Johannese 1

Kristûsib nelâgut Gudeoninganik uviningorninganiglo. Johannesib baptiterijub oᴋauteᴋarninganik Jêsusemik. Jêsusib annerosungninganik ilinniartime sivorlinginik.

1 Pigiarnerme oᴋausek ipok, oᴋauserlo Gûdemêpok, oᴋauserlo Gûdiovok. 2 Tâmna pigiarnerme Gûdemêpok. 3 Tamaitaᴋsuit tâpsomunga pingortitauvut, tâpsomalo assiagut pingortisimangilat pingortisimajut. 4 Inôsek tâpsoma iluanêpok; inuillo inôsek ᴋaumanerivât. 5 ᴋaumajorlo ᴋaumaivok tâᴋtomut, tâᴋtomiullo tukkisingilât. 6 Inungmik tilijaumajoᴋarpoᴋ Gûdemut, Johannesemik atilingmik. 7 Tâmna tikilauᴋpok kigligiutsijôvlune, kigligiutserᴋovlugo ᴋaumajomik, ilûnnaita tâpsomunga okpertitaulerᴋovlugit. 8 Nangminek tâmna ᴋaumajôlaungilak, kigligiutsijuksauvlunele ᴋaumajomik. 9 Tamadja mikseᴋârtok ᴋaumajok, inungnik ilûnnainik ᴋaumarsaijok, nunamut tikitunik. 10 Silaᴋsoarmêlauᴋtok, silaᴋsoarlo tâpsomunga pingortitauvok; silaᴋsoarmiullo illitaringilât. 11 Inuᴋotiminut tikipok, inuᴋotingitalo illaliungilât. 12 Tâpsominga illaliortut ilûnnaita, tâpkoa pitsartunermik tunitjivigivait, ᴋitorngaulerᴋovlugit Gûdemut, okpertut tâpsoma atinganut. 13 Tâpkoa aungmit pingitut, uviniub pijomajanganillônêt, angutib pijomajanganillônêt, Gûdemille erniangomajut. 14 Oᴋauserlo uviniolerpok, inôᴋatigilutalo, (ânanauningalo takolauᴋpavut, ernetuab Atâtamit pijub ânanauningatut) saimanelijartok, mikseᴋârnelijartorlo. 15 Johannese tâpsominga kigligiutjivok, ᴋaggudlarlunelo oᴋarpok: Tâmnauvok oᴋautigilauᴋtara imâk: ᴋingunipkut ᴋainiarpok sivunimnêlauᴋtok, pilerᴋârtinanga ilaurame. 16 Tâpsomalo pitaᴋaloringninganit tigusilauᴋpogut saimanermik saimanermut. 17 Perᴋojalle Môsesekut tunijauvut, saimanek mikseᴋârnerlo Jêsuse Kristûsekut pivuk. 18 Gûdemik takomajoᴋangilak. Ernetuab, Atâtab sarliartangata, tamattominga nelojungnaitilauᴋpâtigut. 19 Tamadja Johannesib kigligiutjininga, Jûdit tiliklermatta Jerûusalemit ajoᴋertuijunik Lêvitiniglo, aperijauᴋovlugo: Kinauvêt? 20 Kigligiutjivorlo saglunanelo, kigligiutjivorlo: Kristûseungilanga. 21 Aperivâllo: Kinauvêt? Eliaseôvêt? Oᴋarpok: Taimnaungilanga. Nelautaijôvêt? Kiovaillo: Aukak. 22 Tagva oᴋautivât: Kinauvêt? Kiojungnarᴋovluta uvaptingnik tiliklertunut. Igvit ᴋanok pivlutit oᴋauseᴋarᴋêt? 23 Oᴋarpok: Ajoᴋertuijub nippinga uvanga inuᴋangitome: Nâlekab apᴋotiksanga âᴋiksorsiuk; sôrlo nelautaijoᴋ Jesaiase oᴋarmat. 24 Tilijaujullo Farisêerinit pijut. 25 Tâpkoa aperivât oᴋautivlugolo: Sôk baptisivêt, Kristûseunginavit, Eliaseonaglônêt, nelautaijônaglônêt? 26 Johannesib kiovait oᴋarlunelo: Imermut baptisivunga, akunapsingnêlerporle illitaringitase. 27 Tâmnauvoᴋ kingunipkut ᴋainiartok sivunimnêlauᴋtok, nelopᴋotivigijara itigagutîgik singêjarlugik. 28 Tamattominga pijoᴋalauᴋpok Betâbarame Jordanib akiane, Johannesib baptisivingane. 29 Uvlub aippangane Johannesib Jêsuse nelipsariartortine takovâ oᴋarlunelo: Ahâk tagga Gûdib saugârsunga silaᴋsoarmiut ajorninginik nangmartok! 30 Tâmnauvok oᴋautigilauᴋtara: Kingunipkut angut ᴋainiarpok sivunimnêlauᴋtok; pilerᴋârtinanga ilaurame. 31 Ilitarilaungilaralo; Israêlekunulle ilitarijaulerᴋovlugo, tamanna pivlugo baptisijartorpunga. 32 Johanneselo kigligiutjivok oᴋarlunelo: Takolauᴋpunga, Anernek akᴋarmat ᴋilangmit, tingmiatut Taubetut, tâpsomanêlerdlunelo. 33 Ilitarilaungitaralo; baptisijartorᴋojimale imermut, tâpsoma oᴋautivânga: Takoleruvit Anernerub akᴋarvigijanganik ᴋânganêvigijanganiglo, tâmnauvok Anernermut ajunginermut baptisijok. 34 Takolauᴋparalo; kigligiutsilungalo tâmna, Gûdib erneringmago. 35 Uvlub aippangane Johannese tagvanênivoᴋ ilinniartime illâgik maggûk illagilugik. 36 Jêsuselo arvertartok takogamiuk, oᴋarpok Ahâk, tagga Gûdib saugârsunga! 37 Ilinniartîkitalo oᴋartok tussarpâk, Jêsuselo malikpâk. 38 Jêsusele ᴋeviarpok, maliktîngnelo takovak, oᴋautivlugiglo: Suna ᴋenerpitikô? Tâpkoale oᴋautivâk: Rabbi (imaipok: ajoᴋertuijok), kikkunêkêt? 39 Tâpsoma oᴋautivak: ᴋailutik takojartortiko! ᴋaivuk takolugolo, uvlormelo tamattomane tâpsomane uvlilerpuk; stûndele 10 iolerpok. 40 Magguk tâpkua, Johannesemit tussartuk Jêsusemiglo maliktuk, aippanga Andrêaseovoᴋ, Sîmonib Pêtrusib nukanga. 41 Tâpsoma angajune Sîmon naiperᴋârpâ, oᴋautivlugolo: Messîase naipipavut (imaipok: Kristûse, ubvalo: mingoarsimajok). 42 Jêsusemullo pitippâ: Jêsusib takogamiuk, oᴋautivâ: Sîmoneovotit, Jônasib erninga; Kêfasemik ateᴋartuksauvotit (imaipok: Pêtrusemik, ubvalo: ᴋairtomik). 43 Uvlub aippangane Jêsusib ama Galilêamut aijomavlune Filippuse naipipâ oᴋautivlugolo: Malinga! 44 Filippusele Betsaidamiôjok, Andrêasiblo Pêtrusiblo iglugasaksoarmioᴋatingak. 45 Filippusib Natânaêl naipipâ oᴋautivlugolo: Tâmna naipilauᴋpavut, Môsesib perᴋojane nelautaijullo aglagutigilauᴋtangat, Jêsuse, Jôsefib erninga, Nazaremioᴋ. 46 Natânaêliblo oᴋautivâ: Nazaretemit sumik ajungitomik pijoᴋarungnarᴋâ? Filippusib oᴋautivâ: ᴋailutit takojartoruk! 47 Jêsusib Natânaêl tikitine takovâ, oᴋautigivlugolo: Ahâk, tagga Israêlite idluartok, nelangaineᴋangitok! 48 Natânaêlib oᴋautivâ: Nakît ilitarivingâ? Jêsusib kiovâ oᴋautivlugolo: Filippusemut ᴋaiᴋojauᴋârtinak, napârtub paungatannaᴋarpaktub atânêtilutit, takolauᴋpagit. 49 Natânaêlib kiovâ oᴋautivlugolo: Rabbi, Gûdib ernerivâtit, igvit Israêlitit atanerivâtit. 50 Jêsusib kiovâ oᴋautivlugolo: Oᴋperpotit oᴋautilaurapkit, napârtûb paungatannaᴋarpaktub atânêtilutit takolaurapkit: tamattomangat pijariarᴋortunersanik takojomârpotit. 51 Oᴋautivlugolo: Âhamarik, âhamarik oᴋautivapse: Mattoma kingorngagut ᴋilak angmajoᴋ takoniarpase, Gûdiblo Engelingit ᴋangatartut akᴋartullo Inûb Erninganut.

Johannese 2

Jêsusib tatamnartulininganik sivorlerpâmik Kaname Galilêamêtome. Aularviksiorvingmik Jerûsaleme. Tempelib sujungaititauninganik. Jûdit nelunaikutamik takojomaninginik.

1 Uvluk pingajuangne nuliarêlitainartoᴋarpok Kaname Galilêamêtome; Jêsusiblo anânanga tagvanêpok. 2 Jêsusele ilinniartingillo ᴋaiᴋojaugivut nuliarêlitainartungnut. 3 Vainelo amigarmat, anânangata Jêsuse oᴋautivâ: vaineᴋarungnairput. 4 Jêsusib oᴋautivâ: Arnaᴋ suliarpîk ilingnût? Stûndiga tikisimangilak sulle. 5 Anânangata kivgat oᴋautivait: Oᴋausingit ilipsingnut piniarutigisigik. 6 Tagvanele ilijaumajoᴋarpok imeᴋarvingnik ujarᴋanik pingasujortunik, Jûdit sujungairsautingita ilusingititut; tâpkoa maggûngnik pingasuniglônêt ôktuteᴋasôngovut. 7 Jêsusib oᴋautivait: Imeᴋarvît ukua imertulersigik. Tâpkoalo imertorpait ullipkidlugit. 8 Oᴋautivaillo: Kalutitse mâna, âtsiluselo nerᴋiksaliortomut. Atsilerpullo. 9 Nerᴋiksaliortuble vaine imetuinaulauᴋtok ôgamiuk, (ᴋaujimananelo, nakit pingmangât, kivgalle imermik ᴋalulauktut ᴋaujimavât,) nerᴋiksaliortub uiksak ᴋaiᴋovâ, 10 Oᴋautivlugolo: Ilûnnatik vaine mamarnek sivorlermik ᴋaipât; ᴋaiᴋojaujullo imerugungnairpatta, mamanginersak ᴋaipât; igvit vaine mamarnek kingorliotipat. 11 Tamadja Jêsusib tatamnartitangita sivorlerpângat, piniartok Kaname Galilêamêtome, ajugaᴋanginine saᴋᴋertiniaramiuk. Ilinniartingitalo okperivât. 12 Mattoma kingorngagut Kapernaumut atârpoᴋ, nangminek, anânanelo, ᴋatangutinelo, ilinniartinelo illagivlugit; tagvanelo akunêngilat. 13 Jûdillo aularviksiorvingat ᴋaglilerpok; Jêsuselo Jerusalemut majorarpok. 14 Katimaviksoarmelo tuktuvangnik, saukaniglo, taubiniglo niorvgutilit naipipait, kênaujaniglo tauᴋsêjut. 15 Aklunâniglo iperautsiorpok, ilûnnaitalo anitipait katimaviksoarmit, saugallo tuktuvaillo illaliudlugit, kênaujaniglo tauᴋsêjut kênaujaᴋotingit serᴋitivait, sângillo ochotidlugit. 16 Taubiniglo niorvgutilit oᴋautivait: Tamakkoa anitisigik, atâtamalo iglunga niuverviotiniarasiuk. 17 Ilinniartingitalo erᴋarpât aglaksimangmat: Ilungertornerub iglut pivlugo nungutipânga. 18 Tagva Jûdit kiovât oᴋautivlugolo: Sumik tatamnartitsivigijomavitigût taimailiorungnarnernût? 19 Jêsusib kiovlunelo oᴋautivait: Katimavik una asserorsiuk; uvluglo pingajuangne napartitsomagivara. 20 Tagva Jûdit oᴋarput: Katimavik una jârine 40 ine senajaumavoᴋ, igvillo uvlune pingasune napartitsomajât? 21 Timiminigle oᴋarpok tailugo katimavingmik. 22 Toᴋungajunille makisimangmat, ilinniartingita erᴋarpât, tamanna oᴋautigilaungmago; aglaillo, Jêsusiblo oᴋauserilauᴋtangit okperivait. 23 Aularviksiorveᴋarningane Jerusalemêtilugo, unuktut okpilerput atinganut, tatamnartitangit takogamigit. 24 Jêsusible ingminik sungertorlungilait, ilûnnaita ilitarigamigit. 25 Inungmiglo nelojungnaititaujariaᴋangilak kimullônêt; ᴋaujimatsiarame inûb ilumigijanginik.

Johannese 3

Jêsusib Nikodêmusiblo oᴋaᴋatigêngnîgingnik. Johannesib baptiterijub kigligiutsininganik ânanaunerpâmik kingorlerpâmiglo Jêsusemik.

1 Angutekalaukporle Farisêerit akorngane, Nikodêmusemik atilingmik, Jûdine angajoᴋaujomik. 2 Tâpsoma unnuangotilugo Jêsuse tikipâ, oᴋautivlugolo: Ajoᴋertuijok, ᴋaujimavogut, ajoᴋertuijôvlutit Gûdemit pigavit; iliktut tatamnartitsijoᴋarungnangimat, Gûdib aiparikpago kisiane. 3 Jêsusib kiovâ oᴋautivlugolo: Âhamarik, âhamarik oᴋaupagit: Nutâmik erniangongitub Gûdib nâlegauvinga takojungnangilâ. 4 Nikodêmusib oᴋautivâ: Inîk ᴋanok erniangojungnarᴋâ inuᴋoarlunê? Ama anâname timinganut iterungnarivâ erniangolunelô? 5 Jêsusib kiovâ: Âhamarik, âhamarik oᴋaupâgit: Erniangongitok imermut Anernermullo, Gûdib nâlegauvinganut pijungnangilak. 6 Uviningmit erniangojok uviniovok; Anernermille erniangojok anerniovok. 7 Tataminiarutiginago, oᴋautilaurapkit: Nutâmik erniangojuksauvose. 8 Anore isumaminik nane anordlerpok, suluksungningalo tussaralloarpat; ᴋaujimangilatille, nakit pingmangât, namullo aingmangât. Taimainivok neliat Anernernit erniangomajok. 9 Nikodêmusib kiovâ oᴋautivlugolo: ᴋanok tamanna ilinganiarᴋâ? 10 Jêsusib kiovâ oᴋautivlugolo: Isrâêlitine ajoᴋertuijôvêt, tamanalo ᴋaujimanagô? 11 Âhamarik, âhamarik oᴋaupagit: ᴋaujimajaptingnik oᴋarpogut, takolauᴋtaptingniglo kigligiutjivogut; kigligiutjiniptingniglo okpingilase. 12 Nunab pinginik oᴋautijarangapse, okpinginapse: ᴋanok okperajarᴋisê, ᴋilaub pinginik oᴋautinajarupsê? 13 ᴋilangmullo ᴋongmuartoᴋangilak, ᴋilangmit akᴋartok kisime, tagva Inûb Erninga ᴋilangmêtok. 14 Sôrlolo Môsesib ᴋuglugiangoak napautilaungmago inuᴋangitome, taimaktauk Inûb Erninga napautjaujariaᴋarpok; 15 Ilûnnatik okpertut tâpsomunga assioᴋonagit, nungusuitomigle inôguteᴋarᴋovlugit. 16 Imâk Gûdib silaᴋsoarmiut nagligivait, Ernetuane tunilugo, ilûnnatik okpertut tâpsomunga asioᴋonagit, nungusuitomigle inôguteᴋarᴋovlugit. 17 Gûdib Ernine tililaungimago silaᴋsoarmut, silaᴋsoarmiunik erᴋartuirᴋovlugo; silaᴋsoarmiulle piulijauᴋovlugit tâpsomunga. 18 Tâpsomunga okpertok erᴋartortauniangilak; okpingitorle erᴋartortaujarêrpok; Gûdib Ernetuangata atinganut okpinginame. 19 Tamadja erᴋartortaujutiksauvok, ᴋaumajok silaᴋsoarmut tikisimangmat, inuille tâᴋsoak ungaginersarivât ᴋaumajomit. Piniarningit idluimatta. 20 Idluitulijub ᴋaumajok ômigivâ, ᴋaumajomullo aijomanane, piniarnerlungnine pidlartauᴋonagit. 21 Mikseᴋârnermigle piniartok, ᴋaumajomut aivok, piniarnine sagvartauᴋovlugit; Gûdeme piniaramigit. 22 Mattoma kingorngagut Jêsuse ilinniartine illagilugit nunamut Jûdêamut pivok, tagvanelo piniarveᴋarpok tâpkoa illagilugit, baptisilunelo. 23 Johanneselotauk baptisivok sulle Enoneme, Sâlimib ᴋanitangane, tamanna imiliksôngmat; tagvungalo tikiput baptitaujomavlutik. 24 Johannese sulle parngnanairsimavingmut pititaungimat. 25 Tagva Johannesib ilinniartingit Jûdillo ingmingnut apersôtilerput sujungainermik (baptitaunermik). 26 Johanneselo tikipât oᴋautivlugolo: Ajoᴋertuijoᴋ, angut Jordanib akianut tikitigilauᴋtat, kigligiudjutigijat, ahâk, tâmna baptisivoᴋ, ilûnnatiglo tikipât. 27 Johannese kiovoᴋ oᴋarlunelo: Inuk tigusijungnangilak sumik, ᴋilangmit tunitjiviongikune. 28 Ilipse nangminek kigligiudsijigivapse, oᴋalaurama Kristûseunginimnik, tilijaugamale tâpsoma sivorngagut. 29 Nuliaksalik uiksauvoᴋ, uiksable ilannârijingata nangerdlunelo naipertorpâ, ᴋuviasudlarporlo uiksab nipinganik. Tamanna ᴋuviasungnera nâmaksilerpok mâna. 30 Tâmna aglisijariaᴋarpok, uvangale miklileriaᴋarpunga. 31 Takpângat tikitok tamainit anginerovok. Nunamit pijok nunamit pivok, nunablo pinginik oᴋarpok! ᴋilangmit tikitok tamainit anginerovok. 32 Kigligiudsivorlo takolauᴋtaminik tusalauᴋtaminiglo; illaliortoᴋalungilarlo kigligiutsininganik. 33 Tâpsomingale illaliortub, tâpsoma naᴋiterpâ Gûdib mikseᴋârtôninga. 34 Gûdib tilijangata Gûdib oᴋausingit oᴋautigingmagit; Gûdib Anerneᴋ tuningmago ôktûmut ôktornago (amigangitomigle). 35 Atâtab Ernine erdligivâ, tamaitalo tunilauᴋpait tâpsoma agganginut. 36 Erninganut okpertok nungusuitomik inôseᴋarpok. Erninganut okpingitub inôsek takoniangilâ, Gûdible ningausingata ᴋolangiangînarpâ.

Johannese 4

Arnamik Samâriamiomik. Ataniub kivgangata erningata âᴋiktauninganik Kapernaume Galilêamêtome.

1 Nâlegarle tukkisilerame, Farisêerit tusaumalermatta, Jêsuse ununersanik ilinniarteotitsingmat, baptisingmallo Johannesemit, 2 (Jêsuse nangminek baptisingigalloarmat, ilinniartimigulle,) 3 Tagva nuna Jûdêa ᴋemakpâ, Galilêamullo ingergarmilune. 4 Nunale Samâria apᴋotigijariaᴋarpâ. 5 Tagva Samâriab iglugasaksoangita illanginut tikipok, Siᴋaremik atilingnut, iglugasait, Jâkob tunilauᴋtangita ernerminut Jôsefemut ᴋanitanginêtunut. 6 Jâkoble imeᴋtarvinga tagvanêpok. Jêsusele ingerganerminut merngortorame, tagva imeᴋtarvingmut ingipok; stûndelo pingasujortôlerpok. 7 Tagva arnak Samâriamiok tikilerpok, imermik ᴋalujartorlune. Jêsusib oᴋautivâ: Imertilaunga. 8 (Ilinniartingille iglugasaksoarnut aimavut nerᴋiksarsiniaromavlutik) 9 Arnab Samâriamiub tagva oᴋautivâ: Sôᴋ ᴋenuvêt uvamnut imertitaunermik, Jûdiogavit, uvangale Samariamiut arnangita ilangât? (Samâriamiullo Jûdillo ingmingnut illagêngimatta). 10 Jêsusib kiovâ oᴋautivlugolo: Gûdib tunergutâ illitarilerungne, kinaungmangâllo ilingnut oᴋartok: Imertilaunga; tuksiarviginajarpat, tâpsomalo tunitjiviginajarpâtit imermik inôgutilingmik. 11 Arnab oᴋautivâ: Nâlegak ᴋalutiksaᴋangilatillônêt; imeᴋtarviglo itingmat. Nakît inôgutilingmik imeᴋaralloarᴋêt? 12 Anginersauvêt atâtaptingnit Jâkomit, tunijijomit imeᴋtarvingmik ôminga uvaptingnût? Nangminerle ômangat imilauᴋpok, ᴋitorngangillo nergjutingillo. 13 Jêsusib kiovâ oᴋautivlugolo: Imermik ôminga imertok imerulerniarivok. 14 Imermigle tunergusiarijaminik uvamnut imerniartok imerungniarungnairpok issoᴋangitomut; imerle tuniniartara tâpsomunga iluane puilavioniarpok imermik, inôtsemut nungusuitomut puilajomik. 15 Arnab oᴋautivâ: Nâlegak, imermik tamattominga tunitjiviginga, imerugungnairᴋovlunga, ovungartuksaujungnairᴋovlunga ᴋalujartorlunga. 16 Jêsusib oᴋautivâ: Ailerit, uit ᴋaiᴋolugo, ᴋailutillo ovunga. 17 Arnab kiovâ oᴋautivlugolo: Ueᴋangilanga. Jêsusib oᴋautivâ: Nellâgut oᴋarpotit: Ueᴋangilanga. 18 Tellimanik ueᴋalauᴋpotit, mânalo najortigijat uigingilat. Nelâgut oᴋarpotit. 19 Arnab oᴋautivâ: Nâlegak tukkisivunga nelautaijôgavit. 20 Sivorlivut ᴋakᴋame tamâne tuksialauᴋput (Gudemut); ilipsele oᴋarpose: Jerusaleme kisiane tuksiarveᴋartuksaugapta. 21 Jêsusib oᴋautivâ: Arnak okperinga, neliutsomârpo ᴋakᴋame tamânelônêt, Jerusalemelônêt Atâtamut tuksiarveᴋarungnairvise. 22 Tuksiarvigijase nelovase; uvagulle tuksiarvigijavut nelungilavut; piulijiksak Jûdinit pingmat. 23 Neliutsomârporle, neliutijarêrporlo tuksiartut nelâgôrtut Atâtamik tuksiarveᴋarvingat anernerme mikseᴋârnermelo; Atâtalo taimaitunik tuksiartiminik pijomavok. 24 Gûde anerniovok, tuksiartingitalo anernerme mikseᴋârnermelo tuksiarvigijaksarivât. 25 Arnab oᴋautivâ: ᴋaujimavunga, Messîase tikitsomârmat, Kristûsemik atilik; tâpsoma tikikune, tamainik oᴋautiniarpâtigut. 26 Jêsusib oᴋautivâ: Tâmnauvunga, oᴋaᴋatigijat. 27 Taimâk oᴋartilugo, ilinniartingit tikiput, tataminiarutigivâllo, arnak oᴋaᴋatigingmago. Oᴋangigalloarpulle: Sumîk apersornikêt? Ubvalo: Sôk oᴋaᴋatigiviûk? 28 Tagva arnab imeᴋtautine ᴋemakpâ tagvunga, ailunelo iglugasaksoarnut, inuillo oᴋautivait: 29 ᴋaititse, inuk takojartorsiuk, oᴋautjiga tamainik pinialauᴋtamnik, Kristûseungimangât. 30 Tagva iglugasaksoarnit anilutiglo tikilerpât. 31 Tikerᴋârtinagit, ilinniartingita innapât oᴋarlutiglo: Rabbi, nerrilerît! 32 Tâpsomale oᴋautivait: Nerᴋiksaᴋarpunga ᴋaujimangitapsingnik. 33 Tagva ilinniartit ingmingnut oᴋarput: ᴋaitsijoᴋalaunerᴋâ nerᴋiksanganîk? 34 Jêsusib oᴋautivait: Tamadja nerᴋiksara, tilijima pijomajanga piniarutigilugo, piniarningalo pijarêrlugo. 35 Nangminik oᴋalerpangilasê: Takᴋit sitamat nâkpatta, katersiveᴋalârpôᴋ? Ahâk, oᴋautivapse: Uititse, perorsêviglo takolersiuk; perortut ᴋaᴋorsijarêrput katitaksauvlutik. 36 Kibluijorlo akkilertauniksarsivok, katersilunelo perortunik inôtsemut nungusuitomut, ᴋuviasuᴋatigêngniarlutiglo karngasuijok kibluijorlo. 37 Tamâne oᴋautsit nelautsingmatta: Tâmna karngasuivok, asia kibluivok. 38 Uvanga tililauᴋpapse kibluerᴋovluse senalaungitapsingnik; asise senalauᴋput, ilipselo sulianginut tikipose. 39 Samâriamiulle iglugasaksoarnit taipkonangat pijut unuktut okperivât, arnab oᴋausingit pivlugit, kigligiutjijub: Tâpsoma oᴋautilauᴋpânga tamainik pinialaungnimnik. 40 Samâriamiulle tikinamitsuk, ᴋenuvigivât uvliviojomavlutik; uvlungniglo maggungnik tagvane uvlivok. 41 Ununersallo okpilerput oᴋausingit pivlugit. 42 Arnamullo oᴋarput: Okperapta oᴋautsitit pitjutigijungnairpavut, nangminek tusarapta tukkisilutalo, tâmna ilâ Kristûseongmat, silaᴋsoarmiut piulijingat. 43 Uvluk maggûk nângmanik, tagvangat aularpok, Galilêamullo ingergalerdlune; 44 Nangminerle Jêsuse kigligiutjivok, nelautaijok nunamine nakorijaungimat. 45 Galilêamulle tikingmat, Galilêamiut illaliorpât, takolauktut tamainik piniarninginik Jerusaleme aularviksiorviotilugo. Aularviksiorvingmut tikilaungmigamik. 46 Jêsuselo ama Kânamut Galilêamêtomut tikinivok, imermik vainiotitsivigilauᴋtaminut. 47 Ataniuble kivgangita ilangata erninga ᴋanimavlune nelavok Kapernaume. Tâmna tusaumagame, Jêsuse Jûdêamit Galilêamut tikingmat, tuksiarvigijartorpâ atersârᴋovlugo, ernine âᴋiktauᴋovlugo, toᴋoniarᴋôrdlune ᴋanimangmat. 48 Jêsusiblo oᴋautivâ: Nelunaikutanik tatamnartuniglo takungikupse, okperomangilase. 49 Ataniub kivgangata oᴋautivâ: Nâlegak, atersâlaurit ᴋitorngara toᴋoᴋârtinago. 50 Jêsusib oᴋautivâ: Ailerit, ernît inôvok. Angullo tâmna oᴋautsemik oᴋarvionerminik Jêsusemut okperpok ailerlunelo. 51 Atersârtilugolo, kivgangita pâᴋpât, nelojungnaitilugolo oᴋautivât: ᴋitgorngat inôvok. 52 Tagva kiglisiniarpait stûndemik nakornersaulervigilauᴋtanganik. Oᴋautivâllo: Ippaksak, stûndit 7 oningane ôlingnartub ᴋemakpâ. 53 Tagva atâtanga tukkisivoᴋ, stûnde tâmnaungmat, oᴋautjauvine Jêsusemut: Ernît inôvok. Okpilerporlo iglomioᴋatine ilûnaita illagilugit. 54 Tamadja Jêsusib tatamnartitangata aippanga, Jûdêamit Galilêamut tikiname.

Johannese 5

Jêsusib Sabbateme Jârinik 38 inik ᴋanimalauᴋtok âᴋikpâ. Jûdit tamanna pivlugo unangmilugo pijut oᴋaᴋatigivait suangavlugillo.

1 Mattoma kingorngagut Jûdit uvloᴋsiorveᴋarmatta, Jêsuse majorarivok Jerûsalemut. 2 Jerûsaleme saukat iterᴋattarvingata kiglingane tesseᴋarpoᴋ, Ebrêeritut taijamik Betesdamik, tellimaniglo iglotalingmik. 3 Tamakkonane ᴋanimajut unuktut nelavut, tautungitut, tusiaktullo, uvinêrutisimajullo. (Tâpkoa utaᴋivut imiub aulatitauniarninganik. 4 Engele akᴋarpangmat tessermut, neliuninga neliutijarangat, imanganik aulatitsijartorlune. Neliat tagva sivorliovlune imiub aulatitauningata kingorngane misiktok tagvunga, tâmna pijungnailerpok, sumiglônêt ᴋanimasermik pilik). 5 Inuᴋarporle tagvane Jârinik 38 inik ᴋanimavlune Nêlalauᴋtomik. 6 Jêsusible tâmna nelajok takogamiuk, tussaramelo, Taimâk sivitutigijomik nelalaungmat, oᴋautivâ: Pijungnaileromavêt? 7 ᴋanimajûb oᴋautivâ: Nâlegaᴋ, inuᴋangilanga, imek aulajarangat, misiktitsijiksamnik tesermut; tikikumalo assima ingiarpânga. 8 Jêsusib oᴋautivâ: Makitit, aumititillo tigulugit aularit. 9 Tagvainarlo inuk tâmna pijungnailerpok, aumitinelo tigulugit aularpok. Uvlorle tamanna Sabbateovok. 10 Tagva Jûdit pijungnailauᴋtok oᴋautivât: Uvlome Sabbateovok; idluangilak aumititit nangmarangne. 11 Tâpsoma kiovait: Pijungnaititima oᴋautivânga: Aumititit tigukit aularlutillo. 12 Tagva aperivât: Inuk imna kinauvâ, oᴋautjît: Aumititit tigukit aularlutillo? 13 Pijungnailertuble ᴋaujimangilâ, kinaungmangât; Jêsuse ᴋemailaungmat, inuliksôngmat tagvane. 14 Kingorngagut Jêsusib katimaviksoarme naipipâ, oᴋautivlugolo: Udjertulerit; pijungnairpotit; idluitulijungnairit, sôngonersamik sugiartauᴋonak. 15 Inuk tâmna aivok, Jûdillo oᴋautijartorlugit, Jêsuseongmat pijungnaititine. 16 Tamanna pivlugo Jûdit Jêsuse unangmivât toᴋotsomavlugo, taimailiulaungmat Sabbateotilugo. 17 Jêsusible kiovait: Atâtaga mânamut tikidlune piniarpok uvangalo piniarivunga. 18 Tamanna pivlugo Jûdit piganerterluarlutik toᴋotsomavât, Sabbate isumagingimago kisianeungitok, oᴋarmingmalle: Gûde atâtagigamiuk, ingminiglo Gûdemut adsiotilune. 19 Tagva Jêsusib kiovait oᴋautivlugillo: Âhamarik, âhamarik oᴋaupapse: Ernek ingminik piniarungnangilak sumik, takojaminik Atâtamit kissênik; tâpsoma piniarutigijanga Ernerubtauk taimaluatsiak piniarutigivâ. 20 Atâtab Ernine erdligivâ piniarninelo tamaita takojautipait tâpsomunga, sullelo piniarnerit pijariaᴋortunersat takotitjutiginiarpait tâpsomunga, tataminiarutigijaksapsingnik. 21 Sôrlo Atâtab toᴋungajut tupaktingmagit, ômartilugillo, taimâk Erningatauk ômartitsivok pijomajaminik. 22 Atâta erᴋartuingimat kimiglônêt, Erninele erᴋartuijungortilauᴋpâ tamainik. 23 Ernek ilûnainut nâlektauᴋovlugo, sôrlo Atâta nâlengmatsuk. Ernermik nâlengitok Atâtamiktauk nâlenginivok tilijinganik. 24 Âhamarik, âhamarik oᴋaupapse: Oᴋausimnik tussartok, okperilugolo tilijiga, tâmna inôseᴋarpok nungusuitomik, erᴋartuivingmullo piniangilak, toᴋomille inôtsemut nuktersimavok. 25 Âhamarik, âhamarik oᴋaupapse: Stûnde neliutsomârpok, neliutijarêrporlo, toᴋungajut Gûdib Erningata nippinganik tussarvingat; tamattomingalo tussartut inôniarput. 26 Sôrlo Atâta inôseᴋarmat ingmine, taimâktauk Ernine tunitjivigivâ inôseᴋarᴋovlugo ingmine. 27 Pitsartunermiglo tunitjivigivâ, erᴋartuirᴋovlugotauk, Inûb Erneringmago. 28 Tataminiarutiginasiuk tamanna. Stûnde neliutsomârmat ilûnatik iluvernêtut tussaromârviksangat tâpsoma nâppinganik; 29 Anivlutiglo makitsomârput ajungitulilauᴋtut inônermut pijuksauvlutik, idluitulilauᴋtulle erᴋartuivingmut pijuksauvlutik. 30 Uvamnik sumik piniarungnangilanga. Tussartaptut erᴋartuivunga, erᴋartuineralo idluarpok; pijomajara piniarutiginginapko, Atâtable tilijima pijomajanga. 31 Uvanga nangminimnik kigligiudsiguma, kigligiudsinera mikseᴋârtôngilak. 32 Assigale kigligiudsivok uvamnik; ᴋaujimavungalo, kigligiudsinek mikserᴋârtongmat, kigligiudsininga uvamnik. 33 Ilipse tiliklilauᴋpose Johannesemut, tâmnalo mikseᴋârnermik kigligiudsilauᴋpok. 34 Uvangale inungnut kigligiutjaujariaᴋangilanga; taimaitomigle oᴋautivapse, piulijaulerᴋovluse. 35 Taimna nennergoangolauᴋpok ikomalik ᴋaumaijorlo; ilipsele anikitomik ᴋuviasûteᴋaromalauᴋpose ᴋaumaninganik. 36 Uvangale pijariarᴋortunersamik kigligiutjuteᴋarpunga Johannesib kigligiutjininganit; piniarnerille, Atâtab ᴋailauᴋtangit uvamnut, nâjerᴋovlunga tamakkoninga, piniarnerit tamakkoa piniarutigijakka, kigligiutjivut uvamnik, Atâtab tilingmanga. 37 Atâtalo tilijiga, tâmna kigligiutjivok uvamnik. Tâpsoma nippinga tussalaungimarikpase, tautualônêt takolaungilase. 38 Oᴋausingalo ilumigingilase; okperinginapsiuk tâpsoma tililauᴋtanga. 39 Aglangne ᴋeneritse; inôtsemik nungusuitomik pitaᴋarasugigapse tâpkonane; tâpkoangovullo kigligiutsijut uvamnik. 40 Uvamnullo ᴋaijomangilase inôseᴋaromavluse. 41 Inungnut nertortaunasuangilanga. 42 Illitarivapsele, Gûdib naglingninganik ilumiuteᴋanginapse. 43 Atâtama atingane tikipunga illaliungilapsingalo. Assiga tikipat attermine nangminermine, tâmna illaliorniarpase. 44 ᴋanok okperungnarᴋisê, nertortaujomautigupse ilipsingnût? Nertornarnerlo Gûdemit kissianit pijok ᴋenernagô? 45 Isumaniarase, uvanga Atâtab sângane passijomârapse. Pasiklertoᴋarpoᴋ ilipsingnik, Môsesemik ipsominga tattigijapsingnik. 46 Môsese okperigupsiuk, okperinajarivapsinga; uvamnik aglalaungmat. 47 Tâpsomale aglangit okperingikupsigik, ᴋanok oᴋausikka okperinajarpisigîk?

Johannese 6

Kristûsib nerrititsinganik 5 ,000 inik. Arvertarninganik imiub ᴋângagut. Oᴋâlaninganik nerrinermik timinganik, imernermiglo aunganik.

1 Mattoma kingorngagut Jêsusib Galilêab tesseᴋsoanga, tagva Tibêriasib tesseᴋsoanga ikârvigivâ. 2 Inugasaksuillo malikpât, tatamnartitangit takolauᴋtatik pivlugit, pinialauᴋtangit ᴋanimajunut. 3 Jêsusele ᴋakᴋamut majorarpok, tagvungalo ingitsartorlune ilinniartine illagilugit. 4 Aularviksiorvigle Jûdit uvloᴋsiorvingat ᴋaglilerpok. 5 Tagva Jêsuse takosarpok takolunelo inugasaksoarnik tikitiminik, Filippûsemullo oᴋarpok: Nakit ᴋakᴋôjaksarsiniarpitâ makkoa nerᴋiksanginîk? 6 Taimagle oᴋarpok oktoromavlugo; ᴋaujimagalloarame piniaromajaminik. 7 Filippusib kiovâ: ᴋakᴋôjat kênaujarsungnut 200 inut pisiangovaktut inuit tâpkoa amigarivait, mikijomiglônêt atunit pigalloarunik. 8 Ilinniartingita illangata, Andrêasib, Sîmonib Pêtrusib nukangata, oᴋautivâ: 9 Nukappiaᴋarpoᴋ ovane ᴋakᴋôjânik tellimanik mingeriangniglo maggûngnik pilingmik; kisianele unuktoᴋsoarnut tâpkoa suglunarput. 10 Jêsusible oᴋautivait: Inugasaksuit ikterᴋosigik. Iviksukaᴋarporle tagvane unuktunik. Tagva ikterput 5 ,000 ikasait. 11 Jêsusible ᴋakᴋôjat tiguvait, ᴋujalivlunelo ilinniartiminut tunivait, ilinniartulle iksivajunut; taimâktauk mingeriangnit nâmagijaminik. 12 ᴋâgungnailermattale, ilinniartine oᴋautivait: Amiakut katersorsigik, assioᴋarᴋonago. 13 Tagva katersoilutik amârgaujat 12 it tattapait amiakunik, ᴋakᴋôjanit tellimanit, nerrilauktut kikilauktanginik. 14 Inuit Jêsusib tatamnartitanga tamanna takogamitsuk, oᴋarput: Tâmna ilâ nelautaijôvok tikituksak silaᴋsoarmut. 15 Jêsusele malugosulerame, ᴋainajarmatta tigujomavlugolo, ataniotitsomavlugo, ama ᴋemâlerpok ᴋakᴋamut inutôvlune. 16 Unnulermalle ilinniartut atârput tesseᴋsûb kiglinganut. 17 Umiamullo ikivlutik ikârniarlutiglo Kapernaumut. Tâᴋsijarêrporlo, Jêsusiblo tikisimangilait. 18 Tesseᴋsoarlo mallilerpok akᴋunaksoarmut. 19 Epulauᴋârdlutik isaktanik 25 ,000 inik 30 ,000 iniglônêt ungasiktigijomut, Jêsuse imab ᴋângagut pisuktoᴋ umiablo ᴋanitanganut tikitok takovât erᴋsilerlutiglo. 20 Tâpsomale oᴋautivait: Uvangauvunga, erᴋsinase! 21 Tagva umiamut ikerᴋolerpât; tagvainarlo umiab nuna aivigijomajatik tikisimalerpâ. 22 Uvlub aippangane inuit tesseᴋsûb miksânêtut takovut umiaᴋangimat asianik, ilinniartingita ikimavigijanganik kisianik, Jêsusiblo ilinniartine ikeᴋatigilaungimagit umiamut, ilinniartingit kisimik aulalaungmatta. 23 Umiable assingit Tibêriasemit tagvunga pivut ᴋakᴋôjamik nerrimârvinganut Nâlekab ᴋujalininganut. 24 Inuillo takogamik, Jêsuse tagvanêngimat, ilinniartingillônêt, umianut ikilerivut, Kapernaumullo tikilerlutik Jêsuselo ᴋenerlugo. 25 Tesseᴋsûblo akiane nagvâramitsuk, oᴋautivât: Rabbi, ᴋanga tamaungarnerᴋêt? 26 Jêsusib kiovait oᴋautivlugillo: Âhamarik, âhamarik oᴋaupapse tatamnartitakka takolauᴋtase, pivlugit ᴋenilungilapsinga; ᴋakᴋôjamigle nerrilaurapse kâgungnairluselo. 27 Nerᴋiksamik nungusârtomik pinasuarase, inôtsemulle nungusuitomut itsainartomik, Inûb Erningata tuniniartanganik ilipsingnut; tâmna Gûdib Atâtab naᴋitjusilaungmago. 28 Tagva oᴋautivât: Sumîk piniartuksauvitâ, Gûdib piniarᴋojanginik piniarungnarlutâ? 29 Jêsusib kiovait oᴋautivlugillo: Tamadja Gûdib piniarᴋojanga, okperluse tâpsomunga tilijanganut. 30 Tagva oᴋautivât: Sumîk tatamnartitsiniarᴋêt, takovluta okperilutillo pijungnarᴋovlutâ? Sumîk piniarᴋêt? 31 Sivorlivut Mannanik nerrilauᴋput inuᴋangitome, sôrlo aglaksimangmat: Tâpsoma ᴋakᴋôjamik tunitjivigivait, nerᴋiksanginik. 32 Tagva Jêsusib oᴋautivait: Âhamarik, âhamarik oᴋaupapse: Môsesib ᴋakᴋôjamik ᴋilangmit tunitjivigilaungilâse, Atâtamale ᴋaᴋᴋôjamik idluartomik tunitjivigivâse ᴋilangmit. 33 Tamadja Gûdib ᴋakᴋôjanga, ᴋilangmit pijok, tunijijok silaᴋsoarmiunut inôtsemik. 34 Tagva oᴋautivât: Nâlegak, ᴋakᴋôjamik, taimaitomik tunitjivigitsainartigut. 35 Jêsusible oᴋautivait: Uvanga ᴋakᴋôjauvunga inôgutilik. Uvamnut ᴋaijok kângniarungnairpok; uvamnullo okpertok imerosungniarungnairpok. 36 Oᴋautijarêrpapsele, takolaurapsinga, okperingilapsingalo. 37 Ilûnnatik Atâtama ᴋaitangita uvamnut tikipânga; uvamnullo pijok aniti nagolo ajaktorniangilara. 38 ᴋilangmit tikinama, pijomajaraungitok piniaromavlugo, tâpsomale tilijima. 39 Tamadjale Atâtama tilijima pijomajanga, asiojoᴋarᴋonago tamainit, tunilauktanginit uvamnut, ômartitserᴋovlungale tâpkoninga uvlut naggatiksangane. 40 Tamadjale tâpsoma tilijima pijomajanga, Erninganik takojok okperivlugolo nungusuitomik inôguteᴋarᴋovlugo; uvangalo ômartitsomârpara uvlut naggatiksangane. 41 Tagva Jûdit anûtigivât, oᴋarmat: Uvanga ᴋaᴋkôjauvunga ᴋilangmit tikitunga; 42 Oᴋarlutiglo: Jêsuseungilâk una, Jôsefib erningâ? atâtangalo anânangalo illitaringilavût? ᴋanorle oᴋarᴋâ: ᴋilangmit tikitungâ? 43 Jêsusib kiovait oᴋautivlugillo: Anûtjiᴋatigêngniarase! 44 Uvamnut tikitoᴋarungnangilaᴋ, Atâtab tilijima amuangipago; uvangalo ômartitsomârpara uvlut naggatiksangane. 45 Nelautaijut aglangine aglaksimavok: Ilûnnatik ajoᴋertortaumajôjomârput Gûdemut. Atâtamillo tamattominga tusartoᴋ ilinniarlugolo, tâmna ᴋaijungnarpok uvamnut. 46 Atâtamik takomajoᴋangilak; Gûdemit pijub kisime Atâta takolaukpâ. 47 Âhamarik, âhamarik, oᴋaupapse: Uvamnut okpertok, nungusuitomik inôseᴋarpok. 48 Uvanga ᴋakᴋôjauvunga inôgutilik. 49 Sivorlise Mannanik nerrilaukput inuᴋajuitome toᴋovlutiglo. 50 Tamadja ᴋakᴋôjak, ᴋilangmit tikitok, tamattomangat nerrijok, toᴋoᴋonago. 51 Uvanga ᴋakᴋôjauvunga ômanartok, ᴋilangmit tikitok. ᴋakᴋôjamit tamattomangat nerriniartok, inôniarpok isoᴋangitomut. ᴋakᴋôjarlo tuniniartara, uvinigivara, tuniniartara, silaᴋsoarmiut inôᴋovlugit. 52 Tagva Jûdit akkerartortigêlerput oᴋarlutiglo: ᴋanok ôma uviningminik nerrititsungnarpâtigût? 53 Jêsusib oᴋautivait: Âhamarik, âhamarik oᴋaupapse: Inûb Erningata uvininga nerriniangikupsiuk, aungalo imernago, inôseᴋarungnangilase ilupsingne. 54 Uvinimnik nerrijok, aumniglo imertok, nungusuitomik inôguteᴋarpok, uvangalo ômartitsomârpara uvlut naggatiksangane. 55 Uviniga ilâ nerᴋiksaungmat, augalo ilâ imiksauvlune. 56 Uvinimnik nerrijok, aumniglo imertok uvamnêtsainarpok, uvangalo tâpsomanêpunga. 57 Sôrlo Atâtab ômajub tilingmanga, uvangalo inôgama Atâta pivlugo: taimâktauk uvamnik nerrijok inôniarivok pivlunga. 58 Tamadja ᴋakᴋôjak, ᴋilangmit tikitok; imângungitok, sivorlise Mannanik nerrilaungmattatut, toᴋovlutiglo. ᴋakᴋôjamik tamattominga nerrijok inôniaromârpok isoᴋangitomut. 59 Tamattominga oᴋâlavok katimavingme, ajoᴋertuigame Kapernaume. 60 Ilinniartingitale unuktut, tamanna tussaramitsuk, oᴋarput: Oᴋautsit tamakkoa sôngudlarput; kia tusarungnarᴋagît? 61 Jêsusele ilumigut malugosulerame, ilinniartingita tamanna anûjutigingmatsuk, oᴋautivait: Tamanna sinaungajutigivisiûk? 62 ᴋanôk, Inûb Erninga takojomârupsiuk ᴋongmuartok takpikunga itsainarvingminut sivornganê? 63 Anernek tagva ômartitsijok! Uvinik piungilak. Oᴋautsit oᴋauserijakka anerniovut inôgutaularmiglo. 64 Akunapsingnêtoᴋarporle illanginik okpingitunik. Jêsuse pigiarninganit ᴋaujimatsiaralloarmat, nelît okpingimatta, neliatalo pititsomârmago. 65 Oᴋarporlo: Tamanna pivlugo oᴋautilauᴋpapse: Uvamnut tikitoᴋarungnangilak, Atâtamut tamattominga tunitjiviogune kisiane. 66 Taimangat ilinniartingita unuktut tunupât ingergaᴋatigijungnairlugolo. 67 Tagva Jêsusib 12 it oᴋautivait: Ilipsetauk aularomagivisê? 68 Tagva Sîmonib Pêtrusib kiovâ: Nâlegak, namût aijuksauvitâ? Igvit oᴋauseᴋarpotit nungusuitomik inôgutilingnik. 69 Uvagullo okpilauᴋpogut illitarsilerlutalo, Kristûseogavit, Gûdib ômajub Erninga. 70 Jêsusib kiovâ: Uvanga 12 iojose anerilaungilapsê? Illaselo atausek Sâtanaseovok. 71 Jûdasele Iskâriot, Sîmonib (erninga) oᴋautigivâ; tâpsoma kingorngagut pitipâ; tâmnalo 12 it illangat.

Johannese 7

Kristûsib oᴋâlaninginik katimaviksoarme, uvloᴋsiorvingme, akkerᴋunik milukatalingnik igloᴋarvingme.

1 Mattoma kingorngagut Jêsusib Galilêa ingergavigivâ; Jûdêa ingergavigijomanginamiuk, Jûdit toᴋonasuarmatsuk. 2 Jûdille uvloᴋsiorvingat, akkerᴋunik milukatalingnik igloᴋarvingat, ᴋanilerpok. 3 Tagva ᴋatangutingita oᴋautivât: Parngnailerit aularlutillo Jûdêamullo ailerit, ilinniartitittauk takoᴋovlugit piniarnernik piniarnerijarnik. 4 Angigutjilune piniartoᴋangimat sumik, tautuktaujomagune. Taimailioruvit, saᴋᴋijâlerit silaᴋsoarmiunut. 5 ᴋatangutingitalônêt okperingimatsuk. 6 Tagva Jêsusib oᴋautivait: Piviksara neliutisimangilak sulle; piviksasele neliutitsainarpok. 7 Silaᴋsoarmiut ômigijungnangilâse, uvangale ômigivânga, tâpkoninga kigligiutsigama, piniarningit idluingmatta. 8 Ilipse uvloᴋsiorvingmut tamattomunga majoraleritse. Uvanga majoraromangilanga sulle uvloᴋsiorvingmut tamattomunga, piviksara neliutisimangimat sulle. 9 Tamattomingale oᴋautijarêramigit, Galilêamêtuarpok sulle. 10 ᴋatangutingille majoralermatta, tagva uvloksiorvingmut tamattomunga majoralerivok, sakᴋijârane angigutjivlunele. 11 Tagva uvloᴋsiorviotilugo Jûdit ᴋenerpât oᴋarlutiglo: Imna nanêkâ? 12 Tâpsomingalo oᴋarnilutjijoᴋadlarpoᴋ inuit akorngane. Illangit oᴋarput: Ajungitôvoᴋ. Asingille oᴋarput: Aukak, inuille uivêrivait. 13 Sagvartomigle oᴋartoᴋangilak tâpsominga, Jûdit erᴋsigigamigit. 14 Uvloᴋsiorviotilugole Jêsuse majorarpok katimaviksoarmut, ajoᴋertuilunelo. 15 Jûdillo tataminiarutigivât, oᴋarlutiglo: ᴋanok ôma aglait ᴋaujimavagît, ilinnialaungigalloaramigît? 16 Jêsusib kiovait oᴋautivlugillo: Ajoᴋertûtiga uvamnit pingilak, tâpsomangalle tilijimnit. 17 Tâpsoma pijomajanganik piniaromajoᴋarpat, tukkisiniarpoᴋ, ajoᴋertûseᴋ tamanna Gûdemit pingmangât, ubvalo uvamnik oᴋâlamangârma. 18 Ingminik oᴋâlajok nertortauniksaminik ᴋenerpok; tâpsomale tilijime nertornarninganik pinasuartok, tâmna mikseᴋârtôvok, idluineᴋangilarlônêt tâpsomane. 19 Môsesib perᴋojanik tunitjivigilaungilâsê? Akunapsingnelo maliktoᴋangilak perᴋojanik! Sôᴋ toᴋonasuarpisingâ? 20 Inuit kiovut oᴋarlutiglo: Sâtanaseᴋarpotit; kia toᴋonasuarpâtît? 21 Jêsuse kiovoᴋ oᴋarlunelo: Tatamnartitamik atausênarmik pinialaukpunga, ilûnapselo tataminiarutigivase. 22 Môsesib kipinermik perᴋolaukpâse (Môsesemit pingigalloartok, atâtagijaptingnille); inuglo kipivase Sabbatemê. 23 Inugle kipijaukpat Sabbatemê, Mosesib perᴋojangit aserortaulerᴋonagit: Sôᴋ ningarivisingâ, inuk ilûnât âᴋilaurapko Sabbatemê? 24 Kalinetuinak maliklugo erᴋartuiniarase, erᴋartuinermigle idluartomik erᴋartuileritse. 25 Tagva Jerusalemiut illangit oᴋarput: Tâmnaungilâk toᴋonasuartangât? 26 Ahâglo agviartaunane oᴋâlavok, inertingilâllônêt. Angajoᴋâvut tukkisimarilerᴋât mâna, tâmna ᴋolarnangitomik Kristûseongmât? 27 ᴋaujimavogulle, tâmna nakit pingmangât; Kristûsele tikipat, ᴋaujimajoᴋarniangilak, nakit pingmangât. 28 Tagva Jêsuse katimaviksoarme nipperᴋortovlune ajoᴋertuilerpok oᴋarlunelo: Âhaila ilitarivapsinga, ᴋaujimavoselo nakit pingmangârma; uvamniglo tikisimangilanga, mikserᴋartotôvorle tilijiga ilitaringitase. 29 Uvangale illitarivara; tâpsomangat pigama, uvamniglo tiliklilauᴋpok. 30 Tagva tigunasuarpât; aktuijoᴋangilarle tâpsominga Stûndinga tikisimangimat sulle. 31 Inuille unuktut okperivât, oᴋarlutiglo: Kristûse tikikune, ôma piniarnerijanginit tatamnartulinersauniarᴋâ? 32 Farisêerillo tusaumalerput, inuit taimâk oᴋautigingmatsuk. Tagva Farisêerit ajoᴋertuijoᴋsuillo kivganik tiliklerput, tigujauᴋovlugo. 33 Tagva Jêsusib oᴋautivait: Sule anikitomik najorniarpapse, kingorngagullo tâpsomunga ainiarpunga tilijimnut. 34 ᴋeneromârpapsinga nenninangalo; najugaralo tikitsungnangilase. 35 Tagva Jûdit ingmingnut oᴋarput: Namut aijomavâ una, nennijaksaringinaptigô? Grîᴋinut, sunatuinarnut siamangajunut aijomavâ, Grîᴋit ajoᴋertoriartorlugît? 36 Oᴋausingit ᴋanok tukkeᴋarᴋât? oᴋarame: ᴋeneromârpapsinga nenninangalo; najugaralo tikitsungnangilase! 37 Uvloᴋsiorviuble tamattoma uvlungita kingorlerpângane, ᴋuvianernerpângane, Jêsuse nikovipok, nipliarlunelo oᴋarpok: Imeruktoᴋarpat, ᴋailerle uvamnut, imerlunelo! 38 Uvamnut okpertub timinganit, sôrlo aglaksimangmat, kôt inôgumik imalit kôleromârput. 39 Taimagle oᴋarpok Anernek pitjutigilugo, okperijingita tunergusiaksangat; Anernek ajunginek tikisimangimat sule, Jêsuse ânanausijaungimat sule. 40 Inuille unuktut, oᴋautsinik tamakkoninga tusartut; oᴋarput: Tâmna nelautaijôvok idluartok. 41 Asingille oᴋarput: Kristûseovok. Ilangit oᴋarput: Kristûse Galilêamit tikituksauvâ? 42 Aglait imaingilât: Dâvidib kinguvânginit, iglugasangnit Betlehemit, Dâvidib najugarilauᴋtanganit, Kristûse tikituksaungmât? 43 Taimâk inuit akkerartortigêlerput tâmna pivlugo. 44 Ilangitale tigujomagalloarpât; aktuijoᴋangilarle tâpsominga. 45 Kivgat ajoᴋertuijoᴋsoarnut Farisêerinullo tikiput. Tapkoalo oᴋautivait: Sôk ᴋaingipisiûk? 46 Kivgat kiovut: Oᴋâlajoᴋalaungimarikpok sule inungmik, inuktut ipsotunak. 47 Tagva Farisêerit kiovait: Ilipsetauk uivêrijauvisê? 48 Angajoᴋât Farisêerillônêt ilangata okperivaûk? 49 Inuille, perᴋojanik ᴋaujimangitut, ôminarneraraksauvat. 50 Tagva Nikodêmusib, unnuangotilugo (Jêsusib) nelipsartigilauᴋtangata, tapkoalo illangata oᴋautivait: 51 Perᴋojat pigijavut maliklugit inungmik erᴋartuijuksauvitâ, kiglisiniartauᴋârtinago tukkisijauᴋârtinagolo piniarninginîk? 52 Tâpkoa kiovât oᴋautivlugolo: Galilêamiôgivêt? kiglisiniarit takolutillo, Galilêamit nelautaijomik pijoᴋangilak. 53 Taimâk ilûnnatik angergalerput.

Johannese 8

Jêsusib idluarsaininganik arnak ajortulilauᴋtok pivlugo. Inuit akkerartortigêngninginik Kristûsib ajoᴋertutingit ilinniartingitalo ilusingit pivlugit.

1 Jêsusele ᴋakᴋamut orᴋsoᴋtalingmut aivok. 2 ᴋaulermallo katimaviksoarmut ᴋailerivok, inuillo ilûnnatik tikipât, ingidlunelo ajoᴋertorpait. 3 Aglangniglo ilisimajut Farisêerillo arnamik âtsivut tâpsomunga, tigujamingnik anguniartilugo, akornganullo pitipât. 4 Oᴋautivlugolo: Ajoᴋertuijok, arnak una anguniartilugo appakataujok! 5 Môsesible perᴋojane perᴋolauᴋpâtigut, taimaitut millorlugit ujarᴋanut; Igvit ᴋanok oᴋarᴋêt? 6 Taimâgle oᴋarput ôktoromavlugo, pasitiksaᴋaromavlutik tâpsomunga. Jêsusele okkolerpok, tikkerminullo aglaklune nunamut. 7 Apersoranermatsugle, makilerpok, oᴋautivlugillo: Akunapsingne ajorneᴋangitûb millorᴋârliuk ujarᴋamut. 8 Ama okkovlune aglakivok nunamut. 9 Tamanna tusaramitsuk, kingorlerêklutik anilerput inuᴋoarnernit inôsuktut tikilugit, issumamingnut passijauvlutik. Jêsuselo kisimeotilugo ᴋemaktauvok, arnarlo ᴋerᴋane nangertok. 10 Jêsusele makilerpok; inuksinginamelo arnab asianik, oᴋautivâ: Arnak, ipkoa passijitit nanêkât? erᴋartortaumangilatît? 11 Tâpsomale oᴋautivâ: Âhaila Nâlegak. Jêsusible oᴋautivâ. Tagva uvangatauk erᴋartoromangilagit; aularit, kingorngane ajortulijungnairit. 12 Tagva Jêsusib oᴋarvigigivait oᴋarlunelo: Silaᴋsoarmiut ᴋaumanerivânga; uvamnik maliktok tâᴋtome arvertarniangilak, ᴋaumajorle inôgutaujok piginiarpâ. 13 Tagva Farisêerit oᴋautivât: Ilingnik kigligiutjivotit, kigligiutjinît mikseᴋârtôngilak. 14 Jêsusib kiovait oᴋautivlugillo: Uvamnik kigligiutjiguma, kigligiutjinera mikseᴋârtônajarpok; ᴋaujimagama, nakit pingmangârma, namullo ainiarmangârma. Ilipsele ᴋaujimangilase, nakit pingmangârma, namullo ainiarmangârma. 15 Ilipse uvinik maliklugo erᴋartuivose; uvanga erᴋartuingilanga kimiglônêt. 16 Erᴋartuigumale, erᴋartuinera idluartôvok; kisimaunginama, uvangale Atâtagalo tilijiga. 17 Perᴋojipsingne aglaksimavok, inûk maggûk kigligiutjiningak mikseᴋârtôngmat. 18 Uvangauvunga kigligiksautijunga uvamnik, Atâtagalo tilijiga kigligiutsigivok uvamnik. 19 Tagva oᴋautivât: Atâtat nanêᴋâ? Jêsusib kiovait: Uvamniglônêt, Atâtamiglônêt ilitarsingilase; uvanga ilitarigupsinga, Atâtagatauk ilitarinajarivase. 20 Oᴋautsit tamakkoa Jêsusib oᴋauserivait Gûdib iklervingata senianêdlune, ajoᴋertuigame katimaviksoarme; tigusijoᴋangilarlo tâpsominga; stûndinga tikisimangimat sulle. 21 Tagva Jêsusib ama oᴋautivait: Aularniarpunga ᴋeneromârpapsingalo, toᴋoluselo ajornipsingne; aiviginiartara tikitsungnangilase. 22 Tagva Jûdit oᴋarput: Ingminik toᴋotsomavâ? oᴋarame: Aiviginiartara tikitsungnangilase. 23 Oᴋautivaillo: Ilipse mângat pivose, uvanga takpângat pivunga; ilipse silaᴋsoarmit tamattomangat pivose, uvanga silaᴋsoarmit tamattomangat pingilanga. 24 Taimâk toᴋojomârnipsingnik ajornipsingne oᴋautilaukpapse; toᴋojomârapse ajornipsingne, okpingikupse uvangaugama. 25 Tagva oᴋautivât: Kivauvêt? Jêsusiblo oᴋautivait: Sivorlermik tâmna oᴋaᴋatigijise. 26 Unuktunik oᴋausiksaᴋarpunga ilipsingnut, erᴋartuitiksaᴋarlarmalo; tilijigale mikseᴋârtôvok; tusalauᴋtakkalo tâpsomangat oᴋauserivakka silaᴋsoarmiunut. 27 Tukisingilâlle, Atâtamik oᴋarvigingmagit. 28 Tagva Jêsusib oᴋautivait: Inûb Erninga napautigupsiuk, ilitarsijomârpose uvangaunimnik, uvamniglo pinginimnik; sôrlole Atâtab ajoᴋertulaungmanga, taimâk oᴋâlavunga. 29 Tilijimalo ilagivânga, Atâtab kisimauᴋungilânga; piniatsainarama ᴋuviagijanganik. 30 Taimâk oᴋâlatilugo unuktut okperilerpât. 31 Tagva Jêsusib Jûdit okperijine oᴋautivait: Oᴋausikka malitsainalerupsigik, idluartunik ilinniartigivapse. 32 Mikseᴋârnerlo ilitariniarpase. mikserᴋârnerublo kivgaujungnaitiniarpâse. 33 Tagva kiovât: Âbrahâb kinguvârivâtigut kivgaungitsainarlutalo kimullônêt; ᴋanok oᴋarᴋêt: kivgaujungnainiarposê? 34 Jêsusib kiovait oᴋautivlugillo: Âhamarik, âhamarik oᴋaupapse: Idluitulijok kivgauvok ajornernut. 35 Kivgarle iglomêtsainarniangilaᴋ, ernerle tagvanêtsainarniarpok. 36 Ernerub tagva kivgaujungnaitikpase, nelâgut kivgaujungnairpose. 37 Nelungilanga, Âbrahâb kinguvâringmase; toᴋonasuarpapsingale; oᴋausikka iterviksarsingimatta akunapsingne. 38 Oᴋâlavunga takolauktamnik atâtamne; taimailiorivose takojapsingnik atâtapsingne. 39 Tagva kiovât oᴋautivlugolo; Âbrahâ atâtagivavut. Jêsusib kiovait: Âbrahâb ᴋitorngarikpase, Âbrahâb pinialauktangit piniarajarivase. 40 Mânale toᴋonasuarpapsinga, inuk taimaitok, mikseᴋârnermik oᴋautjijoᴋ ilipsingnut, tusalauktamnik Gûdemit: Âbrahâ taimailiulaungilak. 41 Atâtapse piniarningit piniarnerivase. Tagva oᴋautivât: Tamângainâgaungilagut; atautsemik atâtaᴋarpogut, Gûdemik. 42 Jêsusib oᴋautivait: Gûde atâtagigupsiuk, nagliginajarpapsinga; anilaurama, Gûdemillo pilunga; uvamnik ᴋailaunginama, tâpsoma tilivânga. 43 Sôk oᴋausikka illitaringipisigîk? Oᴋausikka tusarungnanginapsigik. 44 Atâtapsingnit Sâtanasemit pivose, atâtapselo ikliguningit maligomavase. Tâmna inuartôvok pigiarninganit, mikseᴋârnermêtsainalaungitorlo; mikseᴋârnek tâpsomanêngimat. Saglonermik oᴋâlagune, nangminerijaminik oᴋâlavok; saglotojoᴋsôgame, saglonerublo atâtagivâ. 45 Uvangale mikseᴋârnermik oᴋâlagama okperingilapsinga. 46 Nelipse akunapsingne ajornermik passijungnarpângâ? Mikseᴋârnermigle oᴋâlaguma ilipsingnut, sôk okperingilapsingâ? 47 Gûdemit pijub Gûdib oᴋausingit tusarpait; tamanna pivlugo tusangilase, Gûdemit pinginapse. 48 Tagva Jûdit kiovât oᴋautivlugolo: Nelâgut oᴋangilagût, Samâriamiogavit, Sâtanaseᴋarlarpillô? 49 Jêsusib kiovait: Sâtanaseᴋangilanga, atâtagale nertorpara, ilipselo nachogivapsinga. 50 Nertortauniksara ᴋeningilara, ᴋenertoᴋarporle tamattominga erᴋartuilunelo. 51 Âhamarik, âhamarik oᴋaupapse: Oᴋausimnik maliktub, toᴋo takoniangilâ isoᴋangitomut. 52 Tagva Jûdit oᴋautivât: Mâna nelojungnairpogut Sâtanaseᴋaravit. Âbraha toᴋolauᴋpok, nelautaijullo; oᴋarpotillo: Oᴋausimnik maliktub toᴋo ôngniangilâ isoᴋangitomut! 53 Anginersauvêt atâtaptingnit Âbrahamit toᴋolauᴋtomît? nelautaijullo toᴋolaurivut. Ilingnik sunautipêt? 54 Jêsusib kiovait: Uvamnik nertortiguma, nertornera piungilak. Atâtagale, tâmnauvok nertordlertok uvamnik, oᴋautigijase Gûdigivlugo. 55 Ilitaringilaselo. Uvangale ilitarivara. Oᴋarajarumalônêt: Ilitaringilara; sagloᴋitsinajarpunga ilipsitut. Ilitarivarale oᴋausingillo malikpakka. 56 Âbrahâ atâtase ᴋuviasulerpok, uvluksamnik takojuksaugame; takogamiuglo ᴋuviasulerpok. 57 Tagva Jûdit oᴋautivât: Jâreᴋarnak sule 50 inik, Âbrahalo takolauᴋpiûk? 58 Jêsusib oᴋautivait: Âhamarik, âhamarik oᴋaupapse: Âbrahâ ilerᴋârtinago uvanga ipunga. 59 Tagva ujarᴋanik tigusivut milloromavlugo. Jêsusele ijerpok anilunelo katimavingmit, akorngatigut.

Johannese 9

Kiglinganit tautungitomik Kristûsib tautuktitsininganik.

1 Jêsuselo senerᴋotsivok takovlunelo erniangonerminit tautungitomik. 2 Ilinniartingitalo aperivât oᴋarlutiglo: Ajoᴋertuijok, kina idluitulilauᴋâ, tâmna, angajoᴋâgiglônêt, tautugane erniangongmât? 3 Jêsusib kiovait: Tâmnalônêt, angajoᴋâgiglônêt idluitulilaungilat; Gûdible piniarningit sakᴋertitaulerᴋovlugit tâpsomane. 4 Tilijima piniarningit piniaraksarivakka uvlôtilugo; unnuangojomârpok kialônêt piniarvigijungnangitanga. 5 Silaksoarmêtilunga ᴋaumaniovunga silaksoarmiunut. 6 Taimâk oᴋarêrame, nunamut oriarpok nuvaglo ivjomut akudlugo, tamattominga tautungitub ijîgik mingoarpak, 7 Oᴋautilugolo: Siloab (imaipok: tilijab) tesinganut ailerit ermiklutillo. Tagva ailerpok ermiklunelo, tautuklunelo ᴋaivok. 8 Silalingit, tautuktullo tâpsominga sivorngane, ᴋenujôngmat, oᴋarput: Tamnaungilâk iksivalauᴋtok ᴋenuvlunelô? 9 Ilangit oᴋarput: Tâmnauvok. Ilangille: Adsigivâ. Nangminerle oᴋarpok: Tâmnauvunga. 10 Tagva oᴋautivât: ᴋanok tautuktitaulerᴋêt? 11 Kiovok oᴋarlunelo: Inûb, Jêsusemik atiliub, ivjok senavâ, mingoarlugiglo ijîkka, oᴋarlunelo: Siloab tesunganut ailerit, ermiklutillo. Ailerpunga ermiklungalo, tautulerlungalo. 12 Tagva oᴋautivât: Taimna nanêᴋâ? Oᴋarpok: Nelovunga. 13 Tagva Farisêerinut aularutivât tautulaungitok. 14 Sabbateovorle, Jêsusib ivjok senangmago ijîgiglo uitingmagik. 15 Tagva Farisêerittauk ama aperivât, ᴋanok tautuktitaulermangât. Tâpsomale oᴋautivait: Ivjomik ilijivok ijîmnut, ermilerpungalo, mânalo tautukpunga. 16 Tagva Farisêerit ilangit oᴋarput: Inuk taimna Gûdemit pingilak, Sabbate isumaginginamiuk. Asingille oᴋarput: ᴋanok inuk ajortolik taimâk tatamnartitsijungnarᴋâ? Akkerartortigêlerpullo. 17 Tautulaungitok ama oᴋautivât: Sumik oᴋarᴋêt tâpsominga, ijîkik uitilaungmagîk? Tâmnale oᴋarpok: Nelautaijôvok. 18 Jûdille okperingilât tautulaungininga, tautulerningalo, ᴋaiᴋojerᴋâratik tâpsoma tautulertub angajoᴋâgingnik. 19 Apersorlugiglo oᴋautivakit: Ernerivitikô una, oᴋautigijatik tautugane erniangolauᴋtomîk? ᴋanok ilingavâ, mâna tautulermât? 20 Angajoᴋâkita kiovait oᴋautivlugillo: ᴋaujimavavuk, tâmna ernerigaptigo, tautuganelo erniangolaungmat; 21 ᴋanorle mâna tautuktitaungmangât, nelovoguk. Inumariogalloak, aperisiuk; ingminik oᴋarᴋosiuk. 22 Taimâk angajoᴋâgik oᴋarpuk, Jûdit erᴋsigigamikik. Jûdit kajusiᴋatigêjarêrmatta, tâpsominga Kristûseojomik kigligiutsijoᴋarpat, tâmna katimavingmit avitauᴋovlugo. 23 Tamanna pitjutigilugo angajoᴋâgik oᴋarpuk: Inumariogalloak, aperisiuk. 24 Tagva aippanganik inuk tautulaungitok ᴋaiᴋolerpât oᴋautivlugolo: Gûde nertoruk. ᴋaujimavogut, inuk tâmna ajortôngmat. 25 Tâmna kiovok oᴋarlunelo: Ajortôngmangât nelovara; atautsemik nelungigalloarpunga, tautulaunginama, mânalo tautulerama. 26 Tagva ama oᴋautivât: Sumik piniarpâtît? ᴋanok ijîkik uitipagîk? 27 Tâpsoma kiovait: Oᴋautigijarêrpara ilipsingnut, tusangipisiûk? Ama tusaromavisiûk? Tâpsomunga ilinniarteojomagivisê? 28 Tagva oᴋarnerlôtilerpât oᴋarlutiglo: Igvit taipsoma ilinniartigivâtit; uvagulle Môsesib ilinniartigivâtigut. 29 ᴋaujimavogut, Gûdib Môsese oᴋaᴋatigingmago; taimnale ᴋaujimangilavut, nakit pingmangât. 30 Inub kiovait oᴋautivlugillo: Tamanna tatamnadlarpok, ᴋaujimanginapse, nakit pingmangât; ijîkkalo uitilaukpak. 31 ᴋaujimavogulle, Gûdib idluitulijut tusangimagit; Gûdemigle opigosuktoᴋarpat, pijomajanganiglo piniartok, tâmna tusarpâ. 32 Silaᴋsûb pigiarninganit tusaumajoᴋangilak tautugane erniangomajub ijîgingnik uititsijoᴋartomik. 33 Tâmna Gûdemit pingikune, piniarungnarajangilak sumik. 34 Tâpkua kiovât oᴋautivlugolo: Ajornerne erniangomamarigalloarlutit ajoᴋertorpitigût? Pingujarpâllo. 35 Jêsuse tusaumalerpoᴋ pingujalaungmatsuk. Naipinamiuglo oᴋautivâ: Gûdib erninganut okperᴋêt? 36 Tâpsoma kiovâ oᴋautivlugolo: Nâlegak neliat tâmnauvâ? Okperᴋovlunga tâpsomunga. 37 Jêsusib kiovâ: Takolauᴋpat; oᴋaᴋatigijallo, tâmnauvok. 38 Tâpsomale oᴋautivâ: Nâlegak okperpunga! Tuksiarvigivâlo. 39 Jêsuselo oᴋarpok: Erᴋartuijartorlunga silaᴋsoarmut tamattomunga pivunga, tautungitut tautulerᴋovlugit, tautuktullo tautugungnairᴋovlugit. 40 Farisêerillo illangita najortingita tamanna tussarpât, oᴋautivlugolo: Tautunginivitâ? 41 Jêsusib oᴋautivait: Tautungikupse, ajorneᴋarajangilase; mânale oᴋarapse: Tautukpogut; ajortoêrungnangilase.

Johannese 10

Kristûsemik mianersijomik ajungitomik, saugaᴋotinginiglo. Jêsuselo Messîaseongmangât?

1 Âhamarik, âhamarik oᴋaupapse: Itertarvikut itingitok saugat iglunganut, asiagulle itertok, tâmna tigliktôvlunelo inuartôvok. 2 Itertarvikulle itertok saugat mianerijigivât. 3 Tâmna itertarviub idjertortingata upkuêrutivâ, saugallo nippinga tussarpât, saugaᴋotinelo ᴋaiᴋovait, atingit taivlugit, anitilaitalo. 4 Saugaᴋotinelo anititsarêrpagit, saugat sivorlerivât maliklugolo; nipinga ilitarigamitsuk. 5 Takorngartarle malingilât, ᴋemâvâlle, takorngartat nipingit ilitaringinamigit. 6 Oᴋautsinik tamakkoninga Jêsusib oᴋarvigivait: tukkisingilâlle, sunaungmangât oᴋarvionitik tâpsomunga. 7 Tagva Jêsusib ama oᴋautivait: Âhamarik, âhamarik oᴋaupapse: Uvanga saugat itertarvigivânga. 8 Ilûnnatik sivunamne tikilauᴋtut tigliktôvlutiglo inuartôlauᴋput; saugallo nâlalaungilait. 9 Itertarviovunga: uvapkut itertoᴋarpat, tâmna piulijauniarpok, iterlunelo anilunelo nerᴋiksarsiniarpok. 10 Tigliktok ᴋailerpangilak, kisiane tiglingnigomavlune, toᴋotsijomavlunelo, aseroijomavlunelo. 11 Uvanga tikipunga, inôtsemik piksaniglo nâmaktunik peᴋarᴋovlugit. 12 Uvanga mianersijôvunga ajungitok. Mianersijok ajungitok inôtsiminik tunivok saugat pivlugit. Attartugable, mianersijiungitub, nangmineᴋangitub sauganik, amarok ᴋailertok takogamiuk saugat ᴋemakpait ᴋemâvlunelo; amarᴋublo saugat angulugit siamartipait. 13 Atartugarle ᴋemâvok; attartugaugame, saugallo kamagingilait. 14 Uvanga mianersijôvunga ajungitok, pikkalo ilitarivakka, ilitarijauvlungalo pimnut, 15 Sôrlo Atâtab ilitaringmanga, uvangalo âtâta ilitarigapko. Inôseralo tunivara saugat pivlugit. 16 Sule asinginik saugaᴋuteᴋarpunga iglomit tamattomangat pingitunik. Tâpkoalo tamaunga pititsariaᴋarpakka, nipigalo tusaromârpât, atautsimêlutiglo katimgajomârput, atautsemiglo mianerijeᴋarlutik. 17 Tamanna pivlugo Atâtama nagligivânga, inôsera tunigapko, ama tiguserᴋovlunga tamattominga. 18 Arᴋtaijoᴋangilak tamattominga uvamnit, isumamnigle iperarpara. Pitsartuneᴋarpunga iperarlugo, pitsartuneᴋarivungalo ama tigulugo. Perᴋojamik taimaitomik tunitjiviovunga Atâtamnut. 19 Tagva Jûdit akkerartortigêlerput oᴋautsit tamakkoa pivlugit. 20 Unuktut tâpkunanêtut oᴋarput: Sâtanaseᴋarpok ilisimaidlarlunelo, sôᴋ nâlakpisiûk? 21 Asingit oᴋarput: Tamakkoa (Sâtanasemik) ilumiktub oᴋauseringilait; Sâtanasiblo tautungitut ijingit uitijungnarpagît? 22 Katimaviksûble atortautainarninganik uvloᴋsiorviovok Jerûsaleme, okiongovorlo. 23 Jêsuselo arvertarpok katimaviksoarme, Sâlomôb iglorusingane. 24 Tagva Jûdit iluvât oᴋautivlugolo: ᴋanok sivitutigijomik tarnivut noᴋᴋangatipigît? Kristûseoguvit, nelâgut oᴋautitigut. 25 Jêsusib oᴋautivait: Oᴋautigijarêrpara ilipsingnut, okperingilaselo. Piniarnerit piniarnerijakka Atâtama attingane, kigligiutsivut uvamnik. 26 Okpingilasele; saugaᴋotiginginapse, sôrlo oᴋautilaurapse. 27 Saugaᴋotima nipiga tusarpât ilitarivakkalo; malikpângalo. 28 Inôtsemiglo nungusuitomik tunitsivigivakka, aserorniatsangilallo, arᴋtaijoᴋarniangilarlônêt tâpkoninga aggamnit. 29 Atâta, tunijijok tâpkoninga uvamnut, anginerovok tamainit; arᴋtaijoᴋarungnangilarlo tâpkoninga Atâtama agganginit. 30 Uvangalo Atâtalo atausiovoguk. 31 Tagva Jûdit ama ujarᴋanik tigusivut milloromavlugo. 32 Jêsusib kiovait: Piniarnernik ajungitunik unuktunik Atâtamnit pijunik sakᴋertitsilauᴋpunga ilipsingnut. Piniarnerit tamakkoa neliat pivlugo milloromavisingâ ujarᴋanût? 33 Jûdit kiovât oᴋautivlugolo: Piniarnerit ajungitut pivlugit milloromangilaptigit ujarᴋanut; Gûdemigle mitauteᴋarnît pivlugo, inutuinaugavillo, ilingniglo Gûdiotinavit. 34 Jêsusib kiovait: Aglaksimangilâk perᴋojapsingne: Oᴋautilaukpapse Gûdiogapsê? 35 Taipkoa Gûdinik taikpagit, Gûdib oᴋausinginik oᴋarviojut (aglaillo akkerartortaujungnangilat); 36 Sôk Atâtab ivjornaititanganut tilijanganullo silaᴋsoarmiunut oᴋarᴋisê: Gûde mitautigivat; oᴋarnera pivlugo: Gûdib ernerivângâ? 37 Atâtama piniarningit piniarneringikupkit, okperiniarasinga. 38 Piniarnerigupkille, piniarnerit okperisigik, uvanga okperijomangikupsinga, ilitarsilerᴋovluse okpilerluselo, Atâta uvamnêngmat uvangalo tâpsomanênama. 39 Amalo tigunasuarpât; agganginille ᴋemâvok, 40 Aulalermilunelo Jordanib akianut Johannesib baptisivigilauᴋtanganut, tagvanêlerdlunelo. 41 Unuktullo tikipât oᴋarlutiglo: Johannese tatamnartitsilaungilak, ilûnnatigle Johannesib oᴋauserilauktangit tâpsominga mikseᴋârput. 42 Tagvanelo unuktut okperivât.

Johannese 11

Lazarusib toᴋungajûb ômartitauninganik. Farisêerit toᴋotsijomaninganik Jêsusemik.

1 ᴋanimajoᴋarporle nelajomik Lazarusemik atelingmik, Betâniamiomik, Marîab angajuatalo iglugasangine. 2 Marîale tâmnauvok, Nâlekamik mingoarsilauᴋtok mingoarumut, itiganginiglo alarterijoᴋ nujarminut; tâpsoma aninga Lazaruse ᴋanimalune nelavok. 3 Tagva najâgik tiliklerpuk oᴋautjauᴋovlugo: Nâlegak, ahâk, nagligijat ᴋanimalune nelavok. 4 Jêsuse tamattominga tusarame, oᴋarpoᴋ: ᴋanimasek toᴋomut ilingalungilak, Gûdible nertortauninganut, Gûdib Erninga tamattomunga nertortauᴋovlugo. 5 Jêsusible Marta nagligivâ, nukangalo, Lazaruselo. 6 Tusaramele ᴋanimangmat, sule uvlungnik maggûngnik uvlivok tagvane, najortamine. 7 Kingorngagut ilinniartiminut oᴋarpoᴋ: Jûdêamut ama ingergalermita. 8 Ilinniartingita oᴋautivât: Ajoᴋertuijok, taipsomane Jûdit milloromalauᴋpâtit ujarᴋanut, amalo tagvunga ingergaromagivêt? 9 Jêsuse kiovok: Uvloᴋ 12 inik stûndeᴋangilâk? Uvlôtilugo arvertartok aporniangilak; silaksûb tamattoma ᴋaumaninga tautugamiuk. 10 Unnuangotilugole arvertartok aporniarpok, ᴋaumaneᴋanginame. 11 Taimâk oᴋarpok, kingorngagullo oᴋautivait: Lazaruse illanârijivut sinikpok; ainiarpungale tupaktitsomavlugo. 12 Tagva ilinniartingit oᴋarput: Nâlegak sinikune, nakornersauniarpok. 13 Jêsusible toᴋoninga oᴋautigivâ, isumaᴋarpulle timib siningninganik oᴋarasugilugo. 14 Tagva Jêsusib oᴋautitsiarpait: Lazaruse toᴋovok; 15 ᴋuviasukpungalo, tainganêlaunginama, okpilerᴋovluse. Ingergalertale tâpsomunga. 16 Tagva Tômase, maggoliavinermik taijak, ilinniartunut oᴋarpok: Ingergaᴋatigêkta toᴋoᴋatigijomavlugo. 17 Tagva Jêsuse tikilerpok, naipipâlo, uvlunik sitamanik iluvermêlerêrtovinek. 18 Betâniale Jerûsalemut isaktatitut 15 ,000 itut ᴋanitigijok. 19 Jûdillo unuktut Martamut Marîamullo tikilaukput, manigoromavlugik aningak pivlugo. 20 Martale tusaumagame, Jêsuse ᴋaglilermat, pagreartorpâ; Marîale iglome iksivalune nokᴋangavok. 21 Tagva Martab Jêsuse oᴋautivâ: Nâlegak, ovanêlauruvit, aniga toᴋonajalaungilak. 22 Sullele ᴋaujimavunga, sumik Gûdemit tuksiaruvit, Gûdib tamattominga tunitsiviginiarpâtit. 23 Jêsusib oᴋautivâ: Anît makiniarpok. 24 Martab oᴋautivâ: Nelungiᴋalloarpunga, makitsomârmat makivingme uvlut naggatiksangane. 25 Jêsusib oᴋautivâ: Uvanga makitjutauvlungalo inôgutauvunga. Uvamnut okpertok inôjomârpok, toᴋogalloarune. 26 Inôvlunelo okpertok uvamnut toᴋoniangimarikpok. Tamanna okperiviûk? 27 Tâpsoma oᴋautivâ: Nâlegak, âhailâ, okperpunga Kristûseogavit, Gûdib Erninga, silaksoarmut tikisimajotit. 28 Taimaglo oᴋarêrame, ailerpok nukane Marîa angigutjilune ᴋaiᴋovlugo, oᴋautivlugolo: Ajoᴋertuijok tikisimavok, ᴋaiᴋovâtillo. 29 Tâmna tamattominga tusarame, nikovisâdlarpok, aivigilugolo. 30 Jêsuse iglugasangnut tikisimangimat sulle, tagvanêporle sule pagreartortauvingmine Martamut. 31 Jûdit najortingita iglome manigortingitalo Marîa takogamitsuk, nikovisârlunelo aningmat, malikpât oᴋarlutiglo: Iluvermut ailerpok, ᴋeajomavlune tagvane. 32 Marîalo tikiname Jêsusib najugânut, takogamiuglo, itiganginut pâmakpok, oᴋautilugolo: Nâlegak, ovanêlauruvit, aniga toᴋonajalaungilak. 33 Jêsusib ᴋeajok takogamiuk, Jûdillo ᴋeajut tikiᴋatingit, anernermigut ilapsugosulerpok ingminiglo kiksartilune, 34 Oᴋarlunelo: Namut ilivisiûk? Tâpkua oᴋautivât: Nâlegak, ᴋailutillo takojartorit. 35 Jêsusiblo ijîgik ᴋugviolerpuk. 36 Tagva Jûdit oᴋarput: Ahâk, nagligidlalaukpâ! 37 Ilangille akornganêtut oᴋarput: Tautungitut ijinginik uititsijub tâmnatauk toᴋotailititsungnalaungilaûk? 38 Jêsuselo ama ilapsugosudlalerivok ingmine, iluvermullo tikilerdlune. Itersaliorsimajôvorle matumajok ujarᴋamik. 39 Jêsuse oᴋarpok: Ujarak pêrsiuk. Martab oᴋautivâ, toᴋungajub najangata: Nâlegaᴋ tipelulerêrpoᴋ; uvlunik sitamanik tagvanêname. 40 Jêsusib oᴋautivâ: Oᴋautilaungilagît, okperuvit, Gûdib ajugaᴋangininga takonajarangnê? 41 Tagva ujarak pêrpât toᴋungajub iluvinganit. Jêsusele ᴋongmut ârlorpok, oᴋarlunelo: Atâtak ᴋujagivagit tusalauramga. 42 Nelungilangale tusatsainaramga; inuille ovane nangertut pivlugit taimâk oᴋarpunga, okpilerᴋovlugit tililauramga. 43 Taimâk oᴋarêrame, niperᴋortovlune ᴋaigarsukpok: Lazaruse anît! 44 Toᴋungajorlo anilerpok, imusersimajok uvineruksajanik niukikullo talikikullo, kênangalo matusimajok kitjijârnerûb allarterutânut. Jêsusib oᴋautivait: Tamakkoninga pêrsivigisiuk, pisulerlelo! 45 Jûdillo unuktut, Marîamut tikilauᴋtut, takojullo Jêsusib piniarninganik okpervigivât. 46 Tâpkoale ilangit Farisêerinut ailerput, oᴋautilugillo Jêsusib piniarnerilauᴋtanganik. 47 Tagva ajoᴋertuijoᴋsuit Farisêerillo ᴋaggimiojunik katimatitsivut, oᴋarlutiglo: Sumik piniartuksauvitâ? Inuk taimna tatamnartitsivoᴋ unuktunik. 48 Taimailingatileruptigo, tagva ilûnnatik okperviginiarpât. Tagva Rômiut ᴋainiarput, aᴋsârniarlutalo nunaᴋotiptingnik inuᴋotiptingniglo. 49 Tâpkoale ilangata, Kaifasib, jâreme tamattomane ajoᴋertuinerojub, oᴋautivait: ᴋaujimangilase sumik, 50 Isumaksarsiunginivose sumik; nakornersauvok uvaptingnut, inuk atausek toᴋokpat inûᴋatigêt pivlugit, inuit ilûnnatik aserortuksauninginit. 51 Tamattominga oᴋâlalungilak ingminik; jâremele tamattomane ajoᴋertuinerogame, nelautsijuksanik oᴋarpok. Jêsuse toᴋojuksaungmat inuᴋatigêt pivlugit; 52 Inûᴋatigêllo kisêtaungitok; Gûdible ᴋitornganginik siamangajunik katersoerᴋovlugo. 53 Uvlormit taipsomangat isumaksarsioᴋatigêkput, ᴋanok ilivlutik toᴋoniarlugo. 54 Jêsusele sakᴋijârlune arvertarungnailerpok Jûdit akorngane, inuᴋajuituble erᴋânut aularpok, iglugasaksoarnut Efrêmik attilingnut; tagvane piniarveᴋarlune ilinniartine illagilugit. 55 Jûdille aularviksiorvingat ᴋaglilerpok, unuktullo Jerusalemut majoralerput tamattoma erᴋânit, aularviksiorvioᴋârtinago, sujungaitijomavlutik. 56 Tagvane nangerdlutiglo Jêsuse aperᴋutigivât oᴋaᴋatigêklutiglo katimaviksoarme: ᴋanok isumavisê, uvloᴋsiorvingmut tamattomunga ᴋaingimât? 57 Ajoᴋertuijoᴋsuillo Farisêerillo perᴋojaᴋartitsilaukput: ᴋaujimajoᴋarpat nanêninganik, ᴋaujititserᴋovlugo; tigujomagamitsuk.

Johannese 12

Kristûsib mingoartauninganik Betâniame. Jerûsalemut iterninganik. Nippemik ᴋilangmit. Jêsusib oᴋâlaninginik kingorlerpânik inugiartoᴋsoarnut.

1 Uvlut pingasujortut aularviksiorviub sivorngagut Jêsuse Betâniamut tikipok, Lazarusib toᴋolauktub Jêsusib ômartitangata toᴋungajunit najugânut. 2 Tagvane nerᴋiksaliorutivât unnungme, Martalo kivgartorpok; Lazarusible tâpkoa illagivait iksivaᴋatingit nerrimârvingme. 3 Tagva Marîab mingoarut illaᴋangitok pivianartok tiguvâ, Jêsusiblo itigangit mingoarpait, allarterlugillo itigangit nujarminut; iglole tattalerpok mingoarutib tipitsiaringninganik. 4 Tagva ilinniartingita ilangat, Jûdase Iskâriot, Sîmonib erninga, kingorngagut pititigilârtanga, oᴋarpok: 5 Sôk mingoarut tamanna pisiangolaungilâ kênaujanut 300 inut, aklujut pijaksanginût? 6 Taimâgle oᴋangilak aklujut isumagijomavlugit; tigliktôgamele, ikpiârsulijaramelo, neksalarmelo tunergutinik. 7 Tagva Jêsuse oᴋarpok: Ullapinasiuk una, tamanna torᴋolaukpâ uvlormut iluvertauniksamnut. 8 Aklujunik illaᴋatsainarapse; uvangale najortigitsainangilapsinga. 9 Tagva Jûdit unuktut tusaumalerput, tagvanêngmat; Jêsuselo kisiat ᴋaijutigingilât, Lazaruseletauk takojomavlugo, ômartilauktanga toᴋungajunit. 10 Ajoᴋertuijoksuille pinasuarput Lazarusetauk toᴋotsomavlugo. 11 Tâmna pivlugo Jûdit unuktut ailermatta okpilerlutiglo Jêsusemut. 12 Uvlub aippangane inuit unuktut, uvloksiorvingmut tikisimajut, tusaramik Jêsuse ᴋainiarmat Jerûsalemut, 13 Palmit ᴋesertutinginik tigusivut, anilerpullo pagreartorlugo, ᴋaggudlarlutiglo: Hosianna, nertortaule Nâlekab atingane tikitok, ataniojok Israêleme. 14 Jêsusele siuterᴋortojomik pititaulerpok, tâpsomungalo nangmartauvlune ingergavok, sôrlo aglaksimangmat: 15 Sivôraniarnak, Zionib pania; ahâk atanît ᴋaivok, nangmartauvlune siuterᴋortojûb nogganganut. 16 Ilinniartingitale tamanna tukisilaungilât sivorngane; Jêsusele ânanausijaungmat, tagva erᴋarpât, taimaitomik aglaksimajoᴋarmat tâpsominga, taimaglo piniarvigilauramitsuk. 17 Inuille illagijangita, Lazaruse anerᴋolaungmago iluvermit, ômartilugolo toᴋungajunit, piniarninga nertorpât. 18 Tamanna pivlugo inuit pagreartorpât tussaramik taimâk tatamnartitsilaungmat. 19 Farisêerille ingmingnut oᴋarput: Takovose, sulitsanginapse; ahâk inuit ilûnnatik malikpât. 20 Grîᴋeᴋalaukporletauk majoralauktut akorngane, tuksiaromavlutik uvloᴋsiorvingme. 21 Tâpkoa Filippuse, Betsaidamit Galilêamêtomit pijok, tikilugo ᴋenuvigivât oᴋarlutiglo: Nâlegak, Jêsuse takojomadlaralloarpavut. 22 Filippusib tagva Andrêase oᴋautijartorpâ tamattominga; Filippûsiblo Andrêasiblo ama oᴋautigivâk Jêsusemut. 23 Jêsusible kiovauk oᴋautivlugiglo: Inûb Erningata ânanausijauvia neliutisimavok. 24 Âhamarik, âhamarik oᴋaupapse: Perorsiaksak senaugaksak ivjomut katangikune toᴋonanelo, kisimêtôlerpok; toᴋogunele singailiktaᴋalerpok unuktunik. 25 Inôserminik ivlersijub asiojijomârpâ: inôserminiglo silaksoarme tamattomane ivlersingitub inôtsemut nungusuitomut pigênarniarpâ. 26 Kivgartoromajûb uvamnik, maliklinga; najukamnelo kivgara tagvanêtsomarivok. Atâtamalo uvamnik kivgartorniartok nertoromârpâ. 27 Mâna tarniga kiksarpok. Sumiglo oᴋarlangâ? (imâk:) Atâtak stûndemit tamattomangat piulingâ? Tamannale pivlugo stûndemut tamattomunga tikipunga. 28 Atâtak, atît ânanausileruk! Tagva nipe ᴋilangmit pivoᴋ: Ânanausilaukpara, amalo ânanausijomagivara. 29 Tagva inuit nangerdlutik nâlektut oᴋarput: Kallilerpoᴋ. Asingit oᴋarput: Engelib oᴋaᴋatigivâ. 30 Jêsusib kiovait oᴋautivlugillo: Nipe tâmna pivlunga pilaungitok, pivlusele. 31 Mâna silaksoarmiut erᴋartortaunermut tikitaulerput, mâna silaᴋsûb tamattoma ataninga anititauniarpok. 32 Uvangalo ᴋangatartitauniaruma nunamit, ilûnnaita amuaromavakka uvamnut. 33 Taimâgle oᴋarpok tukisititsilune toᴋoniarnerme ilusinganik. 34 Tagva inuit kiovât: Perᴋojanit tusarpogut Kristûse isoᴋangitomut-itsainarmat. ᴋanorlo oᴋarᴋât: Inûb Erninga ᴋangatartitaujariaᴋarpôᴋ? Inûb Erninga tâmna kinauvâ? 35 Tagva Jêsusib oᴋautivait: ᴋaumajûb sulle anikitomik najorniarpâse. Arvertaritse, ᴋaumajomik najorteᴋartiluse, tâᴋtomut tikitaulerᴋonase. Tâktome arvertartok ᴋaujimangilak namut ainerminik. 36 ᴋaumajok okpervigisiuk, najorteᴋartiluse tâpsominga, ᴋitorngaulerᴋovluse ᴋaumajomut. 37 Taimâk Jêsuse oᴋâlavok, aularlunelo ijeriartorlunelo tâpkonangat. Taimaglo tatamnartitsigalloarmat takoane, okpervigingilâllônêt. 38 Nelautaijub Jêsaiasib oᴋausingit nelautsilerᴋovlugit, oᴋarmat: Nâlegaᴋ, kia oᴋâlanivut okperivagît? Kimullo Nâlekab talinga sakᴋertitauvâ? 39 Tamanna pivlugo okperungnalaungilat; Jesaiase ama oᴋarmat: 40 Tâpsoma takpêtipait ijingit, mangaitilugillo ômatingit; ijimingnut takoᴋonagit, ômatimingnullo tukkiserᴋonagit; sâgiarᴋonagillo ikajortaujungnarlutik uvamnut. 41 Taimâk Jesaiase oᴋalaukpok, ânanauninga takogamiuk oᴋâlatigigamiuglo. 42 Angajoᴋâlle unuktut okpervigigalloarpât; Farisêerille pivlugit kigliutjingilat tamattominga, avitaujomanatik katimavingmit. 43 Nertortaunek inungnut ivlerinersarigamitsuk nertortaunermingnit Gûdemut. 44 Jêsusele ᴋaggudlarpok oᴋarlunelo: Uvamnut okpertok uvamnuinak okpingilak, tâpsomungale tiliklertomut uvamnik. 45 Uvamniglo tautuktub tâmna tautukpâ tiliklertok uvamnik. 46 ᴋaumajôvlunga silaksoarmut tamattomunga tikipunga, uvamnut okpertok tâktomêrᴋonago. 47 Oᴋausimniglo tusartoᴋ okperanelo, erᴋartorniangilara; tikisimanginama, silaksoarmiut erᴋartoriartorlugit, silaksoarmiulle piulijauᴋovlugit uvamnut. 48 Uvamnik nachojoᴋ illalioranelo oᴋautsimnik, tâmna peᴋalerêrpoᴋ erᴋartortiminik; oᴋautsit oᴋauserilauktama, tamakkoa erᴋartoromarpât uvlut naggatiksangane. 49 Uvamnik oᴋalaunginama; Atâtable tilijima perᴋojamik tunitjivigilaukpânga piniaraksamnik oᴋauserijaksamniglo. 50 ᴋaujimavungalo perᴋojanga inôgutaungmat nungusuitok. Taimaimat oᴋauserijakka taimâk oᴋauserivakka, sôrlo Atâtab oᴋautilaungmanga.

Johannese 13

Jêsusib ilinniartime itiganginik ubvarninganik. Naglingnermik perᴋojininganik. Judasib pititsinasuarninganik. Pêtrusib missialârninganik.

1 Aularviksiorviuble sivorngane, Jêsuse tukisigame, aularviksane silaksoarmit tamattomangat Atâtamut neliutisimangmat, sôrlo pine silaksoarmêtut nagligilauramigit, taimâk naggatiksaminut tikidlune nagligivait. 2 Unnuksiumiglo nerrijarêramik, (Sâtanasib Jûdase Iskâriot Sîmonib erninga ômamiuteᴋartilerêrmago pititsijomanermik tâpsominga,) 3 Jêsuselo ᴋaujimagame, tunitjiviogame tamainik aggangminut Atâtamut, Gûdemillo pilaurame, Gûdemullo ainiarame; 4 Nerrimârnermit nikovipok, annorânelo pêrpait, sailitamiglo tigusivok atilugolo. 5 Kingorngagut imermik kovisivok ubvarvingmut, ilinniartullo itigangit ubvalerpait, allarterlugillo sailitamut atortaminut. 6 Tagva Sîmon Pêtruse tikilerpâ; tâpsomalo oᴋautivâ: Nâlegaᴋ, igvit itigakka ubvaraksarivigît? 7 Jêsusib kiovâ oᴋautivlugolo: Sumik piniarama, ᴋaujimangilatit mâna; kingorngagulle tukkisilârpat. 8 Tagva Pêtrusibo ᴋautivâ: Itigakka ubvaraksaritsangilatit. Jêsusib kiovâ: Ubvarniangikupkit, illangiuteᴋatiginiangilarma. 9 Sîmonib Pêtrusib oᴋautivâ: Nâlegaᴋ itigakka Kisêtaungitôk, aggakkalole, niaᴋoralo! 10 Jêsusib oᴋautivâ: Ubvarsimajoᴋ itikat assianik ubvariaᴋangilaᴋ, epᴋêjarsimavorle ilûnnane. Epᴋêjarsimavoselo, ilûnnaseungitorle. 11 Pititigilârtane ᴋaujimatsiaramiuk; tamanna pivlugo oᴋarpok: Epᴋêjarsimavose ilûnnaseungitorle. 12 Itigangille ubvarêramigit, annorâminik tigusivok ingilermilunelo, amalo oᴋautivait: Pinialaungnimnik ilipsingnut ᴋaujimavisê? 13 Ajoᴋertuijomik Nâlekamiglo taivapsinga, nelâgullo oᴋarpose; tâmnaugama. 14 Tamanna pivlugo uvanga, Nâlekapse ajoᴋertortipselo itikase ubvalaurapkit, taimâk ilipsetauk itikapsingnik ubvartigêktuksaugivose. 15 Igjaraksamik tunitsivigilauᴋpapse, piniarᴋovluse, Sôrlo piniarvigilaurapse. 16 Âhamarik, âhamarik oᴋaupapse: Kivgaᴋ anginersaungilak angajoᴋâminit, Apostelelônêt anginersaunginivok tilijiminit. 17 Tamanna ᴋaujimagupsiuk, piloridlarpose, piniarutigigupsiuk. 18 Ilûnapsingnik oᴋalungilanga. Nelungilakka anerimalauktakka. Aglaille nelautsilerᴋovlugit: ᴋakᴋôjaktôᴋatima itikaminut tullerarpânga. 19 Mâna oᴋautigivara ilipsingnut piniarutauᴋârtinago; piniarutaujarêrpat, okpilerᴋovluse uvangaunimnik. 20 Âhamarik, âhamarik oᴋaupapse: Illaliortok tiliniartamnik, uvamnik illaliorpok; uvamnigle illaliortub tilijiga illaliorpâ. 21 Jêsuse taimâk oᴋarêrame, kiksalerpoᴋ anernermigut, kigligiutilunelo oᴋarpok: Âhamarik, âhamarik oᴋaupapse: Ilapse illangata pitilârpânga. 22 Tagva ilinniartut ingmingnut takonautivut kuksasulerlutiglo, nelitik oᴋautigingmangâgo. 23 Nerrimârvingmele iksivajoᴋarpok ilinniartingita illanganik, Jêsusib sagvianut êgangajomik Jêsusib nagliktanganik. 24 Tâmna Sîmonib Pêtrusib ijingmikpâ, kiglisiniarᴋovlugo oᴋautigijanga kinaungmangât, 25 Tâpsoma egalerdlunelo Jêsusib sagvianut oᴋautivâ Nâlegak, kinauvâ? 26 Jêsuse kiovok: Tâmnauvok tamuamik misuksiutijara, tunitjivigilugolo. Tamualo misukpâ tunilallo Jûdasemut Iskâriotemut, Sîmonib erninganut. 27 Tamualo êngmago, Sâtanasib pullavâ. Tagva Jêsusib oᴋautivâ: Piniartat piniarsâruk! 28 Nerrimâᴋatingitale nelianiglônêt ᴋaujimajoᴋangilak, suna pivlugo taimâk oᴋautingmangâgo. 29 Ilangit isumavut, Jûdase pôksalijarmat, Jêsusib oᴋautingmago imâk: Pisiniarit ajortaptingnik uvloᴋsiorvingmut! Ubvalo, tunijerᴋovlugo aklujunut sumik. 30 Tagvale tamua êjarêramiuk, anisâdlarpok. Unnuangovorlo. 31 Anijarêrmallo, Jêsuse oᴋarpok: Mâna Inûb Erninga ânanausijauvok, Gûdelo ânanausijaugivok tâpsomane. 32 Gûde ânanausijaugune tâpsomane, Gûdibtauk ânanausiniarivâ ingmine, ânanausisârpâlo. 33 ᴋitorngârsukka, sulle anikitomik najorniarpapse. ᴋeneromârpapsinga; sôrlolo Jûdinut oᴋalaurama: Aiviginiartamnut tikitsungnangilase. 34 Mânalo oᴋautivapse: Perᴋojaktâmik tunitjivigivapse, nagliktigêrᴋovluse, sôrlo nagligilaurapse, nagliktigêlerᴋovluse. 35 Tamattomunga ilûnnatik illitarsiniarput, ilinniartigigapse, nagliktigêkupse. 36 Sîmonib Pêtrusib oᴋautivâ: Nâlegak, namut ainiarᴋêt? Jêsusib kiovâ. Aiviginiartamnut tamattomane, maligungnangilarma; kingorngagulle maligomârparma. 37 Pêtrusib kiovâ: Nâlegaᴋ, sôk tamattomane maligungnangilagît? Inôsera tunijomavara pivlutit! 38 Jêsusib kiovâ: Inôtsît pivlunga tuninajarpiûk? Âhamarik, âhamarik oᴋaupagit; Angutaunek niplerniangilak, pingasuertorlunga misiarutauᴋârtinanga ilingnut.

Johannese 14

Jêsusib oᴋâlaninginik ilinniartiminut ainiarnine Atâtamut, tuksiarnerlo; Anernerlo manigoijok pivlugit.

1 Ilinniartiminullo oᴋarpok: Ômatise ᴋoaksânganiaratik! Gûde okpervigisiuk uvangalo okpervigisinga! 2 Atâtama iglungane igluksaᴋarpok unuktunik. Taimainajangipat, oᴋautiginajalaukpara ilipsingnut. (Mânale) ainiarpunga iniksalioriartorluse. 3 Ainiarumalônêt iniksalioriartorluse, uteromagivunga, ailuselo uvamnut, tagvanêrᴋovluse najugamne. 4 Aiviksarolo ᴋaujimavase, apᴋullo ᴋaujimagivase. 5 Tômasib oᴋautivâ: Nâlegak ᴋaujimangilagut aiviksarnik, ᴋanorlo apᴋut ᴋaujimajungnarpitigô? 6 Jêsusib oᴋautivâ: Apᴋutauvunga mikseᴋârniovlungalo inôgutauvlungalo; Atâtamut pijoᴋangilak, uvapkut kisiane. 7 Ilitarigupsinga, Atâtaga ilitarinajarivase. Mânamillo ilitarivase takolaukpaselo. 8 Filippûsib oᴋautivâ; Nâlegak Atâta takotitsuk uvaptingnut, nâmaksiniarpogut tagva. 9 Jêsusib oᴋautivâ: Taimâk sivitutigijomik najorpapse, ilitaringilarmalô? Filippûse, uvamnik tautuktub Atâta tautukkivâ. Sôkle oᴋarᴋêt: Atâta takotitsuk uvaptingnût? 10 Okpingilatît, Atâtamnênama, Atâtalo uvamnêngmât? Oᴋautsit oᴋauserijakka ilipsingnut uvamnik oᴋauseringilakka, Atâtable uvamne ineᴋartûb, tâpsoma piniarnerit piniarnerivait. 11 Okperisinga, Atâtamnênama, Atâtalo uvamnêngmat; saperupsele, piniarnerit pivlugit okperisinga. 12 Âhamarik, âhamarik oᴋaupsapse: Uvamnut okpertûb piniarnerit piniarnerijakka piniarutiginiarivait, anginersaniglo tâpkonangat piniaruteᴋarniarpok. Atâtamut aigama. 13 Sumiglo tuksiarniarupse atimne, piniaromavunga, Atâta nertortauᴋovlugo ernermigut. 14 Sumik tuksiarniarupse atimne, piniaromavunga. 15 Nagligigupsinga, perᴋojakka malingniarsigik. 16 Atâtalo tuksiarvigijomavara manigoijomik asimnik tunitjivioᴋovluse, ilipsingnêtsainarᴋovlugo isoᴋangitomut. 17 Mikseᴋârnerub Anerninga, silaksoarmiut pijungnangitangat; takunginamitsuk ilitaringinamitsuglo. Ilipsele ilitarivase, ilagitsainarmase, ilipsingnêniarmallo. 18 Iliarsôᴋojomangilapse, tikitsomagivapse. 19 Akuniungitok sulle, tagva silaksoarmiut takoniarungnairpânga, ilipsele takoniarivapsinga; inôgama ilipselo inôjuksaugivose. 20 Uvlorme taipsomane tukkisiniarpose, Atâtamnênama, ilipselo ilumnênapse, uvangalo ilupsingnênama. 21 Perᴋojamnik pilik, maliklugillo, tâmnauvok nagliktok uvamnik. Uvamnigle nagliktok nagligijauniarpok Atâtamnut, uvangalo nagliginiarpara nelojungnaitilugolo uvamnik. 22 Jûdasib oᴋautivâ (Iskârioteungitûb): Nâlegak, ilingnik nelonarungnaititsomanît uvaptingnut, silaᴋsoarmiunu-ungitorlo, sunauvâ? 23 Jêsusib kiovâ oᴋautivlugolo: Uvamnik nagliktub oᴋausikka malingniarpait; Atâtamalo nagliginiarpâ, tikiniarpavuglo inigijartorlugo. 24 Uvamnigle naglingitub oᴋausikka malingilait. Oᴋautsillo tussartase pigingilakka, Atâtable tilijima. 25 Tamattominga oᴋarvigilaukpapse, ilipsingnêlaurama. 26 Manigoijuble, Anernerûb ajunginerûb, Atâtama tilijomârtangata atimne, tâpsoma ajoᴋertorniarpâse tamainik, erᴋaitiluselo tamainik oᴋauserilauktamnik ilipsingnut. 27 Ulapirsaumik ᴋemaivigivapse, ulapirsautimnik tunitjivigivapse. Tunitjivigingilapse silaksoarmiut tunijiningititut. Omatise ᴋoaksârniaratik erᴋsiniaratiglo! 28 Tusalaukpose, oᴋautilaurapse: Ainiarpunga tikiluselo ama. Nagligigupsinga, ᴋuviasugajarpose, oᴋautilaurapse: Atâtamut ainiarpunga; Atâta anginersaungmat uvamnit. 29 Mânalo oᴋautigilaukpara ilipsingnut, tamanna pilerᴋârtinago, okpilerᴋovluse, tamanna pilerpat. 30 Mattoma kingorngane unuktunik oᴋauseᴋarniarungnairpunga ilipsingnut; silaksûb tamattoma ataninga tikilermat peᴋaranelo uvamne. 31 Silaksoarmiulle tukkisilerᴋovlugit, Atâta nagligigapko, taimaglo piniarama, sôrlo Atâtab perᴋolaungmanga: Nikovititse ovangallo aulartâ!

Johannese 15

Kristûsemik napârtôjomik vaineliksamik. Naglingnermik nagliktigêngnermiglo. Okpertut ômigijauninginik silaksoarmiunut.

1 Uvanga napârtôvunga vaineliksak idluartok, Atâtagalo vaineliksatalingmik perorsêvilerijôvok. 2 Akkerᴋut uvamnêtut ilûnnaita paungaᴋarpangitut pêjarniarpait; ilûnnaitalo paungaᴋarpaktut piungininginik pêjaiviginiarpait, paungaᴋarnersauᴋovlugit. 3 Ilipse mâna sujungaipose oᴋautsit pivlugit, oᴋauserilauktakka ilipsingnut. 4 Ilumnêtsainaritse, uvangalo ilupsingnêdlunga. Sôrlo Akᴋerok paungaᴋarungnangimat ingminik, napârtomêtsainangikune vaineliksame; taimainivosetauk, ilumnêtsainangikupse. 5 Uvanga napârtôvunga vaineliksak, ilipse akkerôvose. Uvamnêtsainartok, uvangalo tâpsomanêdlunga, paungaᴋarniarpok unuktunik, piginanga piniarungnanginapse sumik. 6 Ilumnêtsainangitok egitauniarpok akkerᴋotut, panersârlunelo, katitauniarpullo egitaulutiglo ikomamut, ikoalajuksauvlutik. 7 Ilumnêtsainarupse, oᴋausikkalo ilupsingnêtsainarpatta, pijomajapsingnik tuksiarniarpose, tunitsiviolâlapselo. 8 Tamakutigûna Atâtaga nertortauniarpok, paungaᴋarnialerupse unuktunik, ilinniarteolerluselo uvamnut. 9 Sôrlo Atâtama nagligingmanga, taimaktauk uvanga nagligivapse. Naglingnimnêtsainaritse. 10 Perᴋojakka malikupsigik, naglingnimnêtsainarpose, Sôrlo uvanga Atâtama perᴋojangit malikapkit, naglingninganêtsainarlungalo. 11 Taimâk oᴋarvigivapse, ᴋuviasuteᴋarnera ilipsingnêtsainarᴋovlugo, ᴋuviasungniselo nâmaksivalliaᴋovlugo. 12 Tamadja perᴋojara, nagliktigêrᴋovluse, sôrlo nagligigapse. 13 Nagligosungnersaujoᴋangilaᴋ imaitomit, inôserminik tunijomit ilannârijane pivlugit. 14 Ilipse ilannârivapse, piniarutjigupse perᴋojamnik. 15 Mattoma kingorngane oᴋangilanga kivgaugapse; kivgak ᴋaujimangimat angajoᴋâme piniarninginik. Ilipsele ilannârijimnik taimavapse; tamainik Atâtamnit tusalauᴋtamnik, nelojungnaitilaurapse. 16 Anerilaungilapsinga, anerilauᴋpapsele, isumagivluselo, paungaᴋariartorᴋovluse, paungaᴋarniselo soᴋoserᴋonago; Atâta tuksiarvigigupsiuk atimne, tamattominga tunijerᴋovlugo ilipsingnut. 17 Mattominga perᴋovapse, nagliktigêrᴋovluse. 18 Silaᴋsoarmiut ômigikpase, ᴋaujimaleritse, ômigerᴋârmanga ilipsingnit. 19 Silaksoarmiut ilagigupsigik, silaksoarmiut pitik nagliginajarpait; silaksoarmiulle ilaginginapsigik, anerimalaurapsele silaksoarmiunit: tamanna pivlugo silaksoarmiut ômigivâse. 20 Oᴋausera erᴋarisiuk oᴋauserilauktara ilipsingnut: Kivgak anginersaungilak angajoᴋâminit. Unangmilauruninga, unangminiarivâse; oᴋausikka malilaurunigit, oᴋausisê malingniarivait. 21 Tamakkoningale tamainik piniarvigijomârpâse atera pivlugo; ilitaringinamitsuk tilijiga. 22 Tikilaungikuma, tamattominga oᴋautijartorlugit, ajorneᴋarajangilat; mânale pasijaujungnairutiksarsijungnangilat ajornitik pivlugit. 23 Uvamnik ômisuktub Atâtaga ômigigivâ. 24 Piniarnerit piniarnerilaungikupkit, asimma piniarnerilaungitangit, ajorneᴋarajangilat; mânale takolauralloaramigit, tamamnuk ômigivâtiguk, uvangalo Atâtagalo. 25 Oᴋautsille nelautsilerᴋovlugit aglaksimajut perᴋojangine: Pitjuteᴋaratik ômigivânga. 26 Manigoijorle tikitsomârpat, tilijomârtara ilipsingnut Atâtamit, mikseᴋârnerûb anerninga, Atâtamit anijok: tâmna kigligiutsiniarpok uvamnik. 27 Ilipselo kigligiutsiniarivose; pigiarnermit najulaurapsinga.

Johannese 16

Anernerûb ajunginerûb piniarninganik. Takôtilânermik Mânakasâkut Tuksiarnermik Jêsusib atingane.

1 Tamattominga oᴋautilaukpapse sinaungajuteᴋalerᴋonase. 2 Ilagêngnermingnit avitsomârpâse. Neliutijomârporle toᴋotsijut ilipsingnik isumaᴋarvingat, tamattomunga Gûde kivgartorasugilugo. 3 Taimailiorvigijomârpâse, Atâtagalônêt uvangalônêt ilitaringinamitiguk. 4 Tamattominga oᴋautilaukpapse, neliutikpat erᴋailerᴋovluse oᴋautigilauktamnik ilipsingnut. Tamattominga pigiarnermit oᴋautilaungilapse najulaurapse. 5 Mânale tilijimnut ainiarpunga; apersortoᴋangilarlo akunapsingne: Namungarniarᴋêt? 6 Taimâgle oᴋautilaurapse, ômatise kiksarnermik ilumertaulerput. 7 Mikseᴋârtomigle oᴋautivapse: Idluarpok ilipsingnut, ainiarama. Ainiangikuma, manigorniktub tikiniangimase. Ainiarumale, tilijomavara ilipsingnut. 8 Tikikunelo, silaksoarmiut tukkisitiniarpait ajornermik, idluarnermiglo, erᴋartuinermiglo. 9 Ajornek pivlugo, okperlungimatta uvamnut; 10 Idluarnerle pivlugo, Atâtamut ainiarama, takoniarungnairapsingalo. 11 Erᴋartuinek pivlugo, silaksûb mattoma ataninga erᴋartortaungmat. 12 Sulle unuktunik oᴋausiksaᴋarpunga ilipsingnut, mânale tusarlugit saperpase. 13 Ipsomale, mikseᴋârnerûb anerningata, tikikune, mikseᴋârnernut tamainut tesiorniarpâse. Ingminik oᴋâlanianginame; tusartaminigle oᴋautjiniarpok, pijomârtomiglo oᴋautiniarpâse. 14 Tâpsoma ânanausiniarpânga, pimnit tigusiniarame oᴋautigilugolo ilipsingnut. 15 Tamaita Atâtab pigijangit pigivakka. Tamanna pivlugo oᴋautivapse: Pimnit tigusiniarpok oᴋautigilugolo ilipsingnut. 16 Mânakasâkut takoniarungnairpapsinga; amalo Mânakasâkut takoniarivapsinga; Atâtamut ainiarama. 17 Tagva ilinniartingita ilangit oᴋaᴋatigêkput: Sunauvât oᴋausingit, oᴋautingmatigut: Mânakasâkut takoniarungnaipapsinga amalo mânakasâkut takoniarivapsinga, Atâtamullo ainiarama? 18 Tagva oᴋarput: Sunauvâ oᴋarninga: Mânakasâkût? oᴋausingit nelovavut. 19 Tagva Jêsuse malugosulerpok, aperijomangmatsuk, oᴋattivaillo: Tamattominga apersortigêkpose, oᴋalaurama: Mânakasâkut takoniarungnairpapsinga, amalo mânakasâkut takoniarivapsinga. 20 Âhamarik, âhamarik oᴋaupapse: ᴋialuselo ogguarniarpose silaksoarmiulle ᴋuviasudlarniarput. Ilipsele kiksadlarniarpose; kiksarnisele ablatsângorniarivok ᴋuviasungnermut. 21 Arnak ernisukkune, kiksarneᴋarpok, stûndinga tikisimangmat; nutarârsugle erniarijarêruniuk, kappiasungnerilauktane isumagijungnairpâ, ᴋuviasungnek pivlugo, inuk silaksoarmut erniangongmat. 22 Ilipselo kiksarneᴋarivose mânna; takojomagivapsele, ômatiselo ᴋuviasudlarniarput, ᴋuviasungnipsingniglo aᴋsârniktoᴋartuksaungilak ilipsingnit. 23 Uvlormelo taipsomane aperiniangilapsinga sumik. Âhamarik, âhamarik oᴋaupapse: Atâta tuksiarvigigupsiuk sumik atimne, tunitjiviginiarpâse tamattominga. 24 Mâna tikilugo tuksialaungilase sumik atimne. Tuksiaritse, tigusiniarpose tagva, ᴋuviasungnise nâmakserᴋovlugo. 25 Taimâk oᴋautilaukpapse adsiujutigut; neliutijomârporle adsiujutigut oᴋâlajungnaiviginiartara ilipsingnut, tukkisinartomigle oᴋautiniarpapse Atâtamnik. 26 Uvlorme taipsomane tuksiarniarpose atimne. Oᴋautingilapselo, Atâta tuksiarvigijomavlugo pivluse; 27 Nangminek Atâtab nagligingmase, nagligigapsinga, okperluselo, Gûdemit pilaurama. 28 Atâtamit anilaukpunga, pilungalo silaksoarmut; amalo silaksoak ᴋemangniarpara, Atâtamullo ailunga. 29 ilinniartingita oᴋautivât: Ahâk mâna tukkisinartomik oᴋâlavotit, adsiujomiglo oᴋauseᴋarnak. 30 Mânna ᴋaujimavogut, tamaita nelunginangne, aperijaujariaᴋarungnairlutit. Tamanna pivlugo okperpogut, Gûdemit anilauravit. 31 Jêsusib kiovait: Mânna okperpose. 32 Ahâk stûnde neliutiniarpok, neliutijarêrporlo siamarviksase, atunit ingmikoartiluse, kisimautilungalo; kisimaungilangale, Atâtab najormanga. 33 Tamattominga oᴋautilaukpapse, ulapirsauteᴋarᴋovluse uvamne. Silaksoarme kappiasungneᴋarpose; manigoritsele, silaksoak sâlagivara.

Johannese 17

Kristûsib ajoᴋertuinerojipta tuksiarninganik, nangminek pivlune, ilinniartinelo, illagêktitanelo pivlugit.

1 Taimâk Jêsuse oᴋarame, ᴋilangmut ârlorpok oᴋarlunelo: Atâtak, stûnde tikisimavok ânanausivît Ernernik, Ernernut ânanausijauᴋovlutittauk. 2 Sôrlo pitsartunermik tunitjivigigangne uviningnut tamainut, inôtsemik nungusuitomik tunijerᴋovlugo ilûnnainut, tunijarnut tâpsomunga. 3 Tamadjauvorle inôgut nungusuitok: ilitarsilune ilingnik, kisivit nelâgut Gûdeogavit tililauktarniglo Jêsuse Kristûsemik. 4 Ânanausilaukpagit nuname, piniarnerlo nâmaksilaukpara piniarutauᴋolauktat uvamut. 5 Mânalo ânanausilaunga, Atâtak, ilingne, ânanaunermut ilingnêdlunga pigilauktamnut silaksoaᴋarᴋârtinago. 6 Aternik nelojungnaitilaukpakka inuit tunilauktatit uvamnut silaksoarmiunit. Pigilaukpatit, uvamnullo tunilaukpatit, oᴋautsitillo malilaukpait. 7 Mânnale ᴋaujimavut, tamaita tunilauktatit uvamnut ilingnit pingmatta. 8 Oᴋautsille tunilauktatit uvamnut, tunilaukpakka tâpkonunga; ilaliulauᴋpaillo, nelâgullo ilitarsilutik, ilingnit anilaurama, okpilerlutiglo, tililauramga. 9 Tuksiutivakka, silaksoarmiullo tuksiutinagit, tâpkoale tunilauktatit uvamnut; pigigangne. 10 Tamaitalo pigijakka pigivatit, pigijatillo pigivakka, tâpkonanelo ânanausijauvunga. 11 Silaksoarmêtsungnairpungalo, tâpkoale silaksoarmêput, uvangalo ilingnut ᴋaivunga. Hailigeojok Atâtak, aternêtsainartikit tunijatit uvamnut, atausioᴋovlugit sôrlo uvaguk. 12 Najulaurapkit silaksoarme, aternêtitsainarpakka. Tunijatit uvamnut saputilauᴋpakka; asiojoᴋangilarlo tâpkonangat, ᴋitorngak asiojok kisime, aglait nelautsilerᴋovlugit. 13 Mânnale ᴋaivunga ilingnut, taimâglo oᴋarpunga silaksoarmêdlunga, ᴋuviasungnimnik ilumiuteᴋarᴋovlugit nâmaktomik. 14 Oᴋautsitit tunilaukpakka tâpkonunga, silaksoarmiullo ômigivait; ilagingimatigik, sôrlo uvanga silaksoarmiut ilaginginapkittauk. 15 Tuksiangilanga nûtserᴋovlutit tâpkoninga, silaksoarmit, saputserᴋovlutille tâpkoninga idluitunit. 16 Silaksoarmiut illagingilait, sôrlo uvanga silaksoarmiut ilaginginapkittauk. 17 Ivjornaitikit mikseᴋârnerne; oᴋautsitit mikseᴋârtôvut. 18 Sôrlo silaksoarmut tililauramga, taimâktauk tiligivakka silaksoarmut. 19 Tâpkoa pivlugit ivjornailivunga, tâpkoatauk ivjornailerᴋovlugit mikseᴋârnerme. 20 Tâpkoa kisêta tuksiutingilakka, tâpkoaletauk oᴋausinginut okperomârtut uvamnut. 21 Ilûnnaita atausiolerᴋovlugit, sôrlo igvit Atâtak ilumnênavit uvangalo ilungnênama, tâpkoatauk iluptingne atausiolerᴋovlugit, silaksoarmiut okpilerᴋovlugit, tililauramga. 22 Ânanaunerlo tunilaukpara tâpkonunga, tunilauktat uvamnut, atausiolerᴋovlugit, sôrlo uvaguk atausiogamnuk, 23 Tâpkonanêdlunga, igvillo uvamnêdlutit; atausemariolerᴋovlugit, silaksoarmiullo ilitarsilerᴋovlugit, tililauramga, nagligigangnelo, sôrlo nagligigamga. 24 Atâtak pijomavunga, najugamne tâpkoatauk uvamnêᴋovlugit, tunilauktatit uvamnut, ânanaunimnik tunilauktarnik uvamnut takoᴋovlugit; nagligilauramga silaksoak tunganilijauᴋârtinago. 25 Idluartok Atâtak, silaksoarmiut ilitaringilâtit; uvangale ilitarivagit, tâpkoalo ilitarsivut tililauramga. 26 Nelojungnaitilaukpakkalo aternik, nelojungnaititsomavakkalo; nagligutsit, nagligutigijat uvamnik, ilunginêᴋovlugo, uvangalo ilunginêdlunga.

Johannese 18

Kristûsib tigujauninganik perorsêvingme. Kiglisiniartauninganik ajoᴋertuijoksoarmut. Pêtrusib missiarninganik. Jêsusib kiglisiniartauninganik Pilâtusemut.

1 Jêsuse taimâk oᴋarêrame, ilinniartine illagilugit anivlunelo aularpok kôb Kidrônib, akianut; tagvane perorsêveᴋarpok, tagvunga Jêsuse ilinniartingillo iterput. 2 Jûdasible pititiginiartangata tamanna nelunginivâ; Jêsuse ilinniartingillo tagvane katimaᴋattarmatta. 3 Jûdasib sorsuktuksat, ajoᴋertuijoᴋsuillo Farisêerillo kivgangit ilasearileramigit, tagvunga ᴋaivok, nennerutsoalijarlutik, nenneroalijarlarmiglo, sakkolijarlarmiglo. 4 Jêsusible tamaita piniarviolârnine ᴋaujimagamigit, anilerpok oᴋautivaillo: Kina ᴋenerpisiûk? 5 Kiovât: Jêsuse Nazaremiok, Jêsusib oᴋautivait: Uvangauvunga. Jûdasible pititiginiartangata illagivait. 6 Jêsusible oᴋautingmagit: Uvangauvunga; kingorpiosârdlutik nunamut niverput. 7 Tagva ama aperivait: Kina ᴋenerpisiûk? Oᴋarpulle: Jêsuse Nazaremiok. 8 Jêsusib kiovait: Oᴋautilaukpapse uvangaugama. ᴋenerupsingale, ukkua aularlit. 9 Oᴋautsit nelautsilerᴋovlugit oᴋauserilauktangit: Uvamnut tunilauktavit nelianik assiojoᴋangilanga. 10 Tagva Sîmonib Pêtrusib saviksoalijarame, tâmna amuvâ, ajokertuijoksûblo kivganga ullimavlugo, siutâ talerpia nakapâ. Kivgarlo tâmna Makusemik ateᴋarpok. 11 Tagva Jêsusib Pêtruse oᴋautivâ: Saviksuit kênailitanganut pôleruk! Ermgusiarsûb, Atâtama tunijangata uvamnut, imanga imeraksaringilarâ? 12 Sorsuktuksalle, angajoᴋâksoangatalo, Jûdillo kivgangita Jêsuse tiguvât ᴋelaksulâllo. 13 Sivorlermiglo Hannasemut aularuterᴋârpât, Kaifasib, jâreme tamattomane ajoᴋertuinerojub sakinganut. 14 Kaifasele tâmnauvok Jûdinut oᴋalauᴋtok, nakornersaungmat, inuk atausek toᴋotaupat inuit pivlugit. 15 Sîmonible Pêtrusib Jêsuse malikpâ, ilinniartublo, tâpsoma asiata. Ilinniartok tâmna ajoᴋertuijoksûb ilitarijanga, Jêsuselo ilagilugo iterpok ajoᴋertuijoksûb igloksoanganut. 16 Pêtruselo upkuab silatâne nangerpok. Tagva ilinniartok (Pêtrusib) assia, ajoᴋertuijoksûb illitarijanga anilerpok, arnarlo upkuamik udjertortok oᴋaᴋatigivâ, Pêtruselo itertipâ. 17 Tagva arnab, upkuab udjertortingata, Pêtruse oᴋautivâ: Inûb tâpsoma ilinniartingit ilagingilatît? Oᴋarpok: illagingilakka. 18 Kivgallo nangerdlutik ikomamik ikitsilaukpuk itjilidlarmat, kitjaᴋejârlutiglo. Pêtrusible nangeᴋatigivait, kitjaᴋejârlunelo. 19 Ajoᴋertuijoksûble Jêsuse apersorpâ ilinniartingit pivlugit, ajoᴋertûsingillo pivlugit. 20 Jêsusib kiovâ: Agviartaunanga tusarnartomik oᴋâlalauᴋpunga silaksoarmiunut. Ilinniarvingnelo katimaviksoarmelo ajoᴋertuilaukpunga, Jûdit ilûnnatik katimavingine, oᴋâlalaungnangalo sumik sagvangitome. 21 Sôk tamattominga apersorpingâ? Ipkoa apersukit tusalauktut oᴋâlautigilauktamnik tâpkonunga; ahâk, taipkoa ᴋaujimavut oᴋauserilauktamnik. 22 Taimagle oᴋartilugo, kivgat tagvane nangertut ilangata Jêsuse erᴋsârpâ oᴋarlunelo: Ajoᴋertuijoasoak taimâk kiojaksariviûk? 23 Jêsusib kiovâ: Idluitomik oᴋaruma, nelunailiuk ajormat; idluartomigle oᴋaruma, sôk erᴋsârpingâ? 24 Hannasiblo ᴋelalsorsimatilugo tilikliutigivâ ajoᴋertuijoksoarmut Kaifasemut. 25 Sîmon Pêtrusele nangerpok kitjaᴋejârlunelo. Tagva oᴋautivât: Ilinniartingit ilagingilatît? Misiarporle oᴋarlunelo: Ilagingilakka. 26 Ajoᴋertuijoksûb kivgangita ilangata, ilaliub tâpsominga, Pêtrusib ulimalauktanganik siutingagut, oᴋautiva: Perorsêvingme ilagigangne takolaungilagît? 27 Tagva Pêtruse ama misiarivok; tagvainarlo angutaunek niplerpok. 28 Tagva Jêsuse aularutivât Kaifasemit iglûb kinglisiniarviub sânganut. Uvlângovorlo. Kiglisiniarvingmullo itingilat, ivjornaromanatik, saugârsugle aularviksiorutiksak nerrijomavlugo. 29 Tagva Pilâtusib anivigivait, oᴋautivlugillo: Sumîk inungmut ômunga pasitiksaᴋarᴋisê? 30 Kiovât oᴋautivlugolo: Una idluitulijeongipat, unertujutiginajangilavut ilingnut. 31 Tagva Pilâtusib oᴋautivait: Tagva ilipse tigusiuk, erᴋartorlugolo perᴋojat pigijase maliklugit. Tagva Jûdit oᴋautivât: Toᴋotsijuksaungilagut kimik. 32 (Jêsusib oᴋausingit nelautsilerᴋovlugit, oᴋauserilauktangit, tukkisititsigame toᴋoniksame ilusinganik.) 33 Tagva Pilâtuse ama iterivok kiglisiniarvingmut, Jêsuselo ᴋaiᴋovâ oᴋautivlugolo: Jûdit atanerivâtît? 34 Jêsusib kiovâ: ilingnik tamattominga oᴋarᴋêt? asivîllônêt tamattominga oᴋautilauᴋâtît uvamnîk? 35 Pilatusib kiovâ: Jûdiovêk? Inuᴋativît ajoᴋertuijoᴋsuillo unertûtigilauᴋpâtit uvamnut. Sumik pinialauᴋêt? 36 Jêsuse kiovok: Nâlegauviga silaksoarmit tamattomangat pingilak. Nâlegauviga silaksoarmit tamattomangat pikpat, kivgama sorsugutiginajarpât, Jûdinut unertûtigijauᴋonanga; mânale nâlegauviga tamattomangat pingilak. 37 Tagva Pilâtusib oᴋautivâ: Taimaimat ataniogalloarᴋêt? Jêsusib kiovâ: Nelâgut oᴋarpotit, ataniovunga. Tamanna pivlugo erniangovunga silaksoarmullo tikilunga, kigligiutjerᴋovlunga mikseᴋârnermik. Mikseᴋârnermit pijub nipiga tusarpâ. 38 Pilâtusib oᴋautivâ: Mikseᴋârnek sunauvâ? Taimaglo oᴋarêrame, Jûdit anivigivait, oᴋautivlugillo: Pasitiksarsingilanga tâpsomane. 39 Iluseᴋarposele imaitomik, aularviksiorviolerangat, parngnanairsimajut ilanganik aularᴋojivaklunga; mâna Jûdit ataninganik aulaᴋojerᴋôvisingâ? 40 Tagva ama ilûnnamatsiatik niperᴋortovlutik oᴋarput: Tâpsomingaungitok, Barrabasêmigle. Barrabasêle inuartôvok.

Johannese 19

Kristûsib isaᴋajauninganik, niaᴋôsertauninganiglo, kikiaktortauninganiglo, toᴋoninganiglo, ilijartortauninganiglo.

1 Tagva Pilâtusib Jêsuse tiguvâ, isaᴋajauᴋolâllo. 2 Sorsuktuksallo niaᴋotemik ukpiganik kakilautilingnik pergaivut, ilivlugolo niaᴋoanut, uliksoarmiglo aupaluktamik kapitipât, 3 Oᴋarlutiglo: Salutitaulerit, Jûdit ataningat! Erᴋsârpâllo. 4 Tagva Pilâtusib anivigigivait, oᴋautivlugillo: Ahâk anitipara ilipsingnut, tukisilerᴋovluse, pasitiksarsinginama tâpsomane. 5 Tagva Jêsuse anilerpok, niaᴋôtelijarlune ukpiganik kakilautilingnik annorâlijarlarmelo aupaluktamik. Tâpsomalo oᴋautivait: Takolersiuk inuk unâ! 6 Ajoᴋertuijoksuillo kivgallo takogamitsuk, ᴋaggudlalerput oᴋarlutiglo: Kikiaktoruk, kikiaktoruk seningajolingmut. Pilâtusib oᴋautivait: Ilipse tigusiuk kikiaktorlugolo, pasitiksarsinginama tâpsomane. 7 Jûdit kiovait: Perᴋojaᴋarpogut, perᴋojarlo tâmna maliklugo toᴋotaksauvok; ingminik erniotingmat Gûdemut. 8 Pilâtusib oᴋausek tamanna tusaramiuk, sivôranersaulerpok. 9 Amalo kiglisiniarvingmut iterivok, Jêsusemullo oᴋarlune: Nakit pivêt? Jêsusible kiungilâ. 10 Tagva Pilâtusib oᴋautivâ: Kiojomangilarmâ? ᴋaujimangilatît, pitsartuneᴋarama, kikiaktorlutit seningajolingmut, pitsartuneᴋaramalo aularᴋolutît? 11 Jêsusib kiovâ: Pitsartuneᴋarajangilatit uvamnut pângat tunitjiviongikuvit tamattominga; tamanna pivlugo uvamnik pititsijok ilingnut, ajortoᴋarnersauvok. 12 Mattomangat Pilâtuse pinasuarpok aularᴋojomavlugo. Jûdille ᴋaggudlarput oᴋarlutiglo: Una aularᴋogungne, ataniviksûb ilanâriniatsangilâtit! Ingminik ataniotitok ataniviksoarmut akkerartormat. 13 Pilâtusib oᴋausek tamanna tusaramiuk, Jêsuse anitipâ, ingidlunelo kiglisiniarviub iksivautanganut, tagvunga (igloᴋsûb sânganut), Ebrêeritut Gabbatemik, imaipok: ujarᴋanik netsitelingmik taijamut. 14 (Uvlorle opalungaijaiviksauvok aularviksiorvingmut, Stûndelo pingasojotôlerpok.) Jûdinullo oᴋarpok: Ahâk tagga atanise! 15 Kaggudlarpulle: pêruk, pêrung-una! Kikiaktoruk seningajolingmut! Pilâtusib oᴋautivait: Atanise kikiaktoraksarivigô seningajolingmût? Ajoᴋertuijoksuit kiovut: Ataneᴋangilagut ataniviksûb asianik. 16 Tagva unertûtigilerpâ kikiaktortauᴋovlugo seningajolingmut. Jêsusele tiguvât aularutilâllo. 17 Kikiaktortauviksanelo erᴋsukpâ aularlunelo tagvunga niaᴋovinertalingmik, Ebrêeritut Golgatamik taijamut. 18 Tagvane kikiaktorpât seningajolingmut, assîgiglo Maggûk avatânut, Jêsusele akuliutilugo. 19 Pilâtusele aglangnik ᴋolimiutaksanginik aglakpok, nipitilugillo seningajolingmut; tâpkoa imaitunik aglalit: Jêsuse Nazaremiok, Jûdit Ataningat. 20 Kolimiutat tâpkoa Jûdit unuktut atuarpait, Jêsusib seningajolingmut kikiaktortauvinga iglugasaksoarnut ᴋaningmat. Aglaksimavullo Ebrêeritut Grîᴋitullo Lataineritullo. 21 Tagva Jûdit ajoᴋertuijoksoangit Pilâtusemut oᴋarput: Aglangnak: Jûdit ataninganik; imâgle: oᴋalaungmat: Jûdit atanerivânga. 22 Pilâtusib kiovait: Aglalauktakka aglagêrpakka. 23 Sorsuktuksalle Jêsuse kikiaktorêramitsuk, annorângit tiguvait, (aviklugillo sitamaulivait, sorsuktuksat ilûnatik atunit ivajânginik,) taimaktauk ulinga. Uligle kiloᴋarane senamalaukpoᴋ pikangat ununga tikidlune. 24 Tagva oᴋaᴋatigêlerput: Avingniaratigo una! Imerautiginiarlavulle, kia piniarmangâgo; nelautsilerᴋovlugit aglait imailijut: Annorâkka avilaukpait ingmingnut, uligalo imerautigilaukpât. Taimailiorput sorsuktuksat. 25 Jêsusible seningajolingata seniane nangerput anânanga, anânangatalo ᴋatangutâ Marîa, Kleofasib nulianga, Marîa Magdalênalo. 26 Jêsusible anânane takogamiuk, ilinniartorlo nagliktane nangeᴋatinga, anânane oᴋautivâ: Arnak, ahâk, tagga ernît! 27 Kingorngagut ilinniartok oᴋautivâ: Ahâk, tagga anânat! Stûndemillo tamattomangat ilinniartûb ingminut pitipâ. 28 Kingorngagut, Jêsuse ᴋaujimagame, tamaita nâmaksijarêrmatta, aglait nelautsilerᴋovlugit, oᴋarpok: ᴋêlerpunga! 29 Imektauteᴋarpoᴋ tagvane sêrnartomik imalingmik. Tâpkoale niperᴋumik misuksivut, ajaupiamullo kapomitârlugo, ᴋaninganullo manivât. 30 Jêsusib sêrnartok pigamiuk, oᴋarpok: Nâmaksivok! Niaᴋonelo nairpâ, anernangerdlunelo. 31 Uvlorle taimna opalungaijaiviongmat, Jûdit timit seningajolingmêrᴋonagit Sabbateotilugo, (Sabbate tâmna angidlarmat,) Pilâtuse tuksiarvigivât, tâpkoa niungit navgortauᴋovlugit, akᴋartitaulerᴋovlugillo. 32 Tagva sorsuktuksat tikilerput, sivorliublo niugik navgorpakit, aippangatalo kikiaktortauᴋatingata. 33 Jêsusele tikinamitsuk, takogamiglo, toᴋojarêrmat, niugik navgongilakit, 34 Sorsuktuksalle ilangata seneranga angmarpâ ᴋalugiaksoarmut, tagvainarlo auk imerlo anilerpuk. 35 Tamattomingalo tautuktub kigligiutjutigilaukpâ, kigligiutjiningalo mikseᴋârtôvok, tâmnalo ᴋaujimavok, mikseᴋârnermik oᴋarame, okpilerᴋovluse. 36 Tamannale piniarutaulaukpok, aglait nelautsilerᴋovlugit: Tâpsoma niugik navgoraksaringilase. 37 Amalo aglait asingit imailivut: Takojomârput kapilauktamingnik. 38 Kingorngagulle Jôsefib Arimatîamiub, ilinniarteojûb Jêsusemut (angigutjilunele, Jûdit erᴋsigigamigit), Pilâtuse tuksiarvigivâ, perᴋojaujomavlune Jêsusib timinga akᴋartilugo. Pilâtusiblo perᴋongmago, ᴋailerpok, akᴋartilâllo Jêsusib timinga. 39 Nikodêmuselo ᴋailerivok sivorngagut unnuangotilugo Jêsusemut tikilauktoᴋ, ᴋaitsilunelo tipigiksautenik mingoarutiksaniglo akutsimajunik, oᴋumailutatitut 100 itut oᴋumaitigijunik. 40 Tagva Jêsusib timinga tiguvâk, imuserdlugolo uvineruksajanik, mingoarutit ilaliudlugit, Jûdit iluversivangningatitut. 41 Tagvanele kikiaktortauvingane perorsêveᴋarpok, perorsêvingmelo iluveᴋarpok nutâmik, ilijiviolaungitomik sule kimik. 42 Tagvunga Jêsuse ilijartorpâk, Jûdit opalungaijaivingat pivlugo, iluvek ᴋaningmat.

Johannese 20

Kristûsib makininganik sakᴋerninganiglo Marîa Magdalênamut, ilinniartunullo, Tômasemullo.

1 Vogib uvlungita sivorlerpângane Marîa Magdalêna tikilerpok iluvermut tâᴋtilugo sulle, takolunelo, ujaraksoak aksakâtitaunermat iluvermit. 2 Tagva aᴋpangerdlune Sîmon Pêtruse tikipâ, ilinniartublo aippanga Jêsusib nagliktanga, oᴋautivlugiglo: Nâlegak aᴋsârnigarinerpât iluvermit, nelovavullo, namut ilingmangâtsuk. 3 Tagva Pêtruse asingalo ilinniartok anilerpuk, iluvermullo ailutik. 4 Tamarmiglo aᴋpangeᴋatigêkpuk, asiatalo ilinniartûb ingiarpâ, sukalinersauvlune Pêtrusemit, sivorliovlunelo iluvermut tikipok. 5 Iluanut itsuarlune uvineruksajat ilimajut takovait, iteranele. 6 Tagva Sîmonib Pêtrusib malikpâ, iluvermullo iterlune, uvineruksajallo ilimajut takovait, 7 Kidjijârnerublo alarutâ, Jêsusib niaᴋoanut tapsiolauktoᴋ, uvineruksajanut ilimangitok, ingmigulle imumajok, apsimavlune. 8 Tagva ilinniartok (Pêtrusib) asia, tikerᴋâlauktok iluvermut, iterivok, takolunelo okperpok. 9 Aglait ᴋaujimanginamigit sule, toᴋungajunit makitsariaᴋarmat. 10 Tagva ilinniartuk aulaᴋatigêlerivuk. 11 Marîale iluviub sângane nangerpok, ᴋeavlunelo silatâne. ᴋeagamelo, iluvermut itsuarpok. 12 Engelîglo maggûk, ᴋaᴋortângnik annorâlîk, iksivajuk takovak, atausek niaᴋungata iningane, aippangale itigangita iningane, Jêsusib timingata ilijauvigilauktangane. 13 Tâpkoalo oᴋautivâk: Arnak, sôk ᴋeavît? Oᴋautivâk: Nâlegara aᴋsârnigarinerpât, nelovungalo, namut ilingmangâtsuk. 14 Taimâglo oᴋarame, ᴋeviarpok, Jêsuselo nangertok takovâ, nelovlunelo Jêsuseongmat. 15 Jêsusib oᴋautivâ: Arnak, sôk ᴋeavêt? Kina ᴋenerpiûk? Perorsêvilerijeonasugigamiuk, oᴋautivâ: Nâlegak, nûlaurungne, oᴋautilaunga, namut ilingmangângne. Tagva aijomavara. 16 Jêsusib oᴋautivâ: Marîa! Tagva ᴋeviarlunelo oᴋautivâ: Rabbûni; imaipok: Ajoᴋertuijok. 17 Jêsusib oᴋautivâ: Aktorniarnanga, takpaungarsimanginama sule Atâtamnut. Ailerille ᴋatangutimnut oᴋautilugillo: Takpaungarniarpunga Atâtamnut Atâtapsingnullo, Gûdimnut Gûdipsingnullo. 18 Marîa Magdalêna tikilerpok, ilinniartullo oᴋautivait: Nâlegak takolaukpara, taimâglo oᴋautilaukpânga. 19 Vogib uvlungita sivorlerpângata unnulerningane ilinniartut katimatilugit, upkuallo parngnanairsimatilugit, Jûdit erᴋsigigamigit, Jêsuse tikipok, akornganelo nangerpok, oᴋautilugillo: Ulapirsauteᴋaritse! 20 Taimâglo oᴋarame, agganelo seneranelo ᴋemergojautipait tâpkonunga. Tagva ilinniartut ᴋuviasulerput, Nâlegaᴋ takogamitsuk. 21 Tagva Jêsusib ama oᴋautivait: Ulapirsauteᴋaritse! Sôrlo Atâtab tilingmânga, taimâk tilivapse. 22 Taimâglo oᴋarame, suporpait, oᴋautivlugillo: Anernek ajunginek pigilersiuk! 23 Isumagijungnaitase ajorninginit, isumagijaujungnaineᴋarput; isumagijungnainiangitaselo ajorninginit isumagijaujungnaineᴋangilat. 24 Tômasible, 12 it ilangata, maggôliavinermik taijab ilagingilait, Jêsuse tikitilugo. 25 Tagva ilinniartut asingita oᴋautivât: Nâlegak takolaukpavut. Tâpsomale oᴋautivait: Aggangine kikiaktornerit takungikupkit tikeralo ilingikupko seneranganut, okperijâmangilara. 26 Uvlullo sitamaujortut nângmatta, ilinniartut ama ᴋamanêlerivut, Tômasiblo ilagivait. Jêsuse tikipok, upkuat parngnanairsimatilugit, akornganelo nangerpok oᴋarlunelo: Ulapirsauteᴋaritse! 27 Kingorngagut Tômase oᴋautivâ: Tikît ᴋaitsuk, aggakkalo takolikit; aggaktillo isakkit ovunga, ililugillo senerᴋamnut; okpinginaglo, okperille! 28 Tômasib kiovâ oᴋautivlugolo: Nâlegara Gûdigalo! 29 Jêsusib oᴋautivâ: Takogamga, Tômase, okperpotit. Piloridlarput takolugatik okpertut! 30 Tatamnartutauᴋ asingit unuktut Jêsusib piniarnerivait ilinniartime takoane, aglaksimangitut aglangne tamakkonane. 31 Tamakkoale aglaksimavut, okpilerᴋovluse, Jêsuse Kristûseongmat, Gûdib Erninga; okpernermullo inôseᴋarᴋovluse tâpsoma atingane.

Johannese 21

Jêsusib sakᴋerninganik ilinniartiminut Tibêriasib teseksoangata seniane. Jêsusib, Pêtrusiblo, Johannesiblo oᴋaᴋatigêngningat.

1 Mattoma kingorngagut Jêsuse sakᴋerivok ilinniartiminut Tibêriasib teseksoangata seniane. Imailiorlunele sakᴋerpok. 2 Ilagêklutik tagvanêput Sîmon Pêtruse, Tômaselo Maggôliavinermik taijak, Natanaêlelo, Kanamit Galilêamêtomit pijok, Zebedêusiblo ernîgik, asîgiglo Maggûk ilinniartingita ilâgik. 3 Sîmonib Pêtrusib oᴋautivait: Nuluarniariartoromavunga. Tâpkoa oᴋautivât: Tagva ilagijomavaptigit. Anilutiglo, umiarmut ikisâdlalerput, unnuamelo tamattomane nuluartitsilungilat. 4 Uvlângolertilugole, Jêsuse sidjame nangerpok, ilinniartullo ᴋaujimangilat Jêsuseongmat. 5 Jêsusib oᴋautivait: ᴋitorngat, nerᴋiksaᴋangilasê? Tâpkoa kiovât: Âhailâ. 6 Tâpsomale oᴋautivait: Nulutjat ningitisigik umiab talerpianut, nagvârniarpose tagva. Tagva ningitipait, amuarungnarungnailugillo mingeritjat unurninginut. 7 Tagva ilinniartûb, Jêsusib nagliktangata, Pêtruse oᴋautivâ: Nâlegak una. Sîmonib Pêtrusib tusaramiuk, Nâlegaungmat, uvinerune atilerpâ (annorailaurame), imânullo misikpok. 8 Ilinniartut asingit umiakut ᴋailerput (nuna ungasinginamitsuk ablornernik 200 inik) nulutjallo mingeriaᴋtalit amuvait. 9 Nunamulle niuleramik, aumanik ilimajunik takovut, ᴋânganelo mingeritjanik ᴋakᴋôjamiglo. 10 Jêsusib oᴋautivait: ᴋaitsileritse mingeritjanit mâna nuluartitapsingnit. 11 Sîmon Pêtruse iperârpok, nulutjallo amuvait nunamut tattatut mingeritjanik angijunik 153 nik. Taimâglo unuktigigalloarmatta, nulutjat aliktaungilat. 12 Jêsusib oᴋautivait: ᴋaititse nerrimârluselo. Ilinniartingitale neliatalônêt aperijariaᴋangilâ: Kinauvêt? ᴋaujimagamitsuk, Nâlegaungmat. 13 Tagva Jêsusib ᴋakᴋôjak tigujartorpâ, tunilâllo tâpkonunga, taimâktauk mingeritjat. 14 Tamadja pingajuat Jêsusib sakᴋerlaungningita ilinniartiminut, toᴋungajunit makiningata kingorngane. 15 Nerrijarêramigle, Jêsusib Sîmon Pêtruse oᴋautivâ: Sîmon, Jônasib erninga, ukunangat nagliginersarivingâ? Tâpsoma oᴋautivâ: Âhailâ Nâlegak, nelungilarma nagligigapkit. Oᴋautivâ: Saugârsukka nerritiniakit. 16 Aippânik oᴋautivâ: Sîmon, Jônasib erninga, naligivingâ? Tâpsoma oᴋautivâ: Âhailâ Nâlegak nelungilarma nagligigapkit. Oᴋautivâ: Saugakka nerritiniakit. 17 Pingajuangnik oᴋautivâ: Sîmon, Jônasib erninga, nagligivingâ? Pêtrusib kiksalerpok, pingajuangnik oᴋautingmago: Nagligivingâ? Oᴋautivâlo: Nâlegak, tamainik ᴋaujimavotit, nelungilarma nagligigapkit. Jêsusib oᴋautivâ: Saugakka nerritiniakit. 18 Âhamarik, âhamarik oᴋaupagit: Inôsungnersautilutit, nangminernik tapserusilaukpotit, arvertarlutillo pijomajarnut; itôleruville, aggaktit isagomârpatit, asivîllo tapseruseromârpâtit, tesiorlutillo pijomangitarnut. 19 Taimâgle oᴋarpok nelunaijailune, toᴋûb ilusingita nelianut Gûde nertoromârmangâgo. Taimâglo oᴋarêrame, oᴋautivâ: Malingâ! 20 Pêtrusele ᴋevialerpok, ilinniartorlo Jêsusib nagliktanga maliktok takovâ, sagvinganullo êgangalauktok unnungme nerrivlutik, oᴋalauktorlo: Nâlegak, ilingnik pititsiniartok kinauvâ? 21 Pêtrusib tâmna takogamiuk, Jêsuse oᴋautivâ: Nâlegak, unale ᴋanok ilingajuksauvâ? 22 Jêsusib oᴋautivâ: Pijomaguma tagvanêᴋovlugo tikitsiarilunga, erᴋanangilak ilingnut! Igvit malinga! 23 Tagva ᴋatangutigêt ingmingnut oᴋalerput: Ilinniartok una toᴋoniangilak. Jêsusible oᴋautilaungilâ: Toᴋoniangilak; imâgle: Pijomaguma tagvanêᴋovlugo tikitsiarilunga, erᴋanangilak ilingnut. 24 Ilinniartok tâmnauvok tamakkoninga kigligiutjijok, tamakkoalo aglalaukpait. ᴋaujimavogullo kigligiutjiningit mikseᴋârtôngmatta. 25 Asingillo unuktut Jêsusib piniarnerilauktangit ilûnnatik kingorlerêklutik aglaktaunajarpatta, silaksoarmiut aglangnik aglagutiksaujunik tukisinajarasugingilakka.