1 Achtu nemik ne palabraj wan ne palabraj nemik itech ne Teut wan Teut ne palabraj. 2 Uni nemik achtu itech ne Teut. 3 Yaja kichijki muchi wan te tatka muchijtuk asunte tay yaja kichijtuk. 4 Ijtik yaja nemik tay yultuk wan ne tay yultuk itawil ne takamet 5 wan ne tawil tajtawia ijtik kunyua wan ne kunyua inte kipewij. 6 Nemik se takat ká ne Teut kaltitanij itukay Yojan. 7 Uni walaj ma nemi sé pal taneshtia, ma ina ka yek ne tawil, pal kiane muchi kiyulmatit ipanpa yaja. 8 Inte yajuni ne tawil, asunte sema pal ina ka nemi ne tawil. 9 Ne yekkaya tawil ne kintawilua muchi ne ajsiket ne taltikpak. 10 Yaja nemik ijtik ne taltikpak wan yajasan kichijki ne taltikpak, wan ne taltikpak inte kishmatki. 11 Ajsik itech tay ipal wan ne ipal inte kikwijket. 12 Kinmakak tatuktilis ne kikwijket pal muchiwat ikukunew Teut. Kineki ina ne kiyulmatit ne itukay; 13 yejemet inte nesket itech esti nian itech itaelewilis tunakayu nian itaelewilis ne takat; itech ne Teut nesket yejemet. 14 Wan ne palabraj weykakiski wan tutzalan muchantij wan tikitaket tzitzinaka; tzitzinaka ken ikunew se teteku tentuk iwan tetasujtalis ipal ikunew, ne uni ikunew isel kipia. 15 Yojan ina ka tejkia wan tzajtzituk ina: —Ini né, ká ne ninak: "Ká ne nuipan witz nuishpan muchijtuk, ika achtu ka naja nemituya." 16 Ika muchi tejemet tikwijtiwit se takutun ipal uni temilis wan tetasujtalis ipanpa tetasujtalis. 17 Ika ne tajtuli itech Moshe mutemakak; ne tetasujtalis wan ne tejkia itech Yeshu Mawaltijtuk muchijki. 18 Inte keman aka kitztuk ne Teut: ne ikunew Teut ne isel kipishtuk ká nemi tik ielpan iteku - yajuni kineshtij.
Yojan ne teulyujmaka
19 Wan ini tay inak ne Yojan kwak ne Yudayujmet kintitanijket palejmet wan Lewijmet ma kisakan tik Yerushalem wan ma ajsikan itech kitajtaniliat: "Ká taja?" 20 Wan inak ka ijkia, inte inak ka inte; inak ka ijkiuni, ka: —Inte naja ne Mawaltijtuk. 21 Wan kitajtanilijket: —Tay taja tel? Taja ti Eliya? Wan ina: —Naja inte. —Taja ne taketzani? Wan inak: —Inte. 22 Kilwijket tel: —Ká taja pal ma tikinmakakan se nankilis ne waltechtuktijtiwit? Tay tina mupanpa? 23 Inak: —Naja se tzajtzi tik ne kojtan: "Shikmelawakan ne ujti ipal Tutajwan." ijkiunisan ken inak Ishaya ne taketzani. 24 Wan ne mutitanijtiwit sejse pal ne Parishayujmet, 25 wan kitajtanilijket: —Su ijkiuni, ken ka titamaka ulyuj asu taja inte ne Mawaltijtuk, nian ti Eliya, nian ne taketzani? 26 Yaja najnankilij, kinhilwij: —Naja nitamaka ulyuj iwan at. Anmutzalan muajsi se ká inte ankishmatit, 27 yaja nemi pal witz nuipan, wan te niyek nian pal niksutuma ne iishmekayu ne ikak! 28 Ini panuk tik Bet-Anya, sentapal ne apan Yarden, kan ne Yojan tamaka katka ulyuj. 29 Ne ukse tunal, yaja kita ne Yeshu ajsi witz wan ina: —Ini ne iichkakunew ne Teut ne kishtia tay tateyekchijki ne taltikpak. 30 Ini ne, ká ipanpa ninak naja: "Nuipan witz se takat ká nuishpan muchijtuk ika yaja nemik achtu." 31 Naja nusan inte nikishmatki; melka uni, pal ma muneshti ipal Israel niwalaj nitamaka ulyuj iwan at. 32 Wan inak Yojan: —Ika nikitztuk n' Ijiutzin kistuk ka ilwikak waltemu ken wilut wan mutalia ijpak. 33 Naja nusan inte nikishmatki; melka uni, ne nechtuktijtuk pal nitamaka ulyuj iwan at, yajuni nechilwij: "Ká tiaw tikita waltemu ne Ijiutzin wan mutalia ijpak, yaja ne tamaka ulyuj iwan ne Ijiutzin." 34 Wan naja nikitztuk wan ninatuk ka yajini ne Itelpuch ne Teut.
Ne ajachtu mumachtiani
35 Ne ukse tunal senpa nemik ne Yojan, wan ume pal ne imujmumachtiani, 36 wan kitak ne Yeshu pashalua, wan ina: —Ini ne iichkakunew ne Teut. 37 Wan ne ume mumachtiani kikakket taketza wan yajket iipan ne Yeshu. 38 Muishkwepki ne Yeshu wan kinhitak ipan witzet wan kinhilwia: —Tay ankitemuat? Yejemet kilwijket: —Rabi (kineki ina: tamachtiani), kan tinaka? 39 Kinhilwia: —Shiwikan pal ankitat. Yajket tel, wan kitaket kan ne muchantia, wan mukawket iwan uni tunal. Nemituyat achka nawi horaj ka teutak. 40 Andreas, ne iikaw Shimon Pedro, se ipal ne ujume ne kikakket Yojan wan walajket iipan; 41 ne achtu ne iwan munamiki yajini, ne iechkaw, ne Shimon, wan kilwia: —Tikajsitiwit ne Meshiaj (ne kineki ina: ne Mawaltijtuk). 42 Kiwikaket itech ne Yeshu. Ne Yeshu kitak wan inak: —Taja ti Shimon ikunew Yojan. Taja tiaw timunutza Kepas (kineki ina Pedro; tik Nawat: "tet"). 43 Ne ukseuk tunal, kinekik yawi Galilaya. Wan munamiki iwan Pilipo wan ne Yeshu kilwia: —Shiwi nuwan! 44 Ne Pilipo se ipal Bet-Tzaida, ne intechan Andreas wan Pedro. 45 Ne Pilipo munamiki iwan ne Natanel wan kilwia: —Ká ne kitajkwiluj Moshe tik ne tajtuli, wan ne taketzanimet nusan, tikajsitiwita: Yeshu ikunew Yosep ipal Nazaret. 46 Wan Natanel kilwij: —Tik Nazaret weli kisa se tay yek? Ne Pilipo kilwia: —Shiwi wan shikita. 47 Ne Yeshu kitak ne Natanel walejku witz wan ina ipanpa: —Ini ijkia se pal Israel ká inte weli tashijshikua. 48 Natanel kilwia: —Kan tinechishmattuk? Nankilij Yeshu: —Achtu ka Pilipo metznutzki, kwak tinemituya itankupa uni kwawit, nimetzitak. 49 Nankilij Natanel: —Rabi, taja ne itelpuch ne Teut. Taja tiitatuktiani Israel. 50 Nankilij ne Yeshu, kilwij: —Ika nimetzilwij ka nimetzitak itankupa ne kuyu higoj titayulmati. Tiaw tikita sejse mas wejwey que uni. 51 Wan kilwia: —Ini tay nimetzinhilwia: anyawit kitat ne ilwikak mupelua wan ne tanawatianimet ipal ne Teut tejtemut ijpak ne Itelpuch ne Takat.
Ne at mukwepa atata
1 Wan kwak panuket yey tunal, munamiktij se tik Kana ipal Galilaya, wan ne inan ne Yeshu nemituya ikuni. 2 Nusan kinutzket ne Yeshu wan ne imujmumachtiani pal yawit takwat. 3 Wan tamik ne atata, wan ne inan ne Yeshu kilwij: —Atata te kanaj. 4 Wan ne Yeshu kilwia: —Tay tikneki nuwan, siwat? Teuk walaj ne nuhoraj. 5 Ne inan kinhilwia ne tekitinimet: —Shikchiwakan muchi tay ne metzinhilwia. 6 Nemituyat ikuni chikwasen tzutzukul ipal tet sujsul wejwey iwan at pal ne Yudayujmet tapupuat; 7 Yeshu kinhilwia: —Shiktemakan ne tzujtzutzukul iwan at. Wan kintenket hasta tejtentuk, 8 wan kinhilwia: —Ashan shiktilanakan wan shikwikakan itech ne itekuyu ne yualu. Wan kiwikaket. 9 Kwak ne itekuyu ne yualu kiejekuj ne at, mukweptuka atata, wan te kimati kanka walajtuk; ne tekitinimet ne kitilanket ne at kia kimatket. Ne itekuyu ne yualu kinutza ne munti, 10 wan kilwia: —Muchi kitaliat achtu ne atata yek, wan kwak mutawantijtiwita, kishtiat ne yankwik. Taja inte, taja tikanki ne yek atata hasta ashkan!
Ajsik ne teupan
11 Ijkini ne Yeshu pejki kichiwa muchi tay kichijki pal muishmati; tik Kana pal Galilaya taneshtij ken yaja wey wan ne imujmumachtiani kiyulmatket. 12 Tipan yajki ka Kaparnajum iwan ne inan wan iikawan wan ieltiwan wan ne imujmumachtiani, wan nakaket ka né ankakeski tunal. 13 Wan kwak witzaya ne Paskwaj ipal ne Yudayujmet, ne Yeshu tejkuk ka Yerushalem, 14 wan iten ne teupan yaja kinhajsik ne kinamakat wakashmet wan ichkamet wan wijwilut wan ne tuminpatanit muejmuetztuk, 15 wan kichijki se mekat pal tawiteki, wan kinhishtij muchi ijtik ne teupan, nusan ne ichkamet wan ne wajwakash, wan kikushinij ne intujtumin ne tuminpatanimet wan kishtapachuj muchi ne mejmesaj. 16 Kinhilwij ne kinamakat wijwilut: —Shikishtikan uni ka nikan. Ini ne ikal nuteku, maka shikwepakan se tiankis! 17 Ne mumachtianimet kielnamikket ka nemi ijkwilujtuk: "Nechkwa ne devocion ipanpa ne mukal!" 18 Kwakuni nankilijket ne Yudayujmet wan kilwijket: —Tay titechilwitilia pal muishmati taika tikchiwa uni? 19 Najnankilij Yeshu wan kinhilwij: —Shiktzitzinukan ini teupantzin wan ijtik yey tunal naja niketzas. 20 Ne Yudayujmet inaket tel: —Kiketzket ini teupantzin ijtik unpual-chikwasen shiwit, wan taja ijtik yey tunal tiaw tiketza? 21 Yajuni ina katka ipanpa ne teupantzin ipal ne iweyka; 22 yajika, kwak mikik wan muyulkwij, ne mumachtianimet kielnamikket tay nemi ijkwilujtuk wan tay inak ne Yeshu. 23 Kwak nemituya tik Yerushalem tik ne Paskwaj, tik ne ilwit, sujsul miak kiyulmatket kwak tachishket ken yaja kichiwa katka pal muishmati. 24 Yeshu, yaja inte kalinnamik, ika yaja kinhishmati ne inyulu, 25 wan ika inte muneki ma aka taneshti ipanpa ne takat: ika yajasan kimati yek tay nemi tik iyulu ne takat.
Nikodemos
1 Nemik se takat ipal ne Parishayujmet, itukay Nikodemos, se tatuktiani pal ne Yudayujmet. 2 Yajuni ajsik itech ne tayua wan kilwij: —Tajtzin, tikmatit ka tiwalajtuk itech Teut, ika inte aka weli kichiwa muchi uni pal muishmati ken taja tikchiwa su iwan ne Teut inte nemi yaja. 3 Nankilij Yeshu wan kilwij: —Ini tay nimetzilwia: asu inte nesi ka ikajku se, inte weli kita ne itatekimakalis ne Teut. 4 Ne Nikodemos kilwia: —Ken weli nesi se kwak chulet? Anka weli kalaki uksenpa tik iijti ne inan wan mupunia senpa? 5 Yeshu nankilij: —Ini tay nimetzilwia: asu inte nesi se tik at wan Ijiutzin, inte weli kalaki ijtik ne itatekimakalis ne Teut. 6 Ne nestuk tik ne nakat yaja nakat, wan ne nestuk tik ne Ijiutzin yaja Ijiutzin. 7 Maka shishpuyawi ika nimetzilwij: "Nemi pal annesit ka ikajku!" 8 Ne ejekat kishpitza kan kineki, wan melka tikaki kishpitza inte tikmati kanka witz nian kanka yawi. Muchi ne nestiwit itech ne Ijiutzin kiane. 9 Nankilij Nikodemos wan kilwij: —Ken weli muchi ini? 10 Nankilij Yeshu wan kilwij: —Taja titamachtiani ipal Israel wan te tikmati uni? 11 Ini tay nimetzilwia: tinat tay tikmatit wan titaneshtiat tay tikitztiwit, wan te ankikwit tay titaketzat. 12 Asu nimetzinhilwijtuk sejse tay ipal ne tal wan te antayulmatit, asu nimetzinhilwia ne ipal ne ilwikak ken antayulmatisket? 13 Wan te tejkutuk aka tik ne ilwikak asunte yajane ká kiski tik ne ilwikak: ne Itelpuch ne Takat. 14 Wan ijkiunisan ken Moshe kiajkukij ne kuat tik ne kojtan, ijkiuni nemi pal muajkukia ne Itelpuch ne Takat 15 pal muchi ne kiyulmatit ma yujyultuk senpa, 16 ika kiane kitasujtak ne Teut ne taltikpak ken hasta tamakak ne itelpuch ne isel kipiatuya pal muchi ne kiyulmatit ma inte puliwikan asunte ma yujyultuk senpa. 17 Ika ne Teut inte kititanij ne Kunet tik ne taltikpak ma kitenewa ne taltikpak ipanpa tay kichijtuk asunte ma kipalewi ne taltikpak. 18 Ne kiyulmati inte yawi muchiwa juzgar. Ne inte kiyulmati muchijkia juzgar ika inte tayulmatki tik ne ikunew ne Teut ne isel kipishki. 19 Ijkini muchijki juzgar: ka walajsituk ne tawil ijtik ne taltikpak, wan ne takamet mas kielewijket ne kunyua que ne tawil, ika inte yek tay ne yejemet kichijtuyat. 20 Ika ká ne kichiwa tay inte yek kishijia ne tawil wan te ajsi kan nemi ne tawil ma inte kiajajwakan ipanpa tay kichijtuk; 21 ká ne kichiwa tay yek ajsi kan nemi ne tawil ma muneshti tay kichijtuk ika muchi muchijtuk ipal ne Teut.
Tay inak Yojan ne teulyujmaka
22 Tipan ne Yeshu ajsik ne tal ipal Yudaya iwan ne mumachtianimet, wan nakak inwan ka ikuni tamaka ulyuj. 23 Ne Yojan nusan nemituya tamaka ulyuj tik Aynon inawak Shalem ika punit miak at ka ikuni, wan ajsit itech wan kinmaka katka ulyuj, 24 ika inteuk kitzaktuyat Yojan. 25 Ne imujmumachtiani Yojan pejket muishtenewat iwan se Yudayuj ipanpa ne tapupulis. 26 Wan ajsiket itech Yojan wan kinhilwijket: —Tajtzin, yajuni ká nemik muwan sentapal ne apan wan tinak ka yek, shikita, uni tamaka ulyuj wan muchi ajsit itech. 27 Nankilij Yojan wan inak: —Inte weli kikwi tatka se asu ne ilwikak inte kimakatuk. 28 Ankimatit ka ninak ka inte naja ne Mawaltijtuk, asunte nechtitanijtiwit iishpan yajane. 29 Ká kipia ne siwamunti yaja munti; ne ikunpa ne munti, ne naka takaki, yaja paki sujsul kwak kikaki ne munti. Yajika, ini nupakilisyu yekawtuk. 30 Yajuni nemi pal weya; naja ninemi pal nitewaki. 31 Ne witz ka ikajku nemi ijpak muchi. Ne ipal ne tal, yaja ipal ne tal wan taketza ipal ne tal. Ne witz tik ne ilwikak ká nemi ijpak muchi 32 ina tay kitztuk wan takaktuk wan te aka kikwi n' itaneshtilis. 33 Ká ne kikwijtuk ne taneshtilis inatuk ka ijkia ka nemi ne Teut. 34 Ká ne kititanijtuk ne Teut ina tay ipal ne Teut, ika inte kimaka n' Ijiutzin tamachijtuk. 35 Ne teteku kitasujta n' itelpuch wan kimakatuk muchi tik imey. 36 Ká ne kiyulmati ne telpuch yawi yultuk senpa; ká ne inte kitakamati ne telpuch inte yawi yultuk wan n' ikwalan ne Teut yawi naka ijpak.
Yeshu tajtaketza iwan se siwat ipal Shamarea
1 Yajika, kwak kimatki ne Yeshu ka takaktiwit ne Parishayujmet ka Yeshu kichiwa mumachtianimet wan kinmaka ulyuj mas que Yojan 2 (melka Yeshu isel inte tamaka katka ulyuj asunte ne imujmumachtiani), 3 kiajkaw Yudaya wan mukwepki ka Galilaya. 4 Yaja nemituya pal panu ijtik Shamarea. 5 Ajsi tel tik se techan ipal Shamarea itukay Sukar inawak ne tal ne Yakob kimakak Yosep ne ikunew. 6 Ikuni nemituya ne ishat ipal Yakob. Kwakuni ne Yeshu kujkutiak ika pashalua, wan ijkiuni mutalij itech ne ishat. Nemituyat achka tajkutunal. 7 Se siwat ipal Shamarea ajsik kitilana at. Ne Yeshu kilwij: —Shinechmaka chiupi at! 8 Ika ne mumachtianimet yajtuyat tik ne techan kikuat takwal. 9 Kwakuni ne siwat ipal Shamarea kilwia: —Ken ka taja, se Yudayuj, tinechtajtani at se siwat ipal Shamarea? Ika ne Yudayujmet inte sentakwat iwan aka ipal Shamarea. 10 Nankilij Yeshu wan kilwij: —Asu taja tikishmatiskia n' itetakulis ne Teut wan ká ne metzilwia "Shinechmaka chiupi at", tajasan tiktajtaniskia wan metzmakaskia ne at yultuk! 11 Ne siwat kilwia: —Tajtzin, nian se wajkal tikpia wan miktan ne ishat; kanka tikpia ne at yultuk tel? 12 Tina ka taja tiwey mas que ne tuteku Yakob ne techmakak ne ishat wan yajasan atik ka né, wan ne ipilawan wan ne takwalmet? 13 Nankilij Yeshu wan kilwij: —Ká ne kiuni ini at san mukwepas amiki; 14 ká ne kiuni ne at ne niaw nikmaka naja, inte keman amikis, mas yek ne at ne niaw nikmaka yawi muchiwa se ishat kan puni at pal yultuk senpa. 15 Ne siwat kilwia: —Tajtzin, shinechmaka se chiupi pal uni at ma inte niaw niamiki wan ma inte niwiki nikan niktilana at. 16 Kilwia: —Shu shiknutza mushulejyu wan shiwi nikan! 17 Nankilij ne siwat wan kilwij: —Inte nikpia nushulejyu. Ne Yeshu kilwia: —Yek tinak "inte nikpia nushulejyu", 18 ika makwil mushulejyu tikpishtuk, wan ká ne tikpia ashan yaja inte mushulejyu. Tinatuk tejkia! 19 Ne siwat kilwia: —Tajtzin, nikita ka taja titaketzani. 20 Ne tutejteku mutankwaketzket ijtik ini tepet wan anmejemet anhinat ka ijtik Yerushalem nemi ne kan nemi pal timutankwaketzat. 21 Ne Yeshu kilwia: —Siwat, shikmati tay nimetzilwia, witz se horaj kan nian ijtik ini tepet nian ijtik Yerushalem yawit mutankwaketzat iishpan ne Tuteku. 22 Anmejemet anmutankwaketzat wan te ankimatit iishpan ká. Tejemet kia, ika ne tamakishtilis yaja ipal ne Yudayujmet. 23 Melka uni, witz se horaj wan ashan nemia kwak ká ne mutankwaketzat yek yawit mutankwaketzat iishpan ne Teteku tik Ijiutzin wan tik tejkia, ika nusan ne Tuteku kintemua ne mutankwaketzat ijkiuni. 24 Ne Teut yaja Ijiutzin, wan ká ne mutankwaketzat iishpan nemit pal mutankwaketzat itech Ijiutzin wan itech tejkia. 25 Ne siwat kilwia: —Nikmati ka witz ne Meshiaj, ne muilwia Mawaltijtuk. Kwak witz yajuni, yaja techneshtilis muchi. 26 Ne Yeshu kilwia: —Naja ne, ne nimetznutza ninemi!
Tajtaketza iwan ne mumachtianimet
27 Wan kwakuni ajsiket ne mumachtianimet wan ishpuyajket ika tajtaketza nemi iwan se siwat. Melka uni, inte inak aka "Tay tiktemua?" nian "Tay titaketza iwan?" 28 Kwakuni ne siwat kiajkaw ne itzutzukul wan yajki tik ne techan, wan kilwia ne takamet: 29 —Shiwikan, shikitakan se takat nechilwij muchi tay nikchijtuk. Anka yajini ne Mawaltijtuk! 30 Kisket tik ne techan wan ajsiket itech. 31 Kwak inteuk walejkuket, mutajtawelijket ne mumachtianimet, inat: —Tajtzin, shitakwa! 32 Yaja kinhilwij: —Naja nikpiaya nutakwal ne anmejemet inte ankishmatit. 33 Kwakuni ne mumachtianimet muilwijket: —Anka aka kalwikak tatka pal kikwa? 34 Ne Yeshu kinhilwia: —Ne takwal nupal, yaja ma nikchiwa tay kineki ne nechtuktijtuk wan ma niktami ne itekiw. 35 Tejkia ka anhinat ka kinekiuk nawi metzti wan witz ne tapishkal? Nikan nimetzinhilwia: shikajkukikan ne anmujmuish, shitachiakan! Istayatiwita ne mijmil, nemia pal titapishkat! 36 Ne tapishkak kikwi ipatiw wan kisentepewa itakil ma yultuk senpa, pal pajpakit kenhaya ne tatuka wan ne tapishka. 37 Ijtik uni, tejkia tay inat: ka tatuka se wan seuk tapishka. 38 Naja nimetzintitanijtuk pal ankipishkat tay inte anmejemet ankujkutiatiwit; kujkutiatiwit sejseuk wan anmejemet kalaktiwit ijtik intekiw.
Tajtaketza inwan ne techanchanejket wan yawi ka Galilaya
39 Miak pal Shamarea tik uni techan kiyulmatket ipanpa tay inak ne siwat, ne taneshtij ka "nechilwij muchi tay nikchijtuk". 40 Yajika, kwak ne takamet ipal Shamarea walajsiket, kitajtanit katka ma mukawa inwan, wan nakak ka ikuni ume tunal. 41 Wan miak mas kiyulmatket ipanpa tay inatuya, 42 wan kilwijket ne siwat: —Ashan intea ipanpa ne mutajtaketza tikyulmatit, ika tejemetsan titakaktiwit wan tikmatit ka ijkia ini ne tamakishtiani ipal ne taltikpak. 43 Panuket ume tunal wan kisket ka ikuni, wan yajket Galilaya, 44 ika ne Yeshu yajasan kitak ka tejkia ka se taketzani inte kipia ipatiw tik itechan. 45 Kwakuni, kwak ajsik tik Galilaya, ne Galilaya chanejket kikwijket yek. Yejemet kitztuyat muchi tay yaja kichijtuk tik Yerushalem tik ne ilwit, ika yejemet nusan yajtiwit ka né tik ne ilwit.
Tik Kana, Yeshu kipajtia ne ikunew ne itekitini ne tatuktiani
46 Seujti ajsik uksenpa tik Kana, tik Galilaya, kan yaja kichijtuya ka ne at mukwepki atata. Wan né nemik se itekitini ne tatuktiani, wan ne ikunew kukushki tik Kaparnajum. 47 Yajuni, kwak takakik ka Yeshu ajsi witz ka Galilaya, yajki kitajtani ma waltemu wan ma kipajti ne itelpuch ika yawi miki. 48 Ne Yeshu kilwij: —Asu inte ankitat sejse pal muishmati wan sejse tay tetekia, intesu ankimatit tik anmuyujyulu! 49 Ne itekitini ne tatuktiani kilwia: —Tajtzin, shaltemu achtu ma miki ne nukunetzin. 50 Ne Yeshu kilwia: —Shu, ne mutelpuch yawia pajti. Ne takat kimatki tik iyulu tay kilwij ne Yeshu wan yajki. 51 Kwak yaja temuk yajki, ne itejtekitini kinamikket wan kilwijket ka yultuk ne ipiltzin. 52 Kwakuni kintajtanilij tay horaj pejki yektia, wan kilwijket ka ne tutunkayu kiajkaw yalua ka sé horaj. 53 Kwakuni kimatki ne teteku ka tik uni horaj ne Yeshu kilwij: "Ne mutelpuch yawi pajti", wan yaja kiyulmatki wan muchi tik ne ikal nusan. 54 Uni ne seuk pal muishmati ne kichijki ne Yeshu senpa kwak kiski Yudaya wan ajsik Galilaya.
Tapajtia ijtik ne tunal ipal sewilis
1 Tipan nemik se ilwit ipal ne Yudayujmet, wan Yeshu tejkuk ka Yerushalem. 2 Nepa kan mupia katka ne ichkatal tik Yerushalem, nemituya se kan yawit katka maltiat, tik itaketzalis ne Yudayujmet itukay Bet-Jesda. Makwil tenkal kipiatuya, 3 kan mutekat katka sujsul miak kukuyat, pupuyumet, metzkelumet wan tzijtzitzintik. (4) . 5 Nemik ikuni se takat, kichiwa senpual-chikwey shiwit ka yaja kipia ikukulisyu. 6 Kwak ne Yeshu kitak wetztuk yajuni wan kimatki ka kipiaya miak shiwit ijkiuni, kilwia: —Tikneki timutalia yek? 7 Nankilij ne kukuya: —Tajtzin, inte nikpia aka pal nechkalaktia tik ne at kwak mukumuntia; kwak inteuk niajsi iten ne at, temu seuk nuishpan. 8 Ne Yeshu kilwia: —Shimuketza, shikana mutapech wan shinejnemi! 9 Wan yektiak ne takat nemanha wan kianki ne itapech wan pejki nejnemi. Nemituyat ne tunal ipal ne sewilis. 10 Yajika ne Yudayujmet kilwiat katka ne mupajtijtuk: —Tinemit ne tunal ipal sewilis, wan te nemi yek ma shikana mutapech! 11 Wan nankilij: —Ne kichijki ka ninemi yek, yajuni nechilwij "shikana mutapech wan shinejnemi". 12 Kitajtanilijket: —Katiawel ne takat metzilwij "shikana mutapech wan shinejnemi"? 13 Ne mupajtijtuk inte kimati katka ká yaja, ika ne Yeshu muajkewtuk ipanpa ne miaktal. 14 Tipan ne Yeshu kiajsik ne takat iten ne teupan wan kilwij: —Shitachia, ashan tinemia yek. Maka shu shikchiwa tay inte yek pal tea panu muwan tatka inteyek. 15 Yajki ne takat wan kinneshtilij ne Yudayujmet ka Yeshu ne kichijki ka yaja nemia yek.
Ká Yeshu wan tay weli kichiwa?
16 Wan yajika ne Yudayujmet kitalultijket ne Yeshu ika kichiwa katka uni tik ne sewilis. 17 Ne Yeshu najnankilij: —Ne nuteku hasta ashan kichiwa itekiw; naja nusan nikchiwa nutekiw. 18 Yajika tel ne Yudayujmet hasta mas kitejtemuat katka, ika yaja inte semaya kitujtuma ne sewilis; nusan ina ka ne Teut ne iteku: muchiwa katka yajasan kenha ken ne Teut. 19 Kwakuni nankilia ne Yeshu wan kinhilwia: —Ini tay nimetzinhilwia: ne telpuch inte weli kichiwa tatka isel, sema tay ne kita ne iteku kichiwa, ika tay ne kichiwa yajuni, ne itelpuch nusan kichiwa kenha. 20 Ika ne teteku kitasujta ne ikunew wan muchi tay kichiwa kilwitilia, wan kenhayuk mas wejwey kilwitilis ma shiishpuyawikan anmejemet. 21 Ika kenha ken ne teteku kinketza ne miktiwit wan kinyulkwiltia, ijkiuni nusan ne telpuch kiyulkwiltia ká kineki. 22 Nian kitenewa aka ne Teteku ipanpa tay kichijtuk, asunte temakatuk iwan ne ikunew muchi pal kita ká yejyek wan ká inte, 23 pal kiane ma kitakamatikan muchi ne Telpuch ijkiunisan ken kitakamatit ne Teteku. Ká ne inte kitakamati ne Telpuch inte kitakamati ne iteku ká kituktijtuk. 24 Ini tay nimetzinhilwia: ká ne takaki tay nina wan kiyulmati ne nechtuktia, yawi yultuk senpa wan te yawit kitat su yek ush inte, asunte melka miktuk yawi yultuk. 25 Ini tay nimetzinhilwia: witz se horaj wan ashan nemia kwak ne miktiwit yawit kikakit taketza ne itelpuch ne Teut wan ne takakit yawit yujyultuk. 26 Kenha ken ne Teteku nemi yultuk yajasan isel, ijkiuni nusan kimaka ne Ikunew ma nemi yultuk yajasan isel; 27 wan kimakak tatuktilis pal ina ká yek wan ká inte ika yaja ne Itelpuch ne Takat. 28 Maka shiishpuyawikan ika witz se horaj keman muchi ne mikinimet ijtik ne shajshaput yawit kikakit, 29 wan ne kichijtiwit tay yek san kisasket wan muyulkwepasket pal yujyultuk. Ne kichijtiwit tay inte yek kisasket wan muyulkwepasket pal muchiwat juzgar. 30 Naja nusel inte niweli nikchiwa tatka. Ken nitakaki, ijkiuni nina ká yek, wan ken naja nina yaja kiane, ika inte niktemua tay ne nikneki asunte tay ne kineki ne nechtuktijtuk. 31 Asu naja nusel nitaneshtia nupanpa, ne nutaneshtilis inte tatka ipatiw. 32 Seuk taneshtia nupanpa, wan nikmati ka tejkia tay ne yaja taneshtia nupanpa. 33 Anmejemet kititanijtiwit sejse itech Yojan wan taneshtijtuk ne tejkia. 34 Naja inte nikwi taneshtilis itech aka; melka uni, nina ini pal kiane anyawit anmupalewiat. 35 Yajuni katka ne tawil ne tata wan tajtawia. Anmejemet kinekituyat pajpakit se anmuratojchin tik ne itawilyu. 36 Naja nikpia se taneshtilis mas wey que Yojan, ika ne nutekiw ne nechmakatuk ne Nuteku pal ma niktami, uni nutekiw tay naja nikchiwa taneshtia nupanpa, ika ne Nuteku nechtitanijtuk. 37 Wan uni Nuteku ne nechtuktijtuk taneshtijtuk nupanpa; Nuteku ká ne anmejemet inte keman kikaktiwit nian kitztiwit, 38 wan ne ipalabraj inte naka ijtik anmejemet, ika inte ankiyulmatit ká ne yaja kititanij. 39 Shitatejtemukan tik tay nemi ijkwilujtuk, ika anhinat ka ijtik yaja ankipiat pal anyujyultuk senpa, wan uni kan taneshtia nupanpa, 40 wan te ankinekit anhajsit nutech pal anyujyultuk! 41 Inte nikita yek ma inakan takamet ka niwey; 42 melka uni, nimetzinhishmati, wan ijtik anmejemet inte ankipiat pal ma shiktasujtakan ne Teut. 43 Naja niwalajtuk tik itukay ne Nuteku wan te annechkwit. Asu witz seuk tik itukay, yaja ankikwisket. 44 Ken welit ankiyulmatit kwak anhinat ne se ka wey ne seuk wan anhinat ka uni nemi yek, wan te ankitemuat ma wiki itech ne Teut ne isel nemi? 45 Maka shinakan ka naja niaw nimetzintenewa iwan ne Teteku; nemi se ká yawi metzintenewa: Moshe yajasan, ká ne ankiyulmattiwit. 46 Ika su ankiyulmatiskiat Moshe, naja annechyulmatiskiat ika yajuni tajkwiluj nupanpa. 47 Asu inte ankiyulmatit tay ne yaja kijkwilujtuk, ken anyawit kiyulmatit tay ne nina naja?
Yeshu kitakwaltia se miaktal
1 Tipan ne Yeshu yajki sentapal ne weyat ipal Galilaya, ne ipal Tiberias. 2 Se wey miaktal yajket iipan ika kitaket muchi tay kichiwa katka iwan ne kukuyat. 3 Tejkuk Yeshu ijtik ne tepet wan ikuni mutalij iwan ne mumachtianimet. 4 Witzaya ne Paskwaj, ne ilwit ipal ne Yudayujmet. 5 Kwakuni ne Yeshu ajkutachishki wan kitak ka sujsul miak ajsit itech. Wan kilwia Pilipo: —Kanka tiawit tikuat tajtamal pal ma takwakan? 6 Inak uni pal kiejekua, ika yaja kimatiaya tay yawi kichiwa. 7 Nankilij ne Pilipo: —Ume tzunti tumin tajtamal inte techajsit pal takwat muchi yejemet chiupi. 8 Se pal ne mumachtianimet, Andreas ne iikaw Shimon Pedro, kilwia: 9 —Nemi ka nikan se takapiltzin ne kipia makwil tamal ipal cebadaj wan ume michin. Tay uni ipal muchi ne tukniwan? 10 Yeshu inak: —Ma mutalikan talchi ne tukniwan. Ika nemituya wey sakat ka né. Mutalijket tel, wan yejemet achka cinco mil. 11 Ne Yeshu kitzkij ne tajtamal wan inak panpadiush, wan kinmajmakak ne mutalijtiwit, wan kenhaya ne mijmichin, keski kinekituyat. 12 Kwak ishwitiwit, kinhilwia ne mumachtianimet: —Shiktepewakan ne pusul ma inte puliwi tatka. 13 Kitepewket tel wan kitenket majtakti-ume chikiwit iwan pusul naktuk kwak tamiket kikwat ne makwil tamal ipal cebadaj. 14 Kwakuni kwak muchi kitaket tay ne kichijtuk pal muishmati, inat katka ka ijkia ka yajini ne taketzani ne yawi witz tik ne taltikpak. 15 Kwakuni ken Yeshu kimati katka ka yawit witzet kitzkiat pal kichiwat ma yaja tatuktiani, yajki senpa yaja isel tik ne tepet.
Yeshu nejnemi ijpak ne at
16 Kwak tayuakik waltemuket ne mumachtianimet ka tenhat, 17 wan kalakket tik se barcoj wan yawit sentapal ne weyat, ka Kaparnajum. Wan kunyuaya wan ne Yeshu inteuk walaj, 18 wan kishpitza wey ejekat wan ne at pejki kumuni. 19 Kwakuni, kwak yajtiwita achka makwil ush chikwasen kilometroj ijtik ne at, kitaket ne Yeshu nejnemi witz ijpak ne at wan yawi ajsi inawak ne barcoj, wan majmawit. 20 Yaja kinhilwij: —Naja ne! Maka shimajmawikan! 21 Kwakuni kinekiket kikwit tik ne barcoj wan nemanha ajsik ne tal kanka yasnekit.
Ne tamal yultuk
22 Ne ukse tunal, ne takamet wan siwatket ne nakaket sentapal ne at kitaket ka inte kanaj ka ikuni ukse barcojtzin, sema se, wan ne Yeshu inte kalaktuya iwan ne mumachtianimet tik ne barcoj wan ne mumachtianimet yajket insel. 23 Uksejse barcoj ipal Tiberias ajsiket nepa inawak kan kikwajtuyat ne tamal teuchijtuk ipal ne Tajtzin. 24 Kwakuni, kwak muchi kitaket ka Yeshu inte nemituya ikuni, nian ne mumachtianimet, yejemet kalakket ijtik ne bajbarcojtzitzin wan yajket Kaparnajum pal kitemuat ne Yeshu. 25 Wan kwak kiajsiket sentapal ne at kilwijket: —Tajtzin, keman tiajsik nikan? 26 Ne Yeshu nankilij wan inak: —Ini tay nimetzinhilwia: Annechtejtemuat inte ika ankitztiwit sejse pal muishmati, asunte ika ankikwajket ne tajtamal wan anhishwitiwit. 27 Maka shitekitikan pal ankitemuat ne takwal ne puliwi, asunte ne takwal ne mukawa pal yultuk senpa se; ne takwal ne yawi metzinmaka n' Itelpuch ne Takat, ika ne Teteku ne Teut kitetilijtuk. 28 Kwakuni kilwijket: —Tay welit tikchiwat pal tikchiwat ne tutekiw ipal ne Teut? 29 Yeshu nankilij wan kinhilwij: —Ini ne anmutekiw ipal ne Teut: ma shikyulmatikan ne ká ne Teut kititanijtuk. 30 Kwakuni kilwijket: —Taja tay tikchiwa tel ken se pal muishmati, ma tikitakan wan ma timetzyulmatikan? Tay mutekiw tikchiwa? 31 Ne tutejteku kikwajket ne manaj kan inte nemituya tatka, ken nemi ijkwilujtuk: "Tamal ipal ne ilwikak kinmakak pal kikwat." 32 Kwakuni ne Yeshu kinhilwij: —Ini tay nimetzinhilwia: inte Moshe metzinmakak ne tamal ipal ne ilwikak ne tejkia, 33 ika ne itamal ne Teut yaja ne kisa tik ne ilwikak wan waltemu ma yultuk ne taltikpak. 34 Kwakuni kilwijket: —Tajtzin, shitechmaka uni tamal mujmusta. 35 Ne Yeshu kinhilwij: —Naja ne tamal yultuk. Ká ajsi nutech inte yawi mayana, wan ká nechyulmati inte keman yawi amiki. 36 Wan nimetzinhilwijtuk: melka annechitztiwit, inte annechyulmatit. 37 Muchi tay nechmaka ne Teteku nutech ajsi, wan ne ajsi nutech intesu nikishtis, 38 ika inte naltemutuk ka ilwikak pal nikchiwa tay ne nikelewia asunte n' itaelewilis ne nechtuktijtuk. 39 Ini n' itaelewilis ne nechtuktijtuk: ma inte nikpulu tatka ipal muchi tay nechmakatuk, wan ma niketza muchi tik ne tipan tunal. 40 Ika ini tay kielewia ne Nuteku: ma yultuk senpa muchi ká kitat ne Telpuch wan kiyulmatit, wan ma naja niketza tik ne tipan tunal. 41 Yajika ne Yudayujmet pejket kikinakat ipanpa, ika inak: "naja ne tamal waltemutuk ka ilwikak", 42 wan inat katka: —Su yajuni Yeshu ikunew Yosep! Tikishmatit ne iteku wan ne inan! Ken ka ina ashan ka waltemutuk ka ilwikak? 43 Najnankilij Yeshu wan kinhilwij: —Maka shinemikan kikinakat ijtik anmejemet! 44 Inte aka weli ajsi nutech asunte ká ne Nuteku kaltilana, wan naja niaw niketza tik ne tipan tunal. 45 Nemi ijkwilujtuk ijtik ne iajamaw ne taketzanimet: "Wan muchi muchiwasket majmachtijtuk ipal Teut." Ká ne takaktuk itech ne Teteku wan mumachtijtuk, ajsi nutech: 46 inte ika se kitztuk ne Teteku, asunte ne ipal ne Teut, yajuni kitztuk ne Teteku. 47 Ini tay nimetzinhilwia: ne tayulmati yawi yultuk senpa. 48 Naja ne tamal yultuk. 49 Ne anmutejteku kikwajket ne manaj kan inte takati tatka, wan miktiwita. 50 Ini ne tamal ne waltemu ka ilwikak pal ma kikwa se pal te miki. 51 Naja ne tamal yultuk ne waltemu ka ilwikak. Asu se kikwa ini tamal, yawi yultuk senpa, wan ne tamal ne niaw nitamaka, yaja ne nunakayu ipatka ma weli yultuk ne taltikpak. 52 Kwakuni ne Yudayujmet pejket musumat, muilwiat: —Ini ken weli techmaka ne inakayu pal tikwat? 53 Kwakuni ne Yeshu kinhilwij: —Ini tay nimetzinhilwia: asu inte ankikwat ne inakayu ne Itelpuch ne Takat wan ankiunit ne iesyu, inte anyawit yujyultuk ijtik anmejemet. 54 Ne kikwa ne nunakayu wan kiuni ne nuesyu yawi yultuk senpa wan naja niaw niketza tik ne tipan tunal, 55 ika ne nunakayu yaja yekkaya takwal wan ne nuesyu yaja yekkaya at. 56 Ne kikwa ne nunakayu wan kiuni ne nuesyu mukawa ijtik naja wan naja ijtik yaja. 57 Ijkiunisan ken nechtitanijtuk ne Teteku yultuk wan naja ninemi yultuk ipanpa ne Teteku, ká ne nechkwa yaja nusan yawi yultuk nupanpa. 58 Ini ne tamal waltemutuk ka ilwikak, inte ken kikwajket ne tetekuwan wan mikiket; ká ne kikwa ini tamal yawi yultuk senpa. 59 Uni tay inak kwak tamachtia ijtik ne kalsennemit tik Kaparnajum. 60 Miak mumachtiani ká kikaktiwit inaket: —Uni tay inatuk uij. Ká weli kikaki? 61 Ne Yeshu kimati katka ka ne mumachtianimet kikinakat ipanpa uni, wan kinhilwij: —Uni metzintekukujmati? 62 Asu ankitaskiat tejku ne Itelpuch ne Takat, kanka nemik achtu? 63 Ne iijiu se kichiwa ka yultuk, ne inakayu inte tatka kichiwa. Uni tay naja nimetzinhilwijtuk, yaja iijiu wan yajaya tay yultuk. 64 Melka uni, sejse anmejemet inte tayulmatit. Ika kwak pejki kimatiaya ne Yeshu ká ne inte tayulmati wan ká ne yawi temaka, 65 wan inak: —Neka nimetzinhilwijtuk ka inte aka weli ajsi nutech asu ne Teteku inte kimakatuk. 66 Yaja kwak miak imumachtiani kiajkawket wan tea senyajket iwan. 67 Kwakuni ne Yeshu kinhilwij ne majtakti-ume: —Anka nusan ankinekit anyawit? 68 Najnankilij Shimon Pedro: —Tajtzin, ká itech tiasnekit? Tikpia ne pajpalabraj pal ma tiyujyultuk senpa! 69 Wan tejemet titayulmatit wan tikishmatit ka taja tiipal ne Teut. 70 Nankilij ne Yeshu: —Inte najasan nimetzinhishpejpen ne majtakti-ume, wan se itzalan anmejemet ne Tamintuk! 71 Kinekituya ina Yuda ikunew Shimon Ishkaryot, ika yajuni yawi temaka, wan yaja se pal ne majtakti-ume.
Ne iikawan Yeshu
1 Tipan ne Yeshu pejki pashalua tik Galilaya; inte kinekituya pashalua tik Yudaya ika ne Yudayujmet kitemuat pal kimiktiat. 2 Witzaya ne inhilwiw ne Yudayujmet itukay Tawipanpikilis, 3 wan ne iikawan kilwijket: —Shu Yudaya pal kiane ne mumujmumachtiani nusan yawit kitat tay tikchiwa, 4 ika te aka kichiwa tatka ichtaka ká kineki ma muchi kitakan. Asu tikchiwa uni, shimuneshti ishpan muchi ne taltikpak! 5 Ika nian ne iikawan kiyulmatit. 6 Kwakuni ne Yeshu kinhilwia: —Nupal ne tunal inteuk ajsik, wan anmupal senpa nemi. 7 Ne taltikpak inte weli metzinhishijia; naja kia nechishijia ika nitaneshtia ka inte yek tay kichijtuk. 8 Anmejemet shitejkukan Yerushalem ipal ne ilwit. Naja inte nitejku tik ini ilwit ika inteuk yekajtuk ne tunal nupal. 9 Kinhilwij ijkiuni wan nakak Galilaya. 10 Kwak tamiketa tejkut ne iikawan, kwakuni yaja nusan tejkuk ka né, inte ishpan muchi asunte ichtaka.
Yeshu tamachtia iten ne teupan
11 Kiane tel, ne Yudayujmet pejket kitemuat tik ne ilwit wan inat: —Kanka nemi yajuni? 12 Wan pejket kikinakat sujsul ijtik muchi: sejse inat katka ka yek; sejseuk inat katka: —Te ijkiuni, yaja kinshijshikua ne tukniwan. 13 Melka uni, inte aka taketza katka melaknaj ika muchi majmawit inpanpa ne Yudayujmet. 14 Tatajku ne ilwit, tejkuk Yeshu iten ne teupan wan pejki tamachtia. 15 Yajika ishpuyajket ne Yudayujmet, inat: —Yajuni ken ka kishmati ne ajamat mal te keman mumachtij? 16 Kwakuni najnankilij ne Yeshu, wan kinhilwij: —Ne nutamachtilis inte nupal asunte ipal ne nechtuktijtuk. 17 Asu aka kichiwaskia ne itaelewilis, yaja san kimatis asu ne tamachtilis ipal ne Teut ush nusel nitanutza. 18 Ká ne tanutza isel tatejtemua ma inakan ka yaja wey. Ká ne tatejtemua ma inakan ka wey ne kituktijtuk, uni ina tay tejkia wan te nemi ijtik yaja tatka tay inte yek. 19 Inte metzinmakak Moshe ne tajtuli? Wan te aka ijtik anmejemet kichiwa tay tatuktia ne tajtuli. Taika annechtemuat pal annechmiktiat? 20 Nankilijket ne tukniwan: —Tikpia se nawal! Ká metztemua pal metzmiktia? 21 Nankilij Yeshu wan kinhilwij: —Nikchijtuk se wan muchi anhishpuyawit! 22 Yajika tel, Moshe metzinmakak ne tayawaltekilis (yajini inte walaj itech Moshe asunte intech ne tetekuwan) wan antayawaltekit tik ne sewilis. 23 Asu muyawalteki se tik ne tunal ipal sewilis ma inte mutujtuma ne itajtuli Moshe, ken ka anmuishkwalantiat nuwan ika naja nikpajtijtuk muchi ne iweyka se tik ne sewilis? 24 Maka shiktenewakan aka ipanpa ken muita asunte ken muneki ipanpa tay yek.
Kanka walajtuk Yeshu?
25 Kwakuni inat katka sejse pal ne Yerushalemchanejket: —Inte yajuni kitemuat pal kimiktiat? 26 Wan shikita! Tanutza nemi wan te kilwiat tatka! Anka ijkia ne tatuktianimet kimatit ka yaja ne Mawaltijtuk... 27 Semaya ka tikmatit kanka witz yajuni; kwak yawi witz ne Mawaltijtuk, inte aka kimati kanka witz. 28 Tamachtia nemi ne Yeshu iten ne teupan wan tzajtzik, ina: —Annechishmatit, wan nusan ankimatit kanka niwitz. Inte niwalajtuk nutech asunte ne nechtuktijtuk ne inte ankishmatit, yaja tejkia. 29 Naja nikishmati ika niwalaj itech wan yajuni nechtitanijtuk. 30 Kwakuni mutatemuilijket pal kipewiat, wan te aka kitalij ijpak se imey ika inteuk ajsituya ihoraj. 31 Miak pal ne tukniwan kiyulmatket, wan inat katka: —Kwak witz ne Mawaltijtuk, inte yawi kichiwa mas pal muishmati, semaya ken yajuni? 32 Ne Parishayujmet kikakket ne tukniwan kikinakat ika inat ijkiuni, wan ne weypalejmet wan ne Parishayujmet kititanijket tekitinimet pal kipewiat. 33 Kwakuni ne Yeshu inak: —Sema ninemi achi anmuwan wan niawa kan nemi ne nechtuktijtuk. 34 San annechtemusket wan te anyawit annechajsit, wan kan niaw ninemi naja inte anwelisket ankalakit. 35 Kwakuni ne Yudayujmet muilwijket: —Kanka yasneki ka tejemet inte tiawit tikajsit? Anka yasneki intech ne musentalujtiwit tik tepal tal pal kinmachtia ne Greciajchanejket? 36 Tay kineki ina kwak inatuk: "San annechtemusket wan te anyawit annechajsit, wan kan niaw ninemi naja inte anwelisket ankalakit"?
Tay inak tik ne tipan tunal ipal ne ilwit
37 Tik ne tipan tunal, ne mas wey ipal ne ilwit, muketzki ne Yeshu wan tzajtzik: —Asu aka amiki, ma wiki nutech wan ma ati. 38 Ká ne nechyulmati, ijkiunisan ken ina kan nemi ijkwilujtuk, ijtik yaja yawit punit ajat mutaluat iwan at yultuk. 39 Inak uni ipanpa ne Ijiutzin ne yawit kikwit ne kiyulmatit, ika inteuk nemituya ijiutzin ika inteuk mumatki ka Yeshu wey. 40 Ijtik ne miaktal tel, kwak takakket tay inak pejket inat: —Uni kia se taketzani. 41 Uksejse inat: —Ini ne Mawaltijtuk! Sejse inat: —Ken ka witz tik Galilaya ne Mawaltijtuk?! 42 Inte muijkwiluj ka itech ne ishinach Dawid wan tik ne techan ipal Bet-Lejem, kan nemi katka Dawid, yawi witz ne Mawaltijtuk? 43 Neka mutakutuntijket. 44 Sejse pal yejemet kinekituyat kipewiat; melka uni, inte aka kitalij ijimey ijpak. 45 Kwakuni ajsiket ne tekitinimet itech ne weypalejmet wan Parishayujmet wan kinhilwijket: —Taika inte ankiwikaket? 46 Nankilijket ne tekitinimet: —Ijkiuni inte keman taketzki aka. 47 Kwakuni ne Parishayujmet kinhilwijket: —Anka anmejemet nusan anmushijshikujtiwit? 48 Niakeman aka ipal ne tatuktianimet kiyulmatket ush ne Parishayujmet? 49 Wan tetekia iwan ini miaktal ne inte kimati ne tajtuli! 50 Kinhilwij Nikodemos (yaja ne achtu ajsik itech, wan se pal yejemet): 51 —Anka ne tutajtuli kitenewa se takat asu inte kikaktuk wan kimati tay kichiwa? 52 Najnankilijket wan kilwijket: —Taja nusan tiipal Galilaya? Shimumachti wan tiaw tikita ka tik Galilaya inte muiskalis nian se taketzani! 53 Wan yajket sejse ka ichan.
Ne siwat mawiltiani
1 Yeshu yajki tik ne Olivajtepet. 2 Kwak tanesik yaja ajsik ne teupan senpa wan muchi ne tukniwan ajsiket itech, wan mutalij kinmachtia. 3 Ne tajkwiluanimet wan ne Parishayujmet kalwikaket se siwat ká ne kitzkijtuyat kwak mawiltia nemi wan kitalijket né tatajku 4 wan kilwiat: —Tamachtiani, kitzkijtiwit ini siwat kwak mawiltia iwan ukse takat. 5 Tik ne tajtuli Moshe techtuktij ma mutejtemimakan ne mawiltianimet; taja tay tina? 6 Inat katka uni pal kiejekua ma ina se pal welit kitenewat. Ne Yeshu mupatachuj wan mutalij tawawasua ijpak ne tal iwan ne imapipil. 7 Nakaket kitajtaniliat wan yaja ajkutachishki wan kinhilwij: —Ká ipal anmejemet ne inte kichijtuk tatka teyek? Ma yaja kitamutili ini siwat ne achtu tet. 8 Wan mupatachuj senpa tawawasua ijpak ne tal. 9 Muchi ne kikaktiwit pejket kisat sejse ika, ne noymet ne ajachtu, hasta yaja mukawki isel iwan ne siwat né tatajku. 10 Ne Yeshu ajkutachishki wan kilwij ne siwat: —Kan nemit? Inte metzilwijtuk aka tatka? 11 Yaja inak: —Inte, tajtzin. Yeshu inak: —Naja nusan inte nimetzilwia tatka. Shu wan makaya shikchiwa tay teyek.
Naja n' itawil ne taltikpak
12 Kwakuni Yeshu kinnutzki senpa wan ina: —Naja n' itawil ne taltikpak. Ká ne yawi nuipan intea nejnemis tik kunyua, kipias ne tawil yultuk. 13 Kwakuni ne Parishayujmet kilwijket: —Taja musel titaneshtia mupanpa. Ne mutaneshtilis inte tatka ipatiw! 14 Yeshu nankilij, kinhilwij: —Melka naja nusel nitaneshtia nupanpa, ne nutaneshtilis tejkia ika nikmati kanka niwalajtuk wan kanka niaw. Anmejemet inte ankimatit kanka niwitz ush kanka niaw. 15 Anmejemet tatenewat ipanpa tay kichijtuk n' iweyka. Naja inte niktenewa aka ipanpa tay kichijtuk. 16 Wan melka uni asu naja nitatenewaskia, ninaskia ne tejkia ika inte ninemi nusel asunte naja wan ne nechtuktijtuk. 17 Nusan nemi ijkwilujtuk tik anmutajtuli ka asu taneshtiat ume, tejkia: 18 naja ne taneshtiani nupanpa, wan ne nuteku ne nechtuktijtuk taneshtia nupanpa. 19 Kwakuni kilwiat: —Kan nemi ne muteku? Nankilij Yeshu: —Nian annechishmatit, nian ankishmatit ne nuteku. Asu annechishmatiskiat, nusan ne nuteku ankishmatiskiat. 20 Ijkiuni tanutzki itech ne teupan, inawak ne cajaj kan musentepewa katka ne tumin, kwak tamachtia nemi, wan te aka welituya kipewia ika inteuk walajtuk ne ihoraj.
Ne inte kiyulmatit
21 Kwakuni kinhilwij senpa: —Naja niawa, wan san annechtemusket, wan tik ne tay antateyekchijtiwit yawit anmikit. Kan naja niaw inte anwelit ajsit. 22 Kwakuni ne Yudayujmet inat katka: —Anka yaja isel yawi mumiktia? Ika ina ka "kan naja niaw inte anwelit ajsit". 23 Wan kinhilwij: —Anmejemet ipal ne katani, naja niipal ne ajku. Anmejemet ipal ini taltikpak; naja inte niipal ini taltikpak. 24 Yajika nimetzinhilwij ka yawit anmikit tik ne tay antateyekchijtiwit, ika asu inte ankimatit ka naja ne, yawit anmikit tik ne tay antateyekchijtiwit. 25 Kwakuni kilwijket: —Ká taja? Ne Yeshu kinhilwij: —San yaja ká nimetzinhilwia senpa. 26 Melka nikpia miak pal nina anmupanpa wan pal nimetzinchiwa juzgar, ne nechtuktijtuk yekkaya wan tay ne nikaktuk itech naja nitaketza tik ne taltikpak. 27 Inte kimatket ka yaja kineki ina ne Tuteku. 28 Yajika ne Yeshu kinhilwij: —Kwak yawit ankiajkukiat n' Itelpuch ne Takat, kwakuni ankimatisket ka naja ne, wan nusel te nikchiwa tatka, sema ken nechmachtij ne Nuteku, ijkiunisan nitaketza, 29 wan ne nechtuktijtuk nemi nuwan, inte nechajkaw nusel, ika naja senpa nikchiwa tay ne ipal ajwiak. 30 Kwak taketza katka ijkiuni, miak kiyulmatket.
Yeshu wan Abraham
31 Kwakuni Yeshu kinhilwij ne Yudayujmet ne kiyulmatket: —Asu annakat ijtik ne nupalabraj, ijkia annumujmumachtiani, 32 wan yawit ankishmatit ne tejkia, wan ne tejkia yawi metzinmakishtia. 33 Yejemet nankilijket: —Tejemet tiipilawan Abraham, wan te keman titekitket ipal aka. Ken tina ka yawit techmakishtiat? 34 Ne Yeshu nankilij: —Ini tay nimetzinhilwia: ka ká ne kichiwa tay teyek, yaja itekitini ne tateyekchijtuk. 35 Ne tekitini inte naka tik ne ikal senpa; n' itelpuch n' itekuyu naka pal senpa. 36 Yajika, asu ne Telpuch metzinmakishtia, tejkia yawit anmumakishtiat. 37 Nikmati ka melka anhipilawan Abraham, anmutatemuiliat pal nechmiktiat ika ne nupalabraj inte weli ijtik anmejemet. 38 Naja nitaketza tay ne nikitztuk itech nuteku, wan anmejemet ankichiwat tay ne ankikaktiwit itech anmuteku. 39 Nankilijket wan kilwijket: —Ne tuteku yaja Abraham. Ne Yeshu kinhilwia: —Asu anhikukunew Abraham, n' itekiw ne Abraham ankichiwaskiat. 40 Ashan anmutatemuiliat nechmiktiat, se ká nimetzinhilwijtuk tay tejkia, tay ne nikakik itech ne Teut. Uni inte kichijki Abraham. 41 Ankichiwat n' itekiw ne anmuteku! Kwakuni kilwijket: —Tejemet inte tinestiwit tik tatzinhejenchiwalis. Se tuteku tikpiat: ne Teut. 42 Ne Yeshu kinhilwij: —Asu anmupal ne Teut, annechtasujtaskiat, ika naja itech ne Teut nikistuk wan niwitz, nian niwalajtuk nusel asunte nechtitanij Yajane. 43 Taika inte ankimatit tay nitaketza? Ika inte welit ankikakit tay nina. 44 Anmejemet ipal anmuteku ne Tamintuk, ankinekit ankichiwat tay kielewia anmuteku. Yajuni nusan kwak pejki muchi takamiktiani katka, wan te naka tik ne tejkia ika te kanaj tejkia ijtik yaja. Kwak ina sanka, ina tay ipal, ika sankataketza wan yaja n' iteku. 45 Ika naja nina ne tejkia inte annechyulmatit. 46 Ká ijtik anmejemet nechajajwa ipanpa se tateyekchijtuk? Asu nina tejkia, taika inte annechyulmatit? 47 Ká ne ipal ne Teut, takaki tay ina ne Teut. Yajika inte antakakit, ika anmejemet inte ipal ne Teut. 48 Nankilijket ne Yudayujmet wan kilwijket: —Yek tinat ka taja tiipal Shamarea wan se nawal tikpia! 49 Nankilij Yeshu: —Naja nawal inte nikpia, asunte niktakamati ne nuteku wan anmejemet inte annechtakamatit. 50 Naja inte niktemua ma inakan ka niwey. Nemi se tatemua wan ina ká yek. 51 Ini tay nimetzinhilwia: asu aka tajpia nupalabraj, inte keman yawi miki. 52 Ne Yudayujmet kilwijket: —Ashan kia tikmatit ka tikpia se nawal. Abraham mikik wan ne taketzanimet nusan, wan taja tina "asu se tajpia nupalabraj, inte keman yawi kiekua mikilis"! 53 Anka taja mas yek que ne tuteku Abraham ká mikik, wan ne taketzanimet ne mikiket? Ká tina ka taja? 54 Nankilij Yeshu: —Asu naja nusel nina ka niwey, inte tatka. Nuteku yaja ká ina ka niwey; yajasan ká anmejemet inat "yaja Tuteut", 55 wan te ankishmatit. Naja nikishmati, wan melka ninaskia ka inte nikishmati nimuchiwaskia sankataketza ken anmejemet. Naja nikishmati wan nitajpia tay inatuk. 56 Abraham anmuteku muyulkwesuj pal kita ne tunal nupal, wan kitztuk wan pajpakituk. 57 Kwakuni ne Yudayujmet kilwijket: —Inteuk tikpia unpual-majtakti shiwit wan tikitztuk Abraham? 58 Yeshu kinhilwij: —Ini tay nimetzinhilwia: achtu ka muchijki Abraham, naja ninemi. 59 Kwakuni kiketzket tejtet pal kitamutiliat. Yeshu minashki wan kiski tik ne teupan.
Kipajtia se pupuyut
1 Wan kwak panu ka né kitak se takat ne nestuya pupuyut, 2 wan ne mumachtianimet kitajtanket: —Rabi, ká tateyekchijki pal ma nesi pupuyut, yajuni o ne itejteku? 3 Yeshu nankilij: —Nian yajuni tateyekchijki, nian ne itejteku, asunte pal ma muneshti ijtik yaja tay weli kichiwa ne Teut. 4 Tinemit pal tikchiwat ne itekiw ne nechtuktijtuk kwak uk nemi ne tunal; walas ne tayua, keman inte weli aka tekiti. 5 Kwak ninemiuk ijtik ne taltikpak, naja ne itawil ne taltikpak. 6 Kwak tamik ina ini, tachijchak talchi wan kichijki sukit iwan ne itachijchal wan kimawaltij ne ijish uni takat iwan ne sukit, 7 wan kilwij: —Shu shimuapaka tik ne kan maltiat, itukay Shilo (kineki ina: Titanijtuk). Yajki tel wan muapakak, wan kwak mukwepki welituya tachia. 8 Kwakuni ne ichantakawan, wan ne kitztiwit tajtani achtu, inat: —Su yajini ne mutalia katka tajtani! 9 Seki inat ka yaja né, wan seki inat ka te, ka ukseuk. Yajuni inak: "Naja né!" 10 Kwakuni kilwijket: —Ken mupelujket ne mujmuish? 11 Nankilij: —Uni takat itukay Yeshu kichijki sukit wan kimawaltij ne nujnuish wan nechilwij: "Shu ka Shilo timuapaka ka né." Niajki wan nimuapakak wan welik nitachia. 12 Wan kilwijket: —Kan nemi yajuni? Ina: —Inte nikmati. 13 Kiwikat ne katka pupuyut itech ne Parishayujmet. 14 Nemituyat ne sewilis tik ne tunal kwak ne Yeshu kichijki ne sukit wan kitapuilij ne takat ne ijish. 15 Ne Parishayujmet nusan kitajtanilijket ken welik tachia. Yaja kinhilwij: —Kitalilij sukit ne nujnuish wan nimuapakak wan ashan nitachia. 16 Kwakuni inat ankakeski Parishayuj: —Uni takat inte ipal ne Teut ika inte tajpia ne sewilis. Sekit inat: —Ken weli kichiwa se ijkiuni se tateyekchiwa? Wan ijtik yejemet mutakutuntijket. 17 Kilwiat ne pupuyut senpa: —Taja tay tina ipanpa ká metztapuilijtuk ne mujmuish? Yaja inak: —Ka yaja se taketzani. 18 Ne Yudayujmet inte tayulmatket ka yaja pupuyut katka wan ashan welia tachia, hasta ka kalinnutzket ne itejteku ne ashan tachiaya 19 wan kintajtanilijket, inat: —Ini ne anmukunew ká anhinat ka nesik pupuyut? Ken ka seman tachia? 20 Ne itejteku najnankilijket, inaket: —Tikmatit ka ini tukunew wan ka nesik pupuyut. 21 Ken ka ashan tachia tejemet te tikmatit, wan ká kitapuilij ne ijish inte tikmatit. Shiktajtanilikan, takata wan weli taketza isel. 22 Ne tetejteku inaket ijkiuni ika majmawit, ika ne Yudayujmet sentaketztiwit ma muishti se tik ne sennemit asu ina ka yaja ne Mawaltijtuk. 23 Neka ne itejteku inaket shiktajtanilikan ika takata. 24 Uksenpa kalnutzket ne katka pupuyut wan kilwijket: —Shina ka wey ne Teut. Tejemet tikmatit ka uni takat se tateyekchiwa. 25 Nankilij yajuni: —Asu yaja tateyekchiwa inte nikmati. Sema ini nikmati: nipupuyut katka wan seman nitachia. 26 Kwakuni kilwijket: —Tay metzchiwilij? Ken metztapuilij ne mujmuish? 27 Nankilij: —Nimetzinhilwija wan te annechkakit. Taika ankinekit annechkakit senpa? Anka nusan ankinekit anmuchiwat imujmumachtiani? 28 Wan kitejtenejket wan inaket: —Taja tiimumachtiani yajuni! Tejemet inte, tiimujmumachtiani Moshe. 29 Tejemet tikmatit ka ne Teut kinutzki Moshe. Yajini, inte tikmatit kanka walajtuk. 30 Nankilij ne takat wan kinhilwij: —Ini tay tetekia: ka inte ankimatit kanka walajtuk wan nechtapuilijtuk ne nujnuish! 31 Tikmatit ka ne Teut inte kinkaki ká tateyekchiwat, wan asu se kitasujta ne Teut wan kichiwa ken kineki, kia. 32 Inte keman mukakik ka mutapuilijket ne ijish se nestuk pupuyut: 33 asu yaja inte ipal ne Teut inte welituskia kichiwa tatka. 34 Nankilijket, wan kilwijket: —Taja tinestuk ijtik tajtateyekchijtuk sea wan tiknekiskia titechmachtia? Wan kishtijket. 35 Takakik Yeshu ka kishtijtiwit tatenpan, wan kwak kinamik kilwij: —Taja tikyulmati ne Itelpuch ne Takat? 36 Yajuni nankilij wan inak: —Wan ká yaja, tajtzin, pal nikyulmati? 37 Ne Yeshu kilwij: —Taja tikitztuk, wan ne muwan taketza nemi, yaja né. 38 Yaja inak: —Nikyulmati, tajtzin! Wan mutankwaketzki. 39 Wan Yeshu inak: —Niwalajtuk pal muita ká yek wan ká inte, ma tachiakan ne inte tachiat, wan ne tachiat ma muchiwakan pupuyumet. 40 Ankakeski Parishayuj ne nemituyat inawak kikakket wan kilwijket: —Anka tejemet nusan tipupuyumet? 41 Ne Yeshu kinhilwij: —Asu anpupuyumet, inte ankipiasket culpaj. Ashan anhinat "Titachiat", tay antateyekchijtiwit naka.
Ne ichkatal wan ne tajpiani
1 (Wan Yeshu inak:) —Ini tay nimetzinhilwia: ká ne inte panu tik ne tentzakka pal kalaki ijtik ne kulal asunte muishtuka ka ukse ladoj, yaja techteki witz. 2 Ne kalaki tik ne tentzakka, yajaya ne tajpiani ipal n' ichkatal: 3 ne tajpiani ipal ne tenkal, kwak kita, kitapuilia wan n' ichkamet kikakit wan kishmatit, wan yaja kimati ken itukay ne se wan ne seuk, wan kinhishtia wan kinwika. 4 Kwak kishtia n' ichkatal, yaja nejnemi ishpan muchi wan yejemet yawit iipan ika kishmatit kwak tanutza. 5 Iipan ne seuk inte yasnekit, mas yek chuluat ika inte kishmatit kwak tanutza. 6 Ne Yeshu kinhilwij ini wan te kimatket tay kineki ina. 7 Taketzki ukseujti ne Yeshu: —Ini tay nimetzinhilwia: najasan ne tentzakka ipal ne ichkatal. 8 Muchi ká walajtiwit achtu tejtechtekinimet, wan ne ichkamet inte kinchiwilijket casoj. 9 Naja ne tentzakka: asu se panu ijtik naja pal kalaki, yasneki yek wan weli kalaki wan kisa wan kiajsi ne sakatal. 10 Ne techtekini sema witz pal techteki wan pal tamiktia wan pal tawilewa. Naja niwalajtuk ma kipiakan vidaj wan ma uk kipiakan. 11 Naja ne yek tajpiani. Ne yek tajpiani temaka muchi ka imaku n' ichkatal. 12 Ne patiwtekitini ne inte tajpiani ne inte ipal n' ichkatal, kita ne kuyut witz wan kiajkawa n' ichkatal wan chulua yawi, wan ne kuyut kinhitzkia wan kinsentalua, 13 ika yajane sema se patiwtekitini wan te tatka inpatiw ipal. 14 Naja ne yek tajpiani, nikishmati ne nuichkatal wan ne nuichkatal nechishmati, 15 kenha ken nechishmati Nuteku wan naja nikishmati Nuteku; wan nitemaka muchi ipatka n' ichkatal. 16 Wan nikpia sejseuk ichkat ne inte ipal ini kulal, wan yejemet nusan nemi pal nikwika wan nechkakisket nitanutza wan muchiwasket sanse ichkatal, sanse tajpiani. 17 Neka nechtasujta Nuteku, ika naja nitemaka nualmaj pal nikwi senpa. 18 Mal te aka weli nechishtilia, najasan nusel nitemaka; naja weli nitemaka wan weli nikwi senpa. Uni ne tatuktilis ne nikwij itech Nuteku. 19 Mutakutuntijket senpa ne Yudayujmet ipanpa ini tay inatuk. 20 Miak inat katka: —Kipia se nawal wan tzunhejekat. Taika ankikakit? 21 Sejseuk inat katka: —Muchi ini inte tay ipal se nawalpia. Anka se nawal teyek weli kitapua ne ijish se pupuyut?
Ká Yeshu?
22 Tik Yerushalem nemituyat ne ilwit itukay Januka, tik ne shupan, 23 wan Yeshu pashalua nemi itech ne teupan, tik ne Itenkal Shalomo. 24 Kwakuni ne Yudayujmet kiyawalujket wan kilwiat: —Hasta keman tiaw tikitzkia ne tualmaj? Asu taja ne Mawaltijtuk, shitechilwi melaknaj. 25 Ne Yeshu nankilij: —Nimetzinhilwijtuk wan te antayulmatit. Ne nutejtekiw ne nikchiwa tik itukay Nuteku taneshtiat nupanpa. 26 Anmejemet inte antayulmatit ika inte anhipal ne nuichkatal. 27 Ne nuichkatal nechkaki kwak nitanutza wan naja nikishmati wan witzet nuipan, 28 wan naja nikinmaka ma yujyultuk pal senpa, wan tea keman puliwisket, wan te aka kinhitzkis tik ne numey. 29 Ne Nuteku ne nechmakatuk, yaja ne mas wey ipal muchi, wan te aka weli kinhitzkia tik n' imey ne Nuteku. 30 Naja wan ne Teteku, tejemet sesan. 31 Ne Yudayujmet kalkwijket tejtet senpa pal kitejtemimat. 32 Ne Yeshu nankilij: —Nimetzinhilwitilijtuk miak nutekiw yek ipal ne Nuteku. Katiawel pal muchi yejemet ne taika annechtejtemimat? 33 Nankilijket ne Yudayujmet: —Inte timetztejtemimat ipanpa ne mutekiw yek, asunte ika tikukujtaketztuk wan ika taja titakat wan timuchiwa Teut. 34 Nankilij Yeshu: —Inte nemi tajkwilujtuk tik ne anmutajtuli ka: "Naja ninak: anmejemet teujteut"? 35 Su kinhilwij teujteut yejemet ká inpal muchijki ne ipalabraj ne Teut, wan su inte weli musutuma ne tay ijkwilujtuk, 36 ká ne Teteku inatuk ka wey wan kititanij tik ne taltikpak, anmejemet anhinat ka "tikukujtaketza" ika ninak: "Naja niikunew ne Teut"? 37 Su inte nikchiwa ne itekiw ne Nuteku, maka shinechyulmatikan, 38 wan su nikchiwa, melka inte annechyulmatit, shitayulmatikan tik ne tejtekit, ma shikmatikan ashan wan senpa ka ne Teteku nemi ijtik naja wan naja ijtik ne Teteku. 39 Kwakuni pejket mutatemuiliat senpa pal kipewiat. Wan kiski tik ne inmey 40 wan yajki senpa sentapal Yarden kan nemituya achtu Yojan, ne achtu teulyujmaka, wan nakak ka ikuni. 41 Wan miak ajsiket itech wan inat katka ka: "Yojan inte kichijki tatka pal muishmati. Melka uni, muchi tay inak Yojan ipanpa yajini tejkia." 42 Wan miak ikuni kiyulmatket.
Yeshu kiyulkwiltia Lazar
1 Nemik se kukuya itukay Lazar, ipal Bet Anya, ne itechan Maryam wan Marta ne ipipi. 2 Yajaya ne Maryam ká kimajmawaltij ne Tajtzin iwan ushit wan kimatiluj ne ijikshi iwan ne itzujtzunkal. Yaja ká kipiatuya Lazar iikaw kukuya. 3 Ne ipipiwan tatuktijket kinutzat, inat: —Tajtzin, shitachia, kukuya ká ne tiktasujta. 4 Kwak takakik ne Yeshu, inak: —Ini kukulis inte nemi pal miki, semaya pal muita ken wey ne Teut, ma inakan ipanpa ka wey ne Itelpuch ne Teut. 5 Yeshu kitasujta katka ne Marta wan ne ieltiw wan ne Lazar; 6 yajika kwak takakik ka kukuya, nakak ume tunal, 7 tipan kwak panuket kinhilwia ne mumachtianimet: —Tiakanha Yudaya senpa! 8 Ne mumachtianimet kilwiat: —Tamachtiani, sanuk mutatemuliat ne Yudayujmet pal metztejtemimat wan tiasneki ikuni senpa? 9 Nankilij Yeshu: —Majtakti-ume horaj kipia ne tunal. Asu se pashalua ka tunal inte mutasa ika kita ne tawil ipal ini taltikpak. 10 Asu pashalua tayua mutasa ika inte kanaj tawil ijtik yaja. 11 Kwak tami ina uni, kinhilwia: —Ne tuamigoj Lazar kuchi. Niawa nikishatia. 12 Ne mumachtianimet kilwijket: —Tajtzin, su kuchi yawia yektia. 13 Ne Yeshu kinekituya ina ka yaja miktuk, wan yejemet kimatit ka ina ka sema kuchi, musewia. 14 Kwakuni ne Yeshu kinhilwij melaknaj: —Lazar mikik, 15 wan nipaki anmupanpa, pal ma antayulmatikan, ika inte ninemik ka né. Saman tiakanha ka né. 16 Kwakuni Tomas ne muilwia katka chachawat kinhilwij ne sejseuk mumachtiani: —Tiakanha tejemet nusan ma timikikan iwan. 17 Ajsik tel ne Yeshu wan kiajsik ka kipiaya nawi tunal itan tal. 18 Bet Anya nemituya wejka Yerushalem achka yey kilometroj. 19 Miak pal ne Yudayujmet ajsituyat itech Marta wan Maryam pal kintasujta ipanpa ne inhikaw. 20 Ne Marta tel, kwak takakik ka Yeshu ajsi witz, yajki kinamiki; Maryam nakak ichan. 21 Ne Marta kilwij ne Yeshu: —Tajtzin, asu tinentuskia nikan inte miktuskia ne nuikaw. 22 Nikmati ka hasta ashan muchi tay tiaw tiktajtani ne Teut, ne Teut metzmakas. 23 Ne Yeshu kilwia: —Yawi muyulkwepa ne muikaw. 24 Ne Marta kilwia: —Nikmati ka yawi muyulkwepa kwak muyulkwepasket muchi tik ne tipan tunal. 25 Ne Yeshu kilwij: —Naja ne muyulkwepalis wan ne yulkwilis. Ká ne nechyulmati, melka miki, yawi yultuk, 26 wan ká nemi yultuk wan nechyulmati inte keman mikis. Tikmati ini? 27 Kilwia: —E tajtzin, naja nikmatiaya ka taja ne Mawaltijtuk, ne Itelpuch ne Teut, ne walejkuk ne taltikpak. 28 Wan kwak tamik ina uni, yajki kinutza Maryam ne ieltiw ka ikwaj, wan inak: —Ne tamachtiani nemi nikan wan metznutza. 29 Yajuni kwak takakik munelwij muketza wan ajsi itech. 30 Ne Yeshu inteuk ajsituya ne techan, kenhayuk nemituya kan munamik iwan Marta. 31 Yajika, ne Yudayujmet ne nemituyat iwan Marta ka ichan wan kitasujtat, kwak kitaket ne Maryam muketza wan kisa mutalua, yajket iipan wan inaket ka yaja yawi chuka itech ne shaput. 32 Ne Maryam yajki kan nemituya Yeshu, wan kwak kitak mutamutak itech ne ijikshi wan kilwia: —Tajtzin, asu tinentuskia nikan inte miktuskia ne nuikaw! 33 Yajika Yeshu, kwak kitak ken chuka yaja wan chukat ne Yudayujmet walajtiwit iwan, mutechtij ne iyulu wan kakasiwik, 34 wan inak: —Kan tiktekatuk? Kilwiat: —Tajtzin, shiwi, shikita. 35 Chukak ne Yeshu. 36 Kwakuni ne Yudayujmet inat katka: —Shikita ken kitasujta! 37 Sejse yejemet mutajtanilijket: —Yaja ká kitapuilij ne pupuyut ne ijish, inte welik kichiwa nusan ma inte miki yajini? 38 Kwakuni Yeshu senpa mutechtij wan ajsi itech ne shaput. Yaja se ustut wan ijpak mutalijtuya se tet. 39 Ina ne Yeshu: —Shikajkukikan ne tet. Marta, ne ipipi ne miktuk, kilwia: —Tajtzin, ijyaya, kipiaya nawi tunal! 40 Ne Yeshu kilwia: —Nimetzilwija ka asu titayulmati tikitas ken wey ne Teut. 41 Kwakuni kianket ne tet. Ne Yeshu tachishki ka ikajku wan inak: —Nuteku, panpadiush ika tinechkakik. 42 Naja nikmatki ka senpa tinechkaki. Melka uni, ipanpa muchi ne miaktal ne nikan nemit ninatuk pal ma kimatikan ka taja ne talnechtitanijtuk. 43 Wan kwak tamik ina uni, tzajtzik: —Lazar, shikisa! 44 Walkiski ne miktuk. Kipiatuya ne ijikshi wan ne ijimey ijilpituk iwan kwajkwachti wan ne iishkalyu kwachtzaktuk. Ne Yeshu kinhilwia: —Shiktujtumakan wan shikajkawakan yawi. 45 Kwakuni miak Yudayuj ne ajsitiwit itech Maryam wan kitztiwit tay kichijki kiyulmatket. 46 Ankakeski yajket itech ne Parishayujmet wan kinhilwijket tay kichijki Yeshu. 47 Yajika ne weypalejmet wan ne Parishayujmet kisentepejket se kalpuli wan inaket: —Tay tiawit tikchiwat? Ika ini takat kichiwa miak pal muishmati. 48 Asu tikajkawat ijkiuni, muchi yawit kiyulmatit, wan walasket ne takamet ipal Roma wan kitzkisket ne tutal wan ne tutechan. 49 Se yejemet itukay Kayapa katka ne weypalej tik uni shiwit, wan kinhilwij: —Anmejemet inte ankimatit tatka, 50 nian ankishkejketzat ka mas yek ma miki se takat ka inmaku muchi que ma wilewi muchi ne techan. 51 Uni inte inak ka isel, asunte kwak yaja katka weypalej ipal uni shiwit taketzki wan inak ka Yeshu yawi miki ipatka ne techan, 52 wan te semaya ipatka ne techan asunte pal musentepewat muchi ne ikukunew ne Teut sejsentalujtuk. 53 Tik uni tunal tel pejket munawatiat pal ma kimiktikan. 54 Yajika ne Yeshu intea yawi pashalua ishpan muchi ijtik ne Yudayujmet. Kiski wan yajki ne tal te wejka ne kojtan, tik ne techan itukay Epraim, wan nakak ikuni iwan ne mumachtianimet. 55 Witzaya ne Paskwaj ipal ne Yudayujmet, wan miak kisket ne tejtechan wan tejkuket ka Yerushalem pal mupupuat ipal ne Paskwaj. 56 Itech ne teupan kitemuat ne Yeshu wan pejket muilwiat: —Tay tina? Yaja intea yawi ajsi tik ne ilwit? 57 Ne weypalejmet tatuktijtuyat, wan ne Parishayujmet nusan, ka asu aka kimatiskia kan nemi, ma inakan pal welit kitzkiat.
Ne Maryam kimaka pajtipuputuka
1 Kwakuni kwak kinekiuk chikwasen tunal pal pewa ne Paskwaj, ne Yeshu ajsik Bet Anya, kan nemituya Lazar, ne ká mikik wan Yeshu kiyulkwiltij. 2 Ikuni kichijket se yualu wan ne Marta kintakwaltij. Wan se ipal ne sentakwat, ne Lazar. 3 Kwakuni ne Maryam kikwij se libraj ushit sujsul yek wan wey ipatiw, wan kimajmawaltij ne ijikshi ne Yeshu, wan kimatiluj ne ijikshi iwan ne itzunkal. Temik muchi ne kal iwan ne ipuputukayu ne ushit. 4 Ina Yuda Ishkaryot, ne mumachtiani ne yawi temaka: 5 —Taika inte tiknamakaket uni ushit tik ne tiankis ka yey tzunti tumin pal tikintakuliat ne munekit? 6 Inte inak uni ika kintasujta ne munekit, semaya ika se techtekini, wan yaja ne tuminpiani wan kiwika tay ne mutamutilia ne cajaj. 7 Kwakuni inak ne Yeshu: —Shikajkawa ma kitajpia ipal kwak nechtalpachusket; 8 ika senpa ankipiasket ne munekit anmuwan; naja inte senpa annechpiasket.
Kalaki tik Yerushalem
9 Miak ipal ne Yudayujmet kimatit katka ka nemituya ikuni, wan te ajsitiwit sema ipanpa ne Yeshu, nusan pal kitat ne Lazar ká ne mikik wan kiyulkwiltij. 10 Ne weypalejmet tanawatijket ma kimiktikan ne Lazar nusan, 11 ika miak ipal ne Yudayujmet yajtiwit wan kiyulmatit ne Yeshu ipanpa. 12 Ne ukse tunal, miak ká ajsitiwit tik ne ilwit, kwak takakket ka ajsi ne Yeshu ka Yerushalem, 13 kikwijket imajmajtzal palmaj wan kisket kinamikit, wan kitzajtzalijket: —Hosha-na! Teutasujtatuk ne witz tik itukay Tutajwan, ne kitekimaka Israel! 14 Ne Yeshu kiajsik se burrojchin wan mutalij ka ijpak, ijkiunisan ken nemi ijkwilujtuk: 15 "Maka shimajmawi, isiwapil Tzion: uni witz ne metztekimaka muetztuk ijpak se burrojkunet." 16 Kwak pejki, ne mumachtianimet inte kimatket. Wan kwak mumatki ka wey ne Yeshu, kwakuni kielnamikket ka ijkiuni muijkwilujtuk wan ijkiuni kichiwilijket. 17 Kwakuni pejket taneshtiat muchi ká ne nemiket iwan kwak kalnutzki ne Lazar tik ne shaput wan kiyulkwiltij kwak miktuk. 18 Neka nusan kinamikket muchi, ika takakket ka kichijtuya uni pal muishmati. 19 Kwakuni ne Parishayujmet muilwijket: —Shitachiakan ka inte timupalewiat tatka! Shikita keski yajtiwit iipan!
Ajsik ne horaj!
20 Nemituyat sejse ipal Grecia ijtik ne tejkut ka Yerushalem mutankwaketzat tik ne ilwit. 21 Yejemet ajsiket itech Pilipo ne ipal Bet-Tzaida tik Galilaya, wan kitajtanit: —Tajtzin, tiknekit tikitat Yeshu. 22 Ajsi ne Pilipo wan kilwia ne Andreas. Ajsi Andreas iwan Pilipo wan kilwiat ne Yeshu. 23 Ne Yeshu nankilij, kinhilwia: —Ajsituk ne horaj pal ma mumati ka wey ne Itelpuch ne Takat. 24 Ini tay nimetzinhilwia: asu ne iish ne sinti inte wetzi talchi wan miki, isel mukawa. Asu miki, wey itakil kalwika. 25 Ká kitasujta ne ialmaj, yajane kipulua; wan ká kijia ne ialmaj tik ne taltikpak, yaja kipias yultuk senpa. 26 Asu aka tekiti nupal, ma wiki nuipan wan kan naja ninemi, ikuni nemis ne nutekitini nusan. Asu tekiti aka nupal, ne Teteku kimakas honor. 27 Ashan kakasiwi nualmaj wan tay ninaskia? "Nuteku, shinechpalewi tik ini horaj"? Melka uni, neka niajsik tik ini horaj! 28 Nuteku, shikchiwa ma inakan ka wey mutukay. Kwakuni mukakik ka ilwikak: —Nikchijtuk, wan nikchiwas senpa. 29 Kwakuni ne miaktal ne nemituyat ka né, wan kikakket, inat ka tikwinik. Inat seki ka se tanawatiani kinutzki. 30 Nankilij Yeshu wan inak: —Inte mukakik ka numaku asunte ka anmumaku. 31 Ashkan yawi muita ká yek wan ká inte tik ne taltikpak; ashkan yawi muishtia ne tatuktiani ipal ini taltikpak, 32 wan su nechajkukiat wan nikajkawa ne tal, nalintilanas muchi nutech. 33 Yaja ina uni ika kimatiaya ken yawi miki. 34 Kwakuni nankilijket muchi: —Tejemet titakaktiwit tik ne tajtuli ka ne Mawaltijtuk mukawa pal senpa, wan ken ka tina taja ka nemit pal kiajkukiat ne Itelpuch ne Takat? Ká ini Itelpuch ne Takat? 35 Kwakuni ne Yeshu kinhilwij: —Achi tawil ijtik anmejemet nemiuk. Shinejnemikan ashan kwak metzintawilua, ma inte metzinhitzki ne kunyua wan ne nejnemi tik kunyua inte kimati kanka yawi. 36 Kwak ankipiat ne tawil shikyulmatikan ne tawil pal anmuchiwat ikukunew tawil. Inak ini ne Yeshu wan yajki minaya.
Tay inak inpanpa ne miak ká inte kiyulmatket
37 Melka yaja kichijtuya muchi ini inhishpan, inte kiyulmatit, 38 pal ma yekawi tay inak Ishaya ne taketzani: "Tajtzin, ká kiyulmattuk tay ne titakakket? Wan ká muneshtilijtuk n' imajkul ne Tajtzin?" 39 Neka inte welituyat kiyulmatit, ika ukseujti inak Ishaya: 40 "Niktzaktuk n' inhijish wan niktakwawaltijtuk n' inyulu ma inte tachiakan n' inhijish nian tamatikan n' inyujyulu pal muishkwepat ma niaw nikinpajtia." 41 Ijkiuni inak Ishaya ika kitak ken wey wan taketzki ipanpa. 42 Melka uni, miak ipal ne tatuktianimet nusan kiyulmatket. Inpanpa ne Parishayujmet inte inat katka tatka, pal ma inte kinhishtikan tik ne sennemit, 43 ika kielewiat mas tzitzinakat ishpan takamet que ma tzitzinaka ne Teut. 44 Yeshu tzajtzik wan inak: —Ká ne nechyulmati inte nechyulmati, kiyulmati ne nechtuktijtuk, 45 wan ká ne nechita kita ne nechtuktijtuk. 46 Naja niwalajtuk ken tawil tik ne taltikpak pal muchi ne nechyulmatit ma inte nakakan tik kunyua, 47 wan asu aka takaki tay nina wan te kishpelwia, naja inte niktenewa, ika inte niwalajtuk pal niktenewa ne taltikpak, semaya pal nikpalewia ne taltikpak. 48 Ne nechilwia ka inte wan inte kikwi tay nina, kipiaya ká kitenewaskia: ne tay nitaketztuk, yajaya yawi kitenewa tik ne tipan tunal, 49 ika naja inte nitaketzki nusel; ne Teteku ká nechtitanijtuk, yajaya nechtuktij tay ninaskia wan tay nitaketzaskia, 50 wan nikmati ka tamakak itatuktilis pal ma shiyujyultuk senpa. Ken naja nitaketza, tel, yaja tay nechilwij ne Teteku wan ijkiunisan nitaketza.
Yeshu kinhikshipaka ne mumachtianimet
1 Kwak inteuk ajsik ne ilwit ipal ne Paskwaj, ne Yeshu kimatiaya ka ajsituk ne horaj pal yaja kiajkawa ini taltikpak wan yawi itech ne iteku. Yaja kintasujtatuya ne imiakwan tik ne taltikpak, wan senpa kintasujtak hasta ne tamilis. 2 Wan kwak tamiket takwat, muishtukatuk ne Tamintuk ijtik ne iyulu Yuda ikunew Shimon Ishkaryot ma temaka ne Yeshu. 3 Yeshu kimati katka ka ne iteku kitalijtuk muchi tik ijimey wan ka itech Teut kistuk wan itech ne Teut yasneki. 4 Muketza kwak tami takwa wan mutapetztilia wan kikwij se kwachti wan kilpij tik itajku. 5 Neman kitema se wajkal iwan at wan pejki kipaka ne inhijikshi ne mumachtianimet wan kinmatilua iwan ne kwachti ne kitalijtuk tik itajku. 6 Ajsi tel itech Shimon Pedro. Kilwia: —Tajtzin, taja tinechikshipaka? 7 Nankilij Yeshu wan kilwij: —Tay ne naja nikchiwa, taja inte tikmati seman. Tipan tiaw tikmati. 8 Pedro kilwia: —Inte keman tikpakas ne nujnukshi. Nankilij Yeshu: —Asu inte nimetzikshipaka, inte tikpias tatka nuwan. 9 Shimon Pedro kilwia: —Tajtzin, inte semaya nujnukshi, shikpaka nusan numejmey wan nutzuntekun! 10 Ne Yeshu kilwia: —Ká ne mupaktuk sema muneki mukshipaka; muchi ne iweyka nemi pupujtuk. Anmejemet nusan annemit pujpupujtuk, mal te muchi anmejemet. 11 Ika kimati katka ká yawi temaka. Yajika inak ka "inte muchi annemit pujpupujtuk". 12 Kwak tamik kinhikshipaka, wan kitalija ikwajkwach wan mutalija senpa, kinhilwij: —Ankimatit tay nimetzinchiwilijtuk? 13 Anmejemet nechnutzat ne tamachtiani wan ne tajtzin, wan anhinat yek, ika tejkia. 14 Yajika, asu naja, ká ne nitajtzin wan nitamachtiani, nimetzinhijikshipakak, anmejemet nusan nemit pal anmukshipakat sejse iwan sejse. 15 Yajika, nimetzinmakatuk ini tamachtilis, pal ma shikchiwakan nusan ken naja nikchijtuk. 16 Ini tay nimetzinhilwia: se tekitini inte mas wey que ne tajtzin, nian mas wey se titanijtuk que ká ne kituktijtuk. 17 Asu ankimatit uni, ankipiat suertej asu ankichiwat kiane. 18 Inte nina anmupanpa muchi. Naja nikishmati ká ne nikishpejpentuk. Pal ma yekawi ne ijkwilujtuk, ne kikwa nutamal kiajkukijtuk itzinteu ne ikshi pal taksa nujpak. 19 Ashan nimetzinhilwia, achtu ma muchiwa, ma shikyulmatikan kwak muchiwa, ika naja né. 20 Ini tay nimetzinhilwia: ká ne kikwi ká niktuktia, naja nechkwi. Ká ne nechkwi, kikwi ne nechtuktijtuk.
Yeshu taneshtia ka Yuda yawi temaka
21 Kwak tamik ina ini ne Yeshu, kakasiwik iyulu wan tanutzki, inak: —Ini tay nimetzinhilwia: ka sé anmejemet yawi nechtemaka. 22 Ne mumachtianimet pejket muitat wan ishpuyawit ipanpa tay ina. 23 Nemituya se pal ne mumachtianimet munekwilujtuk tik ielpan ne Yeshu; yaja ká mas kitasujta katka. 24 Shimon Pedro kishnutzki ma kitajtanili ká ipanpa ina. 25 Kwakuni yajane waltzinkiski inakastan ne Yeshu wan kilwia: —Tajtzin, ká? 26 Nankilia ne Yeshu: —Yajane ká naja nikajwilia se takutun wan nikmaka. Kwakuni kiajwilij se takutun wan kikwi wan kimaka Yuda ikunew Shimon Ishkaryot, 27 wan kwak tamik kikwa ne takutun, kalak ne Tenewani ijtik yaja. Kwakuni ne Yeshu kilwia: —Tay ne tiaw tikchiwa, shikchiwaya! 28 Inte aka ipal ne sentakwat kimatki taika kilwij uni, 29 wan inat sejse ka yaja ika Yuda ne tuminpiani wan kineki ina ne Yeshu: "Shu shikua tay timunekit ipal ne ilwit", ush ma kinmaka ne munekit chiupi tumin. 30 Kwak kikwija ne takutun, kiski talul yajane. Tayuaya.
Kinhilwia ne mumachtianimet ka yawia
31 Wan kwak kistuk, Yeshu ina: —Ashan mumatki ka wey ne Itelpuch ne Takat, wan mumatki ka wey ne Teut ijtik yaja. 32 Asu mumatki ka wey ne Teut ijtik yaja, nusan ne Teut kilwitia ka yaja wey ijtik yajasan, wan kilwitia ka wey nemanha. 33 Nukukunetzitzin, semaya chiupichin uk ninemi anmuwan. Yawit annechtemuat, wan ijkiunisan ken nikinhilwij ne Yudayujmet ka "kanka naja niaw, anmejemet inte welit ajsit", nusan nimetzinhilwia kenha seman. 34 Nimetzintuktia se yankwik: ma shimutasujtakan. Ijkiuni ken naja nimetzintasujtak, shimutasujtakan sejse iwan sejse. 35 Ijkini muchi kishmatisket ka annumujmumachtiani, asu ankipiat tetasujtalis sejse iwan sejse. 36 Shimon Pedro kilwia: —Tajtzin, kan tiaw? Nankilij Yeshu: —Kan niaw inte tiweli tiwitz nuwan ashan; tiwalas tipan. 37 Ne Pedro kilwia: —Tajtzin, taika inte weli niaw muwan seman? Nitemakas ne nualmaj ka mumaku! 38 Nankilia Yeshu: —Titemakas ne mualmaj ka numaku? Shikaki tay nimetzilwia: inte yawi takwika ukichtijlan hasta ma shina yeshpa ka inte tinechishmati!
Naja ne ujti
1 (Yeshu inak:) —Maka shikakasiwikan; ankiyulmatit ne Teut wan annechyulmatit. 2 Ne ikal ne Nuteku techajsi, sujsul wey; asu inte, nimetzinhilwijtuskia ka niaw nimetzinhekchiwilia kan annemiskiat. 3 Wan asu niaw wan nikekchiwa anmupal, nalmukwepa senpa, wan nimetzinwikas nuwan, pal kan ninemi naja ma shinemikan anmejemet. 4 Wan kanka naja niasneki, ankimatisket ne ujti. 5 Tomas kilwia: —Tajtzin, inte tikmatit kanka tiaw; ken welit tikmatit ne ujti? 6 Ne Yeshu kilwia: —Naja ne ujti wan ne tejkia wan ne yulkwilis. Inte aka ajsi itech ne Teteku asu inte nuwan. 7 Asu annechishmatiskiat, nusan ankishmatisket ne Nuteku; wan nemanha ankishmatisket wan ankitasket. 8 Pilipo kilwia: —Tajtzin, shitechilwitili ne Teteku, wan techajsi. 9 Ne Yeshu kilwia: —Keski tunal ninentuk anmunawak, wan inteuk tinechishmati Pilipo! Ká ne nechitztuk, kitztuk ne Teteku. Ken ka tina "Shitechilwitili ne Teteku"? 10 Anka inte tikmati ka naja ijtik ne Teteku ninemi, wan ne Teteku ijtik naja? Muchi tay nimetzinhilwia inte nitaketza nusel; ne Teteku nemi ijtik naja wan kichiwa ne itekiw. 11 Shinechyulmatikan ika naja ninemi ijtik ne Teteku, wan ne Teteku ijtik naja. Wan asu inte, shitayulmatikan ipanpa ne itekiw isel. 12 Ini tay nimetzinhilwia: ká ne nechyulmati, tay ne naja nikchiwa yaja nusan yawi kichiwa, wan mas wejwey yawi kichiwa ika naja niawa kan nemi Nuteku. 13 Wan tay ne antajtanit tik nutukay niaw nikchiwa, pal kiane inat ka wey ne Teteku ijtik ne Itelpuch. 14 Asu annechtajtanit se tik nutukay, naja niaw nikchiwa.
Yawi witz se walnutztuk
15 (Wan inak:) —Asu annechtasujtat, shitajpiakan tay ne nitatuktijtuk, 16 wan naja niaw niktajtani ne Nuteku wan yawi metzinmaka ukse walnutztuk pal senpa naka anmuwan: 17 ne iijiu ne tejkia, ká ne taltikpak inte weli ina ka yek ika inte kita nian kishmati; anmejemet kishmatit ika naka anmutech wan nemi anmuwan. 18 Inte niaw nimetzinhajkawa anmusel ken iknupipil; niaw nalmukwepa anmutech. 19 Kinekiuk chiupichin wan ne taltikpak intea yawi nechita. Anmejemet kia san nechitasket, ika naja niyultuk wan anmejemet anyawit yujyultuk. 20 Tik uni tunal, yawit ankimatit ka ninemi ijtik ne Teteku, wan anmejemet ijtik naja, wan naja ijtik anmejemet. 21 Ká kipia tay nitatuktijtuk wan tajpia, yajaya ne nechtasujta. Ká ne nechtasujta, ne nuteku yawi kitasujta, wan naja nusan niaw niktasujta, wan niaw nimuneshtia ipal. 22 Yuda (ne seuk, inte ne Ishkaryot) kilwia: —Tajtzin, ken ijtuk ka tiaw timuneshtia tupal wan te ipal ne taltikpak? 23 Nankilij Yeshu wan inak: —Asu aka nechtasujta kitajpias tay ninatuk, wan ne nuteku kitasujtas, wan tiajsisket itech wan tikchiwasket ne tukal iwan. 24 Ká ne inte nechtasujta inte tajpias tay ninatuk; wan tay ne ninatuk wan antakaktiwit inte nupal, yaja ipal ne Teteku ne nechtuktijtuk.
Nimetzinhajkawilia nejmachnemilis
25 Uni tay nimetzinhilwijtuk kwak ninakayuk anmutech. 26 Ne walnutztuk, ne Ijiutzin ne yawi kituktia ne Teteku tik nutukay, yaja san metzinmachtis muchi wan metzinhelnamiktilis muchi tay naja nimetzinhilwijtuk. 27 Nimetzinhajkawilia nejmachnemilis. Ne nunejmachnemilis nimetzinmaka: inte ken tamaka ne taltikpak naja nimetzinmaka. Ma inte kakasiwi anmuyulu nian ma muishmuti. 28 Annechkaktiwit nimetzinhilwia "Niawa wan nalmukwepa anmutech". Asu annechtasujtaskiat, anpakiskiat ika niaw itech ne Teteku, ika ne Teteku mas wey que naja. 29 Wan ashan nimetzinhilwijtuka kwak inteuk muchijki, pal kiane kwak yawi muchiwa ma shitayulmatikan. 30 Semaya chiupi niaw nitaketza anmuwan, ika witzaya ne tatuktiani ipal ne taltikpak. Melka nujpak inte kipia tatka, 31 yaja pal ma kimati ne taltikpak ka niktasujta ne Teteku wan ken nechtuktij ne Teteku ijkiuni nikchiwa. Shimuketzakan, tiawita!
Naja ne shukumekat
1 (Wan Yeshu inak:) —Naja ne shukumekat yekkaya wan ne Nuteku ne talchiwani. 2 Ne mulinka nujpak ne inte kiwika itakil, yaja kishtia, wan ne kiwika itakil kiyektia ma kiwika ukchiupi. 3 Anmejemet metzinyektijtuka ne palabraj ne nitaketztuk anmuwan. 4 Shimukawakan nuwan wan naja anmuwan. Ijkiunisan ken ne mulinka isel inte weli kiwika itakil asu inte naka musalujtuk ijpak ne shukumekat, anmejemet kenhaya inte anwelit asu inte anmukawat nuwan. 5 Naja ne shukumekat; anmejemet ne mujmulinka. Ká ne mukawa nuwan wan naja iwan, yajane kiwika wey itakil, ika asu inte ninemi inte welit ankichiwat tatka. 6 Asu se inte mukawa nuwan, muishtia ken ne mulinka wan wajwaki wan kitepewat wan kimutiliat ne tit wan tata. 7 Asu anmukawat nuwan wan tay ne ninatuk naka ijtik anmejemet, san antajtanisket muchi tay ankinekit wan yawi muchiwa. 8 Tik ini mumati ka wey ne Nuteku: ma shikwikakan wey anmutakil, wan anmuchiwasket numujmumachtiani. 9 Kenha ken nechtasujtatuk ne Nuteku, ijkiuni nimetzintasujtatuk. Shimukawakan tik nutetasujtalis. 10 Asu ankitajpiat tay ne nitatuktijtuk, anmukawasket tik nutetasujtalis, kenha ken naja niktajpishtuk tay ne tatuktijtuk ne nuteku wan nimukawa tik itetasujtalis. 11 Nimetzinhilwijtuk ini pal ma nemi ne nupakilis ijtik anmejemet wan ma yekawi ne anmupakilis. 12 Ini tay nimetzintuktijtuk: ma shimutasujtakan ken nimetzintasujtatuk. 13 Inte aka kipia tetasujtalis mas wey que ini: ma ajaka temaka ialmaj ka inmaku ne ikniwan. 14 Anmejemet annukniwan asu ankichiwat tay ne nimetzintuktijtuk. 15 Intea nimetzinhilwia tekitinimet, ika ne tekitini inte kimati tay kichiwa nemi ne itekuyu. Anmejemet nimetzinhilwijtuk nukniwan ika muchi tay nitakaktuk itech nuteku nimetzinneshtilijtuk. 16 Inte annechishpejpentiwit, naja nimetzinhishpejpentuk wan nimetzintalijtuk ma shumet shikpiakan anmutakil wan ma naka ne anmutakil pal kiane muchi tay ankitajtanit ne Teteku tik nutukay yawi metzinmaka. 17 Ini tay nimetzintuktia: ma shimutasujtakan.
Ne taltikpak kinhishijia Yeshu wan ne mumachtianimet
18 (Wan inak:) —Asu ne taltikpak metzinhishijia, shikmatikan ka nechishijishtuk naja achtu. 19 Asu anhipal ne taltikpak, ne taltikpak kitasujtaskia ká ipal. Ika inte anhipal ne taltikpak asunte naja nimetzinhishpejpen ijtik ne taltikpak, neka ne taltikpak metzinhishijia. 20 Shikelnamikikan tay nimetzinhilwij: se tekitini inte mas wey que itekuyu. Asu nechtalultijtiwit, anmejemet nusan metzintalultisket. Asu yejemet kitajpishtiwit tay ne ninatuk, san kitajpiasket tay ne anmejemet inat nusan. 21 Yawit kichiwat muchi uni nupanpa, ika inte kishmatit ne nechtuktijtuk. 22 Asu inte niwalajtuskia nian nitaketztuskia inwan, inte tateyekchijtuskiat. Ashan inte welit inat tatka ipanpa tay tateyekchijtiwit. 23 Ká ne nechishijia nusan kishijia ne nuteku. 24 Asu inte nikchijtuskia ijtik yejemet sejse tay inte aka kichijki, inte tateyekchijtuskiat. Ashan, kitztiwit wan nusan nechishijishtiwit naja wan ne nuteku kenhaya. 25 Ijkiuni pal ma yekawi tay nemi ijkwilujtuk tik ne intajtuli: ka yawit nechishijiat wan te kipiat taika. 26 Kwak yawi witz ne walnutztuk ne naja niktuktis anmutech —ne iijiu ne tejkia ne witz itech ne Teteku— yajuni yawi taketza nupanpa, 27 wan anmejemet nusan, ika annentiwit nuwan kwak pejki.
1 (Wan inak:) —Nimetzinhilwijtuk ma inte shitekukujmatikan. 2 Melka metzinhishtisket tik ne sennemit, witz ne horaj pal muchi ne metzinmiktiat kimatit ka kichiwiliat itekiw ne Teut, 3 wan yawit metzinchiwiliat ijkiuni ika nian kishmatit ne Teteku nian naja nechishmatit. 4 Muchi ini nimetzinhilwijtuk pal kwak witz ne horaj ma shikelnamikikan ka nimetzinhilwija.
Yeshu yasneki, ne walnutztuk yawi witz
(Wan inak:) —Inte nitaketzki anmuwan ijkiuni kwak pejki ika ninemituya anmuwan. 5 Ashan niawa kan nemi ne nechtuktijtuk, wan te aka pal anmejemet nechtajtanilia: "Kan tiaw?" 6 Wan ika nimetzinhilwijtuk ini, metzinkukua anmuyulu. 7 Wan nimetzinhilwia tay tejkia: mas yek anmupal ma niaw. Ika asu inte niaw, ne walnutztuk inte walajsis anmutech. Wan asu niaw, niktuktis anmutech, 8 wan kwak witz, yawi kiajajwa ne taltikpak ipanpa ne tateyekchijtuk, wan ipanpa ne muchijtuk yek, wan ma muita ká yek wan ká inte. 9 Kia, ipanpa ne tateyekchijtuk ika inte nechyulmatket. 10 Ipanpa ne muchijtuk yek, ika niawa kan nemi nuteku wan intea annechitasket. 11 Pal ma muita ká yek wan ká inte, ika muchijtuk juzgar ne tatuktiani ipal ne taltikpak. 12 Nikpiayuk wey pal nimetzinhilwia wan te welit ankiseliat seman. 13 Kwak yawi witz yajuni, ne iijiu ne tejkia yawi metzinhilwitilia ne ujti tik muchi ne tejkia; ika inte taketzas ka isel: muchi tay takaki taketzas wan tay yawi witz metzinneshtilis. 14 Yaja yawi nechweychiwa, ika tik tay nupal kikwis wan metzinneshtilis. 15 Muchi tay kipia ne Teteku, nupal; neka ninak ka tik tay nupal kikwi wan metzinneshtilis.
San annechitasket senpa!
16 (Wan inak:) —Kwak panu se chiupi, intea annechitasket, wan senpa ukse chiupi, wan san annechitasket. 17 Kwakuni ankakeski mumachtiani muilwijket: —Tay uni techilwia: "yawi panu se chiupi wan tea annechitasket, wan senpa ukse chiupi wan san annechitasket", wan "niawa kan nemi ne Teteku"? 18 Inat katka tel: —Tay kineki ina "se chiupi"? Inte tikmatit tay ina nemi... 19 Ne Yeshu kimatki ka kinekituyat kitajtaniliat wan kinhilwij: —Yajika anmutajtaniliat? Ika ninak "Kwak panu se chiupi, inte annechitasket, wan senpa ukse chiupi, wan san annechitasket"? 20 Ini tay nimetzinhilwia: ka yawit anchukat wan yawit anmutechtiat, wan ne taltikpak yawi pajpaki. Yawi metzinkukua, wan ne anmupenaj yawi mukwepa pakilis. 21 Ne siwat kwak puni kikukua ika ajsik ne horaj; kwak tamik puni, intea kielnamiki ka muchijki uij ipanpa ne pakilis ika nestuk se takat tik ne taltikpak. 22 Anmejemet nusan tel, melka ashkan metzinkukua, niaw nimetzinhita uksenpa wan yawi paki anmuyulu, wan te aka yawi metzinhishtilia anmupakilis, 23 wan tik uni tunal inte annechtajtanisket tatka. Ini tay nimetzinhilwia: asu ankitajtanit ne Teteku se, yawi metzinmaka tik nutukay. 24 Hasta seman inte antajtantiwit tatka tik nutukay. Welit antajtanit wan yawit ankikwit pal ma shiishwikan iwan pakilis. 25 Nimetzinhilwijtuk muchi ini tik tajtaketza, wan witzaya ne horaj pal intea nimetzinhilwia tik tajtaketza asunte niaw nimetzinhilwia melaknaj ipanpa ne Teteku. 26 Tik uni tunal yawit antajtanit tik nutukay, wan te nimetzinhilwia ka niaw niktajtani ne Teteku anmupanpa, 27 ika ne Teteku yajasan metzintasujta ika annechtasujtatiwit wan annechyulmattiwit ika niwalaj itech ne Teut. 28 Nikistuk itech ne Teteku wan nalajsituk tik ne taltikpak; nikajkawa ne taltikpak uksenpa wan niaw itech ne Teteku. 29 Ne mumachtianimet inat: —Shikita, ashan titaketza melaknaj wan te tina tajtaketza. 30 Ashan tikmatit ka tikmati muchi wan te timuneki ma aka metztajtanili. Neka tikmatit ka tiwalajtuk itech ne Teut. 31 Nankilij Yeshu: —Seman ankimatit tik anmuyujyulu? 32 Ashan ajsi ne horaj, wan walejkutuk, ma shimusentalukan sejse ka iladoj wan ma shinechajkawakan nusel. Wan te ninemi nusel ika ne Teteku nuwan nemi. 33 Nimetzinhilwijtuk muchi ini pal annejmachnemit. Melka ijtik ne taltikpak san ankipiasket pejpenaj, makaya shiyulkakasiwikan. Naja niwelik mas que ne taltikpak!
Yeshu kinujnutza ne Teut
1 Yeshu tamik ina muchi ini, wan ajkutachishki wan inak: —Nuteku: walajtuk ne horaj. Shikweychiwa ne mukunew pal ne kunet metzweychiwa, 2 ijkiuni ken tikmakak tatuktilis ijpak muchi ká kipiat inweyka, ma kichiwa ma yujyultuk senpa muchi ká tikintemakak. 3 Ma yujyultuk senpa pal kiane metzishmatit: sema tajasan ti Teut yekkaya, wan ká ne tiktuktij: Yeshu Mawaltijtuk. 4 Naja ninak ka tiwey pak ne tal; niktamij ne nutekiw tinechmakak ma nikchiwa. 5 Wan ashan shinechweychiwa, Nuteku, munawak, ma niwey ken katka kwak inteuk muchijki ne taltikpak. 6 Nikinneshtilijtuk mutukay ne taltikpaktakamet tikintemakak; yejemet mupal katka wan tinechmakak, wan mupalabraj kitajpishtiwit. 7 Ashan kimatit ka muchi tay tinechmakak mutech witz, 8 ika tay ne tinechmachtij nikinmachtijtuk, wan yejemet kikwijtiwit wan kishmattiwit ka mutech nikistuk, wan kiyulmattiwit ka taja tinechtitanij. 9 Naja nimetztajtani ka inmaku, inte ipanpa ne taltikpak, nitajtani inpanpa ká tikintemakak nuwan ika yejemet mupal. 10 Wan muchi tay nupal mupal, wan tay mupal nupal, wan muchi nechmatit wey inpanpa. 11 Intea ninemi tik ne taltikpak, wan yejemet tik ne taltikpak nemit wan naja niaw mutech. Tekutzin, ká ne nechmakak shikintajpia tik mutukay ma muchiwakan sesan, ken tejemet. 12 Kwak ninemituya inwan ká ne tikintemakak nuwan, nikintajpia katka tik mutukay wan nikinhishpelwij wan te puliwik nian se, semaya n' ikunew ne tapululis pal ma yekawi tay ijkwilujtuk. 13 Ashan niaw mutech wan ini nina tik ne taltikpak ma kipiakan ne nupakilis yekajtuk ijtik yejemet. 14 Naja nikinmakak ne mupalabraj wan ne taltikpak kinhishijishki ika yejemet inte ipal ne taltikpak ken naja inte niipal ne taltikpak. 15 Te nimetztajtani ma shikinhishti tik ne taltikpak, semaya ma shikintajpia ijtik ne taltikpak. 16 Yejemet inte ipal ne taltikpak ken naja inte niipal ne taltikpak. 17 Shikinweychiwa tik ne tejkia; ne mupalabraj yaja tejkia. 18 Ijkiuni ken nechtitanij tik ne taltikpak naja nusan nikintitanij tik ne taltikpak, 19 wan ka inmaku nimuweychiwa ma muweychiwakan tik tejkia kenhaya. 20 Te nimetztajtani semaya inpanpa, nusan inpanpa muchi ká nechyulmatit ipanpa tay inasket yejemet, 21 pal muchi muchiwat sesan, ken taja, Nuteku, ijtik naja wan naja ijtik taja, pal kiane yejemet nusan muchiwat ijtik tejemet, ma tayulmati ne taltikpak ika taja nechtitanij. 22 Wan ne taweychiwalis ne tinechmakak nikinmakatuk ma muchiwakan sesan, ken tejemet tisesan. 23 Naja ijtik yejemet wan taja ijtik naja, ma sujsul muchiwakan sesan, pal ma kimati ne taltikpak ka taja tinechtitanij wan tikintasujtak ken tinechtasujtak. 24 Nuteku, ká ne titemakak kan ninemi naja nikneki ma nemikan nusan yejemet nuwan, pal ma kitakan ne nutaweychiwalis ne tinechmakatuk, ika tinechtasujtak kwak teuk mutzintij ne taltikpak. 25 Nuteku yek, ne taltikpak nusan inte metzishmatki; naja kia nimetzishmatki, wan yejemet metzishmatket ika taja tinechtitanij, 26 wan nikinneshtilijtuk mutukay wan nikneshtis ma nemi ijtik yejemet ne mutetasujtalis ne tinechtasujtak wan ma ninemi ijtik yejemet.
Yeshu ilpituk
1 Kwak Yeshu tamik taketza, kiski iwan ne mumachtianimet wan yajket sentapal ne achin ipal Kidron, kan nemituya se mil, wan yaja wan ne mumachtianimet kalakket ka né. 2 Yuda nusan, ne temaka, kimati katka kan nemituyat ika seujseujti musentepejtuya Yeshu iwan ne mumachtianimet ka né. 3 Yuda kikwij se tepewa itech ne weypalejmet wan ne Parishayujmet wan ajsik ka ikuni. Kiwikaket tajtawil wan ujukut wan tajtaiwan. 4 Kiski Yeshu; yaja kimati katka muchi tay yawi muchiwa. Wan kinhilwia: —Ká ankitemuat? 5 Nankilijket: —Yeshu ne Nazarayuj. Kinhilwia: —Naja ne. Yuda ne temaka né nemituya inwan nusan. 6 Kwak kinhilwij "Naja ne", yajket ka inteputz wan mutamutaket talchi. 7 Kintajtanilij uksenpa: —Ká ankitemuat? Inaket: —Yeshu ne Nazarayuj. 8 Yeshu nankilij: —Nimetzinhilwijtuk ka naja ne. Su naja annechtemuat, shikajkawakan ma yawit 9 pal yekawi ne pajpalabraj: "Inte nikpulujtuk nian se ipal muchi ká titemakatuk nuwan". 10 Shimon Pedro kipiatuya se espadaj. Yaja kishtij wan kichaluj ne itekitini ne weypalej, wan kikutun ne inakas. Uni se tekitini itukay Malek. 11 Kwakuni ne Yeshu kilwij Pedro: —Shikishtuka ne espadaj ijtik ivainaj. Ninemi pal nikuni ne atiluni ne nechmakak ne Nuteku! 12 Kwakuni ne tepewa wan ne miaktuktiani wan ne takamet ipal ne Yudayujmet kitzkijket Yeshu wan kilpijket, 13 wan kiwikaket iishpan Hanan achtu, ika yaja iteku ne isiwaw ne Kayapa, ká ne weypalej katka tik uni shiwit. 14 Kayapa yaja ne kinhilwij ne Yudayujmet ka mas yek ma miki se takat ka imaku muchi ne techan. 15 Iipan Yeshu yajki Shimon Pedro wan ukse mumachtiani. Ne weypalej kishmati katka uni mumachtiani wan kalak ijtik ne iweykal ne weypalej iwan Yeshu. 16 Nakak ne Pedro itenpan ne tentzakka. Kwakuni kalak kalijtik ne ukse mumachtiani, ne kishmati ne weypalej, wan kilwij ne siwat ne tajpia ne tenkal wan yaja kiajkaw kalaki ne Pedro. 17 Ne siwapil ne tajpia ne tenkal kilwia ne Pedro: —Nina ka taja imujmumachtiani uni takat! Ina yajuni: —Naja inte. 18 Né nemituyat ne tekitinimet wan tajpianimet, ne kitalijtuyat tejtekunal pal mututuniat, ika sekmikit. Ne Pedro nusan mutalij inwan mututunia. 19 Kwakuni ne weypalej kitajtan Yeshu inpanpa ne imujmumachtiani wan ipanpa ne itamachtilis. 20 Nankilij Yeshu: —Naja nitaketztuk melaknaj iwan muchi ne taltikpak. Senpa nitamachtijtuk tik ne kajkalsennemit wan itech ne teupan, kan ne musentepewat muchi ne Yudayujmet, wan te nitaketztuk tatka ichtaka: 21 ken ka tinechtajtanilia? Shikintajtanili ne takaktiwit tay nikinhilwijtuk. Shikita! Yejemet kimatit tay ninak naja! 22 Kwak inak uni, se pal ne tajpianimet nemituyat inawak kimakak ne Yeshu iwan ne imatashkal wan inak: —Ijkiuni tiknutza ne weypalej? 23 Nankilij Yeshu: —Asu nitanutzki teyek, shina tay teyek. Asu yek, taika tinechwiteki? 24 Ne Hanan kititanijtuk ilpituk itech Kayapa, ne weypalej. 25 Shimon Pedro nemituya mututunia ka né. Kilwijket: —Nina ka taja nusan se imumachtiani. Yajuni kilwij ka inte, inak: —Inte naja! 26 Ina ne se tekitini, ne iiknew yajuni ká Pedro kikutun ne inakas: —Nina ka nimetzitak iwan tik ne mil. 27 Inak Pedro senpa ka inte; nemanha takwikak ne ukichtijlan.
Iishpan Pilatus
28 Kisket ichan Kayapa wan kiwikaket ne Yeshu tik ne Praytorioj peyna. Wan yejemet inte kalakket ijtik ne Praytorioj ma inte mususulwikan pal welit kikwat ne Paskwaj. 29 Yajika ne Pilatus kiski tatenpan kanka nemituyat wan inak: —Tay anhinat ka kichijki ini takat? 30 Nankilijket wan kilwijket: —Asu yaja inte kichijtuskia tay inte yek, inte titemakatuskiat! 31 Kinhilwij ne Pilatus: —Shikwikan wan shikchiwakan juzgar ken ina ne anmutajtuli. Ne Yudayujmet kilwijket: —Tejemet inte tinemit pal tikmiktiat aka. 32 Ijkiuni, pal yekawi tay inak ne Yeshu kwak taneshtij ken yawi miki yaja. 33 Yajika kalak senpa tik ne Praytorioj ne Pilatus wan kinutzki ne Yeshu wan kilwij: —Taja ne tatuktiani ipal ne Yudayujmet? 34 Nankilij Yeshu: —Tajasan tina uni, ush metzilwijket sejseuk? 35 Nankilij ne Pilatus: —Anka naja ni Yudayuj? Ne mutechan wan ne weypalejmet metztemakatiwit nuwan. Tay tikchijtuk? 36 Nankilij Yeshu: —Ne nutatekimakalis inte ipal ini taltikpak. Asu ipal ini taltikpak ne nutatekimakalis, ne nutajtajpiani mutatejtemuilijtuskiat ma inte nechtemakakan iwan ne Yudayujmet. Ashkan ne nutatekimakalis inte pal nikan. 37 Yajika ne Pilatus kilwij: —Taja titatuktiani tel? Nankilij Yeshu: —Taja tina ka naja nitatuktiani. Yajika ninesik wan yajika niajsik ne taltikpak, pal nikneshtia tay tejkia. Ká ne ipal ne tejkia, nechkaki. 38 Ne Pilatus kilwia: —Tay ne tejkia? Wan kwak inatuk uni, kiski wan yajki kan nemituyat ne Yudayujmet wan kinhilwia: —Naja inte nikajsi taika nikchiwiliskia tatka. 39 Ankipiat se tay ankichiwat katka: ma nikchululti se anmupal tik ne Paskwaj. Ankinekit ma nikchululti anmupal ne tatuktiani ipal ne Yudayujmet? 40 Kwakuni tzajtziket senpa, inat: —Yaja inte! Shikchululti ne Bar-Aba! Ne Bar-Aba katka se techtekini.
1 Kwakuni ne Pilatus kikwij ne Yeshu wan kiwitek; 2 wan ne tasumanimet kipikket se yawal pal wijwitzti wan kitalilijket ijpak ne itzuntekun, wan kitakentijket iwan ikwajkwach galantzin, 3 wan ajsit katka itech wan inat "Oj! Tatuktiani pal ne Yudayujmet!" wan kimakat. 4 Wan kiski tatenpan ne Pilatus senpa wan kinhilwia: —Shikita: nalwika nikan anmupal ma shikmatikan ka inte nikajsi nian se taika. 5 Kwakuni kiski ne Yeshu kiwika ne yawal ipal wijwitzti wan ne ikwajkwach galantzin. Wan kinhilwia: —Nikan nemi ne takat! 6 Kwakuni, kwak ne weypalejmet wan ne tajpianimet kitaket, tzajtziket, inat: —Shikcruzpilu! Shikcruzpilu! Ne Pilatus kinhilwia: —Shikwikan anmejemet wan shikcruzpilukan, ika naja inte nikajsi taika. 7 Nankilijket ne Yudayujmet: —Tejemet tikpiat tutajtuli, wan ne tajtuli ina ma miki, ika muchiwa ken yajasan itelpuch ne Teut. 8 Kwak takakik uni tay inaket, ne Pilatus majmawki mas 9 wan kalak ijtik ne Praytorioj senpa wan kilwia ne Yeshu: —Kanka tikiski? Ne Yeshu inte inak tatka. 10 Kwakuni ne Pilatus kilwia: —Inte tinechilwia tatka? Te tikmati ka nikpia tatuktilis pal nimetzchulultia, wan nikpia tatuktilis pal nimetzcruzpilua? 11 Nankilij Yeshu: —Taja inte tikpiaskia nian se tatuktilis nujpak, asu inte metzmakatuskiat tik ne ajku. Neka ne nechtemakak muwan kichijtuk se tay inte yek sea wey. 12 Ne Pilatus mutatemuilia pal kichulultia. Ne Yudayujmet tzajtziket inat: —Asu tikchulultia, inte tiiamigoj ne taltikpaktuktiani, ika ká ne muchiwa tatuktiani yajasan, kishtenewa ne taltikpaktuktiani. 13 Kwakuni, kwak ne Pilatus kinkakik, kalishtij ne Yeshu wan mutalij ijpak se tepatznaj kan itukay Tejtet Chayajtuk, wan tik itaketzalis ne Yudayujmet Gabata. 14 Yaja ne tunal ipal tajshitilis ipal ne Paskwaj wan nemituyat tajkutunal. Wan kinhilwia ne Yudayujmet: —Shikita! Anmutatuktiani! 15 Yejemet tzajtziket: —Shikwika wejka! Shikcruzpilu! Kinhilwia: —Ma nikcruzpilu ne anmutatuktiani? Nankilijket ne weypalejmet: —Inte tikpiat tatuktiani, semaya ne taltikpaktuktiani ipal Roma!
Yeshu cruzpilujtuk
16 Kwakuni temakak ma kicruzpilukan. Kiwikaket tel, 17 wan kisajsakak yajki isel ne icruz wan ajsik kan itukay Ne Tzuntekumat, ne muilwia Golgota tik itaketzalis ne Yudayujmet, 18 kan ne kicruzpilujket, yaja wan ume iwan, ne se nikan wan ne se ikuni wan ne Yeshu tatajku. 19 Ne Pilatus tajkwiluj wan kitalij pak ne cruz se kan mutukaytia: "Yeshu ne Nazarayuj, intatuktiani ne Yudayujmet". 20 Muchi ne Yudayujmet kitaket uni amat, ika kan ne kicruzpilujket Yeshu inte wejka ne techan, wan nemituya ijkwilujtuk ijtik ne intajtaketzalis ipal ne Yudayujmet, ipal Roma wan ipal Grecia. 21 Kwakuni ne weypalejmet pal ne Yudayujmet kilwiat ne Pilatus: —Maka shiktali "intatuktiani ne Yudayujmet", shina semaya ka yaja inak "naja niintatuktiani ne Yudayujmet". 22 Nankilij ne Pilatus: —Tay ne nikijkwilujtuk, nikijkwilujtuk! 23 Ne tasumanimet, kwak kicruzpilujtiwit ne Yeshu, kitzkijket ne ikwajkwach wan kichijket nawi takutun, pal kimajmakat sejse itakutun, wan nusan kikwijket ne iwipil. Ne iwipil inte nemituya ijtzuntuk, muchi tzawtuk. 24 Yajika muilwijket: —Ma inte tiktzayanakan. Mas yek ma tiktamutakan chivos pal tikitat ká yawi kipia. Ijkiuni pal ma yekawi tay nemi ijkwilujtuk, ina: "Kitakutuntijket nukwajkwach inpal wan ipanpa nuwipil kimutaket chivos." Ijkiuni kichijket ne tasumanimet. 25 Inawak ne icruz ne Yeshu nemituyat ne inan wan ne ieltiw ne inan, Maryam isiwaw Klopas wan Maryam pal Magdala. 26 Ne Yeshu kitak unisan ne inan wan ne imumachtiani ne kitasujta katka sea, wan kilwia ne inan: —Siwat, shikita mukunew. 27 Neman kilwia ne mumachtiani: —Shikita ne munan. Wan ne mumachtiani kikwij ken inan. 28 Kwakuni ne Yeshu kimatki ka tamik muchi pal yekawi tay nemi ijkwilujtuk. Wan ina: —Niamiki. 29 Nemituya ka né se taijtik tentuk iwan yayushukuk. Kiyawalujket se esponjaj tentuk iwan yayu tik se majtzal wan kalkwijket itech ne iten. 30 Kwak Yeshu kikwijtuya ne yayu, inak: —Tamik! Wan kishtapachuj itzuntekun wan temakak ne iijiu.
Se tasumani kitzupin ne iumiskwil
31 Kwakuni ne Yudayujmet kitaket ka nemia ne tajshitilis, wan pal inte nakat ne inwejweyka ijpak ne cruz tik ne sewilis, ika uni sewilis katka ne wey ilwit, kitajtanket ne Pilatus ma mukshikelunakan wan ma muanakan. 32 Ajsiket ne tasumanimet wan kikshikelunket ne achtu, wan ne seuk ne musencruzpilujtuya iwan kenhaya. 33 Kwak ajsiket itech ne Yeshu, ken kitaket ka yaja miktuka, inte kikshikelunket. 34 Se pal ne tasumanimet kitzupin ne iumiskwil iwan ne chuzoj wan kiski esti wan at, 35 wan ne kitztuya taketzki ipanpa wan tejkia ne itaneshtilis, wan yajuni kimati ka ina tay tejkia pal kiane anmejemet nusan kimatit, 36 ika uni muchijki pal ma yekawi tay nemi ijkwilujtuk: "Inte mukelunas nian se iumiu." 37 Wan ukse tay ijkwilujtuk ina: "Kitasket ne ká kikuyuntiwit."
Ne shaput
38 Tipan, sé kitajtan ne Pilatus ma kiajkawa kiana ne mikini, wan kiajkaw. Yaja Yosep ipal Ramatay, se imumachtiani Yeshu minashtuk ipanpa mawi ipal ne Yudayujmet. Ajsik wan kianki ne mikini. 39 Nusan walaj Nikodemos, ne ajsituya ka tayua kalwika sejse pajti majmalijtuk, achka sentzunti libraj. 40 Kwakuni kikwijket ne imikini wan kiululujket ijtik ikwenyu iwan pajtipuputuka, ken kichiwat katka ne Yudayujmet pal kintalpachuat ne mijmikini. 41 Kan mucruzpiluj nemituya se mil wan ijtik ne mil se yankwik shaput kan inte aka mutekatuk. 42 Ikuni kitekaket ne Yeshu ipanpa ne tajshitilis ika inte nemi wejka.
Muyulkwi
1 Tik ne achtu tunal pal ne semanaj, Maryam ipal Magdala ajsi peyna tik ne shaput, kwak uk kunyua, wan kita ka mijkwantuk ne tet ipal ne shaput. 2 Kwakuni kisa mutalua wan ajsi itech Shimon Pedro, wan itech ne ukse mumachtiani ká ne Yeshu sujsul kitasujta katka, wan kinhilwia: —Kishtijtiwit ne Tajtzin ijtik ne shaput wan te tikmatit kan kitalijket. 3-4 Kisket mutaluat tel ne Pedro wan ne ukse mumachtiani wan ajsit tik ne shaput nemanhachin, wan ken ne ukse mumachtiani yajki mas talul ajsik tik ne shaput achtu, 5 wan kwak muishpiluj, kitak ne ikwenyu pak ne tal. Melka uni, intesu kalak. 6 Kwakuni ajsik Shimon Pedro iipan wan kalak tik ne shaput wan kita ne ikwenyu pak ne tal, 7 wan ne ikwach ne nentuya ijpak ne itzuntekun inte nemituya iwan ne ikwenyu asunte kimilujtuk ka ikwaj. 8 Kwakuni kalak nusan ne ukse mumachtiani ne achtu ajsituk ne shaput, wan tachishki wan kimatki, 9 ika inteuk kimatit ka muijkwilujtuk ka yaja nemi pal muyulkwi kwak miktuka. 10 Ne mumachtianimet mukwepket ka inchan; 11 Maryam nakak iten ne shaput chuka. Kwak chuka nemi, muishpiluj tachia ijtik ne shaput, 12 wan kita ume tanawatiani ijistatakentijtuk muetztuk ne sé itech ne itzuntekun wan ne seuk itech ne ijikshi kan ne mutekatuya ne iweyka Yeshu, 13 wan kilwiat: —Siwat, taika tichuka? Kinhilwia: —Ika kiwikatiwit ne Nutajtzin wan te nikmati kan kitalijket. 14 Kwak tamik ina uni, muishkwepki wan kita ne Yeshu ejkatuk ka iipan, wan te kimatki ka yaja ne Yeshu. 15 Yeshu kilwia: —Siwat, taika tichuka? Ká tiktemua? Yajane kimati ka yaja ne milpiani wan kilwia: —Tajtzin, asu taja tikwikak, shinechilwi kan tiktalijtuk wan niaw nalkwi. 16 Yeshu kilwia: —Maryam! Yaja muishkwepa wan kilwia tik itaketzalis ne Yudayujmet: —Rabuni! Kineki ina "nutamachtiani!" 17 Yeshu kilwia: —Maka shu-shinechmatuka, ika inteuk nitejkutuk itech Nuteku. Shu shikinhilwi ne nukniwan ka nitejku kan nemi ne Nuteku wan Anmuteku wan Nuteut wan Anmuteut. 18 Ajsi Maryam ipal Magdala kinnawatia ne mumachtianimet ka nikitztuk ne Tajtzin, wan ini tay kilwijtuk. 19 Kwakuni ka teutak tik uni achtu tunal ipal ne semanaj, ne tentzakka kan nemituyat ne mumachtianimet nemituya tzaktuk ipanpa ne mawi kipiatuyat ipal ne Yudayujmet. Wan ajsik ne Yeshu wan nakak tatajku wan kinhilwia: —Shinemikan yek! 20 Kwak tamik ina ini, kilwitij ne ijimey wan ne iumiskwil. Kwakuni kwak kitaket ne Tajtzin pakiket ne mumachtianimet. 21 Ne Yeshu kinhilwij senpa: —Shinemikan yek! Ijkiunisan ken nechtitanij ne Teteku, naja nusan nimetzintuktia. 22 Wan kwak inatuya ini, kinpitzki wan kinhilwia: —Shikwikan Ijiutzin. 23 Mutapupulwisket ne intajtateyekchijtuk ká ne ankintapupulwiat. Ká ne ankinpachuat, mupachusket. 24 Tomas, se pal ne majtakti-ume ne muilwia chachawat, inte nemituya inwan kwak walaj Yeshu. 25 Kwakuni ne uksejse mumachtiani kilwiat: —Tikitztiwit ne Tajtzin. Yaja kinhilwij: —Asu inte nikita ne kuyuntuk kan nemituyat ne clajclavoj tik imejmey wan niktalia numapipil ijtik ne kuyuntuk pal ne tejtepusti wan niktalia ne numey tik ne iumiskwil, tesu nikmattuskia! 26 Wan ukseujti kwak panutiwit chikwey tunal, ne mumachtianimet nemituyat kalijtik wan Tomas nemituya inwan. Witz ne Yeshu melka nemituya tzaktuk ne tentzakka, wan nakak tatajku wan inak: —Shinemikan yek! 27 Neman kilwia Tomas: —Shiktali ka nikan ne mumapipil wan shikita ne nujnumey, wan shiktali ne mumey wan shikmatuka ne nuumiskwil, wan shikmatiaya! 28 Nankilij Tomas wan kilwij: —Nutajtzin wan Nuteut! 29 Ne Yeshu kilwia: —Ika tinechitztuk tikmatki. Suertej kipiat ne inte kitat wan kimatit! 30 Kiane tel, ne Yeshu kichijki miak pal muishmati tik intachialis ne mumachtianimet tay inte muijkwilujtiwit tik ini amat. 31 Ini muijkwilujtuk pal ma shikmatikan tik anmuyulu ka Yeshu yaja ne Mawaltijtuk, ne Itelpuch ne Teut, wan ma shiyujyultuk tik itukay ika antayulmatit.
Ukse muneshtilis
1 Tipan, muneshtij ne Yeshu ukseujti ishpan ne mumachtianimet itech ne weyat ipal Tiberias. Walmuneshtij ijkini: 2 Sennemituyat Shimon Pedro wan Tomas ne chachawat wan Natanel ne ipal Kana pal Galilaya wan ne ipilawan Zabday wan uk ume ipal ne mumachtianimet. 3 Kinhilwia Shimon Pedro: —Niawa nikitzkia michin. Kilwiat: —Tejemet nusan tiwitzet muwan. Kisket wan kalakket ijtik ne barcoj, wan tik uni tayua nian tatka kitzkijket. 4 Kwak tanesik, Yeshu nemituya ejkatuk iten ne at, melka ne mumachtianimet inte kishmatket. 5 Kwakuni ne Yeshu kinhilwij: —Kukunetzitzin, inte ankipiat taiwan antakwaskiat? Nankilijket ka inte. 6 Yaja kinhilwij: —Shiktamutakan ne matat ka imayekkan ne barcoj wan san ankiajsisket. Kitamutaket tel, wan te welituyat kaltilanat ika ne michin sujsul mijmiak. 7 Kwakuni ne mumachtiani ká ne sea kitasujta katka ne Yeshu kilwij Pedro: —Yajane ne Tajtzin! Kwak Shimon Pedro kikakik ka yaja ne Tajtzin, kitalij ne icoton, ika nemituya petztituk, wan mutamutak ijtik ne weyat. 8 Ne sejseuk mumachtiani walajket iwan ne barcojtzin, ka inte nemituyat wejka ne tenhat, semaya achka sentzunti metroj. Kitilanat witzet ne matat iwan muchi ne mijmichin. 9 Kan walejkuket ne tal, né kitaket tejtekunal tajtalijtuk wan michin talijtuk ijpak, wan tajtamal. 10 Ne Yeshu kinhilwia: —Shalwikakan sejse pal ne mijmichin ne ankitzkijtiwit. 11 Tejkuk Shimon Pedro, wan kitilan ne matat hasta ne tal tentuk iwan sentzunti-unpual-majtakti-yey tumak michin, wan melka mijmiak, inte tzayanik ne matat. 12 Ne Yeshu kinhilwia: —Shiwikikan, shitakwakan! Nian se ipal ne mumachtianimet kitajtanilij "Ká taja?" ika majmawit; kimatit ka yaja ne Tajtzin. 13 Witz Yeshu wan kikwi ne tajtamal wan kinmajmaka, wan nusan ne michin. 14 Iwan ini, yey wipta kichiwa ka muneshtij Yeshu ishpan ne mumachtianimet kwak miktuka wan muyulkwija. 15 Kwakuni, kwak takwajtiwit, ne Yeshu kilwia Shimon Pedro: —Shimon ikunew Yojan, tinechtasujta mas que yejemet? Kilwia: —E tajtzin, taja tikmati ka nimetztasujta. Kilwia: —Shiktajpia ne nuijichkakunetzizin! 16 Kilwia uksenpa: —Shimon ikunew Yojan, tinechtasujta? Kilwia: —E tajtzin, taja tikmati ka nimetztasujta. Kilwia: —Shiktakwalti ne nuichkatal! 17 Nusan uksenpa kilwia: —Shimon ikunew Yojan, tinechtasujta? Ne Pedro mutechtij ika kilwij yeshpa "Tinechtasujta?", wan kilwia: —Tajtzin, muchi tikmati; taja tikmati ka nimetztasujta. Ne Yeshu kilwia: —Shiktajpia ne nuichkatal! 18 Ini tay nimetzilwia: kwak tipiltzin katka, tiktalia katka mukwajkwach musel wan tinejnenki katka kanka tikelewia. Kwak tiaw tishulejtia, tiaw tikmelawa ne mujmumey pal seuk metztalilia mukwajkwach wan yawi metzwika kanka inte tikelewia. 19 Inak uni pal taneshtia iwan katiawel mikilis yawi kiweychiwa ne Teut, wan kwak inatuk, kilwia: —Shiwi nuipan. 20 Muishkwepki ne Pedro wan kita ne mumachtiani ká ne Yeshu kitasujta, nejnemi witz ka ipan. Yajaya ne ká tzinkiski inakastan ne Yeshu kwak takwat nemit wan inak: "Tajtzin, ká ne yawi metztemaka?" 21 Ne Pedro kitak yajuni wan kilwia ne Yeshu: —Tajtzin, ken ijtuk iwan yajini? 22 Ne Yeshu kilwia: —Asu nikelewia ma naka yaja hasta niwitz, tay tikneki tikchiwa? Taja nikan nuipan naja! 23 Kwakuni pejket inat ijtik ne tukniwan ka uni mumachtiani inte yawi miki. Wan ne Yeshu inte kilwij: "Inte yawi miki." Semaya kilwij: "Asu nikelewia ma naka yaja hasta niwitz, tay tikneki tikchiwa?" 24 Uni ne mumachtiani ne taneshtia ipanpa muchi ini wan tajkwiluj, wan tikmatit ka tejkia tay ne taneshtijtuk. 25 Nusan nemit miak sejseuk tajtay kichijki ne Yeshu: asu muijkwiluskia muchi uni, nina ka inte ajsiskia muchi ne taltikpak ipal ne ajamat kan muijkwiluskia.