1

1 A 'a yic mantzac b'o smasnil tas, 'ayc' xon jun mach, Spaxti Dios sb'i. A jun cha, 'ayc' xon yet' Dios, caw a Dios. 2 A 'a yic mantzac syamch Dios sb'on yolyib'n̈q'uinl tic, 'ayc' xon jun chi yet'oc. 3 A yet' jun chi sb'ojnac can Dios smasnil tas. Yujto a jun chi 'ix mol b'on smasnil yet'oc. 4 Yu'uj 'ay qui q'uinlec qui masnil. A jun tz'a'n qui q'uinlec tic, tzyac' pax sacq'uinl 'a qui pixnec. 5 A jun sacq'uinl tic, tzyac' sacq'uinl 'a 'aj 'ay q'uic'q'uinal. Ax jun q'uic'q'uinl cha, matz tac' ya'n tup jun sacq'uinl tic. 6 'Ay jun win checb'il cot yuj Dios, Juan sb'i, atn win tz'a'w bautizar. 7 A wul ya'jnac testigoal sb'a yuj jun sacq'uinl cha, sec wach' tzann̈j mach tztac' ya'n 'och sc'ojl 'a jun sacq'uinl cha. 8 Man̈oc Juan chi caw sacq'uinal, ton̈j wulnc 'ec' yac' testigoal sb'a yu'uj. 9 A jun caw yel sacq'uinl yic Dios, wulnc 'ec' 'a yolyib'n̈q'uinl tic. A tz'a'n sacq'uinl 'a spixn smasnil 'anma'. 10 A jun Spaxti Dios cha, wulnc 'ec' 'a yolyib'n̈qiuinl tic. Caw b'ob'il yolyib'n̈q'uinl tic yu'uj. Palta a yic swulc 'emta, ma'ix nachj 'el yuj eb' 'anma', toto a'. 11 A 'a scal eb' yico', ata wulnc 'eq'ui, palta toxn man̈ chab'ilc yuj eb'. 12 Palta ax jantcn̈ej eb' tzchani, eb' tzya'ch sc'ojl 'a 'a, a tzalni to 'ay yaln eb' yic yoch yunnalc Dios. 13 A yic tz'och eb' yunnalc Dios, 'icha to tzat 'alj eb'. Palta man̈ lajnoc 'icha tz'aj yalj junc 'anma'. Man̈ yujoc tas tznib'j junc 'anma', tz'alj eb'. Man̈ yujoc tas tznib'j junc winac, palta a Dios tz'i'n 'och eb' yunnaloc. 14 A jun Spaxti Dios sb'i cha, 'ochnc 'anma'il. Wulnc 'ec' 'a qui calc jun tiempoal. A jun cha, caw yel. Niwn swach'c'ojlal Dios xwul sch'ox 'ayn̈ec. 'Ix quil on̈ caw niwn yel'chi, yujto cojxn jun chi Yunnal Dios, checb'il cot yuj Smam. 15 A Juan aljnac yab'xil jun cha, yic yaln 'ixtic: —'Ay jun tza'n sjaw wu'uj, caw 'ec'b'al yopiso 'a wib'an̈, yujto yic mantzac in 'alji, toxn 'ayq'ui. Tox 'ix wal yab'xil jun chi 'ayex, xchi. 16 A jun cha, caw tz'acn swach'c'ojlal. Yuj cha, tz'acn tzch'ox swach'c'ojlal chi 'ayn̈ec. 17 A Moisés yajnac can sley Dios 'ayn̈ec. Palta a Jesucristo tzch'oxn swach'c'ojlal Dios 'ayn̈ec. Tzya'n pax jun cuynb'il caw yel. 18 May junc mach 'ix 'iln Dios jun 'ejmoc. Palta a jun c'otn̈ Yunnal to Dios paxi, a ch'oxjnac 'eli. A Yunnal tic caw chamc'ojlb'il yu'uj. 19 A jun 'el, 'ay jun tzo'n̈ eb' israel 'aj Jerusalén, 'ix checn 'at jaywn̈ eb' ya'mal 'och sti eb' 'anma 'a Dios, yet' jaywn̈ eb' yin̈tl Leví. A 'a Juan Bautista, ata xc'och eb'. 'Ix sc'anb'n eb' 'ixtc 'a 'a: —¿Mach ach? xchi eb'. 20 'Ix yaln Juan chi 'a caw yel. Tojln̈ej xyutj yaln 'ixtc 'a eb': — An tic, man̈oc in Cristo in, xchi. 21 'Ix sc'anb'n pax eb' 'ixtc 'a 'a: —¿Machch jun? ¿Mto ach Elías ach? xchi eb'. —Man̈ ino'oc, xchi. —¿Mto ach schecb' ach Dios tan̈b'ilch cuj on̈? xchi eb'. —Ma'ay, xchi 'a eb'. 22 —¿Machch wal jun? Al 'ayn̈ on̈ mach ach, yujto yowlal 'oj 'at cal 'a eb' on̈ checn cot on̈. Al 'ayn̈ on̈ 'an, ¿tas aji? xchi eb' 'a 'a. 23 Yuj cha, 'ix yaln pax 'a eb' 'ixtic: — An tic, tzin 'awj 'a cusltac lu'um, tzwaln 'ixtic: B'oc junc sb'e Cajlil, caw tojl tzeyutj e b'on 'a 'a, xin chi. Yujto 'ixta yaj stz'ib'x can wab'xil yuj Isaías, atn jun schecb' Dios 'a pecti', xchi 'a eb'. 24 Ay jun tzo'n̈ xo eb' xitc' 'a Juan cha, atn ewin fariseo checjnac 'at eb'. 25 'Ix sc'anb'n pax eb' 'ixtc 'a 'a: —¿Tas yuj tzac' bautisar eb' 'anma', toto man̈toc Cristo ach, man̈ ach Eliasoc, man̈ ach schecb'oc pax Dios? xchi eb' 'a 'a. 26 Yuj cha, xyaln Juan chi 'a eb' 'ixtic: — An tic, tzwac' bautisar eb' 'anma 'a a a'. Palta 'ay jun mach 'a qui cal man̈ eyojcoc. 27 A jun cha, tza'n sjaw wu'uj, palta yel xo wal niwn yel'ch 'a wib'an̈. Yuj cha, man̈ in mojc wa'n servil, wach'xam ton̈j tzin jiyl sc'ab' xan̈b' 'a yoc, xchi Juan 'a eb'. 28 A 'a sc'axpil a niwn a Jordán 'a lugar Betania, ata xyac' bautisar Juan eb' 'anma'. Ata xit' sc'anb'c eb' jun tzo'n̈ tic 'a 'a. 29 Ax 'a junx c'u, 'ix yiln sb'a Juan to wan sc'och Jesús 'a 'a, yuj cha, xyaln 'ixtic: —'Iltec, a jun wan sjaw tic, 'icha yopiso junc quelm calnelu, 'ixta yopiso yuj Dios, yujto a tzwul 'i'nc 'el qui mulc qui masnil 'a yolyib'n̈q'uinl tic. 30 Atn jun tic xwal yuj 'ixtic: 'Ay jun tza'n sjaw wu'uj, palta 'ec'b'al yopiso 'a wib'an̈, yujto yic mantzac in 'alji, toxn 'ayq'ui, xin chi. 31 Ma'ix nachj 'el wu'uj, mach jun cha. Palta in jaw wac' bautisar eb' 'anma 'a a a', sec wach' 'oj nachjoc 'el cuj an̈ israel on̈c tic, mach jun cha, xchi Juan. 32 'Ix yaln pax Juan chi 'ixtic: —'Ix wil yeml Yespíritu Dios 'a yib'n̈ 'icha junc no parama, 'ix 'ochcn 'a 'a. 33 Ma'ix nachj 'el wu'uj, mach jun cha, palta a jun checjnacn cot wac' bautisar eb' 'anma 'a a a', a xaln 'ayn 'ixtic: Ach 'oj el yeml Wespíritu 'a yib'n̈ jun mach, ax yochcn 'a 'a. A jun chi 'oj 'a'nc 'och Wespíritu 'a eb' 'anma', 'icha to 'oj 'ajxc bautisar eb' yu'uj, xchi 'ayin. 34 An tic, 'ix wil jun cha. Yuj cha, tzwac' testigoal in b'a chajtlto a Jesús tic, caw yel Yunnal Dios, xchi Juan. 35 Ax 'a junx c'u, 'ayc' Juan yet' chawn̈ eb' scuywum. 36 Ax 'ix yiln 'ati, wan yec' Jesús. Yuj cha, xyaln 'ixtic: —'Iltec, a jun tz'ec' cha, 'icha yopiso junc quelm calnelu, 'ixta yopiso yuj Dios, xchi. 37 Yic 'ix yab'n eb' scuywum Juan jun cha, 'ix 'at 'och tza'n eb' yuj Jesús. 38 Ax Jesús cha, 'ix sutmj 'at q'ueln 'a spatic. 'Ix yilni to tza'n 'och eb' yu'uj, yuj cha, xyaln 'ixtc 'a eb'. —¿Tas tze saya? xchi 'a eb'. — Ach qui Cuymal on̈ i'ajm til 'ay atut ticnec? xchi eb' 'a 'a. 39 —Cotn̈ec, 'at quilc nab'an, xchi 'a eb'. 'Ix 'at eb' yet'oc, x'at yilnoc eb' 'aj 'ayq'ui. Yic xom 'a las cuatroil x'at eb', masnto 'a sq'uic'b'alil xjapx eb'. 40 A chawn̈ eb' cha, 'ix yab' eb' tas xyal Juan. Yuj cha, x'och eb' scuywumoc Jesús. 'Ay jun Andrés sb'i 'a eb', yu'tac sb'a yet' Simón Pedro. 41 Xlajwn̈ej sc'umn sb'a Andrés chi yet' Jesús, 'ix 'at saync 'ec' jun yu'tac cha. A yic 'ix 'ilchj yu'uj, 'ix yaln 'a 'ixtic: —'Ix 'ilchj jun Mesías cuj on̈, xchi 'a 'a. (A Mesías tzyal 'el'chi, Cristo.) 42 Yajn̈j cha, 'ix yi'n 'at jun yu'tac chi 'a Jesús. 'Ix 'och q'ueln Jesús 'a Simón cha, 'ix yaln 'ixtc 'a 'a: — Ach tic Simón ach, yunnal ach Juan. Palta Cefas 'oj a b'ioc, xchi Jesús. (A Cefas, tzyal 'el'chi, Pedro, mto q'ue'en.) 43 Ax 'a junx c'u, 'ix 'at Jesús 'a Galilea. Yic wan sb'eyi, 'ix chan sb'a yet' Felipe, xyaln Jesús 'a 'ixtic: —'Ochn̈ in cuywumoc, xchi 'a 'a. 44 A Felipe cha, 'aj chon̈b' Betsaida. 'Ixta pax Andrés yet' Pedro, junn̈j schon̈b' eb'. 45 Ax Felipe chi xit' saync 'ec' Natanael. Yic 'ix 'ilchj yu'uj, 'ix yaln 'a 'ixtic: —'Ay jun x'ilchj cuj on̈. Atn jun tz 'ib'b'il can yab'xil yuj Moisés 'a Ch'an̈ Un̈ yic ley, tz'ib'b'il can pax yuj eb' schecb' Dios pecti'. Atn Jesús yunnal José, 'aj chon̈b' Nazaret, xchi. 46 Yuj cha, xyaln Natanael 'ixtc 'a 'a: —¿Tom 'ay junc wach' tzcot 'a Nazaret cha? xchi 'a 'a. —Cotan̈, 'at quila', xchi Felipe chi 'a 'a. 47 Ax 'ix yiln 'at Jesús, wan sc'och Natanael 'a 'a. 'Ix yaln yuj 'ixtic: — A jun tzjaw tic, caw yel israel 'a sat Dios, may 'aj chab'sat tzyutj sb'a, xchi Jesús. 48 Yuj cha, 'ix sc'anb'n Natanael chi 'a 'ixtic: —¿Tas 'ix otj in ojcan 'eli? xchi. — A yic mantzac ach yawtj cot Felipe, ach wilni, 'aych 'ec' 'a yich jun te higo, xchi Jesús 'a 'a. 49 — Ach in Cuymal, yel Yunnal ach Dios. Sreyl ach eb' quit israelal, xchi. 50 —¿Cojn am yuj xwala to ach wil 'a yich jun te snun higo, yujn̈ej am cha, tza'n 'och a c'ojl 'ayin? Palta 'ayt jun tzo'n̈ xo milagro 'oj ela', yel xo wal niwn yel'chi, xchi Jesús 'a 'a. 51 'Ix yaln pax Jesús 'ixtc 'a eb' 'ayc' yet' cha: —Wal yel tzwal 'ayex, 'oj eyila', jacn satcha'an̈. Ax eb' yángel Dios, 'ay eb' tz'eml 'a in tz'ey, 'ay eb' tzpaxx q'ue'i, yujto 'Ochnc in 'Anma'il, xchi Jesús 'a eb'.

2

1 Schab'jil xo slajw jun cha, 'ix 'och jun nupnel 'a chon̈b' Caná 'a yol yic Galilea. Ax snun Jesús 'ix c'och ta'. 2 'Ix c'och pax Jesús yet' eb' scuywum, yujto 'awtb'il eb'. 3 Ax jun yal uva ma'ix 'e'ch 'a eb' 'anma cha. Yuj cha, xyaln snun Jesús 'a 'ixtic: —'Ix lajw jun yal uva tic, xchi. 4 —Nunin, ¿tas yuj a 'ayn tzala? Mantzac c'och stiempoal in ch'oxn 'el in poder 'a eb' 'anma', xchi Jesús. 5 Palta 'ix yaln snun chi 'ixtc 'a eb' tz'a'w servil cha: —Jantcn̈ej tas 'oj yal Jesús 'ayex, tze b'on̈ej, xchi 'a eb'. 6 Ata 'ayc' waque b'el yet'l a', 'ayam otcoc ch'ub' a tz'em 'a yojl jun jun. Ata tzq'uet a a tzc'an eb' yic tzb'icn 'el eb' jun tzo'n̈ tas, 'icha yaj sb'eyb'al eb' israel cha. 7 'Ix yaln Jesús 'ixtc 'a eb' tz'a'w servil cha: —'A'c b'ut'joc jun tzo'n̈ yet'l a tic yet' a a', xchi 'a eb'. Ax yic xlajw sb'ut'ji, 8 'ix yaln pax Jesús 'a eb' 'ixtic: — Al ticnec, lechc q'uet jab'oc, tzeya'n 'a win tz'a'n cuenta nupnel tic, xchi 'a eb'. Yuj cha, xya'n eb' 'a winac. 9 Ax yic xya'lni win yu'n jab' a cha, tox 'ix 'och yal uvail. Man̈ yojcoc winac, 'aj 'ix cot jun yal uva cha. Palta ax eb' tz'a'w servil cha, yojc eb', yujto a eb' 'ix lechn q'uet jun a cha. Ax win 'ix 'awtn cot jun win tznupn cha. 10 'Ix yaln win 'a win 'ixtic: — A sley eb' 'anma', a jun yal uva wach', a tzyac' eb' 'u'xoc b'ab'el. Ax 'a slajub', a jun yal uva tzyal wal yu'xi, a tzyac' eb'. Palta ach tic, xa mol jun yal uva wach'. Ax ticnec wanto a'n 'elt 'u'xoc, xchi win tz'a'n cuenta cha. 11 A jun milagro tic, sch'ox Jesús 'a chon̈b' Caná 'a yol yic Galilea. B'ab'l milagro jun chi 'ix sch'oxli. 'Ixta xyutj sch'oxni, to niwn spoder. Ax eb' scuywum, caw xya'ch eb' sc'ojl 'a 'a. 12 Xlajw xoj cha, x'at Jesús 'a chon̈b' Capernaum. 'Ix 'at pax snun, eb' yu'tac, yet' pax eb' scuywum yet'oc, ata xcan eb' jaye c'u. 13 Wan sjapx jun sq'uin̈ yic snanb'il cot yel eb' israel 'a libre. Yuj cha, 'ix c'och Jesús 'a Jerusalén. 14 'Ix c'och 'a yamq'uil yatut Dios. 'Ix yilni, 'ay eb' tzchon̈w wacax. 'Ay eb' tzchon̈w calnelu. 'Ay eb' tzchon̈w parama. 'Ay pax eb' jelm tumn wocn 'ejm ta'. 15 Ax yic 'ix yilni, 'ix sb'on jun ch'an̈ stz'umoc. 'Ix spechn 'elt eb' smasnil 'a yamq'uil yatut Dios, yet' scalnelu, yet' swacax. 'Ix sma'n pax 'elt tzicnjoc stumn eb' jelm tumn 'a sat smexa. Sma'n telwc pax jun tzo'n̈ smexa eb'. 16 'Ix yaln 'a eb' tzchon̈w parama 'ixtic: —¡'Ijec 'el jun tzo'n̈ noc' tic! A jun yatut in Mam tic, man̈ eya'ch plasil, xchi 'a eb'. 17 Ax eb' scuywum, 'ix snan cot eb' tas tzyal 'a Ch'an̈ U'un̈, 'a 'aj tzyal 'ixtic: Caw pitz'n 'och 'a in c'ojl in ya'iln atut, xchi. 18 Ax ewin 'aj Judea chi 'ix aln 'ixtc 'a 'a: —¿Tas junc milagro tza ch'ox 'ayn̈ on̈, sec cojc on̈ to 'ay aln ec a b'on jun tzo'n̈ tic? xchi ewinac. 19 Yuj cha, xyaln 'ixtc 'a ewinac: —Toto tze mac' lan̈chjoc jun yatut Dios tic, ax 'a yoxl c'u, ax sb'ox can wuj jun 'ejm xo, xchi 'a ewinac. 20 Yuj cha, xyaln pax ewin 'aj Judea chi 'ixtc 'a 'a: — A jun yatut Dios tic, 46 ab'il ya'jnac eb' yet'oc sb'o yuj eb'. Ach xo tic, ¿tom 'oj b'o oj 'a 'oxe c'u cha? xchi ewin 'a 'a. 21 A jun caw yatut Dios 'ix yal snan ewinac. Ticni a sniwnal 'ix yala. 22 Yuj cha, a yic 'ix pitzw pax 'a scal eb' chamnac, 'ixta to b'i'an, 'ix snan cot eb' scuywum tas 'ix yala. Yujto at wal ta 'ix ya'ch eb' 'a sc'ojol, yuj tas tz'ib'b'il can 'a Ch'an̈ U'un̈, yet' 'a tas yaljnac can Jesús 'a eb'. 23 A yic 'ayc' Jesús 'a Jerusalén yuj jun q'uin̈ cha, til wal eb' xya'ch sc'ojl 'a 'a, yujto xyil eb' jun tzo'n̈ milagro 'ix ch'oxo. 24 Palta ma'ix ya'ch Jesús yipc sc'ojl eb', yujto yojc xon snab'en smasnil 'anma'. 25 Man̈ yowlalc tzat alx 'a 'a, tas snab'en junc mach. Toxn yojtac tas 'ay 'a qui nab'en junjn on̈.

3

1 'Ay jun fariseo Nicodemo sb'i, yajl yaj 'a scal eb' yit israelal, yet' 'a eb' yit yajlil. 2 Ax 'a jun 'ac'wal, 'ix c'och 'a Jesús. 'Ix yaln 'ixtic: —Mamin, cojc on̈ to a Dios checjnacch cot wul on̈ a cuy on̈, yujto 'ay jun tzo'n̈ milagro tza ch'oxo. May junc mach tztac' sb'on 'ixta', toto matz 'och Dios yet'oc, xchi. 3 'Ix yaln Jesús 'a win 'ixtic: —Wal yel tzwal 'ayach, a mach matz 'alj pax 'a scha'ejmal, ma'oj stac' yoch 'a yol sc'ab' Dios, xchi. 4 — A junc 'ichm 'anma xo, ¿tast wal 'oj 'aj yalj pax 'a scha'ejmal? ¿Tom 'ojt stac' yochx 'a yol sc'ojl snun, ax yalj pax jun 'ejm xo? xchi Nicodemo. 5 —Wal yel tzwal 'ayach, a mach matz 'alj 'a a a', yet' yuj Yespíritu Dios, ma'oj stac' yoch 'a yol sc'ab' Dios. 6 A eb' tz'alj 'a snun, 'anman̈ej eb'. Palta ax eb' tz'alj pax yuj Yespíritu Dios, espíritu tz'aj 'el'ch eb'. 7 Man̈ sat a c'ojl yuj tas 'ix wala, to yowlal tzex 'alji yuj e chan jun q'uinl tzcot 'a satcha'an̈. 8 A 'ic', tz'atn̈j 'a 'aj tz'ati. Tzcab'c sc'an̈i, palta man̈ cojcoquec 'aj tzcoti, yet' 'aj tzc'ochi. 'Icha jun 'ic' cha, 'ixta pax eb' tz'alj yuj Yespíritu Dios, xchi Jesús 'a winac. 9 —¿Tas wal 'oj 'aj sb'o jun tzo'n̈ tic? xchi win 'a 'a. 10 Yuj cha, xyaln pax Jesús 'ixtic: —¿Tom mant ojcoc jun tzo'n̈ tic? Palta 'in caw cuywjum ach 'a scal eb' quit israelal si'mb'il. 11 Wal yel tzwal 'ayach, a tas cojc on̈, a tzcal on̈. A tas xquil yet' qui sat on̈, a chi tzcal 'ayx on̈. Palta ax tic, matz e chaj eyab' tas tzcal 'ayx on̈. 12 Toto matz e chaj eyab' tas tzwal 'ayx yuj tastc 'ay 'a yolyib'n̈q'uinl tic, ¿tom 'oj e cha pax eyab'i', toto tzwal 'ayx yuj tastc 'ay 'a satcha'an̈? 13 May junc mach 'ix xit' q'ue 'a satcha'an̈. Palta an tic, ata cotnc in, yujto 'Ochnc in 'Anma'il, 'aj satchan̈ in. 14 An tic, 'Ochnc in Anma'il, palta 'icha yutjnac Moisés st'win q'ue jun yechl chan 'a cusltac lu'um, 'ixta 'oj waj q'ue t'un̈n paxi. 15 'Ixta 'oj waji, sec wach' jantcn̈ej eb' tzin 'a'n 'och 'a sc'ojol, ma'oj satc' eb', palta 'oj scha eb' sq'uinl 'a jun 'ejmn̈ej. 16 Man̈ jantcoc schamc'ojlal Dios 'a eb' 'anma 'a yolyib'n̈q'uinl tic. Yuj cha, wach'xam jun c'otn̈ in an Yunnaln tic, in ya' coti, sec wach' jantcn̈ej eb' tzin 'a'n 'och 'a sc'ojol, ma'oj satcn 'el eb', palta 'ay sq'uinl eb' 'a jun 'ejmn̈ej. 17 An tic, Yunnaln ton Dios. Man̈ yujoc wa'n 'och syailal eb' 'anma', in ya'n cot 'a yolyib'n̈q'uinl tic, palta yuj in coln eb'. 18 A eb' tzin 'a'n 'och 'a sc'ojol, man̈x 'oj 'at eb' 'a yailal. Palta ax eb' matz in 'a'n 'och 'a sc'ojol, 'oj 'ochn̈j yailal 'a yib'n̈ eb'. Yujto cojxn in ton Yunnal Dios in, palta matz in ya'ch eb' 'a sc'ojol. 19 An tic, in 'eml 'a yolyib'n̈q'uinl tic wul wac' sacq'uinl 'a spixn eb' 'anma'. Palta 'ay pax eb' matz nibn̈ jun sacq'uinl tic. Yuj cha, 'oj cann̈j syailal eb' 'a yib'an̈. Cojn q'uic'q'uinl tznib'j eb' 'a spixan, yujto maysch'olnil tas tzb'o eb'. 20 Jantcn̈ej eb' tzb'on maysch'olnil, may yopiso jun sacq'uinl tic 'a sat eb'. Matz nib'j eb' tzcha'aj, yujto tzxiw eb' scheclj 'el jun tzo'n̈ maysch'olnil chi tzb'o cha. 21 Palta a eb' tzyiclni 'icha tzyal jun cuynb'il caw yel, tzchaj eb' jun sacq'uinl tic, sec wach' tzcheclj 'eli to 'aych Dios yet' eb' yuj tas tzb'o'o, xchi Jesús 'a Nicodemo cha. 22 Xlajw cha, x'at Jesús yet' eb' scuywum 'a yol yic Judea. Ata 'ix 'och wan jaye c'u yet' eb'. Ax eb' scuywum chi x'a'n bautisar eb' 'anma ta'. 23 An̈jtona Juan, 'ix 'a'w bautisar 'a jun lugar tzcuch Enón 'ay 'a stz'ey Salim, yujto til wal a ta'. 'Ix laj c'och eb' 'anma', xit' ya'nc 'ajxc bautisar sb'a eb' 'a 'a. 24 'Ix sb'o Juan jun tzo'n̈ cha, yic mantzac 'ajx 'och 'a preso. 25 Ay jaywn̈ eb' scuywum Juan 'ix stej sb'a yet' eb' israel, yuj tas tzyutj eb' 'anma sacb'tzan sb'a 'icha yaln ley. 26 Yuj cha, xit' yalnc eb' 'ixtc 'a Juan cha: — Ach qui cuymal on̈, a jun 'e'nc et' 'a sc'axpil 'ec' a Jordán, jun alcn 'ayn on, a jun cha, wan ya'n bautisar eb' 'anma ticnec. C'uxn tzlaj 'och eb' scuywumoc, xchi eb' 'a Juan cha. 27 Yuj cha, xyaln pax 'a eb' 'ixtic: —May junc mach tztac' scomn 'och yopiso, toto man̈oc Dios tz'a'n 'a 'a. 28 Ax tic, eyab'jnac walni to man̈ in Cristooc. An tic, ton̈j b'ab'l checb'iln coti. 29 Q'uinloc 'ay junc nupnel tz'och ticnec. A win tznupni, tzyi'n junc 'ix. Toto 'ay junc swach'c'ojl win 'ayc' yet' ta', caw tzalj yab'n tas tzyal win tznupn chi yet' 'ix 'ix cha. An̈jtona', 'ixta 'in tzalj ticnec, yujto wan yoch eb' 'anma scuywumoc Jesús. 30 A Jesús cha, yowlal yel xo 'oj niwtjoc chan̈ yopiso. An xo tic, c'ojnc'ojnil 'oj sat 'ejm wopiso, xchi Juan 'a eb' scuywum cha. 31 'Ix yaln pax Juan 'a eb' 'ixtic: — A jun 'emlnac 'a satcha'an, yajl yaj 'a yib'n smasnil 'anma'. An̈ xo 'aj yolyib'n̈q'uinl ohc tic, 'anman̈n̈ej qui masnil. An̈j wal tas yic yolyib'n̈q'uinl tic tzcalec. Palta ax jun 'emlnac 'a satchan̈ cha, yajl yaj 'a quib'n̈ec qui masnil. 32 A tas yab'jnac, yet' tas yiljnac, a tzyala, palta may wal mach tzchan 'ab'nc 'a 'a. 33 Toto 'ay eb' tzchan 'ab'nc 'a 'a, tzyac' testigoal sb'a eb' yu'uj, chajtlto caw yel tzyal Dios. 34 Yujto a jun cha, a Dios checjnac coti. Yuj cha, a spaxti Dios tzyala. A jun cha, tz'acn ya'jnac Dios Yespíritu 'a 'a. 35 Yunnal qui Mam Dios jun cha, chamc'ojlb'il yu'uj. Yuj cha, a Smam chi 'a'jnac 'och smasnil tas 'a yol sc'ab' yic tzya'n cuenta. 36 A eb' tzya'ch sc'ojl 'a Yunnal Dios, 'ay sq'uinl eb' 'a jun 'ejmn̈ej. Palta a eb' matz ya'ch sc'ojl 'a 'a, ma'oj scha eb' sq'uinl 'a jun 'ejmn̈ej. 'Ay cot yowl sc'ojl Dios 'a yib'n̈ eb'.

4

1 'Ix yab'n eb' fariseo yab'xil to 'ec'b'al sb'isl eb' scuywum Jesús 'a yib’n̈ eb' yic Juan. 'Ec'b'al pax eb' x'ajx bautisar yu'uj. 2 Palta man̈oc Jesús xcaw 'a'n bautisar eb', a eb' scuywum. 3 Yic 'ix yab'n Jesús to yojc eb' fariseo jun cha, 'ix meltzj 'a Judea, 'ix 'atx 'a Galilea. 4 Yowlal a 'a yol yic Samaria tz'eq'ui yic tz'at cha. 5 Yuj cha, yic wan yec' Jesús 'a yol yic Samaria cha, 'ix c'och 'a chon̈b' Sicar. Ata 'ay jun chon̈b' chi 'a stz'ey jun lum ya'jnac can Jacob 'a jun yunnal José sb'i. 6 Ata 'ay jun a joyb'il can yuj Jacob. Ax Jesús, tecn chimc'ul 'ix c'och ta'. Yujto 'ix c'unb' sb'eyi, yuj cha, 'ix 'em wocn 'a sti jun a cha. 7 Ax eb' scuywum, 'ix 'at eb' sman jac yic schimc'ul 'a jun chon̈b' 'ay 'a sla'nil jun a cha. Ax yic tox 'ix 'at eb', 'ix c'och jun 'ix 'ix 'aj Samaria 'at yic' q'uet ya'al. 'Ix yaln Jesús 'a 'ix 'ixtic: —'Ac' wal wuc' jac al tic, xchi 'a 'ix. 9 — Ach tic, 'in israel ach. ¿Tas yuj tza c'an a a tic 'ayin? ¿Tom man̈ ojcoc to 'aj Samaria in? xchi 'ix 'a Jesús. 'Ixta xyutj 'ix yaln 'a 'a, yujto a eb' israel, may 'ajtil tzc'umj xon sb'a eb' yet' eb' 'aj Samaria cha. 10 Xlajw cha, xyaln pax Jesús 'ixtc 'a 'ix: —Tzin c'an wuc' jac a 'ayach, palta man̈ ojcoc mach in. Man̈ ojcoc pax tas tznib'j Dios tzyac'a. Comnoc ojtac. Toto 'ixta', ach xo tic, xa c'an 'ayin, an xo xwac' jun a tz'a'n a q'uinal, xchi Jesús 'a 'ix. 11 — Ach winac, 'in may a lechlab' tzac' lechnc q'uet a'. Caw xab' yaj 'ejm a'. ¿ Ajm til 'oj ec' jun a 'oj ac' 'a'nc in q'uinl cha? 12 A qui mam 'ichm Jacob on̈, a 'u'jnac a yet' eb' yunnal 'a tic, yet' jun tzo'n̈ scajb'en noc'. A yic schami, xcan jun a tic 'ayn̈ on̈. Ach xo tic, ¿tom 'ec'b'al opiso 'a Jacob cha? xchi 'ix 'a 'a. 13 Yuj cha, xyaln pax Jesús 'ixtc 'a 'ix: —Tzann̈j mach tz'u'n jun a tic, tz'ochx stacn̈til eb' jun 'ejm xo. 14 Palta ax eb' tz'u'n jun a tzwac'a, man̈x b'a'n̈ 'oj cot stacn̈til eb' jun 'ejm xo. Yujto a jun a tzwac' tic, 'oj 'aj sjaj a 'a eb', ax ya'n a sq'uinl eb' 'a jun 'ejmn̈ej, xchi Jesús 'a 'ix. 15 — Ac' jun a chi 'ayn 'an, sec man̈x 'oj tacjoc in ti'. Toto 'ixta', man̈x yowlalc tzwul wic' q'uet jun a tic, xchi 'ix. 16 —'Ixic, 'at 'ij cot win echmil, tzex jaw 'a tic, xchi Jesús 'a 'ix. 17 Palta may wichmil, xchi 'ix. —Yel ton tzala may echmil ticnec. 18 Palta 'in own̈ xo echmil 'aj ach 'eq'ui. Ax jun 'aj 'aych 'ec' pax ticnec, man̈ echmiloc toni. Yuj cha, yel ton tzal 'ayin may echmil, xchi Jesús 'a 'ix. 19 Xlajw yab'n 'ix jun tzo'n̈ cha, xyaln pax 'ix 'a 'ixtic: — Ach winac, schecb' ach Dios tzwab'i. 20 A eb' qui mam quichm an̈ 'aj Samaria on̈ tic on̈, a 'a jun witz tic wul yaljnac sb'a eb' 'a Dios. Palta ax xo israel ex tic, tzeyal 'ixtic: A 'a Jerusalén, ata yowlal tz'at calc qui b'a 'a Dios, xe chi, xchi 'ix. 21 'Ix yaln pax Jesús 'a 'ix: — Ach 'ix, 'a'ch a c'ojl 'a tas 'oj wal 'ayach. 'Ay jun tiempoal 'oj jawoc, man̈xoc 'a jun witz tic 'oj wul eyal e b'a 'a qui Mam Dios, an̈jtona', man̈x yowlalc 'oj e 'at 'a Jerusalén. 22 Ax 'aj Samaria ex tic, tzcob' eyal e b'a 'a Dios, palta man̈ eyojcoc Dios cha. Aln̈ an̈ israel on̈ tic on̈, caw cojc qui Diosal 'aj tzcal qui b'a on̈. A 'a qui cal on̈, ata 'oj 'eltc jun Colwjum. 23 'Ay eb' a 'a qui Mam Dios tzyal sb'a wal 'a yel. Al ticnec, tox 'ix jaw stiempoal 'oj yal sb'a eb' 'a caw yel, 'a 'esal. Yujto a qui Mam Dios, tznib'ej to 'ixta tzyutj eb' yaln sb'a 'a 'a. 24 A Dios Espíritu, yuj cha, toto 'ay mach tzyal sb'a 'a 'a, yowlal tzyal sb'a eb' wal 'a yel, 'a 'esal, xchi Jesús 'a 'ix. 25 'Ix yaln pax 'ix 'a 'ixtic: — Aln tic, wojtac 'ay jun Mesías sb'i, tzyal 'el'chi atn Cristo 'oj jawoc. A yic 'oj jawc jun cha, tojln̈ej 'oj yutc yaln smasnil tas, xchi 'ix 'a 'a. 26 — An ton tic wan in paxtin 'aych tic, xchi Jesús 'a 'ix. 27 Wal slajw yaln Jesús jun tzo'n̈ cha, 'ix c'ochx eb' scuywum. Caw 'ix sat sc'ojl eb' yilni, to wan spaxtin Jesús yet' jun 'ix cha. Palta may junc eb' 'ix c'anb'n 'a 'a, tas tznib'j tzc'anb'j 'a 'ix, tas yuj tzpaxtin yet' 'ix. 28 Ax jun 'ix cha, 'ix yactn can sch'ub' 'a sti a cha. X'at yalnc 'ix 'a eb' 'anma 'ay 'a yol chon̈b' cha. 'Ix yaln 'ix 'a eb' 'ixtic: 29 —'Ay jun winac, cuxn yojtac tastc tzin b'o'o, yictax in cottch 'a yune'al. C'uxn xyal win 'ayn smasnil. Coyc wet'oc, 'at quilc nab'an. Tope laj to a jun Mesías, xchi 'ix 'a eb'. 30 Yuj cha, 'ix 'elt eb' 'a yol chon̈b' cha. Xjaw eb' 'a 'aj 'ayc' Jesús. 31 Yic mantzac c'och eb', 'ix yaln eb' scuywum 'ixtc 'a 'a: —Mamin, wan̈ jab'oc, xchi eb'. 32 — Ay wo'och, palta man̈ eyojcoc, xchi 'a eb'. 33 Yuj cha, xlaj sc'anb'noc 'ec' eb' 'a scal: —¿Tom 'ay mach xwul 'a'noc yoch cha? xchi eb'. 34 Palta xyaln pax 'ixtc 'a eb': —Caw tzin nib'j tzin b'o tas tznib'j jun checjnacn coti, masnto tzin laj smunljel ya'jnac 'ayin. A yic tzin b'on jun cha, 'icha to ata tzin wa'i. 35 Ax tic, tzeyal 'ixtic: Chan̈e to 'uj sjaw stiempoal jach'oj, xe chi. Palta an tzwal 'ayex: 'Iltec, tox 'ix jaw stiempoal jach'oj. Palta wan waln yuj eb' tot 'oj in chani. 36 'Ay eb' 'e'nc xo munljoc 'a scal eb', 'icha junc 'awm 'in̈at. 'Ay pax eb' tzmunlj 'icha junc jach'm 'a scal eb', sec 'oj scha eb' 'anma chi sq'uinl 'a jun 'ejmn̈ej. Ax eb' tzmunlj cha, c'uxn 'oj scha eb' spac jun smunljel cha, sec wach' lajnn̈ej 'oj tzaljc eb' munljum chi smasnil. 37 Yujto yel tzyal jun 'ab'x tic: 'Ay eb' 'awum. Chuc pax eb' jach'um, xchi. 38 An tic, ex in checb't munljoc 'a scal eb' 'anma 'icha junc jach'um. Palta man̈oc ex ex b'ab'l munlj 'a scal eb'. Chuc eb' b'ab'l munljnac 'a scal eb' 'icha junc 'awum. Ax xo tic, 'icha to 'oj e jach' smunljel eb' cha, xchi Jesús 'a eb'. 39 A 'a jun chon̈b' 'ay 'a yol yic Samaria cha, til wal eb' xya'ch sc'ojl 'a Jesús, yujto xyal jun 'ix chi 'ixtc 'a scal eb': C'uxn yojtac tastc tzin b'o'o, yictax in cottch 'a yune'al, 'ix yal 'ayn smasnil, xchi 'ix 'a eb'. 40 Yuj cha, 'ix wul tewc 'och eb' 'a Jesús sec tz'och wan yet' eb'. Chab' c'u 'ix 'och wan yet' eb'. 41 Til to wal eb' xya'ch sc'ojl 'a 'a, yic xyab'n eb' tas 'ix yala. 42 Yuj cha, xyaln eb' 'a jun 'ix chi 'ixtic: — A 'a b'ab'el, 'ix ca'ch qui c'ojl 'a Jesús oj on̈, yuj tas 'ix al 'ayn̈ on̈. Ax ticnec, caw a Jesús 'ix aln 'ayn̈ on̈. Yuj cha, xqui wach' 'a'n 'och qui c'ojl 'a ticnec on̈. Caw cojc on̈, to a Jesús cha, caw yel qui Colmalec qui masnil 'a yolyib'n̈q'uinl tic, atn jun tan̈b'il sjaw cujec, xchi eb' 'a 'ix. 43 Xlajwn̈ej chab' c'u cha, 'ix 'atx Jesús yic tz'at 'a Galilea. 44 Yujto yaljnacx cani, chajtlto may yel'ch junc schecb' Dios 'a sat eb' yit chon̈ab'. 45 Yic xc'och 'a Galilea cha, caw tzaljc'ojlal schaj eb' 'anma sc'och ta', yujto xit' yil eb' q'uin̈ 'a Jerusalén, atn snanb'il cot yel eb' israel 'a libre. Ata yiljnac eb', to til wal tas xit' sb'ojnac Jesús chi ta'. 46 Ax Jesús 'ix c'ochx 'a chon̈b' Caná, 'a yol yic Galilea cha. Ata 'ec' yajnac 'och jun a yal uvail. Ax 'a chon̈b' Capernaum, ata 'ay jun win capitan̈ caw ya'ay jun yunnal. 47 'Ix yab'n winac, to 'ix cotx Jesús 'a Judea, 'ix c'ochx 'a Galilea cha. Yuj cha, x'at sc'umnoc winac. 'Ix tew 'och wal win 'a 'a, sec toq'ue tz'at Jesús yet' win 'a yatut, tz'at ya'n b'oxc sc'ojl jun yunnal win cha, yujto caw jab'xoj schami. 48 Palta xyaln Jesús 'ixtc 'a winac: —Q'uinloc matz eyil jun tzo'n̈ milagro, jun tzo'n̈ tzch'oxn 'el in poder, toto 'ixta', matz eya'ch e c'ojl 'ayin, xchi 'a winac. 49 Palta xyaln pax win capitan̈ chi 'ixtc 'a 'a: —Mamin, caw con̈ wet' muc'uc, ya' sb'a pitznto jun wunnal cha, xchi win 'a 'a. 50 —Paxan̈, ma'oj cham jun onnal cha, xchi 'a winac. —'Ix ya'n 'och win sc'ojl 'a tas 'ix yal Jesús, yuj cha, 'ix pax winac. 51 Wan s'atx win 'a yol b'e, 'ix chan sb'a win yet' eb' smajn tzmunlj 'a 'a. 'Ix yaln eb' 'ixtc 'a winac: —Tox 'ix jaw sc'ojl jun onnal cha, xchi eb' 'a winac. 52 —¿Janc' wal jun 'ix b'ox sc'ojol? xchi winac. — At xo 'ew b'ox sc'ojol, a 'a yic 'a la una sicb' jun c'ac' chi 'a 'a, xchi eb' 'a winac. 53 Yuj cha, 'ix snan cot winac, to 'ixta yorail xyal Jesús 'a win 'a yewial cha. Yic yaln 'ixtic: Ma'oj cham jun onnal cha, xchi 'a winac. Yuj cha, xya'n 'och win sc'ojl 'a Jesús, yet' jantcn̈ej eb' 'ay yet' 'a yol yatut cha. 54 A jun tic, schab'l milagro 'ix sch'ox Jesús yic 'ix cot 'a Judea, 'ix c'ochx 'a Galilea.

5

1 Xlajw cha, 'ix 'atx Jesús 'a Jerusalén, x'at yilnoc jun sq'uin̈ eb' yit israelal. 2 A 'a yol jun chon̈b' cha, ata 'ay jun tanque Betesda sb'i 'a hebreo, atn sti eb' israel. A 'a sti jun tanque cha, ata 'ay o'e ha may yich. 'Ayc' jun tanque chi 'a sla'nil jun puerta 'aj tzb'ey no calnelu. 3 Til wal eb' palta yaj 'ayc' 'a yojol. 'Ay eb' matz uj yilni. 'Ay eb' coxo. 'Ay pax eb' sicb'nac 'eli. [To tztan̈wj eb' yib'x jun a cha. 4 Yujto 'ay 'aj tzwulc' 'emt jun ángel 'a jun a cha, tzwul ya'n 'ib'xoc a'. An̈j junc tzb'ab'l 'ejm 'a yojl a', an̈j tzb'ox can sc'ojl yuj tzann̈j tas palta yaj 'a 'a.] 5 Ata 'ay jun winac, 38 ab'il xo sjuw cani. 6 Ax yic x'ec' Jesús, 'ix yilni c'otn 'ec' winac. Yojc Jesús chajtlto najtl xo tiempo 'ixta yaj winac. Yuj cha, 'ix sc'anb'n 'a win 'ixtic: —¿Tzam a nib'j tzach b'oxi? xchi 'a winac. 7 —Comnoc wal tztac' Mamin, palta a yic tz'ib'x jun a tic, may mach tzcolwj in ya'n 'ejm jac 'a yojl a'. 'A junjn 'ejem, mun tzcob' wa'lc in 'at 'a yojl a', palta chucx eb' tzb'ab'l 'ejm pax mu'c 'ayin, xchi win 'a Jesús. 8 Yuj cha, xyaln Jesús 'ixtc 'a winac: —Q'uen̈ wa'an, 'ij chan̈ a waynub'. B'eyah, xchi 'a winac. 9 Yajn̈j wal cha, 'ix b'ox sc'ojl winac. 'Ix yi'n chan̈ win swaynub', 'ix b'ey winac. Palta sc'ul 'iljelal jun c'u cha. 10 Yuj cha, 'ay jaywn̈ ewin 'aj Judea xaln 'ixtc 'a win xb'ox cha: — A ticnec, caw sc'ul 'iljelal. Caw may sleyl tza cuchb't a waynub' tic, xchi ewin 'a winac. 11 — A jun in 'a'n b'oxoc, a 'ix aln 'ayn 'ixtic: 'Ij chan̈ a waynub', b'eyan̈, xchi 'ayin, xchi winac. 12 Yuj cha, 'ix sc'anb'n ewin 'ixtc 'a winac: —¿Mach jun chi 'ix aln 'aych cha, tze'n chan̈ a waynub', yic tzach b'ey cha? xchi ewinac. 13 Palta man̈ yojcoc winac tas sb'i jun chi x'a'n b'oxc winac, yujto til wal 'anma 'ayc' ta'. Yuj cha, ma'ix yil winac 'aj xc'och Jesús 'a scal eb' 'anma chi muc'uc. 14 At 'a jun 'ejm xo, 'ix sc'umn sb'a Jesús yet' win 'a yamq'uil yatut Dios, 'ix yaln 'ixtc 'a winac: —'Ab'i, a ticnec 'ix b'ox a c'ojol. Man̈x a b'o junc maysch'olnil, sec man̈x 'oj jawc jun niwn yailal 'a eb'an̈, xchi 'a winac. 15 Yuj cha, 'ix 'atx win 'at yal 'a ewin 'aj Judea cha, chajtlto a Jesús chi x'a'n b'oxc winac. 16 Yuj cha, caw x'och ewin 'ajc'ojlal 'a Jesús cha. ['Ix cob' snib'c ewin smil chamoc,] yujto sc'ul 'iljelal 'ix sb'o jun tzo'n̈ cha. 17 Palta xyaln Jesús chi 'a ewin 'ixtic: — A 'in Mam, may 'aj tz'och wan smunlji. Yuj cha, an̈jan̈ej in munlj pax an tic, xchi 'a ewinac. 18 Yic xyaln Jesús jun tzo'n̈ cha, yel xo wal caw snib'j ewin smil chamoc. Man̈ yujochej matz yiclj sc'ul 'iljelal, palta yujto 'ix yal Dios Smamoc. 'Ix yaln paxi to caw lajn yet' Dios. 19 'Ix yaln pax Jesús 'a ewin 'ixtic: —Wal yel tzwal 'ayex, an Yunnaln Dios tic, may tas tztac' in b'on in ch'ocoj. Cojn tas tzwil sb'on in Mam, an̈j tzin b'o'o. Jantcn̈ej tas tzb'o in Mam cha, a tzin b'o paxi. 20 A 'in Mam cha, tzin schamc'ojlej an Yunnaln tic. Jantcn̈ej tas tzb'o'o, tzch'oxn̈j pax 'ayin. 'Ayt wal jun tzo'n̈ xo tas 'oj sch'oxo', sec 'oj sat e c'ojl eyilni. 21 Yujto a 'in Mam cha, tztac' ya'n pitzwc pax eb' chamnac, tzya'n sq'uinl eb'. 'Ixta pax in an Yunnaln tic, toto 'ay eb' tzin nib'j tzwac' sq'uinal, 'oj wac'a'. 22 A 'in Mam, matz b'eyc'ojlej junc 'anma'. Palta an Yunnaln tic, an ya'jnac wopiso in b'eyc'ojlan eb' smasnil. 23 'Ixta yutjnac in Mam ya'n wopiso an Yunnaln tic, sec wach' lajn wel'ch yet' in Mam chi 'a sat smasnil 'anma'. Toto 'ay eb' may wel'ch 'a sat, an̈jtona', may yel'ch pax in Mam 'a sat eb', yujto a checjnacn coti. 24 Wal yel tzwal 'ayex, a eb' tz'ab'n in paxti', tzya'n 'och eb' sc'ojl 'a jun checjnacn coti, atn eb' chi 'ay sq'uinl 'a jun 'ejmn̈ej. Man̈x 'oj 'at eb' 'a yailal, yujto tox 'ix 'el eb' 'a yol sc'ab' chamel, 'ix schaj eb' sq'uinal. 25 Wal yel tzwal 'ayex, a ticnec, tox 'ix jaw stiempoal yab'n eb' chamnc in jaj an Yunnaln Dios tic. A eb' tzyiclni, atn eb' 'oj scha sq'uinal. 26 Yujto a 'in Mam, 'ay spoder ya'n sq'uinl eb' 'anma'. Ya'jnac can pax jun spoder chi 'ayn an Yunnaln tic. Yuj cha, an̈jtona 'in, tztac' wa'n pax squinl eb'. 27 Ya'jnac can pax in poder in b'eyc'ojlan smasnil 'anma', yujto 'Ochnc in 'Anma'il. 28 Man̈ eyac' sat e c'ojl yuj jun tzo'n̈ tzwal 'ayx tic. Yujto 'ay jun tiempoal 'oj jawoc, a wal eb' mucb'ilx xo, 'oj yab' eb' in jaj, 29 ax sq'ue paxt eb'. A eb' wach' 'e'nc 'a yolyib'n̈q'uinl tic, 'oj pitzwc pax eb', ax schan eb' sq'uinl 'a jun 'ejmn̈ej. Ax eb' maysch'olnil 'ec' yutjnac sb'a, 'oj pitzwc pax eb' jun xo, palta 'oj 'atcn eb' 'a yailal 'a jun 'ejmn̈ej. 30 An tic, may junc tas tztac' in b'on in ch'ocoj. 'Icha tzyal in Mam 'ayin, 'ixta tzwutj in b'eyc'ojlani. Caw wach'n̈j tzwutj in b'eyc'ojlani, yujto matz in b'o 'icha tzin nib'j an tic, palta an̈j 'icha tznib'j jun checjnacn coti, atn in Mam. 31 Toto mun tzwala to 'ay wopiso, may yel'ch jun wic chi tzwala. 32 Palta 'ay junx tzalni tas wopiso. A jun cha, wojtac to caw yel tzyal wu'uj. 33 Ax tic, xit' eya' c'anb'xoc 'a Juan Bautista tas wopiso. A tas yaljnac vvu'uj, caw yel tzyala. 34 Palta an tic, matz wa'ch yipc in c'ojol tas tzyal junc 'anma wu'uj. Ton̈j tzwac' e na coti, tas yaljnac Juan 'ayex, sec toq'ue 'oj e colchji. 35 A Juan cha, 'icha junc tziclab'il taj caw 'ay yoc, 'ixta yeq'ui. Yuj cha, ex tzalj jaye c'u yet'oc. 36 Palta 'ay junx 'ec'b'al yel'ch 'a yib’n̈ Juan cha. A tzch'oxn 'eli tas wopiso. Yujto a jun tzo'n tas tzyac' in Mam in b'o', a tzin b'o'o. 'Ixta tz'aj scheclj 'eli, to a 'in Mam chi checjnacn coti. 37 A 'in Mam cha, a checjnacn coti, a tzyac' testigoal sb'a wu'uj. Ax tic, may jun 'ejmoc xeyab' sjaj spaxtini. May 'aj xeyil jun 'ejmoc. 38 Ma'ix eya'ch e nab'en 'a spaxti', yujto matz eya'ch e c'ojl 'ayn an checb'iln cot yuj tic. 39 Yelc'ojlal tze cuy ton Ch'an̈ Un̈ tz'ib'b'il cani, yujto tze na'a, to ata 'oj 'ilchjoc e q'uinl 'a jun 'ejmn̈ej. Palta wach'xam tzyal Ch'an̈ Un̈ chi wab'xil, 40 matz e nib'j tzex jaw 'ayin, yic tze chan e q'uinl cha. 41 Matz in nib'j to 'ay wel'ch 'a sat eb' 'anma'. 42 Ax xo tic, wojtac tas yaj e nab'en, to may e chamc'ojlal 'a Dios. 43 An tic, checb'iln cot yuj in Mam, palta 'in matz eya'ch e c'ojl 'ayin. Toto 'ay junc xo mach mun 'oj jawc 'a yol yico', atn 'a jun chi 'oj eya'ch e c'ojol. 44 Toto an̈j 'a e sat junjn ex tze nib’j 'ay eyel'chi, toto matz e nib'j 'ay eyel'ch 'a sat Dios jun caw yel, ¿tom 'oj stac' eya'n 'och e c'ojl 'a 'a? 45 Xe natlaji, to an 'oj ex wac' queja 'a in Mam. Yujto 'ay junx 'oj eya'n queja 'a 'a, atn Moisés, jun tzeya'ch cob' yipc e c'ojol. 46 Octom xeya'ch e c'ojl 'a tas stz'ib'jnac can Moisés cha. Toto 'ixta', xeya'ch e c'ojl 'ayin, yujto a tz'ib’jnac can wab'xil. 47 Toto matz eya'ch e c'ojl 'a tas stz'ib'jnac can cha, ¿tast wal 'oj eyutc eya'n 'och e c'ojl 'a tas tzwal 'ayex? xchi Jesús 'a ewin 'aj Judea cha.

6

1 Xlajw cha, 'ix 'at Jesús, 'ix c'ochx 'a junx sc'axpil 'ec' sti a mar yic Galilea. A jun a cha, Tiberias pax sb'i. 2 Til wal eb' 'anma x'och tza'n yuj Jesús, yujto xyil eb' jun tzo'n̈ milagro sch'oxo yic xya'n b'oxc sc'ojl eb' ya'ay. 3 Ax Jesús cha, 'ix 'at yet' eb' scuywum 'a jun tzalan. Ata x'em wocn yet' eb'. 4 Wan sjapx stiempoal sjaw jun q'uin̈ yic snanb'il cot yel eb' israel 'a libre. 5 Ax yic xyiln Jesús, til wal 'anma wan sc'och 'a 'a, xyaln 'a Felipe 'ixtic: —¿'Aj wal 'oj qui man yoch eb' 'anma tic? xchi 'a 'a. 6 Palta ton̈j xyal 'ixta', sec tzyab'i tas 'oj yal Felipe chi 'a 'a, yujto yojc xoni tas 'oj sb'o'. 7 Ax Felipe cha, 'ix yaln pax 'a 'ixtic: —Wach'xam 'ay chab'oc ciente denario pan 'ayon̈, palta matz yab' 'e'ch ca'n junjnoc yic eb' smasnil, xchi. 8 'Ay pax junx scuywum Jesús Andrés sb'i, yu'tac sb'a yet' Simón Pedro. 'Ix yaln 'ixtc 'a Jesús. 9 —'Ay jun win 'unn 'ayc' 'a tic, yet' o'e span cebada, yet' chac'otn̈ schay. Palta ¿tom 'oj 'e'choc jab' tic 'a scal eb' smasnil? 'In caw niwn eb', xchi 'a Jesús. 10 Xlajw cha, 'ix yaln Jesús 'ixtc 'a eb' scuywum: — Alc 'a eb' 'anma tic, to tz'em wocn eb' smasnil, xchi 'a eb'. A jun 'aj 'ayc' eb' cha, caw niwn 'alic. 'Aym o'e'oc mil eb' winc 'ix 'em wocn ta'. 11 Ax Jesús, 'ix syamn chan̈ 'ixm pan cha. 'Ix ya'n yuj diosal 'a Dios yuj 'ixim. 'Ix spojn 'ec' 'ixm 'a eb' scuywum. Ax eb' x'ec' 'a'noc 'ixm 'a eb' x'em wocn cha. 'Ixta xyutj pax no chay cha. Caw colb'il 'ix 'e'ch 'a eb' smasnil. 12 Ax yic xlajw swa eb' si'mb'il, 'ix yaln Jesús 'a eb' scuywum chi 'ixtic: —'Ec' chajec can pax smasnil tas 'ix yac' sobra, sec may tas 'oj 'ixtxoc, xchi 'a eb'. 13 Yic 'ix lajw schan can pax eb', 'ix b'ut'j can pax lajchwe xuc pan chi xyac' sobra 'a o'e pan cebada cha. Palta caw 'ix wa eb' smasnil. 14 Ax eb' 'anma cha, c'uxn 'ix yil eb' jun milagro chi 'ix sch'ox Jesús. Yuj cha, xyaln eb' 'ixtic: — Atn jun schecb' Dios tic tan̈b'il xon sjaw 'a yolyib'n̈q'uinl tic, xchi eb'. 15 Palta yojc Jesús to tznib'j eb' syama', tzya'n pural eb' ya'n 'och sreyloc. Yuj cha, 'ix yi'n 'el sb'a 'a scal eb', 'ix 'atx 'a jun tzaln chi sch'ocoj. 16 Ax yic wan sq'uic'b'i, 'ix c'ochx eb' scuywum Jesús 'a sti a mar. 17 'Ix 'ochx eb' 'a yol barco, 'ix 'atx eb'. Yujto tznib'j eb' tzc'axw 'ec' 'a chon̈b' Capernaum 'a sti a mar cha. Tox 'ix caw q'uic'b'i yic 'ix 'at eb'. Ax Jesús, mantzac japx 'a eb'. 18 A yic wan sb'ey eb', 'ix pitzw chan̈ jun 'ic' 'a yib'n̈ a mar cha. Caw ow yeq'ui. Ax a mar cha, caw chan̈ tzq'ue wan chel-loc a sma'n chan̈ jun 'ic' cha. 19 A yic tox 'ix 'at am eb' junc nan̈l schab'l legua, 'ix yiln can paxt eb', to wan sc'och Jesús 'a eb'. Mun tzb'eyb't yet' yoc 'a yib'n̈ a'. Yuj cha, caw 'ix xiw chan̈ eb'. 20 Palta xyaln 'a eb' 'ixtic: — An Jesús in. Man̈ ex xiwoc, xchi 'a eb'. 21 Yuj cha, 'ix caw tzalj eb'. 'Ix chan 'och eb' yet' 'a yol te barco cha. Waln̈ej 'a mu'c cha, 'ix c'och eb' 'a sc'axpil 'ec' a mar 'aj tz'at eb' cha. 22 Ax 'a junx c'u, an̈ja 'aycn eb' 'anma chi 'a sc'axpil 'ec' a mar cha. Ax 'ix snan cot eb', to cojn jun barco chi x'ati. 'Ix yiln pax eb', to cojn eb' scuywum Jesús x'at 'a yojol. May 'aj x'och Jesús chi yet' eb'. 23 Palta 'ay jun tzo'n̈ barco xcot 'a chon̈b' Tiberias, 'ix c'och 'a stz'ey jun lugar chi 'aj 'ix swaj eb' 'ixm pan, yic 'ix ya'n Cajlilec yuj diosal yu'uj. 24 Ax 'ix yiln cot sb'a eb' 'anma cha, man̈x 'ayc 'ec' Jesús chi yet' eb', yet' pax eb' scuywum, man̈x 'ayc 'ec' pax eb'. Yuj cha, 'ix 'och eb' 'anma chi 'a yol jun tzo'n̈ barco cha. 'Ix 'at saync 'ec' eb' 'a chon̈b' Capernaum. 25 Ax yic xc'och eb' 'anma chi 'a sc'axpil 'ec' a a cha. Atta 'ix 'ilchj Jesús yuj eb'. 'Ix sc'anb'n eb' 'a 'ixtic: — Ach qui Cuymal on̈, ¿tom a tic 'aych 'eq'ui? ¿Janic' ach jawi? xchi eb' 'a 'a. 26 Xta'w Jesús 'a eb' 'ixtic: —Wal yel tzwal 'ayex, yujn̈ej to xb'ut'j e c'ojl wa'n e wa pan, yuj cha, tzin wul e saync pax 'eq'ui, man̈ yujoc xnachj 'el eyu'uj tas tzyal 'el'ch jun tzo'n̈ milagro xin ch'oxo. 27 Man̈oc 'a jun tzo'n̈ tas tzqui c'uxu, man̈oc tzeya'ch e nab'en e sayn 'eq'ui, yujto ton̈j 'e'lb'a yec' jun tzo'n̈ cha. 'Ayt wal junx tas 'icha to tzqui c'uxu, palta may b'a'n̈ tzlajwi. 'Ay yopiso jun chi ya'n e q'uinl 'a jun 'ejmn̈ej. Yuj cha, a 'a jun chi tzeya'ch e nab'en e sayn 'eq'ui. An 'oj wac' jun chi 'ayex, yujto 'Ochnc in 'Anma'il. A qui Mam Dios 'a'jnac spoder 'ayin, xchi Jesús 'a eb'. 28 Yuj cha, 'ix sc'anb'n eb' 'ixtc 'a 'a: —¿Tas wal tzcutj qui b'on tas tznib'j Dios tzqui b'o cha? xchi eb' 'a 'a. 29 — A jun tznib'j Dios tze b'o tic. Tznib'ej to tzeya'ch e c'ojl 'ayin, yujto a checjnacn coti, xchi Jesús 'a eb'. 30 Xlajw yab'n eb' jun cha, 'ix sc'anb'n pax eb' 'ixtc 'a 'a: —¿Tas wal junc milagro tztac' a ch'oxn quil on̈, sec 'oj ca'ch qui c'ojl 'aych on̈? ¿Tom 'ay tas tztac' a b'oni? 31 A eb' qui mam quichmec, yiljnac eb' jun milagro 'a pecti', yic sc'uxn eb' jun maná 'a cusltac lu'um, 'icha tzyal 'a Ch'an̈ U'un̈, 'a 'aj tzyal 'ixtic: A Dios 'a'jnac cot yoch eb' 'a satcha'an̈, swan eb', xchi 'a Ch'an̈, xchi eb' 'a Jesús. 32 Yuj cha, xyaln pax 'a eb' 'ixtic: —Wal yel tzwal 'ayex, man̈oc Moisés 'a'jnac jun wal yic satchan̈ chi 'a eb'. Palta a 'in Mam, a tz'a'n cot jun wal caw yel, ata tzcot 'a satcha'an̈. 33 Yujto a jun wal tzyac' Dios tic, a 'a satchan̈ 'emncta. 'Ay eb' 'ay 'a yolyib'n̈q'uinl tic 'oj scha sq'uinl 'a jun 'ejmn̈ej yu'uj, xchi Jesús 'a eb'. 34 —Mamin, tzac' jun wal chi 'ayn̈ 'a smasnil tiempo on̈ 'an, xchi eb' 'a Jesús. 35 — An ton tic, 'icha wal in, yujto 'ay eb' tzlaj wac' sq'uinl 'a jun 'ejmn̈ej. A eb' tzjaw 'ayin, man̈x b'a'n̈ 'oj 'och swejl eb'. A eb' tzin 'a'n 'och 'a sc'ojol, man̈x b'a'n̈ 'oj 'och stacn̈til eb'. 36 Palta tox 'ix wal 'ayex, wach'xam tzin eyila, matz eya'ch e c'ojl 'ayin. 37 Jantcn̈ej eb' tz'ajx 'ayn yuj qui Mam Dios, 'oj jawc eb' 'ayin. A eb' tzjaw 'ayn cha, ma'oj in pechl eb'. 38 An tic, cotnc in 'a satcha'an̈, tzwul in b'onc 'icha tznib'j jun checjnacn coti. Man̈ yujoc wul in b'onc tas tzin nib'j in ch'ocoj, in coti. 39 A 'in Mam checjnacn coti. Tznib'ej to may junc 'oj sat 'a scal eb' tzyac' 'ayin. Tznib'ej to an 'oj wac' pitzwc pax chan̈ eb' 'a slajb' c'ual. 40 An tic, Yunnaln Dios. Yuj cha, jantcn̈ej eb' tz'och q'ueln 'ayin, toto tzin ya'ch eb' 'a sc'ojol, tznib'j in Mam cha, to tzchaj eb' sq'uinl 'a jun 'ejmn̈ej. Yuj cha, an 'oj wac' pitzwc pax chan̈ eb' 'a slajb' c'ual, xchi Jesús 'a eb'. 41 Yic 'ix yab'n eb' 'aj Judea jun tzo'n̈ cha, tu xyal eb' 'a spatic. Yujto xyal Jesús 'ixtic: An ton tic 'icha wal in, cotnc in 'a satcha'an̈, xchi 'a eb'. 42 —Palta a win tic, Jesús winac, yunnal José winac. Cojquec smam snun winac. Palta wan cob' yalnoc winac to a 'a satchan̈ cotnc winac, xchi eb' 'aj Judea cha. 43 Yuj cha, 'ix yaln pax 'a eb' 'ixtic: —Man̈ in eyalb'tan̈oc. 44 A 'in Mam checjnacn coti. May junc mach tztac' scomn jaw 'ayin, yic tzchan sq'uinal, toto man̈oc in Mam tz'i'n cot 'ayin. A eb' tzjaw 'ayn cha, 'oj wac' pitzwc pax chan̈ eb' 'a slajb' c'ual. 45 Tz'ib'b'il can yuj jun tzo'n̈ eb' schecb' Dios 'ixtic: 'Oj 'ajxoc cuywc smasnil 'anma yuj Dios, xchi eb'. Yuj cha, jantcn̈ej eb' tzya'ch schicn 'a tas tzyal qui Mam Dios, toto tznachj 'el yuj eb' tas tzyala, 'oj jawc eb' 'ayin. 46 Man̈toc tzwala, toto 'ay junc mach 'ix 'iln qui Mam Dios. Palta an tic cotnc in 'a 'a, cojn in wiljnac. 47 Wal yel tzwal 'ayex, a mach tzin 'a'n 'och 'a sc'ojol, 'ay sq'uinl 'a jun 'ejmn̈ej. 48 An ton tic 'icha wal in, yujto 'a'm in q'uinl 'a jun 'ejmn̈ej. 49 A eb' qui mam quichmec, sc'uxjnac eb' jun maná 'a cusltac lu'um, palta chamnc pax eb' smasnil. 50 Palta a eb' tzwan jun wal cotnc 'a satcha'an̈, may 'oxlajn̈b'a'n̈ 'oj cham eb'. 51 An ton tic cotnc in 'a satcha’an̈, 'icha wal in, yujto 'a'm in q'uinl 'a jun 'ejmhej. Yuj cha, a eb' tzwan jun tic, pitzn eb' 'a smasnil tiempo. A jun 'icha wal tzwac' waxoc tic, atn in chib'jal, xchi Jesús 'a eb'. 52 Ax eb' 'aj Judea cha, 'ix laj stej sb'a eb' yuj tas 'ix yal cha. 'Ix laj yalnc eb' 'ixtic: — A wal jun winc tic, ¿tas wal 'oj yutc ya'n qui chi schib’jal chi snani? xchi eb'. 53 Yuj cha, xyaln pax 'a eb' 'ixtic: —Wal yel tzwal 'ayex, toto ma'oj e chi in chib'jal tic, toto ma'oj eyuc' pax in chic'l tic, to 'ixta', ma'oj stac' e chan pax e q'uinal, yujto an tic, 'Ochnc in 'Anma'il. 54 Yuj cha, tzann̈j eb' 'oj chinc in chib'jal tic, ax yu'n pax eb' in chic'l tic, 'ay sq'uinl eb' 'a jun 'ejmn̈ej. An ton tic, 'oj wac' pitzwc pax chan̈ eb' 'a slajb' c'ual. 55 Yujto a jun in chib'jal tic, caw yel lajn yet' junc tas tzc'uxxi. Yet' in chic'l tic, lajn yet' junc tas tz'u'xi. 56 Tzann̈j eb' 'oj chinc in chib'jal tic, ax yu'n pax eb' in chic'l tic, junxn̈ej tz'ajcn eb' wet'oc. An xo tic, 'ayn 'och pax 'a eb'. 57 A qui Mam Dios, pitzn 'a smasnil q'uinal. A checjnacn coti. Yu'uj pitzn in jun xo. Yuj cha, a eb' tzchin in chib'jal tic, 'oj wac' pax sq'uinl eb' jun xo. 58 Ticnec, wan waln yuj jun 'icha wal cotnc 'a satcha'an̈. A jun tic, man̈ lajnoc yet' jun maná sc'uxjnac eb' qui mam quichmec 'a pecti'. Niwnoc cob' sc'uxjnac eb', palta 'in chamnc pax eb'. Palta a eb' 'oj wanc jun 'icha wal tic, 'oj scha eb' sq'uinl 'a jun 'ejmn̈ej, xchi Jesús 'a eb'. 59 A 'a chon̈b' Capernaum, 'a yol scapiya eb', ata xyalcn 'el Jesús jun tzo'n̈ cuynb'il tic. 60 Ax yic 'ix yab'n eb' scuywum jun tzo'n̈ cha, til wal eb' 'ix aln 'ixtic: —Caw tu jun tzyal tic. ¿Tom 'ay mach tztechj yab'n jun tzo'n̈ tzyal tic? xchi eb'. 61 Ax Jesús, yojtac tas jun wan yaln eb'. Yuj cha, xyaln pax 'a eb' 'ixtic: —¿Tom tzcot eyowl yuj jun tzo'n̈ paxti xwal tic? 62 An tic, 'Ochnc in 'Anma'il. Toto 'oj eyil in pax q'ue 'a 'aj contnc in, ¿tas 'oj eyutc eyaln ta'? 63 A jun Espíritu yic Dios, a tz'a'n qui q'uinlec. Ax qui niwnalec tic, may jac tztac' yu'uj. A jun tzo'n̈ paxti xwal 'ayx tic, caw yel yic Yespíritu Dios. Yuj cha, a tztac' ya'n e q'uinl 'a jun 'ejmn̈ej. 64 Palta 'ay jaywn̈ ex, matz in eya'ch wal 'a e c'ojol, xchi Jesús 'a eb' scuywum cha. 'Ixta xyutj Jesús yaln 'a eb', yujto yictax b'ab'el, yojc xoni mach eb' matz ya'ch sc'ojl 'a 'a. Yojc xon paxi, mach jun 'oj 'a'nc 'och 'a yol sc'ab' chamel. 65 'Ix yaln pax junx tic 'ixtic: —Yujto 'ayx matz eya'ch e c'ojl 'ayin, yuj cha, xwaln 'ayex, may junc mach tztac' scomn jaw 'ayin, toto man̈oc in Mam tz'i'n cot 'ayin, xin chi, xchi Jesús 'a eb'. 66 Yuj cha, til wal eb' scuywum chi 'ix laj meltzj pax 'a spatic. Man̈xtzac yal sc'ojl eb' jun yec' yet'oc. 67 Yuj cha, 'ix sc'anb'n Jesús 'ixtc 'a eb' lajchwa'an̈: —¿ Ax xo tic, tzam e nib'j tzex meltzj 'a e patc jun xo? xchi 'a eb'. 68 Ax Simón Pedro 'ix ta'w 'ixtc 'a 'a: —Mamin, ¿tom 'ay junc mach 'aj 'oj stac' qui 'at yet' on̈? Yujto a jun tzo'n̈ paxti tzal 'ayn̈ tic on̈, ata 'oj qui cha qui q'uinl 'a jun 'ejmn̈ej on̈. 69 An̈ tic on̈, tox ach ca'ch 'a qui c'ojl on̈. Cojc on̈, [to ach tic, Cristo ach.] Yunnal ach Dios [pitzan], xchi Pedro 'a 'a. 70 — Ax lajchwan̈ ex tic, an ex in si'cn 'eli. Palta 'ay jun 'a e cal, schecb' win diablo yaji, xchi 'a eb'. 71 A jun 'ix yal tic, yuj Judas yunnal Simón 'aj Queriot 'ix yalni. Yujto a Judas chi 'oj 'a'nc 'och Jesús 'a yol sc'ab' chamel. Palta yit cuywumal sb'a yet' eb' uxlchwan̈ cha.

7

1 Xlajw cha, 'ix b'eyc' Jesús 'a yol yic Galilea. Ax 'a yol yic Judea, ma'ix snib’j 'ec' sb'a ta', yujto a ewin 'aj Judea cha, tznib'j ewin smil chamoc. 2 Wan sjapx stiempoal jun sq'uin̈ eb' israel tzcuch Q'uin̈ Chinama. 3 Yuj cha, a eb' yu'tac Jesús, 'ix yaln eb' 'a 'ixtic: —Man̈ ach can 'a tic. 'Ixc 'a Judea, sec wach' ax eb' a cuywum 'ayc' ta', 'oj yil pax eb' jun tzo'n̈ milagro tza ch'oxo. 4 Toto 'ay junc mach tznib'j tzcheclj 'el 'a sat eb' 'anma', matz tac' tzmunlj 'a c'ultaquil. Yuj cha, 'ixta ach. Toto yel 'ay jun tzo'n̈ milagro tza ch'oxo, yowlal tza ch'oxl a b'a 'a sat eb' 'anma', xchi eb' 'a 'a. 5 'Ixta cob' xyutc eb' yu'tac chi yaln 'a 'a, yujto ma'ix ya'ch pax eb' sc'ojl 'a jun xo. 6 Yuj cha, 'ix yaln Jesús 'ixtc 'a eb': —Mantzac jaw stiempoal in ch'oxn 'el in b'a. Ax xo tic, tzann̈j tiempoal tztac' e 'ati. 7 A eb' yic yolyib'n̈q'uinl tic eyet'oc, matz tac' tzchichn 'och eb' 'ayex. Palta an xo tic, tzchichn 'och eb' 'ayin, yujto tzin ch'oxli, to maysch'olnil sb'eyb'al eb'. 8 'Ixquecn̈ej e ch'ocj 'a jun q'uin̈ cha. Yujto an tic, mant 'oj in 'ati, yujto mantzac jaw stiempoal in ch'oxn 'el in b'a, xchi Jesús 'a eb'. 9 Xlajw yaln jun tzo'n̈ cha, 'ix can yuj eb' 'a Galilea cha. 10 Palta ax yic tox 'ix 'at eb' yu'tac chi 'a jun q'uin̈ cha, ax Jesús, c'ojnc'ojnilt 'ix 'ati. C'ultacn̈ej x'ati. 11 Ax ewin 'aj Judea cha, til wal cob' saync 'ec' ewin 'a jun q'uin̈ cha. —¿'Aj laj wal 'ay jun winc cha? xchi ewinac. 12 Ax 'a scal eb' 'anma', til wal eb' tzlaj aln yu'uj. 'Ay eb' tzaln 'ixtic: Caw wach' winac, xchi eb'. Palta 'ay pax eb' tzcob' alnoc: Ma'ay, to tzlaj yixtc paxti win eb' 'anma', xchi eb'. 13 Palta c'ultac tzlaj yal eb' yu'uj. May junc eb' 'ip yaln 'a scal eb', yujto tzxiw eb' yab'n ewin 'aj Judea cha. 14 Spaclto yaj jun q'uin̈ cha, 'ix c'och Jesús 'a yamq'uil yatut Dios. 'Ix cuywj 'a eb' 'anma'. 15 Ax eb' israel 'ayc' ta', caw 'ix sat sc'ojl eb' yab'xni. 'Ix laj yalnc eb' 'ixtic: — A jun tic, ¿tas wal tzyutj yojcan 'el jun tzo'n̈ tzyal tic? Palta 'in man̈ cuywnacoc, xchi eb'. 16 Yuj cha, xyaln 'a eb' 'ixtic: — A jun tzo'n̈ cuynb'il tzwal 'ayx tic, man̈ wico'oc. Yic jun mach checjnacn coti. 17 Toto 'ay mach tzyal sc'ojl tzb'o 'icha tznib'j Dios, 'oj nachjoc 'el yu'uj, to yic Dios jun tzo'n̈ cuynb'il tic, man̈ munoc tzwal 'a yol wico'. 18 A mach tzpaxtin 'a yol yico', ton̈j tzb'an̈ sb'a, sec 'ay yel'ch 'a sat eb' 'anma snani. Palta an tic, tzin nib'ej to a jun checjnacn coti, 'ay yel'ch 'a e sat. Yuj cha, caw yel tzwala. May jac 'es tzwac'a. 19 A Moisés, a 'a'jnac can sley Dios 'ayex. Palta 'in may junc ex tzeyiclj tas tzyal jun ley cha. ¿Tas yuj tze nib'j tzin e mila? xchi Jesús 'a eb'. 20 Ax eb' 'anma chi 'ayc' ta', 'ix yaln eb' 'ixtc 'a 'a: — Ach tic, tecn 'aych junc demonio 'ayach. ¿Mach wal junc tznib'n tzach miln cham tzela? xchi eb' 'a 'a. 21 Yuj cha, 'ix yaln pax 'a eb' 'ixtic: —'Ay wal jun tas xin b'o 'a sc'ul 'iljelal. Yuj cha, caw 'ix sat e c'ojl yu'uj. 22 Yuj eb' qui mam quichmec 'a pecti', yuj cha, yelcn yich jun b'eyb'al tzcuch circuncisión. Ax Moisés a aljnac cani, chajtlto yowlal tzqui b'eylb'ejec jun cha. Yuj cha, wach'xam sc'ul 'iljelal, tzeyac' circuncidar eb' 'unn tzlaj 'alji. 23 Ax tic, 'in tzeyac' circuncidar eb' 'unn 'a sc'ul 'iljelal, sec matz ex 'ec' 'a yib'n̈ jun ley yic Moisés cha. Toto 'ixta', ¿tas yuj tzex owx 'ayin, yujto xwac' b'oxc sc'ojl jun win ya'ay 'a sc'ul 'iljelal cha? 24 Ax tic, man̈ e comn b'eyc'ojloc junc mach 'a 'ichn̈j ta'. Toto 'ay mach tze b'eyc'ojlej, caw wach'n̈j tzeyutj e b'eyc'ojlani, xchi Jesús 'a eb'. 25 Yuj cha, 'ay jaywn̈ eb' 'aj Jerusalén chi 'ix aln 'ixtic: — A jun winc tic, ¿man̈oc am win tz'ec' sayc' ewin tznib'j milnc chamoc? 26 Palta 'in yaj win 'a tic, wan spaxtin 'elt win 'a qui calec. Palta may jac owl tzyac' ewin yet'oc. Lemb'il 'ix ya'ch ewin yajl chi sc'ojl 'a 'a, chajtlto a Cristo. 27 A yic 'oj jawc jun Colwjum sb'i cha, may mach 'ojtnac 'aj 'oj cotoc. Palta a jun winc tic cojquec 'aj cotnac, xchi eb'. 28 Yic 'ix yab'n Jesús jun tzo'n̈ cha, 'ix yaln jun tzo'n̈ xo cuynb'il tic 'a eb' 'ay 'a yamq'uil yatut Dios cha, 'ix yaln 'elt 'ixtc 'a scal eb': —Yel ton jun, eyojc in. Eyojc ton pax 'aj cotnc in. Palta man̈ munoc in jaw 'a yol wico'. To a Dios, atn jun caw yel, a checjnacn coti. Palta a jun cha, man̈ eyojcoc. 29 An xo tic wojtac, yujto ata cotnc in. A checjnacn coti, xchi 'a eb'. 30 Yuj cha, 'ay eb' tznib'j 'a'nc 'och 'a preso. Palta may mach 'ix yamni, yujto mantzac jaw stiempoal schami. 31 Palta til wal 'anma 'ix ya'ch sc'ojl 'a 'a. 'Ix laj yalnc eb' 'ixtic: — A yic 'oj jawc Cristo, ¿tom caw 'ec'b'al xo milagro 'oj sch'ox 'a yib'n̈ jun tic? xchi eb'. 32 Ax ewin fariseo, xyab'n ewinac tas xyal eb' 'anma yuj Jesús. Yuj cha, smol aln ewin yet' eb' sat ya'mal 'och sti eb' israel 'a Dios, 'ix cob' schecnc 'at ewin jun tzo'n̈ eb' policía stan̈mal yatut Dios, yic tz'at yi'nc cot ewin Jesús, sec tzya'ch ewin 'a preso cob' snani. 33 Ax Jesús cha, 'ix yaln 'ixtc 'a eb' 'anma': —Jab'xoj wal tiempo 'ayn 'ec' eyet'oc. 'Oj lajwc cha, ax in pax 'a 'aj 'ay jun checjnacn coti. 34 Ax xo tic, 'oj cob' in e sayq'ui. Palta man̈x 'oj in chax eyu'uj, yujto ma'oj stac' e c'och 'a 'aj 'oj in c'ochi, xchi 'a eb'. 35 Ax eb' israel cha, 'ix laj yal-lanc eb' 'ixtic: —¿'Aj laj 'oj c'och snani, yuj cha, tzyalni to ma'oj chax cujec? Al cha, 'ay eb' quit chon̈b'ec 'ayb't 'a scal eb' griego. ¿Tom tznib'j ata 'oj c'och 'a scal eb', tz'at scuync eb' griego chi snani? 36 'In xyal 'ayn̈ec, ax xo tic, 'oj cob' in e sayq'ui. Palta man̈x 'oj in chax eyu'uj, yujto ma'oj stac' e c'och 'a 'aj 'oj in c'ochi, 'in xchi 'ayn̈ec. ¿Tas wal tzyal 'el'ch jun xyal 'ayn̈ec tic? xchi eb' israel cha. 37 A wal 'a yol slajw q'uin̈, ata caw sin̈n̈i tz'aj eb' 'anma'. Yuj cha, at 'a yol slajw q'uin̈ cha, atta 'ix q'ue lin̈n Jesús 'a sat eb'. Caw 'ip 'ix yal 'elt 'a scal eb' 'ixtic: —Toto 'ayx tze nib'j tze chaj e q'uinl 'a jun 'ejmn̈ej, cotn̈ec 'ayin. 'Icha tzeyutj ey'un a yuj e tacn̈ti'al, 'ixta 'oj e yutc e chan jun e q'uinl chi 'ayin. 38 Toto 'ayx tzeya'ch e c'ojl 'ayin, 'icha to 'ay jun a 'oj pac' 'a e pixan, ax yel yoctac. Atn jun chi tz'a'n e q'uinl 'a jun 'ejmn̈ej. Yujto 'ixta yaj yalx can 'a Ch'an̈ U'un̈, xchi Jesús 'a eb'. 39 'Ixta xyutj yalni, chajtlto a eb' tzya'ch sc'ojl 'a 'a, 'oj 'ajxc 'och Yespíritu Dios 'a eb'. A 'a jun tiempoal cha, mantzac 'ajx Yespíritu Dios 'a eb', yujto mantzac pax q'ue Jesús chi 'a satcha'an̈. 40 Xlajw yab'n eb' 'anma chi tas 'ix yal Jesús, 'ay eb' xlaj aln 'ixtic: —Wal yel, atn jun schecb' Dios tic tan̈b'il xon sjaw cujec, xchi eb'. 41 —Ma'ay, a jun tic, atn Cristo, xchi jaywn̈ xo eb'. Palta 'ay pax eb' xlaj alnoc: — A jun Colwjum cha, ¿tom 'aj Galilea tze na 'icha win tic? 42 A Ch'an̈ Un̈ tzalni, chajtlto a Cristo, yowlal a 'a chon̈b' Belén, ata 'oj 'aljoc, 'a 'aj 'e'nc David pecti', yujto yin̈tl can David cha, xchi eb'. 43 Yuj cha, 'ix laj spojnc 'el sb'a eb' 'anma yuj Jesús cha. 44 Ay eb' tzcob' snib'c 'a'nc 'och 'a preso, palta may eb' xyamni. 45 Ax eb' policía stan̈mal yatut Dios, an̈ja sch'ocj eb' 'ix c'ochx 'a 'aj 'aycn ewin xchecn 'at eb' cha, atn ewin fariseo, yet' ewin sat ya'mal 'och sti eb' israel 'a Dios. Yuj cha, xyaln ewin 'a eb' 'ixtic: —¿Tas yuj ma'ix eyij cot Jesús cha? xchi ewinac. 46 —'In caw may junc mach tza'wni wal spaxtin 'icha jun cha, xchi eb' policía cha. 47 Yuj cha, xyaln pax ewin fariseo chi 'ixtc 'a eb': —¿Tom ex 'ixtx paxti pax yuj win jun xo? 48 ¿Tom 'ay junc eb' cajlilec tic tzya'ch sc'ojl 'a winac? An̈jtona', an̈ fariseo on̈ tic on̈, may pax junc on̈ tzca'ch qui c'ojl 'a win on̈. 49 An̈j eb' comn 'anma', eb' man̈ yojcoc xon jac ley yic Moisés, an̈j eb' tzya'ch sc'ojl 'a winac. Palta a eb' cha, 'ay cot yowl sc'ojl Dios 'a yib'n̈ eb', xchi ewin fariseo cha. 50 Palta 'ay jun win fariseo chi Nicodemo sb'i. Atn jun xit' c'umnc Jesús 'a 'ac'wal. 'Ix yaln 'ixtc 'a ewinac: 51 — A jun ley 'aycn 'ayn̈ec, tzyala to may sleyl tztac' ca'nec 'och junc mach 'a yol sc'ab' yailal, toto mantzac cab'c 'a 'a, tas tzyutj scoln sb'a, xchi 'a ewinac. 52 Yuj cha, xyaln pax ewin 'ixtc 'a 'a: —¿Tom 'aj Galilea ach yet' winac? Cuy Ch'an̈ Un̈ tz'ib'b'il cani. Atta 'oj ela', to may xon junc schecb' Dios tz'alj 'a Galilea cha, xchi ewin 'a 'a. 53 ['Ix laj paxx can junjn ewin 'a yatut.

8

1 Ax Jesús, 'ix 'at 'a tzaln Olivo. 2 Ax yic sacb'i, 'ix 'atx 'a yatut Dios jun 'ejm xo. Yic 'ix c'och ta', c'uxn xlaj c'och eb' 'anma 'a stz'ey. Ax Jesús, 'ix 'em wocan, syamn 'och scuywj 'a eb'. 3 Ax ewin cuywjum 'a ley yic Moisés, yet' ewin fariseo, 'ix yij 'at ewin jun 'ix 'a 'a. 'Ix yamchj 'ix yuj ewinac yic wan smuln 'ix. Xya'n 'och ewin 'ix 'a yojltac Jesús, yet' 'a yojltac eb' 'ayc' yet'oc. 4 Xyaln ewin 'ixtc 'a 'a: —Mamin, a jun 'ix tic, wan smulni yic 'ix yamchj cuj on̈. 5 A ley yic Moisés tzalni, a eb' 'ix tzb'on 'ixtic, yowlal tzjulx cham eb' yet' q'uen q'ue'en. Al ach ¿tas xa chi jun xo? xchi ewin 'a 'a. 6 Palta ton̈j xcob' stz'ac ewin sc'anb'c 'ixta', yic tzya'lni prowal ewinac, yujto tznib'j ewin tzyac' queja. Ax Jesús ton̈j 'ix 'em n̈ojan. 'Ix stz'ib'n can 'ejm jun tzo'n̈ tas 'a sat lum yet' yune sc'ab'. 7 'Ix sc'anb'n pax wal ewin 'ixtc 'a jun 'ejm xo: ¿Tas wal xa chi yuj jun tic jun? xchi pax ewinac. Yuj cha, 'ix q'uex lihan, 'ix yaln 'a ewin 'ixtic: —Toto 'ay junc ex caw may jac e mul, b'ab'l juljec 'och junc q'uen 'a 'ix, schi 'a ewinac. 8 Xlajw yaln jun tzo'n̈ cha, 'ix 'emx n̈ojn jun 'ejm xo. 'Ix stz'ib'n can pax 'ejm jun tzo'n̈ xo tas 'a sat lum cha. 9 A yic 'ix yab'n ewin jun tic, 'ix laj snan sb'a junjn eb', 'ayn̈j smul eb'. Yuj cha, junjnal xlaj pax ewinac. A ewin 'ichmtac winac, a ewin xlaj b'ab'l paxi. Ax ewin quelmtac, tza'nto xlaj pax eb'. Ax Jesús sch'ocj xoj xcan 'a 'aj lin̈n 'ec' jun 'ix cha. 10 Xlajw cha, 'ix yi'n chan̈ Jesús sat. 'Ix yilni sch'ocj xoj jun 'ix chi 'aycni. Yuj cha, xyaln 'a 'ix 'ixtic: — Ach 'ix, ¿'ajtc 'ay ewin ach 'a'n queja cha? ¿Man̈x 'a mach am tz'a'n 'och junc tas 'a eb'n̈ ticnec? xchi 'a 'ix. 11 —May Mamin, man̈x 'a mach, xchi 'ix. — An̈jtona 'in, may tas tzwa'ch 'a eb’an̈. Yuj cha, 'ixic. Man̈x a say a mulc jun 'ejm xo, xchi Jesús 'a 'ix.] 12 'Ix yaln pax Jesús 'ixtc 'a scal eb' 'anma cha: — An tic, 'icha sacq'uinl waj 'a eb' 'anma 'ay 'a yolyib'n̈q'uinl tic. A eb' tz'och in cuywumoc, 'oj wac' sacq'uinl 'a spixn eb'. Yuj jun sacq'uinl cha, 'oj scha eb' sq'uinl 'a jun 'ejmn̈ej. Man̈x 'oj b'ey eb' 'a scal q'uic'q'uinal, xchi Jesús. 13 Ax ewin fariseo 'ix aln 'a 'ixtic: — Ach tic, mun tzala to 'ay opiso. Yuj cha, caw may yel'ch jab' ec chi cob' wan aln cha, xchi ewin 'a 'a. 14 Yuj cha, xyaln pax 'ixtc 'a ewinac: —Wach'xam mun tzwala to 'ay wopiso, palta caw yel tzwala. Yujto an tic, caw wojtac 'aj cotnc in. Anjtona', wojtac 'aj 'oj in c'ochxi. Ax xo tic, man̈ eyojcoc 'aj cotnc in, yet' 'a 'aj 'oj in c'ochxi. 15 Ax tic, ton̈j tze comn b'eyc'ojlej junc mach muc'uc. Aln tic, may mach tzin b'eyc'ojlej. 16 Palta q'uinloc 'ay mach tzin nib'j tzin b'eyc'ojlej. Toto 'ixta', caw tojlhej tzwutj in b'eyc'ojlani. Yujto man̈ in ochej tzin b'eyc'ojlej. Palta a 'in Mam 'aych wet'oc, yujto a checjnacn coti. 17 A jun ley 'aycn 'ayn̈ec, a tzalni toto 'ay chawn̈ testigo lajn tas tzyala, yowlal tzqui chajec cab' tas tzyal eb'. 18 Palta 'in 'ay chawn̈ testigo tzaln wu'uj. An ton tic testigo 'in, testigo pax in Mam wet'oc, yujto a checjnacn coti, xchi 'a ewinac. 19 —Palta ¿'ajtil 'ay a Mam chi jun? xchi ewin 'a 'a. Yuj cha, xyaln pax 'ixtc 'a ewinac: — Ax tic, man̈ eyojcoc mach in. Man̈ eyojcoc pax in Mam cha. Octom eyojtac mach in, toto 'ixta', eyojc pax in Mam cha, xchi 'a ewinac. 20 A 'a yamq'uil yatut Dios 'a stz'ey jun chalab' ofrenda, ata xyal Jesús jun tzo'n̈ tic. Ata 'ix cuywj 'a eb' 'anma'. May junc mach 'ix yamni, yujto mantzac jaw stiempoal schami. 21 'Ix yaln Jesús 'a ewin 'ixtic: — An tic, 'oj in 'ati. Ax xo tic 'oj cob' in e sayq'ui, palta a 'a scal e mul 'oj e chami. Yuj cha, ma'oj stac' e comn c'och 'a 'aj 'oj in c'och cha, xchi. 22 Yuj cha, xlaj yalnc ewin 'aj Judea chi 'ixtic: —Tecn to 'oj smil sb'a am winac. Yuj cha, xyaln winac to ma'oj stac' qui c'ochc 'a 'aj tzc'och cha, xchi ewinac. 23 'Ix yaln pax Jesús chi 'ixtc 'a ewinac: — Ax tic, 'aj sat lum ex, yujto yic ex yolyib'n̈q'uinl tic. Aln tic, man̈ in yico'oc yolyib'n̈q'uinl tic, to 'aj satchan̈ in. 24 Yuj cha, xwaln 'ayex to a 'a scal e mul 'oj e chami. Toto matz eya'ch 'a e c'ojol, to an ton 'icha xwala, toto 'ixta', a 'a scal e mul chi 'oj e chami, xchi. 25 —¿Machch cob' jun? xchi pax ewin 'a 'a. —Palta 'in waljnacx 'ayx 'a yaln̈taxi, mach in. 26 Til to wal tastc 'oj wal eyu'uj, yic 'oj ex in b'eyc'ojloc. A jun checjnacn coti, caw yel tzyala. A tas yaljnac 'ayin, an̈j tzwal 'a eb' 'anma 'a yolyib'n̈q'uinl tic, xchi 'a ewinac. 27 Palta ma'ix nachj 'el yuj ewinac, toto wan yaln yuj qui Mam Dios. 28 Yuj cha, 'ix yaln pax 'a ewin 'ixtic: — At yic 'oj in e t'un̈nc q'ue'i, ax snachj 'el eyu'uj, to an 'Ochnc in 'Anma'il. Atta 'oj eyojcoc 'eli to may tas mun tzin b'o in ch'ocoj. An̈j jun tzo'n̈ cuynb'il yaljnac in Mam 'ayin, an̈j tzwala. 29 A jun checjnacn cot cha, a 'aych wet'oc. A 'in Mam cha, ma'in yactj can in ch'ocoj, yujto an̈j tas tznib'ej, an̈j tzin b'o 'a smasnil tiempo, xchi 'a ewinac. 30 Ax yic 'ix yaln jun tzo'n̈ tic, til wal eb' xya'ch sc'ojl 'a 'a. 31 'Ix yaln Jesús 'ixtc 'a eb' israel xya'ch sc'ojl 'a 'a: —Toto smasnil tiempo tzeya'ch e nab'en 'a tas tzwala, wal yel in cuywum ex. 32 Toto 'ixta', 'oj eyojcoc 'el spaxti Dios caw yel. Yuj jun spaxti yel cha, 'oj eyijx 'elt 'a libre, xchi Jesús 'a eb'. 33 Palta xyaln pax eb' 'ixtc 'a 'a: — An̈ tic on̈, yin̈tl oh pax Abraham et' on̈. May jun 'ejmoc on̈ 'och ya'malc servil junc 'anma 'on̈. Yuj cha, ¿tas yuj tzal to 'oj quijx 'el 'a libre chi 'on̈? xchi eb'. 34 —Wal yel tzwal 'ayex, tzann̈j eb' an̈ja sayn smul, caw 'aych eb' ya'malc servil maysch'olnil. 35 Q'uinloc 'ay junc mach 'aych ya'malc servil junc 'anma ticnec. A jun cha, may yaln yic yet' eb' yunnal jun 'anma chi 'a jun 'ejmn̈ej. Palta a junc caw yunnal junc 'anma cha, toxn to 'ay yaln yic yet' 'a jun 'ejmhej. 36 Yuj cha, toto an tzex in colcn 'el 'a yaln̈ e mul, caw yel 'oj eyelcn 'a libre, yujto Yunnaln Dios. 37 An tic, wojc xoni to yihtl ex Abraham wet'oc. Palta 'in tze nib'j tzin e mil chamoc, yujto a tas tzwal 'ayex, may yel'ch 'a e sat. 38 A tas wiljnac yet' in Mam, a tzwal 'ayex. Ax xo tic, chuc jun e mam wan e b'on tas tzyal 'ayex, xchi Jesús 'a eb'. 39 —Palta atn Abraham, a mamb'il yaj 'ayn̈ on̈, xchi eb' 'a 'a. —Octom yel yin̈tlex Abraham cha. Toto 'ixta', wan e b'eylb'an 'icha 'e'nc cha. 40 A jun tzo'n̈ tas yel yaljnac Dios 'ayin, an̈j tzwal 'ayex. Palta 'in tze nib'j tzin e mil chamoc. Ax Abraham cha, may jun 'ejmoc sb'ojnac 'ixta'. 41 Ax tic, a tas tzb'o jun e mam, an̈j tze b'o yet'oc, xchi Jesús 'a eb'. —Palta an̈ tic on̈, man̈ mitz' 'unnoc caj on̈. Junn̈j qui mam on̈, atn Dios, xchi eb' 'a 'a. 42 —Octom yel a Dios chi e mam. Toto 'ixta', 'ay e chamc'ojlal 'ayin, yujto a 'a Dios chi cotnc in, in jaw 'a tic. Man̈ munoc tzin jawi, yujto a Dios checjnacn coti. 43 ¿Tas yuj matz nachj 'el eyu'uj, tas tzwal 'ayex? Tecn to matz yal e c'ojl tze chaj eyab' in paxti tic. 44 Ax tic, a jun e mam, atn win diablo. Yuj cha, an̈j 'a win tzeya'ch e nab'en. An̈j tas tznib'j winac, an̈j tze b'o'o. Yictax sb'o yolyib'n̈q'uinl tic, ma'm cham 'anma xon win ta'. May jac yel'ch junc tas yel 'a winac, yujto may junc yel tzyal winac. A yic tzya'n win junc 'es, a 'a snab'en win tzcoti, yujto caw 'a'm 'es winac. A 'a winac, ata tzpitzw 'el smasnil 'es. 45 Aln tic, caw yel jun tzo'n̈ tas tzwal 'ayex, palta matz e chaj eyab'i'. 46 ¿Mach junc ex 'oj stac' e ch'oxn 'el jac in mul? Caw yel jun tzo'n̈ tas tzwal 'ayx tic. Yuj cha, ¿tas yuj matz e chaj eyab'i'? 47 A eb' yic Dios, tzya'ch eb' schicn 'a spaxti'. Palta ax xo tic, man̈ ex yico'oc Dios. Yuj cha, matz yal e c'ojl tzeya'ch e chicn 'a 'a, xchi Jesús 'a eb'. 48 'Ix yaln pax ewin 'aj Judea chi 'ixtc 'a Jesús: —'Ilt nab'n jun, yel tzcal on̈. Tecnto 'aj Samaria ach. Tecnto 'aych junc demonio 'ayach, xchi ewin 'a 'a. 49 —Ma'ay, may junc demonio 'aych 'ayin. To wan in yiclni tas tzyal in Mam. Palta ax xo tic, ton̈j tzex b'uchwj 'ayin. 50 An tic matz in nib'j 'ay wel'chi. Palta 'ay jun tzalni to 'ay wel'ch 'a sat. A jun chi tzb'eyc'ojlani, mach yel tzyala. 51 Wal yel tzwal 'ayex, a eb' tzyiclni tas tzwala, may b'a'n̈ 'oj cham eb', xchi Jesús 'a ewinac. 52 — A ticnec, caw cojc on̈, to 'aych jun demonio chi 'ayach. A win Abraham yet' jantcn̈ej eb' schecb' Dios pecti', c'uxn chamnc eb' smasnil. Ach xo tic tzal 'ixtic: Toto 'ay eb' tzyiclni tas tzwala, may b'a'n̈ 'oj cham eb', xa chi cob'i'. 53 ¿Tom 'ec'b'al el'ch 'a yib'n̈ qui mam quichmec Abraham cha? Yet' pax 'a ewin schecb' Dios chi pecti', ¿tom 'ec'b'al pax el'ch 'a yib'n̈ ewinac? 'In chamnc ewin chi smasnil. ¿Machch cob' a nanc ticnec? xchi ewin 'a 'a. 54 Yuj cha, xyaln pax 'ixtc 'a ewinac: —Toto mun tzwij chan̈ in b'a, may jac wel'chi. Palta a 'in Mam tzalni, to 'ay wel'chi. A 'in Mam cha, a tzeyalch e Diosaloc, 55 palta niwnoc tzeyal 'ixta', yujto man̈ eyojcoc. Aln tic, caw wojc Dios cha. Q'uinloc tzwala to man̈ wojcoc. To 'ixta', caw tzwac' 'es 'icha 'ex. Palta caw yel wojtac, yujto a tas tzyala, a tzin yiclej. 56 A qui mam quichmec Abraham, tzaljnac yujto alxnac 'a 'a, to 'oj yil in jawi. In yiln toni, yuj cha, caw tzaljnac, xchi 'a ewinac. 57 ¿Tom a c'umjnac a b'a yet'Abraham cha? Palta 'in caw 'ayt a c'och a cincuenta ab'il, xchi ewin 'a 'a. 58 —Wal yel tzwal 'ayex, yic mantzac 'alj Abraham cha, toxn 'ayn xon 'eq'ui, xchi Jesús 'a ewinac. 59 Xlajw cha, 'ix laj si'nc chan̈ ewin q'ue'en, snib'n ewin sjul chamoc. Ax Jesús 'ix sc'ub'j 'el sb'a 'a ewinac. 'Ix 'elt 'a yamq'uil yatut Dios cha.

9

1 Ax 'a jun 'el, yic wan sb'ey Jesús yet' eb' scuywum, 'ix yiln eb' jun winc matz uj xon yilni. 2 Ax eb' scuywum Jesús cha, 'ix sc'anb'n eb' 'a 'ixtic: — Ach qui Cuymal on̈, ¿tasrn yuj matz uj yiln jun winc tic yictax yalji? ¿Yuj am smul smam snun, mto yuj smul winac? xchi eb' 'a Jesús. 3 — A jun winc tic, man̈ yujoc smul smam snun, man̈ yujoc pax smul winac, 'ixta yajcn winac. Yujto a Dios tznib'j tzch'ox junc milagro yet' winac, yuj cha, 'ixtc yaj winac. 4 Yowlal tzin b'o smunljel jun mach checjnacn coti, ya' sb'a 'ayt c'u. Yujto a yic tox x'at c'u, man̈x 'a mach tztac' smunlji. 5 Yic 'aynto 'ec' 'a yolyib'n̈q'uinl tic, 'icha sacq'uinl waj 'a eb' 'anma', xchi Jesús 'a eb'. 6 Xlajw yaln jun tzo'n̈ tic, 'ix stzub'n 'ejm stzub' 'a sat lu'um. 'Ix sb'on jab' b'i'ch yet' stzub' cha. Sucn 'och 'a yol sat win matz uj yiln cha. 7 Xlajw cha, xyaln 'a win 'ixtic: —'Ixc 'a jun tanque tzcuch Siloé. 'At b'icl a sat chi ta', xchi 'a winac. (Siloé, tzyal 'el'chi, 'ic'b'il cot a'.) Xlajwn̈ej cha, 'ix 'at winac. X'at sb'icnc 'el win sat chi 'aaa cha. Ax yic xmeltzj paxi, tox 'ix b'ox sat winac. 8 Ax eb' 'ay 'a stz'ey yatut winac, yet' jun tzo'n̈ xo eb' toxn 'ojtnac winac, to matz uj yiln xon winac, 'ix laj yalnc eb' 'ixtic: — A jun winc tic, 'icha to a jun tz'em wocn sc'an stumin, xchi eb'. 9 — Atn winac, xchi jun tzo'n̈ xo eb'. —Ma'ay, a jun winc tic, to ton̈j lajn yilx yet' jun matz uj yiln cha, xchi jun tzo'n̈ xo eb'. Palta xyaln win 'ixtc 'a eb': — An ton tic, xchi winac. 10 —¿Tas wal x'aj sjacw a sat tic jun? xchi eb' 'a winac. 11 — A jun Jesús sb'i, a x'a'n jacwc in sat tic. 'Ix sb'o jab' b'i'ch yet' stzub'. Sucn 'och 'a yol in sat tic. Xlajw cha, xyaln 'ayn 'ixtic: 'Ixc 'a jun tanque tzcuch Siloé. 'At b'icl a sat chi ta', xchi 'ayin. Yuj cha, xit' in b'icnc 'el in sat tic ta'. 'Ixta x'aj sjacw in sat tic, xchi winac. 12 —¿ Aj 'ay win ticnec jun? xchi eb'. —Man̈ wojcoc, xchi win 'a eb'. 13 Xlajw cha, 'ix yi'n 'at eb' win 'a ewin fariseo. 14 A 'a jun sc'ul 'iljelal, ata 'ix sb'o Jesús jab' lum b'i'ch chi 'ix yac' jacn sat win cha. 15 Yuj cha, 'ix sc'anb'n ewin fariseo chi 'a win 'ixtic: —¿Tas wal x'aj sjacw a sat tic jun? xchi ewinac. — A Jesús, a 'ix sucn 'och jab' b'i'ch 'a yol in sat tic. Xlajw cha, 'ix ya'n in b'icli. Yuj cha, wach'x wiln ticnec, xchi winac. 16 Yuj cha, 'ay jaywn̈ ewin xcob' alnc 'a win 'ixtic: — A jun winc chi xjacn yol a sat cha, man̈ yico'oc Dios, yujto matz yiclj sc'ul 'iljelal, xchi eb' 'a winac. Palta xlaj yalnc jun tzo'n̈ xo eb': — A Jesús cha, man̈ 'ajmuloc. A junc 'ajmul, ¿tom tztac' sch'oxn junc milagro 'icha tzch'ox Jesús tic? xchi ewinac. —Yuj cha, chapoj xyutj sb'a eb'. 17 'Ix scha c'anb'n pax eb' 'ixtc 'a win xjacw sat cha: — Ach xo tic, ¿tas tza na yuj win xjacn a sat tic? xchi eb' 'a winac. — An tic, tzin na'a schecb' Dios yaji, xchi winac. 18 Palta ax ewin 'aj Judea cha, ma'ix schaj ewin yab'i', toto tot 'ix jacw sat winac. A snan ewinac, toxn wach' sat win cha. 'Ixta to b'i'an, at smam snun win 'ix yij cot ewinac. 19 At wal ta 'ix sc'anb'j ewin 'a eb' 'ixtic: —¿Eyunnal am jun win tic? Tzeyala, to matz uj xon yilni yictax yalji. Toto 'ixta', ¿tast wal x'aj sjacw sat winac? xchi ewin 'a eb'. 20 — A jun winc tic, quic ton on̈. Yictax yalji, caw wal matz uj yiln xon jab'oc. 21 Palta man̈ cojcoc on̈, tasm x'aj sjacw yol sat tic. Man̈ cojcoc pax on̈, machm 'ix jacn 'a 'a. 'In 'ayx sq'uinl winac, ¿tas yuj man̈oc 'a win tze c'anb'j eyab'i'? A win 'oj stac' yaln 'ayex, tas x'aj sjacw yol sat tic, xchi eb'. 22 'Ixta xyutj eb' yalni, yujto caw xiw eb' yaln yuj ewin yajl 'a scal eb' 'aj Judea cha. Yujto tox 'ix yal ewin yajl chi 'ixtic: Toto 'ay eb' 'oj alnoc, chajtlto a Jesús atn Cristo, 'oj qui pechc 'el eb' 'a yol qui capiya tic, xchi ewin yajl cha. 23 Yuj cha, cojn jab' tic xyal smam snun win 'ixtic: 'In 'ayx sq'uinl winac. ¿Tas yuj man̈oc 'a win tze c'anb'j eyab'i'? schin̈j eb'. 24 Xlajw cha, 'ix yawtn paxt ewin win 'ix jacw sat cha, 'ix yaln ewin 'ixtc 'a 'a: —Caw yel tzach paxtin 'a sat Dios. Yujto cojc on̈, caw 'ajmul jun winc tzal jacnc a sat cha, xchi ewin 'a 'a. 25 — An tic, man̈ wojcoc, toto 'ajmul, mto ma'ay. Matz tac' walni. Cojn jun tas wojtac, to a 'a yic yalan̈, toxn matz uj wiln xon jab'oc. Al ticnec, tzax stac' wilni, yujto 'ix jacw in sat tic yu'uj, xchi winac. 26 — Palta ¿tas wal ach yutj winac? ¿Chajtl 'ix yutj win sjacn a sat tic? xchi ewin 'a 'a. 27 —'In tox xwal 'ayex, chajtl x'aj sjacw in sat tic, palta matz e chaj eyab' 'ayin. ¿Tas yuj tze nib'j tzwal 'ayx jun 'ejm xo? ¿Tom tze nib'j tzex 'och pax scuywumoc wet'oc? xchi win 'a ewin 'aj Judea cha. 28 Yic 'ix yab'n ewin jun tzo'n̈ tic, caw xb'uchwj ewin 'a winac. 'Ix yaln ewin 'ixtic: — Ach tic, scuywum ach ton jun winc cha. Aln̈ tic on̈, scuywum on̈ Moisés on̈. 29 Cojc on̈, to yaljnac can Dios spaxti 'a Moisés cha. Palta ax Jesús cha, man̈ cojcoc on̈ mach 'a'jnac yopiso winac, xchi ewin 'aj Judea cha. 30 —'E... ¿Tasm jun? Ax tic, tzeyala to man̈ eyojcoc, mach 'a'jnac yopiso winac. Palta 'in 'ix jacw in sat tic yu'uj. 31 Cojquec, caw matz yab' Dios slesl eb' maysch'olnil sb'eyb'al. Cojn eb' tzyal sb'a 'a 'a, eb' tzyiclni tas tzyala, cojn eb' tzyab' yico'. 32 Mant 'a junc mach tzcab' sjacn sat junc matz uj yiln xoni yic tz'alji. 33 Q'uinloc man̈ schecb'oc Dios Jesús cha. Toto 'ixta', may xon am jac tas tztac' yu'uj, xchi winac. 34 —'In ach tic, toxn 'ajmul ach yic alji. ¿Tom tza nib'j tzon̈ cob' a cuy on̈? xchi ewinac. Xlajw xoj cha, spechn 'elt ewin 'a scal. 35 Ax yic xyab'n Jesús to 'ix spechl ewin win xjacw sat chi 'a scal, yuj cha, ax yic 'ix 'ilchj pax win yu'uj, 'ix yaln 'a win 'ixtic: —¿Tzam a'ch a c'ojl 'a jun mach 'Ochnc 'Anma'il? xchi 'a winac. 36 —Mamin, al 'ayin mach jun cha, sec 'oj wa'ch in c'ojl 'a 'a, xchi winac. 37 —Tox 'ix ela. To an ton tic wan in paxtin et' ticnec, xchi 'a winac. 38 Xlajw xoj yaln Jesús jun cha, 'ix 'em cumnjoc win 'a yojltac. 'Ix yaln win 'ixtc 'a 'a: —Mamin, caw tzach wa'ch 'a in c'ojol, xchi winac. 39 —Yuj sb'o yaj eb' 'anma', in jaw 'a yolyib'n̈q'uinl tic. Yujto 'ay eb' matz uj yiln yic Dios ticnec, 'icha to q'uic'q'uinl yaj eb'. Palta wu'uj, 'icha to 'oj jacwc sat eb'. 'Ay pax nan̈l xo eb' caw tztac' yiln yic Dios snani. Palta a eb' cha, wu'uj, 'icha to 'oj juwc sat eb', xchi Jesús. 40 Ay jaywn̈ ewin fariseo 'ayc' ta'. Yic 'ix yab'n ewin jun cha, 'ix yaln ewin 'ixtc 'a 'a: —¿Tom tza na'a, to matz uj quiln yic Dios ofi? xchi ewinac. 41 —Octom xnachj 'el eyu'uj, chajtlto matz uj eyiln yic Dios. Toto 'ixta', ma'ix can e mul 'a eyib'an̈. Palta 'in tzeyala, to caw tztac' eyiln yic Dios cha, yuj cha, 'oj cann̈j e mul 'a eyib'an̈, xchi 'a eb'.

10

1 'Ix yaln Jesús 'ixtic: Q'uinloc 'ay junc col-l calnelu ticnec. 'Ay pax junc winc tz'och 'a yojl te col-l cha. Wal yel tzwal 'ayex, toto man̈oc 'a sti jun col-l chi tz'ochi, toto chuc 'aj tzcomn 'ochi, a jun cha, 'elc'um. 2 Ax win tz'och 'a caw sti jun col-l cha, atn win yilmal no calnelu cha. 3 Ax win waymtam calnelu, a win tzjacn te col-l chi 'a win 'ilm calnelu cha. Ax no calnelu cha, c'aync no yet' win yilmal cha. Yojc win sb'i junjn no'. A win tzjacn 'elt e no'. 4 Tzlajw sjacn 'elt win e no', tzb'ab'lj winac. Tz'och tza'n e no yuj winac, yujto caw c'aync e no yet' winac. 5 Palta q'uinloc 'ay junc xo winac, man̈ c'ayncoc no 'a winac, matz tac' scomn 'och tza'n no yu'uj. Toto man̈ c'ayncoc no 'a 'a, ton̈j tz'at no 'elc yu'uj, xchi Jesús 'a eb'. 6 'Ixta xyutj Jesús yaln jun 'ab'x tic 'a eb', palta ma'ix nachj 'el yuj eb', tas tzyal 'el'chi. 7 'Ix yaln pax Jesús 'ixtc 'a eb': —Wal yel tzwal 'ayex, 'icha sti jun col-l 'aj tz'och no calnelu, 'ixta 'in. 8 Ay eb' xb'ab'l jaw 'ayin, xcob' yalnc 'och sb'a eb' colwjumal. 'Icha junc 'elc'm tz'och 'a te colal, 'ixta eb' smasnil. Palta ax eb' yic xo Dios, ma'ix ya'ch eb' snab'en 'a eb'. 9 An tic, lajn in yet sti colal. A eb' tz'och wu'uj, 'oj colchjoc 'el eb'. 'Icha junc calnelu tz'och 'a yol scolal, tz'el paxta, tz'at saync wa sb'a, 'ixta 'oj 'aj eb'. 10 Ay eb' 'icha junc 'elc'm tzjawi, tzyelc'n eb' smil junc calnelu. Aln tic, tzin jaw wul wac' sq'uinl eb' 'anma 'a jun 'ejmn̈ej, sec wach' caw niwn swach'c'ojlal Dios 'oj scha eb'. 11 An tic, ajn in yet' junc 'ilm calnelu caw wach'. A junc 'ilm calnelu wach', 'ay sgana tzyac' cham sb'a yuj no calnelu cha. 12 'Ay 'aj ton̈j tzmajnax junc mach, tz'ilw calnelu, palta man̈toc caw 'ilm calnelu xoni. Toto tzc'och no 'ocs 'a 'a, yajn̈ej tzyactn can e no calnelu chi sch'ocoj. Tz'at 'eloc, yujto man̈ yico'oc e no'. Ax no 'ocs cha, tzyamn can cot no e no calnelu cha. Tzsactzic can 'at e no yuj no'. 13 Ton̈j tz'at win 'eloc, yujto yujn̈ej schan win stojol, tzyiln win e no'. Yuj cha, may yel'ch e no 'a winac. 14 An tic, lajn in yet' junc 'ilm calnelu caw wach'. Ax eb' 'anma to yajnacx 'och sc'ojl 'ayin, 'icha in calnelu yaj eb'. A 'in Mam, yojc in. An̈jtona 'in, wojc pax in Mam cha. 'Icha wojc in b'a yet' in Mam cha, 'ixta wojc in b'a yet' eb' wic jun xo. 'Oj wac' cham in b'a yuj eb' wic cha. 16 Ay pax jun tzo'n̈ xo eb' 'oj ya'ch sc'ojl 'ayin, palta man̈ quit chon̈b'oc eb'. Yowlal 'oj in molb'tzoc cot eb'. A eb' cha, 'oj syiclc eb' tas tzwala. Junn̈j 'oj 'aj eb' wic smasnil, yujto junn̈j mach tz'iln eb'. 17 Tzin schamc'ojlej in Mam, yujto 'oj wac' cham in b'a, ax in pitzw pax jun 'ejm xo. 18 An tic, 'oj wac' cham in b'a, yujto 'ixta tz'el 'a in c'ojol. May mach tztac' scomn 'i'n 'ec' in q'uinl tic, toto matz yal in c'ojol. 'Ay waln wic wa'n cham in b'a. An̈jtona', 'ay waln wic in chan in q'uinl tic jun 'ejm xo. Yujto 'ixta yaj yaln can in Mam jun schecnb'il 'ayin, xchi Jesús 'a eb'. 19 Yic 'ix yaln jun tzo'n̈ tic, 'ix laj spojnc 'el sb'a eb' 'aj Judea chi yuj tas 'ix yal cha. 20 Ay nan̈l eb' xcob' alnc 'ixtic: —¿Tas yuj tzcob' eya'ch e chicn 'a win tic? Palta 'in 'aych win demonio 'a winac. 'In to owya winac, xchi cob' eb'. 21 Palta 'ay nan̈l xo eb' 'ix alni: —Toto 'aych junc demonio 'a 'a, ¿torn tztac' yaln 'ixta'? A junc demonio, ¿tom tztac' sjacn sat junc mach matz uj yilni? xchi eb'. 22 Ax 'a yic xjaw stiempoal n̈ab'lq'uinai, 'ix 'och sq'uin̈ yatut Dios 'a Jerusalén. 23 Ax Jesús, 'ix b'eyc' 'a jun corredor tzcuch yic Salomón, 'ay 'a sti yatut Dios cha. 24 Ax eb' 'aj Judea 'ayc' ta', 'ix 'och oyn eb' 'a 'a, xyaln eb' 'a 'ixtic: —¿B'a'n̈to wal 'oj al 'ayn̈ on̈, mach ach? Toto yel Cristo ach, tojlriej tzotj aln 'ayn̈ ticnec on̈, xchi eb' fa 'a. 25 Yuj cha, 'ix ta'w Jesús 'ixtc 'a eb': —'In tox xwal 'ayex, palta matz in eya'ch 'a e c'ojol. A jun tzo'n̈ milagro tzin ch'oxo, yujn̈ej spoder in Mam tztac' in ch'oxni. Yujn̈ej jun tzo'n̈ cha, chequel mach in. 26 Palta ax tic, caw matz in eya'ch 'a e c'ojol, yujto man̈ wico'oc eyaji, ['icha xwal 'ayx 'a jun 'el.] 27 A eb' wico', tzya'ch eb' schicn 'ayin. An xo tic, wojc eb'. 'Icha e no calnelu tz'och tza'n yuj yilmal, 'ixta tz'ajch tza'n eb' wu'uj. 28 An tzwac' sq'uinl eb' 'a jun 'ejmn̈ej. Yuj cha, man̈x b'a'n̈ 'oj satl eb'. May junc mach 'oj stac' yi'n 'ec' eb' 'a yol in c'ab'. 29 A 'in Mam, 'ec'b'al xo yel'ch 'a yib'n̈ smasnil. A x'a'n eb' 'ayin. May junc mach 'oj stac' yi'n 'ec' eb' 'a yol sc'ab' in Mam cha. 30 An tic, caw lajn in yet' qui Mam Dios, yujto junn̈j 'anmal waj yet'oc, xchi Jesús 'a eb' 'aj Judea cha. 31 Yuj cha, 'ix laj si'nc chan̈ eb' q'uen q'ue'en, snib'n eb' sjul chamoc. 32 Palta xyaln pax 'ixtc 'a eb': —Til wal tas wach' xin b'o yuj spoder in Mam 'a e cal. ¿'Aja junc chi 'i'n tzin e nib'n in e jul chamoc? xchi 'a eb'. 33 —Man̈ yujoc junc wach' xa b'o'o, tzach qui nib'n qui jul cham on̈, palta yujn̈ej to tzach b'uchwj 'a Dios. Ach tic, comn 'anma ach, palta 'in tzalch a b'a Diosal, xchi eb'. 34 Yuj cha, 'ix yaln pax 'ixtc 'a eb': — A 'a ch'an̈ ley 'aycn 'ayn̈ec, ata tz'ib'b'il can 'ixtic: An tzwala, ax tic, dios ex, xchi Dios 'a Ch'an̈ Un̈ cha. 35 Cojquec, a tas tz'ib'b 'il can 'a Ch'an̈ Un̈ cha, matz tac' ton̈j tzqui ma'c 'eq'ui. A Dios aljnac cani, to a eb' yab'jnac spaxti cha, dios pax eb' yet'oc. 36 An xo tic, a Dios si'jnacn 'eli, schecn in cot 'a yolyib'n̈q'uinl tic. Yuj cha, ¿tas yuj tzeyala to tzin b'uchwj 'a Dios, yic tzwalni to Yunnaln Dios cha? 37 Toto matz in b'o 'icha tzb'o in Mam cha, man̈ eya'ch e c'ojl 'ayin. 38 Palta an tic, yel wan in b'on 'icha tzb'o in Mam cha. Yuj cha, wach'xam matz eya'ch e c'ojl 'a tas tzwala, palta 'a'c 'och e c'ojl 'ayn yuj jun tzo'n̈ tzin b'o tic. Toto 'ixta', 'oj nachjoc 'el eyu'uj, chajtlto 'aych qui Mam Dios 'ayin, 'ayn 'och pax 'a 'a, xchi 'a eb'. 39 Yuj cha, 'ix cob' ya'lnoc eb' syamn jun 'ejm xo, palta 'ix scoln pax sb'a 'a eb'. 40 Xlajw cha, xc'axw can pax 'ec' 'a a niwn a Jordán. Ata x'och wan 'a 'aj ya'jnac bautisar Juan eb' 'anma'. 41 Til wal 'anma xc'och ta'. 'Ix laj yal-lanc eb' 'ixtic: — A Juan, may 'aj 'ix ch'ox junc milagro, palta jantcn̈ej tas 'ix yal yuj Jesús tic, caw yel, xchi eb'. 42 A 'a jun lugar cha, til wal eb' xlaj ya'ch sc'ojl 'a Jesús cha.

11

1 A 'a jun aldea Betania sb'i, ata 'ay jun winc caw ya'ay, Lázaro sb'i winac. 'Ay chawn̈ yanab', jun 'ix tzcuch María, junx 'ix tzcuch Marta. Ata 'ayc' eb' yet'oc. 2 A 'ix María cha, a 'ix sucjnac 'och yal su'q'ui sjab' 'a yoc Jesús, sucn tacjoc 'ix yet' xil sjolom. Ax win Lázaro cha, caw ya'ay. 3 Yuj cha, 'ix ya'n 'at eb' yanb' chi sti 'a Jesús, 'ix yaln 'at eb' 'ixtic: —Mamin, a jun a wach'c'ojl 'a tic, caw ya'ay ticnec, xchi eb'. 4 Xlajw yab'n Jesús tas 'ix yalb't eb', 'ix yaln 'ixtic: — A jun yab'il cha, ma'oj cham win yuj 'a jun 'ejmn̈ej. 'Ix yamchj win yuj jun yab'il cha, sec 'oj sch'ox Dios to caw niwn yel'chi. Ax scheclj pax 'eli, to caw niwn wel'ch pax an Yunnaln Dios tic, xchi Jesús. 5 A Jesús, caw 'ay schamc'ojlal 'a Lázaro cha. 'Ay schamc'ojlal pax 'a María yet' 'a Marta cha. 6 Palta ax yic 'ix yab'ni, to caw ya'ay Lázaro, ma'ix 'at muc'uc. Chab' to c'u x'ec' yu'uj. 7 Xlajw cha, 'ix yaln 'a eb' scuywum 'ixtic: —Coyc 'a lugar Judea jun 'ejm xo, xchi 'a eb'. 8 'Ix yaln eb' scuywum chi 'ixtc 'a 'a: —Palta Mamin, caw jaye nant c'u xya'lj ewin 'aj Judea chi ach sjuln cham 'a cha. ¿Tom tza nib'j tzach 'at jun 'ejm xo ta'? xchi eb' 'a 'a. 9 Yuj cha, xyaln pax 'ixtc 'a eb': —Cojquec, to 'ay lajchwe hora tz'ec' 'a junjn c'u. Toto tzon̈ b'eyc' 'a c'ual, matz on̈ comn telwi, yujto sacq'uinal. 10 Palta ax eb' tzb'eyc' 'a 'ac'wal, tzcomn telw eb', yujto may sacq'uinl 'a eb', xchi Jesús. 11 Xlajw yaln jun tic, 'ix yaln 'ixtc pax yuj Lázaro: — A jun qui wach'c'ojlec cha, to tzwayi, palta 'oj 'at in pitzl swayn̈ cha, xchi 'a eb'. 12 —Palta Mamin, toto tzwayi, tecn 'oj b'oxc sc'ojol, xchi eb' scuywum cha. 13 Yic xyaln Jesús to tzway Lázaro cha, tznib'j tzch'ox 'a eb', to chamnc xo. Palta snan eb', ton̈j tzwayi. 14 Yuj cha, tojln̈ej xyutj yaln 'ixtc 'a eb': —Tox 'ix chami. 15 A ticnec caw tzin tzalji, yujto man̈toc 'ayn 'ec' ta' yic 'ix chami, sec 'oj e wach' 'a'c 'och e c'ojl 'ayin. Al ticnec, coyc 'at quila', xchi 'a eb'. 16 Ax Tomás, tzcuch pax Tiyx 'anma', 'ix yaln 'ixtc 'a eb' yit cuywumal cha: —Coyc pax 'at ca'c cham qui b'a yet'oc, xchi. 17 Ax yic 'ix c'och eb', 'ix yab'n eb' to yoxjil xo smucx Lázaro cha. 18 A chon̈b' Betania 'aj 'ayc' cha, ata 'ay 'a stz'ey Jerusalén. 'Ay am junc mel-l legua yaj scal. 19 Yuj cha, til wal eb' israel 'aj Jerusalén xit' 'a'nc sniwnal sc'ojl María yet' Marta, yuj jun snul'j eb' chi xcham cha. 20 Yic 'ix yab'n Marta to wan sc'och Jesús, 'ix 'at schanc 'ix. Ax María ton̈j xcan 'a yol n̈a. 21 'Ix yaln Marta 'ixtc 'a Jesús: —Mamin, octom 'aych 'ec' 'a tic, 'ix cham win in nulj tic. Toto 'ixta', ma'ix chami. 22 Palta ax ticnec, wojtac tzann̈j tas 'oj a c'an 'a Dios, a 'oj 'a'nc 'ayach, xchi 'ix 'a 'a. 23 — A jun a nul'j tic, 'oj pitzwc paxi, xchi Jesús 'a 'ix. 24 — N', wojtac. At 'a slajb' c'ual a yic 'oj pitzwc pax eb' chamnac, atta 'oj pitzwc pax yet' eb', xchi 'ix 'a 'a. 25 — An tic, 'a'm in pitzwc pax chamnac, 'aj q'uinl in paxi. Tzann̈j eb' tzin 'a'n 'och 'a sc'ojol, wach'xam 'oj cham eb', palta 'oj pitzwc pax eb'. 26 Jantcn̈ej eb' pitznto, tzin ya'n 'och eb' 'a sc'ojol, may b'a'n̈ 'oj cham eb'. ¿Tzam a'ch jun tic 'a a c'ojol? xchi Jesús 'a 'ix. 27 —N', Mamin caw tzwa'ch 'a in c'ojol, chajtlto Cristo ach, Yunnal ach Dios. Ach tic, tan̈b'il xon a jaw 'a yolyib'n̈q'uinl tic, xchi 'ix 'a 'a. 28 Xlajw yaln 'ix Marta jun tic, 'ix paxi. 'Ix 'at yawtnoc cot 'ix 'ix snul'ej. C'ultac xyal 'a 'ix 'ixtic: —'Ix jaw qui Cuymal, to tzach yawtj 'ati, xchi 'ix. 29 Xlajwn̈ej yab'n 'ix María jun cha, 'ix q'ue lin̈njoc 'ix muc'uc. 'Ix 'at 'a 'aj 'ayc' Jesús cha. 30 Palta 'ay eb' israel 'ayc' yet' 'ix 'a yol yatut cha. Ayc' eb' yac' sniwnal sc'ojl 'ix. Ax xyiln eb', 'ix q'ue lin̈njoc 'ix, 'ix 'at 'ix mu'c 'a 'aj xit' scha 'ix Marta cha, yujto mantzac c'och Jesús 'a yol aldea cha. Tza'n xoj x'at eb' israel chi yuj 'ix, yujto snan eb' to tz'at 'ix 'o'c 'a 'aj mucn win snul'j cha. 32 Xlajw sc'och 'ix 'a 'aj 'aycn Jesús cha, 'ix 'em cumn 'ix 'a yojltac. Xyaln 'ix 'ixtc 'a 'a: —Mamin, octom 'aych 'ec' 'a tic yic 'ix cham win in nul'j tic. Toto 'ixta', ma'ix chami, xchi 'ix. 33 'Ix yiln Jesús to tz'oc' 'ix, tz'oc' pax eb' israel ajun yet' 'ix cha. Yuj cha, caw x'och pitz'n cuslal 'a spixn yet' eb'. 34 'Ix sc'anb'n 'ixtc 'a eb': —¿'Ajtil xe muc winac? xchi. —Mamin, coyc 'at quil nab'an, xchi eb' 'a 'a. 35 A Jesús 'ix 'oq'ui. 36 Ax eb' israel chi 'ayc' ta', 'ix laj yalnc eb' 'ixtic: —'In caw chamc'ojlb'il win yu'uj, xchi eb'. 37 Ay pax eb' xlaj alni: —Palta a Jesús tic, a 'a'jnac jacwc sat jun win matz uj yilni. ¿Tom matz tac' 'ix colwj 'a win Lázaro tic, sec ma'ix cham winac? xchi eb'. 38 Ax Jesús, an̈ja pitz'n 'och cusc'ojlal 'a 'a, yic 'ix c'och 'a 'aj mucn winac. A 'a yol jun q'uen olb'il, ata 'aych sniwnal winac. Aych can pax jun q'uen smacloc. 39 —'Ijec 'el smac q'uen tic, xchi Jesús. Ax 'ix Marta, 'ix yanb' winac, 'ix yaln 'ix 'ixtc 'a Jesús: —Palta Mamin, yoxjil xo scham winac, tecn 'ayx sjab' win ticnec, xchi 'ix. 40 —Tox xwal 'ayach, toto tzin a'ch wal 'a a c'ojol, 'oj el nab'n spoder Dios, xchi 'a 'ix. 41 'Ixta to b'i'an, 'ix yi'n 'el eb' q'uen smac chi 'aj 'aycn 'och winac. Ax Jesús, 'ix q'ue q'ueln 'a satcha'an̈, 'ix yaln 'ixtic: —Mamin, yuj wal dios 'ayach, 'ix ab' tas 'ix wala. 42 Wojc xoni to smasnil tiempo tzab' tas tzwala. Palta yuj eb' 'anma tic, tzwaln jun tzo'n̈ tic 'ayach, sec wach' 'oj ya'ch eb' 'a sc'ojol, chajtlto ach checjnacn coti, xchi Jesús. 43 Xlajw yaln jun tzo'n̈ tic, caw 'ip 'ix 'awj cha'an̈: —Lázaro, 'eln̈ta, xchi. 44 Ax win chamnc cha, 'ix 'el paxta. B'a'nto 'och jun tzo'n̈ nip 'a yoc yet' 'a sc'ab'. 'Ay pax jun xotn 'ejm 'a sti'. Yuj cha, xyaln Jesús 'ixtic: —Xuyc 'el jun tzo'n̈ nip tic 'aych 'a 'a, xchi 'a eb'. 45 Ax eb' israel chi ajun yet' 'ix María cha, 'ix yiln eb' tas 'ix b'o yuj Jesús. Yuj cha, til wal eb' xya'ch sc'ojl 'a 'a. 46 Palta 'ay jun tzo'n̈ xo eb' x'at alnoc yab' ewin fariseo, tas 'ix b'o yu'uj. 47 Ax ewin fariseo cha, yet' eb' sat ya'mal 'och sti eb' israel 'a Dios, 'ix sc'umj sb'a ewin yet' eb' sat yajal 'Ix laj yalnc eb' 'ixtic: —¿Tas tzcutjec tze na'a? Yujto til wal jun tzo'n̈ milagro wan sch'oxn jun winc cha. 48 Toto ton̈j tzquilc win ticnec, smasnil eb' quit chon̈b'ec, 'oj ya'ch eb' sc'ojl 'a winac. Ax ewin yajl 'a Roma, 'oj wul smac' poj ewin jun yatut Dios tic, ax ya'n pax ewin owl yet' eb' quit chon̈b'ec smasnil. Caw 'oj qui canc 'a yaln̈ yuj ewinac, xchi eb'. 49 Palta 'ay jun win Caifás sb'i 'a scal eb'. Atn jun chi sat ya'mal 'och sti eb' 'a Dios 'a jun ab'il cha. A 'ix aln pax 'ixtc 'a eb': — Ax tic, caw may xon jac tas eyojtac. 50 Matz nachj 'el eyu'uj, to yel xo wach' 'ayn̈ec, toto tzcham jun chi sjelc eb' 'anma smasnil. Toto 'ixta', ma'oj lajwc 'el eb' quit chon̈b'ec tic smasnil, xchi winac. 51 A win Caifás cha, man̈ munoc xnachj 'el jun chi yu'uj, xyaln jun cha. Palta yujto sat ya'mal 'och sti eb' israel yaj win 'a Dios 'a jun ab'il cha, yuj cha, a 'a win 'ix sch'ox Dios, to 'oj cham Jesús sjelc eb' israel smasnil. 52 Man̈ yujocn̈ej eb' israel cha, 'ix schami. 'Ix chami, yic tzmolb'tzan jantc eb' Yunnal Dios t'un̈ctac yajcn 'at 'a yolyib'n̈q'uinl tic, sec junxn̈ej 'oj 'aj eb'. 53 Yuj cha, a 'a jun c'u cha, 'ix 'el yich syamn 'och ewin yajl chi sayn tas tzyutj smiln Jesús. 54 Yuj cha, man̈xtzac 'ec' Jesús 'a scal eb' 'aj Judea cha. 'Ix yi'n 'el sb'a 'a jun lugar cha. 'Ix 'at 'a jun chon̈b' Efraín sb'i 'ay 'a sti lum cusltac lu'um. Ata x'och wan yet' eb' scuywum cha. 55 Ax yic wan sjapx stiempoal sjaw q'uin̈ yic snanb'il cot yel eb' israel 'a libre, til wal eb' xlaj cot 'a najat, 'ix laj c'och eb' 'a Jerusalén. Yic mantzac 'och q'uin̈ cha, 'ix c'och eb' ta', sec tzb'o sb'a eb' 'icha xon sb'eyb'al. 56 A yic 'ayc' eb' ta', til wal xlaj sayc' eb' Jesús. Yet' 'a yamq'uil yatut Dios, 'ay eb' xlaj aln 'ixtic: —¿Tas tze na'a? ¿'Oj jawc am Jesús 'a q'uin̈ tic, mto ma'ay? xchi eb'. 57 Ax ewin fariseo yet' eb' sat ya'mal 'och sti eb' israel chi 'a Dios, 'ix ya'n 'elt eb' jun ley, 'a 'aj tzyal 'ixtic: Toto 'ay 'aj tzeyil Jesús, tzwul eyal 'a tic, xchi jun ley cha. 'Ixta xyutj ewin yaln 'eli, yujto tznib'j ewin ya'ch Jesús 'a preso.

12

1 Ob'xoc to yoch q'uin̈ 'a Jerusalén, atn q'uin̈ yic snanb'il cot yel eb' israel 'a libre, 'ix c'ochx Jesús 'a Betania. Ata 'ay yatut Lázaro, win pitzwnac pax yu'uj. 2 Yic 'ix c'och Jesús ta', 'ix ya'n eb' jun niwn wal yet'oc. 'Ix wa pax Lázaro yet' eb'. Ax 'ix Marta, a 'ix x'a'n servil eb'. 3 Ax 'ix María yet' 'ix mel-l litro yal su'q'ui sjab', nardo sb'i. A jun cha, caw chan̈ stojol. 'Ix c'och 'ix 'a Jesús. 'Ix stob'n 'och 'ix 'a yoc. Xlajwn̈ej cha, 'ix sucn tacj 'ix yet' xil sjolom. Caw c'uxn 'ix pucb't sjab' 'a yol jun n̈a cha. 4 'Ay jun scuywum Jesús Judas sb'i, yunnal Simón 'aj Queriot. Atn win 'oj 'a'nc 'och Jesús 'a yol sc'ab' chamel. 'Ix yaln win 'ixtic: 5 — A jun yal su'q'ui sjab' tic, 'aym 'oxe'oc ciente c'ul munljelal stojol. Octom xqui chon̈ec, xca'nec stojl 'a eb' meb'a', xchi cob' winac. 6 Palta yes winac. Matz na win jac eb' meb'a cha, yujto a win molm tumn yaji. Yuj cha, a win tzcob' nib'nc molnc stojl cha, sec tzyij can 'el win jac yic 'a 'a, yujto toxn 'elc'm xon winac. 7 Ax Jesús, a 'ix aln 'ixtc 'a winac: —'Actj a tzuntzn 'ix, yujto a jun yal su'q'ui sjab' tic, molb'il yuj 'ix. 'Aycto xya'n 'och 'ix 'ayin, sec lista xo waji ax in mucxi. 8 A eb' meb'a' 'ayc'n̈ej eb' eyet'oc. An xo tic, man̈toc 'aynn̈ej 'ec' eyet'oc, xchi 'a winac. 9 Til wal eb' israel 'ix 'ab'ni to 'ayc' Jesús 'a Betania. Yuj cha, x'at yilnc eb'. Man̈ cojnoc Jesús chi tznib'j eb' yila'. Tznib'j pax eb' yil Lázaro, yujto 'ix 'ajx pitzwc pax 'a scal eb' chamnc yu'uj. 10 Yuj Lázaro cha, til wal eb' israel 'ix ya'ch sc'ojl 'a Jesús. Man̈xtzac ya'ch eb' snab'en 'a eb' ya'mal 'och sti eb' 'a Dios. Yuj cha, 'ix slajtin sb'a eb' sat ya'mal 'och sti eb' 'anma cha, snib'n eb' smil cham Lázaro cha. 12 Til wal 'anma 'ix c'och 'a Jerusalén yuj q'uin̈ yic snanb'il cot yel eb' israel 'a libre. Ax 'a junx c'u, 'ix yab'n eb' to wan sc'och Jesús ta'. 13 Yuj cha, til wal eb' xtzu'n 'emt xil te q'uib'. 'Ix yi'n 'at eb' x'at schanc eb' Jesús. 'Ix laj yalnc chan̈ eb' 'ixtic: —Yuj wal dios. Calc wach' paxti 'a jun checb'il cot yuj Cajlilec. Calc wach' paxti 'a qui Reyl an̈ israel on̈c tic, xchi eb'. 14 Ax Jesús, 'ix 'ilchj jun no b'uru yu'uj. 'Ix q'ue 'a yib'n̈ no 'icha yaj stz'ib'x 'a Ch'an̈ U'un̈, 'a 'aj tzyal 'ixtic: 15 Ex 'aj chon̈b' Sión, man̈ ex xiwoc. 'Iltec wal sjaw e reyl 'ayex. 'Ay q'ue 'a yib'n̈ jun no quelm b'uru, xchi 'a Ch'an̈. 16 A 'a jun c'u cha, ma'ix nachj 'el jun tzo'n̈ tic yuj eb' scuywum Jesús. At yic tox 'ix 'ijx pax q'ue Jesús chi 'a satcha'an̈, atta 'ix sna cot eb', to a yab'xil Jesús tz'ib'b'il can 'a Ch'an̈ Un̈ cha, caw 'ix 'el'ch 'icha yaj yalx cani. 17 A jun tzo'n̈ eb' 'ayc' yet' Jesús, yic yawtn 'elt Lázaro 'a 'aj mucb'il 'ochi, yic xpitzw paxi, 'ix laj yalnc 'el eb' tas yiljnac eb'. 18 Yuj cha, 'ix 'at eb' 'anma 'at scha Jesús, yujto xlaj yab' eb' yab'xil jun milagro chi 'ix sb'o'o. 19 Ax ewin fariseo, 'ix laj yalnc ewin 'ixtic: —Man̈x 'a tas tztac' qui b'onec ticnec. 'Iltec eb' 'anma', c'uxn tzlaj 'och eb' yet' winac, xchi ewinac. 20 Ay jun tzo'n̈ eb' griego 'ix c'och 'a jun q'uin̈ cha, yic tzyaln sb'a eb' 'a Dios. 21 A eb' cha, 'ix c'och eb' 'a Felipe 'aj Betsaida 'a yol yic Galilea. 'Ix yaln eb' 'a 'ixtic: — Ach winac, tzqui nib'j tzquil Jesús on̈, xchi eb'. 22 Yuj cha, 'ix 'at Felipe chi 'at yal 'a Andrés. 'Ixta to b'i'an, 'ix yi'n 'at sb'a eb' schawin̈l 'at yal 'a Jesús. 23 Ax Jesús cha, 'ix yaln 'ixtc 'a eb'. — An tic, 'Ochnc in 'Anma'il, a ticnec, wan sjaw yorail scheclj 'eli, chajtlto caw niwn wel'chi. 24 Wal yel tzwal 'ayex, q'uinloc 'ay junc 'in̈t trigo tzcan 'a yib'n̈ lu'um. Ton̈j tzcann̈j 'ixta'. Toto tzmucxi, 'icha to tzchami, palta a yic tzpaq'ui, caw niwn sat tzyac'a. 25 A eb' an̈j wal sq'uinl 'ay yel'ch 'a 'a, 'oj lajwc can 'ec' sq'uinl eb' cha. A pax eb' may yel'ch sq'uinl 'a yolyib'n̈q'uinl tic 'a 'a, atn wal eb' chi 'oj scha sq'uinl 'a jun 'ejmn̈ej. 26 Toto 'ay mach tznib'j tzin 'a'n servil, yowlal tzb'eylb'ej in b'eyb'al tic. A eb' tzin 'a'n servil cha, 'oj 'aj eb' wet' 'a 'aj 'ayn 'eq'ui. Toto 'ay eb' tzin 'a'n servil, ax in Mam 'oj 'a'nc spac 'a eb', caw niwn yel'ch 'oj 'aj 'a sat. 27 A ticnec, caw tz'och pitz'n cusc'ojlal 'a in pixan. ¿Palta tas 'oj wutc walni? ¿Tom 'oj wal 'ixtc 'a Dios: Mamin, coln 'elt 'a yol sc'ab' jun yailal 'oj jawc 'a wib'n̈ tic, tom 'oj in chioc? Palta yuj wal jun tic 'ayn cot yu'uj. 28 Mamin, checlj cab' 'eli, chajtlto caw niwn el'chi, xchi Jesús. Xlajw cha, 'ix yab'n eb' yoch jun paxti 'a satcha'an̈, 'ix yaln 'ixtic: —Tox xin ch'oxo chajtlto niwn wel'chi. Al ticnec, 'oj in ch'ox pax jun 'ejm xo, xchi. 29 Ax eb' 'anma 'ayc' ta', 'ix yab'n eb' jun cha. Yuj cha, 'ay eb' 'ix aln 'ixtic: Tecn to a c'u tzc'an̈i, xchi jaywn̈ eb'. 'Ay pax eb' 'ix alni: —Tecn ángel jun tz'awj 'emt 'a Jesús tic, xchi eb'. 30 Yuj cha, 'ix yaln Jesús 'ixtc 'a eb': —Man̈ wujoc 'ix alx 'emt jun tzo'n̈ tic, palta eyu'uj. 31 A ticnec, a eb' 'ay 'a yolyib'n̈q'uinl tic 'oj b'eyc'ojlaxc eb'. Ax win tz'a'n yajlil 'a yolyib'n̈q'uinl tic, 'oj can 'a yaln̈ wu'uj. 32 Aln tic, a yic 'oj wajx q'ue'i, 'oj wi' cot smasnil 'anma 'ayin, xchi Jesús. 33 'Ixta xyutj yalni, chajtlto 'ixta 'oj 'aj schami. 34 Ax eb' 'anma', 'ix yaln eb' 'ixtc 'a 'a: — A 'a ch'an̈ ley 'aycn 'ayn̈ec, ata xcab' on̈, chajtlto a Cristo 'ayc'n̈ej 'a smasnil tiempo. Yuj cha, ¿tas yuj tzala, to a jun 'Ochnc 'Anma'il, yowlal 'oj 'ajxc q'ue'i? ¿Mach jun 'Ochnc 'Anmal tzal cha? xchi eb' 'a 'a. 35 Yuj cha, xyaln pax 'a eb' 'ixtic: — An tzwac' sacq'uinl 'a e pixan, 'ayn 'ec' 'a e cal ticnec, palta jab'xoj wal tiempo 'ayn 'eq'ui. Caw tze b'o e b'eyb'al, ya' sb'a 'aynto 'ec' jacx eyet'oc. Toto ma'ay, 'oj somchjc 'el e nab'en. 'Icha junc mach tzb'eyc' 'a q'uic'q'uinal, matz uj yiln 'aj tz'ati, 'ixta 'oj eyaji. 36 An tic, 'aj sacq'uinl in, yuj cha, 'a'c 'och e c'ojl 'ayin, ya' sb'a 'aynto 'ec' eyet'oc, sec 'oj wac' sacq'uinl 'a e pixn 'a jun 'ejmn̈ej, xchi Jesús 'a eb'. Xlajw xoj yaln jun tzo'n̈ tic, 'ix yi'n 'el sb'a. Sc'ub'n 'el sb'a 'a eb'. 37 Wach'xam til wal milagro sch'oxjnac Jesús 'a eb' israel, palta may wal eb' 'ix ya'ch sc'ojl 'a 'a. 38 'Ixta x'aj 'el'ch tas yaljnac can win Isaías, atn jun schecb' Dios, yic yaln can 'ixtic: Ach Cajlil, ¿toc 'ay mach xchan 'ab'nc tas 'ix calcn 'el on̈? ¿Tom 'ay mach x'ojcan 'el a poder ch'oxb'il o'oj? xchi Isaías chi 'a Ch'an̈ U'un̈. 39 Yuj cha, ma'ix stac' ya'n 'och eb' 'a sc'ojol. Yajnac Dios yal-l Isaías junx tic 'ixtic: 40 'Icha to tzin mac sat eb', tzin wach' 'a'n pitb'oc 'eb', sec wach', 'icha to matz yil eb', matz nachj 'el yuj eb', sec man̈xtzac sjel xon eb' jac snab'en. Yuj cha, ma'oj wac' lajwc smul eb', xchi Dios, xchi can Isaías cha. 41 Yaljnac can Isaías jun tzo'n̈ tic, yujto yiljnac swachl Jesús. Yuj cha, atn yab'xil tic yaljnac. 42 Wach'xam yaljnac can 'ixta', palta 'ay eb' israel 'ix ya'ch sc'ojl 'a Jesús cha. An̈jtona eb' yajal, niwn eb' 'ix ya'ch 'a sc'ojol. Palta matz ch'oxl sb'a eb', yujto tzxiw eb' yuj ewin fariseo, toq'ue tzpech 'elt ewin eb' 'a yol scapiya. 43 'Ixta xyutj sb'a eb', yujto ton̈j tznib'j eb' an̈j 'a sat 'anma 'ay yel'ch eb'. Matz na eb', toto 'ay yel'ch eb' 'a sat Dios. 44 Ax Jesús, caw 'ip xyal 'elt 'ixtc 'a scal eb' 'anma': — A eb' tzya'ch sc'ojl 'ayin, man̈ochej 'ayn tzya'ch eb' sc'ojol, tzya'ch pax eb' sc'ojl 'a in Mam checjnacn coti. 45 A eb' tzin 'ilni, wan yiln pax eb' jun mach checjnacn coti. 46 An tic, in jaw wul wac' sacq'uinl 'a spixn eb' 'anma 'a yolyib'n̈q'uinl tic, sec wach' a eb' tzya'ch sc'ojl 'ayin, man̈x 'a q'uic'q'uinl 'a spixn eb'. 47 A eb' tz'ab'n in paxti', toto matz yiclj eb', man̈oc in 'oj wa'ch yailal 'a yib'n̈ eb'. Yujto man̈ yujoc wa'n 'och syailal eb' 'anma', in jaw 'a yolyib'n̈q'uinl tic, palta yuj wul wa'n colchjoc eb', in jawi. 48 A eb' may wel'ch 'a sat, eb' matz yiclni in paxti', toxn 'ayc' xon jun 'oj 'a'nc 'och syailal eb', atn in paxti tzwalcn tic. Yuj in paxti tic, 'oj 'ajxc 'och syailal eb' 'a slajb' c'ual. 49 Yujto man̈ munoc tzin paxtin in ch'ocj 'a yol wico'. A 'in Mam checjnacn coti, a aljnac schecnb'il 'ayin tas tzwul wala'. 50 Wojtac, yuj schecnb'il cha, tztac' schan eb' 'anma sq'uinl 'a jun 'ejmn̈ej. Yuj cha, 'icha yaj yaln in Mam 'ayin; 'ixta tzwutj walni, xchi Jesús.

13

1 Q'ui'noc xoj yoch q'uin̈ yic snanb'il cot yel eb' israel 'a libre. Ax Jesús, yojtac to tox 'ix jaw stiempoal yactc can jun yolyib'n̈q'uinl tic, ax spax q'ue 'a qui Mam Dios. A eb' yic 'ayc' 'a yolyib'n̈q'uinl tic, caw chamc'ojlb'il eb' yu'uj. A ticnec 'oj sch'oxo', jantc schamc'ojlal 'a eb'. 2 Ax win Judas, yunnal Simón 'aj Queriot, tox 'ix 'och win diablo 'a spixn winac, sec a win tz'a'n 'och Jesús 'a yol sc'ab' chamel. Palta yojc Jesús to a 'a Dios cotnac, ata 'oj paxx q'ue'i. Yojtac a qui Mam Dios 'ajnac smasnil tas 'a yol sc'ab'. Ax yic wan swa yet' eb' scuywum, 'ix q'ue lin̈an. 'Ix yi'n 'el jun spotil, sb'a'n 'och jun toaya 'a snan̈al. 5 Xlajw cha, 'ix stob'n 'ejm a 'a yol jun palagan. 'Ix syamn 'och sb'icn 'el yoc eb' scuywum cha. Ax jun toaya chi 'aych 'a snan̈l cha, a xyac' sucn tacjoc yoc eb' cha. 6 Ax yic wan 'ijn sb'icn 'el yoc Simón Pedro, 'ix yaln Pedro chi 'a 'ixtic: —Mamin, ¿tom 'ijn tza b'icl woc tic tza na'a? xchi. 7 — Mantzac nachj 'el o'oj, tas wan in b'oni. Palta c'ojnc'ojnilt 'oj nachjc 'el o'oj, xchi Jesús 'a 'a. 8 — Palta may xon b'a'n̈ 'oj wac' a b'icl woc tic, xchi Pedro cha. —Toto matz ac' in b'icl jun, to 'ixta', toxn may aln ec wet'oc, xchi Jesús 'a 'a. 9 — Toto 'ixta jun Mamin, man̈ cojnoc woc tic tza b'icli. Tza b'icl pax in c'ab' tic yet' in jolom, xchi Pedro chi 'a 'a. 10 Palta xyaln pax Jesús 'ixtic: —Q'uinloc 'ay junc mach tot 'ix 'achni, man̈x yowlalc tzb'icx sniwnal smasnil. Cojxn yoc tzb'icxi, yujto mant 'a slumal sniwnal cha. Ax tic, 'icha junc tz'achn cha, 'ixta xo eyaji, yujto tox 'ix b'o e nab'en. Palta man̈ e masnilc xb'o e nab'en, xchi Jesús. 11 Yojc xoni, mach jun 'oj 'a'nc 'och 'a yol sc'ab' chamel. Yuj cha, xyaln 'ixtic: Man̈ e masnilc xb'o e nab'en, xchi. 12 Xlajw xoj sb'icn 'el yoc eb' cha, 'ix ya'n pax 'och jun spotl cha. 'Ix 'emx wocn yet' eb'. 'Ix yaln pax 'a eb' 'ixtic: —¿Tznachj am 'el eyu'uj, tas yuj 'ixtc tzex wutej? 13 An tic, tzin eyal e Cuymaloc, Eyajliloc. Yel ton tzeyala. 14 Cuywjum in ton 'ayex. Yajl in ton pax 'ayex. Palta 'in xin b'icl eyoc tic. Yuj cha, smoj 'ixta tzlaj eyutc e b'a jun xo. 15 Xin ch'ox jun tic 'ayex, sec wach' 'icha tzex wutj tic, 'ixta 'oj eyutc e b'a 'ayx jun xo. 16 Wal yel tzwal 'ayex, may junc moso 'ec'b'al yel'ch 'a yib'n̈ spatron̈. 'Ixta pax eb' checab', may junc eb' 'ec'b'al 'a yib'n̈ jun tzchecn eb' cha. 17 Toto tznachj 'el jun tzo'n̈ tic eyu'uj, tzeyiclni, caw wach' eyico'. 18 —Matz wal eyuj e masnil, yujto wojtac, machx sic'b'ilx xo 'el wu'uj. Palta yowlal 'oj 'el'choc tas tz'ib'b'il can 'a Ch'an̈ U'un̈, 'a 'aj tzyal 'ixtic: A jun in wach'c'ojl to junn̈j tzin wa yet'oc, 'ix meltzj 'och 'ajc'ojlal 'ayin, xchi. 19 'Aycto tzwaln can jun tzo'n̈ tic 'ayex, sec wach' a yic 'oj jawc jun chi 'a wib'an̈, ax e wach' 'a'n 'och e c'ojl 'ayin, to an ton Cristo in. 20 Wal yel tzwal 'ayex, a mach tzchan eb' in checab', tzyal 'el'chi, an tzin schaj eb'. A eb' tzin chan cha, tzchaj pax eb' jun checjnacn coti, xchi Jesús. 21 Xlajw xoj yaln Jesús jun tzo'n̈ tic, 'ix 'och pitz'n cusc'ojlal 'a spixan. 'Ix yaln 'ixtic: —Wal yel tzwal 'ayex, a 'a e cal tic, ata 'ay jun 'oj wa'n 'och 'a yol sc'ab' chamel, xchi 'a eb'. 22 Ax eb' scuywum cha, 'ix laj yil-lanc 'och sb'a eb', yujto man̈ yojcoc eb' mach junc tzyal cha. 23 Ay jun caw chamc'ojlb'il yu'uj, wocn 'ejm 'a smo'och, yic wan swa eb'. 24 Ax Simón Pedro 'ix yac' jab' senya 'a 'a, sec toq'ue tzc'anb'j 'a Jesús cha, mach junc tzyala. 25 Yuj cha, 'ix swach' nitzn 'ochch sb'a 'a stz'ey. 'Ix sc'anb'n 'a 'ixtic: —Mamin, ¿machm laj jun chi tzal ticnec? xchi. 26 'Ix yaln Jesús chi 'ixtc 'a 'a: —'Oj in lab'c 'ejm jab' pan tic 'a scal vinagre tic, ax mach 'aj 'oj wac'a', atn jun cha, xchi. —Xlajwn̈ej yaln Jesús jun cha, 'ix slab'n 'ejm jab' pan chi 'a scal jun vinagre cha, 'ix ya'n 'a win Judas, win yunnal Simón 'aj Queriot. 27 Xlajwn̈ej schan win jab' pan cha, 'ix wach' 'och win Satanás 'a winac. Ax Jesús, 'ix yaln 'ixtc 'a winac: — A tas tza nalb'ej a b'oni, tzaln̈ej tza b'on muc'uc, xchi 'a winac. 28 Ax eb' 'aych yet' 'a te mexa cha, may junc eb' xnachj 'el yu'uj, tas yuj 'ixta xyal 'a winac. 29 A win Judas cha, molm tumn yaj win 'a eb'. Yuj cha, 'ay eb' xcob' nanoc, to tzyal Jesús 'a win yuj tas tz'at sman win yuj jun q'uin̈ cha, mto a jac tumn chi tz'at yac' win 'a eb' meb'a snan eb'. 30 Xlajwhej swan win Judas jab' pan cha, 'ix yi'n 'el sb'a 'a scal eb', caw sq'uic'b'alil xo. 31 Xlajw xoj yi'n 'el sb'a win Judas cha, 'ix yaln pax Jesús 'ixtic: — A ticnec, 'oj checljoc 'eli to caw niwn wel'ch an 'Ochnc in 'Anmal tic. Ax in ch'oxn pax 'eli, chajtlto caw niwn yel'ch Dios. 32 Toto tzin ch'oxo to niwn yel'ch Dios, an̈jtona 'oj sch'oxl paxi, to niwn pax wel'chi. Yajn̈ej ax sch'oxn 'eli, to niwn wel'chi. 33 Ex chamc'ojlb'il wu'uj, jab'xoj wal tiempo 'ayn 'ec' eyet'oc. 'Oj in e sayq'ui, palta mant 'oj stac' e c'och 'a 'aj 'oj in c'och cha, 'icha wutjnac waln 'a eb' 'aj Judea. 34 Ay junx 'ac' checnb'il 'oj walcn 'ayx ticnec: To tzlaj e chamc'ojloc e b'a junjn ex. 'Icha tzex wutj ex in chamc'ojlani, 'ixta tzlaj eyutc e chamc'ojlan e b'a jun xo. 35 Toto tzlaj e chamc'ojloc e b'a junjn ex, 'oj yojcoc 'el eb' 'anma smasnil, to yel in cuywum ex, xchi Jesús 'a eb'. 36 Ax Simón Pedro 'ix c'anb'n 'ixtc 'a 'a: —Mamin, ¿'aj wal til 'oj a c'och jun? xchi. — A 'aj 'oj in c'ochi, mant 'oj stac' e c'och wet'oc. C'ojnc'ojnilt 'oj e c'och pax wet' ta', xchi Jesús 'a 'a. 37 —Palta Mamin, ¿tas yuj matz tac' in 'at et' mu'c ticnec jun? Caw lista waj wa'n cham in b'a o'oj, xchi cob' Pedro chi 'a 'a. 38 —'A... ¿tom yel lista aj a'n cham a b'a wu'uj? Wal yel tzwal 'ayach, a yic mantzac 'oc' no 'ajtzo 'a jun 'ac'wl tic, 'ox 'ejm 'oj e'l 'a eb'an̈, chajtlto man̈ in ojcoc, xchi Jesús 'a 'a.

14

1 'Ix yaln Jesús 'a eb' scuywum 'ixtic: —Man̈ eyac' somchjc 'el e nab'en. 'A'c 'och e c'ojl 'a Dios, tzeya'n pax 'och e c'ojl 'ayin. 2 A 'a yatut in Mam, til wal lugar 'aj wach' tzon̈ 'ajc cajan. Q'uinloc may tas, tox am 'ix wal 'ayex. A ticnec, to 'oj 'at in b'o eyet'l 'aj 'oj e c'ochi. 3 'Oj lajwc in b'on can eyet'l chi ta', ax in japx jun 'ejm xo. Ax wul ex wi'nc wet'oc, sec wach' a 'aj 'ayn 'ec' cha, ata 'oj eyaj wet'oc. 4 Ax tic, eyojc xoni, 'aj 'oj in c'ochi. Eyojc pax jun b'e 'aj 'oj in 'ati, xchi 'a eb'. 5 Ax Tomás 'ix aln 'ixtc 'a 'a: —Palta Mamin, man̈ cojcoc on̈, 'aj 'oj a c'och cha. Yuj cha, ¿tas 'oj cutc cojcan 'el jun b'e chi 'on̈? xchi. 6 — A jun b'e tzwal tic, an ton tic. Cojn in tztac' ex wi'n 'at 'a 'aj 'ay qui Mam Dios. An tic yel in, 'aj q'uinl in. 7 Octom tzin eyojquej 'eli. To 'ixta', 'oj eyojcoc 'el in Mam. Al ticnec, eyojc xo in Mam cha, yujto tox xeyila, xchi. 8 Ax Felipe 'ix aln 'ixtc 'a 'a: —Mamin, ch'ox quil a Mam chi 'on̈, colb'iln̈ej cab' cha, xchi. 9 Yuj cha, 'ix yaln pax Jesús 'a 'ixtic: —Felipe, 'in niwn xo tiempo 'ayn 'ec' eyet'oc. ¿Tom mant in ojcoc, mach in? A eb' tzin 'ilni, tzyal 'el'chi wan yiln eb' qui Mam Dios. Yuj cha, ¿tas yuj tzat al 'ayin: Ch'ox quil a Mam chi 'on̈, xa chi? 10 ¿Tom matz a'ch 'a a c'ojol, to 'ayn 'och 'a qui Mam Dios, 'aych pax 'ayin? A tas tzwala, man̈ munoc tzwal in ch'ocoj. Palta a qui Mam Dios 'aych 'ayin, a wan smunlj wet'oc. 11 'A'c 'och 'a e c'ojol, chajtlto 'ayn 'och 'a qui Mam Dios, 'aych pax 'ayin. Toto matz in eya'ch 'a e c'ojl yuj tas tzwala, 'a'c 'och e c'ojl 'ayn yuj jun tzo'n̈ milagro tzin ch'oxo. 12 Wal yel tzwal 'ayex, a eb' tzin 'a'n 'och 'a sc'ojol, 'oj sb'o eb' jun tzo'n̈ tas tzin b'o'o. 'Ay jun tzo'n̈ xo tas 'ec'b'al 'a yib'n̈ jun tzo'n̈ tic 'oj b'o yuj eb', yujto 'oj in pax 'a 'aj 'ay qui Mam Dios. 13 Tzann̈j tas 'oj e c'an 'a Dios 'a in b'i, 'oj in b'o 'ayex. 'Ixta 'oj in b'o an Yunnaln Dios tic, sec wach' 'oj checljc 'el wu'uj, to caw niwn yel'ch qui Mam Dios. 14 Tzann̈j tas 'oj e c'an 'a Dios 'a in b'i, 'oj in b'o 'ayex. 15 Toto tzin e chamc'ojlej, yicljec jun tzo'n̈ in checnb'il. 16 An tic, 'oj in c'an 'a qui Mam Dios, ax 'oj checnc cot junx 'oj colwjoc eyet'oc, atn Yespíritu caw yel. A 'oj can eyet' 'a jun 'ejmhej. 17 A eb' yic xon yolyib'n̈q'uinl tic, ma'oj stac' schan eb' jun tic, yujto matz tac' yiln eb', man̈ yojcoc eb'. Ax xo tic, eyojc xo Yespíritu tic, yujto 'ayc' xon eyet'oc. A 'oj 'ochcn 'ayx 'a jun 'ejmn̈ej. 18 An tic, ma'oj ex wactc can e ch'ocoj, 'oj in japx eyet' jun 'ejm xo. 19 Jab'xoj wal tiempo, 'ixta to b'i'an, man̈x b'a'n̈ 'oj in yil eb' 'anma'. Ax xo tic, 'oj in eyila'. Yujto pitzn in 'a jun 'ejmn̈ej, yuj cha, pitzn ex pax 'a jun 'ejmhej jun xo. 20 A 'a jun c'u yic 'oj 'ochcn Espíritu 'ayex, atta 'oj nachjoc 'el eyu'uj, chajtlto 'ayn 'och 'a qui Mam Dios, 'aych pax 'ayin. Ax snachj pax 'el eyu'uj, chajtlto 'ayx 'och 'ayin, 'ayn pax 'och 'ayex. 21 A eb' 'aych snab'en 'a jun tzo'n̈ in checnb'il, tzyiclni paxi, atn eb' chi 'ay schamc'ojlal 'ayin. A eb' 'ay schamc'ojlal 'ayin, ax in Mam 'oj chamc'ojlanc eb'. An̈jtona 'in, 'oj in chamc'ojloc pax eb'. Ax in ch'oxn in b'a 'a eb' 'a 'esal, schi Jesús 'a eb'. 22 'Ay junx Judas sb'i, palta man̈oc Judas 'aj Queriot, a 'ix aln 'ixtc 'a Jesús: —Mamin, ¿tas yuj cojn 'ayn̈ on̈, an̈jta 'oj a ch'ox a b'a? ¿Tas yuj ma'oj a ch'ox a b'a 'a eb' yic yolyib'n̈q'uinl tic? xchi 'a Jesús. 23 Yuj cha, 'ix yaln pax 'a 'ixtic: — A eb' 'ay schamc'ojlal 'ayin, tzyiclni eb' tas tzwala. Yuj cha, ax in Mam, tzchamc'ojlan pax eb', ax woch cajn yet' in Mam chi 'a eb'. 24 Ax eb' matz in chamc'ojlani, matz yiclj xon eb' tas tzwala. A jun tzo'n̈ paxti tzwal 'ayx tic, man̈ wico'oc, yic qui Mam Dios, atn jun checjnacn coti. 25 Tzwalcn jun tzo'n̈ tic 'ayex, ya' sb'a 'aynto 'ec' eyet'oc. 26 A qui Mam Dios 'oj checnc cot Yespíritu 'ayx in jeloc. A 'oj colwjoc eyet'oc. 'Oj ex scuy 'a smasnil tas. 'Oj yac' e na cot jantcn̈ej tas waljnacx 'ayex. 27 A ticnec, tzwa'cn junc'ojlal 'a e pixan. Atn wal in junc'ojlal tic tzwa'cn 'ayex. Man̈ 'icha'oc jac junc'ojlal tz'ilchj 'a yolyib'n̈q'uinl tic, man̈ 'ixta'oc wic tic tzwa'cn 'ayex. Man̈ eyac' somchjoc 'el e nab'en, mafi ex xiwoc. 28 Tox 'ix wal eyab'i', to 'oj in paxi, palta 'oj in japxi, ax in can eyet'oc. Toto yel tzin e chamc'ojlej, toto 'ixta', tzex tzalji, yic 'oj eyab'ni, to 'oj in pax 'a qui Mam Dios. Yujto caw 'ec'b'al xo yel'ch 'a wib'afi. 29 'Aycto, tzwaln can jun tzo'fi tic 'ayex, sec wach' a yic 'oj jawc 'icha tzwal tic, ax in e wach' 'a'n 'och 'a e c'ojol. 30 Man̈x niwnoc tas 'oj wal 'ayex, yujto wan sjaw win syajlil yolyib'n̈q'uinl tic. A win cha, may yaln win yic 'ayin. 31 Palta 'ixta 'oj 'ajoc, sec 'oj yojcoc 'el eb' 'anma smasnil, to 'ay in chamc'ojlal 'a qui Mam Dios, tzin yiclni smasnil schecnb'il tzyac' 'ayin. Al ticnec jun, q'uen̈ec lin̈an, coyec, xchi Jesús 'a eb'.

15

1 'Ix yaln pax Jesús 'ixtc 'a eb' scuywum: — An tzin sch'ox cot jun te snun uva. Ax junc winc tzlaj mesn 'el sc'ab' te', a in Mam tzch'ox coti. 2 Toto 'ay te sc'ab' matz laj satni, ax win 'aych stzu'n 'eli. Toto 'ay te sc'ab' wach' satni, ax win 'aych laj swach' mesn 'el te', sec tzwach' satni. 'Icha tzyutj win sb'on te', 'ixta tzyutj in Mam sb'on eb' 'aych snab'en 'ayin. 3 Ax xo tic, tox 'ix b'o e nab'en yuj jun tzo'n̈ cuynb'il waljnacx 'ayex. 4 Caw cann̈ecn̈ej wet'oc. An xo tic, 'oj in cann̈j pax eyet'oc. 'Icha junc sc'ab' te tz'el 'a snun, man̈xtzac stac' satni, 'ixta 'ex jun xo, toto matz ex can wet'oc. 5 An tic, 'icha junc snun 'awb'ente', 'ixta 'in. Ax xo tic, 'icha te sc'ab', 'ixta 'ex. A eb' junn̈j tz'ajcn wet'oc, junn̈j tzin 'ajcn yet' eb' jun xo. A eb' cha, 'icha junc te caw niwn sat tzyac'a, 'ixta 'oj 'aj eb' jun xo. Toto man̈toc 'ayn 'och eyet'oc, may xon jac tztac' eyuj e ch'ocoj. 6 Ax eb' matz cann̈j wet'oc, lajn 'oj 'aj eb' 'icha junc sc'ab' te tzu'x 'el 'a snun, tztacji, tzlajw cha, tzsi'x monto, tz'a'i. 7 Toto junn̈j tzex 'ajcn wet'oc, toto 'aychn̈ej e nab'en 'a in paxti', c'anc tas tze nib'ej, 'oj 'ajxoc 'ayex. 8 Toto niwn 'oj e satni, 'oj checljoc 'el eyu'uj, to niwn yel'ch in Mam. 'Ixta 'oj eyutc e ch'oxn 'eli, chajtlto yel in cuywum ex. 9 'Icha tzin schamc'ojlej qui Mam Dios, 'ixta tzex wutj ex in chamc'ojlan jun xo. Yuj cha, cann̈ecn̈ej 'a in chamc'ojlal tic. 10 Toto tzeyiclj jun tzo'n̈ in checnb'il, 'oj e cann̈j 'a in chamc'ojlal tic. Yujto 'ixta waj yet' in Mam, tzin yiclj jun tzo'n̈ schecnb'il. Yuj cha, tzin cann̈j 'a schamc'ojlal. 11 Tzwalcn jun tzo'n̈ tic 'ayex, sec wach' 'icha tzin tzalji, 'ixta pax 'oj e tzalj jun xo, sec caw tz'acn 'oj 'ajcn e tzaljc'ojlal. 12 A ticnec, 'ay jun checnb'il 'oj walcn 'ayex, to tzlaj e chamc'oljoc e b'a junjn ex, 'icha tzex wutj ex in chamc'ojlani. 13 Toto 'ay junc mach tzyac' cham sb'a yuj junc swach'c'ojol, may junc mach 'ec'b'al schamc'ojlal 'a jun cha. 14 Ax tic, toto tzeyiclj jun tzo'n̈ in checnb'il, to 'ixta', in wach'c'ojl ex. 15 A ticnec, tzwal 'ayex, man̈xtoc ton̈j 'a'm ex servil 'ayin. Yujto a junc tz'a'w servil, man̈ yojcoc tas tzb'o spatron̈. Palta ax ticnec, caw in wach'c'ojl ex, yujto jantcn̈ej tas yaljnac can in Mam 'ayin, c'uxn xwalx 'ayex. 16 Ax tic, man̈oc ex in e sic' 'elta. Palta to an ex in sic' 'elta. 'Ix wa'n 'och eyopiso, ex in checn 'at satnoc. Ax jun tzo'n̈ e sat cha, 'oj can 'a jun 'ejmn̈ej. Yuj cha, jantcn̈ej tas tze c'an 'a qui Mam Dios 'a in b'i, 'oj ya'n̈j 'ayex. 17 Atn jun checnb'il tzwalcn 'ayx tic, to tzlaj e chamc'ojloc e b'a junjn ex. 18 Toto 'ay eb' yic yolyib'n̈q'uinl tic tzchichn 'och 'ayex, nac coti, to a 'ayn tzb'ab'l chichn 'och eb'. 19 Q'uinloc yic ex yolyib'n̈q'uinl tic yet' eb', toto 'ixta', tecn tzex schamc'ojlej eb'. Palta man̈x ex yico'oc yolyib'n̈q'uinl tic, yujto tox ex in si'cn 'elt 'a scal eb'. Yuj cha, tzchichn 'och eb' 'ayex, yujto man̈x eyitb'eymoc e b'a yet' eb'. 20 Caw tze na cot jun paxti 'ix wal 'ayx tic: May junc moso 'ec'b'al yel'ch 'a yib'n̈ spatron̈, xin chi 'ayex. 'Icha tzya'ch eb' yailal 'a wib'an̈, 'ixta 'oj yutc eb' ya'n 'och 'a eyib'n̈ jun xo. Toto 'ix syiclj eb' in paxti an tic, 'oj syiclc pax eb' eyic jun xo. 21 C'uxn 'oj laj ya'ch eb' jun tzo'n̈ tic 'a eyib'n̈ wu'uj, yujto man̈ yojcoc eb' jun checjnacn coti. 22 Quinloc ma'ix wul wal 'a eb'. To 'ixta', may smul eb'. Palta ax ticnec, man̈x 'a 'aj wach' scoln sb'a eb' yuj smul. 23 Yujto a eb' tzchichn 'och 'ayin, tzchichn pax 'och eb' 'a in Mam. 24 A jun tzo'n̈ milagro xlaj in ch'ox 'a scal eb', may junc xo mach tztac' yuj 'ixta'. Q'uinloc may milagro chi xin ch'oxo, to 'ixta', may smul eb'. Al ticnec, wach'xam xyil eb' jun tzo'n̈ cha, palta an̈ja schichn 'och eb' 'ayin, tzchichn pax 'och eb' 'a in Mam. 25 Palta 'ixtn tic tz'aj yel'ch jun tzo'n̈ tic, sec tz'el'ch tas tz'ib'b'il can 'a ch'an̈ ley 'aj tzcob' ya'ch eb' snab'en. 'A 'aj tzyal 'ixtic: Tzcomn chichn 'och eb' 'ayin, xchi 'a Ch'an̈ U'un̈. 26 Palta 'ay jun 'oj cot 'a qui Mam Dios, atn Yespíritu caw yel. 'Oj jawoc, ax scolwj eyet'oc. An 'oj 'at in chec coti. A jun chi 'oj yac' testigoal sb'a wu'uj. 27 An̈jtona', 'ixta 'ex, 'oj eyac' pax testigoal e b'a wu'uj, yujto jun 'e'nc ex wet'oc yictax yel yich in munljel tic.

16

1 Tzwalcn jun tzo'n̈ tic 'ayex, sec ma'oj somchjc 'el e nab'en. 2 Yujto 'oj ex spech 'elt eb' quit israelal 'a yol scapiya. 'Ay wal jun tiempoal 'oj jawoc, yaln̈ej mach 'oj e milni, ax snan eb', to a Dios wan ya'n servil eb'. 3 'Ixta 'oj ex yutc eb', yujto man̈ yojcoc eb' in Mam, man̈ in yojcoc pax eb'. 4 Tzwalcn jun tzo'n̈ tic 'ayex, sec a yic 'oj jawc jun tiempoal cha, 'oj e na coti, to waljnacx can 'ayex. Ma'ix wal jun tzo'n̈ tic 'ayx 'a yic yalah, yujto 'aynto 'ec' eyet' ta'. 5 Al ticnec, 'oj in pax 'a jun checjnacn coti. Palta 'in may junc ex tze c'anb'j 'ayin, 'aj 'oj in c'ochi. 6 Ton̈j tzex caw cus chan̈ yuj jun tzo'n̈ tzwalcn 'ayx tic. 7 Palta yel tzwal 'ayex, a yic 'oj in 'ati, yel xo caw wach' eyico'. Toto ma'oj in 'ati, ax jun 'oj jawc colwjoc eyet'oc, ma'oj jawoc. Palta a yic 'oj in 'ati, 'oj in chec cot jun chi 'ayex. 8 A yic 'oj jawoc, 'oj yac' yojcoc 'el eb' yic yolyib'n̈q'uinl tic to 'ay smul eb'. 'Oj yac' yojcoc 'el eb' chajtlto wach'n̈j xwutj in b'a. 'Oj yac' yojcoc pax 'el eb', to 'oj b'eyc'ojlaxc eb' yuj Dios. 9 'Oj yac' yojcoc 'el eb' to 'ay smul eb', yujto matz in ya'ch eb' 'a sc'ojol. 10 'Oj yac' yojcoc 'el eb' chajtlto wach'n̈j xwutj in b'a, yujto 'oj in pax 'a 'aj 'ay qui Mam Dios. Man̈x 'a 'aj 'oj in eyil 'a tic. 11 'Oj yac' pax yojcoc 'el eb', to 'oj b'eyc'ojlaxc eb' yuj Dios, yujto tox 'ix b'eyc'ojlax win syajlil yolyib'n̈q'uinl tic. 12 Til to wal tas tzin nib'j tzwal 'ayex, palta mantzac nachj 'el eyuj ticnec. 13 At 'a yic 'oj jawc Yespíritu Dios caw yel, at 'oj 'a'nc nachjc 'el smasnil tas yel eyu'uj, yujto man̈ munoc 'oj yal 'a yol yico'. Jantcn̈ej tas 'oj alxc 'a 'a, an̈j 'oj yala'. 'Oj yal pax 'ayex, yuj tastc tot 'oj jawoc. 14 Yu'uj, 'oj checljoc 'eli to caw niwn wel'chi. Jantcn̈ej tas 'oj wal 'a 'a, a 'oj alnc pax 'ayex. 15 Jantcn̈ej tas 'ay 'a qui Mam Dios, wichej yaji. Yuj cha, xwaln 'ayex, to jantcn̈ej tas 'oj wal 'a Yespíritu Dios cha, a 'oj alnc pax 'ayex. 16 Jab'xoj wal tzin eyil ticnec, ax yec' 'a janic', man̈x 'oj in eyila'. Palta at pax chab'j 'oxej, ax in eyiln paxi, [yujto 'oj in pax q'ue 'a 'aj 'ay qui Mam Dios], xchi Jesús 'a eb'. 17 Xlajw yaln jun cha, 'ay jaywn̈ eb' scuywum, 'ix laj yal-lanc eb' 'ixtic: —¿Tas laj tzyal 'el'ch jun tzo'n̈ xyal 'ayn̈ec tic? 'In xyala: Jab'xoj wal tzin eyil ticnec. Ax yec' 'a janic', man̈x 'oj in eyila', xchi. Xyaln paxi: Yujto 'oj in pax q'ue 'a 'aj 'ay qui Mam Dios, xchi 'ayn̈ec. 18 A jun jab'xoj xyal tic, ¿tas laj wal tzyal 'el'ch ticnec? Caw matz nachj 'el cujec, tas tzyala, xchi eb'. 19 Ax Jesús, yojtac to tznib'j eb' sc'anb'c 'a 'a, tas tzyal 'el'ch jun xyal cha. Yuj cha, 'ix yaln 'ixtc 'a eb': —Tox 'ix wal 'ayex: Jab'xoj wal tzin eyil ticnec. Ax yec' 'a janic', man̈x 'oj in eyila'. Palta at pax chab'j 'oxej, ax in eyiln paxi, xin chi 'ayex. ¿Tom yuj jun tzo'n̈ tzwal tic, 'i'n tzlaj e c'anb'lanc 'ec' 'ayex? 20 Wal yel tzwal 'ayex, 'oj e cusi, 'oj eyoq'ui. Ax eb' yic yolyib'n̈q'uinl tic, 'oj laj tzaljoc eb'. 'Oj e cus toni, palta a jun e cusc'ojlal cha, 'oj meltzjoc 'och tzaljc'ojlal 'ayex. 21 Q'uinloc 'ay junc 'ix ticnec, wan yalj yune'. Tzcus toni, yujto 'aych 'a syailal. Palta ax yic tox 'ix 'alj yune cha, man̈xtzac sna cot syailal cha, caw tzalj paxi, yujto x'alj jun 'unn chi 'a yolyib'n̈q'uinl tic. 22 'Icha junc 'ix cha, 'ixta 'oj eyaji. 'Oj e cus ton ticnec. Palta at yic 'oj in eyilnc pax jun 'ejm xo, caw 'oj e tzalj paxi. Ax jun e tzaljc'ojlal cha, may mach 'oj stac' yi'n 'ec' 'ayex. 23 A 'a jun c'ul cha, man̈x 'a tas 'oj e c'anb'c 'ayin. Wal yel tzwal 'ayex, jantcn̈ej tas 'oj e c'an 'a qui Mam Dios 'a in b'i, 'oj ya'n̈j 'ayex. 24 Ax ticnec, mant 'a tas tze c'an 'a Dios 'a in b'i. C'anec, ax e chani. 'Oj 'ajxoc 'ayex, sec 'oj tz'acwc e tzaljc'ojlal. 25 Chuc xwutj waln jun tzo'n̈ cuynb'il tic 'ayex. Palta 'ay jun tiempoal 'oj jawoc, man̈xtoc 'oj wal 'ayx 'ixta', yujto tojl xoj 'oj wutc waln yab'xil qui Mam Dios 'ayex. 26 At 'a yic 'oj jawc jun c'u cha, atta 'oj e leslwi 'a in b'i yuj tas tze nib'ej. Matz wal 'ayex, to an 'oj in c'an tas 'a qui Mam Dios eyu'uj. 27 Yujto caw a 'ay xon schamc'ojlal 'ayex, yujto tzin e chamc'ojlej. Tzeya'ch 'a e c'ojol, to ata cotnc in. 28 Yel, a 'a qui Mam Dios cotnc in, in jaw 'a yolyib'n̈q'uinl tic. A ticnec, 'oj wactc can pax yolyib'n̈q'uinl tic, ax in pax q'ue 'a 'aj 'ay qui Mam Dios cha, xchi 'a eb'. 29 Ax eb' scuywum cha, 'ix yaln eb' 'ixtc 'a 'a: — A ticnec, caw tojl xoj tzotj aln 'ayn̈ on̈. Man̈xtoc chuc tzotj aln 'icha 'a jun 'el. 30 A ticnec, cojc on̈ to ojcn̈ej smasnil tas. Man̈ yowlalc tzat qui c'anb'j 'aych on̈, ax aln 'ayn̈ on̈. Yuj cha, tzca'ch 'a qui c'ojl on̈, to a 'a Dios cotnc ach, xchi eb' 'a 'a. 31 Yuj cha, xyaln pax 'ixtc 'a eb': —¿Tzam eya'ch wal e c'ojl 'ayn ticnec? 32 Palta wan xo sjaw stiempoal 'oj e sactziqui. 'Oj e 'at 'elc junjn ex, ax in eyactn can in ch'ocoj. Palta man̈ in ch'ocjoc 'oj in cani, 'ayc' qui Mam Dios wet'oc. 33 'Ix wal smasnil jun tzo'n̈ tic 'ayex, sec wach' junc'ojlal xoj 'oj 'aj e pixn wu'uj. A 'a yolyib'n̈q'uinl tic, 'oj eyab' ton syail. Palta te'n tzeyutj e b'a, yujto a jun yolyib'n̈q'uinl tic, 'ix can 'a yaln̈ wu'uj, xchi 'a eb'.

17

1 Xlajw yaln Jesús jun tzo'n̈ cha, 'ix q'ue q'ueln 'a satcha'an̈. 'Ix yaln 'ixtic: —Mamin, tox xjaw stiempoal yic tza ch'oxn 'eli to niwn wel'ch an Onnaln tic. Ax in ch'oxn paxi, to caw niwn pax el'chi. 2 Yujto ach ajnac wopiso 'a yib'n̈ smasnil 'anma', sec wach' jantcn̈ej eb' tzac' 'ayin, tztac' wa'n sq'uinl eb' 'a jun 'ejmn̈ej. 3 Caw yel cojn ach Dios ach, a eb' 'ojtnac ach, an̈jtona yojc in pax eb' an checb'iln cot oj tic, atn eb' chi 'ay sq'uinl 'a jun 'ejmn̈ej. 4 A yic 'ayn 'ec' 'a yolyib'n̈q'uinl tic, xin ch'oxo, to caw niwn el'chi. A jun munljel tic 'ac'b'il can 'ayn o'oj, 'ix b'o 'el'ch wu'uj. 5 A 'a yic mantzac b'o yolyib'n̈q'uinl tic, 'ayn 'ec' et' 'a 'aj 'ay qui wach'il. Al ticnec Mamin, chaj in pax q'ue et' 'a 'aj 'ay qui wach'l cha, 'icha xon waj et'oc. 6 A eb' xa sic' 'elt 'a yolyib'n̈q'uinl tic, xa'n eb' 'ayin, xin ch'ox 'a eb' tas yaj a nab'en. A eb' xac' 'ayn cha, toxn ec xon eb'. Tzlaj syiclc eb' a paxti'. 7 A ticnec, jantcn̈ej tas a'jnac 'ayin, yojc eb' to a 'aych cotnac. 8 A wal a paxti 'a'jnac 'ayin, c'uxn xwal 'a eb'. Ax eb', xya'ch eb' sc'ojl 'a 'a. Yuj cha, yojc eb' to yel a 'aych cotnc in. Tzya'ch eb' 'a sc'ojol to ach checjnacn coti. 9 Yuj cha, tzin leslwi yuj eb'. Ax eb' yic yolyib'n̈q'uinl tic, matz in leslwi yuj eb'. Cojn eb' xac' 'ayin, an̈j eb' tzin leslwi yu'uj, yujto ec xo eb'. 10 Jantcn̈ej eb' wico', ec xo pax yaj eb'. An̈jtona eb' eco', wic pax eb' et'oc. Atn eb' tic tzch'oxn 'eli, to caw niwn wel'chi. 11 Jab'xoj wal 'ayn 'ec' 'a yolyib'n̈q'uinl tic, ax in pax q'ue et'oc. Ax eb' tic, 'oj laj can eb' jacx 'a yolyib'n̈q'uinl tic. Mamin, caw tojln̈ej a nab'en. A eb' xac' 'ayn tic, tza tan̈wj eb' yet' a poder, sec junxfiej tz'aj snab'en eb' 'icha waj et'oc. 12 Yic 'ayn 'ec' yet' eb' 'a yolyib'n̈q'uinl tic, xin tan̈wj eb' yet' a poder. An 'ix wac' cuenta eb' xac' 'ayn tic, sec may tz'i'n eb'. Yuj cha, may junc eb' sati, palta cojn jun satnc xoni, sec tz'el'ch tas tz'ib'b'il can 'a Ch'an̈ U'un̈. 13 'Oj in paxx 'ayach. Palta ya' sb'a 'aynto 'ec' jacx 'a yolyib'n̈q'uinl tic, tzwaln can jun tzo'n̈ tic, sec wach', 'icha tzin tzalj tic, 'ixta 'oj tzaljc pax eb'. 14 Tox xlaj walcn a paxti 'a eb'. Palta a eb' 'anma yic yolyib'n̈q'uinl tic, caw tzchichn 'och eb' 'a eb', yujto man̈x yico'oc yolyib'n̈q'uinl tic yaj eb' yet' eb'. 'Icha in an tic, man̈ in yico'oc yolyib'n̈q'uinl tic. 15 May tas tzwal 'ayach, to tzej 'el eb' 'a yolyib'n̈q'uinl tic muc'uc. Palta tzin c'an 'ayach, to tza tan̈wj eb', sec may eb' tzjuw 'el yuj win syajlil maysch'olnil. 16 An tic, man̈ in yico'oc yolyib'fiq'uinl tic. An̈jtona 'ixta eb', man̈ yico'oc yolyib'n̈q'uinl tic eb'. 17 Ach tza wach' tojlb'tzej snab'en eb' yet' a paxti caw yel. Cojxn a paxti chi caw yel. 18 'Icha in otj in a checn cot 'a scal eb' 'anma 'a yolyib'n̈q'uinl tic, 'ixta tzwutj eb' in checn 'at 'a scal eb' 'anma cha. 19 Yuj swach'loc eb', yuj cha, tzwac' in b'a 'ayach, yic wach' tz'och eb' eco'oc wal 'a yel. 20 Man̈ yujocn̈ej eb' tic tzin leslwi. Tzin leslwi pax yuj eb' tot 'oj ya'ch sc'ojl 'ayn yuj tastc 'oj yal eb' in checb' tic. 21 Tzin c'an 'ayach, sec junxn̈ej 'oj 'aj snab'en eb' smasnil. Mamin, junn̈j in et'oc, junn̈j ach pax wet'oc. Comnoc 'icha caji, 'ixta 'oj 'aj eb', junfij tz'aj eb' quet'oc. Toto 'ixta', ax eb' 'anma 'a yolyib'fiq'uinl tic, 'oj ya'ch eb' 'a sc'ojol, to ach checjnacn coti. 22 A jun a wach'l ajnac can 'ayin, a 'ix wac' pax 'a eb', sec junxn̈ej tz'aj snab'en eb', 'icha waj et'oc. 23 An 'ayn 'och 'a eb', ach xo 'aych 'och 'ayin, sec wach' caw junxn̈ej 'oj 'aj snab'en eb'. Yuj cha, ax eb' 'anma 'a yolyib'n̈quinl tic, 'oj nachjc 'el yuj eb', to ach checjnacn coti. 'Oj yil eb', 'icha tzotj in a chamc'ojlani, 'ixta tzotj a chamc'ojlan pax eb' tic jun xo. 24 Mamin, a eb' tzac' 'ayin, tzin nib'ej to 'oj 'aj eb' wet' 'a 'aj 'oj in c'ochi, sec 'oj yil eb' in wachl 'ac'b'il oj 'ayin. Yujto chamc'ojlab'iln xon o'oj, yictax mantzac b'o yolyib'n̈q'uinl tic. 25 Mamin, caw tojl a nab'en. A eb' yic yolyib'n̈q'uinl tic, man̈ ach yojcoc eb'. Aln tic, wojc ach. Ax eb' tic, yojc xo eb' to ach checjnacn coti. 26 An xwac' yojcoc 'el eb' tas yaj a nab'en. 'Oj in wach' 'a'c yojcoc 'el eb', sec wach' 'icha tzin otj in a chamc'ojlani, 'ixta tzotj a chamc'ojlan pax eb', ax woch cajn 'a eb' 'a jun 'ejmn̈ej, xchi Jesús 'a qui Mam Dios.

18

1 Xlajw yaln Jesús jun tzo'n̈ tic, 'ix 'at yet' eb' scuywum. 'Ix c'och eb' 'a sc'axpil 'ec' jun ch'oln Cedrón sb'i', 'a 'aj 'ay jun tzo'n̈ 'awb'ente'. Ata xc'och eb' 'a scal. 2 Ax win Judas, tz'a'n 'och Jesús 'a yol sc'ab' chamel, yojc pax win jun lugar cha, yujto niwn 'ejm syamjnac sb'a Jesús yet' eb' scuywum ta'. 3 Yuj cha, 'ix c'och win ta'. Yet' win nahl eb' soldado. Ay pax nan̈l ewin stahmal yatut Dios, 'ix checx 'at yuj ewin sat ya'mal 'och sti eb' israel 'a Dios. Locn pax ewin fariseo 'ix checn 'at ewinac. A eb' xc'och cha, tzicb'il staj eb', yet' eb' scantil. Yet' pax eb' syamc'ab' yic owal xc'och eb'. 4 Ax Jesús, yojc xoni jantc tas 'oj jawc 'a yib'an̈. Yuj cha, 'ix yi'n 'el'ch sb'a, 'ix sc'anb'n 'ixtc 'a eb' xc'och cha: —¿Mach tze sayc' jun? xchi 'a eb'. 5 — A Jesús 'aj Nazaret, a tzqui sayc' on̈, xchi eb' 'a 'a. — A 'in, xchi 'a eb'. Ax win Judas, atn win tz'a'n 'och 'a yol sc'ab' chamel, ajun win yet' eb'. 6 Xlajwn̈ej yaln Jesús 'a eb', 'ix 'at tectnoc eb' 'a spatic, 'ix telw 'at pa'njoc eb'. 7 Ax Jesús, sc'anb'n 'a eb' jun 'ejm xo: —¿Mach tze sayc' jun? xchi pax 'a eb'. — A Jesús 'aj Nazaret, a tzqui sayc' on̈, xchi pax eb' 'a 'a. 8 —Palta tox 'ix wal 'ayex, to a 'in. Toto an tzin e sayq'ui, ax jun tzo'n̈ eb' ajun wet' tic, 'a'c can 'el eb' 'a libre, xchi 'a eb'. 9 'Ixta x'aji, sec tz'el'ch tas 'ix yal Jesús yuj eb' scuywum, yic yaln 'ixtic: A eb' xac' 'ayn tic, may junc eb' sati, xchi. 10 Ax Simón Pedro, 'ix yij q'uet yespada 'a yol yatut, 'ix stzu'n 'och 'a jun win Malco sb'i. 'Ix 'el schicn win 'a swach' yu'uj. A jun winc cha, smoso win sat ya'mal 'och sti eb' israel 'a Dios. 11 Ax Jesús, 'ix aln 'ixtc 'a Pedro cha: — Ac' 'ejm espada chi 'a yol yatut. ¿Tom tza na'a, to ma'oj wac' in b'a 'a jun yailal tzya' cot qui Mam Dios 'a wib'n̈ tic? xchi 'a 'a. 12 Ax ewin soldado yet' win scomandanteal ewinac, yet' ewin stan̈mal yatut Dios, 'ix syamn ewin Jesús, 'ix sjaln ewinac. 13 Xlajwn̈ej cha, 'ix yi'n 'at ewin 'a yatut win Anás, win shi win Caifás. A win Caifás cha, sat ya'mal 'och sti eb' 'a Dios 'a jun ab'il cha. 14 Atn win Caifás chi aljnac 'a eb' 'aj Judea cha, to yowlal tzcham jun winc sjelc eb' 'anma smasnil. 15 A yic xyi'n 'at ewin Jesús, tza'n 'och Simón Pedro yu'uj, yet' junx scuywum Jesús cha. A junx scuywum cha, 'ojcab'il yuj win Anás. Yuj cha, 'ix 'ochch yet' Jesús 'a yol yamq'uil yatut winac. 16 Ax Pedro, 'ix can 'a sti'. Yuj cha, a junx scuywum Jesús cha, 'ix 'el paxta. 'Ix yaln 'a 'ix stan̈mal sti n̈a cha, to tz'och Pedro chi yet' eb'. 17 Ax 'ix stahmal sti n̈a cha, 'ix yaln 'ix 'a 'ixtic: — Ach tic, tecn scuywum ach win xyamchj tic, schi 'ix 'a Pedro cha. —Ma'ay, man̈ ino'oc, xchi cob' 'a 'ix. 18 A 'a jun tiempoal cha, caw 'ay si'ic. Yuj cha, ax ewin moso yet' ewin stan̈mal yatut Dios, 'ix ya'ch ewin sc'ac' yet' jun tzo'n̈ 'ac'al. Lin̈n 'och ewin c'achnoc. Ax Pedro, 'ix 'ochch yet' ewin 'a sti c'ac' cha, 'ix c'achn yet' ewinac. 19 Ax win Anás, win sat ya'mal 'och sti eb' israel 'a Dios, 'ix sc'anb'n win 'ixtc 'a Jesús: —¿Machtc eb' a cuywum? ¿Tas jun tzo'n̈ a cuynb'il tzac' scuy eb'? xchi win 'a 'a. 20 Ax Jesús, 'ix yaln 'ixtc 'a winac: — A jun tzo'n̈ cuynb'il tic, 'in 'ix wal 'elt 'a scal eb' 'anma smasnil. Smasnil tiempo tzwal 'elt 'a yol jun tzo'n̈ e capiya, yet' 'a yamq'uil yatut Dios, 'a 'ajtil tzyam sb'a eb' quit israelal smasnil. May junc tas 'ix wal 'a c'ultaquil. 21 ¿Tas yuj a 'ayn tza c'anb'ej? C'anb’j 'a eb' x'ab'n waln 'elta. Yal cab' eb' 'ayach, tas jun tzo'n̈ cuynb'il tic. 'In yojc xon eb' tas 'ix wal 'elta, xchi Jesús 'a winac. 22 Xlajwn̈ej yaln jun tzo'n̈ cha, ax jun win stan̈mal yatut Dios 'ayc' ta', spawn 'och win sc'ab' 'a sat Jesús cha. 'Ix yaln win 'ixtc 'a 'a: —¿Tom 'ixta tzotj a ta'wni tas tzyal win sat ya'mal 'och qui ti 'a Dios? xchi win 'a Jesús. 23 —Toto 'ay tu 'ix wal tzab'i, al 'ayin, 'ajm 'a junc tu 'ix wal cha. Palta 'in wach' 'ix wutj waln 'a 'a. Yuj cha, ¿tas yuj tzin a comn maq'uej? xchi Jesús 'a winac. 24 Xlajw cha, ax win Anás, 'ix 'a'n 'ijxc 'at Jesús 'a win Caifás, win sat ya'mal 'och sti eb' israel 'a Dios. An̈ja jalb'il yuj ewinac, 'ix yi'n 'at ewinac. 25 Ax Pedro, an̈ja lihn 'och c'achnoc yet' ewin policía chi 'a sti c'ac'. Yuj cha, 'ix yaln ewin 'ixtc 'a 'a: — Ach tic, tecn scuywum ach Jesús, xchi ewinac. Ax Pedro, 'ix yij 'el 'a yib'an̈. 'Ix yaln 'ixtic: —Ma'ay, man̈ ino'oc, xchi cob'i'. 26 Xlajw cha, 'ay jun smoso win sat ya'mal 'och sti eb' 'a Dios, 'ayt yuj sb'a yet' win 'ix tzu'x 'el schicn yuj Pedro. 'Ix yaln 'ixtc 'a Pedro cha: — Ach tic, ¿Tom man̈oc ach 'ix wil ec' yet' Jesús 'a scal jun tzo'n̈ 'awb'ente'? xchi 'a Pedro. 27 Palta ax Pedro cha, 'ix yij pax 'el 'a yib'n̈ jun 'ejm xo. Xlajwn̈ej yaln jun cha, 'ix 'oc' jun no 'ajtzo'. 28 Ax yic sacb'i, 'ix yi'n 'elt ewin Jesús 'a yol yatut win Caifás. Xyi'n 'at ewin 'a 'aj 'ay sdespacho win yajal. A sley eb' 'aj Judea cha, matz tac' yoch eb' 'a yol sdespacho win cha. Tzna eb', toq'ue tzjuw 'el eb' 'a sat Dios. Toq'ue man̈xtzac stac' swa eb' 'a jun yemc'ul yic q'uin̈ cha. 29 Yuj cha, ax Pilato, atn win yajal, 'ix 'elt win 'a sti'. 'Ix sc'anb'n win 'a ewin 'ixtic: —¿Tas smul jun win tzwul eyac' 'ayn tic? xchi winac. 30 —Toto man̈ tuc winac, matz tac' qui comn 'i'n cot win 'aych on̈, xchi ewinac. 31 Yuj cha, 'ix yaln pax win Pilato chi 'ixtic: —'Ijec pax 'at win 'a 'aj 'ayex. Mun tze b'o yaj win ta', 'icha tzyal e ley, xchi winac. —Palta an̈ israel on̈ tic on̈, matz tac' qui comn 'a'n 'och chaml 'a yib'n̈ junc mach on̈, xchi ewinac. 32 'Ixta x'aj yel'ch tas 'ix yal Jesús, chajtlto 'ixta 'oj yutc eb' smiln chamoc. 33 Ax win Pilato cha, 'ix 'ochx can win 'a yol sdespacho cha. Ata 'ix yawtj 'och win Jesús, 'ix sc'anb'n win 'a 'ixtic: —¿Tom ach tic, sReyl ach eb' israel? xchi winac. 34 —¿Mun am tza c'anb'j jun tic 'ayin, mto 'ay mach xaln 'ayach? xchi Jesús 'a winac. 35 —¿Tom israel in tzela? A eb' et chon̈ab', yet' eb' sat ya'mal 'och e ti 'a Dios, a eb' ach wul 'a'nc 'och 'a yol in c'ab'. ¿Tas xa say a muloc? xchi win 'a 'a. 36 — An tic, man̈oc 'a yolyib'n̈q'uinl tic rey in. Q'uinloc a 'a yolyib'n̈q'uinl tic rey in. To 'ixta', ax eb' tzin 'a'n servil, 'ix yac' eb' owal, sec ma'in 'ajx 'och 'a yol sc'ab' eb' 'aj Judea. Palta manoc 'a tic rey in, xchi Jesús 'a winac. 37 — ¿Tom yel, to ach reych jun? xchi win 'a 'a. —N', reyn ton 'icha tzal tic. An tic, in wulc' 'a yolyib'n̈q'uinl tic, yic tzwul walnc 'el jun tas caw yel. Yuj cha, in 'alji. Jantcn̈ej eb' yic xon jun yel tic, tzya'ch eb' schicn 'a tas tzwala, xchi Jesús. 38 'Ix yaln pax win Pilato chi 'ixtic: —'A... ¿Tasm jun yel tzal tic? xchi win Pilato chi 'a Jesús. Xlajw xoj yaln win jun cha, 'ix 'el paxt 'a 'aj 'aycn eb' 'aj Judea 'a sti'. 'Ix yaln 'elt win 'a scal eb' 'ixtic: — A jun winc tic, may jac smul tz'ilchj wu'uj. 39 Palta 'ay jun e ley, to a 'a junjn e q'uin̈ tic, tze c'an 'elt junjn eb' preso yaji, yic tz'el 'a libre. Yuj cha, ¿mamtzac yal e c'ojl tzwa'l jun e Reyl ax israel ex tic 'a libre ticnec? xchi win 'a eb'. 40 Yuj cha, 'ix 'awj chan̈ eb' smasnil 'ixtic: — A jun winc tic, matz qui nib'j on̈. A win Barrabás, a win tza'l 'a libre, xchi eb' 'a winac. A win Barrabás cha, 'elc'm winac.

19

1 Ax win Pilato cha, 'ix yi'n 'elt win Jesús, xya'n win ma'xoc. 2 Xlajw cha, ax ewin soldado, 'ix spalch'ab'n ewin jun q'ui'ix, setn xoj xyutj ewinac. 'Ix ya'n q'ue ewin 'a sjolm Jesús scoronaoc. 'Ix ya'n pax 'och ewin jun q'uic'mucnac pichl 'a 'a, 'icha yic eb' rey. 3 Xlajw cha, 'ix laj c'och ewin 'a stz'ey, 'ix stz'acn ewin yal 'a 'ixtic: —Tzaljan̈ ach cob' sReyl eb' israel, xchi ewin 'a 'a. Spawn 'och ewin sc'ab' 'a sat. 4 Xlajw cha, 'ix 'el paxt win Pilato 'aj 'aycn eb' 'aj Judea chi 'a sti'. 'Ix yaln pax 'elt win 'ixtc 'a scal eb': —'Iltec, tic tzin ch'ox 'elt win 'ayex, sec tzeyojquej 'eli, to may jac smul tz'ilchj wu'uj, xchi win 'a eb'. 5 'Ixta to b'i'an, 'ix 'elt Jesús 'a sti'. An̈ja 'ay q'ue jun q'uix chi 'a sjolom, yet' jun q'uic'mucnac pichl cha. Ax win Pilato cha, 'ix yaln pax 'elt win 'ixtc 'a eb': —Yaj winac, xchi. 6 Ax ewin sat ya'mal 'och sti eb' israel 'a Dios, yet' eb' stan̈mal yatut Dios cha, yic 'ix yiln eb' yel-l 'a sti cha, 'ix q'ue b'uynjoc eb' yaln 'ixtic: —'Och cab' win 'a spenc culus, 'och cab' win 'a spenc culus, xchi eb'. Palta 'ix yaln pax win Pilato chi 'ixtc 'a eb': —'Ijec 'at winac, tzeya'n 'och win 'a spenc culs chi e ch'ocoj. Aln tic, may jac smul win tz'ilchj wu'uj, xchi win 'a eb'. 7 —Palta ah tic on̈, 'ay jun ley 'aycn 'ayn̈ on̈. Yuj jun ley cha, yowlal 'oj milxc cham jun winc tic, yujto 'ix yalch sb'a Yunnaloc Dios, schi eb' 'a winac. 8 Yic 'ix yab'n win Pilato chi jun cha, caw 'ix wach' xiw winac. 9 Yuj cha, 'ix 'ochx win 'a yol sdespacho jun 'ejm xo. 'Ix sc'anb'n pax win 'ixtc 'a Jesús: —¿'Aj wal til cotnc ach jun? xchi win 'a 'a. Palta ax Jesús, ma'ix ta'w 'a winac. 10 Yuj cha, 'ix yaln pax win 'a 'ixtic: —¿Tas yuj matz ach ta'w 'ayin? ¿Tom man̈ ojcoc to an 'ay wopiso ach wa'n 'och 'a spenc culus? ¿'Ay pax waln wic ach wa'n 'el 'a libre? xchi win 'a 'a. 11 Yuj cha, 'ix yaln Jesús 'ixtc 'a winac: —Yujto a Dios 'a'jnac opiso tic, toto ma'ay, may xon jac aln ec 'ayin. Yuj cha, a jun in 'a'n 'och 'a yol a c'ab', a 'ec'b'al smul 'a eb'an̈, xchi Jesús 'a winac. 12 Xlajw xoj yab'n win jun cha, 'ix snani tas tzyutj ya'n 'el Jesús chi 'a libre. Palta ax eb' 'aj Judea cha, 'ix q'uex b'uynjoc eb' yaln 'ixtic: —Toto tza'l win 'a libre, caw tzach meltzj 'och 'ajc'ojlal 'a win yajl 'a Roma. A win tic, 'in 'ix yalch sb'a reyal. Palta tzann̈j mach tzaln 'ixta', caw 'ajc'ojl yajch 'a win yalj 'a Roma cha, xchi eb' 'a winac. 13 Xlajw yab'n win jun tzo'n̈ tic, 'ix ya'n 'ijxoc 'el Jesús 'a 'aj 'ayc' cha. Xlajw cha, 'ix 'em wocn win 'a 'aj tzb'oyaj eb' 'anma'. A jun lugar cha, Gabata sb'i 'a hebreo, atn sti eb' israel. Tzyal 'el'chi, 'aj latz'b'il 'ejm q'ue'en. 14 A yic 'ix 'em wocn cha, wan yoch chimc'ual. Q'ui'noc xoj yoch q'uin̈ cha. 'Ix yaln pax 'elt win 'a scal eb' 'ixtic: —'Iltec, yaj win e reyl tic, xchi 'elt win 'a eb'. 15 Palta 'ix laj 'awj pax chan̈ eb' jun 'ejm xo: —Cham cab' winac. 'Och cab' win 'a spenc sulus, xchi pax eb'. —¿Tom tzwa'ch jun e reyl tic 'a spenc culs cha? xchi win 'a eb'. Ax ewin sat ya'mal 'och sti eb' 'a Dios, 'ix ta'w pax ewin 'ixtic: — An̈ tic on̈, cojn win yajl 'a Roma qui reyl oti, may junc xo, xchi ewinac. 16 'Ixta to b'i'an, 'ix ya'n 'och win Jesús 'a yol sc'ab' eb', yic tz'at ya'nc 'och eb' 'a spenc culus. Xlajw xoj cha, 'ix yi'n 'at eb'. 17 Ax Jesús, toxn 'ix scuch sculsal. 'Ix 'at 'a jun lugar tzcuch Gólgota 'a hebreo. Tzyal 'el'chi: Yet'l Sb'acl Jolom. 18 Ata 'ix ya'ch eb' Jesús 'a spenc culus. 'Ay chawn̈ xo eb' x'ajx 'och 'a spenc culs chi yet'oc, junjn eb' 'a smo'och. Yuj cha, a 'a snan̈l sculsal eb' chi xcan Jesús yet' sculsal cha. 19 Ax win Pilato 'ix 'a'n tz'ib'xc 'och jun tzo'n̈ paxti 'a jun yune 'a'nte'. 'Ix ya'n 'ajxoc q'ue 'a sjolm sculsal Jesús. Tzyal jun chi 'ixtic: A Jesús 'aj Nazaret, sReyl eb' israel, xchi. 20 A jun lugar 'aj 'ix t'ufíx q'ue cha, ata 'ay 'a sti chon̈ab'. Yuj cha, til wal eb' israel 'ix 'iln jun tzo'n̈ paxti cha. To tz'ib'b'il 'och 'a sti eb', yet' 'a griego, yet' pax 'a latín, atn sti eb' 'aj Roma. 21 Yuj cha, ax ewin sat ya'mal 'och sti eb' israel chi 'a Dios, 'ix aln 'a Pilato 'ixtic: —Octom man̈oc sReyl eb' israel xac' tz'ib'xc 'ochi. Yel xo wach', tzac' tz'ib'xc 'och 'ixtic: A win tic, 'ix yalch sb'a Sreyloc eb' israel, xa chi, xchi eb' 'a winac. 22 — A tas xwac' tz'ib'xoc 'och cha, 'oj cann̈j 'icha yaj cha, xchi win 'a eb'. 23 Ax ewin soldado cha, xlajw st'uhn can q'ue ewin Jesús, xyi'n 'el ewin spichul. 'Ix spojn 'ec' ewinac. Chan̈e x'eli, junjn yic junjn ewinac. Palta ax jun spotil, junn̈j yaj sjalxi, may stz'isul. 24 Yuj cha, 'ix yaln ewin 'ixtic: —Tecn a jun tic, ma'oj stac' qui pojnec 'ec' 'ayn̈ec. Yel xo wach', ton̈j tzca'c b'ul yu'uj, yaln̈ej mach junc on̈ec 'oj qui'cni, xchi ewinac. 'Ixta x'aj yel'ch tas tz'ib'b'il can 'a Ch'an̈ U'un̈, 'a 'aj tzyal 'ixtic: 'Ix spojc' eb' in pichl 'a 'a, xya'n 'och eb' b'ul 'a yib'an̈, xchi 'a Ch'an̈. Yuj cha, 'ixtc wal 'ix yutj ewin soldado cha. 25 A 'a stz'ey sculsal Jesús, 'aj t'un̈n q'ue cha, ata 'ayc' snun. Ajun pax jun 'ix snul'j yet'oc, yet' 'ix María yistl Cleofas, yet' pax 'ix María Magdalena. 26 Ayc' pax jun scuywum Jesús 'a stz'ey snun cha, atn jun caw chamc'ojlb'il yu'uj. Yic 'ix yiln Jesús eb', 'ix yaln 'a snun chi 'ixtic: —Nunin, a jun 'ayc' et' tic, 'icha one tzotej, xchi. 27 Xlajwn̈ej cha, 'ix yaln 'ixtc 'a jun scuywum cha: — A 'in nun tic, 'icha a nun tzotej, xchi. Yuj cha, a jun scuywum cha, 'ix yi'n can 'at snun Jesús chi yet' 'a yatut. Ye'xn̈ej xcan yet' ta'. 28 Xlajw cha, a Jesús, yojc xoni, to tox 'ix lajw 'el'ch smasnil tas tz'ib'b'il can 'a yib'an̈. Yuj cha, 'ix yaln 'ixtic: —Caw tztacj in ti', xchi. 'Ixta xyutj yalni, sec tz'el'ch tas tz'ib'b'il can 'a Ch'an̈ U'un̈. 29 Ata 'ayc' jun vaso vinagre. 'Ix slab'n 'ejm eb' jun 'icha pitz' 'a scal. 'Ix ya'n 'och eb' 'a sjolm jun te'. 'Ix ya'n q'ue eb' 'a sti Jesús. 30 'Ix stz'ub'ni. Xlajwn̈ej cha, 'ix yaln 'ixtic: —Tox 'ix b'o 'el'ch smasnil, xchi. Xlajw xoj cha, 'ix 'em hojnjoc, 'ix chami. 31 A jun c'u cha, q'ui'noc xoj yoch q'uih yic snanb'il cot yel israel 'a libre, sc'ul 'iljelal paxi. Ax ewin 'aj Judea cha, may sgana ewin tzcan sniwnal eb' 'a te culs cha. Yujto a jun c'u tzjaw cha, caw 'ay yel'ch 'a eb' israel. Yuj cha, xit' tewc ewin 'a win Pilato, to tzyac' win ma'xoc poj sb'acl sat spenc eb', sec yajn̈ej, tz'ijx 'emt sniwnal eb' cha. 32 Yuj cha, 'ix c'och ewin soldado 'a 'aj t'un̈n q'ue eb' cha. 'Ix sma'n poj ewin sb'acl sat spenc eb' t'uhn q'ue yet' Jesús cha. 33 Palta ax yic xc'och ewin 'a stz'ey Jesús, 'ix yiln ewinac, chamnc xo. Yuj cha, man̈xtoc sma' poj ewin sb'acl sat spenc cha. 34 Palta 'ay jun soldado 'ix stecch slanza 'a scostl Jesús. Yajn̈j wal cha, 'ix 'el-l pulnjoc chic' yet' a'. 35 An tic, caw 'ix wil jun tzo'n̈ tic. Yuj cha, tzwa'n testigoal in b'a yu'uj, sec 'oj eya'ch pax 'a e c'ojol. A jun tzo'n̈ tas tzin tz'ib’j can tic, caw yel. An tic, wojtac caw yel tzwala. 36 'Ixta yaj sb'ocn jun tzo'n̈ tic, sec tz'el'ch tas tz'ib'b'il can 'a Ch'an̈ U'un̈, 'a 'aj tzyal 'ixtic: May junc sb'acl 'oj ma'x pojoc, xchi. 37 Tzyaln pax junx tic 'a Ch'an̈: A eb' tecjnac, 'oj yil eb' jun tecb'il yuj cha, xchi. 38 Ay jun winc José sb'i, 'aj chohb' Arimatea. A jun cha, scuywum Jesús, palta c'ultacn̈ej yaji, yujto caw tzxiw yab'n eb' 'aj Judea. 'Ix xit' sc'an spermiso 'a win Pilato, sec tzyij 'emt win sniwnal Jesús, tz'at smucnoc. Ax win Pilato cha, sta'wni win 'a 'a. Yuj cha, 'ix 'at yi'nc 'emta, 'ix yi'n 'ati. 39 Ax Nicodemo, 'ix c'och pax ta'. Yet' 'oxe arroba jun tzo'n̈ su'q'ui sjab', mirra sb'i, caln yaj yet' junx áloe sb'i. A Nicodemo cha, atn xit'nc 'ec' sc'umc Jesús 'a 'ac'wal. 40 'Ix yi'n 'at eb' sniwnal Jesús. Sb'a'n 'och eb' jun tzo'n̈ nip najt yoc 'a sniwnal cha. Xya'n 'och eb' jun su'q'ui sjab' chi 'a 'a. Yujto 'ixta sley eb' israel cha, 'ixta tzyutj eb' smucn eb' tzchami. 41 A 'a sla'nil 'aj 'ix t'uhx q'ue Jesús, ata 'ay jun tzo'n̈ 'awb'ente'. A 'a scal cha, ata 'ay jun q'uen olb'il yojol. A jun q'uen cha, mant 'a xon junc chamnc chi tz'ajx 'och 'a yojol. 42 Yujto a jun sc'ul 'iljelal yic eb' israel, jun 'ip xoj syamchj 'ochi, yuj cha, a 'a jun q'uen cha, ata xya'cn 'och eb' sniwnal Jesús muc'uc, yujto la'nn̈ej yaj 'a stz'ey 'aj xcham cha.

20

1 Ax 'a yic domingo, 'ayt wal sacb'i, 'ix 'at María Magdalena 'a 'aj xmucx can 'och sniwnal Jesús cha. Ax yic xc'ochi, 'ix yilni 'elnc xo smac q'uen q'uen cha. 2 Yuj cha, caw carela x'at 'ix. Ax 'a Simón Pedro xc'ochi. 'Ayc' pax junx scuywum Jesús, atn jun caw chamc'ojlb'il yu'uj. 'Ix yaln 'ix 'a eb' 'ixtic: —Caw 'ix 'ijx 'elt sniwnal Cajlilec 'a 'aj mucb'il can 'ochi. ¿ Ajm wal 'ix yij 'at ewinac? xchi 'ix 'a eb'. 3 Xlajwn̈ej yab'n Pedro chi yet' junx scuywum Jesús cha, 'ix 'at eb', x'at yilnc eb' 'a q'uen q'uen cha. 4 Caw carela x'at eb' schawn̈il. Ax Pedro jab'jnal 'ix cani. Yuj cha, a junx cuywum chi 'ix b'ab'l c'och muc'uc. 5 'Ix 'och t'an̈n 'a yojl q'ue'en. 'Ix yilni cojxn jun tzo'n̈ te nip lan̈n can 'elta. Palta ma'ix 'och 'a yojol. 6 Ax Simón Pedro cha, tza'nto xc'och yu'uj. 'Ix 'och mu'c 'a yojl q'ue'en. 'Ix yilni lahn 'ec' jun tzo'n̈ te nip cha. 7 Yet' junx te b'ac'b'il 'och 'a sjolm Jesús cha, chulb'il can b'ec'an, najttac c'otn can coti. 8 Xlajw cha, 'ix 'och pax junx cuywum chi 'ix b'ab'l c'och cha. Yic 'ix yiln jun cha, 'ixta to b'i'an, 'ix ya'n 'och 'a sc'ojol. 9 At 'ijnoc wal ya'n 'och eb' 'a sc'ojl cha, to yel xpitzw pax Jesús. Yujto ma'ix nachj 'el yuj eb' tas tz'ib'b'il can 'a Ch'an̈ U'un̈, chajtlto yowlal 'oj pitzwc pax Jesús 'a scal eb' chamnac. 10 Xlajw cha, 'ix paxx can junjn eb' 'a yatut. 11 Ax María Magdalena, 'ix can 'ix 'a stz'ey jun q'uen cha. Ma'ix 'och 'ix 'a yojol. Wan yoc' 'ix, 'ix 'och t'an̈n 'ix 'a yojl q'ue'en. 12 Ax xyilni, 'ay 'elt chawn̈ ángel 'a yojl q'ue'en. Caw sac spichl eb', wocn 'ejm eb' 'a 'aj 'ix 'ec' sniwnal Jesús, jun 'a sjolmtac, jun 'a yoctac. 13 'Ix sc'anb'n 'elt eb' 'a 'ix 'ixtic: — Ach 'ix, ¿tas yuj tzach 'oq'ui? xchi 'elt eb'. —Yujto 'ix 'ijx 'el sniwnal Wajlil 'a tic. ¿'Ajm wal 'ix yij 'at eb'? xchi 'ix 'a eb'. 14 Wanto slajw yaln 'ix jun cha, 'ix sutmj 'at q'ueln 'ix 'a spatic. Ax xyiln 'ix, 'ayc' Jesús. Palta ma'ix yilch 'ix toto a'. 15 Yuj cha, sc'anb'n 'a 'ix 'ixtic: — Ach 'ix, ¿tas yuj tzach 'oq'ui? ¿Mach tza sayq'ui? xchi 'a 'ix. Palta snan 'ix, to a win tzmunlj 'a te 'awb'ente chi lin̈n 'ec' ta'. Yuj cha, xyaln 'ix 'ixtc 'a 'a: — Ach winac, toto ach xwul ec' 'elt sniwnal Jesús tic, al 'ayin, 'aj xit' a'cni, sec 'oj wi'ti, xchi 'ix 'a 'a. 16 —María, xchi Jesús chi 'a 'ix. —Yuj cha, 'ix sutmj 'at q'ueln 'ix 'a 'a. 'Ix paxtin 'ix 'a hebreo: —Raboni, xchi 'ix. Tzyal 'el'chi, ach in Cuymal. 17 —Man̈ in a yama', yujto mantzac in pax q'ue 'a 'aj 'ay in Mam. Palta 'ixic, 'at al 'a eb' wu'tac, yet' 'a eb' wanb' smasnil, chajtlto 'oj in pax q'ue 'a 'aj 'ay in Mam. A in Mam cha, e Mam pax wet'oc. A in Diosal, e Diosal pax wet'oc, xchi Jesús 'a 'ix. 18 Yuj cha, ax 'ix María Magdalena cha, x'at yaln 'ix 'ixtc 'a eb' scuywum Jesús cha: —Caw 'ix wil Cajlilec, xchi 'ix 'a eb'. 'Ix yaln pax 'ix 'a eb', tastc 'ix yal 'a 'ix. 19 An̈ja 'a jun domingo chi 'a sq'uic'b'alil, 'ix syam sb'a eb' scuywum Jesús. Caw sihhi xyutj eb' sch'apn jun n̈a cha, yujto tzxiw eb' 'a ewin 'aj Judea cha. Ax xyiln eb', 'ayx 'ec' Jesús 'a scal eb'. 'Ix yaln 'a eb' 'ixtic: —Junc'ojlal cab' eyaji, xchi 'a eb'. 20 Xlajw cha, xch'oxn yol sc'ab' 'a eb', yet' scostil. Ax eb' scuywum cha, caw 'ix tzalj eb' yiln Cajlil cha. 21 'Ix yaln pax jun 'ejm xo 'ixtc 'a eb': —Junc'ojlal cab' eyaji. 'Icha in yutj qui Mam Dios in schecn coti, 'ixta tzex wutj ex in checn can 'ati, xchi 'a eb'. 22 Xlajw yaln jun tzo'n̈ tic, 'ix yutz'n 'at yic' 'a yib’n̈ eb'. 'Ix yaln 'ixtic : —Chajec can Yespíritu Dios. 23 Toto 'ay eb' tzeyac' niwnc'ojlal yuj smul, an̈jtona Dios 'oj yac' niwnc'ojlal 'a eb' jun xo. Toto 'ay eb' matz eyac' niwnc'ojlal yuj smul cha, 'oj cann̈j smul eb' chi 'a yib'an̈, xchi Jesús 'a eb'. 24 Palta 'ay jun yitb'eym eb' scuywum Jesús, Tomás sb'i, tzcuch pax Tiyx 'anma'. Man̈ 'ayc 'ec' yet' eb' yic yec' Jesús chi ta'. 25 Yuj cha, xyaln eb' yit cuywumal chi 'a 'ixtic: — An̈ tic on̈, 'ix quil Cajlilec chi on̈, xchi eb'. —'A... 'oj wila', toto tzwil 'aj x'och q'uen lawx 'a yol sc'ab', tzwa'n 'och yune in c'ab' 'a yolnil 'aj x'och q'uen cha, tzwa'n pax 'och in c'ab' 'a yolnil scostil, cojn 'ixta', 'oj stac' wa'n 'och 'a in c'ojol, to caw a Jesús cha, xchi 'a eb'. 26 Yucb'ixial xo, 'ix syamn pax sb'a eb' jun 'ejm xo 'a yol n̈a cha. Ayx 'ec' Tomás chi yet' eb'. Caw sin̈n̈i yaj sch'apx te ha cha, palta ax xyiln eb', 'ayx 'ec' Jesús 'a scal eb'. 'Ix yaln 'a eb' 'ixtic: —Junc'ojlal cab' eyaji, xchi. 27 Xlajwn̈ej cha, xyaln 'ixtc 'a Tomás: —'Ilt in c'ab' tic, 'a'ch yune a c'ab' 'a yolnil tic. Tza'n pax 'och a c'ab' 'a yolnil in costl tic. 'A'ch a c'ojl 'ayin, man̈x a chab'c'ojloc a b'a, xchi Jesús. 28 Xlajw cha, xyaln pax Tomás chi 'a 'ixtic: — Ach ton tic Wajlil ach, in Diosal ach, xchi 'a 'a. 29 —Tomás, xa'ch a c'ojl 'ayin, yujto in ela. Ax eb' matz in 'ilni, palta toto tzya'ch eb' sc'ojl 'ayin, yel xo wach' yic eb', xchi Jesús. 30 Til to wal milagro sch'ox Jesús 'a eb' scuywum cha, palta ma'ix tz'ib'x can smasnil 'a ch'an̈ un̈ tic. 31 'Ix tz'ib'x can jun tzo'n̈ tic, sec 'oj eya'ch 'a e c'ojol, to a Jesús atn Cristo, Yunnal Dios. Toto 'oj eya'ch 'a e c'ojol, 'oj e cha e q'uinl 'a jun 'ejmhej 'a 'a.

21

1 Ax 'a jun 'ejm xo, 'ix sch'oxn pax sb'a Jesús 'a eb' scuywum, yic 'ayc' eb' 'a sti a mar yic Tiberias. 'Ixtc 'ix yutj sch'oxn sb'a 'a eb'. 2 'Ix schan pax 'el'ch sb'a Simón Pedro yet' Tomás, tzcuch pax Tiyx 'anma'. Ajun pax Natanael 'aj Caná 'a yol yic Galilea. An̈jtona', 'ayc' pax eb' yunnal Zebedeo, yet' chawn̈ xo eb' yit cuywumal eb'. 3 Ax Simón Pedro 'ix aln 'a eb' 'ixtic: —To 'oj in 'at yamj chay, xchi 'a eb'. —'At con̈ et' 'on̈, xchi eb' 'a 'a. Yuj cha, x'at eb'. 'Ix 'och eb' 'a yol jun barco. Palta a 'a jun 'ac'wl cha, toxn may junc no chay chi xyamchj yuj eb'. 4 A yic wan sacb'i, 'ayc' Jesús 'a sti a mar cha. Ax eb' scuywum cha, ma'ix yilch eb', toto a 'ayc' ta'. 5 'Ix yaln 'at 'a eb' 'ixtic: —Ex winac, ¿'ay am no 'ix yamchj eyu'uj? xchi 'a eb'. —Ma'ay, toxn man̈ junoc, xchi eb' 'a 'a. 6 — A 'a swach' te barco cha, ata tze julb't jun e chim cha. Atta 'oj yamchjoc nahloc e chay cha, xchi Jesús 'a eb'. 'Ixta xyutj eb'. Ax 'ix cob' ya'lnoc eb' sto'n q'uet schim cha, man̈xtzac q'uet yuj yal-l no chay cha, yujto xcaw b'ut'ji. 7 Ax jun scuywum Jesús caw chamc'ojlb'il yu'uj, a 'ix aln 'ixtc 'a Pedro: —'In a Cajlil tic, xchi. Xlajwn̈ej yab'n Simón Pedro jun cha, 'ix stza'n cot spichul. 'Ix ya'n 'och muc'uc, yujto 'elnc spichl chi yu'uj. 'Ix sjuln 'elt sb'a 'a yol barco cha, 'ix 'el'ch 'a sti a'. 8 Cojn am junc chan̈e ch'an̈l yajb't eb' 'a yib'n̈ a'. Ax jun tzo'n̈ xo eb' yitb'eyum, tza'nto xc'och eb' yet' jun yune barco cha. Toc'b'il schim eb' 'aj b'ut'n 'ejm no chay cha. 9 Ax 'ix 'elt eb', 'ix yiln eb' 'aych jun c'ac' yet' 'ac'al. Ayb't jun chay 'a yib'an̈. Ayc' pax jun tzo'n̈ pan 'a stz'ey. 10 Ax Jesús 'ix yaln 'a eb' 'ixtic: —'Ijec cot nan̈loc e chay chi xe yam cha, xchi 'a eb'. 11 Yuj cha, 'ix 'ochx Simón Pedro 'a yol te barco cha. 'Ix sto'n 'el'ch ch'an̈ chim chi 'a sti a'. 'Ix yiln eb', caw b'ut'n ch'an̈ yet' jun tzo'n̈ no niwc chay cha. 'Ay 153 sb'isl no'. Caw wal niwn no', palta ma'ix jat ch'an̈ chim chi yuj yal-l no'. 12 Xlajw cha, 'ix yaln Jesús 'a eb' 'ixtic: —Cotn̈ec, wan̈ec, xchi 'a eb'. May junc eb' scuywum chi 'ix c'anb'n 'a 'a: ¿Mach ach? man̈ xchic eb', yujto yojc xon eb', to a Cajlilec. 13 Ax Jesús, 'ix wach' c'och 'a stz'ey eb'. 'Ix yi'n chan̈ 'ixm pan cha, xya'n 'ec' 'a eb'. An̈jtona', 'ixta xyutj ya'n 'ec' no chay cha. 14 A Jesús cha, yoxlal xo sch'oxn sb'a 'a eb' scuywum cha, yic 'ix pitzw pax 'a scal eb' chamnac. 15 Xlajw xoj swa eb', 'ix yaln Jesús 'a Simón Pedro 'ixtic: —Simón, ach yunnal Juan, tzin c'anb'j 'ayach, ¿'ec'b'al am tzin a chamc'ojlej 'a yib'n̈ eb' tic? xchi 'a 'a. —N', Mamin. Caw ojc xoni, to tzach in chamc'ojlej, xchi Pedro chi 'a 'a. —Toto 'ixta', 'icha junc 'ilm cotc calnelu, 'ixta tzotj a jucb'tzan eb' 'unnto 'ayin, xchi Jesús 'a 'a. 16 Xlajwn̈ej yaln jun tzo'n̈ tic, 'ix yaln jun 'ejm xo 'ixtic: —Simón, ach yunnal Juan, ¿tzam in a chamc'ojlej? xchi 'a 'a. —N', Mamin. Caw ojc xoni, tzach in chamc'ojlej, xchi pax Pedro chi 'a 'a. —Toto 'ixta', 'icha junc 'ilm calnelu, 'ixta tzotj a tan̈wni eb' wic xo, xchi Jesús 'a 'a. 17 'Ix yaln pax 'ixtc 'a yoxlal: —Simón, ach yunnal Juan, ¿tzam in a chamc'ojlej? xchi 'a 'a. Yuj cha, caw 'ix cus chan̈ Pedro cha, yujto yoxlal sc'anbn Jesús 'a 'a, toto tzchamc'ojlej. Yuj cha, 'ix yaln pax 'a 'ixtic: —Mamin, ojc xon smasnil to chamc'ojlb'ilchn̈ej wu'uj, xchi 'a 'a. —Toto 'ixta', 'icha junc 'ilm calnelu, 'ixta tzotj a jucb'tzan eb' wic xo. 18 Wal yel tzwal 'ayach, a 'a yic quelm ach to, mun a pichjnac a b'a. C'uxn 'e'nc ach 'a 'aj tza nib'ej. Palta ax yic 'oj echmaxi, 'oj a jen̈l a c'ab'. Chucx mach 'oj jalnc a nan̈al. Ax ach yi'n 'at 'a 'aj matz a nib'j 'at a b'a, xchi Jesús 'a 'a. 19 'Ixta xyutj yalni, chajtl 'oj 'aj Pedro chi schami, ax sch'oxn 'eli, to caw niwn yel'ch Dios. Xlajw cha, xyaln pax Jesús 'a 'ixtic: —'Ochn̈ wal tza'n wu'uj, xchi 'a Pedro cha. 20 Ax 'ix sutmj 'at q'ueln Pedro chi 'a spatic. 'Ix yilni to a jun scuywum Jesús chi xajn yu'uj, a tza'n 'och yuj eb'. Atn jun chi wocn 'ejm 'a smo'och yic swa eb' 'a jun 'el, yic sc'anb'n 'ixtc 'a 'a: Mamin, ¿mach 'oj a'n 'och 'a yol sc'ab' chamel? xchi 'a 'a. 21 Yic 'ix yiln Pedro jun cha, 'ix sc'anb'n 'ixtc 'a Jesús: —Mamin, a jun tzjaw tic, ¿tasm 'oj 'aj scham jun xo? xchi 'a 'a. 22 Yuj cha, 'ix yaln pax Jesús 'a 'ixtic: —Toxn̈ej tzyal in c'ojol, pitznto ax in japxi, may aln ec 'a 'a. Cojnto tzach 'och wal tza'n wu'uj, xchi 'a Pedro cha. 23 Yuj cha, 'ix 'el speclal 'a scal eb' creyente, chajtlto ma'oj cham jun scuywum Jesús cha. Palta may tas 'ix yal Jesús, toto ma'oj chamoc. Cojn 'ix yal 'ixtic: Toxn̈ej tzyal in c'ojol, pitznto ax in japxi, may aln ec 'a 'a, xchi. 24 Atn jun scuywum tic tzyac' testigoal sb'a yuj jun tzo'n̈ tic, tz'ib'n can paxi. An̈ tic on̈ cojc on̈, caw yel jun tzo'n̈ tic 'ix tz'ib'x can tic. 25 Tilto wal jun tzo'n̈ xo tas 'ix sb'o Jesús. Q'uinloc tz'ib'x can jun jun, tzin na'a, matz yab' am yolyib'n̈q'uinl tic yuj ch'an̈ un̈ 'aj tz'ib'x can cha. [Ya' cab'i'.]