1 Yet yalan̈tocanoj, yet maẍto hunu tzet watx'inaxa, ayxatic'a Comam Tzoti' isbi. Ha' Comam Tzoti' tu' hune'n̈e ye yeb Comam Dios, caw Diospaxo yehi. 2 Yet caw yichebanil ayxatic'a Comam tu' yeb Comam Dios. 3 Yu Comam Tzoti' tu', yuxin iswatx'e Comam Dios Mame sunil tzettaj ay yul sat yiban̈k'inal ti' yeb satcan̈. Machi hunu tzet ye tu' watx'inaj ta mach yuho Comam Tzoti'. 4 Yin̈ Comam Tzoti' tu', chipitzc'ati k'inale, ha' ton xin chiak'ni issajilk'inal tet yanma anma. 5 Hune' issajilk'inal ti' chimujli xol k'ejholo. Ha' k'ejholo tu' xin, mach chik'oji isbutnitan̈oj. 6 Ay xin hune' naj ischejab Comam Dios, Juan isbi. 7 Hulic'o naj tzotelo yin̈ hune' issajilk'inal tu' yun̈e yanayto sunil anma hune' issajilk'inal yul yanma. 8 Ha' naj Juan tu' xin, maẍtaj naj hune' issajilk'inal tu', caw ton̈e hul naj tzotelo yin̈ issajilk'inal. 9 Wal Comam yin̈ caw yeli issajilk'inal tu', hulic'o yul sat yiban̈k'inal ti' yu yak'ni Comam issajilk'inal yul yanma sunil anma. 10 Waxan̈ca iswatx'e Comam Dios sunil yul sat yiban̈k'inal ti' yu Comam Tzoti' tu', yaja' yet yulic'oj maẍtic'a ohtan̈elax Comam yu anma. 11 Hulic'o Comam yul iscon̈ob, yaj machi ischah anma Comam. 12 Yaj wal sunil mac chahni Comam, yanayto yul yanma yin̈ tzet chala, ha' ton huntek'an tu' yak' Comam yip yoccano yuninalo Comam Dios. 13 Yet ch'oc yuninalo Comam Dios, mach lahano haca' chu ispitzc'a yuninal anma yul sat yiban̈k'inal ti', yeb mach haca'o chal isc'ul naj winaj, to haca' chiel yin̈ isc'ul Comam Dios, hac tu' chu yoc anma yuninalo Comam. 14 Comam Tzoti' tu', yaco isba anmahil. Hulic'o coxol isyeni isyelal jet, yebpaxo isc'ulal isc'ul Comam Dios. Jilnipaxo isk'ak'al yip Comam ischah tet Ismam. Wal xin han̈c'an̈e hunpilan Isc'ahol Comam Dios tu'. 15 Hacpax tu' naj Juan yal naj yin̈ Comam tu' yin̈ caw ip haca' ti': —Ha' ton hune' naj ti' walan teyet ta tzujan yul wintajan yeb ta caw ec'bal yelapno ye insatajan, yuto ayxatic'a naj yet yalan̈to maẍto chinpitzc'ahan, ẍi naj Juan tu'. 16 Ha' Comam chiwalti'an, caw cosunil chicochah isc'ulal isc'ul, yaj xin mach huneln̈eho chicochah, chilann̈etic'a cochahni. 17 Yul isk'ab naj Moisés yak' Comam Dios hune' chejbanile caw how yak'ni naj jet, haxa Comam Jesucristo xin, hul ak'no sunil isc'ulal isc'ul yeb xin isyelal Comam Dios jet. 18 Caw maẍto hunu mac xailni yin̈ Comam Dios, hachcachann̈e hunpilan Isc'ahol Comam Dios, ha' ton Comam Jesucristo ayn̈etic'a isc'atan̈, ha' Comam hul yeno jet tzet ye Comam Dios. 19 Yet hunel xin ebnaj yahawil con̈ob Israel ay bey Jerusalén, ischejto ebnaj huntek'an ebnaj sacerdote yeb huntek'an ebnaj levita isk'ambeno tet naj Juan haca' ti': —¿Mac hach anmahil hach ti'? ẍi ebnaj. 20 Yalnilo naj yin̈ caw isyelal tet ebnaj, matzet yebacano naj, yalni naj haca' ti': —Maẍtajinan chiwijan Cristohal, ẍi naj tet ebnaj. 21 Isk'ambenpaxo ebnaj hunelxa: —¿Mac hach anmahilach, chal tu'? ¿Tom hach ti' Elías? ẍi ebnaj. —Machoj, maẍtajinan, ẍi naj. —¿Mato hach ti' ischejab Comam Dios echmabil yul juhan̈? ẍi ebnaj tet naj. —Machoj, ẍipaxo naj. 22 Isk'ambenpaxo ebnaj hunelxa: —¿Mac ach anmahil, chal tu'? Halilo jetan̈ yun̈e jinitojan̈ ispaj istzoti' ebnaj chejn̈eon̈tijan̈. ¿Tzet caw chawute hawalni jetan̈ tawin̈? ẍi ebnaj. 23 Istak'wi naj Juan tu' xin, yalni naj: —Haninti'an yal naj Isaías, hune' naj ischejab Comam Dios yet payat, yet istz'ibn̈encano naj: Ay hune' mac chiawi bey tx'otx' desierto, chalni: “Haca' chu ishamlax hunu beh, cat istoholban̈elaxi yet chul naj jahaw, hac tu' chu hewatx'enico heyanma, yuto chihul Comam Dios Jahawil,” ẍicano naj Isaías tu', ẍi naj Juan. 24 Ebnaj chejlaxto tzotelo tet naj Juan yu ebnaj fariseo, 25 isk'ambe ebnaj tet naj: —¿Tzet yin̈ yuxinto chawacan̈ ha' iswi' anma ti' tato maẍtajach ti' Cristo hach? ¿Mach Elíaspaxo hach? ¿Maẍtajachpaxo ischejab Comam Dios echmabil yul juhan̈? ẍi ebnaj. 26 Yalni naj Juan tu' tet ebnaj: —Wal haninti'an han̈e ha ha' chiwak'an yahbalo ha' iswi' anma, yaj coxol ti' ayco hune' mac caw maẍto heyohtajoj. 27 Tzujan yul naj wintajan, yaj caw ec'bal naj insatajan, yuxin mach chu inpuhnilojan istx'an̈al isxan̈ab naj chiwabehan, ẍi naj Juan. 28 Ha' bey hune' tx'otx' chiyij Betania, isk'axepic'to ha' niman Jordán, bay yacan̈ naj Juan ha' iswi' anma, ha' tu' beyc'o ebnaj isk'ambe' huntek'an ti' tet naj. 29 Haxa yet hunxa tz'ayical xin, yilnito naj Juan tato lan̈an yapni Comam Jesús isc'atan̈, yalni naj haca' ti': —Ilwec'anabi lah, ha' hune' mac lan̈an yul ti', ha' ak'bilti jet yu Comam Dios coxahanbaloj, haca' chiyu yoc no' me' xahanbalil. Ha' naj chiinilo comul jiban̈ cosunil han̈on̈ ayon̈ yul sat yiban̈k'inal ti'. 30 Ha' ton yin̈ naj ti' quintzotelan yet walnihan teyet: “Ay hune' naj tzujan yul wintajan, caw ec'bal yelapno insatajan, yuto ayxatic'a naj yet maẍto chinpitzc'ahan yul sat yiban̈k'inal ti',” quinchiyan teyet. 31 Yet yalan̈tocanoj, caw maẍtic'a wohtajojan mac Cocolomal, yaj wahcan̈an ha' iswi' anma yun̈e yohtan̈elaxilo Comam yu anma Israel ti', ẍi naj Juan tu'. 32 Yalnipaxo naj Juan: —Caw wilan yayilo Comam Espíritu Santo yul satcan̈ yiban̈ naj. Haca' chiyu yay lalon hunu no' palamuch, hac tu' yu yay yiban̈. 33 Yet yalan̈tocano tu', caw maẍto wohtajojan naj, yaj Comam Dios chejn̈eintijan wanocan̈an ha' iswi' anma ti', ha' Comam chalni wetan: “Ha' hune' mac chawil yay Comam Espíritu Santo yiban̈, ha' ton hune' tu' chiak'ni Comam Espíritu Santo tet anma,” ẍi Comam Dios wetan. 34 Caw ilbilxa wuhan, yuxin chiwalic'ojan tato caw Isc'ahol Comam Dios ye naj ti', ẍi naj Juan. 35 Yet hune'xa tz'ayical xin, aypaxic'o naj Juan bey tu' yeb cawan̈xa ebnaj iscuywom isc'atan̈. 36 Hayet yilni naj Juan yec'to Comam Jesús, yalni naj tet ebnaj cawan̈ tu': —Ilwec'anabi lah, ha' naj tu' ak'bil jet coxahanbalo yu Comam Dios haca' chiyu yoc no' me' xahanbalil ju, ẍi naj Juan tu'. 37 Hayet yaben ebnaj cawan̈ tu' tzet yal naj Juan, isto ebnaj yinta Comam Jesús. 38 Ist'an̈xito Comam Jesús yintaj, yilni Comam tato tzujan ebnaj cawan̈ tu' yinta Comam. Isk'amben Comam tet ebnaj: —¿Tzet chesaya? ẍi Comam. —Rabí, ¿baytu'wal ayach? ẍi ebnaj. (Hune' tzoti' rabí, cuywawom chaliloj.) 39 Istak'wi Comam xin: —Catawej cat heyilni, ẍi Comam. Hac tu' yu isto ebnaj yilno baytu'wal ay Comam. Iscancano ebnaj hune' ak'bal tu' yuto k'ejbixa. 40 Ebnaj cawan̈ aben tzet yal naj Juan occano tzujno ebnaj yinta Comam. Hune' naj Andrés isbi, yuẍta isba naj yeb naj Simón Pedro. 41 Yet lahwi istzotel naj Andrés tu' yeb Comam Jesús, yin̈ hamataj to naj saywal yin̈ yuẍtaj, yalni naj tet naj: —Caw machahloyo Comam Mesías juhan̈, ẍi naj. 42 Hac tu' xin yu yijbanto naj Andrés tu' naj Simón isc'atan̈ Comam Jesús. Yoc t'an̈no Comam yin̈ naj Simón tu', yalni Comam tet naj: —Simón, isc'ahol naj Jonás, wal tinan̈ Cefas chioccano habihoj, ẍi Comam tet naj. (Yin̈ hune' yabxubal ebnaj tu', hune' bihe Cefas chal yelapnoj Pedro.) 43 Yet hune'xa tz'ayic xin yoc yin̈ isnabal Comam Jesús isto bey yulaj ismajul tx'otx' Galilea. Ischahni isba Comam yeb naj Felipe, yalni Comam tet naj: —Ocan̈ tzujno wintajan, ẍi Comam. 44 Caw xin yet con̈ob isba naj Felipe tu' yeb naj Andrés yebpaxo naj Simón Pedro; ah con̈ob Betsaida ebnaj. 45 Lahwi tu' xin, isto naj Felipe saywal yin̈ naj Natanael. Yet ischahlo naj Natanael tu' yu naj, yalni naj tet naj: —Machahlo Comam tz'ibn̈ebilcanayo yul Hum yet ley ak'bilcano yu naj Moisés, yeb tz'ibn̈ebilcano yu huntek'anxa ebnaj ischejab Comam Dios yet payat; ha' naj Jesús ah Nazaret, isc'ahol naj José, ẍi ebnaj. 46 Yalni naj Natanael tu': —¿Tom xin ay hunu mac c'ul chielti xol ebnaj ay bey con̈ob Nazaret tu'? ẍi naj. Istak'wi naj Felipe xin: —Ton̈c'anab jila' cat hawilni, ẍi naj. 47 Yet yilnito Comam Jesús yapni naj Natanael isc'atan̈ tu' xin, yalni Comam: —Ha' hune' naj lan̈an yul ti', caw Israel naj yul sat Comam Dios, caw machi nino lek'ti'al ayco yin̈ naj, ẍi Comam. 48 Isk'amben naj Natanael tet Comam: —¿Tzet xin chu quinhawohtan̈enilojan? ẍi naj. Yalni Comam tet naj: —Macachwilan yet maẍto chachyawte naj Felipe ti', yet ayach yich te' higuera, ẍi Comam tet naj. 49 Istak'wi naj Natanael tu': —Mam cuywawom, yin̈ caw yeli hach ti' Isc'ahol Comam Dios, Yahawil con̈ob Israel hawehi, ẍican̈ naj tet Comam. 50 Yalnipaxo Comam tet naj: —Chawayto yul hawanma win̈an yuto mawalan ta macachwilan yich te' higuera, wal xin caw ec'nato c'aybalc'ule chito hawila' sata ti', ẍi Comam. 51 Yalnipaxo Comam haca' ti': —Yin̈ caw isyelal chiwalan teyet, cheyila' ishajni isba satcan̈, cat heyilni yahtoj yeb yayilo ebnaj yángel Comam Dios wiban̈an Hanin Ak'bilintijan texol yu Comam Dios, ẍi Comam Jesús.
1 Haxa yet yoxihalxa xin, yoc hune' mohyilal bey yul con̈ob Caná ay yul ismajul Galilea. Ayco ismi' Comam Jesús xol hune' mohyilal tu'. 2 Awtebilpaxo Comam Jesús yeb ebnaj iscuywom yin̈ hune' k'in̈ tu'. 3 Yaja' xin lahwilo isvino ebnaj ay ismohyilal tu', yuxin yal ismi' Comam tet: —Caw malahwi isvino ebnaj, ẍi ismi' Comam. 4 Istak'wi Comam xin: —¿Tzet yin̈ wetan chawal hune' ti', mi'? Wal xin maẍto chiapni istiempohal inyenilo wipan tet anma, ẍi Comam. 5 Lahwi tu' xin, yalni ismi' Comam tet ebnaj chejab yin̈ k'in̈ tu': —Yijewe hewatx'en sunil tzet chal naj teyet, ẍi ismi' Comam. 6 Ha' bey tu' xin ayayo wajeb nimeta ch'en moc tz'ahab. Aymi oxebo maca can̈ebo nimeta tz'ahab ha' chiayto yul hunun. Yul huntek'an moc tu' chiayto ha ha' chiocnico yu ebnaj Israel istx'ahni isk'ab haca' yalni ischejbanil ebnaj. 7 Yalni Comam tet ebnaj chejab yin̈ k'in̈ tu': —Nohtzewe huntek'an moc ti' yu ha ha', ẍi Comam tet ebnaj. Hac tu' xin yu yoc ebnaj isnohtzenoj. 8 Yet nohnaxa huntek'an ch'en moc tu' xin, yalni Comam tet ebnaj: —Iwelti ha' yul moc tu' tinan̈, cat xin heyinito tet naj chi'ilni yoc anma sat meẍa, ẍi Comam. Hac tu' yute ebnaj. 9 Yablen naj chi'ilni yoc anma sat meẍa tu' ha ha' oc vinohal, caw xin mach yohtajo naj baytu'wal caw istitico huntek'anxa vino tu'. Wal ebnaj chejab tu' xin, yohta ebnaj tzet yehi, yuto ha' ebnaj inilti ha ha' yul ch'en moc tu'. Hayet yablen naj chi'ilni yoc anma sat meẍa, hune' vino tu', yawten naj naj mohyom tu', 10 yalni naj tet naj: —Ha' chute anma, to babel chi'alaxic'o vino caw c'ul tet anma awtebil, yet chilahwi yuc'ni anma te' vino caw c'ul tu', cat xin yalaxic'o huntek'an mach lahano isc'ulal. Wal hach ti' yin̈xa islahobal chawak' vino caw c'ul, ẍi naj. 11 Ha' xin bey yul con̈ob Caná ayco yul ismajul Galilea, ha' bey tu' isye Comam Jesús babel c'aybalc'ule. Hac tu' yu isyeni Comam ishelanil yip, wal ebnaj chicuywi yinta Comam xin, caw yacanayto ebnaj yul yanma yin̈ Comam. 12 Lahwi tu' xin, isto Comam bey yul con̈ob Capernaum; istopaxo ismi' Comam yeb yuẍta Comam, yebpaxo xin ebnaj chicuywi yintaj. Ha' tu' xin ehayo hayeb tz'ayical. 13 Yet toxa chi'ayilo k'in̈ Pascua, isk'in̈ anma Israel, isto Comam Jesús bey yul con̈ob Jerusalén. 14 Yet yocto Comam yul yatut Comam Dios, yilni Comam tato ayicto ebnaj txon̈om wacax, yeb ebnaj txon̈om me', yeb ebnaj txon̈om palamuch. Aypaxo xin ebnaj helom melyu tz'on̈anicto bey tu'. 15 Hayet yilni Comam hune' tu', iswatx'enayo Comam hune' tz'um yin̈ huntek'an lasu, yoc Comam istzumbenilti ebnaj txon̈om wacax yeb ebnaj txon̈om me'. Istiẍnipaxcanto Comam ismelyu ebnaj helom melyu. Ispac'chancanocan̈ Comam ismeẍa ebnaj. 16 Yalni xin Comam tet ebnaj txon̈om palamuch haca' ti': —Iwelto huntek'an no' ch'ic ti' bey ti', mach chu heyak'aco yatut Inmaman txon̈balil, ẍi Comam tet ebnaj. 17 Hac tu' xin, yu isnaniti ebnaj chicuywi yinta Comam Jesús tzoti' tz'ibn̈ebilcanayo yul Hum yu ischejab Comam Dios yet payat, bay chal haca' ti': “Yu caw xahan ay hawatut wuhan, yuxin caw ya' chuco yin̈ wanmahan,” ẍiayoj. 18 Isk'amben xin ebnaj yahawil Israel tet Comam: —¿Tzet hunu chawak' yechelo jetan̈ yun̈e johtan̈enilojan̈ tato ay hawip hawatx'en huntek'an ti'? ẍi ebnaj tet Comam. 19 Istak'wi Comam tet ebnaj: —Uchc'aweyo hune' yatut Comam Dios ti', cat xin wahnican̈an selel yin̈ oxeb tz'ayic, ẍi Comam tet ebnaj. 20 Yalni xin ebnaj yahawil yin̈ anma Israel tu' tet Comam: —Hune' yatut Comam Dios ti', caw cuarenta y seis habil yitoj yet yahi. ¿Caw xin oxebn̈ech'an tz'ayic chawutecan̈ selel hawalni? ẍi ebnaj tet Comam. 21 Yaj caw maẍtic'a txumchalo yu ebnaj baytet hune' n̈a bay chitzotel Comam tu', ton̈ca xin ha' Comam bay chitzoteli. 22 Yuxin hayet yitzitzbican̈ Comam xol anma camom, isnaniti ebnaj chicuywi yinta Comam tato halbilcano hune' tu' yu Comam. Yanayto ebnaj yul yanma yin̈ tzet tz'ibn̈ebilcano yul Hum yu ischejab Comam Dios yet payat, yeb yin̈ tzet yal Comam Jesús. 23 Yet ayc'o Comam Jesús yul con̈ob Jerusalén yin̈ k'in̈ Pascua, caw hantan̈e anma chahnayto Comam yul yanma yu c'aybalc'ule iswatx'e Comam bey tu'. 24 Yaja' machi cawxi isc'ul Comam yin̈ anma, yuto caw yohta Comam anma sunil. 25 Mach yechelto ay mac chihalni tet Comam tzet ye anma, yuto caw yohta Comam tzet ye yanma hunun anma.
1 Xol ebnaj fariseo ay hune' naj, Nicodemo isbi, caw niman yelapno naj xol ebnaj yahawil con̈ob Israel. 2 Yet ak'balil xin, apni naj yila' Comam Jesús, yalni naj tet Comam: —Mam cuywawom, caw johtajan̈ tato ha' Comam Dios an̈e hachti con̈hacuyu'an̈, yuto machi mac chiyu iswatx'en c'aybalc'ule haca' chawatx'e ti' ta mach ayoco Comam Dios yetbihoj, ẍi naj tet Comam. 3 Yalni Comam Jesús tet naj: —Yin̈ caw yeli chiwalan tawet, macn̈etic'a mach chipitzc'a yin̈ iscayelal mach chu yoc yul isk'ab Comam Dios, ẍi Comam tet naj. 4 Isk'amben naj Nicodemo tu' xin: —¿Tzettaxca chu ispitzc'a hunu anma yin̈ iscayelal tato ichamxa? ¿Tom chito yu ismeltzoco yin̈ ismi' hunelxa cat xin ispitzc'a, hawalni? ẍi naj tet Comam. 5 Istak'wi Comam tet naj: —Caw yel chiwalcanojan tawet, macn̈etic'a mach chipitzc'a yu ha ha' yeb xin yu Yespíritu Comam Dios, caw mach chiyu yoc yul isk'ab Comam. 6 Hayet chon̈pitzc'a yin̈ comi', yeli ay hune' isk'inal conimanil chabil ju tet comi', yaj caw yilal copitzc'a yu Yespíritu Comam Dios yun̈e cochahni isk'inal Espíritu Santo jin̈. 7 Mach chic'ay hac'ul yuto chiwalan tawet ta yilal chipitzc'a sunil anma yin̈ iscayelal. 8 Haca'tic'a jak'ek' tinan̈, caw ton̈e chijabe yeq'ui, yaj caw mach johtajoj baytu'wal chi-caw-istita, caw mach johtajopaxoj baytu'wal chi-caw-istopaxicoj. Hac ton tu' xin yet anma chipitzc'a yu Yespíritu Comam Dios, yin̈ yesalil chipitzc'ahi, ẍi Comam tet naj. 9 Isk'amben naj hunelxa tet Comam: —¿Tzet xin chu yijni isba hune' tu'? ẍi naj. 10 Yalni Comam tet naj: —Hach ti', caw cuywawom hawehico xol ebnaj Israel, yaj ¿tzet yin̈ caw mach hawohtajo hune' ti'? 11 Yin̈ caw yeli ha' tzet ohtabil juhan̈ ha' chijalan̈, cat jalnipaxojan̈ tzet ilbil juhan̈. Walex caw mach cheyayto yul heyanma yin̈ tzet chijalan̈. 12 Yet chiwalnihan teyet tzet yelapno ye tzettaj ay yul sat yiban̈k'inal ti', caw mach cheyayto yul heyanma, hajxam ta chiwalan teyet yin̈ tzettaj ay yul satcan̈ chal tu', caw maẍtic'am cheyapaxayto yul heyanma. 13 Wal xin, caw maẍto hunu mac xabeyahto yul satcan̈ tu', hachcachann̈e Hanin Ak'bilintijan texol yu Comam Dios, titnajinan yul satcan̈. 14-15 Haca' yu yanican̈ naj Moisés hune' yechel no' laba yin̈ te te' bey tx'otx' desierto, caw yilal hac tu' chiyu wahlaxcan̈an yin̈ te' culus, yuxinto macn̈etic'a chinchahnihan yul yanma, mach chic'aytoj, wal xin chischah hune' isk'inal mach istan̈bal. 16 Wal xin, caw xahancano ay anma ay yul sat yiban̈k'inal ti' yu Comam Dios, yuto yati Comam hunpilan Isc'ahol coxol, yuxinto macn̈etic'a chichahni yul yanma, mach chic'aytoj, to caw chischah hune' isk'inal mach istan̈bal. 17 Haninti'an caw Isc'ahol Comam Dios wehan. Ak'bilintijan yu Comam yul sat yiban̈k'inal ti', maẍtaj yu wulan wanocojan isya'tajil yiban̈ anma, machoj, to yu incolnihan yalan̈ ismul. 18 Macn̈etic'a chinchahnihan yul yanma, mach chiay isya'tajil yiban̈, wal mac mach chinchahnihan yul yanma xin caw chitocano ismul yiban̈ yuto mach chayto yul yanma win̈an, haninn̈ech'an Isc'ahol Comam Dios inti'an. 19 Hulnajinan bey yul sat yiban̈k'inal ti' yun̈e wanicojan anma xol issajilk'inal, yaj xin caw ay anma mach chiocheni. Hacn̈e tu' xin caw chicawxico ismul yiban̈ yu istx'ojal chiswatx'e anma tu', yuto yet k'ejholo yehi. 20 Sunil huntek'an anma chiwatx'en ismachiswalilal, mach chiyoche hune' issajilk'inal ti'. Mach chisjepaxti xol, yuto mach chiyoche isc'ul tato ch'el yen̈el sunil istx'ojal chi-la-iswatx'e. 21 Yaja' wal mac chiyijen cuybanile ak'bilcano yu Comam Dios xin, chaco isba xol issajilk'inal yun̈e yiẍtan̈wiloj ta ha' tzet chiswatx'e, lahan haca' tzet choche Comam Dios, ẍi Comam tet naj Nicodemo tu'. 22 Lahwi tu', isto Comam Jesús yeb ebnaj iscuywom bey yul ismajul Judea. Ha' tu' xin ehayo Comam hanic' tiempohal yeb ebnaj; chiyanican̈ ebnaj ha' iswi' anma. 23 Wal naj Juan xin, ayco naj yanican̈ ha' iswi' anma bey Enón iscawilal Salim, yuto caw tx'i'al ha ha' bey tu'. Ha' tu' xin chiapni anma isc'atan̈ naj yu yahcano ha' iswi'. 24 Yu huntek'an ti' yet maẍto chialaxico naj preso. 25 Yet hunel tu' xin, oc ebnaj chicuywi yinta naj Juan isteyele isba yeb hune' naj israelita yin̈ tzet chiyu cosajn̈en coba yin̈ isbeybal Comam Dios. 26 Isto ebnaj yalno tet naj Juan: —Mam cuywawom, naj ayco tac'atan̈ yet ayach bey ha' niman Jordán, naj hawal jetan̈, lan̈an yahnican̈ naj ha' iswi' anma. Caw xin hantan̈e anma chioccano tzujno yinta naj, ẍi ebnaj tet naj Juan. 27 Istak'wi naj Juan tet ebnaj: —Caw machi hunu mac chiwatx'en hune' munil ti' tato maẍtaj Comam Dios chiak'ni tet. 28 Walex hex ti', xaheyabe tzet walan teyet tato maẍtajinan Cristo hinan. Wal xin caw babel quinchejlaxtijan yalan̈to yet maẍto chihul Comam Cristo yul sat yiban̈k'inal ti'. 29 K'inalo ta ay hunu mohyilal tinan̈, ha' naj chimohyi tu', ha' naj chi'ik'ni ix ix, wal naj yamigo naj ayco isc'atan̈, chitzala naj yaben istzotel naj chimohyi tu'. Hac tu' xin istzala wanmahan wabenan yapni anma isc'atan̈ Comam Jesús. 30 Yuxin caw yilal niẍtejal yoccano yip ismunil Comam, walinan xin, niẍtejal islahwipaxcano wetti'an, ẍi naj Juan tet ebnaj chicuywi yintaj. 31 Ha' Comam tit yul satcan̈, ha' caw ec'bal jiban̈ cosunil. Wal han̈on̈ ti' yet sat tx'otx'al jehi, yuxin han̈e tzet ay yul sat yiban̈k'inal ti' ha' chijala. Wal hune' Mac ec'bal cosataj, ha' ton Comam ispeto yul satcan̈. 32 Yuxin ha' tzet ilbil yu, yeb xin tzet abebil yu, ha' chiyala, yaj xin machi mac chiyayto yul yanma yin̈ tzet chiyala. 33 Yaj tato ay mac chichahni tzet chal Comam tu' yul yanma, hune' mac tu' chaco isba yalniloj ta ha' tzet chal Comam Dios caw yeli. 34 Hune' Comam ak'bilti yu Comam Dios, ha' Istzoti' Comam Dios chalic'oj, yuto caw nohnan̈etic'aco Comam Espíritu Santo yin̈ yu Comam Dios. 35 Caw xahan ay Isc'ahol Comam Dios tu' yu, yuxinto caw yaco Comam Dios Mame sunil tzettaj ye tu' yul isk'ab Isc'ahol tu'. 36 Hac tu' xin, macxan̈etic'a chichahni Isc'ahol Comam yul yanma, chischah hune' isk'inal mach istan̈bal, yaj wal mac mach chichahni Comam yul yanma xin, caw mach chischah isk'inal mach istan̈bal, to ha' isya'tajil chischah yu Comam.
1 Yaben ebnaj fariseo ta chiyapaxocan̈ Comam Jesús ha' iswi' anma yeb xin ta caw ec'naxa anma tzujan yinta Comam satapaxo naj Juan; 2 (Waxan̈ca maẍtaj caw Comam chianican̈ ha' iswi' anma tu', wal xin ha' ebnaj chicuywi yinta Comam, ha' ebnaj chianican̈ ha' iswi' anma.) 3 Hayet yabenilo Comam Jesús ta yabe ebnaj fariseo hune' tu', yel Comam yul ismajul Judea, ismeltzoto bey yul ismajul Galilea, 4 yaja' xin, caw yilal yec' Comam yul ismajul Samaria. 5 Yapni Comam bey hune' con̈ob chiyij Sicar ayco yul ismajul Samaria tu', iscawilal hune' tx'o tx'otx' ak'bilcano yet payat yu naj Jacob tet isc'ahol, ha' ton naj José. 6 Ha' bey tu' xin, ay hune' c'uh watx'ebil yu naj Jacob. Caw xin xasiqui Comam isbelwi, yuxin oc tz'on̈no Comam isti' hune' c'uh tu' yet lan̈anxa yoc chuman. 7-8 Wal ebnaj chicuywi yinta Comam tu' xin, to ebnaj yul con̈ob islok'o tzet chilolaxi. Hayet ayto ebnaj lok'wo tu' xin, yapni hune' ix ah Samaria ik'oti ha' yul hune' c'uh tu', yalni Comam tet ix: —Ak' nino hawa' tu' wuc'u'an, ẍi Comam. 9 Istak'wi ix tet Comam: —Walach hach ti', caw ah con̈ob Israel hach, ¿tom caw mach hawohtajoj tato ah con̈ob Samaria inan? ¿Tzet yin̈ chak'anpaxo ha ha' hawuc'u wetan? ẍi ix tet Comam. (Yal ix haca' tu', yuto ha' anma Israel mach chischahle tzotelo isba yeb anma ah Samaria.) 10 Yalni Comam Jesús tet ix xin: —K'inalo ta hawohta hune' mac chik'anni ha' tawet ti', yeb xin ta hawohta isc'ulal isc'ul Comam Dios chiyak' jet, chimhak'anpaxo hawa' wetan, catmi wak'nihan ha' chiak'ni k'inale machi istan̈bal tawet, ẍi Comam tet ix. 11 Yalnipaxo ix tet Comam: —Mamin, caw nahat yehayto ha' yul c'uh lah, caw xin machi hanet chiinahti ha'. ¿Bay xin chaẍto hawik'ati ha' chiak'ni k'inale chawak' wettu'an hawalni? 12 Naj Jacob, jichmam yettax payat tiempo, ha' naj an̈ecano hune' c'uh ti' jetan̈. Ha ha' yul hune' c'uh ti' xin yuc' naj yeb sunil yuninal, yebpaxo sunil isnok'. ¿Tom xin caw ec'bal hachto satapaxo naj Jacob tu'? ẍi ix tet Comam. 13 Istak'wican̈ Comam tet ix: —Sunil mac chiuc'ni hune' ha ha' ti' chititpaxo istajinti'al hunelxa. 14 Wal mac chiuc'ni ha ha' chiwak'ti'an xin, matxa bak'in chitaj isti', yuto hune' ha ha' chiwak'ti'an lahan haca' hunu isnuk' ha ha' chiahilo toptoni cat isbelwi, ha' chak'ni k'inale mach istan̈bal tet, ẍi Comam tet ix. 15 Yalni ix tet Comam xin: —Mamin, ak' hune' ha' chawal ti' wuc'u'an haxinwal matxa chitaj inti'an, matxa chinhulan ik'o ha' bey ti', ẍi ix tet Comam. 16 Yalni Comam tet ix: —As awteti hawichamil cat heyul bey ti', ẍi Comam tet ix. 17 —Machi wichamilan, ẍi ix tet Comam. Yalni Comam tet ix: —Caw yel chawala, machi hawichamil. 18 Yaj howan̈xa ebnaj chawik'le, walpaxo naj ik'bil hawu tinan̈ xin, mach hawichamilo naj. Yuxin caw yel chawala, machi hawichamil, ẍi Comam tet ix. 19 Hayet yaben ix hune' tu' xin, yalni ix tet Comam. —Mamin, wal tinan̈, caw chitxumchalo wuhan tato caw ischejab Comam Dios hawehi. 20 Ebnaj jichmaman̈, ha' ti' hulic'o ebnaj iswi' hune' witz ti' yik'ayo isba tet Comam Dios, walexpaxo israelita hex ti', caw cheyala ta cachann̈ech'an yul con̈ob Jerusalén chiyu coto jinoyo coba tet Comam Dios, ẍi ix tet Comam. 21 Yalni Comam tet ix: —Hach ix ach ti', ayto sunil tzet chiwalti'an yul hawanma. Chiapni hune' istiempohal yet matxa chexhul heyik'ayo heba tet Comam Dios bey hune' witz ti', yeb matxa yilalo chextopaxo bey Jerusalén. 22 Hex ah con̈ob Samaria hex ti', cheyiyo heba tet Comam Dios heyalni, yaj xin mach heyohtajo Comam, walon̈ Israel on̈ti'an̈ xin, johtajan̈ Comam Dios bay chijiyo cobahan̈, yuto coxolan̈ chiel Iscolomal anma. 23 Wal xin lan̈an yapni istiempohal, ha' ton tinan̈, yet chiyinayo isba anma yin̈ istoholal. Caw xin chíyo isba tet Comam Dios yin̈ sunil yanma yeb xin yin̈ caw isyelal, yuto hac tu' choche isc'ul Comam ta chiyiyo isba anma tet. 24 Wal Comam Dios, caw Espíritu ye Comam, yuxin macn̈etic'a chiyiyo isba tet Comam, caw yilal chiyiyo isba yin̈ sunil yanma yeb xin yin̈ caw isyelal, ẍi Comam tet ix. 25 Yalni ix tet Comam: —Caw wohtajan tato chul hune' naj Mesías, ha' ton Comam Cristo Cocolomal, yu Comam Dios. Hayet chihul naj tu' xin, ha' naj chi-cam-halni yin̈ tzet caw yelapno ye sunil, ẍi ix tet Comam. 26 Yalni Comam xin: —Hanintonan hune' chawal ti', hune' lan̈an istzotel tawet ti', ẍi Comam tet ix. 27 Hayet lan̈an istzotel Comam tu' xin, yapni ebnaj iscuywom. Caw c'ayilo isc'ul ebnaj yilni istzotel Comam yeb hune' ix ix tu'. Wal xin caw machi hunu ebnaj k'ambeni tzet yin̈ xin tzotel Comam yeb ix, yeb xin tzet chal Comam yeb ix. 28 Lahwi tu' xin, isbejnicano ix istz'ahab isti' c'uh tu', isto ix yalno tet anma yul iscon̈ob haca' ti': 29 —Catawej, ton̈we jila' hune' mac mahalni wetan yin̈ sunil tzet wehicojan. ¿C'uxan tato ha' naj tu' Cristo? ẍi ix. 30 Hayet yaben anma hune' tu', istit anma yilno Comam. 31 Yet maẍto chiapni anma isc'atan̈ Comam, yalni ebnaj iscuywom Comam: —Mam cuywawom, wa'an̈, ẍi ebnaj tet Comam. 32 Istak'wi Comam tet ebnaj: —Ay hune' tzet chinlohan caw mach heyohtajoj, ẍi Comam. 33 Yoc ebnaj iscuywom Comam tu' yalno tet hunun haca' ti': —¿Toc'anab xin ay mac mahulic'o ak'no tzet chislo Comam ti'? ẍi ebnaj. 34 Yalni Comam xin: —Wal xin, ha' tzet choche Comam chejn̈eintijan, ha' chiwochehan chinwatx'ehan, cat xin inlahnihan ismunil ak'bilcano yul ink'aban. Yuxin hayet chinwatx'enan ismunil ti', caw lahan yeb haca' yet lan̈an inwa'an. 35 Hex ti' cheyala ta can̈ebto ixahaw bay chic'uplaxcan̈ ixim trigo. Caw hactic'am tu', yaj chiwalan teyet: ¡T'an̈xan̈wetoj lah, naweloj! Caw maayilo istiempohal iscutxbalaxico anma wetan, haca' chiyu iscutxbalax ixim trigo yet chik'anbilo ixim. 36 Ha' naj chic'upnican̈ ixim trigo chischah naj istohol, yechel naj ye naj chiinito anma isc'atan̈ Comam yu ischahni isk'inal chiyak' Comam. Yuxin naj chitz'unni ixim yeb naj chic'upnican̈ ixim, lahan istzala isc'ul ebnaj iscawan̈il. 37 Haca' yalni anma chijabe: “Nan naj chitxihni ixim trigo, nanxapaxo naj chic'upnican̈ ixim,” ẍi. 38 Yuxin chexinchejtojan xol anma, haca' ebnaj chic'upnican̈ ixim trigo tu', nan ebnaj babel munlanahi haca' yin̈ istxihnayo ixim, hex ti' xin caw toxan̈e chexec' hec'upu'can̈ ixim, ẍi Comam tet ebnaj. 39 Caw tx'i'al anma yul hune' con̈ob ay yul ismajul Samaria tu' chahnicano Comam yul yanma yuto caw wiyom yalni ix haca' ti': “Mayalilo naj wetan yin̈ sunil tzet xale inwatx'ehan,” ẍi ix. 40 Yuxin hayet yapni anma tu' isc'atan̈ Comam, yalni anma tet Comam tato chicancano Comam yul con̈ob tu'. Hac tu' xin yu iscancano Comam cab tz'ayical bey tu'. 41 Caw xin hantan̈eto anma chahnicano Comam yul yanma yet yaben iscuywacanto Comam. 42 Yalni anma tet ix tzotel tet Comam haca' ti': —Wal tinan̈, caw chijaytojan̈ yul janmahan̈, yaj maẍn̈etaj yu tzet maxawal jetan̈, to yu han̈-caw-on̈an̈ majabehan̈ tzet chal Comam, yuxinto caw johtajan̈ ta ha' Comam ti' Cristo, ha' Cocolomal cosunil yul sat yiban̈k'inal ti', ẍi anma tet ix. 43 Yet islahwi cab tz'ayic yec' Comam Jesús bey ismajul Samaria tu' xin, isto Comam bey yul ismajul Galilea. 44 Caw xin halbilxatic'a yu Comam tu' tato caw machi hunu ebnaj ischejab Comam Dios xahan chiillax yul iscon̈ob. 45 Hayet yapni Comam bey Galilea tu' xin, caw c'ul yu ischahlax Comam yu anma, yuto yil anma tzettaj iswatx'e Comam yet yec' k'in̈ Pascua bey Jerusalén, yet isbeyc'o anma yin̈ k'in̈. 46 Yapni Comam Jesús bey yul con̈ob Caná bay elico ha ha' vinohal yu Comam. Ha' bey yul con̈ob Capernaum xin, ay hune' naj niman yelapno ismunil chimunla yinta naj rey, ay xin hune' isc'ahol naj caw tx'oj ye isc'ul yu yabil. 47 Yet yaben naj tato tit Comam Jesús bey Judea yapni bey ismajul Galilea tu', isto naj yilno Comam. Isk'anni naj tet Comam tato chito Comam yila' hune' isc'ahol naj caw how yehico yabil yin̈, lan̈anxa iscami. 48 Yalni xin Comam tet naj haca' ti': —Wal hex ti', tato mach cheyil sunil wipan yeb ej c'aybalc'ule chinwatx'ehan, caw maẍtic'am chinhechahan yul heyanma, ẍi Comam. 49 Yalni naj tet Comam: —Mamin, ton̈ yin̈ an̈e yak' isba maẍto chicam inc'aholan, ẍi naj tet Comam. 50 Yalni Comam tet naj: —Paxan̈to hawatut, cawxa naj hac'ahol, ẍi Comam tet naj. Hac tu' yu yanayto naj yul yanma yin̈ tzet yal Comam, ispaxto naj yatut. 51 Yet ayco naj yin̈ isbel bey con̈ob Capernaum tu', yapni huntek'an ebnaj ismunlawom naj chahwal yin̈ yul beh, yalni ebnaj tet naj: —Cawxa naj hac'ahol, ẍi ebnaj tet naj. 52 Isk'ambenilo naj mame tu' tet ebnaj ismunlawom: —¿Hanic' mawatx'ilo isc'ul inc'aholtu'an? ẍi naj. Yalni ebnaj: —Ewitax yin̈ ch'en hujeb yel k'a' yin̈ naj, ẍi ebnaj. 53 Istxumni naj mame tu' ta haca'tic'a orahil chal ebnaj ismunlawom naj tu', hac tu' orahil yet yalni Comam Jesús tet naj haca' ti': “Cawxa naj hac'ahol tu' tinan̈,” ẍi Comam. Hac tu' xin yu ischahnicano naj Comam Jesús yul yanma yeb sunil mac ay bey yul yatut naj tu'. 54 Ha' hune' c'aybalc'ule ti' iswatx'e Comam yul ismajul Galilea lahwi isbey Comam yin̈ k'in̈ bey Judea. Ha' xin iscab c'aybalc'ule ti' iswatx'e Comam.
1 Lahwi tu' xin, istopaxo Comam Jesús yul con̈ob Jerusalén yin̈ hune' isk'in̈ anma Israel chiec' yul con̈ob tu'. 2 Bey yul con̈ob Jerusalén tu' xin, iscawilal ispultahil bay ch'octo no' me', ha' tu' ay hune' ha ha' ton̈e etxan. Yul abxubal hebreo Betesda isbi hune' ha' tu'. Isti'la ha' tu' xin, aycan̈ howeb n̈a machi yich. 3 Caw xin tx'i'al anma ya'ay hilanejayo yul huntek'an n̈a tu'. Ay mac mach chu yilni, ay xin mac mach chu yeq'ui, aypaxo mac mach chibili isnimanil. Huntek'an anma ya'ay tu' ayco yechman isbilican̈ ha', 4 yuto caw yin̈n̈e istiempohal chihulayti hune' naj ángel isbile ha', macn̈etic'a babel chiayto yet chibilican̈ ha' xin, ha' chian̈chahi, cat yel tzettaj yabilal ayco yin̈. 5 Xol anma ya'ay tu' ayayo hune' naj treinta y ocho habilxa yoc yabil yin̈. 6 Hayet yilni Comam Jesús ta hilanayo naj bey tu', istxumnilo Comam tato caw payxa ichico naj, yalni Comam tet naj: —¿Chimhawoche chaẍan̈chahi? ẍi Comam. 7 Yalni naj tet Comam haca' ti': —Mamin, caw machi hunu mac chinanaytojan xol ha' ti' yet chibilican̈ ha'. Hayet chinaytojan xol ha' walnihan, nan mac chibabayto insatajan, ẍi naj tet Comam. 8 Yalni Comam tet naj xin: —Ahan̈wanoj, ican̈ hawaybal ti', cat hatohi, ẍi Comam tet naj. 9 Yin̈n̈ena tu' iscawxican̈ naj, yoc naj yinocan̈ iswaybal, isto naj xin. Hayet yan̈chacano naj tu', c'uxan istz'ayical xewilal, 10 yuxinto yal ebnaj yahawil yin̈ con̈ob Israel tet naj haca' ti': —Wal tinan̈, caw istz'ayical xewilal, caw mach chu hawijnic'o hawaybal ti', ẍi ebnaj tet naj. 11 Istak'wican̈ naj cawxican̈ tu': —Ha' mac maquinak'ni cawxojan, ha' mahalni wetan haca' ti': “Ican̈ hawaybal, cat xin hatohi,” ẍi wetan, ẍi naj tet naj yahawil tu'. 12 Isk'amben ebnaj tet naj: —¿Mac xin najil mahalni tawet, ta chawican̈ hawaybal cat xin hatohi? ẍi ebnaj. 13 Wal xin caw mach yohtajo naj mac ak'ni cawxo tu', yuto caw hantan̈e anma bey tu', caw xin pet c'aycan̈ Comam Jesús xol anma. 14 Lahwi tu' xin, ischahnayo Comam Jesús naj yul yatut Comam Dios, yalni Comam tet naj: —Wal tinan̈, caw macachcawxiloj. Matxa chawaco yak'bil hamul haxinwal matxa hunuxa isya'tajil caw tx'oj chul tawiban̈, ẍi Comam tet naj. 15 Lahwi tu' xin, isto naj yalno tet ebnaj yahawil yeco yin̈ con̈ob Israel tato ha' Comam Jesús ak'ni cawxo naj. 16 Hac tu' xin, yu yoccano ebnaj yanoco ishowal yin̈ Comam isyayil yak' cawxo Comam hune' naj yin̈ istz'ayical xewilal. 17 Yalni Comam Jesús xin: —Inmaman, maẍtic'a chisbej ismunlahi, yuxin haquintu'an, maẍtic'a chinbejcanojan inmunlahan, ẍi Comam. 18 Hac tu' xin, caw yacanico ebnaj yahawil con̈ob Israel tu' yin̈ isc'ul yak'ni camo Comam Jesús, yuto mach isyije Comam hune' tz'ayic xewilal. 19 Yalni Comam Jesús tet ebnaj: —Yin̈ caw isyelal chiwalcanojan teyet, caw Isc'ahol Dios wehan, yuxin ha' huntek'an chinwatx'eti'an caw mach wetojan inchuquilan. Ha' tzet chak' Inmaman inwatx'ehan, ha' chiwuhan, yuxinto sunil tzet chiswatx'e Inmamtu'an, caw chiyupaxo wuhan. 20 Wal haninti'an, Isc'ahol Dios wehan, caw xin xahan ayinan yu Inmamtu'an. Sunil tzet chinwatx'ehan Inmamtu'an chiyeni wetan. Ayto xin huntek'an tzet caw ay yelapno chisye Inmamtu'an wetan cat inwatx'enan, hac tu' xin chic'ay hec'ul heyilni. 21 Wal Inmamtu'an chiyu yak'ni itzitzbocan̈ camom, cat xin yak'nipaxo isk'inal mach istan̈bal. Haquinpaxtu'an chiwak'an k'inale tet mac bay choche inc'ulan chiwak'an. 22 Machi hunu anma chiyil Inmaman yin̈ tzet chielicoj, walxinto haninan ak'bil wipan yu Inmaman yu wilnihan yin̈ tzet chielico anma. 23 Caw yul ink'aban ayco huntek'an ti' yu Inmaman yun̈e lahann̈e ch'oc inmayan yeb Inmaman. Yaj tato ay anma machi welapnojan yul sat, caw machipaxo yelapno Inmaman yul sat chal tu', yuto Inmamtu'an chejn̈eintijan. 24 Yin̈ caw isyelal chiwalan teyet, macn̈etic'a ch'aben tzet chiwalti'an, cat yanayto yul yanma yin̈ Inmaman chejn̈eintijan, chischah isk'inal mach istan̈bal. Hac tu' xin mach chicawxico ismul yiban̈, caw wiyom yel yul isk'ab naj camical, cat ischahnicano isk'inal yin̈ huneln̈e. 25 Wal hanin Isc'ahol Comam Dios weti'an, caw chiwalcanojan teyet tato chihul istiempohal, ha' ton tinan̈ yet chaben anma camom wawihan; ha' mac chiaben tzet chiwalti'an xin chischah isk'inal mach istan̈bal. 26 Wal Inmaman, ha'tic'a ik'n̈e isk'inal, haquinpaxtu'an win̈an ayco ink'inalan yu Inmaman. Haca' chu yak'ni Inmaman isk'inal anma, hac tu' chu wak'nipaxojan. 27 Chak'nipaxo Inmaman wipan yul ink'aban wilnihan yin̈ tzet chielico anma, ta c'ul maca tx'oj tzet chiswatx'e. Ay hune' wipti'an yuto Hanin Ak'bilintijan texol yu Inmaman. 28 Caw mach cheyak' c'ayo hec'ul yin̈ huntek'an tzet chiwalcanojan teyet ti'. Wal xin caw chiapni istiempohal yet chaben sunil anma camomxa yul innuk'an, cat xin yitzitzbican̈. 29 Macn̈etic'a c'ul tzet iswatx'e yul sat yiban̈k'inal ti', chiitzitzbican̈ cat ischahni hune' isk'inal mach istan̈bal, walpaxo anma caw istx'ojaln̈etic'a hulic'o iswatx'e yul sat yiban̈k'inal ti', chiitzitzbican̈ cat xin ischahni isya'tajil, ẍicano Comam Jesús. 30 Yalnipaxo Comam Jesús tet ebnaj yahawil yeco yin̈ con̈ob Israel: —Wal haninti'an, caw machi hunu ti' chinwatx'ehan yul wetan inchuquilan. Haca' halbil wetan yu Inmaman hac tu' chu wilnihan yin̈ tzet chielico anma, yaja' chiwilan yin̈ tzet chielico yin̈ caw istoholal. Yuxin ha' tzet chal isc'ul Inmaman an̈eintijan, ha' chinwatx'ehan, maẍtaj tzet chiwochehan. 31 Tato han-caw-inan chinocan tzotelo yin̈ sunil tzet chinwatx'ehan, caw matzet chalilo chal tu'. 32 Yaja' ay hune' mac caw chak' isba istzotel win̈an, caw xin wohtajan ta sunil tzet chala caw yeli. 33 Yet hechejnito hechejab tet naj Juan hek'ambeno tzet caw yelapno ye naj, caw isyelal yal naj teyet. 34 Yaj maẍtaj yu wik'ni wipan yin̈ tzet chal anma yuxin chiwalan hune' ti' teyet, machoj, walxinto yu hecolchahi. 35 Naj Juan tu', caw lahan naj haca' hunu cantil ayco k'a' yin̈, nahat chimujli isk'ak'al. Caw hac tu' yu yulic'o naj, yuxintic'a quextzalacan̈ yu naj hanic' tiempohal. 36 Yaja' ay hune' tzet caw ec'bal yelapno ye sata tzet yal naj Juan tu' win̈an, sunilej c'aybalc'ule yak' Inmaman inwatx'ehan, ha' chitzotel win̈an. Ha' xin chiyeniloj tato ha' Inmaman quinanitijan. 37 Ha' Inmaman an̈eintijan ha' chitzotel win̈an, walex hex ti' caw maẍto bay cheyabe istzoteli, caw maẍto chetxumilo mac caw Inmaman. 38 Caw maẍto Istzoti' Inmamtu'an yul heyanma, yuto mach cheyayto yul heyanma win̈an, wal xin ha' Comam Dios an̈eintijan. 39-40 Hex ti' caw cheyil hecuyni Istzoti' Comam Dios, yuto ch'ec' yin̈ henabal ta yin̈ tu' chiilchalo hek'inal mach istan̈bal. Yaja' waxan̈ca Istzoti' Comam Dios tu' chitzotel win̈an, yaja' mach chisje hec'ul chexoc tzujno wintajan yun̈e hechahni hek'inal mach istan̈bal chiwak'ti'an. 41 Maẍtaj yu yalaxico inmayan yu anma yuxin chiwalan huntek'an tzoti' ti'. 42 Wal haca' quexwilniti'an, caw mach cheyoche Comam Dios. 43 Haninti'an caw chejbilintijan yu Inmaman, yaj caw mach cheyabe tzet chiwalan. Wal tato hunuxa naj comon anma chihul yeb yet, wal tu' caw sak'al heyijen sunil tzet chal naj. 44 ¿Tzettic'a chu heyanayto yul heyanma tato hemay cheyaco hununex, wal helanil chitit tet Comam Dios, caw mach chicam hec'ul hesayniloj? 45 Tajca cheyala tato haninti'an chinocan ak'oc'ule yin̈ hemul tet Inmaman, walxinto ha' caw naj Moisés chioc ak'oc'ule teyin̈, naj bay chicawxi hec'ul. 46 Wal xin tato cheyayto yul heyanma yin̈ tzet tz'ibn̈ebilcano yu naj Moisés, chimheyapaxayto yul heyanma win̈an, yuto win̈an chitzotel huntek'an tzet tz'ibn̈ebilcano yu naj. 47 Yaja' tato mach cheyayto yul heyanma yin̈ tzet tz'ibn̈ebilcano win̈an yu naj tu', tzic'anab chiyu heyanayto yul heyanma yin̈ sunil tzet chiwalti'an, ẍi Comam tet ebnaj.
1 Lahwi tu' xin, isto Comam Jesús isk'axepic'to ha' lago Galilea, chiyijpaxo Tiberias. 2 Caw xin hantan̈e anma oc tzujno yinta Comam, yuto yil anma tu' iswatx'en Comam c'aybalc'ule yet iscawxi anma ya'ay yu Comam. 3 Isto Comam Jesús iswi' hune' won̈an yeb ebnaj chicuywi yintaj, yay tz'on̈no Comam yeb ebnaj bey tu'. 4 Toxa xin chiichico k'in̈ Pascua, isk'in̈ ebnaj Israel. 5 Yet yilni Comam xin ta caw hantan̈e anma apni isc'atan̈, yalni Comam tet naj Felipe: —¿Baytu'wal chicolok' tzet chislo sunil anma ti'? ẍi Comam tet naj. 6 Yal Comam hune' ti' yun̈e yaben Comam tzet chiyute yalni naj Felipe. Wal Comam xin, caw yohtaxa tzet chiyu yak'ni wa'o sunil anma tu'. 7 Istak'wi naj: —Waxan̈ca ay cabo ciento denario comelyu chilok'ni tzet chilolaxi, caw maẍtic'am chabe yik'ni anma hunta tx'inano yet, ẍi naj tet Comam. 8 Ay xin hune' naj chicuywi yinta Comam tu', yuẍta isba yeb naj Simón Pedro, Andrés isbi. Ha' naj halni: 9 —Ay hune' naj nich'an coxol ti', ay cac'on̈ no' cay ik'bil yu naj yeb xin howeb ixim pan cebada, yaja' ¿tzet chak' hanic' ti' yin̈ sunil anma? ẍi naj tet Comam. 10 Yalni Comam tet ebnaj iscuywom tu': —Halwe tet sunil anma ayojab tz'on̈noj, ẍi Comam. Caw xin chek'anla sat tx'otx' bey tu', yuxin hacn̈e tu' yu yay tz'on̈no anma sunil. Aymi howebo mil isbisil ebnaj winaj. 11 Yinican̈ Comam ixim pan tu'. Yet lahwi yak'ni Comam yuch'andiosal yin̈ ixim tet Comam Dios, yitxk'anto Comam ixim yin̈ anma tz'on̈an tu'. Hactic'apax tu' yute Comam yin̈ no' cay, yak' Comam hantatic'a caw choche anma. 12 Hayet lahwi isnohcano isc'ul anma tu' xin, yalni Comam tet ebnaj chicuywi yintaj: —Cutxbaweyo sunil ixim matxa malahwi yu anma ti', haxinwal machi ixim chietaxtoj, ẍi Comam. 13 Hac tu' xin yu iscutxbanico ebnaj ixim, caw xin cablahon̈ebto motx ixim matxa lahwi yu anma tu' yin̈ ixim howeb pan cebada. 14 Yet yilni anma hune' c'aybalc'ule iswatx'e Comam Jesús tu', yalni anma haca' ti': —Yin̈ caw yeli, ha' hune' naj ti' ischejab Comam Dios halbilcanoj tato chihul coxol bey yul sat yiban̈k'inal ti', ẍi anma. 15 Isnanilo Comam Jesús tato ch'ec' yin̈ isnabal anma yinito Comam cat yanico anma Comam yahawiloj, yuxinto el Comam xol anma, isto Comam iswi' won̈an ischuquil. 16 Yet yay numnahi yapni ebnaj iscuywom Comam Jesús isti' ha' lago. 17 Lahwi tu' xin yocto ebnaj yul hune' te' barco yun̈e yec' apno ebnaj isk'axepxac'to ha' lago cat yapni ebnaj yul con̈ob Capernaum. Caw xaay numnahi, maẍtotic'a xin chiapni Comam isc'atan̈ ebnaj. 18 Yet bel chu isbarco ebnaj yiban̈ ha' tu', istzabnico yec' hune' niman jak'ek'. Caw nahat chi'ah ha' isbilen jak'ek'. 19 Ayxam xin yictajo iscab legua chito isbarco ebnaj yiban̈ ha' lago tu', yilni ebnaj Comam Jesús belwo chu yiban̈ ha'. Lan̈an xin ishitzico Comam isc'atan̈ te' barco bay ayicto ebnaj tu', isxiwcan̈ ebnaj. 20 Yalni Comam tet ebnaj: —Haninan, mach chexxiwcan̈, ẍi Comam. 21 Yuxinto caw tzalacan̈ ebnaj ischahnicto ebnaj Comam yul barco tu' isc'atan̈. Hunepixto xin, yapni ebnaj isk'axepic'to ha' bay nabilto yu yapni. 22 Haxa yin̈ hunxa tz'ayic xin, yet aytoc'o anma sunil isti' ha' lago tu', isnaniti anma tato xato ebnaj iscuywom Comam yul hune' te' barco ayayo bey tu', han̈e xin te' ayayoj. Isnanipaxti anma ta machi to Comam yinta ebnaj. 23 Ay xin huntek'an te' barco ispeto yul con̈ob Tiberias apni iscawilal bay iswah anma ixim pan yet yak'ni Comam yuch'andiosal yin̈ ixim tet Comam Dios. 24 Yet yilni anma tato matxa Comam Jesús bey tu' yeb ebnaj chicuywi yintaj, yocto anma yul huntek'an te' barco apni bey tu', isto anma saywal yin̈ Comam k'axepxac'to ha' bey yul con̈ob Capernaum. 25 Yet yec' apno anma isk'axepic'to ha' lago tu' yilcha Comam yu anma. Isk'amben anma tu' tet Comam: —Mam cuywawom, ¿hanic' hawul bey ti'? ẍi anma tet Comam. 26 Istak'wi Comam tet anma: —Yin̈ caw isyelal chiwalan teyet, walex hex ti', chinhesayilojan yuto caw noh hec'ul yu ixim pan wak'an hewab. Maẍtaj yu matxumchalo heyu yin̈ tzet chal yelapno ye hune' c'aybalc'ule inwatx'etu'an, ẍi Comam. 27 Yalnipaxo Comam: —Maẍn̈etaj tzet chelo cheyaco yin̈ hec'ul hesayniloj yuto hune' tu' chilahwi. Wal xin ay hune'xa haca' tzet chicolo mach chitan̈iloj, ha' hune' tu' chiak'ni hek'inal mach istan̈bal. Ha' hune' tu' wal heyanico yin̈ heyanma hesayniloj. Hanin Ak'bilintijan texol yu Inmaman, haninan chiwak'an hune' itah, ha' ton k'inale mach istan̈bal, yuto xaisyelo Comam Dios tato haninan sic'bilintijan yu, ẍi Comam Jesús tet anma. 28 Isk'amben anma tet Comam: —¿Tzet xin wal juten cobahan̈ yun̈e cowatx'enan̈ sunil tzet choche isc'ul Comam Dios? ẍi anma. 29 Istak'wi Comam: —Ha' hune' chiyoche Comam Dios to cheyayto yul heyanma win̈an, yuto ha' Comam chejn̈eintijan, ẍi Comam. 30 Yalnipaxo anma tet Comam: —¿Tzet xin hunu c'aybalc'ulehal chaye jila'an̈, yun̈e cachcochahnihan̈ yul janmahan̈? ¿Tzet hunu chawatx'e? 31 Ebnaj jichmaman̈ yet payat, ay hune' c'aybalc'ule ilbil yu ebnaj yet isloni ebnaj maná bey tx'otx' desierto. Haca' yalni Istzoti' Comam Dios bay chal haca' ti': “Yati Comam Dios hune' itah satcan̈ islob sunil anma,” ẍiayoj, ẍi anma tet Comam. 32 Yalni Comam tet anma: —Yin̈ caw isyelal chiwalan teyet, maẍtaj naj Moisés ak'n̈e hune' itah satcan̈il tu' tet ebnaj jichmam yet payat tiempo tu'. Wal xin itah tit yul satcan̈ tu' yechel yin̈ hune' wah caw yeli chak' Inmaman teyet. 33 Hune' wah chak' Comam ti', yul satcan̈ titnaj, ha' xin chiak'ni k'inale mach istan̈bal tet anma, ẍi Comam. 34 Yalni anma tet Comam: —Mamin, ak' hune' wah tu' jetan̈ yin̈ sunilbal tiempo, ẍi anma. 35 Yalni Comam tet anma: —Hanintonan hune' wah tu', yuto chiwak'an k'inale mach istan̈bal. Macn̈etic'a chaco isba yul ink'aban, matxa bak'inal chin̈ohchahi, yeb xin macn̈etic'a chianayto yul yanma win̈an, matxa bak'inal chitajpaxo isti'. 36 Caw xatic'a walan teyet, waxan̈ca caw cheyilico win̈an, yaja' caw mach cheyaco heba yul ink'aban. 37 Wal xin, sunil mac chahti Inmaman wetan, chul yul ink'aban, yuxin mac chihul yul ink'abtu'an caw chinchahan, mach chinman̈c'otojan. 38 Wal haninti'an, quintitan yul satcan̈, yaj maẍtaj yu inwatx'enan tzet chal inc'ulan, wal xin titnajinan yun̈e inwatx'enan tzet chal isc'ul Inmaman chejn̈eintijan. 39 Ha' tzet choche isc'ul Comam chejn̈eintijan yin̈ sunil macta chiyaco yul ink'aban, ta machi hunu mac chic'ayto wuhan, to chiwak' itzitzbocan̈an yet chiapni islahobal tz'ayic. 40 Ha' choche isc'ul Inmaman, to ha' mac chinilnihan ta haninan Isc'ahol Dios wehan, cat yanayto yul yanma win̈an, chischah isk'inal mach istan̈bal. Haxa yet chiapni islahobal tz'ayic, cat wak'ni itzitzbocan̈an xol camom, ẍi Comam. 41 Yet yaben ebnaj yahawil yin̈ ebnaj Israel yin̈ tzet chal Comam tu', yoc ebnaj buchwal yin̈ Comam yuto yal Comam haca' ti': “Haninti'an hune' wah titna yul satcan̈,” ẍi Comam. 42 Yalni ebnaj haca' ti': —¿Tom maẍtaj naj ti' naj Jesús, isc'ahol naj José? Caw johta mac ismam naj yeb ismi' naj. ¿Tzet yin̈ yuxinto chal naj tato yul satcan̈ titna naj? ẍi ebnaj yin̈ Comam. 43 Yalni Comam tet ebnaj: —Bejwe hetzotel win̈an. 44 Caw machi hunu mac chihul yul ink'aban tato maẍtaj Inmaman chichejniti wetan, Comam an̈eintijan. Haninan xin chiwak' itzitzbocan̈an yet islahobal tz'ayic. 45 Tz'ibn̈ebilcano yu ebnaj ischejab Comam Dios yet payat haca' ti': “Sunil mac chicuylax yu Comam Dios,” ẍiayoj. Yuxin sunil mac chiaben tzet chal Comam Dios tu', chitxumchalo yu yin̈ tzet chala, ha' xin chihul yul ink'aban. 46 Caw maẍto hunu mac iln̈e yin̈ Comam Dios Mame hachcachann̈e inan, yuto yul satcan̈ titnajinan, yuxinto caw wohtajan Comam. 47 Yin̈ caw isyelal chiwalan teyet, macn̈etic'a chinchahnihan yul yanma, caw chischah hune' isk'inal mach istan̈bal. 48 Haninti'an ha' ton hune' wah chiak'ni k'inale mach istan̈bal. 49 Ha' ebnaj heyichmam yet payat tu', iswah ebnaj huntek'an maná bey tx'otx' desierto, yaj xin sunil ebnaj xa-le-camtoj. 50 Yaja' mac chiwahni hune' wah titna yul satcan̈, chiwalti'an xin, machi bak'inal chicami. 51 Hanintonan hune' wah itzitz titna yul satcan̈, yuxin macn̈etic'a chiwahni hune' wah ti', caw itzitzn̈etic'a yin̈ sunilbal tiempo. Ha' hune' wah chiwak'ti'an, ha' ton innimanilan chiwak'an yun̈e ischahni anma isk'inal, ẍi Comam Jesús tet anma. 52 Hayet yaben anma Israel huntek'an ti', istzabnico anma isteyelen isba yin̈ tzet yal Comam. Le-yalni anma haca' ti': —¿Tzet chu yak'ni naj ti' isnimanil coc'uxu'? ẍi anma tet hunun. 53 Yalni Comam xin: —Yin̈ caw isyelal chiwalan teyet, haca' tato mach chec'ux innimanilti'an, Hanin Ak'bilintijan texol yu Comam Dios, yeb xin haca' ta mach cheyuc' inchiq'uilan, mach chechah hek'inal mach istan̈bal. 54 Yuxin macn̈etic'a chic'uxni innimanilti'an, cat yuc'ni inchiq'uilti'an, caw chischah isk'inal mach istan̈bal. Hayet islahobal tz'ayic xin chiwak' itzitzbocan̈an xol anma camom. 55 Yuto innimanilti'an lahan haca' wah, ha' chiak'ni k'inale mach istan̈bal, hacpax tu' xin inchiq'uilan haca' tzet chiuc'laxi. 56 Macn̈etic'a chic'uxni innimanilan cat xin yuc'ni inchiq'uilan, caw hunxan̈e chiwucanojan yebi. 57 Comam Dios caw itzitz yin̈ sunilbal tiempo, ha' Comam tu' quinchejnitijan, yuxin itzitz inn̈etic'apaxojan. Hac ton tu' xin, mac chic'uxni innimanilti'an, caw itzitzn̈etic'apaxo wuhan. 58 Hanintonan, hune' wah titna yul satcan̈, yaj mach haca'o maná islo ebnaj jichmam, yuto waxan̈ca islo ebnaj huntek'an maná tu', yaj cam ebnaj. Wal mac chiwahni hune' wah chiwalti'an xin, caw ay isk'inal mach istan̈bal, ẍi Comam. 59 Sunil huntek'an ti' yak' Comam Jesús iscuyu' anma yul iscapilla ebnaj Israel bey yul con̈ob Capernaum. 60 Yet yaben anma chicuywi yinta Comam Jesús huntek'an cuybanile yak' Comam tu', tx'i'al ebnaj halni tet hunun: —Caw ya'ta cochahni huntek'an chal naj ti'. ¿Mactaxca chik'oji isyijeni? ẍi ebnaj. 61 Wal Comam xin, caw yohtaxa tzettaj chal ebnaj tu', yuxin yal Comam haca' ti': —¿Tom caw chicabconcan̈ hec'ul yin̈ tzet chiwalti'an? 62 Wal Hanin Ak'bilintijan texol yu Comam Dios ti', tato cheyil inmeltzohan yul satcan̈ bay titnajinan, ¿tzixam chi-la-heyala'? 63 Ha' Yespíritu Comam Dios ha' chiak'ni k'inale mach istan̈bal, wal conimanil matzet chak'a. Huntek'an cuybanile xawalan teyet tu', yin̈ caw yeli yet Espíritu yehi, ha' chiak'ni k'inale mach istan̈bal. 64 Yaja' ayexto hex ti', maẍto cheyayto yul heyanma yin̈ tzet chiwalti'an, ẍi Comam. Yal Comam haca' tu' yuto caw yohtaxa Comam yet caw yalan̈tocanoj macta mach chianayto yul yanma yin̈ tzet chal Comam. Caw xin yohtaxapaxo Comam mac chianico yul isk'ab ebnaj ayco ishowal yin̈. 65 Yuxinto yalpaxo Comam haca' ti': —Caw chiwalan teyet tato caw machi hunu mac chaco isba yul ink'aban tato maẍtaj Inmaman chichejniti wetan, ẍi Comam. 66 Yet yaben anma tzet yal Comam tu' xin, tx'i'al anma bejnicano yec' yinta Comam. 67 Yuxinto isk'ambe Comam tet ebnaj cablahon̈wan̈ iscuywom: —Haxa hex ti', ¿chimheyoche chextopaxoj? ẍi Comam tet ebnaj. 68 Istak'wi naj Simón Pedro, tet Comam: —Mamin, macc'anab yinta chon̈oc tzujnojan̈, yuto han̈c'an̈e hatzoti' chiak'ni k'inale mach istan̈bal. 69 Wal han̈on̈ti'an̈, caw xajaytojan̈ yul janmahan̈ tawin̈. Caw xin johtajan̈ tato ach ti' Cristo hach, Isc'ahol Comam Dios caw itzitz, ẍi naj Pedro tet Comam. 70 Yalni Comam tet naj: —Wal xin quexinsayilojan hecablahon̈wan̈il, yaj ay hune' hex ti' ayayto naj matzwalil yul yanma, ẍi Comam tet ebnaj. 71 Yet yalni Comam haca' tu', yin̈ naj Judas, isc'ahol naj Simón Iscariote yal Comam. Yuto waxan̈ca ayco naj yetbiho ebnaj cablahon̈wan̈, yaj xin ha' naj anico Comam yul isk'ab camical.
1 Lahwi tu' xin, istzabnico Comam Jesús yec' yul ismajul Galilea. Matxa isje isc'ul Comam ehoyo yul ismajul Judea yuto caw chiyoche ebnaj yahawil yin̈ ebnaj Israel yak'a' camo Comam. 2 Toxa xin chiichico hune' k'in̈ Poy telaj isbi, hune' isk'in̈ anma Israel, 3 yalni ebnaj yuẍta Comam tu' tet: —Mach chaẍcan bey ti', wal xin asi' bey Judea bay caw ay anma chicuywi tawintaj, haxinwal chil anma c'aybalc'ule chi-la-hawatx'e ti'. 4 Yuto ta ay hunu mac choche chiohtan̈elaxi mach chiswatx'e hunu tzet ye tu' bay ewan, yuxin yilal hayeni sunil c'aybalc'ule chi-la-hawatx'e ti' yin̈ sat anma, ẍi ebnaj tet Comam. 5 Hac tu' yute yalni ebnaj yuto mach chayto ebnaj yul yanma yin̈ Comam. 6 Yuxinto yal Comam tet ebnaj haca' ti': —Maẍto chiapni istz'ayical inyenilo inbahan tet anma, wal hex ti', tzijxan̈e tz'ayical c'ul heyenilo heba. 7 Anma yul sat yiban̈k'inal ti' mach chexisyaha, walinan xin caw caj chinillaxan, yuto chiwalan tato caw machiswalil sunil tzet chiswatx'e anma. 8 Asi'we hex ti' yin̈ k'in̈ tu', walinan mach chintohan, yuto maẍto chiapni istiempohal inyenilo inbahan tet anma, ẍi Comam. 9 Yet lahwi yalni Comam huntek'an ti' tet ebnaj xin, iscancano Comam bey Galilea. 10 Yet xato ebnaj yuẍta Comam Jesús tu' yin̈ k'in̈ istopaxo Comam, yaj yin̈ ewantajil. 11 Caw xin chissayic'o ebnaj iswi'ehal ebnaj Israel tu' Comam Jesús yin̈ k'in̈ tu', chalni ebnaj: —¿Baytaxca tu' ay hune' naj winaj tu'? ẍi ebnaj. 12 Caw xin nanantaxan̈e chal anma yin̈ Comam, ay anma chalni: “Caw c'ulcano hune' naj tu',” ẍi. Aypaxo anma chihalni: “Caw machiswalil hune' naj tu', caw ton̈e chiyak' subchaho naj anma,” ẍipaxoj. 13 Yaja' xin caw ewanta chitzotel anma tu' yuto caw chixiw anma tet ebnaj yahawil yin̈ anma Israel. 14 Hayet caw niman k'in̈ tu', yocto Comam Jesús yul yatut Comam Dios, istzabnico Comam iscuyni anma. 15 Caw xin chic'ay isc'ul ebnaj Israel tu' yaben tzet chal Comam. Chi-la-yalni ebnaj haca' ti': —¿Tzet chute hune' naj ti' yohtan̈enilo sunil huntek'an ti'? Yaj mach cuywina naj, ẍi ebnaj yin̈ Comam. 16 Istak'wican̈ Comam tet ebnaj: —Ha' cuybanile chiwalan teyet ti' mach wetojan inchuquilan, yet Comam chejn̈eintijan. 17 Tato ay mac chiyoche chisyije tzet chal Comam Dios, caw yilal istxumniloj tato yet Comam ye cuybanile ti'. Yohtapaxoj ta maẍtaj yul inwi'an inchuquilan chiwitijan cat xin walnihan teyet. 18 Macn̈etic'a yul iswi' chiyiti tzet chiyak' iscuyu' anma, chiyute hune' tu' yun̈e yoc iswinajil sata anma. Wal hanin chejbilintijan yu Comam Dios, ha' yalaxico ismay Comam yu anma ha' chinsayan, yuxin caw isyelal sunil tzet chiwalti'an, caw machi lek'ti'al yin̈. 19 Caw ak'bil isley Comam Dios teyet yu naj Moisés, yaja' machi hunujex cheyije tzet chal hune' ley tu'. ¿Tzet yin̈ yuxinto chinhepotx'an heyalni? ẍi Comam tet ebnaj. 20 Istak'wi ebnaj xin, yalni ebnaj tet Comam: —Etzan̈em ay hunu ischejab naj matzwalil ayco tawin̈. ¿Mac chachak'ni camo hawalni? ẍi ebnaj tet Comam. 21 Yalnipaxo Comam tet ebnaj: —Yu hune' c'aybalc'ule inwatx'ehan yin̈ hune' tz'ayical xewilal caw hesunil chic'ayilo hec'ul yin̈. 22 Hatax ebnaj heyichmam ichencanocan̈ hune' circuncisión, ha' xin naj Moisés chihalni tato caw yilal isyijelaxi. Yuxinto waxan̈ca yin̈ istz'ayical xewilal, cheyak' circuncidar niẍte unin winaj semanahil ixto ispitzc'ahi. 23 Walex hex ti', istz'ayicalojab xewilal masan cheyak' circuncidar niẍte unin yun̈e mach cheman̈c'o isley naj Moisés heyalni. Tato caw hac tu' cheyute, ¿tzet yin̈ yuxinto caw chichiwa hec'ul win̈an yuto yet istz'ayical xewilal wak'ni cawxojan hune' naj? 24 Mach ton̈eho chexoc heyila' yin̈ tzet chiswatx'e anma. Tato cheyoche chexoc heyila' tzet yehi, ilwe yin̈ caw istoholal, ẍi Comam tet ebnaj. 25 Ay xin huntek'an ebnaj ah Jerusalén halni haca' ti': —¿Machmi taj naj ti' chal ebnaj ispotx'o'? 26 Caw yin̈ sat anma lan̈an istzotel naj lah, yaj machi hunu mac chicachni naj istzoteli. ¿Mato xayayto ebnaj jahawil ti' yul yanma tato ha' naj ti' Cristo? 27 Yet chul Comam Cristo tu', machi hunu mac ohtan̈e baytu'wal chi-caw-istiticoj. Wal naj ti' xin caw johtaj baytu'wal titnaco naj, ẍi ebnaj yin̈ Comam. 28 Yet yaben Comam yalni ebnaj haca' tu', ha' ton yet lan̈an iscuywa Comam yul yatut Comam Dios, yalni Comam yin̈ caw ip: —Caw quinheyohtajan heyalni, yeb xin heyohtaj baytu'wal titnaj inpaxojan. Yaja' caw maẍtajinan witi inbahan inchuquilan, wal xin chejbilintijan yu Comam Dios, Comam caw isyelaln̈etic'a chala, yaj mach heyohtajo Comam. 29 Wal inti'an caw wohtajan Comam tu', yuto yin̈ Comam titnajinan, ha' quinanitijan, ẍi Comam. 30 Yet lan̈an yalni Comam hune' tu' xin, ay huntek'an ebnaj yoche inoto Comam yul te', yaj xin machi hunu mac tzabnayo Comam, yuto maẍto chiapni istiempohal bay chicami. 31 Caw xin hantan̈e mac chanayto yul yanma yin̈ Comam, chi-la-yalni haca' ti': —Yet chihul Comam Cristo tu', ¿tom caw ec'balto c'aybalc'ule chisye sata sunil tzet chisye naj ti' jet? ẍi anma yin̈ Comam. 32 Yet yaben ebnaj fariseo tzet yal anma yin̈ Comam Jesús tu', iscutxbanayo isba ebnaj yeb xin ebnaj yahawil sacerdote, ischejnito ebnaj ebnaj mayor chitan̈en yatut Comam Dios yu istzabnayo ebnaj Comam, cat yanicto Comam yul preso. 33 Yalni Comam haca' ti': —Hanic'xan̈ech'an tiempohal ayinic'ojan texol, cat xin inpaxtojan isc'atan̈ Comam chejn̈eintijan. 34 Hex ti' chexoc saywal win̈an, yaj matxa chinilchahan heyu, yuto mach chu heyapni bay chinapnitu'an, ẍi Comam tet ebnaj. 35 Yichico ebnaj yahawil con̈ob Israel tu' isk'amben tet hunun haca' ti': —¿Baytaxca tu' chito naj ti', yuxin chal naj tato matxa chiilcha naj ju? Ay ebnaj jet con̈ob pujanto xol ebnaj griego, ¿ham tu' chito naj cuywal xol ebnaj, cat yoc naj iscuyno ebnaj griego tu' yalni? 36 ¿Tzet caw chalilo hune' chal naj ti': “Chinhesaya'an, yaj matxa chinilchahojan heyu, yuxinto mach chiyu heyapni bay chinapnitu'an?” ẍi naj, ẍi ebnaj yin̈ Comam. 37 Ha' islahobal tz'ayic k'in̈ tu', ha' caw ay yelapno ye yul sat anma Israel. Yin̈ hune' tz'ayic tu' xin, ah lin̈no Comam Jesús, yalni Comam yin̈ caw ip haca' ti': —Maquex chitaj heti' titan̈we inc'atan̈an, cat heyuc'ni hune' ha ha' chiwak'an. 38 Haca' yalni yul Yum Comam Dios bay chala: “Ha' mac chianayto yul yanma win̈an, haca' chiyu ispitzc'a isnuk' ha ha' chiel yojomal, hac tu' chiyu ispitzc'a isnuk' ha' yet k'inale yul yanma,” ẍiayoj, ẍi Comam tet ebnaj. 39 Yal Comam Jesús hune' ti' yin̈ Comam Espíritu Santo chischah macta chianayto yul yanma yin̈ Comam. Yet hune' tiempohal tu' xin, maẍto chiayilo Comam Espíritu Santo isyayil maẍto chiilaxto Comam yul satcan̈. 40 Yet yaben anma cutxanico tu' yin̈ tzet yal Comam Jesús, ay anma halni haca' ti': —Yin̈ caw yeli, ha' naj ti' ischejab Comam Dios halbilcanoj ta chuli, ẍi. 41 Aypaxo mac halni haca' ti': —Ha' ton naj ti' Cristo, echmabil yul ju, ẍi. Aypaxo hune'xa majan anma halni: —Naj Cristo tu', ¿tom Galilea chitit naj heyalni? 42 Chal yul Yum Comam Dios tato ha' bey yul con̈ob Belén, yul iscon̈ob naj rey David chipitzc'a naj Cristo tu', yuto yuninal yuninal naj rey David ye naj, ẍi hunmajanxa anma. 43 Hac tu' yu ispohnito isba anma yu Comam. 44 Aypaxo ebnaj xin etza inito Comam yul preso, yaj machi hunu mac yaco isk'ab yin̈ Comam. 45 Haxa yet ismeltzo ebnaj chitan̈en yatut Comam Dios isc'atan̈ ebnaj fariseo, isk'amben ebnaj tet ebnaj: —¿Tzet yin̈ yuxinto machi maxeyiti naj Jesús tu'? ẍi ebnaj. 46 Yalni ebnaj chitan̈en yatut Comam Dios tu' haca' ti': —Caw machi hunu mac caw helan istzotel haca' istzotel naj, ẍi ebnaj yin̈ Comam. 47 Yalni xin ebnaj fariseo tu' tet ebnaj: —¿Tom ha' hunex cheyak' subchaho heba tet hune' naj tu'? 48 ¿Tom ay hunu ebnaj yahawil chianayto yul yanma yin̈ tzet chal naj, maca hunujon̈an̈ han̈on̈ fariseo on̈ti'an̈? 49 Han̈c'an̈e huntek'an anma caw mach yohtajo isley naj Moisés, ha' chisubcha yu naj, yaja' xin chiay isya'tajil yiban̈ huntek'an anma tu' yu Comam Dios, ẍi ebnaj. 50 Ay xin hune' naj fariseo Nicodemo isbi, naj beyc'o tzotelo tet Comam yin̈ hune' ak'balil, ha' naj xin halni tet ebnaj yetbi tu': 51 —Ha' chiyute yalni coley tato mach chu iscawxico ismul hunu naj yiban̈ yalan̈to maẍto chijabe tzet chal naj, yun̈e johtan̈eniloj tzet iswatx'e naj, ẍi naj Nicodemo tu'. 52 Yuxinto yal ebnaj yetbi naj tu' tet: —¿Tom ah Galilea hachpaxoj? Wal xin say yul Istzoti' Comam Dios cat hawilni tato ay hunu ischejab Comam Dios chitit bey Galilea tu', ẍi ebnaj. 53 Lahwi tu' xin, ispaxto ebnaj yatut.
1 Wal Comam Jesús xin to Comam bey hune' won̈an, Olivo isbi. 2 Yin̈ hune'xa tz'ayical xin, yapni Comam hunelxa yul yatut Comam Dios yin̈ caw sahab sac'ayal. Caw xin hantan̈e anma apni isc'atan̈ Comam. Lahwi tu' xin, yay tz'on̈no Comam istzabnico iscuyni anma tu'. 3 Hunepixto xin yiniti ebnaj fariseo yeb ebnaj chicuyni anma yin̈ isley naj Moisés hune' ix ix tet Comam. Caw c'uxan ischahlo ix yin̈ ismul yu ebnaj. Yalaxico ix xol anma cutxanico isc'atan̈ Comam tu'. 4 Yalni ebnaj tet Comam: —Mam cuywawom, machahlo hune' ix ti' juhan̈ isc'atan̈ iswinaj. 5 Wal xin, chal isley naj Moisés tato ebix ix tx'oj ye iswi' haca' hune' ix ti', yilal isk'ojlax camo ebix, yaja' ¿tzimi chawute hawalnipaxo hach ti'? ẍi ebnaj tet Comam. 6 Yal ebnaj haca' tu' yun̈e yilwen ebnaj Comam, yeb yun̈e yayc'ay Comam yin̈ hunu istx'ojal, cat xin yoc ebnaj ak'oc'ule yin̈ Comam, chute yalni. 7 Yaj xin ton̈e ay c'on̈no Comam, istzabnico istz'ibli sat tx'otx' yu yiximal isk'ab. Ayn̈etic'aco xin ebnaj isk'amben tet Comam tzet caw chielcanico ix, yuxinto ah t'an̈no Comam, yalni haca' ti': —Macn̈etic'a caw machi nich'ano ismul texol, ha'ojab babel ch'ak'ni ch'en k'ojbal yin̈ ix, ẍi Comam. 8 Lahwi tu' yaypaxo c'on̈no Comam, istzabnico istz'ibli sat tx'otx' hunelxa. 9 Yet yaben ebnaj tzet yal Comam tu', istxumni isba yanma ebnaj ta machi hunu ebnaj c'ul, yuxin hununtajil yu yel ebnaj isc'atan̈ Comam. Babel el ebnaj ec'na ichamtaxa, lahwi tu' istopaxo ebnaj tzehtaj. Hac tu' yu iscancano Comam ischuquil yeb ix tu'. 10 Lahwi tu' xin, yah lin̈no Comam, isk'amben Comam tet ix: —Ix, ¿baytu'wal ay ebnaj chiak'wi c'ule tawin̈? ¿Tom caw machi hunu ebnaj macachk'ojnican̈ yu ch'en ch'en? ẍi Comam tet ix. 11 —Macho Mamin, machi hunu maca, ẍi ix tet Comam. —Haquinpaxtu'an, mach chiwalan ta chaẍk'ojlax camo yu hamul. Asi' xin, matxa chawaco hamul hunelxa, ẍi Comam tet ix. 12 Yalnipaxo Comam tet anma hunelxa: —Wal haninti'an, caw haca' issajilk'inal wehayojan xol anma yul sat yiban̈k'inal ti'. Macn̈etic'a ch'oc tzujno wintajan chiwak'an issajilk'inal yul yanma. Yu hune' issajilk'inal ti' xin, chischah isk'inal mach istan̈bal. Matxa xin chiec' xol k'ejholo, ẍi Comam. 13 Yalni ebnaj fariseo xin: —Caw matzet chalilo tzet chawal ti', yuto hach ti', hach caw chachtzotel tawin̈, ẍi ebnaj tet Comam. 14 Istak'wi Comam: —Waxan̈ca caw han-caw-inan chiwalan yin̈ tzet wehan, yaj caw isyelal sunil tzet chiwalan. Yuto haninti'an wohtajan baytu'wal titnajinan, caw wohtapaxojan baytu'wal chi-caw-intocojan. Walex hex ti', caw mach heyohtajo baytu'wal titnajinan, yeb baytu'wal chintopaxojan. 15 Walex hex ti', caw comonn̈etic'a chexoc heyila' tzet ye anma, yaj walinan mach ton̈etic'aho chinocan wila'an tzet chielico anma. 16 Yaja' yet chiwilnihan yin̈ tzet chielico anma, chiwilan yin̈ caw istoholal, yuto mach inchuquilojan chiwilan tzet chielico anma, to ha' hun Inmaman an̈eintijan, ha' chiilni tzet chielico anma wintajan. 17 Chal hecuybanil tato ay cawan̈o testigo lahan yalni yin̈ hunu tzet ye tu', caw yel hune' tu' chal tu'. 18 Ilwec'anab xin, ay cawan̈ mac chak' testigohal. Caw testigo wehicojan win̈an, yeb xin Inmaman an̈eintijan ha' chitzotel win̈an, ẍi Comam tet ebnaj. 19 Lahwi tu' xin isk'amben ebnaj tet Comam: —¿Baytu'wal ay hamam tu' xin? ẍi ebnaj. Istak'wi Comam tet ebnaj: —Hex ti', mach quinheyohtajojan, caw xin mach heyohtajo Inmamtu'an. K'inalo tato quinheyohtajan, heyohtapaxo Inmaman, ẍi Comam. 20 Hayet iscuywa Comam Jesús yul yatut Comam Dios yalnicano Comam huntek'an ti', iscawilal bay chibey anma yak'a'cano yofrenda. Yaj xin machi hunu mac tzabnayo Comam, yuto maẍto chiapni istz'ayical bay chicami. 21 Yalnipaxo Comam Jesús hunelxa: —Haninti'an chintohan, wal xin chinhesaya'cojan yaja' mach chinilchahan heyu, yuto mach chu heto bay chintotu'an. Walex hex ti' yin̈ hemul chexcamcantoj, ẍi Comam. 22 Yuxin yal ebnaj yahawil yin̈ con̈ob Israel: —¿Tom xin chispotx' isba naj, yuxinto chal naj tato caw mach chu japni bay chiapni naj tu'? ẍi ebnaj yin̈ Comam. 23 Yalnipaxo Comam tet ebnaj: —Walex hex ti', caw yet sat tx'otx'al heyehi, wal inti'an yet satcan̈ wehan, caw yet yul sat yiban̈k'inal ti' heyehi, wal inpaxojan mach yeto sat yiban̈k'inal ti' wehan. 24 Yuxinto caw chiwalan teyet tato yin̈ hemul chexcami, yuto mach chechayto yul heyanma tato haninan hune' haca' chiwute walnihan teyet, yuxinto caw yin̈ hemul chexcamtoj, ẍi Comam tet ebnaj. 25 Isk'ambenpaxo ebnaj tet Comam: —¿Mac hach anmahil chal tu'? ẍi ebnaj. Yalni Comam tet ebnaj: —Halbilxatic'a teyet wuhan yet yalan̈tocanoj mac anmahilinan. 26 Caw hantan̈e tzet chiwalan teyin̈ yet chiwilnihan yin̈ tzet chexelicoj. Yaj Comam an̈eintijan texol ti', caw yin̈ isyelal chitzoteli. Yuxinto ha' tzet halbil wetan yu, ha' chiwalpaxojan tet anma ay yul sat yiban̈k'inal ti', ẍi Comam. 27 Yaj xin caw maẍtic'a txumchalo yu ebnaj tato ha' Comam Dios chal Comam. 28 Yuxinto yal Comam tet ebnaj: —Hayet chinheyanican̈an yin̈ te' culus, ha' to tu' chitxumchalo heyu tato Hanin Ak'bilintijan texol yu Comam Dios, cat xin heyohtan̈eniloj tato mach wetojan inchuquilan sunil tzet chiwalti'an. Wal xin ha' tzet chal Inmaman wetan, ha' chiwalan. 29 Ha' Comam an̈eintijan, ha' ayco wetbihojan. Caw mach chinisbejcanojan inchuquilan, yuto han̈c'an̈e tzet choche isc'ul chinwatx'ehan yin̈ sunilbal tiempo, ẍi Comam tet ebnaj. 30 Yet yalni Comam huntek'an tu', caw hantan̈e anma chahni Comam yul yanma. 31 Yalni Comam Jesús tet anma Israel chahni Comam yul yanma: —Tato caw huneln̈e cheyayto yul heyanma yin̈ tzet chiwalan, yin̈ caw yeli incuywoman heyehi. 32 Hac tu' xin chu heyohtan̈enilo isyelal; ha' isyelal tu' xin, ha' chexcolnicanoj, ẍi Comam. 33 Yalni ebnaj tet Comam: —Han̈on̈ti'an̈ jichmaman̈ ye icham Abraham, caw machi hunelo con̈txon̈laxan̈ tet anma. ¿Tzet yin̈ yuxinto chawala “chexcolchacanoj?” cachi, ẍi ebnaj. 34 Istak'wi Comam tet ebnaj: —Yin̈ caw yeli chiwalan teyet, mac caw mach chisbejcano yanico ismul, caw txon̈bil isba tet mule. 35 K'inalo hunu naj txon̈bil chejabo tet huno yahaw tinan̈, mach chiyu yoc naj yetbiho yuninal naj yahawil tu' yin̈ huneln̈e. Wal haca' naj c'ahole xin, caw yetbitic'a isba naj yeb ismam yeb ismi' yeb ej yuẍtaj. 36 Yuxin tato haninan chexincolilojan yin̈ hemul, yin̈ caw yeli chexcolchacanoj yuto caw Isc'ahol Dios wehan. 37 Caw wohtajan tato heyichmam icham Abraham, yaj caw cheyoche quinhepotx'o'an, yuto mach cheyoche heyabe' cuybanile chiwak'ti'an. 38 Ha' tzet wilan bey Inmamtu'an, ha' chiwalan teyet, walex hex ti' caw nan hemam, yuxinto ha' tzet chal hemam tu' ha' chewatx'e, ẍi Comam tet ebnaj. 39 Istak'wipaxo ebnaj: —Wal han̈on̈ti'an̈, comaman̈ jichmam Abraham, ẍi ebnaj. Istak'wi Comam: —Tato caw yel cheyala hemam ye icham Abraham tu', ham tzet iswatx'e icham, ha' chewatx'e. 40 Wal xin waxan̈ca ha' caw isyelal halbil wetan yu Comam Dios ha' chiwalan teyet, yaj caw cheyoche quinheyak'a' camojan. Wal icham Abraham cheyal ti', machi hunelo yute isba icham haca' hex ti'. 41 Ha'tic'a tzet chiswatx'e hemam, ha' cheyupaxoj, ẍi Comam tet ebnaj. Yuxinto yal ebnaj: —Wal han̈on̈ti'an̈, mach matn̈ebilon̈an̈, wal xin hune'ch'an comaman̈, ha' ton Comam Dios, ẍi ebnaj. 42 Yalnipaxo Comam: —Tato yeli hemam Comam Dios tu', xahanmi chinheyilan, yuto ha' bay ay Comam Dios titnajinan yet wulan bey ti', Maẍtajinan witi inbahan inchuquilan, ha' Comam Dios chejn̈eintijan. 43 ¿Tzet yin̈ xin mach chitxumchalo tzet chiwalti'an heyu? 44 Walex hex ti', ha' naj matzwalil, ha' naj caw hemam, yuto hatzet choche isc'ul naj, ha' caw choche hec'ul hewatx'e'. Naj matzwalil tu', caw potx'om anma naj yichtaxtic'a yul naj sat yiban̈k'inal ti'. Caw maẍtic'a isyelal yin̈ naj, yuxin sunil tzet chiahti yul isti' naj mach yeloj. Hayet chanico naj lek'ti'al, ha' tzet ye naj ha' chal naj, yuto caw lek'ti' naj; caw ismam lek'ti'wom naj. 45 Wal haninti'an, ha' caw isyelal chiwalan, yuxinto caw mach cheyayto yul heyanma tzet chiwalti'an. 46 ¿Mac hunujex ti' tinan̈ chiyu heyalnico yin̈ insatan tato ay inmulan? Wal xin, caw isyelal sunil tzet chiwalti'an, yaj ¿tzet yin̈ xin mach cheyayto yul heyanma? 47 Ha' mac yet Comam Dios yehi, caw choche yabe' Istzoti' Comam. Walex hex ti' xin, mach yeto Comam Dios heyehi, yuxinto mach chiyoche hec'ul heyabe' Istzoti' Comam, ẍi Comam tet ebnaj. 48 Yalni ebnaj yahawil yehico yin̈ anma Israel tu' tet Comam Jesús: —Ha' ye juhan̈ chijalnihan̈ ta ah Samaria hach, yeb ta ayco hune' ischejab naj matzwalil tawin̈, ẍi ebnaj tet Comam. 49 Istak'wi Comam Jesús xin: —Machoj, machi huno ischejab naj matzwalil ayco win̈an, walxinto ha' wanicojan ismay Inmaman ha' chiwuhan, walex hex ti' chinhehincaniltojan. 50 Wal haninti'an, maẍtaj yalaxico inmayan chinsayan; waxan̈ca ay hune' Mac chianico inmayan, ha' hune' tu' xin chihalnoj Mac caw yel chala. 51 Yin̈ caw isyela chiwalan teyet, macn̈etic'a chiyijen tzet chiwalti'an, machi bak'inal chicami, ẍi Comam tet ebnaj. 52-53 Yalni ebnaj: —Wal xin caw yel chijalan̈ tato ayco hunu ischejab naj matzwalil tawin̈. Icham Abraham yebpaxo xin ebnaj ischejab Comam Dios yet payxa, sunil ebnaj camnatoj. Wal chawute hawalnipaxo xin: “Macn̈etic'a chiyijen tzet chiwalan maẍtic'a chicamtoj,” cachi. ¿Tom caw ec'bal hach to sata jichmam Abraham tu'an̈ yeb sunil ebnaj ischejab Comam Dios ec'lena yet payat tiempo tu'? ¿Tzet yelapno hawe hawalni? ẍi ebnaj tet Comam. 54 Yuxinto yalpaxo Comam tet ebnaj: —Tato han-caw-inan chiwican̈ inbahan, caw matzet chalilo hune' tu', yaj wal xin ha' caw Inmaman chianico inmayan. Ha' Inmamtu'an xin, ha' cheyal heDiosaloj. 55 Yaj hex ti', mach heyohtajo Inmamtu'an, walinan, caw wohtajan. Yaj tato chiwalan ta mach wohtajojan Inmamtu'an, lahanmi inlek'ti'alan yeb hex chal tu'. Wal xin caw chiwalan caw wohtajan Inmaman, yuxinto sunil tzet chal Inmaman wetan chinyijehan. 56 Icham heyichmam Abraham tu', caw tzala isc'ul icham yet yabeni ta chinhulan. Hayet isyelax tet icham xin, caw tzalacanocan̈ isc'ul icham sic'lebil, ẍi Comam tet ebnaj tu'. 57 Yalnipaxo ebnaj tet Comam: —Hach ti', maẍto hach yin̈ cincuenta habil, cat xin hawalni ta hawil icham Abraham tu': 58 Yalni Comam: —Yin̈ caw isyelal chiwalan teyet, yettax yalan̈to maẍto chipitzc'a icham Abraham tu', ay inxatic'ahan, ẍi Comam. 59 Hac tu' xin, yu yinican̈ ebnaj ch'en ch'en yun̈e isk'ojni camo ebnaj Comam yalni. Yaj yebato isba Comam tet ebnaj, yelti Comam yul yatut Comam Dios tu'.
1 Yet yec' Comam Jesús yin̈ isbel hunel, yilni Comam hune' naj caw maẍtic'a chu yilni yettaxtic'a ispitzc'ahi. 2 Isk'amben ebnaj chicuywi yinta Comam tu': —Mam cuywawom, ¿tzet yin̈ yuxin mutz'an sat hune' naj ti' yet ispitzc'a naj? ¿Tom yu ismul ismam naj mato yu ismul naj? ẍi ebnaj tet Comam. 3 Yalni Comam xin: —Maẍtaj yu ismul ismam naj yeb ismi' naj, maẍtajpaxo yu ismul naj yuxinto hac tu' ye naj. Wal xin Comam Dios caw choche isc'ul chisyelo yip yin̈ naj, yuxinto hac tu' ye naj. 4 Caw yilal inwatx'enan ismunil Comam an̈eintijan yak' isba tz'ayical to yuc'a' chiah ak'bal yet matxa chu comunlahi. 5 Yak' isba ay intoc'ojan yul sat yiban̈k'inal ti' caw haca' issajilk'inal wehayojan xol sunil anma, ẍi Comam. 6 Yet lahwi istzotel Comam xin, istzublayo Comam sat tx'otx', issomni Comam nich'an tz'otz'ew yu isk'ab, lahwi tu' xin ismasnico Comam yin̈ isbak'sat naj mutz'an sat tu'. 7 Yalni Comam tet naj: —Asi' bey ha' Siloé, hune' ha' etxan, cat xin hatx'ahnilo hasat, ẍi Comam tet naj. (Siloé chiyal yelapnoj Ak'biltij.) Hac tu' xin yu isto naj bey ha' Siloé tu', istx'ahni naj sat xol ha'. Haxa yet ispaxti naj xin, xayu yilni naj. 8 Yuxin ha' anma ayayo yatut iscawilal naj yeb huntek'anxa anma ohtan̈e naj, yal haca' ti': —¿Cochan ha' naj ti' chiec' tz'on̈la k'ano melyu? ẍi anma tu' yin̈ naj. 9 Ay mac xin halni: —Ho', ha' naj ti', ẍi anma. Aypaxo mac halni: —Machoj, maẍtaj naj, yaj etza hac ti' jilni naj, ẍipaxoj. Wal naj xin yal naj: —Ho', hanin-ton-an, ẍi naj. 10 Yoc anma isk'ambeno tet naj: —¿Tzet xin mayu ishajlo hasat? ẍi anma. 11 Yalni naj xin: —Hune' ya', Jesús isbi, ha' ya' somni nich'an tz'otz'ew, ismasnico ya' yin̈ insatan. Lahwi tu' xin, yalni ya' wetan: “Asi' bey ha' Siloé, cat hatx'ahnilo hasat xol ha',” ẍi ya' wetan. Hac tu' yu intohan intx'ahnolojan insatti'an; lahwi tu' xin ishajlo insatan, ẍi naj. 12 Isk'amben ebnaj tet naj: —¿Baytu'wal xin ay naj tinan̈? ẍi ebnaj. —Caw mach wohtajojan, ẍi naj. 13 Lahwi tu' xin, yilaxto naj mutz'antic'a sat tu' tet ebnaj fariseo. 14 Yet iswatx'en Comam nich'an tz'otz'ew yun̈e ishajlo sat naj tu', caw c'uxan istz'ayical xewilal. 15 Yuxinto ocpaxo ebnaj fariseo tu' isk'ambe' tet naj hunelxa: —¿Tzet yu ishajlo hasat ti'? ẍi ebnaj tet naj. Istak'wi naj: —Ya' Jesús masnico nich'an tz'otz'ew yin̈ insatan, lahwi tu' xin intohan intx'ahnolojan; hac tu' xin yu ishajlo insatan, ẍi naj. 16 Ay xin ebnaj fariseo halni: —Hune' naj tu', caw mach yeto Comam Dios ye naj yuto mach chisyije naj istz'ayical xewilal, ẍi ebnaj yin̈ Comam. Yaj ay ebnaj halnipaxoj: —Ya' Jesús tu', mach mulumo ya'. Wal xin tato mulum ya', ¿tom chiyu isyeni ya' hunu c'aybalc'ule haca' chisye ti'? ẍi ebnaj. 17 Yocpaxo ebnaj fariseo isk'ambeno tet naj maẍtic'a chiyu yilni tu': —Haxa hach ti', ¿tzet chawute hawalni yin̈ naj ak'ni hajlo hasat ti'? ẍi ebnaj. Yalni naj haca' ti': —Ha' hune' chiwute walnihan, to caw ischejab Comam Dios ye ya', ẍipaxo naj tet ebnaj. 18 Yaj caw maẍtic'a yaco ebnaj yahawil con̈ob Israel tu' yin̈ isc'ul tato hajlo sat hune' naj tu' yu Comam. Ha' yute isnani ebnaj to caw c'ultic'a ye sat naj, yuxinto awtelax ismam naj yeb ismi' naj yu ebnaj. 19 Isk'amben ebnaj tet ismam naj yeb ismi' naj haca' ti': —¿Ham naj ti', heyuninal cheyala tato caw maẍtic'a chu yilni yet ispitzc'ahi? ¿Tzet yu ishajlo sat naj? ẍi ebnaj. 20 Istak'wi ismam naj yeb ismi' naj: —Caw yeli juninalan̈ naj, caw yelpaxoj maẍtic'a chiyu yilni naj yet ispitzc'a naj. 21 Yaj caw mach johtajojan̈ tzet yu ishajlo sat naj, yeb xin mach johtapaxojan̈ mac ak'ni hajloho sat naj. ¡K'ambewe tet naj yuto ichamxa naj, chiyu yalni naj teyet! ẍi ismam naj yeb ismi' naj tet ebnaj tu'. 22 Wal xin, hac tu' yute yalni ismam naj yeb ismi' naj yuto caw chixiw tet ebnaj yahawil yehico yin̈ con̈ob Israel, yuto halbil yu ebnaj haca' ti': “Macn̈etic'a chihalni tato ha' naj Jesús ti' Cristo, matxa chicochacti yul capilla ti',” ẍi ebnaj. 23 Yuxinto hac tu' yute yalni ismam naj yeb ismi' naj: “K'ambewe tet naj, ichamxa naj, xayu yalni naj teyet,” ẍi. 24 Lahwi tu' xin, yawtenpaxti ebnaj naj hajlo sat tu' hunelxa, isk'amben ebnaj tet naj: —Caw chabe Comam Dios caw halilo isyelal jetan̈, wal xin caw johtajan̈ ta caw mulum hune' naj chawal ti', ẍi ebnaj tet naj. 25 Yalni naj xin: —Haninti'an, caw mach wohtajojan tato mulum ya' maca machoj, yuxin mach chiyu walnihan teyet; hachcachann̈e wohtajan to maẍtic'a chiyu wilnihan yet yalan̈tocanoj, wal tinan̈ xin xayu wilnihan, ẍi naj tet ebnaj. 26 Isk'amben ebnaj hunelxa: —¿Tzet caw caẍyute naj? ¿Tzet caw yu ishajlo hasat ti' yu naj? ẍi ebnaj. 27 Yalni naj xin: —Caw mawalan teyet, yaj to caw mach cheyaco yin̈ hec'ul. ¿Tzet yin̈ xin cheyoche chiwalan teyet hunelxa? ¿Mato cheyoche chexocpaxo cuywo yinta ya'? ẍi naj tet ebnaj. 28 Yet yalni naj haca' tu', istzabnico ebnaj isbahni naj, yalni ebnaj tet naj: —Hach ti', ayachxaco yinta naj, wal han̈on̈ti'an̈ yinta iscuybanil naj Moisés tzujanon̈an̈. 29 Walon̈ti'an̈ caw johtajan̈ tato ha' caw Comam Dios anicano cuybanile tet naj Moisés tu'. Wal naj chawal ti', caw mach johtajojan̈ baytu'wal titnaco naj, ẍi ebnaj. 30 Istak'wican̈ naj tet ebnaj xin: —Caw chic'ay inc'ulan yuto cheyala tato mach heyohtajo bay titnaco ya', yaja' caw cheyila hajlo insatan yu ya'. 31 Caw johtaj tato mach chabe Comam Dios tzet chisk'an anma mulum, hachcachann̈e anma caw ayco yanma yin̈ Comam, cat yinayo isba tet, hachcachann̈e huntek'an anma tu' chak' Comam ispaj tzet chisk'ana'. 32 Wal xin, caw maẍto bay chijabe isk'umal tato ay huno mac chiyu yak'ni hajloho sat hunu anma maẍtic'a chiyu yilni yettaxtic'a ispitzc'ahi. 33 Tato maẍtaj Comam Dios an̈eti ya' ti', caw machim nino tzet chiyu iswatx'en ya', ẍi naj tet ebnaj. 34 Istak'wi ebnaj tet naj: —Walach hach ti', caw mulumach yettaxtic'a hapitzc'ahi. ¿Tom chaẍoc con̈hacuyu'an̈ hawalni? ẍi ebnaj tet naj, hac tu' yu istennilti ebnaj naj tu' yul capilla. 35 Yabe Comam Jesús tato tenlaxilti naj hajlo sat tu' yul capilla, haxa yet ischahloyo naj yu Comam, yalni Comam tet naj haca' ti': —¿Chimhawayto yul hawanma yin̈ Hanin Ak'bilintijan texol yu Comam Dios? ẍi Comam tet naj. 36 Isk'amben naj tet Comam: —Mamin, ¿mac hune' chawal tu'? Hal wetan cat xin wanico wanmahan yin̈, ẍi naj. 37 Yalni Comam tet naj: —Caw xahawil yin̈; Hanintonan hune' mac bay lan̈an hatzotel ti', ẍi Comam tet naj. 38 Yet yaben naj haca' tu', yay jahno naj yin̈ sat Comam, yalni naj: —Caw chiwaco wanmahan tawin̈ Mam, ẍi naj. 39 Yalni Comam tet naj: —Wal haninti'an, hulnajinan bey yul sat yiban̈k'inal ti' yun̈e wilnihan tzettaj chi'elico anma, yuto ay anma ti' caw mach chiyu yilni, yaj xin haninan chiwak' hajlohojan sat. Aypaxo anma caw c'ul yilni, yaj chimutz'icano sat wuhan yun̈e matxa chiyu yilni, ẍi Comam. 40 Ay xin huntek'an ebnaj fariseo ayco isc'atan̈ Comam, yet yaben ebnaj yin̈ tzet yal Comam tu', yalni ebnaj: —¿Tom xin ha' hunon̈an̈ mach chiyu jilnihan̈ hawalni? ẍi ebnaj. 41 Istak'wi Comam tet ebnaj: —K'inalo tato mach chiyu heyilni tzettaj ye tu' yet Comam Dios yehi, caw machim hemul. Yaj cheyala tato caw chiyu heyilni tzettaj ye tu' yet Comam Dios, yaj mach cheyijepaxoj, yuxinto caw ay hemul, ẍi Comam tet ebnaj.
1 Yalnipaxo Comam Jesús: —K'inaloj ta ay hunu ispeyabil no' me', cat yocto hunu naj yul, nan bay xin chisholicto isba naj; yin̈ caw isyelal chiwalan teyet, caw elk'om hune' naj tu'. 2 Wal naj chi'octo yul ispultahil ispeyab no' tu', ha' ton naj tu' chitan̈en no'. 3 Ha' naj chiwayn̈en no' xin chishaj naj ispultahil ispeyabil no' tet naj, cat yocto naj isc'atan̈ no'. Caw sunil no' k'ayna yaben yul isnuk' naj. Caw hununtajil yawtenilti naj no', yuto ay isbi hunun no' yu naj, hac tu' xin chiyu ishajnilti naj no'. 4 Yet chilahwi yinilti naj isme' tu', cat xin isbabi naj sata no', cat yoc tzujno no' yinta naj, yuto caw yohta no' yul isnuk' naj. 5 Yaja' wal ta hunu naj comon, mach ch'oc tzujno no' yinta naj; chixiwilo no' tet naj yuto mach k'aynajo no' yaben yul isnuk' naj, ẍi Comam tet ebnaj. 6 Yal Comam hune' yechel ti' tet ebnaj, yaj maẍtic'a txumchalo yu ebnaj tzet caw yelapno yehi. 7 Yalnipaxo Comam Jesús: —Yin̈ caw yeli chiwalan teyet, haninti'an haca' ispultahil ispeyab no' me', caw hac tu' wehan. 8 Yet yalan̈to yet maẍto chinhulan, ay ebnaj hulic'o yanico isba ebnaj hecolomaloj. Ha' huntek'an ebnaj tu' xin, caw lahan ebnaj haca' hunu naj elk'om chiocto yul ispeyabil no' me' tu', yaj wal anma caw yettic'a Comam Dios ye xin, caw maẍtic'a ishajba istxiquin yin̈ tzet yal ebnaj. 9 Haninti'an, lahaninan haca' ispultahil ispeyabil no' me', macn̈etic'a chiocto yul hune' peyab ti' chicolchahi. Haca'tic'a hunu no' me' chielti lowoj cat yapnipaxo yul ispeyab, hac tu' xin ye huntek'an mac tu'. 10 Ay ebnaj haca' elk'om chiyu yuli, ton̈e chihul elek' yeb xin yak'ni camo anma. Yaj walinan, hulnajinan wak'a'an k'inale mach istan̈bal tet anma chiyaco isba yul ink'aban. Huntek'an anma tu', caw niman chiyu ischahni isc'ulal isc'ul Comam Dios. 11 Wal haninti'an, caw lahaninan haca' hunu naj tan̈em me' caw c'ul. Hune' naj tan̈em me' caw c'ul tu', caw hinan yanma naj yak'ni camo isba yin̈ isme'. 12 Wal tato ton̈e chitohlalax hunu naj chitan̈en no' me' tu', maẍtaj xin naj yahaw no' tu' chitan̈eni. Hayet chiyilni naj yapni no' oj, chisbejcano naj no' cat yelcan̈ naj, yuto mach yeto naj no', cat yoc no' oj tu' istzabnayo no', cat xin ispujnacan̈ no' sunil. 13 Chielcan̈ naj chitan̈en no', yuto yin̈n̈e istohol naj ayco yanma. Caw mach chicam isc'ul naj yin̈ no' yuto mach yeto naj no'. 14-15 Wal haninti'an, caw lahaninan yeb naj tan̈em me' caw c'ul, haxa mac chaco isba yul ink'aban lahan haca' no' me'. Caw ohtabilinan yu Inmaman, wohtapaxojan Inmamtu'an, hac tu' xin wepaxojan yeb macta chaco isba yul ink'aban, caw johta cobahan̈ yebi. Yin̈ ton huntek'an mac tu' chiwak' camo inbahan. 16 Aypaxo huntek'an anma chinchahnihan yul yanma, ton̈e xin caw mach jet con̈oboj. Caw yilal winitijan cat xin yoc isyijeno cuybanile chiwalti'an, caw xin hunxan̈e chucanoj yeb hunxan̈e mac chitan̈eni. 17 Caw xahan ayinan yu Inmaman yu caw chiwak' camo inbahan yin̈ anma, yaj chinchahpaxojan ink'inalan hunelxa. 18 Chiwak' camo inbahan yuto hac tu' chiel yin̈ inc'ulal. Wal xin, caw machi hunu mac chiyu quinispotx'ni camojan tato mach chisje inc'ulan. Caw machi hunu mac chincachnihan wak'ni inbahan yin̈ camical, aypaxo wipan inchahnihan ink'inalan hunelxa, yuto hac tu' inchejbanilan yu Inmaman, ẍi Comam. 19 Yet yaben anma Israel yin̈ tzet yal Comam tu', ispohnipaxto isba hunelxa. 20 Ay hun majan anma halni: —¿Tzet yuxin cheyabeto tzet chal naj ti'? Wal hune' naj ti', caw chabil locohal yu naj, ayco hune' ischejab naj matzwalil yin̈ naj, ẍi ebnaj. 21 Ay hunxa majan anma halnipaxoj haca' ti': —Tato ayco hunu ischejab naj matzwalil yin̈ naj, ¿tom hac tu' istzotelo naj? Yalnipaxo ebnaj: —¿Tom chu yu hunu ischejab naj matzwalil ishajni sat hunu naj caw maẍtic'a chiyu yilni? ẍi ebnaj. 22 Yin̈ istiempohal n̈abil chiec'tzelax isk'in̈ Yatut Comam Dios bey yul con̈ob Jerusalén. 23 Yet lan̈an yec' Comam Jesús isti' yatut Comam Dios tu', hune' chiyij Yamak'il naj rey Salomón, 24 yoc hoyno ebnaj Israel yin̈ Comam, yalni ebnaj haca' ti': —¿Caw bak'in chon̈hawilojan̈ yin̈ hune' cabc'ulal ti'? ¿Mac caw anmahilach? Yin̈ caw yeli, tato hach ti' Cristo hach, caw mak'bil hawalnilo jetan̈, ẍi ebnaj. 25 Istak'wican̈ Comam tet ebnaj: —Caw xawalan teyet, yaj caw mach cheyayto yul heyanma. Sunil c'aybalc'ule chinwatx'ehan yu yip Inmaman, ha' caw chiyeniloj mac anmahilinan. 26 Walex hex ti', caw mach chinhechaytojan yul heyanma, yuto caw maẍtic'a wetojan heyehi haca' walnihan yalan̈tocanoj. 27 Macta caw wetan yehi, caw chishajba istxiquin yin̈ tzet chiwalan; caw xin wohtapaxojan hune' mac tu'. Haca'tic'a chiyu yoc tzujno no' me' yinta istan̈emal, hacpax tu' chiyu yoc tzujno wintajan. 28 Wal xin, hanan chiwak'an isk'inal mach istan̈bal, machi bak'inal chicami, machi hunu mac xin chiyu yinilo yul ink'aban. 29 Wal xin ha' Inmaman, caw ec'balcano sata sunil maca, ha' ak'n̈e anma ti' wetan. Caw machi hunu mac chiyu yinilo huntek'an ti' yul isk'ab Inmamtu'an. 30 Haninti'an yeb Inmaman, caw hune'n̈e jehan̈, ẍi Comam. 31 Hac tu' yu istzabnipaxico ebnaj yahawil con̈ob Israel tu' issic'nican̈ isch'en yun̈e isk'ojni camo ebnaj Comam yalni. 32 Yalni Comam Jesús tet ebnaj: —Yu ishelanil Inmaman, yuxin caw hantan̈e tzet caw c'ul chinwatx'ehan texol. ¿Baytet yin̈ yuxin chinhek'oj camojan heyalni? ẍi Comam tet ebnaj. 33 Istak'wi ebnaj yahawil yin̈ ebnaj Israel tu': —Mach chaẍcok'ojcan̈an̈ yu hunu isc'ulal chawatx'e, wal xin yu chachbuchwa yin̈ Comam Dios, yuto hach ti' caw comon anma hach, yaj chawalico haba Diosal, ẍi ebnaj tet Comam. 34 Yalni Comam Jesús: —Istzoti' Comam Dios tz'ibn̈ebilcano yet payat ak'bilcano teyet, chal haca' ti': “Haninan chiwalan tato dios hex,” ẍicanoj. 35 Caw xin mach chiyu coman̈c'on tzet tz'ibn̈ebilcanoj, yuto caw Comam Dios tu' haln̈ecanoj diosal yin̈ mac bay ak'bilcano Istzoti'. 36 Ha' Comam Dios an̈eintijan yul sat yiban̈k'inal ti', yaja' ¿tzet yin̈ xin cheyalpaxoj tato buchwal chiwuhan yin̈ Comam Dios yet chiwalnihan tato caw Isc'ahol Dios wehan? 37 Tato mach chinyijehan chejbanile ak'bil wetan yu Inmaman, mach cheyayto yul heyanma win̈an. 38 Wal xin hatzet chal Inmaman, ha' chinwatx'ehan. Waxan̈ca caw mach chinhechaytojan yul heyanma, chahwe yul heyanma tzet chinwatx'eti'an. Hac tu' xin chiyu heyohtan̈eniloj tato caw ayco Comam Dios wetbihojan, ayinpaxicojan yin̈ Comam, ẍi Comam tet ebnaj. 39 Caw xin yoche ebnaj istzabayo Comam, yaj iscolilo isba Comam yul isk'ab ebnaj. 40 Lahwi tu' xin, istopaxo Comam k'axepxac'to ha' niman Jordán, bay ah ha' iswi' anma yu naj Juan yet yalan̈tocanoj, ha' bey tu' xin cancano Comam. 41 Caw hantan̈e anma apni ilno Comam bey tu', yalni haca' ti': —Yin̈ caw yeli waxan̈ca machi hunu c'aybalc'ule isye ya' Juan jet, yaj sunil tzet yalcano ya' yin̈ ya' Jesús ti' caw yeli, ẍi anma tu'. 42 Caw xin hantan̈e anma anayto yul yanma yin̈ Comam Jesús bey tu'.
1-2 Bey con̈ob Betania ay hune' naj chiyij Lázaro ya'bi ay, ha' bey tu' xin aypaxo cawan̈ yanab naj, María isbi hune' ix, hune'xa ix xin Marta isbi. Ix María tu', ha' ix anico aceite caw xuk' sam yin̈ yoj Comam Jesús, lahwi tu', issuni tajo ix yoj Comam yu xil iswi'. 3 Ebix cawan̈ yanab naj Lázaro tu' xin, yato ebix tzoti' tet Comam Jesús haca' ti': —Mamin, caw tx'oj ye isc'ul conohan̈, naj caw xahan ay hawu, ẍito ebix tet Comam. 4 Yet yaben Comam hune' chejbanil tu', yalni Comam: —Hune' yabil tu', mach chitan̈cano yin̈ camical. Wal xin ha' chiyenilo yip Comam Dios, ha' xin bay chiixtan̈wipaxilo wipan, hanin Isc'ahol Comam Dios inti'an, ẍi Comam. 5-6 Waxan̈ca caw xahan ay ix Marta yeb ix María yeb naj Lázaro yu Comam Jesús, yaj yet yallaxi tato caw ya'ay naj Lázaro tu', caw cabto tz'ayic ec' Comam bey tu'. 7 Lahwi tu' xin yalni Comam tet ebnaj iscuywom: —Ton̈wepaxo ismajul Judea hunelxa, ẍi Comam. 8 Yalni xin ebnaj iscuywom Comam tu' tet: —Mamin, caw tolto yoche ebnaj yahawil con̈ob Israel cachisk'ojo' camoj. ¿Tom xin chaẍtopaxo hunelxa hawalni? ẍi ebnaj tet Comam. 9 Yalni Comam tet ebnaj: —Caw johtaj tato caw cablahon̈eb hora ik'bil yu hune' tz'ayic, yuxin tato tz'ayical chon̈belwi, mach comono chon̈txak'mohi, yuto sajk'inal. 10 Yaj tato xol k'ejholo chon̈ec' xin, wal tu' chon̈txak'mohi yuto mach sajk'inal, ẍi Comam tet ebnaj. 11 Lahwi tu' xin, yalni Comam: —Caw mawaycan̈ jamigo Lázaro, wal tinan̈ xin chintohan wik'alojan iswayan̈ naj, ẍi Comam. 12 Yalni ebnaj iscuywom Comam Jesús tu': —Mamin, yaj tato wayan̈ chu naj, chicawxocan̈ naj chal tu', ẍi ebnaj tet Comam. 13 Yaja' xin yin̈ iscamical naj Lázaro yal Comam, wal ebnaj chicuywi yinta Comam tu' xin, ton̈e chiway naj, yalni Comam, chute yalni ebnaj. 14 Yuxinto caw yal Comam yin̈ caw haban tet ebnaj: —Naj Lázaro macam naj, 15 yaj caw chintzalahan yuto machijinan yet iscam naj, yu isc'ulalo teyin̈ yun̈e caw heyanico heyanma win̈an. Ton̈we jila' naj, ẍi Comam. 16 Yalni naj Tomás, naj chihallax tioẍ uninal, tet huntek'anxa ebnaj chicuywi yinta Comam: —Ton̈we yinta Comam haxinwal hun cocam yebi, ẍi naj. 17 Yet yapni Comam Jesús bey tu' xin, yaben Comam tato can̈ebxa tz'ayic ismuji naj Lázaro tu'. 18 Ha' con̈ob Betania tu', ayn̈em yictajo legua yehilo yin̈ con̈ob Jerusalén. 19 Yuxinto caw tx'i'al anma ah Jerusalén beyc'o yak'a isnimanbal isc'ul ix Marta yeb ix María yu iscamical isnoh tu'. 20 Hayet yaben ix Marta tato lan̈an yapni Comam Jesús bey tu', istit ix ischahno Comam, wal ix María xin cancano ix yul n̈a. 21 Yalni ix Marta tu' tet Comam yet ischahni isba ix yebi: —Mamin, tato ayachic'o bey ti', caw machim cam innohan. 22 Yaj xin caw wohtajan tato sunil tzet chak'an tet Comam Dios chiyak' Comam tawet, ẍi ix. 23 Istak'wi Comam tet ix: —Wal hanoh tu', chiitzitzbocan̈, ẍi Comam. 24 Yalni ix: —Ho' Mamin, caw wohtajan tato chiitzitzbican̈ innohtu'an yet chiitzitzbican̈ sunil anma yet islahobal tz'ayic, ẍi ix tet Comam. 25 Yalni Comam xin: —Haninti'an chiwak' itzitzbocan̈an anma camnaxa, yeb xin haninan chiwak'an isk'inal mach istan̈bal. Yuxinto macn̈etic'a chinchahnihan yul yanma, waxan̈ca chicami chiitzitzbican̈. 26 Yebpaxo xin sunil anma itzitzto chinchahnihan yul yanma, mach chicam yin̈ huneln̈e. ¿Chimhawayto yul hawanma yin̈ tzet chiwalan? ẍi Comam tet ix. 27 Ho' Mamin, caw chiwaytojan yul wanmahan tato hach ti' Cristo hach. Caw Isc'ahol Comam Dios hawehi, halbilcanoj ta chachhul yul sat yiban̈k'inal ti', ẍi ix Marta tu' tet Comam. 28 Lahwi yalni ix Marta haca' tu', isto ix yawtenoti isnoh, yalni ix tet ix yin̈ ewantajil: —Ayc'o Comam cuywawom bey ti', chachyawte Comam, ẍi ix tet ix María. 29 Yaben̈e ix María tzet yal isnoh tu' xin, yah lemna ix, isto ix yilno Comam. 30 Maẍto xin chiapni Comam Jesús yul con̈ob, ha' bay ischah isba ix Marta yeb Comam, ha' to tu' xin ay Comam yet yapni ix María. 31 Wal anma ah Judea ayco yak'ni isnimanbal isc'ul ebix yet yilni anma yah lemna ix María tu' isto ix, yoc tzujno anma yinta ix yuto istxum anma tato chito ix ok'o bay mujan isnoh tu'. 32 Yet yapni ix María isc'atan̈ Comam Jesús xin, yay jahno ix yich yoj Comam, yalni ix haca' ti': —Mamin, tato ayachic'o bey ti', machim cam conohti'an̈, ẍi ix tet Comam. 33 Yet yilni Comam Jesús yok'can̈ ix María yeb anma ah Judea tzujan yinta ix tu', yoc bisc'ulal yin̈ isc'ul Comam, istz'aycan̈ isc'ul Comam. 34 Isk'amben Comam xin: —¿Baytu'wal mujan naj heyu? ẍi Comam. —Mamin, ton̈ jila', ẍi ix María yeb anma tu'. 35 Yok'can̈ Comam xin. 36 Yet yilni anma ah Judea yok'can̈ Comam, yalni haca' ti': —Caw yeli xahan ay naj yu ya', ẍi anma. 37 Aypaxo hunmajanxa anma halni: —Ha' ya' ti' ak'ni hajloho sat naj mutz'an sat, ¿tom xin mach an̈cha naj Lázaro ti' yu ya'? Hac tu' xin machim cam naj, ẍi anma. 38 Caw ec'na oc bisc'ulal yin̈ isc'ul Comam yet yapni bay ayicto naj Lázaro tu'. Ha' hune' bay mujan naj tu', n̈ach'en yehi, ayco hune' ch'en niman ch'en ismajiloj. 39 Yalni Comam Jesús xin: —Iwelo ismajil ch'en, ẍi Comam. Yalni ix Marta, yanab naj Lázaro tu': —Mamin, con̈itax cam naj tinan̈, caw ayxam sam naj, ẍi ix. 40 Istak'wi Comam Jesús: —¿Tom machi mawalan tawet xin tato chawayto yul hawanma yin̈ tzet chiwalan, caw chawila' ishelanil yip Comam Dios? ẍi Comam tet ix. 41 Lahwi tu' xin, yilaxilo ismajil ch'en bay mujan naj tu', ist'an̈xican̈ Comam Jesús satcan̈, yalni haca' ti': —Mamin, caw chiwak'an yuch'andios tawet yu maxawabe tzet mawalan. 42 Wohtajan Mam ta sunilbal tiempo chawabe tzet chiwalan, yaj xin chiwalan hunel ti' tawet yu sunil anma cutxanico ti', yun̈e yanayto yul yanma ta hach ti' an̈eintijan, ẍi Comam tu'. 43 Yet lahwi yalni Comam hune' ti' xin, yah yaw Comam yin̈ caw ip: —Lázaro, elan̈tij, ẍi Comam. 44 Hac tu' xin yu yelti naj Lázaro tu', bec'bilico k'ap yin̈ isnimanil naj, pichbilpaxto sat naj yu hune' k'ap. Yalni Comam xin: —Holwelo k'ap yin̈ naj, cat isto naj, ẍi Comam. 45 Anma ah Judea apni ilwal yin̈ ix María, caw yilpaxo tzet iswatx'e Comam Jesús bey tu', yuxinto caw hantan̈e anma anayto yul yanma yin̈ Comam. 46 Aypaxo huntek'an ebnaj to halno tet ebnaj fariseo yin̈ tzet iswatx'e Comam. 47 Hac tu' xin yu yoc ebnaj fariseo islahti'n̈en isba yeb ebnaj yahawil yehico yin̈ ebnaj sacerdote yeb xin ebnaj yahaw con̈ob. Yalni ebnaj: —¿Tzet wal juten tinan̈, hune' naj tu' caw tx'i'al c'aybalc'ule chisyecano naj? 48 Tato ton̈e chijila chislahnico naj, caw sunil jet con̈ob ti' chak'ayto yul yanma yin̈ naj. Hac tu' xin chiyu yulo ebnaj yahawil con̈ob Roma, cat xin yuchc'anayo ebnaj yatut Comam Dios, cat xin yetanto ebnaj cocon̈ob ti', ẍi ebnaj tet hunun. 49 Ay xin hune' naj, Caifás isbi, iswi'ehal yehico naj yin̈ ebnaj sacerdote yin̈ hune' habil tu'. Ha' naj halni: —Hex ti' caw matzet heyohtaj. 50 Caw mach chitxumchalo heyu tato ec'bal c'ul iscam naj ti' selelo sunil anma, hac tu' xin matxa chitan̈ilo cocon̈ob ti' chal tu', ẍi naj. 51 Wal xin mach yal naj Caifás hune' tu' yul yet ischuquil, yuto ha' naj yahawil yehico yin̈ ebnaj sacerdote hune' habil tu', yuxinto ha' Comam Dios ak'ni yala' naj tato chicam Comam Jesús selelo sunil anma ah Israel. 52 Yaj maẍn̈etaj yin̈ con̈ob Israel chicam Comam Jesús, wal xin chicampaxo Comam yun̈e iscutxbanico sunil yuninal Comam Dios pujanto yul sat yiban̈k'inal ti', yun̈e hunxan̈e chiyute isba. 53 Yin̈ hune' tz'ayic tu', islahti'n̈e isba ebnaj yahawil con̈ob Israel tato chak' camo ebnaj Comam Jesús. 54 Yuxin matxa ec' Comam Jesús xol anma bey ismajul Judea, wal xin to Comam bey yul hune'xa con̈ob chiyij Efraín, hune' con̈ob ayco iscawilal tx'otx' desierto. Ha' tu' xin ehayo Comam yeb ebnaj chicuywi yintaj. 55 Wal yul con̈ob Jerusalén xin, toxa chiichico k'in̈ Pascua, hune' k'in̈ tu' isk'in̈ anma Israel. Caw xin tx'i'al anma yul hunun con̈ob apni bey Jerusalén tu', yu isyijen yak'ni sajbo isba yet yalan̈to maẍto chiichico k'in̈ tu'. 56 Chi-xin-ec' anma tu' saywal yin̈ Comam Jesús. Yet cutxanico anma yul yatut Comam Dios, chisk'amben anma tet hunun haca' ti': ¿Tzet quexchi? ¿Chimhulu ya' Jesús yin̈ k'in̈ ti' mato machoj? ẍi anma. 57 Ebnaj fariseo yeb xin ebnaj iswi'ehal yeco yin̈ ebnaj sacerdote, yalilto ebnaj xol anma tato macn̈etic'a yohta baytu'wal ay Comam Jesús, chihallax tet ebnaj yun̈e istzabnayo ebnaj Comam.
1 Wajebto tz'ayic yichico k'in̈ Pascua, yapni Comam Jesús bey Betania, bay ay yatut naj Lázaro, naj itzitzbican̈ xol camom yu Comam. 2 Yet yapni Comam bey tu', yoc hune' niman wah yu tzalahilal yin̈ Comam. Ha' hun naj Lázaro oc sat meẍa isc'atan̈ Comam, ha' xin ix Marta chianayo itah sat meẍa. 3 Wal ix María xin, aymi hunu libra an̈ caw xuk' sam ik'bil yu ix, naba nardo caw xin aycan̈ istohol. Yanico ix yin̈ yoj Comam, lahwi tu' xin issuni tajo ix yoj Comam yu xil iswi'. Hac tu' xin, caw sunil yul n̈a tu' pujnacan̈ sunil isxuk'al sam. 4 Wal naj Judas Iscariote, isc'ahol icham Simón, naj ayco yetbiho ebnaj chicuywi yinta Comam, naj chianico Comam yul isk'ab camical, ha' naj halni haca' ti': 5 —Hune' an̈ caw xuk'cano sam ti', caw oxebmi ciento denario istohol. Estam matxon̈laxtoj, cat ispohlaxto istohol yin̈ anma caw meba', ẍi naj. 6 Matolo yu chitz'ay isc'ul naj yin̈ anma meba' yuxinto yal naj haca' ti', machoj. Walxinto ha' naj ik'n̈e istx'uyal ch'en melyu, caw xin k'ayna naj yelk'anilo ch'en melyu chisc'uba tu', yuto caw elk'om naj. 7 Yalni Comam Jesús tet naj: —¡Mach chacach ix! Wal xin caw yan̈ebil hune' an̈ ti' yu ix, yun̈e yanico ix yin̈ innimanilan yet yalan̈to maẍto chinmujlaxan. 8 Wal anma meba' chawal ti', caw ayn̈etic'aco texol, yaj walinan xin, mach ton̈etic'a ay inicojan texol, ẍi Comam. 9 Caw tx'i'al anma Israel abeniloj tato ayc'o Comam Jesús bey Betania; isto anma yilno Comam, yeb chiyoche anma yila'paxo naj Lázaro itzitzbican̈ xol anma camom yu Comam. 10-11 Yu naj Lázaro tu', caw niman anma Israel yayto yul yanma yin̈ Comam Jesús; matxa xin chisje isc'ul anma tu' isyije' tzettaj chal ebnaj sacerdote. Yu hune' tu', yuxinto islahti'n̈e isba ebnaj yahawil yehico yin̈ ebnaj sacerdote tato chak' camo ebnaj naj Lázaro. 12 Caw hantan̈e anma apni yin̈ k'in̈ Pascua bey yul con̈ob Jerusalén. Yet hune'xa tz'ayic xin, yaben anma tato lan̈an yapni Comam Jesús bey yul con̈ob tu'. 13 Yuxin yilo anma xaj te' ch'ib, yinito anma te' yun̈e isto anma ischahno Comam. Chi-la-el yaw anma yin̈ caw ip, chalni: —¡Caw niman yelapno Comam Dios! ¡Jala'we tzoti' caw c'ul yin̈ Mac ak'bilti coxol yu Comam Dios Jahawil. Jak'a'we tzalaho coc'ul yin̈ Jahawil, han̈on̈ Israel hon̈ ti'! ẍi anma tu'. 14 Ay xin hune' no' nich'an burro ilcha yu Comam. Yahto Comam yiban̈ no' haca'tic'a yalni Comam Dios bay tz'ibn̈ebilcanoj: 15 Hex ah con̈ob Sión, mach chexxiwi. Ilwec'anabi lah, chihul Heyahawil, ayahto yiban̈ hune' no' burro, ẍiayoj. 16 Yet hune' tz'ayical tu' xin caw maẍtic'a txumchalo yu ebnaj iscuywom Comam Jesús yin̈ tzet chalilo hune' tu'. Hato yet istocano Comam yul satcan̈, hato tu' xin isnaniti ebnaj tato tz'ibn̈ebilcano hune' tu' yin̈ Comam, yuxinto hac tu' yuhi. 17 Wal anma ayc'o isc'atan̈ Comam Jesús yet yawtenilti Comam naj Lázaro yul panteón, yet yitzitzbican̈ naj yu Comam, ha' anma tu' halnic'o yin̈ tzet yuhi. 18 Caw tx'i'al anma to chawal yin̈ Comam, yuto yabe anma isk'umal yin̈ hune' c'aybalc'ule iswatx'e Comam tu'. 19 Wal ebnaj fariseo xin, yal ebnaj tet hunun: —Ilwec'anabi lah, caw matzet wal juteni yuto caw sunil anma tzujan yinta naj, ẍi ebnaj yin̈ Comam. 20 Xol sunil anma apni yik'ayo isba tet Comam Dios yin̈ k'in̈ tu', ayco huntek'an ebnaj griego. 21 Apni ebnaj ti' isc'atan̈ naj Felipe ay bey con̈ob Betsaida ayco yul ismajul Galilea, yalni ebnaj tet naj: —Mamin, caw chijochehan̈ chijilan̈ yin̈ Comam Jesús, ẍi ebnaj. 22 Hac tu' xin yu isto naj Felipe tu' yalno tet naj Andrés, iscawan̈ilxa xin ebnaj to halno tet Comam. 23 Yalni Comam tet ebnaj: —Wal Hanin Ak'bilintijan texol yu Comam Dios, lan̈an yapni yorahil isyelaxilo inhelanilan. 24 Caw isyelal chiwalan teyet, k'inalo tato mach chitz'unlax hunu hin̈at trigo sat tx'otx' cat isk'ato ixim, machom chul isc'ul ixim. Yaj tato chik'ato ixim, wal tu' chihul isc'ul ixim, caw xin niman sat ixim chak'a. 25 Mac mach hinano yaben isya'tajil win̈an, chisc'ayto isk'inal mach istan̈bal. Wal mac hinan yanma yaben isya'tajil win̈an, caw chischah isk'inal mach istan̈bal. 26 Tato ay mac chiyijen tzet chiwalan, ocojab tzujno wintajan. Yuxinto ha' bay ayinan, ha' tu' chiehpaxo mac caw yijem chute isba wetti'an; ha' xin Inmaman chihalni isc'ulal yin̈, ẍi Comam. 27 Lahwi tu' xin, yalni Comam Jesús: —Wal tinan̈, caw bisc'ulal ye wanmahan, yaja' ¿tzet chiwute walnihan? ¿Tom chiwalan tet Comam Dios haca' ti'? “Mam, colinilojan yul isk'ab hune' isya'tajil lan̈an yul wiban̈ti'an,” ¿Tom quinchiyan? ¡Machoj! Yu ton hune' ti', yuxinto hulnajinan yul sat yiban̈k'inal ti'. 28 Mam, yeloj tato caw aycano yelapno hawehi, ẍi Comam. Lahwi tu' xin yabelax hune' yul nuk'e satcan̈, yalni haca' ti': —Caw xainyelojan tato caw aycano yelapno wehan, yaj chinyelojan hunelxa, ẍiayti yul satcan̈. 29 Sunil anma cutxanico bey tu', aben hune' yul nuk'e tu', yalni anma haca' ti': —C'uh man̈irlahi, ẍi anma. Aypaxo mac halni: —Hune' naj ángel matzotel tet naj, ẍipaxoj. 30 Yalni Comam Jesús tet ebnaj: —Mach wuhojan xin to mahallaxayti huntek'an tzoti' ti', machoj, to heyu. 31 Wal tinan̈ xin, yilchaxati anma ay yul sat yiban̈k'inal ti' yu Comam Dios yin̈ tzet chi-la-iswatx'e, cat yinilo Comam naj yahawil yehico yul sat yiban̈k'inal ti'. 32 Wal inti'an, yet chinilaxcan̈an sat tx'otx' ti' yin̈ te' culus, sunil anma chiwitijan inc'atan̈an, ẍi Comam. 33 Yal Comam hune' tu' yu isyeniloj tzet camical chiik'ni camoj. 34 Istak'wi anma tet Comam: —Chal Istzoti' Comam Dios yin̈ ley aycano jet, tato ya' Cristo chiehoc'o ya' yin̈ sunilbal tiempo. ¿Tzet yin̈ yuxinto chawal haca' ti'?: “Wal Hanin Ak'bilintijan texol yu Comam Dios, caw yilal chinilaxcan̈an,” cachi. ¿Mac xin hune' Ak'bilti coxolan̈ yu Comam Dios tu'? ẍi ebnaj tet Comam. 35 Yalni Comam tu' xin: —Yin̈xan̈e hanic' tiempohal ayinic'ojan texol ti', caw chiwacanicojan issajilk'inal yin̈ heyanma, yuxinto watx'eweco heba yin̈ caw istoholal yak' isba ay intoc'ojan texol. Ta machoj, chissomchahocan̈ cheyila, cat xin heyoco haca' anma chiec' xol k'ejholo, caw mach chiyu yilni bay caw chitocoj. 36 Wal haninti'an, caw lahaninan haca' issajilk'inal, yuxinto chahweinan yul heyanma yak' isba ay intoc'ojan texol, cat xin wanicojan issajilk'inal ti' yul heyanma yin̈ caw huneln̈e, ẍi Comam. Lahwi yalni Comam tu' xin, isto Comam yebanto isba tet anma. 37 Caw hantan̈e c'aybalc'ule isye Comam Jesús tet anma tu', yaj caw maẍtic'a ischah anma Comam yul yanma. 38 Hac tu' xin yu yijnicano isba yin̈ tzet tz'ibn̈ebilcano yu naj Isaías, ischejab Comam Dios yet payat, bay chala: Mamin, ¿mac chahnayto yul yanma yin̈ tzettaj jalan̈? Waxan̈ca caw xahaye hawip tet anma, yaja' caw maẍtic'a mac chahn̈e hach yul yanma, ẍiayoj. 39 Caw maẍtic'a ischayto anma Comam yul yanma, hac tu' yu istz'ibn̈encano naj Isaías: 40 Comam Dios majchencano sat anma, yak'nipaxo cawbolo Comam yanma anma yun̈e matxa chiyu yilni, yeb xin mach chitxumchalo yu. Caw mach chisbejcano anma ismachiswalilal, yuxin mach chian̈cha anma yin̈ ismul yu Comam, ẍicano naj Isaías tu'. 41 Yalcano naj Isaías huntek'an ti', yuto ilbilxa ishelanil Comam Jesús yu naj. 42 Waxan̈ca hac tu' yute yalnicano naj Isaías, yaja' caw hantan̈e ebnaj yahawil yin̈ ebnaj Israel chahnicano Comam yul yanma. Yaj to caw mach chisyelo ebnaj, machi bay chalpaxic'o ebnaj yuto caw chixiw ebnaj tet ebnaj fariseo. Tato chiyabecan̈ ebnaj fariseo tu', caw matxa chichahlaxicto ebnaj yul capilla. 43 Hac tu' yute ebnaj yun̈e iscan ebnaj c'ulal yul sat anma, sata iscanpaxo ebnaj c'ulal yul sat Comam Dios. 44 Yalni Comam Jesús yin̈ ip tet anma: —Ha' mac chinchahnaytojan yul yanma, maẍn̈etajinan chinischahan, to ha' hun Inmaman chischahpaxoj, yuto ha' quinanitijan. 45 Yeb mac chinilnihan, caw lan̈an yilnipaxico yin̈ Inmaman quinanitijan. 46 Wal inti'an, hulnajinan wak'a'an sajilk'inal yul yanma anma ay yul sat yiban̈k'inal ti', yuxin macn̈etic'a chinchahnihan yul yanma mach chican xol k'ejholo. 47 Yaja' ha' mac chiaben tzet chiwalti'an, mach xin chisyijepaxoj, maẍtajinan chincawxecojan ismul yiban̈. Walinan maẍtaj yu incawxenicojan ismul anma yiban̈ yuxinto hulnajinan yul sat yiban̈k'inal ti'; to yu incolnihan anma yuxin quinhulan. 48 Macta chinyahnihan, yeb xin mach chisyije tzet chiwalan, ay hune' chicawxenico ismul tu' yiban̈, ha' ton tzoti' xawalan xol anma. Ha' tzoti' tu' xin, chicawxenico ismul tu' yiban̈ yet islahobal tz'ayic. 49 Wal xin, sunil tzet chiwalan, caw mach wetojan inchuquilan, ha' Inmaman an̈eintijan, ha' chejn̈einan yin̈ tzettaj chiwalan yeb tzettaj chiwak'an iscuyu' anma. 50 Caw xin wohtajan tato ha' ischejbanil Inmamtu'an, ha' chiak'ni k'inale mach istan̈bal tet anma; yuxin haca' yu yalni wetan, hac tu' chiwute walnicanojan teyet, ẍi Comam tet anma.
1 Yet hecalxan̈e chiichico k'in̈ Pascua, caw yohtaxa Comam Jesús tato apni istiempohal bay chiyacano Comam hune' yul sat yiban̈k'inal ti', cat isto Comam isc'atan̈ Comam Dios. Caw xahan yil Comam macta yaco isba yul isk'ab yul sat yiban̈k'inal ti'. Wal tinan̈ xin caw chisyecanilo Comam tato caw xahan ay sunil anma tu' yu. 2-4 Wal naj matzwalil xin, xa'aynato naj yul yanma naj Judas Iscariote, isc'ahol icham Simón, yin̈ yanico naj Comam yul isk'ab camical. Wal Comam Jesús caw yohtaj tato isc'atan̈ Comam Dios titna Comam, yuxinto isc'atan̈ Comam Dios tu' chitopaxo hunelxa. Caw yohtapaxo Comam tato yul isk'ab yacanico Comam Dios sunil tzettaj ye tu'. Yet lan̈an iswa' Comam yeb ebnaj chicuywi yinta tu', yahwano Comam yinilo Comam hune' xil isk'ap hucanico yiban̈ iscamiẍ, isc'alnico Comam hune' pixe yin̈ yictaj. 5 Yanayto Comam ha ha' yul pech'an, istzabnico Comam istx'ahni yoj ebnaj chicuywi yinta tu', issuni tajo Comam yu hune' pixe ayco yin̈ yicta tu'. 6 Yet lan̈an istzabnico Comam istx'ahni yoj naj Simón Pedro, yalni naj tet Comam: —Mamin, ¿tom chachoc hatx'aha' wojti'an hawalni? ẍi naj tet Comam. 7 Istak'wi Comam tet naj: —Tinan̈ caw mach chitxumchalo hawu tzet chinwatx'eti'an, yaj yet tzujanxa cat istxumchalo hawu, ẍi Comam. 8 Yalni naj tet Comam: —¡Machoj Mamin! Caw maẍtic'a chu hatx'ahnilo wojti'an, ẍi naj. Yalni Comam: —Wal xin tato mach chisje hac'ul chintx'ahan hawoj ti', caw mach ayachoco yetbiho ebnaj ayxaco yul ink'aban, ẍi Comam tet naj. 9 Yalni naj Pedro tet Comam: —Ta hac tu' chal tu' Mamin, maẍn̈eojabtaj wojti'an chatx'aha, wal xin yilal hatx'ahnipaxo ink'aban yebpaxo xin inwi'an, ẍi naj tet Comam. 10 Istak'wi Comam tet naj: —K'inalo tato ay hunu mac lan̈anto yaẍniloj, matxa yilalo istx'ahlax sunil isnimanil, han̈c'an̈e yoj, yuto caw sajto ye isnimanil tu'. Yuxinto caw lahan hex ti' yeb anma lan̈anto yaẍniloj; caw saj ye heyanma, yaj mach hesuniloj, ẍi Comam. 11 Wal xin, caw yohtaxa Comam mac chianico yul isk'ab camical, yuxinto yal haca' ti': “Yaj mach hesunilo saj ye heyanma,” ẍi Comam. 12 Yet lahwi istx'ahni Comam yoj ebnaj xin, yanipaxico Comam hune' xil isk'ap hucan ye tu'. Yaypaxo tz'on̈no Comam isc'atan̈ ebnaj, yalni haca' ti': —¿Chimtxumchalo heyu tzet manwatx'eti'an? ẍi Comam tet ebnaj. 13 Yalnipaxo Comam: —Walex hex ti', chinheyalan hecuywawomal yeb xin heyahawiloj. Wal xin caw yel cheyala, ist'in̈anil ton hune' tu'. 14 Haninti'an hecuywawom wehan, Heyahawil wepaxojan, yaj mantx'ahan heyoj, yuxin hex ti' hac tu' wal heyuni teyin̈ hununex. 15 Wal xin manwatx'ehan hune' ti' yun̈e inyenicanojan tato hac tu' wal heyuteni. 16 Yin̈ caw isyelal chiwalan teyet, haca' hunu naj c'amte', mach ec'balo naj sata naj bay chimunla tu', hactic'apax tu' naj chejab, mach ec'balo naj sat naj chichejni. 17 Tato chitxumchalo huntek'an ti' heyu, cat xin heyijeni, caw sak'al heyet. 18 Maẍtaj teyin̈ hesunil chiwalan hune' ti', wal xin wohtajan macta sic'bililo wuhan, yaja' xin yilal yijni isba yin̈ tzet tz'ibn̈ebilcanayo yin̈ Istzoti' Comam Dios bay chala: “Ha' hune' mac caw hun chinwa'an yebi, ha' chipaq'uico win̈an,” ẍiayoj. 19 Yalan̈to chiwalnicanojan hune' ti' teyet haxinwal yet chiyijno isba, caw cheyayto yul heyanma tato haninan Cristo hinan. 20 Yin̈ caw isyelal chiwalan teyet, macn̈etic'a chichahni hunu inchejaban, haninan chinischahpaxojan. Hacpax tu' xin macn̈etic'a chinchahnihan, chischahpaxo Mac chejn̈eintijan, ẍi Comam. 21 Yet lahwi yalnicano Comam huntek'an ti' xin, yoc hune' niman bisc'ulal yin̈ isc'ul Comam, yalni Comam yin̈ caw haban: —Yin̈ caw isyelal chiwalan teyet, texol ti' ayco hune' mac chinanocojan yul isk'ab camical, ẍi Comam. 22 Yet yaben ebnaj iscuywom Comam tu' xin, toxan̈e chi-la-t'an̈xico ebnaj yin̈ sat hunun, yuto mach yohtajo ebnaj mac yin̈ yal Comam. 23 Ay xin hune' naj iscuywom Comam caw xahan ay yu, iscawilal xin Comam ayco naj yet chiwa'i. 24 Yak'ni naj Simón Pedro yechel tet naj, yun̈e isk'ambenilo naj mac hune' chal Comam tu'. 25 K'ehan xin naj iscawilal istxam isc'ul Comam Jesús, isk'amben naj tet Comam: —Mamin, ¿mac najil hune' chawal ti'? ẍi naj. 26 Istak'wi Comam tet naj: —Ha' mac bay chiwak'atojan ixim pan chinlabahan, ha' hune' tu', ẍi Comam tet naj. Lahwi tu' xin islaban Comam ixim pan tu', yak'ni Comam ixim tet naj Judas Iscariote, isc'ahol icham Simón. 27 Yet ischahni naj ixim pan tu', yaynato naj matzwalil yul yanma naj, yalni Comam tet naj: —Ha' tzet nabil hawu hawatx'eni, watx'e yin̈ an̈e, ẍi Comam tet naj. 28 Wal ebnaj chiwa' sat meẍa yeb Comam tu' xin, caw machi hunu ebnaj txumchalo yu tzet yin̈ yuxinto yal Comam haca' tu'. 29 Naj Judas tu' xin ha' naj ik'n̈e istx'uyal ch'en melyu, yuxin ay ebnaj txumni ta chischejto Comam naj islok'o tzet chiocnico yin̈ k'in̈ tu', maca yu ispohnito naj hanic'o ch'en melyu tu' yin̈ anma meba'. 30 Yet lahwi iswahni naj Judas ixim pan tu', yelti naj bey tu', caw xin xa'ay numnahi. 31 Lahwi istocano naj Judas tu', yalni Comam Jesús haca' ti': —Wal tinan̈ chisyelo isba wipan Hanin Ak'bilintijan texol yu Comam Dios, cat xin isyenipaxilo isba yip Comam Dios win̈an. 32 Tato chinyelojan yip Comam Dios, chisyepaxilo Comam wipan, caw xin lan̈anxa isyeniloj. 33 Hex caw xahan ayex wuti'an, caw hanic'xan̈e tiempo ayinic'ojan texol. Chinhesaya'c'ojan, yaj caw mach chiyu heto bay chintotu'an. Haca'tic'a wute walnihan tet anma Israel, hac tu' chiwute walnipaxojan teyet. 34 Chiwak'canojan hune' ac' chejbanile ti' teyet, xahan cheyil heba hununex. Haca' isxahanil ayex wuhan, hac tu' cheyutepaxo heba. 35 Tato caw xahancano cheyil heba hununex, hac tu' chiyu yohtan̈enilo anma tato quexincuywoman, ẍi Comam tet ebnaj. 36 Isk'amben naj Simón Pedro tet Comam: —Mamin, ¿baytu'wal xin chaẍtohi? ẍi naj. Istak'wi Comam: —Bay chintotu'an mach chu hato wintajan. Chaẍoco tzujno wintajan, yaj maẍto tinan̈, ẍi Comam. 37 Yalnipaxo naj Pedro tu' tet Comam: —Mamin, ¿tzet yin̈ yuxin mach chu woc tzujnojan tawintaj? Caw hinaninan wak'ni camo inbahan tawin̈, ẍi naj tet Comam. 38 Istak'wi Comam: —¿Caw yelmi chawala? ¿Caw hinan hachmi hawak'ni camo haba win̈an? Wal xin yin̈ isyelal chiwalan tawet, caw oxelxa chawala tato mach quinhawohtajojan yalan̈to maẍto chiok'can̈ no' icham chiyo, ẍi Comam tet naj.
1 Yalni Comam Jesús tet ebnaj iscuywom: —Caw mach chicabcon hec'ul, aweco heyanma yin̈ Comam Dios cat xin heyanipaxico heyanma win̈an. 2 Bey yatut Inmaman caw ay hamanil bay wal jehi; k'inalo ta machi hamanil tu' xamwalan teyet. Wal xin caw aya, yuxinto chintohan inwatx'e'an hune' bay chexapni tu'. 3 Yetxa lahwi inwatx'enan bay chexapni, cat xin wulan hunelxa quexwinotojan, haxinwal bay chinehan, ha' tu' chexehpaxoj. 4 Ha' bay chintotu'an, caw heyohtaxa, yeb xin heyohtapaxo isbelal, ẍi Comam tet ebnaj. 5 Yalni naj Tomás tet Comam: —Mamin, caw mach johtajojan̈ baytu'wal chaẍtohi. ¿Tzet xin chiyu johtan̈enilojan̈ isbehal? ẍi naj tet Comam. 6 Istak'wi Comam: —Hanintonan hune' beh chiwalan teyet ti', yuto haninn̈ehan chiyu quexwinitojan isc'atan̈ Inmaman. Haninan isyelal, yeb xin haninn̈ehan chiwak'an k'inale mach istan̈bal. 7 Tato quinheyohtaj inxahan, caw heyohtaxa Inmaman. Wal tinan̈ xin, caw heyohtaxa Inmaman, yuto xaheyilico yin̈, ẍi Comam. 8 Yalni xin naj Felipe tet Comam: —Mamin, ye Hamam tu' jila'an̈, c'uxanojtamna tu', ẍi naj tet Comam. 9 Yalni Comam tet naj: —Felipe, ayxa istiempohal wehic'ojan texol. ¿Tom caw maẍto quinhawohtajan? Macn̈etic'a chinilnihan, lan̈an yilnipaxo yin̈ Inmaman. ¿Tzet yin̈ yuxinto chawalpaxoj?: “Ye Hamam tu' jila'an̈,” cachi. 10 ¿Tom caw maẍto chawayto yul hawanma tato wetbi inbahan yeb Inmaman, yetbipaxo Inmaman wehan? Yuxinto sunil tzet chiwalan teyet mach wetojan inchuquilan, ha' Inmaman ayico wetbihojan, ha' chiwatx'en ismunil. 11 Aweyto yul heyanma ta wetbi inbahan yeb Inmaman, aypaxico Inmamtu'an win̈an. Tato mach cheyayto yul heyanma yin̈ tzet chiwalti'an, aweyto yul heyanma yu ej c'aybalc'ule chinyehan teyet. 12 Yin̈ caw isyelal chiwalan teyet, macn̈etic'a chinchahnihan yul yanma, chiswatx'epaxo haca' tzet chinwatx'eti'an. Aypaxo tzet ec'balto chiswatx'e', yuto isc'atan̈ Inmaman chintohan. 13 Tzijxan̈e tzet chek'ana yu ayexxaco yul ink'aban chiwak'an. Hanin Isc'ahol Comam Dios inti'an, chinyelojan yip Inmamtu'an. 14 Yuxin chiwalan teyet, tzijxan̈e ye tu' chek'an yin̈ inbihan chiwak'an teyet, yuto caw wetxahan heyehi. 15 Tato xahan ayinan heyu, yijewe tzet chiwalti'an. 16-17 Haninan chink'anan tet Inmaman cat yaniti Comam Espíritu Santo colwal teyin̈, ha' Comam tu' isyelaln̈etic'a chala. Ha' xin chihul texol yin̈ sunilbal tiempo. Wal anma yet yul sat yiban̈k'inal ti' xin, caw mach chiyu ischahni hune' Espíritu tu' yuto mach ohtabilo yu anma, machi xin chitxumchalo yu. Walex hex ti' xin, caw heyohtaxa, caw xin chi'ehayo texol cat yehpaxico teyin̈. 18 Wal inti'an mach chexinbejcanojan hechuquil, chinhulpaxojan tec'atan̈ hunelxa. 19 Caw hanic'xan̈e tiempohal ayinic'ojan, lahwi tu' xin matxa chinillaxojan yu anma. Walex hex ti', chi-tic'a-heyila'paxo win̈an, yuto caw itzitz inn̈etic'ahan yin̈ sunilbal tiempo. Haquexpax tu', itzitz hexn̈etic'apaxoj. 20 Yet ayxaco Comam Espíritu Santo teyin̈, cat istxumchaholo heyu ta wetbi inbahan yeb Inmaman. Haquexpax tu', ayexpaxico win̈an, ay inpaxicojan teyin̈. 21 Macta chiaben tzet chiwalan, cat xin isyijeni, ha' huntek'an tu' caw chon̈ochenan̈. Yuxin macn̈etic'a chinochenan, caw xahan ay yu Inmaman, xahan aypaxo wuhan, cat xin inyenilo inbahan tet, ẍi Comam. 22 Yalni naj Judas, yaj maẍtaj naj Judas Iscariote: —Mamin, ¿tzet yin̈ yuxinto jetn̈ehan̈ chayelo haba? Wal tet anma yet yul sat yiban̈k'inal ti' mach chayelo haba tet, ẍi naj. 23 Yalni Comam xin: —Ha' mac chinochenan, chisyije tzet chiwalan, caw xin xahan ch'illaxo yu Inmaman. Hac tu' xin chu julan̈ cat joccanojan̈ yetbihoj. 24 Ha' mac mach chinochenan, mach chisyije tzet chiwalan. Wal hune' cuybanil lan̈an heyaben ti' caw mach wetojan, yet Inmaman an̈eintijan texol. 25 Caw chiwalcanojan huntek'an ti' teyet yak' isba ayintoc'ojan texol. 26 Chati Inmamtu'an Comam Espíritu Santo texol; ha' chihul inselelojan cat iscolwa teyin̈, cat xin quexiscuyni yin̈ sunil tzettaj ye tu'. Ha' xin chiak'ni henabati sunil tzet xa-le-hecuycano wuhan. 27 Wal tinan̈ xin, chiwacanojan ak'anc'ulal yul heyanma. Hune' ak'anc'ulal chiwak'ti'an caw c'ul, mach haca' ak'anc'ulal chak' anma yet yul sat yiban̈k'inal ti'. Wal xin mach chicabcon hec'ul, mach chexxiwpaxoj. 28 Caw xawalan teyet ta chintohan, yaj xin chinhulpaxojan hunelxa tec'atan̈. Ta caw yeli chinheyochehan, caw chimquextzala heyabeni tato chintohan isc'atan̈ Inmaman, yuto caw ec'balto Inmamtu'an insatajan. 29 Yalan̈tocanoj chiwalnicanojan teyet yin̈ huntek'an ti', haxinwal yet chijni isba, cat heyanayto yul heyanma yin̈. 30 Matxa caw tzet chiwalan teyet, yuto caw lan̈an yul naj matzwalil, naj yahawil yeco yin̈ hune' yul sat yiban̈k'inal ti'. Waxan̈ca ay yip naj, yaj mach chik'oji naj wiban̈an. 31 Yaj to caw yilal yec'ya' wanmati'an yun̈e yohtan̈enilo sunil anma tato caw chiwochehan Inmaman, cat inyenilojan tato caw chinyijehan chejbanil ak'bil wetan yu. Wal tinan̈ xin, ahan̈wewanoj, elojon̈we bey ti', ẍi Comam.
1 Yalni Comam Jesús tet ebnaj iscuywom: —Wal haninti'an, caw lahaninan yeb xin hunu yoj te' uva caw c'ul, wal Inmaman xin, caw lahan yeb hunu mac chiilni te'. 2 K'inaloj tato ayej te' isk'ab mach chisatni, chitzoc'laxilto te' yu naj chitan̈en te'. Wal te' isk'ab caw c'ul issatni xin, chiyilo naj istajinal isk'ab te', hac tu' xin caw chisatni te' sic'lebil. Haca' iswatx'encan̈ naj te' uva tu', caw hac tu' chiyute istan̈en Inmaman macta ayxaco yul ink'aban. 3 Walex hex ti', caw sajxa ye heyanma yu cuybanile ak'bilxa teyet wuhan. 4 Ayojab exn̈etic'aco win̈an, cat wehic'ojan yul heyanma. Caw haca' hunu isk'ab te' uva tzoc'bililto yin̈ yoj, matxa chisatni, caw hac tu' heyehi tato machijex win̈an. 5 Wal haninti'an, caw lahaninan yeb xin yoj te' uva. Wal hexpaxo xin, caw lahanex haca' te' isk'ab. Yuxin ta ayexn̈etic'aco win̈an, ay inpaxic'ojan teyin̈, lahanex haca' hunu isk'ab te' uva caw c'ul issatni. Wal tato machijinan teyin̈, caw machi hunu ti' chiyu hewatx'en hechuquil. 6 Wal mac mach chiehic'o win̈an xin, caw lahan chiutelax haca' te' isk'ab mach chiyak' sat, chitzoc'laxiloj cat istajiloj. Chilahwi istajilo te' xin, cat iscutxbalaxcan̈ te', cat yalaxto te' yul k'a'. 7 Tato hacn̈etic'a tu' heyehico win̈an, machi xin chec'ayto heyijen cuybanile chiwalcanoti'an, k'anwe tzet choche hec'ul chiak'laxo teyet. 8 Ta haca' te' isk'ab caw satnom tu' haquex tu', wal tu' cheyeloj tato caw yeli incuywoman heyehi. Hac tu' xin chiyu heyinican̈ isbi Inmaman. 9 Haca' isxahanil ayinan yu Inmamtu'an, hac tu' isxahanil chexwilpaxojan. Yuxin xahann̈ehojabn̈etic'a cheyil heba, haca' isxahanil ayex wuhan. 10 Tato cheyije chejbanile chiwak'canojan teyet ti', chexahann̈e heba, haca' isxahanil ayex wuhan. Yuto hac tu' wehan yeb xin Inmaman, caw xahan chexwilan, haca' isc'ulch'anil isc'ul Inmaman. 11 Caw chiwalan huntek'an ti' teyet yun̈e haca' istzala inc'ulti'an, hac tu' heyabenpaxo tzalahilal wintajan; haxinwal caw chitz'ajnacano hune' tzalahilal tu' yul heyanma. 12 Ha' hune' chejbanile ti' chiwalcanojan teyet, caw xahanojab cheyil heba hununex haca' isxahanil chexwilan. 13 Hac ti' chiyu coyeniloj tato caw xahan aycano hunu jamigo ju, tato hinanon̈ jak'ni camo coba yin̈. 14 Tato cheyije tzet chiwalti'an, caw wamigohan heyehi. 15 Walex hex ti', caw matxa chexwalan inchejabojan, yuto hunu naj chejab caw mach yohtajo naj tzet chiswatx'e yahaw, wal xin chexwalan wamigohojan, yuto xawalan teyet sunil tzet halbil wetan yu Inmaman. 16 Maẍtajex quinhesayilojan, haninan quexinsayilojan, quexwanicojan yin̈ hemunil yun̈e lahan chexelico haca' hunu te' satnom te' caw niman sat chak'a, ha' xin sunil huntek'an chewatx'e tu' ayn̈etic'a yin̈ sunilbal tiempo. Hac tu' xin tzijxan̈e ye tu' chek'an tet Inmaman yin̈ inbihan, chiak'lax teyet. 17 Yuxinto caw chiwalcanojan teyet, caw xahan cheyille heba hununex. 18 Yalnipaxo Comam Jesús: —Tato chexcajlax yu anma ay yul sat yiban̈k'inal ti', nawetij tato caj quinyilpaxojan anma. 19 K'inalo tato ayextoco xol tzet chiswatx'e anma ti', caw xahanmi chexyila, haca' isxahanil chil isba. Wal xin caw haninan quexinsiqu'ilojan xol anma, yuxintic'a chexiscaj anma, yuto matxa ayexoco xol tzet chiswatx'e. 20 Tijab yul hec'ul yet walnihan teyet haca' ti': “Naj c'amte' caw mach ec'balo naj sata ispatrón,” yuxin tato caw quincajlaxan yu anma, ha' quexpax tu' chal tu', chexcajlaxpaxo yu anma. Wal tato isyije anma intzoti'an walan tet xin, haquex pax tu', chisyije anma cuybanile cheyala. 21 Caw chexec'oya' yu anma isyayil ayexico yul ink'aban. Chiyute anma hune' tu' yuto caw mach yohtajo anma tu' Mac an̈eintijan. 22 K'inalo tato caw mach quinhulan wala'an cuybanile tet anma, caw machmi ismul anma yin̈. Wal tinan̈ xin, caw matxa tzet tz'aj yala' yu iscolni isba yin̈ ismul tu'. 23 Macn̈etic'a chincajnihan, chiscajpaxo Inmaman. 24 Sunil tzet inyehan xol anma, caw maẍto hunu mac chiyeni yila' anma haca' tu'. K'inalo tato machi c'aybalc'ule inyehan xol anma, caw machim ismul anma, chal tu'. Wal xin, waxan̈ca caw yil anma huntek'an tu', yaj to caw chiniscajan, chiscajpaxo Inmaman. 25 Yaja' caw chu huntek'an ti', yun̈e yijnicano isba sunil tzet tz'ibn̈ebilcano yin̈ Istzoti' Comam Dios bay chala: Caw machi inmulan tet anma, yaj to caw yaco ishowal win̈an, ẍiayoj. 26 Yaj ay hune' Comam chicolwa teyin̈ chitit bey Inmaman, ha' ton xin Comam Espíritu Santo, Comam han̈e isyelal chala. Haninan chintohan incheja'tijan Comam tu'. Yet ay Comam texol chitzotelo win̈an. 27 Haquexpax tu' hex ti', caw chextzotelo win̈an yuto caw hune'n̈etic'a hetzujico wintajan yettaxtic'a wichicojan walnihan istzoti' Inmaman.
1 Caw chiwalcanojan huntek'an ti' teyet, yun̈e mach chebej iscawxi hec'ul win̈an. 2 Wal xin, caw matxa chexchahlaxicto yul iscapilla ebnaj Israel; chiapni hune' tiempohal bay chexyak'a camo ebnaj, cat xin isnano ebnaj tato lan̈an isyijen ebnaj tzet chal Comam Dios. 3 Chiswatx'e ebnaj huntek'an ti', yuto caw mach yohtajo ebnaj Inmaman, yeb xin mach quinyohtajojan ebnaj. 4 Caw chiwalcanojan huntek'an ti' teyet, haxinwal yet chiapni istz'ayical chitit yul hec'ul tato halbilxatic'a teyet wuhan. Yalnipaxo Comam Jesús: —Caw machi walan huntek'an ti' teyet yet yalan̈tocanoj yuto ayinic'ojan texol. 5 Yaja' wal tinan̈ xin, caw chinpaxtojan isc'atan̈ Inmaman an̈eintijan, yaj xin machi hunujex chek'ambe: “¿Baytu'wal chaẍtohi?” quexchi. 6 Wal xin, caw chioc bisc'ulal yin̈ hec'ul yu chiwalan huntek'an ti' teyet. 7 Yin̈ caw yeli chiwalcanojan teyet, caw ec'na c'ul tato chintohan, yuto ta mach chintohan caw mach chihul Comam chicolwa teyin̈. Wal xin caw chintohan cat inchejnitijan Comam. 8 Yet chihul Comam tu', ha' chiak'ni yohtan̈elo anma tato mulum. Ha' Comam tu' chiak'ni yohtan̈elo anma tu' ta caw istoholal quinhulic'ojan inwatx'e'an, yeb ta chil Comam Dios yin̈ tzet chielico anma. 9 Ha' Comam Espíritu tu', chiak'ni yohtan̈elo anma tato caw mulum, yuto maẍtic'a isje isc'ul quinischaba'an yul yanma. 10 Ha' Comam chiak'nipaxo yohtan̈elo anma tato caw istoholal quinhulic'ojan inwatx'e'an, yuxin chinpaxtojan isc'atan̈ Comam Dios, matxa xin bay chiillax win̈an. 11 Chak'nipaxo Comam yohtan̈elo anma tato ha' Comam Dios chiilni yin̈ tzet chielico anma, yuto xacawxico ismul naj yahawil yul sat yiban̈k'inal ti' yiban̈ yu Comam. 12 Caw hantan̈e tzet chiwochehan chiwalan teyet, yaj tinan̈ maẍto chexk'oji hetxumniloj. 13 Yaja' yet chihul Comam Espíritu Santo isyelal chala, ha' Comam xin chexcuyni yin̈ sunil isyelal. Yaj xin mach yeto tzet chak' hecuyu' tu' to tzet abebil yu, ha' chal teyet, cat yak'ni heyohtan̈elo tzettaj ye tu' chito yub. 14 Ha' xin chianico inmayan, yuto chohtan̈e baytet wetan yehi cat xin yalnolo teyet. 15 Sunil tzettaj ye tu' yet Inmaman caw wetpaxojan, yuxinto chiwalcanojan teyet; sunil tzettaj ye tu' wetan yehi caw challaxo teyet yu Comam Espíritu Santo, ẍi Comam. 16 Yalnipaxo Comam tet ebnaj iscuywom: —Hanic'xan̈e bay matxa cheyila' win̈an, hanic'xan̈e cat heyilnipaxo win̈an hunelxa yuto chintohan bey Inmaman, ẍi Comam. 17 Lahwi yalni Comam haca' tu' xin, istzabnico ebnaj iscuywom Comam isk'amben tet hunun: —¿Tzet chal yelapno hune' chiyal Comam ti'? “Caw hanic'xan̈e bay matxa cheyila' win̈an, hanic'xan̈e xin cat heyilni win̈an hunelxa yuto chintohan isc'atan̈ Inmaman,” ẍi Comam, ẍi ebnaj tet hunun. 18 Yalnipaxo ebnaj: —¿Tzet caw yelapno ye hune' chiyal Comam ti', “caw hanic'xan̈e”? ẍi Comam. Caw mach chitxumchalo ju tzet chal yelapnoj, ẍi ebnaj. 19 Isnanilo Comam Jesús tato caw choche ebnaj isk'ambe' tet Comam, yuxinto yal Comam tet ebnaj: —Caw xawalan teyet: “Caw hanic'xan̈e bay matxa cheyila' win̈an, hanic'xan̈e xin cat heyilnipaxo win̈an hunelxa,” quinchiyan. ¿Tom ha' hune' mawalti'an, ha' caw chek'ambe teyet hunujex? 20 Yin̈ caw yeli chiwalan teyet; chioc bisc'ulal yin̈ heyanma cat heyok'i. Wal anma yet yul sat yiban̈k'inal ti' xin, caw chitzalahocan̈. Chiayo bisc'ulal teyiban̈, yaj hune' hebisc'ulal tu' xin caw chipaq'uico yin̈ tzalahilal. 21 K'inalo haca' hunu ix ix, yet chiapni yorahil iswatx'i isc'ul caw bisc'ulal chulo yanma ix yu isya'il chul yiban̈ ix. Yaja' yet xapitzc'a nich'an istz'ul ix tu' xin matxa chisnati ix isya'tajil tu' yu tzalahilal yin̈ nich'an unin xapitzc'a yul sat yiban̈k'inal ti'. 22 Hac tu' cheyak'le hex ti', caw chioc bisc'ulal yin̈ hec'ul tinan̈, yaj xin yet cheyilnopaxo win̈an hunelxa, caw choco hune' icham tzalahilal yin̈ hec'ul. Machi hunu mac chiyu yinilo hune' tzalahilal tu' teyet. 23 Yet hune' tiempohal tu' xin, matxa yilalo ay tzet chek'ambe wetan. Yin̈ caw isyelal chiwalcanojan teyet, tzijxan̈e ye tu' chek'an tet Inmaman yin̈ inbihan, chiyak' Comam teyet. 24 Wal tinan̈ xin, caw maẍto hunu tzet chek'an yin̈ inbihan tet Inmaman. K'anwej cat yak'lax teyet, haxinwal caw tz'ajan chucanico tzalahilal yul heyanma, ẍi Comam. 25 Yalni xin Comam Jesús: —Huntek'an cuybanile xawalan teyet ti', yecheln̈e yu walnihan. Yaj xin chiapni yorahil yet matxa chiwalan teyet yin̈ yecheln̈e, walxinto caw yin̈xa haban chiwalan teyet tzet caw ye Inmaman. 26 Yet hune' tiempohal tu' xin, chek'an tzet choche hec'ul tet Inmaman yin̈ inbihan. Matxa yilalo chintzotelan teyin̈ tet Inmamtu'an, 27 yuto caw xahan ayex yu Inmaman. Caw xahan ayex yu Comam tu' yuto caw xahan ayinan heyu yeb xin yu xaheyayto yul heyanma tato isc'atan̈ Comam titnajinan. 28 Isc'atan̈ Inmaman quintitan yet wulan yul sat yiban̈k'inal ti'. Wal tinan̈ xin chinelan yul sat yiban̈k'inal ti', cat intohan isc'atan̈ Inmaman hunelxa, ẍi Comam. 29 Yalni ebnaj iscuywom Comam tu' tet: —Wal tinan̈, caw habanxa hatzoteli, yu matxa chaẍtzotel yin̈ yecheln̈e. 30 Tinan̈ xin, caw chinachalo juhan̈ tato sunil caw hawohtaj; yuxin chijaytojan̈ yul janmahan̈ tato isc'atan̈ Comam Dios titnajach; matxa yilalo chicok'ambehan̈ tawet, ẍi ebnaj tet Comam. 31 Yalni Comam tet ebnaj: —¿Mataxca caw yeli chechayto yul heyanma win̈an? 32 Wal xin, caw lan̈an yul istiempohal bay chexpujnahocantoj, nananta bay xin chextocanicoj. Hac tu' xin chu quinhebejnicanojan inchuquilan, yaj xin mach chincanan inchuquilan yuto caw ayco Inmaman wetbihojan. 33 Caw chiwalcanojan sunil huntek'an ti' teyet yun̈e yoccano ak'anc'ulal yin̈ heyanma wuhan. Yul sat yiban̈k'inal ti' cheyila' isya'tajil, yaj aweco yip heyanma yuto haninti'an xaquink'ojihan yin̈ sunil isya'tajil ay yul sat yiban̈k'inal ti'.
1 Yet lahwi yalnicano Comam Jesús huntek'an ti' xin, ist'an̈xican̈ Comam satcan̈, yalni Comam: —Mam, maapni yorahil hayenilo yip Hac'ahol ti', cat isyenipaxilo Hac'ahol hawip. 2 Wal xin caw ayxaco anma yalan̈ wipan hawu, yun̈e wak'nihan k'inale mach istan̈bal tet anma xahawak' yul ink'aban. 3 K'inale mach istan̈bal chaliloj, to chaẍyohtan̈elo anma ta hachn̈ech'an caw Dios yin̈ caw isyelal, cat xin quinyohtan̈enilojan anma tato haninan Cristo hinan, hach an̈einpaxtijan. 4 Caw xainyelojan hawip yul sat yiban̈k'inal ti', yuto xainlahan munil hawak' inwatx'ehan. 5 Wal tinan̈ xin Mam, yepaxilo wipan tawintaj, hune' wipan ik'biltic'a wuhan yet ayinan tac'atan̈ yet yalan̈to maẍto chiwatx'i hune' yul sat yiban̈k'inal ti'. 6 Huntek'an mac xahasiq'uilo xol anma yul sat yiban̈k'inal ti', hawati yul ink'aban, xacachwak'an yohtan̈elo ebnaj. Huntek'an ebnaj ti' xin caw hawetxatic'a yehi, caw xin chisyije ebnaj tzet chawala. 7 Wal tinan̈ xin caw yohtaxa tato sunil tzet ak'bil wetan hawu, tac'atan̈ titnaj. 8 Cuybanile hawak' wetan, caw xawalan yabe' ebnaj, ischahni ebnaj yul yanma. Yuxinto caw yohta ebnaj tato caw yeli tac'atan̈ titnajinan. Caw ischayto ebnaj yul yanma tato hach an̈eintijan. 9 Caw chiwaben̈ecanojan ebnaj yul hak'ab, maẍtaj anma yet yul sat yiban̈k'inal ti' chiwaben̈etojan yul hak'ab, to han̈c'an̈e ebnaj hawak' wetan, yuto caw hawet ye ebnaj. 10 Macta chiwalan wetojan, caw hawetpaxoj, yeb xin macta caw hawet, wetpaxojan, yin̈ xin chiilchalo sunil wipan. 11 Caw hanic'xan̈e tiempohal ayinic'ojan yul sat yiban̈k'inal ti', cat xin inpaxtojan tac'atan̈. Walpaxo ebnaj ti' xin, chicancano ebnaj bey ti'. Walach hach ti' Mam, caw c'ul hachn̈etic'a. Macta xahawak' wetan, chawil yu hahelanil, haxinwal hunxan̈e chute isnabal, haca' je han̈on̈ ti'. 12 Yet ayinic'ojan xol ebnaj bey yul sat yiban̈k'inal ti', caw ilbil ebnaj wuhan, yu hawip ayco ebnaj yul ink'aban. Ebnaj hawak' wetan, caw xin machi hunu mac c'aytoj, cachann̈e hune' naj t'in̈anxatic'a yetanto isba; yun̈e yijni isba tzet aycanayo yul Hatzoti'. 13 Wal tinan̈ Mam, chinpaxtojan tac'atan̈, yaj yet ayintoc'ojan ninoxa yul sat yiban̈k'inal ti', chiwalcanojan huntek'an ti' haxinwal haca'tic'a yehico tzalahilal yin̈ wanmati'an, hac tu' chupaxico tzalahilal yin̈ yanma ebnaj. 14 Caw xawalan hatzoti' yabe' ebnaj, yaj wal anma yet yul sat yiban̈k'inal ti', caw chichiwa isc'ul yin̈ ebnaj yuto caw matxa yeto yul sat yiban̈k'inal ti' ye ebnaj. Haca' inpaxojan mach yeto yul sat yiban̈k'inal ti' wehan. 15 Wal xin mach chink'anan tawet ta chawilo ebnaj yul sat yiban̈k'inal ti', han̈c'an̈e chink'anan tawet ta chac'uba ebnaj tet naj matzwalil. 16 Caw mach yeto yul sat yiban̈k'inal ti' wehan, hacpax tu' ebnaj, caw mach yeto yul sat yiban̈k'inal ti' ye ebnaj. 17 Watx'eco isnabal ebnaj tawin̈ yu hahelanil, Hatzoti' xin, ha' ton isyelal. 18 Haca' yu quinhawanitijan xol anma ay yul sat yiban̈k'inal ti', hac tu' chiyu wanipaxtojan ebnaj xol anma. 19 Yu ebnaj hawaco yul ink'aban, yuxin chiwaco inbahan yin̈ munil hawak' wetan; hac tu' xin chiwatx'ico ebnaj yul hak'ab yu isyelal. 20 Maẍn̈etajpaxo yin̈ ebnaj ti' chink'anan hac'ulal, caw chink'anpaxojan hac'ulal yin̈ sunil anma chinchahnihan yul yanma yu Hatzoti' chala'co ebnaj ti'. 21 Wal tinan̈ xin Mam, caw chink'anan tawet tato caw hunn̈ehojab chiyute isnabal ebnaj. Haca'tic'a je han̈on̈ ti', hawetbi wehan, wetbipaxojan hawehi. Hac tu' Mam, chiwochehan tato caw hunxan̈ehojab chucano isnabal ebnaj. Hac ton tu' xin chiyu yanayto anma yul yanma tato hach an̈eintijan yul sat yiban̈k'inal ti'. 22 Ha' isc'ulch'anil hawak' wetan xawak'paxojan tet ebnaj tu', yun̈e caw lahanxan̈e chiyucano isnabal haca'tic'a je han̈on̈ ti'. 23 Caw wetbi inbahan yeb ebnaj, caw xin jetbipaxo coba. Hac tu' xin caw hunxan̈e chucano ebnaj. Hac ton tu' xin chiyu istxumchalo yu anma ay yul sat yiban̈k'inal ti' tato caw hach quinhachejtijan, cat xin isnachalo yu tato caw haca' isxahanil ayinan hawu, hac tu' isxahanil aypaxo anma ayxaco yul ink'abti'an hawu. 24 Mam, ebnaj ayxaco yul ink'abti'an hawu, caw chiwochehan tato bay chinehan ha' tu' xin chiehpaxo ebnaj inc'atan̈an yun̈e yilni ebnaj wipan ak'bil wetan hawu, yuto caw xahan ayinan hawu yalan̈to yet maẍto hune' yul sat yiban̈k'inal ti'. 25 Walach hach ti' Mam, caw toholcano sunil tzet chawatx'e. Wal anma ay yul sat yiban̈k'inal ti', caw mach cachyohtajoj. Walinan xin, caw ohtabilach wuhan, caw xin yohtapaxo ebnaj ayco yul ink'abti'an tato hach an̈eintijan. 26 Caw xacachinyelojan tet ebnaj, yuxin chachyohtan̈elo ebnaj, yaj chito cam cachwak'a'an yohtan̈elo ebnaj. Yun̈e haca' isxahanil ayinan hawu, hac tu' isxahanil aypaxo ebnaj hawu, haxinwal hun chiwupaxojan yeb ebnaj, ẍi Comam Jesús tet Comam Dios.
1 Lahwi yalnicano Comam Jesús huntek'an tzoti' tu' xin, isto Comam yeb ebnaj iscuywom isk'axepic'to hune' ha' nich'an ha' chiyij Cedrón, bey yul hune' peyab xol huntek'an te' tz'unub, ha' tu' xin octo Comam yeb ebnaj iscuywom tu'. 2 Wal naj Judas, chianico Comam yul isk'ab camical, caw yohta naj hune' peyab tu', yuto caw tx'i'al el beyc'o Comam yeb ebnaj iscuywom bey tu'. 3 Yuxin hac tu' yu isbey naj Judas tu' issaynoyo Comam. Tzujan xin hun bulan ebnaj soldado yinta naj, yeb huntek'an ebnaj chitan̈en yatut Comam Dios chejlaxti yu ebnaj fariseo yeb ebnaj iswi'ehal yin̈ ebnaj sacerdote. Yetbi ebnaj tu' istah, yeb iscantil, yeb ch'en ch'en chiocnico yin̈ howal. 4 Wal xin, caw yohtaxa Comam Jesús tzet lan̈an yul yiban̈, yuxinto elto Comam chahwal yin̈ ebnaj, isk'ambeni: —¿Mac chesaya? ẍi Comam. 5 Istak'wi ebnaj xin: —Naj Jesús nazareno chicosayic'ojan̈, ẍi ebnaj. —Hanintonan, ẍi Comam tet ebnaj. Aypaxico naj Judas xol ebnaj, naj chianico Comam yul isk'ab camical. 6 Yet yalni Comam haca' ti': Hanintonan, ẍi Comam, isto tecton ebnaj yintaj, yayc'ay ebnaj xin. 7 Lahwi tu' xin, isk'ambenpaxo Comam: —¿Mac chesaya? ẍi Comam. —Ha' naj Jesús nazareno chicosayan̈, ẍipaxo ebnaj. 8 Yalni Comam xin: —Yaj caw chiwalan teyet tato haninan chinhesayic'ojan, bejwecano ebnaj ti', ẍi Comam tet ebnaj. 9 Hac tu' xin yu yijni isba tzet yal Comam tet Comam Dios yet yalni: “Sunil ebnaj hawak' yul ink'aban, machi hunu ebnaj chic'ayto wuhan,” ẍi. 10 Wal naj Simón Pedro, yihti naj yespada yul yatut, ispitnilto naj istxiquin ischejab naj yahawil ebnaj sacerdote, Malco isbi. Ha' hune' istxiquin naj yin̈ iswatx'k'ab ha' ispitilto naj. 11 Yalni Comam tet naj: —Ayto hawespada yul yatut. ¿Tom mach yilalo wak'ni inbahan yul isk'ab isya'tajil nabilico win̈an yu Inmaman? ẍi Comam. 12 Lahwi tu' xin, istzablaxayo Comam Jesús yu ebnaj soldado, yeb naj yahawil yeco yin̈ ebnaj, yeb yu ebnaj chitan̈en yatut Comam Dios chejbilti yu ebnaj yahawil yin̈ ebnaj Israel; isc'alnayo ebnaj Comam. 13 Babel yito ebnaj Comam bey yatut naj Anás, ismam yixal naj Caifás. Ha' naj Caifás, caw yahawil yeco yin̈ ebnaj sacerdote yin̈ hune' habil tu'. 14 Ha' naj Caifás tu' halni tet ebnaj yahawil yin̈ ebnaj sacerdote tato ec'na c'ul iscam hunu anma selelo sunil anma ay yul con̈ob Israel tu'. 15 Yet yilaxto Comam Jesús, caw nahat tzujan isto naj Pedro yinta Comam, yeb hune'xa naj iscuywom Comam. Hune' naj ti' xin, caw yohta isba naj yeb naj yahawil yehico yin̈ ebnaj sacerdote, yuxinto octo naj isti' yatut naj yinta Comam. 16 Wal naj Pedro tu' xin, cancano naj sat hune' pulta ayco isti' beh, yaj xin elti naj iscuywom Comam yohta isba yeb naj yahawil yin̈ ebnaj sacerdote, yalni naj tet ix chitan̈en pulta tu' ta chiocto naj Pedro. 17 Yalni ix chitan̈en yocto anma yul hune' pulta tu' tet naj Pedro: —¿Tom maẍtaj hunach chaẍcuywi yinta hune' naj ti'? ẍi ix tet naj. Istak'wi naj Pedro tu' tet ix: —Machoj, maẍtajinan, ẍi naj. 18 Yet hune' tiempohal tu' caw chew, yuxin yaco ebnaj chejab yeb ebnaj chitan̈en yatut Comam Dios k'a', yoc ebnaj k'aẍnoj. Sunil ebnaj tu' oc lin̈no yin̈ k'a', ha' hun naj Pedro tu' oc lin̈no k'aẍno yin̈ k'a' xol ebnaj. 19 Lahwi tu' xin, isk'amben naj yahawil ebnaj sacerdote huntek'an k'ambebal tet Comam Jesús: —¿Mac ebnajil chicuywi tawintaj? ¿Tzettaj ye tu' chawak' iscuyu' ebnaj? ẍi naj tet Comam. 20 Istak'wi Comam tet naj: —Yet incuywahan yin̈ anma, caw sajsatil quincuywahan. Caw incuyan anma yulaj capilla yeb xin yul yatut Comam Dios bay chi-la-iscutxba isba anma Israel. Yuxinto caw machi hunu tzet ye tu' ti' walan yin̈ caw ewantajil. 21 ¿Tzet yin̈ yuxinto wetan chak'ambe? K'ambe tet anma bay quincuywahan, ha' anma chihalni tawet tzet wak'an iscuyu'. Wal xin caw yohta anma tu' tzet halbilcano tet wuhan, ẍi Comam. 22 Yet yalni Comam tet naj haca' tu', ispak'laxilto sat Comam yu hune' naj chitan̈en yatut Comam Dios, yalni naj: —¿Tzet yin̈ yuxinto hac tu' hatak'wi tet naj yahawil sacerdote ti'? ẍi naj tet Comam. 23 Istak'wican̈ Comam tet naj: —Tato ay hunu tx'oj mawalan chawabe, halilo tinan̈ baytet. Ta c'ul xin, ¿tzet yin̈ yuxinto chinhamak'an? ẍi Comam tet naj. 24 Isc'allaxto Comam tet naj Caifás yu naj Anás, naj yahawil yin̈ ebnaj sacerdote. 25 Wal naj Pedro xin, k'aẍno chu naj xol ebnaj chejab yeb ebnaj chitan̈en yatut Comam Dios, yoc ebnaj isk'ambeno tet naj: —¿Walach hach ti', hawetbimi haba yeb naj Jesús ti'? ẍi ebnaj tet naj. Yaj caw maẍtic'a yalilo naj, yalni naj haca' ti': —Machoj, caw mach wetbiho inbahan yeb naj, ẍi naj Pedro tu'. 26 Hunepixto xin, isk'amben hune' ischejab naj yahawil yin̈ ebnaj sacerdote ayto yu isba yeb naj elto istxiquin yu naj Pedro tu': —Yaj caw cachwilan xol te' tz'unub yeb naj Jesús ti', ẍi naj tet naj Pedro. 27 Yanipaxico naj Pedro tu' lek'ti'al tato mach yohtajo naj Comam, hunepixto xin, yok'can̈ no' icham chiyo. 28 Yet issajbilo xin, yilaxilti Comam Jesús yul yatut naj Caifás, yilaxto Comam sata naj gobernador Poncio Pilato. Yaj mach octo ebnaj Israel yul capil bay ayicto naj gobernador tu', yuto txahul yocto ebnaj haca' yalni isley ebnaj. Tato chiocto ebnaj tu', matxa chiyu isloni ebnaj itah chilolax yin̈ k'in̈ Pascua. 29 Yuxinto elti naj gobernador tzotelo isti' capil, isk'amben naj tet ebnaj: —¿Tzet ismul hune' naj ti' heyalni? ẍi naj. 30 Istak'wi ebnaj tet naj: —Tato mach xiwquilta ismul naj ti', machim majitijan̈ naj tawet, ẍi ebnaj. 31 Yalni naj Pilato tu' tet ebnaj: —Iweto naj, cat xin heyilni tzet chielico naj haca' chiyute yalni heley, ẍi naj tet ebnaj. Istak'wi ebnaj Israel tu': —Yaj wal han̈on̈ Israel on̈ti'an̈, caw mach chiyu jak'ni camojan̈ hunu anma, ẍi ebnaj. 32 Hac tu' xin yu yijni isba tzet halbilcano yu Comam Jesús yin̈ tzet chiyu iscami. 33 Yocpaxto naj Pilato tu' yul capil hunelxa. Yawtenicto naj Comam Jesús isc'atan̈, isk'amben naj tet Comam: —¿Tom yahawil anma Israel hawehi? ẍi naj tet Comam. 34 Istak'wi Comam xin: —¿Yulmi hawi' chawiti chawalni hune' ti', mato ay mac haln̈e tawet? ẍi Comam. 35 Istak'wi naj Pilato tu' xin: —¿Tom Israel inan hawalni? Ha' ebnaj hawet con̈ob, yeb xin ebnaj yahawil yehico yin̈ ebnaj sacerdote, ha' ebnaj macachiniti wetan, ¿tzet hamul? ẍi naj tet Comam. 36 Yalni Comam: —Wal haninti'an, maẍtaj yul hune' sat yiban̈k'inal ti' chinocan Yahawil. Tato yul sat yiban̈k'inal ti' yahaw inan, sunilmi anma ayxaco yul ink'aban chiscutxba isba cat xin istzabnico howal yun̈e quiniscolnihan yul isk'ab ebnaj yahawil con̈ob Israel. Wal xin maẍtaj yul sat yiban̈k'inal ti' chinocan Yahawil, ẍi Comam tet naj. 37 Yalni naj Pilato tu': —¿Tom yeltic'a yahawil hach, chal tu'? ẍi naj. —Ho' Yahawil wehan haca' hawalni ti'. Quinpitzc'ahan yul sat yiban̈k'inal ti' yun̈e walnihan isyelal. Yuxin macn̈etic'a yetxatic'a isyelal yehi chiyabe tzet chiwalan, ẍi Comam. 38 Isk'amben naj Pilato tu': —¿Tzet yelapno hune' isyelal tu'? ẍi naj tet Comam. Yet lahwi isk'amben naj Pilato tet Comam haca' tu' xin, yelpaxti naj isti' capil, yalni naj tet ebnaj Israel cutxanico tu': —Walinan, caw machi mule chiilchalo yin̈ naj ti' wuhan. 39 Yaj hex ti', caw hunun habil hek'annilto hunun ebnaj presowom yet chiec' k'in̈ Pascua ti'. ¿Chimheyoche tato chinbejtzohan hune' naj heyahawil ti'? ẍi naj tet ebnaj. 40 Yet yaben ebnaj yalni naj Pilato haca' tu', yah wejla ebnaj, yalni yin̈ caw ip: —¡Machoj! Maẍtaj naj chabejtzo, ha' naj Barrabás, ha' naj chabejtzo, ẍi ebnaj. Wal naj Barrabás tu' xin, elk'om naj.
1 Lahwi tu' xin, yinito naj Pilato tu' Comam Jesús, ischejni naj hatelaxo Comam. 2 Isbak'onayo ebnaj soldado huntek'an te' tx'ix coronahil, yanahto ebnaj yin̈ iswi' Comam, yanipaxico ebnaj hune' xilk'ape yin̈ Comam, hucan yehi, cajmutz'mun̈e jilni. 3 Lahwi tu' xin, ishitzico ebnaj isc'atan̈ Comam, yalni ebnaj haca' ti': —Jak'a'co iswinajil naj yahawil con̈ob Israel, ẍi ebnaj chetan ebnaj Comam. Chi-la-ispak'nilto ebnaj sat Comam. 4 Lahwi tu' xin, yelpaxti naj Pilato tu' isti' iscapil, yalni naj tet ebnaj Israel tu': —Ilwec'anabi lah, chiwiltijan naj heyila' yun̈e caw heyabencanoj tato caw machi nich'ano ismul naj chiilchalo yin̈ wuhan, ẍi naj tet ebnaj. 5 Lahwi tu' xin, yelilo Comam isti' capil, ayahto hune' corona tx'ix tu' yin̈ iswi' Comam, hucanpaxico hune' k'ap yin̈ Comam cajmutz'mun̈e. Yalni naj Pilato tu' tet ebnaj: —Ilwec'anabi, ay naj lah, ẍi naj. 6 Hayet yilni ebnaj yahawil yin̈ ebnaj sacerdote yeb ebnaj chitan̈en yatut Comam Dios, yah yaw ebnaj, yalni ebnaj yin̈ caw ip: —Ahojab naj yin̈ culus, ahojab naj yin̈ culus, ẍixan̈e ebnaj sunil. —Yuxinto yal naj Pilato tu' tet ebnaj: —Ta hac tu' chal tu', iweto naj cat heyanican̈ naj yin̈ culus tu' hechuquil, yuto caw machi nino ismul naj chiilchalo yin̈ wuhan, ẍi naj tet ebnaj. 7 Yalni xin ebnaj Israel tu' tet naj: —Wal coleyan̈ xin, chala tato caw yilal iscam naj, yuto caw chalico isba naj Isc'aholo Comam Dios, ẍi ebnaj. 8 Yet yaben naj Pilato hune' ti' xin, ec'na caw xiwcan̈ naj. 9 Yuxinto meltzopaxicto naj yul capil tu' hunelxa, isk'amben naj tet Comam: —¿Baytu'wal titnajachicoj? ẍi naj. Caw xin maẍtic'a tak'wi Comam tet naj. 10 Yuxinto yal naj tet Comam: —¿Tzet yin̈ yuxinto mach chaẍtak'wi wetan? ¿Tom mach hawohtajoj tato ay wipan cachinbejtzonan, maca xin cachwanican̈an yin̈ culus? ẍi naj tet Comam. 11 Istak'wi Comam tet naj: —Caw machim hawip win̈an tato maẍtaj Comam Dios ak'n̈e hune' hawip ti' yul hak'ab. Wal xin, ha' naj quinanicojan yul hak'ab ti', ha' naj caw ec'na ay ismul tasataj, ẍi Comam tet naj. 12 Yet yaben naj yalni Comam hune' tu', issayni naj tzet caw chiyu iscolcha Comam, yaj caw ip yahcan̈ yel yaw ebnaj Israel tu', chalni ebnaj: —¡Tato chabejtzo naj, caw chacaj naj jahaw ay bey Roma chal tu', yuto macn̈etic'a chal isba jahawil, caw chiscaj naj jahaw ay bey Roma! ẍi ebnaj. 13 Yet yaben naj Pilato hune' tu', yalni naj tato chiillaxilti Comam Jesús. Lahwi tu' xin, yay tz'on̈no naj yul ischem bay chiillaxi tzet chielico anma ay ismul. Hune' lugar tu', Gabata isbi yul abxubal hebreo. Gabata tu' chal yelapnoj latz'bilcan̈ ch'en ch'en. 14 Chumanil xin yet hecalxan̈e chiichico k'in̈ Pascua, yalni naj tet ebnaj Israel tu': —Ay heyahawil ti' lah, ẍi naj. 15 Yahpaxo wejna ebnaj yalni yin̈ caw ip: —¡Camojab naj, camojab naj, acan̈ naj yin̈ culus! ẍi ebnaj yin̈ Comam. Istak'wipaxo naj: —¿Tom chiwacan̈an naj heyahawil ti' yin̈ culus, chal tu'? ẍi naj tet ebnaj. Istak'wi ebnaj yahawil yin̈ ebnaj sacerdote: —Wal han̈on̈ti'an̈, mach hunuxa jahawilan̈ cachann̈e naj jahawil ay bey Roma, ẍi ebnaj tet naj. 16 Hac tu' xin yu yanico naj Pilato Comam yul isk'ab ebnaj yun̈e yanican̈ ebnaj yin̈ culus. Hac tu' xin yu yinito ebnaj Comam. 17 Yet yelto Comam Jesús yul con̈ob Jerusalén tu', yinito Comam isculus yiban̈ iswixic' bay chialaxicoj. Yilaxto Comam bey hune' tx'otx' chiyij Gólgota. Hune' tzoti' Gólgota tu', chal yelapnoj Isbajil Wi'e yin̈ abxubal hebreo. 18 Ha' tu' xin alaxcan̈ Comam yin̈ culus. Aypaxo xin cawan̈xa ebnaj alaxcan̈ yin̈ culus yinta Comam. Hune' naj ah yin̈ iswatx'k'ab Comam, hune'xa naj ah yin̈ ismeck'ab. 19 Istz'ibn̈en naj Pilato hayeb tz'ib, ischejni naj yalaxoco yiban̈ iswi' Comam yin̈ culus, chalni haca' ti': Naj Jesús ah Nazaret, Yahawil anma Israel, ẍi hayeb tz'ib tu'. 20 Caw hantan̈e ebnaj Israel ilni huntek'an tz'ib tu', yuto caw istxam con̈ob Jerusalén alaxcan̈ Comam yin̈ culus. Ha' huntek'an tz'ib tu' xin, ayico yin̈ abxubal hebreo yeb xin yin̈ abxubal griego, yeb xin yin̈ hune'xa abxubal chiyij latín. 21 Yuxinto yal ebnaj yahawil yin̈ ebnaj sacerdote tet naj Pilato tu': —Majaltam ti', mach yahawilo ebnaj Israel maxawutecoj, hacoj ti' maxawutecoj lah, naj chiyal isba yahawil ebnaj Israel, ẍi ebnaj. 22 Istak'wi naj Pilato tet ebnaj: —Baytettic'a toxa mantz'ibn̈ecojan hac tu' chiyucanoj, ẍi naj. 23 Yet lahwi yanican̈ ebnaj soldado Comam Jesús yin̈ culus tu', yinican̈ ebnaj xil isk'ap Comam, ispohnicanto ebnaj yin̈. Caw can̈eb elico k'ap, hunun litx'an yet hunun ebnaj. Wal hune' k'ap chishucbaco Comam yiban̈ xil isk'ap xin, machi istzilbanil k'ap, yuto hune'n̈e ye ischembanil k'ap sunil masanta chiayilo yin̈ yojtabanil. 24 Yuxinto yal ebnaj soldado tu' tet hunun: —Mach chicotzilto hune' ti', wal xin jilwe coba yin̈ mac chiinitoj, ẍi ebnaj tet hunun. Hac tu' xin yu yijnicano isba yin̈ tzet tz'ibn̈ebilcano yul Yum Comam Dios bay chala: “Istzilayo ebnaj xil ink'apan yin̈, yilwenpaxo isba ebnaj yin̈ mac chiinito xil ink'apan hucan yehi,” ẍicanayoj. Yaj xin caw yeli, hac tu' yute ebnaj soldado tu'. 25 Iscawilal bay aycan̈ Comam yin̈ culus tu' xin, lin̈ancan̈ ismi' Comam yeb xin isnoh ismi', yeb xin ix María yixal naj Cleofas, yeb xin ix María ah Magdala. 26 Isc'atan̈ ismi' Comam tu' xin, lin̈ancan̈ hune' naj iscuywom Comam caw ochebil yu. Yet yilni Comam ismi' tu', yalni Comam: —Mi', naj lin̈ancan̈ tac'atan̈ tu', haca' hawunin chiyucanico naj, ẍi Comam. 27 Yalnipaxo Comam tet naj iscuywom tu': —Inmi'ti'an, caw haca' hami' chiyucanicoj, ẍi Comam tet naj. Hac tu' xin yu yoc naj yilno ismi' Comam bey yatut. 28 Lahwi tu' xin, yohtan̈enilo Comam Jesús tato caw yijcano isba sunil tzet yilal iswatx'eni, yuxinto yal haca' ti': —Caw chitaj inti'an, ẍi Comam. Yal Comam hune' ti' yun̈e yijnicano isba tzet tz'ibn̈ebilcano yin̈ Istzoti' Comam Dios yet payat. 29 Bey tu' xin, ayayo hune' ẍalu vinagre, islabanayto ebnaj hune' esponja xol, yanico ebnaj hune' esponja tu' yin̈ iswi' hune' te' hisopo, yanahto ebnaj yin̈ isti' Comam. 30 Yet lahwi yuc'ni Comam vinagre tu' xin, yalni haca' ti': —Mayijcano isba sunil tinan̈, ẍicano Comam. Lahwi tu' xin, yay xulna iswi' Comam, iscamiloj. 31 Caw xin hecalxan̈e k'in̈ Pascua yeb xin istz'ayical xewilal, yuxinto mach chisje isc'ul ebnaj Israel tato chicancano isnimanil ebnaj aycan̈ yin̈ culus bey tu', yuto caw aycano yelapno hune' tz'ayic xewilal tu' yul sat ebnaj. Yuxinto bey ebnaj isk'ana' tet naj Pilato tato chischej naj k'ahlaxoto isbajil yoj Comam yeb ebnaj alaxcan̈ yin̈ culus yinta Comam tu', yun̈e iscamilo yin̈ an̈e cat xin yilaxayo isnimanil yin̈ culus. 32 Yuxin apni ebnaj soldado isk'ahalto yoj naj babel yeb xin naj iscab. 33 Yet yapni ebnaj yin̈ Comam Jesús xin, yilni ebnaj tato xacamnalo Comam, yuxinto matxa isk'ahilto ebnaj yoj Comam. 34 Yaj xin ay hune' naj soldado hopchan ismotx Comam yu islanza, yelilo chic' yeb ha ha' yul ismotx Comam. 35 Wal xin haninan caw wilan hun ti' yuxinto chiwalan teyet, caw chiwalan isyelal teyet yun̈e heyanayto yul heyanma tato caw hac tu' yuhi. Caw wohtajan tato caw isyelal tzet chiwalti'an. 36 Matxa k'ahlaxilto yoj Comam yun̈e yijnicano isba tzet tz'ibn̈ebilcano yul Yum Comam Dios yet payat bay chal haca' ti': “Machi hunu isbajil chik'ahlaxtoj,” ẍi. 37 Chalpaxo haca' ti' yin̈ Istzoti' Comam Dios: “Chiillax hune' naj hopchabil yu ch'en lanza,” ẍi. 38 Ay xin hune' naj José isbi, ah Arimatea. Ha' naj tu' xin tzujantic'a yin̈ tzet chal Comam Jesús, ton̈e xin mach chisyelo naj yuto caw chixiw naj tet ebnaj yahawil yeco yin̈ anma Israel. Isbey naj isk'anno tet naj Pilato ta chiyiyo naj isnimanil Comam yin̈ culus. 39 Ha' hun naj Nicodemo, naj beyc'o ilno Comam yet ak'balil yet yalan̈tocanoj, apni naj bey tu', ik'bil oxeb arroba huntek'an an̈ caw xuk' sam yu naj; mirra isbi, sombil yeb huntek'an an̈ chiyij áloes. 40 Lahwi tu' xin, yinito ebnaj isnimanil Comam, ispichnico ebnaj k'ap yeb an̈ caw xuk' sam tu' yin̈ isnimanil Comam; yuto hac tu' chiyute anma Israel yin̈ iscamom yet chimujlaxi. 41 Iscawilal bay alaxcan̈ Comam yin̈ culus tu', ay hune' peyab yet tz'unub, ha' tu' xin ay hune' ch'en ch'en holbil yul bay chialaxicto camom. Caw xin ac'to ch'en, caw maẍto hunu camom chialaxicto yul ch'en. 42 Yu yichixa tz'ayic xewilal, yeb xin yu cawil yeco hune' ch'en ch'en tu', yuxin ha' tu' yacanicto ebnaj isnimanil Comam.
1 Haxa yet babel tz'ayic yin̈ semana, caw ayto issajbiloj isto ix María ah Magdala bay alaxicto isnimanil Comam. Yilni ix ta matxa ch'en ch'en ayco ismajilo isti' bay alaxicto Comam tu'. 2 Hac tu' xin yu ispaxto ix yin̈ an̈e yalno tet naj Simón Pedro yeb xin tet hune'xa naj iscuywom Comam, naj caw xahan ay yu. Yalni ix María ah Magdala tu' tet ebnaj: —Caw ma'ilaxilti isnimanil Comam Jesús baytic'a ayictoj; baymitu'wal mailaxto isnimanil Comam, caw mach johtajoj, ẍi ix tet ebnaj. 3 Yet yaben naj Pedro yeb hune'xa naj caw ochebil yu Comam tu', isto ebnaj bay alaxicoto Comam tu'. 4 Caw xin an̈e yak' ebnaj iscawan̈il, yaj xin babico hune'xa naj tu' sata naj Pedro, yuxin babel apni naj sata naj. 5 Apnin̈e naj xin yay c'on̈no naj, ist'an̈xicto naj bay alaxicto isnimanil Comam. Yilni naj xin tato haxan̈c'an̈e k'ap k'ap pichlaxico yin̈ Comam wojanayoj, yaja' xin machi octo naj. 6 Lahwi tu' xin, yapni naj Simón Pedro, beh xin yocto naj yilnoj, yilni naj xin tato caw haxan̈c'an̈e k'ap k'ap wojancanayoj. 7 Wal k'ap payu'e c'aln̈e iswi' Comam, chulbilayo k'ap. Mach hunu yehayo k'ap yeb k'ap pichlaxico yin̈ Comam. 8-9 Lahwi tu' xin, yocto hune'xa iscuywom Comam tu', naj babel apni, yilni naj xin tato matxa Comam ayicto yul ch'en, yanayto naj yul yanma. Yaja' wal xin caw maẍto chitxumchalo yu ebnaj tzet tz'ibn̈ebilcano yul Yum Comam Dios bay chala tato caw yilal ispitzc'acan̈ Comam Jesús xol camom. 10 Lahwi tu' xin, ispaxti ebnaj bay aya. 11 Wal ix María ah Magdala, cancano lin̈no ix ok'o isti' bay alaxicto Comam, yay n̈ohno ix ist'an̈xicto ix. 12 Yilnicto ix cawan̈ ebnaj ángel, caw saj jilni xil isk'ap ebnaj ayco yin̈, tz'on̈ayo ebnaj bay ec'lena isnimanil Comam tu', hune' naj yin̈ iswi'taj hune'xa naj yin̈ yojtaj. 13 Lahwi tu' xin, isk'amben ebnaj tet ix: —¿Tzet chawok'te? ẍi ebnaj. Istak'wi ix: —Chinok'an yuto ma'ilaxto isnimanil Wahawilan, caw mach wohtajojan baytu'wal ma-bey-alaxocanoj, ẍi ix tet ebnaj. 14 Hunepixto tu' xin, ist'an̈xito ix yintaj, yilni ix xin lin̈anxacan̈ Comam Jesús isc'atan̈ ix, yaj mach istxumilo ix tato ha' Comam. 15 Isk'amben Comam tet ix: —¿Tzet yin̈ yuxinto chachok'i? ¿Mac chasaya? ẍi Comam. Ha' yute isnani ix tato ha' naj chitan̈en hune' tz'unub tu' chitzotel tet ix, yuxinto yal ix: —Mamin, tato hach maxawitoj, halilo wetan baytu'wal macachbey hawak'a'canoj, cat winitojan, ẍi ix. 16 Yalni Comam tet ix: —¡María! ẍi Comam. Hac tu' xin yu ismeltzoto ix yintaj, ist'an̈xico ix yin̈ Comam, yalni ix yin̈ abxubal hebreo: “Raboni,” ẍi ix. Maestro, ha' chaliloj hune' tu'. 17 Yalni Comam tet ix: —Bejtzoinan, mach chinhatzaban yuto maẍto chinapnihan isc'atan̈ Inmaman. Wal tinan̈ xin, as hal tet ebnaj wuẍtajan tato chinpaxtojan isc'atan̈ Inmaman, ha' Hemampaxoj, inDiosalan, heDiosalpaxoj, ẍi Comam tet ix. 18 Yuxin to ix María ah Magdala tu' yala' tet ebnaj iscuywom Comam, yalni ix haca' ti': —Caw mawilan yin̈ Comam Jesús, ẍi ix. Lahwi tu' yalni ix tet ebnaj yin̈ tzet yal Comam. 19 Yet babel tz'ayic yin̈ semana tu' yet lan̈an yah ak'bal cutxanico ebnaj iscuywom Comam. Caw caw yecano ispulta ebnaj yu, yuto caw chixiw ebnaj tet ebnaj yahawil yin̈ ebnaj Israel. Yoc apno Comam bey tu', yoc lin̈no Comam yictabal ebnaj, yalni Comam tet ebnaj: —Ayojab ak'anc'ulal texol, ẍi Comam. 20 Yet lahwi yalni Comam hune' tu', isyeni Comam isk'ab tet ebnaj yeb ismotx bay to ch'en lanza. Hayet yilni ebnaj Comam tu' xin, caw occano hune' niman tzalahilal yin̈ yanma ebnaj. 21 Yalni Comam tet ebnaj hunelxa: —Ayojab ak'anc'ulal texol. Haca' yu walaxtijan yu Inmaman, hac tu' xin chiyu quexwanitojan, ẍi Comam tet ebnaj. 22 Lahwi tu' xin, yanilto Comam xob isti', yalni Comam: —Chahwecano Espíritu Santo, ẍi Comam. 23 Ha' mac chitan̈cano ismul yiban̈ heyu, chitan̈cano ismul yiban̈ yu Comam Dios. Wal mac mach chitan̈cano ismul yiban̈ heyu xin, caw mach chitan̈paxo ismul yiban̈ yu Comam Dios, ẍi Comam tet ebnaj. 24 Ay xin hune' naj xol ebnaj cablahon̈wan̈ iscuywom Comam Jesús tu', Tomás isbi, naj chihallax “Tioẍ uninal.” Machi naj ayco xol ebnaj iscuywom Comam tu' yet isyeni isba Comam. 25 Yuxinto yal ebnaj tet naj Tomás tu': —Caw majilan̈ yin̈ Comam, ẍi ebnaj. —Istak'wi naj: —Tato mach chiwilan bay tona ch'en lawuẍ yul isk'ab Comam cat wanicto yiximal ink'aban yul, yeb ta mach chintzaban bay tona ch'en lanza yul ismotx Comam, caw mach chiwaytojan yul wanmahan, ẍi naj. 26 Semanahilxa tu' xin, iscutxbanpaxo isba ebnaj hunelxa yul n̈a, ayicto xin naj Tomás tu' xol ebnaj, caw xin c'ul yecanico ispultahil te' n̈a bay ayicto ebnaj tu'. Yoc apno Comam bey tu', yoc lin̈no Comam yictabal ebnaj, yalni Comam: —Ayojab ak'anc'ulal texol, ẍi Comam. 27 Lahwi tu' xin yalni Comam tet naj Tomás: —Tomás, acto yiximal hak'ab yul isholanil ink'abti'an lah, cat hawanipaxicto yul isholanil inmotxan. Mach chicabcon hac'ul, ayto yul hawanma win̈an, ẍi Comam. 28 Lahwi tu' xin, yalni naj Tomás tu' tet Comam: —¡Hach Wahawil, hach inDiosalan! ẍi naj tet Comam. 29 Yalni Comam Jesús tet naj xin: —Caw mato xawilico win̈an maxawanayto yul hawanma. Wal xin, aytam sak'al yet anma mach yechto chinyilan cat xin quinyanaytojan yul yanma, ẍi Comam tet naj. 30 Caw xin tx'i'alto c'aybalc'ule isye Comam Jesús yila' ebnaj iscuywom mach tz'ibn̈ebilayo yul hune' hum ti'. 31 Yaja' tz'ibn̈ebilcano huntek'an ti' yun̈e heyanayto yul heyanma tato ha' Comam Jesús, ha' ton Cristo, Isc'ahol Comam Dios. Haxinwal yet cheyanayto yul heyanma, chechah hek'inal mach istan̈bal yin̈ isbi Comam.
1 Lahwi tu' xin, isyenipaxocan̈ isba Comam Jesús hunelxa tet ebnaj iscuywom yet ay ebnaj isti' ha' lago Tiberias. Hac ti' xin yu isyeni isba Comam tet ebnaj. 2 Isti' ha' lago tu' ayayo naj Simón Pedro, yeb naj Tomás, naj chihallax tioẍ uninal, yeb xin naj Natanael ah Caná ay yul ismajul Galilea, yeb xin cawan̈ ebnaj isc'ahol icham Zebedeo, yebpaxo xin cawan̈xa ebnaj iscuywom Comam. 3 Yalni naj Simón Pedro: —Chintohan tzabo cay, ẍi naj. Yalnipaxo huntek'anxa ebnaj tu': —Chon̈tohan̈ tawintaj, ẍi ebnaj. Hac tu' xin yu isto ebnaj. Yocto ebnaj yul hune' te' barco, yaja' xin maẍtic'a hunu no' cay istzab ebnaj yin̈ hune' ak'bal tu'. 4 Yet lan̈anxa issajbilo xin, lin̈anxacan̈ Comam Jesús isti' ha'. Wal ebnaj iscuywom Comam tu' xin, caw maẍtic'a txumchalo Comam yu ebnaj. 5 Yalni Comam tet ebnaj: —¡We ach! ¿Tom caw maẍto no' chiahti heyu? ẍi Comam. Istak'wi ebnaj: —Caw machi no', ẍi ebnaj. 6 Yalni Comam tet ebnaj: —Aweyto hehac' yin̈ hewatx'k'ab, haxinwal cheyik' no', ẍi Comam tet ebnaj. Hac tu' xin yu yanayto ebnaj ishac' tu' xol ha' hunelxa, haxa yet yinahti ebnaj tx'an̈ xol ha' xin, caw matxa chik'oji ebnaj yinahti tx'an̈ yu yalil no' nohayto yul tx'an̈. 7 Ha' xin naj iscuywom Comam caw xahan ay yu, yal naj tet naj Pedro: —¡Ha' Comam hune' ti'! ẍi naj. Yaben̈e naj Pedro tato ha' Comam hune' tu', yanico naj xil isk'ap, yuto yuln̈e k'ap ayco yin̈ naj. Caw xin yin̈ an̈e isbejtzoto isba naj xol ha', isto naj yilno Comam. 8 Yuxin haxa huntek'anxa ebnaj n̈ic'niti te' barco isti' ha' lago tu'. Hatxbil xin tx'an̈ hac tu' yu ebnaj, nohna tx'an̈ yu no' cay tu'. Can̈ebn̈em xin tx'an̈il yehic'to te' yin̈ isti' ha' tu'. 9 Yet yapni ebnaj isti' ha' tu' xin, yilni ebnaj hune' k'a k'a', batxanayo hune' no' cay yiban̈ tzak'ak'. Aypaxayo ixim pan isc'atan̈. 10 Yalni Comam tet ebnaj: —Iweti hayc'on̈o no' cay maxeyik' tu', ẍi Comam. 11 Hac tu' xin yu yahto naj Pedro tu' yul te' barco, ispuhnilo naj tx'an̈, ishatxnilo naj tx'an̈ isti' ha'. Waxan̈ca caw nohna tx'an̈ yu no' cay tu', yaj caw maẍtic'a lin̈moto tx'an̈; caw xin ciento cincuenta y tres no' yik' ebnaj yin̈ sunil. 12 Lahwi tu' xin, yalni Comam tet ebnaj: —Catawej, wa'an̈wej, ẍi Comam. Caw xin machi hunu ebnaj k'amben mac anmahil Comam, yuto caw yohta ebnaj tato ha' Comam Jesús. 13 Lahwi tu' xin, isto Comam yinocan̈ ixim pan, yak'ni Comam ixim tet ebnaj. Hactic'a tu' yutepaxo Comam yin̈ no' cay. 14 Ha' yin̈ hunel tu' xin, tz'ajna yoxel isyeni isba Comam tet ebnaj iscuywom yet xaitzitzbican̈ Comam xol camom. 15 Lahwi iswa' ebnaj xin, yalni Comam Jesús tet naj Simón Pedro: —Simón, isc'ahol naj Juan, ¿caw xahanmi ayinan hawu sata ebnaj ti'? ẍi Comam. Istak'wi naj Pedro: —Ho' Mamin, caw hawohtaj tato xahan ayach wuhan, ẍi naj tet Comam. —Ta hac tu' chal tu', haca' chute hunu naj tan̈em me' islotzen no' niẍte yunin, hac tu' chawute hacuyni macta chiyaco isba yul ink'aban, ẍi Comam tet naj. 16 Lahwi tu' xin, yalni Comam yin̈ iscayel: —Simón, isc'ahol naj Juan, ¿caw xahanmi ayinan hawu? ẍipaxo Comam tet naj. —Ho' Mamin, caw hawohtaj tato caw xahan ayach wuhan, ẍipaxo naj Pedro tu'. Yalni Comam tet naj xin: —Ta hac tu' chal tu', haca' chiyute istan̈en hunu naj tan̈em me' isme', hac tu' chawute hawilni anma chiyaco isba yul ink'aban, ẍi Comam tet naj. 17 Yalnipaxo Comam yet yoxel tet naj: —Simón, isc'ahol naj Juan, ¿caw yelmi xahan ayinan hawu? ẍi Comam tet naj. Hac tu' xin yu yoc bisc'ulal yin̈ isc'ul naj Pedro yuto yetxa yoxel isk'amben Comam tet naj tato yeli xahan ay Comam yu naj. Yuxinto yal naj: —Mamin, walach hach ti', caw sunil tzet hawohtaj, caw xin hawohtaj tato caw yeli xahan ayach wuhan, ẍi naj tet Comam. Istak'wi Comam: —Ta hac tu' chal tu', caw haca' chiyute hunu naj tan̈em me' islotzen no' niẍte yunin, hac tu' chawute hacuyni macta chaco isba yul ink'aban. 18 Yin̈ caw isyelal chiwalan tawet, yet caw tzehach to, caw chawatx'eco isc'alil hawictaj. Ha' cawxencan̈ haba, hasaynito haba baytic'a chal hac'ul. Wal yet chachichambi xin, toxan̈e chawican̈ hak'ab, nanxa mac ch'anico xil hak'ap, cat hawilaxto bay mach isjeto hac'ul, ẍi Comam tet naj. 19 Yal Comam haca' ti' tet naj Pedro tu' yun̈e yohtan̈enilo naj yin̈ tzet chiyu iscami, cat xin isyenilo isba yip Comam Dios yin̈ iscamical naj Pedro tu'. Lahwi tu' xin yalni Comam: —Ocan̈ tzujno wintajan, ẍi Comam tet naj. 20 Lahwi tu' xin, ist'an̈xiti naj Pedro yintaj, yilni naj tato tzujanpaxo naj iscuywom Comam caw ochebil yu, naj tz'on̈an iscawilal Comam yet iswa' yeb iscuywom, naj k'amben tet Comam haca' ti': “Mamin, ¿mac chaẍanico yul isk'ab camical?” ẍi. 21 Yet yilni naj Pedro tato tzujan naj xin, isk'amben naj tu' tet Comam Jesús: —Mamin, ¿haxaca naj tzujan jinta ti', tzet chiyub iscamopaxo naj? ẍi naj tet Comam. 22 Istak'wi Comam: —Tato chiwochehan ayton̈etic'ac'o naj yet chinhulan hunelxa, wal xin machi hawoc yin̈. Hachcachann̈e chachoc tzujno wintajan, ẍi Comam tet naj Pedro tu'. 23 Hac tu' xin yu yelto isk'umal xol ebnaj ayxaco yul isk'ab Comam tato mach chicam hune' naj iscuywom Comam tu', yaj mach yal Comam tato mach chicam naj, wal xin yal Comam: “Tato chiwochehan ayton̈etic'ac'o naj ti' yet chinhulan, caw machi hawoc yin̈,” ẍi Comam. 24 Hune' naj iscuywom Comam ti', ha' naj caw chihalni sunil huntek'an ti', ha' xin tz'ibn̈encanoj. Yuxinto caw johtaj tato caw yel tzet tz'ibn̈ebilcano ti'. 25 Caw hantan̈eto tzet iswatx'e Comam Jesús tu'. K'inalo tato caw hununtajil le-yu istz'ibn̈elaxcanoj, caw machim chiyabe hune' yul sat yiban̈k'inal ti' yu te' hum tato tz'ibn̈elaxi. ¡Hacojab tu'!