Aju' tyol Dyos ok te xjal
1 Tej ttzajku' qe t-xetnejel atitoqtlte' Yol, ex atitoqju' Yol junx tuk'i'l Dyos ex axte Dyosju'. 2 Atzunju' Yol atitoq junx tuk'i'l Dyos atxi'x ttzajlen qe tkyaqil. 3 Tkyaqilju' b'ajb'ent, ate b'inchankye; mixwitloti' tkyaqilju' ati naqwit mya Yol b'inchante. 4 Tuk'i'l Yol ta'yaju' chwinqlal, atzunju' chwinqlal atoq spik'un kyeju' xjal te tkyaqil twitz tx'otx'. 5 Aju' spik'un lu nqoptz'aj toju' qlolj, ex mixti'x nkub' yupj kyu'nju' qxopin. 6 Atitzun jun ichan tzaj chq'o'n tu'n Dyos, Xwan tb'i 7 tu'n tok te tziyal, tu'ntzun tyolin kye xjal ti'ju' spik'un ex tu'n kyokslan xjal tu'nju' chik'b'ab'l ntma'n. 8 Myate Xwan spik'un, naq o'kx ul chq'o'n chik'b'alte ti'ju' spik'un. 9 Aju' spik'un axxi'x, ch'inxtltoq tul twitz tx'otx' spik'umalte toj kychwinqlal xjal. 10 Aju' tok tb'i Yol atitoq twitz tx'otx', maskyepe' tu'nelte kub' tb'incha'na Dyosju' twitz tx'otx', aye'tzunju' ate' twitz tx'otx' min elkynik' te. 11 Tetzunj tul twitz tx'otx', mixti'x k'amli kyu'nju' xjal teqe'. 12 Aye'tzunju' xjal e'k'monte ex e'okslan te, xitq'o'n kyoklen tu'n kyok te tk'wal Dyos. 13 Ex tk'wal Dyos qe', mya kyi'j xjal ẍe' itz'ja', mujqa aye'wt xjal ẍe' q'mante, qu'n aku'te Qman Dyos sok'onkye te tk'wal. 14 Aju' tok tb'i Yol matz'ok te ichan ex manajan qxol. Ex qilju' tajwalil, axju' tajwalil o'kxku' jun Tk'wal Dyos, nojni tu'n xtalb'il ex axxi'x yolin. 15 Ti'jtzunju' tok tb'i Yol yolina' Xwan tej tmante: Ti'jtzu'n nchan lu nchin yolina'toqe', aj oje txinma'ne' kyeye' qa tzultoq wi'jxi'ye' ex nimxi'x toklen kye nwitze', qu'n atitltoq na'mxtoq witz'jiye', nchije' xinma'ne' kyeye', chi Xwan. 16 Ti'jtzun tkyaqil ati te, qkyaqil matxi' qk'am jun xtalb'il te; 17 qu'n aju' ojtxi' kawb'il a Moyses ul q'inte, atzunju' tk'u'jlalil exju' axx'ix a Jesukrist sul q'inte. 18 Mix-a'lox jun ojewt til Dyos; ma'tzun tzaj chik'b'a'n qe tu'nju' o'kxku' jun Tk'wal Dyos, qu'n Dyosnate' ex majx nche yolin tuk'i'l Dyos Manb'aj.
Yolin Xwan Jawsal a' ti'j Jesukrist
19 Atzun yol ja'lu tma Xwan, tej kyxi' chq'o'n kynejel pale ex aj Leb'i toj Jerusalen tk'etz kyu'n kawil aj Juda qanilte te alkyetoq. 20 Atzunte Xwan xitchik'b'a'n axxi'x kye ex tma: —Myayinwe' Krist, chij. 21 Ex xikyqani'n jumajtl te: —¿Altzunkyeya ikju'? ¿Mujqa ajuya Eliy t-sanjelal Dyos? chechij Atzunte Xwan xitma'n kye: Myayinwe', chij Aye'tzunkye ilti'j kyu'n tqe'k qanilte —Alkyetzuntza, ¿Mujqa aya jun t-sanjelal Dyos ati tulel? chechij Atzunte Xwan xittzaq'we'n kye: Ex myayinwe', chi Xwan. 22 Xikma'ntzuntz te Xwan: —¿Alkyexi'xtzun ikju'? q'mantza tu'ntzun txi' qchik'b'a'ne' kyeju' ẍetzaj chq'onqeye'. ¿Titi' ntma'na ti'jxa, alkyexi'xa? chechij. 23 Atzunte Xwan xittzaq'we'n kye: —Ayinwejuye' nchin ẍch'in kuw toj chq'ajlaj kjalu: Kyb'inchame' jun tb'e Taye tzinun ti'j, se'nx tma Isayiy t-sanjelal Dyos. 24-25 Xi'tzun kqani'n exi' chq'o'n kyu'n parisey yolil tuk'i'l Xwan te kjalu: —Qanatzun myaya Jesukrist, exqa myaya Eliy mujqa jun t-sanjelal Dyos, ¿Tiquntzun njawa tq'o'na a' kywi' xjal? chechij. 26 Atzunte Xwan xittzaq'we'n kye: —Njaw we' a' wu'n kwi' xjal toj a'; extzun ati jun kxole' minti' ojtzqi'n kyu'ne' 27 ex tzul wi'jxi'ye'. Expe' mixti'we' woklen tu'n tel npoq'injuye' taq'e'l t-xajab', qu'n nimxi'x toklen kye nwitze'. 28 Tkyaqil ja'lu b'aj toju' tnam B'etanya tb'i, tojxi' jun plajtl teju' nin a' Jordan, atzu' ja intoq jawsana' Xwan a' kwi' xjal.
Ate Jesus tal trit Dyos
29 Tetzun juntl q'ij ilwi Jesus tu'n Xwan, xi'toq ttzaj lq'e tk'etz, ex tma: ¡kka'yinxe' ichan tzul chix, atzun ichanju' sk'o'n tu'n Dyos ex nakuj jun tal rit, nel ti'nju' kyil xjal toj tkyaqil twitz tx'otx'!. 30 Ti'jtzu'n ichan lu nyolina'ye' tej nmanteye' kyeye': Atix juntl tzul wi'jxi'ye' ex nimxi'xte toklen kye nwitze', qu'n atitoqtl tej na'mxtoq witz'jiye', nchije' kyeye'. 31 Expe' mixtoq junti' ojtzqi'nwe' twitz wu'n, ex tu'ntzun ja'lu njaw nq'o'ne' a' kwi' xjal tu'ntzun telkynik'ju' aj Israel te, chi Xwan. 32 Ex ttziyate Xwan kjalu: Wile' Xewb'aj Xjan ku'tz toj kya'j nakuj jun paloms saq ti'j, ex kub'ten tib'aj Jesus. 33 Mixtoqti' ojtzqi'n wu'ne' alkye; atzunju' tzaj chq'onweye' jawsal a', tzaj tma'n kjalu: Qama tila al qib'aj mak'u'la' Xewb'aj Xjan ex makub'ten tib'aj, atzun ktzajil q'onte Xewb'aj Xjanju' kye xjal, chij tzaj tma'n weye'. 34 Matxi' wilku'ye' tu'n nwitze', qu'mtzun kxe'l ntziya'ne', qa ate lu tk'wal Dyos, chi Xwan b'aj tma'n.
Aye' tnejel t-xnaq'tzb'en Jesus
35 Tojtzun juntl q'ij, atitoq Xwan wa'l kyuk'ilju' kab'e' t-xnaq'tzb'en. 36 Tetzunj tlonte Xwan xi'toq tik' Jesus, tma: —¡Kka'yinxe' ichan chix, atzun ichanju' sk'o'n tu'n Dyos ex nakuj jun tal rit! 37 Aye'tzunju' kab'e' t-xnaq'tzb'en Xwan tej kb'inte lu, eb'jik'lpe ti'j Jesus. 38 Atzunte Jesus anjtz ka'yinti'j, tetzunj txi' tka'yin lepchqe'ktoq ti'j xitqani'n kye: —¿Titi' nkjyo'ne'? chij Aye'tzunkye xikytzaq'we'n te: —Xnaq'tzal, ¿Ja tu'me'l najla'ya? chechij. 39 Atzunte Jesus xittzaq'we'n kye: —Kuktzaje' ex qo'qeye' ka'yilte. Exi'tzun ex kyil jatoq najla'ya Jesus, ex axtzu' ekyeja' ten tk'etz, qu'n matoq tzaj kyaje' or te qale. 40 Aju' Leẍ titz'in Luch atoqtzun junju' kxolju' kab'e' eb'inte yol tma Xwan ex eb'jik'lpe ti'j Jesus. 41 Eltzun yalju' Simon tnejelxi'x twitzju' Leẍ ex lwiyxi'x xitma'n te: —Matxi' tz'el yalju' Krist qu'ne' aju' ati toklen tu'n Dyos. Chij 42 Xi'tzun q'i'n Simon tu'n Leẍ tk'etz Jesus; tetzunj tok ka'yi'n Simon tu'n Jesus, xitma'n te: —Aya Simon tk'wal Xwan, aju' tb'iya k'okyel te Sepas, ax tz'elpuna'ju' Luch mujqa ab'j.
Tej ktxokli Pelip ex Natanael tu'n Jesus
43 Tetzun juntl q'ij kub' t-xima'n Jesus tu'n txi' toju' tx'otx' Kaliley. Atzuntzu' ela' yalju' Pelip tu'n, ex xitma'n te: —Lpeka wi'je', 44 Atzunte Pelip atoqtzu' najla' toju' tnam B'etzayda ktanam Leẍ ex Simon. 45 Xi'tzun Pelip jyolte Natanael, tetzunj tel yal tu'n xitma'n te: —Matxi' tz'el yalju' wnaq qu'ne' aju' tz'ib'a'n tu'n Moyses kyoju' tu'jil kawb'il, ex kyej tz'ib'a'n kyu'n t-sanjelal Dyos ojtxi'. Aju' Jesus aj Nasaren, tk'wal Jse, chi Pelip. 46 Atzunte Natanael xitma'n te Pelip: —¿Ma tojtzun tal Nasaret k'eletza jun xjal b'a'n? chi Natanael Atzunte Pelip xittzaq'we'n te: —Qo'chaqa ka'yilte wuk'i'le'. 47 Tetzunj tlonte Jesus ch'inxtltoq tpon Natanael tk'etz, tma: —Lu jun aj Israelxi'x tzul, ex mixti' sb'ub'l ati toj tanmi, chi Jesus. 48 Atzunte Natanael xitqani'n te Jesus ex tma: —¿Se'n taq'witzun ojtzqi'nqine' tu'na? chij Xi'tzun ttzaq'we'n Jesus te: —Mawile' tej atitoqa tjaq' junwi' iw, tej na'mxtoq ttzaj txko'na tu'n Pelip. 49 Xi'tzun tma'ntl Natanael te Jesus: —Xnaq'tzal, ¡ateju'ya tk'wal Dyos, ex aya knimaqkawil aj Israel! 50 Atzunte Jesus xittzaq'we'n te: —¿Ma'pe' chinx toksla'na naqtu'n xinma'ne' teya qa atitoqa tjaq' jun wi' iw? Okpe' k'okyel tka'yin txqantla ti'xti' nimaqxi'x toklen kyetwitz ja'lu. 51 Ex ikx xitma'n Jesus te: —Axxi'x kxe'l nma'n kyeye' qa k'okyel kka'yine' kya'j k'ab'li, exqe' tanjl Dyos nche jax toj kya'j ex nche k'u'l wib'aje' ayine' Tk'wal Dyos, chi Jesus kye.
B'aj jun mjeb'le'n toj Kana toj tx'otx' Kaliley
1 Tb'ajlenxi'tzun oxe' q'ij b'aj jun mjeb'le'n Kana jun tnam ati toj ttx'otx' Kaliley. Atitoqtzun ttxu Jesus atzu', 2 Ex ikx exi' txko'nju' Jesus kyuk'i'l t-xnaq'tzb'en toju' mjeb'le'n lu. 3 Kub'tzun b'aju' b'in toju' mjeb'le'n lu, ex atzunte ttxu Jesus xitma'n te Jesus kjalu: —Matxi' kub'aju' kb'in xjal. 4 Atzunte Jesus xittzaq'we'n te ttxu: —Na, ¿Tiqu'n ntzaja' tma'nju'ya lu weye'? Qu'n na'mx tponwe' q'ij we. 5 Atzunte ttxu Jesus xitma'n kyeju' nche' sipan: —Kyb'inchame' tkyaqilju' kxe'l tma'n kyeye', chij. 6 Ate'toqtzun qaq ẍoq' b'incha'nqe' te ab'j atzu' te tk'b'elju' a' najb'en kye aj Juda tx'ajb'ilkye se'nxju' ntma'nju' kawb'il. Tojtzun junjun ẍoq' intoq xib'aj kab'naqlajoj mujqa oxnaq lajoj litr a' toj. 7 Xi'tzun tma'n Jesus kyeju' nche sipan kjalu: —Che knojsankuye' ẍoq' kkyaqil tu'n a'. Aye'tzunju' nche sipan ku chechij, kub' knojsa'n b'a'nxi'x, 8 Xi'tzun tma'ntl Jesus kye: —Ja'lo kyiq'inktze' ch'i'n ex kyiq'inxe' teju' in nuk'un toju' mjeb'le'n. Ex iktzun kb'inchaju'. 9 Tetzunj txi' tnik'b'e'nju' in nuk'un toju' mjeb'le'n matxitoq jawb'entju' a' te b'in, extzun mixti'toq b'i'n kyu'n ja tzajaju' b'in; o'qekxju' sipal eb'inte, qu'n aye'na' ejatz q'inte a' toju' ẍoq'. Atzunju' in nuk'un toju' mjeb'le'n tzaj ttxko'nju' chmilb'aj 10 ex xitma'n te: —Kkyaqil xjal nxi' ksipa'n tb'anilxi'x b'in nej, naqatzun xb'aj txqan kyu'nju' ktxokin, in nexkyq'o'ntlju' myaxi'x wi'yal. Atzunta makyej tklo'na b'in tb'anilxi'x yajxi'tl, b'a'nte' xtb'inchaya, chij te. 11 Atzun tnejel b'a'nq'ob'aj lu tb'incha Jesus, toj tnam Kana toj tx'otx' Kaliley ja tyek'uya' toklen; atzuntzu' e' oksla'na' t-xnaq'tzb'en te. 12 Tb'ajlenxi'tzun ja'lu, xi' Jesus toj tnam Kaparnawum, kyuk'i'lju' ttxu, titz'in exqe'ju' t-xnaq'tzb'en; ex atzu' e'kub'a' ten jte' q'ij.
T-ẍtilsa Jesus tja Dyos
13 Tetzunj ch'inxtltoq tulkanun tq'ij tzaqpib'l kxolju' aj Juda, xi' Jesus toj tnam Jerusalen. 14 Okxtzun toj tja Dyos ex eb'jo'k yalju' xjal tu'n intoq che k'ayin wakx, rit ex paloms, ex til q'uqlqe'toqju' xjal nche ch'exb'en pwaq kye xjal. 15 Tetzunj tlonte Jesus, tzaj ti'n jun aqwil ex kub' tb'incha'n te asyal, oktentzuntz xla'jalkyeju' xjal nche k'ayin toj tja Dyos kyuk'ilxi'ju' kyrit ex kwakyix. Ex el tchto'n kpwaqju' nche ch'exb'en pwaq kye xjal ex majx jaw tpich'ku'nju' kmes. 16 Ex xitma'n kyeju' nche k'ayin paloms kjalu: —¡Kyiq'imixjuye' kpalomse' tzalu! ¡Lalun tz'ok kq'o'ne' tja Dyos te jun k'wik! 17 Aye'tzunju' t-xnaq'tzb'en tzaj kna'nju' yol tz'ib'a'n toj tu'jil tyol Dyos aj ntma'n: Nex ch'yo'n toj wanmiye' tu'nju' inxi'x nk'u'jla'nju'ye' tjaya, chiju' tz'ib'a'n. 18 Aye'tzunju' aj Juda xikyqani'n te: —¿Titi'tzun jun techlal kb'el tb'incha'na te yek'b'ilte qa ati toklena tu'n Dyos? 19 Xi'tzun ttzaq'we'n Jesus kye: —Kxitunkuye' tja Dyos lu, ex kjawil nb'incha'ne' toj oxe' q'ijx. 20 Aye'tzunju' aj Juda xikyma'n te: —Ate' tja Dyos lu b'enti toj kab'naq qaq ab'q'i, ¿Ma oktzun kb'entel tu'na toj oxe' q'ijx? chechij te Jesus. 21 Atzunte Jesus atzu' nyolina'taq ti'ju' t-xmilal, tma qa aju' t-xmilal atzun tja Dyosu'. 22 Qu'mtzun tej tjaw anq'in kxol kyimni, ul julk'ajtzuntz toj kk'u'ju' t-xnaq'tzb'en qa ojetoq tmaju' yol lu; ex xi'tzun kyoksla'ntz aju' ntma'n toj Tu'jil tyol Dyos, ex ikxju' yol ojetoq tma Jesus.
Kkyaqil xjal ojtzqi'nqe' tu'n Jesus
23 Tetzunj atixtoq Jesus toj tnam, toju' tq'ij tzaqpib'l, nim xjal e'okslan te naqx tu'nju' b'a'nq'ob'aj b'aj tb'incha'n. 24 Atzunte Jesus mixtoqti' nokqe tk'u'j kyi'j, qu'n ojtzqi'nqetoq tu'n kkyaqil. 25 Mitoqjun nojqelan tete' Jesus tu'n txi' q'ma'n jun ti'xti' te ti'j jun xjal, qu'n ojtzqi'ntoq kyanmiju' xjal kkyaqil tu'n.
Tej tyolin Jesus tuk'i'l Nikodemo
1 Atitoq jun parisey Nikodemo tb'i, nimtoq toklen kxolju' aj Juda. 2 Pon tk'etz Jesus te qonik'an q'olb'elte ex xitqani'n te: —Xnaq'tzal, b'i'n qe'qu'n qa a Dyos saj chq'onteya tu'n t-xnaq'tzana kye xjal, qu'n aye' b'a'nq'ob'aj nche' b'ent tu'na layx b'ent tu'n jun xjal qa mixti' Dyos tuk'i'l, chij. 3 Atzunte Jesus xitma'n te: —Axxi'x kxe'l nma'n teya qa jun xjal mixti' sitz'ji tkamaji'n, layx tilju' tkawb'il Dyos. 4 Atzunte Nikodemo xitqani'n te kjalu: —¿Se'n taq'witzun kb'entel titz'ji jun xjal matxitoq tijin? ¿Ma jakutzun tz'ok iqa'n jumajtl twi' tu'n ttxu, tu'n titz'ji tkamaji'n? chij 5 Xi'tzun ttzaq'we'n Jesus te: —Axxi'x kxe'l nma'n teya qa alkyete minti' xjatz anq'in toj a' ex toj Xewb'aj, layx b'ent tokx toju' tkawb'il Dyos. 6 Alkyeju' itz'ji tijwnaq, wnaqxte'; ex aju' itz'jni ti'j Xewb'aj te Dyos, ex Xewb'aj. 7 Lalun jaw lab'tiya tu'nju' xinma'ne' teya: Ilxi'xti'j tu'n kyitz'jiye' tkamaji'n. 8 Jaqchku' njub'inate' kyq'iq' nxi' tb'ina, naqtzun a mixti'x b'i'n tu'na ja ntzaja' ex ja kpomila'. Ikxqetzun xjalju' nche' jaw anq'in toj Xewb'aj te Dyos, chi Jesus te. 9 Atzunte Nikodemo xitqani'n jumajtl te ex tma: —¿Se'n taq'witzun ajtb'ent ja'lu? 10 Xi'tzun ttzaq'we'ntl Jesus te: —¿Aya xnaq'tzal kye aj Israel, ma minti' nkaneju' lu toj twitza? 11 Axxi'x kxe'l nma'ne' teya qa aqe' b'i'n qu'n atzunqe' nqyoli'n, ex aqe' nqtziya'n aju' oje qile'; aye'tzunkye' mixti' nxi' kyoksla'ne' nxi' qma'n kyeye'. 12 Qa mixti' nxi' kyoksla'ne' nxi' nma'n kyeye' tiju' ti'xti' te twitz tx'otx', ¿Se'n taq'witzun ajt-xi' kyoksla'ne' ti'xti' toj kya'j? 13 Mix-a'lox jun oje japun toj kya'j, naq o'kx ayine' Tk'wal Dyos ntzaj chq'o'ne' tu'n nkutze' toj kya'j. 14 Iku' se'nte Moyses jawtiq'i'n jun tilb'ilal kan toj chq'ajlaj tib'aj jun tze, ex ikxtzunwe' ayine' Tk'wal Dyos ilti'j tu'n njax q'o'ne' twitz krus, 15 tu'ntzun lalun che naj kkyaqilju' che okslal weye' ex tu'n tten jun kychwinqlal tejumajx.
Aju' tk'u'jlalil Dyos kyi'ju' xjal
16 Qu'n tu'nju' tk'u'jlalil Dyos nimxi'x kyi'ju' xjal, machin tzaj tchq'o'ne' ayine' o'kxku' jun tk'wal, tu'ntzun lalun che naj kkyaqilju' che okslal weye', naq o'kx tu'n tten kychwinqlal tejumajx. 17 Qu'n minti' ẍin tzaj chq'o'ne' ayine' Tk'wal Dyos tu'n kxi' nq'o'ne' xjal toj tz'e'ysb'il witzb'aj, naq o'kx machin tzajchq'o'ne' tu'n kkletju' xjal wu'ne'. 18 Alkyete matz'okslan weye' ayine' Tk'wal Dyos, lay txi' toj tz'e'ysb'il witzb'aj; atzunju' minti' tajb'il tu'n tokslan weye' kxe'l toj tz'e'ysb'il witzb'aj noqx tu'nju' minti' nokslan weye' ayine' Tk'wal Dyos. 19 Aye'ju' minti' nchinx kyoksla'ne', ok che xe'l toj tz'e'ysb'il witzb'aj, qu'n tej tulju' spik'un minti' etzalaj ti'j, a kyajb'ilu' tu'n kten toj qlolj tu'n tpaju' kb'inchb'aj myab'a'n. 20 Qu'n kkyaqilju' nche b'inchan taq'wix nel kyik'o'nju' spik'un, ex min kyajb'il tu'n kyul lq'e tk'etzju' spik'un, tu'ntzun lalun q'ancha'lixju' kb'inchb'aj myab'a'n. 21 Aye'tzunju' xjal nche b'et toju' axxi'x, nche oklq'e tk'etzju' spik'un tu'ntzun tq'ancha'lix qa nkb'incha'n se'nxju' tajb'il Dyos, chi Jesus b'aj tma'n kye.
Yolin jumajtl Xwan Jawsal a' ti'j Jesus
22 Tb'ajlenxi'tzun ja'lu, xi' Jesus kyuk'ilju' t-xnaq'tzb'en toju' tx'otx' te Judey, ex axtzu' e'kub' tena' jte' q'ij intoq jawxi' a' kwi' xjal tu'n. 23 Ex ikxte Xwan intoq jaw a' kywi' xjal tu'n tojun tnej tx'otx' Enon tb'i, nqayin tk'etzju' tnam Salim, qu'n nimtoqju' a' ati atzu'; intoqtzun che ponju' xjal atzu' tu'n tjaw a' kwi'. 24 B'aj ja'lu tej na'mxtoq tokx jpu'n Xwan toj kars. 25 Aye'tzunju' t-xnaq'tzb'en Xwan tzaj jun yol kxol te wuljtib'il kyuk'i'l junjunju' aj Juda tib'aju' ẍtilsab'l, 26 ex epontzun tk'etz Xwan ex xikyma'n te: —Xnaq'tzal, aju' oje ten tuk'ila jlajxi' a' Jordan, aju' tzajni tma'na qeye', lu in jawsan a' kwi' xjal ex kkyaqil xjal nche oklpe ti'j, chechij. 27 Atzunte Xwan xitma'n kye: —Lay ten jun oklenj te xjal qa mya Dyos ntzaj q'onte te. 28 Kyb'iniye' b'a'nxi'x tej txi' nma'n kyeye' qa myayine' Krist, naq o'kx xinma'nju'ye' kyeye' qama chin tzajchq'o'ne' tu'n nkub'neje' twitz. 29 Tojun mjeb'le'n, aju' ati t-xu'jil atzunte chmilb'aju'; ex atzunju' tamiw wa'lok tk'etz nb'ink kye, ntzalaj ajt-xi' tb'i'n nyolinju' chmilb'aj. Ikxtzunwejuye' nchin tzalaje' nimxi'x tu'n ja'lu. 30 Ilti'j tu'n tch'iyte toju' toklen, atzunwe' woklen atl junjun q'ij xi' tkub'aj.
Aju' ntzaj toj kya'j
31 Aju' ntzaj toj kya'j ati toklen kyib'aj kkyaqil. Atzunju' twitz tx'otx' tex twitz tx'otx', ex nyolin ti'jxju' te twitz tx'otx'. Atzunte' ntzaj toj kya'j ati toklen kyib'aj kkyaqil xjal, 32 ex a ntzaj tchik'b'a'nju' oje til ex oje tb'i; extzun mixti'xte' nxi' b'inte. 33 Qatzun ati jun matz'okslan te, nttziya'ntzuntz qa axte' Dyos tyol; 34 Qu'n aju' saj chq'o'n tu'n Dyos, nyolin ti'ju' tyol Dyos, qu'n aku' Dyos nku' q'onte nim Xewb'aj Xjan toj. 35 Intk'u'jla'nte Dyos Manb'aj Tk'wal, ex matxi' txi' tq'o'n toklen tib'aj tkyaqilju' ti'xti'. 36 Alkye matz'okslan teju' Tk'wal Dyos, ati tchwinqlal tejumajx; alkyetzunte' min nokslan teju' K'wa'lb'aj, lay ten tchwinqlal tejumajx, ate tzul q'o'n te aju' tz'e'ysb'il witzb'aj nimxi'x tu'n Dyos.
Yolin Jesus tuk'i'l jun qya aj Samarya
1 Kyb'itzun parisey qa matxitoq che chmet t-xnaq'tzb'en Jesus ex nimtoq xjal njaw a' kywi' tu'n 2 (maskye myaku' Jesus njawsa'n a' kwi' xjal, aye'ju' t-xnaq'tzb'en nche b'inchante). 3 Tetzunj tb'inte Jesus ja'lu, etztzuntz toj Judey ex anjti'j toj Kaliley. 4 Ilti'jtoq tu'n tik' Jesus toju' tnam Samarya tej txi' Kaliley. 5 Qu'mtzun pon tojun tnam te Samarya Sikar tb'i, nqakutaq ta' tk'etzju' tx'otx' xitq'o'n Jakob' te tetzb'il Jse aju' tk'wal. 6 Atoqtzuntz ta' jun xoch atoq tb'iju' t-xoch Jakob'. Kub'tzun qe Jesus ch'inxtoqlo ttzaj wanq'ij ojlal ttziju' xoch qu'n ma'toq sikti. 7-8 Ma'toqtzun che'xju' t-xnaq'tzb'en Jesus lq'ol kwa toju' tnam. Tej tpon jun qya aj Samarya ttziju' xoch q'il a' toju' kmuj lu, ex xitma'n Jesus te: —Q'ontz ch'i'nwe' nk'wa' a', chij. 9 Atzunju' qya aj Samarya xitma'n te Jesus: —¿Se'n taq'wi ntzaj tqani'na a' weye' extzun aj Judaya, ayintzunwe' aj Samaryaqine'?. Qu'n myatoq b'a'n kyten aj Juda kyuk'ilju' aj Samarya. 10 Atzunte Jesus xittzaq'we'n te: —Naqwit b'i'n tu'na aju' ntzaj tq'o'n Dyos ex alkyeju' nxi' qaninte tk'wa' teya, jaku' txi' tqani'na a' te, ex jaku' tzaj tq'o'nte' teya aju' a' te chwinqlal. 11 Atzunju' qya xittzaq'we'n te: —Taye, mixti'pe'na' jun tk'b'el a tu'na tu'n tjatz, qu'n niminte' xoch t-xe: ¿Jatzun ktzajela'ju' a' te chwinqlal tu'na tu'n ttzaj tq'o'na weye'? 12 Aju' qyajilb'ene' Jakob' kyej q'onteju' xoch lu qeye', atzu' k'wana' ti'j exqe'ju' tk'wal e' talu'n. ¿Ma nimxi'xtzunta toklen kyetwitz Jakob'? 13 Xi'tzun ttzaq'we'n Jesus te: —Kkyaqilju' nche k'wan ti'ju' a' lu, ntzaj jumajtl k'waj kyi'j; 14 ex atzunju' nk'wan ti'ju' a' nxi' nq'o'ne', lay tzajtl k'waj ti'j. Qu'n aju' a' nxi' nq'o'ne' te kjawil b'ent te jun t-xiklil a' npoq'chaj toj tanmi, tu'n tten tchwinqlal tejumajx. 15 Atzunte qya xitma'n te Jesus: —Taye, q'ontza a' xtmaya weye', tu'ntzun lalun tzajtl k'waj wi'je', ex tu'n lalun chin ul jumajtle' q'ayil tzmaxtzu' ttziju' xoch lu. 16 Atzunte Jesus xitma'n te qya: —Kutxi'ya txkolte tchmila ex kuktzaje' tzalu. 17 Atzunju' qya xittzaq'we'n te: —Mixti'we' nchmil. Xi'tzun tma'ntl Jesus te: —B'a'nju' xtmaya ikju' qa mixti' tchmila; 18 qu'n jwe'xi' tchmila ten, atzunju' ichan najliya tuk'i'l ja'lo, mya tchmila. Qu'mtzun axxi'xju' xtmaya. 19 Tetzun tb'inte qya ja'lu xitma'n te: —Taye, matxi' tz'el nnik'e' teya qa jun t-sanjelal Dyosa. 20 Ayeju' qyajilb'ene' ojtxi', atoqtzu' nche' k'uluna' te Dyos twi'ju' witz lu, aye'tzunkye' aj Juda nkma'ne' qa atzu' tu'n qk'uluna' te Dyos toj Jerusalen. 21 Atzunte Jesus xittzaq'we'n te: —Qya, chin tokslama, qu'n tzul tq'ijlalil tu'n kk'ulune' twitz Qman Dyos jaxjaku', mya o'kxtzu' twi'ju' witz lu, ex mya o'kxtzu' Jerusalen. 22 Aye'tzunkye' min kyojtzqi'ne' alqe nche' k'ulunaye', ayo'tzunqe' qojtzqi'nqe' ja nqo' k'ulunaye', qu'n aju' kolb'il atzu' ntzaja' kxol aj Juda. 23 Extzun kpomil tq'ijlalil, ex matxi' tzul ja'lo, tu'n kk'ulun xjal axxi'x te Qman Dyos ex se'nx ntchq'onju' Xewb'aj Xjan. Qu'n ate Qman Dyos tajb'il tu'n kk'ulun xjal te tu'n tkyaqil kyanmi. 24 Xewb'ajte Dyos, ex ati tu'n kk'ulunju' xjal axxi'x te se'nxju' tajb'il T-xew Dyos. 25 Atzunju' qya xitma'n te Jesus: —B'i'nwe' wu'n qa tzulju' Krist, ajtzun tul ktzajel tchik'b'a'n tkyaqil qe, chij. 26 Xitzun tma'n Jesus te: —Ayinajuye' Krist nchin yoline' tuk'ila. 27 Tetzunju' kmuj lu eponju' t-xnaq'tzb'en ex majx e'jaw lab'ti tej kka'yinte Jesus nyolin tuk'ilju' qya. Ex mix-a'lo' jun xiqaninte te titi'toq tajb'il ex ti'toq ntyoli'n tuk'ilju' qya. 28 Atzunju' qya kyej tq'o'nju' t-ẍoq' ex xi'tzun toj tnam q'malte kye xjal: 29 —Kuktzaje' ka'yilte jun ichan matzaj tma'n tkyaqil nb'inchb'aje' weye'. ¿Ma myatzulo Kristju' lu? chij 30 Eb'jetztzuntz toju' tnam ex exi' jata'ju' Jesus. 31 Intoqtzun che kub'sanju' t-xnaq'tzb'en twitz kjalu: —Xnaq'tzal, wantzuna, chechij 32 Atzunte Jesus xitma'n kye: —Atiwe' nwa tu'n nwanteye', aju' minti' ojtzqi'n kyu'ne'. 33 Aye'tzunju' t-xnaq'tzb'en eb'jaw xjelun kxolilex, ex kma: —¿Ma ma'tzulo tzul iq'i'n twa? 34 Xi'tzun tma'nte Jesus kye: —Awe' nwaju' tu'n nb'inchanteye' tajb'ilju' saj chq'onweye', ex tu'n tjapun b'aj ju' taq'un wu'ne'. 35 Atzunkye' nkma'ne': Atix kyaje' xjawtl tu'n tjaw b'uyitju' twitz awal; atzunwe' kxe'l nma'n kyeye' tu'n tok kka'yine' awal b'a'nxi'x, qu'n matxi' q'anax tu'n tjaw. 36 Aju' naq'unan ti'j awal intzaj q'o'n twi'tk'u'j, atzunju' twitz awal njaw tb'uyi'n najb'en te chwinqlal tejumajx, tu'ntzun ttzalaju' in nawan exju' nb'uyinte twitz awal junx. 37 Qu'n axte' yol nq'manjtz qa Junte' nok awante atzun juntel njaw b'uyinte, chechi xjal. 38 Ma'tzun che'x nchq'o'ne' b'uyilte twitz awal jamin soka kyawane'; qu'n junxi'qetlkye' ẍe' aq'unan ti'j, aye'tzunkye' che jawil b'uyinte twitz kyaq'unb'enju' txqantl, chi Jesus kye. 39 Txqanju' xjal aj Samarya najlqe' toj Sikar e'okslan ti'j Jesus tu'n tyolju' qya xitma'n kye: Matxi' tzaj tma'n tkyaqil nb'inchb'aje'. 40 Tetzunj kyulju' aj Samarya tk'etz Jesus ekub'san te tu'n tkyejten kyuk'i'l. Kyejtzun ten kab'e' q'iju' Jesus atzu' kyuk'i'l, 41 Ex txqantl xjal e'okslan te Jesus tej kb'intekuju' tyol. 42 Xi'tzun kma'ntzu' teju' qya: —Ja'lo matxitzun txi' qoksla'ne', myanaq o'kx tu'nju' saj tma'na qeye', qu'n matxi' qb'ikuye' tyol ex maqile' axxi'x qa ate Kristju' lu, aju' Klol kye xjal toj tkyaqil twitz tx'otx'.
Q'anit tk'wal jun xjal ati toklen toj tja nimaqkawil tu'n Jesus
43 Tb'ajlenxi'tzun kab'e' q'ij, etz Jesus toj Samarya, ex xi' toj Kaliley. 44 Qu'n axnate Jesus q'mante, qa mixti' nok q'o'n toklen jun t-sanjelal Dyos kyu'n xjal tojxju' ttx'otx'. 45 Tetzunj tpon toj Kaliley, k'monjtz b'a'n kyu'n xjal toju' tx'otx' lu, qu'n aye'x junkye' ext'anj ik'salte tq'ij tzaqpib'l toj Jerusalen ex ma'toq kyil tkyaqilju' tb'incha Jesus. 46 Atzunte Jesus anjtzti'j toju' tnam Kana toj ttx'otx' Kaliley, ja jawa' b'entju' a' tu'n te b'in. Atitoqtzun jun xjal tmajen nimaqkawil yab'toq jun tk'wal toj Kaparnawum. 47 Tetzunj tb'inte tmajen nimaqkawil qa ma'toq tz'anjtz Jesus Judey exqa ma'toq pon Kaliley, xi' ka'yilte ex kub'san twitz Jesus tu'n txi' tja ex tu'n tkub' tq'aninju' tk'wal, qu'n ch'inxtltoq tkyim. 48 Atzunte Jesus xittzaq'we'n te: —Qa min xkyilkye jun techlal mujqa jun b'a'nq'ob'aj, mixti'x nxi' koksla'ne', chij. 49 Atzunju' tmajen nimaqkawil xitma'n te: —Taye, kuttzaja ja'loxi'x, na'mxku' tkyimju' nk'wale', chij. 50 Xi'tzun tma'ntl Jesus te: —Kuxtxi'ya tjaya; itz'xte' tk'wala ex matxi' b'enti. Atzunju' ichan lu xitoksla'n aju' xitma'n Jesus te, ex xi'tzuntz tja. 51 Tetzunj ch'inxtltoq tpon tja, eb'je'tzju' tmajen k'lulte ex xikyma'n te: —¡Itz'te' tk'wala ex matxi' b'ent! 52 Atzunju' tmajen nimaqkawil xitqani'n kyeju' tmajen alkye kmuj telju' yab'il tiju' tk'wal, ex aye'tzunju' majen xikytzaq'we'n te: —Ewi tej ttzaj jun te qale tchewixju' kyeq ti'j, che chij. 53 Atzuntzu' kane toj tnab'lju' tman k'wal qa axkmuju' tej txi' tma'n Jesus te: Itz'te' tk'wala ex matxi' b'ent; okslantzunju' ichan lu te Jesus exqe'ju' toj tja. 54 Atzun tkab' b'a'nq'ob'aj ja'lu tb'incha Jesus tej tetz toj Judey ex pon toj Kaliley.
Q'anit jun k'oljni tu'n Jesus toj B'etesda
1 Tb'ajlenxi'tzun ja'lu, tej tok jun ninq'ij kyu'nju' aj Juda, anjti'j Jesus Jerusalen. 2 Tojtzunju' tnam Jerusalen ati jun nin pil tk'wel a' B'etesta tb'i toj eb'rey nqaku' ta' tk'etzju' tjpel tnam kye Rit tb'i. Ati jwe' twitzju' ja ti'jileju' nin pil, 3 atoqtzuntzu' ate'qeya' txqan yab', moẍ, kox ex k'oljni kuẍlqe' intoq che ayon tu'n tjaw yukchiju' a'. 4 Qu'n intoq ku'tz jun anjl toj jte'chaq q'ij, ex intoq xityukcha'nju' a' ati toju' nin pil; atzunju' nku'x nej kxolju' yab' toju' a' ajtjaw yukchi, atzunte yab'ju' nb'ent te alchaqkyexku' yab'il. 5 Atitoqtzun jun ichan kxol matxitoq b'aj junaq wajxaqlajoj (38 ) ab'q'i tu'n toj yab'il. 6 Tetzunj tok ka'yi'n tu'n Jesus kuẍlitoq ex tej tb'inte qa matoq b'et q'ij tu'n toj yab'il xitqani'n te: —¿Ma tajb'ila tu'n tq'aneta? chij 7 Atzunte yab' xittzaq'we'n te: —Taye, mixna'-a'lox jun ntzaj oninweye' tu'n nku'xe' toju' a' ajtjaw yukchi. Wajb'ile' tu'n nku'xe' extzun lwiy nku'x nej juntl nwitze'. 8 Atzunte Jesus xitma'n te: —We'ktza, iq'inktza tkuẍb'ila ex b'eta. 9 Textzunju' kmuj lu b'entju' ichan, jaw ti'nju' tkuẍb'il ex aq'wi b'etil. Naqtzun aju' q'ij lu atoq te ojlab'l, 10 xi'tzun kma'nju' aj Juda teju' yab' kjalu: —Q'ij te ojlab'lte' ja'lo; lay b'ent tu'n txi' ti'njuya tkuẍb'ila, chechij. 11 Atzunju' ichan lu xitma'n kye: —Aju' xq'aninweye', matzaj tma'n: Q'inktza tkuẍb'ila ex b'eta, chij weye'. 12 Aye'tzunkye xikyqani'n te: —¿Alkyetzunju' xiq'mante teya: Q'inktza tkuẍb'ila ex b'eta? 13 Atzunju' ichan mitoqjunti' b'i'n tu'n alkyeju' kub' q'aninte, qu'n matoq kub'naj Jesus kxol txqan xjal twitz. 14 Yajxi'tzuntel okyal jumajtlu' ichan lu tu'n Jesus toj tja Dyos, ex xitma'n te: —Matxi' b'entiya, ja'lo lantzun jyontl ila, tu'ntzun mlalun tzaj juntl ti'xti' nimxi'x ti'ja. 15 Atzunju' ichan lu anjtlti'j q'malte kyeju' aj Juda qa a Jesus kub' q'aninte. 16 Tu'ntzun ja'lu eb'jo'kten aj Juda ljol toj tq'ij Jesus, qu'n intoq tb'incha'nju' lu toj q'ij te ojlab'l. 17 Atzunte Jesus xitma'n kye: —In naq'unanwe' Nman kukx, ex ikxwe' inchin naq'unawe'. 18 Tu'ntzun tpaj ja'lu, kyajb'iltoqju' aj Juda tu'n tkub' kb'yo'n Jesus, qu'n mya o'kx tu'nju' mitoqjunti' ntnima'nju' q'ij te ojlab'l, ex ikx tu'nju' nok tq'o'ntib' se'nte Dyos tu'nju' ntma'n qa tk'walxi'x Dyos.
Aju' toklen tk'wal Dyos
19 Xi'tzun tma'n Jesus kye: Axxi'x kxe'l nma'n kyeye' qa ayine' tk'wal Dyos layx b'ent jun ti'xti' wu'ne' njunalxe'; o'kx nb'incha'njuye' aju' nok nka'yine' ti'j Nmane'. Tkyaqilju' ntb'incha'n Nmane', ex ikx axwe' nb'incha'n. 20 Qu'n ate nmane' inxi'x chin tk'u'jla'ne', ex ntzaj tyek'u'n weye' tkyaqilju' ntb'incha'n; expe' ktzajel tyek'u'n txqantl ti'xti' weye' nimaqxi'x, ex majx che jawil lab'tiye' ti'j ajkyka'yinteye'. 21 Qu'n iku' se'nte Nmane' nche jaw anq'in kyimni tu'n ex nxi' tq'o'n kychwinqlal, ikxtzunwejuye' ayine' K'wa'lb'aj kxe'l nq'o'ne' chwinqlal kyeju' xjal kyajb'il kychwinqlal. 22 Myate Nmane' nok q'onkye xjal toj xjel, ayinwe' k'wa'lb'aj matzaj q'o'n woklene' tu'n kyok xjal toj xjel wu'ne', 23 tu'ntzun kyniman kykyaqil xjal weye' kse'nxju' nche niman te Nmane'. Alkyete min nchin tnima'ne' ayine' Tk'wal Dyos, ex minti' ntnima'n Nmane' saj chq'onweye'. 24 Axxi'x kxe'l nma'n kyeye' qa alkyete nkub' tq'o'n nak'b'il teju' nxi' nma'ne' ex nxi' toksla'n alkye saj chq'onweye', atite' tchwinqlal tejumajx; ex lay txi' toj tz'e'ysb'il witzb'aj, matz'etz toj kamik ex mapon kanun toj chwinqlal. 25 Axx'ix kxe'l nma'n kyeye' qa tzulju' kmuj, ex matxi' ponju' kmuj, ajt-xi' kb'i'n kyimniju' tq'ojq'ojel nwiye' ayine' Tk'wal Dyos; ex aye'tzunju' che kxe'l b'inte ok che anq'il. 26 Qu'n ikse'nte Nmane' ati tchwinqlal tu'nxtib', ex ikxwe' ayine' Tk'wal ati nchwinqlale' wu'nx wib'e', 27 ex matxi' tzaj tq'o'n woklene' tu'n kyok xjal toj xjel wu'ne', tu'nju' ayine' tk'wal Dyos. 28 Lalun che jaw lab'tiye' tu'n ja'lu, qu'n kpomel tq'ijlalil ajkyb'inte kykyaqilju' kyimni tq'ojq'ojel nwi'ye' 29 ex che b'je'letztzuntz toj muqb'il. Aye'ju' ẍeb'inchante b'a'n aye'tzun che jawil anq'in k'molteju' chwinqlal, aye'tzunju' ẍeb'inchante taq'wix, che jawil anq'in tu'n kxi' toj tz'e'ysb'il witzb'aj.
Xityek'u'n Jesus toklen tu'nju' tb'inchb'en
30 Layx b'ent jun ti'xti' wu'ne' njunalxe'. Inche okwe' xjal wu'n toj xjel se'nxju' ntzaj tma'n Nmane' weye', ex tojxi'x tnik'alti'ju' xjel kye xjal wu'ne', qu'n min nb'incha'nwe' wajb'il, o'kxwe' nb'incha'n aju' tajb'il Nmane' tu'nju' machin tzaj tchq'o'ne'. 31 Naqwit nchin yoline' wi'jxe', aju' nyole' jaku' mixti'x toklen. 32 Ex atix juntl tziyal wi'je', ex b'i'n wu'ne' qa aju' ntma'n wi'je' tnik'alxi'xti'j. 33 Exi' kychq'o'ne' sanjelal qanilte te Xwan, ex aju' tzaj tma'n Xwan kyeye' wi'je' axxi'x. 34 Expe' mya ilti'j tu'n tok jun xjal tziyal wi'je'. Naqx xinma'nwe' tma Xwan kyeye' tu'n tkub' tiju' kolb'il kyu'ne'. 35 Iktoqte' Xwan se'n jun q'aq' ink'ant ex intq'o'n t-spik'umal, ex etzalaj jte' q'ije' tiju' t-spik'umal lu. 36 Ex ati junwe' tziyal wi'j nimxi'x toklen kyetwitz Xwan. Aju' aq'untl ntzaj chq'o'ne' b'inchalte tu'n Nmane' atzun nb'incha'njuye', ex aye' aq'untl lu nche yek'unte qa a Manb'aj Dyos saj chq'onweye'. 37 Ex ikxju' Manb'aj saj chq'onweye', ex a tziyalju' wi'je', expe' na'mx tok kb'ine' tq'ojq'ojel twi' ex na'mx tok kka'yine', 38 ex na'mx tokxju' tyol toj kyanmiye', qu'n minti' nche okslane' weye' ayine' ẍin tzaj chq'o'ne' tu'n. 39 Aye'kye' inxi'x noktilil kyu'ne' tu'n kxnaq'tzane' tiju' Tujil tyol Dyos, qu'n nkub' kximane' qa atzu' kknetelaju' chwinqlal tejumajx toj; expe' nyolinju' Tu'jil wi'je', 40 aye'tzunkye' mixti'x kyaje' tu'n ktzaje' nk'etze' tu'n tten kychwinqlale' tejumajx. 41 Lay wajwe' tu'n njaw nimane' kyu'n xjal, qu'n myawe' njyo'n. 42 Qu'n ojtzqi'nqe'ye' wu'ne' ex kanli nwitze' qa mixti' nkyk'u'jla'ne' Dyos. 43 Machin tzajchq'o'nwe' toj tb'i Nmane', aye'tzunkye' mixti' nxi' kyoksla'ne'; atzun qama tzul juntl xjal tu'nxtib' ex mya chq'o'n tu'n Dyos, atzunlo ok kxe'l kyoksla'njuye'. 44 ¿Se'n taq'wi aj kyokslanteye', ina' kynima'n kyib'e' kyxolilexe' ex minti' nkjyo'ne' ninb'il ntzaj tk'etzku' Dyos? 45 Lalun kub' kximane' qa ayine' chin xe'l poqonkyeye' twitz Nmane'; alkyete nxi' poqonkye' a Moyses, tu'nju' q'uqlok kk'u'je' ti'j. 46 Qu'n noqwit nxi' kyoksla'ne' Moyses, ex inwtlo chinx kyoksla'ne', qu'n aju' kyej ttz'ib'a'n Moyses toj Tu'jil atzu' nyolina' wi'je'. 47 Extzunqa min nxi' kyoksla'ne' kyej ttz'ib'a'n Moyses, ¿Se'n taq'wi kxe'la kyoksla'ne' nxi' nma'ne'?
Ewan txqan xjal tu'n Jesus
1 Tb'ajlenxi'tzun ja'lu, xi' Jesus jlajxi'tl njab' te Kaliley, ex ax tb'iju' Tib'eryas. 2 Txqantoq xjal lepchqe'k ti'j, qu'n matxitoq tz'ok kka'yinju' b'a'nq'ob'aj tb'incha Jesus tu'nju' nche b'ent yab' tu'n. 3 Atzunte Jesus jax twi' jun witz, ex kub' qe kyuk'ilju' t-xnaq'tzb'en. 4 Ch'inxtltoqtzun tul kanunju' tq'ij tzaqpib'l, aju' niq'ij kye aj Juda. 5 Tetzun tka'yinte Jesus txqan xjal lepchqe'k ti'j, xitma'n te Pelip: —¿Jatzun ktzajela' qlq'o'n kwaju' txqan xjal lu? chij 6 Xi'tzun tqani'n Jesus te Pelip naqx tu'n tb'inte ti'toq ktzajel ttzaq'we'n Lip, qu'n kanlitoq twitzte Jesus ti'toq ktb'incha'. 7 Atzunte Pelip xittzaq'we'n: —Mlayxpe' kanun twi'tk'u'j jun xjal ma'toq tz'aq'unan lajnaq q'ij te twi' kwaju' txqan xjal lu, ex tu'n txi' q'et ch'i'naq teyile junjun. 8 Atzunju' Leẍ titz'in Simon Luch, juntl t-xnaq'tzb'en Jesus, xitma'n te Jesus: 9 —Ati jun tal q'a tzalu iq'i'n jwe' wab'j seb'ad tu'n ex kab'e' kyiẍ; ¿Ma oktzun kkanil tal jte' wab'j lu kye txqan xjal? chi Leẍ 10 Atzunte Jesus xittzaq'we'n kye: —Kmanxe' kye xjal kkyaqil tu'n kkub' qe. Atitoqtzun txqan q'u'sin twi'ju' witz lu, ex eb'aj kub' qe. Kab'lajk'al lajnaqtoqlo (5 ,000 ) kb'aju' ichan ate' atzu'. 11 Ejawtzun ttzyu'n Jesusju' wab'j toj tq'ob' ex tb'ajlenxi' q'on chjonte te Dyos, xitq'o'n kye t-xnaq'tzb'en, aye'tzunju' t-xnaq'tzb'en b'ajx ksipa'n kxolju' txqan xjal. Ikxtzun tb'inchaju' kyi'ju' kyiẍ, ex eb'aj wanju' xjal b'a'nxi'x ti'j. 12 Tetzunj kb'aj wan kkyaqil, xitma'n Jesus kyeju' t-xnaq'tzb'en: —Kyb'uyinktze' wab'j mixti' xb'aj tu'ntzun lalun kub' yajti. 13 Jawtzun kb'uyi'n, ex noju' kab'lajoj chi'l tu'nju' wab'j kyejten. 14 Aye'tzunju' xjal tej kka'yinteju' b'a'nq'ob'aj tb'incha Jesus, kma kjalu: —Axxi'x ate t-sanjelal Dyos ja'lu aj ati tulel, chechij. 15 Eltzun tnik' Jesus kyi'j qa atitoq jun kxim ti'j, qu'n atoq kyajb'ilu' tu'n tok kq'o'n te kynimaqkawil, qu'mtzun ela' tpa'ntib' kyi'ju' xjal twi'ju' witz, tu'n tkub'ten tjunal.
Intoq b'et Jesus tib'aj a'
16 Tetzunj qok yupj, aye'ju' t-xnaq'tzb'en Jesus eku'x ttziju' njab', 17 ex ejax tojun b'ark ex e'ik'x tib'aj a' tu'ntzun kpon toju' tnam Kaparnawum. Ma'toqtzun qo ok yupj b'a'nxi'x ex na'mtoq tpon Jesus kk'etz. 18 Tetzunju' kmuj lu, tzaj jun kyq'iq' kuw ex majx jaw yukchiju' a' tu'n. 19 Matxitoqtzun kb'eti qajpelo jun ajlab' tk'i' nik'jan (6 km.), tej txi' kka'yi'n ch'inxtltoq tul Jesus kk'etz intoq b'et tib'aj a', ex majx e'jaw xob' te. 20 Atzunte Jesus xitma'n kye: —¡Ayinwe', lalun che xob'e'! chij. 21 Aye'tzunkye kk'am tuk'i'l tzalajb'il toju' b'ark, ex e'pontzuntz junx toju' tx'otx' jatu'n kpona'.
Nche jyon xjal ti'j Jesus
22 Tetzun juntl q'ij, tzaj kna'nju' xjal ekyejten jlajxi' njab' qa o'qekxju' t-xnaq'tzb'en Jesus e'okx tojun b'ark, qu'n o'kxku' jun b'arku' ati atzu', atzunte Jesus mixti' o'kx kyuk'i'l. 23 Ate'toqtzun junjuntl b'ark e'tzaj toju' nintnam Tib'eryas tb'i, ex e'ul ttziju' tx'otx' atzu' nqayin ja ojetoq che wana' xjal tej txi' tq'o'n Taye chjonte te Dyos. 24 Tetzunj kka'yinte xjal qa mixti'toq Jesus kyuk'ilju' t-xnaq'tzb'en atzu', ejaxtzuntz tojun b'ark ex exi' jyolte Jesus toju' tnam Kaparnawum.
Ate Jesus wab'j te chwinqlal
25 Tetzunj kypon jlajxi'tlju' njab', elyal Jesus kyu'n, ex xikqani'n te: —Xnaq'tzal, ¿Jtoje tula tzalu? chechij. 26 Atzunte Jesus xittzaq'we'n kye: —Axxi'x kxe'l nma'n kyeye' qa nchin kjyo'ne' tu'n tpaju' ewane' b'a'nxi'x wu'ne', mya tu'nwit matxi' kaneju' b'a'nq'ob'aj nb'inchaye' toj kwitze'. 27 Lalun che aq'unane' tiju' wab'j ja'lo nb'aj, atzu' kq'onkakye' tilil ti'ju' wab'j minb'aj ex ntzaj tq'o'nju' chwinqlal tejumajx. Atzunte' wab'ju' kxe'l nq'o'ne' kyeye' ayine' Tk'wal Dyos, qu'n ate Dyos Manb'aj, atzunte saj q'onte woklenju'ye', chi Jesus kye. 28 Aye'tzunju' xjalxi' kqani'n te: —¿Titi' kb'ajil qeye' tu'n qb'inchanteye' aq'untl tajb'il Dyos tu'n txi' qb'incha'ne'? 29 Atzunte Jesus xittzaq'we'n kye: —O'kxte' Dyosju' tajb'il tu'n kyb'inchanteye', aju' tu'n kyokslane' weye' ayine' Tk'wal Dyos ẍintzaj chq'o'ne' tu'n. 30 Xikyma'ntzun xjaltz te Jesus: —¿Ti'tzun techlal nche tb'incha'na, tu'ntzun aj qka'yinteye' kxe'l qoksla'na? ¿Ti'ju' ntb'incha'na nimaq toklen? 31 Qu'n aye'ju' qyajilb'ene' ojtxi' tej kten toj chq'ajlaj tzaj q'o'nju' kwa, se'n ntma'n toju' Tu'jil kjalu: Tzaj q'o'n kwa te toj kya'j tu'n Dyos, chechij te Jesus. 32 Atzunte Jesus xittzaq'we'n kye: —Axxi'x kxe'l nma'n kyeye' qa myate Moyses tzaj q'onte kwaye' toj kya'j, ate Dyos Manb'aju' ntzaj q'onte wab'j, aku' ntzaj toj kya'j. 33 Qu'n aju' wab'j ntzaj tq'o'n Dyos, aju' oje ku'tz toj kya'j ex a wab'ju' nq'onte chwinqlal kye xjal, chi Jesus. 34 Aye'tzunju' xjalxi' kma'n te: —Taye, q'ontza wab'j qeye' lu kukxju'. 35 Atzunte Jesus xitma'n kye: —Ayinwejuye' wab'j tu'n tten kychwinqlale'. Alkye matzaj nk'etze' lay tzajtl we'yaj ti'j; ex alkye matz'okslan weye' lay tzajtl k'waj ti'j. 36 Aye'tzunkye' oje txi' nma'n kyeye', matxi' chin kyile' extzun mixti' nchinx kyoksla'ne'. 37 Kkyaqilju' nche tzaj tq'o'n Nmane' weye', nche ul nk'etze', ex mixti' nche elwik'o'ne'. 38 Qu'n minti' ẍin ku'tze' toj kya'j tu'n nb'inchanteye' wajb'ile', o'kx tu'n nb'inchanteye' tajb'il Nmane' Dyos saj chq'onweye'. 39 A tajb'il Nmane' saj chq'onweye', aju' tu'n lalun tzpet junju' saj tq'o'n weye', a tajb'ilju' tu'n kyjaw anq'in wu'ne' toj mankb'il q'ij. 40 Qu'n a tajb'il Nmanjuye' tu'n tten kychwinqlal kykyaqilju' xjal ẍe'ok ka'yinweye' ex ẍe'okslan weye' ayine' Tk'wal Dyos; ex che jawil anq'in wu'ne' toj mankb'il q'ij, chi Jesus kye. 41 Aye'tzu'n xjal aj Juda e'aq'wi yolil kyxolilex ti'j Jesus tu'n tpaju' intoq tma'n: Ayinwe' wab'j xku'tz toj kya'j, chij. 42 Ex intoq kma'nju' aj Juda kjalu: —¿Ma myatzun Jesusju' lu tk'wal Jse? naqx tak'ante', ojtzqi'na'qe' tma'n qu'n exju' ttxu. ¿Se'ntzun ntma'na' ja'lo qama ku'tz toj kya'j? chechij. 43 Atzunte Jesus xittzaq'we'n kye: —Lalun chin kub' kyoli'ne' kxolilexe'. 44 Qu'n mix-a'lox jun xjal tzul nk'etze' qa mya Nmane' ntzaj q'inte, aju' saj chq'onweye'; ex wu'ne' kjawil anq'ina toj mankb'il q'ij. 45 Kyej tz'ib'a'n jun yol kyoju' kyuj t-sanjelal Qman Dyos aj ntma'n kjalu: Ate Qman Dyos tzul q'onte xnaq'tzb'il kye kkyaqilju' xjal chiju' tz'ib'a'n. Qu'mtzun kkyaqilju' matxi' kb'i'n tyol Nmane', exqa makyb'incha se'nte, che ul wuk'i'le'. 46 Mix-a'lo' jun ojewt tilju' Dyos Manb'aj; o'kxwe' oje wile' qu'n atzu' ẍin tzaja'ye' tk'etz. 47 Axxi'x kxe'l nma'n kyeye' qa alkyete matz'okslan, ati tchwinqlal tejumajx. 48 Ayinwe' wab'j te chwinqlal. 49 Ayekye' ojtxi' kyajilb'ene' mache wan ti'ju' mana toj chq'ajlaj, extzun mache kyim; 50 ayintzunwe' nchin yoline' ti'ju' wab'j aju' nku'tz toj kya'j; alkyete matxi' wante, lay kyim. 51 Ayinwejuye' wab'j itz' ku'tz toj kya'j; alkyete matxi' wante, ktenb'il tchwinqlal tejumajx. Atzunju' wab'j lu kxe'l nq'o'ne' kyeye' aju' nchib'jile'. Kxe'l nq'o'ne' tu'n tten kychwinqlal xjal tu'n. 52 Aye'tzunju' aj Juda e'aq'wi yolil kxolilex ex kma: —¿Se'n taq'wi ntzaj tma'nju' ichan lu tu'n ttzaj tq'o'nju' tchib'jil qe ex tu'n txi' qwan? chechij. 53 Atzunte Jesus xitma'n kye: —Axxi'x kxe'l nma'ne' kyeye' qa min xxikywane' tchib'jilju' Tk'wal Dyos exqa min xxikyk'wa'ne' tchk'el, layx ten kychwinqlale' tejumajx. 54 Alkyete matxi' twanju' nchib'jile' exqa matxi' tk'wa'nju' nchk'ele', ktenb'il tchwinqlal tejumajx; ex kjawil anq'in wu'ne' toj mankb'il q'ij kxol kyimni. 55 Qu'n aju' nchib'jile' chib'jxi'xte', exju' nchk'ele' k'wab'jxi'xte'. 56 Alkye matxi' wante nchib'jile' ex matxi' k'wante nchk'ele', ktenb'il wuk'i'le' ex chin tenb'ile' tuk'i'l. 57 Iku' se'nte Nmane' Dyos saj chq'onweye' itz', ex itz'qinwe' tu'n; ikxtzunju' alkyeju' xjal mawan wi'je', ktenb'il tchwinqlal wu'ne'. 58 Atzu' nchin yolinaye' ti'ju' wab'j xku'tz toj kya'j. Ate' wab'j lu mikxa'ju' kse'n mana xikywan ojtxi' kyajilb'ene', expe' e'kyim extzun e'wan ti'j; atzunteju' wab'j lu, alkye matxi wante, k'anq'il tejumajx, chi Jesus b'aj tma'n kye. 59 B'aj tma'n Jesus tkyaqilju' yol lu, tej intoq q'on xnaq'tzb'il toj ja te k'u'lb'il toj tnam Kaparnawum.
Yol te chwinqlal tejumajx
60 Tetzunj kb'inte xjalju' xnaq'tzb'il tu'n Jesus, nimju' lepchqe'k ti'j kma kjalu: —Kuwqekye' yol lu xb'aj tma'n; ¿alxi'xkye jun kb'entil tu'n? chechij. 61 Atzunte Jesus pon toj tnab'l kyi'j tej intoq che yolin kxolilex, xitqani'n kye: —¿Ma myab'a'n sela' nyole' toj kwitze'? 62 ¿Ti'tzulo jaku' kmaye' naqwit kyile' ajnjaxe' toj kya'j jatoq tinqiniye' ayine' Tk'wal Dyos? 63 Ate' chwinqlal aju' Xewb'aj Xjan nq'onte; atzunju' chib'j mixti'xte' nb'enti tu'n. Ex aye'tzunju' yol xb'ajx nma'n kyeye', nyolin ti'ju' Xewb'aj ex ntq'o'n chwinqlal. 64 Naqtzun aju' ate'x junjun kxole' minti' nxi' kyoksla'n. Qu'n ojtzqi'ntl tu'n Jesus alkyeju' minti' nxi' kyoksla'n, ex ojtzqi'ntl tu'n alkyetoq kxe'l q'onte toj kyq'ob' xjal. 65 Expe' tmatl Jesus kye: —Qu'mtzun oje txinma'ne' kyeye' qa lay b'ent kyule' wuk'i'le' qa mya Nmane' xxiq'onte anb'il kyeye'. 66 Tu'ntzun ja'lu nimju' xjal lepchqe'k ti'j Jesus el kypa'n kyib' ti'j, ex minti' eb'etl tuk'i'l. 67 Xi'tzun tqani'n Jesus kyeju' kab'lajoj t-xnaq'tzb'en: —¿Yajtzunkye' ma kyajb'ile' tu'n kxi' lpeye' kyi'ju' xjal lu? chij. 68 Atzunte Simon Luch xittzaq'we'n te ex tma: —Taye, ¿Ja qoxe'la' lpeye'? O'kxnata ati yol tuk'i'la te chwinqlal. 69 Matxi' qo okslanqe' teya ex matxi' tz'el qnik'e' teya qa aya Tk'wal Dyos Xjan. 70 Atzunte Jesus xittzaq'we'n kye: —¿Ma mya'tzun kab'lajoj kb'aje' e'jaw nsk'o'ne'? Extzun ati junkye' matxi' tz'okx tajaw il toj tanmi. 71 Atoqtzu' nyolina' Jesus tiju' Judas tk'wal Simon Iskaryot tej tmante yol lu, qu'n atoq Judas kxe'l q'onte toj kyq'ob' xjal, maskyepe' t-xnaq'tzb'en Jesus.
Min xi'oksla'n Jesus kyu'nju' titz'in
1 Tb'ajlenxi'tzun ja'lu, intoq b'et Jesus toj tx'otx' Kaliley. Mixtoqti' tajb'il tu'n tten toj tx'otx' Judey, qu'n kyajb'iltoq aj Juda tu'n tkub' kb'yo'n. 2 Ex ch'inxtltoqtzun tulju' ninq'ij kyxolju' aj Juda, aju' ajkyjaw b'incha'n tal pach, 3 xikyma'nju' titz'in Jesus te: —Lalun kyejtena tzalu; kuxtxi'ya toj tx'otx' Judey, tu'ntzun tok ka'yi'n taq'unb'ena kyu'nju' t-xnaq'tzb'ena atzu'. 4 Qana' qajb'ilte' tu'n tok ka'yi'n qaq'unb'en, mixti' tu'n tkub' qewa'n. Se'nta nche b'ent ti'xti' tu'na, kuxtxi'ya b'inchalte kywitz kykyaqilju' xjal, chechij te Jesus. 5 Kymaju' titz'in Jesus ikyju', qu'n mixtoqjun nche okslan te. 6 Atzunte Jesus xitma'n kye: —Na'mx tpon kanunwe' kmuj we, atzunkye' b'a'n tu'n kyb'ete' tkyaqil q'ij. 7 Aye'ju' xjal te twitz tx'otx' lay b'ent kyel ik'une' kyu'n, ayintzunwe' majx nchinel ik'une' kyu'n, qu'n inxi' nchik'b'a'ne' kye aju' kb'inchb'en myab'a'n. 8 Kukxi'kye' toju' ninq'ij; lay chinxwe', qu'n na'mx tjapun kmuj weye', chi Jesus kye. 9 Tetzunj tb'aj tma'n ja'lu kye, axtzu' kyeja' ten Kaliley.
Ten Jesus toju' ninq'ij aj kb'inchanjtzu' pach
10 Kxi'lenxi'tzun titz'in Jesus toju' ninq'ij, ex ikxte Jesus xi' toju' ninq'ij, expe' minti' xityek'u'ntib' naq toj ewaj kub'a' ten. 11 Intoq che jyonju' aj Juda ti'j toju' ninq'ij ex intoq kma'n: —¿Jatzulo ta'ju' ichan lu? 12 B'a'npun intoq che yolin ti'j Jesus kxolju' txqan xjal toj ninq'ij. Intoq kyma'n junjun: Majx b'a'nte' ichan lu, chechij; atzun junjunjtl nkyma'n: Mya b'a'nte' ichan lu; qu'n tok sb'ulkye xjal, chechij. 13 Ex mixtoqti' nche yolinxi'xju' xjal chik'lixi'x ti'j Jesus, tu'n tpaj nche xob' kyeju' aj Juda. 14 Tetzunj tok ninq'ij toj nik'jan, o'kx Jesus toju' tja Dyos ex aq'wi q'ol xnaq'tzb'il kye xjal. 15 Aye'tzunju' aj Juda inxi'xtoq che lab'ti ti'j ex intoq kma'n: —¿Se'n taq'wi b'i'n txqan ti'xti' tu'n, extzun mixti' xtk'am xnaq'tzb'il tib'aj? chechi xjal. 16 Atzunte Jesus xittzaq'we'n kye: —Aju' xnaq'tzb'il nq'o'ne' mya wewe', tete' saj chq'onwejuye'. 17 Qa ati jun xjal tajb'il tu'n tb'inchanteju' tajb'il Dyos, k'elel tnik' ti'ju' nxnaq'tzb'ile' qa xi' ntzaja' tk'etz Dyos mujqa ayinxe' nchin jaw ximante. 18 Ate' xjal qa tajb'il tu'n tjaw nima'n, ti'jx nyolina'; atzunju' xjal a tajb'ilju' tu'n tjaw tnima'n Dyos saj chq'onte, atzunte xjalju' nyolin ax ex min nchan yol. 19 ¿Ma myatzun Moyses kyej q'onteju' kawb'il kyeye'? Extzun mix-a'lox junkye' njapunju' kawb'il lu tu'n. ¿Tiquntzun kyajb'ilaye' tu'n nkub' kb'yone'? 20 Aye'tzunju' xjalxi' ktzaq'we'n te Jesus kjalu: —¡Matz'ok tajaw il toj tanmiya! ¿Alkyetzun tajb'il tu'n tkub' b'yonteya? chechij. 21 Atzunte Jesus xitma'n kye: —Kkyaqilxe' nche jaw lab'tiye' tu'nju' jun tal ti'xti' nb'inchaye' toju' q'ij te ojlab'l. 22 Aye'tzunkye' q'ma'ntl kyeye' tu'n Moyses tu'n tok kyechele' ti'j ktz'a'lb'ile' (qumpe'tzun myatzu' tzaja' qe'nju' lu ti'j Moyses, atzu' tzajna' kyi'ju' ojtxi' kychmane'), aye'tzunkye' nok kyq'o'ne' kyechelju' ichan ti'j kytz'a'lb'il maskye toju' q'ij te ojlab'l. 23 Qatzun ati maj nkb'incha'njuye' lu toju' q'ij te ojlab'l, naq tu'n tjapunju' tkawb'il Moyses kyu'ne', ¿tiquntzun nche q'ojinaye' wi'je' tu'nju' kub' nq'a'nane' jun xjal toju' q'ij te ojlab'l? 24 Lalun che yoline' myab'a'n ti'j juntl naq tu'nju' nok kka'yine'. Che yolinqeye' ex che ximanqeye' tojxi'x tu'me'l, chi Jesus kyeju' xjal aj Juda.
Yolin Jesus tiju' ja tzajna'
25 Aye'tzunju' junjun xjal najlqe' toj Jerusalen e'aq'wi xjelul ex intoq kma'n: —¿Ma myatzun ichan ju'lu nche jyon xjal ti'j tu'n tkub' kb'yo'n? 26 Qu'n lu nyolin kwitz kkyaqil xjal, ex mix-a'loxte nxi' q'mante te. ¿Mujqa matxi' tz'elkynik'ju' kawil te qa axx, qa a Kristju' ati toklen tu'n Dyos? 27 extzun b'i'n qe'qu'n ja sajaju' ichan lu; atzunte ajtulju' Krist, mix-a'loxte' kb'ilte ja tzula'. 28 Tetzunj tb'inte Jesusju' nkyma'n xjal ti'j tej intoq q'on xnaq'tzb'il toj tja Dyos, jawtma'n kuw kjalu: —¡Axxte' se'n nkma'ne' qa ojtzqi'n nwitze' kyu'ne' ex ojtzqi'n kyu'ne' jaẍin tzaja'ye'! Extzun mixti' ẍin nule' wu'nx wib'e', qu'n machin tzajchq'o'ne' tu'nju' axx yolin ex aju' mixti' ojtzqi'n kyu'ne'. 29 Ojtzqi'nwe' wu'n qu'n tk'etz ẍin tzaja'ye', ex ate saj chq'onweye', chi Jesus. 30 Kyajb'iltoqtzun xjal tu'n tkub' ktzyu'n Jesus; extzun mix-a'lox jun oktq'o'n tib' tzyulte qu'n na'mxtoq tponju' tq'ijlalil. 31 Nimtzun xjal e'okslan te, ex intoq kma'n: —Naqa sulju' Krist, ¿ma kb'entel txqantl b'a'nq'ob'aj tu'n kyetwitzju' ichan lu? chechij.
Exi' chq'o'n xjal tzyultoqte Jesus kyu'nju' parisey
32 Kyb'i pariseyju' intoq kma'n xjal ti'j Jesus; aye'tzunkye exqe'ju' knejel pale exi' kychq'o'nju' junjun xjal xq'uqil tja Dyos tu'n tkub' ktzyu'n Jesus. 33 Atzunte Jesus xitma'n kye: —Naq jte' q'ijxtl chin tenb'ile' kyuk'i'le', qu'n k'anjeltl wi'je' tk'etzju' saj chq'onweye'. 34 Oktzun che jyoltze' wi'je', ex lay chin nelyale' kyu'ne', qu'n layx b'ent kxi'ye' ja chin b'ela' tene'. 35 Aye'tzunju' aj Juda e'aq'wi xjelul kxolilex ex intoq kma'n: —¿Jatzulo kxe'la'ju' ichan lu, qa lay tz'okyal qu'n? ¿Ma alotzu' kxe'la kxolju' xjal sputi'n kyib' kyoju' najchaq tx'otx' ex ma atzu' kxnaq'tzala' kyeju' xjal min nche okslan te Dyos?. 36 ¿Titi' tz'elpuna'ju' intma'n: okchin kyjya'ye' extzun lay chin knete' kyu'ne', qu'n lay che pone' ja chin tenb'ila'ye', chij qe?, chechi xjal aj Juda.
Nin a' itz' te chwinqlal
37-38 Nimxi'x toklenju' mankb'il q'ij toju' ninq'ij. Tojtzunju' q'ij lu, kub' we' Jesus ex tma tuk'i'l tq'ojq'ojel twi' kuw kjalu: —Qa ati jun xjal ati k'waj ti'j, kuttzaj nk'etze', ex alkye ma chinx toksla'ne' kxe'l nq'o'ne' tk'wa'. Se'n ntma'nju' Tu'jil tyol Dyos, kpoq'chajel nin a' itz' toj tanmiju' xjal qa matz'okslan. 39 Atzu' yolina Jesus tiju' Xewb'aj Xjan tej tmante ikju', ju atitoq tu'n kyk'monteju' nche okslan te Jesus, qu'n aju' Xewb'aj na'mxtoq tul, qu'n na'mxtoq tanj Jesus toj kya'j.
Kub' kpa'n kyib'ju' xjal
40 Ate'toq junjun xjal kxolju' txqan xjal tej kb'inteju' yol lu kma: —Axxi'x ate' ichan ja'lu t-sanjelal Dyos. 41 Aye'tzun junjuntl intoq kma'n: —Ate' Kristju' lu. Ex aye'tzun junjuntel intoq kma'n: —Myate', qu'n aju' Krist myatzu' kjawila' anq'in toju' tx'otx' Kaliley. 42 Ina' tma'nte' toju' Tu'jil qa atzu' ktzajela' tyajajil Krist tiju' nimaqkawil Dab'i, exqa atzu' k'itz'jela' toju' tx'otx' te B'elen, aju' ttanam Dab'i. 43 Tu'n tpajtzun kyol kma ti'j Jesus, kub' kypa'n kyib'ju' xjal. 44 Ate'toq junjun kyajb'iltoq tu'n tokx kjpu'n Jesus, ex mix-a'lox jun b'inchante.
Min xi' oksla'n Jesus kyu'n tzyul kawb'il
45 Tetzunj tanjtzkyi'ju' xq'uqil tja Dyos jatoq ta'qeju' parisey exqe'ju' knejel pale, xikyqani'n kye: —¿Titiqu'n minti' saj kyi'ne'? chechij. 46 Aye'tzunju' xq'uqil xikytzaq'we'n kye: —¡Mix-a'lox jun xjal ojewt yolin se'nju' ichan lu! 47 Aye'tzunju' parisey xikyma'n kye: —¿Ma ikxkye' matxi' txi' kq'a sb'u'kyib'e'? 48 ¿Ma matxitzun tz'okslan junqe' ayoye' parisey te mujqa jun kawil? 49 Aye'ju' xjal nche okslan te, aye'ju' mixti' ojtzqi'nju' kawb'il kyu'n, lasmix kwitz ex majxwit che naj, chechi parisey. 50 Xi'tzun tma'n jun parisey Nikodemo tb'i kye aj ojetoq pon jumaj tk'etz Jesus kjalu: 51 —Aju' ntma'nju' qkawb'il, mixti' tu'n tkub' tz'e'yset twitz jun xjal qa na'mxtoq qb'inteju' tyol exqa na'mxtoq qka'yinteju' tb'inchb'en. 52 Aye'tzunju' parisey xikytzaq'we'n te Nikodemo: —¿Ma ikx aj kalileyta? Jch'inktza toju' Tujil tyol Dyos ex atzu' k'elela' tnik'a ti'j qa layx tz'etz jun t-sanjelal Dyos toj Kaliley. 53 Tetzunj kmanteju' lu, b'aj kypa'n kyib' ex junjun xi' tja.
Aju' qya ajpajil
1 Xi'tzunte Jesus twi'ju' witz Olib'os tb'i. 2 Tetzunj qsqix te juntl q'ij, anjtlti'j Jesus toj tja Dyos. Eb'aj pon lq'eju' xjal tk'etz, kub'tzun qe ex aq'wi xnaq'tzalkye. 3 Aye'tzu'n parisey exqe' xnaq'tzal kawb'il pon kyiq'i'n jun qya elyal kyu'n toj ajpajil. Kub' kyq'o'n kyxol kykyaqilju' xjal ate'toq tk'etz Jesus. 4 Xi'tzun kma'ntz te Jesus: —Xnaq'tzal, luju' jun qya lu matzyet qu'ne' tojxi'xju' kmuj tej intoq b'inchan ajpajil. 5 Aju' kawb'il kyejni tq'o'n Moyses ojtxi' ntma'n qa ati jun qya nb'inchan ajpajil ati tu'n tkub' b'yet toj ab'j. ¿Yajtzunta titi' ntma'na tu'n ja'lu? chechij. 6 Xikyqani'n ja'lu te Jesus naqxwitlo tu'n tkub' tz'aq kyu'n toj jun til ex tu'n kypoqonte. Atzunte Jesus kub' qe ex aq'wi tz'ib'al twitz tx'otx' tuk'i'l twi'tq'ob'. 7 Aye'tzunkye ilxi'xtoqti'j kyu'n ate'k qanilte, tzaj tmiltz'u'n tib' Jesus kyume'l ex xitma'n kye: —Qa ati jun kyxole' mixti' til atzun b'a'n tu'n txi' t-xon tnejel ab'ju' ti'ju' qya lu, chi Jesus kye. 8 Kub' qe jumajtlu' Jesus ex aq'wi jumajtel tz'ib'al twitz tx'otx'. 9 Tetzunj kb'inte yol lu, eb'aj ik'b'et junjunal, ex tnejelxi'x eb'jik' b'etju' tijwnaq qu'n mya'na' b'a'nqe'. Tetzunj tkyej ten Jesus tjunal tuk'i'lju' qya wa'ltoq twitz, 10 anjtz miltz'uj ti'j ex xitqani'n te: —Qya, ¿Jatzun te'qeju' nche' poqonteya? ¿Ma mixti' jun inq'mante tu'n tb'aj xoyita toj ab'j? chi Jesus teju' qya. 11 Atzunju' qya xittzaq'we'n: —Mixti' Taye. Atzunte Jesus xitma'n te: —Ex ikxwe' mixti' in nma'nwe' tu'n tb'aj xoyita toj ab'j, kuxtxi'ya, ex lalun b'inchantl ila.
A Jesus spik'un kye xjal
12 Yolin jumajtl Jesus kye xjal ex tma: —Ayinwe' spik'un kye xjal, alkye matz'ok lpe wi'je' ktenb'il spik'un toj tchwinqlal, ex lay ten toj qxopin. 13 Aye'tzunju' parisey xikyma'n te: —Axtzu' nyolina'ta ti'jxa: mixti' toklenju' nyolina ti'j, chechij. 14 Atzunte Jesus xittzaq'we'n kye: —Aju' in nma'ne' atite' toklen, maskyepelo wi'jxe' nchin yolinaye'. Qu'n b'i'nwe' wu'n b'a'nxi'x jaẍin tzaja'ye' ex jamachinxa'ye'; aye'tzunkye' mixti'x b'i'n kyu'ne'. 15 Inche yolinkye' myab'a'n kyi'ju' xjal kse'nxju' nkane' toj knab'le'. Ayintzunwe' minti' nchin yoline' myab'a'n kyi'j xjal; 16 qatzun machin yoline' aju' ax nxi' nmane', qu'n min nchin yolinwe' njunale', qkab'ilqe' tuk'i'l Nmane' saj chq'onweye' nqo yolin. 17 Qu'n toju' kawb'il najb'en kyeye' tz'ib'a'n qa ati kab'e' tziyal junxju' kyol, atzunte kxe'l oksletju'. 18 Ikxtzunwejuye' ayinxe' nchin tziyan wi'jxe', ex atzunju' Nmane' saj chq'onweye' atzun juntl tziyalju' wi'je', chi Jesus kye. 19 Xi'tzun kqani'n te Jesus ex kma: —¿Jatzunta'ju' tmana? Atzunte Jesus xittzaq'we'n kye: —Mixti' ojtzqi'nqine' kyu'ne', qu'mtzun minti' ojtzqi'n Nmane' kyu'ne'; noqwit ojtzqi'nqine' kyu'ne', ojtzqi'nwtlo Nmane' kyu'ne'. 20 Atzu' yolina' Jesus tij ja'lu toj tja Dyos, jata'qetoq tk'b'el oyaj. Ex mix-a'lo' jun kub' tzyunte, qu'n na'mxtoq tpon kanunju' tq'ijlalil.
Lay b'ent kxi'ye' ja chin xe'laye'
21 Xi'tzun tma'n jumajtl Jesus kye: —Kchin xe'lwe', ex aye'tzunkye' kche jyole' wi'je', ex ok che kyimile' toj kyile'. Ja chin xe'laye', layx b'ent kxi'ye'. 22 Aye'tzunju' aj Juda intoq kma'n: —¿Ma oktzulo kb'el tb'yo'ntib' tib'xtib' tu'nju' ntma'n qa lay qo'x ja kxe'la'? chechij. 23 Atzunte Jesus xitma'n kye: —Aye'kye' te kub'lqe'ye' twitz tx'otx', ayintzunwe' te jawl toj kya'j, te twitz tx'otx'qekye' ayintzunwe' mya te twitz tx'otx'qine'. 24 Qu'mtzun xa' nma'ne' kyeye' qa che kyimile' toj kyile'; qu'n qa minti' ẍinx kyoksla'ne' qa ayine' ati woklene' tu'n Dyos, ok che kyimile' toj kyile'. 25 Xi'tzun kqani'ntzuntz te Jesus ex kma: —¿Alkyetzuna? Atzunte Jesus xittzaq'we'n kye: —Tnejelxi'x, ¿tiqu'n chin yolilaye' kyuk'ile'? 26 Nimte' ti'xti' ati tu'n txinma'ne' kyeye' ex nimju' myab'a'n nkyb'incha'ne', atzunju' saj chq'onweye' ax yolin, exju' nxinma'ne' kyeye' atzu' noka' nb'i'ne' te. 27 Aye'tzunkye minti' nkane' toj kwitz qa atzu' nyolina' Jesus ti'ju' Dyos Manb'aj. 28 Qu'mtzun xaya' tma'n Jesus kye: —Naqa xjaw kyq'o'ne' Tk'wal Dyos twitz krus, atzuntzu' k'elila' knik'e' qa Ayine' Tk'wal Dyos, exqa mixti' nchin yoline' wi'jxe', o'kxwe' nxi' nma'n aju' tzajni t-xnaq'tzan Nmane' weye'. 29 Qu'n aju' saj chq'onweye' atite' wuk'i'le'; mixti' nchin kyej q'o'nwe' njunale' tu'n Nmane', qu'n ayinwe' o'kx nxi' nb'incha'ne' aju' b'a'n nela' toj twitz. 30 B'a'npun xjal okslan te Jesus tej tb'aj tma'nju' yol lu.
Aye' tk'wal Dyos exqe'ju' tmajen il
31 Atzunte Jesus xitma'n kyeju' aj Juda ojetoq che okslan te: —Qa kukx matxi' kb'i'ne' nyole', che okyeltzuntze' te nxnq'tzb'ene'; 32 K'elelkynik'e ti'ju' axx, ex axtzunju' axx ktzaqpilkyeye'. 33 Aye'tzunju' aj Juda xikytzaq'we'n te: —Tyajajil Ab'raam qoqe', ex b'ajx qo okaqe' te lq'o'n majen; ¿Se'n taq'witzun ntma'na qeye' tu'n qtzaqpete'? chechij. 34 Xi'tzun ttzaq'we'n Jesus kye: —Axxi'x kxe'l nma'n kyeye' qa kkyaqilxju' nche b'inchan il tmajen ilqe'. 35 Aju' lq'o'n majen minti' nkyej ten tejumajx tjaju' tajaw aq'untl; atzunju' k'wa'lb'aj majxtzun nkyej tente'. 36 Qu'mtzun qa aju' k'wa'lb'aj xtzaqpinkyeye', che tzaqpeteltzuntze' axxi'x. 37 B'i'ntlwe' wu'n qa a kyajaljuye' Ab'raam; extzun noktilil kyu'ne' tu'n nkub' kb'yo'ne' tu'nju' min nxi' kyoksla'ne' nyole'. 38 Nchin yolinwe' ti'ju' matxi' tzaj tyek'u'n Nmane' weye'; ex ikxtzunkye' kb'inchanxe' aju' matxi' kb'iye' teju' kmane', chi Jesus kye. 39 Aye'tzunkye' aj Juda xikytzaq'we'n te Jesus: —¡Aqe' qman Ab'raam! Atzunte Jesus xitma'n kye: —Naqwit axx qa tk'wal Ab'raamqeye', inwtlo kb'incha'ne' se'n tb'incha Ab'raam. 40 Atzunkye' maskye matxi' txi' nma'n kyeye' aju' axx saj t-xnaq'tza'n Dyos weye', ilti'j noktilil kyu'ne' tu'n nkub' kb'yo'ne'. ¡Mixti'te' Ab'raam xtb'incha ikju'! 41 Aye'tzunkye' a nkb'incha'njuye' aju' ntb'incha'n kmane', chi Jesus kye. —Aye'tzunkye xikyma'n te: —¡Myanaqwit xqo' tzaj sk'o'nqe'; Naq junqe' Qman ati, aju' Dyos! 42 Xi'tzun ttzaq'we'n Jesus kye: —Naqwit axxi'x kyeye' qa tk'wal Dyos qe'ye' inwtlo chin kk'u'jla'ne', qu'n tk'etz Dyos ẍin tzaja'ye' ex luqine' lu. Min ẍintzaje' wu'nx wib'e', aku'te Dyos saj chq'onweye'. 43 ¿Tiqu'n mixti' nkaneju' npakb'ab'le' toj knab'le'? Minti' qu'n aye'xe' mixti' nkub' kb'i'ne' nyole'. 44 Akye' kman aju' tajaw il; atzu' taqeye' tuk'i'l ex a nkb'incha'njuye' aju' tajb'il. Ate' tajaw il jun b'yolxjalte' atxi'x ttzaj qen tnejel. B'ajx tena' toju' axx ex mya axx yolin. Naqa saq'wi q'mal chajyolil nyolin nakuj b'a'n; qu'n chalyolna' ex a kman xjalju' nche chanyol. 45 Atzunwe' nxi' nma'nwe' axx kyeye', extzun mixti' nchinx kyoksla'ne'. 46 ¿Alkye junkye' ktzajel tma'n weye' qa ati jun wile'? Extzunqa nxi' nma'ne' axxi'x, ¿tiqu'n minti' nchinx kyoksla'ne'? 47 Jun xjal qa tex Dyos, nxi' tb'i'nju' tyol Dyos; aye'tzunkye' myana' te Dyosqeye', qu'mtzun mixti' nxi' kb'i'ne', chi Jesus xitma'n kye xjal.
Atitoqtl Krist tej na'mxtoq titz'ji Ab'raam
48 Aye'tzunju' aj Juda xikyma'n te Jesus: —Tu'me'lxqe' qu'n tej qmanteye' qa aj Samaryata exqa ati tajaw il toj tanmiya, chechij. 49 Atzunte Jesus xittzaq'we'n kye: —Mixti'we' tajaw il toj wanmi. Awe' nb'incha'n tu'n nnimane' te Nmane'; aye'tzunkye' mixti' nchin jaw knimane'. 50 Minti' nokwe' tilil wu'n tu'n njaw nimsa'n, ate kawil tnik'alxi'xti'j atzun tajb'ilju' tu'n njaw nimane'. 51 Axxi'x kxe'l nma'n kyeye' qa alkyete ma japun nyole' tu'n lay kyim. 52 Aye'tzunju' aj Juda xikytzaq'we'n te: —Matxitzun tz'el qnik'e' teya ja'lo qa ati tajaw il toj tanmiya. Ate Ab'raam oje kyim exqe'ju' t-sanjelal Dyos, atzunta intma'na: Alkyete' ma japun nyole' tu'n lay kyim, chija. 53 ¿Ma nimxi'xtzunta toklen kyetwitzju' qyajilb'ene' Ab'raam? Mana' kyimte', exqe'ju' t-sanjelal Dyos mache kyim. ¿Yajtzunta alkyetzuna toj twitza? chechij. 54 Atzunte Jesus xittzaq'we'n te: —Naqwit njaw nnima'n wib'e' wib'x wib'e', mixwitlo ti'x toklenju' woklene'. Atzunwe' njaw nimanwe' aju' Nmane', aju' Dyos nkma'ne' qa nche ajb'ene' te. 55 Aye'tzunkye' minti' ojtzqi'n twitz kyu'ne'. Atzunwe' ojtzqi'nwe' twitz wu'n; naqwittzun txi' nma'n kyeye' qa mixti' ojtzqi'n twitz wu'ne' junwtlo nimaq chalyolqine' se'nkye'. Atzunwe' nxi' nma'n Ax qu'n ojtzqi'nwe' wu'n, ex nxi' nb'incha'ne' aju' tyol. 56 Aju' kyajilb'ene' Ab'raam tzalajxi'x tu'nju' atitoq tu'n tka'yinteju' nq'ijlalile'; extzun til ex majx tzalaj b'a'nxi'x tu'n tpaj. 57 Aye'tzunju' aj Juda xikyma'n te Jesus: —Na'mxpe' tpona toj kawnaq lajoj ab'q'i, ¿extzun ntma'na qa tiljuya Ab'raam? 58 Xi'tzun ttzaq'we'n Jesus kye: —Axxi'x kxe'l nma'n kyeye' qa atinqintlwe' tej na'mxtoq titz'ji Ab'raam. 59 Aye'tzunju' aj Juda b'jaw ktzyu'nju' ab'j tu'n tb'ajx kxon ti'j Jesus; atzunte Jesus kub'naj kwitz ex etz toju' tja Dyos.
Q'anit jun moẍ titz'jlenx tu'n Jesus
1 Til Jesus jun xjal moẍ titz'jlenx tej intoq b'et. 2 Aye'tzunju' t-xnaq'tzb'en xikyqani'n te Jesus: —Xnaq'tzal, ¿Tilotiqu'n moẍju' ichan lu tej titz'ji? ¿Ma tu'nlo tpaju' kyil tman, mujqa tu'n til? chechij 3 Atzunte Jesus xittzaq'we'n kye: —Mya tu'n tpaj til ex mya tu'n tpaj kyil tman; ate' ichan lu itz'ji moẍ tu'ntzun tka'yinjtzu' tipumal Dyos ti'j. 4 Atixku' anb'il q'ijtl, ilti'j tu'n nb'inchanteye' taq'un saj chq'onweye'; qu'n tzulju' qonik'an ja lay b'enta' qaq'unan. 5 Atinqinxku'ye' twitzju' tx'otx' lu, spik'unqine' kyeju' xjal. 6 Tb'ajlenxi'tzun tma'n Jesusju' yol lu, kub' ttzub'a'n twitz tx'otx' ex kub' tb'incha'n ch'i'n xoq'l tu'n ex ok tq'ontzuntz ti'j twitzju' moẍ. 7 Xi'tzun tma'ntz teju' moẍ: —Kuxtxi'ya txjolte twitza toju' nin pil Siloe tb'i (a tz'elpuna'ju' Siloe: Chq'o'n). —Xi'tzunju' moẍ txjolteju' twitz, tetzunj tanjtzti'j intoq ka'yintl. 8 Aye'tzunju' xjal nqaku' najlqe' tk'etz exqe'ju' ojtzqilte kma: —¿Ma myatzun xjalju' lu intoq kub' qe mol? chechij. 9 Aye'tzun junjun kma: —Ana'tzu'n. Aye'tzun junjuntel kma: —Myate', naq aju' majx ikxi'x ka'yinju'. Atzunju' xjal moẍtoq intoq tma'n: —Ayinwe', chij. 10 Aye'tzunju' xjalxi' kma'n teju' moẍ: —¿Se'n taq'witzun xka'yina? 11 Atzunju' moẍtoq xittzaq'we'n kye: —Aju' ichan Jesus tb'i, kub' tb'incha'n ch'i'n xo'q'l tu'n ttzub', ok t-suntzuntz ti'j nwitze', ex tzaj tma'ntzuntz weye': Kutxi'ya txjolteju' xo'q'l ti'j twitza toju' nin pil Siloe, chij. Ayintzunwe' ku nchije', elntxjo'n nwitze' ex atzuntzu' nka'yinaye'. 12 Aye'tzunju' xjalxi' kqani'n te: —¿Jatzunta'ju' ichan lu? Atzunju' moẍ xitma'n kye: —Ja'lo, mixti'we' b'i'n wu'n, chij.
Okju' moẍ q'anit tu'n Jesus toj xjel kyu'nju' parisey
13-14 Xi'tzun q'i'nju' moẍ q'anit tu'n Jesus kwitz parisey. Qu'n aju' q'ij tej tq'anit tu'n Jesus, jun q'ijtoq te ojlab'l, 15 aye'tzunju' parisey eb'jo'kten qanilte teju' ichan lu se'nxi'x taq'wi xka'yin. Atzunte xittzaq'we'n kye: —Oktq'o'nju' xoq'l kyi'j nwitze', eltzun ntxjo'ne', ja'lotzun nchin ka'yine'. 16 Ate'tzun junjunju' parisey kyma: —Ate' xb'inchanteju' lu, myatzu' tzajna' tk'etz Dyos, qu'n min ntnima'nju' q'ij te ojlab'l, chechij. Aye'tzun junjuntl kyma: —¿Se'n taq'wi nche' b'entju' b'a'nq'ob'aj lu tu'n extzunqa aj il? chechij. Tzajtzun pa'jtib'il kyxol tu'n tpaj, 17 xi'tzun kyqani'n jumajtl teju' moẍ ojetoq ka'yin tu'n Jesus kjalu: —¿Titi' ntma'na ti'ju' xjal lu tu'nju majqet twitza tu'n? chechij. Atzunju' moẍ xittzaq'we'n kye: —T-sanjelal Dyoste' xjal lu, chij. 18 Aye'tzu'n aj Juda min xikyoksla'n qa moẍtaqju' xjal tnejel, exqa ojetoq jqet twitz, tzmaxi'j kytzaj txko'nju' tman, 19 xikyqani'ntzuntz kyeju' tman: —¿Ma a kyk'walju'ye' lu? ¿Ma ax qa moẍ titz'jlenx? ¿Se'ntzun taq'wi nka'yintl ja'lo? chechij. 20 Aye'tzun tmanju' moẍ xikytzaq'we'n: —Kanlixi'x qwitze' qa a qk'waljuye' xjal lu ex moẍtoq tej titz'ji. 21 Naqtzun aju' minti' b'i'n qu'ne' se'ntaq'wi xka'yina', ex mixti' b'i'n qu'ne' alkye xjqonte twitz. Kqaninxe' te, qu'n matxina' ch'iy, ex axte kq'malte se'ntaq'wi ẍejqetju' twitz, chechij. 22 Iktzu'n kma manb'aju' kjalu, qu'n intoq che xob' kyeju' aj Juda, ex tu'n ma'toq b'entti'j kyu'nju' aj Juda tu'n tex kxla'jin jun xjal toj tja Dyos qama tma qa atoq Jesusju' Krist. 23 Qu'mtzun xa'ya kma'nju' manb'aj: Kyqaninxe' te, qu'n matxi' ch'iyte', chechij. 24 Tzajtzun txko'n jumajtlu' moẍ matxitoq ka'yin tu'n Jesus kyu'nju' aj Juda, ex xikyma'n te: —Twitzku' Qman Dyos q'mantza axxi'x qeye'. Qu'n b'inaqe' qu'n qa aj ilju' ichan lu, chechij. 25 Xi'tzun ttzaq'we'nju' xjal moẍtoq kye: —Mixti' kanliwe' nwitz qa aj il. O'kxwe' kanli nwitz qa moẍqintoqe' exqa matxi' chin ka'yine'. 26 Ex xikyqani'n jumajtel te: —¿Ti'tzunju' tb'incha ti'ja? ¿Se'n taq'wi xb'ent tka'yina tu'n? 27 Atzunju' xjalxi' ttzaq'we'n kye: —Matxina' txi' nma'n kyeye' ex min kb'i'ne'. ¿Tiquntzun kyajb'ilaye' tu'n txi' nma'n jumajtle' kyeye'? ¿Mujqa kyajb'ile' tu'n kxi' lpeye' ti'j ex tu'n kyokye' te t-xnaq'tzb'en? chij. 28 Ejawtzun wulin ti'ju' xjal lu ex xikyma'n te: —T-xnaq'tzb'en Moyses qo'qe', atzunta t-xnaq'tzb'enju' ichan lu. 29 B'i'n qu'n qa yolin Dyos tuk'i'l Moyses, atzunte' ichan lu min b'i'n qu'ne' jasaja', chechij. 30 Atzunju' xjal moẍtoq xittzaq'we'n kye: —¡Se'n taq'witzun ikju'! Min b'i'n kyu'ne' ja tzajna', atzunwe' majqetwe' nwitz tu'n. 31 B'i'na' qu'n qa minti' nche'x b'i'n aj il tu'n Qman Dyos; o'kxkye' nche'x b'i'nju' aye' nche k'ulun ex nkb'incha'nju' tajb'il. 32 B'ajx qb'iya' qa ati jun xjal ojewt jqet twitz jun moẍ titz'jlenx tu'n. 33 Naqwit myatz sajaju' ichan lu tk'etz Dyos, mixti'wtlo nb'enti tu'n, chij. 34 Xi'tzun ktzaq'we'nju' aj Juda te: —Aj ilxi'xta titz'jlenxa, ¿Ma tajb'ila tu'n qtzaj t-xnaq'tza'na ja'lo? chechij. Ex eb'je'x kxla'jantzuntz toju' ja te k'u'lb'il.
Aye' moẍ toj Xewb'aj
35 Tb'itzun Jesus qa ojetoq tz'etz xla'janju' xjal jqet twitz tu'n; tetzunj tokyal twitz, xitqani'n te: —¿Ma nxi' toksla'njuya tk'wal Dyos? chij. 36 Atzunju' ichan lu tma: —Taye, q'mantza weye' alkye, tu'ntzun wokslane' te. 37 Atzunte Jesus xittzaq'we'n te: —Matxi' tila; ayinwejuye' Tk'wal Dyos nchin yolin tuk'ila. 38 Atzunte xjal tej tb'inte kub' meje twitz Jesus ex xitma'n te: —Taye chin okslalwe' teya. 39 Tmatzun Jesus kjalu: —Ma chinulwe' twitz tx'otx' tu'n tq'ancha'lin kyil xjal, tu'n tjqet kywitzju' moẍ ex tu'n kykub' moẍixju' nche ka'yin. 40 Aye'tzun junjun parisey ate'toq tuk'i'l, tej kb'inte yol lu xikyqani'n te: —¿Yajtzunqe' moẍqotzunqe'? chechij. 41 Atzunte Jesus xittzaq'we'n kye: —Naqwit moẍqeye', myawtlo kpaje'. Tu'ntzunju' nkma'ne' qa nche ka'yine' kukx tten kyilju'ye'.
Aju' k'ik'lel kyuk'ilju' trit
1 Ex tma Jesus kjalu: Axxi'x kxe'l nma'n kyeye' qa alkye jun xjal minti' sokx toj ttziju' kych'lajil rit, leq'te' ex b'inchal taq'wixil. 2 Ex atzunju' nokx ttziju' kych'laj rit, atzunte k'ik'lelju' nxq'uqinkye rit. 3 Aju' xq'uqil ttzi ch'laj nokx tjqo'nju' ch'laj, ex atzunju' k'ik'lel nche'x ttxko'nju' trit teyile junjun se'nxju' kb'i, extzun nelkynik'ju' rit ti'ju' tq'ojq'ojel twi'; ex nche etztiq'i'n toj ch'laj. 4 Ajtzun tetz tiq'inju' rit toj ch'laj, nkub'nej kwitz ex kkyaqilju' rit nche oklpe ti'j qu'n ojtzqi'nju' tq'ojq'ojel twi' kyu'n. 5 Atzun qa jun xjal mixti' kyojtzqi'n, mixti' nche'x lpe ti'j, xi'pe' nche kub'a' oq twitz, qu'n min ojtzqi'nju' tq'ojq'ojel twi' kyu'n. 6 Xiq'ma'n techlal lu kye tu'n Jesus, aye'tzunkye' xjal mixti' kane toj knab'l ti'toq tz'elpuna'.
Jun b'a'n k'ik'lelte' Jesus
7 Atzunte Jesus xitma'n jumajtl kye: Axxi'x kxe'l nma'n kyeye': Qa ayine' ttzija janche okxa rit. 8 Txqante' eb'ju'l nej nwitze' eleq' qe' ex b'inchal taq'wixqe'; Aye'tzunju' rit minti' xikyb'i'nju' kyol. 9 Ayinwe' ttzija: alkye matz'oktz woje', kkletel. Ikju' se'n jun rit netz ex nokx ex nelyal twab'l. 10 Aju' eleq' nul naqx elq'al, b'iyul ex xitul; ayintzunwe' ma chinule' tu'n tten kychwinqlale' tejumajx ex nimxi'x. 11 Ayinwe' b'a'n k'ik'lel. Ate' b'a'n k'ik'lel ntq'o'nju' tchwinqlal naqx tu'n kpaju' trit; 12 ex alkyetzunte naq'unan naqx tu'n tpaj twi'tk'u'j, ajtzun txi' tka'yi'n xi' ttzaju' xo'j nche kyej ttzaqpi'n trit ex nkub' oq, qu'n myana' k'ik'lel ex mya teqeju' rit. Atzunju' xo'j nok lpe kyi'ju' rit ex nche b'ajx t-sputi'n. 13 Aju' xjal lu nkub' oq, qu'n o'kxna' twi'tk'u'j nxi' t-xima'n ex mixti' kyilwiju' rit tu'n. 14-15 Ayinwe' b'a'n k'ik'lel. Ojtzqi'nwe' Nman wu'n ex ikx ojtzqi'nqine' tu'n, ex ikx ojtzqi'nqe' nrite' wu'ne' ex ojtzqi'nqine' kyu'n. Ex nxi' nq'o'ne' nchwinqlale' naqx tu'n kkletju' nrite'. 16 Atix txqantlu' nrite' myatzu' ate'kxa' toju' ch'laj lu; ex ilti'j tu'n ktzaj wi'ne'. Kche b'ilju' rit lu weye' tu'ntzun tb'ent naq jun ch'laj rit ex naq jun k'ik'lel kyi'j. 17 Nchin k'u'jlanjtze' tu'nju' Nmane' tu'n tpaj nxi' nq'o'n nchwinqlale' ex chin jawil anq'in jumajtle'. 18 Mix-a'lox jun k'elel q'inte nchwinqlale', ayinkuwe' nchinx q'onte wib' tu'n nkyim. Ati oklenj weye' tu'n txi' nq'o'ne' ex tu'n njaw itz'ji jumajtle'. Atzun oje chaq'liju' weye' tu'n Nmane', chi Jesus b'aj tma'n kye aj Juda. 19 Tetzunj kb'inte aj Juda yol lu, kub' kpa'n jumajtlkyib'. 20 Nimtzun eq'mante kjalu: —¿Tiqu'n nxa' kb'i'ne', tajaw ilnate' tokx toj tanmi ex matxi' tz'ok toj twi'?. 21 Aye'tzun junjutl intoq kma'n: —Mix-a'lox jun qa ati tajaw il toj tanmi nb'ent tyolin ikju'. ¿Ma jakutzun jqet kwitzju' moẍ tu'n jun tajaw il?
El ik'u'n Jesus kyu'n aj Juda
22 Intoq che ik'san xjal ninq'ij toj Jerusalen tu'n ttzajkna'n tej t-ẍtilsetju' tja Dyos, ex tej tokjumajtl k'u'lb'il toj; kb'inchaju' lu toj jb'alil. 23 Atitoqtzun Jesus tpen tja Dyos, ex intoq b'et twitzju' tjpel tok tb'i te Salomon. 24 Aye'tzunju' aj Juda eb'jo'k txole ti'j Jesus ex xikyqani'n te: —¿Jtojtzun tzaj tma'na axxi'x qeye' qu'n njawje qanmiye'? Ma aya Krist, q'mantz ch'i'na axxi'x, chechij. 25 Atzunte Jesus xittzaq'we'n kye: —Matxi'na' txi' nma'n kyeye', ex min nchinx kyoksla'ne'. Aye'ju' b'a'nq'ob'aj nche nb'incha'ne' aku' Nmane' inq'mante weye', ex atzuntzu' nyek'una' qa ayine' Krist; 26 Aye'tzunkye' mixti' nxi' kyoksla'ne', qu'n mya nritqe'ye'. 27 Aye'we' nrit ojtzqi'nwe' tq'ojq'ojel nwi' kyu'n, ex ikxwe' ojtzqi'nqe' wu'ne'. 28 Kxe'l nq'o'nwe' kychwinqlal tejumajx ex layx che naj ex mix-a'lox k'elel q'inkye toj nq'ob'e'. 29 Aju' matxi' tzaj tq'o'n Nmane' weye' nimxi'x kyetwitz juntl ti'xti', ex mix-a'lox kb'entel tel iq'inte. 30 Naq junqoye' qkab'ile' tuk'i'l Nmane'. 31 Aye'tzunju' aj Juda jaw ktzyu'n jumajtl ab'j tu'n tb'ajx kxon ti'j Jesus, 32 atzunte Jesus xitma'n kye: —Nimju' b'a'nq'ob'aj matxi' b'aj nb'incha'ne' kwitze' tu'nju' tipumal Nmane'; ¿Tiquntzun chin b'ajela' kxone' toj ab'j, taq'wixtzun xnb'inchaye'? 33 Aye'tzunju' aj Juda xikytzaq'we'n te: —Lay b'aj qxona toj ab'j tu'nju' ti'xti' b'a'n xtb'inchaya, naq o'kx tu'nju' nyolina myab'a'n ti'j Dyos. Xjalnata, extzun nok tq'o'ntib'a te Dyos. 34 Xi'tzun tma'n Jesus kye: —Ma mitzunjunti' tz'ib'a'n toju' kkawb'ile': tma Dyos qa dyosileqo'. 35 B'i'n qu'n b'a'nxi'x qa aju' tz'ib'a'n toju' Tu'jil, lay b'ent tkub' qewa'n; ate Dyos oktq'o'n kb'i xjal te dyos tej tq'onteju' tpakb'ab'l. 36 Ate Dyos xkub' Xjansanweye' ex ate saj chq'onweye' twitz tx'otx', ¿Se'ntzun taq'wi nkyma'ne' wi'je' qa nchin yoline' myab'a'n ti'j Dyos tu'nju' xinma'ne' qa Tk'wal Dyos qine'? 37 Qa minti' nb'incha'ne' se'nju' ntb'incha'n Nmane', lalun chinx kyoksla'ne'. 38 Qatzun nxi' nb'incha'ne', maskye min nchinx kyoksla'ne', kyokslanxe' aye'ju' nche nb'incha'ne', tu'ntzun telkynik'e' jumajx qa atiju' Manb'aj wuk'i'le' ex atinqine' tuk'i'l Manb'aj, chi Jesus kye. 39 Kyajb'iltoqtzun jumajtl tu'n tkub' ktzyu'n Jesus, mixti' tzyet kyu'n. 40 Anjtzun ti'j Jesus jlajxi' nin a' Jordan, ex atzu' kub'a' ten toju' jun tnej tx'otx' ja tenaju' Xwan Jawsal a'. 41 Txqan xjal e'pon ka'yilte ex intoq kma'n: —Axxi'x, mixti' tb'inchate Xwan jun b'a'nq'ob'aj te techlal tzalu, ex tkyaqilju' tma ti'ju' ichan lu axte', chechij. 42 B'a'npun xjal e'okslan te Jesus ate'toq toju' najb'il lu.
Tej tkyim Lasaro
1 Atitoq jun xjal yab' Lasaro tb'i, teju' tnam B'etanya tb'i, aju' ttanam Mariy kyitz'inkyib' tuk'i'l Marta. 2 Aju' Mariy, tanab'toq Lasaro aj ok q'onte k'ok'sb'il ti'j tqan Jesus ex b'aj ttzqijsa'n tu'nju' t-xya'mal twi'. 3 Tu'ntzunju' yab'toq Lasaro xikysma'n tqanil te Jesus kjalu: —Taye, aju' tamiwa matxi' yab'ti. 4 Atzunte Jesus tej tb'inte, tma: —Ate yab'il lu lay kyimte' Lasaro tu'n, naq o'kx tu'n tka'yinjtzu' tipumal Dyos ti'j, ex tu'n tjaw nimsa'n nb'iye' ayine' tk'wal Dyos, chij. 5 Intoqtzun che k'u'jlanjtz Marta, Mariy ex Lasaro tu'n Jesus, 6 ex tetzunj tb'inte Jesus qa yab'toq Lasaro kyejten kab'e' q'ijtl jatoq ta'ya'. 7 Tb'ajlenxi'tzun kab'e' q'ij xitma'n Jesus kyeju' t-xnaq'tzb'en: —Qoqe' jumajtle' Judey. 8 Aye'tzu'n t-xnaq'tzb'en xikyma'n te: —Xnaq'tzal, lu tzqeku' b'ajtoq xona toj ab'j kyu'n aj Juda toju' tx'otx' lu, ¿Ma tajb'iltzun jumajtla tu'n qxi' atzu'? chechij. 9 Atzunte Jesus xitma'n kye: —¿Ma myatzun kab'lajoj kmuj anb'il ati tojun q'ij? Qu'n qa ati jun xjal nb'et q'ijtl lay jaw tz'aq, qu'n nka'yin toju' spik'un ati twitz tx'otx'; 10 qatzun ati jun xjal nb'et te qonik'an, njaw tz'aq qu'n mixti' spik'un toj tb'e. 11 Tetzunj tb'aj tma'n Jesusju' lu, xitma'ntzuntz kye: —Matxi' tzik'wtanju' qamiw Lasaro, extzun machinxe' k'asilte, chij. 12 Aye'tzunju' t-xnaq'tzb'en xikyma'n te: —Taye, qa matxi' tzik'wtan, oklo kb'entel jun kmujx, chechij. 13 Ex ate Jesus tma ti'j Lasaro qa matxitoq kyim, aye'tzunkye t-xnaq'tzb'en kane toj kwitz qa nyolintoq Jesus tiju' watl. 14 Atzunte Jesus xitchik'b'a'n b'a'nxi'x kye: —Ate Lasaro matxi' kyim. 15 Ex majx nchin tzalaje' tu'nju' myatzu' tinqiniye' tej xkyim, qu'n b'a'nxi'x kyeye' ikju', tu'ntzun txi' kyoksla'ne'. Qoqe'tzune' ka'yilte chi Jesus. 16 Atzunju' Tomas, aj toktaq tb'i te yuẍ kyu'n xjal, xitma'n kye txqantl xnaq'tzb'en: —Ex ikxqe qo'qeye', tu'n qkyim junx tuk'i'l Jesus, chij.
Ate Jesus q'olte anq'ib'l ex chwinqlal
17 Ma'toqtzun b'aj kyaje' q'ij tku'xlen mqu'nju' Lasaro tej tpon kanun Jesus kk'etz. 18 Nqayintzun kxolju' tnam B'etanya tuk'ilju' tnam Jerusalen, qajpelo nik'jan ajlab'; 19 nimqetzunju' aj Juda eb'ajx q'olb'elte Marta ex Mariy tu'n kq'uqb'ante kk'u'j tu'n tpaj matxitoq kyimju' kxib'en. 20 Tetzunj tb'inte Marta qa xi'toq tpon Jesus, etz k'lulte; atzunte Mariy axtzu' kyeja' ten tuja. 21 Atzunte Marta xitma'n te Jesus: —Taye, naqwit axtzu' ta'ya tzalu, mixti'wtlo xkyimu' nxib'ene', chij. 22 Extzun b'i'n wu'ne' qa titi'xku' matxi' tqani'na ja'lo te Qman Dyos ktzajel q'o'n teya, chi Marta. 23 Xi'tzun ttzaq'we'n Jesus te: —Kjawil anq'intlte' t-xib'ena. 24 Atzunte Marta xitma'n te: —Iku' Taye, b'i'n we'wu'n qa kjawil anq'in kxol kyimni toj mankb'il q'ij, chij. 25 Xiq'mantzuntz te tu'n Jesus: —Ayinwe' q'olte anq'ib'l ex chwinqlal. Alkyete matz'okslan weye', maskye ma'toq kyim, k'anq'iltl; 26 Exqetzunju' xjal itz'qe'x qama che okslan weye', layx che kyim. ¿Ma nxi' toksla'na lu? chi Jesus te Marta. 27 Atzunte Marta xitma'n te: —Iku' Taye, nxi' woksla'ne' qa aya Krist, Tk'wal Dyos aju' ati tulel twitz tx'otx'.
Oq' Jesus ttziju' muqb'il te Lasaro
28 Tb'ajlenxi'tzun tma'n Marta ja'lu, xi'tzuntz txkolte Mariy, ex xitma'n toj ewaj te: —Lu xnaq'tzal matxi' tzul ex ntxokliya tu'n. 29 Tetzunj tb'inte Mariy ja'lu, lwiyxi'x jawe' ex xi' ka'yilte Jesus. 30 Na'mxtoqtzun tokxju' Jesus toju' tal tnam; axtoqtzu' ta' ja ula' Marta k'lulte. 31 Aye'tzunju' aj Juda ate'toq tja Mariy tej kka'yinte tjawe' ojqel, kub' kxima'n qa xi'toq txi' oq'el ja ku'x mqu'na' Lasaro ex eb'ajxlpe ti'j. 32 Tetzunj tpon kanun Mariy jatoq ta'ya' Jesus, kub' meje t-xe tqan ex xitma'n te: —Taye, naqwit axtzu' ta'ya tzalu, mixti'wtlo xkyimu' nxib'ene', chij. 33 Tetzunj tka'yinte Jesus tej intoq oq' Mariy exqe'ju' aj Juda e'pon tuk'i'l, tzaj tb'is tu'n ex majx exch'yon toj tanmi, 34 ex xitqani'n kye: —¿Jatzun xku'xa' kmqu'ne'? Aye'tzunkye xikyma'n te: —Kuttzaja Taye, qo'ya ka'yilte. 35 Ex jawtzun oq' Jesus. 36 Aye'tzunju' aj Juda tej kka'yinte kma: —¡Kka'yinxpe'ye' inxi'xtoq tk'u'jla'n! chechij. 37 Extzun ate' junjuntl intoq kma'n: —Ate' ichan lu, jqet twitz jun moẍ tu'n, ¿Ma laytzulo b'ent jun ti'xti' tu'n, tu'n lalun kyimju' Lasaro?
Jaw anq'in Lasaro
38 Exch'yon jumajtl toj tanmi Jesus, ex xi' lq'e tk'etzju' muqb'il. Tokxtaq tojun jul, jpu'ntoq ttzi tu'n jun nin ab'j. 39 Tmatzun Jesus: —Kyiq'imile' ab'j. Atzunte Marta tanab' Lasaro, xitma'n te Jesus: —Taye, in tzuwixtl, qu'n matxi'na b'aj kyaje' q'ij tkyimlen. 40 Atzunte Jesus xittzaq'we'n te: —¿Ma mitzun jun xinma'ne' teya, qama tokslaya oktla'ya tipumal Dyos? 41 Eltzun kyi'nju' ab'j, atzunte Jesus jaw ka'yin twitz kya'j ex tma: —Qman Dyos, kxe'l nq'o'n chjonte teya qu'n matxi' chinx tb'i'na. 42 B'i'n we'wu'n qa kukx nchin tzaj tb'i'na, ma'tzun txi' nma'n teya ikju' naq tu'n kb'inte xjal ateqe' nk'etze', tu'ntzun txi' kyoksla'n qa aya saj chq'onweye'. 43 Tb'ajlenxi'tzun tma'n Jesus ja'lu, jawẍch'in kuw ex tma: —¡Kutetza na'tz Lasaro! chij. 44 Ex etzju' kyimni, b'altz'i'nqeju' tqan exju' tq'ob' toj jun xb'alun ex ptzo'ntoqju' twitz tu'n jun su't. Xi'tzun tma'n Jesus kye xjal. —Kpoq'imile' ex ktzaqpinxe', chij.
Kjoy xjal tu'me'l tu'n ttzyet Jesus kyu'n
45 B'a'npunju' aj Juda e'tzaj tuk'i'l Mariy e'okslan te Jesus tej klonte b'a'nq'ob'aj lu. 46 Ex aye'tzun junjuntl eb'ajx q'malte kyeju' parisey aju' tb'incha Jesus. 47 Aye'tzunju' parisey exqe'ju' knejel pale b'aj kb'u'yin kyib' kyuk'i'lju' k'loj tzyul kawb'il kxolju' aj Juda, ex kma: —¿Titi' qb'incha'? qu'n aju' ichan lu nche tb'incha'nju' b'a'nq'ob'aj te techlal. 48 Qama kyej qq'o'n kukxju', kykyaqilju' xjal che okslal te, ex che b'ju'lju' tzyul kykawb'il aj Rom xitulteju' tja Dyos exju' qtanam, chechij. 49 Atitoqtzun jun kxol a tb'iju' Kaypas, atoq knejel pale toju' ab'q'i aju', xitma'n kye: —Mixti'xkye' b'a'n kyu'n, 50 qu'n minti' nkane toj knab'le', qa b'a'nxi'x tu'n tkyim naq jun xjal, kyetwitz tu'n kkyim kkyaqilju' najlqe' toju' tnam lu. 51 Minti' tmate' Kaypasju' yol lu tu'nxwit tnab'l, tmaju' lu qu'n ax Dyos q'mante toj tnab'l, tu'nju' knejel paletoq, tmatzuntz qa atitoq tu'n tkyim Jesus te kxel kkyaqilju' aj Juda; 52 ex mya o'kx tu'n tkyim te kxelju' aj Juda, ex ikx tu'n ktzaj tb'u'yinju' tk'wal Dyos matxi' che b'ajx sputj. 53 Tojtzunju' q'ij lu kyej b'entti'j kyu'nju' tzyul kawb'il kxolju' aj Juda tu'n tkub' kb'yo'n Jesus. 54 Qu'mtzun minti' tentl Jesus kxolju' xjal aj Juda, etz toju' tx'otx' Judey ex xi' toj jun tnam Eprayin tb'i, nqaku' tk'etz jun chq'ajlaj. Axtzuntzu' kyeja' ten kyuk'ilju' t-xnaq'tzb'en. 55 Ch'inxtltoqtzun tkub' kyik'sa'n aj Juda tq'ij tzaqpib'l, txqan xjal kyoju' tal tnam eb'ajx toj Jerusalen tu'n ktxjonte kyib' toj kyil, na'mxtoqku' tpon kanunju' ninq'ij. 56 Intoqtzun che jyon ti'j Jesus, ex intoq kqanla'n kxolilex toju' tja Dyos: —¿Titi'kye' nkxima'n? ¿Ma oktzulo ktenb'il toju' ninq'ij mujqa lay? chechij. 57 Aye'tzunju' parisey exqe'ju' knejel pale matxitoq kychaq' kye xjal qama kyil mujqa makyb'i jatoq ta' Jesus, tu'n txi' kma'n lwiyxi'x, tu'ntzun tkub' ktzyu'n.
Kub' qo'n k'ok'sb'il tib'aj tqan Jesus tu'n jun qya
1 Atixtoqtzun qaq q'ijtel tu'n tkub' ik'sa'nju' tq'ij tzaqpib'l, xi' Jesus toj tnam B'etanya, jatoqu' najla' Lasaro, aj ojetoq jaw anq'in tu'n Jesus. 2 Atzuntzu' b'aja'ju' ninwan kyu'n te ninb'ilte Jesus; ate Marta ok sipal wab'j ex axtoq junte' Lasaro nwan kyuk'i'l Jesus ti'j mes. 3 Atzunte Mariy tzaj tiq'i'n jun lmet k'ok'sb'il nardo tb'i, twi' wi'yal ex mya smo'n twitz tuk'i'l juntl ti'xti', ex ok tq'o'ntzuntz ti'j tqan Jesus ex tu'nju' t-xya'mal twi' b'aj ttzqijsa'na'. Majxtzun kub' noju' tuja tu'nju' tk'ok'jil. 4 Atzunte Judas Iskaryot t-xnaq'tzb'en Jesus aju' jaw miltz'uj ti'j, tma: 5 ¿Tiqu'n minti' xxi' k'ayitju' k'ok'sb'il lu tu'n txqan pwaq se'n twi'tk'u'j jun xjal toj o'lajnaq q'ij aq'untl, tu'n txi' q'et kyeju' prow? 6 Minti' tmate Judas ja'lu tu'nwt nlaqj tk'u'j kyi'ju' prow, tmaju' lu qu'n eleq'toq ex atoqna' q'ilteju' tk'b'el pwaq, intoq jatz talq'anju' pwaq nku'x q'o'n toj. 7 Atzunte Jesus xitma'n te: —Xtenku'j, lalun lab'tiya tu'n, qu'n ilti'j tu'n tb'inchetju' lu ti'j nxmilale' na'mxku' nkyime'. 8 Aye'kye' prow kukxkye' kten kxole', ayintzunwe' lay chin tentle' kxole', chij.
Kub' kxima'n xjal tu'n tkub' kb'yo'n Lasaro
9 B'ajtzun kb'i'n txqan xjal aj Juda qa atzu' ta'toq Jesus toj tnam B'etanya, ex exi'tzuntz atzu', mya o'kxtaq ka'yilte Jesus expe' ikx ka'yilte Lasaro matxitoq jaw anq'in tu'n Jesus kxol kyimni. 10 Ex b'entti'j kyu'nju' knejel pale tu'n tkub' kb'yo'nju' Lasaro, 11 qu'n tu'n tpaj txqanju' aj Juda ma'toq tz'el kypa'n kyib' kyi'j ex intoq che okslan te Jesus.
Okx Jesus toj tnam Jerusalen
12 Txqan xjal ma'toq che pon Jerusalen toju' tq'ij Tzaqpib'l. Tetzunj kb'inte toj juntl q'ij qa kpomel Jesus toju' nintnam. 13 Eb'ajxtzun toqilte t-xaq tze tut ex exi'tzuntz k'lulte Jesus intoq kma'n: —¡Qo tkloma, Dyos! ¡K'i'wlanxi'xte' tzul toj tb'i Qman Dyos, aju' kynimaqkawil aj Israel! 14 Knet jun b'ur tu'n Jesus, ex chejin tib'aj, kse'nxju' ntma'n toj Tu'jil tyol Dyos. 15 Lalun che xob'e' aye'ye' najlqe'ye' toju' nintnam Syon; kka'yinxe' kynimaqkawile' lu tzul iqa'n tu'n jun tal b'ur. 16 Mixtoq junti' nkane toj kwitzju' t-xnaq'tzb'en nejku'; yajxi'tzuntl tkane toj kwitz qa atzu' nyolina'ju' Tu'jil ti'j Jesus tzmaxi'j tej tanj toj kya'j. 17 Aye'tzunju' xjal ate'toq tk'etz Jesus tej tetz ttxko'n Lasaro toju' muqb'il ex tej tjaw anq'in kxol kyimni, intoq kyoli'n kxolju' xjal. 18 Qu'mtzun eb'je'tza' xjal k'lulte Jesus, qu'n ma'toq kb'i ti'ju' techlal ex b'a'nq'ob'aj tb'incha Jesus. 19 Aye'tzunju' parisey intoq kma'n kxolilex: —Kka'yinxpe'ye' mlayx b'ent kmyetju' xjal qu'n. ¡Matxi' che'x lpe kkyaqil ti'j!, chechij.
Intoq che jyon junjun xjal kryek ti'j Jesus
20 Ate'toq junjun xjal kryek kxolju' xjal matxitoq che pon k'ulul toj Jerusalen. 21 Epontzun lq'eju' xjal kryek tk'etz Pelip te B'etzayda, jun tnam te Kaliley, ex ekub'san twitz kjalu: —Taye, qajb'ile' tu'n tok qka'yine' Jesus. 22 Atzunte Pelip xi' q'malte te Leẍ, ex kykab'il exi' q'malte te Jesus. 23 Xi'tzun tma'n Jesus kye: —Matxi' ponju' kmuj tu'n njaw nimsa'ne' ayine' Tk'wal Dyos. 24 Axxi'x kxe'l nma'n kyeye' qa aju' twitz triy min xku'x mqet toj tx'otx', kukx ttenju' tjunal; qatzun makyim tjaq' tx'otx' intq'o'n txqan twitz. 25 Alkye o'kx toka' twitz ti'ju' tchwinqlal twitz tx'otx', layx tkanb'aju' tchwinqlal tk'etz Dyos, atzunju' min ntk'u'jla'n tchwinqlal twitz tx'otx', atzunte' ktkanb'a' tchwinqlal tejumajx. 26 Qa ati jun tajb'il tu'n tajb'en weye', lpek wi'je'; ex ja chin tenb'iliye' axtzu' ktenb'ila' wuk'i'le'. Qa ati jun najb'en weye', kjawil nima'n tu'n Nmane' Dyos.
Yolin Jesus ti'ju' tkamik
27 ¡Ja'lo inxi'x t'uẍjne wanmiye'! ¿Titi' kxe'l nma'ne' ja'lo? ¿Mujqa kxe'l nma'ne': Nman, chin tkloma teju' k'ixk'oj lu? ¡Lay qu'n Apena' ẍin tzaja'ye' twitzju' tx'otx' lu! 28 Nman, nimsanktza tb'iya, chi Jesus. —Tzajtzun jun tq'ojq'ojel wi'yj toj tkya'j ex tma: Oje jaw nnimsa'ne' ex kjawil nnimsa'n jumajtle'. 29 Aye'tzun xjal ate'toq ex tej kb'inte tq'ojq'ojel wi'yj, kma qa juntoq q'ankyaq; aye'tzun junjutl intoq kma'n: —Jun anjlte' mayolin tuk'i'l, chechij. 30 Atzunte Jesus xitma'n kye: —Mya tu'n npaje' sajaju' tq'ojq'ojel wi'yj lu, matzajte' naq o'kx tu'n kpaje'. 31 Atzun kmuju' ja'lo tu'n kyokju' xjal toj xjel, ex ja'lo k'elex xla'jitu' nkawin twitzju' tx'otx' lu. 32 Naqatzun ẍin jaw anq'ine' twitz tx'otx', che tzajel wi'ne' xjal kkyaqil nk'etze'. 33 Tma Jesus ja'lu tu'n telkynik' xjal ti'j se'ntoq tu'n tkyima'. 34 Aye'tzunju' xjalxi' ktzaq'we'n te: —B'i'n qe'qu'n toju' kawb'il qa aju' Krist k'anq'il tejumajx. ¿Se'ntzun taq'wi ntma'na qa kjawilju' Tk'wal Dyos twitz krus? ¿Alkyetzunju' tk'wal Dyos ikju'? chechij te Jesus. 35 Atzunte Jesus xitma'n kye: —Ktenb'el ch'i'ntlu' spik'un lu kyxole', ex naq junkmujtl ktenb'il. Che b'ete' qu'n atixkuju' spik'un, tu'ntzun lalun che oke' toj qxopin; qu'n alkyete nb'et toj qxopin, mixti'x kanli twitz ja ljo'na' tb'e. 36 Che okslanqeye' teju' spik'un qu'n atixku' kxole', tu'ntzun koke' te spik'un. Tb'ajlenxi'tzun tma'n Jesus ja'lu, xi'tzuntz ex kub' tewa'ntib' kwitz xjal.
Tiqu'n minti' nche okslan aj Juda te Jesus
37 Ex maskye txqantoq b'a'nq'ob'aj te techlal matxitoq tb'incha Jesus kxolju' aj Juda, mixti'xtoq nche okslan te; 38 qu'n ilti'jtoq tu'n tjapunju' kyejni tz'ib'a'n tu'n t-sanjelal Dyos Isayiy: Taye, ¿alkye jun matxi' tz'okslan teju' qpakb'ab'le'? ¿Alqe oje tyek'uya Qman Dyos tipumal? 39 Ex layxtaq txi' kyoksla'n, qu'n ikx kyajttz'ib'a'n Isayiy kjalu: 40 Axte Qman Dyos xkub' jpunte kwitz ex axte xkub' chukinte knab'l, tu'ntzun lalun b'ent tka'yit kyu'n expe' tu'n lalun kane toj kwitz; tu'ntzun lalun nanjtzkyi'j nk'etze', ex tu'n lalun che kub' nq'a'na'ne'. 41 Tmate' Isayiyju' lu qu'n ojetoq til t-spik'umal Jesus, ex qu'mtzun yolina' ti'j. 42 Maskye ikju', txqanju' aj Juda okslan te Jesus, expe' e'okslan junjunju' nimaq kyoklen. Ex mixtoqti' nxi' kma'n kwitz xjal qu'n intoq che xob' kyeju' parisey, tu'ntzun lalun che etz xla'jan kyoju' ja te k'u'lb'il. 43 Qu'n atoq b'a'nju' toj kwitz tu'n kjaw nima'n kyu'n xjal mya tu'n Dyos.
Tu'n tyol Jesus kb'ela' tz'e'ysa'n kwitz xjal
44 Jawtzun tq'ojq'ojel twi' Jesus ex tma: Alkye matz'okslan weye', mya o'kx weye' sokslana' ex teju' Nmane' saj chq'onweye'. 45 Ex alkye nok ka'yinweye', ex ikx in oktka'yi'n Nmane' saj chq'onweye'. 46 Ayinwe' spik'un ma chinule' kyxol xjal, tu'ntzun lalun che kyej tenju' mache okslan weye' toj qxopin. 47 Ex alkyete nxi' tb'i'nju' nyole' extzun min njapun tu'n, myayinwe' chin b'el tz'e'ysante twitz; qu'n min ẍin nulwe' tz'e'ysal kwitzju' xjal twitz tx'otx', ma'pe' chin ulwe' klol kye xjal. 48 Alkyete nel ik'unweye' ex min nxitb'i'nju' nyole', atitlte' kb'el tz'e'ysante twitz: aye' yol matxi' che nmaye' che kb'el tz'e'ysante twitz toj mankb'il q'ij. 49 Qu'n minti' nchin yolinwe' wu'nx wib'; ate Nmane' saj chq'onweye' ntzaj q'mante weye' titi' kxe'l nma'ne' ex se'n kxe'la' nxnaq'tza'ne'. 50 Ex kanli nwitze' qa aju' chaq'b'il tu'n Nmane' in tqo'n chwinqlal tejumajx. Qu'mtzun aju' yol nxi' nma'n kyeye', aye'x yolju' tzaj q'ma'n weye' tu'n Nmane'.
El ttxjo'n Jesus kqanju' t-xnaq'tzb'en
1 Ch'inxtloqtzun tul kanunju' tq'ij Tzaqpib'l, b'i'ntoqtl tu'n Jesus qa ma'toq pon kanunju' kmuj tu'n tkyej tq'o'nju' twitz tx'otx' ex tu'n txi' tk'etz Manb'aj Dyos. Ate intoq che tk'u'jla'nju' eb'jo'k lpe ti'j ex kukxju' nche tk'u'jla'n nimxi'x. 2-4 Atzun tajaw il ojetoq tz'okx tq'o'ntib' toj tanmiju' Judas, tk'wal Simon Iskaryot tu'n tkub' t-sb'u'n Jesus. B'i'ntoqtzuntl tu'n Jesus qa atzu' tzajna' tk'etz Dyos, qa k'anjeltl ti'j tk'etz Dyos exqa a Manb'aj tzaj q'onte toklen; tetzunj intoq che wan, jawe' Jesus ti'j mes, eltiq'i'n t-xb'alun ex oktk'lo'n jun sub'l q'ob'aj tk'u'j. 5 Ku'x tq'o'n a' tojun tk'b'el ex aq'witzuntz txjolte ti'j kqanu' t-xnaq'tzb'en ex aku' okten sulte tu'nju' xb'alun oktk'lo'n tk'u'j. 6 Atzunte Luch xitma'n te Jesus tej teltoq ttxjo'n ti'j tqan kjalu: —Taye, ¿Ma atzunta k'elel txjonte ti'j nqane'? 7 Atzunte Jesus xittzaq'we'n te: —Aju' nb'incha'ne' ja'lo mixti' nkane' toj twitza, yajxi'tzuntl kkaneb'il toj twitza. 8 Ex xitma'ntl Luch te: —¡Layx waje' tu'n tel ttxjo'na ti'j nqane'! Atzunte Jesus xittzaq'we'n te: —Qa minti' sel ntxjo'ne', layx tz'oka wuk'i'le', chi Jesus te. 9 Atzunju' Simon Luch xitma'n te: —¡Qanatzun iku' Taye, laluna' tz'el ttxjo'na o'kxju' nqane', txjomila nq'ob'e' exju' nwi'ye'! 10 Atzunte Jesus xittzaq'we'n te: —Alkyeju' akxtoq tb'aj ichin, minti' nojqelan tu'n tel txjet tkyaqil t-xmilal, naq o'kxju' tqan nojqelan tu'n ttxjet, qu'n ẍnu'lna' t-xmilal. Ex aye'kye' ẍnulqekye', maskye mya kkyaqile'. 11 Tma ja'lu: Mya ẍnu'lqeye' kkyaqile', chij, qu'n b'i'ntlna' tu'n alkye kjawiltoq miltz'uj ti'j. 12 Tetzunj tb'aj ttxjo'n Jesus ti'j kyqan t-xnaq'tzb'en, oktq'o'n jumajtlu' tpinpa't, kub' qe jumajtlti'j mes ex xitma'n kye: —¿Ma nkane toj kwitze' aju' xnb'inchaye'? 13 Aye'kye' nchin nok kq'o'ne' te Taye ex Xnaq'tzal, ex tu'me'lte' kyu'ne', qu'n ayinwejuye'. 14 Ayinwe' Xnaq'tzal ex Taye kyeye', matz'el ntxjo'nwe' ti'j kqane', ikxtzunkye' ati tu'n tel ktxjo'n ti'j kqane' jun te juntl. 15 Matxi' kub' nq'o'ne' jun yekb'il kwitze', tu'ntzun txi' kb'incha'ne' ikxju' se'nxju' xnb'inchaye'. 16 Axxi'x kxe'l nma'n kyeye' qa mixti'x jun majen nimxi'x toklen kyetwitzju' tajaw aq'untl, ex mixti'x jun tzajni chq'o'n nimxi'x toklen kyetwitzju' ntzaj chq'onte. 17 Qa nkane ja'lu toj knab'le' ex nkub' kyaq'unane', che b'elk'i'wlane' b'a'nxi'x. 18 Minti' nchin yoline' kyi'je' kkyaqile'; kanliwe' nwitz alkyeqeju' ẍe jawnsk'o'ne'. Ex ilti'j tu'n tjapunju' ntma'n toju' Tu'jil tyol Qman Dyos kjalu: Aju' nwan wuk'i'le' junx atzun k'okyel miltz'uju' te ajq'oj wi'je'. 19 Nxi' nma'npune' kyeye' na'mxku' tjapun, tu'ntzun nxi' kyoksla'ne' qa ayine' Tk'wal Dyos naqa xb'aj tkyaqil ja'lu. 20 Axxi'x kxe'l nma'n kyeye' alkye jun mak'monteju' kxe'l nchq'o'ne', ayine' nchin tmk'o'n; ex alkyetzunju' machin tmk'o'ye' a Nmane' in tmk'o'n.
Tma Jesus qa kb'el sb'u'n tu'n Judas
21 Tb'ajlenxi'tzun tma'n Jesus ja'lu, majx exch'yon toj tk'u'j ex tmatzuntzu': —Axxi'x kxe'l nma'n kyeye' qa junkye' kxe'l q'onweye' toj kq'ob' xjal. 22 Aye'tzunju' t-xnaq'tzb'en e'jaw ka'ylaj toj kwitz, ex mixti' elkynik' ti'j alqi'jtaq nyolina' Jesus. 23 Atzunju' jun xnaq'tzb'en k'u'jlanxi'x tu'n Jesus, q'uqloktoq ttx'u'k tej intoq che wan, 24 atzunte Simon Luch xitma'n teju' xnaq'tzb'en lu tu'n tq'ob' tu'n txi' tqani'n te Jesus alqi'jtaq nyolina'. 25 Xi'tzun lq'eju' xnaq'tzb'en lu tk'etz Jesus ex xitqani'n te: —Taye, ¿alkyetzun? 26 Atzunte Jesus xittzaq'we'n te: —Kb'elix nnub'ine' jun piẍ wab'j, altzunqe kxe'la' nq'o'ne' atzunju'. Ku'xtzun tnub'i'n Jesusju' wab'j ex xitq'o'n te Judas tk'wal Simon Iskaryot. 27 Textzunju' kmuj tej txi' twan Judasju' wab'j, okxju' tajaw il toj tanmi. Ex xiq'ma'ntzuntz te tu'n Jesus: —Aju' ati tu'n tb'inchanteya, wix txi' tb'incha'na. 28 Mix-a'lox jun kxolju' q'uqlqe'ktoq ti'j mes kane toj kwitz tiqu'n xa'ya' q'ma'n te ikju'. 29 Qu'n atoqtzun Judas iq'ilte tk'b'el pwaq te oyaj, ate' junjun kub' kxima'n qa atitoq jun ti'xti' tu'n ttzaj tlq'o'n toju' ninq'ij mujqa tu'n txi' tq'o'n jte' pwaq kyeju' prow. 30 Tetzunj tb'aj twan Judas wab'j, etztzuntz ojqel. Ex matxitoq qo' ok yupj.
Aju' ak'a'j chaq'b'il
31 Tetzunj ma'toq tz'etzju' Judas, tma Jesus kjalu: —Ja'lotzun kjawil nimsa'n nb'iye' ayine' Tk'wal Dyos, ex wu'nele' kjawila' nimsa'n Dyos. 32 Qatzun ma jaw nnimsa'ne' tb'i Qman Dyos ayine' Tk'wal Dyos, ex ikxte Dyos chin jawil tnima'ne'; ex ktb'incha lwiyxi'x. 33 Aye'ye' nk'wal, naq jun kmujtl tu'n ntene' kyuk'ile'. Aye'kye' che jyole' wi'je', kse'nxju xinma'ne' kye aj Juda ikxtzun kxe'l nma'nju'ye' kyeye': Lay b'ent kxi'ye' ja chin xe'laye'. 34 Kjel nq'o'ne' jun ak'a'j chaq'b'il kyeye': Kk'u'jlam kyib'e' jun te juntl. Iku' se'nwe' nche nk'u'jla'ne', ikxtzunkye' kyk'u'jlam kyib'e' kxolilexe'. 35 Qama kyk'u'jla kyib'e' jun te juntl, kkyaqil xjal che okyel ka'yinte qa nxnaq'tz'b'enqe'ye'.
Tma Jesus qa kb'eltoq e'wan tu'n Luch
36 Atzunte Simon Luch xitqani'n te Jesus: —Taye, ¿jatzun kxe'la'ya? —Ja chin xe'laye' lay b'ent tok lpeya wi'je' ja'lo chi Jesus xittzaq'we'n, ok k'okyel lpeya wi'je' yajxi'tel. 37 Atzunte Luch xitma'n te: —Taye, ¿Tiquntzun lay b'ent nxi' lpeye' ti'ja ja'lo? ¡Q'o'na'we' nchwinqlal tu'n nkyim tuk'i'la, chij! 38 Atzunte Jesus xittzaq'we'n te: —¿Ma axxi'x teya qa q'o'nju' tchwinqlala naqx tu'n npaje'? Qu'n axxi'x kxe'l nma'n teya qa na'mxtoq tjaw oq'ju' tmanek' ajnkub' tewa'n oxe' maja, chi Jesus te Luch.
A Jesus tb'eyil Qman Dyos
1 Lalun tzaj b'is toj kyanmiye'. Qek kk'u'je' ti'j Dyos ex qek kk'u'je' wi'je'. 2 Nimte' najb'il ate' toj tja Nmane'; naqwit mikxa'ju' mixti'wtlo nxi' nma'n kyeye' qama chinxe' b'inchalkyeju' najb'il lu. 3 Ajtzun nxi'ye' ex aj tb'entju' knajb'ile' wu'ne', chin ultzun jumajtle' nelkyeye' tu'ntzun ktene' toju' najb'il ja chin tenb'ilaye'. 4 Ojtzqi'nkye' b'e kyu'n jamachinxa'ye', chi Jesus kye. 5 Atzunte Tomas xitma'n te Jesus: —Taye, mixti'qe' b'i'n qu'n jamatxa'ya, ¿Se'n taq'witzun ajtok qojtzqi'ne' b'e lu? 6 Atzunte Jesus xittzaq'we'n te: —Ayinwe' b'e, ayine' yol axxi'x ex ayine' q'olte chwinqlal. Lay b'ent tpon jun xjal tk'etz Dyos qa mya wu'ne'. 7 Qa matxi' tz'el kynik'e' weye', ex ikx matxi' tz'el kynik'e' te Nmane'; ex ojtzqi'ntl kyu'ne' ja'lo, qu'n matxi'na' tz'ok kka'yine'. 8 Xi'tzun tma'nte Pelip te Jesus: —Taye, q'ontza anb'il qeye' tu'n tok qka'yine' Qman Dyos ex xle'kutzunj. 9 Atzunte Jesus xittzaq'we'n te: —Matxi' b'et q'ij atinqine' kyuk'ile', ¿Ma na'mxtzun teltnik'a weye' Pelip? Alkye matxi' tz'ok ka'yinweye', matxi' tz'ok tka'yi'n Nmane'; ¿Tiqu'n ntzaja' tqani'na weye' tu'n txi' nye'k'u'ne' teya? 10 ¿Ma mitzunjunti' ntoksla'na qa atinqine' tuk'i'l Manb'aj exqa atiju' Manb'aj wuk'i'le'? Aju' ti'xti' nxi' nma'n kyeye' myayinxwe' nchin q'mante. Ate Manb'aj ati wuk'i'le' nb'inchante tkyaqilju' aq'untl. 11 Kyokslanxe' qa ayine' atinqine' tuk'i'l Manb'aj exqa atite wuk'i'le'; qatzun min nxi' kyoksla'ne', kyokslanx ch'i'ne' naqx tu'nju' b'a'nq'ob'aj nb'incha'ne'. 12 Axxi'x kxe'l nma'n kyeye' qa alkye jun matz'okslan weye' ktb'incha'ju' aq'untl se'nxju' nb'incha'ne'; expe' nimxi'x kyoklenju' aq'untl che b'entil tu'n kyekwitz ja'lu, qu'n ayintzunwe' ma chinxwe' tk'etz Nmane'. 13 Ex tkyaqilju' kxe'l kqani'ne' toj nb'iye', ktzajel nq'o'nwe' tu'ntzun tjaw nimsa'n tb'iju' Nmane' ti'ju' knb'incha'ye' kyeye'. 14 Kkyaqilju' ti'xti' ktzajel kqani'ne' toj nb'iye' kxe'l nq'o'nwe' kyeye'.
Ttziya Jesus tu'n ttzaj tq'o'nju' Xewb'aj Xjan
15 Qa nchin kk'u'jlane', che japumelju' nchaq'b'ile' kyu'ne'. 16-17 Ex chin kub'sale' twitz Nmane' tu'n ttzaj tchq'o'n jun Klolkyeye', aju' Xewb'aj te axxi'x, tu'ntzun tten kyuk'ile'. Lay kk'amju' xjal te twitz tx'otx', qu'n mina' junti' kyojtzqi'n; aye'tzunkye' ojtzqi'nkye' kyu'n, qu'n atina' kyuk'ile' ex ktenb'il kyuk'ile'. 18 Lay che kyajnq'o'ne' meb'a; k'anjetz jumajtl wi'je' tu'n ntene' kyuk'ile'. 19 Naq jte' q'ijtl tu'n ntene', ex layx chin okka'yintle' kyu'n xjal; aye'tzunkye' chin okyel kka'yi'n jumajtle', ex ktenb'il kychwinqlale' tejumajx qu'n atinawe' nchwinqlal. 20 Tojtzun tq'ijlalil tzul, atzuntzu' k'elela' knik'e' weye' qa atinqine' tuk'i'l Nmane', ate'qeye' wuk'i'le' ex atinqine' kyuk'ile'. 21 Alkyeju' nokslan kyeju' nchaq'b'ile' ex nche japun tu'n, atzuntzu' ntyek'u'na' qa nchin tk'u'jla'ne' axxi'x. Ex ate Nmane' ktk'u'jlaju' xjal aj nk'u'jlanweye' ex ikwe' knk'u'jlaye' ex kxe'l nyek'u'n wib'e' te, chi Jesus xitma'n kye. 22 Atzunju' juntl Judas xitma'n te: (myaju' Judas Iskaryot) —Taye, ¿Se'n taq'witzun o'kxtzu' kb'ela' tyek'u'n tib'a qwitze' ex mya kye kkyaqil xjal? 23 Atzunte Jesus xittzaq'we'n te: —Alkyete nchin tk'u'jla'ne', ex njapunju' nyole' tu'n; kk'u'jlanjtzel tu'n Nmane', extzun Nmane' ex ayine' qo' ule' tk'etz tu'n qnajane' tuk'i'l. 24 Alkyete min nchin tk'u'jla'ne' mixti' njapunju' nyole' tu'n. Qu'n aye'ju' yol nxi' nma'n kyeye' mya nyolwe', tyolte' Nmanjuye' saj chq'onweye'. 25 Tkyaqil ja'lu nxi' nma'n kyeye' atinqinxkuye' kxole'; 26 extzun aju' Xewb'aj Xjan Klolkyeye' ktzajel tchq'o'n Nmane' te nxele' ktzajel yek'unte tkyaqilju' ti'xti' kyeye' ex ate ktzajel na'nte kyeye' tkyaqilju' oje txi' nma'ne' kyeye'. 27 Kxe'l nq'o'ne' nak'b'il kyeye'. Atzun nak'b'il lu mikxa'ju' se'n nak'b'il nkq'o'n xjal twitz tx'otx'. Lalun che jawjeye' ex lalun che xob'e'. 28 Matxi' kb'iye' qa chin xe'le' exqa chin ul jumajtle' tu'n ntene' kyuk'ile'. Naqwit nchin kk'u'jla'ne', ma'wtlo che jaw tzalaje' tej xkb'iye' qama chinxe' tk'etz Nmane', qu'n nimxi'xte toklen kye nwitze'. 29 Nxi' nma'npune' kyeye' ja'lo na'mxku' tb'aj, tu'ntzun txi' kyoksla'ne' ajtjapun tq'ijlalil. 30 Lay chin yolintle' nim kyuk'ile', qu'n luju' nkawin twitz tx'otx' tzul. Expe' mixti' toklen wi'je', 31 iktzulo kb'ajela', tu'ntzun telkynik'ju' xjal qa nk'u'jla'ne' Manb'aj Dyos ex nxi' nb'incha'ne' tchaq'b'il. Che we'ktze' ex qoqe' ik' tzalu, chi Jesus kye t-xnaq'tzb'en.
Aju' axxi'x tqan ub'a
1 Ayinwe' axxi'x tqan lob'j ub'a, ex ate nmane' naq'unan ex nxq'uqin ti'j. 2 Qa minti' ntq'o'n twitzju' jun nq'ob'e', nel ttx'e'mi'n nmane', qatzun nwitzan, exqa ati ch'i'n tzqij ti'j neltiq'i'n tu'ntzun tq'onte txqantl twitz. 3 Aye'tzunkye' matxi' che b'ajẍtilsetkye' tu'nju' yol matxi' b'ajx nma'ne' kyeye'. 4 Lalun tz'el kypa'n kyib'e' wi'je', ex lay tz'el npa'nwe'wib' kyi'je'. Iku' se'n jun tq'ob' ub'a lay witzan qa pa'ntib' ti'ju' tqan; ikxtzunkyeju'ye' lay che witzane' kyu'nx kyib'e' qa pa'n kyib'e' wi'je'. 5 Ayinwe' tqan lob'j ub'a, aye'tzunkye' tq'ob'. Atzunju' ati wuk'i'le' ex atinqine' tuk'i'l, ktq'a' txqan twitz; qu'n qama tz'el kypa'n kyib'e' wi'je' mixti'x kb'entil kyu'ne'. 6 Alkye mixti' mujb'a'ntib' kukxju' wuk'i'le', k'elix xon ex kb'el tzqij se'nju' tq'ob' tze njaw sk'o'n ex nkub' tz'e'ysa'n. 7 Qama che tene' kukx wuk'i'le', exqa ma japunju' nyole' kyu'ne', kqaninxe' tkyaqilju' kyajb'ile' ex ktzajel q'o'n kyeye'. 8 Qatzun mache witzane' b'a'nxi'x exqa makyek'uye' qa nxnaq'tzb'en qe'xixe', atzuntzu' kjawila' nimsa'n tb'i Nmane'. 9 Iku' se'nte Nmane' nchin tk'u'jla'ne' ikxtzunwejuye' nche nk'u'jla'ne'; lalun tz'el kypa'n kyib'e' tiju' nk'u'jlalile'. 10 Qama japunju' nchaq'b'ile' kyu'ne', kukx ttentzun nk'u'jlaljuye' kyi'je', ikx se'nwe' mache japun tchaq'b'il Nmane' wu'ne', qu'mtzun kukx tten tk'u'jlajilju' wi'je'. 11 Matxi' nma'n ja'lu kyeye' tu'ntzun ktzalaje' junx wuk'i'le' ex tu'n ktzalaje' b'a'nxi'x. 12 Awe' nchaq'b'il ja'lu: Kk'u'jlam kyib'e' jun te juntl iku' se'nwe' mache nk'u'jlaye'. 13 Aju' tk'u'jlalil nimxi'x tu'n tten te jun xjal, aju' qama taq'tib' tu'n tkyim naq tu'n kkletju' tamiw. 14 Aye'kye' wamiwe', qama kb'inchaye' aju' kxe'l nma'n kyeye'. 15 Lay che oknq'o'ne' te majen, qu'n ate majen mixti' b'i'n tu'n titi' ntb'incha'nju' tajaw aq'untl. K'okyel nq'o'ne' kb'iye' te wamiwe', qu'n matxi' b'ajx nma'ne' kyeye' aju' tzaj tma'n Nmane' weye'. 16 Mya'yekye' ẍe jaw sk'onweye', ayinwe' ẍin jaw sk'on kyeye' ex oje txi' wab'tzi'ne' kyeye' tu'n kxi'ye' ex tu'n kyoke' se'n jun tq'ob' tze ntq'o'n txqan twitz. Tu'ntzun ttzaj tq'o'n Nmane' kyeye' tkyaqilju' kxe'l kqani'ne' te toj nb'iye'. 17 Atzun chaq'b'il ja'lu kxe'l nma'ne' kyeye': tu'n kyk'u'jlante kyib'e' jun te juntl.
Ntx'a'lti'j kk'u'j xjal ti'j Jesus ex kyi'ju' t-xnaq'tzb'en
18 Qa ntx'a'lti'j kyk'u'j xjal kyi'je', kanex toj kywitze' qa wi'je' nej ntx'a'la' ti'j kyk'u'j. 19 Naqwit te twitz tx'otx'qeye', inwtlo che k'u'jlanjtze' kyu'n kse'n nkyk'u'jla'n kyib' kyxolilex twitz tx'otx'. Ayinwe' ẍin jaw sk'on kyeye' kyxolju' xjal te twitz tx'otx', qu'mtzun ntx'a'la' ti'j kyk'u'j xjal kyi'je', qu'n mya'na' te twitz tx'otx'qetle'. 20 Kyna'ntze' yol xinma'ne' kyeye': Mix-a'lox jun majen nimxi'x toklen kyetwitzju' tajaw aq'untl. Qama ljonjtz toj nq'ije' kyu'n xjal ex ikxtzunkye' kljonjtzel toj kyq'ije'; exqa makub' kyb'i'nju' nyole' ex ikxkye' kb'el b'i'n kyole' kyu'n. 21 Tkyaqil ja'lu k'okyel b'incha'n kyeye' naqx tu'n npaje', qu'n mixti'na' kyojtzqi'nju' saj chq'onweye'. 22 Naqwit minti' ẍin nule' ex naqwit minti' ẍin yoline' kyuk'i'l mixti'wtlo kyil. Atzun ja'lo mlay b'ent kmante qa mixti'wt kyil. 23 Qu'mtzun alkyeju' ntx'a'lti'j tk'u'j wi'je', ex ikx ntx'a'lti'j tk'u'j ti'j Nmane'. 24 Naqwit minti' xnb'inchaye' ti'xti' kxol aju' mix-a'lox juntl nb'inchante, mixti'wtlo kyil; atzunte' matxi' kyilju' ti'xti' lu, extzun inx tx'a'lti'j kk'u'j wi'je' ex ti'j Nmane'. 25 Intzun b'aj tkyaqil ja'lu naqx tu'n tjapunju' yol tz'ib'a'n toju' kkawb'il aj ntma'n kjalu: Matzaj tx'a'lti'j kk'u'j wi'je' extzun mixti'we' wil kye, chiju' tz'ib'a'n. 26 Ex ktzajel nchq'onwe' Xewb'aj Xjan klolkyeye' ktzajel tk'etz Nmane' ex kxe'l tyek'u'nju' axxi'x kyeye', ate k'okyel tziyal wi'je'. 27 Ex aye'x junkye' che okyel tziyal wi'je', qu'n mana' che tene' wuk'i'le' tej ttzaj qen nejku'.
1 Nb'ajx nma'ne' tkyaqil ja'lu kyeye' tu'ntzun mlalun jawje kk'u'je' wi'je'. 2 Okche b'je'letz xla'jane' kyoju' ja te k'u'lb'il, expe' kpomel jun kmuj kb'el kxima'n xjal qa te Dyos nche ajb'ena' ajkykub' b'yo'ne' kyu'n. 3 Kyb'incha ja'lu qu'n min ojtzqi'nqine' tuk'i'l Nmane' kyu'n. 4 Matxi' nma'n tkyaqil ja'lu kyeye' tu'ntzun ajtpon kanunju' tq'ijlalil, ktzajel kna'ne' qa ojetoq txi' nma'n kyeye'.
Aju' ntb'incha'n Xewb'aj Xjan
Mixti' xinma'njuye' lu kyeye' tnejel, qu'n atinxtoqe' kyuk'ile'. 5 Atzun ja'lo machinxe' tu'n ntene' tk'etzju' tzaj chq'onweye', ex mix-a'lox junkye' ntzaj qaninte ja ma chinxa'ye'; 6 xi'pe' ẍejaw b'isunaye' tej xb'ajx nma'ne' tkyaqil ja'lu kyeye'. 7 Ex axxi'x kxe'l nma'n kyeye': b'a'n k'elila' kyeye' qama chinxe'. Qu'n qa min ẍinxe' lay tzulju' Kolol kyuk'i'le'; qatzun machinxe', tzultzun nchq'o'ntze' kyk'i'le'. 8 Ajtzun tul, ktzajel tyek'u'n chik'lixi'x kwitz xjal qa alkye aj il, alkye mya aj il ex alkye kb'el tz'e'ysa'n twitz tu'n Dyos. 9 Alkye aj il: aju' mixti' nokslan weye'; 10 alkye mixti' til: ayinwe' machinxe' tk'etz Manb'aj, ex lay chin ok kyka'yintle'; 11 ate k'okyelju' toj xjel tu'n Dyos: aju' nkawin kyib'aj kykyaqil xjal twitz tx'otx' b'antnitlti'j tu'n txi' toj ttz'e'ysb'il witzb'aj. 12 Atix txqantl tu'n txi' nma'n kyeye', naqtzun aju' qaj min selkynik'e' ti'j. 13 Ajtzun tulju' Xewb'aj te axxi'x, ate kẍaqlulkyeye' toju' ax; qu'n lay yolinte tu'nxtib', ate' ktmaju' aju' k'okyel tb'i'n te Dyos ex ate kyek'ulte kyeye' tkyaqilju' tzul kyi'je'. 14 Chin jawil nimsa'ne' tu'n, qu'n aju' yol kxe'l nma'ne' te, kxe'l tchik'b'a'n kyeye'. 15 Tkyaqilju' ti'xti' ati tk'etz Nmane', ex ikx weye'; qu'mtzun xa'ya' nma'ne' qa aju' Xewb'aj Xjan kxe'l tma'n kyeye' tkyaqil wi'je'. 16 Naq jte' q'ijtl tu'n ntene' kyuk'ile' ex lay chin ok kyka'yintle', yajxi'tzuntl chin okyel kka'yi'n jumajtle'.
Kjawil b'entju' kb'ise' te tzalajb'il
17 Aye'tzunju' junjun t-xnaq'tzb'en e'aq'wi xjelul kxolilex ex kma: —¿Ti'tzun tz'elpuna'ju' yol xb'aj tma'n qe? Intma'n qa lay tz'ok qka'yi'ntl exqa yajxi'tl k'okyel qka'yi'n, ex ikx ntma'n qa kb'ajel ja'lu tu'nju' kxe'l tk'etz Manb'aj. 18 ¿Se'ntzun tz'elpuna'ju' yol lu yajxi'ch'i'ntl? Mixti'x nkaneqe' toj qwitz alqi'j nyolina', chechij. 19 Atzunte Jesus eltnik' qa kyajb'iltoqju' t-xnaq'tzb'en tu'n kxjelun te, qu'mtzun xa'ya' tma'n: —Oje txi' nma'n kyeye' qa naq jte' q'ijtl chin tenb'ile' kyuk'ile' ex lay chin ok kyka'yintle' ex yajxi'ch'i'ntl chin okyel kka'yi'n jumajtle'. ¿Ma atzun nkxjelu'nju'ye' kxolilexe'? 20 Axxi'x kxe'l nma'n kyeye' qa che oq'ile' ex che b'isule', aye'tzunkye' xjal te tkyaqil twitz tx'otx' che jawil tzalaj. Aye'tzunkye' maskye mache b'isune', kjawil b'entte' kb'ise' te tzalajb'il. 21 Jun qya ajtpon tq'ijlalil tu'n titz'ji tal, njaw b'isun qu'n xi' tponju' kmuj te k'ixk'oj; titz'jlenxi'tzun tal, minti' ntzaj tna'ntlu' k'ixk'oj tu'nju' ntzalaj ti'ju' k'wal sitz'j twitz tx'otx'. 22 Ikxtzunkyeju'ye' ja'lo nche b'isune'; ajtzun tanjtz jumajtl wi'je', kjawil tzalaj jumajtl kyanmiye' ex mix-a'lox k'elel q'inte tzalajb'il lu toj kyanmiye'. 23 Ajtzun tponju' tq'ijlalil lu, lay tzaj kqani'n juntl ti'xtiye' weye'. Axxi'x kxe'l nma'n kyeye' qa kxe'l q'onte' kyeye' tu'n Nmane' tkyaqilju' kxe'l kqani'ne' te toj nb'iye'. 24 Na'mx txi' kqani'n jun ti'xtiye' toj nb'iye'; kqaninxe' ex tzul q'o'nte', tu'ntzun ktzalaje' nimxi'x.
Makub' ti'j taq'wix twitz tx'otx' tu'n Jesus
25 Ma b'ajx nma'ne' tkyaqil kyeye' tuk'i'l techlal, extzun tzul jun tq'ijlalil lay chin yolintle' tuk'i'l techlal, kxe'lxi'x nchik'b'a'ne' kyeye' ti'j Nmane'. 26 Lay chin kub'santle' twitz Nmane' kyi'je' toju' tq'ijlalil tzul, aye'kukye' che kxe'l qaninte te Nmane' qu'n matxi' che okye' te nxnaq'tzb'ene'. 27 Qu'n aku'te Nmane' nk'u'jlankyeye'. Nche k'u'jlanjtze' tu'nju' nchin kk'u'jlane', ex tu'n matxi' kyoksla'ne' qa tk'etz Dyos ẍin tzaja'ye'. 28 Ma chinetze' tk'etz Nmane' tu'n wule' twitz tx'otx', atzun ja'lo kjel nq'o'ne' twitz tx'otx' tu'n tanjwi'je' tk'etz Nmane', chi Jesus kye t-xnaq'tzb'en. 29 Aye'tzunju' t-xnaq'tzb'en xikyma'n te: —Ja'lo nyolina chik'lixi'x, ex mixti' najb'en techlal tu'na. 30 Ex matxi' tz'el qnik'e' teya ja'lo qa b'i'n tkyaqil ti'xti' tu'na, ex min nojqelan tu'n t-xi' qqanine' teya. Qu'mtzun nxa'ya' qoksla'na qa xi' sajaya tk'etz Dyos, chechij. 31 Xi'tzun ttzaq'we'n Jesus kye: —¿Ja'lo kyokslanxtzune'? 32 Qu'n matxi' ponju' tq'ijlalil, ex matxi' ponju' kmuj tu'n kxi' sputje' ex teyile junjun kxe'l tljo'n tb'e ex chin jel kq'o'ne' njunale'. Extzun mya njunale' chin jel ten, qu'n atite' Nmane' wuk'i'le'. 33 Tkyaqil ja'lu nxi' nma'n kyeye' tu'n tqexi'x kk'u'je' wi'je' ex tu'n lalun tz'el kypa'n kyib'e' wi'je'. Kuwqexe' twitz tx'otx' ajttzaj yajb'il kyi'je'; qu'n tkyaqilju' myab'a'n twitz tx'otx' oje kub'ti'j wu'ne', chi Jesus b'aj tma'n kye t-xnaq'tzb'en.
Na'n Jesus Dyos kyi'ju' t-xnaq'tzb'en
1 Tb'ajlenxi'tzun tma'n Jesus ja'lu, jaw ka'yin twitz kya'j ex tma: Nman Dyos, matxi' ponju' kmuj ja'lo: Chin tnimsaktza tu'ntzun ikxwe' kjawil nnimsa'ne' tb'iya. 2 Tu'n matzaj tq'o'na woklene' kyib'aj kkyaqil xjal, ex tu'n txi' nq'o'ne' chwinqlal tejumajx kyeju' xjal ẍe tzaj tq'o'na weye'. 3 Ex atzunju' chwinqlal tejumajx aju' tu'n tok ojtzqi'na kyu'n, aya o'kxku'ya jun Dyos axxi'x, ex tu'n wojtzqinjtze' kyu'n ayine' Krist, ju' ntzaj tchq'o'na. 4 Ayinwe' matxi' jaw nnimsa'ne' tb'iya tzalu twitz tx'otx', ex matxi' japun b'aju' aq'untl wu'ne' tzaj tma'na weye' tu'n nb'inchanteye'. 5 Ja'lotzun, Nman Dyos chin tnimsa'nktza tk'etza ikx se'nju' tinqintoqe' tk'etza tej na'mxtoq tb'enti twitz tx'otx'. 6 Aye' xjal mache etz ti'na kxolju' xjal te twitz tx'otx' ex mache tzaj tq'o'na weye', matxi' txi' nma'ne' kye alkyeya. Teqetoqa tnejel ex mache tzaj tq'o'na weye' ex matxi' che okslan teju' tyola. 7 Atzun ja'lo kanlitl kwitz qa tkyaqilju' ntzaj tq'o'na weye' atzu' ntzaja' tk'etza; 8 qu'n aju' yol tzaj tma'na weye' matxi' txi' nma'ne' kye, ex aye'tzunkye matxi' kk'am. Ex matxi' tz'el kynik' qa xi' ẍin tzaja'ye' tk'etza, ex matxi' txi' kyoksla'n qa aya saj chq'onweye'. 9 Inchin kub'sane' twitza kyi'j; myatzu' kyi'ju' xjal te twitz tx'otx', atzu' kyi'ju' ẍe tzaj tq'o'na weye', qu'n teqeya. 10 Tkyaqilju' ati weye', teya, ex tkyaqilju' ati teya, weye'; ex machin jaw nimsa'ne' kyu'n, qu'n mache tzaj tq'o'na weye'. 11 Lay chin tentlwe' twitz tx'otx', aye'tzunkye axtzu' che jela' ten twitz tx'otx', ex ma chinxwe' tu'n ntene' tuk'ila. Xjanta Nman Dyos, xq'uqimqe'ya ẍetzaj tq'o'na weye' tu'n tipumala tu'ntzun kyten junx kyxim kse'nqe junqo'. 12 Tej atintoqe' kyuk'i'l twitz tx'otx' lu, xq'uqinqe'toq wu'ne' tu'nju' tipumala, aye'ju' oje che tzaj tq'o'na weye'. Ex mix-a'lo' junkye ma'wt txi' tzpet, naq o'kxu' jun ma naj, aj ilxtoqti'j tu'n tnaj, tu'ntzun tjapunju' tz'ib'a'n toju' Tu'jil. 13 Ja'lo ma'tzun chinxe' tk'etza; ex nxi' nma'ne' tkyaqil ja'lu atinxkuye' twitzju' tx'otx' lu, tu'ntzun ktzalaju' ẍe tzaj tq'o'na weye', tuk'ilju' tzalajb'il ati weye'. 14 Oje txi' nma'nju'ye' tyola kye, aye'tzunju' xjal te twitz tx'otx' ntx'a'lti'j kk'u'j kyi'j qu'n myana' te twitz tx'otx'qe'tl, ikx se'nwe' mya te twitz tx'otx'qine'. 15 Mixti' nxi' nqanine' teya tu'n kyetz tiq'ina kxolju' xjal te twitz tx'otx', naq o'kx tu'n kxi' tklo'na teju' taq'wix. 16 Ik se'nwe' mya te twitz tx'otx'qine', ex ikxtzunkye' xjalju' ẍe tzaj tq'o'na weye'. 17 Xjansamqeya tu'nju' tyola axxi'x; tu'ntzun kyajb'en o'kx teya. 18 Iku' kse'nwe' machin tzajtchq'o'na kxol xjal te twitz tx'otx', ex ikxtzunwe' che kxe'l nchq'o'ne' kxolju' xjal te twitz tx'otx'. 19 Naq tu'n kpaj xwaq'a' wib'e' tu'n wajb'ene' o'kx teya, tu'ntzun ex ikxkye tu'n kyq'onte kyib' tu'n kyajb'en o'kx teya naq tu'nju' tyola axxi'x. 20 Mixti' nchin kub'sane' teya o'kx kyi'ju' lu, expe' ikx kyi'ju' ok che okslal tjax chix tu'nju' kpakb'ab'lju' ate' ja'lo. 21 Ex nxi' nqanine' teya tu'n tb'inchanteya tu'n kten junx; ikx se'nta Nman atiya wuk'i'le' ex atinqine' tuk'ila, ex ikxkye tu'n kten junx quk'i'l, tu'ntzun txi' kyoksla'n xjal te twitz tx'otx' qa aya saj chq'onweye'. 22 Matxi' txi' nq'o'ne' ipumalj kye se'nxju' saj tq'o'na weye', tu'ntzun kyok junx, iku' se'nqe junqo'. 23 Ayinwe' kyuk'i'l ex aya wuk'i'le', tu'ntzun kyokxi'x te junx kyxim, tu'ntzun telkynik'ju' xjal te twitz tx'otx' qa aya saj chq'onweye', exqa nche tk'u'jla'na se'nwe' inxi'x chin tk'u'jla'na. 24 Nman, aya saj q'onkye weye', ex wajb'ile' tu'n kten wuk'i'le' ja chin tenb'ilaye', tu'ntzun tok kka'yi'n woklene' tzajni tq'o'na, qu'n k'u'jlanqine' tu'na atxi'x ojtxi' tej na'mxtoq tb'enti twitz tx'otx'. 25 Nman Dyos aya tnik'alxi'x ti'ja, aye'ju' ate' twitz tx'otx' mixti' ojtzqi'na kyu'n; atzunwe' ojtzqi'na wu'ne', exqetzunju' ate' wuk'i'le' ma tz'el kynik' ti'j qa aya saj chq'onweye'. 26 Oje txi' nchik'b'a'ne' kye alkyeya, expe' kxe'l nchik'b'a'nxi'xtle' kye, tu'ntzun ttenju' tk'u'jlalila wi'je' kyuk'i'l ex tu'ntzun ayinku'ye chin tenb'el kyuk'i'l, chi Jesus tma toj tna'j Dyos.
Tej ttzyet Jesus kyu'n ajq'oj
1 Tetzunj tb'aj tma'n Jesus ja'lu toj tna'j Dyos, xi'tzuntz kyuk'ilju' t-xnaq'tzb'en jlajxi' tal a' Sedron tb'i. Atitoqtzun jun piẍ tx'otx' te awal atzu' ex atzu' okxa' Jesus kyuk'ilju' t-xnaq'tzb'en toj. 2 Ex ojtzqi'ntoqju' piẍ tx'otx' lu tu'n Judas jaw miltz'uj ti'j Jesus, qu'n b'a'npunxi'toq maj b'aj kyb'u'yi'n kyib' Jesus kyuk'ilju' t-xnaq'tzb'en atzu'. 3 Atzunte Judas pon toju' piẍ tx'otx' lu kyuk'ilju' jun tnej xjal te q'oj exqe'ju' junjun xq'uqil tja Dyos exi'ni chq'o'n kyu'nju' knejel kye pale ex kyu'nju' parisey. Iq'intoq txqan kb'ujb'il ex intoq k'ant ttxa'n kq'aq'. 4 Atzunte Jesus b'i'ntoqtl tu'n titi'toq kb'ajel ti'j, etz lq'etzuntz kwitz ex xitqani'n kye: —¿Alkye nkjyo'ne'? chij. 5 Aye'tzunkye xiktzaq'we'n: —In qo jyo'ne' ti'j Jesus aj Nasaret, chechij. Atzunte Jesus xitma'n kye: —Ayinwe', chij. Atitoqte' Judas kyuk'i'l, aju' matxitoq tz'ok miltz'uj ti'j Jesus. 6 Tetzunj txitma'n Jesus kye: Ayinwe' chij, majx eb'ajx limimin kytze'lkyi'j ex majx e'kub' tz'aq twitz tx'otx'. 7 Atzunte Jesus xitqani'n jumajtl kye: —¿Alkye inkjyo'ne'? chij. Aye'tzunkye xikytzaq'we'n: —Aju' Jesus aj Nasaret, chechij. 8 Xi'tzun tma'n jumajtl Jesus kye: —Matxina' txinma'ne' kyeye' qa ayine'. Qatzun ayine' nchin kjyo'ne', lalun che kub' ktzyu'ne' xjal lu, chij. 9 Tma Jesus ja'lu, tu'n tjapunju' yol ojetoq tma: Nman mix-a'lox junkye xnaj kxolju' ẍetzaj tq'o'na weye', chi Jesus. 10 Atzunte Luch atitoq jun tk'uẍtx'e'nb'il iq'i'n, jatztiq'i'n toj tja ex elttx'e'mu'n t-ẍkyin jun xjal toj tb'anq'ob', Malko tb'i, tmajin kynejel pale. 11 Atzunte Jesus xitma'n te Luch: —Q'onku'xa tk'uẍtx'e'nb'ila toj tja. Qu'n ilti'j tu'n tik'xju' k'ixk'oj lu wu'ne', kse'nxju' tma Nmane', chi Jesus.
Pon q'i'n Jesus twitz Anas
12 Aye'tzunju' xjal te q'oj kyuk'ilju' chaq'ul kye, exqe' xq'uqil toj tja Dyos, kub' kytzyu'n Jesus ex kub' kyk'lo'n. 13 Xikyi'n nejku' tja Anas, qu'n atoqte' Anas tji Kaypas, knejel pale toju' ab'q'i lu. 14 Ex axte Kaypas q'mante nejku' kye aj Juda qa b'a'nxi'xtoq tu'n tkyim naq jun xjal te kyxel jun tnam xjal.
Kub' e'wa'n Jesus tu'n Luch
15 Atzunte Luch ex juntl xnaq'tzb'en lepchqe'ktoq ti'j Jesus. Ojtzqi'ntoq twitzju' juntl xnaq'tzb'en tu'n kynejel pale, qu'mtzun okx tuk'i'l Jesus toju' ja; 16 atzunte Luch kyejten ttzija twi'xi'pe'n. Qu'mtzun etzju' juntl xnaq'tzb'en yolil tuk'ilju' txin xq'uqil, ex atzuntzu' okxa' tzaqpi'nju' Luch. 17 Atzunju' txin xq'uqil xitqani'n te Luch: —¿Ma myatzun junta t-xnaq'tzb'enju' ichan lu? chij. Atzunte Luch xittzaq'we'n: —Mya, myayinwe', chij. 18 Kub'tzun kyq'aq'ju' majen kyuk'ilju' xq'uqil tja Dyos qu'n nimtoq che'w, ex intoq che q'aẍnenk ti'j. Axtoqtzun junte' Luch nq'aẍnenk kyuk'i'l ti'ju' q'aq'.
Xjelun knejel pale te Jesus
19 Aq'witzun kynejel pale xjelul te Jesus alkyeqe' t-xnaq'tzb'en ex titi'toqju' nt-xnaq'tza'n. 20 Oje chin yolinwe' kywitz kykyaqil xjal; ex kukx nq'onte xnaq'tzb'iljuye' kyoju' ja te k'u'lb'il ex toj tja Dyos, ja nb'aj kyb'u'yina' kyib' aj Juda, ex mixti' jun ti'xti' ojewt nmaye' toj ewaj. 21 ¿Tiqu'n ntzaja' tqani'na weye'? Qaninxa kye oje tz'ok kyb'i'nju' nyole', tu'ntzun kymante titi' oje txinma'ne' kye. Aye'kye ojtzqilte titi' oje txi' nma'ne' kye, chi Jesus. 22 Tetzunj tmante Jesus ja'lu, aju' jun xq'uqil wa'ltoq tk'etz xi' ojqelan jumalte twitz Jesus, ex xitma'n te: —¿Ma ikype' tzaq'web'lju' nxitq'o'na teju' knejel pale? chij. 23 Atzunte Jesus xittzaq'we'n te: —Qa myab'a'nju' nyole' xinma'ne', q'mantza titi' tpaltil; extzunqa b'a'nju' xinma'ne', ¿Tiqu'n nchin noka' tb'yo'na? chi Jesus teju' xq'uqil. 24 Atzunte Anas xit-sma'n Jesus tk'etz Kaypas kynejel pale, k'lo'nxtoq tq'ob' tu'n.
Kub' e'wa'n jumajtl Jesus tu'n Luch
25 Tetzunj inxtoq q'aẍjnenju' Luch ti'j q'aq'. Xiqani'n te kyu'n xjal: —¿Ma mya ax junta t-xnaq'tzb'enju' ichan lu? Atzunte Luch xittzaq'we'n: —Mya, myayinwe'. 26 Ex xi'tzun qani'n te Luch tu'n jun majen teju' knejel pale, twitze'l tib' tuk'ilju' majen eltx'e'mu'n t-ẍkyin tu'n Luch kjalu: —¿Ma mitzunjunti' wila tej atitoqa tuk'i'l Jesus toju' piẍ tx'otx' te awal? 27 Atzunte Luch kub' tewa'n jumajtl, ex textzunju' kmuj lu jaw oq'ju' tmanek'.
Pon q'i'n Jesus twitz Pilat
28 Tetzunj xi'toq qsqix, etzq'i'n Jesus toj tja Kaypas tu'n tpon q'i'n tja kawil aj Rom. Aye'tzun aj Juda min e'okx toj tja kawb'il qu'n laytoq ktz'ilsa kyib' ex laytoq tu'n kyik' tib'aju' kawb'il, qatzun min laytoq b'ent kwan ti'ju' wab'j te qale toj tq'ij tzaqpib'l. 29 Qu'mtzun etz Pilat yolil kyuk'i'l ex tma: —¿Titi' tilju' xjal lu toj kwitze'? chij. 30 Aye'tzunkye xikytzaq'we'n: Naqwit mya b'inchal taq'wixil mixti'wtlo saj qi'ne' tk'etza, chechij. 31 Atzunte Pilat xitma'n kye: —Kyiq'inxe' tu'n tok toj xjel kyu'ne' ex tu'n tkub' ktz'e'ysa'ne' twitz se'nx ntma'nju' kkawb'ile'. Aye'tzunju' aj Juda nimaq kyoklen xikytzaq'we'n: —Mixti'qe' qoklen ayo'qoye' aj Juda tu'n tkub' qb'yo'n jun xjale', chechij. 32 Iktzu'n japuna' yol ojetoq tma Jesus se'ntoq tu'me'l kkyimela'. 33 Atzunte Pilat okx jumajtl toj tja kawb'il, xittxko'n Jesus ex xitqani'n te: —¿Ma aya knimaqkawil aj Juda? 34 Atzunte Jesus xitma'n te: —¿Ma ntzaj t-xjeluna lu weye' tu'nx tnab'la, mujqa ati juntel matxi' q'mante teya? 35 Xi'tzun ttzaq'we'n Pilat te: —¿Ma aj Juda qine' teya? Aye'xnaju' twnaqila ẍe ul q'inteya exqe'ju' knejel pale nwitze'. ¿Ti'tzun xtb'inchaya? 36 Atzunte Jesus xittzaq'we'n te: —Awe' nkawb'il mya te twitz tx'otx'. Naqwit te twitz tx'otx' ate'wtlo nxjale' mache q'ojin tu'n lalun chinx q'o'ne' toj kq'ob'ju aj Juda. Ex aju' nkawb'ile' mya te twitz tx'otx'. 37 Xi'tzun tqani'ntl Pilat te: —¿Axtzun qa aya nimaqkawil? Atzunte Jesus xittzaq'we'n te: —Ayine' nimaqkawil se'nxju' xtmaya. Ayinwe' machin jaw itz'jiye' twitz tx'otx' ex machin ule' q'malte axx. Ex kkyaqilju' ojtzqi'n axx kyu'n, inchinx kyb'i'ne'. 38 Atzunte Pilat xitma'n te: —¿Ti'tzunju' axx?
Kyej b'entti'j tu'n tkyim Jesus
Tb'ajlenxi'tzun xjelun Pilat te Jesus, etz jumajtl yolil kyuk'ilju' aj Juda, ex tma: —Mixti' jun tilju' xjal lu nokyal wu'ne'. 39 Expena' naq'lqe'tlkye' qa nxi' ntzaqpi'n jun xjale' jpu'n toju' ninq'ij te tzaqpib'l: ¿ma kyajb'ile' tu'n txi' ntzaqpi'ne' kynimaqkawil aj Juda? chi Pilat kye. 40 Aye'tzunkye kykyaqil e'jaw ẍch'in ex kyma: —¡Myaju'! ¡A B'arab'as tzaqpimitza!, chechij. Ex ate B'arab'as eleq'toq.
1 Xiq'i'ntzun Jesus tu'n Pilat ex tchaq' tu'n tb'aj jiku'n toj syal. 2 Aye'tzun xjal te q'oj kub' kxpatx'i'nju' ch'i'x tu'n tjax kq'o'n toj twi' Jesus ex okkq'o'n jun tpinpa't tb'anilxi'x kyaq ka'yin, te xmayb'ilte. 3 Ex exi'lq'etzuntz tk'etz intoq kma'n: —¡Nimanxwit tb'iju' knimaqkawil aj Juda! chechij Ex intoq nok kjuminxi'ju' twitz. 4 Atzunte Pilat etz jumajtel ex xitma'n kye xjal: —Kka'yintze', lu Jesus k'eletz wi'ne' tzalu, tu'ntzun telkynik'e' te qa mixti' jun til nelyal wu'ne', chi Pilat kye. 5 Etztzun Jesus tuk'ilju' xpatx'i'n ch'i'x tokxtaq toj twi' ex toktoqju' t-xb'alun tb'anilxi'x ti'j kyeqtoq ka'yin. Ex xitma'n Pilat kye xjal: —¡Luju' ichan lu! 6 Tetzunj kka'yinte knejel pale exqe'ju' xq'uqil tja Dyos, e'aq'wi ẍch'il ex kma: —¡Q'onktz twitz krus! ¡Q'onktz twitz krus! Atzunte Pilat xitma'n kye: —Kyiq'inxniye' ex kyq'o'nktze' twitz krus, qu'n ayinwe' mixti'we' til nelyal wu'n. 7 Aye'tzu'n aj Juda tzyul kawb'il xikytzaq'we'n: —Ati junqe' qkawb'il, ex a ntma'n toj qkawb'ile' qa ati tu'n tkyim, qu'n noktq'o'ntib' te Tk'wal Dyos, chechij. 8 Tetzunj tb'inte Pilat ja'lu, tzajxi'x txqan xob'il ti'j. 9 Okxtzun jumajtel toju' tja kawb'il ex xitqani'n te Jesus: —¿Jaxi'xtzun tzajna'ya? Atzunte Jesus mixti' xittzaq'we'n te. 10 Xi'tzun tma'ntl Pilat te: —¿Ma laytzun tzaj ttzaq'we'na weye'? ¿Ma mitzunjunti' b'i'n tu'na qa ati woklene' tu'n tjaw nq'o'na twitz krus, mujqa tu'n txi' tzaqpeta? chij. 11 Atzunte Jesus xittzaq'we'n te: —Naqwit mya Dyos tzajni q'onte toklena, mixti'wtlo toklena wi'je'; qu'mtzun alkyeju' xiq'onweye' toj tq'ob'a nimxi'x til kyetwitza, chi Jesus te Pilat. 12 Tu'ntzun ja'lu, oktilil tu'n Pilat tu'n tjyet tu'me'l tu'n ttzaqpet Jesus; aye'tzunju' aj Juda e'jaw ẍch'inxi'xtl kuw ex kma: —¡Qama txittzaqpi'na ichan lu, myatzun b'a'n ttentza tuk'i'l ninimaqkawil aj Rom! ¡Qu'n alkye jun xjal nok tq'o'ntib' te nimaqkawil, nnok ajq'oj tiju' ninimaqkawil aj Rom! chechi xjal. 13 Atzunte Pilat tej tb'inte ja'lu, etztiq'i'n Jesus ex kub' qe toju' tq'uqb'il te kawb'il twitz ja b'incha'n ab'jile toj, atoq tb'iju' tok toj eb'rey Kab'ata. 14 Najchijtaqtzun tu'n tkub' kyik'sa'n xjalju' tq'ij tzaqpib'l, tetoqlo wanq'ij. Xitma'n Pilat kye xjal aj Juda kjalu: —¡Luju' kynimaqkawile' lu, chi Pilat kye! 15 Aye'tzunkye e'jaw ẍch'in ex kma: —¡Iq'imixa! ¡Iq'imixa! ¡Q'onktza twitz krus! Atzunte Pilat xitqani'n kye: —¿Ma kjawiltzun nq'o'ne' knimaqkawile' twitz krus? chij. Aye'tzun knejel pale xikytzaq'we'n te: —¡Mixti'qe' qnimaqkawil, o'kxqe' qninimaqkawilju' aj Rom!, chechij. 16 Tetzunj tb'inte Pilatju' kyol xitq'o'n Jesus toj kq'ob' ex xikyi'ntzuntz tu'n tjaw kq'o'n twitz krus.
Jawq'o'n Jesus twitz krus
17 Xi'tzun q'i'n Jesus kyu'n, jawtiqa'n tkurus ex xi'tzuntz toju' jun tnej tx'otx' Tb'aqil kyimni tb'i (atzun tb'i toj eb'rey aju' Kolkota). 18 Atzuntzu' jawa' q'o'n twitz krus kyuk'i'l kab'e'tl xjal eb'jo'kten ttx'u'k, ate Jesus ku'x ten kxol. 19 Atzunte Pilat kub' ttz'ib'a'n jun tnej yol intoq tma'n kjalu: Ate Jesus ja'lu aj Nasaret knimaqkawil aj Juda ex jax kq'o'n tib'ajxi' twi' Jesus. 20 Ex nimqe' aj Juda jaw kẍch'i'nju' yol lu, qu'n naqaku' tk'etz nintnam jawa' kyq'o'n Jesus twitz krus, ex tz'ib'a'ntoqju' tnej yol lu toj oxe' yol, toj eb'rey, latin ex kriek. 21 Aye'tzun knejel pale kxol aj Juda xikyma'n te Pilat kjalu: —Lalun kub' ttz'ib'ana tnej yol: Knimaqkawil aj Juda, ate tz'ib'inkuju'ya: Aju' nok tq'o'ntib' te knimaqkawil aj Juda, chechij. 22 Atzunte Pilat xittzaq'we'n kye: —Aju' matxi' kub' ntz'ib'a'ne', lay b'ent tch'exb'et. 23 Tetzunj ma'toq jawq'o'n Jesus twitz krus kyu'nju' xjal te q'oj, xikyiq'i'n t-xb'alun tu'n tex kyaq'pu'n toj kyaje', ex xikyi'n junjun piẍte' junjun. Ex ikx xikyi'nju' t-xb'alun nimin twe' aju' mixti' tz'isb'ente ex junx chinb'ente tkyaqil, 24 kmatzuntz kxolilex kjalu: —Lalun kub' qẍilu'n, naq o'kx qjyonku' ti'j, ex atzuntzu' k'elila' qnik' qa alkye kxe'l q'inte. Iktzu'n japuna'ju' tz'ib'a'n toj Tu'jil kjalu: Kub' kyaq'punju' nxb'alune', ex b'aj kjyo'n ti'j alkyetoq kxe'l q'inte nxb'alune' nimin twe'. Ex ikxtzun kb'incha xjalju' te q'oj. 25 Ex atitoq ttxu Jesus, exju' titz'in mo ttzik t-xu'jil Kleopas extzunju' Mariy Makdalena wa'lqetoq nqaku' tk'etz krus ja tokxa' Jesus. 26 Tetzunj tka'yinte Jesusju' ttxu exju' jun t-xnaq'tzb'en k'u'jla'nxi'x tu'n, xitma'n te ttxu: —Na, luju' tala ati tk'etza. 27 Ex ikx xitma'n teju' t-xnaq'tzb'en: —Luju' ttxuya ati tk'etza. Textzunju' kmuj ok mk'o'nju' xnaq'tzb'en lu toj tjaju' ttxu Jesus.
Tej tel kyim Jesus
28 Tb'ajlenxi'tzun ja'lu, qu'n kanlitlna' twitz Jesus qa ma'toq japun tkyaqil, ex tu'ntoq tjapunju' tz'ib'a'n toj tu'jil tma: —inchin k'wajtiye', chij. 29 Atitoqtzun jun xar nojni tu'n b'inayr; aye'tzunju' xjal ku'x knub'sa'n jun sponj toju' b'inayr, ex ok kk'lo'n ti'j jun tze, ex jax kq'o'ntzuntz toj ttzi Jesus. 30 Atzunte Jesus xitk'wa'n b'inayr ex tma: —Matxitzun japun tkyaqil Ex o'kx ttzaj pitze twi' ex majx el natxk'uj.
Tej tokx xyu'n jun ch'ut ttxa'n tk'u'j Jesus
31 Najchi'jtaqtzun tu'n tik'ju' tq'ij tzaqpib'l, ex mixti'toq kyajb'ilju' aj Juda tu'n kkyej tenju' kxmilal oxe' wnaq twitz krus toju' tq'ij ojlab'l, qu'n q'ij te ojlab'l toqju' qi'j lu nimxi'xtoq toklen. Qu'mtzun ekub'sana' twitz pilat tu'n tkub' toqit kqanju' xjal tk'etz twitz krus tu'ntzun che kyima' ex tu'n tel kyi'nju' kxmilal. 32 Epontzunju' xjal te q'oj, ex kub' ktoqi'n tqanju' tnejel ex ikx tqanju' juntel toktaq ttx'u'k Jesus. 33 Atzunj tej kpon lq'e tk'etz Jesus, kyil qa matxitoq kyim. Qu'mtzun mixti' kub' ktoqi'nju' tqan. 34 Naq o'kx jun xjal te q'oj okx xyunte jun ch'ut ttxa'n tk'u'j Jesus, ex texju' kmuj lu majx etz chitju' chik' ex a' ja aq'pon xyu'na'. 35 Aju' q'mante tkyaqil ja'lu ajun xjal ka'yinte, ex ntma'nju' axxi'x; twitzte kanla' qa ax, tu'ntzun ikxkye' tu'n kyokslanteye'. 36 Qu'n tkyaqil ja'lu b'aj ti'j Jesus, tu'n tjapunju' tz'ib'a'n toju' Tu'jil kjalu: Lay kub' toqi'n jun tb'aqil. 37 Ex ikx ati juntl yol tz'ib'a'n toj Tu'jil kjalu: K'okyel ka'yi'n kyu'nju' e'ok xyunte.
Ku'x mqu'n Jesus
38 Tb'ajlenxi'tzun ja'lu, atitoq jun xjal Jse tb'i, aj Arimat, xitqani'n anb'il te Pilat tu'n tku'tz tiq'i'nju' t-xmilal Jesus twitz krus ex tu'n txi' tiq'i'n toj muqb'il. Atzunte Pilat ku chij xitq'o'n anb'il te Jse qu'n minti' b'i'ntoq tu'n qa aju' xjal lu juntoq t-xnaq'tzb'en Jesus. 39 Ex ikxte Nikodemo aj pon yolil tuk'i'l Jesus te qonik'an, pon tuk'i'l jo'k'al lib'r k'ok'sb'il smo'ntoq twitz tuk'i'l mir ex alowe. 40 Atzunte Jse ex Nikodemo kub' kb'altz'i'nju' t-xmilal Jesus ex in nokxi' kq'o'nju' k'ok'sb'il ti'j, se'nx nkb'incha'nju' aj Juda ajtku'x mqet jun kyimni. 41 Atitoqtzun jun piẍ tx'otx' te awal nqayin jajawa' q'o'nju' Jesus twitz krus, tojtzunju' piẍ tx'otx' lu atitoq jun muqb'il ak'a'j na'mxtoq tokxq'o'n jun kyimni toj. 42 Atzuntzu' okxa' kq'o'nju' t-xmilal Jesus toj qu'n naqakutaq ta'ya' ex ch'inxtltoq ttzyetju' q'ij tej ojlab'l kyeju' aj Juda.
Tjatzlen anq'in Jesus kxol kyimni
1 Tojtzun tnejel q'ij te sman, xi'ju' Mariy Makdalena te b'a'n prim, qloljxtoq qwitz ttziju' muqb'il; atzunj tpon xitka'yi'n qa mixti'totlju' ab'j ttziju' muqb'il. 2 Tetzunj tka'yinte anjtzti'j ojqel q'malte te Luch tuk'ilju' xnaq'tzb'en k'u'jlanxi'x tu'n Jesus ex tma: —¡Matxi' tz'etz iq'i'n t-xmilal Taye toj muqb'il ex mix-a'loxte b'ilte ja xkub'a' q'o'n! 3 Atzunte Luch tuk'ilju' juntl xnaq'tzb'en exi' ka'yilte. 4 Exi'tzun kkab'il ojqel; atzunju' juntl xnaq'tzb'en pon nej ttzi muqb'il qu'n ojqelanxi'x twitz Luch. 5 Kub' qe ex okx tka'yi'n toju' muqb'il, ex o'kx tilju' xb'alun ajb'en b'otz'b'ilte Jesus, ex mixti' okx toj. 6 Ti'jxitzunte pona' Luch ex majx okxte toju' muqb'il. Ex ikxte tilju' xb'alun b'otz'b'ilte Jesus; 7 expe' til qa aju' xb'alun ajb'en k'alb'ilte twi' Jesus mya junx tkub'a kyuk'ilju' xb'alun e'ajb'en b'otz'b'ilte. 8 Ex okxju' xnaq'tzb'en pon nej twitz Luch toju' muqb'il, xitoksla'ntzuntz tej tlonteju' tkyaqil ja'lu. 9 Ex na'mxtoq tkane toj kwitzju' xnaq'tzb'en aju' ntma'n toju' Tu'jil, qa kjawiltoq anq'in Jesus. 10 Anjtztzun kyi'jtz kja.
Kub' tyek'u'ntib' Jesus twitz Mariy Makdalena
11 Atzunte Mariy kyej we' ttziju' muqb'il intoq noq'. Ex inxtoqtzun oq' kub' qe ex okx ka'yin toju' muqb'il, 12 ex xitka'yi'n kab'e' anjl tok kxb'alun saq, q'uqlqe'toq ja kub'a' ten t-xmilal Jesus; jun ja kub'a' tenju' twi' atzun juntl ja kub'a' ten tqan. 13 Aye'tzunju' anjl xikyqani'n te Mariy: —Qya, ¿Tiqu'n noq'iya? chechij. Atzunte Mariy xitma'n kye: —Qu'n matxi' txi' kyi'nju' t-xmilal Taye, ex mixti' b'i'n wu'ne' ja xkub'a' q'o'n. 14 Tetzunj tb'aj tma'n Mariy yol lu, anjtz ka'yinti'j ex til qa wa'ltoq Jesus, extzun minti' eltnik' te qa aju'. 15 Xi'tzun tqani'n Jesus te: —Qya, ¿tiqu'n noq'iya? ¿Alkye ntjyo'na? chij. Atzunte Mariy, kub' t-xima'n qa aju' xq'uqilteju' piẍ tx'otx', xitma'n te: —Taye, qa aya xiq'inte t-xmilal Jesus, q'mantza weye' ja xkub'a' tq'o'na tu'ntzun nxi'ye' jyolte. 16 Atzunte Jesus xittzaq'we'n te: —¡Mariy! Tzajtzun miltz'uj Mariy ex xiyolin te toj eb'rey ex xitma'n: —¡Rab'uni! (a tz'elpuna'ju' yol lu: Xnaq'tzal) 17 Atzunte Jesus xitma'n te: —Lalun chin kub'tmyo'na, qu'n na'mx njaxe' toj kya'j tk'etz Nmane'. Ex kutxi'ya q'malte kyeju' witz'ine' qama chinxe' tk'etz Nmane' aju' Ndyose' ex Kydyose'. 18 Xi'tzun Mariy q'malte kyeju' xnaq'tzb'en qa matxitoq tilju' Jesus, ex xitma'n kye aju' yol xitma'n Jesus te.
Kub' tyek'u'ntib' Jesus kwitzju' t-xnaq'tzb'en
19 Tetzun qonik'an texju' tnejel q'ij te sman, b'aj kb'u'yi'n kyib'ju' xnaq'tzb'en ex okx kjpu'n kyib' tuja qu'n intoq che xob' kyeju' aj Juda tzyul kawb'il. Pon Jesus kk'etz, kub' we' kxol ex exi' tq'olb'en kjalu: —¡Che tzalajxe' ex qexi'x kk'u'je'! 20 Tetzunj tmante ja'lu, b'ajx tyek'u'n tq'ob' exju' ttx'u'k kye. Aye'tzunkye t-xnaq'tzb'en ojexi'x che tzalaj tej klonte Jesus. 21 Ex xitma'n jumajtl Jesus kye: —¡Che tzalajxe'! Iku' se'nwe' machin tzajchq'o'ne' tu'n Nmane', ex ikxtzunwe' che kxe'l nchq'o'ne'. 22 Tetzun tb'aj tma'n ja'lu xit-xupi'n kyib'aj ex xitma'n kye: —Kyk'mome' Xewb'aj Xjan. 23 Aye'qeju' xjal kb'el knajsa'ne' kyil, kb'el tnajsa'n Dyos kyil, ex aye'tzunju' lay kub' knajsa'ne' kyil, lay kub'najset kyil.
Til Tomas Jesus matxitoq jatz anq'in
24 Atzunte Tomas aj nok q'o'n kyu'n xjal te yuẍ, jun kxolju' kab'lajoj t-xnaq'tzb'en Jesus mix-a'lotoq tej tpon Jesus. 25 Xi'tzun kma'n txqantl xnaq'tzb'en te: —Ma qile' Taye, chechij te. Atzunte Tomas xittzaq'we'n kye: —Qa minti' xwiljuye' tik'len klawẍ exqa minti' sokx nq'o'n nq'ob'e' kyoj ex toj ttxa'n tk'u'j txi' woksla'ne', chij kye. 26 Tb'ajlenxi'tzun wajxaq q'ij, b'aj kb'u'yi'n kyib' jumajtl xnaq'tzb'en, ex atitoq Tomas kyuk'i'l. Jpu'ntoqju' tjpel ja kyu'n atzunte Jesus okpin kxol, exi' tq'olb'e'n ex tma: —¡Che tzalajxe' ex qexi'x kk'u'je'! 27 Ex lwiyxi'x xiyolin te Tomas ex tma: —Q'onkxa twi' tq'ob'a toju' tik'len klawẍ; ex q'onkxa tq'ob'a toju' tik'len ch'ut toj nxuke'. Lalun tz'oka pi's; ¡okslanxa! 28 Xi'tzun ttzaq'we'n Tomas te: —¡Aya Taye ex Dyos Manb'aj! 29 Atzunte Jesus xitma'n te: —¿Ma matxi' toksla'na tu'nju' ẍin tila? ¡K'i'wlanqekye' xjal nxi' kyoksla'n extzun min xkyil!
Tiqu'n tz'ib'a'na'ju' u'j lu
30 Txqante b'a'nq'ob'aj tb'incha Jesus kwitzku' t-xnaq'tzb'en, naq aju' mixti' tz'ib'a'n toju' u'j lu. 31 Aye'qetzun b'a'nq'ob'aj ex techlal lu tz'ib'anqe' tu'ntzun txi' kyoksla'ne' qa a Jesukrist Tk'wal Dyos, ex tu'n tten kychwinqlale' qama che okslane' te.
Kub' tyek'u'ntib' Jesus kwitz wuq t-xnaq'tzb'en
1 Tb'ajlenxi'tzun ja'lu kub' tyek'u'n jumajtltib' Jesus kwitz t-xnaq'tzb'en ttziju' njab' Tib'eryas tb'i. Iktzun b'aja' kjalu: 2 Junxtoq ateqe' Simon Luch, tuk'i'l Tomas, aj nok q'o'n tb'i te yuẍ kyu'n xjal, ex tuk'i'l Natanael te Kana toj kaliley, exqe' tk'wal Seb'edey ex kab'e'tl xnaq'tzb'en. 3 Xitma'ntzun Simon Luch kyeju' tuk'i'l: —Machinxe' kyiẍil. Aye'tzunkye xikytzaq'we'n: —Ex ikxqe' maqo'xe' tuk'ila, chechij. Exi'tzuntz ex ejax tojun b'ark; ex mixti'xte' jun kyiẍ jatz kyu'n tb'aj qonik'an. 4 Tetzunj xi'toq qsqix, kub' tyek'u'ntib' Jesus kwitz ttziju' njab', aye'tzunkye' xnaq'tzb'en mixti' elkynik' qa a Jesus. 5 Atzunte Jesus xitqani'n kye: —Q'aye, ¿Ma matxi' che tzyet kyiẍ kyu'ne'? chij Aye'tzunkye xikytzaq'we'n te: —Mixti', chechij. 6 Xi'tzun tma'n Jesus kye: —Kq'onku'xe' tzyub'l kyiẍ toj tb'a'nq'ob'ju' b'ark, oktzun che tzyetel kyiẍtzu' kyu'ne', chij. Kyb'inchatzuntz se'nxju' xiq'ma'n kye, ex yajxi'tzuntel mixti'x b'ent tjatzju' pa kyu'n toj a' qu'n nojnitoq tu'n txqan kyiẍ. 7 Atzunju' jun xnaq'tzb'en k'u'jla'nxi'x tu'n Jesus, xitma'n te Luch: —¡Ate Tayeju' lu! Atzunte Luch tej tb'inte, oktq'o'n t-xb'alun, qu'n mixti'toq ti'j tok, ku'x tq'o'ntib' toj a'. 8 Aye'tzunju' jte'tl xnaq'tzb'en e'pon ttzi njab' tuk'ilju' b'ark jk'u'ntoqju' pa kyu'n, qu'n nojnitoq tu'n kyiẍ extzun jo'naq metrlo te'qekxa' tojxi' a'. 9 Tetzunj kyetz toj b'ark, xikyka'yi'n ttxalq'aq' atitoq, atokxtoq jun kyiẍ tib'aj ex wab'j. 10 Atzunte Jesus xitma'n kye: —Kyiq'intze' jte' kyiẍ kyi'ju' tzma ẍe tzyet kyu'ne'. 11 Atzunte Simon Luch jax toju' b'ark ex tzaj tjk'u'nju' pa nojni tu'n wuqnaq oxlajoj kyiẍ tzmax ttzi tx'otx', mixti' el laqju' pa maskyepe' txqanju' kyiẍ tku'x toj. 12 Ex xi'tzun tma'n Jesus kye: —Kuktzaje' ex che wanqe'ye'. Mix-a'lox jun xnaq'tzb'en xiqaninte te alkyetaq qu'n kanlitaq kwitz qa a Tayeju'. 13 Tzajtzun lq'e Jesus ex jaw ttzyu'nju' wab'j toj tq'ob' ex xitq'o'n kye; ex ikx tb'inchaju' kyi'ju' kyiẍ. 14 Toxi'n majtzuntz kub' tyek'u'ntib' Jesus kwitzju' t-xnaq'tzb'en tej tjawlenxi' anq'in.
Tyol Jesus te Simon Luch
15 Tetzunj kb'aj wan, xitqani'n Jesus te Simon Luch: —¿Ma nchin tk'u'jlanxi'xa kyekwitzju' lu? Aya Simon tk'wal Xwan. Atzunte Luch xittzaq'we'n: —Iku' Taye, ojtzqi'na'ta tu'n Taye qa inxi'x nk'u'jla'na. Xi'tzun tma'n Jesustz te: —K'ik'leniya kyi'ju' nrite'. 16 Xi'tzun tqani'n jumajtl Jesus te: —¿Ma axxi'x qa nchin tk'u'jla'na? Aya Simon tk'wal Xwan. Atzunte Luch xittzaq'we'n: —Iku' Taye, b'i'na' tu'na qa inxi'x nk'u'jla'na. Atzunte Jesus xitma'n te: —K'ik'leniya kyi'ju' nrite'. 17 Xitqani'n jumajtl Jesus toj toxmaji'n te: —¿Ma inxi'xtzun chin tk'u'jla'na? Aya Simon tk'wal Xwan. Atzunte Luch matxitoq tzaj b'is toj tanmi tu'nju' oxe' majku' xiqani'n te qa ntk'u'jla'n Jesus, xittzaq'we'n: —Taye, ojtzqi'nta tu'n tkyaqil: Ex ojtzqi'n tu'na qa inxi'x nk'u'jla'na. Xi'tzun tma'n jumajtl Jesus te: —K'ik'leniya kyi'ju' nrite'. 18 Axxi'x kxe'l nma'n teya qa tej ku'xinxtoqa, intoq nok tq'o'na t-xb'aluna ex nxi'ya jaxku'; ex ajtzun ttijina, naq juntel k'okyel q'onte t-xb'aluna, ex kxe'l q'i'na tu'n jamin tajb'iliya. 19 Tma Jesus ja'lu, tu'n txi' tchik'b'a'n te Luch se'ntoq kkyimela' ex tu'n tjaw tnimsa'nju' tb'i Dyos. Ex xitma'ntzuntz te: —¡Lpeka wi'je'!
Aju' xnaq'tzb'en k'u'jlanxi'x tu'n Jesus
20 Tetzunj tanjtz ka'yinti'j Luch ti'jxi' til qa lepchiktoqu' xnaq'tzb'en k'u'jlanxi'x tu'n Jesus, aju' okqe tk'etzxi'x Jesus toju' wan ti'j mes ex xitqani'n te Jesus kjalu: Taye, ¿Alkyetzunju' kjawil miltz'uj ti'ja? chij. 21 Tetzunj tlonte Luchju' xnaq'tzb'en lu, xitqani'n te Jesus: —Taye, yajtzunte' lu ¿Titi' kb'ajel ti'j? chij. 22 Atzunte Jesus xittzaq'we'n te: —Wajb'ilwe' tu'n tanq'in tzmaxi'j aj wul jumajtle', ¿Titi'ta toklen ti'j? Lpekta wi'je', chi Jesus. 23 Qu'mtzun kub'a' puql kxolju' okslal qa lay kyimtoqju' xnaq'tzb'en lu. Ex myate Jesusju' tma qa laytoq kyim. Ate tmaju': Qa wajb'ile' lay kyim, kukx tten aj wul jumajtle', ¿Titi'ta toklen ti'j?. 24 Axtzun xnaq'tzb'en ja'lu inq'mante tkyaqilju' ti'xti' lu, ex kyej ttz'ib'a'n. Extzun b'i'n qu'n qa ate' xnaq'tzb'en lu ntma'nju' axxi'x. 25 Ex txqantlju' ti'xti' tb'incha Jesus; txqanku', qu'n naqwit ku'x tz'ib'a'n junjunalchaq, jaku' layx che'x b'aju' u'j toj tkyaqil twitz tx'otx'.