Momen mome ocvtes, mv nettv take omof, ekvnv omvlkv este e hocefhokv vhonkvthoyvranet cohoyvren Sesv Vkvstvs maken, vhakvn tvlemihocvtes. (Silenevs Selev ofvn evpayvt huerof, heyv vhonkvtkv enhvteceskvn hahoyvtes.) Momen este omvlkvt vhonkvthoyvranen em etvlotv vrahrvkvn vpeyakvtes. Momen Cosef, Kalvle tvlofv Nasvlen aosiyet, Cutevn eceyet, Tewe em etvlofv Perehem ayvtes, (Tewe en cuko momet erhonvpse aosse tatet ok;) Mele ehiwvrane temfaccat nvrkesan vpvken vhonkvthoyvren. Momen mome ocvtes, mvn welakof, heckuecvranvte nettvt fvcfakvtes. Momen e'chuswv hunvnwv enhvteceskvn heckuehcet, vpvllahyet, vpuekv em ohhompetv ofvn wvkecvtes, hompetvcuko ofv em etektvnke sekot omekv. Momen mv ekvnv etvwyn yvpefikvhecicvlket neren en yvpefikv fulle hvmken vhecicet lvpvtken fekhonnvke tates. Momen hecvs, encelvt Pucase enaket oh vlvkakvtes; momen Pucase en hvyayvket em vfoloten hvyvyakvtes; momen tayen penkvlvke tates. Momen encelvt, Ce penkahlvkats, hecvks, afvcketv rakke opunvkv-hervn es cem vlakvkvyet omekv, este omvlkv em ocvranat. Mucv nettvn Tewe em etvlofvn Hesayecv; Pucase Klist tat, cen heckvket omekv. Momen heyvt es cen kerkv tares; Estuce vpvllvket, vpuekv em ohhompetv ofvn wakken eshecatskvres. Momen vyvkhvmkusen encelvlke sulke mahet Hesaketvmesen vkvsvmaket, Momet, Hesaketvmesen vrakkuehocekvs, hvlwe mahaten, momen ekvnvn herkv heromkv tepakat este em ocvkskvs, makaket, encelvn vpvkakvtes. Momen mome ocvtes, encelvt enkvpahket, hvlwen escehyof, yvpefikvhecicvlket ete'm punahoyet, Mucvn Perehem mahusan vpeyet, heyv nake mome Pucase pun kerkuecan er hecvkeres, makakvtes. Momet lvpēcicet yicet, Mele Cosef tepakan, momen estuce vpuekv em ohhompetv ofvn wakken eshecakvtes. Momet hecahkof, heyv estuce ohfvccv nak make em onahoyvten hvmkvn kerkuecakvtes. Momen pohakat omvlkvt nanvke yvpefikvhecicvlke em onvyakat em estomahakvtes. Momis Melet, heyv nanvke omvlkvn vevyecet, e feke ofvn oh vkerricvtes. Momen yvpefikvhecicvlket em onahoyvte vevkvye nanvke pohet, hecakat omvlkv svrahkvn Hesaketvmesen vkvsamet, vrakkuecaket fulecvtes.