1

ᐱᒫᑎᓯᐎ ᐊᔭᒥᐎᓐ

1 ᒫᐗᒋ ᓃᔥᑕᒻ ᑮ ᐃᑖᐤ ᐋᔭᒥᐎᓐ, ᐋᔭᒥᐎᓐ ᒫᑲ ᑮ ᐎᒉᐌᐤ ᑭᒋᒪᓂᑐᐗ, ᓀᔥᑕ ᐋᔭᒥᐎᓐ ᑮ ᑭᒋᒪᓂᑐᐎᐤ᙮ 2 ᐁᐗᑯ ᐊᐗ ᒫᐗᒋ ᓃᔥᑕᒻ ᑮ ᐎᒉᐌᐤ ᑭᒋᒪᓂᑐᐗ᙮ 3 ᒥᓯᐌ ᑫᒀᓇ ᑮ ᐅᔑᑕᐤ; ᓀᔥᑕ ᓇᒪᐎᓚ ᑫᒀᓐ ᐅᒋ ᐅᔑᑖᓂᐗᓐ ᐎᓚ ᐁᑳ ᐁ ᐅᒋ ᐅᔑᑖᑦ᙮ 4 ᐎᓚ ᑮ ᐱᒋᔅᑳᑯ ᐱᒫᑎᓯᐎᓂᓕᐤ; ᐊᓂᐁᓕᐤ ᐱᒫᑎᓯᐎᓂᓕᐤ ᒫᑲ ᑮ ᐙᔅᑌᓇᒫᑯᐗᒃ ᐃᓕᓕᐗᒃ᙮ 5 ᐙᔅᑌᐎᓐ ᒫᑲ ᐙᔅᑌᐤ ᐗᓂᑎᐱᔅᑭᓯᐎᓂᒃ; ᐗᓂᑎᐱᔅᑭᓯᐎᓐ ᒫᑲ ᓇᒪᐎᓚ ᐅᒋ ᓂᓯᑕᐌᓕᑕᒧᒪᑲᓐ᙮ 6 ᑮ ᐃᑖᐤ ᐃᓕᓕᐤ ᑳ ᑮ ᐯᒋᑎᔕᐅᑯᑦ ᑭᒋᒪᓂᑐᐗ, ᒑᓐ ᐁ ᐃᔑᓂᑳᓱᑦ᙮ 7 ᐁᐗᑯ ᐊᐗ ᑮ ᑕᑯᔑᓐ ᑭᒋ ᑎᐹᒋᒧᑦ, ᑭᒋ ᑎᐹᑐᑕᒃ ᐊᓂᐁᓕᐤ ᐙᔅᑌᐎᓂᓕᐤ, ᒥᓯᐌ ᐃᓕᓕᐗ ᐎᓚ ᐅᒋ ᑭᒋ ᑖᐺᑕᒥᓕᒋ᙮ 8 ᐎᓚ ᓇᒪᔦᐤ ᐊᓂᒪ ᐙᔅᑌᐎᓐ, ᒫᑲ ᑮ ᐯᒋᑎᔕᐗᐤ ᑭᒋ ᑎᐹᑐᑕᒃ ᐊᓂᐁᓕᐤ ᐙᔅᑌᐎᓂᓕᐤ᙮ 9 ᐁᐗᒀᓂᒪ ᑖᐺ ᐙᔅᑌᐎᓐ, ᑳ ᐙᔅᑌᓇᒫᑯᑦ ᒥᓯᐌ ᑕᑐ ᐃᓕᓕᐤ ᑳ ᐯᒋ ᐃᑐᑌᑦ ᐅᑕ ᐊᔅᑮᒃ᙮ 10 ᑮ ᐃᑖᐤ ᐊᔅᑮᒃ, ᐊᔅᑭᓕᐤ ᓀᔥᑕ ᐎᓚ ᑮ ᐅᔑᑕᐤ, ᐊᔅᑭᓕᐤ ᒫᑲ ᓇᒪᐎᓚ ᐅᒋ ᑭᔅᑫᓕᒥᑯ᙮ 11 ᑮ ᐯᒋ ᓈᑌᐤ ᐊᓂᐃ ᑳ ᑎᐱᓚᐌᐎᓰᑦ, ᓇᒪᐎᓚ ᒫᑲ ᐅᒋ ᐅᑎᓂᑯ ᐊᓂᐃ ᑳ ᑎᐱᓚᐌᐎᓰᑦ᙮ 12 ᒥᓯᐌ ᐊᓂᐃ ᒫᑲ ᑳ ᐅᑎᓂᑯᑦ, ᐁᐗᒀᓂᐃ ᒫᓛᑦ ᑲᔥᑭᐅᐎᓂᓕᐤ ᑭᒋ ᐅᑯᓯᓯᒥᑯᓕᒋ ᑭᒋᒪᓂᑐᐗ, ᐊᓂᐃ ᐅᑎ ᑳ ᑖᐺᔦᓕᑕᒥᓕᒋ ᐅᑦ ᐃᔑᓂᑳᓱᐎᓐ᙮ 13 ᐊᓂᑭ ᐁᑳ ᒥᑯᒃ ᑳ ᐅᒋ ᓂᑖᐎᑭᒋᒃ, ᐁᑳ ᓀᔥᑕ ᐎᔮᓯᐎ ᐃᑌᓕᑕᒧᐎᓂᒃ, ᐁᑳ ᓀᔥᑕ ᐃᓕᓕᐎ ᐃᑌᓕᑕᒧᐎᓂᒃ, ᒫᑳ ᑭᒋᒪᓂᑐᒃ ᐅᒋ᙮ 14 ᐋᔭᒥᐎᓐ ᒫᑲ ᑮ ᐎᔮᓯᐎᐋᑲᓂᐎᐤ, ᓀᔥᑕ ᑭ ᑮ ᐎᒋᑕᔑᑫᒥᑯᓇᐤ, ᓀᔥᑕ ᑭ ᑮ ᐙᐸᑕᒸᓈᓇᐤ ᐅ ᑭᔅᑌᓕᑖᑯᓯᐎᓐ, ᐅ ᑭᔅᑌᓕᑖᑯᓯᐎᓐ ᑖᐱᔅᑯᒡ ᐅ ᐯᔭᑯᔖᓇ ᐌᐅᑖᐎᒪᐎᑦ, ᐁ ᓵᑲᔅᑭᓀᔅᑳᑯᑦ ᔕᐌᓕᒋᑫᐎᓂᓕᐤ ᓀᔥᑕ ᑖᐺᐎᓂᓕᐤ᙮ 15 ᒑᓐ ᒫᑲ ᑮ ᑎᐹᒋᒣᐤ, ᑮ ᑌᐺᐤ ᒫᑲ, ᐁ ᐃᑗᑦ, ᐁᐗᑯ ᐊᐗ ᑳ ᑮ ᐋᓕᒧᒪᒃ, ᐊᓇ ᑳ ᐯᒋ ᓄᔅᐱᓇᔑᑦ ᐊᐙᓯᑌ ᐃᑌᓕᑖᑯᓯᐤ ᐃᔥᐱᔥ ᓂᓚ; ᐌᓴ ᑮ ᐃᑖᐤ ᐸᒧᔑ ᐃᑖᔮᓐ᙮ 16 ᓀᔥᑕ ᐅ ᐱᓵᑯᓯᐎᓂᒃ ᐅᒋ ᒥᓯᐌ ᑭᓚᓈᓇᐤ ᑭ ᑮ ᐅᑎᓀᓈᓇᐤ, ᓀᔥᑕ ᔕᐌᓕᒋᑫᐎᓐ ᔕᐌᓕᒋᑫᐎᓐ ᐅᒋ᙮ 17 ᐌᓴ ᐅᓚᔓᐌᐎᓐ ᑮ ᒥᓕᐙᓂᐗᓐ ᒧᓯᔅ ᐅᒋ, ᒫᑲ ᒋᓴᔅ ᙭ ᑮ ᐯᑕᐤ ᔕᐌᓕᒋᑫᐎᓂᓕᐤ ᓀᔥᑕ ᑖᐺᐎᓂᓕᐤ᙮ 18 ᓇᒪᐎᓚ ᐊᐌᓇ ᐎᔅᑳᒡ ᐅᒋ ᐙᐸᒣᐤ ᑭᒋᒪᓂᑐᐗ: ᐯᔭᑯᑯᓯᓵᓐ, ᑳ ᐃᑖᑦ ᐅ ᐱᓗᒧᐎᓂᓕᒃ ᐅᑖᐎᒪᐗ, ᑮ ᑭᔅᑫᓕᑖᑯᐁᐤ᙮

ᒑᓐ ᐅᓯᑲᐋᑖᑫᐤ ᐅᑲᑫᔅᑭᒥᐌᐎᓐ

19 ᐁᐗᑯ ᐅᒪ ᒫᑲ ᐅ ᑎᐹᒋᒧᐎᓐ ᒑᓐ, ᐃᔅᐱ ᒎᐗᒃ ᐁᔑᑎᔕᐙᒋᒃ ᓵᓵᑭᐎᓕᐌᐎᓕᓕᐗ ᓀᔥᑕ ᓕᐸᐃᑕ ᒋᕉᓴᓚᒥᒃ ᐅᒋ, ᑭᒋ ᑲᑴᒋᒫᓕᒋ, ᐊᐌᓇ ᑭᓚ? 20 ᑮ ᐎᑕᒻ ᒫᑲ, ᓇᒪ ᓀᔥᑕ ᐅᒋ ᐋᓉᑕᒻ; ᒫᑲ ᑮᐎᑕᒻ, ᓈᒪᔦᐤ ᓂᓚ ᙭᙮ 21 ᑮ ᑲᑴᒋᒣᐗᒃ ᒫᑲ, ᑫᒀᓐ ᒫᑲ? ᑭᓚ ᓈ ᐃᓛᐃᒐ? ᐃᑗᐤ ᒫᑲ, ᓇᒪᐎᓚ ᓂᑦ ᐋᐎᓐ᙮ ᑭᓚ ᓈ ᐊᓇ ᐅᑭᔅᑭᐙᐃᑫᐤ? ᑮ ᓇᔥᑴᐗᔑᐃᐌᐤ ᒫᑲ, ᓇᒪᐎᓚ᙮ 22 ᐁᑯ ᐁᑖᒋᒃ, ᐊᐌᓇ ᑭᓚ? ᑭᒋ ᑮ ᓇᔥᑴᐗᔑᐊᑭᒃ ᐊᓂᑭ ᑳ ᐯᒋᑎᔕᐎᔭᒥᒋᒃ᙮ ᑖᓂ ᐁᑖᒋᒥᑎᓱᔭᓐ? 23 ᑮ ᐃᑗᐤ, ᓂᓚ ᐁᐗᑯ ᐅ ᐯᑖᑯᓯᐎᓐ ᐊᐌᓇ ᐁ ᑌᐺᑦ ᐸᑾᑕᔅᑲᒥᑳᒃ, ᑾᔭᔅᑯᒧᑕᐙᒃ ᐅ ᒣᔅᑲᓇᐤ ᐅᑎᐯᓕᒋᑫᐤ, ᑳ ᑮ ᐃᑗᑦ ᐅᑭᔅᑭᐙᐃᑫᐤ ᐋᐃᓭᔭ᙮ 24 ᐊᓂᑭ ᒫᑲ ᑳ ᐃᔑᑎᔕᐙᑲᓂᐎᒋᒃ ᑮ ᐸᕋᓯᐎᐗᒃ᙮ 25 ᑮ ᑲᑴᒋᒣᐗᒃ ᒫᑲ, ᓀᔥᑕ ᑮ ᐃᑌᐗᒃ, ᑖᓀᑭ ᐌᒋ ᓯᑲᐋᑖᑫᔭᓐ ᒫᑲ, ᑮᔥᐱᓐ ᐁᑳ ᐃᐋᐎᐗᓀ ᐊᓇ ᙭, ᐁᑳ ᓀᔥᑕ ᐃᓛᐃᒐ, ᐁᑳ ᓀᔥᑕ ᐊᓇ ᐅᑭᔅᑭᐙᐃᑫᐤ? 26 ᒑᓐ ᑮ ᓇᔥᑴᐗᔑᐁᐤ, ᐁ ᐃᑗᑦ, ᓂᓚ ᓂ ᓯᑲᐋᑖᑫᐙᑳᓐ ᓂᐱ: ᒫᑲ ᑭ ᐎᒋᑳᐸᐎᔅᑖᑯᐗᐤ ᐊᐌᓇ, ᐁᑳ ᑳ ᑭᔅᑫᓕᒣᒃ᙮ 27 ᐁᐗᑯ ᐊᐗ, ᑳ ᐯᒋ ᓄᔅᐱᓇᔑᑦ ᐊᐙᓯᑌ ᐁᑌᓕᑖᑯᓯᑦ ᐃᔥᐱᔥ ᓂᓚ, ᐅ ᒪᔅᑭᓯᓀᐋᐱᔭ ᐁᑳ ᐙᐙᒡ ᐁ ᐃᑌᓕᑖᑯᓯᐗᒃ ᑭᒋ ᐊᐱᑯᓇᒶᒃ᙮ 28 ᐅᐅ ᑫᒀᓇ ᑮ ᑐᒋᑳᑌᐗ ᐯᑕᐸᕋᐃᒃ ᐊᑲᒥᒃ ᒐᕐᑕᓂᒃ, ᐃᑕ ᒑᓐ ᑳ ᓯᑲᐋᑖᑫᑦ᙮

ᑭᒋᒪᓂᑐ ᐅᒫᓂᔥᒑᓂᔑᔑᒪ

29 ᐎᐋᐸᓂᓕᒃ ᒑᓐ ᐙᐸᒣᐤ ᒋᓴᓴ ᐁ ᐯᒋ ᐱᒧᑌᓕᒋ, ᐃᑗᐤ ᒫᑲ, ᑲᓇᐙᐸᒥᒫᒃ ᑭᒋᒪᓂᑐ ᐅ ᒫᓂᔥᒑᓂᔑᔑᒪ, ᑳ ᐎᐗᔑᑦ ᒪᒋᑐᑕᒧᐎᓂᓕᐤ ᐊᔅᑮᒃ ᑳ ᐃᑕᑾᓂᓕᒃ᙮ 30 ᐁᐗᑯ ᐊᐗ ᑳ ᑮ ᐃᑕᒃ, ᓂ ᓄᔅᐱᓇᑎᒃ ᐃᓕᓕᐤ ᐊᐙᓯᑌ ᐁᑌᓕᑖᑯᓯᑦ ᐃᔥᐱᔥ ᓂᓚ; ᐌᓴ ᑮ ᐃᑖᐤ ᐸᒧᔑ ᐃᑖᔮᓐ᙮ 31 ᓇᒪᐎᓚ ᒫᑲ ᓂ ᐅᒋ ᑭᔅᑫᓕᒪᐤ: ᒫᑲ ᑭᒋ ᑭᔅᑫᓕᒥᑯᑦ ᐃᔅᕃᐃᓚ, ᐁᐗᑯ ᐌᒋ ᐯᒋ ᓯᑯᐋᑖᑫᐙᑫᔮᓐ ᓂᐱ᙮ 32 ᒑᓐ ᒫᑲ ᑮ ᑎᐹᒋᒧ, ᐁ ᐃᑗᑦ, ᓂ ᑮ ᐙᐸᒪᐤ ᐊᒑᒃ ᑭᒋᑭᔑᑯᒃ ᐁ ᐅ ᓛᔒᑦ ᑖᐱᔅᑯᒡ ᐅᒥᒥᒃ, ᑮ ᑗᐅᑕᐌᐤ ᒫᑲ᙮ 33 ᓇᒪᐎᓚ ᒫᑲ ᓂ ᐅᒋ ᑭᔅᑫᓕᒪᐤ: ᒫᑲ ᐊᓇ ᑳ ᑮ ᐯᒋᑎᔕᐅᑦ ᑭᒋ ᓯᑲᐋᑕᑫᐙᑫᐗᒃ ᓂᐱᓕᐤ, ᐁᐗᑯ ᓂ ᑮ ᐃᑌᒃ, ᐊᓇ ᑫ ᐙᐸᒪᑦ ᐁ ᓛᔑᔅᑖᑯᑦ ᐊᒑᑾ, ᓀᔥᑕ ᐁ ᑗᐅᑖᑯᑦ, ᐁᐗᒀᓇ ᑫ ᓯᑲᐋᑕᑫᐙᑫᑦ ᑳ ᐸᓓᑭᓯᓕᒋ ᐊᒑᑾ᙮ 34 ᓂ ᑮ ᐙᐸᑌᓐ ᒫᑲ, ᓀᔥᑕ ᓂ ᑮ ᑎᐹᒋᒧᓐ ᐊᐗ ᐁ ᐅᑯᓯᓯᒥᑯᑦ ᑭᒋᒪᓂᑐᐗ᙮

ᓂᔅᑕᒻ ᑳ ᑮ ᐅᑭᔅᑭᓄᐊᒪᐙᑲᓂᐎᒋᒃ ᒋᓴᓴ

35 ᒥᓇ ᐎᐋᐸᓂᓕᒃ ᒑᓐ ᑮ ᓂᐸᐎᐤ, ᓀᔥᑕ ᓂᔓ ᐅ ᑭᔅᑭᓄᐊᒪᐙᑲᓇ: 36 ᐁ ᑲᓇᐙᐸᒫᑦ ᒫᑲ ᒋᓴᓴ ᐁ ᐱᒧᑌᓕᒋ, ᐃᑌᐤ, ᑲᓇᐙᐸᒥᒫᒃ ᑭᒋᒪᓂᑐ ᐅ ᒫᓂᔥᒑᓂᔑᔑᒪ! 37 ᐊᓂᑭ ᓂᔓ ᑭᔅᑭᓄᐊᒪᐙᑲᓇᒃ ᒫᑲ ᑮ ᐯᑕᐌᐗᒃ ᐁ ᐋᔭᒥᓕᒋ; ᑮ ᓄᔅᐱᓇᑌᐗᒃ ᒫᑲ ᒋᓴᓴ᙮ 38 ᐁᑯ ᒋᓴᔅ ᑶᐁᔅᑭᑳᐸᐎᑦ, ᓀᔥᑕ ᑮ ᐙᐸᒣᐤ ᐁ ᓄᔅᐱᓇᔑᐌᓕᒋ, ᐃᑌᐤ ᒫᑲ, ᑫᒀᓐ ᓂᐋᓇᑕᐌᓕᑕᒣᒃ? ᑮ ᐃᑌᐗᒃ ᒫᑲ, ᕌᐸᐃ, (ᑳ ᐃᑗᒪᑲᒃ ᐁ ᐃᑗᔅᒋᑳᑌᒃ, ᑫᔅᑭᓄᐊᒫᑫᔭᓐ,) ᑖᓐᑌ ᐙᑭᔭᓐ? 39 ᐃᑌᐤ, ᐯᒋ ᐙᐸᑕᒧᒃ᙮ ᑮ ᐯᒋ ᐙᐸᑕᒶᒃ ᒫᑲ ᐃᑕ ᐙᑭᓕᒋ, ᓀᔥᑕ ᑮ ᐎᒋᑕᔑᑫᒣᐗᒃ ᐊᓂᒪ ᐁ ᑭᔑᑳᓕᒃ: ᐌᓴ ᓈᓐᑕᐤ ᒣᒀᒡ ᒥᑖᑦ ᑎᐹᔨᑲᓐ ᐱᓭᒧᑳᓂᒃ᙮ 40 ᐯᔭᒃ ᐊᓂᑭ ᑳ ᓂᔑᒋᒃ ᑳ ᐯᑕᐙᒋᒃ ᒑᓇ ᐁ ᐋᔭᒥᓕᒋ, ᓀᔥᑕ ᑳ ᓄᔅᐱᓇᑖᒋᒃ ᐁᐗᑯ ᐋᓐᑦᕉ, ᓵᐃᒪᓐ ᐱᑕᕐ ᐎᒋᔖᓇ᙮ 41 ᐎᓚ ᓃᔥᑕᒻ ᒥᔅᑲᐌᐤ ᑎᐱᓚᐌ ᐎᒋᔖᓇ ᓵᐃᒪᓐ, ᐃᑌᐤ ᒫᑲ, ᓂ ᑮ ᒥᔅᑲᐙᓈᓐ ᒥᓵᔭᔅ, ᑳ ᐃᑗᒪᑲᒃ ᐁ ᐃᑗᔅᒋᑳᑌᒃ, ᙭᙮ 42 ᑮ ᐯᑐᐌᐤ ᒫᑲ ᒋᓴᓴ᙮ ᐃᔅᐱ ᒫᑲ ᒋᓴᔅ ᐎᐋᐸᒫᑦ, ᑮ ᐃᑗᐤ, ᑭᓚ ᓵᐃᒪᓐ ᐅᑯᓯᓴ ᒍᓇ: ᑭ ᑳ ᐃᔑᓂᑳᑎᑳᐎᓐ ᓯᐸᔅ, ᑳ ᐃᑗᒪᑲᒃᐁ ᐃᑗᔅᒋᑳᑌᒃ, ᐊᓯᓂ᙮

ᒋᓴᔅ ᓇᑐᒣᐤ ᐱᓕᐸ ᓀᔥᑕ ᓇᑕᓂᔭᓚ

43 ᐎᐋᐸᓂᓕᒃ ᒋᓴᔅ ᐎ ᐃᑐᑌᐤ ᑳᓕᓖᒃ, ᒥᔅᑲᐌᐤ ᒫᑲ ᐱᓕᐸ, ᐃᑌᐤ ᒫᑲ, ᓄᔅᐱᓇᔑᓐ᙮ 44 ᐱᓕᑉ ᒫᑲ ᐯᑦᓭᑕᐃᒃ ᑮ ᐅᒋᐤ, ᐅᑦ ᐃᑖᐎᓂᐗᐤ ᐋᓐᑦᕉ ᓀᔥᑕ ᐱᑕᕐ᙮ 45 ᐱᓕᑉ ᒥᔅᑲᐌᐤ ᓇᑕᓂᔭᓚ, ᓀᔥᑕ ᐃᑌᐤ, ᓂ ᑮ ᒥᔅᑲᐙᓈᓐ ᐊᓇ ᑳ ᐋᓕᒧᒥᑯᑦ ᒧᓯᓴ ᐅᓚᔓᐌᐎᓂᒃ, ᓀᔥᑕ ᐅᑭᔅᑭᐙᐃᑫᐗ, ᒋᓴᔅ ᓈᓴᕋᑎᒃ ᑳ ᐅᒌᑦ, ᒍᓯᑉ ᐅᑯᓯᓴ᙮ 46 ᓇᑕᓂᔭᓪ ᒫᑲ ᑮ ᐃᑌᐤ, ᑫᒀᓐ ᓈ ᐁ ᒥᓨᔑᒃ ᑲᑕ ᑮ ᐅᒋᒪᑲᓐ ᓈᓴᕋᑎᒃ?

ᐱᓕᑉ ᐃᑌᐤ, ᐯᒋ ᐙᐸᑕ᙮

47 ᒋᓴᔅ ᑮ ᐙᐸᒣᐤ ᓇᑕᓂᔭᓚ ᐁ ᐯᒋ ᓈᑎᑯᑦ, ᐃᑌᐤ ᒫᑲ, ᐙᐸᒥᒃ ᐁ ᑖᐺᐎᓂᐎᑦ ᐃᔅᕃᐃᓚᐃᑦ, ᐁᑳ ᐁ ᐱᒋᔅᑳᑯᑦ ᐙᔦᔑᐃᐌᐎᓂᓕᐤ᙮ 48 ᓇᑕᓂᔭᓪ ᐃᑌᐤ, ᑖᓐᑌ ᐌᒋ ᑭᔅᑫᓕᒥᔭᓐ? ᒋᓴᔅ ᐁ ᓇᔥᑴᐗᔑᐋᑦ, ᐃᑌᐤ, ᐸᒧᔑ ᑳ ᓇᑐᒥᔉ ᐱᓕᑉ, ᐃᔅᐱ ᔑᐹ ᐸᑫᓵᓂᒥᓈᑎᑯᒃ ᐁᑖᔭᓐ, ᑭ ᑮ ᐙᐸᒥᑎᓐ᙮ 49 ᓇᑕᓂᔭᓪ ᐁ ᓇᔥᑴᐗᔑᐋᑦ, ᐃᑌᐤ, ᕌᐸᐃ, ᑭᓚ ᑭᑦ ᐅᑯᓯᓯᒥᒃ ᑭᒋᒪᓂᑐ; ᑭᓚ ᐃᔅᕃᐃᓪ ᐅ ᑭᒋᐅᑭᒫᒪ᙮ 50 ᒋᓴᔅ ᑮ ᓇᔥᑴᐗᔑᐁᐤ, ᐁ ᐃᑖᑦ, ᐁ ᑮ ᐃᑎᑖᓐ, ᑭ ᑮ ᐋᐸᒥᑎᓐ ᔑᐹ ᐸᑫᓵᓂᒥᓈᑎᑯᒃ, ᑮ ᑖᐺᑌᓐ ᓈ? ᑭ ᑳ ᐙᐸᑌᓐ ᐊᐙᓯᑌ ᑭᒋ ᑫᒀᓇ ᐃᔥᐱᔥ ᐅᐅ᙮ 51 ᐃᑌᐤ ᓀᔥᑕ, ᑖᐺ, ᑖᐺ, ᑭᑦ ᐃᑎᓇᐗᐤ, ᐹᑎᒫ ᑭ ᑳ ᐙᐸᑌᓇᐗᐤ ᑭᒋᑭᔑᒃ ᐁ ᐹᔅᑭᑌᓂᑳᑌᒃ, ᓀᔥᑕ ᑭᒋᒪᓂᑐ ᐅᑦ ᐁᓐᒐᓕᒪ ᐁ ᐅᐱᔅᑮᔅᑕᐙᓕᒋ ᓀᔥᑕ ᐁ ᓛᔑᔅᑕᐙᓕᒋ ᐃᓕᓕᐎᑯᓯᓵᓇ᙮

2

ᐁ ᐎᑭᑐᓈᓂᐗᒃ ᑫᓇᐃᒃ

1 ᑳ ᓂᔅᑐ ᑫᔑᑳᒃ ᒫᑲ ᑮ ᐎᑭᑐᓈᓂᐗᓐ ᑫᓇᐃᒃ ᑳᓕᓖᒃ; ᓀᔥᑕ ᒋᓴᔅ ᐅᑳᐎᔭ ᐁᑯᑕ ᐁᑖᓕᒋ: 2 ᑖᐱᔅᑯᒡ ᒫᑲ ᒋᓴᔅ ᑮ ᓇᑐᒪᐤ, ᓀᔥᑕ ᐅ ᑭᔅᑭᓄᐊᒪᐙᑲᓇ ᐎᑭᑐᐎᓂᒃ᙮ 3 ᐃᔅᐱ ᒫᑲ ᓀᑕᐌᓕᑕᑭᒃ ᔓᒥᓈᐳᓕᐤ, ᒋᓴᔅ ᑮ ᐃᑎᑯ ᐅᑳᐎᔭ, ᓇᒪᐎᓚ ᐋᔭᐗᒃ ᔓᒥᓈᐳᓕᐤ᙮ 4 ᒋᓴᔅ ᐃᑌᐤ, ᐃᔅᑴᐤ, ᑖᓂ ᐙ ᐃᑖᐸᒋᐃᔭᓐ? ᓂ ᑎᐹᔨᑲᓐ ᐱᓯᒧᑳᓂᒃ ᓇᒪᐎᓚ ᐁᔥᑾ ᐅᑎᒋᐸᓕᐤ᙮ 5 ᐅᑳᐎᔭ ᐃᑌᓕᐗ ᐊᑑᔅᑫᓛᑲᓇ, ᐱᑯ ᑫᒀᓕᐤ ᑫ ᐃᑎᑖᑴ, ᐁᐗᑯ ᐃᑐᑕᒧᒃ᙮ 6 ᐁᑯᑕ ᒫᑲ ᑳ ᐊᔅᑖᓂᐗᑭ ᓂᑯᑣᔅ ᐊᓯᓂᐎ ᓂᐱ ᐊᓱᐗᒋᑲᓇ, ᐁ ᐃᔑ ᑐᑕᑭᒃ ᒎᐗᒃ, ᓈᓐᑕᐤ ᓂᔓ ᓀᔥᑕᐱᑯ ᓂᔅᑐ ᐸᕐᑭᓇ ᐯᐯᔭᒃ ᐁ ᑌᐸᔅᑭᓀᒃ᙮ 7 ᒋᓴᔅ ᐃᑌᐤ, ᓵᑲᔅᑭᓀᐸᑖᒃ ᓂᐱ ᐊᓱᐗᒋᑲᓇ ᓂᐱ ᐅᒋ᙮ ᐁᑯ ᒥᑐᓂ ᓯᐋᑲᔅᑭᓀᐸᑖᒋᒃ᙮ 8 ᐃᑌᐤ ᒫᑲ, ᐅᑎᓇᒧᒃ ᐁᑯ, ᐃᑐᑕᑣᒃ ᒫᑲ ᒪᑯᔐᐎᑭᒪᐤ᙮ ᑮ ᐃᑐᑕᑐᐌᐗᒃ ᒫᑲ᙮ 9 ᐃᔅᐱ ᒫᔑᑫᐎᑭᒪᐤ ᑳ ᑮ ᑯᑖᑲᒥᔅᐱᑕᒃ ᓂᐱᓕᐤ ᑳ ᑮ ᔓᒥᓇᐳᐎᑖᓂᐗᓂᓕᒃ, ᐁᑳ ᓀᔥᑕ ᐁ ᑭᔅᑫᓕᑕᒃ ᑖᓐᑌ ᐌᒋᒪᑲᓂᓕᒃ: (ᒫᑲ ᐊᑑᔅᑫᓛᑲᓇᒃ ᑳ ᑮ ᐅᑎᓇᑭᒃ ᓂᐱᓕᐤ ᑮ ᑭᔅᑫᓕᑕᒶᒃ;) ᒫᔑᑫᐎᑭᒪᐤ ᑮ ᓇᑐᒣᐤ ᐅᔥᑭᔅᑴᐌᐗ, 10 ᐃᑌᐤ ᒫᑲ, ᒥᓯᐌ ᑕᑐ ᐃᓕᓕᐤ ᓃᔥᑕᒻ ᐅᓚᔅᑣᑫᐤ ᐁ ᒥᓨᔑᓂᓕᒃ ᔓᒥᓈᐳᓕᐤ; ᐃᔅᐱ ᒫᑲ ᐃᓕᓕᐗ ᒥᔅᑕᐃ ᑳ ᒥᓂᑴᓕᑡᐌ, ᐁᑯ ᐊᓂᐁᓕᐤ ᐁᑳ ᑳ ᐃᔥᐱᔥ ᒥᓨᔑᓂᓕᒃ: ᒫᑲ ᑭᓚ ᑭ ᑮ ᑲᓇᐌᓕᑌᓐ ᐁ ᒥᓨᔑᒃ ᔓᒥᓈᐳ ᐊᓄᒡ ᐃᔅᑯ᙮ 11 ᐁᐗᑯ ᐅᒪ ᐁ ᑮ ᒫᒋ ᒫᒪᑖᐎᐃᔑᒋᑫᑦ ᒋᓴᔅ ᑫᓇᐃᒃ ᑳᓕᓖᒃ, ᓀᔥᑕ ᑮ ᐙᐸᑎᓕᐌᐤ ᐅ ᑭᔅᑌᓕᑖᑯᓯᐎᓐ; ᑮ ᑖᐺᔦᓕᒥᑯ ᒫᑲ ᐅ ᑭᔅᑭᓄᐊᒪᐙᑲᓇ᙮ 12 ᐹᑎᒫ ᐅᒪ ᑮ ᐃᑐᑌᐤ ᑲᐸᕐᓀᔭᒥᒃ, ᐎᓚ, ᓀᔥᑕ ᐅᑳᐎᔭ, ᓀᔥᑕ ᐎᒋᔖᓇ, ᓀᔥᑕ ᐅ ᑭᔅᑭᓄᐊᒪᐙᑲᓇ: ᓇᒪᐎᓚ ᒫᑲ ᒥᒉᑐ ᑭᔑᑳᐗ ᐊᓐᑕ ᑮ ᐃᑕᐗᒃ᙮

ᒋᓴᔅ ᐃᑐᑌᐤ ᑭᒋ ᐊᔭᒥᐁᐎᑲᒥᑯᒃ

13 ᒎᐗᒃ ᐅ ᒥᔮᔥᑳᑫᐎ ᒪᑯᔐᐎᓂᐗᐤ ᒫᑲ ᑮ ᐯᔓᓈᑾᓂᓕᐤ, ᒋᓴᔅ ᒫᑲ ᑮ ᐃᑐᑌᐤ ᒋᕉᓴᓚᒥᒃ᙮ 14 ᑮ ᒥᔅᑲᐌᐤ ᒫᑲ ᑭᒋᐋᔭᒥᐁᐎᑲᒥᑯᒃ ᐊᓂᐃ ᑳ ᐊᑖᐙᑫᓕᒋ ᒥᔅᑐᓴ ᓀᔥᑕ ᒫᓂᔥᒐᓂᔕ, ᓀᔥᑕ ᐅᒥᒥᐗ, ᓀᔥᑕ ᐊᓂᐃ ᑳ ᒦᔅᑯᑐᓈᓕᒋ ᔔᓕᐋᓇ ᐁ ᐊᐱᓕᒋ: 15 ᐃᔅᐱ ᒫᑲ ᑳ ᑮ ᐅᔑᑖᑦ ᐸᓴᔅᑌᐃᑲᓂᓕᐤ ᔐᔅᑕᑴᔮᐱᔕ ᐅᒋ, ᒥᓯᐌ ᐁ ᐃᑕᓱᓕᒋ ᑭᒋᐋᔭᒥᐁᐎᑲᒥᑯᒃ ᑮ ᐅᒋ ᐗᓚᐎᑎᔕᐌᐤ, ᑖᐱᔅᑯᒡ ᒫᓂᔥᒑᓂᔕ ᓀᔥᑕ ᒥᔅᑐᓴ; ᓀᔥᑕ ᑮ ᓯᑭᐌᐱᓂᒣᐤ ᐅ ᔔᓕᐋᓂᒥᓕᐗ ᐊᓂᐃ ᑳ ᒦᔅᑯᑐᓈᓕᒋ ᔔᓕᐋᓇ, ᓀᔥᑕ ᑮ ᑲᐎᐌᐱᓇᒻ ᒥᒋᓱᓈᑎᑾ; 16 ᑮ ᐃᑌᐤ ᒫᑲ ᐊᓂᐃ ᑳ ᐊᑖᐙᑫᓕᒋ ᐅᒥᒥᐗ, ᐅᑎᓇᒧᒃ ᐅᐅ ᐅᑕ ᐅᒋ; ᐁᑳᐎᓚ ᐊᑖᐌᐎᑲᒥᑯᑳᑕᒸᒃ ᓄᑖᐎ ᐅ ᐙᔅᑳᔨᑲᓂᒻ᙮ 17 ᐅ ᑭᔅᑭᓄᐊᒪᐙᑲᓇ ᒫᑲ ᑮ ᑭᔅᑭᓯᓕᐗ ᐁ ᐃᑕᓯᓇᐃᑳᑌᓕᒃ, ᐁ ᐃᔅᐱᑌᓕᑕᒫᓐ ᑭ ᐙᔅᑳᔨᑲᓂᒻ ᓂ ᑮ ᑭᑖᒧᑯᓐ᙮ 18 ᐁᑯ ᓀᔥᑴᐗᔑᐃᐌᒋᒃ ᒎᐗᒃ, ᐁ ᐃᑖᒋᒃ, ᑫᑯ ᑭᔅᑭᓄᐙᒋ ᐙᐸᑎᓕᐌᐎᓐ ᐎᐋᐸᑎᓕᔮᒃ ᐅᐅ ᑫᒀᓇ ᐁ ᑐᑕᒪᓐ? 19 ᒋᓴᔅ ᐁ ᓇᔥᑴᐗᔑᐃᐌᑦ, ᑮ ᐃᑌᐤ, ᓂᔑᐗᓈᒋᑖᒃ ᐅᒪ ᑭᒋᐊᔭᒥᐁᐎᑲᒥᒃ, ᑮ ᓂᔅᑐ ᑭᔑᑳᑫ ᒫᑲ ᓂ ᑳ ᐗᓂᔥᑳᓀᓐ᙮ 20 ᐁᑯ ᐁᑗᒋᒃ ᒎᐗᒃ, ᓀᒥᑕᓇᐤ ᓂᑯᑣᓱᔖᑉ ᐱᐴᓋ ᑮ ᓄᒋᑖᓂᐗᓐ ᐁ ᐅᔑᑖᓂᐗᒃ ᐅᒪ ᑭᒋᐋᔭᒥᐁᐎᑲᒥᒃ, ᓂᔅᑐ ᑭᔑᑳᐗ ᒫᑲ ᐃᔥᐱᔥ ᑭᓚ ᓈ ᑭ ᑳ ᒋᒪᑖᓐ? 21 ᑮ ᐋᓕᒧᑕᒻ ᒫᑲ ᐅ ᑭᒋᐋᔭᒥᐁᐎᑲᒥᑯᐎ ᐎᔭᐤ᙮ 22 ᐃᔅᐱ ᒫᑲ ᑳ ᐗᓂᔥᑳᑦ ᐅᓂᐱᐗ ᐅᒋ, ᐅ ᑭᔅᑭᓄᐊᒪᐙᑲᓇ ᑮ ᑭᔅᑭᓯᓕᐗ ᐅᒣᓕᐤ ᐁ ᑮ ᐃᑎᑯᒋᒃ; ᐁᑯ ᑎᐋᐺᑕᑭᒃ ᑭᒋᒪᓯᓇᐃᑫᐎᓂᓕᐤ, ᓀᔥᑕ ᐋᔭᒥᐎᓂᓕᐤ ᑳ ᑮ ᐃᑗᓕᒋ ᒋᓴᓴ᙮

ᒋᓴᔅ ᑭᔅᑫᓕᒣᐤ ᑖᓐ ᐁ ᐃᑖᑎᓯᒋᒃ ᐃᓕᓕᐗ

23 ᐃᔅᐱ ᒫᑲ ᒋᕉᓴᓚᒥᒃ ᐁᑖᑦ ᒥᔮᔥᑳᑫᐎ ᒪᑯᔐᐎᓂᒃ, ᐁ ᒪᑯᔐᑭᔑᑳᓕᒃ, ᒥᒉᑦ ᑖᐺᔦᓕᑕᒬᐗᒃ ᐅᑦ ᐃᔑᓂᑳᓱᐎᓂᓕᐤ, ᐃᔅᐱ ᐎᐋᐸᑕᒸᒋᒃ ᒫᒪᑖᐎ ᐃᓯᒋᑫᐎᓇ ᑳ ᑐᑕᒥᓕᒋ᙮ 24 ᒫᑲ ᒋᓴᔅ ᓇᒪᐎᓚ ᑮ ᑖᐺᐗᑫᓕᒣᐤ, ᐁ ᑭᔅᑫᓕᒫᑦ ᒥᓯᐌ ᐃᓕᓕᐗ, 25 ᓇᒪ ᓀᔥᑕ ᑮ ᓇᑕᐌᓕᒣᐤ ᐊᐌᓕᐗ ᑭᒋ ᐎᑕᒫᑯᑦ ᐁ ᐃᔑᑣᓕᒋ ᐃᓕᓕᐗ: ᐌᓴ ᑮ ᑭᔅᑫᓕᑕᒬᐤ ᑫᒀᓕᐤ ᑳ ᐱᒋᔅᑳᑯᓕᒋ ᐃᓕᓕᐗ᙮

3

ᒋᓴᔅ ᓀᔥᑕ ᓂᑯᑎᒪᔅ

1 ᑮ ᐃᑖᐤ ᐃᓕᓕᐤ ᐁ ᐸᕋᓰᐎᑦ, ᓂᑯᑎᒪᔅ ᐁ ᐃᔑᓂᑳᓱᑦ, ᐁ ᑎᐯᓕᒫᑦ ᒎᐗ: 2 ᐁᐗᑯ ᐊᐗ ᑮ ᐯᒋᓈᑌᐤ ᒋᓴᓴ ᓂᐹᑎᐱᔉ, ᑮ ᐃᑌᐤ ᒫᑲ, ᕌᐸᐃ, ᓂ ᑭᔅᑫᓕᑌᓈᓐ ᐁ ᐅᑭᔅᑭᓄᐊᒫᑫᔭᓐ ᑭᒋᒪᓂᑐᒃ ᐁ ᐯᒋ ᐅᒋᔭᓐ; ᐌᓴ ᓇᒪᐎᓚ ᐊᐌᓇ ᑮ ᑐᑕᒻ ᐅᐅ ᒫᒪᑖᐎ ᐃᓯᒋᑫᐎᓇ ᑭᓚ ᑳ ᑐᑕᒪᓐ, ᑮᔥᐱᓐ ᐁᑳ ᐎᒋᐃᑯᑦ ᑭᒋᒪᓂᑐᐗ᙮ 3 ᒋᓴᔅ ᐁ ᓇᔥᑴᐗᔑᐃᐌᑦ, ᑮ ᐃᑌᐤ, ᑖᐺ, ᑖᐺ, ᑭᑦ ᐃᑎᓐ, ᑮᔥᐱᓐ ᐃᓕᓕᐤ ᐁᑳ ᒥᓇ ᓂᑖᐎᑭᑌ, ᓇᒪᐎᓚ ᑲᑕ ᑮ ᐙᐸᑕᒬᐤ ᑭᒋᒪᓂᑐᐗ ᐅᑦ ᐅᑭᒫᐎᐎᓂᓕᐤ᙮ 4 ᓂᑯᑎᒪᔅ ᐃᑌᐤ, ᑖᓐᑌ ᑫ ᑮ ᐃᔑ ᓂᑖᐎᑭᑦ ᐃᓕᓕᐤ ᐃᔅᐱ ᑭᔐᓕᓕᐎᑦ? ᑲᑕ ᑮ ᐱᑐᑫᐌᐤ ᓈ ᒥᓇ ᐅᑳᐎᔭ ᐅᔅᐹᔮᓕᒃ, ᓀᔥᑕ ᑭᒋ ᓂᑖᐎᑭᑦ? 5 ᒋᓴᔅ ᑮ ᓇᔥᑴᐗᔑᐃᐌᐤ ᑖᐺ, ᑖᐺ, ᑭᑦ ᐃᑎᓐ, ᑮᔥᐱᓐ ᐃᓕᓕᐤ ᐁᑳ ᓂᑖᐎᑭᐃᑯᑌ ᓂᐱᓕᐤ ᓀᔥᑕ ᐊᒑᑾ, ᓇᒪᐎᓚ ᑲᑕ ᑮ ᐱᑐᑫᐌᐤ ᑭᒋᒪᓂᑐᐗ ᐅᑦ ᐅᑭᒫᐎᐎᓂᓕᒃ᙮ 6 ᐊᓂᒪ ᐎᔮᓯᒃ ᑳ ᐅᒋ ᓂᑖᐎᑭᒪᑲᒃ ᐎᔮᓯᐗᓐ; ᓀᔥᑕ ᐊᓂᒪ ᐊᒑᑯᒃ ᑳ ᐅᒋ ᓂᑖᐎᑭᒪᑲᒃ ᐊᒑᑯᐗᓐ᙮ 7 ᐁᑳᐎᓚ ᒫᒪᔅᑳᑕ ᐁ ᑮ ᐃᑎᑖᓐ ᒥᓇ ᐁ ᓇᑕᐌᓕᑖᑯᓯᔦᒃ ᑭᒋ ᓂᑖᐎᑭᔦᒃ᙮ 8 ᐙ ᐃᔑᓚᐌᑭ ᐁᑯᑕ ᐁᔑᓚᐌᒃ, ᑭ ᐯᑌᓐ ᒫᑲ ᐁ ᐱᒬᐌᔅᑎᒃ, ᒫᑲ ᓇᒪᐎᓚ ᑭ ᑭᔅᑫᓕᑌᓐ ᑖᓐᑌ ᐌᒋᐸᓕᒃ, ᓀᔥᑕ ᑖᓐᑌ ᐁᔅᐸᓕᒃ: ᐁᑯ ᑖᐱᔅᑯᒡ ᐁᑎᑦ ᒥᓯᐌ ᑕᑐ ᐊᐌᓇ ᐊᒑᑯᒃ ᑳ ᐅᒋ ᓂᑖᐎᑭᑦ᙮ 9 ᓂᑯᑎᒪᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑖᓐᑌ ᑫ ᑮ ᐃᔑ ᐃᑭᑭ ᐅᐅ ᑫᒀᓇ? 10 ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑭᓚ ᓈ ᑭ ᑭᔅᑭᓄᐊᒫᑫᐎᑭᒫᐎᓐ ᐃᔅᕃᐃᓕᒃ, ᓇᒪ ᒫᑲ ᑭ ᑭᔅᑫᓕᑌᓐ ᐅᐅ ᑫᒀᓇ? 11 ᑖᐺ, ᑖᐺ, ᑭᑦ ᐃᑎᓐ, ᓂ ᐎᑌᓈᓐ ᐊᓂᒪ ᑳ ᑭᔅᑫᓕᑕᒫᒃ, ᓀᔥᑕ ᓂᑦ ᐋᓕᒧᑌᓈᓐ ᐊᓂᒪ ᑳ ᑮ ᐙᐸᑕᒫᒃ, ᓇᒪᐎᓚ ᒫᑲ ᑭᑦ ᐅᑎᓀᓇᐗᐤ ᓂ ᑎᐹᒋᒧᐎᓂᓈᓐ᙮ 12 ᑮᔥᐱᓐ ᐁ ᐎᑕᒫᑕᑾᒃ ᐊᔅᑭᐎ ᑫᒀᓇ, ᐁᑳ ᒫᑲ ᐁ ᑖᐺᑕᒣᒃ, ᑖᓐᑌ ᑫ ᑭ ᐃᔑ ᑖᐺᑕᒣᒃ ᑮᔥᐱᓐ ᐎᑕᒫᑕᑾᑫ ᑭᒋᑭᔑᑳᐎ ᑫᒀᓇ? 13 ᓀᔥᑕ ᒫᑲ ᓇᒪᐎᓚ ᐊᐌᓇ ᐅᒋ ᐅᐱᔅᑲᐤ ᑭᒋᑭᔑᑯᒃ, ᐱᑯ ᐊᓇ ᑭᒋᑭᔑᑯᒃ ᑳ ᑮ ᐅᒋ ᐯᒋ ᓛᔑᑦ ᑭᒋᑭᔑᑯᒃ, ᐃᓕᓕᐎᑯᓯᓵᓐ ᐅᑎ ᑭᒋᑭᔑᑯᒃ ᑳ ᐃᑖᑦ᙮ 14 ᑖᐱᔅᑯᒡ ᓀᔥᑕ ᒧᓯᔅ ᑳ ᑮ ᐃᔑ ᐅᐱᓈᑦ ᒥᔑᑭᓀᐱᑾ ᐸᑾᑕᔅᑲᒥᑳᒃ, ᐁᑯ ᑖᐱᔅᑯᒡ ᑫ ᐃᔑ ᐅᐱᓈᑲᓂᐎᑦ ᐃᓕᓕᐎᑯᓯᓵᓐ: 15 ᒥᓯᐌ ᑕᑐ ᐊᐌᓕᐗ ᑳ ᑖᐺᔦᓕᒥᑯᑦ ᐁᑳ ᑭᒋ ᓂᔑᐗᓈᑎᓯᓕᒋ, ᒫᑲ ᑭᒋ ᐋᔮᓕᒋ ᑳᑭᑫ ᐱᒫᑎᓯᐎᓂᓕᐤ᙮ 16 ᐌᓴ ᑭᒋᒪᓂᑐ ᐁᔅᐱᒋ ᓵᑭᑖᑦ ᐊᔅᑭᓕᐤ, ᑮ ᒥᓕᐌᐤ ᑳ ᐯᔭᑯᓕᒋ ᐅᑯᓯᓴ, ᒥᓯᐌ ᑕᑐ ᐊᐌᓕᐗ ᑳ ᑖᐺᔦᓕᒫᓕᒋ ᐁᑳ ᑭᒋ ᓂᔑᐗᓈᑎᓯᓕᒋ, ᒫᑲ ᑭᒋ ᐋᔮᓕᒋ ᑳᑭᑫ ᐱᒫᑎᓯᐎᓂᓕᐤ᙮ 17 ᐌᓴ ᑭᒋᒪᓂᑐ ᓇᒪᐎᓚ ᐅᒋ ᐯᒋᑎᔕᐌᐤ ᐅᑯᓯᓴ ᑭᒋ ᓂᔑᐗᓈᒋᑕᒥᓕᒋ ᐊᔅᑭᓕᐤ; ᒫᑲ ᐎᓚ ᑭᒋ ᐅᒋ ᐱᒫᒋᑖᓂᐗᒃ ᐊᔅᑭ᙮ 18 ᐊᓇ ᑳ ᑖᐺᔦᓕᒫᑦ ᓇᒪᐎᓚ ᓂᔑᐗᓈᒋᒪᐤ: ᒫᑲ ᐊᓇ ᐁᑳ ᑳ ᑖᐺᔦᓕᒫᑦ ᐋᔕᔾ ᓂᔑᐗᓈᒋᒪᐤ, ᐁᑳ ᐁ ᐅᒋ ᑖᐺᔦᓕᑕᒸᑦ ᐅᑦ ᐃᔑᓂᑳᓱᐎᓂᓕᐤ ᑳ ᐯᔭᑯᓕᒋ ᐅᑯᓯᓴ ᑭᒋᒪᓂᑐ᙮ 19 ᐁᐗᑯ ᐅᒪ ᒫᑲ ᓂᔑᐗᓈᒋᑕᒧᐎᓐ, ᐙᔅᑌᐎᓐ ᐁ ᑮ ᑕᑯᔑᓄᒪᑲᒃ ᐊᔅᑮᒃ, ᐃᓕᓕᐗᒃ ᒫᑲ ᐊᐙᓯᑌ ᑮ ᓵᑭᑖᐗᒃ ᐗᓂᑎᐱᔅᑭᓯᐎᓂᓕᐤ ᐃᔥᐱᔥ ᐙᔅᑌᐎᓂᓕᐤ, ᐁ ᒫᓛᑕᓂᓕᑭ ᐅᑦ ᐋᔨᑎᐎᓂᐗᐗ᙮ 20 ᐌᓴ ᒥᓯᐌ ᑕᑐ ᐊᐌᓇ ᑳ ᒪᒋᑐᑕᒃ, ᐸᒀᑕᒻ ᐙᔅᑌᐎᓂᓕᐤ, ᓇᒪᐎᓚ ᓀᔥᑕ ᐯᒋ ᓈᑕᒻ ᐙᔅᑌᐎᓂᓕᐤ, ᐁᑳ ᑭᒋ ᑭᔅᑫᓕᒋᑳᑌᓕᑭ ᐅᑦ ᐋᔨᑎᐎᓇ᙮ 21 ᐊᓇ ᒫᑲ ᑳ ᑐᑕᒃ ᑖᐺᐎᓂᓕᐤ ᐯᒋ ᓈᑕᒻ ᐙᔅᑌᐎᓂᓕᐤ, ᑭᒋ ᓄᑯᑖᓂᐗᓂᓕᑭ ᐅᑦ ᐋᔨᑎᐎᓇ, ᑭᒋᒪᓂᑐᐗ ᐁ ᐃᑌᓕᑕᒥᓕᒋ ᐁ ᑐᑕᒃ᙮

ᒋᓴᔅ ᓀᔥᑕ ᒑᓐ

22 ᑳ ᐳᓂᐸᓕᑭ ᐅᐅ ᒋᓴᔅ ᑮ ᐯᒋ ᐃᑐᑌᐤ ᓀᔥᑕ ᐅ ᑭᔅᑭᓄᐊᒪᐙᑲᓇ ᒎᑎᐊ ᐊᔅᑮᒃ; ᐁᑯᑕ ᒫᑲ ᐙᒋᑕᔑᑫᒫᑦ, ᓀᔥᑕ ᓯᐃᑲᐋᑖᑫᑦ᙮ 23 ᒑᓐ ᓀᔥᑕ ᑮ ᓯᑲᐋᑖᑫᐸᓐ ᐃᓇᓂᒃ, ᑭᔑᐙᒃ ᓭᓕᒥᒃ, ᐁ ᒥᒉᓂᓕᒃ ᓂᐱᓕᐤ ᐊᓐᑕ: ᑮ ᐯᒋ ᐃᑐᑌᐗᒃ ᒫᑲ, ᓀᔥᑕ ᑮ ᓯᑲᐋᑕᐗᐗᒃ᙮ 24 ᐌᓴ ᒑᓐ ᓇᒪᐎᓚ ᐁᔥᑾ ᑮ ᐃᔑ ᐌᐱᓇᐤ ᑭᐸᐅᑐᐎᑲᒥᑯᒃ᙮ 25 ᐁᑯ ᐁᑎ ᐋᓉᑖᑐᒋᒃ ᐋᑎᑦ ᒑᓐ ᐅ ᑭᔅᑭᓄᐊᒪᐙᑲᓇ ᓀᔥᑕ ᒎᐗᒃ ᐁ ᐊᓕᒧᑕᑭᒃ ᐹᔦᑭᐃᐌᐎᓂᓕᐤ᙮ 26 ᓀᔥᑕ ᒫᑲ ᐁ ᐯᒋ ᓈᑖᒋᒃ ᒐᓇ, ᑮ ᐃᑌᐗᒃ, ᕌᐸᐃ, ᐊᓇ ᑳ ᑮ ᐎᒉᐎᔉ ᐊᑳᒥᒃ ᒐᕐᑕᓂᒃ, ᐊᓇ ᑳ ᑮ ᑎᐹᒋᒪᑦ, ᒫᑎᑳ, ᐊᐗ ᓯᑲᐋᑖᑫᐤ, ᓀᔥᑕ ᐯᒋ ᓈᑎᑯ ᒥᓯᐌ ᐃᓕᓕᐗ᙮ 27 ᒑᓐ ᐁ ᓇᔥᑴᐗᔑᐃᐌᑦ, ᑮ ᐃᑗᐤ, ᓇᒪᐎᓚ ᑫᒀᓕᐤ ᑲᑕ ᑮ ᐋᔭᐤ ᐃᓕᓕᐤ ᑮᔥᐱᓐ ᐁᑳ ᑭᒋᑭᔑᑯᒃ ᐅᒋ ᒥᓛᑲᓂᐎᑌ᙮ 28 ᑭᓚᐗᐤ ᑫᒋᐙᒃ ᑭ ᑭᔅᑫᓕᑌᓇᐗᐤ ᐁ ᑮ ᐃᑗᔮᓐ, ᓇᒪᔦᐤ ᓂᓚ ᙭, ᒫᑲ ᓂᑳᓐ ᓂᑦ ᐃᑎᔕᐅᑳᐎᓐ᙮ 29 ᐊᓇ ᑳ ᐋᔭᐙᑦ ᐅᔥᑭᔅᑴᐙᓇ, ᐁᐗᑯ ᐅᔥᑭᔅᑴᐌᐤ: ᒫᑲ ᐅᔥᑭᔅᑴᐌᐤ ᐅᑐᑌᒪ ᑳ ᓂᐸᐎᓕᒋ ᓀᔥᑕ ᑳ ᐯᑖᑯᑦ, ᓈᔅᐱᒡ ᒥᓜᓕᑕᒥᓕᐗ ᐁ ᐯᑕᐙᓕᒋ ᐅᔥᑭᔅᑴᐌᐗ: ᐁᐗᑯ ᐅᒪ ᒫᑲ ᓂ ᒥᓚᐙᑕᒧᐎᓐ ᑎᐱᐸᓕᐤ᙮ 30 ᐎᓚ ᔮᓕᑌᓪ ᑲᑕ ᐊᑎ ᑭᔅᑌᓕᑖᑯᓯᐤ, ᓂᓚ ᒫᑲ ᓂ ᑳ ᐊᑎ ᐋᐱᔅᑌᓕᑖᑯᓯᓐ᙮

ᐊᓇ ᐃᔥᐱᒥᒃ ᑳ ᐅᒋᑦ

31 ᐊᓇ ᐃᔥᐱᒥᒃ ᑳ ᐅᒌᑦ ᐊᐙᓯᑌ ᐃᔅᐯᓕᑖᑯᓯᐤ ᐃᔥᐱᔥ ᒥᓯᐌ: ᐊᓇ ᐊᔅᑮᒃ ᑳ ᐅᒌᑦ, ᐊᔅᑭᐎ ᐃᑖᑎᓯᐤ, ᓀᔥᑕ ᐊᔅᑭᓕᐤ ᐋᓕᒧᑕᒻ: ᐊᓇ ᑭᒋᑭᔑᑯᒃ ᑳ ᐅᒌᑦ ᐊᐙᓯᑌ ᐃᔅᐯᓕᑖᑯᓯᐤ ᐃᔥᐱᔥ ᒥᓯᐌ᙮ 32 ᐊᓂᐁᓕᐤ ᒫᑲ ᑳ ᑮ ᐙᐸᑕᒃ ᓀᔥᑕ ᑳ ᑮ ᐯᑕᒃ ᐁᐗᑴᓕᐤ ᑳ ᑎᐹᑐᑕᒃ; ᓇᒪᐎᓚ ᐊᐌᓇ ᒫᑲ ᐅᑎᓇᒬᐤ ᐅ ᑎᐹᒋᒧᐎᓂᓕᐤ᙮ 33 ᐊᓇ ᑳ ᑮ ᐅᑎᓇᒸᑦ ᐅ ᑎᐹᒋᒧᐎᓂᓕᐤ ᓱᑲᔅᑕᐤ ᑭᒋᒪᓂᑐᐗ ᐁ ᑖᐺᐎᓂᐎᓕᒋ᙮ 34 ᐌᓴ ᐊᓇ ᑳ ᐃᑎᔕᐅᑯᑦ ᑭᒋᒪᓂᑐᐗ, ᐋᔭᒥᐌᐤ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐗ: ᐌᓴ ᑭᒋᒪᓂᑐᐗ ᓇᒪᐎᓚ ᑎᐯᓕᑕᒫᑯ ᐊᒑᑾ᙮ 35 ᐅᑖᐎᒪᐤ ᓵᑭᐁᐤ ᐅᑯᓯᓯᒫᐗ, ᓀᔥᑕ ᑮ ᐸᑭᑎᓇᒻ ᒥᓯᐌ ᑫᒀᓇ ᐅᒋᒌᓕᒃ᙮ 36 ᐊᓇ ᑳ ᑖᐺᔦᓕᒫᑦ ᐅᑯᓯᓯᒫᐗ ᐋᔭᐤ ᑳᑭᑫ ᐱᒫᑎᓯᐎᓂᓕᐤ: ᐊᓇ ᒫᑲ ᐁᑳ ᑳ ᑖᐺᑕᐙᑦ ᐅᑯᓯᓯᒫᐗ ᓇᒪᐎᓚ ᑲᑕ ᐙᐸᑕᒻ ᐱᒫᑎᓯᐎᓂᓕᐤ; ᒫᑲ ᑭᒋᒪᓂᑐᐗ ᐅᑦ ᐊᑯᓚᐌᓯᐎᓂᓕᐤ ᒫᑕᑯᔅᑳᑯᐌᐤ᙮

4

ᒋᓴᔅ ᐊᔭᒥᐁᐤ ᐃᔅᑴᐗ ᓴᒣᕆᐊ ᑳ ᐅᒋᑦ

1 ᐃᔅᐱ ᒫᑲ ᑌᐯᓕᒋᑫᑦ ᑫᔅᑫᓕᑕᒻ ᐸᕋᓯᔭ ᐁ ᑮ ᐯᑕᒥᓕᒋ ᒋᓴᓴ ᐊᐙᓯᑌ ᒥᒉᑦ ᐁ ᑮ ᑭᔅᑭᓄᐊᒪᐙᑲᓂᑫᓕᒋ ᓀᔥᑕ ᓯᑲᐋᑕᐙᓕᒋ ᐃᔥᐱᔥ ᒑᓐ, 2 (ᐋᑕ ᒋᓴᔅ ᑫᒋᐙᒃ ᐁᑳ ᐁ ᑮ ᓯᑲᐋᑖᑫᑦ, ᒫᑲ ᐅ ᑭᔅᑭᓄᐊᒪᐙᑲᓇ)᙮ 3 ᑮ ᓇᑲᑕᒻ ᒎᑎᐊᐃᓕᐤ, ᓀᔥᑕ ᐁ ᑭᑐᑌᑦ, ᒥᓇ ᑮ ᐃᑐᑌᐤ ᑳᓖᓖᒃ᙮ 4 ᔮᓕᑌᓪ ᒫᑲ ᑮ ᔖᐳᑕᐌᔥᑲᒻ ᓴᒣᕆᔭᐃᓕᐤ᙮ 5 ᐁᑯ ᐌᑎᑕᒃ ᐃᑖᐎᓂᓕᐤ ᓴᒣᕆᔭᐃᒃ, ᓴᐃᑳᕐ ᑳ ᐃᔑᓂᑳᑌᓕᒃ, ᑭᔑᐙᒃ ᐊᓂᐁᓕᐤ ᐊᔅᑭᓕᐤ ᒉᑲᑉ ᑳ ᑮ ᒥᓛᑦ ᐅᑯᓯᓴ ᒍᓯᐸ᙮ 6 ᒉᑲᑉ ᐅ ᒧᓇᐃᐹᓐ ᒫᑲ ᐊᓐᑕ ᑮ ᐃᑕᑾᓂᓕᐤ᙮ ᒋᓴᔅ ᒫᑲ ᐁ ᐋᔦᔅᑯᓯᑦ ᐁ ᑮ ᐱᒧᑌᑦ, ᑮ ᓇᐊᐱᐤ ᒧᓈᐃᐹᓂᒃ: ᓈᓐᑕᐤ ᒫᑲ ᑮ ᐋᐱᑕ ᑭᔑᑳᓕᐤ᙮ 7 ᐯᒋ ᐃᑐᑌᐤ ᒫᑲ ᐃᔅᑴᐤ ᓴᒣᕆᔭᐃᒃ ᐁ ᐅᒌᑦ ᑭᒋ ᐃᔅᑾᐱᑫᐱᑕᒃ ᓂᐱᓕᐤ: ᒋᓴᔅ ᐃᑌᐤ, ᒥᓇᐃᓐ᙮ 8 (ᐌᓴ ᐅ ᑭᔅᑭᓄᐊᒪᐙᑲᓇ ᑮ ᐃᑐᑌᓕᐗ ᐃᑖᐎᓂᒃ ᑭᒋ ᐊᑖᐌᓕᒋ ᒥᒋᒥᓕᐤ᙮) 9 ᐁᑯ ᐃᔅᑴᐤ ᓴᒣᕆᔭᐃᒃ ᑳ ᐅᒌᑦ ᐁᑖᑦ, ᑖᓐᑌ ᐌᒋ ᓇᑐᑕᒪᐎᔭᓐ ᑭᒋ ᒥᓇᐃᑖᓐ, ᑭᓚ ᐁ ᒎᐎᔭᓐ, ᓂᓚ ᒫᑲ ᐁ ᓴᒣᕆᔭ ᐃᔅᑴᐎᔮᓐ? ᐌᓴ ᒎᐗᒃ ᓇᒪᐎᓚ ᐅᑐᑌᒥᒣᐗᒃ ᓴᒣᕆᔭ ᐃᓕᓕᐗ᙮ 10 ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑮᔥᐱᓐ ᑭ ᑭᔅᑫᓕᑕᒧᐙᐸᓀ ᑭᒋᒪᓂᑐ ᐅ ᒥᓕᐌᐎᓐ, ᓀᔥᑕ ᐊᐌᓇ ᐊᓇ ᑳ ᐃᑎᔉ, ᒥᓇᐃᓐ; ᑭ ᑳ ᑮ ᓇᑐᑕᒪᐙᑖᔾ, ᑭ ᑳ ᑮ ᒥᓕᑯᑖᔾ ᒫᑲ ᐱᒪᑎᓯᐎ ᓂᐱᓕᐤ᙮ 11 ᐃᔅᑴᐤ ᐃᑌᐤ, ᐅᑭᒪᐤ, ᓇᒪ ᑫᒀᓐ ᑭᑦ ᐋᔮᓐ ᑭᒋ ᐃᔅᒀᐱᑫᐱᒋᑳᑫᔭᓐ, ᒧᓇᐃᐹᓐ ᒫᑲ ᓛᐎᓈᒀᑖᑲᓐ: ᑖᓐᑌ ᒫᑲ ᐌᒋ ᐋᔮᔭᓐ ᐊᓂᒪ ᐱᒫᑎᓯᐎ ᓂᐱ? 12 ᐊᐙᓯᑌ ᓈ ᑭ ᑭᔅᑌᓕᑖᑯᓯᓐ ᐃᔥᐱᔥ ᓄᑖᐎᓈᓐ ᒉᑲᑉ, ᑳ ᑮ ᒥᓕᔭᒥᑦ ᒧᓇᐃᐹᓂᓕᐤ, ᓀᔥᑕ ᐎᓚ ᑫᒋᐙᒃ ᑳ ᑮ ᐅᒋ ᒥᓂᑴᑦ, ᓀᔥᑕ ᐅᑦ ᐊᐙᔑᒥᔕ, ᓀᔥᑕ ᐅᑦ ᐊᐗᑳᓂᒪ? 13 ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑕᑐ ᐊᐌᓇ ᑳ ᒥᓂᑴᑦ ᐅᒣᓕᐤ ᓂᐱᓕᐤ ᒥᓇ ᑲᑕ ᓄᑌᔮᐸᑴᐤ: 14 ᒫᑲ ᑕᑐ ᐊᐌᓇ ᑫ ᒥᓂᑴᑦ ᐊᓂᐁᓕᐤ ᓂᐱᓕᐤ ᑫ ᒥᓚᒃ ᓇᒪᐎᔅᑳᑦ ᑲᑕ ᓄᑌᔮᐸᑴᐤ; ᒫᑲ ᓂᐱᓕᐤ ᑫ ᒥᓚᒃ ᑲᑕ ᐱᒋᔅᑳᑯ ᐁ ᒧᓇᐃᐹᓂᐗᓂᓕᒃ, ᐁ ᒧᔅᑭᒋᐗᓂᓕᒃ ᑭᒋ ᐅᒋ ᑳᑭᑫ ᐱᒫᑎᓰᑦ᙮ 15 ᐃᔅᑴᐤ ᐃᑌᐤ, ᐅᑭᒪᐤ, ᒥᓕᓐ ᐅᒪ ᓂᐱ, ᐁᑳ ᑭᒋ ᓄᑌᔮᐸᑴᔮᓐ, ᐁᑳ ᓀᔥᑕ ᐅᑕ ᑭᒋ ᐯᒋ ᐃᔅᒀᐱᑫᐱᒋᑫᔮᓐ᙮ 16 ᒋᓴᔅ ᐃᑌᐤ, ᒫᒑ, ᓇᑐᒻ ᑭ ᓈᐯᒻ, ᐯᒋ ᐃᑐᑌ ᒫᑲ᙮ 17 ᐃᔅᑴᐤ ᐁ ᓇᔥᑴᐗᔑᐃᐌᑦ, ᑮ ᐃᑗᐤ, ᓇᒪᐎᓚ ᓂᑦ ᐅᓈᐯᒥᓐ᙮ ᒋᓴᔅ ᑮ ᐃᑌᐤ, ᒀᔭᔉ ᑭᑦ ᐃᑣᓐ, ᓇᒪᐎᓚ ᓂᑦ ᐅᓈᐯᒥᓐ, ᐁ ᐃᑗᔭᓐ: 18 ᐌᓴ ᑭ ᑮ ᐋᔭᐗᐗᒃ ᓂᔮᓚᓐ ᓈᐯᐗᒃ; ᐊᓇ ᒫᑲ ᐊᓄᒡ ᑳ ᐋᔭᐗᑦ ᓇᒪᔦᐤ ᑭ ᓇᐯᒻ: ᐁᑯᑕ ᑎᐋᐺᔭᓐ ᑳ ᐃᑗᔭᓐ᙮ 19 ᐃᔅᑴᐤ ᐃᑌᐤ, ᐅᑭᒪᐤ, ᓂ ᐙᐸᑌᓐ ᐁ ᐅᑭᔅᑭᐙᐃᑫᐎᔭᓐ᙮ 20 ᓄᑖᐎᓈᓇᒃ ᑮ ᐋᔭᒥᐁᔅᑖᑫᐗᒃ ᐅᑕ ᐗᒌᒃ; ᑭᓚᐗᐤ ᒫᑲ ᑭᑦ ᐃᑣᓇᐗᐤ, ᒋᕉᓴᓚᒥᒃ ᐁᑯᑕ ᐃᓕᓕᐗᒃ ᑫ ᐃᔑ ᐋᔭᒥᐁᔅᑖᑫᐙᔅᐸᓐ᙮ 21 ᒋᓴᔅ ᐃᑌᐤ, ᐃᔅᑴᐤ, ᑖᐺᑖᐎᓐ, ᑎᐹᔨᑲᓐ ᐱᓯᒧᑳᓂᒃ ᐹᐸᓕᐤ, ᐃᔅᐱ ᐁᑳ ᐅᑕ ᐗᒌᒃ, ᐁᑳ ᓀᔥᑕ ᒋᕉᓴᓚᒥᒃ ᑫ ᐋᔭᒥᐁᔅᑕᐌᒃ ᐅᑖᐎᒪᐤ᙮ 22 ᑭᑦ ᐋᔭᒥᐃᔅᑌᓇᐗᐤ ᐊᓂᒪ ᐁᑳ ᑳ ᑭᔅᑫᓕᑕᒣᒃ; ᓂᓚᓈᓐ ᓂ ᑭᔅᑫᓕᑌᓈᓐ ᐊᓂᒪ ᑳ ᐋᔭᒥᐁᔅᑕᒫᒃ: ᐌᓴ ᐱᒫᒋᐃᐌᐎᓐ ᒎᐗᒃ ᐁᑯᑕ ᐌᒋᒪᑲᒃ᙮ 23 ᒫᑲ ᐹᐸᓕᐤ ᑎᐹᔨᑲᓐ ᐱᓯᒧᑳᓂᒃ, ᐋᔕᔾ ᒫᑲ ᐊᓄᒡ, ᐃᔅᐱ ᐊᓂᑭ ᑖᐺ ᐅᑖᔭᒥᐊᐗᒃ ᑫ ᓇᐗᑮᔅᑕᐙᒋᒃ ᐅᑖᐎᒫᐗ ᐊᒑᑯᒃ ᓀᔥᑕ ᑖᐺᐎᓂᒃ: ᐌᓴ ᐅᑖᐎᒪᐤ ᓇᑕᐌᓕᒣᐤ ᐊᓂᐃ ᑐᐎ ᑭᒋ ᓇᐗᑮᔅᑖᑯᑦ᙮ 24 ᑭᒋᒪᓂᑐ ᐊᒑᑯᐎᐤ: ᐊᓂᑭ ᓀᔥᑕ ᑳ ᓇᐗᑮᔅᑕᐙᒋᒃ ᔮᓕᑌᓪ ᑲᑕ ᓇᐗᑮᔅᑕᐌᐸᓇᒃ ᐊᒑᑯᒃ ᓀᔥᑕ ᑖᐺᐎᓂᒃ᙮ 25 ᐃᔅᑴᐤ ᐃᑌᐤ, ᓂ ᑭᔅᑫᓕᑌᓐ ᒥᓵᔭᔅ ᑭᒋ ᑕᑯᔑᒃ, ᙭ ᑳ ᐃᔑᓂᑳᑖᑲᓂᐎᑦ: ᐃᔅᐱ ᑕᑯᔑᑫ, ᒥᓯᐌ ᑫᒀᓇ ᓂ ᑳ ᐎᑕᒫᑯᓈᓐ᙮ 26 ᒋᓴᔅ ᐃᑌᐤ, ᓂᓚ ᑳ ᐋᔭᒥᐃᑖᓐ ᐁᐗᒀᓇ ᑳ ᐋᐎᔮᓐ᙮ 27 ᐁᑯ ᒣᒀᒡ ᑮ ᑕᑯᔑᓂᓕᐗ ᐅ ᑭᔅᑭᓄᐊᒪᐙᑲᓇ, ᑮ ᒫᒪᔅᑳᑕᒥᓕᐗ ᒫᑲ ᐁ ᐎᒋᐋᔭᒥᒫᑦ ᐊᓂᐃ ᐃᔅᑴᐗ: ᐁᓕᐌᒃ ᒫᑲ ᓇᒪᐎᓚ ᐊᐌᓇ ᐅᒋ ᐃᑗᐤ, ᑫᒀᓐ ᓀᑕᐌᓕᑕᒪᓐ? ᓀᔥᑕᐱᑯ, ᑫᒀᓐ ᐌᒋ ᐎᒋᐋᔭᒥᒪᑦ? 28 ᐁᑯ ᐃᔅᑴᐤ ᓀᑲᑕᒃ ᐅ ᒀᐱᑳᑲᓐ, ᑮ ᐃᑐᑌᐤ ᒫᑲ ᐃᑖᐎᓂᒃ, ᓀᔥᑕ ᐃᑌᐤ ᐃᓕᓕᐗ, 29 ᐋᔅᑕᒥᑐᒃ, ᐯᒋ ᐙᐸᒥᒃ ᐃᓕᓕᐤ, ᑳ ᑮ ᐎᑕᒫᐎᑦ ᒥᓯᐌ ᑫᒀᓇ ᑳ ᑮ ᐯᒋ ᑐᑕᒶᒃ: ᓇᒪ ᓈ ᐁᐗᑯ ᐊᐗ ᙭? 30 ᐁᑯ ᐌᓚᐎᒋᒃ ᐃᑖᐎᓂᒃ ᐅᒋ, ᓀᔥᑕ ᑮ ᐯᒋ ᐅᑎᑌᐗᒃ᙮ 31 ᒣᒀᒡ ᐅᒪ ᐅ ᑭᔅᑭᓄᐊᒪᐙᑲᓇ ᑮ ᔑᑭᒥᑯ, ᐁ ᐃᑗᓕᒋ, ᐅᑭᒪᐤ, ᒥᒋᓱ᙮ 32 ᒫᑲ ᑮ ᐃᑌᐤ, ᓂᑦ ᐋᔮᓐ ᒥᒋᒻ ᑭᒋ ᒥᒋᔮᓐ ᐁᑳ ᑳ ᑭᔅᑫᓕᑕᒣᒃ ᑭᓚᐗᐤ᙮ 33 ᐁᐗᑯ ᐌᒋ ᐁᑎᑐᒋᒃ ᑭᔅᑭᓄᐊᒪᐙᑲᓇᒃ, ᑮ ᐯᑣᑯ ᓈ ᐊᐌᓕᐗ ᑫ ᒥᒋᑦ? 34 ᒋᓴᔅ ᐃᑌᐤ, ᐁᐗᑯ ᓂ ᒥᒋᒥᒻ ᑭᒋ ᑐᑕᒶᒃ ᐅᑦ ᐃᑌᓕᑕᒧᐎᓐ ᐊᓇ ᑳ ᑮ ᐯᒋᑎᔕᐅᑦ, ᓀᔥᑕ ᑭᒋ ᑭᔑᑖᐗᒃ ᐅᑦ ᐊᑑᔅᑫᐎᓐ᙮ 35 ᓇᒪ ᓈ ᑭᑦ ᐃᑣᓇᐗᐤ, ᑫᔮᐸᒡ ᓀᐤ ᐱᓯᒶ, ᐁᑯ ᑫ ᐅᑎᒋᐸᓕᒃ ᑭᒋ ᒪᐗᒋᒋᑳᓂᐗᒃ? ᒫᑎᑲ, ᑭᑦ ᐃᑎᓇᐗᐤ, ᑕᔅᑕᓵᐱᒃ, ᑲᓇᐙᐸᑕᒧᒃ ᒫᑲ ᓂᑖᐎᑭᒋᑲᓇ; ᐌᓴ ᐋᔕᔾ ᐙᐸᐗ ᑭᒋ ᒪᐗᒋᒋᑳᓂᐗᒃ᙮ 36 ᐊᓇ ᒫᑲ ᑳ ᒪᓂᔑᑫᑦ ᐅᑎᓇᒻ ᑎᐸᐊᒫᑯᓯᐎᓂᓕᐤ, ᓀᔥᑕ ᒪᐗᒋᑕᐤ ᓂᑖᐎᑭᑖᑲᓇ ᑭᒋ ᐅᒋ ᑳᑭᑫ ᐱᒫᑎᓰᑦ: ᑖᐱᔅᑯᒡ ᐊᓇ ᑳ ᐸᑭᑎᓂᑫᑦ ᓀᔥᑕ ᐊᓇ ᑳ ᒪᓂᔑᑫᑦ ᑭᒋ ᒥᓚᐙᑕᑭᒃ᙮ 37 ᐁᑯᑕ ᐅᑕ ᑌᐱᐸᓕᒃ ᐊᓂᒪ ᐃᑗᐎᓐ, ᐯᔭᒃ ᐸᑭᑎᓂᑫᐤ, ᑯᑕᒃ ᒫᑲ ᒪᓂᔑᑫᐤ᙮ 38 ᑭ ᑮ ᐃᑎᔕᐅᑎᓇᐗᐤ ᑭᒋ ᒪᓂᔕᒣᒃ ᐊᓂᒪ ᐁᑳ ᑳ ᐅᒋ ᐋᓕᒥᑲᒣᒃ: ᑯᑕᑭᔭᒃ ᐃᓕᓕᐗᒃ ᑮ ᐊᑑᔅᑫᐗᒃ, ᑭᓚᐗᐤ ᒫᑲ ᑭᑦ ᐋᔮᒧᐙᓇᐗᐤ ᐅᑦ ᐊᑑᔅᑫᐎᓂᐗᐗ᙮ 39 ᒥᒉᑦ ᒫᑲ ᓴᒣᕆᔭ ᐃᓕᓕᐗᒃ ᐊᓂᒪ ᐃᑖᐎᓂᒃ ᑳ ᐃᑖᒋᒃ ᑮ ᑖᐺᔦᓕᒣᐗᒃ ᐃᔅᑴᐗ ᐅᑦ ᐋᔭᒥᐎᓂᓕᐗ ᐅᒋ, ᑳ ᑮ ᐃᑗᓕᒋ, ᓂ ᑮ ᐎᑕᒫᒃ ᒥᓯᐌ ᑫᒀᓇ ᑳ ᑮ ᐯᒋ ᑐᑕᒶᒃ᙮ 40 ᐃᔅᐱ ᒫᑲ ᓴᒣᕃᔭ ᐃᓕᓕᐗ ᐌᑎᑎᑯᑦ, ᑮ ᓇᑐᑕᒫᑯ ᑭᒋ ᐎᒋᑕᔑᑫᒫᑦ: ᐁᑯᑕ ᒫᑲ ᑌᔑᑫᑦ ᓂᔓ ᑭᔑᑳᐗ᙮ 41 ᓀᔥᑕ ᐊᐙᓯᑌ ᒥᒉᑦ ᑮ ᑖᐺᑕᒶᒃ ᐎᓚ ᑫᒋᐙᒃ ᐅᑦ ᐋᔭᒥᐎᓂᓕᐤ ᐅᒋ; 42 ᓀᔥᑕ ᑮ ᐃᑌᐗᒃ ᐃᔅᑴᐗ, ᐁᑯ ᑎᐋᐺᑕᒫᒃ, ᓇᒪᐎᓚ ᑭᓚ ᑭᑦ ᐃᑗᐎᓐ ᐅᒋ: ᐌᓴ ᓂᓚᓈᓐ ᑫᒋᐙᒃ ᓂ ᑮ ᐯᑕᐙᓈᓐ, ᓀᔥᑕ ᓂ ᑭᔅᑫᓕᑌᓈᓐ ᐊᐗ ᑖᐺ ᐁᐗᒀᓇ ᙭, ᑳ ᐱᒫᒋᑖᑦ ᐊᔅᑭᓕᐤ᙮

ᒋᓴᔅ ᒥᓇᐙᒋᐁᐤ ᑭᒋ ᐃᓕᓕᐤ ᐅᑯᓯᓴ

43 ᑳ ᓂᔓ ᑭᔑᑳᓕᒃ ᒫᑲ ᐊᓐᑕ ᑮ ᐅᒋ ᑭᑐᑌᐤ, ᓀᔥᑕ ᑮ ᐃᑐᑌᐤ ᑳᓕᓕᒃ᙮ 44 ᐌᓴ ᒋᓴᔅ ᑫᒋᐙᒃ ᑮ ᐃᑗᐤ, ᐅᑭᔅᑭᐙᐃᑫᐤ ᓇᒪᐎᓚ ᐋᔭᐤ ᑭᔅᑌᓕᑖᑯᓯᐎᓂᓕᐤ ᐎᓚ ᑎᐱᓚᐌ ᐅᑦ ᐊᔅᑮᒃ᙮ 45 ᐃᔅᐱ ᒫᑲ ᑌᑯᔑᒃ ᑳᓕᓕᒃ, ᑳᓕᓕ ᐃᓕᓕᐗ ᑮ ᒥᓜᓕᒥᑯ, ᐁ ᑮ ᐙᐸᑕᒥᓕᒋ ᒥᓯᐌ ᑫᒀᓇ ᑳ ᑮ ᑐᑕᒃ ᒋᕉᓴᓚᒥᒃ ᒣᒀᒡ ᑳ ᒪᑯᔖᓂᐗᓂᓕᒃ: ᐌᓴ ᐎᓚᐗᐤ ᓀᔥᑕ ᑮ ᐃᑐᑌᐗᒃ ᐁ ᒪᑯᔖᓂᐗᓂᓕᒃ᙮ 46 ᐁᑯ ᒋᓴᔅ ᒥᓇ ᑌᑯᔑᒃ ᑫᓇᐃᒃ ᑳᓕᓕᒃ, ᐃᑕ ᑳ ᑮ ᔓᒥᓇᐳᐎᑖᑦ ᓂᐱᓕᐤ᙮ ᑮ ᐃᑖᐤ ᒫᑲ ᑭᒋᐃᓕᓕᐤ, ᐅᑯᓯᓴ ᐁ ᐋᑯᓯᓕᒋ ᑲᐸᕐᓀᔭᒥᒃ᙮ 47 ᐃᔅᐱ ᐱᐁᑕᒃ ᒋᓴᓴ ᐁ ᑮ ᐯᒋ ᐃᑐᑌᓕᒋ ᑳᓕᓖᒃ ᒎᑎᐊᐃᒃ ᐅᒋ, ᑮ ᓈᑌᐤ, ᓀᔥᑕ ᑮ ᓇᑐᑕᒪᐌᐤ ᑭᒋ ᐯᒋ ᒥᓂᐙᒋᐋᓕᒋ ᐅᑯᓯᓴ: ᐌᓴ ᑫᑳᑦ ᑮ ᓂᐱᓕᐗ᙮ 48 ᐁᑯ ᒋᓴᔅ ᐁᑖᑦ, ᑮᔥᐱᓐ ᐁᑳ ᐙᐸᑕᒣᑴ ᑭᔅᑭᓄᐙᒋ ᐙᐸᑎᓕᐌᐎᓇ ᓀᔥᑕ ᒫᒪᑖᐎ ᑫᒀᓇ, ᓇᒪᐎᓚ ᑭ ᑳ ᑖᐺᑌᓇᐗᐤ᙮ 49 ᑭᒋᐃᓕᓕᐤ ᐃᑌᐤ, ᐅᑭᒪᐤ, ᐯᒋ ᐃᑐᑌ ᐸᒧᔑ ᓂᐱᑦ ᓂᑦ ᐊᐙᔑᒥᔥ᙮ 50 ᒋᓴᔅ ᐃᑌᐤ, ᑭᐌ, ᐱᒫᑎᓯᐤ ᑭᑯᓯᔅ᙮ ᐊᓇ ᐃᓕᓕᐤ ᒫᑲ ᑮ ᑖᐺᑕᒬᐤ ᐋᔭᒥᐎᓂᓕᐤ ᑳ ᑮ ᐃᑎᑯᒃ ᒋᓴᓴ, ᓀᔥᑕ ᑮ ᑭᐌᐤ᙮ 51 ᐁ ᐊᑎ ᑭᐌᑦ ᒫᑲ ᐅᑦ ᐊᑑᔅᑫᓛᑲᓇ ᑮ ᓇᑭᔥᑳᑯ, ᓀᔥᑕ ᑮ ᐎᑕᒫᑯ, ᐁ ᐃᑗᓕᒋ, ᐱᒫᑎᓯᐤ ᑭᑯᓯᔅ᙮ 52 ᐁᑯ ᑫᑴᒋᒫᑦ ᐊᓂᐁᓕᐤ ᑎᐸᔨᑲᓂᓕᐤ ᐱᓯᒪᑳᓂᒃ ᐃᔅᐱ ᑳ ᐊᑎ ᒥᓇᐙᑎᓯᓕᒋ᙮ ᑮ ᐃᑎᑯ ᒫᑲ, ᐅᑖᑯᔒᒃ ᒣᒀᒡ ᓂᔂᓱ ᑎᐹᔨᑲᓂᓕᐤ ᐱᓯᒧᑳᓂᒃ ᑮ ᓇᑲᑎᑯ ᑭᓯᓱᐎ ᐃᑖᔅᐱᓀᐎᓂᓕᐤ᙮ 53 ᐁᑯ ᐅᑖᐎᒪᐤ ᑫᔅᑫᓕᑕᒃ ᐁ ᑮ ᐃᑭᓂᓕᒃ ᒣᑾᒡ ᐊᓂᐁᓕᐤ ᑎᐳᔨᑲᓂᓕᐤ ᐱᓯᒧᑳᓂᒃ ᑳ ᐃᑎᑯᑦ ᒋᓴᓴ, ᐱᒫᑎᓯᐤ ᑭᑯᓯᔅ: ᐁᑯ ᐎᓚ ᑎᐋᐺᑕᒃ, ᓀᔥᑕ ᒥᓯᐌ ᐁᑕᓯᓕᒋ ᐅ ᐙᔅᑳᔨᑲᓂᒥᒃ᙮ 54 ᐁᐗᑯ ᐅᒪ ᒫᑲ ᓂᔓ ᒋᓴᔅ ᒫᒪᔅᑳᒋ ᐃᓯᒋᑫᐎᓂᓕᐤ ᑳ ᑐᑕᒃ ᐃᔅᐱ ᑳ ᑮ ᐯᒋ ᐃᑐᑌᑦ ᑳᓕᓕᒃ, ᒎᑎᐊᐃᒃ ᐅᒋ᙮

5

ᐁ ᒥᓇᐗᒋᐃᐗᓂᐗᒃ ᒨᓇᐃᐹᓂᒃ

1 ᐹᑎᒫ ᐅᒪ ᑮ ᐃᑕᑾᓂᓕᐤ ᐯᔭᒃ ᒎᐗᒃ ᐅ ᒪᑯᔐᐎᓂᐗᐤ; ᒋᓴᔅ ᒫᑲ ᑮ ᐃᑐᑌᐤ ᒋᕉᓴᓚᒥᒃ᙮ 2 ᒋᕉᓴᓚᒥᒃ ᒫᑲ ᐃᑕᑾᓐ ᓵᑲᐃᑲᓂᔥ ᑭᔑᐙᒃ ᒫᓂᔥᒑᓂᔕᒃ ᐅᑦ ᐃᔥᒀᑌᒥᐙᒃ, ᐦᐃᑉᕉ ᐃᔑᑭᔗᐎᓂᒃ ᐯᑌᔅᑕ ᑳ ᐃᔑᓂᑳᑌᒃ, ᓂᔮᓚᓪ ᐱᔅᑭᑣᔅᑳᐃᑲᓂᔕ ᐁᑯᑕ ᐁ ᐃᑕᑾᑭ᙮ 3 ᐱᒋ ᐅᐅ ᑮ ᐱᒥᔑᓋᒃ ᒥᒉᑦ ᐁ ᐋᑯᓯᒋᒃ, ᐁᑳ ᐁ ᐙᐱᒋᒃ, ᐁᑳ ᐁ ᓂᑖᐅᑌᒋᒃ, ᐁ ᓂᐳᐎᓈᑯᓯᒋᒃ, ᐁ ᐯᑖᒋᒃ ᑭᒋ ᐋᑕᑲᒪᐃᑳᑌᓕᒃ ᓂᐱᓕᐤ᙮ 4 ᐌᓴ ᐁᓐᒐᓪ ᐋᔅᑲᐤ ᑮ ᐃᑐᑌᐤ ᓵᑲᐃᑲᓂᔑᒃ, ᓀᔥᑕ ᑮ ᐋᑕᑳᒪᐊᒻ ᓂᐱᓕᐤ: ᐊᓇ ᐊᐌᓇ ᒫᑲ ᓃᔥᑕᒻ ᑳ ᐸᑯᐯᑦ ᑳ ᐋᑕᑲᒪᐃᑳᑌᓕᒃ ᓂᐱᓕᐤ, ᑮ ᒥᓇᐙᒋᐋᑲᓂᐎᐤ ᐱᑯ ᐊᓂᐁᓕᐤ ᐋᑯᓯᐎᓂᓕᐤ ᑳ ᐋᔮᑦ᙮ 5 ᐊᓐᑕ ᒫᑲ ᑮ ᐃᑖᐤ ᐯᔭᒃ ᐃᓕᓕᐤ, ᐁ ᑮ ᐋᑯᓯᑦ ᓂᔅᑐᒥᑕᓇᐤ ᔭᓇᓀᐅᔖᑉ ᐱᐴᓋ᙮ 6 ᐃᔅᐱ ᒋᓴᔅ ᐎᐋᐸᒫᑦ ᐁ ᐱᒥᔑᓂᓕᒋ, ᓀᔥᑕ ᑫᔅᑭᓕᑕᒃ ᐋᔕᔾ ᑭᓉᔥ ᐁ ᑮ ᐋᑯᓯᓕᒋ, ᐃᑌᐤ ᑭ ᐎ ᒥᓇᐙᒋᐃᑯᓯᓐ ᓈ? 7 ᑮ ᓇᔥᑴᐗᔑᐃᑯ ᒫᑲ ᑳ ᐋᑯᓯᓕᒋ ᐃᓕᓕᐗ, ᐅᑭᒪᐤ, ᓇᒪᐎᓚ ᓂᑦ ᐋᔭᐗᐤ ᐊᐌᓇ ᑭᒋ ᑭᑖᓂᑦ ᓵᑲᐃᑲᓂᔑᒃ ᐃᔅᐱ ᐃᐋᑕᑲᒪᐃᑲᑌᒃ ᓂᐱ; ᒫᑲ ᒣᒀᒡ ᐁ ᐯᒋ ᐃᑐᑌᔮᓐ, ᑯᑕᒃ ᐸᑯᐯᐤ ᐸᒧᔑ ᓂᓚ᙮ 8 ᒋᓴᔅ ᐃᑌᐤ, ᐗᓂᔥᑳ, ᐅᑎᓇ ᑭ ᓂᐯᐎᓐ, ᐱᒧᑌ ᒫᑲ᙮ 9 ᑣᔦᒃ ᒫᑲ ᐊᓇ ᐃᓕᓕᐤ ᑮ ᒥᓇᐙᒋᐋᑲᓂᐎᐤ, ᓀᔥᑕ ᑮ ᐅᑎᓇᒻ ᐅ ᓂᐯᐎᓐ, ᑮ ᐱᒧᑌᐤ ᒫᑲ: ᐁᐗᒀᓂ ᐁ ᑭᔑᑳᒃ ᒫᑲ ᑮ ᐋᔭᒥᐁᑭᔑᑳᐤ᙮ 10 ᐁᐗᑯ ᐌᒋ ᒎᐗᒃ ᐃᑖᒋᒃ ᐊᓂᐃ ᑳ ᑮ ᒥᓇᐙᒋᐋᑲᓂᐎᓕᒋ, ᐊᓄᒡ ᐋᔭᒥᐁᑭᔑᑲᐤ: ᓇᒪᐎᓚ ᐅᓚᔓᐌᓕᑖᑾᓐ ᑭᒋ ᐱᒥᐎᑖᔭᓐ ᑭ ᓂᐯᐎᓐ᙮ 11 ᑮ ᓇᔥᑴᐗᔑᐁᐤ, ᐊᓇ ᑳ ᒥᓇᐙᒋᒃ, ᐁᐗᑯ ᑳ ᐃᔑᑦ, ᐅᑎᓇ ᑭ ᓂᐯᐎᓐ, ᐱᒧᑌ ᒫᑲ᙮ 12 ᐁᑯ ᑫᑴᒋᒫᒋᒃ, ᐊᐌᓇ ᐊᓇ ᐃᓕᓕᐤ ᑳ ᐃᑎᔉ, ᐅᑎᓇ ᑭ ᓂᐁᐎᓐ, ᐱᒧᑌ ᒫᑲ? 13 ᐊᓇ ᒫᑲ ᑳ ᒥᓇᐙᒋᐋᑲᓂᐎᑦ ᓇᒪᐎᓚ ᐅᒋ ᑭᔅᑫᓕᑕᒻ ᐊᐌᓕᐗ ᐃᐋᐎᓕᒋ: ᐌᓴ ᒋᓴᔅ ᑮ ᑭᑐᑕᐃᑎᓱ, ᐁ ᒫᒪᐎᒥᒉᑎᓕᒋ ᐃᓕᓕᐗ ᐁᑯᑕ ᐁ ᐃᑖᓕᒋ᙮ 14 ᐹᑎᒫ ᒋᓴᔅ ᒥᔅᑲᐌᐤ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᑮ ᐃᑌᐤ, ᒫᑎᑲ, ᑮ ᒥᓇᐙᒋᐃᑳᐎᓐ: ᐁᑳᐎᓚ ᒥᓇ ᒪᒋᑐᑖ, ᑫᑳ ᑭ ᑳ ᐅᑎᑎᑯᓐ ᑫᒀᓐ ᐊᐙᓯᑌ ᐁ ᒫᓛᑕᒃ᙮ 15 ᐊᓇ ᐃᓕᓕᐤ ᑮ ᑭᑐᑌᐤ, ᓀᔥᑕ ᑮ ᐎᑕᐅᐌᐤ ᒎᐗ ᐁ ᐋᐎᓕᒋ ᒋᓴᓴ ᑳ ᑮ ᒥᓇᐙᒋᐃᑯᑦ᙮ 16 ᐁᐗᑯ ᐌᒋ ᒎᐗᒃ ᑮ ᑯᒋ ᒪᒋᑐᑕᐙᒋᒃ ᒋᓴᓴ, ᓀᔥᑕ ᑮ ᐎ ᓂᐸᐁᐗᒃ, ᐁ ᑮ ᑐᑕᒥᓕᒋ ᐅᐅ ᑫᒀᓇ ᐁ ᐋᔭᒥᐁᑭᔑᑳᓕᒃ᙮ 17 ᒫᑲ ᒋᓴᔅ ᑮ ᓇᔥᑴᐗᔑᐁᐤ, ᓄᑖᐎ ᐯᒋ ᐋᐸᑎᓯᐤ ᐊᓄᒡ ᐃᔅᑯ, ᓂᓚ ᓀᔥᑕ ᓂᑦ ᐋᐸᑎᓯᓐ᙮ 18 ᐁᐗᑯ ᐌᒋ ᒎᐗᒃ ᐊᐙᓯᑌ ᑮ ᐎ ᓂᐸᐁᐗᒃ, ᓇᒪᐎᓚ ᐱᑯ ᐁ ᑮ ᐱᑯᐱᑕᒥᓕᒋ ᐁ ᐋᔭᒥᐁᑭᔑᑳᓕᒃ, ᐊᓯᒋ ᒫᑲ, ᑭᒋᒪᓂᑐ ᓄᑖᐎ ᐁ ᑮ ᐎᑗᓕᒋ, ᐁ ᑭᒋᒪᓂᑐᑳᓱᓕᒋ᙮

ᐁ ᐃᔑ ᑲᔥᑭᐅᑦ ᐅᑯᓯᓯᒫᐤ

19 ᐁᑯ ᓀᔥᑴᐗᔑᐋᑦ ᒋᓴᔅ, ᓀᔥᑕ ᑮ ᐃᑌᐤ, ᑖᐺ, ᑖᐺ ᑭᑦ ᐃᑎᓇᐗᐤ, ᐅᑯᓯᓯᒫᐤ ᐁ ᐯᔭᑯᑦ ᓇᒪᐎᓚ ᑫᒀᓕᐤ ᑲᑕ ᑮ ᑐᑕᒻ, ᐱᑯ ᑫᒀᓕᐤ ᐁ ᐙᐸᒫᑦ ᐅᑖᐎᒫᐗ ᐁ ᑐᑕᒥᓕᒋ, ᐅᐅ ᓀᔥᑕ ᑐᑕᒻ ᐅᑯᓯᓯᒫᐤ᙮ 20 ᐌᓴ ᐅᑖᐎᒪᐤ ᓵᑭᐁᐤ ᐅᑯᓯᓯᒫᐗ, ᓀᔥᑕ ᐙᐸᑎᓓᐤ ᒥᓯᐌ ᑫᒀᓇ ᐎᓚ ᑫᒋᐙᒃ ᑳ ᑐᑕᒃ: ᓀᔥᑕ ᑲᑕ ᐙᐸᑎᓓᐤ ᐊᐙᓯᑌ ᑭᒋ ᑫᒀᓇ ᐃᔥᐱᔥ ᐅᐅ, ᑭᒋ ᐅᒋ ᒫᒪᔅᑲᑕᒣᒃ᙮ 21 ᐌᓴ ᑖᐱᔅᑯᒡ ᐅᑖᐎᒫᐤ ᐁ ᐃᔑ ᐗᓂᔥᑳᓈᑦ ᑳ ᓂᐱᓕᒋ, ᓀᔥᑕ ᐁ ᐋᐱᓯᐋᑦ: ᐁᑯ ᓀᔥᑕ ᐅᑯᓯᓯᒪᐤ ᐁ ᐃᔑ ᐋᐱᓯᐋᑦ ᐊᓂᐃ ᐙᑐᑕᐙᑦ᙮ 22 ᐌᓴ ᐅᑖᐎᒪᐤ ᓇᒪᐎᓚ ᑎᐹᔅᑯᓀᐤ ᐊᐌᓕᐗ, ᒫᑲ ᑮ ᐸᑭᑎᓇᒪᐌᐤ ᐅᑯᓯᓯᒫᐗ ᒥᓯᐌ ᑎᐹᔅᑯᓂᑫᐎᓂᓕᐤ: 23 ᒥᓯᐌ ᐃᓕᓕᐗᒃ ᑭᒋ ᑭᔅᑌᓕᒫᒋᒃ ᐅᑯᓯᓯᒪᐗ, ᑖᐱᔅᑯᒡ ᐁ ᐃᔑ ᑭᔅᑌᓕᒫᒋᒃ ᐅᑖᐎᒫᐗ᙮ ᐊᓇ ᐁᑳ ᑳ ᑭᔅᑌᓕᒫᑦ ᐅᑯᓯᓯᒫᐗ, ᓇᒪᐎᓚ ᑭᔅᑌᓕᒣᐤ ᐅᑖᐎᒪᐗ ᑳ ᑮ ᐯᒋᑎᔕᐙᓕᒋ᙮ 24 ᑖᐺ, ᑖᐺ, ᑭᑦ ᐃᑎᓇᐗᐤ, ᐊᓇ ᑳ ᓇᑐᑕᒃ ᓂᑦ ᐋᔭᒥᐎᓂᓕᐤ, ᓀᔥᑕ ᑳ ᑖᐺᔦᓕᒫᑦ ᐊᓂᐃ ᑳ ᑮ ᐯᒋᑎᔕᐅᓕᒋ, ᐋᔭᐤ ᑳᑭᑫ ᐱᒫᑎᓯᐎᓂᓕᐤ, ᓇᒪ ᓀᔥᑕ ᑲᑕ ᐅᑎᑎᑯ ᓂᔑᐗᓈᒋᒥᑯᓯᐎᓂᓕᐤ; ᒫᑲ ᑮ ᒥᔮᔥᑲᒻ ᓂᐱᐎᓂᓕᐤ ᐁ ᐅᑎᑕᒃ ᐱᒫᑎᓯᐎᓂᓕᐤ᙮ 25 ᑖᐺ, ᑖᐺ, ᑭᑦ ᐃᑎᓇᐗᐤ, ᐹᐸᓕᐤ ᑎᐹᔨᑲᓐ ᐱᓯᒧᑳᓂᒃ, ᐋᔕᔾ ᒫᑲ ᐊᓄᒡ, ᐃᔅᐱ ᐅᓂᐱᐗᒃ ᑫ ᐯᑕᒸᒋᒃ ᑭᒋᒪᓂᑐ ᐅᑯᓯᓴ ᐅ ᐯᑖᑯᓯᐎᓂᓕᐤ: ᓀᔥᑕ ᒫᑲ ᐊᓂᑭ ᑳ ᐯᑕᑭᒃ ᑲᑕ ᐱᒫᑎᓯᐗᒃ᙮ 26 ᐌᓴ ᑖᐱᔅᑯᒡ ᐅᑖᐎᒪᐤ ᐁ ᐃᔑ ᐱᒋᔅᑳᑯᑦ ᐱᒫᑎᓯᐎᓂᓕᐤ; ᐁᑯ ᑳ ᐃᔑ ᒥᓛᑦ ᐅᑯᓯᓯᒫᐗ ᑭᒋ ᐱᑭᔅᑳᑯᓕᒋ ᐱᒫᑎᓯᐎᓂᓕᐤ; 27 ᑮ ᒥᓓᐤ ᒫᑲ ᑎᐯᓕᒋᑫᐎᓂᓕᐤ ᑭᒋ ᑎᐹᔅᑯᓂᑫᓕᒋ ᓀᔥᑕ, ᐁ ᐃᓕᓕᐎᑯᓯᓵᓂᐎᓕᒋ᙮ 28 ᐁᑳᐎᓚ ᒫᒪᔅᑳᑕᒧᒃ ᐅᒪ: ᐌᓴ ᐹᐸᓕᐤ ᑎᐹᔨᑲᓐ ᐱᓯᒧᑳᓂᒃ ᐃᔅᐱ ᒥᓯᐌ ᐊᓂᑭ ᓕᑾᐊᔅᑳᓂᒃ ᑳ ᐃᑖᒋᒃ ᑫ ᐯᑕᒸᒋᒃ ᐅ ᐯᑖᑯᓯᐎᓂᓕᐤ, 29 ᓀᔥᑕ ᑫ ᐯᒋ ᐗᓚᐎᒋᒃ; ᐊᓂᑭ ᑳ ᑮ ᒥᓗᑐᑕᑭᒃ ᑲᑕ ᐗᓂᔥᑳᐗᒃ ᑭᒋ ᐋᔮᒋᒃ ᐱᒫᑎᓯᐎᓂᓕᐤ; ᐊᓂᑭ ᒫᑲ ᑳ ᑮ ᒪᒋᑐᑕᑭᒃ ᑲᑕ ᐗᓂᔥᑲᐗᒃ ᑭᒋ ᐋᔮᒋᒃ ᓂᔑᐗᓈᒋᒥᑯᓯᐎᓂᓕᐤ᙮

ᑎᐹᒋᒣᐗᒃ ᒋᓴᓴ

30 ᓂᓚ ᑫᒋᐙᒃ ᓇᒪᐎᓚ ᑫᒀᓐ ᓂ ᑮ ᑐᑌᓐ: ᐁ ᐃᔑ ᐯᑕᒫᓐ ᓂᑦ ᐃᔑ ᑎᐹᔅᑯᓂᑳᓐ: ᓂ ᑎᐹᔅᑯᓂᑫᐎᓐ ᒫᑲ ᑳᔨᔅᑾᓐ: ᐁᑳ ᐁ ᐎ ᑐᑕᒫᓐ ᓂᓚ ᑎᐱᓚᐌ ᓃᑦ ᐃᑌᓕᑕᒧᐎᓐ, ᒫᑲ ᐅᑦ ᐃᑌᓕᑕᒧᐎᓐ ᐅᑖᐎᒪᐤ ᑳ ᑮ ᐯᒋᑎᔕᐅᑦ᙮ 31 ᑮᔥᐱᓐ ᑌᐹᒋᒥᑎᓱᐙᓂ, ᓂ ᑎᐸᒋᒧᐎᓐ ᓇᒪᐎᓚ ᑖᐺᒪᑲᓐ᙮ 32 ᑯᑕᒃ ᐃᑖᐤ ᑳ ᑎᐹᒋᒥᑦ; ᓂ ᑭᔅᑫᓕᑌᓐ ᒫᑲ ᐁ ᑖᐺᒪᑲᓂᓕᒃ ᐊᓂᐁᓕᐤ ᑎᐹᒋᒧᐎᓂᓕᐤ ᑳ ᐃᑖᒋᒥᑦ᙮ 33 ᑭ ᑮ ᐃᑎᔕᐅᐙᓇᐗᐤ ᑭᒋ ᑲᑴᒋᒣᒃ ᒑᓐ; ᑮ ᑎᐹᑐᑕᒻ ᒫᑲ ᑖᐺᐎᓂᓕᐤ᙮ 34 ᓇᒪᐎᓚ ᒫᑲ ᓂᑦ ᐅᑎᓀᓐ ᑎᐹᒋᒧᐎᓐ ᐃᓕᓕᒃ ᐅᒋ: ᒫᑲ ᐅᐅ ᑫᒀᓇ ᓂᑦ ᐃᑣᓐ ᑭᒋ ᐱᒫᒋᐃᑲᐎᔦᒃ᙮ 35 ᐎᓚ ᑮ ᐙᔅᑌᐎᓂᐎᐤ ᐁ ᓴᔅᑭᓱᑦ ᓀᔥᑕ ᐁ ᐙᓯᓱᑦ: ᓀᔥᑕ ᑭ ᑮ ᓵᐯᓕᑌᓇᐗᐤ ᐎᓕᐱᔉ ᑭᒋ ᒥᓚᐙᑕᒣᒃ ᐅ ᐙᔅᑌᐎᓂᒃ᙮ 36 ᒫᑲ ᓂᑦ ᐋᔮᓐ ᑎᐹᒋᒧᐎᓐ ᐊᐙᓯᑌ ᐁ ᑭᔅᑌᓕᑖᑾᒃ ᐃᔥᐱᔥ ᒑᓐ ᐅ ᑎᐹᒋᒧᐎᓐ: ᐌᓴ ᐊᓂᐃ ᐋᔨᑎᐎᓇ ᐅᑖᐎᒪᐤ ᑳ ᑮ ᒥᓕᑦ ᑭᒋ ᑭᔑᑖᐗᒃ, ᐁᐗᒀᓂᐃ ᐋᔨᑎᐎᓇ ᑳ ᐃᑐᑕᒫᓐ, ᓂ ᑎᐹᒋᒥᑯᓐ, ᐁ ᑮ ᐯᒋᑎᔓᐅᑦ ᐅᑖᐎᒪᐤ᙮ 37 ᓀᔥᑕ ᐅᑖᐎᒪᐤ ᑫᒋᐙᒃ ᑳ ᑮ ᐯᒋᑎᔕᐅᑦ, ᓂ ᑮ ᑎᐹᑭᒥᒃ᙮ ᓇᒪᐎᔅᑳᑦ ᑭ ᐅᒋ ᐯᑕᒸᓇᐗᐤ ᐅ ᐯᑖᑯᓯᐎᓐ, ᓇᒪ ᓀᔥᑕ ᑭ ᐅᒋ ᐙᐸᑕᒸᓇᐗᐤ ᐅᑦ ᐃᔑᓈᑯᓯᐎᓐ᙮ 38 ᓇᒪᐎᓚ ᓀᔥᑕ ᑮ ᐱᒋᔅᑳᑯᐙᓇᐗᐤ ᐅᑦ ᐋᔭᒥᐎᓐ: ᐌᓴ ᐊᓂᐃ ᑳ ᑮ ᐯᒋᑎᔕᐙᑦ, ᐁᐗᑯ ᓇᒪᐎᓚ ᑮ ᑖᐺᑕᐙᐗᐤ᙮ 39 ᓈᓇᑕᐙᐸᑕᒧᒃ ᑭᒋ ᒪᓯᓇᐃᑫᐎᓇ; ᐌᓴ ᐁᑯᑕ ᑭᑦ ᐃᑌᓕᑌᓇᐗᐤ ᐁ ᐋᔮᔦᒃ ᑳᑭᑫ ᐱᒫᑎᓯᐎᓐ: ᐅᐅ ᓀᔥᑕ ᐁᐗᒀᓂᐃ ᑳ ᑎᐹᒋᒥᑯᔮᓐ᙮ 40 ᓇᒪᐎᓚ ᓀᔥᑕ ᑭ ᐎ ᐯᒋ ᓈᔑᓇᐗᐤ, ᑭᒋ ᐋᔭᔦᒃ ᐱᒫᑎᓯᐎᓐ᙮ 41 ᓇᒪᐎᓚ ᓂᑦ ᐅᑎᓀᓐ ᑭᔅᑌᓕᑖᑯᓯᐎᓐ ᐃᓕᓖᒃ ᐅᒋ᙮ 42 ᒫᑲ ᑭ ᑭᔅᑫᓕᒥᑎᓇᐗᐤ ᐁᑳ ᐁ ᐱᒋᔅᑳᑯᐌᒃ ᑭᒋᒪᓂᑐ ᐅ ᓵᑭᐃᐌᐎᓐ᙮ 43 ᓂ ᑮ ᐯᒋ ᐃᑐᑖᓐ ᓄᑖᐎ ᐅᑦ ᐃᔑᓂᑳᓱᐎᓂᒃ, ᓇᒪᐎᓚ ᒫᑲ ᑭ ᐱᔑᑭᐃᓇᐗᐤ: ᑮᔥᐱᓐ ᑯᑕᒃ ᐊᐌᓇ ᑫ ᑕᑯᔑᓄᑴ ᐎᓚ ᑎᐱᓚᐌ ᐅᑦ ᐃᔑᓂᑳᓱᐎᓂᒃ, ᐁᐗᑯ ᑫ ᐱᔑᒋᐁᒃ᙮ 44 ᑖᓐᑌ ᑫ ᑮ ᐅᒋ ᑖᐺᑕᒣᒃ, ᑭᓚᐗᐤ ᑳ ᑭᔅᑌᓕᑖᑯᐃᑐᔦᒃ, ᓀᔥᑕ ᐁᑳ ᑳ ᓈᓇᑕᐙᐸᑕᒣᒃ ᐊᓂᒪ ᑭᔅᑌᓕᑖᑯᓯᐎᓐ ᑭᒋᒪᓂᑐᒃ ᐱᑯ ᑳ ᐅᒋᒪᑲᒃ? 45 ᐁᑳᐎᓚ ᐃᑌᓕᑕᒧᒃ ᓂᓚ ᑭᒋ ᒫᒥᔑᒥᑖᑾᒃ ᐁ ᑎᐹᒋᒧᔅᑕᐗᒃ ᐅᑖᐎᒪᐤ: ᐃᑖᐤ ᐊᐌᓇ ᑳ ᒫᒥᔑᒥᑖᒃ, ᒧᓯᔅ ᐅᑎ ᑳ ᒪᒥᔑᑐᑕᐌᒃ᙮ 46 ᐌᓴ ᑮᔥᐱᓐ ᑮ ᑖᐺᑕᐌᑯᐸᓀ ᒧᓯᔅ, ᓂᓚ ᓀᔥᑕ ᑭ ᑳ ᑭ ᑖᐺᑕᐎᑕᐗᐤ: ᐌᓴ ᓂ ᑮ ᐋᓕᒧᒥᒃ ᐁ ᒪᓯᓇᐃᑫᑦ᙮ 47 ᒫᑲ ᑮᔥᐱᓐ ᐁᑳ ᑎᐋᐺᑕᒬᑴ ᐅ ᒪᓯᓇᐃᑫᐎᓇ, ᑖᓐᑌ ᑫ ᑮ ᐅᒋ ᑖᐺᑕᒣᒃ ᓂᑦ ᐊᔭᒥᐎᓇ?

6

ᒋᓴᔅ ᐊᔕᒣᐤ ᓂᔭᓚᓐ ᑭᒋᒥᑖᑐᒥᑎᓇᐤ ᐃᓕᓕᐗ

1 ᑳ ᐳᓂᐸᓕᑭ ᐅᐅ ᒋᓴᔅ ᑮ ᐊᔓᐗᐊᒻ ᑳᓕᓕ ᑭᒋᑲᒥᓕᐤ, ᐁᐗᒀᓂ ᑕᐃᐱᕆᔭᔅ ᑭᒋᑲᒥ᙮ 2 ᑮ ᓄᔅᐱᓈᑎᑯ ᒫᑲ ᒥᔭᒪᐎᒥᒉᑎᓕᒋ ᐃᓕᓕᐗ, ᐁ ᑮ ᐙᐸᑕᒥᓕᒋ ᐅ ᒫᒪᔅᑳᒋ ᐃᓯᒋᑫᐎᓇ ᑳ ᑮ ᑐᑕᐙᑦ ᐊᓂᐃ ᑳ ᐋᑯᓯᓕᒋ᙮ 3 ᒋᓴᔅ ᒫᑲ ᑮ ᑯᔅᐹᒪᒋᐌᐤ ᐗᒌᒃ, ᐁᑯᑕ ᒫᑲ ᐁᐱᑦ ᓀᔥᑕ ᐅ ᑭᔅᑭᓄᐊᒪᐙᑲᓇ᙮ 4 ᒥᔮᔥᑳᑫᐎ ᒪᑯᔐᐎᓐ, ᒎᐗᒃ ᐅ ᒪᑯᔐᐎᓂᐗᐤ, ᑮ ᐯᔓᓈᑾᓐ᙮ 5 ᐃᔅᐱ ᒫᑲ ᒋᓴᔅ ᑌᔅᑕᓵᐱᑦ, ᓀᔥᑕ ᐎᐋᐸᒫᑦ ᒥᒉᑦ ᐃᓕᓕᐗ ᐁ ᐯᒋ ᓈᑎᑯᑦ, ᐃᑌᐤ ᐱᓕᐸ, ᑖᓐᑌ ᑫ ᐅᒋ ᐊᑖᐌᔭᒃ ᐊᓚᑯᓇᐤ ᐅᑯ ᑭᒋ ᑮ ᒥᒋᓱᒋᒃ? 6 ᐅᒪ ᒫᑲ ᑮ ᐃᑌᐤ ᑭᒋ ᑯᒋᐋᑦ: ᐌᓴ ᐎᓚ ᑫᒋᐙᒃ ᑮ ᑭᔅᑫᓕᑕᒻ ᑖᓂ ᑫ ᑐᑕᒃ᙮ 7 ᐱᓕᑉ ᑮ ᓇᔥᑴᐗᔑᐁᐤ, ᓂᔡᐤ ᒥᑖᑐᒥᑕᓇᐤ ᔔᓕᐊᓈᐱᔅᑯᔕᒃ ᐁ ᐊᑖᐙᑲᓂᐗᒃ ᐊᓚᑯᓇᐤ ᓇᒪᐎᓚ ᑲᑕ ᐃᔅᐸᓕᐤ ᒥᓯᐌ ᐁ ᐃᑕᓯᒋᒃ ᐋᐱᔑᔥ ᑭᒋ ᒥᒋᓱᒋᒃ᙮ 8 ᐯᔭᒃ ᐅ ᑭᔅᑭᓄᐊᒪᐙᑲᓇ, ᐋᓐᑦᕉ, ᓵᐃᒪᓐ ᐱᑕᕐ ᐎᒋᔖᓇ, ᐃᑎᑯ, 9 ᐅᑕ ᐃᑖᐤ ᐅᔥᑭᓂᑭᐤ, ᐁ ᐋᔭᐙᑦ ᓂᔮᓚᓐ ᐙᐸᓘᒥᓐ ᐊᓚᑯᓇᐗ, ᓀᔥᑕ ᓂᔓ ᓇᒧᓯᔕ: ᑫᒀᓐ ᒫᑲ ᐅᑯ ᐁ ᐃᔥᐱᔑ ᒥᒉᑎᓈᓂᐗᒃ? 10 ᒋᓴᔅ ᒫᑲ ᑮ ᐃᑗᐤ, ᐎᑕᒫᑯᒃ ᐃᓕᓕᐗᒃ ᑭᒋ ᓇᐊᐱᒋᒃ᙮ ᑮ ᒥᒉᑎᓋ ᒫᑲ ᒪᔅᑯᔑᔭ ᐊᓐᑕ᙮ ᐁᑯ ᐃᓕᓕᐗᒃ ᓀᐊᐱᒋᒃ, ᐁ ᐃᑕᓯᒋᒃ ᓇᓐᑕᐤ ᓂᔮᓚᓦᐤ ᑭᒋᒥᑖᑐᒥᑕᓇᐤ᙮ 11 ᒋᓴᔅ ᒫᑲ ᑮ ᐅᑎᓀᐤ ᐊᓂᐃ ᐊᓚᑯᓈᐗ: ᐃᔅᐱ ᒫᑲ ᑳ ᑮ ᓇᓈᔅᑯᒧᑦ, ᑮ ᒫᑎᓇᒪᐌᐤ ᑭᔅᑭᓄᐊᒪᐙᑲᓇ, ᑭᔅᑭᓄᐊᒪᐙᑲᓇᒃ ᒫᑲ ᐊᓂᐃ ᑳ ᐊᐱᓕᒋ; ᓀᔥᑕ ᓇᒣᓴ ᐊᓯᒋ ᐃᔥᐱᔥ ᓀᑕᐌᓕᒫᓕᒋ᙮ 12 ᐃᔅᐱ ᑳᔥᐳᓕᒋ, ᑮ ᐃᑌᐤ ᐅ ᑭᔅᑭᓄᐊᒪᐙᑲᓇ, ᒧᔕᑭᓇᒪᒃ ᐃᔅᑾᒋᑲᓇ ᑳ ᐃᔅᑾᒋᑳᑌᑭ, ᐁᑳ ᑫᒀᓐ ᑭᒋ ᐗᓂᑖᓂᐗᒃ᙮ 13 ᐁᐗᑯ ᐌᒋ ᒧᔕᑭᓇᑭᒃ, ᑮ ᒧᔥᑭᓇᑖᐗᒃ ᒫᑲ ᓂᔓᔖᑉ ᐗᑕᐱᐗᑕ ᐁ ᐱᐗᒫᑲᓂᐎᓕᒋ ᐊᓂᐃ ᓂᔮᓚᓐ ᐙᐸᓘᒥᓐ ᐊᓚᑯᓇᐗ, ᑳ ᐃᔅᑯᑆᓕᒋ ᓀᔥᑕ ᑳ ᐋᓕᐙᑭᐸᓕᓕᒋ ᐊᓂᐃ ᑳ ᑮ ᒥᒋᓱᓕᒋ᙮ 14 ᐁᑯ ᐊᓂᑭ ᐃᓕᓕᐗᒃ, ᐃᔅᐱ ᑳ ᑮ ᐙᐸᑕᒸᒋᒃ ᒫᒪᔅᑳᒋ ᐃᓯᒋᑫᐎᓂᓕᐤ ᑳ ᑮ ᑐᑕᒥᓕᒋ ᒋᓴᓴ, ᑮ ᐃᑗᐗᒃ, ᐁᐗᑯ ᐊᐗ ᑫᒋᓈᔥ ᐊᓇ ᐅᑭᔅᑭᐙᐃᑫᐤ ᑫ ᑐᑯᔑᑭᐸᓐ ᐊᔅᑮᒃ᙮ 15 ᐁᐗᑯ ᐅᒋ ᐃᔅᐱ ᒋᓴᔅ ᐎᐋᐸᑕᒃ ᐁ ᐎ ᐯᒋ ᐅᑎᓂᑯᑦ ᑭᒋ ᐅᑭᒫᑳᑎᑯᑦ, ᒥᓇ ᑮ ᐃᑐᑌᐤ ᐁ ᐯᔭᑯᑦ ᐗᒌᒃ᙮

ᒋᓴᔅ ᐱᒧᑌᐤ ᓀᐲᒃ

16 ᐃᔅᐱ ᒫᑲ ᐁᑎ ᐅᑖᑯᔑᓂᓕᒃ, ᐅ ᑭᔅᑭᓄᐊᒪᐙᑲᓇ ᑮ ᐃᑐᑌᓕᐗ ᑭᒋᑲᒥᒃ ᐃᔑ᙮ 17 ᑮ ᐳᓯᐗᒃ ᒫᑲ ᓈᐱᒀᓂᒃ, ᐁ ᐊᑎ ᐊᔓᐗᐊᑭᒃ ᑲᐸᕐᓀᔭᒥᒃ ᐃᔑ᙮ ᐋᔕᔾ ᒫᑲ ᑮ ᐗᓂᑎᐱᔅᑳᓕᐤ, ᓇᒪᐎᓚ ᐁᔥᑾ ᒫᑲ ᐅᒋ ᐅᑎᑎᑯᐗᒃ ᒋᓴᓴ᙮ 18 ᑮ ᐊᑎ ᒪᒪᑲᐊᓐ ᒫᑲ ᑳ ᐃᔅᐱᒋ ᓱᑭᓚᐌᒃ᙮ 19 ᐃᔅᐱ ᒫᑲ ᑳ ᑮ ᐱᒥᔥᑳᒋᒃ ᓇᓐᑕᐤ ᓂᔑᑕᓇᐤ ᓂᔮᓚᓗᔖᑉ, ᓀᔥᑕᐱᑯ ᓂᔅᑐᒥᑕᓇᐤ ᐸᕐᓚᓐᑲ, ᐙᐸᒣᐙᒃ ᒋᓴᓴ ᐁ ᐱᒧᑌᓕᒋ ᑭᒋᑲᒦᒃ, ᓀᔥᑕ ᑭᔑᐙᒃ ᐁ ᐯᒋ ᓈᑕᒥᓕᒋ ᓈᐱᒀᓂᓕᐤ: ᑮ ᑯᔅᑖᒋᐗᒃ ᒫᑲ᙮ 20 ᒫᑲ ᐃᑌᐤ, ᓂᓚ ᐅ; ᐁᑳᐎᓚ ᑯᔅᑖᒌᒃ᙮ 21 ᐁᑯ ᒣᓜᓕᑕᑭᒃ ᐁ ᐳᓯᐋᒋᒃ ᓈᐱᒀᓂᒃ: ᑣᔦᒃ ᒫᑲ ᑮ ᐅᑎᒋᐸᓕᐤ ᓈᐱᒀᓐ ᐊᔅᑭᒃ ᐃᑕ ᐙ ᐃᔑᒋᒣᒋᒃ᙮

ᐃᓕᓕᐗᒃ ᓈᓐᑕᐙᐸᒣᐗᒃ ᒋᓴᓴ

22 ᐎᐋᐸᒃ, ᐃᔅᐱ ᐃᓕᓕᐗᒃ ᐊᑳᒥᒃ ᐃᑌᑫ ᑳ ᓂᐸᐎᒋᒃ ᐎᐋᐸᑕᑭᒃ ᐁᑳ ᑯᑕᒃ ᒋᒫᓐ ᐁ ᐃᑕᑾᓂᓕᒃ ᐊᓐᑕ, ᐱᑯ ᐊᓂᐁᓕᐤ ᐃᑕ ᐅ ᑭᔅᑭᓄᐊᒪᐙᑲᓇ ᑳ ᐳᓯᓕᒋ, ᓀᔥᑕ ᒋᓴᓴ ᐁᑳ ᐁ ᑮ ᐎᒋᐳᓯᒫᓕᒋ ᒋᒫᓂᒃ ᐅ ᑭᔅᑭᓄᐊᒪᐙᑲᓂᓕᐗ, ᒫᑲ ᐅ ᑭᔅᑭᓄᐊᒪᐙᑲᓂᓕᐗ ᐱᔑᔑᒃ ᐁ ᑮ ᑭᔑᒋᒣᓕᒋ; 23 (ᐁᓕᐌᒃ ᒫᑲ ᑮ ᐯᒋ ᐃᔑᒋᒣᒪᑲᓋ ᑯᑕᑭᔭ ᒋᒫᓇ ᑖᐃᐱᕆᔭᓯᒃ ᐅᒋ ᑭᔑᐙᒃ ᐃᑕ ᑳ ᑮ ᒧᐙᒋᒃ ᐊᓚᑯᓇᐗ, ᑳᐃᔥᑾ ᑌᐯᓕᒋᑫᑦ ᑳ ᑮ ᓇᓈᔅᑯᒧᑦ:) 24 ᐃᔅᐱ ᒫᑲ ᐃᓕᓕᐗᒃ ᐎᐋᐸᑕᑭᒃ ᒋᓴᓴ ᐁᑳ ᐊᓐᑕ ᐁ ᐃᑖᓕᒋ, ᐁᑳ ᓀᔥᑕ ᐅ ᑭᔅᑭᓄᐊᒪᐙᑲᓂᓕᐗ, ᐎᓚᐗᐤ ᐊᓯᒋ ᑮ ᐳᓯᐗᒃ, ᓀᔥᑕ ᑮ ᒥᔕᑲᐗᒃ ᑲᐸᕐᓀᔭᒥᒃ, ᐁ ᓈᓇᑕᐙᐸᒫᒋᒃ ᒋᓴᓴ᙮

ᒋᓴᔅ ᐁᐗᑯ ᐱᒫᒋᐃᐌᐎ ᐋᓚᑯᓈᐤ

25 ᐃᔅᐱ ᒫᑲ ᑳ ᒥᔅᑲᐙᒋᒃ ᑴᔅᑲᑳᒻ ᐎᓂᐯᑯᒃ, ᑮ ᐃᑌᐗᒃ, ᕌᐸᐃ, ᑖᓂᔅᐱ ᐅᑕ ᑳ ᐯᒋ ᐃᑐᑌᔭᓐ? 26 ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑖᐺ, ᑖᐺ, ᑭᑦ ᐃᑎᓇᐗᐤ, ᑭ ᓈᓇᑕᐌᓕᒥᓇᐗᐤ, ᐁᑳ ᐁ ᑮ ᐙᐸᑕᒣᒃ ᒫᒪᔅᑳᒋ ᐃᓯᒋᑫᐎᓇ, ᒫᑲ ᐁ ᑮ ᒧᐌᑾᒃ ᐊᓚᑯᓈᐗᒃ ᓀᔥᑕ ᐁ ᑮ ᑭᔥᐳᔦᒃ᙮ 27 ᐁᑳᐎᓚ ᐋᐸᑎᓯᒃ ᑭᒋ ᐋᔮᔦᒃ ᐊᓂᒪ ᒥᒋᒻ ᑳ ᓂᔑᐙᓈᑕᒃ, ᒫᑲ ᑭᒋ ᐋᔮᔦᒃ ᐊᓂᒪ ᒥᒋᒻ ᑳᑭᑫ ᐱᒫᑎᓯᐎᓂᒃ ᑫ ᐃᔅᑯ ᐃᑕᑾᒃ, ᐃᓕᓕᐎᑯᓯᓵᓐ ᑫ ᒥᓕᑖᒃ: ᐌᓴ ᐁᐗᑯ ᑳ ᓱᑲᑭᒥᑯᑦ ᐅᑖᐎᒫᐗ᙮ 28 ᐁᑯ ᐁᑖᒋᒃ, ᑫᒀᓐ ᑫ ᑐᑕᒫᒃ, ᑭᒋ ᑮ ᑐᑕᒶᑭᑦ ᑭᒋᒪᓂᑐ ᐅᑦ ᐋᔨᑎᐎᓇ? 29 ᒋᓴᔅ ᐁ ᓇᔥᑴᐗᔑᐋᑦ ᑮ ᐃᑌᐤ, ᐁᐗᑯ ᐅᒪ ᑭᒋᒪᓂᑐ ᐅᑦ ᐋᔨᑎᐎᓐ ᑭᒋ ᑖᐺᔦᓕᒥᒣᒃ ᐊᓂᐃ ᑳ ᑮ ᐯᒋᑎᔕᐙᑦ᙮ 30 ᐁᐗᑯ ᐌᒋ ᐃᑖᒋᒃ, ᑫᑯ ᑭᔅᑭᓄᐙᒋ ᐙᐸᑎᓕᐌᐎᓐ ᒫᑲ ᐎᐋᐸᑎᓕᐌᔭᓐ, ᑭᒋ ᑮ ᐋᐸᑕᒫᒃ, ᓀᔥᑕ ᑖᐺᑖᑖᒃ? ᑫᒀᓐ ᐁ ᑐᑕᒪᓐ? 31 ᓄᑖᐎᓈᓇᒃ ᑮ ᒧᐌᐗᒃ ᒫᓇᐊ ᐸᑾᑕᔅᑲᒥᑳᒃ; ᐁ ᐃᑕᓯᓇᐃᑳᑌᒃ, ᑮ ᒥᓓᐤ ᐊᓚᑯᓇᐗ ᑭᒋᑭᔑᑯᒃ ᐅᒋ ᑭᒋ ᒧᐙᓕᒋ᙮ 32 ᐁᑯ ᒋᓴᔅ ᐁᑖᑦ, ᑖᐺ, ᑖᐺ, ᑭᑦ ᐃᑎᓇᐗᐤ, ᒧᓯᔅ ᓇᒪᐎᓚ ᑭ ᐅᒋ ᒥᓕᑯᐗᐤ ᐊᓂᐃ ᐊᓚᑯᓇᐗ ᑭᒋᑭᔑᑯᒃ ᐅᒋ; ᒫᑲ ᓄᑖᐎ ᑭ ᒥᓕᑯᐗᐤ ᑖᐺ ᐊᓚᑯᓇᐗ ᑭᒋᑭᔑᑯᒃ ᐅᒋ᙮ 33 ᐌᓴ ᑭᒋᒪᓂᑐ ᐅᑦ ᐊᓚᑯᓈᒪ ᐁᐗᒀᓇ ᑳ ᐯᒋ ᓛᔑᑦ ᑭᒋᑭᔑᑯᒃ ᐅᒋ, ᓀᔥᑕ ᑳ ᒥᓕᐌᑦ ᐱᒫᑎᓯᐎᓂᓕᐤ ᐅᑕ ᐊᔅᑮᒃ᙮ 34 ᐁᑯ ᐁᑖᒋᒃ ᑌᐯᓕᒋᑫᔭᓐ, ᑳᑭᑫ ᒥᓕᓈᓐ ᐊᐗ ᐊᓚᑯᓇᐤ᙮ 35 ᒋᓴᔅ ᒫᑲ ᑮ ᐃᑌᐤ, ᓂᓚ ᐁᐗᑯ ᐱᒫᑎᓯᐎᓂ ᐊᓚᑯᓇᐤ: ᐊᓇ ᑳ ᐯᒋ ᓈᔑᑦ ᓇᒪᐎᔅᑳᑦ ᑲᑕ ᓄᑌᑲᑌᐤ; ᐊᓇ ᓀᔥᑕ ᑳ ᑖᐺᔦᓕᒥᑦ ᓇᒪᐎᔅᑲᑦ ᑲᑕ ᓄᑌᔮᐸᑴᐤ᙮ 36 ᒫᑲ ᑭ ᑮ ᐃᑎᑎᓇᐗᐤ, ᑭ ᑮ ᐙᐸᒥᓇᐗᐤ ᓀᔥᑕ, ᓇᒪᐎᓚ ᒫᑲ ᑭ ᑖᐺᑌᓇᐗᐤ᙮ 37 ᒥᓯᐌ ᐊᓂᐃ ᑳ ᒥᓕᑦ ᐅᑖᐎᒪᐤ ᓂ ᑳ ᐯᒋ ᓈᑎᑾᒃ: ᐊᓇ ᓀᔥᑕ ᑳ ᐯᒋ ᓈᔑᑦ ᔮᓕᑌᓪ ᓇᒪᐎᓚ ᓂ ᑳ ᐗᓚᐎᐌᐱᓇᐤ᙮ 38 ᐌᓴ ᓂ ᑮ ᐯᒋ ᓛᔑᓐ ᑭᒋᑭᔑᑯᒃ ᐅᒋ, ᓇᒪᐎᓚ ᑭᒋ ᑐᑕᒫᓐ ᓂᓚ ᑎᐱᓚᐌ ᓂᑦ ᐃᑌᓕᑕᒧᐎᓐ, ᒫᑲ ᐊᓇ ᑳ ᐯᒋᑎᔕᐅᑦ ᐅᑦ ᐃᑌᓕᑕᒧᐎᓐ᙮ 39 ᐁᐗᑴᓕᐤ ᒫᑲ ᐅᑖᐎᒪᐤ ᐅᑦ ᐃᑌᓕᑕᒧᐎᓐ ᑳ ᑮ ᐯᒋᑎᔕᐅᑦ, ᒥᓯᐌ ᑳ ᑮ ᒥᓕᑦ ᐁᑳ ᑭᒋ ᐗᓂᑖᔮᓐ ᑫᒀᓐ, ᒫᑲ ᑭᒋ ᐗᓂᔥᑳᓇᒫᓐ ᒥᓇ ᒫᒋᒡ ᑭᔑᑳᑫ᙮ 40 ᐁᐗᑴᓕᐤ ᒫᑲ ᐅᑦ ᐃᑌᓕᑕᒧᐎᓐ ᐊᓇ ᑳ ᑮ ᐯᒋᑎᔕᐅᑦ, ᒥᓯᐌ ᑕᑐ ᐊᐌᓇ ᑳ ᐙᐸᒫᑦ ᐅᑯᓯᓯᒫᐗ, ᓀᔥᑕ ᑳ ᑖᐺᔦᓕᒫᑦ, ᑭᒋ ᐋᔮᑦ ᑳᑭᑫ ᐱᒫᑎᓯᐎᓂᓕᐤ: ᓂ ᑳ ᐗᓂᔥᑳᓇᐤ ᒫᑲ ᒫᒋᒡ ᑭᔑᑳᓕᑫ᙮ 41 ᒎᐗᒃ ᒫᑲ ᑮ ᐙᔦᔥ ᐃᑌᓕᒣᐗᒃ, ᐁ ᑮ ᐃᑗᓕᒋ, ᓂᓚ ᐁᐗᑯ ᐊᓚᑯᓇᐤ ᑭᒋᑭᔑᑯᒃ ᑳ ᐅᒋᐸᓕᑦ᙮ 42 ᑮ ᐃᑗᐗᒃ ᒫᑲ, ᓇᒪᔦᐤ ᓈ ᐊᐗ ᒋᓴᔅ, ᒍᓯᑉ ᐅᑯᓯᓴ, ᐅᑖᐎᔭ ᓀᔥᑕ ᐅᑳᐎᔭ ᑳ ᑭᔅᑫᓕᒥᒪᑯᒃ? ᑖᓐᑌ ᒫᑲᐌᒋ ᐃᑗᑦ, ᓂ ᑮ ᐯᒋ ᓛᔑᓐ ᑭᒋᑭᔑᑯᒃ ᐅᒋ? 43 ᐁᐗᑯ ᐌᒋ ᒋᓴᔅ ᓀᔥᑴᐗᔑᐋᑦ ᓀᔥᑕ ᑮ ᐃᑌᐤ, ᐁᑳᐎᓚ ᐙᔦᔥ ᐃᑌᓕᑕᒧᒃ᙮ 44 ᓇᒪᐎᓚ ᐊᐌᓇ ᓂ ᑳ ᑮ ᐯᒋ ᓈᑎᒃ, ᑮᔥᐱᓐ ᐅᑖᐎᒪᐤ ᑳ ᑮ ᐯᒋᑎᔕᐅᑦ ᐁᑳ ᐅᒋᐱᑖᑌ: ᓂ ᑳ ᐗᓂᔥᑳᓇᐤ ᒫᑲ ᒫᒋᒡ ᑭᔑᑳᓕᑫ᙮ 45 ᒪᓯᓇᐃᑳᑌᐤ ᐅᑭᔅᑭᐙᐃᑫᐗᒃ ᐅ ᒪᓯᓇᐃᑲᓂᐙᒃ, ᒥᓯᐌ ᐁ ᐃᑕᓯᒋᒃ ᒫᑲ ᑲᑕ ᑭᔅᑭᓄᐊᒪᑯᐗᒃ ᑭᒋᒪᓂᑐᐗ᙮ ᐁᐗᑯ ᐅᒋ ᒥᓯᐌ ᑕᑐ ᐃᓕᓕᐤ ᑳ ᑮ ᐯᑕᐙᑦ, ᓀᔥᑕ ᑳ ᑮ ᑭᔅᑭᓄᐊᒫᑯᑦ ᐅᑖᐎᒪᐗ, ᓂ ᐯᒋ ᓈᑎᒃ᙮ 46 ᓇᒪᐎᓚ ᐊᐌᓇ ᐁ ᑮ ᐙᐸᒫᑦ ᐅᑖᐎᒪᐗ, ᐱᑯ ᐊᓇ ᑭᒋᒪᓂᑐᒃ ᑳ ᐅᒌᑦ, ᐁᐗᑯ ᑳ ᑮ ᐙᐸᒫᑦ ᐅᑖᐎᒪᐗ᙮ 47 ᑖᐺ, ᑖᐺ, ᑭᑦ ᐃᑎᓇᐗᐤ, ᐊᓇ ᑳ ᑖᐺᔦᓕᒥᑦ ᐋᔭᐤ ᑳᑭᑫ ᐱᒫᑎᓯᐎᓂᓕᐤ᙮ 48 ᓂᓚ ᐁᐗᑯ ᐱᒫᑎᓯᐎᓂ ᐊᓚᑯᓇᐤ᙮ 49 ᑯᑖᐎᐙᐗᒃ ᑮ ᒧᐌᐗᒃ ᐊᓚᑯᓇᐗ ᐸᑾᑕᔅᑲᒥᑳᒃ, ᐋᔕᔾ ᒫᑲ ᓇᒪ ᐱᒫᑎᓯᐗᒃ᙮ 50 ᐁᐗᑯ ᐊᐗ ᐊᓚᑯᓇᐤ ᑭᒋᔑᑯᒃ ᑳ ᐅᒋᐸᓕᑦ, ᐊᐌᓇ ᑭᒋ ᒧᐙᑦ, ᐁᑳ ᓀᔥᑕ ᑭᒋ ᓂᐱᑦ᙮ 51 ᓂᓚ ᐁᐗᑯ ᐱᒫᑎᓯᐎ ᐊᓚᑯᓇᐤ ᑭᒋᑭᔑᑯᒃ ᑳ ᐅᒋᐸᓕᑦ: ᑮᔥᐱᓐ ᐊᐌᓇ ᒧᐙᑌ ᐅᐅ ᐊᓚᑯᓇᐗ, ᑳᑭᑫ ᑲᑕ ᐱᒫᑎᓯᐤ: ᓀᔥᑕ ᐊᓇ ᐊᓚᑯᓇᐤ ᑫ ᒥᓕᐌᔮᓐ ᐁᐗᑯ ᓂᔮᔅ, ᑫ ᒥᓕᐌᔮᓐ ᑭᒋ ᐅᒋ ᐱᒫᑎᓯᒪᑲᒃ ᐊᔅᑭ᙮ 52 ᐁᐗᑯ ᐌᒋ ᒎᐗᒃ ᑲᑴᒋᒥᑐᒋᒃ, ᐁ ᐃᑗᒋᒃ, ᑖᓐᑌ ᐊᐗ ᐃᓕᓕᐤ ᑫ ᑮ ᐅᒋ ᒥᓕᑕᒃ ᐎᔮᔅ ᑭᒋ ᒥᒋᐗᒃ? 53 ᐁᑯ ᒋᓴᔅ ᐁᑖᑦ, ᑖᐺ, ᑖᐺ, ᑭᑦ ᐃᑎᓇᐗᐤ, ᑮᔥᐱᓐ ᐁᑳ ᑫ ᒥᒋᐌᑴ ᐃᓕᓕᐎᑯᓯᓵᓐ ᐎᔮᔅ, ᓀᔥᑕ ᐁᑳ ᑫ ᒥᓂᑴᐌᑫ ᐅᒥᑯ, ᓇᒪᐎᓚ ᑭ ᐱᒋᔅᑳᑯᓇᐗᐤ ᐱᒫᑎᓯᐎᓐ᙮ 54 ᐊᓇ ᑳ ᒥᒋᑦ ᓂᔮᓯᓕᐤ ᓀᔥᑕ ᑳ ᒥᓂᑴᑦ ᓂᒥᑯᓕᐤ, ᐋᔭᐤ ᑳᑭᑫ ᐱᒫᑎᓯᐎᓂᓕᐤ; ᓂ ᑳ ᐗᓂᔥᑳᓇᐤ ᒫᑲ ᒫᒋᒡ ᑭᔑᑳᓕᑫ᙮ 55 ᐌᓴ ᓂᔮᔅ ᑖᐺ ᒥᒋᒥᐗᓐ, ᓀᔥᑕ ᓂᒥᑯ ᑖᐺ ᒥᓂᑴᐎᓂᐗᓐ᙮ 56 ᐊᓇ ᑳ ᒥᒋᑦ ᓂᔮᓯᓕᐤ, ᓀᔥᑕ ᑳ ᒥᓂᑴᑦ ᓂᒥᑯᓕᐤ, ᓂ ᐱᒋᔅᑳᒃ, ᓀᔥᑕ ᓂᓚ ᓂ ᐱᒋᔅᑲᐗᐤ᙮ 57 ᑖᐱᔅᑯᒡ ᑳ ᐃᔑ ᐯᒋᑎᔕᐅᑦ ᐯᒫᑎᓰᑦ ᐅᑖᐎᒪᐤ, ᓀᔥᑕ ᐁ ᐱᒫᑎᓯᔮᓐ ᐅᑖᐎᒪᐤ ᐅᒋ ᐁᑯ ᑖᐱᔅᑯᒡ ᐊᓇ ᑳ ᒧᐎᑦ, ᐎᓚ ᓀᔥᑕ ᑲᑕ ᐱᒫᑎᓯᐤ ᓂᓚ ᐅᒋ᙮ 58 ᐁᐗᑯ ᐊᐗ ᐊᓇ ᐊᓚᑯᓇᐤ ᑭᒋᑭᔑᑯᒃ ᑳ ᐯᒋ ᐅᒋᐸᓕᑦ: ᓇᒪᐎᓚ ᑖᐱᔅᑯᒡ ᑯᑖᐎᐙᐗᒃ ᑳ ᑮ ᒧᐙᒋᒃ ᒫᓇᐊ, ᐋᔕᔾ ᒫᑲ ᓇᒪ ᐱᒫᑎᓯᐗᒃ: ᐊᓇ ᑳ ᒧᐙᑦ ᐅᐅ ᐊᓚᑯᓇᐗ ᑳᑭᑫ ᑲᑕ ᐱᒫᑎᓯᐤ᙮ 59 ᐅᐅ ᑫᒀᓇ ᑮ ᐃᑗᐤ ᐋᔭᒥᐁᐎᑲᒥᑯᒃ, ᒣᒀᒡ ᐁ ᑭᔅᑭᓄᐊᒫᑫᑦ ᑲᐸᕐᓀᔭᒥᒃ᙮

ᒋᓴᔅ ᐅᑕᔭᒥᐎᓇ ᐱᑯ ᑲᑕ ᐅᒋ ᐱᒫᑎᓯᐤ ᐊᐌᓇ

60 ᒥᒉᑦ ᒫᑲ ᐅ ᑭᔅᑭᓄᐊᒪᐙᑲᓇ, ᐃᔅᐱ ᐅᒣᓕᐤ ᑳ ᑮ ᐯᑕᒥᓕᒋ, ᑭ ᐃᑗᓕᐗ, ᐋᓕᒪᓐ ᐅᒪ ᐃᑗᐎᓐ; ᐊᐌᓇ ᑫ ᑮ ᐯᑕᒃ? 61 ᐃᔅᐱ ᒋᓴᔅ ᑫᔅᑫᓕᑕᒃ ᐅ ᒥᑐᓀᓕᒋᑲᓂᒃ ᐅ ᑭᔅᑭᓄᐊᒪᐙᑲᓇ ᐁ ᐙᔦᔥ ᐃᑌᓕᑕᒥᓕᒋ, ᑮ ᐃᑌᐤ, ᑭ ᐙᓯᔅᑕᐌᓕᑕᒥᐃᑯᓐ ᓈ ᐅᒪ? 62 ᑫᒀᓐ ᒫᑲ ᑮᔥᐱᓐ ᑫ ᐙᐸᒣᑴ ᐃᓕᓕᐎᑯᓯᓵᓐ ᐁ ᐅᐱᔅᑳᑦ ᐃᑕ ᓃᔥᑕᒻ ᑳ ᑭ ᐃᑖᑦ᙮ 63 ᐊᒑᒃ ᐁᐗᑯ ᑳ ᐱᒫᑎᓯᐃᐌᑦ: ᐎᔮᔅ ᓇᒪ ᐙᔦᔥ ᐃᑖᐸᑕᓐ: ᐋᔭᒥᐎᓇ ᑳᐎᑕᒫᑕᑾᒃ, ᐊᒑᑯᐗᓋ, ᓀᔥᑕ ᐱᒫᑎᓯᐎᓂᐗᓋ᙮ 64 ᒫᑲ ᐃᑖᐗᒃ ᐋᑎᑦ ᐁ ᐃᑕᓯᔦᒃ ᐁᑳ ᑳ ᑖᐺᑕᑭᒃ᙮ ᐌᓴ ᒋᓴᔅ ᓃᔥᑕᒻ ᐅᒋ ᑮ ᑭᔅᑫᓕᒣᐤ ᐊᐌᓕᐗ ᐊᓂᐃ ᐁᑳ ᑖᐺᑕᒥᓕᒋ, ᓀᔥᑕ ᐊᐌᓕᐗ ᑫ ᐙᔦᔑᐸᑭᑎᓂᑯᑦ᙮ 65 ᑮ ᐃᑗᐤ ᒫᑲ, ᐁᐗᑯ ᐌᒋ ᑮ ᐃᑎᑕᑾᒃ, ᓇᒪᐎᓚ ᐊᐌᓇ ᓂ ᑳ ᑮ ᐯᒋ ᓈᑎᒃ ᑮᔥᐱᓐ ᐁᑳ ᒥᓕᑯᑌ ᓄᑖᐎᔭ᙮ 66 ᐁᑯᔅᐱ ᐅᒋ ᒥᒉᑦ ᐅ ᑭᔅᑭᓄᐊᒪᐙᑲᓇ ᑮ ᑭᐌᓕᐗ, ᓇᒪᐎᓚ ᓀᔥᑕ ᑫᔮᐸᒡ ᑮ ᐎᒉᐎᑯ᙮ 67 ᐁᑯ ᒋᓴᔅ ᐁᑖᑦ ᐊᓂᐃ ᑳ ᓂᔓᔖᐱᓕᒋ, ᑭᓚᐙᐤ ᓈ ᓀᔥᑕ ᑭ ᑳ ᑭᑐᑖᓇᐗᐤ? 68 ᐁᑯ ᓀᔥᑴᐗᔑᐃᑯᑦ ᓵᐃᒪᓐ ᐱᑕᕋ, ᑌᐯᓕᒋᑫᔭᓐ, ᐊᐌᓇ ᑫ ᓈᑕᑭᑦ? ᑭᓚ ᑭᑦ ᐋᔮᓐ ᑳᑭᑫ ᐱᒫᑎᓯᐎᓂ ᐋᔭᒥᐎᓇ᙮ 69 ᓂ ᑖᐺᑌᓈᓐ ᒫᑲ, ᓀᔥᑕ ᓂ ᑫᒋᓇᐅᓈᓐ ᑭᓚ ᐁ ᐋᐎᔭᓐ ᐊᓇ ᙭ ᐯᒫᑎᓰᑦ ᑭᒋᒪᓂᑐ ᐅᑯᓯᓴ᙮ 70 ᒋᓴᔅ ᑮ ᓇᔥᑴᐗᔑᐁᐤ, ᓇᒪ ᓈ ᑭ ᑮ ᐙᐌᓛᐸᒥᑎᓇᐗᐤ ᑭᓚᐗᐤ ᐁ ᓂᔓᔖᐱᔦᒃ, ᐯᔭᒃ ᐁ ᐃᑕᔑᔦᒃ ᒫᑲ ᐁ ᒪᒋᒪᓂᑐᐎᑦ? 71 ᑮ ᐋᓕᒧᒣᐤ ᒎᑕᔅ ᐃᔅᑳᕆᔭᑕ, ᓵᐃᒪᓐ ᐅᑯᓯᓴ: ᐌᓴ ᐁᐗᒀᓂᐃ ᑫ ᐙᔦᔑᐸᑭᑎᓂᑯᑦ, ᐁ ᐊᔑᑕᑭᒫᑲᓂᐎᓕᒋ ᐊᓂᐃ ᓂᔓᔖᑉ᙮

7

ᒋᓴᔅ ᐎᒋᔕᓇ ᒧᓚ ᑖᐺᔦᓕᒥᑯ

1 ᑳ ᐳᓂᐸᓕᑭ ᐅᐅ ᒋᓴᔅ ᑮ ᐸᐸᒧᑌᐤ ᑳᓕᓕᒃ: ᐌᓴ ᓇᒪᐎᓚ ᑮ ᐎ ᐸᐹᒧᑌᐤ ᒎᕆᐃᒃ, ᐁ ᐎ ᓂᐹᔨᑯᑦ ᒎᐗ᙮ 2 ᒎᐗᒃ ᒫᑲ ᐅ ᒥᑭᐙᒥ ᒪᑯᔐᐎᓂᐗᐤ ᑮ ᐯᔓᓈᑾᓂᓕᐤ᙮ 3 ᐁᐗᑯ ᐌᒋ ᐃᑎᑯᑦ ᐎᒋᔖᓇ, ᐅᑕ ᐅᒋ ᑮᑐᑌ, ᐃᑐᑌ ᒫᑲ ᒎᑎᐊᐃᒃ, ᑭ ᑭᔅᑭᓄᐊᒪᐙᑲᓇᒃ ᓀᔥᑕ ᑭᒋ ᐙᐸᑕᑭᒃ ᐊᓂᐃ ᐋᔨᑎᐎᓇ ᑳ ᑐᑕᒪᓐ᙮ 4 ᐌᓴ ᓇᒪ ᐃᑖᐤ ᐊᐌᓇ ᐁ ᐃᑐᑕᒃ ᑫᒀᓕᐤ ᑮᒧᒡ, ᐎᓚ ᒫᑲ ᐁ ᓇᑕᐌᓕᑕᒃ ᒧᔑᔐ ᑭᒋ ᑭᔅᑫᓕᒫᑲᓂᐎᑦ᙮ ᑮᔥᐱᓐ ᐁᑐᑕᒪᐗᓀ ᐅᐅ ᑫᒀᓇ ᓄᑯᐃᑎᓱ ᐊᔅᑮᒃ᙮ 5 ᐌᓴ ᐎᒋᔖᓇ ᓀᔥᑕ ᓇᒪᐎᓚ ᐅᒋ ᑖᐺᔦᓕᒥᑯ᙮ 6 ᐁᑯ ᒋᓴᔅ ᐁᑖᑦ, ᓇᒪᐎᓚ ᐁᔥᑾ ᐅᑎᒋᐸᓕᐤ ᓂᓚ ᓂ ᑭᔑᑳᒻ: ᒫᑲ ᑭᓚᐗᐤ ᑭ ᑭᔑᑳᒥᐗᐤ ᒧᔕᒃ ᐋᔦᔅᑲᐗᓐ᙮ 7 ᐊᔅᑭ ᓇᒪᐎᓚ ᑭ ᑳ ᑮ ᐗᑳᑎᑯᓇᐗᐤ; ᒫᑲ ᓂᓚ ᓂ ᐗᑳᑎᑯᓐ, ᐌᓴ ᓂ ᑎᐹᑐᑌᓐ, ᐁ ᒫᓛᑕᑭ ᐊᓂᐃ ᐋᔨᑎᐎᓇ ᐊᓐᑕ ᐌᒋᒪᑲᑭ᙮ 8 ᑭᓚᐗᐤ ᓈᑕᒧᒃ ᐅᒪ ᒪᑯᔐᐎᓐ: ᓇᒪᐎᓚ ᐁᔥᑾ ᓂᓚ ᓂ ᑳ ᓈᑌᓐ ᐅᒪ ᒪᑯᔐᐎᓐ; ᐌᓴ ᓂ ᑭᔑᑳᒻ ᓇᒪᐎᓚ ᐁᔥᑾ ᒥᑐᓂ ᐅᑎᒋᐸᓕᐤ᙮ 9 ᐃᔅᐱ ᐅᐅ ᐋᔭᒥᐎᓇ ᑳ ᐃᑖᑦ, ᑫᔮᐸᒡ ᑮ ᑕᔑᑫᐤ ᑳᓕᓖᒃ᙮

ᒋᓴᔅ ᐃᑐᑌᐤ ᒪᑯᔐᐎᓂᒃ

10 ᐃᔅᐱ ᒫᑲ ᐎᒋᔖᓇ ᑳ ᐃᑐᑌᓕᒋ, ᐁᑯ ᓀᔥᑕ ᐎᓚ ᓀᑕᐎ ᓈᑕᒃ ᒪᑯᔐᐎᓂᓕᐤ, ᓇᒪᐎᓚ ᒧᔑᔐ, ᒫᑲ ᑭᒧᒡ ᐃᔑ᙮ 11 ᑮ ᓈᓇᑕᐌᓕᒥᑯ ᒫᑲ ᒎᐗ ᒪᑯᔐᐎᓂᒃ, ᑮ ᐃᑗᓕᐗ ᒫᑲ, ᑖᓐᑌ ᐁᑖᑦ? 12 ᒥᔅᑕᐃ ᒫᑲ ᑮ ᐋᔭᒥᐃᑐᐗᒃ ᐎᓚ ᐅᒋ: ᐌᓴ ᐋᑎᑦ ᑮ ᐃᑗᐗᒃ, ᒥᓗᑡᐤ: ᑯᑕᑭᔭᒃ ᑮ ᐃᑗᐗᒃ, ᓇᒪᐎᓚ; ᒫᑲ ᐙᔦᔑᐁᐤ ᐃᓕᓕᐗ᙮ 13 ᓇᒪᐎᓚ ᐊᐌᓕᐗ ᒫᑲ ᒧᔑᔐ ᐅᒋ ᐋᓕᒧᒥᑯ, ᐁ ᑯᔅᑖᓕᒋ ᒎᐗ᙮ 14 ᐁᑯ ᓈᓐᑕᐤ ᐁ ᐋᐱᑕᐗᓂᓕᒃ ᒪᑯᔐᐎᓂᓕᐤ, ᒋᓴᔅ ᑮ ᐃᑐᑌᐤ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᑭ ᑭᔅᑭᓄᐊᒫᑫᐤ᙮ 15 ᒎᐗᒃ ᒫᑲ ᑮ ᒫᒪᔅᑳᑕᒶᒃ, ᐁ ᐃᑗᒋᒃ, ᑖᓐᑌ ᐌᒋ ᑭᔅᑫᓕᑕᒃ ᐊᐗ ᐃᓕᓕᐤ ᒪᓯᓇᐃᑲᓇ, ᐁᑳᐐᔅᑳᑦ ᑳ ᐅᒋ ᑭᔅᑭᓄᐊᒫᑦ? 16 ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᓂ ᑭᔅᑭᓄᐊᒫᑫᐎᓐ ᓇᒪᔦᐤ ᓂᓚ ᓂ ᑭᔅᑭᓄᐊᒫᑫᐎᓐ, ᒫᑲ ᐅ ᑭᔅᑭᓄᐊᒫᑫᐎᓐ ᐊᓇ ᑳ ᑮ ᐯᒋᑎᔕᐅᑦ᙮ 17 ᑮᔥᐱᓐ ᐊᐌᓇ ᐎ ᑐᑕᒸᑌ ᐅᑦ ᐃᑌᓕᑕᒧᐎᓂᓕᐤ, ᑲᑕ ᑭᔅᑫᓕᑕᒻ ᑭᔅᑭᓄᐊᒫᑫᐎᓂᓕᐤ, ᑮᔥᐱᓐ ᑭᒋᒪᓂᑐᒃ ᐌᒋᒪᑲᓂᓕᑴ, ᓀᔥᑕᐱᑯ ᑎᐱᓚᐌ ᓂ ᒥᑐᓀᓕᒋᑲᓂᒃ ᐌᒋ ᐋᔭᒥᐙᓀ᙮ 18 ᐊᓇ ᑳ ᐋᔭᒥᑦ ᐎᓚ ᑎᐱᓚᐌ ᐅ ᒥᑐᓀᓕᒋᑲᓂᒃ ᐅᒋ, ᓇᑕᐌᓕᑕᒻ ᐎᓚ ᑫᒋᐙᒃ ᐅ ᑭᔅᑌᓕᑖᑯᓯᐎᓐ: ᒫᑲ ᐊᓇ ᑳ ᓇᑕᐌᓕᒫᑦ ᑭᒋ ᑭᔅᑌᓕᑖᑯᐋᑲᓂᐎᓕᒋ ᐊᓂᐃ ᑳ ᑮ ᐯᒋᑎᔕᐅᑯᑦ, ᐁᐗᑯ ᑖᐺᐎᓂᐎᐤ, ᓇᒪ ᓀᔥᑕ ᐙᐙᒡ ᐱᒋᔅᑳᑯ ᒪᒑᑎᓯᐎᓂᓕᐤ᙮ 19 ᓇᒪ ᓈ ᒧᓯᔅ ᑭ ᑮ ᒥᓕᑯᐗᐤ ᐅᓚᔓᐌᐎᓂᓕᐤ, ᐁᓕᐌᒃ ᒫᑲ ᓇᒪᐎᓚ ᐊᐌᓇ ᐁ ᐃᑕᔑᔦᒃ ᑲᓇᐎᑕᐤ ᐅᓚᔓᐌᐎᓂᓕᐤ? ᑫᒀᓐ ᐌᒋ ᓇᑕᐌᓕᑕᒣᒃ ᑭᒋ ᓂᐹᔨᔦᒃ? 20 ᐃᓕᓕᐗᒃ ᒫᑲ ᐁ ᓇᔥᑴᐗᔑᐋᒋᒃ, ᑮ ᐃᑌᐗᒃ, ᑭᑦ ᐋᔭᐗᐤ ᒪᒋ ᐊᒑᒃ: ᐊᐌᓇ ᓀᑕᐌᓕᑕᐤ ᑭᒋ ᓂᐸᐃᔉ? 21 ᒋᓴᔅ ᐁ ᓇᔥᑴᐗᔑᐋᑦ, ᑮ ᐃᑌᐤ, ᓂ ᑮ ᑐᑌᓐ ᐯᔭᒃ ᐋᔨᑎᐎᓐ, ᒥᓯᐌ ᐁ ᐃᑕᔑᔦᔉ ᒫᑲ ᑭᑮ ᒫᒪᔅᑳᑌᓇᐗᐤ᙮ 22 ᒧᓯᔅ ᒫᑲ ᑭ ᑮ ᒥᓕᑯᐗᐤ ᑭᔅᑭᓄᐙᒋᔓᐎᓂᓕᐤ; (ᓇᒪᐎᓚ ᒧᓯᔅ ᐁ ᐅᒋᒪᑲᒃ, ᒫᑲ ᐅᑖᐎᒪᐗᒃ ᐅᒋ;) ᓀᔥᑕ ᐁ ᐋᔭᒥᐁᑭᔑᑳᒃ ᑭ ᑭᔅᑭᓄᐙᒋᔡᐗᐤ ᐃᓕᓕᐤ᙮ 23 ᑮᔥᐱᓐ ᐃᓕᓕᐤ ᐁ ᐋᔭᒥᐁᑭᔑᑳᓕᒃ ᑫᔅᑭᓄᐙᒋᔣᑲᓂᐎᑴ ᐁᑳ ᑭᒋ ᐱᑯᐱᒋᑳᑌᓕᒃ ᒧᓯᔅ ᐅᑦ ᐅᓚᔓᐌᐎᓐ; ᑭ ᐗᓯᔅᑕᐌᓕᒥᓇᐗᐤ ᓈ ᒥᑐᓂ ᐁ ᑮ ᒥᓇᐙᒋᐊᒃ ᐃᓕᓕᐤ ᐁ ᐋᔭᒥᐁᑭᔑᑳᓕᒃ? 24 ᐁᑳᐎᓚ ᑎᐹᔅᑯᓂᑫᒃ ᐁ ᐃᔑᓈᑯᓯᓈᓂᐗᒃ, ᒫᑲ ᑎᐹᔅᑯᓂᑫᒃ ᒀᔭᔅᑭᑖᑎᓯᐎ ᑎᐹᔅᑯᓂᑫᐎᓐ᙮

ᐐᓚ ᓇ ᒥᓵᐃᔭ?

25 ᐁᑯ ᐋᑎᑦ ᐊᓂᑭ ᒋᕉᓴᓚᒥᒃ ᑳ ᐅᒌᒋᒃ ᐁᑗᒋᒃ, ᓇᒪᔦᐤ ᓈ ᐊᐗ ᐊᓂᐃ ᑳ ᐎ ᓂᐸᐋᒋᒃ? 26 ᒫᑎᑲ, ᒫᑲ, ᓱᑭᑌᐁᐎ ᐋᔭᒥᐤ, ᓇᒪᐎᓚ ᐙᔦᔥ ᒫᑲ ᐃᑌᐗᒃ᙮ ᑭᒋᐌ ᓈ ᑭᔅᑫᓕᑕᒶᒃ ᐅᑭᒫᐗᒃ ᐅᐅ ᑖᐺ ᐁ ᐋᐎᓕᒋ ᙭? 27 ᐋᑕᐎᓚ ᒫᑲ ᑭ ᑭᔅᑫᓕᒫᓇᐤ ᐊᐗ ᐃᓕᓕᐤ ᐃᑕ ᐌᒌᑦ: ᒫᑲ ᐃᔅᐱ ᙭ ᑕᑯᔑᑫ, ᓇᒪᐎᓚ ᐊᐌᓇ ᑭᔅᑫᓕᑕᒻ ᐃᑕ ᐌᒋᓕᒋ᙮ 28 ᐁᑯ ᒋᓴᔅ ᑎᐁᐺᑦ ᑭᒋᐋᔭᒥᐁᐎᑲᒥᑯᒃ ᒣᒀᒡ ᐁ ᑭᔅᑭᓄᐊᒫᑫᑦ, ᐁ ᐃᑗᑦ, ᑭ ᑭᔅᑫᓕᒥᓇᐗᐤ, ᓀᔥᑕ ᑭ ᑭᔅᑫᓕᑌᓇᐗᐤ ᐃᑕ ᐌᒋᔮᓐ: ᓇᒪᐎᓚ ᒫᑲ ᑎᐱᓚᐌ ᓂ ᒥᑐᓀᓕᒋᑲᓂᒃ ᓂ ᐅᒋ ᑕᑯᔑᓂᓐ, ᒫᑲ ᐊᓇ ᑳ ᑮ ᐯᒋᑎᔕᐅᑦ ᑖᐺᐎᓂᐎᐤ, ᐁᑳ ᑳ ᑭᔅᑫᓕᒣᒃ᙮ 29 ᒫᑲ ᓂᓚ ᓂ ᑭᔅᑫᓕᒪᐤ: ᐌᓴ ᐎᓚ ᐁᑯᑕ ᐌᒋᔮᓐ, ᐎᓚ ᓀᔥᑕ ᓂ ᑮ ᐯᒋᑎᔕᐅᒃ᙮ 30 ᐁᑯ ᑫᑴᒋ ᐅᑎᑎᓈᒋᒃ: ᒫᑲ ᓇᒪᐎᓚ ᐊᐌᓇ ᑮ ᒫᑯᓀᐤ, ᐁᑳ ᐁᔥᑾ ᐁ ᐅᑎᒋᐸᓕᓕᒃ ᐅ ᑎᐹᔨᑲᓐ ᐱᓯᒧᑳᓂᒃ᙮ 31 ᒥᒉᑦ ᒫᑲ ᐃᓕᓕᐗᒃ ᑮ ᑖᐺᔦᓕᒣᐗᒃ, ᑮ ᐃᑗᐗᒃ ᒫᑲ, ᐃᔅᐱ ᙭ ᑕᑯᔑᑫ, ᐊᐙᓯᑌ ᓈ ᒥᒉᑦ ᒫᒪᔅᑳᒋ ᐃᓯᒋᑫᐎᓇ ᑲᑕ ᑐᑕᒻ ᐃᔥᐱᔥ ᐅᐅ ᐊᐗ ᐃᓕᓕᐤ ᑳ ᑮ ᑐᑕᒃ?

ᐅᓚᔓᐌᐎ ᐊᑐᔅᑫᓛᑲᓇᒃ ᐃᔑᑎᔕᐌᒃ ᑭᒋ ᒫᑯᓈᒋᒃ ᒋᓴᓴ

32 ᐹᕋᓯᔭᒃ ᑮ ᐯᑕᒶᒃ ᐃᓕᓕᐗ ᐁ ᐃᔑ ᐋᓕᒧᒫᓕᒋ; ᐸᕋᓯᔭᒃ ᒫᑲ ᓀᔥᑕ ᑭᒋ ᓵᓵᑭᐎᓕᐌᐎᓕᓕᐗᒃ ᑮ ᐃᑎᔕᐌᐗᒃ ᐅᓚᔓᐌᐎ ᐊᑑᔅᑫᓛᑲᓇ ᑭᒋ ᐅᑎᑎᓈᓕᒋ᙮ 33 ᐁᑯ ᒋᓴᔅ ᐁᑖᑦ, ᑫᔮᐸᒡ ᐎᓕᐃᔉ ᑭ ᐎᒉᐎᑎᓇᐗᐤ, ᐁᑯ ᒫᑲ ᑫ ᓇᑕᐙᐸᒪᒃ ᐊᓇ ᑳ ᑮ ᐯᒋᑎᔕᐅᑦ᙮ 34 ᑭ ᑳ ᓈᓇᑕᐌᓕᒥᓇᐗᐤ, ᓇᒪᐎᓚ ᒫᑲ ᑭ ᑳ ᒥᔅᑲᐎᓇᐗᐤ: ᐃᑕ ᓀᔥᑕ ᐁ ᐃᑖᔮᓐ, ᐊᓐᑕ ᓇᒪᐎᓚ ᑭ ᑳ ᐯᒋ ᐃᑐᑖᓇᐗᐤ᙮ 35 ᐁᑯ ᒎᐗᒃ ᐁᑎᑐᒋᒃ, ᑖᓐᑌ ᑫ ᐃᑐᑌᑦ ᐁᑳ ᑫ ᒥᔅᑲᐗᒃ? ᑲᑕ ᓇᑕᐙᐸᒣᐤ ᓈ ᐊᓂᐃ ᓇᓈᓂᔅ ᑳ ᐃᑖᓕᒋ ᒣᑴᔭᔥ ᒉᓐᑖᐃᓚ, ᓀᔥᑕ ᑲᑕ ᑭᔅᑭᓄᐊᒪᐌᐤ ᒉᓐᑖᐃᓚ? 36 ᑫᑯ ᑐᐎ ᐃᑗᐎᓂᓕᐤ ᐅᒣᓕᐤ ᑳ ᑮ ᐃᑗᑦ, ᑭ ᑳ ᓈᓇᑕᐌᓕᒥᓇᐗᐤ, ᓇᒪᐎᓚ ᒫᑲ ᑭ ᑳ ᒥᔅᑲᐎᓇᐗᐤ: ᓀᔥᑕ ᐃᑕ ᐁ ᐃᑖᔭᓐ, ᐊᓐᑕ ᓇᒪᐎᓚ ᑭ ᑳ ᑮ ᐯᒋ ᐃᑐᑖᓇᐗᐤ? 37 ᒫᒋᒡ ᐁ ᑭᔑᑳᒃ, ᐊᓂᒪ ᑫᔅᑌᓕᑖᑾᒃ ᐁ ᑭᔑᑳᒃ ᒪᑯᔐᐎᓂᒃ, ᒋᓴᔅ ᐁ ᓂᐸᐎᑦ, ᑮ ᑌᐺᐤ, ᐁ ᐃᑗᑦ, ᑮᔥᐱᓐ ᐊᐌᓇ ᓄᑌᔮᐸᑴᑌ, ᐁᑯᔑ ᓂ ᑳ ᐯᒋ ᓈᑎᒃ, ᓀᔥᑕ ᑲᑕ ᒥᓂᑴᐤ᙮ 38 ᐊᓇ ᑳ ᑖᐺᔦᓕᒥᑦ, ᐁ ᐃᔑ ᐃᑗᒪᑲᒃ ᑭᒋᒪᓯᓇᐃᑫᐎᓐ, ᐗᑖᒃ ᑲᑕ ᐅᒋᒋᐗᓂᓕᐗ ᓯᐱᔭ ᐃᑕ ᐁ ᐃᑕᑾᒃ ᐱᒫᑎᓯᐎ ᓂᐱ᙮ 39 (ᒫᑲ ᐅᒣᓕᐤ ᑮ ᐃᑗᐤ ᐁ ᐋᓕᒧᒫᑦ ᐊᒑᑾ ᑫ ᒥᓛᑲᓂᐎᓕᒋ ᐊᓂᐃ ᑳ ᑖᐺᔦᓕᒥᑯᑦ: ᐌᓴ ᐯᓓᑭᓯᑦ ᐊᒑᒃ ᓇᒪᐎᓚ ᐁᔥᑾ ᐅᒋ ᒥᓕᐙᓂᐎᐤ; ᐁᑳ ᐁᔥᑾ ᐁ ᑮ ᑭᔅᑌᓕᑖᑯᐋᑲᓂᐎᑦ ᒋᓴᔅ᙮)

ᐃᓕᓕᐗᒃ ᐗᐙᓀᓕᑕᒧᒃ ᐊᐌᓇ ᐁ ᐋᐎᓕᒋ ᒋᓴᓴ

40 ᐁᐗᑯ ᐌᒋ ᒥᒉᑦ ᐃᓕᓕᐗᒃ ᐃᔅᐱ ᐱᐁᑕᑭᒃ ᐅᒣᓕᐤ ᐃᑗᐎᓂᓕᐤ, ᑮ ᐃᑗᐗᒃ; ᑖᐺ ᐊᐗ ᐊᓇ ᐅᑭᔅᑭᐙᐃᑫᐤ᙮ 41 ᑯᑕᑭᔭᒃ ᑮ ᐃᑗᐗᒃ, ᐁᐗᑯ ᐊᐗ ᙭᙮ ᒫᑲ ᐋᑎᑦ ᑮ ᐃᑗᐗᒃ ᑳᓕᓖᒃ ᓈ ᑲᑕ ᐅᒋᐤ ᙭? 42 ᓇᒪ ᓈ ᑭᒋ ᒪᓯᓇᐃᑫᐎᓐ ᑮ ᐃᑗᒪᑲᓐ, ᙭ ᑭᒋ ᐅᒌᑦ ᑌᐱᑦ ᐅᑦ ᐊᐙᔑᒥᔕ ᐅᒋ, ᓀᔥᑕ ᐯᑦᓕᔭᒻ ᐃᑖᐎᓂᒃ ᐅᒋ, ᐅᑕ ᑌᐱᑦ ᑳ ᑮ ᐃᑖᑦ᙮ 43 ᐁᑯ ᐹᐸᑳᓐ ᐁᑗᒋᒃ ᐃᓕᓕᐗᒃ ᐎᓚ ᐅᒋ᙮ 44 ᓀᔥᑕ ᐋᑎᑦ ᐁ ᐃᑕᓯᒋᒃ ᑮ ᐎ ᐅᑎᓀᐗᒃ; ᓇᒪᐎᓚ ᐊᐌᓇ ᒫᑲ ᐅᒋ ᒫᑯᓀᐤ᙮

ᑳ ᓂᑳᓀᓕᑖᑯᓯᒋᒃ ᒎᐗᒃ ᒧᓚ ᑖᐺᔦᓕᒥᑯ

45 ᐁᑯ ᐅᓚᔓᐌᐎ ᐊᑑᔅᑫᓛᑲᓇᒃ ᐌᑎᑖᒋᒃ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᐹᕋᓯᔭ; ᑮ ᐃᑎᑯᐗᒃ ᒫᑲ, ᑖᓀᑭ ᐌᒋ ᐁᑳ ᑮ ᐯᔑᐌᒃ? 46 ᐅᓚᔓᐌᐎ ᐊᑑᔅᑫᓛᑲᓇᒃ ᑮ ᓇᔥᑴᐗᔑᐃᐌᐗᒃ, ᓇᒪᐎᔅᑳᑦ ᐊᐌᓇ ᐃᔑ ᐋᔭᒥᐤ ᑖᐱᔅᑯᒡ ᐊᐗ ᐃᓕᓕᐤ᙮ 47 ᐁᑯ ᓀᔥᑴᐗᔑᐃᑯᒋᒃ ᐸᕋᓯᔭ, ᑭᓚᐗᐤ ᓈ ᓀᔥᑕ ᑭ ᐙᔦᔑᐃᑲᐎᓇᐗᐤ? 48 ᑮ ᑖᐺᔦᓕᒥᑯ ᓈ ᐊᐌᓕᐗ ᐁ ᐅᑭᒫᐎᓕᒋ ᓀᔥᑕᐱᑯ ᐁ ᐹᕋᓯᐎᓕᒋ? 49 ᒫᑲ ᐅᑯ ᐃᓕᓕᐗᒃ ᐁᑳ ᑳ ᑭᔅᑫᓕᑕᑭᒃ ᐅᓚᔓᐌᐎᓂᓕᐤ ᓂᔑᐗᓈᒋᒫᑲᓂᐎᐗᒃ᙮ 50 ᓂᑯᑎᒪᔅ ᐃᑌᐤ, (ᐊᓇ ᑳ ᐯᒋ ᓈᑖᑦ ᒋᓴᓴ ᓂᐹᑎᐱᔉ, ᐁ ᐊᔑᑕᑭᒫᑲᓂᐎᑦ,) 51 ᑎᐹᔅᑯᓂᑯ ᓈ ᐊᐌᓇ ᑭᑦ ᐅᓚᔓᐌᐎᓂᓇᐤ ᐸᒧᔑ ᐯᑖᑯᑦ, ᓀᔥᑕ ᑭᔅᑫᓕᒋᑳᑌᒃ ᑫᒀᓕᐤ ᑳ ᑐᑕᒃ? 52 ᑮ ᓇᔥᑴᐗᔑᐁᐗᒃ ᒫᑲ ᐁ ᐃᑖᒋᒃ, ᑭᓚ ᓈ ᓀᔥᑕ ᑳᓖᓖᒃ ᑭᑦ ᐅᒌᓐ? ᓈᓇᑕᐌᓕᑕ, ᓀᔥᑕ ᓈᓇᑕᐙᐸᑕ: ᐌᓴ ᑳᓖᓖᒃ ᓇᒪᐎᓚ ᐅᒋᐤ ᐅᑭᔅᑭᐙᐃᑫᐤ᙮ 53 ᐁᑯ ᐁᑐᑌᑦ ᒥᓯᐌ ᑕᑐ ᐊᐌᓇ ᑎᐱᓚᐌ ᐅ ᐙᔅᑳᔨᑲᓂᒥᒃ᙮

8

ᐊᓇ ᐃᔅᑴᐤ ᑳ ᑳᒋᑎᓈᑲᓂᐎᑦ ᐱᔑᒀᑎᓯᐎᓂᒃ

1 ᒋᓴᔅ ᑮ ᐃᑐᑌᐤ ᐊᓕᑉᔅ ᐗᒌᒃ᙮ 2 ᐎᐸᒡ ᒫᑲ ᐁ ᑭᑭᔐᐹᔮᓕᒃ ᒥᓇ ᑮ ᐯᒋ ᐃᑐᑌᐤ ᑭᒋᐋᔭᒥᐁᐎᑲᒥᑯᒃ, ᑮ ᐯᒋ ᓈᑎᑯ ᒫᑲ ᒥᓯᐌ ᐃᓕᓕᐗ; ᐁᑯ ᓀᐊᐱᑦ, ᓀᔥᑕ ᑫᔅᑭᓄᐊᒪᐙᑦ᙮ 3 ᐅᒪᓯᓇᐃᑫᐗᒃ ᒫᑲ ᓀᔥᑕ ᐹᕋᓯᔭᒃ ᑮ ᐯᑐᐌᐗᒃ ᐃᔅᑴᐗ ᐁ ᑮ ᒥᔅᑲᐙᑲᓂᐎᓕᒋ ᐱᔑᒀᑎᓯᐎᓂᒃ; ᐃᔅᐱ ᒫᑲ ᑳ ᑮ ᐸᑭᑎᓈᒋᒃ ᑌᑖᐎᒡ, 4 ᐃᑌᐗᒃ, ᑫᔅᑭᓄᐊᒫᑫᔭᓐ, ᐊᐗ ᐃᔅᑴᐤ ᑮ ᒣᒀᔥᑲᐙᑲᓂᐎᐤ ᐱᔑᒀᑎᓯᐎᓂᒃ, ᒣᒀᒡ ᐁ ᐃᑐᑕᒃ᙮ 5 ᒧᓯᔅ ᒫᑲ ᐅᓚᔓᐌᐎᓂᒃ ᓂ ᑮ ᐃᑕᔓᐙᑎᑯᓈᓐ ᐊᓂᑭ ᐅᒣᓕᐤ ᑳ ᑐᑕᑭᒃ ᑭᒋ ᐱᒧᓯᓈᑕᐙᑲᓂᐎᒋᒃ: ᒫᑲ ᑖᓐ ᐁᑗᔭᓐ ᑭᓚ? 6 ᐅᒣᓕᐤ ᑮ ᐃᑗᐗᒃ, ᐁ ᑲᑴᒋᐋᒋᒃ, ᑭᒋ ᐋᔮᒋᒃ ᑫ ᐅᒋ ᒫᒥᔑᒫᒋᒃ᙮ ᒫᑲ ᒋᓴᔅ ᑮ ᓇᐌᑳᐸᐎᐤ, ᓀᔥᑕ ᐅᓕᓕᑭᒋᒑᓐ ᑮ ᒪᓯᓇᐃᑳᑫᐤ ᒧᔅᑕᔅᑲᒥᒃ, ᑖᐱᔅᑯᒡ ᐁᑳ ᐁ ᐯᑕᐙᑦ᙮ 7 ᐁᑯ ᐁᑳ ᐁ ᐳᓂ ᑲᑴᒋᐃᑯᑦ, ᑮ ᑕᔓᑳᐸᐎᐤ, ᓀᔥᑕ ᑮ ᐃᑌᐤ, ᐊᓇ ᐁ ᐃᑕᔑᔦᒃ ᐁᑳ ᑳ ᒪᒑᑎᓯᑦ, ᐁᐗᑯ ᓃᔥᑕᒻ ᑫ ᐱᒸᑦ ᐊᓯᓂᓕᐤ᙮ 8 ᒥᓇ ᒫᑲ ᑮ ᓇᐌᑳᐸᐎᐤ, ᐁ ᒪᓯᓇᐃᑫᑦ ᒧᔅᑕᔅᑲᒥᒃ᙮ 9 ᐊᓂᑭ ᒫᑲ ᑳ ᐯᑕᑭᒃ, ᐅ ᒥᑐᓀᓕᒋᑲᓂᐙᐗ ᐁ ᑎᐹᔅᑯᓂᑯᒋᒃ, ᑭ ᐗᓚᐎᐗᒃ ᐯᐯᔭᒃ, ᓃᔥᑕᒻ ᐊᓇ ᑳ ᑭᔐᓕᓕᐎᑦ ᐱᓕᔥ ᐊᓇ ᒫᒋᒡ; ᒋᓴᔅ ᒫᑲ ᑮ ᓇᑲᑖᑲᓂᐎᐤ ᐁ ᐯᔭᑯᑦ, ᓀᔥᑕ ᐃᔅᑴᐤ ᑌᑖᐎᒡ ᐁ ᓂᐸᐎᑦ᙮ 10 ᐃᔅᐱ ᒋᓴᔅ ᑳ ᑮ ᑕᔓᑳᐸᐎᑦ, ᐁᑳ ᒫᑲ ᐎᐋᐸᒫᑦ: ᐊᐌᓕᐗ ᐱᑯ ᐃᔅᑴᐗ, ᑮ ᐃᑌᐤ, ᐃᔅᑴᐤ, ᑖᓐᑌ ᐁᑖᒋᒃ ᐊᓂᑭ ᑳ ᒫᒥᔑᒥᔅᑭᒃ? ᓇᒪ ᓈ ᐊᐌᓇ ᑭ ᐅᒋ ᓂᔑᐗᓈᒋᒥᒃ? 11 ᑮ ᐃᑗᐤ, ᓇᒪᐎᓚ ᐊᐌᓇ, ᑌᐯᓕᒋᑫᔭᓐ᙮ ᒋᓴᔅ ᒫᑲ ᑮ ᐃᑌᐤ, ᓂᓚ ᓀᔥᑕ ᓇᒪᐎᓚ ᑭ ᓂᔑᐗᓈᒋᒥᑎᓐ: ᒫᒑ, ᐁᑳᐎᓚ ᒫᑲ ᒥᓇ ᒪᒋᐱᒫᑎᓯ᙮

ᒋᓴᔅ ᒥᓓᐤ ᐙᔅᑌᐎᓂᓕᐤ ᐃᓕᓕᐗ ᐅᑕ ᐊᔅᑭᒃ

12 ᐁᑯ ᒋᓴᔅ ᒥᓇ ᐁᔭᒥᐋᑦ, ᐁ ᐃᑗᑦ, ᓂᓚ ᐁᐗᑯ ᑳ ᐅᒋ ᐋᔅᑌᒃ ᐊᔅᑭ: ᐊᓇ ᑳ ᓄᔅᐱᓇᔑᑦ ᓇᒪᐎᓚ ᑲᑕ ᐱᒧᑌᐤ ᐗᓂᑎᐱᔅᑭᓯᐎᓂᒃ, ᒫᑲ ᑲᑕ ᐊᔮᐤ ᐱᒫᑎᓯᐎᓂ ᐙᓭᔮᓯᐎᓂᓕᐤ᙮ 13 ᐁᐗᑯ ᐌᒋ ᐃᑎᑯᒃ ᐸᕋᓯᔭ, ᑭ ᑎᐹᒋᒥᑎᓱᓐ; ᑭ ᑎᐹᒋᒧᐎᓐ ᓇᒪᐎᓚ ᑖᐺᒪᑲᓐ᙮ 14 ᒋᓴᔅ ᐁ ᓇᔥᑴᐗᔑᐋᑦ ᑮ ᐃᑌᐤ, ᐋᑕ ᐁ ᑎᐹᒋᒥᑎᓱᔮᓐ, ᐁᓕᐌᒃ ᓂ ᑎᐹᒋᒧᐎᓐ ᑖᐺᒪᑲᓐ: ᐌᓴ ᓂ ᑭᔅᑫᓕᑌᓐ ᐃᑕ ᐌᒋᔮᓐ, ᓀᔥᑕ ᐃᑕ ᐁᑐᑌᔮᓐ; ᒫᑲ ᑭᓚᐗᐤ ᓇᒪᐎᓚ ᑭ ᑭᔅᑫᓕᑌᓇᐗᐤ ᐃᑕ ᐌᒋᔮᓐ ᓀᔥᑕ ᐃᑕ ᐁᑐᑌᔮᓐ᙮ 15 ᑭᓚᐗᐤ ᐎᔮᓯᒃ ᑭᑦ ᐃᔑ ᑎᐹᔅᑯᓂᑳᓇᐗᐤ; ᓂᓚ ᓇᒪᐎᓚ ᐊᐌᓇ ᓂ ᑎᐹᔅᑯᓇᐤ᙮ 16 ᑮᔥᐱᓐ ᒫᑲ ᑌᐹᔅᑯᓂᑫᐙᓀ, ᓂ ᑎᐹᔅᑯᓂᑫᐎᓐ ᑖᐺᒪᑲᓐ: ᐌᓴ ᓇᒪᐎᓚ ᓂ ᐯᔭᑯᓐ, ᒫᑲ ᓂᓚ ᓀᔥᑕ ᐅᑖᐎᒪᐤ ᑳ ᑮ ᐯᒋᑎᔕᐅᑦ᙮ 17 ᒪᓯᓇᐃᑳᑌᐤ ᓀᔥᑕ ᑭᑦ ᐅᓚᔓᐌᐎᓂᐙᒃ, ᓂᔓ ᐃᓕᓕᐗᒃ ᐅ ᑎᐹᒋᒧᐎᓂᐗᐤ ᐁ ᑖᐺᒪᑲᓂᓕᒃ᙮ 18 ᓂᓚ ᐯᔭᒃ ᐁ ᑎᐹᒋᒥᑎᓱᔮᓐ, ᐅᑖᐎᒪᐤ ᓀᔥᑕ ᑳ ᑮ ᐯᒋᑎᔕᐅᑦ ᓂ ᑎᐹᒋᒥᒃ᙮ 19 ᐁᑯ ᐁᑖᒋᒃ, ᑖᓐᑌ ᐁᑖᑦ ᑯᑖᐎ? ᒋᓴᔅ ᑭ ᓇᔥᑴᐗᔑᐃᐌᐤ, ᓇᒪᐎᓚ ᑭ ᑭᔅᑫᓕᒥᓇᐗᐤ, ᓇᒪ ᓀᔥᑕ ᓄᑖᐎ: ᑮᔥᐱᓐ ᑮ ᑭᔅᑫᓕᒥᐌᑯᐸᓀ, ᑭ ᑳ ᑮ ᑭᔅᑫᓕᒫᑕᐗᐤ ᓄᑖᐎ ᓀᔥᑕ᙮ 20 ᐅᐅ ᐋᔭᒥᐎᓇ ᒋᓴᔅ ᑮ ᐃᑗᐤ ᔔᓕᔭᐎᑲᒥᑯᒃ, ᒣᒀᒡ ᐁ ᑭᔅᑭᓄᐊᒫᑫᑦ ᑭᒋᐋᔭᒥᐁᐎᑲᒥᑯᒃ: ᓇᒪᐎᓚ ᐊᐌᓕᐗ ᒫᑲ ᑮ ᒫᑯᓂᑯ; ᐌᓴ ᐅ ᑎᐹᔨᑲᓐ ᐱᓯᒧᑳᓂᒃ ᓇᒪᐎᓚ ᐁᔥᑾ ᑮ ᐅᑎᒋᐸᓕᓕᐤ᙮

ᒧᓚ ᑳ ᑮ ᐃᑐᑌᓈᐗᐤ ᐃᑕ ᐁ ᐃᑐᑌᔮᓐ, ᒋᓴᔅ ᐃᑗᐤ

21 ᐁᑯ ᒋᓴᔅ ᒥᓇ ᐁᑖᑦ, ᓂ ᑭᑐᑖᓐ, ᑭ ᑳ ᓈᓇᑕᐌᓕᒥᓇᐗᐤ ᒫᑲ, ᓀᔥᑕ ᑭ ᑳ ᓂᐱᓇᐗᐤ ᑭ ᒪᒋᑐᑕᒧᐎᓂᐙᒃ: ᐃᑕ ᐁᑐᑌᔮᓐ ᓇᒪᐎᓚ ᑭ ᑳ ᑮ ᐯᒋ ᐃᑐᑖᓇᐗᐤ᙮ 22 ᐁᑯ ᐁᑗᒋᒃ ᒎᐗᒃ, ᑲᑕ ᓂᐹᐃᑎᓱ ᓈ? ᐌᓴ ᐃᑗᐤ, ᐃᑕ ᐁ ᐃᑐᑌᔭᓐ ᓇᒪᐎᓚ ᑭ ᑳ ᑮ ᐯᒋ ᐃᑐᑖᓇᐗᐤ᙮ 23 ᑮ ᐃᑌᐤ ᒫᑲ, ᑭᓚᐗᐤ ᑕᐸᔒᔥ ᑮᑦ ᐅᒌᓇᐗᐤ; ᓂᓚ ᐃᔥᐱᒥᒃ ᓂᑦ ᐅᒌᓐ: ᐅᑕ ᐊᔅᑮᒃ ᑭᓚᐗᐤ ᑮᑦ ᐅᒌᓇᐗᐤ; ᓂᓚ ᓇᒪᐎᓚ ᐅᑕ ᐊᔅᑮᒃ ᓂᑦ ᐅᒌᓐ᙮ 24 ᐁᐗᑯ ᐌᒋ ᐃᑎᑕᑾᒃ, ᑭ ᑳ ᓂᐱᓇᐗᐤ ᑭ ᒪᒋᑐᑕᒧᐎᓂᐙᒃ: ᐌᓴ ᑮᔥᐱᓐ ᐁᑳ ᑖᐺᑕᒣᑴ ᓂᓚ ᐁᐗᑯ ᐁ ᐋᐎᔮᓐ, ᑭ ᑳ ᓂᐱᓇᐗᐤ ᑭ ᒪᒋᑐᑕᒧᐎᓂᐙᒃ᙮ 25 ᐁᑯ ᐁᑖᒋᒃ, ᐊᐌᓇ ᑭᓚ? ᒋᓴᔅ ᒫᑲ ᐃᑌᐤ, ᐊᓇ ᐅᑎ ᑳ ᑮ ᐃᑎᑕᑾᒃ ᓃᔥᑕᒻ ᐅᒋ᙮ 26 ᓂᑦ ᐋᔮᓐ ᒥᒉᑦ ᑫᒀᓇ ᑭᓚᐗᐤ ᑭᒋ ᐅᒋ ᐃᑗᔮᓐ ᓀᔥᑕ ᑭᒋ ᑎᐹᔅᑯᓂᑫᔮᓐ: ᒫᑲ ᐊᓇ ᑳ ᑮ ᐯᒋᑎᔕᐅᑦ ᑖᐺᐎᓂᐎᐤ; ᓀᔥᑕ ᓂ ᐎᑌᓐ ᐅᑕ ᐊᔅᑮᒃ ᐊᓂᐃ ᑫᒀᓇ ᑳ ᑮ ᐎᑕᒫᐎᑦ᙮ 27 ᓇᒪᐎᓚ ᑮ ᓂᓯᑐᑕᒶᒃ ᐁ ᐋᓕᒧᑕᒫᑯᒋᒃ ᐅᑖᐎᒪᐗ᙮ 28 ᐁᑯ ᒋᓴᔅ ᐁᑖᑦ, ᐃᔅᐱ ᑮ ᐅᐱᓀᑴ ᐃᓕᓕᐎᑯᓯᓵᓐ, ᐁᑯ ᑫ ᑭᔅᑫᓕᑕᒣᒃ ᓂᓚ ᐁᐗᑯ ᐁ ᐋᐎᔮᓐ, ᓀᔥᑕ ᐁᑳ ᐁ ᑐᑕᒫᓐ ᑫᒀᓐ ᓂᓚ ᑎᐱᓚᐌ ᓂ ᒥᑐᓀᓕᒋᑲᓂᒃ ᐅᒋ; ᒫᑲ ᐁ ᑮ ᐃᔑ ᑭᔅᑭᓄᐊᒪᐎᑦ ᓄᑖᐎ, ᓂᑦ ᐋᔭᒥᓐ ᐅᐅ ᑫᒀᓇ᙮ 29 ᓀᔥᑕ ᐊᓇ ᑳ ᑮ ᐯᒋᑎᔕᐅᑦ ᓂ ᐎᒉᐎᒃ: ᐅᑖᐎᒪᐤ ᓇᒪᐎᓚ ᓂ ᐅᒋ ᓇᑲᑎᒃ ᑭᒋ ᐯᔭᑯᐗᒃ; ᐌᓴ ᒧᔕᒃ ᓂᑦ ᐃᑐᑕᒸᓐ ᐊᓂᐃ ᑫᒀᓇ ᑳ ᓇᐃᓚᐌᐃᑯᑦ᙮ 30 ᒣᒀᒡ ᐁᔭᒥᑦ ᐅᐅ ᐋᔭᒥᐎᓇ ᒥᒉᑦ ᑮ ᑖᐺᔦᓕᒥᑯᑦ᙮

ᐊᐌᓂᑭ ᐋᐸᐗᑲᓇᒃ ᓀᔥᑕ ᑭᐸᐗᑲᓇᒃ

31 ᐁᑯ ᒋᓴᔅ ᐁᑖᑦ ᐊᓂᐃ ᒎᐗ ᑳ ᑖᐺᔦᓕᒥᑯᒃ, ᑮᔥᐱᓐ ᒧᔕᒃ ᑐᑕᒣᑴ ᓂᑦ ᐋᔭᒥᐎᓐ, ᐁᑯ ᑖᐺ ᐌᑭᔅᑭᓄᐊᒪᐙᑲᓂᒥᑕᑾᒃ; 32 ᓀᔥᑕ ᑭ ᑳ ᑭᔅᑫᓕᑌᓇᐗᐤ ᑖᐺᐎᓐ, ᓀᔥᑕ ᑖᐺᐎᓐ ᑭ ᑳ ᐋᐱᑯᓂᑯᓇᐗᐤ᙮ 33 ᑮ ᓇᔥᑴᐗᔑᐁᐗᒃ, ᓂᓚᓈᓐ ᐁᑉᕃᐋᒻ ᐅᑦ ᐊᐙᔑᒥᔕ, ᓇᒪᐎᔅᑳᑦ ᓀᔥᑕ ᐊᐌᓇ ᓂᑦ ᐅᒋ ᐊᐗᑳᑎᑯᓈᓐ: ᑖᓐᑌ ᐌᒋ ᐃᑗᔭᓐ, ᑭ ᑳ ᐋᐱᑯᓂᑲᐎᓇᐗᐤ? 34 ᒋᓴᔅ ᑮ ᓇᔥᑴᐗᔑᐁᐤ, ᑖᐺ, ᑖᐺ, ᑭᑦ ᐃᑎᓇᐗᐤ, ᑕᑐ ᐊᐌᓇ ᑳ ᒪᒋᑐᑕᒃ ᐅᑦ ᐊᑑᔅᑫᓛᑲᓂᒥᑯ ᒪᒋᑐᑕᒧᐎᓂᓕᐤ᙮ 35 ᐊᑑᔅᑫᓛᑲᓐ ᒫᑲ ᓇᒪᐎᓚ ᑳᑭᑫ ᐱᒋ ᐙᔅᑳᔨᑲᓂᒃ ᐃᑖᐤ: ᒫᑲ ᐅᑯᓯᓯᒫᐤ ᑳᑭᑫ ᐃᑖᐤ᙮ 36 ᑮᔥᐱᓐ ᒫᑲ ᐅᑯᓯᓯᒫᐤ ᐋᐱᑯᓂᑖᑴ, ᑖᐺ ᑭ ᑳ ᐋᐱᑯᓂᑲᐎᓇᐗᐤ᙮ 37 ᓂ ᑭᔅᑫᓕᑌᓐ ᐁᑉᕃᐋᒻ ᐁ ᐅᑦ ᐊᐙᔑᒥᔑᒥᑖᒃ; ᒫᑲ ᑭ ᐎ ᓂᐸᐃᓇᐗᐤ, ᐁᑳ ᒥᑐᓂ ᐁ ᐱᒋᔅᑳᑯᔦᒃ ᓂᑦ ᐋᔭᒥᐎᓐ᙮ 38 ᓂᑦ ᐃᑣᓐ ᐊᓂᒪ ᑳ ᑮ ᐙᐸᑕᒫᓐ ᐁ ᐎᒉᐗᒃ ᓄᑖᐎ: ᑭᓚᐗᐤ ᒫᑲ ᑭᑦ ᐃᑐᑌᓇᐗᐤ ᐊᓂᒪ ᑳ ᑮ ᐙᐸᑕᒣᒃ ᐁ ᐎᒉᐌᒃ ᑯᑖᐎᐗᐤ᙮ 39 ᐁ ᓇᔥᑴᐗᔑᐋᒋᒃ ᒫᑲ ᑮ ᐃᑌᐗᒃ, ᐁᑉᕃᐋᒻ ᐁᐗᑯ ᓄᑖᐎᓈᓐ᙮ ᒋᓴᔅ ᐃᑌᐤ, ᑮᔥᐱᓐ ᐁᑉᕃᐋᒻ ᐌᑕᐙᔑᒥᔑᒥᑖᑴ, ᑭ ᑳ ᑐᑕᒸᑕᐗᐤ ᐁᑉᕃᐋᒻ ᐅᑦ ᐋᔨᑎᐎᓇ᙮ 40 ᐊᓄᒡ ᒫᑲ ᑭ ᐎ ᓂᐸᐃᓇᐗᐤ, ᐁ ᐃᓕᓕᐎᔮᓐ ᐁ ᐎᑕᒫᑕᑾᒃ ᑖᐺᐎᓐ, ᑳ ᑮ ᐎᑕᒪᐎᑦ ᑭᒋᒪᓂᑐ: ᐅᒣᓕᐤ ᓇᒪᐎᓚ ᐅᒋ ᑐᑕᒻ ᐁᑉᕃᐋᒻ᙮ 41 ᑭᑦ ᐃᑐᑕᒸᓇᐗᐤ ᐅᑦ ᐋᔨᑎᐎᓇ ᑯᑖᐎᐗᐤ᙮ ᐁᑯ ᐁᑖᒋᒃ, ᓇᒪᐎᓚ ᐱᔑᒀᑎᓯᐎᓂᒃ ᓂ ᑮ ᐅᒌᓈᓐ; ᐯᔭᑯ ᓄᑖᐎᓈᓐ, ᑭᒋᒪᓂᑐ ᐅᑎ᙮ 42 ᒋᓴᔅ ᑮ ᐃᑌᐤ, ᑮᔥᐱᓐ ᑭᒋᒪᓂᑐ ᐌᑖᐎᔦᑯ, ᑭ ᑳ ᓵᑭᐃᑕᐗᐤ: ᐌᓴ ᑭᒋᒪᓂᑐᒃ ᓂᑦ ᐅᒌᓐ ᓀᔥᑕ ᓂᑦ ᐅᑐᑖᓐ; ᓇᒪᐎᓚ ᓀᔥᑕ ᓂᓚ ᑎᐱᓚᐌ ᓂ ᒥᑐᓀᓕᒋᑲᓂᒃ ᓂᑦ ᐅᒋ ᐯᒋ ᐃᑐᑖᓐ, ᒫᑲ ᓂ ᑮ ᐯᒋᑎᔕᐅᒃ᙮ 43 ᑖᓀᑭ ᐌᒋ ᐁᑳ ᓂᓯᑐᑕᒣᒃ ᓂᑦ ᐃᑗᐎᓐ? ᐁᑳ ᐁ ᑮ ᓇᑐᑕᒣᒃ ᓂᑦ ᐋᔭᒥᐎᓐ᙮ 44 ᑭᓚᐗᐤ ᑭᑦ ᐅᒌᓇᐗᐤ ᑯᑖᐎᐗᐤ ᒪᒋᒪᓂᑐ, ᓀᔥᑕ ᑯᑕᐎᐗᐤ ᐅ ᒪᒋᐃᑌᓕᑕᒧᐎᓇ ᑭ ᑳ ᑐᑕᒸᓇᐗᐤ᙮ ᑮ ᓂᐸᔨᐌᔅᑭᐤ ᓃᔥᑕᒻ ᐅᒋ, ᓇᒪᐎᓚ ᓀᔥᑕ ᑖᐺᐎᓂᒃ ᐅᒋ ᐃᑖᐤ, ᐁᑳ ᒥᑐᓂ ᐁ ᐱᒋᔅᑳᑯᑦ ᑖᐺᐎᓂᓕᐤ᙮ ᐃᔅᐱ ᐁᑗᒋ ᑭᓛᔅᑭᐎᓂᓕᐤ, ᐁ ᐃᑖᑎᓰᑦ ᐃᔑ ᐋᔭᒥᐤ: ᐌᓴ ᑭᓛᔅᑭᔅᑭᐤ ᓀᔥᑕ ᐅᑖᐎᒥᑯ ᑭᓛᔅᑭᐎᓂᓕᐤ᙮ 45 ᐁ ᐃᑡᒫᑕᑾᒃ ᒫᑲ ᑖᐺᐎᓐ, ᓇᒪᐎᓚ ᑭ ᑖᐺᑕᐎᓇᐗᐤ᙮ 46 ᐊᐌᓇ ᐁ ᐃᑕᔑᔦᒃ ᑫ ᑮ ᐙᐸᑎᓕᐌᑦ ᐁ ᒪᒋᑐᑕᒫᓐ? ᑮᔥᐱᓐ ᒫᑲ ᑖᐺᐎᓐ ᐁᑗᐗᓀ, ᑖᓀᑭ ᐌᒋ ᐁᑳ ᑖᐺᑕᐎᔦᒃ? 47 ᐊᓇ ᑭᒋᒪᓂᑐᒃ ᑳ ᐅᒌᑦ ᐯᑕᒬᐤ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐗ: ᑭᓚᐗᐤ ᒫᑲ ᓇᒪᐎᓚ ᑭ ᐯᑕᒸᓇᐗᐤ ᐁᑳ ᑭᒋᒪᓂᑐᒃ ᐁ ᐅᒋᔦᒃ᙮

ᒋᓴᔅ ᓀᔥᑕ ᐁᑉᕃᐋᒻ

48 ᐁᑯ ᒎᐗᒃ ᓀᔥᑴᐗᔑᐋᒋᒃ, ᐁ ᐃᑖᒋᒃ, ᓇᒪ ᓈ ᒀᔭᔉ ᓂᑦ ᐃᑣᓈᓐ ᐁ ᐃᑗᔮᒃ, ᑭ ᓴᒣᕆᔭ ᐁᓕᓕᐎᓐ, ᓀᔥᑕ ᑭᑦ ᐋᔭᐗᐤ ᒪᒋ ᐊᒑᒃ? 49 ᒋᓴᔅ ᑮ ᓇᔥᑴᐗᔑᐃᐌᐤ, ᓇᒪᐎᓚ ᓂᑦ ᐋᔭᐗᐤ ᒪᒋ ᐊᒑᒃ; ᒫᑲ ᓂ ᑭᔅᑌᓕᒪᐤ ᓄᑖᐎ, ᑭᓚᐗᐤ ᒫᑲ ᑭ ᒪᒉᓕᒥᓇᐗᐤ᙮ 50 ᓇᒪᐎᓚ ᓀᔥᑕ ᓂ ᓈᓇᑕᐌᓕᑌᓐ ᓂᓚ ᑎᐱᓚᐌ ᓂ ᑭᔅᑌᓕᑖᑯᓯᐎᓐ: ᐃᑖᐤ ᐊᐌᓇ ᑳ ᓈᓇᑕᐌᓕᑕᒃ ᓀᔥᑕ ᑳ ᑎᐹᔅᑯᓂᑫᑦ᙮ 51 ᑖᐺ ᑖᐺ, ᑭᑦ ᐃᑎᓇᐗᐤ, ᑮᔥᐱᓐ ᐊᐌᓇ ᑲᓇᐎᑖᑌ ᓂᑦ ᐃᑗᐎᓂᓕᐤ, ᓇᒪᐎᔅᑳᑦ ᑲᑕ ᐙᐸᑕᒻ ᓂᐱᐎᓂᓕᐤ᙮ 52 ᐁᐗᑯ ᐌᒋ ᐃᑎᑯᑦ ᒎᐗ, ᐁᑯ ᑫᔅᑫᓕᑕᒫᒃ ᐁ ᐋᔭᐗᑦ ᒪᒋ ᐊᒑᒃ᙮ ᐁᑉᕃᐋᒻ ᑮ ᓂᐱᐤ, ᓀᔥᑕ ᐅᑭᔅᑭᐙᐃᑫᐗᒃ; ᑭᓚ ᒫᑲ ᑭᑦ ᐃᑣᓐ, ᑮᔥᐱᓐ ᐊᐌᓇ ᑲᓇᐎᑖᑌ ᓂᑦ ᐃᑗᐎᓂᓕᐤ, ᓇᒪᐎᔅᑳᑦ ᑲᑕ ᑯᒋᔅᑕᒻ ᓂᐱᐎᓂᓕᐤ᙮ 53 ᐊᐙᓯᑌ ᓈ ᑭ ᑭᔅᑌᓕᑖᑯᓯᓐ ᐃᔥᐱᔥ ᓄᑖᐎᓈᓐ ᐁᑉᕃᐋᒻ, ᑳ ᑮ ᓂᐱᑦ? ᓀᔥᑕ ᐅᑭᔅᑭᐙᐃᑫᐗᒃ ᑳ ᑮ ᓂᐱᒋᒃ: ᐊᐌᓇ ᐙ ᐃᑌᓕᑖᑯᐃᑎᓱᔭᓐ? 54 ᒋᓴᔅ ᑮ ᓇᔥᑴᐗᔑᐃᐌᐤ, ᑮᔥᐱᓐ ᑫᔅᑌᓕᒥᑎᓱᐙᓂ ᓂ ᑭᔅᑌᓕᒧᐎᓐ ᓇᒪᐎᓚ ᐎᓛᐸᑲᓐ: ᓄᑖᐎ ᐁᐗᑯ ᑳ ᑭᔅᑌᓕᒥᑦ; ᐊᓇ ᓂ ᑭᒋᒪᓂᑐᒥᓈᓐ ᑳ ᐃᑌᒃ᙮ 55 ᐁᓕᐌᒃ ᒫᑲ ᓇᒪᐎᓚ ᑮ ᐅᒋ ᑭᔅᑫᓕᒪᐗᐤ; ᒫᑲ ᓂᓚ ᓂ ᑭᔅᑫᓕᒪᐤ: ᑮᔥᐱᓐ ᒫᑲ ᐃᑗᔮᓀ, ᓇᒪᐎᓚ ᓂ ᑭᔅᑫᓕᒪᐤ, ᓂ ᑳ ᑭᓛᔅᑭᔅᑭᓐ ᑖᐱᔅᑯᒡ ᑭᓚᐗᐤ: ᒫᑲ ᓂ ᑭᔅᑫᓕᒪᐤ, ᓀᔥᑕ ᓂ ᑲᓇᐎᑕᐙᓐ ᐅᑦ ᐃᑗᐎᓐ᙮ 56 ᑯᑕᐎᐗᐤ ᐁᑉᕃᐋᒻ ᑮ ᒥᓚᐙᑕᒻ ᑭᒋ ᐙᐸᑕᒃ ᓂ ᑭᔑᑳᒥᓕᐤ: ᑮ ᐙᐸᑕᒻ ᒫᑲ, ᓀᔥᑕ ᑮ ᓯᑭᓓᓯᐤ᙮ 57 ᐁᑯ ᒎᐗᒃ ᐁᑖᒋᒃ, ᓇᒪᐎᓚ ᐁᔥᑾ ᑭ ᓂᔭᓚᓗᒥᑕᓇᐤ ᐱᐴᓀᓯᓐ, ᑭ ᑮ ᐙᐸᒪᐤ ᓈ ᒫᑲ ᐁᑉᕃᐋᒻ? 58 ᒋᓴᔅ ᑮ ᐃᑌᐤ, ᑖᐺ, ᑖᐺ, ᑭᑦ ᐃᑎᓇᐗᐤ, ᐸᒧᔑ ᐃᑖᑦ ᐁᑉᕃᐋᒻ, ᓂ ᑮ ᐃᑖᓐ᙮ 59 ᐁᑯ ᐌᑎᓈᒋᒃ ᐊᓯᓂᔭ ᑭᒋ ᐱᒸᒋᒃ: ᒫᑲ ᒋᓴᔅ ᑮ ᑳᓱ, ᓀᔥᑕ ᑮ ᐅᒋ ᐗᓚᐎᐤ ᑭᒋᐋᔭᒥᐁᐎᑲᒥᑯᒃ, ᐁ ᔕᐳᔥᑲᐙᑦ, ᐁᑯ ᒫᑲ ᐁᔑ ᒥᔮᔥᑳᑫᑦ᙮

9

ᒋᓴᔅ ᒥᓇᐙᒋᐁᐤ ᓈᐯᐗ ᐁᑳ ᐙᐱᓕᒋ

1 ᒣᒀᒡ ᒫᑲ ᒋᓴᔅ ᐁ ᐊᑎ ᐱᒧᑌᑦ, ᑮ ᐙᐸᒣᐤ ᐃᓕᓕᐗ ᐁᑳ ᐁ ᐙᐱᓕᒋ ᐃᔅᑯᓈᒃ ᑳ ᓂᑖᐎᑭᓕᒋ᙮ 2 ᑮ ᑲᑴᒋᒥᑯ ᒫᑲ ᐅ ᑭᔅᑭᓄᐊᒪᐙᑲᓇ, ᐁ ᐃᑗᓕᒋ, ᐅᑭᒪᐤ, ᐊᐌᓇ ᑳ ᒪᒋᑐᑕᒃ, ᐊᐗ ᐃᓕᓕᐤ, ᓀᔥᑕᐱᑯ ᐅᓂᑭᐃᑾ, ᐌᒋ ᐁᑳ ᐙᐱᑦ ᓀᑖᐎᑭᑦ? 3 ᒋᓴᔅ ᑮ ᓇᔥᑴᐗᔑᐃᐌᐤ, ᓇᒪᐎᓚ ᐊᐗ ᐃᓕᓕᐤ ᐅᒋ ᒪᒋᑐᑕᒻ, ᓇᒪ ᓀᔥᑕ ᐅᓂᑭᐃᑾ: ᒫᑲ ᑭᒋᒪᓂᑐ ᐅᑦ ᐋᔨᑎᐎᓇ ᑭᒋ ᓄᑯᑖᓂᐗᓂᓕᑭ ᐅᐅ ᐃᓕᓕᐗ ᐅᒋ᙮ 4 ᓂ ᑳ ᑐᑕᒸᓐ ᐅᑦ ᐋᔨᑎᐎᓇ ᐊᓇ ᑳ ᑮ ᐯᒋᑎᔕᐅᑦ ᐁᔥᑾ ᐁ ᑭᔑᑳᒃ: ᐹᐸᓕᐤ ᐁ ᑎᐱᔅᑳᒃ, ᐃᔅᐱ ᐁᑳ ᐊᐌᓇ ᑫ ᑮ ᐋᐸᑎᓯᑦ᙮ 5 ᐃᔥᐱᔥ ᐁ ᐃᑖᔮᓐ ᐊᔅᑮᒃ, ᓂᓚ ᐅᒋ ᐙᔅᑌᐤ ᐊᔅᑭ᙮ 6 ᐃᔅᐱ ᐅᒣᓕᐤ ᑳ ᑮ ᐃᑗᑦ, ᑮ ᓯᑯ ᒧᔅᑕᔅᑲᒥᒃ, ᓀᔥᑕ ᑮ ᐊᔑᔥᑭᑳᑫᐤ ᓯᑯᐎᓂᓕᐤ, ᑮ ᔑᔓᔥᑭᐗᑭᓇᒬᐤ ᒫᑲ ᐅᔅᑭᔑᑯᓕᐗ ᐁᑳ ᑳ ᐙᐱᓕᒋ ᐃᓕᓕᐗ᙮ 7 ᑮ ᐃᑌᐤ ᒫᑲ, ᒫᒐ, ᑭᒋᔅᑖᐸᐗᓗ ᓴᐃᓗᐊᒻ ᓵᑲᐃᑲᓂᔑᒃ, (ᑳ ᐃᑗᒪᑲᒃ ᐁ ᐃᑗᔅᒋᑳᑌᒃ, ᑳ ᐃᑎᔕᐙᑲᓂᐎᑦ᙮) ᑮ ᑭᑐᑌᐤ ᒫᑲ, ᓀᔥᑕ ᑮ ᑭᒋᔅᑖᐸᐊᓗ, ᑮ ᐯᒋ ᐃᑐᑌᐤ ᒫᑲ ᐁ ᐙᐱᑦ᙮ 8 ᐁᐗᑯ ᐅᒋ ᐎᒋᐃᓕᓕᐗ ᓀᔥᑕ ᐊᓂᐃ ᐋᔕᔾ ᑳ ᑮ ᐙᐸᒥᑯᑦ ᐁᑳ ᐁ ᐙᐱᑦ, ᑮ ᐃᑗᓕᐗ, ᓇᒪᔦᐤ ᓈ ᐊᐗ ᐊᓇ ᑳ ᑮ ᐊᐱᑦ ᐁ ᐸᑯᔑᑣᑦ? 9 ᐋᑎᑦ ᑮ ᐃᑗᐗᒃ, ᐁᐗᑯ ᐊᐗ: ᑯᑕᑭᔭᒃ ᑮ ᐃᑗᐗᒃ, ᓇᔅᐱᑕᐌᐤ: ᒫᑲ ᐎᓚ ᑮ ᐃᑗᐤ, ᓂᓚ ᓂᑦ ᐋᐎᓐ᙮ 10 ᐁᐗᑯ ᐌᒋ ᐃᑖᒋᒃ, ᑖᓐᑌ ᑳ ᐃᔑ ᐋᐸᐃᑳᑌᑭ ᑭᔅᑭᔑᑾ? 11 ᑮ ᓇᔥᑴᐗᔑᐁᐤ ᒫᑲ ᐁ ᐃᑗᑦ, ᐃᓕᓕᐤ ᒋᓴᔅ ᐁ ᐃᔑᓂᑳᓱᑦ, ᑮ ᐊᔑᔥᑭᑫᐤ, ᓀᔥᑕ ᑮ ᔑᔓᓇᒻ ᓂᔅᑭᔑᑾ, ᓀᔥᑕ ᓂ ᑮ ᐃᑎᒃ, ᐃᑐᑌ ᓴᐃᓗᐋᒻ ᓵᑲᐃᑲᓂᔑᒃ, ᓀᔥᑕ ᑭᒋᔅᑖᐸᐗᓗ: ᐁᑯ ᐁᑐᑌᔮᓐ ᓀᔥᑕ ᑫᒌᔅᑖᐸᐗᓗᔮᓐ, ᓂ ᑮ ᒥᓕᑲᐎᓐ ᒫᑲ ᑭᒋ ᐗᐱᔮᓐ᙮ 12 ᐁᑯ ᐁᑖᒋᒃ, ᑖᓐᑌ ᐁᑖᑦ? ᑮ ᐃᑗᐤ, ᓇᒪᐎᓚ ᓂ ᑭᔅᑫᓕᑌᓐ᙮

ᐊᓂᑭ ᐸᕋᓯᔭᒃ ᓈᑕᐎ ᑭᔅᑫᓕᑕᒧᒃ ᑖᓐᑌ ᑳ ᐅᒋ ᐙᐱᑦ ᐊᓇ ᓈᐯᐤ

13 ᑮ ᐯᑐᐌᐗᒃ ᐹᕋᓯᔭ ᐊᓂᐃ ᐊᓄᒋᑫ ᐁᑳ ᑳ ᐙᐱᓕᒋ᙮ 14 ᑮ ᐋᔭᒥᐁᑭᔑᑳᓕᐤ ᒫᑲ ᐃᔅᐱ ᒋᓴᔅ ᑳ ᐊᔑᔥᑭᑫᑦ, ᓀᔥᑕ ᑳ ᐋᐸᐊᒸᑦ ᐅᔅᑭᔑᑯᓕᐗ᙮ 15 ᐁᑯ ᒥᓇ ᐹᕋᓯᔭᒃ ᑫᑴᒋᒫᒋᒃ ᑖᓐᑌ ᑳ ᐅᒋ ᒥᓛᑲᓂᐎᑦ ᑭᒋ ᐙᐱᑦ᙮ ᑮ ᐃᑌᐤ, ᑮ ᔑᔓᔥᑭᐊᑭᓇᒻ ᐊᔑᔥᑭᓕᐤ ᓂᔅᑭᔑᑾ, ᓂ ᑮ ᑭᒋᔅᑖᐸᐗᓗᓐ ᒫᑲ, ᐁᑯ ᐎᐋᐱᔮᓐ᙮ 16 ᐁᐗᑯ ᐌᒋ ᐃᑗᒋᒃ ᐋᑎᑦ ᐹᕋᓯᔭᒃ, ᐊᐗ ᐃᓕᓕᐤ ᓇᒪᐎᓚ ᑭᒋᒪᓂᑐᒃ ᐅᒋᐤ, ᐁᑳ ᐁ ᑲᓇᐎᑖᑦ ᐁ ᐋᔭᒥᐁᑭᔑᑳᓕᒃ᙮ ᑯᑕᑫᔭᒃ ᑮ ᐃᑗᐗᒃ, ᑖᓐᑌ ᑫ ᑮ ᐅᒋ ᑐᑕᒃ ᐅᒪ ᑐᐎ ᒫᒪᔅᑳᒋ ᐃᓯᒋᑫᐎᓇ? ᐁᑯ ᐹᐱᑐᔥ ᐁᑌᓕᑕᑭᒃ᙮ 17 ᒥᓇ ᐃᑌᐗᒃ ᐊᓂᐃ ᐁᑳ ᑳ ᑮ ᐙᐱᓕᒋ, ᑖᓂ ᑭᓇ ᐁᑕᑦ ᐊᓇ ᑳ ᑮ ᐋᐸᐊᒃ ᑮᔅᑭᔑᑾ? ᑮ ᐃᑗᐤ, ᐅᑭᔅᑭᐙᐃᑫᐎᐤ᙮ 18 ᒫᑲ ᒎᐗᒃ ᓇᒪᐎᓚ ᐅᒋ ᑖᐺᑕᒶᒃ ᑳ ᑮ ᐃᑎᒥᒋ, ᐁᑳ ᑳ ᑮ ᐙᐱᓕᒋ, ᐹᑎᒫ ᑳ ᓇᑐᒥᒫᒋᒃ ᐅᓂᑭᐃᑯᓕᐗ ᐊᓂᐃ ᑳ ᒥᓛᑲᓂᐎᓕᒋ ᑭᒋ ᐙᐱᓕᒋ᙮ 19 ᑮ ᑲᑴᒋᒣᐗᒃ ᒫᑲ, ᐁ ᐃᑗᒋᒃ ᐁᐗᑯ ᐊᐗ ᓈ ᑭᑯᓯᔅ, ᑳ ᐃᑌᒃ, ᓇᒪᐎᓚ ᐅᒋ ᐙᐱᐤ ᓀᑖᐎᑭᑦ? ᑖᓐᑌ ᒫᑲ ᐌᒋ ᐙᐱᑦ ᐁᑯ? 20 ᑮ ᓇᔥᑴᐗᔑᐃᑯᐗᒃ ᐅᓂᑭᐃᑯᓕᐗ ᐁ ᐃᑗᓕᒋ, ᓂ ᑭᔅᑫᓕᑌᓈᓐ ᐁᐗᑯ ᐊᐗ ᓂᑯᓯᓯᓈᓐ, ᓀᔥᑕ ᐁᑳ ᑳ ᐙᐱᑦ ᓀᑖᐎᑭᑦ: 21 ᑫᒀᓕᐤ ᒫᑲ ᐊᓄᒡ ᐌᒋ ᐙᐱᑦ ᓇᒪᐎᓚ ᓂ ᑭᔅᑫᓕᑌᓈᓐ; ᓇᒪ ᓀᔥᑕ ᓂ ᑭᔅᑫᓕᑌᓈᓐ ᐊᐌᓕᐗ ᑳ ᐋᐸᐊᒥᓕᒋ ᐅᔅᑭᔑᑾ: ᑎᐱᑕᑐᐱᐴᓀᓯᐤ; ᑲᑴᒋᒥᒃ: ᐎᓚ ᑫᒋᐙᒃ ᑲᑕ ᐋᔭᒥᔅᑕᒫᓱ᙮ 22 ᐅᐅ ᐋᔭᒥᐎᓇ ᑮ ᐃᑗᓕᐗ ᐅᓂᑭᐃᑾ, ᐁ ᑯᔅᑖᓕᒋ ᒎᐗ: ᐌᓴ ᒎᐗᒃ ᐋᔕᔾ ᑮ ᓇᔅᑯᒥᑐᐗᒃ, ᑮᔥᐱᓐ ᐊᐌᓇ ᑫ ᐃᑗᑴ ᐁ ᐋᐎᓕᒋ ᙭, ᐋᔭᒥᐁᐎᑲᒥᑯᒃ ᑭᒋ ᐅᒋ ᐗᓚᐎᑎᔑᓈᑲᓂᐎᑦ᙮ 23 ᐁᐗᑯ ᐌᒋ ᐃᑗᓕᒋ ᐅᓂᑭᐃᑾ, ᑎᐱᑕᑐᐱᐴᓀᓯᐤ; ᑲᑴᒋᒥᒃ᙮ 24 ᐁᑯ ᒥᓇ ᓀᑐᒫᒋᒃ ᐊᓂᐃ ᐃᓕᓕᐗ ᐁᑳ ᑳ ᑮ ᐙᐱᓕᒋ, ᓀᔥᑕ ᑮ ᐃᑌᐗᒃ, ᒦᓐ ᑭᒋᒪᓂᑐ ᒫᒥᒋᒥᑯᓯᐎᓕᓕᐤ: ᓂ ᑭᔅᑫᓕᑌᓈᓐ ᐊᐗ ᐃᓕᓕᐤ ᐁ ᒪᒋᑣᑦ᙮ 25 ᐁ ᓇᔥᑴᐗᔑᐃᐌᑦ ᒫᑲ, ᑮ ᐃᑗᐤ, ᓇᒪᐎᓚ ᓂ ᑭᔅᑫᓕᑌᓐ ᒣᒋᑣᑴ: ᐯᔭᒃ ᒫᑲ ᑫᒀᓐ ᓂ ᑭᔅᑫᓕᑌᓐ, ᐁᐗᑯ, ᐁᑳ ᐁ ᐅᒋ ᐙᐱᔮᓐ, ᐊᓄᒡ ᓂ ᐙᐱᓐ᙮ 26 ᐁᑯ ᒥᓇ ᐁᑖᒋᒃ, ᑖᓂ ᑳ ᑐᑖᔉ? ᑖᓐᑌ ᑳ ᐅᒋ ᐋᐸᐊᒃ ᑮᔅᑭᔑᑾ? 27 ᑮ ᓇᔥᑴᐗᔑᐁᐤ, ᐋᔕᔾ ᑭ ᑮ ᐎᑕᒫᑎᓇᐗᐤ, ᓇᒪ ᒫᑲ ᑭ ᐅᒋ ᓇᑐᑌᓇᐗᐤ: ᑖᓀᑭ ᐌᒋ ᒥᓇ ᐎ ᐯᑕᒣᒃ? ᑭᓚᐗᐤ ᓈ ᓀᔥᑕ ᑭ ᓇᑕᐌᓕᑌᓇᐗᐤ ᑭᒋ ᐅ ᑭᔅᑭᓄᐊᒪᐙᑲᓂᒥᑖᒃ? 28 ᐁᑯ ᑳ ᑭᑳᒫᒋᒃ, ᓀᔥᑕ ᑮ ᐃᑗᐗᒃ, ᑭᓚ ᑭᑦ ᐅᑭᔅᑭᓄᐊᒪᐙᑲᓂᒥᒃ; ᒫᑲ ᓂᓚᓈᓐ ᒧᓯᔅ ᓂᑦ ᐅ ᑭᔅᑭᓄᐊᒪᐙᑲᓂᒥᑯᓈᓐ᙮ 29 ᓂ ᑭᔅᑫᓕᑌᓈᓐ ᑭᒋᒪᓂᑐ ᐁ ᑮ ᐋᔭᒥᐋᑦ ᒧᓯᓴ: ᐊᐗ ᐃᓕᓕᐤ ᒫᑲ ᓇᒪᐎᓚ ᓂ ᑭᔅᑫᓕᑌᓈᓐ ᐃᑕ ᐌᒌᑦ᙮ 30 ᐊᓇ ᐃᓕᓕᐤ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑖᐺ ᐅᒪ ᒫᒪᔅᑳᑌᓕᑖᑾᓐ, ᐁᑳ ᐁ ᑭᔅᑫᓕᑕᒣᒃ ᐃᑕ ᐌᒌᑦ, ᐁᓕᐌᒃ ᒫᑲ ᐁ ᑮ ᐋᐸᐊᒃ ᓂᔅᑭᔑᑾ᙮ 31 ᑭ ᑭᔅᑫᓕᑌᓈᓇᐤ ᒫᑲ ᑭᒋᒪᓂᑐ ᐁᑳ ᐁ ᓇᑐᑕᐙᑦ ᐅᒪᒋᑣᐗ: ᒫᑲ ᑮᔥᐱᓐ ᐊᐌᓇ ᓀᐗᑮᔅᑕᐙᑴ ᑭᒋᒪᓂᑐᐗ, ᓀᔥᑕ ᐁᑐᑕᒸᑴ ᐅᑦ ᐃᑌᓕᑐᒧᐎᓂᓕᐤ, ᐁᐗᑯ ᓀᑐᑖᑯᑦ᙮ 32 ᑳ ᐃᔥᐱᔑ ᐊᔅᑭᐗᒃ ᓇᒪᐎᔅᑳᑦ ᐅᒋ ᐯᑖᑾᓐ ᐊᐌᓇ ᑭᒋ ᐋᐸᐊᒸᑦ ᐅᔅᑭᔑᑯᓕᐗ ᐊᐌᓕᐗ ᐁᑳ ᐁ ᐅᒋ ᐙᐱᓕᒋ ᓀᑕᐎᑭᓕᒋ᙮ 33 ᑮᔥᐱᓐ ᐊᐗ ᐃᓕᓕᐤ ᐁᑳ ᑭᒋᒪᓂᑐᒃ ᐅᒋᑯᐸᓀ, ᓇᒪᐎᓚ ᑫᒀᓕᐤ ᑲᑕ ᑮ ᑐᑕᒧᐸᓐ᙮ 34 ᐁ ᓇᔥᑴᐗᔑᐋᒋᒃ ᒫᑲ ᑮ ᐃᑌᐗᒃ, ᒥᑐᓂ ᒪᒋᑣᐎᓂᒃ ᑭ ᑮ ᓂᑖᐎᑭᓐ, ᑭ ᑭᔅᑭᓄᐊᒪᐎᓈᓐ ᓈ ᒫᑲ ᓂᓚᓈᓐ? ᐁᑯ ᐌᓚᐎᑎᔑᓈᒋᒃ᙮

ᐊᒑᑯᐎ ᐊᑯᐙᔅᑌᐎᓐ

35 ᒋᓴᔅ ᑮ ᐯᑕᒻ ᐁ ᑮ ᐗᓚᐎᑎᔑᓈᓕᒋ; ᐃᔅᐱ ᒫᑲ ᑳ ᒥᔅᑲᐙᑦ, ᑮ ᐃᑌᐤ, ᑭ ᑖᐺᔦᓕᒥᒫᐗ ᓈ ᑭᒋᒪᓂᑐ ᐅᑯᓯᓴ? 36 ᑮ ᓇᔥᑴᐗᔑᐃᐌᐤ ᒫᑲ ᐁ ᐃᑗᑦ, ᐊᐌᓇ ᐊᓇ, ᑌᐯᓕᒋᑫᔭᓐ, ᑭᒋ ᑮ ᑖᐺᔦᓕᒪᒃ? 37 ᒋᓴᔅ ᒫᑲ ᑮ ᐃᑌᐤ, ᑭ ᑮ ᐙᐸᒪᐤ, ᓀᔥᑕ ᐁᐗᑯ ᑳ ᐋᔭᒥᐃᔉ᙮ 38 ᑮ ᐃᑗᐤ ᒫᑲ, ᑌᐯᓕᒋᑫᔭᓐ, ᓂ ᑖᐺᑌᓐ᙮ ᐁᑯ ᓀᐗᑮᔅᑕᐙᑦ᙮ 39 ᒋᓴᔅ ᒫᑲ ᑮ ᐃᑗᐤ, ᑎᐹᔅᑯᓂᑫᐎᓐ ᐁᐗᑯ ᐌᒋ ᑮ ᐯᒋ ᐃᑐᑌᔮᓐ ᐅᑕ ᐊᔅᑮᒃ, ᐊᓂᑭ ᐁᑳ ᑳ ᐙᐱᒋᒃ ᑭᒋ ᐙᐱᒋᒃ; ᓀᔥᑕ ᐊᓂᑭ ᑳ ᐙᐱᒋᒃ ᑭᒋ ᐃᔑ ᑐᑕᐙᑲᓂᐎᒋᒃ ᐁᑳ ᑭᒋ ᐙᐱᒋᒃ᙮ 40 ᐋᑎᑦ ᒫᑲ ᐹᕋᓯᔭᒃ ᑳ ᐎᒉᐎᑯᑦ ᑮ ᐯᑕᒥᓕᐗ ᐅᐅ ᐋᔭᒥᐎᓇ, ᑮ ᐃᑎᑯ ᒫᑲ, ᓂᓚᓈᐤ ᓈ ᐊᓯᒋ ᓇᒪᐎᓚ ᓂ ᐙᐱᓈᓐ᙮ 41 ᒋᓴᔅ ᑮ ᐃᑌᐤ, ᑮᔥᐱᓐ ᐁᑳ ᐙᐱᐌᑯᐸᓀ, ᓇᒪᐎᓚ ᑭ ᑳ ᑮ ᐋᔮᑕᐗᐤ ᒪᒋᑣᐎᓐ: ᒫᑲ ᐊᓄᒡ ᑭᑦ ᐃᑣᓇᐗᐤ, ᓂ ᐙᐱᓈᓐ; ᐁᐗᑯ ᐌᒋ ᑫᔮᐸᒡ ᐃᑕᑾᒃ ᑭ ᒪᒋᑣᐎᓂᐗᐤ᙮

10

ᐊᓂᒪ ᒫᓂᔥᒑᓂᓯᐎᓕᓕᐤ ᓈᔅᐱᑐᐎ ᐋᑕᓗᑳᓐ

1 ᑖᐺ, ᑖᐺ, ᑭᑦ ᐃᑎᓇᐗᐤ, ᐊᓇ ᐁᑳ ᐃᔥᒀᑌᒥᒃ ᑳ ᐅᒋ ᐱᑐᑫᑦ ᒫᓂᔥᒑᓂᔑᑲᒥᑯᒃ, ᒫᑲ ᑳ ᐃᔅᒀᑕᐎᑦ ᐱᑐᔥ ᐃᔑ, ᐁᐗᑯ ᑭᒧᑎᔅᑭᐤ ᓀᔥᑕ ᒪᔅᑲᑗᔅᑭᐤ᙮ 2 ᒫᑲ ᐊᓇ ᐃᔥᒀᑌᒥᒃ ᑳ ᐅᒋ ᐱᑐᑫᑦ, ᐁᐗᑯ ᒫᓂᔥᒑᓂᔕᒃ ᐅ ᒫᓂᔥᒑᓂᔑᐎᓕᓕᒥᐙᐗ᙮ 3 ᐁᐗᑯ ᐃᐋᐸᐊᒫᑯᑦ ᐅᑲᓇᐎᔅᒀᑕᐎᐗ; ᓀᔥᑕ ᒫᓂᔥᒑᓂᔕ ᓇᑐᑕᒥᓕᐗ ᐅ ᐯᑖᑯᓯᐃᓐ: ᓀᔥᑕ ᓇᑐᒣᐤ ᐎᓚ ᑎᐱᓚᐌ ᐅ ᒫᓂᔥᒑᓂᔑᒪ ᐁ ᐎᓛᑦ, ᓀᔥᑕ ᐗᓚᐎᑭᔅᑭᓄᑕᐁᐤ᙮ 4 ᐃᔅᐱ ᒫᑲ ᐌᓚᐎᑕᐋᒋ ᐎᓚ ᑎᐱᓚᐌ ᐅ ᒫᓂᔥᒑᓂᔑᒪ, ᓂᑳᓄᑕᐌᐤ, ᓄᔅᐱᓈᑎᑯ ᒫᑲ ᒫᓂᔥᒑᓂᔕ: ᐌᓴ ᓂᓯᑐᑕᒥᓕᐗ ᐅ ᐯᑖᑯᓯᐎᓐ᙮ 5 ᒫᓐᑌᐗ ᒫᑲ ᓇᒪᐎᓚ ᑲᑕ ᓄᔅᐱᓇᑌᐗᒃ, ᒫᑲ ᑲᑕ ᐅᔑᒣᐗᒃ: ᐌᓴ ᓇᒪᐎᓚ ᓂᓯᑐᑕᒬᐗᒃ ᒫᓐᑌᐗ ᐅ ᐯᑖᑯᓯᐎᓂᓚᐤ᙮ 6 ᐅᒣᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ ᒋᓴᔅ ᑮ ᐃᑌᐤ: ᒫᑲ ᓇᒪᐎᓚ ᐅᒋ ᓂᓯᑐᑕᒬᐗᒃ ᐊᓂᐃ ᑫᒀᓇ ᑳ ᑮ ᐋᓕᒧᑕᒫᑯᒋᒃ᙮

ᒋᓴᔅ ᐊᓇ ᒥᓗ ᒫᓂᔥᒑᓂᔑᐎᓕᓕᐤ

7 ᐁᑯ ᒋᓴᔅ ᒥᓇ ᐁᑖᑦ, ᑖᐺ, ᑖᐺ, ᑭᑦ ᐃᑎᓇᐗᐤ, ᓂᓚ ᐁᐗᑯ ᒫᓂᔥᒑᓂᔕᒃ ᐅᑦ ᐃᔥᒀᑌᒥᐗᐤ᙮ 8 ᒥᓯᐌ ᐊᓂᑭ ᑳ ᑮ ᐯᒋ ᐃᑐᑌᒋᒃ ᐸᒧᔑ ᐯᒋ ᐃᑐᑌᔮᓐ ᑮ ᑭᒧᑎᔅᑭᐗᒃ ᓀᔥᑕ ᑮ ᒪᔅᑲᑗᔅᑭᐗᒃ: ᒫᑲ ᓇᒪᐎᓚ ᐅᒋ ᓇᑐᑖᑯᐗᒃ ᒫᓂᔥᒑᓂᔕ᙮ 9 ᓂᓚ ᐁᐗᑯ ᐃᔥᒀᑌᒻ: ᑮᔥᐱᓐ ᐊᐌᓇ ᓂᓚ ᐅᒋ ᐱᑐᑫᑌ, ᑲᑕ ᐱᒫᒋᐋᑲᓂᐎᐤ, ᑲᑕ ᐱᑐᑫᐤ ᒫᑲ ᓀᔥᑕ ᑲᑕ ᐗᓚᐎᐤ, ᑲᑕ ᒥᔅᑲᒻ ᒫᑲ ᒥᒋᓱᐎᓂᓕᐤ᙮ 10 ᑭᒧᑎᔉ ᓇᒪᐎᓚ ᐯᒋ ᐃᑐᑌᐤ ᐱᑯ ᐙ ᑭᒧᑎᒋ, ᓀᔥᑕ ᐙ ᓂᐹᔨᐌᒋ, ᓀᔥᑕ ᐙ ᓂᔑᐗᓈᒋᐃᐌᒋ: ᓂᓚ ᓂ ᑮ ᐯᒋ ᐃᑐᑖᓐ ᑭᒋ ᐋᔮᒋᒃ ᐱᒫᑎᓯᐎᓂᓕᐤ, ᓀᔥᑕ ᐊᐙᓯᑌ ᑭᒋ ᐌᓗᒋᑖᒋᒃ᙮ 11 ᓂᓚ ᐁᐗᑯ ᒥᓗ ᒫᓂᔥᒑᓂᔑᐎᓕᓕᐤ: ᒥᓗ ᒫᓂᔥᒑᓂᔑᐎᓕᓕᐤ ᒥᓕᐌᐤ ᐅ ᐱᒫᑎᓯᐎᓐ ᒫᓂᔥᒑᓂᔕ ᐅᒋ᙮ 12 ᐊᓇ ᒫᑲ ᑳ ᐋᐸᒋᐋᑲᓂᐎᑦ, ᐁᑳ ᒫᑲ ᐁ ᒫᓂᔥᒑᓂᔑᐎᓕᓕᐎᑦ, ᐁᑳ ᐁ ᑎᐱᓚᐌᐎᓯᑦ ᒫᓂᔥᒑᓂᔕ, ᐙᐸᒣᐤ ᒪᐃᑲᓇ ᐁ ᐯᒋ ᐃᑐᑌᓕᒋ, ᐁᑯ ᓀᑲᑖᑦ ᒫᓂᔥᒑᓂᔕ, ᓀᔥᑕ ᐅᔑᒧ: ᐁᑯ ᒪᐃᑲᓐ ᒥᔮᑯᓈᑦ, ᓀᔥᑕ ᐗᓴᓶᑎᔕᐌᐤ ᒫᓂᔥᒑᓂᔕ᙮ 13 ᑳ ᐋᐸᒋᐋᑲᓂᐎᑦ ᐃᓕᓕᐤ ᐅᔑᒧ ᐁ ᐋᐸᒋᐋᑲᓂᐎ ᐃᓕᓕᐎᑦ, ᓀᔥᑕ ᐁᑳ ᐁ ᑕᑴᓕᒫᑦ ᒫᓂᔥᒑᓂᔕ᙮ 14 ᓂᓚ ᐁᐗᑯ ᒥᓗ ᒫᓂᔥᒑᓂᔑᐎᓕᓕᐤ, ᓀᔥᑕ ᓂ ᑭᔅᑫᓕᒫᐗᒃ ᓂ ᒫᓂᔥᒑᓂᔑᒪᒃ, ᓀᔥᑕ ᓂ ᑭᔅᑫᓕᒥᑾᒃ ᐊᓂᑭ ᑳ ᑎᐱᓚᐌᐎᓯᔮᓐ᙮ 15 ᑖᐱᔅᑯᒡ ᐅᑖᐎᒪᐤ ᐁ ᐃᔑ ᑭᔅᑫᓕᒦᑦ, ᐁᑯ ᓀᔥᑕ ᐁᔑ ᑭᔅᑫᓕᒪᒃ ᐅᑖᐎᒪᐤ: ᓂ ᐱᒥᑎᑖᓐ ᒫᑲ ᓂ ᐱᒫᑎᓯᐎᓐ ᒫᓂᔥᒑᓂᔕᐤ ᐅᒋ᙮ 16 ᑯᑕᑭᔭᒃ ᓀᔥᑕ ᒫᓂᔥᒑᓂᔕᒃ ᓂᑦ ᐋᔭᐙᐗᒃ ᐁᑳ ᐅᒪ ᒫᓂᔥᒑᓂᔑᑲᒥᑯᒃ ᐁ ᐃᑖᒋᒃ ᐁᐗᒀᓂᑭ ᔮᓕᑌᓪ ᑫ ᐯᔑᐗᑭᒃ, ᑲᑕ ᓇᑐᑕᒶᒃ ᒫᑲ ᓂ ᐯᑖᑯᓯᐎᓂᓕᐤ; ᐁᑯ ᑫ ᐯᔭᑾᒃ ᒫᓂᔥᒑᓂᔑᑲᒥᒃ, ᓀᔥᑕ ᑫ ᐯᔭᑯᑦ ᒫᓂᔥᒑᓂᔑᐎᓕᓕᐤ᙮ 17 ᐁᐗᑯ ᐌᒋ ᓄᑖᐎ ᓵᑭᐃᑦ, ᐁ ᐱᒥᑎᑖᔮᓐ ᓂ ᐱᒫᑎᓯᐎᓐ, ᒥᓇ ᑭᒋ ᑮ ᐅᑎᓇᒫᓐ᙮ 18 ᓇᒪᐎᓚ ᐊᐌᓇ ᓂ ᒪᔅᑲᒥᒃ, ᒫᑲ ᓂ ᐱᒥᑎᑖᓐ ᓂᓚ ᑫᒋᐙᒃ᙮ ᓂᑦ ᐋᔮᓐ ᑲᔥᑭᐅᐎᓐ ᑭᒋ ᐱᒥᑎᑖᔮᓐ, ᓀᔥᑕ ᓂᑦ ᐋᔮᓐ ᑲᔥᑭᐅᐎᓐ ᒥᓇ ᑭᒋ ᐅᑎᓇᒫᓐ᙮ ᐅᒪ ᐅᓚᔓᐌᐎᓐ ᓂ ᑮ ᒥᓕᒃ ᓄᑖᐎ᙮ 19 ᐁᐗᑯ ᐌᒋ ᒥᓇ ᐹᐸᑳᓐ ᐃᑗᒋᒃ ᒎᐗᒃ ᐅᐅ ᐋᔭᒥᐎᓇ ᐅᒋ᙮ 20 ᒥᒉᑦ ᐁ ᐃᑕᓯᒋᒃ ᒫᑲ ᑮ ᐃᑗᐗᒃ, ᐋᔭᐌᐤ ᒪᒋ ᐊᒑᑾ, ᓀᔥᑕ ᑮᔥᑴᐤ; ᑖᓀᑭ ᐌᒋ ᓇᑐᑕᐌᒃ? 21 ᑯᑕᑭᔭᒃ ᑮ ᐃᑗᐗᒃ, ᐅᐅ ᓇᒪᔦᓕᐗ ᐅᑦ ᐋᔭᒥᐎᓇ ᐊᐌᓇ ᒪᒋ ᐊᒑᑾ ᐁ ᐋᔭᐙᑦ᙮ ᒪᒋ ᐊᒑᒃ ᓈ ᑲᑕ ᑮ ᐋᐸᐊᒬᐤ ᐅᔅᑭᔑᑯᓕᐗ ᐊᐌᓕᐗ ᐁᑳ ᐁ ᐙᐱᓕᒋ?

ᒋᓴᔅ ᐋᑕᐌᓕᒫᑲᓂᐎᐤ

22 ᑮ ᐃᑭᓐ ᒫᑲ ᒋᕉᓴᓚᒥᒃ ᒣᒀᒡ ᐁ ᐸᑳᓇᔅᑕᐎ ᒪᑯᔖᓂᐗᒃ, ᓀᔥᑕ ᑮ ᐱᐴᓄᐸᓐ ᒣᒀᒡ᙮ 23 ᒋᓴᔅ ᒫᑲ ᑮ ᐱᒧᑌᐤ ᑭᒋᐋᔭᒥᐁᐎᑲᒥᑯᒃ ᓴᓚᒪᓇ ᐅ ᐱᔅᑭᒋ ᐙᔅᑳᔨᑲᓂᓕᒃ᙮ 24 ᐁᑯ ᐱᐁᒋ ᐙᔅᑳᔅᑳᑯᑦ ᒎᐗ, ᓀᔥᑕ ᑮ ᐃᑎᑯ, ᑖᓂ ᑫ ᐃᔥᐱᔑ ᐙᐙᓀᓕᑕᒥᐃᔮᒃ? ᑮᔥᐱᓐ ᐃᐋᐎᐗᓀ ᙭, ᒧᔑᔐ ᐎᑕᒪᐎᓈᓐ᙮ 25 ᒋᓴᔅ ᑮ ᓇᔥᑴᐗᔑᐁᐤ, ᑭ ᑮ ᐎᑕᒫᑎᓇᐗᐤ, ᓇᒪᐎᓚ ᒫᑲ ᑭ ᐅᒋ ᑖᐺᑌᓇᐗᐤ: ᐊᓂᐃ ᐋᔨᑎᐎᓇ ᑳ ᑐᑕᒫᓐ ᓄᑖᐎ ᐅᑦ ᐃᔑᓂᑳᓱᐎᓂᒃ ᓂ ᑎᐹᒋᒥᑯᓐ᙮ 26 ᒫᑲ ᓇᒪᐎᓚ ᑭ ᑖᐺᑌᓇᐗᐤ, ᐁᑳ ᐁ ᐊᔑᑕᑭᒥᑲᐎᔦᒃ ᓂ ᒫᓂᔥᒑᓂᔑᒪᒃ, ᑖᐱᔅᑯᒡ ᐁ ᑮ ᐃᑎᑕᑾᒃ᙮ 27 ᓂ ᒫᓂᔥᒑᓂᔑᒪᒃ ᓇᑐᑕᒶᒃ ᓂ ᐯᑖᑯᓯᐎᓂᓕᐤ, ᓀᔥᑕ ᓂ ᑭᔅᑫᓕᒪᐗᒃ ᓂ ᓄᔅᐱᓈᑎᑾᒃ ᓀᔥᑕ᙮ 28 ᓀᔥᑕ ᓂ ᒥᓛᐗᒃ ᑳᑭᑫ ᐱᒫᑎᓯᐎᓂᓕᐤ; ᓇᒪᐎᔅᑳᑦ ᒫᑲ ᑲᑕ ᓂᔑᐗᓈᑎᓯᐗᒃ, ᓇᒪᐎᓚ ᓀᔥᑕ ᐊᐌᓇ ᓂ ᑳ ᑮ ᒪᔅᑲᒥᒃ ᓂᒌᒌᒃ ᐅᒋ᙮ 29 ᓄᑖᐎ, ᑳ ᑮ ᒥᓕᑦ ᐊᐙᓯᑌ ᑭᔅᑌᓕᑖᑯᓯᐤ ᐃᔥᐱᔥ ᒥᓯᐌ; ᓀᔥᑕ ᓇᒪᐎᓚ ᐊᐌᓇ ᑲᑕ ᑮ ᒪᔅᑲᒣᐤ ᓄᑖᐎᔭ ᐅᒋᒋᓕᒃ ᐅᒋ᙮ 30 ᓂᓚ ᓀᔥᑕ ᓄᑖᐎ ᓂ ᐯᔭᑯᓈᓐ᙮ 31 ᐁᑯ ᒎᐗᒃ ᒥᓇ ᐌᑎᓈᒋᒃ ᐊᓯᓂᔭ ᑭᒋ ᐱᒧᓯᓈᑕᐙᒋᒃ᙮ 32 ᒋᓴᔅ ᑮ ᓇᔥᑴᐗᔑᐁᐤ, ᒥᒉᑦ ᒥᓗ ᐋᔨᑎᐎᓇ ᑭ ᑮ ᐙᐸᑎᓕᑎᓇᐗᐤ ᓄᑖᐎ ᐅᒋ; ᑖᓐ ᐊᓂ ᐋᔨᑎᐎᓐ ᐙ ᐅᒋ ᐱᒧᓯᓈᑕᐅᔦᒃ? 33 ᒎᐗᒃ ᑮ ᓇᔥᑴᐗᔑᐁᐗᒃ, ᐁ ᐃᑗᒋᒃ, ᓇᒪᐎᓚ ᑭ ᐎ ᐱᒧᓯᓈᑕᐅᑎᓈᓐ ᒥᓗ ᐋᔨᑎᐎᓐ ᐅᒋ; ᒫᑲ ᐹᔅᑕᒧᐎᓐ ᐅᒋ; ᓀᔥᑕ ᐁ ᑭᒋᒪᓂᑐᑳᓱᔭᓐ ᐋᑕ ᐁ ᐃᓕᓕᐎᔭᓐ᙮ 34 ᒋᓴᔅ ᑮ ᓇᔥᑴᐗᔑᐁᐤ, ᓇᒪ ᓈ ᒪᓯᓇᐃᑳᑌᐤ ᑭᑦ ᐅᓚᔓᐌᐎᓂᐙᒃ, ᓂ ᑮ ᐃᑣᓐ, ᑭᓚᐗᐤ ᑭ ᒪᓂᑐᐎᓇᐗᐤ? 35 ᑮᔥᐱᓐ ᒪᓂᑐᐗᒃ ᑳ ᐃᔑᓂᑳᑖᑴ ᐊᓂᐃ ᑳ ᑮ ᐅᑎᑎᑯᓕᒋ ᑭᒋᒪᓂᑐᐗ ᐅᑦ ᐋᔭᒥᐎᓀᓕᐤ, ᑭᒋ ᒪᓯᓇᐃᑫᐎᓐ ᒫᑲ ᓇᒪᐎᓚ ᑲᑕ ᑮ ᐱᑯᐱᒋᑳᑌᐤ; 36 ᑭᑦ ᐃᑖᐗᐤ ᓈ ᐊᓇ ᑳ ᐸᓓᑭᐃᑯᑦ ᐅᑖᐎᒪᐗ, ᓀᔥᑕ ᑳ ᑮ ᐯᒋᑎᔕᐅᑯᑦ ᐊᔅᑮᒃ, ᑭ ᐹᔅᑕᒧᓐ; ᐁ ᑮ ᐃᑗᔮᓐ, ᓂᓚ ᑭᒋᒪᓂᑐ ᐅᑯᓯᓴ? 37 ᑮᔥᐱᓐ ᐁᑳ ᐁᑐᑕᒸᐗᑫ ᓄᑖᐎ ᐅᑦ ᐋᔨᑎᐎᓇ, ᐁᑳᐎᓚ ᑖᐺᑕᐎᒃ᙮ 38 ᒫᑲ ᑮᔥᐱᓐ ᐁᑐᑕᒸᐗᑫ, ᐋᑕ ᐁᑳ ᐁ ᑖᐺᑕᐎᔦᒃ, ᑖᐺᑕᒧᒃ ᐋᔨᑎᐎᓇ: ᑭᒋ ᑭᔅᑫᓕᑕᒣᒃ ᓀᔥᑕ ᑭᒋ ᑖᐺᑕᒣᒃ ᐁ ᐱᒋᔅᑲᐎᑦ ᐅᑖᐎᒪᐤ, ᓂᓚ ᓀᔥᑕ ᐁ ᐱᒋᔅᑲᐗᒃ᙮ 39 ᐁᐗᑯ ᐌᒋ ᒥᓇ ᐎ ᐅᑎᑎᓈᒋᒃ: ᒫᑲ ᑮ ᑭᐃᑯᐗᒃ 40 ᒥᓇ ᓀᔥᑕ ᑮ ᐃᑐᑌᐤ ᐊᑳᒥᒃ ᒐᕐᑕᓂᒃ, ᐃᑕ ᒑᓐ ᓃᔥᑕᒻ ᑳ ᑮ ᓯᑲᐋᑖᑫᑦ; ᐁᑯᑕ ᒫᑲ ᑌᔑᑫᑦ᙮ 41 ᑮ ᐯᒋ ᓈᑎᑯ ᒫᑲ ᒥᒉᑦ, ᓀᔥᑕ ᑮ ᐃᑗᓕᐗ, ᒑᓐ ᓇᒪᐎᓚ ᐅᒋ ᑐᑕᒻ ᒫᒪᔅᑳᒋ ᐃᓯᒋᑫᐎᓂᓕᐤ: ᒫᑲ ᒥᓯᐌ ᑫᒀᓇ ᑳ ᑮ ᐃᑖᒋᒫᑦ ᒑᓐ ᐅᐅ ᐃᓕᓕᐗ ᑖᐺᒪᑲᓂᓕᐗ᙮ 42 ᒥᒉᑦ ᒫᑲ ᐁᑯᑕ ᑎᐋᐺᔦᓕᒥᑯᑦ᙮

11

ᓛᓴᕋᔅ ᓂᐱᐤ

1 ᑮ ᐃᑖᐤ ᒫᑲ ᐃᓕᓕᐤ ᐁ ᐋᑯᓯᑦ, ᓛᓴᕋᔅ ᐁ ᐃᔑᓂᑳᓱᑦ, ᐯᑕᓂ ᐅᒋ, ᐅᑦ ᐃᑖᐎᓂᐗᒃ ᒣᕆ ᓀᔥᑕ ᒫᕐᑕ ᐎᒋᔖᓂᔅᑴᒪ᙮ 2 (ᐁᐗᑯ ᐊᓇ ᒣᕆ ᑳ ᑮ ᑕᒪᔅᑯᓈᑦ ᑌᐯᓕᒋᑫᓕᒋ ᑕᒪᔅᑯᐎᓂᓕᐤ, ᓀᔥᑕ ᑳ ᑮ ᑳᓯᓯᑌᓈᑦ ᐅᔅᑎᒀᓂᐱᐗᔭ, ᐎᒋᔖᓇ ᓛᓴᕋᔅ ᑳ ᐋᑯᓯᓕᒋ᙮) 3 ᐁᐗᑯ ᐌᒋ ᐃᑎᔕᐊᒫᑯᑦ ᐊᐌᓕᐗ ᐎᒋᔖᓂᔅᑴᒪ, ᐁ ᐃᑗᓕᒋ, ᑌᐯᓕᒋᑫᔭᓐ, ᒫᑎᑲ, ᐊᓇ ᑳ ᓵᑭᐊᑦ ᐋᑯᓯᐤ᙮ 4 ᐃᔅᐱ ᒋᓴᔅ ᐱᐁᑕᒃ, ᑮ ᐃᑗᐤ, ᐅᒪ ᐋᑯᓯᐎᓐ ᓇᒪᐎᓚ ᓂᐱᐎᓂ ᑲᑕ ᐃᔅᐸᓕᐤ, ᒫᑲ ᑭᒋ ᐅᒋ ᒫᒥᒋᒫᑲᓂᐎᑦ ᑭᒋᒪᓂᑐ, ᑭᒋᒪᓂᑐ ᐅᑯᓯᓴ ᑭᒋ ᐅᒋ ᒫᒥᒋᒫᑲᓂᐎᓕᒋ᙮ 5 ᒋᓴᔅ ᒫᑲ ᑮ ᓵᑭᐁᐤ ᒫᕐᑕᐊ, ᓀᔥᑕ ᐎᒋᔖᓂᔅᑴᒥᓕᐗ ᓀᔥᑕ ᓈᓴᕋᓴ᙮ 6 ᐃᔅᐱ ᒫᑲ ᑳ ᐯᑕᒃ ᐁ ᐋᑯᓯᓕᒋ, ᑫᔮᐸᒡ ᓂᔓ ᑭᔑᑲᐗ ᑮ ᑕᔑᑫᐤ ᐃᑕ ᐁᑖᑦ᙮ 7 ᐹᑎᒪ ᐊᓂᐁᓕᐤ ᐃᑌᐤ ᐅ ᑭᔅᑭᓄᐊᒪᐙᑲᓇ, ᒥᓇ ᐃᑐᑌᑕᐤ ᒎᑎᐊᐃᒃ᙮ 8 ᐅ ᑭᔅᑭᓄᐊᒪᐙᑲᓇ ᐃᑎᑯ, ᐅᑭᒪᐤ, ᒎᐗᒃ ᐊᓄᒋᑫ ᑭ ᐎ ᐱᒧᓯᓈᑕᐅᑾᒃ; ᒥᓇ ᓈ ᒫᑲ ᐊᓐᑕ ᑭᑦ ᐃᑐᑖᓐ? 9 ᒋᓴᔅ ᑮ ᓇᔥᑴᐗᔑᐃᐌᐤ, ᓇᒪ ᓈ ᓂᔓᔖᑉ ᐃᑕᑎᓋ ᑎᐹᔨᑲᓇ ᐱᓯᒧᑳᓂᒃ ᐯᔭᑾᐤ ᐁ ᑭᔑᑳᒃ? ᑮᔥᐱᓐ ᐊᐌᓇ ᐯᒧᑌᒋ ᐁ ᑭᔑᑳᓕᒃ, ᓇᒪᐎᓚ ᐱᓱᐊᒪᐤ, ᐁ ᐙᐸᑕᒃ ᐙᔅᑌᐎᓂᓕᐤ ᐅᑕ ᐊᔅᑮᒃ ᑳ ᐃᑕᑾᓂᓕᒃ᙮ 10 ᒫᑲ ᑮᔥᐱᓐ ᐊᐌᓇ ᐯᒧᑌᒋ ᐁ ᑎᐱᔅᑳᓕᒃ ᐱᓱᐊᒫᐤ, ᐁᑳ ᐁ ᐱᒋᔅᑳᑯᑦ ᐙᔅᑌᐎᓂᓕᐤ᙮ 11 ᐅᐅ ᑫᒀᓇ ᑮ ᐃᑗᐤ: ᐹᑎᒫ ᒫᑲ ᐃᑌᐤ, ᑭᑐᑌᒥᓇᐤ ᓛᓴᕋᔅ ᓂᐸᐤ; ᒫᑲ ᓂᑦ ᐃᑐᑖᓐ ᑭᒋ ᑯᔅᑯᓇᒃ ᐁ ᓂᐹᑦ᙮ 12 ᐁᑯ ᐅ ᑭᔅᑭᓄᐊᒪᐙᑲᓇ ᐁᑗᓕᒋ, ᑌᐯᓕᒋᑫᔭᓐ, ᑮᔥᐱᓐ ᓀᐹᑴ, ᑲᑕ ᒥᓗ ᐋᔭᐤ᙮ 13 ᒋᓴᔅ ᒫᑲ ᑮ ᐋᓕᒧᑕᒬᐤ ᐅ ᓂᐱᐎᓂᓕᐤ: ᒫᑲ ᐎᓚᐗᐤ ᐁ ᐋᓜᓯᓈᓂᐗᒃ ᐁ ᓂᐹᓂᐗᒃ ᐋᓕᒧᑕᒻ, ᑮ ᐃᑌᓕᒣᐗᒃ᙮ 14 ᐁᑯ ᒋᓴᔅ ᒧᔑᔐ ᐁᑖᑦ, ᓛᓴᕋᔅ ᑮ ᓂᐱᐤ᙮ 15 ᓀᔥᑕ ᓂ ᒥᓜᓕᑌᓐ ᑭᓚᐗᐤ ᐅᒋ, ᐁᑳ ᐊᓐᑕ ᑳ ᐃᑖᔮᐸᓐ, ᑭᒋ ᐅᒋ ᑖᐺᑕᒣᒃ; ᐁᓕᐌᒃ ᒫᑲ ᓇᑕᐙᐸᒫᑕᐤ᙮ 16 ᐁᑯ ᑕᒪᔅ ᑎᑎᒪᔅ ᑳ ᐃᔑᓂᑳᓱᑦ, ᐁᑖᑦ ᐎᒋᑭᔅᑭᓄᐊᒪᐙᑲᓇ, ᑭᓚᓈᓇᐤ ᓀᔥᑕ ᐃᑐᑌᑕᐤ ᑭᒋ ᐎᒋᓂᐱᒪᒃ᙮

ᒋᓴᔅ ᐅᐙᓂᔅᑳᓂᐌᐤ ᓀᔥᑕ ᐱᒫᒋᐃᐌᐤ

17 ᐃᔅᐱ ᒫᑲ ᒋᓴᔅ ᑌᑯᔑᒃ, ᑮ ᒥᔅᑲᐙᑕᐤ ᐋᔕᔾ ᓀᐤ ᑭᔑᑲᐗ ᐁ ᑮ ᐱᒥᔑᓂᓕᒋ ᒋᐹᔨᑲᒥᑯᒃ᙮ 18 ᐯᑕᓂ ᒫᑲ ᑭᔑᐙᒃ ᒋᕉᓴᓚᒥᒃ ᑮ ᐃᑕᑾᓐ, ᓈᓐᑕᐤ ᓂᔮᓚᓗᔖᑉ ᐸᕐᓚᓐᑲ ᐁ ᐃᔅᐱᒑᒃ᙮ 19 ᒥᒉᑦ ᒎᐗᒃ ᒫᑲ ᑮ ᐯᒋ ᓇᑕᐙᐸᒣᐗᒃ ᒫᕐᑕᐊ ᓀᔥᑕ ᒣᕆᔭ, ᑭᒋ ᑳᑭᒋᐋᒋᒃ ᐎᒋᔖᓂᓕᐗ ᐅᒋ᙮ 20 ᐁᑯ ᒫᕐᑕ, ᐎᐸᒡ ᐱᐁᑕᒃ ᒋᓴᓴ ᑳ ᐯᒋ ᑕᑯᔑᓂᓕᒋ, ᑮ ᓇᑕᐎ ᓇᑭᔥᑲᐌᐤ: ᒣᕆ ᑮ ᐊᐱᐤ ᐙᔅᑳᔨᑲᓂᒃ᙮ 21 ᐁᑯ ᒫᕐᑕ ᐁᑖᑦ ᒋᓴᓴ, ᑌᐯᓕᒋᑫᔭᓐ, ᑮᔥᐱᓐ ᐅᑕ ᐃᑖᐙᐸᓀ, ᓂᒋᔖᓐ ᓇᒪᐎᓚ ᑲᑕ ᑮ ᓂᐱᐸᓐ᙮ 22 ᒫᑲ ᓂ ᑭᔅᑫᓕᑌᓐ, ᐁᓕᐌᒃ ᐊᓄᒡ, ᐱᑯ ᑫᒀᓐ ᑫ ᓇᑐᑕᒪᐗᐗᑌ ᑭᒋᒪᓂᑐ, ᑭᒋᒪᓂᑐ ᑭ ᑳ ᒥᓕᒃ᙮ 23 ᒋᓴᔅ ᐃᑌᐤ, ᑭᒋᔖᓐ ᒥᓇ ᑲᑕ ᐗᓂᔥᑲᐤ᙮ 24 ᒫᕐᑕ ᐃᑌᐤ, ᓂ ᑭᔅᑫᓕᑌᓐ ᒥᓇ ᑭᒋ ᐗᓂᔥᑳᑦ ᐗᓂᔥᑳᓂᐗᑫ ᒫᒋᒡ ᑭᔑᑳᓕᑫ᙮ 25 ᒋᓴᔅ ᑮ ᐃᑌᐤ, ᓂᓚ ᐁᐗᑯ ᐅᐗᓂᔥᑳᓂᐌᐤ, ᓀᔥᑕ ᑳ ᐋᐎᔮᓐ ᐱᒫᑎᓯᐎᓐ: ᐊᓇ ᑳ ᑖᐺᔦᓕᒥᑦ, ᐋᑕ ᐁ ᓂᐱᑦ, ᐁᓕᐌᒃ ᒫᑲ ᑲᑕ ᐱᒫᑎᓯᐤ: 26 ᓀᔥᑕ ᒥᓯᐗ ᑕᑐ ᐊᐌᓇ ᑳ ᐱᒫᑎᓰᑦ ᓀᔥᑕ ᑳ ᑖᐺᔦᓕᒥᑦ, ᓇᒪᐎᓚ ᐎᔅᑳᑦ ᑲᑕ ᓇᐱᐤ᙮ ᑭ ᑖᐺᑌᓐ ᓈ ᐅᒪ? 27 ᐃᑌᐤ, ᐁᐁ, ᑌᐯᓕᒋᑫᔭᓐ: ᓂ ᑖᐺᑌᓐ ᐁ ᐋᐎᔭᓐ ᙭ ᑭᒋᒪᓂᑐ ᐅᑯᓯᓴ, ᐊᓇ ᑫ ᐯᒋ ᐃᑐᑌᔅᐸᓐ ᐅᑕ ᐊᔅᑮᒃ᙮

ᒋᓴᔅ ᒫᑐ

28 ᐃᔅᐱ ᒫᑲ ᐅᒣᓕᐤ ᑳ ᐃᑗᑦ, ᑮ ᑭᑐᑌᐤ, ᓀᔥᑕ ᑭᒧᒡ ᑮ ᓇᑐᒣᐤ ᐎᒋᔕᓂᔅᑴᒪ ᒣᕆᔭ, ᐁ ᐃᑗᑦ, ᐅᑭᒪᐤ ᑕᑯᔑᓐ, ᓀᔥᑕ ᑭ ᓇᑐᒥᒃ᙮ 29 ᐎᐸᒡ ᒫᑲ ᐱᐁᑕᒃ, ᑮ ᑭᓕᐱ ᐸᓯᑯ, ᓀᔥᑕ ᑮ ᐯᒋ ᓇᑕᐙᐸᒣᐤ᙮ 30 ᓇᒪᐎᓚ ᐁᔥᑾ ᒫᑲ ᒋᓴᔅ ᐅᒋ ᐱᑐᑫᐤ ᐃᑖᐎᓂᒃ, ᒫᑲ ᑮ ᐃᑖᐤ ᐃᑕ ᑳ ᑮ ᓇᑭᔥᑳᑯᑦ ᒫᕐᑕᐊ᙮ 31 ᒎᐗᒃ ᒫᑲ ᑳ ᑮ ᐎᑕᐱᒫᒋᒃ ᐙᔅᑳᔨᑲᓂᒃ, ᓀᔥᑕ ᑳ ᑮ ᑳᑭᒋᐋᒋᒃ, ᐃᔅᐱ ᐎᐋᐸᒫᒋᒃ ᒣᕆᔭ ᐁ ᑭᓕᐱ ᐸᓯᑯᓕᒋ, ᓀᔥᑕ ᐁ ᐗᓚᐎᓕᒋ, ᑮ ᓄᔓᔥᑲᐌᐗᒃ, ᐁ ᐃᑗᒋᒃ, ᒋᐹᔨᑲᒥᑯᒃ ᐃᑐᑌᐤ ᐁᑯᑕ ᑭᒋ ᒫᑐᑦ᙮ 32 ᐃᔅᐱ ᒫᑲ ᒣᕆ ᑳ ᑕᑯᔑᒃ ᐃᑕ ᒋᓴᓴ ᐁ ᐃᑖᓕᒋ, ᓀᔥᑕ ᑳ ᐙᐸᒫᑦ, ᑮ ᐸᑭᔑᓐ ᐅᓯᑎᓕᒃ, ᐁ ᐃᑗᑦ, ᑌᐯᓕᒋᑫᔭᓐ, ᑮᔥᐱᓐ ᐅᑕ ᑮ ᐃᑖᐙᐸᓀ, ᓂᒋᔖᓐ ᓇᒪᐎᓚ ᑲᑕ ᑮ ᓂᐱᐸᓐ᙮ 33 ᐃᔅᐱ ᒫᑲ ᒋᓴᔅ ᐎᐋᐸᒫᑦ ᐁ ᒫᑐᓕᒋ, ᓀᔥᑕ ᒎᐗ ᐊᓯᒋ ᐁ ᒫᑐᓕᒋ ᑳ ᑮ ᐯᒋ ᐎᒉᐙᓕᒋ, ᑮ ᒫᒫᑗᐤ ᐅᑦ ᐊᒑᑯᒃ, ᓀᔥᑕ ᑮ ᒥᑯᔥᑳᑌᓕᑕᒻ, 34 ᓀᔥᑕ ᑮ ᐃᑗᐤ, ᑖᓐᑌ ᑳ ᑮ ᐱᒥᔑᒣᒃ? ᑮ ᐃᑗᐗᒃ, ᑌᐯᓕᒋᑫᔭᓐ, ᐯᒋ ᐙᐸᑕ᙮ 35 ᒋᓴᔅ ᑮ ᒫᑐ᙮ 36 ᐁᑯ ᐁᑗᒋᒃ ᒎᐗᒃ, ᒫᑎᑲ, ᐁᔅᐱᒋ ᑮ ᓵᑭᐋᑦ! 37 ᐋᑎᑦ ᐁ ᐃᑕᓯᒋᒃ ᒫᑲ ᑮ ᐃᑗᐗᒃ, ᓇᒪ ᓈ ᐊᐗ ᐃᓕᓕᐤ, ᑳ ᑮ ᐋᐸᐊᒸᑦ ᐅᔅᑭᔑᑯᓕᐗ ᐁᑳ ᑳ ᐙᐱᓕᒋ, ᑲᑕ ᑮ ᑐᑕᒧᐸᓐ ᐁᑳ ᑭᒋ ᓂᐱᓕᒋ ᐅᐅ ᐃᓕᓕᐗ?

ᓛᓴᕋᔅ ᒥᓇ ᐱᒫᑎᓯᐤ

38 ᒋᓴᔅ ᒫᑲ, ᒥᓇ ᐁ ᒫᒫᑗᑦ, ᐅᑎᑕᒻ ᒋᐹᔨᑲᒥᑯᓕᐤ᙮ ᑮ ᐙᑎᑳᓂᑯᐸᓐ, ᐊᓯᓂ ᓀᔥᑕ ᑕᑯᒡ ᑮ ᐊᐱᐤ᙮ 39 ᒋᓴᔅ ᑮ ᐃᑗᐤ, ᐃᑲᑌᓂᒃ ᐊᓯᓂ᙮ ᒫᕐᑕ, ᐎᒋᔖᓂᔅᑴᒪ ᐊᓇ ᑳ ᓂᐱᑦ, ᐃᑌᐤ, ᑌᐯᓕᒋᑫᔭᓐ, ᐋᔕᔾ ᐎᒉᑭᔑᓐ: ᐌᓴ ᓀᐤ ᑭᔑᑲᐗ ᑮ ᓂᐱᐤ᙮ 40 ᒋᓴᔅ ᐃᑌᐤ, ᓇᒪ ᓈ ᑭ ᑮ ᐃᑎᑎᑖᔾ, ᑮᔥᐱᔥ ᑖᐺᑕᒪᓀ, ᑭ ᑳ ᐙᐸᑕᒸᓐ ᑭᒋᒪᓂᑐ ᐅ ᑭᔅᑌᓕᑖᑯᓯᐎᓐ? 41 ᐁᑯ ᑳ ᐃᑲᑌᓈᒋᒃ ᐊᓯᓂᔭ ᐊᓐᑕ ᐅᒋ ᐁ ᐱᒥᔑᒫᑲᓂᐎᓕᒋ ᐊᓂᐁᓕᐗ ᑳ ᓂᐱᓕᒋ᙮ ᒋᓴᔅ ᒫᑲ ᑮ ᑕᔅᑕᓵᐱᐤ, ᓀᔥᑕ ᑮ ᐃᑗᐤ, ᓄᑖ, ᑭ ᓈᓈᔅᑯᒥᑎᓐ ᐁ ᑮ ᓇᑐᑕᐎᔭᓐ᙮ 42 ᓂ ᑭᔅᑫᓕᑌᑖᔾ ᒫᑲ ᒧᔕᒃ ᐁ ᓇᑐᑕᐎᔭᓐ: ᒫᑲ ᐃᓕᓕᐗᒃ ᑳ ᐙᔅᑲᑳᐸᐎᒋᒃ ᐌᒋ ᐃᑗᔮᓐ ᑭᒋ ᑖᐺᑕᑭᒃ ᐁ ᑮ ᐯᒋᑎᔕᐅᔭᓐ᙮ 43 ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᑮ ᑌᐺᐤ, ᐁ ᑭᔗᐌᑦ, ᓛᓴᕋᔅ, ᐯᒋ ᐗᓚᐎ᙮ 44 ᐁᑯ ᐊᓇ ᑳ ᑮ ᓂᐱᑦ ᐱᐁᒋ ᐗᓚᐐᑦ, ᐁ ᐌᐌᑳᐱᓱᑦ ᐅᒌᒌᒃ ᓀᔥᑕ ᐅᓯᑎᒃ ᒋᐹᔨᑲᒥᑯᐎ ᐋᐸᒋᑖᐎᓇ ᐅᒋ: ᓀᔥᑕ ᐅᑖᔅᑕᒥᒃ ᑮ ᐌᐌᑳᐱᑌᓕᐤ ᐙᐱᔅᑫᑭᓂᓕᐤ᙮ ᒋᓴᔅ ᐃᑌᐤ, ᐋᐸᐅᒃ, ᓀᔥᑕ ᐸᑭᑎᓂᒃ᙮

ᐁ ᐗᔦᓯ ᐸᑭᑎᓈᑲᓂᐎᑦ ᒋᓴᔅ

45 ᐁᑯ ᒥᒉᑦ ᒎᐗᒃ ᑳ ᑮ ᐯᒋ ᓇᑕᐙᐸᒫᒋᒃ ᒣᕆᔭ, ᓀᔥᑕ ᑳ ᐙᐸᑕᑭᒃ ᐊᓂᐃ ᑫᒀᓇ ᒋᓴᓴ ᑳ ᑮ ᑐᑕᒥᓕᒋ, ᑮ ᑖᐺᔦᓕᒣᐗᒃ᙮ 46 ᒫᑲ ᐋᑎᑦ ᐁ ᐃᑕᓯᒋᒃ ᑮ ᑭᑐᑌᐗᒃ ᐸᕋᓯᔭ ᐁ ᓇᑕᐙᐸᒫᒋᒃ, ᓀᔥᑕ ᑮ ᐎᑕᒪᐌᐗᒃ ᐊᓂᐃ ᑫᒀᓇ ᒋᓴᓴ ᑳ ᑮ ᑐᑕᒥᓕᒋ᙮ 47 ᐁᑯ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᐸᕋᓯᔭᒃ ᒥᔭᐗᒋᐃᑐᒋᒃ ᐁ ᑲᑫᔅᑭᒥᑐᒋᒃ, ᑮ ᐃᑗᐗᒃ ᒫᑲ, ᑖᓐ ᐁᔨᑎᔭᒃ? ᐌᓴ ᐊᐗ ᐃᓕᓕᐤ ᑐᑕᒻ ᒥᒉᑦ ᒫᒪᔅᑳᒋ ᐃᓯᒋᑫᐎᓇ᙮ 48 ᑮᔥᐱᓐ ᐅᒪ ᐃᔑ ᐁᑳ ᐱᒣᓕᒪᑴ, ᒥᓯᐌ ᐃᓕᓕᐗ ᑲᑕ ᑖᐺᔦᓕᒥᑯ᙮ ᐁᑯ ᕈᒥᐎᓕᓕᐗᒃ ᑫ ᐯᒋ ᒪᔅᑲᒥᑖᑯᒃ ᐃᑕ ᐁ ᐃᑖᔭᒃ ᓀᔥᑕ ᑭᑦ ᐃᓕᓕᒥᓇᐗ᙮ 49 ᐯᔭᒃ ᐁ ᐃᑕᓯᒋᒃ ᒫᑲ, ᑳᔭᐸᔅ ᐁ ᐃᔑᓂᑳᓱᑦ, ᐁ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐎᑦ ᐊᓂᐁᓕᐤ ᐁ ᐱᐴᓂᓕᒃ, ᑮ ᐃᑌᐤ, ᓇᒪᐎᓚ ᑫᒀᓐ ᑭ ᑭᔅᑫᓕᑌᓇᐗᐤ᙮ 50 ᓇᒪ ᓀᔥᑕ ᑭ ᒫᒥᑐᓀᓕᑌᓇᐗᐤ ᐁ ᓇᐃᐸᓕᐃᑯᔭᒃ ᐯᔭᒃ ᐃᓕᓕᐤ ᑭᒋ ᓂᐳᔅᑕᒪᐙᑦ ᐃᓕᓕᐗ, ᐁᑳ ᒫᑲ ᒥᓯᐌ ᐅᑯ ᐁ ᐯᔭᑯᔅᑳᓀᓯᒋᒃ ᐃᓕᓕᐗᒃ ᑭᒋ ᓂᔑᐗᓈᑎᓯᒋᒃ᙮ 51 ᐅᒣᓕᐤ ᒫᑲ ᓇᒪᐎᓚ ᐎᓚ ᑫᒋᐙᒃ ᐅᒋ ᐃᑗᐤ: ᒫᑲ ᐁ ᒪᐗᒋ ᑭᒋ ᓵᓵᑭᐎᓕᐌᐎᓕᓕᐎᑦ ᐊᓂᐁᓕᐤ ᐁ ᐱᐴᓂᓕᒃ, ᑮ ᑭᔅᑭᐙᐃᑫᐤ ᒋᓴᓴ ᑭᒋ ᓂᐳᔅᑕᒪᐙᓕᒋ ᐊᓂᐃ ᐁ ᐯᔭᑯᔅᑳᓀᓯᓕᒋ ᐃᓕᓕᐗ; 52 ᓇᒪᐎᓚ ᒫᑲ ᐱᑯ ᐊᓂᐃ ᐃᓕᓕᐗ ᐅᒋ, ᒫᑲ ᐊᓯᒋ ᑭᒋ ᒪᐗᒋᐃᒫᓕᒋ ᑭᒋᒪᓂᑐᐗ ᐅᑦ ᐊᐙᔑᒥᔑᓕᐗ ᑭᒋ ᐯᔭᑯᓕᒋ ᑳ ᓇᓈᓂᔅ ᐃᑖᓕᒋ᙮ 53 ᐁᑯ ᐊᓂᐁᓕᐤ ᐁ ᑭᔑᑳᓕᒃ ᐅᒋ ᑮ ᓇᔅᑯᒥᑐᐗᒃ ᑭᒋ ᓂᐸᐋᒋᒃ᙮ 54 ᐁᐗᑯ ᐌᒋ ᒋᓴᔅ ᓇᒪᐎᓚ ᑫᔮᐸᒡ ᐅᒋ ᒧᔑᔐ ᐱᒧᑌᐤ ᒎᐗ ᐃᑕ ᐁ ᐃᑖᓕᒋ; ᒫᑲ ᐊᓐᑕ ᑮ ᐅᒋ ᑭᑐᑌᐤ ᐁ ᐃᑐᑌᑦ ᐊᔅᑮᒃ ᑭᔑᐙᒃ ᐸᑾᑕᔅᑲᒥᑳᒃ, ᐃᑖᐎᓂᒃ ᐃᑉᕃᐃᒻ ᐁ ᐃᔑᓂᑳᑌᒃ, ᐁᑯᑕ ᒫᑲ ᑌᔑᑫᑦ ᐊᓯᒋ ᐅ ᑭᔅᑭᓄᐊᒪᐙᑲᓇ᙮ 55 ᒎᐗᒃ ᐅ ᒥᔮᔥᑳᑫᐎ ᒪᑯᔐᐎᓂᐗᐤ ᒫᑲ ᑮ ᐯᔓᓈᑾᓂᓕᐤ: ᒥᒉᑦ ᒫᑲ ᐊᓐᑕ ᑮ ᐅᒋ ᑭᑐᑌᐗᒃ ᑭᒋ ᐃᑐᑌᒋᒃ ᒋᕉᓴᓚᒥᒃ ᐸᒧᔑ ᒥᔮᔥᑳᑫᐎ ᒪᑯᔖᓂᐗᓂᓕᒃ, ᑭᒋ ᐹᔦᑭᐃᑎᓱᒋᒃ᙮ 56 ᐁᑯ ᓀᓇᑕᐌᓕᒫᒋᒃ ᒋᓴᓴ, ᓀᔥᑕ ᑮ ᐋᔭᔭᒥᐃᑐᐗᒃ, ᒣᒀᒡ ᑭᒋᐋᔭᒥᐁᐎᑲᒥᑯᒃ ᐁ ᓂᐸᐎᒋᒃ, ᑖᓐ ᐁᑌᓕᑕᒣᒃ ᑭᓚᐗᐤ, ᓇᒪ ᓈ ᑲᑕ ᐯᒋ ᐃᑐᑌᐤ ᒪᑯᔐᐎᓂᒃ? 57 ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ ᓀᔥᑕ ᐹᕋᓯᔭᒃ ᑮ ᐃᑕᔓᐌᐗᒃ, ᑮᔥᐱᓐ ᐊᐌᓇ ᑫᔅᑫᓕᑕᒧᑴ ᐃᑕ ᐁ ᐃᑖᓕᒋ, ᑭᒋ ᐙᐸᑎᓕᐌᑦ, ᑭᒋ ᑮ ᐅᑎᑎᓈᒋᒃ᙮

12

ᒋᓴᔅ ᑖᒫᔅᑯᓈᑲᓂᐎᐤ ᐯᑕᓂᒃ

1 ᐁᑯ ᒫᑲ ᓂᑯᑣᓱ ᑭᔑᑳᐗ ᐸᒧᔑ ᐅᑎᒋᐸᓕᒃ ᒥᔭᔥᑲᑫᐎ ᒪᑯᔐᐎᓐ, ᒋᓴᔅ ᑮ ᐯᒋ ᐃᑐᑌᐤ ᐯᑕᓂᐃᒃ, ᐃᑕ ᓛᓴᕋᓴ ᑳ ᐃᑖᓂᒋ, ᐊᓂᐃ ᑳ ᑮ ᐗᓂᔥᑳᓈᑦ ᐅᓂᐱᐗ ᐅᒋ᙮ 2 ᐁᑯᑕ ᐌᔑᑕᒪᐙᒋᒃ ᓂᐯᑴᐎᓂᓕᐤ; ᒫᕐᑕ ᒫᑲ ᑮ ᐊᑑᔅᑫᔅᑖᑫᐤ: ᒫᑲ ᓛᓴᕋᔅ ᐯᔭᒃ ᐊᓂᐃ ᑳ ᐎᑕᐱᒥᑯᑦ ᒥᒋᓱᓈᑎᑯᒃ᙮ 3 ᐁᑯ ᒣᕆ ᐌᑎᓇᒃ ᐯᔭᒃ ᑎᐹᐯᔅᑯᒋᑲᓐ ᔅᐸᐃᒃᓈᕐᑦ ᑕᒪᔅᑯᐎᓂᓕᐤ, ᓈᔅᐱᒡ ᐁ ᐋᓕᒪᑭᑖᑾᓂᓕᒃ, ᓀᔥᑕ ᑮ ᑐᒥᓇᒬᐤ ᒋᓴᓴ ᐅᓯᑎᓕᐗ ᑕᒪᔅᑯᐎᓂᓕᐤ, ᑮ ᑳᓯᓯᑌᐌᐤ ᒫᑲ ᐅᔅᑎᒀᓂᐱᐙᔭ ᐅᒋ: ᐁᑯ ᐙᔅᑳᔨᑲᓂᒃ ᓯᔮᑲᔅᑭᓀᒫᑾᒃ ᑕᒪᔅᑯᐎᓐ᙮ 4 ᐁᑯ ᐁᑗᓕᒋ ᐯᔭᒃ ᐅ ᑭᔅᑭᓄᐊᒪᐙᑲᓇ, ᒎᑕᔅ ᐃᔅᑳᕆᔭᑦ, ᓵᐃᒪᓐ ᐅᑯᓯᓴ, ᐊᓂᐃ ᑫ ᐙᔦᔑᐸᑭᑎᓂᑯᑦ, 5 ᑖᓀᑭ ᐌᒋ ᐁᑳ ᐊᑖᐙᑲᓂᐗᒃ ᐅᒪ ᑕᒪᔅᑯᐎᓐ ᓂᔅᑡᐤ ᒥᑖᑐᒥᑕᓇᐤ ᔔᓕᔭᐙᐱᔅᑯᔕᒃ, ᑭᒋ ᒥᓛᑲᓂᐎᒋᒃ ᒫᑲ ᑳ ᑭᑎᒫᑭᓯᒋᒃ? 6 ᐅᒣᓕᐤ ᑮ ᐃᑗᐤ, ᓇᒪᐎᓚ ᐁ ᒥᑐᓀᓕᒫᑦ ᐊᓂᐃ ᑳ ᑭᑎᒫᑭᓯᓕᒋ; ᒫᑲ ᐁ ᑭᒧᑎᔅᑭᑦ, ᓀᔥᑕ ᐁ ᐋᔮᑦ ᒥᐗᑎᓕᐤ, ᓀᔥᑕ ᐁ ᐱᒥᐎᑖᑦ ᑫᒀᓕᐤ ᑳ ᐱᑕᐃᑳᑎᓕᒃ᙮ 7 ᐁᑯ ᐁᑗᑦ ᒋᓴᔅ, ᐁᑳᐎᓚ ᐱᓯᔅᑫᓕᒥᒃ: ᑮ ᑲᓇᐌᓕᑕᒻ ᐅᒣᓕᐤ ᐊᓂᐁᓕᐤ ᐁ ᑭᔑᑳᓕᒃ ᐅᒋ ᑫ ᓇᐃᑳᑲᐎᐗᒃ᙮ 8 ᐌᓴ ᒧᔕᒃ ᑭ ᐎᒉᐎᑯᐙᐗᒃ ᐊᓂᑭ ᑳ ᑭᑎᒫᑭᓯᒋᒃ; ᒫᑲ ᓂᓚ ᓇᒪᐎᓚ ᒧᔕᒃ ᑭ ᐎᒉᐎᑎᓇᐗᐤ᙮

ᑭᒋ ᓴᓵᑭᐎᓕᐌᐎᓕᓕᐗᒃ ᐐ ᓂᐸᐁᐗᒃ ᓛᓴᕋᓴ

9 ᒥᒉᑦ ᒫᑲ ᐃᓕᓕᐗᒃ ᐁ ᒎᐎᒋᒃ ᑮ ᑭᔅᑫᓕᑕᒶᒃ ᐊᓐᑕ ᐁ ᐃᑖᓕᒋ: ᓀᔥᑕ ᑮ ᐯᒋ ᐃᑐᑌᐗᒃ, ᓇᒪᐎᓚ ᒋᓴᓴ ᐱᑯ ᐅᒋ, ᒫᑲ ᑭᒋ ᐙᐸᒫᒋᒃ ᓛᔅᕋᓴ ᐊᓯᒋ, ᑳ ᑮ ᐗᓂᔥᑳᓇᓕᒋ ᐅᓂᐱᐗ ᐅᒋ᙮ 10 ᒫᑲ ᑭᒋ ᓵᓵᑭᐎᓕᐌᐎᓕᓕᐗᒃ ᑮ ᑲᑫᔅᑭᒥᑐᐗᒃ ᑭᒋ ᓂᐸᐋᒋᒃ ᓛᓴᕋᓴ ᓀᔥᑕ; 11 ᐌᓴ ᐊᓂᐃ ᐅᒋ ᒥᒉᑦ ᒎᐗᒃ ᑮ ᑭᑐᑌᐸᓇᒃ, ᓀᔥᑕ ᑮ ᑖᐺᔦᓕᒣᐗᒃ ᒋᓴᓴ᙮

ᒋᓴᔅ ᐁ ᐱᑐᑫᑦ ᒋᕉᓴᓚᒥᒃ ᐁ ᒫᒥᒋᒥᑯᑦ

12 ᐎᐋᐸᓂᓕᒃ ᒥᒉᑦ ᐃᓕᓕᐗᒃ ᑳ ᑮ ᐯᒋ ᐃᑐᑌᒋᒃ ᒪᑯᔐᐎᓂᒃ, ᐃᔅᐱ ᐱᐁᑕᑭᒃ ᒋᓴᓴ ᐁ ᐯᒋ ᐃᑐᑌᓕᒋ ᒋᕉᓴᓚᒥᒃ, 13 ᑮ ᐅᑎᓇᒶᒃ ᐗᑎᑾᓇ ᐹᒫᑎᑯᒃ ᐅᒋ, ᓀᔥᑕ ᑭ ᐗᓚᐎᐗᒃ ᑭᒋ ᓇᑭᔥᑲᐙᒋᒃ, ᐁ ᑌᐺᒋᒃ, ᐦᐅᓵᓇ: ᔕᐌᓕᑖᑯᓯᐤ ᐃᔅᕆᐃᓪ ᐅ ᑭᒋᐅᑭᒫᒪ ᑳ ᐯᒋ ᐃᑐᑌᑦ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ᙮ 14 ᒋᓴᔅ ᒫᑲ, ᐃᔅᐱ ᑳ ᒥᔅᑲᐙᑦ ᐋᓯᔑᔕ, ᑮ ᑌᑕᐱᐤ; ᐁ ᐃᑕᓯᓇᐃᑳᑌᒃ, 15 ᐁᑳᐎᓚ ᑯᔅᑖᒋ, ᓵᐃᐊᓐ ᐅᑖᓂᓴ; ᒫᑎᑲ, ᑭ ᑭᒋᐅᑭᒫᒻ ᐯᒋ ᐃᑐᑌᐤ, ᐁ ᑌᑕᐱᑦ ᐋᓴ ᐅᑯᔑᔑᓕᐗ᙮ 16 ᐅᐅ ᑫᒀᓇ ᐱᑕᒫ ᓇᒪᐎᓚ ᐅᒋ ᓂᓯᑐᑕᒥᓕᐗ ᐅ ᑭᔅᑭᓄᐊᒪᐙᑲᓇ: ᒫᑲ ᐃᔅᐱ ᑳ ᑭᔅᑕᑭᒫᑲᓂᐎᑦ ᒋᓴᔅ, ᐁᑯ ᑫᔅᑭᓯᓕᒋ ᐅᐅ ᑫᒀᓇ ᐎᓚ ᐁ ᑮ ᐅᒋ ᒪᓯᓇᐃᑳᑌᓕᑭ, ᓀᔥᑕ ᐁ ᑮ ᑐᑕᐙᒋᒃ ᐅᐅ ᑫᒀᓇ᙮ 17 ᐊᓂᐃ ᐃᓕᓕᐗ ᒫᑲ ᑳ ᑮ ᐎᒉᐎᑯᑦ ᐃᔅᐱ ᑳ ᓇᑐᒫᑦ ᓛᓴᕋᓴ ᒋᐹᔨᑲᒥᑯᒃ ᐅᒋ, ᓀᔥᑕ ᑳ ᐗᓂᔥᑳᓈᑦ ᐅᓂᐱᐗ ᐅᒋ, ᑮ ᑎᐹᒋᒧᓕᐗ᙮ 18 ᐁᐗᑴᓕᐤ ᓀᔥᑕ ᐌᒋ ᓇᑭᔥᑳᑯᑦ ᐃᓕᓕᐗ, ᐌᓴ ᑮ ᐯᑕᒥᓕᐗ ᐁ ᑮ ᑐᑕᒃ ᐅᒣᓕᐤ ᒫᒪᔅᑳᒋ ᐃᓯᒋᑫᐎᓂᓕᐤ᙮ 19 ᐁᐗᑯ ᐌᒋ ᐃᑎᑐᒋᒃ ᐹᕋᓯᔭᒃ, ᑭ ᐙᐸᑌᓇᐗᐤ ᓈ ᐁᑳ ᑫᒀᓇ ᐁ ᑲᔥᑭᑖᔦᒃ? ᒫᑎᑲ, ᒥᓯᐌ ᐊᔅᑭᓕᐤ ᓄᔅᐱᓈᑎᑯ᙮

ᐋᑎᑦ ᒃᕇᑲᒃ ᓈᑕᐙᐸᒣᐗᒃ ᒋᓴᓴ

20 ᐋᑎᑦ ᒫᑲ ᒃᕆᑲᒃ ᑮ ᐎᒉᐌᐗᒃ ᐊᓂᐃ ᑳ ᑮ ᐯᒋ ᐃᑐᑌᓕᒋ ᑭᒋ ᐋᔭᒥᐁᔅᑖᑫᓕᒋ ᒣᒀᒡ ᑳ ᒪᑯᔖᓂᐗᓂᓕᒃ: 21 ᐁᐗᒀᓂᑭ ᐱᐁᒋ ᓈᑖᒋᒃ ᐱᓕᐸ, ᐯᑦᓭᑕᐃᒃ ᑳ ᐅᒌᓕᒋ ᑳᓕᓕᒃ, ᑮ ᑲᑴᒋᒣᐗᒃ ᒫᑲ, ᐁ ᐃᑗᒋᒃ, ᐅᑭᒪᐤ, ᓂ ᐎ ᐙᐸᒫᓈᓐ ᒋᓴᔅ᙮ 22 ᐱᓕᑉ ᐯᒋ ᐎᑕᒪᐌᐤ ᐋᓐᑦᕉᐗ: ᒥᓇ ᒫᑲ ᐋᓐᑦᕈ ᓀᔥᑕ ᐱᓕᑉ ᑮ ᐎᑕᒪᐌᐗᒃ ᒋᓴᓴ᙮ 23 ᒋᓴᔅ ᒫᑲ ᑮ ᓇᔥᑴᐗᔑᐁᐤ, ᐁ ᐃᑗᑦ, ᐋᔕᔾ ᐅᑎᒋᐸᓕᐤ ᐊᓂᒪ ᑎᐹᔨᑲᓐ ᐱᓯᒧᑳᓂᒃ ᐃᓕᓕᐎᑯᓯᓵᓐ ᑭᒋ ᑭᔅᑕᑭᒫᑲᓂᐎᑦ᙮ 24 ᑖᐺ, ᑖᐺ, ᑭᑦ ᐃᑎᓇᐗᐤ, ᑮᔥᐱᓐ ᐯᔭᑯᒥᓐ ᐸᑴᔑᑲᓐ ᐁᑳ ᐸᑭᑎᑫ ᐊᔅᑮᒃ ᓀᔥᑕ ᓂᐱᒪᑲᑫ, ᐯᔭᑯ ᐊᔅᑌᐤ: ᒫᑲ ᑮᔥᐱᓐ ᓂᐱᒪᑲᑫ, ᓂᑖᐎᑭᑖᒪᑲᓐ ᒥᔅᑕᐃ ᐸᑴᔑᑲᓂᒥᓇ᙮ 25 ᐊᓇ ᑳ ᓵᑭᑖᑦ ᐅ ᐱᒫᑎᓯᐎᓐ ᑲᑕ ᐗᓂᑕᐤ; ᐊᓇ ᒫᑲ ᑳ ᐸᒀᑕᒃ ᐅ ᐱᒫᑎᓯᐎᓐ ᐅᑕ ᐊᔅᑮᒃ, ᑲᑕ ᑲᓇᐌᓕᑕᒻ ᑭᒋ ᐋᔮᑦ ᑳᑭᑫ ᐱᒫᑎᓯᐎᓂᒃ᙮ 26 ᑮᔥᐱᓐ ᐊᐌᓇ ᐁᑑᔅᑲᐎᑴ ᐁᑯᔑ ᓂ ᑳ ᓄᔅᐱᓇᑎᒃ; ᓀᔥᑕ ᐃᑕ ᐁ ᐃᑖᔮᓐ, ᐁᑯᑕ ᐊᓯᒋ ᓂᑦ ᐊᑑᔅᑫᓛᑲᓐ ᑫ ᐃᑖᑦ: ᑮᔥᐱᓐ ᐊᐌᓇ ᐁᑑᔅᑲᐎᑴ, ᐁᐗᒀᓇ ᑫ ᑭᔅᑌᓕᒥᑯᑦ ᓄᑖᐎᔭ᙮

ᒋᓴᔅ ᓂᑳᓂᐎᑕᒻ ᑖᓐ ᑫ ᐃᔑ ᓂᐱᑦ

27 ᐊᓄᒡ ᓂᑦ ᐊᒑᒃ ᒥᑯᔥᑳᑌᓕᑕᒻ; ᑖᓂ ᒫᑲ ᑫ ᐃᑗᔮᓐ? ᓄᑖ, ᒥᑖᑴᓇᒪᐎᓐ ᐅᒪ ᑎᐹᔨᑲᓐ ᐱᓯᒧᑳᓂᒃ: ᒫᑲ ᐁᐗᑯ ᐅᒪ ᑳ ᐅᒋ ᐅᑎᑕᒫᓐ ᐅᒪ ᑎᐹᔨᑲᓐ ᐱᓯᒧᑳᓂᒃ᙮ 28 ᓄᑖ, ᑭᔅᑌᓕᑖᑯᑕ ᑭᑦ ᐃᔑᓂᑳᓱᐎᓐ᙮ ᐁᑯ ᐱᐁᑖᑾᒃ ᐯᑖᑯᓯᐎᓐ ᑭᒋᑭᔑᑯᒃ ᐅᒋ, ᓂ ᑮ ᑭᔅᑌᓕᑖᑯᑖᓐ, ᒥᓇ ᒫᑲ ᓂ ᑳ ᑭᔅᑌᓕᑖᑯᑖᓐ᙮ 29 ᐃᓕᓕᐗᒃ ᒫᑲ ᐊᓐᑕ ᑳ ᓂᐸᐎᒋᒃ, ᓀᔥᑕ ᑳ ᐯᑕᑭᒃ, ᑮ ᐃᑗᐗᒃ, ᐅᓂᒥᔅᑭᐗᒃ ᑭᑐᐗᒃ: ᑯᑕᑭᔭᒃ ᑮ ᐃᑗᐗᒃ, ᑮ ᐋᔭᒥᐃᑯ ᐁᓐᒐᓚ᙮ 30 ᒋᓴᔅ ᒫᑲ ᐁ ᓇᔥᑴᐗᔑᐃᐌᑦ, ᑮ ᐃᑗᐤ, ᐅᒪ ᐯᑖᑯᓯᐎᓐ ᓇᒪᐎᓚ ᑮ ᐯᑖᑾᓐ ᓂᓚ ᐅᒋ, ᒫᑲ ᑭᓚᐗᐤ ᐅᒋ᙮ 31 ᐊᓄᒡ ᑎᐹᔅᑯᓂᑳᑌᐤ ᐅᒪ ᐊᔅᑭ: ᐊᓄᒡ ᐊᓇ ᑳ ᑎᐯᓕᑕᒃ ᐅᒣᓕᐤ ᐊᔅᑮᓕᐤ ᑲᑕ ᐗᓚᐎᐌᐱᓈᑲᓂᐎᐤ᙮ 32 ᓂᓚ ᒫᑲ, ᑮᔥᐱᓐ ᑫ ᐅᐱᓂᑲᐎᐗᓀ ᐊᔅᑮᒃ ᐅᒋ, ᓂ ᑳ ᐅᒋᐱᑕᒫᓱᓐ ᒥᓯᐌ ᐃᓕᓕᐗᒃ᙮ 33 ᐅᒣᓕᐤ ᑮ ᐃᑗᐤ, ᐁ ᑭᔅᑫᓕᑖᑯᑖᑦ ᑫᑯ ᓂᐱᐎᓂᓕᐤ ᑫ ᐅᒋ ᓂᐱᑦ᙮ 34 ᐃᓕᓕᐗᒃ ᑮ ᓇᔥᑴᐗᔑᐁᐗᒃ, ᓂ ᑮ ᐯᑌᓈᓐ ᐅᓚᔓᐌᐎᓂᒃ ᐅᒋ ᙭ ᐁ ᐃᑖᑦ ᑳᑭᑫ: ᑖᓀᑭ ᒫᑲ ᐌᒋ ᐃᑗᔭᓐ ᑭᓚ, ᐃᓕᓕᐎᑯᓯᓵᓐ ᑭᒋ ᐅᐱᓈᑲᓂᐎᑦ? ᐊᐌᓇ ᐊᐗ ᐃᓕᓕᐎᑯᓯᓵᓐ? 35 ᐁᑯ ᒋᓴᔅ ᐁᑖᑦ, ᑫᔮᐸᒡ ᐎᓕᐱᔉ ᑭ ᐎᒉᐎᑯᓇᐗᐤ ᐙᔅᑌᐎᓐ᙮ ᐱᒧᑌᒃ ᐁᔥᑾ ᐁᐋᔮᔦᒃ ᐙᔅᑌᐎᓐ, ᐁᑳ ᐗᓂᑎᐱᔅᑭᓯᐎᓐ ᑭᒋ ᐅᑎᑎᑯᔦᒃ: ᐌᓴ ᐊᓇ ᑳ ᐱᒧᑌᑦ ᐗᓂᑎᐱᔅᑭᓯᐎᓂᒃ ᓇᒪᐎᓚ ᑭᔅᑫᓕᑕᒻ ᑖᓐᑌ ᐁᑐᑌᑦ᙮ 36 ᐁᔥᑾ ᐁ ᐋᔮᔦᒃ ᐙᔅᑌᐎᓐ, ᑖᐺᔦᓕᑕᒧᒃ ᐙᔅᑌᐎᓐ, ᑭᒋ ᐅᑦ ᐊᐙᔑᒥᔑᒥᑯᔦᒃ ᐙᔅᑌᐎᓐ᙮

ᒧᓚ ᑖᐺᔦᓕᒣᐗᒃ ᒋᓴᓴ

ᐅᐅ ᑫᒀᓇ ᑮ ᐃᑗᐤ ᒋᓴᔅ, ᐁᑯ ᑫᑐᑌᑦ, ᓀᔥᑕ ᑮ ᐋᓱᑕᐙᑦ᙮ 37 ᐋᑕ ᒫᑲ ᐃᔅᐱᒋ ᒥᒉᑦ ᒫᒪᔅᑳᒋ ᐃᓯᒋᑫᐎᓇ ᐁ ᑮ ᑐᑕᒃ ᐁ ᐙᐸᒥᑯᑦ, ᐁᓕᐌᒃ ᒫᑲ ᓇᒪᐎᓚ ᐅᒋ ᑖᐺᔦᓕᒥᑯ᙮ 38 ᑭᒋ ᑎᐱᐸᓕᓕᒃ ᐋᐃᓭᔭ ᐅᑭᔅᑭᐙᐃᑫᐤ ᐅᑦ ᐃᑗᐎᓐ, ᑳ ᑮ ᐃᑗᑦ, ᑌᐯᓕᒋᑫᔭᓐ, ᐊᐌᓇ ᑳ ᑖᐺᑕᒃ ᓂ ᑎᐹᒋᒧᐎᓂᓈᓐ? ᐊᐌᓇ ᓀᔥᑕ ᑳ ᐙᐸᑎᓛᑲᓂᐎᑦ ᐅᑎᐯᓕᒋᑫᐗ ᐅᔅᐱᑐᓂᓕᐤ? 39 ᐁᐗᑯ ᐌᒋ ᐁᑳ ᑮ ᑖᐺᑕᑭᒃ, ᐁ ᑮ ᐃᑗᑦ ᐋᐃᓭᔭ ᒥᓇ, 40 ᑮ ᐋᑲᐙᐱᓀᐤ, ᓀᔥᑕ ᑮ ᒪᔥᑲᐎᑕᐌᐤ ᐅᑌᐃᓕᐗ; ᐁᑳ ᑭᒋ ᐙᐱᓕᒋ ᐅᔅᑭᔑᑯᓕᐗ ᐅᒋ, ᐁᑳ ᓀᔥᑕ ᑭᒋ ᓂᓯᑐᑕᒥᓕᒋ ᐅᑌᐃᓕᐗ ᐅᒋ, ᓀᔥᑕ ᐁᑳ ᑭᒋ ᑴᔅᑳᑎᓯᐋᑲᓂᐎᓕᒋ, ᐁᑳ ᒫᑲ ᑭᒋ ᒥᓇᐙᒋᐊᑭᒃ᙮ 41 ᐅᐅ ᑫᒀᓇ ᑮ ᐃᑗᐤ ᐋᐃᓭᔭ, ᐃᔅᐱ ᐎᐋᐸᑕᒸᑦ ᐅ ᑭᔅᑌᓕᑖᑯᓯᐎᓂᓕᐤ, ᓀᔥᑕ ᐃᐋᓕᒧᒫᑦ᙮ 42 ᐁᓕᐌᒃ ᒫᑲ ᒥᒉᑦ ᐅᑎᐯᓕᒋᑫᐗᒃ ᑮ ᑖᐺᔦᓕᒣᐗᒃ; ᒫᑲ ᐹᕋᓯᔭ ᐅᒋ ᓇᒪᐎᓚ ᑮ ᐎᑕᒶᒃ, ᐁᑳ ᑭᒋ ᐗᓚᐎᑎᔑᓈᑲᓂᐎᒋᒃ ᐋᔭᒥᐁᐎᑲᒥᑯᒃ ᐅᒋ᙮ 43 ᐌᓴ ᐊᐙᓯᑌ ᑮ ᓵᑭᑖᐗᒃ ᑭᒋ ᒫᒥᒋᒥᑯᒋᒃ ᐃᓕᓕᐗ, ᐃᔥᐱᔥ ᑭᒋ ᒫᒥᒋᒥᑯᒋᒃ ᑭᒋᒪᓂᑐᐗ᙮

ᐊᐌᓇ ᐁᑳ ᑳ ᑖᐺᑕᒃ ᑕ ᑎᐹᔅᑯᓈᑲᓂᐎᐤ ᒋᓴᔅ ᐅᑕᔭᒥᐎᓇ ᐅᒋ

44 ᒋᓴᔅ ᑮ ᑌᐺᐤ, ᐁ ᐃᑗᑦ, ᐊᓇ ᑳ ᑖᐺᔦᓕᒥᑦ, ᓇᒪᐎᓚ ᓂ ᑖᐺᔦᓕᒥᒃ ᓂᓚ, ᒫᑲ ᐊᓂᐃ ᑳ ᑮ ᐯᒋᑎᔕᐅᓕᒋ᙮ 45 ᐊᓇ ᒫᑲ ᑳ ᐙᐸᒥᑦ, ᐙᐸᒣᐤ ᐊᓂᐃ ᑳ ᑮ ᐯᒋᑎᔕᐅᓕᒋ᙮ 46 ᓂ ᐯᒋ ᐃᑐᑖᓐ ᑭᒋ ᐙᔅᑌᐎᓂᔮᓐ ᐊᔅᑮᒃ, ᒥᓯᐌ ᐊᐌᓇ ᑳ ᑖᐺᔦᓕᒥᑦ ᐁᑳ ᐗᓂᑎᐱᔅᑭᓯᐎᓂᒃ ᑭᒋ ᐃᑖᑦ᙮ 47 ᑮᔥᐱᓐ ᓀᔥᑕ ᐊᐌᓇ ᐱᐁᑕᒧᑴ ᓂᑦ ᐋᔭᒥᐎᓇ, ᓀᔥᑕ ᐁᑳ ᑎᐋᐺᑕᒧᑴ, ᓂᓚ ᓇᒪᐎᓚ ᓂ ᑎᐹᔅᑯᓇᐤ: ᐌᓴ ᓇᒪᐎᓚ ᓂ ᑮ ᐯᒋ ᐃᑐᑖᓐ ᑭᒋ ᑎᐹᔅᑯᓇᒫᓐ ᐊᔅᑭ, ᒫᑲ ᑭᒋ ᐱᒫᒋᑖᔮᓐ ᐊᔅᑭ᙮ 48 ᐊᓇ ᑳ ᐋᑕᐌᓕᒥᑦ, ᓀᔥᑕ ᐁᑳ ᑳ ᐅᑎᓇᒃ ᓂᑦ ᐋᔭᒥᐎᓇ, ᐋᔭᐌᐤ ᐊᐌᓕᐗ ᑳ ᑎᐹᔅᑯᓂᑯᑦ: ᐊᓂᒪ ᐋᔭᒥᐎᓐ ᑳ ᑮ ᐃᑗᔮᓐ, ᐁᐗᑴᓕᐤ ᑫ ᑎᐹᔅᑯᓂᑯᑦ ᒫᒋᒡ ᑭᔑᑳᓕᑫ᙮ 49 ᐌᓴ ᓇᒪᐎᓚ ᓂ ᑮ ᐋᔭᒥᓐ ᓂᓚ ᑫᒋᐙᒃ: ᒫᑲ ᐅᑖᐎᒪᐤ ᑳ ᑮ ᐯᒋᑎᔕᐅᑦ, ᓂ ᑮ ᒥᓕᒃ ᐅᓚᔓᐌᐎᓂᓕᐤ, ᑫ ᐃᑗᐗᒃ, ᓀᔥᑕ ᑫ ᐃᔑ ᐋᔭᒥᐗᒃ᙮ 50 ᓂ ᑭᔅᑫᓕᑌᓐ ᒫᑲ ᐅᑦ ᐅᓚᔓᐌᐎᓐ ᐁ ᑳᑭᑫ ᐱᒫᑎᓯᐎᓂᐗᓂᓕᒃ: ᐁᐗᑯ ᐌᒋ ᒥᓯᐌ ᑫᒀᓐ ᑳ ᐋᔭᒥᔮᓐ, ᑖᐱᔅᑯᒡ ᐅᑖᐎᒪᐤ ᐁ ᑮ ᐃᔑᑦ, ᐁᑯ ᐃᔑ ᐋᔭᒥᔮᓐ᙮

13

ᒋᓴᔅ ᑭᒋᔅᑖᐹᐗᓯᑌᓀᐤ ᐅᑭᔅᑭᓄᐊᒪᐙᑲᓇ

1 ᐸᒧᔑ ᒫᑲ ᒥᔮᔥᑳᑫᐎ ᒪᑯᔖᓂᐗᓂᓕᒃ, ᐃᔅᐱ ᒋᓴᔅ ᑫᔅᑫᓕᑕᒃ ᐅ ᑎᐹᔨᑲᓐ ᐱᓯᒧᑳᓂᒃ ᐁ ᐅᑎᒋᐸᓕᓕᒃ ᐅᑕ ᐊᔅᑮᒃ ᑭᒋ ᐅᒋ ᑭᑐᑌᑦ ᐅᑖᐎᒪᐗ ᑭᒋ ᓈᑖᑦ, ᐁ ᑮ ᓵᑭᐋᑦ ᐊᓂᐃ ᑳ ᑎᐱᓚᐌᐎᓯᑦ ᐊᔅᑮᒃ ᑳ ᐃᑖᓕᒋ, ᑮ ᓵᑭᐁᐤ ᐱᓕᔥ ᐃᔅᒀᔮᒡ᙮ 2 ᐁᑯ ᑳ ᑭᔑ ᓂᐯᒀᓂᐗᒃ, ᒪᒋᒪᓂᑐ ᐁ ᑮ ᐸᑭᑎᓇᒸᑦ ᐅᑌᐃᓕᒃ ᒎᑕᔅ ᐃᔅᑳᕆᔭᑕ ᓵᐃᒪᓐ ᐅᑯᓯᓴ, ᑭᒋ ᐙᔦᔑᐸᑭᑎᓈᓕᒋ; 3 ᒋᓴᔅ ᐁ ᑭᔅᑫᓕᑕᒃ ᐅᑖᐎᒪᐗ ᐁ ᑮ ᒥᓕᑯᑦ ᒥᓯᐌ ᑫᒀᓇ ᐅᒋᒌᒃ, ᓀᔥᑕ ᑭᒋᒪᓂᑐᒃ ᐁ ᐅᒌᑦ, ᓀᔥᑕ ᑭᒋᒪᓂᑐᐗ ᐁ ᓈᑖᑦ; 4 ᐸᓯᑯ ᓂᐯᑴᐎᓂᒃ ᐅᒋ, ᓀᔥᑕ ᑮ ᒪᓂᓇᒻ ᐅ ᐎᓛᒋᑲᓇ; ᑮ ᐅᑎᓇᒻ ᒫᑲ ᑳᓯᒀᓂᓕᐤ, ᓀᔥᑕ ᑮ ᐸᑾᑌᐅ᙮ 5 ᑳ ᐋᔨᑎᑦ ᓯᑭᓇᒻ ᓂᐱᓕᐤ ᐅᓛᑲᓂᒃ, ᑮ ᐊᑎ ᑭᒋᔅᑕᐸᐗᓯᑌᓀᐤ ᒫᑲ ᐅ ᑭᔅᑭᓄᐊᒪᐙᑲᓇ, ᓀᔥᑕ ᑮ ᑳᓯᓇᒬᐤ ᑳᓯᑾᓂᓕᐤ ᐅᒋ ᑳ ᐸᑾᑌᐅᓂᔥᑲᒃ᙮ 6 ᐁᑯ ᐌᑎᑖᑦ ᓵᐃᒪᓐ ᐱᑕᕋ: ᐱᑕᕐ ᒫᑲ ᐃᑌᐤ, ᑌᐯᓕᒋᑫᔭᓐ, ᑭ ᑭᒋᔅᑖᐸᐗᓯᑌᓂᓐ ᓈ? 7 ᒋᓴ ᐁ ᓇᔥᑴᐗᔑᐋᑦ, ᑮ ᐃᑌᐤ, ᐊᓂᒪ ᑳ ᑐᑕᒫᓐ ᓇᒪᐎᓚ ᐊᓄᒡ ᑭ ᑭᔅᑫᓕᑌᓐ; ᒫᑲ ᐹᑎᒪ ᑭ ᑳ ᑭᔅᑫᓕᑌᓐ᙮ 8 ᐱᑕᕐ ᐃᑌᐤ, ᓇᒪᐙᔅᑳᑦ ᑭ ᑳ ᑭᒋᔅᑕᐸᐗᓯᑌᓂᓐ ᓂᓚ᙮ ᒋᓴᔅ ᑮ ᓇᔥᑴᐗᔑᐁᐤ, ᑮᔥᐱᓐ ᐁᑳ ᑭᒋᔅᑖᐸᐗᓕᑖᓀ, ᓇᒪᐎᓚ ᑭ ᐎᒉᐎᓐ᙮ 9 ᓵᐃᒪᓐ ᐱᑕᕐ ᐃᑌᐤ, ᑌᐯᓕᒋᑫᔭᓐ, ᓇᒪᐎᓚ ᓂᓯᑕ ᐱᑯ, ᒫᑲ ᓂᒋᒋᔭ ᓀᔥᑕ ᓂᔅᑎᒀᓐ ᐊᓯᒋ᙮ 10 ᒋᓴᔅ ᐃᑌᐤ, ᐊᓇ ᑳ ᑭᒋᔅᑖᐸᐗᓛᑲᓂᐎᑦ ᓇᒪᐎᓚ ᓇᑕᐌᓕᑕᒻ ᐱᑯ ᑭᒋ ᑭᒋᔅᑖᐸᐗᑖᑦ ᐅᓯᑕ, ᐹᔦᑭᓯᐤ ᒫᑲ ᒥᑐᓂ: ᑭᓚᐗᐤ ᒫᑲ ᑭ ᐹᔦᑭᓯᓇᐗᐤ, ᒫᑲ ᓇᒪᐎᓚ ᒥᓯᐌ᙮ 11 ᐌᓴ ᑮ ᑭᔅᑫᓕᒣᐤ ᐊᐌᓕᐗ ᑫ ᐙᔦᔑᐸᑭᑎᓂᑯᑦ; ᐁᐗᑯ ᐌᒋ ᐃᑗᑦ, ᓇᒪᐎᓚ ᒥᓯᐌ ᑭ ᐹᔦᑭᓯᓇᐗᐤ᙮ 12 ᐁᑯ ᑳ ᑭᒋᔅᑖᐸᐗᓯᑌᓈᑦ, ᓀᔥᑕ ᑳ ᐅᑎᓇᒃ ᐅ ᐎᓛᒋᑲᓇ, ᓀᔥᑕ ᑳ ᓇᐊᐱᑦ ᒥᓇ, ᑮ ᐃᑌᐤ, ᑭ ᑭᔅᑫᓕᑌᓇᐗᐤ ᓈ ᑫᒀᓐ ᑳ ᑐᑖᑕᑾᒃ? 13 ᐅᑭᔅᑭᓄᐊᒫᑫᐤ ᓀᔥᑕ ᐅᑭᒪᐤ, ᑭᑦ ᐃᔑᓂᑳᔑᓇᐗᐤ: ᒀᔭᔉ ᒫᑲ ᑭᑦ ᐃᑣᓇᐗᐤ; ᐌᓴ ᓃᑦ ᐋᐐᓐ᙮ 14 ᑮᔥᐱᓐ ᒫᑲ ᓂᓚ ᑭᑦ ᐅᑭᒫᒥᐗᐤ ᓀᔥᑕ ᑳ ᑭᔅᑭᓄᐊᒫᑕᑾᒃ ᑳ ᑭᒋᔅᑖᐸᐗᑖᐙᓀ ᑭᓯᑎᐗᐗ; ᑭᓚᐗᐤ ᓀᔥᑕ ᑭ ᑳ ᑭᒋᔅᑖᐸᐗᓯᑌᓂᑐᑖᐗᐤ᙮ 15 ᐌᓴ ᑭ ᑮ ᑭᔅᑭᓄᐙᐸᑎᓕᑎᓇᐗᐤ ᑭᒋ ᑐᑕᒣᒃ ᑳ ᐃᔑ ᑐᑖᑕᑾᒃ᙮ 16 ᑖᐺ, ᑖᐺ, ᑭᑦ ᐃᑎᓇᐗᐤ, ᐊᑐᔅᑫᓛᑲᓐ ᓇᒪᐎᓚ ᐊᐙᓯᑌ ᐃᑌᓕᑖᑯᓯᐤ ᐃᔥᐱᔥ ᐅᑦ ᐅᑭᒫᒪ; ᓇᒪ ᓀᔥᑕ ᐊᓇ ᑳ ᐃᔑᑎᔕᐙᑲᓂᐎᑦ ᐊᐙᓯᑌ ᐃᑌᓕᑖᑯᓯᐤ ᐃᔥᐱᔥ ᐊᓂᐃ ᑳ ᐃᑎᔕᐅᑯᑦ᙮ 17 ᑮᔥᐱᓐ ᑫᔅᑫᓕᑕᒧᐌᑴ ᐅᐅ ᑫᒀᓇ, ᑭ ᒥᓜᓕᒧᓇᐗᐤ ᑮᔥᐱᓐ ᐁᑐᑕᒧᐌᑴ᙮ 18 ᓇᒪᐎᓚ ᒥᓯᐌ ᐁ ᐃᑕᔑᔦᒃ ᑭᑦ ᐋᓕᒧᒥᑎᓇᐗᐤ: ᓂ ᑭᔅᑫᓕᒫᐗᒃ ᐊᓂᑭ ᑳ ᑮ ᐙᐌᓛᐸᒪᑭᒃ: ᒫᑲ ᑭᒋ ᒪᓯᓇᐃᑫᐎᓐ ᑭᒋ ᑎᐱᐸᓕᒃ, ᐊᓇ ᑳ ᐎᒋᒥᒋᓱᒥᑦ ᐊᓚᑯᓇᐗ, ᑮ ᐅᐱᓇᒻ ᐅᑐᑕᓐ ᑭᒋ ᒪᒋᑐᑖᐎᑦ᙮ 19 ᐊᓄᒡ ᑭ ᐎᑕᒫᑎᓇᐗᐤ ᐸᒧᔑ ᐅᑎᒋᐸᓕᒃ, ᐃᔅᐱ ᐅᑎᒋᐸᓕᑫ, ᑭᒋ ᑖᐺᑕᒣᒃ ᓂᓚ ᐁ ᐋᐎᔮᓐ᙮ 20 ᑖᐺ, ᑖᐺ, ᑭᑦ ᐃᑎᓇᐗᐤ, ᐊᓇ ᑳ ᐱᔑᒋᐋᑦ ᐊᐌᓕᐗ ᑫ ᐃᑎᔕᐅᒪᑭ, ᓂ ᐱᔑᒋᐃᒃ ᓂᓚ; ᐊᓇ ᓀᔥᑕ ᑳ ᐱᔑᒋᐃᑦ, ᐱᔑᒋᐁᐤ ᐊᓂᐃ ᑳ ᑮ ᐯᒋᑎᔕᐅᓕᒋ᙮

ᒋᓴᔅ ᓂᑳᓂᐎᑕᒻ ᒋ ᐗᔦᔑ ᐸᑭᑎᓈᑲᓂᐎᑦ

21 ᐃᔅᐱ ᒋᓴᔅ ᐅᒣᓕᐤ ᑳ ᑮ ᐃᑗᑦ, ᑮ ᒥᑯᔥᑳᑌᓕᑕᒻ ᐅᑦ ᐊᒑᑯᒃ, ᓀᔥᑕ ᑮ ᐎᑕᒫᑫᐤ, ᐁ ᐃᑗᑦ, ᑖᐺ, ᑖᐺ, ᑭᑦ ᐃᑎᓇᐗᐤ, ᐯᔭᒃ ᐁ ᐃᑕᔑᔦᒃ ᓂ ᑳ ᐙᔦᔑᐸᑭᑎᓂᒃ᙮ 22 ᐁᑯ ᑭᔅᑭᓄᐊᒪᐙᑲᓇᒃ ᑫᓇᐙᐸᒥᑐᒋᒃ, ᐁ ᐙᐙᓀᓕᑕᑭᒃ ᐊᐌᓕᐗ ᑳ ᐋᓕᒧᒫᓕᒋ᙮ 23 ᑮ ᐋᔅᐸᒋᔑᓂᓕᐗ ᒫᑲ ᐯᔭᒃ ᐅ ᑭᔅᑭᓄᐊᒪᐙᑲᓇ ᒋᓴᔅ ᐅᔅᑳᔅᑭᑲᓂᒡ, ᐊᓂᐃ ᒋᓴᔅ ᑳ ᓵᑭᐋᑦ᙮ 24 ᓵᐃᒪᓐ ᐱᑕᕐ ᒫᑲ ᑮ ᓈᒥᔅᑴᓖᔅᑕᐌᐤ ᑭᒋ ᑲᑴᒋᑫᒧᓕᒋ ᐊᐌᓕᐗ ᐊᓂᐃ ᑳ ᐋᓕᒧᒫᓕᒋ᙮ 25 ᐎᓚ ᒫᑲ ᐁ ᐋᔅᐸᒋᔑᒃ ᒋᓴᓴ ᐅᔅᑳᔅᑭᑲᓂᓕᒃ, ᐃᑌᐤ, ᑌᐯᓕᒋᑫᔭᓐ, ᐊᐌᓇ? 26 ᒋᓴᔅ ᑮ ᓇᔥᑴᐗᔑᐃᐌᐤ, ᐁᐗᑯ ᐊᓇ ᑫ ᒥᓚᒃ ᓴᔅᑲᒧᐎᓂᓕᐤ ᑮ ᑭᑖᓇᒶᑫ᙮ ᐃᔅᐱ ᒫᑲ ᑳ ᑮ ᑭᑖᓇᒃ ᓴᔅᑲᒧᐎᓂᓕᐤ, ᑮ ᒥᓓᐤ ᒎᑕᔅ ᐃᔅᑳᕆᔭᑕ, ᓵᐃᒪᓐ ᐅᑯᓯᓴ᙮ 27 ᐃᔅᐱ ᑳ ᒥᓛᑲᓂᐎᑦ ᓴᔅᑲᒧᐎᓂᓕᐤ, ᒪᒋᒪᓂᑐᐗ ᑮ ᐱᑐᑫᔅᑳᑯ᙮ ᐁᑯ ᐁᑎᑯᑦ ᒋᓴᔅ, ᐊᓂᒪ ᑫ ᑐᑕᒪᓐ, ᑭᓕᐱ ᑐᑕ᙮ 28 ᓇᒪ ᐊᐌᓕᐗ ᒫᑲ ᒥᒋᓱᓈᑎᑯᒃ ᑮ ᑭᔅᑫᓕᑕᒥᓕᐗ ᑫᒀᓕᐤ ᐌᒋ ᑮ ᐃᑖᑦ ᐅᒣᓕᐤ᙮ 29 ᐌᓴ ᐋᑎᑦ ᑮ ᐃᑌᓕᑕᒥᓕᐗ, ᒎᑕᔅ ᐁ ᐋᔮᑦ ᒥᐗᑎᓕᐤ, ᑮ ᐃᑎᑯᑐᑫ ᒋᓴᓴ, ᐊᑖᐌ ᐊᓂᐃ ᑫᒀᓇ ᑳ ᓇᑕᐌᓕᑕᒪᒃ ᒪᑯᔐᐎᓐ ᐅᒋ; ᓀᔥᑕᐱᑯ ᑭᒋ ᒥᓛᑦ ᑫᒀᓕᐤ ᐊᓂᐃ ᑳ ᑭᑎᒫᑭᓯᓕᒋ᙮ 30 ᐎᓚ ᒫᑲ ᐁ ᑮ ᐅᑎᓇᒃ ᓴᔅᑲᒧᐎᓂᓕᐤ ᑣᔦᒃ ᑮ ᐗᓚᐎᐤ: ᑮ ᑎᐱᔅᑳᓕᐸᓐ ᒫᑲ᙮

ᐊᓂᒪ ᐅᔥᑭ ᑲᑫᔅᑴᐎᓐ

31 ᑳ ᐗᓚᐎᓕᒋ ᒫᑲ, ᒋᓴᔅ ᑮ ᐃᑗᐤ, ᐊᓄᒡ ᐃᓕᓕᐎᑯᓯᓵᓐ ᑭᔅᑕᑭᒫᑲᓂᐎᐤ, ᓀᔥᑕ ᑭᒋᒪᓂᑐ ᑭᔅᑕᑭᒫᑲᓂᐎᐤ ᐎᓚ ᐅᒋ᙮ 32 ᑮᔥᐱᓐ ᑭᒋᒪᓂᑐ ᑫᔅᑕᑭᒫᑲᓂᐎᑴ ᐎᓚ ᐅᒋ, ᑭᒋᒪᓂᑐ ᐊᓯᒋ ᑲᑕ ᑭᔅᑕᑭᒣᐤ ᐎᓚ ᑫᒋᐙᒃ, ᓀᔥᑕ ᑣᔦᒃ ᑲᑕ ᑭᔅᑕᑭᒣᐤ᙮ 33 ᐊᐱᔅᑕᐙᔑᔑᑐᒃ, ᑫᔮᐸᒡ ᐎᓕᐱᔉ ᑭ ᐎᒉᐎᑎᓇᐗᐤ᙮ ᑭ ᑳ ᓈᓇᑕᐌᓕᒥᓇᐗᐤ: ᓀᔥᑕ ᐁ ᑮ ᐃᑕᑭᒃ ᒎᐗᒃ, ᐃᑕ ᐁ ᐃᑐᑌᔮᓐ, ᓇᒪᐎᓚ ᑭ ᑳ ᑮ ᐯᒋ ᐃᑐᑖᓇᐗᐤ; ᐁᑯ ᓀᔥᑕ ᐁᑎᑕᑾᒃ᙮ 34 ᐅᔥᑭ ᑲᑫᔅᑴᐎᓐ ᑭ ᒥᓕᑎᓇᐗᐤ, ᑭᒋ ᓵᑭᐃᑐᔦᒃ; ᑖᐱᔅᑯᒡ ᐁ ᑮ ᐃᔑ ᓵᑭᐃᑕᑾᒃ, ᑭᓚᐗᐤ ᓀᔥᑕ ᑭᒋ ᐃᔑ ᓵᑭᐃᑐᔦᒃ᙮ 35 ᐁᑯᑕ ᐅᒪ ᒥᓯᐌ ᐃᓕᓕᐗᒃ ᑫ ᐅᒋ ᑭᔅᑫᓕᑕᑭᒃ ᑭᓚᐗᐤ ᐁ ᐅ ᑭᔅᑭᓄᐊᒪᐙᑲᓂᒥᑖᑾᒃ, ᑮᔥᐱᓐ ᓯᐋᑭᐃᑐᔦᑴ᙮

ᒋᓴᔅ ᓂᑳᓂᐎᑕᒻ ᒋ ᐋᑕᐌᓕᒥᑯᑦ ᐱᑕᕐ

36 ᓵᐃᒪᓐ ᐱᑕᕐ ᑮ ᐃᑌᐤ, ᑌᐯᓕᒋᑫᔭᓐ, ᑖᓐᑌ ᐁᑐᑌᔭᓐ? ᒋᓴᔅ ᑮ ᓇᔥᑴᐗᔑᐁᐤ, ᐃᑕ ᐁᑐᑌᔮᓐ ᓇᒪᐎᓚ ᐊᓄᒡ ᑭ ᑳ ᑮ ᓄᔅᐱᓇᔑᓐ; ᒫᑲ ᐹᑎᒫ ᑭ ᑳ ᓄᔅᐱᓇᔑᓐ᙮ 37 ᐱᑕᕐ ᑮ ᐃᑌᐤ, ᑌᐯᓕᒋᑫᔭᓐ, ᑖᓀᑭ ᐌᒋ ᐁᑳ ᑭ ᓄᔅᐱᓈᑎᑖᓐ ᐊᓄᒡ? ᓂ ᑳ ᐱᒥᑎᑖᓐ ᓂ ᐱᒫᑎᓯᐎᓐ ᑭᓚ ᐅᒋ᙮ 38 ᒋᓴᔅ ᑮ ᓇᔥᑴᐗᔑᐁᐤ, ᑭ ᑳ ᐱᒥᑎᑖᓐ ᓈ ᑭ ᐱᒫᑎᓯᐎᓐ ᓂᓚ ᐋᒋ? ᑖᐺ, ᑖᐺ, ᑭᑦ ᐃᑎᓐ, ᓈᐯᐹᑲᐋᒀᓐ ᓇᒪᐎᓚ ᑲᑕ ᓇᑖᑯᓯᐤ ᐹᑎᒫ ᓂᔅᑡᐤ ᑮ ᐋᓉᑕᒪᓀ ᐁ ᑭᔅᑫᓕᒥᔭᓐ᙮

14

ᒋᓴᔅ ᐊᓇ ᒣᔅᑲᓇᐤ ᐅᑖᐎᒫᐗ ᐃᔑ

1 ᐁᑳᐎᓚ ᑭᑌᐃᐗᐤ ᑲᑕ ᒥᑯᔥᑳᑌᓕᑕᒧᒪᑲᓐ: ᑭ ᑖᐺᔦᓕᒪᐗᐤ ᑭᒋᒪᓂᑐ, ᑖᐺᔦᓕᒥᒃ ᓂᓚ ᓀᔥᑕ᙮ 2 ᓄᑖᐎ ᐅ ᐋᔅᑳᔨᑲᓂᒥᒃ ᒥᒉᓋ ᑕᔑᑫᐎᓇ: ᑮᔥᐱᓐ ᒫᑲ ᐁᑳ, ᑭ ᑳ ᑮ ᐎᑕᒫᑎᑕᐗᐤ᙮ ᓂ ᑭᑐᑖᓐ ᑭᒋ ᐋᔦᔅᑲᐎᑕᒫᑕᑾᒃ ᐃᑕ ᑫ ᐃᑖᔦᒃ᙮ 3 ᑮᔥᐱᓐ ᓀᔥᑕ ᓇᑕᐎ ᐋᔦᔅᑲᐎᑕᒫᑕᑾᑫ ᐃᑕ ᑫ ᐃᑖᔦᒃ, ᒥᓇ ᓂ ᑳ ᐯᒋ ᐃᑐᑖᓐ, ᓀᔥᑕ ᑭ ᑳ ᐅᑎᓂᑎᓇᐗᐤ; ᐁᑕ ᐁ ᐁᑖᔮᓐ ᓂᓚ, ᐁᑯᑕ ᓀᔥᑕ ᑭᓚᐗᐤ ᑭᒋ ᐃᑖᔦᒃ᙮ 4 ᐃᑕ ᓀᔥᑕ ᐁ ᐃᑐᑌᔮᓐ ᑭ ᑭᔅᑫᓕᑌᓇᐗᐤ, ᓀᔥᑕ ᒣᔅᑲᓇᐤ ᑭ ᑭᔅᑫᓕᑌᓇᐗᐤ᙮ 5 ᑕᒪᔅ ᐃᑌᐤ, ᑌᐯᓕᒋᑫᔭᓐ, ᓇᒪᐎᓚ ᓂ ᑫᔅᑫᓕᑌᓈᓐ ᐃᑕ ᐁ ᐃᑐᑌᔭᓐ, ᑖᓐᑌ ᒫᑲ ᑫ ᑮ ᐅᒋ ᑭᔅᑫᓕᑕᒫᒃ ᒣᔅᑲᓇᐤ? 6 ᒋᓴᔅ ᐃᑌᐤ, ᓂᓚ ᐁᐗᑯ ᒣᔅᑲᓇᐤ, ᓀᔥᑕ ᑖᐺᐎᓐ, ᓀᔥᑕ ᐱᒫᑎᓯᐎᓐ: ᓇᒪᐎᓚ ᐊᐌᓇ ᓈᑌᐤ ᐅᑖᐎᒪᐗ, ᐱᑯ ᓂᓚ ᐅᒋ᙮ 7 ᑮᔥᐱᓐ ᑭ ᑭᔅᑫᓕᒥᐌᑯᐸᓀ, ᑭ ᑳ ᑮ ᑭᔅᑫᓕᒫᑕᐗᐤ ᓄᑖᐎ ᓀᔥᑕ: ᐊᓄᒡ ᒫᑲ ᐅᒋ ᑭ ᑭᔅᑫᓕᒪᐗᐤ, ᓀᔥᑕ ᑭ ᑮ ᐙᐸᒪᐗᐤ᙮ 8 ᐱᓕᑉ ᐃᑌᐤ, ᑌᐯᓕᒋᑫᔭᓐ, ᐙᐸᑎᓕᓈᓐ ᐅᑖᐎᒪᐤ, ᐁᑯ ᑫ ᓇᐁᓕᑕᒫᒃ᙮ 9 ᒋᓴᔅ ᐃᑌᐤ, ᑭ ᑮ ᐎᒉᐎᑎᓇᐗᐤ ᓈ ᐁᑯ ᐃᔥᐱᔥ ᑭᓉᔥ, ᐁᔥᑾ ᓈ ᒫᑲ ᓇᒪ ᑭ ᑭᔅᑫᓕᒥᓐ ᐱᓕᑉ? ᐊᓇ ᑳ ᑮ ᐙᐸᒥᑦ ᑮ ᐙᐸᒣᐤ ᐅᑖᐎᒪᐗ; ᑖᓐᑌ ᒫᑲ ᐌᒋ ᐃᑗᔭᓐ, ᐙᐸᑎᓕᓈᓐ ᐅᑖᐎᒪᐤ? 10 ᓇᒪ ᓈ ᑭ ᑖᐺᑌᓐ ᐅᑖᐎᒪᐤ ᐁ ᐱᒋᔅᑲᐗᒃ, ᓀᔥᑕ ᐅᑖᐎᒪᐤ ᐁ ᐱᒋᔅᑳᐎᑦ? ᐋᔭᒥᐎᓇ ᑳ ᐃᑎᑕᑾᒃ ᓇᒪᐎᓚ ᓂᓚ ᑫᒋᐙᒃ ᓂᑦ ᐋᔭᒥᓐ: ᒫᑲ ᐅᑖᐎᒪᐤ ᑳ ᐱᒋᔅᑲᐎᑦ, ᐁᐗᑯ ᑳ ᑐᑕᒃ ᐋᔨᑎᐎᓇ᙮ 11 ᑖᐺᑕᐎᓐ ᐅᑖᐎᒪᐤ ᐁ ᐱᒋᔅᑲᐗᒃ, ᓀᔥᑕ ᐁ ᐱᒋᔅᑲᐎᑦ ᐅᑖᐎᒪᐤ; ᓀᔥᑕᐱᑯ ᑖᐺᑕᐎᒃ ᐊᓂᐃ ᐋᔨᑎᐎᓇ ᐅᒋ᙮ 12 ᑖᐺ, ᑖᐺ, ᑭᑦ ᐃᑎᓇᐗᐤ, ᐊᓇ ᑳ ᑖᐺᔦᓕᒥᑦ, ᐋᔨᑎᐎᓇ ᑳ ᑐᑕᒶᒃ ᐎᓚ ᓀᔥᑕ ᑲᑕ ᑐᑐᒻ; ᓀᔥᑕ ᑲᑕ ᑐᑕᒻ ᐋᔨᑎᐎᓇ ᐊᐙᓯᑌ ᐁ ᐃᑌᓕᑖᑾᓂᓕᑭ ᐃᔥᐱᔥ ᐅᐅ; ᐁ ᓈᑕᒃ ᓄᑖᐎ᙮ 13 ᓀᔥᑕ ᒫᑲ ᐱᑯ ᑫᒀᓐ ᑫ ᓇᑐᑕᒫᔦᒃ ᓂᑦ ᐃᔑᓂᑳᓱᐎᓂᒃ, ᐁᐗᑯ ᑫ ᑐᑕᒫᓐ, ᐅᑖᐎᒪᐤ ᑭᒋ ᑭᔅᑕᑭᒫᑲᓂᐎᑦ ᐅᑯᓯᓯᒫᐗ ᐅᒋ᙮ 14 ᑮᔥᐱᓐ ᓇᑐᑕᒫᔦᑴ ᑫᒀᓐ ᓂᑦ ᐃᔑᓂᑳᓱᐎᓂᒃ, ᓂ ᑳ ᑐᑌᓐ᙮

ᓄᑖᐎ ᑭ ᑲ ᒥᓕᑯᐗᐤ ᐊᒑᑾ, ᐃᑌᐤ ᒋᓴᔅ

15 ᑮᔥᐃᓐ ᓯᐋᑭᐃᐌᑴ, ᑲᓇᐎᑖᒃ ᓂ ᑲᑫᔅᑴᐎᓇ᙮ 16 ᓀᔥᑕ ᓂ ᑳ ᐋᔭᒥᐁᔅᑕᐗᐤ ᐅᑖᐎᒪᐤ, ᑭ ᑳ ᒥᓕᑯᐗᐤ ᒫᑲ ᑯᑕᑭᔭ ᐅᒥᓜᓕᒧᐃᐌᐗ, ᑳᑭᑫ ᑭᒋ ᐎᒉᐎᑖᒃ᙮ 17 ᑖᐺᐎᓂ ᐊᒑᒃ ᐅᑎ, ᐊᔅᑭᓕᐤ ᐁᑳ ᑳ ᑮ ᐅᑎᓂᑯᑦ, ᐁᑳ ᐁ ᐙᐸᒥᑯᑦ, ᐁᑳ ᓀᔥᑕ ᐁ ᑭᔅᑫᓕᒥᑯᑦ; ᒫᑲ ᑭᓚᐗᐤ ᑮ ᑭᔅᑫᓕᒪᐗᐤ, ᓀᔥᑕ ᑭ ᑳ ᐱᒋᔅᑳᑯᐗᐤ᙮ 18 ᓇᒪᐎᓚ ᑭ ᑳ ᓇᑲᑎᑎᓇᐗᐤ ᐁ ᑭᐗᔑᔖᓂᐎᔦᒃ: ᑭ ᑳ ᐯᒋ ᓇᑎᑎᓇᐗᐤ᙮ 19 ᑫᔮᐸᒡ ᐎᓕᐱᔉ, ᐁᑯ ᐊᔅᑭ ᐁᑳ ᒥᓇ ᑫ ᐙᐸᒥᑯᔮᓐ; ᒫᑲ ᑭᓚᐗᐤ ᑭ ᑳ ᐙᐸᒥᓇᐗᐤ: ᐁ ᐱᒫᑎᓯᔮᓐ ᓂᓚ, ᐁᐗᑯ ᑭᓚᐗᐤ ᓀᔥᑕ ᑫ ᐅᒋ ᐱᒫᑎᓯᔦᒃ᙮ 20 ᐊᓂᒪ ᑫ ᑭᔑᑳᒃ ᑭ ᑳ ᑭᔅᑫᓕᑌᓇᐗᐤ ᓂᓚ ᐁ ᐱᒋᔅᑲᐎᑦ ᓄᑖᐎ, ᓀᔥᑕ ᑭᓚᐗᐤ ᐁ ᐱᒋᔅᑲᐎᔦᒃ, ᓀᔥᑕ ᓂᓚ ᐁ ᐱᒋᔅᑳᑕᑾᒃ᙮ 21 ᐊᓇ ᑳ ᐋᔭᑦ ᓂ ᑲᑫᔅᑴᐎᓇ, ᓀᔥᑕ ᑳ ᑲᓇᐎᑖᑦ ᐁᐗᒀᓇ ᑳ ᓴᑭᐃᑦ: ᐊᓇ ᓀᔥᑕ ᑳ ᓵᑭᐃᑦ ᑲᑕ ᓵᑭᐃᑯ ᓄᑖᐎᔭ, ᓀᔥᑕ ᓂᓚ ᓂ ᑳ ᓵᑭᐊᐤ, ᓂ ᑳ ᓄᑯᓰᔅᑕᐗᐤ ᒫᑲ᙮ 22 ᒎᑕᔅ ᐃᑌᐤ, ᓇᒪᐎᓚ ᐃᔅᑳᕆᔭᑦ, ᑌᐯᓕᒋᑫᔭᓐ, ᑖᓐᑌ ᑫ ᐃᔑ ᓄᑯᓰᔅᑕᐎᔭᒃ, ᐁᑳ ᒫᑲ ᑭᒋ ᐙᐸᒥᑲᐎᔭᓐ ᐊᔅᑮᒃ? 23 ᒋᓴᔅ ᑮ ᓇᔥᑴᐗᔑᐁᐤ, ᐁ ᐃᑖᑦ, ᑮᔥᐱᓐ ᐊᐌᓇ ᓵᑭᐃᑌ ᑲᑕ ᑲᓇᐎᑕᐤ ᓂᑦ ᐋᔭᒥᐎᓇ: ᓀᔥᑕ ᑲᑕ ᓵᑭᐃᑯ ᓄᑖᐎᔭ, ᓂ ᑳ ᐯᒋ ᓈᑖᓈᓐ ᒫᑲ, ᓀᔥᑕ ᓂ ᑳ ᐎᒋᑕᔑᑫᒫᓈᓐ᙮ 24 ᐊᓇ ᐁᑳ ᑳ ᓵᑭᐃᑦ ᓇᒪᐎᓚ ᑲᓇᐎᑕᐤ ᓂᑦ ᐃᑗᐎᓇ: ᐋᔭᒥᐎᓐ ᒫᑲ ᑳ ᐯᑕᒣᒃ ᓇᒪᔦᐤ ᓂᓚ ᓂᑦ ᐋᔭᒥᐎᓐ, ᒫᑲ ᐅᑖᐎᒪᐤ ᑳ ᑮ ᐯᒋᑎᔕᐅᑦ ᐅᑦ ᐋᔭᒥᐎᓐ᙮ 25 ᐅᐅ ᑫᒀᓇ ᑭ ᑮ ᐎᑕᒫᑎᓇᐗᐤ, ᑫᔮᐸᒡ ᐁ ᐎᒉᐎᑕᑾᒃ᙮ 26 ᒫᑲ ᐅᒥᓜᓕᒧᐃᐌᐤ, ᐁᐗᑯ ᐯᓓᑭᓯᑦ ᐊᒑᒃ, ᑫ ᐯᒋᑎᔕᐅᑯᑦ ᐅᑖᐎᒪᐗ ᓂᑦ ᐃᔑᓂᑳᓱᐎᓂᒃ, ᐎᓚ ᑭ ᑳ ᑭᔅᑭᓄᐊᒫᑯᐗᐤ ᒥᓯᐌ ᑭᒀᓇ, ᓀᔥᑕ ᑭ ᑳ ᑭᔅᑭᓯᐃᑯᐗᐤ ᒥᓯᐌ ᑫᒀᓇ ᑳ ᑮ ᐃᑎᑕᑾᒃ᙮ 27 ᑳᔮᒣᓕᑕᒧᐎᓐ ᑭ ᓇᑲᑕᒫᑎᓇᐗᐤ, ᓂ ᑳᔮᒣᓕᑕᒧᐎᓐ ᑭ ᒥᓕᑎᓇᐗᐤ: ᓇᒪᐎᓚ ᑖᐱᔅᑯᒡ ᐊᔅᑭ ᑳ ᐃᔑ ᒥᓕᐌᒪᑲᒃ, ᑭᑦ ᐃᔑ ᒥᓕᑎᓂᐗᐤ᙮ ᐁᑳᐎᓚ ᑭᑌᐃᐗᐤ ᑲᑕ ᒥᑯᔥᑳᑌᓕᑕᒧᒪᑲᓐ, ᐁᑳᐎᓚ ᓀᔥᑕ ᑲᑕ ᑯᔅᑖᒋᒪᑲᓐ᙮ 28 ᑭ ᑮ ᐯᑌᓇᐗᐤ ᑳ ᑮ ᐃᑎᑕᑾᒃ, ᓂ ᑭᑐᑖᓐ, ᓀᔥᑕ ᒥᓇ ᑭ ᑳ ᐯᒋ ᓈᑎᑎᓇᐗᐤ᙮ ᑮᔥᐱᓐ ᑮ ᓵᑭᐃᔦᒃ, ᑭ ᑳ ᒧᒋᑫᓕᑌᑕᐗᐤ, ᐁ ᑮ ᐃᑗᔮᓐ, ᓂ ᓈᑕᐤ ᐅᑖᐎᒪᐤ: ᐌᓴ ᓄᑖᐎ ᐊᐙᓯᑌ ᑭᔅᑌᓕᑖᑯᓯᐤ ᐃᔥᐱᔥ ᓂᓚ᙮ 29 ᐊᓄᒡ ᒫᑲ ᑭ ᑮ ᐎᑕᒫᑎᓇᐗᐤ ᐸᒧᔑ ᐅᑎᒋᐸᓕᒃ, ᐅᑎᒋᐸᓕᑫ ᑭᒋ ᑮ ᑖᐺᑕᒣᒃ᙮ 30 ᐊᓄᒡ ᐅᒋ ᓇᒪᐎᓚ ᒥᔅᑕᐃ ᑭ ᑳ ᐎᒋᐋᔭᒥᒥᑎᓇᐗᐤ: ᐌᓴ ᐊᓇ ᑳ ᑎᐯᓕᑕᒃ ᐅᒣᓕᐤ ᐊᔅᑭᓕᐤ ᐯᒋ ᐃᑐᑌᐤ, ᓇᒪ ᓀᔥᑕ ᑫᒀᓕᐤ ᐋᔭᐤ ᑳ ᐱᒋᔅᑲᑯᐗᒃ᙮ 31 ᒫᑲ ᐊᔅᑭ ᑭᒋ ᑭᔅᑫᓕᑕᒧᒪᑲᒃ ᐁ ᓵᑭᐊᒃ ᐅᑖᐎᒪᐤ; ᓀᔥᑕ ᑖᐱᔅᑯᒡ ᐅᑖᐎᒪᐤ ᑳ ᐃᑕᔓᐙᔑᑦ, ᐁᑯ ᐃᔑ ᑐᑕᒫᓐ᙮ ᐸᓯᑯᒃ, ᑭᑐᑌᑕᐤ᙮

15

ᒋᓴᔅ ᑖᐺ ᔓᒥᓈᑎᒃ ᐃᔑᓂᑲᑖᑲᓂᐎᐤ

1 ᓂᓚ ᐁᐗᑯ ᑖᐺ ᔓᒥᓈᑎᒃ, ᓄᑖᐎ ᒫᑲ ᓂᑕᐎᑭᒋᑫᐎᓕᓕᐤ᙮ 2 ᒥᓯᐌ ᑕᑐ ᐗᑎᑾᓐ ᑳ ᐱᒋᔅᑳᑯᔮᓐ ᐁᑳ ᑳ ᓂᑖᐎᑭᑖᒪᑲᒃ ᒥᓂᔕ ᐃᑲᑌᓇᒻ; ᓀᔥᑕ ᒥᓯᐌ ᑕᑐ ᐗᑎᑾᓐ ᑳ ᓂᑖᐎᑭᑖᒪᑲᒃ ᒥᓂᔕ, ᐹᔦᑭᑖᐤ, ᐊᐙᓯᑌ ᑭᒋ ᒥᓂᔑᐗᓂᓕᒃ᙮ 3 ᐁᑯ ᐯᔦᑭᓯᔦᒃ ᐋᔭᒥᐎᓐ ᐅᒋ ᑳ ᑮ ᐎᑕᒫᑕᑾᒃ᙮ 4 ᐱᒋᔅᑲᐎᒃ ᓀᔥᑕ ᐁᑯ ᓀᔥᑕ ᑫ ᐱᒋᔅᑳᑕᑾᒃ᙮ ᑖᐱᔅᑯᒡ ᐗᑎᑾᓐ ᐁᑳ ᑎᐹᓐ ᐁ ᑮ ᓂᑖᐎᑭᑖᒪᑲᒃ ᒥᓂᔕ ᑮᔥᐱᓐ ᐁᑳ ᐁᑕᑾᑭ ᔓᒥᓈᑎᑯᒃ; ᓇᒪ ᓀᔥᑕ ᑭᓚᐗᐤ ᑮᔥᐱᓐ ᐁᑳ ᐱᒋᔅᑲᐎᔦᑴ᙮ 5 ᓂᓚ ᐁᐗᑯ ᔓᒥᓈᑎᒃ, ᑭᓚᐗᐤ ᒫᑲ ᐗᑎᑾᓇ: ᐊᓇ ᑳ ᐱᒋᔅᑲᐎᑦ, ᓀᔥᑕ ᓂᓚ ᑳ ᐱᒋᔅᑲᐗᒃ ᐁᐗᑯ ᑳ ᓂᑕᐎᑭᑖᑦ ᒥᒉᑦ ᒥᓂᔕ: ᐌᓴ ᐁᑳ ᐁ ᐱᒋᔅᑲᐎᔦᒃ ᓇᒪᐎᓚ ᑫᒀᓐ ᑭ ᑳ ᑮ ᑐᑌᓇᐗᐤ᙮ 6 ᑮᔥᐱᓐ ᐊᐌᓇ ᐁᑳ ᐱᒋᔅᑲᐎᑌ, ᐌᐱᓈᑲᓂᐎᐤ ᑖᐱᔅᑯᒡ ᐗᑎᑾᓐ, ᓂᐱᐤ ᒫᑲ; ᐁᑯ ᐃᓕᓕᐗᒃ ᒥᔭᐗᒋᑖᒋᒃ, ᓀᔥᑕ ᒣᒎᔅᑌᐌᐱᓇᑭᒃ, ᐃᔥᒀᑌᐗ ᒫᑲ᙮ 7 ᑮᔥᐱᓐ ᐱᒋᔅᑲᐎᔦᑴ, ᓀᔥᑕ ᓂᑦ ᐋᔭᒥᐎᓐ ᐱᒋᔅᑳᑯᔦᑶ, ᑭ ᑳ ᓇᑐᑕᒫᓇᐗᐤ ᑫᒀᓐ ᐁ ᐃᔑ ᓇᑕᐌᓕᑕᒣᒃ, ᐁᑯ ᑫ ᑐᑕᒫᑲᐎᔦᒃ᙮ 8 ᐁᑯᑕ ᒫᑲ ᐌᒋ ᑭᔅᑌᓕᑖᑯᐋᑲᓂᐎᑦ ᓄᑖᐎ, ᑭᒋ ᓂᑖᐎᑭᑖᔦᒃ ᒥᔅᑕᐃ ᒥᓂᔕ; ᐁᑯ ᑫ ᐅ ᑭᔅᑭᓄᐊᒪᐙᑲᓂᒥᑕᑾᒃ᙮ 9 ᐅᑖᐎᒪᐤ ᑳ ᐃᔑ ᓵᑭᐃᑦ, ᐁᑯ ᑖᐱᔅᑯᒡ ᑳ ᐃᔑ ᓵᑭᐃᑕᑾᒃ: ᑕᔑᑫᒃ ᓂ ᓵᑭᐃᐌᐎᓂᒃ᙮ 10 ᑮᔥᐱᓐ ᑲᓇᐎᑕᒣᑴ ᓂ ᑲᑫᔅᑴᐎᓇ, ᑭ ᑳ ᑕᔑᑳᓇᐗᐤ ᓂ ᓵᑭᐃᐌᐎᓂᒃ; ᑖᐱᔅᑯᒡ ᐁ ᑮ ᐃᔑ ᑲᓇᐎᑕᐗᒃ ᓄᑖᐎ ᐅ ᑲᑫᔅᑴᐎᓇ, ᓀᔥᑕ ᐁ ᐃᔑ ᑕᔑᑫᐗᒃ ᐅ ᓵᑭᐃᐌᐎᓂᒃ᙮ 11 ᐅᐅ ᑫᒀᓇ ᑭ ᑮ ᐎᑕᒫᑎᓇᐗᐤ, ᓂ ᒥᓚᐙᑕᒧᐎᓐ ᑭᒋ ᐱᒋᔅᑳᑯᔦᒃ, ᓀᔥᑕ ᑭ ᒥᓚᐙᑕᒧᐎᓂᐗᐤ ᑭᒋ ᓵᑲᔅᑭᓀᒃ᙮ 12 ᐁᐗᑯ ᐅᒪ ᓂ ᑲᑫᔅᑴᐎᓐ, ᑭᒋ ᓵᑭᐃᑐᔦᒃ, ᑖᐱᔅᑯᒡ ᐁ ᑮ ᐃᔑ ᓵᑭᐃᑕᑾᒃ᙮ 13 ᓇᒪᐎᓚ ᐊᐌᓇ ᐋᔭᐤ ᓵᑭᐃᐌᐎᓂᓕᐤ ᐊᐙᓯᑌ ᐁ ᐃᑌᓕᑖᑾᓂᓕᒃ ᐃᔥᐱᔥ ᐅᒪ, ᐃᓕᓕᐤ ᑭᒋ ᐱᒥᑎᑖᑦ ᐅ ᐱᒫᑎᓯᐎᓐ ᐅᑐᑌᒪ ᐅᒋ᙮ 14 ᑭᑦ ᐅᑐᑌᒥᒥᑎᓇᐗᐤ ᑮᔥᐱᓐ ᑐᑕᒧᑴ ᒥᓯᐌ ᑫᒀᓐ ᑳ ᐃᑕᔓᐙᑎᑕᑾᒃ 15 ᐊᓄᒡ ᐅᒋ ᓇᒪᐎᓚ ᐊᑑᔅᑫᓛᑲᓇᒃ ᑭᑦ ᐃᔑᓂᑳᑎᑎᓇᐗᐤ; ᐌᓴ ᐊᑑᔅᑫᓛᑲᓐ ᓇᒪᐎᓚ ᑭᔅᑫᓕᑕᒻ ᑫᒀᓕᐤ ᐅᑦ ᐅᑭᒫᒪ ᐁᑐᑕᒥᓕᒋ: ᒫᑲ ᓂᑐᑌᒪᐤ ᑭ ᑮ ᐃᔑᓂᑳᑎᑎᓇᐗᐤ, ᐌᓴ ᒥᓯᐌ ᑫᒀᓇ ᑳ ᑮ ᐯᑕᒫᓐ ᓄᑖᐎ ᐅᒋ, ᑭ ᑮ ᑭᔅᑫᓕᑕᒥᐃᑎᓇᐗᐤ᙮ 16 ᓇᒪᐎᓚ ᑭᓚᐗᐤ ᑭ ᐅᒋ ᐙᐌᓛᐸᒥᓇᐗᐤ, ᒫᑲ ᓂᓚ ᑭ ᑭᑮᐙᐌᓛᐸᒥᑎᓇᐗᐤ, ᓀᔥᑕ ᑭ ᑮ ᐹᑲᓂᐃᑎᓇᐗᐤ ᑭᒋ ᓇᑕᐎ ᓂᑖᐎᑭᑖᔦᒃ ᒥᓂᔕ, ᓀᔥᑕ ᑭ ᒥᓂᔑᒥᐙᐗ ᑭᒋ ᐃᑕᑾᑭ: ᐱᑯ ᑫᒀᓐ ᒫᑲ ᑫ ᓇᑐᑕᒪᐗᐌᑴ ᐅᑖᐎᒪᐤ ᓂᑦ ᐃᔑᓂᑳᓱᐎᓂᒃ ᑭᒋ ᒥᓕᑖᒃ᙮ 17 ᐅᐅ ᑫᒀᓇ ᑭᑦ ᐃᑕᔓᐙᑎᑎᓇᐗᐤ, ᑭᒋ ᓵᑭᐃᑐᔦᒃ᙮

ᐁᔑ ᐅᑳᑎᑯᑦ ᐃᓕᓕᐗᒃ ᐊᔅᑭᒃ ᑳ ᐃᑖᒋᒃ

18 ᑮᔥᐱᓐ ᐊᔅᑭ ᐸᒀᑎᑯᔦᑴ, ᑭ ᑭᔅᑫᓕᑌᓇᐗᐤ ᐁ ᑮ ᐸᒀᑎᑯᔮᓐ ᐸᒧᔑ ᐸᒀᑎᑯᔦᒃ ᑭᓚᐗᐤ᙮ 19 ᑮᔥᐱᓐ ᐊᔅᑮᒃ ᑮ ᐅᒋᐌᑯᐸᓀ, ᐊᔅᑭ ᑲᑕ ᓵᑭᑖᒪᑲᓄᐸᓐ ᐊᓂᒪ ᑳ ᑎᐱᓚᐌᐎᓯᒪᑲᒃ: ᐁᑳ ᒫᑲ ᐊᔅᑮᒃ ᐁ ᐅᒋᔦᒃ, ᐁ ᑮ ᐙᐌᓛᐸᒥᑕᑾᒃ ᒫᑲ ᐊᔅᑮᒃ ᐅᒋ, ᐁᐗᑯ ᐌᒋ ᐸᒀᑎᑯᔦᒃ ᐊᔅᑭ᙮ 20 ᑭᔅᑭᓯᒃ ᐊᓂᒪ ᐋᔭᒥᐎᓐ ᑳ ᑮ ᐃᑎᑕᑾᒃ, ᐊᑑᔅᑫᓛᑲᓐ ᓇᒪᐎᓚ ᐊᐙᓯᑌ ᐃᑌᓕᑖᑯᓯᐤ ᐁᑌᓕᑖᑯᓯᓕᒋ ᐅᑦ ᐅᑭᒫᒪ᙮ ᑮᔥᐱᓐ ᓂᓚ ᑳ ᓇᓀᑳᒋᐃᐙᑴ, ᑭᓚᐗᐤ ᓀᔥᑕ ᑭ ᑳ ᓇᓀᑳᒋᐃᑯᐙᐗᒃ; ᑮᔥᐱᓐ ᑳ ᑲᓇᐎᑕᐙᑴ ᓂᑦ ᐃᑗᐎᓂᓕᐤ, ᑭᑦ ᐃᑗᐎᓂᐗᐤ ᓀᔥᑕ ᑲᑕ ᑲᓇᐎᑖᐗᒃ᙮ 21 ᒫᑲ ᒥᓯᐌ ᐅᐅ ᑫᒀᓇ ᑭ ᑳ ᑐᑖᑯᐙᐗᒃ ᓂᑦ ᐃᔑᓂᑳᓱᐎᓂᓕᐤ ᐅᒋ, ᐁᑳ ᐁ ᑭᔅᑫᓕᒫᒋᒃ ᐊᓂᐃ ᑳ ᑮ ᐯᒋᑎᔕᐅᓕᒋ᙮ 22 ᑮᔥᐱᓐ ᐁᑳ ᐅᒋ ᐯᒋ ᐋᔭᒥᐊᑭᒃ, ᓇᒪᐎᓚ ᑲᑕ ᐋᔮᐸᓇᒃ ᒪᒋᑣᐎᓂᓕᐤ: ᒫᑲ ᐊᓄᒡ ᓇᒪᐎᓚ ᑫᒀᓕᐤ ᐋᔭᐗᒃ ᑭᒋ ᐅᒋ ᐊᑾᓇᐊᑭᒃ ᐅ ᒪᒋᑣᐎᓂᐗᐤ᙮ 23 ᐊᓇ ᑳ ᐸᒀᔑᑦ ᐸᒀᑌᐤ ᓄᑖᐎᔭ ᓀᔥᑕ᙮ 24 ᑮᔥᐱᓐ ᐁᑳ ᐅᒋ ᑐᑕᒶᒃ ᑭᒋ ᐙᐸᑕᑭᒃ ᐋᔨᑎᐎᓇ ᐁᑳ ᑯᑕᒃ ᐊᐌᓇ ᑳ ᑮ ᑐᑕᒃ, ᓇᒪᐎᓚ ᑲᑕ ᐋᔮᐸᓇᒃ ᒪᒋᑣᐎᓂᓕᐤ: ᒫᑲ ᐊᓄᒡ ᓂ ᑮ ᐙᐸᒥᑯᓈᓇᒃ ᓀᔥᑕ ᓂ ᑮ ᐸᑾᑎᑯᓈᓇᒃ ᓂᓚ ᓀᔥᑕ ᓄᑖᐎ᙮ 25 ᒫᑲ ᐅᒪ ᐃᑭᓐ ᑭᒋ ᑎᐱᐸᓕᓕᒃ ᐋᔭᒥᐎᓂᓕᐤ ᑳ ᒥᓯᓇᐃᑳᑌᓕᒃ ᐅᑦ ᐅᓚᔓᐌᐎᓂᐙᒃ, ᔐᔥᒀᑦ ᓂ ᑮ ᐸᒀᑎᑾᒃ᙮ 26 ᒫᑲ ᐃᔅᐱ ᐅᒥᓜᓕᒧᐃᐌᐤ ᑕᑯᔑᑫ, ᑫ ᐯᒋᑎᔕᐊᒫᑕᑾᒃ ᐅᑖᐎᒪᐤ ᐅᒋ, ᑖᐺᐎᓂ ᐊᒑᒃ ᐅᑎ, ᐅᑖᐎᒫᒃ ᑳ ᐅᒌᑦ, ᐁᐗᑯ ᑫ ᑎᐹᒋᒥᑦ: 27 ᓀᔥᑕ ᑭᓚᐗᐤ ᐊᓯᒋ ᑭ ᑳ ᑎᐹᒋᒥᓇᐗᐤ, ᐁ ᑮ ᐎᒉᐎᔦᒃ ᓃᔥᑕᒻ ᐅᒋ᙮

16

1 ᐅᐅ ᑫᒀᓇ ᑭ ᑮ ᐎᑕᒫᑎᓇᐗᐤ, ᐁᑳ ᑭᒋ ᓈᔦᑕᐌᓕᑕᒣᒃ᙮ 2 ᑭ ᑳ ᐗᓚᐎᐌᐱᓂᑯᐙᐗᒃ ᐋᔭᒥᐁᐎᑲᒥᑯᒃ ᐅᒋ: ᐁᐁ, ᑎᐹᔨᑲᓐ ᐱᓯᒧᑳᓂᒃ ᐹᐸᓕᐤ, ᐃᔅᐱ ᒥᓯᐌ ᐊᐌᓇ ᑫ ᓂᐹᔨᑖᒃ, ᓂᑦ ᐊᑑᔅᑲᐗᐤ ᑭᒋᒪᓂᑐ, ᑲᑕ ᐃᑌᓕᑕᒻ᙮ 3 ᐅᐅ ᑫᒀᓇ ᒫᑲ ᑭ ᑳ ᑐᑖᑯᐙᐗᒃ ᐁᑳ ᑳ ᐅᒋ ᑭᔅᑫᓕᒫᒋᒃ ᐅᑖᐎᒪᐗ ᓀᔥᑕ ᓂᓚ᙮ 4 ᒫᑲ ᐅᐅ ᑫᒀᓇ ᑭ ᑮ ᐎᑕᒫᑎᓇᐗᐤ, ᐃᔅᐱ ᑎᐹᔨᑲᓐ ᐱᓯᒧᑳᓂᒃ ᐅᑎᒋᐸᓕᑫ ᑭᒋ ᑭᔅᑭᓯᔦᒃ ᐁ ᑮ ᐋᓕᒧᑕᒫᑕᑾᒃ᙮

ᐅᑕᐹᑎᓯᐎᓐ ᐸᓓᑭ ᐊᒑᒃ

ᐅᐅ ᑫᒀᓇ ᒫᑲ ᓇᒪᐎᓚ ᑭ ᐅᒋ ᐎᑕᒫᑎᓈᐗᐤ ᓃᔥᑕᒻ, ᐁ ᐎᒉᐎᑕᑾᑭᐸᓐ᙮ 5 ᒫᑲ ᐊᓄᒡ ᓂ ᓈᑕᐤ ᐊᓇ ᑳ ᑮ ᐯᒋᑎᔕᐅᑦ: ᓇᒪ ᒫᑲ ᐊᐌᓇ ᐁ ᐃᑕᔑᔦᒃ ᓂ ᑲᑴᒋᒥᒃ, ᑖᓐᑌ ᐁᑐᑌᔭᓐ? 6 ᒫᑲ ᐁ ᑮ ᐎᑕᒫᑕᑾᒃ ᐅᐅ ᑫᒀᓇ, ᑯᐹᑌᓕᑕᒧᐎᓐ ᑭ ᓵᑲᔅᑭᓀᔅᑳᑯᓇᐗᐤ ᑭᑌᐃᐙᒃ᙮ 7 ᐁᓕᐌᒃ ᒫᑲ ᑭ ᐎᑕᒫᑎᓇᐗᐤ ᑖᐺᐎᓐ: ᑭᓚᐗᐤ ᐅᒋ ᓇᐃᐸᓕᐤ ᑭᒋ ᑭᑐᑌᔮᓐ: ᐌᓴ ᑮᔥᐱᓐ ᐁᑳ ᑭᑐᑌᔮᓀ, ᐅᒥᓜᓕᒫᐃᐌᐤ ᓇᒪᐎᓚ ᑭ ᑳ ᐯᒋ ᓈᑎᑯᐗᐤ; ᒫᑲ ᑮᔥᐱᓐ ᑭᑐᑌᔮᓀ, ᑭ ᑳ ᐯᒋᑎᔕᐊᒫᑎᓇᐗᐤ᙮ 8 ᐃᔅᐱ ᒫᑲ ᑕᑯᔑᑫ, ᑲᑕ ᑭᑐᑕᒻ ᐊᔅᑭᓕᐤ ᒪᒋᑣᐎᓂᓕᐤ ᐅᒋ, ᓀᔥᑕ ᒀᔭᔅᑭᑖᑎᓯᐎᓂᓕᐤ ᐅᒋ, ᓀᔥᑕ ᑎᐹᔅᑯᓂᑫᐎᓂᓕᐤ ᐅᒋ: 9 ᒪᒋᑣᐎᓂᓕᐤ ᐅᒋ, ᐁᑳ ᐁ ᑖᐺᔦᓕᒥᒋᒃ: 10 ᒀᔭᔅᑭᑖᑎᓯᐎᓂᓕᐤ ᐅᒋ, ᐁ ᓈᑕᒃ ᓄᑖᐎ, ᐁᑳ ᒫᑲ ᒥᓇ ᑭᒋ ᐙᐸᒥᔦᒃ; 11 ᑎᐹᔅᑯᓂᑫᐎᓂᓕᐤ ᐅᒋ, ᐁ ᑎᐹᔅᑯᓈᑲᓂᐎᑦ ᐊᓇ ᑳ ᑎᐯᓕᑕᒃ ᐅᒣᓕᐤ ᐊᔅᑮᓕᐤ᙮ 12 ᓂᑦ ᐋᔮᓐ ᑫᔮᐸᒡ ᒥᒉᑦ ᑫᒀᓇ ᑭᒋ ᐎᑕᒫᑕᑾᒃ, ᒫᑲ ᐊᓄᒡ ᓇᒪᐎᓚ ᑭ ᑳ ᑮ ᐯᑌᓇᐗᐤ᙮ 13 ᐁᓕᐌᒃ ᒫᑲ, ᐃᔅᐱ ᐎᓚ ᑖᐺᐎᓂ ᐋᒐᒃ ᑕᑯᔑᑫ, ᑭ ᑳ ᑭᔅᑭᓄᑕᐃᑯᐗᐤ ᒥᓯᐌ ᑖᐺᐎᓂᒃ: ᐌᓴ ᓇᒪᐎᓚ ᐎᓚ ᑫᒋᐙᒃ ᑲᑕ ᐅᒋ ᐋᔭᒥᐤ; ᒫᑲ ᑕᑐ ᑫᒀᓕᐤ ᑫ ᐯᑕᒃ ᐁᐗᑴᓕᐤ ᑫ ᑎᐹᑐᑕᒃ: ᑫ ᑳ ᐙᐸᑎᓕᑯᐗᐤ ᓀᔥᑕ ᑫᒀᓇ ᑫ ᐃᑭᓂᓕᑭ᙮ 14 ᓂ ᑳ ᑭᔅᑌᓕᑖᑯᐃᒃ: ᐌᓴ ᑲᑕ ᐅᑎᓇᒻ ᓂᑦ ᐋᔮᓂᒃ ᐅᒋ, ᑭ ᑳ ᐙᐸᑎᓕᑯᐗᐤ ᒫᑲ᙮ 15 ᒥᓯᐌ ᑫᒀᓇ ᐅᑖᐎᒪᐤ ᑳ ᐋᔮᑦ ᓂ ᑎᐱᓚᐌᐎᓰᓐ: ᐁᐗᑯ ᐌᒋ ᑮ ᐃᑗᔮᓐ, ᑲᑕ ᐅᑎᓇᒻ ᓂᑦ ᐋᔮᓂᒃ ᐅᒋ ᓀᔥᑕ ᑭ ᑳ ᐙᐸᑎᓕᑯᐗᐤ᙮

ᐲᑭᔅᑳᑕᒧᐎᓐ ᓀᔥᑕ ᒥᓗᐙᑕᒧᐎᓐ

16 ᐎᓕᐱᔉ, ᓇᒪᐎᓚ ᒫᑲ ᑭ ᑳ ᐙᐸᒥᓇᐗᐤ: ᒥᓇ ᒫᑲ ᐎᓕᐱᔉ, ᐁᑯ ᑫ ᐙᐸᒥᔦᒃ, ᐁ ᓈᑕᒃ ᐅᑖᐎᒪᐤ᙮ 17 ᐁᑯ ᐋᑎᑦ ᐅ ᑭᔅᑭᓄᐊᒪᐙᑲᓇ ᐁᑎᑐᓕᒋ, ᑫᒀᓕᐤ ᐅᒪ ᑳ ᐃᑎᑕᒃ, ᐎᓕᐯᔉ, ᓇᒪᐎᓚ ᒫᑲ ᑭ ᑳ ᐙᐸᒥᓇᐗᐤ: ᒥᓇ ᒫᑲ, ᐎᓕᐱᔉ, ᐁᑯ ᑫ ᐙᐸᒥᔦᒃ: ᓀᔥᑕ ᒫᑲ, ᐁ ᓈᑕᒃ ᐅᑖᐎᒪᐤ? 18 ᑮ ᐃᑗᐗᒃ ᒫᑲ, ᑫᒀᓕᐤ ᐅᒪ ᑳ ᐃᑗᑦ, ᐎᓕᐱᔉ? ᓇᒪᐎᓚ ᑭ ᑭᔅᑫᓕᑌᓈᓇᐤ ᑖᓐ ᐁᑗᑦ᙮ 19 ᒋᓴᔅ ᒫᑲ ᑮ ᑭᔅᑫᓕᑕᒻ ᐁ ᓇᑕᐌᓕᑕᒥᓕᒋ ᑭᒋ ᑲᑴᒋᒥᑯᑦ, ᐁᑯ ᐁᑖᑦ, ᑭ ᑲᑴᒋᒥᑐᓈᐗᐤ ᓈ ᐊᓂᒪ ᐅᒋ ᑳ ᑮ ᐃᑗᔮᓐ, ᐎᓕᐱᔉ, ᓇᒪᐎᓚ ᒫᑲ ᑭ ᑳ ᐙᐸᒥᓇᐗᐤ: ᒥᓇ ᒫᑲ, ᐎᓕᐱᔉ, ᐁᑯ ᑫ ᐙᐸᒥᔦᒃ? 20 ᑖᐺ, ᑖᐺ, ᑭᑦ ᐃᑎᓇᐗᐤ, ᑭᓚᐗᐤ ᑭ ᑳ ᒫᑐᓇᐗᐤ, ᓀᔥᑕ ᑭ ᑳ ᐱᑭᔅᑳᑌᓇᐗᐤ, ᒫᑲ ᐊᔅᑭ ᑲᑕ ᒥᓚᐙᑕᒧᒪᑲᓐ: ᑭᓚᐗᐤ ᑭ ᑳ ᑯᐹᑎᓕᒧᓇᐗᐤ, ᒫᑲ ᑭ ᑯᐹᑌᓕᒧᐎᓂᐗᐤ ᑲᑕ ᑴᔅᑭᓂᑳᑌᐤ ᒥᓚᐙᑕᒧᐎᓂᒃ᙮ 21 ᐃᔅᑴᐤ ᐙ ᐙᐸᒪᐗᓱᒋ ᐋᔭᐤ ᑯᐹᑌᓕᒧᐎᓂᓕᐤ, ᐁ ᐅᑎᒋᐸᓕᓕᒃ ᐅ ᑎᐹᔨᑲᓐ ᐱᓯᒧᑳᓂᒃ: ᒫᑲ ᐎᐸᒡ ᑳ ᐙᐸᒪᐗᓱᒋ, ᓇᒪᐎᓚ ᑫᔮᐸᒡ ᑭᔅᑭᓯᑐᑕᒻ ᐅ ᑲᒀᑕᑫᓕᒧᐎᓐ ᐁ ᓯᑭᓓᓯᑦ ᐃᓕᓕᐗ ᐁ ᓂᑖᐎᑭᓕᒋ ᐊᔅᑮᒃ᙮ 22 ᑭᓚᐗᐤ ᒫᑲ ᐊᓄᒡ ᑭᑦ ᐋᔮᓇᐗᐤ ᑯᐹᑌᓕᒧᐎᓐ: ᒫᑲ ᒥᓇ ᑭ ᑳ ᐙᐸᒥᑎᓇᐗᐤ, ᐁᑯ ᑭᑌᐃᐗᐤ ᑫ ᒥᓚᐙᑕᒧᒪᑲᒃ, ᓀᔥᑕ ᑭ ᒥᓚᐙᑕᒧᐎᓂᐗᐤ ᓇᒪᐎᓚ ᐊᐌᓇ ᑭ ᒪᔅᑲᒥᑯᐗᐤ᙮ 23 ᓀᔥᑕ ᐊᓂᒪ ᑫ ᑭᔑᑳᒃ ᓇᒪᐎᓚ ᑫᒀᓐ ᑭ ᑳ ᓇᑐᑕᒪᐎᓇᐗᐤ᙮ ᑖᐺ, ᑖᐺ, ᑭᑦ ᐃᑎᓇᐗᐤ, ᒥᓯᐌ ᑫᒀᓐ ᑫ ᓇᑐᑕᒪᐌᒃ ᐅᑖᐎᒪᐤ ᓂᑦ ᐃᔑᓂᑳᓱᐎᓂᒃ, ᑭ ᑳ ᒥᓕᑯᐗᐤ᙮ 24 ᐊᓄᒡ ᐃᔅᑯ ᓇᒪᐎᓚ ᑫᒀᓐ ᑭ ᑮ ᐅᒋ ᓇᑐᑌᓇᐗᐤ ᓂᑦ ᐃᔑᓂᑳᓱᐎᓂᒃ: ᓇᑐᑕᒫᒃ, ᑭ ᑳ ᒥᓕᑲᐎᓇᐗᐤ ᒫᑲ, ᑭ ᒥᓚᐙᑕᒧᐎᓂᐗᐤ ᑭᒋ ᓵᑲᔅᑭᓀᒃ᙮

ᑭ ᑲ ᔖᑯᒋᑖᓈᐗᐤ ᐊᔅᑭ, ᐃᑗᐤ ᒋᓴᔅ

25 ᐅᐅ ᑫᒀᓇ ᑭ ᑮ ᐃᑎᑎᓇᐗᐤ ᓇᔅᐱᑐᐌᐎ ᐋᔭᒥᐎᓂᒃ: ᒫᑲ ᐹᐸᓕᐤ ᐁ ᑭᔑᑳᒃ, ᐃᔅᐱ ᐁᑳ ᒥᓇ ᑫ ᐋᔭᒥᐃᑕᑾᒃ ᓇᔅᐱᑐᐌᐎ ᐋᔭᒥᐎᓂᒃ, ᒫᑲ ᑭ ᑳ ᐙᐸᑎᓕᑎᓇᐗᐤ ᒧᔑᔐ ᐅᑖᐎᒪᐤ ᐅᒋ᙮ 26 ᐊᓂᒪ ᑫ ᑭᔑᑳᒃ ᑭ ᑳ ᓇᑐᑕᒫᓇᐗᐤ ᓂᑦ ᐃᔑᓂᑳᓱᐎᓂᒃ: ᓇᒪᐎᓚ ᒫᑲ ᑭᑦ ᐃᑎᓇᐗᐤ, ᓂ ᑳ ᐋᔭᒥᐁᔅᑕᐗᐤ ᐅᑖᐎᒪᐤ ᑭᓚᐗᐤ ᐅᒋ: 27 ᐌᓴ ᐅᑖᐎᒪᐤ ᑫᒋᐙᒃ ᑭ ᓵᑭᐃᑯᐗᐤ, ᐁ ᑮ ᓵᑭᐃᔦᒃ, ᓀᔥᑕ ᐁ ᑮ ᑖᐺᑕᒣᒃ ᑭᒋᒪᓂᑐᒃ ᐁ ᐅᒋᔮᓐ᙮ 28 ᐅᑖᐎᒫᒃ ᓂ ᑮ ᐅᒌᓐ, ᓀᔥᑕ ᓂ ᑮ ᐯᒋ ᐃᑐᑖᓐ ᐊᔅᑮᒃ: ᒥᓇ, ᓂ ᓇᑲᑌᓐ ᐊᔅᑭ, ᓂ ᓈᑕᐤ ᒫᑲ ᐅᑖᐎᒪᐤ᙮ 29 ᐅ ᑭᔅᑭᓄᐊᒪᐙᑲᓇ ᑮ ᐃᑎᑯ, ᒫᑎᑲ, ᐁᑯ ᒧᔑᔐ ᐁᔭᒥᔭᓐ, ᓇᒪᐎᓚ ᓀᔥᑕ ᑭᑦ ᐋᔭᒥᓐ ᓇᔅᐱᑐᐌᐎ ᐋᔭᒥᐎᓂᒃ᙮ 30 ᐁᑯ ᑭᐁᒋᓇᐅᔮᒃ ᒥᓯᐌ ᑫᒀᓇ ᐁ ᑭᔅᑫᓕᑕᒪᓐ, ᓀᔥᑕ ᐁᑳ ᐁ ᓇᑕᐌᓕᑕᒪᓐ ᐊᐌᓇ ᑭᒋ ᑲᑴᒋᒥᔉ: ᐅᒪ ᓂᑦ ᐅᒋ ᑖᐺᑌᓈᓐ ᑭᒋᒪᓂᑐᒃ ᐁ ᐅᒋᔭᓐ᙮ 31 ᒋᓴᔅ ᑮ ᓇᔥᑴᐗᔑᐁᐤ, ᐁᑯ ᓈ ᑎᐋᐺᑕᒣᒃ? 32 ᒫᑎᑲ, ᑎᐹᔨᑲᓐ ᐱᓯᒧᑳᓂᒃ ᐹᐸᓕᐤ, ᐁᐁ, ᐋᔕᔾ ᐅᑎᒋᐸᓕᐤ, ᐃᔅᐱ ᑫ ᓇᓈᓂᔑᑎᔕᐅᑲᐎᔦᒃ, ᒥᓯᐌ ᑕᑐ ᐊᐌᓇ ᐎᑭᒃ, ᓀᔥᑕ ᑫ ᓇᑲᔑᔦᒃ ᐁ ᐯᔭᑯᔮᓐ: ᐁᓕᐌᒃ ᒫᑲ ᓇᒪᐎᓚ ᓂ ᐯᔭᑯᓐ, ᐌᓴ ᐅᑖᐎᒪᐤ ᓂ ᐎᒉᐎᒃ᙮ 33 ᐅᐅ ᑫᒀᓇ ᑭ ᑮ ᐎᑕᒫᑎᓇᐗᐤ ᓂᓚ ᑭᒋ ᐅᒋ ᐋᔮᔦᒃ ᑳᔮᒣᓕᑕᒧᐎᓐ᙮ ᒥᑯᔥᑳᑌᓕᑕᒧᐎᓐ ᑭ ᑳ ᐋᔮᓇᐗᐤ ᐊᔅᑮᒃ: ᒫᑲ ᒥᓜᓕᑕᒧᒃ; ᓂ ᑮ ᔔᑯᒋᑖᓐ ᐊᔅᑮ᙮

17

ᒋᓴᔅ ᐊᔭᒥᐁᔅᑕᒪᐌᐤ ᐅᑭᔅᑭᓄᐊᒪᐙᑲᓇ

1 ᐅᐅ ᐋᔭᒥᐎᓇ ᑮ ᐃᑗᐤ ᒋᓴᔅ, ᐁᑯ ᑌᔅᑕᓵᐱᑦ ᑭᒋᑭᔑᑯᒃ, ᓀᔥᑕ ᐁᑗᑦ, ᓄᑖ, ᐅᑎᒋᐸᓕᐤ ᑎᐹᔨᑲᓐ ᐱᓯᒧᑳᓂᒃ; ᑭᔅᑌᓕᑖᑯᐃ ᑭᑯᓯᔅ, ᑭᑯᓯᔅ ᓀᔥᑕ ᑭᒋ ᑭᔅᑌᓕᑖᑯᐃᔉ: 2 ᑖᐱᔅᑯᒡ ᐁ ᑮ ᒥᓛᑦ ᑲᔥᑭᐅᐎᓂᓕᐤ ᑭᒋ ᑎᐯᓕᒫᑦ ᒥᓯᐌ ᐃᓕᓕᐗ, ᑭᒋ ᒥᓛᑦ ᑳᑭᑫ ᐱᒫᑎᓯᐎᓂᓕᐤ ᑕᑐ ᐊᓂᐃ ᑳ ᑮ ᒥᓚᑦ᙮ 3 ᐁᐗᑯ ᐅᒪ ᒫᑲ ᑳᑭᑫ ᐱᒫᑎᓯᐎᓐ, ᑭᒋ ᑭᔅᑫᓕᒥᔅᑭᒃ ᐁ ᐯᔭᑯᔭᓐ ᑖᐺ ᐁ ᑭᒋᒪᓂᑕᐎᔭᓐ, ᓀᔥᑕ ᑭᒋ ᑭᔅᑫᓕᒫᒋᒃ ᒋᓴᔅ ᙭ᑕ ᑳ ᑮ ᐯᒋᑎᔕᐅᒪᑦ᙮ 4 ᑭ ᑮ ᑭᔅᑌᓕᑖᑯᐃᑎᓐ ᐊᔅᑮᒃ: ᓂ ᑮ ᑭᔑᑖᓐ ᐊᓂᒪ ᐋᐸᑎᓯᐎᓐ ᑳ ᑮ ᒥᓕᔭᓐ ᑭᒋ ᑐᑕᒫᓐ᙮ 5 ᐁᑯ ᒫᑲ, ᐅ ᓄᑖ, ᑭᔅᑌᓕᑖᑯᐃᓐ ᐊᓯᒋ ᑭᓚ ᓀᔥᑕ, ᐊᓂᒪ ᑭᔅᑌᓕᑖᑯᓯᐎᓐ ᐅᒋ ᑳ ᑮ ᐋᔮᔮᓐ ᐁᔥᑾ ᐁ ᐎᒋᑕᔑᑫᒥᑖᓐ ᐸᒧᔑ ᐃᑕᑾᒃ ᐊᔅᑭ᙮ 6 ᓂ ᑮ ᐙᐸᑎᓚᐗᒃ ᑭᑦ ᐃᔑᓂᑳᓱᐎᓂᓕᐤ ᐊᓂᑭ ᐃᓕᓕᐗᒃ ᑳ ᑮ ᒥᓕᔭᓐ ᐊᔅᑮᒃ ᐅᒋ: ᑭ ᑮ ᐅᑦ ᐃᓕᓕᒥᒫᐗᒃ, ᑭ ᑮ ᒥᓕᓐ ᒫᑲ; ᓀᔥᑕ ᑮ ᑲᓇᐌᓕᑕᒶᒃ ᑭᑦ ᐋᔭᒥᐎᓂᓕᐤ᙮ 7 ᐁᑯ ᑳ ᑭᔅᑫᓕᑕᑭᒃ ᒥᓯᐌ ᑫᒀᓇ ᑳ ᑮ ᒥᓕᔭᓐ ᑭᓚ ᐁ ᐅᒋ ᐃᑕᑾᑭ᙮ 8 ᐌᓴ ᓂ ᑮ ᒥᓛᐗᒃ ᐊᓂᐃ ᐋᔭᒥᐎᓇ ᑳ ᑮ ᒥᓕᔭᓐ; ᑮ ᐅᑎᓇᒶᒃ ᒫᑲ, ᓀᔥᑕ ᑮ ᑖᐺᑕᒶᒃ ᐁ ᑮ ᐯᒋᑎᔕᐅᔭᓐ᙮ 9 ᐎᓚᐗᐤ ᓂᑦ ᐋᔭᒥᐁᔅᑕᒪᐙᐗᒃ: ᓇᒪᐎᓚ ᐊᔅᑭ ᓂᑦ ᐋᔭᒥᐁᔅᑕᒫᑌᓐ; ᒫᑲ ᐊᓂᑭ ᑳ ᑮ ᒥᓕᔭᓐ; ᐌᓴ ᑭᑦ ᐅᑦ ᐃᓕᓕᒥᒫᐗᒃ᙮ 10 ᓀᔥᑕ ᒥᓯᐌ ᓂᑦ ᐃᓕᓕᒪᒃ ᐁᐗᒀᓂᑭ ᑭᑦ ᐃᓕᓕᒪᒃ, ᓀᔥᑕ ᑭᑦ ᐃᓕᓕᒪᒃ ᐁᐗᒀᓂᑭ ᓂᑦ ᐃᓕᓕᒪᒃ; ᓀᔥᑕ ᓂ ᑭᔅᑌᓕᑖᑯᐃᑾᒃ᙮ 11 ᐊᓄᒡ ᒫᑲ ᓇᒪᐎᓚ ᑫᔮᐸᒡ ᐊᔅᑮᒃ ᓃᑦ ᐃᑖᓐ, ᒫᑲ ᐅᑯ ᐊᔅᑮᒃ ᐃᑖᐗᒃ, ᓂᓚ ᒫᑲ ᑭ ᐯᒋ ᓈᑎᑎᓐ᙮ ᐯᓓᑭᓯᔭᓐ ᐅᑖᐎᒪᐤ, ᑲᓇᐌᓕᒥᒃ ᑭᓚ ᑭᑦ ᐃᔑᓂᑳᓱᐎᓐ ᐅᒋ ᐊᓂᑭ ᑳ ᑮ ᒥᓕᔭᓐ, ᑭᒋ ᐯᔭᑯᒋᒃ, ᑖᐱᔅᑯᒡ ᑭᓚᓈᓇᐤ᙮ 12 ᐁᔥᑾ ᐁ ᐎᒉᐗᑭᒃ ᐊᔅᑮᒃ, ᓂ ᑮ ᑲᓇᐌᓕᒪᐗᒃ ᑭᑦ ᐃᔑᓂᑳᓱᐎᓂᒃ: ᐊᓂᑭ ᑳ ᑮ ᒥᓕᔭᓐ ᓂ ᑮ ᑲᓇᐌᓕᒪᐗᒃ, ᓀᔥᑕ ᓇᒪ ᐙᐙᒡ ᐯᔭᒃ ᐁ ᐃᑕᓯᒋᒃ ᐗᓂᐋᑲᓂᐎᐤ, ᐊᓇ ᐱᑯ ᑳ ᐅᑯᓯᓯᒥᑯᑦ ᓂᔑᐗᓈᒋᐅᐎᓂᓕᐤ; ᑭᒋ ᒪᓯᓇᐃᑫᐎᓐ ᑭᒋ ᑎᐱᐸᓕᒃ᙮ 13 ᐊᓄᒡ ᒫᑲ ᑭ ᐯᒋ ᓈᑎᑎᓐ; ᓀᔥᑕ ᐅᐅ ᑫᒀᓇ ᓂᑦ ᐋᔭᒥᓐ ᐊᔅᑮᒃ, ᑭᒋ ᓵᑲᔅᑭᓀᔅᑳᑯᒋᒃ ᓂ ᒥᓚᐙᑕᒧᐎᓂᓕᐤ᙮ 14 ᓂ ᑮ ᒥᓛᐗᒃ ᑭᑦ ᐋᔭᒥᐎᓂᓕᐤ; ᐊᔅᑭᓕᐤ ᒫᑲ ᑮ ᐸᒀᑎᑯᐗᒃ, ᐁᑳ ᐊᔅᑮᒃ ᐁ ᐅᒋᒋᒃ, ᑖᐱᔅᑯᒡ ᓂᓚ ᐁᑳ ᐊᔅᑮᒃ ᐁ ᐅᒋᔮᓐ᙮ 15 ᓇᒪᐎᓚ ᓂᑦ ᐋᔭᒥᐋᓐ ᐊᔅᑮᒃ ᑭᒋ ᐅᒋ ᐅᑎᓇᒋᒃ, ᒫᑲ ᑭᒋ ᑲᓇᐌᓕᒪᒋᒃ ᑳ ᒫᓛᑕᓂᓕᒃ ᐅᒋ᙮ 16 ᐎᓚᐗᐤ ᓇᒪᐎᓚ ᐊᔅᑮᒃ ᐅᒋᐗᒃ, ᑖᐱᔅᑯᒡ ᓂᓚ ᐁᑳ ᐊᔅᑮᒃ ᐁ ᐅᒋᔮᓐ᙮ 17 ᑭ ᑖᐺᐎᓂᓕᐤ ᐅᒋ ᐸᓓᑭᐃᒃ: ᑭᑦ ᐋᔭᒥᐎᓐ ᑖᐺᐎᓂᐗᓐ᙮ 18 ᑖᐱᔅᑯᒡ ᐁ ᑮ ᐯᒋᑎᔕᐅᔭᓐ ᐊᔅᑮᒃ, ᐁᑯ ᓀᔥᑕ ᑖᐱᔅᑯᒡ ᑳ ᐃᑎᔕᐗᑭᒃ ᐊᔅᑮᒃ᙮ 19 ᓀᔥᑕ ᐎᓚᐗᐤ ᐅᒋ ᓂ ᐸᓓᑭᐃᑎᓱᓐ, ᐎᓚᐗᐤ ᐊᓯᒋ ᑭᒋ ᐸᓓᑭᐃᑯᒋᒃ ᑖᐺᐎᓂᓕᐤ᙮ 20 ᓇᒪᐎᓚ ᐅᑯ ᐱᑯ ᓂᑦ ᐋᔭᒥᐁᔅᑕᒪᐙᐗᒃ, ᒫᑲ ᐊᓂᐃ ᐊᓯᒋ ᑫ ᑖᐺᔦᓕᒥᓕᒋ ᐅᑦ ᐋᔭᒥᐎᓂᐗᐤ ᐅᒋ; 21 ᒥᓯᐌ ᑭᒋ ᐯᔭᑯᒋᒃ: ᑖᐱᔅᑯᒡ ᑭᓚ, ᐅᑖᐎᒪᐤ, ᐁ ᐱᒋᔅᑲᐎᔭᓐ, ᓀᔥᑕ ᓂᓚ ᐁ ᐱᒋᔅᑳᑖᓐ ᐎᓚᐗᐤ ᐊᓯᒋ ᑭᒋ ᐯᔭᑯᒋᒃ ᐁ ᐱᒋᔅᑳᑕᑯᒃ: ᐊᔅᑭ ᑭᒋ ᑖᐺᑕᒧᒪᑲᒃ ᐁ ᑮ ᐯᒋᑎᔕᐅᔭᓐ᙮ 22 ᓀᔥᑕ ᐊᓂᒪ ᑭᔅᑌᓕᑖᑯᓯᐎᓐ ᑳ ᑮ ᒥᓕᔭᓐ ᓂ ᑮ ᒥᓛᐗᒃ: ᑭᒋ ᐯᔭᑯᒋᒃ, ᑖᐱᔅᑯᒡ ᐁ ᐃᔑ ᐯᔭᑯᔭᒃ: 23 ᓂᓚ ᐁ ᐱᒋᔅᑲᐗᑭᒃ, ᑭᓚ ᒫᑲ ᐁ ᐱᒋᔅᑲᐎᔭᓐ, ᑭᒋ ᒥᑐᓂᐋᑲᓂᐎᒋᒃ ᐁ ᐯᔭᑯᒋᒃ; ᓀᔥᑕ ᐊᔅᑭ ᑭᒋ ᑭᔅᑫᓕᑕᒧᒪᑲᒃ ᐁ ᑮ ᐯᒋᑎᔕᐅᔭᓐ, ᓀᔥᑕ ᐁ ᑮ ᓵᑭᐊᒋᒃ ᑖᐱᔅᑯᒡ ᐁ ᑮ ᐃᔑ ᓵᑭᐃᔭᓐ᙮ 24 ᓄᑖ, ᓂ ᓇᑕᐌᓕᑌᓐ ᐎᓚᐗᐤ ᐊᓯᒋ, ᑳ ᑮ ᒥᓕᔭᓐ, ᐃᑕ ᐁ ᐃᑖᔮᓐ ᑭᒋ ᐎᒉᐎᒋᒃ; ᑭᒋ ᐙᐸᑕᑭᒃ ᓂ ᑭᔅᑌᓕᑖᑯᓯᐎᓂᓕᐤ, ᑳ ᑮ ᒥᓕᔭᓐ: ᐌᓴ ᑭ ᑮ ᓵᑭᐃᓐ ᐸᒧᔑ ᐅᔑᑖᓂᐗᒃ ᐊᔅᑭ᙮ 25 ᐅ ᑳ ᒀᔭᔅᑭᑖᑎᓯᔭᓐ ᐅᑖᐎᒪᐤ, ᐊᔅᑭ ᓇᒪᐎᓚ ᑮ ᐅᒋ ᑭᔅᑫᓕᒥᑯᓐ: ᒫᑲ ᓂᓚ ᑭ ᑮ ᑭᔅᑫᓕᒥᑎᓐ, ᓀᔥᑕ ᐅᑯ ᑭᔅᑫᓕᑕᒶᒃ ᐁ ᑮ ᐱᒋᑎᔕᐅᔭᓐ᙮ 26 ᓂ ᑮ ᐎᑕᒪᐙᐗᒃ ᒫᑲ ᑭᑦ ᐃᔑᓂᑳᓱᐎᓂᓕᐤ, ᓀᔥᑕ ᓂ ᑳ ᐎᑌᓐ: ᐊᓂᒪ ᓵᑭᐃᐌᐎᓐ ᑳ ᑮ ᐅᒋ ᓵᑭᐃᔭᓐ ᑭᒋ ᐱᒋᔅᑳᑯᒋᒃ, ᓂᓚ ᓀᔥᑕ ᑭᒋ ᐱᒋᔅᑲᐗᑭᒃ᙮

18

ᒋᓴᔅ ᐅᑎᓈᑲᓂᐎᐤ

1 ᐃᔅᐱ ᒋᓴᔅ ᑳ ᑮ ᐋᔭᒥᑦ ᐅᐅ ᐋᔭᒥᐎᓇ, ᑮ ᐃᑐᑌᐤ ᐊᓯᒋ ᐅ ᑭᔅᑭᓄᐊᒪᐙᑲᓇ ᐊᑳᒥᒃ ᑭᑕᕋᓐ ᓯᐱᔑᔥ, ᐃᑕ ᐁ ᐃᑕᑾᓂᓕᒃ ᓂᑖᐎᑭᒋᑲᓂᓕᐤ, ᐁᑯᑕ ᐹᑐᑫᑦ ᓀᔥᑕ ᐅ ᑭᔅᑭᓄᐊᒪᐙᑲᓇ᙮ 2 ᒎᑕᔅ ᓀᔥᑕ, ᐊᓇ ᑳ ᐙᔦᔑᐸᑭᑎᓈᑦ, ᑮ ᑭᔅᑫᓕᑕᒻ ᐊᓂᐁᓕᐤ: ᐌᓴ ᒋᓴᔅ ᒥᒉᑡᐤ ᐊᓐᑕ ᑮ ᐃᑐᑌᐤ ᓀᔥᑕ ᐅ ᑭᔅᑭᓄᐊᒪᐙᑲᓇ᙮ 3 ᐁᑯ ᒎᑕᔅ, ᑳ ᐅᑎᓈᑦ ᒥᒉᑦ ᐃᓕᓕᐗ ᓀᔥᑕ ᓇᑐᐸᓕᐎᑭᒫᐗ ᑳ ᐸᑭᑎᓇᒫᑯᑦ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᐹᕋᓯᔭ, ᐯᒋ ᐃᑐᑌᐤ ᐊᓐᑕ ᐁ ᐋᔮᓕᒋ ᔖᐳᐙᔅᑌᓂᑲᓇ, ᓀᔥᑕ ᐙᔅᑌᓂᑲᓇ, ᓀᔥᑕ ᐸᑲᒫᑲᓇ᙮ 4 ᒋᓴᔅ ᒫᑲ, ᐁ ᑭᔅᑫᓕᑕᒃ ᒥᓯᐌ ᑫᒀᓇ ᑫ ᐅᑎᑎᑯᑦ, ᑭ ᐗᓚᐎᐤ, ᓀᔥᑕ ᑮ ᐃᑌᐤ, ᐊᐌᓇ ᓀᓇᑕᐌᓕᒣᒃ? 5 ᑮ ᓇᔥᑴᐗᔑᐁᐗᒃ, ᒋᓴᔅ ᓈᓴᕋᑎᒡ ᑳ ᐅᒌᑦ᙮ ᒋᓴᔅ ᐃᑌᐤ, ᓂᓚ ᐁᐗᑯ᙮ ᒎᑕᔅ ᒫᑲ ᐊᓯᒋ ᑳ ᐙᔦᔑᐸᑭᑎᓈᑦ, ᑮ ᐎᒋᑳᐸᐙᔅᑕᐌᐤ᙮ 6 ᑣᔦᒃ ᒫᑲ ᑳ ᐃᑖᑦ, ᓂᓚ ᐁᐗᑯ, ᑮ ᐊᔐᑳᐸᐎᐗᒃ, ᓀᔥᑕ ᑮ ᐸᑭᔑᓋᒃ ᒧᔅᑕᔅᑲᒥᒃ᙮ 7 ᐁᑯ ᒥᓇ ᑫᑴᒋᒫᑦ, ᐊᐌᓇ ᓀᓇᑕᐌᓕᒣᒃ? ᑮ ᐃᑗᐗᒃ ᒫᑲ, ᒋᓴᔅ ᓈᓴᕋᑎᒃ ᑳ ᐅᒌᑦ᙮ 8 ᒋᓴᔅ ᑮ ᓇᔥᑴᐗᔑᐃᐌᐤ, ᑭ ᑮ ᐎᑕᒫᑎᓇᐗᐤ ᓂᓚ ᐁᐗᑯ: ᑮᔥᐱᓐ ᒫᑲ ᓀᓇᑕᐌᓕᒥᔦᑴ, ᐸᑭᑎᓂᑯᒃ ᐅᑯ ᑭᒋ ᑭᑐᑌᒋᒃ: 9 ᑭᒋ ᑎᐱᐸᓕᓕᒃ ᐊᓂᐁᓕᐤ ᐃᑗᐎᓂᓕᐤ ᑳ ᑮ ᐃᑗᑦ, ᐊᓂᑭ ᑳ ᑮ ᒥᓕᔭᓐ ᓇᒪᐎᓚ ᐙᐙᒡ ᐯᔭᒃ ᐁ ᐃᑕᓯᒋᒃ ᓂ ᑮ ᐗᓂᐊᐤ᙮ 10 ᐁᑯ ᓵᐃᒪᓐ ᐱᑕᕐ ᐁ ᐋᔮᑦ ᔑᒫᑲᓂᓕᐤ ᑮ ᓛᓕᔅᑭᐱᑕᒻ, ᑮ ᐅᑖᒪᐅᒣᐤ ᒫᑲ ᑭᒋ ᓵᓵᑭᐎᓕᐌᐎᓕᓕᐤ ᐅᑦ ᐊᑑᔅᑫᓛᑲᓂᒪ, ᓀᔥᑕ ᑮ ᒪᓂᔕᒬᐤ ᐅᑖᐗᑳᓕᐤ ᐅ ᑭᒋᓂᔅᑭᓕᒃ ᐃᑌᑫ᙮ ᐊᓇ ᐊᑑᔅᑫᓛᑲᓐ ᒫᓐᑲᔅ ᑮ ᐃᔑᓂᑳᓱ᙮ 11 ᐁᑯ ᒋᓴᔅ ᐁᑖᑦ ᐱᑕᕋ, ᐱᑕᐊ ᑭ ᔑᒫᑲᓐ ᐱᒋᑯᒫᓈᓂᒃ: ᐊᓂᐁᓕᐤ ᒥᓂᒀᑲᓂᓕᐤ ᓄᑖᐎ ᑳ ᑮ ᒥᓕᑦ, ᓇᒪ ᓈ ᓂ ᑳ ᒥᓂᑴᐙᓐ?

ᒋᓴᔅ ᐯᔖᑲᓂᐎᐤ ᐅᑎᔥᑲᐤ ᐋᓇᓴ

12 ᐁᑯ ᒥᔮᒪᐎᒥᒉᑎᒋᒃ ᓀᔥᑕ ᓇᑐᐸᓕᐎᑭᒪᐤ ᓀᔥᑕ ᒎᐗᒃ ᐅ ᒫᔑᑫᐎᑭᒫᒥᐙᐗ ᐌᑎᓈᒋᒃ ᒋᓴᓴ, ᓀᔥᑕ ᑮ ᒫᒪᒋᑯᐱᑌᐗᒃ, 13 ᓃᔥᑕᒻ ᒫᑲ ᑮ ᐃᑐᑕᑐᐌᐗᒃ ᐋᓇᓴ; ᐌᓴ ᐁᐗᑯ ᑳᔭᐸᔅ ᐅᓯᓴ, ᑳ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐎᑦ ᐊᓂᐁᓕᐤ ᐁ ᐱᐴᓂᓕᒃ᙮ 14 ᑳᔭᐸᔅ ᒫᑲ ᐁᐗᑯ ᑳ ᑮ ᑲᑫᔅᑭᒫᑦ ᒎᐗ, ᐁ ᓇᑕᐌᓕᑖᑾᓂᓕᒃ ᐯᔭᒃ ᐃᓕᓕᐤ ᑭᒋ ᓂᐳᔅᑕᒪᐙᑦ ᐃᓕᓕᐗ᙮

ᐲᑕᕐ ᐋᑕᐌᓕᒣᐤ ᒋᓴᓴ

15 ᓵᐃᒪᓐ ᐱᑕᕐ ᒫᑲ ᑮ ᓄᔅᐱᓇᑌᐤ ᒋᓴᓴ, ᐊᓯᒋ ᓀᔥᑕ ᑯᑕᒃ ᑭᔅᑭᓄᐊᒪᐙᑲᓐ: ᐊᓇ ᑭᔅᑭᓄᐊᒪᐙᑲᓐ ᑮ ᑭᔅᑫᓕᒥᑯ ᑭᒋ ᓵᓵᑭᐎᓕᐌᐎᓕᓕᐗ, ᑮ ᐎᒋᐱᑐᑫᒣᐤ ᒫᑲ ᒋᓴᓴ ᐱᒋ ᑭᒋ ᓵᓵᑭᐎᓕᐌᐎᓕᓕᐗ ᐅ ᑭᒋᐙᔅᑳᔨᑲᓂᒥᓕᒃ᙮ 16 ᒫᑲ ᐱᑕᕐ ᑮ ᓂᐸᐎᐤ ᐃᔥᒀᑌᒥᒃ ᐗᓚᐎᑎᒥᒃ᙮ ᐁᑯ ᐌᓚᐐᑦ ᐊᓇ ᑯᑕᒃ ᑭᔅᑭᓄᐊᒪᐙᑲᓐ ᑳ ᑭᔅᑫᓕᒥᑯᑦ ᑭᒋ ᓵᓵᑭᐎᓕᐌᐎᓕᓕᐗ, ᓀᔥᑕ ᑮ ᐋᔭᒥᐁᐤ ᐊᓂᐃ ᑳ ᑲᓇᐌᓕᑕᒥᓕᒋ ᐃᔥᒀᑌᒥᓕᐤ, ᑮ ᐱᑐᑲᐁᐤ ᒫᑲ ᐱᑕᕋ᙮ 17 ᐁᑯ ᐊᓇ ᐅᔥᑭᓂᑭᔅᑴᐤ ᑳ ᑲᓇᐌᓕᑕᒃ ᐃᔥᒀᑌᒥᓕᐤ ᐁᑖᑦ ᐱᑕᕋ, ᓇᒪ ᓈ ᑭᓚ ᐊᓯᒋ ᑭᑦ ᐅ ᑭᔅᑭᓄᐊᒪᐙᑲᓂᒥᒃ ᐊᐗ ᐃᓕᓕᐤ? ᐃᑌᐤ, ᓇᒪᐎᓚ᙮ 18 ᐊᑑᔅᑫᓛᑲᓇᒃ ᒫᑲ ᓀᔥᑕ ᓇᑐᐸᓕᐎᑭᒫᐗᒃ ᑮ ᓂᐸᐎᐗᒃ ᐊᓐᑕ, ᐁ ᑮ ᑰᑕᐌᒋᒃ ᑲᑭᑌᐗ ᐅᒋ; ᐌᓴ ᑮ ᑭᓴᓈᓕᐸᓐ: ᓀᔥᑕ ᑮ ᐋᐗᓱᐗᒃ: ᐱᑕᕐ ᓀᔥᑕ ᑮ ᐎᒋᑳᐸᐙᔅᑕᐌᐤ, ᓀᔥᑕ ᑮ ᐋᐗᓱ᙮

ᑭᒋᓴᓵᑭᐃᐌᐎᓕᓕᐤ ᑲᑴᒋᒣᐤ ᒋᓴᓴ

19 ᐁᑯ ᒫᑲ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑫᑴᒋᒫᑦ ᒋᓴᓴ ᐅ ᑭᔅᑭᓄᐊᒪᐙᑲᓂᓕᐗ ᐅᒋ, ᓀᔥᑕ ᐅ ᑭᔅᑭᓄᐊᒫᑫᐎᓂᓕᐤ ᐅᒋ᙮ 20 ᒋᓴᔅ ᑮ ᓇᔥᑴᐗᔑᐁᐤ, ᓂ ᑮ ᐋᔭᒥᓐ ᒧᔑᔐ ᐅᑕ ᐊᔅᑮᒃ; ᒧᔕᒃ ᓂ ᑮ ᑭᔅᑭᓄᐊᒫᑳᓐ ᐋᔭᒥᐁᐎᑲᒥᑯᒃ, ᓀᔥᑕ ᑭᒋᐋᔭᒥᐁᐎᑲᒥᑯᒃ, ᐃᑕ ᒧᔕᒃ ᐁ ᐃᑐᑌᒋᒃ ᒎᐗᒃ; ᓇᒪᐎᓚ ᑫᒀᓐ ᓀᔥᑕ ᑭᒧᒡ ᓂᑦ ᐅᒋ ᐃᑣᓐ᙮ 21 ᑖᓀᑭ ᐌᒋ ᑲᑴᒋᒥᔭᓐ? ᑲᑴᒋᒥᒃ ᐊᓂᑭ ᑳ ᑮ ᐯᑕᐎᒋᒃ ᑫᒀᓕᐤ ᑳ ᐃᑕᑭᒃ; ᒫᑎᑲ, ᐎᓚᐗᐤ ᑭᔅᑫᓕᑕᒶᒃ ᑫᒀᓕᐤ ᑳ ᐃᑗᐗᒃ᙮ 22 ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᐯᔭᒃ ᓇᑐᐸᓕᐎᑭᒪᐤ ᐊᓐᑕ ᐁ ᓂᐸᐎᑦ, ᑮ ᐅᑖᒪᐌᐤ ᒋᓴᓴ ᐅᑖᔅᑕᒥᒋᒑᓐ ᐅᒋ, ᐁ ᐃᑗᑦ, ᐁᑯ ᓈ ᐃᔑ ᓇᔥᑴᐗᔑᐊᑦ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ? 23 ᒋᓴᔅ ᑮ ᓇᔥᑴᐗᔑᐁᐤ, ᑮᔥᐱᓐ ᑳ ᒪᒋᐋᔭᒥᐙᓀ ᑎᐹᑐᑖ ᒪᒋ ᐋᔭᒥᐎᓐ: ᒫᑲ ᑮᔥᐱᓐ ᒀᔭᔉ, ᑖᓀᑭ ᐌᒋ ᐅᑖᒪᐅᔭᓐ? 24 ᐋᓇᔅ ᒫᑲ ᑮ ᐃᔑᑎᔕᐌᑯᐸᓐ ᐁ ᒫᒪᒋᑯᐱᓯᓕᒋ ᑭᒋ ᓈᑖᓕᒋ ᑳᔭᐸᓴ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐗ᙮

ᐲᑕᕐ ᐋᑕᐌᓕᒣᐤ ᒥᓇ ᒋᓴᓴ

25 ᓵᐃᒪᓐ ᐱᑕᕐ ᑮ ᓂᐸᐎᐤ ᐁ ᐊᐗᓱᑦ᙮ ᐁᐗᑯ ᐌᒋ ᐃᑖᒋᒃ, ᓇᒪ ᓈ ᑭᓚ ᓀᔥᑕ ᐯᔭᒃ ᐅ ᑭᔅᑭᓄᐊᒪᐙᑲᓇ? ᑮ ᐋᓉᑕᒻ ᒫᑲ, ᓀᔥᑕ ᑮ ᐃᑗᐤ, ᓇᒪᐎᓚ᙮ 26 ᐯᔭᒃ ᐅᑦ ᐊᑑᔅᑫᓛᑲᓂᒪ ᑭᒋ ᓵᓵᑭᐎᓕᐌᐎᓕᓕᐤ, ᐁ ᐎᒋᓕᓕᑦ ᐊᓂᐃ ᐅᑕᐗᑳᓕᐤ ᐱᑕᕐ ᑳ ᑮ ᒪᓂᔕᒸᑦ, ᐃᑌᐤ, ᓇᒪ ᓈ ᑭ ᑮ ᐙᐸᒥᑎᑖᔾ ᓂᑖᐎᑭᒋᑲᓂᒃ ᐁ ᐎᒉᐗᑦ? 27 ᐁᑯ ᐱᑕᕐ ᒥᓇ ᐃᐋᓉᑕᒃ: ᐁᑯ ᑣᔦᒃ ᒫᑲ ᓈᐯᐹᑲᐋᒀᓐ ᓂᐅᑖᑯᓯᑦ᙮

ᒋᓴᔅ ᐅᑎᔥᑲᐎᑳᐸᐎᔅᑕᐌᐤ ᐹᐃᓚᑕ

28 ᐁᑯ ᒫᑲ ᐁᑐᑕᐋᒋᒃ ᒋᓴᓴ ᑎᐹᔅᑯᓂᑫᐎᑲᒥᑯᒃ ᐁ ᓇᑲᑖᒋᒃ ᑳᔭᐸᓴ: ᑮ ᑭᑭᔐᐹᔮᓕᐸᓐ ᒫᑲ; ᐎᓚᐗᐤ ᒫᑲ ᓇᒪᐎᓚ ᐅᒋ ᐱᑐᑫᐗᒃ ᑎᐹᔅᑯᓂᑫᐎᑲᒥᑯᒃ, ᐁᑳ ᑭᒋ ᐎᓕᐱᐃᑎᓱᒋᒃ, ᒫᑲ ᑭᒋ ᑮ ᒥᒋᓱᒋᒃ ᐁ ᒥᔮᔥᑳᑫᐎ ᒪᑯᔖᓂᐗᓂᓕᒃ᙮ 29 ᐁᑯ ᒫᑲ ᐹᐃᓚᑦ ᐌᓚᐎᔅᑕᐙᑦ, ᓀᔥᑕ ᑮ ᐃᑗᐤ, ᑫᒀᓕᐤ ᐁᑖᒣᓕᒣᒃ ᐊᐗ ᐃᓕᓕᐤ? 30 ᐁ ᓇᔥᑴᐗᔑᐋᒋᒃ ᒫᑲ ᑮ ᐃᑌᐗᒃ, ᑮᔥᐱᓐ ᐁᑳ ᐅᒋ ᒪᒋᑐᑕᒧᑯᐸᓀ, ᓇᒪᐎᓚ ᑭ ᑳ ᑮ ᐯᑣᑎᑖᓐ᙮ 31 ᐁᑯ ᐹᐃᓚᑦ ᐁᑖᑦ, ᐅᑎᓂᒃ ᑭᓚᐗᐤ, ᓀᔥᑕ ᑎᐹᔅᑯᓂᒃ ᐁ ᐃᑕᔅᑌᒃ ᑭᑦ ᐅᓚᔓᐌᐎᓂᐙᒃ᙮ ᐁᐗᑯ ᐌᒋ ᒎᐗᒃ ᐃᑖᒋᒃ, ᓇᒪᐎᓚ ᐅᓚᔓᐌᓕᑖᑾᓐ ᓂᓚᓈᓐ ᑭᒋ ᓂᐸᐊᑭᑦ ᐊᐌᓇ: 32 ᐅᑦ ᐃᑗᐎᓐ ᒋᓴᔅ ᑭᒋ ᑎᐱᐸᓕᓕᒃ, ᑳ ᑮ ᐃᑗᑦ, ᐁ ᑭᔅᑫᓕᑖᑯᑖᑦ ᑫᑯ ᓂᐱᐎᓂᓕᐤ ᑫ ᐅᒋ ᓂᐱᑦ᙮ 33 ᐁᑯ ᐹᐃᓚᑦ ᒥᓇ ᐹᑐᑫᑦ ᑎᐹᒃᑯᓂᑫᐎᑲᒥᑯᒃ, ᓀᔥᑕ ᑮ ᓇᑐᒣᐤ ᒋᓴᓴ, ᓀᔥᑕ ᑮ ᐃᑌᐤ, ᑭᓚ ᓈ ᒎᐗᒃ ᐅ ᑭᒋᐅᑭᒫᒥᐙᐗ? 34 ᒋᓴᔅ ᑮ ᓇᔥᑴᐗᔑᐁᐤ, ᑭᓚ ᓈ ᑫᒋᐙᒃ ᐅᒪ ᑭᑦ ᐃᑣᓐ, ᓀᔥᑕᐱᑯ ᑯᑕᑭᔭᒃ ᓈ ᑭ ᑮ ᐎᑕᒫᑾᒃ ᐁ ᐃᑖᒋᒥᑲᐎᔮᓐ? 35 ᐹᐃᓚᑦ ᑮ ᓇᔥᑴᐗᔑᐃᐌᐤ, ᓂᓚ ᓈ ᓂ ᒎᐎᓐ? ᑭᓚ ᑎᐱᓚᐌ ᑭ ᐎᑕᔅᑭᒫᑲᓇᒃ ᓀᔥᑕ ᑭᒋ ᓵᓵᑭᐎᓕᐌᐎᓕᓕᐗᒃ ᑭ ᑮ ᐸᑭᑎᓂᑾᒃ ᓂᒋᒋᒃ: ᑫᒀᓐ ᑳ ᑐᑕᒪᓐ? 36 ᒋᓴᔅ ᑮ ᓇᔥᑴᐗᔑᐃᐌᐤ, ᓂᑦ ᐅᑭᒫᐎᐎᓐ ᓇᒪᐎᓚ ᐅᑕ ᐊᔅᑮᒃ ᐃᑕᑾᓐ: ᑮᔥᐱᓐ ᐅᑕ ᐊᔅᑮᒃ ᐃᑕᑾᓄᑯᐸᓀ ᓂᑦ ᐊᑭᒫᐎᐎᓐ ᐁᑯ ᑫ ᓄᑎᓂᑫᐙᔅᐸᓐ ᓂᑦ ᐊᑑᔅᑫᓛᑲᓂᒪᒃ, ᐁᑳ ᑭᒋ ᐸᑭᑎᓂᑲᐎᔮᓐ ᒎᐗᒃ ᐅᒋᒋᐙᒃ: ᒫᑲ ᐊᓄᒡ ᓂᑦ ᐅᑭᒫᐎᐎᓐ ᓇᒪᐎᓚ ᐅᑕ ᐃᑕᑾᓐ᙮ 37 ᐁᐗᑯ ᐌᒋ ᐹᐃᓚᑦ ᐃᑖᑦ, ᑭ ᑭᒋᐅᑭᒫᐎᓐ ᓈ? ᒋᓴᔅ ᑮ ᓇᔥᑴᐗᔑᐁᐤ, ᑭᑦ ᐃᑣᓐ ᐁ ᑭᒋᐅᑭᒫᐎᔮᓐ᙮ ᐁᐗᑯ ᐅᒪ ᐌᒋ ᑮ ᓂᑕᐎᑭᔮᓐ, ᓀᔥᑕ ᐁᐗᑯ ᐅᒪ ᐌᒋᑮ ᐯᒋ ᐃᑐᑌᔮᓐ ᐊᔅᑮᒃ, ᑭᒋ ᑎᐹᑐᑕᒫᓐ ᑖᐺᐎᓐ᙮ ᒥᓯᐌ ᑕᑐ ᐊᐌᓇ ᑖᐺᐎᓂᒃ ᑳ ᐃᑖᑦ ᐱᔑᒋᑕᒻ ᓂᑦ ᐋᔭᒥᐎᓇ᙮ 38 ᐹᐃᓚᑦ ᐃᑌᐤ, ᑫᒀᓐ ᑖᐺᐎᓐ?

ᒋᓴᔅ ᐸᑭᑎᓇᑲᓂᐎᐤ ᑭᒋ ᓂᐱᑦ

ᐃᔅᐱ ᒫᑲ ᐅᒣᓕᐤ ᑳ ᐃᑗᑦ, ᒥᓇ ᑮ ᐗᓚᐎᔅᑕᐌᐤ ᒎᐗ, ᓀᔥᑕ ᐃᑌᐤ, ᓇᒪ ᒥᑐᓂ ᓂ ᒥᔅᑲᒸᓐ ᑳ ᒪᒋᑐᑕᒃ᙮ 39 ᒫᑲ ᒧᔕᒃ ᑭᑦ ᐃᔑ ᑐᑖᑲᐎᓇᐗᐤ, ᐯᔭᒃ ᐊᐌᓇ ᑭᒋ ᐸᑭᑎᓇᒫᑕᑾᒃ ᐁ ᒥᔮᔥᑳᑫᐎ ᒪᑯᔖᓂᐗᒃ: ᑭ ᓵᐯᓕᑌᓇᐗᐤ ᓈ ᑭᒋ ᐸᑭᑎᓇᒫᑕᑾᒃ ᒎᐗᒃ ᐅ ᑭᒋᐅᑭᒫᒥᐙᐗ? 40 ᐁᑯ ᒥᓇ ᒥᓯᐌ ᑎᐁᐺᒋᒃ, ᐁ ᐃᑗᒋᒃ, ᓇᒪᐎᓚ ᐊᐗ ᐃᓕᓕᐤ, ᒫᑲ ᐹᕌᐸᔅ᙮ ᑮ ᒪᔅᑲᑗᔅᑭᐤ ᒫᑲ ᐸᕌᐸᔅ᙮

19

1 ᐁᑯ ᐹᐃᓚᑦ ᐌᑎᓈᑦ ᒋᓴᓴ, ᓀᔥᑕ ᑮ ᐸᐸᓴᔅᑌᐌᐤ᙮ 2 ᓇᑐᐸᓕᐎᓕᓕᐗᒃ ᒫᑲ ᑮ ᐊᐱᑳᑕᒶᒃ ᑭᒋᐅᑭᒪᐎ ᐊᔅᑐᑎᓂᓕᐤ ᒥᔑᑲᐎᒥᓇᑯᔑᔭ ᐅᒋ, ᓀᔥᑕ ᑮ ᐳᔅᑕᔅᑐᑎᓇᐁᐗᒃ, ᓀᔥᑕ ᑮ ᐳᔅᑕᑯᐸᐁᐗᒃ ᒥᑴᑭᓐ ᐊᑯᐅᓂᓕᐤ᙮ 3 ᑮ ᐃᑗᐗᒃ ᒫᑲ, ᐙᒋᔭ, ᑭᓚ ᒎᐗᒃ ᐅ ᑭᒋᐅᑭᒫᒥᐙᐗ! ᓀᔥᑕ ᑮ ᐅᑖᒪᐌᐗᒃ ᐅᒋᒋᐙᐗ ᐅᒋ᙮ 4 ᐹᐃᓚᑦ ᒫᑲ ᒥᓇ ᑮ ᐗᓚᐎᐤ, ᓀᔥᑕ ᐃᑌᐤ, ᒫᑎᑲ, ᑭ ᐯᒋ ᐗᓚᐎᑕᑣᑎᓇᐗᐤ, ᑭᒋ ᑭᔅᑫᓕᑕᒣᒃ ᐁᑳ ᐁ ᒥᔅᑲᒶᒃ ᑳ ᒪᒋᑐᑕᒃ᙮ 5 ᐁᑯ ᒋᓴᔅ ᐱᐁᒋ ᐗᓚᐙᑦ, ᐁ ᑭᑭᔥᑲᒃ ᑭᒋᐅᑭᒫᐎ ᐊᔅᑐᑎᓂᓕᐤ ᒥᔑᑲᐎᒥᓇᑯᔑᔭ ᑳ ᐅᒋ ᐅᔑᑖᓂᐗᓂᓕᒃ, ᓀᔥᑕ ᒥᑴᑭᓐ ᐊᑯᐅᓂᓕᐤ᙮ ᐁᑯ ᐹᐃᓚᑦ ᐁᑖᑦ, ᑲᓇᐙᐸᒥᒃ ᐊᐗ ᐃᓕᓕᐤ! 6 ᐃᔅᐱ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᓇᑐᐸᓕᐎᑭᒫᐗᒃ ᐎᐋᐸᒫᒋᒃ, ᑮ ᑌᐺᐗᒃ, ᐁ ᐃᑗᒋᒃ, ᒌᔅᑖᔅᑾᐤ ᒌᔅᑖᔅᑾᐤ᙮ ᐹᐃᓚᑦ ᐃᑌᐤ, ᐅᑎᓂᒃ ᑭᓚᐗᐤ, ᓀᔥᑕ ᒌᔅᑖᔅᑾᐅᑦ: ᐌᓴ ᓂᓚ ᓇᒪᐎᓚ ᓂ ᒥᔅᑲᒸᓐ ᑳ ᒪᒋᑐᑕᒃ᙮ 7 ᒎᐗᒃ ᑮ ᓇᔥᑴᐗᔑᐁᐗᒃ ᓂᑦ ᐋᔮᓈᓐ ᐅᓚᔓᐌᐎᓐ, ᓀᔥᑕ ᓂᑦ ᐅᓚᔓᐌᐎᓂᓈᓐ ᐅᒋ ᑲᑕ ᓂᐱᐸᓐ, ᐌᓴ ᑭᒋᒪᓂᑐ ᐅᑯᓯᓴ ᑮ ᐃᑌᓕᑖᑯᐃᑎᓱ᙮ 8 ᐃᔅᐱ ᒫᑲ ᐹᐃᓚᑦ ᐱᐁᑕᒃ ᐊᓂᐁᓕᐤ ᐃᑗᐎᓂᓕᐤ ᐊᐙᓯᑌ ᑮ ᓭᑭᓯᐤ; 9 ᒥᓇ ᒫᑲ ᑮ ᐱᑐᑫᐤ ᑎᐹᔅᑯᓂᑫᐎᑲᒥᑯᒃ, ᓀᔥᑕ ᐃᑌᐤ ᒋᓴᓴ, ᑖᓐᑌ ᐌᒋᔭᓐ? ᓇᒪ ᐙᐙᒡ ᒫᑲ ᑮ ᓇᔥᑴᐗᔑᐃᑯ ᒋᓴᓴ᙮ 10 ᐁᑯ ᐹᐃᓚᑦ ᐁᑖᑦ, ᓇᒪ ᓈ ᑭᑦ ᐋᔭᒥᐃᓐ? ᓇᒪ ᓈ ᑭ ᑭᔅᑫᓕᑌᓐ ᐁ ᐋᔮᔮᓐ ᑲᔥᑭᐅᐎᓐ ᑭᒋ ᒌᔅᑖᔅᑾᐅᑖᓐ, ᓀᔥᑕ ᐁ ᐋᔮᔮᓐ ᑲᔥᑭᐅᐎᓐ ᑭᒋ ᐸᑭᑎᓂᑖᓐ? 11 ᒋᓴᔅ ᑮ ᓇᔥᑴᐗᔑᐃᐌᐤ, ᓇᒪᐎᓚ ᑭ ᑳ ᐋᔮᑖᔾ ᑲᔥᑭᐅᐎᓐ ᐙᔦᔥ ᑭᒋ ᑐᑕᐎᔭᓐ, ᑮᔥᐱᓐ ᐁᑳ ᒥᓕᑲᐎᔭᓐ ᐃᔥᐱᒥᒃ ᐅᒋ: ᐁᐗᑯ ᐌᒋ ᐊᓇ ᑳ ᑮ ᐸᑭᑎᓂᑦ ᑭᒋᒋᒃ ᐊᐙᓯᑌ ᒥᔖᓕᐤ ᐅ ᒪᒋᑐᑕᒧᐎᓐ᙮ 12 ᐁᑯᔅᐱ ᒫᑲ ᐅᒋ ᐹᐃᓚᑦ ᑮ ᑯᒋ ᐸᑭᑎᓀᐤ: ᒫᑲ ᒎᐗᒃ ᑮ ᑌᐺᐗᒃ, ᐁ ᐃᑗᒋᒃ, ᑮᔥᐱᓐ ᐸᑭᑎᓇᑌ ᐊᐗ ᐃᓕᓕᐤ, ᓇᒪᐎᓚ ᑭᑦ ᐅᑐᑌᒥᒪᐤ ᓯᓴᕐ: ᑕᑐ ᐊᐌᓇ ᑳ ᑭᒋᐅᑭᒫᑳᑎᓱᑦ, ᓇᔅᐹᒡ ᐃᔑ ᐋᓕᒧᒣᐤ ᓯᓴᕋ᙮ 13 ᐃᔅᐱ ᒫᑲ ᐹᐃᓚᑦ ᐱᐁᑕᒃ ᐊᓂᐁᓕᐤ ᐃᑗᐎᓂᓕᐤ, ᑮ ᐯᒋ ᐗᓚᐎᑕᐁᐤ ᒋᓴᓴ, ᓀᔥᑕ ᑮ ᓇᐊᐱᐤ ᑎᐹᔅᑯᓂᑫᐎ ᐊᐱᐎᓂᒃ, ᐃᑕ ᐁ ᐃᔑᓂᑳᑌᓕᒃ ᐊᓯᓂᐎ ᐊᔅᐱᔑᒧᓂᑳᓐ, ᒫᑲ ᐦᐃᑉᕉ ᐃᔑᑭᔗᐎᓂᒃ, ᑳᐸᑕ᙮ 14 ᐁᑯ ᒣᒀᒡ ᒫᑲ ᑮ ᐋᔦᔅᑲᐎᑖᓂᐗᓐ ᒥᔮᔥᑳᑫᐎ ᒪᑯᔐᐎᓐ, ᓀᔥᑕ ᓈᓐᑕᐤ ᐁ ᐋᐱᑕᑭᔑᑳᒃ: ᐁᑯ ᐁᑖᑦ ᒎᐗ, ᑲᓇᐙᐸᒥᒃ ᑭ ᑭᒋᐅᑭᒫᒥᐗᐤ! 15 ᒫᑲ ᑮ ᑌᐺᐗᒃ, ᑭᑐᑖᔾ, ᑭᑐᑖᔾ, ᒌᔅᑖᔅᑾᐤ᙮ ᐹᐃᓚᑦ ᐃᑌᐤ, ᓂ ᑳ ᒌᔅᑖᔅᑾᐗᐤ ᓈ ᑭ ᑭᒋᐅᑭᒫᒥᐗᐤ? ᑭᒋ ᓵᓵᑭᐎᓕᐌᐎᓕᓕᐗᒃ ᑮ ᓇᔥᑴᐗᔑᐃᐌᐗᒃ, ᓇᒪᐎᓚ ᑯᑕᒃ ᑭᒋᐅᑭᒪᐤ ᓂᑦ ᐋᔭᐙᓈᓐ ᐱᑯ ᓯᓴᕐ᙮ 16 ᐁᑯ ᒫᑲ ᐯᑭᑎᓇᒪᐙᑦ ᑭᒋ ᒌᔅᑖᔅᑾᐙᑲᓂᐎᓕᒋ᙮

ᒋᓴᔅ ᒋᔅᑖᔅᑾᑲᓂᐎᐤ

ᐁᑯ ᐌᑎᓈᒋᒃ ᒋᓴᓴ ᓀᔥᑕ ᑫᑐᑕᐋᒋᒃ᙮ 17 ᐎᓚ ᒫᑲ, ᐁ ᐱᒥᐎᑖᑦ ᐅᑦ ᐋᔑᑌᐋᑎᑯᒻ ᑭ ᐃᑐᑌᐤ ᐅᑕ ᐅᔅᑎᒀᓂᑲᓐ ᐁ ᐃᔑᓂᑳᑌᓕᒃ, ᐦᐃᑉᕉ ᐃᔑᑭᔗᐎᓂᒃ ᑯᓪᑯᑕ ᑳ ᐃᔑᓂᑳᑌᒃ: 18 ᐁᑯᑕ ᒋᐃᔅᑖᔅᒀᐙᒋᒃ, ᐊᓯᒋ ᓀᔥᑕ ᓂᔓ ᑯᑕᑭᔭ, ᐋᓕᑕᐤ ᐯᔭᒃ, ᒋᓴᔅ ᒫᑲ ᑕᔅᑕᐎᒡ᙮ 19 ᐹᐃᓚᑦ ᒫᑲ ᑮ ᒪᓯᓇᐊᒻ ᒪᓯᓇᐃᑫᐎᓂᓕᐤ, ᓀᔥᑕ ᑭ ᑭᑲᒧᑕᐤ ᐋᔑᑌᐋᑎᑯᒃ᙮ ᑮ ᐃᑕᓯᓇᐃᑳᑌᐤ ᒫᑲ, ᒋᓴᔅ ᓈᓴᕋᑎᒃ ᐅᒋ, ᒎᐗᒃ ᐅ ᑭᒋᐅᑭᒫᒥᐙᐗ᙮ 20 ᐅᒣᓕᐤ ᒪᓯᓇᐃᑫᐎᓂᓕᐤ ᒫᑲ ᒥᒉᑦ ᒎᐗᒃ ᑮ ᐋᔭᒥᑖᐗᒃ: ᐌᓴ ᐃᑕ ᒋᓴᔅ ᑳ ᒌᔅᑖᔅᑾᐙᑲᓂᐎᑦ ᑭᔑᐙᒃ ᐃᑖᐎᓂᒃ ᑭ ᐃᑕᑾᓐ: ᑮ ᒪᓯᓇᐃᑳᑌᐤ ᒫᑲ ᐦᐃᑉᕉ ᐃᔑᑭᔗᐎᓂᒃ, ᓀᔥᑕ ᒃᕆᒃ ᐃᔑᑭᔗᐎᓂᒃ, ᓀᔥᑕ ᓛᑎᓐ ᐃᔑᑭᔙᐎᓂᒃ᙮ 21 ᐁᑯ ᒎᐗᒃ ᐅ ᑭᒋᓵᓵᑭᐎᓕᐌᐎᓕᓕᒥᐙᐗ ᐁᑖᓕᒋ ᐹᐃᓚᑕ, ᐁᑳᐎᓚ ᒪᓯᓇᐊ, ᒎᐗᒃ ᐅ ᑭᒋᐅᑭᒫᒥᐙᐗ; ᒫᑲ ᐁ ᑮ ᐃᑗᑦ, ᓂᓚ ᐁᐗᑯ ᒎᐗᒃ ᐅ ᑭᒋᐅᑭᒫᒥᐙᐗ᙮ 22 ᐹᐃᓚᑦ ᑮ ᓇᔥᑴᐗᔑᐃᐌᐤ, ᐊᓂᒪ ᑳ ᑮ ᒥᓯᓇᐊᒫᓐ ᓂ ᑮ ᒪᓯᓇᐁᓐ᙮ 23 ᐁᑯ ᓇᑐᐸᓕᐎᓕᓕᐗᒃ, ᐃᔅᐱ ᑳ ᑮ ᒌᔅᑖᔅᑾᐙᒋᒃ ᒋᓴᓴ, ᑮ ᐅᑎᓇᒬᐗᒃ ᐅ ᐎᓛᒋᑲᓂᓕᐗ, ᓀᔥᑕ ᑮ ᓀᐅᑕᒬᐗᒃ, ᒥᓯᐌ ᑕᑐ ᓇᑐᐸᓕᐎᓕᓕᐤ ᐸᔅᑭ ᑭᒋ ᐋᔮᑦ; ᓀᔥᑕ ᐅᑖᑯᐅᓂᓕᐤ: ᐊᓂᒪ ᒫᑲ ᐊᑯᐅᓐ ᓇᒪᐎᓚ ᑮ ᐱᒥᒀᑌᐤ, ᑮ ᐊᐱᑳᑌᐤ ᒫᑲ ᒥᓯᐌ ᑳ ᐃᔅᐱᔖᒃ᙮ 24 ᐁᐗᑯ ᐌᒋ ᐃᑎᑐᒋᒃ, ᐁᑳᐎᓚ ᑖᑐᐱᑖᑕᐤ, ᒫᑲ ᒪᐃᑲᓈᑎᑯᑫᑕᐤ ᐊᐌᓇ ᑫ ᐋᔮᑦ: ᑭᒋ ᒪᓯᓇᐃᑫᐎᓐ ᑭᒋ ᑎᐱᐸᓕᒃ, ᑳ ᐃᑗᒪᑲᒃ, ᑮ ᒫᑎᓇᒫᑐᐗᒃ ᓂ ᐎᓛᒋᑲᓇ, ᓀᔥᑕ ᓂᑦ ᐊᑯᐅᓂᓕᐤ ᑮ ᐅᒋ ᒪᐃᑲᓈᑎᑯᑫᐗᒃ ᐊᐌᓇ ᑫ ᐋᔮᑦ᙮ ᐅᐅ ᑫᒀᓇ ᒫᑲ ᑮ ᑐᑕᒶᒃ ᓇᑐᐸᓕᐎᓕᓕᐗᒃ᙮ 25 ᒋᓴᔅ ᐅᑳᐎᔭ ᒫᑲ ᑮ ᓂᐸᐎᓕᐗ ᑭᔑᐙᒃ ᐅᑦ ᐋᔑᑌᐋᑎᑯᒥᒃ, ᓀᔥᑕ ᐅᑳᐎᔭ ᐎᒋᔖᓂᔅᑴᒥᓕᐗ, ᒣᕆ ᒃᓕᐅᐹᔅ ᐎᐗ, ᓀᔥᑕ ᒣᕆ ᒫᒃᑕᓖᓐ᙮ 26 ᐃᔅᐱ ᒫᑲ ᒋᓴᔅ ᐎᐋᐸᒫᑦ ᐅᑳᐎᔭ, ᓀᔥᑕ ᐊᓂᐃ ᑭᔅᑭᓄᐊᒪᐙᑲᓇ ᑳ ᓵᑭᐋᑦ ᐊᓐᑕ ᐁ ᓂᐸᐎᓕᒋ, ᐃᑌᐤ ᐅᑳᐎᔭ, ᐃᔅᑴᐤ, ᐙᐸᒻ ᑭᑯᓯᔅ! 27 ᐁᑯ ᐁᑖᑦ ᐊᓂᐃ ᑭᔅᑭᓄᐊᒪᐙᑲᓇ, ᐙᐸᒻ ᑭᑳᐎ! ᐁᑯ ᐊᓂᒪ ᑎᐸᔨᑲᓐ ᐱᓯᒧᑲᓂᒃ ᐅᒋ ᐊᓇ ᑭᔅᑭᓄᐊᒪᐙᑲᓐ ᑮ ᐃᑐᑕᐁᐤ ᐎᓚ ᑎᐱᓚᐌ ᐎᑭᒃ᙮

ᐅᓂᐱᐎᓐ ᒋᓴᔅ

28 ᐹᑎᒫ ᐅᒪ, ᒋᓴᔅ ᐁ ᑭᔅᑫᓕᑕᒃ ᒥᓯᐌ ᑫᒀᓇ ᐋᔕᔾ ᐁ ᑭᔑᑖᓂᐗᓂᓕᑭ, ᑭᒋ ᒪᓯᓇᐃᑫᐎᓐ ᑭᒋ ᑎᐱᐸᓕᒃ, ᐃᑗᐤ, ᓂ ᐎ ᒥᓂᒀᓐ᙮ 29 ᑮ ᐊᔅᑌᐤ ᒫᑲ ᐊᓱᐗᒋᑲᓐ ᐁ ᓵᑲᔅᑭᓀᒃ ᔑᐎᑳᐳ, ᐁᑯ ᓯᐋᑲᔅᑭᓇᑖᒋᒃ ᐅᐸᓂᓕᐤ ᔑᐎᑳᐳᓕᐤ, ᓀᔥᑕ ᑮ ᐊᔅᑖᐗᒃ ᐎᐹᔅᑯᒃ, ᓀᔥᑕ ᑮ ᐊᑯᓇᒬᐗᒃ ᐅᑐᓂᓕᒃ᙮ 30 ᐃᔅᐱ ᒫᑲ ᒋᓴᔅ ᑳ ᑮ ᐅᑎᓇᒃ ᔑᐎᑳᐳᓕᐤ, ᑮ ᐃᑗᐤ, ᑭᔑᒋᑳᑌᐤ: ᐁᑯ ᓂᔮᒥᔅᑴᓕᑦ, ᓀᔥᑕ ᐯᑭᑎᓈᑦ ᐅᑦ ᐊᒑᑾ᙮

ᒋᓴᔅ ᐅᔅᐹᑳᒃ ᑕᑲᒫᑲᓂᐎᐤ

31 ᒎᐗᒃ ᒫᑲ, ᐁ ᐋᔦᔅᑲᐎᓈᓂᐗᒃ, ᒥᔭᐗ ᐁᑳ ᐋᔑᑌᐋᑎᑯᒃ ᑭᒋ ᐃᑕᑾᓂᓕᑭ ᐁ ᐋᔭᒥᐁᑭᔑᑳᓕᒃ, (ᐌᓴ ᐊᓂᒪ ᐁ ᐋᔭᒥᐁᑭᔑᑳᒃ ᑮ ᐃᔅᐯᓕᑖᑾᓐ,) ᑮ ᓇᑐᑕᒪᐌᐗᒃ ᐹᐃᓚᑕ ᐅᔅᑳᑎᓕᐗ ᑭᒋ ᓈᑣᐃᑳᑌᓕᑭ, ᓀᔥᑕ ᑭᒋ ᑭᑐᑕᐋᑲᓂᐎᓕᒋ᙮ 32 ᐁᑯ ᓇᑐᐸᓕᐎᓕᓕᐗᒃ ᐱᐁᒋ ᐃᑐᑌᒋᒃ, ᓀᔥᑕ ᑮ ᓈᑡᑳᑌᐌᐗᒃ ᐊᓂᐃ ᓂᔥᑕᒻ, ᓀᔥᑕ ᐊᓂᐃ ᑯᑕᑭᔭ ᑳ ᐊᓯᒋ ᑭᔅᑖᔅᑾᐙᑲᓂᐎᓕᒋ᙮ 33 ᒫᑲ ᐃᔅᐱ ᐌᑎᑖᒋᒃ ᒋᓴᓴ, ᓀᔥᑕ ᐎᐋᐸᑕᑭᒃ ᐋᔕᔾ ᐁ ᓂᐱᓕᒋ, ᓇᒪᐎᓚ ᐅᒋ ᓈᑣᑲᑌᐌᐗᒃ: 34 ᒫᑲ ᐯᔭᒃ ᐊᓂᑭ ᓇᑐᐸᓕᐎᓕᓕᐗᒃ ᑕᑲᒋᑲᓂᓕᐤ ᑮ ᐅᒋ ᑕᑲᒣᐤ ᐅᔅᐱᑳᓕᒃ, ᑣᔦᒃ ᒫᑲ ᑮ ᐅᒋᒋᐗᓂᓕᐤ ᒥᑯ ᓀᔥᑕ ᓂᐱ᙮ 35 ᐊᓇ ᒫᑲ ᑳ ᑮ ᐙᐸᑕᒃ ᑎᐹᒋᒣ, ᓀᔥᑕ ᐅ ᑎᐹᒋᒧᐎᓐ ᑖᐺᐎᓂᐗᓂᓕᐤ: ᓀᔥᑕ ᑭᔅᑫᓕᑕᒻ ᐁ ᑖᐺᑦ, ᑭᒋ ᑖᐺᑕᒣᒃ᙮ 36 ᐌᓴ ᐅᐅ ᑫᒀᓇ ᑮ ᑐᒋᑳᑌᐗ, ᑭᒋ ᒪᓯᓇᐃᑫᐎᓐ ᑭᒋ ᑎᐱᐸᓕᒃ, ᓇᒪ ᐙᐙᒡ ᐯᔭᒃ ᐅᔅᑲᓐ ᑲᑕ ᓈᑣᐃᑳᑌᓕᐤ᙮ 37 ᒥᓇ ᒫᑲ ᑯᑕᒃ ᑭᒋ ᒪᓯᓇᐃᑫᐎᓐ ᐃᑗᒪᑲᓐ, ᑲᑕ ᑲᓇᐙᐸᒣᐗᒃ ᐊᓂᐃ ᑳ ᑮ ᑕᑲᒫᒋᒃ᙮

ᐁ ᓈᐃᑲᐋᑲᓂᐎᑦ ᒋᓴᔅ

38 ᐹᑎᒫ ᐅᒪ ᒫᑲ ᒍᓯᑉ ᐋᕆᒫᑎᔭᐃᒃ ᑳ ᐅᒌᑦ, ᐁ ᐅ ᑭᔅᑭᓄᐊᒪᐙᑲᓂᒥᑯᑦ ᒋᓴᓴ, ᑭᒧᒡ ᒫᑲ, ᐁ ᑯᔅᑖᑦ ᒎᐗ, ᑮ ᓇᑐᑕᒪᐌᐤ ᐹᐃᓚᑕ ᑭᒋ ᑭᑐᑕᑕᐙᑦ ᒋᓴᓴ ᐎᔭᐎᓕᐤ: ᑮ ᓇᔅᑯᒥᑯ ᒫᑲ ᐹᐃᓚᑕ᙮ ᑮ ᐯᒋ ᐃᑐᑌᐤ ᒫᑲ, ᓀᔥᑕ ᑮ ᐅᑎᓇᒬᐤ ᒋᓴᓴ ᐎᔭᐎᓕᐤ᙮ 39 ᐊᓯᒋ ᓀᔥᑕ ᑮ ᐯᒋ ᐃᑐᑌᐤ ᓂᑯᑏᒪᔅ, ᐊᓇ ᓂᐹᑎᐱᔉ ᓂᔥᑕᒻ ᑳ ᑮ ᐯᒋ ᓈᑖᑦ ᒋᓴᓴ ᓀᔥᑕ ᑮ ᐯᑕᐤ ᐁ ᑭᓕᑲᐎᓂᑳᑌᓕᒃ ᒪᕐ ᓀᔥᑕ ᐋᓗᐊ, ᓈᓐᑕᐤ ᒥᑖᑐᒥᑕᓇᐤ ᑎᐹᐯᔅᑯᒋᑲᓇ ᐃᔥᐱᔥ᙮ 40 ᐁᑯ ᐌᑎᓇᒸᒋᒃ ᐎᔭᐎᓕᐤ ᒋᓴᓴ, ᓀᔥᑕ ᑮ ᐌᐌᑭᓇᒶᒃ ᐸᐸᑭᐙᔮᓀᑭᓄᒃ ᐊᓯᒋ ᐊᓂᐃ ᒪᔥᑭᑭᔭ, ᐁ ᐃᔑ ᓇᐃᑳᑫᒋᒃ ᒎᐗᒃ᙮ 41 ᐃᑕ ᒫᑲ ᑳ ᒋᔅᑖᔅᑾᐙᑲᓂᐎᑦ ᑮ ᐃᑕᑾᓐ ᓂᑖᐎᑭᒋᑲᓐ; ᓀᔥᑕ ᐱᒋ ᓂᑖᐎᑭᒋᑲᓂᒃ ᑮ ᐃᑕᑾᓐ ᐅᔥᑭ ᒋᐸᔨᑲᒥᒃ, ᐃᑕ ᐁᑳ ᐁᔥᑾ ᐊᐌᓇ ᑳ ᐅᒋ ᐱᒥᔑᒫᑲᓂᐎᑦ᙮ 42 ᐁᑯᑕ ᒫᑲ ᐯᒥᔑᒫᒋᒃ ᒋᓴᓴ, ᒎᐗᒃ ᐅᑦ ᐋᔦᔅᑲᐎ ᑭᔑᑳᒥᐗᐤ ᐅᒋ; ᐌᓴ ᑭᔑᐙᒃ ᑮ ᐃᑕᑾᓐ ᒋᐹᔨᑲᒥᒃ᙮

20

ᐊᓂᒪ ᑳ ᐱᔑᔑᒃ ᒋᐸᐃᑲᒥᒃ

1 ᓃᔥᑕᒻ ᐁ ᑭᔑᑳᒃ ᐊᓂᒪ ᐁ ᑕᐙᔅᑌᒃ ᐎᐸᒡ ᐯᒋ ᐃᑐᑌᐤ ᒣᕆ ᒫᒃᑕᓖᓐ ᒋᐹᔨᑲᒥᑯᒃ ᐙᐸᒣᐤ ᒫᑲ ᐊᓯᓂᔭ ᐁ ᑮ ᐅᑎᓈᑲᓂᐎᓕᒋ ᒋᐹᔨᑲᒥᑯᒃ ᐅᒋ᙮ 2 ᐁᑯ ᑫᒋᐸᑖᑦ, ᐅᑎᑌᐤ ᒫᑲ ᓵᐃᒪᓐ ᐱᑕᕋ, ᓀᔥᑕ ᐊᓂᐃ ᑯᑕᑭᔭ ᑭᔅᑭᓄᐊᒪᐙᑲᓇ ᒋᓴᔅ ᑳ ᓵᑭᐋᑦ, ᐃᑌᐤ ᒫᑲ, ᑮ ᐅᑎᓀᐗᒃ ᑌᐯᓕᒋᑫᓕᒋ ᒋᐹᔨᑲᒥᑯᒃ ᐅᒋ, ᓇᒪᐎᓚ ᓀᔥᑕ ᓂ ᑭᔅᑫᓕᑌᓈᓐ ᑖᓐᑌ ᑳ ᐱᒥᔑᒫᒋᒃ᙮ 3 ᐁᐗᑯ ᐌᒋ ᐱᑕᕐ ᐗᓚᐙᑦ, ᓀᔥᑕ ᐊᓇ ᑯᑕᒃ ᑭᔅᑭᓄᐊᒪᐙᑲᓐ, ᓀᔥᑕ ᑮ ᐯᒋ ᐃᑐᑌᐗᒃ ᒋᐹᔨᑲᒥᑯᒃ᙮ 4 ᐁᑯ ᑖᐱᔅᑯᒡ ᐯᒥᐸᑖᒋᒃ: ᐊᓇ ᑯᑕᒃ ᑭᔅᑭᓄᐊᒪᐙᑲᓐ ᒫᑲ ᑮ ᓇᑲᒋᐸᐁᐤ ᐱᑕᕋ, ᓀᔥᑕ ᓃᔥᑕᒻ ᑮ ᐅᑎᑕᒻ ᒋᐹᔨᑲᒥᑯᓕᐤ᙮ 5 ᐎᓚ ᒫᑲ ᐁ ᓇᐌᑳᐸᐎᑦ, ᓀᔥᑕ ᐁ ᐋᑯᓯᑶᐋᐸᑕᒃ, ᑮ ᐙᐸᑕᒻ ᐸᐸᑭᐙᔮᓀᑭᓋ ᐁ ᐊᔅᑌᓕᑭ, ᓇᒪᐎᓚ ᒫᑲ ᐅᒋ ᐱᑐᑫᐤ᙮ 6 ᐁᑯ ᑌᑯᔑᒃ ᓵᐃᒪᓐ ᐱᑕᕐ ᐁ ᓄᔅᐱᓇᑖᑦ, ᑮ ᐱᑐᑭᐤ ᒫᑲ ᒋᐹᔨᑲᒥᑯᒃ, ᓀᔥᑕ ᐙᐸᑕᒻ ᐸᐸᑭᐙᔮᓀᑭᓋ ᐁ ᐊᔅᑌᓕᑭ, 7 ᓀᔥᑕ ᐊᓂᐁᓕᐤ ᐙᐱᔅᑫᑭᓂᓕᐤ, ᑳ ᑮ ᐌᐌᑭᔅᑎᒀᓀᐱᓱᓕᒋ ᐁᑳ ᐁ ᐊᔑᑕᔅᑌᓕᒃ ᐸᐸᑭᐙᔮᓀᑭᓋ, ᒫᑲ ᐹᑳᓐ ᐁ ᐌᐌᑭᓂᑳᑌᓕᒃ᙮ 8 ᐁᑯ ᓀᔥᑕ ᐹᑐᑫᑦ ᐊᓇ ᑯᑕᒃ ᑭᔅᑭᓄᐊᒪᐙᑲᓐ, ᐊᓇ ᓃᔥᑕᒻ ᑳ ᐅᑎᑕᒃ ᒋᐹᔨᑲᒥᑯᓕᐤ, ᑮ ᐙᐸᑕᒻ ᒫᑲ, ᓀᔥᑕ ᑮ ᑖᐺᑕᒻ᙮ 9 ᐌᓴ ᓇᒪᐎᓚ ᐁᔥᑾ ᑮ ᑭᔅᑫᓕᑕᒶᒃ ᑭᒋ ᒪᓯᓇᐃᑫᐎᓂᓕᐤ, ᒥᓇ ᑭᒋ ᐗᓂᔥᑳᓕᒋ ᐅᓂᐱᐗ ᐅᒋ᙮ 10 ᐁᑯ ᑳᐌᒋᒃ ᑭᔅᑭᓄᐊᒪᐙᑲᓇᒃ ᒥᓇ ᐎᓚᐗᐤ ᑎᐱᓚᐌ ᐎᑭᐙᒃ᙮

ᒋᓴᔅ ᓄᑯᓯᔅᑕᐌᐤ ᒣᕇ ᒫᒃᑕᓕᓇ

11 ᒫᑲ ᒣᕆ ᑮ ᓂᐸᐎᐤ ᐗᓚᐎᑎᒥᒃ ᒋᐹᔨᑲᒥᑯᒃ ᐁ ᒫᑐᑦ: ᓀᔥᑕ ᒣᒀᒡ ᑳ ᒫᑐᑦ, ᑮ ᓇᐌᑳᐸᐎᐤ, ᓀᔥᑕ ᑮ ᐋᑯᓯᑴᐋᐸᑕᒻ ᒋᐹᔨᑲᒥᑯᓕᐤ, 12 ᐙᐸᒣᐤ ᒫᑲ ᓂᔓ ᐁᓐᒐᓚ ᐁ ᐊᐱᓕᒋ, ᐯᔭᒃ ᐅᔅᑎᒀᓂᓕᒃ ᐃᑌᑫ, ᑯᑕᒃ ᒫᑲ ᐅᓯᑎᓕᒃ ᐃᑌᑫ, ᐃᑕ ᒋᓴᔅ ᐎᔭᐤ ᑳ ᑮ ᐱᒥᑎᓂᓕᒃ᙮ 13 ᐁᑯ ᐁᑖᒋᒃ, ᐃᔅᑴᐤ, ᑖᓀᑭ ᐌᒋ ᒫᑐᔭᓐ? ᐃᑌᐤ, ᐁ ᑮ ᑭᑐᑕᐋᒋᒃ ᓂ ᑌᐯᓕᒋᑫᒪ, ᓇᒪᐎᓕ ᒫᑲ ᓂ ᑭᔅᑫᓕᑌᓐ ᑖᓐᑌ ᑳ ᐱᒥᔑᒫᒋᒃ᙮ 14 ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᑮ ᑴᔅᑭᑳᐸᐎᐤ, ᓀᔥᑕ ᑮ ᐙᐸᒣᐤ ᒋᓴᓴ ᐁ ᓂᐸᐎᓕᒋ, ᓇᒪᐎᓚ ᒫᑲ ᐅᒋ ᑭᔅᑫᓕᑕᒻ ᐁ ᐋᐎᓕᒋ ᒋᓴᓴ᙮ 15 ᒋᓴᔅ ᐃᑌᐤ, ᐃᔅᑴᐤ, ᑖᓀᑭ ᐌᒋ ᒫᑐᔭᓐ? ᐊᐌᓇ ᓀᓇᑕᐌᓕᒪᑦ? ᐎᓚ, ᐁᐗᑯ ᐊᐗ ᓂᑖᐎᑭᒋᑫᐎᓕᓕᐤ ᐁ ᐃᑌᓕᑕᒃ, ᐃᑌᐤ, ᐅᑭᒪᐤ, ᑮᔥᐱᓐ ᑳ ᑭᑐᑕᐋᐗᑌ, ᐎᑕᒫᐎᓐ ᑖᓐᑌ ᑳ ᐃᒥᔑᒪᑦ, ᐁᑯ ᑫ ᐅᑎᓇᒃ᙮ 16 ᐃᑎᑯ ᒋᓴᓴ, ᒣᕆ᙮ ᑮ ᑴᔅᑭᑳᐸᐎᐤ, ᓀᔥᑕ ᐃᑌᐤ, ᕌᐳᓈᔾ; ᑳ ᐃᑗᒪᑲᒃ, ᑫᔅᑭᓄᐊᒫᑫᔭᓐ᙮ 17 ᒋᓴᔅ ᐃᑌᐤ ᐁᑳᐎᓚ ᓵᒥᓂᓐ; ᐌᓴ ᓇᒪᐎᓚ ᐁᔥᑾ ᓂ ᑮ ᐅᐱᔅᑳᓐ ᑭᒋ ᓈᑕᒃ ᓄᑖᐎ: ᒫᑲ ᓇᑕᐙᐸᒥᒃ ᓂᒋᔖᓇᒃ, ᓀᔥᑕ ᐃᔑᒃ, ᓂᑦ ᐅᐱᔅᑳᓐ ᑭᒋ ᓈᑕᒃ ᓄᑖᐎ, ᓀᔥᑕ ᑯᑖᐎᐗᐤ; ᓀᔥᑕ ᓂ ᑭᒋᒪᓂᑐᒻ, ᑭ ᑭᒋᒪᓂᑐᒥᐗᐤ ᒫᑲ᙮ 18 ᒣᕆ ᒫᒃᑕᓖᓐ ᑮ ᐯᒋ ᐎᑕᒪᐌᐤ ᑭᔅᑭᓄᐊᒪᐙᑲᓇ ᐁ ᑮ ᐙᐸᒫᑦ ᐅᑎᐯᓕᒋᑫᐗ, ᓀᔥᑕ ᐁ ᑮ ᐎᑕᒫᑯᑦ ᐅᐅ ᑫᒀᓇ᙮

ᒋᓴᔅ ᓄᑯᓯᔅᑕᐌᐤ ᐅᑭᔅᑭᓄᐊᒪᐙᑲᓇ

19 ᐁᐗᑯ ᑫᔮᐸᒡ ᐁ ᑭᔑᑳᒃ ᐁ ᐅᑖᑯᔑᒃ, ᓃᔥᑕᒻ ᐁ ᑭᔑᑳᒃ ᐊᓂᒪ ᐁ ᑕᐙᔅᑌᒃ, ᐃᔥᒀᑌᒪ ᐁ ᑭᐸᐃᑳᑌᑭ ᐃᑕ ᑭᔅᑭᓄᐊᒪᐙᑲᓇᒃ ᐁ ᑮ ᒫᐗᒋᐃᑐᒋᒃ ᐁ ᑯᔅᑖᒋᒃ ᒎᐗ, ᑭᐺᒋ ᐃᑐᑌᐤ ᒋᓴᔅ, ᓀᔥᑕ ᑮ ᓂᐸᐎᐤ ᑌᑖᐎᒡ, ᐃᑌᐤ ᒫᑲ, ᑳᔭᒣᓕᑕᒧᐎᓐ ᑭ ᑳ ᐎ ᐋᔮᓇᐗᐤ᙮ 20 ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᑮ ᐙᐸᑎᓓᐤ ᐅᒋᒋᔭ ᓀᔥᑕ ᐅᔅᐱᑳᔾ᙮ ᐁᑯ ᑭᔅᑭᓄᐊᒪᐙᑲᓇᒃ ᑳ ᓯᑭᓓᓯᒋᒃ ᐃᔅᐱ ᐎᐋᐸᒫᒋᒃ ᐅᑎᐯᓕᒋᑫᐗ᙮ 21 ᐁᑯ ᒋᓴᔅ ᒥᓇ ᐁᑖᑦ, ᑳᔮᒣᓕᑕᒧᐎᓐ ᑭ ᑳ ᐎ ᐋᔮᓇᐗᐤ: ᑖᐱᔅᑯᒡ ᓄᑖᐎ ᐁ ᑮ ᐯᒋᑎᔕᐅᑦ, ᐁᑯ ᓀᔥᑕ ᐁ ᐃᔑᑎᔕᐅᑕᑾᒃ᙮ 22 ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᑮ ᓓᓓᑐᑕᐌᐤ, ᓀᔥᑕ ᐃᑌᐤ, ᐅᑎᓂᒃ ᐸᓓᑭ ᐊᒑᒃ: 23 ᒥᓯᐌ ᐊᐌᓂᑭ ᐅ ᒪᒋᑐᑕᒧᐎᓂᐙᐗ ᑫ ᐊᔐᓇᒬᑾᒃ ᐊᔐᓂᑳᑌᓕᐗ; ᓀᔥᑕ ᒥᓯᐌ ᐊᐌᓂᑭ ᐅ ᒪᒋᑐᑕᒧᐎᓂᐙᐗ ᑫ ᒫᒫᒋᑯᓇᒬᑾᒃ, ᒫᒪᒋᑯᓂᑳᑌᓕᐗ᙮

ᒋᓴᔅ ᓀᔥᑕ ᑡᒪᔅ

24 ᒫᑲ ᑕᒪᔅ, ᐯᔭᒃ ᐊᓂᑭ ᓂᔓᔖᑉ, ᑎᑎᒪᔅ ᐁ ᐃᔑᓂᑳᓱᑦ, ᓇᒪᐎᓚ ᑮ ᐎᒉᐌᐤ ᐃᔅᐱ ᑳ ᑕᑯᔑᓂᓕᒋ ᒋᓴᓴ᙮ 25 ᑮ ᐃᑎᑯ ᒫᑲ ᑯᑕᑭᔭ ᑭᔅᑭᓄᐊᒪᐙᑲᓇ, ᓂ ᑮ ᐙᐸᒫᓈᓐ ᐅᑎᐯᓕᒋᑫᐤ᙮ ᒫᑲ ᑮ ᐃᑌᐤ, ᑮᔥᐱᓐ ᐁᑳ ᐗᐸᑕᒶᑫ ᐅᒌᒌᒃ ᐁ ᐁᔑᑎᓂᓕᑭ ᒌᔅᑖᔅᒀᓇ, ᓀᔥᑕ ᐱᑎᓇᒪᓀ ᐁ ᐁᔑᑎᓂᓕᑭ ᒌᔅᑖᔅᑾᓇ, ᓀᔥᑕ ᑯᑖᐎᓇᒶᑫ ᐅᔅᐱᑳᔾ, ᓇᒪᐎᓚ ᓂ ᑳ ᑖᐺᑌᓐ᙮ 26 ᐁᑯ ᑳ ᔮᓈᓀᐤ ᑭᔑᑳᓕᒃ, ᐅ ᑭᔅᑭᓄᐊᒪᐙᑲᓇ ᒥᓇ ᐱᒋ ᐁ ᐃᑖᓕᒋ, ᓀᔥᑕ ᑕᒪᔅ ᐁ ᐎᒉᐙᑦ: ᐁᑯ ᐱᐁᒋ ᐃᑐᑌᑦ ᒋᓴᔅ, ᐃᔥᒀᑌᒪ ᐁ ᑭᐸᐃᑳᑌᓕᑭ, ᑮ ᓂᐸᐎᐤ ᒫᑲ ᑌᑖᐎᒡ ᓀᔥᑕ ᑮ ᐃᑗᐤ, ᑳᔮᒣᓕᑕᒧᐎᓐ ᑭ ᑳ ᐎ ᐋᔮᓇᐗᐤ᙮ 27 ᐁᑯ ᐁᑖᑦ ᑕᒪᓴ, ᐅᑕ ᐃᔑᒋᒉᓕ, ᓀᔥᑕ ᐙᐸᑕ ᓂᒋᒋᔭ: ᐅᑕ ᒫᑲ ᐃᔑᒋᒉᓕ, ᓀᔥᑕ ᑯᑖᐎᓇ ᓃᔅᐱᑳᔾ: ᐁᑳᐎᓚ ᒫᑲ ᐋᓉᔦᓕᑕ, ᒫᑲ ᑖᐺᔦᓕᑕ᙮ 28 ᐁᑯ ᑕᑎᔅ ᓀᔥᑴᐗᔑᐃᐌᑦ ᓀᔥᑕ ᐁᑖᑦ, ᓂ ᑎᐯᓕᒋᑫᒻ ᓀᔥᑕ ᓂ ᑭᒋᒪᓂᑐᒻ᙮ 29 ᒋᓴᔅ ᐃᑌᐤ, ᑕᒪᔅ, ᐁ ᑮ ᐙᐸᒥᔭᓐ ᑭ ᑮ ᑖᐺᑌᓐ: ᔕᐌᓕᑖᑰᓯᐗᒃ, ᐊᓂᑭ ᐁᑳ ᑳ ᐅᒋ ᐙᐸᒥᒋᒃ, ᐁᓕᐌᒃ ᒫᑲ ᑳ ᑖᐺᑕᑭᒃ᙮

ᑫᑾᓐ ᐌᒋ ᑳ ᒪᓯᓇᐃᑳᑌᑭ ᐅᐅ ᒪᓯᓇᐃᑲᓐ

30 ᓀᔥᑕ ᒥᒉᑦ ᑯᑕᑭᔭ ᑭᔅᑭᓄᐙᒋ ᐙᐸᑎᓕᐌᐎᓇ ᑖᐺ ᑮ ᑐᑕᒻ ᒋᓴᔅ ᐁ ᐙᐸᒥᑯᑦ ᐅ ᑭᔅᑭᓄᐊᒪᐙᑲᓇ, ᐁᑳ ᑳ ᒪᓯᓇᐃᑳᑌᑭ ᐅᒪ ᒪᓯᓇᐃᑲᓂᒃ: 31 ᒫᑲ ᐅᐅ ᒪᓯᓇᐃᑳᑌᐗ, ᑭᒋ ᑖᐺᑕᒣᒃ ᒋᓴᔅ ᐁ ᐋᐎᑦ ᙭, ᑭᒋᒪᓂᑐ ᐅᑯᓯᓴ; ᓀᔥᑕ ᐁ ᑖᐺᑕᒣᒃ ᑭᒋ ᐋᔮᔦᒃ ᐱᒫᑎᓯᐎᓐ ᐅᑦ ᐃᔑᓂᑳᓱᐎᓐ ᐅᒋ᙮

21

ᒋᓴᔅ ᓄᑯᓯᔅᑕᐌᐤ ᓂᔂᔅ ᐅᑭᔅᑭᓄᐊᒫᑲᓇ

1 ᑳ ᐳᓂᐸᓕᑭ ᐅᐅ ᑫᒀᓇ ᒋᓴᔅ ᒥᓇ ᑮ ᓄᑯᓰᔅᑕᐌᐤ ᐅ ᑭᔅᑭᓄᐊᒪᐙᑲᓇ ᑖᐃᐱᕆᔭᔅ ᑭᒋᑲᒦᒃ; ᐅᒪ ᒫᑲ ᑮ ᐃᔑ ᓄᑯᐃᑎᓱ᙮ 2 ᒫᒪᐤ ᑮ ᐃᑖᐗᒃ ᓵᐃᒪᓐ ᐱᑕᕐ, ᓀᔥᑕ ᑕᒪᔅ, ᑎᑎᒪᔅ ᑳ ᐃᔑᓂᑳᓱᑦ, ᓀᔥᑕ ᓇᑕᓂᔭᓪ ᑫᓇᐃᒃ ᑳᓕᓖᒃ ᑳ ᐅᒌᑦ, ᓀᔥᑕ ᓭᐸᑎ ᐅᑯᓯᓴ, ᓀᔥᑕ ᓂᔓ ᑯᑕᑭᔭ ᐅ ᑭᔅᑭᓄᐊᒪᐙᑲᓇ᙮ 3 ᓵᐃᒪᓐ ᐱᑕᕐ ᐃᑌᐤ, ᓂ ᓇᑕᐎ ᓄᑕᒣᓵᓐ᙮ ᐃᑌᐗᒃ, ᓂᓚᓈᓐ ᓀᔥᑕ ᑭ ᑳ ᐎᒉᐎᑎᓈᓐ᙮ ᑮ ᐗᓚᐎᐗᒃ, ᓀᔥᑕ ᑣᔦᒃ ᑮ ᐳᓯᐗᒃ ᓈᐱᒀᓂᒃ; ᐊᓂᐁᓕᐤ ᐁ ᑎᐱᔅᑳᓕᒃ ᒫᑲ ᓇᒪᐎᓚ ᑫᒀᓕᐤ ᐅᒋ ᐱᑕᐅᓛᐗᒃ᙮ 4 ᐃᔅᐱ ᒫᑲ ᐌᑎᒋᐸᓕᒃ ᐁ ᑭᑭᔐᐹᔮᒃ, ᒋᓴᔅ ᑮ ᓂᐸᐎᐤ ᔑᔓᒡ: ᒫᑲ ᑭᔅᑭᓄᐊᒪᐙᑲᓇᒃ ᓇᒪᐎᓚ ᐅᒋ ᑭᔅᑫᓕᒣᐗᒃ ᐁ ᐋᐎᓕᒋ ᒋᓴᓴ᙮ 5 ᐁᑯ ᒋᓴᔅ ᐁᑖᑦ, ᐊᐙᔑᔑᑐᒃ, ᑭᑦ ᐋᔮᓇᐗᐤ ᓈ ᒥᒋᒻ? ᑮ ᓇᔥᑴᐗᔑᐁᐗᒃ, ᓇᒪᐎᓚ᙮ 6 ᐁᑯ ᐁᑖᑦ, ᐸᑲᔅᑕᐌᐅᒃ ᐊᓕᐱ ᑭᒋᓂᔅᑮᒃ ᐃᑌᑫ ᓈᐱᒀᓂᒃ, ᐁᑯ ᑫ ᒥᔅᑲᒣᒃ᙮ ᐁᐗᑯ ᐌᒋ ᐸᑲᔅᑕᐌᐙᒋᒃ, ᐁᑯ ᒫᑲ ᐁᑳ ᑫᔥᑭᑖᒋᒃ ᑭᒋ ᐅᒋᐱᑖᒋᒃ ᑳ ᐃᔥᐱᔑ ᒥᒉᑎᓕᒋ ᓇᒣᓴ᙮ 7 ᐊᓇ ᒫᑲ ᑭᔅᑭᓄᐊᒪᐙᑲᓐ ᑳ ᓵᑭᐃᑯᑦ ᒋᓴᓴ ᐃᑌᐤ ᐱᑕᕋ, ᐁᐗᑯ ᐅᑎᐯᓕᒋᑫᐤ᙮ ᐃᔅᐱ ᒫᑲ ᓵᐃᒪᓐ ᐱᑕᕐ ᐱᐁᑕᒃ ᐁ ᐋᐎᓕᒋ ᐅᑎᐯᓕᒋᑫᐗ, ᑮ ᐸᑾᑌᐅᑐᑕᒻ ᐅ ᓄᑕᒣᓭᐗᑯᑉ, (ᐌᓴ ᑮ ᒧᔐᔥᑲᑌᐤ,) ᑮ ᐸᑲᔅᑕᐌᐸᓕᐅ ᒫᑲ ᑭᒋᑲᒦᒃ᙮ 8 ᑯᑕᑭᔭᒃ ᑭᔅᑭᓄᐊᒪᐙᑲᓇᒃ ᒫᑲ ᑮ ᐯᒋ ᐃᔑᒋᒣᐗᒃ ᓈᐱᒀᓂᔑᒃ; ᐌᓴ ᓇᒪᐎᓚ ᑖᐎᒡ ᑮ ᐃᑖᐗᒃ, ᒫᑲ ᓈᓐᑕᐤ ᓂᔡᐤ ᒥᑖᑐᒥᑕᓇᐤ ᑭᐤᐱᑕ, ᐁ ᐅᒋᐱᑖᒋᒃ ᐊᓚᐱᔭ ᐊᓯᒋ ᓇᒣᓴ᙮ 9 ᐎᐸᒡ ᒫᑲ ᑳ ᑲᐹᒋᒃ, ᑮ ᐙᐸᑕᒶᒃ ᐃᔥᑯᑌᓕᐤ ᑲᑭᑌᐗ ᐁ ᑮ ᐅᒋ ᐅᔑᑖᓂᐗᓂᓕᒃ, ᓀᔥᑕ ᓇᒧᓴ ᐁ ᑌᑕᓛᑲᓂᐎᓕᒋ, ᓀᔥᑕ ᐊᓚᑯᓇᐗ᙮ 10 ᒋᓴᔅ ᐃᑌᐤ, ᐯᔑᑯᒃ ᐸᔅᑭ ᓇᒣᓴᒃ ᐊᓄᒡ ᑳ ᑮ ᐱᑕᐅᓚᔦᒃ᙮ 11 ᓵᐃᒪᓐ ᐱᑕᕐ ᑮ ᐃᑐᑌᐤ, ᓀᔥᑕ ᑮ ᐋᒀᓯᐱᑌᐤ ᐊᓚᐱᔭ ᐁ ᓵᑲᔅᑭᓀᓕᒋ ᓇᒣᓴ ᐁ ᒥᔑᑭᑎᓕᒋ, ᒥᑖᑐᒥᑕᓇᐤ, ᓀᔥᑕ ᓂᔮᓕᓗᒥᑕᓇᐤ ᓂᔅᑐᔖᑉ: ᐋᑕ ᒫᑲ ᐁ ᐃᔥᐱᔑ ᒥᒉᑎᒋᒃ, ᐁᓕᐌᒃ ᓇᒪᐎᓚ ᐅᒋ ᐱᑯᐸᓕᐤ ᐊᓚᐱ᙮ 12 ᒋᓴᔅ ᐃᑌᐤ, ᐯᒋ ᒥᒌᓱᒃ᙮ ᓇᒪᐎᓚ ᒫᑲ ᐙᐙᒡ ᐯᔭᒃ ᐅ ᑭᔅᑭᓄᐊᒪᐙᑲᓇ ᑮ ᐃᔥᐱᔑ ᓱᑭᑌᐁᓕᐗ ᑭᒋ ᑲᑴᒋᒥᑯᑦ, ᐊᐌᓇ ᑭᓚ? ᐁ ᑭᔅᑫᓕᑕᒥᓕᒋ ᐁ ᐋᐎᑦ ᐅᑎᐯᓕᒋᑫᐤ᙮ 13 ᒋᓴᔅ ᒫᑲ ᐯᒋ ᐃᑐᑌᐤ, ᓀᔥᑕ ᐅᑎᓀᐤ ᐊᓚᑯᓇᐗ, ᒥᓓᐤ ᒫᑲ, ᐊᓯᒋ ᓀᔥᑕ ᓇᒣᓴ᙮ 14 ᐁᐗᑯ ᐅᒪ ᓂᔅᑡᐤ ᒋᓴᔅ ᑳ ᓄᑯᐃᑎᓱᔅᑕᐙᑦ ᐅ ᑭᔅᑭᓄᐊᒪᐙᑲᓇ ᐃᔅᑯᓈᒃ ᑳ ᐗᓂᔥᑳᑦ ᐅᓂᐱᐗ ᐅᒋ᙮

ᒋᓴᔅ ᓀᔥᑕ ᐱᑕᕐ

15 ᐁᑯ ᐃᔅᐱ ᑳ ᑮ ᒥᒋᓱᒋᒃ; ᒋᓴᔅ ᐃᑌᐤ ᓵᐃᒪᓐ ᐱᑕᕋ, ᓵᐃᒪᓐ, ᒑᓐ ᐅᑯᓯᓴ, ᐊᐙᓯᑌ ᓈ ᑭ ᓵᑭᐃᓐ ᐃᔥᐱᔥ ᐅᑯ? ᐃᑌᐤ, ᐁᐁ, ᑌᐯᓕᒋᑫᔭᓐ; ᑭ ᑭᔅᑫᓕᑌᓐ ᐁ ᓵᑭᐃᑖᓐ᙮ ᐃᑌᐤ, ᐊᔕᒥᒃ ᓂ ᒫᓂᔥᒑᓂᔑᔑᒪᒃ᙮ 16 ᐃᑌᐤ ᐁᑯ ᓂᔡᐤ, ᓵᐃᒪᓐ, ᒑᓐ ᐅᑯᓯᓴ, ᑭ ᓵᑭᐃᓐ ᓈ? ᐃᑌᐤ, ᐁᐁ, ᑌᐯᓕᒋᑫᔭᓐ; ᑭ ᑭᔅᑫᓕᑌᓐ ᐁ ᓵᑭᐃᑖᓐ᙮ ᐃᑌᐤ, ᐊᔕᒥᒃ ᓂ ᒫᓂᔥᒑᓂᔑᒪᒃ᙮ 17 ᐃᑌᐤ ᐁᑯ ᓂᔅᑡᐤ, ᓵᐃᒪᓐ, ᒑᓐ ᐅᑯᓯᓴ, ᑭ ᓵᑭᐃᓐ ᓈ? ᐱᑕᕐ ᓇᒪ ᑭ ᓇᐁᓕᑕᒻ ᐁᑯ ᓂᔅᑡᐤ ᐁ ᑮ ᐃᑎᑯᑦ, ᑭ ᓵᑭᐃᓐ ᓈ? ᑮ ᐃᑌᐤ ᒫᑲ, ᑌᐯᓕᒋᑫᔭᓐ, ᑭ ᑭᔅᑫᓕᑌᓐ ᒥᓯᐌ ᑫᒀᓇ; ᑭ ᑭᔅᑫᓕᑌᓐ ᐁ ᓵᑭᐃᑖᓐ᙮ ᒋᓴᔅ ᐃᑌᐤ, ᐊᔕᒥᒃ ᓂ ᒫᓂᔥᒑᓂᔑᒪᒃ᙮ 18 ᑖᐺ, ᑖᐺ, ᑭᑦ ᐃᑎᓐ, ᒣᒀᒡ ᐌᔥᑭᓂᑭᔭᐸᓐ, ᑮ ᐸᑾᑌᐅᑎᓱᑖᔾ, ᓀᔥᑕ ᑮ ᐱᒧᑌᑖᔾ ᐃᑕ ᐁᑌᓕᑕᒪᐸᓐ: ᒫᑲ ᐃᔅᐱ ᑭᔐᓕᓕᐎᔭᓀ, ᑯᑕᒃ ᐊᐌᓇ ᑭ ᑳ ᐸᑾᑌᐅᒃ, ᓀᔥᑕ ᑭ ᑳ ᐃᑐᑕᐃᒃ ᐃᑕ ᐁᑳ ᐁ ᓇᐁᓕᑕᒪᓐ᙮ 19 ᐅᒣᓕᐤ ᑮ ᐃᑗᐤ, ᐁ ᑭᔅᑫᓕᑖᑯᑖᑦ ᑫᑯ ᓂᐱᐎᓂᓕᐤ ᑫ ᐅᒋ ᒫᒥᒋᒫᓕᒋ ᑭᒋᒪᓂᑐᐗ᙮ ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᐃᑌᐤ, ᓄᔅᐱᓇᔑᓐ᙮

ᒋᓴᔅ ᓀᔥᑕ ᐊᓇ ᑯᑕᒃ ᑭᔅᑭᓄᐊᒫᑲᓐ

20 ᐁᑯ ᐱᑕᕐ, ᐁ ᑴᔅᑭᑳᐸᐎᑦ ᐙᐸᒣᐤ ᐊᓂᐃ ᑭᔅᑭᓄᐊᒪᐙᑲᓇ ᒋᓴᔅ ᑳ ᓵᑭᐋᑦ ᐁ ᓄᔅᐱᓇᔑᐌᓕᒋ; ᐊᓂᐃ ᑳ ᑮ ᐋᔅᐸᒋᔑᒧᓕᒋ ᐅᔅᑳᔅᑭᑲᓂᒃ ᓂᐯᑴᐎᓂᒃ, ᓀᔥᑕ ᑳ ᑮ ᐃᑗᓕᒋ, ᑌᐯᓕᒋᑫᔭᓐ, ᐊᐌᓇ ᐊᓇ ᑫ ᐙᔦᔑᐸᑭᑎᓂᔉ? 21 ᐱᑕᕐ ᐁ ᐙᐸᒫᑦ, ᐃᑌᐤ ᒋᓴᓴ, ᑌᐯᓕᒋᑫᔭᓐ, ᑫᒀᓕᐤ ᒫᑲ ᑫ ᑐᑕᒃ ᐊᐗ ᐃᓕᓕᐤ? 22 ᒋᓴᔅ ᐃᑌᐤ, ᑮᔥᐱᓐ ᐃᑌᓕᑕᒫᓐ ᑭᒋ ᐃᑖᑦ ᐹᑎᒪ ᑕᑯᔑᓂᔮᓀ, ᑖᓂ ᑫ ᐃᑖᐸᒋᑖᔭᓐ ᑭᓚ? ᓄᔅᐱᓇᔑᓐ ᑭᓚ᙮ 23 ᐁᑯ ᐅᒪ ᐃᑗᐎᓐ ᐯᐹᒥᐸᓕᒃ ᐁ ᐎᑕᒫᑐᒋᒃ ᑳ ᐎᒋᔓᓂᑐᒋᒃ, ᐊᓇ ᑭᔅᑭᓄᐊᒪᐙᑲᐤ ᐁᑳ ᑭᒋ ᓂᐱᑦ: ᐁᓕᐌᒃ ᒫᑲ ᒋᓴᔅ ᓇᒪᐎᓚ ᐅᒋ ᐃᑌᐤ, ᓇᒪᐎᓚ ᑲᑕ ᓂᐱᐤ; ᒫᑲ, ᑮᔥᐱᓐ ᐃᑌᓕᑕᒫᓐ ᑭᒋ ᐃᑖᑦ ᐹᑎᒫ ᑕᑯᔑᓂᔮᓀ, ᑖᓂ ᑫ ᐃᑖᐸᒋᑖᔭᓐ ᑭᓚ? 24 ᐁᐗᑯ ᐊᐗ ᑭᔅᑭᓄᐊᒪᐙᑲᓐ ᑳ ᑎᐹᑐᑕᒃ ᐅᐅ ᑫᒀᓇ, ᓀᔥᑕ ᑳ ᒪᓱᓇᐊᒃ ᐅᐅ ᑫᒀᓇ: ᓀᔥᑕ ᓂ ᑭᔅᑫᓕᑌᓈᓐ ᐁ ᑖᐺᒪᑲᓂᓕᒃ ᐅ ᑎᐹᒋᒧᐎᓐ᙮

ᐁ ᑭᔑᐱᐸᓂᒃ

25 ᓀᔥᑕ ᑫᔮᐸᒡ ᐃᑕᑾᓋ ᒥᒉᑦ ᑯᑕᑭᔭ ᑫᒀᓇ ᒋᓴᔅ ᑳ ᑮ ᑐᑕᒃ, ᐁᐗᒀᓂᐃ, ᑮᔥᐱᓐ ᒥᓯᐌ ᑮ ᒪᓯᓇᐃᑳᑌᓕᐙᑯᐸᓀ, ᒫᔅᑯᒡ ᓇᒪᐎᓚ ᐅᑕ ᐊᔅᑮᒃ ᑲᑕ ᑮ ᑌᐸᔅᑌᐸᓇ ᒪᓯᓇᐃᑲᓇ ᑫ ᒪᓯᓇᐃᑳᑌᐙᑯᐸᓀ᙮ ᐁᒣᓐ᙮