All people done sin an ain able fa do right nuff fa medja op ta God glory. Rome 3:23
Cause det de payback ob sin, bot life dat las faeba an eba God gii we fa free. We git dat life wen we come fa be one wid Jedus Christ we Lawd. Rome 6:23
Wen God sabe oona, dat ain been cause dat fittin coddin ta wa ya done do. E done dis cause oona trus een Christ. Eben dat trus wa oona got ain come fom oonasef. E de gif fom God. So den, oona ain got nottin fa brag bout, cause dey ain nottin oona kin do fa sabe oonasef. Ephesians 2:8-9
Bot de man wa da geda tax stan way off. E ain eben lif e eye ta heaben, cause e know e done sin. E beena beat e chest cause e too saary fa e sin. And e pray ta God say, "God, hab mussy pon me, cause A a sinna!" Luke 18:13
Cause God lob all de people een de wol sommuch dat e gii we e onliest Son. God sen we um so dat ebrybody wa bleebe pon um ain gwine dead. Dey gwine lib faebamo. God ain sen e Son eenta de wol fa condemn um. God sen e Son fa come sabe de people shru e Son. John 3:16-17
Ebry kinda test oona hab, dat de same kinda test oda people hab. Bot all de time God do wa e promise fa do. E gwine gii ya scrent so dat ya ain haffa do nottin bad. Jes wen ya wahn fa do dat ebil ting, dat same time dey, God gwine mek ya able fa stan scrong, an e gwine show ya de way fa keep fom do dat wrong ting dat ya been wahn fa do. 1 Corinth 10:13
Cause A know fa sho dat dey ain nottin able tall fa mek God stop fa lob we. Ef we done dead or ef we da lib, e da lob we. Angel dem ain able fa stop um, needa dem ebil sperit, needa ting wa come een dis time yah or een de time fa come, needa de powa dem wa dey op oba de cloud, needa dem dey pon de eart. Ain nottin wa God mek kin mek God stop fa lob we. E show we dat by wa Jedus Christ we Lawd done fa we. Rome 8:38-39
God da mek all ting right wid dem wa bleebe pon Christ, an so dey ain got no need no mo fa try fa git right wid God shru de Law. Rome 10:4
Cause God say, "A been listen ta ya jes wen de right time come, and wen de day fa sabe oona come, A hep oona." A da tell oona say, now de right time. Taday de day fa people fa be sabe! 2 Corinth 6:2
Wen de people yeh wa Peter say, dey been too opsot. Dey aks Peter an de oda postle dem say, "Bredren, wa we fa do?" Peter ansa um say, "All ob oona haffa ton from oona sin. Come ta God an leh um bactize oona een de name ob Jedus Christ, so dat God gwine paadon oona sin an gii oona de Holy Sperit. Acts 2:37-38
Oona mus be de nyew poson wa God mek fa be like esef. Dat nyew poson gwine treat oda people right an do wa right een God eye. Ephesians 4:24
Jes like dey done write down een God Book say: "Ain nobody wa stan right een God eye, ain eben one poson." Rome 3:10
Sin fus come eenta de wol wen one man sin, an dat man sin done bring det. An sin spread out ta all people an dey all sin, and cause ob dat, all people gwine dead. Rome 5:12
Wiles we stillyet been sinna an ain been able fa hep wesef, Christ dead fa we sake at jes de right time wa God been pick; fa we wa ain beena do wa God wahn. Rome 5:6
Bot God show we hommuch e lob we, cause eben wiles we stillyet been sinna, Christ dead fa we sake. Rome 5:8
De Son ob God come fom God an blongst ta God. Wen God mek um get op fom mongst de dead an lib gin, e show wid e mighty powa dat Jedus Christ, we Lawd, e God son. Rome 1:4
Cause we know dat God done mek Christ git op fom mongst de dead people an lib gin, so e ain neba gwine dead no mo. Det ain got no powa oba um no mo. Rome 6:9
Cause ef ya tell de people say "Jedus, e Lawd" an ya bleebe een ya haat dat God mek Jedus git op fom mongst de dead people and lib gin, den God gwine sabe ya. Rome 10:9
Jes like dey write een God Book say, "Ebrybody wa da call pon de name ob de Lawd gwine be sabe." Rome 10:13
Cause A know fa sho dat dey ain nottin able tall fa mek God stop fa lob we. Ef we done dead or ef we da lib, e da lob we. Angel dem ain able fa stop um, needa dem ebil sperit, needa ting wa come een dis time yah or een de time fa come, needa de powa dem wa dey op oba de cloud, needa dem dey pon de eart. Ain nottin wa God mek kin mek God stop fa lob we. E show we dat by wa Jedus Christ we Lawd done fa we. Rome 8:38-39