Jesúsd'ebemata Juanba b'ʉd'a
Cristora Bed'eata Beubari Bape b'ad'a
1 Jẽdebara b'asia Bed'eata, maʉ̃ Bed'eara Daizeze ũme b'asia, Bed'eara Daizeze basia. 2 Izhira jẽde wed'auba Daizeze ũme b'asia. 3 Izhik'areuba Daizezebara ne jõma osia, izhik'areuba obʉrʉ ẽãrã miã k'ãrẽsid'a o ẽbasia. 4 Izhira dazhi b'ʉ k'arra, mawũã dazhi b'ʉ k'arrata Daizezed'ebema k'awuabiga b'ʉba zhãrãĩta ʉ̃nata b'ʉa. 5 Izhira ʉ̃nata pãrĩguad'e ʉ̃na b'ʉa, izhira pãrĩguabara kia ẽã. 6 Iab'a b'asia Daizezeba zok'ad'ata, maʉ̃ Juan Buruk'oemiã abazhid'a. 7 Maʉ̃ zesia ʉ̃nanebemata jarak'aita, aramaʉ̃ne jõmaʉ̃ba ĩjãnamarẽã izhid'eba. 8 Juan ʉ̃nata b'a ẽbasia, awuarabʉrʉ b'asia ʉ̃nanebemata jarak'aita. 9 Wãrĩnu ʉ̃nabara Daizezed'ebema k'awuabiga b'ʉba zhãrã jõma ʉ̃nabi b'ʉra zeita b'asia naʉ̃ ẽjũãẽna. 10 Maʉ̃ ʉ̃narã naʉ̃ ẽjũãne b'asia, ẽjũãrã Daizezebara izhik'areuba osia, mawũãmina ẽjũãne b'ebara ũduk'awad'a ẽbasia. 11 Izhid'erãma zesia, mawũãmina izhid'erãbara bia edad'a ẽbasia. 12 Mawũãmina izhita bia edad'apead'ara, izhid'ebemata ĩjãnapead'ara Daizeze warrarãta duanebisia. 13 Mawũã Daizeze warrarãta duanebi ẽbasia beubari b'eba tod'ad'eba, awuarabʉrʉ zhi warrarãta duanebisia Daizezeba. 14 Bed'eara Beubari Bape dazhirãne ed'a b'asia, kʉãg'aba bira b'ʉba k'awuabiga b'asia Daizezed'ebema wãrãta. Daibara ũdusid'a izhira zhi zromata, zhi Warra ab'a b'ʉta zhi zroma basia zhi Zezed'eba. 15 Juanbara izhid'ebemata mawũãsia: Naʉ̃ jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawed'a b'ad'aba. 16 Izhi b'ʉd'ebema biaba dazhirã jõma bia erunʉmʉã, aramaʉ̃ne bia erunʉma tau ẽã. 17 Daizezebara izhi ũrãg'ara diasia Moiséd'eba, mawũãmina izha zhãrã kʉãg'a b'ʉra izhid'ebemata wãrĩnurã dajada nʉmesia Jesucristod'eba. 18 Daizezera miõba ũduk'a, mawũãmina zhi Warra ab'a b'ʉta zhi Zeze ũme b'ʉba dazhirãã k'awuabisia sãwũã b'ʉta.
Jesúsd'ebemata jarad'a Juan Buruk'oemiãba
19 Jesúsd'ebemata Juanba jarasid'era, nok'orã judíorãba Jerusalénneba sacerdoterãta levitarã bawara zok'asid'a wid'i mawũãnamarẽã: ¿Bʉra k'aipe? 20 Mawũãnaĩ merã ẽã jarabʉrʉta mawũãsia: Mʉ ẽã zhãrã Ẽdrʉbiira. 21 Mawũãĩ wid'i mawũãsid'a: ¿Mobera bʉra k'aipe? ¿Bʉra Elíak'a? Mawũãnaĩ mawũãsia: Mʉrã maʉ̃ ẽã. Mawũãĩ mawũãsid'a: ¿Mobera bʉra Daizezeba bed'eata jarabibarita zeita b'ad'ak'a? Mawũãnaĩ panaʉ̃ mawũãsia: Mʉrã maʉ̃ ẽã. 22 Mawũãĩ mawũãsid'a: ¿Mobera bʉra k'aipe? Dai zok'ad'apead'arãã daibara jarad'aibara bʉra k'aita. ¿Bʉd'ebema bʉara daia k'ãrẽta jaraipe? 23 Mawũãnaĩ Juanbara mawũãsia: Mʉrã iab'a nemi jĩgua bed'eaid'ebemata drua drudrua tab'ʉ maẽ mawũãĩnebema: Bia ẽãrã ãmabʉdaba jipa obʉdak'audua Nok'o zei ota. Mawũãĩnebema Daizezeba bed'eata jarabibariba Isaíaba jarad'a kĩrãk'a. 24 Juanma zok'akuad'apead'ara fariseorãnebema basia. 25 Maʉ̃rãbara wid'i mawũãsid'a: ¿Bʉara k'ai bed'ead'eba zhãrã buru k'oe b'ʉ, zhãrã Ẽdrʉbiita bʉ ẽbʉrʉ, miã Elía ẽbʉrʉ, miã Daizezeba bed'eata jarabibari ẽbʉrʉ? 26 Mawũãnaĩ Juanbara panaʉ̃ mawũãsia: Mʉãrã zhãrã buru k'oe b'ʉa baniãba. Mawũãmina iab'a marãne ed'a b'ʉa marãba ũduk'awad'a ẽãta. 27 Maʉ̃ mʉ tẽã urua, izhira mʉ audre zhi zroma, nezok'aba obari kĩrãk'ara mʉãrã ẽnaĩne b'ʉ ẽã izha jẽrũne jʉ̃ b'ʉra. 28 Maʉ̃ Betania pʉwʉrʉd'e mawũã berab'arisia, do Jordán kĩrãrẽ Juanba zhãrã buru k'oekua nʉmana maẽ.
Jesúra Oveja zake Daizezed'ea
29 Nrũẽma Juanbara Jesús izhima uruta ũdupe mawũãsia: Akaudua, k'ãʉ̃ta Oveja zake Daizezed'ea, naʉ̃bara k'azhirua ne ẽã oya ẽjũãne zhãrã b'eta. 30 Naʉ̃ta jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawed'a b'ad'aba. 31 Jesús k'aira mʉãrã k'awua ẽbasia, mawũãmina Israel b'eba ũduk'awad'amarẽã mʉãrã zhãrãta buru k'oe zebʉrʉa baniãba. 32 Juanbara dewara mawũãsia: Jawurebia Daizezed'eta mʉã ũdusia ʉ̃treba pusirã kĩrãk'a uruta, maʉ̃ b'arisia Jesú ʉ̃rʉ̃. 33 Jesús k'aira mʉãrã k'awua ẽbasia, mawũãmina baniãba zhãrã buru k'oemarẽã Daizezeba mʉta zok'ad'abara mʉãã mawũãsia: Iab'aʉ ʉ̃rʉ̃ Jawurebia uruta bʉa ũdubʉrʉd'era izhi ʉ̃rʉ̃ b'ariya, maʉ̃bara Jawurebiata diaya Daizezed'eta. 34 Mawũã jarad'ata mʉãrã izhira ũdubʉrʉa, mawũẽ mʉãrã jarabʉrʉa naʉ̃ Daizeze Warrata.
Jesúsba naara jʉrʉkuad'a
35 Nrũẽma Juan wakusa mama b'asia izha jʉrʉkuad'ata ũme bawara. 36 Maʉ̃ne Jesústa mama taita ũdui mawũãsia: ¡Akaudua, naʉ̃ta Oveja zake Daizezed'ea! 37 Juanba jʉrʉkuad'ata ũmebara mawũãbʉrʉta ũrĩnape Jesús k'aid'u wãsid'a. 38 Maʉ̃ne Jesúsbara jẽrũya akʉbʉrʉd'e k'aid'u taid'ata ũdui mawũãsia: ¿Marã k'ãrẽta jʉrʉ panʉ? Mawũãĩ ãzhara mawũãsid'a: Rabí, bʉra ¿sãma b'ʉ? Rabí bed'eabara jara krĩña b'ʉa Miã Ũrãg'abarita. 39 Mawũãnaĩ mawũãsia: Akʉd'e zeudua. Mawũãĩ wãnape sãma b'ʉta akʉsid'a, mobe maʉ̃ ewadera izhi ũme panesia kewara a las cuatro basi baera. 40 Andrés basia, Simón Pedro mebeara, ũmenebema ab'a Andrés basia Juanba jarabʉrʉta ũrĩnape wãnapead'ara Jesús k'aid'u. 41 Andrésbara naara zhi mebea Simónta jʉrʉ wãpe ũdui mawũãsia: Daibara ũdusid'a zhãrã Ẽdrʉbira. 42 Aramaʉ̃ne wesia Jesúsma. Jesúsbara ũdui mawũãsia: Bʉra Simón Jonás warra, bʉ trʉ̃rã Cefa baya. Maʉ̃ trʉ̃bara jara krĩña b'ʉa Pedrota o Peñata.
Jesúsba jʉrʉd'a Felipeta Natanaelta
43 Nrũẽma Jesús Galilea druaed'a wãĩta babʉrʉd'era, Felipeta ũdupe mawũãsia: Mʉ k'aid'u b'adua. 44 Felipera Betsaidad'ebema basia, dewara maʉ̃ pʉwʉrʉd'ebema basia Andrésta Pedrota. 45 Felipebara Natanael jʉrʉ wãpe ũdui mawũãsia: Daibara ũdusid'a jari Moiséba ũrãg'ad'e b'ʉd'ara, jari Daizezeba bed'eata jarabibarirãba jara b'ʉd'apead'ara. Izhira Jesúa, José warra Nazared'ebema. 46 Mawũãĩ Natanaelbara mawũãsia: ¿Nazared'ebara biara ʉ̃tʉ zeita b'ʉka? Mawũãĩ Felipebara mawũãsia: Zerua akʉd'e. 47 Jesúsbara Natanael izhi k'aita zebʉrʉta ũdui mawũãsia: Akaudua, naʉ̃ wãrĩnu israelitarãã, zhãrã izhara sewa ẽã. 48 Mawũãĩ Natanaelbara mawũãsia: ¿Bʉara mʉnebema sãwũã k'awua b'ʉ? Mawũãĩ Jesúsbara panaʉ̃ mawũãsia: Felipeba bʉ trʉ̃ĩ nawed'a bʉra higuera bakuru edre b'ʉta mʉã bʉra ũdusia. 49 Mawũãĩ Natanaelbara mawũãsia: Miã Ũrãg'abari, bʉra Daizeze Warra, bʉra Israel duanu Rey. 50 Mawũãĩ Jesúsbara mawũãsia: ¿Mʉrã maʉ̃ta bʉara ĩjãbʉrʉka mʉã bʉra higuera bakuru edre b'ʉta ũdusia abʉrʉd'eba? Maʉ̃ k'ãñabara bʉara k'ãrẽ audre waib'ʉata bio ũduya. 51 Mawũãpe mawũãsia: Mʉã wãrĩnu marãã jaraya, id'id'eba marãbara ũdud'aya bãjã ewa nʉmʉta, ũdud'aya ángelerã Daizezed'eta wãrĩze b'eta ud'ub'ae b'eta mʉ Beubari Bape b'ʉma.
Iab'a juwua jidad'a Caná pʉwʉrʉd'e
1 Ewari ũbead'e iab'a juwua jidabʉrʉd'e fiesta osid'a Caná pʉwʉrʉd'e, maʉ̃ pʉwʉrʉra Galilea druad'ebema. Mama b'asia Jesús papata. 2 Mawũã iab'a juwua jidabʉrʉd'era trʉ̃sid'a Jesústa izha jʉrʉkuad'a bawara. 3 Maʉ̃ne vino jõbʉrʉd'e zhi papaba Jesúa mawũãsia: Ya vino ne ẽã duaĩna. 4 Mawũãĩ Jesúsbara mawũãsia: ¿Papa, dazhira maʉ̃ne nʉmʉ ẽãta bʉara k'ãrẽã maʉ̃ta mʉãã jarabʉrʉ? Mʉã k'ãrẽ oira wad'i araba ẽã. 5 Zhi papabara vino jed'ekabadarãã mawũãsia: Izha jarabʉrʉra jõma oudua. 6 Mama zok'o seis b'asia mong'ara omata baniã tʉbadata, Daizeze kĩrãbita bia b'eaita judíorãbara ne sʉgʉira baniã maʉ̃ zok'od'eba jue bazhid'a. Maʉ̃ zok'od'era ab'a ab'aʉd'e baniã balde diez ara b'asia. 7 Jesúsbara vino jed'ekabadarãã mawũãsia: Zok'o za nʉmeta baniãba biraudua. Mawũãĩ birakuasid'a. 8 Mawũẽ Jesúsbara mawũãsia: K'õbebʉrʉ wĩka jue edad'ape vino jed'ekabi nʉmʉma edeudua. Mawũãĩ edesid'a. 9 Mawũẽ vino jed'ekabi nʉmʉbara baniãta vino babʉrʉra do akʉsia sãmaʉ̃ba ʉ̃tʉ zebʉrʉta k'awua ẽãta, baniãta ãzha juesid'a baera vino jed'ekabadabʉrʉ k'awua k'opanasia, aramaʉ̃ne vino jed'ekabi nʉmʉbara juwua jida nʉmʉta trʉ̃pe, 10 mawũãsia: Jõmaʉ̃ba naara vino zhi biata ded'ekabada, mawũẽ bio dobʉdad'era vino zhi bia ẽãta ded'ekabada. Mawũãmina bʉara vino zhi biara wuag'asia tẽã ded'ekaita. 11 Maʉ̃ ũdud'ak'ata naarabemata obʉrʉra Jesúsbara osia Caná pʉwʉrʉd'e Galilea druad'e, aramaʉ̃ne ũdubigasia izhira zhi zromata, mawũẽ izha jʉrʉkuad'abara wuaabʉrʉ ĩjãsid'a izhid'ebemata. 12 Maʉ̃ tẽã Capernaúm pʉwʉrʉed'a wãsid'a izhita, zhi papata, zhi mebẽrãta, izha jʉrʉkuad'ata. Mobe mama b'easia ewari k'akutua.
Jesúsba miti ẽã od'a Daizeze deta
13 Ewari araa zebod'o basia Egiptod'eba ẽzoad'ata krĩcha judíorãba fiesta obadata, mawũẽ Jesús wãrĩzesia Jerusalén pʉwʉrʉed'a. 14 Maʉ̃ne Daizeze ded'a ewara maẽ ũdukuasia Daizezeita babueid'ebemata nendo b'eta pak'ata, ovejata, palomata, plata k'ãbiabadasid'a ũdusia mama jewed'a b'eta. 15 Mawũẽ lasota bio baratʉ edape Daizeze ded'a ewara maẽbara jõma ãĩ jʉrekuasia ãzhi oveja bawara, ãzhi pak'a bawara, monedara kuekuasia plata k'ãbiabadad'era, burekuasia mesara. 16 Mobe paloma nendobadaa mawũãsia: Ãĩ edeudua naʉ̃ namaʉ̃bara, mʉ Zeze deta k'ãwũã orãũdua ne nendobada deta. 17 Mobebʉrʉ izha jʉrʉkuad'abara bude basid'a maʉ̃ẽnabemata zhi b'ʉmata mawũã b'ʉta: Mʉã bʉ dera k'ãbãẽã jiwa b'ʉa. 18 Maʉ̃nerã judíorãba mawũãsid'a: ¿Sãwũãta daia k'awuabirua Daizezeba k'ãwũã obi nʉmʉbʉrʉ? 19 Mawũãnaĩ Jesúsbara panaʉ̃ mawũãsia: Naʉ̃ Daizeze dera ãrĩũdua, mʉã ewari ũbead'e wakusa pãrãña. 20 Mawũãĩ judíorãbara mawũãsid'a: Naʉ̃ Daizeze dera cuarenta y seis añone pãrãsid'a, ¿maʉ̃ta bʉara ewari ũbead'e pãrãĩka? 21 Mawũã Daizeze deta jarabʉrʉra Jesúsbara jarasia izhi k'akuata. 22 Maʉ̃neba beud'ata piradrʉbʉrʉd'era izha jʉrʉkuad'abara bude basid'a maʉ̃ta jarad'ata, mawũẽ ĩjãsid'a maʉ̃ẽnabemata zhi b'ʉmata, aramaʉ̃ne ĩjãsid'a bed'eata Jesúsba jarad'ara.
Jesúsbara k'aua zhãrãnebema jõma
23 Jesús Jerusalénne b'ʉta, Egiptod'eba ẽzoad'ata krĩcha fiesta obadad'e b'ʉd'e, izhid'ebemata bioba ĩjãsid'a ũdud'ak'ata bio onʉmʉta ũdubʉdaba. 24 Mawũãmina Jesúsbara k'awuasia ãzhara wãrĩnu ĩjãbʉda ẽãta, zhãrãnebema jõma k'au baera. 25 Aramaʉ̃ne zhãrãnebema jarad'aira nesid'a ẽbasia, aramaʉ̃ne izhara k'au basia sod'era zhãrã sãwũã b'eta.
Jesúsma zed'a Nicodemo
1 Fariseorãnebemata b'asia Nicodemo abadata, nok'ota b'asia judíorãnebemata. 2 Maʉ̃ta diamase Jesúsma zepe mawũãsia: Miã Ũrãg'abari, daibara k'awua panʉã bʉra Daizezeba zok'ad'ata miã ũrãg'amarẽã, ũdud'ak'ata bʉa k'ãwũã ob'ʉra miõba ob'e ẽã Daizezeta izhi ũme b'ʉ ẽbʉrʉ. 3 Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iab'a wakusa tobʉrʉ ẽãrã Daizezeta Nok'od'ebema ẽã. 4 Mawũãĩ Nicodemobara mawũãsia: ¿Dazhira zõrãta sãwũã wakusa toipe? ¿Mobera wakusa zhi papa b'itaed'a wã b'eika wakusa toita? 5 Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iab'a baniãneba Jawurebiad'eba tobʉrʉ ẽãrã ed'a wã b'e ẽã Daizezeta Nok'o maẽrã. 6 Beubarid'eba tobʉrʉra zharad'ebema. Mawũãmina Jawurebiad'eba tobʉrʉra Jawurebiad'ebema. 7 K'awua ẽã krĩcharãrũã mʉã jarabʉrʉ k'area zhãrã wakusa tod'ai barata. 8 Pʉ̃ãdrʉra pʉ̃ãdrʉbaria izha krĩña maẽba, zhi ugara bʉara ũrĩbaria, mawũãmina bʉara k'awua ẽã sãmaʉ̃ba uruta miã sãmaã wãta. Aramaʉ̃ kĩrãk'a sãwũãta k'awua ẽmina dajada awuara b'ebaria Jawurebiad'eba tobʉrʉra. 9 Mawũãĩ Nicodemobara mawũãsia: ¿Maʉ̃ mawũãrã sãwũãpe? 10 Mawũãĩ Jesúsbara panaʉ̃ mawũãsia: ¿Bʉra Israel b'eta ũrãg'abarita maʉ̃ sãwũãta k'awua ẽka? 11 Mʉã wãrĩnu bʉaa jaraya, daibara k'ãrẽ k'awua b'eta jarabada, k'ãrẽ ũdud'ata jarabada, mawũãmina marãbara ĩjãna ẽã daiba jara b'era. 12 Ne ud'abemata mʉã marãã jarabʉrʉta ĩjãna ẽbʉrʉ, ¿sãwũã ĩjãnaĩpe mʉã marãã jarara ne ʉ̃trebemata? 13 Maʉ̃ k'awuaira miõta ʉ̃tre wãrĩzek'a, awuarabʉrʉ ʉ̃treba zed'aba k'awua b'ʉta mʉ Beubari Bape b'ʉba k'awua b'ʉa ne ʉ̃trebemarã. 14 Drua drudrua tab'ʉ maẽ Moiséba dãma ʉ̃tʉ jirab'ʉd'a kĩrãk'a, mʉ Beubari Bape b'ʉra ʉ̃tʉ jirab'ʉd'aya. 15 Aramaʉ̃ne mʉnebemata ĩjãbʉrʉra adua ẽbamarẽã, awuarabʉrʉ erub'amarẽã Daizeze ũme b'ai jõ ẽãta.
Daizezebara kʉãg'a ẽjũãne b'era
16 Daizezebara ẽjũãne b'era k'ãbãẽã kʉãg'aba diasia zhi Warra ab'a b'ʉta, izhid'ebemata ĩjãbʉrʉra adua ẽbamarẽã, awuarabʉrʉ erub'amarẽã Daizeze ũme b'ai jõ ẽãta. 17 Daizezebara zhi Warra naʉ̃ ẽjũãẽna zok'a ẽbasia aduabimarẽã ẽjũãne b'eta, awuarabʉrʉ zok'asia ẽjũãne b'era ẽdrʉd'amarẽã izhid'eba. 18 Izhid'ebemata ĩjãbʉrʉra adua ẽã, mawũãmina zhi ĩjã ẽãrã aduaya, ĩjã ẽãba Daizeze Warra ab'a b'ʉd'ebemata. 19 K'ãrẽneba aduaita mʉã jaraya: Ʉ̃nata b'ʉra zesia ẽjũãne b'ema, mawũãmina zhãrãbara pãrĩguata audre kʉãg'asid'a ʉ̃na k'ãñabara, bia ẽãta ob'eba. 20 Bia ẽãta ob'ebara ʉ̃nata b'ʉra krĩñana ẽã, aramaʉ̃ne ʉ̃nata b'ʉma zed'a ẽã, ãzha ob'eta k'awuad'a ẽbamarẽã. 21 Mawũãmina Daizezed'ebema wãrãta arib'ae b'ʉra ze b'ʉa ʉ̃nata b'ʉma, aramaʉ̃ne k'awuad'amarẽã izhara ob'ʉta Daizezed'ebemata.
Juanba jarad'a Jesúsd'ebemata
22 Maʉ̃ tẽã Jesús zesia izha jʉrʉkuad'a bawara Judea druaed'a, ãzhi bawara mama b'asia zhãrã buru k'oekua. 23 Juanbid'a zhãrã buru k'oekua nʉmasia Enón pʉwʉrʉd'e Salin k'aita, mama tadrʉ b'asi baera dota k'ãbãẽã. Mawũẽ zhãrã zepe buru k'oe nʉmeãsia. 24 Maʉ̃nerã wad'i cárceld'e b'ʉd'a ẽbasia Juan. 25 Maʉ̃ne Juanba jʉrʉkuad'ata judíorã ʉ̃kʉrʉ bawara k'aik'aiasid'a Daizeze kĩrãbita bia b'eaita ne sʉgʉ badad'ebema k'area. 26 Maʉ̃rãta Juanma zed'ape mawũãsid'a: Miã Ũrãg'abari, Jordán kĩrãrẽ bʉ ũme k'ob'ad'ad'ebemata bʉa daia jarad'abara zhãrã buru k'oekua nʉmʉã, mawũẽ jõma izhima ze nʉmʉã. 27 Mawũãnaĩ Juanbara panaʉ̃ mawũãsia: Miõba mawũã jʉre nʉma b'e ẽã Daizezeba dia ẽbʉrʉ. 28 Mʉã jarad'ara marãbara k'awua b'eta mʉãrã mawũãsia: Mʉ ẽã zhãrã Ẽdrʉbira, awuarabʉrʉ izhi zeita jarak'amarẽã mʉrã izhi na zok'ad'apead'a. 29 Juwua jidaid'era wũẽrã zhũmakĩrãba erunʉmʉã, izhi ũme zhi biata k'aita b'ʉra izhi nemita ũrĩ b'ʉba k'ãbãẽã sobia b'id'abaria. Jesúsd'ebema ũrĩ b'ʉba aramaʉ̃ kĩrãk'a mʉrã k'ãbãẽã sobia b'ʉa. 30 Jesúra wuaabʉrʉ zhi zromata b'eya, mawũãmina mʉrã zhi zroma ẽãta b'eya.
Ʉ̃treba zed'ad'ebema
31 Jesús ʉ̃treba zebʉrʉra jõmaʉ̃ audre zhi zroma, druad'ebemata b'ʉra druad'ebemata b'ʉba ne druad'ebemata jara bed'ea b'ʉa, mawũãmina ʉ̃treba zebʉrʉra jõmaʉ̃ audre zhi zroma. 32 Mawũẽ ʉ̃tre izha ũdud'ata izha ũrĩnata jara b'ʉa, mawũãmina miõba ĩjãna ẽã izha jara b'ʉra. 33 Izha jara b'ʉta iab'aʉba ĩjãrã maʉ̃ĩtara Daizezera wãrĩnu bed'ea b'ʉa. 34 Daizezeba zok'ad'abara Daizeze bed'eata jara b'ʉa Daizezeba Jawurebiata diad'aba. 35 Zhi Zezebara zhi Warra kʉãg'a, mawũẽ ne jõma chãb'arisia izhi juwuad'e. 36 Zhi Warrad'ebemata ĩjã b'ʉbara erub'ʉa Daizeze ũme b'ai jõ ẽãta, mawũãmina zhi Warrad'ebemata ĩjã ẽãbara erub'a ẽã Daizeze ũme b'ai jõ ẽãrã, awuarabʉrʉ Daizezeba kĩrũbiba pua k'awua oya.
Jesús bed'ead'a wũẽrã Samariad'ebemaa
1 Nok'o Jesúsbara k'awuasia fariseorãbara ũrĩsid'ata zhãrãba mawũãbʉdata: Jesúsbara zhãrã audre jʉre buru k'oekua nʉmʉã Juan k'ãñabara. 2 Mawũãsid'a Jesúsbara zhãrã buru k'oekua nʉmʉ ẽãta, awuarabʉrʉ zhãrã buru k'oe duanasia izha jʉrʉkuad'abʉrʉ. 3 Fariseorã bĩ ẽã b'eta k'awuape Judea druad'ebara wãbʉrʉta, wakusa wãsia Galilea druaed'a. 4 Maʉ̃nerã berab'ariita bara basia Samaria druad'e. 5 Aramaʉ̃ne zesia pʉwʉrʉ Samaria druad'ebemata Sicar abadaid'u, mama k'aita b'asia Jacobo b'ad'aba druata diad'ata zhi warra Joséa. 6 Mama b'asia poso Jacobod'eta. Mawũẽ Jesúra od'e mapoea zebʉrʉba jewed'asia poso k'aita. Maʉ̃nerã nʉmasia ʉ̃matipa badea. 7 Maʉ̃ne wũẽrãta Samariad'ebemata zesia baniã jued'e, mawũẽ Jesúsbara mawũãsia: Baniã mʉã doita diadua. 8 Maʉ̃ẽna izha jʉrʉkuad'ara pʉwʉrʉed'a wãsid'a k'ãrẽ k'oita edad'e. 9 Mawũãĩ wũẽrã Samariad'ebemabara mawũãsia: ¿Bʉra judíota sãwũã baniã doita mʉãã wid'ibʉrʉ, maʉ̃ne mʉrã wũẽrã Samariad'ebemata b'ʉ ẽka? Mawũãsia judíorã Samariad'ebema bawara zhi biata duanu ẽbaera. 10 Mawũãĩ Jesúsbara panaʉ̃ mawũãsia: Daizezeba dia b'ʉd'ebemata sãwũãta bʉa k'awuara, k'aiba baniã mʉã doita diadua abʉrʉta bʉa k'awuara, bʉara baniã wid'ik'ausia, mobed'eba mʉãrã diak'ausia baniã dazhi b'abi b'ʉta. 11 Mawũãĩ wũẽrãbara mawũãsia: Nok'ó, bʉara k'ãrẽba jueira ne ẽã, maʉ̃ne posora eid'ua. ¿Mawũẽ bʉara sãmabemata erub'ʉ baniã dazhi b'abi b'ʉra? 12 ¿Mobera bʉra audre zhi zromak'a zõrã dazhirãta Jacobo k'ãñabara? Naʉ̃ posora izhara daiita ãmaẽsia, naʉ̃ta do bazhid'a izha, zhi warrarãba, izhi pak'arãba. 13 Mawũãĩ Jesúsbara panaʉ̃ mawũãsia: Naʉ̃ baniãta dobʉrʉra wakusa obisiaya. 14 Mawũãmina baniã mʉã diabʉrʉta dobʉrʉra obisiak'a baya, awuarabʉrʉ baniã mʉã diabʉrʉra izhid'e drʉ nʉmaña Daizeze ũme b'ai jõ ẽãta. 15 Mawũãĩ wũẽrãbara mawũãsia: Nok'ó, mʉãã diadua maʉ̃ baniãta, mʉ obisia ẽbaita, miã nama jued'e ze ẽbaita. 16 Mawũãĩ Jesúsbara mawũãsia: Bʉzhi kĩmata trʉ̃ne wãrũã, mobe zeudua naĩnu. 17 Mawũãĩ wũẽrãbara panaʉ̃ mawũãsia: Mʉrã kĩma ne ẽã. Mawũãĩ Jesúsbara mawũãsia: Bʉara bia jarabʉrʉa bʉra kĩma ne ẽã abʉrʉbara. 18 Bʉara kĩma edama juesoma b'ʉa, id'i erub'ʉsid'a bʉ kĩma ẽã, mawũẽ bʉa mawũã jarabʉrʉra wãrĩnuã. 19 Mawũãĩ wũẽrãbara mawũãsia: Nok'ó, mʉma bʉra Daizezeba bed'eata jarabibaria. 20 Dai zhibarirãbara Daizezera ibia jara b'easia naʉ̃ k'atumane, maʉ̃ne marãbara jara b'ea Daizezera Jerusalénnebʉrʉ ibia jarad'ai barata. 21 Mawũãĩ Jesúsbara mawũãsia: Mʉã za jaraita ĩjãrũã, ewarita zeya, maʉ̃nerã marãbara naʉ̃ k'atumane miã Jerusalénne ibia jarad'a ẽã Daizezera. 22 Marãbara Daizezera ibia jara b'eta izhid'ebema sãwũãta k'awuad'a ẽã, daibara Daizezera ibia jara b'ea izhid'ebema sãwũãta k'awua b'eta, zhãrã Ẽdrʉbigaira uruba judíorãneba. 23 Mawũãmina ewarita zeya, maʉ̃ ewarira ya arabasia, mawũẽ Daizeze wãrĩnu ibia jara b'ebara Jawurebiad'eba wãrĩnu ibia jarad'aya, Daizezebara krĩña b'ʉa izhira mawũã ibia jarad'aita. 24 Daizezera Jawurea, mawũẽ izhita ibia jara b'ebara Jawurebiad'eba wãrĩnu ibia jarad'aid'e b'ʉa. 25 Mawũãĩ wũẽrãbara mawũãsia: Mʉã k'awua b'ʉa zhãrã Ẽdrʉbiira zeita, izhi zebʉrʉd'era daia bia jarak'aya ne jõma. 26 Mawũãĩ Jesúsbara mawũãsia: Mʉta izhia, mʉãta bʉ ũme bed'ea k'ob'ʉa. 27 Maʉ̃ne izha jʉrʉkuad'ara zesid'a, mawũẽ bia akʉdruasid'a wũẽrã ũme bed'ea k'ob'ʉba, mawũãmina miõba wid'id'a ẽbasia k'ãrẽta wid'i b'ʉra, o maʉ̃ wũẽrã ũme k'ãrẽ ʉ̃rʉ̃ bed'ea k'ob'ʉra. 28 Wũẽrãbara zok'o izhid'era ãmaẽpe wãsia pʉwʉrʉed'a, mobe zhãrã b'ea mawũãsia: 29 Ũmakĩrãta akʉd'e zeudua, jõma jarabʉrʉa mʉã k'ãrẽ od'ata. ¿K'ãgʉra zhãrã Ẽdrʉbii ẽka? 30 Mawũãĩ pʉwʉrʉd'ebara wãsid'a, aramaʉ̃ne zesid'a Jesúsma. 31 Maʉ̃ẽna izha jʉrʉkuad'abara ibiad'e jara mawũãsid'a: Miã Ũrãg'abari, nek'orua. 32 Mawũãnaĩ izhara mawũãsia: Mʉãrã zhikota k'oita erub'ʉa marãba k'awuad'a ẽãta. 33 Mawũãĩ izha jʉrʉkuad'abara ãzhirãĩnu mawũãsid'a: ¿Iab'aʉba zhikota wesi ẽka? 34 Maʉ̃ne Jesúsbara mawũãsia: Mʉ zhikora mʉãrã mʉ zok'ad'aba krĩñata oibara, aramaʉ̃ne izha k'ãrẽ obi nʉmʉk'ãrĩta jõbiibara. 35 ¿Ne ud'apead'ata b'ʉaira marãbara jed'ek'o kĩmarẽ wãẽã nʉmʉã abada ẽka? Mawũãmina mʉã marãã jaraya: Ne b'ʉaita akʉd'ai kĩrãk'a akaudua druad'e zhãrã b'eta, ya mʉnebemata ĩjãĩta nʉmeã. 36 Ne b'ʉa nʉmʉbara ne jida b'ʉa, aramaʉ̃ kĩrãk'a nʉmʉbara jara b'ʉa mʉnebemata ĩjãnamarẽã Daizeze ũme b'ai jõ ẽãnebemata, mawũẽ ne ubarita ne b'ʉabari ũme sobiabada kĩrãk'a b'ʉa. 37 Maʉ̃ẽnabemata jarabadara wãrĩnuta mawũã b'ʉa: Ab'ara zhi ubaria, waya dewarabemata zhi b'ʉabaria. 38 Aramaʉ̃ kĩrãk'a mʉã marã zok'asia awʉrʉrãba jarad'apead'a maẽ marãneba ĩjãnamarẽã, aramaʉ̃ne awʉrʉrãba jarad'apead'a maẽ marãneba ĩjã tupud'ea. 39 Samaria bid'arã maʉ̃ pʉwʉrʉd'e b'ebara bioba Jesúsd'ebema ĩjãsid'a, maʉ̃ẽnabema wũẽrãba mawũãsia: K'ãʉ̃bara mʉãã jarasia mʉã k'ãrẽ od'ata jõma. 40 Maʉ̃neba Samaria bid'arã Jesúsma zed'ape zuburia bed'easid'a ãzhi bawara b'emarẽã, mawũẽ mama b'esia ewari ũme. 41 Aramaʉ̃ne ãmaña bioba ĩjãsid'a bed'eata izha jarabʉrʉta ũrĩbʉdaba. 42 Maʉ̃nerã wũẽrãã mawũãsid'a: Daibara ĩjã k'opanʉ ẽã bari bʉa jarabʉrʉd'eba, awuarabʉrʉ izhi bed'eara jipa daiba ũrĩbʉda, mawũẽ k'awuabʉda naʉ̃ wãrĩnu ẽjũãne zhãrã b'eta Ẽdrʉbiita.
Jesúsba b'ebid'a nok'o warrata
43 Mawũã ewari ũme b'ape Samaria druad'ebara Jesús wãsia Galilea druaed'a. 44 Izhi Jesúsba jarad'a kĩrãk'a Daizezeba bed'eata jarabibarira izhi druad'ebʉrʉ bia edad'a ẽã. 45 Galilea druaed'a zebʉrʉd'era Galilea bid'arãbara bia edasid'a, maʉ̃ẽnabema ãzhara ũdusid'a Jerusalénne k'ãrẽ od'ata jõma, Egiptod'eba ẽzoad'ata krĩcha fiesta od'apead'a maẽ mawũã ũdusid'a, ãzhisid'a wãsi baera maʉ̃ fiestaid'ura. 46 Jesús wakusa zesia Caná pʉwʉrʉed'a, maʉ̃ pʉwʉrʉra Galilea druad'ebema, mama baniãta vino babid'a basia. Maʉ̃ne Capernaúm pʉwʉrʉd'e b'asia reyba nok'ota b'ʉk'ãrĩta, maʉ̃ warrata k'aya nʉmasia. 47 Maʉ̃ne izha ũrĩsia Jesús zebʉrʉta Judea druad'eba Galilea druaed'a, mawũẽ izhima zepe zuburia bed'easia zhi warrata b'ebid'e wãmarẽã beubod'ota. 48 Mawũẽ Jesúsbara mawũãsia: Ũdud'ak'ata mʉã obʉrʉta ũdubʉda ẽãrã marãbara mʉnebema ĩjãna ẽã. 49 Mawũãĩ reyba nok'ota b'ʉk'ãrĩbara mawũãsia: Nok'ó, zerua mʉ warra beui nawed'a. 50 Mawũãĩ Jesúsbara mawũãsia: Ded'aa wãrũã, bʉ warrara b'id'a. Maʉ̃bara ĩjãsia Jesúsba mawũãbʉrʉra, mawũẽ wãsia. 51 Od'e wãne izhi nezok'arãba kĩrãzhu zed'ape mawũãsid'a: Bʉ warrara b'id'a. 52 Mawũãnaĩ izhara wid'isia k'ãrẽ ʉ̃madaud'e arigu basita. Mawũẽ mawũãsid'a: Nuwued'a ʉ̃madau pʉrra a la una kenab'arisia kʉwamiãbara. 53 Mawũẽ zhi zezebara k'awuasia maʉ̃ ʉ̃madaud'e Jesúsba bʉ warrara b'id'a ad'ata. Mawũẽ izhara Jesúsd'ebema ĩjãbʉrʉba ĩjãsid'a zhi kĩmaba zhi warrarãba. 54 Jesúsbara maʉ̃ta ũdud'ak'ata zhi ũmeta osia, Judea druad'eba Galilea druaed'a wãpe.
K'akua pira ẽã b'ad'a Betesdad'e
1 Maʉ̃ tẽã judíorãbara fiesta osid'a, mawũẽ Jesús wãrĩzesia Jerusalén pʉwʉrʉed'a. 2 Jerusalénne ed'a wãbarita puerta ovejarãneã abada k'aita b'ʉa posota, maʉ̃ta hebreo bed'ead'era Betesda abada, mamarã juesoma b'ʉa de zaketa. 3 Maʉ̃za k'ayarãta bio nʉmasia, daʉb'errea b'eta, wã b'e ẽã b'eta, k'akua pira ẽã k'aya b'eta nʉmasia, maʉ̃rãbara jʉ̃ã b'easia poso õb'ʉta pirayeed'a. 4 Maʉ̃ẽnabema ed'aud'e ángelta zepe maʉ̃ poso õb'ʉta pirabi b'asia, mawũẽ pirabʉrʉd'e naara doed'a õb'ebʉrʉta b'e b'asia ne bariduba k'aya b'ʉta. 5 Maʉ̃ne ũmakĩrãta mama b'asia treinta y ocho año bata k'aya b'ʉta. 6 Maʉ̃ tab'ʉta Jesúsba ũdubʉrʉd'era, mawũã b'ʉta ewari dããrã bata k'awuape mawũãsia: ¿Bʉra b'e krĩña b'ʉka? 7 Mawũãĩ k'ayabara panaʉ̃ mawũãsia: Nok'ó, mʉrã b'e krĩña b'ʉa, mawũãmina poso pirabʉrʉd'era mʉrã k'aiba doed'a õb'ʉd'aita ne ẽã, mawũẽ mʉ wãbʉrʉed'a awʉrʉta ed'a wã b'ʉa mʉ nawed'a. 8 Mawũãĩ Jesúsbara mawũãsia: Piradrʉrua, bʉzhi ertõ jiraedape tebarua. 9 Audre ẽãne maʉ̃ b'esia, mawũẽ izhi ertõ jiraedape tebad'ewasia. Ẽnaʉ̃bada ewari basia maʉ̃ ewadera. 10 Mawũẽ judíorãbara mawũã b'ebʉrʉa mawũãsid'a: Id'ira ẽnaʉ̃bada ewaria, mawũẽ bʉzhi ertõ anʉma b'e ẽã. 11 Mawũãnaĩ izhara panaʉ̃ mawũãsia: Mʉta b'ebid'abara ertõ jiraedape tebarua asia. 12 Mawũãĩ wid'i mawũãsid'a: ¿K'aiba bʉaa mawũã bʉzhi ertõ jiraedape tebarua asi? 13 Mawũãbʉdad'era zhi b'ed'abara k'awua ẽbasia k'aita, Jesús nebasi baera mama zhãrã k'abana nʉmanane ed'a. 14 Tẽã Jesúsbara ũdupe mawũãsia: Bʉra b'esia, mawũẽ wueta k'azhiruata orãrũã audre zuburia ẽbaita. 15 Maʉ̃ wãpe judíorãã jarasia izhira Jesúsba b'ebid'ata. 16 Maʉ̃ k'area judíorã Jesús k'aid'u jirpanesia bead'aita, maʉ̃ta onʉmaẽrã ẽnaʉ̃bada ewade. 17 Mawũẽ Jesúsbara mawũãsia: Mʉ Zezera ewariza k'ãrẽ ob'ʉa, mawũẽ mʉsid'a k'ãrẽ onʉmʉã. 18 Mawũãbʉrʉ k'area judíorãbara wuaabʉrʉ bea krĩñasid'a, ãzhima aramaʉ̃nerã bari ewari ẽnaʉ̃badad'ebemata arib'ae ẽã nʉma ẽbasia, awuarabʉrʉ Daizezesid'a zhi Zezeta jarasia, ãzhima aramaʉ̃nerã Daizeze ũme ab'arikad'e nʉmasia.
Zhi Zezeba ob'ʉta ob'ʉa zhi Warrabara
19 Maʉ̃ k'area Jesúsbara mawũãsia: Mʉã wãrĩnu marãã jaraya: Mʉ zhi Warrabara mʉzhikusaubara miã k'ãrẽta ob'e ẽã, awuarabʉrʉ mʉ Zezeba obʉrʉta ũdubʉrʉta ob'ʉa, aramaʉ̃ne jõma mʉ Zezeba ob'ʉra mʉ zhi Warrabid'a ob'ʉa. 20 Mʉ Zezebara zhi Warra mʉrã kʉãg'aba jõma ũdubi b'ʉa izha ob'ʉra, mawũẽ k'ãrẽ ãmaña audre waib'ʉata bio ũdubiya, mawũẽ marãbara bia akʉdrua jirpaneña. 21 Mʉ Zezebara beukuad'ara piradrʉbipe zok'ai b'ʉbari kĩrãk'a, mʉ zhi Warrabid'a mawũã okrĩñabʉrʉrãta zok'ai b'ʉbaria. 22 Mʉ Zezebara miõta k'awua o ẽã, awuarabʉrʉ zhãrã k'awua oid'ebema jõma diasia mʉta zhi Warraa. 23 Mawũãtrʉ jõmaʉ̃ba mʉ zhi Warrata wawiad'aya mʉ Zeze wawia panʉ kĩrãk'a. Mʉ zhi Warrata wawia ẽãbara wawia ẽã mʉ Zeze mʉ zok'ad'ata. 24 Mʉã wãrĩnu marãã jaraya: Iab'aʉba mʉ bed'eata ũrĩ b'ʉba mʉ zok'ad'ad'ebemata ĩjã b'ʉra erub'ʉa Daizeze ũme b'ai jõ ẽãta, mawũẽ Daizezebara pua k'awua o ẽbaya, awuarabʉrʉ aduaita b'ad'ata zhi berab'arima baya Daizeze ũme b'ai jõ ẽãma. 25 Mʉã wãrĩnu marãã jaraya: Ewarita zeya, maʉ̃ ewarira ya arabasia, mawũẽ aduaita b'ebara ũrĩnaña mʉ Daizeze Warra nemita, mʉ bed'eata ũrĩbʉdara Daizeze ũme b'ai jõ ẽã b'eaya. 26 Mʉ Zezebara erub'ʉa izhi ũme b'ai jõ ẽãta, mawũẽ mʉ zhi Warraabid'a diasia erub'amarẽã izhi ũme b'ai jõ ẽãta. 27 Dewara zhãrã k'awua oi zareata diasia mʉrã Beubari Bape b'ʉba. 28 Mʉã maʉ̃ta jarabʉrʉ k'area k'awua ẽã krĩcharãũdua, ewarita zeya, maʉ̃ ewadera beud'apead'ata jou nʉmebara ũrĩnaña mʉ nemirã. 29 Mawũẽ biata od'apead'ara piradrʉd'aya Daizeze ũme b'ai jõ ẽã b'aita, mawũãmina bia ẽãta od'apead'ara piradrʉd'aya aduaita.
Jara b'ea Jesúra zhãrã Ẽdrʉbita
30 Mʉãrã mʉzhikusaubara k'ãrẽ o ẽã. Awuarabʉrʉ sãwũãta mʉ Zezeba mʉãã jarabʉrʉta ũrĩpe mʉãrã zhãrã k'awua obaria, aramaʉ̃ne obaria sãwũã oi b'ʉd'e, mawũẽ mʉãrã onʉmʉ ẽã mʉã krĩñata, awuarabʉrʉ onʉmʉã mʉ Zeze mʉ zok'ad'aba krĩñata. 31 Mʉnebemata mʉã jarara mʉnebema zhãrãma wãrĩnu ẽã. 32 Mawũãmina mʉ Zezeba mʉnebemata jara b'ʉa, mʉã k'awua b'ʉa mawũã mʉnebemata jara b'ʉra wãrĩnuã. 33 Mʉnebemata wid'id'amarẽã marãbara zhãrãta zok'asid'a Juan Buruk'oemiãma, mawũẽ izhara jarasia mʉnebema wãrãta. 34 Mawũãmina mʉãrã zhãrãba mʉnebema mawũã jaraita nesid'a nʉmʉ ẽã, awuarabʉrʉ mʉãrã Juanba jarad'ata jarabʉrʉa marãta ẽdrʉd'amarẽã. 35 Juanbara mʉnebema k'awuabiga nʉmʉba pãrĩguad'e ĩbĩrã ʉ̃nabari kĩrãk'a b'asia, aramaʉ̃ne marã ewari k'akutua sobiasid'a izhi ʉ̃nane. 36 Mawũãmina mʉã erub'ʉa mʉnebema audre bia jara b'ʉta Juanba jarad'a k'ãñabara, k'ãrẽ arib'aeita mʉ Zezeba mʉãã diad'ata mʉã ob'ʉba mʉnebemata jara b'ʉa mʉrã mʉ Zezeba zok'ad'ata. 37 Mʉ Zeze mʉ zok'ad'abid'a mʉnebemata jara b'ʉa. Marãbara ũrĩnak'a izhi nemirã, miã ũdud'ak'a izhira. 38 Miã izhi bed'eara eruduanu ẽã marã sod'era, mʉta izha zok'ad'ara marãbara ĩjãna ẽãba. 39 Daizeze bed'eata zhi b'ʉmarã marãbara kĩrãkuita estudia b'ea, mazhima maʉ̃neba erub'eba Daizeze ũme b'ai jõ ẽãta, mawũã zhi b'ʉmabara jara b'ʉa mʉnebemata. 40 Maʉ̃ne marã mʉma ze krĩñana ẽã aramaʉ̃ne erub'eaira Daizeze ũme b'ai jõ ẽãta. 41 Mʉãrã zhãrãba mʉta bia jarad'amarẽã nʉmʉ ẽã. 42 Maʉ̃ẽnabema mʉã marã ũduk'awua b'ʉa, marãbara Daizezera kʉãg'ad'a ẽã. 43 Mʉrã zesia mʉ Zezed'eba, maʉ̃ta marãbara mʉrã bia edad'a ẽã, awʉrʉta izhikusaud'eba zera maʉ̃ marãbara bia edad'aya. 44 ¿Marãbara mʉnebema sãwũã ĩjãnaĩpe k'ãwũã mazhirãĩnubʉrʉ zhiya bia jara b'era? K'ãwũãrã Daizeze ab'a b'ʉba bia jaramarẽã duanu ẽã. 45 Krĩcharãũdua kĩrãbita mʉã marã jikuaita mʉ Zezea, mawũãmina k'aiba marã jikuaira b'ʉta Moiséa, maʉ̃ne marãbara izhita krĩcha b'ea. 46 Moiséba b'ʉd'ata marãba ĩjã b'ebʉrʉ mʉnebemata ĩjãk'ausid'a, izhara mʉnebemata b'ʉd'aba. 47 Mawũãmina izha b'ʉd'ata ĩjãna ẽãrã, ¿sãwũã ĩjãnaĩpe mʉ bed'eara?
1 Maʉ̃ tẽã Jesús kĩrãrã wãsia Galilea dota jed'ea õb'ʉd'e, maʉ̃ dora ab'aʉta Tiberia abada. 2 K'abanata izhi k'aid'u wãsid'a ũdud'ak'ata ũdu b'eta b'ebiga nʉmʉba k'ayarãta. 3 Mawũẽ Jesús wãrĩzesia k'atuma zakeid'u, mobe mama jewed'asia izha jʉrʉkuad'a bawara. 4 Maʉ̃nerã ewari araa zebod'o basia Egiptod'eba ẽzoad'ata krĩcha fiesta obadata judíorãba. 5 Jesúsba akʉbʉrʉd'era ũdusia k'abanata izhi k'aid'u b'eta, mawũẽ Felipea mawũãsia: ¿Zhiko sãma edad'aipe naʉ̃rãta nek'od'amarẽãrã? 6 Mawũã wid'isia sãwũã panaʉ̃ĩ k'awuaita, izhara k'awua b'ʉta k'ãrẽ oira. 7 Mawũãĩ Felipebara panaʉ̃ mawũãsia: Ewari dociento trajad'aba denario docientoba pan edabʉrʉsid'a arab'ae ẽã naʉ̃rãta ab'a ab'ak'a wĩkabid'a nek'obigaira. 8 Izha jʉrʉkuad'aba ab'aʉba, Andrés Pedro mebeaba mawũãsia: 9 Kũrãta za b'ʉba pan juesoma erub'ʉta cebada omata erub'ʉa, b'edasid'a ũme erub'ʉa, mawũãmina ¿naʉ̃ sãwũãĩpe bioitara? 10 Mawũãĩ Jesúsbara mawũãsia: Zhãrãta jewed'abigaudua. Mamarã bio nʉmasia poajãrãta, aramaʉ̃ne cinco mil jewed'asid'a zhũmakĩrãrãta. 11 Mobebʉrʉ Jesúsbara maʉ̃ pan jiraedape Daizezea zhibia jipe b'ʉekuape diasia izha jʉrʉkuad'aa, mawũẽ izha jʉrʉkuad'abara jed'ekasid'a jewed'a k'ob'ea, b'edasid'a ab'arika osia ãzha k'obʉdad'e k'od'amarẽã. 12 Jãwũã duanebʉdad'e izha jʉrʉkuad'aa mawũãsia: Ad'ubabʉdata zhi b'ʉgʉzoamata jʉrepeudua, miã k'ãrẽta adua ẽbamarẽã. 13 Mawũãĩ jʉrepesid'a, aramaʉ̃ne zhi b'ʉgʉzoamaba jamara doce birasid'a, pan juesomata cebada omata ad'ubad'apead'ata zhi k'od'apead'aba. 14 Mawũẽ zhãrãbara ũdud'ak'ata Jesúsba mawũã obʉrʉta ũdud'ai mawũãsid'a: Naʉ̃ wãrĩnu Daizezeba bed'eata jarabibarita zeita b'ad'a naʉ̃ ẽjũãẽna. 15 Maʉ̃nerã Jesúsbara k'awuasia izhira zaread'e edeita k'opanʉta rey babid'aita, mawũẽ wakusa k'atumaẽna wãsia izhi dob'a.
Jesús tebad'a do ʉ̃rʉ̃
16 Keubʉrʉd'era Jesúsba jʉrʉkuad'ara zesid'a do jed'ea õb'ʉid'u. 17 Mobe jãbad'e b'arikuape do jed'ea õb'ʉd'e kĩrãrã wãsid'a Capernaúm pʉwʉrʉed'a. Maʉ̃nerã ya paisosoa nʉmʉne Jesús wad'i ze ẽbasia ãzhima. 18 Maʉ̃ne do jed'ea õb'ʉra bomatʉ bʉsad'ewasia zarea pʉ̃ãdrʉ nʉmʉba. 19 Wigui wãnata cinco o seis kilómetro babʉrʉd'e Jesús do ʉ̃rʉ̃ taita ũdubʉdad'era orra tebasia jãbata, mawũẽ perasid'a. 20 Maʉ̃ne izhara mawũãsia: Mʉta taia, perarãũdua. 21 Mawũãĩ ãzhara sobia jãbad'e edasid'a, aramaʉ̃ne dããrã ẽãne jũẽkuasia drua ãzhi wãma.
Zhãrãba jʉrʉd'apead'a Jesús
22 Do jed'ea õb'ʉ kĩrãrẽ zhãrã duanenabara nrũẽmane k'awuasid'a mama jãba ab'abai b'ad'ata, izha jʉrʉkuad'a bawara Jesús maʉ̃ jãbad'era b'ari ẽbasia, awuarabʉrʉ maʉ̃rã wãsid'a ãzhi dob'a. 23 Maʉ̃ne jãba awʉrʉta Tiberia pʉwʉrʉd'eba zesid'a, Jesúsba Daizezea zhibia jipe pan k'od'apead'a k'aita. 24 Aramaʉ̃ne zhãrãbara k'awuasid'a Jesús mama ne ẽãta, miã izha jʉrʉkuad'asid'a ne ẽãta, mawũẽ maʉ̃ jãbad'e b'arikuape wãsid'a Capernaúm pʉwʉrʉed'a Jesús jʉrʉd'e.
Jesúra panta Daizeze ũme b'ai jõ ẽãnebema
25 Aramaʉ̃ne do jed'ea õb'ʉ kĩrãrẽ ũdud'ape mawũãsid'a: Miã Ũrãg'abari, ¿bʉra sõmbewed'a naĩnu zesi? 26 Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya, marãbara mʉrã jʉrʉ duanu ẽã sãwũãta k'awuasid'a baera mʉã od'ata ũdud'ak'ata, awuarabʉrʉ mʉrã jʉrʉ duanuã panta jãwũã k'osid'a baera. 27 K'ãrẽ obʉdata bari zhiko jõbari k'area orãũdua, awuarabʉrʉ k'ãrẽ oudua pan jõk'a k'area, Daizeze ũme b'ai jõ ẽã k'area, mʉ Beubari Bape b'ʉba maʉ̃ pan marãã diaya, mʉrã maʉ̃ k'area b'ʉsia mʉ Zhibari mʉ Zezeba. 28 Mawũãĩ mawũãsid'a: ¿Daibara k'ãrẽta od'aibarape k'ãrẽ Daizezed'eta od'aira? 29 Mawũãnaĩ Jesúsbara panaʉ̃ mawũãsia: Marãba k'ãrẽ Daizezed'eta od'aira, ĩjãũdua mʉ izha zok'ad'ata. 30 Mawũãĩ mawũãsid'a: ¿Bʉara k'ãrẽta ũdud'ak'ata oipe daiba maʉ̃ta ũdud'ape bʉd'ebemata ĩjãnaĩrã? ¿Bʉara k'ãrẽta oipe? 31 Dai zhibarirã b'ead'abara pan maná abadata k'osid'a drua drudrua tab'ʉ maẽ, maʉ̃ẽnabemata zhi b'ʉmata mawũã b'ʉa: Pan ʉ̃trebemata ded'ekasia k'od'amarẽã. 32 Mawũãnaĩ Jesúsbara mawũãsia: Mʉã wãrĩnu marãã jaraya: Maʉ̃ pan ʉ̃trebema Moiséba ded'eka ẽbasia, awuarabʉrʉ ded'ekasia mʉ Zezeba. Aramaʉ̃ne mʉ Zezebara ded'eka b'ʉa wãrĩnu pan ʉ̃trebemata. 33 Pan Daizezed'ea mʉta ʉ̃treba zed'ata, mʉãrã Daizeze ũme b'ai jõ ẽãta dia b'ʉa ẽjũãne zhãrã b'ea. 34 Mawũãĩ mawũãsid'a: Nok'ó, daia ewariza diadua maʉ̃ panta. 35 Mawũãnaĩ Jesúsbara mawũãsia: Mʉta panta Daizeze ũme b'ai jõ ẽãnebema, mʉma zebʉrʉra maʉ̃nebemanerã jarrak'a baya, mʉnebemata ĩjãbʉrʉra aramaʉ̃ne obisiak'a baya. 36 Mawũãmina mʉã marãã jarad'a kĩrãk'a, marãbara mʉrã ũdu b'emina mʉnebema ĩjãna ẽã. 37 Mʉ Zezeba mʉãã diabʉrʉra jõma mʉma zed'aya, mʉma zebʉrʉra mʉãrã ãĩ jʉreta ẽã. 38 Mʉrã ʉ̃trebara ze ẽbasia mʉã krĩñata oita, awuarabʉrʉ zesia mʉ Zeze mʉ zok'ad'aba krĩñata oita. 39 Mʉ Zeze mʉ zok'ad'abara krĩña b'ʉa jõma izha mʉãã diabʉrʉra mʉrẽ miõta adua ẽbaita, awuarabʉrʉ krĩña b'ʉa maʉ̃rãta beud'apead'ara mʉã piradrʉbigaita ewari nʉmʉta jõbʉrʉd'era. 40 Mʉ Zeze mʉ zok'ad'abara krĩña b'ʉa zhi Warra mʉta krĩcha b'ebara, mʉnebemata ĩjã b'ebara jõmaʉ̃ba erub'eamarẽã Daizeze ũme b'ai jõ ẽãta. Aramaʉ̃nerã maʉ̃rãta beud'apead'ara mʉã piradrʉbigaya ewari nʉmʉta jõbʉrʉd'era. 41 Judíorãbara Jesús bĩ ẽã jarasid'a: Mʉrã pan ʉ̃treba zed'a, abʉrʉba. 42 Maʉ̃nerã mawũãsid'a: ¿Naʉ̃ Jesúra José warra ẽka? Zhi Zezera, zhi papara dazhirãbara ũduk'awua b'ea. ¿Maʉ̃ta sãwũã naʉ̃bara izhira ʉ̃treba zed'a abʉrʉ? 43 Mawũãnaĩ Jesúsbara panaʉ̃ mawũãsia: Bĩ ẽã bed'earãũdua. 44 Miõta mʉma ze b'e ẽã mʉ Zeze mʉ zok'ad'aba webʉrʉ ẽbʉrʉ. Izha webʉrʉtrʉ beud'ata mʉãrã piradrʉbiya ewari nʉmʉta jõbʉrʉd'era. 45 Daizezeba bed'eata jarabibarirãba jarad'apead'ata zhi b'ʉmata mawũã b'ʉa: Daizezeba jõma ũrãg'aya. Aramaʉ̃nerã mʉ Zeze bed'eata ũrĩnape izhid'ebemata k'awabʉdara jõma mʉma zed'aya. 46 Mʉã maʉ̃ta jarabʉrʉ ẽã iab'aʉba mʉ Zezeta ũdud'aba, awuarabʉrʉ mʉta Daizeze maẽba zed'abʉrʉ mʉãbʉrʉ ũdubaria mʉ Zezera. 47 Mʉã wãrĩnu marãã jaraya: Mʉnebemata ĩjã b'ʉbara erub'ʉa Daizeze ũme b'ai jõ ẽãta. 48 Mʉrã panta Daizeze ũme b'ai jõ ẽãnebema. 49 Marã zhibarirã b'ead'aba drua drudrua tab'ʉ maẽ maná k'o b'ead'ara bari zhiko basia, mawũẽ k'o b'easimina beukuasia. 50 Mʉrã pan ʉ̃treba zed'a, pan mʉta k'obʉrʉra adua ẽã. 51 Mʉrã panta Daizeze ũme b'ai jõ ẽãta ʉ̃treba zesia, iab'aʉba pan mʉta k'obʉrʉra Daizeze ũme b'ai jõ ẽã b'aya. Pan mʉã diabʉrʉra mʉ zharata diaya. Maʉ̃ mʉãrã Daizeze ũme b'ai jõ ẽãta diaya ẽjũãne zhãrã b'ea. 52 Mawũãĩ judíorã ãzhirãĩnu bĩ ẽã mawũãsid'a: ¿Naʉ̃bara sãwũã mawũã dazhirãã k'obigaipe izhi zharata? 53 Mawũãnaĩ Jesúsbara mawũãsia: Mʉã wãrĩnu marãã jaraya: Mʉ Beubari Bape b'ʉ zharata k'od'a ẽbʉrʉ, mʉ wata dod'a ẽbʉrʉ erub'ea ẽã Daizeze ũme b'ai jõ ẽãrã. 54 Mʉ zharata k'o b'ʉbara mʉ wata do b'ʉbara erub'ʉa Daizeze ũme b'ai jõ ẽãrã, mawũẽ beud'ata mʉã piradrʉbiya ewari nʉmʉta jõbʉrʉd'era. 55 Mʉ zhara wãrĩnu zhikoa, mʉ wara wãrĩnu doyid'ebema. 56 Mʉ zharata k'o b'ʉra mʉ wata do b'ʉra mʉne b'ʉa, mʉrã izhid'e b'ʉa. 57 Mʉ Zeze mʉ zok'ad'ata b'ʉ kĩrãk'a, mʉrã b'ʉa mʉ Zezed'eba, aramaʉ̃ kĩrãk'a mʉta k'o b'ʉra b'aya mʉneba. 58 Mʉta panta ʉ̃treba zed'a. Marã zhibarirã b'ead'aba maná k'od'apead'a kĩrãk'a b'ʉ ẽã, mawũã k'osid'amina beukuasia. Pan mʉta k'obʉrʉra Daizeze ũme b'ai jõ ẽã b'aya. 59 Jesúsbara Capernaúm pʉwʉrʉd'e maʉ̃ta jarasia miã ũrãg'a nʉmʉba de zhi jʉrebada maẽ.
Bed'eata Daizeze ũme b'ai jõ ẽãnebema
60 Maʉ̃ta ũrĩnape izhi pẽwã b'ebara bioba mawũãsid'a: Maʉ̃ bed'eara zarea. ¿Mawũẽ k'aiba ũrĩ b'eipe? 61 Jesúsbara k'awuasia izhi pẽwã b'e mawũã bĩ ẽã bed'ea k'ob'era, mawũẽ mawũãsia: ¿Maʉ̃ bed'eabara marã bĩ ẽãbʉdak'a? 62 ¿Mobera sãwũãnaĩpe mʉ Beubari Bape b'ʉta ʉ̃taa wãbʉrʉta ũdud'ara naara mʉ b'ad'ama? 63 Jawurebiabʉrʉ dia b'ʉa Daizeze ũme b'ai jõ ẽãta, zharabara dia ẽã. Bed'eata mʉã marãã jara b'ʉra Jawurebiad'ebemata Daizeze ũme b'ai jõ ẽãnebema. 64 Mawũãmina marã ʉ̃kʉrʉbara ĩjãna ẽã. Jesúsbara mawũã jarasia jẽde wed'auba k'awua b'asi baera k'airãba ĩjãna ẽãta, aramaʉ̃ne k'awua b'asia izhira k'aiba chãb'ariita. 65 Maʉ̃nerã mawũãsia: Maʉ̃neba mʉã marãã jarasia miõta mʉma ze ẽãta mʉ Zezeba diabʉrʉ ẽãrã. 66 Mamaʉ̃ba ʉ̃taara izhi pẽwã b'ebara bioba izhira kenab'arisid'a, mawũẽ ya izhi bawara erjirana ẽbasia. 67 Mawũẽ Jesúsbara izha jʉrʉkuad'ata docea mawũãsia: ¿Marãsid'a wã krĩña panʉka? 68 Mawũãĩ Simón Pedroba panaʉ̃ mawũãsia: Nok'ó, ¿daira k'aima wãĩpe? Bʉabʉrʉ bed'eata erub'ʉa Daizeze ũme b'ai jõ ẽãta. 69 Maʉ̃ daibara ĩjã b'ea, aramaʉ̃ne daiba k'awua b'ed'era bʉra zhãrã Ẽdrʉbita Daizeze zok'ai b'ʉ Warra. 70 Mawũãĩ Jesúsbara mawũãsia: Mʉã marã doce jʉrʉkuasia, mawũãmina marãnebema ab'a ãtõmiãba erunʉmʉã. 71 Mawũã jarabʉrʉbara Juda Iscarioteta jarasia Simón warrata, izhira maʉ̃ba chãb'arii baera mawũã jarasia, maʉ̃ doced'ebema basia.
Jesús mebẽrãba izhid'ebema ĩjã ẽã b'ead'a
1 Maʉ̃ tẽã Jesús pʉrrʉasia Galilea druad'e, Judea druad'era pʉrrʉa krĩña ẽbasia judíorãba beaita jirpanʉba. 2 K'aita bata nʉmasia fiesta judíorãne de pãne duanebadata. 3 Mawũẽ zhi mebẽrãbara Jesúa mawũãsid'a: Namaʉ̃bara wãrũã Judea druaed'a, maĩnu bʉ pẽwã b'ebid'a ũdud'amarẽã bʉa ob'ʉta. 4 Iab'aʉba izhita ũduk'awabiga krĩña b'ʉbara k'ãrẽ chupea o ẽã. Mawũẽ bʉara k'ãwũã k'ãrẽ onʉmaẽrã jõmaʉ̃ daid'u k'ãrẽ odua. 5 Mawũãsid'a miã zhi mebẽrãbid'a izhid'ebema ĩjãna ẽãba. 6 Mawũãnaĩ Jesúsbara mawũãsia: Mʉrã wad'i wãĩne b'ʉ ẽã, mawũãmina marã baridu ʉ̃madaud'e wã b'eya. 7 Naʉ̃ ẽjũãne b'ebara marã ũduama ẽã, mawũãmina mʉrã ũduama b'ea mʉã jara b'ʉba ãzha ob'era bia ẽãta. 8 Marã wãrĩzeudua fiestaid'u, mʉrã wad'i wãrĩze ẽã maʉ̃ fiestaid'ura, mʉ wãĩ ewarira wad'i araba ẽã. 9 Maʉ̃ta jarak'ape b'esia Galilead'e.
Jesús fiestad'e b'ad'a de pãne duanu maẽ
10 Zhi mebẽrã wãrĩzekuad'a tẽãne izhisid'a wãrĩzesia fiestaid'u, mawũãmina jõmaʉ̃ daid'u wã ẽbasia, awuarabʉrʉ wãsia chupea. 11 Maʉ̃ne judíorãbara fiestad'e jʉrʉ b'eta mawũã duanasia: ¿K'ãʉ̃ sãma b'ʉba? 12 K'abanane ed'ara izhi ʉ̃rʉ̃rã biod'e bed'ea jirpanʉta ʉ̃kʉrʉbara biata b'ʉa aduanasia. Waya ʉ̃kʉrʉbara mawũã duanasia: Mawũã ẽã, awuarabʉrʉ zhãrãta sewa b'ʉa. 13 Mawũãmina izhi ʉ̃rʉ̃rã miõta dajada bed'ead'a ẽbasia judíorã wawiaba. 14 Fiestara ẽsadra babʉrʉd'era, Jesús Daizeze deid'u wãrĩzepe ewara maẽ miã ũrãg'asia. 15 Mawũẽ judíorãbara bia akʉdrua mawũãsid'a: ¿Naʉ̃bara sãwũã k'awua b'ʉ miã ũrãg'aid'ebema estudia ẽbad'ata? 16 Maʉ̃ne Jesúsbara mawũãsia: Ũrãg'ata mʉã jara b'ʉra mʉrẽ ẽã, awuarabʉrʉ Daizeze mʉ zok'ad'ad'ea. 17 Daizezeba krĩñata okrĩña b'ʉbara k'awuaya ũrãg'ara Daizezed'eta, o k'awuaya mʉrã bed'ea b'ʉta mʉzhikusauba. 18 Izhikusauba bed'ea b'ʉbara izhitrʉ bia jarad'amarẽã b'ʉa, mawũãmina mʉãrã Daizeze mʉ zok'ad'ata bia jarad'amarẽã b'ʉa, mawũẽ wãrĩnuta jara b'ʉa, aramaʉ̃ne mʉãrã sewata jara ẽã. 19 ¿Moisébara ũrãg'ara marãã diasi ẽka? Maʉ̃ta marãbara miõba arib'aed'a ẽã. ¿Maʉ̃ba mʉrã bea krĩña duanu ẽka? 20 Mawũãĩ k'abanabara panaʉ̃ mawũãsid'a: Bʉra jaiba mawũã krĩchabi b'ʉa, ¿bʉra k'aiba bea krĩña nʉmʉ? 21 Mawũãnaĩ Jesúsbara panaʉ̃ mawũãsia: Ẽnaʉ̃bada ewade mʉã ne ab'a obʉrʉba marã jõma k'awua ẽã krĩcha k'ob'ea. 22 Mawũẽ mʉã jaraya, Moisébara marãã jarasia warra zakera k'akua eta k'õnamarẽã, mawũã oira Moiséd'eba ze ẽbasia, awuarabʉrʉ marã zhibarirã b'ead'ad'eba zesia, aramaʉ̃ne marãbara ẽnaʉ̃bada ewadebid'a warra zakera k'akua eta k'õbada. 23 Mawũã ẽnaʉ̃bada ewadebid'a warra zakera k'akua eta k'õbada Daizezeba ũrãg'a Moiséa diad'ata arib'aed'ai k'area, ¿maʉ̃ta marã mʉ bawara kĩrũ duanuka ẽnaʉ̃bada ewade mʉã jipa b'ebibʉrʉba zhãrãta? 24 Zhãrãba k'ãrẽ obʉrʉta ũdud'ape bĩ ẽã bed'earãũdua, awuarabʉrʉ k'ãrẽ obʉrʉta bigara kĩrãẽpa biga audua.
¿Naʉ̃ka zhãrã Ẽdrʉbiira?
25 Jerusalénne b'ebara ʉ̃kʉrʉba mawũã duanasia: ¿Naʉ̃ ẽka bead'aita jʉrʉ b'era? 26 Akaudua, jõmaʉ̃ daid'u bed'ea nʉmʉta k'ãrẽ jarad'a ẽã. ¿Nok'orãbara wãrĩnu krĩcha duanu ẽka naʉ̃ zhãrã Ẽdrʉbiita? 27 Mawũãmina dazhirãbara k'awua b'ea naʉ̃ sãmabemata, maʉ̃ne zhãrã Ẽdrʉbiita zebʉrʉd'era miõba k'awua ẽbaya sãmabemata. 28 Mobebʉrʉ Jesúsbara Daizeze ded'a ewara maẽ miã ũrãg'a nʉmʉba nemi jĩgua mawũãsia: Marãbara mʉrã ũduk'awua b'eta k'awua b'ea sãmabemata. Mawũãmina mʉrã mʉzhikusauba ze ẽbasia, awuarabʉrʉ mʉrã zok'asia Daizeze wãrĩnu b'ʉba, izhid'ebema marãbara k'awua duanu ẽã. 29 Mawũãmina mʉãrã k'awua b'ʉa mʉrã zesi baera izhi maẽba, mʉrã izha zok'asia. 30 Mawũãbʉrʉ k'area Jesús jida krĩñasid'a, mawũãmina miõba jida ẽbasia wad'i araba ẽãba izhi ewarita. 31 K'abanabara bioba izhid'ebemata ĩjãnape mawũã duanasia: Zhãrã Ẽdrʉbiita zebʉrʉd'era, ¿ũdud'ak'ara audre oibʉka naʉ̃ba ob'ʉ k'ãñabara?
Fariseorãba Jesús jida krĩñanapead'a
32 Fariseorãbara ũrĩsid'a zhãrã Jesú ʉ̃rʉ̃ mawũã bed'ea jirpanʉta, mawũẽ sacerdoterã nok'orãbara, fariseorã bawarauba Daizeze de akʉbadata zok'asid'a jidad'amarẽã. 33 Mawũẽ Jesúsbara mawũãsia: Mʉrã wad'i ewari k'akutua marã bawara b'ape wãña mʉ zok'ad'ama. 34 Marãbara mʉrã jʉrʉd'aya, mawũãmina mʉrã ũdud'a ẽbaya, aramaʉ̃ne mʉ b'aima marã wã b'ed'a ẽã. 35 Mawũãĩ judíorãbara ãzhirãĩnu mawũãsid'a: ¿Naʉ̃ sãmaã wãĩba dazhirãba mawũã ũdud'a ẽbaira? ¿Judíorã druaza griegorãne ed'a b'ema wãĩbʉka, aramaʉ̃ne griegorã ũrãg'aita? 36 Izhara k'ãrẽta jara krĩñaba mawũãbʉrʉ: Marãbara mʉrã jʉrʉd'aya, mawũãmina mʉrã ũdud'a ẽbaya, aramaʉ̃ne mʉ b'aima marã wã b'ed'a ẽã.
Dota Daizeze ũme b'ai jõ ẽãnebema
37 Fiesta jõbʉrʉ ewarita zhi zroma ewade, Jesús edau nʉmepe nemi jĩgua mawũãsia: Iab'a obisia b'ʉbʉrʉ mʉma zerua, aramaʉ̃ne baniã dorua. 38 Mʉnebemata ĩjã b'ʉd'ebara Daizeze bed'eata zhi b'ʉmane jara b'ʉ kĩrãk'a izhi sod'eba zhãrãma dota drʉya Daizeze ũme b'ai jõ ẽãta. 39 Mawũã dota jarabʉrʉra jarasia izhid'ebemata ĩjãbʉdabara Jawurebiata jidad'aita, maʉ̃nerã wad'i ze ẽbasia Jawurebiara, wad'i Jesús ʉ̃taa wã ẽãba.
Krĩcha ab'arika zed'a ẽbad'apead'a
40 K'abanata ʉ̃kʉrʉbara maʉ̃ bed'eata ũrĩnape mawũãsid'a: Naʉ̃ wãrĩnu Daizezeba bed'eata jarabibaria. 41 Waya ʉ̃kʉrʉbara mawũãsid'a: Naʉ̃ zhãrã Ẽdrʉbia. Mawũãmina ʉ̃kʉrʉbara mawũãsid'a: ¿Galilead'ebara ʉ̃tʉ zeita b'ʉka zhãrã Ẽdrʉbiira? 42 ¿Maʉ̃ẽnabemata zhi b'ʉmanerã jara b'ʉ ẽka rey David'eba ʉ̃tʉ zeita, aramaʉ̃nerã David Belén pʉwʉrʉd'ebemata b'ad'a maẽba ʉ̃tʉ zei ẽka zhãrã Ẽdrʉbiira? 43 Aramaʉ̃ne zhãrã krĩcha ab'arika zed'a ẽbasia Jesúsd'ebemanerã. 44 Ãzhara ʉ̃kʉrʉbara jida krĩñasid'a, mawũãmina miõba jidad'a ẽbasia.
¡Miõta bi-ia bed'ea ẽã Jesús kĩrãk'ara!
45 Daizeze deta akʉbadara wakusa zesid'a sacerdoterã nok'orãma, fariseorãma, mawũẽ maʉ̃rãbara mawũãsid'a: ¿Sãwũẽ Jesús wed'a ẽpe? 46 Mawũãnaĩ Daizeze deta akʉbadabara panaʉ̃ mawũãsid'a: ¡Miõta bi-ia bed'ea ẽã k'ãʉ̃ kĩrãk'ara! 47 Mawũãnaĩ fariseorãbara panaʉ̃ mawũãsid'a: ¿Marãsid'a k'ãʉ̃ã zhi sewabi nʉmeka? 48 ¿K'ãʉ̃nebema ĩjã duanuka nok'orãbara, o fariseorãbara? 49 K'ãʉ̃nebema ĩjã b'ebara Moisé ũrãg'ara k'awua ẽã b'ea, mawũẽ Daizezebara k'awua okuaya. 50 Mawũãnaĩ Nicodemo Jesúsma diamase zed'abara ãzhid'ebemaba mawũãsia: 51 ¿Ũrãg'a dazhirãnebara jara b'ʉ ẽka dazhirãbara zhãrã k'awua ob'ed'a ẽãta naara izhi bed'eata ũrĩbʉda ẽbʉrʉ k'awuaita k'ãrẽ od'ata? 52 Mawũãĩ panaʉ̃ mawũãsid'a: ¿Bʉsid'a Galilead'ebemak'a? Daizeze bed'eata bia estudiadua, mawũãrã k'awuaya Galilead'ebara piradrʉk'ata Daizezeba bed'eata jarabibarira. 53 Maʉ̃ tẽã wãsid'a ãzhi deza.
Wũẽrãba kĩma ẽãta eruk'ãĩna
1 Waya Jesúra wãsia Olivo k'atumaĩnu. 2 Nrũẽma diaped'a wakusa Daizeze ded'a ewara maẽ zebʉrʉd'era zhãrã jõma zesid'a izhima. Mawũẽ jewed'ape maʉ̃rãta ũrãg'asia. 3 Maʉ̃ne ũrãg'a Moiséd'e jarabadaba fariseorã bawarauba wũẽrãta izhima wesid'a kĩma ẽãta eruk'ãĩ nʉmʉta burud'ape, mobe miõ ẽsadra k'ob'ʉd'ape, 4 mawũãsid'a: Miã Ũrãg'abari, naʉ̃ wũẽrã kĩma ẽãta eruk'ãĩ nʉmʉta burusid'a. 5 Ũrãg'ad'era Moisébara daia jarasia wũẽrã k'ãwũã b'era mong'araba tab'ari bead'amarẽã. ¿Mawũẽ bʉara k'asia aipe? 6 Maʉ̃ta jarasid'a wãẽãbid'ape nok'oa jid'ai k'area. Mawũãmina Jesús ju k'ob'epe egorod'e ne b'ʉsia juwua jĩwĩniba. 7 Maʉ̃ne ãzhara pi wid'i barab'ʉba jipa k'ob'epe mawũãsia: Marãnebema k'azhirua ne ẽãba maʉ̃ba naara mong'araba tab'arirua k'ãʉ̃ wũẽrã. 8 Mawũãpe wakusa ju k'ob'epe ari ne b'ʉ nʉmesia egorod'e. 9 Mawũãmina ãzhara maʉ̃ta ũrĩnape k'azhirua bara b'eta k'awua b'eba ab'a ab'aʉd'e ãĩ wãsid'a, naara ãĩ wãsid'a zõrãrãta, maʉ̃are kũrãrãta. Aramaʉ̃ne Jesús dob'a k'ob'esia, wũẽrãsid'a k'ob'esia miõ ẽsadra k'ob'ed'ata. 10 Mawũẽ Jesús jipa k'ob'ebʉrʉd'e miõ ũdu ẽãne wũẽrãtrʉ ũdui mawũãsia: ¿Wũẽrã, bʉta ji k'opanana sãma k'opanʉ? ¿Bʉra miõba bea ẽka? 11 Mawũãĩ wũẽrãbara mawũãsia: Nok'ó, mʉrã miõba bea ẽã. Mobebʉrʉ Jesúsbara mawũãsia: Bʉra miã mʉãbid'a bea ẽã, mawũẽ wãrũã, mobe wueta k'azhiruata orãrũã.
Jesúra ʉ̃nata b'ʉa ẽjũãne b'erãĩta
12 Wakusa Jesúsbara zhãrã k'ob'ea mawũãsia: Mʉrã ʉ̃nata b'ʉa ẽjũãne b'erãĩta, mʉta pẽwã b'ʉra pãrĩguad'e nimiba ẽã, awuarabʉrʉ ʉ̃nata erub'aya Daizeze ũme b'ai jõ ẽãta. 13 Mawũãĩ fariseorãbara mawũãsid'a: Bʉara bʉzhid'ebemata jara b'ʉa, mawũẽ bʉa jara b'ʉra k'ãrẽ ẽã. 14 Mawũãnaĩ Jesúsbara panaʉ̃ mawũãsia: Mʉãrã mʉzhid'ebemata jara b'ʉmina mʉã jara b'ʉra wãrĩnuã, mʉã k'awua b'ʉba mʉ sãmaʉ̃ba zed'ata, mʉ sãmaã wãĩta. Mawũãmina marãbara k'awuad'a ẽã mʉ sãmaʉ̃ba zed'ata miã sãmaã wãĩta. 15 Marãbara mʉrã jara b'ea beubarita bed'ea b'ed'e, mawũãmina mʉã zhãrã mawũãrã jara ẽã. 16 Mʉã zhãrãnebemata jarara mʉãrã wãrĩnuta jaraya mʉrã ab'a nʉmʉ ẽbaera, awuarabʉrʉ daira panʉã mʉta mʉ Zeze mʉ zok'ad'ata. 17 Marã ũrãg'ad'era b'ʉ tab'ʉa zhãrã ũmeba bed'eata jarabʉdara wãrĩnuta. 18 Aramaʉ̃ kĩrãk'a mʉãrã mʉnebemata jara b'ʉa, mʉ Zeze mʉ zok'ad'abid'a jara b'ʉa mʉnebemata. 19 Mawũãĩ ãzhara mawũãsid'a: ¿Sãma b'ʉ bʉ Zezera? Mawũãnaĩ Jesúsbara panaʉ̃ mawũãsia: Marãbara mʉrã ũduk'awua duanu ẽã, miã mʉ Zezesid'a ũduk'awua duanu ẽã, mʉta ũduk'awua b'ebʉrʉ mʉ Zezesid'a ũduk'awua b'ea. 20 Jesúsbara maʉ̃ bed'eata jarasia ofrenda b'ʉbada maẽ Daizeze ded'a ewara maẽ miã ũrãg'a nʉmʉba. Maʉ̃nerã miõba jidad'a ẽbasia wad'i araba ẽãba izhi ewarita.
Mʉ wãĩma marã wã b'ed'a ẽã
21 Jesúsbara wakusa mawũãsia: Mʉta wãbʉrʉd'era marãbara mʉrã jʉrʉd'aya, mawũãmina marã mazhi k'azhiruad'e beukuaya, mawũẽ mʉ wãĩma marã wã b'ed'a ẽã. 22 Mawũãĩ judíorãbara mawũãsid'a: ¿Mobera izhikusa zhi beaika, sãwũã mawũã mʉ wãĩma marã wã b'ed'a ẽã abʉrʉ? 23 Maʉ̃ne Jesúsbara mawũãsia: Marã ud'abema, mʉrã ʉ̃trebema, marã naʉ̃ ẽjũãnebema, mʉrã naʉ̃ ẽjũãnebema ẽã. 24 Maʉ̃ba mʉã marãã jarabʉrʉa marã mazhi k'azhiruad'e beukuaita, Mʉrã Mʉta ĩjãna ẽbʉrʉ mazhi k'azhiruad'e beukuaya. 25 Mawũãĩ mawũãsid'a: ¿Bʉra k'aipe? Mawũãnaĩ Jesúsbara mawũãsia: Mʉnebema jẽde wed'auba mʉã marãã zhi jarama. 26 Mʉãrã marãnebema ne bio jara k'awua oya, mʉ zok'ad'abara wãrĩnuta jara b'ʉa, mawũẽ mʉãrã izha jarabʉrʉta ũrĩbʉrʉta jara b'ʉa ẽjũãne b'ea. 27 Mawũãbʉrʉd'era ãzhara k'awuad'a ẽbasia zhi Zezeta jarabʉrʉra. 28 Mawũẽ Jesúsbara mawũãsia: Mʉ Beubari Bape b'ʉta marãba cruzd'e jirab'ʉd'ai marãbara k'awuad'aya Mʉrã Mʉta, aramaʉ̃ne k'awuad'aya mʉã miã k'ãrẽta o ẽãta mʉzhikusaubara, awuarabʉrʉ mʉrã mʉ Zezeba jaradiad'ad'e bed'ea b'ʉa. 29 Mʉ zok'ad'ara mʉ ũme b'ʉa, aramaʉ̃ne mʉ Zezebara mʉrã dob'a kenab'ari ẽã, mʉãrã ewariza ob'ʉba izha krĩñata. 30 Jesúsba maʉ̃ta jarabʉrʉba bioba ĩjãsid'a izhid'ebemata.
Wãrãbara ẽdrʉbigaya
31 Mobebʉrʉ Jesúsbara judíorã izhid'ebema ĩjãbʉdaa mawũãsia: Marãba mʉ bed'eata arib'ae b'ebʉrʉ wãrĩnu mʉta pẽwã b'ea. 32 Mawũãrã k'awuad'aya Daizezed'ebema wãrãta, wãrãbara ẽdrʉbigaya. 33 Mawũãĩ panaʉ̃ mawũãsid'a: Daira Abrahamneba uruta b'ea, mawũẽ daira nezok'ata duanu ẽã. ¿Sãwũã maʉ̃ta bʉara ẽdrʉd'aya abʉrʉ? 34 Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya: K'azhiruata ob'era k'azhirua nezok'ata b'ea. 35 Nezok'ara zhidekʉ maẽ jipa ded'abema ẽã, mawũãmina zhi warrara jipa ded'abema. 36 Mawũẽ mʉta Daizeze Warraba ẽdrʉbigara, wãrĩnu ẽdrʉd'aya. 37 Mʉãrã k'awua b'ʉa marã Abrahamneba uruta, mawũãmina marãbara mʉrã bea krĩña b'ea, mʉ bed'eara ĩjãna ẽãba marãbara. 38 Mʉãrã jara b'ʉa mʉ Zezeba ũdubid'ata, waya marãbara ob'ea mazhi zezeba ũrĩbid'ata.
Marã mazhi zeze ãtõmiãneã
39 Mawũãĩ panaʉ̃ mawũãsid'a: Dai zezea Abrahamta. Mawũãnaĩ Jesúsbara mawũãsia: Marãta Abraham warrarãbʉrʉ, Abrahamba od'ata ok'ausid'a. 40 Mawũãmina marãbara mʉrã bea krĩña b'ea, maʉ̃ne mʉãrã wãrãta jarak'a b'ʉa Daizezed'eba ũrĩnata. Marã kĩrãk'a maʉ̃ k'aud'a b'a ẽbasia Abraham. 41 Marãbara ob'ea mazhi zezeba ob'ʉta. Mawũãĩ mawũãsid'a: Daira wũẽrã jõmaĩnu b'ʉba tod'ata duanu ẽã. Daibara zeze ab'a erub'ea, izhira Daizezea. 42 Mawũãnaĩ Jesúsbara mawũãsia: Marã zezeta Daizeze basibʉrʉ, marãbara mʉrã kʉãg'a k'ausid'a. Mʉrã Daizeze maẽba zed'aba mʉzhikusaud'eba ze ẽbasia, awuarabʉrʉ mʉrã izha zok'asia. 43 ¿Marãbara k'ãrẽneba sãwũãta k'awuad'a ẽpe mʉã jara b'ʉra? K'awua ẽã b'ea mʉ bed'eara ũrĩ krĩña ẽã b'eba. 44 Marã mazhi zeze ãtõmiãneã, mawũẽ mazhi zezeba krĩñata okrĩña b'ea. Jẽde wed'auba izhira miã beamiãta b'ʉa, wãrãnebemane b'ʉ ẽãba wãrãta jarak'a. Sewata jara bed'eabʉrʉd'era izhi b'ʉd'e bed'ea b'ʉa. Aramaʉ̃ne sewa nebʉrʉmiãba sewad'ebema zezea. 45 Mawũãmina mʉãrã wãrãta jara b'ʉta ĩjãna ẽã. 46 ¿Marãnebemabara mʉrã k'aiba k'azhiruata osia aipe? Mʉã wãrãta jara b'ʉbʉrʉ, ¿marãbara k'ãrẽã ĩjãna ẽpe? 47 Daizezed'eta b'ʉbara Daizeze bed'eata ũrĩ b'ʉa, mawũãmina marãbara ũrĩna ẽã Daizezed'eta duanu ẽãba.
Abraham nawed'a b'ʉa zhãrã Ẽdrʉbira
48 Mawũãĩ judíorãbara panaʉ̃ mawũãsid'a: ¿K'ãʉ̃neba bia daibara bʉra Samaria bid'ata jara panʉta bʉra jaiba erunʉmʉ ẽka? 49 Mawũãnaĩ Jesúsbara panaʉ̃ mawũãsia: Mʉrã jaiba erunʉmʉ ẽã. Awuarabʉrʉ mʉãrã wawia b'ʉa mʉ Zezeta, maʉ̃ne marãbara mʉrã wawiad'a ẽã. 50 Mʉãrã mʉta bia jarad'amarẽã b'ʉ ẽã, mʉ Zezebʉrʉ mʉrã bia jarad'amarẽã b'ʉa, mawũã bia jarad'a ẽbʉrʉ izhabʉrʉ k'awua oya. 51 Mʉã wãrĩnu marãã jaraya: Mʉ bed'eata arib'ae b'ʉra beuk'a baya. 52 Mawũãĩ judíorãbara mawũãsid'a: Ya daibara k'awuabʉda bʉra jaiba erunʉmʉã. Abraham beusia, Daizezeba bed'eata jarabibarirãsid'a beukuasia, maʉ̃ne bʉara mawũãbʉrʉa: Mʉ bed'eata arib'ae b'ʉra beuk'a baya. 53 ¿Mobera bʉra zhi zromak'a dai zeze Abraham k'ãñabara? Izhira beusia, Daizezeba bed'eata jarabibarirãsid'a beukuasia. ¿Mawũẽ bʉra k'aipe mawũã bed'ea nʉmaĩrã? 54 Mawũãnaĩ Jesúsbara panaʉ̃ mawũãsia: Mʉta mʉzhikusa bia jara nʉmaĩbʉrʉ, mawũã mʉzhita bia jara nʉmʉrã k'ãrẽ ẽã. Mawũãmina mʉrã mʉ Zezeba bia jara b'ʉa, izhira marãbara Daizezea ab'ea. 55 Mawũãmina marãbara izhira ũduk'awua duanu ẽã, maʉ̃ne mʉãrã ũduk'awua b'ʉa, mʉã ũduk'awua b'ʉ ẽã ara, sewa nebʉrʉmiã baya marã kĩrãk'a, mawũãmina mʉãrã ũduk'awua b'ʉa, mawũẽ mʉãrã izhi bed'eara arib'ae b'ʉa. 56 Marã zeze Abraham sobiasia mʉ zebʉrʉ ewarita ũdui baera, aramaʉ̃ne ũdusia, mawũẽ sobiasia. 57 Mawũãĩ judíorãbara mawũãsid'a: Bʉra cincuenta añobid'a ne ẽãta, ¿bʉa ũdusika Abrahamta? 58 Mawũãnaĩ Jesúsbara mawũãsia: Mʉã wãrĩnu marãã jaraya: Abraham nawed'a mʉrã b'ʉa. 59 Mawũãĩ mong'arata jirakua edasid'a tab'ari bead'aita, mawũãmina Jesús merũpe ãĩ wãsia Daizeze ded'a ewara maẽbara. Aramaʉ̃ne ãzhi ẽsadra berab'ari wãsia.
Jesúsba ne ũdubid'a daʉb'errea tod'ata
1 Jesús wãbʉrʉd'era ũdusia ũmakĩrã daʉb'errea tod'ata. 2 Mawũẽ izha jʉrʉkuad'abara wid'i mawũãsid'a: Miã Ũrãg'abari, ¿k'azhiruara k'aiba osi, naʉ̃ba o zhibarirãba osid'ak'a k'ãwũã daʉb'errea toira? 3 Mawũãnaĩ Jesúsbara panaʉ̃ mawũãsia: Izha k'azhiruata od'ad'eba k'ãwũã b'ʉ ẽã, miã zhibarirãba k'azhiruata od'apead'ad'eba k'ãwũã b'ʉ ẽã, awuarabʉrʉ k'ãwũã tosia Daizezeba k'ãrẽ ob'ei b'ʉta dajada nʉmemarẽã naʉ̃neba. 4 Mʉ zok'ad'aba obi nʉmʉrã mʉãrã oibara wad'i ãsaped'a nʉmʉ kĩrãk'a nʉmʉwed'a. Ewarita zeya diamase dog'o kĩrãk'a miõba Daizezed'ebema ob'e ẽãta. 5 Mʉta naʉ̃ ẽjũãne b'ʉwed'ara mʉta ʉ̃nata b'ʉa ẽjũãne b'erãĩta. 6 Maʉ̃ta jarape egorod'e id'osia, aramaʉ̃ne egorora id'oba susua ope maʉ̃ egoro susuaba pãrĩkua k'ob'ʉsia daʉb'errea b'ʉ dabʉta. 7 Mobe mawũãsia: Sʉgʉd'e wãrũã Siloé posoid'u. Maʉ̃ trʉ̃bara jara krĩña b'ʉa Zok'abued'ata. Mawũãĩ wãpe sʉgʉsia, mawũẽ jẽrũya zebʉrʉd'era ne ũdu zesia. 8 Mawũẽ arak'aita b'ebara naara daʉb'errea b'ʉta akʉ b'ead'abara mawũãsid'a: ¿Naʉ̃ ẽka jewed'ape nebari wid'i b'ad'ara? 9 Ʉ̃kʉrʉbara mawũãsid'a: K'ãʉ̃ izhia. Waya awʉrʉrãbara mawũãsid'a: Izhi kĩrãk'a b'ʉa. Maʉ̃ne izhara mawũãsia: Mʉrã izhia. 10 Mawũãĩ mawũãsid'a: ¿Bʉra sãwũã ne ũdu b'id'a? 11 Mawũãnaĩ izhara panaʉ̃ mawũãsia: Jesús abadaba egorota id'oba susua ope mʉ dabʉta pãrĩkua k'ob'ʉpe mawũãsia: Siloé posoid'u wãpe sʉgʉdua. Mawũãĩ mʉrã wãpe sʉgʉsia, aramaʉ̃ne mʉrã ne ũdusia. 12 Mawũãĩ mawũãsid'a: ¿Maʉ̃ sãma b'ʉ? Mawũãnaĩ izhara mawũãsia: Mʉãrã k'awua ẽã.
Fariseorãba wid'id'apead'a daʉb'errea b'ʉta b'ed'aa
13 Fariseorã kĩrãbita edesid'a daʉb'errea b'ad'ara. 14 Ẽnaʉ̃bada ewari basia Jesúsba egorota id'oba susua ope ne ũdubisid'era. 15 Mawũẽ fariseorãbid'a wid'isid'a sãwũã ne ũdu b'id'ata. Mawũẽ izhara mawũãsia: Egorota id'oba susua ope mʉ dabʉta pãrĩkua k'ob'ʉsia, maʉ̃ta mʉã sʉgʉbʉrʉd'era mʉrã ne ũdusia. 16 Mawũãĩ fariseorã ʉ̃kʉrʉbara mawũãsid'a: K'ãʉ̃ Daizezed'eba nʉmʉ ẽã, mawũẽ arib'ae ẽã ẽnaʉ̃bada ewarira. Waya awʉrʉrãbara mawũãsid'a: ¿K'azhirua omiãbara sãwũã mawũã ũdud'ak'ata oipe? Ãzhira aramaʉ̃ne krĩcha ab'arika ze ẽbasia. 17 Mawũẽ daʉb'errea b'ad'aa wakusa mawũãsid'a: ¿Bʉara k'asia aipe bʉ daʉb'errea b'ʉta ne ũdubid'ad'ebema? Mawũãnaĩ izhara mawũãsia: Mʉma k'ãʉ̃ Daizezeba bed'eata jarabibaria. 18 Judíorãbara ĩjãna ẽbasia izhira daʉb'errea b'ad'ata ne ũdu b'id'ara, mawũẽ zhibarirãta trʉ̃sid'a. 19 Mobe wid'i mawũãsid'a: ¿Marã naʉ̃ zhibarirãta panʉka, naʉ̃ka marãba jara panʉrã daʉb'errea tod'ata? ¿Sãwũã k'ãwũã ne ũdu b'id'a? 20 Mawũãnaĩ zhibarirãbara panaʉ̃ mawũãsid'a: Daibara k'awua panʉã daira naʉ̃ zhibarirãta, naʉ̃ daʉb'errea tosia. 21 Mawũãmina sãwũã k'ãwũã ne ũdu b'id'ara daibara k'awuad'a ẽã, miã daʉb'errea b'ʉta k'aiba k'ãwũã ne ũdubi b'id'apʉra daibara k'awuad'a ẽã. Ya zõrã baera izhaa wid'iudua, ari izha nebʉrʉya. 22 Zhibarirãbara mawũãsid'a judíorãta wawia panʉba, maʉ̃ẽnabemata judíorã ya krĩcha ab'arika zekuasia Jesús zhãrã Ẽdrʉbia abʉrʉra de zhi jʉrebada maẽ ed'a wãbid'a ẽbaita. 23 Maʉ̃ k'area zhibarirãbara mawũãsid'a: Ya zõrã baera izhaa wid'iudua. 24 Mawũẽ daʉb'errea b'ad'ara wakusa trʉ̃nape mawũãsid'a: Daizeze kĩrãbita daia wãrãta jaradua. Daibara k'awua b'ea k'ãʉ̃ k'azhirua omiãta. 25 Mawũãnaĩ izhara panaʉ̃ mawũãsia: K'azhirua omiãbʉrʉ mʉãrã k'awua ẽã. Awuarabʉrʉ mʉã k'awua b'ʉra mʉrã daʉb'errea b'ad'ata ne ũdu b'id'a. 26 Mawũãĩ wakusa mawũãsid'a: ¿Bʉra sãwũã osi? ¿Bʉra sãwũã ne ũdubi b'id'apʉ? 27 Mawũãnaĩ izhara panaʉ̃ mawũãsia: Mʉãrã ya marãã jarasia, mawũãmina marãbara ũrĩna ẽã. ¿K'ãrẽã wakusa ũrĩ krĩña panʉ? ¿Marãbid'a pẽwã krĩña panʉka? 28 Mawũãĩ ik'azhirua jarad'ape mawũãsid'a: Bʉabʉrʉ pẽwã b'id'a, mawũãmina daibara pẽwã b'ea Moiséta. 29 Daibara k'awua b'ea Daizezera bed'easita Moiséa, mawũãmina k'ãʉ̃ẽnabema daibara k'awuad'a ẽã sãmaʉ̃ba ʉ̃tʉ zed'ara. 30 Mawũãnaĩ maʉ̃bara panaʉ̃ mawũãsia: Sakua mawũã marãbara sãmaʉ̃ba ʉ̃tʉ zed'ata k'awuad'a ẽpe, maʉ̃ne mʉrã ne ũdubi b'id'apʉa. 31 K'awua b'ea Daizezebara ũrĩ ẽãta k'azhirua omiãrã bed'eara, mawũãmina iab'aʉba Daizezeta wawia b'ʉra, aramaʉ̃ne izha krĩñata ob'ʉra, maʉ̃ bed'eara ũrĩ b'ʉa. 32 Ũrĩnak'a iab'aʉba ne ũdubisia abʉdara iab'a daʉb'errea tod'ata. 33 Naʉ̃ta Daizezed'eba ze ẽbasibʉrʉ miã k'ãrẽta ob'e ẽbak'ausia. 34 Mawũãĩ panaʉ̃ mawũãsid'a: Bʉra jipad'e k'azhiruad'e tosia. ¿Maʉ̃ta bʉabʉrʉ ũrãg'aika daita? Mawũãnape jarasid'a de zhi jʉrebada maẽ wueta ed'a wã ẽbamarẽã.
Daizezed'ebema ũdu b'ed'e b'ebara ũdud'a ẽã
35 Jesúsbara ũrĩsia aramaʉ̃ne ãĩ kenab'aribʉdata, mawũẽ ũdui mawũãsia: ¿Bʉara ĩjã b'ʉka Daizeze Warrad'ebema? 36 Mawũãĩ izhara panaʉ̃ mawũãsia: ¿Nok'ó, maʉ̃ k'aipe mʉã ĩjãĩta izhid'ebemata? 37 Mawũãĩ Jesúsbara mawũãsia: Maʉ̃ bʉara ũdu k'ob'ʉta mʉ bʉ ũme bed'ea k'ob'ʉta izhia. 38 Mawũãĩ izhara mawũãsia: Nok'ó, bʉd'ebema mʉãrã ĩjãbʉrʉa. Mawũãpe ibia jarasia. 39 Jesúsbara mawũãsia: Zhãrã k'awua oi k'area mʉrã zesia naʉ̃ ẽjũãẽna. Aramaʉ̃ne Daizezed'ebema ũdu ẽã b'ebara ũdud'amarẽã, waya ũdu b'ed'e b'ebara ũdu ẽã b'eamarẽã. 40 Fariseorãnebema ʉ̃kʉrʉ izhi bawara k'opanʉba maʉ̃ta ũrĩbʉdad'era mawũãsid'a: ¿Mobera daisid'a daʉb'errea duanuka? 41 Mawũãnaĩ Jesúsbara panaʉ̃ mawũãsia: Daizezed'ebemata ũdu ẽã b'ebʉrʉ k'azhirua ne ẽã b'eak'ausia. Mawũãmina ũdu b'ea ab'eba marãne k'azhiruara ari nʉmʉã.
Ne jarad'a ovejarã akʉbarid'eba
1 Jesúsbara mawũãsia: Mʉã wãrĩnu marãã jaraya: Ovejarãne k'orrata nʉmʉ maẽ puertad'e ed'a wãbʉrʉ ẽãrã, awuarabʉrʉ jãpe wãrĩze ed'a wãbʉrʉra nezrʉgamiã. 2 Mawũãmina puertad'e ed'a wãbʉrʉra ovejarã akʉbaria. 3 Puerta jʉ̃ã b'ʉbara maʉ̃ ed'a wãmarẽã ewabaria, ovejarãbara izhi nemirã ũrĩk'awua b'ea, izhi ovejarã trʉ̃ jara ãĩ jʉre edebaria. 4 Aramaʉ̃ne izhi ovejarã jõma ãĩ zebigape ãzhi naa wãbaria, mawũẽ ovejarã izhi k'aid'u wãbada izhi nemita ũrĩk'awua b'eba. 5 Mawũãmina ũdud'ak'ara pẽwãna ẽã, awuarabʉrʉ maʉ̃ k'areara merũ wãẽba panʉã ũdud'ak'a nemirã ũrĩnak'aba. 6 Jesúsbara mawũã ne jarak'asia, mawũãmina ãzhara k'awuad'a ẽbasia k'ãrẽta jara krĩñabʉrʉra.
Jesúra bigaua izhid'erã akʉira
7 Mawũẽ Jesúsbara wakusa mawũãsia: Mʉã wãrĩnu marãã jaraya: Mʉta puerta ovejarãneã. 8 Jõma mʉ nawed'a zed'apead'ara nezrʉgamiãta b'ea, mawũẽ ãzhi bed'eara ũrĩna ẽbasia mʉrẽta b'ebara. 9 Mʉta puerta. Mʉneba ed'a wãbʉrʉra ẽdrʉya. Aramaʉ̃ne adu-a b'aya mʉã bia erunʉmʉba. 10 Nezrʉgamiã zebaria nezrʉgaita, zhãrã beaita, zhãrã jõbiita. Mawũãmina mʉrã zesia Daizeze ũme b'ai jõ ẽãta ad'uba erub'eamarẽã. 11 Mʉrã bigaua ovejarã akʉira. Ovejarã akʉita bigaura beubaria ovejarã k'area. 12 Mawũãmina pag'a b'ʉk'ãrĩnata ovejarã akʉbari ẽãbara ovejarã izhid'e ẽbaera usa pã zebʉrʉta ũdubʉrʉd'era ovejarã ãmaẽkua wãẽba wãbaria, mawũẽ usa pãbara ovejarã k'a jãrãzoabibaria. 13 Pag'a b'ʉk'ãrĩnarã mawũã wãẽba wãbaria, plata k'area nʉmʉ baera sopua ẽã ovejarã k'area. 14 Mʉrã ovejarã akʉira bigaud'eba ũduk'awua b'ʉa mʉ ovejarã, mʉrẽta b'ebid'a mʉrã ũduk'awua b'ea. 15 Aramaʉ̃ kĩrãk'a mʉ Zezebara mʉrã ũduk'awua b'ʉa, mʉ Zezera mʉãbid'a ũduk'awua b'ʉa. Mʉrã beuya ovejarã k'area. 16 Mʉã dewara erub'ʉa ovejarã naʉ̃ k'orrad'ebema ẽãta. Maʉ̃rãsid'a mʉãrã wei baraba maʉ̃rãbara mʉ bed'eara ũrĩnaña. Aramaʉ̃ne ãba duaneña, ãzhi akʉbarira ab'a b'aya. 17 Mʉ Zezebara mʉrã kʉãg'a mʉrã beui baera wakusa piradrʉita. 18 Mʉrã miõba bead'a ẽã, awuarabʉrʉ mʉrã mʉzhi biaba beuya. Mʉãrã erub'ʉa beui zareara, mʉãrã erub'ʉa wakusa piradrʉi zareara. Maʉ̃ta omarẽã jarasia mʉ Zezeba. 19 Judíorã wakusa krĩcha ab'arika zed'a ẽbasia maʉ̃ bed'eaba. 20 Ãzhirãnebema biobara mawũãsid'a: Jaiba erunʉmʉba kĩrãne b'ʉ ẽã. ¿Maʉ̃ba izhi bed'eara k'ãrẽã ũrĩnaĩpe? 21 Waya awʉrʉrãbara mawũãsid'a: Mawũãrã bed'ea ẽã jaiba erunʉmʉrã. ¿Jaibara ne ũdubiga b'eika daʉb'errea b'era?
Judíorãbara Jesús seribid'a ẽbasia
22 Jerusalénne fiesta obʉdata Daizeze ded'ebemata osid'a. Maʉ̃nerã kũrãsã ewari basia. 23 Daizeze ded'a ewara maẽ Jesús tebasia Salomón abada maẽ. 24 Maʉ̃ne judíorãba bʉredrʉd'ape mawũãsid'a: ¿Bʉara daira sõmbeed'a bʉd'ebema bia k'awuabiga ẽã erunʉmaĩpe? Bʉta zhãrã Ẽdrʉbibʉrʉ daia jipa jaradua. 25 Mawũãnaĩ Jesúsbara panaʉ̃ mawũãsia: Mʉrã maʉ̃ta mʉã marãã jarasimina marãbara ĩjãna ẽã. Mʉ Zezed'eba mʉã k'ãrẽ onʉmʉba jipa k'awuabi b'ʉa mʉrã maʉ̃ta. 26 Mawũãmina marãbara ĩjãna ẽã mʉrẽnebemata duanu ẽbaera mʉã marãã jarad'a kĩrãk'a. 27 Mʉ ovejarãbara mʉ bed'eara ũrĩ b'ea, mʉãrã ãzhira ũduk'awua b'ʉa, mʉrã aramaʉ̃ne pẽwã b'ea. 28 Mʉãrã ded'ekaya Daizeze ũme b'ai jõ ẽãta, mawũẽ aduad'a ẽã, miõba jãrĩkua ẽã mʉ juwuad'ebara. 29 Mʉ Zezera ãzhita mʉãã diad'ara jõmaʉ̃ audre zhi zroma, mawũẽ miõba jãrĩkua ẽã mʉ Zeze juwuad'ebara. 30 Mʉrã mʉ Zeze ũme ab'aʉta panʉã. 31 Mawũãbʉrʉ k'area judíorãbara wakusa mong'arata jirakua edasid'a tab'ari bead'aita. 32 Mawũẽ Jesúsbara mawũãsia: Mʉãrã mʉ Zezed'eba biata bio onʉmʉta marãã ũdubiga nʉmʉã. ¿Mawũẽ maʉ̃rãnebema sãʉ̃ k'area mʉrã mong'araba tab'arid'aipe? 33 Mawũãĩ judíorãbara panaʉ̃ mawũãsid'a: Bʉa biata ob'ʉ k'area mong'araba tab'arid'aita k'opanʉ ẽã, awuarabʉrʉ tab'arid'aya Daizezema mitia bed'ea b'ʉd'eba, aramaʉ̃ne bʉra beubari b'ʉta Daizezea ab'ʉa. 34 Mawũãnaĩ Jesúsbara panaʉ̃ mawũãsia: ¿Marã ũrãg'ata b'ʉ tab'ʉd'era Daizezebara mawũãsi ẽka: Mʉã zhi jarama marã dai zezerãta? 35 Mawũã dai zezerãta jarasia izha bed'eata jarak'ad'ata, maʉ̃ta zhi b'ʉmarã mawũã ẽã ab'ed'a ẽã. 36 ¿Maʉ̃ne mʉrã mʉ Zezeba jʉrʉpe naʉ̃ ẽjũãẽna zok'ad'ata, marãbara bʉra Daizezema mitia bed'eabʉrʉa abʉda ẽka, bari mʉã jarabʉrʉd'eba mʉrã Daizeze Warrata? 37 Mʉ Zezeba ob'ʉta mʉã o ẽbʉrʉ, mʉã jara nʉmʉrã ĩjãrãũdua. 38 Mawũãmina mʉã onʉmʉbʉrʉ, mʉã jara nʉmʉta ĩjãna ẽãsid'a, maʉ̃ mʉã onʉmʉta ĩjãũdua, aramaʉ̃ne k'awuad'aya mʉ Zezera mʉne b'ʉta, mʉrã mʉ Zezed'e b'ʉta. 39 Mawũãbʉrʉ k'area wakusa jida krĩñasid'a, mawũãmina Jesús ẽdrʉsia ãzhi juwuad'ebara. 40 Mobe wakusa wãsia Jordán do kĩrãrẽ, naara Juanba zhãrã buru k'oe b'ad'aid'u, mobe b'esia mama. 41 Maʉ̃nerã bio izhima ze nʉmʉbara mawũã duanasia: Ũdud'ak'ara Juanbara o ẽbasia, mawũãmina naʉ̃ Jesúsd'ebemata Juanba jarad'ara jõma wãrĩnu basia. 42 Aramaʉ̃ne Jesúsd'ebema mama bioba ĩjãsid'a.
Lázaro beud'a
1 Lázaro abadata k'aya nʉmʉta Betania pʉwʉrʉd'ebema basia, zhi nawek'aurãsid'a Maríata, Marta ũme maʉ̃ pʉwʉrʉd'ebema basia. 2 Maʉ̃ Maríara Lázaro k'aya nʉmʉ nawek'aubara tẽãne kerata Jesús jẽrũne ʉ̃rʉ̃ weape izhi bud'aba põãsã jaresia. 3 Zhi nawek'aurãbara bed'eata jarabuesid'a Jesúa mawũãnamarẽã: Nok'ó, bʉa kʉãg'ara k'aya nʉmʉã. 4 Jesúsbara maʉ̃ta ũrĩpe mawũãsia: Maʉ̃ mawũã k'aya nʉmʉrã bari beuid'ebema ẽã, awuarabʉrʉ Daizeze zhi zromata k'awuad'aid'ebema, mʉ Daizeze Warrata zhi zromata k'awuad'aid'ebema. 5 Martara, Maríara, Lázarora Jesúsbara kʉãg'a basia. 6 Lázaro k'aya nʉmʉta ũrĩbʉrʉd'era wad'i ewari ũme b'esia izhi b'ad'a maẽ. 7 Mobe maʉ̃ tẽã izha jʉrʉkuad'aa mawũãsia: Wakusa wãdrʉ Judea druaed'a. 8 Mawũãĩ izha jʉrʉkuad'abara mawũãsid'a: Miã Ũrãg'abari, dããrã ba ẽã judíorãba bʉra mong'araba tab'arid'ai bad'apead'ara. ¿Maʉ̃ta wakusa maĩnu wãĩka? 9 Mawũãnaĩ Jesúsbara panaʉ̃ mawũãsia: ¿Ewarira doce hora ʉ̃na nʉmʉ ẽka? Ewarid'e nimirã tenedrʉ ẽã ẽjũã ʉ̃nata ũdu b'ʉba. 10 Mawũãmina diamase nimirã tenedrʉya ʉ̃na nʉmʉ ẽãba. 11 Mawũãpe mawũãsia: Dazhirã bawara zhibiara Lázaro k'ãĩ nʉmʉã, mawũãmina mʉrã wãña ʉ̃rʉ̃mane. 12 Mawũãĩ izha jʉrʉkuad'abara mawũãsid'a: Nok'ó, mawũã k'ãĩ nʉmʉbʉrʉ b'eya. 13 Mawũã jarabʉrʉbara Jesúsbara jara krĩñasia Lázaro beusita, mawũãmina ãzhara krĩchasid'a jarabʉrʉta ẽnaʉ̃ k'ãĩ nʉmʉta. 14 Mawũẽ Jesúsbara jipa jara mawũãsia: Lázaro beusia. 15 Mʉrã marã k'area sobia b'ʉta mama b'a ẽbad'aba marãbara mʉnebema audre ĩjãnaña, mawũẽ wãnaña izhima. 16 Mobebʉrʉ Tomás Memerã abadabara dewaraurã Jesúsba jʉrʉkuad'aa mawũãsia: Dazhirãsid'a wãnaña izhi bawara beud'e.
Jesúsbara beud'ara piradrʉbiya
17 Jesús zebʉrʉd'era Lázaro wuag'ad'apead'ara ya ewari kĩmarẽ nʉmasia. 18 Betania pʉwʉrʉra b'asia Jerusalén k'aita, zhi wawarata b'asia kilómetro ũbea. 19 Judíorã bio zesid'a Martama, Maríama, aramaʉ̃ne k'opayad'aita ãzhi mebeata beusi baera. 20 Martabara Jesús uruta ũrĩbʉrʉd'era kĩrãzhu wãsia, mawũãmina Maríara b'esia ded'a. 21 Martabara Jesúa mawũãsia: Nok'ó, bʉta nama b'asibʉrʉ mʉ nawewaura beu ẽbak'ausia. 22 Mawũãmina mʉãrã k'awua b'ʉa jõma bʉa Daizezea wid'ibʉrʉra izhara arib'aeya. 23 Mawũãĩ Jesúsbara mawũãsia: Bʉ nawewaura beud'ata piradrʉya. 24 Mawũãĩ Martabara mawũãsia: Mʉãrã k'awua b'ʉa beud'ata piradrʉita beud'apead'ata piradrʉbʉdad'e ewari jõbʉrʉd'e. 25 Mawũãĩ Jesúsbara mawũãsia: Beud'ara mʉã piradrʉbipe Daizeze ũme b'ai jõ ẽã b'abiya. Mʉnebemata ĩjã b'ʉra beubʉrʉsid'a zok'ai b'aya. 26 Zok'ai b'eba mʉnebemata ĩjã b'era jipa beu ẽã. ¿Maʉ̃ bʉara ĩjãĩka? 27 Mawũãĩ izhara mawũãsia: Ããjã Nok'ó, mʉãrã ĩjã b'ʉa bʉra zhãrã Ẽdrʉbita Daizeze Warrata zesia naʉ̃ ẽjũãẽna.
Jesús jẽgad'a Lázaro wuag'ad'apead'a maẽ
28 Mawũãpe Martabara zhi mebea María trʉ̃ne wãpe chupea mawũãsia: Miã Ũrãg'abarira nama b'ʉa, bʉta trʉ̃ k'ob'ʉa. 29 Maríabara maʉ̃ta ũrĩpe ĩñabasia piradrʉpe zesia Jesúsma. 30 Jesús wad'i pʉwʉrʉd'e ed'a ze ẽbasia, awuarabʉrʉ b'asia Martaba ũdud'a maẽ. 31 Ded'a judíorã María k'opaya b'ebara María ĩñabasia piradrʉpe wãbʉrʉta ũdud'ai, k'aid'u wãbʉdata mawũãsid'a: Zhi mebea wuag'ad'apead'aid'u jẽgad'e wã. 32 María Jesús k'ob'ʉ maẽ zebʉrʉd'e ũdui, izhi jẽrũ k'aita sãk'ok'od'e k'ob'epe mawũãsia: Nok'ó, bʉta nama b'asibʉrʉ mʉ nawewaura beu ẽbak'ausia. 33 Jesúsbara María jẽga b'ʉta ũdubʉrʉd'e, judíorã izhi k'opaya b'esid'a jẽga k'ob'eta ũdui k'ãbãẽã sopuasia. 34 Mawũẽ mawũãsia: ¿Sãma wuag'asid'a? Mawũãĩ mawũãsid'a: Nok'ó, akʉd'e zerua. 35 Jesús jẽgasia. 36 Mawũẽ judíorãbara mawũãsid'a: Akaudua sãwũã kʉãg'a basita. 37 Maʉ̃rã ʉ̃kʉrʉbara mawũãsid'a: ¿Naʉ̃bara daʉb'errea b'ʉta ne ũdubid'ara, Lázarosid'a beubi ẽbaid'e b'asi ẽka?
Beud'ata piradrʉd'a Lázaro
38 Jesús wakusa k'ãbãẽã sopua zesia Lázaro wuag'ad'apead'a maẽ. Mama zob'eata nʉmʉta mong'ara zromaba tapa nʉmasia. 39 Mawũẽ Jesúsbara mawũãsia: Mong'ara ãĩ edaudua. Maʉ̃ne Marta zhi beud'a nawek'aubara mawũãsia: Nok'ó, ya ʉ̃siasia ewari kĩmarẽ basi baera. 40 Mawũãĩ Jesúsbara mawũãsia: ¿Mʉã bʉaa jarasi ẽka bʉa mʉnebemata ĩjãrã ũduita zarea Daizezed'era? 41 Mobebʉrʉ beud'ata b'ʉd'apead'a maẽbara mong'ara ãĩ edasid'a. Mawũẽ Jesúsbara ʉ̃taa akʉ mawũãsia: Zeze, mʉã bʉaa zhibia jiya mʉã wid'id'ara bʉa ũrĩbʉrʉba. 42 Mʉãrã k'awua b'ʉa bʉara mʉ bed'eara baridua ũrĩ b'ʉta, mawũãmina mʉrã mawũã bed'eabʉrʉa k'abanata za k'ob'e k'area, aramaʉ̃ne ĩjãnamarẽã mʉrã bʉa zok'ad'ata. 43 Mawũãpe nemi jĩgua mawũãsia: ¡Lázaro ãĩ zerua! 44 Mawũãĩ beud'ara ãĩ zesia, juwuata jẽrũta bʉra chub'asia wuaba, kĩrãsid'a bʉra chub'asia pañueloba. Mawũẽ Jesúsbara mawũãsia: Ẽnaʉ̃dua tebamarẽã.
Krĩcha jʉrʉd'apead'a bead'aita Jesús
45 Mobebʉrʉ judíorã bio María k'opayad'aita zed'apead'abara Jesúsba mawũã obʉrʉta ũdud'ape ĩjãsid'a izhid'ebemata. 46 Mawũãmina maʉ̃rãnebema ʉ̃kʉrʉra fariseorãma wãpe jarasid'a Jesúsba mawũã obʉrʉta. 47 Mawũẽ sacerdoterã nok'orãbara, fariseorãbara, nok'orã wag'aurãta ãba jʉred'ape mawũãsid'a: ¿K'ãrẽta od'aipe? Jesúsbara bio onʉmʉã ũdud'ak'ata. 48 K'ãwũã idaribid'ara izhid'ebemata jõmaʉ̃ba ĩjãnaña, k'ãwũãrã Roma bid'arãta zed'ape Daizeze de dazhirãnerã ãrĩnaña, dazhirãsid'a beakuad'aya. 49 Mawũãnaĩ ãzhirãnebema ab'a Caifás maʉ̃ añone sacerdote wag'auta b'ʉba mawũãsia: Marãbara miã k'ãrẽta k'awuad'a ẽã. 50 Miã marãbara k'awuad'a ẽã ũmakĩrã ab'a jõmaʉ̃bari beuita audre bigata, Roma bid'arãba judíorã jõma bead'ai k'ãñabara. 51 Mawũãbʉrʉra izhikusauba mawũã ẽbasia, awuarabʉrʉ maʉ̃ añone izhita sacerdote wag'auta b'ʉ baera Daizezed'eba mawũãsia Jesús beuita judíorã jõmaʉ̃bari. 52 Bari judíorãbari beuita ẽã, awuarabʉrʉ beuita Daizeze warrarã ab'a nʉmʉĩta druaza b'eta. 53 Aramaʉ̃ne maʉ̃ ewadeba krĩchasid'a Jesús bead'aita. 54 Maʉ̃ k'area judíorãne ed'ara Jesús ya dajada nimiba ẽbasia, awuarabʉrʉ mamaʉ̃bara wãsia drua drudrua tab'ʉ k'aita, pʉwʉrʉta Efraín abadaid'u wãsia, mobe mama b'esia izha jʉrʉkuad'a bawara. 55 K'aita bata nʉmasia Egiptod'eba ẽzoad'ata krĩcha fiesta obadata judíorãba, mawũẽ fiesta nawed'a bio wãrĩzesid'a Jerusalén pʉwʉrʉed'a, Daizeze kĩrãbita nene ẽã k'ob'aid'ebemata od'ai k'area. 56 Zhãrãbara Jesús jʉrʉ b'eta Daizeze ded'a ewara maẽ ãzhirãĩnu mawũãsid'a: ¿Marãma sãwũãpe? ¿Fiesta bad'era zeibʉka? 57 Sacerdoterã nok'orãbara, fariseorãbara jarasid'a iab'aʉba sãma b'ʉta k'awuara jaramarẽã jidad'aita.
Jesús jẽrũne kerata wead'apead'a
1 Egiptod'eba ẽzoad'ata krĩcha fiesta obadata ewari seis wãẽã nʉmʉne, Jesús Betania pʉwʉrʉed'a zesia Lázaro b'ʉ maẽ, maʉ̃ beud'ata izha piradrʉbid'a basia. 2 Mama Jesúita zhiko osid'a, Martaba ne jed'ekasia, Lázaro jewed'a k'ob'asia zhãrã Jesús bawara nek'o duanune ed'a. 3 Maríabara kera nardo izhiawa kiruta botellad'e nʉmʉta ne ʉ̃tʉta jiraedape weasia Jesús jẽrũne, mobe izhi bud'aba põãsã jaresia, aramaʉ̃ne dera jõma tũã nʉmesia keraba. 4 Maʉ̃ne Jesúsba jʉrʉkuad'ata ab'a Juda Iscariote Simón warraba Jesús chãb'ariita b'ʉba mawũãsia: 5 ¿Naʉ̃ kera k'ãrẽã nendo ẽbasi, ewari treciento trajad'abari nendoid'e b'asi ẽka denario trecientobari, mobe platara diaid'e b'asi ẽka zuburia b'ea? 6 Judabara mawũã ẽbasia zuburia b'eta krĩcha b'ʉba, awuarabʉrʉ mawũãsia nezrʉgamiãta b'ʉ baera. Zũbita izha erub'ʉba zrʉga b'asia ãzhi jõmaʉ̃ĩta plata ed'a kenab'ari panʉnebemata. 7 Mawũẽ Jesúsbara mawũãsia: Idaribirua, Maríabara mʉ wuag'a b'ʉd'ai ewariita wuag'a erub'asia naʉ̃ kerara. 8 Zuburia b'era marã bawara ewariza b'eaya, mawũãmina mʉrã marã bawara ewariza b'a ẽã.
Krĩcha jʉrʉd'apead'a bead'aita Lázaro
9 Judíorãbara k'abanaba k'awuasid'a Jesús Betania pʉwʉrʉd'e b'ʉta, mawũẽ maĩnu zesid'a, bari Jesús akʉd'e zed'a ẽbasia, awuarabʉrʉ Lázarosid'a akʉd'e zesid'a, beud'ata Jesúsba piradrʉbid'ata. 10 Mawũẽ sacerdoterã nok'orãbara krĩchasid'a bead'aita Lázarosid'a. 11 Maʉ̃ẽnabema Lázarod'eba judíorã bioba ãzhira kenab'arisid'a, mobe ĩjãsid'a Jesúsd'ebemata.
Jesús ed'a wãna Jerusalénne
12 Jerusalén pʉwʉrʉed'a k'abanata fiesta bad'e zed'apead'abara nrũẽmane ũrĩsid'a Jesúsid'a uruta. 13 Mawũẽ pãrãrã kiduata tʉd'ape kĩrãzhu wãsid'a, maʉ̃nerã nemi jĩgua mawũãsid'a: ¡Daizezera ibia jarad'aya!¡Ibia jarad'aya Daizezed'eba zebʉrʉra, izhira Rey Israel b'ed'ea! 14 Jesúsbara burro kũrãta ũdupe ʉ̃rʉ̃ b'arisia, maʉ̃ẽnabemata zhi b'ʉmata mawũã b'ʉa: 15 Perarãũdua marã Jerusalénne b'era, marã Reyra urua, burro kũrãne ʉ̃rʉ̃ b'ari urua. 16 Izha jʉrʉkuad'abara maʉ̃ naarara sãwũãrã k'awuad'a ẽbasia, mawũãmina Jesús ʉ̃taa wãna tẽãne bude basid'a maʉ̃ izhi ʉ̃rʉ̃bemata b'ʉ tab'ed'e od'apead'ata. 17 Zhãrã Jesús bawara k'ob'ead'abara awʉrʉa nebʉrʉsid'a Lázaro trʉ̃bʉrʉd'era beud'ata piradrʉbid'ata. 18 Maʉ̃ k'area zhãrãbara Jesús kĩrãzhu zesid'a, ũrĩsid'a baera izha od'ata maʉ̃ ũdud'ak'ata. 19 Mawũãmina fariseorãbara ãzhirãĩnu mawũãsid'a: Marãba akʉ b'e kĩrãk'ara dazhirãbara miã k'ãrẽta ob'ed'a ẽã. Akaudua sãwũã jõmaʉ̃ba pẽwã duaĩnata.
Griegorã ʉ̃kʉrʉba jʉrʉd'apead'a Jesús
20 Ʉ̃kʉrʉ griegorãta duanasia Jerusalén pʉwʉrʉed'a wãrĩzekuad'ara Daizeze ibia jarad'aita fiestad'e. 21 Maʉ̃rãbara Felipeta orrasid'a, Felipera Betsaida pʉwʉrʉd'ebema basia, maʉ̃ pʉwʉrʉra Galilea druad'ebema, mawũã orrad'ape zuburia bed'ea mawũãsid'a: Daibara ũdu krĩña panʉã Jesústa. 22 Felipera wãpe jarasia Andrea, aramaʉ̃ne Andrésba Felipe ũmeba jarasid'a Jesúa. 23 Mawũẽ Jesúsbara panaʉ̃ mawũãsia: Ewarira arabasia mʉ Beubari Bape b'ʉra beud'ata piradrʉpe ʉ̃taa wãĩta. 24 Mʉã wãrĩnu marãã jaraya, trigo ta egorod'e ubudata pãwãrãĩta beu ẽbʉrʉ ab'abai b'aya, mawũãmina pãwãrãĩta beura, waripe bio zauya. 25 B'a krĩñaba mʉ k'area beu ẽãrã aduaya, mawũãmina naʉ̃ ẽjũãne b'a krĩña ẽkĩrãk'a mʉ k'area beubʉrʉra Daizeze ũme b'ai jõ ẽã b'aya. 26 Iab'aʉba mʉ bed'eata arib'ae nʉmʉbara mʉta pẽwãdua, mawũãrã mʉ b'ʉ maẽ b'aya mʉ bed'eata arib'ae b'ʉra. Iab'aʉba mʉ bed'eata arib'ae b'ʉra mʉ Zezebara bia edaya.
Jesúsba jarad'a izhi beuita
27 Mʉrã sopua k'ob'ʉa. ¿Mʉãrã k'asia aipe? ¿Zeze mʉrã k'arebarua, mʉrã zuburiabirãrũã aika? Mawũãmina mʉrã zesia maʉ̃ k'area. 28 Mawũẽ mʉãrã mawũãña: Zeze, bʉra zhi zromata ũduk'awabigarua. Maʉ̃ne Daizeze ʉ̃treba bed'eabʉrʉta mawũãsia: Mʉrã zhi zromata ũduk'awabiga b'ʉta mʉãrã wakusa ũduk'awabigaya. 29 K'abanata mama k'ob'ebara maʉ̃ bed'eata ũrĩbʉdad'era jarasid'a bata. Waya awʉrʉrãbara mawũãsid'a: Ángelta Jesúa bed'eabʉrʉa. 30 Mawũãnaĩ Jesúsbara mawũãsia: Mawũã bed'eabʉrʉra mʉĩtabema ẽã, awuarabʉrʉ marãĩtabema. 31 Arababʉrʉa Daizezebara k'awua okuaita naʉ̃ ẽjũãne b'era, arababʉrʉa ãtõmiã naʉ̃ ẽjũãne nok'ota b'ʉra Daizezebara ãĩ jʉretaita. 32 Mʉta druad'e cruzd'e jirab'ʉd'ai mʉãrã jõmaʉ̃ã ĩjãbigaya mʉnebemata. 33 Mawũã jarabʉrʉbara Jesúsbara jara krĩñasia sãwũã beuita. 34 Zhãrãbara mawũãsid'a: Daiba ũrĩbadara ũrãg'ad'era jara b'ʉa zhãrã Ẽdrʉbira beuk'ata. ¿Maʉ̃ta bʉara sãwũã Beubari Bape b'ʉra cruzd'e jirab'ʉd'aya abʉrʉ? ¿Mobera k'aipe maʉ̃ Beubari Bape b'ʉra? 35 Mawũãnaĩ Jesúsbara mawũãsia: Wad'i ewari k'akutua mʉta ʉ̃nata marãne ed'a b'ʉa. Mʉ ũme nimibaudua wad'i eruduanuwed'a mʉta ʉ̃nata, mawũãrã marãĩtara keubʉrʉ kĩrãk'a toto ẽbaya, pãrĩguad'e nimibara k'awua ẽã sãmaã wãrã. 36 Ʉ̃nata eruduanuwed'a ĩjãũdua ʉ̃nanebemata, aramaʉ̃ne b'eaita ʉ̃na warrarãta. Jesúsbara maʉ̃ta jarape wãpe merũsia zhãrã k'area.
Ĩjã ẽã nʉmeãna judíorãbara
37 Jesúsbara ũdud'ak'ata ãzhi kĩrãbita okuasiid'u ĩjãna ẽbasia izhid'ebema. 38 Aramaʉ̃ne arimaẽ berab'arisia Daizezeba bed'eata jarabibariba Isaíaba mawũãnata: Nok'ó, ¿k'aiba ĩjãbʉrʉ bed'eata dazha jarabʉdara? ¿K'aiba k'awuabʉrʉ bʉra zhi zromata? 39 Maʉ̃neba ĩjã b'ed'a ẽbasia, maʉ̃ẽnabemata Isaíabara dewara mawũãsia: 40 Daizezebara mawũãsia: Ĩjãna ẽãba mʉãrã ãnatʉsia ãzhi dabʉra, zarea duanusia ãzhi sora, aramaʉ̃nerã ũdud'a ẽã dabʉbara, sãwũãta k'awuad'a ẽã sobara, miã k'azhiruara ãmape mʉ pẽwãna ẽã mʉã ẽdrʉbigaira. 41 Isaíabara maʉ̃ta jarasia k'ãĩmok'arad'e kĩrãk'a ũdud'aba Jesús zhi zromata b'aita, mawũẽ jarasia izhid'ebemata. 42 Isaíaba mawũã jarasimina judíorãta nok'orãbara bioba ĩjãsid'a Jesúsd'ebema. Mawũãmina ĩjã b'ea ad'a ẽbasia wawia b'eba fariseorãta, aramaʉ̃ne ed'a wãbi ẽã nʉmʉna ẽbamarẽã de zhi jʉrebada maẽ. 43 Aramaʉ̃ne zhãrãba bia jaraita krĩña b'easia Daizezea bia jarabid'ai k'ãñabara.
Jesús bed'eaba k'awua oya zhãrã b'era
44 Jesúsbara nemi jĩgua mawũãsia: Mʉnebemata ĩjã b'ʉra bari mʉnebemata ĩjã b'ʉ ẽã, awuarabʉrʉ ĩjã b'ʉa mʉ zok'ad'ad'ebemata. 45 Mʉta ũdu b'ʉbara ũdu b'ʉa mʉ zok'ad'ata. 46 Mʉta ʉ̃nata zesia naʉ̃ ẽjũãẽna, mʉnebema ĩjãbʉdara pãrĩguad'e b'ea ẽbamarẽã. 47 Mʉ bed'eata ũrĩpe arib'ae ẽãrã mʉãrã k'awua o ẽã, mʉrã zhãrã k'awua oita ze ẽbasi baera naʉ̃ ẽjũãẽna, awuarabʉrʉ mʉrã zesia zhãrã ẽdrʉbigaita ẽjũãne b'eta. 48 Mʉta seribi ẽãba mʉ bed'eata ĩjã ẽãbara erub'ʉa k'aiba pua k'awua oira, bed'eata mʉã jara nʉmʉba maʉ̃neba Daizezeba k'awua oya ewari jõbʉrʉd'e. 49 Mʉrã bed'ea nʉmʉ ẽã mʉzhikusauba, awuarabʉrʉ mʉ Zeze mʉ zok'ad'aba jarasia k'ãrẽ jarai b'ʉra sãwũã jaraita. 50 Mʉãrã k'awua b'ʉa izha mʉãã jarabi nʉmʉrã izhi ũme b'ai jõ ẽãnebema. Mawũẽ mʉã jara nʉmʉrã jara nʉmʉã mʉ Zezeba mʉãã jarad'ad'e.
Jesúsba jẽrũ sʉgʉkuad'a izha jʉrʉkuad'ata
1 Egiptod'eba ẽzoad'ata krĩcha fiesta obada nawed'a, Jesúsbara k'awua b'asia ewari arabata naʉ̃ ẽjũãnebara zhi Zezema wãĩta, izhi pẽwã b'eta naʉ̃ ẽjũãne b'era kʉãg'aba kʉãg'asia druad'e b'ʉ ewarita jõbʉrʉid'u. 2 Dauja zhiko k'obʉdad'era ãtõmiãbara Simón warra Juda Iscariotera sod'era ya krĩchabisia Jesús chãb'aribiita. 3 Jesúsbara k'awua b'asia zhi Zezebara ne jõma izhaa chãb'arid'ata, k'awua b'asia izhira Daizeze maẽba zed'ad'eba Daizezema wãĩta. 4 Maʉ̃ba nek'o k'ob'ed'e Jesús piradrʉpe wua ãneb'ari b'ʉta wẽãpe toallata jiraedape tãjʉ̃ k'ob'ʉsia kʉrrʉd'e. 5 Mobebʉrʉ poncherad'e baniãta weape izha jʉrʉkuad'ata jẽrũ sʉgʉkua põãsã jaresia toalla kʉrrʉd'e tãjʉ̃naba. 6 Aramaʉ̃ne Pedroid'u babʉrʉd'era maʉ̃bara mawũãsia: ¿Nok'ó, bʉa sʉgʉika mʉ jẽrũta? 7 Mawũãĩ Jesúsbara panaʉ̃ mawũãsia: Mʉã obʉrʉra k'ãwũãwed'ara bʉara sãwũãta k'awua ẽã, mawũãmina tẽãne k'awuaya. 8 Mawũãĩ Pedrobara mawũãsia: Bʉara sʉgʉ ẽã mʉ jẽrũrã. Mawũãĩ Jesúsbara panaʉ̃ mawũãsia: Mʉã bʉ jẽrũta sʉgʉ ẽbʉrʉ, bʉra mʉnebema ẽã. 9 Mawũãĩ Simón Pedrobara mawũãsia: Mobera Nok'ó, bari mʉ jẽrũta ẽã, awuarabʉrʉ mʉrã sʉgʉ b'ʉdua juwuata buruta. 10 Mawũãĩ Jesúsbara mawũãsia: Kuid'ara jaigu ẽãba jẽrũtrʉ sʉgʉid'e b'ʉa jõma nene ẽãba. Marã jaigu ẽã b'ea, mawũãmina jõma ẽã. 11 Jesúsbara k'awua b'asia izhira k'aiba chãb'ariita, maʉ̃ba mawũãsia: Marã jõma nene ẽã duanu ẽã. 12 Mawũã jẽrũ sʉgʉkuape wakusa izhi wuata ãneb'aripe wakusa jewed'asia mesa maẽ, mobe mawũãsia: ¿Marãbara sãwũãta k'awuabʉdak'a mʉã marã k'ãwũã obʉrʉd'ebema? 13 Marãbara mʉrã jara b'ea Miã Ũrãg'abarita, Nok'ota, mawũã jarad'aira biga mʉrã maʉ̃ baera. 14 Mʉta Nok'ota Miã Ũrãg'abarita b'ʉba marã jẽrũta sʉgʉbʉrʉba, marãsid'a ab'arika jẽrũ sʉgʉd'aibara zhiya. 15 Mʉãrã marã k'ãwũã obʉrʉa marãbid'a ab'arika od'amarẽã. 16 Mʉã wãrĩnu marãã jaraya: Nezok'ara audre zhi zroma ẽã izhi nok'o k'ãñabara, miã zok'abuebʉdara audre zhi zroma ẽã izhi zok'abuebʉrʉ k'ãñabara. 17 Maʉ̃ta sãwũãta k'awuad'ara Daizezebara sobia b'eabiya arib'aed'ara. 18 Mʉãrã marã jõma jara k'ob'ʉ ẽã, mʉãrã k'awua b'ʉa k'airãta jʉrʉkuad'ata. Mawũãmina arimaẽ berab'arii barata zhi b'ʉmata mawũã b'ʉa: Mʉ ũme nek'o b'ʉra mʉ ʉ̃rʉ̃ baya. 19 Mʉãrã maʉ̃ta nawed'a marãã jarabʉrʉa, mawũã berab'aribʉrʉd'era ĩjãnamarẽã Mʉrã Mʉta. 20 Mʉã wãrĩnu marãã jaraya: Mʉã zok'abʉrʉta bia edabʉrʉra mʉta bia edabʉrʉa, mʉ Zeze mʉ zok'ad'ata bia edabʉrʉa.
Jesúsba jarad'a izhi chãb'ariita Judaba
21 Jesúsbara maʉ̃ta jarape k'ãbãẽã sopua mawũãsia: Mʉã wãrĩnu marãã jaraya, marãnebema ab'aʉba mʉrã chãb'ariya. 22 Mawũãĩ izha jʉrʉkuad'ara ãzhirãĩnu zhiya akʉsid'a k'aita jara k'ob'ʉta k'awuad'a ẽãba. 23 Izha jʉrʉkuad'ata ab'a Jesúsba kʉãg'ata k'ob'asia Jesús k'aita. 24 Mawũẽ Pedrobara maʉ̃ã juwuaba jarasia wid'imarẽã k'aita jara k'ob'ʉta. 25 Mawũẽ maʉ̃bara Jesústa audre k'aita orrape mawũãsia: Nok'ó, ¿bʉ mawũã oira k'aipe? 26 Mawũãĩ Jesúsbara panaʉ̃ mawũãsia: Mʉã panta sõmberape diataya, maʉ̃ta izhia. Mawũãpe pan sõmberape Juda Iscariotea diasia Simón warraa. 27 Maʉ̃ta k'obʉrʉd'era ãtõmiã ed'a izhid'e wãsia. Mawũẽ Jesúsbara mawũãsia: Bʉzha oira ĩñabasia odua. 28 Mawũãmina nek'o duanubara miõba k'awuad'a ẽbasia k'ãrẽã mawũãbʉrʉra. 29 Ʉ̃kʉrʉbara krĩchasid'a Judabara zũbi plata atauta erub'ʉba Jesúsbara mawũãsita: Edarua dazhirãba fiestad'e nesid'ara, o mawũãsi ẽbʉrʉ jarasita k'ãrẽ diamarẽã zuburia b'ea. 30 Judabara pan k'ope aramaʉ̃ta wãsia. Maʉ̃nerã ya diamase nʉmasia.
Arib'aeita zhiwid'ia
31 Juda wãbʉrʉd'era Jesúsbara mawũãsia: K'õbebʉrʉ Daizezebara zhi zromata ũduk'awabigaya mʉ Beubari Bape b'ʉra, izhi Daizezesid'a zhi zromata ũduk'awabigaya mʉneba. 32 Daizezeba izhira zhi zromata mʉneba ũduk'awabigabʉrʉd'era, Daizezebara ab'arika ũduk'awabigaya mʉrã zhi zromata, dããrã ẽãne mawũã oya. 33 Warrarã, mʉrã marã bawara k'ob'aya aritiaed'a. Marãbara mʉrã jʉrʉd'aya, mawũãmina judíorãã mʉã jarad'a kĩrãk'a mʉã marãã jaraya: Mʉ wãĩma marã wã b'ed'a ẽã. 34 Arib'aeita zhiwid'ita mʉã marãã jaraya: Zhiya kʉãg'audua, mʉã marãta kʉãg'a b'ʉ kĩrãk'a. 35 Mawũãtrʉ jõmaʉ̃ba k'awuad'aya marã mʉ pẽwã b'eta, zhiya kʉãg'a b'ebʉrʉ.
Jesúsba jarad'a Pedroba ũduk'a aita
36 Pedrobara Jesúa mawũãsia: Nok'ó, ¿bʉra sãmaã wãĩpe? Mawũãĩ Jesúsbara panaʉ̃ mawũãsia: Mʉ wãĩma k'ãwũãwed'ara bʉra mʉ k'aid'ura wã b'e ẽã, mawũãmina mʉ k'aid'u zeya tẽã. 37 Mawũãĩ Pedrobara mawũãsia: Nok'ó, ¿mʉrã k'ãrẽneba k'ãwũãwed'ara bʉ k'aid'u wã b'e ẽpe? Mʉrã bʉ k'area beuya. 38 Mawũãĩ Jesúsbara panaʉ̃ mawũãsia: ¿Bʉta beuika mʉ k'area? Mʉã wãrĩnu bʉaa jaraya: Gallora beru ẽã bʉa mʉta ũduk'ata jarama ũbea jara ẽwed'ara.
Jesústa oa wãĩta Daizezema
1 Sopuarãũdua. Ĩjãũdua Daizezed'ebemata, ĩjãũdua mʉnebemasid'a. 2 Mʉ Zeze ded'ara sãma b'aira bio b'ʉa, mawũã b'ʉ ẽbʉrʉ mʉã marãã jarak'ausia. Mawũẽ mʉrã wãña sãma b'aita arib'aed'e marãĩta. 3 Mʉrã mawũã wãpe sãma b'aita arib'aepe mʉrã wakusa zeya marã mʉzhi bawara jʉre edeita, aramaʉ̃ne mʉ b'ʉ maẽ marãsid'a b'eamarẽã. 4 Marãbara k'awua b'ea mʉ sãmaã wãĩrã, k'awua b'ea ora. 5 Mawũãĩ Tomásba mawũãsia: Nok'ó, daibara k'awuad'a ẽã bʉ sãmaã wãĩrã, ¿mawũẽ daibara sãwũã k'awuad'aipe ora? 6 Mawũãĩ Jesúsbara mawũãsia: Mʉta oa, mʉta wãrã, mʉta b'ai jõ ẽãnebema. Mawũẽ miõta mʉ Zezema jũẽ ẽã, awuarabʉrʉ jũẽña mʉneba. 7 Marãba mʉta ũduk'awua b'easibʉrʉ, mʉ Zezesid'a ũduk'awua b'eak'ausia, nane wed'auba ũduk'awad'aya ũdu b'eba. 8 Mawũãĩ Felipeba mawũãsia: Nok'ó, daia ũdubigarua bʉ Zezeta, daira bari maʉ̃baa. 9 Mawũãĩ Jesúsbara mawũãsia: ¿Mʉrã marã bawara b'ʉta ewari bio bata, bʉa mʉrã ũduk'awa ẽka Felipe? Mʉta ũdu b'ʉbara mʉ Zezeta ũdu b'ʉa, ¿maʉ̃ta bʉara sãwũã mawũãbʉrʉ: Daia ũdubigarua bʉ Zezeta? 10 ¿Bʉara ĩjã ẽka mʉrã mʉ Zezed'e b'ʉta, mʉ Zezera mʉne b'ʉta? Mʉã bed'eata marãã jara nʉmʉrã mʉzhikusauba jara nʉmʉ ẽã, awuarabʉrʉ mʉ Zeze mʉne b'ʉba mʉneba k'ãrẽ onʉmʉã. 11 Ĩjãrũã mʉrã mʉ Zezed'e b'ʉta, mʉ Zezera mʉne b'ʉta. Maʉ̃ta ĩjã ẽbʉrʉ, ĩjãrũã mʉã k'ãrẽ onʉmʉneba. 12 Mʉã wãrĩnu marãã jaraya: Mʉnebemata ĩjã b'ʉbara mʉã k'ãrẽ onʉmʉta izhabid'a oya. K'ãrẽ audre oya mʉta wãĩ baera mʉ Zezema. 13 Jõma k'ãrẽ mʉ Zezea wid'ibʉdata mʉneba wid'ibʉdara mʉã arib'aeya, aramaʉ̃ne mʉ Zezeta zhi zromata ũduk'awad'amarẽã mʉ zhi Warrad'eba. 14 Mʉãã k'ãrẽta wid'id'ara mʉãrã arib'aeya.
Jesúsba zok'aita jarad'a Jawurebiata
15 Mʉta kʉãg'a b'ebʉrʉ arib'aeudua mʉã jara b'ʉta. 16 Mawũãrã mʉta zuburia bed'eaya mʉ Zezea, mobed'eba marãã diaya awʉrʉ marã K'arebata, aramaʉ̃ne marã bawara b'amarẽã ewariza. 17 Jawurebiara wãrãnebemata b'ʉa, mʉnebema ẽãta ẽjũãne b'ebara izhira jidad'aid'e b'ʉ ẽã ũdud'a ẽbaera, miã ũduk'awad'a ẽbaera. Mawũãmina marãbara ũduk'awua b'ea marã bawara b'ʉ baera, aramaʉ̃ne marãne b'aya. 18 Mʉã marã dob'a ãmaẽkua ẽã jẽrãmarãta b'e kĩrãk'a, mʉrã marãma zeya. 19 Mʉnebema ẽãta ẽjũãne b'ebara dããrã ẽãne mʉrã wueta ũdud'a ẽã. Mawũãmina marãbara mʉrã ũdud'aya. Mʉta b'ʉba marãsid'a b'eaya. 20 Mawũã ũdubʉda ewadera marãbara k'awuad'aya mʉrã mʉ Zezed'e b'ʉta, marãta mʉne b'eta, mʉta marãne b'ʉta. 21 Mʉã jara b'ʉta arib'ae b'ʉbara mʉrã kʉãg'a b'ʉa. Mʉta kʉãg'a b'ʉra mʉ Zezeba kʉãg'a baya, mʉãbid'a kʉãg'a baya, mobe mʉnebemata k'awuabi nʉmaña. 22 Mawũãĩ Juda awʉrʉba Iscariote ẽãba mawũãsia: Nok'ó, ¿bʉara sãwũã daiaabʉrʉ bʉd'ebemata k'awuabi nʉmaĩne k'awuabi nʉma ẽpe bʉd'ebema ẽãta b'eara ẽjũãne? 23 Mawũãĩ Jesúsbara panaʉ̃ mawũãsia: Mʉta kʉãg'a b'ʉbara mʉ bed'eata arib'aeya, mobed'eba mʉ Zezebara kʉãg'a baya, aramaʉ̃ne daira izhima zed'ape izhi bawara panaña. 24 Mʉta kʉãg'a ẽãbara mʉ bed'eara arib'ae ẽã. Mʉã jara nʉmʉ bed'eata ũrĩ b'era mʉrẽ ẽã, awuarabʉrʉ mʉ Zeze mʉ zok'ad'ad'ea. 25 Mʉã maʉ̃ jõma marãã jarabʉrʉa marã bawara b'ʉwed'a. 26 Mawũãmina marã K'arebata Jawurebiata mʉ Zezeba mʉbari zok'aibara maʉ̃bara marãã ne jõma jaraded'ekaya, bude babigaya jõma mʉã marãã jarad'ata. 27 Adu-a b'aid'ebemata mʉã marãĩta ãmaẽña, adu-a b'aid'ebemata mʉrẽta mʉã marãã diaya. Maʉ̃ mʉãrã ded'eka ẽã ẽjũãne b'eba aritiaed'a diabada kĩrãk'a. Mawũẽ sopuarãũdua, miã perarãũdua. 28 Marãbara ũrĩsid'a mʉã marãã mawũãnata: Mʉrã wãpe marãma zeya. Mʉta kʉãg'a b'ebʉrʉ marã sobiad'aid'e b'ʉa mʉã jarasi baera mʉrã mʉ Zezema wãĩta, mʉ Zezera zhi zromaneba mʉ audre. 29 Mʉã maʉ̃ta marãã jarabʉrʉa mawũã berab'arii nawed'a, mawũã berab'aribʉrʉd'era ĩjãnamarẽã. 30 Ya mʉrã marã bawara bio bed'ea ẽã ãtõmiãta uru baera naʉ̃ ẽjũãne nok'ota, izhira zarea ne ẽã mʉ ʉ̃rʉ̃rã. 31 Mawũãmina mʉãrã mʉ Zezera kʉãg'ata ẽjũãne b'eba k'awuad'amarẽã, mʉãrã mʉ Zezeba jarad'a kĩrãk'a onʉmʉã. Pirab'ariudua, wãdrʉ namaʉ̃bara.
Jesús wãrĩnu uva k'arra
1 Mʉrã wãrĩnu uva k'arra, waya mʉ Zezera zhi akʉbaria. 2 Jʉ̃k'ara mʉ k'arrad'ebema zhi zau ẽãrã izha tiaweya. Mawũãmina zhi zaubʉdara zhi tae seri ẽãtrʉ k'õkua araa oya audre zaumarẽã. 3 Aramaʉ̃ kĩrãk'a marã ya zhi araa omata b'ea, bed'eata mʉã marãã jara nʉmʉba. 4 Mʉ ũme b'eaudua, mobed'eba mʉrã marãne b'ʉa. Uva jʉ̃k'ara izhikusara zau ẽã zhi k'arra maẽba nʉmʉ ẽbʉrʉ, aramaʉ̃ kĩrãk'a marãbara Daizezeba krĩñarã ob'ed'a ẽã mʉ ũme duanu ẽbʉrʉ. 5 Mʉrã uva k'arra, waya marãta zhi jʉ̃k'ara. Mʉ ũme b'ʉra mʉrã izhid'e b'ʉba maʉ̃bara Daizezeba krĩñata bio oya. Mʉ ũme duanu ẽbʉrʉ miã k'ãrẽta ob'ed'a ẽã. 6 Mʉ ũme b'ʉ ẽãrã ãĩ b'ʉd'aya uva jʉ̃k'ara zau ẽã kĩrãk'a. Bagui jʉrepe tebʉd'e pepekuabada, mawũẽ eradrʉbaria. 7 Mʉ ũme b'ebʉrʉ, mʉ bed'eata arib'ae b'ebʉrʉ wid'iudua jõma mazha krĩñata, mʉã marãã diaya. 8 Mʉ Zezera zhi zromata nʉmabid'aya izha krĩñata bio ob'eba, aramaʉ̃ne mʉã jʉrʉkuad'ata b'eaya. 9 Mʉ Zezeba mʉ kʉãg'a kĩrãk'a, mʉãbid'a marã kʉãg'a, mawũẽ mʉã kʉãg'ata b'eaudua. 10 Mʉã jara b'ʉta arib'ae b'ebʉrʉ mʉã kʉãg'ata b'eaya, aramaʉ̃ kĩrãk'a mʉãrã mʉ Zezeba jara b'ʉta jõma arib'ae b'ʉa, mawũẽ mʉrã izha kʉãg'a. 11 Mʉã maʉ̃ta marãã jarabʉrʉa marã mʉ kĩrãk'a jipad'e sobia b'eamarẽã. 12 Mʉã jaraya k'ãrẽ arib'aeita: Zhiya zhi kʉãg'audua marãta mʉã kʉãg'a kĩrãk'a. 13 Kʉãg'ata k'ãbãẽã erub'ʉbara izhi bebuta diaya izhi bawara zhibiarãbari. 14 Marã mʉ bawara zhibiata b'ea mʉã jara b'ʉta arib'aed'ara. 15 Mʉã ya marã mʉ nezok'arã a ẽã, nezok'abara k'awua ẽbaera izhi nok'oba k'ãrẽ ob'ʉra. Awuarabʉrʉ mʉãrã mʉ bawara zhibiarã ab'ʉa, mʉ Zezed'eba k'ãrẽ jõma mʉã ũrĩnarã mʉã marãã k'awuabiga b'ʉba. 16 Mʉta marãba jʉrʉd'a ẽbasia, awuarabʉrʉ mʉã marãta jʉrʉkuasia, aramaʉ̃ne mʉã marã duanusia wãnape mʉ Zezeba krĩñata ob'eamarẽã, jipa maʉ̃trʉ ob'eamarẽã. Mawũãrã jõma k'ãrẽ mʉ Zezea mʉneba wid'ibʉdara izhara marãã diaya. 17 Mʉã marãã jaraya: Zhiya zhi kʉãg'audua.
Mʉnebema ẽãbara marã juradea
18 Mʉnebema ẽãta ẽjũãne b'eba marãta juradebʉrʉ, k'awuaudua mʉta jurad'apead'ata marã nawed'a. 19 Marãta mʉnebema ẽãta ẽjũãne b'ebʉrʉ, mʉnebema ẽãta ẽjũãne b'ebara kʉãg'a k'ausid'a ãzhirãrã. Mawũãmina marã mʉnebema ẽãta ẽjũãne duanu ẽã, awuarabʉrʉ mʉã marã jʉrʉkuasia mʉnebema ẽãta ẽjũãne b'eta. Maʉ̃ba mʉnebema ẽãta ẽjũãne b'ebara marã juradea. 20 Bed'eata bude baudua mʉã marãã mawũãnata: Nezok'ara audre zhi zroma ẽã izhi nok'o k'ãñabara. Mʉ zuburia oita pẽwã b'ed'ebara, marãsid'a zuburia oita pẽwãnaña. Mʉ bed'eata arib'ae b'ed'ebara, marã bed'easid'a arib'aed'aya. 21 Marã mʉ k'area mawũã zuburia od'aya, ũduk'awad'a ẽãba mʉ zok'ad'ata. 22 Mʉta zepe zhãrãta ũrãg'a ẽbasibʉrʉ k'azhirua ne ẽã b'eak'ausia, mawũãmina ũrĩk'awua nʉmeba k'azhirua ne ẽã b'ea ab'ed'a ẽã. 23 Mʉta jura b'ʉbara mʉ Zezesid'a jura b'ʉa. 24 Mʉã ãzhid'e ed'a awʉrʉba ok'ata osi ẽbʉrʉ k'azhirua ne ẽã b'eak'ausia, mawũãmina akʉ b'eta juradea mʉta, mʉ Zezeta. 25 Aramaʉ̃ne arimaẽ berab'ari nʉmʉã bed'eata zhi b'ʉmata ãzhi ũrãg'ad'e mawũã b'ʉta: Mʉrã k'ãrẽã jurad'ai ne ẽãne juradea. 26 Mawũãmina K'arebata zebʉrʉd'era, mʉã maʉ̃ marãma mʉ Zezed'eba zok'abʉrʉra Jawurebia wãrãnebema, izhira zeya mʉ Zeze maẽba, izha jaraya mʉnebemata. 27 Marãbid'a mʉnebemata jarad'aya, mʉ bawara b'ead'aba jẽde wed'auba.
1 Mʉãrã maʉ̃ta marãã jarabʉrʉa kenab'arid'a ẽbamarẽã mʉnebema ĩjã b'eta. 2 De zhi jʉrebadata nʉme maẽ marã ed'a wãbid'a ẽbaya, ewarita zeya bariduba marã beabʉrʉd'era krĩchaita Daizezeba krĩñata obʉrʉta. 3 Maʉ̃ta od'aya ũduk'awad'a ẽãba mʉ Zezeta miã mʉta. 4 Mʉãrã maʉ̃ta marãã jarabʉrʉa maʉ̃ ewarita zebʉrʉd'era marãba bude bad'amarẽã ya mʉãrã marãã zhi jaramata.
Jawurebiaba ob'ʉd'ebema
Maʉ̃ mʉãrã jẽdeubara marãã jara ẽbasia, mʉrã b'ʉ baera marã bawara. 5 Mawũãmina k'õbebʉrʉ mʉrã wãña mʉ zok'ad'ama, maʉ̃ta marãnebemabara miõba wid'i mawũã ẽã: ¿Bʉra sãmaã wãĩpe? 6 Awuarabʉrʉ mʉã maʉ̃ta marãã jarabʉrʉ k'area marã k'ãbãẽã sopua k'ob'ea. 7 Mawũãmina wãrĩnu mʉã marãã jaraya: Marãĩtara biga mʉrã wãĩta, mʉta wã ẽbʉrʉ K'arebara marãma ze ẽã, mawũãmina mʉta wãrã mʉã marãma zok'aya 8 Izhi zebʉrʉd'era ẽjũãne b'ea k'awuabigaya k'azhiruad'e b'eta, waya mʉrã bed'ea ne ẽã b'ʉta, k'awuabigaya zhãrã Daizezebara k'awua oita. 9 K'awuabigaya k'azhirua bara b'eta ĩjãna ẽãba mʉnebemata. 10 K'awuabigaya mʉrã bed'ea ne ẽã b'ʉta mʉrã wãĩ baera mʉ Zezema, aramaʉ̃ne marãbara mʉrã wueta ũdud'a ẽbaya. 11 K'awuabigaya zhãrã Daizezebara k'awua oita, izhara ãtõmiã naʉ̃ ẽjũãne nok'ora ya k'awua osi baera. 12 Mʉãrã wad'i ne bio erub'ʉa marãã jaraita, mawũãmina aritiara marãbara sãwũãta k'awuad'a ẽbaya. 13 Mawũãmina Jawurebia wãrãnebemata zebʉrʉd'era, marã erunʉmaña Daizezed'ebema wãrãne. Izhara jara ẽbaya izhikusaud'ebemata, awuarabʉrʉ jõma jaraya mʉneba ũrĩbʉrʉta, aramaʉ̃ne jõma marãã k'awuabiya k'ãrẽ berab'ariita. 14 Jawurebiabara k'awuabigaya mʉrã zhi zromata, mʉ bed'eata ũrĩpe marãã k'awuabigaya. 15 Jõma mʉ Zezeba erub'ʉra mʉrẽã. Maʉ̃ba mʉãrã jarabʉrʉa Jawurebiabara mʉ bed'eata ũrĩpe marãã k'awuabigaita.
Sopuara sobia baya
16 Dããrã ẽãne marãbara mʉrã ũdud'a ẽbaya, mawũãmina dããrã ẽãne mʉrã wakusa ũdud'aya mʉrã wãĩ baera mʉ Zezema. 17 Mawũãĩ izha jʉrʉkuad'ata ʉ̃kʉrʉbara ãzhirãĩnu mawũãsid'a: ¿K'ãrẽta mawũã dazhirãã mawũãbʉrʉ: Dããrã ẽãne marãbara mʉrã ũdud'a ẽbaya, mawũãmina dããrã ẽãne wakusa ũdud'aya mʉrã wãĩ baera mʉ Zezema? 18 ¿K'ãrẽta jara krĩñabʉrʉ mawũã dããrã ẽãne abʉrʉbara? Sãwũãta k'awuad'a ẽã izha jarabʉrʉra. 19 Jesúsbara k'awuasia wid'i krĩña k'ob'eta, mawũẽ mawũãsia: ¿Marãbara mazhirãĩnu wid'i k'ob'e ẽka mʉã mawũãnata: Dããrã ẽãne marãbara mʉrã ũdud'a ẽbaya, mawũãmina dããrã ẽãne mʉrã wakusa ũdud'aya? 20 Mʉã wãrĩnu marãã jaraya, marã jẽgad'aya, sopuad'aya, waya mʉnebema ẽãta ẽjũãne b'era sobiad'aya. Mawũãmina marã sopuad'aimina marã sopuara sobia baya. 21 Wũẽrã toira puabaria toi ewarita arababʉrʉba. Mawũãmina wũãwũã tobʉrʉd'era pua k'ob'ad'ara sobiaba kĩrãduabaria wũãwũãta tobʉrʉba naʉ̃ ẽjũãne. 22 Aramaʉ̃ kĩrãk'a marãsid'a k'ãwũãwed'ara sopua b'ea. Mawũãmina mʉã marã wakusa ũdubʉrʉba sobiad'aya, mobebaira miõba jãrĩ ẽã marã sobiara. 23 Maʉ̃ ewadera marãbara mʉãã wid'id'a ẽã miã k'ãrẽta. Mʉã wãrĩnu marãã jaraya, jõma k'ãrẽ mʉ Zezea mʉneba wid'ibʉdara izha marãã diaya. 24 Wad'i marãbara mʉnebara k'ãrẽ wid'id'a ẽã. K'ãrẽ wid'iudua, mobed'eba jidad'aya, aramaʉ̃ne marã jipad'e sobia b'eaya.
Mʉã edre b'aebisia zareata ẽjũãnebema
25 Maʉ̃ mʉãrã ne jarak'a jarabʉrʉa. Ewarita zeya mʉã jarabʉrʉra ne jarak'a jara ẽãta, awuarabʉrʉ marãã jipa jaraya mʉ Zezed'ebemata. 26 Maʉ̃ ewadera marãbara mʉneba k'ãrẽ wid'id'aya. Maʉ̃bara mʉãrã jara k'ob'ʉ ẽã mʉta mʉ Zezea zuburia bed'eaita marãbari. 27 Mʉ Zezebara marã kʉãg'a b'ʉa marãba mʉta kʉãg'a b'e baera, aramaʉ̃ne ĩjã b'ea mʉrã zesita Daizeze maẽba. 28 Mʉrã mʉ Zeze maẽba zesia naʉ̃ ẽjũãẽna, mʉãrã naʉ̃ ẽjũãrã ãmaẽña, mʉrã wakusa wãña mʉ Zezema. 29 Mawũãĩ izha jʉrʉkuad'abara mawũãsid'a: Id'ibʉrʉ bʉa jarabʉrʉra jipa jara k'ob'ʉa, ne jarak'a jara ẽã. 30 Id'ibʉrʉ daibara k'awuabʉda bʉara ne jõma k'awua b'ʉta, mawũẽ miõba k'ãrẽ wid'id'aira nesid'a ẽã, k'ãʉ̃ba daibara ĩjã b'ea bʉra zesita Daizeze maẽba. 31 Mawũãnaĩ Jesúsbara panaʉ̃ mawũãsia: ¿Id'ibʉrʉ ĩjãbʉdak'a? 32 Ewarita arabaid'ebema ya arabasia, mawũẽ marã ab'a ab'ak'a wãẽbad'aya mazhi wãbʉrʉma, aramaʉ̃ne mʉrã ãmaẽnaña dob'a. Mawũãmina mʉrã dob'a b'ʉ ẽã mʉ Zezeta b'ʉba mʉ ũme. 33 Mʉã maʉ̃ta marãã jarabʉrʉa mʉneba adu-a b'eamarẽã. Naʉ̃ ẽjũãnerã marã zuburiaya, mawũãmina wãnigua b'eaudua, mʉã edre b'aebisia ãtõmiã zareata ẽjũãne nʉmʉrã.
Jesús zhiwid'id'a izha jʉrʉkuad'abari
1 Jesúsbara maʉ̃ta jarape ʉ̃taa akʉ zhiwid'i mawũãsia: Zeze, ewarira arabasia, mawũẽ k'awuabigarua mʉ bʉ Warra zhi zromata, aramaʉ̃ne mʉ bʉ Warrabid'a k'awuabigaya bʉra zhi zromata. 2 Zhãrã jõmaʉ̃ ʉ̃rʉ̃ bʉara mʉãã zareata diasia, aramaʉ̃ne bʉ ũme b'ai jõ ẽãta diamarẽã bʉa mʉãã diad'ata jõmaʉ̃ã. 3 B'ai jõ ẽãrã, bʉta ũduk'awad'aid'e b'ʉa Daizezera ab'abai b'ʉta wãrĩnuta, ũduk'awad'aid'e b'ʉa mʉta Jesucristota bʉa zok'ad'ata. 4 Mʉãrã bʉra zhi zromata k'awuabiga nʉmʉã naʉ̃ druad'e, aramaʉ̃ne mʉãrã jõbibʉrʉa k'ãrẽ omarẽã bʉa mʉãã diad'ata. 5 K'õbebʉrʉ Zeze, mʉrã bʉ k'aita zhi zromata b'ʉdua, bʉ ũme zhi zromata b'ad'a kĩrãk'a ẽjũã nʉmeĩ nawed'a. 6 Ẽjũãne b'eta bʉa mʉãã diad'ata b'ea mʉãrã bʉd'ebema k'awuabiga nʉmʉã, ãzhira bʉre basia, maʉ̃ta bʉa mʉãã ded'ekasia, ãzhara arib'ae b'ea bʉ bed'eara. 7 Id'ibʉrʉ k'awuabʉda jõma k'ãrẽ bʉa mʉãã diad'ara bʉ maẽba zed'ata. 8 Bed'eata bʉa mʉãã diad'ara mʉãrã jarak'asia, maʉ̃ ãzhara ĩjãsid'a. Aramaʉ̃ne k'awuasid'a mʉrã wãrĩnu bʉ maẽba zed'ata, aramaʉ̃ne ĩjã b'ea mʉrã bʉa zok'ad'ata. 9 Mʉrã ãzhibari bʉaa zuburia bed'eaya. Mʉnebema ẽãta ẽjũãne b'ebari mawũã zuburia bed'ea ẽã, awuarabʉrʉ bʉa mʉãã diad'ata b'ebari zuburia bed'eaya bʉreta b'eba. 10 Mʉrẽta b'era bʉrea, bʉreta b'era mʉrẽã. Aramaʉ̃ne mʉrã zhi zromata dajada nʉmʉã ãzhid'eba. 11 Mʉrã ya naʉ̃ ẽjũãne b'a ẽã. Mawũãmina ãzhira naʉ̃ ẽjũãne b'eaya, maʉ̃ne mʉrã bʉma wãña. Zeze bʉra biata b'ʉa, bʉa mʉãã diad'ata b'era bʉzhi zareaba akʉ jʉre edarua, aramaʉ̃ne ab'a b'eamarẽã dazhi ab'aʉ kĩrãk'a. 12 Naʉ̃ ẽjũãne ãzhi bawara b'asid'era mʉãrã bʉ zaread'eba akʉ jʉresia. Bʉa mʉãã diad'ata b'era mʉãrã akʉ jʉresia, aramaʉ̃ne ãzhid'ebema miõta adua ẽbasia, awuarabʉrʉ zhi aduaitrʉ aduaya. Aramaʉ̃ne maʉ̃ta zhi b'ʉmata arimaẽ berab'ariya. 13 K'õbebʉrʉ mʉrã bʉma wãña. Mawũẽ mʉãrã maʉ̃ta jarabʉrʉa wad'i naʉ̃ ẽjũãne b'ʉwed'a, aramaʉ̃ne ãzhisid'a mʉ kĩrãk'a jipad'e sobia b'eamarẽã. 14 Mʉãrã bʉ bed'eara jarak'asia, mawũẽ mʉnebema ẽãta ẽjũãne b'ebara juradea, naʉ̃ ẽjũãnebemata duanu ẽãba mʉta naʉ̃ ẽjũãnebema ẽkĩrãk'a. 15 Mʉãrã wid'i ẽã bʉa naʉ̃ ẽjũãneba ãĩ jʉre edemarẽã, awuarabʉrʉ wid'i b'ʉa k'arebamarẽã ãtõmiã bia ẽã juwuad'eba. 16 Ãzhira naʉ̃ ẽjũãnebema ẽã mʉta naʉ̃ ẽjũãnebema ẽkĩrãk'a. 17 Wãrãneba bʉita b'eabirua, bʉ bed'eata wãrã. 18 Bʉa mʉta ẽjũãne b'ema zok'ad'a kĩrãk'a, mʉãbid'a zok'akuabʉrʉa ẽjũãne b'ema. 19 Ãzhi k'area bʉita b'id'a ari mʉzhita, ãzhisid'a bʉita b'eamarẽã bʉ bed'eata wãrãneba. 20 Mʉrã bari naʉ̃rã k'area bʉaa zuburia bed'ea k'ob'ʉ ẽã, awuarabʉrʉ zuburia bed'eabʉrʉa mʉnebemata ĩjãnaĩ k'areabid'a ãzhi bed'ead'eba. 21 Aramaʉ̃nerã jõma ab'a b'eaya. Zeze, mawũãrã bʉta mʉne b'ʉ kĩrãk'a, mʉta bʉd'e b'ʉ kĩrãk'a, ãzhisid'a dazhi ũme ab'a b'eaya. Aramaʉ̃ne ẽjũãne b'ebara ĩjãnamarẽã mʉrã bʉa zok'ad'ata. 22 Mʉãrã zhi zromata b'ʉkuasia bʉa mʉta zhi zromata b'ʉd'a kĩrãk'a, aramaʉ̃ne ab'a b'eamarẽã dazhi ab'a panʉ kĩrãk'a. 23 Mʉta ãzhid'e b'ʉa, bʉta mʉne b'ʉa, aramaʉ̃ne jipad'e ãba b'ea. K'ãwũãrã ẽjũãne b'ebara k'awuad'aya mʉrã bʉa zok'ad'ata, k'awuad'aya mʉnebemata b'era bʉara kʉãg'ata mʉta kʉãg'a kĩrãk'a. 24 Zeze, bʉa mʉãã diad'ata b'era mʉãrã krĩña b'ʉa mʉta b'ʉ maẽ ãzhisid'a mʉ bawara b'eaita, aramaʉ̃ne ãzha ũdud'amarẽã bʉa mʉrã zhi zromata b'ʉd'ata, bʉa mʉrã kʉãg'a ẽjũã oi nawed'a. 25 Zeze, bʉra biata b'ʉa, ẽjũãne b'ebara bʉra ũduk'awad'a ẽã, mawũãmina mʉã bʉra ũduk'awua b'ʉa, naʉ̃rã mʉnebemata b'ebara k'awuasid'a mʉrã bʉa zok'ad'ata. 26 Mʉãrã bʉd'ebema k'awuabigad'ata ãmaña k'awuabigaya. Aramaʉ̃ne bʉa mʉta kʉãg'a kĩrãk'a ãzhirãĩnu zhiya kʉãg'a b'eamarẽã, aramaʉ̃ne mʉrã ãzhid'e b'aya.
Jesús jidad'apead'a
1 Jesús mawũã zhiwid'ipe izha jʉrʉkuad'a bawara wãsia do zake Cedrón kĩrãrẽ. Mama ne uta b'ʉ maẽ ed'a wãsia izha jʉrʉkuad'a bawara. 2 Juda Jesús chãb'ariita b'ʉbara k'awua b'asia mawũã ne uta b'ʉ maẽrã, Jesús mama ãba zema bio basi baera izha jʉrʉkuad'a bawara. 3 Mawũẽ Judabara jʉre edesia soldaorãta, Daizeze de akʉbadata, maʉ̃rã zok'asid'a sacerdoterã nok'orãba, fariseorãba, aramaʉ̃ne mama erbuesia ĩbĩrãẽna, kuchoed'a. 4 Mawũẽ Jesúsbara izhi sãwũã berab'ariita k'awua k'ob'ʉba ãzhi orrape mawũãsia: ¿K'aita jʉrʉ panʉ? 5 Mawũãĩ panaʉ̃ mawũãsid'a: Jʉrʉ panʉã Jesús Nazared'ebemata. Mawũãnaĩ Jesúsbara mawũãsia: Mʉta izhia. Ãzhi bawara k'ob'asia Judasid'a Jesús chãb'ariita. 6 Mawũã Mʉta izhia abʉrʉd'era, ãbudea b'aekuasid'a egorod'e. 7 Jesúsbara wakusa wid'i mawũãsia: ¿K'aita jʉrʉ panʉ? Mawũãĩ mawũãsid'a: Jʉrʉ panʉã Jesús Nazared'ebemata. 8 Mawũãnaĩ Jesúsbara panaʉ̃ mawũãsia: Mʉã marãã jarabʉrʉa mʉta izhita. Mawũẽ mʉta jʉrʉ panʉbʉrʉ idu wãbiudua mʉã jʉrʉkuad'a za k'opanʉta. 9 Aramaʉ̃ne arimaẽ berab'arisia izha mawũãnata: Zeze, bʉa mʉãã diad'ata b'era adua ẽã miõta. 10 Maʉ̃ne Simón Pedroba kucho ab'ʉta ẽpe tusia sacerdote wag'au nezok'ata, mawũẽ ʉrawesia kʉwʉrʉ juwua araarebemata. Nezok'ara Malco abazhid'a. 11 Jesúsbara Pedroa mawũãsia: Bʉzhi kuchora ed'a pẽũdua. Mʉ Zezeba mʉrã zuburiabiya nʉmʉba, ¿mʉrã zuburiaid'e b'ʉ ẽka?
Jesús edesid'a sacerdote wag'au kĩrãbita
12 Mobebʉrʉ soldaorãbara ãzhi nok'o bawarauba Daizeze de akʉbadata judíorãne bawarauba Jesús jidad'ape jʉ̃sid'a. 13 Mobebʉrʉ naara edesid'a Anás b'ʉma Caifás zãwũrẽ baera. Caifás sacerdote wag'auta b'asia maʉ̃ añone. 14 Maʉ̃ Caifásba judíorãã jarasia ũmakĩrã ab'a beuita bigata jõmaʉ̃bari.
Pedro chub'ed'a Anás drog'oad'e
15 Jesús k'aid'u wãsid'a Simón Pedrota dewarabema Jesúsba jʉrʉd'ata. Maʉ̃ Jesúsba jʉrʉd'ara ũduk'awua b'asia sacerdote wag'auba, maʉ̃ta Jesú ũme ed'a wãsia sacerdote wag'au drog'oad'e. 16 Mawũãmina Pedrora drog'oad'e ãĩ b'esia puerta maẽ. Mawũẽ Jesúsba jʉrʉd'ara sacerdote wag'auba ũduk'awua b'ʉta wũẽrã puerta akʉbari ũme bed'eape ed'a wãbisia Pedrora. 17 Mawũẽ wũẽrã puerta akʉbaribara Pedroa mawũãsia: ¿Bʉsid'a k'ãʉ̃ba jʉrʉkuad'ad'ebema ẽka? Mawũãĩ izhara mawũãsia: Mʉrã izhi ẽã. 18 Maʉ̃ne nezok'arãta Daizeze de akʉbada bawara edau nʉmeãsia tebʉta puad'ape. Kũrãsãba tebʉ k'ã nʉmeãsia. Ãzhi bawara Pedrosid'a edau nʉmasia tebʉ k'ã.
Anásba wid'id'a Jesúa
19 Sacerdote wag'aubara Jesúa wid'isia izha jʉrʉkuad'ad'ebemata izhi ũrãg'ad'ebemata. 20 Mawũẽ Jesúsbara panaʉ̃ mawũãsia: Mʉrã dajada bed'ea b'asia zhãrã jõmaʉ̃ daid'u. Mʉrã baridua miã ũrãg'a b'asia de zhi jʉrebada maẽ, Daizeze ded'a ewara maẽ, judíorã jõma zhi jʉrebada maẽ, mʉãrã aramaʉ̃ne k'ãrẽ chupea jara b'a ẽbasia. 21 ¿K'ãrẽã mʉãã wid'ibʉrʉ? Mʉ bed'eata ũrĩnapead'aa wid'idua mʉã k'ãrẽta jarak'a b'ad'ata. Ãzha k'awua b'ea mʉã k'ãrẽta jarad'ata. 22 Jesúsba mawũãĩ Daizeze de akʉbadad'ebemata ab'a mama k'ob'ʉba kĩrãma tachipe mawũãsia: ¿Bʉara mawũã panaʉ̃bʉrʉka sacerdote wag'au bed'eara? 23 Mawũãĩ Jesúsbara panaʉ̃ mawũãsia: Mʉta ãña bed'ea tabebʉrʉ jaradua k'ãrẽne ãña bed'ea tabeta. Mawũãmina mʉta bia bed'ea tabebʉrʉ, ¿mʉrã k'ãrẽã tachibʉrʉ? 24 Mobebʉrʉ Anás sacerdote wag'auta b'ad'abara jʉ̃ diabuesia Caifás sacerdote wag'auma.
Pedroba ũduk'a ad'a Jesús
25 Pedrora edau nʉmasia tebʉ k'ã. Maʉ̃ne mawũãsid'a: ¿Bʉra Jesúsba jʉrʉkuad'ad'ebema ẽka? Mawũãnaĩ izhara merãbʉrʉta mawũãsia: Mʉrã izhi ẽã. 26 Maʉ̃ne sacerdote wag'au nezok'ata ab'a Pedroba kʉwʉrʉ ʉrawed'a mebẽrãba Pedroa mawũãsia: ¿Mʉã bʉra Jesú ũme ũdusi ẽka ne uta b'ʉ maẽ? 27 Mawũãĩ Pedrobara wakusa merãsia. Maʉ̃ daucha berusia gallora.
Jesús eded'apead'a Pilato kĩrãbita
28 Caifás de maẽbara Jesús edesid'a nok'o ded'a soldaorã tab'ʉid'u. Maʉ̃nerã diaped'a nʉmasia. Judíorã Jesús eded'apead'ara maʉ̃ ded'ara ed'a wãna ẽbasia. Ãzhima aramaʉ̃nerã Daizeze kĩrãbita mitia ẽãba k'o b'eid'e b'asia Egiptod'eba ẽzoad'ata krĩcha k'obadara. 29 Mawũẽ Pilato ãzhima zepe mawũãsia: ¿Naʉ̃ k'ãrẽã ji k'opanʉ? 30 Mawũãĩ panaʉ̃ mawũãsid'a: Naʉ̃ta bia ẽãta obari ẽbʉrʉ daibara bʉaa chãb'arid'a ẽbak'ausia. 31 Mawũãnaĩ Pilatobara mawũãsia: Mazhabʉrʉ eded'ape k'awua oudua mazhi ũrãg'aba jara b'ʉd'e. Mawũãĩ judíorãbara mawũãsid'a: Marã Roma bid'arãbara daia idu beabid'a ẽã miõta. 32 Aramaʉ̃ne arimaẽ berab'arisia Jesúsba jarad'ata izhi sãwũã beuita. 33 Pilato wakusa ed'a wãsia izhita nok'ota b'ʉ ded'a, mobe Jesús trʉ̃pe mawũãsia: ¿Bʉra Rey judíorãneka? 34 Mawũãĩ Jesúsbara panaʉ̃ mawũãsia: ¿Bʉzhikusauba mawũãbʉrʉka o mʉnebema awʉrʉba bʉaa mawũãsid'a? 35 Mawũãĩ Pilatobara panaʉ̃ mawũãsia: ¿Mobera mʉrã judíok'a? Bʉzhirãta b'eba, sacerdoterã nok'orãba bʉra mʉãã chãb'arisid'a. ¿Bʉara k'ãrẽta osi? 36 Mawũãĩ Jesúsbara panaʉ̃ mawũãsia: Mʉrã naʉ̃ ẽjũãne Reyta b'aid'ebema ẽã. Mʉta naʉ̃ ẽjũãne Reyta b'aid'ebemabʉrʉ mʉta arib'ae b'era zhõk'ausid'a mʉta chãb'arid'a ẽbamarẽã judíorãã. Mawũãmina mʉrã nama Reyta b'aid'ebema ẽã. 37 Mawũãĩ Pilatobara mawũãsia: ¿Mobera bʉra Reyka? Mawũãĩ Jesúsbara panaʉ̃ mawũãsia: Ara bʉzha jarabʉrʉa mʉrã Reyta. Mʉrã maʉ̃ k'area tobʉdata naʉ̃ ẽjũãẽna zesia wãrãta jaraita. Wãrãnebemata b'ebara ũrĩ b'ea mʉ bed'eara. 38 Mawũãĩ Pilatobara mawũãsia: ¿K'ãrẽpe wãrã? Mawũãpe wakusa wãsia judíorãma, mobe mawũãsia: Mʉma naʉ̃ bed'ea ne ẽã. 39 Mawũãmina marã zhi k'awama cárceld'eba mʉã ab'a ẽdrʉbi b'ʉta Egiptod'eba ẽzoad'ata krĩcha fiesta obada ewade. ¿Mawũẽ marãbara krĩñadeka mʉã ẽnaĩta Rey judíorãneta? 40 Mawũãĩ jõmaʉ̃ba nemi jĩgua mawũãsid'a: ¡K'ãʉ̃ta ẽnarãrũã! Awuarabʉrʉ ẽnadua Barrabáta. Maʉ̃ Barrabára nezrʉgamiã basia.
1 Mobebʉrʉ Pilatobara Jesús ubigasia. 2 Soldaorãbara corona jʉ̃k'ara ʉrʉta pʉrrasid'a, mobe burud'e joatrʉsid'a. Mobe ãneb'aribisid'a wua granateta. 3 Mobe mawũãsid'a: ¡Kʉa, judíorã Rey! Mobe tachi jirpanesia kĩrãma. 4 Pilato wakusa ãĩ zepe mawũãsia: Akaudua, mʉãrã wakusa ãĩ webʉrʉa k'awuad'amarẽã mʉma naʉ̃ bed'ea ne ẽãta. 5 Jesús ãĩ webʉdad'era corona jʉ̃k'ara ʉrʉta burud'e joatrʉ nʉmasia, ãneb'ari b'asia wua granateta. Maʉ̃ne Pilatobara mawũãsia: ¡Naʉ̃ za b'id'a! 6 Jesús ũdubʉdad'era sacerdoterã nok'orãbara, Daizeze de akʉbadabara nemi jĩgua mawũãsid'a: ¡Cruzd'e k'achibirua! ¡Cruzd'e k'achibirua!Mawũãnaĩ Pilatobara mawũãsia: Mazhabʉrʉ cruzd'e k'achiudua. Mʉma naʉ̃ bed'ea ne ẽã. 7 Mawũãĩ judíorãbara panaʉ̃ mawũãsid'a: Daibara erub'ea ũrãg'ata, mawũẽ dai ũrãg'aba jara b'ʉd'era beuibara izhikusa Daizeze Warrad'e b'ʉd'eba. 8 Mawũãbʉdata Pilatoba ũrĩbʉrʉd'era audre perasia. 9 Mawũẽ izhita nok'ota b'ʉ ded'a wakusa ed'a wãsia, mobe Jesúa mawũãsia: ¿Bʉra sãmabema? Mawũãmina Jesúsbara panaʉ̃ ẽbasia. 10 Mawũẽ Pilatobara mawũãsia: ¿Bʉra mʉãã bed'ea ẽka? ¿Bʉara k'awua ẽka mʉ zarea b'ʉra bʉ cruzd'e k'achi beabiita o bʉ ẽnetaita? 11 Mawũãĩ Jesúsbara panaʉ̃ mawũãsia: Bʉa mʉrã k'ãrẽ sãwũã ẽbak'ausia ʉ̃treba k'ãwũã idaribi ẽbasibʉrʉ. Mawũẽ mʉta bʉ juwuad'e chãb'arid'atrʉ bʉ audre k'azhirua barasia. 12 Mawũãĩ Pilatobara Jesús ẽna krĩñasia. Mawũãmina judíorãbara nemi jĩgua mawũãsid'a: Bʉa naʉ̃ta ẽnarã, César bawara bʉra zhibia ẽã. Iab'a izhitrʉ reyd'e b'ʉra César rey wag'au bawara zhi jura. 13 Pilatobara maʉ̃ta ũrĩpe Jesús ãĩ edepe zhãrã k'awua obari maẽ jewed'asia dejã mong'ara douga od'a abada maẽ, hebreo bed'ead'era Gábata abada. 14 Maʉ̃nerã arib'ae jirpanasia Egiptod'eba ẽzoad'ata krĩcha fiesta obadad'ebemata, maʉ̃nerã ʉ̃matipa nʉmasia. Maʉ̃ne Pilatobara judíorãã mawũãsia: ¡Za b'id'a mazhi Rey! 15 Mawũãĩ nemi jĩgua mawũãsid'a: ¡Beabirua! ¡Beabirua! ¡Cruzd'e k'achibirua!Mawũãnaĩ Pilatobara mawũãsia: ¿Marã Reyra mʉã cruzd'e k'achibiid'e b'ʉka? Mawũãĩ sacerdoterã nok'orãbara panaʉ̃ mawũãsid'a: Daibara rey ãmaña eruduanu ẽã rey César awuarara. 16 Aramaʉ̃ne Pilatobara Jesús ãzhaa chãb'aribʉrʉta soldaorãã chãb'arisia cruzd'e k'achi bead'amarẽã. Mawũẽ Jesús edesid'a.
Cruzd'e k'achi beud'a Jesús
17 Jesúsbara izhi cruz ataupe wãsia Buru B'ʉwʉrʉ abadaid'u, hebreo bed'ead'era Gólgota abada. 18 Mama cruzd'e k'achisid'a, izhi bawara awʉrʉta ũme k'achi jirapanʉsid'a ab'a juwua araare ab'a juwua ãk'aare, Jesús jirab'ʉsid'a ẽsadra. 19 K'ãrẽã bead'aita Pilatobara b'ʉpe cruzd'e jirab'id'apʉta mawũã b'asia: JESÚS NAZARED'EBEMA REY JUDÍORÃNEÃ. 20 Judíorã bioba maʉ̃ta lesid'a Jesús cruzd'e k'achid'apead'ara pʉwʉrʉ k'aita baera. Maʉ̃ bed'eara b'ʉ jirab'asia hebreo bed'ead'e, griego bed'ead'e, latin bed'ead'e. 21 Sacerdoterã nok'orãta judíorãbara Pilatoa mawũãsid'a: Mawũã b'ʉrãrũã: Rey judíorãneã arãrũã, awuarabʉrʉ mawũãdua: Naʉ̃bara mawũãsia: Mʉrã Rey judíorãneã. 22 Mawũãnaĩ Pilatobara panaʉ̃ mawũãsia: Mʉã b'ʉsibʉrʉ mʉã b'ʉsia. 23 Soldaorãbara Jesús cruzd'e k'achid'ape izha jʉ̃ b'ad'ara jirakua edad'ape kĩmarẽta ab'aʉd'e drasid'a soldaoza. Wua ãneb'ari jʉ̃ b'ad'asid'a jidasid'a, maʉ̃ wuara kĩrã tẽũ k'asud'apead'a ẽbasia, awuarabʉrʉ jipa ab'a k'ad'apead'a basia ʉ̃tʉba ed'aa. 24 Mawũẽ ãzhirãĩnu mawũãsid'a: Naʉ̃ k'õãna ẽã, awuarabʉrʉ k'aid'e baita k'awuad'aid'ebemata od'aya. Aramaʉ̃ne arimaẽ berab'arisia zhi b'ʉmata mawũã b'ʉta: Mʉã jʉ̃ b'ad'ara ãzhirãĩnu drasid'a sãwũã drad'aid'ebemata od'ape. Mawũã jara b'ʉd'e osid'a soldaorãbara. 25 Jesús cruzd'e jirab'ʉ k'aita panasia zhi papata, wũẽrã zhi papa mebeata, María Cleofas kĩmata, María Magdalenata. 26 Jesúsba zhi papata ũdubʉrʉd'e izha jʉrʉd'ata izha audre kʉãg'ata mama k'ob'ʉd'e zhi papaa mawũãsia: Papa, k'ãʉ̃ bʉ waua. 27 Mobebʉrʉ maʉ̃ izha jʉrʉd'aa mawũãsia: K'ãʉ̃ bʉ papaa. Maʉ̃ ewadeba izha jʉrʉd'abara zhi papa kĩrãk'a erub'asia izhi ded'a. 28 Mawũãpe Jesúsbara izha oita b'ad'ara jõma arib'aeta k'awuape maʉ̃ zhi b'ʉmata arimaẽ berab'arimarẽã mawũãsia: Mʉrã obisia k'ob'ʉa. 29 Maʉ̃ne zok'ota mama nʉmasia uva b'a oregueaba bira nʉmʉta. Mawũẽ maʉ̃ oreguead'e sõmbera edasid'a esponjata, mobe hisopo bakurud'e tãjʉ̃nape Jesúsma tʉsid'a yed'a. 30 Jesúsbara maʉ̃ oregueara dope mawũãsia: Mʉã oita b'ad'ara jõma arib'aea. Mawũãpe buru jab'ari izhi jawure Daizezea chãb'ari beusia.
Jesús orrota miãsuba sud'apead'a
31 Maʉ̃ ewadera arib'ae jirpanʉta Egiptod'eba ẽzoad'ata krĩcha fiesta obadata od'aid'era nrũẽmarã ẽnaʉ̃bada ewari basia. Mawũẽ judíorãma biga ẽbasia zhãrã ari cruzd'e jizoa nʉmaĩrã ẽnaʉ̃bada ewade. Maʉ̃nerã ewari ẽnaʉ̃badara ne bia basia. Mawũẽ Pilatoa jarasid'a cruzd'e jizoa nʉmʉrã jẽrũ b'ʉekuabipe mamaʉ̃bara ãĩ jirakuabimarẽã. 32 Mawũẽ soldaorã zed'ape ab'a naara jẽrũ b'ʉekuasid'a, dewarabemasid'a jẽrũ b'ʉekuasid'a, mawũã okuasid'a Jesús bawara cruzd'e k'achid'apead'ara. 33 Mawũãmina Jesús maẽ zebʉdad'era ya beusi baera jẽrũ b'ʉekuad'a ẽbasia. 34 Mawũãmina soldaorãnebema ab'aʉba miãsuba orroma susia, mawũẽ aramaʉ̃ta drʉsia wata, baniãta. 35 Maʉ̃ta zhi ũdud'aba jara b'ʉa, maʉ̃ jara b'ʉra wãrĩnuã. Izhara k'awua b'ʉa wãrãta jara b'ʉta marãbid'a ĩjãnamarẽã. 36 Mawũã berab'arisia maʉ̃ zhi b'ʉmata mawũã b'ʉta: B'ʉekuad'a ẽbaya izhi b'ʉwʉrʉra. 37 Dewara zhi b'ʉmata mawũã b'ʉa: Akʉd'aya sud'apead'ara.
Jesús wuag'ad'apead'a
38 Maʉ̃ tẽã José Arimatea pʉwʉrʉd'ebemata judíorã wawiaba Jesús chupea pẽwã b'ʉta Pilatoa zuburia bed'easia idu edebimarẽã Jesús k'akuata, mawũẽ Pilatobara idaribisia. Mawũẽ zepe edesia Jesús k'akuara. 39 Nicodemosid'a zesia naara diamase Jesúsma zed'ata, mirra kerata, áloe keraed'a poera wesia, maʉ̃ b'asia treinta kilo. 40 Aramaʉ̃ne Jesús k'akuara jiraedad'ape keraed'a burub'aba burasid'a. Mawũã osid'a judíorãba wuag'a k'awa b'ed'e. 41 Jesús cruzd'e k'achid'apead'a k'aita b'asia ne uta, mawũã ne uta b'ʉ maẽ b'asia peña zob'eata zhiwid'ita. Mamarã beuwãrã wad'i b'ʉd'a ẽbasia miõta. 42 Egiptod'eba ẽzoad'ata krĩcha judíorãba fiesta od'aita arib'ae jirpanʉ baera mawũã beuwãrã wuag'aita arak'aita nʉmʉ maẽ ed'a tab'ʉsid'a Jesúra.
Jesús beud'ata piradrʉd'a
1 Semana ewarita nabemata domingod'e María Magdalena diaped'a wad'i pãrĩgua nʉmʉne wãsia Jesús wuag'ad'apead'aid'u. Maʉ̃nerã peña zob'eata tapa k'ob'ad'ara mong'ara ãña ʉratʉ k'ob'ʉta ũdusia. 2 Mawũẽ wãẽba wãsia Simón Pedroma, dewarabema Jesúsba jʉrʉd'ata Jesúsba kʉãg'ama, mobe mawũãsia: Izhi wuag'ad'apead'a maẽbara edesid'a Nok'ora, k'awuad'a ẽã sãma tab'ʉsid'ara. 3 Mawũãĩ Pedrora dewarabema Jesúsba jʉrʉd'a ũme wãsid'a Jesús wuag'ad'apead'aid'u. 4 Ũmewed'a wãẽba wãsid'a, mawũãmina dewarabema Jesúsba jʉrʉd'ara audre wãẽba wãsia Pedro k'ãñabara, mawũẽ naara jũẽsia Jesús wuag'ad'apead'aid'u. 5 B'arrupe ed'a akʉbʉrʉd'era burub'ata ũdusia, mawũãmina ed'a wã ẽbasia. 6 Tẽã zesia Simón Pedrora izhi k'aid'u, mobe peña zob'ead'e ed'a wãbʉrʉd'era ũdusia burub'a k'ob'ʉta mama. 7 Wua Jesús buruta burad'apead'asid'a ũdubʉrʉd'era burub'a bawara k'ob'a ẽbasia, awuarabʉrʉ ãĩ buratʉ k'ob'asia. 8 Mobebʉrʉ ed'a wãsia dewarabema Jesúsba jʉrʉd'asid'a, izhira naara zesia peña zob'eata nʉmʉĩnu. Mawũã berab'aribʉrʉta ũdui ĩjãsia Jesús piradrʉd'ata. 9 Maʉ̃ẽnabema wad'i sãwũãta k'awuad'a ẽãrã zhi b'ʉmata, Jesús mawũã beud'ata piradrʉi bara basia. 10 Mobebʉrʉ Jesúsba jʉrʉkuad'ara wãsid'a ãzhi panʉma.
Jesús zhi ũdubid'a María Magdalenaa
11 Mawũãmina María jẽga b'asia peña zob'eata nʉmʉ k'aita. Mawũã jẽga b'ʉd'e b'arrusia ed'a akʉi k'area. 12 Maʉ̃ne ũdusia ángelerã ũme wua torro jʉ̃ panʉta. Ab'a buru bude, ab'a jẽrũ b'adaud'e jewed'a k'opanasia Jesús k'akua tab'ʉd'apead'a maẽ. 13 Maʉ̃rãbara mawũãsid'a: Wũẽrã, ¿bʉra k'ãrẽã jẽga b'ʉ? Mawũãnaĩ mawũãsia: Mʉ Nok'ota edesid'a, mʉã k'awua ẽã sãma tab'ʉsid'ara. 14 Mawũãpe pʉrʉwabʉrʉd'era ũdusia Jesús mama k'ob'ʉta, mawũãmina k'awua ẽbasia Jesústa k'ob'ʉta. 15 Maʉ̃ne Jesúsbara mawũãsia: Wũẽrã, ¿bʉra k'ãrẽã jẽga b'ʉ? ¿K'aita jʉrʉ b'ʉ? Mawũãĩ izhara ne uta akʉbarita krĩchape mawũãsia: Jesús k'akuata bʉa edesibʉrʉ mʉãã jaradua sãma tab'ʉsita, mobed'eba mʉã edeya. 16 Mawũãĩ Jesúsbara mawũãsia: ¡María!Mawũãĩ pʉrʉwape izhara mawũãsia: ¡Raboni! Maʉ̃bara jara krĩña b'ʉa Miã Ũrãg'abarita. 17 Maʉ̃ne Jesúsbara mawũãsia: Mʉta jiru nʉmerãrũã, mʉrã wad'i wãrĩze ẽã mʉ Zezema, mawũẽ mʉ mebẽrãma wãpe jaradua: Mʉrã wãrĩzeita mʉ Zezema, marã Zezema, mʉ Zhibarima, marã Zhibarima. 18 Mawũãĩ María Magdalena wãsia Jesúsba jʉrʉkuad'aa jaraita Nok'o Jesús izha ũdud'ata. Aramaʉ̃ne jarak'asia Jesúsba jarad'ata.
Jesús zhi ũdubid'a izha jʉrʉkuad'aa
19 Keubʉrʉd'e maʉ̃ ab'aʉ ewadera semana ewartia nabemata domingod'era Jesúsba jʉrʉkuad'ara zhi jʉre ãzhi duanu maẽ puerta serrape duanasia. Judíorã wawiaba mawũã duanune Jesús zepe ãzhi ẽsadra edau nʉmepe mawũãsia: ¡Kʉa, marã adu-a b'eaudua! 20 Mawũãpe ũdubigasia izhi juwuata, izhi orrota. Izha jʉrʉkuad'ara sobiasid'a Nok'ota ũdubʉdaba. 21 Mawũẽ Jesúsbara wakusa mawũãsia: ¡Kʉa, marã adu-a b'eaudua! Mʉ Zezeba mʉta zok'ad'a kĩrãk'a mʉãbid'a marãta zok'aya. 22 Mawũãpe ãzhima jãrãpuape mawũãsia: Jidaudua Jawurebiata. 23 Zhãrã k'azhirua od'ata marãba Jawurebiad'eba bed'ea ne ẽã edabʉdara maʉ̃ Daizezebara bed'ea ne ẽã b'ʉya. Mawũãmina marãba Jawurebiad'eba bed'ea ne ẽã edabʉda ẽãrã maʉ̃ Daizezebid'a bed'ea ne ẽã b'ʉ ẽã.
Tomásbara ĩjã ẽã nʉmape ĩjãna
24 Tomás Jesúsba doce jʉrʉkuad'ad'ebemata Memerã abadara ãzhi bawara ne ẽbasia Jesús zesid'era. 25 Mawũẽ dewarabemarã Jesúsba jʉrʉkuad'abara mawũãsid'a: Nok'ora daibara ũdusid'a. Mawũãnaĩ mawũãsia: Izhi juwua clavoba k'achid'apead'ata mʉã ũdupe mʉ juwua jĩwĩnita ed'a pẽũ ẽbʉrʉ, mʉ juwuata izhi orrod'e pẽũ ẽbʉrʉ, beud'ata piradrʉd'ara mʉãrã ĩjã ẽã. 26 Ewari ocho babʉrʉd'e Jesúsba jʉrʉkuad'ara wakusa ed'a zhi jʉre b'ed'era Tomás ãzhi bawara b'asia. Maʉ̃ne puerta serra nʉmʉne Jesús zepe ẽsadra edau nʉmepe mawũãsia: ¡Kʉa, marã adu-a b'eaudua! 27 Mobe Tomás k'ob'ʉa mawũãsia: Nama pẽũdua bʉ juwua jĩwĩnita, akʉdua mʉ juwuata, bʉ juwuara pẽũdua mʉ orrod'e. Mobe ĩjã ẽã nʉmarãrũã, awuarabʉrʉ ĩjãrũã. 28 Mawũãĩ Tomásbara panaʉ̃ mawũãsia: ¡Bʉra mʉ Nok'oa, mʉ Zhibaria! 29 Mawũãĩ Jesúsbara mawũãsia: Mʉta ũdubʉrʉ baera Tomás bʉara ĩjãbʉrʉa. Sobiad'aid'e b'ʉa ũdu ẽãta ĩjãbʉdara.
K'ãrẽã b'ʉd'apead'a naʉ̃ libro
30 Jesúsbara dewara ũdud'ak'ata bio osia izha jʉrʉkuad'a daid'u, maʉ̃ zhi b'ʉma ẽã naʉ̃ librod'era. 31 Mawũãmina naʉ̃ b'ʉsid'a ĩjãnamarẽã Jesúra zhãrã Ẽdrʉbita Daizeze Warrata. Maʉ̃ta ĩjãbʉdaba izhik'areuba erub'eamarẽã Daizeze ũme b'ai jõ ẽãta.
Jesús zhi ũdubid'a izha jʉrʉkuad'ata sietea
1 Maʉ̃ tẽã izha jʉrʉkuad'aa Jesús wakusa zhi ũdubisia do jed'ea õb'ʉta Tiberia abada doya. Maʉ̃nerã k'ãwũã berab'arisia: 2 Ãba duanasia Simón Pedrota, Tomás Memerã abadata, Natanael Caná pʉwʉrʉd'ebemata, maʉ̃ pʉwʉrʉra Galilea druad'ebema, dewara Zebedeo warrarãta, dewara ũme Jesúsba jʉrʉkuad'ata. 3 Maʉ̃ne Simón Pedrobara mawũãsia: Mʉrã wãña b'eda bead'e. Mawũãĩ jarirãbara mawũãsid'a: Daisid'a wãnaña bʉ bawara. Aramaʉ̃ne wãnape jãbad'e b'arisid'a, maʉ̃ diamasera b'eda bead'a ẽbasia miã k'ãrẽta. 4 Ʉ̃nadrʉ bʉsid'e Jesús zhi ũdubisia ibud'e, mawũãmina izha jʉrʉkuad'abara k'awuad'a ẽbasia Jesústa k'ob'ʉta. 5 Maʉ̃ne Jesúsbara mawũãsia: Warrarã, ¿jidasid'ak'a b'eda k'oira? Mawũãĩ panaʉ̃ mawũãsid'a: Jidad'a ẽã. 6 Mawũãnaĩ mawũãsia: Atarraya jãbad'eba juwua araare b'aribueudua mawũãrã jidad'aya. Mawũãĩ b'aribuesid'a, mawũẽ jirab'ari b'ed'a ẽbasia b'eda bioba. 7 Maʉ̃ne izha jʉrʉd'ata Jesúsba kʉãg'aba Pedroa mawũãsia: ¡K'ãʉ̃ Nok'oa!Simón Pedroba mawũã Nok'ota ũrĩbʉrʉd'era, wua ãneb'ari jʉ̃ b'ʉta wẽãnata jʉ̃pe doid'u tẽũsia. 8 Dewaraurã izha jʉrʉkuad'ara jãbad'e zesid'a ibuid'u, erb'ari wesid'a atarraya b'edaed'a. Druad'ebara wawara k'opana ẽbasia, awuarabʉrʉ k'opanasia cien metro. 9 Drua wãbʉdad'era ũdusid'a tebʉ purea nʉmʉta, b'eda ba nʉmʉta, pan k'ob'ʉta. 10 Maʉ̃ne Jesúsbara mawũãsia: Weudua b'eda aritia jidabʉdata. 11 Mawũãĩ Simón Pedrora jãbad'e ed'a wãpe atarraya drua webʉrʉta b'eda zromarãba bira wesia, b'edara b'asia ciento cincuenta y tres. Mawũã biomina atarraya tʉd'ʉzoa ẽbasia. 12 Mobebʉrʉ Jesúsbara mawũãsia: Zeudua, nek'oudua. Izha jʉrʉkuad'abara miõba bʉra k'aipe ad'a ẽbasia k'awuasid'a baera Nok'ota. 13 Aramaʉ̃ne Jesúsbara pan jiraedape ded'ekasia b'edasid'a ded'ekasia. 14 Maʉ̃ta zhi ũbea basia izha jʉrʉkuad'aa Jesús zhi ũdubi nʉmʉta beud'ata piradrʉpe.
Jʉredua mʉ pẽwã b'eta
15 Nek'od'a tẽã Jesúsbara Simón Pedroa mawũãsia: Simón Jonás warra, ¿bʉa mʉrã audre kʉãg'ak'a naʉ̃rãne k'ãñabara? Mawũãĩ panaʉ̃ mawũãsia: Ããjã Nok'ó, bʉa k'awua b'ʉa mʉã bʉra kʉãg'ata. Mawũãĩ mawũãsia: Jʉredua mʉ pẽwã b'eta. 16 Jarama ũmeta wakusa mawũãsia: Simón Jonás warra, ¿bʉa mʉrã kʉãg'ak'a? Mawũãĩ Pedrobara panaʉ̃ mawũãsia: Ããjã Nok'ó, bʉa k'awua b'ʉa mʉã bʉra kʉãg'ata. Mawũãĩ mawũãsia: Jʉredua mʉ pẽwã b'eta. 17 Jarama ũbeata mawũãsia: Simón Jonás warra, ¿bʉa mʉrã kʉãg'ak'a? Pedrora sopuasia mawũã jarama ũbea, ¿bʉa mʉrã kʉãg'ak'a abʉrʉba? Mawũẽ mawũãsia: Nok'ó bʉara jõma k'awua b'ʉa. Bʉa k'awua b'ʉa mʉã bʉra kʉãg'ata. Mawũãĩ Jesúsbara mawũãsia: Jʉredua mʉ pẽwã b'eta. 18 Mʉã wãrĩnu bʉaa jaraya: Bʉ kũrãta b'asid'era zhope wã b'asia bʉzha krĩñama, mawũãmina ya zõrãta b'ebʉrʉd'era bʉra juwua jirab'ariya, aramaʉ̃ne bʉra awʉrʉba zhobiya, mobe edeya bʉa krĩña ẽãma. 19 Maʉ̃bara Jesúsbara jara krĩñasia Pedro sãwũã beuita, aramaʉ̃ne k'awuabigaita Daizeze zhi zromata. Maʉ̃ jarape mawũãsia: Mʉrã pẽwã b'adua.
Izha jʉrʉd'ata kʉãg'ad'ebema
20 Pedroba jẽrũya akʉbʉrʉd'era ũdusia k'aid'u taita Jesúsba jʉrʉd'a Jesúsba kʉãg'ata, nek'o duanune maʉ̃ ab'aʉta Jesús k'aita k'ob'ad'a basia, mawũã k'ob'asid'era mawũãsia: Nok'ó, ¿bʉra k'aiba chãb'ariipe? 21 Pedroba maʉ̃ta ũdui Jesúa mawũãsia: Nok'ó, ¿naʉ̃ sãwũã berab'ariipe? 22 Mawũãĩ Jesúsbara mawũãsia: Naʉ̃ mʉ zeyeed'a b'aita mʉã krĩñabʉrʉ, ¿bʉa sãwũãĩpe? Bʉra mʉta pẽwã b'adua. 23 Maʉ̃neba mebẽrãbara ãzhirãĩnu jara duanesia maʉ̃ Jesúsba jʉrʉd'ara beu ẽãta. Mawũãmina Jesúsbara jara ẽbasia beu ẽãta, awuarabʉrʉ mawũãsia: Naʉ̃ mʉ zeyeed'a b'aita mʉã krĩñabʉrʉ, ¿bʉa sãwũãĩpe? 24 Maʉ̃ Jesúsba jʉrʉd'aba naʉ̃ bed'eata jarak'a b'ʉbʉrʉa. K'awua panʉã izha jara b'ʉra wãrĩnuta. 25 Dewara ne bio b'ʉa Jesúsba od'ara. Maʉ̃ta ab'a ab'aʉd'e b'ʉsid'abʉrʉ mʉma ẽjũãnerã ara ẽbak'ausia libro b'ʉkuad'ara. Amén.