsagh taˀats´edinh. 39 Nendaniyah hink´an guts´en gadinh, "Dideqa ts´adenelhdil? Guyen ˀeŝqi lha ch´adinil gan belheẑilhghin han." 40 Gan jeyitidizˀin jid jeyantadluy. Gatŝ´in tigubeneniyud ch´iz, guyen ˀeŝqi tŝ´iqi beta belh beban belh guyen gubelhnindil ˀeyen, ˀeŝqi nents´in hant´ih ˀegun nendajenindil. 41 ˀEŝqi la hinlhchud hink´an yets´en gadinh, "Talɨsah kum!" (Aramaic ch´ih nenduwh gadinh hadaghini, "ˀEŝqi tŝ´iqi ganelhesnih, Nidinyash!") 42 Nenk´eyed danh nidinyah hink´an ˀeguh natilhgay. ˀElhch´aẑnan guˀen nad xi ghinda haghint´i. Nenduwh gagujagh gwa ˀinlhes gunchagh jid lha gwanijilil. 43 Nenduwh gagubelhnih, "Nenduwh gagujagh ˀeguh gwa ˀinlhes lha deni ˀinlhanx gubelh gweẑelhnɨg." Nenduwh chuh gagubelhnih, "Ts´eyan ˀinlhitah betl´axulhnish."

6

Sizi Nazareth niyah ˀeyed bedeŝniqi lha jeyudidlanl.

1 Sizi belh jeyelhnadilh ˀeyed gwech´anajendil ˀegun gugun qwentex nizan ˀeyed najendil. 2 Nats´etejɨsh gwadzin ŝelin, xents´agult´i qungh jiz deni ˀigwedetilhˀin, hink´an deni lhan xuldinh ˀeguh lha gwanijilil. Gwech´ez gaˀelhelhjededinh, "Nents´enz xagwedaghinˀan hadinh? ˀEsdiny gweched ˀegweyeniẑen, bets´enz nagwedint´i bid deni jedenidah saˀanalhˀinsh chuh ˀat´insh. 3 Gubadzed ˀats´edinh gwech´ez nenduwh chuh gajedinh, Nenden qungh ˀenagwelish ˀeyen telant´ih? Nenden Mary beyi hink´an becheliqi James belh Joses belh Judas belh Simon telant´ih? Bediziqi nexwetuwh jedilhtŝ´ih telajint´ih?" 4 Sizi guts´en gadinh, "Gudinits´ilˀin danajegwelnɨsh ˀeyen ganents´in gheyalh ˀeguh ts´edilhti, gan benenz nizan ˀeyed hink´an belhtesiqi tuwh hink´an belhghedex tuwh dzanh lha gats´iŝen." 5 Lha jid gutuwh Gudinits´ilˀin bets´enz nagwedint´i bid deni saˀanaŵelhˀinsh guyal, gan deni jedenidah lhalah dzanh ch´idilni jid saˀanagubinlagh. 6 Lha jeyudidlanl gwech´ez lha gubanilil.

Sizi, ˀelhch´aẑnan guˀen nandih ˀeyen, nandih jelt´ih ˀelhijudeten ˀelhanx gwetl´agubaghinlah.

ˀEyed qwentex jixanaghejah hink´an qwentex ˀeyuwh gwelex deni ˀigwedelhˀanx gwetuwh niyah. 7 Guyen ˀelhch´aẑnan guˀen nandinh jelt´ih jeyelhnadilh ˀeyen guqajaghinish. Nentsen deni ch´ajeneŵeyog gweqa nagwedint´i gubetl´ax ghinˀan hink´an nandih jelt´ih ˀelhijudeten ˀelhanx g wetl´ agubaghinlah. 8 Gwetl´agubelih nenduwh gajunax gubelhnih, "Nents´in teẑehˀaz ˀegun lha ts´eyan xeẑalhnih, lha ˀalhchens chuh xeẑalhnih, lha seneya chuh nentezahdzash, gan dechen bet´ad nats´eyah dzanh detuhtan. 9 Qi ˀidaŵehˀaẑ, lha ts´enz bitŝ´edeltŝish ˀeyuy xeẑalhnih. 10 Nents´in qungh nendanehˀaz ˀeyed qwentex gwanataht´as gwets´en ˀeyed ŵehqi. 11 Hink´an nents´in qwentex lha nendaxwets´uyah k´es lha nexwetŝ´uẑilhtŝ´an ˀeyed gubenalh nexweqi lhiz bech´anahghed ˀeguh hink´an gubajixanaŵeht´as. Lha Gudinits´ilˀin bejeni juẑuŵelhtŝ´an jegut´in hink´ed gubets´enz hagunt´ih, ˀeyed gweqa nenduwh gaŵehnax, ˀeguh gubech´an nadeẑehyah jid gudzish hagwetat´ilh." 12 ˀEgu nents´in deni tuwh najedilh ˀeguh deni ˀananajenentet´anx gwech´an najeduyax gweqa gubelh yajaghinlhtɨg. 13 Nentsen lhan deni ˀixadajenizud hink´an deni lhan jedenidah saˀanaguts´elax gughad olive niẑt´an tlagh nentsel gutŝi jetlɨsh chuh ˀajat´in. 14 King Herod ts´edinh ˀeyen, Sizi beghuzi ts´edaghilhtɨsh jigwedilhyan. Deni belhdan gajedinh, "Guyen John deni tubiˀaghinlhˀinsh ˀeyen ch´adejagh ch´iz naguŝdiny gwech´ez nagwedint´i jid ˀanat´in." 15 ˀEyun gajedinh, "Elijah ts´edinh ˀeyen hant´ih." Belhdan ˀeyen, "Gudinits´ilˀin bedanagwelnɨg, ˀundidanh gajaghint´i gant´en hant´ih, " jedinh. 16 Herod gwedeẑtŝ´an belh gadinh, "John ˀelhatŝ´enuŵetŝinlh desnih ˀeyen naguŝdiny hagujagh."

Herod, John deni tubiˀalhˀinsh ˀeyen ch´ayedinlagh.

17-20 John denilin ˀegu nenduwh gagwat´in. Herod bunagh Philip beˀad Herodias ts´edinh, ˀeyen yaxagweltin hink´an yelh tubiˀajagh. John Herod yets´en nenduwh gadinh jid yeghanadedinh, "Lha ˀegun hilih hananjagh, nunagh beˀad ghanaŝindah." ˀEguh gwech´ez Herodias, John lha yut´in hink´an ch´ayedulax jid yuŝt´in. Herodias ˀinlhetah jid Herod yetŝi nadeniẑˀan. John nendats´ulht´ax nɨsh, ˀeguh gwech´ez nendats´enilht´i. Gan Herod John yuẑelhtŝ´insh, gwatish lha su xuldinh teguŵelhchud gan yuẑinlhtŝ´an gunt´in. Gudinits´ilˀin ts´en su ˀegun jid yeda denilin ˀegweyeniẑen gwech´ez yininljed, ˀeyed hah su gweqa ch´ats´edulax ch´a yaxiẑtan. ˀEyed gwech´ez Herodias lha jid John ch´ayedulax guyal. 21 Xenink´an Herod ˀelhenagwediŝed, ˀeyed gweqa bedeni su ˀech´an jinlin, ˀeyen belh ˀelhts´ult´ax gwaˀanajedeni jinlin ˀeyen belh nen Galilee deni gubets´edilhti ˀeyen gubaghinẑlay. 22 ˀEgu Herodias betŝi nendaniyah hink´an guba naday. Herod belh gubaghinẑlay ˀeyen jeyananaghedinsh. ˀEyed hink´an King Herod tŝ´iqi naday ˀeyen gayelhnih, "Nendidah xuẑint´in beqasudaghinlhqed ˀeyi nentl´axetasnɨsh." 23 Nenduwh chuh gayelhnih, "Gudinits´ilˀin beghuzi bid ˀinlhes ˀalhˀadesnɨsh, Gagulhchugh gwaˀanadesni ˀeguh ˀelhts´ih gwets´en nentl´agughetasˀalh, guẑint´in hink´ed." 24 Gats´edinh belh beban ts´en tinalgay hink´an gayelhnih, "Bets´en nendidah qa xudetaŝqed?" Beban xeded xuyenelẑen ˀeguh baˀelhqagughedaltŝ´ed. Nenduwh gayelhnih, "John deni tubiˀalhˀinsh ˀeyen betŝi qa xudughunlhqed." 25 Nenk´eyed gagulhghen Herod yets´en nendanalgay hink´an gayelhnih, "Nenk´edanh John deni tubiˀalhˀinsh ˀeyen betŝi tŝ´aych´ed teniẑˀan setl´aghunqalh guzest´in." 26 Herod gats´edinh ˀeguh gwa ˀinlhes gwadenildah ŝelin, guyen gubaghinẑlay ˀeyen gubenalh hink´an tŝ´iqi yets´en xuldinh ˀeyed gwech´ez lha jid nagughetutŝid guyal. 27 Nenk´eyed belh John betŝi ˀelhatŝ´enuŵetŝinlh gweqa ŝuljeŝ ˀinlhanx qungh nenchagh gwetl´ayaghinlhtin. ˀEyed qungh nenchagh John yets´en niyah, nenk´eyed jiz ˀelhayenenintŝinl. 28 Hink´an betŝi tŝ´aych´ed teniẑˀan nendanayeninqan. ˀEyi tŝ´iqi tl´ayaghinqan, nenk´egun beban yetl´ayaghinqan. 29 John jeyelhnadilh ˀeyen jijegwedilhyan belh bedatŝagh qanajeŝdil hink´an tŝiyi xats´egughinlah ˀegun sunijeyenilhtin.

Sizi deni ˀesgunla tawzen gajenilt´ih ghedaghinlhch´el.

30 Sizi ˀelhanx gwetl´agubaghinlish ˀeyen jeyananaghedil hink´an deni ˀijegwedaghinlhˀin belh xujalt´in ˀeguh gagulhchugh jeyelh nagwalnɨg. 31 Gwechugh deni lhan gubixudilh gwech´ez ˀejetayinlh ˀeyed lha gughajiẑelh. ˀEyed gwech´ez gubets´en gadinh, "Natughujish gweqa ˀilhch´es tah lha gwetesjiz ˀegun nighudilh." 32 Jadint´ah gugun lha deni gulih ˀegun ts´i bid gwech´ajeninqin. 33 Gwech´ajenqish deni lhan najeyulhtŝ´id, nenk´eyed danh nents´in jetiẑqin ˀegun jaghetiẑnan, qwentex ˀelhaghˀeyuwh gwelex xadatŝ´aghiẑnan, nents´in naghajaqilh ˀegun gubech´an ˀeyed jenilẑul. 34 Naghajeẑqin, dixaghiyalh ˀeyed yedanx deni lhan chexiẑdil. Gangu shib lha bats´aghitan gajint´ih jid gubinlhtŝan gwech´ez gubayeniẑˀan, ˀeyed hah su gweqa gagulhanwh jid ˀigubedetilhˀin. 35 Dẑanaŝ guˀen sa yanish hilin niniˀan ˀegu jeyelhnadilh ˀeyen jeyeghen nixeninan hink´an gajeyelhnih, "Nenjan qwentex gwech´adeniẑad, gwetiẑed chuˀagujagh. 36 ˀEjuyan gweqa gugun nen ts´edilhtŝ´ɨsh ˀeyed hink´an qwentex gwelex ˀegun ts´eyan najuduqid qaˀagubinlax, " jeyelhnih. 37 Gan nenduwh gagubelhnih, "Xun ˀinlhitah gubadelhch´ulh." Jeyets´en gajedinh, "Seneya lhaˀaguŝed beqa ˀanatŝ´eŝt´in galhan telah bid lhiz ŝet´ɨsh jeyuyan gweqa guba ˀutaghaqelh?" 38 Nenduwh gagubelhnih, "Lhiz ŝet´ɨsh xulhan gulin hagunt´ih? ˀEgweyenughudẑanx gweqa denituwh nanaht´is." Denitex xanajest´iz belh "Lhiz ŝet´ɨsh ˀesgunla hink´an lhuy nanqih dzanh gunlin, " jedinh. 39 ˀEgu Sizi jeyelhnadilh ˀeyen nenduwh gagubelhnih, "Gatŝ´in nenduwh gajunax qaˀagubulhax, tl´ugh deltsugh ch´ed lhaˀajilhah ˀelhidanajedichud ˀelhaghˀeyuwh nitl´ajedeŵeltŝ´ilh." 40 ˀEgu deni ˀinlhed hunded hink´an ˀesgunla ˀelhch´aẑnan gajenilt´ih ˀelhelh nitl´ajediltŝ´ih. 41 Guyi lhiz ŝet´ɨsh ˀesgunla belh lhuy nanqih yinlhchud hink´an gudish yat´ax yetiẑˀin, beta ts´en ch´iqidadiny hink´an lhiz ŝet´ɨsh ˀelhts´idayetilhqed. Qatŝ´ay biyelhgwɨsh ˀeyi denitex xats´unih gweqa jeyelhnadilh gubetl´ayeqash. Nenguyi lhuy nanqih ˀeyi chuh su gayinlagh jid denitex xayeẑni. 42 Gatŝ´in seˀajejagh jid nejadan. 43 Hink´an guyen jeyelhnadilh ˀeyen lhiz ŝet´ɨsh belh lhuy beghets´aghizan nachejaghizdzay, qatŝ´ay ˀelhch´aẑnan guˀen nanqih ganilt´ih jedilhben. 44 Deyenẑqi ˀeyen dzanh ˀesgunla tawzen gajenilt´ih hagughint´i.

Sizi tach´ed helgay.

45 Nenk´eyed belh Sizi, guyen jeyelhnadilh ˀeyen ts´i bid bech´an qwentex Bethsaida gwets´en najetuqi qaˀagubinlagh, jelan ˀeyen guqungh najetudilh gubelhnih. 46 Bech´anats´endil ch´iz xents´agutalt´ilh gweqa gudish dilhgwenlh tuwh gughinyah. 47 K´an dzanh salhyiny ŝelin biny taniz hilin najaghinqin, hink´an xeded ˀeguh nench´ed xedint´ah niniltŝ´ed. 48 Gubedisets´ɨsh gwech´ez ˀejet´ungh gubets´en gwagwelhnad. ˀEgu ˀech´ilhˀah nagubenaghelˀin. K´an dzanh yalhqalh ˀegu gubets´en tach´ed gheyalh gubets´en helgay, gubech´ed tedalgɨsh ˀegu jeyinlhtŝan; nandinlh hat´in jiguniẑlid gwech´ez xajaghinẑel. 49-50 Gatŝ´in nandinlh jinlhtŝan jeyeniẑen gwech´ez ˀinlhes gunchagh jid jenilhjud. Nenk´eyed belh nenduwh gadinh guts´en jaghini, "Lha gweqa nuŵelhjux hat´eh xungh? Sid hast´in; lha nilhjed hah." 51 Gubets´en ts´i bighinyah. Nenk´eyed danh nilhts´i naxedalt´i gwech´ez ˀinlhes lha gwanijilil. 52 Gwech´an lhiz ŝet´ɨsh xuyinlhad ˀegwechuh lha ˀegwejeyeniẑinl. Lha gubini tegughilchelh.

Sizi Genesaret gwet´in jelan ˀeyen saˀanagubinlagh.

53 Gunan nen Genesaret ts´egwedinh gwets´en neghajeninqin belh ts´i jijaghiẑtl´un. 54 K´an dzanh ts´i bixajaghindil belh Sizi natŝ´ulhtŝ´id. 55 ˀEyed nen gagulhchugh Sizi niyah ts´edinh denituwh natŝ´aghiẑnan, nents´in hant´ih jits´egwedilhyan belh nendan jedenidah lha jid najuya guyah ˀeyen ˀegun yuŝitil ch´ed gubets´enilah. 56 Hink´an nents´in gheyalh, qwentex guntsel gwelex taˀagunt´ih, qwentex gunchagh belh yaˀanxw nen ts´edilhtŝ´ɨsh, ˀeguh deni jedenidah ˀets´uqid gwelex ˀeguh nidaguts´aghili. Yets´enz k´abeh dzanh ˀijagheduŵenax jedinh ˀetijededlih. ˀEgu nendan yets´enz ˀixedaghinax ˀeyen gatŝ´in saˀanajejagh.

7

Nendid bid ts´edetsen ts´aghedeltsish.

1 Guyen Pharisee hink´an Deni ˀijegwedelhˀanx belhdan qwentex Jerusalem xajaghindil. Sizi jeyeghex chejaghiẑdil. 2 Sizi jeyelhnadilh ˀeyen belhdan lha lajedelhdax chu jejeneyan guts´enaghinlhˀin. Gats´egulhˀin ˀeguh lha gajinil. 3 (Guyen Pharisee belh Jews gatŝ´in lajedeldɨsh hink´an ˀejeyinsh jegulhˀin. Yedanx ˀelhch´iz ˀeguh gajet´in lha jijedeŝnish. 4 ˀEts´uqid gwelex xadanajedɨlh ˀegun lajedeldɨsh hink´an ˀejeyinsh. Nenduwh chuh gajegulhˀin, bidaqash belh beŝ bitunalten belh bituniẑɨlh gadant´i tah tinajelish hink´an jeyiˀanat´insh jegughinlhˀan chu ˀajint´ih.) 5 ˀEyed gwech´ez Pharisee belh Deni ˀijegwedelhˀanx Sizi jeyudilhqed, "Xulht´i jid nelh najedilh ˀeyen lha lajedelhdax chu ˀejeyan, yedanx ch´iz gats´egulhˀin ˀeguh lha gajeŝt´in?" 6 Sizi gagubelhnih, "Isaiah ts´edaghini Gudinits´ilˀin danagwelnɨsh ˀeyen ˀalhˀanexwelhnih hadaghini su taˀanaht´in xedetalhˀinlh. Nenduwh gadinh destl´es ch´ed jidagwedilah: ´Israel gwet´in gubeẑi dzanh bid sejedilhti, gan gubini ˀeyuwh sech´a deniẑad diẑˀan. 7 Gants´iz sets´en tŝ´idaneŝ jegulhˀin. Xedanijegwedilyah ˀeguh dzanh gwech´ih deni ˀijegwedelhˀanx.´ 8 Gudinits´ilˀin nexwanigughenilah ˀeguh jidalhghel hink´an yedanx ch´iz xedanigwedenelhyah ˀeguh dzanh gwech´ih taˀanaht´in."

Nenta belh nemban gubeduŵelhti.

9 Nenduwh chuh gagubelhnih, "Yedanx ch´iz gaht´insh gaŵehnax gweqa Gudinits´ilˀin nɨgughenilah ˀeguh dehnih xedeyenehdẑen til gughetehtŝɨg. 10 Moses ghinli nenduwh gadinh, ´Nenta belh nemban gubeduŵelhti,´ hink´an, ´Nendan beta k´es beban ts´udinla ˀeyen ch´ats´edetalilh jid gwetŝ´enẑ hagunt´i.´ 11 Xun ˀeguh deni ˀinlhanx beta k´es beban ts´en nenduwh gadinh dehnih, ´Ganendid hist´in bid nelhˀagwetanilh tesaghint´i ˀeyi Gudinits´ilˀin ts´en xeteẑiˀan,´ 12 ˀEyed guˀen lha jid beta k´es beban belhˀaŵet´in guyah sinlhtsin. 13 Yedanx ch´iz xeda nɨgwedenelhyah gwech´ih dzanh taˀanaht´in, Gudinits´ilˀin bejeni nenduwh xuldinh ˀeguh lha xagwelhˀah yalhin. Lhaˀagulhah nenduwh gagunt´ih jid gwaghex taˀanaht´in."

Ts´eyan gatŝ´i nezun.

14 Sizi shunchuwh jelan gughex najedilh ˀeyen guqanajadiny hink´an gagubelhnih, "Ganexwenilhan Ŝuẑeŵelhtŝ´an! Nenduwh gadetasnilh ˀeguh sul ˀegweyenuhŝin. 15-16 ˀInlhitah ts´etilhni ˀeyi bid lha jid detsen ts´aghedultsilh guyah hagunt´i. Gan guntsen jid nanitŝ´eẑed gwech´ih taˀanats´et´in, ˀeyi hah bid detsen ts´aghedetaltsilh."

ˀEguyeniẑen gan Gudinits´ilˀin nexwanigughenilah gwa ˀanananentint´anx ˀeguh jid detsen xedetaghanltsilh.

17 ˀEguh ch´iz jelan ˀeyen gubech´a qungh nendananjah, guyen jeyelhnadilh ˀeyen nagwedɨng bech´initŝ´eẑig gant´i bid gubelh nagwalnɨg ˀeyi, su xuldinh ˀeguh gweqa jeyudilhqed. 18 Nenduwh gagubelhnih, "Xulht´i jid lha teguŵelhcholh hadehnih. Deni ˀinlhitah tilhni ˀeyi bid lha jid detsen xedultsilh guyah hagunt´i. 19 ˀEyi lha bedzi biz niŝtl´ɨg gan bebed biz nitl´ɨg hat´ish, hink´an ˀeyi ˀech´ilhˀah deni ch´an ˀat´insh." (ˀEgu ts´eyan gatŝ´i lha xulht´ɨh nih hadaghini.) 20 "Guntsen jid nanitŝ´eẑed gwech´ih taˀanats´et´in ˀeyi hah bid detsen ts´aghedetaltsilh. 21 Nanitŝ´eẑed gwetŝ´enẑ, guntsen nanitŝ´eẑed, tintah ˀats´et´anx, ˀets´eneˀinsh, ch´elhts´ededlax, ˀelhghanats´egwedenet´insh, 22 ts´en nats´egwedilˀah, ch´its´edanx, nelhts´enet´ax; gan xuts´elt´in guntsen taˀanats´et´in lha guts´en ˀelhaghˀeyuwh hilih taˀagunt´ih, ˀelhts´en dats´intsen, yayagh jid ˀelhghayats´eltɨg, gwechugh yadi jid xedadanitŝ´edẑed, lha deni ch´ih ts´eniẑed. 23 Ganendad gats´at´in ˀeyi hah bid detsen ts´aghedetaltsilh, " gubelhnih.

Sizi tŝ´iqi betŝi seˀanalagh.

24 Sizi ˀeyed gwanajetiŝdil hink´an qwentex Tyre ts´egwedinh gughen qungh gweẑˀan ˀeyed jenindil. Lha ˀinlhanx nents´in ŝedah ˀegweyenuẑin gut´in gan lha jid nents´in ŝedah ˀeyed deni ˀigwenuŵeẑin guyal. 25 Guyen tŝ´iqi ˀeyen, Sizi nents´in hant´ih jigwedilhyan. ˀEyen betŝi nentsel ˀeyen nentsen ˀanayeli gwech´ez ˀeyed niyah hink´an yenadas natŝilegwedilyah. 26 Guyen tŝ´iqi ˀets´en deni ˀeyen ch´ih yets´en jizah." Ŝetŝi guyi nentsen ˀeyi bech´anayenughuyud, " nih ˀetidedlih. 27 Nenduwh gayelhnih, "ˀEŝqax ŝid nejudan qaˀagubinlax. Guts´eyan lhin ts´en tinilhguy ˀeguh lha ˀegun hilih xungh." 28 "Sizi, ˀalhˀadinih hadinih. Lhin ˀeyi chu la ch´ededan yes naghingwɨsh ˀeyi nayeldɨlh hat´insh." 29 Nenduwh gayelhnih, "Nenk´ed naghindalh, ˀeguh gadinɨsh gwech´ez guyi nentsen nentŝi yech´ananjah." 30 ˀEgu qungh gunaghejah ˀegun betŝi lha xulht´ɨh chu taŝ ŝetin yananaghejah.

Sizi deni lha ˀeditŝ´iny saˀanalagh.

31 Sizi qwentex Tyre gwech´ananjah, ˀegun guˀen qwentex Sidon gughananjah; ˀegun yatŝen Galilee biny ˀeyed chuh gughananjah, ˀegun nen Decapolis gwets´en niyah. 32 ˀEyed deni belhdan deni ˀinlhanx lha ˀedeŝtŝ´iny hink´an ŝenqay yalhtɨg ˀeyen jeyets´en jeyenilhtin hink´an yech´idulnish gweqa jeyinadedɨlh. 33 Guyen deni lha ˀedeŝtŝ´iny ˀeyen deni jelan gubaˀeyud niyaghilchud ˀegun Sizi yedzagh ˀanilht´id yinaˀelhged, ˀegun tizi hink´an yetŝul ˀixedaghinax. 34 Gudish yat´ax yetiẑˀin gughad, ya yeniẑˀan gwech´ez yades nanagheji, hink´an yets´en gadinh, "ˀEfatha!" (ˀEguh nenduwh gadinh hadaghini, "ˀEdughunts´anx, yalhtɨg naghundlanx!") 35 Nenk´eyed danh bedzagh qedetilhghel, ˀeditŝ´iny ŝelin, sul yalhtɨg naŝdlin. 36 Sizi gagubelhnih, "Lha ˀinlhanx gubelh gŵezelhnɨg." ˀElhch´iz gagubelhdenish gan guˀen jid gwayajetilhtɨg. 37 Gunchagh jid lha gwanijilil. "Gagulhchugh jidinsun jid ˀanat´in. Lha ˀejedeŝtŝ´iny ˀeyen ˀejeditŝ´iny nagubelhtsish; lha yajelhtɨg ˀeyen yajelhtɨg nagubelhtsish, " jedinh.

8

Sizi deni diny tawzen gajenilt´ih ghedaghinlhch´el.

1 ˀEyed shunchuwh deni lhan chexiẑdil. Ts´eyan yajenilhnan gwech´ez Sizi jeyelhnadilh ˀeyen guqajaghini hink´an gagubelhnih, 2 "Yedanx tad dzin selh jedetilhtŝ´i, ts´eyan yajenilhnan chu ˀajejagh gwech´ez gubayaˀanasjagh. 3 Guyen belhdan niẑex xadajeẑdil ˀeyen lha nejidinl chu najetudilh qaˀagubeŝdlagh hink´ed nidajetatl´elh hajint´ih." 4 Guyen jeyelhnadilh gajedinh, "Yanuwh deẑiltŝ´ih hat´ih, nents´in ts´eyan seˀalhan teghalchelh hadinih?" 5 Sizi gubudilhqed, "Lhiz ŝet´ɨsh xulhan heht´in?" "ˀInlhed ch´ilhghilh ganilt´ih hit´in," jedinh. 6 Gajenilhan nench´ed nitl´ajedeŵeltŝ´ilh gubelhnih. ˀEgu lhiz ŝet´ɨsh gulin ˀeyi bech´ez gudish beta ts´en "Xwechanalˀin," nih xents´anagughelt´ih hink´an ˀelhghadayetilhqed hink´an jeyelhnadilh ˀeyen denitex xajeyunɨsh gweqa gutl´ayeqash, ˀeguh gajejagh. 7 Lhuy nentsel gulin ˀeyi chuh su gayinlagh, gudish beta ts´en xents´anagughelt´ih hink´an jeyelhnadilh ˀeyen denitex xajeyeẑni. 8 Gatŝ´in saˀajejagh jid ˀejaghiyan. Gwech´iz jeyelhnadilh beghets´aghizan ˀeyi qatŝ´ay chugh ˀinlhed ch´ilhghilh ganilt´ih jedilhben. 9 Deni diny tawzen gajenilt´ih hagughint´i. Nenk´ed, "Natuhdilh," gubelhnih. 10 Guyen jeyelhnadilh gubelh ts´i binaghejah hink´an gunan qwentex Dalmanutha gwets´en neghajeẑqin.

Sizi Pharisee belh Herod guba bi lhiz ts´enisoylh ghajughu ŵetan gubelhnih.

11 Guyen Pharisee ˀeyen, Sizi jeyets´enindil hink´an ˀaxudulni k´es ˀaxuŵelnax jeyeniẑen gwech´ez gajeyelhnih, "ˀInlhetah jid nudughudlanx gweqa Gudinits´ilˀin bets´enz xagwedaltŝ´ed lha gwanitŝ´eŝlish nexwigwenughulhˀin." 12 Guts´ediŝdinh gwech´ez yades nanagheji hink´an gadinh, "Xugunlht´i gweqa nenden deni nenduwh jadex ˀeyen lha gwanitŝ´eŝdlax gubits´egwenuŵelhˀin gweqa ˀejudelhqed hanh? Sid, ˀelhˀagwedinh jid ganexwelhdetasnilh, lha nexwits´egwenentalhˀinlh!" 13 ˀEgu Sizi jeyelhnadilh belh deni ghanajaghetiŝdan. Ts´i binajadil hink´an gunan tachi biny jitaghilin ˀegwenz gwets´en gwech´ajeninqin. 14 Guyen jeyelhnadilh ˀeyen ts´eyan jaghetalhnih jinajelhned, gan lhiz ŝet´ɨsh ˀinlhi dzanh ts´i bighiˀa. 15 Sizi gagubelhnih, "ˀInlhes xedaxuŵehtan. Guyen Pharisee belh Herod ˀeyen guba yeast cake ghaxuŵehtan." 16 Sizi xuldinh ˀeguh gwanayajaltɨg hink´an nenduwh gajedinh, "Lha lhiz ŝit´in gwech´ez hadaghini." 17 Xuldinh ˀeguh lha tejegughilcholh jid yajelhtɨg gwech´ez Sizi gagubelhnih, "Xulht´i gweqa lha lhiz ŝeht´in ˀeyed gwayalhtɨg hanh? Shunk´ah lha gweẑelhtŝax k´es lha teguŵeẑelhchud telaneht´ih? Nexwetŝi deghintŝ´i ŝelin telaneht´ih? 18 Nexwenagh gulin gan lha gweẑelhtŝax; nexwedzagh gulin gan lha ˀedeẑehtŝ´anx. Lha ˀegwinayeneẑehdẑanx telaneht´ih. 19 Deni ˀesgunla tawzen gajenilt´ih (5,000) ˀeyen guba lhiz ŝet´ɨsh ˀesgunla ˀelhts´idaŝilhqed beghets´aghizan ˀeyi qatŝ´ay xulhan deẑelhben?" Gajeyelhnih, "ˀElhch´aẑnan guˀen nanqih ganilt´ih." 20 "Ch´iz deni diny tawzen gajenilt´ih (4,000) ˀeyen guba lhiz ˀinlhed ch´ilhghilh ganilt´ih ˀelhts´idaŝilhqed ˀeyi qatŝ´ay chugh xulhan deẑelhben?" Gajeyelhnih, "ˀInlhed ch´ilhghilh ganilt´ih." 21 Gubets´en gadinh, "Shunk´ah hanh lha teguŵeẑelhchud?"

Sizi deni lha gwaŝˀin sa ˀanalagh.

22 Neghajeẑqin hink´an qwentex Bethsaida ts´egwedinh ˀeyed jenindil. Hink´an deni belhdan deni ˀinlhanx lha gwaŝˀin ˀeyen jeyets´en jeyenilhtin hink´an Sizi yixedeŵenax gweqa jeyidenindil. 23 ˀEgu Sizi guyen deni lha gwaŝˀin ˀeyen yela hinlhchud hink´an qwentex gweˀanwh niyagheniyah. ˀEgu, guyen deni, yenagh ch´isezi hink´an yenaghch´ed nadilhni belh yudilhqed, "ˀInlhitah hinlhtŝan hanh?" 24 Ninadenit´an hink´an gadinh, "Deni gubenisˀin ˀeyen gangu dechen naxena sagwelagunt´ih." 25 Shunchuwh ˀinlhed yenaghch´ed nanadilhni. ˀEguh hink´an benagh saˀanajagh, su natist´iz. 26 Sizi gayelhnih, "Nenqungh natughunja. Lha qwentex nasaghindalh."

Sizi ch´ats´edetalilh gwanagwelnɨg.

27 Sizi belh guyen jeyelhnadilh ˀeyen yadish dẑelh qichen qwentex Caesarea Philippi ts´egwedinh jenindil, ˀeyed qwentex gweˀanwh najediẑdil. ˀEguh jadelh gubudilhqed, "Deni nendan hanest´ih ts´edenish hanh?" 28 Gajeyelhnih, "Deni belhdan ˀeyen John deni tubiˀalhˀinsh ˀeyen ninlin jedenish. ˀEyun ˀeyen Elijah ninlin jedenish, hink´an belhdan ˀeyen deni ˀinlhanx Gudinits´ilˀin yeda nagulnɨg gweqa ˀetex xayaghinlhtin ˀeyen hanint´ɨsh, jedinh." 29 Gubudilhqed, "Gan xun ˀeguh nendan hanest´ih dehnih?" Peter ˀeyen gadinh, "Nin Gudinits´ilˀin nexwets´en gwetl´anaghinlhtin ˀeyen hanint´ih." 30 Sizi gubeghanadadiny, "Lha deni ˀinlhanx ˀeyen hast´ih deẑehnih." 31-32 Sutsel ˀejedutŝ´anx gweqa nenduwh gadinh jid ˀigubedetilhˀin. "Sid Deni gudes xaghinyah nesdlin, gagulhanxw gundaẑ jid ˀetisets´etalhˀinlh hink´an t´agultinqi belh yaŝalhtɨg ˀaghendes jinlin belh Deni ˀijegwedelhˀanx jinlin ˀeyen lha sejutaŝt´in, sech´anajedetadelh hink´an ch´asejedilagh ch´iz tad dzin ghili nagutasdinh has." ˀEguh hink´an Peter yuˀan hilin niyaghinlchud hink´an gayelhnih, "Lha nenduwh gadeẑinih." 33 Nenk´eyed belh Sizi, Peter yech´anadizah hink´an jeyelhnadilh ˀeyen gubets´enilˀah ˀegu Peter yets´en najizah, "Lejab, ˀeyuwh sagweˀinz nayah! Deni ch´ih dzanh naninẑed. Lha Gudinits´ilˀin bech´ih naniŝinẑed hanint´ih hany!"

Gwagwelnah ˀegwechuh Sizi xugunlht´i jid denitaghanlilh ganelhnih ˀeguh gwech´ih ta ˀanataghant´in.

34 Jeyelhnadilh ˀeyen belh guˀanz deni lhan najedilh ˀeyen guqajaghini hink´an nenduwh gagubelhnih, "Nendan senentuya guŝt´in ˀeyen lha xedadanitaŝdẑed chu baˀelhinilhjes beganŝdlangh ch´ed tenayaghiẑtan hink´an sech´ih tayalh han. 35 Ganendan xeda ch´ih denilin ˀeyen jidetanish. Ganendan sanagwelnɨg gweqa ch´adejagh ˀeyen detajɨsh. Seqa ch´adejagh ˀeyen chuh detajɨsh. 36 Ganendan lha betsin dijɨsh chu nenjan nenqay didah gatŝ´i chexilhtsed ˀeguh xugunlht´i jid guŵezu. 37 K´es nendidah bid betsin qa ˀelhch´ixaguŵetalhnɨsh? 38 Nenjan nenqay ˀananats´enentet´anx hink´an lha Gudinits´ilˀin xats´ilhˀah chu denits´ilin hagunt´ih. Gudinits´ilˀin beliẑanŝ belh seta bets´enz xaghindin belh guts´en natasdalh. Ganendan sid belh sejeni gha junjan ˀeyen sid chuh gubaxutasjalh."

9

Sizi beneŝ ˀets´en ˀanajagh.

1 Sizi nenduwh gagubelhnih, "Tŝ´idaneŝ jid ganexwelhdetasnilh, k´an nenjan najedilhyah ˀeyen belhdan lha ch´ajedeŝnax jegwelhqen danh Gudinits´ilˀin gwaˀanadetanilh ˀeyed dzin jegwenentalhˀinlh." 2 Dzin ˀelhch´antay ganilt´ih ghili Sizi, Peter hink´an James belh John chu, dilhgwenlh didinaẑ ˀegun gubenilah, hink´an jadint´ah gunalh beneŝ ˀets´en ˀanajagh. 3 Bets´enz ˀinlhes gunchagh jid bech´ed tesadindin jid lhek´el ŝelin, nenduwh nenqay ts´enz lha jid ˀeguh galhik´el ts´ulhtsilh guyah ˀegun gant´ih. 4 Elijah belh Moses gulhts´edinh ˀeyen deni ˀijaghediltŝan hink´an Sizi jeyelh yalhtɨg. 5 ˀEyed hink´an Peter, Sizi nenduwh gayelhnih, "Sizi Ninlin, nenjan guzun nexwenilah. Nenk´edanh xun tan nelht´ih nin belh Moses belh Elijah ˀelhelhch´ih nexwaghulben." 6 Nilhjud lha ˀaxudulni guyal gwech´ez nenduwh gadinh hadaghini. 7 Gubi sa qw´es ˀinh ghiˀan hink´an qw´es yi Gudinits´ilˀin guts´en gadinh, "Nenden seyi helin gunchagh jid xunest´in. ˀEyen xuẑuŵelhtŝ´an." 8 Xentsel lha deni najiltŝil. Sizi xedint´ah dzanh ˀeyed naẑed. 9 Dilhgwenlh didinaẑ gwetŝ´enẑ gweninajadelh ˀegu Sizi gagubelhnih, "Deni gudes xaghinyah ch´adejagh ch´iz ninadijah ˀeguh hink´an shunk´an gwenaghelhˀin ? eyed gwanagulhnɨg." 10 Nenduwh gagubelhnih ˀeguh jadint´ah gwa ˀelhelh nayajaltɨg, hink´an nenduwh gajedinh, "Ch´adetanilh hink´an ninadetadalh nih, ˀeguh xuldinh hadaghini?" 11 Hink´an Sizi jeyudilhqed, "Deni ˀijegwedelhˀanx xulht´i gweqa nenduwh gajedenish, Elijah ˀeyen ŝid xanatadalh han?" 12 Sizi gagubelhnih, "Elijah ˀeyen su ˀech´an xanatadalh, ˀeyen gagulhan saˀanagwetalilh. Xulht´i jid hagunt´ih, Gudinits´ilˀin bejeni destl´es gwech´edets´ezjez ˀeyi nenduwh gagwedinh, ´Deni gudes xaghinyah ˀeyen gwechugh jinats´enentalhtanx hink´an bets´uts´edetadlanx.´ 13 Gan ganexwelhusni, Elijah gant´en ˀeyen nenduwh xaghinyah. ˀEyen chuh ganenduwh xujeyulhax jeguŝt´in ˀeguh gajeyaghinlhˀin, ˀeyed su gagwedinh Gudinits´ilˀin bejeni destl´es gwech´edets´ezjez."

Sizi ˀeŝqi nentsen yixanaghiyud.

14 Sizi jeyelhnadilh belhdan, gweduˀajint´ih ˀeyed gwets´en gwebanajedidil. ˀEyed deni lhan chexiẑdil, dezan Deni ˀijegwedelhˀanx ˀeyen belh jeyelhnadilh ˀelhˀijedelnax. 15 Deni lhan, Sizi lha jeyeqa jeyetiˀin, jeyinlhtŝan belh gwajenini gwech´ez ˀaghal jeghanalh jeyedixiẑnan. 16 Sizi gubudilhqed, "Dideqa ˀelhˀidelhnax hadahni?" 17 Deni tex ˀinlhanx ˀeyen nenduwh gadinh, "Nin deni ˀigwedinlhˀanx ninlin, nenden seyi nents´en nilhtin ˀeyen nentsen ts´enz ŝelin ˀeyed gwech´ez lha yalhtɨg ŝelin. 18 Hink´an guyi nentsen yilhchog, nench´ed nayelht´ɨsh hink´an beẑi guwɨsh xadanelẑulh, hink´an beghu ˀelhidelhk´es hink´an beneŝ ˀinlhes ˀelhch´edenog. ˀEyed hah nelh najedilh ˀeyen saˀanajeyulax gubelhesnih gan lha jid nentsen jeyech´anuŵeyud guyal." 19 Sizi gagubelhnih, "Deni nenduwh k´an deni nelhin, ˀesdiny lha gwetah gudihdlan. Xugunŝed lha nexwiniŝeŝtŝ´id chu nexwelh deni tasdlilh? Sets´en ghelhtilh!" 20 Hink´an guyen ˀeŝqi ˀeyen Sizi jeyets´en jeyenilhtin. Sizi yinlhtŝan belh nentsen ˀeyi ˀeŝqi nench´ed nayaghinlht´i. Delteẑ hink´an beẑi guŵish xadanelẑulh ˀelhanx naxedetelmilh. 21 Sizi yeta yudilhqed, "Xugunŝed ˀeguh gaghint´i han." Nenduwh gayelhnih, "ˀEŝqi helin danh ˀeguh gat´in han. 22 Xenchuh tŝiyedelht´ɨsh, xenchuh tayelht´ɨsh, ch´ayedulax qaˀayelhˀin. Saˀanaghunlax gwet´in hink´ed nexwayeˀananenjagh, nexwelhˀaghunax." 23 Sizi nenduwh gayelhnih, "Xudinlnih hadinih, ´Saˀanaghunlax gwet´in hink´ed,´ dinih ˀeguh! Ganendan set´ayenintan ˀeyen ba gagwetanilh hagunt´i, lha ˀinlhi t´anentaŝdalh han." 24 Nenk´eyed danh, guyen beta jaghinish, "Nent´ayenestan gan guˀen jid nent´ayenestan nasughunlhtsilh." 25 Sizi beghex guˀen jid bits´ughetiẑdil, hink´an nentsen yeghanadadiny gadinh, "Nentsen ninlin nenden lha ˀeditŝ´iny hink´an lha yalhtɨg sinlhtsin ˀeyen bech´ananindash, lha gwech´iz binaxedeẑindanx." 26 Nenk´eyed danh nentsen xaghizel belh guyen beneŝ gwelan ˀelhch´edunog qaˀayinlagh hink´an yech´ananjah. ˀEŝqi ˀeyen ˀinlhes datŝagh jinilˀin ŝelin. ˀEyed gwech´ez deni lhan nenduwh gajedinh, "Ch´adejagh han." 27 ˀEguh hink´an Sizi yela hinlhchud yelhˀat´in jid ninadijah. 28 Sizi qungh nendananjah. ˀEguh hink´an jeyelhnadilh belh jadint´ah jeẑlin hink´an jeyudaghinlhqed, "Xulht´i xun lha jid nentsen bech´anughujud guyal?" 29 Nenduwh gagubelhnih, "Nendid gant´i xents´agult´ih ˀaxunelt´in jid deninilin ˀeguh dzanh jid deni ch´ats´eneyog hagunt´i."

Sizi nagutadinh gwanagwalnɨg.

30-31 ˀEyed jadint´ah gwanajetiŝdil hink´an nen Galilee dzidzajenindil. Jeyelhnadilh ˀigubedelhˀanx gwech´ez lha nents´in hajint´ih ˀaguts´eyenuẑin gut´in. Nenduwh gagubelhnih, "Deni la sets´aghilhtin jid sech´an ninats´edetadalh, ch´asejedilagh ch´iz tad dzin ghili nagutasdinh." 32 Lha xuldinh ˀeguh ˀegujeyeniẑinl, gweqa jeyudetalhqed chuh jijenilhjud.

Nendan ˀech´an ŵeli guŝt´in ˀeyen ˀech´ilhˀah talilh.

33 Gugun qwentex Capernaum ˀeyed najaghindan. Qungh nendajagheninan hink´an gubudetilhqed, "ˀEten xahnalh, dideqa ganexwenilhan ˀelhinadehdɨlh hadahni." 34 Nendan ˀech´a yadi helin jedinh gweqa ˀelhinajedadɨlh gwech´ez lha jeyets´enztijɨsh. 35 Sizi natl´adadah belh jeyelhnadilh guqajaghini hink´an gagubelhnih, "Nendan su ˀech´an ŵeli guŝt´in ˀeyen su ˀech´ilhˀah talilh hink´an deni gatŝ´in nadadetalnɨsh." 36 ˀEŝqi nentsel la hinlhchud hink´an gut´aniz niyenilhgay hink´an nenduwh gagubelhnih, 37 "Ganendan nenden ˀeŝqi nentsel gajint´en gangu sid nesdlin gagunt´ih jid nendayuniyah hink´ed, sid nendasuniyah gagwetat´ilh. ˀEguh ganendan sid nendasuniyah ˀeyen lha sid dzanh nendasuyal, guyen nexwets´en gwetl´asaghinlhtin ˀeyen chuh nendayuniyah gagwetat´ilh hagunt´i." 38 Sizi jeyelhnadilh ˀinlhanx John ts´edinh ˀeyen gayelhnih, "Sizi, deni ˀinlhanx nughuzi bid nentsen deni ch´adaneyud naghilˀin. Lha nexwelh nasˀas gwech´ez naxedughult´ax qaˀaghit´in." 39 Sizi gagubelhnih, "Lha naxedulht´ax qaˀaŝeht´in. Ganendan sughuzi bid guzun jid ˀanat´in ˀeyen lha jid guntsen jid sayaŵelhtig guyah hant´ih, 40 ganendan lha xwech´an ˀadeŝdinsh ˀeyen nexwetŝ´enẑ ˀadedinh han. 41 Tŝ´idaneŝ jid ganexwelhdetasnilh, sets´enz ninlin gwech´ez, ganendan gangu sid nesdlin gagunt´ih jid tu niẑq´eẑ naninlhchud hink´ed, seta yech´ixetalhtsilh han. 42 Ganendan ˀeŝqi ˀinlhanx nenden gajint´en, set´ayenetan ˀeyen, ˀanananentut´anx qaˀayelhˀin hink´ed, nendan ˀat´in ˀeyen tŝi deninchagh beqw´eŝ bitŝ´aghiẑtl´un k´an tats´elht´ax dzanh jidaltŝen. Gats´inlagh hink´ed ch´iˀin jid gwetalhqen. 43-44 Nela ch´eŝ bid ˀanananentint´anx hink´ed xaghulht´aŝ, nela ˀanilht´id belh guyax tŝilhyax lha nagweneŝaŝ ˀegun tiyash gwech´a saˀagunt´ih hagunt´i. 45-46 Nenqi ch´eŝ bid ˀanananentint´anx hink´ed xaghulht´aŝ. Nenilchuny ˀeguh, nenqi ˀanilht´id belh guyax tŝinents´edelht´ax gwech´a saˀagunt´ih hagunt´i. 47 Nenagh ch´eŝ bid ˀanananentint´anx hink´ed xanughunˀalh, nenagh ˀinlhi dzanh belh gudish nench´ez ghinyalh ˀeguh, nenagh ˀanilht´id belh guyax tŝinents´edelht´ax gwech´a saˀagunt´ih hagunt´i. 48 ˀEgun gagulhnaẑ gu gubetayinlh jelh gagulhnaẑ jedetak´en. 49 "Deni ˀananajenentat´insh gatŝ´in Gudinits´ilˀin benadas najedetalyalh hagunt´ih. 50 Lesal nezun hat´ish gan ˀelhidelhnax ˀeguh gangu lha lesal ẑagulqen gagunt´ɨsh, xulht´i jid beẑagwelqen nagwetaghanlhtsilh. Lha deni ts´en guntsen tegwedeẑahˀalh chu lesal belh tuhnɨsh."

10

Sizi ˀelhelh tubiˀajet´insh gwayalhtɨg.

1 Sizi ˀeyed gwanatisdzah hink´an nen Judea gughananjah hink´an yeqox Jordan gwa gunez ninanjah. ˀEyed chuh deni lhan jeyixughiẑdil, hink´an ˀeguh gat´insh ˀeguh ganatiŝt´in, ˀigubedetilhˀin. 2 ˀEgu deni belhdan Pharisee gulhts´edinh ˀeyen jeyixughiẑdil. Hink´an ˀaxudulni jeyeniẑen nenduwh gajedinh jeyudetilhqed, "Deni ˀinlhanx beˀad ˀeyutulht´ax guŝt´in, lha gweqa ˀagwedeŝdinh telagunt´ih?" 3 Nenduwh gagubelhnih gubudilhqed, "Moses nexwanigughenilah ˀeguh xugweldinh?" 4 Nenduwh gajedinh, "Guyen deni beˀad ˀeyutulht´ax guŝt´in ˀeyen, ˀelhch´ajetat´es gweqa destl´es ch´idilni ˀeguh hink´an ˀelhch´ajetat´es gwedinh nexwanɨgugheniˀan." 5 Sizi gagubelhnih, "Xun gwechugh lha denich´ih niŝed gwaneŝ Moses nenduwh nɨgughenilah. 6 Gan su ˀech´an Gudinits´ilˀin nenqay ˀegunlagh danh, guyen deyenẑ belh tŝ´iqi ˀagubinlagh. 7 ˀEyed gwaneŝ guyen deni ˀinlhanx beta belh beban guch´atayalh, hink´an beˀad chu ˀelhghanajetaqilh. 8 ˀEyed guˀen lha nandih jilt´ɨsh gan gangu ˀinlhanx lajint´ish jetalilh.´ 9 Gudinits´ilˀin deni nendan ˀelhghen nɨgubenilhtin ˀeyen lha deni ˀinlhanx ˀelhch´itigubetalhtilh." 10 Qungh nendajenindil ˀeguh hink´an guyen jeyelhnadilh ˀeyen Sizi ˀeyed gwa najeyudilhqed. 11 Gagubelhnih, "Ganendan beˀad ˀeyutilht´i hink´an tŝ´iqi ˀeyun belh bituˀanajagh ˀeyen beˀad ts´en ˀanananentet´anx hagunt´ih. 12 Hink´an tŝ´iqi xeded beqen ˀeyutilht´i hink´an deyenẑ ˀeyun belh bituˀanajagh, xeded beqen ts´en ˀanananentet´anx hagunt´ih."

Sizi ˀeŝqax gubaxents´anagughelt´ih.

13 Gubech´its´edulnɨsh gughad guba xents´agutalt´ilh jeyeniẑen gweqa deni lhan Sizi jeyets´en ˀeŝqax jintsel xajaghilah, gan guyen jeyelhnadilh ˀeyen najeyeniẑˀen. 14 Sizi, jeyelhnadilh ˀeyen gajet´in gubinlhtŝan, lha gut´in ˀats´et´in gwech´ez gadinh, "ˀEŝqax jintsel lha sech´aghagubeneẑehˀan chu sets´en najudilh qaˀagubelhax. Nenden gajint´en Gudinits´ilˀin gubets´enz hajint´ih. 15 Tŝ´idaneŝ jid ganexwelhesnih, ganendan lha gudish nench´ez, ˀeŝqi nentsel gant´en ch´ih gudidlan hink´ed, lha ˀegun taŝalh hagunt´ih." 16 Hink´an ˀeŝqax ˀinlhanx liny hilhchug hink´an bela bid gubech´idilnɨsh hink´an gubaxents´anagughelt´ih.

Xulht´i jid deni gwetuwh jegulyuẑ ˀeyen gudish nench´ez ˀajegwetalilh.

17 Sizi k´an dzanh gwech´anatalgɨsh ˀegu deni ˀinlhanx ˀaghal ghelgɨsh nenk´egun yenadas betŝigwed bid naghetled hink´an nenduwh gadinh yudaghinlhqed, "Deni ˀigwedinlhˀanx jid ninzun. Xutasnilh jid Gudinits´ilˀin bets´en ˀagwetaslilh has?" 18 Sizi gayelhnih, "Xulht´i gweqa sid nesun dinih hany? Lha ˀinlhanx nezun hilɨsh xungh, Gudinits´ilˀin xedint´ah dzanh nezun hagunt´ih. 19 Gudinits´ilˀin nexwanigughenilah ˀeguh ˀegweyeniẑen telanint´ih. Lha deni ch´adeẑinlax. Bituˀanenjagh ch´iz lha tŝ´iqi ˀeyun belh nasiˀas. Lha ˀeneẑinˀinsh. Lha xunts´id jid xeda k´es ˀeyun ghanagweẑinlnɨg. Lha deni ˀinlhitah yedilhti ˀeyi, naninˀax jid ghunlhchud qaˀaŝint´in. Nenta belh nemban gubedeẑinlhti hink´an gubaxeẑintan." 20 Nenduwh gadinh, "Sizi, ˀeŝqi nesdlin danh nexwanits´egughenilah ˀeguh lha gwa ˀanananentezest´anx." 21 Sizi yunt´in jid yenaghilhˀin hink´an gayelhnih, "Nenduwh chuh gataghanilh. Didagatŝ´i hint´in ˀeyi biˀughinqid hink´an deni ˀetijelˀin ˀeyen gutuwh xaghunɨsh. ˀEguh hink´an gudish nench´ez gwetah gwetaghant´inlh. ˀEguh ganenjagh hink´an sech´ih teghunya." 22 Guyen deni ˀeyen gwedeẑtŝ´an belh lha gut´in jinaghelˀin. Gwetah gulyuẑ gwaneŝ bedzi denidah gwanatisdzah. 23 Sizi ˀeguh yetaghiˀin hink´an guyen jeyelhnadilh ˀeyen guts´en gadinh, "Gwetah jegulyuẑ ˀeyen gudish nench´ez nendajetayalh ˀeyed guts´en gwagwelnah hajint´ɨsh." 24 Guyen jeyelhnadilh ˀeyen, nenduwh xugubelhnih ˀeguh lha gwanijilil. Gan shunchuwh gagubelhnih, "Gudish nench´ez ˀegun gwagwelnah jid nendats´eyash. 25 Guyen deni seneya jelyuẑ ˀeyen Gudish nench´ez nendajetayalh ˀeyed, guyi nulh camel ˀeyi guˀen jid gwagwelˀiny ˀaghangɨnshnagh gughatayalh han." 26 Guyen jeyelhnadilh ˀeyen ˀinlhes guˀen jid lha gwanijilil hink´an ˀelhts´en gajedinh, "ˀEguh lha jid gudish nench´ez nendats´uya guyah telagunt´ih?" 27 Sizi gubenaghilhˀin hink´an gadinh, "Deni jadint´ah ˀinlhes gubets´en gwagwelnah hagunt´ɨsh gan Gudinits´ilˀin belh ˀeguh lha gagut´ɨsh. Gudinits´ilˀin belh ˀeguh lha did t´ats´enentaŝdalh."

Sizi nelanaghetadinsh gwayalhtɨg.

28 Peter nenduwh gayelhnih, "Xun ˀeguh didagatŝ´i hit´in ch´anidil hink´an nenenteẑidil." 29 Sizi nenduwh gadinh, "Tŝ´idaneŝ jid ganexwelhusni, ganendan ˀeyen sid sech´ez belh Gudinits´ilˀin bejeni bech´ez, gwa becheliqi, k´es bediziqi, k´es beban, k´es beta, k´es beŝqiqi guch´aniyah, k´es bequngh belh benen gwech´aniyah. 30 Nendan gajagh ˀeyen ˀinlhed hunded gweˀanz jid belaghetanɨsh, becheliqi, bediziqi, beban, beŝqiqi lajint´ih belanats´etalilh, benen hink´an bequngh lagunt´ih belanagwetaltŝ´elh. Hink´an nenduwh chuh gats´etaŝinlh, lha tŝ´utaŝt´in, jinats´enelhtanx, bants´etedlux jid bantats´edidiny, jinats´enelhtanx gughalanz gagulhnaẑ gudish nench´ez selhdenitalilh. 31 Gan jelan ˀech´an jinlin ˀeyen ˀech´ilhˀah jetalilh han hink´an ˀech´ilhˀah ˀeyen ˀech´an jetalilh han."

Sizi shunchuwh k´adex xuts´etalhˀinlh ˀeguh gwayalhtɨg.

32 Sizi guch´an ghelgɨsh, Jerusalem gwets´en ˀeten jeghanalh, guyen jeyelhnadilh ˀeyen lha gwanijilil. Jelan guch´ih jadelh ˀeyen yajeniljud. Hink´an shunchuwh guyen jeyelhnadilh ˀeyen jelan ˀeyen gubaˀeyud nigubenilah hink´an nenduwh xuts´etalhˀinlh ˀeguh gagubelhdetiẑni. 33 Nenduwh gagubelhnih, "Jerusalem nidil ˀegun Deni gudes xaghinyah ˀeyen, yaŝalhtɨg ˀaghendes belh Deni ˀijegwedelhˀanx ˀeyen gutl´ats´etalhtilh, ˀeyed hink´an ch´ats´edulax gweqa banits´egughetaˀalh hink´an ˀets´en deni tl´ats´etalhtilh. 34 ˀEyen jeyantadlux, ts´uts´edetaẑex, jeyutalhtŝeŝ hink´an ch´ajeyedetalilh. Tad dzin ghili ch´iz nagutadinh."

Deni gudes xaghinyah ˀeyen lha benadats´etaŝt´in gweqa nenjan hiyal.

35 Hink´an guyen James belh John, ˀelhchel Zebedee beyiqi ˀeyen, Sizi jeyets´eniˀaz hink´an gajeyelhnih, "Sizi, nendid gweqa nudaghilqed ˀeguh nexweduˀaghunax jid nuẑit´in." 36 "Nexwaxutasnilh jid ŝuẑeht´in?" nih gubudilhqed. 37 Nenduwh gajeyelhnih, "Gudish nench´ez ˀegun ˀinlhanx nench´eẑ ˀinstl´ans tetadalh hink´an ˀinlhanx nench´eẑ nalhes tetadalh. ˀEguh ganexughunlax guẑit´in." 38 Sizi nenduwh gagubelhnih, "Lha dideqa ˀudelhqed ˀeguh ˀegweyenehŝen hadehnih. Gugun tasalh ˀegun xun chuh tahˀas xedeyenehdẑen teladehnih? Bidaqash bid tasdinlh gwelagunt´ih ˀeyi tahdinlh xedeyenehdẑen teladehnih? K´es tubiˀasets´etalilh gwelagunt´ih ˀeyi bid tubiˀanexwets´etalilh xedeyenehdẑen teladehnih?" Jinanentatanx gwa yalhtɨg hadaghini. 39 Gajeyelhnih, "Xulht´i lha gasughudanx!" Hink´an Sizi nenduwh gagubelhnih, "Gweqehtasalh ˀegun xun chuh gweqehtahˀes hink´an tubiˀasets´etalilh ˀeyi bid tubiˀanexwets´etalilh, xulht´i lha gaŝuhnax! 40 Gan ˀinlhanx sech´eẑ ˀinstl´ans hink´an senalhes tetahqilh ˀeguh lha gwaˀanadezesni has. Guyen gubaˀats´egunlagh ˀeyen gubaˀagunt´ih hagunt´ɨsh." 41 Guyen jeyelhnadilh ˀeyun, James belh John, gajedinh ˀejudilhqed gweqa guts´en yajaghenilch´agh. 42 Hink´an Sizi gatŝ´in guqajaghini, hink´an nenduwh gagubelhnih, "Nenduwh nenqay king, deni gha nijegughenilah, ˀeyed gwech´ih deni gha ˀanajedetanilh hajint´ɨsh. King bedeni ˀeyen gajetat´inlh. 43 Gan xun xwets´en ˀeguh lha gagut´ih. Nexwetex ganendan yadi ŵeli guŝt´in ˀeyen xwenadatat´in. 44 Hink´an nendan su ˀech´an ŵeli guŝt´in ˀeyen gatŝ´in guba ˀelhna talilh hagunt´ih. 45 Deni gudes xaghinyah ˀeyen xeded hinchuh lha banadatŝ´etaŝt´in gweqa nenjan hiyal, gan nexwenadatat´in hink´an deni ˀananajenentat´insh ˀeyed gweqa ch´adetanilh jid gwech´ixetalhtsilh han."

Sizi, lha gwaŝˀin ˀeyen nayetilhˀiz.

46 Ch´iz gugun qwentex Jericho ts´egwedinh ˀegun jenindil, ch´iz Sizi jeyelhnadilh belh deni lhan ˀeyen qwentex Jericho jixajetiẑdil. ˀEgu deni lha gwaŝˀin, Bartimaeus ts´edinh, Timaeus beyi, ˀeyen ˀeten gwalhch´eẑ ŝedah ˀudedzɨsh jeyeghex gughajaghenalh. 47 Sizi Nazareth gwet´in gheyalh gwedeẑtŝ´an belh nenduwh gadinh yets´en jetiẑnish, "Sizi, David bets´enz xaghinẑed, sayaˀanaghundanx." 48 Deni lhan "Tadindiny!" jeyelhnih. ˀEguh chuh ˀelhch´iz nenduwh gadinh jenish, "Sizi, David bets´enz xaghinẑed, sayaˀanaghundanx." 49 Sizi nininyah hink´an nenduwh gadinh, "Beqajehnish." ˀEyed hink´an deni lha gwaŝˀin bets´en nenduwh gajedinh jid jeyeqajaghinish, "Nidinyash. Guzun jid gwadanɨghunẑed. Nenqajenish hadinh." 50 ˀEch´ed yiŝedah ˀeyi xayaghiˀed. Niditled hink´an Sizi yeghen nininyah. 51 Hink´an Sizi gayelhnih, "Naxutasnilh jid ŝuẑint´in?" Deni lha gwaŝˀin, nenduwh gayelhnih, "Sizi, natust´is guzest´in." 52 Sizi gayelhnih, "Nenk´ed ghinlgɨsh. Set´ayenintan gwech´ez saˀananenjagh." Nenk´eguh danh natist´iz, nenk´egun deni lhan belh Sizi yech´ih gwech´algay.

11

Sizi Jerusalem gwet´in nendajeyuniyah.

1 Sizi jeyelhnadilh belh Jerusalem gwets´en jeghanalh. Bethphage qwentex hink´an Bethany qwentex gughen dilhgwenlh ch´ed olive chen gulin ˀeyed, nandih yelhnaˀas ˀeyen guch´an gwetl´agubeghinlah. 2 Nenduwh gagubelhnih, "Nexwech´az qwentex guntsel ˀeyed, k´an dzanh qwentex nehˀaz, donkey lha ˀinlhed binatŝ´eŝex, jixetl´un talhtŝax. ˀEyi betl´ulh ch´edahˀed k´an ˀegwenz tulhush. 3 Deni ˀinlhanx tah, ´Xunlht´in haht´inˀ´ nexwelhnih hink´ed nenduwh galhuhni, ´Nexwaˀanadeni yutat´in, lha sex hilih ˀegwenz nexwets´en gwetl´anayulhtilh.´" 4 ˀEgu ˀegun jeniˀaz. Donkey yaˀanxw gweqwedeten gughen jixetl´un jinlhtŝan, hink´an k´an dzanh tl´ulh ch´ejedetiẑˀed. 5 ˀEgu deni belhdan gughex najedilhyah ˀeyen nenduwh gajedinh, "Nendideqa donkey betl´ul ch´edeteẑehˀed?" 6 Sizi gagubelhnih ˀeguh gajedinh gwech´ez gubits´edalghel. 7 ˀEgu Sizi bets´en donkey najeniluy. Ts´ed xadijedits´enz ˀeyi jeyech´ilah hink´an Sizi yech´itl´adidah. 8 Deni lhan guts´ed xadijedits´enz ˀeyi ˀeten tayalh ˀeguh gujeyedaghilah. Hink´an belhdan ˀelgan xadajelht´aŝ ˀeyi ˀeten nijedaghili. 9 Deni belhdan bech´an xanalh hink´an belhdan bech´ih xanalh gatŝ´in nenduwh gajedinh jejaghinish, "Nanidiny nenjan ninyah. Gudinits´ilˀin bedataˀanant´in gwech´ez ˀegwenz xaghinyah, ˀeyen deẑilti. 10 ˀUndidanh David ghinli bets´enz xaghidẑed. David ˀeyen gwaˀanadiẑni gagughint´i shunchuwh ganagwetadinlh. Su ˀech´a yadi jid gwedeẑilti." 11 Sizi Jerusalem niyah hink´an Gudinits´ilˀin bequngh gughen chets´aghedɨlh gwaˀagunt´ɨsh ˀegun jiz gughelgay. Gagulhchugh naseˀiz. Gwetiẑed chuˀagujagh gwech´ez guyen jeyelhnadilh ˀeyen belh Bethany gwets´en gunajadil.

Sizi fig chen belh yalhtɨg.

12 ˀEgwilhqan Bethany gwech´anajendil, Sizi bechanguẑun. 13 Niẑaẑ fig chen bet´an gulin hinlhtŝan. Niẑt´an talhtŝax yeniẑen ˀegun helgay. Fig niẑt´an ba gwetalax lha gwanagweŝid gwech´ez ˀet´an dzanh hinlhtŝan. 14 "Lha gwech´iz naniẑt´an natŝ´etaŝdinlh" nih, fig chen belh yaghinlhtɨg. Guyen Sizi jeyelhnadilh ˀeyen jeyuẑaghilhtŝ´an.

Sizi deni ˀejeneˀinsh gubelhnih ˀeyen tidagubenizud.

15 Shunchuwh Jerusalem gunajadil. Hink´an Gudinits´ilˀin bequngh gughen chets´aghedɨlh gwaˀagunt´ɨsh ˀegun jiz gughelgay, ˀegun guyen gwetuwh jejuqid hink´an gwetuwh jeguqid ˀeyen tidagubenizud. Guyen seneya ˀelhch´ixejenentedzih ˀeyen guch´edan dish nadaghilhqɨg. Guyen nulh lhek´el bejuqid ˀeyen guch´edeŝdagh dish nadaghilhqɨg. 16 Hink´an lha gwech´iz gugun Gudinits´ilˀin bequngh gughen chets´aghedɨlh gwaˀagunt´ɨsh ˀegun lha gwetuwh ˀinlhuwh chuh gughanajuŝlilh gubelhnih. 17 Hink´an nenduwh gadinh ˀigubedetilhˀin, "Nenduwh gagwedinh Gudinits´ilˀin bedestl´es ch´ed gweẑˀan: ´Sequngh deni gatŝ´in guqa xents´agult´i qungh hagunt´ih,´ gan deni ˀejeneˀinsh ˀeyen guqa gweẑˀan gwezelhtsin! Nexwets´ughutan ch´a xents´agult´i qungh gughen gaht´in!" 18 Xughelt´in hink´an xudalni ˀeguh deni lhan lha gwanijilil, yaŝalhtig ˀaghendes belh Deni ˀijegwedelhˀanx ˀeyen jijegwedilhyan gwech´ez jeyinilhjud. ˀEguh gwech´ez ˀinlhuwh tah jid ch´ajeyedulax gweqa jeguŵetiẑˀan.

Sizi xents´agult´i gwayalhtɨg.

19 Sizi belh jeyelhnadilh, xelhyiz qwentex jixanajadil. 20 ˀAben ˀeguh jeghanalh ˀegu t´ig chen ghananajadil, ˀeyi galhchugh disez ŝelin. 21 Peter gwech´inanighedẑed hink´an nenduwh gadinh, "Sizi, gweninlhˀin. Guyi fig chen belh yaghinlhtɨg ˀeyi disez ŝelin." 22 Sizi nenduwh gagubelhnih, "Gudinits´ilˀin bet´ayenehtan helhish. 23 ˀAlhˀadesnɨsh, Deni ˀinlhanx tah nendid dilhgwenlh, ´Taxedintŝid,´ nih, dilhgwenlh belh yaghinlhtɨg, bedzi bid lha gwets´udidlan chuˀant´ɨsh hink´ed. ˀInlhes gagwetanilh jid gwet´ayenetan hink´ed, bagagwetanilh han. 24 ˀEguh gwaneŝ ganexwelhesnih, Gan nendideqa xents´agulht´ih, yedanx helhchud jid gudehdlan hink´ed, talhcholh han. 25 Ganendan xents´agulht´ih hink´ed, deni ˀinlhanx yets´en nentsen ˀeyen yets´en naghedzun hink´ed, ˀeyen yets´en suninagwetaˀalh. ˀEguh gajagh hink´ed nexweta yudish ŝedah ˀeyen chuh yets´en suninagwetaˀalh han. 26 Gan lha denits´en suninagwehˀal hink´ed nexweta gudish ŝedah ˀeyen chuh lha nexwets´en suninagwetaŝˀalh."

Sizi betl´ats´egughin ˀan gwayalhtɨg.

27 Shunchuwh Jerusalem najendil. Hink´an Gudinits´ilˀin bequngh gughen chets´aghedɨlh gwaˀagunt´ɨsh jiz najedilh, ˀegu yaŝalhtɨg belhdan belh deni ghaˀanajedeni gant´en jeyenaghindil. 28 Sizi bets´en nenduwh gajedinh jeyudilhqed, "Nendan ˀeguh gaghunt´in nelhnih hanent´in k´es nendan nenduwh gataghant´inlh nentl´axgughiˀan hanent´in?" 29 Sizi gagubelhnih, "ˀInlhitah qa nexudetaŝqed, gaselhdahnih ˀeguh hink´an ˀeguh gast´in ˀeguh nents´enz setl´ats´egughiˀan ganexwelhdetasnilh. 30 John deni tubiˀalhˀinsh, Gudinits´ilˀin bets´enz telaghet´in k´es denitŝ´enẑ telaghet´in? ˀEguh gaselhdehnih!" 31 ˀElhelh gwanayajaltɨg, "Gudinits´ilˀin bets´enz didinh hink´ed nenduwh gadinh nexudetalhqed, ´Dideqa lha xudehdlanl?´ 32 Gan Denits´enz didinh hink´ed..." (Gatŝ´in John ˀinlhes Gudinits´ilˀin bets´enz haghet´in jegudidlan gwech´ez deni lhan ˀijenilhjud.) 33 Nenduwh gajedinh, "Lha ˀegweyenidẑen." Sizi nenduwh gagubelhnih, "Sid chuh ˀeguh gast´in ˀeguh nents´enz setl´ats´egughiˀan lha ganexwelhdetezasnilh."

12

Sizi nagwedɨng bech´initŝ´eẑig gant´i bid xedanagwelnɨg.

1 Sizi nagwedɨng bech´initŝ´eẑig gant´i bid gubelh nagwetilhnɨg, "Deni ˀinlhanx niẑt´an chen gunachen daghilah hink´an gweneniẑtl´un. Niẑt´an ts´enelhjenẑ gwaˀagunt´ɨsh gweqa nen xagughilah. Yadish tets´eyash ˀelhanx ts´eyetiẑˀin gwaˀagunt´ɨsh ˀagunlagh. Did xanaghilhyan belhdan ch´ilhgha nen deni gubagwelhˀan, hink´an niẑaẑ gughiyah. 2 Niẑt´an ch´inint´an hink´an niẑt´an belhdan guts´en naŵelchud gweqa ˀelhna ˀinlhanx ˀegun guts´en gwetl´aghilhtin. 3 ˀEyen tejeyaghelchud hink´an ˀananajeyeŝdlin. Lha did chuh naxalhnih jeyinadalghel. 4 Guyen bets´enz gulin ˀeyen shunchuwh ˀelhna ˀeyun guts´en gwetl´aghilhtin, ˀeyen k´es jeyetŝ´enilht´i. Hink´an lha ˀegun hilih jid jeyets´en ˀanajeŝt´in. 5 Bets´enz gulin ˀeyen shunchuwh ˀeyun ˀinlhanx guts´en gwetl´aghilhtin. ˀEyen ch´ajeyedilagh. ˀEyed gat´in, ˀeyun guts´en gwetl´ahelhtish. Deni lhaˀalhah ch´aguts´edilagh, belhdan ˀananaguts´adlish. 6 "ˀInlhanx dzanh gwetl´atalhtilh gulin. Beyi xunt´in ˀeyen su ˀech´ilhˀah gwetl´ayaghinlhtin. Nenduwh gadinh, ´ˀInlhes yadi jid jeyadanitaẑed hant´ɨsh; ˀinlhes jeyedetalhti hant´ish.´ 7 "Guyen niẑt´an xajenelhyax ˀeyen nenduwh gaˀelhelhjededinh, ´ˀEyen k´adex nen betl´anagughetaltŝ´elh hant´ih. Ch´adilyagh ˀeguh, xun xwetl´anagultŝ´id.´ 8 Tejeyaghelchud hink´an ch´ajeyedilagh. Niẑt´an gweneniŝtl´un ˀeyed jixajeyaghilht´i. 9 "Guyen benen ˀeyen xutalnilh? Niẑt´an xajenelhyax ˀeyen guts´en niyah hink´an ch´agubedetalilh. Hink´an niẑt´an belhdan ch´ilhgha, nen deni ˀeyun ghagwetalhˀalh. 10 Gudinits´ilˀin bejeni nenduwh gagwedinh gwech´edets´ezjez lha gwech´eyaŝelhtɨg tesaneht´i, ´Guyi tŝi lha xuht´in ˀeyi hah su bet´ad Gudinits´ilˀin tŝi ˀelhch´idenaghindzay. 11 Gudinits´ilˀin ˀagunlagh hagunt´ih. Jitidat´in.´" 12 Nenduwh xuldinh ˀeguh gubayalhtɨg hadaghini ˀeguh ˀegwejeyeniẑen gwech´ez ˀinlhetah jid nendajeyuŵelht´ax jeguŝt´in gan deni lhan ˀijenilhjud gwech´ez gwanajetiŝdil.

Sizi ˀets´en ˀaduni qaˀats´elhˀin.

13 Guyen Pharisee hink´an Herod gubixudinten belhdan Sizi bets´en gwetl´aguts´eghinlah. ˀInlhetah jid gwaghex ˀadinh tejeyeŵelchud jeyeniẑen. 14 Jeyets´enindil hink´an nenduwh gajedinh, "Sizi ˀalhˀadinih ˀegweyenidẑen. Lha deni ˀinlhanx bets´enz nideẑintlad gan Gudinits´ilˀin bech´ih tŝ´idaneŝ jid ˀigwedinlhˀanx. Caesar bets´en taks ch´ixaˀiltsish ˀeyi, ˀegun k´es lha ˀegun hilih tesat´inˀ 15 Taks ch´ixeteghaltsilh k´es lha gateẑaghadinlh tesanh?" Sizi ˀets´en ˀaduni qaˀajeyelhˀin ˀeguh chuh gubelh ˀegweyeniẑin gwech´ez gagubelhnih, "Dideqa ˀets´en jitasulhtilh qaˀaht´in? Seneya ˀinlhi sets´en nahˀalh, ˀeyi nuŵesˀin." 16 Seneya ˀinlhi jeyets´eninˀan. Hink´an Sizi gagubelhnih, "Bech´ed nendan betŝi ch´idaltsin, nendan beghuzi bidiˀan hant´ih?" "Caesar hant´ih, " jedinh. 17 Sizi gagubelhnih, "Nendid Caesar beghuzi bidiˀan ˀeyi Caesar betl´anuhˀalh, hink´an nendid Gudinits´ilˀin bets´enz ˀeyi Gudinits´ilˀin betl´axulhnish." ˀEguh gadinh gwa ˀinlhes lha jeyanilil.

Sadducee chuh Sizi jeyudilhqed.

18 Hink´an guyen Sadducee gulhts´edinh, ch´ats´edet´insh ch´iz lha ninatŝ´edeŝdash jegudidlan ˀeyen belhdan jeyudulhqed jeyeniẑen gweqa jeyets´enindil. 19 "Sizi, Moses nexwadestl´es ˀalagh bech´ed gagwedinh. Lha ˀeŝqi jeŝt´anx danh tŝ´iqi beqen ch´adejagh hink´ed, ch´adejagh ˀeyen bechel yech´ih gheẑelh ˀeyen ya ˀeŝqi ˀatalilh gwech´ez bunagh beŝandinlh belh bituˀanatadinlh jid gwets´enz. 20 Nenduwh gagujagh, ˀinlhed ch´ilhghilh ganilt´ih jelt´ih, ˀelhcheliqi jinlin su ˀech´an gheẑelh tubiˀajagh hink´an lha ˀeŝqi hit´inl chu ch´adejagh. 21 ˀEyen yech´ih gheẑelh yeŝandinlh belh tubiˀanajagh, ˀeyen chuh lha ˀeŝqi heŝt´anx chu ch´adejagh. Shunchuwh bechel ˀinlhanx su gajagh. 22 Gatŝ´in ˀelhghaˀen lha ˀeŝqax jit´inl chu ch´ayajedijagh. ˀEch´ilhˀah ŝandinlh ˀeyen chuh ch´adejagh. 23 ˀEguh nenduwh xugwetalht´ilh? Gatŝ´in jeyelhtubiˀaghint´i ninajedidil ch´iz nendan beˀad talilh han?" 24 Sizi gagubelhnih, "Gudinits´ilˀin bejeni jidats´egwedinlah k´es Gudinits´ilˀin benadint´i ˀeyed lha su ˀegweyeneŝen ˀeguh gwech´ez ˀets´en jid gwadaniŝed teladehnih? 25 Deni gatŝ´in ch´ajedejagh ch´iz ninajedidil, ˀeguh lha tubiˀajit´ɨsh hagwetat´ilh, gan gangu liẑanŝ gajint´ɨsh jetalax hajint´ɨsh. 26 Ch´ats´edet´insh hink´an ninats´edidɨlh jidagwedinlah. Lha ˀeyed gwech´eyaŝelhtɨg telaneht´ih? Moses destl´es ch´ed, xwests´el diẑk´en hinlhtŝan ˀeyed gweyi Gudinits´ilˀin nenduwh gayelhnih, ´Sid Abraham beGudinits´ilˀin hast´ih. Isaac chuh beGudinits´ilˀin hast´ih hink´an Jacob beGudinits´ilˀin hast´ih.´ 27 Gunchagh jid ˀets´en hadehnih, Gudinits´ilˀin ˀeyen lha ch´ajedejagh ˀeyen gubenits´ilˀin hilih han, gan guyen jegwenɨsh ˀeyen gubenits´ilˀin hant´ih." (Ch´ats´edejagh ch´iz chuh denits´etalilh hagunt´ɨsh.)

Nexwunits´egughenilah nendad su ˀech´a yadi jid badanigwedẑed?

28 Deni ˀijegwedelhˀanx ˀinlhanx niyah ˀeyen ˀelhelh yajeltɨg gubedeẑtŝ´an. Sizi nenduwh xuldinh yuẑaghinlhtŝ´an gunt´in gwech´ez yudilhqed, "Beghad deniteghadlilh nexwanits´egughenilah ˀeyi nendad su ˀech´a han?" 29 Sizi nenduwh gadinh, "Su ˀech´a hink´an ˀech´an nexwanits´egughenilah: ´Israel gwet´in, ˀuẑuŵelhtŝ´an. Gudinits´ilˀin ˀinlhanx gulin ˀeyen nexwaˀanadeni. 30 Gudinits´ilˀin bets´en, nentsin gatŝ´i bid xuteghant´in.´ 31 ˀEyi gwech´ih ˀeyi: ´Deni ganendan ˀeyen, xedunint´in ˀeguh gagunt´ih jid gubuteghant´in.´ Nendid nanqih ˀeyi gwelan nexwanits´egughenilah ˀeyi bech´an hant´ɨsh, " yelhnih. 32 Guyen Deni ˀijegwedelhˀanx ˀinlhanx gayelhnih, "ˀAlhˀadinih, Sizi; Gudinits´ilˀin ˀinlhanx dzanh gulin, lha ˀeyun gulih. 33 Hink´an neneŝ ganlhchugh bid xuteghant´in hink´an deni ganendan ˀeyen xedunint´in ˀeguh gagunt´ih jid gubuteghant´in; Gudinits´ilˀin bets´en gwetah ts´egwedelhk´ansh hink´an Gudinits´ilˀin bets´en nulh ch´ats´edelhˀinsh ˀeyed gwech´a yadi jid gwadanigwedẑed." 34 Sizi guzun ˀats´edinh jid gwech´ighaniŝeŝed hink´an gayelhnih, "ˀEguh gadinih ˀeguh gughen tsel jid Gudinits´ilˀin xutaghanlt´inlh ˀeguh ˀegweyeninẑen." ˀEyed guˀen lha ˀinlhanx yudulhqed ˀanil.

Sizi xedanagwelnɨg.

35 Sizi Gudinits´ilˀin bequngh ˀanz deni ˀigwedelhˀanx nenduwh gadinh, "Xulht´i hajedenish guyen Deni ˀijegwedelhˀanx ˀeyen nenduwh gajedinh ˀeguh, Gudinits´ilˀin bets´enz xaghinyah ˀeyen David yets´enz xaghinẑed? 36 David xeded, Gudinits´ilˀin yedanagwelnɨg, nenduwh gadinh, ´Gudinits´ilˀin saˀanadeni ts´en gadinh: "Senalhes texunda."´ 37 David xeded chuh baˀanadeni Gudinits´ilˀin bets´enz xaghinyah jid yuzɨsh. David baˀanadeni xugunlht´i jid yets´enz xaghinẑed hagwetat´ilh?" Gatŝ´in jeyuẑilhtŝ´an gwenajenaghedinh.

Deni ˀijegwedelhˀanx gubaxuŵehtan.

38 Sizi deni ˀigwedelhˀanx nenduwh gadinh, "Deni ˀijegwedelhˀanx belhdan gubaxuŵehtan. Gubets´eduŵelhti gweqa ˀets´uqid gwelex ˀeguh ts´enz nenaẑ ˀijedilhtŝ´ih. 39 Chets´aghedɨlh ˀeyed ch´edesdagh diẑti ch´ed tejedilhtŝ´ɨsh hink´an ˀets´eguŵelɨsh ˀeyed chuh ts´egwedilhti ˀeyed tetl´ajedeltŝ´ish. 40 Hink´an ŝandinlh guts´enz guch´adajeneˀax. Guch´initŝ´uẑid ch´a sex deni nalh xents´ajegult´ish. Nendan gajet´in ˀeyen su ˀech´a guntsen jid jinaguts´enentalhtanx hajint´ih."

Sizi seneya jits´enedzɨsh gwenilhˀin.

41 Sizi Gudinits´ilˀin bequngh gughen seneya jits´enedzɨsh ˀeyed gwech´az nitl´adindah hink´an xulht´i jid seneya jits´enedzɨsh gwenilhˀin. Guyen gwetah jegulyuẑ ˀeyen seneya lhan xajenedzɨsh. 42 ˀEgu guyen ŝandinlh ˀetilˀin ˀeyen ˀinlhi send dzanh ch´ih gweẑtan, jinaghilhguy. 43 Jeyelhnadilh ˀeyen ts´en gubenentaltsɨg jid guqajaghini hink´an gagubelhnih, "Tŝ´idaneŝ jid ganexwelhusni, nenden ŝandinlh ˀetilˀin ˀeyen gatŝ´in xejenaghindzay ˀelhinagudati gwaguˀen jid xenaghinˀan hajagh. 44 Guyen gwetah jegulyuẑ ˀeyen guzeneya belhdan dzanh xajenaghindzay, gan xeded ˀeguh yet´ad denitalilh ˀeyi gatŝ´i xayenaghinˀan hajagh."

13

K´adex ˀetits´etalˀinlh.

1 Sizi Gudinits´ilˀin bequngh ˀanz tinaghedalh ˀegu, guyen jeyelhnadilh ˀinlhanx gayelhnih, "Sizi, gweninlhˀin, qungh gagusun, tŝi chugh bech´edeˀelhtsin ˀelhch´its´edenaghindzay." 2 Sizi nenduwh gayelhnih, "Qungh gagusun gwenilhˀin. Nanats´egwedenentaggenŝ hagunt´ih, lha tŝi ˀinlhi ˀelhch´ed ˀelhqadenentaŝˀalh hagunt´ih." 3 Sizi Gudinits´ilˀin bequngh gwagunez dilhgwenlh olive niẑt´an xanelhyish ˀeyed gwenen ŝedah ˀegu Peter belh James belh John belh Andrew jadint´ah jeyeghen nijagheninan hink´an jeyudetilhqed: 4 "Xugulhyad gagwetanilh xungh? Gagwetanilh gwets´en gwaẑelh, xugunlht´i jid ˀegweyenentaghadzanx?" 5 Sizi gagubelhdetiẑni, "Lha ˀinlhanx nanexweneŝˀax. 6 Jelan ˀeyen "Gudinits´ilˀin bets´enz xaghinyah hast´in," jedinh, deni lhan ˀets´en jenentaˀex. 7 Nexweghex ˀelhts´ult´ax gwedeẑehtŝ´an, hink´an nen niẑaẑ ˀelhts´ult´ax jigwedelhyan hink´ed lha naxenentaẑehdilh. Nenk´ed gagwetanilh gan lha nenqay ch´agwedetaŝnilh. 8 Nen ˀelhch´an ninats´edindil hink´an nenqay nen gunchagh ˀelhch´an ninats´edindil hink´an ˀelhts´utalt´ex. Niyatah nen chuh nagughetadanlh. Dan yats´etalax. ˀEgu su ˀech´an jinats´enentatanx, gangu tŝ´iqi ˀeŝqi ghet´inlh bech´inlhts´ad, ˀelhghaˀen ˀesdan ˀelhghen bech´inalts´ɨg gagwetat´ilh. 9 "Gan xedaxetahtinlh; deniqa najegughetaˀalh ˀetex xaguts´aghinlah ˀeyen gubed ninanexwets´etalhdɨlh, hink´an chets´aghedɨlh qungh ˀeyed dechen bid nexwech´edats´edetalt´i, tŝeŝ bid nexwech´edats´edetaltŝeŝ. Sudihdlan gwech´ez hink´an sayaŵelhtɨg gweqa nen guntsel gwaˀanajedeni ˀeyen belh nen gagulhchugh gwaˀanajedeni gubenadas nadetalhyalh. 10 Gudinits´ilˀin bets´enz ˀalhˀagwedinh ˀeyi deni gatŝ´in ts´en gubits´egughilhni hink´an ganexwets´etalhˀinlh. 11 Ganendin qungh nenchagh nendanexwets´enilht´i hink´an qod nentŝ´udetalhqed jid nanents´aghetaten. Xudetalhnilh ˀeyed gwech´an lha gwanaxenenteẑindash, gwanagughiẑed k´an ˀinlhetah ˀadetahnilh ˀeyed, Gudinits´ilˀin xudetalhnilh ˀeguh nelh ˀatanilh, lha nin hilih yataghanlhtɨg hagwetat´ilh gan Gudinits´ilˀin ba yataghanlhtɨg ˀeguh jid niˀanatat´in. 12-13 ^Hink´an sid sech´ez deni gatŝ´in gunchagh jid lha nexwejutaŝt´in gwech´ez nenduwh chuh gats´etat´ilh, deni ˀinlhanx bechel ch´ats´edulax gweqa yagwetalnɨg hink´an ˀinlhanx beŝqi ts´en chuh ˀeguh jid ˀanatat´in. Hink´an ˀeŝqax guta belh guban, gubedeŝniqi ch´aguts´edulax gweqa ˀelhch´aninajedetadelh. Ganendan ˀech´ilhˀah gwets´en sech´ez nalt´i ˀeyen detajɨsh. ˀEyen gudish nench´ez ˀagwetalilh. 14 "Guyi gunchagh jid nentsen gwech´ez jigwenijed lha bets´enz gulih ˀeyed nadetalˀalh, nendan ˀech´eyalhtɨg ˀeyen sul ˀegweyenuẑin, guyen nen Judea jedilhtŝ´ɨsh ˀeyen dilhgwenlh ts´en tŝijaghetulnalh. 15 Ganendan bench´ed tenayah ˀeyen lha guyax qungh gwetuwh tinagughetalhnɨsh gweqa ˀegun nanaŵeŝja. 16 Nendan yaneŝ tl´ech´ed ˀanat´in ˀeyen lha ch´ih bekud natalhcholh gweqa ˀegun nanaŵeŝja. 17 Jalchan ˀeyen hink´an ˀeŝqax jintsel jet´in ˀeyen gundaẑ jid ˀetijetalˀinlh. 18 Lha xi hagusnax gweqa xents´anaguŵelht´i. 19 Gudinits´ilˀin nenqay ˀagunlagh gudin lha gagulhtsen nats´egwenentalhˀinlh, ˀeguh gagwetanilh hink´an ˀeyed guˀen lha gwech´ih gagulhtsen ts´egwenentalhˀinlh. 20 ˀEtex xaguts´aghinlah ˀeyen sex jinajenetanx gwech´ez Gudinits´ilˀin guba nagughedetalht´ex, lha ganil hink´ed ch´elejetagganlh, lha ˀinlhanx detaŝjɨsh. 21 Gagwet´in gughad ˀinlhanx tah ganexwelhnih, ´Nenden Gudinits´ilˀin bets´enz xaghinyah hat´in, ninlhˀin!´ k´es ´ˀEyun ˀeyen neyad hant´ih, ninlhˀin!´ jedinh hink´ed lha gubudihdlan. 22 Gudinits´ilˀin bets´enz xaghinyah jaghedilˀin belh Gudinits´ilˀin jeyedanagwelnɨg jaghedilˀin hink´an nagwedint´i jid ˀinlhetah lha gwanitŝ´eŝdlax ˀajetanilh, ˀeyed gwech´ez lha gubanits´ilil ˀeguh jid Gudinits´ilˀin ˀetex xagubaghinlah ˀets´en jenentuˀax qaˀajetat´inlh. 23 Gubaxuŵehtan; ˀeyed gweqa gwech´an danh ganexwelhesnih. 24 "ˀEguh hink´an gundaẑ jid ˀetits´alˀin ch´iz ´sa lha tidɨsh hink´an ˀaldzi lha bets´enz xayidɨsh talax. 25 Hink´an ŝen yat´ax xadanentaẑed, hink´an yat´ax nagwedint´i jid naguŵetadanlh.´ 26 ˀEguh hink´an Deni gudes xaghinyah, benadint´i belh bets´enz xaghindin, qw´es tuwh gudin gheyalh ts´etalhtŝax. 27 Hink´an liẑanŝ, nenqay gagulhchugh ˀetex xaguts´aghinlah ˀeyen, nacheguts´aghetalilh gweqa gwetl´agubetalilh. 28 "Guyi tl´asbay beghad ˀigwedulhˀanx, bedechen begheẑ gweẑlin, bet´an ˀigwediltŝan, dan gwets´en gwaẑelh. 29 ˀEguh gagunt´ih jid nexwenalh nenduwh gwayaghilhtɨg ˀeguh gagwetiŝt´in, nenqay ch´agwedetanilh gughen tsel gwanagughiẑed ˀeguh gagunt´ih jid ˀegweyenentahŝinlh. 30 Tŝ´idaneŝ jid ganexwelhusni, Nenjan k´an deni jilin ˀeyen lha gatŝ´in ch´ajedeŝnax gweˀin danh gagwetanilh. 31 Yat´ax belh nenqay lha gul talax, gan sejeni ˀeyi lha gataŝnilh. 32 "Gan lha ˀinlhanx ˀeyed dzin k´es ˀeguh neghalt´i ˀegweyenentaŝanx, gudish liẑanŝ ˀeyen chuh, sid beyi nesdlin lha ˀegweyeneŝen, seta dzanh ˀegweyeniẑen han. 33 Sul gwaxeẑehtan jid ch´eyeteŵeht´in! Lha ˀeyed neghalt´i gwaguyah. ˀEyed neghalt´i lha ˀegweyenentaẑahŝinlh. 34 Gangu deni ˀinlhanx niẑaẑ gwedenentadalh gagunt´ɨsh. Bequngh gwech´atayalh, beˀelhna jinlin ˀeyen gwajughuŵetan qaˀagubilagh. ˀElhaghˀeyuwh ˀanajetat´in nɨgubeghilish. Nendeten gwaxiẑtan ˀeyen gayelhnih, ´Gagulhnaẑ gwaxughuntan!´" 35 Sizi gagubelhnih, "Lha xugulhyad bequngh ˀanatadalh ˀegweyenehŝen gwech´ez gagulhnaẑ ch´eyetuŵaht´in. Xelhyiz k´es, naghinlhghil k´es, teẑniẑ guˀen k´es, yelhqan tesatanilh. 36 Lha xentsel nenchanx nananataŝdalh. 37 ˀEguh xun ganexwelhesnih, Gwaxuŵehtan! Deni gatŝ´in guqa hadesnih, ´Ch´eyetuŵaht´in!´"

14

Tŝ´iqi Sizi ch´idenlh biˀayinlagh.

1 Nad dzin ghili hink´an gunchagh dzin Passover ts´egwedinh, lhiz lha nilẑux ŝet´ɨsh ts´eyinsh gweqa chets´aghedɨlh gwets´en gwaẑelh. Yaŝalhtɨg ˀaghendes jinlin belh Deni ˀijegwedelhˀanx ˀeyen nagwenet´iny jid Sizi jeyelhghil hink´an ch´ajeyedulax gweqajeguŵeˀa. 2 "Deni lhan nexwetejutsanx ch´a, lha chets´aghedɨlh gughad hasughudanx," jedinh. 3 Bethany qwentex Simon beneŝ xadatlax ts´edinh ˀeyen, Sizi belh bequngh nejedan ˀegu tŝ´iqi beŝ nentsel biˀaŝdenl bededinldzi alabaster ts´edinh bid ˀats´ilagh, ˀeyi ch´idenlh diẑti bid gulin ˀeyi nendayeninlhtan hink´an yedex xagughinlhqed nenk´egun Sizi yetŝi ch´eyeẑnel. 4 ˀEyed gweqa belhdan yajaghenilch´agh jid ˀelhelh gwanayajaltɨg, "Dideqa nendid ch´idenlh gants´iz ŝelin? 5 Nendid ch´idenlh ˀinlhed xi bet´ad deni taghanlilh ch´ih gweẑtan jid beˀughinqid hink´an deni ˀetilˀin tuwh xataghanɨsh tesaghint´i ˀeyi hayinlagh," jedinh. Hink´an jeyets´udaghinla. 6 Gan Sizi gadinh, "Lha bets´udelha hah! Dideqa galhehnih hadehnih? Nenden guzun jid sets´en ˀanaŝt´in. 7 Deni ˀetijelˀin ˀeyen gagulhnaẑ nexwelh denijetalilh, ganendin gubelh ˀaŵehnax guẑeht´in gatahnilh; gan sid lha gagulhnaẑ nexwelh denitezasdlilh has. 8 Guyen tŝ´iqi, gaŵenax guŝt´in ˀeguh gajagh. Sunisets´etalhtilh gweqa ŝeneŝ ch´idenlh bid xenasedelax haghet´in. 9 Tŝ´idaneŝ jid ganexwelhusni, Ganents´in nenqay gagulhchugh sanats´egwelnɨg, nenden tŝ´iqi nenduwh gajagh binats´ulnɨsh gweqa banats´egwetalnɨg han."

Judas nagu Ŵeˀa.

10 ˀElhch´aẑnan guˀen nandih ˀinlhanx Judas Iscariot ts´edinh ˀeyen, Sizi yinaˀuduqid yeniẑen gweqa yaŝalhtɨg ˀaghendes guts´en henlgay. 11 Yaŝalhtɨg ˀaghendes gubini ˀats´edinh, hink´an seneya betl´ats´enentadzɨsh jegwelhtsin. Sizi yinaˀudetaqelh gweqa, nendin su ˀech´a guzun gatanilh gwech´ighanisŝd.

Passover ˀajetayinlh xenats´egwedelax.

12 Gunchagh dzin lha lhiz nilẑux ŝet´ɨsh ts´etayinlh gweqa chets´aghedɨlh su ˀech´an dzin Passover jinats´ulnɨsh gweqa shib yaz ch´ats´edelhˀinsh. Jeyelhnadilh ˀeyen Sizi jeyudaghilhqed, Nents´in Passover ts´eyan teghadinlh gwa xenagwedetaghalyilh gweqa gwelanexweteghalilh?" 13 Jeyelhnadilh nandih gwetl´agubelih nenduwh gagubelhnih, "Gugun qwentex naŵehˀas, deni ˀinlhanx nuŝay beŝ bid tu niẑq´eẑ ghelhtinlh ˀeyen nexweditayalh, ˀeyen nentuht´as. 14 ˀEyen nents´in nendaniyah ˀeyed guyen bequngh ˀeyen galhuhni, ´Sizi nents´in Passover belhnadilh gubelh netadinlh ˀeyed nexwagweẑˀan gweqa nudilqed?´ 15 Gudish ˀabesdas ˀegun gunchagh gweẑˀan nexwigwenentalhˀinlh, ˀeyed ch´edan belh ch´edeŝdagh bid xengwedint´ɨsh. Nexwedud ˀeyed ts´eyan xenadulhax, " gubelhnih. 16 ˀEguh hink´an gwech´a jelgay, qwentex jeniˀaz hink´an ˀeyed xuldinh ˀeguh su gagughint´i, jeguˀan. ˀEyed Passover ts´eyan xenajedilagh.

Passover gunchagh dzin nejedan.

17 ˀEguh xelhyiz Sizi belh jeyelhnadilh ˀeyed jenindil. 18 ˀEyed ch´edan k´abah nejedan ˀegu Sizi gadinh, "Tŝ´idaneŝ ganexwelhdetasnilh, nenjan xun ˀinlhanx selhneˀedan ˀeyen sinaˀudetaqelh." 19 ˀEguh gadinh gwech´ez gatŝ´in gudzi deniŝdagh, ˀinlhanx liny, "Sid telatasnilh. Sid xulht´i gaŵesnax?" jedetizni. 20 Gagubelhnih, "ˀElhch´aẑnan guˀen nandih ˀinlhanx hatanilh, selh lhiz tŝ´ay bitenedelhqɨg ˀeyen hatanilh. 21 Deni gudes xaghinyah nexwanatadalh ˀegwejid gwech´edeˀesjez. Gan Deni gudes xaghinyah ch´azninadinjah ˀeyen bets´en gwedints´ad hagwetat´ilh! ˀEyen deni lha hidlanl guˀen jid gwetazulh ghili." 22 Shunk´ah ˀejeyan gwatish lhiz hinlhchud hink´an gudish beta ts´en gwa ch´iqidadiny hink´an ˀelhts´idayelhqed, nenk´egun gutexayeẑni, hink´an gadinh, "Ŵelhchud; ŵehyan; nendid ŝeneŝ hant´ɨsh." 23 Hink´an bidaqash hinlhchud ˀeyi chuh gudish beta ts´en gwa ch´iqidadiny hink´an gubets´en yetiẑqan, gatŝ´in nentsel jadan. 24 Nenduwh gagubelhnih, "Nendid sedel deni lhan guqa sets´enz xatadenlh ˀeguh jid ch´adetasnilh, nenk´eguh jid Gudinits´ilˀin xuldinh nexwelh nenduwh ninagughetaˀalh. 25 Tŝ´idaneŝ jid ganexwelhesnih, ˀinlhetah dzin Gudinits´ilˀin ba gwaˀanadetasni gweqa xanatasdalh ˀeguh hink´an niẑt´an tu nexwelh natasdinlh."

Sizi jeyelhnadilh ˀeyen ˀelhanx tŝixetalnalh gwayaghilhtɨg.

26 ˀEguh hink´an xents´agult´i shen bijajen ch´iz dilhgwenlh ch´ed olive chen gulin ts´egwedinh ˀegun najaghetiŝdan. 27 Sizi gagubelhnih, "Ganexwenilhan sech´atŝixetalhnalh. Gudinits´ilˀin bejeni gwech´edeˀesjez gagwedinh, Gudinits´ilˀin bejeni nagwedɨng bech´initŝ´eẑig gant´i nenduwh gagwedinh, ´Sid nenguyen shib ghaxiẑtan ˀeyen ch´adetaslilh, hink´an shib ˀelhanx tŝixetalnalh.´ 28 ˀEguh k´adex ch´asets´edinlagh ch´iz ninadesjah hink´an nen Galilee ts´egwedinh ˀegun nexwech´an tasalh," gubelhnih. 29 Peter ˀeyen gayelhnih, "Gatŝ´in natŝixetilhnan, Sid xulht´i gaŵesnax!" 30 Sizi gayelhnih, "Tŝ´idaneŝ jid nin ganalhesnih. Nin ˀeguh k´an ˀelhˀi lusdes lha nad ˀadeŝnih danh tad lha seẑaghinˀin detaghanilh hanint´ih." 31 Gan ˀegwechuh Peter gayelhnih, "Xulht´i! Nelh ch´adetasnilh ˀeguh chuh gagunt´ih lha ninunenteẑaŝinlh has." Gatŝ´in chuh su gajedinh.

Gethsemane ts´egwedinh ˀeyed Sizi tad xents´agughelt´ih.

32 Gethsemane ts´egwedinh ˀeyed gwananajaghadan; hink´an jeyelhnadilh ˀeyen gagubelhnih, "Xents´anagust´ɨsh gwets´en nenjan dulhtŝ´i." 33 Peter belh James belh John ˀeyen dzanh xedelh gubetilhˀaz, ˀeyed gundaẑ jid ˀets´en ninentilhtŝ´ed. 34 Hink´an gagubelhnih, "Ch´adetasnilh jid sedzi deniŝdagh. Nenjan sech´eyeteŵehˀin." 35 Gweˀanz nilhdi tsel nininyah ˀeyed, guyax digwen taxedetilhtŝ´ed hink´an xents´anagutilht´i, gagunax, "ˀEyed neghalt´i sech´an gughetultŝ´id." 36 Hink´an gadinh, "Seta, ganenduwh xuteghanlnilh guẑint´in gataghanilh. Gundaẑ jid jinanestanx ˀeyi sanagughetughunˀalh, gan lha sid sedaˀaguŝnax nin xugulnax guẑint´in ˀeguh gagunax." 37 Gubananaghelgay, belh gubeghighan nagubiltŝan. Peter gayelhnih, "Simon, nelheẑilhghin hanint´ih hany? Lha jid ˀinlhed naghedilht´i gwets´en sech´eyetughuˀin guyah telanint´ih? 38 Guntsen ˀaŵehnax ch´a ch´eyeteẑeht´in, xents´agulht´ih. Nexwetsin tŝ´idaneŝ ˀanaŵet´in gunt´in gan nexweneŝ lha nadit´i." 39 Shunchuwh xents´agutalt´ilh ˀegun gunaghelgay. Xuldinh xents´anagughelt´ih ˀeguh ganadedinh. 40 Shunchuwh jeztiz gubananaghelgay. Belh guch´a nadaghint´ɨsh, hink´an lha ˀaxujeyelhduni guyal. 41 Shunchuwh xents´agult´ɨsh ˀegwenz xanaghelgay, nenduwh tad gajagh, hink´an gagubelhnih, "Shunk´ah hanh, ŝehtiz! Lha nexwanislil! ˀEyed neghalt´i ˀeguh gagwetanilh. Sid, Deni gudes xaghinyah nesdlin ˀeyen guyen deni gwaghex taˀanajet´in ˀeyen gutl´asets´etalhtilh. 42 Ninadahdilh! Nenk´ed ˀaghudanx! Gagwetanilh, guyen deni gutl´asetalhtilh ˀeyen niyah."

Sizi tets´aghelchud.

43 Nenk´eyed lha najesax danh, guyen ˀelhch´aẑnan guˀen nandinh jelt´ih ˀinlhanx Judas ts´edinh ˀeyen deni lhan binlugh chugh belh dechen telt´ɨsh jalilh guts´en gubenilah. Yaŝalhtɨg ˀaghendes jilin ˀeyen belh Deni ˀijegwedelhˀanx ˀeyen belh t´ajegultin nits´ilˀin jilin ˀeyen ˀegwenz gwetl´agubeghinlah gwech´ez hajet´in. 44 Hink´an deni ch´aninadinjah ˀeyen jighanagubenentalten gadinh, "ˀEyen benimeŝen nentasts´ons ˀeyen hatat´ilh. ˀEyen ŵelhchud sutsel baxeẑehtan gwanatulhtilh." 45 ˀEyed jenindil nenk´eguh danh Judas ts´edinh ˀeyen Sizi yulgay hink´an gadinh, "Saˀanadeni nendeẑilhti," hink´an yenizts´ons. 46 Judas jeyelhnadilh ˀeyen Sizi tejeyaghelchud hink´an najeyetilhtin. 47 Sizi yets´enz ˀadedinh ˀinlhanx ˀeyen binlugh chugh xaghegganẑ hink´an guyen yaŝalhtɨg ˀaghendes beˀelhna helin ˀeyen yeqatilht´i yedzagh xaghilht´aẑ. 48 Sizi gagubelhnih, "Gangu deni ˀeneˀinsh ts´etalhcholh laht´in binlugh belh dechen talt´ɨsh ghelhilh sets´en nehdil. 49 Gwelan Gudinits´ilˀin bequngh chets´aghedilh gwaˀagunt´ɨsh ˀeyed deni ˀigwedesˀanx nanaghehdɨlh ˀegwechuh lha selhcholh. Gan yedanx Gudinits´ilˀin bets´enz destl´es ˀats´inlagh bech´ed gagwedinh ˀeguh gagwetat´ilh." 50 Sizi jeyelhnadilh ˀeyen gatŝ´in ˀelhanx tŝijaghetilhnan. 51 Deni k´anighelilh ˀinlhanx ts´enz ts´et´an diẑti dzanh yeˀant´ih Sizi yenayalh, ˀeyen chuh tets´aghelchud, 52 gula tanx tiẑeh, bets´ed ˀiden ˀint´id gubatŝintilhgay.

Sizi nits´ilˀin neŝ naghinẑed.

53 Sizi yaŝalhtɨg ˀaghendes jilin ˀeyen belh Deni ˀijegwedelhˀanx belh t´ajegultin nits´ilˀin jilin ˀeyen ˀelhghanajadil ˀeyed jeyenilhtin. 54 Peter ˀeyen yaniz yenayalh, yaŝalhtɨg ˀaghendes becourtyard jiz gwets´en deni neniyah. Deni ghajaghetinsh gutuwh tetl´adiŝdah, qwenagh naxedenilẑilh. 55 Guyen yaŝalhtɨg ˀaghendes jilin ˀeyen belh chejaghiẑdil gatŝ´in ˀeyen Sizi ch´ajeyedulax jeyeniẑen gweqa ˀinlhetah guntsen ˀajagh jeyughutan qaˀajet´in, gan lha nendidah bid jeyenentuyud guyal. 56 Deni lhan juts´id jid jeyanagwalnɨg gan lha ˀelhqaˀagwedinil. 57 Belhdan ˀeyen nijedindil hink´an nenduwh gajedinh jid jutizts´id, 58 "Nenduwh gadinh xuẑaghiltŝ´an, ´Sid nenjan Gudinits´ilˀin bequngh denila bid ˀets´egunlagh ˀeyed nanagwedenaghigganẑ ch´iz tad dzin ghinli lha denila bid hilih ninagwedetastlelh,´ nih," jedinh. 59 ˀEguh chuh lha ˀelhqaˀagwedinil. 60 ˀEguh hink´an yaŝalhtɨg ˀaghendes ˀeyen deni nadas nininyah. Sizi lha yanilil gwech´ez yudelhqed gadinh, "Xugunlht´i hajedinh nenden deni nenjan nanajegwelnɨg ˀeyen, xunlht´iqa lha xudeẑinlnɨsh?" 61 Gan lha yets´en tijɨsh. Lha xuyelhdinil. Shunchuwh yaŝalhtɨg ˀaghendes nayudelqed, gayelhnih, "Nin telah, Gudinits´ilˀin bets´enz xaghinyah hanint´ih, Gudinits´ilˀin deẑilti ˀeyen beyi ninlin telanint´ih?" 62 Sizi gayelhnih, "Sid hast´ih; Deni gudes xaghinyah chuh helin, ˀeyen nadint´i, ˀeyen Gudinits´ilˀin yenalhes teŝedah gwenentalhˀinlh, ˀeyen didagatŝ´i ghaˀanadetanilh gweqa yat´ax gudish qw´es tuwh nexwananatadalh gwenentalhˀinlh." 63 ˀEyed hink´an yaŝalhtɨg ˀaghendes lha gwanilil gwech´ez bets´enz tiẑganẑ hink´an nenduwh gadinh, "Lha jeyagwelnɨg ˀeyun naxughut´in hat´ah. 64 Gudinits´ilˀin ts´en gwaghex jid yaghinlhtɨg xuẑaghalhtŝ´an. Xuyenelhẑen?" "Ch´ats´edelax dzanh jidaltŝen, " jedinh. 65 ˀEyed hink´an belhdan jeyunentizi hink´an jeyenagh qedenilhˀun hink´an ˀinlhanx liny yulhchinsh hink´an jeyudilhqɨg, "Nendan hajagh?" Ŝuljeŝ jeyunaghinqad hink´an ˀananajeyeŝdlin.

Peter xeduniŝdẑin.

66 ˀEguh gughad Peter guyax courtyard nayah. ˀEgu tŝ´iqi, yaŝalhtɨg ˀaghendes nadat´in ˀinlhanx xaghelgay. 67 ˀEyed Peter nalgwen yinlhtŝan. Sutsel yenaghilhˀin hink´an gadinh, "Nin chuh Sizi Nazareth gwet´in bixudaghinten hanint´ih." 68 "Lha gast´ɨsh. Lha did ghanyalhtɨg chuh Peter nalgwen. ˀegweyeneŝen hadinɨsh," yelhnih. Hink´an tigweniˀah ˀeyed nininyah, ˀegu lusdes ˀadaghini. 69 Tŝ´iqi nenk´eyen ˀeyed naẑed yinlhtŝan, gweghex najedilhyah ˀeyen guts´en ganadedinh, "Nenden deni Sizi yixudaghinten hant´ih." 70 Peter chunchuh xedigweniŝdẑin. ˀAghal ghili, guyen gughen najedilhyah ˀeyen Peter gajeyelhnih, "Nenk´ed ˀinlhes Sizi bixudaghinten hanint´ih. Galilee gwet´in hanint´ih." 71 Shunchuwh, "Lha gast´ih," nih. "Gudinits´ilˀin jinasenulhtanx lha ˀalhˀadezesnih hink´ed, nenden lha sasˀin ˀeyen halhahnih," nih. 72 Najizah gwet´agwediˀan lusdes nenduwh nad ˀadaghini. Peter, Sizi xuyelhnih ˀeguh jinaghelni, "Lusdes lha nad ˀadeŝnih danh tad lha seẑaghinˀin detaghanilh." ˀEyed hink´an bedzi deniŝdagh, gunchagh jid ghintŝagh.

15

Sizi Pilate beneŝ naghinẑed.

1 ˀEgwilhqan ˀabenax danh guyen yaŝalhtɨg ˀaghendes jilin ˀeyen belh t´agultinqi jilin ˀeyen belh Deni ˀijegwedelhˀanx, ˀeyen hink´an deni belh tejedilhtŝ´ɨsh gatŝ´in ˀeyen, xugwetalht´ilh ˀeguh ˀelhelh nijegugheniˀan. Sizi bela ts´elhghil hink´an gwants´etilhtin, ˀeguh hink´an Pilate ts´edinh ˀeyen betl´ajeyaghilhtin. 2 Pilate yudilhqed, "Nin, Jews gubeking ninlin hanint´ih telany?" Sizi gadinh, "Haˀanh, ˀeguh gast´ih hadinih." 3 Hink´an guyen yaŝalhtɨg ˀaghendes jilin ˀeyen lhaˀagulha gwaghex taˀanaŝt´in xadajegwedilhdil. 4 Pilate shunchuwh yudilhqed, "Gagulhan gwaghex taˀanaŝint´in jedinh ˀeyed gwa lha xudeteẑaghanlnilh telanint´ih?" 5 ˀEguh chuh Sizi lha gwantijɨsh gwech´ez Pilate lha yanilil. 6 Gunchagh dzin Passover nagweẑɨg deni ˀinlhanx ganendan qungh nenchagh ŝedah jeyuzin ˀeyen bits´edetalghelh jegughilhˀan. 7 Gademen teŝ jaghedultsilh qaˀajet´in gweqa qungh nenchagh jedilhtŝ´ɨsh ˀinlhanx Barabbas ts´edinh ˀeyen deni ch´ats´edinlagh belh ˀagwat´in. 8 Jelan Pilate jeyixughiẑdil hink´an gajedinh, "Ganexwilhˀinsh ganexughunlax." 9 Pilate gagubelhnih gubudilhqed, "Jews gubeking bidetaŝghelh gutaht´anx tesanh?" 10 Deni lhan Sizi, yaŝalhtɨg ˀaghendes jilin ch´a yadi jeyilhˀin, ˀeyed su gweqa jegughinlhts´i gwech´ez Pilate betl´ajeyaghilhtin. Pilate chuh ˀegweyeniẑen. 11 Gan yaŝalhtɨg ˀaghendes jilin, deni tuwh nanajelhgay, "Barabbas ˀeyen bits´edulghalh duhni," jedinh. 12 Shunchuwh Pilate gubudilhqed, "Nexweking ts´edinh ˀeyen xutasdlilh?" 13 "ˀElhinilhjes ch´ed jits´ebedulht´is dinih," jedinh jenijedetsɨg. 14 Hink´an Pilate gagubelhnih, "Dideqa, xulht´i jid gwaghex taˀanaŝt´in?" ˀEguh chuh jenijeditsɨg, "ˀElhinilhjes ch´ed jits´ebedulht´is dinih." 15 Saˀagunt´ih jid gwadanijuẑed gweqa Pilate, Barabbas guts´en yidalghel. Sizi ˀeyen ts´ughelhtŝaŝ qaˀayinlagh. Hink´an ˀelhinilhjes ch´ed jits´ebedulht´is gweqa deni julht´ax gajint´en belhdan gutl´ats´aghinlhtin.

Sizi ˀelhinilhjes ch´ed jits´ebedilht´ez.

16 Sizi gugun Pilate bequngh ˀeyed Praetorium ts´egwedinh ˀegun nendajeyenilhtin hink´an deni julht´ax jelan ˀeyen chejuŵedilh gweqa guqajets´aghinish. 17 Ts´enz nenaẑ disch´enz jid deldel ˀijeyaghinlhtin hink´an xwes chenmal betŝi ghad gwet´in ˀeguh gangu jeyelhˀul lajeyilagh jid najeyenilhŵed ˀeyi betŝi najeyedaghiˀan. 18 Nenduwh gajeyelhdetiẑni, "Jews gubeking ninlin, sex denɨghunli texant´a." 19 Hink´an ˀelhch´iz dechen bid betŝi ts´ughilht´i, jeyudenaghizi, hink´an gubetŝigwed bid najedilhyah jid yadi jeyinlhˀin jaghedilˀin taˀajat´in. 20 Jeyanagwelhyah ch´iz ts´enz nenaẑ disch´enz jid deldel ˀeyi binats´edilah hink´an xeded bets´enz binats´aghilhtin. Hink´an gugun guˀanwh ˀelhinilhjes ch´ed jits´ebedetalht´es ˀegun gwech´ats´eniluy. 21 Deni ˀinlhanx nen Cyrene deni Simon ts´edinh, Alexander belh Rut´us gubeta ˀeyen gubeghex xaghelgay, qwentex gwets´en ghelgɨsh. Lha gayeniẑen gan ˀelhinilhjes detutan qaˀats´ilagh. 22 Sizi, Golgotha ts´egwedinh (deni tŝigwen jits´egusih) ˀegun ts´eniluy. 23 Tu nentsen, dechen dzax myrrh ts´edinh belh ˀelhtuwh ˀant´ih ˀeyi bats´ulhchud qaˀajat´in, gan lha guch´a yidinl. 24 ˀElhinilhjes ch´ed jits´ebedilht´ez ch´iz bets´enz nendan yulhchud gweqa ˀets´enentaghilhˀog. ˀEguh jid bets´enz ˀelhtex xanatŝ´eŝdiny. 25 Sa tediˀan gagujagh ˀelhinilhjes ch´ed jits´ebedilht´ez. 26 Tl´estil ch´ed "Jews gubeking helin," gwedinh jits´egwediˀan ˀeyed gweqa nats´enizud gwedinh. 27 Denitsiny deni ghaxejenedzɨsh gajint´en nandih ˀeyen chuh ˀelhinilhjes ch´ed jiguts´ebedilht´ez. ˀInlhanx Sizi beˀinstl´ans hats´inlagh, ˀinlhanx ˀeyen benalhes. 28 Gudinits´ilˀin bets´enz destl´es ˀats´inlagh bech´ed gagwedinh ˀeguh gagujagh. Denitsiny ch´ih xusdzin. 29 Nendan jeyeghex telgɨsh ˀeyen guntsen jid jeyuzish. ˀAjanilh jid tŝijelghɨlh hink´an nenduwh gajedenish, "Nin hadaghini ´Gudinits´ilˀin bequngh chugh nanagwedenaghigganz hink´an tad dzin ghili ninagwedetastlelh,´ dinih. 30 Ganinsun hink´ed jighanexwenilhten, ch´adughunax ch´a xedelh ˀanandanx, ˀelhinilhjes ch´ed nanandash!" 31 Yaŝalhtɨg ˀaghendes jilin belh Deni ˀijegwedelhˀanx chuh ˀelhts´en su gajedinh, "Deni lhan belh ˀaghet´in gan xeded lha jid xedelhˀaŵet´in guyah. 32 Nudughudlanx gweqa nenden Gudinits´ilˀin bets´enz xaghinyah Israel gwetin gubeking helin ˀeyen, ˀelhinilhjes ch´ed gwet´aŵeya." Guyen belh ˀelhinilhjes ch´ed jiguts´ebedilht´ez ˀeyen chuh gulh ˀagwedaghini. 33 Dẑanaŝ gwatish tad neghedelt´ex gwets´en nenqay gagulhchugh tsalhyah gwaltŝ´ed. 34 Tad neghedilht´i Sizi jeni bid nenduwh gadinh, "ˀEloy, ˀEloy, Lama sabaxtani!" Nenqayni ch´ih ˀeguh nenduwh gadinh hadaghini, "SeGudinits´ilˀin, seGudinits´ilˀin, dideqa sech´an nadeẑinyah." 35 Deni belhdan gughen najedilhyah ˀeyen jeyedeẑtŝ´an hink´an gajedinh, "ˀEshenishjed, Elijah yeqajenish." 36 Deni ˀinlhanx yets´en hentled hink´an nentŝeŝ gant´i, tu nentsen ts´elqen ˀitanayedilhqed ˀeyi dechen dinaẑ belangh gughedenetsox ghayedenilhtan, ˀeyi Sizi yudan gweqa yets´en tiyebedenilhtan hink´an gadinh, "Gweduˀaghut´i. Elijah gwet´anayetalhtilh, gwenughulˀin tesanh."

Sizi ch´adejagh hink´an sunits´enilhtin.

37 Hink´an Sizi gwechugh ˀadaghini, ˀegu ˀech´ilhˀah xanadagheji. 38 Gudinits´ilˀin bequngh chugh gwatish manda heŝtl´un detan hesbes ˀeyi, gudes ts´en xaghindlad ˀinlhes yayax ˀelhts´ighindlad. 39 Deni julht´ax ghaˀanadeni ˀeyen Sizi yenadas naẑed, benalh ˀech´ilhˀah xanadagheji gwenaghinlhˀin, gadinh, "Nenden deni ˀinlhes tŝ´idaneŝ jid Gudinits´ilˀin beyi haghint´i." 40 Tŝ´iqi belhdan lha gwechugh gwech´adiẑad jegwenilhˀin najedilhyah, Mary, Magdala qwentex gwet´in, belh Mary nenden gubeˀinkwel helin, James K´anighelilh ts´edinh ˀeyen belh Joses, hink´an Salome denituwh najedilhyah. 41 Nen Galilee tŝ´iqiqi Sizi jeyenadadelnih gweqa najeyeniẑdil. Tŝ´iqi ˀeyun jelan Sizi belh Jerusalem qwentex jenindil ˀeyen chuh ˀeyed najedilh. 42 Dzin gunchagh dzin talax ˀinlhed dzin jid gwech´an gwa xenats´edet´insh ˀeguh xelhyiz tiẑli, 43 Joseph qwentex Arimathea deni ˀaghendes tejedilhtŝ´ɨsh ˀinlhanx helin. ˀAghendes tejedilhtŝ´ɨsh ˀeyen jeyet´ayenintan. Xeded chuh ˀinlhetah Gudinits´ilˀin gwaˀanadetanilh gwanagughinẑed gweduˀant´ih. Lha niljed chu Pilate yets´en helgay, hink´an Sizi bedatŝagh qanajadiny. 44 Pilate ˀaghal ch´ats´edejagh ˀeyed lha gwanilil. Deni julht´ax ghaˀanadeni ˀeyun qajaghini hink´an gweqa yudilhqed. 45 Deni julht´ax ghaˀanadeni ˀeyen yets´en tŝ´idaneŝ gwelhtsin ˀeguh hink´an Sizi bedatŝagh naŵelchud ts´edinh. 46 Joseph layan ts´et´an diẑti xughinqid. Datŝagh nanayaghinlhtin, ˀeyi yech´inayediẑdeẑ, tŝ´iny gulin ˀeyed tŝiyi gwenits´egughinlah ˀegun gweyi suniyenilhtin. Tŝi chugh gweqanajedenilhmel. 47 Mary qwentex Magdala gwetˀin helin belh Mary Joses beban ˀeyen nents´in nijeyenilhtin jegwenaghilhˀin.

16

Sizi naguŝdiny.

1 Nats´etejɨsh gwadzin xengwedijagh, Mary qwentex Magdala gwet´in, belh Mary James beban hink´an Salome ˀeyen, Sizi bedatŝagh jutlez jeyeniẑen gweqa sultsen bid ts´enetlez gant´i jughinqid. 2 ˀAbenax danh su ˀech´an dzin sa k´an dzanh xaghiˀan ch´iz tŝiyi gwenits´egughinlah gwets´en najeghadanlh. 3 "Nendan tŝi gweqats´edenilhmel ˀeyi nexwagwadenentalhmelh?" jedinh nelhjudelqed. 4 Sutsel ˀegun nanajet´is, yedanx tŝi gadenilhchugh eyi nendagweniˀah gwech´eẑ deniẑˀan jegulhtŝan. 5 Tŝiyi gwenits´egughinlah ˀegun k´an dzanh nendajaghetiẑnan ˀegu, deni k´anighelilh lhek´el beˀant´ih nalhes ˀegwenz teŝedah jinlhtŝan; jenilhjud hink´an lha gwanijilil. 6 ˀEyen gagubelhnih, "Lha gwanilhil hanh; lha nilhjed hah! Sizi qwentex Nazareth gwet´in ˀelhinilhjes ch´ed jits´ebedilht´ez beqahˀis ˀeyen lhagul xungh. Naguŝdiny ninadijah xungh. Guyed ghinlhti ˀeyed gwenilhˀin. 7 Gan ch´ih natuhdilh, Peter hink´an jeyelhnaŝedil ˀeyen gagubelhduhni, ´Sizi Galilee gwets´en nexwech´an tayalh, ˀeyed nentalhˀinlh, gwech´an danh ganexwelhnih ghinli.´" 8 Jedilhteŝ, jenilhjud gwech´ez tŝiyi gwenits´egughinlah tijagheninan tŝijaghetilhnan. Jenilhjud gwech´ez lha deni ˀinlhanx belh jegulnɨsh.

Mark nenjan gwets´en nigwelnɨg. Hink´an deni ˀeyun nenjan guˀen nagwalnɨg.

9 ˀEgu ˀech´an dzin lha yelhqex danh Sizi naguŝdiny ninadijah ch´iz, Mary qwentex Magdala gwet´in nentsen ˀinlhed ch´ilhghilh ganilt´ih yixadanizud ˀeyen ŝid yixediltŝan. 10 Nenk´eyed danh jeyelhnaŝedil Sizi beqa gudzi denidah gwech´ez jetŝagh ˀeyen gutuwh xanalhgay gagubelhnih gulh nagwalnɨg. 11 Sizi naguŝdiny ch´iz yenaghilhˀin nih gan bets´uts´ediŝlan. 12 ˀEguh ch´iz jeyelhnaŝedil nandinh qwentex gwech´adeniẑad jeghanalh, guba ˀets´en jinilˀin xedelhtsin gubixedenaghelˀin. 13 Jeyelhnaŝedil ts´en najaghindan hink´an denilh najegwalnɨg, gan ˀeyen chuh guts´uts´ediŝdlan. 14 ˀEguh ch´iz ˀelhch´aẑnan guˀen ˀinlhanx ˀeyen, nejedan gubixedenaghelˀin; lha jegudidlan jid gutŝi denaghintŝ´i. Naguŝdiny ninadijah gaguts´edinh gwets´ujediŝdlan gweqa gulh yaghinlhtɨg. 15 Gagubelhnih, "Nenqay gagulhchugh denits´ilin ˀeguh sanagwelhnɨg naŵehdilh. 16 Ganendan set´ayenetan hink´an tubiˀats´inlagh ˀeyen detajɨsh; ganendan lha set´ayenitan ˀeyen tŝidetayalh. 17 Nendan set´ajeyenintan ˀeyen: Sughuzi bid nentsen deni ˀixadajenentayud; gagunlhanwh gwech´ih yajetalhtɨg; 18 Gula bid tl´ugheŝen najetalalh; pazen jetiŝdan ˀeguh chuh lha xujetalhnilh; hink´an deni jedenidah ch´ijedilni ˀeyen saˀanajetadinlh." 19 ˀEguh gagubelhnih ch´iz, Sizi gudish guts´aghinlhtin ˀegun Gudinits´ilˀin benalhes tetl´adiŝdah. 20 Jeyelhnaŝedil ˀeyen Sizi jeyanagwelnɨg gagulhchugh gwech´ijedaghindil, ˀAnadeni gagulhnaẑ gulh ˀaghet´inlh hink´an lha gubanitŝ´eŝdlish jid sutaˀanajet´in gwech´ez gubuts´edidlan hajaghint´i. Nenk´eguh dzanh.