Jan 1

Papang yulni muih kalna kidika

1 Tatuna kaupak Yulni kidika laih ban sakdai, dawak kidika Yulni dai kidika laih Papang karak dai, dawak Papang dai. 2 Witing kidika tatuna kaupak Papang karak dai. 3 Witing munah, Papang di balna kidika bitik yamna; di balna bangkidika pasyakat as bik diski witing dis kat yamna dini kidika. 4 Witing yakat sakdai sangnika kidika, dawak kidika sangnika kidika laih yaringni diana dai muih balna yakat. 5 Adika yaringni laih puksani pasyakat ingni yaringwi, dawak puksani kidika yaklauwi sip piwas dana. 6 Muih al as dai ayangni laih Jan, witing kidika Papang yaklauwi kalsihna dai 7 witnis atnin, kaput laih yaringni kidika witninis atnin, dawak witing yulwa balna kidika yakat muih bitik kulna atnin. 8 Yaringni kidika laih Jan awasdai, kaunah witing kidika laih sisihna dai yaringni kidika witnis yulna atnin. 9 Yaringni rahm muih balna yakat yaringni diawa kidika sau akat kaina dai. 10 Kidika Yul dai kidik laih sau akat sakdai; dawak, Papang yaklauwi witing munah sau adika yamna dai kaunah, sau muihni balna kidika amangnilawas dadana. 11 Witing palni sauni yakat kaina, kaunah witing dini balna kidika kalduwas dadana. 12 Kaunah wais balna duwi dawak rahm kukulna balna kidika laih witing yakat, witingna yakat yamni dikulna Papang walanibis balna atninna kidika. 13 Dawak witingna kidika laih Papang walanibis balna, muih balna muihnina nuhni dukih diawak walaninabis yayakwa kaput laih awaski, kaunah Papang yaklauwi diyakna bahang. 14 Kidika Yul, muih kalna kidika, mayang mapasking yakat yalahna dalani lani nuhni dawak rahm karuk bik. Dawak alasnina yaksihni bik talnamayang, kidika alasnina yaksihni Papangni kaupak duna dai kidika, witing Walanibis aslah dai kaput. 15 Jan yaklauwi kidika witninis yulwi aput yulna: “Witing adika kuduh yang yultayang dai kidika, yang uskit yakat kaiwi, kaunah tanit nuhni kulna ki, kat witing laih yang takit kaupak ban ki.” 16 Witing di manas duwa kidika kaupak, witing blisinni kidika wat wat mayana. 17 kat lā kidika laih Moses munah kalana dai, kaunah dalani lani, dawak di rahm kidika balna laih Jisas Krais munah kaiwi kalahna. 18 Muih as bik Papang kidika talwas ki; Walanibis aslah kidika manah talna, kidika laih Papang, dawak aslah palni yalahwa kidika Papang karak, bahang witing yaklauwi manikingkana.

Jan was utuhwi yakyang kidika, Jisas Krais witninis yulwi

19 Jerusalén kaupak Ju muihni balna dawak sumalyang balna kauna sisihna dai Jan yakat witing yakat kalyulwi dakana atninna wais daipa. 20 Dawak witing lāih diyulna dai: —Yang laih Mesías awasyang. 21 Dawak watwi kalyulwi dakakana: —¿Kaput kat waismahn? ¿Prapit Elías? Jan yulna: —Yang witing awasyang. Dawak witingna watwi yulwi dakakana: —Kaput kat, ¿prapit kaiwarang dai kidika manyah? Nangnitnalana: —Dikah. 22 Kalyuyulna: —¿Kaput kat waismahn? Yanasisihna muihni balna yakat yul as duyawinikna ki. ¿Man yulma kidika sipmahn yanayulnin? 23 Jan yaklauwi nangnitnalana: —Yang kuduh parasni sarahtik yultayang kauhmak wanilang yakat: ‘Dawan tani barangni yamtanauh’, prapit Isaías yulna kaput. 24 Parisi balna yaklauwi sisihna dai kidika Jan karak yulbaunin, 25 kalyulwi dakakana: —Mesías awasman, Elías bik awasman, prapit bik awasman kat, ¿ais yamta muih was utuhta yaktamahn? 26 Jan yaklauwi nangnitnalana: —Yang laih was kau utuhtik yaknayang; kaunah manna pasmangna yakat as likki kidika man amanglatasmana, 27 kidika laih uskit kaupak kaiwi. Kidika laih yang witing susni wahni bik sip awasyang uluhnik. 28 Adika dini laih Betania pāni yakat kalahna, Jordán wasni nakasyakau, kidika yakat Jan muih was utuhwi yakwasakdai kidika.

Jisas, Papang sīpni

29 Kidika kaupak payahwak, Jan talna Jisas, witing yakat kiwak, dawak yulna: “¡Talnauh, kidika kuduh Papang sīpni, muih balna dutnina uswi yakwa kidika! 30 Witing yakat kuduh yulnayang dai kidika: ‘Yang kaupak uskit yakat as kaiwi, witing kauh tanit nuhni kalkulna ki, kat witing laih yang takit kaupak ban bahang.’ 31 Yang palni bik amanglatasyang dai wais daipa; kaunah yang laihwas kau utuhtik yaktik aiwanayang, kaput laih Israel muihni balna kidika amanglana atnin yulni.” 32 Jan bik adika lāih yulna: “Yang talnayang, Spirit Holi kidika makau kisang kidika kaupak kaiwi bukwak buhtuku kapat, witing minit yakat. 33 Yang bik baisa amanglatasyang dai, wais daipa; kaunah was kau utuhtik yaknin yulni yasihna muihni kidika yayulna: ‘Kidika muihni minit yakat Spirit Holi kidika kiwi watwarang kat, kidika muihni kuduh Spirit Holi kau was utuhwi yakwa kidika.’ 34 Yang uman talnayang, dawak bik witnisyang witing laih Papang Walanibis al.”

Jisas disainipil tatuna balna kidika

35 Kidika kaupak ma payahwak, Jan kidika witing usnit uiyang balna bu kidika karak bangdai. 36 Witing talwak Jisas kidika bayakkiwak, Jan yulna: —¡Talnauh, kidika kuduh Papang sīpni! 37 Jan usnit uiyang balna bu kidika, Jan yulwa dakakana, dawak Jisas usnit yakat uina. 38 Jisas wiryaklawi talwak usnit yakat uiwak, diyulwi dakana: —¿Ais waltamanah? Witingna kalyuyulna: —Maestro, ¿man angkat yalahtamahn? 39 Jisas yaklauwi nangnitnalana: —Aiwa talnauh. Uiwi tatalna, witing angkat yalahwa kidika, dawak kidika mani bitik laih witing karak bayayakna, kat uman maulahu awar arungka kapat dai bahang. 40 Jan yulwak dakawi Jisas usnit uiwi uina balna bu kidika kaupak as, kidika laih Andru dai, Saiman Pita wirahni. 41 Andru witing tatuna kalpakna kidika laih witing wirahni Saiman dai, dawak kalyulna: —Mesías karak kalpaknayangna (kidika tanka laih: Krais.) 42 Kidika usnit kat Saiman dai kidika Andru yaklauwi dukiuna, Jisas sakdai yakat, dawak Jisas kaltalwi kalyulna: —Man laih Saiman man, Jan walanibis, kaunah man ayangma laih Cefas karang (kidika tanka laih Pita).

Jisas yaklauwi diyulwi uina atnin Pilip dawak Natanael yakat

43 Kidika kaupak payahwak, Jisas Galilea yakat kiunin kulna. Pilip karak kalpakwi kalyulna: —Uskit uitah. 44 Pilip kidika laih Betsaida tawanni kaupak dai, kaput bik laih Andru dawak Pita bik laih sihm kidika pāni kaupak dai. 45 Pilip, witing Natanael yakat walwi kiwi kalpakwi kalyulna: —Yangna kalpaknayangna kidika muihni yulni Moses lā wauhnitaya yakat ulna dai kidika, dawak sihm kidika muihni yulni prapit balna bik uhulna dai kidika. Kidika laih Jisas, José walanibis, Nazaret kaupak dai kidika. 46 Natanael yulna: —¿Nazaret kaupak di yamni as kalahnin sip katpah? Pilip yaklauwi nangnitlana: —Man aiwa laktatalah. 47 Jisas witing talwak Natanael kidika witing yakat kiwalik kat, yulna: —Akat kaiwi, rahm Israel palni kidika, witing yakat alas as bik diski. 48 Natanael yaklauwi kalyulwi dakana: —¿Man amput amangkilatamahn? Jisas yaklauwi nangnitlana: —Pilip mayulwa tanit kau matalnayang, ani damni panan dinit yakat sakman kat. 49 Natanael yaklauwi kalyulna: —Maestro, ¡man kuduh Papang Walanibisman, dawak Israel Kingni bik! 50 Jisas yaklauwi nangnitlana: —¿Yang akat rahm kultaman, kat yang lawik mayultikda bahang, ani damni panani dinit yakat sakman kat matalnayang? Man di tanit nunuhni talma, adika karak dawakat. 51 Dawak adika yulni bik Jisas kalyulna: —Yang rahm palni mayultayang, makau kisang kidika bik apahwak talma, dawak Papang innisal balna kidika muih Walanibis al minit yakat yaklakaiwi, dawak kilwi kiwi ahawak.

Jan 2

Caná Galilea yakat muih marid kalalahna

1 Ma bās laihwak Caná yakat muih marid kalalahna, kidika laih Galilea sauni yakat tawan as dai. Bahang kidika yakat Jisas nanangni bik sakdai, 2 dawak Jisas dawak disainipil balna karak bik diyuyulna dai kidika marit alasnina yakat uinin. 3 Wain dahnkalna, dawak Jisas nanangni yaklauwi kalyulna: —Wain dahnkalna. 4 Dawak Jisas yaklauwi nangnitlana: —Yal, ¿ais yamta kidika yulni yayultamahn? Yang awarki kidika baisa kiwi kawas ki. 5 Yal kidika yaklauwi muih kau di lakwi yuwa muihni balna yakat diyulna: —Witing manayulwarang kidika bitik yamtanama. 6 Kidika yakat was punin dini nunuhni kipala kau yamna balna kidika tiaskauas raudai, kidika kau Ju balna was puwi amput maisihni dis kalahnin kidika yayamwādai. Kidika wasni punin dini kidika aslah was litro 50 kidika awaskat 70 laihwādai. 7 Jisas yaklauwi muih kau dilakwi yuwa bangkidika yakat diyulna: —Was punin dini balna adika was puta buhng datanauh. Kaput laih was puwi buhng dadana, 8 dawak Jisas yaklauwi diyulna: —Waralaih apis yakta, adika alasnina tunan muihni yakat duyawa kalatanauh. Bahang witingna kaput yayamna. 9 Kidika alasna tunan duwa kidika diwi dakana, was kau wain yamna kidika, witing amanglawasdai angkaupak kalahna kidika; yakat muih kau dilakwi diawabang kidika balna manah amanglalana dai, kat witingna was kidika yayakna dai bahang. Kaput laih kidika alasna tatuna duwalikkidika yaklauwi marid kalahwa al wahma yakat kalyulwak kiuna 10 dawak kalyulna: —Muih bitik laih tatuna wain tanit yamni kidika yuyuwi, bahang kaput laih yulwak uina muihni balna kidika aitani didina usnit kat, wain kuihwas parasni kidika utuhwi yuyuwi. Kaunah man laih wain tanit yamni kidika apaknaman. 11 Adika Jisas, Galilea sauni kau Caná pāni yakat yamna kidika, sain taldas tatuna yamna dai, kaput laih kidika kau witing alasnina yaksihni kidika lāih yakna; dawak witing disainipil balna kidika kasak kukulna witing yakat. 12 Kidika usnit kat Capernaum yakat kiuna, nanangni, wirahni balna dawak disainipil balna karak kalpakwi; yakat ma buas bangdai.

Jisas, makatyulnin ūni kidika maisihni dis yamwi

13 Insal kaiwi bayakna kidika ulisna dai bahang, Ju balna pasyakat, Jisas Jerusalén yakat kiuna. 14 Dawak makatyulnin ūni yakat kalpapakna, turuh wawahma balna, sīp, buhtuku kidika balna wauhwi bakanyang balna, dawak muih balna kau lalah sins yayamwa balna kidika panina yakat yalahna bangdai. 15 Kidika talwi, Jisas wah as duna dawi, wirwi, kidika kau kangwi yakna, makatyulnin ūni kaupak, tingninalau balna karak libitwi. Lalah sins yamyang balna dai kidika laih lalahnina ruhmlakna dawak tininabil bik laihwi abuklana. 16 Dawak buhtuku bakanyang balna yakat diyulna: —¡Dini balna adik, adika kaupak yaktanauh! ¡Yang Papangki ūni adika di wauhwi bakannin ūni yayamwinih! 17 Kaput laih disainipil balna kidika amanglalana, Ulna yakat aput yulwakidika: “Man ūma kidika minit parasni antayang.” 18 Ju balna kalyulwi dakakana: —¿Lā parasni duta adika yamtaman adika, ais amput manikingkamayah? 19 Jisas yaklauwi nangnitnalana: —Makatyulnin ūni adika bahta uhtanauh, ma bās kat wattik dulautik yamki. 20 Ju balna kalyulwi dakakana: —Adika makatyulnin ūni, kurih 46 kat yamwi yayakna, ¿man laih ma bās manah kat yamta yakmayah? 21 Makatyulnin ūni as Jisas yulwa kidika laih witing palni muihni nuhni kidika yulna dai. 22 Kidika bahang, witing dauna kaupak watwi yaklauna kat, disainipil balna isningnakatna dai, yulna dai kidika yulni, dawak Ulna yakat bik kukulna dawak Jisas yakat bik.

Jisas laih muih bitik kidika amangninalawi

23 Jisas kidika Jerusalén yakat sakkat, insal kaiwi bayakna alasnina yakat, muih manas Jisas yakat kalkukulna dai, witing sain taldas balna kidika yamwak. 24 Kauna Jisas laih kidika muihni balna yakat rahm laih dikulwasdai, kat yamni amangninalawa bahang bitik kau. 25 Muih as bik kalyulnin nid awasdai, kidika muihni balna yulnina, kat witing silp talwadai bahang muih balna kulninna kidika.

Jan 3

Jisas dawak Nicodemo karak

1 Parisi as dai ayangni laih Nicodemo, Ju balna pasyakat muih nuhni as kalkulna dai. 2 Adika muihni Jisas yakat pukta kiwi kaltalna, dawak aput kalyulna: —Maestro, amangladi Papang yaklauwi masihna yanasumalna atnam, kat muih as bik yamwaski man sain balna yamtaman kidika, Papang man karak awaskat. 3 Jisas yaklauwi kalyulna: —Rahm mayultayang, angdika muihni watwi wisam batahndawas kat, Papang kingni lani balna kidika sip talwas ki. 4 Nicodemo yaklauwi nangnitlana: —¿Amput muih as muihbarak kalna kidika watwi batahndawarang yah? ¿Sip karang katpah watwi nanangni pasyakat kawi dawi watwi batahnin? 5 Jisas yaklauwi nangnitlana: —Rahm mayultayang, angdika muihni watwi batahndawas kat, was karak dawak Spirit Holi karak, sip-awas karang, Papang kingni lani yakat kanin. 6 Sau muihni papangni munah batahndawa kidika laih, muih, dawak Spirit kau batahndawa kidika laih spirit. 7 Mayultikda kidika laih di as amangladas dini kapat laih kulwinih: ‘Muih bitik laih watwi batahndanin ki.’ 8 Wing kidika wauhwi angkut wauhkih kalawa yakat, yulni dakaman kaunah, amanglatasman angkaupak kaiwapa, dawak bik angkat kiwapa. Sihm kaput ki Spirit kau batahndadawa kidika. 9 Nicodemo watwi kalyulwi dakana: —¿Adika dini amput kaput atnin sipyah? 10 Jisas yaklauwi nangnitlana: —¿Man, Israel pasyakat maestro man bik, adika dini amanglatasmahn? 11 Mayultayang, mayang di amanglada kidika yulbaudi, dawak mayang witnis mayang di talnamayang kidika, kaunah manna rahm kultasmana yulda balna kidika yakat. 12 Adika sauni dini balna yulni manayulting rahm yakultasmana kat, ¿amput yakultanamayah makau kisang kidika yulni manayultingkat? 13 “Muih as bik mayakat kilwaski, kaunah makau kisang kidika kaupak kaina kidika manah laih, yuldarangkat, muih Walanibis al. 14 Dawak Moses, witing kauhmak wanilang yakat bil wayani dulauna kaput bik laih, muih Walanibis al kidika dulauna karang, 15 kaput laih wais kat kukulwarang balna bitik kidika sangka ban atnin kidika duduwarang.

Papang dalani lani duwa kidika laih muih balna dinina

16 “Bahang Papang laih muih yakat dalani palni talna, bahang Walanibis al aslah kidika kalana, kidika balna witing yakat kukulwarang bitik kidika laih dauwas atnin, kaunah sangka ban atnin kidika dunin. 17 Kat Papang laih Walanibis kidika sau akat sihwaski, muih balna kidika lanina yamwi dutni yakat ānin, kaunah nawatkauh laih witing munah laihwi yaknin kidika duna atnin. 18 “Papang Walanibis yakat kulwa muihni kidika, dutni yakat kalwirlawaski ki, kaunah kalkulwas muihni kidika laih uman dutni yakat kalwirlana, Papang Walanbibis al aslah yakat kulwas kidika yulni. 19 Kukulwas muihni balna kidika uman dutni yakat wirlana, kat dutni yayamwādai bahang, sau akat yaringni kaiwak puksani kidika wawalna, yaringni karak dawakat. 20 Di dutni yayamwa balna bitik kidika laih yaringni kidika dutni tatalwi, dawak yaihnit yakat uiwas ki, witingna ais yayamwa kidika lāih kalahnin awas yulni. 21 Kaunah di rahm karak yalalahwa balna kidika laih yaringni yaihnit yakat aiwi, kaput laih witingna yayamwa kidika lāih talna atnin, kidika laih Papang kulnin lani.”

Jan muih was utuhyang kidika watwi Jisas yulni yulwi

22 Adika usnit kat, Jisas witing disainipil balna karak uina Judea sauni yakat, kidika pāni yakat witingna karak kalpakwi ma as as muih was utuhwadai kidika. 23 Jan bik Enón yakat muih was utuhwa sakdai, Salim yaihnit yakat, kat kidika yakat laih was manas dai bahang, muih balna kidika yakat uiwak was utuhwi diyakwadai. 24 Adika kalahna dai, Jan kidika baisa silak yakat ahawas tanit yakat. 25 Kaunah Jan usnit uiyang balna kidika Ju muihni as karak kalbibilna dai, maisihni dis kalahnin kidika yulni, 26 dawak Jan yakat uiwi kalyuyulna: —Maestro, Jordán wasni nakaskau man karak sakdai kidika, dawak witing yulni yulnaman dai kidika, waralaih witing muih kau was utuhwi yakwi, dawak muih bitik usnit uhuiwi. 27 Jan yulna: —Muih as sip di as bik duwaski, Papang yaklauwi kalawas kat. 28 Manna palni yadakanamana, lāih palni yultingkat, yang laih Mesías awasyang, kaunah witing tanit yakat yasihna kidika as yang. 29 Marid alasnina pasyakat, al wahma kidika kuduh yal sirau yakat duwa kidika; dawak marid wahma kaltalyang yamni duwa kidika laih, yakat sakkauna, dawak yulbauwak dakawi alasna kalwi. Sihm kaput bik laih waradika yang alaskina laih bitik palni dutayang. 30 Witing kidika laih tanit nuhni kalnin ki, dawak yang laih parahkau lakwinik ki.

Makaupak kaiwa kidika

31 “Makaupak kaiwa kidika laih di bitik minit yakat ki. Kaunah sau muihni kidika laih sau muihni, dawak sau dini balna kidika yulni yulbauwi. Kaunah makau kisang kidika kaupak kaiwa kidika laih, di bitik minit yakat ki, 32 dawak talna balna, dakana balna kidika yulni yulwi, kaunah muih as bik kidika yulni laihwi duwas ki. 33 Kaunah muih as kat laihwi duwarang kat, kidika karak yulwi Papang kidika di rahm yulwi; 34 Papang yaklauwi sihna kidika laih, Papang yulni kidika yulwi, kat Papang Spiritni kidika manas palni kalawa bahang. 35 Papangni kidika Walanibis yakat dalani talwi, bahang di bitik minit yakat parasni kidika kalana. 36 Wais kat Walanibis yakat kulwa kidika, sangka ban atnin kidika duwarang, kaunah angdika muihni kat Walanibis yakat kulwa kidika laih, kidika sangnika sip duwas karang, kaunah nawatkauh laih Papang wahni yamadahngni kidika duwarang.”

Jan 4

Jisas dawak Samaria yal as karak

1 Parisi balna dakakana, Jisas kauh disaipil mahni duwi dawak bik muih mahni was utuhwi yakwi, Jan karak dawakat 2 (di rahm kidika laih, Jisas muih was utuhwi yakwas dai, kaunah disainipil balna yayamwādai). 3 Jisas kidika yulni dakawi, Judea kaupak kalahwi Galilea yakat nawatwi kiuna. 4 Witing kiuna kidika laih Samaria munah bayakwi kiunin dai. 5 Kaput laih Samaria sauni yakat tawan as pakdai ayangni laih Sicar, kidika laih Jacob yaklauwi walanibis José yakat sau as kalana kidika yaihnit yakat dai. 6 Kidika yakat Jacob pāni kuhrna kidika sakdai. Jisas, witing lapakwi kiuna kidika kalsuhdana bahang kidika pāni kuhrna yakat kiwi yalahna dai. Kidika laih matunak dai. 7-8 Disainipil balna kidika laih tawan yakat uina dai, kasnin dini bakanna. Kidika yakat, Samaria yal as kiuna was yakna atnin pa kuhrna kidika kaupak, dawak Jisas yaklauwi kalyulna: —Was apis yatah. 9 Kauna Ju balna kidika yamni awas dai, Samaria muihni balna karak yulbabauwas bahang, yal kidika yaklauwi nangnitlana: —¿Amput man, Ju man kidika, yang akat was yayultamahn, yang laih Samaria yal yang adika? 10 Jisas yaklauwi nangnitlana: —Papang yaklauwi di yuwa kidika amanglataman kat laih, dawak wais yaklauwi man yakat was mayulwa kidika, man lawa kalatitimdai witing yakat, dawak witing yaklauwi sangka wasni kidika mawitdai. 11 Yal kidika yaklauwi kalyulna: —Dawan, was yaknin dini diski, pāni kuhrna adika tuhni palni ki: ¿angkaupak sangka wasni kidika yāmayah? 12 Yangna muihkinabarak Jacob adika pāni kuhrna yanana, witing palni adika wasni kaupak diwādai, walanibis balna dawak tingnilau balna bik didiwadai. ¿Witing karak dawak man kauh tanitman katpah? 13 Jisas yaklauwi nangnitlana: —Muih bitik adika wasni didiwarang kidika laih watwi was dikih diawarang ki; 14 kaunah yang lawik was kalaki kidika diwarang laih, watwi was dikih kalawas karang ki. Kat yang was kalaki kidika laih, witing muihni yakat wastuna as kapat buhrwarang, dawak ban sangka atnin kidika kalawarang. 15 Yal kidika yaklauwi kalyulna: —Dawan, kidika wasni yatah, kaput laih wattik was dikih yawas karang, dawak bik wattik adika pāni akat aiwik was butnik awas. 16 Jisas yaklauwi kalyulna: —Yawa alma kalyultang kaiwang, dawak man bik aiwah akat. 17 Yal kidika yaklauwi nangnitlana: —Al disyang. Jisas yaklauwi kalyulna: —Yamni yultaman al disyang timan kidika; 18 kat ahal singka dunaman, dawak waradika dutaman kidika bik man alma awaski. Man yultaman kidika laih rahm ki. 19 Kidika dakwi, yal kidika yaklauwi kalyulna: —Dawan, yang talayang man laih prapit asman. 20 Yangna muihkina bararak balna, Samaria muihni balna, akat Papang kau ayangni nuhni yayamna, adika asangni akat, kaunah manna Ju muihni balna manna kidika yultamana, Jerusalén pāni yakat ki, Papang kau ayangni nuhni yamnin kidika. 21 Jisas yaklauwi nangnitlana: —Yultayang kidika rahm yakultah, yal, awarni kaiwi kawi, manna Dawan yakat ayangni nuhni yamtanama kidika, adika asangni akat aiwas dawak Jerusalén yakat bik yawas. 22 Manna amanglatasmana, wais yakat ayangni nuhni yamtamana kidika, laihwi yaknin kidika laih Ju balna munah kaiwi. 23 Kaunah awarni kaiwi kawi, dawak adika awarni palni kuduh, Papang yakat ayangni nuhni yayamwa kidika rahm palni yayamwarang ki, Papang Spiritni yaklau diyulwarang kidika kaput. Kat Papang laih dukih kalawi, muih balna kidika kaput yayamna atnin ayangni nuhni yayamwa kidika. 24 Papang laih Spirit, witing yakat ayangni nuhni yayamwa kidika laih rahm palni yamnin ki, Papang Spiritni kaput. 25 Yal kidika yaklauwi kalyulna: —Yang amanglatayang Mesías kaiwarang kidika (yuldarangkat Krais); dawak witing kaiwarang kat, kidika bitik lāih yanayulwarang bitik palni. 26 Jisas yaklauwi kalyulna: —Kidika kuduh yang, man karak yulbauwa kidika. 27 Kidika minitni yakat disaipil balna uiwi kakana, dawak witingna yamni kapat laih tatalwasdai, Jisas yal as karak yulbauwasak kidika. Kaunah witingna as bik kalyulwi dakakawas dai, yal kidika ais walwadaipa, kidika awas bik ais yulbabauna kidika. 28 Yal kidika, was butnin dini duwalik kidika dasakwi tawan yakat kiuna, muih balna yakat diyulna: 29 —Aiwa talnauh, muih al as ki, yang di yamnayang balna kidika bitik laih yayulna. ¿Kidika Mesías awasyah? 30 Kaput laih tawan kaupak kalahwi uina muih balna kidika Jisas sakyakat. 31 Dawak disainipil balna laih kalni dinit yakat bukwi yuyulna: —Maestro, di apis kastah. 32 Kaunah witing yaklauwi diyulna: —Yang di kasnin as dutayang, kidika laih manna amanglatasmana. 33 Disainipil balna kidika as as kalyulwi dakakana: —¿Kasnin dini duaiwi kalalana kat awasyah? 34 Kaunah Jisas yaklauwi diyulna: —Yang kasnik kidika laih yasihna muihni kulnin lani yamnik, dawak warkni balna bitik yamtik dahn danik. 35 Manna yultamana: ‘Baisa waiku arungka ki di minik balna bahnin’; kaunah yang manayultayang, dahna balna yakat talnauh, uman minik balna pihna bahnin mani ki. 36 Di minik bahnin warkni yamwa kidika muihni laih minit duwi, dawak di minik balna uduhwa kidika laih sangka ban atnin kidika ki, dahwa muihni dawak bik minik bahwa muihni kidika balna albupak alasna duduwarang. 37 Yamni yuyulwi yul as yuyulwa kidika: ‘Muih buas dadahwi, dawak uk balna kidika laih minik babahwi.’ 38 Dawak yang manna yakat manasihnayang minik bahna atnin, wark as bik manataihwasdai kidika, muih ūk balna wark yayamna, dawak manna kuduh dunamana witingna wark yayamna dai kidika. 39 Samaria kau kidika tawanni muihni balna kidika, Jisas yakat kalkukulna, yal yulna dai kidika kaput kalahna bahang: “Yayulna, yang di yamnayang balna bitik kidika.” 40 Kaput bahang, Samaria muihni balna kidika uiwi kawi, Jisas kalni dinit yakat bukwi kalyuyulna, kidika karak watna atnin. Kaput laih witing ma bu watna dai kidika yakat witingna karak, 41 muih manas witing yakat rahm kalkukulna, witing yulwa kidika dakawi. 42 Dawak yal yakat kalyuyulna: —Waradika laih rahm kuldi, man yanayulnaman kidika manah laih awaski, kat yangna palni yulwak dakanayangna bahang, dawak amangladi, witing kidika kuduh muih Laihwi Yakyang.

Jisas, king, kalbauyang tunan duwa kidika walanibis as sikninis kaupak dulauna

43 Kidika ma bu bayakwak, Jisas Samaria kaupak kalahwi kiuna Galilea yakat. 44 Kat, witing yulna kaput, prapit as kidika witing sauni yakat laih risnipik kalalawaski. 45 Galilea yakat kiwi kāwak, kidika muihni balna yamni kalduduna, kat witingna bik Jerusalén yakat uina dai bahang insal kaiwi bayakna alasnina yakat, kaput laih Jisas di yamna balna kidika bitik tatalna dai. 46 Jisas nawatwi kaina Galilea sauni kau Caná tawanni yakat, kidika yakat kuduh was kau wain yamwadai kidika. Dawak king, kalbauyang muihni balna taninatuna as duwa dai, bahang kidika lani walanibis al as siknis duwasakdai Capernaum yakat. 47 Kalbauyang balna taninatuna kidika dakana Jisas kidika Judea kaupak Galilea yakat kiuna atwak, dawak kiwi kaltalwi, kalni dinit yakat bukwi kalyulna witing ūni yakat kiuna atnin, dawak walanibis siknis kidika kaupak dulauwi kalana atnin, bahang walanibis kidika laih daunin manah dai. 48 Jisas yaklauwi nangnitlana: —Manna kasak kultasmana, sain as bik talasmana kat. 49 Kaunah kalbauyang balna taninatuna kidika kalyulna: —Dawan, sirihni aiwah, walakibis al kidika dauwas tanitkauh. 50 Jisas yaklauwi kalyulna: —Ūma yakat nawatta yawah, man walamabis sangka ki. Kidika alni rahm kulna, Jisas kalyulna kidika, bahang mahka kiuna. 51 Witing ūni yakat kiwak, dini yamyang balna kidika niningkauh uiwi kalyuyulna: —¡Walamabis sangka ki! 52 Witing yaklauwi diyulwi dakana, ais awarni kaupak walanibis al kidika yamni kaldakana daih, dawak nangnitlalana: —Damai mani maulahu awar as praisni yakat yamahni kidika kaldana dai. 53 Muih al bin papangni kidika kulwi talwak sihm kidika awarni Jisas kalyulna dai: “Man walamabis al kidika sangka ki”; witing dawak ūnipas kau walanibis balna bitik laih Jisas yakat kalkukulna dai. 54 Adika kat, Jisas sain bu yamna dai, Judea kaupak Galilea yakat kiuna yakat.

Jan 5

Jisas, Betzata kau muih muihni kusulana dulauna

1 Ma buas bayakwak usnit kat, Ju balna alasna yayamna, dawak Jisas kidika Jerusalén yakat nawatwi kiuna. 2 Jerusalén yakat, sīp balna dūrnina atwa yakat, was as pakki, hibru kau laih yuyulwi Betzata. Kidika laih dūrni singka duwi, 3 kidika yakat siknis muihni balna manas bangdai, miniknapa dis, yamni lapapakwas, kalnina kusulana kidika balna laih sau yakat kalangna bangdai. 5 Kidika balna pasyakat muih al as siknis tusdai kurih 38 praisni. 6 Jisas witing talna, kidika yakat kalangna tuskat, dawak bik amanglana kidika alni mamahni kidika yakat tusdai kidika, dawak kalyulwi dakana: —¿Man watta muihma yamni dukih mawih? 7 Siknis muihni kidika nangnitlana: —Dawan, muih as bik diski was yakat yahanin, was kidika lumakwak. Awakuhtingkat, muih ūk balna kidika tatuna kakawi. 8 Jisas yaklauwi kalyulna: —Lawah, payahtaman pāni kidika trukta yawah. 9 Kidika minitni yakat muih al dai kidika muihni yamni kalahna, dawak kalangwa pāni kidika trukwi kiuna. Kidika mani laih urupnin mani dai bahang, 10 Ju balna yaklauwi kalyuyulwadai, sikninis kaupak yamni kalyamna muihni yakat: —Warmani laih urupnin mani; sip-awas ki alangwaman pāni kidika trukta yawanam. 11 Kidika alni yaklauwi diyulna: —Muihki yamni yayamna muihni kidika yaklauwi yayulna: ‘Alangwaman pāni trukta yawah.’ 12 Dawak witingna yaklauwi kalyulwi dakakana: —¿Wais yaklauwi mayulnayah: ‘Pama trukta yawah’? 13 Kaunah al kidika amanglawasdai wais yaklauwi muihni yamni kalyamnapa, dawak Jisas muih mahni bangkidika pasyakat kawi disna dai. 14 Kidika usnitkat Jisas witing kalpakna dai kidika alni karak, makatyulnin ūni yakat, dawak kalyulna: —Talah, waradika laih yamni kalnaman bahang, watwi dutni yamwinih, baisa di dutni kidika makalahnin awas yulni. 15 Kidika alni dai kidik kiwi Ju balna yakat diyulna, Jisas yaklauwi witing muihni kidika yamni kalyamna. 16 Kidika yulni, Ju balna kidika Jisas yakat laihwi wawalna, kat yakurupdinin mani kat kidika dini balna yamwa bahang. 17 Kaunah Jisas yaklauwi diyulna: —Yang Papangki laih ban wark kalahna, kidika bahang yang bik wark alahwayang. 18 Kidika bahang, Ju balna yaklauwi baisa īnin kukulna, kat urupnin mani kidika manah kulwas laih awasdai, kaunah witing kidika laih Papang kapat kaldakawadai kidika bahang, kat witing yulwadai kidika: “Papang kidika laih yang palni Papangki.”

Papang Walanibis al, di balna yamwa kidika

19 Jisas yaklauwi diyulna: “Yang manayultayang, Papang Walanibis al kidika witing alas sip di balna kidika yamwas ki; Papangni yamwa kidika yakat talwi yamwi witing bik. Papangni yamwa bitik kidika, Walanibis bik yamwi. 20 Kat Papangni kidika Walanibis al yakat dalani talwi, bahang ais yamwa balna kidika bitik niningkawi; di tanit nuhni bik niningkawarang ki, manna namangna yakat di taldas dini talnama. 21 Kat sihm kaput bik Papangni kidika muih dauna kaupak dulauwi sangninaka diawakat, Walanibis al bik sangninaka diawi wais yakat kalanin kulwa kidika. 22 Dawak Papangni kidika muih as bik lanina laihwi yamwas ki, kaunah Walanibis al yakat parasni kidika kalana, muih lanina yamnin, 23 kaput laih muih bitik Walanibis al yakat risnipik kalanin, sihm Papangni kau kalalawa kapat. Wais kat Walanibis al sihna yakat rispik kalawas kidika, Papangni yakat bik risnipik kalawas ki. 24 “Rahm manayultayang, wais kat yang yultayang balna yakat tapayuwi dakawi rahm kulwakat yasihna muihni yakat, sangka ban atnin kidika duwarang; kaput laih daunin yakat wirlawaskarang, kidika laih daunin kaupak bayakna sangka atnin yakat. 25 Rahm manayultayang awarni kaiwi, bahang kidika laih waradika ki, dadauna balna kidika Walanibis al yulwa kidika dakakawarang; dawak dakakawarang balna kidika, sangka karang. 26 Kaput bik Papangni witing silp sangnika duwa kidika, sihm kaput kalyamna Walanibis al yakat bik silp sangnika duna atnin, 27 dawak bik parasni kalana muih lanina yamna atnin, kat witing laih muih Walanibis al bahang. 28 Adika manna di wisam as kapat laih dakakawinih, kat awarni kaiwi kawarang ki, dauna muihni balna bik witing dinit yulwa kidika dakakawarang ki 29 dawak sau-ū kaupak kalalahwarang. Yamni yayamna balna kidika laih, dauna kaupak yaklalauna karang, sangka ban atnin yakat, kaunah dutni yayamna balna kidika laih, dauna kaupak yaklalauwarang kaunah daunin yakat diwirlana karang.

Jisas parasni duwa kidika

30 “Yang alas sip di yamtasyang. Muih lani yamtayang Papang yaklauwi yapakwa kidika kat, kidika bahang yang la yamtayang kidika laih barangni ki, yang kulnik lani yamtasyang kaunah Papang kulnin lani kidika yamtayang, witing yaklauwi yasihna kidika. 31 Yang alas witkinis yulki kat, yang witnis yultayang kidika laih parasni dis karang. 32 Kaunah ūk ki yang witkinis yulwa kidika, bahang kidika witnis yulwa kidika laih rahmki. 33 Manna muih sihtanangkat Jan yakat kalyulwi dakakana, dawak witing witnis yulna kidika laih di rahm kidika witninis yulna. 34 Kaunah yang laih muih al as bik witkinis yulwas ki. Yang kidika yultayang manna laihwi yaknin kidika dunamna yulni. 35 Jan laih awas as dahlwi yaringni yamwa kapatdai, dawak manna kidika yaringni alasnina dunaman ma balna parahni. 36 Kaunah yang nikingyakat witnis yulwa tanit yamni as dutayang, Jan witnis yulwa kidika karak dawakat. Yang yamtayang kidika laih, Papang yaklauwi yamnin yapakna kidika yamtayang, laihwi talna ki kidika laih rahm Papang yaklauwi yasihna. 37 Dawak bik Papang yasihna kidika, yang witkinis yulwi, manna dinit yulwa kidika dakasmana, dawak talasmana kaunah, 38 dawak datanangkat witing yulni balna kidika manna yakat watwas ki, kat Papang sihna yakat kultasmana bahang. 39 Manna laih Ulna balna kidika yamni laihta tala lan alahwamana, kidika yakat sangka ban atnin kidika waltamana bahang; kaput kaunah, Ulna balna kidika yang witkinis yuyulwa kaunah, 40 manna yang akat aiwinin kultasmana, kidika sangnika dunin. 41 “Yang dutasyang alasna yaksihni muih kaupak kaiwa kidika. 42 Baisa kidika minityakat, manna amangmanalatayang, dawak amanglatayang, Papang dalani kidika dismana. 43 Yang laih Papangki ayangni kau aiwanayang, bahang manna kidika kultasmana; kaput kaunah, ūk kat witing alas ayangni kau kaiwarang laih, kidika yakat rahm kalkultanama. 44 ¿Manna amput kultanamayah, manna silp biri biri alasmana yaksihni yakat kultamana kidika, alasna yaksihni Papang kaupak kaiwa yakat waltasmana kidika? 45 Manna kukulwinih, yang Papangki yakat yulmana yakki; manna yulmana yulwa kidika laih Moses, manna witing yakat kasak kultamana kidika. 46 Kaunah manna Moses yakat kultamana katlaih, yang akat bik yakultanama, kat Moses ulna kidika yang yulki balna kidika ulna. 47 Kaunah manna kultasmana kat witing ulna balna kidika, ¿manna amput kultanamayah yang manayulki kidika?”

Jan 6

Jisas muih mahni di bayahwi

1 Adika usnit kat, Jisas witing kiuna Galilea lakunni nakas yakat, kidika laih sihm ki Tiberias lakunni kidika. 2 Muih manas usnit uiwi uina, kat sain manas yamwak tatalna kidika, muih siknis balna kaupak dulauna, bahang kidika yulni usnit uiwi uina dai. 3 Jisas asang as kau kilwi kiuna, dawi disainipil balna karak yalalahna. 4 Insal kaiwi bayakna mani kidika ulis danadai, Ju balna alasna yayamwa kidika. 5 Jisas witing talwak muih manas usnit uiwi uiwak, dawak Pilip yakat kalyulna: —¿Angkaupak di kasnin bakandarangyah adika muihni balna bitik bayahnin? 6 Pilip ais yulwak dakanin manah kalyulwi dakana, kat Jisas witing yamni amanglawadai ais amput yamnin kidika. 7 Pilip yaklauwi nangnitlana: —Ma andat bu wark kalahna minit kidika kau kasnin dini kidika bakandarang bik sip dilawas karang ki. 8 Kaput laih Andru, disaipil ūk dai kidika Saiman Pita wirahni, witing kalyulna: 9 —Akat muihbin as duwalikki plawar busna singka, dawak waspa dini bu, kaunah, ¿aisyah, adika dini muih mahni niningyakat? 10 Jisas yaklauwi yulna: —Diyultanang kat muih bitik yalalahwang. Kidika pāni yakat sihrsihr yamni pakdai, dawak yalalahna. Muih balna kidika tausin singka praisni dai. 11 Jisas, witing plawar busna balna kidika duwi Papang kau minityulwi tingkih yulwi dawi, muih yalahna balna bangkidika bitik yakat diana. Waspa dini balna kidika bik sihm kaput yamna, witingna kaskih diawa kidika balna bitik yakat diana. 12 Kaswi aitani dibahngna kat, Jisas witing disainipil balna yakat diyulna: —Sutni bayakna balna kidika uduhtanauh, as bik dauh pini disnin awaski. 13 Witingna ududuhna, dawak uslun kapatnah kau pupuna 12 , plawar busna singka dai kidika kaupak. 14 Jisas adika sainni yamwak muih balna talwi yuyulna: —Rahm palni ki prapit as kaiwarang dai kidika kuduh witing. 15 Kaunah Jisas witing amanglana, witingna parasni kau laihwi duwi uiwi king ānin yayamwa kidika, bahang, witing baisa asang mayakat kilwi kiuna disainipil balna karak.

Jisas was minit yakat lapakwi

16 Puklakwakat, Jisas disainipil balna dai kidika lakun yakat yaklakwi uina, 17 kuring as kau kawi lakun kidika dakyaklalana Capernaum yakat kiunin. Puksani palni dai, dawak Jisas kidika baisa nawatwi kaiwasdai. 18 Kidika dakyaklalawakat, wing parasni wauhwak was kidika lalamna. 19 Kilómetro singka, kidika awaskat tiaskauas uman kalahwi uina dai, dawak witingna tatalwak Jisas kidika lapakwi kiuna was minit munah, kuring yakat, dawak yamaduduna. 20 Witing yaklauwi diyulna: —¡Yang, yamaduduwinih! 21 Dawak witingna kuring yakat ahana, dawak sirihni kat uiwi kikilna angkat uiwa yakat.

Muih balna Jisas yakat wawalwi

22 Kidika kaupak payahwak, muih balna lakun nakas yakat bangdai kidika witingna amanglalana, Jisas disainipil balna kidika kuring aslah witdai kidika kau uina dai kidika, dawak Jisas kidika laih witingna karak kiwasdai kidika witingna karak. 23 Dawak, kuring ūk balna kidika laih uina dai Tiberias tawanni nuhni kaupak, Dawan yaklauwi plawar busna kidika blisyamwak kakasna kidika pāni yaihnit yakat. 24 Kaput bahang witingna tatalwak Jisas dawak disainipil balna kidika bik disdai kidika pāni yakat, dawak muih balna kidika kuring yakat kawi Capernaum yakat uina, walwi. Jisas laih, kasnin as sangka kidika 25 Witingna lakun nakas yakat uiwak, Jisas kalpapakna dawak kalyulwi dakakana: —Maestro, ¿mampat akat aiwanamahn? 26 Jisas yaklauwi diyulna: —Di rahm kidika laih, manna yawaltamana, di kastanang manabuhngdana bahang, kaunah sain kidika amanglanamana yulni laih awas ki. 27 Manna wark kalalahwinih kasnin dini dahnkalahwa kidika yulni, kaunah kasnin dini as dahnkalwas dawak sangka ban atnin mayawa kidika yulni wark yamtanauh. Kidika kasnin kuduh muih Walanibis al kidika yaklauwi manawarang kidika, kat Papang tampni kidika laih Walanibis al yakat kalana bahang. 28 Kalyulwi dakakana: —¿Ais yamniknayah, Papang warkni yamtiningkat talkih kalawa kidika? 29 Jisas yaklauwi nangnitnalana: —Papang dukih kalawa kidika, mayang yamna atnin, kidika laih, witing sihna muihni yakat kalkulnin. 30 Dawak kalyulwi dakakana: —¿Ais sainni sipyah nikingnakanam, kidika talik man yakat kasak makulnikna? ¿Man warkma balna kidika angdikayah? 31 Yangna muihkinabararak balna maná kakasna kauhmak wanilang yakat, Wauhtaya yakat ulna kaput: ‘Makau kisang kidika kasnin kaupak diawak kakasna.’ 32 Jisas yaklauwi nangnitnalana: —Yang rahm manayultayang, Moses yaklauwi makau kisang kidika kasnin kaupak manawasdai, kaunah yang Papangki kuduh yaklauwi makau kisang kasnin rahm palni yuwa kidika. 33 Kat kasnin dini Papang yaklauwi yuwa kidika laih, makau kisang kaupak kaiwi yaklakna kidika, dawak muih balna yakat sangninaka diawa kidika. 34 Witingna yaklauwi yuyulna duna atnin: —Dawan, kidika kasnin yanatah. 35 Dawak Jisas yaklauwi diyulna: —Yang kuduh kasnin dini kidika, dawak sangnika ban kalawa kidika. Wais yang akat kaiwa kidika yuh kalawas karang; dawak wais yang akat kulwa kidika, dikih bik kalawas karang. 36 Kaunah uman manayulnayang kaput, manna rahm kultasmana yatalnamana bik. 37 Papangki yawa bitik kidika, yang akat aiwi; dawak yang akat aiwa kidika, ahni yakat datas awaki. 38 Kat yang makau kisang kaupak aiwik lakwanayang kidika laih, yang kulnin lani yamna aiwasyang, kaunah Papangki kulnin lani yamna aiwanayang, witing yasihna kidika. 39 Dawak yasihna kulnin lani kidika laih, witing yana kidika as bik disnin awaski, kaunah mani witni yakat dauna kaupak dulauna atnin. 40 Kat Papangki kulnin lani kidika, Papang Walanibis al yakat tatalwa bitik kidika, witing yakat kulnin, dawak sangka ban atnin kidika dunin; dawak yang lawik mani witni yakat dauna kaupak dulauki. 41 Kidika bahang Ju balna kidika Jisas niningyakat yuyulna, kat yulna bahang: “Yang kuduh kasnin dini as makau kisang kaupak kaina kidika.” 42 Dawak kalyuyulna: —¿Adika awasyah Jisas, José walanibis? Mayang amangladi papangni dawak nanangni bik. ¿Kaunah amput yulwi witing kidika makau kisang kidika kaupak kaina? 43 Jisas yaklauwi diyulna: —Manna ap yultamana kidika datanauh. 44 Muih as bik sip yang akat kaiwas ki, Papang yaklauwi duaiwas kat, yasihna muihni kidika; dawak yang dulauki dauna kaupak mani witni yakat. 45 Prapit balna uhulna yakat yulwi: ‘Papang yaklauwi muih bitik yakat sumalna karang.’ Kaput bahang muih bitik Papang yakat dakakawarang kidika, lan kakalwarang kidika witing kaupak, yang akat aiwarang ki. 46 “Muih as Papang yakat talna laih awaski; talna muihni kidika laih Papang kaupak kaiwi. 47 Rahm manayultayang wais kasak kulwakidika laih, sangka ban atnin duwi. 48 Yang kuduh kasnin dini as sangnika kalawa kidika. 49 Manna muihmanabararak balna maná kakasna kauhmak wanilang yakat, kaunah witingna dadauna; 50 kaunah yang manayultayang, kasnin dini as makau kisang kaupak kaina kidika; wais kat kidika kaupak kaswarang kat, dauwas karang. 51 Yang kuduh kasnin dini as makau kisang kidika kaupak kaina kidika; wais kat adika kaupak kaswarang kat, sang ban kaput karang. Kasnin dini yang kalaki kidika kuduh yang muihki. Muih balna bitik sangninaka yulni diana awaki ki. 52 Ju balna biri biri yuyulna: —¿Amput sipyah witing muihni palni kidika mayawak kasnin? 53 Jisas yaklauwi diyulna: —Rahm manayultayang, muih Walanibis al muihni kidika kastasmana kat, dawak āni bik ditasmana kat, sangmanaka dutasmana. 54 Wais kat muihki kaswi, āki diwi, witing sangka ban atnin duwi; dawak mani witni yakat yang dulauna awaki dauna kaupak. 55 Kat yang muihki kidika laih kasnin dini rahmpalni ki, dawak āki kidika bik dini rahm palni ki. 56 Wais kat yang muihki kaswi, āki diwi, kidika laih yang karak aslah ki, dawak yang bik witing karak aslahyang. 57 Papang, yasihna kidika laih witing sangnika duwi, bahang yang sangkayang witing munah, sihm kaput bik laih, yang kaupak di kaswa kidika, yang munah sangka karang. 58 Kasnin dini as makau kisang kaupak kaina kidika yultayang. Dawak adika kasnin laih sihm awaski, manna muihmana bararak balna maná kakasna kidika kauhmak wanilang kau, witingna kakasna dai kaunah dadauna; kaunah wais kat adika kasnin dini kaswarang kat sangka ban karang ki. 59 Jisas adika sumalna, Capernaum kau sumamalwa ūni yakat.

Sangka ban atnin yulni balna

60 Kidika sumalwak dakawi, Jisas usnit uiyang balna manas yuyulna: —Adika yulwa kidika laih dadasni mayang yamnin; ¿wais sipyah adika yulni dakawi yamnin? 61 Tani yuyulwa kidika Jisas dakawi diyulwi dakana: —¿Adika yulni dutni dakamanah? 62 ¿Ais kalahwarang, talanangkat muih Walanibis al kidika kilkiwarang kat muhnilau sakdai yakat? 63 Spirit kidika yaklauwi sangnika kalawi; muihni nuhni kidika laih dauh ki. Yang di balna manayultikda kidika laih spirit dawak bik sangnika. 64 Kaunah manna pasyakat buas kukulwas ki. Kat Jisas laih uman amanglana dai tatuna kaupak wais balna kidika kukulwas karang kidika, dawak wais balna daunin tingni yakat ahawarang kidika. 65 Dawak baisa minit yakat lakwi yulna: —Yang akat muih as bik kainin sip-awas ki atnayang kidika laih Papang yaklauwi kalawas karang kat. 66 Kidika kaupak, muih manas Jisas usnit uhuiwa balna kidika usnit uiwas dadana dai. 67 Dawak Jisas yaklauwi disainipil 12 yakat diyulwi dakana: —¿Manna bik mahka yawakih manawih? 68 Saiman Pita yaklauwi nangnitlana: —Dawan, ¿wais yakat sipyah yawinikna? Yulma balna kidika laih sangka ban atnin yulni. 69 Yangna laih uman kulnayangna, yangna amanglatayangna, man laih Papang holi kidika man. 70 Jisas yaklauwi nangnitnalana: —¿Yang lawik manayaknayang awasyah manna 12 mana kidika? Kaput kaunah manna pasyakat as kidika laih muih alasni yulyang ki. 71 Kidika Jisas yulna kidika laih Judas yakat kalyulna, Saiman Iscariote walanibis kidika, kat Judas yaklauwi dutni yakat āwarang bahang, disaipil 12 kidika paskaupak kaunah.

Jan 7

Jisas wirahni balna kidika witing yakat rahm kalkukulwas dai

1 Adika usnit kat, Jisas witing Galilea sauni yakat kiuna dai. Judea yakat sak atnin kidika dukih kalawasdai, kidika yakat Ju balna yaklauwi kalwawalwādai īna atnin. 2 Kauna ū lababanni alasnina yayamwa kidika ulisna bahang, Ju balna alasna yayamwa mani kidika, 3 wirahni ahal balna kidika kalyuyulna: —Akat watwinih; Judea yakat yawah, kaput laih man usmat uhuiwa balna kidika tatalwarang man ais yamtaman kidika. 4 Muih as kat kaltalyang kalahnin kulwa kidika, di kidika malni yakat yamwaski. Adika di balna yamtaman kat, muih balna bitik muhnina yakat yamtah. 5 Dawak witing wirahni ahal balna palni bik rahm kalkukulwasdai. 6 Jisas yaklauwi diyulna: —Baisa awarki kaiwi kawas ki, kaunah manna namangna yakat laih angdika awar karang bik yamni ki. 7 Sau muihni balna kidika laih manna yakat sip dutni manakukulwas karang, kaunah yang akat laih dutni yatatalwi, kat yang lawik lāih niningnakatayang bahang, witingna yayamwa kidika dutni kidik. 8 Manna kidika alasnina yakat yawanauh; yang laih yawasyang, kat baisa awarki kidika kaiwi kawas bahang. 9 Adika diyulwi dawi, witing laih Galilea yakat watna dai.

Jisas ū lababanni alasnina yakat

10 Kaunah witing wirahni ahal balna kidika uidadawak, Jisas bik kidika alasnina yakat kiuna dai, kaunah lāih kiwasdai muih muhnina yakat, yakmaldi kiuna. 11 Ju balna kalwawalna kidika alasnina yakat, dawak yuyulwadai: —¿Kidika alni angkat laih sakyah? 12 Muih balna pasyakat witing yulni manas palni laih yuyulna dai. Buas yuyulna: “Witing laih muih al as yamni ki”; dawak ūk balna kidika yuyulna: “Yamni laih awaski, muih balna yakat alas diyulwi.” 13 Kaput kaunah, muih as bik laih witing yulni kidika lāih yuyulwasdai, Ju balna yamaniduduwa kidika yulni. 14 Alasna kidika papus dawakat, Jisas laih makatyulnin ūni yakat kawi sumalna dai muih balna yakat. 15 Ju balna kidika laih yamni talwi aput yuyulna: —¿Amput witing di manas amanglawih, skul kawas bik? 16 Jisas yaklauwi nangnitnalana: —Yasumalna kidik laih yang diki awaski, kaunah yasihna muihni kidika dini. 17 Muih as kat Papang kulnin lani yamkih kalawak, sip ki amanglanin sumaltayang kidika Papang kaupak kaiwapa kidika awaskat, yang alas kulnik lani yultayang pa. 18 Wais kat silp kulnin kaupak yakwi yulwa kidika laih, witing alas alasnina yaksihni kidika walwi; kaunah wais kat kalsihna kidika alasnina yaksihni walwa kidika laih, kidika muihni rahm yulwi, dawak witing yakat la kat awas kidika laih diski. 19 “¿Rahm awasyah, manna yakat Moses yaklauwi lā manana kidika? Kaput kaunah, manna kaupak as bik lāni yakat yamtasmana. ¿Ais yulni yaīnin kultamanah?” 20 Muih balna yaklauwi nangnitlalana: —¡Sitan malaihna! ¿Wais maīnin yamwih? 21 Jisas yaklauwi diyulna: —Manna bitik, yakurupdinin mani di as yamnayang kidika, di taldas dini kapat talamana. 22 Kaput kaunah, Moses yaklauwi Papang sainni kidika yamnin manapakna (kaunah kidika laih Moses kaupak kaiwas ki, kaunah manna mamuihkibararak balna kaupak kaiwi), dawak manna muih as kau Papang sainni kalatamana urupdinin mani karang bik. 23 Moses lani yakat tala yamtas data, urupdinin mani karang bik muih al bin kidika Papang sainni kalatamana, ¿kaput kat ais yulni manna kulnamna daukaltamanah yang karak, yang urupnin mani kat muih muihni nuhni sikninis kaupak dulaunayang kidika yulni? 24 Manna muih muhni yakat tala lani yayamwinih. Muih lani laihta yamtamana kat, lani kidika barangni yamtanauh.

Jisas angkaupak kaina kidika yulwi

25 Jerusalén yakat yalalahwa muihni balna as as kidika yaklauwi kalyulwi dakakana: —¿Adika awasyah īnin walwabangdai kidika? 26 Yakat sakki, muih balna yakat yuldibauwi, muih as bik di as kalyulwas ki. ¿Lā muihni balna kidika kukulwakatpah, kidika alni laih Mesías? 27 Kaunah mayang amangladi angkaupak kidika; kaunah, Mesías kaiwarangkat muih as bik amanglawas karang ki angkaupak kaiwarang kidika. 28 Jisas, kidika dakwi, witing makatyulnin ūni yakat sumalwa sakkauna, yulna yulni parasni karak: —¡Kaput bahang manna amangkilatamanah angkaupak aiwayang kidika! Kaunah yang alas kulnik lani aiwasyang, kaunah as ki witing kidika yakat laih rahm palni kalkulnin ki, bahang witing kuduh yasihna kidika, manna laih amangnilatas mana. 29 Yang laih amangnilatayang, kat witing kaupak aiwayang bahang, dawak witing yaklauwi yasihna kidika. 30 Witingna laihwi balaknin kukulna kaunah, witingna as bik tingnina dulalauwas dai, kat awarni kidika kai'kawas bahang. 31 Muih manas witing yakat kukulna, dawak yuyulwadai: —Mesías kaiwarang kat, ¿sain balna kau tanit yamwarang katpah, adika alni yamwa karak dawakat?

Parisi balna Jisas yakat laihwi sitnin yayamna

32 Parisi balna dakakana, muih balna yuyulwa kidika Jisas yulni; witingna dawak sumalyang balna taninatuna karak kalpakwi sisihna, kalbauyang balna makat yulnin ūni maintatalwa muihni balna kidika, Jisas yakat laihwi sitna atnin. 33 Dawak Jisas yaklauwi yulna: —Manna karak ma parahni sak awaki ki, dawak nawattik yawaki ki, yasihna muihni yakat. 34 Manna yawaltanama, kaunah yayaktas awanama, kat yang sak awaki yakat manna sip yawas awanama bahang. 35 Kaput laih Ju balna biri biri yulwi dakakana: —¿Witing angkat kiwarangyah, mayang sip yakdas mawarang kidika? ¿Ju balna pa ūk kau pini ruhna balna yakat kiwarang katpah, dawak Papang kulwas balna yakat bik sumalna atnin? 36 ¿Ais yulkuhti yulwih ‘Yawawalwarang, kaunah yāyayakwas karang, kat angkat sak awaki yakat yawanamna sip-awas bahang’?

Sangka wasni murwa kidika

37 Kidika alasnina ma witni palni kidika kauh tanit nuhni kulna dai. Kidika mani Jisas yaklauwi, yulni parasni yulwi yulna: —Wais kat dikih kalawakat, yang akat kaiwi diwang. 38 Ulna yakat yulwa kaput, kidika muihni pasyakat was sangka kirarang. 39 Adika laih Jisas aput yulnin kulwi yulna, wais witing yakat kulwarang kat Spirit duwarang ki; kat Spirit kidika baisa disdai bahang, dawak bik Jisas yakat baisa alasnina yaksihni kidika yamwasdai bahang.

Muih balna kidika kalwayahwi kalalahwi

40 Muih balna pasyakat muih as as adika yulni dakawi yuyulna: —Rahm palni laih adika lani laih prapit. 41 Ūk balna laih yuyulna: —Adika laih Mesías. Kaunah ūk balna kidika yuyulna: —Dikah, Mesías laih sip Galilea kaupak kaiwas karang. 42 Ulna yakat yulwi, Mesías laih king Devid sulani kaupak kaiwarang ki, dawak Belén kaupak kaiwarang ki, Devid tawanni dai kidika kaupak. 43 Kaput laih muih balna kidika Jisas yulni kalwayahwi kalalahna. 44 Buas laih silak ānin kukulna, kaunah muih as bik yamwasdai.

Lā muihni balna kidika Jisas yakat kukulwasdai

45 Makatyulnin ūni maintalyang balna dai kidika nawatwi uina parisi balna bangdai yakat, dawak sumalyang balna taninatuna balna yakat bik, dawak diyulwi dakakana: —¿Ais yamta duaitasmana daih? 46 Kalbauyang muihni makatyulnin ūni maintalyang balna yuyulna: —¡Muih al as bik witing yulbauwa kapat yulwas ki! 47 Kaput laih parisi balna yaklauwi diyuyulna: —¿Manna bik datanangkat alas manayulnayah? 48 ¿Mayang matakituna balna as as witing yakat rahm kalkukulwa katpah, kidika awaskat parisi balna bik kukulwih? 49 Kaunah adika muihni balna lā amanglalawas kidika laih, witingna dutni palni ki. 50 Nicodemo, parisi as, witing ma as kat kiwi kaltalna dai kidika Jisas yakat, witing diyulna: 51 —Mayang malaki yakat, sip daunin yakat wirladaski muih al as, witing kaupak yul as bik dakadas, dawak bik ais yamna kidika balna bik. 52 Witingna yaklauwi nangnitlalana: —¿Man bik Galilea kaupak mahn? Ulna balna kidika lan alahwa talah, Galilea kidika wat as bik kidika kaupak prapit as bik kalahwas ki.

Muih yal marid lani bahyang

53 Witingna mahka ūnina kau uiyamna.

Jan 8

1 Jisas laih witing Olib asangni yakat kilwi kiuna, 2 dawak ma payahlawak, baisa puksani kau makatyulnin ūni yakat kiuna. Muih balna kidika witing yaihnit yakat uina, dawak witing yalahwi disumalna. 3 Lā sumamalwa muihni balna, parisi balna, witingna yal as duwi uina, yal kidika marid lani bahwasakkat lalaihna. Dawak muih balna bangkidika papusyakat duwi uiwi dulausasakna, 4 dawak Jisas yakat kalyuyulna: —Maestro, adika yalni marid lani bahwasakkat lalaihna. 5 Lā yakat, Moses yaklauwi yanapakna kipala kau bahrwi īna atnin adika satni yalni laih. ¿Man laih ais yultamahn? 6 Witingna adika yulwi dakakana kidika laih traini tatalna, kaput laih witing misnitik yakna atnin yulni. Kaunah Jisas witing abukwi sau yakat tingni kau ulna. 7 Kidika usnit kat, witingna ban ban kalyulwi dakakawa bahang, wauhyaklauwi diyulna: —Manna kaupak wais kat dutni as bik yamwas kidika, kipala tatuna kidika dulauwi ruhmwang. 8 Dawak watwi abukwi sau yakat tingni kau ulna. 9 Kidika dakawi, mahka kalahwi uina as as, muihbararak balna kidika tatuna kalahwi uina. Jisas dawak yal kidika karak manah wawatna kat, kidika pāni yakat, 10 wauhyaklauwi kalyulwi dakana: —Yal, ¿angkat bangyah? ¿Muih as bik daunin yakat mawirlawasdaih? 11 Yal kidika yaklauwi nangnitlana: —Muih as bik, Dawan. Jisas yaklauwi kalyulna: —Yang bik daunin yakat mawirlatasyang; waradika yawah, kaunah watta dutni yamwinih.

Jisas laih muih balna yaringnina

12 Jisas watwi muih balna yakat kiwi diyulna: —Yang kuduh muih balna yaringnina; wais uskit uiwakat, yaringni as sangka duwa kidika duna karang, dawak watwi laih puksani yakat lik-awas karang. 13 Parisi balna yaklauwi kalyuyulna: —Man silp witmanis yultaman: kidika witnis laih dauh ki. 14 Jisas yaklauwi nangnitnalana: —Yang witkinis kidika laih minit nuhni ki, yang alas witkinis yulki karang bik. Yang amanglatayang angkaupak aiwanayang kidika dawak bik angkat yawayang kidika; kaunah manna laih amanglatasmana. 15 Manna laih amput muih as, muih ūk lani laihwi yamwa kaput yamtamana. Kaunah yang laih muih as bik lani laihtik yamtasyang; 16 kaunah muih lani laihtik yamtayang kat, di rahm kidika karak laihtik yamtayang, dawak bik yang alas laihtik yamtasyang, kaunah Papang yasihna kidika karak laihtik yamtayangna. 17 Manna lamana yakat ulna ki, muih bu witnis kakawarang kat kidika laih rahm ki. 18 Kaput kat, yang witnis as yang, yang alas witkinis, dawak Papang yasihna kidika witnis ūk ki. 19 Kalyulwi dakakana: —¿Papangma angkat sakyah? Jisas yaklauwi nangnitnalana: —Manna amangkilatasmana, dawak Papangki yakat bik amangnilatasmana; yang akat amangkilatamana kat laih, Papangki yakat bik amangnilatanama. 20 Jisas adika yulni balna yulna makatyulnin ūni yakat sumalwa sakkauna, kalik yakwi ahawa baksni balna bangkidika pāni yakat sakkauna yulna. Kauna muih as bik witing yakat laihwi sitwasdai, kat witing awarni kidika kiwi kawas dai bahang. “Yang yawayang kidika yakat manna sip yawasmana” 21 Jisas watwi diyulna: —Yang yawayang, dawak manna yawaltanama, kaunah dutmana yakat dautanama. Yang yawayang pāni yakat manna sip yawasmana. 22 Ju balna yuyulna: —¿Witing alas kalinin kulwakatpah, kidika bahang yulwa kidika witing kiwa yakat mayang sip mawaski? 23 Jisas yaklau diyulna: —Manna laih sau akaupak mana, kaunah yang laih makaupak yang; manna laih adika sauni kaupak mana, kaunah yang laih adika sauni kaupak awasyang. 24 Kidika bahang manayulnayang manna dutmana yakat dautanama; kat manna kasak kultas awanama kat yang akat, dutmana yakat ban dautanama. 25 Kaput laih kalyulwi dakakana: —¿Man kidika waismahn? Jisas yaklauwi nangnitnalana: —Tatuna kidika, ¿ais yamtik manna karak yulbaunikyah? 26 Di manas yulnik ki, dawak bik manna ais lamana yamkiyah, kaunah yasihna muihni kidika laih di rahm yulwi, dawak yang lawik muih balna yakat yultayang kidika laih sihm witing yulwak dakanayang kidika yultayang. 27 Kaunah witingna amanglalawas dai Papangni yulni kat yulwa kidika. 28 Kidika bahang diyulna: —Manna muih Walanibis al kidika mayakat dulautanama kat, yang adika amangkilatanama, yang alas kulnik lani yulbautasyang; Papang yaklauwi yasumalna kidika manah yultayang. 29 Yasihna muihni kidika laih yang karak ki, Papangki kidika yang alas yadawaski, kat yang laih nining yamtayang witing dukih kalawa kidika. 30 Jisas kidika yulwak, muih manas witing yakat kukulna.

Papang walanibis balna dawak, dutni dini yamyang balna

31 Jisas yaklauwi Ju balna witing yakat kalkukulna balna yakat diyulna: —Manna yang yulki balna yakat barangni awanama kat, manna rahm palni laih yang disaikipil awanama; 32 di rahm kidika amanglatanama, dawak rahm kidika yaklauwi manalaihwi yakwarang. 33 Witingna yaklauwi nangnitlalana: —Yangna laih Abraham sulani balna yangna, bahang watas bik muih dini yamyang alahwasyangna; ¿amput man yultamahn yangna yanalaihwi yakwarang? 34 Jisas yaklauwi diyulna: —Rahm manayultayang, dutni yayamwa bitik kidika laih dutni kidika warauni kakalwi. 35 Muih dini yamyang as kidika wanaihni balna pasyakat kalkulna awaski; kaunah walanibis kidika laih, wanaihni balna pasyakat kalkulna ki. 36 Kaput bahang, Walanibis al kidika yaklauwi laihwi yakwi, bahang manna laih rahm palni malaihwi yakna karang. 37 Yang uman amanglatayang, manna laih Abraham sulanimana; kaunah yaīnin yamtamana, kat yang yulki kidika dutasmana bahang. 38 Yang yultayang Papang yaklauwi nikingkana kidika; kaput bik manna bik, papangmana kaupak dakanamana kidika yamtamana. 39 Witingna yaklauwi kalyuyulna: —¡Yangna papangkina laih Abraham! Kauna Jisas yaklauwi nangnitnalana: —Manna kidika rahm Abraham walanibis balna mana kat laih, witing yamna kaput manna bik yamnamna dai. 40 Kaput kaunah, di rahm kidika Papang yaklauwi yasumalna kidika manayulnayang kaunah, manna yaīnin yamtamana. ¡Abraham witing kaput yamwasdai! 41 Manna laih papangmana yamwa kapat yamtamana. Dawak witingna yaklauwi kalyuyulna: —¡Yangna laih bastar awasyangna; Papang aslah dutayangna, kidika laih Papang! 42 Jisas yaklauwi nangnitnalana: —Papang kidika rahm manna papangmana katlaih, manna yang akat dalani yatalnama, kat yang laih Papang kaupak aiwayangna, bahang akat sakyang. Yang alas kulnik aiwasyang, kaunah Papang yaklauwi yasihna. 43 ¿Amput dawak yang sumaltayang balna kidika amanglatasmanah? Kat kidika laih yang yulki kidika dakanin sip awasmana. 44 Manna papangmana laih sitan; manna laih witing dinimana, dawak manna yamtamana witing dukih kalawa kidika kaput. Sitan laih tatuna kaupak muih iyang ki. Di rahm yakat awaski, dawak bik rahm kidika yulwas ki. Witing alas yulwa kidika, yulbauwa kidika yakat ki; kat alas muihni bahang, dawak bik alas balna papangnina witing laih. 45 Kaunah yang laih di rahm yultayang bahang, manna yang akat rahm yakultasmana. 46 ¿Manna pasyakat wais sipyah, yang dutni as yamnayang kat nikingkanin? Dawak yang di rahm yultayang kat, ¿amput dawak yultayang kidika kasak kultas manah? 47 Papang kaupak kidika laih, Papang yulni kidika dakawi; kaunah manna laih Papang kaupak awasmana bahang, dakakih manawas ki.

Krais laih Abraham tanit kaupak ban ki

48 Kaput laih Ju balna yaklauwi kalyuyulna: —Rahmkina dutayangna, yangna yultayangna kidika, man laih Samaria kaupak man, dawak walasa dutaman. 49 Jisas yaklauwi nangnitnalana: —Yang walasa as bik disyang. Yamtayang kidika laih Papangki ayangni nuhni yamtayang; kaunah manna laih nawatkauh rispik dis yayamtamana. 50 Yang alas alaskina yaksihni kidika waltasyang; muih as ki walwa kidika, dawak witing kuduh muih lani laihwi yamwa kidika. 51 Rahm manayultayang, wais kat yang yulki balna dakawa kidika laih dauwas karang. 52 Ju balna yaklauwi nangnitlalana: —Waralaih rahm palni amangladi walasa dutaman kidika. Abraham dawak prapit balna bitik dadauna, dawak man yultaman: ‘Wais yang yulki dakawa kidika dauwas karang.’ 53 ¿Man kidika yangna papangkina Abraham karak tanit mahn? Witing dauna dawak prapit balna bik dadauna. ¿Bahang man kidika wais kaldakamahn? 54 Jisas yaklauwi nangnitlana: —Yang alas alaskina yaksihni kidika yamtayang kat, yang alaskina yaksihni kidika laih dauhki. Kaunah Papangki yaklauwi yamwa kat, manna bik yultamana kidika mapapangki, Papang. 55 Kaunah manna laih amanglatasmana witing kidika. Yang laihtak amangnilatayang; yang yulki kat amangnilatasyang, kidika laih alas muihni as awaki manna kapat. Kauna rahm palni laih witing kidika amangnilatayang, dawak witing yulni balna kidika dakik yamtayang. 56 Abraham, manna muihmanabarak, witing alasna duna dai kat yang maki adika talwarang dai bahang; dawak talna; kaput laih alasna nuhni duna. 57 Ju balna Jisas yakat kalyuyulna: —Man kurih 50 bik dutasman, ¿dawak yultaman Abraham talnaman? 58 Jisas yaklauwi nangnitnalana: —Yang rahm manayultayang, Abraham dis mani kaupak yang laih banyang. 59 Kaput laih witingna kipala duwi bahrnin yayamna; kaunah Jisas yakmaldi makatyulnin ūni kaupak kalahwi kiuna.

Jan 9

Al as minikpa dis batahn dana kidika Jisas yaklauwi minikpa kalana

1 Jisas kalahwi kiwakat, tanipas yakat muih al as minikpa dis batahndana dai kidika sakdai. 2 Dawak disainipil balna kalyulwi dakakana: —Maestro, ¿amput dawak kidika alni minikpa dis batahndana yah? ¿Papangni balna dutni yayamna yulni, kidika awaskat witing alas dutni yulni? 3 Jisas yaklauwi nangnitnalana: —Witing alas dutni bik awas, dawak papangni balna dutni yayamna bik awaski, kaunah witing munah lāih kalahna atnin, Papang di yamnin sip kidika. 4 Baisa madah kidika yakat, yasihna muihni warkni balna kidika yamnin ki; kat pukta kidika kaiwi, bahang muih as bik sip wark yamwas karang ki. 5 Baisa muih balna pas-akat likyang kidika, yang laih muih balna yaringnina yang. 6 Kidika yulna usnit kat, Jisas sau yakat susuih tuhwi ulangwi dawi, muih minikpa dis yakat kahna minikpa balna yakat. 7 Usnit kat kalyulna: —Yawa Siloé wasni yakat suhtah (Siloé tanka laih: “Sihna”). Minikpa disdai kidika kiwi suhna, dawi nawatwi kaiwak uman minikpa kidika talnin sipdai. 8 Yaihnitkau muih balna witingna tatalwadai, kidika alni lalah yulwak, dawak yulwi dakakana: —¿Kidika muihni awasyah yalahwi lalah yulwadai kidika? 9 Buas yuyulna: —Agha, kidika laih witing. Ūk balna yuyulna: —Witing awaski, kaunah sihm kapapat ki. Kaunah witing palni bik yulna: —Agha, kidika laih yang. 10 Kaput laih kalyulwi dakakana: —¿Dawak waralaih amput dawak mamakpa talamahn? 11 Witing yaklauwi nangnitnalana: —Kidika alni ayangni Jisas kidika yaklauwi wasmak yamwi dawi mikpa yakat kahwi dawi yayulna: ‘Siloé yakat yawa suhtah.’ Dawak yawik suhnayang, bahang kidika minitni yakat yang mikpa talnayang. 12 Dawak kalyulwi dakakana: —¿Kidika alni angkat sakyah? Dawak witing yaklauwi diyulna: —Amanglatasyang.

Parisi balna, minikpa kalana muihni yakat laihwi yulwi dakakana

13-14 Jisas witing wasmak yamwi, muih minikpa kalana mani kidika laih urupnin mani dai. Kidika bahang parisi balna yakat duwi uina, minikpa kalana muihni dai kidika, 15 dawak witingna kalyulwi dakakana, amput dawak waralaih witing minikpa talwa kidika. Dawak witing yaklauwi diyulna: —Mikpa yakat wasmak kahna, dawak yawik suhnayang, bahang waralaih talayang. 16 Parisi buas yuyulna: —Adika yamna muihni laih Papang awaski, kat urupnin mani rispik yamwas bahang. Kaunah ūk balna kidika yuyulna: —¿Kaunah amput adika sainni as yamnin sipkarang, dutni yamyang muihni kat? Kaput laih witingna pasyakat kalwayahwi kalahnin sakdai, 17 dawak watwi kalyulwi dakakana, muhnilau minikpa dis dai kidika yakat: —Mamakpa mana bahang, ¿man laih ais yultamahn witing kidika? Witing yaklauwi nangnitnalana: —Yang yultayang laih prapit as ki. 18 Kauna Ju balna kukulwas dai kidika muihni minikpa dis dai kidika, dawak waradika laih witing minikpa duwa kidika, dawak papangni balna yuyulwak uina 19 dawak diyulwi dakakana: —¿Adika man walamabis yah? ¿Manna yultamanah minikpa dis batahndana daih? ¿Waradika laih amput dawak minikpa talwih? 20 Papangnina balna kidika yuyulna: —Adika laih yangna walakinabis, witing minikpa dis batahndana; 21 kaunah amanglatasyangna amput dawak waradika minikpa ditalwapa, dawak bik amanglatasyangna wais yaklauwi minikpa kalana pa. Witing yakat kalyulta dakanauh; witing uman muihbarak ki, witing silp manayulnin sipki. 22 Papangni balna kidika kaput yuyulna, yamaduwi, kat Ju balna kidika kulninna aslah kalalahna dai bahang, sumamalwa ūni kaupak kangwi yaknin kidika, wais kat Jisas kidika Mesías kulwarang kat. 23 Kidika bahang papangni balna yuyulna: “Witing yakat kalyulta dakanauh, witing laih muihbarak ki.” 24 Ju balna watwi kalyuyulwak kiuna minikpa dis dai kidika, dawak kalyuyulna: —Papang niningyakat di rahm kidika yanayultah. Yangna amanglatayangna, kidika lani laih dutni yamyang as ki. 25 Witing yaklauwi nangnitnalana: —Dutni yamyang kidika laih amanglatasyang. Yang amanglatayang kidika laih, mikpa disyang dai kaunah waralaih talayang. 26 Watwi kalyulwi dakakana: —¿Ais mayamnayah? ¿Amput yamwi mamakpa manayah? 27 Nangnitnalana: —Uman manayulnayang, kaunah yulki kidika dakasmana. ¿Ampadawak wattik yulting dakakih manawih? ¿Manna bik usnit uikih manawih? 28 Kaput laih niningkauh yaklauwi kalyuyulna: —Man kidika alni disainipil awama; yangna laih Moses disainipil yangna. 29 Yangna amanglatayangna, Papang yaklauwi Moses yakat yulkalbauna, kaunah kidika muihni laih angkaupak kalahna kidika amanglatasyangna. 30 Al kidika yaklauwi nangnitnalana: —¡Di taldas diniyah! Manna amanglatasmana angkaupak kalahna kidika, kaunah yang laih mikpa yana. 31 Yamni amangladi, dutni yamyang balna yulnina laih Papang dakawas ki; witing kulnin lani yayamwa balna kidika manah laih yulnina dakawi. 32 Wat as bik dakadaski, muih as minikpa ditalwas batahndana kidika minikpa kalana atwakat. 33 Adika alni Papang kaupak kaiwas kat, witing di as bik yamwas karang. 34 Kaput laih witing yakat kalyuyulna: —Man, dutni manah buhng batahndanaman kidika, ¿yangna akat yanasumalnin kultamahn? Dawak makatyulnin ūni kaupak yakpapamna.

Spirit minikpa dis

35 Jisas dakana muih al minikpa dis dai kidika yakpapamna atwakat; dawak witing karak kalpakwak kalyulwi dakana: —¿Muih Walanibis al yakat man kasak kultamahn? 36 Witing yaklauwi kalyulna: —Dawan yayultah, kidika waisyah, yang witing yakat kulna atnik. 37 Jisas yaklauwi nangnitlana: —Uman talnaman: kidika laih yang, witing karak kuduh yulbautaman kidika. 38 Kaput laih al kidika Jisas muhni yakat limbabahwi kalyulna: —Yang kasak kultayang, Dawan. 39 Kidika usnit kat Jisas yulna: —Yang sau muihni balna akat aiwanayang la kat kidika yamna atnik, dawak miniknapa dis balna kidika talna atninna, dawak miniknapa tatalwa balna kidika di talwas kalninna. 40 Parisi balna buas witing karak bangdai kidika, dakawi, kalyulwi dakakana: —¿Yangna bik miniknapa diskatpah? 41 Jisas yaklauwi nangnitnalana: —Manna mamaknapa diskat laih, dutni yamnamana kidika pātni dis awanama. Kaunah taldi timana bahang, pāt dutamana.

Jan 10

Sīp maintalyang dawak sīp balna

1 Kaput laih Jisas yaklauwi kalyulna: “Rahm yultayang, angdika kat sīp balna bangkidika yakat dūr munah kawas kat, kidika laih dimalyang. 2 Kaunah angdika kat dūr munah kawa kidika laih sīp maintalyang. 3 Dūr maintalyang kidika dūr apahwi, dawak sīp maintalyang sīpni balna yakat ayangnina kau diyulwi; dawak sīp balna kidika amanglalawi wais dinit yulwa kidika; daklana pāni kaupak yakwi, 4 bitik kalahwi dadawak, witingna tanitna yakat kiwi, dawak sīp balna kidika witing dangnit yakat uiwi, dinit yulwa kidika dakakawa bahang. 5 Kaunah, muih as amangnilalawas kidika laih usnit uiwi uiwaski, nawatkauh laih witing kaupak kikiri, kat witing dinit yulwa kidika amanglalawas bahang.” 6 Jisas yaklauwi adika karak libitwi diyulna, kaunah witingna amanglalawasdai ais diyulnin kulwi yulwa kidika.

Jisas laih sīp maintalyang yamni

7 Jisas watwi diyulna: “Adika rahm manayultayang: Yang kuduh dūr yang, sīp balna kidika yang munah bayayakwi. 8 Yang takitkauh aina balna kidika laih, dimalyang balna dai, dawak bik muih dudutni; kidika bahang sīp balna kidika witingna yuyulwa kidika dakakawasdai. 9 Yang kuduh dūr: yang munah kawa kidika, solni laihwi yakna karang. Kidika laih sīp as kat kiwi kawi dawi watwi kalahwi dibasta yamni yakwa kapat karang. 10 “Dimalyang kidika laih kaiwi di malnamanah, īnin dawak daukalnin; kaunah yang laih aiwanayang sangninaka duna atnin yulni, dawak bik sangninaka kidika manas palni dunin. 11 Yang kuduh sīp maintalyang yamni. Sīp maintalyang yamni kidika, sīpni balna yulni sangnika kidika kalana ki; 12 kaunah minit dunin yulni manah wark kalahwa kidika laih, nawah kaiwak talwi, sīpni balna kidika dawi kiri, kat sīp maintalyang awas bahang, dawak bik sīp balna kidika witing dini awas bahang. Nawah kidika yaklauwi sīp balna yakat iwi dawak pini ruhna ki. 13 Kidika lani kiri, kat witing walwa kidika laih minit dunin kamanah kulwa bahang, kaunah sīp balna yakat laih kulwaski. 14-15 “Yang kuduh sīp maintalyang yamni kidika. Papangki amangkilawa kapat bik, yang amangnilatayang Papangki yakat, kaput bik laih sīpki balna yakat bik amangninalatayang, dawak witingna kidika amangkilalawi. 16 Dawak sīp ūk balna bik dutayang, kidika adika kaluduhna balna kaupak awaski; kidika balna bik akat duainik ki. Witingna yulki dakakawarang ki, dawak kaluduhna aslah kakalwarang ki, dawak sīp maintalyang bik aslah karang ki. 17 “Papangki dalani yatalwi kat sangkika kidika kalatayang kaunah wattik duna atnik yulni. 18 Muih as bik sangkika kidika dakyakwas ki, kaunah yang silp kulnik lani kalatayang. Yang rahmki dutayang kalanik kidika, dawak bik wattik dunik kidika. Papangki yaklauwi kaput yamnin yapakna.” 19 Ju balna kidika yulni dakawi, watwi kalwayahwi kalalahna. 20 Witingna manas bik yuyulna: —¿Ais yamta yulwa kidika dakamanah, witing walasa duwi dawak bik sinsni yamni awas kidika? 21 Kaunah ūk balna kidika yuyulna: —Muih as walasa duwa kidika sip kaput yulbauwas ki. ¿Walasa kidika sip katpah, muih as minikpa kalawak talnin?

Ju balna Jisas kidika ruhwi dadawi

22 Kidika laih wasma dai, dawak Jerusalén yakat makatyulnin ūni blisyamna mani kidika alasnina yamwa bangdai. 23 Jisas kidika makatyulnin ūni yakat sakdai, dawak Salomón dūrni kidika yakat likdai. 24 Kaput laih Ju balna kidika awaihwidakwi kalyulwi dakakana: —¿Mampat kat lāih maiyaktasman kidika damayah? Man kidika Mesías man kat barangni maiyultah. 25 Jisas yaklauwi nangnitnalana: —Uman mayulnayang manna yakat, kaunah rahm yakultas mana. Yang di balna yamtayang kidika laih Papangki ayangni kau yamtayang kidika di bitik lāih yakna ki; 26 kaunah manna sip kultasmana, kat manna laih yang sīpki awasmana bahang. 27 Yang sīpki balna kidika laih yang dikit yulting dakakawi, dawak witingna kidika amangninalatayang, dawak witing uskit uhuiwi. 28 Yang lawik sangka ban atnin kidika diatayang, bahang witingna dadauwas karangki, dawak bik muih as bik nikingyakwas karang. 29 Papangki yana kidika laih di bitik yakat tanit nuhni ki, dawak muih as bik dakyakwas ki. 30 Papangki dawak yang karak laih aslah yangna. 31 Ju balna kidika watwi kipala laihwi ruhmnin yayamna, 32 kaunah Jisas yaklauwi diyulna: —Papangki parasni kau di yayamni manas yamnayang manna muhmana yakat; ¿bahang angdika palni yulni kipala kau yabahrtanamayah? 33 Ju balna kalyuyulna: —Di yamni balna yamnaman kidika yulni laih kipala kau mabahrdaski, kaunah man yultaman balna kidika laih Papang niningkauh ki. Man laih dauh muih as man, kaunah man muihma kidika Papang yamtaman. 34 Jisas diyulna: —Manna lāmana yakat ulna: ‘Yang yulnayang manna laih dawan mana.’ 35 Amangladi ulna balna yakat yulwa kidika, sip dauh kuldas ki; Papang yaklauwi kidika muihni balna witing yulni duwi uina muihni balna yakat diyulna, witingna kidika laih dawan. 36 Dawak Papang yaklauwi blisyayamwi, muih balna pasyakat yasihna kat, ¿manna amput yulnamna sipyah, Papang niningkauh kidika, yang laih Papang Walanibisyang atnayang kidika manah? 37 Papangki wark balna yamwa kidika yamtasyang kat, yakukulwinih. 38 Kaunah yamtayang kat, yang akat yakultasmana bik, wark balna yamtayang yakat kultanauh, kaput laih manna amanglatanama Papang kidika yang karak kidika, dawak yang bik Papang karak yang kidika. 39 Watwi laihwi sitnin kukulna, kaunah kidika kaupak Jisas kiri yaklana. 40 Jisas, witing Jordán wasni nakas yakat dakyaklana, dawak yakat watna dai, muhnilau kau Jan muih was utuhwi sak-atna pāni yakat. 41 Muih manas kiwi talwi, yuyulna: —Rahm laih Jan kidika sain manas yamwasdai, kaunah adika alni yulna balna kidika bitik laih rahm dai. 42 Kidika pāni yakat muih manas Jisas yakat rahm kalkukulna dai.

Jan 11

Lázaro dauna

1 Muih al as siknis dai kidika ayangni laih Lázaro, witing laih Betania kaupak dai, Mery dawak wirahni Marta karak tawannina dai kidika. 2 Mery kidika laih Lázaro wirahni yal dai, bahang witing kuduh dia walapni Jisas kalni yakat utuhna dai kidika, dawak basni kau uswi buhna dai kidik. 3 Kaput bahang, wirahni yayal balna bu dai kidika yaklauwi yul kalsisihna dai Jisas yakat: —Dawan, man karak kaltalyang yamni dai kidika siknis ki. 4 Jisas, kidika dakawi yulna: —Kidika sikninis yaklauwi kalyamwak dauwas karangki; kaunah kidika munah Papang alasnina yaksihni kidika niningkana karang, dawak Papang Walanibis al alasnina yaksihni kidika bik. 5 Jisas yaklauwi Marta yakat dalani talwadai, wirahni yal, dawak Lázaro yakat bik, 6 Lázaro siknis kidika kalyuyulna kaunah baisa ma bu walna dai, witing sakdai kidika pāni yakat. 7 Kidika usnit kat disainipil balna yakat diyulna: —Judea yakat watdi mawanang. 8 Disainipil balna yaklauwi kalyuyulna: —Maestro, wisam palni, kidika pāni kau Ju balna bangkidika kipala kau mabahrwi mainin yayamna, ¿kaunah watta kiunin kultamahn kidika pāni yakat? 9 Jisas yaklauwi diyulna: —¿Rahm awasyah, ma as kidika awar 12 duwi? Kaput kat muih as madah yakat likkidika, kalni bauwi bukwas ki, kat adika sauni akat yaringni duwa kidika talwa bahang; 10 kaunah pukta liklaih, kalni bauwi, kat yaringni dis kidika yulni. 11 Kidika usnit kat baisa minit yakat yulna: —Lázaro karak kaltalyang yamni mayang dai kidika kamana, kaunah yawaki ki ustik sahmuna. 12 Disainipil balna yaklauwi kalyuyulna: —Dawan, witing kamana kat, kidika tanka laih kalyamwarang ki. 13 Kauna Jisas diyulna kidika laih, Lázaro laih uman dauna, kaunah disainipil balna kukulna kidika laih rahm kaminin kidika kukulna. 14 Kaput laih Jisas yaklauwi lāih diyulna: —Lázaro dauna. 15 Yang alasnayang kat kidika yakat sak-awasyang dai bahang, kat kaput laih manna namangna yakat yamni ki, kasak kulnamna kidika. Kaunah talna mawang. 16 Kaput laih Tomás, sūtki kalatwadai kidika, disaipil ūk balna yakat diyulna: —Mayang bik mawanang, witing karak kalpakdi daunin.

Jisas, dauna kaupak yaklaunin, dawak sangka

17 Jisas kiwakat, Lázaro dauwak nununa kidika laih uman ma arungka duwadai. 18 Betania kidika laih Jerusalén yaihnit yakat dai; kilómetro bās kapat dai; 19 dawak Ju balna kidika manas palni uina dai Marta dawak Mery yakat kaltalna atnin, dawak bik walanina ānin, witingna wirahnina al dauna kidika yulni. 20 Marta dakana, Jisas kidika mahka kiwi kawi atwak, kalahwi kiuna kalpakna atnin, kaunah Mery laih ū yakat watna dai. 21 Marta yaklauwi Jisas yakat kalyulna: —Dawan, man akat sakman dai katlaih, yang wirahki al kidika daunin awasdai. 22 Kaunah yang amanglatayang, man Papang yakat ais yulma kidika mawarang. 23 Jisas yaklauwi nangnitlana: —Man wirahma kidika watwi sangka kalwarang ki. 24 Marta yaklauwi kalyulna: —Agha, yang amanglatayang watwi sangka kalwarang kidika, dauna balna yaklalauwarang mani yakat, mani witni yakat. 25 Jisas yaklauwi kalyulna: —Dauna kaupak yaklaunin kidika kuduh yang, dawak bik sangka kidika bik. Wais yang akat yakulwarang kat, dauwarang kaunah watwi sangnika duwarang; 26 muih bitik baisa sangka balna kidika, yang akat yakukulwarang kat, sip dadauwas karang. ¿Kidika rahm kultamahn? 27 Yal kidika yaklauwi kalyulna: —Agha Dawan, yang kultayang man laih Mesías man, Papang Walanibis al kidika, sau akat kainin dai kidika.

Jisas kaidana Lázaro sauni-ū yakat

28 Kidika yulna usnit kat, Marta kiwi wirahni Mery yakat kalyulna kiuna atnin, dawak malni kau kalyulna: —Maestro akat sakki, mayulwi yawanam. 29 Witing dakawa minitni yakat, Mery yaklauwi kiuna, Jisas yakat talna atnin. 30 Jisas kidika baisa tawan yakat kiwi kawasdai; Marta karak kalpakna kidika pāni yakat sakdai. 31 Mery kidika sirihni yaklauwi kalahkiwak, Ju balna witingna karak bangdai kidika walani āwi, witingna bik usnit uiwi uina, witingna kukulna laih, sau-ū yakat kaidana kiwi. 32 Mery witing Jisas sakyakat kiwi, kalni dinit yakat limbabahwi, yulna: —Dawan man sakmandai katlaih, yang wirahki al kidika daunin awasdai. 33 Jisas witing Mery kaidak talwi, dawak Ju balna bik witing karak uina kidika balna bitik talwak, parasni palni kulnin kidika kalitikna, dawak bik kalyukna, 34 dawak diyulwi dakana: —¿Angkat uita nunamanah? Kalyuyulna: —Dawan, aiwatalah. 35 Dawak Jisas kaidana. 36 Kaput dawak Ju balna yuyulna: —¡Talnauh, ampus dalani kaltalwādai kidika! 37 Kaunah buas yuyulna: —Adika, muih miniknapa dis kidika yakat miniknapa diana, ¿bahang sip di as bik yamwasdaih Lázaro dauwas atnin yulni?

Lázaro kidika dauna kaupak dulauna

38 Jisas, watwi kulnin kidika kasak palni kalitikna, dawak sau-ū yaihnit yakat kiuna. Kidika laih pasulihni as dai, panikungmak kidika laih kipala kau putna dai. 39 Jisas diyulna: —Kinipala kidika yaktanauh. Marta, dauna kidika wirahni yal kidika yulna: —Dawan, uman wayani kalna, kat dauna kidika ma arungka dawabahang. 40 Jisas yaklauwi nangnitlana: —¿Mayulnayang awasyah, kasak kulmakat, Papang alasnina yaksihni kidika talma? 41 Kipala kidika yakwi lalana, dawak Jisas, witing makau kisang yakat talwi yulna: —Papang, tingkih mayultayang, kat yadakanaman bahang. 42 Yang amanglatayang, man nining yadakaman, kaunah yultayang akat muih bang-adika yamnina kidika yulni, kaput laih witingna rahm kulninna, man lawa yasihnaman kidika. 43 Kidika yulwak usnit kat sarahna: —¡Lázaro kidika kaupak alahwah! 44 Dauna dai kidika kaupak kalahna, tingni balna, kalni balna bik sitna dai asna kungni kapatnah kau, dawak muhni laih asna baini kau wadatna dai. Jisas yaklauwi diyulna: —Uluhtanang kat mahka kiwang.

Jisas yakat laihwi sitnin yayamna

45 Kidika yulni muih manas kukulna, Ju balna Mery karak uina dai kidika balna bik, kat witing ais yamna balna kidika bitik tatalna dai bahang. 46 Kaunah buas parisi balna yakat uina, dawak Jisas di yamna kidika yuyulna. 47 Kaput laih parisi balna sumalyang taninatuna balna kidika, kaluduhna tanit nuhni kidika karak kalududuhna, dawak yuyulna: —¿Ais yamdarangyah? Adika alni sain manas palni yamwi. 48 Dadarang kat, muih manas palni laih witing yakat kukulwarang, dawak Roma kaupak lā muihni balna kidika aiwi makatyulnin ūni duda kidika dawak mayang nisan balna bik daukalmumukwarang. 49 Kaunah kidika balna pasyakat as ayangni Caifás, witing laih sumalyang nuhni as dai, kidika kurihni yakat, bahang diyulna: —Manna laih di amanglatasmana, 50 ismangna aitasmanah, manna namangna yakat tanit yamni karang awasyah, muih aslah dauwarang kidika tawan yulni, dawak tawan bitik muih dadauwarang karak dawakat. 51 Kaunah, Caifás kidika witing silp kulnin yulwasdai, kaunah witing kidika sumalyang nuhni dai bahang kidika kurihni yakat, bahang prapit yulni kidika yulna, Jisas laih Ju ninisan yulni dauwarang ki; 52 kaunah kidika ninisan manah yulni awaski, kaunah Papang walanibis balna kidika bitik uduhnin yulni, rani bangkidika kaupak. 53 Kaput bahang kidika mani kaupak Ju lā muihni balna kidika kukulna Jisas kidika īna atnin. 54 Kidika bahang Jisas kidika Ju balna muhnina yakat lāih lik-awasdai, kaunah Judea sauni kaupak kalahwi kiuna, kauhmak wanilang yaihnit yakat kiuna, tawan as ayangni Efraín yakat. Kidika yakat witing disainipil balna karak wawatna. 55 Insal kaiwi bayakna kidika mani Ju balna alasna yayamwa kidika ulisdana dai, bahang tawan muihni balna kidika manas palni laih Jerusalén yakat uina, maisihnidis kalahna atnin, insal kaiwi bayakna mani kidika kaiwi kawas tanit kauh. 56 Jisas yakat wawalna, dawak biri biri yulwi dakakana, makatyulnin ūni yakat: —¿Ampat talamanah? ¿Alasna akat kaiwarang pah? 57 Parisi balna, dawak sumalyang balna taninatuna balna bik yaklauwi papakna dai, Jisas kidika angkat sakkat tatalna kat isningna papakwarang, kaput laih laihwi sitna atnin.

Jan 12

Yal as Jisas minit yakat dia walapni utuhwi

1 Insal kaiwi bayakna mani kidika kaiwi kawas tanitkauh ma tiaskauas yakat, Jisas Betania yakat kiuna, Lázaro yalahwa pāni yakat, dawak witing yaklauwi dauna kaupak dulauna dai kidika. 2 Kidika yakat kasnin alasnina as yayamna dai Jisas risnipik kau; Marta laih kasnin dini balna lakwalikdai, dawak Lázaro laih tibil yakat Jisas karak di kaswaraudai. 3 Mery laih dia walapni gramos andat bās duwi kiuna, kidika laih minitdai, bahang kidika kau Jisas kalni yakat utuhna, dawi basni kau uswi buhna. Ū pas kidika bitik walapni manah danadai. 4 kaput dawak Judas Iscariote, Jisas yakat daunin yakat āwarangdai kidika, yulna: 5 —¿Amput dawak adika diani walapni wauhwi bakakanwas dai, ma andat bu muih as wark kalahna kidika minit, dawak kidika lalahni kau muih balna miniknakunni yakat dina atnin? 6 Kaunah Judas witing yulwas dai, muih miniknakunni yakat dalani talwa kidika yulni, kaunah witing laih di malyang dai bahang, dawak bik witing lalah ūni kidika duwalikbahang, lalah ūni yakat āwa kidika kaupak witing malwādai. 7 Jisas yaklauwi kalyulna: —Datah, witing apakna duwasakdai, yanunuwarang kidika dini mani. 8 Muih miniknakunni kidika laih manna ban dutanama ki, kaunah yang laih ban yadutas awanama.

Lázaro yakat īnin yayamna

9 Ju balna manas dakakana Jisas kidika Betania yakat sakki atwakat, dawak kidika yakat uina, Jisas yakat talna manah uiwasdai, kaunah Lázaro yakat bik talna uina, Jisas yaklauwi dauna kaupak dulauna dai kidika. 10 Kaput laih sumalyang balna taninatuna kidika yaklauwi Lázaro yakat bik īnin yayamna, 11 kat witing yulni Ju balna manas witingna kaupak dakkalahwi uiwi Jisas yakat kukulwa kidika yulni.

Jisas laih Jerusalén yakat kakiwi

12 Muih manas Jerusalén yakat uina, insal kaiwi bayakna kidika alasnina yakat. Kidika mani payahwakat, dakakana, Jisas laih tawan nuhni yakat kiwi kawarang ki. 13 Kaput laih kuku satni balna basni kidika dadakna, dawak kalalahna kalpakna atnin, dawak bik sarahwi aput yuyulna: —¡Alasna yaksihni! ¡Dawan ayangni kau duwi kaiwa kidika laih ayangni nuhni yamna karang! ¡Israel kingni kidika laih ayangni nuhni yamna karang! 14 Jisas biriku as kau kilwi kiuna, Ulna yakat yulwa kaput: 15 “Yamaduwinih, Sayan tawanni nuhni; talah, man Kingma kaiwi biriku almuk bik as kau kilwi.” 16 Tatuna laih disainipil balna amanglalawas dai, kaunah usnit dawak, Jisas kidika alasnina yaksihni yamna usnit kat, witing yakat kalyayamna balna bitik kidika wauhtaya yakat ulna dai witing yulni. 17 Jisas yaklauwi Lázaro yakat kalahnin kalyulna dai kidika sau-ū kaupak, bahang kidika mani witing karak muih balna bangdai kidika, yuyulna dai, witing di balna yamwak tatalna dai kidika. 18 Kidika bahang, muih balna kidika Jisas niningkau kalahwi uina dai kalpakna atnin, kat witingna dakakana dai bahang sain yamna kidika. 19 Kaunah parisi balna laih biri biri yuyulna: —Manna talamana, kaput laih mayang di as bik yamdas karang. Talnauh, ¡muih bitik witing karak uiwi!

Grik muihni balna Jisas wawalwi

20 Jerusalén yakat muih balna uina dai kidika alasnina yakat, grik balna bik bangdai. 21 Kidika balna Pilip yaihnit yakat uina, Betsaida kaupak dai kidika, Galilea kau tawan as dai kidika kaupak, witing yakat kalyulwi dakakana: —Dawan, Jisas kidika talkih yanawi. 22 Pilip kiwi Andru yakat kalyulna, dawak albu kalpakwi uiwi Jisas yakat kalyuyulna. 23 Kaput laih Jisas yaklauwi diyulna: —Awarni kaiwi kana, muih Walanibis al kidika alasnina yaksihni kidika yamna karang. 24 Yang rahm manayultayang, plawar minik kidika sau yakat bukwak dauwas karang kat, witing alas watwarang; kaunah dauwarang kat, minik mahni yakwarang. 25 Wais kat sangnika dalani talwarang kidika diswarang, kaunah sangnika kidika dalani talwas karang kat adika sauni akat, sangka ban atnin yakat apakna karang. 26 Muih as yang diki yamnin kulwakat, uskit uiwang; yang angkat sakyangkat, diki yamwa kidika bik kidika yakat sakkarang. Muih as yang diki yamwarang kat, Papangki yaklauwi risnipik kalana karang.

Jisas dauwarang kidika yulna

27 “¡Adika minitni akat kulnin bukna parasni yalaihwi! ¿Dawak ais yulkiyah? ¿Yulkiyah: ‘Kulnik bukna akaupak Papang yalaihta yaktah’? ¡Kauna kidika yulni kuduh aiwanayang kidika! 28 Papang, man ayangma kidika yaringni yaksihni yamtah. Kaput dawak yulni as makau kisang kidika kaupak dakana, aput yulwak: “Uman yaringni yaksihni kidika yamnayang, kaunah wattik yamki ki.” 29 Muih balna yakat bangkauna dakakana kidika, yuyulna kidika laih alwana as dai; kaunah muih ūk balna kidika yuyulna: —Insal as yulkalbauna. 30 Jisas yaklauwi diyulna: —Yang yulki laih awaski, kidika yulwak dakanda kidika, kaunah manna yulmana yulna. 31 Adika minitni adika kuduh muih balna lanina kidika yamna karang kidika, dawak bik waradika, adika sauni akat king kawa kidika kangwi yakna karang. 32 Kaunah yang adika sau akaupak yadulauwarang kat, muih bitik kidika yang akat duaiki. 33 Adika yulni balna munah diyulnin yamna, witing amput dauwarang kidika. 34 Muih balna yaklauwi nangnitlalana: —Lā munah amanglatayangna Mesías laih dauwas ban karang ki. ¿Amput man yultaman, muih Walanibis al kidika laih dulauna karang ki? ¿Waisyah muih Walanibis al kidika? 35 Jisas yaklauwi diyulna: —Baisa manna pasmangna yakat yaringni kidika sakkarang, kaunah ma parahni manah karang. Manna lapaktanauh, yaringni dutamana bahang, kaput laih pukta kidika manalaihwas karang; kat puksani yakat likkidika laih, angkat kiwa kidika amanglawas ki. 36 Yaringni kidika yakat kalkultanauh, dutamana bahang, kaput laih yaringni muihni awanama. Adika yulni balna yulna usnit kat, Jisas kiwi yakmaldana.

Amput dawak Ju balna kidika Jisas yakat kalkukulwasyah

37 Jisas kidika sain nunuhni balna yamnadai kaunah witingna muhnina yakat, witing yakat rahm kalkukulwasdai; 38 kat prapit Isaías ulna yakat kaiwi kalahnin dai bahang: “Dawan, ¿mayang yulnamayang kidika wais kulnayah? ¿Dawan parasni kidika wais yakat niningkanayah?” 39 Kaput bahang sip kukulwasdai, kaput bahang Isaías ulna dai kidika: 40 “Papang yaklauwi miniknapa putna dawak sinsnina bik dutni yammukna, witingna tatalwas atninna dawak bik amanglawas atninna; kaput laih yang akat yang akat ainin awas, dawak yang lawik muihnina nuhni kidika yamni diyamnik awas.” 41 Isaías witing kaput yulna, kat Jisas alasnina yaksihni kidika talna dia bahang, dawak bik witing yulni yulna dai. 42 Kaput kaunah, Ju balna manas kalkukulna dai Jisas yakat, dawak bik Ju balna tanit nunuhni balna bik. Kaunah witingna lāih laih yuyulwasdai parisi balna yamanina duduwa kidika yulni, sumalnin ūni kaupak diyakmuknin awas yulni. 43 Witingna kau yamni kukulna alasna yaksihni muih yaklauwi kalawa kidika, dawak Papang yaklauwi alasna yaksihni diawa kidika karak.

Jisas yulni balna kidika kau, muih balna lanina yamna karang

44 Jisas yulni parasni yulwi yulna: “Wais yang akat kulwa kidika, yang akat manah laih yakulwas ki, kaunah Papang yakat bik kulwi, witing yasihna kidika. 45 Dawak wais yang akat yatalwa kidika, yasihna muihni yakat bik talwi. 46 Yang, yaringniyang adika, adika sauni akat aiwanayang, yang akat yakukulwa balna kidika puksani yakat watnin awas yulni. 47 Kaunah angdika muihni yulki dakawi kulwas kidika; yang lawik daunin yakat kalwirlatasyang; kat yang aiwanayang adika sau muihni balna adika daunin yakat diwirlanik aiwasyang, kaunah solnina laihtik yaknin aiwanayang. 48 Wais kat dauh yakulwi, yulki balna yakat dakawas kidika laih, uman duwi wais yaklauwi daunin yakat kalwirlana kidika: yang yul balna yulnayang kidika yaklauwi laih witni mani yakat daunin yakat kalwirlana karang. 49 Kat yang alas kulnik lani yultasyang; Papang witing yasihna kidika, yaklauwi yapakna yang ais yulnik kidika, dawak ais sumalnik kidika bik. 50 Dawak yang amanglatayang Papangki yulni balna kidika laih sangka ban atnin yulni balna. Kaput bahang yang yultayang kidika, Papangki yapakna kaput yultayang.”

Jan 13

Jisas disainipil balna kalnina suhwi

1 Insal kaiwi bayakna alasnina yayamwas tanit kauh, Jisas witing amanglana dai, uman awarni kaiwi kana kidika adika sauni kaupak dawi bayakwi kiwi Papang karak kalpaknin kidika. Witing dini balna kidika dalani talna dai sau akat bangkidika, dawak kaput bik laih witni kat dalani ditalna dai. 2-4 Sitan kidika uman Judas, Saiman Iscariote walanibis kulnin yakat kana dai, Jisas kidika daunin tingni yakat ānin kidika. Jisas amanglana dai Papang kaupak kaina kidika, dawak Papang yakat kiwarang kidika nawatwi, dawak Papang yaklauwi parasni bitik kalana kidika; kaput bahang, masan yakat di kaswabangkat, tibil kaupak yaklauwi, prakni nuhni kidika yakpamwi, dawi banimak yakat tawil as sitna. 5 Usnit kat tingsuhnin dini kau duwi was utuhna, dawak disainipil balna kalnina suhna, dawak banimak kau tawil sitna kidika karak uswi buhna. 6 Saiman Pita kalni suhnin yamwakat, witing yaklauwi kalyulna: —Dawan, ¿man yang kalki suhmayah? 7 Jisas yaklauwi nangnitlana: —Waradika amanglatasman ais yamtayang kidika, kaunah usnit kat amanglama. 8 Pita yaklauwi kalyulna: —¡Datingkat kalki suhtas awama! Jisas yaklauwi nangnitlana: —Suhtas awakikat, yang diki awas awama. 9 Saiman Pita yaklauwi kalyulna: —¡Kaput kat Dawan, kalki manah suhwinih, kaunah tingki balna, dawak tunaki bik suhtah! 10 Kaunah Jisas yaklauwi nangnitlana: —Wisam waskawi kalahna kidika, nid awaski baisa suhnin, kaunah kalnimanah laihtak, kal muihni bitik laih klin bahang. Manna laih klin mana, kaunah bitik laih kaput awasmana. 11 Yulna: “Manna bitik laih klin awasmana”, kat witing amanglana dai bahang wais yaklauwi daunin tingni yakat āwarang kidika. 12 Kalnina suhna usnit kat, watwi prakni nuhni kidika kanadai, dawak watwi tibil yakat yalahwi diyulna: —¿Manayamtikda kidika amanglatamanah? 13 Manna yayultamana, Maestro, dawak Dawan bik, bahang manna rahm yultamana, kat kaputyang bahang. 14 Yang laih Maestro yang dawak bik Dawan yang, dawak kalmana suhtikda, kaput bik laih manna biri biri kalmana suhtanama ki. 15 Yang yamtik namangnakatikda, manna bik sihm kaput yamnamna, yang yamtikda kapat. 16 Manayultayang, muih dini yamyang kidika kauh tanit awaski daniwan karak dawakat, dawak sihna muihni kidika kauh nuhni awaski, muih sihyang kidika karak dawak. 17 Manna adika amanglata, kaput yamtanama kat, manna alasna awanama. 18 “Manna bitik yakat laih manayultasyang; yang amanglatayang wais balna kidika walyaktik dunayang kidika. Kaunah Ulna kidika yakat kalahnin ki: ‘Yang karak di kaswa muihni kidika, yang nikingkauh ki.’ 19 Baisa kaiwi kalahwas tanitkauh manayultayang, bahang kaiwi kalahwarang kat, manna yakultanama yang adika. 20 Yang manayultayang, sihnayang muihni yakat duwa kidika, yang akat yaduwi, dawak yasuhna muihni yakat bik duwi.

Jisas yulna Judas yaklauwi dutni yakat kal-awarang kidika

21 Kidika yulwak usnit kat, Jisas witing tuhni palni kulnin yakat kalusna dai, dawak lāih yulna: —Rahm manayultayang, manna paskaupak as daunin yakat yahawarang ki. 22 Kaput laih disainipil balna kidika biri biri kaltatalna, amanglalawasdai wais yakat kalyulwapa. 23 Witingna paskaupak as, Jisas yaklau dalani kaltalwa dai kidika, yaihnit yakat sakdai, di kaswabang yakat, 24 dawak Saiman Pita sain yamwi kalyulna, kalyulwi dakana atnin wais kat yulwapa. 25 Dawak Jisas yaihnit palni yakat kiwi kalyulwi dakana: —Dawan, ¿kidika waisyah? 26 Jisas yaklauwi nangnitlana: —Plawar busna kidika apis suihtik kalaki, bahang kidika muihni karang. Kaput laih plawar busna kidika apis suihwi kalana Judas yakat, Saiman Iscariote walanibis. 27 Dawak Judas plawar busna kidika duna usnit yakat, Sitan kidika witing kulnin yakat kana. Dawak Jisas kalyulna: —Man yamma kidika, sirihni yamtah. 28 Kaunah tibil yakat di kaswabang kidika, as bik amanglawasdai, ais yulwa kidika. 29 Judas kidika lalah uni trukwa bahang, buas kukulna, Jisas kalyulwa kidika laih di bakanna atnin alasna mani kidika dini bakanna atnin, kidika awasbik muih miniknakunni balna yakat di as as diana atnin. 30 Judas plawar busna kidika duna usnit kat, kalahwi kiuna. Uman puklakna dai.

Lā wisam

31 Judas kalahwi kiwak usnit kat, Jisas yulna: —Waradika laih muih Walanibis al alasnina yaksihni kidika lāih kalahwi, dawak Papang alasnina yaksihni kidika laih niningkana ki, witing munah. 32 Muih Walanibis al kidika yaklauwi Papang alasnina yaksihni kidika lāih yakwakat, Papang yaklauwi biriwi witing alasnina yaksihni kidika lāih yakwarang; dawak kidika laih sirihni yamna karang. 33 Walakibis binina, ma mahni manna karak awas awaki ki. Manna yawaltanama, kaunah Ju balna kau diyulnayang kaput, manna yakat bik manayultayang: Yang angkat yawaki kidika manna sip yawas awanama. 34 Adika lā wisam manatayang: Manna biri biri dalani kaltalnauh. Yang manna kau dalani manatalayang kapat, bahang manna bik kaput biri biri dalani kaltalnamna ki. 35 Manna biri biri dalani kaltalnama kat, muih bitik manatatalwarang, manna laih yang disaikipil mana.

Jisas yulna, Pita yulwarangki yang yatalwaski

36 Saiman Pita, Jisas yakat kalyulwi dakana: —Dawan, ¿angkat yawamahn? —Angkat yawayang kidika —Jisas kalyulna— waralaih sip uskit uitasman, kaunah kidika usnit kat uskit uima. 37 Pita yaklauwi kalyulna: —Dawan, ¿ampadawak, waralaih sip usmat uitas awakiyah? ¡Man yulma sangkika kalanik kidika ridiyang! 38 Jisas yaklauwi nangnitlana: —¿Rahm palni yang yulki sangmaka kalanam kidika ridimahn? Yang mayultayang, sakara almuk baisa unbauwas tanit kauh, yang yatalasman kidika wat bās yulma.

Jan 14

Jisas laih, Papang yakat kiunin tani

1 “Manna kulnamna kaidinin awaski. Papang yakat kultanauh, dawak yang akat bik yakultanauh. 2 Yang Papangki ūni yakat yalahnin ūni manas ki; kaput awas katlaih, yang manayultas awaki, pa ridi yamna yawayang. 3 Dawak yang yawing usnit kat, pa balna kidika ridi yamtik datik wattik aiwik manadutik yawaki yangkarak, kaput laih yang angkat sak-awaki yakat manna bik bang-atnamna. 4 Manna tani amanglataman, yang yawayang kidika. 5 Tomás yaklauwi Jisas yakat kalyulna: —Dawan, amanglatasyangna angkat yawaman pa, ¿ta kidika amput amanglatanakiyah? 6 Jisas yaklauwi nangnitlana: —Yang kuduh ta, di rahm kidika, dawak sangka atnin kidika. Yang munah manah sipki Papang yakat kiunin kidika. 7 Manna yang akat amangkilatamana kat, Papangki yakat bik amangnilatanama; warmani kaupak amanglatamana, kat talamana dai bahang. 8 Kaput laih Pilip yaklauwi kalyulna: —Dawan, yanadatang kat Papang kidika talnakuh, dawak kidika manah aitani karang. 9 Jisas yaklauwi nangnitlana: —Pilip, ma mahni mannakarak yang, ¿baisa amangkilatasmahn? Wais yang akat yatalna kidika laih Papang yakat talna; ¿kaunah amput dawak yayultamahn manadating kat Papang yakat talnin? 10 ¿Man kultasmahn, yang Papang karakyang, dawak Papang kidika yangkarak kidika? Adika di balna manayultayang adika, yang alas kulnin lani manayultasyang. Papang yang akat yalahwa kidika, witing silp warkni balna yamwi. 11 Yakultanauh, yang Papang yakat yang kidika, dawak Papang kidika yang karak kidika; kaput awaskat, warkni balna yakat tala kultanauh. 12 Rahm manayultayang, wais yang akat yakulwa kidika, yang wark balna yamtayang kidika witing bik yamwarang, dawak baisa nuhni bik yamwarang, kat yang yawayang bahang Papang sakyakat. 13 Manna di bitik yultanama kidika yang ayangki kau, yamna awaki, kaput laih Walanibis al kidika munah Papangni alasnina yaksihni kidika lāih kalahwarang. 14 Ais ais karang bik yang ayangni kau yultanama kat, yamki.

Jisas pramis yamwi Spirit Holi kidika sihnin

15 “Manna dalani yatalamana kat, yang laki balna kidika yamtanama. 16-17 Dawak yang lawik Papang yakat yulki ki tamatna daknin kidika ūk manasihna atnin, rahm Spiritni kidika, kaput laih ban manna karak atnin kidika. Adika sauni muihni balna laih sip duduwas karang, kat tatalwaski dawak bik amanglalawas bahang; kaunah manna laih amanglatamana, kat witing laih manna karak bahang, dawak bik manna yakat karang bahang. 18 “Warau manadatas awaki, yang nawattik aiwaki manna karak atnin. 19 Tihndawak, sau muihni balna kidika yatatalwas karang; kaunah manna laih yatalnama, dawak sangka awanama, kat yang sangkayang bahang. 20 Kidika mani, manna amanglatanama yang Papang yakat yang kidika, dawak manna laih yang karak mana, dawak yang manna karak. 21 Yang laki balna dakawi kaput yamwa kidika, yakat lāih kalahwi yang akat dalani yatalwa kidika. Dawak Papangki bik dalani kaltalwarang wais yang akat dalani yatalwa kidika, dawak yang bik dalani kaltalki, dawak witing yakat lāih alahwaki. 22 Judas (Iscariote awas kidika) kalyulwi dakana: —Dawan, ¿amput dawak yangna akat manah lāih alahwamayah, kaunah sau muihni balna yakat laih awas? 23 Jisas yaklauwi nangnitlana: —Wais dalani yatalwa kidika, yang yulki dakawi yamwi; bahang Papangki bik dalani kaltalwarang, yang dawak Papangki karak aiwik witing karak yalahdanaki. 24 Wais dalani yatalwas kidika, yang yulki balna kidika kulwas ki. Manna yul balna dakamana kidika laih yang yulki balna awaski, kidika laih Papangki kaupak ki, witing yaklauwi yasihna kidika. 25 “Adika yulni balna bitik manayultayang, yang manna karak sakyang bahang; 26 kaunah Tanitdakyang, Spirit Holi, Papang yaklauwi sihwarang kidika yang ayangki kau, di bitik manasumalwarang, dawak watwi ismangnapakwarang manayulnayang yulni balna bitik. 27 “Kulnin aslah manatayang. Kulnin aslah dutayang kidika manatayang, kaunah sau muihni balna yuyuwa kapat laih manatasyang. Kulnamna kaidinin awaski, dawak bik yamaduduwinih. 28 Uman yulting yadakanamana, dawak wattik aiwaki manna karak atnik. Manna rahm dalani yatalamana kat, manna alasna dutanama, yang Papang yakat yawayang kidika amanglatamana bahang, kat witing laih yang karak takit bahang. 29 Adika baisa tanitkauh manayultayang, kaput kaiwi kalahwakat, rahm kultanama. 30 “Yang yul mahni yultas awaki manna karak, kat adika sauni tunan muihni kidika kaiwa bahang. Kaput kaunah, yang mikityakat parasni as bik diski, 31 kaput atnin ki, kaput laih sau muihni amanglawarang Papang yakat dalani talayang kidika, dawak yamtayang, witing yaklauwi yapakna kidika. “Lawanauh. Akaupak mahka mawanang.

Jan 15

Wain panan rahm kidika

1 “Yang kuduh wain panan rahm palni kidika, dawak Papangki kuduh dahwa kidika. 2 Yang tingki rahni balna kidika wain minik yakwas karang kat, dakwi; kaunah wain minik yakwa kat, tingni rahni balna kau di laihna balna kidika bitik tukwi yakwi, kaput laih minik kidika manas laihna atnin yulni. 3 Manna laih uman klin mana yul balna manayulnayang kidika karak. 4 Yang karak aslah awanauh, yang manna karak aslahyang kapat. Tingni rahni as kidika sip minikyakwaski witing silp, panan nuhni karak aslah awaskat; sihm kaput bik laih, manna sip minik yaktasmana, yang karak aslah awasmana kat. 5 “Yang kuduh wain panan nuhni, dawak manna laih tingni rahnimanah. Wais kat yang karak aslah kidika, dawak yang witing karak aslahyang kidika, minik mahni kalahwi; yang karak awasmana kat manna di as yamtasmana. 6 Wais kat yangkarak aslah awaskat, ahni yakat ruhmna karang dawak buhlawarang, pan tingni balna buhlalana kat uduhwi kuhkau buswa kapat bubusna karang. 7 “Manna yang karak aslah awanama kat, dawak bik sumalnayang balna kidika kat barangni yamtanama kat, ais dukih manawa kidika yultanauh, manana karang. 8 Yang Papangki laih risnipik kidika duwi manna minik manas yaktamana mani kat dawak kaput karak rahm palni yang disaikipil balna kaltamana. 9 Yang manna yakat dalani manatalayang, Papangki dalani yatalwa kapat; yang dalani manatalayang yakat ban awanauh. 10 Yang laki balna yakat daka yamtanama kat, yang dalani talayang yakat awanama, yang Papangki lani balna yakat dakik yamtayang, dawak witing dalani talwa yakat banyang kaput. 11 “Kaput manayultayang yang karak alasna atnamna yulni, dawak alasna alahwamana kidika bitik palni atnin. 12 Yang laki balna laih adika ki: Biri biri dalani katalnin, manna yakat dalani manatalayang kapat. 13 Dalani talnin tanit nuhni kidika laih, sangnika kalanin kaltalyang yamni balna kidika yulnina. 14 Manna laih yang karak kaltalyang yamni mana, yang yamnin yultayang kidika yamtanama kat. 15 Muih dini yamyang balna manatisyang, kat muih dini yamyang kidika laih amanglawas ki, daniwan di yamwa kidika. Manayultayang kaltalyang yamni mayang, kat Papangki yayulna balna kidika bitik namangnakanayang bahang. 16 Manna lawa yawalta yaktasmana, kaunah yang lawik manawaltik yaknayang, dawak manapaknayang yawa minik manas yaknin, dawak kidika minik balna kidika ban atnin. Kaput laih Papang yaklauwi manawarang, yang ayangki kau yakta yultanama kat. 17 Adika kuduh yamnin manayulna kidika: Biri biri dalani kaltalnauh.

Sau muihni balna, Jisas yakat, dawak disainipil balna yakat bik dutni tatalwi

18 “Sau muihni kidika manna yakat dutni manatalwa, amanglatanauh tatuna yang akat dutni yatatalwi. 19 Manna kidika sau akaupakmana katlaih, sau muihni balna adika dalani manatatalwitdai, witingna balna aslah dalani kaldakakawa kapat. Kaunah yang lawik sau muihni balna paskaupak manawaltik yaknayang, kidika bahang sau muihni balna dutni manatatalwi, kat uman sau kaupak awasmana bahang. 20 Ismangna kattanama manayultayang adika: ‘Dini yamyang kidika kauh nuhni awaski, daniwan karak dawakat.’ Yang akat yauhuina kat, manna yakat bik manauhuiwarang; yang yulki yakat daka yamtamana kat, manna yulmana kidika bik dakawi yayamna karang. 21 Kidika bitik laih yang yulki kaput kalahwarang, kat yasihna muihni kidika amangnilalawas bahang. 22 “Witingna pāt as bik diskarang, yang aiwik yuldibautasyang dai katlaih. Kaunah waralaih witingna dutnina kidika dawak disnin sip awaski; 23 yang akat dutni yakukulwa kidika, Papangki yakat bik dutni tatalwi. 24 Witingna pāt as bik diskarang, witingna pasyakat, muih ūk yamwas kidika yamnayang kidika; kaunah adika dini balna uman tatalna, kaput kaunah, yang akat dutni yatatalwi, dawak Papangki yakat bik dutni tatalwi. 25 Adika kaput kalahwi, kat kaput kalahnin dai bahang yulni balna ulna kidika, witingna lānina yakat: ‘Pini kaupak dutni yatatalwi.’ 26 “Kaunah Tanitdakyang kidika kaiwarang kat, yang lawik sihki kidika Papangki kaupak, rahm Spiritni kidika Papang kaupak kaiwi, bahang witing witkinis karang. 27 Manna bik yang witkinis awanama, kat tatuna kaupak yangkarakmana dai bahang.

Jan 16

1 “Adika yulni manayultayang, kat manna kasak kulnin lani dutamana kidika disnamna awas yulni yang akat. 2 Sumalnin ūni kaupak manakangwi yayakwarang, kaput bik laih manaihiwarang, bahang witingna kukulwarang kidika laih Papang warkni as yayamwi. 3 Adika yayamwarang kat maamangkilalawas bahang, Papang yakat, dawak yang akat bik. 4 Adika manayultayang, kidika mani kiwi kawakat, ismangna katwarang yang manayulnayang kidika.

Spirit Holi yamwa kidika

“Adika yulni tatuna kaupak manayultasyang dai, kat manna karakyang dai bahang. 5 Kaunah waralaih yawik watki witing yasihna kidika karak, kaunah manna as bik yayulta dakasmana angkat yawayangpa; 6 nawatkauh laih, kulnamna bukna, adika yulni manayultikda bahang. 7 Kaunah di rahm kidika manayultayang: manna namangna yakat tanit yamni ki yang yawaki kidika. Yawas awaki kat, Tanitdakyang kidika kaiwas karang manna karak atnin; kaunah yawaki kat, yang lawik manasihki. 8 Witing mampat kaiwarang kat, witing yaklauwi sau muihni balna yakat lāih yakwi niningnakana karang wais kidika dutni yamyangpa, dawak wais kidika dutni yamwaspa, dawak wais kidika Papang lakat yamwa kidika duwapa. 9 Wais kidika dutni yamyang yah: yang akat yakulwas kidika ki; 10 wais kidika dutni yamwasyah: yang, Papang yakat yawayang kidika, manna yatalas awanama; 11 wais kat Papang lakat yamwa kidika duwakat: adika sauni akat kabamint kawa kidika laih uman dutni yakat kalwirlana ki. 12 “Di manas manayulnik dutayang, kaunah warminitni laih manna namangna yakat uba minit bayak karang. 13 Rahm Spiritni kidika kaiwarang kat, witing yaklauwi manaduwi kiwarang di bitik rahm kidika yakat manah, kat witing alas kulnin kaupak yulwas karang bahang, kaunah di dakawa balna kidika bitik laih yulna karang, dawak di kalahwarang balna kidika namangnakawarang. 14 Witing yaklauwi alaskina yaksihni kidika lāih yakwarang, kat yang diki kidika duwarang bahang, dawak manna yakat namangnakawarang. 15 Papang duwa balna bitik kidika bik yang diki, kidika bahang yulnayang, Spirit kidika duwarang yang diki bitik, dawak manna yakat namangnakawarang. 16 “Tihndawak, manna yatalas awanama, kidika kaupak tihn ūk yakat yatalnama watta.”

Kulnin bukna kidika kaupak alasna yakat wirlawi

17 Dawak disainipil balna kidika buas biri biri yulwi dakakana: —¿Ais yulnin kulwih adika yulni karak? Maiyulwi tihndawak taldas karang, dawak baisa tanit yakat tihndawak kaltaldarang, kat Papang sakyakat kiwa bahang. 18 ¿Ais yulnin kulwih adika karak ‘tihndawak’? Amangladas ki ais yulwapa. 19 Jisas amanglana, witing kalyulwi dakanin kukulwa kidika, dawak diyulna: —Yang manayulnayang, tihndawak yatalas awanama, dawak tanit yakat ūk tihndawak watta yatalnama. ¿Kidika manna yulta dakamana? 20 Rahm manayultayang, aidanama dawak, kulnamna bukwarang, kaunah sau muihni balna laih alasna duduwarang. Manna kulnamna buknakarang kaunah, kulnamna bukna kidika alasna yakat wirlana karang. 21 Muih yal muihbin duwarang kat, witing kulnin bukwi kat awarni kaina bahang; kaunah muihbin kidika batahndawak, dalani wauhna dai kidika dinitkahwi, kat sau akat muih as batahndana kidika yulni alasna kulwa kidika yulni. 22 Kaput bik laih manna warmani kulnamna bukwi; kaunah yang nawattik aiwaki manatalna, kaput laih kulnamna kidika alasna manah bahngwarang, kidika alasnina laih muih as bik sip manadakyakwas karang. 23 “Kidika mani di as bik yayulta dakas awanama. Rahm manayultayang, Papangki yakat di kalyultanama kidika yang ayangni kau, witing manawarang. 24 Waradika, manna yang ayangki kau di yultasmana; yultanama kat dutanama, kaput laih alasmanana kidika bitik palni atnin.

Jisaskrais laih sau muihni yakat minitbayakwi

25 “Adika dini manayulnayang, di ūk karak libittik; kaunah awarni balna kaiwarang, di balna karak libittik manayultas awaki, nawatkauh laih Papang tanka kidika lāih manayulki. 26 Kidika mani, manna yang ayangki kau di yultanama; yang yultasyang manna yulmana Papang kalni dinit yakat buktik yulki, 27 kat Papang kidika manna yakat dalani manatalwa bahang. Dalani manatalwi, kat manna yang akat dalani yatalamana bahang, dawak bik rahm kultamana yang Papang kaupak aiwanayang kidika. 28 Papang kaupak alahwanayang adika sauni akat aiwinik, dawak waralaih adika sauni datayang, Papang yakat wattik nawattik yawinik yulni. 29 Kaput dawak disainipil balna yuyulna: —Waralaih lāih yulbautaman, di karak libitta yultasman. 30 Waralaih taldi, di balna bitik amanglataman, dawak bik nid awaski muih as bik man yakat mayulwi dakanin kidika. Kidika bahang rahm kuldi Papang kaupak aiwanaman. 31 Jisas yaklauwi nangnitnalana: —¿Kaput bahang waralaih rahm kultamana? 32 Awarni kaiwi kawi, kidika laih waradika minitni kuduh, manna pini kalruhtanama kidika, dawak alas yadatanama. Kaunah alas awasyang, kat Papang laih yang karak bahang. 33 Adika manayultayang, kulnin aslah dunin yang karak mana kidika. Sau akat, manna wauhnamna ki; kaunah kulnamna parasni dutanauh: yang sau adika minit bayaknayang.

Jan 17

Jisas minityulwi disainipil balna yulnina

1 Kidika yulna usnitkat, Jisas makau kisang yakat talwi yulna: “Papang, awarni kaiwi kana: Walamabis al yakat alasnina yaksihni kidika yamtah, kaput laih, man yakat bik alasmana yaksihni kidika yamnakarang. 2 Kat man Walamabis al yakat kalanaman parasni bitik kidika muih balna bitik minitna yakat, kaput laih sangka ban atnin kidika dianin, man lawa kalanaman balna bitik yakat. 3 Sangka ban atnin kidika laih man yakat amangmalanin, man manah Papang aslahman kidika, dawak Jisaskrais, man lawa sihnaman kidika. 4 “Yang alasmana yaksihni kidika yamnayang sau akat, man wark yamnin yanaman kidika yamnayang. 5 Waralaih Papang, man muhma yakat alasna yaksihni dutayang dai kidika watta yatah, sau adika dis mani balna kau dutayang dai kidika. 6 “Sau kaupak walta yaknaman kidika, yana atnam, bahang niningnakanayang waisman kidika. Man dima balna dai, dawak man yanaman, kaput laih man yulma kidika dakakana. 7 Waralaih amanglataman, man yanaman balna bitik dai kidika man yakat aiwi; 8 yul balna yanaman dai kidika dianayang, bahang witingna duduna. Dawak amanglalana, rahmpalni man kaupak aiwanayang kidika, dawak bik witingna rahm kukulwi man yasihnaman kidika. 9 “Witingna yulnina man kalma dinit yakat buktik yultayang; sau muihni balna yulnina kalmadinit yakat buktik yultasyang, kaunah yanaman balna kidika yulnina, kat man dima balna bahang. 10 Yang diki balna bitik kidika man dima balna, dawak man dima balna kidika yang diki balna, bahang yang alaskina yaksihni kidika lāih kalahwi witingna munah. 11 “Yang sau akat ban awas awaki, kaunah witingna laihtak sau akat ban karang ki, yang laih yawik man karak awaki. Papang holi, man ayangma parasni kidika maintalah, kidika ayangni yanaman kidika, kaput laih witingna kidika aslah palni atnin, man yang karak aslah mayang kapat. 12 Yang witingna karakyang dai, adika sauni akat, man ayangma parasni kau maintalayang dai, dawak nanitna daktayang dai, ayangni yanaman kidika kau. Witingna kidika as bik didiswas ki, kaunah aslah uman disna dai kidika manah laih, Ulna balna yakat kaiwi kalahnin yulni. 13 “Waralaih yawayang man sakman yakat; kaunah adika yulni balna yultayang baisa minit as sau akat sakyang bahang, yang alasna dutayang kapat witingna bik alasna duna atnin. 14 Man yulma balna kidika dianayang, kaunah sau muihni balna kidika dutni ditatalwi, kat witingna laih sau muihni awas bahang. 15 Mayultasyang sau akaupak yaknin, kaunah dutni balna kidika kaupak nanitnadaknin. 16 Yang sau muihni awasyang kaput bik, witingna kidika sau muihni awaski. 17 Man dima yaktah, di rahm kidika munah; man yulma balna kidika kuduh rahm. 18 Sau muihni balna pasyakat yasihnaman kaput bik, yang witingna kidika sihtayang, sau muihni balna pasyakat. 19 Witingna yulnina, man dima alahwayang, kaput bik laih witingna kidika man dima kalnin, di rahm kidika munah. 20 “Adika balna yulnina manah kalma dinit yakat buktik yultasyang, kaunah yang akat yakukulwarang balna kidika yulnina bik, witingna yuyulwak dakawi. 21 Mayultayang witingna kidika aslah karang; man kapat, Papang, man yangyakman kidika, dawak yang manyakyang, dawak witingna kidika mayang karak kawang, kaput laih sau muihni balna kidika kukulwang man lawa yasihnaman. 22 Man alasna yaksihni yanaman kidika, sihm witingna yakat bik dianayang, kaput laih aslah atnin, man dawak yang karak aslah mayang kapat: 23 yang witingna yakatyang, dawak man laih yangyakatman, kaput laih yamni palni aslah atnin kidika, kaput laih sau muihni balna kidika amanglalawarang man lawa yasihnaman kidika, dawak bik witingna yakat dalani ditalaman, yang akat dalani yataman kapat. 24 “Papang man lawa yanaman, kaput bahang dukih yawi yang angkat sak- awaki kidika, witingna bik yakat atnin, kaput laih alaskina yaksihni kidika tatalwarang, alasna yaksihni yanamna kidika; kat man dalani yatalnaman sau adika yamwas tanitkauh. 25 Papangki la kat, sau muihni balna kidika amangmalalawas ki; kaunah yang laih amangmalatayang, dawak adika balna bik amanglalawi man yasihnaman kidika. 26 Niningnakana yang, waisman kidika, kaunah baisa yamki ki, kaput laih dalani yatalaman kidika witingna yakat bik karang, dawak kaput bik yang witingna karak awaki.”

Jan 18

Jisas lalaihna

1 Kidika yulna usnit kat, Jisas disainipil balna karak kalahwi kiuna, Cedrón wasni nakas yakat. Di dadahna pāni as pakkat yakat uiwi kakana, Jisas disainipil balna karak. 2 Judas bik, witing yaklauwi daunin yakat āwadai kidika, amanglawādai kidika pani, kat Jisas wat wat kidika pāni yakat disainipil balna karak kalududuhwādai bahang. 3 Kaput laih Judas witing soldado balna duwi kiuna, dawak makatyulnin ūni maintalyang balna bik uina dai, kidika laih sumalyang balna dawak parisi balna bik yaklauwi sisihna dai. Kalbaunin dini duwi uina, dawak awas bik dahlwi uina dai. 4 Kaunah Jisas laih amanglawadai bahang di kalkalahwarang kidika witing yakat, kalahwi diyulwi dakana: —¿Wais waltamanah? 5 Witingna yaklauwi nangnitlalana: —Jisas Nazaret kaupak kidika. Jisas yulna: —Kidika laih yang. Judas, witing yaklauwi īnin tingni yakat āwa kidika bik likdai witingna karak. 6 Jisas kaput diyulwak: “Kidika laih yang”, witingna dangsani uiwi bubukna sau yakat. 7 Jisas watwi diyulwi dakana: —¿Wais yakat waltamanah? Dawak witing watwi yuyulna: —Jisas Nazaret kaupak kidika. 8 Jisas watwi diyulna: —Uman manayulnayang, kidika laih yang. Manna yawaltamana kat, adika balna datanang uiwang. 9 Adika kalahna, Jisas yulna dai yakat kaiwi kalahnin dai bahang: “Papang yanaman balna dai kidika as bik diswasdai.” 10 Kaput laih Saiman Pita, witing isparah as duwadai kidika, yakwi kidika balna paskaupak as tapani dakna tingnipal niningkauh kidika, bahang ayangni laih Malco, kidika lani laih sumalyang nuhni dini yamyang as dai. 11 Jisas yaklauwi Pita yakat kalyulna: —Ismaparah kidika pāni yakat atah. Papang ki yaklauwi adika dinin tapahlni yāwakat, ¿yang dinik awaskatpah?

Jisas Anás muhni tani yakat

12 Soldado balna kidika, taninatuna karak, dawak Ju balna makatyulnin ūni maintalyang balna karak, Jisas kidika laihwi sisitna dai. 13 Tatuna laih Anás ūni yakat duwi uina, kat witing laih Caifás unisah dai bahang, kidika kurihni balna yakat witing kidika sumalyang nuhni dai. 14 Adika Caifás kuduh Ju balna yakat diyulna dai kidika, tanit yamni ki muih al aslah dauwarang kidika tawan yulni.

Pita, yulna Jisas kidika talwas ki

15 Saiman Pita dawak disaipil ūk balna kidika Jisas usnit yakat uina. Disaipil ūk kidika laih sumalyang nuhni kidika amanglawadai, kidika bahang Jisas karak ū yakat uiwi kakana; 16 kaunah Pita laih ahni yakat watna, dūr yakat. Kaput bahang, disaipil as sumalyang nuhni yaklauwi amangnilawa dai kidika kalahwi yulkalbauna dūr maintalyang yakat, dawak Pita kidika kalawak kana. 17 Dūr maintalyang kidika Pita yakat kalyulwi dakana: —¿Man kidika alni disainipil asman awasyah? Pita yaklauwi nangnitlana: —Dikah, dikah yang awaski. 18 Sanni lakwasakdai bahang, dinina yamyang balna dawak makatyulnin ūni maintalyang balna kidika kuh bibina dai, bahang kidika yakat kalpuihwa bangdai. Pita bik witingna karak kuh yaihnit yakat kalpuihwa sakdai.

Sumalyang nuhni kidika Jisas yakat kalyulwi dakana

19 Sumalyang nuhni kidika yaklauwi Jisas yakat kalyulwi dakana, disainipil balna yulnina dawak, witing ais sumalwadai kidika. 20 Jisas yaklauwi kalyulna: —Yang muih balna muhnina yakat maltas yulbaunayang; sumamalwa ūni yakat sumaltayang dai, dawak makatyulnin ūni yakat bik, kidika yakat Ju balna kidika kalududuhwādai, kaput bahang yul mani as bik yultasyang dai. 21 ¿Ais yamta yayulta dakaman yang akat? Yulting dakakana balna yakat diyulta dakah, dawak witingna mayuyulwarang ais yulbaunayang kidika. Witingna amanglalawi ais yulbaunayang kidika. 22 Jisas kaput yulwak, makatyulnin ūni maintalyang as yaklauwi Jisas muhni yakat tisna, dawi kalyulna: —¿Sumalyang nuhni yakat kaput nangnitlatamahn? 23 Jisas yaklauwi nangnitlana: —Dutni as yulnayang kat, yayultah ais dutni yulnayang; yulnayang kidika yamni kat, ¿ais yamta yatistamahn? 24 Kaput dawak Anás yaklauwi sihna, sitwi dawi, Caifás, sumalyang nuhni yakat.

Pita watwi yulna, Jisas kidika talasyang

25 Kaput laih, Pita kidika ban kalpuihwasak dai kuh yaihnit yakat. Dawak kalyulwi dakakana: —¿Man awasyah, kidika alni disainipil? Pita yulna: —Dikah, yang awaski. 26 Usnit kat, sumalyang nuhni dini yamyang as yaklauwi yulwi dakana, Pita yaklauwi tapani dakna kidika alni kidika wanaihni dai: —¿Matalasyang daih, di dahna pāni pasyakat? 27 Pita, watwi talasyang yulna, kidika minitni yakat sakara unbauna.

Jisas Pailat muhni yakat

28 Jisas kidika Caifás ūni kaupak yakwi duwi uina, Roma kabamintni ūni yakat. Payahlanin manah bahang, Ju balna kidika kabamint ūni yakat kakawasdai, kakawarang kat, maisihnidis atnin lani kidika niningkauh karang bahang, dawak kaput bik witingna sip kakaswaskarang bahang, insal kaiwi bayakna kasnin kidika. 29 Kidika bahang Pailat kalahwi yuldibauna. Dawi diyulna: —¿Adika alni ais yulni witing minit yakat duaitamanah? 30 —Muih dutni awas katlaih —nangnitlalana—, man tingma yakat ādas karang. 31 Pailat diyulna: —Manna duyawanauh, manna lamana kat lani yamtanauh. Kaunah Ju la muihni balna kidika yuyulna: —Ju balna yangna laih muih as bik īnin kidika rahmkina yanawas ki. 32 Kaput laih Jisas yulna yakat kaiwi kalahna, witing amput dauwarang dai kidika. 33 Pailat watwi ūni yakat kawi kiuna, Jisas yakat kalyulwak kiwak, kalyulwi dakana: —¿Man Ju balna Kingninamahn? 34 Jisas kalyulna: —¿Kidika man silp yulta dakamahn, kidika awaskat, muih ūk yaklauwi yang yulki mayulnayah? 35 Pailat yaklauwi kalyulwi dakana: —¿Yang adika Ju yang katpah? Man nimasan balna, dawak sumalyang tunan muihni balna yaklauwi yang tingki yakat ma-ahana. ¿Man ais yamnamahn? 36 Jisas yaklauwi nangnitlana: —Yang king āwayang kidika adika sauni akat awaski. Kaput kat laih, muih diki yamyang balna duki, dawak witingna kalbabauwarang dai, Ju balna tingnina yakat āwinik awas yulni. Kaunah yang king awayang kidika adika sauni akat awaski. 37 Kaput dawak Pailat kalyulwi dakana: —¿Kaput bahang, man kingmahn? Jisas yaklauwi nangnitlana: —Man kaput yultaman: yang king yang. Yang sau akat aiwik batahndanayang, di rahm kidika yulna atnik. Dawak di rahm muihni balna bitik kidika, yadakakawi. 38 Pailat yaklauwi kalyulna: —¿Di rahm kidika aisyah?

Jisas laih daunin yakat wirlana

Kidika balna kalyulwi dakawak usnit kat, Pailat watwi kalahwi Ju balna karak yulbauna, dawak diyulna: —Yang dutni as bik yaktasyang, kidika alni yakat. 39 Kaunah manna nining kaput yamtamana, insal kaiwi bayakna mani alasnina yakat, yang muih as uluhtik manatayang: ¿dukih manawih, Ju balna Kingnina kidika uluhtik mananik? 40 Bitik sararahna: —¡Kidika laih awaski! ¡Barrabás kidika uluhtah! Dawak Barrabás laih di malyang as dai.

Jan 19

1 Kaput dawak Pailat yaklauwi pakwak Jisas yakat wiwisna. 2 Dawak, soldado balna yakat kraunni as yayamna, dawak Jisas tunan yakat papakna, dawak prakni pauni kat ahana dai. 3 Usnit kat, yaihnit yakat uiwi kalyulwi dakakana: —¡Ju balna Kingnina sangka kawang! Dawak muhni yakat wiwisna dai. 4 Pailat watwi ahni yakat kalahwi diyulna: —Talnauh, akat duaitayang, kaput laih manna amanglanamna, witing yakat di dutni as bik yaktasyang. 5 Kaput laih kalahna Jisas, witing tunan yakat wakal kraunni kidika pakna dai, dawak witing prakni kidika pauni kat ahana dai. Pailat yulna: —¡Yakat kidika alni dutamana! 6 Sumalyang balna taninatuna, makatyulnin ūni maintalyang balna kidika tatalna kat parasni sarahwi yuyulna: —¡Pan prihni yakat patah! ¡Pan prihni yakat patah! Pailat yaklauwi diyulna: —Manna duyawa, pan prihni yakat patanauh, kat yang laih witing yakat dutni as bik yaktayang bahang. 7 La muihni Ju balna kidika nangnitlalana: —Yangna lā as dutayangna, bahang yangna lākina kat daunin ki, kat witing laih Papang Walanibis kapat kaldakana bahang. 8 Pailat kidika dakawi, baisa yamaduna. 9 Ūni yakat kawi kiwi, baisa Jisas yakat kalyulwi dakana: —¿Man angkaupakmahn? Kaunah Jisas yaklauwi nangnitlawasdai. 10 Pailat yaklauwi kalyulna: —¿Nangkitlatas awamayah? ¿Man amanglatasmahn, yang la parasni dutayang kidika pan prihni yakat mapanik, sihm kaput bik malaihtik yaknik? 11 Kaput dawak Jisas yaklauwi nangnitlana: —Yang mikit yakat lā parasni as bik dis awama, Papang yaklauwi mawas katlaih; kidika bahang, angdik muihni yaklauwi man tingma yakat yahana kidika tanit dutni duwi, man karak dawakat. 12 Kidika minitni kaupak, Pailat witing tanka walna Jisas kidik uluhna atnin; kaunah Ju balna yaklauwi parasni kalsararahna: —¡Uluhma karang kat, king tanit nuhni karak kaltalyang yamni awasman! ¡Wais muihni kat king kaldakawa kidika, king tanit nuhni karak kalwaihla kalwi! 13 Pailat kidika dakawi, Jisas kidika yakna, usnit kat la yamwa pāni yakat yalahna, hibru yulni kau laih Gabata, kidika tanka laih: kipala kau yamna kidika. 14 Kidika laih insal kaiwi bayakna mani kidika tanitkauh dai, matunak kapat dai. Pailat Ju balna yakat diyulna: —¡Yakat manna kingmana dutamana! 15 Kaunah witingna sararahna: —¡Kangyaktah! ¡Kangyaktah! ¡Pan prihni yakat patah! Pailat yaklauwi diyulwi dakana: —¿Kingmana kidika pan prihni yakat paki katpah? Dawak sumalyang balna taninatuna nangnitlalana: —¡Yangna laih king as bik disyangna kaunah, king tanit nuhni kidika manah dutayangna! 16 Kaput laih Pailat yaklauwi Jisas kidika diana dai, pan prihni yakat pana atnin, dawak witingna duwi uina.

Jisas pan prihni yakat papana

17 Jisas kalahwi panan prihni trukwi kiuna, “Muih tunan wakalni” kidika pāni yakat (Hibru kau laih Gólgota). 18 Kidika yakat pan prihni kau papana, dawak muih ūk bu karak ilwi papana, pirini nakaskau, nakaskau, kaput laih Jisas kidika papus yakat witdai. 19 Pailat ulna dai aput: “Jisas Nazaret kaupak, Ju balna Kingnina”, dawak kidika sihwak duwi uiwi, Jisas panan prihni mayakat papana dai. 20 Ju balna manas ulna kidika yulwi tatalna, kat Jisas papana pāni kidika laih tawan nuhni yaihnit yakat dai bahang, dawak ulna kidika laih hibru, latin dawak grik kau bik ulna dai bahang. 21 Kaput bahang, sumalyang taninatuna Ju balna kidika Pailat yakat kalyuyulna: —Ulwinih: ‘Ju balna Kingnina’, kaunah ultah: ‘Yulna, witing laih Ju balna Kingninayang atna’. 22 Kaunah Pailat yaklauwi diyulna: —Ulnayang kidika laih, kaput ban karang. 23 Soldado balna yaklauwi Jisas kidika pan prihni yakat papana usnit kat, asnina kidika duwi pīsni arungka bibisna, soldado balna kidika as as dinina. Dawak prakni nuhni kidika bik duduna, kaunah kidika laih biwas barangni aslah yamna dai, makaupak saukat, 24 soldado balna kidika biri biri yuyulna: —Bisdas kawang, kaunah suerte ruhmdi taldang, wais yakat bukwarangpa. Ulna yakat kaput kalahna, yulwa kidika: “Prakki kidika witingna biswi duduna, dawak prakki nuhni kidika laih suerte ruruhmna.” Soldado balna kidika yayamna. 25 Pan prihni yaihnit yakat Jisas nanangni kidika sakdai, nanangni wirahni yal kidika, Mery, Cleofas yalni, dawak Mery Magdalin. 26 Jisas nanangni yakat talna, dawak yaihnit yakat sakdai disainipil dalani palni talwa kidika, dawak nanangni yakat kalyulna: —Yal, yakat walamabis al kidika dutaman. 27 Kidika usnit kat disainipil yakat kalyulna: —Yakat nanangma dutaman. Kidika kaupak, disaipil ūni yakat duna dai.

Jisas dauna

28 Kidika usnit kat, Jisas witing amanglana bahang, di balna kidika bitik laih kalahna bahang, ulna yakat kalahnin yulni, yulna: —Dikih yawi. 29 Kidika yakat wain sapahni pupuna buhng sakdai. Di yudutni kau susuihna wain sapahni kidika pan as walapni kidika tingni rahni as sutni yakat sitwi dawi, Jisas tinpas yakat ahana. 30 Jisas wain sapahni kidika diwi, yulna: —Di bitik laih yamna ki. Kidika usnit kat tunan kidika abukna, dawak spiritni kidika kalana dai.

Jisas pirini yakat langsa papana

31 Kidika laih insal kaiwi bayaknin kidika tanitkauh ma as dai, Ju balna kidika dukih diawasdai, muih muihni kidika ban pan prihni yakat wit atnin, urupnin mani, kat kidika urupnin mani laih tanit nuhni kulna dai bahang. Kidika bahang Pailat yakat papakna pan prihni yakat papana balna kidika barahninamak bahna atnin, dawak muihni balna kidika bik, kidika kaupak lakna atnin. 32 Kaput laih soldado balna kidika uiwi tatuna witkidika barahnimak balna kidika wiswi babahna dai, dawak ūk as Jisas yaihnitkau papana witdai kidika bik kaput kalyayamna dai. 33 Kaunah Jisas yaihnit yakat uiwi tatalwak uman dauna dai. Kidika bahang barahnimak balna babahwas dadana. 34 Kaput kaunah, soldado balna kidika as yaklauwi pirini yakat langsa kau pana, dawak was, ā karak kalahna. 35 Adik yulwa kidika laih, as talna kidika yulwi, dawak di rahm yulwi; witing amanglawi rahm yulwa kidika, kaput laih manna bik kulnamna. 36 Adika dini balna kalahna, ulna yakat kaiwi kalahnin yulni: “Wakalni as bik babahwas karang.” 37 Dawak ulna ūk yakat yulwa kidika: “Talah pawi ahllalana kidika.”

Jisas nununa

38 Kidika usnit kat, José, Arimatea kaupak kidika, Pailat yakat kalyulna kalawak Jisas muihni kidika duwi kiuna atnin. José laih Jisas disainipil dai, kaunah malnikau dai, Ju balna yamaninaduwa kidika yulni. Dawak Pailat yaklauwi kalana, dawak José kiwi Jisas muihni kidika duwi kiuna. 39 Nicodemo bik, pukta as Jisas yakat kiwi yulbauna dai kidika, dia walapni kilo 30 duwi kiuna, kidika laih mirra dawak aloe karak bahana dai. 40 Kaput laih José dawak Nicodemo karak Jisas muihni kidika duwi uina, dawak asna balaknin dini balna kidika dia walapni kau suihwi dawi wadadatna, Ju balna muih dauwak amput nunuwa kidika kaput. 41 Jisas pan prihni papana yaihnit yakat di dadahna pāni as pakdai, dawak kidika yakat sau-ū wisam as yayamna sakdai, kidika yakat muih as bik ahawasdai. 42 Kidika yakat Jisas muihni kidika uiwi ahana, kat yaihnit yakat dai bahang, dawak bik Ju balna urupninna mani kidika uman kaiwi kawadai bahang.

Jan 20

Sau-ū pāni manah

1 Kidika wīkni ma tatuna yakat, Mery Magdalin witing mapiris palni sau- ū yakat kiuna, baisa apis puksani dai; bahang talwakat panikungmak kau kipala kakna sakdai kidika kahrwi lapamna dai. 2 Bahang witing kidika talwi kiri kiuna Saiman Pita, dawak disaipil Jisas yaklauwi tanit dalani talwadai yakat bik, dawak diyulna: —¡Sau-ū kaupak Dawan dai kidika duwi uina, amangladaski angkat duwi uinapa! 3 Pita dawak disaipil ūk kidika karak kalahwi uina sau-ū yakat. 4 Albupak kiri uina papatni; kaunah as kidika laih tanit kirana Pita karak dawakat, bahang tatuna kiwikana sau-ū yakat. 5 Abukwi talna, dawak kidika yakat asna sisitna dai kidika tusdai, kaunah kāwasdai. 6 Witing dangnit kaupak Saiman Pita kiwi kana, dawi sau-ū yakat kawi kiuna. Dawak witing bik talna asna sitna balna dai kidika; 7 dawak baisa minit yakat, Jisas tunan balalakna asnina dai kidika, asna ūk piririna dai kidika karak libitni bang-awasdai, piriwi dawi silp lakna dai. 8 Kaput laih disaipil as dai kidika bik kawi kiuna, tatuna sau-ū yakat kiuna dai kidika, di balna kalahna kidika talna dawak kasak kulna. 9 Kat Ulna balna dai kidika amanglawasdai bahang, kat witing laih dauna kaupak yaklaunin dai kidika. 10 Kidika usnit kat disaipil balna dai kidika nawatwi uina ūnina kau.

Jisas kidika lāih kalahwi Mery Magdalin yakat

11 Mery kidika laih ahni yakat watna dai, sau-ū yaihnit yakat, bahang kaput laih kaidasakdai. Dawak kaida sakkauna abukwi talna pasyakat, 12 bahang witing talwak insal bu raudai praknina kidika pihni kat kana, bahang witingna laih yalahna raudai, Jisas lalakna pāni dai yakat; as kidika tunan niningyakauh, dawak ūk kidika laih kalnisut niningyakauh. 13 Insal balna yaklauwi kalyulwi dakakana: —Yal, ¿ais yulni aidamahn? Yal kidika yaklauwi diyulna: —Yang Dakiwan kidika duwi uina, amanglatasyang angkat duwi uinapa. 14 Kidika yulwa minitni yakat, wiryaklawi talwak Jisas sakdai, kaunah amanglawasdai witing kidika. 15 Jisas yaklauwi kalyulwi dakana: —Yal, ¿ais yamta aidamahn? ¿Wais waltamahn? Witing kulna laih kidika pāni maintalwa muihni kulna, bahang kalyulna: —Dawan, man duyawanaman kat, yayultah angkat laknamahn, yang yawik walnik. 16 Kaput laih Jisas yaklauwi kalyulna: —¡Mery! Yal kidika wiryaklawi hibru yulni kau kalyulna: —¡Rabuni! (kidika tanka laih: “Maestro”). 17 Jisas yaklauwi kalyulna: —Yalaihwinih, kat baisa Papangki yakat yawik kalpaktasyangna bahang. Kaunah yawa wirahki ahal balna yakat diyultah, yang Papangki yakat yawik kalpaktanaki ki, bahang kidika laih manna bik Papangmana. 18 Kaput laih Mery Magdalin kidika kiwi disaipil balna yakat diyulna, Dawan talna kidika, dawak bik diyulna kalyulna yulni dai kidika.

Jisas disaipil balna yakat lāih kalahwi

19 Kidika mani puklakwak, wīk tatuna yakat, disaipil balna kidika kaluduhwi dawi dūrnina kidika puputna dai, lā muihni Ju balna kidika yamaninaduduwa kidika yulni. Jisas kiwi kawi disainipil balna bangkidika papus yakat yaklauna, dawi diparasna: —¡Kulnin aslah manna karak! 20 Kidika yulwi usnit kat, ningnakana tingni balna dawak pirini kidika bik. Dawak witingna Dawan talwi alasna kalalahna. 21 Kidika usnit kat watwi Jisas diyulna: —¡Kulnin aslah manna karak! Papang yaklauwi yasihna kapat, yang bik manna yakat manasihtayang. 22 Dawak witingna minitna yakat puhwi diyulna: —Spirit Holi kidika dutanauh. 23 Wais balna yakat dutnina datanang disna karang kat, kidika laih dutnina dawak disna karang; dawak wais balna yakat dutnina datanang diswas karang kat, dutnina dawak diswas karang.

Tomás talna Jisas dauna kaupak yaklauna kidika

24 Tomás, disaipil balna paskaupak as dai kidika, dawak sūtki kalahwadai kidika, sak-awasdai Jisas kiwi kana yakat. 25 Usnit kat disaipil ūk balna yaklauwi kalyuyulna: —Yangna Dawan talnayangna. Kaunah Tomás yaklauwi diyulna: —Tingni yakat silak papana kidika talasyang kat, dawak pirini kau yakat bik tingki uhr-atik talasyang kat, sip kultas awaki. 26 Ma tiaskaubās bayakwak, disaipil balna kidika ū as kau kalududuhna, kidika yakat laih Tomás bik sakdai. Dūr balna kidika puputna dai, kaunah Jisas kawi yaklana, dawak papusyakat yaklauwi, diparaswi yulna: —¡Kulnin aslah manna karak! 27 Kidika usnit kat Tomás yakat kalyulna: —Tingma bikis akat uhr-ata dakah, dawak bik tingki balna adika talah; tingma uhr-ata dakah piriki akat. Kulwas atna; ¡kultah! 28 Kaput dawak Tomás yulna: —¡Yang Dawanki, yang Papangki! 29 Jisas yaklauwi kalyulna: —¿Kasak kultamahn yatalada bahang? ¡Yamni ki talwas kaunah rahm kukulwa kidika!

Ais yulni adika wauhnitaya ulnayah

30 Jisas sain manas yamna disainipil balna muhnina yakat, kidika balna laih adika wauhnitaya akat ulwas ki. 31 Kaunah adika balna ulna, manna kasak kulnamna Jisas laih Mesías, Papang Walanibis, kaput laih witing yakat kulta sangka ban atnin kidika dutanama witing munah.

Jan 21

Jisas disainipil balna tiaskaubu yakat kalahna

1 Kidika usnit kat, Jisas watwi disainipil balna yakat lāih kalahna, Tiberias lakunni kungyakat. Aput kalahna dai: 2 Aslah bangdai, Saiman Pita, Tomás, sūtki kalatwadai kidika, Natanael Galilea kau Caná tawanni kaupak dai kidika, Zebedeo walanibis balna, dawak Jisas disainipil balna ūk bu dai kidika. 3 Saiman Pita kalyulna: —Dipamna yawayang. Witingna yaklauwi nangnitlalana: —Yangna bik man karak yawanaki. Uiwi kuring kau kawi uina, kaunah kidika puknita waspa dini as bik lalaihwas dai. 4 Mahka payahlawak, Jisas waskung yakat lāih kalahna, kaunah disainipil balna kidika amanglalawasdai Jisas kidika. 5 Jisas yaklauwi diyulwi dakana: —Walabis, ¿waspa dini dismanah? Witingna yaklauwi nangnitlalana: —Dikah. 6 Jisas yaklauwi diyulna: —Waspa dini laihnin dini kidika tingmanapal niningyakat ruhm-atanauh, kaput laih laihtanama. Kaput yayamna, bahang witingna sip-awasdai laihwi dulaunin dini kidika kat waspa dini mahni palni kidika pasyakat kakanadai bahang. 7 Kaput dawak, disaipil as Jisas yaklauwi dalani talwadai kidika yaklauwi Pita yakat kalyulna: —¡Kidika laih Dawan! Saiman Pita dakawak Dawan atwak, prakni balna kana kat wahdis sakdai bahang, dawak was yakat ruhmwi kana. 8 Dawak disaipil ūk balna kidika laih kauhmak yakat uiwi kikilna kuring kau, waspa laihnin dini kidika waspa dini manah buhng kat murwi uina, kat waskung kaupak metro 100 manah kalahwi uinadai bahang. 9 Sau yakat yaklalakwak, kuh biwi minit yakat waspa dini as ihilna tusdai, dawak plawar busna bik. 10 Jisas yaklauwi diyulna: —Waspa dini wisam palni yaknamana kidika duaitanauh. 11 Saiman Pita kuring yakat kawi waspa dini laihnin dini kidika murwi kiuna, waspa dini nunuhni manah buhngdai kidika 153 , mahni dai kaunah sip biswasdai. 12 Jisas yaklauwi diyulna: —Aiwa mapiris dini kastanauh. Disaipil balna as bik kalyulwi dakakawasdai witing kidika waispa, kat amanglalana dai bahang witing kidika laih Dawan. 13 Kidika usnit kat, Jisas witing plawar busna kidika dulauwi diana, dawak waspa dini kidika sihm kaput diana. 14 Adika kat Jisas watbās disainipil balna yakat lāih kalahna, dauna kaupak yaklauna dai kidika kaupak.

Jisas yaklauwi Saiman Pita yakat kalyulna

15 Dikaswi dahn dadawak, Jisas yaklauwi Saiman Pita yakat kalyulwi dakana: —Saiman, Jan walanibis, ¿dalani yatalamahn, adika balna karak tanit? Pita yaklauwi nangnitlana: —Agha, Dawan, man amanglataman dalani matalayang. Jisas yaklauwi kalyulna: —Sīpki balna maintalah. 16 Watwi kalyulwi dakana: —Saiman, Jan walanibis, ¿dalani yatalamahn? Pita yaklauwi nangnitlana: —Agha, Dawan, man amanglataman dalani matalayang. Jisas kalyulna: —Sīpki balna maintalah. 17 Watbās kalyulwi dakana: —Saiman, Jan walanibis, ¿dalani yatalamahn? Pita, kulnin bukna kat watbās kalyulwi dakawa bahang, dalani kaltalwapa, nangnitlana: —Dawan, man di bitik amanglataman: yang dalani matalayang. Jisas kalyulna: —Sīpki balna maintalah. 18 Rahm mayultayang, wahmaman mani balna dai yakat, prakma awa angkat yawinin kidika yawaman dai; kaunah muihbarak kalma kat, tingma dulautang muih ūk prakma ma-ahawarang, yawakih mawas pāni yakat maduwi uiwarang. 19 Kidika yulna Jisas, Pita amput dauwarang kidika tanka kalyulna, dawak witing dauwarang kidika munah Papang alasnina yaksihni yamwarang kidika. Kidika usnit kat kalyulna: —¡Uskit uitah!

Jisas disainipil as kau tanit dalani talwadai kidika

20 Pita wiryaklawi talna, dangnit yakat disaipil as Jisas yaklauwi dalani talwadai kidika kaiwalikkat, masan dini kakasna mani yaihnit palni yakat sakkauna kalyulwi dakana dai kidika: “Dawan, ¿wais yaklauwi dutni yakat mahawarangyah?” 21 Pita talwi, Jisas yakat kalyulwi dakana: —Dawan, witing yakat laih, ¿ais kalkalahwarangyah? 22 Jisas yaklauwi nangnitlana: —Dukih yawi, witing laih ban karang, yang aiwaki kat, ¿man kidika ais kultamahn? Uskit uitah. 23 Kidika yulni, witingna kalwirah balna pasyakat yuyulna dai, kidika disaipil laih dauwas karang ki. Kaunah Jisas yulwas dai dauwas karang ki. Yulna kidika laih: “Dukih yawi, witing ban atnin yang aiwaki kat, ¿man kidika ais kultamahn?” 24 Sihm kidika disainipil kuduh, adika witnis yulwa kidika, dawak bik ulna kidika. Dawak amangladi rahm yulwa kidika. 25 Jisas di ūk manas yamna; manas palni ki, kaunah bitik uhulwarang kat, sau bitik sip laihwas karang uba mahni wauhtaya manah.