Sa' eb li cutan a'an li acuabej César Augusto quixq'ue jun li chak'rab re nak chixjunileb li tenamit te'ajlak ut te'xq'ue xc'aba'eb chi tz'îbac. A'in li xbên sut nak que'xtz'îba xc'aba'eb li tenamit. A'an quic'ulman nak cuank laj Cirenio chi taklanc sa' li na'ajej Siria. Chixjunileb que'côeb xq'uebaleb xc'aba' chi tz'îbac. Ac sa' xtenamiteb li junjûnk que'côeb chixtz'îbanquileb lix c'aba'. Laj José qui-el sa' li tenamit Nazaret li cuan sa' xcuênt Galilea ut cô Belén li cuan xcuênt Judea. A'an xtenamit li rey David. Aran cô xban nak a'an xcomoneb li ralal xc'ajol laj David. Aran quixq'ue xc'aba' chi tz'îbac rochben lix María li ac tz'amanbil xban. Lix María ac yaj aj ixk. Nak ac cuanqueb aran Belén quicuulac xk'ehil nak tayo'lak lix c'ula'al. Ut quiyo'la li xbên xc'ula'al, quixlan sa' t'icr ut quixyocob sa' xna'aj xcuaheb li cuacax xban nak mac'a' xna'ajeb sa' eb li ochoc Nach' riq'uin li tenamit Belén cuanqueb aj ilol xul yôqueb chixc'ac'alenquil lix quetômk chi k'ek. Mac'a' sa' xch'ôleb nak xakamil jun x-ángel li Kacua' chiruheb. Ut quisakeno' chi xjun sutam li cuanqueb cui'. Ut eb laj ilol xul c'ajo' nak que'xucuac. Abanan li ángel quixye reheb: -Mexxucuac xban nak lain xinchal xyebal êre jun chabil esilal. A'in jun sahil ch'ôlej chok' reheb chixjunileb li tenamit. Anakcuan xyo'la jun laj Colol êre sa' lix tenamit laj David ut a'an li Cristo li Kacua' li yechi'inbil xban li Dios. Jo'ca'in nak têtau. Li c'ula'al lanbil sa' t'icr ut yocyo sa' xbên li q'uim sa' xna'aj xcuaheb li cuacax. A'in li retalil nak a'an li têtau, chan li ángel. Ut sa' junpat que'chal nabaleb chic li ángel sa' choxa. Yôqueb chixlok'oninquil li Kacua' ut yôqueb chixyebal: -Chinimak taxak xlok'al li Kacua' Dios li cuan sa' choxa ut chicuank taxak li tuktûquilal sa' xyankeb li cristian li rarôqueb xban li Dios.- Nak ac xcôeb li ángel sa' choxa, eb laj ilol xul que'oc chixyebal chi ribileb rib: -Yôkeb Belén ut takil chak li c'a'ru xc'ulman, li xtakla xyebal ke li Kacua', chanqueb. Côeb sa' anil ut que'xtau lix María rochben laj José ut li c'ula'al yocyo sa' xna'aj xcuaheb li xul. Ut nak ac xe'xtau, que'xserak'i reheb li c'a'ru quiyehe' reheb chirix li c'ula'al. Ut chixjunileb li que'abin re li c'a'ru que'xye laj ilol xul, sachsôqueb xch'ôl que'cana. Ut lix María quixc'ûla sa' xch'ôl chixjunil li c'a'ru quic'ulman ut yô chixc'oxlanquil rix. Ut chirix chic a'an eb laj ilol xul que'suk'i sa' lix na'ajeb. Yôqueb chixlok'oninquil ut yôqueb chixnimanquil ru li Kacua' riq'uin li c'a'ru que'rabi ut que'ril xban nak chixjunil li que'ril, a'an jo' li quiyehe' reheb.