1:1 Da time wen eryting had start, God wen make da sky an da world. 2 Da world come so no mo notting inside, no mo shape notting. On top da wild ocean dat cova eryting, neva had light notting. Ony had God Spirit dea, moving aroun ova da watta.
Day Numba One
3 Den God say, "I like light fo shine!" an da light start fo shine. 4God see how good da light. Den he put da light on one side, an da dark on da odda side. 5Da light time, he give um da name "Day time." Da dark time, he give um da name "Nite time." So, had da nite time an da day time, az day numba one.
Day Numba Two
6 Den God say, "I like get someting inside da middo, fo no let da watta up dea an da watta undaneat come togedda!" 7 An dass wat God wen do. God make someting fo no let da watta up dea an da watta undaneat come togedda. 8 Da ting inside da middo, God give um da name "Da Sky." Had da nite time an da day time, az day numba two.
Day Numba Three
9 Den God say, "I like da watta unda da sky come togedda one place, so dat get dry land!" An dass wat God wen do. 10 Da dry groun, God give um da name "Land," an da watta dat wen come togedda one side, he give um da name "Sea." God look da dry groun an da sea, an he tell, "Real, real good, all dat!" 11 Den God say, "I like da land, get all diffren kine plant grow! Da kine plants dat make dea own kine seed, an da kine trees dat make da fruits wit da seed inside, eryting!" An dass wat God wen do. 12 So da land wen make all diffren kine plant grow, da kine plants dat make dea own kine seed, an da kine trees dat make da fruits wit dea own kine seed inside, eryting. An God look da plants, an he tell, "Real, real good, all dat!" 13 Had da nite time an da day time, az day numba three.
Day Numba Four
14 Den God say, "I like put lights up dea inside da sky! Dass fo make da day time diffren den da nite time. Dass fo show da time fo do tings, an da odda kine days fo do someting, an da years. 15 I like get lights up dea inside da sky, fo make light all ova da world!" An dass wat God wen do. 16 God make da two big lights. Da big light, he make um fo be da main one day time, an da odda light, he make um fo be da main one nite time. He even make da stars too. 17God put da lights up dea inside da sky, fo make light shine on top da groun, 18 day time an nite time, an fo make da light an da dark diffren. An God look da day an da nite, an he tell, "Real, real good, all dat!" 19 Had da nite time an da day time, az day numba four.
Day Numba Five
20 Den God say, "Inside da watta, I like get choke diffren kine fishes an odda kine tings dat live dea! Up inside da sky, I like get plenny bird an any kine tings dat fly up ova da groun!" 21 God make all da big kine fishes an odda kine tings dat live inside da ocean, an choke plenny small kine fishes an odda kine tings dat move aroun inside da watta, an all kine birds an bugs wit wings. An God look da tings inside da watta an da tings dat fly, an he tell, "Real, real good, all dat!" 22 Den God tell da fishes an birds an all da odda kine life, "I give you da powa so you can do eryting I wen make you fo do. So, I like you get plenny bebes, an fill up da ocean wit um. You birds too, I like you fo do da same ting an fill up da world!" 23 Had [da] nite time an [da] day time, az day numba five.
Day Numba Six
24 Den God say, "I like da land make all kine diffren tings! da animals dat live wit peopo, an da small kine animals, an da wild animals." An dass wat wen happen. 25 God wen make um all: all kine wild animals, an all kine animals dat live wit peopo, an all da small kine animals dat run aroun on top da groun. An God look da animals, an he tell, "Real, real good, all dat!" 26 Den God say, "Now, I like make peopo. I like dem be like me, jalike one copy. Dey goin be in charge a eryting: da fishes inside da ocean, da birds inside da sky, da animals, all da land, an all da small kine animals dat go aroun on top da groun." 27 So God make da peopo, same same jalike one copy a him. Fo start, he make one guy an one wahine. 28 Den God tell um, "I give you guys da powa so you can do eryting I wen make you fo do. So, get plenny bebes, an fill up da world wit um, an take ova! You guys in charge a da fishes inside da ocean, an da birds inside da sky, an all da animals dat move aroun on top da groun." 29 An God say dis too: "You know wat? I give you guys all da plants all ova da world dat make seed, an all da trees dat make fruits wit da seed inside. Dat fo you guys eat. 30 An fo all da wild animals, an fo all da birds inside da sky, an fo all da animals moving aroun on top da groun -- eryting dat stay alive, I give dem all da grasses an odda kine green plants fo dea food." An dass wat God wen do. 31 God look eryting he wen make, an he say, "Real, real good, all dat!" An had da nite time an da day time, az day numba six.
Day Numba Seven
2:1 Az how God wen finish make da sky, an da world, an all da tings inside dem. 2 Wen da day numba seven come, God was pau awready wit da work he was doing. 3 God say, "Day numba seven, dass da bestes day!" He make dat day da spesho day fo him. Cuz dat was da day wen he pau make eryting an no need do moa. 4 An dass da story bout how was, wit da sky an da world, wen God wen make um.
God Make Da Firs Guy
Dat time, wen God, da one dey call Yahweh, wen make da world an da sky, 5 all ova da world, neva even have bushes inside da fields. Neva have grass dat come up inside da fields, cuz da God Yahweh neva make da rain come down on top da groun yet, an cuz neva have nobody fo work da groun. 6 Had fog come up outa da groun, an da dew from dat was da ony watta dat da land get, dat time. 7 Den da God Yahweh take dirt from da groun an make one guy. God blow on top his face fo make da guy come alive. Az how da guy get life inside him.
God Put Da Guy Inside One Place Wit Trees
8 Da God Yahweh wen plant plenny trees one place ova dea Eden side, da east side. Dass wea he put da guy he wen make. 9 Da God Yahweh make um grow outa da groun, all nice kine tree you like look at, da kine dat make fruits good fo eat. Inside da place wit all da trees, inside da middo, had one Tree Dat Can Make You Live Foeva if you eat da fruit, an one Tree Dat Can Make You Know Wass Good An Wass Bad if you eat da fruit. 10 Had one riva dat come up inside Eden an give watta fo all da trees inside dat place. Outside, da riva split up an come four diffren riva. 11 One riva get da name Pishon, an go aroun da outside Havilah land. (Dass da place wea get gold inside da groun, 12 da bestes kine gold, an gum from one tree fo make perfume, an rocks da kine fo make jewelry.) 13 One nodda riva get da name Gihon, an go aroun da outside Cush land. 14 One nodda river get da name Tigris, da one dat go by Assyria on da east side. Da odda river, dass da Eufrates Riva.
God Tell Da Guy Wat He Gotta Do
15 Da God Yahweh wen put da guy inside Eden, da place he wen plant all da trees, fo live dea an work da groun an take care eryting. 16 God tell um wat he gotta do, "All da trees inside dis place, you can eat da fruits from dem, wateva you like. 17 Ony one tree -- da Tree Dat Get Fruits Dat Can Make You Know Wass Good An Wass Bad, no eat da fruit from dat. Cuz wen you eat dat fruit, den you goin get cut off from me, an you goin mahke fo shua!"
Da Guy Stay Alone By Himself
18 Den da God Yahweh tell, "No good da guy ony stay alone by himself. I goin make somebody fo him, jalike him but diffren, dat goin kokua him." 19 Befo time, da God Yahweh take dirt from da groun an make all da diffren kine wild animals an all da diffren kine birds in da sky. He bring um all in front da guy, fo find out wat name da guy goin give um. Eryting dat stay alive, da name dat da guy give um, dass da name dey goin get. 20 So da guy give name to all da kine animals dat live wit peopo, an all da kine birds in da sky, an all da kine wild animals. But still yet, da guy neva find one a dem dat stay jalike him but diffren, fo kokua him.
God Make Da Firs Wahine
21 Den da God Yahweh make da guy lay down an go pass out sleep. Wen da guy sleeping, God take one rib outa him, an den close up da place wit skin. 22 Den da God Yahweh make one wahine outa da rib. He make her go by da guy. 23 Da guy say, "Now, dis one, jus right fo me! She da wahine fo me. Her bones, come from my bones, Her skin, come from my skin. Dis one, I goin give her da name 'Wahine,' Cuz God wen take her outa me, one guy." 24(Dass how come da guys go way from dea fadda-mudda guys, an come tight wit dea wife, an da guy an da wahine, dey come jalike dey one.) 25 Now even so, da guy an da wahine was naked, but dey neva have shame from dat.