/1 Mv nake enhvteceskv vteke ocvte, poheyvte, pu turwv es heceyvte, momet oh heceyvte, momen pu'nke celayvte mv hesaketv em opunvkv aenkvpvkat. Momen hesaketv heckvtet os, momen heceyvtet os, momet kerkueceyet os, momet mv hesaketv em eyuksvseko Erke vpake tate, momet pun kerkuecvkvten ce hecicvkeyet os. Mv nake hece, poheyvten cen kerkuecvkeyet os, cemeyakeu etohkvlketv pum ocatske taren, momen mehenwusen pum etohkvlketv Erke, momet E'ppuce Cesvs Klist vpaket os. Momen cem afvcketv taket fvcke taren heyv nanvke cen coyvkeyet os. Momen opunvkv em poheyvte, momet cen kerkuecvkeyat heyvt omes; Hesaketvmeset hvyayvket omen, eme ofv yomucke seko mahet os. Etohkvlketv emen etemoces, maket, yomucke ofvn yvkvpaken omat, lakseyet os, momet mehenwvn momecekot os. Momis eme hvyayvke ofv likat omen hvyayvke ofvn yvkvpaken omat, etohkvlketv etemoces, momen E'ppuce Cesvs Klist e catvt naorketv omvlkvn pun hvsvtecet os. Naorketvn ocek's, maken omat, e emvkerrevet os, momen mehenwv epu 'pikekot os. Pun naorketvn kerkuecen omat, naorketv pu'nkvpvyecicvret, momet fvccetv tokat omvlkvn pun hvsvtecvret, mvt vkvsvmvkvre oret fvccet omes. Naorkek's, maken omat, emen laksvn hayeyet os, momen em opunvkv epu 'pikekot os. /2 Vn hopuetakuce, naorkatskekaren heyv nanvke cen coyvkit omis; Momen este estomet naorken omat, Erke vpvken em vfastvn oceyet os, Cesvs Klist fvccan.