Le t'aano' tu beetubáa máaquil
1 Le ca j chu'unpaj tuláacale', yanili' le t'aano'. Le t'aano' ti' yanili' tu yicnal Kue', leti'e' Kuli'e'. 2 Ti' u cáajbal túune', leti'e' ti' yanili' tu yicnal Kue'. 3 Tu yo'olal leti'e' Kue' tu beetaj tuláacal ba'al. Ti' le ba'alo'ob yano' mixba'al beeta'ab wa ma' tu yo'olal leti'. 4 Ti' leti' yanili' le cuxtalo', le cuxtalo' tu taasaj sáasil ti' máaco'ob. 5 Le sáasilila' cu léembal ich éekjoch'e'enil, le éekjoch'e'enilo' ma' páatac u tupqui'. 6 Yanji' jun túul máac túuxta'ab tumen Ku, u kaaba'e' Juan. 7 J taal u ti'al u ya'al u jaajil tu yo'olal le sáasilo', u ti'al ca ocsaj óolnac tuláacal máac tu yo'olal ba'ax cu ya'alic. 8 Juane' ma' leti' le sáasilo'. Leti'e' chéen jun túul máac túuxta'ab u ti'al t'aan tu yo'olal le sáasilo'. 9 Le jaajil sáasilo', le cu sáasilcuntic tuláacal máaco'obe', táan u kuchul yóolkolcaab. 10 Le T'aano' ti' yaan yóokolcaabe'. Quex tumen Ku tu beetaj yóokolcaab tu yo'olal leti'e', u máaquilo'ob yóokolcaabe' ma' tu kaj óoltajo'obi'. 11 J taal ti' jun p'éel yóokolcaab u ti'al, ba'ale' ma' j ka'am tumen le u ti'alo'obo'. 12 Ba'ale' yaan dze'edzec tu kamajo'ob yéetel tu yocsaj u yóolo'ob ti'. Tu dzaj páajtalil ti'ob u béeychajlo'ob u paalalo'ob Ku. 13 Lelo'oba' ma' beyo'ob je'el bix u paalalo'ob máac, cu síijilo'ob ti' u bakel máaque' wa tu yo'olal u dzíibolal wa máax máaquil, ba'ale' u paalalo'ob Ku. 14 Le t'aano' tu beetubáa máaquil ca j cajlaj ichilo'on. To'one' t ilaj u qui'ichquelemil, u qui'ichquelemil u jun túulili' u Paal le Taatao', chuup yéetel yaacunaj yéetel jaaj. 15 Juane' j t'aanaj tu yo'olal, ca tu ya'alaj: Lela' leti' le máax t'aanajen tu yo'olal, le ca tin wa'alaj: Le máax cu taal paachal ti' tene' leti' táanil ti' teen, tumen yanili'e' ma'ili' yanaquen tene'. 16 Tuláacalo'on dzo'oc c kamic ti' u ya'abcach ayikalilo'ob, siibal utzil yóokol siibal utzil. 17 Le a'almaj t'aano' j dza'ab tu yo'olal Moisés, le yaacunaj yéetel le jaajilo' j taalo'ob tu yo'olal Jesucristo. 18 Mix jun téen ila'ac Ku tumen mixmáac; ba'ale' u jun túulili' Paal, ti' yaan naadz tu pucsi'ikal le Taatao', leti' dzo'oc u ca'ansic to'on bix Ku.
Juan Bautistae' cu t'aan tu yo'olal Jesucristo
19 U judíoilo'ob Jerusalene' tu túuxtajo'ob aj kiino'ob yéetel levitaob u ti'al u káato'ob ti' Juan: ¿Teche' máaxech? 20 Leti'e' jach t'áalcab tu ya'aljilac: Ma' teen le Cristoo'. 21 Tu káat chi'ito'ob ti' tu ca'a téen: ¿Máaxech túun? ¿Teech wa aj bóobat Elías? Juane' ca tu ya'alaj: Ma' teni'. Cu dzo'ocole' ca tu káat chi'ito'ob ti': ¿Teech wa le aj bóobat bíin taalaco'? Leti'e' tu núucaj: Ma'. 22 Ca túun tu ya'alajo'ob ti' ¿Máaxech túun? Yaan c a'alic ba'ax ta núucaj to'on ti' le máaxo'ob túuxto'ono'. ¿Ba'ax ca wa'alic to'on ta wo'olal? 23 Juane' ca tu núucaj ti'ob: Tene' jun túul máax cu ka'am a'alic te x tocoy cúuchilo: Nu'ucbese'ex jun p'éel toj bej ti' Yuumtzil, je'el bix tu ya'alaj aj bóobat Isaiase'. 24 Le máaxo'ob j bino'ob t'aan yéetel Juane' j túuxta'abo'ob tumen le fariseobo', 25 ca tu káatajo'ob ti': Wa ma' teech le Cristoo', mix Elías, mix le aj bóobat, ¿ba'axten túun ca dzáic ocja'? 26 Juanae' tu ya'alaj ti'ob: Tene' quin dzáic ocja' yéetel ja', ba'ale' ichile'exe' yaan jun túul máac ma' a kaj óolexi'. 27 Paachil ti' teen cu taal, quex leti' táanil ti' teen. Tene' ma' táan in najmatic in wach'ic mix u táabil u xaanab. 28 Tuláacal lela' j úuch ti' le cúuchil cu kaaba'intic Betábara yaan tu j lakin u ja'il Jordán, tu'ux cu dzáic ocja' Juano'.
Jesús u j taman Yuum Ku
29 Ti' u jeel kiine' Juane' tu yilaj Jesús táan u náadzal tu yicnal, ca tu ya'alaj: Ile'ex, lela' u j taman Ku, máax cu lukesic u keban yóokolcaab. 30 Tu yo'olal leti' t'aanajen le ca tin wa'alaj: Paachil ti' teen cu taal jun túul máac leti' táanil ti' teen, tumen leti' yáax anchaj ma'ili' yanaquene'. 31 Tene' ma' in wojel ca'ach máaxi'. Ba'ale' taalaja'anen in dzáa ocja' yéetel ja' u ti'al ca kaj óolta'ac tumen u caajil Israel. 32 Juane' tu ya'alaj xan: Tene' tin wila u je'epajal ca'ane' yéetel u yéemel Quili'ich Pixan bey jun túul palomae' ca j p'áat tu yóokol. 33 Tene' la'ili ma' in wojel ca'ach máaxi', ba'ale' le máax j túuxten in dzáa ocja' yéetel ja'e' tu ya'alaj teen: Le quéen a wil u yéemel Quili'ich Pixan yéetel u p'atal yóokol jun túul máaque', leti' le máax cu dzáic ocja' yéetel Quili'ich Pixano'. 34 Tene' dzo'oc in wilic, le beetic quin jaajcuntique' leti' u Paal Ku.
U yáax aj canbalo'ob Jesús
35 Tu jeel kiine', Juane' ti' yaan tu ca'a téen te'elo' yéetel ca'a túul u aj tzaypacho'ob. 36 Le ca tu yilaj u máan Jesuse' tu ya'alaj: Ile'ex, leti' u j taman Ku. 37 Le ca'a túul u aj tzaypacho'ob Juano' tu yu'ubajo'ob u ya'alic lela', ca j bino'ob tu paach Jesús. 38 Jesuse' j paacatnaj paachil, le ca tu yilaj táan u tzaypachta'al tumeno'obe', ca tu ya'alaj ti'ob: ¿Ba'ax ca caxtique'ex? Leti'obe' tu ya'alajo'ob ti': Aj ca'anbesaj, ¿tu'ux caja'anech? 39 Jesuse' tu núucaj ti'ob: Co'otene'ex a wile'ex. J bino'ob túune' ca tu yilajo'ob tu'ux caja'an, ca tu máanso'ob u yala' le kiin tu yéetelo', tumen ta'aytac u bin kiin. 40 Ti' le ca'a túul tu yu'ubajo'ob Juane', tu tzaypachto'ob Jesús, jun túule' Andrés, u yíidzin Simón Pedro. 41 Ba'ax tu yáax beetaj Andrese' j bin u caxant Simón u sucu'une' ca tu ya'alaj ti': Dzo'oc nuptáantic le Mesíaso' (u káat u ya'ale' le Cristoo'). 42 Cu dzo'ocole' Andrese' tu bisaj Simón tac tu'ux yaan Jesús. Le ca j ila'ab tumen Jesuse' ca j a'ala'ab ti': Teche' Simonech, u paal Jonás, ba'ale' yaan a kaaba'intic Cefas (U káat ya'ale' Pedro).
Jesuse' cu t'anic Felipe yéetel Natanael
43 Tu jeel kiine' tu yóoltaj bin Jesús tu lu'umil Galilea, ca tu yilaj Felipee' ca tu ya'alaj ti': Tzaypach teni'. 44 Le Felipea' Betsaida u caajal, tu'uxilo'ob xan Andrés yéetel Pedro. 45 Felipee' j bin u caxant Natanael ca tu ya'alaj ti': Dzo'oc c ilic le máac tu yo'olal máax dzíibnaj Moisés ti' u dzíiba'an ju'unil le a'almaj t'aano', tu yo'olal máax dzíibnajo'ob xan le aj bóobato'obo'. Leti'e' Jesús, u paal José, ti' u caajil Nazaret. 46 Natanaele' tu ya'alaj: ¿Je'el wa u páajtal u jóokol ba'al ma'alob ti' u caajil Nazarete'? Felipee' tu núucaj ti': Co'oten a wile. 47 Le ca tu yilaj Jesús táan u nadzcubáa Natanaele' tu ya'alaj: Je'el cu taal jun túul jach Israelita, ti' máax mina'an tuus. 48 Natanaele' tu káataj túun ti': ¿Bix a kaj óolilen? Jesuse' tu ya'alaj ti': Ma'ili' u t'anech Felipee' tin wilajech culucbalech ca'ach yaanal jun cúul higo. 49 Natanaele' tu ya'alaj túun ti': Aj ca'anbesaj, teech u Paal Ku, teech u Ajawil Israel. 50 Jesuse' tu núucaj ti': ¿Ca wocsaj óoltiquen chéen tu yo'olal úuchic in wa'alic teech tin wilajech yáanal jun cúul higo? Bíin a ca'aj a wil ba'alo'ob mas nuuctac ti' lela'. 51 Jesuse' tu ya'alaj xan: Tu jaajil quin wa'alic ti' te'exe' yaan a wilique'ex je'ekab le ca'ano' yéetel u ángelo'ob Ku táan u na'acalo'ob yéetel táan u yéemelo'ob tu yóokol u Paal Máac.
Jun p'éel dzo'ocol beel Caná ti' Galilea
1 Tu yóox p'éel kiine' yanji jun p'éel dzo'ocol beel tu caajil Caná, ti' u lu'umil Galilea. U maama Jesuse' ti' yaan te'elo', 2 Jesús yéetel u aj canbalo'obe' j t'a'ano'ob xan te j dzo'ocol beelo'. 3 Xu'up le vinoo', ca j a'ala'ab ti' Jesús tumen u maama: Mina'an vino ti'ob. 4 Ba'ale' Jesuse' tu núucaj ti': Co'olel, ¿ba'ax teen ca wa'alic teen lelo'? Ma' kuchuc in kiinili'. 5 Ba'ale' u maamae' tu ya'alaj ti' le cu meyajo'obo' beete'ex tuláacal ba'ax cun u ya'al ti' te'ex. 6 Yaan te'elo' seis u p'éelel cáat tuunich, je'el bix le cu meyaj ti' le judíobo' u ti'al u p'o'icuba'obo'. Ti' jun p'éel cáate' je'el u bin míin ochenta wa cien litros ja'e'. 7 Jesuse' tu ya'alaj ti' le j meyajo'obo': Chupe'ex yéetel ja' le cáato'oba'. Ca tu túul chupto'ob. 8 Jesuse' tu ya'alaj túun ti'ob: Beora' jóokse'ex jun p'íiti', ca a bise'ex ti' u noj poolil le qui'imac óolalo'. Bey tu beetilo'ob. 9 U noj poolil le qui'imac óolalo' tu túuntaj le ja' dzo'oc u suut vinoilo', quex ma' u yojel tu'ux taali; chéen le j meyajo'ob u yojelo'obo', tumen leti'ob tu jóoksajo'ob le ja'o'. Bey túuno' le noj poolo' tu t'anaj le íichamtzilo' 10 ca tu ya'alaj ti': Tuláacal máaque' cu t'oxic táanil le ma'alob vinoo', le quéen ukulnac ya'ab le u'ula'obo', cu t'oxic le x ma' paatal vinoo'. Ba'ale' teche' a ta'acmaj le ma'alob vino tac bejla'. 11 Le ba'ax tu beetaj Jesús tu caajil Caná le Galileao' leti' le yáax chíiculal tu beetaj, táan u ye'esic u nojbe'enil; u aj canbalo'ob túune' tu yocsaj u yóolo'ob ti'. 12 Cu dzo'ocol lela', j bin tu caajil Capernaum, j láakinta'ab tumen u maama, u yíidzino'ob yéetel u aj canbalo'ob. Ca j yanji'ob dze'edzec kiin te'elo'.
Jesús cu Jóokesisc le j coonolo'ob ti' le kulnajo'
13 Tumen táan u náadzal u kiinbesajil u pascua le judíobo', Jesuse' j bin tu caajil Jerusalén. 14 Te'elo' tu yilaj te j kulnajo' le máaxo'ob táan u conico'ob wacaxo'ob, tamano'ob yéetel palomaob, bey xan tu yilaj le máaxo'ob culucbalo'ob tu cúuchil tu'ux cu kexico'ob taakin ti' le máaco'obo'. 15 Le ca tu yilaj lela', Jesuse' tu beetaj jun p'éel u suumil jadz ca tu láaj tojolch'intajo'ob ti' le kulnajo', pa'ate' yéetel u tamano'ob yéetel u wacaxo'ob. Ti' le máaxo'ob cu kexico'ob taakino' tu kitaj u taakino'obe' yéetel tu walkesaj u mayacche'ob. 16 Ti' le máaxo'ob cu conico'ob palomaobo' tu ya'alaj ti'ob: ¡Lukese'ex way le ba'alo'oba'! ¡Ma' a sutique'ex u najil in Taatae' jun p'éel u najil coonol! 17 J ka'aj túun ti' u aj canbalo'ob le Quili'ich Dzíib cu ya'alic beya': In yaacunaj tu yo'olal a najile' tu t'abaj in wóol. 18 Le judíob túuno' tu káatajo'ob ti': ¿Ba'ax chíiculal ca we'esic to'on u ti'al c kaj óoltic tu jaajil yaan teech páajtalil a beetic le ba'alo'oba'? 19 Jesuse' tu núucaj ti'ob: Jene'ex le kulnaja', ichil óox p'éel kiine' tene' quin líikesic tu ca'a téen. 20 Le judíobo' tu ya'alajo'ob túun ti': Cuarenta y seis ja'abo'ob dzo'oc u man táan u beeta'al le kulnaja'. ¿Teche' bíin ca'aj wa túun a líikes ichil chéen óox p'éel kiino'ob? 21 Ba'ale' le kulnaj cu ya'alic Jesuso' leti' le wíinclilo'. 22 Le o'olale' le ca j ca'a púut cuxlaj Jesús ti' le quimeno'obo' j ka'aj ti' u aj canbalo'ob le ba'ax tu ya'alaja', ca tu yocsaj óoltajo'ob le Quili'ich Dzíibo' bey xan le t'aano'ob u ya'almaj Jesús ti'obo'.
Jesuse' u kaj óol tuláacal máac
23 Le ca yanji' Jesús Jerusalén ti' u kiinbesajil le Pascuao', ya'ab máaco'ob tu yocsaj u yóolo'ob ti', le ca tu yilajo'ob le chíiculalo'ob cu beetico'. 24 Ba'ale' Jesuse' ma' tu kubaj u yóol ti'obi', tumen u láaj kaj óolo'ob. 25 Ma' kaabéet ca a'ala'ac ti' tumen mixmáac bix le máaco'obo', tumen leti'e' u yojel ba'ax yaan tu pucsi'ikal máac.
Jesús yéetel Nicodemo
1 Yanji jun túul fariseo u kaaba'e' Nicodemo, lela' jun túul ti' u nuuctaquil le judíobo'. 2 Nicodemoe' j bin u xíimbalt Jesús yéetel áakab, ca tu ya'alaj ti': Aj ca'anbesaj, c ojel Ku túuxtmailech u ti'al ca'ansaj, tumen mixmáac cu páajtal u beetic chíiculalo'ob je'el bix ca beetic techo' wa mina'an Ku tu yéetel. 3 Jesuse' tu ya'alaj ti': Tu jaajil, quin wa'alic ti' teche', le máax ma' tu síijil tu ca'a téene' ma' tu páajtal u yilic u ajawil Ku. 4 Nicodemoe' tu káat chi'itaj ti': ¿Bix je'el u páajtal u síijil tu ca'a téen jun túul máac dzo'oc u nojochtale'? ¿Je'el wa u páajtal u yocol tu jobnel u maama u ti'al u síijil tu ca'a téene'? 5 Jesuse' tu núucaj ti': Tu jaajil quin wa'alic ti' teche', le máax ma' tu síijil ti' ja' yéetel ti' Quili'ich Pixane' ma' tu páajtal u yocol tu ajawil Ku. 6 Le ba'ax cu síijil ti' lu'umcabil taataobe', lu'umcabil; le ba'ax cu síijil ti' Quili'ich Pixane', pixan. 7 Ma' u ja'akal a wóol tumen tin wa'alaj teech: Kaabéet a síijile'ex tu ca'a téen. 8 Le iiko' cu jóopsaj je'el tu'uxac u káate'; ca wu'uyic u juum, ba'ale' ma' a wojel tu'ux u taali' mix tu'ux cu bini'. Bey tuláacal le cu síijilo'ob ti' Quili'ich Pixano'. 9 Nocodemoe' tu káat chi'itaj tu ca'a téen: ¿Bix je'el u páajtal u yúuchul lela'? 10 Jesuse' tu núucaj ti': Teche' jun túul u nojoch aj ca'anbesajil Israel ¿ma' a wojel le ba'alo'oba'? 11 Tu jaajil tu jaajil quin wa'alic ti' teche', to'one' c a'alic le ba'ax c ojelo', yéetel c jaajcuntic le ba'ax c ilmao', ba'ale' te'exe' ma' táan a wocsaj óoltique'ex le ba'ax c a'alic ti' te'exo'. 12 Wa ma' ta wocsaj óoltiquene'ex le quéen in wa'al ti' te'ex u ba'alo'obil le yóokolcaaba' ¿bix can a wocsaj óoltene'ex le quéen in wa'al ti' te'ex u ba'alo'obil ca'an? 13 Mix máac na'ac te j ca'ano', chéen le máax éem ti' le ca'ano', u Paal Máac, le máax yaan te j ca'ano'. 14 Bey je'el bix Moisés tu líikesaj le can te x tocoy lu'umo', bey xan u Paal Máac yaan u líiksa'al, 15 u ti'al tuláacal le máax cu yocsic u yóol ti'e' ma' u sa'atal, ba'ale' ca yanac cuxtal mina'an u xuul ti'.
U yaacunaj Ku u ti'al yóokolcaab
16 Tumen Kue' tu sen yaabiltaj le yóokolcaaba, ca tu dzaj u jun túulili' a Paal, u ti'al tuláacal le máax cu yocsic u yóol ti'e' ma' u sa'atal, ba'ale' ca yanac cuxtal mina'an u xuul ti'. 17 Kue' tu túuxtaj u Paal yóokolcaab ma' u ti'al u xot kinti', ba'ale' u ti'al u toque. 18 Le máax cu yocsic u yóol ti' u Paal Kue', ma' xot kinta'ani', ba'ale' le máax ma' tu yocsaj óoltique', dzo'oc u xot kinta'al, tumen ma' tu yocsaj óoltaj u jun túulili' u Paal Kui'. 19 Le máaxo'ob ma' tu yocsaj óolalo'obe' dzo'oc u xot kinta'alo'ob, tumen le ca j taal le sáasil yóokolcaabo', asab utzchaj tu t'aano'ob le éekjoch'e'enilo' ti' le sáasilo', tumen táan u beetico'ob ba'al kaas. 20 Tuláacal le máax cu beetic ba'al kaase' cu p'ectic le sáasilo', yéetel ma' tu náadzal ti' le sáasilo', u ti'al ma' u chíicpajal le ba'al kaas cu beetico'. 21 Ba'ale' le máax cuxa'an tu bejil le jaajilo' cu náadzal ti' le sáasilo', u ti'al ca ila'ac ti' yaan Ku ti' ba'ax cu beetique'.
Juan Bautistae' cu t'aan tu ca'a téen tu yo'olal Jesús
22 Cu dzo'ocol lela', j bin Jesús yéetel u aj canbalo'ob tac tu lu'umil Judea. Tu beetaj dze'edzec kiin yéetelo'ob te'elo' táan u dzáic ocja'. 23 Bey xan Juan táan u dzáic ocja' Enón, naadz ti' Salim, tumen yaan ya'abcach ja' te'elo' cu taalo'ob le máaco'obo', cu dza'abal ocja' ti'ob. 24 Lela' j úuch ma'ili' ka'alac Juani'. 25 Dze'edzec túun ti' u j tzaypacho'ob Juane' jo'op' u ba'atel t'aano'ob yéetel dze'edzec judíob tu yo'olal le p'o'obailo'. 26 J bino'ob túun u ya'alo'ob ti' Juan: Aj ca'anbesaj, le máax yaan ca'ach ta wéetel tu lakin u ja'il Jordane', le máax ta wa'alaj to'one', beoraa' táan u dzáic ocja'; táan xan u láaj bino'ob tu paach. 27 Juane' tu ya'alaj ti'ob: Mix máac cu páajtal u yantal ba'al ti' wa ma' tu dza'abal ti' tumen Ku. 28 Te'exe' ta wu'uye'ex in t'áalcab a'alic ma' teen Cristoo' tene' chéen jun túul máac túuxta'anen tu táan leti'. 29 Ti' jun p'éel dzo'ocol beele' le máax kamic le atantzilo' leti' le íichamtzilo'. U amigo le íichamtzil yaan te'elo' yéetel cu yu'ubic ba'ax cu ya'alique' cu jach qui'imacchajal u yóol iquil cu yu'ubic. Bey xan teen cu qui'imacchajal in wóol bejela'e'. 30 Leti'e' yaan u nojochtal láaj kiin, ba'ale' tene' yaan in chichantal.
Le máax ca'anal u taale'
31 Le máax ca'anal u taale' yóokol tuláacal yaan. Le máax yóokolcaabile', lu'umcabil, yéetel cu ya'alic lu'umcabil ba'alo'ob. Ba'ale' le máax ca'an u taale' yóokol tuláacal yaan, 32 yéetel cu ya'alic ba'ax u yilmaj yéetel u yu'ubmaj, ba'ale' mixmáac ocsaj óoltic ba'ax cu ya'alic. 33 Ba'ale' wa yaan máax ocsaj óoltique', cu béeycuntic tan u ya'ala'al u jaajil tumen Ku. 34 Tumen le máax túuxta'an tumen Kue' cu ya'alic u t'aano'ob Ku, tumen Kue' cu dzáic u Quili'ich Pixan x ma' P'iisil. 35 Le Taatao' u yaabiltmaj le Paalo', yéetel u dzaamaj tuláacal ba'al tu kab. 36 Le máax cu yocsic u yóol ti' le Paalo' yaan cuxtal mina'an u xuul ti'. Ba'ale' le máax ma' u káat u yocsaj óolt le Paalo', ma' bíin yanac cuxtal ti'i', ba'ale' bíin u kam u yaayaj jadz Ku.
Jesús yéetel jun túul co'olel Samariail
1 Le fariseobo' kuch u yojéelto'ob mas ya'ab u aj tzaypacho'ob Jesús cu dza'abal ocja' ti'obe' que u aj tzaypacho'ob Juan. 2 Quex tu jaajile' Jesuse' ma' tu dzáic ocja', chéen u aj canbalo'ob. 3 Le ca tu yojéeltaj Jesús lela', jóok Judeae' u ti'al u binbal Galilea. 4 U ti'al u binbale' yanchaj u máan tu lu'umil Samaria. 5 J kuch túun ti' jun p'éel u caajil Samaria u kaaba'e' Sicar, naadz ti' le lu'um tu dzaj Jacob ti' José u paal. 6 Ti' yaan le ch'e'en cu ya'ala'al u ch'e'en Jacob. Jesuse' j culaj tu chi' le ch'e'eno' tumen ca'ana'an ti' u xíimbal míin chúumuc kiin. 7 J kuch túun ti' le ch'e'eno' jun túul co'olel u ti'al u jóoksic ja'. Jesuse' tu ya'alaj: Síiten ja' in wukej. 8 Le aj canbalo'obo' j bino'ob te j caajo' u ti'al u mano'ob janal. 9 Le co'olel samariailo' tu ya'alaj túun ti' Jesús: ¿Bix anil teech judíoeche' ca káatic ja' ti' teen samariailen? (Tumen le judíobo' ma'atech u biscuba'ob yéetel le samariailo'obo') 10 Jesuse' tu núucaj túun ti': Wa ca wojéelt ba'ax cu dzáic Kue', yéetel máax le cu káatic teech ja'e', jach tu jaajile' je'el a káatic ja' ti' tene', teen túune' je'el in dzáic teech cuxa'an ja'e'. 11 Le co'olelo' tu ya'alaj ti': Yuumtzil taam le ch'e'ena' mina'an teech ba'ax yéetel a jóoksic le ja'a'. ¿Tu'ux can a jóokes le cuxa'an ja' u ti'al a dzáic teno'? 12 C úuchben láak Jocobe' tu p'ataj to'on le ch'e'ena', tu'ux tu yukaj ja' leti', u paalal yéetel u yalak ba'alche'ob. ¿mas nojochech wa ti' leti'? 13 Jesuse' tu núucaj ti': Tuláacal le máaxo'ob cu yukico'ob le ja'a', yaan u ca'a ukajchajlo'ob. 14 Ba'ale' le máax cu yukic le ja' quin dzáic ti'o', yaan u tuul bey jun p'éel sayab ichil leti'e', u ti'al u dzáic cuxtal mina'an u xuul ti'. 15 Le co'olelo' tu ya'alaj túun ti': Yuumtzil, dzáa teen le ja'o', u ti'al ma' in ca'a ukajchajal, mix u yantal in suut way ti' le ch'e'ena' u ti'al in jóoksic ja'. 16 Jesuse' tu ya'alaj ti': Xeen a t'aan a wíichame', cu dzo'ocole' ca taaquech waye'. 17 Le co'olelo' tu núucaj ti': Mina'an in wíicham. Jesuse' tu ya'alaj túun ti': Jaj a t'aan. Mina'an a wíicham, 18 tumen cinco a wíichamo'ob dzo'oc u yantal, ba'ale' le máax yéetel yanech bejela'e' ma' a wíichami'. Jaaj ba'ax ta wa'alaj. 19 Le co'olelo' le ca tu yu'ubaj lela', tu ya'alaj ti': Yuumtzil táan in wilique' teche' aj bóobatech. 20 C úuchben láako'obe' tu kultajo'ob Ku way yóokol le pu'uca', ba'ale' te'exe' ca wa'alique'exe' Jerusalén u cúuchil tu'ux unaj u kulta'al. 21 Jesuse' tu núucaj ti': Co'olel ocsaj óolteni', táan u taal u kiinile' mix te pu'uca' mix Jerusalén can a kulte'ex le Taatao'. 22 Te'ex samariaile'exe' ma' a wojele'ex ba'ax ca kultique'exi', ba'ale' to'one' c ojel ba'ax c kultic, tumen le tocsajilo' ti' le judíob u taalo'. 23 Ba'ale' táan u taal u kiinil, lela' dzo'oc xan u kuchul, le quéen kulta'ac le Taatao' ti' Pixan yéetel ti' jaaj, tumen le máaxo'ob jach tu jaajil yóolo'ob cu kultico'obo'. Le Taata xano' bey u káat ca u beet le máaxo'ob kultico. 24 Kue' Pixan, le máaxo'ob kultic túuno' unaj u kultico'ob ti' pixan yéetel ti' jaaj. 25 Le co'olelo' tu ya'alaj ti': Tene' in wojel yaan u taal le Mesíaso', u káat ya'ale' le Cristoo'. Le quéen taalaque' yaan u ca'ansic to'on tuláacal ba'al. 26 Jesuse' tu ya'alaj ti': Teen, lelo' máax táan in t'aan ta wéetel. 27 Ti' le súutuca' j kucho'ob u aj canbalo'ob, ca ja'ak u yóolo'ob tumen táan u t'aan yéetel jun túul co'olel. Ba'ale' mix jun túul tu yóoltaj u ya'al ti' le co'olelo': ¿Ba'ax a káati'? wa ti' Jesús: ¿Ba'ax ca tzicbaltic tu yéetel? 28 Le co'olel túuno' tu p'ataj u p'uule' ca j bin ti' le caajo', ca tu ya'alaj ti' le máaco'obo': 29 Co'otene'ex a wile'ex jun túul máac dzo'oc u ya'alic teen tuláacal ba'ax in beetmaj. ¿Ma' leti' wa le Cristoo'? 30 Jóoko'ob túun ti' le caajo' ca j bino'ob tac tu'ux yaan Jesús. 31 Ca'aliquile' le aj canbalo'obo' tu káat óoltajo'ob ti' Jesús, táan u ya'alico'ob: Aj ca'anbesaj, jaant wa ba'ax. 32 Ba'ale' leti'e' tu ya'alaj ti'ob: Tene' yaan ba'al in jaant ma' a wojele'exi'. 33 Le aj canbalo'obo' jo'op' u káaticuba'ob tu baatzilo'ob: ¿Dzo'oc ta t'aan u taasa'al ba'al u jaant tumen wa máax? 34 Ba'ale' Jesuse' tu ya'alaj ti'ob: In janale' in beetic u yóolal le máax túuxteno', yéetel in dzo'ocsic u meyaj. 35 Te'exe' ca wa'alique'ex: Cu bineltic can p'éel winal u ti'al u yúuchul jooch; ba'ale' tene' quin wa'alic te'ex: Ile'ex, pacte'ex le pakalo'obo', tumen dzo'oc u kantalo'ob u ti'al jochbil. 36 Le máax cu jocho' cu kamic u bo'ol, yéetel le ba'ax cu jochico' u ti'al cuxtal mina'an u xuul, u ti'al ca múuch' qui'imacchajac u yóolo'ob le máax cu pakalo' bey xan le máax cu joocho'. 37 Tumen ba'al jaaj cu ya'alic le t'aana': yaanal máax cu pakal, yaanal máax cu jooch. 38 Tene' dzo'oc in túuxtique'ex jooch tu'ux ma' pakalnaje'exi'; tumen yaanal le meyajnajo'obo', te'ex túune' táan a ch'a'ique'ex u yutzil u meyajo'ob. 39 Ya'ab ti' u cajnáalilo'ob le caaj yaan Samariao', tu yocsaj u yóolo'ob ti' Jesús, tu yo'olal le ba'ax a'ala'ab ti'ob tumen le co'olelo', le ca tu ya'alaj: Tu ya'alaj teen tuláacal ba'ax in beetmaj. 40 Bey túuno', le ca j taal le samariailo'obo' tu káat óoltajo'ob ti' ca p'áatac tu yéetelo'ob, ca j p'áat Jesús ca'a p'éel kiin te'elo'. 41 Ya'ab u láak máaxo'ob ocsaj óolnajo'ob, le ca tu yu'ubajo'ob ba'ax cu ya'alic Jesús. 42 Ca tu ya'alajo'ob túun ti' le co'olelo': Beoraa' c ocsaj óoltic, ma' chéen tu yo'olal ba'ax ta wa'alaj to'oni', ba'ale' tumen to'one' t xiquinil dzo'oc u'uyic ba'ax cu ya'alic leti', yéetel c ojel jach tu jaajil leti' le Cristoo', u aj tocsaj yóokolcaab.
Jesús cu dzáic u toj óolal u paal jun túul jalach wíinic
43 Cu dzo'ocol u máan ca'a p'éel kiine', jóok Jesús Samariaie u ti'al u binbal tac tu lu'umil Galilea. 44 Tumen je'el bix tu ya'alaj Jesuse' jun túul aj bóobate' ma' tu yaabilta'al tu caajal. 45 Le ca j kuch te'elo' ka'am ma'alob tumen u cajnáalilo'ob Galilea, tumen j bino'ob xan ti' u kiinbesajil le Pascua tac Jerusaleno', te'elo' tu yilajo'ob tuláacal ba'ax tu beetaj Jesús tu kiinilo'ob le kiinbesajo'. 46 J suunaj Jesús Caná tu lu'umil Galilea, tu'ux tu sutaj vinoil le ja'o'. Jun túul u jalachil le ajawo', yaan jun túul u paal koja'an Capernaum. 47 Le jalacho' le ca tu yojéeltaj dzo'oc u kuchul Jesús Galilea lukic Judeae', j bin u yila'e', ca tu káat óoltaj ti' ca xi'ic tac tu yotoch ca u dzáa u toj óolal u paal, tumen ta'aytac u quíimil. 48 Jesuse' tu ya'alaj túun ti': Te'exe' ma' ta wocsaj óolale'ex wa ma' ta wilique'ex chíiculalo'ob yéetel jakbe'en meyajo'ob. 49 Ba'ale' le jalacho' tu ya'alaj ti': Yuumtzil co'oten tu séeblaquil, ma'ili' quíimic in paale'. 50 Jesuse' tu ya'alaj túun ti': Suunen ta wotoch. A paale' cuxa'an. Le máaco' tu yocsaj óoltaj ba'ax tu ya'alaj Jesuse' ca j bini. 51 Ta'aytac u kuchul tu yotoche', ca jóok u palitzilo'ob nuptáantique', ca tu ya'alajo'ob ti': Cuxa'an a paal. 52 Tu káataj túun ti'ob u yorail ca'aj jo'op' u yutztal u paal, ca j a'ala'ab ti': Jo'oljeac, míin launa kiin ca j síischaj u chocwil. 53 Le taatatzilo' tu yilaj túune' lela' u yorail iquil a'ala'abic ti' tumen Jesús: A paale' cuxa'an. Leti' yéetel tuláacal u yotoche' tu yocsaj óoltajo'ob túun Jesús. 54 Lela' u ca'a p'éel chíiculal tu beetaj Jesús le ca j suunaj Galilea líikic Judeae'.
Jesús cu dzáic u toj óolal jun túul máac túuch' u wíinclil yaan Betesda
1 Cu dzo'ocol lela' le judíobo' tu beetajo'ob jun p'éel kiinbesaj, ca j suunaj Jesús Jerusalén. 2 Ti' le caajo', naadz ti' le jool naj cu kaaba'intic u Jool naj le j tamano'obo', yaan jun p'éel u cúuchil ja' u kaaba' ich hebreoe' Betesda, yaan cinco u jool najilo'ob. 3 Yaan te'elo' ya'abcach koja'ano'ob chilicbalo'ob lu'um, ch'óopo'ob, móocho'ob yéetel paralitico'ob, táan u pa'atico'ob u péecsa'al le ja'o'. 4 Tumen yaan u kiinil cu yéemel jun túul ángel u péeques le ja'o'; le máax cun yáax ocol ichil le ja' cu dzo'ocol u péecsa'alo', cu yutztal ti' je'el ba'axac koja'anil yaan ti'e'. 5 Yaan túun te'elo' jun túul máac dzo'oc treinta y ocho ja'abo'ob koja'anchajac. 6 Jesuse' le ca tu yilaj le máac chilicbalo' ca tu na'ataj dzo'oc u yúuchtal anac beyo', ca tu káat chi'itaj ti': ¿A káat utztal? 7 Le koja'ano' tu núucaj ti': Yuumtzil, mina'an máax ocsiquen ichil le ja' quéen péecsa'aco'. Mantadz cu yúuchul le quéen in wóolt ocle', u láak cu yocol táanil ti' teen. 8 Jesuse' tu ya'alaj ti': Líiken, ch'a'a u nu'ucul a chital, xíimbanen. 9 Ti' le jun súutuco' utzchaj le máaco', tu ch'a'aj u nu'ucul u chitale' ca jo'op' u xíimbal. Ba'ale' tumen sábadoe' 10 le judíobo' tu ya'alajo'ob ti' le máax dza'ab u toj óolalo': Bejela'e' sábado; ma' utz a cuchic u nu'ucul a chitali'. 11 Le máaco' tu núucaj ti'ob: Le máax dzáa in toj óolalo' tu ya'alaj teen: Ch'a'a u nu'ucul a chital, xíimbanen. 12 Tu káatajo'ob túun ti': ¿Máax a'al teech: ch'a'a u nu'ucul a chital xíimbanen? 13 Ba'ale' me máaco' ma' u yojel máax dzáa u toj óolali', tumen yaan ya'abcach máaco'ob te'elo', Jesús xane' dzo'oquili' u bine'. 14 Cu dzo'ocole' j ila'ab tumen Jesús te j kulnajo', ca j a'ala'ab ti': Ile, beora' dzo'oc a wutztala', ma' a suut kebanchajal, u ti'al ma' u yúuchul teech u láak ba'al asab kaas. 15 Le máaco' j bine' ca tu ya'alaj ti' le judíobo' Jesús máax dzáa u toj óolal. 16 Le o'olale' le judíobo' jo'op' u ch'a'apachtico'ob Jesús yéetel tu yóoltajo'ob u quiimso'ob, tumen tu beetaj le ba'alo'oba' u ti'al sábado. 17 Ba'ale' Jesuse' tu ya'alaj ti'ob: In Taatae' tac bejela' táan u meyaja', bey xan teen táan in meyaj. 18 Le o'olale' le judíobo' jach tu tucultajo'ob u quiimso'ob, tumen ma' chéen cu dzáic jun tzéel u ya'almaj t'aanil sábadoi', ba'ale' cu queticubáa xan yéetel Ku iquil u ya'alic Ku u Taata.
U páajtalil u Paal Ku
19 Jesuse' tu ya'alaj túun ti'ob: Tu jaajil, tu jaajil quin wa'alic ti' te'exe', u Paal Kue' ma' tu páajtal u beetic mixba'al chéen túun jun yóolal. Chéen cu beetic le ba'ax cu yilic u beetic u Taatao'. Tuláacal ba'ax cu beetic le Taatao', bey xan le Paalo' cu beetic. 20 Tumen le Taatao' u yaabiltmaj le Paalo', le o'olale' cu ye'esic ti'e' tuláacal ba'ax cu beetic; yéetel bíin u ye'es ti'e' ba'alo'ob mas nuuctaco'ob, bíin ja'akac a wóole'ex tu yo'olal le ba'alo'oba'. 21 Tumen je'el bix le Taata cu caapúut cuxquintic le quimeno'ob yéetel cu dzáic cuxtal ti'obo', bey xan le Paalo' cu dzáic cuxtal ti' le máaxo'ob u káat u dzáe'. 22 Le Taatao' ma' tu p'is óoltic mix máac, tumen u dzaamaj ti' le Paalo' tuláacal páajtalil u ti'al u p'is óol, 23 u ti'al ca tzi'iquic le Paal tumen tuláacal máaco' je'el bix cu tziquico'ob le Taatao'. Le máax ma' tu tziquic le Paalo', ma' táan u tziquic le Taata máax túuxto'. 24 Tu jaajil tu jaajil, quin wa'alic ti' te'exe' le máax cu ch'en xiquint le ba'ax quin wa'alica' yéetel cu yocsaj óoltic máax túuxtene' yaan cuxtal mina'an u xuul ti': yéetel ma' bíin xot kinta'aqui', tumen dzo'oc u lukul ti' quíimil u ti'al u máan ti' cuxtal. 25 Tu jaajil tu jaajil quin wa'alic ti' te'exe', táan u taal u kiinil, dzo'oc xan u kuchul, le quéen u'uya'ac u t'aan u Paal Ku tumen le quimeno'obo'; le máaxo'ob cu yu'ubico'ob u t'ane' bíin cuxlaco'ob. 26 Tumen le Taatao' yaan páajtalil ti' u dzáic cuxtal, bey xan u dzaamaj páajtalil ti' le Paalo' u ti'al u dzáic cuxtal. 27 Dza'an xan páajtalil ti' u ti'al u p'is óol, tumen leti'e' u Paal Máac. 28 Ma' u ja'akal a wóole'ex tu yo'olal lela', tumen bíin kuchuc u kiinil le quéen u'uya'ac u t'aan tumen tuláacal le quimeno'obo' 29 yéetel bin jóokoco'ob ti' le mucnalo'obo'. Le máaxo'ob tu beetajo'ob utze', bin caapúut cuxlaco'ob u ti'al u yantal cuxtal ti'ob; ba'ale' le máaxo'ob tu beetajo'ob kaase', bíin caapúut cuxlaco'ob u ti'al ca xot kinta'aco'ob. 30 Tene' ma' tu páajtal in beetic mixba'al chéen tu juunal in wóol. Tene' quin p'is óol je'el bix cu ya'alic teen Kue' yéetel in p'is óole' ma'alob, tumen ma' táan in beetic le ba'ax in káate' ba'ale' le ba'ax u káat le Taata máax túuxteno'. 31 Wa teen jaajcuntic ba'ax quin wa'alique', le ba'ax quin wa'alico' ma' ma'alob jaajcunta'anili'. 32 Ba'ale' yaan u láak máax jaajcuntic tin wo'olal, tene' in wojel le ba'ax cu ya'alic tin wo'olalo' jach u jaajil. 33 Te'exe' ta túuxtaje'ex káatbil u chi' Juan, le ba'ax tu núucaj leti'o' jaaj. 34 Ba'ale' tene' ma' táan in kamic u jaajcunaj wa máax máaquil, chéen quin wa'alic lela' u ti'al ca páatac a to'ocle'ex. 35 Juane' bey jun p'éel sáasil cu yelel yéetel cu sáasilcunaje', te'ex túune' ta wóoltaje'ex a qui'imaccuns a wóole'ex ti' u sáasilil tu yo'olal jun p'íit kiino'ob. 36 Ba'ale' tene' yaan tin wo'olal jun p'éel jaajcunaj asab ma'alob ti' le tu ya'alaj Juano'. Le ba'alo'ob quin beetico', leti'e' ba'alo'ob tu kubentaj teen le Taata ca in beeto', leti'ob jaajcuntic jach tu jaajil túuxta'aben tumen le Taatao'. 37 Bey xan le Taata túuxteno' cu dzáic jaajcunaj tin wo'olal, quex mix jun téen a wu'uyme'ex u t'aan mix a wilme'exi'. 38 Ba'ale' u t'ane' ma' ococ ta pucsi'ikale'exi', tumen ma' ta wocsaj óoltique'ex le máax túuxta'an tumen le Taatao'. 39 Te'exe' ca xakaltique'ex le Quili'ich Dzíib yéetel chuca'an óolalo', tumen ca pa'atique'ex a caxtique'ex ti'obe' le cuxtal mina'an u xuulo', ba'ale' leti' le Quili'ich Dzíibo'ob cu t'aano'ob tin wo'olalo'. 40 Cu dzo'ocole' ma' a káate'ex taal ti' teen u ti'al ca yanac te'ex le cuxtalo'. 41 Tene' ma' táan in kamic tziquil cu taal ti' máaco'ob. 42 U láak ba'ale', tene' in kaj óole'ex yéetel in wojel ma' a yaabiltma'ex Kui'. 43 Tene' taalaja'anen tu kaaba' in Taata, ba'ale' te'exe' ma' táan a kamique'ex; wa ca taalac u láak máax chéen ti' u kaaba'e', leti'e' je'el a kamique'exe'. 44 ¿Bix je'el u páajtal u yantal te'ex ocsaj óolal, wa ca kamique'ex tziquil cu taal chéen ta baatzile'exe' yéetel ma' táan a caxtique'ex le tziquil cu taal ti' le jun túulili' Kuo'? 45 Ma' a tuclique'ex wa teen quin in tac a poole'ex tu táan in Taata; máax taquic a poole'exe' Moisés, ti' máax a dzaamajex a alab óolale'ex. 46 Tumen wa ca wocsaj óolte'ex ba'ax tu ya'alaj Moisese', je'el xan a wocsaj óoltiquene'exe', tumen Moisese' dzíibnaj tin wo'olal. 47 Ba'ale' wa ma' táan a wocsaj óoltique'ex ba'ax tu dzíibtaj leti'e', ¿bix can a wocsaj óolte'ex ba'ax quin wa'alic teen?
Jesús cu tzéentic cinco mil máaco'ob
1 Cu dzo'ocol lela', Jesuse' j bin tu táanxel tzéelil u ka'anabil Galilea, lela' láili' u ka'anabil Tiberiase'. 2 Ya'abcach máaco'ob j bin tu paach, tumen tu yilajo'ob le jakbe'en chíiculalo'ob tu beetaj, le ca tu dzaj u toj óolal le koja'ano'obo'. 3 J na'ac túun Jesús ti' jun p'éel pu'uque' ca j culaj yéetel u aj canbalo'ob te'elo'. 4 Dzo'oc u náadzal u kiinil le Pascuao', u kiinbesaj le judíobo'. 5 Le ca j paacatnaj Jesús ca tu yilaj ya'abcach máaco'ob cu taalo'ob tu paache', tu ya'alaj ti' Felipe: ¿Tu'ux je'el c manic janal u ti'al tuláacal le máaco'oba'? 6 Ba'ale' tu ya'alaj lela' u ti'al u yu'ubic ba'ax cun u ya'al Felipe, tumen Jesuse' u yojel ba'ax cun u beete. 7 Felipee' tu núucaj túun: Doscientos denarios waaje' ma' tu dzáic mix u ti'al ca u kamo'ob quex chéen jun p'íiti'. 8 Andrés, u láak jun túul ti' u aj canbalo'obe' máax u yíidzin Simón Pedroe' tu ya'alaj ti': 9 Je'el jun túul chan xi'ipal yaan cinco u waajil cebada ti'a' yéetel ca'a túul cay; ba'ale' lela', ¿ba'ax u biilal u ti'al buca'aj máaco'ob? 10 Jesuse' tu ya'alaj túun: A'ale'ex ti' tuláacal ca culaco'ob. Yaan ya'abcach su'uc ti' le cúuchilo', ca j culajo'ob míin cinco mil máaco'ob. 11 Jesuse' tu ch'a'aj túun le waaj tu kabo', cu dzo'ocol u dzáic nib óolal ti' Kue', tu dzaj ti' u aj canbalo'ob, u aj canbalo'obe' túune' tu t'oxajo'ob ichil le máaxo'ob culucbalo'obo'. Bey tu beetilac yéetel le cayo'obo', ca tu dzáa ti'ob je'el buca'aj u káato'obe'. 12 Le ca j na'ajchajo'obe' Jesuse' tu ya'alaj ti' u aj canbalo'ob: Mole'ex le u xéexet'al j p'áato', u ti'al ma' u pu'ulul mix ba'al. 13 Tu molajo'ob, ca tu chupajo'ob doce xaaco'ob yéetel u xéexet'al j p'áat ti' le cinco u waajil cebadao'. 14 Le máaco'ob túuno', le ca tu yilajo'ob le jakbe'en chíiculal tu beetaj Jesuso', tu ya'alajo'ob: Tu jaajil le máaca' leti' le aj bóobat unaj u taal yóokolcaaba'. 15 Ba'ale' le ca tu kaj óoltaj Jesús jach u káat bisbil yéetel muuk tumen le máaco'ob u ti'al beetbil ajawo' ca j bin tu juunal tu ca'a téen ti' u ca'anlil le pu'uco'.
Jesús cu xíimbal yóokol ja'
16 Le ca j áakabchaje' u aj canbalo'ob Jesuse' j éemo'ob tac tu jáal le ka'anabo', 17 j ooco'ob ti' jun p'éel cheeme' ca jo'op' u ch'actico'ob le ka'anabo' u ti'al u bino'ob tac Capernaum. Dzo'oc u éekjoch'e'enchajal, láili' ma' suunac Jesusi'. 18 Cáaj túun u jóopsaj jun p'éel ka'amcach iik yéetel u líikil u cuclil le ja'o'. 19 Cu dzo'ocol u náachtalo'ob míin jun lúub ca'a tac táancoche', tu yilajo'ob táan u náadzal Jesús ti' le cheemo', xíimbalil u taal tu yóokol le ja'o', ca sajacchajo'ob. 20 Ba'ale' leti'e' tu ya'alaj ti'ob: ¡Teen, ma' a ch'a'ique'ex sajaquil! 21 Leti'obe' tu kamajo'ob yéetel qui'imac óolal te j cheemo', séeba'an túun kuchico'ob tac ti' le lu'um tu'ux cu bino'obo'.
Le máaco'obo' cu caxtico'ob Jesús
22 Tu jeel kiine' le máaco'obo' j p'áato'ob ti' u láak jun tzéel le ka'anabo' tu yilajo'ob u bin le aj canbalo'ob ti' le jun p'éelili' cheem yaan ca'ach te'elo', tu yilajo'ob xan ma' j bin Jesús tu yéetelo'obi'. 23 Ca'aliquile' u láak cheemo'ob Tiberias u taalo'obe' j kucho'ob naadz ti' le cúuchil tu'ux tu jaantajo'ob le waaj cu dzo'ocol u dza'abal nib óolal tumen Yuumtzilo'. 24 Bey túuno', le ca tu yilaj le máaco'ob mina'an Jesús mix u aj canbalo'ob te'elo', j ooco'ob ti' le cheemo'oba' ca j bino'ob tac Capernaum u caxto'ob Jesús.
Jesús u waajil cuxtal
25 Le ca j kucho'ob ti' u láak jun tzéel le ka'anabo', tu caxtajo'ob Jesús ca tu káat chi'ito'ob ti': Aj ca'anbesaj, ¿Ba'ax kiin ca j kuchech waye'? 26 Ba'ale' Jesuse' tu ya'alaj ti'ob: Tu jaajil, tu jaajil, quin wa'alic ti' te'exe' táan a caxtiquene'ex tumen na'ajchaje'ex le ca jaane'exe', ma' tumen dzo'oc a na'atique'ex le jakbe'en chíiculalo'obo'. 27 Ma' a meyaje'ex tu yo'olal le janal cu xu'ululo' ba'ale' tu yo'olal le janal cu xáantalo' yéetel cu dzáic te'ex cuxtal mina'an u xuul. Lela' leti' le janal bíin u dzáa te'ex u Paal Máac, tumen Ku le Taatao' tu dzáa u páajtalil tu yóokol le Paalo'. 28 Tu káatajo'ob túun ti': ¿Ba'ax unaj c beetic u ti'al c dzo'ocbesic le ba'alo'ob u káat Ku ca c beeto'? 29 Jesuse' tu núucaj ti'ob: Le ba'ax u káat Ku ca a beete'exo', leti' lela', ca a wocsaj óolte'ex le máax u túuxtmao'. 30 Tu káatajo'ob túun ti': ¿Ba'ax chíiculal cu páajtal a we'esic ti' to'on u ti'al ca c ila'e' yéetel ca c ocsaj óoltech? ¿Ba'ax ba'alil ca beetic? 31 C úuchben láako'obe' tu jaantajo'ob le mana' te x tocoy lu'umo' je'el bix cu ya'alic le Quili'ich Dzíibo': Kue' tu dzáa u waajil ca'an u jaanto'ob. 32 Jesuse' tu núucaj ti'ob: Tu jaajil tu ja'il quin wa'alic ti' te'ex: Moisese' ma' tu dzáa te'ex u waajil ca'ani', ba'ale' in Taata máax dzáic te'ex u jaajil waajil ca'an. 33 Tumen le waaj cu dzáic Kuo' leti' le waaj ca'an u taalo' yéetel cu dzáic cuxtal ti' le yóokolcaabilo'obo'. 34 Tu ya'alajo'ob túun ti': Yuumtzil, dzáa to'on mantadz le waajo'. 35 Jesuse' tu ya'alaj ti'ob: Teen le waaj cu dzáic cuxtalo'. Le máax cu taal ti' tene', mix bikin bíin wi'ijchajac. Yéetel le máax cu yocsic u yóol ti' tene' mix bikin bíin ukajchajac. 36 Ba'ale' je'el bix dzo'oc in wa'alic ti' te'exe', te'exe' ma' táan a wocsic ta wóole'ex quex dzo'oc a wilquene'ex. 37 Tuláacal ba'ax cu dzáic teen le Taatao' cu taal ti' teen; yéetel le máax cu taal ti' tene' ma' táan in tojolch'intic. 38 Tumen tene' ma' j luken ca'an ca taalaquen in beet ba'ax in káati', ba'ale' u ti'al in beet ba'ax u káat le máax túuxteno'. 39 Le ba'ax u káat in Taata máax túuxteno' ma' ca in sat mix jun túul ti' tuláacal le máaxo'ob u dzaamaj teno', ba'ale' ca in ca'a púut cuxquinto'ob tu dzo'oc kiin. 40 Ba'ax u káat le máax túuxteno' leti' lela', tuláacal le máaxo'ob cu pactico'ob u Paal Ku yéetel cu yocsic u yóolo'ob ti'e' ca yanac cuxtal mina'an u xuul ti'ob. Teen túune' yaan in caapúut cuxquintico'ob tu dzooc kiin. 41 Tu yo'olal lela', le judíobo' cáaj u ya'alico'ob ba'al ti' Jesús, tumen tu ya'alaj: Tene' leti' le waaj ca'an u taalo'. 42 Ca tu ya'alajo'ob: ¿Lela' ma' wa Jesús u paal José? To'one' c kaj óol u taata yéetel u maama. ¿Bix túun u ya'alic ca'an u taal? 43 Jesuse' tu ya'alaj túun ti'ob: P'at a wa'alique'ex ba'al. 44 Mix máac cu páajtal u taal ti' teen wa ma' tu taasa'al tumen le Taata máax túuxteno'; tene' yaan in caapúut cuxquintic tu dzo'oc kiin. 45 Ti' u dzíibo'ob le aj bóobato'obo' cu ya'ala'al beya': Bíin ca'ansa'ac tuláacal máac tumen Ku. Bey túuno' tuláacal máac cu yu'ubic u t'aan le Taatao', yéetel cu canbal ti' leti'e', cu taal ti' teen. 46 Ma' tumen wa yaan máax dzo'oc u yilic le Taatao'; le jun túulili' máax ilmaile' leti' le máax ti' Ku u taalo'. 47 Tu jaajil tu jaajil quin wa'alic te'ex, le máax cu yocsic u yóol ti' tene' yaan cuxtal mina'an u xuul ti'. 48 Teen le waaj cu dzáic cuxtalo'. 49 A úuchben láake'exe' tu jaantajo'ob le mana' te x tocoy lu'umo', ba'ale' quex beyo' j quíimo'ob. 50 Ba'ale' tene' táan in t'aan tu yo'olal le waaj ca'an u taalo', u ti'al ma' u quíimil le máax jaantico'. 51 Teen le cuxa'an waaj ca'an u taalo' le máax cu jaantic le waaja' bíin cuxlac mantadz. Le waaj quin in dzáo' in wíinclil. Quin in dza'e' u ti'al u cuxtal yóokolcaab. 52 Le judíob túuno' jo'op' u ba'atel t'aano'ob tu baatzilo'ob, táan u ya'alico'ob: ¿Bix je'el u páajtal le máaca' u dzáic to'on jach u wíinclil u ti'al ca c jaante? 53 Jesuse' tu ya'alaj ti'ob: Tu jaajil, tu jaajil quin wa'alic ti' te'ex, wa ma' ta jaantique'ex u wíinclil u Paal Máac yéetel ca wukique'ex u ki'ikele', mina'an cuxtal ti' te'ex. 54 Le máax cu jaantic in wíinclil yéetel cu yukik in ki'ikele' yaan cuxtal mina'an u xuul ti', yéetel tene' bíin in caapúut cuxquint tu dzo'oc kiin. 55 Tumen in wíinclile' u jaajil janal, yéetel in ki'ikele' u jaajil ukul. 56 Le máax cu jaantic in wíinclil yéetel cu yukik in ki'ikele' cuxa'an mantadz ti' teen, bey xan teen ti' leti'. 57 Le Taata máax túuxteno' yaan cuxtal ti', tene' cuxa'anen tu yo'olal. Bey xan le máax cu jaantiquene' bíin cuxlac tin wo'olal. 58 Táan in t'aan tu yo'olal le waaj ca'an u taalo'. Leti' le waaj ma' je'el bix le mana' tu jatajo'ob le a úuchben láake'exo', tumen quex tu jaantajo'obe' j quíimo'ob. Le máax cu jaantic le waaja' bíin cuxlac mantadz. 59 Jesuse' tu ca'ansaj le ba'alo'oba' tu sinagogail Capernaum.
U t'aanilo'ob cuxtal mina'an u xuul
60 Le ca tu yu'ubajo'ob le ca'ansaja' ya'ab ti' u tzaypacho'ob Jesuse' tu ya'alajo'ob: Le ba'ax cu ya'alica' jach talam u ka'amal. ¿Máax je'el u páajtal u yu'ubique'? 61 Jesuse' tu kaj óoltaj táan u tutuc chi'ob tu yo'olal ba'ax tu ca'ansaje', ca tu ya'alaj ti'ob: ¿Kaas u lúubul ti' te'ex lela'? 62 ¿Ba'ax je'el u yúuchul túun wa ca a wile'ex u na'acal u Paal Máac tac tu'ux yaan ca'acho'? 63 Le pixano' leti' cu dzáic cuxtal, le bako' mix ba'al u biilal. Le ba'alo'ob dzo'oc in wa'alic ti' te'exa' u ba'alo'obil pixan cu dzáico'ob cuxtal. 64 Ba'ale' láili' yaan dze'edzec ti' te'ex ma' táan a wocsaj óolale'exe'. Tumen Jesuse' u yojlili' tu yáax chuun máaxo'ob le ma' tu yocsaj óolalo'obo', bey xan máax cun kubic. 65 Ca tu ya'alaj: tu yo'olal lela' tin wa'alaj ti' te'ex mix máac cu páajtal u taal ti' teen wa ma' táan u taasa'al tumen le Taatao'. 66 Ti' le kiino', ya'ab ti' máaxo'ob cu tzaypachtico'ob ca'ach Jesuso' tu cúulpachcuntajo'ob ca jáaw u máano'ob tu yéetel. 67 Jesuse' tu káat chi'itaj ti' u doce aj canbalo'obe': ¿Tac wa te'ex a káate'ex bin? 68 Ba'ale' Simón Pedroe' tu núucaj ti': Yuumtzil, ¿Ti' máax je'el u páajtal c bine'? A t'aano'obe' u t'aanilo'ob cuxtal mina'an u xuul. 69 To'one' dzo'oc c ocsaj óoltic, yéetel c ojel teche; leti' le Cristoo', u Paal le cuxa'an Kuo'. 70 Jesuse' tu núucaj ti'ob: ¿Ma' wa teen yéeye'ex ta doceile'exi'? Cu dzo'ocole' jun túul ti' te'exe' kasilba'al. 71 Le ca tu ya'alaj lela', Jesuse' j t'aanaj tu yo'olal Judas Iscariote, tumen Judas cun kubic, quex leti' jun túul ti' le doce aj canbalo'obo'.
U yíidzino'ob Jesuse' ma' tu yocsic u yóolo'ob ti'
1 Cu dzo'ocol lela', Jesuse' xíimbalnaj Galilea. Ma' tu yóoltaj yantal Judeai', tumen te'elo' u káat quiimsbil tumen le judíobo'. 2 Ba'ale' naadz u kiinil u kiinbesico'ob cajlajico'ob ti' máacano'obe', lela' jun p'éel ti' u kiinbesajilo'ob le judíobo'. 3 Le o'olale' u yíidzino'obe' tu ya'alajo'ob ti': Ma' a p'áatal waye'. Xeen Judea, u ti'al ca ila'ac ba'ax ca beetic tumen le aj canbalo'ob yano'ob te'elo'. 4 Tumen wa yaan máax u káat ca kaj óolta'aque' ma' tu muclic ba'ax cu beetic. Wa táan a beetic le ba'alo'oba', beet tu táan tuláacal yóokolcaab. 5 Tumen mix u yíidzino'ob u yocsmaj u yóolo'ob ti' leti'. 6 Jesuse' tu ya'alaj túun ti'ob: In kiinile' ma' kuchuqui', ba'ale' a ti'al te'exe' je'el máacalmáac kiinile' ma'alob. 7 Yóokolcaabe' ma' tu páajtal u ch'a'ap'ectique'ex, ba'ale' tene' cu ch'a'a p'ectiquen, tumen tene' quin beetic u yila'al jach kaas ba'ax cu beetic. 8 Xeene'ex te'ex te j kiinbesajo'; tene' ma' táan in bini', tumen ma' kuchuc in kiinili'. 9 Cu dzo'ocol u ya'alic ti'ob lela', j p'áat Galilea.
Jesuse' cu bin ti' u kiinbesajil le macano'obo'
10 Ba'ale' cu dzo'ocol u bin u yíidzino'obe', Jesuse' j bin xan ti' le kiinbesajo', quex ma' tu táan máaco'obi' ba'ale' ta'acbe'enbáil. 11 Le judíobo' jo'op' u caxantico'ob Jesús te j kiinbesajo', táan u ya'alico'ob: ¿Tu'ux yaan le máaco'? 12 Ichil le máaco'obo' ya'ab táan u t'aano'ob tu yo'olal Jesús. Dze'edzeque' cu ya'alico'ob: Leti'e' jun túul ma'alob máac, ba'ale' u láako'obe' cu ya'alico'ob: Ma' beyi', tumen táan u tusic máaco'ob. 13 Ba'ale' mix máac cu jéechcab t'aan tu yo'olal, tumen sajaco'ob ti' le judíobo'. 14 Tu táan chúumuc anil le kiinbesajo' ca j ooc Jesús kulnaj, ca jo'op' u ca'ansaj. 15 Le judíobo' jaka'an u yóolo'ob táan u ya'alico'ob: ¿Bix u yojéeltmail buca'aj ba'alo'ob le máaca' quex ma' xoocnaja'ani'? 16 Jesuse' tu núucaj ti'ob: In ca'ansaje' ma' in ti'ali' ba'ale' u ti'al le máax túuxteno'. 17 Wa yaan máax u káat u beet le ba'ax u káat Kue', bíin u kaj óolt wa ti' Ku cu taal in ca'ansaj wa chéen tu juunal in wóol quin t'aan. 18 Le máax cu t'aan chéen tu juunal u yóole', cu beetic chéen u ti'al ca tzi'iquic tumen máaco'ob, ba'ale' le máax cu beetic u tzi'iquil le máax túuxto', leti'e' cu ya'alic ba'al jaaj, yéetel mina'an tuus ti' leti'. 19 ¿Ma' wa jaaj Moisés dzáa te'ex le a'almaj t'aano'? Cu dzo'ocole' mix jun túul ti' te'ex dzo'ocbesic le a'almaj t'aano'. ¿Ba'axten a káat a quiimsene'ex? 20 Le máaco'obo' tu núucajo'ob ti': Oca'an kaakas pixan ti' teech. ¿Máax u káat u quiimsech? 21 Jesuse' tu ya'alaj ti'ob: Tu yo'olal chéen jun p'éel ba'al tin beetaj ti' sábadoe', ca láaj ja'akal a wóole'ex. 22 Ba'ale' Moisese' tu dzaj ti' te'ex le súutkuptajo' (quex ma' leti' cáajsi', ba'ale' a úuchben láakale'ex); le o'olale' te'exe' ca súut kutique'ex jun túul chaan pale' quex ti' sábado. 23 Le beetique' u ti'al ma' u mamba'alcunta'al u ya'almaj t'aan Moisese' te'exe' ca súut kuptique'ex jun túul chaan pale' quex sábado, ¿ba'axten túun ca kuuxile'ex tin wéetel tumen tin dzáa toj óolal tuláacal u wíinclil jun túul máac ti' sábado? 24 Ma' a p'is óole'ex chéen tu yo'olal le ba'ax cu yila'al tu yóok cabil ba'alo'ob, ba'ale' p'is óolnene'ex yéetel toj tuucul.
Jesuse' cu ya'alic tu'ux u taal
25 Dze'edzec túun ti' le máaxo'ob caja'ano'ob Jerusaleno' jo'op' u káatico'ob: ¿Ma' wa leti' le máax táan u caxta'al u ti'al quiimsbilo'? 26 Tumen táan u ca'ansaj tu táan caaj te'elo', cu dzo'ocole' mix máac a'alic mixba'al ti'. ¿Dzo'oc ta t'aan u kaj óoltic le jalach wíinico'obo' jach tu jaajil le máaca' leti' le Cristoo'? 27 Ba'ale' to'one'; c ojel tu'ux u taal lela', u jela'anile', le quéen taalac le Cristoo', mix máac cun ojéeltic tu'ux u taal. 28 Jesuse' táan u ca'ansaj te j kulnajo', ca tu ka'am a'alaj: ¡Bey túuno' a kaj óolene'ex yéetel a wojele'ex tu'ux in taal! Ba'ale' ma' taalaja'anen chéen tu juunal in wóoli', j taalen tumen túuxta'aben tumen jun túul máax chuca'an u yóol, le máaxa' te'exe' ma' a kaj óole'exi'. 29 Tene' in kaj óol, tumen leti' in taal, yéetel leti' túuxten. 30 Tu yóoltajo'ob túun u bis u kalo'ob, ba'ale' mix máac mache tumen ma' kuchuc u kiini'. 31 Ba'ale' ya'ab máaco'ob tu yocsaj u yóolo'ob ti', ca tu ya'alajo'ob: Le quéen taalac le Cristoo' ¿bin u ca'aj u beet asab ya'ab chíiculalo'ob ti' le cu beetic le máaca'?
Le fariseobo' tu túuxtajo'ob palitzilo'ob u ti'al machic Jesús
32 Le fariseobo' tu yu'ubajo'ob ba'ax cu ya'alic le máaco'ob tu yo'olal Jesuso', ca tu nupuba'ob yéetel le u nuuctaquil le aj kiino'obo' ca tu túuxtajo'ob palitzilo'ob u ti'al machic Jesús. 33 Jesuse' tu ya'alaj túun ti'ob: Bin in ca'aj antal ta wéetele'ex chéen jun p'íit kiino'ob, cu dzo'ocole' yaan in suut ti' le máax túuxteno'. 34 Te'exe' bíin a caxtene'ex, ba'ale' ma' bíin wilene'exi', tumen ma' tu páajtal a bine'ex tac tu'ux quin bin. 35 Le judíob túuno' jo'op' u káatico'ob tu baatzilo'ob: ¿Tu'ux je'el u bin le máaca' u ti'al ma' c caxtique'? ¿Je'el wa u bin ti' le judíob t'i'it'paja'ano'ob ichil le griego'obo', u ti'al u ca'ansic le griego'obo'? 36 ¿Ba'ax u káat u ya'al le tu ya'alaj to'ono': Bíin a caxtene'ex, ba'ale' ma' bíin a wilene'exi', tumen ma' tu páajtal a bine'ex tac tu'ux quin bin?
U sayabilo'ob cuxa'an ja'
37 U dzo'oc kiin le kiinbesajo' lela' leti' u asab nojochil. Ti' le kiino' j wa'alaj Jesuse' ca tu ka'am a'alaj: Wa yaan máax ukaje', taalac ti' teen ca ukulnac. 38 Je'el bix cu ya'alic le Quili'ich Dzíibo' yaan u yantal u sayabilo'ob cuxa'an ja' tu pucsi'ikal le máax cu yocsaj óoltiqueno'. 39 Jesuse' tu yóoltaj u ya'al lelo', bíin u kamo'ob Quili'ich Pixan tuláacal le máaxo'ob cu yocsic u yóolo'ob ti' leti'e'. Tumen ma'ili' taalac le Quili'ich Pixano'; tumen Jesuse' ma' nojbe'encunta'aqui'.
Le máaco'obo' cu jatzicuba'ob
40 Dze'edzec ti' le máaco'obo', le ca tu yu'ubajo'ob lela', tu ya'alajo'ob: Tu jaajile' le máaca' leti' le aj bóobat unaj u taalo'. 41 U láako'obe' tu ya'alajo'ob: Lela' leti' le Cristoo'. Ba'ale' u láako'obe' tu ya'alajo'ob: ¿Galilea wa bíin taalac le Cristoo'? 42 Le Quili'ich Dzíibo' cu ya'alique' le Cristoo' ti' u ch'i'ibal David bíin taalac yéetel Belén bíin síijic, tumen lela' u caajal David. 43 Bey túuno' le máaco'obo' tu jatzláantuba'ob tu yo'olal Jesús. 44 Yaan dze'edzec ti'obe' tu yóoltajo'ob u mach u biso'ob, ba'ale' mix máac beete.
Le jalach wíinico'obo' ma' táan u yocsic u yóolo'ob ti' Jesús
45 Le palitzilo'obo' j suunajo'ob tac tu'ux yaan le fariseobo' yéetel u nuuctaquil le aj kiino'obo', lelo'oba' tu káat chi'ito'ob ti'ob: ¿Ba'axten ma' ta taase'exi'? 46 Le palitzilo'obo' tu núucajo'ob: Mix jun téen t'aanac mix máac je'el bix u t'aan le máaco'. 47 Le fariseobo' tu ya'alajo'ob túun ti'ob: ¿Tac te'ex dzo'oc a cha'ique'ex a tu'usule'ex? 48 ¿Dzo'oc wa u yocsaj óolta'al tumen wa máax ti' le c nuuctaquilo'obo', wa ti' le fariseobo'? 49 Ba'ale' le máaco'oba', tumen ma' u kaj óolo'ob le a'almaj t'aano', yáanal loolob t'aan yano'ob. 50 Nicodemo' jun túul ti' le fariseobo' le máax j bin u yil Jesús yéetel áakabe', tu ya'alaj: 51 C a'almaj t'aane' cu ya'alique' ma' tu páajtal c xot kintic jun túul máac, wa ma' táanil kaabéet c u'uyic u ti'al c ojéeltic ba'ax u beetmaj. 52 Tu núucajo'ob túun ti': ¿Galileailech wa xan? Xakalt le Quili'ich Dzíibo'obo' ca a wila'e' mix jun túul aj bóobat taalaja'an ti' Galilea.
Le nupkeban co'olelo'
53 Bey túuno' jujun túule' j bin tu yotoch.
1 Ba'ale' Jesuse' j bin tu pu'uquil Olivo'ob. 2 Ti' u jeel kiine le ca j sáaschaje', j suunaj kulnaj. Tuláacal le máaco'obo' tu nadzuba'ob ti', leti'e' j culaji' ca jo'op' u ca'ansico'ob. 3 U aj ca'anbesajilo'ob le a'almaj t'aano' yéetel le fariseobo' tu taasajo'ob jun túul co'olel j chu'uc tan u nup keban. Tu dzajo'ob chúumuc ti' le máaxo'ob yano'ob te'elo' 4 ca tu ya'alajo'ob ti' Jesús: aj ca'anbesaj, le co'olela' j chu'uc jach tu yorail táan u nup kebanchajal. 5 U ya'almaj t'aan Moisese' cu ya'alic to'on ca muruxtunta'ac le co'olelo'ob beyo'oba'. Teche' ¿Ba'ax ca wa'alic? 6 Lela' tu ya'alajo'ob táan u túuntico'ob u yóol, u ti'al ca yanac ba'ax o'olal u taquico'ob u pool. Jesuse' j chinlaj túun ca jo'op' u dzíib te j lu'umo' yéetel u yaal u kab. 7 Ba'ale' tumen láili' táan u káatico'ob ti'e', tu líiksaj u yiche' ca tu ya'alaj ti'ob: Je'el máacalmáac ti' te'ex mina'an u kebane', u ch'in u yáax tuunich tu yóokol. 8 Ca j chinlaj dzíib tu ca'a téen te j lu'umo'. 9 Ba'ale' leti'obe', le ca tu yu'ubajo'ob lela', lúub u yóolo'ob tumen tu tuclajo'ob ba'ax u beetmo'ob, ca jóoko'ob jujun túulil, cáajic yéetel u mas nuxibilo'ob. Le ca láaj jóoko'obe', Jesuse' j p'áat chéen tu juunal yéetel le co'olelo', máax wa'alacbal te'elo'. 10 Le ca tu líiksaj u yich Jesuse', mix máac u láak tu yilaj chéen le co'olelo' ca tu ya'alaj ti': Co'olel, ¿Tu'ux yano'ob le máaxo'ob cu taquico'ob a pool ca'acho'? ¿Mix jun túul tu xot kintechi'? 11 Leti'e' tu ya'alaj ti': Ma', Yuumtzil, mix jun túul. Jesuse' tu ya'alaj túun ti': Mix teen quin xot kintiquech. Xeen ma' a suut kebanchajal.
Jesús u sáasil yóokolcaab
12 Jesuse' t'aanaj tu ca'a téen yéetel le máaco'obo' ca tu ya'alaj ti'ob: Teen u sáasil yóokolcaab, le máax cu tzaypachtiquene' bíin yanac sáasil cu dzáic cuxtalo', yéetel mix bikin bíin máanac ti' éekjoch'e'enil. 13 Le fariseobo' tu ya'alajo'ob túun ti': Teche' táan a t'aan chéen ta wo'olal, a t'ane' mixba'al u biilal. 14 Jesuse' tu núucaj ti'ob: In t'ane' yaan ba'ax u biilal, quex teen ca in wa'al tin wo'olal. Tumen tene' in wojel tu'ux taalen yéetel tu'ux quin bin. Ba'ale' te'exe' ma' a wojele'ex tu'ux taalen mix tu'ux quin bin. 15 Te'exe' ca p'is óole'ex je'el bix u p'is óol yóokolcaabe'. Tene' ma' táan in p'is óoltic mix máac. 16 Ba'ale' wa quin p'is óole', tu beel quin in beete tumen ma' táan in p'is óol tin juunal, le Taata máax túuxteno' cu p'is óol jun múuch' tin wéetel. 17 Ti' a wa'almaj t'aane'exe' dzíiba'an wa ca'a túul jaajcunajo'ob cu ya'alico'ob jun p'éelili' ba'ale', unaj u yocsaj óolta'al ba'ax cu ya'alico'ob. 18 Ma'alob túun, tene' jun túulen ti' le jaajcunajo'ob tin wo'olalo', le Taata máax túuxteno' leti' le u láak jun túul jaajcunajo'. 19 Tu káat chi'ito'ob túun ti': ¿Tu'ux yaan a Taata? Jesuse' tu núucaj ti'ob: Te'exe' ma' a kaj óolene'exi', mix in Taata a kaj óole'ex. Wa ca kaj óoltene'exe', je'el xan a kaj óoltique'ex in Taatae'. 20 Jesuse' tu ya'alaj le ba'alo'oba' ca'aliquil táan u ca'ansaj te j kulnajo', tu'ux dza'an u nu'uculilo'ob siibalo'ob. Ba'ale' mix máac mache, tumen ma' kuchuc u kiinili'.
Te tu'ux quin bino' te'exe' ma' tu páajtal a bine'exi'
21 Jesuse' tu ya'alaj ti'ob tu ca'a téen: Tene' táan in bin, te'ex túune' bíin a caxtene'ex, ba'ale' bíin quíimque'ex ichil a kebane'ex. Tumen te tu'ux quin bino' te'exe' ma' tu páajtal a bine'exi'. 22 Le judíobo' tu ya'alajo'ob túun: ¿Bin u ca'aj wa u quiimsubáa, le o'olal cu ya'alic: Te tu'ux quin bino' te'exe' ma' tu páajtal a bine'exi'? 23 Jesuse' tu ya'alaj ti'ob: Te'exe' cabalile'ex, tene' ca'analilen. Te'exe' yóokolcaabile'ex, ba'ale' tene' ma' yóokolcaabileni'. 24 Le o'olal tin wa'alaj ti' te'exe' bin quíimque'ex ichil a kebane'ex, tumen wa ma' ta wocsaj óoltique'ex wa teen le máaxen teno', bíin quíimque'ex ichil a kebane'ex. 25 Tu káatajo'ob túun ti': ¿Máaxech teech? Jesuse' tu núucaj ti'ob: Dzo'oc in wa'alic ti' te'ex tu yáax chuun. 26 Ya'ab ba'alo'ob yaan in wa'al yéetel in p'is óolt ta wo'olale'ex, ba'ale' le máax túuxteno' cu ya'alic ba'al jaaj. Le ba'alo'ob in wu'uymaj u ya'alic leti'o' le quin wa'alic ti' yóokolcaab. 27 Ba'ale' leti'obe' ma' tu na'atajo'ob wa tan u t'aan tu yo'olal le Taatao'. 28 Le o'olal tu ya'alaj ti'ob: Le quéen a líikese'ex u Paal Máaque', bíin túun a kaj óolte'ex máaxen teen. Bíin a wile'ex xan tu jaajil tene' ma' tin beetic mixba'al chéen tu juunal in wóolal. Ba'ale' quin wa'alic chéen le ba'ax tu ca'ansaj teen le Taatao'. 29 Tumen le máax túuxteno' ti' yaan tin wéetele'. In Taatae' ma' u p'atmajen tin juunali', tumen tene' mantadz quin beetic le ba'ax utz tu t'ano'. 30 Le ca tu ya'alaj Jesús lela', ya'ab máaxo'ob tu yocsaj u yóolo'ob ti'.
U paalalo'ob Ku yéetel u palitzilo'ob le kebano'
31 Jesuse' tu ya'alaj túun ti' le judíob dzo'oc u yocsic u yóolo'ob ti'o': Wa ca p'áatale'ex ti' le ba'axo'ob quin wa'alic ti' te'exa', jach tu jaajile' te'exe' in aj canbale'ex. 32 Bíin a kaj óolte'ex le jaajo', le jaaj túuno' bíin u jáalkabte'ex. 33 Leti'obe' tu núucajo'ob ti': To'one' u ch'i'ibalo'on Abraham yéetel mix jun téen palitzilta'aco'on tumen mix máac. ¿Bix a wa'alic teech yaan c jáalkabta'al? 34 Jesuse' tu ya'alaj ti'ob: Tu jaajil tu jaajil quin wa'alic ti' te'ex, tuláacal máax cu kebanchajle' palitzilta'an tumen le kebano'. 35 Jun túul palitzile' ma' tu p'áatal mantadz ichil láaktzilo'ob. 36 Bey túuno' wa le Paal cu jáalkabtique'exe' jach tu jaajil jáalkabe'ex. 37 In wojel te'exe' u ch'i'ibale'ex Abraham, ba'ale' a káat a quiimsene'ex, tumen ma' táan a kamique'ex ba'ax quin wa'alic ti' te'ex. 38 Tene' quin wa'alic le ba'ax u ye'esmaj teen in Taatae', te'exe' ca beetique'ex le ba'ax cu ya'alic te'ex a taataexo'. 39 Leti'obe' tu núucajo'ob ti': C taatae' Abraham. Jesuse' tu ya'alaj ti'ob: Wa tu jaajil Abraham a taataexe', je'el a beetique'ex le ba'ax tu beetaj leti'o'. 40 Ba'ale', quex dzo'oc in wa'alic ti' te'ex le jaaj tu ca'ansaj teen Kuo', te'exe' a káat a quiimsene'ex. ¡Abrahame' mix jun téen tu beetaj ba'al beyo'! 41 Te'exe' ca beetique'ex le ba'ax cu beetic a taataexe'. Leti'ob túune' tu ya'alajo'ob ti': To'one', ma' síijo'on ti' nupkebani' jun túulili' taata yaan ti' to'on, lela' Ku. 42 Jesuse' tu ya'alaj túun ti'ob: Wa tu jaajil Ku a taataexe' je'el a yaabiltiquene'exe', tumen tene' taalaja'anen ti' Yuum Ku yéetel way yanene'. Ma' j taalen chéen tu juunal in wóolali' ba'ale' Ku túuxten. 43 ¿Ba'axten ma' tu páajtal a na'atique'ex ba'ax quin wa'alic? Tumen ma' a káat a wu'uye'ex in ca'ansaji'. 44 Te'exe' u ti'ale'ex kasilba'al, tumen leti' a taataex. Le o'olale' a káat a beete'ex le ba'ax u káat leti'o'. Kasilba'ale' jun túul quiimsaj wíinic tu yáax chuun, Mix jun téen u ch'a'a u muuk ti' le jaajo', yéetel mix bikin cu ya'alic u jaajil. Le quéen tuusnaque' cu t'aan je'el bix leti'e', tumen leti'e' jun túul j tuus yéetel u taata le tuuso'. 45 Ba'ale' tumen táan in wa'alic u jaajile' te'exe' ma' ta wocsaj óoltiquene'ex. 46 ¿Máax ti' te'ex cu páajtal u ye'esic wa yaan wa ba'ax kebanil ti' teen? Wa táan in wa'alic u jaajile' ¿Ba'axten ma' ta wocsaj óoltiquene'ex? 47 Le máax u ti'al Kue' cu yu'ubic u t'aan Ku. Te'exe' ma' a káat a wu'uye'ex u t'aani' tumen ma' u ti'ale'ex Kui'.
Cristoe' yanji' táanil ti' Abraham
48 Le judíobo' tu ya'alajo'ob túun ti': Ti' u jaajil yano'on le ca t a'alaj samariailech yéetel yaan jun túul kaakas pixan ti' teech. 49 Jesuse' tu núucaj ti'ob: Mina'an mix jun túul kaakas pixan ti' teen. Ba'ax quin beetique' in tziquic in Taata, te'ex túune' ma' ta tziquiquene'ex. 50 Tene' ma' in káat ca a tziquiltene'exi', quex yaan máax u káat ca tziquilta'aquen, leti' xan cu p'is óol. 51 Tu jaajil tu jaajil quin wa'alic ti' te'ex, le máax cu dzáic u yóol ti' ba'ax quin wa'alique' mix bikin cun quíimil. 52 Le judíobo' tu núucajo'ob túun ti': Bejela' jach tu jaajil c ojel yaan jun túul kaakas pixan ti' teech. Abraham yéetel tuláacal le aj bóobato'obo' j quíimo'ob, ba'ale' teche' ca wa'alic: Le máax cu dzáic u yóol ti' ba'ax quin wa'alique' mix bikin cun quíimil. 53 ¿Mas nojochech wa ti' c taata Abraham? leti'e' j quíimi, le aj bóobato'obo' j quíimo'ob xan. ¿Máaxech ca tuclicabáa? 54 Jesuse' tu núucaj ti'ob: Wa teen quin tzijquinbáa tin juunale' in tziquile' mixba'al u biilal. In Taata máax tziquiquen, le máax ca wa'alique'ex a Kue'exo'. 55 Ba'ale' te'exe' ma' a kaj óole'exi'. Tene' in kaj óol. Wa ca in wa'al ma' in kaj óole', táan in tuus je'el bix te'exe'. Ba'ale' tene' jach tu jaajil in kaj óol, yéetel quin dzáic in wóol ti' ba'ax cu ya'alic. 56 Abraham le a úuchben láake'exo', j qui'imacchaj u yóol tumen bin u ca'aj u yil in kiinil. Tu yilaj xan, ca j chu'up u pucsi'ikal yéetel qui'imac óolal. 57 Le judíobo' tu ya'alajo'ob túun ti' Jesús: Mina'an mix cincuenta a ja'abilo'ob ¿cu dzo'ocole' ca wa'alic ta wila Abraham? 58 Jesuse' tu núucaj ti'ob: Tu jaajil tu jaajil quin wa'alic ti' te'ex, ma'ili' síijic Abrahame', yanili'en tene'. 59 Tu ch'a'ajo'ob tuunicho'ob túun u ti'al u ch'inico'ob Jesús, ba'ale' leti'e' tu baluba'e' ca jóok ti' le kulnajo'. Ca j máan chúumuc ti'obe', ca j bini'.
Jesuse' cu dzáic u paacat jun túul máac ch'óop síijic
1 Ca'aliquil táan u máan Jesuse' tu yilaj jun túul máac ch'óop síijic. 2 U aj ca'anbesajo'ob túune' tu káat chi'ito'ob ti': Aj ca'anbesaj ¿Ba'axten ch'óop síijic le máaca'? ¿Tu yo'olal u keban u taataob, wa tu yo'olal u keban leti'? 3 Jesuse' tu núucaj ti'ob: Ma' tu yo'olal u kebani' mix tu yo'olal u keban u taataobi'. Ba'ale' j úuch lela' u ti'al ca chíicbesa'ac ti' leti'e' le ba'ax cu páajtal u beetic Kue'. 4 Ca'aliquil yéetel kiine', tene' yaan in beetic u meyaj le máax túuxteno', tumen táan u taal le áakabo' quéen p'áatac mix máac cu páajtal u meyaj. 5 Ca'aliquil ti' yanen way yóokolcaabe', teen u sáasil yóokolcaab. 6 Cu dzo'ocol u ya'alic lela', Jesuse' j túubnaj lu'um, ca tu beetaj jun p'íit luk yéetel le túubo', ca tu ji'ikabtaj tu yich le ch'óopo'. 7 Ca tu ya'alaj ti': Xeen a p'o'abáa tu cúuchil u ja'il Siloé, jun p'éel kaaba' u káat u ya'ale' Túuxta'an. Le ch'óopo' j bini' ca tu p'o'ojubáa; le ca suunaje' cu páajtal u paacat. 8 Le caja'ano'ob naadzo' yéetel le máaxo'ob u yilmajo'ob ch'óope tu ya'alajo'ob: ¿Ma' wa leti' le máax cu cutal ca'ach u káat siibalo'obe'? 9 Yaan dze'edzec cu ya'alique': Bey leti'. U láako'obe' cu ya'alico'obe': Ma' leti'i, ba'ale' chica'an ti'. Ba'ale' le máaco' tu ya'alaj: Bey, leti'en. 10 Ca tu káatajo'ob ti': ¿Bix yanil cu páajtal a paacat? 11 Leti'e' tu núucaj: Le máac Jesús u kaaba'e' tu beetaj luk, ca tu ji'ikabtaj tin wich ca tu ya'alaj teen: Xeen tu cúuchil u ja'il Siloé ca a p'o'abáa. J binen túun, le ca tin p'o'inbae' ca j páatji' in paacat. 12 Káata'ab túun ti': ¿Tu'ux yaan le máaco'? Leti'e' tu ya'alaj ti'ob: Ma' in wojeli'.
Le fariseobo' cu kático'ob u chi'le máac ch'óop ca'acho'
13 J bisa'ab túun le máac ch'óop ca'acho' tu táan le fariseobo'. 14 Ba'ale' le kiin tu beetaj le luk ca tu dzáa u toj óolal le j ch'óopo' ti' u kiinil sábado. 15 Tu ca'a káato'ob túun le fariseob ti' le máaco' bix yanil cu páajtal u paacat. Leti'e' tu ya'alaj ti'ob: tu dzáa luk tin wicho'ob ca tin p'o'inbáa, bejela'e' quin paacat. 16 Dze'edzec túun ti' le fariseobo' tu ya'alajo'ob: Le máac tu beetaj lela' ma' ti' Ku taalaja'ani, tumen ma' tu kiinbesic sábadoi. Ba'ale' u láako'obe' tu ya'alajo'ob: ¿Bix je'el u páajtal u beetic le nucuch chíiculalo'ob wa jun túul keban máac? Ca yanji' jatzlantáambail ichilo'ob. 17 Ca tu ca'a káato'ob ti' le máac ch'óop ca'acho': ¿Teche', ba'ax ca wa'alic tu yo'olal le máac tu dzaj ti' teech u sáasil a wicho'? Leti'e' tu ya'alaj: Tene' quin wa'alique' jun túul aj bóobat. 18 Ba'ale' le judíobo' ma' u káat u yocsaj óolto'ob wa tu jaajil ch'óop síijic le máaco' yéetel cu páajtal u paacat bejela'e', ca tu t'anajo'ob u taataob le máac ch'óop ca'acho' 19 ca tu káat chi'ito'ob ti'ob: ¿Leti' wa le a paal ca wa'alique'ex ch'óop síijica? ¿Bix yanil cu páajtal u paacat bejela'e'? 20 Le taatatzilo'obo' tu núucajo'ob: To'one; c ojel c paal lela' yéetel ch'óop síijic, 21 ba'ale' ma' c ojel bix yanil cu páajtal u paacat bejela'e', mix c ojel máax dzac u yichi'. Káate'ex ti', dzo'oc u nojoch máactal, leti' je'el u páajtal u ya'alic te'exe'. 22 U taataobe' tu ya'alajo'ob lela' tumen sajaco'ob, Tumen le judíobo' dzo'oc u múuch' tucultico'obe' u jóoksico'ob ti' le sinagogao' je'el máax ca u ya'al Jesús le Cristoo'. 23 Le o'olale' u taataobe' tu ya'alajo'ob: Káate'ex ti', tumen dzo'oc u nojoch máactal. 24 Le judíob túuno' tu ca'a t'aano'ob le máac ch'óop ca'acho' ca tu ya'alajo'ob ti': A'al to'on u jaajil tu táan Ku, to'one' c ojel j keban le máaco'. 25 Leti' túune' tu núucaj ti'ob: Tene' ma' in wojel wa j kebani' wa ma'. Chéen jun p'éel ba'al in wojel tene' ch'óopen ca'achi, bejela'e' quin paacat. 26 Tu káatajo'ob ti' tu ca'a téen: ¿Ba'ax tu beetaj teech? ¿Bix tu beetil u ti'al u dzáic teech u sáasil a wich? 27 Tu núucaj ti'ob: Dzo'oc in wa'alic ti' te'ex, ba'ale' ma' ta wóoltaj a wu'uye'exi'; ¿Ba'ax teen a káate'ex ca in wa'al tu ca'a téen? ¿A káate'ex xan a beetaba'ex u aj canbalo'ob? 28 Tu loolob t'antajo'ob túun ca tu ya'a'lajo'ob ti': Teche' u aj canbalech le máaco', ba'ale' to'one' u aj canbalo'on Moisés. 29 To'one' c ojel Kue' t'aanaj yéetel Moisés, ba'ale' lela' mix c ojel tu'uxili'. 30 Le máac túuno' tu núucaj ti'ob: ¡Jach jela'an le ba'ax ca wa'alique'exa'! te'exe' ma' a wojele'ex tu'uxili', cu dzo'ocole' ti' tene' tu dzáa in paacat. 31 jach ma'alob c ojlil Kue' ma' tu yu'ubic le j keban máaco'obo', chéen cu yu'ubic le máaxo'ob tziquico' yéetel cu beetico'ob ba'ax u káati'. 32 Ti' buca'aj kiin cáajac yóokolcaabe' mix jun téen u'uya'ac u dza'abal u sáasil u paacat jun túul máac ch'óop síijic. 33 Wa le máac ma' taalaja'an ti' Kua', mixba'al je'el u páajtal u beetique'. 34 Tu ya'alajo'ob túun ti': Teche' síijech chuupech yéetel keban. Cu dzo'ocole' ¿A káat a ca'anso'on? Ca tu jóokeso'ob ti' le Sinagogao'.
Máaco'ob ch'óopo'ob ti' u pixano'ob
35 Jesuse' tu yojéeltaj dzo'oc u jóokesa'al le máac ch'óop ca'acho', ca j bin u caxante ca tu ya'alaj ti': ¿Ca wocsic a wóol ti' u Paal Ku? 36 Le máaco' tu ya'alaj ti': Yuumtzil, a'alten máaxi', u ti'al ca in woques in wóol ti'. 37 Jesuse' tu núucaj ti': Dzo'oc a wilic, leti' le máax cu t'aan ta wéetela'. 38 Le máac túuno' tu ya'alaj ti': Yuumtzil, quin wocsic in wóol ti', ca j xolaj tu táan Jesús. 39 Cu dzo'ocole' Jesuse' tu ya'alaj: Tene' taalen ti' le yóokolcaaba' u ti'al ca p'is óolta'ac máaco'ob, u ti'al ca paacatnaco'ob le ch'óopo'obo', yéetel u ti'al ca ch'óopaco'ob le cu paacato'obo'. 40 Dze'edzec túun ti' le fariseob yano'ob tu yicnale', le ca tu yu'ubajo'ob lela', tu káato'ob ti': ¿Tac wa to'on ch'óopo'on beya'? 41 Jesuse' tu núucaj ti'ob: Wa ch'óope'exe' bejela'a' mina'an a cuche'ex tu yo'olal a kebane'exe'. Ba'ale', tumen ca wa'alique'ex ca paacate'exe' yaan a si'ipile'ex.
U queet t'aanil u cúuhcil tu'ux cu ka'ala'al j tamano'ob
1 Tu jaajil, tu jaajil, quin wa'alic ti' te'ex, le máax ma' tu yocol tu jool najil tu'ux cu ka'alal j tamano'obe', ba'ale' cu yocol táanxel tu'uxe', jun túul j ocol yéetel loolob máac. 2 Ba'ale' le máax cu yocol tu jool najile' leti' le máax canantic le j tamano'obo'. 3 Le j canan jool najo' cu je'ic le jool naj ti'o' u ti'al ca ococ, bey xan le j tamano'obo' cu kaj óoltico'ob u t'aan. Cu t'anic u j tamano'ob yéetel u kaaba'ob u ti'al u jóokesico'ob. 4 Cu dzo'ocol u jóokesic tuláacal u j tamano'obe' cu xíimbal táanil ti'ob; le j tamano'obo' cu bino'ob tu paach tumen u kaj óolo'ob u t'aan. 5 Ba'ale' ma' tu bino'ob tu paach jun túul máac ma' u kaj óolo'obi'; ba'ax cu beetico'obe' cu púudzulo'ob ti', tumen ma' u kaj óolo'ob u t'aan yaanal máaqui'. 6 Jesuse' tu ya'alaj ti'ob le queet t'aana', ba'ale' leti'obe' ma' tu na'atajo'ob ba'ax tu jo'oltaj u ya'ali'.
Jesús le ma'alob aj canan tamano'
7 Jesuse' tu ca'a a'alaj ti'ob túun: Tu jaajil, tu jaajil quin wa'alic ti' te'ex: Teen le jool naj tu'ux cu yocol le j tamano'obo'. 8 tuláacal le j taalo'ob táanil ti' tene' j oocolo'ob yéetel loolob máaco'ob, ba'ale' ma' u'uya'ab u t'aano'ob tumen le j tamano'obo'. 9 Teen le jool najo'; le máax cu yocol ti' tene' bíin to'ococ, yéetel bíin béeychajac je'el bix jun túul j taman cu yocol yéetel cu jóokol u ti'al u caxtic u janal. 10 Le j oocolo' chéen cu taal u ti'al oocol, quiimsaj yéetel xu'ulsaj, ba'ale' tene' taalaja'anen u ti'al ca yanac cuxtal ti'ob, cuxtal ca jach ya'abac ti'ob. 11 Teen le ma'alob aj canan tamano'. Le ma'alob aj canan tamano' cu dzáic u cuxtal tu yo'olal u j tamano'ob. 12 Ba'ale' le máax cu meyaj chéen tu yo'olal le bo'olalo', le quéen u yil u taal le kaakas ba'alche'o' cu p'atic le j tamano'obo' u ti'al u púudzul, tumen ma' leti' le aj canan tamano' yéetel le j tamano'obo' ma' u ti'ali'. Bey túuno' le kaakas ba'alche'o' cu jáanpaytic yéetel cu t'i'it'besic le j tamano'obo'. 13 Le máaca' cu púudzul tumen chéen cu meyaj tu yo'olal le bo'olalo', u ti'al leti'e' mixba'al le j tamano'obo'. 14 Teen le ma'alob aj canan tamano'. In kaj óol in tamano'ob, le in ti'alo'obo' u kaj óoleno'ob xan, 15 je'el bix in Taata u kaj óoleno', yéetel in kaj óol in Taatao'. Tene' quin dzáic in cuxtal tu yo'olal le j tamano'obo'. 16 Yaan teen xan u láak j tamano'ob mina'ano'ob ti' le cúuchila': yaan in taasico'ob xan. Leti'obe' yaan u yu'ubico'ob in t'aan, yaan u yantal jun p'éelili' u múuch'ul j tamano'ob yéetel jun túulili' aj canan taman. 17 Le Taatao' u yaamaen tumen quin dzáic in cuxtal u ti'al in kamic tu ca'a téen. 18 Mix máac cu lukesic in cuxtal ba'ale' teen dzáic tu juunal in wóolal. Yaan teen páajtalil in dzáic bey xan yaan teen páajtalil u ti'al in kamic tu ca'a téen. Bey tu ya'aljilac teen in Taata. 19 Le judíobo' le ca tu yu'ubajo'ob le t'aano'oba' tu jatzuba'ob tu ca'a téen. 20 Ya'ab ichilo'obe' tu ya'alajo'ob: Yaan jun túul kaakas pixan ti' yéetel choco u pool. ¿Ba'axten ca wu'uyique'ex u t'aan? 21 Ba'ale' u láako'obe' tu ya'alajo'ob: Mix máac ca yanac jun túul kaakas pixan ti' cu páajtal u t'aan beya'. ¿Cu páajtal wa jun túul kaakas pixan u dzáic u paacat le ch'óopo'obo'?
Le judíobo' cu cúulpaachcuntico'ob Jesús
22 U kiinilo'ob que'elil, táan túun u kiinbesa'al Jerusalene' u kiinil cáajic u kulta'al Yuum Ku te j kulnajo'. 23 Táan u xíimbal Jesús te j kulnajo' ti' u Portalil Salomón 24 ca bakpachta'ab tumen le judíobo' ca tu káat chi'ito'ob ti': ¿Tac ba'ax kiin can a p'ato'on yéetel ca'a p'éel óolal? Wa teech le Cristoo' a'al to'on tu jaajil a wóol jun puli'. 25 Jesuse' tu núucaj ti'ob: Dzo'oc in wa'alic ti' te'ex, ba'ale' ma' ta wocsaj óolte'exi'. Le meyajo'ob quin beetic tu yo'olal u páajtalil in Taatae' jach sáasil u t'aano'ob tin wo'olal. 26 Ba'ale' te'exe' ma' ta wocsaj óolale'ex tumen ma' in j tamane'exi', je'el bix tin wa'alaj te'exo'. 27 In tamano'obe' cu kaj óoltico'ob in t'aan, tene' in kaj óolo'ob yéetel cu taalo'ob tin paach. 28 Teen dzáic cuxtal mina'an u xuul ti'ob, mix bikin bíin quíimico'ob, yéetel ma' bíin jáanpayta'aco'ob tin kab tumen mix máaqui'. 29 Dza'ano'ob ti' teen tumen in Taata, leti'e' mas nojoch ti' tuláacal, mix máac cu páajtal u jáanpaytico'ob tu kab leti'. 30 Teen yéetel le Taatao' jun túulili'on. 31 Le judíobo' tu ch'a'ajo'ob tuunich tu ca'a téen u ti'al u muruxtuntico'ob Jesús. 32 Jesuse' tu ya'alaj túun ti'ob: Dzo'oc in beetic ya'ab ba'alo'ob ma'alobtac ta táane'ex yéetel u páajtalil in Taata. ¿Tu yo'olal máacalmáac ti' le ba'alo'ob can a muruxtuntene'exo'? 33 Le judíobo' tu núucajo'ob ti': Ma' táan c muruxtuntiquech tu yo'olal mix jun p'éel ma'alob ba'al a beetmaj, ba'ale' tumen dzo'oc a wa'alic ba'al ti' Yuum Ku. Teche' chéen jun túul máaquech, ba'ale' táan a beetcabáa Kuil. 34 Jesuse' tu ya'alaj túun ti'ob: Ti' a wa'almaj t'aane'exe' dzíiba'ane' Kue' tu ya'alaj: Te'exe' kue'ex. 35 C ojel ma' tu páajtal u mixba'alcunta'al ba'ax cu ya'alic le Quili'ich Dzíibo'obo'; Kue' tu ya'alaj kuo'ob le máaxo'ob tu kamajo'ob u t'aano'. 36 Wa Ku tu jun páaycunten ca tu túuxtajen yóokolcaabe', ¿bix je'el u páajtal a wa'alique'ex táan in wa'alic ba'al ti' Ku tumen tin wa'alaj: Tene' u Paalen Ku? 37 Wa ma' tin beetic le ba'alo'ob cu beetic in Taatae' ma' a wocsaj óoltiquene'ex. 38 Ba'ale' wa táan in beetique', quex ma' a wocsaj óoltiquene'exe' ocsaj óolte'ex le ba'alo'ob quin beetico', u ti'al ca a wojéelte'ex jun puli'e' le Taatao' ti' yaan ti' tene', yéetel tene' ti' yanen ti' le Taatao'. 39 Tu yóoltajo'ob tu ca'a téen u mach u biso'ob, ba'ale' Jesuse' púudz ti'ob. 40 Jesuse' j suunaj túun tu lakin u áalcab ja'il Jordán ca j p'at te'elo', ti' le cúuchil tu'ux dza'ab ocja' tumen Juano'. 41 Ya'abcach máaco'ob bin ilic ca tu ya'alajo'ob: Tu jaajile' quex Juan ma' tu beetaj mix jun p'éel nojoch chíiculale', jaaj tuláacal ba'ax tu ya'alaj tu yo'olal le máaca'. 42 Ya'ab máaco'ob tu yocsaj óolto'ob Jesús ti' le cúuchilo'.
U quíimil Lázaro
1 Yanji; jun túul máac koja'ane' u kaaba'e' Lázaro, Betaniail. Betaniae' u caajal María yéetel Marta u quiic. 2 María, u yíidzin Lázaroe', leti' le máax tu láalaj qui'iboc aceite tu yooc Yuumtzile' ca tu tiquincuntaj yéetel u tzo'otzel u pool. 3 Bey túuno' le u yíidzino'oba' tu túuxtajo'ob a'albil ti' Jesús: Yuumtzil le máax a yaamae' koja'an. 4 Jesuse' le ca tu yu'ubaje' tu ya'alaj: Le koja'anila' ma' u ti'al quíimili', chéen u ti'al u chíicbesa'al u nojbe'enil Ku, bey xan u ti'al u chíicbesa'al u nojbe'enil u Paal Ku. 5 Jesuse', quex jach u yaamaj Marta, María u yíidzin yéetel Lázaroe', 6 le ca j a'ala'ab ti' koja'an Lazaroe' j p'at u láak ca'a p'éel kiin te tu'ux yaan ca'acho'. 7 Cu dzo'ocole' tu ya'alaj ti' u aj canbalo'ob: Co'one'ex Judea tu ca'a téen. 8 Le aj canbalo'obo' tu ya'alajo'ob ti': aj ca'anbesaj, ma' úuche' u judíolo'ob le cúuchilo' tu yóoltajo'ob u muruxtuntecho'ob, ¿táan wa túun a bin tu ca'a téen te'elo'? 9 Jesuse' tu ya'alaj ti'ob: ¿Ma' wa doce u yorailo'ob jun p'éel kiini'? Wa jun túul máac cu xíimbal yéetel kiine', ma' tu t'óochpajal, tumen cu yilic u sáasil le yóokolcaaba'. 10 Ba'ale' wa jun túul máac cu xíimbal yéetel áakabe' cu t'óochpajal tumen mina'an sáasil ti'. 11 Cu dzo'ocole' tu ya'alaj Jesús ti'ob: C amigo Lázaroe' táan u wenel, ba'ale' bin in ca'aj in wajse. 12 Le aj canbalo'ob túuno' tu ya'alajo'ob ti': Yuumtzil, wa táan u wenele', u káat u ya'ale' táan u ma'alobtal. 13 Ba'ale' Jesuse' tu yóoltaj u ya'ale' dzo'oc u quíimil Lázaro; u aj canbalo'obe' tu tuclajo'obe' táan u t'aan tu yo'olal le wenel u ti'al je'elelo'. 14 Jesuse' tu ya'alaj túun ti'ob jach t'áalcab: Lazaroe' dzo'oc u quíimil. 15 Cu qui'imactal in wóol tumen ma' anjien te'elo', tumen beyo' utz a ti'al te'ex, u ti'al ca ocsaj óolnaque'ex. Ba'ale' co'one'ex tu yicnal. 16 Tomase' le máax cu ya'ala'al Dídimo ti'e' tu ya'alaj ti' le u láak aj canbalo'obo': Co'one'ex tac to'on u ti'al c much' quíimil tu yéetel.
Jesue' leti' le caapúut cuxtalo' yéetel le cuxtalo'
17 Le ca j kuch Jesuse' tu yilaj dzo'oc can p'éel kiin mu'ucuc Lázaro. 18 Betaniae' naadz yanil ti' Jerusalén, míin jun p'íit maanlil ti' táancoch lúub. 19 Ya'ab ti' le judíobo' j bino'ob u xíimbalto'ob Marta yéetel María u ti'al u qui'imaccunsic u yóolo'ob tu yo'olal quíimic u sucu'uno'ob. 20 Le ca tu yojéeltaj Marta táan u kuchul Jesuse', jóok u kame, ba'ale' Mariae' j p'áat ich naj. 21 Martae' tu ya'alaj ti' Jesús: Yuumtzil wa ca yanaquech waye', ma' tu quíimil ca'ach in sucu'une'. 22 Ba'ale' tene' in wojel je'el u dzáic teech Ku je'el ba'alac ca c káat ti'e'. 23 Jesuse' tu ya'alaj ti': A sucu'une' yaan u ca'a cuxtal. 24 Martae' tu ya'alaj ti': Bey, tene' in wojel yaan u ca'a cuxtal le quéen caapúut cuxlac le quimeno'ob ti' u dzo'oc kiino'. 25 Jesuse' tu ya'alaj túun ti': Teen leti' le caapúut cuxtalo' yéetel le cuxtalo'. Le máax cu yocsic u yóol ti' tene' quex quíimique', yaan u cuxtal, 26 Bey xan tuláacal le máax cuxa'an yéetel cu yocsic u yóol ti' tene' mix bikin cun quíimil. ¿Ca wocsaj óoltic lela'? 27 Leti'e' tu ya'alaj ti': Bey, Yuumtzil, tene' quin wocsaj óoltic teech leti' le Cristoo', u Paal Ku, máax yaan u taal yóokolcaab.
Jesuse' cu yokol tu tzéel u mucnal Lázaro
28 Cu dzo'ocol u ya'alic lela' Martae' bin u t'aan María u yíidzin, ca tu x mucul a'alaj ti': Le aj ca'anbesajo' wayane' yéetel tu túuxtaj t'anbilech. 29 Le ca tu yu'ubaj lela' tu séeblaquil j líik Mariae' ca j bin u yil Jesús. 30 Jesuse' ma'ili' ococ ich caaje', ti' yaan te j cúuchil tu'ux ila'ab tumen Martae'. 31 Le judíob yano'ob ti' le najo', máaxo'ob táan u qui'imaccunsico'ob u yóol Mariae' le ca tu yilajo'ob u líikil yéetel u séeb jóokole', j bino'ob tu paach, tumen tu tuclajo'obe' táan u bin te j mucnal u ti'al u yokol te'elo'. 32 Mariae' le ca j kuch tu'ux yaan Jesuse' tu yilaje' ca j xolaj tu ni' yooc ca tu ya'alaj ti': Yuumtzil, wa ca yanaquech waye' ma' tu quíimil ca'ach in sucu'une'. 33 Le ca tu yilaj Jesús táan u yokol María pa'ate' yéetel le judíob j taalo'ob tu paacho', j okomchaj u yóol ca j péecnaj u yóol u pucsi'ikal. 34 Tu káataj túun ti'ob: ¿Tu'ux ta muque'ex? Ca j a'ala'ab ti': Yuumtzil, co'oten a wile. 35 Ca j okolnaj Jesús. 36 Le judíobo' tu ya'alajo'ob túun: Il a wile'ex buca'aj u yaabiltmail. 37 Ba'ale' dze'edzec ti'obe' tu ya'alajo'ob: Lela' leti' máax tu dzáa u paacat le ch'óopo' ¿ma' páatji' wa u beetic wa ba'ax u ti'al ma' u quíimil Lázaroi'?
Bix caapúut cuxtquinta'abic Lázaro
38 Jesuse' jach péecnaj u yóol tu ca'a téen, ca j náadz te j mucnalo'. Lela' jun p'éel áactun maca'an u jool yéetel jun p'éel tuunich. 39 Jesuse' tu ya'alaj: Lukese'ex le tuunicho'. Martae' u yíidzin le quimeno' tu ya'alaj: Yuumtzil, dzo'oc u tu'utal u boc, tumen dzo'oc can p'éel kiin mu'ucuc. 40 Ba'ale' Jesuse' tu ya'alaj ti': ¿Ma' wa tin wa'alaj teche' wa ca wocsaj óolale' yaan a wilic u nojbe'enil Ku? 41 Lukesa'ab túun le tuunicho'. Jesuse' tu líikesaj u yich ca'an ca tu ya'alaj: In Yuum, quin dzáic teech nib óolal tumen dzo'oc a wu'uyiquen. 42 Tene' in wojel mantadz ca wu'uyiquen, ba'ale' tin wa'alaj lela' u ti'al u yutzil le máaco'ob yano'ob waya', u ti'al ca u ocsaj óolto'ob teech túuxten 43 Cu dzo'ocol u ya'alic lela', ca tu ka'am a'alaj: ¡Lázaro, jóoken te'elo'! 44 Le quimeno' jóoki, kaxa'antac u kabo'ob bey xan u yooco'ob yéetel u tzíitzilal nooko'ob, to'an xan u yich yéetel jun p'éel nook. Jesuse' tu ya'alaj ti'ob: Wach'e'ex ca cha'ex u bin.
Cu múuch' tuculta'al u quiimsa'al Jesús
45 Yéetel lela', ya'ab ti' le judíob binja'ano'ob u láakinto'ob Mariae' le ca tu yilajo'ob ba'ax tu beetaj Jesuse' tu yocsaj u yóolo'ob ti'. 46 Ba'ale' dze'edzec ti'obe' bin u yilo'ob le fariseobo' ca tu tzicbalto'ob ti'ob ba'ax tu beetaj Jesús. 47 Le fariseob túuno' yéetel u nuuctaquil le aj kiino'obo' much'lajo'ob yéetel u nuuctaquil le caajo' ca tu ya'alajo'ob: ¿Ba'ax bin c beete'? Le máaca táan u beetic ya'ab noj chíiculalo'ob. 48 Wa c p'atic beyo', tuláacal cun u yoques u yóol ti', bíin taalac túun u nuuctaquil le romano'obo' u ti'al u xu'ulso'ob c kulnaj bey xan c caajal. 49 Ba'ale' jun túul ti' leti'obe', Caifás u kaaba'e', máax u nojochil le aj kiino'ob ti' le ja'abo', tu ya'alaj ti'ob: Te'exe' ma' a wojele'ex mixba'ali', 50 mix táan a wilque'ex wa ma'alob c ti'al to'on ca quíimic jun túulili' máac tu yo'olal le caajo' que ca xu'ulsa'ac tuláacal le caajo'. 51 Ba'ale' Caifase' ma' tu ya'alaj lela' chéen tu juunal u yóoli', ba'ale' tumen leti' u nojochil le aj kiino'ob ti' le ja'abo' Ku dzáa tu tuucule' ca u ya'al yaan u quíimil Jesús tu yo'olal le judíobo'. 52 Ma' chéen tu yo'olal le judíobo', ba'ale' u ti'al u much'quintic xan tuláacal u paalalo'ob Ku t'i'it'paja'ano'obo'. 53 Bey túuno', ti' le kiino' u nuuctaquil le judíobo' ca tu múuch' tucultico'ob bix cun u quíimso'ob Jesús. 54 Le o'olale' Jesuse' jáaw u máan tu táan caaj ichil le judíobo', ba'ale' jóok ti' u lu'umil Judea ca j bin ti' jun p'éel cúuchil naadz te x tocoy lu'umo', ti' jun p'éel caaj Efraín u kaaba'. Ti' j p'áat yéetel u aj canbalo'obi'. 55 Nadz yanil u kiinil u kiinbesa'al u Pascua le judíobo'. Ya'ab máaco'ob ti' le caajo'obo' j bino'ob tac Jerusalén u ti'al le x p'o'obáilo' ma'ili' cáajac le Pascuao'. 56 Jo'op' túun u caxtico'ob Jesús. Ti' yano'ob kulnaje' ca tu káatajo'ob tu baatzilo'ob: ¿Bix ca tucultique'ex? ¿Je'el u taal ti' le kiinbesajo' wa ma'? 57 Le fariseob yéetel u nuuctaquil le aj kiino'obo' u ya'almajo'ob wa yaan máax u yojel tu'ux yaan Jesuse' u ya'ale, u ti'al ca ma'achac kalbil.
Cu ji'ikabta'al Jesús tumen jun túul co'olel
1 Seis kiin u bin u kuchul le Pascuao' ca j bin Jesús Betania tu'ux caja'an Lázaro le máax caapúut cuxquinta'ab tumen Jesús ti' le quimeno'obo'. 2 Te'elo' j beeta'ab jun p'éel janal u ti'al u tzi'iquil Jesús. Martae' táan u táan óoltic le janalo', Lazaroe' jun túul ti' le máaxo'ob culucbalo'ob janal yéetel Jesuso'. 3 Mariae' tu taasaj túun míin táancoch litro qui'iboc aceite qui'ibocquinta'an chéen yéetel u nicte'il nardo, jach ya'ab u tojol, ca tu ji'ikabtaj tu yooc Jesús ca tu tiquincuntaj yéetel u tzo'otzel u pool. Tuláacal le najo' chu'up yéetel u qui'iboquil le aceiteo'. 4 Judas Iscariotee', u paal Simón, le máax jun túul ti' u aj canbalo'ob Jesuse' yéetel le máax cun kubique', tu ya'alaj túun: 5 ¿Ba'axten ma' j co'on le qui'iboc aceitea' u ti'al ca dza'abac ti' óotzilo'ob? tumen je'el u tojoltic trecientos denariose'. 6 Judase' tu ya'alaj lela', ma' tumen jach cu táan óoltic le óotzilo'obo', ba'ale' tumen j oocol, tumen leti' dza'an u canant le taakino' ba'ale' cu yoclic le ba'ax cu dza'abalo'. 7 Jesuse' tu ya'alaj túun ti: p'ate, tumen u ta'acmaj lela' u ti'al u kiinil in mu'ucul. 8 Mantadz cun yantal óotzilo'ob ta wéetele'ex, ba'ale' tene' ma' mantadz quin wantal ta wéetele'exi'.
Cu múuch' tuculta'al u quiimsa'al Lázaro
9 Ya'ab ti' le judíobo' j kuch u yojéelto'ob ti' yaan Jesús Betaniae' ca j bino'ob te'elo', ma' chéen u ti'al u yilico'ob Jesusi', ba'ale' u ti'al u yilico'ob xan Lázaro, máax caapúut cuxquinta'ab tumen Jesús ti' le quimeno'obo'. 10 U nuuctaquil le aj kiino'obo' tu múuch' tucultajo'ob túun u quiimsico'ob tac Lázaro 11 tumen tu yo'olale' ya'ab ti' le judíobo' táan u tzelcuba'ob ti' le aj kiino'obo' u ti'al u yocsaj óoltico'ob Jesús.
Jesuse' cu yocol Jerusalén
12 Ya'ab máaco'ob binja'ano'ob Jerusalén u ti'al u kiinbesajil le Pascuao'. Tu jeel kiine' tu yojéeltajo'ob yaan u kuchul Jesús ti' le caajo'. 13 Tu ch'a'ajo'ob u le' xa'an ca jóoko'ob u kamo'ob Jesús táan u ka'am a'alico'ob: ¡Hosanna! ¡Qui'iqui' t'anta'ac máax cu taal tu kaaba' Yuumtzil! ¡Qui'iqui' t'anta'ac u ajaw israel! 14 Jesuse' tu yilaj jun túul burroe' ca tu nat'aj, je'el bix cu ya'alic le Quili'ich Dzíibo': 15 Ma' a sajactal, u caajil Sión; je'el túuna' táan u taal a Ajaw, culucbal yóokol jun túul burro. 16 Ti' le kiino; u aj canbalo'obe' ma' tu na'atajo'ob le ba'alo'oba', ba'ale' cu dzo'ocol u nojbe'encunta'al Jesuse', ka'aj ti'ob dzíiba'an tuláacal le ba'alo'ob tu yo'olala', yéetel bey xan úuchic ti'. 17 Le máaco'ob yano'ob ca'ach yéetel Jesús le ca tu t'anaj Lázaro ti' le mucnalo' yéetel ca tu caapúut cuxquintajo', táan u tzicbaltico'ob le ba'ax tu yilajo'obo'. 18 Le o'olale' le máaco'obo' jóoko'ob u yilo'ob Jesús, tumen tu yojéeltajo'ob le nojoch chíiculal tu beetajo'. 19 Le fariseob túuno' tu ya'alajo'ob tu baatzilo'ob: Il a wile'ex, ma' táan u páajtal u beeta'al mixba'al. Ile'ex tuláacal yóokolcaab táan u bin tu paach.
Dze'edzec griego'ob cu caxtico'ob Jesús
20 Ichil le máaco'ob j bino'ob Jerusalén u ti'al kultaj ti' le kiinbesajo', yaan dze'edzec griego'obi'. 21 Lelo'oba' tu nadzuba'ob ti' Felipe, máax Betsaidail tu lu'umil Galileae', ca tu káat óoltajo'ob táan u ya'alico'ob ti': Dzuul to'one' j káat c il Jesús. 22 Felipe j bine' ca tu ya'alaj ti' Andrés. Ca j bino'ob tu ca'a túulilo'ob u tzicbalto'ob ti' Jesús. 23 Jesuse' tu ya'alaj túun ti'ob: Dzo'oc u kuchul u yorail cun nojbe'encunta'al u Paal Máac. 24 Tu jaajil tu jaajil, quin wa'alic ti' te'ex, wa jun p'éel u neek trigo ma' tu lúubul lu'um u ti'al ca quíimique', cu p'áatal láili' chéen jun p'éel neeke', ba'ale' wa cu quíimile' ya'ab u yich cu dzáic. 25 Le máax cu yaabiltic u cuxtale' bíin u sate, ba'ale' le máax cu p'ectic u cuxtal way ti' le yóokolcaaba', cu canantic u ti'al cuxtal mina'an u xuul. 26 Wa yaan máax u káat u meyajtene' u tzaypachten. Je'el tu'uxac ca yanaquene' ti' cun yantal xan le máax cu meyajtiqueno'. Wa yaan máax cu meyajtiquene' yaan u tzi'iquil tumen in Taata.
Jesuse' cu ya'alic bix cun quíimil
27 Beora' péecnaja'an in wóol. ¿Ba'ax túun quin in wa'ale? ¿Yaan wa in wa'alic: In Yuum, toquen ti' le ba'ax cun úuchul tena'? Ba'ale' taalaja'anen u ti'al lela'. 28 In Yuum, nojbe'encunt a kaaba'. U'uya'ab túun jun p'éel t'aan te j ca'ano' táan u ya'alic: Dzo'oc in nojbe'encuntic yéetel yaan in nojbe'encuntic tu ca'a téen. 29 Le máaco'ob yano'ob te'elo' le ca tu yu'ubajo'obe' yaan tu ya'alaje' cháac quíilbanaji, u láako'obe' tu ya'alajo'obe': Jun túul ángel t'ane. 30 Jesuse' tu ya'alaj túun ti'ob: Ma' tin wo'olal j u'uya'ab le t'aana', ba'ale' ta wo'olale'ex. 31 Beora' u yorail le quéen p'is óolta'ac yóokolcaaba', beora' yaan u tojolch'inta'al le máax cu tusbel way yóokolcaabe'. 32 Le quéen líikesa'aquen tu yóokol le lu'uma', yaan in taasic tuláacal máac ti' teen. 33 Yéetel lela' táan u dzáic na'ata'al bix cun quíimil. 34 Le máaco'obo' tu núucajo'ob ti': C u'uymaj u xo'ocol ti' le a'almaj t'aano' leti' le Cristoo' yaan u cuxtal mantadz. ¿Bix túun a wa'alic teech yaan u líikesa'al u Paal Máac? ¿Máax le u Paal Máaca'? 35 Jesuse' tu ya'alaj ti'ob: Chéen jun p'íit kiin cun yantal le sáasil ichile'exo'. Xíimbanene'ex túun ca'aliquil yaan ti' te'ex le sáasila', u ti'al ma' u yáakabchajal te'ex, tumen le máax cu máan ti' le éekjoch'e'enilo' ma' u yojel tu'ux cu bini'. 36 Ocsaj óolte'ex le sáasilo' ca'aliquil ti' yaan ta wéetele'exe', u ti'al ca beetchajque'ex u paalale'ex sáasil. Cu dzo'ocol u ya'alic le ba'alo'oba' Jesuse' j bini ca tu ta'acajubáa ti'ob.
Ba'axten le judíobo' ma' tu yocsaj óolto'ob Jesusi'
37 Quex tu beetaj Jesús ya'abcach nojoch chíiculalo'ob tu táano'obe', ma' tu yocsaj u yóolo'ob ti'i', 38 tumen yanchaj u dzo'ocpajal le ba'ax tu dzíibtaj aj bóobat Isaías: Yuumtzil, ¿Máax dzo'oc u yocsaj óoltic c tze'ec? ¿Ti' máax dzo'oc u ye'esic Yuumtzil u páajtalil? 39 Bey túuno' ma' páatji' u yocsaj óolalo'obi', tumen Isaiase' tu dzíibtaj xan: 40 Beeta'abo'ob ch'óopo'ob yéetel chich u pucsi'ikalo'ob tumen Ku, u ti'al ma' u paacato'ob yéetel u yicho'ob, mix ca u na'ato'ob yéetel u pucsi'ikalo'ob, mix u suuto'ob ti' teen u ti'al ca in dzáa u toj óolalo'ob. 41 Isaiase' tu ya'alaj lela' tumen tu yilaj u qui'ichquelemil Jesús yéetel t'aanaj tu yo'olal leti'. 42 Quex beya', ya'ab ti' le judíobo' tu yocsaj u yóolo'ob ti' Jesús, tac dze'edzec ti' le u nuuctaquilo'obo', ba'ale' ma' tu ya'alajo'ob tu táan máaco'obi', tumen sajacchajo'ob ti' le fariseobo', u ti'al ma' u jóokesa'alo'ob ti' le sinagogao'. 43 Tumen mas utz tu t'ano'ob le tziquil cu dzáic máaco'obo' ti' le tziquil cu dzáic Kuo'.
U t'aano'ob Jesús bíin u p'is óolt máaco'ob
44 Jesuse' ka'am tu ya'aljilac ti'ob: Le máax cu yocsic u yóol ti' tene' ma' táan u yocsic u yóol chéen ti' teen ba'ale' tac ti' le Taata máax túuxteno'. 45 Le máax cu yilquene' cu yilic xan le máax túuxteno'. 46 Teen le sáasilo' j taalen way yóokolcaabe' u ti'al tuláacal le máax cu yocsic u yóol ti' tene' ma' u p'áatal ti' éekjoch'e'enil. 47 Ba'ale' wa yaan máax cu yu'ubic in t'aan ba'ale' ma' tu dzo'obesique', ma' teen máax cun xot kintiqui', tumen tene' ma' taalaja'anen u ti'al in xot kint yóokolcaabi', ba'ale' u ti'al in toque. 48 Le máax ma' tu kamiquene' yéetel ma' tu dzo'ocbesic in t'aano'obe', yaan máax xot kintic: Le máax cun xot kintic tu dzo'oc kiino' leti' le in t'aano'ob dzo'oc in wa'alico'. 49 Tumen tene' ma' tu juunal in wóolal quin t'aani', le Taata máax túuxteno' u ya'almaj teen ba'ax unaj in wa'alic yéetel ba'ax unaj in ca'ansic. 50 In wojel xan u ya'almaj t'aan in Taatae' u ti'al cuxtal mina'an u xuul. Bey túuno' le ba'ax quin wa'alica' quin wa'alic je'el bix u ya'almaj teen in Taatae'.
Jesuse' cu p'o'ic u yooc u aj canbalo'ob
1 Lela' leti' le kiin cu taal táanil ti' u kiinbesajil le Pascuao'. Jesuse' u yojel dzo'oc u kuchul u kiinil u p'atic le yóokolcaaba' u ti'al u bin ti' le Taatao'. Je'el bix tu yaabiltaj le máaxo'ob u ti'alo'ob yano'ob way yóokolcaaba', tu yaabiltajo'ob tac tu xuul. 2 Jesús yéetel u aj canbalo'obe' culucbalo'ob janal. Kasilba'ale' dzo'oc u yocsic tu pucsi'ikal Judas Iscariote, u paal Simón, u tuuculil u kubic Jesús. 3 Jesuse' u yojel dza'an tuláacal páajtalil ti' tumen u Taata u yojel xan ti' Ku taalaja'an, yéetel ti' Ku cu bin. 4 J líik túun ti' le mayacche'o', tu pitaj jun yáal u nooke' ca tu kaxnaktubáa yéetel jun p'éel x cho'obol ja'. 5 Tu dzáa ja' ti' jun p'éel cáat kate' ca jo'op' u p'o'ic u yooc u aj canbalo'ob yéetel u tiquincuntic yéetel le x cho'obol ja' u kaxnaktmajo'. 6 Le ca tu yóoltaj u p'o'o u yooc Simón Pedroe', lela' tu ya'alaj ti': Yuumtzil ¿Teech p'o'ic in wooc? 7 Jesuse' tu núucaj ti': Bejela'e' ma' ta na'atic ba'ax quin beetic, ba'ale' cu dzo'ocole' yaan a na'atic. 8 Ba'ale' Pedroe' tu ya'alaj ti': Mixbikin bíin a p'o'o in wooc. Jesuse' tu núucaj ti': Wa ma' tin p'o'ic a wooque' mixba'al yaan a wil tin wéetel. 9 Simón Pedroe' tu ya'alaj ti': Yuumtzil, wa beyo', ma' chéen in wooqui', p'o'o tac in kab bey xan in pool. 10 Jesuse' tu ya'alaj ti': Le máax dzo'oc u yichquile', chéen kaabéet u p'o'ic u yooc, tumen láaj p'o'an. Te'exe' p'o'ane'ex quex ma' tuláacale'exi'. 11 Tu ya'alaj: Ma' p'o'ane'ex tuláacale'exi', tumen u yojel máax cun kubic. 12 Cu dzo'ocol u p'o'oic u yooco'obe' Jesuse' tu ca'a búuquintaj u nooke', culaj tu ca'a téen ti' le mayacche'o' ca tu ya'alaj ti'ob: ¿Ca na'atique'ex ba'ax dzo'oc in beetic ti' te'exa'? 13 Te'exe' ca wa'alique'ex teen aj ca'anbesaj yéetel Yuumtzil, u jaajil ba'ax ca wa'alique'ex tumen leti'en. 14 Bey túuno', wa teen quex aj ca'anbesajen yéetel Yuumtzilen dzo'oc in p'o'ic a wooque'exe', bey xan te'ex unaj a p'o'ic a wooque'ex ta baatzile'ex. 15 Tumen dzo'oc in we'esic te'ex bix u beeta'al, u ti'al ca a beete'ex je'el bix dzo'oc in beetic ti' te'exo'. 16 Tu jaajil, tu jaajil quin wa'alic ti' te'ex mix jun túul palitzil mas nojoch ti' u dzuulil, yéetel mix jun túul j túuchi'il mas nojoch ti' le máax túuchi'ito'. 17 Wa ca na'atique'ex le ba'alo'oba' yéetel ca beetique'exe', yaan u yantal te'ex qui'imac óolal. 18 Ma' táan in t'aan tu yo'olal tuláaclile'ex. Tene' in wojel máaxo'ob in yéeymaj. Ba'ale' yaan u dzo'ocpajal ba'ax cu ya'alic le Quili'ich Dzíibo': Le máax cu janal tin wéetele', dzo'oc u suticubáa tin contra. 19 Táan in wa'alic te'ex ma'ili' úuchuque'; lela' beyo' le quéen úuchuque' ca wocsaj óolte'exe' tene' teen. 20 Tu jaajil tu jaajil quin wa'alic ti' te'ex, le máax cu kamiquene' cu kamic máax túuxten.
Jesuse' cu ya'alic Judas cun kubic
21 Cu dzo'ocol u ya'alic lela' Jesuse' jach péecnaj u yóol tac tu taamil u pucsi'ikal ca tu ya'alaj jach t'áalcab: Tu jaajil, tu jaajil quin wa'alic ti' te'ex, jun túul ti' te'exe' cun kubiquen. 22 U aj canbalo'ob túune' jo'op' u pacticuba'ob tu baatzilo'ob, tumen ma' u yojelo'ob máax o'olalil tu ya'alaj lela'. 23 Jun túul ti' le aj canbalo'obo', le máax jach yaabilta'an tumen Jesuse', culucbal janal tu tzéel Jesús. 24 Simón pedroe' tu béech'kabtaj u ti'al ca u káat ti' Jesús máax o'olalil tu ya'alaj lela'. 25 Leti' túune' tu jach nadzubáa ti' Jesuse' ca tu káataj ti': Yuumtzil ¿Máaxi'? 26 Jesuse' tu núucaj ti': Bin in ca'aj in ch'ul jun xet' waaj, ti' le máax quin in dzáe' leti'. Bey túuno' tu ch'ulaj jun xet' waaje' ca tu dzaj ti' Judas Iscariote, u paal Simón. 27 Le ca tu kamaj Judas le waajo', tu séeblaquil ooc Satanás tu pucsi'ikal, Jesuse' tu ya'alaj túun ti': Le ba'ax can a beeto', beet séeba'an. 28 Ba'ale' mix jun túul ti' le máaxo'ob culucbalo'ob janal tu na'ataj ba'axten tu ya'alaj ti' lela'. 29 Tumen Judase' leti' máax canantic u bolsail le taakino'; le o'olale' yaan tu tucultajo'obe' táan u ya'ala'al ti' tumen Jesuse' ca u man wa ba'ax kaabéet u ti'al le kiinbesajo', wa ca u dzáa dze'edzec taakin ti' le óotzilo'obo'. 30 Judase', cu dzo'ocol u kamic le waajo', jóoki'. Dzo'oc u yáakabtal.
Le tumben a'almaj t'aano'
31 Cu dzo'ocol u jóokol Judase', Jesuse' tu ya'alaj ti'ob: Beora' cu chíicpajal u nojbe'enil u Paal Máac, yéetel u nojbe'enil Kue' cu chíicpajal ti' leti'. 32 Wa u Paal Máac cu ye'esic u nojbe'enil Junab Kue', Ku túune' yaan u ye'esic u nojbe'enil u Paal Máac, yéetel séeba'an cun u beetil. 33 In paalale'ex, chéen dze'edzec kiino'ob mas quin wantal ta wéetele'ex. Te'exe' yaan a caxtiquene'ex, ba'ale' je'el bix tin wa'alaj ti' le judíobo' quin wa'alic ti' te'ex beora': Ma' tu páajtal a taale'ex te tu'ux quin bino'. 34 Quin dzáic ti' te'ex le túumben a'almaj t'aana': Yaabiltaba'ex ta baatzile'ex. Je'el bix in yaabiltma'exe' te'exe' unaj a yaabiltcaba'ex ta baatzile'ex. 35 Wa ca yaabiltcaba'ex ta baatzile'exe' tuláacal yóokolcaab cun u kaj óolte' te'exe' in aj canbale'ex.
Jesuse' cu ya'alic yaan u cúulpachcunta'al tumen Pedro
36 Simón Pedroe' tu káat chi'itaj ti' Jesús: Yuumtzil ¿Tu'ux ca bin? Jesuse' tu núucaj ti': Tu'ux quin bine' ma' tu páajtal a taal tin paach beora', ba'ale' cu dzo'ocole' yaan a taal tin paach. 37 Pedroe' tu ya'alaj túun ti': Yuumtzil, ¿ba'axten ma' tu páajtal in taal ta paach beora'? Chuca'an in wóol in dzáa in cuxtal ta wo'olal. 38 Jesuse' tu núucaj ti': ¿Tu jaajil chuca'an a wóol a dzáa a cuxtal tin wo'olal? Tu jaajil, tu jaajil quin wa'alic ti' teech, ma'ili' kaaynac le t'eelo' quéen a wa'al óox téen ma' a kaj óoleni'.
Jesús u bejil ti' le Taatao'
1 Ma' u jach sa'atal a wóole'ex. A wocsmaj a wóole'ex ti' Kue' ocs a wóole'ex xan ti' teen. 2 Tu yotoch in Taatae' yaan ya'abcach cúuchilo'ob tu'ux cu yúuchul cajtal. Wa ma' bey anilo', tene' dzo'oc in wa'alic ti' te'exe'. Bey túuno' bin in ca'aj in nu'uct jun p'éel cúuchil a ti'al te'ex. 3 Cu dzo'ocol in bin yéetel in nu'uctic te'ex jun p'éel cúuchile' yaan in suut tu ca'a téen u ti'al ca in bise'ex tin wéetel, u ti'al ca yanaque'ex ti' le cúuchil tu'ux quin wantal teno'. 4 Te'exe' a wojele'ex tu'ux quin bin yéetel a wojele'ex u bejil. 5 Tomase' tu ya'alaj ti': Yuumtzil, ma' c ojel tu'ux ca bini' ¿Bix je'el u páajtal c ojéeltic u bejile'? 6 Jesuse' tu núucaj ti': Teen le bejo', teen le jaajo' yéetel teen le cuxtalo'. Chéen tin wo'olale' cu páajtal u taal máac ti' le Taatao'. 7 Wa ca kaj óoltiquene'exe' bey xan ca kaj óoltique'ex in Taata. Beora' dzo'oc a kaj óoltique'ex tumen táan a wilique'ex. 8 Felipe' tu ya'alaj túun ti': Yuumtzil, e'es to'on le taatáo, yéetel lelo' cu qui'imactal c óol. 9 Jesuse' tu núucaj ti': Felipe, buca'aj kiin yanaquen ta wéetele'ex ¿ma' páatac wa a kaj óoltiqueni'? Le máax cu yilquen tene' cu yilic le Taatao', ¿Ba'axten túun ca káatic teen ca in we'es te'ex le Taatao'? 10 ¿Ma' ta wocsaj óoltic wa ti' yanen ti' le Taatao' Yéetel le Taatao' ti' yaan ti' tene'? Le ba'alo'ob quin wa'alic ti' te'exa' ma' táan in wa'alic tu juunal in wóoli'. Le Taata cuxa'an teno', leti' máax cu meyaj. 11 Ocsaj óolte'ex tene' ti' yanen ti' le Taatao' bey xan le Taatao' ti' yaan ti' tene'. Wa ma' ta wocsaj óoltique'ex lela', ocsaj óoltene'ex tu yo'olal ba'ax quin beetic. 12 Tu jaajil, tu jaajil quin wa'alic ti' te'ex, le máax ocsaj óoltiquene' yaan u beetic xan le ba'alo'ob quin beetico', ba'alo'ob mas nuuctac cun u beete, tumen tene' táan in bin tu'ux yaan le Taatao'. 13 Tuláacal ba'ax ca a káate'ex tin kaaba'e' bíin in beete, u ti'al ca e'esa'ac u nojbe'enil le Taatao' tumen le Paalo'. 14 Tene' bíin in beet je'el ba'alac ca káate'ex tin kaaba'e'.
Jesuse' cu ya'alaic yaan u túuxtic le Quili'ich Pixano'
15 Wa a yaabiltmaene'exe' dzo'ocbese'ex in wa'almaj t'aano'ob. 16 Teen túune' yaan in káat óoltic ti' le Taatao' ca u túuxt ti' te'ex u láak máax áantique'ex yéetel u dzáic a wóole'ex, u ti'al ca yanac mantadz ta wéetele'ex: 17 u Pixanil le jaajo', le máaxo'ob yóokolcaabilo'obo' ma' tu páajtal u kamico'ob, tumen ma' tu yilico'ob mix u kaj óolo'obi'. Ba'ale' te'exe' a kaj óole'ex tumen leti'e' ti' yaan ta wéetele'ex yéetel yaan u p'áatal mantadz ti' te'ex. 18 Ma' táan in xúump'attique'ex. Yaan in suut u ti'al c yanaquen ta wéetele'ex. 19 Ichil jun p'íit kiine' ma' tin ilbil tumen máaco'ob, ba'ale' te'exe' yaan a wiliquene'ex; tumen cuxa'anen tene', te'exe' yaan a cuxtale'ex xan. 20 Ti' le kiino; te'exe' yaan a kaj óoltique'ex tene' ti' yanen ti' in Taatae', te'exe' ti' yane'ex ti' tene' yéetel tene' ti' yanen ti' te'exe'. 21 Le máax u yojel yéetel cu dzo'ocbesic in wa'almaj t'aano'obe' táan u ye'esic jach tu jaajil u yaamaen. In Taatae' yaan u yaabiltic le máax u yaamaene', teen xane' yaan in yaabiltic yéetel yaan in we'esiquimbáa ti'. 22 Judas ma' Iscarioteil tu ya'alaj ti': Yuumtzil ¿Ba'axten can a we'esabáa ti' to'on, ba'ale' ma' ti' u máaquilo'ob yóokolcaabi'? 23 Jesuse' tu núucaj ti': Le máax u yaabiltmaene' cu dzo'ocbesic ba'ax quin wa'alic. Bíin yaabilta'ac tumen in Taata, in Taata yéetel tene' bíin taalaco'on cuxtal tu yéetel. 24 Le máax ma' u yaabiltmaene' ma' tu dzo'ocbesic ba'ax quin wa'alic. Le t'aan ca wu'uyque'exa' ma' in ti'ali', u ti'al le Taata máax túuxteno'. 25 Táan in wa'alic te'ex tuláacal le ba'alo'oba' ca'aliquil ti' yanen ta wéetele'exe'. 26 Ba'ale' le Quili'ich Pixan cun u túuxt le Taata tin kaaba'o', u ti'al ca u yáante'ex yéetel u dzáic a wóole'exe', leti' cun u ca'ans te'ex tuláacal ba'al, yéetel yaan u ka'ajsic te'ex tuláacal le ba'alo'ob dzo'oc in wa'alic te'exo'. 27 Táan in bin, p'áatene'ex ich jéedzel. In jéedzel quin dzáic ti' te'ex. Ba'ale' ma' táan in dzáic je'el bix cu dzáic jéedzel le máaxo'ob yóokolcaabilo'. Ma' u sa'atal a wóole'ex mix a sajactale'ex. 28 Dzo'oc a wu'uyique'ex in wa'alic táan in bin yéetel yaan in suut u ti'al ca yanaquen ta wéetele'ex tu ca'a téen. Wa tu jaajil a yaabiltmaene'exe' dzo'oc ca'ach u qui'imactal a wóole'ex le ca ta wojéeltaje'ex táan in bin ti' le Taatao', tumen leti'e' mas nojoch ti' teen. 29 Táan in wa'alic te'ex lela' ma'ili' úuchuque', beyo' le quéen úuchuque' ca wocsaj óolte'ex. 30 Ma' ya'ab t'aan quin in beet ta wéetele'exi, tumen táan u taal le máax cu tusbel way yóokolcaabe', quex mina'an mix jun p'íit páajtalil ti' tin wóokol. 31 Bey unaj, u ti'al ca u yojéelt yóokolcaabe' tene' in yaabiltmaj le Taatao' yéetel táan in beetic le ba'ax tu ya'alaj ca in beeto'. Líikene'ex. Co'one'ex lukul waye'.
Jun cúul uva yéetel u kabo'ob
1 Tene' leti' le jun cúul jaajil uvao, in Taatae' leti' le máax canantic le pakalo'. 2 je'el máacalmáac ti' in kabo'ob ma' tu yichanquile' cu lukesic; ba'ale' cu p'éep'ic u kaasil le in kabo'ob cu yichanquilo'obo', u ti'al ca mas ya'abac u yich. 3 Te'exe' lukesa'an a kaasile'ex tu yo'olal le ca'ansajo'ob in dzaamaj te'exo'. 4 P'áatac mantadz a nupmaba'ex ti' teen, je'el bix teen in nupminbáa mantadz ta wéetele'exe'. U kab jun cúul che'e ma' tu páajtal u yichanquil tu juunal wa ma' u nupmubáa mantadz ti' u che'il, bey xan te'ex ma' tu páajtal a dzáique'ex ich wa ma' a nupmaba'ex mantadz ti' teen. 5 Teen leti' le jun cúul che'o', te'exe' u kabo'ob. Le máax cu p'áatal mantadz u nupmubáa ti' tene' bey xan teen in nupminbáa tu yéetele', jach ya'ab u yichanquil, tumen mixba'al cu páajtal a beetique'ex wa jun páay yanile'ex ti' teen. 6 Le máax ma' tu p'áatal mantadz u nupmubáa ti' tene', yaan u pu'ulul táancab yéetel yaan u tijil, je'el bix u kabo'ob le che' cu mo'olol u ti'al ca tóoca'ac ti' káako'. 7 Wa te'ex ca p'áatale'ex mantadz a nupmaba'ex ti' tene', bey xan in ca'ansajo'ob ca p'áataco'ob ti' te'exe', je'el ba'alac ca a káate'exe' yaan u dza'abal ti' te'ex. 8 In Taatae' nojoch tziiquil cu kamic le quéen a dza'ex ya'ab ich, tumen beyo' ca béeychajle'ex tu jaajil in aj canbale'ex. 9 Tene' in yaabiltma'ex bey je'el bix u yaabiltma'en le Taatao'. P'áatene'ex túun ti' in yaacunaj. 10 Wa ca dzo'ocbesique'ex in wa'almaj t'aano'obe' bíin p'áataque'ex ti' in yaacunaj, je'el bix teen quin dzo'ocbesic u ya'almaj t'aan in Taatae' yéetel p'aatlen ti' u yaacunaj. 11 Tene' táan in t'aan ta wéetele'ex beya' u ti'al ca yanac in qui'imac óolal ti' te'ex yéetel u ti'al ca chúucpajac a qui'imac óolale'ex. 12 In wa'almaj t'aane' leti' lela': Yaabiltaba'ex ta baatzile'ex, je'el bix in yaabiltma'exe'. 13 U mas nojochil yaacunaj cu páajtal u yantal ti' jun túul máaque' leti' lela': u dzáic u cuxtal tu yo'olal u amigo'ob. 14 Te'exe' in amigoex wa ca beetique'ex le ba'ax quin wa'alic te'exo'. 15 Ma' táan in wa'alic wa palitzile'ex, tumen le palitzilo' ma' u yojel ba'ax cu beetic u dzuulili'. Táan in wa'alic te'exe' in amigoex, tumen dzo'oc in dzáic a wojéelte'ex tuláacal ba'ax tu ya'alaj teen in Taata. 16 Ma' te'ex ta yéeyajene'exi', teen tin yéeyaje'ex ca tin kubentaj te'ex ca xi'ique'ex u ti'al ca a dza'ex ya'ab ich yéetel ca p'áatac mantadz a wiche'ex. Bey túuno' le Taatao' je'el u dzáic te'ex tuláacal ba'ax ca a káate'ex ti' tin kaaba'e'. 17 Le ba'ax quin wa'alic ti' te'exa' leti' lela' yabiltaba'ex ta baatzile'ex.
Jesús yéetel le máaxo'ob u ti'alo'obo' p'ectano'ob tumen yóokolcaab.
18 Wa yóokolcaab cu p'ectique'exe' ojéelte'exe' teen táanil tu p'ectajen. 19 Wa te'ex yóokolcaabile'exe', u máaquilo'ob yóokolcaabe' je'el u yaabiltique'exe' je'el bix u yaabiltico'ob le máaxo'ob u ti'alo'obo'. Ba'ale' tene' tin yéeyaje'ex ti' ichil u máaquilo'ob yóokolcaab, le o'olale' yóokolcaabe' u p'ecmajex, tumen ma' yóokolcaabile'exi'. 20 Ka'ajac te'ex le ba'ax tin wa'alaj ti' te'exo': Mix jun túul palitzil mas nojoch ti' u dzuulil. Wa teen tu ch'a'apachteno'obe' bey xan te'ex yaan a ch'a'apachta'ale'ex; wa tu dzo'ocbeso'ob in ca'ansaje' bey xan yaan u dzo'ocbesico'ob a ca'ansaje'ex. 21 Tuláacal lela' yaan u beeta'al ti' te'ex tin wo'olal tumen ma' u kaj óolo'ob máax túuxteni'. 22 Ma' bíin yanac ca'ach u si'ipilo'ob wa ma' in taal ca'ach in t'aano'obi'. Ba'ale' beora' mixba'al yaan u ya'alo'ob tu yo'olal u kebano'ob, 23 tumen le máaxo'ob u p'ecmajeno'obe' u p'ecmajo'ob xan in Taata. 24 Ma' bíin yanac ca'ach u si'ipilo'ob wa ma' in beetic ichilo'ob ba'alo'ob mix jun láak máac beetmail. Dzo'oc u yilico'ob le ba'alo'oba', cu dzo'ocole' quex beyo' u p'ecmajeno'ob yéetel u p'ecmajo'ob xan in Taata. 25 Ba'ale' le ba'alo'oba' cu yúuchul tumen ka'ana'an ca dzo'ocpajac le t'aano'ob dzíiba'an ti' u ya'almaj t'aano'obo': Tu p'ectajeno'ob quex mina'an ba'ax o'olal. 26 Ba'ale' le quéen taalac le máax cun u yáante'exo' yéetel cun u dzáa a wóole'exo', u Pixanil le jaajo' le máax bíin in túuxt te'exo', le máax ti' le Taata u taalo' leti' cun t'aan tin wo'olal. 27 Te'ex xane' yaan a táane'ex tin wo'olal, tumen yanji'ex tin wéetel tu yáax chuun.
1 Quin wa'alic ti' te'ex le ba'alo'oba' u ti'al ma' u lúubul a wóole'ex. 2 Yaan a jóoksa'ale'ex ti' le sinagogaobo', yéetel bíin kuchuc u kiinil le quéen quíimsa'aque'ex tumen wa máaxe' bíin u tucult táan u meyajtic Ku beyo'. 3 Lela' yaan u beetico'ob tumen ma' u kaj óolto'ob mix le Taatao' mix teen. 4 Quin wa'alic ti' te'ex lela', u ti'al beyo', le quéen úuchuque' ca ka'ajac te'ex dzo'oc in wa'alic ti' te'ex.
Ba'ax cu beetix Quili'ich Pixan
Lela' ma' tin wa'alaj ti' te'ex tu yáax chuni' tumen ti' yaanen ca'ach ta wéetele'exe'. 5 Ba'ale' beora' táan in bin u ti'al in wantal yéetel máax túuxten, ba'ale' mix jun túul ti' te'ex cu katic teen tu'ux quin bin; 6 chéen dzo'oc u okomtal a wóole'ex tumen tin wa'alaj ti' te'ex le ba'alo'oba'. 7 Tene' quin wa'alic ti' te'ex u jaajil, asab ma'alob a ti'al te'ex ca xi'iquen. Tumen wa ma' tin bine' ma' túun taal u ti'al antal ta wéetele'ex le máax áantique'ex yéetel cu dzáic a wóole'exo', ba'ale' wa quin bine' yaan in túuxtic. 8 Le quéen taalaque' yaan u beetic u kaj óoltic u máaquilo'ob yóokolcaabe' yaan u kebano'ob, yaan xan jun p'éel ma'alob bej, yéetel Ku xan cun p'is óoltico'ob. 9 Leti'obe' j kebano'ob tumen ma' táan u yocsaj óoltiqueno'ob. 10 Yaan u kaj óoltico'ob máacalmáac le ma'alob bejo' tumen tene' táan in bin tac tu'ux yaan le Taatao', yéetel ma' bíin a wilene'exi'. 11 Yéetel yaan u kaj óoltico'ob u p'is óolal Ku tumen dzo'oc u xot kinta'al le máax cu tusbel way yóokolcaaba'. 12 Ya'ab u láak ba'alo'ob yaan u ti'al in wa'al te'ex, ba'ale' ma' táan u páajtal a na'atique'ex beora'. 13 Le quéen taalac u Pixan le jaajo' leti' cun ca'ansic te'ex tuláacal le jaajo', tumen ma' túun t'aan tu juunal yóol, ba'ale' yaan u ya'alic tuláacal le ba'ax cun u yu'ube' yéetel yaan u beetic a wojéeltique'ex tuláacal le ba'alo'ob bíin úuchuco'. 14 Leti'e' yaan u nojbe'encuntiquen tumen yaan u kamic ba'ax in ti'ale', u ti'al u dzáic a wojéelte'ex. 15 Tuláacal ba'ax yaan ti' le Taatao' in ti'al xan, le o'olal tin wa'alaj yaan u kamic le Pixan ba'ax in ti'alo' u ti'al u dzáic a wojéelte'ex.
Le yaayaj óolalo' yaan u suut qui'imac óolalil
16 Ichil jun p'íit kiine' ma' bíin a wilene'exi', ba'ale' le quéen máanac u láak jun p'íit kiine' bíin a wilene'ex tu ca'a téen, tumen tene' táan in bin tac tu'ux yaan le Taatao'. 17 Dze'edzec túun ti' u aj canbalo'obe' tu káat chi'ito'ob tu baatzilo'ob: ¿Ba'ax u káat u ya'al lela'? Cu ya'alic ti' to'one': Ichil jun p'íit kiine' ma' bíin a wilene'exi', ba'ale' le quéen máanac u láak jun p'íit kiine' bíin a wilene'ex tu ca'a téen tumen tene' táan in bin tu'ux yaan le Taatao. 18 ¿Ba'ax u káat u ya'al Ichil jun p'íit kiin? Ma' táan c na'atic ba'ax cu ya'alic. 19 Jesuse' tu kaj óoltaj yaan ba'ax u káat u káato'obe' ca tu ya'alaj ti'ob: Tene' tin wa'alaj ti' te'exe' ichil jun p'íit kiine' ma' bíin a wilene'exi', ba'ale' le quéen máanac u láak jun p'íit kiine' bíin a wilene'ex tu ca'a téen. ¿Leti' wa le ca káatique'ex ta baatzile'exo'? 20 Tu jaajil, tu jaajil quin wa'alic ti' te'exe' yaan a wokole'ex yéetel yaan u yantal te'ex yaayaj óolal, ba'ale' u máaquilo'ob yóokolcaabe' yaan u qui'imacchajal u yóolo'ob. Bey túuno', quex yaan te'ex yaayaj óolale', a yaayaj óolale'exe' yaan u suut qui'imac óolalil. 21 Le quéen kuchuc u kiinil u síijsaj jun túul co'olele' cu mukyaj tumen dzo'oc u kuchul u kiinil u ki'inamtal; ba'ale' cu dzo'ocol u síijil le chaan palo' ma' táan u ka'ajal ti' u ki'inamil tu yo'olal u qui'imac óolalil iquil síijic jun túul chaan pal way yóokolcaabe'. 22 Bey xan te'ex táan a mukyaje'ex beora', ba'ale' yaan in suut in wile'ex; le quéen suunaquene' yaan u chu'upul a pucsi'ikale'ex yéetel qui'imac óolal, jun p'éel qui'imac óolal mix máac cun páajtal u lukesic te'ex. 23 Ti' le kiino' mixba'al can a káate'ex ti' teen. Tu jaajil, tu jaajil quin wa'alic ti' te'ex, tuláacal ba'ax ca a káate'ex tin kaaba' ti' le Taatao', bíin u dzáa te'ex. 24 Tac beora' mix ba'al a káate'ex tin kaaba'; káate'ex ca a kame'ex, u ti'al ca chu'upuc a pucsi'ikale'ex yéetel qui'imac óolal.
Jesuse' u dzáanche'etmaj yóokolcaab
25 Dzo'oc in wa'alic te'ex le ba'alo'oba' ichil queet t'aano'ob, ba'ale' yaan u taal u kiinil in t'aan ta wéetele'ex x ma' queet t'aanilo'ob, tumen jach t'áalcab bíin t'aanaquen ta wéetele'ex tu yo'olal le Taatao'. 26 Ti' le kiino' te'exe' bíin káat óolnaque'ex tin kaaba'. Ma' táan in wa'alic ti' te'ex wa bíin káat óolnaquen ta wo'olale'ex ti' le Taatao', 27 tumen le Taatao' u yaabiltma'ex. U yaabiltma'ex tumen te'exe' a yaabiltmaene'ex yéetel dzo'oc a wocsaj óoltique'ex ti' Ku taalaja'anen. 28 Ti' u táan le Taatao' jóoken u ti'al in taal way yóokolcaabe', ba'ale' beora' táan in p'atic le yóokolcaaba' u ti'al in suut ti' le Taatao'. 29 U aj canbalo'obe' tu ya'alajo'ob túun ti': Beora' jach t'áalcab a t'aan, x ma' queet t'aanilo'ob. 30 Beora' táan c ilique' a wojel tuláacal ba'al, ma' kaabéet ca káatac a chi' tumen mix máaqui'. Le o'olale' c ocsaj óoltic ti' Ku taalaja'anech. 31 Jesuse' tu núucaj ti'ob: ¿Bey túuno' beora' ca wocsaj óolale'ex? 32 Táan u taal u kiinil, lela' dzo'oc u kuchul, le quéen t'i'it'besa'aque'ex jujun túulil táanxel tzéelilo'ob, yéetel yaan a p'atiquene'ex tin juunal. Ba'ale' ma' tin juunal in wanili', tumen le Taatao' ti' yaan tin wéetele'. 33 Táan in wa'alic ti' te'ex tuláacal le ba'alo'oba' u ti'al ca yanac ti' te'ex jéedzel le quéen a nupaba'ex ti' teen. Ti' le yóokolcaabo' te'exe' yaan a mukyaje'ex, ba'ale' yanac a wóole'ex, tumen tene' dzo'oc in dzáanche'etic yóokolcaab.
Jesuse' cu payalchi' tu yo'olal u aj canbalo'ob
1 Cu dzo'ocol u ya'alic le ba'alo'oba', Jesuse' j paacatnaj ca'ane' ca tu ya'alaj: In Yuum, dzo'oc u kuchul u yorail. Nojbe'encunt a Paal, u ti'al ca u nojbe'encuntech xan a Paal. 2 Tumen teche' a dzaamaj páajtalil ti' a Paal yóokol tuláacal máac, u ti'al ca u dzáa cuxtal mina'an u xuul ti' tuláacal le máaxo'ob ta kubaj ti'o'. 3 Le cuxtal mina'an u xuulo' leti' lela': ca u kaj óolto'ob teech chéen jun túulili' Ku, yéetel ca u kaj óolto'ob Jesucristo le máax ta túuxtajo'. 4 Tene' dzo'oc in nojbe'encuntiquech way yóokolcaabe'. Dzo'oc in dzo'ocsic le meyaj ta túuxtajen in beeto'. 5 Beora', in Yuum, dzáa teen ta táan le nojbe'enil yaan ti' teen ca'ach ta wicnal ma'ili' yanac le yóokolcaaba'. 6 Le máaxo'ob ta yéeyaj ti' ichil le yóokolcaabilo' u ti'al a kubo'ob ti' teno', tin beetaj u yojéeltico'ob máaxech teech. A ti'alo'ob ca'achi', ca ta kubo'ob ti' teen, dzo'oc xan u yu'ubico'ob a t'aan. 7 Beora' u yojéelo'obe' tuláacal ba'ax ta dzaj ti' tene' ti' teech u taal. 8 Tumen dzo'oc in dzáic ti'ob le ma'alob péectzil ta dzaj ti' teno', dzo'oc xan u kamico'ob. Dzo'oc u yilico'ob jach tu jaajil ti' teech taalaja'anen, yéetel dzo'oc u yocsaj óoltico'ob teech túuxten. 9 Tene' táan in káat óolal tu yo'olalo'ob; ma' táan in káat óolal tu yo'olal le yóokolcaabilo'obo', ba'ale' tu yo'olal le máaxo'ob ta kubaj ti' teno', tumen a ti'alo'ob. 10 Tuláacal ba'ax in ti'ale', a ti'al; yéetel le ba'ax a ti'ale', in ti'al; yéetel in nojbe'enile' cu yila'al ti' leti'ob. 11 Tene' ma' táan in p'áatal way yóokolcaabe', ba'ale' leti'obe' yaan u p'áatalo'ob way yóokolcaabe'. Tene' táan in bin u ti'al in wantal ta wicnal. In Quili'ich Yuum, canant yéetel u páajtalil a kaaba' le máaxo'ob ta kubaj teno', u ti'al ca jun p'élili'chajco'ob je'el bix to'one'. 12 Le ca yanjien tu yéetelo'ob way yóokolcaabe' tin canantaj yéetel u páajtalil a kaaba' le máaxo'ob ta kubaj teno', tin toco'ob xan ti' kaas. Mix jun túul ti'ob sa'ati', chéen le máax sa'atalili'e, u ti'al ca dzo'ocpajac ba'ax cu ya'alic le Quili'ich Dzíibo'. 13 Beora' táan in bin tac tu'ux yanecho', ba'ale' ca'aliquil ti' yanen yóokolcaabe' quin wa'alic le ba'alo'oba', u ti'al ca chu'upuc u pucsi'ikalo'ob yéetel qui'imac óolal yaan ti' teno'. 14 Tene' dzo'oc in dzáic ti'ob a ma'alob péectzil, ba'ale' p'ecta'ano'ob tumen yóokolcaab tumen ma' yóokolcaabilo'obi' je'el bix teen ma' yóokolcaabilene'. 15 Ma' táan in káatic teech ca a lukeso'ob ti' le yóokolcaaba', táan in káatic ca a toco'ob ti' kasilba'al. 16 Je'el bix ma' yóokolcaabilene' bey xan leti'ob ma' yóokolcaabilo'obi'. 17 Jun páaycunto'ob a ti'al teech yéetel le jaajo', a ma'alob péectzile' leti' le jaajo'. 18 Je'el bix ta túuxtilaquen yóokolcaabe', bey xan teen táan in túuxtico'ob yóokolcaab. 19 Tu yo'olalo'obe' táan in jun páaycuntquinbáa a ti'al teech, u ti'al ca jun páaycunta'aco'ob leti'ob xan a ti'al teech yéetel le jaajo'. 20 Ba'ale' ma' táan in káat óolal ti' teech chéen tu yo'olal lelo'oba', ba'ale' tac tu yo'olal le máaxo'ob bíin u yocsaj óolteno'ob tu yo'olal u tze'ec lelo'oba'. 21 Quin káatic teech ca jun p'éelili'ichajac tuláacalo'ob, ca jun p'éelili'ichajco'ob jun múuch' t éetel, in Yuum, je'el bix teech yanech ti' teen yéetel teen yanen ti' teech. Ca jun p'éelili'ichajco'ob u ti'al ca ocsaj óolta'ac tumen yóokolcaabe' teech túuchi'itmailen. 22 Dzo'oc in dzáic ti'ob le nojbe'enil a dzaamaj teno' u ti'al ca jun túulili'ichajco'ob je'el bix to'on jun túulili'one'. 23 Teen ti' leti'ob yéetel teech ti' teen, u ti'al ca jach jun túulili'ichajco'ob, beyo' ca ila'ac tumen yóokolcaabe' teech túuchi'itmailen, yéetel a yaabiltma'ob je'el bix a yaabiltma'ene'. 24 In Yuum, teech kubo'ob ti' teen; in káat túune' ca yanaco'ob tin wéetel tu'ux quin j antal, u ti'al ca u yilo'ob le nojbe'enil a dzaamaj teno', tumen ta yaabilten ma'ili' beeta'ac yóokolcaabe'. 25 In Yuum, ca beetic tuláacal ba'al tu beel, le máaxo'ob yóokolcaabilo'obo' ma' u kaj óolecho'obi', ba'ale' tene' in kaj óolech, yéetel lelo'oba' dzo'oc u yojéeltico'ob teech túuchi'itmailen. 26 Tin dzáa u yojéelto'ob máaxech, la'ili' yaan in dzáiquech kaj óoltbile', u ti'al ca yanac ti'ob le yaacunaj yaan teech ti' teno' u ti'al ca yanaquen ti'ob xan.
Cu ku'ubul yéetel cu ma'achal Jesús
1 Cu dzo'ocol u ya'alic le ba'alo'oba' Jesuse' jóok yéetel u aj canbalo'ob u ti'al u binbal ti' u láak jun tzéelil u ja'il Cedrón. Yaan ca'ach jun p'éel huerto te'elo' tu'ux j ooc Jesús yéetel u aj canbalo'ob. 2 Bey xan Judas, le máax kubico', u kaj óol le cúuchilo', tumen Jesuse' ya'ab u téenel tu much'ubáa yéetel u aj canbalo'ob te'elo'. 3 Bey túuno' Judase' j kuch te'elo' yéetel jun múuch' soldado'ob yéetel dze'edzec u aj cananilo'ob kulnaj j túuxta'abo'ob tumen u nuuctaquil le aj kiino'obo' yéetel le fariseobo'. U ch'a'amo'ob u nu'ucul ba'atel, táan xan u bisico'ob tzuubo'ob yéetel tajche'ob. 4 Ba'ale' tumen Jesús u yojel tuláacal ba'ax cu úuchule', jóok tu táano'obe' ca tu káat chi'itaj ti'ob: ¿Máax ca caxtique'ex? 5 Leti'obe' tu núucajo'ob ti': Jesús Nazaretil. Jesuse' tu núucaj ti'ob: Teen lelo'. Judase', le máax kubico', ti' yaan tu yicnalo'obe'. 6 Le ca tu ya'alaj Jesús: Teen lelo', j bino'ob paachil ca j lúubo'ob lu'um. 7 Jesuse' tu káataj ti'ob tu ca'a téen. ¿Máax ca caxtique'ex? Leti'obe' tu ya'alajo'ob: Jesús Nazaretil. 8 Jesuse' tu ya'alaj túun ti'ob: Dzo'oc in wa'alic ti' te'ex teen lelo'. Wa teen ca caxtiquene'exe', cha'ex u bin lelo'oba'. 9 Lela' j úuch u ti'al ca dzo'ocpajac le t'aan tu ya'alaj Jesús: Ti' le máaxo'ob ku'ubo'ob teen, tumen le Taatao' mix jun túul sa'ati'. 10 Simón Pedroe', tumen yaan u máascabe', tu jíilpaytaj ca tu ch'acaj u le' u x no'oj xiquin jun túul máac, Malco' u kaaba', lela' u palitzil u nojoch le aj kiino'obo'. 11 Ba'ale' Jesuse' tu ya'alaj ti' Pedro: Oques le máascab tu pixo'. Wa le Taata u káat ca máanaquen ti' le yaayaj óolala', ¿ma' wa unaj ca náaqueni'?
Jesús tu táan u nojoch le aj kiino'obo'
12 Le soldado'ob túuno' yéetel u nojchilo'obe' jun múuch' yéetel le aj canano'ob j túuxta'abo'ob tumen le judíobo' tu macho'ob Jesuse' ca tu kaxo'ob. 13 Cu dzo'ocole' ca tu biso'ob tu yotoch Anas, tumen Caifás, máax u nojoch le aj kiino'ob ti' le ja'abo'obo' u ja'an Anas. 14 Le caifasa' leti' máax tu ya'alaj ti' le judíobo' mas ma'alob ca quíimic jun túulili' máac tu yo'olal le caajo'.
Pedroe' cu ya'alic ma' u kaj óol Jesusi'
15 Simón Pedro yéetel u láak jun túul aj canbale' j bino'ob tu paach Jesús. Le u láak jun túul aj canbalo' kaj óola'an tumen u nojoch le aj kiino'obo', le o'olale' j ooc yéetel Jesús tac tu táancabil u yotoch u nojoch le aj kiino'obo'. 16 Ba'ale' Pedroe' j p'áat paachil, tu jool naj. Le o'olale' le aj canbal kaj óola'an tumen u nojoch le aj kiino'obo' Jóoke' ca j t'aanaj yéetel le x canan jool najo' ca tu yocsaj Pedro. 17 Le x canan jool najo' tu káataj túun ti' Pedro: ¿Ma' wa teech jun túul ti' u aj canbalo'ob le máaco'? Pedroe' tu núucaj: Ma', tene' ma'. 18 Tumen táan u beetic que'ele', le palitzilo'ob yéetel le aj canano'obo' tu t'abo'ob káake' ca j wa'alajo'ob u kíintuba'obi'. Ti' wa'alacbal xan Pedro yéetelo'obi' táan u kíinticubáa tu tzéel le káako'.
U nojoch le aj kiino'obo' cu káatic u chi' Jesús
19 U nojoch le aj kiino'obo' jo'op' u káat chi'itic ti' Jesús máax u aj canbalo'ob yéetel ba'ax cu ca'ansic. 20 Jesuse' tu ya'alaj ti': Tene' t'aanaja'anen tu táan tuláacal máaco'ob. Mantadz ca'ansajnajen te j sinagogaobo' yéetel te j kulnajo', tu'ux cu much'tal tuláacal le judíobo'. Bey túuno' mixba'al in mucult a'almaj. 21 ¿Ba'axten ca káatic ti' teen? Káat ti' le máaxo'ob tu yu'ubajeno'obo', ca u ya'alo'ob teech ba'ax tin wa'alaj ti'ob. Leti'obe' u yojelo'ob ba'ax in wa'almaj. 22 Le ca tu ya'alaj Jesús lela', jun túul u aj cananilo'ob kulnaj yaan te'elo', tu lajaj tu yich ca tu ya'alaj ti': ¿Bey a núuquic u t'aan u nojoch aj kiino'obo'? 23 Jesuse' tu núucaj ti': Wa tin wa'alaj ba'al kaase', a'al tu'ux yaan u kaasil. Ba'ale' wa ma'alob ba'ax tin wa'alaje', ¿ba'axten ca lajiquen? 24 Anas túune' tu túuxtaj Jesús kaxa'an tu táan Caifás u nojoch le aj kiino'obo'.
Pedore' cu ya'alic tu ca'a téen ma' u kaj óol Jesusi'
25 Ca'aliquil táan u yúuchul lela', Pedroe' láili' wa'alacbal táan u kíinticubáa tu tzéel le káako', ca j a'ala'ab ti': ¿Ma' wa teche' jun túul ti' u aj canbalo'ob le máaco'? Pedroe' tu núucaj, táan u ya'alic: Ma', tene' ma'. 26 J káata'ab túun ti' tumen jun túul u palitzilo'ob u nojoch, le aj kiino'obo', jun túul u láaktzil le máax ch'a'ac u xiquin tumen Pedroo': ¿Ma' wa tin wilajech te j huerto tu yéetelo'? 27 Pedroe' tu ca'a a'alaj: Ma', ti' le jun súutuc túuno' j kaaynaj le j t'eelo'.
Jesús tu táan Pilato
28 J lukesa'ab túun Jesús tu yotoch Caifase' ca j bisa'ab tac tu chúumuc naj le jalach wíinico'. Táan u taal u sáastal, le o'olale' le judíobo' ma' j ooco'ob te j chúumuc najo' u ti'al ma' u kascunticuba'ob u ti'al ca páatac u jaantico'ob le Pascuao'. 29 Le o'olale' jóok Pilato j t'aan yéetelo'ob, ca tu ya'alaj ti'ob: ¿Ba'ax tacpoolil ca taasique'ex tu yóokol le máaca'? 30 Leti'obe' tu núucajo'ob: Wa ma' jun túul kaakas máaque' bejela' ma' táan c kubic teche'. 31 Pilatoe' tu ya'alaj túun ti'ob: Bise'ex ca a p'is óolte'ex yéetel a wa'almaj t'aane'ex. Le judíobo' tu núucajo'ob ti': To'on judíone' ma' tu cha'abal c quíimsic mix máac. 32 Bey dzo'ocpajic ba'ax tu ya'alaj Jesús tu yo'olal bix cun quíimil. 33 Pilatoe' j ooc tu ca'a téen te j chúumuc najo', tu t'anaj Jesuse' ca tu káataj ti': ¿Teech wa u ajaw le judíobo'? 34 Jesuse' tu ya'alaj ti': ¿Táan a káatic tu juunal a wóol lela', wa j a'ala'ab teech tin wo'olal tumen u láako'ob? 35 Pilatoe' tu núucaj ti': ¿Judíoen wa? A wéet caajalo'ob yéetel u nuuctaquil le aj kiino'ob kubecho'ob ti' teno'. ¿Ba'ax a beetmaj? 36 Jesuse' tu núucaj túun ti': In ajawile' ma' yóokolcaabili'. Wa yóokolcaabile' in tzaypacho'obe' dzo'oc ca'ach u ba'atelo'obe' u ti'al ma' in ku'ubul ti' le judíobo'. Ba'ale' in ajawile' ma' wayile'. 37 Pilatoe' tu ya'alaj túun ti': ¿Bey túuno' teche' ajawech? Jesuse' tu núucaj ti': Ajawen, je'el bix dzo'oc a wa'alico'. Tene' j síijen yéetel j taalen way yóokolcaabe' u ti'al in t'aan tu yo'olal le jaajo'. Tuláacal máax cu yu'ubic le jaajo', cu yu'ubic in t'aan. 38 Pilatoe' tu ya'alaj ti': ¿Ba'ax le jaajo'?
Jesuse' cu xot kinta'al u ti'al quíimil
Cu dzo'ocol u káatic lela', Pilatoe' jóok t'aan tu ca'a téen yéetel le judíobo' ca tu ya'alaj ti'ob: Mix jun p'éel si'ipil quin wilic ti' le máaca'. 39 Ba'ale' suuca'an ti' te'ex in jáalkabtic jun túul kala'an wíinic ichil u kiinbesajil le pascuao'. ¿A káate'ex wa ca in jáalkabt u ajaw le judíobo'? 40 Tuláacalo'ob tu ca'a yaawtajo'ob: ¡Lela' ma'! ¡Jáalkabt Barrabás! Le Barrabasa' jun túul j ocol.
1 Pilato tu túuxtaj túun jadzbil Jesús. 2 Le soldado'obo' tu jit'ajo'ob jun p'éel péet jo'ol yéetel ki'ix ca tu dzajo'ob tu pool Jesús, ca tu beeto'ob u búuquintic jun p'éel box chac nook. 3 Cu dzo'ocole' tu nadzuba'ob ti', táan u ya'alico'ob: ¡Te'escun ti' u ajaw le judíobo'! Ca tu la'alajo'ob xan tu yich. 4 Pilatoe' jóok tu ca'a téen ca tu ya'alaj ti'ob: Ile'ex, táan in jóokesic waye' u ti'al ca a wojéelte'ex mix jun p'éel si'ipil quin wilic ti' le máaca'. 5 Ca jóok Jesús yéetel le péet jo'ol jit'a'an yéetel ki'ix dza'an tu poolo', u búuquintmaj xan le box chac nooko', Pilatoe' tu ya'alaj túun ti'ob: ¡Je'el le j xiiba'! 6 Le ca j ila'ab tumen u nuuctaquil le aj kiino'obo' yéetel le aj canano'obo', jo'op' u yaawtico'ob: ¡Sin ti' cruz! ¡Sin ti' cruz! Pilatoe' tu ya'alaj ti'ob: Bise'ex te'ex ca sine'ex ti' cruz, tumen tene' ma' tin wilic mix jun p'éel si'ipil ti'. 7 Ba'ale' le judíobo' tu núucajo'ob ti': To'one' yaan to'on jun p'éel a'almaj t'aan. Cu ya'alic le a'almaj t'aano' leti'e' unaj u quíimil tumen tu beetubáa u Paal Ku. 8 Le ca tu yu'ubaj Pilato lela' ca mas sajacchaji'. 9 Ca j ooc tu ca'a téen te j chúumuc najo' ca tu káataj ti' Jesús: ¿Tu'uxilech? Ba'ale' Jesuse' mixba'al tu núucaj ti'. 10 Pilatoe' tu ya'alaj túun ti': ¿Ma' ta núuquic in t'aan? ¿Ma' wa a wojel yaan teen páajtalil u ti'al in siniquech ti' cruz yéetel yaan teen páajtalil u ti'al in jáalkabtiquechi'? 11 Jesuse' tu núucaj ti': Mix jun p'éel páajtalil je'el u yantal teech tin wóokol, wa ma' tu dza'abal teech tumen Kui'. Le o'olale' le máax tu kubajen teche' mas nojoch u keban ti' teech. 12 Tu yo'olal lelo' Pilatoe' jo'op' u caxtic bix je'el u páajtal u jáalkabtic Jesuse', ba'ale' le judíobo' tu yaawtajo'ob ti': ¡Wa ca jáalkabtique'; ma' amigoech yéetel Cesari'! Je'el máaxac ca u beetubáa ajawe' u aj p'eec César. 13 Pilatoe' le ca tu yu'ubaj lela' tu túuxtaj jóokesbil Jesuse' ca j culaj ti' le jalach káanche' yaan ti' le cúuchil cu kaaba'intic Gabata ich hebreo, lela' u káat u ya'ale' máaka'anta'an yéetel póolbil tuunich. 14 Míin chúumuc kiin ti' le kiin cu taal táanil ti' le Pascuao'. Pilatoe' tu ya'alaj túun ti' le judíobo': ¡Je'el a ajawe'exa'! 15 Ba'ale' leti'obe' tu yaawtajo'ob: ¡Quíimic! ¡Sin ti' cruz! Pilatoe' tu ya'alaj ti'ob: ¿Yaan wa in sinic ti' cruz a ajawe'exa'? Ba'ale' u nuuctaquil le aj kiino'obo' tu núucajo'ob ti': To'one' mina'an to'on u láak ajaw chéen César. 16 Yéetel lela' Pilatoe' tu kubaj Jesús ti'ob u ti'al ca si'inic ti' cruz. Leti'ob túune' tu bisajo'ob.
Si'inic Jesús ti' cruz
17 Jesuse' jóok túun táan u bisic u cruz u ti'al u binbal te j cúuchil cu kaaba'intic u Baaquel pool, ich hebreoe' u kaaba'e' Gólgota. 18 Te j si'in ti' cruz yéetel u láak ca'a túul máaco'ob, Jesuse' chúumuc, leti'obe' tu tzéelo'ob. 19 Pilatoe' tu túuxtaj dzaabil tu yóokol le cruzo' jun p'éel dzíib cu ya'alic beya': Jesús Nazaretil, u Ajaw le judíobo'. 20 Ya'ab ti' le judíob tu xoco'ob le dzíibo', tumen le cúuchil tu'ux si'in Jesús ti' cruzo' naadz ti' le caajo'. Le dzíibo' dzíiba'an ich hebreo, griego yéetel latín. 21 Le o'olale' u nuuctaquil u aj kiino'ob le judíobo' tu ya'alajo'ob ti' Pilato: Ma' a dzíibtic: u Ajaw le judíobo', unaj a dzíibtic: Le máax cu ya'alicubáa u Ajaw le judíobo'. 22 Ba'ale' Pilatoe' tu núucaj ti'ob: Le ba'ax dzo'oc in dzíibtico' bey cun p'áatalo'. 23 Le soldado'obo' cu dzo'ocol u sinico'ob Jesús ti' cruze' tu ch'a'ajo'ob u nooke' ca tu jóokeso'ob can jatz ti', jun jatz u ti'al jujun túul soldado'. Tu ch'a'ajo'ob xan u búuc, ba'ale' mina'an u chuuyil, tumen jun p'éelili' jit'a'anil ca'anal tac cabal. 24 Le soldado'obo' tu ya'alajo'ob tu baatzilo'ob: Ma' c jatic. Co'ox bulic u ti'al ca c il máax cun ti'altic. Bey dzo'ocbesa'abic le Quili'ich Dzíib cu ya'alic beya': Tu t'oxajo'ob in nook yéetel buulnajo'ob tu yóokol in búuc. Le soldado'ob j beet lela'. 25 Tu yicnal u cruz Jesuse' ti' yaan u maama, u quiic u maama, María u yatan Cleofas yéetel María Magdalena. 26 Jesuse', le ca tu yilaj u maama yéetel le aj canbal jach u yaabiltmaj wa'alacbal te'elo', tu ya'alaj ti' u maama: Co'olel, je'el a paalo'. 27 Cu dzo'ocole' ca tu ya'alaj ti' le aj canbalo': Je'el a maamao'. Le aj canbal túuno' tu kamaj tu yotoch.
Quíimic Jesús
28 Cu dzo'ocol lela', tumen u yojel Jesús dzo'ocpaja'an tuláacale', u ti'al ca dzo'ocpajac le Quili'ich Dzíibo', tu ya'alaj: Ukajen. 29 Ti' yaan ca'ach te'elo' jun p'úul su'udz vino, tu ch'ulajo'ob túun jun p'éel esponja yéetel le su'udz vinoo', tu dzajo'ob ti' jun p'éel u kab hisopoe', ca tu nadzajo'ob tu chi'. 30 Jesuse' tu yukaj le su'udz vinoo', cu dzo'ocole' tu ya'alaj: Dzoca'an tuláacal. Ca tu chinaj u poole' ca j quíimi.
Jun túul soldado' cu lomic u ch'ala'atel Jesús
31 Lela' leti' le kiin cu taal táanil ti' le Pascuao', le o'olale' le judíobo' ma' u káato'ob ca p'áatac le wíinclilo'ob te j cruzo'ob sábadoo', tumen le sábadoo' jun p'éel kiin jach quili'ich. Le o'olale' tu káatajo'ob ti' Pilato' ca u túuxt cachbil u yooco'ob le máaxo'ob sina'ano'ob ti' cruzo' u ti'al ca lukesa'ac u wíinclilo'ob te'elo'. 32 Le soldado'obo' j bino'ob túun ca tu cacho'ob u yooc yáax jun túuli', bey xan ti' le u láak sina'an ti' cruz yéetel Jesuso'. 33 Ba'ale' le ca tu nadzuba'ob ti' Jesuse', tu yilajo'ob dzo'oc u quíimil, le o'olale' ma' tu cachajo'ob u yooqui'. 34 Ba'ale' jun túul ti' le soldado'obo' tu lomaj u ch'ala'atel Jesús yéetel jun p'éel lóomte', ca jóok ki'ik yéetel ja'. 35 Le máax tzicbaltic lela' tu yilaj yéetel táan u ya'alic u jaajil; leti'e' u yojel táan u ya'alic u jaajil, u ti'al ca ocsaj óolnaque'ex tac te'ex. 36 Tumen le ba'alo'oba' j úucho'ob u ti'al ca dzo'ocpajac le Quili'ich Dzíib cu ya'alic: Ma' bíin ca'achac mix jun p'éel u baaqueli'. 37 Yaan xan u láak Quili'ich Dzíib cu ya'alique': Yaan u pactico'ob máax tu lomajo'ob.
Mu'uquic Jesús
38 Cu dzo'ocol lela' José Arimateail tu káataj ti' Pilato ca cha'abac ti' u bisic u wíinclil Jesús. Josee' jun túul u aj tzaypach Jesús, quex u mucultmaj tumen sajac ti' le judíobo'. Pilatoe' tu ya'alaj ma'alobil ti', Josee' j bine' ca tu bisaj u wíinclil Jesús. 39 Bey xan Nicodemo', le máax bin tzicbal tu yicnal Jesús yéetel áakabe', j kuch yéetel míin treinta kilos qui'iboc xíiwo'ob lela' mirra xa'akta'an yéetel sáabila. 40 José yéetel Nicodemoe' tu to'ajo'ob u wíinclil Jesús yéetel nooko'ob qui'iboquinta'ano'ob yéetel le xíiwo'obo', je'el bix suuca'an u mu'ucul le quimeno'ob tumen le judíobo'. 41 Ti' le cúuchil tu'ux si'in Jesús ti' le cruzo' yaan ca'ach jun p'éel huerto'; ti' le huerto' yaan jun p'éel túumben mucnal tu'ux mix máac dza'abaqui'. 42 Ti' j dza'ab u wíinclil Jesusi', tumen le mucnalo' naadz yanil yéetel ta'aytac u cáajal sábado u ti'al le judíobo'.
U caapúut cuxtal Jesús
1 Tu yáax kiin ti' le winalo', láili' éekjoch'e'ene' ma'ili' píik sáasaque' j bin María Magdalena te j mucnalo', ca tu yilaj lukesa'an le tuunich cu maquic u jool le mucnalo'. 2 Áalcabil j binic tac tu'ux yaan Pedro yéetel le u láak aj canbal jach yaabilta'an tumen Jesuso', ca tu ya'alaj ti'ob: Dzo'oc u lukesa'al Yuumtzil ti' le mucnalo', ma' c ojel tu'ux dza'abi'. 3 Pedro yéetel le u láak aj canbalo' jóoko'ob túune', ca j bino'ob te j mucnalo'. 4 Tu ca'a túulalo'ob queet u yáalcabo'ob ca'achi' ba'ale' le u láak aj canbalo' mas chich áalcabnajic ti' Pedro ca j kuch te j mucnalo'. 5 Tu ch'enebtaj ca tu yilaj le nooko'ob dza'an te'elo', ba'ale' ma' j ooqui'. 6 Paachil ti'e' j kuch Simón Pedro, lela' j ooc te j mucnalo'. Tu yilaj xan le nooko'ob dza'an te'elo'. 7 Tu yilaj xan le nook meyajnaj u ti'al u to'obol u pool Jesuse' ma' dza'an yéetel le u láak nooko'obo', ba'ale' to'an jun páayil. 8 Ooc túun xan le u láak aj canbalo', le máax j kuch táanil te j mucnalo', ca tu yilaj le ba'ax j úucho, ca j ocsaj óolnaji'. 9 Tumen ma' u na'ato'ob ca'ach le Quili'ich Dzíibo'obo', wa kaabéet u caapúut cuxtal Jesús ti' le quimeno'obo'. 10 Le aj canbalo'ob túuno' j suunajo'ob tu yotocho'ob.
Jesuse' cu chicbesicuba ti' María Magdalena
11 Ba'ale' Maraie' j p'áat táancab táan u yokol tu tzéel le mucnalo'. Ca'aliquil táan u yokole' j chinlaj u ti'al paacat ichil le mucnalo', 12 ca tu yilaj ca'a túul ángelo'ob sactac u nooko'ob, culucbalo'ob tu'ux dza'an ca'ach u wíinclil Jesús; jun túule' tu'ux yanji' u pool, u láake' tu'ux yanji' u yooc. 13 Le ángelo'obo' tu káat chi'ito'ob ti': Co'olel, ¿ba'axten táan a wokol? Leti'e' tu ya'alaj ti'ob: Tumen dzo'oc u bisa'al in Yuumtzil, cu dzo'ocole' ma' in wojel tu'ux dza'abi'. 14 Le ca tu ya'alaj lela', tu sutaj u yiche' ca tu yilaj Jesús ti' yaan te'elo', ba'ale' ma' u yojel wa Jesusi'. 15 Jesuse' tu káat chi'itaj ti': co'olel, ¿ba'axten táan a wokol? ¿Máax ca caxtic? Leti'e' tu tuclaje' leti' le máax canantic le huerto' ca tu ya'alaj ti': Dzuul wa teech bise', a'alten tu'ux ta dzáa, u ti'al ca in bise. 16 Jesuse' tu ya'alaj túun ti': ¡María! Leti'e' tu sutubae' ca tu ya'alaj ti' ich hebreo: ¡Raboni! U káat u ya'ale' aj ca'anbesaj. 17 Jesuse' tu ya'alaj ti': Ma' a machiquen, tumen ma' na'acquen tac tu'ux yaan in Taata máax a Taataex xan, in Kue' Junab, a Kue'ex xan. 18 María Magdalenae' j bin túun u ya'al ti' le aj canbalo'obo' leti'e' dzo'oc u yilic Yuumtzil máax a'al le ba'alo'ob ti'a'.
Jesuse' cu chíicbesicubáa ti' le aj canbalo'obo'
19 Láili' ti' le kiino', u yáax kiin le semanao', le ca j áakabchaje'; j much'laj le aj canbalo'obo' ca tu kalo'ob le jool najo'obo' tumen sajaco'ob ti' le judíobo'. Jesuse' j ooque' a yanji' chúumuc ti' le aj canbalo'obo', ca tu ya'alaj ti'ob: Yanac te'ex jéedzel. 20 Cu dzo'ocol u ya'alic lela', tu ye'esaj ti'ob u kabo'ob yéetel u ch'ala'atel. Leti'ob túune', le ca tu yilajo'ob Yuumtzile' qui'imacchaj u yóolo'ob. 21 Jesuse' tu ya'alaj ti'ob tu ca'a téen: Yanac te'ex jéedzel. Je'el bix tu túuxtilaquen le Taatao' bey xan quin túuxtique'ex te'ex. 22 Ca jóopsajnaj tu yóokolo'ob ca tu ya'alaj ti'ob: Kame'ex le Quili'ich Pixano'. 23 Ti' le máaxo'ob ca sa'atsique'ex u kebano'obe', sa'atsa'an ti'ob. Ti' le máaxo'ob ma' táan a sa'atsique'ex u kebano'obe', ma' sa'atsa'an ti'obi'.
Tomase' cu yilic le caapúut cuxa'an Yuumtzilo'
24 Ba'ale' Tomase', jun túul ti' le doce aj canbalo'obo', le máax cu ya'ala'al Dídimo ti'e', mina'an tu yéetelo'ob le ca j taal Jesuso'. 25 Le u láak aj canbalo'ob tu ya'alajo'ob ti': Dzo'oc c ilic Yuumtzil. Ba'ale' Tomase' tu ya'alaj ti'ob: Wa ma' tin wilic tu kabo'ob u jool le clavo'obo', yéetel ca in woques u yaal in kabo'ob tu'ux ooc le clavo'obo', yéetel ca in woques in kab tu ch'ala'atele', ma' tu páajtal in wocsaj óoltic. 26 Cu dzo'ocol u máan ocho kiino'obe', much'ucbal le aj canbalo'ob tu ca'a téen ti' jun p'éel naj, ti' yaan Tomás túun, tu yéetelo'obe'. Quex kala'an le jool najo'obo', Jesuse' j ooqui' ca tu dzáajubáa chúumuc ti'ob, ca tu ya'alaj ti'ob: Yanac te'ex jéedzel. 27 Cu dzo'ocole' ca tu ya'alaj ti' Tomás: Oques u yaal a kab te'ela', pact in kabo'ob; tich' a kabo' ca a woques tin ch'ala'atel. Xu'uluc a ca'a p'éel óolal, ocsaj óolnen. 28 Tomase' tu núucaj ti': ¡In Yuumtzil, in Ku! 29 Jesuse' tu ya'alaj ti': Tomás, tumen ta wiljene' ocsaj óolnajech. Qui'imac u yóolo'ob le máaxo'ob ocsaj óolnajo'ob quex ma' tu yiljeno'obi'.
Ba'ax o'olal dzíibta'ab le dzíibil ju'una'
30 Jesuse' tu beetaj u láak ya'abcach chíiculalo'ob tu táan u aj canbalo'ob ma' dzíibta'ano'ob ti' le dzíibil ju'una'. 31 Ba'ale' lelo'oba' dzíibta'ano'ob u ti'al ca a wocsaj óolte'ex Jesuse' leti' le Cristoo', u Paal Ku, yéetel u ti'al ca yanac te'ex cuxtal le quéen a wocsaj óolte'exe'.
Jesuse' cu chíicbesicubáa ti' siete u aj canbalo'ob
1 Cu dzo'ocol lela' Jesuse' tu chíicbesubáa tu ca'a téen ti' u aj canbalo'ob tu jal u ka'anabil Tiberias. Tu chíicbesubáa beya'. 2 Much'ucbalo'ob Simón Pedro, Tomás le máax cu ya'ala'al Dídimo' ti'e', Natanael máax Canail ti' Galilea, u paal Zebedeo yéetel u láak ca'a túul u aj canbalo'ob Jesús. 3 Simón Pedroe' tu ya'alaj ti'ob: Tan in bin chuc cay. Leti'obe' tu ya'alajo'ob ti': To'on xane' táan c bin ta wéetel. J bino'ob ca j na'aco'ob ti' jun p'éel cheem, ba'ale' ti' le áakabo' ma' tu chucajo'ob mix ba'ali'. 4 Táan u taal u sáastale' Jesuse' tu chíicbesubáa tu jáal le ja'o', ba'ale' le aj canbalo'obo' ma' u yojelo'ob wa leti'i. 5 Tu ya'alaj túun ti'ob: Xi'ipale'ex, ¿mixba'al a chuque'ex? Leti'obe' tu núucajo'ob ti': Mixba'al. 6 Jesuse' tu ya'alaj túun ti'ob: Pule'ex le u káanil chuc cay tu x no'oj le cheemo', u ti'al ca chuc caynaque'ex. Bey tu beetilo'ob, cu dzo'ocole' ma' páatji' u jóokesico'ob u káanil chuc cay ti' le ja'o' tu yo'olal le bajun cay tu chucajo'obo'. 7 Le aj canbal jach yaabilta'an tumen Jesuso', tu ya'alaj ti' Pedro: ¡Leti' le Yuumtzilo'! Le ca tu yu'ubaj Simón Pedro leti' le Yuumtzilo', tu kaxnaktaj u nooke' (tumen u pitmaj ca'achi') ca tu pulubáa te ja'o'. 8 Le u láak aj canbalo'obo' j kucho'ob tu jáal ja' yéetel le cheemo', táan u jíiltico'ob u káanil chuc cay chuup yéetel cayo'ob, tumen míin can dzáac ca'a tac táacoch yanilo'ob tu jáal le ja'o'. 9 Le ca j éemo'ob lu'ume', tu yilajo'ob t'aba'an chúuc, yéetel jun túul cay dza'an tu yóokol; tu yilajo'ob xan waaj te'elo', 10 Jesuse' tu ya'alaj ti'ob: Taase'ex dze'edzec ti' le cayo'ob táant a chuquique'exo'. 11 Simón Pedroe' j na'ac ti' le cheemo' ca tu jíiltaj tac tu jáal ja' le u káanil chuc cayo' chuup yéetel ciento cincuenta yéetel tres nucuch cayo'ob. Quex jach ya'abe' le u káanil chuc cayo' ma' jáati'. 12 Jesuse' tu ya'alaj túun ti'ob: Co'otene'ex ukul. Mix jun túul ti' le aj canbalo'ob tu yóoltaj u káat ti': Teche' ¿Máaxech? Tumen u yojelo'ob leti' le Yuumtzilo'. 13 Cu dzo'ocole' Jesuse' tu nadzuba'e', tu ch'a'aj le waajo', ca tu dzáa ti'ob, bey tu beetil xan yéetel le cayo'. 14 Lela' u yóox páac u chíicbesicubáa Jesús ti' u aj canbalo'ob cu dzo'ocol u caapúut cuxtal ti' le quimeno'obo'.
Jesuse' cu t'aan yéetel Simón Pedro
15 Cu dzo'ocol u yukulo'obe', Jesuse' tu káataj ti' Simón Pedro: Simón, u paal Jonás, ¿asab a yaabiltmaen ti' lelo'oba'? Pedroe' tu núucaj ti': Bey Yuumtzil, teche' a wojel in yaabiltmaech. Jesuse' tu ya'alaj ti': Canant túun in j tamano'ob. 16 Tu káataj ti' tu ca'a téen: Simón, u paal Jonás, ¿a yaabiltmaen? Pedroe' tu núucaj ti': Bey, Yuumtzil, teche' a wojel in yaabiltmaech. Tu ya'alaj ti': Canant túun in mejen j tamano'ob. 17 Tu yóox téen tu káataj ti': Simón, u paal Jonás, ¿a yaabiltmaen? Pedroe' yaji tu yóol tumen káata'ab ti' tu yóox téen wa u yaabiltmae', ca tu ya'alaj ti': Yuumtzil, teche' tuláacal ba'al a wojel. Teche' a wojel in yaabiltmaech. Jesuse' tu ya'alaj ti': Canant túun in j tamano'ob. 18 Tu jaajil quin wa'alic ti' teech, le ca'ach táanquelmeche' ca búuquintic a nooke' yéetel ca bin je'el tu'uxac a káate'. Ba'ale' le quéen nuxibaqueche' yaan a tich'ic a kab u ti'al ca ta'acac teech a nook tumen yaanal máac, yéetel ca u bisech tu'ux ma' a káat bini'. 19 Le ca tu ya'alaj lela', Jesuse' táan u dzáic ojéeltbile' bix cun quíimil Pedro u ti'al ca u nojbe'encunt Ku beyo'. Cu dzo'ocole' tu ya'alaj ti': ¡Tzaypachteni'!
Le aj canbal yabilta'ano'
20 Le ca tu sutjubáa Pedroe', tu yilaj táan u taal tu paacho'obe' le aj canbal jach yaabilta'an tumen Jesuse', le máax yanchaj tu tzéel Jesús le ca jaano'ob tu dzoocaque' yéetel tu káataj ti' Jesús: Yuumtzil, ¿máax cun kubiquecho'? 21 Pedroe' le ca tu yilaje' tu káataj ti' Jesús: Yuumtzil, cux túun lela' ¿Ba'ax bíin úuchuc ti'? 22 Jesuse' tu núucaj ti': Wa in káat ca p'áatac tac quéen suunaquene', ¿ba'ax a káat ti'? ¡Teche' tzaypachteni'! 23 Jóok u tzicbalil ichil le sucu'uno'obo' le aj canbalo' ma' bíin quíimiqui'. Ba'ale' Jesuse' ma' tu ya'alaj ti' wa ma' bíin quíimiqui', ba'ax tu ya'alaje': Wa in káat ca p'áatac tac quéen suunaquene' ¿Ba'ax a káat ti'? 24 Lela' leti' le aj canbal cu jaajcuntic le ba'alo'oba', yéetel dzo'oc u dzíibtic. C ojel táan u ya'alic u jaajil. 25 Yaan xan u láak ya'abcach ba'alo'ob tu beetaj Jesús, wa ca láaj dzíibta'ac jujun p'éelile', quin tuclique' le libro'ob tu'ux cun dzíibtbilo' mix ti' tuláacal yóokolcaab je'el u páajtal u yantal tu'ux u dza'abalo'obe'. Amén.