John Tell Bout Jesus

Wat God Say Make Us Come Alive Inside

1:1 Da time everyting had start, had one Guy. “God's Talk,” dass who him. Dat Guy an God, dey stay togedda, an da Guy stay God fo real kine. 2 Dass da Guy, da time everyting had start, him an God stay togedda. 3 God wen make everyting, but da way he do um, he tell dis Guy fo do um. No mo notting dis Guy neva make. 4 He da Guy, if you like come alive fo real kine, you come by him, cuz dat kine life come from him. Wen peopo come alive lidat, jalike dey stay inside one place dat get plenny light. Den dey can see an undastan. 5 No matta stay dark, da dark no can pio da light. Everytime get light. 6 Had one guy God wen send, name John. 7 God wen send John fo tell all da peopo wat he know bout God's light, so dey can trus God cuz a him. Dass his kuleana. 8 John, he not da light. He ony come fo tell da peopo dat da light stay fo real. 9 Dat time wen John stay teaching, jalike da light dass fo real was coming inside da world. Dass da light dat show everybody wass true. 10 Dat time, da light dass fo real wen stay inside da world. Wen God wen make da world, he da Guy wen do um. But da peopo inside da world, dey neva know who him. 11 He wen come his own country, but even his own peopo neva take him in. 12 But everybody dat take him in an trus him, God give dem da right fo come his kids, cuz dey know who him. 13 Da way dey born, not da regula way, wit one guy fo dea fadda dat like get kids. Dey wen come God's kids cuz God wen give um life inside. 14 Dat “God's Talk” Guy, he wen come one guy jalike us guys. He wen stay wit us. We wen see how awesome he stay. He awesome, cuz he da one an ony Boy dat come from da Fadda. He like do plenny good stuff fo us, cuz dass how he stay. Everyting he say bout God, stay fo real. 15 John, he wen tell peopo wat he know bout dat Guy. He talk real strong so all da peopo can hear. He tell, “Dis da Guy I wen talk bout wen I wen say, ‘Bumbye one Guy goin show up, an dat Guy mo importan den me, cuz he stay awready from befo I born.’-” 16 John talk lidat cuz dat Guy like do so plenny good kine stuff, an he do um fo all us guys, ova an ova. 17 Moses wen give our ancesta guys God's Rules. Den Jesus Christ, God's Spesho Guy, he wen do plenny good stuff fo us, an everyting he tell us bout God, stay fo real. 18 No mo nobody dat wen see God fo real kine. But get dat Guy. No mo odda guy jalike him cuz he God too. An he stay mo tight wit his Fadda den all da oddas. He da One dat wen make clear how God stay.

Wat John Da Baptiza Guy Tell

19 One time, da Jewish leada guys wen send pries guys an odda guys from da Levi ohana dat help da pries guys. Dey send um by John fo aks, “Eh, who you?” Dis wat he wen tell um: 20 He neva bulai. He tell um strait out, “Lissen! I not da Christ, da Spesho Guy God Goin Send.” 21 Dey aks him, “Den who you? You Elijah?” He tell, “No, I not.” Dey say, “Den you da Spesho Guy dat goin come an talk fo God?” He tell, “No, I not.” 22 Dey tell him, “Kay den. Tell us who you. Wat you say bout yoaself? We gotta tell da guys dat wen send us someting, you know!” 23 He say, jalike Isaiah wen say, da guy who talk fo God long time ago, “I da guy dat talk real strong inside da boonies, ‘Eh, make da road ready fo da Good Boss. Make um strait fo him!’-” 24 Some a da guys da Jewish leadas wen send by John, dey Pharisees. 25 Dem guys aks him, “Kay den. If you not da Spesho Christ Guy Dat God Goin Send, an you not Elijah, an you not da Spesho Guy dat goin come an talk fo God, den how come you stay baptize da peopo?” 26 John tell um, “I stay baptize da peopo wit water. Anodda guy stay hea wit you guys, but you guys donno who him. 27 I wen start fo teach first befo him, but I not spesho nuff even fo help him hemo his slippa.” 28 All dis wen happen inside Betany town, da one dat stay da odda side da Jordan River. Dass wea John stay baptize da peopo.

Jesus Jalike God's Baby Sheep

29 Da nex day John spock Jesus coming by him, an he say, “Eh, you guys, try look da guy ova dea! You know wat? He jalike God's baby sheep fo da sacrifice. He can hemo da shame fo da bad kine stuff dat everybody inside da whole world stay do! 30 Dis da guy I wen talk bout wen I wen say, ‘Bumbye one guy goin show up afta me, but he stay mo importan den me, cuz he stay befo I born.’ 31 I neva know who him befo time. But I stay hea so da Israel peopo can know who him. Dass why I stay baptize peopo wit water.” 32-33 John tell mo bout wat he know. He say dis: “God wen send me fo baptize peopo wit water. He tell me, ‘You goin see my Spesho Spirit come down an stay wit one guy. He da guy goin let my Good an Spesho Spirit take ova my peopo.’ Dat time I wen see one guy, an I neva know who him. But den I wen see God's Spesho Spirit come down from da sky jalike one dove, an stay wit da guy. 34 I wen see dat, an I tell you guys, dat guy, he God's Boy.”

Da First Guys Jesus Pick Fo Teach

35 Da nex day John stay standing dea again wit two guys he teaching. 36 Wen John spock Jesus walking by him, he say, “Look! Dis guy jalike God's baby sheep fo da sacrifice.” 37 Da two guys hear him say dat, an dey go wit Jesus. 38 Jesus turn aroun an see dem going wit him. He tell, “Eh, wat you guys looking fo?” Dey say, “Rabbi, wea you stay live?” (Now, ‘Rabbi,’ dat mean ‘Teacha.’) 39 Jesus say, “Come look.” So dey go wit him an see wea he stay, an dey stay dea wit him dat day. Was bout four clock in da aftanoon. 40 Andrew, Simon Peter's brudda, he one a da two guys dat wen hear John Da Baptiza guy, an go wit Jesus. 41 Da first ting, Andrew find his brudda Simon an tell him, “We wen find da Messiah.” (Now, ‘Messiah,’ dat mean ‘da Christ Guy, da Spesho Guy God Wen Send,’ dea language.) 42 Den he bring Simon to Jesus. Jesus look at um an say, “You Simon, an yoa fadda's name John, yeah? but not da Baptiza guy. From now dey goin call you ‘Cefas.’-” (Dat mean ‘Peter,’ o ‘Da Rock,’ in dea language.)

Jesus Tell Philip an Natanael fo Come

43 Da nex day Jesus wen tink fo go Galilee side. He find Philip an tell him, “Eh, come wit me, an be my guy.” 44 Now, Philip come from Betsaida town, da same place Andrew an Peter live. 45 Philip find Natanael an tell him, “We wen find da Guy dat Moses wen write bout in da book wit God's Rules inside. An da guys dat wen talk fo God long time ago, dey wen write bout him too. He Jesus from Nazaret town, Joseph's boy.” 46 Natanael say, “Nah! No mo notting good come from Nazaret!” Philip say, “Come look!” 47 Jesus see Natanael coming by him, an he say, “Dis guy one fo real Israel guy. No mo notting fake inside him! He everytime tell da trut.” 48 Natanael say, “How come you know who me?” Jesus say, “I wen see you da time you was undaneat da fig tree, befo Philip tell you fo come.” 49 Den Natanael tell him, “Teacha, you God's Boy fo real kine! You da King fo da Israel peopo! 50 Jesus wen tell him, “You trus me jus cuz I tell you dat I wen see you undaneat da fig tree? Eh, you goin see mo betta stuff den dat!” 51 Den he tell him, “Dass right! An I like tell all you guys dis: You guys goin see da sky open up, an God's angel messenja guys going up an going down by me, da Guy Dass Fo Real.”

Da Wedding Lu`au Inside Cana Town

2:1 Afta two days had one wedding lu`au inside Cana town, Galilee side. Jesus mudda was dea. 2 Da ohana wen tell Jesus an his guys fo come too, so dey wen go. 3 Bumbye no mo wine. Den Jesus mudda tell him, “Dey no mo wine, you know.” 4 Jesus say, “Eh, Ma! Dass not my job, you know. Not time yet fo me fo show da awesome stuff.” 5 Den his mudda tell da worka guys, “Wateva my boy tell you guys fo do, you do um!” 6 Now, da Jewish peopo get Rules bout how dey gotta wash dea hands befo dey eat. So dey had six real big stone water jugs ova dea by da wall. Each jug can hold twenty o thirty gallon water. 7 Jesus tell da worka guys, “Fill up da jugs wit water.” So dey wen fill um up to da top. 8 Den he tell um, “Now, go take some out, an take um to da guy in charge a da lu`au.” So dey take um to da guy. 9 Da guy taste da water. Eh, da water wen come wine! Now, he neva know wea da wine come from. But da worka guys dat wen go get da water, dey know. Den da guy tell da groom fo come. 10 Den da guy tell da groom, “Everybody bring out da real good wine first. Den, afta dea friends drink plenny, dey bring out da cheap wine. But you, you wen bring out da bestes kine wine now!” 11 Dis ting inside Cana town, Galilee side, dis da first time Jesus wen do someting awesome. He wen show how awesome he stay, an da guys he teaching wen trus him. 12 Afta dat, Jesus, his mudda, his bruddas, an da guys he teaching, dey wen go down Capernaum town. But dey ony stay dea litto wile.

Jesus Inside Da Temple

13 Now, almos time fo da Jewish Passova. So Jesus wen go Jerusalem. 14 Inside da temple yard Jesus see guys selling cows, sheeps, an doves fo da sacrifice. Had guys dea sitting down, selling da spesho kine temple money dat da peopo give God fo da temple. 15 Jesus wen make one whip from small kine ropes, an he chase um all outside da temple yard, even da cows an sheeps. He wen huli da guys tables an dump dea coins all ova da place. 16 An he tell da guys dat selling da doves, “Get um outa hea! No make my Fadda's house jalike one store! 17 Den his guys rememba dat da Bible say, “I love yoa house plenny. Stay burn inside me jalike one fire.” 18 Den da Jewish leada guys tell him, “Wat awesome ting you goin do fo show us dat you get da right fo do all dis kine stuff?” 19 Jesus say, “Bus up dis temple, an in three days I goin make one new temple.” 20 Den da Jewish guys tell him, “Ho! Had guys dat wen work fo forty six years fo make dis temple! How you figga you goin make one new temple in three days?” 21 But Jesus was talking bout his body, cuz his body jalike one temple. 22 So den, bumbye, wen Jesus mahke an come back alive, his guys wen rememba dat he wen tell um dat, an dey wen trus wat da Bible say from befo time, an wat Jesus wen say.

Jesus Know How Everybody Stay Inside

23 Now, wen Jesus stay inside Jerusalem fo da Passova religious time, plenny peopo wen trus him, cuz dey wen see all da awesome stuff he do fo show who him. 24 But Jesus neva give himself to da peopo, cuz he know all dem. 25 He neva need nobody fo tell um how da peopo stay, cuz he know how dey stay inside.

Jesus Talk to Nicodemus

3:1 Had one Pharisee guy. His name Nicodemus, an he was one leada fo da Jewish peopo. 2 One nite he wen go by Jesus an tell him, “Teacha, we know dat you one teacha who come from God, cuz nobody can show us da kine awesome stuff dat you doing, if God no stay wit him.” 3 Jesus tell him, “Dass right! An I tell you dis too: Whoeva not born again God's new way, dey no goin get God fo dea King.” 4 Nicodemus tell him, “How one old guy can get born again? No way he can go inside his mudda one mo time an get born!” 5 Jesus tell him, “Dass right! An I tell you dis too: Whoeva not born again from water an from God's Spirit, dey no can get God fo dea King. 6 Peopo born from peopo, an peopo's spirit born again from God's Spirit. 7 Eh, no let um blow yoa mind, jus cuz I tell you, ‘You guys gotta born again God's new way.’ 8 Da wind blow hea an dea. You can hear um, but you donno wea da wind wen come from o wea going. Dass jalike everybody dat born again from God's Spirit.” 9 Nicodemus go aks him, “How can be?” 10 Jesus tell him, “You da main teacha fo da Israel peopo, an you no undastan dis stuff? 11 Fo shua, I tell you dis too: I know wat I talking bout. I wen see da stuff I telling. But you guys, you still no like trus wat I tell you. 12 Wen I tell you guys bout stuff down hea inside dis world, you guys no believe me. Den how you guys goin believe me if I tell you guys bout da stuff up dea wea God stay inside da sky? 13 Nobody wen eva go up inside da sky. Ony me, da Guy Dass Fo Real, I wen come down from da sky. 14 “You know, long time ago inside da boonies, Moses wen put one snake on top one stick so everybody can see um an come good. Da same ting gotta happen to me, da Guy Dass Fo Real. Dey goin put me on top one cross, 15 so dat everybody who stay trus me, can get da real kine life dat stay to da max foeva. 16 “God wen get so plenny love an aloha fo da peopo inside da world, dat he wen send me, his one an ony Boy, so dat everybody dat trus me no get cut off from God, but get da real kine life dat stay to da max foeva. 17 You know, God neva send me, his Boy, inside da world fo punish da peopo. He wen send me fo take da peopo outa da bad kine stuff dey doing. 18 Whoeva stay trus me, God no goin punish dem. But whoeva no trus me, garans God goin punish dem, cuz dey neva trus me, God's ony Boy. 19 “God wen send da light inside da world. Da light show everybody how dey stay inside. But da peopo like stick wit da dark an dey hate da light, cuz dey stay do bad kine stuff. Dass why God goin punish da peopo. 20 Everybody dat stay do bad kine stuff hate da light, an no like let da light shine on top dem, cuz dey no like nobody know bout da bad kine stuff dey doing. 21 But whoeva stay do wat da true stuff say fo do, dass jalike dey like let da light shine on top dem, fo show everybody dat everyting dey do, dass wat God say fo do.”

Jesus an John Da Baptiza Guy

22 Afta dat, Jesus an da guys he teaching wen go Judea side. He wen stay wit dem ova dea an wen baptize peopo. 23 Da same time John stay baptize da peopo Enon side, near Salim, cuz had plenny water ova dea. Da peopo stay come by John an he stay baptize dem. 24 You know, dis wen happen befo dey throw John inside da jail. 25 Now, had one Jewish guy wen make argue wit da guys John stay teaching. Dey make argue bout how dey gotta wash demself befo dey can pray. 26 So dey go by John an tell um, “Teacha, you know da guy dat wen stay by you ova dea, da odda side da Jordan River, an you wen tell us bout him? Look! Everybody going ova dea, an he stay baptizing um.” 27 John tell um, “Nobody can get anyting, ony wat God in da sky give um. 28 You guys, you wen hear me say, ‘I not da Christ, da Spesho Guy God Goin Send, but God wen send me first, befo him. 29 “Da groom, he da guy dat get da bride. Da bes man, he standing dea, an he stay real good inside wen he hear da groom talking. I jalike da bes man, an Jesus, jalike da groom. Dass why I stay real good inside. 30 He gotta come mo importan den me, cuz I not dat importan.”

Da Guy From Up Dea Come Down

31 Da One who come from up dea wea God stay inside da sky, he mo importan den anybody. Da guy who come from down hea on top da earth, he jalike all da peopo hea on top da earth, an he talk bout da kine stuff from down hea. Da guy from up dea wea God stay inside da sky, fo shua he mo importan den all da peopo. 32 He tell wat he wen see an hear, but nobody trus wat he say. 33 But whoeva take wat da One from up dea say, dat guy show dat God tell da trut. 34 Da guy dat God wen send tell wat God say, cuz God no hold back wen God give him his Spirit. 35 Da Fadda get plenny love an aloha fo his Boy. He wen give him da power ova everyting. 36 Whoeva stay trus God's Boy, dey get da real kine life dat stay to da max foeva. But whoeva no trus God's Boy, an no do wat he say, dey no goin get dat kine life, cuz God no take wat dey do.

Jesus an Da Wahine From Samaria

4:1 Da Pharisee guys wen hear dat Jesus stay baptizing mo peopo den John, an dat all da peopo wen go wit Jesus. 2 (But you know, Jesus neva baptize um, his guys wen do um.) 3 Wen Jesus wen know dat da Pharisee guys wen hear dat, he wen go way from Judea, an go Galilee side. 4 But fo go Galilee, he figga mo betta go thru Samaria. 5 He go to one town inside Samaria name Sykar, dat stay near da land Jacob wen give his boy Joseph long time befo. 6-8 Was bout lunch time. Had one puka fo da water dea, name Jacob's Puka. Jesus stay tired cuz he wen walk long way. His guys wen go inside town fo buy lunch, an he sit down by da puka. Den one wahine from dat place come fo get water. Jesus tell her, “You can give me some water fo drink?” 9 Da wahine from Samaria tell him, “How come you aks me fo one drink water?! You one Jew an I one wahine from Samaria. You know, da Jewish peopo no like get notting fo do wit da Samaria peopo.” 10 Jesus tell her, “If you wen know wat God like give everybody, an who me dat stay aks you fo water, den you aks me fo water, an I give you da kine water dat make peopo live fo real kine foeva.” 11 She say, “Mista, you no mo notting fo bring up water, an da puka stay deep. So, wea you goin get da kine water dat make peopo live fo real kine foeva? 12 You mo betta den our ancesta guy Jacob, o wat? He wen give us dis puka. Him, his kids, an his cows even wen drink water from da puka.” 13 Jesus say, “Whoeva drink dis water, bumbye dey goin come thirsty again. 14 But whoeva go drink da kine water I goin give him, dey no goin eva come thirsty again. Cuz da kine water I give dem goin come jalike water dat come mo an moa. Goin make dem live to da max foeva. 15 Da wahine tell him, “Mista, give me dat kine water! Den I no goin come thirsty no moa, an I no need come hea fo get water!” 16 Jesus tell her, “Go, tell yoa husban fo come, an bring um ova hea.” 17 She say, “I no mo husban.” Jesus say, “Az right, you no mo husban. 18 Cuz you wen get five husbans. Da guy you get now, he not even yoa husban. You wen tell da trut!” 19 Da wahine say, “Mista, now I know fo shua you one talka fo God. 20 Us Samaria peopo, our ancesta guys wen go down an pray to God on top dis mountain ova hea. But you Jewish peopo, you guys say dat everybody gotta go Jerusalem fo go down an pray to God.” 21 He say, “Sista, trus me, I telling da trut. Da time goin come wen you guys goin go down an pray to God our Fadda, but no goin be hea on top dis mountain o inside Jerusalem. 22 You guys from Samaria go down in front somebody an pray, but you guys donno who him. Us Jewish peopo, we go down in front God an pray, an we know who him. Cuz God wen show us Jewish peopo da ony way fo come outa da bad kine stuff we stay in. 23 Garans da time goin come, an awready stay hea now, wen da peopo dat go down an pray to da Fadda fo real kine, dey goin give him plenny love an respeck, cuz dey stay tight wit God's Spirit, an dey know how God stay fo real. Dass da kine peopo da Fadda like fo give him plenny love an respeck. 24 God, he one spirit. So den, da peopo dat give him plenny love an respeck gotta do um cuz dey stay tight wit God's Spirit, an cuz dey know how God stay fo real.” 25 Da wahine say, “I know dat Messiah goin come, da Christ Guy, da Spesho Guy God Goin Send. Wen he come, he goin tell us everyting.” 26 Jesus tell her, “I da Guy, da One dat stay talking to you.” 27 Right den an dea Jesus guys wen come back, an wen blow dea minds dat he wen talk to da wahine. But nobody aks um, “Wat you like?” o “How come you talk to her?” 28 Den da wahine wen leave her water jar, an go back inside town. She tell da peopo ova dea, 29 “Try come! Check out dis guy! He wen tell me everyting I eva wen do. Try check out if dis da Christ Guy, da Spesho Guy God Goin Send!” 30 So da peopo wen go outa da town an wen go wea Jesus stay. 31 Same time Jesus guys was begging him, “Teacha, come eat!” 32 But he tell dem, “I awready get food, but you guys donno wat kine.” 33 So his guys aks each odda, “Wat you tink? Somebody wen bring him food, o wat?” 34 Jesus tell dem, “I doing wat God like, an I goin do all his work. Dass jalike food fo me. 35 You guys say, ‘Get four months moa, den da crop stay ready fo cut.’ Lissen! I tell you: Look da fields, cuz dey stay ready fo cut awready. 36 Da guy dat cut da crop an bring um inside da store house get pay fo dat. He jalike da guy dat help da peopo fo trus God. Den da guy dat wen tell um da Good Kine Stuff From God first, an da guy dat wen help um trus God, dey can both stay good inside togedda, cuz now da peopo dat trus God cuz a dem, get da real kine life dat stay to da max foeva. 37 Az true wat da peopo say, ‘One guy plant da seed an anodda guy cut da crop an bring um inside da store house.’ 38 I wen send you guys fo bring in da crop dat you neva work fo. Odda guys wen work hard, an den you guys get da good kine stuff dey wen work fo.” 39 Plenny Samaritan peopo from dat town wen trus Jesus cuz a wat da wahine wen tell dem. She say, “He wen tell me everyting I eva do.” 40 So wen da Samaritan peopo wen come by Jesus, dey beg him, “Come stay wit us!” So he wen stay dea two days. 41 Den plenny odda peopo wen trus him, cuz dey wen hear wat he say. 42 Den dey tell da wahine, “Befo, we ony hear wat you wen tell us. But now we trus him cuz we hear him ourself, an we know fo shua dat dis da Guy who can take all us guys in da whole world outa da bad kine stuff we stay in.”

Jesus Make One Leada Guy's Boy Come Good

43 Afta Jesus wen stay dea two days, he wen go Galilee side. 44 You know, Jesus wen tell befo, “One talka fo God no mo respeck inside his own town.” 45 But befo, Passova time, da peopo from Galilee wen go Jerusalem fo da spesho religious time. An dey wen see everyting dat Jesus wen do ova dea. So wen he come Galilee, da peopo from dea wen give him all dea aloha. 46 Den Jesus go Cana town Galilee side one mo time. Dass wea he wen take da water an make um come wine befo time. Now, had one leada guy Capernaum town dat work fo da King. His boy stay sick. 47 Da guy wen hear dat Jesus wen come from Judea to Galilee side. So he wen go Cana town by Jesus, an beg him fo make his boy come good, cuz da boy litto mo mahke. 48 Jesus tell him, “If you guys no see me show you all kine awesome stuff, you guys no like trus me.” 49 Da leada guy say, “Boss, try come, o my kid goin mahke.” 50 Jesus tell him, “Go home. Yoa boy stay live.” An da guy wen trus wat Jesus wen tell um, an he go home. 51 Wen he stay going home, his worka guys wen come an tell him, “Yoa boy, he stay live!” 52 He aks dem, “Wat time my boy wen come mo betta?” Dey say, “Da feva wen pau one clock yesterday.” 53 Da fadda wen know dat da same time wen Jesus wen tell him, “No worry. Yoa boy stay live.” Den him an all his ohana wen trus Jesus. 54 Dis da numba two awesome ting Jesus wen do afta he leave Judea side an go Galilee side.

Jesus Make One Guy Come Good By One Water Place

5:1 Latas Jesus wen go Jerusalem, cuz da Jewish peopo get one spesho religious time. 2 Inside Jerusalem get one big water place near da Gate fo da Sheeps. Get five lanai dea. Da peopo call um ‘Betzata’ in da local language. 3 Inside da lanai plenny sick peopo was lying down: blind peopo, peopo dat no can walk, an peopo dat no can move. Dey stay waiting fo weneva da water move. 4 Cuz you know, sometimes one angel guy from da Boss go down inside da water an make um move. Afta dat, da first guy dat go inside da water, he come good from wateva kine sick he get. 5 Had one guy dea dat was sick thirty-eight years. 6 Jesus see him lying dea. He know dat da guy stay sick long time awready. So he aks him, “You like come good?” 7 Da sick guy tell him, “Mista, I no mo nobody fo put me inside wen da water start fo move. Cuz wen I trying fo go inside, anodda guy go inside first.” 8 Jesus tell him, “Get up! Take yoa mat an walk!” 9 Right den an dea da guy wen come good. He take his mat an wen walk. Was da Rest Day wen dat wen happen. 10 So da Jewish leada guys tell da guy dat wen come good, “Eh, dis da Rest Day! Dass agains da Rules fo you fo carry yoa mat! 11 He say, “Da guy dat wen make me come good, he tell me, ‘Take yoa mat an walk.’-” 12 Dey aks him, “Who da guy dat wen tell you fo take yoa mat an walk?” 13 But da guy dat wen come good neva know who Jesus, cuz had plenny peopo dea, an Jesus wen throw da dig. 14 Bumbye Jesus wen find da guy inside da temple yard. He say, “Eh, you stay good now. No go do da bad kine stuff no moa, o mo worse ting goin happen to you.” 15 Den da guy go way an tell da Jewish leada guys dat was Jesus wen make him come good. 16 Dass why dem guys wen start fo make Jesus suffa, cuz he wen make da guy come good on da Rest Day. 17 So Jesus tell dem, “My Fadda still yet stay doing da kine good tings, an I do da same ting too.

God's Boy Get Da Right Fo Make Like God

18 Dass why da Jewish leada guys wen try mo hard fo kill him, cuz he wen broke da Rules bout da Rest Day. An even mo worse, he wen say dat God his own Fadda. Dat mean he wen make himself jalike God. 19 So Jesus tell dem, “You guys get um fo shua! An I tell you guys dis: I no can do notting by myself. I God's Boy, an I ony do da stuff I see my Fadda doing. Wateva my Fadda do, dass wat I do. Same ting. 20 My Fadda get love an aloha fo me, his Boy. An he show me everyting dat he stay doing. He goin show me even mo betta tings den dis, an dat goin blow yoa minds! 21 My Fadda bring back da mahke guys an make um live. Same ting, me, cuz I his Boy, I can make anybody I like come back fo live again. 22 My Fadda not da judge fo nobody, but he wen make me da judge fo everybody, cuz I his Boy. I da one dat suppose to say if dey wen do good tings o bad tings. 23 My Fadda like everybody get respeck fo me, cuz I his Boy, jalike dey get respeck fo him. Whoeva no mo respeck fo me, cuz I his Boy, dey no mo respeck fo my Fadda dat wen send me. 24 “Dass right! An I tell you guys dis: Whoeva hear wat I say, an trus God who wen send me, dey get da real kine life dat stay to da max foeva. God no goin punish dem. Dey no stay mahke no moa. Dey stay live now fo real kine. 25 An if you guys undastan dat, I like tell you guys dis too: I God's Boy. Da time goin come, an awready stay hea now, wen da mahke guys goin hear wat I say. An da peopo who hear me, an lissen to wat I say, dey goin live fo real kine. 26 Jalike my Fadda, he can make da peopo come alive fo real kine, same ting, cuz I his Boy he give me da power fo make um come alive too. 27 My Fadda wen give me da right fo be da judge fo everybody, cuz I his Boy, da Guy Dass Fo Real. 28 No let dis blow yoa minds, cuz da time goin come wen all da mahke guys goin hear my voice. 29 An dey goin come outa dea graves. Da peopo dat wen do da good kine stuff goin come back fo live again, an da peopo dat wen do da bad kine stuff goin come back fo get punish.

Da One Dat Tell Bout Jesus

30 “I no can do notting by myself. I da judge, but wen I say dey wen do good o bad, dat come from wat my Fadda tell me. Dass how come I can judge um right, cuz I not trying fo do wat I like, but ony wat my Fadda like. He da One who wen send me. 31 “If I da ony guy telling bout myself, dat not proof nuff dat wat I say stay true. 32 Get anodda One dat tell wat he know bout me. An I know dat everyting he tell bout me stay true. 33 You guys wen send messenja guys to John, an he wen tell everyting he know bout da trut bout me. 34 I no need peopo fo tell wat dey know bout me. But I telling dis stuff so dat you guys can come outa da bad kine stuff you stay doing. 35 Wat John wen say wen stay jalike one lamp dat stay shiny bright. Fo litto wile you guys wen like wat John wen say, cuz wen make you guys stay good inside. 36 But I get odda stuff dat tell bout me, an dass mo betta den wat John tell. Da Fadda give me stuff fo do, an I do um. Da tings I do show who me, an make proof dat da Fadda wen send me. 37 An da Fadda, who wen send me, he one nodda One dat tell wat he know bout me. But you guys neva hear him o see him. 38 You guys no mo wat God say inside you guys, cuz you guys no trus me, an I da guy he wen send. 39 You guys go check out da Bible everytime, cuz you guys tink you goin find da real kine life dat stay to da max foeva, inside da Bible from befo time. But wen da Bible talk bout how fo get da real kine life, dass me he talking bout. 40 An you guys, you no like come by me an be my guys so dat you guys can get da real kine life dat stay to da max foeva. 41 “I no need peopo fo tell me I awesome. 42 But I know you guys. I know dat you guys no mo love an aloha fo God inside you. 43 I wen come to dis world cuz my Fadda wen give me da right fo come fo him. But you guys neva like trus me o lissen to me. If anodda guy come by himself, jus cuz he like, you guys goin trus da guy. 44 You guys like talk good bout each odda, but you guys no do notting fo make God talk good bout you guys. He da ony God. Den how you guys goin trus him? 45 No tink I goin poin finga at you guys to da Fadda. But get one guy dat stay poining finga at you guys. Dass Moses, da guy you trus, cuz he wen give you guys God's Rules. 46 But if you guys wen trus Moses fo real kine, den you guys wen trus me too, cuz he wen write bout me. 47 But you guys neva trus wat Moses wen write, so how you guys goin trus wat I say? No way!”

Jesus Feed Five Tousand Peopo

6:1 Afta dat Jesus dem wen go da odda side Galilee Lake. (Da peopo call um Tiberias Lake too.) 2 Plenny peopo wen go wit him, cuz dey wen see all da awesome stuff he wen do fo show who him, wen he wen make plenny sick peopo come good. 3-4 Now, almos time fo da Jewish Passova. Jesus wen go sit down on top one hill wit da guys he was teaching. 5 Jesus look up an see plenny peopo coming by him. He tell Philip, “Eh, wea we can buy food fo feed all dese peopo?” 6 You know, Jesus wen say dat jus fo check out Philip, cuz Jesus awready know wat he goin do. 7 Philip tell him, “Somebody gotta work mo den two hundred days fo get nuff money fo buy bread fo give all dese peopo even litto bit.” 8 Andrew, he Simon Peter's brudda. Andrew one a da guys Jesus stay teaching. He tell Jesus, 9 “You know, get one boy hea dat get five small barley kine bread an two small fish. But how dat goin feed so plenny peopo? No can!” 10 Had plenny grass dea. Jesus tell his guys, “Make da peopo sit down.” So dey sit um down. Had bout five tousand guys dea. 11 Den Jesus take da breads, an tell God, “Mahalo plenny.” He give um to his guys, an dey give um to da peopo dat was sitting dea. Same ting wit da fish. An everybody eat how plenny dey like. 12 Wen everybody get nuff fo eat, Jesus tell his guys, “Go get all da lefovas. No good waste um.” 13 So dey go get da lefovas, an fill twelve big baskets wit da bread da peopo neva eat. 14 Afta da peopo see dis awesome ting Jesus wen do fo show who him, dey say, “Fo shua dis da Guy who goin come inside da world fo talk fo God.” 15 Jesus wen know dat da peopo goin come fo grab him fo make him come king. So he wen go way, an go up on top one hill wea nobody stay.

Jesus Walk On Top Da Water

16 Befo dark time come, Jesus guys wen go down to da lake. 17 Dey go inside one boat, an start fo go da odda side da lake, Capernaum side. Now, dark time wen come awready, but still yet Jesus neva come by dem. 18 Den one strong wind wen start fo blow, an da waves was coming mo big. 19 Jesus guys wen row da boat three o four miles, an den dey spock Jesus walking on top da water. He was coming near da boat. An dey was real scared. 20 But Jesus tell dem, “Dis me! No scared!” 21 Den dey let him come inside da boat. Right den an dea dey wen come to da place wea dey was going.

Da Peopo Stay Looking Fo Jesus

22 Da nex day, da peopo dat stay back dea, da odda side da lake, dey know dat had ony one boat dea befo. An dey know Jesus guys wen go way inside dat boat, but Jesus neva go wit dem. 23 Dey know too dat odda boats from Tiberias side wen come land dat side, near da place wea da Boss Jesus wen tell God “Mahalo plenny” an dey wen eat da bread. 24 So, wen da peopo wen see dat Jesus an his guys no stay, dey wen go inside da odda boats, an go Capernaum fo look fo him.

Da Bread Dat Make Us Come Alive

25 Dey find Jesus on da odda side da lake, an dey aks him, “Eh, Teacha! Wen you wen come ova hea?” 26 Jesus tell dem, “Dass good you guys stay looking fo me. But I like tell you guys dis: You guys do um cuz I wen give you guys bread, an you guys wen come full. You guys no stay looking fo me cuz I wen do awesome stuff fo show who me. 27 No go work ony fo da kine food dat bumbye come no good. Work fo da kine food dat stay long time an can make you guys live to da max foeva. I da Guy Dass Fo Real, an I can give you guys dat kine, cuz God da Fadda wen give me da right fo do dat.” 28 Dey tell him, “Kay den! Wat us guys gotta do, fo do da kine stuff dat God like?” 29 Jesus tell dem, “Dis wat God like you guys fo do: Trus me, cuz I da Guy God wen send.” 30 Dey say, “Wat kine awesome ting you goin do fo show us who you, so us guys can trus you? Wat you goin do? 31 Our ancesta guys wen eat da spesho manna kine bread inside da boonies, jalike da Bible say, ‘He wen give dem bread from da sky fo eat.’-” 32 Jesus tell dem, “Dass right! An I tell you guys dis too: No was Moses dat wen give yoa ancesta guys da bread from da sky. Was my Fadda, an he da One dat give you guys da real kine bread from da sky still yet. 33 Cuz da bread from God, dass me, da Guy dat come down from da sky. I make da peopo inside da world come alive fo real kine.” 34 Dey tell him, “Mista, give us dis kine bread, an no stop eva!” 35 Jesus tell dem, “I jalike da bread. I da One dat can make da peopo come alive fo real kine. Anybody come by me fo be my guy, dey no goin come hungry eva! Anybody trus me, dey no goin come thirsty eva! 36 “Jalike I wen tell you guys awready, you guys wen see me, but you guys still yet no trus me. 37 Everybody da Fadda pick fo be my guys, dey goin come by me. No way I eva goin throw out da peopo dat come by me! 38 I wen come down from da sky. I neva come fo do any kine how I like, but fo do wat my Fadda like. He da One who wen send me. 39 Dis wat da Fadda like me fo do: Everybody he pick fo be my guys, he like me fo get dem all, an no leave nobody. An den, I goin make dem come back alive wen da world goin pau. 40 Jalike I wen say: dis wat my Fadda like, da One who wen send me: Everybody dat see me his Boy, an trus me, dey goin get da real kine life dat stay to da max foeva. An I goin make dem come back alive wen da world goin pau.” 41 Dass why da Jewish guys wen start fo grumble bout him, cuz he wen say, “I jalike da bread dat can make da peopo live. I wen come down from da sky.” 42 Dey tell each odda, “Eh, dis guy, he Jesus, yeah? He Joseph's boy! We know his fadda an mudda, yeah? So, how come he say now, ‘I wen come down from da sky’?” 43 Jesus tell dem, “Eh! Stop grumbling to each odda! 44 My Fadda wen send me hea. No mo nobody can come by me, if my Fadda no bring um. An I goin make dem guys come back alive from mahke wen da world goin pau. 45 Da guys who wen talk fo God long time ago, dey wen write, ‘God goin teach all da peopo.’ Everybody who wen lissen to da Fadda, an learn da good kine stuff from him, dey goin come by me an be my guys. 46 I Da guy dat come from God, an I da ony guy dat eva see da Fadda. No mo any odda guy who wen eva see him. 47 “Dass right! An I like tell you guys dis too: Whoeva trus me, dey goin live to da max foeva. 48 I jalike da bread, an I can make da peopo live to da max foeva. 49 Yoa ancesta guys wen eat da manna kine bread in da boonies, but no matta, lata dey wen mahke die dead. 50 But dis kine bread from me, dat come down from da sky, anybody can eat dis bread. Dat mean dey can trus me, an den, dey no goin stay cut off from God. 51 I da real bread. I da one dat can make peopo come alive fo real kine. I wen come down from da sky. Anybody take dis bread, dey goin live to da max foeva. Dis da bread I goin give wen I mahke, my body. An dis goin make you live to da max foeva. 52 Den da Jewish guys wen start fo argue mo hard wit each odda. Dey say, “Eh, wat dis guy talking bout? How he can give us his body fo eat?” 53 Jesus tell dem, “Eh, you guys get um! An I like tell you guys dis too: I da Guy Dass Fo Real. If you guys no take wat I telling you guys bout why I goin mahke, no way you guys goin come alive fo real kine. If you guys take um, dass jalike you guys eat my body an drink my blood. 54 Jalike I wen say: Whoeva eat my body an drink my blood, dey goin live to da max foeva, an I goin bring um back alive wen da world goin pau. 55 Cuz my body, dass food fo real kine. An my blood, dass drink fo real kine. 56 Whoeva eat my body an drink my blood lidat, dey stay tight wit me, an I stay tight wit dem. 57 Da Fadda stay live fo real kine, an he wen send me hea. I stay live too, cuz he make me live fo real kine. Whoeva take me, same ting, dey goin live, cuz I goin make dem live fo real kine. 58 Dis not jalike da manna kine bread dat yoa ancesta guys wen eat, an bumbye dey wen mahke. Dis da kine bread dat wen come from God in da sky. Whoeva eat dis kine bread goin live fo real kine.” 59 Jesus say all dat wen he stay teaching inside da Jewish church, Capernaum side.

Da Good Kine Stuff from God Make Peopo Come Alive Foeva

60 Den plenny guys dat go wit Jesus, wen dey wen hear all dat stuff, dey say, “Wow! Dis stuff too hard fo believe!” 61 But Jesus wen know dat his guys stay squawking lidat. So he aks um, “Wat! Dis bodda you guys? 62 Eh, wat if bumbye you guys see me, da Guy Dass Fo Real, going back up dea, to da place wea I wen stay befo? Den wat? 63 “God's Spirit, dass who make da peopo live fo real kine. Da body no can. Wat I stay telling you guys, dass from God's Spirit, an dass wat make peopo live fo real kine. 64 But get some a you guys dat no trus me.” Jesus wen say dat cuz he wen know from da start who no trus him, an who goin set up him. 65 An he say, “Dass why I wen tell you guys, no mo nobody can come by me an be my guy. Ony if da Fadda like help um, den dey can come.” 66 From dat time had plenny guys dat he wen teach befo, but some a dem wen go back, an neva like go wit him no moa. 67 So Jesus aks his twelve guys, “Eh, you guys goin go way too, o wat?” 68 Den Simon Peter tell him, “Boss, wea we goin go? No mo nobody can tell us how fo live to da max foeva. You da ony one. 69 An us guys trus you, cuz we know dat you da Good An Spesho One from God.” 70 Jesus tell um, “I wen pick all twelve a you guys, yeah? But still yet, one a you guys, he jalike one devil!” 71 He mean Judas, Simon Iscariot's boy. He one a da twelve guys, but latas Judas goin set up Jesus.

Jesus an His Bruddas

7:1 Afta dat, Jesus go aroun inside Galilee. He neva like go aroun inside Judea, cuz da Jewish leada guys ova dea stay looking fo him, fo kill him. 2 Now, almos time fo da spesho religious time, wen da Jewish peopo rememba da time dea ancesta guys wen walk all ova da boonies, an stay inside shacks, long time befo. 3 Den Jesus bruddas tell him, “Go way from hea, an go Judea side, so da peopo you wen teach can see da kine stuff you stay doing. 4 If one guy like everybody know bout him, he no goin do stuff wea nobody can see him, yeah? You stay doing all dis kine stuff, so, let everybody all ova da place see you doing um!” 5 You know, even Jesus bruddas neva trus him. 6 Jesus tell dem, “Az not time fo me fo go yet. You guys can go any time. 7 Da peopo inside da world, dey no goin hate you guys. But dey hate me, cuz I tell um dat da kine stuff dey stay doing, dass bad kine stuff. 8 You guys go Jerusalem fo da spesho religious time. I no going yet, cuz not time fo me fo go.” 9 Afta he wen say dat, den he wen stay Galilee side.

Jesus Go Da Spesho Religious Time

10 But afta Jesus bruddas wen go da spesho religious time, den he wen go too. But nobody know he wen come. 11 Den da Jewish leada guys, dey stay looking fo him at da spesho religious time. Dey wen aks da peopo, “Wea dat bugga stay?” 12 All da peopo stay talking bout him to each odda. Some peopo say, “He one good guy, you know.” Odda peopo say, “Nah! He bulai da peopo.” 13 But nobody talk loud bout him, cuz dey scared da Jewish leada guys. 14 In da middle a da spesho religious time awready Jesus go inside da temple yard an start fo teach. 15 Da Jewish leada guys, wen blow dea minds. Dey say, “How come dis bugga know all dis stuff? He neva study wit da odda teachas, you know.” 16 Jesus tell dem, “Da stuff I teach, no come from me. Come from da One who wen send me. 17 If anybody like do wat God like um fo do, dey goin know if da stuff I teaching come from God, o if ony come from my own head. 18 Da guy dat tell stuff dat come from his own head, he ony like make peopo tink he awesome. But if one guy like peopo fo tink dat da one who wen send him stay awesome, dat guy stay telling da trut. He no notting wrong. 19 Moses wen give you guys God's Rules, but no mo nobody from you guys do wat God's Rules say. So, how come you guys trying fo kill me?” 20 All da peopo say, “Wassa matta you? You get one bad kine spirit in charge a you, o wat? Wat you mean, somebody trying fo kill you?” 21 Jesus tell dem, “I wen do one awesome ting, an dat wen blow all you guys minds. 22 Moses wen give you guys da Rule fo cut skin on day numba eight afta one baby boy wen born, an you guys do um fo one baby boy, no matta da Rest Day. (You know, our ancesta guys wen do dat long time befo Moses. No was Moses dat wen give um da Rule first time.) 23 Now, if you guys can cut skin on one guy on da Rest Day fo no broke Moses Rules, how come you guys come huhu wit me cuz I wen make one sick guy come good on da Rest Day? 24 No ack like one judge wen you guys can see ony da outside stuff. If you guys goin ack like one judge, gotta figga um da right way.”

Dis God's Spesho Guy?

25 Den some peopo from Jerusalem wen say, “Eh! Dis da guy dey stay looking fo, cuz dey like kill him, yeah? 26 But, wow! He stay talking hea in front everybody, an nobody tell him fo shut his mout. Wat you guys tink? You tink da leada guys wen figga dat dis guy, he da Spesho Guy God Goin Send, fo real kine, o wat? 27 But us guys, we know wea dis guy wen come from. Wen God send his Spesho Guy Christ, nobody goin know wea he wen come from.” 28 Jesus stay teaching inside da temple yard. Wen he hear dem guys say dat, he talk real strong an say, “You guys tink you know me, an wea I wen come from? I neva come hea by myself, fo do wat I like. Da One who wen send me, he fo real. But you guys donno him. 29 But I know him, cuz I wen come from him, an he wen send me hea.” 30 Den dey wen try fo take him, but nobody wen grab him, cuz not time yet. 31 But plenny peopo dat stay dea wen trus him. Dey say, “Wen Christ, God's Spesho Guy come, you tink he goin do mo awesome stuff fo show who him den dis guy? Nah!”

Dey Send Da Police Fo Bus Jesus

32 Da Pharisee guys wen hear all da peopo saying dat stuff bout Jesus. So dem guys an da main pries guys wen send da police guys from da temple fo bus him. 33 Den Jesus say, “I ony goin stay wit you guys litto bit mo time, an den I goin go back to da One who wen send me hea. 34 You guys goin look fo me, but you no goin find me, cuz wea I going, you guys no can go ova dea.” 35 Den da Jewish leada guys tell each odda, “Wea dis bugga going, an we no can find him? You tink he going by da Jewish peopo inside da Greek towns far away, fo teach da peopo dat talk da Greek language, o wat? 36 Wat he mean wen he say, ‘You guys goin look fo me, but you no goin find me,’ an ‘Da place I goin stay, you guys no can go dea’?”

Da Water Dat Make da Peopo Live

37 On da last day a da spesho religious time, dass da main day, Jesus wen stand up, an talk real loud. He say, “Whoeva stay thirsty, let um come by me fo drink. 38 Jalike da Bible say, ‘Whoeva trus me, dey come alive inside dem. An dey goin help make da odda peopo come alive too, jalike one river dat get plenny water inside um give da kine water fo help da peopo live.’-” 39 Jesus say dat bout God's Spirit, cuz bumbye da peopo who trus Jesus goin get God's Spirit. Dat time Jesus wen say dat, dey neva get da Spirit yet, cuz God neva make Jesus come awesome yet.

Da Peopo Split in Half

40 Plenny peopo wen hear him say dat. An dey say, “Fo shua, dis da Spesho Guy dat goin come fo talk fo God!” 41 Da odda guys say, “Dis da Christ guy, da Spesho Guy God Wen Send!” But da odda guys say, “You tink God's Spesho Guy goin come from Galilee? Nah! 42 Da Bible say dat da Christ guy goin come from King David ancesta guys, an goin come from Betlehem, wea King David wen live, yeah?” 43 So da peopo wen split in half cuz a Jesus. 44 Some guys wen like grab him an bus him, but nobody wen touch him.

Da Jewish Leada Guys No Trus Jesus

45 Da police guys wen go back by da main pries guys an da Pharisee guys. An da pries guys wen aks da police guys, “Eh! How come you guys neva bring him hea?” 46 Dey say, “Wow! Nobody eva talk like dat guy Jesus!” 47 Da Pharisee guys say, “Wat! He wen bulai you guys too? 48 You know, no mo leada guys o Pharisee guys dat trus him. 49 But dis peopo, dey donno God's Rules, an God goin punish dem!” 50 Nicodemus, he one a da Pharisee guys. He da guy wen come fo talk to Jesus one nite befo time. He say, 51 “Our Rules say, we gotta lissen to da guy first, an find out wat he wen do. Den we can figga if he wen do good o bad.” 52 Dey tell him, “Wot! You no come from Galilee jalike him! Go check out da Bible. You goin find out dat nobody dat eva talk fo God come from Galilee!” 53 Den everybody wen go home dea own place.

Da Wahine Dat Wen Fool Aroun

8:1 But Jesus wen go Olive Ridge. 2 Nex day he go inside da Temple yard early. Everybody come wea he stay. Den he sit down dea fo teach dem. 3 Da guys dat teach God's Rules an da Pharisee guys wen find one wahine fooling aroun wit one guy dat not her husban. So dey bring her in front Jesus an all da peopo. 4 Dey tell him, “Teacha, we wen find dis wahine fooling aroun wit anodda guy dat not her husban! 5 Now, Moses wen tell us in da Rules, ‘Whoeva fool aroun behind da odda's back, gotta throw big kine stones at um fo kill um.’ But you, wat you say?” 6 Dey say dat fo see wat he goin say, cuz dey like catch him fo bus him. But Jesus wen bend ova an write someting wit his finga on top da dirt. 7 So wen dey stay aks him ova an ova, he stand up strait an tell um, “If get one a you guys dat neva do bad kine stuff, he can throw da first stone at her.” 8 Den he bend ova one mo time, an write some mo on top da dirt. 9 Wen dey hear dat, dey wen come shame cuz dey know dey do bad kine stuff too. So dey all go way, one afta da odda, da older guys first, an den da younga guys. Den get ony Jesus an da wahine standing dea. 10 Jesus stand up again an say, “Sista, wea everybody stay? No mo nobody hea fo say you gotta mahke?” 11 She say, “No mo, Mista.” Jesus say, “You can go now, cuz I no say you gotta mahke. But no go do da bad kine stuff no moa.

Jesus Jalike da Light fo da Peopo All Ova da World

12 Jesus wen talk to dem one mo time. He say, “I jalike da light fo da peopo inside da world. Whoeva come by me an be my guy, dey no goin go aroun inside da dark. Dey goin get da light dat make dem live fo real kine.” 13 Da Pharisee guys tell him, “Eh! You saying dis fo yoaself. No mo odda guy say um fo you. So dat not nuff fo make proof dat wat you say stay true.” 14 Jesus tell dem, “No matta I talk fo myself, wat I say stay true. I know wea I wen come from, an wea I going. But you guys, you donno wea I wen come from, o wea I going. 15 You guys figga how one guy stay from looking at him on da outside. I no tink lidat. 16 No matta if I say one guy good o bad, I wen tell da trut, cuz I no do um by myself. I get my Fadda fo help me, cuz he da One wen send me hea. 17 Yoa own Rules say dat wen two peopo tell da same ting, den wat dey say stay true. 18 Kay den. I tell bout myself, an my Fadda who wen send me hea, he tell da same ting bout me.” 19 Dey tell, “Yeah? Yoa fadda, wea he stay?” Jesus say, “You guys donno me o my Fadda. If you guys wen know me, den you guys wen know my Fadda too.” 20 Jesus wen say all dat wen he wen teach inside da Temple, near da place wea dey bring da money. An nobody bus him, cuz not time yet fo dat. “Da Place I Going, You Guys No Can Go Dea” 21 Jesus tell dem again, “I going away, an you guys goin look fo me. Da place I going, you guys no can go dea. But you guys goin mahke wit all da bad kine stuff you guys stay doing. 22 So da Jewish leada guys say, “Wat he talking bout? He goin kill himself, o wat? Cuz he say, ‘Da place I going, you guys no can go dea.’-” 23 Jesus tell dem, “You guys come from down hea, I come from up dea. You guys come from dis world, I no come from dis world. 24 Dass why I wen say dat you guys goin mahke wit all da bad kine stuff you guys stay doing. Cuz if you guys no believe dat I da Spesho Guy, den you guys goin mahke wit all yoa bad kine stuff.” 25 So dey aks him, “Eh, who you?” Jesus say, “I da same guy, jalike I wen tell you guys from da start. 26 Get plenny bad kine stuff I can tell bout you guys, but I no goin tell um. Da One who wen send me hea, he everytime tell da trut. I ony tell da peopo inside da world da stuff I wen hear from him.” 27 (He mean his Fadda. But dem guys, dey no undastan.) 28 Jesus tell dem, “Bumbye you guys goin put me, da Guy Dass Fo Real, up high. Den you guys goin know dat I da Spesho Guy, an dat I no do notting by myself. I ony teach da stuff my Fadda wen teach me. 29 Da One who wen send me hea, he stay wit me. He no leave me by myself. I everytime do da kine stuff dat he like.” 30 Wen he wen say all dat, plenny peopo wen trus him. “You Guys Goin Know Wat Stay True” 31 Den Jesus tell da Jewish peopo dat wen trus him, “If you guys stick wit me an da stuff I teaching you, den you goin be my guys fo real kine, an you guys goin learn mo plenny stuff from me. 32 You guys goin know da true stuff, an den you guys no need be slave guys no moa.” 33 Dey tell him, “Ho! Us guys come from Abraham! We neva was slave guys eva! Wat you mean, ‘No need be slave guys no moa’?” 34 Jesus tell dem, “Dass right, wat I wen tell you! An I tell you guys dis too: Whoeva stay do da bad kine stuff, dey jalike one slave, cuz dey gotta do da bad kine stuff. 35 You know, one slave guy no stay wit da boss foeva. Ony da boss's boy, he stay wit him foeva. 36 So, I God's Boy, an if I hemo da shame fo da bad kine stuff you guys wen do, an let you guys go, den you guys no need be slave guys foeva. Fo shua you guys no need do da bad kine stuff! 37 “I know dat you guys come from Abraham. But still yet, you guys trying fo kill me, cuz you guys no like take da stuff I stay teaching. 38 I tell bout da stuff I wen see, dat my Fadda wen show me, an you guys do da stuff you wen hear bout from you guys fadda.”

Da Devil, He You Guys Fadda

39 Dey tell him, “Us guys, eh, Abraham our fadda!” Jesus tell dem, “If you guys was Abraham's kids, den you guys suppose to do da kine stuff Abraham wen do. 40 But now you guys stay trying fo kill me, no matta I everytime tell you guys da trut, jalike I wen hear um from my Fadda. Abraham, he neva make like you guys! 41 You guys do da kine stuff dat come from yoa fadda.” Dey tell him, “Eh, us guys ony get one fadda, an he God! No mo odda guy our fadda!” 42 Jesus tell dem, “If God was you guys fadda, den you guys wen get love an aloha fo me, cuz I wen come from God, an now I stay hea. I neva come by myself, but God wen send me hea. 43 How come you guys no can undastan da stuff I telling you? Cuz you guys no like lissen, dass why! 44 “You guys come from yoa fadda, da Devil! You guys like do da kine stuff he like do. From da start, he wen like kill da peopo. He no like da trut, cuz no mo notting true inside him. He everytime bulai, cuz dass wat he like do. He da first guy eva wen bulai, cuz dass how he stay. 45 I stay telling you guys da trut, but you guys no trus me. 46 You guys no can show proof dat I wen do da bad kine stuff, yeah? So, if I stay telling da trut, how come you guys no trus me? 47 “Whoeva come from God, dey lissen to wat God say. Dass why you guys no like lissen to me, cuz you guys no come from God.”

“Befo Abraham Stay, I Stay Awready”

48 Da Jewish leada guys tell him, “Az right wat we saying! You one Samaritan guy, not one real Jew, an you get one bad kine spirit in charge a you!” 49 Jesus tell dem, “I no mo bad kine spirit in charge a me. I show respeck fo my Fadda. But you guys no mo respeck fo me. 50 I no try fo make peopo tink I awesome. Get anodda One dat show peopo how awesome I stay, an he da judge. 51 “If you guys undastan dat, den I like tell you guys dis too: Whoeva lissen to wat I say, dat guy no goin mahke, eva!” 52 Den da Jewish leada guys tell him, “Ho! Now we stay shua dat you get one bad kine spirit in charge a you. Abraham wen mahke, an da guys dat wen talk fo God long time ago, dey wen mahke too. But you still say, ‘Whoeva lissen to wat I say, dey no goin mahke, eva.’ 53 You tink you mo importan den our fadda Abraham? He wen mahke awready. An da guys dat wen talk fo God, dey wen mahke too. Who you tink you, hah?” 54 Jesus say, “If I try make da peopo tink I awesome, dat no good. My Fadda, he da One dat show dem how awesome I stay. An you guys say dat he yoa God. 55 But you guys neva know him. I know him. If I wen say dat I donno him, den I bulai, jalike you guys. But I know him, an I do wat he say. 56 Abraham, dass you guys fadda. He wen stay real good inside wen he tink dat I goin come hea. He wen see dat, an he feel good inside.” 57 Da Jewish leada guys tell him, “Eh! you no make fifty years yet! Wat you mean, you wen see Abraham?” 58 Jesus tell dem, “Dass right! An I tell you guys dis too: Befo Abraham wen born, I wen stay awready.” 59 Den dem guys wen go get rocks fo throw at Jesus. But he wen hide an wen go outside from da temple yard.

Jesus Make One Guy See Dat Wen Born Blind

9:1 Afta dat Jesus was walking, an he spock one guy dat wen born blind. 2 Da guys Jesus stay teaching wen aks him, “Eh, Teacha! Who wen do bad kine stuff, dis guy o his mudda an fadda? Az why he wen born lidat, yeah?” 3 Jesus tell dem, “Not even him o his fadda o mudda. Az not why he wen born blind. He wen born lidat so dat everybody can see da awesome stuff God goin do fo da guy. 4 God wen send me hea. We gotta do da kine stuff he tell us fo do now wen still get light. Bumbye nite time come, an den nobody can work. 5 I stay inside da world now, an I jalike da light fo da peopo all ova da world.” 6 Afta Jesus say dat, he wen spit on top da dirt, an make some mud. Den he take some a dat an put um on top da guy's eyes. 7 Den Jesus tell him, “Go, wash yoa face inside da Siloam water place.” Now, Siloam mean, “Dey Send Water Dea.” So da guy go ova dea an wash his face, an wen he go home, he can see! 8 So da peopo dat stay live near da guy, an da oddas dat wen see him beg befo, dey say, “Eh, dis da guy dat wen sit an beg befo, yeah?” 9 Some peopo say, “Yeah, he da guy!” Odda peopo say, “Nah! He ony look like him.” But da guy say, “Yeah! I da guy!” 10 So dey aks him, “How come you can see now?” 11 He tell dem, “Da guy Jesus wen make mud, an put um on top my eyes, an tell me, ‘Go da Siloam water place an wash.’ So I wen go an wash, an den I can see!" 12 Dey aks him, “Wea he stay?” He say, “I donno.”

Da Pharisee Guys Check Out Da Guy Dat Was Blind

13 Den dey take da guy dat was blind to da Pharisee guys. 14 Now, dat was da Rest Day wen Jesus wen make da mud an make da guy see. 15 So da Pharisee guys wen aks him, “Eh, how come you can see?” Da guy tell dem, “He wen put mud on top my eyes, an I wen wash, an den I can see!” 16 Den some a da Pharisee guys say, “Dis guy no can come from God, cuz he do stuff he not suppose to do on da Rest Day.” But odda Pharisee guys say, “Nah! How can one bad kine guy do da kine awesome stuff dat show who him?” An dey wen argue wit each odda. 17 So dey aks da guy dat was blind one mo time, “Eh, wat you say bout da guy dat wen make you see? Da guy say, “He one talka fo God.” 18 Da Jewish leada guys neva believe dat da guy wen stay blind befo he wen see. So dey wen send guys fo bring his mudda an fadda. 19 Dey aks da mudda an fadda, “Dis yoa boy? You say he wen born blind? How come he can see now?” 20 Da mudda an fadda say, “Yeah, dis our boy. An he wen born blind. 21 But we donno how come he can see now, o who da guy wen make him see. Go aks him. He old nuff. He can talk fo himself.” 22 His mudda an fadda guys wen talk lidat, cuz dey scared da Jewish leada guys. Cuz dem guys wen awready talk togedda, an say, “If anybody say dat Jesus da Christ, da Spesho Guy from God, we goin throw him outa da Jewish church.” 23 Dass why his mudda an fadda guys wen say, “He old nuff. Go aks him.” 24 So dey tell da guy dat was blind fo come back one mo time. Dey say, “Eh! Tell da trut in front God! Us guys know fo shua dat dis bugga Jesus, he one bad guy. 25 Da guy tell dem, “I donno if he one bad guy o wat. But I know one ting: befo I no can see -- now I can see!” 26 Dey aks him, “Wat he wen do to you? How he wen open yoa eyes?” 27 He tell dem, “I wen tell you guys awready, but you guys neva lissen. How come you guys like hear um again? You guys like come his guys so he can teach you guys too?” 28 Den dey talk bad to him, an say, “You his guy, an you lissen to him. Us guys, we Moses guys, an we ony lissen to Moses. 29 We know dat God wen talk to Moses. But dis bugga, we donno wea he come from.” 30 Da guy tell dem, “Wat! Dis blow my mind! You guys donno wea he wen come from, but still yet he wen make me see.” 31 An da guy say, “Now, we know dat God no lissen to da bad kine guys. But he lissen to da guys dat get respeck fo him an do wat he like.” 32 An da guy say, “Lissen! From da time wen God wen make da world till now, nobody eva wen hear dat somebody wen make one guy see dat wen born blind.” 33 An da guy say, “If dis guy neva come from God, den he no can do notting.” 34 Dey tell him, “Eh, you ony do da bad kine stuff from da time you wen born! How come you tink you can teach us guys someting?” Den dey wen throw him outa da Jewish church.

Blind Inside

35 Jesus wen hear dat dey wen throw da guy outa da Jewish church, so he go find da guy, an tell him, “You trus da Guy Dass Fo Real?” 36 Da guy say, “Who him, Mista? Tell me, so I can trus him.” 37 Jesus tell him, “You wen see him awready. Dass me, da guy talking to you.” 38 Da guy say, “Boss, I trus you!” An he go down on his knees in front Jesus. 39 Jesus tell him, “I wen come inside dis world fo show who do da bad kine stuff. Bumbye da guys dat no can see, goin see, an da guys dat can see goin come blind.” 40 Had some Pharisee guys dea dat wen hear dat. Dey aks Jesus, “Eh! You tink we no can see too?” 41 Jesus tell dem,“If you guys no can see, den nobody can poin finga you guys. But you guys say dat you guys can see. Dass why God poin finga you guys.”

Da Sheep Farma

10:1 Jesus say, “Dis fo shua wat I telling you guys: If get one place fo da sheeps, an somebody no go inside dea by da gate, but he go climb ova da wall one nodda place, dat guy ony like steal da sheeps. 2 But da guy dat go inside by da gate, dass da guy dat take care da sheeps. 3 Da guy dat watch da gate, he open um fo da sheep farma. Da sheeps hear da sheep farma's voice wen he call dem by dea name, an den he take dem outside. 4 Afta he take um outside, he go in front dem, an da sheeps go wit him, cuz dey know his voice. 5 Dey no going wit one guy dat dey donno. Dey goin run away from dat guy, cuz dey donno dat guy's voice.” 6 Jesus wen teach dem dis story, but dey neva undastan wat he teaching dem.

Jesus Jalike One Good Kine Sheep Farma

7 Den Jesus tell um one mo time, “You guys wen undastan dat? Kay den, I like tell you guys dis too: I jalike da gate fo da sheeps. 8 All da odda guys dat wen come befo me, dey jalike steala guys. But da sheeps neva lissen to dem guys. 9 I jalike da gate. If anybody trus me, God goin take um outa da bad kine stuff dey stay in, an let um go. Dass jalike dey goin go inside God's place by me, da gate. An dey goin go wea eva dey like an find food fo eat. 10 Da steala guy, he ony come fo steal, kill, an bus up da place. But I wen come so da peopo can come alive inside, an live to da max. 11 “I jalike one good sheep farma, cuz da good kine sheep farma give himself fo mahke fo his sheeps. 12 “But if get one worka guy dey pay, den he not da sheep farma guy. He no own da sheeps. So wen he spock one wild wolf coming, he run away from da sheeps. Den da wolf grab da sheeps, an all da odda sheeps run all ova da place. 13 Da worka guy run away, cuz he ony working fo da money, an he no care fo da sheeps. 14 “I jalike one good sheep farma. I know my sheeps, an dey know me, 15 jalike my Fadda know me, an I know my Fadda. I give myself fo mahke fo my sheeps. 16 I get odda sheeps too, dat no come from dis place. I gotta go get dem too. Dey goin lissen to my voice, an dey goin come togedda, an be one ohana wit one sheep farma. 17 “Dis why my Fadda get love an aloha fo me: cuz I goin give myself fo mahke so I can come back alive again. 18 Nobody goin make me go mahke, I like do um by myself. I get power fo give myself fo mahke, an fo come back alive. Dass wat my Fadda wen tell me fo do.” 19 One mo time da Jewish guys wen argue wit each odda cuz a wat Jesus wen say. 20 Plenny a dem guys wen say, “Eh! Da bugga get bad kine spirit in charge a him, an he pupule! How come you guys stay lissen to him?” 21 But odda guys wen say, “Nah! One guy wit one bad kine spirit in charge a him no talk lidis! You tink one bad kine spirit can make one blind guy see? No way!”

Da Jewish Leada Guys No Trus Jesus

22 Was one spesho religious time. Dass wen da Jewish peopo rememba da time wen dea ancestas wen make da temple inside Jerusalem spesho fo God again. Was winta time. 23 Jesus was walking inside da temple yard wea da place dey call "Solomon's Lanai" stay. 24 Da Jewish leada guys wen come aroun him an tell him, “Eh, how long you goin make us guys wait? Tell us strait if you da Christ guy, da Spesho Guy From God!” 25 Jesus wen tell dem, “I wen tell you guys awready, but you guys no trus me. Da tings I stay doing cuz my Fadda wen give me da right fo do um, dat show who me. 26 But you guys no trus me, cuz you guys not my sheeps. 27 My sheeps, dey hear my voice. I know dem. An dey stick wit me. 28 I goin make dem live to da max foeva, an no mahke. An nobody can grab dem away from me. 29 My Fadda wen give dem to me. He get mo power den anybody. Dass why nobody can grab dem away from my Fadda. 30 Me an my Fadda, we stay one.” 31 Den one mo time da Jewish leada guys wen pick up stones fo throw um at Jesus fo kill him. 32 Den Jesus wen tell dem, “I wen show you guys plenny good tings dat I wen do fo my Fadda. Now, wat good ting you guys throw stones at me fo?” 33 Da Jewish leada guys tell him, “We throw stones at you cuz you talking stink God, not cuz you wen do good kine stuff. No matta you ony one guy jalike us, you stay make jalike you God!” 34 Jesus tell dem, “Eh, God wen say inside yoa own Rules, ‘I telling you guys, you guys gods.’ 35 Kay den. We know dat everyting da Bible say from befo time, stay true. So, if God wen call dem guys he talking to ‘gods,’ 36 how you guys can say dat I talking stink bout God, cuz I wen say dat I God's Boy? Da Fadda wen say I spesho fo him, an he wen send me hea inside da world. 37 If I no stay doing wat my Fadda like me fo do, den you guys no need trus me. 38 But I stay doing wat my Fadda like me fo do. So, no matta you guys no trus me, trus da stuff I do. Den you guys can know an undastan dat my Fadda stay tight wit me, an I stay tight wit my Fadda.” 39 So one mo time dem guys wen try fo grab him, but he wen dig out. 40 Jesus wen go da odda side da Jordan River, wea John wen baptize first time. An he wen stay ova dea. 41 Plenny peopo wen go by Jesus. Dey say, “John neva do awesome stuff fo show who him, but everyting he wen say bout dis guy Jesus stay true!” 42 An plenny peopo wen go trus him ova dea.

Lazarus Come Back Alive

11:1-2 Had one guy, name Lazarus. He get two sistas, Mary an Marta, an dey all come from Betany town. Mary, she da wahine dat wen put da perfume on top da Boss Jesus feet, an wipe um wit her hair. Now, Lazarus wen come sick. 3 So Lazarus sistas, dey send guys fo tell Jesus, “Boss, yoa good friend Lazarus, he stay sick.” 4 Wen Jesus wen hear dat, he wen say, “Lazarus no goin mahke from dis sick. Dis wen happen so everybody goin know how awesome God stay. I God's Boy, an everybody goin find out from dis how awesome I stay too.” 5 Now Jesus get love an aloha fo da sistas, Marta an Mary, an fo Lazarus too. 6 Afta Jesus hear dat Lazarus stay sick, he still yet stay ova dea da odda side da Jordan River two mo days. 7 Den he tell his guys, “Come on. We go back Judea side, wea Lazarus stay.” 8 Da guys Jesus teaching wen tell him, “Eh, Teacha, ony litto wile befo dis da Jewish peopo wen like throw stones at you fo kill you. An you still like go back ova dea again?” 9 Jesus tell dem, “No scared! God goin take care us guys, cuz he jalike da light. Day time get twelve hours, yeah? If you walk aroun day time, you no goin trip an fall down, cuz da light dat shine inside dis world let you see. 10 But if you walk aroun nite time, you goin trip an fall down, cuz you no mo light.” 11 Afta Jesus wen say dat, he tell dem, “Our friend Lazarus wen go sleep, but I going ova dea fo wake him up.” 12 Jesus guys wen say, “Boss, if he sleeping, he goin come good.” 13 Jesus mean he mahke die dead, but his guys tink he talking bout rest an sleep. 14 Den Jesus tell um strait, “Lazarus mahke awready. 15 I feel good inside fo you guys, cuz I neva stay ova dea wen he wen mahke. Cuz you guys goin trus me cuz a wat goin happen. An now, we going ova dea by him.” 16 Den Thomas da Twin tell Jesus odda guys, “Eh, mo betta we go wit Jesus too, so we can mahke wit him.”

Jesus Make da Mahke Peopo Come Alive Fo Real Kine

17 Den wen Jesus go Betany, he wen find out dat Lazarus wen stay inside da grave four days awready. 18 Now, Betany stay not too far from Jerusalem, not even two miles. 19 Plenny Jewish peopo wen come fo kokua Marta an Mary, cuz dea brudda wen mahke. 20 Den Marta wen find out dat Jesus stay coming. She go outside da town an meet him. But Mary stay inside da house. 21 Marta tell Jesus, “Boss, if you was hea, my brudda no wen mahke! 22 But I know dat even now, God goin do wateva you aks him fo do.” 23 Jesus tell her, “Yoa brudda goin come back alive again.” 24 Marta tell him, “I know dat he goin come back alive, bumbye wen all da mahke guys goin come back alive, an dis world goin pau.” 25 Jesus tell her, “I da Guy dat make peopo come back alive an stay live fo real kine. Whoeva trus me goin come alive, no matta dey mahke. 26 Whoeva stay live fo real kine an trus me, dey no goin mahke inside, eva! You believe dat, Marta?” 27 She tell him, “Yeah, Boss! I trus you, dat you da Christ, da Spesho Guy God Wen Send. You God's Boy, da Guy dey wen tell us goin come inside dis world.”

Jesus Cry

28 Afta Marta wen say dat, she go back by her sista Mary. Dey talk wea nobody can hear wat dey say. She say, “Da Teacha wen come, an he like see you.” 29 Mary wen hear dat. She get up quick an go outside wea Jesus stay. 30 You know, Jesus neva come inside da town yet, but he stay da place wea Marta meet him. 31 Da Jewish peopo dat stay inside da house wit Mary, fo kokua her, dey wen see her get up quick an go outside. So dey wen go too. Dey tink she going to da grave fo cry ova dea. 32 Den Mary wen come wea Jesus stay, an see him. She go down in front his feet an say, “Boss, if you was hea, my brudda no wen mahke.” 33 Wen Jesus see her crying, an da Jewish peopo who wen come wit her crying too, he come all bodda an funny kine inside. 34 He say, “Wea you guys wen bury him?” Dey say, “Boss, come see.” 35 Jesus wen cry. 36 Den da Jewish peopo say, “Look, how plenny love an aloha he get fo Lazarus!” 37 But some a dem say, “Eh! Dis guy wen make da blind guys see. How come he no can make Lazarus come good, so he no mahke, aah?”

Lazarus Come Back Alive

38 One mo time Jesus wen come all funny kine inside. He go to da cave wea dey wen bury Lazarus. An had one big stone dea dat cover da cave so nobody can go inside. 39 Jesus say, “Take away da big stone.” Marta, da mahke guy's sista, she say, “Auwe, Boss, he mahke four days awready! Goin get bad smell! 40 Jesus tell her, “I wen tell you awready dat if you trus God, you goin find out how awesome he stay, yeah?” 41 Den some guys wen take da stone away from da puka. Jesus look up to da sky an say, “Fadda, mahalo plenny dat you wen lissen to me. 42 I know dat you everytime lissen to me. But I wen say dat so dey goin believe me, dat you wen send me hea.” 43 Afta he say dat, he talk real loud, “Lazarus, come outa dea!” 44 Da mahke guy wen come outside. He get bandage fo mahke guys aroun his hands an feet, an anodda bandage aroun his face. Jesus say, “Hemo da bandage from his face, an let him go.”

Dey Talk How Dey Goin Kill Jesus

45 Den plenny Jewish peopo dat wen come fo kokua Mary, an wen see all da awesome stuff Jesus wen do, dey wen trus him. 46 But odda guys wen go by da Pharisee guys, an tell dem all da stuff Jesus wen do. 47 Den da main pries guys an da Pharisee guys wen tell all da Jewish leadas fo come togedda. Dey say, “Dis guy Jesus doing all kine awesome stuff dat show who him! Wat we goin do? 48 If we let him stay do dis kine stuff, everybody goin go trus him jalike he dea king! An cuz a dat, da Rome army guys goin come an wipe out our temple an our peopo.” 49 One a dem, Kaiafas, da Head Priest guy dat year. He tell dem, “You guys donno notting! 50 Mo betta fo you guys if one guy mahke fo all da peopo. If not, da Rome guys goin wipe out all da Jewish peopo!” 51 Kaiafas neva say dat by himself, but he da Head Priest guy dat year, dass why he can talk lidat. He wen talk fo God wen he say dat Jesus goin mahke fo all da Jewish peopo. 52 An he no goin mahke ony fo da Jewish peopo, but fo all God's kids dat stay all ova da world, fo bring dem all togedda fo come one peopo. 53 Dass why, from dat time, da Jewish leada guys wen talk togedda how dey goin kill Jesus. 54 So Jesus no go aroun no moa wea da Jewish leada guys can see him. He go one place near da boonies, Efraim town. An he wen stay ova dea wit da guys he teaching. 55 Now, almos time fo da Jewish Passova religious time. Plenny peopo from da boonies wen go Jerusalem befo da Passova, so dey can do all da stuff God's Rules say fo do fo make demself clean fo pray Passova time. 56 Da peopo stay looking fo Jesus. Wen dey standing inside da temple yard, dey aks each odda, “Wat you guys tink? You tink Jesus goin come to da spesho religious time, o wat?” 57 But da main pries guys an da Pharisee guys wen tell dat if anybody know wea Jesus stay, dey gotta tell dem, so dey can send da police guys fo bus Jesus.

Mary Put Perfume On Top Jesus Feet

12:1 Den six days befo da Passova religious time, Jesus wen go to Betany. Dass wea Lazarus wen stay, da guy Jesus wen make come back alive from mahke. 2 So dey wen make one dinna fo Jesus. Marta wen bring da food to da peopo, an Lazarus stay sit by Jesus at da table. 3 Den Mary wen take one pint nard kine perfume dat cost plenny, pour um on top Jesus feet, an den wipe um wit her hair. Den wen smell real good all ova inside da house. 4 But Judas Iscariot, one a Jesus guys, da guy dat lata goin set him up fo mahke, he wen say, 5 “Eh, how come dey neva sell dis perfume fo three hundred silva coins, an give da money to da peopo dat no mo notting?” 6 Da guy, he no mo aloha fo da peopo dat no mo notting, he ony talk lidat cuz he one steala guy. He stay in charge a da money bag fo Jesus dem, an he cockaroach um. 7 But Jesus say, “Eh, no bodda her! She wen stash dis perfume fo use um wen dey goin make me ready fo bury.” 8 You guys everytime get peopo dat no mo notting wit you. But you guys no goin get me wit you everytime.

Da Main Priest Guys Talk How Dey Can Kill Lazarus

9 Dat time plenny Jewish peopo wen find out dat Jesus was dea inside Betany town, an dey wen come fo see him. An not ony him, but Lazarus too. Cuz dey wen hear dat Jesus wen make Lazarus come back alive from mahke. 10 So da main pries guys wen talk togedda how dey goin kill Lazarus too. 11 Cuz plenny Jewish peopo wen hear bout Lazarus, an see him. Az why dey wen bag dea leadas, an trus Jesus.

Jesus Go Inside Jerusalem Jalike One King

12 Da nex day, plenny peopo dat wen come Jerusalem fo da Passova wen hear dat Jesus stay coming dea. 13 Dey wen cut branches from da palm trees fo wave cuz dey like cheer Jesus, an dey wen go fo meet Jesus. Dey yelling, “Hui! God goin take us outa da bad kine stuff we stay in! Dis da King fo da Israel peopo. God goin do plenny good kine stuff fo him. He da guy dat come fo da Boss! 14 Jesus wen find one young donkey an sit down on top um, jalike da Bible say, 15 “No scared, you peopo from Jerusalem town! Look! Yoa King stay coming! He sitting on top one young donkey.” 16 Dat time, Jesus guys no can figga all da stuff dat stay happen. But latas, Jesus wen come back alive from mahke an God wen make um come awesome. Den, dey wen rememba dat da Bible wen say all dis tings bout him. An dey wen rememba dat da peopo wen make lidat to him. 17 Now, all da peopo dat wen stay wit Jesus, da time he wen make Lazarus come back alive from mahke, dey wen tell wat dey wen see. 18 Dass why plenny peopo wen go outside Jerusalem fo meet Jesus, cuz dey wen hear bout da awesome ting he wen do dat wen show who him. 19 Den da Pharisee guys tell each odda, “Look! Everybody in da whole world stay going wit Jesus! An us guys no can do notting fo stop um!”

Had Greek Guys Dat Like See Jesus

20 Had some Greek guys dat wen go Jerusalem wit da odda peopo fo da Passova religious time, fo go down an show God love an respeck dea. 21 Dey come by Philip, da guy who come from Betsaida town, Galilee side, an dey tell him, “Eh Mista, us guys, we like meet Jesus.” 22 Philip, he go tell Andrew. Den Andrew an Philip, dey go togedda an tell Jesus. 23 Jesus tell dem, “Time awready fo me, da Guy Dass Fo Real. Now God goin make me come awesome fo real kine! But befo I come awesome, I gotta mahke. 24 An I like tell you guys dis too: I jalike da wheat seed dat gotta fall down inside da groun an mahke, an den can grow, fo make plenny mo seeds. If da seed no mahke, stay ony one seed. 25 Whoeva like hang on to dea life, dey goin lose um. But whoeva give up dea life in dis world, goin hang on to um, an stay live to da max foeva. 26 Whoeva like be my helpa gotta go wit me an be my guy. Wea I stay, my helpa guy goin stay dea too. An my Fadda goin show respeck to dat helpa guy.”

Jesus Tell How He Goin Mahke

27 Den Jesus tell, “Right now I feel all funny kine inside. Wat I goin say? ‘Fadda, no let me mahke right now’? No way I goin say dat! Dass why I wen come hea, so I can mahke. 28 I say dis: ‘Fadda, let um happen, so everybody can know how awesome you stay.’-” Den one voice from da sky wen say, “I wen show dem I stay awesome awready, an I goin show um one mo time.” 29 Da peopo dat wen stand dea an hear um, wen say, “Eh! Get thunder!” Da odda peopo wen say, “Nah, az was one angel messenja guy from da Boss dat wen talk to him.” 30 Jesus tell dem, “Dis voice not fo me, but fo you guys. 31 Now da peopo inside dis world goin stand in front God da Judge, an God goin throw out da Bad Guy dat stay in charge a da peopo all ova da world. 32 Wen dey lift me up from da groun fo kill me, den I goin bring everybody by me.” 33 (He wen say dat fo show dem how he goin mahke.) 34 Da peopo tell him, “We wen hear from God's Rules dat da Christ Guy goin live foeva. Den how come you say, ‘Dey goin take me, da Guy Dass Fo Real, an lift me up from da groun fo kill me’? Who dis Guy Dass Fo Real dat you talking bout?” 35 Jesus wen tell dem, “Me, I jalike da light fo you guys. Ony litto wile mo da light goin stay hea wit you guys. Live da right way now wen get light still yet, cuz no good da dark pio da light you get inside you. Whoeva walk aroun inside da dark, dey donno wea dey going. 36 Right now, I stay hea wit you guys. I jalike da light fo you guys. So go trus me. Den you guys can come da kine peopo dat know wea dey going cuz dey get da light inside.” Jesus say dat. Den he go way from da peopo so he can stay by himself.

Da Jewish Peopo No Trus Jesus

37 No matta Jesus wen do plenny awesome stuff in front da peopo fo show who him, dey still yet no trus him. 38 Jalike da guy Isaiah wen say, dat wen talk fo God long time ago, “Eh Boss! No mo nobody wen trus wat us guys wen say! Wen you wen show yoa power, nobody see notting!” 39 Az why da Jewish peopo no can trus God nowdays, jalike Isaiah wen say one nodda time, 40 “God wen make um so dey no can see, An make um hard head, So dey no like see wit dea eyes, No like undastan wit dea head, No like change an come by me, Cuz dey no like fo me fo make um come good.” 41 Isaiah wen say dat cuz he wen see how awesome Jesus stay, an he wen tell wat goin happen wit Jesus. 42 Plenny Jewish main leada guys wen trus Jesus, but dey no like tell everybody, cuz dey scared da Pharisee guys goin throw um outa da Jewish church. 43 Cuz da leada guys, dey like da peopo talk good bout dem, mo den dey like God talk good bout um.

Wat Jesus Say Show Wat Kine Peopo Dem

44 Jesus wen talk loud an say, “Whoeva trus me, he no trus ony me, but he trus da One dat wen send me hea too. 45 Whoeva see me, he see da One dat wen send me hea too. 46 I wen come jalike da light inside da world, so dat whoeva trus me, dey no goin stay dark inside. 47 Whoeva hear wat I say an no do um, I no goin punish dem. I neva come fo punish da peopo inside da world. Me, I wen come fo take um outa da bad kine stuff dey doing. 48 Whoeva no take me an wat I say, dat guy goin get one nodda judge. In da end time wen da world goin pau, all da stuff I wen say goin show how dat guy stay. 49 Cuz I neva talk by myself, but my Fadda who wen send me wen tell me everyting he like me fo say. 50 I know dat wat da Fadda tell us fo do show everybody how dey can come alive foeva fo real kine. So everyting I say, dass jalike my Fadda wen tell me.”

Jesus Wash His Guys Feet

13:1 Was jus befo da Passova time. Jesus wen know dat was time fo him fo go outa dis world, an go by his Fadda. He everytime get love an aloha fo his peopo dat stay inside da world, an he get love an aloha fo dem all da way. 2 Jesus dem was eating da Passova dinna. An da Devil wen awready make Judas, Simon Iscariot's boy, tink dat he like set Jesus up. 3 Jesus know dat his Fadda wen give him all da power ova everyting. He know he wen come from God an now he going back to God. 4 So Jesus wen stand up from da table, take off his robe, an put one towel aroun his waist. 5 Den he wen pour water inside one small wash tub, an wen start fo wash his guys feet, first one guy, den da odda. An den he dry um wit da towel he wen get aroun his waist. 6 Den he wen go by Simon Peter. An Peter wen aks him, “Eh, Boss! Wat you doing? You goin wash my feet?” 7 Jesus tell him, “You no undastan how come I doing dis now, but bumbye you goin undastan um.” 8 Peter tell him, “No way you eva goin wash my feet!” Den Jesus tell him, “If I no wash you, den you no can be my guy.” 9 Den Simon Peter tell him, “Kay den, Boss. No wash ony my feet. Wash my hands an my head too!” 10 Jesus tell him, “Whoeva wen bafe, dey ony need wash dea feet. Dea body stay clean awready. You guys stay clean inside, but not all you guys.” 11 (Cuz Jesus know awready who goin set him up. Dass why he say, “All you guys not clean.”) 12 Afta Jesus wen wash dea feet, he put on his robe an go back to da table. Den he aks um, “Eh, you guys undastan how come I wen wash you guys feet? 13 You guys call me ‘Teacha’ an ‘Boss.’ Dass good, cuz dass who me. 14 I you guys Boss an Teacha, yeah? an I wen wash you guys feet. Kay den. You guys suppose to wash each odda's feet too. 15 I wen show you guys wat fo do, cuz jalike I wen do fo you guys, you guys suppose to do too. 16 Dass right! An I tell you guys dis too: Da slave guy not mo importan den his boss. An da messenja guy not mo importan den da guy dat wen send him. 17 You guys know all dis stuffs. So, if you guys do um, you guys goin stay good inside. 18 “I not talking bout all you guys. I know da guys I wen pick. But gotta happen jalike da Bible say from befo time, ‘One guy dat wen eat wit me, like go agains me.’ 19 I stay telling you guys dis now, befo he do um, so wen he do um, you guys goin know fo shua dat I God's Spesho Guy. 20 Dass right! An I like tell you guys dis too: Whoeva stick wit da guy I send, dey stick wit me too. An whoeva stick wit me, dey stick wit da One who wen send me too.”

Dey Goin Set Up Jesus fo Mahke

21 Afta Jesus wen say dat, he come all funny kine inside. He tell da guys he teaching, “Dis fo shua wat I telling you guys: One a you guys goin set me up fo mahke.” 22 His guys wen look at each odda, an dey no can figga who he talking bout. 23 Had one a Jesus guys was sitting by him at da table. Jesus get plenny love an aloha fo him. 24 So Simon Peter nod da head at da guy an say, “Eh! Try find out who he talking bout.” 25 So da guy wen move mo close an aks Jesus, “Eh, Boss! Who da guy?” 26 Jesus say, “I goin take one piece bread, dip um inside da sauce, an give um to da guy.” So he take da bread, dip um inside, an give um to Judas, Simon Iscariot's boy. 27 Judas wen take da bread, an right den an dea, da Devil take ova him. Den Jesus say, “Hurry up an go do wat you goin do!” 28 But da odda guys sitting dea neva undastan how come Jesus wen tell him dat. 29 Some a Jesus guys was tinking dat Jesus telling Judas, ‘Go get wat we need fo da Passova,’ o ‘Go give someting to da peopo dat no mo notting.’ Dey tinking lidat cuz Judas stay in charge a da money fo all da guys. 30 So afta Judas take da bread, he go outside quick. Was nite time.

Da New Ting Dey Gotta Do

31 Afta Judas go way, Jesus say, “I da Guy Dass Fo Real. Now everybody goin see how awesome I stay. An from dat, dey goin find out how awesome God stay. 32 I goin show how awesome God stay, an he goin make me awesome too, cuz I stay tight wit him. An he goin do um right away. 33 Eh guys! I get plenny love an aloha fo you guys! But I goin stay wit you guys ony litto wile moa. Den you guys goin look fo me, but jalike I wen tell da Jewish leada guys, I telling you guys now, ‘Da place wea I going, you guys no can go dea.’ 34 “I give you guys one new ting you gotta do: Show love an aloha fo each odda. Jus like I get love an aloha fo you guys, dass how you guys gotta get love an aloha fo each odda. 35 If all you guys get love an aloha fo each odda, den everybody goin know you my guys.”

Bumbye Peter Goin Say He Donno Jesus

36 Simon Peter aks him, “Eh, Boss, wea you going?” Jesus tell him, “Da place I going, you no can go dea now, but bumbye you going dea.” 37 Peter tell him, “Eh, Boss, how come I no can go wit you now? I stay ready fo mahke fo you!” 38 Jesus tell him, “Fo real? You tink you stay ready fo mahke fo me? Dass right! But I tell you dis too: Befo da roosta make noise early today, you goin say three times dat you donno who me!”

Ony By Jesus We Can Go To Da Fadda

14:1 “No need you guys come all bodda inside yoa heart. Trus God, an trus me too. 2 Inside my Fadda's house, get plenny place fo stay. If neva have, I wen tell you guys awready. I going ova dea fo make you guys place ready. 3 Afta I go an make da place ready, I goin come back, an take you guys ova dea wit me, so da place I stay, you guys goin stay dea too. 4 Da place I going, you guys know how fo go ova dea.” 5 Thomas tell um, “Eh Boss! Us guys, we donno wea you going. How we goin know how fo go ova dea?” 6 Jesus tell um, “No mo odda guy can bring peopo to da Fadda, ony me. I bring peopo to um, jalike I da road. I da guy who get da trut. I da guy dat make da peopo come alive fo real kine. 7 You guys know me, so dass mean you guys goin know my Fadda. An from now, you guys know him, an see him.” 8 Philip tell um, “Eh Boss, show us yoa Fadda, an dass nuff fo us guys.” 9 Jesus tell him, “I stay wit you guys long time, an you still yet donno who me, Philip? Whoeva wen see me, dey wen see my Fadda. So how come you say, ‘Show us yoa Fadda’? 10 You no trus me, o wat, wen I say dat I stay tight wit my Fadda, an he stay tight wit me? Da stuff I telling you guys, all dat no come from me, come from my Fadda. He stay tight wit me, an he da One dat stay doing all dis kine stuff. 11 Trus me wen I say dat I stay tight wit my Fadda an he stay tight wit me. If you guys no can believe dat, den trus me cuz a da stuff I stay doing. 12 “Dass right! An I tell you guys dis too: Whoeva trus me, dey goin do da same kine stuff I do. An dey goin do even mo betta stuff, cuz I going by my Fadda. 13 Wateva you guys aks me fo do cuz you my guys, I goin do um. Den everybody can know how awesome my Fadda stay, cuz I his Boy, an I show dem how awesome he stay. 14 Wateva you guys aks me fo do cuz you my guys, I goin do um fo you.

Jesus Tell Dat God's Spesho Spirit Goin Come

15 “If you guys get love an aloha fo me, you goin do wat I tell you guys fo do. 16 I goin aks my Fadda, an he goin give you guys one nodda One fo kokua you guys. An dat One goin stay wit you guys foeva. 17 Dass God's Spirit dat teach you guys da trut. But da peopo inside da world no like take him, cuz dey no see him, an dey donno him. You guys know him, cuz he stay by you guys, an he goin stay tight wit you guys. 18 “I no goin leave you guys all alone. I goin come back by you guys. 19 Litto wile moa, da peopo inside da world no goin see me. But you guys goin see me. Cuz I goin come back alive, dass why you guys goin come alive fo real kine. 20 Wen I come back alive, you guys goin know fo shua dat I stay tight wit my Fadda, an you guys stay tight wit me, an I stay tight wit you guys. 21 “Whoeva take wat I tell um fo do, an do um, dass da ones dat get love an aloha fo me. My Fadda goin get love an aloha fo dem, an I goin get love an aloha fo um, an I goin show um who me fo real kine.” 22 Had one nodda guy name Judas, not da Iscariot guy. He wen aks Jesus, “Boss, how come you goin show us guys who you fo real kine, an not show da odda peopo inside da world?” 23 Jesus wen tell him, “Whoeva get love an aloha fo me, dey goin do wat I tell um. My Fadda goin get love an aloha fo dem too. Den me an my Fadda going by dem, an jalike we goin make house wit dem togedda. 24 Whoeva no mo love an aloha fo me, dey no goin do wat I say. All da stuff you wen hear me tell, dat no come from me, come from my Fadda who wen send me. 25 “I wit you guys still yet, az why I stay telling you guys all dis stuff now. 26 My Fadda, bumbye he goin send you guys his Good an Spesho Spirit fo kokua you guys fo me. He goin teach you guys everyting, an help you guys rememba all da stuff I wen tell you guys awready. 27 “Wen I go way, I goin make you guys hearts rest inside, da kine rest dat ony I can give. All da stuff inside da world no can make you guys rest inside lidat. No let yoa heart come all funny kine inside! No scared! 28 You guys wen hear me say, ‘I going way from you guys, an I goin come back by you guys.’ So, no feel bad. If you guys wen get love an aloha fo me, den you guys stay good inside, cuz I going by my Fadda. Cuz my Fadda, he mo importan den me. 29 I wen tell you guys all dis stuff befo da ting happen. So wen da ting happen, you guys goin trus me. 30 I ony goin talk to you guys litto wile moa, cuz da Devil stay coming. Fo now, he in charge a da peopo inside dis world, but he no mo power ova me. 31 But no matta he coming, cuz I goin do wat my Fadda wen tell me fo do. Dat goin show da peopo inside da world dat I get love an aloha fo my Fadda. “Come on! We going!”

Jesus, Jalike Da Grape Vine

15:1 “Lissen up. I da guy dat you guys stay tight wit. I jalike da grape vine, but me, I fo real kine. My Fadda, he jalike da farma guy dat take care da grape vine. 2 All da peopo dat say dey stay tight wit me, but dey no do notting, my Fadda take um off, jalike da grape farma guy take off all da branches dat no mo fruit. An all da peopo dat stay tight wit me, he take away da junk kine stuff from inside dem, jalike wen da grape farma guy trim da branches so dey get plenny fruit. 3 “From da stuff I telling you, you guys stay clean inside awready, jalike da branches dey wen trim. 4 Come tight wit me, jalike I stay tight wit you guys. Da branch no can make fruit if no stay tight wit da vine. Same ting, you guys no can do notting if you guys no stay tight wit me. 5 “Me, I jalike da grape vine, an you guys jalike da branches. Whoeva come tight wit me awready, an I stay tight wit dem, dey goin be jalike one branch dat get plenny fruit. Cuz you guys no can do notting if you no stay tight wit me. 6 Whoeva no stay tight wit me, dey jalike one branch dat stay no good. Dass da kine branch peopo throw out, an da branch dry up. Den dey go get all da odda dry branches, an throw um inside da fire fo burn. 7 If you guys stay tight wit me, an stick wit da tings I stay telling you guys, den you guys can aks God fo wateva you guys like, an he goin do um fo you guys. 8 “Dis how everybody goin know how awesome my Fadda stay, if you guys stay doing plenny good kine stuff, jalike da grape branches dat give plenny fruit. Dass how you guys goin show dat you my guys. 9 “Jalike da Fadda get love an aloha fo me, dass how I get love an aloha fo you guys. Hang in dea an stay tight wit me, so I can give you guys my love an aloha. 10 If you guys stay doing wat I tell you guys fo do, den you guys goin hang in dea an stay tight wit me fo shua, an I goin give you guys my love an aloha. Jalike I do wat my Fadda tell me fo do, an he stay give me plenny love an aloha. 11 “I wen tell you guys all dis stuff awready, so you guys can stay good inside yoa hearts, jalike I stay good inside. Den you guys goin stay good inside to da max. 12 Dis wat I tell you guys fo do: Get love an aloha fo each odda, jalike I stay get love an aloha fo you guys. 13 No mo nobody get mo love an aloha fo da odda guy, den da guy dat goin go mahke fo his friends. 14 You guys stay my friends, if you guys do da stuff I telling you guys fo do. 15 I no goin call you guys my worka guys no moa, cuz da worka guy no undastan wat his boss stay doing. But I call you guys my friends, cuz I wen tell you guys everyting dat my Fadda wen tell me. 16 You guys neva pick me. I wen pick you guys, an give you dis job: go do plenny good stuff dat stay long time, jalike one grape vine dat give plenny good fruit, long time. Den, anyting you aks my Fadda fo do cuz you my guys, he goin do um fo you. 17 So den, dis wat I tell you guys fo do: stay get love an aloha fo each odda.

Da Peopo Inside da World Hate Jesus Peopo

18 “If da peopo hea inside da world hate you guys, rememba dis: was me dey wen hate first. 19 If you guys wen do same ting jalike da odda guys inside da world, dey wen love you guys, cuz you guys jalike dem. But, you guys no stay jalike dem. I wen pick you guys fo come outa da bad kine stuff inside dis world. Dass why dey hate you guys. 20 “Rememba wat I wen tell you guys. Da worka guy not mo betta den his boss. If dey make me suffa, dey goin make you guys suffa too. If dey wen do wat I wen tell um fo do, dey goin do wat you guys tell um fo do too. 21 But dey goin do all dis stuff to you guys, jus cuz you my guys, an dey donno da One who wen send me hea. 22 If I neva come an talk to dem, dey neva tink dey doing bad kine stuff. But now, dey no can go do bad kine stuff an den say, ‘Eh, us guys neva know was bad!’ 23 Whoeva hate me, dey hate my Fadda too. 24 I wen do da kine stuff in front dem dat no odda guy wen eva do. If I neva do dat, den dey neva know dey doing da bad kine stuff. But now dey wen see me an my Fadda, an dey hate us both. 25 But all dis stuff wen happen, jalike dea Rules say, ‘Dey wen hate me fo notting.’ 26 “Da Kokua Guy goin come. He da Spirit dat make you guys know da trut, an he come from my Fadda. Wen I go to my Fadda, I goin send his Spirit by you guys. He goin tell you guys wat he know bout me. 27 Same ting, you guys goin tell wat you know bout me too, cuz you guys wen stay wit me from da start.” 16:1 “I wen tell you guys dis stuff awready, cuz no good bumbye you guys no stick wit me no moa. 2 Da Jewish peopo goin throw you guys outa dea churches. An even goin get one time wen whoeva kill you guys goin tink dey doing someting good fo God. 3 Dey goin make lidat to you guys cuz dey donno my Fadda an dey donno me. 4 I wen tell you guys dis stuff too, so wen da time come, you guys goin rememba dat I wen tell you guys bout um. I neva tell you guys dis stuff befo, cuz I was wit you guys.

Wat God's Spirit Do

5 “But now I going to da One dat wen send me. But still yet, you guys no even aks me wea I going. 6 I wen tell you guys dis stuff awready. Dass why you guys stay all sad an crying inside. 7 Dis da trut, wat I stay telling you guys: Mo betta fo you guys if I go way. Cuz if I no go way, da One who goin kokua you guys no goin come hea. But if I go way, den I goin send him to you guys. 8 “Wen da Kokua Guy come, he goin show da peopo inside da world how dey mess up. Dat mean, da Kokua Guy goin show peopo dat dey do bad kine stuff, an dat dey no do wat stay right, an dat God goin be dea Judge. 9 He goin show dem dat dey do bad kine stuff, cuz dey no like trus me. 10 He goin show dem dat dey no do wat stay right, cuz I going to my Fadda, an den you guys no goin see me no moa. 11 He goin show dem dat God goin be dea Judge, cuz God awready wen judge da main leada fo dis world, da Devil. 12 “I still yet get plenny mo stuff fo tell you guys, but dass mo den you guys can handle right now. 13 Wen da Spirit come dat make you guys know da trut, he goin show you guys how fo do da true stuff. He no goin talk by himself, but he goin tell wat my Fadda wen tell him. An he goin tell you guys bout da stuff dat goin happen bumbye. 14 Dass how he goin show how awesome I stay, cuz he goin take all da true stuff bout me an show you guys wat all dat mean. 15 Everyting my Fadda get, dass mines too. Dass why I wen say, God's Spirit goin take all da true stuff bout me, an show you guys wat dat mean.

You Guys Goin Cry Inside, An Afta Dat, You Goin Stay Good Inside

16 “In litto wile, you guys no goin see me. Den litto wile moa, you guys goin see me. 17 Den some a da guys he wen teach wen tell each odda, “Eh, wass he talking bout? He say, ‘In litto wile, you guys no goin see me. Den litto wile moa, you guys goin see me.’ An how come he say, ‘Cuz I going to my Fadda’? 18 So dey wen say, “Wass dis he mean, ‘In litto wile’? We donno wat he talking bout.” 19 Jesus know dey like aks him question, so he tell um, “I wen say, ‘In litto wile you guys no goin see me. Den litto wile moa, an you guys goin see me.’ Dat wat you aksing each odda bout? 20 Dass good you aks! An I like tell you guys dis too: you guys goin cry an come sad inside, but da peopo hea inside da world, dey goin stay good inside. You guys goin be crying inside, but afta, you guys goin stay good inside. 21 You know, wen one wahine goin born one baby, she sad cuz she stay suffa. But afta da baby born, she no tink bout dat no moa. Den she stay good inside cuz one baby wen born hea inside dis world. 22 Same ting wit you guys: Now, you guys stay sad an crying inside, but bumbye I goin see you guys again, an den you guys goin stay good inside. Dat time, no goin get nobody can make you feel bad again. 23 “Wen dat time come, you guys no goin need aks me bout notting. Dass right! I tell you guys, wateva you guys aks my Fadda fo do cuz you my guys, he goin do um fo you guys. 24 Befo now, you guys neva aks my Fadda fo do notting cuz you my guys. Aks now, an you guys goin get um, so you guys can stay good inside to da max.

Jesus, He Da Winna

25 “Till now I wen teach you guys wit stories. Da time goin come wen I no goin teach you guys wit stories lidat no moa. Den I goin tell you strait out bout my Fadda. 26 Wen dat time come, you guys goin aks my Fadda fo do stuff cuz you my guys. No need fo me aks him fo you guys. 27 My Fadda, he da One dat get love an aloha fo you guys, cuz you guys get love an aloha fo me, an you stay shua dat I wen come from God. 28 Befo, I wen go way from wea my Fadda stay, an wen come inside da world. Now I going outa da world, an going back to my Fadda.” 29 Den da guys he teaching tell him, “Eh! Now you talking strait out, an not ony teaching wit stories! 30 Now, we know fo shua dat you know everyting. You no need nobody fo aks you notting, cuz you know awready wat dey like aks an wat da answer. Dat show us dat you wen come from God.” 31 Jesus tell um, “Fo real? You guys trus me now? 32 You know wat? Da time goin come, an almos stay hea now, wen all you guys goin bag, an run all ova da place. Everybody goin go his own place, an I goin stay by myself. But I no stay by myself, cuz my Fadda stay wit me. 33 I wen tell you guys all dis stuff so yoa hearts can rest inside, cuz you guys stay tight wit me. Da peopo inside da world goin make you guys suffa. But make strong! I da winna ova all da power inside da whole world!”

Jesus Pray Fo His Guys

17:1 Afta Jesus wen say dat, he wen look up to da sky an say, “Fadda, time awready. Now, show da peopo how awesome I stay cuz I yoa Boy, so den I like show dem how awesome you stay. 2 Cuz you wen make me in charge a da peopo all ova da world, I goin make everybody you wen give me come alive fo real kine foeva. 3 Dis wat da kine life mean dat stay fo real kine foeva: dat da peopo dat get dat kine life know you, da ony God dass fo real, an dat dey know me too, Jesus Christ, da Spesho Guy You Wen Send. 4 I wen show da peopo hea inside da world how awesome you stay. I wen pau do all da stuff dat you wen tell me fo do. 5 Fadda, wen I wen stay by you, from befo da time wen we wen make da world, I wen stay awesome jalike you. Now I going back by you, an I like you make me awesome, same kine jalike befo time. 6 “Da guys you wen give me from inside da world fo be my guys, I wen teach dem bout you, so dat dey can know you. Dey was yoa guys, an you wen give dem to me. Dey do wat you say. 7 Now dey know dat everyting you teach me, wen come from you. 8 Cuz I wen teach dem all da stuff dat you wen tell me, an dey wen take um. Dey know fo shua dat I wen come from you, cuz dey believe dat you wen send me hea. 9 “I like pray fo dem. I no pray fo all da peopo inside da world, but ony fo da peopo dat you wen give me, cuz dey yoa guys. 10 Everyting I get, dass yoas. An everyting you get, dass mines. My peopo stay showing how awesome I stay awready. 11 I no goin stay inside da world no moa, cuz I coming to you. But dese guys, dey stay inside da world. Fadda, you stay spesho an good. Take care dem wit yoa power, cuz dey yoa guys, an dey get yoa name, jalike me. So den, dey goin stay tight wit each odda, jalike me an you stay tight wit each odda. 12 All da time I wen stay wit dem inside da world, I wen take care dem wit yoa power. I yoa guy, an I wen help dem stay tight wit you. Nobody wen wipe out. Ony da one guy Judas, da guy dat like mess up, he wen wipe out, jalike da Bible wen say long time ago. 13 “Now I goin come by you. I say dis tings hea inside da world so my peopo can stay good inside to da max, jalike me. 14 I wen tell dem wat you wen say. Da peopo hea inside dis world hate dem, cuz dey no do same ting jalike da odda guys inside dis world, jalike I no do same ting jalike da odda guys inside dis world. 15 I no aks you fo take dem outa da world, but fo you help dem stay away from da Bad Guy, da Devil. 16 Dey no do same ting jalike da odda guys inside dis world, jalike I no do same ting jalike da odda guys inside dis world. 17 “Make dem good an spesho fo you, cuz dey know wat you say, an you everytime tell da trut. 18 Jalike you wen send me to da peopo inside da world, same ting, I wen send my guys to da peopo inside da world. 19 Dass why I stay good an spesho fo you, so dem guys can be good an spesho fo you too. Da true stuff you say, dass wat goin make dem go all out fo you. 20 “I no pray ony fo dem guys, but fo all da odda peopo dat goin trus me cuz a wat dem guys tell um. 21 So dat everybody goin stay tight wit each odda, jalike you stay tight wit me, Fadda, an I stay tight wit you. I like dem stay tight wit us, so da peopo inside da world goin believe dat you da One dat wen send me hea. 22 Jalike you wen show peopo how awesome I stay, I wen make dem come awesome jalike me, so dey goin stay tight wit each odda, jalike we stay tight wit each odda. 23 I stay tight wit dem, an you stay tight wit me. Den dey goin stick togedda to da max. Cuz dey stick togedda, da peopo inside da world goin know dat you da One dat wen send me hea, an dat you get love an aloha fo dem guys jalike you get love an aloha fo me. 24 “Fadda, I like everybody dat you wen give me be wit me wea I goin stay, cuz I like dem see how awesome I stay. Cuz you wen get love an aloha fo me, an you wen make me awesome befo we wen make da world. 25 Fadda, you everytime do da right ting. But da peopo hea inside da world donno you. I know you, an my peopo, dey know dat you da One wen send me hea. 26 I wen tell dem wat kine guy you, an I goin stay telling dem, cuz I like dem get da same kine love an aloha dat you get fo me, an I can stay tight wit dem.”

Da Police Guys Grab Jesus

18:1 Wen Jesus wen pau pray, he wen go ova da Kidron Stream wit da guys he teaching, an dey wen go inside one garden wit trees. 2 Judas, da guy who wen set Jesus up fo mahke, wen know da place, cuz Jesus wen go ova dea plenny times befo wit his guys. 3 Da main pries guys an da Pharisee guys wen let Judas take dea army guys an police guys wit him. So Judas dem go to da garden, an dey all wen go dea togedda, wit lanterns an torches an swords. 4 Jesus wen know all da stuff dat going happen to him, so he wen go by dem an aks dem, “Who you guys looking fo?” 5 Dey tell him, “Jesus, da guy from Nazaret.” He tell dem, “I da guy.” Judas, da guy who wen set him up fo mahke, was right dea wit dem. 6 An you know wat? Wen Jesus wen tell dem, “I da guy,” dey wen back up an wen fall down on top da groun. 7 He wen aks dem again, “Who you looking fo?” Dey tell, “Jesus, da guy from Nazaret.” 8 Jesus tell um, “I wen tell you, I da guy. If I da guy you looking fo, den let dese odda guys go.” 9 He wen say dat fo make wat he wen say befo come true, “Fadda, Da guys you wen give me, I neva lose dem, not even one guy.” 10 Simon Peter, he get one sword. He pull um out an wack one guy dat work fo da Head Priest, an cut off his right ear. Da worka guy's name was Malkus. 11 Jesus tell Peter, “Put back yoa sword! My Fadda say I suppose to suffa all dis kine stuff, an dass wat I goin do! Jalike he give me one cup full wit da bitta kine stuff fo drink, an I goin drink da whole ting.”

Jesus an da Head Priest Guy

12 Den da captain, da army guys, an da police guys from da Jews wen take Jesus an tie him up. 13 Dey wen bring Jesus by Annas first. He Kaiafas fadda-in-law. Kaiafas, he da Head Priest guy dat year. 14 Kaiafas da guy wen tell da Jewish leada guys befo, “Mo betta fo you guys if one guy mahke fo all da peopo.” Peter Tell, “I Donno Jesus” 15 Simon Peter wen go wit Jesus. An anodda guy Jesus wen teach go too -- dass me. Now, da Head Priest guy know me. Dass how I wen go inside da Head Priest guy's yard togedda wit Jesus. 16 But Peter, he stay outside by da gate. Den me, cuz I Jesus odda guy dat was dea, an da Head Priest guy know me, I wen go outside, talk to da girl dat watch da gate, an bring Peter inside. 17 Den da girl dat watch da gate wen tell Peter, “You one a da guys dat bugga wen teach, yeah?” Peter say, “No way! I not!” 18 Had odda worka guys an police guys standing dea by one charcoal fire dey wen make, cuz was cold, an dey like come mo warm. An Peter, he wen stand dea too wit da odda guys, fo come warm.

Da Head Priest Guy Aks Jesus Plenny Stuff

19 Den da Head Priest guy aks Jesus bout da guys he wen teach, an wat he teaching dem. 20 Jesus tell him, “I wen talk wea everybody can hear me. Everytime I teach inside da Jewish churches an inside da temple yard. I neva say notting secret. 21 How come you aksing me? Aks da peopo who wen hear me, wat I wen tell dem. Fo shua, dey know wat I wen say.” 22 Afta dat, one police guy who was standing dea wen slap Jesus an say, “Eh! You not suppose to talk lidat to da Head Priest!” 23 Jesus tell him, “If I wen talk bad, tell me wat I wen say was bad. But if was good, how come you wen go slap me?” 24 Den Annas wen send him, all tie up, to da Head Priest guy, Kaiafas.

Peter Say He Donno Jesus One Mo Time

25 Simon Peter, he still yet stay standing by da fire fo come warm. Da odda guys standing dea tell him, “Eh! You one a da guys he wen teach, yeah?” Peter say, “No way! I not!” 26 Had one nodda guy dea dat work fo da Head Priest an was ohana to da guy dat Peter wen cut off his ear. Da guy tell, “Eh! Dat was you inside da garden wit him, yeah?” 27 One mo time Peter wen say, “No way! Not me!” Right den an dea, da roosta wen make noise.

Jesus an Pilate

28 Den da guys dat work fo da Head Priest take Jesus away from Kaiafas place to da Rome army headquarters. Was early in da morning. But dey neva go inside da Rome guys place, cuz if dey do dat, bumbye dey no can eat da spesho food fo da Passova cuz jalike dey pilau. 29 Den Governa Pilate wen go outside wea da Jews stay. He aks dem, “Wat you guys get agains dis guy?” 30 Dey tell him, “If da bugga no was one crook, us guys no goin turn him ova to you.” 31 Den Pilate tell dem, “Take him den an judge him jalike how yoa Rules say you gotta do.” Da pries guys tell Pilate, “Us guys no can do dat, cuz us guys no mo da right fo kill nobody da Rome way, on top one cross.” 32 Wen dey say dat, da ting Jesus wen say befo wen come true. He wen tell his guys awready dat he goin mahke da Rome way on top one cross. 33 Den Pilate go back inside da army headquarters, an he tell Jesus fo come inside, an tell him, “Eh, you! You da king fo da Jews, o wat?” 34 Jesus tell him, “Dass wat you figga yoaself? O odda peopo wen tell you dat bout me?” 35 Pilate tell, “Me? You tink I one Jew? Dass was yoa own peopo an da main pries guys wen bring you to me. Wat you wen do?” 36 Jesus tell, “I not da kine king from dis world. If I was dat kine king, den my guys goin fight so da Jews no can take me. I one king, but no mo nobody hea inside dis world wen make me one king.” 37 Pilate aks him, “So, you one king den?” Jesus tell him, “You wen say I one king. Az why I wen born, an az why I wen come hea inside da world -- so I can tell everyting dat I know bout da true stuff. Everybody dat stick wit da trut, dey lissen to me.” 38 Pilate aks him, “Wat da trut?”

Dey Say, Jesus Gotta Mahke

Wen Pilate wen say dat, he wen go back outside to da Jews, an he tell dem, “I no find notting wrong wit dis guy. 39 But you guys get dis ting wea I suppose to let one guy go at da Passova time. So, you guys like me let go da King fo da Jews, o wat?” 40 Dey all yell an say, “Not dis guy! We like Barabbas!” Now, Barabbas, he was one mean crook guy.

Da Army Guys Take Jesus

19:1 Den Governa Pilate tell his guys fo take Jesus an cut him up wit da whip. 2 Da army guys wen twist togedda big kine thorn branches fo make one crown, an dey put um on top his head. Den dey put one purple kine robe on top him. 3 An dey coming in front him, an tell, “Hui! King fo da Jews!” An dey slap his face wit dea hands. 4 Den Pilate go outside one mo time, an tell everybody, “Eh, look! I goin bring him outside fo you guys, so you guys can know dat I neva find notting wrong fo punish him.” 5 Jesus wen come outside wit da crown a thorns on top his head an da purple robe. Den Pilate tell da peopo, “Look, da guy!” 6 Wen da main pries guys an da police guys see Jesus, dey make big noise, an dey yelling, “Kill him on top one cross! Kill him on top one cross!” Pilate tell um, “You guys take him an kill um on top one cross! I no find notting wrong fo punish him.” 7 Da Jews tell Pilate, “Us guys get Rules from God, an da Rules say dis guy gotta mahke, cuz he wen go talk like he God's Boy.”

Governa Pilate Talk To Jesus

8 Wen Governa Pilate hear wat dey wen tell um, he come mo scared. 9 He go back inside da army headquarters an aks Jesus, “Eh, you! Wea you come from?” But Jesus neva say notting. 10 Den Pilate tell him, “You no like talk to me, o wat? Eh, you donno dat I get da right fo make dem kill you on top one cross, an I get da right fo let you go?” 11 Jesus tell, “Ony one way you get da right fo hurt me. Ony if God Up Dea Inside Da Sky let you do all dis, den you can. Dass why da guy who wen turn me ova to you, he do mo worse ting den you.” 12 From dat time, Pilate try fo let him go. But da Jews make big noise an yell, “If you let dis guy go, you not King Cesar's friend. If anybody make himself one king, he agains King Cesar.” 13 So, wen Pilate hear da tings dey saying, he bring Jesus outside, an he sit down on top da judge chair by da place dey call “Stone Pavemen Square,” an da Jews call um “Gabbata.”

Pilate Say Jesus Gotta Mahke

14 Was da Day fo Make Ready fo da Passova. Bout noon time, Pilate tell da Jews, “Look now, yoa king!” 15 But dey make big noise an yell, “Take um away! Take um away! Kill um on top one cross!” Pilate tell um, “Wot! You mean, yoa king, I gotta kill um?” Da main pries guys tell, “Us guys, we no mo no odda king, ony King Cesar!” 16 Den Pilate turn ova Jesus fo da army guys kill um on top one cross.

Dey Wen Nail Jesus to One Cross

So dey take charge a Jesus, 17 an he wen carry his own cross outside da town, da place dey call “Da Skull Place,” an da Jews call um “Golgota,” dea language. 18 Ova dea dey wen nail Jesus to one cross. Same ting fo two odda guys, one on top one cross on da left side, da odda one on top one nodda cross on da right side, an Jesus inside da middle. 19 One nodda ting: Pilate wen tell da army guys fo make one sign an put um on top da cross. Da sign say, “Jesus from Nazaret, da King fo da Jews.” 20 Dis sign, plenny Jews wen read um, cuz da place dey wen kill him stay near Jerusalem town. Da army guys wen write da sign in three language: Hebrew, Greek, an Latin. 21 Da Jewish main pries guys tell Pilate, “Eh, no write, ‘Da King fo da Jews’! Mo betta write, ‘Dis guy wen say, I da king fo da Jews’.” 22 Pilate tell um, “I wen tell my guys wat fo write, an dass how goin stay!” 23 Da army guys, afta dey wen nail Jesus to da cross, dey take his clotheses an make four piles. Was one pile fo every army guy. Had his robe too, dat neva have seam, cuz dey wen weave um from da top an all ova. 24 So dey say, “Mo betta no broke up da robe. We go throw da dice fo um, yeah? Fo find out who goin get um.” Dat was fo make happen jalike da Bible wen say from befo time: “Dey wen split my clotheses. An my robe, dey wen throw da dice fo um.” So dass wat da army guys wen do.

Jesus Tell John Fo Take Care Jesus Mudda

25 Had Jesus mudda standing by da cross wit her sista, an Mary, Clopas wife, an Mary from Magdala. 26 Jesus wen see his mudda standing dea, wit one guy he wen teach, da one he get plenny love an aloha fo. (Dass was me, you know.) So Jesus tell his mudda, “Look, Ma, dis yoa boy now.” 27 Den Jesus tell me, “Look! Make like her yoa mudda now.” An I wen take her to my own place from dat time.

Jesus Mahke

28 Afta dat, Jesus wen know dat he wen pau do everyting he suppose to do. Den fo make come true everyting da Bible wen say befo time, he say, “I thirsty!” 29 Had one jug full a cheap wine ova dea. Dey fill up one sponge wit dat wine, put um on top one oregano branch, an put um up to his mout. 30 Wen Jesus wen suck da cheap wine he say, “Everyting pau awready!” An he wen bend down his head, an den let go his spirit.

Dey Stab Jesus

31 Was da Day Fo Make Everyting Ready Fo Da Passova. Da Jews neva like fo da mahke bodies fo stay on top da cross on da Rest Day. Dat Rest Day stay real spesho, so da leada guys wen go beg Pilate fo broke da guys legs fo kill um mo quick, so dey can take down da bodies. 32 Da army guys wen go dea. Da two guys dey wen kill um on top da odda crosses same time wit Jesus, dey wen broke da first guy's legs, an den da odda guy's legs. 33 But wen dey go by Jesus, dey see dat he mahke awready, so dey neva broke his legs. 34 But one army guy wen stab him wit his spear on da side, an blood an water come out. 35 (You know, one a da guys dat wen see all dat happen, dass me. I tell da tings I wen see, an I tell da trut. I know I telling true kine stuff, so you guys can trus wat I say.) 36 All dis wen happen jalike da Bible wen say befo time, “Dey no goin broke even one bone.” 37 An da Bible wen tell one nodda ting, “Dey goin look at him, da guy dey wen stab.”

Dey Bury Jesus

38 Had one guy, name Joseph from Arimatea. He wen like learn plenny from Jesus, but he neva tell nobody, cuz he scared da Jewish leada guys. He wen go aks Pilate fo let him take Jesus body, an Pilate let him. So he go an take away Jesus body. 39 Nicodemus, he go ova dea wit Joseph too. He da guy who befo time wen go by Jesus, nite time, fo talk to him. He wen bring aloe an myrrh, all mix up, bout hundred pounds, fo put on top Jesus body befo dey bury him. 40 Dey wen take Jesus body an wrap um up inside linen kine cloth wit da aloe an myrrh inside, cuz dass how da Jews bury da mahke guys. 41 Now da place dey wen kill Jesus, had one garden wit trees, an one new place fo bury dat da owna guy jus pau dig outa one cave, an dey neva put nobody inside dea yet. 42 Dass wea dey put Jesus, cuz was da Day da Jews Make Ready fo da Passova, an dat place stay near.

Jesus Come Back Alive

20:1 Da first day in da week, Mary from Magdala wen come back to da place dey wen bury Jesus. She come dea wen dark time still yet. She wen see da big stone Jesus friends wen use fo close da place afta dey bury um. But now, da stone stay on da side. 2 So she wen run ova dea wea Simon Peter wen stay, an me, da guy dat Jesus get love an aloha fo, I stay dea wit Peter. She wen tell us, “Dey wen take da Boss away! He no stay inside da place dey wen bury um! We donno wea dey wen put him!” 3 So Peter an me wen run, fo go da place. 4 Us guys wen run togedda, but me, I wen run mo fast, an come to da place first. 5 I wen bend down, an look inside, an I spock all da linen kine cloths lying ova dea, da ones dey wen wrap Jesus inside. But I neva go inside da place dey wen bury Jesus. 6 Den Peter come afta. An he go inside da place dey wen bury Jesus, an see da cloths dey use fo wrap Jesus inside fo bury him. Da cloths lying ova dea too. 7 He see da odda cloth dat was aroun Jesus head, all fold up on da odda side. 8 Den me, dat wen come first, I wen go inside too. An I wen see um, an I wen believe wat Jesus wen say befo time, dat he goin come back alive. 9 Cuz us guys still yet neva undastan dat da Bible say Jesus gotta come back alive from mahke. 10 Den us two, Jesus guys, we wen go back da place we staying.

Mary From Magdala See Jesus

11 Mary stay outside da place dey wen bury Jesus, an she crying. An wen she was still crying, she wen bend down, an look inside. 12 She wen spock two angel guys wit white clotheses sitting ova dea wea Jesus body wen stay befo, one by wea da head wen stay, an da odda by wea da feet wen stay. 13 Dey tell her, “Lady, how come you stay crying?” She tell dem, “Cuz dey wen take away my Boss, an I donno wea dey wen put um.” 14 Afta she wen say dat, she wen turn aroun an see Jesus standing dea. But she neva know dat was Jesus. 15 Jesus tell her, “Lady, how come you stay crying? Who you looking fo?” She wen tink he da yard man, an she tell him, “Mista, if you wen take him away, tell me wea you wen put him, an I goin take da body fo bury.” 16 Jesus say, “Eh, Mary!” She wen turn aroun an say, “Rabboni!” Dass how da Jewish peopo say, “Teacha!” 17 Jesus tell her, “No touch me, cuz I neva go up by my Fadda yet. But go by my brudda an sista guys an tell dem, I goin go up dea by my Fadda an yoa Fadda, an by my God an yoa God.” 18 Den Mary from Magdala wen go an tell his guys, “Eh! I wen see da Boss Jesus!” Den she wen tell dem wat Jesus wen tell her.

Jesus Guys See Him

19 Was da same day Sunday, da first day in da week, an da sun wen go down. Jesus guys wen stay togedda an da doors lock, cuz dey scared da Jews. Den Jesus wen show up in da middle a dem. He tell um, “Aloha! I like yoa hearts rest inside!” 20 An wen Jesus say dat, he show dem da scars on top his hands an his side. An his guys wen come real good inside wen dey see dea Boss. 21 Den Jesus tell dem again, “I like yoa hearts rest inside. Jalike my Fadda wen send me all ova, dass how I goin send you guys all ova.” 22 Wen he say dat, he wen breathe on top dem, an say, “I giving you guys God's Spesho Spirit. Take um. 23 Whoeva do bad kine stuff, an you guys let um go, God goin let um go too. Whoeva do bad kine stuff, an you guys no let um go, God no goin let um go too.”

Jesus an Thomas

24 One a Jesus twelve guys, Thomas, dey call him “Twin.” He neva stay ova dea wit dem wen Jesus wen come. 25 Dass why da odda guys wen tell him, “Eh, us guys wen see da Boss, you know.” But he tell dem, “If I no see da puka from da nails inside Jesus hands, an put my finga inside da puka in his side, no way I goin believe he alive fo real kine!” 26 One week lata da guys wen stay togedda again inside da house, an Thomas stay dea too. Da doors was shut, an Jesus wen show up in da middle a dem. An he say, “Aloha! I like yoa hearts rest inside.” 27 Den he tell Thomas, “Put yoa finga ova hea an check out my hands. Put out yoa hand, an touch my side. Now, no say you no believe I alive fo real kine. Believe!” 28 Den Thomas tell Jesus, “You, you my Boss! You my God!” 29 Jesus tell him, “Thomas, cuz you wen see me, you believe I alive. Goin get peopo dat neva see me, but dey goin believe I alive too. Dey da ones goin stay good inside.”

How Come Get Dis Book

30 Jesus wen do plenny odda awesome stuff fo show who him, but I neva write all dat inside dis book. 31 But da tings I wen write, I write um so you guys goin believe dat Jesus da Christ guy, da Spesho Guy God Wen Send, an he God's Boy. Wen you guys trus him, you guys goin live foeva fo real kine cuz you his guys.

Jesus Talk To His Guys

21:1 An den, afta dat, Jesus wen let his guys go see him again. Dis wen happen by Lake Tiberias. Dis wat wen happen. 2 Some a Jesus guys wen get togedda. Had Simon Peter, an Thomas da guy dey call Da Twin, Natanael da guy from Cana town Galilee side, an Zebedee's two boys, plus two odda guys. Jesus was dea teacha. 3 Simon Peter wen tell da guys, “Eh, I like go fish!” An dey tell um, “Yeah! We like go too.” So da guys wen go down to da beach, an dey wen go inside one boat. But dat nite, dey neva catch notting. 4 Den wen real early in da morning an get ony litto bit light, had Jesus standing dea on da beach. But his guys, dey neva know was him. 5 He tell um, “Eh! Wat you guys wen catch?” Dey tell um, “Whitewash! No mo notting!” 6 Den he tell um, “Go throw da net ova da right side! You goin get plenny fish dea!” Dey go throw da net, an get so plenny fish, da guys no can pull up da net. 7 Now me, I was dea. I da guy dat Jesus wen get plenny love an aloha fo. I wen tell Peter, “Eh! Dass da Boss!” Wen Simon Peter wen hear dat, he put on his shirt dat he wen take off befo fo work, an den he go jump outa da boat fo swim quick to da beach, 8 cuz da boat ony stay bout hundred yards from da beach. So den Jesus odda guys wen row da boat back to da beach, dragging da net wit all da fishes inside. 9 Wen da guys wen go outa da boat, dey spock one charcoal fire on da beach. Had fish on top, an had bread. 10 Jesus tell um, “Eh, bring some a da fish you wen catch ova hea.” 11 So Simon Peter go back inside da boat, an he help da guys drag da net on top da beach. Had plenny big kine fishes inside -- was hundred fifty three! An you know wat? Da net neva even broke, no matta had so plenny fish inside. 12 Jesus tell um, “Come on, you guys! Breakfas time awready!” His guys, dey know awready, was da Boss. An dey too scared fo aks him, “Who you?” 13 Den Jesus wen go ova dea, an take da bread an give um to his guys. Same ting wit da fish. 14 Az was three times Jesus wen let da guys see him afta he wen come back alive from mahke.

Jesus an Peter

15 Afta dey pau eat, Jesus wen aks Simon Peter, “Eh Simon, John's boy. Tell me dis: You get mo plenny love an aloha fo me den dese guys get, o wat?” Peter tell um, “Eh, fo shua, Boss. You know I yoa friend.” An Jesus wen tell um, “Kay den. Feed my baby sheeps.” 16 Den Jesus aks um one mo time, “Eh Simon, John's boy. You get love an aloha fo me, o wat?” Peter tell um, “Eh, fo shua, Boss! You know I yoa friend.” An Jesus tell um, “Kay den. Take care my sheeps.” 17 An den one mo time, Jesus aks um, “Eh Simon, John's boy. You my friend, o wat?” Den Peter wen come all hurt inside, cuz now three times awready Jesus go aks him. He wen say, “You my friend, o wat?” So Peter tell um, “Boss! You know everyting! You know I yoa friend.” Jesus tell um “Feed my sheeps. 18 You know wat I mean? Den I like tell you dis too: Befo time, wen you was one young guy, you used to put on yoa clotheses an tie yoa belt an go wea eva you like. Bumbye, you goin come one old guy. Den you goin stick out yoa hands an one nodda guy goin tie you up an take you one place you no like go.” 19 (Jesus wen talk lidat fo tell Peter wat goin happen bumbye, how Peter goin mahke fo show how awesome God stay.) Den Jesus tell um, “Come on! Stay tight wit me an be my guy.”

Da Guy Dat Jesus Love Plenny

20 Den Peter wen turn aroun, an spock me walking behind dem. I one a Jesus guys, da one Jesus get plenny love an aloha fo. I da guy dat wen sit by Jesus da time dey wen eat da Passova food, an wen aks Jesus, “Eh Boss, who da guy dat goin set you up fo mahke?” 21 Wen Peter spock me, he wen aks Jesus, “Eh Boss! Wat bout dis guy? Wat goin happen to him?” 22 Jesus tell um, “So, wat if I like him stay alive till I come back? Bodda you? You, you stay tight wit me!” 23 Cuz a dat, Jesus odda guys telling each odda, “Dat guy John, he no goin mahke, eva.” But Jesus neva tell um dat I no goin mahke, eva. He ony say, “So, wat if I like fo da guy stay alive till I come back? Bodda you?”

One Mo Ting

24 An you know who dat guy dat Jesus talk bout, yeah? Was me, John! Jesus, he my teacha. I telling you guys all dis stuff. I wen see um happen, an I wen write um all down. An we all know da stuff I stay telling you guys, dat stuff stay true. 25 An get plenny mo odda kine stuff Jesus wen do. If somebody wen try write all dat Jesus wen do, from da time he wen start till pau, I figga da whole world no mo room fo put all da kine books bout um.