Tâura bîla nani ulbanka
1 Tasba na kau paskras kan ba ra, Bîla ba pat bâra kan. Bîla ba Gâd wal kan, bara witin sika Gâd kan ba. 2 Tâ pali ra, bamna Bîla ba Gâd wal kan. 3 Witin bâk Gâd mita diara sut paskan, witin âpu kira diara nani bâra ba, kumi sin paskras kata. 4 Witin ra raya kaia lâka ba bâra kan, bara naha rayaka na sika upla nani ingnika kan. 5 Naha ingnika na tihmu tara tilara ban ingwisa, bara tihmu tara ba mita sin sip daskras, ban ingwisa. 6 Waitna kum bâra kan nina ba Jan, witin ra Gâd mita blikan, 7 naha ingnika dukiara witnis aisaia, bara baha aisanka ra upla sut kasak lukbia. 8 Jan ba naha ingnika apia kan; sakuna Gâd mita witin ba blikan, naha ingnika dukiara aisaia. 9 Ingnika kasak pali upla sut ra ingwi ba, naha tasba ra aula sa. 10 Baha Bîla ba naha tasba ra kan; Gâd mita witinka bâk naha tasba na paskan, sakuna naha tasba ra iwi nani ba mita witin ra kaikras kan. 11 Balan ai tasbaya pali ra, sakuna ai uplika nani mita witin ba briras kan. 12 Sakuna ya nani witin ra brin bara kasak sin lukan nani ra, witin mita naha uplika nani ra Gâd luhpia takaia karnika ba yan. 13 Witin nani Gâd luhpia sa, diara nani paskanka ba wina lika apia, baku sin upla brinka bâk sin apia, sakuna Gâd mita ai karnika wal mangkan bamna. 14 Baha Bîla ba upla takan, bara yang nani tilira iwan. Bamna yang nani ai prana ba kaikri, baha prana Aisa Luhpia kumi baku Gâd wina brin ba. 15 Jan, witinka dukiara witnis aisi, naku win: “Naha sika baha witin dukiara yang aisi katna ba, naku aisi: witinka ninira aula ba lika, yang wal kau tara sa, kan yang âpu kapri ba ra, witin pat bâra kan.” 16 Yang nani sut witin ai yuyaka tara nani ba wina, yamnika sât sât nani bri banhri sa. 17 Gâd mita lâ ba Moses bâk yan kata; sakuna latwan lâka bara kasak tânka ba lika, Jisas Kraist bâk baman lika sip kata. 18 Upla kumi sin Gâd ba kaikras pali sa, sakuna ai Luhpia kumi baman, witin sika Gâd, Aisa lama pali kat wal asla iwi ba, witin mita sika Gâd tânka ba wan marikan.
Jan Tatahbra Jisas witniska aisisa
19 Ju nani Jerusalem wina, prîs bara Libait nani saki Jan ra blikan, makabi walaia, witin ba ya sapa. 20 Bara Jan lika, ai tânka yukukras param pali saki, win: —Yang lika Misaya apia. 21 Kli prîs bara Libait nani bui makabi walan: —Ban kaka, ¿man ba ya? ¿Man ba prapit Ilayas? Pana Jan win: —Yang baha apia sni. Witin nani kli kli makabi wali kan: —Bamna, ¿man ba baha prapit balaia kata ba ki? Bara Jan bui witin nani ra win: —Apia. 22 Kli aisi, win: —Ban kaka, ¿man ba ya? Yang nani ra ai blikan uplika nani ra bîla brih waia sna. ¿Bamna man pali dukiamra dîa wan wiaia sip sma ki? 23 Jan pana win: —Yang sika upla iwras tasbaya ra bîla baikra kum wini ba: “Dawan kainara yabal wapni kum dauks”, prapit Aiseya aisin ba baku. 24 Parisi nani mita Jan wal aisaia blikan uplika nani ba, 25 makabi walan: —Bamna man ba Misaya apia, Ilayas sin apia, bara baha prapitka ba sin apia, ¿baku kaka dîa kan upla nani ra tahbi daukisma? 26 Jan pana win: —Yang lika lî ni upla tahbi daukisna, sakuna man nani tilamra kum bâra sa, man nani bui witin ba kaikras sma, 27 bara witinka yang ninira aula ba. Yang bui witin sûska awa pan sin lanhkaia aitani apia sni. 28 Naha diara sut na Jordan awala lalmika tani ra takan, plis kumi nina Betania wi ba ra; bahara lika Jan upla nani tahbi dauki kan.
Jisas, Gâd Sîpka Luhpia ba
29 Yaprika wala, Jan kaikan Jisas witin ra aula kan, bamna upla nani ra naku win: “Kaiks man nani, naha waitnika aula na sika Gâd Sîpka Luhpia, naha tasba saurka bri saki ba. 30 Yang bui witin na dukiara sika aisi, naku wisatna ba: ‘Yang ninira upla kum aula ba sika, yang wal kau tara sa, kan witin lika yang âpu kapri wina ban bâra sa.’ 31 Yang sin, witin ba ya sapa kaikras katna, kuna upla nani ra lî ni tahbi dauki balri, Israel luhpia nani mita witin ba kakaira takbia dukiara.” 32 Bara Jan naha sin win: “Yang kaikri Spirit Holikira butku baku, kasbrika pura wina bal iwi witinka pura kat takaskan ba. 33 Baha kat sin yang lika witin ba ya sapa kau kaikras katna; sakuna witinka lî ni tahbi daukaia ai blikan ba mita ai wisata: ‘Ani waitnika purara Spirit Holikira ba bal iwi takaskan kaikma ba, baha mita sika Spirit Holikira ni tahbi dauki ba.’ 34 Pat yang mita kaikri, bara baha witniska sin aimakisna: witin sika Gâd Luhpia ba.”
Jisas disaipilka nani pas ba
35 Yaprika wala, kli Jan bâra kan ai nina blablikra wâl ba kira. 36 Jisas bal luya kan kaiki, Jan mita naku win: —Kaiks man nani, witin sika Gâd Sîpka Luhpia ba. 37 Jan nina blablikra wâl ba mita naha aisin walan ba ra, mahka Jisas nina blikan. 38 Bamna Jisas ai ninara tawi kaikan, baha nani ai nina bliki kan ba ra naku wisata: —¿Dîa pliki banhwisma ki? Witin nani bila: —Smasmalkra, ¿anira takaskisma ki? 39 Jisas pana win: —Man nani bal kaiks. Bamna witin nani wih kaikan, Jisas anira takaski kan pliska ba; bara baha yua kau tâka ba, witin nani ba Jisas wal takaskan, pat tutni 4 aklak kan bamna. 40 Jan aisin wali, waitna wâl taki Jisas nina blikan ba wina, kumi ba nina Andru mâki kata, witinka ba Saiman Pita muihnika kan. 41 Andru ai muihni Saiman pliki saki, naku win: —Yang nani Misaya ba sakri (baha tânka lika Kraist). 42 Ningkara Andru mita Saiman ba brih wan Jisas bâra kan ba kat, bamna Jisas kaiki, naku win: —Man ba Saiman, Jan luhpia, sakuna Cefas mai mâkan kabia (baha tânka ba: Pita).
Jisas bui Pilip bara Natanael wal ra paiwisa
43 Yu wala Jisas Galili tasbaya ra waia luki kan ba ra, witin Pilip wal prawan, bara witin ra naku win: —Nini blîks. 44 Pilip lika Betsaida tawanka wina kata, Andru bara Pita tawanka ba. 45 Bamna Pilip lika wan Natanael pliki, bara naku win: —Yang nani waitna kum kaikri, witinka dukiara Moses bara prapit nani mita ulban kan ba. Baha ba lika Jisas Nasaret wina, Josep luhpia ba. 46 Natanael bila: —¿Nasaret ba wina ban diara pain bal takbia ki? Pilip mita win: —Bal kaiki, tânkam bris. 47 Jisas kaikan Natanael ai lamara aula kan, bara witin dukiara naku win: —Kaiks Israel waitnika pali kum aula ba, witinka ra kunin âpu ba. 48 Natanael makabi walan: —¿Nahki ai kaikisma ki? Pana Jisas bila: —Pilip kau mai winras kan ba ra, yang pat mai kaikri kan, kwah damni dusa mununhtara katma ba ra. 49 Bamna Natanael bila: —Smasmalkra, man ba Gâd Luhpia bara Israel Kingka sma. 50 Jisas pana win: —¿Kasak ai lukisma, kwah damni dusa mununhtara kapram wisi mai wîri bamna? Sakuna naha nani wal kau diara tara nani man kaikma. 51 Bara Jisas naha sin win: —Kasak mai wisni, man nani kasbrika pura ba kwawan kaikma, bara Gâd insalka nani bal iwi uli kabia, Upla Luhpia Waitna purara.
Kena Galili ra marit liliaka kum daukan ba
1 Yu yumhpa aimakan ra, marit lâka kum bâra kan Kena, Galili tasbaya ra. Jisas yaptika bâra kan, 2 bara Jisas ai disaipilka nani wal sin marit pata ra paiwan kata. 3 Wain laya ba danh takan, bamna Jisas yaptika win: —Wain laya âpu, danh takan sa. 4 Jisas pana win: —Mairin, ¿dîa kan man bui yang ra baha ai wisma ki? Yang awarki ba kau balras sa. 5 Jisas yaptika bui wark dauki nani ra win: —Dîa dîa witin bui man nani ra mai wibia ba, dauki banhs. 6 Bahara lî watla walpa ni paskan 6 bâra kan, Ju nani klin takaia dukiara yus muni kan ba. Laya watla bani ba batil 50 , tila nani ba 70 alki kan. 7 Jisas wark tatakra nani ra naku win: —Naha laya watla nani na, lî laiki banhki dauks. Baku bamna, witin nani mita banhki daukan. 8 Ningkara Jisas bila win: —Nanara wirâ laiki saki, naha lilia paiwanka tâ uplika ba ra bri si yas. Witin nani baku daukan. 9 Bamna lilia dauki tâ uplika ba, lî wina wain daukan ba dih kaikan; baha ba ani wina takan sapa nu âpu kan, sakuna alba nani lî panhkan ba baman lika nu kan, kan witin nani sika laya ba panhkan kata. Baku bamna, tâ uplika ba mita marit waitnika ba ra winan, 10 bara naku win: —Upla nani sut ba, wain pain ba pas tâura uplika nani paiwan ra yui dakakisa, bara baha nani manis din bâra lika, wain karna apia ba dakakisa. Sakuna man lika, wain kau pain ba alki takaskram bara nanara kat sakisma. 11 Naha na lika, pas sain kata Jisas daukan ba Kena Galili ra; baha wal ai prana ba marikan, bara disaipil nani ba witin ra kasak luki banhwan. 12 Baha ningkara Jisas Kapernaum ra wan; ai yaptika, ai muihni nani bara ai disaipilka nani sin, witin yula kahbi wata. Bahara witin nani yu kulki takaski banhwan.
Jisas tempel klin sakisa
13 Insal luan Yua Liliaka Ju nani kulki ba pat baila kan bamna, Jisas Jerusalem tawanka ra wan. 14 Tempel watla bilara kaikan upla nani ba bîp nani, sîp nani bara butku nani sin atki kan. Lalah sins mamunra nani ba sin, ai iwaika ra iwi, upla nani lalahka sins muni kan. 15 Jisas baha kaikan ba ra kiwa lupia nani brin, bara wipaia kiwka kum paskan, bara tempel watla wina baha nani sut kangbi sakan, ai sîpka bara bîpka wainhka nani sut aikuki. Lalah sins muni uplika nani ra lalahka tasba ra yakaban, bara tibilka ba makupan. 16 Butku âiatkra nani ra win: —¡Baha nani ba sâks naha wina! ¡Yang Aisiki watla na, sim atkaia watla baku daukpara! 17 Baha kat disaipil nani ba Ulbanka ra aisi ba tânka bri banhwan: “Man wamtla na tâwan, yang kupi aiska ni lawri.” 18 Bamna Ju nani mita Jisas ra makabi walan: —¿Dîa sainka ni wan marikisma, man ba naha diara daukaia karnika brisma ba? 19 Jisas pana win: —Man nani naha tempelka na sauhki banhs, bara yu yumhpa bilka ra yang kli paskamna. 20 Ju nani mita win: —Mani 46 naha tempelka na paski tnata alkan, ¿bamna man lika sip kama ki yu yumhpa bilara paski tnata alkaia? 21 Sakuna tempel dukiara Jisas aisi kan ba lika, witin ai wîna pali dukiara aisi kata. 22 Jisas raiti wina buan piua, ai disaipil nani naha dukiara ai kupia krauki banhwan naha dukiara aisan ba, bamna Jisas bîla nani ra kasak lukan bara Ulbanka nani ra sin.
Jisas lika upla sut ra kakaira sa
23 Jisas Insal luan yua Liliaka tara piua ra Jerusalem ra kan; bara upla manis witin ra kasak lukan, sain aihka nani witin daukan ba kaiki. 24 Sakuna Jisas lika witin nani ra kasak lukras kata, kan witin sut ra kakaira kan bamna. 25 Baha mita Jisas ra sip upla kum mita wiaia âpu kan, witin pali mita pat kaiki kan upla kupia ra dîa bâra ba sut.
Jisas Nikudimus wal
1 Parisi waitna kum bâra kan, nina ba Nikudimus mâki kan; witin ba Ju nani tilara kulkanka tara bri kata. 2 Tihmia kan ba ra, Nikudimus ba Jisas kaikaia wan, bara naku win: —Smasmalkra, yang nani kaikisna wan smalkaia dukiara, Gâd mita man ba mai blikan sa; kan upla âpu sa sain aihka nani daukaia, man daukisma ba baku, Gâd ba witin wal apia sa kaka. 3 Jisas pana win: —Kasak pali mai wisna, ya kli aisubi takras sa kaka, witin sip Gâd king aimaki ba lâka kaikbia apia. 4 Nikudimus pana makabi walan: —¿Sakuna nahki upla kum pat tara pâwan ba, sip kabia kli aisubi takaia? ¿Sip kabia ki ai yaptika biara ra aimaki kli aisubi takaia? 5 Jisas mita pana win: —Kasak pali mai wisna, ani uplika lî ni bara Spirit wina aisubi takras kaka, witin sip Gâd kingka tasbaya ra dimbia apia. 6 Upla wina aisubi takan ba, wan wîna sika; sakuna Spirit wina aisubi takan ba, spirit sika. 7 Aihka lukpara mai wisna ba dukiara: ‘Upla sut ba kli aisubi takaia sa.’ 8 Pâsa ba krawisa, witin ani tani wina krawan dauki ba ra; ai binka ba walisma, sakuna kaikras sma ani tani wina aula sapa bara ani tani ra auya sapa. Baku sa ani uplika Spirit wina aisubi taki ba. 9 Bamna Nikudimus kli makabi walan: —¿Naha na nahki baku takbia ki? 10 Jisas pana win: —Man ba sika, Israel smasmalkra tara kum sma, ¿bara naha diara nani na tânka sip briras sma ki? 11 Kasak mai wisna, dîa yang nani kaikisna ba baha aisisna, bara dîa yang nani kaikri ba, witniska nani aimakisna; sakuna dîa yang nani mai wisna ba, man nani sip kasak lukras sma. 12 Naha tasba dukia nani tânka mai wîri, man nani sip kasak lukras sma ba, ¿nahki kasak luki banhma, kasbrika purara dukia nani ba mai wimna kaka? 13 “Upla kumi sin kau kasbrika purara uli waras, sakuna witinka kasbrika purara ba wina bal iwan ba lika, baha sika Upla Luhpia Waitna ba. 14 Bara baku sin, Moses upla iwras tasbaya ra piuta purara bukan kata baku, Upla Luhpia Waitna ba sin purara bukan kabia. 15 Bamna witin ra kasak lukbia ba sut, raya ban kaia lâka ba bri kabia.
Gâd tasba ra latwan kaikan
16 “Bamna Gâd tasba ra uya latwan kaikan, bara witin mita ai Luhpia kumi baman bri kan ba yan; bara baku mika ani uplika witin ra kasak lukbia ba, sut pali tanis tiwbia apia, sakuna raya ban kaia lâka ba bribia. 17 Gâd mita ai Luhpia naha tasba ra blikras kan, upla nani na pât ra lakaia, sakuna witin mita swaki sakaia. 18 “Ani uplika Gâd Luhpia ra kasak luki ba, pât ra lakan kabia apia, sakuna ya kasak lukras ba, witin lika Gâd Luhpia kumi baman ba ra kasak lukras bamna, pât ra lakan kabia. 19 Kasak lukras nani ba pat pât ra lakan sa; kan ingnika naha tasba ra balan ba ra, witin nani tihmia ba ra kau brin daukan, ingni ra lika baku apia, kan diara saura nani baman daukisa. 20 Saura dauki uplika nani ba sut ingni ra misbara kaikisa, bara ingni lamara sin balras, witin nani saura dauki ba param sâkbia sîa. 21 Sakuna baha nani kasakka lâka dauki ba, witin nani lika sut ingni lamara aula, baku mika kaikbia dîa witin nani dauki ba tilara, Gâd kupia lâka sin bâra ba.
Jan Tatahbra kli Jisas dukiara aisisa
22 Naha ningkara, Jisas ai disaipilka nani aikuki Judia tasbaya ra wan, bara witin baha nani wal piua kulki takaski, upla tahbi dauki kan. 23 Jan Tatahbra sin tahbi dauki kan Enón ra, Salim lamara, kan bahara lî manis bâra kan. Bamna upla nani Jan ra balan, bara tahbi dauki kan. 24 Naha diara na takan, Jan Tatahbra kau silak ra mangkras kan piua ra. 25 Bamna Jan nina blablikra kum kum, Ju kum wal blahwi kan wîna klin takaia ba tânka dukiara. 26 Bamna baha nani Jan ra wih maisa pakan: —Smasmalkra, kaiks baha uplika man wal kata ba, Jordan lalmika ra, witinka dukiara man wan wisatma ba, nanara upla tahbi daukisa bara manis sin ai nina blikisa. 27 Bamna Jan bila: —Upla sip diara kumi sin briras, Gâd mita yaras sa kaka. 28 Man nani pali param walram yang wîri: ‘Yang lika Kraist apia sni’, sakuna witin kainara ai blikan sa. 29 Marit lâka kum ra, marit taki mairka ba sika marit waitna maya mairin; bara marit taki waitnika pânika bâra ba, witin aisanka nani wali bara lilia manis takisa. 30 Witin ba kau tara takaia sa, sakuna yang lika kau mâyara tawaia sni.
Witinka pura wina aula ba
31 Witinka pura wina aula ba lika, diara sut purkara sa. Witinka tasba wina ba lika tasba dukia sa, bara tasba dukiara baman aisisa. Sakuna kasbrika pura wina aula ba lika, diara sut purara sa, 32 bara witin aisisa diara kaikan bara walan ba sin; kuna witin aisi ba ra upla kumi sin kasak lukras sa. 33 Sakuna ani uplika kasak lukisa kaka, witin param marikisa Gâd bui dîa aisi ba kasak pali sa; 34 bamna Gâd mita blikan uplika ba, Gâd bîla nani ba aisisa, kan Gâd mita ai Spiritka ba piua bani yabisa. 35 Aisa ba ai Luhpia ra latwan kaikisa, bara witin mihta ra diara sut mangkan sa. 36 Ya Gâd Luhpia ra kasak luki ba, raya ban kaia lâka ba brisa; sakuna ya Gâd Luhpia ra kasak lukaia apia wi ba, sip baha rayaka ba bribia apia, sakuna Gâd klalka saura pali ba bribia.
Jisas Sameria mairka ba wal
1 Parisi nani walan nahki Jisas kau nina blablikra nani ailal bri kan, Jan ba wal, bara kau upla manis sin tahbi dauki kan ba, 2 (sakuna Jisas pali mita tahbi daukras, ai disaipilka nani mita lika.) 3 Jisas naha walan ba ra, Judia wina takan kli Galili ra waia. 4 Ai impakanka ra, witin Sameria tawanka bâk luaia kan. 5 Bamna witin Sameria tawanka kumi ra balan, nina ba Sicar; baha ba lika Jekob mita ai luhpia Josep ra tasba kum yabata ba wal baila kan. 6 Bahara sika Jekob layawanhta mâki banhwi kan ba bâra kan. Jisas yabal wihka pali wapan ba mita swapan kan bamna, layawanhta ba lamara iwan; baha piua ba lika pat yu wan lal kat baila kan. 7-8 Disaipil nani ba lika, plun wiria atki piaia dukiara tawan ra wan kan. Baha sim awarka ra, Sameria wina mairin kum balan lî panhkaia, bamna Jisas bui win: —Lî wirâ aik diaia. 9 Sakuna Ju nani ba Sameria uplika nani wal diara briras bamna, mairka ba naku Jisas ra win: —Man ba Ju uplika kum sma, ¿bara nahki man bui yang ra lî diaia makabisma, kan yang na Sameria wina mairka sna na? 10 Bara Jisas pana win: —Gâd diara yabi ba kaikram kata, bara ya sin man ra lî makabi ba, kasak pali mai wisna man bui witin ra lî makabaia kapram; bara witin mita lî rayakira ba maikbia. 11 Mairin ba bila: —Mâsa, dîa ni lî panhkaia kat sin âpu sma ba, bara liwanhta na sin pakni pali sa. ¿Bamna ani wina lî diaia aikma ki? 12 Yang nani damiki Jekob naha liwanhta na wankan; witin pali sin naha wina din, ai luhpia nani bara ai daiwra nani sin. ¿Bamna dîa man kau tara sma ki witin ba wal? 13 Jisas pana win: —Ani uplika nani naha laya wina di ba, sut kli din daukbia; 14 sakuna yaura yang mita lî yarka dibia ba, kli din daukbia apia. Kan yang lî diaia yamna ba, witin wina lî aubi kabia raya ban kaia ra. 15 Pana mairin ba bila win: —Mâsa, baha laya ba aik dimna bara kli diran ai daukbia apia ba mata, bara naha liwanhtika ra kli bal lî panhkamna apia. 16 Jisas mita win: —Man wih mayam wini brih, nahara kli bal. 17 Mairin ba pana win: —Yang mayi âpu. Bamna Jisas mita win: —Man aitani aisaram, mayam âpu; 18 kan man pat waitna matsip brih swiram, bara nanara brisma ba sin, man mayam apia sa. Naha man kasak aisaram. 19 Naha walan ba ra, mairin ba bila: —Mâsa, yang kaikisni man na prapit kum sma. 20 Wan damika nani Sameria wina kan ba, naha ilka ra Gâd ra ai pura suni mayuni kan; sakuna man nani Ju nani bila, Jerusalem ra baman Gâd ra wan pura suni mayunaia sa. 21 Jisas pana win: —Mairin, yang ra pain ai wals, piua ba aula bara man nani Aisa ra puram suni mayuni kama naha ilka ra balras kira, baku sin Jerusalem ra waras kira. 22 Man nani Sameria uplika nani ba, yaura puram suni mayunisma sapa sin kaikras; sakuna yang nani lika kaikisna, yaura puri suni mayunisna ba, swaki sakan lâka ba Ju nani wina aula bamna. 23 Piua ba aula, bara baha ba nanara pali sika, bara Aisa ra ai pura suni mayuni banhwi ba lika, ai pura suni mayunbia kasak tânka ra bara Spirit ra sin. Aisa ba baku brin daukisa, witin ra ai pura suni mayuni banhwi ba baku daukbia. 24 Gâd ba Spirit sika, bamna witin ra ai pura suni mayuni banhwi ba baku daukbia, kasak tânka ra bara Spirit ra sin. 25 Mairin ba mita pana win: —Yang kaikisna Misaya ba balbia (baha wiaia ba, Kraist); bara witin balbia ba ra, diara sut tânka ba param wan wibia. 26 Jisas mita win: —Baha ba yang sika, man wal aisisna ba. 27 Baha pali piua ra disaipil nani ba aidrubi balan, bara witin nani sut aihka luki kan, Jisas mairin kum wal man aisi kan bamna. Sakuna witin nani kumi sin karnika âpu kan makabi walaia dîa want sapa, bara Jisas ra sin makabi walras kan, dîa muni mairin ba wal man aisi kan sapa. 28 Bamna mairin ba ai laya watla ba swi si tawan ra wan, bara upla nani ra win: 29 —Man nani bal kaiks, nahki waitna kum yang dîa daukri ba sut ai win. ¿Naha apia ki Kraist ba? 30 Bamna witin nani tawan ba wina taki, Jisas ra aidrubi balan. 31 Kau aidrubi balras kan ba ra, disaipil nani Jisas ra win: —Smasmalkra, plun wiria pan pis. 32 Sakuna witin mita win: —Yang piaia dukia brisna, baha man nani kaikras sma ba. 33 Bamna disaipil nani ba pana pana tawi makabi wali kan: —¿Upla kum mita witin ra plun piaia sal yan ki? 34 Sakuna Jisas mita win: —Yang pati sika witinka ai blikan ba kupia lâka daukaia, bara ai warkka sin sut pali daukaia. 35 Man nani wisma: ‘Kau kati walhwal ba ra insla mâ nani krikaia piua kabia’; sakuna yang mai wisni: Namkra nani buki insla nani ba ra kaiks, mâ ba pat pihwan sa, mahka krikaia piua sika. 36 Insla mâ kriki uplika ba ai mana brisa, bamna insla mâ wahbisa raya ban kaia ba briaia, bara baku lika mâ mangki ba bara mâ kriki ba wâlsut lilia kabia. 37 Bamna kasak pali sika, sturi aisanka kum naku win ba: ‘Upla kum mâ mangkisa bara upla wala sika mâ kriki ba.’ 38 Yang bui man nani ba mai blikri anira mâ mangkras sma ba wina mâ krikaia, upla wala wark takan ba wina yamnika briaia. 39 Sameria uplika nani baha tawanka ra iwi banhwi kan ba tila, manis Jisas ra kasak lukan, dîa baha mairin aisin natka wina: “Dîa daukri ba sut, witin bui yang ra ai win.” 40 Baku bamna, Sameria uplika nani bal Jisas ra makaban, witin nani wal takaskbia; bamna witin baha nani wal yu wâl takaskan, 41 bara kau upla manis kasak lukan, Jisas pali aisin walan ba mita. 42 Bamna Sameria uplika nani mita mairin ba ra win: —Nanara yang nani kasak lukisni, man wan wiram ba baman apia, kuna yang nani pali mita witin wina walri bamna; bara yang nani sin tânka brisna, witin ba kasak sa tasba aiska Swaki Sasakrika sa.
Jisas king wihtka tara luhpia kum rakisa
43 Yu wâl ningkara, Jisas Sameria wina taki mahka impakan Galili kuntrika ra. 44 Kan Jisas pali mita wisata, prapit kum ai tasbaya ra yamni kulkras sa. 45 Galili ra wan ba ra, baha uplika nani mita witin ra pain brin, kan baha uplika nani ba Insal luan yua Liliaka ra Jerusalem ra wan, bara Jisas bahara dîa daukan ba kaiki banhwan kan bamna. 46 Bara Jisas Galili wina kli Kena ra wan, bahara sika witin mita lî wina wain daukata ba. Bahara wihta tara kum bâra kan, witin ai luhpia waitna Kapernaum ra siknis pali bri kata. 47 Naha wihtka tara na walan, Jisas kli Judia wina Galili ra balan, witin wih Jisas ra makaban, ai watla ra wih ai luhpia waitna sikniska ba wina rakbia, pat pruaia man sa bamna. 48 Jisas pana wisata: —Man nani sip kasak lukras sma, wark aihka nani ba kaikras kaka. 49 Sakuna wihtka tara ba bila: —Dawan, aihni bal kau luhpi pruras ba ra. 50 Jisas mita naku wisata: —Wamtla ra kli tawi was; man luhpiam ba raya sa. Waitnika ba Jisas bîla kat kasak lukan. 51 Bamna witin ai watla ra auya kan ba ra, ai albika nani witin ba prawaia taki wih, naku win: —¡Man luhpiam waitna ba raya sa! 52 Bamna wihtka ba ai albika nani ra makabi walan, ai luhpia waitna ba dîa piua wina mahka yamni takan sapa. Alba nani ba bila: —Nahwala tutni wan aklak wina ai rihka ba swin. 53 Baku bamna, aisika ba ai kupia kraukan, baha pali piua ra kata Jisas witin ra wisata ba: “Man luhpiam ba raya sa”; bara witin ai watla uplika sut aikuki Jisas ra kasak lukan. 54 Naha ba, aima wâl sika Jisas mita sain aihka daukan ba, witin Judia wina Galili ra balan piua ra.
Jisas bui Betzatá wina waitnika kum rakisa
1 Naha ningkara, Ju nani lilia piua tara kum bri kan, bamna Jisas kli Jerusalem ra tawi balan. 2 Jerusalem pliska ra, Sîp nani Durka wi ba lamara, lî madakura kumi bâra sa, Hibru bîla ra Betzatá mâki ba, bahara dur matsip nani bâra sa. 3 Bahara upla sikniskira ailal tasba ra aitniki kan: kaikras nani, skahwa nani, bara wîna tara lâwi pruan nani sin. Bara witin nani sut lika lî aiawanka ba bîla kaiki banhwi kata. 4 Kan insal kumi ai piua kat baha lî madakura ra bal iwi munan aiawi kan, bara ani uplika pas lî aiawanka ba ningkara dimuya kaka, dîa dîa sât sikniska bri kan ba sut wina rawi kan. 5 Bahara waitnika kum kan pat mani 38 siknis kata. 6 Jisas naha waitnika aitniki kan ba kaikan ba ra, pat sin kaikan nahki piua wihka baku ba, bamna makabi walan: —¿Man sikniskam ba wina rawan mai daukisa ki? 7 Sikniskira waitna ba pana win: —Dawan, yang ra hilp ai munaia uplika briras sna, lî klahbi ba piua ra, lî madakura ra ai alki ai dingkaia; ani piua yang dimwaisna ba ra, kainira upla wala pat dimisa. 8 Jisas mita win: —Man bus, krikrikam ba twilki was. 9 Baha sim piua ra, waitnika ba ai sikniska wina rawan, bara ai yapaika wahbi brih, mahka wapan. Sakuna baha piua ba lika ris yua kan bamna, 10 Ju nani mita ai sikniska wina rawan waitnika ba ra win: —Naiwa na ris yua sa; bamna lâ apia sa krikrikam ba twilkaia. 11 Waitnika ba mita pana baha nani ra win: —Ai rakan waitnika ba mita ai win: ‘Krikrikam ba buki brih, mahka was.’ 12 Bara witin nani mita makabi walan: —¿Ya pali baku mai win: ‘Krikrikam ba twilki brih was’? 13 Sakuna waitnika ba kaikras kata ya mita rakan sapa, kan bahara upla uya ailal kan, bara Jisas sin pat taki wan kan. 14 Ningkara Jisas baha waitnika wal prawan tempel ra, bara win: —Kaiks, nanara man sikniskam ba wina rawram sa, kuna kli saura yapara, diara kau saura mai takbiara sîa. 15 Waitnika ba mahka wan, bara Ju nani sut ra maisa pakan, baha ba Jisas kata witin ra rakan ba. 16 Baha mita Ju nani ba Jisas ra ai waihla saki ikaia want kata, kan naha diara nani na ris yua ra dauki kan bamna. 17 Sakuna Jisas witin nani ra win: —Yang Aisiki piu sut wark takan, bara yang sin wark takisna. 18 Naha tâwan, Ju nani Jisas ra mahka ikaia want kan, baha lika ris yua kulkaia lâka baman sauhkras, sakuna witin ai wîna ba Gâd wal baku dauki kan, bara Gâd ba ai Aisika pali sa win bamna.
Gâd Luhpia karnika ba
19 Bamna Jisas bila baha nani ra win: “Yang kasak pali man nani ra wisna, Gâd Luhpia ba witin yakan diara daukras sa, sakuna Aisa dîa daukan kaikan ba sika, witin daukisa. Diara sut Aisa mita dauki ba, Luhpia sin daukisa. 20 Aisa ba ai Luhpia ra latwan kaikisa bamna, dîa witin dauki ba sut marikisa. Bamna witin ra kau diara tara sin marikbia, bara baku mika tâ iwan pali taki banhma. 21 Bamna Aisa mita pruan nani ba buki kli rayaka yabi ba baku, Luhpia mita sin witin yaura raya kaia lâka yan dauki ba yabisa. 22 Aisa mita upla kumi sin lâka aisi daukras sa, sakuna lâ aisi daukaia karnika aiska ba, ai Luhpia ra yan sa. 23 Baku mika, upla sut mita Aisa ra mayunra yabi ba baku, Luhpia ra sin mayunbia. Ya luhpia ra mayunras ba, Aisa ra sin mayunras sa, witinka bui sika ai Luhpia blikan ba. 24 “Kasak pali mai wisna: Yang aisisna ba ra ya aman walisa, ai blikan ba ra sin kasak lukisa kaka, witin raya ban kaia lâka ba brisa, pât ra sin lulkan kabia apia; kuna pruan wina taki pat raya kaia ra luan sa. 25 Kasak pali mai wisna, piua ba aula, bara baha ba lika nanara pali, pruan nani ba Gâd Luhpia Waitna bîla baikra walbia, bara baha nani bîla wali banhbia ba sut raya takbia. 26 Kan Aisa ba yakan raya ban kaia lâka ba brisa; baku sin witin ai Luhpia ra yan, witin yakan raya ban kaia lâka sin briaia; 27 bara lâ aisi daukaia karnika sin yan, kan witin sika upla takan ba. 28 Naha dukiara man nani aihka lukpara, kan piua ba aimakbia, bara pruan nani sut bîla baikra wali, 29 raiti wina buan kabia. Yamni daukan nani ba buan kabia raya kaia lâka ba briaia; sakuna saura daukan nani ba lika buan kabia, pât tara ra lulkan kabia dukiara.
Jisas karnika bri ba tânka kaikan
30 “Yang yakan diara sip daukras. Aisa mita aikan ba kat daukisna, bamna kasakka lâka kat lâ daukisni; yang brinki ba kat daukaia lika plikras, sakuna Aisa ai blikan ba brinka kat mika. 31 Yang yakan dukira witnis aimakisna kaka, aisisna ba dukiara raitki ba âpu sa. 32 Sakuna wala kumi bâra sa yang witniski; bamna pain kaikisni witin, yang dukira kasak aisi ba tânka bâra sa. 33 Man nani mita Jan ra makabi walaia upla blikram, bamna witin dîa aisin ba lika kasak pali sa. 34 Sakuna yang, upla kum witnis aisinka ra sin tniwaia apia sna; naha aisisni man nani swaki mai sakan kabia dukiara. 35 Jan lika lamp kumi baku klauhi ai ingnika saki kata, bara man nani mita wilin banhwi katma piua prahni kum ai ingnika ra lilia kaia. 36 Sakuna yang witniski kum brisna, Jan ba wal kau tara sa. Diara nani daukisna ba, baha daukamna wisi Aisa mita mihti ra mangkan bamna, param mamrikisa yang na, Aisa mita ai blikan sa. 37 Aisa ai blikan ba mita sin, yang dukira witniski aisisa; aima kumi sin man nani mita ai bîla baikra walras bara namkra ni sin kaikras. 38 Ai smalkanka bîla ba sin man nani kupiam ra dimras, kan Aisa mita blikan ba ra kasak luki banhkras sma. 39 Man nani naha Ulbanka nani na, aman kaiki tânka laki kaikma kaka, baha ba wina raya ban kaia ba briaia lukma; ban sakuna, Ulbanka nani na sika, yang dukira aisisa, 40 sakuna man nani lika yang ra balaia want apia sma, baha rayaka ba briaia. 41 “Upla wina mayunra ba plikras sni. 42 Baha purkara, yang lika man nani tânkam ba pain kaikisna, man nani bui Gâd ra latwan kaikras sma ba. 43 Yang na Aisa mita ai blikan, man nani ai briras sma; sakuna upla kum yakan ai karnika ra balbia kaka lika man nani brima. 44 ¿Nahki man nani kasak lukma, kan man nani ba kumi mita wala ra tawi pana pana mayunra ba brisma, bara Gâd kumi baman ba wina mayunra aula ba lika pliki banhras sma? 45 Man nani lukpara yang mita Aisa ra damhra kwahkamna; damhra kwahki uplika ba lika Moses sika, naika diara briaia dukiara witinka ra man nani lukankam mangkram ba. 46 Bamna man nani lika Moses dîa aisin ba ra kasak lukras kapram, yang ra sin kasak ai luki banhwaia apia kapram, kan Moses mita yang dukira ulban sa. 47 Moses ulban ba ra kasak lukras sma kaka, ¿nahki kasak lukma yang dîa aisisna ba ra?”
Jisas bui upla 5,000 plun dakakan ba
1 Naha ningkara Jisas Galili lakunka baila wala ra wan, baha sika sim Tiberias lakunka ba. 2 Upla ailal ai nina bliki kan, sain aihka nani daukan kaikan ba mita, siknis bri uplika nani ra sin raki kan kaikan bamna. 3 Bamna Jisas il kum purara uli wih, ai disaipilka nani aikuki iwan. 4 Insal luan Yua Liliaka Ju nani dauki ba sin pat baila kata. 5 Jisas ai nakra buki kaikan, upla ailal pali ai nina bliki aula kan, bamna Pilip ra win: —¿Ani wina yawan plun atkbia naha uplika nani na dakakaia? 6 Pilip ba dîa aisabia sapa kaikaia wisi, Jisas baku wisata, kan witin pain nu kan dîa daukaia ba. 7 Bamna Pilip pana win: —Lalah mâ handat wâl brit plun atkbia sin, naha uplika sut na baha wina wiria pan sin pibia apia. 8 Bamna disaipil wala kumi nina Andru, Saiman Pita muihnika ba bila: 9 —Nahara lika tuktan waitna lupia kum, barli mâ britka matsip brisa bara inska sin wâl; sakuna, ¿baha ba dîa sa ki naha upla ailal na mapara? 10 Bamna Jisas bila: —Witin nani ra wis sut iwbia. Baha pliska ra twi manis pâwi kan, bara upla 5 , 000 ba iwan. 11 Bara Jisas brit nani ba ai mihta ra brih, Gâd ra tingki wih, bara upla nani iwi kan ba tilara yuan. Inska wâl ba ni sin baku daukan, sut want kan ba praiska kat. 12 Sut pih ai biara banhki daukan ba ningkara, Jisas ai disaipilka nani ra win: —Yuya nani kau takaskan ba wahbi bris, wiria sin tiwan kaia apia ba mata. 13 Wahbi banhwan ba ra, upla nani barli mâ britka matsip pin yuyaka nani ba 12 baskit wahban kata. 14 Bamna upla nani ba Jisas naha sainka aihka pali daukan kaiki, naku win: —Kasak pali, naha sika prapit tasba ra balaia kan ba. 15 Sakuna Jisas kaikan baha uplika nani mita witin ba priski bri si king mangkaia kan bamna, witin yakan mahka taki wan, il ba purara.
Jisas lî purara wapisa
16 Pat tihmia iwan kan ba ra, Jisas disaipilka nani ba lakun ra iwi wan, 17 bara duri tara kum ra aimaki mahka lakun baila wala ra lui Kapernaum ra auya kan. Pat sin tihmu kan, kuna Jisas lika kau balras kan. 18 Baku bamna, mahka pâsa karna kum krawan, bara rip nani sin tara buki kan. 19 Disaipilka nani ba pat 3 , apia kaka 4 mail praiska lakun un ba wina tihu ra takan kan ba ra, witin nani kaikan Jisas duri tara ba lamara aula kan, lî pura bâk wapi; bara witin nani sibrin taki banhwan. 20 Sakuna Jisas mita win: —¡Yang sna, man nani si bripara! 21 Bamna witin nani wilin pali, Jisas ba duri ra brin, bara witin nani waia kan pliska ra pat pali wan.
Upla nani mita Jisas plikisa
22 Yu wala, upla nani lakun baila wala ra takaskan ba kaikan, disaipil nani brih wan dwarka ba baman bahara kan, bara Jisas lika baha nani wal waras kata. 23 Ban sakuna, Tiberias wina duri tara wala nani sin balan, Dawan ra tingki win ningkara, witin nani brit pin ba pliska lamara. 24 Baku bamna, upla nani ba kaikan Jisas ai disaipilka nani ba wal bahara âpu kata, bamna witin nani baha dwarka tara nani ba ra aimaki Kapernaum ra wan, Jisas ra pliki.
Jisas ba raya kaia britka
25 Witin nani lakun baila wala ra lui wan ba ra, Jisas wal prawan. Bara witin ra makabi walan: —Smasmalkra, ¿ahkia man nahara balram ki? 26 Jisas pana win: —Kasak pali mai wisna, man nani ai plikisma biamra banhkram ba mita bamna, sain aihka nani tânka briram ba mita lika apia. 27 Wark taki banhpara, baha pata isti aisawi ba dukiara; sakuna wark taki banhs, ban kaia ra pata ba dukiara, rayaka ban kaia lâka yabi ba dukiara sin. Naha pata ba sika Upla Luhpia Waitna bui maikbia, kan Gâd Aisa mita witin ra bâk sakan sa. 28 Bara uplika nani makabi walan: —¿Yang nani dîa daukaia sna ki, Gâd yamni kaiki warkka ba alki brih daukaia? 29 Jisas pana aisi wisata: —Gâd want sa man nani daukma, witin mita blikan uplika ba ra kasak lukma. 30 Bamna baha uplika kli makabi walan: —¿Dîa sainka sip sma ki wan marikaia, bara yang nani baha kaiki, man ra kasak luki banhwamna? ¿Dîa warkka daukisma ki? 31 Wan damika nani upla iwras tasbaya ra manâ ba pin, Ulbanka ra wi ba baku: ‘Gâd mita kasbrika purara ba wina baha britka ba yan pi banhwan.’ 32 Jisas pana win: —Kasak pali mai wisni: Moses apia sika baha britka kasbrika purara ba wina yan ba, sakuna yang Aisiki sika brit kasakkira kasbrika purara ba wina yabi ba. 33 Kan Gâd mita yabi britka lika, kasbrika pura ba wina naha tasba ra bal iwan, tasba ra iwi uplika nani ra rayaka yabaia. 34 Bamna upla nani ba bila: —Dawan, piua bani baha britka ba wanki bas. 35 Bara Jisas pana win: —Yang sika raya kaia yabi britka ba. Ya yang ra aula ba kli plun daukbia apia; bara yang ra kasak luki ba, kli sin diran daukbia apia. 36 Kuna pat mai wîri ba baku, man nani ai kaikram, sakuna man nani kasak lukras sma. 37 Diara sut Aisa aiki ba, yang ra aula; baha nani yang ra aula ba, yang sip kangbi sakamna apia pali. 38 Yang kupi lâka kat daukaia wisi kasbrika pura ba wina balras, sakuna witinka ai blikan ba kupia lâka daukaia mika. 39 Naha sika Aisiki ai blikan ba kupia lâka; witin aikan nani ba wina kumi sin tikamna apia, bamna yang tnata piua ra pruan wina kli bukamna. 40 Naha sika witinka ai blikan kupia lâka ba: Upla sut mita Gâd Luhpia ra kaiki kasak lukbia, bara baku mika raya ban kaia ba bribia; bara tnata piua ra, yang mita pruan wina kli bukamna. 41 Naha aisin ba wali, Ju nani Jisas mapara rangbi aisin banhwan, witin naku aisin bamna: “Yang sika kasbrika purara ba britka sna naha tasba ra bal iwri ba.” 42 Bara witin nani bila: —¿Naha na Jisas apia ki, Josep luhpia ba? Yawan nani witin aisika bara yaptika wal kakaira sa. ¿Bamna nahki witin kasbrika purara ba wina bal iwan wisa? 43 Bamna Jisas pana win: —Man nani rangbi aisaia lâka ba swis. 44 Upla kumi sin yakan yang ra balras, Aisiki ai blikan ba mita brih balbia lika; bara yang tnata piua ra pruan wina bukamna. 45 Prapit nani wauhkataya ra naku wisa: ‘Gâd mita upla sut ra smalkbia.’ Baku bamna, Aisa ra wali uplika nani ba, witin ba wina lan taki yang ra aula. 46 “Upla kumi sin Aisa ba kaikras, sakuna witinka Gâd blikan ba lika. 47 Yang kasak pali mai wisni, ya yang ra kasak luki ba, raya ban kaia lâka ba brisa. 48 Yang sika raya ban kaia yabi britka ba. 49 Man nani damikam nani lika upla iwras tasbaya ra manâ ba pin, sakuna sut pruan. 50 Sakuna yang aisisna na lika kasbrika purara ba wina bal iwi britka ba dukiara, bamna ani uplika baha pibia ba, prubia apia. 51 Bara yang pali na sika, baha rayaka britka kasbrika purara ba wina bal iwan ba; ya naha britka na pibia kaka, ban kaia ra raya kabia. Baha britka yang mita yabamna ba lika, yang pali wîni tara ba sika. Yang baha yabamna, upla nani sut raya kabia ba dukiara. 52 Bamna Ju nani ba mahka pana pana aisi blahwi, naku aisan: —¿Nahki naha waitna ai wîna pali ba piaia wankbia? 53 Jisas pana win: —Kasak, kasak pali mai wisna, man nani Upla Luhpia Waitna wîna tara na piras bara tâlia sin diras sma kaka, raya ban kaia ba briras sma. 54 Ya yang wîni tara pîsa bara tâilia sin dîsa kaka, raya ban kaia ba brisa, bamna yang mita tnata piua ra pruan wina bukamna. 55 Kan yang wîni tara ba lika plun aihwa sa, bara tâilia ba lika diaia laya aihwa sa. 56 Ya yang wîni tara ba pîsa bara tâilia sin dîsa kaka, witin ba yang wal asla iwisa, bara yang sin witin wal asla sna. 57 Aisa rayakira ba mita ai blikan, bamna yang na witin ba mita raya sni. Baku sin ya yang wina plun pi ba, yang wina raya kabia. 58 Kasbrika purara ba wina bal iwan britka ba dukiara aisisni. Naha britka na damikam nani pali pin ba sâtka apia sa, kan sut prui tiwan. Ani uplika naha britka pibia ba, ban kaia ra raya kabia. 59 Jisas naha diara nani na smalkan, Kapernaum Ju nani priaska watla ra asla aidruban kan ba piua ra.
Raya ban kaia bîla nani
60 Naha smalkanka walan ba ra, Jisas nina blikan kan ba wina ailal naku win: —Naha aisi na uya karna sa alki briaia; ¿ya sip kabia naha bîla na walaia? 61 Bamna Jisas kaikan naha dukiara ai disaipilka nani ba rangbi aisi kan, bamna makabi walan: —¿Naha na minam batakisa ki? 62 ¿Ban kaka, dîa takbia ni, Upla Luhpia Waitna kli uli auna kaka man nani ai kaikma ba ra? 63 Spirit ba sika raya kaia yabi ba; wan wîna tara ba lika bahki pali sa. Bara diara nani yang mai wîri ba lika kasak pali spirit tânka nani sa, bara raya kaia sin yabisa. 64 Sakuna man nani tilamra upla tila nani kau kasak lukras sa. Kan tâ pali wina Jisas lika kaikan, ani uplika nani ba kasak lukras kan, bara ya mita ai waihla nani mihta ra mangkbia ba sin. 65 Bamna Jisas bila: —Baha mita sika yang bui man nani ra mai wîri, upla kumi sin yang ra balbia apia, Aisa mita brih balras sa kaka. 66 Baha piua wina, upla manis Jisas nina bliki kan ba mahka swin, bara kli sin witin wal taukras kata. 67 Bamna Jisas mita disaipil 12 ba ra makabi walan: —¿Man nani sin mahka waia want sma ki? 68 Sakuna Saiman Pita mita pana win: —Dawan, ¿yaura yang nani wamna ki? Man bîlam nani ba lika raya ban kaia bîla nani sa. 69 Yang nani pat kasak lukri bara sin kaiki banhwisna, man ba Holikira, Gâd wina sma. 70 Jisas pana win: —Man nani 12 sma ba, ¿yang bâk saki mai briri apia? Ban sakuna, man nani wina kumi ba dibil kum sa. 71 Jisas naha aisin na lika, witin aisi kan Judas Iskariot ba dukiara; witinka Saiman luhpia waitna ba. Kan Judas mita sika Jisas ba waihla mihta ra mangkaia kan, witin ba disaipil 12 ba wina kumi kan sakuna.
Jisas muihnika nani witin ra kasak lukras kan ba
1 Naha diara na ningkara, Jisas Galili tasbaya ra impaki tauki kan; witin Judia ra takaskan daukras kata, kan bahara Ju nani witin ra ikaia want kan bamna. 2 Utla Papakni liliaka piua ba pat baila kan, bara baha ba lika Ju nani mapa ra lilia piua tara kum kata. 3 Bamna Jisas muihnika nani witin ra win: —Man nahara takaskpara; mahka Judia ra was, bara baku mika ninam blablikra nani bahara banhwi ba mita naha diara nani daukisma na kaiki banhbia. 4 Upla kumi upla wala nani mita witin ra kakaira kaia want sa kaka, witin sip yukuwan ra diara daukras. Man nahmuna dukia nani daukisma na, tasba aiska mawanra dauks. 5 Kan Jisas muihnika nani pali mita sin, witin ra kasak lukras kata. 6 Bamna Jisas witin nani ra win: —Yang piui ba kau aimakras sa, sakuna man nani mampa ra lika awar bani ba pain sa. 7 Tasba uplika nani man nani ra sip misbara mai kaikras sa, sakuna yang ra lika misbara ai kaikisa, kan yang lika witin nani diara saura nani dauki ba witniska sna. 8 Man nani was baha liliaka tara ra; yang lika wamna apia, kan piui ba kau aimakras sa. 9 Naha diara nani na aisan ningkara, Jisas Galili ra ban takaskan.
Jisas Utla Papakni liliaka ra
10 Bamna ai muihni nani mahka wan ba ningkara, Jisas sin baha liliaka tara ra wan, upla nani mawanra param pali lika apia, kuna yukuwi baku. 11 Ju nani mita lilia piua ra Jisas ba pliki, naku aisan: —¿Baha waitnika ba anira sa ni? 12 Upla nani ba tilara manis Jisas dukiara aisi kan. Tila nani bila: “Baha ba waitna pain kum sa”; kuna wala nani bila: “Baha ba upla pain apia sa, kan upla ra kunin munisa.” 13 Sakuna upla kumi sin param taki aisaras kan, Ju nani ra sibrin luki kan bamna. 14 Lilia piua nani ba pat bakriki dauki kan ba ra, Jisas tempel ra dimi, mahka smalkan. 15 Bara Ju nani ba tâ iwi, naku aisin: —¿Nahki naha waitna diara tânka manis kaikisa, skul sin dimras ba? 16 Jisas mita pana win: —Smalkanki nani ba yang duki apia sa, sakuna witinka ai blikan ba dukia sa. 17 Upla kum Gâd want ba dukia daukaia lukisa kaka, witin kaikbia smalkanki nani ba, Gâd wina apia kaka, yang yakan kupi wina saki smalkisna sapa. 18 Ya yakan ai kupia wina baman saki smalki ba lika, upla wina mayunra lâka plikisa; sakuna ani uplika witin ra blikan uplika mayunra pliki ba, baha lika diara kasak ba aisisa kunin sin âpu. 19 “¿Kasak apia Moses mita man nani ra lâ ba maikan? Ban sakuna, man nani kumi sin baha lâka bîla wali daukras. ¿Bamna dîa muni ai ikaia want sma ki? 20 Upla nani ba mita pana win: —¡Man pirit saura kum brisma baku sa! ¿Ya man ra mai ikaia want sa ki? 21 Jisas pana win: —Diara kumi ris yua ra daukri ba dukiara, man nani yamni kaikras kapram. 22 Sakuna Moses bui man nani ra adar maikan, luhpiam waitna nani ra Aisa sainka daukaia (witin pali mita baha ba tâ krikras, kuna ai damika nani mita), bara baha mita man nani luhpiam waitna bani ra, Aisa sainka daukisma ris yua kabia kra. 23 Bara pain pali Moses lâka ba kulkaia dukiara, ris yua ra kabia sin, ban luhpiam nani ra Aisa sainka daukisma, ¿bamna dîa muni man nani lika yang ra kupiam baikisma, ris yua ra waitna kum sikniska rakri ba dukiara? 24 Man nani upla mawan kulki lâ daukpara. Lâ daukisma ba ra, wapni kat lâ ba dauks. ¿Witin ba Misaya sa ki? 25 Bamna Jerusalem ra iwi kan uplika kum kum mita makabi walan: —¿Naha waitnika ra apia pliki banhwi ba ikaia? 26 Bamna kaiks witin baha upla sut mawanra aisisa, bara upla kumi sin diara wiras sa. ¿Wihta nani mita kaikisa krani naha waitnika na Misaya ba? 27 Sakuna yawan lika pain kaikisa naha waitnika na, ani wina balan ba; ban sakuna, Misaya balbia ba ra, upla kumi sin kaikras kabia witin ba ani wina aula sapa. 28 Jisas tempel ra smalki kan ba ra, witin baha wali, ai bîla baikra karna aisin: —¡Baku bamna, ai kakaira sma bara ani wina aulna ba sin man nani kaikisma! Sakuna yang yakan balras; witin kasak lukaia aikan ba mita ai blikan, man nani bui witin ba kakaira apia sma. 29 Yang witinka ba kakaira sna, kan witin wina yang balri, bara witin mita ai blikan sa. 30 Baku mika, upla nani ba mita Jisas ba priski bri waia luki kan; kuna upla kumi sin witin ra ai mihta mangkras kata, kan ai piua ba kau aimakras kan bamna. 31 Sakuna upla ailal Jisas ra kasak luki, naku win: —¿Bara Misaya balbia ba ra, naha waitnika na wal, kau sain ailal daukbia ki? Parisi nani mita suldiar nani blikan, Jisas ba priski brih waia 32 Parisi nani walan upla nani Jisas dukiara dîa aisi kan ba; bamna witin nani bara prîs wihtka nani mita tempel ba wina suldiar nani saki blikan, Jisas ba priski brih waia. 33 Bamna Jisas bila: —Yang lika man nani wal kamna kau piua wiria baman, ningkara witinka ai blikan ba ra kli wamna. 34 Man nani ai plikma kuna ai sâkma apia, kan man nani sin sip wama apia yang anira kamna pliska ba ra. 35 Bamna Ju nani pana pana tawi makabi wali kan: —¿Naha na anira waisa ki, sip wal prawras kabia wi ba? ¿Apia kaka Ju nani ra waisa, tringsar nani tilara yakabrira iwi ba ra, idan nani ra smalkaisa? 36 ¿Baha witin wan win ba dîa tânka sa ki: ‘Ai plikma, sakuna ai sâkma apia, dîa kan yang bâra kamna pliska ba ra man nani sip wama apia aisi ba’?
Raya ban kaia awala nani
37 Lilia tara piua prakaia ba lika, kau tara daukan. Baha piua ra Jisas ai mina ra bûi, ai bîla baikra tara ni aisi, naku win: —Ya lî din daukisa kaka, witin ba yang ra bal dibia. 38 Ya yang ra kasak luki ba, Ulbanka ra aisi ba baku, witin ai kupia wina lî rayakira nani awala baku aubi kabia. 39 Naha tânka na wal, Jisas wiaia want kan, ya witin ra kasak lukbia ba Spirit ba bribia. Baha piua ra Spirit ba kau balras kan, Jisas kau ai prana daukras kan bamna.
Upla nani turwi takanka ba
40 Bamna upla manis naha walan ba ra, naku aisan: —Naha waitnika sika kasak, baha prapitka balaia kata ba. 41 Wala nani bila: —Naha sika Misaya ba. Sakuna kum kum bila: —¿Nahki Misaya ba Galili wina kabia ki? 42 Ulbanka ba wisa Misaya ba king Debit kiamka wina kaia sa, bara sin Betlehem ba wina kabia, baha sim pliska ba sika Debit Tawanka ba. 43 Baku bamna, Jisas tâwan upla nani ba baiwi takan. 44 Upla tila mita Jisas ba priski brih waia want kan, kuna upla kumi sin baha daukras kan.
Ju wihtka nani mita Jisas ra kasak lukras kan
45 Tempel wina suldiar nani wan kan ba kli tawi balan, parisi nani ra bara prîs wihtka nani ra sin. Baha nani mita suldiar nani ra makabi walan: —¿Dîa kan Jisas ba brih aidrubi balras kapram? 46 Suldiar nani ba mita pana win: —¡Baha waitnika aisi ba baku, kau upla kumi sin aisaras sa! 47 Bamna parisi nani mita pana win: —¿Dîa ban swiram man nani ra sin kunin mai munan? 48 ¿Dîa wan wihtka nani na tila wina, apia kaka parisi nani na tila wina kum pat Jisas ra kasak lukan sa ki? 49 Sakuna naha uplika nani lâ ba kaikras, bamna saura pali kulkan sa. 50 Nikudimus, witinka Jisas kaikaia tihmia ra wata ba, baha lika parisi nani wina kumika kata, bamna witin mita baha nani ra win: 51 —Wan lâka ba kat sip apia sa, upla kum ra baku saura kulkaia, yawan pali mita witin dîa daukan tânka kau walras kaka. 52 Bara witin nani mita pana win: —¿Man sin Galili wina sma ki? Ulbanka ba pain aisi kaiks, Galili ba wina prapit kum sin kau taki balras sa.
Marit lâka sasauhkra mairka ba
53 Baku bamna, kumi bani mahka ai watla ra wan.
1 Sakuna Jisas lika Oliv Ilka ra wan. 2 Bara yu wala titan pali kli tempel ra balan. Upla sut ai lamara balan, bamna witin iwi mahka baha nani ra smalkan. 3 Baku mika Lâ Smasmalkra nani bara parisi nani mita, mairin kum marit lâka sauhki kan ba alki brih balan. Bara mairka ba baha nani bâra kan ba lilapas kat yan buan, 4 bara witin nani bui Jisas ra win: —Smasmalkra, naha mairka na lika marit lâka sauhki kan ba minitka ra alkan. 5 Bamna Moses lâka lika wan wisa, naha sât uplika na, walpa ni sabi ikaia sa. ¿Bara man dîa wisma baha dukiara? 6 Witin nani baku win traika kaikaia dukiara, bara baku sip kabia dahra kwahkaia. Bara Jisas ai lal makupi, tasba ra ai mihta tâ ni ulbi kan. 7 Sakuna baha nani mita kli makabi wali kan. Bara Jisas ai lal buki, naku win: —Man nani tilamra ya saurka luha ba, baha mita pas mairin ba ra walpa ni lulki sabia. 8 Bamna Jisas kli ai lal makupi, tasba ra ulbi kan. 9 Sakuna witin nani naha walan ba ra, kumi kumi taki mahka aidruban, almukka nani ba pas tâura taki wan, ningkara wala nani sut, bara Jisas yakan takaskan kan bara mairin ba sin. 10 Bara Jisas ai lal buki, witin ra makabi walan: —Mairin, ¿uplika nani kata ba anira sa? ¿Upla kumi sin pât ra mai dingkras ki? 11 Mairin ba bila: —Apia, Dawan, upla kumi sin pât ra ai dingkras. Pana Jisas win: —Bamna yang sin pât ra mai dingkras sni; nanara mahka was, kuna kli saura yapara.
Jisas, tasba ingnika
12 Jisas kli upla nani ra aisi, win: —Yang sika upla nani ingnika; ya yang nini bliki ba, raya kaia yabi ingnika ba bri kabia, bara kli sin tihmia ra tauki kabia apia. 13 Bara parisi nani win: —Man lika yakan dukiamra witnis aisisma: baha lika bahki. 14 Jisas pana win: —Yang yakan dukira witnis aisamna kra, kuna dîa aisisna ba lika kasak pali sa, bamna yang kaikisna ani wina balri ba, bara anira sin kli auna ba; sakuna man nani lika kaikras sma ani wina taki balri bara anira sin auna ba. 15 Man nani lika lâ aisi daukisma naha tasba lâka ba kat. Yang mita upla kumi sin lâka aisi daukras; 16 sakuna ban kra lâ aisi daukamna kaka, yang lâ daukisna ba lika kasak sa, kan yang yakan lâ aisi daukras sna, sakuna Aisa mita ai blikan ba, yang wal lâ daukisa. 17 Man nani lâmka ra ulban sa, upla wâl witnis aisabia kaka, baha lika kasak kulkaia sa. 18 Yang yakan witniski aisisni, bara Aisa ai blikan ba sin, yang witniski aisisa. 19 Bamna baha nani mita makabi walan: —¿Man aisikam ba anira sa ki? Jisas pana win: —Man nani bui yang ai kakaira apia sma, bara Aisiki sin kakaira apia sma; yang ai kakaira banhwi katma kaka, Aisiki ra sin kakaira kaia kapram. 20 Jisas naha diara nani na aisin, witin kau tempel ra smalki kan ba ra, Gâd ra prisant auhbaia bakska bâra kan pliska ra. Sakuna upla kumi mita sin witin ba alki priskras kata, kan ai piua ba kau aimakras kan. “Anira yang auna pliska ba ra, man nani sip wama apia” 21 Bamna Jisas kli baha nani ra win: —Yang mahka auna, bara man nani ai plikma, sakuna saurkam nani tilara pruma; kan yang auna ba ra man nani sip wama apia. 22 Bara Ju nani win: —¿Dîa witin yakan pruaia lukisa ki, bara baha mita aisisa: ‘Anira auna ba ra man nani sip waras’? 23 Bamna Jisas mita win: —Man nani lika mâya tani wina sma, sakuna yang lika pura tani wina sni; man nani naha tasba wina sma, kuna yang lika naha tasba wina apia sna. 24 Baha mita sika mai wîri man nani saurkam nani wal ban pruma; man nani kasak luki banhras sma “Yang sika Yang sna” ba, bamna saurkam wal ban pruma. 25 Bamna baha nani mita makabi walan: —¿Man ba ya sma ki? Jisas pana win: —Pas ba, ¿dîa kan yang bui man nani wal aisaia sna? 26 Diara ailal brisni mai wiaia, bara man nani lâmka aisi daukaia sin, sakuna ai blikan ba lika kasak ba aisisa, bamna witinka wina walri ba sika tasba ra aisisna ba. 27 Sakuna baha nani mita sip tânka briras kan, Jisas witin nani ra Aisa dukiara aisi kan ba. 28 Bamna Jisas baha nani ra win: —Man nani mita Upla Luhpia Waitna purara bukma, bâra mika kaikma “Yang sika, Yang sna” ba tânka, bara yang yakan lika daukras, Aisa ai smalkanka ba baman lika aisisni. 29 Kan witinka ai blikan ba yang wal sa. Aisiki mita yang na yakan ai swiras, kan witin kupia lâka ba kat daukisna. 30 Jisas naha diara nani aisin ba ra, upla manis witin ra kasak lukan.
Gâd luhpia nani bara saurka albika nani
31 Ju nani kasak luki banhwan ba sut ra Jisas mita win: —Dîa mai wisna ba kat kasak kama kaka, man nani ba kasak yang disaipilki nani kama. 32 Bamna diara kasak tânka ba kaikma; bara kasak tânka ba mita sin pri mai sâkbia. 33 Baha nani pana win: —Yang nani na lika Ebraham kiamka, bara kau aima kumi sin yang nani upla albika takras; ¿bamna nahki man wisma, yang nani na pri lâka bri kamna? 34 Jisas baha nani ra win: —Kasak pali mai wisni, baha nani saura dauki ba lika saurka lâka albika sa. 35 Alba ba utla ra ban kaia apia sa, sakuna luhpia ba lika utla ra ban kaia sa. 36 Baku bamna, Luhpia mita pri mai sakisa kaka, man nani lika kasak pali pri kama. 37 Yang kaikisna man nani ba Ebraham kiamka, sakuna man nani ai ikaia want sma, kan yang dîa mai wisna ba alki daukras sma. 38 Aisa mita dîa ai marikan ba sika, yang aisisna ba; man nani diara daukisma ba lika Aisikam mai win bamna. 39 Baha nani pana win: —¡Yang nani aisiki ba lika Ebraham! Jisas pana win: —Man nani ba kasak Ebraham luhpia nani katma kaka, dîa witin daukata ba, man nani dauki kaia kapram. 40 Gâd mita ai marikan tânka kasak pali ba mai wîri, ban sakuna man nani want sma ai ikaia. ¡Ebraham aima kumi sin baku daukras kata! 41 Man nani daukisma dîa aisikam daukan ba. Baha nani pana win: —¡Yang nani lika bastar apia; Aisa kumi baman brisna, baha ba Gâd! 42 Bamna Jisas pana win: —Gâd ba kasak man nani aisikam kata kaka, latwan ai kaikaia katma, kan yang lika Gâd wina ai blikan nahara sni. Yang yakan balras, sakuna Gâd mita ai blikan. 43 ¿Dîa muni man nani ra diara mai wisna ba sip tânka briras sma? Baha lika man nani mita smalkanki ba walaia want apia sma bamna. 44 Man nani aisikam ba lika dibil; man nani ba witin wina atia sma, bamna dîa witin brin dauki ba kat daukisma. Dibil ba tâ pali piua wina upla âikra sa. Aima kumi sin kasakka lâka ra aibapi buras sa. Witin kunin aisi ba ra, ai tânka ba kat aisisa, kan witin lika kuninkira pali sa bara sin kunin aisika sa. 45 Yang na diara kasak ba aisisna bamna, man nani sip kasak ai lukras sma. 46 ¿Man nani tilam wina ya mita sip sa ki saurka kum brisna kaka, ai marikaia? Bara diara kasak ba aisisna kaka, ¿dîa muni sip kasak ai lukras sma ki? 47 Ya Gâd wina sa kaka, Gâd bîla nani ba aman walisa; sakuna man nani na Gâd wina apia sma ba mita, walaia want apia sma.
Ebraham âpu piua wina Kraist bâra sa
48 Bamna Ju nani Jisas ra win: —Yang nani aisisna ba lika kasak sa: man ba Sameria uplika kum sma bara pirit saura brisma. 49 Jisas baha nani ra win: —Yang pirit saura kumi sin âpu. Diara daukisna ba lika Aisiki mayunaia dukiara, sakuna man nani lika saura ai wisma. 50 Yang lika maiyunra ba plikras, sakuna wala kumi lika bâra sa, yang baha maiyunra plikisna, bara baha mita lâ daukisa. 51 Kasak pali mai wisni, ya yang aisisna ba alki bribia kaka, witin prubia apia ban kabia. 52 Bara Ju nani pana win: —Nanara yang nani kasak kaikisna, man lika pirit saura kum brisma. Ebraham bara prapit nani sut pruan, bamna man wisma: ‘Ya yang bîli alki bribia kaka, prubia apia ban kaia ra.’ 53 ¿Dîa man na wan aisika Ebraham wal kau tara sma ki? Ebraham bara prapit nani sin pruan. ¿Bamna man na ya sma damra walisma ki? 54 Jisas pana win: —Yang yakan maiyunra daukisna kaka, baha maiyunra ba lika bahki sa. Sakuna Aisiki mita maiyunisa, man nani mita witin ra Gâd wisma ba. 55 Ban sakuna, man nani bui witin ba kakaira apia sma. Yang lika witin ra kakaira sni; bara witinka ba kaikras wimna kaka, yang sin man nani wal baku kuninkira sna. Sakuna kasak pali mai wisna, witin ba yang kakaira sna, bara ai bîla sin wali daukisni. 56 Man nani damikam Ebraham ba, yang ra ai kaikaia kan ba ai kaikan baha mita lilia ni aibanhwan kata. 57 Ju nani Jisas ra win: —Man ba kau mani 50 sin alkras sma, ¿bara wisma Ebraham ba kaikram? 58 Jisas pana win: —Kasak pali mai wisni, Ebraham kau aisubi takras kan ba wina, yang pat bâra sni. 59 Baku mika Ju nani mita walpa wahbi brin, Jisas ra sabaia; sakuna witin yukuwi, tempel wina taki wan.
Jisas mita waitna kumi aisubi takan wina blain kan ba rakisa
1 Jisas plis kum bâk impaki lui auya kan ba ra, witin waitna kumi kaikan ba aisubi takan ba wina blain kan. 2 Bara ai disaipilka nani ba mita, witin ra makabi walan: —Smasmalkra, ¿dîa kan naha waitnika na blain aisubi takan ki? ¿Dîa ai aisika nani saurka ba mita, apia kaka witin ai saurka ba mita ki? 3 Jisas pana win: —Witin ai saurka ba mita apia bara ai aisika nani saurka ba mita sin apia; sakuna Gâd karnika witin bâk marikan kaia ba mata sa. 4 Kau kakna na ra, ai blikan ba warkka yawan daukaia sa; kan tihmia ba aula, bara bahara upla sip wark daukras sa. 5 Kau naha tasba ra sna ba piua ra, yang lika naha tasba ingnika sna. 6 Naha aisin ba ningkara, Jisas tasba ra yabalaya tuhban, bara yabalaya ni drapapa wiria dauki, blain waitnika ba nakra nani ra yukan. 7 Ningkara witin ra win: —Siloé laya madakura ra wih aihtas (baha nina tânka ba lika: “Blikan”). Blain ba wih aihtaban, bara kli tawi balan ba ra, witin sip kan diara kaikaia. 8 Bamna ai watla tnaya ra iwi nani ba, witin diara makabi kan kaikan uplika nani ba sin, naku win: —¿Naha waitnika apia, iwi upla ra diara makabi kata ba? 9 Upla kum kum bila: —Âu, witin sika. Wala nani bila: —Witin apia, kuna blain waitna kata ba talia sa. Sakuna waitnika pali ba bila: —Âu, yang sika baha waitnika ba. 10 Bara upla nani makabi walan: —¿Bara nahki kan man sip sma kaikaia? 11 Waitnika kata ba bila: —Baha waitnika nina Jisas mâki ba mita drapapa wiria dauki, naikra ra yuki, naku ai win: ‘Siloé laya madakura ra wih aihtas.’ Bamna yang mahka wih aihtabri ba ra, sip kapri kaikaia. 12 Baha nani makabi walan: —¿Baha waitnika ba anira sa ki? Waitnika kata ba bila: —Yang kaikras. Parisi nani bui blain kan rawan ba ra makabi walisa nahki rawan ba 13 Bamna witin nani blain kan rawan waitnika ba, parisi nani mawanra brih wan. 14 Jisas drapapa dauki blain waitnika ra rakan ba lika ris yua kata. 15 Bamna parisi nani blain kan rawan waitnika ra kli makabi walan, nahki ai nakra brin sapa. Waitnika ba bila: —Drapapa naikra nani ra yukan, ningkara wih naikra ba sikbri, bara nanara kaikisna. 16 Bamna parisi nani tila bila: —Naha daukan waitnika ba, Gâd wina apia sa, kan witin ris yua ba kulkras sa. Kuna wala nani bila: —Upla saura kaka, ¿nahki sip kabia naha sât wark aihka nani na daukaia? Baku bamna, witin nani ai tilara tar baiwan lâka takan. 17 Bara blain kan rawan waitnika ra kli makabi walan: —¿Bara man ba dîa wisma baha waitnika namkra maikan ba dukiara? Waitnika ba bila: —Yang lika wisna baha waitnika ba prapit kum sa. 18 Sakuna Ju nani lika sip kasak lukras kan, baha waitnika ba nakras kan bara nanara ai nakra pain brisa, aisika bara yaptika wal ba paiwi, 19 baha nani ra makabi walan kat ra mika: —¿Naha na man nani luhpiam sa ki, witinka nakras ban aisubi takan wisi man nani aisisma ba? ¿Nahki kan nanara witin diara pain kaikisa? 20 Aisika bara yaptika wal bila: —Yang nani kaikisna naha na yang nani luhpi pali bara witin sika blain ban aisubi takan ba; 21 sakuna yang nani kaikras nahki witin ba sip sa sapa kaikaia, bara ya pali mita nakra ba pain daukan sapa sin kaikras. Man nani bui witin ra makabi wals; witin pat aitani waitna pâwan sa, bamna dîa dîa tânka sut param aisaia sip sa. 22 Aisika bara yaptika wal sibrin kan ba mita baku aisin, kan Ju nani pat lâ daukan kan, ya mita Jisas ba Misaya sa wibia kaka, prias watla ba wina kangbi sakaia. 23 Baha mita aisika bara yaptika wal mita win: “Man nani mita makabi wals, witin na aitani almuk pâwan sa bamna.” 24 Bara Ju nani mita kan piua ra blain kan waitnika ba kli paiwi, win: —Diara kasak ba wan wis Gâd mawanra; kan yang nani kaikisna baha waitnika ba lika saura dadaukra sa. 25 Blain kan rawan waitnika pana win: —Yang kaikras sni witin ba saura dadaukra, apia kaka baku apia sapa. Sakuna diara kumi baman lika kaikisna: yang blain kapri, bara nanara kaikaia sip sna ba. 26 Ju nani mita kli makabi walan: —¿Dîa mai daukan ki? ¿Namkra maikaia dukiara dîa daukan ki? 27 Waitnika mita pana win: —Pat man nani ra mai wîri, sakuna man nani bîli ba kulkras sma. ¿Dîa muni kli aisarika walaia want banhwisma? ¿Dîa man nani sin witin ba nina blikan mai daukisa ki? 28 Bara witin nani mita waitnika ra swira dauki, naku win: —Man lika baha waitnika nina blikisma, sakuna yang nani lika Moses nina blikisna. 29 Yang nani lika pain kaikisna Gâd mita Moses ra aisin; sakuna baha waitnika ba lika ani wina sapa sin yang nani kaikras. 30 Waitnika ba pana baha nani ra win: —¡Naha lika diara aihka pali sa! Witin ba ani wina sapa kaikras sma, sakuna witin bui yang ra naikra aikan. 31 Yang nani kaikisna Gâd lika saura dadaukra nani ra walras sa; sakuna ya witin ra ai pura suni mayuni bara ai kupia lâka sin dauki ba lika, witin walisa. 32 Tasba paskan piua ba wina, upla kum mita, nahki upla kum aisubi takan piua wina nakras kan ba, nakra yabi ba sturka kau yawan walras sa. 33 Naha waitnika na Gâd wina balras kan kaka, witin diara kumi sin sip daukaia apia kan. 34 Bara witin nani win: —Man lika saurka lâka wina aisubi takram, ¿bamna yang nani ra ai smalkaia lukisma ki? Bamna witin nani Ju nani priaska watla ba wina waitnika ba kangbi sakan.
Spirit âpu mita blain nani ba
35 Jisas walan blain waitna kata ba, prias watla wina saki lulkan ba. Witin waitnika wal prawan ba ra, naku win: —¿Man ba Upla Luhpia Waitna ra kasak lukisma ki? 36 Waitnika ba bila: —Dawan, yang mita kasak lukaia sna uplika ba ya kaka, ai wis. 37 Jisas pana win: —Man bui witin ba pat kaikram sa: baha ba yang sika, man witinka wal nanara pali aisisma na. 38 Bara waitnika ba Jisas mawanra ai lula kriki, win: —Kasak lukisni, Dawan. 39 Ningkara, Jisas bila: —Yang balri naha tasba ra lâ daukaia dukiara, blain nani ba diara pain brih kaikbia, bara diara pain kaiki nani ba blain takbia dukiara. 40 Bara parisi kum kum witin wal banhwi kan ba naha walan ba ra, makabi wali banhwan: —¿Dîa yang nani na sin naikra aisawan sa ki? 41 Bamna Jisas pana win: —Man nani sut namkra aisawan kan kata kaka, saurka luha banhwi kaia kapram. Sakuna man nani namkra pain bri banhwisma wisma bamna, pâtkira atia sma.
Sepad ba ai sîpka aikuki
1 “Bamna yang kasak pali mai wisni, ani uplika sîp nani klarka ra dimaia durka ba swi si tnaya walak ni dimisa kaka, baha lika âimplikra bara upla ra rausauhki dukia dadakbra sa. 2 Kuna durku dimi uplika ba sika sepad, sîp nani main kakaira ba. 3 Bara dur main kakaira ba mita sîp main kakaira dimbia dukiara dur ba kwâkisa, bara sîpka nani mita sin ai bîla baikra walisa. Ai sîpka nani nina kat mâki winisa, bara klar bîla wina saki latara brih auya. 4 Ai sîpka nani sut latara sakan ba ningkara, witin lika sîp nani ba sut ba tâ kat aimaki wapi auya; bara sîp nani ba mita nina bliki auya, kan ai bîla baikra ba kakaira banhwisa. 5 Bamna sîp nani ba mita upla tringsar nina lika blîkbia apia, sakuna witin nani ba wina plapbia, kan witin nani lika upla tringsar nani bîla baikra ba wawalra apia sa bamna.” 6 Jisas naha maprika na aisin, sakuna parisi nani sip tânka briras kata, dîa wiaia dukiara Jisas baha aisin ba.
Jisas Sepad yamni ba
7 Bamna Jisas kli parisi nani ra win: “Kasak pali man nani ra mai wisni: Yang sika sîp nani dimaia durka ba. 8 Sakuna baha nani sut yang kainira balan ba lika, âimplikra nani bara upla ra rausauhki dukia dadakbra nani kan; bara sîp nani ba mita witin nani ra walras kata. 9 Yang sika dur ba: bamna ani uplika yangku dimbia ba, swaki sakan kabia. Bara witinka ba lika sîp kumi klarka ra dimi si, ai pata pliki taki auya baku kabia. 10 “Bamna âimplikra ba lika aula, implikaia bara iki âpu daukaia baman; sakuna yang balri na lika, witin nani raya kaia lâka bribia ba dukiara, bara baha sin manis pali bribia mata. 11 Yang sika Sepad yamni ba. Sepad yamni ba ai sîpka nani tâwan ai rayaka ba yabaia wilin sa. 12 Sakuna wark taki uplika ba lika ai mana briaia dukiara baman wark takisa; bamna ani piua yul wail kaikan aula ba ra, sîpka nani ba swi si plapisa, kan witin ba sepad apia sa, bara sîp nani ba sin ai dukia apia bamna. Baku bamna, yul wail ba mita sîp nani ba alkuya, bara yakabrira baman daukuya. 13 Naha waitnika na lika plapisa ai mana ba dukiara baman wark takisa bamna, bara baha mita sîp nani ba dukiara lukras pali sa. 14-15 “Yang sika Sepad yamni ba. Aisiki mita ai kakaira ba baku, yang mita sin Aisiki ba kakaira pali sni, bara baha sim natka ra, yang na sîpki nani mita sin ai kakaira ba baku. Bara sîpki nani ba tâwan yang rayaki ba yaia wilin sni. 16 Bara sîp wala nani sin brisni, bara baha nani ba lika naha klarka wina apia sa; sakuna baha nani ba sin brih balaia sni. Âu, witin nani mita sin yang bîli walbia, bara baku dakni kumi takbia bara sepadka sin kumi kabia. 17 “Aisa latwan ai kaikisa, kan yang rayaki ba yaia wilin sni, adar ba kat yang kli baha ba briaia dukiara. 18 Upla kumi sin âpu sa rayaki ba yang wina sakaia, yang kupi wilinkira yamna kaka lika. Baha ba yang yaia sna, kli briaia ba dukiara. Naha sika Aisa mita adar aikan ba.” 19 Ju nani ba naha bîla nani walan ba ra, kli aihka baiwi takan. 20 Witin nani ba wina manis aisin: —Witin ba pirit saura kum brisa bara lal saura kaka, ¿dîa muni man nani bui witin ra walisma? 21 Sakuna wala nani bila: —Upla kum pirit saura kum bri kaka, nahmuna bîla nani sip aisaras sa. ¿Sip sa ki pirit saura kum mita blain uplika nani ra nakra yaia?
Ju nani mita Jisas ra bahki kulkan
22 Kauhla piua ba ra, Jerusalem ra tempel Dawan mihta ra mangkan piua liliaka ba dauki banhwi kan. 23 Jisas ba tempel ra wapi tauki kan, Salaman Durka wi ba tani ra, 24 bara Ju nani Jisas tnaya kir kutbi win: —¿Ahkia kat man wan kupia namhpa namhpa wan muni kama ki? Man ba Kraist kaka, param wan wis. 25 Jisas pana win: —Yang pat mai wîri, sakuna man nani kasak ai lukras sma. Diara nani daukisna ba lika Aisiki karnika ra sika, bara baha ba mita param marikan sa; 26 sakuna man nani sip kasak lukras sma, kan man nani ba sîpki nani apia sma. 27 Sîpki nani ba bîli baikra pain walisa; yang bui witin nani ba kakaira sna, bara witin nani nini blikisa. 28 Yang baha nani ra raya ban kaia lâka ba yabisni, bamna witin nani sin prubia apia ban kaia ra raya kabia, baku bamna upla kumi sin âpu sa baha nani ba mihti wina dakbi briaia. 29 Aisiki mita aikan dukia ba kau tara sa diara wala nani ba sut wal; bara upla kumi sin baha nani ba Aisa mihta wina sip dakbi bribia apia. 30 Yang na Aisa wal kumi pali sni. 31 Bara Ju nani kli walpa nani brin, Jisas ra lulki sabaia. 32 Bamna Jisas mita witin nani ra win: —Aisiki karnika mita man nani mamwanra diara manis pain daukri; ¿ani pali dukia ba tâwan walpa ni ai sabaisma ki? 33 Ju nani pana win: —Diara pain nani daukram ba kumi sin tâwan yang nani bui man ra walpa ni mai sabamna apia, sakuna man bui Gâd mapara saura aisisma ba tâwan lika. Man ba upla kum sma, bara trai kaikisma wînam ba Gâd baku takaia. 34 Jisas pana win: —Man nani lâmka ra Gâd aisin ba ulban sa: ‘Man nani ba gâd nani sma.’ 35 Yawan kaikisa Ulbanka dîa aisi ba, sip baha ba bahki wiras; bamna Gâd mita baha uplika nani ai smalkanka alki brin nani ba gâd nani mâkan sa. 36 Bamna Gâd mita bâk saki naha tasba ra ai blikan kaka, ¿nahki man nani wiaia sip sma, yang lika Gâd Luhpia sna wîri ba wal ai mapara saura aisari? 37 Aisiki dîa dîa dauki dukia nani ba daukras sna kaka, man nani ba yang ra ai lukpara. 38 Sakuna daukisna kaka, yang pali ra kasak lukras kama kra, kuna diara nani daukisna ba ra kasak luks, bara baku mika man nani kaiki kama, Aisa ba yang ra iwisa bara yang sin witin ra. 39 Bamna Ju nani kli Jisas ba priski brih waia lukan, kuna witin swak takan. 40 Bamna Jisas ba Jordan awala lalma tani ra bal, bahara takaskan; baha pliska ra sika pas piua, Jan Tatahbra mita upla tahbi dauki kan ba. 41 Upla ailal Jisas kaikaia balan ba, naku aisi banhwi kan: —Âu, Jan lika wark aihka nani daukras kan, sakuna naha waitnika dukiara diara nani aisi kan ba lika sut kasak pali kan. 42 Bamna baha pliska ra, upla ailal Jisas ra kasak lukan.
Lasarus pruanka ba
1 Waitna siknis kum bâra kata, nina ba Lasarus, witin Betania wina kan, Meri ai muihni Marta wal tawanka ba. 2 Naha Meri ba sika Lasarus siknis ba lakrika kata, bara witin mita sika Jisas mina ra batana kîa pain ni yukan, bara ai tâwa ni sin dikata ba. 3 Bamna Lasarus lakrika mairin wâl ba mita Jisas ra upla blikan, naku wiaia: —Dawan, man uplikam latwankira ba siknis pali sa. 4 Jisas naha wali, naku aisin: —Naha sikniska Lasarus ra alkan na lika pruaia dukia apia sa, sakuna Gâd prana ba marikaia bara yaka baha sikniska bâk, Gâd Luhpia prana ba marikaia dukiara sa. 5 Âu, Jisas mita Marta bara Lasarus wal ra uya latwan kaiki kata. 6 Sakuna Jisas ba Lasarus sikniska witin ra win, bara kau yu wâl takaskan. 7 Baha ningkara Jisas ai disaipilka nani ra win: —Kaisa yawan kli Judia ra waia. 8 Disaipil nani mita pana win: —Smasmalkra, bisi pali baha sim pliska ra Ju nani mita walpa ni sabi mai ikaia mai munata, ¿bara man kli bahara waia lukisma ki? 9 Jisas bila: —¿Kasak apia, yu aiska ba ra 12 awar brisa? Bamna upla kumi kakna ra wataukisa kaka, ai mina prukbia apia, kan naha tasba ra ingni bâra ba kaikisa. 10 Sakuna upla kumi tihmia ra wataukisa kaka, ai mina prukisa, kan witin ingni ra apia sa bamna. 11 Baha ningkara, Jisas sin naku win: —Wan uplika Lasarus ba mahka yapan sa, sakuna yang wih witin ba tatukbi bukamna. 12 Disaipil nani pana win: —Dawan, witin ba yapisa kaka, baha tânka lika witin kli rawaia sa. 13 Jisas baha wiaia want kan ba lika, Lasarus ba pruan sa, kuna disaipil nani luki kan, Jisas win Lasarus ba yapan aihwa yapi kan. 14 Bamna Jisas mita param pali saki muni, win: —Lasarus ba pruan sa. 15 Bamna lilia sni bahara yang âpu kapri ba dukiara, kan baku kau pain sa man nani mampa ra, man nani kasak luki kama ba dukiara. Sakuna kaisa yawan bui witin ba wih kaikaia. 16 Bara Tamas, nina Sutki mâki ba mita disaipil wala nani ra wisata: —Kaisa yawan sin witin wal aikuki pruaia.
Jisas sika raiti wina buaia tânka bara raya kaia lâka ba sin
17 Bamna Jisas balan ba ra, kaikan Lasarus ba pat bikan yu walhwal kan. 18 Betania ba Jerusalem lamara kan, kau wiria ba ra mail wâl praiska. 19 Ju nani ailal aidrubi balan kata, Marta bara Meri wal ra maisa nihkaia, ai lakrika Lasarus pruan ba dukiara. 20 Bamna Jisas aula kan ba Marta kaikan ba ra, mahka taki wan wal prawaia, sakuna Meri lika utla ra ban takaskan. 21 Marta mita Jisas ra win: —Dawan, man nâra katma kaka, laikra ba pruaia apia kan, 22 Sakuna yang kaikisna, Gâd ra dîa makama ba witin sut maikbia. 23 Jisas pana win: —Man lamkra Lasarus ba kli raya takbia. 24 Marta bila: —Âu, yang kaikisna witin ba kli bubia, tnata piua ra pruan nani kli bubia ba ra. 25 Jisas pana win: —Yang sika kli buaia tânka bara rayaka ba sin. Ya yang ra kasak luki ba, prubia kra kuna raya kabia. 26 Bamna baha nani kau raya ba piua ra yang ra kasak luki ba, prubia apia ban kaia ra. ¿Naha man kasak lukisma ki? 27 Marta bila: —Âu, Dawan, yang kasak lukisna man ba Kraist, Gâd Luhpia ba, witinka naha tasba ra balaia kan ba.
Jisas Lasarus raitika lamara inisa
28 Naha aisin ningkara, Marta wan ai muihni Meri ba winaia, bara witin wal man aihka taki, naku win: —Smasmalkra ba nâra sa, bara witin lika mai paiwisa. 29 Meri naha walan ba ra, aihni pali mahka taki wan Jisas wal prawaia. 30 Jisas ba kau tawan ra dimras, witin Marta wal prawan pliska ra ban bâra kan. 31 Ju nani utla bilara Meri maisa nihki kan ba mita kaikan, Meri lika aihni pali latara taki auya. Bamna witin nani sin ninara taki wata, kan luki banhwan Meri ba raiti ra auya bahara inaia. 32 Bamna Meri ba Jisas bâra kan ba pliska ra wan ba ra, witin Jisas mina ra ai lula kriki, naku win: —Dawan, man nâra katma kaka, laikra ba pruaia apia kan. 33 Jisas kaikan Meri ba ini kan, bara Ju nani witin wal balan ba sin. Bamna Jisas sari takan bara ai kupia ra wirha pali diman, 34 bara makabi walan: —¿Anira Lasarus ba bikram sa ki? Witin nani bila: —Dawan, bal kaiks. 35 Baku kan ba ra Jisas mahka inan. 36 Bamna Ju nani bila: —¡Kaiks, nahki latwan kaiki kan ba! 37 Sakuna baha nani wina kum kum bila: —Naha waitnika sika upla blain kan yan kaikan, ¿bara diara kum daukaia sip kan apia Lasarus ba pruaia apia dukiara?
Lasarus pruan wina buan ba
38 Jisas kli ai kupia wirha diman ba kira, raiti lamara balan. Baha raiti ba lika walpa unta kum kan, bahara Lasarus pruan ba, dingki dimaika ba prakan kan walpa kum ni. 39 Jisas bila: —Man nani walpa ba sâks. Marta, Lasarus pruan ba lakrika bila: —Dawan, nanara pat kîa saura takisa baku sa, kan Lasarus ba pat pruan yu walhwal brisa. 40 Sakuna Jisas bila: —¿Yang mai wiras katna, man kasak lukma ba ra, Gâd prana ba kaikma? 41 Bamna walpa ba sakan. Bara Jisas kasbrika purara kaiki, naku aisin: —Aisa, yang tingki mai wisna man bîli baikra walram bamna. 42 Yang kaikisna man piu bani bîli walisma, sakuna yang baku aisisna upla nani nahara banhwi na dukiara, witin nani kasak lukbia ba dukiara ai blikatma. 43 Naha aisin ba ningkara, ai bîla baikra tara ni winan: —¡Lasarus, baha wina bal taks! 44 Bamna pruan kata ba bal takan, bara ai mihta bara mina nani sut kwala ni blakan kata, bara ai mawan sin kwala ni wilkan kata. Bamna Jisas mita win: —Man nani bui witin ba lanhks, bara swis mahka wabia.
Jisas alkaia lâ daukan ba
45 Naha tâka mita, Meri yula kahbi aidrubi balan kan Ju nani wina ailal, baha nani Jisas ra kasak lukan, kan witin nani lika Jisas diara daukan ba kaiki banhwan bamna. 46 Sakuna baha Ju nani tila wina kum kum ba mita parisi nani ra wih win, Jisas dîa daukan ba. 47 Bamna parisi nani, prîs tara nani bara lâ uplika nani aikuki asla taki, makabi walan: —¿Yawan dîa daukaia sa ki? Naha waitnika lika wark aihka nani uya pali daukisa. 48 Yawan baku ban swibia kaka, upla sut witin ra kasak lukbia, bara Rom wihtka nani bal wan tempelka bara wan nisanka nani sut âpu daukbia. 49 Sakuna witin nani wina kumi nina Keyapas, baha manka ra witinka prîs tara aimaki kata ba mita naku win: —Man nani lika diara kumi sin kaikras, 50 tânka nani sin briras sma, yawan wan mapara kau pain sa upla ailal tâwan upla kumi prubia, wan nisanka aiska âpu daukaia ba wal. 51 Bamna Keyapas lika naha na, witin ai kupia wina aisaras kata; sakuna baha manka ra witin ba prîs tara aimaki kan bamna, Gâd mita yan baha dahra aisin, nahki Jisas ba Ju nani nisanka aiska ba tâwan pruaia sa; 52 bara Ju nani nisanka tâwan baman apia, sakuna Gâd luhpia nani laihura yakaban nani ba sut asla daukaia mata sin. 53 Baku bamna, baha piua wina Ju wihtka nani lâ dauki banhwan Jisas ba ikaia. 54 Baha mita Jisas ba Ju nani tilara kli param pali taukras kan, sakuna Judia tasbaya ba wina taki plis kum ra wan nina ba Efraín, bara baha tawanka ba upla iwras tasbaya lamara sa. Jisas bahara ai disaipilka nani aikuki takaskan. 55 Ju nani Insal luan Yua Liliaka dauki ba pat baila kan, bamna tawan nani wina upla ailal Jerusalem ra balan, Moses lâka ba kat ai wîna klin daukaia, Insal luan Yua kau kainara. 56 Bara Jisas ra pliki banhwi kata tempel ra, bara pana pana sin makabi wali kan: —¿Man nani dîa lukisma? ¿Naha lilia na ra witin balbia, apia kaka balbia apia ki? 57 Parisi nani bara prîs tara nani mita adar yan kata, ani uplika Jisas anira takaski ba kaiki kaka, witin nani ra wibia, bara baku mika sip kabia alkaia.
Mairin kum mita Jisas ra batana ni yukisa
1 Insal luan Yua Liliaka kau yu 6 kan, Jisas Betania ra wan; bahara Lasarus takaski kata, bara witinka sika Jisas mita pruan wina bukata ba. 2 Bahara Jisas prana daukaia dukiara tutni pata tara kum dauki banhwan; Marta lika plun ba tibil ra kahbi hilp muni kan, bara Lasarus sin Jisas wal tibil ra iwi plun pi kata. 3 Baku mika, Meri mita batana isint kîa painkira batil banhki bri balan, baha ba mana pali kan, bamna baha ni Jisas mina nani ra yukan bara ningkara ai tâwa ni dikan. Utla aiska ba isint kîa man kata. 4 Bamna Saiman luhpia Judas Iskariot ba, witinka sin Jisas disaipilka nani tilara kulkan kan, bara witinka mita sika Jisas waihla mihta ra mangkaia kan ba bila: 5 —¿Dîa kan naha batanka kîa painkira na, lalah mâ handat yumhpa mana wauhi atki muni, lalahka ba umpira nani ra yaras kan? 6 Judas naha aisin na lika umpira nani ra luki lika apia, kuna witin ba âimplikra kan ba mita, bara baha purkara lalah sakbatka ba twilki kata, bara witin baha sakbatka wina lalah impliki kan. 7 Bara Jisas win: —Swis mairin na, witin baha ba bri kan ai bikaia piua ba dukiara. 8 Piu bani upla umpira nani ba tilamra bri kama, sakuna yang lika piu bani ban ai bri kama apia.
Lasarus ikaia lukan ba
9 Ju ailal kaiki banhwan Jisas ba Betania ra kan, bamna baha nani bahara wan Jisas kaikaia man apia, kuna Lasarus ba sin kaikaia, Jisas mita pruan wina bukan ba. 10 Bara prîs tara nani mita lâ daukan Lasarus ba sin ikaia. 11 Kan Lasarus tâka mita, Ju ailal pali witin nani wina dakwi taki kan, Jisas ra kasak lukaia dukiara.
Jisas Jerusalem ra dimisa
12 Upla ailal Jerusalem ra wan kata Insal luan Yua Liliaka ba luaia; yu wala witin nani tânka brin, Jisas sin Jerusalem ra balaia ba. 13 Bamna dus wahia nani klaki brih taki wan Jisas wal prawaia, naku sin witin nani wini kata: —¡Mayunra! ¡Yamni pali sa, witinka Dawan nina brih aula ba, yamni pali sa Israel Kingka ba! 14 Baku ba ra Jisas lika biriku kum saki baha purara ulan, Ulbanka ra aisi ba baku: 15 “Si bripara, Saion tawanka; kaiks, man Kingkam ba aula, biriku kum purara uli.” 16 Tâ pali ra, disaipil nani naha diara nani tânka briras kan, sakuna Jisas pruan ba mita lika tânka brin, naha sut ba witin ra takaia kan ba, bara sin witin dukiara dîa ulban ba baku kat sin takan sa. 17 Bamna Jisas mita Lasarus pruan kan wina raki bukan bara upla nani bahara kaiki banhwan nani ba witin nani baha tânka, upla nani ra maisa paki kan. 18 Baha mita upla nani taki wan Jisas wal prawaia, kan witin nani kaikan Jisas sain aihka pali daukan bamna. 19 Bara parisi nani pana tawi aisi banhwi kan: —¡Kaikram si man nani, nahki witin ra sip diara munaia tânka apia sa; kan upla sut, witin nina blikisa!
Grik kum kum Jisas plikisa
20 Yua tara ba luaia dukiara upla nani Jerusalem ra aidrubi balan Gâd ra ai pura suni mayunaia, bara baha nani tilara Grik nani sin bâra kan. 21 Baha Grikka nani ba mita Pilip Betsaida Galili kuntrika wina ba lamara bal, makabi win: —Mâsa, yang nani Jisas kaikaia want sna. 22 Pilip bara Andru ra wih win, bamna witin nani wâlsut Jisas ra wih maisa pakan. 23 Bamna, Jisas pana win: —Piua ba aimakan sa, Upla Luhpia Waitna prana daukan kaia. 24 Kasak pali yang mai wisni, plawar mâ kumi tasba ra mangkan ba pruras sa kaka, piua bani ban mâ kumi baman kabia; sakuna tasba ra mangkan ba prubia kaka lika, mâ ailal pali sakaia sip sa. 25 Ani uplika ai rayaka ra latwan kaiki ba lika witin tikbia; sakuna naha tasba ra ani uplika ai rayaka bahki kulkbia kaka, witin lika ban kaia ra swaki sâkbia. 26 Bamna upla kumi yang duki daukaia want sa kaka, witin nini blikaia sa; bara anira sna pliska ba ra, yang duki dadaukra ba sin bâra kabia. Bamna upla kumi yang duki daukisa kaka, Aisiki mita prana daukbia.
Jisas maisa pakisa ai pruanka dukiara
27 “¡Bamna nanara, yang kupi ra uya wirha ni ai taiban sa! ¿Bara yang dîa aisamna ki? Wimni: ‘Aisa, ¿naha kupi wirha taibanka wina swaki ai sâks’? ¡Sakuna naha pali dukiara sika yang balri ba! 28 Aisa, ninam ba prana dauks. Bamna bîla baikra kumi kasbrika purara ba wina walan ba, naku win kata: “Yang baha ba pat prana daukri, bara kli sin prana daukamni.” 29 Upla nani bahara kan ba aisi banhwi kan baha ba alwani kum binka, bara wala nani bila: —Insal kum witin ra aisin. 30 Bara Jisas baha uplika nani ra win: —Baha bîla baikra wali banhram ba lika, yang dukira apia sa, sakuna man nani dukiamra sa. 31 Bamna nanara sika naha tasba na lâka aisi daukan kaia piua ba, bara naha tasba wihtka tara aimaki ba sin latara lulkan kabia. 32 Bara yang pruan wina kli buamna ba ra, upla sut yang ra raski bri balamna. 33 Naha tânka na wal mariki kata, witin dîa pruanka ni prubia ba. 34 Bara upla nani ba mita pana win: —Lâ wauhkataya wina yang nani kaikisna Misaya ba lika ban kaia ra raya kaia sa. ¿Bamna nahki man wisma, Upla Luhpia Waitna ba purara bukan kaia sa? ¿Baha Upla Luhpia Waitna ba ya sa ki? 35 Bara Jisas bila baha nani ra: —Kaiks, piua wiria baman ingni ba kau man nani tilamra kabia. Bamna watauki bas kau baha ingnika brisma ba ra, tihmia kra mai alkbiara sîa; kan tihmia ra watauki uplika ba, witin kaikras sa anira auya sapa. 36 Ingni ba kat kasak luki bas, kau man nani tilamra ingnika ba brisma ba ra, bamna baku mika sip kama ingni luhpia nani takaia. Jisas naha diara nani aisin ba ningkara, mahka taki wih baha nani wina yukuwan.
Ju nani dîa muni Jisas ra kasak lukras kan ba
37 Bamna Jisas mita sain aihka nani manis daukan baha uplika nani mawanra, sakuna kumi sin sip witin ra kasak lukras kan, 38 bamna naha diara sut na aimakaia kan prapit, Aiseya ulbanka ba kat: “Dawan, ¿ya wan smalkanka ra kasak lukan ki? ¿Yaura Dawan mita ai karnika ba marikan ki?” 39 Baku bamna, witin nani sip apia kan kasak lukaia, bamna Aiseya sin naku ulban: 40 “Gâd mita baha uplika nani ba nakras bara kupia karna daukan, ai nakra nani ni kaikbiara sîa, bara ai sinska ni tânka bribiara, bara witin nani tawi yang ra balka rakamnara sîa.” 41 Aiseya naha diara nani ra aisin, witin pali mita Jisas prana ba kaikan bamna, bara baha mita witin Jisas dukiara aisi kata. 42 Ban sakuna Ju ailal Jisas ra kasak lukan, ban sin Ju wihtka nani sin; sakuna parisi nani sîa upla nani mawanra param aisaras kan, prias watla wina kra kangbi sâkbiara sîa. 43 Witin nani lika upla wina mayunra briaia ba kau want kan, Gâd wina mayunra briaia ba wal.
Jisas bîla nani ba mita, upla nani lâka daukan kabia
44 Jisas ai bîla baikra tara ni aisin: “Ani uplika yang ra kasak luki ba, yang ra baman kasak lukras, kuna Aisiki ai blikan ba ra sin kasak lukisa. 45 Bamna ani uplika yang ai kaiki ba, Aisa ai blikan ba ra sin kaikisa. 46 Yang, ingni sna na, naha tasba ra balri, bamna ani uplika nani yang ra kasak luki ba tihmia ra ban wataukaia apia sa. 47 Upla kumi bîla wali, sakuna baha kat daukras ba, yang mita lika pât ra lulkamna apia, kan upla pât ra lulkaia wisi yang na tasba ra balras, kuna swaki sakaia. 48 Ani uplika bahki ai kulki bara bîli nani sin wali daukras ba, ya mita pât ra lulkaia ba pat bâra sa. Bîla nani yang aisari ba mita sika tnata piua ra pât ra lulkan kabia. 49 Kan yang yakan lukanki wina mai wiras, sakuna Aisa ai blikan ba adarka kat smalkisna. 50 Bara yang kaikisna Aisiki lâka ba lika raya ban kaia dukiara sa. Baku bamna, dîa aisisna ba lika Aisa adarka ba kat aisisna.”
Jisas ai disaipilka nani mina sikbisa
1 Insal luan yua Liliaka ba yauhka baku aimakaia kan, bara Jisas kaikan witin naha tasba na swi si, ai Aisa ra waia awarka ba aimakan kan. Witin ai uplika nani naha tasba ra kan ba sut ra ban latwan kaikan, bamna nanara ai latwanka lâka kau tara pali takan ba sin mariki kan. 2-4 Jisas ai disaipilka nani aikuki tutni pata pi kan ba ra Judas, Saiman Iskariot luhpia ba, Jisas waihla mihta ra mangkaia lukanka ba dibil mita pat kupia ra mangkan kan. Jisas kaikan ai Aisika mita witin ra karnika aiska pali ba yan sa, bara witin sin Gâd wina balan bara kli Gâd ra auya. Bamna Jisas tibil wina bûi, ai pura kwalka ba saki swi si, kwala pîs kum brih ai maisa ra wilkan. 5 Bara bisin kum ra lî laiki brih, ai disaipilka nani mina nani sikbi, kwala pîs ai maisa ra wilkan ba ni diki kan. 6 Witin Saiman Pita mina nani mahka sikbaia kan ba ra, Pita win: —Dawan, ¿man bui yang mini nani sikbisma ki? 7 Jisas pana win: —Dîa daukisna ba nanara man tânka sip briras sma, sakuna kau naika man tânka ba brima. 8 Sakuna Pita bila: —¡Man bui yang mini lika sip sikma apia! Jisas bila: —Yang bui man minam nani sikbras sna kaka, man sip yang disaipilki kama apia. 9 Saiman Pita bila: —¡Ban kaka, Dawan, mini nani baman sikpara, sakuna mihti nani bara laila sin siks! 10 Sakuna Jisas bila: —Ani uplika bisiura aihtaban ba, witin lika klin sa, bamna mina nani baman sikbaia sa. Baku bamna man nani lika klin sma, sakuna sut lika apia. 11 Jisas win: “Man nani sut lika klin apia sma”, kan witin pain kaikan ya mita ai waihla mihta ra mangkbia ba. 12 Jisas ai disaipilka nani mina nani sikban ningkara, witin ai pura kwalka kata ba dimi, kli tibil ra iwi, naku win: —¿Dîa daukri ba, man nani tânka brisma ki? 13 Man nani mita yang ra Smasmalkra bara Dawan sin ai wisma, bamna baha ba kasak aisisma, kan yang lika baha sna. 14 Yang na man nani Smasmalkrikam bara Dawankam sna, kuna man nani minam nani sikbri kaka, baku walkam mina nani ba siks. 15 Yang bui man nani ra tânka kum mamrikri, baha sim natka ba kat man nani daukma. 16 Kasak pali yang mai wisni, alba kumi sin kau tara apia sa ai dawanka ba wal, bara blikan uplika kumi sin kau tara apia sa witinka bui blikan ba wal. 17 Bamna naha diara nani na tânka brih baha kat sin daukma kaka, lilia kama. 18 “Man nani sut dukiamra lika aisaras sna, kan yang kaikisna ani uplika nani ba bâk saki briri ba. Ban sakuna, Ulbanka dîa aisi ba sut aimakaia sa: ‘Yang wal plun pi ba maipara buan sa.’ 19 Kan manis wina naha mai wisni, bamna baha ba takbia ba ra, man nani kasak lukma: Yang sna ba Yang sika. 20 Kasak pali mai wisna, ya yang blikri uplika ra bri ba, yang ra ai brisa; bamna ya yang ai bri ba, witinka ai blikan ba ra sin brisa.
Jisas aisisa Judas mita ai waihla mihta ra mangkbia
21 Bamna Jisas naha aisin ba ningkara, ai kupia ra wirha pali diman, bara witin param pali aisin: —Kasak pali mai wisna, man nani tilam wina kum bui waihli mihta ra ai mangkbia. 22 Bara disaipil nani pana pana tawi ai walka ra kaikan, kan ya pali dukiara aisi kata sapa tânka sin briras kan. 23 Bara disaipil kum Jisas mita latwan kaiki kan ba, tutni pata ba ra Jisas lama kat iwi plun pi kan; 24 bamna Saiman Pita mita baha disaipilka ra sain dauki win, makabi walbia ya pali dukiara aisi sapa. 25 Baku bamna, witinka ba kau Jisas lamara wih, makabi walan: —Dawan, ¿baha ba ya? 26 Jisas pana win: —Yang brit pîs buski yaura yamna ba, baha sika. Bamna witin brit pîs brih buski, Saiman luhpia Judas Iskariot ba ra yan. 27 Judas baha britka pîs ba brin wal baku, Sitan lika witin kupia ra diman. Baku bamna, Jisas bila: —Dîa daukaia sma ba, aihni dauks. 28 Tibil ra plun pi kan nani ba wina kumi sin tânka briras kan, dîa muni baku win sapa. 29 Judas ra yan lalah watla ba bri kan bamna, disaipil tila nani lukan Jisas win baha piua liliaka tara ba dukiara, diara nani ba wans atkbia, apia kaka umpira nani ra hilp munbia. 30 Bamna Judas brit ba pin ningkara, mahka taki wan. Pat sin tihmia kan.
Lâ raya ba
31 Judas mahka taki wan ba ra, Jisas bila: —Nanara sika Upla Luhpia Waitna prana ba param marikan kabia, bara witin bâk Gâd prana ba sin marikan kabia. 32 Upla Luhpia Waitna na mita, Gâd prana ba marikisna kaka, Gâd mita sin ai Luhpia prana ba marikbia, bara baha ba aihni pali daukan kabia. 33 Luhpi lupia nani, kau piua wihka lika man nani wal kamna apia. Man nani ai plikma, sakuna Ju nani ra wîri ba baku, nanara man nani ra sin mai wisni: Yang auna pliska ra man nani sip wama apia. 34 Naha lâ raya na, man nani ra maikisni: Pana pana walkam ra latwan kaiki kama. Yang bui man nani ra latwan mai kaikisna ba baku, pana pana walkam ra latwan kaiks. 35 Man nani pana pana walkam ra latwan kaikisma kaka, upla sut kaikbia man nani ba yang disaipilki nani sma.
Jisas mita Pita witin ra kaikras wibia dahra sakisa
36 Saiman Pita mita Jisas ra makabi walan: —Dawan, ¿man anira auma ki? Jisas pana win: —Anira auna pliska ba ra, nanara man sip nini bliki wama apia. Sakuna naika lika nini blîkma. 37 Pana Pita bila: —Dawan, ¿dîa muni nanara yang sip ninam blikamna apia? Yang ridi sni man tâmwan rayaki ba yaia. 38 Jisas mita pana win: —¿Man ba yang tâiwan rayakam yaia ridi sma ki? Kasak mai wisni, kalila wainhka kau aiwanras ba ra, man aima yumhpa ai kaikras wima.
Jisas, Aisa ra waia yabalka ba
1 “Man nani kupiam ra uya trabil taki luki kapara. Gâd ra bara yang ra sin kasak luki bas. 2 Aisiki watla ra plis manis bâra sa; baku apia kan kaka, yang bui man nani ra mai wiaia apia kapri, man nani pliskam kum ridi daukaia auni. 3 Bamna yang wih pliskam ridi daukamna ba ningkara, kli balamna man nani mai brih waia, bara baku mika yang anira sna ba pliska ra man nani sin bâra kama. 4 Man nani lika pat kaikisma, yang anira auna ba, bara yabalka ba sin kaikisma. 5 Tamas bila: —Dawan, yang nani kaikras man anira auma sapa, ¿bamna nahki yabal ba tânka kaiki banhwi kamna ki? 6 Jisas bila: —Yang sika yabal ba, kasak tânka ba bara rayaka ba sin. Yang bâk baman sip sa Aisa ra waia. 7 Man nani bui yang na ai kakaira katma kaka, Aisiki ra sin kakaira kaia kapram; bamna nanara wina pat kakaira sma, man nani bui witin ba pat kaiki kapram bamna. 8 Bara Pilip bila: —Dawan, Aisa ba wan mariks, baha wal yang nani aitani sna. 9 Jisas pana win: —Pilip, nahki piua wihka yang lika man nani wal sna, ¿bara kau ai kakaira apia sma ki? Ani uplika yang ai kaiki ba, Aisiki ra sin kaikisa; ¿bamna, dîa muni Aisa ba kaikaia makabisma? 10 ¿Pilip, man kasak lukras sma ki, yang na Aisa wal asla pali sna ba bara Aisa sin yang wal asla pali ba? Diara nani man nani ra mai wisna ba lika, yang yakan mai wiras. Aisa yang ra iwi ba mita sika ai warkka daukisa. 11 Bamna kasak ai luks man nani, yang na Aisa wal asla pali sna, Aisa sin yang wal asla pali sa; baku apia kaka, diara daukisna ba wina pan man nani kasak ai luks. 12 Kasak pali mai wisni, yang ra kasak luki uplika ba, diara nani daukisna ba witin mita sin daukbia, kau diara tara nani sin daukbia, kan yang Aisa bâra ba pliska ra auna. 13 Diara sut man nani bui yang nini mâki makama ba, yang daukamna, bara baku mika Luhpia ba mita Aisa prana ba marikbia. 14 Bamna yang nini mâki diara makama ba, daukamni.
Jisas pramis munisa Spirit Holikira ba blikaia
15 “Bamna man nani latwan ai kaikisma kaka, lâika bîla nani ba wali dauki kama. 16 Yang Aisa ra makabamna, witin bui man nani hilpkam bara maisam nihkaia dukiara wala kumi maikbia, baha sika kasak tânka Spiritka ba, witin ba man nani wal kabia ban kaia ra. 17 Dawan ra tawras uplika nani baha Spiritka ba sip bribia apia, kan witin nani mita sip kaikbia apia, bara sip tânka bribia apia; sakuna man nani lika pat kakaira nani, kan witin ba man nani wal sa, bara ban kaia ra sin man nani wal kabia. 18 “Yang bui man nani ba, ban lulki mai swimna apia; kli balamni man nani wal kaia dukiara. 19 Kau piua wiria ba ra, upla nani mita ai kaikbia apia, sakuna man nani lika ai kaikma bara raya kama, kan yang raya sna bamna. 20 Baha piua kat man nani tânka brima, yang Aisiki wal asla pali sna ba, bara man nani lika yang wal asla, bara yang mita sin man nani wal asla pali sna. 21 Bamna ani uplika lâika nani tânka brisa bara bîli kat wali daukisa kaka, witin param marikisa yang ra latwan ai kaikisa. Latwan ai kaiki uplika ra, Aisiki latwan kaikbia, bara yang sin latwan kaikamna, ban sin witin ra latan takamna. 22 Judas wala (Iskariot ba apia) bila: —Dawan, ¿dîa muni yang nani ra lika latan takma, kuna tasba uplika nani ra lika apia? 23 Jisas pana win: —Ani uplika latwan ai kaiki ba, dîa aisisna ba kat wali daukisa, bara Aisiki mita latwan kaikbia, bamna yang Aisiki wal bal baha uplika ra takaskamna. 24 Ani uplika latwan ai kaikras ba, yang dîa aisisna ba kat wali daukras sa. Yang wina man nani smalkanka walisma ba, yang duki apia sa, sakuna Aisa ai blikan ba dukia sa. 25 “Naha diara sut na man nani ra mai wisna, kau man nani aikuki sna bamna. 26 Sakuna Spirit Holikira Aisa mita yang nini ra luki blîkbia ba lika, man nani ra hilp mai munaia bara maisam nihkaia dukiara, bara witinka mita diara sut mai smalkbia, bara dîa dîa mai wîri ba sut kupiam kraukbia. 27 “Man nani wina dakwi takuna kupia kumi lâka ra. Kupi kumi lâka man nani ra maikisni, sakuna tasba uplika nani kupia kumi lâka yabi ba sât lika apia. Man nani kupiam trabil bripara bara sibrin kapara. 28 Man nani lika yang aisari ba pat walram yang mahka auna, bara kli balamna man nani wal takaskaia. Man nani kasak latwan ai kaikisma kaka, lilia banhwi kaia kapram yang Aisa ra auna bamna, kan witin ba kau tara sa yang ba wal. 29 Naha mai wisna na, piua kau na ra baku takbia, bara man nani kasak lukma. 30 “Nanara diara kau manis man nani wal aisaia apia sna, naha tasbaya ra wihta ba aula bamna. Karnika kumi sin yang purira âpu sa sakuna, 31 baha ba baku takaia sa, bamna baku lika tasba uplika nani kaikbia, yang Aisa ra latwan kaikisna bara witin mita daukamna win ba kat daukisna. “Man nani bus. Kaisa naha wina mahka waia.
Wain kiwka rait pali ba
1 Jisas kau aisin: “Yang sika wain kiwka rait pali ba, bara Aisiki ba sika baha mangki ba. 2 Witin mita ani tnawa sip ai mâ sakras ba klaki sakisa, sakuna ani tnawa ai mâ saki ba lika dauhbi klin daukisa, ai mâ kau sâkbia dukiara. 3 Man nani lika pat klin sma, baha bîla mai smalkri ba mita. 4 Bamna yang wal asla ban banhwi bas, yang sin man nani wal asla ban sna ba baku. Tnawa kumi ai kiwka ra apia sa kaka, witin yakan sip ai mâ sakras sa; baha sim natka ra, man nani ba yang wal asla ban apia sma kaka, sip mâ sâkma apia. 5 “Yang sika wain kiwka ba, bara man nani lika tnawa nani sma. Bara ani uplika yang wal asla ban ba, yang sin witin wal asla sna, bara baku lika witin ai mâ manis sakisa; baku bamna yang âpu kira man nani sip diara daukras. 6 Bamna ani uplika yang wal ban asla apia ba, saki latara lulkan kabia, bara lâwbia sin dus tnawa kumi lâwan wahbi, pauta ra lulkan ami ba baku. 7 “Man nani ba yang wal asla ban sma kaka, bara dîa mai smalkri ba sin âmya tikras sma kaka, dîa dîa want sma ba makas, bara maikan kabia. 8 Bamna man nani mâ manis sakuma ba ra, Aisiki ba mayunra brisa, bara baha ba mita marikisma man nani ba kasak disaipilki nani sma. 9 Aisa mita latwan ai kaiki ba baku, yang bui man nani ra latwan mai kaikisni; baku bamna, yang laitwanka ra ban banhwi bas. 10 Man nani lâika bîla kat wali dauki kama kaka, yang laitwanka lâka ra sin ban kama, sim yang Aisiki lâka wali daukisna bara latwan ai kaiki ba kat ban sna ba baku. 11 “Baku aisisna man nani ba yang wal lilia kama ba dukiara, bara lilia pali kama. 12 Bamna naha sika yang lâika bîla ba: Man nani pana pana walkam ra latwan kaikma, yang mita man nani ra latwan mai kaikisna ba baku. 13 Latwan lâka kau tara upla briaia sip ba lika, ai uplika nani dukiara ai rayaka yabaia ba. 14 Bamna man nani sika upliki nani, yang dîa mai wisna ba sut daukma kaka. 15 Nanara man nani ba albiki nani mai wiras sni, kan alba ba ai dawanka dîa dauki ba kaikras. Bamna man nani ba upliki nani mai wisna, kan Aisiki dîa dîa ai win ba sut man nani ra param mamrikri bamna. 16 Man nani mita yang na bâk saki ai briras katma; sakuna yang mita man nani ba bâk saki mai briri, bamna man nani mahka taki wih mâ ailal sâkma ba dukiara, bara baha mâ sin ban kaia. Baku lika dîa dîa yang nini mâki Aisa ra makama ba sut maikbia. 17 Bamna naha lâka maikisna: Man nani pana pana walkam ra latwan kaiki kama.
Tasba uplika nani mita Jisas ra bara ai disaipilka nani ra misbara kaikisa
18 “Tasba uplika nani mita man nani ra misbara mai kaikisa kaka, kupiam krauki bas yang ra sika pas misbara ai kaikan ba. 19 Man nani ba naha tasba wina katma kaka, naha tasba wina uplika nani mita ai tahkia nani ra baku latwan mai kaikaia kan. Sakuna yang bui man nani ba naha tasba uplika nani tila ba wina bâk mai saki mai briri, bara baha mita sika naha tasba uplika nani mita misbara mai kaiki ba, kan nanara man nani lika naha tasba wina uplika apia sma. 20 Bamna dîa mai wîri ba dukiara kupiam krauki bas: ‘Alba kumi sin âpu sa, witin ai dawanka wal kau tara ba.’ Yang pali nini bliki rau ai sauhkan sa kaka, man nani ra sin ninam bliki rau mai sauhkan kabia; bara witin nani bui yang smalkanki bîla ba alki brin kaka, man nani smalkankam bîla ba sin alki bribia. 21 Naha diara sut yang tâiwan man nani ra mai munan kabia, kan naha tasba wina uplika nani mita, witinka yang ai blikan ba kakaira apia sa. 22 “Witin nani ba pâtkira kaia apia kan, yang na bal witin nani ra smalkras katna kaka. Kuna nanara ai saurka ba dukiara sip pâtkas kulkan kabia apia. 23 Bamna ani uplika yang ra misbara ai kaiki ba, Aisiki ra sin misbara kaikisa. 24 Naha tasba uplika nani ba pâtkas kaia kan, upla wala nani mita sip daukras dukia nani ba witin nani tilara daukras katna kaka; sakuna naha diara sut pali kaiki banhwan sakuna, ban misbara ai kaikisa bara Aisiki ra sin misbara kaikisa. 25 Sakuna naha na baku takaia kan, baha bîla nani witin nani lâka wauhkataya ra ulban ba kat aimakaia dukiara: ‘Pâtkas pali misbara ai kaikan.’ 26 “Sakuna witinka hilp mai munaia bara maisam nihkaia wisi balbia ba, kasak tânka Spiritka yang mita Aisa wina blikamna ba, witin lika yang dukira witnis aisabia. 27 Bamna man nani sin yang dukira witnis aisama, kan man nani lika tâ pali piua wina yang wal kapram.
1 “Naha diara sut na mai wisna, man nani minam pruki kauhma apia dukiara. 2 Ju nani priaska watla nani wina mai kangbi mai sâkbia, bara ban sin piua kum balbia ani uplika mita mai ikbia ba, witin lukbia baha ni Gâd warkka daukisa. 3 Baku daukan kabia, kan tasba wina uplika nani ba mita Aisiki ra kakaira apia sa, bara yang ra sin ai kakaira apia sa. 4 Naha diara na mai wisna, bara baku mika baha piua ba balbia ba ra, kupiam krauki kama baha dukiara yang pat mai wîri sa.
Spirit Holikira dîa dauki ba
“Tâ pali wina naha diara na mai wiras kapri, kan yang lika man nani wal katna. 5 Sakuna nanara mahka auna, ai blikan ba wal kaia, kuna man nani wina kumi sin ai makabi walras sma anira auna sapa. 6 Kau ni naha daira nani mai wîri bamna, man nani sari sma. 7 Sakuna kasak pali mai wisni: yang waia sna ba lika, man nani mampa ra kau pain sa. Kan yang waras kamna kaka, Spirit Holikira ba man nani wal kaia balbia apia, hilp mai munaia bara maisam nihkaia; sakuna wamna kaka lika, yang mita witin ba blikamna. 8 Spirit Holikira ba balbia ba ra, witin mita tasba ra iwi uplika nani ra param marikbia saurka lâka ba, wapni lâka ba, bara Gâd lâ dauki ba. 9 ¿Ya ba saura dadaukra?: baha lika yang ra kasak lukras uplika ba; 10 ¿ya ba pât âpu uplika?: baha sika yang, Aisa ra auna ba, bara man nani kli ai kaikma apia; 11 ¿ya ba Gâd lâ dauki ba klalka bribia?: baha lika naha tasbaya wihtka, witinka sika pât ra pat lulkan ba. 12 “Yang kau diara manis brisni mai wiaia, sakuna man nani nanara sip tânka brima apia. 13 Kasak tânka Spiritka balbia ba ra, witin mita mai smalkbia diara pali ba tânka. Witin ai brinka ba kat aisabia apia, sakuna dîa witin walbia ba baha aisabia, bara dîa dîa naika takaia ba sut mai wibia. 14 Witin mita yang ra maiyunbia, kan dîa witin bribia ba lika yang duki wina sa, baha mita man nani ra tânka ba sut mamrikbia. 15 Diara sut Aisa bri ba yang duki sa; baha mita sika mai wîri, Spirit ba yang duki wina bribia, bamna man nani ra latan mamrikbia. 16 “Bamna kau piua wiria ba ra man nani kli ai kaikma apia; sakuna piua wiria ningkara, kli ai kaiki kama.”
Sari lâka ba kli lilia ra tawbia
17 Bara disaipil nani ba pana pana tawi makabi walan: —¿Naha na dîa pali tânka sa ki? Witin wan wisa kau piua wiria baman witin ra kaikbia apia, bara piua wiria ningkara yawan mita kli witin ba kaikbia, Aisa bâra ba pliska ra auya bamna. 18 Witin nani makabi walan: —‘¿Kau piua wiria ba’ dîa tânka sa ki? Yang nani mita sip tânka briras witin dîa dukiara aisi sapa. 19 Jisas kaikan ai disaipilka nani ba witin ra makabi walan dauki kan, bamna naku win: —Yang mai wîri kau piua wiria baman ai kaikma apia, bara kau piua wiria ningkara kli ai kaikma. ¿Naha tânka dukiara man nani tilamra pana pana makabi walisma ki? 20 Yang kasak pali mai wisni, man nani ini kama bara sari sin banhwi kama, sakuna naha tasba uplika nani ba lika lilia kabia. Ban sakuna, man nani sari kama kra, kuna sarkam ba lilia ra ni tawbia. 21 Mairin kum tukta briaia ba ra sari sa, kan latwan wahwaia piua ba aimakan sa; kuna witin baha tuktika ba brin ningkara, latwan wahwata ba dukiara kli sin ai kupia kraukras sa, sakuna lilia sa witin tuktan kum tasba ra aisubi takan bamna. 22 Baku sin, man nani nanara sari sma, sakuna yang kli bal mai kaikamna ba ra, man nani kupiam lilia pali kabia, liliaka kum upla kumi mita sin mai dakbi briras kabia ba. 23 “Baha piua ra man nani kli diara maikabi walma apia. Kasak pali mai wisni, Aisa ra dîa dîa yang nini mâki makama ba, sut pali maikbia. 24 Naha piua kat man nani bui yang nini mâki Aisa ra kau diara makabras sma; makabi banhs bara brih, lilia ni aibanhma ba dukiara.
Jisas Kraist, naha tasba pura lalura
25 “Bamna yang naha diara nani mai wîri sa, diara wala wal praki muni; sakuna piua kum aimakbia, kli yang bui man nani ra maprika ra aisamna apia, kuna Aisa tânka ba param pali mai wimna. 26 Baha piua ra, man nani bui yang nini mâki Aisa ra makama; bamna yang mita Aisa ra man nani dukiamra makabi kamna lika wiras, 27 kan Aisa mita man nani ra latwan mai kaikisa. Latwan mai kaiki ba lika, man nani mita yang ra latwan ai kaikisma bamna, bara kasak sin luki banhram yang na kasak Gâd wina balri. 28 Yang na Aisa wina taki naha tasba ra balri; bamna nanara naha tasba na swi si, kli Aisa ra auni. 29 Bara ai disaipilka nani bila: —Nanara lika man param pali aisisma, maprika ra lika apia. 30 Nanara yang nani kaikri man ba diara sut pali kaikisma, bara upla kum mita baha dukiara mamkabi walaia apia sa. Baha mita yang nani kasak lukisna man ba Gâd wina balram sa. 31 Jisas pana win: —¿Baku bamna, nanara man nani kasak lukisma ki? 32 Bamna awarka ba aula bara baha awarka ba lika nanara pali, man nani aihka aihka mai yakaban kabia, bamna yang na yakan ai swi banhbia. Sakuna yakan apia sna, kan Aisa ba yang wal sa. 33 Naha dukia sut na mai wisni, yang wal asla kama ba mita kupia kumi lâka ba bri kama. Naha tasba ra man nani ban pât wahwaia kama; kuna kupiam karna bri bas, kan yang mita tasba na pura luri sa.
Jisas ai disaipilka nani dukiara ai pura sunisa
1 Jisas naha diara nani aisin ba ningkara, witin kasbrika pura ba tani ra tawi kaiki, naku aisin: “Aisa, awarka ba pat aimakan sa. Bamna Luhpiam ra mayunra yas, bara baku mika witin mita sin mayunra maikbia. 2 Man mita sika Luhpiam ra karnika yaram ba, upla wala nani sut purkara, raya ban kaia lâka yaia baha nani sut man mita witin ra yabram ba. 3 Bamna raya ban kaia lâka ba lika, mai kakaira takaia, Gâd kumi baman kasakkira sma ba, bara Jisas Kraist ra sin kakaira takaia, witinka man mita blikram ba. 4 “Yang mita naha tasba ra mamyunri, bara dîa daukaia wisi ai blikram ba sin sut daukri. 5 Bamna Aisa, nanara aik baha mayunra kau tasba na âpu kan wina man wal kan ba. 6 “Baha nani man mita tasba ra iwi uplika nani tila wina saki, yang ra aikram ba sut ra marikri, man ba ya sma ba. Baha nani ba man dukiam kan, sakuna yang ra aikram, bamna man smalkankam bîla nani ba alki brin. 7 Nanara witin nani kaiki banhwisa diara nani sut aikram ba, man wina atia sa; 8 smalkaia wisi man aikram ba sut yâri, bamna witin nani baha alki brin. Tânka sin brin yang na man wina balri ba, bara kasak sin lukan ai blikram. 9 “Witin nani dukiara man ra puri sunisni; naha tasba wina uplika nani ba dukiara lika puri sunras, sakuna man mita aikram nani ba dukiara lika, baha nani ba man dukiam sa bamna. 10 Yang duki sut ba man dukiam sa, bara man dukiam sut ba yang duki sa; bamna yang praina ba baha nani ra ingwisa. 11 “Yang lika kau naha tasba ra takaskamna apia; sakuna witin nani lika tasba ra kabia, kan yang lika auna man wal kaia. Aisa Holikira, ninam karnika ba ni baha nani ra main kaiki bri bas, baha ninam yang ra aikram ba, bara baku mika witin nani sut asla kabia, sim man ba yang wal asla ba baku. 12 Yang naha tasba ra witin nani wal katna ba ra, man aikram ba sut main kaiki, kan kahbi bri kapri. Bamna witin nani wina kumi sin tiwras, sakuna witinka pat tiwan kata ba lika, Ulbanka dîa aisi ba aimakaia dukiara. 13 “Bamna nanara man bâra sma pliska ra mahka auna; sakuna kau tasba ra sna na piua ra naha diara nani na aisisni, bara baku mika witin nani, yang lilia brisna ba ni aibanhwan kabia. 14 Yang bui witin nani ra man smalkankam bîla ba yâri, sakuna tasba uplika nani mita misbara kaikisa, kan baha nani ba naha tasba wina apia sa, yang sin naha tasba wina apia sna ba baku. 15 Naha tasba wina mahka sâkma dukiara lika mamkabras, sakuna dibil ba wina dakbi sâkma. 16 Yang naha tasba wina apia sna ba baku, baha nani man aikram ba sin naha tasba wina apia sa. 17 Naha nani ba man kasakkam ba ni aihka saki holikira sâks; man smalkankam bîla ba sika diara kasak pali ba. 18 Naha tasbaya uplika nani ra ai blikram ba baku sin, yang mita naha nani yang mita tasba ra blikisni. 19 Witin nani dukiara, yang rayaki aiska na man mihtam ra mangkisni, bara baku mika witin nani sin diara kasak ba mita holikira sakan kabia. 20 “Sakuna naha nani dukiara baman man ra puri sunras, kuna witin nani smalkanka mita upla wala nani sin yang ra kasak lukbia ba sut dukiara sin. 21 Yang mamkabisni witin nani sut ba asla pali kabia; âu, Aisa, witin nani sut ba yawan aikuki asla kumi kabia, man lika yang wal asla pali sma ba baku, bara yang sin man wal asla pali sna. Witin nani ba asla pali kabia, bara baku mika tasba uplika nani ba kasak lukbia man mita ai blikram sa. 22 Man prana aikatma ba sika yang bui witin nani ra yâri, witin nani ba asla kumi kaia dukiara, man ba yang wal asla kumi ba baku. 23 Yang mita witin nani ra bara man mita lika yang ra, bara baku mika witin nani ba kumi aihwa pali kabia, bara baha mita tasba uplika nani mita kaikbia man mita ai blikram ba, bara man mita witin nani ra latwan kaikisma, sim yang ra latwan ai kaikisma ba baku. 24 “Aisa, man mita sika baha nani aikram ba, bamna want sna baha nani sut yang bâra kamna pliska ra kabia, bara baku mika man prana aikram ba kaiki kabia; kan man mita latwan ai kaikram kau tasba na âpu kan piua ba wina. 25 Aisa kasakkira, tasba uplika nani ba lika man ra mai kaikras, sakuna yang mita lika mai kakaira sna, bamna naha nani sin ai dara walisa man mita ai blikram sa. 26 Yang bui witin nani ba man wal kakaira daukri, bara kau sin baku dauki kamna, bara baku mika latwan ai kaikisma lâka ba witin nani kupia ra kabia, bara yang pali sin witin nani wal asla kumi kamna.”
Jisas ba priski brih auya
1 Jisas ai pura sunan ba ningkara, witin ai disaipilka nani aikuki Cedrón tingnika baila wala ra wan. Bahara giadin kum bâra kan, bara Jisas ai disaipilka nani wal bahara diman. 2 Bara Judas, witinka mita Jisas waihla mihta ra mangkan ba, baha pliska ba pain kaiki kan, kan Jisas piu bani baha pliska ra ai disaipilka nani aikuki asla taki kan. 3 Bamna Judas baha giadinka ra wan, suldiar daknika kum, bara tempel main kakaira kum kum sin aikuki; baha ba prîs wihtka nani bara parisi nani mita sin blikan kan. Witin nani aiklabaia dukia nani, lamp nani, bara awas angki sin brih wan. 4 Jisas lika pat kaikan dîa witin ra takaia ba, bamna mapara taki wih, makabi walan: —¿Man nani ya pliki banhwisma ki? 5 Baha uplika nani ba bila: —Jisas Nasaret wina ba. Jisas mita pana win: —Baha ba yang sika. Judas, witinka mita Jisas waihla mihta ra mangkan ba sin baha nani wal kata. 6 Jisas mita “Baha ba yang sika” win ba wal, sut ai ninara wih, tasba ra kauhan. 7 Bamna Jisas kli makabi walan: —¿Man nani ya plikisma ki? Witin nani bila: —Jisas Nasaret wina ba. 8 Bamna Jisas mita pana win: —Pat mai wîri, baha ba yang sika. Man nani bui yang ai plikisma kaka, swis naha nani lika mahka wabia. 9 Jisas baku aisin, dîa witin pali aisata ba aimakaia dukiara: “Aisa mita aikan nani ba wina, kumi sin tiwras.” 10 Bamna Saiman Pita mita sord kum bri kan ba saki, prîs tara nani albika kum nina Malco wi ba, kiama aihkika ba klaki dakban. 11 Sakuna Jisas mita Pita ra win: —Man sordkam ba kli ai watlika ra mangks. ¿Man lukisma Aisa mita pât wahwamna wisi aikan ba, ban wahwaia apia sna?
Jisas Anás mawanra
12 Bamna suldiar daknika ai kamandanti ba wal, bara Ju nani tempel ra aihwawakra nani kan ba mita, Jisas ba alki priskan. 13 Ningkara Anás ra brih wan. Anás lika Keyapas dapnika kata, bara baha manka ra witin prîs tara aimaki kan. 14 Naha sim Keyapaska mita sika Ju nani ra win kata, pain kabia upla kumi baman prubia, upla nani sut dukiara.
Pita mita Jisas kaikras wisa
15 Saiman Pita bara disaipil wala kum sin, Jisas nina bliki auya kan. Baha disaipilka wala ba lika prîs tara wal kakaira kan, bamna witin Jisas wal ban diman prîs tara watla kutbanka ra; 16 sakuna Pita lata tani durka ra takaskan. Bamna baha disaipilka prîs tara wal kakaira kan ba taki wih, dur main kaiki mairka ba wal aisi, Pita ba utla bilara brih diman. 17 Bamna dur main kaiki mairka ba mita Pita ra makabi walan: —¿Man sin baha waitnika Jisas wi ba disaipilka kum sma apia? Pita mita pana win: —Yang baha waitnika disaipilka apia sna. 18 Kauhla iwi kan bamna, alba nani bara suldiar nani kira pauta muki, ailahki banhwi kan. Pita sin baha nani lamara bûi ailahki kan.
Prîs tara mita Jisas ra makabi walisa
19 Bamna prîs tara ba mita Jisas ra makabi walan: —¿Disaipilkam nani ba ya, bara dîa pali smalki kapram ki? 20 Jisas mita pana win: —Yang lika upla sut mawanra param pali aisari; piua bani Ju nani priaska watla nani ra, bara tempel ra sin smalki katna, Ju nani sut bahara asla taki kan ba ra; yang diara kumi sin yukuki smalkras katna. 21 ¿Bamna dîa kan yang ra makabi walisma ki? Makabi wals baha nani yang ra ai wali kan nani ra, bamna baha nani mita mai wibia, kan witin nani lika pain nu sa yang dîa aisi kapri ba. 22 Jisas naha aisin ba ra, tempel ra aihwawakra kum bâra kan ba mita, witin mawan kat pruki, win: —¿Man baku pali prîs tara ra aisisma? 23 Bamna Jisas mita pana win: —Yang saura aisari kaka, ai wis dîa ba saura sapa; sakuna pain aisari kaka, ¿dîa tâwan ai prukisma ki? 24 Bamna Anás mita Jisas ba priski, prîs tara Keyapas ra blikan.
Pita kli Jisas kaikras wisa
25 Bamna Pita kau ban pauta mukan ba lamara bûi ailahki kan; bamna bahara kan ba mita win: —¿Man sin baha waitnika Jisas wi ba disaipilka kum sma apia? Bamna Pita mita apia win, naku aisi: —Yang baha waitnika disaipilka apia sna. 26 Kau naika prîs tara albika kum ba, witin ra makabi walan, Pita mita kiama klakan ba waitnika ba taika: —¿Yang kaikri apia, man baha waitnika wal giadin bilara katma ba? 27 Pita kli apia win, bara baha sim piua ra kalila wainhka kum aiwanan.
Jisas Pailat mawanra
28 Bamna Jisas ba Keyapas watla wina tawan wihtka tara watla ra brih wan. Baha piua ba pat yu baiwaia man kan, bara Ju nani lika lâ watla tara ra dimras kan, tâski kulkan kabia apia dukiara, kan baku daukbia kaka, Insal luan Yua Liliaka tutnika pata ba piaia sip apia kan. 29 Baha mita Pailat mita baha nani ra taki wih naku aisi, win: —¿Dîa tâwan man nani naha waitnika na dahra kwahkisma ki? 30 Witin nani pana win: —Naha waitnika na saura dadaukra apia kaka, yang nani bui man mihtam ra mangkaia apia kapri. 31 Pailat mita pana win: —Man nani mita waitnika na brih was, bara man nani lâmka kat witin lâka dauks. Bamna Ju nani mita win: —Sakuna yang nani Ju nani mita upla ikaia ba lâ apia sa. 32 Baku lika Jisas, witin dîa pruanka natka ni pruaia aisin ba aimakaia kan. 33 Pailat kli ai watla ra diman, bamna Jisas ba paiwi, makabi walan: —¿Man ba Ju nani Kingka sma ki? 34 Jisas pana win: —¿Man baha maikabi walisma ba, yakan kupiam wina, apia kaka upla wala nani mita yang dukira mai win sa ki? 35 Pailat mita pana win: —¿Dîa yang na Ju? Man nisankam bara prîs tara nani mita sika mihti ra mai mangkan ba. ¿Bamna man dîa daukram? 36 Bamna Jisas mita pana win: —Yang kingki lâka ba naha tasba wina apia sa. Naha tasba wina kan kata, yang nini blablikra nani ba aiklabaia kan, bara baku mika Ju nani mihta ra ai mangkan kaia apia kan. Sakuna yang kingki lâka ba lika naha tasba wina apia sa. 37 Bara Pailat pana win: —¿Baku bamna, man ba king kum sma ki? Jisas pana win: —Âu, yang na king sna, man aisaram ba baku. Yang aisubi taki, naha tasba ra balri diara kasak ba upla nani ra wiaia. Bamna baha nani sut kasakka lâka ra nani ba, yang dîa aisisna ba aman walisa. 38 Pailat pana win: —¿Bamna diara kasak ba dîa?
Jisas ikaia pâtka ra dingkan sa
Naha makabi walan ningkara, Pailat kli taki Ju nani ra wih, naku win: —Naha waitnika wîna ra watawanka kumi sin yang sakras pali. 39 Sakuna man nani natkam brisma, Insal luan Yua Liliaka piua ra upla kumi yang bui lanhki maikaia. ¿Bamna man nani want sma ki, yang bui Ju nani Kingka ba lanhkamna? 40 Bamna baha nani sut ai bîla baikra tara ni naku winan: —¡Jisas lika apia! ¡Sakuna Barabas lika lanhks! Naha Barabas na lika waitna kum âimplikra kata.
1 Bamna Pailat mita adar yan Jisas ba bri si wipbia. 2 Suldiar nani mita kiaya ni kraun kum pitbi, Jisas lal ra bapan, bara kwala balianta talia sin dingkan. 3 Ningkara lama pali ra wih, naku win: —¡Ju nani Kingka ba raya sa! Bamna ai mawan taya ra prukan. 4 Pailat kli taki bal, witin nani ra win: —Kaiks, witin ba nahara brih aulna, bamna man nani kaikma yang bui witin ra watawanka kumi sin sakras pali sna. 5 Jisas latara taki balan, kiaya kraunka ba ai lal ra bapi, bara kwala balianta talia ba sin dimi. Bamna Pailat bila: —¡Kaiks, waitnika nahara ki! 6 Bamna prîs tara nani bara suldiar nani sin Jisas ba kaikan ba ra, mahka ai pura wini, win: —¡Dus prihni ra sas! ¡Dus prihni ra sas! Pailat bila: —Ban kaka, man nani mita witin ba bri si dus prihni ra sabi banhs, kan yang lika witin wîna ra watawanka kumi sin sakras sna. 7 Sakuna Ju nani pana win: —Yang nani lâ kum brisna, baha lâka ba kat witin na pruaia sa, kan witin na Gâd Luhpia sa win. 8 Pailat naha walan ba ra, kau sibrin daukan. 9 Bamna Pailat kli lâ tara watla ra dimi, Jisas ra makabi walan: —¿Man ba ani wina sma ki? Sakuna Jisas lika pana diara kumi sin aisaras kan. 10 Pailat win: —¿Man bui yang ra ai aisaras sma? ¿Man kaikras sma ki, yang karnika brisna dus prihni ra mai sabaia, bara pri mai sakaia karnika sin? 11 Bamna Jisas pana win: —Man lika yang purira karnika kumi sin âpu kaia kapram, Gâd mita maikras kata kaka. Sakuna ya mita man mihtam ra ai mangkan ba sika, saurka kau tara brisa man ba wal. 12 Baha piua ba wina, Pailat ba trai kaikan Jisas ba pri sakaia. Sakuna Ju nani ai pura karna wini kan: —¡Man baha waitnika pri sâkma kaka, Rom kingka wal uplikam apia sma! ¡Kan ani uplika yakan king taki ba lika, Rom kingka mapara sa! 13 Pailat naha walan ba ra, Jisas ba yan saki brih balan; bamna Pailat lâ iwaika ra iwan, Hibru bîla ra Gabatá wi ba pliska ra, baha tânka lika Walpakira. 14 Baha piua ba lika Insal luan Yua Liliaka ba kainara kata, wan lal kat bahmuna. Baku bamna, Pailat mita Ju nani ra win: —¡Nahara sa man nani kingkam ba! 15 Sakuna Ju nani ai pura wini, naku win: —¡Witin ba prubia! ¡Witin ba prubia! ¡Dus prihni ra sas! Pailat bila: —¿Man nani want sma ki, kingkam ba dus prihni ra sabamna? Sakuna prîs tara nani pana win: —¡Yang nani king wala briras, Rom kingka baman! 16 Baku mika, Pailat mita Jisas ba witin nani mihta ra mangkan dus prihni ra sabaia, bamna witin nani mita Jisas ba brih wan.
Jisas ba dus prihni ra saban
17 Bamna Jisas dus prihni ba twilki taki wan, Wan Lalkamhka wi ba pliska ra (baha pliska ba Hibru bîla ra Golgota mâkisa). 18 Bahara witin nani mita Jisas ba dus prihni ra saban, bara âimplikra wâl kan ba sin, kumi Jisas mihta aihkika tani ra bara wala ba smihka tani ra. 19 Bamna Pailat mita wauhtaya kum ulbi, Jisas dusa prihni purara mangkan, bahara naku ulban kata: “Jisas Nasaret wina, Ju nani Kingka ba.” 20 Ju nani manis baha ulbanka ba aisi kaiki banhwan, kan Jisas ra saban pliska ba lika tawan lamara kan. Baha ulbanka ba bîla sât yumhpa ra ulban kata: Hibru, Grik bara Latin bîla aisanka nani ra. 21 Baku bamna, Ju nani bara prîs wihtka tara nani ba mita, Pailat ra win: —Baku ulpara ‘Ju nani Kingka’, sakuna naku uls: ‘Witin mita aisin Ju nani kingka.’ 22 Sakuna Pailat pana win: —Yang dîa ulbri ba, baku kabia. 23 Suldiar nani mita Jisas ba dus prihni ra saban ningkara, witin kwalka ba kalki mânka walhwal ra daukan, suldiar bani pîs kumi briaia, bara prâka yari ba sin brin, prâka ba sipras ban pura wina mina tani kat kan. 24 Suldiar nani ba pana pana aisin: —Yawan kwalka na kalkbiara; sakuna kaisa lat lulki kaikaia, kwalka na yaura tawbia sapa. Baku sika Ulbanka ra dîa aisi ba aimakan: “Witin nani bui yang kwailka pali ba purara lat puli, yui bri banhwan.” Bamna baku suldiar nani mita daukan. 25 Jisas dusa prihni ba lamara, ai yaptika Meri bahara bûi kata, ai yaptika muihnika Cleofás maya ba, bara Meri Magdalin sin. 26 Bamna Jisas ai yaptika ra kaikan, bara disaipil kum witin latwan pali kaiki kan ba sin, ai yaptika lamara kan. Bamna Jisas ai yaptika ra naku win: —Mairin, kaiks man luhpiam nâra ki. 27 Ningkara, baha disaipilka ra win: —Kaiks, man yaptikam nâra ki. Bamna baha piua wina baha disaipilka mita, Jisas yaptika ba main kaiki ai watla ra brin.
Jisas pruan ba
28 Naha diara ningkara, Jisas ai dara walan diara sut aisin ba aimakan, bara ulbanka ba aimakbia dukiara, witin bila: —Lî din ai daukisa. 29 Bahara wain swahwan watla kum bâra kan, bamna suldiar kum mita baha laya ra wahmuk ni buski, hisop dusa tnawa kumi ra mangki, Jisas bîla kat bri si mangkan. 30 Jisas baha wain swahwan ba din ningkara, witin bila: —Diara sut ba daukan sa. Baha ningkara Jisas ai lal makupan, bara pruan.
Suldiar kum Jisas tnaya ra langsa ni saban
31 Insal luan Yua Liliaka kainara kata, bamna Ju nani want apia kan upla wîna tara nani ba dus prihni ra ban swiaia ris yua kat, kan baha ris yua ba lika kulkanka tara yabi kata. Baha mita Ju nani mita Pailat ra makaban suldiar nani blîkbia, dus prihni ra uplika nani ba kuhma dusa nani ba krikaia, ai wîna tara nani ba sin dus prihni ba wina lahbia. 32 Bamna suldiar nani wih, pas uplika kuhma dusa ba krikan, bara wala ba sin, Jisas wal dus ra saban kata ba. 33 Sakuna Jisas lamara balan ba ra, kaikan pat pruan kata; baha mita suldiar nani mita witin kuhma dusa nani lika krikras kan. 34 Sakuna suldiar nani ba wina kum mita langsa ni tnaya mina ra sabi klauhban, bamna tala lî wal takan. 35 Baha uplika naha sturka aisi ba lika, witin pali mita ai nakra ni kaikan, bara diara kasak ba aisisa; bamna witin ai dara pain walisa, dîa aisi ba lika kasak sa; bara baku mika man nani sin kasak lukma. 36 Naha diara nani na naku takan, Ulbanka ra naku wi ba aimakaia dukiara: “Upla mita witin ai dusa kumi sin krikbia apia.” 37 Ulbanka wala ra sin wisa: “Upla nani mita witin ra saban ba kaikbia.”
Jisas raiti ra bikan
38 Naha diara ningkara, Josep Arimatea tawanka wina ba mita, Pailat ra wih Jisas wîna tara ba brih waia makaban. Baha Josepka lika Jisas disaipilka kumi kata, sakuna yukuwi ra kan Ju nani sîa. Pailat mita âu win, bamna Josep wih Jisas wîna tara ba brih wan. 39 Bamna Nikudimus sin Josep wal wan. Naha sim Nikudimuska sika piua luan ra Jisas ra wata ba tihmia ra wal aisaia. Witin mita sika sîka mâka kîa painkira ba alus saika wal miks munan ba kintal kum bri balan. 40 Baku bamna Josep bara Nikudimus wal mita Jisas wîna tara ba brin, bamna linin kwalka ni srukan, bara sîka kîa painkira ba ni yukan; baku sika Ju nani ba dauki kan, upla kum pruan wîna tara ba bikaia piua. 41 Jisas dus prihni ra saban pliska ba lamara upla bikaia tasbaya kum bâra kata, bara bahara raiti raya kum bâra kan, kau upla pruan wîna tara bahara mangkras kata. 42 Baha raitika ra witin nani mita Jisas wîna tara ba mangkan, kan baha raitika ba Jisas dus ra saban pliska ba lamara kan bamna, bara Ju nani ris yua kulki kan ba sin pat baila kata.
Jisas raiti wina buan
1 Wik yua pas, Meri Magdalin ba raiti ra wan titan pali, kau tihmia kata witin kaikan, walpa raiti pura prakan kata ba sakan kan. 2 Bamna witin plapi wan Saiman Pita ra bara disaipil wala Jisas mita latwan pali kaiki kan ba ra sin, bara naku win: —¡Upla mita Dawan ba raiti wina saki brih wan, yang nani sin kaikras ani pali ra bri si swin sapa! 3 Pita bara disaipil wala ba kira taki raiti ra wan. 4 Wâlsut plapi auya kan, kuna disaipilka wala ba kau karna plapan Pita ba wal, bamna witin pas raiti ra balan. 5 Witin bawi kaikan linin kwalka nani lika bahara swin kan, kuna raiti bilara lika witin dimras kata. 6 Witin ninara Saiman Pita sin balan, bara ban raiti bilara diman. Saiman Pita kaikan linin kwalka bahara swin kan ba, 7 sakuna Jisas lal ra angsar wilkan kan ba linin kwalka ni baha ba asla apia kan, sakuna karbi tani wala ra swin kata. 8 Disaipilka wala raiti ra pas balata ba sin raiti bilara diman, bamna witin sin kaikan dîa takan ba, bara kasak lukan. 9 Kan witin nani kau Ulbanka tânka kaikras kan, nahki Jisas pruan nani wina kli buaia kan ba. 10 Ningkara, disaipil nani ba kli ai watla ra mahka wan.
Jisas Meri Magdalin ra latan takisa
11 Sakuna Meri Magdalin lika latara raiti ba lamara ini kan. Witin kau ini ban raiti bilara bawi kaikan ba ra, 12 kaikan insal wâl kwala pihni dimi iwi kan, Jisas wîna tara tnikan kan ba pliska ra, kumi ba lal tani bara wala ba mina tani ra. 13 Bamna insal nani ba mita makabi walan: —Mairin, ¿dîa muni inisma ki? Meri Magdalin bila: —Kan yang Dawanki ba saki brih wan, bara yang kaikras anira bri si swin sapa. 14 Meri Magdalin naha aisin na ningkara, witin ai ninara tawi kaikan, Jisas bahara bûi kan, sakuna witin lika kaikras kan baha ba Jisas kata. 15 Baku bamna, Jisas mita makabi walan: —Mairin, ¿dîa muni inisma? ¿Ya plikisma ki? Meri Magdalin luki kan baha lika raiti main kakaira ba, bamna naku win: —Waitna, man mita witin ba brih waram kaka, pliskam ai wis anira bri si swiram ba, bara yang mita witin ba saki brih wamna. 16 Jisas mita win: —¡Meri! Meri Magdalin tawi, Hibru bîla ra win: —¡Rabuni! (baha bîla tânka ba lika “Smasmalkra”). 17 Jisas win: —Ai alkpara, kan yang Aisa bâra ba pliska ra kau uli wih asla takras sni. Sakuna muihki nani ra wih wis, uli auna Aisiki ra bara man nani Aisikam ra, yang Gâdki ra bara man nani Gâdkam ra. 18 Bamna Meri Magdalin mita disaipil nani ra wih maisa pakan, witin pali mita Dawan ba kaikan, bara sturi nani Dawan bui witin ra win ba sin maisa pakan.
Jisas disaipil nani ra latan takisa
19 Baha sim piua tihmika tutni pali ra, disaipil sut asla taki kan, bamna utla durka nani sut prakan kan, Ju nani sîa. Jisas bal dimi, disaipil nani lilapas kat buan, baha nani ra lakula dauki, naku win: —¡Kupia kumi lâka man nani wal kabia! 20 Naha aisin ningkara, ai mihta nani bara ai tnaya mina sin baha nani ra marikan. Disaipil nani lika Dawan kaikan ba ra, lilia pali takan. 21 Baha ningkara Jisas kli win: —¡Kupia kumi lâka man nani wal kabia! Aisa mita yang ai blikan ba baku, yang mita man nani ba mai blikisna. 22 Jisas mita disaipil nani sut ra ai wingka puhbi, naku win: —Man nani Spirit Holikira ba bris. 23 Ani uplika saurka nani ba man nani mita swih tikma kaka, baha nani ba pâtka swih tikan kabia; sakuna ani uplika saurka nani ba swih tikras kaka, baha saurka nani ba ban swih tikan kabia apia.
Dawan raiti wina buan ba Tamas kaikisa
24 Sakuna disaipil nani wina kumi nina Tamas, upla nani mita Sutki wi ba, Jisas balata piua disaipil wala nani tilara witin âpu kan. 25 Bamna ningkara, disaipil wala nani ba mita Tamas ra win: —Yang nani lika Dawan ba kaikri. Sakuna Tamas bila: —Witin ai mihta nani ra silak ni saban untika nani ra bara tnaya mina untika ba ra mihti sirpika ni dingki kaikras sna kaka, yang sip kasak lukamna apia. 26 Yu 8 luan ningkara, disaipil nani ba kli utla kum ra asla taki banhwan kan, bara naha piua lika Tamas sin baha nani tilara kan. Bamna dur nani ba sut prakan kan, sakuna Jisas ban dimi disaipil nani lilapas kat buan, lakula dauki, naku win: —¡Kupia kumi lâka man nani wal kabia! 27 Ningkara Jisas mita Tamas ra win: —Mihtam kulkaika ba nahara dingki, mihti nani na kaiks, bara mihtam ba sakbi tnaiya mina untika na ra dingki kaiks. ¡Bamna lukras ban kapara, sakuna kasak luks! 28 Tamas mita pana win: —¡Yang Dawanki bara yang Gâdki! 29 Bamna Jisas bila: —Tamas, ¿man ai kaikram ba kat ra kasak lukisma? Yamni pali sa baha uplika nani ai kaikras sakuna kasak luki ba.
Naha wauhkataya dukiara
30 Bamna Jisas mita sain aihka wala nani bara wark aihka wala nani sin manis daukan disaipil nani mawanra, sakuna baha nani sut naha wauhkataya ra ulbras sa. 31 Ban sakuna, naha nani na lika ulban sa, man nani kasak lukma Jisas ba Misaya Gâd Luhpia sa, bara naha kasak lukanka nâk raya ban kaia lâka bri kama.
Jisas disaipil 7 ra latan takisa
1 Bamna naha diara nani ningkara, Jisas kli ai disaipilka nani ra latan takan Tiberias lakunka un ra. Baku bamna witin naku daukan: 2 Saiman Pita, Tamas, upla nani mita Sutki mâki kan ba, Natanael, witinka Kena Galili wina ba, Sebedi luhpia nani bara disaipil wala kau wâl ba kumi ra asla kan. 3 Saiman Pita baha nani ra win: —Yang inska alkaia auna. Disaipil wala nani ba bila: —Yang nani sin man wal wamna. Bamna witin nani wih duri kum ra aimakan, sakuna baha tihmika aiska diara kumi sin alkras pali kata. 4 Mahka yu baiwaia man kan ba ra, Jisas lakun un ra bal buan, sakuna disaipil nani kaikan baha ba Jisas sa. 5 Bamna Jisas bila: —Tuktan nani, ¿inska alkram ki? Pana disaipil nani bila: —Diara alkras. 6 Bamna Jisas bila: —Tân ba duri aihkika tani ra lulks, bara inska alkma. Baku daukan, bamna tân ba lî wina kli sip aubi sunras kan, inska uya ailal alkan kan ba mita. 7 Baha disaipilka Jisas mita latwan kaiki kan ba Saiman Pita ra win: —¡Naha na Dawan sa! Saiman Pita lika baha ba Dawan sa win walan ba ra, witin kwala brih ai taya prakan (kan witin ai taya man kan), bamna liura pâli dimwan. 8 Disaipil wala nani lika duri brih lakun un ra wan, tân ba raski brih, inska ni banhwan kan bamna. Baha nani lika sauhka wina ban laihura apia kan, handat yar baman kata. 9 Disaipil nani sauhka ra nan ulan ba ra, kaikan pauta kum mukan kan, bara baha pautika purara inska kum kahban ami kan, bara brit sin bâra kan kaikan. 10 Bamna Jisas bila: —Inska wiria bri bal, bisiura alkram ba wina. 11 Saiman Pita duri ra aimaki tân ba sauhka ra raskan, bara tân ba inska tara ni aibanhwan kan, asla 153 inska nani kata. Inska ailal pali kan sakuna, tân ba kalras kata. 12 Bamna Jisas bila: —Man nani mahka bal, titan pata pis. Disaipil nani tila wina kumi sin makabi walras kata, witin ba ya sa sapa, kan witin nani sut nu kan baha ba Dawan sa. 13 Ningkara, Jisas baha nani lamara wih, brit ba ai mihta ra brih muni disaipil nani ra yan, ningkara inska ba wal sim baku daukan. 14 Naha kat aima yumhpa Jisas ai disaipilka nani ra latan takan, witin pruan wina buan ningkara.
Jisas Saiman Pita wal aisin ba
15 Bamna titan pata pin ba ningkara, Jisas mita Saiman Pita ra makabi walan: —Saiman, Jan luhpia, ¿man ba naha nani purkara yang ra kau latwan ai kaikisma ki? Pita mita pana win: —Âu, Dawan, man kaikisma nahki yang bui man ra latwan sna ba. Jisas bila: —Baku sa kaka, sîpki luhpia nani ba plun dakaks. 16 Kli Jisas aima wala makabi walan: —Saiman, Jan luhpia, ¿latwan ai kaikisma ki? Pita pana win: —Âu, Dawan, man kaikisma nahki yang bui man ra latwan sna ba. Jisas mita win: —Baku sa kaka, sîpki nani ba main kaiks. 17 Jisas aima yumhpa ra kli makabi walan: —Saiman, Jan luhpia, ¿man latwan ai kaikisma ki? Pita naha kat sari takan, kan Jisas naha kat aima yumhpa witin ra latwan kaiki sapa makabi walan bamna. Baku mika Saiman win: —Dawan, man diara nani sut ba kaikisma, bamna man kaikisma yang bui man ra latwan sna ba. Jisas bila: —Baku sa kaka, sîpki nani ba plun dakaks. 18 Bamna yang kasak pali mai wisni, man kau wahma katma ba ra, kwalkam dimi anira waia want kapram ba ra taki wi katma, kuna man almuk takma ba ra, mihtam sakbi brima bara wala kum mita kwalkam mai dingki, bara anira waia want apia sma ba pliska ra mai brih wabia. 19 Jisas naha aisi kan ba lika mariki kan, Pita nahki pruaia kan ba tânka, baku ni Gâd ra mayunaia dukiara. Baha ningkara, Jisas Pita ra win: —¡Nini blîks!
Jisas mita disaipil kum ra latwan pali kaiki kata ba
20 Pita ai ninara tawi kaikan, Jisas mita latwan kaiki kan disaipilka ba ai ninara aula kata. Baha sim disaipilka sika tutni pata pi kan ba ra, Jisas lama pali ra kan, bara witin mita sika makabi walan: “Dawan, ¿ya pali mita waihla mihta ra mai mangkbia ki?” 21 Pita baha disaipilka kaikan ba ra, Jisas ra makabi walan: —Dawan, ¿naha disaipilka na ra dîa takbia? 22 Jisas pana win: —Witin na yang kli balamna kat raya kabia want sna kaka, ¿baha ba dîa sa man mampara? Sakuna man lika yang nini blîks. 23 Bamna baha disaipilka prubia apia sturka ba disaipil nani sut tilara sahwan. Sakuna Jisas lika wiras kan baha disaipilka ba prubia apia, witin win: “Witin na yang kli balamna kat raya kabia want sna kaka, ¿baha ba dîa sa man mampara?” 24 Naha sim disaipilka sika naha diara nani witnis aisi ba bara sin ulban ba. Bamna yawan pain kaikisa, witin aisi ba lika kasak pali sa. 25 Diara kau manis bâra sa Jisas daukan ba, bamna baha nani sut ba ulbaia kaka, kumi bani yang lukisna tasba aiska ra sip alkbia apia.