Jedus Enemy Dem Take Um
Wiles Jedus beena taak, a crowd come op, Judas, one ob de twebe ciple, beena lead de people. An e come op ta Jedus fa kiss um. Bot Jedus aks um say, "Judas, fa true, wid a kiss you da han de Man from God oba ta e enemy dem?" Wen de ciple dem wa been wid Jedus see wa bout fa happen, dey aks Jedus say, "Lawd, kin we fight dem wid we sword?" An one dem ciple take e sword an strike de man wa wok fa de hedman ob de Jew priest dem. E cut de right yea ob dat wokman off. Bot Jedus chaage e ciple dem say, "Dat nuff. Oona stop dat!" E tetch de wokman weh e yea done been an make de yea come baak gin. Jedus aks de leada dem ob de priest an de leada dem wa beena gyaad God house an de oda Jew leada dem wa done come dey fa git um, e say, "Oona haffa come ya fa git me wid sword an stick like A been a robba? A been wid oona ebry day een God house, an oona ain't try fa grab hole ta me. Bot dis de time wen God gree fa leh oona take me, now wen Satan, wa da rule oba ebil, e dey een chaage."
Dey Beat Jedus an Hole Um Cheap
De sodjaman dem wa beena gyaad Jedus da make fun ob um an beat um. Dey tie a rag oba e eye. Den dey knock um an say, "Ef you a prophut, guess whodat knock you? Tell we!" An dey tell Jedus plenty oda ting fa sho dey hole um cheap.
Dey Take Jedus ta de Jew Council
Wen day clean, dey habe meetin ob de Jew Council. De people leada dem, de leada dem ob de priest, an de Law teacha dem geda tageda. De sodjaman dem take Jedus befo dat Council. De people ob de Council chaage Jedus say, "Ef you de Christ, de Promise Chile, you mus tell we." Jedus ansa um say, "Ef A tell oona, onna ain't gwine beliebe me. An ef A aks oona a queshon, oona ain't gwine ansa me. Bot from now on, de Man wa Come from God, gwine seddown ta de right han ob God, wa habe all powa." All de people wa da jedge um een de Council aks um say, "Well den, you God Son?" Jedus ansa um say, "Oona right wen oona say dat." Den de people wa da jedge um say, "We ain't need no mo people wod ginst um. Wid we own yea we done yeh wa e say!"
Dey Take Jedus ta Gobna Pilate
All de crowd ob people wa done beena jedge een de Jew Council grab Jedus an take um way ta Gobna Pilate. Den dey staat ta cuse Jedus, tell Pilate say, "We done find dis man da pit wod een we people yea fa make um riot ginst de tority. E tell um say we ain't spose fa pay tax ta Emperor Caesar. An e say he Christ, de Promise Chile. Dat mean he a king." Pilate aks Jedus say, "You de king ob de Jew people?" Jedus ansa um say, "Dat wa you say. Dat so e stan." Pilate tell de leada dem ob de priest an de heap ob people wa done geda dey say, "A ain't see nottin bad wa dis man done." Bot de people dem ob de Council keep on a cusin um mo an mo. Dey tell Pilate say, "Jedus been stirrin op de people wid de ting wa e da teach um all oba Judea. E staat een Galilee, an now e done come all de way yah ta Jerusalem."
Dey Take Jedus ta Herod
Wen Pilate yeh wa dem people say, e aks um ef Jedus been from Galilee. Soon as Pilate find out dat Jedus been from Galilee, de arie weh Herod da rule, e sen Jedus ta Herod fa jedge um. An dat same time Herod been dey een Jerusalem too. Herod been real glad wen e see Jedus, cause e done yeh bout um an been want fa see um fa a long time. E want fa see um do some miracle. Herod quizzit Jedus tommuch, bot Jedus neba ansa um eben a wod. De leada dem ob dey priest an de Law teacha dem come stan befo Herod, da cuse Jedus still mo an mo. An Herod an e sodjaman dem da hole Jedus cheap. Dey laff an suck dey teet, tro insult on um. An fa try fa make Jedus feel small, dey make um weah a fine robe, like a king weah. Den Herod make dem take um baak ta Pilate. Now Pilate an Herod dem done beena fight each oda. Bot dat same day, dey come ta be fren.
Dey Say Jedus Mus Die on de Cross
Pilate sen fa da leada dem ob dem Jew priest. An e call fa de tority dem wa da rule an fa de people. E call um all fa come tageda. E tell um say, "Oona done bring dis man yah ta me, tell me dat e da stir op de people, pit wod een dey yea. Bot wen A quizzit um befo oona, A see dat e ain't done none ob dem ting wa oona say e done. An Herod ain't see nottin bad wa Jedus done needa, so e done sen um baak ta we yah. Oona kin see dat Jedus ain't done nottin fa make me habe dem kill um. Cause ob dat, A gwine jes habe dem whip um an den leh um go." (Cause ebry yeah wen dey habe de Passoba feas, Pilate haffa free one man wa de Jew people want.) Bot wen Pilate say e want fa free Jedus fa um, all de people holla say, "No. Habe dem kill dis man an free Barabbas fa we!" (Barabbas de man wa dey done pit een jail cause e been a leada befo, wen de people done riot een de city an one poson been murda.) Pilate beena want fa free Jedus, so e taak ta de people gin. Bot de people keep on a hollarin, tell Pilate say, "Nail um ta de cross! Nail um ta de cross!" Pilate tell de people gin. Dat make tre time. E aks um say, "Wa fa? A ain't see nottin dat e done fa make me habe dem kill um! Cause ob dat, A gwine habe dem whip um an den leh um go." But de people keep on a hollarin louda an louda, say Pilate oughta habe de sodjaman dem kill Jedus on de cross. An cause de people holla sommuch an cause ob de leada dem ob de priest, Pilate change e mind. So e done wa de people want um fa do. E free Barabbas, de man dey aks fa. E de one wa done been een jail fa de riot an fa murda. Den Pilate tell e sodjaman dem ta take Jedus an do wa de people been want um ta do.
Dey Nail Jedus ta de Cross
De Roman sodjaman dem take Jedus an gone. Wiles dey da gwine, dey meet one man nyame Simon, wa been bon een Cyrene. E beena come from out een de country, da gwine ta Jerusalem. De sodjaman dem grab hole ta um an pit Jedus cross on um. Dey make um folla Jedus, da tote e cross. A whole heap ob people beena folla Jedus. Some dem ooman wa da folla um beena weepin n wailin fa um. Jedus ton roun ta dem an say, "Oona daughta ob Jerusalem, mus don't cry fa me! Mus cry fa oonasef an fa oona chillun. Cause de time gwine come wen people gwine say, 'Bless fa true dem ooman wa ain't neba habe no chillun, dem wa ain't neba birs no baby an wa ain't neba nuss none!' Een dat time, people gwine tell dem mountain say, 'Faddown on we!' an dey gwine tell dem hill say, 'Coba we op!' Cause ef dey da do dis ting ta de green wood, fa sho dey gwine do wossa ting ta de dry wood, ainty?" Wen de sodjaman dem take Jedus an go fa kill um, dey take two oda man. Dey been real bad man, an de sodjaman take um wid Jedus fa kill um too. Wen dey git ta de place dey call "De place wa look like a man hed," de sodjaman dem nail Jedus ta e cross. An dey nail de two bad man too, each one ta e own cross. Dey pit one man on de right han side ob Jedus an de oda man on e lef han side. Jedus say, "Papa, paadon dem, cause dey ain't ondastan wa dey da do." An de sodjaman dem tro dice fa wide op Jedus clothes mongst um. De people beena stan op dey da look. An de Jew leada dem been dey, da hole Jedus cheap. Dey say, "E done sabe oda people. So den, leh um sabe esef, ef e be de Christ, de Promise Chile, de poson wa God done pick fa true!" De sidjaman dem take Jedus fa fun too. Dey come op ta um an try fa gem wine vinega fa drink. Dey tell um say, "Ef you de king ob de Jew people, sabe yousef!" Dey write one notice fa de people ta read. Den dey nail um oba Jedus hed. De notice say, "DIS MAN IS DE KING OB DE JEW PEOPLE." One dem two bad man wa beena hang dey on e cross, e tro slam at Jedus. E say, "You de Christ, de Promise Chile, ainty? Well den, sabe yousef an sabe we too!" Bot de oda bad man wa beena hang dey, e buke dat man say, "You ain't scaid ob God? Dey done condemn you fa die jes like dis man yah. Dey done condemn me an you fa wa we done, an wa da git we pay fa all de bad ting we done. Bot dis man yah ain't done nottin bad." Den e beg Jedus say, "Jedus, please do, memba me wen you come wid powa fa rule as King!" Jedus ansa um say, "A da tell you fa true, today you gwine be wid me een heaben."
Jedus Gibe Op de Ghost
E been bout twebe o'clock wen de sun stop shinin. All dat lan been pitch daak til tre o'clock. De sun done stop shinin, an de big tick curtain wa beena hang eenside God house done split down de middle. Jedus holla say, "Papa, A gibe oba me sperit ta you fa take cyaa ob me!" Wen e done say dat, e gibe up de ghost. Wen de offisa fa de sodjaman dem see wa happen, e praise God. E say, "Fa true, dis man ya ain't done nottin bad." All de people wa beena geda dey fa look, wen dey see wa happen, dey lef an gone home. Wiles dey da gwine, dey beat on dey chest fa sho dey habe heaby haat. An all de people wa done beena kno Jedus an de ooman dem wa come wid um outta Galilee beena stan op way off from de cross, da look at all wa happen.
Joseph Bury Jedus Body
One man been dey nyame Jospeh, a mamba ob de Jew Council. E a good man an e da waak scraight. E ain't been gree wid de Council wen dey cide fa condemn Jedus an han um oba ta de Roman tority dem. Joseph come from de town nyame Arimathea een Judea. E beena wait fa de time wen God gwine rule oba dis wol. Joseph gone ta Pilate an aks um fa leh um habe Jedus body. Pilate leh um habe um. So den, Joseph take Jedus body down from de cross an wrop um op een a linen clothe. E pit um eenside a tomb wa done been cut outta a big rock. No one ain't neba pit no body een dat tomb befo. An dat day been de Parparation Day, de day wen dey git ready fa de Jew Woshup Day. An da Woshup Day been jes bout fa staat. De ooman dat done come outta Galilee wid Jedus, dey folla Jospeh an see de tomb an how Joseph pit Jedus body een um. Den dey lef an gone home an git spice an pafume ready fa rub on Jedus body. Den de Woshup Day come, so dey ain't do no wok, jes like de Jew Law say.
Jedus Da Libe Gin
Real aaly een de maanin de fus day ob de week, befo day clean, de ooman dem take de spice wa dey done been mix op an gone ta Jedus tomb. Wen dey git ta de tomb, dey see dat de stone wa done beena kiba de door ta de tomb done been roll baak. So dey gone eenside, bot dey ain't find de Lawd Jedus body. Dey da wonda bout wa done happen, wen all ob a sudden, dey see two man come stan op by um. Dem man habe on bright clothes wa da shine. De ooman been real scaid, an dey bow dey hed down ta de groun. Bot de man dem tell um say, "Oona ain't oughta look yah mongst de ded people fa a man wa da libe, ainty? Jedus ain't yah. E done git op from mongst de ded, an e da libe gin! Oona memba wa e done tell oona wen e been dey wid oona een Galilee. E say, 'Dey gwine grab hole ta de Man wa Come from God an han um oba ta wicked people wa gwine kill um on a cross. On de day wa make tre, e gwine git op from mongst de ded. E gwine libe gin.'" Den de ooman dem memba all dat wa Jedus done tell um. Dey lef de tomb an gone baak ta town an tell de leben postle an all de oda people wa done beena waak wid Jedus befo. Dey tell um all wa done happen. Dem ooman been Mary Magdalene, Joanna, an Mary, James mama. Dem an de oda ooman dem wa been dey wid um tell de postle dem wa done happen. Bot de postle dem ain't beliebe dem ooman, cause wa dey say ain't make no sense to um. Bot Peter git up an ron ta de tomb. Wen e git dey, e ben down an look eenside. E jus see de linen grabe clothes wa dey done beena nyuse fa wrop op Jedus body dey, nottin mo. Den Peter gone baak home, da wondrin wa done been happen.
Jedus Appeah ta E Ciple Dem
Dat same time dey, wen dey beena taak bout dat, Jedus esef da stan op mongst um dey. E tell um say, "Leh oona habe peace een oona haat!" Dey been scaid mos ta det. Dey tink dey da see a ghost. Jedus tell um say, "Oona ain't oughta be scaid. Oona ain't oughta wonda wa oona da see. Look at me han an me foot. See, A mesef fa true! Oona mus tetch me an look at me good fashion. Den oona gwine kno dat A ain't no ghost. Cause A habe body an bone. A ghost ain't habe no body needa no bone like oona see dat A habe." Wen Jedus done say dat, e sho um e han an e foot. Dey keep on a wondrin an dey still ain't beliebe, cause wa dey see make um so full op wid jaiy. Jedus aks um say, "Oona habe sommin fa eat yah?" Dey gem some roas fish an some honeycomb. E take de fish an honey an eat um dey before dey eye. Jedus tell um say, "Wen A been dey wid oona, A done tell oona bout dis. A tell oona dat all ting wa Moses done write down een de Law bout me an wa dem prophut write down an all dey write down een de Psalms bout me, dey all mus happen fa true." Jedus make um able fa ondastan wa been write dey een God book. E tell um say, "Een God book dey write dis down: Dey tell we dat de Christ, de Promise Chile, haffa suffa an die. An on de day wa make tre, e gwine git op from mongst de ded an libe gin. God Book tell we too dat een Christ nyame, e ciple dem must tell all people say, 'Mus change oona way an do wa God want oona fa do. Den God gwine paadon oona.' De ciple dem mus tell dat een Jerusalem fus ob all an den tell all people all oba de wol. Oona done see all dem ting yah, an oona mus tell people bout dem... De people wa beliebe een Jedus da woshup um op. Den dey gone baak ta Jerusalem. Dey been full op wid jaiy. An dey been een God house all de time, praisin God.