Vbanumpa Chan vt holissochi tok.

1

Anumpa achi Chisvs Klaist yvmmak osh vmmona fehna ka Chihowa ha̱ iba chvfa.

1 Vmmona ka Anumpa hvt ahanta mvt, Anumpa hvt Chihowa ya̱ ai iba chvfa tok: mihmvt Anumpa hash ot Chihowa ya̱ tok. 2 Yvmmak inli hosh vmmona ka Chihowa ya̱ ai iba chvfa tok. 3 Yvmmak atuk mak o̱ nan oklu̱ha kvt toba tok; yohmi ka nana kvt toba tok vt yvmmak o̱ keyu hokvno ik tobo ki tok. 4 Yvmmak oka isht ai okcha̱ya yvt a̱sha tok: yohmi ka isht ai okcha̱ya yvmmak ash ot hatak puta ka in tohwikeli ya̱ tok. 5 Mihmvt tohwikeli hash ot ai okhlilika ya̱ a toho̱mmi; yohmi ka okhlilika yvt yvmmak ash o̱ ik akostinincho ki tok.

Nan-tohwikeli ai a̱hli kvt achufa illa ilvppak atuk a̱ atokowa anola chi̱ mak osh Chan vt a̱ya hatok.

6 Hatak Chan hohchifo hosh, Chihowa nana aiahni ho̱ a̱ya tok. 7 Yvmma pulla tuk mak o̱ hatak vt momvt yimma hi o̱, yvmmak ash osh nan atokoli osh Nan-tohwikeli ash atokowa anola chi̱ hosh a̱ya tok. 8 Yvmmak osh Nan-tohwikeli mih mak a tok keyu; amba Nan-tohwikeli yvmma atokowa anola chi̱ mak osh a̱ya tok. 9 Yakni pakna hatak vt ai vtta, hoka mominchit in tohwikelichi, yvmmak osh Nan-tohwikeli a̱hli mak a tok. 10 Yvmmak atuk mak o̱ yakni vt toba tok o̱, yakni a̱ ai ahanta ma, yakni vt yvmmak ash ik ithano ki tok. 11 Yvmmak okvt a̱yvt ilap immi vhleha ho̱ im vla ma, immi vhleha hash osh ik i̱ yimmo ki tok. 12 Amba laua kaniohmi hosh ahninchit, ilapo hohchifo ha̱ i̱ yimmi hokvno, Chihowa ushi vhleha toba chi̱ mak o̱ isht ai vlhpesa ka ima tok; 13 Issish ak o̱ keyu, mikmvt haknip nan ahni keyu, micha hatak osh nan ahni keyu ho̱, yvmmak okvt toba tok; amba Chihowa yak a tok. 14 Micha Anumpa hash ot nipi yo̱ toba cha, nan isht i̱ kana, micha nana aia̱hlika aienvt isht alotowa hosh pi takla ahanta tok: yohmi na isht a holitopa ya̱, I̱ki a̱ Ushi vt achvfa illa cha ai isht a holitopa chatuk mak o̱, chiyuhmi ho̱ e pihi̱sa tok.

Chan vt Klaist a̱ nan vlhtokowa isht ai anoli.

15 Chan vt yvmmak oka atokowa anoli hosh, chitolit anumpulit, Auet siakaiyvt mihinti kak osh sa ti̱kba ahanta tok mak okvt, yvmmak ash holitopa kvt vno a̱ a̱ shahli ho̱, isht anumpohonli li tuk a̱ ilvppak atuk mak oke, achi tok. 16 Micha yvmmvt isht alotowa hatuk ash e moma kvt nan isht i̱ kana yvt ai itvlbitkvchi ho̱, e pisa tok. 17 Nan-vlhpisa yokvto Moses ak atuk mak o̱ vlhpihi̱sa tok: amba nan isht i̱ kana, micha nan-aia̱hlika aiena hokvto Chisvs Klaist ak o̱ a minti tok. 18 Hatak nana hosh Chihowa ya̱ nitak nan ash o̱ pisa tok keyu: Ushi holitopa achvfa illa I̱ki shakba ya̱ afoyuka yvmmak atuk okvto yvmmak oka otvninchi tok oke. 19 Mihma yvmmak ash o̱, Kvta chia hoh cho? achit ont i̱ ponakla chi̱ ka, Chu okla hvt na-holitompa isht a̱sha, micha Lefait okla aiena ka Chelusalem a̱ a kohchit pit tihleli na Chan vt atokowa anoli tok a ilvppak oke. 20 Yohmi kvt yvmmak ash ot atokolit anoli kvt, Mih sia hoke, achi tok keyu; amba atokolit, Vno ak osh Klaist o̱ sia keyu hoke, achi tok. 21 Mihma okla i̱ ponaklot, Mih kvto kvta hak o̱? Elias ak o̱ chia ho̱? achi tok: mihma, Mih sia keyu, achi tok. Hopaii mih mak o̱ chia ho̱? achi ma; afalaminchi mvt, Keyú, achi tok. 22 Mihma, Kvta chia hak o̱? ish pim anoli na auet pi tihleli tuk vhleha ha̱ anumpa falama ka ont il imashke: chishno akinli kvto, Kvta ho̱ ish ile miha cho? im achi tok. 23 Mihma yvmmak ash ot, Achvfa hosh yakni haiaka yo̱ ai anumpohonlit, Chitokaka ata̱ya hi a̱ oh apissvhchi, ahanchi ho̱ hopaii Esaias vt isht anumpohonli tok mak o̱ mih sia mak oke, achi tok. 24 Mihma okla vlhtokvt ilhkoli tuk ash ot Falisi vhleha ha tok. 25 Atuk osh yvmmak ash o̱ okla i̱ ponaklot, Chishno ak osh Klaist mih mak o̱ chia keyu; Elias a̱ chia keyu; anonti hopaii mih mak o̱ chia keyu hokak osh, nanta katiohmi ho̱ ish baptismochi cho? im achi tok. 26 Chan ash osh yvmmak ash o̱ im afalaminchi mvt, Vno vto oka yo̱ ishit baptismochi lishke; amba achvfa kvt hvchi ta̱kla hiki̱a yvmmak okvno hvch ik ithanoshke. 27 Yvmmak osh siakaiyvt minti kvt holitopa kvt a̱ shahli ka, i̱ shulush isht-talakchi a̱ hotofi la he si ahoba keyu mak oke, achi tok. 28 Chatan misha Behlabala yvmmak o̱ Chan vt a baptismochi hosh ahanta hatuk o̱, ilvppa puta kvt ai yakohmi tok. 29 Atuk o̱ ont onna ma Chan vt, Chisvs vt i̱ minti na pisa mvt, Chihowa in Chukfvlhpoba ushi, yvmmak osh yakni im ai-ashvchika isht kanchi a̱, ho pesá. 30 Hatak vt auet siakaiyvt minti kvt, yvmmak osh sa ti̱kba ahanta tuk osh holitopa kvt a̱ shahli hoke; achi li tuk a̱ ilvppak osh mih mak oke. 31 Yohmi kvt ilvppa ithana li tuk keyu; yohmi kia ilvppak osh Islael okla ha̱ im otvna chi̱ kak o̱, vno vt oka ya̱ ishit baptismochit a̱ya li hatuk oke, achi tok. 32 Mihmvt Chan vt atokowa anolit, Shilombish okvto pvchi yoshuba yo̱ chiyuhmi hosh vba ya̱ vttvt mintit, yvmmak ash ant o̱ binili na pisa li tok. 33 Yohmi ka yvmmak ash o̱ ak ithano ki tok; yohmi kia oka ishit baptismochi la chi̱ ho̱, sa tohno tuk yvmmak osh, Kvna ho̱ Shilombish ak osh aka mintit ant o̱ binili na ish pisa chi̱ ka, mihi yosh Shilombish Holitopa ya̱ ishit baptismocha chi̱ mak oke, im achi tok. 34 Atuk o̱, Ilvppak osh Chihowa ha̱ Ushi pulla hatuk a̱ pi̱svt, atokowa anoli li tuk oke, achi tok.

Chan nan im ai ithvna yatuk vt tuklot Chisvs a̱ apeha toba; yvmmak atuk vt achvfvt Antilu ak osh itibapishi Pita ya̱ ilauelit Chisvs a̱ i̱sht im ona.

35 Anonti ont onna ma Chan vt ilap, nan im ai ithvna tuklo aienvt hinli tok. 36 Micha Chisvs ash ot nowvt a̱ya na pisa mvt, Chihowa in Chukfvlhpoba ushi a̱ ho pesá, im achi tok. 37 Mihma nan im ai ithvna tuklo kash ot, yvmmak ash ot anumpuli na haklo mvt, Chisvs a̱ iakaiyvt okla tok. 38 Mihma Chisvs ash ot filema cha, iakaiyvt okla kash o̱ pisa mvt, Nanta ho̱ hvsh hoyo cho? im achi ma, Labbai ma yvmmvt vlhtoshowakmvt, nan-ithvnanchi ma! achi, Katima ko̱ ish ai vtta yoh cho? im achi tok. 39 Mihma, Mintit ant ho pesá, im achi tok. Mihma itvlachit kanima ai-vtta yatuk a̱ ant pisvt okla mvt, hvshi kanvlli vlhpisa ont isht pokoli foka hatuk oka, nitak yvmmvno apehvt a̱shwa tok. 40 Tuklot Chan vt anumpuli na haklo cha, yvmma iakaiyvt okla tuk ash, achvfa kvt Antilu, Saimon Pita itibapishi ha tok. 41 Yvmmak ash ot na ti̱kba ilapo itibapishi akinli Saimon ak o̱ pisa mvt, Messias ash, yvmmvt vlhtoshowakmvt, Klaist achi ho̱ il ahayuchishke, im achi tok. 42 Mihma yvmmak ash o̱ ilauelit Chisvs a im vla tok. Mihma Chisvs vt yvmmak ash o̱ pisa mvt, Chona ushi Saimon chia hvt Sefas, yvmmvt toshowakmvt, tvli achi hoke, yvmmak o̱ chi hohchifashke, achi tok. 43 Atuk osh ont onna ka Chisvs vt Kalili a̱ ia hi atuk osh Filip a̱ pisa mvt, Is siakaiyashke, im achi tok. 44 Filip vt Antilu, micha Pita ita-tuklo in tvmaha Betsaita yak o̱ ai vtta ya tok. 45 Filip vt Nahlanael a̱ pisa mvt, Chisvs Nasaiet vtta, Chosef ushi, yvmmak o̱ nan vlhpisa ya̱ Moses vt, micha hopaii puta kvt isht a holissohonchi tok mak o̱, e pisvshke, im achi tok. 46 Mihma Nahlanael ash osh, Nana achukma kvt Nasalet a̱ ai itolvt kohcha hinla ho̱? im achi ma, Filip ash osh, Minti cha, ant pisá, im achi tok. 47 Chisvs vt Nahlanael vt i̱ minti na pisa mvt, Yakeh! Islael hatak a̱hli fehna kvt nana ilahobi keyu mak oke, achi tok. 48 Mihma Nahlanael ash ot, Katiohmit is svthana cho? im achi ma, Chisvs vt afalaminchi mvt, Filip vt ont ik chi hoyo ki̱sha ho̱, fik vpi nuta ya̱ ish a̱sha kak o̱, chi pi̱sa li kamo, im achi tok. 49 Mihma Nahlanael ash ot afalaminchi mvt, Labbai ma! chishno ak osh Chihowa Ushi chivshke; chishno ak osh Islael okla i̱ mi̱ko chivshke, im achi tok. 50 Chisvs vt afalaminchi mvt, Fik vpi nuta ya̱ ish a̱sha ho̱ chi̱ pi̱sa li tuk achi li kak o̱, chi yimmi há cha? nana kvt ilvppa i̱ shahli fehna ka ish pisa hi oke, im achi tok. 51 Mihma, A̱hlishke, a̱hli mak o̱ chim achi lishke, Himak a pilla vba yvt tiwa na Chihowa im enchil vhleha hvt Hatak Ushi a̱ auet ai akoho̱wa, anonti vba pit ai ihi̱ya aiena ka, ish pisa hi oke, im achi tok.

2

Kana ak o̱ nan-itauwayvchi a̱sha ho̱ Chisvs vt oka kapvssa atok a̱ oka pa̱ki ikbi.

1 Atuk o̱ nitak ont atuchina ma Kalili yakni Kana a̱ nan-itauwayvchi vt a̱sha tok: mihma Chisvs ishki vt yvmma ont anta tok. 2 Mihma Chisvs, micha nan im ai ithvna vhleha aiena kvt nan-itauwayvchi a̱ a̱ya hi a̱, im annoa tok. 3 Atuk o̱ oka pa̱ki vt ont ai ik im ikshot taha ma, Chisvs ishki vt yvmmak ash o̱, Oka pa̱ki vt okla ik im ikshoshke, im achi tok. 4 Chisvs ash ot, Ohoyo ma! vno vt nanta isht a chi ahalaia li cho? hvshi kanvlli vm ai vlhpisa hvt ik ai ono ki̱sha hoke. 5 Ishki ash ot nan-isht a̱sha vhleha hash, Nana ho̱ hvchim achikma, hvsh yvmihchashke, im achi tok. 6 Mihma Chu okla ai yvmohmi yatuk osh isht il ai achifa ya tuk, tvli shuti oka ai-vlbeha hannali kvt, fvkin tuklokmá, tuchinakmá nana ai vlhto aiyuka hosh yvmma talohma̱ya tok. 7 Atuk o̱ Chisvs ash ot, Shuti oka ai-vlbeha ya̱ oka oh alotolí, im achi tok. Mihma yvmmak ash o̱ okla alotolit iti-vlbi vhlichi tok. 8 Mihma, Inta! ho̱ bicheli cha impa pehlichi ya̱ ishit oh im iá, im achi tok. Mihma okla ishit im ia tok. 9 Mihma impa pehlichi ash ot oka oka pa̱ki toba tuk ash ishkot pisa cha, kaniohmi hosh toba tuk a̱ ik akostinincho mvt, yohmi kia nan-isht a̱sha vhleha oka ochi tuk okvto ithana ho̱, impa pehlichi ash ot himona ohoyo itauwaya ash hoyo tok. 10 Yohmi mvt, Hatak moma kvt vmmona ka okapa̱ki achukma ka talohli chatuk; atuk osh hatak vt ishkot fihopak mak o̱, okpulo yak oh chatuk; amba chishno vto oka pa̱ki achukma ya̱ ish il atomba na himak atoshke, im achi tok. 11 Na fehna yvmihchit isht ai vmmona kvt ilvppak o̱ Chisvs vt Kalili yakni Kana yak o̱ ai yvmihchit, ilap im a holitopa ya̱ otvninchi tok; mihma nan im ai ithvna vhleha hvt i̱ yimmi tok.

Chelusalem a̱ ona cha, na chumpa vhleha, micha na kanchi vhleha aiena tempel anu̱kaka aiasha tuk a̱ kocha pit yuhli.

12 Ai yakohmi ha ya, yvmmak ash ot, ishki, micha itibapishi vhleha, mikmvt nan im ai ithvna vhleha aienvt Kapenavm a̱ ilbkoli tok; atuk osh nitak kanohmi keyu ho̱ ont ma̱ya tok. 13 Mihma Chu okla i̱ nan-vbanvblit ont ia yvt ai ona̱ hosi hatuk o̱, Chisvs vt Chelusalem a̱ ia tok. 14 Atuk osh tempel anu̱kaka ya̱ wak, chukfvlhpoba, micha pvchi vlhpoba aiena kanchi vhleha, mikmvt tvli holisso itatoba aiena kvt binohma̱ya na pisa tok. 15 Mihmvt aseta chipunta yo̱ isht fvma ikbi cha, yvmmak ash, chukfvlhpoba, micha wak puta aiena kash mominchit tempel a̱ a kocha weli tok; mihmvt tvli holisso itatoba vhleha in tvli holisso ash aka fohopli mvt, anonti ai-impa tvli holisso ai-itatoba puta kash kinahlichi tok. 16 Mihmvt pvchi yoshuba vlhpoba kanchi vhleha hatuk ash o̱, Ilvppa kanima ishit oh ia cha, A̱ki in chuka yano nana ai-itatoba chuka hvch ik ikbo kashke, im achi tok. 17 Mihma, Chin chuka i̱ hullo pulla kak osh vm anukfila u̱hvlinchit ai ishit kaiyanchishke, achi hosh holisso ha tok a̱, nan im ai ithvna vhleha hvt ithaiyana tok. 18 Mihma Chu okla hash ot afalaminchi mvt, Nan isht atokowa nanta ho̱ ish pim otvninchi hosh ilvppa puta ka ish yakohmichi cho? im achi tok. 19 Mihma Chisvs ash ot afalaminchi mvt, Tempel ilvppa oh okpvní; atuk ma nitak tuchinakma falaminchit ikbit hilechi lashke, im achi tok. 20 Yohmi ma Chu okla hash ot, Tempel ilvppvt afvmmi pokoli ushta akocha hannali ho̱ tobvt vlhtaha tok: yohmi ka chishno vto nitak tuchina ho falaminchit ikbit ish hilecha hinla cho? achi tok. 21 Yohmi kia yvmmak okvt ilap haknip tempel ak o̱ isht anumpuli ha tok. 22 Yohmi tok o̱ yvmmak ash ot illi tuk vt falamvt tani ma, ilvppa im achi tok a̱, nan im ai ithvna vhleha hvt ithaiyana tok; mihmvt Holisso Holitopa, micha Chisvs vt anumpa anumpuli tok aiena ka okla yimmi tok.

Yohmi ma Chisvs vt na fehna yvmihinchi ho̱ pisa hatuk mak osh lauvt i̱ yimmi.

23 Vbanvblit ont ia isht a̱shvt impvt ma̱ya nitakt o̱, yvmmvt Chelusalem a̱ anta cha, na-fehna puta ka yvmihinchi na okla pisa mvt, lauvt i̱ yimmi tok. 24 Yohmi kia Chisvs vt hatak moma ka ithana hatuk okvt ik i̱ yimmo ki tok. 25 Micha nana hosh hatak a̱ anukfoyuka ka ithaiyana hoka, kvna kia hatak a̱ isht atokolit im anola he vlhpesa keyu ki tok.

3

Chisvs vt Nikotemvs a̱ it im anumpuli; yohmi hosh atuklanchit vtta hi oka ai vlhpesa hatuk.

1 Hatak vt Falisi yosh Nikotemvs hohchifo hosh, Chu okla pehlichi yosh ahanta tok. 2 Atuk osh yvmmak ash ot ninak o̱ a̱yvt Chisvs a̱ im vla cha, A̱ shahli ma! chishno ak osh nan ithvnanchi yosh Chihowa ak o̱ ish a minti ka il ithanvshke; Chihowa ak osh ik apelachokma, hatak nana hosh na-fehna ilvppa puta ish yvmihinchi ka, yvmihcha he keyu hoka, im achi tok. 3 Chisvs vt afalaminchi mvt, A̱hlishke, a̱hli mak o̱ chim achi lishke, Hatak vt atuklant vtta keyukmvt, Chihowa apehlichika ya̱ pisa he keyu hoke, im achi tok. 4 Nikotemvs ash ot, Hatak vt sipoknit taiyaha kvt katiohmi kak osh vtta hinla ho̱? atukla ma ishki im oshvto ya̱ pit chukowa cha, vtta hinla ho̱? im achi tok. 5 Chisvs vt afalaminchi mvt, A̱hlishke, a̱hli mak o̱ chim achilishke, Hatak vt oka, micha Shilombish ita-tuklo kak o̱ isht ai vtta keyu hokvto, Chihowa apehlichika ya̱ chukowa he keyu hoke. 6 Nipi yo̱ a tobvt vtta hokuto, nipi yoke; mikma Shilombish o̱ a tobvt vtta hokvto, shilombish oke. 7 Atuklanchit hvsh vtta pullashke, chim achi li tuk a̱, okokko! chik ahno kashke. 8 Mahli hvt kanima yo̱ pit ai im vlhpesakmvt, pit mahlit fo̱kka hokvno ish ha̱klo kia, yvmmak o̱ a minti hosh, anonti yvmmak o̱ ia, ish ai ahni keyu ka, Shilombish ak o̱ a tobvt vtta hokvto yvmmak inli kak o̱ chiyuhmi bano hoke, im achi tok. 9 Nikotemvs ash osh afalaminchi mvt, Katiohmi kak oeh ilvppa puta kvt yvmohma hinla cho? im achi tok. 10 Chisvs vt afalaminchi mvt, Islael okla ha̱ nan-ithvnanchi chia hokak osh, ilvppa puta ka chik ithano cho? 11 A̱hlishke, a̱hli mak o̱ chim achi lishke, Nana ka il ithana mak osh il anumpuli: mikmvt e pi̱sa tuk mak osh atokolit il anoli hoke; yohmi ka nana atokolit il anoli ka ik hvchi yimmoshke. 12 Nana kvt yakni paknaka a̱sha yo̱ isht a hvchim anoli li ha ya̱ tuk a̱, ik hvchi yimmo ke tuk vt, anonti nana kvt vba a̱sha ho̱ isht a hvchim anoli li hok mak o̱, katiohmit hvchi yimma chi̱ cho? 13 Yohmi ka hatak nana hosh vba ya̱ ia tuk keyu; amba vba ya̱ mintit vla tok Hatak Ushi vba ya̱ a̱sha yvmmak illvshke.

Micha kaniohmi kia ilapvt ititaiyukhvna a takalit illa hi a̱ ai vlhpesa hatuk aiena.

14 Yohmi ka Moses vt sinti a̱ kowi anu̱kaka ya̱ vba takalichi tok a̱, yvmmak inli chiyuhmit Hatak Ushi vt vba takali pulla hi oke: 15 Yohmi na kvna hosh yvmma i̱ yimmikmvt, ik illo hosh, amba ai-okcha̱yvt bilia yo̱ pisa hi oke. Mikmvt Chihowa hvt hatak a̱ i̱ hullo ka. 16 Chihowa yvt yakni a̱ i̱ hullo fehna kvt, kvna hosh yvmma i̱ yimmikmvt ik illo hosh, amba ai okcha̱yvt bilia yo̱ pisa hi o̱, Ushi achvfa illa holitopa ya̱ auet ima tok. 17 Yakni ak o̱ ilbvshacha chi̱ ho̱, Chihowa yvt Ushi a̱ auet ima tok keyu hoka; amba yvmmak atuk mak o̱ yakni vt isht ai okcha̱ya hi a tok;

Micha Chihowa ik im antio vhleha hvt nan i̱ palvmma he aiena ka anoli.

18 Kvna hosh yvmma i̱ yimmi kvto, isht ai ilbvsha he anumpa hvt onvtula keyu hoke: amba kvna hosh i̱ yimmi keyu hokvto, Chihowa Ushi achvfa illa holitopa hohchifo hatuk a̱, i̱ yimmi keyu kvt, isht ai ilbvsha he anumpa hvt onvtula ma̱shko hoke. 19 Yohmi ka tohwikeli hvt yakni a̱ ant iba chukowa ma, ilap nana a kaniohmi ai vlhpesa keyu hatuk okvt, hatak vt ai okhlilika yak osh im ai achukma kvt atohwikinli ka, im i̱ shahli, ilvppak o̱ isht ai ilbvsha he anumpa hvt onvtula hoke. 20 Nan ik ai vlhpeso ya̱ a yohmi aiyukali vt atohwikinli ka i̱ nukkillikmvt, anonti ilap nana a kaniohmi yvt otvnit ik hofahyalo ka hinla ka, atohwikinli ka ik ono chatuk oke. 21 Amba kvna hosh nan-ai a̱hlika yo̱ a yohmi yokvto, ilap nana a kaniohmi yvt Chihowa yak atuk mak o̱ isht a yvmohmi tuk vt otvna chi̱ ka, atohwikinli ka ona chatuk oke, im achi tok.

Chan vt Klaist nan-isht a holitopa ya̱, micha yvmma i̱ yimmi hatuk okvto ai okcha̱ya he.

22 Nana kvt ai yakohmi ha ya, Chisvs vt nan im ai ithvna vhleha ha̱ it api̱hvt Chutea yakni a̱ ai vla tok; mihma ta̱kla yvmmak o̱ antvt baptismochi tok. 23 Mihma Chan ak kia Salim i̱ bili̱ka Enon yvmmak o̱ oka vt laua hatuk o̱, baptismochit ahanta tok: mihma okla hvt ai vlvt baptismo tok. 24 Chan vt aboha kvllo ik fohko ki̱sha ha tok. 25 Yohmi ma Chan nan im ai ithvna vhleha kanimi, micha Chu okla aiena kvt na-baptismo a̱ isht ai it im asilhhvchit ma̱ya tok. 26 Mihmvt Chan a̱ ai im ai vlvt, Nan-ithvnanchi ma! Chatan misha ya̱ a chi awant a̱ya tok yvmmak o̱ nana ai atokowa isht ish anohonli kash, yvmmak fehna kvt baptismohonchi ho̱, okla momvt im ai itahohombvshke, im achi tok. 27 Chan ash ot afalaminchi mvt, Vba yak o̱ auet ai ima ho̱ keyukma, hatak vt nana ho̱ ilap inli kvt isha he keyu hoke. 28 Vno vt Klaist mak o̱ sia keyu: amba iti̱kba a̱ya a si vlhtoka hatuk oke; achi li tok a̱, hvchishno fehna akinli kvt ai atokowa ka hvs svm ithanvshke. 29 Ohoyo himona hatak auwaya ka ilaueli kak osh, yvmmvt hatak himona ohoyo itauwaya mak oke: amba himona ohoyo itauwaya i̱ kana hokvto himona ohoyo itauwaya anumpuli pulla kak o̱ hikivt i̱ haponaklot isht a yukpa chinto hoke: yohmi ka na sai yukpa ilvppvt isht aia̱hli mak oke. 30 Yvmmak okvto isht i̱ shahlit ma̱ha̱ya he vlhpesakma, amba vno vto ak a lauwot ma̱ha̱ya la he vlhpesa hoke. 31 Vba ya̱ a minti yvmmak okvto moma ka i̱ shahli hoke: yakni yak o̱ a minti hokvto yakni yakinli; mikmvt yakni yak o̱ ai isht anumpuli hoke; vba ya̱ a minti yvmmak okvto moma ka i̱ shahli hoke. 32 Micha nana ka pi̱sa tuk; mihmvt ha̱klo tuk aiena mak osh yvmmak ash atokoht anumpuli hoke; yohmi kia nan ai vlhtokowa anohonli ka, hatak nana kia ik yimmoshke. 33 Kvna hosh, yvmmvt nan ai vlhtokowa anoli ka yimmit aiokpvchi hokvto, Chihowa yvt aia̱hli ka, aia̱hlichi hosh yimmi hoke. 34 Chihowa yvt atohno tok a̱, yvmmak okvt Chihowa im anumpa ho̱ anumpohonlishke; yvmmak oka Shilombish vt vlhpisa ho̱ Chihowa yvt ihi̱ma keyu hoka. 35 I̱ki vt Ushi a̱ i̱ hullo kvt nan oklu̱ha ka yvmma ibbak o̱ fohkishke. 36 Kvna hosh Ushi a̱ i̱ yimmi hokvto ai-okcha̱yvt bilia ya̱ pisa hoke; mikma kvna hosh Ushi a̱ i̱ yimmi keyu hokvto, ai-okcha̱ya ya̱ pisa he keyu; amba Chihowa nan-isht ai i̱ nukkilli yak osh onvtuyula hoke, achi tok.

4

Chisvs vt Samalia ohoyo ho̱ ai okcha̱ya oka ak o̱ isht im anumpuli hosh.

1 Chisvs vt nan ithvna vhleha ikbit baptismochi kvt, Chan a̱ i̱ shahlichi ka, Falisi vhleha hvt haklot ma̱ya ka, Chitokaka yvt akostininchi hatuk osh, 2 Chisvs vt ilap inli kvto baptismochi keyu ho̱, amba nan im ai ithvna vhleha hak atuk ak o̱, 3 Chutea yash issvt Kalili yash inli ho̱ anonti ia tok. 4 Yohmi kvt Samalia ya̱ pit hlopullit ma̱ya he vlhpesa tuk a tok. 5 Atuk osh Chekob vt ushi Chosef a̱ osapa ima tok talaia ka bili̱ka, Samalia yakni tvmaha Saika hohchifo ho̱, vla tok. 6 Yohmi ma Chekob i̱ kvli hvt yvmma hiki̱a tok; yohmi hatuk o̱ Chisvs vt nowvt a̱yvt hoyvbli mvt, hvshi kanvlli isht vlhpisa ont hannali foka hatuk o̱, kvli yvmmak ash yakohmit a bininli tok. 7 Atuk o̱ Samalia ohoyo hvt oka ochit a̱ya hosh yvmmak ash o̱ vla ma, Chisvs ash ot, Svpeta na ak ishkó, im achi tok. 8 Nan im ai ithvna vhleha hamo ilimpa chumpvt tvmaha ilhkoli tuk a tok. 9 Yohmi ma Chu okla hvt Samalia okla ha̱ nan ai itim ahalaia keyu chatuk oka, Katiohmi ho̱ Chu chia hokak osh, vno vt Samalia ohoyo sia ha̱ oka is svm asilhha cho? im achi tok. 10 Chisvs ash ot afalaminchi mvt, Chihowa i̱ na-hvlbena ha̱, micha kvna hosh, Svpeta na ak ishkó; chim achi aiena ka ish ithana hatuk okmvt, ilapo ak o̱ ish im asilhha na yvmmak okvt oka okcha̱ya yo̱ chipeta he tuk oke, im achi tok. 11 Mihma ohoyo hash ot, A̱ shahli ma! isht ish ocha hi vt nana kia ik chim iksho ho̱, anonti kvli hvt hofobishke; yohmi ka katimak o̱ oka okcha̱ya yvmma ish ai ishi hosh? 12 Chishno ak osh pi̱ki Chekob vt ilapo inli, micha im vlla vhleha, mikmvt i̱ wak aienvt ai ishko yatuk vt kvli ha̱ pima tok a̱ ish imaiya hotuma! im achi tok. 13 Chisvs vt afalaminchi mvt, Kvna hosh oka ilvppa ishko tukmvt, anonti itukshila he; 14 Amba kvna hosh oka ya̱ ipeta la chi̱ yvmmak o̱ ishko hokvto, nitak nana itukshila he keyu; amba vno ak osh oka ya̱ ipeta la chi̱ hokvno, yvmmak atuk ma a foyukvt tobohonli na nitak bilia hi oke im achi tok. 15 Ohoyo hash ot, A̱ shahli ma! oka ilvppa is svpeta na ik svtukshilokmvt, anonti ochit a̱ya kvt ilvppak o̱ ak lo kashke, im achi tok. 16 Chisvs ash ot, Ia cha, chi̱ hatak a̱ ont i̱ howvt vlá, im achi tok. 17 Mihma ohoyo hash ot afalaminchi mvt, A̱ hatak vt ikshoshke, achi ma, Chisvs vt, A̱ hatak vt iksho, ish achi kvt, vlhpesa ish mihvshke. 18 Hatak vt tahlapi hosh chim a̱sha tuk osh, anonti himonasi a̱ chim a̱sha kvto, chi̱ hatak atuk o̱ keyu hoka, yvmmak okvno aia̱hli mak osh ish mihvshke, im achi tok. 19 Ohoyo hash ot, A̱ shahli ma! hopaii chia hatuk o̱ chi akostininchi lishke. 20 Pin ti̱kba vhleha hvt nvnih ilvppa̱k o̱ a̱sht Chihowa pit aiokpahanchi tok: a tok ak o̱ hvchishno vto Chelusalem a̱ a̱shvt hatak puta kvt Chihowa pit aiokpahancha he vlhpesa hatuk a̱ ish mihvshke, im achi tok. 21 Mihma Chisvs ash ot, Ohoyo chia mvt is sa̱ yimmashke; nvnih ilvppa, micha Chelusalem aiena kak kia ma̱yvt I̱ki a̱ pit hvsh aiokpvcha he keyu ka hi a̱ hvshi kanvlli vlhpisa hvt mihinti hoke. 22 Hvchishno vto yvmmak o̱ hvsh ahni keyu hosh pit hvsh aiokpvchishke; isht-ai-okcha̱ya hi vt Chu okla immi hoka, pishno vto nana ho̱ pit il aiokpvchi hokvt il ithana hoke. 23 Yohmi kia Chihowa pit aiokpvchi aia̱hli vhleha hvt shilombish, mikmvt aia̱hli aiena mak o̱ isht aiokpahancha hi a̱, hvshi kanvlli at vlhpisa hvt mihinti ho̱, anonti himonasi a̱ vla hoke: yvmma chohmi hosh ilapa̱ aiokpvcha he ak o̱ I̱ki vt hoyo hoka. 24 Chihowa yvt Shilombish oke: yohmi ka kvna hosh yvmma pit aiokpvchi hokvt shilombish, mikmvt aia̱hli aiena mak o̱ isht aiokpvchi pullashke, im achi tok. 25 Ohoyo hash ot, Messias, Klaist hohchifo kvt, vla hi a̱ ithana lishke, yvmmvt vla hok mak osh, nana moma ka pim anola hi oke, im achi tok.

Ilap ak osh Klaist mak atuk vt il anoli.

26 Chisvs ash osh, Vno vt chim anumpohonli li kak osh mihi yo̱ sia hoke, im achi tok. 27 Mihma nan im ai ithvna vhleha hash ot ilvppa ataklama ma ai vla cha, yvmmvt ohoyo ha̱ it im anumpuli tuk a̱, okla anukhlakancha tok: yohmi kvt hatak achvfa kia, Nanta ho̱ ish hoyo hosh? Katiohmi ho̱ yvmma ish it im anumpuli cho? achi kia iksho ki tok.

Mihma ohoyo hash ot falamvt tvmaha ha̱ ona cha, yvmmak atuk a̱ okla ha̱ im anoli.

28 Yohmi ma ohoyo hash ot isht-ochi ash talali cha, ivt tvmaha ont chukowa mvt, hatak puta kash, 29 Yakeh! hatak vt nana ho̱ a kaniohmi li tok a̱ mominchit vm anoli ka ant ho̱ pesá, ilvppvt Klaist mak o̱ keyu ho̱? achi tok. 30 Mihma tvmaha hash a kohchvt ivt, yvmmak ash okla im ai ona tok. 31 Yohmi ta̱kla ma nan im ai ithvna vhleha hash ot, Pi̱ shahli ma! impá, achit im asilhha tok. 32 Yohmi kia, Ilhpak vpa la chi̱ kvt vm a̱sha yvmmak oka hvch ik akostininchoshke. 33 Yohmi hatuk o̱ nan-ithvna vhleha hash ot, Vpa chi̱ ka hatak nana kia isht im vla tuk atuk o̱? it im achit ma̱ya tok. 34 Chisvs ash ot, Auet sa kanchi tok nan ahni kak o̱ a yvmohmi, micha i̱ na-toksvli atahli aiena kak osh vm ilhpak oke. 35 Na-hoyo ai ulhpesa chi̱ ka hvshi ushtvt a̱sha moma, hvsh achi keyu ho̱? yakeh! oh vba chakali cha, osapa puta kvt himonasi ak kia a hoy a he ai ona kvt tohmbi ka ho pesa, hvchim achi lishke. 36 Na-hokchi, micha nan vmo ita-tuklo kvt itibai yukpa chi̱ ka, nan vmo yash ot vlhtoba ha̱ ishi hosh ai okcha̱yvt bilia na-wa̱ya ya̱ hoyo hoke. 37 Yohmi ka achvfvt hokchi okma, anonti achvfa hosh vmo, achi tok a̱ yvmmvt aia̱hlishke, 38 Hvchishno vt hvsh a toksaiyali tok keyu kvt hvsh ai vma chi̱ ka, pit hvchi tihleli li tuk: hatak inla yosh toksvli tuk o̱, im a toksvli yash pit hvsh chukowa tuk oke, im achi tok.

39 Mihma okla hash ot na yimmi.

39 Mihma ohoyo hvt nana vlhtokowa ka anolit, Nana ho̱ a kaniohmi li tok a̱ mominchit vm anolishke, achi ka Samalia okla tvmaha a̱sha tuk vt lauvt yvmmak ash isht ai i̱ yimmi tok. 40 Yohmi hatuk osh Samalia okla hvt yvmmak ash im ai vla mvt, ta̱kla anta hinla ka im asilhha tok; mihma yvmma anta na nitak tuklo tok. 41 Mihma ilap fehna akinli im anumpa hatuk o̱ himakma yimmi kvt laua tok. 42 Mihmvt ohoyo hash o̱, Himak ano pi yimmishke, chishno ak osh nan ish anoli kak o̱ keyu; pishno akinli hosh il ai i̱ haponaklo cha, ilvppak osh Klaist, yakni okchalinchi mak atuk pulla ka il akostininchishke, im achi tok.

43 Chisvs vt falamvt Kalili a̱ ona tuk osh Kana ak o̱ anta hosh, hatak holitompa ushi vt abeka hosh Kapenavm ak o̱ itonla ka, pit hlakofichi.

43 Nitak tuklo ont vbanvpa ma yvmmak ash kohchvt ia mvt, Kalili a ona tok. 44 Chisvs akinli kvt hopaii vt ilap i̱ yakni akinli ka a holitopa hi vt ik im iksho ka, vlhtokowa anoli tok. 45 Micha Kalili ash vla ma, Kalili okla hvt yvmmak kia impa holitopa ya̱ itvnowa hatuk osh, impa holitopa isht a̱sha yvmmvt Chelusalem a̱ nana puta ka a yvmihchi tuk mo minchit pisa tuk okvt, yvmmak ash o̱ okla aiokpvchi tok. 46 Yohmi hatuk o̱ Chisvs ash ot Kalili yakni Kana yvmmak o̱ oka ya̱ okapa̱ki ai ikbi tok ash ot, anonti ona tok. Mihma hatak holitompa achvfa hosh ushi vt abeka kvt Kapenavm a̱ itonla tok. 47 Atuk osh, Chisvs vt Chutea ya̱ a kohchvt a̱yvt Kalili vla ka, haklo mvt, yvmmak ash im ona cha, ushi vt illa̱ hosi hatuk o̱, ivt ont hlakoficha hinla ka, im asilhha tok. 48 Yohmi ma Chisvs ash ot, Nan isht atokowa, micha na-fehna aiena ho̱ hvsh pisa ho̱ keyukmvt, hvchi yimma he keyushke, im achi tok. 49 Mihma hatak holitompa hash osh, A̱ shahli ma! vm vlla vt ik inlo ta̱kla ish onashke, im achi tok. 50 Mihma Chisvs ash ot, Chiso hvt okcha̱ya hoke; ish iashke, im achi tok. Mihma hatak ash ot, Chisvs vt im anumpuli ka anumpa ha̱ yimmi cha, ia tok. 51 Atuk osh ia hosh a̱ya ma, nan isht im a̱sha vhleha hvt afama cha, Chiso hvt okcha̱yvshke; achit im anoli tok. 52 Mihma hvshi kanvlli vlhpisa yvt kaniohmi kak o̱ pit nuktanlvt isht ia tuk a̱ im a ponaklo tok. Mihma, Pilashash hvshi kanvlli vlhpisa ont isht untuklo kak o̱ yvnha hvt shipa tuk, im achi tok. 53 Yohmi ma i̱ki ash ot, Chisvs vt, Chiso hvt okcha̱ya hoke, im achi tuk hvshi kanvlli vlhpisa vt yvmmak fehna akinli tuk a̱ ithana tok; micha ilapo fehna, mikmvt in chuka chvfa yvt a momvt yimmi tok. 54 Chisvs vt Chutea ya̱ a kohchvt a̱yvt Kalili a̱ vlvt, anonti na-fehna ka ai yimihchi kvt ilvppvt ont atu̱kla ha tok oke.

5

Chisvs vt Chelusalem a̱ ona tuk osh, nitak hullo nitak o̱ Behlesta oka talaia ho̱ hatak vt abeka tok a̱ afvmmi pokoli tuchina akocha untuchina tuk a̱ a hlakofichi.

1 Ilvppvt ai yakohmi ha ya, Chu okla impa holitopa hvt a̱sha tok: mihma Chisvs vt Chelusalem a̱ ia tok. 2 Yohmi ka Chelusalem a̱ chukfvlhpoba a kanchi i̱ bili̱ka yvmmak o̱ ai-yupi vt Heblu hohchifo hosh Behlesta yosh i̱ hoshontika tahlapi hosh tala̱ya hoke. 3 Yakohmi ka hatak iksitopo, ik hoponayo, imomokpulo, nipi vt ikshot kvnia puta aiena kvt laua fehna hosh oka piakvcha chi̱ ka, im aiehchi hosh kahvt ma̱ya tok. 4 Enchil vt kaniohmikma a̱yvt, ai yupi ash oka ont pialichi hatuk o̱; yohmikma kvna hosh oka vt piakvchikma, ti̱kba pit okvtulakmvt, abeka nana ho̱ isht abeka hatuk kia hlakofi beka tok. 5 Yohmi ho̱ hatak achvfa kvt iksitopo ik nowo tok a̱ afvmmi pokoli tuchina akocha untuchina hosh yvmma itonla tok. 6 Yvmmak ash ot itonla na Chisvs vt pisa mvt, ai yvmohmi tok vt hopaki fehnvt taha ka ithana hatuk osh, yvmmak ash o̱, Chi hlakofa hi a̱ ish ahni cho? im achi tok. 7 Mihma hatak iksitopo ik nowo yash ot afalaminchi mvt, A̱ shahli ma! hatak nana kia oka yvt piakvchikma, ai-yupi a̱ pit si okvcha hi vt ik svm ikshoshke; yohmi hatuk o̱ ma̱ya li ta̱klakma, inla yosh sa ti̱kba okvtula beka hoke, im achi tok. 8 Chisvs ash ot, Tanit, chi̱ potvlhpo ya̱ ishi cha, nowá, im achi tok. 9 Yohmi ma ashali̱ka fehna hatak ash ot hlakofi cha, i̱ potvlhpo ash ishi mvt, nowa tok; mihma nitak yvmma fehna kvt nitak hullo ya̱ tok.

Chu vhleha hvt, Chisvs vt nitak hullo yo̱ na hlakofichi hatuk o̱, vbi bvnna ma.

10 Yohmi hatuk o̱ Chu okla hvt na hlakofi tuk yvmmak ash o̱, Nitak hullo yoke; chi̱ potvlhpo a̱ isht ish a̱ya he ai vlhpesa keyu hoke, im achi tok. 11 Mihma yvmmak ash osh afalaminchi mvt, Na sa hlakofichi yvmmak osh, Chi̱ potvlhpo ya̱ ishi cha, nowá, vm achi tuk oke, im achi tok. 12 Mihma yvmmvt, Hatak nanta hosh, Chi̱ potvlhpo ya̱ ishi cha, nowá, chim achi tuk oh cho? achit okla im asilhhvchi tok. 13 Yohmi ma okla laua yvt yvmma a̱sha hatuk o̱, Chisvs vt lumvt a kvnia tuk atuk a̱, na hlakofi tuk ash ot kvna ak atuk a̱ ik ithano ki tok. 14 I̱ himmakma Chisvs vt yvmmak ash o̱ tempel anu̱kaka ya̱ a pisa mvt, Yakeh! chi hlakofi hokvt, nan okpulo i̱ shahli kvt ik chi̱ onvtulo ka chi kvt, himmak mvno ik chi yoshubo kashke, im achi tok. 15 Mihma hatak ash at kohchvt ia mvt, hlakofichi tuk vt Chisvs ak atuk a̱, Chu okla ha̱ ont im anoli tok. 16 Yohmi hatuk o̱ Chu okla hash osh, Chisvs vt nitak hullo nitak o̱ yvmma yvmihchi tuk o̱, yvmmak ash i̱ nukkillit vbi bvnnvt ma̱ya tok.

Chisvs ash osh ilapvt Chihowa ya̱ Ushi yatuk okvt yvmmak oka yvmihcha he im ai vlhpesa-hosh yvmihchi tuk vt anoli

17 Yohmi kia Chisvs vt, A̱ki vt toksahanli na himak a kak o̱, vno vt toksvli li hoke. 18 Yohmi ka yvmmvt nitak hullo ya̱ kobvffi kak o̱ illa keyu, amba Chihowa yak osh I̱ki yo̱ mihvt, Chihowa ya̱ ilapinli kvt itilaui ho̱ isht il ilapissa aiena hatuk o̱, Chu okla hvt yvmmak ash vbi bvnna kvt i̱ shahlichi tok. 19 Mihma Chisvs ash osh afalaminchi mvt, A̱hlishke, a̱hli mak o̱ hvchim achi lishke; Ushi yvt ilapo inli hokvto nana kaniohma he keyu, amba nana ho̱ I̱ki vt yvmihchi ho̱, pisa tuk mak oh chatuk oke; nana ho̱ yvmmak osh a yohmik mak o̱, Ushi yak kia yvmmak o̱ ai yohmi akinli hoke. 20 I̱ki vt Ushi a̱ i̱ hullo hatuk osh, ilaput nana ho̱ a kaniohmi kvt mominchit yvmma im otvninchi chatuk; yohmi kvt hvchi nukhlakancha chi̱ ka, nana kvt ilvppa i̱ shahli fehna ka im otvnincha hi oke. 21 I̱ki vt ill! a̱ tanichit okchalinchi chatuk a̱, Ushi vt yvmmak inli ho̱ chohmit kvna ho̱ ilap ahni hosh okchalinchi hoke. 22,23 I̱ki vt hatak kvna kia nana ka im apesa keyu hoka; amba hatak vt momvt Ushi a̱ holitobli kvt, I̱ki a̱ holitobli kak inli hosh ai itilauecha chi̱ ka, nan-vlhpisa he puta ka mominchit Ushi ak o̱ im issa hoke. Kvna hosh Ushi yash ik holitoblokmvt, yvmma auet kanchi tuk I̱ki ash ik holitoblo hoke. 24 A̱hlishke, a̱hli mak o̱ hvchim achi lishke; Kvna hosh vm anumpa ha̱ haklo cha, auet sa kanchi tok a̱ pit i̱ yimmi hokvto, ai-okcha̱yvt bilia ya̱ ahayuchi; mikmvt isht ai ilbvsha he anumpa hvt ik onvtulo ka hi oke: amba ai-illi ha̱ a kohchvt ai-okcha̱ya yo̱ ona hoke. 25 A̱hlishke, a̱hli mak o̱ hvchim achi lishke; Illi yvt Chihowa Ushi im anumpa ha̱ hakla he hvshi kanvlli ai vlhpisa kvt mihintit, himonasi ak kia vlvshke; yohmi ka haklo hokvto, yvmmvt okcha̱ya he mak oke. 26 I̱ki vt ilapvt kaniohmit ai-okcha̱ya ya̱ ilap inli il ai i̱shi hokvt, yvmmak inli ho̱ chohmit Ushi vt ilap inli il ai i̱sha chi̱ ka, im apesa hoke: 27 Micha yvmmak okvt Hatak Ushi atuk oka, nan apesvt ahanta he isht ai vlhpesa ka im apesa hatuk oke. 28 Hvshi kanvlli ai vlhpisa kvt mihinti yvmmak okvno a-hollopi ya̱ vlbehvt ma̱ya kvt, momvt yvmma im anumpa ha̱ haklo cha, kocha wiha he; 29 Kvna hosh ai vlhpiesa ho̱ yvmohmi tok okvto okcha̱ya chi̱ mak osh tana he; anonti kvna hosh aivlhpesa keyu ho̱ yvmohmi tok okvto, nan isht ai i̱ palvmma chi̱ mak osh tana hi oka, ilvppa hvch ik anukhlakancho kashke. 30 Vno akinli hokvto nana ho̱ kaniohmi la he keyu: nana ka haklo lik mak osh apesa li; yohmi kut vno vm anukfila ho̱ hoyo li keyu, amba A̱ki auet sa kanchi tok im anukfila ak oka, nan apesa li kvt ai vlhpiesa hoke. 31 Vno akinli hosh nan il atokolit anoli li hokmvno, nan il atokolit anoli li kvt ik a̱hlo hoke.

Chisvs vt ilapvt Chihowa Ushi pulla hatuk a̱, Chan vt atokolit anoli ma.

32 Na si atokowa anoli kvt inla hosh a̱sha kvt, yvmmvt nan atokowa isht si anoli ka nan vlhtokowa aia̱hli mak oka ithana lishke. 33 Chan a̱ nan i̱ ponakla chi̱ ka, pit hvsh tihleli ma, yvmmak ash ot aia̱hli ka atokolit anoli tok. 34 Yohmi kia hatak osh nan atokowa anoli ho̱, hoyo li keyu hoke; yohmi kia hvchishno yak osh a hvchi okcha̱ya chi̱ kak o̱, ilvppa puta ka achi li hoke. 35 Yvmmak okvt pvla lua yosh shohmalalit tohwikeli ya tok: yohmi ma hvshi kanvlli vlhpisa achvfa kvno in tohwikinli ka nan isht il aiyukpa ka hvsh ahni tok.

Atu̱kla ma ilapo inli kvt nana kvt a fehna kia yvnuhinchi ka isht otvni.

36 Yohmi kia nan atokowa si anoli kvt Chan a̱ i̱ shahlichi kvt a̱sha hoke; na toksvli atahli la hi o̱ A̱ki vt vm apesa tok o̱, na toksvli ho̱ isht ahanta li ka yvmmak osh, A̱ki vt auet sa kanchi tok o̱ mvhli ka, atokowa si anohonli hoke. 37 Mihma A̱ki vt auet sa kanchi tok vt, ilapvt ai atokowa ka si anohonli tok. Nitak kaniohmi kash o̱ yvmma im anumpa ha̱ hvsh im antia tok keyu mvt, anonti kaniohmit otaiyani ka hvsh pisa tok keyushke. 38 Mihma im anumpa hvt hvchi anukfo̱ka keyu hoke: auet sa kanchi tok ash yvmma hvsh i̱ yimmi keyu hoke.

Baibil vt yvmma atokolit anoli akinli hoke.

39 Holisso Holitopa ya̱ achukmalit asilhhit ho̱ pihi̱sá: yvmmak o̱ ai okcha̱ya yvt a hvchin takali ka hvchim ahoba hatuk okvt, micha yvmmak osh ai-atokowa ka si anohonli mak oke. 40 Yohmi ka vm vlvt ai-okcha̱ya ya̱ hvsh pisa hi vt hvch ik ahno kvmohmishke. 41 Hatak o̱ ai ma holitopa hi ano ahni li keyushke. 42 Yohmi kia Chihowa holitobli kvt hvchi anukfo̱ka keyu ka, hvch ithana lishke. 43 Vno vt A̱ki i̱ hohchifo ho̱ a̱ya li ma, hvch ik si ahninchoshke; inla yosh ilap i̱ hohchifo akinli ho̱ a̱ya hokmvno, yvmmak o̱ hvsh ahnincha hinlvshke. 44 Ilap bi̱ka ai it im aholitopa yak o̱ hvsh aiahni cha, Chihowa ak illa ai im a holitopa hi ano hvsh ahni keyu kvt, katiohmi kak osh hvchi yimma hinla cho? 45 Anumpa hvchi onochit A̱ki a̱ im anoli la hinla ka, ik hvchim ahobo kashke; amba hvsh anukchieto tuk Moses ak osh anumpa hvchi onochi hoke. 46 Moses a̱ hvsh i̱ yimmi tok okmvt, vno a̱ hvs sa yimma he tuk oke; yvmmvt vno ak o̱ isht a sa holissochi tok oka. 47 Amba yvmmvt holissohonchi tok a̱ ik hvchi yimmo hokmvt, katiohmit vm anumpa hak o̱ hvchi yimma hinla cho? im achi tok.

6

Chisvs vt pvska lumbo tahlapi, micha nvni tuklo aiena tuk a̱ hatak tahlepa sipokni tahlapi ka impvchi.

1 Nana kvt ai yakohmi ha ya, Chisvs ash ot Kalili okhvta, yvmmvt Tibelias okhvta ho̱ pit tanvbli tok. 2 Mihma abeka puta hatuk a̱ nana ka ai i̱ yvmihchit anta na pisa tuk ak osh okla laua fehnvt pit iakaiya tok. 3 Yohmi ma Chisvs vt nvnih chaha yo̱ pit oiya cha, yvmmak o̱ nan im ai ithvna vhleha hash pehlinchit binili tok. 4 Mihma vbanvblit ont-ia Chu okla im impa holitopa yvt ai ona̱ hosi tok. 5 Yohmi ma Chisvs ash ot vba chakalit, okla laua fehna hosh im ai vla na pisa mvt, Filip ash o̱, Katima ko̱ pvska ya̱ il a chumpa na okla ilvppvt impa chi̱ cho? im achi tok. 6 Ilapvt nana a kaniohma hinla hokvto ithana hatuk osh, yvmmak o̱ imomaka pisa hosh ilvppa achi tok. 7 Mihma Filip ash ot afalaminchi mvt, Pvska yvt iskvli tahlepa tuklo vlhtoba mak osh, momvt iskvtinosi aiyuka ho̱ isha hinla kia, vlhpesa he keyushke, achi tok. 8 Nan im ai ithvna achvfvt, Antilu, Saimon Pita itibapishi hash osh, 9 Vlla himita yvt bali palvska tahlapi, micha nvni chipunta tuklo aiena ho̱ ishi kvt ilvppa a̱shvshke; yohmi mak osh laua fehna hoka, na katihma heto, im achi tok. 10 Mihma Chisvs ash ot, Okla ha̱ ho binolichi, achi tok. Yvmma hvshuk vt a̱sha fehna tok. Yohmi hatuk o̱ hatak holhtina kvt tahlepa sipokni tahlapi foka hosh aka binohli tok. 11 Mihma Chisvs vt pvska yash ishi cha, vba pit aiokpvchi mvt, nan im ai ithvna vhleha ha̱ ima ma, nan im ai ithvna vhleha hash ot aka binohli tuk ash ima tok: mihmvt nvni mvt kaniohmi ho̱ okla bvnna hinla tuk a̱ yvmmak atuk ash inli ho̱ okla chohmichi tok. 12 Mihma okla hash ot kaiyvt taha ma, nan im ai ithvna vhleha hash o̱, Boshulli vt atampvt a̱sha ka oh itahobi, nanasi kia ik kvnio kashke, im achi tok. 13 Yohmi na yvmmak ash ot bali palvska tahlapi ka okla ai vpa ma im atampa tuk boshulli a̱sha ka, aiowvt itahobi mvt, kishi auah tuklo ka okla alotoli tok.

Nan-ithvna vhleha ash ot okhvta ilhkoli tuk osh, mahli okpulo itafama; yohmi tuk kia okhvta paknaka ya̱ a nowvt ma̱ya hosh Chisvs vt ona.

14 Yohmi ma Chisvs vt na-fehna ho̱ yvmihchi na okla pisa mvt, Ilvppak osh hopaii yakni ilvppa vla he tuk mak o̱ pulla mvhlishke, achi tok. 15 Yohmi hatuk osh okla mintit iti̱ halvllit ishit, mi̱ko ikba hinla ka, Chisvs vt akostininchi mvt, filvmmit ilap bieka hosh nvnih chaha yo̱ anonti ia tok. 16 Atuk o̱ opivt taha ma, nan im ai ithvna vhleha hash ot pit okvtahvt okhvta ho̱ ona tok. 17 Micha peni ont vlhbeha mvt, Kapenavm imma ia hosh okhvta ha̱ a̱sht a̱ya tok. Atuk o̱ ont okhlilit taiyaha ka, Chisvs ash ot ik im a̱yo ki̱sha tok. 18 Mihma mahli chito yosh mahli hatuk o̱, okhvta hash Ot poakahanchi tok. 19 Yohmi hatuk o̱ peni ash okla mo̱fi kvt, kowi tuchinakmá, keyukmvt ushtakmá, nana foka ho̱ ona mvt, Chisvs vt okhvta paknaka a noho̱wa hosh peni ash i̱ bili̱ka ona na okla pisa tok; yohmi mvt okla nukshopa tok. 20 Yohmi kia yvmmak ash ot, Hvchi nukshopa ná, vno sia hash oke. 21 Mihma okla na yukpa fehnvt yvmmak ash o̱ peni ash ik chukowá, okla im ahni tok; atuk o̱ peni ash ot chekosi fehna okla ai ona he tuk ash yakni a̱ ont ataiya tok. 22 Ont onna ma okla okhvta mish tvnnvp hiohma̱ya kvt, peni inla mvt yvmma iksho ho̱, achvfa yvmmak illa tuk o̱ nan im ai ithvna vhleha hvt vlbeha tuk; yohmi ka Chisvs vt nan im ai ithvna vhleha ha̱ ta̱kla peni ont ik chukowo ho̱, amba nan im ai ithvna vhleha ak bano hosh ilhkoli tuk a̱, pisa mvt; 23 Yohmi kia Chitokaka yvt pvska vba pit ai isht aiokpvchi na okla ai impa tuk a̱ pit bili̱ka Tibelias a̱ a minti kvt peni inla kanohmi hosh vla tok. 24 Yohmi hatuk a̱ Chisvs, micha nan im ai ithvna vhleha aiena kash ot yvmmak ash iksho ho̱ okla akostininchi mvt, yvmmak kia peni inla kanohmi kash vlbeha cha, Chisvs a̱ hoyot, itvnowvt Kapenavm a̱ okla ai vla tok. 25 Mihmvt okhvta ha̱ mish in tvnnvp o̱ anta na okla ont pisa mvt, Pi̱ shahli ma! katiohmi kash o̱ ilvppa ish la tuk oh cho? im achi tok. 26 Chisvs vt afalaminchi mvt, A̱hlishke, a̱hli mak o̱ hvchim achi lishke; Nana a fehna puta ka yvmihchi li ho̱ hvs sa pi̱sa tuk ak osh hvs sa hoyo kak keyu, amba pvska ya̱ hvsh pvt, hvchi kaiya tuk ak oke.

Hatak vt imi shilombish ak o̱ ilhpak im atahli bvnnvt ma̱ya hi a̱ i̱ miha mvt.

27 Ilhpak vt okpula hi okvno ahnit hvch ik toksalo kashke; amba ilhpak vt ik taho hosh ai-okcha̱yvt bilia ya̱ ona hinla, yvmma Hatak Ushi vt hvch ima he yvmmak ash ke: yvmmak o̱ I̱ki Chihowa yvt ai atokolit ai im aia̱hlichi hatuk oke, im achi tok. 28 Yohmi ma okla afalaminchi mvt, Nanta ak o̱ e katiohmi hosh Chihowa i̱ na toksvli ha̱ e toksvla hinla cho? im achi tok. 29 Chisvs vt afalaminchi mvt, Auet sa kanchi tok yvmmak o̱ hvch i yimmi ilvppak osh Chihowa i̱ na toksvli mak oke, im achi tok. 30 Yohmi hatuk o̱ okla hash ot, E pisa cha, e chi̱ yimma chi̱ kvno, na-fehna nanta ho̱ ish yvmihchi ho? nanta hak o̱ isht ish ahanta cho? 31 Pin ti̱kba vhleha hvt chukushmi foka ya̱ manna yo̱ ai ahampa tok; okla vpa chi̱ ka pvska vba minti ho̱ ipeta tok, achi kvt holisso tok oke, im achi tok.

32 Ilap ak osh ai okcha̱ya pvska mak atuk vt miha.

32 Yohmi ma Chisvs ash ot, A̱hlishke, a̱hli mak o̱ hvchim achi lishke, Pvska vba minti yvmma Moses ak osh hvch ipeta ha tok keyu; yohmi kia A̱ki ak osh pvska aia̱hli vba minti ka hvch ipeta hoke. 33 Vba mintit vla cha, yakni a ai-okcha̱ya ihi̱ma kak osh, yvmmvt Chihowa i̱ pvska mak oke, im achi tok. 34 Yohmi ma, Chitokaka ma! Pvska ilvppak o̱ ish pipihinta na biliashke. im achi tok. 35 Mihma Chisvs ash ot, Vno ak osh ai-okcha̱ya pvska ya̱ sia mak oke: kvna hosh vno ak o̱ vm vla hokvt nitak nana hohchvfa he keyu; micha kvna hosh vno a̱ a̱ yimmi hokvt nitak nana itukshila he keyu hoke. 36 Yohmi kia hvchishno vto hvs sa pi̱sa kvt ik hvchi yimmo ka, hvchim anoli li tuk oke. 37 A̱ki vt vma hokvno momvt vm vla hi oke; mikma kvna hosh vm vla hokvno, ik kaniohmi kia falaminchit kocha pit tobli la he keyu hoke. 38 Vba ya̱ mintit vla li kvt, vno akinli nana vm anukfila hosh a yvmohmi la he tok keyu hokvt, amba auet sa kanchi tok nan im anukfila ha he tok. 39 Yohmi kvt auet sa kanchi tok A̱ki vt vma tok moyuma ka achvfa kia ik sa̱ kvnio hosh, amba nitak ont ishtaiyopikma falaminchit tanichi la he ilvppak o̱ im anukfila hoke. 40 Micha Ushi a̱ pisa cha, yvmmak ash i̱ yimmi hokvto, momvt ai-okcha̱yvt bilia ya̱ pisa he, ilvppak o̱ auet sa kanchi tok vt aiahni hoke; yohmi ka nitak ont ishtaiyopikma yvmmak ash o̱ falaminchit tanichi la hi oke. 41 Yvmmvt, Vno ak osh pvska vba minti tok mak o̱ sia hoke, achi hatuk o̱, Chu okla hash ot yvmmak ash o̱ lumasit na-mihachit ma̱ya tok. 42 Mihmvt, Ilvppvt Chisvs, Chosef a̱ Ushi yoh chokvsh keyu̱? mikma i̱ki, micha ishki aiena ka iloh ithana keya ho̱? yohmi hokak osh katiohmi ho̱ vba mintit vla li tok, achi cho? achi tok. 43 Yohmi hatuk o̱ Chisvs vt afalaminchi mvt, Lumasit nan itiba mihvt hvch ik ma̱yo kashke. 44 Hatak nana kia vm vla he keyv, amba auet sa kanchi tok A̱ki ak osh halvlli hok mak a hi oke: mikma nitak ont ishtaiyopikma falaminchit tanichi la hi oke. 45 Mihmvt momvt Chihowa yak o̱ nan im ai ithvna he, achi kvt hopaii puta i̱ holisso ha̱ a holisso tok. Yohmi hatuk o̱ hatak vt A̱ki a̱ im a haponaklot, nana ka im ai ithvna aiyuka hokvto, vm ahanla hoke. 46 Hatak nana hosh A̱ki ak o̱ pisa chatuk o̱ keyu; Chihowa yak o̱ a minti tok ak bano yvmmvto A̱ki a̱ pi̱sa chatuk oke. 47 A̱hlishke, a̱hli mak o̱ hvch im achi lishke, Kvna kia a̱ yimmi hokvto ai-okcha̱yvt bilia ya̱ pisa hoke. 48 Vno ak osh ai-okcha̱ya pvska sia mak oke. 49 Hvchin ti̱kba vhleha hvt chukushmi foka ya̱ manna ai ahampa tok vt illi tok. 50 Pvska ilvppak o̱ hatak vt ai vpa cha, ik illo ka hi o̱, vba ya̱ mintit vla tok mak oke. 51 Vno ak osh pvska okcha̱ya vba minti tok a̱ sia mak oke; hatak nana hosh pvska ilvppa vpa hokmvt, okcha̱ya na bilia he; yohmikma pvska ipeta la he, yvmmvt vno sa nipi yakni vt ai okcha̱ya hi o̱, isht atobbi la chi̱ kak oke, im achi tok. 52 Yohmi hatuk o̱ Chu okla hash ot, Hatak ilvppvt katiohmi kak osh ilap nipi ya̱ pipeta na e pa hinla ho̱? achit itachowvt ma̱ya tok. 53 Mihma Chisvs vt, A̱hlishke, a̱hli mak o̱ hvchim achi lishke; Hatak Ushi nipi ya̱ vpvt, im issish ma hvsh ishko keyu hokmvt, ai okcha̱ya hi vt hvchi anukfo̱ka keyu hoke. 54 Kvna hosh sa nipi a̱ vpa cha, svssish ma ishko ho̱ kvto, ai-okcha̱yvt bilia ya̱ pisa hoke; atukma nitak ont ishtaiyopikma falaminchit tanichi la hi oke. 55 Sa nipi vt ilhpak o̱ fehnakma, svssish a̱ ishka hi o̱ fehna hoke. 56 Kvna hosh sa nipi a̱ vpa cha, svssish ma ishko hokvt, vno a̱ a svbai acha̱fakma, anonti vno mvt ilapa̱ ai ibacha̱fa li hoke. 57 A̱ki okcha̱ya yvt vno a̱ auet sa kanchi tok o̱, A̱ki ak o̱ vno vt ai okcha̱ya li hatuk a̱, kvna hosh vno a̱ svpa hokvt, yvmmak inli ho̱ chohmit vno ak o̱ si ai okcha̱ya hi oke. 58 Ilvppak osh pvska vba minti tok mak oke; hvchin ti̱kba vhleha hvt manna ya̱ vpa tuk osh anonti illi tok a̱ a chohmi ho̱ keyu; kvna hosh pvska ilvppa vpa hokvto okcha̱yvt bilia he mak oke, im ahanchi tok. 59 Kapenavm a̱ nan ai ithvnanchit ahanta mak osh sinakak anu̱kaka ya̱ ilvppa puta ka ai ahanchi tok. 60 Yohmi hatuk o̱ nan im ai ithvna vhleha hvt ilvppa haklot in taha mvt, la̱wa kvt, Ilvppvt anumpa kvllo fehnvshke, kvta hosh haponakla hinla cho? achi tok. 61 Nan im ai ithvna vhleha hvt yvmma lumasit nan isht a miha ka, Chisvs vt ilapo inlit akostininchi mvt, Ilvppvt hvchi ibetvblichi hoh cho? 62 Yohmi kvto Hatak Ushi vt ti̱kba ma ai vtta tok vba ya̱ ia na hvsh pisa hok mvto? 63 Okchalinchi vt shilombish ak oke; yohmikma nipi vto nana ho̱ isht ai vlhpesa keyu hoke; anumpa hvchim anumpuli li yvmmak osh shilombish okmvt, anonti isht aiokcha̱ya yoke. 64 Yohmi ka hvsh kaniohmi mvt ik yimmo kvt hvsh a̱shvshke, im achi tok. Vmmonvt isht auehinchi kak inli ho̱ kvna hak osh ik yimmo ka he, mikma kvna hak osh ilapa ishit. inla ibbak fohka he aiena ka Chisvs vt ithana tuk a tok.

Laua hosh ik im vlhpeso mvt, issvt i̱ filvmmi.

65 Mihmvt, Yohmi hatuk o̱ A̱ki ak osh anukfohkichi ho̱ keyukma, hatak nana hosh vm vla he keyu hoke, hvchim achi li kvno, achi tok.

Pita yvt auah tuklo nan im anukfila ka anoli hosh, Chisvs vt Chihowa ak o̱ Ushi pulla ka yimmi ka anoli.

66 Yvmmak fehna kak o̱ nan im ai ithvna vhleha hvt lauvt filamovt taha mvt, i himmak ma apehvt ik itvnowo ki tok. 67 Yohmi ma Chisvs ash ot auah-tuklo kash o̱, Hvchishno ak kia filvmmit a̱ya hi a̱ hvchim anukfila cho? im achi tok. 68 Mihma Saimon Pita yvt afalaminchi mvt, Kvta hak o̱ il im ia hinla cho? chishno ak osh ai okcha̱yvt bilia isht anumpa ha̱ ish ieshishke. 69 Micha chishno ak osh Chihowa okcha̱ya Ushi, Klaist mak o̱ chia pulla ka il ithanvt, pi yimmi fehna hoke, im achi tok. 70 Chisvs ash ot, Auah-tuklo ho̱ hvchi atokoli li tok o̱, hvsh achvfona kvt nan-isht-ahullo okpulo yo̱ chia keyu̱? im achi tok. 71 Yvmmak osh auah-tuklo ka ai iba chvfa yatuk osh, yvmmak ash ishit inla ibbak fohka chi̱ ha tok oka Saimon, ushi Chutas Iskaliot ak o̱ isht anumpuli ha tok oke.

7

Chisvs vt luma chohmi hosh a̱yvt Chelusalem a̱ ona ma, Chu vhleha hvt yvmmak ash pisa bvnnvt aiasha mvt, nan isht anukfilli kvt im ilaiyukvt aiasha.

1 Nana kvt ai yakohmi ha ya, Chisvs vt Kalili yakni ak o̱ ahanta tok: Chu okla hash osh yvmmak ash vbi ka bvnnvt ma̱ya hatuk o̱, Chu i̱ yakni yokvno ahanta he ik ahno ha tok. 2 Mihma Chu okla chisha̱ko vlhtipo nuta ai impa holitopa voh chatuk nitak vt a tikeli tok 3 Yohmi hatuk o̱ i̱ kanomi vhleha hvt yvmmak ash o̱, Ilvppa issvt ivt, Chutea yakni yak o̱ ish ona na nan chim ai ithvna vhleha hak kia na-fehna puta ish ai yvmihchi ka pisashke. 4 Ilapo vt otvni achukmvt annoa hi a̱ ahni hokvt, hatak vt ai aluma̱ka ho̱ nana ka yvmihchi chatuk vt iksho hoke. Ilvppak oka a chi yvmohmi mvhli chatuk okmvt, yakni a̱ ish il ai im otvninchashke, okla im achi tok. 5 I̱ kanomi vhleha hak kia ik i̱ yimmo hatuk osh. 6 Mihma Chisvs ash ot, Vno vt ia la he ai vlhpiesa kvto ik ai ono ki̱sha hoke; amba hvchishno vto hvsh ia hi vt hvchim vlhpiesa bieka hoke. 7 Yakni vt hvchishno yokvno hvchi̱ nukkilla he keyu: amba vno vto yvmma nana a kaniohmi kvt ai vlhpiesa keyu ka atokolit anoli li hatuk o̱, vno yokvno a̱ nukkilli hoke. 8 Ai-impa holitopa a̱sha ilvppa hvsh iashke; vno yokvto ai vlhpesa kvt ai ona fehna keyu ki̱sha hoka, ai-impa holitopa a̱sha ilvppa himonasi kvno ia la chi̱ keyu hoke, im achi tok. 9 Anumpa ilvppa puta ka im ahanchit in taha mvt, Kalili yakni akinli ho̱ anta tok. 10 Yohmi tuk kia i̱ kanomi vhleha hash ot ivt taha tuk o̱, ilap ash kia ile haiakvchi fehna keyu, amba luma chohmit a̱yvt, ai-impa holitopa a̱sha kash ona tok. 11 Yohmi ma Chu okla hvt yvmmak ash ai-impa holitopa a̱sha ka hoyot, Mih mvto katima yak o̱ hikia cho? achi tok. 12 Mihmvt kanimi kvt, Yvmmvt hatak achukma hoke, achi ma, inlaka yokvto, Keyu, amba okla ha̱ haksichi yoke, achi hatuk o̱ yvmmak ash lumasit isht anumpulit, ilap bi̱ka itachowa fehnvt ma̱ya tok. 13 Yohmi kia Chu okla ha̱ i̱ nukshopa hatuk osh, hatak nana kia haiakvchit yvmma isht anumpuli kvt iksho ki tok.

Chisvs vt tempel a̱ ont chukowa cha, nan ithvnanchit ahanta.

14 Atuk o̱ ai-impa holitopa a̱sha ka iklvnnvt taha foks ma, Chisvs ash ot tempel a̱ pit chukowa cha, nana ithvnanchi tok. 15 Mihma Chu okla hvt nukhlakancha cha, Hatak ilvppvt katiohmi kak osh ithvna tok keyu kvto, holisso ha̱ imponna hoh chishba? achi tok. 16 Chisvs vt afalaminchi mvt, Nan isht ai ithvnanchi li kvt vno vmmi ho̱ keyu, amba auet sa kanchi tok ak o immi hoke. 17 Hatak nana hosh, yvmmvt nana ai ahni tok mak o̱ ahninchit yvmihchi hokmvt, nan-isht-ithvnanchi ka Chihowa ak o̱ a minti hokmá, keyukmvt peh vno ahni li hosh anumpuli li hokmá, nana hatuk ma akostinincha hi oke. 18 Kvna kia peh ilap ahni hosh anumpuli hokvto ilap isht a holitopa he ak o̱ aiahni chatuk; amba auet kanchi tok vt nan-isht a-holitopa he ak o̱ aiahni hokvto, yummak osh aia̱hli, mikma nana ik ai vlhpeso nana kia ai a takali keyu hoke. 19 Moses vt vba-nan-vlhpisa ya̱ hvch ima tok keyu ho̱? a tok ak o̱ hvchi achvfona kia vba-nan-vlhpisa mvno hvch ik holitobloshke. Nanta katiohmi ho̱ svbi bvnnvt hvsh itvnowa cho? 20 Okla hash ot afalaminchi mvt, Nan-isht-ahullo okpulo yo̱ il ai eshi chia hoka, kvta hosh chibi bvnnvt itvnowa hoh cho? okla achi tok. 21 Chisvs vt afalaminchi mvt, Nana achvfa ho̱ ai yvmihchi li, yvmohmi ma momvt okokko! hvsh ahnishke. 22 Yohmi ka Moses vt hakshup tvpa ka hvchim apesa tok. Moses ak osh yvmma ti̱kbanlichi tok keyu, amba in ti̱kba vhleha ak a tok: a tok kia hvchishno vto nitak hullo nitak o̱ hatak hakshup hvsh in tahamblishke. 23 Moses i̱ nan-vlhpisa yut ik kobafo ka chi̱ ka, hatak vt nitak hullo nitak o̱ hakshup in tvptoho̱wa ma, vno vto nitak hullo nitak o̱ hlakofichit kaiyanchi li kak o̱, hvs sa̱ nukkilli cho? 24 Nana kvt a kaniohmi ahoba kak o̱ isht ik hvchim anukfilo kashke; amba nana kvt isht vlhpisa kvt ai-vlhpiesa mak o̱ isht hvchim anukfilashke. 25 Mihma Chelusalem a̱ a̱sha tuk vt kanimi kvt, Okla vbi bvnnvt ma̱ya beka tuk a̱ ilvppak osh mih mak o̱ keyu? 26 Yohmi kia nukwa̱ya iksho hosh anumpohonli ma, nan ok ik im achoshke. Ilvppak osh Klaist fehna mak o̱ mvhli kvno, hatak pehlichi vhleha hvt akostininchi hoh chishba? 27 Yohmi kia hatak ilvppvto kanima yo̱ a minti ka iloh im ithanvshke; amba Klaist ak osh vla hokma, kanima yo̱ a minti ka hatak nana hosh akostinincha he keyu hoke. 28 Mihma Chisvs vt tempel anu̱kaka ya̱ nana ai ithvnanchi hosh anta tuk ash osh chitolit, Vno a̱ hvs svthana mvt, anonti kanima yo̱ a minti li tuk ma hvsh ithanvshke; yohmi ka vno akinli ahni li hosh a̱ya li keyu, amba auet sa kanchi tok yvmmak osh aia̱hli mak atuk o̱ yvmma chik ithanoshke. 29 Amba vno vto yvmmak o̱ a minti li tuk okvt, yvmma ithana li hoke; yvmmak osh auet sa kanchi tok mak oke, achi tok. 30 Mihma okla ishi bvnna tok; yohmi kia hvshi kanvlli isht ai im vlhpisa kvt ik ai ono ki̱sha hatuk oka, hatak nana kia ibbak a̱ ik onocho ki tok. 31 Mihma okla la̱wvt yvmmak ash i̱ yimmi mvt, Klaist ak osh vla hokmvto, na-fehna puta ka yvmihchi kvt, hatak ilvppvt ai yvmihchi tuk puta ka i̱ shahlicha hinla ho̱? okla achi tok. 32 Okla hvt lumasit yakohmichit yvmma isht anumpulit ma̱ya ka, Falisi vhleha hvt haklo tok; micha Falisi vhleha, mikmvt na-holitompa isht a̱sha pehlichi vhleha aiena kash ot yvmmak ash isha chi̱ ka, tishu vhleha ha̱ pit tihleli tok. 33 Mihma Chisvs ash ot, Chekosi itintakla kak o̱ hvchi takla anta li moma chi̱; atuk mvt anonti auet sa kanchi tok a̱ im ia la chi̱ hoke. 34 Hvs sa hoyo kia, hvch ik sa peso ka chi̱; mikmvt kanima yo̱ ai ahanta likma, yvmma hvsh ai ona he keyu hoke, im achi tok. 35 Mihma Chu okla hash osh ilapo bi̱ka it im achit, Katima ko̱ ia chi̱ hokak o̱, keho pesa ka chi̱ hoh chishba? ita-fimimpvt Chentail okla ibvlhkahvt a̱sha hak o̱ im a̱yvt, Chentail okla ha̱ nan ithvnancha chi̱ ho̱? 36 Ilvppak osh anumpa nanta mak o̱, Hvs sa hoyo kia, hvch ik sa peso ka chi̱; mikmvt kanima yo̱ ai ahanta likma, yvmma hvsh ona he keyu hoke, achi tok.

Hatak vt itukshila hokvto, ilap ak o̱ im ai onvt nan ishka hi a̱, ahnit Chisvs vt hoyo.

37 Nitak ont ishtaiyopi na holitoblit ai-impa nitak chinto yvmmak fehna Chisvs vt hikia cha, tahpahanla mvt, Hatak nana hosh itukshila hokmvt, vno ak o̱ vm ai vlvt ik ishkó. 38 Kvna hosh vno a̱ a̱ yimmikma, yvmmak o̱, Holisso Holitopa yvt achi hatuk oka, oka okcha̱ya okhina yvt chu̱kvsh a̱ a yanvllit a kokoncha chi̱ hoke, achi tok. 39 Yohmi kia ilapa̱ i̱ yimmi vhleha hvt Shilombish a̱ habena he yvmmak o̱ isht anumpuli hosh ilvppa miha tok: Chisvs vt ont ik a holitopo ki̱sha hatuk o̱, Shilombish Holitopa yvt ik a̱yo ki̱sha ha tok. 40 Yohmi hatuk o̱ anumpa ilvppa haklo mvt, okla hash ot lauvt, Ilvppak osh hopaii mih mak o̱ fehna ho mvhlishke, achi tok. 41 Kanimi mvt, Ilvppak osh Klaist mak oke, achi ma, amba kanimi kvto, Klaist vt Kalili yakni a̱ vttvt a kohchvt a̱ya hinla ho̱? 42 Klaist vt Lewi Ushi ai isht atiaka ho̱, micha Behlehem tvmaha Lewi vt ai ahanta tok mak o̱ ai vtta ahpa hi a̱, Holisso Holitopa yvt achi hatuk keyu̱? achi tok. 43 Yohmi hatuk o̱ yvmmak atuk mak o̱ okla hvt isht ai ta kashapvt ma̱ya tok. 44 Mihma kanimi kvt yvmmak ash ishi ka ahni tok; yohmi kia hatak nana hosh ibbak a̱ ik onocho ki tok. 45 Yohmi ma tishu vhleha hash osh na holitompa isht a̱sha pehlichi vhleha, micha Falisi vhleha aiena kash im ai ona tok; mihma yvmmak ash osh, Nanta katiohmi ho̱ yvmmak ash isht hvch ik lo cho? im achi tok. 46 Mihma tishu vhleha hash ot, Hatak nana hosh anumpuli kvt hatak ilvppa chohmi chatuk keyushke, achi tok. 47 Mihma Falisi vhleha hash ot afalaminchi mvt, Hvchishno ak kia hvsh i̱ haksi hotuma? 48 Hatak hochitoka, keyukmvt Falisi vhleha aiena kvt kanimi mvt, yvmma i̱ yimmi tuk o̱? 49 Yohmi ka nan-vlhpisa kia ithana keyu okla ilvppvto nan isht i̱ palvmma he vlhpesvshke, achi tok. 50 Nikotemvs, yvmmvt ninak o̱ a̱yvt Chisvs a̱ im ona tok ash ot, yvmma ai ibachvfa hatuk osh, 51 Nan vlhpisa pin tonla kvt hatak a̱ ai i̱ haponaklot, nana ho̱ a kaniohmi hatuk ma ai akostininchi keyu ki̱sha kvt, nan im apesa chatuk oh cho? im achi tok. 52 Mihma okla afalaminchi mvt, Chishno ak kia Kalili hatak chia hatuk o̱? achukmalit hoyot pisá: hopaii vt Kalili yakni a̱ ai vttvt kohchvt a̱ya hi vt iksho hoka, im achi tok. 53 Yohmi ma hatak ash ot momvt in chuka aiyuka ilhkolit taha tok.

8

Falisi vhleha hvt, ohoyo hosh haui tobvt ahanta na yvmmak osh nan im apesa chi̱ ho̱, isht im ona.

1 Chisvs vt Alif nvnih ha̱ ia tok. 2 Atuk osh onna-hinli fehna falamvt tempel ash ant chukowa ma, okla momvt im ai itvnaha tok: mihma aka binilit nan ithvnanchi tok. 3 Mihma na-holissochi vhleha, micha Falisi vhleha aiena kvt, ohoyo hvt luma̱kvt anta tuk o̱, isht im ona tok; micha ai iklvnna ka okla binilichi mvt, 4 Nan-ithvnanchi ma! ohoyo ilvppvt luma̱kvt anta, ai yakohmi fehnvt haiaka na ishi tuk oke. 5 Yohmi ka Moses vt ilvppa chohmi hokvt tvli isht boa hi o̱, nan-vlhpisa ya̱ isht a pim apesa tok; yohmi ka chishno vto nantuk ish achi cho? im achi tok. 6 Ilap ak o̱ anumpa onocha hi vt ahnit, imomaka pisa hosh ilvppa okla achi tok. Yohmi kia Chisvs ash ot ik i̱ haponaklo ho̱ chohmit, aka pit waiahpvt, ibbak-ushi a̱ yakni a̱ isht ai o̱ holissochi tok. 10 Yohmi ka okla i̱ ponaklo kash ot a moyuma ma, waka̱ya mvt, Kanima hosh ai ashvchika ik im iksho kvt hvchi takla hikia hokmvt, yvmmak osh na ti̱kba tvli ya̱ isht ik boll, im achi tok. 8 Mihmvt anonti aka pit waiahpvt yakni a̱a ai o̱ holissochi tok. 9 Mihma okla haklo tuk ash ot, ilap chu̱kvsh akinli ka nan isht ai il akostininchi mvt, holitopa i̱ shahli tuk ak osh ti̱kba achvfa aiyukvt kohchvt ihi̱ya mvt, ik a lauwo ke tuk vt momvt ont taiyaha tok; mihma Chisvs ak bano hosh hikia ma, ohoyo hash osh ai iklvnna ash hiki̱a tok. 10 Chisvs ash ot wakaya mvt, inla yvt iksho ho̱, ohoyo ak bano ho̱ pisa mvt, Ohoyo chia ma! anumpa chi onochi vhleha mvto? hatak nana kia anumpa ik chi onocho ke tuk oh cho? im achi tok. 11 Mihma, Hatak nana kia anumpa ik si onochoshke, Chitokaka ma! achi tok. Mihma Chisvs ash ot, Vno ak kia anumpa chi onochi li keyushke, ia cha, himmakma ik chi̱ hakso kashke, im achi tok.

Chisvs vt ilap ak osh yakni in tohwikeli; yohmi ka yvmmvt im aia̱hli ka Iki vt atokolit anoli chatuk aiena ka miha.

12 Mihmvt Chisvs ash ot anonti okla ha̱ im anumpuli mvt, Vno ak osh yakni im a tohwikeli sia mak oke; kvna hosh vno a̱ siakaiya hokvt, ai okhlilika yo̱ a̱ya he keyu; amba ai okcha̱ya tohwikeli hvt in takala he mak oke, im achi tok. 13 Yohmi hatuk o̱ Falisi vhleha hash ot, Nan ish ai atokoli kvt chishno akinli hosh ish il ai-anoli hokvt, nan ish ai atokoli ka a̱hli keyushke, im achi tok. 14 Chisvs ash ot afalaminchi mvt Atokoli kvt vno akinli hosh il ai anoli li akinli kia, nan ai atokoli li ka a̱hli hoke: vno ak okvto kanima yo̱ a minti li tuk: mikmvt kanima yo̱ atia la he aiena kvt ithanali hoka; amba hvchishno vto kanima yo̱ a minti li tuk, micha kanima yo̱ atia la he aiena ka hvsh akostinincha he keyushke. 15 Haknip nan isht a kaniohmi chatuk mak o̱ nana hvsh apesvshke; vno vto hatak nana kia nana ak im apesoshke. 16 Yohmi kia nana ka apesa li hokma, nan apesa li ka aia̱hli hoke; vno ak illa keyu hoka, amba vno vt auet sa kanchi tok A̱ki a̱ itatuklo li hoke. 17 Hatak tuklo hosh nana atokolit anoli ho̱ aia̱hla hi a̱, hvchi nan-vlhpisa yak kia a holihi̱so hoke. 18 Nan isht a si atokowa anoli kvt vno akinli kak osh mihi yo̱ sia hokma, anonti auet sa kanchi tok A̱ki ak osh nana atokowa ka si anoli hoke. 19 Yohmi ma Katima ko̱ Chiki vto a̱sha hosh? okla im achi tok. Chisvs vt afalaminchi mvt, Vno, mikmvt A̱ki ita tuklo li ka hvch ik pithanoshke; vno a̱ hvs svthana hatuk okmvt, A̱ki ma hvsh ithana he tuk akinli hoke, im achi tok. 20 Anumpa ilvppa Chisvs vt tempel anu̱kaka ya̱ nana ai ithvnanchi hosh ahantvt, tvli holisso abohli yo̱ hikia hosh anumpuli tok: hvshi kanvlli isht ai im vlhpisa kvt ik ai ono ki̱sha hatuk o̱, hatak nana kia ibbak a̱ ik onocho ki tok. 21 Anonti Chisvs ash ot, Kanima ia likma, hvs sa hoyo kia, nan ai-ashvchika puta kak o̱ isht hvchi ai illa hi oke: kanima yo̱ ai ona li ka, hvchishno vto hvsh ona he keyu, im achi tok. 22 Yohmi ma Chu okla hash ot, Kanima yo̱ ai ona li ka, hvchishno vto hvsh ona he keyu, achi kvt ilap inli kak osh ile ba chi̱ hoh cho? achi tok. 23 Mihma, Hvchishno vto aka yo̱ a minti hvchia hokma, vno vto vba yo̱ a minti li hoke; hvchishno vto yakni ilvppak o̱ ai ibachvfa hvchia hokma, vno vto yakni ilvppa ai ibachvfa sia keyu hoke. 24 Yohmi ka na hvchim ai-ashvchika puta kak o̱ isht hvchi ai illa hi oke, hvchim achi li hokvno; vno ak osh mih mak o̱ sia ka ik hvchi yimmo hokmvt, na hvchim ai-ashvchika puta kak o̱ isht hvchi ai illa hi oka, im achi tok. 25 Mihma, Chishno ak osh kvta hak o̱ chia ho̱? okla im achi tok. Mihma Chisvs ash ot, Vmmona ka nana ho̱ hvchim anoli li kash mih mak o̱ sia hoke. 26 Nana ka hvchi̱ mihvt, nan isht apesa la hi vt lauvt vm a̱shvshke. Yohmi kia auet sa kanchi tok yvmmak osh aia̱hli mak oke; mihma vno vt yvmmak o̱ nana ka ai im a haklo li tuk mak osh yakni a̱ isht im anumpuli li hoke. 27 I̱ki ak o̱ isht im anumpuli hatuk a̱, okla ik akostinincho ki tok. 28 Mihma Chisvs ash ot, Hatak Ushi a̱ vba hvsh takalichi hok mak osh, vno vt mih mak sia hatuk; micha vno akinli vm anukfila hosh nanasi ka ai yvmohmi li keyu; amba A̱ki ak osh nan svthvnanchi tuk mak o̱ ilvppa puta ka anumpuli li hatuk a̱ hvsh akostinincha hi oke. 29 Micha auet sa kanchi tok vt sa ta̱kla a̱ya hoke; A̱ki vt ilap illvchit sa kanchi tok keyu; nana kvt yvmma yukpali pulla kak o̱ yvmohmi kvt a sa bilia chatuk oke, im achi tok.

Chu okla hvt Chisvs a̱ i̱ sanali; yohmi hatuk o̱ ilapvt Eblaham ak okvno isht atiaka ho mvhli akinli kia, nan ai ashvchika yokvno i̱ yuka vhleha; micha nan isht ahullo okpulo a̱ im vlla vhleha aiena hatuk a̱, Chisvs vt im otvninchL

30 Anumpa ilvppa puta ka anumpohonli ma, i̱ yimmi kvt laua tok. 31 Yohmi ma Chisvs ash ot i̱ yimmi tuk vhleha Chu okla hash o̱, Vm anumpa ha̱ hvsh halvlli kvt hvch ik issokmvt, nan vm ai ithvna a̱hli fehna hvchia mak a chi̱ hoke. 32 Mikmvt nan-aia̱hli ka hvsh ithana he; mikma nan-aia̱hlika yash ot yuka keyu hvch ikba hi oke, im achi tok. 33 Okla afalaminchi mvt, Eblaham ak o̱ isht atiaka pia, yohmi kvt nitak nan ash o̱ hatak nana kia ai i̱ yuka hosh il anta tok keyu ka, katiohmi ho̱, Yuka keyu hvchi toba hi oke, ish achi cho? im achi tok. 34 Chisvs ash ot afalaminchi mvt, A̱hlishke, a̱hli mak o̱ hvchim achi lishke, Kvna hosh nan ai ashvchika ya̱ ai yohmi hokmvt, nan-ai-ashvchika ya̱ i̱ yuka mak oke. 35 Yohmi ka yuka hokvto chuka ya̱ ai ahantvt bilia chatuk keyu; amba Ushi yokvto ahanta na bilia chatuk oke. 36 Yohmi hoka Ushi yak osh yuka keyu ka hvch ikbi hokma, yuka keyu a̱hli mak o̱ hvchia ha hi oke. 37 Eblaham ak o̱ isht atiaka hvchia hokvno hvchim ithana li; yohmi kia vm anumpa hak osh hvchi chu̱kvsh a̱ ai anukfoyuka keyu kak o̱, svbi hvchi bvnnvshke. 38 A̱ki a̱ ai iba pi̱sa li tok mak osh vno vt nana ka isht anumpuli li hoke; mihma hvchishno vt hvch i̱ki a̱ hvsh ai iba-pi̱sa tok mak osh a hvchi yvmohmishke, im achi tok. 39 Mihma okla afalaminchi mvt, Eblaham ak osh pi̱ki oke; im achi tok. Chisvs ash ot, Eblaham ak o̱ ushi hvchia hatuk okmvt, Eblaham vt nana a kaniohmi tok mak o̱, hvsh yvmohma he tuk oke. 40 Amba Chihowa ya̱ nana ai im a haponaklo li tuk vt nan ai a̱hlika mak o̱ hatak hvchim anoli li ka, svbi hvchi bvnnvshke; Eblaham vt ilvppa yakohmi tok keyu hoke. 41 Hvch i̱ki vt nana a kaniohmi tok mak o̱ hvsh yvmohmishke, im achi tok. Mihma, I̱ki, ishki ita tuklo kvt ai vlhpesa keyu ho̱ a toba hosh il vtta tok keyu: Pi̱ki vt achvfa, Chihowa ak oke, im achi tok. 42 Chisvs ash osh, Chihowa ak osh hvch I̱ki atuk okma, hvs sa̱ hulla he tuk oke; vno vt Chihowa yak o̱ a kohchvt a̱ya li hosh vla li ha tok oka; yohmi kvt vno vm anukfila akinli hosh vla li tok keyu; amba yvmmak osh auet sa kanchi tok oke. 43 Nanta katiohmi ho̱ vm anumpa ha̱ hvch ik svm akostinincho cho? vm anumpa ha̱ haponaklo ik hvchi bvnno kak okvt, 44 Setan hvch i̱ki ak o̱ hvsh a toba hatuk osh, hvch i̱ki nana ai-ahni kak o̱ ai yohma hi a̱ hvchim anukfilvshke; yvmmak okvt vmmona kash inli ho̱ hatak vbi a tok; micha ilap ak osh nan aia̱hli kvt anukfo̱ka keyu hatuk osh, nan ai a̱hlika ya̱ a hikia keyu hoke. Holabit anumpuli kvt ai immi ka mak okvt anumpuli hoke; ilap ak osh holabi yokvt, anonti na-holabi i̱ki mak oke. 45 Yohmi hatuk o̱ ai a̱hlika yo̱ hvchim anoli li hatuk o̱, hvch ik sa̱ yimmoshke. 46 Hvsh katima kak osh nan ai-ashvchi li tuk a̱ hvs svm atokola hinla cho? A̱hli mak o̱ miha li hok mak heno, nanta katiohmi ho̱ hvch ik sa̱ yimmo cho? 47 Kvna kia Chihowa ya̱ immi hokmvt, Chihowa im anumpa ha̱ haklo hoke; yohmi hoka hvchishno vto Chihowa immi hvchia keyu hokvt hvch ik hakloshke, im achi tok. 48 Mihma Chu okla vhleha hash ot afalaminchi mvt, Chishno vt Samalitan hatak chia hosh, nan-isht-ahullo okpulo a̱ ish il ai eshi hatuk a̱, e chi achi kvt vlhpesa ho̱ e miha keyu cho? im achi tok. 49 Chisvs vt afalaminchi mvt, Nan-isht-ahullo okpulo il ai i̱shi li keyushke: amba A̱ki a̱ holitobli li hatuk o̱, hvchishno vto vno a̱ hvch ik sa holitobloshke. 50 Micha vno akinli isht a sa holitopa hi o̱ ahni li keyu; yvmma aiahni cha, nan apihi̱sa kvto achvfa hosh a̱sha hoke. 51 A̱hlishke, a̱hli mak o̱ hvchim achi lishke; Hatak vt nana mihi̱ha li ka vm antia hokmvt, nitak nana ai-illika ya̱ pisa he keyu hoke, im achi tok. 52 Mihma Chu okla hash ot, Nan-isht-ahullo okpulo a̱ ish il ai eshi hatuk a̱, himak vno il akostininchishke; Eblaham, mikmvt hopaii vhleha aiena kvt illi tok: yohmi ka hatak vt nana mihi̱ha li ka vm antia hokmvt, nitak nana ai illika ya̱ pisa he keyu, ish achishke. 53 Pi̱ki Eblaham illi tok a̱ ish i̱ shaiyahli cho? mihma hopaii vhleha aiena kvt illit taha tok. Chishno ok ash kvta hak o̱ ish il ai apesa hoh cho? im achi tok. 54 Chisvs vt afalaminchi mvt, Vno akinli hosh ile holitobli li hokma, na sa holitopa he mak keyu hoke. Hvchin Chihowa hvsh miha tuk A̱ki yvmmak osh sa holitobli hoke. 55 Yohmi kia hvchishno vto yvmma hvch ik ithanoshke; amba vno vto yvmma ithana lishke; yohmi kvt yvmma ak ithano hoke; achi li hokmvt, holabi hvchishno akinli ho̱ chohmi la chi̱ hoke; yohmi kia yvmmak oka ithana li mvt, nana ahanchi ka holitobli lishke. 56 Hvch i̱ki Eblaham vt ai ahanta li nitak a̱ pisa hi okvt na yukpa tok; atuk osh pisa cha, na yukpa chinto fehna tok, achi tok. 57 Mihma Chu okla hash ot, Sipokm kvt afvmmi pokoli tahlapi ka chik ono ki̱sha hokak osh, Eblaham a̱ ish pi̱sa tok oh cho? im achi tok. 58 Mihma Chisvs vt A̱hlishke, a̱hli mak o̱ hvchim achi lishke, Eblaham vt iksho ki̱sha ma, anta li tok oke, im achi tok. 59 Yohmi ma ishit bola chi̱ kvt, tvli a̱ okla aiowa tok yohmi kia Chisvs ash ot lumvt okla ai iklvnnaka ya̱ hlopullit a̱yvt tempel a̱ a kohchvt ont ia tok.

9

Hatak vt lvpa yosh vtta tok a̱, Chisvs vt hoponayochi.

1 Micha Chisvs vt ont ia cha a̱ya mvt, hatak vt lvpa imoma yosh vtta tok osh a̱sha na pisa tok. 2 Mihma nan im ai ithvna vhleha hvt, Pi̱ shahli ma! hatak ilvppak okmá, keyukmvt iki, ishki itatuklo ka a katima kak osh nan ashvchi tok o̱, hatak ilvppvt lvpa imoma yosh vtta tok oh cho? achit i̱ ponaklo tok. 3 Chisvs ash ot afalaminchi mvt, Hatak ilvppak okmá, keyukmvt i̱ki, ishki itatuklo ka a kanima kak osh nana ashvchi tok o̱ keyu hoke; amba Chihowa nan-isht im ai a̱hlika yvt ilvppak o̱ isht ai otvna he mak o̱, ai yakohmi tok oke. 4 In toksvli la he mak o̱ auet sa kanchi tok oka nita̱ki moma kak o̱ isht im ahanta li pullashke; ninak vt vla ha yokmvno, hatak nana kia pilesa he keyushke. 5 Yakni a̱ ai ahanta li takla hokvto, yakni a̱ in tohwikeli sia hoke, im achi tok. 6 Ilvppa mak achit ont issa mvt, yakni a̱ on tofvt, lukfi a̱ itukchi ishit y vmvslit tahli mvt, hatak lvpa nishkin a̱ lukfi ash o̱ isht im apolusli tok. 7 Mihmvt, Oka talaia Siloam, yvmmvt toshowakmvt, Pila, achi ho̱ ia cha, ont okamí, im achi tok. Yohmi ma ia cha ont okami mvt, pi̱sa hosh vla tok. 8 Yohmi hatuk o̱ chuka panta hatak vhleha, micha yvmmvt lvpa yo̱ ti̱kba ka pisa beka tuk vhleha yvmmak ash ot, Ilvppvt a̱shvt nana asihi̱hla chokvsh mak o̱ keyu̱? achi ma, 9 Kanimi kvt, Ilvppvt mihi yoka, achi ma, inla mvt, Peh holba hoka, achi tok: yohmi kia ilap vto, Mihi yo̱ sia hoke, achi tok. 10 Yohmi hatuk o̱, Katiohmi hosh chi nishkin vto fatuma tuk oh cho? im achi tok. 11 Mihma afalaminchi mvt, Hatak Chisvs hohchifo kak osh lukfi a̱ yvmvslit, sa nishkin a̱ isht vm apolusli cha, Oka talaia Siloam a̱ ia cha, ont okami, vm achi ma, ivt ont akami li hosh, hoponayo li tuk oke, achi tok. 12 Mihma, Atuk osh mih mvto? okla im achi ma, Ak akostininchoshke, achi tok.

Hatak ash o̱ ilauet Falisi vhleha ha̱ isht im ona ma, Falisi vhleha hash ot hatak ash sinakak a̱ a kohchichl.

13 Mihma lvpa yo̱ beka tuk yvmmak ash o̱ ilauinlit Falisi vhleha ha̱ isht im ona tok. 14 Yohmi ka nitak hullo nitak o̱ Chisvs vt lukfi a̱ yvmvsli cha, nishkin a i̱ fatummi tuk a tok. 15 Yohmi hatuk o̱ anonti Falisi vhleha hvt kaniohmit hopanayo tuk a̱, im asilhhvchi akinli tok. Lukfi yvmvska yo̱ sa nishkin a̱ isht a lapohlechi na okami li tuk osh, hoponayo lishke, im achi tok. 16 Yohmi hatuk o̱ Falisi vhleha kanimi kvt, Hatak yvmmvt nitak hullo nitak a̱ holitobli keyu hokvt, Chihowa ak o̱ a minti keyushke, achi tok. Inlaka yokvto, Hatak vt nan ashvchi atuk vt katiohmi hosh na-fehna puta yakohmi ka yvmihcha hinla cho? achi tok: yohmi mvt ilap bi̱ka okla ai ita kashapvt ma̱ya tok. 17 Hatak lvpa yatuk ash o̱ anonti, Chishno vto chi nishkin a̱ chi̱ fatummi tuk a̱, yvmmak oka nanta isht ish achi cho? okla im achi ma, Yvmmak ash ot hopaii yoke, achi tok. 18 Yohmi kia Chu okla hash ot hoponayo tuk ash i̱ki, ishki ita tuklo ka hoyot ik im asilhhacho ki̱sba kvt, yvmmvt lvpa yatuk osh hoponayo tuk a̱, ik yimmo ki tok. 19 Atuk osh yvmmak ash o̱ okla i̱ ponaklot, Ilvppvt hvch iso lvpa yosh vtta tok hvsh achi chokvsh oh cho? Yohmi hokak osh katiohmi ho̱ himak ano hoponayo cho? okla achi tok. 20 I̱ki, ishki ita-tuklo kash ot afalaminchi mvt, Ilvppvt piso, micha lvpa yosh vtta tok okvno il ithanvshke. 21 Amba nana hosh kaniohmi ho̱ himak ano pi̱sa kvno, kil akostininchoshke; mikmvt kvna hosh nishkin a̱ i̱ fatummi tuk aiena kvno, kil ithanoshke; vlla keyu hoka, ilap ak o̱ hvsh i̱ ponaklokma, ilap inli hosh isht il ai anumpula hinla hoke, achit okla tok. 22 Hatak nana hosh, yvmmvt Klaist oke, achi hokmvt, sinakak a̱ a kohcha hi o̱, Chu okla hvt ai it ibachvfvt taha ma̱shko hatuk o̱, i̱ki, ishki itatuklo kvt Chu okla hak o̱ i̱ nukshopa hatuk osh, anumpa ilvppa achit okla tok. 23 Yohmi hatuk osh i̱ki, ishki itatuklo kash ot, Vlla keyu hoka, ilap ak o̱ oh i̱ ponakló, achit okla tok. 24 Yohmi ma atu̱kla ma hatak lvpa yatuk ash o̱ okla hoyo mvt, Chihowa yak o̱ pit holitoblichi, hatak ilvppak okvto nan ashvchi a̱ il im ithana hoke, im achi tok. 25 Mihma afalaminchi mvt, Yvmmak okvt nana ashvchi yokmá, keyukmá, nana hokvno ak im ithanoshke; nana achvfa kvno ithana li; yohmi kvt lvpa sia ha tuk kia, himak ano hoponayo li kak oke. 26 Mihma anonti, Nanta ho̱ a chi̱ katimichi tuk o̱? Katimihchi hosh chi nishkin a̱ fatummi tuk oh cho? okla im achi tok. 27 Mihma im afalaminchi mvt, Hvchim anolit taiyahli li kia, hvch ik haponaklo ke tuk vt, nanta katiohmi ho̱ atuklanchit haklo ka hvsh ahni cho? hvchishno ak kia nan im ai ithvna toba hvchi bvnna ho̱? achi tok. 28 Yohmi ma okla ishtukhlakafvt, Chishno ak osh yvmma nan im ai ithvna chia hoke; amba pishno vto Moses ak o̱ nan im ai ithvna pia hoke. 29 Moses ak okvno Chihowa yvt im anumpuli beka tok a̱ il ithana; amba ilvppak okvto kanima yo̱ a minti ma, il ai im ithana keyushke, okla im achi tok. 30 Mihma hatak ash osh afalaminchi mvt, Yvmmvt kanima yo̱ a minti tuk a̱ hvch ik im akostinincho ho̱, anonti sa nishkin a̱ a̱ fatummi hoka, ilvppvt na-fehnvshke. 31 Mihmvt Chihowa yvt nan ashvchi vhleha hokvno i̱ haponaklo keyu chatuk; amba hatak nana hosh Chihowa ya̱ aiokpvchi, micha nan ahni ka im antia aiena yok mak o̱ mihi yo̱ i̱ haponaklo chatuk a̱ iloh ithanvshke. 32 Yakni vt toba tok a taiyakla ka lvpa imoma yosh vtta tok a̱ hatak nana kia nishkin ash i̱ fatummi tok a̱ annoa chatuk keyushke. 33 Hatak ilvppvt Chihowa yak o̱ a minti hatuk keyu hokmvt, nana ho̱ yvmihcha he keyushke, im achi tok. 34 Mihma okla afalaminchi mvt, Nana ai ashvchika bieka mak osh ish vtta tok ak na̱ka nan ish pim abvchi hotuma? im achi mvt, a kohchichi tok.

Chisvs vt ilap ak osh Chihowa ho̱ Ushi mak atuk vt hatak yvmmak ash im il otvninchi ma, hatak ash ot i̱ yimmi cha, aiokpvchi.

35 Yvmma a kohchichi tuk a̱, Chisvs vt haklo tok; atuk osh yvmmak ash o̱ pisa mvt, Chihowa Ushi a̱ ish i̱ yimmi cho? im achi tok. 36 Afalaminchi mvt, Chitokaka ma! i̱ yimmi la hinla yvmmak osh kvta ho̱? achi tok. 37 Mihma Chisvs ash osh, Yvmmak oka ish pi̱sa tuk o̱, anonti mihi yosh chit im anumpohonli hoke, im achi tok. 38 Mihma, Chitokaka ma! sai yimmishke, achi mvt, yvmmak ash aiokpvchi tok. 39 Ik hoponayo atuk vt hoponayo yokma, anonti hoponayo tuk vt lvpa yo̱ toba he, yakohmit nan isht im vlhpisa hi o̱, yakni ilvppa a̱ya li hatuk oke. 40 Mihma Falisi vhleha kanimi kvt yvmma apeha tuk ash ot anumpa ilvppa puta ka haklo mvt, Pishno ak kia lvpa pia hoh cho? im achi tok. 41 Chisvs ash ot, Lvpa hvchia hatuk okmvto, nan ai ashvchika yvt ik hvchim iksho ka he tuk; amba, E hoponayo, himak a̱ hvsh achi; yohmi hokvt hvchim ai ashvchika yvt takanli moma hoke, im achi tok.

10

Chisvs ak osh okhissa, mikmvt yvmmak osh chukfvlhpoba apesvchi achukma yatuk osh chukfvlhpoba ya̱ vlhtobvt illi.

1 A̱hlishke, a̱hli mak o̱ hvchim achi lishke, Kvna hosh chukfvlhpoba i̱ holihta okhissa yak o̱ ik a chukowo hosh, amba naksika kanima yo̱ pit oiyvt o̱ walvbli hokvto, yvmmvt hu̱kopa, mikmvt na wehpuli mak oke. 2 Amba okhissa yak o̱ pit a chukowa hokvto, yvmmak osh chukfvlhpoba ya̱ apesvchi mak oke. 3 Yvmmak o̱ okhissa apesvchi atuk vt in tiwikma, itih ola ka, chukfvlhpoba yvt ithana; yohmi hatuk oka in chukfvlhpoba atuk ash hohchifo aiyuka hochifot pehlichit kohcha chatuk. 4 Atuk osh in chukfvlhpoba yash kocha welit tahlikmvt, ti̱kba im iakma, itih ola ka, ithana hatuk okvt, chukfvlhpoba yash ot apehvt ia chatuk. 5 Yohmi kia inla itih ola hokvno ik ithano hatuk osh, api̱hvt ia he keyu hosh, amba i̱ filvmmit yihlepa chatuk oke, im achi tok. 6 Nan-isht-vlhpisa ilvppak o̱ Chisvs vt okla ha̱ isht im anumpuli tok: yohmi kia nana ho̱ yvmmvt isht ai im anumpuli hatuk a̱, okla ik akostinincho ki tok. 7 Yohmi hatuk o̱ Chisvs ash ot atuklanchit, A̱hlishke, a̱hli mak o̱ hvchim achi lishke, Vno ak osh chukfvlhpoba im okhissa sia hoke. 8 A sa ti̱kba a̱ya tok puta kvto hu̱kopa, mikmvt nawehpuli bano ha tok: yohmi hatuk o̱ chukfvlhpoba yvt yvmmak okvno ik i̱ haponaklo ki tok 9 Vno ak osh okhissa sia hoke: hatak nana hosh vno ak o̱ si a chukowa hokvto, okcha̱ya he: micha pit chukoho̱wvt, anonti kohonchvt, ai-impa ya̱ ahayuhoncha hi oke. 10 Na-hu̱kopa yvt hu̱kopa, micha vbi, nan okpvni aiena he ak bieka hosh a̱ya chatuk; amba ai okcha̱ya ya̱ okla ahayuchikmvt, anonti laua kvt i̱ shahli fehna ho̱ pisa he mak o̱, vno vto a̱ya li ha tok. 11 Vno ak osh chukfvlhpoba apesvchi achukma sia mak oke; chukfvlhpoba apesvchi achukma yvt chukfvlhpoba ya̱ ilap im ilhfiopak a̱ a kaiyanchi hoke. 12 Amba peh ilhtohno, chukfvlhpoba apesvchi keyu hatuk, micha chukfvlhpoba yvt immi atuk keyuk mvto, nashoba vt minti na pisakmvt, chukfvlhpoba ya̱ issvt chvfa hoke; yohmi ma nashoba yvt yvmmak ash ant hoklit, chukfvlhpoba yash it ai yuhli hoke. 13 Ilhtono hvt peh ilhtohno atuk okvt, chukfvlhpoba ya̱ nan isht ik ahno hatuk mak osh chvfa hoke. 14 Vno ak osh chukfvlhpoba apesvchi achukma sia hoke; an chukfvlhpoba ya̱ ithaiyana li hoke; mikma anonti vmmi hvt vno a̱ svthana hoke. 15 A̱ki vt svthana ka, vno mvt A̱ki a̱ ithana li akinli koke; yohmi hosh chukfvlhpoba ya̱ isht vlhtoba ho̱ vm ilhfiopak a̱ aka bohyuli lishke. 16 Yohmi kvt chukfvlhpoba inla mvt ilvppa a̱shaka ai achvfa keyu kvt vm a̱sha hoke: yvmmakma pehlichit vla likma, vm anumpa ha̱ hakla hi oke: yohmikma aiasha vt achvfakma, anonti chukfvlhpoba apesvchi vt achvfa hi oke. 17 Vm ilhfiopak a̱ falaminchit ishi la hinla hosh aka bohyuli li; yohmi hoka A̱ki vt sa holitobli hoke. 18 Hatak nana hosh vm ishi ho̱ keyu: amba vno akinli ahni li hosh aka bohyuli li hoke. Aka bohyuli la hi vt isht vm ai vlhpesakmvt, anonti falaminchit ishi la hi vt isht vm ai vlhpesa hoke. Nan-vlhpisa ilvppak o̱ A̱ki a̱ im a habena li tok, im achi tok.

Okla hvt Chisvs a̱ nan isht ai im anukfila kvt ilaiyuka.

19 Yohmi hatuk o̱ anonti Chu vhleha hash ot anumpa ilvppa isht ai it a kashapvt ma̱ya tok. 20 Yohmi mvt, Nan-isht-ahullo okpulo il ai i̱shi hatuk osh tasimbo hokvto, nanta katiohmi ho̱ hvsh i̱ haponaklo hosh? achi kvt laua ma, 21 Inlaka yokvto, Ilvppak okvt nan-isht-ahullo okpulo il ai i̱shi ho̱ im anumpa keyushke. Nan-isht-ahullo okpulo vt lvpa nishkin a̱ fatumma hinla ho? achi tok. 22 Hvshtula yo tempel a̱ himonvchit Chitokaka pit im issa impa hosh Chelusalem a̱ a̱sha ho̱, yohmi tok. 23 Mihma Chisvs vt tempel anu̱kaka Solomon im apishia nutaka ya̱ hikiki̱a tok.

Chisvs vt Chihowa hak o̱ a minti tuk a̱ ilap nana ai isht ahanta kak inli hosh otvninchi ka im anoli.

24 Mihma Chu vhleha hash ot vlvt yvmmak ash o̱ ant a folubli cha, Ik ai ithano chohmit il aiasha na katiohmi foka chi̱ ho̱ ish pim ahni cho? Chishno ak osh Klaist chia hokmvt, achukmalit ish pim anolashke, im achi tok. 25 Mihma Chisvs ash ot afalaminchi mvt, Hvchim anoli li ka, ik hvchi yimmo hoke: nana ka A̱ki hohchifo ho̱ isht a yvmihinchi li kak o̱, yvmmak osh ai vlhtokowa ka si anohonlishke. 26 Yohmi kia ik hvchi yimmoshke; yvmmak o̱ hvchim achi li hatuk oka, an chukfvlhpoba keyu hvchia hatuk okvt. 27 An chukfvlhpoba vto vm anumpa ha̱ haklokma, anonti vno vt ilap ma ithana li ho̱, a si apeha chatuk. 28 Mikma ai-okcha̱yvt bilia ya̱ yvmma im issa li; yohmi ka nitak nana ilbvshvt illa he keyukma, anonti kvna kia yvmmak ash svbbak a̱ a kohchit isha hi vt iksho hoke. 29 A̱ki yvmma vma tok vt moma i̱ shahli; yohmi ka kvna kia yvmmak ash A̱ki ibbak a̱ a kohchit isha hi vt iksho hoke. 30 Vno, A̱ki itatuklo li kvt il it ibai achvfa hoke, achi tok. 31 Mihma anonti Chu okla hash ot tvli ishit bola chi̱ kvt tvli a̱ okla aiowa tok. 32 Chisvs vt afalaminchi mvt, Isht il apelvchi vt A̱ki a minti pulla na na hochukma la̱wa ka isht a yvmihinchi li̱ hvsh pisa tuk a̱, na-fehna yvmma puta tuk ash katima kak o̱ tvli a̱ isht hvs sa bola chi̱ mak oh cho? im achi tok. 33 Mihma Chu okla hash ot afalaminchi mvt, Na fehna achukma yvmmak atuk ak o̱ tvli a̱ ishit e chi bola chi̱ mak o̱ keyu; amba ik ahobalot anumpulit, anonti hatak chia hokak osh, Chihowa ish il apesa aiena kak oke, im achi tok. 34 Chisvs vt afalaminchi mvt, Chitokaka vhleha hvchia hoke, achi li tok, achi kvt hvchi̱ nan-vlhpisa holisso ha̱ a holihi̱so keyu cho? 35 Chihowa im anumpa hvt a̱yvt ai im ahanta yo̱ yvmmak o̱ Chitokaka vhleha hohchifo tok okma, anonti Holisso Holitopa yvt kobafa hi o̱ keyushke: 36 I̱ki vt na-holitopa ka isht a im atokoli cha, yakni a̱ auet kanchi tok o̱, Chihowa Ushi sia hoke, achi li tuk ak o̱, Nan ik ahobalot ish anumpuli, hvsh achi hoh cho? 37 A̱ki vt nana a kaniohmi ak o̱ ak yvmihcho hok mak o̱, hvchik sa̱ yimmo kashke. 38 Amba yvmihchi li hokmvno, vno ak okvno hvch ik sa̱ yimmo hoh kia, nana kvt a kaniohmi yvmmak o̱ hvchi yimmi cha, A̱ki vt auet a si acha̱fakma, anonti vno vt ilap a pit ai acha̱fa li ka, akostininchit hvchi yimmashke, im achi tok.

Chu okla hvt vbi bvnna kia im ahlakofit kocha.

39 Yohmi hatuk o̱ anonti okla ishi bvnna tok: yohmi kia ibbak a̱ im a hlakofi tok.

Chisvs vt ia mvt Chatan misha tvnnvp o̱ ona ma, okla laua hosh i̱ yimmi.

40 Mihmvt anonti ivt, Chatan misha Chan vt a baptismochi vmmona tok yvmmak o̱ ona cha, ahanta tok. 41 Mihma okla la̱wvt im ai itahoba mvt, Chan vto nafehna nana kia yvmihchi tok keyu; yohmi kia Chan vt hatak ilvppa isht anumpohonli tok a̱, momvt aia̱hli ha tok, achi tok. 42 Yohmi ma yvmma a̱shvt ai i̱ yimmi kvt laua tok.

11

Lasalvs vt abeka na in tek vhleha hvt Chisvs a̱ pit im anoli.

1 Hatak achvfa Lasalvs hohchifo, Meli micha itibapishi Mahla itatuklo in tvmaha Betani ak o̱ vtta yosh abeka tok. 2 Meli yvmmak osh Chitokaka ya̱ pa̱shi ahama isht a hvmmi cha, iyi ma ilap pa̱shi yo̱ isht i̱ kasholichi tok mak o̱ i̱ nakfi yosh Lasalvs vt abeka ha tok. 3 Yohmi hatuk o̱ in tek tuklo kash ot yvmmak ash pit im anolit, Yakeh! Chitokaka ma! ish holitobli chatuk vt abekvshke, achi tok. 4 Mihma ilvppa Chisvs vt haklo mvt, Nan abeka ilvppvt isht ai illa hi o̱ keyu hoke; amba Chihowa vt isht a holitopa na Chihowa Ushi vt yvmmak o̱ isht a holitopa chi̱ mak oke, achi tok. 5 Mahla, micha itibapishi, mikmvt Lasalvs aiena ka Chisvs vt holitobli tok. 6 Yohmi hatuk osh yvmmvt abeka tuk a̱ haklo ha yvt ai vtta tuk ash inli ho̱ ahanta na nitak tuklo tok. 7 Atuk osh yvmma ont vbanvpa ma nan im ai ithvna vhleha hash, Anonti Chutea yakni ya̱ iloh iashke, im achi tok. 8 Mihma nan im ai ithvna vhleha hash ot, Pi shahli ma! Chu okla hvt chekosi kash o̱ tvli a̱ ishit chi boh bvnna tuk a̱, anonti yvmma ish ia chi̱ ho̱? im achi tok. 9 Chisvs vt afalaminchi mvt, Nitak achvfa ka hvshi kanvlli vlhpisa auahtuklo chatuk keyu cho? Hatak nana hosh nitak o̱ nowvt a̱ya hokmvt, yakni ilvppa ai in tohwikeli ka pi̱sa hatuk osh ik ibetvblo hoke. 10 Amba hatak vt ninak o̱ nowvt a̱ya hokmvto, tohwekeli kvt ik im iksho hatuk osh, ibetvbli hoke, achi tok. 11 Ilvppak o̱ achi tok: yohmi ha yosh i̱ himmak o̱, Hvpi̱ kana Lasalvs vt nusishke; yohmi kia nusi tuk a̱ ont okchvli la chi̱ mak osh ia li hoke, im achi tok. 12 Yohmi ma nan im ai ithvna vhleha hvt, Chitokaka ma! nusi hatuk okmvt, hlakofa chi̱ hoke, achi tok. 13 Yohmi kia yvmmvt illi kak o̱ Chisvs vt miha ha tok; amba nusit foha kak o̱ miha ka, okla im ahoba tok. 14 Yohmi ma Chisvs vt achukmali fehnvt, Lasalvs vt illi tuk oke. 15 Yohmi ka vno vt yvmma ont ak anto ke tuk vt, hvchishno na hvchi yimma chi̱ ka, hvchishno ak atuk mak o̱ sai yukpvshke; yohmi kia yvmma iloh im ai onashke, im achi tok. 16 Mihma Tamas, yvmmvt Titimvs hohchifo hosh yvmma nan im ai ithvna ai itilaui vhleha hash, Pishno ak kia iloh ia cha, api̱hvt hvp illashke, im achi tok.

Chisvs vt Betaoi a̱ vla, mihmvt Lasalvs a̱ falaminchit tanichi

17 Atuk o̱ Chisvs ash ot ona mvt, yvmmak ash ot hollopi tuk a̱ nitak ushta tuk o̱, ont akostininchi tok. 18 Betani vt Chelusalem a̱ pit i̱ bili̱ka kowi tuklo foka tok. 19 Mihma i̱ nakfi illi Mahla, micha Meli itatuklo ka hopohlvla chi̱ hosh Chu okla hvt lauvt im ai itahoba tok. 20 Atuk o̱ Mahla ash osh, Chisvs vt minti ka, haklo makinli hosh, ivt ont afama tok; amba Meli vto aboha anu̱ka yash a̱sha moma tok. 21 Mihma Mahla vt Chisvs ash o̱, Chitokaka ma! ilvppa ant ish anta tuk okma, a̱ nakfi vt Ola hetuk keyushke. 22 Ik yohmi kia himonasi mak o̱ Chihowa ya̱ nana ho̱ ish im asilhha hoka, Chihowa yvt chima hinla ka ithana lishke, im achi tok. 23 Mihma Chisvs vt, chi̱ nakfi vt falamvt tana chi̱ akinli hoke, im achi tok. 24 Mihma Mahla ash ot, Nitak ont ishtaiyopi illi vt falamvt tani yvmmak okvno falamvt tana hi oka, ithana lishke, im achi tok. 25 Chisvs vt, Vno ak osh illi a̱ falaminchit tanichi, mikmvt ai-okcha̱ya aiena ka sia mak oke. Kvna hosh vno ak o̱ a̱ yimmi hokvto, ik illi tuk nana kia, okcha̱ya he mak oke. 26 Micha kvna hosh okcha̱yvt ahanta hosh vno a̱ a̱ yimmi hokvto, nitak nana illa he heyu hoke. Ilvppa chi yimmi cho? im achi tok. 27 A̱hli, Chitokaka ma! chishno ak osh Chihowa Ushi Klaist yakni ilvppa a̱ya hi a tok mak o̱ chia ka sai yimmishke, im achi tok. 28 Ilvppa yakohmichit miha mvt, ivt itibapishi Meli a̱ lumasit ont i̱ howvt, Nan-ithvnanchi vt vla cha, chi hoyoshke, achi tok. 29 Yvmma haklo makinli hosh, ashali̱ka wakayvt ivt ont afama tok. 80 Chisvs vt tvmaha ha̱ ant ik chukowo ki̱sha hosh, Mahla yvt ai afama tuk ash akinli ho̱ hiki̱a ha tok 31 Mihma Chu okla hvt apehvt aboha anu̱ka ya̱ ma̱yvt hopohlvli tuk ash ot, Meli vt tu̱shpvt wakayvt kocha ia na okla pisa mvt, Ahollopi yvmmak o̱ ont a yaiya chi̱ hosh ia hoka, achi mvt iakaiya tok. 32 Atuk o̱ Meli ash ot Chisvs a hikia kash ona cha, pisa mvt, iyi ituma ya̱ ont hlipia cha, Chitokaka ma! ilvppa ant ish anta tuk okma, a̱ nakfi vt illa he tuk keyushke, im achi tok. 33 Yvmmvt yaha̱ya ma, anonti Chu okla yvmma api̱hvt ai vla tuk aiena kvt yaha̱ya akinli na Chisvs vt pisa hatuk osh, chu̱kvsh anu̱kaka isht a nukha̱klo fehnvt ik im vlhpieso ki tok. 34 Mihmvt, Katima yak o̱ hvsh bohli tuk oh cho? achi ma, Chitokaka ma! minti cha, ant pisá, okla im achi tok. 35 Chisvs vt nishkin okchi minti tok. 36 Mihma Chu okla hash ot, Yakeh! i̱ holitopa fehna tuk o̱ mvhli, achi tok. 37 Mihma kanimi kvt, Lvpa yatuk a̱ hoponayochi tuk vt, hatak ilvppak kia ik illo ka hinla ka, a kanimihcha he tuk keyu chishba? okla achi tok. 38 Yohmi ma Chisvs ash ot anonti chu̱kvsh anu̱ka̱ka isht anukha̱klo fehnvt a̱yvt ahollopi a̱ ona tok. Yakni chiluk o̱ tvli yosh isht vlhkvma ha tok. 39 Chisvs ash osh, Tvli ya̱ ishit ho̱ kanvllichi achi, ma̱, Mahla illi tuk a̱ in tek ash osh, Chitokaka ma! illi tuk a̱ nitak ushta hokvt himak foka ma shua hoke, im achi tok. 40 Mihma Chisvs vt, Chi yimmi hokmvt, Chihowa isht a holitopaka ya̱ ish pisa hinla hoke, ak chim acho ke tuk oh cho? im achi tok. 41 Mihma illi ai itola tuk ash tvli ya̱ okla ai ishit kanvllichi tok. Mihma Chisvs vt nishkin a̱ pit vba chakalichi mvt, A̱ki ma! is sa haiyaklo hatuk a̱ yak oke, chim aiahni lishke. 42 Yohmi kvt is sa haiyaklo a bilia chatuk a̱ ithaiyana li kvno; yohmi kia okla ilvppa hiohma̱ya kvt, chishno ak osh auet is sa kanchi tok a̱ ai yimma chi̱ kak o̱, yvmma achi li tuk oke, achi tok. 43 Yakohmichit anumpulit ont in taha mvt, chitoli hosh anumpulit, Lasalvs ma! auet kohchá, achi tok. 44 Mihma illi atuk ash ot ibbak, iyi aiena ka ahollopi ishit shema yvt isht vlhfo̱wa ho̱ ant kohcha tok; mihma nashuka yano nantapvski yosh isht vhlfoyuka tok Mihma Chisvs vt, Oh i̱ hotofi na ik iá, im achi tok.

Laua hosh Chisvs a̱ i̱ yimmi kia, kanimi kvt Falisi vhleha ha̱ ont im anoli; Chisvs vt kohchvt ia mvt, tvmaha Eflihaim ont anta.

45 Yohmi ma Chu okla Meli a̱ im ai itahoba tuk osh, Chisvs vt nana ka ai yvmihchi na pisa mvt, laua hosh i̱ yimmi tok. 46 Yohmi kia kanimi hokvto falamvt ivt, Falisi vhleha ha̱ im ona cha, nana ka Chisvs vt ai yvmihchi tuk ash okla im anoli tok. 47 Yohmi ma na-holitompa isht a̱sha pehlichi vhleha, micha Falisi vhleha aiena kash ot hatak hochito̱ka nan apesa vhleha ha̱ itahobi mvt, Hatak ilvppvt na-fehna la̱wa ka yvmihchi ka, nanta mak o̱ katiohmi hosh iloh aiasha cho? 48 Ilvppa ant ik yohmí, iloh im ahni hokma, hatak moma kvt i̱ yimma chi̱ hoke; yohmikma Loman okla hvt vla cha, pi̱ yakni, micha pim okla talaia aiena kash ai okpvnicha hinla hoke, achi tok. 49 Mihma achvfvt Kaiafas hohchifo hosh afvmmi yvmma fehna ka na holitompa isht a̱sha pehlichi i̱ shahli a̱ ai ibafohka hatuk osh, Nana ka hvch ik akostinincho kvmohmishke. 50 Mikmvt hatak achvfa hosh okla ha̱ vlhtobvt illi na okla talaia kash ot momvt ik illo ka hi a̱, a hvpim vlhpiesa hatuk a̱ hvch ik anukfilloshke, im achi tok. 51 Yohmi kvt ilap nana aiahni hosh ilvppa anumpuli ha tok keyu; amba afvmmi yvmma fehna ka na-holitompa isht a̱sha pehlichi i̱ shahli hosh anta hatuk okvt, Klaist vt okla yvmma vlhtobvt illa he. 52 Yohmi kvt okla yvmmak bana hi o̱ keyu; amba Chihowa im vlla vhleha kanima ai it afimimpvt a̱sha tuk aiena ma hoyot a miha chvfa ho̱ ai itahoba he ak o̱, tikbanli anoli ha tok. 53 Yvmohmi hatuk o̱ nitak yvmma ai vhlit mihinti ka, yvmma vba chi̱ kvt nana it im apesvt okla ma̱ya beka tok. 54 Yohmi hatuk o̱ Chisvs vt himmakma haiaka fehnvt Chu okla itintakla ya̱ ik a hikiki̱o ki tok; amba yvmmak ash vttvt ia mvt, yakni haiaka pit a bili̱ka tvmaha Eflihaim hohchifo ho̱ nan im ai ithvna vhleha ha pehliechit ahanta tok. 55 Atuk o̱ Chu okla nan im vbanvblit ont ia yvt ai ona̱ hosi tok; mihma ilap nan ai il atahlit ma̱ya chi̱ kvt, nan-vbanvblit ont ia yvt ik ai ono ki̱sha ho̱ yakni yvmma a̱sht Chelusalem a̱ ia kvt laua tok. 56 Atuk osh Chisvs ash okla hoyot, tempel anu̱kaka ya̱ hiohma̱yvt, Impa holitopa a̱sha ka ik lo ka chi̱ hokmá, nana ka hvchim ahoba cho? it im achit ma̱ya tok. 57 Na-holitompa isht a̱sha pehlichi vhleha, mikmvt Falisi vhleha aiena kash ot, yvmmvt kanima yo̱ anta ka hatak nana hosh akostininchi hokmvt, anoli na okla isha hinla kvt anumpa vlhpisa ka bohli tuk a tok oke.

12

Meli vt Chisvs iyi ya̱ nan-ahama im ahvmmi ma, yvmmvt ai vlhpesa ho̱ yohmi hatuk a̱ Chisvs vt miha.

1 A tuk o̱ nan vbanvblit ont ia isht a̱sha chi̱ ka nitak hannalit takanli moma ho̱, Chisvs vt Betani ak o̱ Lasalvs vt ai illi tuk o̱ falaminchit tanichi tuk a̱ yvmmvt yvmmak o̱ ai vtta chatuk o̱, ona tok. 2 Mihma yvmmak o̱ opiaka impa yo̱ okla ai im atahli tok; mihma Mahla ak osh nan ai isht im anta ma, amba Lasalvs vto ibai impa hosh ma̱ya kak o̱ iba takla a̱sha tok. 3 Yohmi ma Meli vt spiknat nan-ahama holitopa fehna weki achvfa ka ishi cha, Chisvs iyi ya̱ ishit a hvmmi mvt ilap pa̱shi akinli ho̱ iyi yash isht i̱ kasholichi tok: mihma nan ahama balama kvt aboha yash alotowa tok. 4 Mihma nan im ai ithvna vhleha achvfa Saimon ushi Chutas Iskaliot vt yvmmak oka inla ibbak fohka he mak osh, 5 Nanta katiohmi ho̱ nan ahama ilvppvt iskvli tahlepa tuchina kia isht ik vlbi cha, ilbvsha ya̱ ik i̱ holhpelo ke tuk oh cho? achi tok. 6 Ilbvsha yak o̱ i̱ nukha̱klo kak osh ilvppa achi tok keyu; amba hu̱kopa yatuk osh, micha yvmmak osh shukcha ya i̱shi hatuk osh, nana kvt yvmma ai vlbeha ho̱ shaiyali yatuk ak a tok. 7 Mihma Chisvs vt, Ant ik yvmihchi, ish im aiahnashke, a sa hollopa chi̱ nitak mak a hi o̱, ilvppa ilatomba hatuk oke. 8 Ilbvsha yak okvto hvchim a̱sha na bilia chatuk; amba vno ak okvto hvchim anta li̱ a bilia he keyushke. 9 Yohmi ma yvmma ant anta ka Chu okla hvt lauvt akostininchi tok: mihmvt Chisvs ak bano kak o̱ keyu, amba Lasalvs, yvmmvt illi tuk o̱, falaminchit tanichi tuk ash it aieninchit pisa chi̱ hosh okla ai vla tok. 10 Yohmi kia na-holitompa isht a̱sha pehlichi vhleha hokvto Lasalvs ak kia aieninchit illicha hinla kvt, isht it im anumpulit ma̱ya tok. 11 Yvmmak atuk pulla mak o̱ Chu vhleha laua kvt yvmma itvnowvt, Chisvs a̱ ai i̱ yimmi kak a tok.

Chisvs vt issuba nashoba yo̱ om binili hosh Chelusalem a̱ ona.

12 Nitak ont atu̱kla ma okla laua kvt ai-impa holitopa ya̱ itvnowa tuk vt, Chisvs vt Chelusalem a̱ vla chi̱ hosh minti na okla haklo mvt, 13 Pam vpi naksish a̱ i̱shit, kohchvt afamvt okla ia mvt, chitoli hosh, Hosanna, Islael i̱ mi̱ko Chitokaka i̱ hohchifo ho̱ il ai eshi hosh a̱ya hokvt holitopa mak oke, okla achi tok. 14,15 Saion ushetik chia hvt chi nukshopa ná, chi̱ mi̱ko vt issuba haksobish falaia himita ya̱ on talaia hosh minti hoke, achi hosh holisso hatuk oka, Chisvs ash ot issuba haksobish falaia himita yo̱ pisa mvt, yvmmak ash on talaia tok. 16 Vmmona kvno nan im ai ithvna vhleha hvt ilvppa ik ai akostinincho ki tok; amba Chisvs vt ont a holitopa ha yak o̱, nana kvt yakohmi hosh yvmma isht a holisso tok a̱, anonti okla hvt nana kash ai i̱ yvmihchi tok aiena ka ithai yana tok. 17 Mihma yvmmvt Lasalvs a̱ ahollopi ai i̱ howvt kohchit illi tuk a̱ falaminchit tanichi ka, okla api̱hvt a̱ya tuk ash osh ai vlhtokowa ka anohonli tok. 18 Yvmmvt na-fehna ilvppa yvmihchi tuk a̱ okla ha̱klo tuk atuk osh, ilvppak atuk pulla kak o̱ okla mak kia ont afama ha tok. 19 Yohmi ma Falisi vhleha hash ot, Nana hvsh kanihma he keyu kvto hvsh akostininchi cho? yakeh! okla puta hash ot yvmmak o̱ pit a kanvllishke, ilap bi̱ka it im achit ma̱ya tok.

Klik kanimi kvt Chisvs a̱ pisa bvnna.

20 Mihma Klik vhleha kanimi kvt vba pit aiokpvchit a̱yvt, ai impa holitopa a̱sha ka ai vla tuk vt takla ma̱ya tok. 21 Yohmi hatuk osh yvmmak ash ot Kalili yakni Betsaita tvmaha a minti tuk, Filip ash im ai ona mvt, Pi̱ shahli ma! Chisvs a̱ pisa pi bvnnvshke, achit i̱ ponaklo tok. 22 Mihma Filip ash osh ivt, Antilu a̱ ont im anoli tok; atuk o̱ anonti Antilu ash osh Filip a̱ ita tuklo cha Chisvs a̱ im anoli tok.

Chisvs vt ilapvt kaniohmit illa he, anoli.

23 Mihma Chisvs vt afalaminchi mvt, Hatak Ushi vt a holitopa he tuk a̱ hvshi kanvlli vlhpisa kvt ai onvshke. 24 A̱hlishke, a̱hli mak o̱ hvchim achi lishke, Onush nihi vt yakni anu̱kaka yo̱ itola cha, illi ho̱ keyukmvt, ilap ash biekvt itonla hoke; amba illi hokmvto, waya fehna chatuk oke. 25 Kvna hosh ilap im ilhfiopak a̱ i̱ hullo fehna hokvto, i̱ kvnia hi oke; amba kvna hosh yakni ilvppa ahanta kvt ilap im ilhfiopak a̱ i̱ nukkilli hokvto, mihma ieshit okcha̱yvt a bilia hi oke. 26 Hatak nana hosh vm antia hokmvt, siakaiyashke; mikmvt kanima yo̱ ai ahanta likma, yvmmak o̱ an tishu hoh kia anta hi oke; hatak nana hosh vm antia hokma, yvmmak o̱ A̱ki vt holitobla he mak oke.

Chisvs vt chu̱kvsh anu̱ka̱ka nan isht nukha̱klo in chito mvt, vba pit anumpuli.

27 Himak oka sa shilombish vt ik im ai vlhpesoshke: yohmi ka, A̱ki ma! hvshi kanvlli ai vlhpisa takali ilvppa ai isht is sai i̱ hlakofichashke, achi likmá, nanta chi̱ cho? yohmi kia ilvppak a he mak o̱ hvshi kanvlli vlhpisa takali ilvppa im a̱ya li ha tok oke. 28 Chi̱ hohchifo ha̱ ish holitoblichashke, A̱ki ma! achi tok. Yohma ma vba ya̱ auet ai anumpa kvt, Yvmmak oka holitoblichi li tuk osh, anonti himmakma holitoblichi la chi̱ akinli hoke, achi tok. 29 Yohmi hatuk o̱ okla hvt bili̱ka hiohma̱ya tuk vt, yvmma haklo mvt, Hilohvshke, achi tok. Mihma kanimi kvt, Enchil osh auet im anumpuli hoke, achi tok. 30 Chisvs ash osh afalaminchit, Vno ak atuk mak o̱ anumpa ilvppvt auet takali ho̱ keyu, amba hvchishno pulla kak oke. 31 Himak okvno yakni vt nana im ai vlhpisa mak oke: himak okvno yakni ilvppa ai i̱ shahli nan im aiyahanchi ash ot issvt kohcha he mak oke. 22 Vno vt yakni a̱ a mokofvt vba takali li hokmvt, hatak moma ka halvllit il a kanvllichi la hi oke, achi tok. 33 Ai-illi kaniohmi ho̱ isht illa he ak osh anoli hosh ilvppa achi ha tok. 34 Mihma okla hash ot afalaminchi mvt, Klaist vt ahanta na bilia ho̱ nan-vlhpisa holisso ha̱ okla il a haklo chatuk; yohmi ka katiohmi ho̱, Hatak Ushi vt vba ya̱ takala hi o̱ ish achi cho? Hatak Ushi ilvppak osh kvta hokak o̱? okla im achi tok. 35 Mihma Chisvs vt Himonasi ta̱kla kak o̱ tohwikeli hvt hvch in takanli hoke. Tohwikeli hvt hvchin takanli ta̱kla kak osh hvsh nowashke, yvmmak keyukma okhlili hvt hvchi onvtula hinla hoke. Kvna hosh okhlili ho̱ nowvt a̱ya hokvto, kanima yo̱ ia kvt ithana keyu hoke. 36 A tohwikeli hvt hvchin takanli ta̱kla kak osh a tohwikinli vlla hvchia ha chi̱ kvt, a tohwikeli ha̱ hvsh i̱ yimmashke, im achi tok. Ilvppak o̱ Chisvs vt anumpohonli mvt, ai i̱ filvmmit kvnia cha, ik i̱ haiako ki tok.

Hatak pehlichi vhleha hvt laua hosh Chisvs a̱ i̱ yimmi: yohmi kia Chisvs a̱ isht anumpuli nukwia.

37 Na-fehna laua ho̱ itikba ya̱ yvmmak ash ot ai yvmihinchi hoh kia, okla ai i̱ yimma he keyu ki tok. 38 Yohmi kvt hopaii Esaias vt anumpuli mvt, Chitokaka ma! nana il anoli ka kvta hosh pi̱ yimmi cho? micha kvta hak o̱ Chihowa i̱ shakba mvt i̱ haiaka tuk oh cho? ahanchi tok a̱ ont aia̱hla chi̱ mak a tok. 39,40 Anonti Esaias vt i̱ himmakma, Nishkin a̱ isht ik peso, mikmvt chu̱kvsh ma ik akostinincho kish, chu̱kvsh himona ik anukfoyuko ki̱, ak hlakoficho ka chi̱ ka, nishkin a̱ im akvmmi mvt, anonti chu̱kvsh ma i̱ kvllochishke; achi tok oka, okla yimma he keyu ki tok. 41 Yvmma im isht a holitopa ya̱ pisvt yvmma pit isht anumpuli mak osh Esaias vt ilvppa puta ka achi tok. 42 Yohmi kia nan apesa hochito̱ka vhleha hvt i̱ yimmi kvt laua akinli tok: yohmi kia sinakak a̱ a kohchicha hinla hatuk o̱, Falisi vhleha pulla kak o̱ yvmmak ash i̱ yimmi ha tuk vt okla ik otvnincho ki tok. 43 Hatak ai im aholitopa yak o̱ im achukma kvt, Chihowa ai im a holitopa ka im i̱ shahli hatuk osh. 44 Chisvs vt chitoli hosh, Kvna hosh vno a̱ a̱ yimmi kvt vno ak o̱ a̱ yimmi ho̱ keyu, amba auet sa kanchi tok yvmmak o̱ i̱ yimmi mak oke. 45 Micha kvna hosh vno a̱ sa pi̱sa hokmvt, auet sa kanchi tok ma pi̱sa mak oke. 46 Kvna hoh kia vno a̱ a̱ yimmi hokvt ai-okhlilika ya̱ ik ai ahanto ka chi̱ mak o̱, nan-tohwikeli mak osh a̱yvt yakni a̱ vla li ha tok oke. 47 Yohmi kia hatak nana hosh vm anumpa ha̱ haklo cha, ik yimmo hokma, nan im apesvt ilbvshali la hi o̱ keyushke; yakni ak o̱ nan im apesvt ilbvshali la hi osh a̱ya li tok keyu; amba yakni a̱ okchalinchi la chi̱ ha tok oke. 48 Kvna hosh vno a̱ sa shitilema cha, vm anumpa ha̱ ik ahnincho hokvno, achvfa hosh nan im apesvt ilbvshali kvto a̱sha hoke; anumpa anumpohonli li tuk ash fehna akinli kak osh nitak ai ishtaiyopikma nana im apesvt ilbvshala he mak oke. 49 Vno akinli hosh nana ka ahnit anumpuli li tuk keyu hoka; amba auet sa kanchi tok A̱ki ak osh nana ho̱ achi la he, mikmvt nana ho̱ anumpuli la he aiena ka nana vm apesa ha tok. 50 Yohmi ka i̱ nan-vlhpisa vt ai-okcha̱yvt bilia yoka ithaiyana lishke; yohmi hatuk osh nana ho̱ anumpohonli li ka, yvmmvt A̱ki vt vno a̱ a̱ miha tok a̱ mih mak o̱ anumpuli li hoke, achi tok.

13

Chisvs vt nan im ai ithvna vhleha ho̱ iyi im achifa.

1 Nan vbanvblit ont ia ai-impa holitopa kvt ik ai ono ki̱sha ho̱, Chisvs vt ilapvt yakni ilvppa ai issvt, I̱ki a̱ im ia chi̱ hvshi kanvlli vlhpisa kvt ai ona ka ithaiyana mvt, immi hvt yakni paknaka a̱sha ka i̱ hullo hatuk vt, yvmma i̱ hullo kvt imomvt ont illi tok. 2 Yohmi ka okhlili ai-impa yvt ont vlhtaha yvmma fehna ma, yvmmak ash ishit inla im issa chi̱ ka Setan vt Saimon ushi, Chutas Iskaliot chu̱kvsh a̱ anukfohkichi hatuk o̱; 3 Chisvs vt, I̱ki vt nana moma ka ilap ak o̱ ibbak a̱ fohki tok, micha ilapvt Chihowa hak o̱ a minti ha tok osh, anonti Chihowa hak o̱ im ia chi̱ kvt ithaiyana mvt, 4 Okhlili impa a̱sha tuk vt wakayvt, im anchi ash o̱ naksika pit bohli mvt, tikba takali ishi cha, isht il ai vskofvchi tok. 5 Yohmi ha yosh oka ya̱ ampo pit vnit ishi cha, nan im ai ithvna vhleha iyi yash achifvt isht ia mvt, tikba takali isht ai il ai vskofanchi tuk ash o̱ ishit isht i̱ kasholichi tok. 6 Atuk osh Saimon Pita yash o̱ ont a hikia tok; mihma Saimon Pita yash ot, Chitokaka ma! saiyi ya̱ ish achifa chi̱ hoh cho? im achi tok. 7 Chisvs vt afalaminchi mvt, Nana ka yvmihchi li ka himonasi kvno chik akostininchoshke; yohmi kia himmak o̱ ish akostinincha hi oke, im achi tok. 8 Pita yash ot, Saiyi yak okvno nitak nana chik svm achifo kashke, im achi tok. Chisvs vt afalaminchi mvt, Ak chi achifo hokma, is si ahalaia keyu hoke, im achi tok. 9 Saimon Pita yash ot, Chitokaka ma! saiyi ak bano keyu kashke, amba svbbak, micha sa noshkobo pit aieninchi hosh, im achi tok. 10 Chisvs vt, Vlhchifa tuk okvto himmak ma ik vlhchifo ho̱ iyi ak bano kia, momvt kashofa chatuk; yohmi ka hvchishno vt hvchi kashofa akinli kia, hvsh moma keyushke. 11 Kvna hosh ilapa ishit inla ibbak fohka chi̱ hoka ithana, yohmi hatuk osh, Momvt hvchi kashofa keyushke, achi tok. 12 Yohmit iyi ya̱ im achifvt taiyahli mvt, im anchi ash ishi cha, falamvt aka binili mvt, Nana ka hvchi̱ yvmihchi li ka hvsh ithana cho? 13 Vno a̱, Na pithvnanchi, pin Chitokaka hvs si achi; yohmi ka mih sia ho̱ mvhli hoka, vlhpesa hvsh mihvshke. 14 Yohmi kia vno vt hvchin Chitokaka, micha na hvch ithvnanchi sia hatuk osh, hvch iyi ya̱ hvchim achifa li hatuk okma, hvchishno ak kia hvchishno bi̱ka iyi ya̱ hvsh it im achifa he vlhpesa hoke. 15 Vno vt a hvchi̱ yvmihchi li tuk mak o̱ hvsh a chiyuhmicha he mak o̱, na hvchim abvchi li hatuk oke. 16 A̱hlishke, a̱hli mak o̱ hvchim achi lishke; Tishu hvt i̱ shahli ha̱ imaiya chatuk keyu; mikma nan-vlhtoka yosh a̱ya kvt nan-atokoli tuk a̱ imaiya chatuk keyu hoke. 17 Ilvppa puta ka hvsh ithana cha, yvmmak o̱ hvsh yvmihchi hokmvt, na hvchi yukpa mak oke.

Chisvs vt Chutas ak osh ishit inla im issa chi̱ hatuk a̱, nana kvt isht vlhpisa ho̱ isht im atokoli.

18 Moma kak o̱ isht hvchi anumpuli li ho̱ keyushke: kanima kak o̱ vno vt atokoli li tok okvto ithana lishke: yohmi kia Holisso Holitopa yvt, Pvska svbai vpa kash ot iyi kotoba ya̱ isht a sai o̱ wakelishke, achi ha tok a̱ yvmmvt ont ai a̱hla chi̱ mak oke. 19 Yvmmak ash ot ont ai yvmohmi ha ma, vno ak atuk a̱ hvchi yimma he mak o̱, ik ai ono ki̱sha ho̱ himak ano hvchim anoli lishke. 20 A̱hlishke, a̱hli mak o̱ hvchim achi lishke, Kvna kia vno ak osh nan tohno li ho̱ a̱ya ka ahninchi hokvt, vno ak o̱ si ahninchi hoke; micha kvna kia, vno a̱ si ahninchi hokmvt, auet sa kanchi tok mak o̱ ahninchi hoke; im achi tok. 21 Chisvs vt yakohmiechit anumpuli mvt, chu̱kvsh anu̱kaka ai ik im vlhpieso mvt, atokolit anolit, A̱hlishke, a̱hli mak o̱ hvchim achi lishke, Hvsh achvfona kvt svshit inla ibbak o̱ hvs sa fohka chi̱ hoke, achi tok. 22 Mihma nan im ai ithvna vhleha hash ot kanima kak o̱ miha hatuk a̱ ik ai akostinincho mvt, filemovt okla iti pisa tok. 23 Yohmi ma nan im ai ithvna vhleha ha̱ achvfa ka Chisvs vt holitobli yatuk o̱, Chisvs ikkishi ha̱ vtayvt a̱sha tok. 24 Yohmi tuk o̱ yvmmak ash osh kvna hak o̱ miha hatuk ma a ponakla chi̱ ka, Saimon Pita yvt i̱ yuchunukli tok. 25 Mihma Chisvs ikkishi ha̱ vtayvt a̱sha hosh, Chitokaka ma! kvta hak o̱ cho? im achi tok. 26 Mihma Chisvs vt afalaminchi mvt, Itih fohka achvfa ka pit okvchit kohchi li kvt, kanima ho̱ pit ima likma, yvmmak osh mih mak a chi̱ hoke, achi tok. Atuk osh itih fohka achvfa ka pit okvchit kohchi mvt, Saimon ushi Chutas Iskaliot ak o̱ ima tok. 27 Mihma itih fohka achvfa ishi ma, Setan vt yvmmak ash ont ckukowa tok. Mihma Chisvs vt, Nana ka ish yvmohma chi̱ kvt tu̱shpvt ish yvmihchashke, im achi tok. 28 Nana ka a kaniohma hi o̱, ilvppa im achi ka, impvt ma̱ya tuk vt hatak achvfa kia ik akostinincho ki tok. 29 Chutas ak osh shukcha ya̱ ishi hatuk oka, ai impa holitopa a̱sha takla ka nana ho̱ pi bvnna hinla ka chumpakmá, keyukmvt ilbvsha vhleha yak o̱ nanasi kia i̱ hopela hinlakmá, nana ho̱ Chisvs vt i̱ miha hatuk a̱, kanimi kvt im ahoba tok. 30 Mihma itih fohka achvfa ka ishi makinli hosh kocha ia tok; mihma yvmmvt ninak a tok.

Chisvs vt ilap nan isht a holitopa hi anoli, mihmvt nan im ai ithvna vhleha hvt it i̱ hulla chi̱ ka, i̱ miha mvt.

31 Yvmmak ash ot kocha ia ma, Chisvs vt, Himak okvno Hatak Ushi vt ai a̱hlit holitopakma, anonti Chihowa yvt yvmmak o̱ isht a holitopa ai a̱hla chi̱ mak oke. 32 Chihowa yvt yvmmak o̱ isht a holitopa ai a̱hli hokmvt, Chihowa yvt anonti ilap inlit yvmmak ash o̱ ai isht il a holitoblichi ai a̱hla chi̱ akinli: micha chekosi fehna yvmmak ash o̱ holiloblichi ai a̱hla chi̱ mak oke. 93 Chipota vhleha ma! chekosi takla kak o̱ hvchi takla a̱sha lishke; yohmi ka hvs sa hoya chi̱ hoke; Chu okla ha̱, Kanima yo̱ ai ia li hoka, hvsh ona he keyushke, im achi li tuk mak osh anonti hvchishno ma himonasi a̱ hvchim achi lishke. 34 Hvsh it i̱ hullo kvt, vno vt hvchi̱ hullo li tuk a̱ ohmichi hosh hvchishno yak kia hvsh it i̱ nulla he mak o̱, nan vlhpisa himona ka hvch ima lishke. 35 Hvchishno bi̱ka yvt hvsh it i̱ hullo ilvppa pulla kak o̱ nan vm ai ithvna hvchia hatuk a̱, hatak moma kvt isht ithaiyana he mak oke, achi tok.

Pita yvt hituchina ha yo ilapa ik ithano miha chi̱ ka, tikbanli im anoli.

36 Saimon Pita yash ot, Chitokaka ma! katima ko̱ ish ia chi̱ hoh cho? im achi ma, Chisvs vt afalaminchi mvt, Kanima yo̱ ia li hoka, himonasi kvno pit is siakaiya he keyushke; yohmi kia i̱ himmak o̱ pit is siakaiya hi oke, im achi tok. Si. Pita yash osh, Chitokaka ma! Na katihmi ho̱ himonasi akinli kvno pit ak chiakaiyo ka hinla cho? chishno a̱ pulla kak o̱ vm ilhfiopak a̱ aka bohyuli lashke. 38 Chisvs vt afalaminchi mvt, Vno a̱ pulla kak o̱ chim ilhfiopak aka ish bohyula chi̱ cho? A̱hlishke, a̱hli mak o̱ chim achi lishke; Aka̱ka yvt ik olo ki̱sha ho̱, hituchina ha chik svthano ish miha chi̱ hoke, im achi tok.

14

Chisvs vt nan im ai ithvna vhleha ha pehlichit impvt a̱sha moma hosh, api̱hvt vba yakni a̱ ont okla a̱sha hi a̱ i̱ miha.

1 Hvchi chu̱kvsh vt nana ik hvchi̱ kaniohmo kashke Chihowa ha̱, oh i̱ yimmi cha, vno ma oh a̱ yimmi. 2 A̱ki in chuka ya̱ aiasha yvt laua hoke: ik yvmohmo hatuk okma, hvchim anoli la he tuk oke, aiasha ya̱ hvchim apoksiachit atahli la chi̱ hosh ia li hoke. 3 Yohmi kvt ont apoksiachit hvchim atahli li hokmvt, anonti falamvt vla lish, vno vt kanima yo̱ ai ahanta likma, hvchishno mvt yvmmak o̱ hvsh ai aha̱shwa hi a̱, ant hvch ishit ai vtta li ka ona la hi oke. 4 Yohmi hokvt kanima yo̱ ia li hoka pit hvsh ithana; mikmvt hina ya̱ hvsh ithanvshke, im achi tok. 5 Tamas ash osh, Chitokaka ma! kanima yo̱ ish ia hoka il ithana keyu: yohmi kvt katiohmi hosh hina yano il ithana hinla cho? im achi tok. 6 Mihma Chisvs ash ot, Vno ak osh hina, micha ai a̱hlika, ai okcha̱ya aiena sia mak oke: vno ak o̱ keyukma hatak nana hosh A̱ki a̱ im ai ona he keyu hoke. 7 Vno a̱ hvs svthana hatuk okmvt, A̱ki ma hvsh ithana akinla he tuk oke: atuk kia hvsh pi̱sa tuk okvt himak ai vhlit ia hokvno hvsh ithaiyanvshke. 8 Filip ash osh, Chitokaka ma! Chiki a̱ ish pi̱ haiakvchashke, yohmikma pim vlhpesa hinla hoke, im achi tok. 9 Mihma Chisvs vt, Chi takla ahanta li̱ hopakit taiyaha ka, Filip vt chik svthano ki̱sha tuk oh cho? kvna hosh vno a̱ sa pi̱sakmvt, A̱ki a̱ pi̱sa hatuk; yohmi ka katiohmi ho̱, Chi̱ki a̱ ish pi̱ haiakvchashke, ish achi cho? 10 Vno vt A̱ki ibai acha̱fa likma, anonti A̱ki vt vno a̱ a svbai acha̱fa ka ik chi yimmo cho? anumpa hvchim anumpohonli li kvt vno akinli vm anukfila hosh anumpuli li keyushke; amba A̱ki svbai acha̱fa yvmmak osh nana ka ai yvmihchi hoke. 11 Vno vt A̱ki a ibai acha̱fa likma, anonti A̱ki vt auet svbai acha̱fa ka hvs sa̱ yimmashke; keyuk mak heto nana kvt a kaniohmi tuk yvmmak pulla kak o̱ isht ai hvs sa̱ yimmashke. 12 A̱hlishke, a̱hli mak o̱ hvchim achi lishke, Kvna hosh a̱ yimmikmvt, vno nana ai yvmihchi li tuk ash yvmihchi akinla hi oke: yohmikmvt vno vto A̱ki a̱ im ia li hatuk oka, nana kvt a fehna ilvppa puta ka i̱ shahli ho̱ yvmihcha hi oke.

Micha ilap hohchifo hak o̱ nan isht asilhhvt anumpuli hokvno moma im aia̱hlicha hi vt miha.

13 Micha a̱ hohchifo pulla ho̱ nana ka isht hvsh asilhna hokma, I̱ki vt Ushi a̱ ai isht a holitopa ai a̱hla hi a̱, mihi yo̱ yvmihchi la hi oke. 14 A̱ hohchifo pulla ho̱ nana ka isht hvsh asilhha hokma, ai yvmihchi la hi mak oke.

Chisvs vt nanuktalali inla auet ima hi vt miha.

15 Hvs sa̱ hullo hokmvt, vm anumpa vlhpisa puta ka hvsh holitoblashke. 16 Mikma A̱ki a̱ mi asilhha likma, yvmmvt a hvchi takla ahanta na bilia he mak o̱ hvchi̱ nanuktalali inla ya̱ auet hvch ima hi oke. 17 Yvmmvt Shilombish ai a̱hli, yvmmak oka yakni okvto pi̱sa keyu, micha ithana keyu aiena hatuk osh, ahnincha he keyu mak oke; yohmi kia hvchishno yokvno hvchi takla ahanta tuk osh, anonti hvchi anukfoyuka chi̱ hoka hvsh ithana hoke. 18 Hvchi vlhtakla ho̱ hvch issvt a̱ya la he keyu; hvchim a̱ya la hi oke. 19 Chekosikma yakni vt sa pisa chi̱ keyu hoke; amba hvchishno vto hvs sa pisa hi oke; yohmi ka sai okcha̱ya hoka, anonti hvchi okcha̱ya he akinli hoke. 20 Vno vt A̱ki a̱ ibai acha̱fa likma, anonti hvchishno vt vno a̱ hvs svbai acha̱fa na hvchishno ma hvch ibai acha̱fa li aiena ka, nitak yvmma fehnakma hvsh akostinincha hi oke. 21 Kvna hosh vm anumpa vlhpisa vt in tonla cha, holitobli hokmvt, yvmmak osh sa holitobli mak oke; micha kvna hosh vno a̱ sa holitoblikmvt, A̱ki ma i̱ holitopakma, vno mvt holitoblit il im otvninchi la hi oke. 22 Chutas vt Iskaliot ak keyu hosh, Chitokaka ma! katiohmi ho̱ pishno ano ant ish pim ile haiakvchi hokak osh, yakni ano chik im ile haiakvcho ka chi̱ hoh cho? im achi tok. 23 Chisvs vt afalaminchi mvt, Hatak vt a̱ hullo hokmvt, vm anumpa ha̱ holitobla he; yohmikma A̱ki vt ilapo ma holitoblikma, il im a̱ya cha, il ibai vtta he mak oke. 24 Vno a̱ a̱ hullo keyu hokvto, vm anumpa ha̱ ik holitoblo hoke; micha anumpa ilvppa hvsh haiyaklo ka vm anumpa keyu, amba auet sa kanchi tok A̱ki ak o̱ immi hoke. 25 Hvchi ta̱kla ahanta li ta̱kla hatuk mak osh ilvppa puta ka isht hvchim anumpohonli lishke. 26 Yohmi kia nanuktalali, yvmmvt Shilombish Holitopa mak o̱ a̱ hohchifo pulla hatuk mak o̱ A̱ki vt auet kancha chi̱ hoka, yvmmak osh nan oklu̱ha ka hvch ithvnanchit, nana ho̱ hvchim ahanchi li tuk ma, moma falaminchit hvchi anukfohka hi oke. 27 Nanaiya ya̱ hvchi bohli lishke: a̱ nanaiya ya̱ hvch ima lishke: yakni vt ima chatuk a̱ chohmi keyu ho̱ hvch ima lishke. Hvchi chu̱kvsh vt ik kaniohmokmvt, anonti ik nukshopo kashke. 28 Ia li tukmvt, anonti falamvt hvchim a̱ya la hi oke, hvchim achi li ka hvsh ha̱klo kvno. Hvs sa̱ hullo hatuk okmvt, A̱ki ak o̱ im ia li hoke, achi li tuk a̱ na hvchi yukpa he tuk; A̱ki vt vmaiya hatuk oka. 29 Micha ont ai a̱hlikma, hvsh i̱ yimma he mak o̱, himonasi ik ono ki̱sha ho̱ hvchim anoli li tuk oke. 30 Yakni ilvppa ai i̱ shahli yatuk mvt, nana ho̱ isht a si ahalaia keyu hosh minti hoka, himak a pilla mvno hvch it im anumpuli li fehna chi̱ keyu mak oke. 31 Yohmi kia A̱ki a̱ holitobli li ka, yakni vt ithaiyana chi̱ ka, A̱ki vt nana ho̱ vm apihi̱sa tok a̱, mih mak o̱ yvmihchi li hoke. Ho waka̱yá, kiloh ilhkolí.

15

Chisvs vt pa̱ki vpi yosh nakwish puta aiena hosh nan isht vlhpisa ilvppak o̱ hatak vt ilap ak o̱ pit ai acha̱fa pulla hosh vnit wa̱ya ka chohma he ai vlhpesa hatuk a̱ anoli.

1 Vno ak osh pa̱k-vpi a̱hli sia hokma, anonti A̱ki ak osh apoksiachi oke. 2 Naksish vno ak o̱ a sai offo hosh vni keyu hokma, mominchit ishit kanchi hoke: mikmvt naksish vt vni hokvto, isht i̱ shahli t vna chi̱ ka, achukmaUt apoksiachi hoke. 3 Anumpa isht hvchim anumpohonli li tuk pulla ho̱ himonasi a̱ isht a hvchi a kashofvshke. 4 Vno a̱ ho svbai acha̱fá; mikma vno mvt hvch ibai acha̱fa lashke. Naksish vt vpi ak o̱ pit a hikia ho̱ keyukmvt, ilap illa kvt vna he keyu chatuk a̱, yvmmak i̱ chiyuhmit hvchishno ak kia vno a̱ hvs svbai acha̱fa ho̱ keyukmvt, nana hvsh kanihma he keyushke. 5 Vno ak osh pa̱kvpi sia hokma, hvchishno vto naksish hvchia hoke. Kvna hosh vno a̱ svbai acha̱fa na anonti ilap ma ibai acha̱fa li hokma, mihi yosh vni fehna chatuk oke: vno ak o̱ keyukma nana hvsh kanihma he keyu hoke. 6 Kvna kia vno a̱ svbai acha̱fa keyu hokma, naksish mak o̱ ai itilauechit kanchi na bvshi chatuk; yohmikma hatak puta mvt yvmmak ash aiowvt luak a̱ pila na lua chatuk oke. 7 Vno a̱ hvs svbai acha̱fa na vm anumpa mvt hvchi anukfoyuka hokma, nana ho̱ hvsh aiahni cha hvsh asilhha hokvt, hvchim ai a̱hla hi oke. 8 Hvsh vni fehna yvmmak okmak o̱, A̱ki vt isht a holitopa ai a̱hla he; yohmikma nan vm ai ithvna hvchia mak a hi oke.

Micha ilapvt nan im ai ithvna vhleha ha̱ i̱ hullo fehna hatuk vt anoli mvt.

9 Vno a̱ A̱ki vt a̱ hullo tok mak o̱, ai itilauechi hosh hvchi̱ hullo li hoke; a sa holitobli kvt hvsh biliashke. 10 Um anumpa vlhpisa puta ka hvsh im antia hokmvt, a sa holitobli kvt a hvchi bilia he: vno vt A̱ki a̱ im anumpa vlhpisa puta ka im antia li kvt, ai i̱ hullo mvt a sa bilia tok mak o̱ hvsh chiyuhma hi oke. 11 Hvchishno pulla atuk mak o̱ nan isht vm ilaiyukpa hatuk mvt hvchin takali bilia na, na hvchi yukpa kvt alotowa chi̱ mak o̱, ilvppa puta ka isht hvchim anumpohonli li hoke.

Anonti yvmmakmvt it i̱ hullo kvt yvmmak inli ho̱ chohma, hi a̱ in tohno.

12 Vno vt hvchi̱ hullo li tok mak o̱, chiyuhmichit hvsh it i̱ bulla he, ilvppak osh vm anumpa vlhpisa mak oke. 13 Hatak vt i̱ kana vhleha ha̱ i̱ hullo kvt im ilhfiopak a̱ aka bohyuli hoka, hatak nana kia yvmma i̱ shahlichit it i̱ hulla hi vt ikshoshke. 14 Nana ho̱ hvchim apesa li ka hvsh yvmohmi hokmvt, a̱ kana hvchia mak oke. 15 Himak pilla kvno ilhtohno hvchi achi la he keyu; ilhtohno yokvto, i̱ shahli hvt nana ho̱ isht ahanta ka, akostininchi keyu chatuk; amba nana ho̱ A̱ki a̱ im a ha̱klo li tuk vt oklu̱yuha hvchim anoli li hatuk okvt, a kana vhleha hvchi achi lishke. 16 Hvchishno ak osh hvs si atokoli tok o̱ keyu; amba itvnowvt vnit hvsh waya he ak atuk oke; yohmikma hvchi a waya kvt aiasha na A̱ki a̱ nana ho̱ a̱ hohchifo pulla kak o̱ isht hvsh im asilhhakma, hvch ima he mak o̱, vno ak osh ai atokolit hvchim apesa li hatuk oke. 17 Hvsh it i̱ nulla he mak o̱, ilvppa hvchim apihi̱sa li hoke. 18 Yakni vt hvchi̱ nukkilli hokmvt, ik hvchi̱ nukkillo ki̱sha hosh vno a̱ a̱ nukkilli tok a̱ hvsh ithaiyanvshke.

Yakni ilvppak okvt ilap, micha Iki ita-tuklo ka ik ahnincho yatuk okvt yvmmakma i̱ nukkillit ilbvshacha hi a̱ im anoli.

19 Yakni ak o̱ hvsh ai achvfa hatuk okmvno, yakni vt immi hatuk okvno holitobla he tuk; amba yakni a̱ hvsh ai achvfa keyu; amba vno ak osh atokoht yakni a̱ a kohchit hvch ishi li hatuk; yohmi hatuk o̱ yakni vt hvchi̱ nukkilli hoke. 20 Tishu hvt i̱ shahli ha̱ imaiya chatuk keyu, hvchim achi li tok anumpa yvmma hvsh ithaiyanashke. Vno a̱ okla svlbvshachi tok okmvt, hvchishno ma hvch ilbvshacha he akinli hoke; vm anumpa ha̱ im antia tok okmvt, hvchim anumpa ha̱ im antia he akinli hoke. 21 Yohmi kia auet sa kanchi tok a̱ pit ithana keyu hokvt, vno pulla hatuk mak o̱ ilvppa puta ka hvchi̱ yvmihcha hi oke. 22 Vno ak osh a̱yvt vlvt ant ak im anumpulo hatuk okmvno, ai ashvchika yvt okla ik im iksho ka he tuk; amba himak okvno nan im ai ashvchika ya̱ isht ompoholma hi vt okla ik im ikshoshke. 23 Kvna hosh vno a̱ a̱ nukkilli hokvt, A̱ki ma i̱ nukkilli akinli hoke. 24 Vno vt na-fehna puta ka, hatak inla nana kia ai yvmihchi chatuk keyu ka ai itintakla ma vno vt ai yvmihchi li̱ tuk keyu hokmvno, nan ai ashvchika yvt okla ik im iksho ka he tuk; amba himak okvno pi̱sa cha, anonti vno, mikmvt A̱ki ita-tuklo ka i̱ nukkilli tuk oke. 26 Yohmi kia na kaniohmi keyu ho̱ okla a̱ nukkillishke, achi anumpa hvt i̱ nan vlhpisa holisso ha̱ a holisso tok vt ont ai a̱hla chi̱ kak o̱, ilvppvt ai yakohmi tok 26 Yohmi kia nanuktalali, yvmmak okvt Shilombish a̱hli, A̱ki a̱ a kohchvt a̱ya mak o̱, A̱ki a̱ im ai isht auet hvchi̱ kanchi li̱ vla hokmvt, yvmmak osh ai atokowa ka si anohonla he mak oke. 27 Yohmikma hvchishno vt nana vmmona ka si apehvt hvsh a̱ya tuk okvt, nan ai-atokowa ka hvsh anoli akinla hi oke.

16

Chisvs vt anonti nan im ai ithvna vhleha ha̱ okla hvt ilbvshala chi̱ puta ka im anoli.

1 Ik hvchi ibetvblo ka he mak o̱, ilvppa puta ka isht hvchim anumpohonli li hoke. 2 Sinakak puta ka okla a hvchi kohchicha he; a̱hli, kvna hosh hvchibi hokmvt, Chihowa ha̱ holitoblichi mak o̱ im ahoba he nitak vt mihinti hoke. 3 Yohmi kvt A̱ki, mikmvt vno il ita-tuklo ka ik pithano hatuk mak osh, ilvppa puta ka hvchi̱ yvmihcha hi oke. 4 Yohmi kia nitak yvmmvt ai ona hokma, yvmmak oka hvchim anoli li tok a̱ hvsh ithana he mak o̱, ilvppa puta ka hvchim anoli li hoke. Yohmi kvt vno vt hvchi ta̱kla anta li hokvt, nana vmmona hokvno ilvppa puta ka ak hvchim acho ki tok oke. 5 Yohmi tuk osh himonasi yokvno auet sa kanchi tok mak o̱ falamvt im ia la chi̱ hoke; yohmi na hvsh kanima kia, Katima yo̱ ish ia chi̱ cho? achit hvchik sa ponakloshke. 6 Amba ilvppa puta ka hvchim achi li kak o̱, nanu̱kha̱klo kvt hvchi chu̱kvsh a̱ alotolishke.

Mihmvt nanuktalali, yvmmvt Shilombish Holitopa mak o̱ auet ima hi vt miha.

7 Yohmi kia a̱hli mak o̱ hvch im anoli lishke. Vno vt ia li hok mak o̱ nan isht a hvchim vlhpiesa chi̱ hoke; vno vt ia li keyu hokmvno, nanuktalali vt hvchim a̱ya he keyu; amba ia li hokmvto, yvmma auet hvchi̱ kanchi la he mak oke. 8 Yohmikma yvmmak osh vlakmvt, ai ashvchika, micha nan ai vlhpiesa, mikmvt nan-vlhpisa aiena ka okla puta ka, anukfohkicha hi oke. 9 Vno a̱ okla a̱ yimmi hatuk keyu hoka, nan im ai ashvchi hatuk a̱ im otvnihincha he; 10 Vno vt A̱ki a̱ im ia li; yohmi na himmakma hvch ik sa peso hatuk oka, nan ai vlhpiesa hatuk a̱ im otvnihincha he: 11 Yakni a̱ ai i̱ shahli hvt nan im vlhpisa hatuk oka, nan-vlhpisa ma im otvnihincha hi oke. 12 Na hvchim achi la he yokvto vm a̱sha moma akinli kia, himonasi okvno yvmmak oka hvsh akostinincha he keyushke. 13 Yohmi kia Shilombish a̱hli, yvmmvt vla hok mak osh, nan ai a̱hlika puta ma hvch ithvnancha hi oke; yvmmak okvt ilap nana aiahni hosh anumpula he keyu hokvt; amba nana ho̱ haklo tuk mak osh mihi yo̱ anumpula hi oke; mikmvt nana a kaniohma he puta ka hvchim otvnihincha hi oke. 14 Yvmmak okvt vno ak o̱ vm ai ishi cha, hvchim otvnihincha hi okvt, vno a̱ sa holitoblicha he mak oke. 15 Nana moma A̱ki vt im a̱sha kvt vmmi hoke; yohmi hatuk mak o̱, vno ak o̱ vm ai eshi cha hvchim otvnihincha he, hvchim achi li tuk oke.

Falamvt tam ha yvt, ilapvt i̱ nowvt a̱ya pulla he im anoli.

16 Chekosikma hvs sa pisa chi̱ keyushke; atukmvt anonti A̱ki ak o̱ im ia li hatuk oka, chekosikma hvs sa pisa hi oke, im achi tok 17 Yohmi ma nan im ai ithvna vhleha kaniohmi kvt, Chekosikma hvs sa pisa chi̱ keyushke; anonti A̱ki a̱ im ia li hatuk oka, chekosikma hvs sa pisa chi̱ hoka hvpim achi ka, ilvppak osh katiohmi hoh cho? ilap bi̱ka it im achit ma̱ya tok. 18 Yohmi hatuk osh, Chekosikma, achi ilvppvt nanta hak oh cho? nana ho̱ miha ka kil im akostininchoshke, okla achi tok. 19 Ilapa okla i̱ ponaklo bvnna ka Chisvs vt im ithana hatuk osh, Chekosikma hvs sa pisa chi̱ keyushke: atuk osh anonti chekosikma hvs sa pisa chi̱ oke, achi li tuk yvmmak ash isht ai it im a ponaklot hvsh ma̱ya cho? 20 A̱hlishke, a̱hli mak o̱ hvch im achi lishke; Hvchishno yokvto nishkin okchi mintit hvsh yaha̱ya chi̱ hoke; yohmikma yakni vto na-yukpa chi̱ hoke: mikma hvchi nukha̱klo fehna he; yohmi kia na hvchi nukha̱klo kash ot falamvt isht a hvchi yukpa hi oke. 21 Ohoyo hvt vlla in tonla chi̱kmvt, hvshi kanvlli vlhpisa hvt im ai vla hokvt ilbvsha hoke; yohmi tuk kia hatak osh tobvt yakni a̱ ai ituyula ka, na yukpa kvt, vlla yvt in tola makinli hosh na palvmmi tuk a̱ imi-haksi hoke. 22 Yohmi ka hvchishno vt himonasi kvno hvch ilbvshvshke; yohmi kia himmakma hvchi pisa la chi̱ akinli; yohmikma hvchi chu̱kvsh vt yukpa he, mikma na hvchi yukpa ka hatak nana hosh ishit hvchi̱ kancha wa.

Ilap hohchifo pulla ho̱ Chihowa ha̱ nan isht im asilhha hokvto im anumpa hvt holitopa pulla hi a̱ miha.

23 Mikma nitak yvmma fehnakma nana kia hvch ik sa̱ ponaklo ka hi oke. A̱hlishke, a̱hli mak o̱ hvch im achi lishke, Vno a̱ hohchifo ho̱ nana ka A̱ki a̱ isht a hvsh im asilhhakma, hvch ima he mak oke. 24 Ti̱kbvt a mihinti hokvno a̱ hohchifo ha̱ nana ka isht hvch ik asilhho ke tuk; oh asilhhá; yohmikmvt na hvchi yukpvt isht alotowa chi̱ ka, hvsh habena he mak oke. 25 Nana ilvppa puta ka nan isht vlhpisa ho̱ isht hvchim anumpuli lishke; yohmi kia himmakma nan isht vlhpisa ho̱ isht ak hvchim anumpulo hosh, amba otvninchi achukma hosh A̱ki a̱ isht a hvchim anohonli la he nitak vt mihinti hoke. 26 Nitak yvmmak okvno a̱ hohchifo ha̱ nan isht a hvsh asilhha hi oke: yohmikma A̱ki a̱ hvch isht im a ponaklo la hi oke; hvchim achi li keyushke. 27 Hvchishno vt hvs sa̱ hullo mikmvt Chihowa ak o̱ a kochvt a̱ya li hatok a̱ hvchi yimmi tuk: yohmi hatuk o̱ A̱ki vt ilapo akinli kvt hvchi̱ hullo hoka. 28 A̱ki ak o̱ a kohchvt a̱ya hosh yakni a̱ vla li tok osh; anonti yakni ash issvt, A̱ki a̱ im ia li hoke, im achi tok. 29 Nan im ai ithvna vhleha hash ot, Inta! himak okvno achukmalit isht pim anumpuli cha, nan-isht vlhpisa ho̱ chik anumpuloshke. 80 Nan okluha ka ish ithaiyana ka, hatak nana hosh nana ka a chim a ponakla hi o̱ keyu ka himak okvno il akostininchishke; Chihowa ak o̱ a kohchvt ish a̱ya tok pulla ka ilvppak o̱ isht a pi yimmishke, okla im achi tok. 81 Chisvs vt afalaminchi mvt, Himak ano okla hvchi yimmi cho? 32 Inta! hatak vt ilap in chuka aiyukali ka ai ita fimimpvt ilap banochit hvs sa̱ filvmma chi̱ ka hvshi kanvlli ai vlhpisa kvt mihinti tuk osh, anonti himak okvno ai ona hoke; yohmi kia A̱ki ak osh si ahina hoka, vno ak illa he keyushke. 33 Vno pulla ho̱ nana anuktanla ka hvsh iesha he mak o̱, ilvppa puta ka isht hvchim anumpuli lishke. Yakni paknaka yokvno na palvmmi puta kvt a hvchim aiasha he; yohmi kia hvchi nuktanla achukmashke; vno vt yakni a̱ imaiyacni li tuk oke, im achi tok

17

Ishit inla ibbak fohka chi̱ ninak a̱ Chisvs vt vba pit anumpuli kvt, ilapvt illi tuk vt falamvt tani ha ya, Chihowa hvt nan im ai ithvna vhleha ha̱ apelahanchi na im anukfila hvt ai it achvfa he.

1 Anumpa ilvppa puta ka Chisvs vt anumpohonli mvt, vba pit vba chakali cha, A̱ki ma! hvshi kanvlli vlhpisa yvt ai onvshke. Chiso ha̱ ish holitoblichi na anonti chiso mvt chi holitoblichi akinlashke. 2 Laua kvt kaniohmi ho̱ ish im ihi̱sa tuk ma, yvmmak ash ai okcha̱yvt bilia yo̱ yvmmak ash ot ima hi vt, hatak puyuta ma ai imaiya he mak o̱, ish im apihi̱sa tok oke. 3 Yohmi ka Chishno ak illa kak osh Chihowa a̱hli chia ka, micha Chisvs Klaist auet ish kanchi tok ma okla ithaiyana he ak o̱ ilvppak osh ai-okcha̱yvt bilia yoke. 4 Yakni paknaka ya̱ a chi holitoblichi lishke. Na-toksvli isht ahanta la hi o̱ is svm apesa tok a̱ atahli lishke. 5 Yohmi ka, A̱ki ma! yakni vt iksho mak o̱ na holitopa ka isht chiba holitopa li ya tok mak o̱, himak a̱ chishno a̱ ai il a aieninchit is sa holitoblichashke. 6 Hatak puta ka yakni ak o̱ ai ishit is svma hatuk a̱, chi̱ hohchifo ha̱ im otvninchi li hokvno; yvmmak okvt chimmi hatuk o̱, is svma hatuk oka, chim anumpa ha̱ okla holitobli tuk oke. 7 Nana ka is svma tok oklu̱yuha kvt chishno ak o̱ a minti hatuk a̱ himak okvno okla akostininchishke. 8 Anumpa is svma chash yvmmak o̱ ima li hokvno; mihma yvmma okla aiokpvchi mvt, vno vt chishno ak o̱ a chi a minti li hatuk a̱, okla akostininchi, micha chishno ak osh auet is sa kanchi tok aiena ka okla yimmi hatuk oke. 0 Yvmmak o̱ isht chim ilbvshvt anumpuli lishke; yakni ak o̱ isht chim ilbvshvt anumpuli li keyu, amba ilvppak o̱ is svma tok a̱, yvmmvt chimmi vhleha hoka, isht chim ilbvshvt anumpuli lishke. 10 Yohmi ka vmmi hvt momvt chimmi hokma, anonti chimmi hvt vno a̱ vmmi makinli hoke: yohmi hoka vno vt yvmma isht a sa holitopa hoke. 11 Himak okvno yakni paknaka ya̱ himmakma ik si ai iksho mak oke; yohmi Ida ilvppak okvto yakni a̱ ai aha̱shwa na vno vt chim a̱ya li mak oke. A̱ki holitopa ma! is svma tok vhleha ilvppak oka chishno chi̱ hohchifo pulla hatuk mak o̱ ish apesahanchi na yvmmak mvt ai itibai achvfa kvt pishno a̱ chiyuhmashke. 12 Pehliechit yakni paknaka ai ahanta li moma kvto chi̱ hohchifo pulla ho̱ isht ai apesahanchi li tok: is svma tok vhleha yvmmak oka apesahanchi li ma, achvfa kia ik kvnio ho̱, amba Holisso Holitopa vt ont ai a̱hla chi̱ kak o̱, nan-ok-pvni ushi ak illa tuk oke. 13 Yohmi ka vno pulla hatuk mak o̱ a̱ nan-isht ilaii̱ukpa ma ilap inlit okla il ai esha hi o̱, ilvppa puyuta ka yakni paknaka isht ai anumpohonli li, yohmi tuk osh himak okvno chim a̱ya li mak oke. 14 Chim anumpa ha̱ ima li tuk oke: yohmi ma yvmmak okvt yakni a̱ ai immi keyu kvt, vno vt yakni a̱ ai immi sia keyu kak inli ho̱ chohmi hatuk o̱, okla i̱ nukkilli hatuk oke. 15 Yakni ak o̱ a kohchit ish isha hi o̱ chim asilhha li keyu; amba apesahanchit nan-okpulo ak o̱ ishit chik ahalaiyacho ka he ak oke. 16 Yakni a̱ ai immi keyu kvt, vno vt yakni a̱ ai immi sia keyu kak inli ho̱ okla chiyuhmi hoke. 17 Yvmmak oka na chim ai a̱hlika pulla kak o̱ isht ish i̱ kashofichashke; chim anumpa hak osh nan ai a̱hlika yoke. 18 Chishno vt yakni paknaka ya̱ auet is sa kanchi tok mak o̱, chohmichit vno mvt ilvppak ma yakni paknaka ya̱ a tihlehinli lishke. 19 Micha ilap ak kia nan-ai a̱hlika ya̱ ai isht a kashofa chi̱ ka, vno vt ilvppak pulla hatuk mak o̱ ile kashofichi li hoke.

Chihowa, Ushi ita tuklo ka im anukfila pit ai itachvfa he.

20 Micha ilvppa illa ho̱ isht asihi̱hla li keyu; amba ilvppa pulla im anumpa hatuk mak o̱ a̱ yimma he aiena kak oke. 21 Moyumvt ai itib achvfa kvt, A̱ki chia hvt vno a̱ is svbai acha̱fakma, anonti vno mvt a chibai acha̱fa li kak inli ho̱ okla chiyuhmi cha, yvmmak mvt pishno a̱ a pibai acha̱fashke: yohmi na chishno ak osh auet is sa kanchi tok a̱, okla moma kvt ithaiyanashke. 22 Yohmikma ilvppvt ai itib achvfa kvt pishno il itibai achvfa kak inli ho̱ chohma hi a̱, nan-isht aholitopa is svma tok a̱ ilvppa ima lishke. 23 Vno vt ilvppa ai ibacha̱fa likma, anonti chishno mvt auet is svbai acha̱fa; ai yakohmi ho̱ yvmmak osh ont ai a̱hli achvfa ka tobashke; yohmikma chishno ak osh auet is sa kanchi tok; a tok osh ilvppak oka ish i̱ hullo kvt vno a̱ is sa̱ hullo kak inli ho̱ ish chohmichi ka, yakni vt ithaiyanashke.

Yohmi cha ilap vt vba yakni a holitopvt ahanta ka ont apehvt ma̱ya he puta ka vba isht anumpohonli.

24 A̱ki ma! is svma tok vhleha hak kia kanima yo̱ ai ahanta likma, si api̱hvt a̱sha cha, nan-isht vm aholitopa yvmma is svma tok a̱ pisa he ak o̱, ahni lishke: yakni vt ik tobo ki̱sha mak o̱ is sa holitobli tok mak oke. 25 A̱ki a̱hli achukma ma! yakni vt ik chithanoshke; yohmi kia vno vto chithana li; mihma chishno ak osh auet is sa kanchi tok a̱ ilvppak okvto akostininchi hatuk oke. 26 Yohmi na ilvppak o̱ chi hohchifo ha̱ isht im anohonli li tuk osh, anonti anohonli la chi̱ hoke: yohmikma na-holitobli ai isht is sa̱ hullo hatuk vt ilvppak ma anukfoyuka na, anonti vno mvt ai ibacha̱fa lashke, achi tok.

18

Chisvs vt osapushi yo̱ ont chukowa.

1 Chisus vt ilvppa puta ka ahanchit in taiyaha mvt, nan im ai ithvna vhleha pehlinchit Kitlon bokushi a̱ pit tanvblit osapushi vt yvmma talaia tuk o̱, nan im ai ithvna vhleha hash ai it api̱hvt ont chukowa tok. 2 Yohmi ka Chisvs vt nan im ai ithvna vhleha ha̱ pehlichit yvmma ai ona fehna chatuk a̱ ishit inla im issa tok Chutas ak kia yvmma pit ai ithana tok. 3 Yohmi hatuk osh Chutas ash ot hatak ai-itapeha achvfa, i̱ kvpitvni vhleha aiena ka na-holitompa isht a̱sha pehlichi vhleha, mikmvt Falisi vhleha aiena ka ai im ai ishi mvt, pvla afohka, mikmvt na shimahli pvla, micha na halupa aiena ka sholi hosh yvmmak ash ai vla tok. 4 Yohmi ma Chisvs vt nana hosh ilapa̱ ai onvtuyula chi̱ puta moma ka ithana hatuk okvt, ivt ont afamvt, Kvta ho̱ hvsh hoyo cho? im achi tok. 5 Mihma, Chisvs Nasalet minti ak oke, okla im achi ma, Chisvs ash osh, vno ak osh mih sia mak oke, im achi tok. Mihma ishit inla im issa tok Chutas ash kia yvmma ta̱kla hiki̱a tok.

Chutas vt Chisvs a̱ isha chi̱ hosh ai vla na, Chisvs vt anumpuli ma, falamvt obvlhpelvt aka ont fohopa.

6 Atuk o̱, Vno ak osh mih sia mak oke, im achi makinli ho̱, okla obvlhpelvt ivt aka ont kaha tok. 7 Mihma atuklanchit i̱ ponaklot, Kvta hak o̱ hvsh hoyo cho? achi tok. Mihma, Chisvs Nasalet minti ak oke, okla achi tok. 8 Chisvs vt afalaminchi mvt, Vno ak osh mih sia hatuk vt hvchim anoli li kvno; yohmi hoka vno ak o̱ hvs sa hoyo hatuk okmvt, ilvppak okvno a̱sht ik itvnowá, hvsh im ahnashke. 9 Yohmi na yvmmak o̱ isht anumpuli hosh, Is svma tok vhleha hokvt achvfa kia ik sa̱ kvnioshke, ahanchi tok a̱ ont ai a̱hlashke, achi tok.

Pita yvt Malkvs haksobish a̱ chanlit hokofi.

10 Yohmi ma Saimon Pita yvt bvshpo falaia shanli tuk osh halvllit shu̱fi mvt, na holitompa isht a̱sha pehlichi i̱ shahli in tishu ho̱ isht fahamvt, haksobish isht impak imma ya̱ chanlit hokofi tok. Tishu hohchifo hvt Malkvs a tok. 11 Mihma Chisvs vt Pita yash o̱, Chi̱ bvshpo falaia ya̱ i̱ shukcha pit fohkí; isht ishko A̱ki vt auet vma tok a̱ ak ai ishko ka hinla cho? im achi tok.

Chisvs a̱ okla takchi cha isht ia mvt, Annas ak o̱ isht im ona tuk osh achakalinchi mvt, Kaiafaa ak o̱ okla isht im ona.

12 Yohmi ma hatak a̱ya achvfa, micha kvpitvni, mikmvt Chu okla nan vlhtoka vhleha aiena kash ot Chisvs ash ishi cha, takchi tok. 13 Mihmvt yvmmak osh Kaiafas vt afvmmi yvmma fehna ka na holitompa isht a̱sha pehlichi i̱ shahli yatuk o̱, yvmma ipochi yatuk oka Annas ak o̱ ti̱kba okla isht im ona tok. 14 Kaiafas ilvppak osh hatak achvfa hosh okla hoka vlhlobvt illa he ak o̱ ai vlhpiesa ka, Chu okla ha̱ it im apesa tuk a tok.

15 Mihma Pita yvt Chisvs a̱ ik ithano miha.

15 Mihma Saimon Pita yvt Chisvs a̱ pit iakaiyvt a̱ya ma, anonti nan im ai ithvna achvfa yvmmak oka na-holitompa isht a̱sha pehlichi i̱ shahli hvt ithana hatuk o̱, Chisvs a̱ awant na-holitompa isht asha pehlichi i̱ shahli i̱ nan-ai-apesa ya̱ ont chukowa tok. 16 Amba Pita vto okhissa kocha yak o̱ hikia tok. Yohmi ma nan im ai ithvna achvfa na-holitompa isht a̱sha pehlichi i̱ shahli hvt ithana hatuk, yvmmak ash ot kohchvt ivt, ohoyo okhissa apesvchi yash ont im anoli cha, Pita ya̱ ilauelit chukowa tok. 17 Mihma ohoyo himita okhissa apesvchi yash ot Pita ya̱, Chishno ak kia hatak ilvppa nan im ai ithvna chia keyu̱? im achi ma, Mih sia keyushke, im achi tok. 18 Mihma kapvssvchi hatuk o̱, ilhtohno vhleha, micha nan vlhtoka vhleha aiena kash ot tobaksi yo̱ oti cha, libisha hosh hiohma̱ya tok; mihma Pita yvt takla hiki̱vt libisha tok. 19 Na-holitompa isht a̱sha pehlichi i̱ shahli ash ot Chisvs a̱ nan im ai ithvna vhleha, mikmvt nan isht im abvchi aiena ka ai im asilhhvchi tok. 20 Chisvs vt afalaminchi mvt, okla puta ka ai im otvni achukma hosh anumpohonli li hatuk; Chu okla hvt ai itvnaha bilia sinakak, micha tempel aiena yvmmak o̱ nana ai ithvnanchi li chatuk; yohmi kvt luma chohmi hokvto nana ak achoshke. 21 Na katihmi ho̱ vno ak o̱ is svma ponaklo cho? nana im achi li ka ha̱klo chatuk vhleha hak o̱ ish i̱ ponaklashke: yakeh! yvmmak osh nana achi li chatuk a̱ okla ithana hoke, achi tok. 22 Ilvppa yakohmichit anumpuli ma, nan-vlhtoka vhleha hvt achvfvt bili̱kasi hikia tuk osh, Chisvs ash ibbak isht pasalichi mvt, Na holitompa isht a̱sha pehlichi i̱ shahli ya̱ yakohmichi hosh ish im anumpuli cho? achi tok. 23 Chisvs vt afalaminchi mvt, Ik vlhpeso hp anumpuli li hokma, nan ik vlhpeso mak o̱ isht ish atokolashke: amba vlhpesa tuk mvno, katiohmi ho̱ is svsso cho? achi tok. 24 Yvmmak ash ot tala̱kchi na Annas vt na holitompa isht a̱sha pehlichi i̱ shahli Kaiafas a̱ pit pila tuk a tok. 25 Mihma Saimon Pita yvt libisha hosh hiki̱a tok: yohmi ma, Chishno vt yvmma nan im ai ithvna vhleha ha̱ ish ibai achvfa tuk keyu̱? okla im achi ma, ik a̱hlo mihvt, Vnco yokvt mih sia keyushke, achi tok. 26 Na holitompa isht a̱sha pehlichi i̱ shahli im ilhtohno vhleha achvfvt Pita yvt haksobish tvbli tuk ash i̱ kanomi hosh, Chishno ak osh yvmma awant osapushi a̱ ish anta ho̱, chi pisa li tuk keyu̱? achi tok. 27 Mihma Pita yvt ik a̱hlo kash inli ho̱ miha tok: mihma chekosi fehna aka̱ka yvt ola tok. 28 Yohmi ma Chisvs ash Kaiafas a̱ im ai ishit ivt, nan ai apesa yo̱ okla isht ona tok: yvmmvt onnahinli ha tok; yohmi kvt nan-vbanvblit ont ia ya̱ ai impa he tuk vt, im ai okpuloka hinla hatuk osh ilapo ak okvto nan ai-apesa ya̱ okla pit ik chukowo ki tok.

Chisvs a Pailat ak o̱ okla isht im ona ma, Pailat ash osh achukmalit nan im a ponaklo̱.

29 Mihma Pailat vt kohchvt ona mvt, Hatak ilvppa anumpa nanta mak o̱ hvsh ai ikbichi cho? achi tok. 30 Mihma okla afalaminchi mvt, Ilvppvt nanokpvni keyu hatuk okma, chibbak oka ant e chi̱ fohka he tuk keyu hoke, okla im achi tok. 31 Mihma Pailat vt, Isht oh ia cha, hvchii̱ nan-vlhpisa mak o̱ isht oh ai im apesá, im achi tok. Yohmi hatuk o̱ Chu okla hash osh, Hatak nana kia illa he il im apesa he vt a pim vlhpesa keyu hoke, okla im achi tok. 32 Yohmi ka Chisvs vt kaniohmit ai-illi yo̱ ai illa hi vt anumpohonli tok a̱, ont ai a̱hla he mak a tok. 33 Mihma Pailat vt atuklanchit nan-ai-apesa yash ont chukowa cha, Chisvs a̱ i̱ howa mvt, Chishno ak osh Chu okla i̱ mi̱ko chia mak oh cho? im achi tok. 34 Mihma Chisvs vt afalaminchi mvt, Chishno akinli hosh, keyukmvt, inla yak osh vno a̱ isht a chim anolikmá, nanta tuk o̱ ilvppa ish achi cho? im achi tok. 35 Pailat vt afalaminchit, Vno vt Chu sia ho̱? chishno chim okla ash inli, mikmvt na holitompa isht a̱sha pehlichi vhleha aiena kak osh chishit svbbak a̱ fohki tuk oke. Nanta mak o̱ ish katiohmi tuk oh cho? achi tok. 36 Chisvs vt afalaminchi mvt, Apehlichi li ka yvt yakni ilvppak inli keyushke. Apehlichi li ka yvt yakni ilvppak inli hatuk okma, Chu okla ibbak ak a fohko ka chi̱ ka, an tishu vhleha hvt itihimba he tuk: amba himak okvno apehlichi li ka yvt ilvppak inli ho̱ keyushke, achi tok. 37 Yohmi hatuk o̱ Pailat ash osh, Mih kvto mi̱ko chia akinli hotuma? im achi ma, Chisvs vt afalaminchit, Mi̱ko sia mak atuk o̱ ish mihvshke. Nan ai a̱hlika atokolit anoli la he ilvppak osh sa toba cha, anonti ilvppa pulla hatuk mak o̱ a̱yvt yakni a̱ vla li tuk oke. Nan ai a̱hlika yo̱ anukfoyuka aiyukali hokvto, vm anumpa ha̱ haponaklo bano hoke, achi tok. 38 Pailat ash osh, Nan-ai a̱hlika yak osh nanta ho? im achi tok. Mihmvt ilvppa achi mvt, falamvt kohchvt Chu okla hash im ona mvt, Nan ik ai-vlhpeso nana kia a takali ka ak im akostinincho kvmohmishke. 39 Yohmi kia nan-vbanvbli ont ia isht a̱sha hokvno, achvfalichit a hvchim i̱ hotofi la he ai vlhpesa chatuk vt a̱shvshke: yohmi hoka Chu okla i̱ mi̱ko ak o̱ a hvchim i̱ hotofi la hi a̱ hvsh ahni cho? im achi tok. 40 Mihma anonti momvt chitoli hosh, Hatak ilvppvno keyu ho̱, amba Balabbas ak ashke, okla achi tok. Yohmi ka Balabbas vt hatak hu̱kopa ya tok.

19

Pailat vt Chisvs ash fvmmit issa ma, tvshka chipota vhleha hvt kvti tvnna yo̱ iachokolichi.

1 Yohmi hatuk o̱ yvmma foka ma Pailat vt Chisvs a̱ ishi cha, fvmmi tok. 2 Mihma tvshka chipota vhleha hvt kvti tvnvt iachuka ikbit, noshkobo ha̱ iachokolichi mvt, na tishepa na fohka holitopa yo̱ ishit okla anchichi tok. 3 Mihmvt aiokpvchi mvt, Chu okla i̱ mi̱ko yosh nan ik yukpá, achi mvt ibbak okla isht isso tok.

Hlakofichi bvnna kia, Chu okla nan ahni kak o̱ im antia hatuk osh, yvmmvt ititaiyukhvna ahonvhla chi̱ mak o̱, im issa.

4 Yohmi ma anonti Pailat ash ot ia cha, Yakeh! nana ik ai-vlhpeso nana kia ai a takali na akostininchi li keyu ka hvsh akostinincha chi̱ mak o̱, ilauelit hvchi̱ kohchi lishke, im achi tok. 5 Mihma Chisvs vt kvti iachuka ha̱ iachukoli cha, na-tishepa na fohka hohtopa fohka hosh auet kohcha tok. Mihma Pailat ash osh, Yakeh! hatak atukma ho pesá, okla ha̱ im achi tok 6 Yohmi ma na-holitompa isht a̱sha pehlichi vhleha, mikmvt nan-vlhtoka vhleha aiena kash ot yvmmak ash pisa mvt, chitoli hosh mihvt, Ititaiyukhvna ak o̱ oh ahonvhlichí, ititaiyukhvna ak o̱ oh ahonvhlichi; ahanchi ma, Pailat ash osh, Oh ishi cha, ititaiyukhvna ak o̱ oh ahonvhlichí; vno yokvto nana ik ai-vlhpeso nana kia ai atakali ka ak im akostinincho hoke, im achi tok. 7 Chu okla hvt afalaminchi mvt, Nan-vlhpisa hvt pin tonla: yohmi ka ilvppak okvt Chihowa Ushi ilapissa hatuk okvt, pi̱ nan-vlhpisa pulla kak o̱ isht illa he vlhpesa hoke, im achi tok. 8 Yohmi hatuk o̱ Pailat vt anumpa yvmma haklo mvt, nukshopa kvt isht i̱ shahli tok 9 Mihmvt anonti nan ai apesa yash ont chukowa cha, Chisvs ash o̱, Katima ko̱ ish minti tok oh cho? im achi tok. Yohmi kia Chisvs ash ot nana ik im acho ki tok. 10 Yohmi ma Pailat ash ot, Chik svm anumpulo mak oh cho? vno vt ititaiyukhvna ya̱ a chi ahonvhlichi la hi vt vm vlhpesa, anonti chi̱ hotofi la hi vt vm vlhpesa aiena ka chik ithaiyano cho? 11 Chisvs vt afalaminchi mvt, Chishno yokvt vba ak o̱ auet a chima ho̱ keyukma, vno yoka nana ho̱ is sa kanihcha hi vt chim vlhpesa keyushke: yohmi hoka svshit a̱yvt chibbak a̱ ant sa fohki tuk a̱ yvmmak osh nan-ashvchi kvt ai in chinto hoke, achi tok. 12 Yohmi ma yvmma ai vhlit minti ka Pailat vt yvmmak ash i̱ hotofi bvnnvt im anukfihinla tok: yohmi kia Chu okla hvt chitolit anumpulit, Hatak ilvppa ish i̱ hotofi hokmvt, Sesa ya̱ i̱ kana chia ha he keyu. Kvna hosh mi̱ko il apesakmvt, Sesa ak o̱ i̱ sanalit anumpuli hoke, okla achi tok. 13 Yohmi hatuk o̱ Pailat vt anumpa yvmma haklo mvt, Chisvs ash ishit kohchi cha, ilap vto nan ai-apesa ai-o̱-minili om binili tok, yvmmvt Tvli potvlhpo hohchifo ho̱, amba Heblu ano Kabbahla hohchifo ha tok. 14 Mihma nan vbanvblit ont ia a̱sha chi̱ ka, ai il atahlit ma̱ya nitak, mihmvt hvshi kanvlli vlhpisa yvt ont isht hannali foka aiena; yohmi hatuk o̱ Chu okla hash o̱, Hvchi̱ mi̱ko ya̱ ho̱ pesá, im achi tok. 15 Yohmi kia okla chitoli hosh anumpulit, Kanima isht oh ia cha, kanima isht oh ia cha, ititaiyukhvna oh ahonvhlichi, achi ma, Pailot ash ot, Hvchi̱ mi̱ko ya̱ ititaiyukhvna ahonvhlichi la chi̱ cho? im achi ma, na holitompa isht a̱sha pehlichi vhleha hash ot, Pi̱ mi̱ko vt iksho, Sesa ak banoshke, im achi tok. 16 Yohmi ma pola̱ka yvmmak ash ot ititaiyukhvna ahon vhlvt illa chi̱ mak o̱, ibbak i̱ fohki tok. Yvmma foka ma Chisvs ash o̱ okla ishi cha, halvllit kanima isht ia tok.

Tvshka chipota vhleha hvt i̱ nafohka yatuk a̱ iti hopela.

17 Yohmi ma im ititaiyukhvna yash o̱ sholi cha ivt yakni hohchifo noshkobo foni aiasha yo̱, anonti Heblu yokvno yvmmvt Kalkohla hohchifo ho̱ ona tok. 18 Mihma yvmmak ash, micha inla yvt tuklo ho̱ aieninchit ititaiyukhvna okla ai ahonvhlichi tok: Chisvs ak osh iklvnna yo̱ takali na achvfa bi̱kvt ita hlakla̱ka takohli tok. 19 Mihma Pailat vt nan anoli holisso ha̱ holissochit ititaiyukhvna ya̱ a lapalichi tok. Yohmi ka holisso kvt, CHISVS NASALET MINTI CHU OKLA I̱ MI̱KO YOKE, achi ha tok. 20 Yohmi na Chisvs vt ititaiyukhvna ai ahonvhlvt illi yvmmvt tvmaha ha̱ i̱ bili̱ka ha tok: yohmi ka holisso kvt Heblu, Klik, mikmvt Latin aiena anumpa hosh isht a holisso hatuk oka, nan anoli holisso ilvppak ash Chu okla laua kvt pisa tok. 21 Yohmi ma Chu okla na holitompa isht im a̱sha pehlichi vhleha hash osh Pailat a̱, Chu okla i̱ mi̱ko, achit chik holissocho kashke; amba Chu okla i̱ mi̱ko sia hoke, achi chatuk yvmmak o̱ ish holissochashke, okla im achi tok. 22 Mihma Pailat ash ot, Nana ho̱ holissochi li kvt holissochi li mak atuk oke, im achi tok. 23 Yohmi ma tvshka chipota vhleha hvt Chisvs a̱ ititaiyukhvna ahonvhlichi mvt, i̱ na fohka yatuk a̱ ishit ita kvsh koa ushtali cha, tvshka, chipota vt i̱ kashampa aiyuka tok; mihmvt i̱ na fohka lumbo ash kia aieninchi tok: na fohka 1umbo yvt ahchu̱wa yo̱ keyu, paknaka yak o̱ a tvnnvt ma̱ya hosh ont taiyaha ha tok. 24 Yohmi hatuk o̱, Ilvppak okvno keho hlilvffo hosh, amba kvna hosh immi ha chi̱ ka, na shoelit kil oh a̱shá, ilap bi̱ka it im achit ma̱ya tok; yohmi ka Holisso Holitopa vt, Vm ilifoka ya̱ okla iti̱ hopela mvt, a̱ na fohka lumbo yoka na shoeli isht aiasha kvno, achi ka ont aia̱hla chi̱ mak a tok; yohmi hatuk o̱ tvshka chipota vhleha hvt ilvppa okla yakohmi tok. 25 Mihma Chisvs ititaiyukhvna a takali ka ituma ya̱ ishki, micha ishki nakfish, mikmvt Meli Kleofas tekchi, mikmvt Meli Maktalene aiena hosh hiohma̱ya tok.

Chisvs vt ishki yatuk a̱ achukmalit apelahancha chi̱ ka, nan im ai ithvna i̱ holitopa yatuk a̱ i̱ miha cha, illi.

26 Yohmi hatuk o̱ Chisvs vt ishki, micha nan im ai ithvna yvmma i̱ hullo beka tuk mak osh itatuklot hinli na pisa mvt, ishki ash o̱, Ohoyo ma! chiso ha̱ ish pisashke, im achi tok. 27 Mihmvt nan im ai ithvna yash o̱, Chishki a̱ ish pisashke, im achi tok. Mihma nan im ai ithvna yvmmak ash osh hvshi kanvlli vlhpisa yvmmak fehna ai-vhlit ia ka, ohoyo hash ilauelit ilap in chuka akinli ho̱ bohli tok. 28 Yakohmi ha ya, nan oklu̱ha kvt ont ai vlhtaha ka, Chisvs vt ithana hatuk osh, Holisso Holitopa yvt ont ai a̱hla chi̱ ka, Sa tukshilvshke, achi tok. 29 Yohmi ma nan-ai-vlhto wineka olota kvt talaia tok; atuk o̱ na-shatvmmi yo̱ wineka yash alotolit hissop o̱ takalichit itih ha̱ pit tikelichi tok. 80 Yohmi hatuk o̱ Chisvs vt wineka yash ishkot pisa mvt, Vlhtaiyahvshke, achi tok; yohmi cha aka yuhchunukli mvt, fiopissa tok.

Tvshka chipota vhleha hvt, Chisvs naksi a̱ tvli halupa ishit bahli.

31 Yohmi hatuk o̱ nan il ai atahli nitak atuk oka, nitak hullo ya̱ haknip vt ititaiyukhvna ya̱ ik a takohma̱yo ka chi̱ ka, nitak hullo yvmmvt nitak holitopa hatuk oka, Chu okla hash osh yvmma hanali ak osh kobahli na ishit kanima ia hinla ka, Pailat a̱ im asilhha tok. 32 Yohmi na tvshka chipota vhleha hash ot ivt, ititaiyukhvna ai iba honvhlvt okla kash achvfalit ti̱kba hanali ha̱ kobahlichi mvt, anonti achvfa yash kobahlichi tok. 33 Amba Chisvs vt a takali tuk a̱ okla ona mvt, yvmmvto illi ma̱shko tuk o̱ pisa cha, yvmmvno hanali ha̱ ik kobahlecho ki tok. 34 Yohmi kia tvshka chipota vhleha yash ot achvfvt naksi a̱ na halupa ho̱ ishit bahli na ashali̱ka issish, micha oka aiena hosh auet fohopa tok. 35 Yohmi ka yvmma pisa tok mak osh atokowa ka anoli; yohmi ka yvmmvt atokoli ka ai a̱hli hoke: yohmi ka hvchishno vt hvchi yimma chi̱ ka, ai a̱hli mak o̱ miha kvt ithana hoke. 36 Holisso Holitopa yvt, Foni vt ik pakoto ka he, achi kvt ont ai a̱hla chi̱ mak o̱, nana kvt a yakohmi tok. 37 Micha anonti Holisso Holitopa ai anumpa inla mvt, Yvmma okla bahli tuk vt yvmmak ash pisa hi oke, achishke.

Chosef Alimahlea minti, micha Nikotemvs ita tuklo hosh Chisvs haknip a̱ ishi cha, hohpi.

38 Micha ai yakohmi ha ya, Chosef Alimahlea minti vt Chisvs a̱ nan im ai ithvna akinli kia, Chu okla ha̱ i̱ nukshopa kvt il aluma beka tuk osh, Chisvs haknip a̱ isha hinla kvt, Pailat a̱ ont im asilhha tok: mihma Pailat vt vlhpesa, im ahni tok. Yohmi hatuk o̱ ivt, Chisvs haknip ash ont ishi tok. 39 Yohmi ma Nikotemvs vt nan vmmona ka ninak o̱ a̱yvt Chisvs a̱ pisa tok yvmmak ash kia vla cha, mvh micha aloes itibvlhto kvt weki tahlepa achvfa foka ho̱ isht vla tok. 40 Yohmi ma Chisvs haknip ash o̱ ishit okla cha, Chu okla hvt hohpi kvt yvmihchi chatuk mak o̱, yvmmak ash o̱ linen osh na-balama pit aiena ho̱ isht a bonulli tok. 41 Ititaiyukhvna ahonvhlvt ai illi yvmma osapushi osh talaia tok: mihma osapushi anu̱kaka ya̱ sepvlka himona, ha tak vt ik a hollopo ki̱sha yo̱, hiki̱a tok. 42 Yohmi hatuk o̱ Chu okla nan il ai atahli nitak a tok; yohmi hatuk o̱ sepvlka yvt yvmma auet i̱ bili̱kasi hatuk oka, yummak o̱ Chisvs a̱ bohlit okla tok.

20

Meli Maktalene vt sepvlka yash ona.

1 Wek chukowvt iahpi onnahinli fehna okhlilinchi moma ho̱, Meli Maktalene vt sepvlka yash ona cha, tvli yash osh sepvlka ya̱ a kanvlli tuk o̱, pisa tok.

Pita, Ohan itatuklo kvt tu̱shpvt ivt, sepvlka yash it onachi akinli.

2 Yohmi ma maleli hosh vlvt, Saimon Pita, micha nan-ithvna achvfa Chisvs vt holitobli yatuk ita tuklo ka, Chitokaka ya̱ sepvlka ya̱ ai ishit kohchi cha kanima yo̱ ont bohli tuk a chini ho̱, kil akostininchoshke, im achi tok. 3 Yohmi ma Pita yvt, micha nan-ithvna achvfa yash ita tuklo cha ivt, sepvlka ya̱ it onachi tok. 4 Yohmi kvt tu̱klot pit tihlaiya tok; atuk o̱ nan-ithvna achvfa yash ot Pita ya̱ imaiya cha, ti̱kba sepvlka ya̱ ona tok. 5 Yohmi cha ont a hlipvt pit hopo̱koyo mvt, linen vto kahvt ma̱ya na pisa akinli kia, pit ik chukowo ki tok. 6 Yohmi ma Saimon Pita yash ot auet iaka̱yvt vla mvt, sepvlka yash pit chukowa cha, linen vt kahvt ma̱ya ka pisa tok. 7 Yohmi ma nantapvski noshkobo isht afoa tuk vto linen a̱ ik ibafo̱ko hosh, amba pohlvt taha cha, ilapissa yo̱ itonla tok. 8 Mihma nan-ithvna achvfa na tikba sepvlka ya̱ ona tuk ash kia pit chukowa cha, pisa mvt, yimmi tok. 9 Yvmma foka mvno illi tuk vt falamvt tana hi oka, Holisso Holitopa ya̱ ik ai akostinincho ki̱shvt okla tok. 10 Yohmi mvt nan-ithvna ash osh ilap in chuka atuk akinli ho̱ itiachi tok.

Meli Maktalene ash ot sepvlka ya̱ falamvt ona, atuk o̱ i̱ himmak o̱ Chisvs fehna kash osh yvmmak ash inli ho̱ ont i̱ haiaka.

11 Yohmi kia Meli vto sepvlka a kocha ya̱ nishkin okchi mihintit hiki̱a tok: atuk osh nishkin okchi mihintit pit aka chunulit, sepvlka anu̱kaka ya̱ pit hopo̱koyo tok. 12 Mihmvt enchil tuklo i̱ na-fohka tombi kvt Chisvs haknip ai itola tuk a̱, achvfvt noshkobo imma yatuk ak o̱ a̱sha ma, achvfvt iyi pilla hatuk ak o̱ a̱sha na pisa tok. 13 Mihma, Ohoyo chia hvt na katihmi ho̱ ish yaha̱ya cho? im achit okla ma, An Chitokaka ya̱ okla ishit kvnia tuk a chini ho̱, kanima yo̱ a bohli tuk a̱ ak ithano kak oke, im achi tok. 14 Micha ilvppa mak achi mvt, im ashak-imma pit filema mvt, Chisvs vt hiki̱a na pisa kia, yvmmak osh Chisvs ash atuk a̱ ik ahno ki tok. 15 Chisvs ash ot, Ohoyo chia hvt na katihmi ho̱ ish yaha̱ya cho? Kvta ho̱ ish hoyo cho? im achi tok: mihma osapushi apesvchi mak o̱ im ahoba mvt, A̱ shahli ma! chishno ak osh yvmmak ash ai isht ish ia tuk okmvt, kanima yo̱ ont ish bohli tuk mvt, is svm anoli na ont ishit minti lashke, im achi tok. 16 Chisvs ash ot, Meli, im achi ma, pit-filema mvt, Labboni, yvmmvt nan-ithvnanchi ma! achi hoke, im achi tok. 17 Chisvs vt, Vba ivt A̱ki a̱ ak im ono ki̱sha hoka, is sa potoli ná; amba ivt tibapishi li vhleha aiasha kak o̱ ona cha, A̱ki, mikmvt hvch I̱ki, an Chihowa, mikmvt hvchin Chihowa im ia li ka, ish im anolashke, im achi tok. 18 Meli Maktalene ash osh vla cha, Chitokaka ya̱ pisa tuk, yohmi na ilvppa puta ka im ahanchi tuk a̱, nan-ithvna vhleha hash im anoli tok.

Mih nitak akinli opivt taha ho̱ nan im ai ithvna vhleha hvt itvnahvt chi̱ya ma, Chisvs vt im ona.

19 Atuk o̱ nitak yvmmak ash inlit ont shohbi wek chukowvt iahpi nitak atuk o̱, Chu okla ha̱ i̱ nukshopa hatuk osh nan-ithvna vhleha ai itvnahvt chieya ka, okhissa yvt vlhkvma ho̱, Chisvs ash ot vlvt iklvnna ant hikia cha. Hvchi nuktanlashke, im achi tok. 20 Ilvppa mak achi mvt, ibbak iti chaplinchit, naksi aiena ka i̱ weli tok. Yohmi ma nan-ithvna vhleha hash osh Chitokaka ya̱, pisa kvt na yukpa tok. 21 Yohmi ma Chisvs ash ot atuklanchit, Hvchi nuktanlashke; A̱ki vt na sa tohno tok mak o̱, ai itilauechi hosh hvchishno ma na hvchi tohno li hoke, im achi tok. 22 Micha ilvppa makachit in taha mvt, o̱ fiopa mvt, Shilombish Holitopa ya̱ oh ishí. 23 Kvna im ai ashvchika yo̱ hvsh i̱ kashofi hoka, i̱ kashofa he mak oke; mikmvt kvna im ai ashvchika yo̱ hvch ik i̱ kashofo hokma, ik i̱ kashofo ka he mak oke, im achi tok. 24 Yohmi kia Chisvs vt vla ka, auah-tuklo yatuk a̱ achvfa, Titimvs hohchifo Tamas vt ta̱kla a̱sha tok keyu.

Wek inla hosh ont taha ho̱ nan im ai ithvna vhleha hvt Tamas a̱ pit a momvt itvnahvt chi̱ya ho̱, Chisvs vt anonti i̱ haiaka.

25 Yohmi tuk o̱ nan-ithvna vhleha inla yash osh, Chitokaka ya̱ e pisa kvno; im achi tok. Yohmi kia, Ibbak chofak ai ahonvhla tuk a̱ pisa lish, chofak pit a hika tuk a̱ svbbak ushi pit maiachi lish, anonti naksi a̱ svbbak pit hilechi li ho̱ keyukmvt, sai yimma he keyushke, im achi tok. 26 Atuk o̱ anonti nitak isht untuchina ma nan im ai ithvna vhleha hash osh aboha anu̱ka aiasha ma, Tamas vt ta̱kla a̱sha tok; yohmi ma okhissa yvt vlhkvma ho̱, Chisvs vt vla cha, iklvnna ya̱ ant hikivt, Hvchi nuktanlashke, achi tok. 27 Mihmvt Tamas ash o̱, Chibbak ushi a̱ auet welit, svbbak a̱ pisá; mikmvt chibbak ma auet welit sa naksi a̱ pit hilechí: yohmi cha, na yimmi iksho hosh ish anta ná, amba chi yimmi kvt a chim alotowashke, im achi tok. 28 Mihma Tamas vt afalaminchi mvt, An Chitokaka ma! an Chihowa ma! im achi tok. 29 Chisvs ash ot, Tamas is sa pisa hatuk mak osh chi yimmishke: pisa ho̱ keyu kia, yimmi tok vhleha hokvt na yukpa mak oke, im achi tok. 30 Micha na-fehna inla kvt laua ho̱, Chisvs vt nan im ai ithvna vhleha hvt pi̱sa na yvmihchi mvhli tok a̱ holisso ilvppa ik a holissoshke. 31 Amba Chisvs vt Chihowa Ushi Klaist mak a tok a̱, hvchi yimma he; micha hvchi yimmi pulla hosh yvmma hohchifo hatuk mak o̱ okcha̱yvt bilia ya̱ hvsh ahayucha he mak o̱, ilvppa puta kvt holisso hatuk oke.

21

Chisvs vt, nan im ai ithvna vhleha hvt Tibelias okhvta ha̱ nvni hokli hosh ma̱ya ho̱, ont im otvni.

1 Ilvppot ai yakohmi ha ya, anonti Chisvs vt nan im ai ithvna vhleha ha̱ Tibelias okhvta hak o̱ ont a im ile haiakvchi tok: mihmvt ilvppak o̱ ai yakohmi hosh ile haiakvchi tok. 2 Saimon Pita, micha Tamas Titimvs hohchifo, mikmvt Nahlanael Kalili yakni Kana vtta, micha Sebete ushi tuklo, anonti nan im ai ithvna inla tuklo aiena kvt ai itapehvt ma̱ya tok. 3 Saimon Pita yash ot, Nvni vbit ia lishke, im achi ma, Pishno ak Ida chi api̱hvt il ivshke, im achi tok. Okla kohchvt ivt chekosi makinli ho̱ peni a̱ ont vlbeha tok; atuk osh ninak yvmma nana kia okla ik hoklo ki tok. 4 Atuk o̱ ont onnvt taha ma, Chisvs vt alaka ya̱ hiki̱a tok; yohmi kia nan-ithvna vhleha hvt Chisvs ash atuk a̱ ik ithano ki tok. 5 Yohmi ma Chisvs ash ot, Vlla vto ilimpa hvchim a̱sha cho? im achi ma, afalaminchit, Ikshoshke, achi tok. 6 Mihma, Peni ishtimpak-imma yak o̱ nvni-isht-hokli a̱ oh okvchi, micha hvsh ahayuchashke, im achi tok. Yohmi hatuk o̱ pit okvchi mvt, anonti nvni yvt laua fehna ka, halvlli kvt okla na kanihma he keyu ki tok. 7 Yohmi ma nan-ithvna Chisvs vt holitobli yatuk, yvmmak ash ot, Chitokaka mak oke, Pita ya̱ im achi tok Mihma yvmmvt Chitokaka mak atuk o̱, Saimon Pita yvt haklo mvt, nipi bano tuk osh nafohkvt nvni hokli yatuk ash o̱ ishit il ai vskofvchi mvt, okhvta hash pit okatula tok. 8 Mihma nan-ithvna vhleha inla ka yvto alaka ya̱ pit i̱ nopaki keyu, amba kubit tahlepa tuklo foka ho̱ a̱sha hatuk okvt, pen-ushi ash o̱ a̱lhtot nvn-isht-hokli nvni alota ka halvllit isht ia tok. 9 Atuk osh alaka ya̱ okla ona makinli ho̱, tobaksi luak vt yvmma a̱sha ma, nvni yvmma itotonla ma, pvska ak kia itonla na okla pisa tok. 10 Chisvs ash ot, Nvni himonasi hvsh hokli tuk vt, ishit ho minti, im achi tok. 11 Saimon Pita yvt pit chukowvt nvn-isht-hokh ash nvni hochito tahlepa achvfa pokoli tahlapi cha, akocha tuchina aienvt alota ho̱ halvllit, alaka isht ona tok: laua hokvto yakohmi nana kia nvn-isht-hokli ash ot ik okpulo ki tok.

Yohmi cha nan-isht-hokli a̱ nvni im alotoli cha, anonti itibai impa.

12 Chisvs ash ot, Mintit ant oh i̱mpá, im achi tok. Mihma yvmmvt Chitokaka mak atuk a̱ ithana hatuk osh, nan-ithvna vhleha hvt achvfa kia i̱ ponaklot, Kvta chia ho̱? achi kia iksho ki tok. 13 Mihma Chisvs ash ot onvt, pvska ya̱ ishi cha, i̱ hopela mvt, nvni ma yvmihchi akinli tok. 14 Chisvs vt illi tuk osh falamvt tani ha yvt, ilvppvt ont atuchina mak o̱ nan im ai ithvna vhleha ha̱ im ile haiakvchi tok.

Chisvs a̱ i̱ hullokmvt in chukfvlhpoba, micha in chukfvlhpobushi aiena ka im ipeta hi a̱ hituchina ha Pita ya̱ i̱ miha; micha Pita yvt na palvmmi isht illa hi a̱ tikbanli im anoli.

15 Atuk o̱ impvt okla issa ma, Chisvs ash ot Saimon Pita ya̱, Saimon, Chonas ushi chia hvt is so̱ hullo kvt, ilvppa puta ka chim i̱ shahli cho? im achi ma, A̱hlishke, Chitokaka ma! chi̱ hullo li hoka chishno vt ish ithanvshke, im achi ma, An chukfvlhpoba ushi puta ka pehlichit ish ipihintashke, im achi tok. 16 Anonti atukla ma, Saimon, Chonas ushi chia hvt is sa̱ hullo cho? im achi ma, A̱hlishke, Chitokaka ma! chi̱ hullo li hoka, chishno vt ish ithanvshke, im achi tok: mihma, An chukfvlhpoba puta ka pehlichit ish ipihintashke, im achi tok. 17 Ont atuchina ma, Saimon, Chonas ushi chia hvt is sa̱ hullo cho? im achi ma; ont atuchina mak o̱, is sa̱ hullo cho? im achi hatuk o̱, Pita yash osh nukha̱klot taha tok. Yohmi mvt, Chitokaka ma! nan oklu̱ha ka ish ithanvshke, chi̱ hullo li hoka chishno vt ish ithanvshke, im achi tok. Mihma Chisvs vt, An chukfvlhpoba puta ka pehlichit ish ipihintashke, im achi tok. 18 A̱hlishke, a̱hli mak o̱ chim achi lishke, Chi himita mvto chishno inlit il ai vskofachechit, chishno ish ahni hosh kanima ish a̱ya beka tok: yohmi kia ont a chi sipokni hayokmvto, chibbak a̱ ish wakeli na inla hosh chi vskofachechi cha, kanima ish aiahni keyu kia, chisht a̱ya hi oke, im achi tok. 19 Ai illi kaniohmi ho̱ Chihowa ha̱ isht a holitoblicha he ak o̱, anoli hosh ilvppa anumpuli tok. Mihmvt ilvppa anumpuli mvt, Is siakaiyashke, im achi tok. 20 Mihma Pita yvt filemvt, nan-ithvna achvfa Chisvs vt holitobli chatuk opiaka impvt ma̱ya ka ikkishi ha̱ pit vtayvt a̱shvt, Chitokaka ma! chishit inla ibbak chi̱ fohki kvto, katima kak oh cho? achi tok ash osh awant a̱ya na pisa tok. 21 Pita yvt yvmma pisa mvt, Chisvs ash o̱, Chitokaka ma! yohmikmvno hatak ilvppak amo katiohma chi̱ cho? im achi tok. 22 Chisvs ash osh, Vno ak osh ahni li hokma, ilvppak okvt ahanta tuk o̱ vla la he, yvmmvt nanta isht chi ahalaia cho? Is siakaiyashke, im achi tok. 23 Yohmi ma itibapishi vhleha hvt, nan-ithvna yvmmvt ik illo ka he yatuk a̱, it im anolit ma̱ya tok; yohmi kia Chisvs vt, Yvmmvt ik illo ka hi a̱ i̱ miha tok keyu; amba vno ahni li hokma, ahanta tuk o̱ vla la he, yvmmvt nanta isht chi ahalaia cho? achi tok.

Chan vt ilap nana anohonli ka aia̱hli, micha Chisvs vt na fehna ka yvmihchi tok a̱, inla yvt lauvt a̱sha hosh ik holisso ka miha.

24 Nan-ithvna ilvppak a tok mak osh ilvppa puta ka atokoli cha, anonti yakohmi ka holissochi tok: yohmi ka yvmmvt nana atokolit anoli ka ai a̱hli ka il ithaiyanvshke. 25 Micha nana inla Chisvs vt a kaniohmi tok a̱ lauvt a̱sha, yvmmak osh momvt holisso hokma, holihi̱so kvt yakni ak oh kia holisso hvt ai itola hi vt iksho ka hinla, vm ahobvshke. Amen.