1 T-xe tnejel, tej na'nxtok tbant tcyakil, attok te Tc'wa'l Dios ex Yol tbi. Ex aju Yol attok tuc'il Dios, ex aju Yol ax Dios te. 2 Ate jlu attok tuc'il Dios atxix t-xe tnejel. 3 Nok tu'n o bant tcyakil; ex tcyakilju o bant, minti'wtlo o bant nokwit mya ate binchante. 4 Attok chwinklal tuc'il, ex aju chwinklal at tuc'il atzunju spic'un cye xjal. 5 Aju spic'un lu in koptz'aj tuj klolj, ex minti' o yupj ju spic'un tu'n klolj. 6 Ul jun xjal Juan tbi, tzaj sama'n tu'n Dios. 7 Ate jlu ul tu'n toc te testiw tu'n ttzaj ttx'olba'n ti'j ju spic'un, tu'ntzun cyocslan cycyakil xjal nok tu'nju tyol. 8 Mya ate Juan spic'un; nok o'cx ul tu'n ttzaj ttx'olba'n ti'j ju spic'un. 9 Aju spic'un axix toc ch'ixtok tul twitz tx'otx' tu'n t-spic'bante cye cycyakil xjal. 10 Tejtzun tten ju Yol twitz tx'otx' minti' el cynic' xjal ti'j, masque tu'nx o bant twitz tx'otx'. 11 Ul twitz ju tx'otx' tecuxix, atzun ke t-xjalil minti' o c'met cyu'n. 12 Pero akeju e c'monte te ex e ocslan ti'j, xi tk'o'n cyoclen tu'n cyoc te tc'wa'l Dios. 13 Pero mya cyi'j xjal ma che el itz'j ex mya tu'n cyajbil xjal ex mya tu'n tajbil xinak ma che itz'j, nok o'cx tu'n tajbil Dios ma che oc te tc'wa'l. 14 Aju Yol oc te xjal ex o najan kxol, nim t-xtalbil ex axix toc tyol; ex o kil tajwalil ma'xix, ax ju tajwalil Dios Mambaj xi tk'o'n te, tu'nju atzun o'cxcu jun Tc'wa'l. 15 Tzaj ttx'olba'n Juan axix toc ti'j, ex jaw tk'ajk'ajel twi' cyuw, tma: —Atzunju xjal lu xi nma'ne cyeye: Aju tzul wi'jxiye mas ma' toclen nwitze, porque attok tej na'nxtok wul itz'je, nchiye cyeye, chi Juan. 16 Nimxix xtalbil at tuc'il Jesucrist; aju xtalbil lu cucx in tzaj tk'o'n Jesucrist ke kcyakil. 17 Porque aju ley ate Moisés tzaj k'onte, atzunju xtalbil ex ju yol axix toc, ate Jesucrist tzaj k'onte. 18 Mi a'l jun xjal o til jun maj twitz Dios; pero ma tzaj chic'ba'n tu'n o'cxcu jun Tc'wa'l Dios tza'n tten Dios, porque ax ta' ttxlaj Mambaj. 19 E tzaj sama'n ke pal ex ke aj Leví cyu'n xjal judiy tuj Jerusalén tu'n t-xi cykanin te Juan: ¿Alcyeya? Che chi. 20 Atzunte Juan xi tma'n jun yol axix toc cye ex minti' cub tewan: —Mya awe kin ju Crist aju at toclen tu'n Dios, chi Juan. 21 Xitzun cykanin juntl maj te: —¿Tza'ntzun tten? ¿Apeya Elías? —Mi'n, chi Juan. —¿Apeya t-sanjel Dios aju at tulel? —Ax mi'n, chi Juan. 22 Xitzun cyma'n te: —¿Alcyetzuna? K'mantza tu'ntzun t-xi ktx'olba'ne cye keju ẍe tzaj samante keye. ¿Chi toc tu'na, alcyetzuna tuj twitza? Che chi. 23 Xitzun tma'n Juan cye: —Akine in jaw tk'ajk'ajel nwi'ye tuj lugar minti' cynajbil xjal tuj, in xi nma'ne: Cybinchame jun tbe Kman jikun ti'j, ic tza'n o tma Isaías aju t-sanjel Dios, chi Juan. 24 Ke xjal lu cyu'n parisey e tzaj sama'n. 25 Xitzun cykanin xjal te Juan: —¿Tiku'ntzun in che byan xjal tu'na tuj a', ka mya aya ju Crist aju at toclen tu'n Dios, ex mya aya Elías, ex mya aya t-sanjel Dios? Che chi. 26 Xi ttzak'we'n Juan: —In che byan xjal wu'ne tu'n a'; pero at juntl cyxole, aju minti' ojtzki'n twitz cyu'ne. 27 Atzunju tzul wi'jxiye ex mas ma' toclen nwitze, minti' woclene ti'j tu'n tel npju'ne tak'al t-xajab, chi Juan. 28 Atzun baj ju yol lu tuj Betania jlajxi nima Jordán, jatum in che byan xjal tu'n Juan. 29 Tuj juntl k'ij o til Juan cyja' ttzaj Jesús, ex tma Juan: —Lu tzul ju Tal T-ẍne'l Dios aju nne'l k'i'n cyil xjal tu'n. 30 Atzunju xjal lu xi nma'ne cyeye: At jun xinak tzul wi'jxiye, aju mas ma' toclen nwitze, porque attok tej na'nxtok wul itz'je, nchiye. 31 Ex minti' ojtzki'n twitz wu'ne, pero nok tu'n tel cynic' aj Israel ti'j, cyja'tzun ẍin tzaje tu'n cybyan xjal wu'ne tu'n a', chi Juan. 32 Ax icx tzaj ttx'olba'n Juan ex tma: —O wile Xewbaj Xjan cu'tz tuj cya'j ic que'yin ic tza'n paloma, ex cub ten tibaj. 33 Ex minti'tok ojtzki'n twitz wu'ne; pero aju tzaj samante weye tu'n cybyan xjal wu'ne tuj a', atzunju tzaj k'mante weye: Oc ttila jun xjal cyja' tcu'tz Xewbaj Xjan tibaj ex ka ma cub ten Xewbaj Xjan tibaj, atzunju che byal xjal tu'n tuj junxitl tumel oc cyc'monte ju Xewbaj Xjan, chi weye. 34 Ex o wile, ex testiw kine ti'j ka ate jlu Tc'wa'l Dios. 35 Te juntl k'ij wa'ltok juntl maj Juan cyuc'ix cabe t-xnak'tzben. 36 Xi tque'yin Juan jatum in bettok Jesús, ex tma: —Lu tzul Tal T-ẍne'l Dios. 37 Akeju cabe t-xnak'tzben Juan o cybi tej tyolin Juan, ex e oc lpe' ti'j Jesús. 38 Ajtz tque'yin Jesús, o til lepch ke'ctok ti'j, ex xi tma'n cye: —¿Ti in cyjyo'ne? Xitzun cyma'n te: —Rabí, ¿jatum in posadiyina? Che chi. (Aju yol Rabí atzun in tma'n Xnak'tzal.) 39 Xitzun tma'n Jesús cye: —Koke wuc'ile que'yilte. E je'xtzun ex o cyil jatum in posadiyin Jesús, ex ax e cyaj ten tuc'il, porque ch'ixtok tex k'ij. 40 Ate Andrés titz'in Simón Pedro o tbi tej tyolin Juan tuc'ix jun tuc'il ex otok che oc lpe' ti'j Jesús. 41 Nej xi' Andrés jyolte Simón aju ttzic; tejtzun tcnet tu'n, xi tma'n te: —Ma cnet ju Mesías ku'ne, chi Andrés. (Aju yol Mesías atzun in tma'n aju Crist aju at toclen tu'n Dios). 42 Xitzun k'i'n Simón tu'n Andrés tuc'il Jesús. Tejtzun tilwaj Simón tu'n Jesús, xi tma'n te: —Aya Simón tcy'ajal Jonás; Cefas c'oquel tbiya, chi Jesús. (Aju yol Cefas atzun in tma'n Pedro, ex ka abj). 43 Te juntl k'ij cub t-ximan Jesús tu'n t-xi' tuj Galiley, atzun cnet Pelip tu'n, ex xi tma'n te: —Lpe'ca wi'je. 44 Ate Pelip aj Betsaida, aju ttanmi Andrés tuc'ix Pedro. 45 Xi' Pelip jyolte Natanael, tejtzun tcnet tu'n xi tma'n te: —Ma cnet ju xjal ku'ne, aju cyaj ttz'iban Moisés ti'j tuj ley, ax icx cyaj cytz'iban t-sanjel Dios ti'j. Ate jlu a Jesús aj Nazaret, aju tc'wa'l José, chi Pelip. 46 Tmatzun Natanael te Pelip: —¿Atpelo jun ba'n jacu tz'etz tuj Nazaret? Xitzun tma'n Pelip te: —Ko' wuc'ile que'yilte. 47 Tejtzun tlonte Jesús ch'ixtok tpon lak'e' Natanael tuc'il, o yolin ti'j ex tma: —Lu jun aj Israel lu, axix toc miban sbun. 48 Xitzun tma'n Natanael te Jesús: —¿Tza'n tten ojtzki'n nwitze tu'na? Xi ttzak'we'n Jesús: —Na'nxtok ttzaj txco'na tu'n Pelip, otok wile tej atxtoka tjak' tkan higo. 49 Xitzun tma'n Natanael te Jesús: —Xnak'tzal, aya Tc'wa'l Dios, aya ju Rey cye aj Israel. 50 Xi ttzak'we'n Jesús: —¿Mape tocslaya nok tu'nju ma txi nma'ne teya: Ma wile tjak' tkan higo? Oc tila'ya txkantl mas ma' t-xilen twitz jlu. 51 Ex xi tma'ntl Jesús te: —Ax toc cxel nma'ne cyeye: Oc cyila'ye cya'j catl ex ke t-anjel Dios in che jax tuj cya'j ex in che cu'tz wuc'ile, akine sc'o'maj kine tu'n Dios tu'n ntene cyuc'il xjal.
1 Tuj toxin k'ij bant jun mejeble'n tuj tnam Caná tuj tx'otx' Galiley; ex otok pon ttxu' Jesús. 2 Ax icx te Jesús o txconjtz tuj mejeble'n cyuc'ix ke t-xnak'tzben. 3 Ex tej tcub baj cyc'a xjal vin, xi tma'n ttxu' Jesús te: —Minti'tl cyvin xjal. 4 Pero xi tma'n Jesús te: —¿Tiku'n in tzaj tma'na jlu weye, nan? Na'nx tpon tk'ijlalil tu'n t-xi nyec'une cye xjal alcye kine. 5 Pero xi tma'n ttxu' cye keju in che sipan c'abj: —Cybinchame tcyakilju ctzajel tma'n cyeye. 6 Ex attok kak abj bincha'maj ic tza'n ẍok' tcubil a' te tx'ajbil cye xjal judiy ic tza'nx cyley; tuj junjun tcubil a' in xi' jwe' ẍok' a' tuj ex ka wuk. 7 Entons xi tma'n Jesús cye keju in che sipan c'abj: —Cynojsame ke ẍok' lu tu'n a'. Ex e baj noj cyu'n. 8 Ex xi tma'ntl cye: —Cyi'ntze ch'in ja'lo, ex cyi'nxe teju nejenel cye sipal c'abj. Xitzun cyi'n. 9 Atzunte nejenel cye sipal c'abj xi tnic'be'n ju a' otok tz'oc te vin, minti' ba'n tu'n jatum otok tzaj, atzun cye sipal c'abj ba'n cyu'n jatum otok jatz cyi'n ju a'. Tzajtzun ttxco'n nejenel ju chmilbaj, 10 ex xi tma'n te: —Cycyakil xjal nej in tzaj cyk'o'n aju vin ba'n; octzun cybaj c'an keju otok che txconjtz tuj mejeble'n, in tzajtzun cyk'o'n aju vin myaxix ba'n; atzun teya ma txi tc'u'na aju vin ba'n te ja'lo, chi nejenel. 11 Atzun tnejel señ jlu bant tu'n Jesús, o tbincha tuj tnam Caná tuj tx'otx' Galiley, ex xi tyec'un Jesús tipumal; ex e ocslan ke t-xnak'tzben ti'j. 12 Tbajlenxitzun jlu xi' Jesús tuj tnam Capernaum, tuc'ix ttxu', cyuc'ix ke terman ex ke t-xnak'tzben; ex axtzun e ten mya nim k'ij. 13 Chixtok tul canun aju nink'ij cye xjal judiy, aju Xjan K'ij tbi; jaxtzun Jesús tuj Jerusalén, 14 ex oc noj cyi'j xjal tuj ttxa'n tpe'n tja Dios, in che c'ayin boys, ex in che c'ayin ẍne'l tuc'ix paloma, ex cyuc'ix ke ch'expul twitz pwak k'ukl ke'tok. 15 Tej tlonte Jesús jlu, baj tbincha'n jun asyal cy'jaj, ex e je'tz tlajo'n cycyakil tuj ttxa'n tpe'n tja Dios, cyuc'ix ke cyẍne'l ex ke cyboys; ex baj tchitun cypwak ke ch'expul twitz pwak, ex e jaw tpich'k'u'n ke cymes. 16 Ex xi tma'n cye keju in che c'ayin paloma: —Cyi'n exe jlu tzalu, ex mi'n tz'oc cyk'o'ne tja Nmane ja te c'aybil. 17 Tzajtzun cyna'n ke t-xnak'tzben aju yol in tma'n tuj Tu'jil cyja': Ma tzaj ta'w tuj wanmiye tu'n tlaj at nc'u'je ti'j tjaya, chi tuj Tu'jil. 18 Xitzun cyma'n ke xjal judiy te Jesús: —¿Alcyetzun señ ctzajel tyec'una keye tu'nju in tbincha'na jlu? Che chi. 19 Xi ttzak'we'n Jesús: —Cyxituncuye aju tja Dios lu, ex tuj ox k'ij cjawil nbincha'ne juntl maj. 20 Xitzun cyma'n xjal judiy te: Tuj 46 abk'i o bant tja Dios lu, ¿atzun teya tuj ox k'ij tu'n tjaw tbincha'na? Che chi te Jesús. 21 Pero o yolin Jesús ti'j t-ximlalx, ka a t-ximlal tja Dios. 22 Cyja'tzun, tej tjatz ank'in Jesús cyxol cyimni, ul ti'j cyc'u'j ke t-xnak'tzben ka otok tma jlu; xi cyocsla'n aju in tma'n tuj Tu'jil ex aju yol otok tma Jesús cye. 23 Attok Jesús tuj Jerusalén tuj ju nink'ij Xjan K'ij tbi, ex nimcu xjal e ocslan ti'j tej cylonte in che bant ke señ tu'n. 24 Pero minti' oc ke' tc'u'j Jesús cyi'j xjal, porque el tnic' cyi'j cycyakil, 25 ex mya il ti'j tu'n ttzaj k'ma'n te tza'n cyten xjal, porque ojtzki'n tu'n alcye cyximbetz xjal tuj cyanmi.
1 Attok jun xjal at toclen cyxol parisey, Nicodemo tbi, nejenel cyxol xjal judiy. 2 Ul Nicodemo tuc'il Jesús te konic'an tu'n tyolin tuc'il ex xi tma'n te: —Xnak'tzal, ba'n ke ku'n ka aya jun xnak'tzal ma tzaj sama'na tu'n Dios, porque mi a'l jun xjal jacu bant jun señ tu'n ic tza'n ke señ in che bant tu'na, ka minti' Dios tuc'il, chi Nicodemo. 3 Xi ttzak'we'n Jesús: —Ax toc cxel nma'ne teya, alcye minti' ma tz'itz'j tcabmaji'n, mlayx tz'el tnic' ti'j tcawbil Dios. 4 Xi tkanin Nicodemo te: —¿Tza'n tten tu'n titz'j jun xjal otok tijin? ¿Jacupe tz'ocx juntl maj tuj talbil ttxu' ex tu'n titz'j tcabmaji'n? 5 Xi ttzak'we'n Jesús: —Ax toc cxel nma'ne teya, mlay tz'ocx jun xjal tuj tcawbil Dios ka minti' ma tz'itz'j ti'j a' ex ti'j Xewbaj Xjan. 6 Aju in itz'j ti'j xjal, ax xjalte, ex aju in itz'j ti'j T-xew Dios, ax xewbajte. 7 Mi'n labina ti'j ju ma txi nma'ne teya: Ilxix ti'j tu'n cyitz'je tcabmaji'n. 8 Aju cyk'ik' in xumin nok jachak ex in tbi'na tk'ajk'ajel, pero minti' ba'n tu'na jatum in tzaj ex tza'n t-xi'; cyja'tzun cyten cycyakil keju in che itz'j ti'j T-xew Dios, chi Jesús. 9 Xitzun tkanin Nicodemo juntl maj: —¿Tza'ntzun tten tu'n tbant jlu? Chi Nicodemo. 10 Xi ttzak'we'n Jesús: —¿Aya xnak'tzal cye aj Israel maj minti' nne'l tnic'a ti'j jlu? 11 Ax toc cxel nma'ne teya, aju ba'n ku'ne in xi kma'ne; ex aju ma kile atzunju in xi ktx'olba'ne; atzun cyeye minti' in xi cyocsla'ne aju yol in xi kma'ne. 12 Ma txi nma'ne cyeye aju at twitz tx'otx', ex minti' in xi cyocsla'ne, ¿tza'ntzun tten tu'n t-xi cyocsla'ne ka ma txi nma'ne aju te tuj cya'j? 13 Mi a'l jun o japun tuj cya'j, nok o'cx akine sc'o'maj kine tu'n Dios tu'n ntene cyuc'il xjal ma chin cu'tze tuj cya'j, ex atine tuj cya'j. 14 Ic tza'n te Moisés jax tk'o'n jun tilbilal lobaj twi tze' tuj lugar minti' cynajbil xjal tuj, icxtzun weye ilxix ti'j tu'n njax k'o'ne, akine sc'o'maj kine tu'n Dios tu'n ntene cyuc'il xjal, 15 tu'ntzun mi'n cynaj cycyakil keju ma che ocslan wi'je, nok o'cx tu'n tten cychwinklal te jumajx. 16 Tu'nju nimxix tc'ujlalil Dios cyi'j xjal, cyja'tzun ma chin tzaj sama'ne tu'n, akine o'cxcu jun Tc'wa'l, tu'ntzun mi'n cynaj cycyakil keju ma che ocslan wi'je, nok o'cx tu'n tten cychwinklal te jumajx. 17 Porque minti' ma chin tzaj sama'ne tu'n Dios cyxol xjal tu'n tcub cysentens xjal, nok o'cx tu'n cyclet xjal wu'ne, akine Tc'wa'l. 18 Alcye ma tz'ocslan wi'je, mlay cub t-sentens; atzun keju minti' in che ocslan, ya ma cub cysentens, porque minti' in xi cyocsla'n nyole, akine o'cxcu jun Tc'wa'l Dios. 19 Ex tu'ntzun jlu, ma cub cysentens xjal; porque ul ju spic'un cyxol xjal, atzun cye xjal mas e tzalaj ti'j tu'n cyten tuj klolj, cyc'i' tu'n cyten tuj spic'un, porque mya ba'n cybinchben. 20 Porque cycyakil keju in che binchan mya ba'n, nne'l cyic'un aju spic'un, ex mi'n cyaj tu'n cyul tuj spic'un, tu'ntzun mi'n tel tuj k'ancha'l aju cybinchben mya ba'n. 21 Atzun ke xjal in che oc lpe' ti'j ju yol axix toc ex in japun cyu'n, in che ul tuj spic'un tu'ntzun tel tuj k'ancha'l ka in cybincha'n tcyakil ic tza'nx tajbil Dios, chi Jesús. 22 Tbajlenxi jlu, xi' Jesús tuj tx'otx' Judey cyuc'ix ke t-xnak'tzben, ex axtzun o ten cyuc'il, ex in che byantok xjal tu'n tuj a'. 23 Ax icx te Juan in che byantok xjal tu'n tuj jun lugar Enón tbi, nikayin ttxlaj lugar Salim, porque attok nim a' tuj Enón, ex ke xjal in che ultok tuc'il tu'n cybyan tuj a'. 24 Porque na'nxtok tocx k'o'n Juan tuj pres. 25 Jawtzun jun yol cyxol ke t-xnak'tzben Juan cyuc'il ke xjal judiy ti'j ju tx'ajbil te tcyakil tza'n tten tu'n t-sakix ic tza'nx in tma'n cyley. 26 E ultzun tuc'il Juan ex xi cyma'n te: —Xnak'tzal, aju o ten tuc'ila jlajxi nima Jordán, aju tzaj tma'na keye, lu in che byan xjal tu'n, ex cycyakil xjal in che'x tuc'il. 27 Tzaj ttzak'we'n Juan: —Minti' jun jacu tc'am jun xjal, ka mya tu'n Dios in tzaj tk'o'n te. 28 Ax keye testiw wi'je, ex o cybiye ju yol xi nma'ne: Myawe kin aju Crist aju at toclen tu'n Dios, nok o'cx ma chin tzaj sama'ne tu'n ncub neje twitz, nchitzune. 29 Oc toc jun mejeble'n, aju xinak tcub xu'j ttxlaj, atzunte chmilbajju; atzunju tamiw chmilbaj tcub ttxlaj ex in bin ti'j tyol chmilbaj, nimxix in tzalaj ti'j tyol chmilbaj; cyja'tzun tten nimxix in chin tzalaje ti'j jlu. 30 Cyja'tzun ilxix ti'j tu'n tten mas toclen, atzun weye tu'n tten nok ch'in woclene. 31 Aju tzajni tuj cya'j at toclen cyibaj cycyakil; atzunju tcub twitz tx'otx', ax tcubte twitz tx'otx' ex in yolin ti'j ju te twitz tx'otx'; aju tzajni tuj cya'j at toclen tibaj tcyakil. 32 Aju o til ex o tbi, atzunju in tzaj tchic'ba'n; pero mi a'l jun in xi tocsla'n aju tyol. 33 Pero ka at jun xjal ma txi tocsla'n aju tyol, in tcyuwsa'n ka ate Dios axix toc tyol. 34 Porque aju ma tzaj sama'n tu'n Dios, atzunju in yolin ti'j tyol Dios; porque te Dios mya malo'n T-xew in tzaj tk'o'n. 35 Ate Dios Mambaj c'ujla'n Tc'wa'l tu'n, ex o tzaj tk'o'n Mambaj tcyakil tuj tk'ab Tc'wa'l. 36 Alcye ma tz'ocslan ti'j Tc'wa'l Dios, at tchwinklal te jumajx; atzunju tc'i' tz'ocslan ti'j Tc'wa'l Dios, mlayx ten tchwinklal, nok o'cx cbel jun tcastiw ma'xix tu'n Dios.
1 Pon tkanil cyuc'il parisey ka mas in che chmet t-xnak'tzben Jesús twitz te Juan ex mas nim xjal in che byan tu'n tuj a'; 2 masque mya tu'n Jesús o che byan xjal; cyu'n t-xnak'tzben in che byan xjal. 3 Tejtzun tbinte Jesús jlu, etz tuj tx'otx' Judey, xi' juntl maj tuj Galiley. 4 Aju be jatum xi' Jesús, atzun nnic' tuj tx'otx' Samaria. 5 Pontzun Jesús tuj jun tnam Sicar tbi, at tuj tx'otx' Samaria, nikayin ttxlaj tetzbil Jacob, aju xi tk'o'n te José aju tcy'ajal. 6 Ex attok jun xoch cyaj tbincha'n Jacob; ex tu'nju otok sict Jesús tu'n betin, cub ke' ttzi xoch; balo te chilcuk'ij. 7 Ultzun jun xu'j aj Samaria k'il a', ex xi tma'n Jesús te: —K'ontza ch'in nc'aye a'. 8 Atzun ke t-xnak'tzben otok che'x lak'ol wabj tuj tnam. 9 Tzajtzun tma'n ju xu'j aj Samaria te Jesús: —¿Tiku'n in tzaj tkanina tc'aya a' weye, aya xjal judiy, atzun weye aj Samaria kine? Chi xu'j. (Porque ke xjal judiy mya ba'n cyten cyuc'il aj Samaria.) 10 Xi ttzak'we'n Jesús: —Nokwit ma tz'el tnic'a ti'j ju toyaj Dios ex nokwit ma tz'el tnic'a wi'je tej xi nkanine nc'aye a' teya, mawtlo tzaj tkanina tc'aya weye ex mawtlo txi nk'o'ne jun a' itz' teya. 11 Atzunte xu'j tma: —Tat, minti' pulbil te k'i'n tu'na tu'n tjatz ti'na a', ex ma' te jul t-xe'. ¿Jatumtzun ta' ju a' itz' tu'na? 12 ¿Maspetzun ma' toclena twitz kxe'chel Jacob, aju cyaj k'onte ju xoch lu ke, jatum o c'an te, ex ke tc'wa'l ex ke talun? Chi xu'j. 13 Xi ttzak'we'n Jesús: —Cycyakil keju in che c'an ti'j a' lu, ctzajel juntl maj txketle'n cyi'j; 14 pero alcyeju ma txi c'ante ju a' cxel nk'o'ne te, mlay tzaj juntl maj txketle'n ti'j. Porque aju a' cxel nk'o'ne te, cpulwil tuj tanmi ic tza'n jun twi' a' tu'n tten tchwinklal te jumajx, chi Jesús. 15 Tzajtzun tma'n ju xu'j te Jesús: —Tat, k'ontza ju a' lu weye, tu'ntzun mi'n ttzaj txketle'n wi'je, ex tu'n mi'n ntzaje k'ilte a' max tzalu. 16 Xi tma'n Jesús te: —Txi'ya, ex txcontza tchmila, ex tzaja tzalu. 17 Tzaj ttzak'we'n ju xu'j: —Minti'we nchmil. Xitzun tma'n Jesús te: —Ba'n ma tmaya: Minti'we nchmil, chitzuna. 18 Porque jwe'xi tchmila ten, ex aju at tuc'ila ja'lo mya tchmila. Ax toc aju ma tmaya. 19 Tmatzun ju xu'j te: —Tat, tuj nnable aya t-sanjel Dios. 20 Keye kxe'chel e c'ulun te Dios twi' witz lu; atzun cyeye xjal judiy, in cyma'ne ka tuj Jerusalén ta' ju lugar jatum tu'n kc'ulun twitz Dios. 21 Xitzun tma'n Jesús te: —Ocslama nyole, nan, tzul tk'ijlalil tu'n cyc'ulune twitz Dios Mambaj, mya twi' ju witz lu tu'n cyc'ulune, ex mya tuj Jerusalén. 22 Akeye aj Samaria in che c'ulune twitz ju minti' ojtzki'n cyu'ne; atzun keye in ko c'ulune twitz ju ojtzki'n ku'ne; porque aju colbil atzun in tzaj cyxol xjal judiy. 23 Tzul tk'ijlalil, ex lu ma tzul ja'lo, keju in che c'ulun axix toc, oc che c'ulul twitz Dios Mambaj tuj cyanmi ex axix toc cyu'n; porque ate Dios Mambaj taj tu'n cyc'ulun xjal twitz ex axix toc cyu'n. 24 Ate Dios Xewbaj; ex keju in che c'ulun twitz, ilxix ti'j tu'n tc'ulunjtz cyu'n tuj cyanmi ex axix toc cyu'n, chi Jesús xi tma'n te xu'j. 25 Xitzun tma'n ju xu'j te Jesús: —Bi'nwe wu'n, tzul ju Mesías, aju Crist tbi, aju at toclen tu'n Dios; octzun tul ctzajel tchic'ba'n tcyakil ke. 26 Xi tma'n Jesús te: —Akine ju Crist in chin yolin tuc'ila. 27 E ultzun ke t-xnak'tzben, e labin ti'j tu'nju in yolintok Jesús tuc'il jun xu'j; pero mi jun xi kaninte te: ¿Ti in xi tkanina? ex ka ¿alcye yol in yolina ti'j tuc'il ju xu'j? Chiwt. 28 Atzunte xu'j cyaj tk'o'n t-ẍok', xi' tuj tnam, ex xi tma'n cye xjal: 29 Ko'ke wuc'ile lolte jun xjal ma tzaj tma'n weye tcyakilju o nbinchaye. ¿Myapelo a Crist jlu aju at toclen tu'n Dios? Chi xu'j. 30 Entons e je'tz ke xjal tuj tnam e ul tuc'il Jesús. 31 Atzun cye t-xnak'tzben Jesús in che cubsan twitz: —Xnak'tzal, chux wa'na, che chi. 32 Atzunte Jesús xi tma'n cye: —At junwe nwa tu'n nwa'ne ti'j, aju minti' ba'n cyu'ne. 33 Cymatzun ke t-xnak'tzben cyxolx: —¿Atpelo jun xjal ma tzul k'inte twa? 34 Pero xi tma'n Jesús cye: —We nwa, atzunju tu'n nbinchanteye aju tajbil ju tzaj samante weye, ex tu'n tbaj bant tak'un wu'ne. 35 ¿Myapetzun in cyma'ne ka atx cyaje xjaw taj tu'n tjaw awal? Pero cxel nma'ne cyeye: Cyque'yinxe awal ma tzkij tu'n tjaw. 36 Aju in jaw chmonte awal, in tc'mo'n twi tc'u'j, ex in jaw tchmo'n twitz awal tu'n tpon tuj chwinklal te jumajx, tu'ntzun cytzalaj junx aju chmol twitz awal tuc'il ju awalte. 37 Porque ti'j jlu in k'manjtz ju tal twitz yol axix toc lu: Jun in cu'x awante, ex juntl in jaw chmonte, chi tal twitz yol. 38 Akine ẍinx samante cyeye tu'n tjaw cychmo'ne twitz awal, aju minti' e ak'nane ti'j; junxitl e ak'nan ti'j, ex atzun cyeye ma jaw cychmo'ne twitz cyawal, chi Jesús cye. 39 Ex nimcu aj Samaria te tnam Sicar e ocslan ti'j Jesús tu'n tyol ju xu'j xi ttx'olba'n cye: Ma tma weye tcyakilju o nbinchaye, chi xu'j. 40 Cyja'tzun tej cyul aj Samaria tuc'il Jesús, e cubsan twitz tu'n tcyaj ten cyuc'il. Ex axtzun cyaj ten Jesús cab k'ij. 41 Ex nimcutl xjal e ocslan tu'nx tyol Jesús. 42 Xitzun cyma'n teju xu'j: —Mya nok o'cx tu'n tyola ma kocslaye, porque ax keko' ma ko binte tyol Jesús, ex ba'n ke ku'n axix toc ate jlu Clol cye xjal, aju Crist aju at toclen tu'n Dios. 43 Tbajlenxitzun cab k'ij, etztzun Jesús tuj Samaria ex xi' tuj Galiley. 44 Porque axte Jesús o k'mante ju yol lu: Jun t-sanjel Dios minti' in nimanjtz tujx ttanmi. 45 Tejtzun tpon Jesús tuj Galiley, ba'n o c'monjtz cyu'n aj Galiley, porque otok cyil tcyakilju otok tbincha Jesús tuj Jerusalén tuj nink'ij, porque ax icx cye otok che'x aj tuj nink'ij. 46 Xi'tzun juntl maj Jesús tuj tnam Caná tuj tx'otx' Galiley, jatum otok tz'oc ju a' te vin tu'n. Ex attok jun xjal at toclen ttxlaj rey, yabtok tc'wa'l tuj tnam Capernaum. 47 Tej tbinte xjal lu ka otok tzaj Jesús tuj Judey ex otok tzul tuj Galiley, tzaj canul ti'j ex o cubsan twitz tu'n t-xi' Jesús tuj Capernaum ex tu'n tbanix ju tc'wa'l tu'n, porque ch'ixtok tcyim c'wa'l. 48 Xitzun tma'n Jesús te: —Ka minti' ma cyile ke señ ex ke binchben nim cyipumal in che bant wu'ne mlay che ocslane. 49 Tzaj ttzak'we'n ju xjal at toclen ttxlaj rey: —Tat, t-xi' naja na'nxtok tcyim nc'wa'le. 50 Xitzun tma'n Jesús te: —Ba'n taja tjaya, cbantel tc'wa'la, chi Jesús. Xi tocsla'n xjal aju yol tzaj k'ma'n te tu'n Jesús, ex aj meltz'aj. 51 Ch'ixtok tpon xjal tuj Capernaum, e etz ke tmajen canul ti'j, ex xi cyma'n te ka otok banix ju tc'wa'l. 52 Xitzun tkanin cye alcye or tej tbanix c'wa'l. Atzun cye tzaj cytzak'we'n: —Txale' k'ij ew ic' cyak ti'j, che chi. 53 Ultzun tuj tnabl mambaj ka atzun orju tej tmante Jesús te: Cbantel tc'wa'la; ocslantzun ju xjal ti'j Jesús cyuc'ix keju ate' tuj tja. 54 Atzun tcabin señ jlu bant tu'n Jesús tej tul juntl maj tuj Galiley tej tetz tuj Judey.
1 Tbajlenxitzun jlu, attok jun nink'ij cye xjal judiy, ex xi'tzun Jesús tuj Jerusalén. 2 At jun pil matij at tuj Jerusalén, nikayin ttzi pwert toc tbi Pwert cye Ẍne'l; atzun tbi pil Betesda tuj yol ebrey, at jwe' twitz ja ti'jele pil. 3 Ex axtoktzun coẍl nimcu yab; ke moẍ, ke cox ex keju tzkijle'n cyyabil, in che ayontok ti'j oc tyucch a'. 4 Porque at jun anjel in cu'tztok junjun maj, in cubil ttxlaj ju pil matij, ex in yucch a' tu'n; ex aju yab in cu'x nej tbajlenxi yucch a', bi'x in banix, nok alcyexju tyabil. 5 Ex at jun xinak cyxol ke jlu otok bant 38 abk'i tyabtlen. 6 Tej tlonte Jesús coẍl xjal, el tnic' ti'j otok tz'el k'ij tyabtlen, cyja'tzun xi tkanin te: —¿Tajpeya tu'n tbanixa? 7 Xi ttzak'we'n ju yab: —Tat, mi a'l jun in cu'x k'o'nte weye tuj pil oc tjaw yucch a'; ex matok in chinxe tu'n ncu'xe tuj a', in cu'x nej juntl nwitze, chi xjal. 8 Xitzun tma'n Jesús te yab: —We'ctza, k'inx tcoẍbila ex beta. 9 Jurat naj banix ju xinak, xi ti'n tcoẍbil ex xi bet. Tuj k'ij te ojlabltok jlu. 10 Cyja'tzun xi cyma'n xjal judiy teju otok banix: —K'ij te ojlabl ja'lo; mya k'o'n tu'n ley tu'n t-xi ti'na tcoẍbila, che chi. 11 Atzunte xjal xi ttzak'we'n: —Aju xjal ma chin banixe tu'n, atzunju saj k'mante weye: K'inx tcoẍbila ex beta, chitzun. 12 Atzun cye xjal judiy xi cykanin te: —¿Alcyetzunju saj k'mante teya: K'inxa tcoẍbila ex beta? Che chi. 13 Pero aju xjal otok banix minti' ba'n tu'n alcye otok k'anan te, porque otok tz'el lak'e' Jesús tu'nju nimtok xjal at. 14 Te yajxitl cnet ju xjal tu'n Jesús tuj tja Dios, ex xi tma'n te: —Quina, ma banixa; mi'n tbinchaya il juntl maj, mya yajcu tzaj juntl mya ba'n tibaja mas pyor ic tza'n nej. 15 Xi'tzun ju xjal ex xi tma'n cye xjal judiy ka tu'n Jesús otok banix. 16 Tu'ntzun tlaj jlu e k'ojin xjal judiy ti'j Jesús, ex o cyajbe tu'n tcub cybyo'n, porque in che banixtok xjal tu'n tuj k'ij te ojlabl. 17 Pero xi tma'n Jesús cye: —We Nman bajx txi tcolin tu'n tak'nan ex cucx tak'nan ja'lo, ax icx weye in chin ak'nane. 18 Tu'ntzun tlaj jlu mas o cyajbe xjal judiy tu'n tcub cybyo'n, porque mya nok o'cx mya niman ju k'ij te ojlabl tu'n, ax icx in tma'n ka acu Dios Tman, oc tk'on tib ic tza'n te Dios. 19 Xitzun tma'n Jesús cye: —Ax toc cxel nma'ne cyeye, mlayx bant jun ak'untl wu'ne wu'nx wibe, akine C'wa'lbaj; nok o'cx in bant wu'ne aju nno'c nque'yine in bant tu'n Nmane; porque aju in tbincha'n Nmane, ax icxtzun weye in bant wu'ne akine C'wa'lbaj. 20 Porque c'ujla'n kine tu'n Nmane, akine Tc'wa'l, ex in tzaj tyec'un Nmane weye tcyakilju in tbincha'n; ex ctzajel tyec'untl Nmane weye aju ak'untl ma'xix twitz jlu, tu'ntzun cylabine ti'j. 21 Porque ic tza'n te Dios Mambaj in che jaw ank'in ke cyimni tu'n ex in xi tk'o'n cychwinklal, ax icxtzun weye, akine Tc'wa'l in xi nk'o'ne cychwinklal alcye keju at wajbile cyi'j. 22 Porque minti' in che oc xjal tuj xjel tu'n Nmane, nok o'cx ma tzaj tk'o'n tuj ncwente tu'n cyoc xjal tuj xjel wu'ne, akine Tc'wa'l, 23 tu'ntzun nnimanjtze cyu'n cycyakil xjal ic tza'n in nimanjtz Nmane cyu'n. Alcye minti' in chin nimanjtze tu'n, ax icx minti' in nimanjtz Nmane tu'n, aju tzaj samante weye. 24 Ax toc cxel nma'ne cyeye, alcye ma txi tbi'n nyole ex ma tz'ocslan ti'j ju tzaj samante weye, at tchwinklal te jumajx; ex mlay cub t-sentens, porque ma tz'etz tuj camic, ma pon tuj chwinklal. 25 Ax toc cxel nma'ne cyeye, tzul tk'ijlalil, ex atzun ja'lo, oc cybi' ke cyimni tk'ajk'ajel nwi'ye, akine Tc'wa'l Dios; ex akeju cxel cybi'n nyole oc che ank'il. 26 Porque ic tza'n te Dios Mambaj at tchwinklal tu'nx tib, ax icxtzun ma tzaj tk'o'n weye tu'n tten nchwinklale wu'nx wibe, porque akine Tc'wa'l; 27 Ex ma tzaj tk'o'n woclene tu'n cyoc xjal tuj xjel wu'ne, porque akine sc'o'maj kine tu'n Dios tu'n ntene cyuc'il xjal. 28 Mi'n che labine ti'j jlu; porque tzul tk'ijlalil cycyakil xjal maku'n tuj camposant oc cybi' tk'ajk'ajel nwi'ye, 29 ex che jawitz ank'in tuj mukbil. Akeju o cybincha ba'n, oc che jawil ank'in tu'n tten cychwinklal, ex atzun keju o cybincha mya ba'n, che jawil ank'in tu'n tcub cysentens. 30 Mlayx bant jun ti'xti wu'ne wu'nx wibe; nok o'cx ic tza'n in tzaj tma'n Nmane weye, icxtzun tten tu'n cyoc xjal tuj xjel wu'ne ex tu'n tcub cysentens; ex aju sentens in cub nk'o'ne tuj tumelxix, porque minti' in nbincha'ne aju wajbile, nok o'cx aju tajbil ju tzaj samante weye, aju tajbil Nmane. 31 Ka ax kine testiw wi'je, minti' tipumal nyole. 32 Pero at juntl testiw wi'je, ex ba'n wu'ne aju in tzaj ttx'olba'n wi'je ax toc. 33 Akeye xi cysama'ne cysanjele tuc'il Juan, ex aju tzaj ttx'olba'n Juan wi'je axix toc. 34 Masque mya il ti'j tu'n toc jun xjal testiw wi'je, pero in tzaj nna'ne ti'j Juan cyeye tu'ntzun cyclete. 35 Ate Juan ic tten ic tza'n jun candil in c'ant ex in t-spic'ba'n, atzun cyeye o cyajbeye tu'n cytzalaje cab k'ij tuj t-spic'umal. 36 Atzun weye at jun testiw wi'je mas ma' toclen twitz Juan. Porque aju ak'untl tzaj tk'o'n Dios Mambaj weye tu'n tjapun wu'ne, axtzunju ak'untl in nbincha'ne testiw wi'je ka ate Dios Mambaj tzaj samante weye. 37 Ax icx te Dios Mambaj aju tzaj samante weye, ma tz'oc te testiw wi'je ka ax toc nyole. Bajx cybiye tk'ajk'ajel twi', ex bajx cyile tza'n que'yin, 38 ex minti' in xi cyc'u'ne tyol tuj cyanmiye; porque minti' in che ocslane wi'je akine ma chin tzaj sama'ne tu'n Dios Mambaj. 39 In baj cyque'yine tuj Tu'jil, porque tuj cynable atzun in cnet chwinklal cyeye te jumajx; ex axtzun ta' ju yol in yolin wi'je. 40 Pero minti' cyaje ti'j tu'n cytzaje wuc'ile tu'n tten cychwinklale. 41 Aju nimbil weye cyu'n xjal mlay nc'ame. 42 Pero ojtzki'n keye wu'ne tza'n cytene, minti' cyc'u'je ti'j Dios. 43 Ma chin tzaj sama'ne tu'n Nmane, pero minti' ma chin cyc'ame; ka at juntl ma tzul tu'nx tib, atzun teju oc cyc'ma'ye. 44 ¿Tza'ntzun tten tu'n cyocslane ka o'cx in cyc'mo'ne ju nimbil cyeye cyxolxe ex minti' cyajbile ti'j tu'n cyc'monteye ju nimbil cyeye in tzaj tk'o'n o'cxcu jun Dios? 45 Mi'n che ximane ti'j ka wu'ne cxel ntx'olba'ne cyile twitz Nmane; at jun in tx'olbante cyile, ate Moisés aju k'ukl cyc'u'je ti'j. 46 Porque nokwit o txi cyocsla'ne tyol Moisés, ax icx mawtlo txi cyocsla'ne nyole, porque aju cyaj ttz'iban Moisés, wi'je in yolin. 47 Katzun minti' in xi cyocsla'ne aju cyaj ttz'iban Moisés, ¿tza'ntzun tten tu'n t-xi cyocsla'ne ke nyole? Chi Jesús cye.
1 Tbajlenxitzun jlu xi' Jesús jlajxi laguna te Galiley, aju Tiberias tbi. 2 Ex nim xjal e oc lpe' ti'j, porque o cyil in che bant ke señ tu'n, in che bant ke yab. 3 Jaxtzun Jesús twi' jun witz ex atzun cub ke' cyuc'ix ke t-xnak'tzben. 4 Ex ch'ixtok tul canun ju nink'ij cye xjal judiy, aju Xjan K'ij tbi. 5 Tej t-xi tque'yin Jesús, o til nim xjal otok che ul tuc'il, xitzun tma'n te Pelip: —¿Jatum ctzajel klak'o'n wabj tu'n cywa'n ke xjal lu? 6 Tma Jesús jlu nok tu'n tbinte chi toc tu'n Pelip, porque ba'n tu'n Jesús alcye tu'n tbinchante. 7 Xi ttzak'we'n Pelip: —Ka ma lak'et cab syent denari wabj, mlaylo canun tu'n tc'monte ch'inak te junjun, chi Pelip. 8 Xitzun tma'n jun t-xnak'tzben, aju Andrés tbi, titz'in Simón Pedro: 9 —At jun tal k'a tzalu at jwe' wabj sebad tuc'il tuc'ix cabe tal cyiẍ, pero, ¿ti tten tu'n tcanun jlu cye nimcu xjal? Chi Andrés. 10 Xitzun tma'n Jesús: —Cymanxe cye xjal tu'n cycub ke', chi Jesús. Ex puro ch'im tuj lugar. E cubtzun ke' xjal, balo at jwe' mil cyajlal xinak. 11 Tzajtzun ttzyu'n Jesús ke wabj, xi tk'o'n chjonte te Dios, xi t-sipan cye t-xnak'tzben, atzun cye t-xnak'tzben xi cysipan cye xjal k'ukl ke'tok. Ax icx xi cysipan ke tal cyiẍ nok nic'pun tu'n tbaj cyu'n. 12 Tejtzun cybaj noj ke xjal, xi tma'n Jesús cye t-xnak'tzben: —Cychmo'nctze ke ttx'akan wabj ma cyaj sobryin, tu'ntzun mi'n tnaj ch'in. 13 Jawtzun cychmo'n ke t-xnak'tzben, ex o noj cablaj chi'l ttx'akan wabj cyaj sobryin cyi'j jwe' wabj sebad tej cybaj wa'n ke xjal. 14 Tejtzun cylonte ke xjal aju señ tbincha Jesús, cyma: —Ax toc ate jlu t-sanjel Dios aju attok tulel cyxol xjal. 15 Tejtzun tel tnic' Jesús ti'j otok cub cyximan tu'n cytzaj k'ilte te tu'ntzun toc te cyrey, el tpa'n juntl maj tib cyi'j xjal, xi' twi witz junx te. 16 Tejtzun toc kax e cu'x ke t-xnak'tzben Jesús ttzi laguna. 17 E ocxtzun tuj jun barc, cyja'tok cyic'x tibaj laguna tu'n cypon tuj Capernaum. Otok koc yupj, ex na'nxtok tcanun Jesús cyuc'il. 18 Tzajtzun jun cyk'ik' nimxix ex tu'n jlu jaw pulin laguna. 19 Balo otok che ic'x jwe' kilómetro tibaj laguna ex ka kak, o cyil in bettok Jesús tibaj a' ex cyja'tok tpon lak'e' ttxlaj barc; tzajtzun cyxobil. 20 Atzunte Jesús xi tma'n cye: —Akine, mi'n che xobe. 21 E jawtzun tzalaj tej tocx Jesús cyuc'il tuj barc, ex jurattzun pon naj barc ttzi tx'otx' jatum tu'n cypon. 22 Tuj juntl k'ij axtok ate' xjal jlajtzi laguna ex otok cyil nok junx barc attok jatum otok che ocx t-xnak'tzben Jesús ex minti' ocx Jesús tuj barc cyuc'il ke t-xnak'tzben, cyjunalx ke t-xnak'tzben otok che'x tuj barc. 23 Pero at junjuntl barc e tzaj tuj tnam Tiberias, e ul ttzi tx'otx' nikayin jatum otok che wa'n ke xjal tej t-xi tk'o'n Kajaw chjonte te Dios. 24 Tejtzun cylonte ke xjal mi a'l Jesús cyuc'ix ke t-xnak'tzben, e ocxtzun xjal cyuj barc tu'n cypon tuj Capernaum, in che jyon ti'j Jesús. 25 Tejtzun tcnet Jesús cyu'n xjal jlajxi laguna, xi cyma'n te: —Xnak'tzal, ¿jtoje tzula tzalu? Che chi. 26 Xi ttzak'we'n Jesús: —Ax toc cxel nma'ne cyeye, in che jyone wi'je nok tu'nju pan xi cywa'ne ex e noje, mya tu'nju señ o cyile. 27 Mi'n che ak'nane ti'j ju wabj in baj, o'cx che ak'nane ti'j ju wabj mlay baj ex in tk'o'n cychwinklale te jumajx. Atzunju wabj lu cxel nk'o'ne cyeye, akine sc'o'maj kine tu'n Dios tu'n ntene cyuc'il xjal, porque ma tzaj k'o'n woclene tu'n Dios aju Nmane, chi Jesús. 28 Xitzun cyma'n xjal te: —¿Titzun oc kbincha'ye tu'n kbinchanteye aju ak'untl in tma'n Dios? 29 Xitzun ttzak'we'n Jesús: —Atzun ak'untl jlu in tma'n Dios tu'n cybinchanteye: Che ocslane wi'je, akine ma chin tzaj sama'ne tu'n Dios. 30 Xitzun cyma'n te: —¿Alcyetzun señ in tbincha'na tu'n klonteye ex tu'n kocslane ti'ja? ¿Alcye jun tbinchbena nim tipumal in bant? 31 Ke kxe'chel xi cywa'n maná tuj lugar minti' cynajbil xjal tuj, ic tza'n in tma'n tuj Tu'jil: Aju wabj cu'tz tuj cya'j xi tk'o'n Dios te cywa, chi tuj Tu'jil. 32 Xitzun tma'n Jesús cye: —Ax toc cxel nma'ne cyeye: Aju wabj cu'tz tuj cya'j, mya ate Moisés tzaj k'onte cyeye, aju Nmane atzun in tzaj k'onte cyeye aju wabj axix toc tzajni tuj cya'j. 33 Porque aju wabj in tzaj tk'o'n Dios, atzunju ma cu'tz tuj cya'j ex in tk'o'n cychwinklal xjal, chi Jesús. 34 Xitzun cyma'n te Jesús: —Tat, cucx k'ontza ju wabj lu keye. 35 Xitzun tma'n Jesús cye: —Akine wabj tu'n tten cychwinklale; aju ma tzul wuc'ile mlay tzaj we'yaj ti'j; ex aju ma tz'ocslan wi'je, mlay tzaj txketle'n ti'j. 36 Pero ma txi nma'ne cyeye, masque ma chin cyile, pero minti' in che ocslane wi'je. 37 Cycyakil keju in che tzaj tk'o'n Nmane weye in che ul wuc'ile; ex alcye keju ma che ul wuc'ile mlay che ex nlajo'ne. 38 Porque ma chin cu'tze tuj cya'j, mya tu'n nbinchanteye aju wajbile, nok o'cx tu'n nbinchanteye aju tajbil ju tzaj samante weye. 39 Ex atzun tajbil Nmane jlu, aju tzaj samante weye: Mi'n taj tu'n tnaj jun xjal wu'ne, akeju ma che tzaj tk'o'n weye, nok o'cx taj tu'n cyjaw ank'in wu'ne tuj mancbil tk'ijlalil. 40 Ex atzun jlu tajbil ju tzaj samante weye, tu'n tten cychwinklal te jumajx cycyakil keju in che que'yin wi'je ex in che ocslan wi'je, akine C'wa'lbaj; ex che jawil ank'in wu'ne tuj mancbil tk'ijlalil, chi Jesús xi tma'n cye. 41 Atzun cye xjal judiy tzaj jun cyyol cyxolx ti'j Jesús, porque o tma Jesús: Akine wabj ma chin cu'tze tuj cya'j. 42 Ex in cyma'ntok cyxolx: —¿Myapetzun a Jesús jlu aju tc'wa'l José? Ojtzki'n tman ku'n, tuc'ix ttxu'. ¿Tza'ntzun tten in tma'n jlu: Tuj cya'j ma chin cu'tze? Chitzun. 43 Xi ttzak'we'n Jesús: —Mi'n che yoline mya ba'n wi'je cyxolxe. 44 Mlay tzul jun xjal wuc'ile ka mya tu'n Nmane sul k'i'n, aju tzaj samante weye; ex cjawil ank'in wu'ne tuj mancbil tk'ijlalil. 45 At jun yol in tma'n tuj cyu'jil t-sanjel Dios: Tu'n Dios che xnak'tzetel cycyakil, chi tuj Tu'jil. Cyja'tzun tten, cycyakil keju ma che binte tyol Nmane ex ma che xnak'tzanjtz tu'n, che ul wuc'ile. 46 Mi jun xjal o til twitz Dios Mambaj, nok o'cx aju tzaj tuc'il Dios, atzunju ma til twitz Dios Mambaj. 47 Ax toc cxel nma'ne cyeye, alcye ma tz'ocslan wi'je at tchwinklal te jumajx. 48 Akine wabj tu'n tten cychwinklale. 49 Ke cyxe'chele xi cywa'n maná tuj lugar minti' cynajbil xjal tuj, pero e cyim. 50 Aju wabj in xi nma'ne, atzunju in cu'tz tuj cya'j tu'ntzun mi'n tcyim aju in wa'n ti'j. 51 Akine wabj k'ol chwinklal ma chin cu'tze tuj cya'j; ka ma txi twa'n jun xjal wabj lu, c'ank'il te jumajx; ex aju wabj cxel nk'o'ne, atzunju nchibjale cxel nk'o'ne tu'n tten cychwinklal xjal. 52 Atzun cye xjal judiy jaw jun yol cyxol: —¿Tza'ntzun tten jlu tu'n ttzaj tk'o'n tchibjal tu'n t-xi kwa'n? Che chi. 53 Xitzun tma'n Jesús cye: —Ax toc cxel nma'ne cyeye, ka minti' ma txi cywa'ne nchibjale, ex ka minti' ma txi cyc'a'ne nchc'ele, mlayx ten cychwinklale, porque akine sc'o'maj kine tu'n Dios tu'n ntene cyuc'il xjal. 54 Alcye ma txi twa'n nchibjale ex ma txi tc'a'n nchc'ele, at tchwinklal te jumajx; ex cjawil ank'in wu'ne tuj mancbil tk'ijlalil. 55 Porque aju nchibjale axix toc wabjte, ex aju nchc'ele axix toc c'abjte. 56 Alcye ma txi wa'nte nchibjale, ex ma txi c'ante nchc'ele, cucx ctel wuc'ile, ex akine tuc'il. 57 Ic tza'n weye ma chin tzaj sama'ne tu'nju Dios itz' tu'nx tib, aju Nmane, ex itz' kine tu'n Nmane, ax icxtzun te xjalju, ka ma txi twa'n nchibjale oc c'ank'il wu'ne. 58 Atzun wabj jlu ma cu'tz tuj cya'j; alcye ma txi wa'nte te oc c'ank'il te jumajx; aju wabj lu mya ic tten ic tza'n ju maná xi cywa'n cyxe'chele, masque xi cywa'n pero e cyim, chi Jesús cye. 59 Atzunju yol lu tma Jesús tuj ja te c'ulbil tej t-xi tk'o'n xnak'tzbil tuj Capernaum. 60 Tej cybinte ju yol lu, nimcu xjal akeju otok che oc te t-xnak'tzben Jesús cyma: —Cyuwte ju yol lu; ¿alcye ba'n txi binte? 61 Eltzun tnic' Jesús ti'j ka ax ke t-xnak'tzben tzaj jun cyyol cyxolx ti'j jlu, xitzun tma'n cye: —¿Maj mya ba'n ma tz'ela nyole tuj cywitze? 62 Yajtzun nokwit xcyile cyja' njaxe tu'n npone jatum atine nej, akine sc'o'maj kine tu'n Dios tu'n ntene cyuc'il xjal, ¿titzun jacu cymaye? 63 Ate T-xew Dios k'olte chwinklal; atzunju kximlal minti' tajben. Aju yol ma txi nma'ne cyeye, in yolin ti'j T-xew Dios ex in tk'o'n chwinklal. 64 Pero at junjun cyxole minti' in xi cyocsla'n, chi Jesús. Porque atxix t-xe tnejel ojtzki'n tu'n Jesús alcye keju minti' in xi cyocsla'n, ex ojtzki'n tu'n alcye tu'n t-xi k'onte te tuj cyk'ab xjal. 65 Ex tma: —Cyja'tzun ma txi nma'ne cyeye, mi a'l jun jacu tzul wuc'ile ka mya ate Nmane sul k'inte. 66 Ex tej tbaj tma'n Jesús ju yol lu, nimcu xjal akeju otok che oc te t-xnak'tzben el cypa'n cyib ti'j, ex minti'tl e bet tuc'il. 67 Xitzun tma'n Jesús cye ke cablaj t-xnak'tzben: —¿Yajtzun cyeye, cyajpeye tu'n cyxi'ye? 68 Pero xi ttzak'we'n Simón Pedro: —Tat, ¿al uc'il ko xe'le? O'cx aya at yol tuc'ila in tk'o'n chwinklal te jumajx. 69 Keye ma txi kocsla'ne ex ma tz'el knic'e ti'ja, aya Xjan Tc'wa'l Dios. 70 Xitzun ttzak'we'n Jesús: —¿Myapetzun cablaj cybete ma che jaw nsc'o'ne? Pero at jun cyeye ma txi tk'on tib te tajaw il. 71 Aju yol lu o tma Jesús ti'j Judas Iscariote, aju tcy'ajal Simón, porque ate Judas tu'n t-xi k'onte Jesús tuj cyk'ab xjal ax jun cyxol keju cablaj t-xnak'tzben Jesús.
1 Tbajlenxitzun jlu o bet Jesús tuj tx'otx' Galiley; minti' o tajbe tu'n tbet tuj Judey porque nno'c tilil cyu'n xjal judiy tu'n tcub cybyo'n. 2 Ch'ixtok tul canun ju nink'ij cye xjal judiy, aju nink'ij tu'n cyjaw binchet ke tal ja t-xak tze'yin cywi'. 3 Xitzun cyma'n terman Jesús te: —Tic'a tzalu, ex txi'ya tuj Judey, tu'ntzun cyque'yinte ke t-xnak'tzbena aju in tbincha'na. 4 Porque ka at jun xjal taj tu'n tel nic'baj ti'j cyu'n cycyakil xjal, mlay tz'ak'nan tuj ewaj. Ka taja tu'n tbinchanteya tcyakil jlu, yec'unx tiba cye xjal, che chi. 5 Porque icx ke terman minti' e ocslan ti'j. 6 Xitzun tma'n Jesús cye: —Na'nx tpon tk'ijlalil tu'n t-xi nyec'un wibe cye xjal alcye kine, atzun cyeye ba'n tu'n cyxi'ye nok alcye k'ij cyaje. 7 Mlay che el ic'une cyu'n xjal; atzun weye in chin el ic'une cyu'n, porque in xi nchic'ba'ne cybinchben mya ba'n. 8 Akeye ba'n tu'n cyxi'ye tuj nink'ij; atzun weye mlay chinxe ja'lo, porque na'nx tpon tk'ijlalil tu'n t-xi nyec'un wibe cye xjal, chi Jesús cye. 9 Tej tbaj tma'n Jesús jlu, ax cyaj ten tuj Galiley. 10 Pero cyxilenxitzun ke terman, ax icx te Jesús xi' tuj nink'ij, pero minti' xi tyec'un tib, tuj ewaj o ten. 11 Atzun cye xjal judiy e jyon ti'j Jesús tuj nink'ij, in cyma'n: —¿Jatum ta' xjal lu? 12 Ex cycyakil xjal in che wululun ti'j. At junjun in cyma'n: Ba'n te xjal; atzun junjuntl in cyma'n: Mya ba'n, nok in sbun cye xjal, che chi. 13 Pero minti' xi cychic'ba'nxix ti'j, porque in che xob cywitz xjal judiy. 14 Otok mijin nink'ij, ocx Jesús tuj tja Dios ex xi tk'o'n xnak'tzbil cye xjal. 15 Ex e labin xjal judiy ti'j: —¿Tza'n tten nimcu ba'n tu'n jlu, ex minti' o ten tuj jun xnak'tzbil? Che chi. 16 Xi ttzak'we'n Jesús: —Aju xnak'tzbil in xi nk'o'ne mya weye, nok o'cx teju tzaj samante weye. 17 Alcye tajbil tu'n tbinchante tajbil Dios, c'elel tnic' ti'j ka te Dios ju xnak'tzbil lu, ex ka wexwe nyol in xi nma'ne. 18 Ka at jun xjal texte tyol in xi tma'n, atzun taj tu'n tjaw nimsa'n cyu'n xjal; pero ka at jun xjal taj tu'n tjaw nimsa'n aju tzaj samante te, atzun teju axix toc tyol ex minti' in nic'an yol. 19 ¿Myapetzun a Moisés tzaj k'onte ley cyeye? Pero mi jun cyeye in japun ley tu'n. ¿Tiku'ntzun cyajbile tu'n ncub cybyo'ne? Chi Jesús cye. 20 Xitzun cytzak'we'n xjal: —At ju'ẍ tuj tanmiya; ¿alcye nno'c tilil tu'n tu'n tcub byo'na? Che chi. 21 Xi ttzak'we'n Jesús: —At jun ak'untl o bant wu'ne tuj k'ij te ojlabl, ex cycyakile in che labine ti'j. 22 Ate Moisés cyaj k'mante cyeye tu'n cysircunsidarinjtze, (pero mya atzun ti'j Moisés tzaj xe't nej, atzun tzaj xe't cyi'j ke kxe'chel); cyja'tzun at maj in che sircunsidarinjtz xjal cyu'ne tuj k'ij te ojlabl. 23 Katzun at maj in che sircunsidarinjtz xjal cyu'ne tuj k'ij te ojlabl tu'ntzun tjapun tley Moisés, ¿tiku'ntzun in che k'ojine wi'je tu'nju banix jun xjal wu'ne tuj k'ij te ojlabl? 24 Mi'n che yoline mya ba'n ti'j juntl nok tu'nju nno'c cyque'yine, pero che ximane ti'j tcyakil tuj tumelxix, chi Jesús cye. 25 Cymatzun junjun xjal ax najl ke tuj Jerusalén: —¿Myapetzun a jlu in che jyon xjal ti'j tu'n tcub byo'n? 26 Lu in yolin cywitz cycyakil, ex minti' in che k'ajt xjal ti'j. ¿Mapelo tz'el cynic' aj sanjelal ti'j ka ax toc a Crist jlu, aju at toclen tu'n Dios? 27 Ba'n ku'n jatum tzajni xjal lu; pero oc tul ju Crist aju at toclen tu'n Dios, mi a'l jun bilte jatum ctzajel, che chi xjal. 28 Cyja'tzun, tej t-xi tk'o'n Jesús xnak'tzbil tuj tja Dios, jaw tk'ajk'ajel twi' ex tma: —¿Axpe toc ojtzki'n nwitze cyu'ne, ex ba'n cyu'ne jatum ẍin tzaje? Pero mya wu'nxe ma chin tzaje, nok o'cx ma chin tzaj sama'ne tu'n juntl, aju axix toc tyol, aju minti' ojtzki'n twitz cyu'ne. 29 Atzun weye ojtzki'n twitz wu'ne, porque tuc'il ẍin tzaje ex ate tzaj samante weye, chi Jesús. 30 O cyajbetzun xjal tu'n ttzyet Jesús cyu'n; pero mi jun xjal tzaj tzyunte porque na'nxtok tpon tk'ijlalil tu'n t-xi tk'on tib. 31 Pero nimcu xjal e ocslan ti'j, ex in cyma'n: —Oc tul ju Crist aju at toclen tu'n Dios, ¿ocpelo tbincha' nim señ twitzju in tbincha'n xjal lu? 32 O cybi ke parisey in che yolin xjal ti'j Jesús, ex in che wululun ti'j; ex ke nejenel cye pal cyuc'ix ke parisey xi cysama'n polisiy tu'n ttzyet Jesús cyu'n. 33 Xitzun tma'n Jesús cye: —Nok ch'intl chin tele cyuc'ile, chin xe'ltzune tuc'ilju tzaj samante weye. 34 Che jyole wi'je, pero mlay chin cnete cyu'ne, porque jatum chin tele mlayx che pone. 35 Cymatzun ke xjal judiy cyxolx: —¿Jatumtzun cxe'l jlu tu'n mi'n tcnet ku'n? ¿Cxe'lpetzun cyuc'il xjal judiy akeju o che pon sputj cyxol xjal grieg ex tu'n t-xi tk'o'n xnak'tzbil cye xjal grieg? 36 ¿Ti t-xilen ju yol lu, aju ma tma: Che jyole wi'je, pero mlay chin cnete cyu'ne, porque jatum chin tele mlay che pone chi in tma'n? 37 Tujtzunju mancbil k'ij te nink'ij, aju k'ij ma' t-xilen, cub we' Jesús ex jaw tk'ajk'ajel twi', tma: —Ka at jun xjal at txketle'n ti'j, e ttzaj wuc'ile tu'n tc'an. 38 Aju ma tz'ocslan wi'je, che eletz tilj tuj tanmi ke nima k'ol chwinklal, ic tza'n in tma'n tuj Tu'jil. 39 Tma Jesús jlu ti'j Xewbaj Xjan aju attok tu'n cyc'monte keju in che ocslan ti'j Jesús; porque na'nxtok tul Xewbaj Xjan, tu'nju na'nxtok tjaw nimsa'n Jesús. 40 Tejtzun cybinte xjal ju yol lu, at junjun cyma: —Ax toc t-sanjel Dios te jlu aju in ko ayon ti'j. 41 Atzun junjuntl cyma: —Ate Crist jlu aju at toclen tu'n Dios. Pero at junjuntl cyma: —¿Maj tuj Galiley ctzajel ju Crist? 42 ¿Myapetzun in tma'n tuj Tu'jil ka ti'j tiyjil David tzul itz'j ju Crist tuj Belén aju ttanmi David? Che chi. 43 Jawtzun jun yol cyuw cyxol xjal tu'n tlaj Jesús. 44 Ex at junjun o cyajbe tu'n ttzaj cytzyu'n, pero mi jun tzaj tzyunte te. 45 E ultzun meltz'aj ke polisiy cyuc'il ke nejenel cye pal ex cyuc'il ke parisey; atzun cye jlu xi cyma'n cye polisiy: —¿Tiku'n minti' saj cyi'ne? 46 Atzun cye polisiy xi cytzak'we'n: —Bajx kile jun xjal in yolin ic tza'n ju xjal lu. 47 Xitzun cytzak'we'n ke parisey: —¿Maj icx cyeye ma che cub sbu'ne tu'n? 48 Baka at jun keye ma tz'ocslan ti'j, aj sanjelal ko'ye, ex parisey ko'ye. 49 Akeju xjal lu minti' ba'n ley cyu'n. Ba'n tu'n cynaj, che chi. 50 Atzunte Nicodemo xi tma'n cye, aju otok tzul aj tuc'il Jesús te konic'an, aju ax parisey: 51 Baka in tma'n tuj kley tu'n tcub t-sentens jun xjal ku'n ka na'nxtok kbinte tyol, ex ka na'nxtok kbinte alcye tbinchben, chi Nicodemo. 52 Xitzun cyma'n te Nicodemo: —¿Maj icx teya nno'c tk'on tiba te aj Galiley? Que'yinxa tuj Tu'jil, c'eleltzun tnic'a ti'j minti' jun t-sanjel Dios in tzaj tuj Galiley, che chi. 53 Ex teyle junjun aj tja.
1 Atzunte Jesús xi' twi witz Olivos. 2 Te prim te juntl k'ij tej ttzaj t-xe cya'j, pon juntl maj Jesús tuj tja Dios, ex cycyakil xjal e pon tuc'il; cubtzun ke', ex xi tk'o'n xnak'tzbil cye. 3 Atzun cye xnak'tzal ti'j ley cyuc'ix ke parisey ul cyi'n jun xu'j otok tzyet cyu'n tu'n tlaj in tbincha'n aj pajil; matok in tbincha'n aj pajil tej ttzyet cyu'n. Cubtzun cyk'o'n cyxol xjal. 4 Xitzun cyma'n te Jesús: —Xnak'tzal, aju xu'j lu tej xtzyet ku'ne in tbincha'n aj pajil. 5 Cyaj tma'n Moisés ke tuj ley, ka at xu'j in cybincha'n aj pajil, il ti'j tu'n cyoc xo't tu'n abj. ¿Yajtzun teya, chi toc tu'na? Che chi. 6 O cyma jlu tu'n toc Jesús tuj joybil ti'j, tu'ntzun tcub tz'ak tuj jun til cyu'n. Pero cub moc'e' Jesús twitz tx'otx', cub ttz'iban twitz tx'otx' tu'n tal tk'ab. 7 Pero tu'nju cucx in che kanin ti'j, jaw we' Jesús, ex xi tma'n cye: —Ka at jun cyxole minti' til, atzunju e toc xo'nte tnejel abj ti'j xu'j. 8 Ex cub moc'e' Jesús juntl maj, oc tentl tz'ibal twitz tx'otx'. 9 Atzun cye tej cybinte jlu, o cyna' ka mya ba'n ke, e je'tztzun junjun tetz. Nej e je'tz ke tij xjal, ex e je'tz baj cycyakil. O'cxte Jesús cyaj ten tuc'ix ju xu'j wa'ltok twitz. 10 Jawtzun we' Jesús ex o til minti'tl xjal at, o'cx te xu'j at, xitzun tma'n te xu'j: —Aya xu'j, ¿jatum ate' ke tx'olbal tila? ¿Minti'pe jun ma tma tu'n tcub t-sentensa? Chi Jesús. 11 Atzun te xu'j tma: —Minti', Tat. Xitzun tma'n Jesús te: —Ax icx weye mlay cub t-sentensa wu'ne; txi'ya, ex mi'n binchantla il. 12 O yolin juntl maj Jesús cye xjal ex tma: —Akine spic'un cye xjal; alcye ma tz'oc lpe' wi'je, mlay bet tuj klolj, nok o'cx ctel tuj spic'un tu'n tten tchwinklal. 13 Xitzun cyma'n ke parisey te Jesús: —Ax teya nno'c tk'on tiba te testiw ti'jxa; cyja'tzun mlay txi kbi'ne tyola in tzaj tma'na porque mya ax toc, che chi. 14 Xi ttzak'we'n Jesús: —Masque ax kine ma tz'oc nk'on wibe testiw wi'jxi, pero ax toc nyole in xi nma'ne. Porque ba'n wu'ne jatum ẍin tzaje ex jatum chin xe'le; atzun cyeye minti' ba'n cyu'ne jatum ẍin tzaje ex minti' ba'n cyu'ne jatum chin xe'le. 15 Cyeye in che oc xjal tuj xjel cyu'ne tu'nxju cyximbetze ic tza'n in cybincha'n mastl xjal; atzun weye minti' jun xjal nno'c tuj xjel wu'ne. 16 Ex masque ma che oc xjal tuj xjel wu'ne, pero aju sentens cbel nk'o'ne tuj tumelxix; porque mya njunalxwe in chin cub k'onte sentens, tuc'ix te Nmane at wuc'ile, aju tzaj samante weye. 17 Ex at jun yol tz'iban tuj cyleye in tma'n, ka at cabe xjal testiw junx ta' cyyol in tzaj cyma'n, entons ax toc cyyol. 18 Akine testiw wi'jxi, ax icx te Nmane testiw wi'je, aju tzaj samante weye, chi Jesús. 19 Xitzun cyma'n te: —¿Jatumtzun ta' Tmana? Xi ttzak'we'n Jesús: —Minti' ma tz'el cynic'e wi'je ax icx ti'j Nmane; nokwit ma tz'el cynic'e wi'je, ax icx mawtlo tz'el cynic'e ti'j Nmane. 20 Atzun o tma Jesús ju yol lu tuj lugar te chembil pwak, tej tk'on xnak'tzbil cye xjal tuj tja Dios. Pero mi a'l jun tzaj tzyunte, porque na'nxtok tjapun tk'ijlalil tu'n ttzyet cyu'n xjal. 21 Xi tma'n juntl maj Jesús cye: —Chin xe'ltzune, ex che jyole wi'je, pero tujx cyile che cymele; ex jatum chin pole mlayx che pone, chi Jesús. 22 Cymatzun xjal judiy: —¿Tu'nxpelo cbel tbyon tib tu'nju in tma'n: Jatum chin pole, mlayx che pone chitzun. 23 Xitzun tma'n Jesús cye: —Cyeye atzun ate'ye te cubni tzalu twitz tx'otx'; atzun weye te tuj cya'j kine; cyeye te twitz tx'otx' keye, atzun weye mya te twitz tx'otx' kine. 24 Cyja'tzun ma txi nma'ne cyeye, che cymele tujxju cyile; ka minti' ma txi cyocsla'ne ka Akine, che cymele tujx ju cyile, chi Jesús. 25 Xitzun cyma'n te: —¿Alcyetzuna? Xi tma'n Jesús cye: —Ax kine ic tza'n xi nma'ne cyeye nej. 26 Nimcu tu'n nyoline cyi'je ex tu'n t-xi nma'ne cybinchbene mya ba'n; pero aju tzaj samante weye, ax toc tyol, ex aju ma nbiye te, atzunju in xi nma'ne cye xjal. 27 Pero minti' el cynic' ti'j ka ti'j Dios Mambaj in yolin Jesús. 28 Cyja'tzun xi tma'n Jesús cye: —Akine sc'o'maj kine tu'n Dios tu'n ntene cyuc'il xjal; ocxi njaw cyk'o'ne twitz crus, maxitzun c'elel cynic'e ti'j ka Akine ex minti' jun ti'xti in bant wu'ne wu'nx wibe, nok o'cx in chin yoline ic tza'n in tzaj xnak'tza'ne tu'n Nmane. 29 Porque aju tzaj samante weye ax ta' wuc'ile; minti' ma chin cyaj coline tu'n Nmane, porque cucx in nbincha'ne aju ba'n nne'la tuj twitz, chi Jesús. 30 Tej tmante Jesús tcyakil jlu, nimcu xjal e ocslan ti'j. 31 Xitzun tma'n Jesús cye xjal judiy akeju otok che ocslan ti'j: —Ka cucx ma txi cybi'ne nyole, axix toc che oquele te nxnak'tzbene; 32 c'elel cynic'e ti'j ju yol axix toc, ex che tzokpetele tu'nju yol axix toc. 33 Xitzun cytzak'we'n: —Tiyjil Abraham ko'ye, ex bajx ko tene te tmajen jun xjal. ¿Tiku'ntzun in tma'na tu'n ktzokpete? 34 Xi ttzak'we'n Jesús: —Ax toc cxel nma'ne cyeye, cycyakil keju in che binchan il, tmajen il ke. 35 Aju majen mya te jumajx tu'n tcyaj ten tuj tja tpatrón; atzunte c'wa'lbaj ax in cyaj ten tuj tja tman te jumajx. 36 Cyja'tzun, ka ma che tzokpete wu'ne akine C'wa'lbaj, axix toc che tzokpetele. 37 Ba'n wu'ne tiyjil Abraham keye; pero nno'c tilil cyu'ne tu'n ncub cybyo'ne, porque minti' jatum tu'n tocx nyole tuj cyanmiye. 38 In chin yoline ti'j ju o wile tej atinxtoke ttxlaj Nmane; atzun cyeye in cybincha'ne aju o cybiye te cymane, chi Jesús cye. 39 Xi cytzak'we'n xjal judiy: —Ate Abraham kmane. Pero xi tma'n Jesús cye: —Nokwit ax toc tc'wa'l Abraham keye, aju o tbincha Abraham awtloju in cybincha'ne. 40 Pero ja'lo nno'c tilil cyu'ne tu'n ncub cybyo'ne tu'nju ma txi nma'ne ju yol axix toc cyeye, aju o nbiye te Dios; atzunte Abraham minti' o tbincha icju ic tza'n cyeye in cybincha'ne. 41 Akeye in cybincha'ne axju in tbincha'n cymane, chi Jesús. Xitzun cyma'n te: —Mya sic'aj c'wa'l ko'ye; junx ke kman at, ate Dios. 42 Xitzun tma'n Jesús cye: —Nokwit ax toc a Dios cymane, mawtlo chin cyc'ujlaye, porque tuc'il Dios ẍin tzaje, ex ma chin ule tzalu. Minti' ma chin tzaje wu'nx wibe, ate Dios tzaj samante weye. 43 ¿Tiku'n minti' nne'l cynic'e ti'j nyole? Tu'nju minti' in cub cybi'ne nyole. 44 Akeye, atzun cymane tajaw il, ex aju tajbil cymane cyajbile tu'n cybinchanteye. Ate tajaw il byol xjal te ttzajlenx atxix t-xe tnejel, ex el tpa'n tib ti'j ju yol axix toc porque minti' jun tyol axix toc. Oc in nic'an yol, texte tyol in tma'n; porque nic'al yolte ex atzun in tzaj nic'aj yol tuc'il. 45 Atzun weye minti' in che ocslane wi'je porque in xi nma'ne ju yol axix toc. 46 ¿Atpe jun cyeye jacu k'mante ka at wile? Katzun in xi nma'ne ju yol axix toc, ¿tiku'ntzun minti' in xi cyocsla'ne nyole? 47 Ka te Dios jun xjal, in xi tbi'n tyol Dios; atzun cyeye minti' in xi cybi'ne porque mya te Dios keye, chi Jesús xi tma'n cye. 48 Xitzun cyma'n xjal judiy te: —¿Myapetzun tuj tumel in kma'ne aya aj Samaria ex at ju'ẍ tuj tanmiya? 49 Xi ttzak'we'n Jesús: —Minti' ju'ẍ tuj wanmiye, nok o'cx in xi nnimane Nmane ex at tchiylal tuj nwitze, atzun cyeye minti' nchiylale tuj cywitze. 50 Pero minti' nno'c tilil wu'ne tu'n njaw nimsa'ne; at juntl nno'c tilil tu'n tu'n njaw nimsa'ne, ex tuj tcwent ta' tu'n njaw nimsa'ne. 51 Ax toc cxel nma'ne cyeye, alcye ma japun nyole tu'n, mlayx cyim, chi Jesús. 52 Xitzun cyma'n xjal judiy te: —Matzun tz'el knic'e ti'j ja'lo at ju'ẍ tuj tanmiya. Ate Abraham o cyim, ax icx ke t-sanjel Dios o che cyim; atzun teya in tma'na: Alcye ma japun nyole tu'n, mlayx cyim, chitzuna. 53 ¿Maspetzun ma' t-xilena twitz kxe'chel Abraham aju o cyim? Ax icx ke t-sanjel Dios e cyim. ¿Alcyetzuna tuj tnabla? Che chi. 54 Xi ttzak'we'n Jesús: —Ka ma jaw nnimsan wibe wu'nx wibe, nokxlo gan in jaw nnimsan wibe; pero aju Nmane, atzunju in jaw nimsante weye, aju in cyma'ne ka atzun Cydiose. 55 Pero minti' ojtzki'n twitz cyu'ne; atzun weye ojtzki'n twitz wu'ne. Katzun ma txi nma'ne minti' ojtzki'n wu'ne, entons nic'al yol kine ic tza'n cyeye; pero ax toc ojtzki'n wu'ne, ex in japun tyol wu'ne. 56 O tzalaj cyxe'chele Abraham tu'nju attok tu'n tlonte tk'ijlalil tu'n wule; ex o til ex o tzalajxix ti'j, chi Jesús cye. 57 Xitzun cyma'n xjal judiy te Jesús: —Na'nx tjapun 50 abk'i tu'na, ¿ex opetzun tila Abraham? Che chi. 58 Xitzun tma'n Jesús cye: —Ax toc cxel nma'ne cyeye, na'nxtok tul itz'j Abraham atintokwe. 59 Jawtzun cytzyu'n xjal judiy abj tu'n toc cyxo'n ti'j Jesús; pero xi tewan tib Jesús ex etz tuj tja Dios; etztzun cyxol, ex ic'tzun.
1 Cyja'tok t-xi' Jesús tuj be, o til jun xjal moẍ titz'jlenx. 2 Xitzun cykanin t-xnak'tzben te: —Xnak'tzal, ¿alcye o binchan il tu'nju itz'j xjal lu moẍ? ¿Axpelo o binchan il, ex ka ake tman? Che chi. 3 Xi ttzak'we'n Jesús: —Aju xjal lu moẍ tej titz'j pero mya tu'nju o binchan il ex mya tu'nju ake tman e binchan il; nok o'cx tu'n tyec'unjtz tipumal Dios ti'j. 4 Il ti'j tu'n nbinchanteye tak'un ju tzaj samante weye acux atx k'ij; tzul konic'an mi jun xjal jacu bant tu'n tak'nantl. 5 Acux atine twitz tx'otx', spic'un kine cye xjal. 6 Tej tmante Jesús jlu, cub ttzuban twitz tx'otx' ex baj tbincha'n ch'in xok'l tu'n ta'l ttzi', ex oc t-su'n ju xok'l ti'j twitz moẍ, 7 ex xi tma'n te: —Txi'ya tx'jol twitza tuj matij pil Siloé tbi, chi Jesús, (atzun in tma'n yol lu, Sama'n). Xi'tzun ju xjal ex el ttx'jo'n twitz, ex ajtz meltz'aj otok bant tque'yin. 8 Atzun cye vesin ex keju otok cyil nej ka moẍtok, cyma: —¿Myapelo a xjal lu aju in cub ke' mo'l? 9 Cymatzun junjun: —Atzun. Ex cyma junjuntl: —Mer ic tza'n ate, pero mya. Atzunte xjal tma: —Akine. 10 Xitzun cykanin te: —¿Tza'ntzun tten ma jaket twitza? 11 Xi ttzak'we'n ju xjal: —Aju xjal Jesús tbi xbaj tbincha'n ch'in xok'l ex soc t-su'n ti'j nwitze ex saj tma'n weye: Txi'ya, ex tx'jo'mel twitza tuj pil Siloé. Ẍinxtzune ex sel ntx'jo'ne nwitze, ex ma jaket nwitze. 12 Xitzun cyma'n xjal te: —¿Jatum ta' ju xjal lu? Atzunte xjal tma: —Minti' ba'n wu'ne, chi xjal. 13 Aju xjal moẍtok nej, xi k'i'n cyu'n xjal cywitz parisey. 14 Tuj k'ij te ojlabltok tej tbaj tbincha'n Jesús ju xok'l ex jaket twitz ju xjal tu'n. 15 Cyja'tzun ax icx ke parisey xi cykanin te tza'n tten otok jaket twitz. Xitzun tma'n xjal cye: —Soc tk'o'n Jesús ch'in xok'l ti'j nwitze, ex ma tz'el ntx'jo'ne ex in que'yin nwitze ja'lo. 16 Cymatzun junjun parisey: —Aju xjal xbinchante jlu myatzun tzajni tuc'il Dios porque mya niman tu'n aju k'ij te ojlabl. Atzun junjuntl cyma: —¿Tza'n tten tu'n cybant ke señ lu tu'n xjal ka aj il? Che chi. Cyja'tzun tzaj jun yol cyxolx. 17 Xitzun cyma'n juntl maj teju xjal moẍtok nej: —¿Chi toctzun tu'na ti'j ju xjal ma jaket twitza tu'n? Atzunte tma: —T-sanjel Dios te xjal lu. 18 Pero minti' xi cyocsla'n xjal judiy ka moẍtok nej ex otok jaket twitz. Maxitzun xi cyocsla'n tej cytxquet ke tman ju xjal otok jaket twitz. 19 Xitzun cykanin cye tman: —¿Apetzun cyc'wa'le jlu aju in cyma'ne ka moẍtok titz'jlenx? ¿Tza'ntzun tten ma bant tque'yin ja'lo? Che chi. 20 Xitzun cytzak'we'n ke tman: —Ba'n ku'ne atzun kc'wa'le jlu, ex ba'n ku'ne moẍ titz'jlenx; 21 pero minti' ba'n ku'ne tza'n tten ma bant tque'yin ja'lo; ex minti' ba'n ku'ne alcye ma jakonte twitz. Cykaninxe te porque ma pon tabk'iyil; axte ck'malte, che chi. 22 Atzun jlu xi cyma'n tman porque in che xobtok cywitz xjal judiy; porque otok bant ti'j cyu'n judiy ka at jun xjal ma yolin ka ate Jesús ju Crist aju at toclen tu'n Dios, bi'x tu'n tetz lajet tuj ja te c'ulbil. 23 Tu'ntzunju cyma ke tman: Cykaninxe te porque ma pon tabk'iyil, che chi. 24 Txquettzun juntl maj cyu'n parisey aju xjal moẍtok nej, ex xi cyma'n te: —Twitz Dios k'mantza jun yol axix toc; ba'n ke ku'n ate xjal lu aj il. 25 Xitzun ttzak'we'n ju xjal: —Minti' ba'n wu'ne ka aj il ex ka mi'n; pero at jun ba'n wu'ne, moẍtok kine nej, atzun ja'lo ma bant nque'yine. 26 Xi cykanin juntl maj te: —¿Ti xtbincha ti'ja? ¿Tza'n tten xjaket twitza tu'n? 27 Xitzun ttzak'we'n xjal: —Ma txi nma'ne cyeye ex minti' in xi cybi'ne; ¿tiku'n cyajbile tu'n cybinteye juntl maj? ¿Cyajpeye tu'n cyoque te t-xnak'tzben? Chi xjal. 28 E octzun ten yasul ti'j: —Aya t-xnak'tzben xjal lu, atzun keye t-xnak'tzben Moisés ko'ye. 29 Ba'n ke ku'n, ate Dios o yolin tuc'il Moisés; atzunte xjal lu, minti' ba'n ku'ne jatum tzajni, che chi. 30 Xitzun ttzak'we'n ju xjal. —Ma'xix t-xilen jlu. Minti' ba'n cyu'ne jatum tzajni, atzun weye ma jaket nwitze tu'n. 31 Ba'n ku'n minti' in che tzaj tbi'n Dios ke xjal aj il; pero ka at jun xjal at tchi Dios tuj twitz ex in tbincha'n aju tajbil, atzunju in tzaj tbi'n Dios. 32 Atxix t-xe tnejel ojtxi bajx kbi ka at jun xjal moẍ titz'jlenx in jaket twitz tu'n juntl xjal. 33 Nokwit mya tuc'il Dios tzajni xjal lu, miwtlo jun jacu bant tu'n, chi xjal. 34 Xitzun cytzak'we'n ke parisey: —Aj ilxixa atxix tej titz'ja, ¿apetzuna cxnak'tzal keye? Che chi. Ex bi'x ex cylajo'n. 35 Tbitzun Jesús ka otok tz'ex lajo'n xjal cyu'n, ex tej tcnet xjal tu'n, xi tma'n te: —¿Ocsla'npe tu'na aju xjal ma tzaj sama'n tu'n Dios tu'n tten cyuc'il xjal? 36 Xi ttzak'we'n ju xjal: —Tat, k'mantza weye alcye, tu'ntzun wocslane ti'j. 37 Xitzun tma'n Jesús te: —Matzun tila xjal lu; akine in chin yoline tuc'ila. 38 Xitzun tma'n ju xjal: —Chin ocslale, Tat. Ex cubtzun ẍmeje' oc ten c'ulul twitz Jesús. 39 Tmatzun Jesús: —Akine ma chin ule twitz tx'otx' tu'n tel cyil xjal tuj k'ancha'l, tu'ntzun tbant cyque'yin keju miban che que'yin, ex tu'n tmoẍix cywitz keju in che que'yin. 40 Tejtzun cybinte junjun parisey ate'tok tuc'il, xi cyma'n te: —¿Maj icx keye moẍ ko'ye? 41 Xi ttzak'we'n Jesús: —Nokwit moẍ keye, minti'wtlo cyile; pero ja'lo cucx atx cyile, porque in cyma'ne: In ko que'yine.
1 Tmatzun Jesús: —Ax toc cxel nma'ne cyeye, alcye minti' nno'cx ttzi cype'n ẍne'l, nok o'cx nno'cx tuj juntl plaj, atzunte elek'ju minti' t-xobil. 2 Atzun teju nno'cx ttzi pe'n, atzunte pastorju cye ẍne'l. 3 Ex in jaket ttzi pe'n tu'n xk'ukil pe'n tu'n tocx pastor, ex ke ẍne'l in cybi'n tk'ajk'ajel twi'; ex in che tzaj ttxco'n t-ẍne'l teyle junjun alcye cybi, ex in che etz ti'n. 4 Ex octzun cyetz ti'n cycyakil keju tecuxix, in cub nej cywitz; ex in che oc lpe' ẍne'l ti'j, porque ojtzki'n tk'ajk'ajel twi' cyu'n. 5 Atzun ti'j junxitl xjal mlay che oc lpe' ti'j; nok o'cx che elel ok ti'j, porque minti' ojtzki'n tk'ajk'ajel twi' junxitl xjal cyu'n, chi Jesús cye. 6 Xi tma'n Jesús aju techal lu cye; pero minti' el cynic' ti'j ti t-xilen aju o tma. 7 Xitzun tma'n Jesús juntl maj cye: —Ax toc cxel nma'ne cyeye: Akine ttzi pe'n cye ẍne'l. 8 Cycyakil keju e ul nej nwitze elek' ke, ex minti' cyxobil; pero minti' xi cybi'n ke ẍne'l cyyol. 9 Akine ttzi pe'n cye ẍne'l; alcye ma tz'octz ttzi pe'n lu ccletel; oc c'oquetz ex c'elex, ex cnetel twabl. 10 Ate elek' nok elk'al nnu'l ex byol cye ẍne'l ex in che naj tu'n; atzun weye ma chin ule tu'n tten cychwinklal ex nimxix cychwinklal tu'n tten. 11 Akine ba'n pastor; ate ba'n pastor in xi tk'on tib tu'n tcyim tu'n cyclet ke ẍne'l. 12 Atzunju xjal majen, ex mya axixte pastor, ex mya te ke ẍne'l, oc tlonte oc ttzaj xo'j, in che cyaj tcolin ke ẍne'l ex nne'l ok; atzun cye ẍne'l in che tzyet naj tu'n xo'j ex in che el sputj tu'n. 13 Nne'l ok xjal porque majen ex minti' taj cyi'j ẍne'l. 14 Akine ba'n pastor, ex ojtzki'n ke nẍne'le wu'ne, ex ke nẍne'le ojtzki'n kine cyu'n, 15 ic tza'n te Nmane ojtzki'n kine tu'n, ex ojtzki'n Nmane wu'ne; ex in xi nk'on wibe tu'n ncyime tu'n cyclet ke ẍne'l. 16 Ax icx ate' txkantl nẍne'le mya a ate' tuj pe'n lu; ax icx il ti'j tu'n cytzaj wi'ne, ex oc cybi' tk'ajk'ajel nwi'ye; ex jun pe'nx ẍne'l ctel ex junx pastor. 17 Tu'ntzunju in chin c'ujlanjtze tu'n Nmane, porque in xi nk'on wibe tu'n ncyime ex chin jawil ank'ine juntl maj. 18 Mi jun c'elel k'inte nchwinklale, wu'nx wibe cxel nk'on wibe tu'n ncyime. At woclene tu'n t-xi nk'on wibe tu'n ncyime, ex at woclene tu'n njaw ank'ine. Atzun mandamyent jlu ma nc'ame te Nmane, chi Jesús cye. 19 Tzaj juntl maj cyyol xjal judiy cyxolx tu'n tlaj ju yol lu. 20 Ex nimcu cye in cyma'ntok: —At ju'ẍ tuj tanmi, ex ma tz'el tzpet tnabl; ¿tiku'n in xi cybi'ne tyol? Che chi. 21 Atzun juntl c'loj in cyma'ntok: —Aju yol lu mya tyol jun xjal at ju'ẍ tuj tanmi. ¿Baka jacu bant tu'n ju'ẍ tu'n tjaket cywitz ke moẍ? Che chi. 22 In che ic'santok xjal nink'ij tuj Jerusalén tu'n ttzaj cyna'n tej tbaj sakset tja Dios tu'n toc juntl maj c'ulbil tuj. Tuj jbaliltok jlu. 23 Atzunte Jesús in bettok twitz tja Dios, aju twitz ja toc tbi te Salomón. 24 E octzun txole' xjal judiy ti'jele Jesús ex xi cyma'n te: —¿Jte' k'ij tu'n ktene nok in jawje' kc'u'je tu'na? Ka aya ju Crist aju at toclen tu'n Dios, k'mantza clarxix keye. 25 Xi ttzak'we'n Jesús: —Ma txi nma'ne cyeye, pero minti' ma txi cyocsla'ne nyole. Aju ak'untl in tma'n Nmane tu'n nbinchanteye, atzun ke testiw wi'je; 26 pero minti' in xi cyocsla'ne porque myatzun ate'ye cyxol ke nẍne'le, ic tza'n ma txi nma'ne cyeye. 27 Ke nẍne'le in cybi'n tk'ajk'ajel nwi'ye, ex ojtzki'n ke wu'ne, ex in che oc lpe' wi'je. 28 In xi nk'o'ne cychwinklal te jumajx, ex mlayx che naj, ex mi jun c'elel k'inte cye tuj nk'abe. 29 A Nmane tzaj k'onte cye weye, ex mas nim toclen Nmane cywitz cycyakil, ex mi jun jacu tz'el k'inte cye tuj tk'ab Nmane. 30 Akine tuc'ix Nmane junx ko'ye, chi Jesús xi tma'n cye. 31 Jawtzun cytzyu'n juntl maj xjal judiy abj tu'n toc cyxo'n ti'j. 32 Xitzun tma'n Jesús cye: —Nimcu nbinchbene ba'n ma nbinchaye cywitze tu'n tipumal Nmane; ¿alcyetzun jun nbinchbene mya ba'n cyxol jlu tu'n woc cyxo'ne tu'n abj? 33 Xitzun cytzak'we'n xjal judiy: —Mlay tz'oc kxo'ne tu'n abj tu'n tlaj jun tbinchbena ba'n, nok o'cx tu'nju in yolina mya ba'n ti'j Dios. Porque xjal teya ex nno'c tk'on tiba te Dios, che chi. 34 Xi ttzak'we'n Jesús: —¿Myapetzun tz'iban tuj cyleye, o nmaye ka dios keye? Chi Dios. 35 Ba'n ku'n aju tz'iban tuj ley mlay ch'expet, porque in tma'n ka dios keju e c'monte tyol Dios. 36 Akine sc'o'maj kine tu'n Nmane ex ma chin tzaj t-sama'n cyxol xjal. ¿Tiku'ntzun in cyma'ne weye: In yolina mya ba'n ti'j Dios, che chiye, nok tu'nju ma txi nma'ne: Tc'wa'l Dios kine? Nchitzune. 37 Ka mya ax ak'untl in bant wu'ne ic tza'n in tbincha'n Nmane, mi'n txi cyocsla'ne nyole. 38 Katzun ax ak'untl in bant wu'ne ic tza'n in bant tu'n Nmane, masque minti' in xi cyocsla'ne nyole, pero cyocslame aju nbinchbene, tu'ntzun tel cynic'e ti'j ex tu'n t-xi cyocsla'ne ka ate Nmane at wuc'ile ex atine tuc'il Nmane, chi Jesús cye. 39 Octzun tilil juntl maj cyu'n tu'n ttzyet Jesús, pero etz tzokpaj tuj cyk'ab. 40 Ex xi' juntl maj jlajxi nima jordán tuj lugar jatum e byan xjal tu'n Juan nej; ex axtzun cyaj ten. 41 Ex nimcu xjal e pon tuc'il, in cyma'n: —Ax toc ate Juan mi jun señ bant tu'n; pero tcyakilju o tma Juan ti'j ju xjal lu, ax toc, che chi. 42 Ex nimcu xjal e ocslan ti'j Jesús tuj lugar lu.
1 At jun xjal Lázaro tbi yabtok, aj Betania xjal lu, aju ttanmi Mariy tuc'ix Marta aju terman. 2 Yabtok Lázaro aju t-xiban Mariy; ate Mariy jlu aju oc su'nte perjum ti'j tkan Kajaw ex el t-su'n ti'j tkan tu'n ttzmal twi'. 3 Xitzun cysama'n ke tanb Lázaro jun sanjel k'malte te Jesús cyja': —Tat, aju c'ujla'n tu'na, ma yabt, chi sanjel. 4 Tej tbinte Jesús tma: —Aju yabil lu mya tu'n tcyim Lázaro tu'n, nok o'cx ma tzaj yabil lu tu'n tjaw nimsa'n tbi Dios ex tu'n tjaw nimsa'n nbiye, akine Tc'wa'l Dios. 5 Ex c'ujla'nxix Marta tu'n Jesús, tuc'ix titz'in tuc'ix Lázaro. 6 Tejtzun tbinte Jesús ka yabtok Lázaro ax cyaj ten cab k'ijtl. 7 Tbajlenxitzun cab k'ij, xi tma'n cye t-xnak'tzben: —Ko'ke juntl maj tuj Judey. 8 Xitzun cyma'n ke t-xnak'tzben Jesús te: —Xnak'tzal, c'itzke o cyajbe xjal judiy tu'n toc xo'na tu'n abj cyu'n. ¿Maj ma txi'ya juntl maj tuj Judey? Che chi. 9 Xi ttzak'we'n Jesús: —¿Myapetzun cablaj or tuj jun k'ij? Ka in bet xjal k'ijl mlay jaw tolj, porque in tque'yin ju spic'un at twitz tx'otx'; 10 pero aju xjal in bet konic'an in jaw tolj, porque minti' spic'un tuc'il. 11 Tej tbaj tma'n Jesús jlu xi tma'ntl cye: —Aju kamiw Lázaro in tan; pero ma chinxe c'asul te, chi Jesús. 12 Xitzun cyma'n ke t-xnak'tzben Jesús te: —Tat, ka in tan Lázaro, cbanteltzun. 13 Pero tma Jesús jlu ti'j Lázaro ka otok cyim; atzun cye t-xnak'tzben ela tuj cynabl ka in yolin Jesús ti'j ojlabl tu'n watl. 14 Xitzun tma'n Jesús clarxix cye: —Ma cyim Lázaro. 15 Ex in chin tzalaje tu'nju mya ax atine tej xcyim, porque mas ba'n te cyeye tu'ntzun cyocslane wi'je; ex ko'tzun jatum ta'. 16 Xitzun tma'n Tomás cye mastl xnak'tzben: —Ax icx ke, ko'ke tu'n kcyim tuc'il, chi Tomás, aju yo'ẍ tbi cyu'n xjal. 17 Pontzun Jesús ex o tbi otok bant cyaje k'ij tcu'xlen maku'n Lázaro. 18 Nikayin t-xol tnam Betania tuc'il Jerusalén, balo ox kilómetro cyxol. 19 Ex nimcu xjal judiy otok che ul tuc'il Marta ex tuc'il Mariy, e ul k'ukbalte cyc'u'j tu'n tlaj otok cyim cyxiban. 20 Tejtzun tbinte Marta cyja' t-xi' Jesús, etz canul ti'j; atzunte Mariy cyaj ten tuja. 21 Xitzun tma'n Marta te Jesús: —Tat, nokwit ata tzalu, miwtlo o cyim nxibane. 22 Pero ba'n wu'ne ja'lo, tcyakilju cxel tkanina te Dios ctzajel tk'o'n Dios teya. 23 Xitzun tma'n Jesús te: —Cjawil ank'in t-xibana. 24 Xi tma'n Marta te: —Ba'n wu'ne cjawil ank'in oc cyjaw ank'in cyimni tuj mancbil tk'ijlalil. 25 Xitzun tma'n Jesús te: —Akine k'olte ank'ibl ex akine k'ol chwinklal; alcye ma tz'ocslan wi'je, masque ka ma cyim, oc c'ank'il. 26 Ex ke xjal itz'xke, ka ma che ocslan wi'je mlay che cyim te jumajx. ¿Mape tocslaya jlu? Chi Jesús. 27 Xi tma'n Marta te: —Ma txi wocsla'ne, Tat; ma wocslaye aya ju Crist aju at toclen tu'n Dios, ex aya Tc'wa'l Dios ma tzula twitz tx'otx'. 28 Tej tbaj tma'n Marta jlu, xi' txcolte Mariy aju titz'in, cheba xi tjasc'u'n te: —Ma tzul Xnak'tzal ex in txconjtza tu'n, chi Marta. 29 Tej tbinte Mariy jlu, jaw we' naj ex ul tuc'il Jesús. 30 Na'nxtok tocx Jesús tuj tnam; ax ta'tok jatum ul Marta canul ti'j. 31 Atzun cye xjal judiy, akeju otok che pon tja Mariy k'ukbalte tc'u'j, tej cylonte otok jaw we' naj Mariy ex otok tz'etz, e oc lpe' ti'j, ex cyma: Ma txi' ok'el ttzi pantyón, che chi. 32 Tejtzun tcanun Mariy jatum ta'tok Jesús ex tej tque'yinte, cub ẍmeje' t-xe tkan Jesús ex tma: —Tat, nokwit ax ta'ya tzalu miwtlo o cyim nxibane. 33 Tej tque'yinte Jesús in ok' Mariy ex cyuc'ix ke xjal judiy in che ok', akeju e tzaj tuc'il, tzaj ta'w tuj tanmi tu'n tbis, 34 ex xi tkanin cye: —¿Jatum ocx cyk'o'ne? Xitzun cyma'n te Jesús: —Tat, ko' que'yilte. 35 Jawtzun ok' Jesús. 36 Cymatzun ke xjal judiy: —Nimxix tc'ujlalil Jesús ti'j. 37 Pero at junjun cyxol cyma: —Ate xjal lu jakonte twitz moẍ, ¿tiku'ntzun minti' xbant tu'n tu'n mi'n tcyim Lázaro? 38 Tzajxix tbis Jesús juntl maj, ex pon jatum tocx cyimni. Tocx tuj jun jul toc jun abj ttzi'. 39 Xitzun tma'n Jesús cye: —Cyi'mele aju abj. Atzunte Marta, aju tanb ktzan Lázaro, xi tma'n te Jesús: —Tat, ma tzuwix, porque ma bant-xi cyaje k'ij tcu'xlen makut. 40 Pero xi tma'n Jesús te: —¿Myapetzun ma txi nma'ne teya, ka ma tocslaya oc tila'ya tipumal Dios? Chi Jesús te. 41 Eltzun cyi'n aju abj jatum otok tz'ocx k'o'n cyimni. Ex jaw tque'yin Jesús twitz cya'j, ex tma: —Tat, cxel nk'o'ne chjonte teya porque ma chin tzaj tbi'na. 42 Ba'n wu'ne cucx in chin tzaj tbi'na, pero ma txi nma'ne jlu tu'n cylaj nimcu xjal ate' ntxlaje, tu'ntzun t-xi cyocsla'n ka aya ma tzaj samante weye. 43 Tejtzun tbaj tma'n Jesús jlu, jaw tk'ajk'ajel twi' cyuwxix, tma: —Tetza, Lázaro. 44 Etztzun aju otok cyim, balk'i'ntok tk'ab tu'n xbalun tuc'ix tkan, ex potzin twitz tu'n jun c'albil. Xitzun tma'n Jesús cye xjal: —Cypaju'mele ex cytzokpinxe. 45 Nimcu xjal judiy otok che ul tuc'il Mariy. Tej cylonte aju tbincha Jesús, nim e ocslan ti'j. 46 Pero at junjun cyxol e je'x cyuc'il parisey ex xi cyma'n aju otok tbincha Jesús. 47 Atzun cye nejenel cye pal ex ke parisey oc cychmo'n ke Aj Sanjelal cye xjal judiy ex cyma: —¿Alcye cbantel ku'n? Porque ate xjal lu nimcu señ in bant tu'n. 48 Ka cucx ma cyaj kk'o'n icju, cycyakil xjal che ocslal ti'j; che ultzun ke aj sanjelal aj Rom, ex cbajel cyxitun tja Dios tuc'ix ktanmi, che chi. 49 Pero at jun xjal cyxol, Caipás tbi, toctok nejenel cye pal tuj abk'i tej tcub byo'n Jesús, xi tma'n cye: —Cyeye minti' cynable; 50 ex minti' nne'l cynic'e ti'j; mas ba'n tu'n tcyim jun xjal te cyxel cycyakil xjal ex mya tu'n cynaj cycyakil xjal tuj nasyon lu, chi Caipás. 51 Mya nok tu'nx Caipás o tma jlu; ate Dios o k'mante tuj tnabl tu'nju toctok te nejenel cye pal tuj abk'i lu, cyja'tzun tzaj tma'n naj ka ate Jesús tu'n tcyim te t-xel enter jun tnam xjal, akeju xjal judiy; 52 ex mya nok o'cx tu'n tcyim te t-xel enter tnam, ax icx tu'n cytzaj chmo'n ke Tc'wa'l Dios tu'n cyten junx, akeju otok che el sputj. 53 Cyja'tzun, atxixtzun tuj k'ij lu bant ti'j cyu'n aj sanjelal cye xjal judiy tu'n tcub cybyo'n. 54 Cyja'tzun minti'tl o ten Jesús cyxol xjal judiy, ic' lak'e', pon tuj jun tnam Efraín tbi, nikayin ttxlaj lugar minti' cynajbil xjal tuj; ex axtzun o ten cyuc'ix ke t-xnak'tzben. 55 Ch'ixtok tul canun nink'ij cye xjal judiy, aju Xjan K'ij tbi; ex nimcu xjal e tzaj tuj cojbil e ja'wil tuj Jerusalén tu'n cytx'jonte cyib ic tza'nx in tma'n cyley, acux na'nxtok tul canun Xjan K'ij. 56 Ex in che jyon ti'j Jesús, ex in che kanin ti'j cyxolx tuj tja Dios, in cyma'n: —¿Chi toc cyu'ne? ¿Mi'npelo tzul tuj nink'ij? Che chi. 57 Ke nejenel cye pal ex ke parisey otok tz'etz jun orden cyu'n, ka at jun xjal ma tbi jatum ta' Jesús, ba'n tu'n tpon naj tkanil tu'n, tu'ntzun ttzyet Jesús cyu'n.
1 Atxtok kak k'ij taj tu'n tul canun Xjan K'ij, ultzun Jesús tuj tnam Betania jatum ta' Lázaro, aju otok cyim ex o jatz ank'in cyxol cyimni tu'n Jesús. 2 Bajtzun cybincha'n jun nintz wa'n te Jesús; ate Marta oc ten sipal wabj; atzunte Lázaro ajun cyxol keju k'ukl ke'tok ti'j mes tuc'il Jesús. 3 Atzunte Mariy tzaj ti'n mij botey perjum nardo tbi mya smo'n twitz, wi'yilxix, oc tko'n ti'j tkan Jesús, ex baj t-su'n tu'n ttzmal twi'; ex o noj tuja tu'n tc'oc'jal perjum. 4 Ex at jun t-xnak'tzben Jesús Judas Iscariote tbi, tc'wa'l Simón aju at tu'n t-xi k'onte Jesús tuj cyk'ab xjal. Tmatzun Judas: 5 ¿Tiku'n minti' xi c'ayit ju perjum lu tu'n ox syent denari pwak ex aju pwak lu tu'n t-xi k'ot cye meba? 6 Pero tma jlu mya tu'nju atwit tc'u'j cyi'j meba, nok o'cx tu'nju elek'tok ex atzun k'ilte tcubil pwak, ex in jatz telk'a'n pwak tuj ch'u'ẍ. 7 Tzajtzun tma'n Jesús: —Mi'n labta ti'j; porque c'u'ntok perjum lu tu'n, tu'n tajben tuj tk'ijlalil oc ncu'x maku'ne. 8 Porque ke meba cucx che tel cyuc'ile, atzun weye mya cucx chin tele cyuc'ile, chi Jesús te. 9 Nimcu xjal judiy o cybi ka atzun ta'tok Jesús tuj Betania, e tzajtzun mya nok o'cx tu'n tlaj Jesús, ax icx tu'n cyque'yinte Lázaro, aju otok jatz ank'in cyxol cyimni tu'n Jesús. 10 Atzun cye nejenel cye pal bant ti'j cyu'n, tu'n tuc'ix te Lázaro tu'n tcub byet, 11 porque tu'n tlaj Lázaro nimcu xjal judiy nibantok tel cypa'n cyib cyi'j nejenel cye pal ex e ocslan ti'j Jesús. 12 Nimcu xjal otok che ul tuj nink'ij te Xjan K'ij. Texi juntl k'ij o cybi ka cyja' ttzaj Jesús tu'n tul tuj Jerusalén. 13 Tzajtzun cyi'n tk'ab xa'j, e je'x canul ti'j Jesús, jaw tk'ajk'ajel cywi' ex cyma: —Nimanxwit tbi Dios. Cy'iwla'n teju tzul, aju Rey cye aj Israel, tu'n Kman ma tzaj sama'n, che chi. 14 Cnettzun jun tal bur tu'n Jesús ex jax tibaj, ic tza'n in tma'n tuj Tu'jil: 15 Mi'n che xobe, akeye ate'ye tuj tnam Sión; lu tzul Cyreye, tjax tibaj jun tal bur, chi tuj Tu'jil. 16 Nej minti' el cynic' t-xnak'tzben ti'j jlu; pero tej taj k'i'n Jesús tuj cya'j, tzajtzun cyna'n ka tz'iba'maj tcyakil jlu ti'j ex ti'j ju otok binchanjtz ti'j cyu'n xjal. 17 Atzun ke xjal, akeju e ten tuc'il Jesús tej tetz txco'n Lázaro tu'n tuj jul ex jaw ank'in cyxol cyimni, xi cytx'olba'n cye mastl aju otok tbincha Jesús. 18 Cyja'tzun tten otok che ex xjal canul ti'j Jesús, porque otok cybi ti'j ju señ otok tbincha Jesús. 19 Atzun cye parisey cyma cyxolx: —Matzun cyile minti' ch'in ma kcamba'. Cyque'yinxe, cycyakil xjal ma che'x lpe' ti'j. 20 At junjun xjal grieg otok che ja'wil cyuc'il mastl xjal c'ulul tuj nink'ij. 21 E pon lak'e' ke jlu ttxlaj Pelip ex e cubsan twitz: —Tat, kajbile tu'n tkile Jesús, che chi. Ate Pelip aj Betsaida aju tnam ta' tuj tx'otx' Galiley. 22 Xi'tzun Pelip ex xi tma'n te Andrés; atzunte Andrés tuc'ix Pelip xi cyma'n te Jesús. 23 Xitzun ttzak'we'n Jesús: —Ma pon tk'ijlalil tu'n njaw nimsa'ne, akine sc'o'maj kine tu'n Dios tu'n ntene cyuc'il xjal. 24 Ax toc cxel nma'ne cyeye, aju twitz triw ka minti' ma cu'x maku'n tuj tx'otx', junxte cyjel ten, mlay pok'l; katzun ma cu'x maku'n, nim twitz c'oquel. 25 Alcye jun xjal o'cx toc tc'u'j ti'j tchwinklal twitz tx'otx', mlay tcamba aju chwinklal in tzaj tk'o'n Dios; pero alcye jun xjal nne'l tic'un tchwinklal tzalu twitz tx'otx', oc tcamba' aju chwinklal in tzaj tk'o'n Dios tu'n tten tchwinklal te jumajx. 26 Ka at jun xjal taj tu'n tajben weye, lpe'c wi'je; jatum chin tele axtzun ctel aju in ajben weye. Ka at jun ma tz'ajben weye, oc cjawil nimsa'n tu'n Nmane. 27 Ma naj nnable ja'lo; ¿ex alcye cxel nma'ne? ¿Ocpe cxel nma'ne cyja': Tat, chin tcloma tu'n mi'n tic'x wu'ne? Mi'n, porque ma chin ule tu'n tic'x wu'ne. 28 Tat, nimsa'nctz tbiya. Tzajtzun jun tk'ajk'ajel tuj cya'j, ex tma: —Ma jaw nnimsa'ne, ex cjawil nnimsa'ntle juntl maj. 29 Atzun ke xjal ax ate'tok, tej cybinte tk'ajk'ajel, cyma ka jun k'ancyok o k'ajt. Ex at junjuntl cyma: —Jun anjel ma yolin tuc'il, che chi. 30 Xi ttzak'we'n Jesús: —Mya tu'n nlaje ma tzaj tk'ajk'ajel lu, nok o'cx tu'n cylaje. 31 Ja'lo tk'ijlalil tu'n tcub cysentens xjal twitz tx'otx'; ex aju nejenel at twitz tx'otx' c'elex lajo'n ja'lo. 32 Ka ma chin jaw k'i'ne twitz tx'otx', che tzajel wi'ne cycyakil xjal tu'n cyten wuc'ile. 33 Tma Jesús jlu tu'n tel cynic' xjal ti'j tza'n tten tu'n tcyim. 34 Xitzun cyma'n xjal te: —Ba'n ku'ne aju in tma'n tuj Tu'jil ley, ate Crist aju at toclen tu'n Dios, cucx ctel te jumajx. ¿Tza'ntzun tten in tma'na ka il ti'j tu'n tjaw k'i'n twitz tx'otx' aju xjal sc'o'maj tu'n Dios tu'n tten cyuc'il xjal? ¿Alcyetzun ju xjal sc'o'maj tu'n Dios? 35 Xitzun tma'n Jesús cye: —Nok ch'intl ctel ju spic'un cyxole; che bete acux atx spic'un cyuc'ile, tu'ntzun mi'n tcanun naj klolj cyi'je; porque aju xjal in bet tuj klolj, minti' ba'n tu'n tza'n t-xi'. 36 Che ocslantzune ti'j ju spic'un acux atx cyuc'ile, tu'ntzun cyoque jun xjal ic tza'n spic'un, chi Jesús. Atzun jlu tma Jesús ex ic'tzun, xi tewan tib cywitz xjal. 37 Masque nim señ bant tu'n Jesús cywitz xjal, pero minti' e ocslan ti'j. 38 Cyja'tzun japun tyol Isaías aju t-sanjel Dios. Chi Isaías: Tat, ¿mape txi cyocslan xjal kpacbable? Ex ¿mape pon cynabl xjal ti'j tipumal Kman? Chi tuj Tu'jil. 39 Cyja'tzun minti' tumel tu'n t-xi cyocsla'n, porque at juntl yol o tma Isaías, chi cyja': 40 Cub moẍix cywitz tu'n Dios, ex cyuwix cyanmi tu'n, tu'ntzun mi'n toc cyque'yin tu'n cywitz, ex tu'n mi'n tel cynic' ti'j tuj cyanmi, ex tu'n mi'n cyajtz meltz'aj tu'n cybanix wu'ne, chi tuj Tu'jil. 41 O tma Isaías jlu porque o til tajwalil Jesús, ex o yolin ti'j. 42 Masque icju, pero nimcu xjal judiy e ocslan ti'j Jesús, ex cyuc'ix junjun nejenel cyxol e ocslan; pero minti' xi cyma'n cye xjal tu'n tlaj in che xob cywitz parisey, tu'ntzun mi'n cyetz lajo'n tuj ja te c'ulbil. 43 Porque mas o cyajbe tu'n cyc'monte nimbil cye cyu'n xjal, twitzju tu'n cyc'monte nimbil cye tu'n Dios. 44 Jaw tk'ajk'ajel twi' Jesús ex tma: —Alcye ma tz'ocslan wi'je, mya o'cx wi'je in ocslan, ax icx in ocslan ti'j ju tzaj samante weye. 45 Ex alcye ma que'yinte weye, ax icx in tque'yin aju tzaj samante weye. 46 Akine ma chin ule te spic'un cyxol xjal, tu'ntzun mi'n cyten tuj klolj cycyakil keju ma che ocslan wi'je. 47 Pero ka at jun xjal ma binte nyole ex ka minti' ma japun tu'n, mya wu'ne cbel t-sentens; porque minti' ma chin ule tu'n tcub cysentens xjal, nok o'cx tu'n cyclet xjal. 48 Alcye ma tz'el ic'unte weye ex minti' ma che'x tbi'n ke nyole, at jun cbel k'onte t-sentens; aju yol ma txi nma'ne, atzunju cbel k'onte t-sentens xjal tuj mancbil tk'ijlalil. 49 Porque mya wexwe nyol ma txi nma'ne; ate Nmane tzaj samante weye, ex ma tzaj tma'n weye alcye tu'n t-xi nma'ne ex tza'n tten tu'n nyoline. 50 Ex ba'n wu'ne aju tmandamyent Nmane in tk'o'n chwinklal te jumajx. Cyja'tzun, aju yol in xi nma'ne icx tten ic tza'n tzaj k'ma'n weye tu'n Nmane, chi Jesús cye.
1 Na'nxtok tul canun aju nink'ij Xjan K'ij tbi, ba'ntok tu'n Jesús otok pon tk'ijlalil tu'n tic' tzalu twitz tx'otx' ex tu'n tpon tuc'il Tman; tu'nju at tc'ujlalil cyi'j ke t-xnak'tzben ate' tzalu twitz tx'otx', cyja'tzun xi tyec'un tc'ujlalil nimxix cye. 2 Otok tma tajaw il tuj tanmi Judas Iscariote, aju tcy'ajal Simón, tu'n t-xi k'o'n Jesús tuj cyk'ab xjal tu'n, ex ba'n tu'n Jesús tcyakil otok tzaj k'o'n tuj tk'ab tu'n Tman, ex ba'ntok tu'n ka tuc'il Dios otok tzaj ex tuc'il Dios tu'n tpon, cyja'tzun jaw we' ti'j mes matok in che wa'n, el ti'n txowbil ti'j ex tzaj ti'n jun xbalun oc tc'alo'n tc'u'j. 5 Cu'x tko'n ch'in a' tuj jun c'oẍ, oc ten tx'jolte cykan ke t-xnak'tzben, ex el t-su'n ti'j cykan tu'nju xbalun aju c'alo'ntok tc'u'j. 6 Pontzun Jesús twitz Simón Pedro; xitzun tma'n Pedro te: —Tat, ¿maj aya c'elel tx'jonte nkane? 7 Xi ttzak'we'n Jesús: —Aju in nbincha'ne minti' nne'l tnic'a ti'j ja'lo, c'elel tnic'a ti'j pero yajxi. 8 Xitzun tma'n Pedro te: —Mlayx tz'el ttx'jo'na nkane. Xitzun tma'n Jesús te: —Ka minti' ma tz'el ntx'jo'ne tkana, minti' toclena wuc'ile. 9 Xitzun tma'n Simón Pedro: —Tat, mya nok o'cx nkane tu'n tel ttx'jo'na, ax icx ke nk'abe tuc'ix nwi'ye. 10 Pero xi tma'n Jesús te: —Alcye ma baj tx'jo'n ti'j, mya il ti'j tu'n ttx'jet juntl maj, nok o'cx ke tkan tu'n cytx'jet, porque sak ti'j tcyakil; atzun cyeye sak cyi'je, pero mya cycyakile, chi Jesús. 11 Porque ba'n tu'n Jesús alcye tu'n t-xi k'onte te tuj cyk'ab xjal; cyja'tzun o tma: Mya cycyakile sak cyi'je. 12 Tejtzun tbaj tx'jet cykan tu'n, oc tk'o'n juntl maj ju txowbil ti'j, cub ke' juntl maj ti'j mes, ex xi tma'n cye: —¿Mape tz'el cynic'e ti'j ju ma nbinchaye cyeye? 13 In cyma'ne ka akine Xnak'tzal cyeye ex Cyajawe; ba'n in cyma'ne, porque ax toc Xnak'tzal kine, ex akine Cyajawe. 14 Ma tz'el ntx'jo'ne cykane, ex akine Xnak'tzal cyeye ex Cyajawe, cyja'tzun icx cyeye tu'n tel cytx'jo'ne cykane cyxolxe. 15 Porque ma txi nyec'une cyeye, ic tza'n ma nbinchaye cyeye, icxtzun cyeye tu'n cybinchanteye. 16 Ax toc cxel nma'ne cyeye, aju majen mya mas at toclen twitz ju tpatrón, ex aju in xi sama'n mya mas at toclen twitz ju samal te. 17 Ka ma tz'el cynic'e ti'j jlu, at-xix tzalajbil cyeye ka ma cybinchaye. 18 Mya cyi'je cycyakile in chin yoline; ba'n wu'ne alcye keju ma che jaw nsc'o'ne; pero il ti'j tu'n tjapun aju in tma'n tuj Tu'jil chi cyja': Aju ma wa'n wuc'ile, ma tz'oc te aj k'oj wi'je, chi tuj Tu'jil. 19 Bi'x cxel nma'ne cyeye ja'lo na'nxtok tbant jlu, tu'ntzun t-xi cyocsla'ne ka Akine oc tbant jlu. 20 Ax toc cxel nma'ne cyeye, alcye ma c'monte aju cxel nsama'ne, ax kine in chin tc'mo'n; ex aju ma c'monte weye, ax icx in c'monjtz Nmane tu'n, aju tzaj samante weye, chi Jesús cye. 21 Tej tbaj tma'n Jesús jlu, tzaj ta'w tuj tanmi, ex clarxix tzaj tma'n cyja': —Ax toc cxel nma'ne cyeye, ax jun cyeye cxel k'onte weye tuj cyk'ab xjal. 22 Atzun cye t-xnak'tzben baj cyque'yin tuj cywitz, in che ximan ti'j alcye o yolin Jesús ti'j. 23 At jun t-xnak'tzben Jesús, aju c'ujla'nxix tu'n, k'ukltok ti'j mes ttxlaj Jesús. 24 Xitzun tyec'un Simón Pedro señ te tu'n tk'ab, tu'n t-xi tkanin te Jesús alcye o yolin Jesús ti'j. 25 Xitzun txale' twi' ttzi t-xu'c Jesús, ex xi tkanin te: —Tat, ¿alcyetzun? 26 Xitzun tma'n Jesús: —Alcyeju ma txi nk'o'ne pan te, otok cu'x nmu'ne tuj lak, atzunju, chi Jesús. Cu'xtzun tmu'n Jesús pan tuj lak, ex xi tk'o'n te Judas Iscariote aju tcy'ajal Simón. 27 Tej t-xi twa'n Judas pan, ocx naj Satanás tuj tanmi. Xitzun tma'n Jesús te: —Aju oc tbincha'ya, bincham naja. 28 Pero mi jun cye keju k'ukltok ti'j mes el tnic' ti'j tiku'n xi k'ma'n te icju. 29 Tuj cynabl junjun malo txi tma'n Jesús te Judas tu'n t-xi' lak'olte aju tu'n tajben tuj nink'ij, ex ka tu'n t-xi k'ot ch'in cye meba; porque ate Judas k'il ch'u'ẍ tcubil pwak. 30 Tejtzun tbaj twa'n Judas ju pan, jurat etz naj; ex otok ko oc yupj. 31 Tetzlenxitzun Judas tma Jesús: —Ja'lo chin jawil nimsa'ne, akine sc'o'maj kine tu'n Dios tu'n ntene cyuc'il xjal, ex cjawil nimsa'n Dios nok wu'ne. 32 Ka ma jaw nimsa'n Dios nok wu'ne, ax icx tu'nx Dios chin jawil nimsa'ne, ex jurat naj chin jawil nimsa'ne tu'n. 33 Akeye tal nc'wa'le, nok ch'intl chin tele cyuc'ile. Che jyole wi'je; pero ic tza'n xi nma'ne cye xjal judiy, ax icx cxel nma'ne cyeye ja'lo: Mlay che'xe jatum chin xe'le. 34 Cxel nk'o'ne jun ac'aj mandamyent cyeye: Tu'n cyc'ujlante cyibe cyxolxe ic tza'n weye ma che nc'ujlaye, icxtzun cyeye tu'n cyc'ujlante cyibe cyxolxe. 35 Ka ma cyc'ujla cyibe cyxolxe, tu'ntzun jlu c'elel cynic' cycyakil xjal cyi'je ka nxnak'tzben keye, chi Jesús cye. 36 Xitzun tma'n Simón Pedro. —Tat, ¿jatum cxe'la? Xitzun ttzak'we'n Jesús: —Mlayx tz'oc lpe'ya wi'je ja'lo jatum chin xe'le; c'oquel lpe'ya wi'je pero yajxi. 37 Xitzun tma'n Pedro te: —Tat, ¿tiku'n mlayx chin oc lpe'ye ti'ja ja'lo? Jacu txi nk'on wibe tu'n ncyime tu'n tlaja. 38 Xi ttzak'we'n Jesús: —¿Maj jacu tak' tiba tu'n tcyima tu'n nlaje? Ax toc cxel nma'ne teya, na'nxtok ttzaj ok' tzec', cbel tewana ox maj cywitz xjal ka minti' ojtzki'n kine tu'na.
1 Mi'n baj cyc'u'je; ke'c cyc'u'je ti'j Dios, ax icx ke'c cyc'u'je wi'je. 2 Tuj tja Nmane at nimcu najbil; nokwit minti', mawtlo txi nma'ne cyeye; chin xe'ltzune tu'n tbaj nbincha'ne jun najbil cyeye. 3 Oc nxi'ye ex oc tbaj nbincha'ne jun cynajbile, chin ule juntl maj ex che xel wi'ne wuc'ile tu'ntzun cytene wuc'ile jatum chin tele. 4 Ex ba'n cyu'ne jatum chin xe'le, ex ojtzki'n be cyu'ne, chi Jesús. 5 Xitzun tma'n Tomás te: —Tat, minti' ba'n ku'ne jatum cxe'la, ¿tza'ntzun tten tu'n tel knic'e ti'j ju be? 6 Xi ttzak'we'n Jesús: —Akine ju be, akine ju yol axix toc, ex akine k'ol chwinklal; mi a'l jun xjal jacu pon tuc'il Dios Mambaj, ka mya wu'ne. 7 Nokwit ma tz'el cynic'e wi'je, mawtlo tz'el cynic'e ti'j Nmane; atzun ja'lo ma tz'el cynic'e ti'j ex ma cyile. 8 Xitzun tma'n Pelip te Jesús: —Tat, yec'untza Dios Mambaj keye, ex acuxtzunju. 9 Xi ttzak'we'n Jesús: —¿Maj na'nx tel tnic'a wi'je, Pelip? Ex ma chin tene nim k'ij cyuc'ile. Alcye ma chin ilwaje tu'n, ma ilwaj Dios Mambaj tu'n. ¿Tza'ntzun tten in tzaj tma'na tu'n t-xi nyec'une Dios Mambaj cyeye? 10 ¿Maj minti' in xi tocsla'na ka akine tuc'il Nmane ex a Nmane wuc'ile? Aju yol in xi nma'ne cyeye, mya wexwe nyol, nok o'cx ate Nmane najl wuc'ile, axtzunju in binchante tak'un. 11 Cyocslame nyole, akine tuc'il Nmane ex at Nmane wuc'ile; katzun mi'n cyaje tu'n t-xi cyocsla'ne nyole, pero cuchiwt tu'n t-xi cyocsla'ne tu'nju nno'c cyque'yine nbinchbene. 12 Ax toc cxel nma'ne cyeye, alcye ma tz'ocslan wi'je, ax ak'untl oc tbincha' ic tza'n in nbincha'ne; ex mas nim ak'untl oc tbincha' cywitz ke jlu, porque akine ma chinxe tuc'il Nmane. 13 Ex tcyakilju cxel cykanine te Nmane tu'nju ocslal keye wi'je, oc nbincha'ye cyeye tu'ntzun tjaw nimsa'n tbi Nmane ti'j ju oc nbincha'ye cyeye, akine Tc'wa'l. 14 Ka at jun ti'xti ma txi cykanine tu'nju ocslal keye wi'je, oc nbincha'ye cyeye. 15 Ka in chin cyc'ujla'ne, japunx ke nmandamyente cyu'ne. 16 Ex akine chin cubsal twitz Nmane, ctzajeltzun tk'o'n Nmane juntl onil cyeye ex k'ukbalte cyc'u'je tu'n tten cyuc'ile te jumajx. 17 Aju onil cyeye ex k'ukbalte cyc'u'je, atzunju Xewbaj Xjan, aju chic'balte ju axix toc. Mlay bant tu'n tc'monjtz cyu'n xjal, porque minti' nno'c cyque'yin, ex minti' ojtzki'n cyu'n; atzun cyeye ojtzki'n cyu'ne, porque ax najl cyuc'ile ex ax ctel tuj cyanmiye. 18 Mlay che cyaj nk'o'ne meba; chin ultle cyuc'ile. 19 Nok ch'intl chin tele ja'lo, ex mlay chin oc que'yintle cyu'n xjal; atzun cyeye chin oquel cyque'yine; ex tu'nju cucx chin ank'ile, ax icx cyeye che ank'ile. 20 Tuj tk'ijlalil tzul c'elel cynic'e ti'j ka atine tuc'il Nmane, ex ate'ye wuc'ile, ex atine cyuc'ile. 21 Aju xjal at ke nmandamyente tuc'il ex in che japun tu'n, atzunju in chin c'ujlanjtze tu'n; ex aju xjal in chin c'ujlanjtze tu'n, oc cc'ujlanjtzel tu'n Nmane, ax icx weye oc nc'ujla'ye, ex cxel nyec'un wibe te, chi Jesús xi tma'n cye. 22 Xitzun tma'n Judas te (mya aju Iscariote): —Tat, ¿tza'ntzun tten nok o'cx keye ctzajel tyec'un tiba, ex mya cye cycyakil xjal? 23 Xi ttzak'we'n Jesús: —Aju xjal in c'ujlante weye, cxel tniman nyole; ex oc cc'ujlanjtzel tu'n Nmane, ko ule tuc'il, ex ko najale tuc'il. 24 Pero alcye jun xjal minti' in chin c'ujlanjtze tu'n, minti' in xi tniman nyole; ex aju yol ma cybiye, mya weye; tete Nmane aju tzaj samante weye. 25 A jlu ma txi nma'ne cyeye atinxe cyuc'ile. 26 Atzunju onil cyeye ex k'ukbal cyc'u'je, aju Xewbaj Xjan, aju ctzajel t-sama'n Nmane te nxele, atzunju ck'olte xnak'tzbil cyeye ti'j tcyakil, ex oc tma' tu'n ttzaj cyna'ne tcyakilju ma txi nma'ne cyeye. 27 Che cyjel ncawine tuj cheba tu'n tke' cyc'u'je; cyjel nk'ukba'ne cyc'u'je, pero mya ic tten k'ukbabl cyc'u'je cxel nk'o'ne ic tza'n cye xjal in cyk'o'n. Cyja'tzun mi'n baj cyc'u'je ex mi'n che xobe. 28 Ma cybiye aju ma txi nma'ne cyeye: Chin xe'le ex chin ule juntl maj cyuc'ile, nchitzune. Nokwit c'ujla'n kine cyu'ne, mawtlo che tzalaje tu'nju ma txi nma'ne ma chinxe tuc'il Nmane; porque ate Nmane mas at toclen nwitze. 29 Ma txi nma'ne cyeye ja'lo na'nxtok tjapun, tu'ntzun t-xi cyocsla'ne oc tjapun. 30 Mya nimtl yol tu'n t-xi nma'ne cyeye porque tzul ju nejenel, aju in cawin cyibaj cycyakil xjal twitz tx'otx'. Minti' toclen wi'je, 31 pero il ti'j tu'n tel cynic' cycyakil xjal ti'j ka c'ujla'n Nmane wu'ne, ex in nbincha'ne ic tza'nx tzaj tma'n Nmane weye. Che we'ctze, ko ic' tzalu.
1 Akine tkan uva axix toc, atzun Nmane atzun ak'nal ti'j. 2 Tcyakil tk'ab uva toc wi'je ka minti' twitz, c'elel ttx'emin; ex tcyakilju tk'ab uva at twitz, c'elel ti'n ttzkijil ti'j tu'ntzun toc mastl twitz. 3 Atzun cyeye ma tz'el baj ttzkijil cyi'je tu'nju yol ma txi nma'ne cyeye. 4 Che tencje wuc'ile ex akine cyuc'ile. Ic tza'n jun tk'ab uva mlay tz'oc twitz tu'nx tib ka mya toc ti'j tkan uva; icxtzun cyeye mlay tz'oc cywitze ka minti' ẍe cyaj tene wuc'ile. 5 Akine tkan uva, atzun cyeye tk'ab uva keye; alcye ax toc wi'je ex toc kine ti'j, atzunju nim twitz c'oquel. Katzun cypa'n cyibe wi'je, minti' cbantel cyu'ne. 6 Alcye minti' ma cyaj ten wuc'ile, c'elex xo'n ex ctzkijel ic tza'n ke tk'ab uva in tzaj cyi'n xjal ex nno'cx cyk'o'n tuj k'ak' tu'n cybaj tz'e'y. 7 Ka ma che cyaj tene wuc'ile, ex ka ma cyaj ten nyole tuj cyanmiye, cykaninxe tcyakil alcye cyajbile, ex ctzajel k'o'n cyeye. 8 Tu'ntzun jlu cjawil nimsa'n Nmane ka ma tz'oc nim cywitze, ex cyja'tzun tten tu'n cyoque te nxnak'tzbene. 9 Ic tza'n te Nmane ma chin c'ujlanjtze tu'n, icxtzun cyeye ma che nc'ujlaye. Ax che tencje tuj nc'ujlalile. 10 Ka ma che japun ke nmandamyente cyu'ne, cucx ctel nc'ujlalile cyi'je; ic tza'n weye ma che japun ke tmandamyent Nmane wu'ne ex cucx ma ten tc'ujlalil wi'je. 11 Tcyakil jlu ma txi nma'ne cyeye tu'ntzun cytzalaje junx wuc'ile ex tu'n cytzalaje nimxix. 12 Atzun nmandamyente jlu: Tu'n cyc'ujlante cyibe cyxolxe, ic tza'n weye ma che nc'ujlaye. 13 Ka at jun xjal ma txi tk'on tib tu'n tcyim tu'n cyclet ke tamiw, mas ma' tc'ujlalil, mlay pon tc'ujlalil juntl ic tza'n jlu. 14 Akeye che oquele te wamiwoye ka ma cybinchaye aju cxel nma'ne cyeye. 15 Mlay tz'oc nk'o'ntle cybiye majen, porque aju majen minti' ba'n tu'n aju in tbincha'n tpatrón; atzun cyeye ma tz'oc nk'o'ne cybiye te wamiwoye, porque tcyakilju o nbiye te Nmane, o txi ntx'olba'ne cyeye. 16 Mya akeye e jaw sc'onte weye; nok o'cx akine ẍin jaw sc'onte cyeye ex ma tz'oc nk'o'ne cyoclene tu'n cyxi'ye ak'nal, ex tu'n toc cywitze ex cucx tu'n tten cywitze ic tza'n jun wi' uva at nim twitz, tu'ntzun ttzaj tk'o'n Nmane cyeye tcyakilju cxel cykanine te, tu'nju ocslal keye wi'je. 17 Atzun jlu cxel nma'ne cyeye: Tu'n cyc'ujlante cyibe cyxolxe. 18 Ka ma che el ic'une cyu'n xjal, tz'elx cynic'e ti'j, nej ma chin el ic'une cyu'n xjal cywitze. 19 Nokwit te twitz tx'otx' keye, mawtlo che c'ujlanjtze cyu'n xjal ic tza'n in che c'ujlanjtz ke cyuc'il cyu'n, pero ja'lo ma che jaw nsc'o'ne cyxol xjal, tu'ntzunju ma che el ic'une cyu'n, porque mya te twitz tx'otx' keye. 20 Cyna'ntze aju yol xi nma'ne cyeye: Aju majen mya mas nim toclen twitz tpatrón nchitzune. Ka ma chin yajlanjtze cyu'n xjal, ax icx cyeye che yajlanjtzele cyu'n; ex ka ma txi cyniman xjal nyole, ax icx cyeye cxel niman cyyole cyu'n. 21 Tcyakil jlu oc cybincha' xjal cyi'je tu'n tlaj ocslal keye wi'je, porque minti' ojtzki'n cyu'n aju tzaj samante weye. 22 Nokwit minti' ma chin ule ex nokwit minti' ma chin yoline cyuc'il, minti'wtlo cyil; atzun ja'lo minti' cycolbil cyib ti'j cyil. 23 Alcye ma tz'el ic'unte weye, ax icx nne'l ic'un Nmane tu'n. 24 Nokwit minti' o nbinchaye ak'untl cyxol, aju minti' o bant tu'n juntl xjal, minti'wtlo cyil; atzun ja'lo ma cyil wak'unbene ex ma chin el ic'une cyu'n, tuc'ix Nmane. 25 In cybincha'n jlu tu'ntzun tjapun aju yol tz'ibamaj tuj cyley, chi in tma'n: Nokx gan ma chin el ic'une cyu'n, chi tuj Tu'jil. 26 Octzun tul ju Onil cyeye ex K'ukbalte cyc'u'je, aju ctzajel nsama'ne, aju ctzajel tuc'il Nmane, ctzajel tma'n ju axix toc wi'je. Atzun jlu aju Xewbaj Xjan, aju chic'balte ju axix toc, atzun in tzaj tuc'il Nmane. 27 Ax icx cyeye cxel cychic'ba'ne ax toc wi'je, porque ma che tene wuc'ile atxix t-xe tnejel.
1 Tcyakil jlu ma txi nma'ne cyeye tu'ntzun mi'n tcyaj cycolin cyocslable wi'je. 2 Che eletz lajo'ne cyuj ja te c'ulbil; ex tzul tk'ijlalil cbel cyximan xjal ka te Dios in che ajben oc cycub byo'ne cyu'n. 3 Ex cbantel jlu cyu'n porque minti' ojtzki'n Nmane cyu'n, ax icx weye minti' ojtzki'n kine cyu'n. 4 Ma txi nma'ne tcyakil jlu cyeye tu'ntzun ttzaj cyna'ne ka otok txi nma'ne cyeye oc tul canun tk'ijlalil lu. Minti' xi nma'ne jlu cyeye t-xe tnejel, porque atinxtoke cyuc'ile. 5 Pero ja'lo ma chinxe tuc'ilju tzaj samante weye; ex mi jun cyeye in tzaj tkanin weye: ¿Jatum ma txi'ya? Chiwt. 6 Nok o'cx ma tzaj nim cybise tu'nju ma txi nma'ne jlu cyeye. 7 Pero ax toc in xi nma'ne cyeye: Mas ba'n te cyeye tu'n nxi'ye, porque ka minti' ma chinxe, mlay tzul cyuc'ile aju Onil cyeye ex K'ukbalte cyc'u'je; pero ka ma chinxe, ctzajel nsama'ne cyuc'ile. 8 Octzun tul, cbel ti'j cynabl xjal tu'n, tu'n tel cynic' ti'j ka at cyil, ex tu'n tel cynic' ti'j ka tz'aklxix kine, ex tu'n tel cynic' ti'j ka at jwisi tzul tu'n Dios. 9 C'elel cynic' ti'j ka at cyil porque minti' in che ocslan wi'je. 10 C'elel cynic' ti'j ka tz'aklxix kine, porque ma chinxe tuc'il Nmane, ex mlay chin oc cyque'yintle. 11 Ex c'elel cynic' ti'j ka at jwisi tzul tu'n Dios porque ya ma cub t-sentens aju nejenel in cawin cyibaj cycyakil xjal twitz tx'otx'. 12 Nimcu atx taj tu'n t-xi nma'ne cyeye, pero mlay tz'el cynic'e ti'j ja'lo. 13 Octzun tul Xewbaj Xjan aju chic'balte ju axix toc, atzunju cẍaklulte cyeye tu'n tel baj cynic'e ti'j ju axix toc; porque mya texte tyol cxel tma'n, nok o'cx cxel tma'n tcyakilju oc tbi', ex cxel tma'n cyeye tcyakilju tzul. 14 Chin jawil nimsa'ne tu'n, porque aju yol cxel nma'ne te, cxel tchic'ba'n cyeye. 15 Tcyakilju at te Nmane, weye; cyja'tzun ma txi nma'ne, aju yol cxel nma'ne te Xewbaj Xjan, atzunju cxel tchic'ba'n cyeye. 16 Nok ch'intl tu'n ntene cyuc'ile ex mlay chin oc cyque'yintle; pero te yajxi ch'intl chin oquel cyque'yintle; porque ma chinxe tuc'il Nmane, chi Jesús xi tma'n cye t-xnak'tzben. 17 Cymatzun junjun t-xnak'tzben cyxolx: —¿Ti t-xilen ju yol lu in tma'n ke? Nok ch'intl tu'n ntene cyuc'ile ex mlay chin oc cyque'yintle, pero te yajxi ch'intl chin oquel cyque'yintle, ex ti t-xilen jlu: Porque ma chinxe tuc'il Nmane, chitzun. 18 Cyja'tzun: ¿Ti t-xilen ju yol lu: Nok ch'intl tu'n tten kuc'il? Minti' nne'l knic' ti'j ju in tma'n, che chi. 19 Eltzun tnic' Jesús ti'j ka o cyajbe t-xnak'tzben tu'n t-xi cykanin ti t-xilen ju yol lu, xitzun tma'n cye: —¿Maj in che kanine ti'j cyxolxe ti'j t-xilen ju yol ma txi nma'ne cyeye? Aju yol ma txi nma'ne, nok ch'intl chin tele cyuc'ile ex mlay chin oc cyque'yintle, pero te yajxi ch'intl chin oquel cyque'yintle, nchitzune. 20 Ax toc cxel nma'ne cyeye, che jawil ok'e ex che wu'yile, atzun cye xjal che tzalajel; masque ctzajel cybise, pero c'elel cybise tu'n tzalajbil. 21 Oc nnu'l itz'j tal jun xu'j, nno'c tuj c'ixc'oj wen, porque otok pon tk'ijlalil tu'n tul itz'j tal; pero titz'jlenxitzun tal, minti'tl in tzaj tna'n ju c'ixc'oj otok tzic'x tu'n, porque in tzalaj tu'nju otok tzul itz'j jun xjal tzalu twitz tx'otx'. 22 Icxtzun cyeye ja'lo in che bisune; pero che oquel nque'yine juntl maj, ex octzun ctzalajel cyanmiye, ex mi a'l jun c'elel k'inte tzalajbil tuj cyanmiye. 23 Tuj ju k'ij oc klonte kib juntl maj, mlay tzaj cykanine jun ti'xti weye. Ax toc cxel nma'ne cyeye, tcyakilju cxel cykanine te Nmane tu'nju ocslal keye wi'je, ctzajel tk'o'n cyeye. 24 Ex cucx ja'lo na'nx t-xi cykanine jun ti'xti ex ocslal keye wi'je; cykaninxe ja'lo, ex oc cyc'ma'ye tu'ntzun cytzalaje nimxix. 25 Tcyakil jlu ma txi nma'ne cyeye tuj techal; pero tzul tk'ijlalil mlay chin yolintle cyuc'ile tuj techal, nok o'cx clarxix chin yolile cyuc'ile ti'j Nmane. 26 Tuj tk'ijlalil tzul, cxel cykanine tu'nju ocslal keye wi'je; minti' in xi nma'ne cyeye ka chin cubsale twitz Nmane cyi'je, 27 porque axte Nmane c'ujla'n keye tu'n. At tc'u'j Nmane cyi'je porque ma chin c'ujlanjtze cyu'ne ex ma txi cyocsla'ne ka tuc'il Dios ẍin tzaje. 28 Tuc'il Nmane ẍin tzaje, ex ma chin ule twitz tx'otx'; pero ja'lo cyjel nk'o'ne twitz tx'otx', ex ma chinxe juntl maj tuc'il Nmane, chi Jesús xi tma'n cye t-xnak'tzben. 29 Xitzun cyma'n ke t-xnak'tzben te: —Matzun in yolina clarxix ja'lo, ex minti' jun techal in tma'na. 30 Matzun tz'el knic'e ti'j ja'lo, tcyakil ojtzki'n tu'na, ex mya il ti'j tu'n t-xjelin jun xjal teya; tu'ntzun jlu ma txi kocsla'ne ka tuc'il Dios saja, che chi. 31 Xitzun tma'n Jesús cye: —¿Mapetzun cyocslaye ja'lo? 32 Tzul tk'ijlalil, ex matzun tzul canun, tu'n cyel sputje; teyle junjun cxel ti'n tbe, ex chin cyjel cyk'o'ne njunalxe. Pero mya njunalxe atine, porque at Nmane wuc'ile. 33 Tcyakil jlu ma txi nma'ne cyeye tu'n tke'xix cyc'u'je wi'je. Tzul yajbil cyeye twitz tx'otx'; pero ke' cyc'u'je porque ma cub ti'j tcyakil mya ba'n at twitz tx'otx' wu'ne.
1 Tbajlenxitzun tma'n Jesús jlu, jaw tque'yin twitz cya'j ex tma: —Tat, ma pon or; chin tnimsa'nctza, akine Tc'wa'la, ax icx teya tu'n tjaw nimsa'na wu'ne. 2 Porque ma tzaj tk'o'na woclene cyibaj cycyakil xjal tu'n t-xi nk'o'ne chwinklal te jumajx cye cycyakil keju ma che tzaj tk'o'na weye. 3 Ex atzun chwinklal jlu te jumajx, tu'n tojtzkinjtza cyu'n, o'cx aya jun Dios axix toc, ex tu'n wojtzkinjtze cyu'n, akine Jesucrist ma chin tzaj t-sama'na. 4 Ma jaw nnimsa'ne tbiya twitz tx'otx', ma japun baj wu'ne aju ak'untl tzaj tk'o'na weye tu'n nbinchanteye. 5 Ja'lotzun Tat, chin tnimsa'nctza ttxlaja ic tza'n o chin jaw tnimsa'na ttxlaja ojtxi na'nxtok tbant twitz tx'otx'. 6 Ma txi nchic'ba'ne cye xjal tza'n ttena, akeju ma che etz ti'na cyxol xjal ex ma che tzaj tk'o'na weye. Etzan ke tu'na nej ex ma che tzaj tk'o'na weye, ex ma txi cyniman tyola. 7 Ja'lo ma tz'el cynic' ti'j, tcyakilju ma tzaj tk'o'na weye, tuc'ila in tzaj; 8 porque aju yol ma tzaj tma'na weye ma txi nma'ne cye; ex ma txi cyniman, ex ma tz'el cynic' ti'j ka axix toc tuc'ila ẍin tzaje, ex ma txi cyocsla'n ka aya tzaj samante weye. 9 Chin cubsale twitza cyi'j; mya cyi'j ke mastl xjal chin cubsale twitza, nok o'cx cyi'j keju ma che tzaj tk'o'na weye; porque etzan ke tu'na. 10 Tcyakilju at weye, teya, ex aju at teya, weye; ex ma chin jaw nimsa'ne cyu'n keju ma tzaj tk'o'na weye. 11 Mlay chin tentle twitz tx'otx'; atzun cye ax ate' twitz tx'otx', ex ma chinxe tuc'ila. Tat, aya xjan, akeju ma che tzaj tk'o'na weye, cwentin oca ke tu'n tipumala, tu'ntzun cyten junx cyximbetz, ic tza'n ke junx ko'. 12 Tej atinxtoke cyuc'il twitz tx'otx' cwentin ke wu'ne tu'n tipumala; akeju ma che tzaj tk'o'na weye cwentin ke wu'ne, ex minti' jun cye ma naj, nok o'cx jun ma naj, aju il ti'j tu'n t-xi tuj najen tu'ntzun tjapun aju tz'iba'maj tuj Tu'jil. 13 Ja'lotzun chin xe'le tuc'ila; pero in xi nma'ne jlu cye acux atinxe twitz tx'otx', tu'ntzun cytzalajxix wuc'ile ic tza'n weye in chin tzalaje. 14 Ma txi nma'ne tyola cye; pero ma che el ic'un cyu'n xjal, porque mya te twitz tx'otx' ke, ic tza'n weye ax mya te twitz tx'otx' kine. 15 Minti' in chin cubsane twitza tu'n cyaj ti'na tu'n mi'n cytentl twitz tx'otx', nok o'cx tu'n cyoc tcwentina tu'n mi'n tcub cyi'j tu'n tajaw il. 16 Mya te twitz tx'otx' ke, ic tza'n weye ax mya te twitz tx'otx' kine. 17 Pa'n ela ke tu'nju tyola axix toc, tu'ntzun cyajben o'cx teya; aju tyola axix toc. 18 Ic tza'n ma chin tzaj t-sama'na tu'n wule cyxol xjal, icxtzun cye ma che'x nsama'ne cyxol xjal. 19 Nok tu'n cylaj ma txi nk'on wibe tu'n wajbene o'cx teya, ax icx cye tu'n t-xi cyk'on cyib teya nok tu'nju tyola axix toc, tu'ntzun cyajben o'cx teya. 20 Mya o'cx cyi'j jlu chin cubsale twitza, ax icx chin cubsale cyi'j mastl oc che ocslal wi'je nok tu'n cyyol. 21 Chin cubsale twitza tu'n toc junx cyximbetz cycyakil, ic tza'n teya ata wuc'ile ex atine tuc'ila, Tat; icxtzun cyeju tu'n cyten junx kuc'il, tu'ntzun t-xi cyocsla'n cycyakil xjal ka aya ma tzaj samante weye. 22 Ic tza'n weye ma chin jaw tnimsa'na, ax icx cye ma che jaw nnimsa'ne tu'ntzun cyoc junx, ic tza'n ke junx ko'. 23 Akine cyuc'il, ex aya wuc'ile, tu'ntzun cytenxix junx cyximbetz, tu'ntzun tel cynic' cycyakil xjal ti'j ka aya tzaj samante weye, ex ma che tc'ujlaya ic tza'n weye ma chin tc'ujlaya. 24 Tat, akeju ma che tzaj tk'o'na weye, wajbile tu'n cyten wuc'ile jatum chin tele, tu'ntzun toc cyque'yin wajwalile aju tzaj tk'o'na weye; porque in c'ujlanjtze tu'na atxix ojtxi na'nxtok tbant twitz tx'otx'. 25 Tat aya tz'aklxix, minti' ojtzki'na cyu'n xjal, atzun weye ojtzki'na wu'ne, ex keju ate' wuc'ile ma tz'el cynic' ti'j ka aya tzaj samante weye. 26 Ma txi nchic'ba'ne cye tza'n ttena, ex cucx cxel nchic'ba'ntle cye tu'n telxix cynic' ti'j, tu'ntzun cyna'nte ka at tc'ujlalila cyi'j ic tza'n at tc'ujlalila wi'je, ex tu'n ntene cyuc'il.
1 Tejtzun tbaj tma'n Jesús tcyakil jlu, etz tuj tnam cyuc'ix ke t-xnak'tzben, pon jlajxi tk'ab xak Cedrón tbi. Atzun ta' jun tkan awal, atzun ocx Jesús cyxol tkan awal cyuc'ix ke t-xnak'tzben. 2 Ax icx te Judas, aju cyja'tok t-xi k'onte Jesús tuj cyk'ab xjal, ojtzki'ntok ju lugar tu'n, porque nimcu maj oc cychmon cyib Jesús cyuc'ix ke t-xnak'tzben tuj lugar lu. 3 Xitzun tuc'in Judas jun c'loj soldad ex junjun polisiy e tzaj sama'n cyu'n ke nejenel cye pal ex cyu'n ke parisey. E je'xtzun jatum ta' Jesús, k'i'n ttxan tzaj cyu'n tuc'ix candil ex cymacbil in che ajben tuj k'oj. 4 Atzunte Jesús ba'ntok tu'n tcyakilju attok ttzajel ti'j, cyja'tzun etz lak'e' cywitz ex xi tkanin cye: —¿Alcye in che jyo'ne ti'j? 5 Xitzun cytzak'we'n: —In ko jyone ti'j Jesús aj Nazaret. Xitzun tma'n Jesús cye: —Akine. Ex tuc'ix Judas at cyuc'il, aju cyja'tok t-xi k'onte Jesús tuj cyk'ab xjal. 6 Tej t-xi tma'n Jesús cye: Akine, e aj lak'e' ex e aj pac'txaj twitz tx'otx'. 7 Xitzun tkanin Jesús juntl maj cye: —¿Alcye in che jyo'ne ti'j? Xitzun cyma'n te: —In ko jyone ti'j Jesús aj Nazaret. 8 Xitzun tma'n Jesús cye: —Ma txi nma'ne cyeye akine. Cyja'tzun, ka akine in chin cyjyo'ne, cytzokpinxe ke jlu, chi Jesús cye. 9 O tma Jesús jlu tu'ntzun tjapun aju yol o tma: Akeju ma tzaj tk'o'n Nmane weye, mi jun ma naj, chitzun Jesús. 10 Atzunte Simón Pedro k'i'n jun spad tu'n, jatz ti'n tuj tjayil, ex oc ttx'emin tmajen nejenel cye pal, bi'x el t-ẍcyin tu'n tuj tbank'ab. Aju majen lu Malco tbi. 11 Pero xi tma'n Jesús te Pedro: —K'oncuxa t-spadiye tuj tjayil. Porque il ti'j tu'n tic'x c'ixc'oj wu'ne ic tza'n tzaj tma'n Nmane weye. 12 Tzyettzun Jesús cyu'n jun c'loj soldad ex tu'n capitán ex cyu'n ke polisiy e tzaj sama'n cyu'n xjal judiy, ex baj c'alo'n Jesús cyu'n. 13 Tnejel xi cyi'n twitz Anás, porque atzun tji' Caipás; ate Caipás toctok te nejenel cye pal tuj abk'i tej tcub byo'n Jesús. 14 Ex ate Caipás xi k'onte cynabl xjal judiy; mas ba'n tu'n tcyim junx xjal te cyxel tnam xjal, chi Caipás. 15 Ex lepchix t-xi' Simón Pedro ti'j Jesús, tuc'ix juntl xnak'tzben. Aju xnak'tzben lu ojtzki'n twitz tu'n nejenel cye pal, ex tuc'ix ocx tuc'il Jesús twitz tja nejenel cye pal. 16 Atzunte Pedro cyaj ten ti'jtze ttzi ja. Cyja'tzun etz aju xnak'tzben lu, aju ojtzki'n twitz tu'n nejenel cye pal, ex o yolin tuc'il ju txin xk'ukil ttzi ja, ocxtzun Pedro tuja tu'n ju txin. 17 Atzunte txin xk'ukil ttzi ja xi tkanin te Pedro: —¿Myapetzun ajuna cyxol t-xnak'tzben xjal lu? Xitzun tma'n Pedro te: —Mya ajunwe kin. 18 Atzun cye majen cyuc'ix ke polisiy wa'l ke'tok, otok cub jun k'ak' cyu'n porque nim che'w in cub, ex in che k'axnen ti'j k'ak'. Ax icx te Pedro wa'ltok cyuc'il in k'axnen ti'j k'ak'. 19 Xitzun tkanin nejenel cye pal te Jesús cyi'j ke t-xnak'tzben ex ti'j ju t-xnak'tzbil. 20 Xi ttzak'we'n Jesús. —Cywitz cycyakil xjal ma chin yoline cye xjal; cucx ma txi nk'o'ne xnak'tzbil cyuj ja te c'ulbil ex tuj tja Dios jatum nno'c cychmon cyib cycyakil xjal judiy; ex minti' ma chin yoline tuj ewaj. 21 ¿Tiku'n in tzaj tkanina weye? Kaninxa cye keju ma che binte nyole alcye ma txi nma'ne cye; ba'n cyu'n alcye ma txi nma'ne cye. 22 Tej tmante Jesús jlu, ak'pon jun twitz tu'n jun polisiy wa'ltok ttxlaj. Ex tma polisiy cyja': —¿Maj ictzun tten tyola in xi tma'na te nejenel cye pal? 23 Xi ttzak'we'n Jesús: —Ka mya ba'n nyole ma txi nma'ne, chic'bantza alcye tpaltil; katzun ba'n nyole, ¿tiku'ntzun in chin oc tbju'na? Chi Jesús te. 24 Xitzun sama'n Jesús tu'n Anás, pon tuc'il Caipás aju nejenel cye pal. C'alo'ntok Jesús cyu'n. 25 Atzunte Pedro wa'ltok in k'axnen ti'j k'ak'. Xitzun cyma'n xjal te: —¿Myapetzun ajuna cyxol t-xnak'tzben xjal lu? Cub tewan Pedro ex tma: —Mya ajunwe kin. 26 Ex attok jun tmajen nejenel cye pal at t-xilen tuc'il ju xjal el tx'emin t-ẍcyin tu'n Pedro, xitzun tma'n xjal te Pedro: —¿Myapetzun ma wile t-xol tkan awal tuc'il Jesús? 27 Cub tewan Pedro juntl maj; ex jurat naj tzak ok' tzec'. 28 Etztzun k'i'n Jesús tuj tja Caipás, xi k'i'n tuj tja gobernador. Primxtok; atzun cye xjal judiy minti' e ocx tuj tja gobernador tu'n mi'n cyic' tibaj cyley, tu'ntzun t-xi cywa'n ju wabj te kale tuj Xjan K'ij. 29 Cyja'tzun etz Pilat yolil cyuc'il ex xi tma'n cye: —¿Alcye til xjal lu tuj cywitze? 30 Xitzun cytzak'we'n xjal: —Nokwit mya binchal mya ba'n jlu, miwtlo ma tzul ki'ne tuc'ila. 31 Xitzun tma'n Pilat cye: —Cyi'nxe tu'n toc tuj xjel cyu'ne ex tu'n tcub t-sentens ic tza'n in tma'n cyleye. Xitzun cyma'n xjal judiy te: —Mya k'o'n permis keye tu'n tcyim jun xjal ku'ne. 32 Cyma jlu tu'ntzun tjapun ju yol otok tma Jesús tej tmante tza'n tten tu'n tcyim. 33 Ocx juntl maj Pilat tuja, tzajtzun txco'n Jesús tu'n ex xi tma'n te: —¿Apetzuna Rey cye xjal judiy? 34 Xi tma'n Jesús te: —¿Axpeya in k'mante jlu, ex ka at juntl ma k'mante teya wi'je? 35 Xi tma'n Pilat te: —¿Baka judiy xjal kine? Ax ke t-xjalila cyuc'ix ke nejenel cye pal ma che ul k'inte teya wuc'ile. ¿Ti ma tbinchaya? 36 Xitzun ttzak'we'n Jesús: —Aju ncawbile mya te twitz tx'otx'; nokwit te twitz tx'otx' ncawbile, mawtlo che k'ojin keju ate' wuc'ile tu'n mi'n nxi k'o'ne tuj cyk'ab xjal judiy. Pero aju ncawbile myatzun te tzalu. 37 Xitzun tma'n Pilat te: —¿Maj reytzuna? Xi ttzak'we'n Jesús: —Akine rey ic tza'n ma tmaya. Atzun wile ma chin ul itz'je tu'n woque te rey, ex atzun wile ma chin ule twitz tx'otx' tu'n t-xi nchic'ba'ne ju yol axix toc. Cycyakil keju in xi cyniman ju yol axix toc, in xi cybi'n nyole, chi Jesús te. 38 Xitzun tma'n Pilat te: —¿Titzun t-xilen ju yol axix toc? Tej tmante Pilat jlu, etz juntl maj yolil cyuc'il xjal judiy ex xi tma'n cye: —Minti' jun til xjal lu in cnet wu'ne. 39 Pero nak'l keye ti'j tu'n t-xi ntzokpi'ne jun pres tuj Xjan K'ij. ¿Cyajpeye tu'n tex ntzokpi'ne aju Cyreye akeye xjal judiy? 40 Jawtzun tk'ajk'ajel cywi' cycyakil juntl maj ex cyma: —Mya ate jlu tu'n tetz ttzokpi'na, ate Barrabás tzokpi'metza, che chi. Ex ate Barrabás elek'tok.
1 Cyja'tzun tten xi k'i'n Jesús tu'n Pilat ex xi tma'n cye tu'n tbaj asyalin. 2 Atzun cye soldad baj cybincha'n jun coron ch'i'x, jax cyk'o'n tuj twi' Jesús ex oc cyk'o'n jun t-xbalun ẍjulin que'yin. 3 E pon lak'e' twitz ex xi cyma'n te: —In xi kk'olbene, aya Rey cye xjal judiy. Cucxwit tel tk'ija, che chi. Ex oc cytz'ajan twitz. 4 Etztzun juntl maj Pilat, xi tma'n cye xjal: —C'eletz wi'ne tu'n tel cynic'e ti'j minti' jun til ma cnet wu'ne. 5 Etztzun Jesús tjax coron ch'i'x tuj twi' ex toc t-xbalun ẍjulin que'yin. Xitzun tma'n Pilat cye xjal: —Lu ju xinak lu. 6 Tejtzun cyque'yinte ke nejenel cye pal cyuc'ix ke polisiy, jaw tk'ajk'ajel cywi': —E tjaw twitz crus. E tjaw twitz crus, che chi. Xitzun tma'n Pilat cye: —Cyi'nxe, ex cyk'o'n jawe twitz crus; porque minti' jun til in cnet wu'ne. 7 Xitzun cytzak'we'n xjal judiy: —At jun keye kley, ex ic tza'n in tma'n tuj kleye il ti'j tu'n tcyim porque ma tz'oc tk'on tib te Tc'wa'l Dios, che chi. 8 Tejtzun tbinte Pilat jlu, tzaj mastl t-xobil. 9 Ocxtzun juntl maj tuja, xi tkanin te Jesús: —¿Jatum tzajniya? Atzunte Jesús minti' xi ttzak'we'n. 10 Xitzun tma'n Pilat te: —¿Maj minti' in chin tzaj ttzak'we'na? ¿Minti'petzun ba'n tu'na at woclene tu'n tjaw nk'o'ne twitz crus, ax at woclene tu'n t-xi ntzokpi'ne? Chi Pilat. 11 Xi tma'n Jesús te: —Nokwit mya tu'n Dios ma tzaj k'o'n toclena, minti'wtlo toclena wi'je; cyja'tzun, aju ma tzaj k'onte weye tuj tk'aba, mas at til, chi Jesús te. 12 Tu'ntzunju oc tilil tu'n Pilat tu'n t-xi tzokpi'n Jesús tu'n; atzun cye xjal judiy jaw tk'ajk'ajel cywi': —Ka ma txi ttzokpi'na jlu, mlay tz'oca te tamiw gobierni. Alcye jun xjal nno'c tk'on tib te rey in jaw ti'n tib ti'j gobierni, che chi xjal. 13 Tejtzun tbinte Pilat jlu, etz k'i'n Jesús tu'n, cubtzun ke' tuj k'ukbil te cawbil tuj jun lugar Gabata tbi tuj yol ebrey; atzun t-xilen ju yol lu, lugar binchamaj tuj tu'n abj. 14 Atzun k'ij tu'n tbant cyten xjal tu'n tic'set Xjan K'ij tuj juntl k'ij, ex chilcuk'ijlo. Xitzun tma'n Pilat cye xjal judiy: —Lu cyreye lu. 15 Atzun cye xjal judiy e jaw sch'in: —E tcub byet. E tcub byet. E tjaw twitz crus, che chi. Xitzun tma'n Pilat cye: —¿Maj cjawil nk'o'ne cyreye twitz crus? Xitzun cytzak'we'n ke nejenel cye pal: —Minti' juntl kreye, o'cxte gobierni kreye. 16 Cyja'tzun tten xi tk'o'n Pilat Jesús tuj cyk'ab tu'n tjaw k'o'n twitz crus. Tzyettzun Jesús cyu'n, ex xi cyi'n. 17 Xitzun k'i'n Jesús cyu'n. Jawtzun tikan Jesús tcrus ex xi' tuj lugar Tbakil Wibaj tbi, atzun tuj yol ebrey, Gólgota tbi. 18 Ex atzun jaw k'o'n Jesús twitz crus cyu'n, ex at cabetl xjal e jaw k'o'n twitz crus tuc'il, jun tuj jun ttxlaj ex jun tuj juntl ttxlaj, atzunte Jesús tuj tmijil. 19 Ex cub ttz'iban Pilat jun yol ex jax tk'o'n twitz crus, in tma'n cyja': Jesús aj Nazaret, Rey cye xjal judiy. 20 Ex nimcu xjal judiy jaw cysch'i'n ju yol lu, porque aju lugar jatum otok jaw k'o'n Jesús twitz crus nikayintok ta' ttxa'n tnam, ex aju yol lu tz'ibantok tuj yol ebrey, tuj yol grieg, ex tuj yol latín. 21 Atzun ke nejenel cye pal cye xjal judiy xi cyma'n te Pilat: —Mi'n cub ttz'ibana icju: Rey cye xjal judiy; nok o'cx tz'ibancuya cyja': Ax o k'mante: Akine Rey cye xjal judiy. 22 Pero xi ttzak'we'n Pilat: —Aju ma cub ntz'ibane mlay ch'expet. 23 Tejtzun tjaw k'o'n Jesús twitz crus cyu'n soldad, tzaj cyi'n t-xbalun, cyaje pa'n el cyu'n, jun te junjun soldad. Ax icx tzaj cyi'n ju tcamiẍ, minti' slapbil te, junx chemben te tcyakil. 24 Cymatzun cyxolx: —Mi'n cub ksbit'un, nok o'cx e tjaw kin swert ti'j tu'ntzun tel knic' ti'j alcye cxel k'inte. O cybincha jlu tu'ntzun tjapun aju tz'iban tuj Tu'jil chi in tma'n: E oc ten k'il swert ti'j nxbalune ex baj cysipan ke nxbalune cyxolx, chi tuj Tu'jil. Atzun jlu cybincha ke soldad. 25 Ex wa'ltok ttxu' Jesús t-xe crus jatum jaw k'o'n Jesús, tuc'ix titz'in ttxu' Jesús, tuc'ix Mariy aju t-xu'jil Cleofas, tuc'ix Mariy aj Magdala. 26 Tej tlonte Jesús ttxu' ex tuc'ix ju xnak'tzben aju c'ujla'nxix tu'n ax wa'ltok, xi tma'n Jesús te ttxu': —Nan, atzun tala jlu. 27 Ax icx xi tma'n teju xnak'tzben: —Atzun ttxu'ya jlu. Ex bi'x xi ti'n ju xnak'tzben ttxu' Jesús tu'n tten tuj tja. 28 Tbajlenxitzun jlu, tma Jesús: —In chin txkete. O tma jlu tu'ntzun tjapun aju tz'iban tuj Tu'jil, porque ba'ntok tu'n otok japun tcyakil. 29 Ex tcubtok jun xar nojni tu'n vinagre; cu'xtzun cyk'o'n xjal jun esponja tuj vinagre, oc cyc'alo'n twi' jun tal tze' hisopo tbi, ex jax cyk'o'n tuj ttzi'. 30 Tejtzun t-xi ttz'uban Jesús ch'in vinagre, tma: —Ma japun tcyakil. Cubtzun moc'e' twi' ex cyimtzun. 31 Atzun cye xjal judiy e cubsan twitz Pilat tu'n tcub tokin cykan keju otok che jaw k'o'n twitz crus ex tu'n tcu'tz k'i'n cyximlal, porque atzun k'ij tu'n tbant cyten xjal judiy tu'n tic'set Xjan K'ij; cyja'tzun mi'n cyaj tu'n tcyaj ten cyximlal twitz crus tuj k'ij te ojlabl, porque aju k'ij te ojlabl lu ma'xix toclen. 32 E pontzun ke soldad, ex cub cytokin tkan ju tnejel; ax icx cub cytokin tkan ju tcabin, akeju e jaw k'o'n twitz crus tuc'il Jesús. 33 Tejtzun cypon ti'j Jesús, minti' cub cytokin tkan, porque o cyil otok cyim. 34 Pero at jun soldad oc t-xayu'n ttxlaj t-xu'c Jesús tu'n lans, ex etz naj chic' tuc'ix a'. 35 Ex aju o que'yinte jlu in xi tchic'ba'n ax toc ti'j, ex aju tyol in xi tchic'ba'n axix toc; porque ba'n tu'n aju yol in tma'n ax toc, tu'ntzun icx cyeye tu'n t-xi cyocsla'ne. 36 Porque tcyakil jlu o baj ti'j Jesús tu'ntzun tjapun aju tz'iban tuj Tu'jil chi in tma'n: Mlay cub tokin tbakil, chi tuj Tu'jil. 37 Ax icx in tma'ntl tuj Tu'jil: C'oquel cyque'yin aju xjal baj cyxayu'n. 38 Tbajlenxitzun tcyakil jlu, at jun xjal José tbi, aj Arimatey, t-xnak'tzben Jesús jlu, pero minti' xi tma'n cye xjal judiy ka t-xnak'tzben Jesús te tu'nju in xob cywitz; xi'tzun José cubsal twitz Pilat tu'n ttzaj k'o'n permis te tu'n tcu'tz ti'n t-ximlal Jesús; ex tzajtzun k'o'n permis te tu'n Pilat. Ultzun José ex xi ti'n t-ximlal Jesús. 39 Ax icx te Nicodemo ul, aju ul aj tuc'il Jesús te konic'an, ul ti'n tk'olil tze' mirra tbi t-sem tib tuc'il tk'olil tze' áloes tbi, atlo jun syent libr. 40 Tzajtzun cyi'n t-ximlal Jesús, ex ocx cybalk'i'n tuj xbalun tuc'ix tc'oc'jal t-sem tib, ic tza'nx cymod xjal judiy oc in cu'x makut jun xjal. 41 Ex tuj ju lugar jatum jaw k'o'n Jesús twitz crus at jun tkan awal, ex at jun pantyón ac'aj cyxol tkan awal, na'nxtok tocx k'o'n jun cyimni tuj. 42 Atzun ocx cyk'o'n t-ximlal Jesús tuj pantyón lu tu'n tlaj matok in bant cyten xjal judiy tu'n tic'set Xjan K'ij, porque aju pantyón lu nikayintok ta'.
1 Tuj tnejel k'ij te seman xi' Mariy aj Magdala ttzi pantyón primxix wen atxtok kwitz; ex o til otok tz'el k'i'n abj ttzi pantyón. 2 Ajtztzun kelan ex ul tuc'il Simón Pedro ex tuc'il juntl xnak'tzben aju c'ujla'nxix tu'n Jesús, ex xi tma'n cye: —Ma tz'etz k'i'n t-ximlal Kajaw tuj pantyón, ex minti' ba'n ku'ne jatum ma pon k'o'n, chi Mariy. 3 Extzun Pedro tuc'ix juntl xnak'tzben, e je'x ttzi pantyón. 4 E je'x kelan junx cycabil; atzun juntl xnak'tzben mas cyuw ojkelan twitz Pedro, ex nej o canun ttzi pantyón. 5 Cub moc'e' tu'n tocx tque'yin, ex o til ke xbalun ax cycubsa'n, pero minti' ocx tuj pantyón. 6 Ex lepchix t-xi' Simón Pedro ti'j, ex ocx tuj pantyón, ex o til ke xbalun ax cycubsa'n, 7 tuc'ix ju c'albil aju ajben c'albil twi' Jesús, mya junx tcub cyuc'il ke xbalun, balk'i'ntok tten ex part tcub. 8 Ax icx ocx juntl xnak'tzben aju pon nej ttzi pantyón; o til ex xi tocsla'n. 9 Porque na'nxtok tel cynic' ti'j ju tz'ibamaj tuj Tu'jil ka ilxix ti'j tu'n tjatz ank'in Jesús cyxol cyimni. 10 E ajtztzun meltz'aj ke xnak'tzben ex e ul tuj cyja. 11 Atzunte Mariy wa'ltok twitz pantyón in ok'; ex cucxtok tok' cub moc'e' tu'n tocx tque'yin tuj pantyón. 12 Ex o til cab anjel toc cyxbalun sak, k'ukl ke jatum cub ten t-ximlal Jesús, k'ukltok jun jatum cub ten twi' Jesús, ex juntl jatum cub ten tkan. 13 Xitzun cyma'n anjel te Mariy: —¿Tiku'n in ok'a, nan? Xi tma'n Mariy cye: —In chin ok'e porque ma tzic' k'i'n t-ximlal Wajawe, ex minti' ba'n wu'ne jatum ma pon k'o'n. 14 Tej t-xi tma'n Mariy jlu, ajtz meltz'aj twitz, ex o til wa'ltok Jesús, pero minti' el tnic' ti'j ka ate Jesús. 15 Xitzun tma'n Jesús te: —¿Tiku'n in ok'a, nan? ¿Alcye in jyona ti'j? Atzunte Mariy, tuj tnabl ka ateju cwentil awal, xitzun tma'n te: —Tat, ka aya ma txi k'inte t-ximlal Jesús, k'mantza jatum ma pon tk'o'na tu'ntzun t-xi wi'ne. 16 Xitzun tma'n Jesús te: —Mariy. Ajtztzun meltz'aj twitz Mariy, ex xi tma'n te tuj yol ebrey: Raboni. (Atzun in tma'n ju yol lu: Xnak'tzal). 17 Xi tma'n Jesús te: —Mi'n chin cub ttzyu'na porque na'nx njaxe tuc'il Nmane; txi'ya cyuc'il wermaniye, ex k'manxa cye, chin jawixe tuc'il Nmane ex Cymane, tuc'il Ndiose ex Cydiose, chi Jesús te. 18 Xi'tzun Mariy aj Magdala k'malte tkanil cye xnak'tzben, ka otok ilwaj Kajaw tu'n ex ka ax Kajaw tzaj k'mante ju yol lu. 19 Ax k'ij otok tz'oc kax, aju tnejel k'ij te seman, oc cybuyin cyib ke xnak'tzben, ex etz cylamo'n ke pwert jatum ate'tok tu'n tlaj in che xobtok cywitz xjal judiy; ul Jesús cyuc'il, cub we' cyxol, ex xi tma'n cye: —Ke' cyc'u'je. 20 Tejtzun t-xi tma'n jlu cye, xi tyec'un ke tk'ab cye ex ju ttxlaj t-xu'c. Atzun ke xnak'tzben e tzalaj tej cylonte Kajaw. 21 Xitzun tma'n Jesús cye juntl maj: —Ke' cyc'u'je. Ic tza'n ma chin tzaj sama'ne tu'n Nmane, ax icxtzun cyeye che xe'l nsama'ne. 22 Tejtzun tbaj tma'n jlu, xi t-xupin cyi'j, ex xi tma'n cye: —Cyc'monxe aju Xewbaj Xjan. 23 Alcye jun xjal ma cub cynajsa'ne til, cnajsetel til; ex alcye jun xjal minti' ma cub cynajsa'ne til, atx til. 24 Atzunte Tomás, aju yo'ẍ tbi cyu'n xjal, jun cyxol keju cablaj t-xnak'tzben Jesús, mi a'ltok cyuc'il mastl xnak'tzben tej tul Jesús. 25 Xitzun cyma'n ke mastl xnak'tzben te Tomás: —Ma kile Kajaw. Xitzun tma'n Tomás cye: —Ka minti' ma wile tocxlen clav tuj tk'ab, ex ka minti' ma tz'ocx nk'o'ne tal nk'abe tuj tocxlen clav, ex ka minti' ma tz'oc nmaco'ne tocxlen lans ttxlaj t-xu'c, mlay txi wocsla'ne, chi Tomás. 26 Tbajlenxitzun wajxak k'ij, ate'tok juntl maj ke t-xnak'tzben Jesús tuja, ex tuc'ix Tomás attok cyuc'il. Masque lamo'n ke pwert, pero pon Jesús cyuc'il, cub we' cyxol, ex xi tma'n cye: —Ke' cyc'u'je. 27 Ex xi tma'n Jesús te Tomás: —K'o'nctz tal tk'aba tzalu, ex que'yin oca ke nk'abe; ex k'ontz tk'aba, maco'nca jatum tocxlen lans ttxlaj nxu'que. Mi'n tz'oca mya ocslal, nok o'cx tu'n toca ocslal, chi Jesús. 28 Xitzun ttzak'we'n Tomás: —Aya Wajawe ex aya Ndiose. 29 Xitzun tma'n Jesús te: —Nok tu'nju ma chin tila, Tomás, ma txi tocsla'na; at tzalajbil cye keju ma cyocsla masque minti' ma cyil, chi Jesús. 30 Ax icx o tbincha Jesús nimcu txkantl señ cywitz ke t-xnak'tzben, mya tz'iban ke tuj ju libro lu. 31 Pero akeju señ lu ma che tz'ibanjtz tu'ntzun t-xi cyocsla'ne ka ate Jesús ju Crist aju at toclen tu'n Dios, ex ax Tc'wa'l Dioste, ex tu'n tten cychwinklale tu'n oc t-xi cyocsla'ne.
1 Tbajlenxitzun jlu, cub tyec'un tib Jesús juntl maj cywitz ke t-xnak'tzben ttzi laguna Tiberias tbi; ex cub tyec'un tib cyja': 2 Attok Simón Pedro, tuc'ix Tomás aju yo'ẍ tbi cyu'n xjal, tuc'ix Natanael aju aj Caná te Galiley, cyuc'ix ke tcy'ajal Zebedey, ex cyuc'ix cabetl t-xnak'tzben. 3 Xitzun tma'n Simón Pedro cye tuc'il: —Ma chinx weye tzyul cyiẍ. Atzun cye tuc'il xi cyma'n te: —Ax icx keye ma ko'xe tuc'ila. E je'xtzun ex e ocx tuj jun barc; pero ex ak'bil cyu'n ex minti' jun cyiẍ tzyet cyu'n. 4 Tejtzun ch'ixtok tja'wil k'ij, lu Jesús wa'ltok ttzi laguna; atzun cye t-xnak'tzben minti' el cynic' ti'j ka ate Jesús. 5 Xitzun tma'n Jesús cye: —¿Atpe cyiẍ ma tzyet cyu'ne, akeye wuc'ile? —Minti', che chi. 6 Xitzun tma'n Jesús cye: —Cyk'oncu'xe xyub tuj a' ttxlaj barc tuj bank'abaj, cneteltzun cyiẍ cyu'ne, chi cye. Cu'xtzun cyk'o'n ju xyub, ex ya minti' bant tu'n tjatz cyu'n tu'nju nim cyiẍ otok tzyet cyu'n. 7 Atzunte ju xnak'tzben c'ujla'nxix tu'n Jesús xi tma'n te Pedro: —Ate Kajaw jlu. Tejtzun tbinte Simón Pedro ka ate Kajaw, oc tk'o'n t-xbalun (porque otok tz'el ti'n), ex cu'x tuj a'. 8 Atzun ke mastl xnak'tzben e tzaj tuj barc, jawo'n xyub cyu'n jatum cycu'x cyiẍ, porque mya najchak ta' ttzi tx'otx', balo cyaje ech. 9 Tej cyul canun ttzi tx'otx' o cyil otok cub pek'chaj k'ak', ex tocx jun cyiẍ twitz k'ak', ex tuc'ix wabj attok. 10 Xi tma'n Jesús cye: —Cyi'ntze cab ox cyiẍ aju ma xtzyet cyu'ne ja'lo, chi Jesús. 11 Ocxtzun Simón Pedro tuj barc, ex ic'tz ti'n xyub ttzi tx'otx', nojni tu'n 153 cyiẍ matij; masque nim cyiẍ tuj xyub, pero minti' cub tzakj. 12 Xitzun tma'n Jesús cye: —Cytzaje, che wa'ne. Ex mi jun xnak'tzben oc tnimarin tib tu'n t-xi tkanin: ¿Alcyeya? chiwt, porque ba'n cyu'n ka ate Kajaw. 13 Atzunte Jesús tzaj lak'e', ex tzaj ti'n wabj, xi tk'o'n cye, ax icx tzaj ti'n cyiẍ ex xi tk'o'n cye. 14 Atzun toxinmaji'n jlu cub tyec'un tib Jesús cywitz ke t-xnak'tzben tjatzlenxi ank'in cyxol cyimni. 15 Tejtzun cybaj wa'n, xi tkanin Jesús te Simón Pedro: —Aya Simón tcy'ajal Jonás, ¿maspe c'ujla'n kine tu'na ic tza'n cye jlu? Chi Jesús. —C'ujla'na wu'ne, Tat; ba'n tu'na ka c'ujla'na wu'ne, chi Pedro. Xitzun tma'n Jesús te: —Che tcwentin oca ke tal nẍne'le. 16 Xitzun tma'n Jesús te tcabmaji'n: —Aya Simón tcy'ajal Jonás, ¿c'ujla'npe kine tu'na? —C'ujla'na wu'ne, Tat; ba'n tu'na ka c'ujla'na wu'ne, chi Pedro. Xitzun tma'n Jesús te: —Che tcwentin oca ke nẍne'le. 17 Xitzun tma'n te toxinmaji'n: —Aya Simón tcy'ajal Jonás, ¿c'ujla'npe kine tu'na? Tzajtzun tbis Pedro tu'nju tzaj k'ma'n te toxinmaji'n: ¿C'ujla'npe kine tu'na? Xitzun ttzak'we'n: —Tat, tcyakil ba'n tu'na; ba'n tu'na ka c'ujla'na wu'ne. Xitzun tma'n Jesús te: —Che tcwentin oca ke nẍne'le. 18 Ax toc cxel nma'ne teya, tej matok cu'xuna, oc tc'alo'n tc'u'ja, ex xi'ya nok jatum tajbila; octzun ttijina, cjawil ti'n tk'aba, ex c'oquel c'alo'n tc'u'ja tu'n juntl, ex cxel k'i'na jatum mya tajbila tu'n t-xi'ya. 19 Tma Jesús jlu tu'n ttzaj tchic'ba'n tza'n tten tu'n tcyim Pedro tu'ntzun tjaw nimsa'n tbi Dios. Tej tmante jlu ax icx xi tma'n: —Lpe'ca wi'je. 20 Ajtz tque'yin Pedro ex o til lepcho'c cyi'j aju xnak'tzben c'ujla'nxix tu'n Jesús, axju xnak'tzben aju xi txale' twi' ttzi t-xu'c Jesús tej cywa'n ti'j mes ex xi tma'n te: Tat, ¿alcyetzun cxel k'onte teya tuj cyk'ab xjal? 21 Tej tlonte Pedro xnak'tzben lu, xi tma'n te Jesús: —Tat, ¿yajtzun te jlu ti cbajel ti'j? 22 Xitzun tma'n Jesús te Pedro: —Ka wajbile tu'n tcyaj ten atx ocxi wule, ¿ti' taja ti'j? Lpe'c teya wi'je. 23 Aju yol lu el lak'e' tkanil cyxol erman ka minti' tu'n tcyim ju xnak'tzben lu. Pero minti' xi tma'n Jesús te tu'n mi'n tcyim, nok o'cx tma: Ka wajbile tu'n tcyaj ten atx ocxi wule, ¿ti' taja ti'j? 24 Atzunju xnak'tzben lu in tchic'ba'n axix toc ti'j tcyakil jlu, ex ma cyaj ttz'iban tcyakil jlu. Ex ba'n ku'n aju yol tzaj tchic'ba'n axix toc. 25 Ex at nimcu mastl o tbincha Jesús, nokwit ma che cub tz'ibet teyle junjun, tuj nnable mlay bant cyten ke libro twitz tx'otx' nokwit ẍe tz'ibanjtz. Icxwitju.