• |New Testament|
• Maahtiyo
• Maarhk
• Lok
• Cwaan
• Ishihcikewinan
• Oroomink
• 1 Kwaarintink
• 2 Kwaarintink
• Kalehshiya
• Ehpihsahsihkaank
• Pilipaai
• Kalaahsiink
• 1 Tehsalanaihkaank
• 2 Tehsalanaihkaank
• 1 Timahti
• 2 Timahti
• Taitahs
• Paailiiman
• Hiiparoowiwak
• Ciimis
• 1 Piitar
• 2 Piitar
• 1 Cwaan
• 2 Cwaan
• 3 Cwaan
• Coot
• Okihkentamooshiwewin

The New Testament of our Lord and Saviour Jesus Christ

Maahtiyo 1

1 Miitahsh o'owe eshipii'ikaatenik aaniinti Ciisahs Christ (Jesus Christ) kaahpionci​nihtaawikitc, mii 'awe kaaontahkaanesitc Tepitink (David), kewiin ekii'ontahkaanesinitc Eparahaamink (Abraham). 2 Eparahaam kii'okosihsi ini Aaisikoon (Isaac) miinawaahsh awe Aaisik kii'ani​okosihsi ini Cekapoon (Jacob), kaye Cekap kii'ani​okosihsi ini Cootawan (Judah), wiicihkiweyini kaye. 3 Shikwa Coota kii'okosihsi iniweniwa' Piirisan (Perez), Siiraawan (Zerah). Temaar (Tamar) tahsh kii'ishinihkaasowan omaamaawaan. Kaye Piiris kii'okosihsi ini Hesranan (Hezron) kaye Hesran kii'okosihsi ini Oraaman (Ram), 4 kaye Oraam kii'ani​okosihsi ini Aminataapan (Amminadab), kaye Aminataap kii'ani​okosihsi ini Naahshanan (Nashon), miinawaahsh Naahshan kii'ani​okosihsi ini Saalmanan (Salmon). 5 Kaye Saalman kii'ani​okosihsi ini Poowaasan (Boaz). Orehaap (Rahab) kii'ishinihkaasowan omaamaan. Kaye Poowaas kii'ani​okosihsi ini Oopitan (Obed). Orooht (Ruth) kii'ishinihkaasowan omaamaan. Kaye Oopit kii'ani​okosihsi ini Cehsiwan (Jesse). 6 Cehsi kii'okosihsi ini Tepitan (David) kaakiihkihci'okimaawinitc. Kaye Tepit kii'ani​okosihsi ini Swaalamanan (Solomon). Yoraaya (Uriah) wiiwan kii'omaamaa Swaalaman. 7 Kaye Swaalaman kii'ani​okosihsi ini Oriiyapoowamoon (Rehoboam), miinawaahsh Oriiyapoowam kii'ani​okosihsi ini Apaaicawan (Abijah), kaye Apaaica kii'ani​okosihsi ini Ehsawan (Asa). 8 Kaye Ehsa kii'ani​okosihsi ini Cehoohshahpaatan (Jehoshaphat), kaye Cehoohshahpaat kii'ani​okosihsi ini Cooramoon (Joram), kaye Cooram kii'ani​okosihsi ini Asaayawan (Uzziah). 9 Kaye Asaaya kii'ani​okosihsi ini Coohtamoon (Jotham), kaye Coohtam kii'ani​okosihsi ini Hesihkaayawan (Hezekiah), 10 kaye Hesihkaaya kii'ani​okosihsi ini Manaahsawan (Manasseh), kaye Manaahsa kii'ani​okosihsi ini Aamanan (Amon), kaye Aaman kii'ani​okosihsi ini Cosaayawan (Josiah). 11 Kaye Cosaaya kii'ani​okosihsi ini Cehkanaayawan (Jeconiah), wiicihkiweya' kaye, i'iwe ahpii Isriyalininiwak (Israel) kaakii'ishiwicikaniwiwaakopanen weti Paapilanonk (Babylon). 12 Ahpii tahsh kaa'ishkwaa​ishiwinintwaa iweti Paapilanonk, Cehkanaaya kii'ani​okosihsi ini Shiyaaltiiyalan (Shealtiel). Miinawaahsh Shiyaaltiiyal kii'ani​okosihsi ini Sirapapalan (Zerubbabel). 13 Miinawaa kaye Sirapapal kii'ani​okosihsi ini Apaayotan (Abiud), kaye Apaayot kii'ani​okosihsi ini Ilaayahkiman (Eliakim). Kaye Ilaayahkim kii'ani​okosihsi ini Esoran (Azor), 14 kaye Esor kii'ani​okosihsi ini Setahkwan (Zadok), kaye Setahk kii'ani​okosihsi ini Ehkiman (Achim), kaye Ehkim kii'okosihsi ini Ilaayotan (Eliud). 15 Kaye Ilaayot kii'ani​okosihsi ini Eli'esaroon (Eleazar), kaye Eli'esar kii'ani​okosihsi ini Maahtanoon (Matthan), kaye Maahtan kii'ani​okosihsi ini Cekapoon (Jacob). 16 Cekap kaye kii'ani​okosihsi ini Coosapoon (Joseph). A'a tahsh Coosap, Meri (Mary) kii'ishinihkaasowan wiiwan, miiwan itahsh ini Ciisahs kaakii'omaamaatc. Ciisahs tahsh kaakii'inintc Kishemanitoon kaakii'onenimikotc cipimaaci'iwetc. 17 Miitahsh kaakiihpi​mitaahshiniiwiwaatc (14) ekiihpi​ayaanihke nihtaawikiwaatc e'inawentiwaatc ekiihpionci​maaciayaawaatc Eparahaamink piinihsh Tepitink, kaye ekiihpi​mitaahshiniiwiwaatc (14) mii 'omaa onci Tepitink piinihsh kiipi-ishiwinintwaa weti Paapilanonk, miinawaa ekii'ani​mitaahshiniiwiwaatc (14) kaakii'ishi​pi​nihtaawikiwaatc Paapilanonk piinihsh kiipi​ocihcihsek kaakii'ishi​nihtaawikitc a'a Kishemanitoon kaakii'onenimikotc cipimaaci'iwetc. 18 Miitahsh o'o nahke Ciisahs kaakii'ishi​nihtaawikitc. Meri (Mary) Ciisahs omaamaan ekii'ahshotamaakonitc ciwii'wiitikemikonitc ini Coosapoon (Joseph), cipwaa wiitikentiwaatc itahsh okiih​kihkentaan a'awe ihkwe apinoonciishan e'ayaawaatc, Kishemanitoon otAhcaahkoni ekii'miinikotc ini apinoonciishan. 19 Coosap itahsh Meriin kaawii'wiitikemaahpan, aahpici kwayahk kii'ishipimaatisi kaye kaawiin okii'antawentansiin citipaacimaatc ini Meriin ewiih​pikwatoonshenitc. Kii'inentam tahsh ewiih​kiimooci​pakitinaatc. 20 Mekwaa tahsh o'o e'ishi​naanaakatawentank, okii'waapamaan ini Kishemanitoo otencaliman i'imaa inaapantamowinink ekii'ikotc: "Coosap, Tepitink (David) kaaontahkaanesiyan! Keko wiin sekisihken ciwiiwiyan Meri. Kishemanitoo otAhcaahkwan ohsha okii'miinikoon ini apinoonciishan. 21 Kwiiwisenhsan ohsha oka​nihtaawiki'aan. Ciisahs (Jesus) tahsh kikaishinihkaanaawaa, aaniihsh oka​pimaaci'aa' opimaatisiima' i'imaa omacitootamowininiink," okii'ikoon. 22 Miitahsh o'o kaakii'onci-ishihsek mayaa piko ci-ishihsenik Kishemanitoo kaakii'ihkitokopanen mewisha otipaacimowininiiman kaakiih​kanootamaakotc o'owe ekii'ihkitonitc: 23 Kwayahk pehkioshkiniikihkwe oka-ayaawaan apinoonciishan kaye oka​nihtaawiki'aan keokosihsitc. Imaaniyo'el (Immanuel) tahsh taishinihkaasowan. Mii'iwe kaaicikaatek: "Kishemanitoo kiwiiciiwikonaan." 24 Coosap tahsh shemaak kii'waanishkaa ekii'ishihciketc aaniin kaakii'ikotc ini kaaTipencikenitc otencalimini. Meriin tahsh kii'wiiwi. 25 Kaawiin tahsh wiihkaa okiih​papaamenimaahsiin ini wiiwan cipwaa nihtaawikinaawahsonitc. Ciisahs tahsh okii'ishinihkaanaan Coosap ini kwiiwisenhsan.

Maahtiyo 2

1 Ciisahs tahsh kii'ishinihtaawiki i'imaa ootenaank Pehtalihemiink (Bethlehem) i'imaa ahkiink Cootiiya (Judea) kaakii'ishinihkaatenik ahpii Herat (Herod) kiikihciokimaawitc. Miitahsh i'i ahpii kiihpiishaawak i'imaa Ceroosalamink (Jerusalem) ikiweniwak ininiwak kaananaakaci'aawaatc wanankohsha' waapanonk kaakii'onciiwaatc. 2 Miitahsh kii'ihkitowak: "Aanti a'awe apinoonciish kaanihtaawikitc kaawii'okimaahkantawaatc i'iweniwa' Coowa'. Ninkii'waapamimaanaanin ohsha ini owanankohshiman i'iweti waapanonk, miitahsh kaaonci​piishaayaank ewii'ociciinkwaniihtawankitc." 3 Ahpii tahsh kaa'noontank a'a Herat wiinke kii'mikoshkaatentam, iki kaye kahkina kaakii'ayaawaatc i'imaa Ceroosalamink. 4 Kahkina tahsh okii'antomaa' i'i Kihcianami'ewikimaa', kaakihkino'amaakenitc kaye Onaahkonikewin, miitahsh kaa'ishi​kakwecimaatc: "Aanti kaawii'ishi​nihtaawikinitc ini Kishemanitoo kaakii'ahshotamaaketc cipimaaci'iwenitc?" 5 Miitahsh Herat kaa'ishi​nahkwehtawintc: "I'imaa hsa ootenaank Pehtalihemiink i'imaa ahkiink Cootiiya taishi​nihtaawiki, aaniihsh Kishemanitoo mewisha kaakiih​kanootamaakotc o'o kii'ishipii'ikewan: 6 'I'iwe hsa Pehtalihem i'imaa kaa-ayaak ahkiink Cootahkaank (Judah), kaawiin pankii inakintehsinoon imaa kaakihci-inentaakwahkin ootenawan Coota ahkiink. Mii ohsha 'imaa Pehtalihemiink kaawii'onciitc a'a kaawiiniikaaniihtamaaketc kekihkinowinaatc kaye nintoopimaatisiima' i'i Isriyala' (Israel), kii'ihkito kaaTipenciketc.' " 7 Herat tahsh okiih​kiimoocikanoonaa' iniweniwa' ininiwa' waapanonk kaakii'onciinitc, kaye okiih​kakwecimaa' aaniin mayaa ahpii kaa'naakosinitc ini wanankohshan. 8 Miitahsh kaa'ishi-ishinisha'waatc i'iweti Pehtalihemiink ekii'inaatc: "Maacaak, weweni kakwe​mihkawihk a'a apinoonciish. Kiimihkawek itahsh piwiintamawihshiihkek keniin hsa ciociciinkwaniihtawak," okii'inaa'. 9 Shemaak itahsh kii'maacaawak. Miinawaa tahsh okii'ani​waapamaawaan ini wanankohshan kaakii'waapamaawaatc waapanonk, ekii'ani​niikaaniihtamaakowaatc, piinihsh eni​otihtaminitc ekii'ani​kipicishkaanitc tipishkoo kaaishi​ayaanitc ini apinoonciishan. 10 Aahpici tahsh kiihkihci​moocikentamook ahpii kaawaapamaawaatc ini wanankohshan. 11 Miitahsh kaa'ishi​piintikewaatc i'imaa waahkaa'ikanink, ekii'waapamaawaatc ini apinoonciishan, kaye omaamaani Meriin (Mary). Shemaak itahsh okii'ociciinkwaniihtawaawaan ini apinoociishan ekiih​kihci-inenimaawaatc. Miitahsh kaa'ishi​paahkinamowaatc omashkimotiwaan kihcikekoonan ekii'miinaawaatc, osaawishooniyaan, minaahsikanini (frankincense) kaye, pikiwi​minaako'onini (myrrh) kaye. 12 Kiihpawaamowak itahsh ekiih​kihkentamoonikowaatc Kishemanitoon cikiiwe​ishaahsikwaa weti Heratan kaaishi​ayaanitc. Pahkaan itahsh inahke kii'ishi​kiiwewak otahkiiwaank. 13 Ahpii tahsh kaa'ani​maacaanitc iniweniwa' ininiwa', Kishemanitoo otencaliman okiih​pinaasihkawaan Coosapoon (Joseph) i'imaa inaapantamowinink kaakii'inaatc: "Wanishkaan, maaciipa'iwek a'a apinoonciish kaye omaamaan, Iicipahkiink (Egypt) ahpa'iwek. Miitahsh weti keayayaayan paamaa kanooninaan maacaahkan. Herat (Herod) kihciokimaa oka​kakwe​mihkawaan ewii'nihsaatc ini apinoonciishan." 14 Shemaak itahsh Coosap kii'wanishkaa ehtipihkaninik ekii'maacipa'iwewaatc ini apinoonciishan, omaamaani kaye, Iicipahkiink ekii'ahpa'iwewaatc. 15 Miitahsh i'imaa kaa'ishi​ayaatc piinihsh ekii'ishkwaapimaatisinitc Heratan. Miitahsh i'i ahpii paanimaa kaakiih​pikiiwewaatc. Miitahsh o'o kaakii'onci-ishihsek mayaa piko ci-ishihsenik kaaTipenciketc kaakii'ihkitokopanen ekii'aapaci'aatc otipaacimowininiiman kaakiih​kanootamaakotc: "Ninkiih​kanoonaa ninKosihs cisaaka'ank i'imaa Iicipahkiink," ekii'ihkitotc. 16 Ahpii tahsh Herat (Herod) ekii'waapantank ekiihpikiiwe​wiintamaakohsik i'i ininiwa' waapanonk kaaonciinitc, aahpici kiihkihcinishkaatisi. Miitahsh kaa'inaahkoniketc kahkina ciantawinihsimintc kwiiwisenhsa' i'imaa Pehtalihemiink (Bethlehem) kaa-ayaanitc kaye pehsho 'imaa kaa-ayaanitc, kaaniishopipoonwenitc (2) nawac kaye kaaoshkaatisinitc cinihcikaniwinitc. Aasha mii'i niishopipoon kii'ishihsenik ahpii a'a wanankohsh nihtam kaakii'naakosikopanen. 17 Shikwa mii'i kaakii'ihkitokopanen a'a Ceramaaya (Jeremiah) kaakiih​kanootamawaatc Kishemanitoon, mayaa piko kii'ishihseni. 18 "Kekoon noontaakwan i'imaa Oremaank (Ramah), mii'i enihtaakwahk taapishkoo awiya ehkihcimawitc kaye ehkakwaatakatemotc, Orehcal (Rachel) e'mawimaatc oniicaanihsa', kaawiin kaye kashki'aahsii ciminwentank, aaniihsh kahkina kii'nipowa'." 19 Ahpii tahsh Herat (Herod) kaa'ishkwaapimaatisitc, Coosap (Joseph) okii'waapamimaan ini kaaTipencikenitc otencalimimi i'imaa inaapancikanink 20 ekii'ikotc: "Wanishkaan, maaciish a'a apinoonciish, omaamaan kaye, i'iweti ishi​kiiwen ahkiink Isriyal (Israel) kaaishinihkaatek. Aaniihsh aasha kahkina kii'nipowak iki kaawii'nihsaawaahpan ini apinoonciishan." 21 Shemaak itahsh Coosap kii'wanishkaa ekii'maaciinaatc ini apinoonciishan, omaamaani kaye, Isriyalihkaank ekii'ishi​kiiwewinaatc. 22 Kiihkohtaaci tahsh Cootiiyawahkiink (Judea) ci-ishaatc, aaniihsh kii'ishi​noontam Aarhkileyahsoon (Archelaus) ehkihciokimaawinitc ekii'naapishkawaanitc ini ohsipaniin Heratan. Kiihkanoocikaniwi tahsh Coosap (Joseph) i'imaa inaapantamowinink, miitahsh kaa'ishi-ishaatc i'iweti nahke Kaalaliiwi (Galilee) ahkiink. 23 I'imaa tahsh ootenaank Naasarit (Nazareth) kaakii'ishinihkaatenik mii 'imaa kaa'ishi​kapehshitc. Miitahsh o'owe miinawaa kaakii'onci-ishihsek mayaa piko ci-ishihsenik mewisha kaakiihpi-ihkitowaakopanen iki kaakiihpi​kanootamawaawaatc Kishemanitoon ehtashimaawaatc iniweniwan Kishemanitoo kaakii'ashotamaaketc cipimaaci'iwenitc: "Mii'iwe keinintc, Naasaritink e'onciitc," kii'ihkitowak.

Maahtiyo 3

1 Ninkotink itahsh iko Cwaan (John) Siika'antaakewinini kiihtakohshin ekii'maaciiwiintamaaketc i'imaa pikwatahkamikonk Cootiiyaahkaank (Judea), 2 ekii'ihkitotc: "Kwehkaatisik onci kimacitootamowiniwaank! Aasha pehshonaakwan i'i Kishemanitoo cioshihsitootc oTipencikewin!" 3 Cwaan tahsh kaakiih​tashimikookopanen ini Aaiseyawan (Isaiah) Kishemanitoo otipaacimowininiiman ahpii ekii'ihkitonikopanen mewisha: "Peshik awiya tashi​shaakowe pikwatahkamik, 'Oshihtamawihk keishaatc a'a kaaTipenciketc, kwayahkomohtamawihk i'iweni omiihkanaam kaawii'ishi​pimohsetc.' " 4 Miitahsh o'o Cwaan kaa'ishihkonayetc, pihkwaawikanewimihtatim opiiwayan kii'onci​oshihcikaateni kekishkank, pashkwekinweyaapiini kiihkihcihpiso. Pahpahkine' itahsh okii'amwaa', aamoowisiinsipaahkwatooni kaye okii'miicin. 5 I'i tahsh awiya' kaakiih​pinaasihkaakotc Ceroosalamink (Jerusalem) kii'onciiwa', i'imaa kaye misiwe Cootiiyawahkiink, i'imaa kaye misiwe pehsho Cwaartanawi siipiink (Jordan). 6 Okii'wiintaanaawaan itahsh omacitootamowiniwaan, Cwaan tahsh okiih​siika'antawaa' i'imaa Cwaartanawi siipiink. 7 Ahpii tahsh Cwaan e'waapamaatc niipiwa' ehpianta​siika'antaasonitc iniweniwa' Perahsii' (Pharisees), Saacahsii' (Sadducees) kaye, o'o tahsh okii'inaa': "Kiinawaa kaakinepikowiyek! Awenen kaakii'ininek cikashkihtooyek cipanishkaakoyek Kishemanitoo onishkaatisiwin kaawiih​piishaamakaninik? 8 Kekoonan itahsh ishihcikek cinaakohtooyek kekeht iko ekiih​kwehkaatisiyek i'imaa kimacitootamowiniwaank. 9 Mihsawaa piko aana​ihkitoyek 'Eparahaam (Abraham) ninkihciaya'aaminaapan', kaawiin kekoon kikaishi​wiici'ikohsiim. Kiwiintamawininim, Kishemanitoo otaakashki'aa' i'i ahsinii' ci-inawemaanihpan ini Eparahaaman. 10 Waakaahkwat tahsh ta-aapatan cikiishkata'ontwaa iki mihtikook kikiciipihk. A'aweti tahsh mihtik kaanihtaawiki'aahsik wenishihshininitc shoomina' takawa'waa, tamacohtewepinikaniwi kaye. 11 Nipiink itahsh niin kitishi​siika'antawininim cikihkenimikooyek ehkwehkipimaatisiyek. A'a tahsh wiin kaawiih​pitakohshink Kishemanitoon otAhcaahkoniink, ishkotenk kaye kikaishi​siika'antaakowaa. Nawac wiin ishpentaakosi ahpiihc niin. Kaawiin ninte​ahpiihtentaakosihsii cipimiwitaawak omahkisinan. 12 Taapishkoo inentaakosi kihtikewinini kaatahkonank opawiwepa'ikanaahtik, ewiih​pawaahshimaatc opahkweshikaniminan. Oka​na'inaan itahsh opahkweshikanimanoominiman. Oka​macohtewepinaan tahsh wiin mashkohsiini i'imaa wiihkaa kaashi​aahtawehsininik ishkoteni." 13 Ciisahs tahsh Kaalaliink (Galilee) kiihpi​oncii ekiih​pinaasihkawaatc ini Cwaanan (John) cisiika'antaakotc i'imaa Cwaartanawi siipiink (Jordan). 14 Cwaan tahsh okii'inaan Ciisahsoon: "Takwac niin kitaa​siika'antaw. Shaakooc itahsh kipinaasihkaw." 15 Ciisahs tahsh okii'ishi​nahkwehtawaan: "Haw maano i'iwe taishihse ci-ishihcikeyank aaniin kaashi​mihsawentank Kishemanitoo." 16 Ahpii tahsh Ciisahs kaa'ishkwaa​siika'antaasotc, ekii'ani​akwaasiitc, kihcikiishik kiihpaahkinikaateni, okii'waapamaan Kishemanitoon otAhcaahkoni ehpinaasihkaakotc taapishkoo piko omiimiinhsink ekii'ishinaakosinitc, ehpipooniihsantaakotc. 17 Kii'noontawaa tahsh awiya ehkiikitotc i'imaa kihcikiishikonk: "Mii wa'a ninKosihs kaasaaki'ak. Aahpici niminwaapamaa."

Maahtiyo 4

1 Ciisahs tahsh okii'ishiwinikoon Kishemanitoon otAhcaahkoni weti pikwatahkamik cikakweci'ikotc ini maciaya'aan. 2 Niimitana tahsokiishik, niimitana tahsotipihk kaye kaawiin Ciisahs kii'onci​wiihsinihsii. Wiinke tahsh kiinoonteskate. 3 Kekeht itahsh maciaya'aan okiih​pinaasihkaakoon ekii'ikotc: "Kiishpin tepwe eyaawiwanen Kishemanitoo oKosihsan, kanoosh oko ahsiniik cipahkweshikaniwiwaatc," ekii'ikotc. 4 Ciisahs itahsh okii'ishi​nahkwehtawaan: "Ishipii'ikaate: 'Kaawiin wiin i'imaa taonci​pimaatisihsii awiya pahkweshikanan ehta kaa-amwaatc, 'imaa tahsh wiin kaatahso​peshikwaninik Kishemanitoon kaaihkitonitc, taonci​pimaatisi,' " okii'inaan. 5 Miinawaa tahsh maciaya'aan okii'ishiwinikoon i'imaa Kishemanitoon otootenaaminiink i'imaa Ceroosalamink (Jerusalem), ekii'ishiwinikotc maawac iko kaaishi-ishpaanik i'i Kihcianami'ewikamik ekii'ishi​niipawi'ikotc, 6 ekii'ikotc: "Kiishpin eyaawiwanen Kishemanitoo oKosihsan, taka pinipani'on, aaniihsh kii'ishipii'ikaate: 'Kishemanitoo oka​kanoonaa' otencalima' cikanawenimihkwaa, kikaminciminikook i'imaa oninciiwaank ciwiihsakihshinsiwan kisitink i'imaa kaashi​ahsiniihkaak,' ishipii'ikaate," okii'ikoon maciaya'aan. 7 Ciisahs tahsh okii'nahkwehtawaan: "Miinawaa ishipii'ikaate: 'Keko kakweci'aahken kaaTipenciketc kiKishemanitoom taka cikanaweniminohkwen.' " 8 Keyaapi okii'ishiwinikoon maawac iko eshi-ishpatinaanik, ekii'waapanta'ikotc kahkina tipencikewinan o'omaa ahkiink, kaye aaniin maawac eshi​kihci-inentaakwahkin. 9 Miitahsh kaa'ikotc: "Kahkina ono kikamiinin kiishpin ociciinkwaniihtawiyan, kihci-inenimiyan kaye." 10 Ciisahs okii'nahkwehtawaan: "Inkoci ishaan kiin Setan (Satan)! Miinawaa ishipii'ikaate: 'KaaTipenciketc kiKishemanitoom wiinehta ko kikakihci-inenimaa.' " 11 Okii'nakanikoon tahsh ini maciaya'aan. Encala' itahsh okiih​pinaasihkaakoo' ekii'wiici'ikotc. 12 Ciisahs tahsh ahpii kaa'noontank Cwaanan (John) ekiih​tahkonikaniwinitc, Kaalaliink (Galilee) inahke kii'ishaa. 13 Kaawiin tahsh wiin kiihkipihciihsii i'imaa Naasaritink (Nazareth). Miitahsh weti kaa'ani-ishaatc ekii'ishitaatc i'imaa ootenaank Kaparniyamiink (Capernaum) i'imaa ciiki​saaka'ikaniink Kaalaliink, i'imaa Sepiyolan (Zebulon) ahkiink kaye Naapihtalaai (Naphtali) ahkiink kaa-ayaak ootena. 14 Miitahsh o'o kaakii'onci-ishihsek mayaa piko ci-ishihsenik kaakii'ihkitokopanen a'a tipaacimowinini Aaiseya (Isaiah) kaakiih​kanootamawaatc Kishemanitoon, 15 i'iweniwa' kaakiih​tashimaatc i'iweniwa' kaaishitaanitc i'imaa Sepiyolan ahkiink kaye Naapihtalaai ahkiink, i'imaa ciikew kihcikamiink, waapanonk inahkekaam Cwaartanawi siipiink (Jordan), i'imaa Kaalalii ahkiink weti kaashi​ayaawaatc kaaCoowiwihsikwaa. 16 Miitahsh o'o kaa'ihkitotc Aaiseya: "Iki tahsh kashkiitipihkanonk kaa-ayaawaatc oka​waapantaanaawaa i'i kihciwaahseyaasiwin. Iki kaye kaatashipimaatisiwaatc i'imaa ahkiink nipowin kaashi​paahtiinatininik, tawaapancikaate i'i kaawaahseyaak." 17 Miitahsh i'i ahpii Ciisahs kaakii'maacii​papaawiintamaaketc ekii'ihkitotc: "Kwehkaatisik kimacitootamowiniwaan onci, aasha ocihcihse a'a Kishemanitoo cioshihsitootc oTipencikewin." 18 Ciisahs tahsh mekwaa ehpimohsetc i'imaa kihcisaaka'ikaniink Kaalalii (Galilee) okii'waapamaa' niishin (2) e'wiicihkiweyintinitc ehpakita'waanitc. Aaniihsh kiihpakita'wewinininiiwiwa'. Saaiman Piitar (Simon Peter) tahsh a'a peshik kii'ishinihkaaso, kotak itahsh Entaroo (Andrew) kii'ishinihkaaso. 19 Ciisahs tahsh okii'inaa': "Ampeyohk, wiiciiwihshik! Kaapi-inanohkiiyek ehpakita'waayek, noonkom itahsh kikamaaciikihkino'amawininim cipiitamawiyek pemaatisiwaatc." 20 Shemaak itahsh okii'maaciwiiciiwaawaan, ekii'nakanaawaatc kahkina otahsapiiwaa'. 21 Miinawaa tahsh Ciisahs okii'ani​waapamaa' niishin ininiwa' ehtashi​pakwa'ahsapiinitc piinciciimaanink otetewaan e'wiici'aanitc. I'i tahsh ininiwa' kii'wiicihkiwentiwa' ekii'ishinihkaasonitc Ciimis (James) shikwa Cwaan (John). Oteteni tahsh Sepatii (Zebedee) kii'ishinihkaasowan. Ciisahs tahsh okiih​kanoonaa'. 22 Shemaak itahsh okii'nakataanaawaa ociimaaniwaa, okii'nakanaawaan kaye otetewaan, ekii'ani​wiiciiwaawaatc Ciisahsoon. 23 Misiwe tahsh Ciisahs kii'ishaa i'imaa Kaalalii (Galilee) ahkiink ekiih​papaakihkino'amaaketc misiwe Coowa' otanami'ewikamikoniink ekii'wiintamaaketc kaye minwaacimowin i'iwe Kishemanitoo wiipa kaawii'oshihsitootc oTipencikewin, ekii'minoayaa'aatc kaye kahkina kaa-aakohsinitc aaniin iko e'inaahpinenitc. 24 Misiwe tahsh kii'noontaakaaniwi i'imaa Siiriya (Syria) ahkiink, aahpici tahsh kiihpaahtiinowa' kaakiih​piitamawintc i'i otaahkosii' pepahkaan e'inaahpinenitc. Iki tahsh otaahkosiik aaninta maciahcaahkwa' okiih​kikishkaakowaa', aaninta kaye kii'ocipinikowaahpinewa', aaninta kaye kii'mamaancikowaahpinewa'. Ciisahs tahsh kahkina okii'minoayaa'aa'. 25 Aahpici kiihpaahtiinowa' kaakiih​piminisha'okotc. I'imaa tahsh kii'onciiwa' Kaalalii ahkiink, weti kaye Mitaahso Ootenaawi Ahkiink (Decapolis), Ceroosalamink (Jerusalem), Cootiiyaahkaank (Judea), weti kaye ahkiink akaamaya'ii Cwaartanawi siipiink (Jordan).

Maahtiyo 5

1 E'waapamaatc itahsh Ciisahs aahpici e'onsaamiinonitc kaapiminisha'okotc, kii'ani​kohpaamaciwe ehpihkwatinaanik, ekii'ani​onapitc. Okihkino'amawaakana' itahsh okiihpi​waahkaashkaakoo'. 2 Miitahsh i'i kaa'ishi​maacii​kihkino'amawaatc: 3 "Shawentaakosiwak oko kaakitimaakenimowaatc, kaa-ahpenimonotawaawaatc Kishemanitoon. Amiiwak oko mayaa Kishemanitoon kaakihci​otookimaamiwaatc! 4 Shawentaakosiwak oko kaamaanentamowaatc. Kishemanitoon oka​minwentami'ikowaan. 5 Shawentaakosiwak oko kaakihtenimohsikwaa. Kishemanitoon oka​miinikowaan kekoonan kaakii'ishi​ahshotamawaanitc i'i opimaatisiimini. 6 Shawentaakosiwak ikiweniwak kaaishi​antawentamowaatc aahpici citootamowaatc Kishemanitoon kaaishi​antawenimikowaatc. Kishemanitoon oka​tepinaweyentami'ikowaan. 7 Shawentaakosiwak iki kaakitimaakinaakewaatc. Aaniihsh Kishemanitoon oka​kitimaakinaakowaan. 8 Shawentaakosiwak iki kaapehkite'ewaatc. Oka​waapamaawaan ihsa Kishemanitoon e'wiiciiwikowaatc. 9 Shawentaakosiwak iki kaawiici'aawaatc ciminowiiciintinitc kahkina pemaatisinitc. 'Kiinawaa niniicaanihsak' oka​ikowaan Kishemanitoon. 10 Shawentaakosiwak iki kaakakwaataki'intwaa 'iwe onci ehtootamowaatc Kishemanitoon kaaishi​antawentaminitc. Amiiwak iki mayaa Kishemanitoon kaakihci​otookimaamiwaatc. 11 Kika​shawentaakosim kiinawaa ahpii awiyak e'mamaci-ininekwaa, shikwa wanitootawinekwaa, shikwa macikiiwanimowinan eninekwaa, ehkihkeniminekwaa niin ehpimiwiiciiwiyek. 12 Kihciminwentamohk, ciihkentamohk! Aaniihsh kihcitipa'amaakoowin kikanawentamaakoom kihcikiishikonk. Amii 'owe mayaa kewiinawaa kaakii'ishi​kakwaataki'intwaa iki Kishemanitoon kaakiih​kanootamawaawaatc kaakiih​pimaatisiwaatc cipwaa ayaayek." 13 "Kiinawaa ciaapaci'ikooyek o'omaa ahkiink peshikwan kaashi​aapatahk i'i shiiwihtaakan kaatakonikaatek miicimink. Kiishpin tahsh shiiwihtaakan ani​nihsitohpokwahsinok, aaniin itahsh miinawaa kekii'ishi​shiiwihtaakaniwankipan? Kaawiin inkotano tainaapatahsinoon, mii ehta ciwepinikaatekipan imaa keani-ishi​tataahkohkaatek. 14 Kiinawaa kiwaahseshkaam 'owe ahki. Ootena kaapatahkitek wakitatin kaawiin takiih​kaacikaatehsinoon. 15 Kaawiin ohsha awiya otaa​sahka'ansiin waahsahkonencikan ciakwana'ank anaamaya'ii miicimiwash, i'imaa hsa waahsahkonencikanaahtikonk ciakootootc. Miitahsh eshi​waahsahkonenamawintwaa kahkina piintik kaa-ayaawaatc. 16 Maano shikwa taishi​waahsahkone 'iwe kiwaahsahkonewiniwaa ciwaapaminekwaa pemaatisiwaatc, ciwaapantamowaatc kiminohcikewiniwaan, shikwa cikihci-inakimaawaatc Koohsiwaan kihcikiishikonk kaa-ayaanitc." 17 "Keko inentankek ehpiishaayaan cipinihshiwanaacihtooyaan otOonahshowewin Moosihs kaye okihkino'amaakewinini Kishemanitoo otipaacimowininiima' kaakiih​kanootamaakotc. Kaawiin nintoonci​piishaahsii cinihshiwanaacihtooyaan. O'owe tahsh kaakii'onci​piishaayaan citootamaan i'i ci-ishiwepahk aaniin eshihsek i'i Onahshowewin. 18 Weweni naakatawentamohk o'owe: Minihk 'owe kihcikiishik shikwa ahki keani​ayaamakahkin, kaawiin awaac peshik oshipii'ikan kaye cahkipii'ikan tanoontehsehsinoon Onahshowewinink onci, piinihsh kahkina ciani​tipihsekin. 19 Awenen itahsh awe keshashiipihtank ono onahshowewinan pooshke maawac kaa-akaahsentaakwaninikin, ani-ishi​kihkino'amawaatc kotak awiya', amii 'awe maawac pankii keinentaakositc ahpii Kishemanitoon keoshihsitoonitc oTipencikewinini. Awenen itahsh ke'tootank kaye kekihkino'amaaketc, niipiwa' tainentaakosi 'imaa Kishemanitoon oTipencikewininiink. 20 Amiitahsh owe eshi​wiintamawinakook: Awahshime ayaankwaamisik kahkina kekoon 'awe Kishemanitoo kaaishi​antaweniminek citootamek. Kaawiin taapishkoo iki kaakihkino'amaakewaatc Onahshowewin, shikwa iki Perahsiik (Pharisees) kaatootamowaatc. Mii ehta 'owe Kishemanitoo keishi​kihciotookimaamiyek, awahshime kihci​ayaankwaamisiyek." 21 "Kikii'noontaam kaakii'inintwaa iki kaapimaatisiwaatc mewisha: 'Keko nihshiwehken. Awenen a'a kenihshiwetc, taishiwinaa onahshowewininiwan.' 22 Niin itahsh kitishi​wiintamawininim: awiya enishkaatisitc, kekoon einenimaatc wiicihkiweyan, taishiwinaa onahshowewininiwan. Kaye awenen keinaakwen wiicihkiweyan, kaawiin inkotano kitinaapatisihsii, mii'imaa keishiwinintc kaaishi​maawaci'itinitc Kaanihtaa​onaahkonikenitc. Awiya tahsh keinaakwen wiicihkiweyan: 'Kiin kiiwashkwehkaan!' tananiisaani'itiso ci-ishaatc maci-ishkotenk. 23 Miitahsh owe onci, kiishpin piitooyan kipakitinikewin i'imaa pakitinaahsowinaapihkonk cipakitinamawintc Kishemanitoo, mii'imaa tahsh mehkawihseyan ninkotano e'inenimihk kiicihkiwe, 24 nakatan amii'imaa kipakitinikewin ciikaya'ii pakitinaahsowinaapihkonk. Amii ani-ishi​maacaan, ahkawe ciwepinamawihk kiicihkiwe, shikwa pikiiwen cipakitinikeyan. 25 "Kiishpin awiya wiihtipaahkonihk kaye ishiwinihk onahshowewinink, shemaak cikakwe​kashki'atc cipooni​nishkenimihk keyaapi eshkwaa​ishihseyan cipwaa takohshinek onahshowewikamikonk. Paahkac imaa kii'ayaayan, amii keni-ishipakitinihk cionahshowaanimihk tipaahkonikewininiwan. Tipaahkonikewinini tahsh kikapakitinik shimaakanihshan cikipa'omihk. 26 Tepwe kitinin, amiitahsh i'imaa keayaayan kipa'otiiwikamikonk, paanimaa kiihtipa'aman 'iwe minihk ketipa'ike'ikooyan." 27 "Kikii'noontaam e'ihkitonk: 'Keko papaamenimaahken pahkaan awiya owiiciiwaakanan.' 28 Niin tahsh kitishi​wiintamawininim: Awiya piko kaakanawaapamaatc e'mihsawenimaatc ini ihkwewan, aasha owiicipihshikwaatisiimaan i'imaa otinentamowinink. 29 Kiishpin itahsh kishkiinshik onci wanitootaman, pahkwacipitoon, wepinan! Nawac taaonishihshin peshik kitishinaakosiwin cinihshiwanaatahk, ekaa tahsh misiwe kiwiiyaw maci-ishkotenk ci-ishiwepinikaatehsinok. 30 Kiishpin kikihcinihk onci wanitootaman, kiishka'an, wepinan! Aaniihsh nawac taaonishihshin peshik kipahkesiwin cinihshiwanaatahk, ekaa tahsh misiwe kiwiiyaw maci-ishkotenk ci-ishiwepinikaatehsinok." 31 "Amii 'owe kaaihkitonaaniwankipan: 'Kiishpin inini wiiwepinaatc ini wiiwan, ahkawe oka​miinaan wepinitiwimasina'ikanenhs.' 32 Niin itahsh kiwiintamawininim: Awiya kewepinaakwen wiiwan, mihsawaa ko aanakii​pihshikwaatisihsinik, kiishpin tahsh kotak awiyan wiitikemaanitc, mii'iwe eishihcike'aatc ini ihkwewan cipihshikwaatisinitc. Kaye awenenan itahsh kewiitikemaanikwen iniwe kaawepinimintc, mii kaye enakimintc ehpihshikwaatisinitc." 33 "Kikii'noontaam kaakii'inintwaa mewisha: 'Keko piikonanken kaakii'ishi​ahshotamaakeyan. Kiishpin kekoon kiiaayiici​ahshotamaakeyan kikatootamawaa kaaTipenciketc i'iwe kaakii'ishi​ahshotamawatc.' 34 Niin itahsh kiwiintamawininim: Keko wiintanken kekoon wii'mashkawi-ihkitoyan e'ahshotamaakeyan kekoon. Keko wiintanken kihcikiishik wii'mashkawi-ihkitoyan. Kihcikiishikonk ohsha weti kaashi​namatapitc otookimaawapiwinink Kishemanitoo. 35 Keko wiintanken o'o ahki wii'mashkawi-ihkitoyan. Ahki ohsha i'imaa Kishemanitoo kaa-ahpisitepitc. Keko kaye wiintanken Ceroosalam (Jerusalem) aaniihsh amii'iwe otootenawim Kishemanitoo maawac kaaKihciokimaawitc. 36 Keko kaye awaac pankii wiintanken i'i kihtikwaan wii'mashkawi-ihkitoyan ahpii kekoon ahshotamaakeyan. Kaawiin ohsha kikakashkihtoohsiin peshikwaapiik kiinisihs cimahkatewaak shikwa ciwaapishkaak peshik. 37 'Eha'' ehta ihkiton, shikwa 'Kaawiin'. Wekonen awahshime eshihsek ahpiihc ono, amii'imaa wencihsek kaamaanaatahk." 38 "Kikii'noontaam o'owe kaa'ihkitonaaniwankipan: 'Awiya hsa taishi​kakwaataki'aa aaniin kaatootank. Kiishpin kicaapiwepakanaamaatc awiyan, kewiin ihsa takicaapiwepaka'ikaniwi. Kiishpin manaapitewepakanaamaatc awiyan, kewiin ihsa tamanaapitewepakanaanso.' 39 Niin itahsh wiin kitinininim: Keko kiiwetootawaahken a'a kiicipimaatis i'i kaatootawihk. Awiya tahsh pahsiinkwekanaamihk kikihcinihkink inahke, kwehkwiinkwenotaw kinamantinihkink inahke ci-ishi​pahsiinkwekanaamihk. 40 Shikwa kiishpin awiya ishiwinihk tipaahkonikewininiwan citipa'ike'ihk kipapakiwayaanini, kipiinsihkawaakanini kaye animiish. 41 Piko awiya pahkaan ahkiink kaaonciiwaatc shimaakanihshak kaancinisha'ohk ci-inihk peshikotipa'ikan ci-ishiwitaawatc opimiwanaan, keyaapi peshikotipa'ikan ishiwitaaw awahshime. 42 Kiishpin awiya kekoon kakwecimihk, mii ishi​miish. Kiishpin awiya wii'awi'aasomihk kekoon, mii ishiawi'." 43 "Kikii'noontaam kaakii'ihkitonaaniwank: 'Saaki' iki kaasaaki'ihkwaa, shiinkenim iki kaashiinkenimihkwaa.' 44 Niin itahsh kitinininim: saaki'ihkok iki kaashiinkeniminekwaa, kaye anami'ehtamawihkok kaamacitootawinekwaa. 45 Miitahsh cioniicaanihsiminek kiTetewaa kihcikiishikonk kaa-ayaatc. Aaniihsh wiin otishihtamawaa' kiisihsoon cisaakaahsokonitc meci-ishiwepisinitc kaye menwaatisinitc. 46 Wekonen keonci​tipa'amawinekipan Kishemanitoo kiishpin saaki'ekwaa ehta iki kaasaaki'inekwaa? Ampooshke mii peshikwan eshihcikewaatc iki kaamaawantoonaawaatc taakihs (tax) shooniyaan. 47 Kiishpin ina ehta pooshoo'atwaa oko kitanami'ewinink kaaonciiwaatc, wekonen entootamek ahpiihc kotak awiyak? Ampooshke iki kaakihkenimaahsikwaa Kishemanitoon mii'i eshihcikewaatc. 48 Kiinawaa tahsh ciminopimaatisiyekipan misiwe kipimaatisiwiniwaank, aaniihsh wiinke temisiwe​minopimaatisi kiTetewaa kihcikiishikonk kaa-ayaatc."

Maahtiyo 6

1 Ciisahs o'owe kii'ani-ihkito: "Ayaankwaamisik! Ahpii waaminotootamek onci anami'aawinink, keko tootankek eshi​ayaawaatc awiyak cikanawaapiminekwaa. Kiishpin tootamek kiTetewaa kihcikiishikonk kaa-ayaatc kaawiin kikatipa'amaakohsiiwaa. 2 Mii'iwe tahsh onci, ahpii e'miinatc awiya kaakitimaakisitc kekoon, keko kakwe​waapanta'iwehken, taapishkoo wiinawaa kaatootamowaatc kaaminwaatisiihshihtoowaatc, anami'ewikamikonk shikwa miihkanaank ehtootamowaatc cikihtakimikowaatc awiya'. Keko kiin nanaapinawaahken. Kihkentan o'owe! Aasha kahkina kiihtipa'amawaawak. 3 Kiin itahsh, ahpii e'wiici'atwaa iki ketimaakisiwaatc, kekoo awiya wiintamawaahken, tootan wiinke cimanaanaakohtooyan, 4 wiinke kiimoocihciken kaye awaac pankii awiyak cikihkentansikwaa. Miitahsh kiinehta cikihkentaman. A'a tahsh kiTete kaawaapantank nihshihke kaatootaman, wiin kikatipa'amaak." 5 "Ahpii tahsh anami'aayek, kaawiin kikaishinaakosihsiim kaaishinaakosiwaatc kaaminwaatisiihkaasowaatc. Osaakihtoonaawaa e'niipawiwaatc e'anami'aawaatc anami'ewikamikonk shikwa ehkiihkemoninikin miihkanawan, ciwaapamikowaatc kahkina awiya'. Kihkentamok o'o! Aasha kahkina kiihtipa'amawaawak. 6 Kiin itahsh e'anami'aayan, piintiken kipahkehcikanink, kipa'an kitishkwaantem, anami'ehtaw kiTete kaawaapamaahsiwintc. A'a tahsh kiTete kaakihkentank nihshihke kaaishihcikeyan, wiin kikatipa'amaak. 7 "Ahpii hsa e'anami'aayek keko naapikiishwewinan kekoon enaapatahsinokin aapacihtoohkek, kaatootamowaatc omanitoohkeshkak. Aaniihsh mii ehta keishi​noontawiyamintc Manitoo kiishpin niipiwa' 'iwe kaakiikitoyaank e'inentamowaatc. 8 Keko naanaapinawaahkekwaanik, aaniihsh kiTetewaa okihkentaan wekonen eshi​noontehseyek cipwaa kakwecimek. 9 O'o tahsh kiinawaa ishi​anami'aak: 'NinTetenaan kihcikiishikonk eyaayan! Kikakwecimikoo kahkina awiya cikihci-inentank kitishinihkaasowin. 10 Kikakwecimikoo i'iwe cipi​oshihsitooyan kitookimaawiwin, kaye kahkina awiyak citootamowaatc kitinentamowin o'omaa ahkiink taapishkoo kaatoocikaatek weti kihcikiishikonk. 11 Miishihshinaam noonkom kaakiishikahk miicim keonci​pimaatisiyaank. 12 Poonentamawihshinaam kaakii'ishi​macitootamaank, kaaishi​poonentamawankitwaa ikiweniwak kaamacitootawiyamintwaa. 13 Keko ishiwishihshinaahkaank koci'ikoowinink. Kanawenimihshinaam tahsh onci a'a maciaya'aa cishaakooci'ihsinowiyamintc. Kiin iitok kaanehpici-kihciokimaawiyan, kaamashkawisiiyan, kaakihci-inentaakosiyan kaye, Emen.' 14 "Kiishpin itahsh poonentamawekwaa iniweniwan kaamacitootawinekwaa, kiTetewaa kihcikiishikonk kaa-ayaatc kaye wiin kikapoonentamaakowaa. 15 Kiishpin itahsh ekaa poonentamawaahsiwekwaa ini macikekoonan kaatootawinekwaa, kaawiin kaye wiin kiTetewaa kikapoonentamaakohsiiwaa kimacitootamowiniwaan." 16 "Miinawaa tahsh, ahpii kiiwiihsinihsiwek anami'aawinink onci, keko ishinaakosihkek kaaishinaakosiwaatc ominwaatisiihshihtook, ehkashkentaminaakosiwaatc. Aaniihsh kakwaatakinaakosi'itisowak ciwaapamikowaatc kahkina awiya' e'wiihsinihsikwaa anami'aawinink onci. Kihkentamok o'o: aasha kahkina kiihtipa'amawaawak. 17 Kiin itahsh wiin, ahpii kiionci​wiihsihsiwan, kisiiyiinkwen, pinaahkwe'on, 18 ekaa cikihkenimihsinohkwaa kahkina awiyak e'wiihsinihsiwan, wiin ehta kiTete kaawaapamaahsiwintc. 'Awe tahsh kiTete okihkentaan nihshihke kaaishihcikeyan. Wiin kikatipa'amaak." 19 "Keko na'ahtoohkek kitahtwaakanihkaasowiniwaan omaa ahkiink ketashi​nihshiwanaacimanicooshiwankin, kaye ketashi​akwaakwaapihkihsinkin, kaye 'imaa kimootishkak cipiikwa'amowaatc cipiintikewaatc cikimootiwaatc. 20 Ahtook itahsh kiwenootisiwiniwaan kihcikiishikonk, 'imaa ketashi​nihshiwanaacihtoohsikwaa manicoohshak, ketashi​akwaakwaapihkihsinsinokin kaye. Mii weti kaawiin tapiikwa'ikehsiiwak kimootishkak cipi​kimootiwaatc. 21 Aanti 'imaa keishi​ahtek kiwenootisiwiniwaan, mii ko 'imaa kaye kiin keishi​mihsawentaman ciayaayan." 22 "Kiwaap kishkiishikoon taapishkoo waahsahkonencikan e'waahtenamaakoyan. Kiishpin e'onishihshinkin kishkiinshikoon, kipakahkinam, waahseyaa ehkikishkaakoyan. 23 Kiishpin itahsh ekaa onishihshinsinokin kishkiinshikoon, kaawiin kiwaapihsii, tipihkisiwin kikikishkaakon. Kiishpin itahsh i'iwe tipihkisiwin onciayaayan imaa kiwaapiwinink, aana​inentaakwahk ciwaahtenamaakooyan, oncita piko kashkiitipihkan kikakikishkaakon!" 24 "Kaawiin awiya oka​tipenimikohsii' niishin okimaa'. Aaniihsh peshik oka​shiinkenimaan, shikwa peshik oka​saaki'aan. Peshik iniwe oka​kihciwinaan, shikwa peshik oka​wepinaan. Kaawiin kitaa​tipenimikohsii Kishemanitoo kayehsh citakotipenimihkipan shooniyaa." 25 "Amii 'owe kaaonci​kanooninakook: Keko onci​mikoshkaatentankek wekonen kemiiciyek kaye keminihkweyek, kaye 'imaa kiwiiyawiwaank kekikishkamek. Kaawiin ina awahshime inentaakwahsinoon pimaatisiwin ahpiihc i'iwe miicim? Kaawiin ina awahshime ahpiihtentaakwahsinoon kiwiiyawiwaan ahpiihc kikishkikanan? 26 "Nashke pinehshiinshak kaapapaamihsewaatc, kaawiin kihtikehsiiwak, kaawiin kaye maawacihcikehsiiwak, kaawiin kaye na'ahtamaasohsiiwak ahtaahsowikamikonk. Keyaapi tahsh kiTetewaa kihcikiishikonk kaa-ayaatc keyaapi otahshamaa'. Kaawiin ina kiinawaa awahshime kitahpiihtentaakosihsiim ahpiihc iki pinehshiinshak? 27 Kiishpin awiya mikoshkaatentamek aaniin kekii'ishipimaatisitc kinwesh, kekeht ina kinwesh tapimaatisi? 28 "Wekonehsh wenci​mikoshkaatentamek aaniin keonci​kikishkikeyek? Nashke waapikwaniin pikwacaya'ii kaanihtaawikinkin! Pisaaniko nihtaawikinoon, kaawiin anohkiimakahsinoonan. Kaawiin oshihtamaasoomakahsinoonan kikishkikanan. 29 Kiwiintamawininim itahsh: Ampooshke 'awe kihciokimaa Swaalaman (Solomon) aanakiih​kihciwenootisitc, kaawiin kii'ishi​onishihshinsininiwan okikishkikanan taapishkoo peshik ono waapikwaniin kaaishi​minonaakwahk. 30 Kaye ini mashkohsiin kaanihtaawikihkin, wiipa kaa-ani​nipoomakahkin, kaapahkwacipitooyank kewiih​pootawaakeyank, ampooshke miiwanono tino mashkohsiin opihcihkonayehtoonan Kishemanitoo. Kehcinaac iitok kaye kiinawaa kikamiinikowaa kekikishkamek! Etatawe akaahsin kitepweyentamowiniwaa! 31 "Keko nashke mikoshkaatentankek ci-ihkitoyek: Aanti keontinamaank kemiiciyaank kaye keminihkweyaank? Aanti kaye keonci​kikishkikeyaank? 32 Amiiwanono mooshak kaananaantone'amowaatc iki ekaa kaakihkenimaahsikwaa Kishemanitoon. KiTetewaa kihcikiishikonk kaa-ayaatc okihkentaan e'noontehseyek miiwanono. 33 Kiinawaa tahsh wiin, mii 'owe maawac kekii'ishi​antone'amek, Kishemanitoo ciokimaahkantawinek, kaye citootamek kahkina kekoon 'iwe kaaishi​antaweniminek. Miitahsh i'i keishi​miininek kahkina kekoon keonci​pimaatisiyek. 34 Keko mikoshkaatentankek aaniin waa'ishiwepahk waapank. Waapank kikawaapantaam kotak kekoonan cinaakatawentamek. Keko tahsh wiin anihshaa awahshime ani​oshihtamaasohkek keonci​mikoshkaatentamek. Aasha kiihtepihse noonkom kaakiishikahk keonci​mikoshkaatentamek."

Maahtiyo 7

1 "Keko macakimaahken a'a kiicipimaatis, ekaa kaye kiin citipaahkonihsinohk a'a Kishemanitoo. 2 Aaniin keishi​kanawaapamatc a'awe kiicipimaatis, mii'iwe keishi​kanawaapamihk Kishemanitoo. Shikwa wekonen i'iwe keishi​tootawatc a'a kiicipimaatis, mii'iwe kaye wiin Kishemanitoo keishi​tipa'amawihk. 3 Aaniihshwiin wenci​pisiskaapantamowatc iwe kiicihkiwe kaa-akaahsininik kaapinsinitc oshkiinshikonk, shikwa kiin ekaa ehpisiskaapantansiwan iwe kihcimihtik kaapimitaahkohsink kishkiinshikonk? 4 Aaniin kaye kekii-ishi-inatipan kiicihkiwe: 'Taka ninka​otaahpinaan i'i kaapinsiniyan,' kaye kiin itahsh ehpimitaahkwamok kihcimihtik kishkiinshikonk? 5 Kiin ominwaatisiihshihtoo! Ahkawe kiin niikaan wepinan i'i kaapimitaahkwamok kishkiinshikonk, kikana'aap itahsh ciotaahpinamawatc i'i kaapinsinitc kiicihkiwe! 6 "Wekonen kaatipentank Kishemanitoo keko miinaahkekwaanik iki animook. Maakishaa tapi​kwehkiiwak, cimiikaaninekwaa. Iki kaye kaakanawenimekwaa kaa-aahkwakinsonitc ahsinii' keko ahpakitawaahkekwaanik iki koohkoohshak. Maakishaa oka​tataahkohkaanaawaa'." 7 "Kakwetwek ihsa, kikamiinikoom. Nanaantonikek, kikamihkaam itahsh. Paahpaawa'ikek, kikapaahkintenamaakoom itahsh. 8 Awenen a'a kaakakwetwetc, mii 'awe kemiinintc. A'a kaananaantoniketc omihkaan. Kaye 'awe kaapaahpaawa'iketc tapaahkintenamawaa. 9 Kiinawaa tahsh kaaokosihsiyek, kiishpin awiya okosihsan kakwecimikotc pahkweshikanan, ahsiniin ina oka​miinaan? Kaawiin iitok! 10 Komaa kaye kinooshen kakwecimikotc okosihsan, kinepikoon ina oka​miinaan? Kaawiin iitok! 11 Nashke kiinawaa aanaishimaci-ininiiwiyek, eniwehk kikihkentaam kaaonishihshininikin keishi​miinekwaa kiniicaanihsiwaak. Kehcinaac awahshime kiTetewaa kihcikiishikonk kaa-ayaatc oka​miinaa' kekoonan kaaonishihshininikin i'i kaakakwecimikotc. 12 "Mii hsa 'owe onci, keishi​antawenimekwaa kiicipimaatisiiwaak citootawinekwaa, mayaa mii'iwe kaye kiinawaa tootawihkok. Aaniihsh mii'iwe kaainahtenik Kishemanitoo otOonahshowewin, mii'iwe kaakii'ishipii'ikewaatc iki Kishemanitoon kaakiih​kanoocikehtamawaawaatc." 13 "Oncipiintikek i'i ishkwaantem kaa-akaahsateyaak. Mankateyaa ohsha ishkwaantem, wentan i'i kaainamok miihkana nihshiwanaatisiwinink. Paahtiinowak itahsh ikiwe 'imaa kaapima'atoowaatc. 14 Aaniihsh akaahsateyaa 'iwe ishkwaantem kaye sanakan miihkana kaainamok pimaatisiwinink. Akaahsiinowak itahsh iki kemihkamowaatc." 15 "Ahshwiihkantawihkok iki kaawanihshimiwewaatc kaakanootamawaashihtoowaatc Kishemanitoon. Kipiotihsikook maanahcaanihshink eshinaakosiwaatc wakicaya'ii. Piincinaw itahsh taapishkoo kaa-aahkwaatisiwaatc ma'iinkanak ishiayaawak. 16 Mii'imaa keonci​kihkenimekwaa e'waapamekwaa aaniin keishipimaatisiwaatc. Inashke kaawiin awiya omawinswaanaahsii' shoomina' ciontinaatc okaawiminakashiiwaahtikonk. Kaawiin kaye kaamiicinaakaatenikin omawinswaatansiinan kaahshashkonk ciontinank. 17 Amiitahsh owe peshikwan, kaaonishihshitc mihtik kwayahk onihtaawikihtoon kaaonishihshininik kaamiicinaakaatenik, a'a tahsh wiin ekaa kaaonishihshihsik mihtik onihtaawikihtoon tino kaaonishihshinsininik kaamiicinaakaatehsininik. 18 'Awe kaaonishihshitc mihtik kaawiin onihtaawikihtoohsiin kaamiicinaakaatehsininik. Kaye 'awe ekaa kaaonishihshihsik mihtik kaawiin onihtaawikihtoohsiin kaamiicinaakaatenik. 19 'Awe tahsh mihtik kihtikewinink kaa-ayaatc ekaa kaaminonihtaawikihtoohsik kaamiicinaakaatenik, takiishkata'waa cimacohte'ontc. 20 Amiitahsh iwe peshikwan, kikaonci​nihsitawinawaak iki kaawanihshimiwewaatc kaakanootamawaahshitoowaatc Kishemanitoon e'waapantamek aaniin entootamowaatc." 21 "Kaawiin wiin iki kahkina kaaishiwaatc 'Tepencikeyan! Tepencikeyan!' tapiintikanaahsiiwak imaa Kishemanitoon kaaishi​Kihciokimaawinitc. Ikiweniwak ehta kaatootamowaatc eshi​antawentaminitc ninTeten kihcikiishikonk kaa-ayaanitc. 22 Niipiwa' ninka​ikook ahpii onahshowewikiishikaninik: 'Tepencikeyan! Tepencikeyan! Ninkiih​kanoocikehtamawaanaan Kishemanitoo kiin ekii​ahpimoyaank kiwiinsowin! Kaye kiin kiwiinsowinink ninkiih​saakicinisha'waanaanik maciahcaahkwak. Kaye kiin kiwiinsowinink ninkii'onci​tootaamin niipiwa' maamahkaacihcikewinan,' ninka​ikook. 23 Shikwa hsa 'owe ninka​inaak: 'Kaawiin wiihkaa kitoonci​kihkenimihsinooninim! Ninkoci ishaak, kiinawaa kaamacitootamek!' ninka​inaak." 24 "Miitahsh o'owe onci, awiya pisintank ono ninkiikitowinan kaye ani​tootank, mii hsa 'owe keishi​awehcikaanak, ehkakiihtaawentank inini kaakii'oshihtootc owaahkaa'ikan wakicaya'ii kihtaapihkonk. 25 Miitahsh kaa'ishi​kihcikimiwank, shikwa kii'nihkipiihse, ehkihcinootink ekiih​pahkihtehsek imaa waahkaa'ikanink. Kaawiin itahsh onci​pankihsinsinoon iwe waahkaa'ikan, aaniihsh ekii'ishi​oshihcikaatek wakici kihtaapihkonk. 26 "Shikwa miinawaa awiya kiinoontank ono nintihkitowinan, ekaa tahsh wiihtootanhsik, taishinaakosi taapishkoo 'awe inini kaakakiipaatisitc, kaawaahkaa'iketc mihtaawankaank. 27 Kiihkihcikimiwan itahsh, kimiwanaapo misiwe ekii'onci​kihci​sesakoocipiiciciwank ehkihcinootink ekiih​pahkihtehsekin imaa waahkaa'ikanink. Miitahsh i'i kaa'ishi​kawihsek i'i waahkaa'ikan, kahkina kekoon kii'nihshiwanaatan." 28 Ahpii tahsh Ciisahs kaapooni​kiikitotc okii'maamahkaasihtamini kahkina awiya' kaamaamawenonitc ono okihkino'amaakewinan. 29 Aaniihsh okii'ishi​kihkino'amawaa' e'ayaatc i'i kashki'ewisiwin, kaawiin wiin i'i taapishkoo kaakii'ishi​kihkino'amaakenitc i'i kaakihkino'amaakenitc Coowa' otOonahshowewinini.

Maahtiyo 8

1 Ahpii tahsh Ciisahs ekiih​piniihsaamaciwetc, aahpici kiihpaahtiinowa' awiya' kaakiih​piminisha'okotc. 2 Peshik itahsh ininiwan e'omikiiwaahpinenitc okiih​pinaasihkaakoon ekii'ociciinkwanapinitc, ekii'ikotc: "Tepencikeyan, kiishpin inentaman kitaa​kashki'ihsh cipehki'ikoowisiyaan." 3 Ciisahs tahsh shemaak kii'ishinihkeni ekiih​saaminaatc, o'o tahsh okii'inaan: "Nintinentam ciminoayaa'inaan, mii'i ishiminoayaan." Shemaak itahsh okii'nakanikoni i'i kaakii'ishi​omikiiwaahpinenitc. 4 Ciisahs tahsh okii'inaan: "Pisintawihshin, keko wiin awiya wiintamawaahken. Shemaak itahsh antawaapam a'a anami'ewikimaa ciantawimihk. Miitahsh ishi​pakitinaahsoohkan kaakii'ishi​kihkino'amaaketc a'a Moosihs (Moses) kahkina awiya citepwehtawihk aasha ekiih​pehki'ikooyan," okii'inaan. 5 Ahpii tahsh Ciisahs ehpi​takohshink i'imaa Kaparniyamiink (Capernaum), Oroom (Rome) kaaonci​tipentaakosinitc shimaakanihshiiwikimaan okii'nakishkaakoon ekiih​pakohsenimikotc ciwiitoohkawaatc, 6 o'o ekii'ikotc: "Tepencikeyan, peshik nintanohkii'aakan wiinke kihciaahkosi i'iweti kaaishitaayaan. Mihcipimihshin onipewinink, kaawiin kaye waahkawiihsii, maawac iko ehkakwaatakihtootc." 7 Ciisahs tahsh okii'ishi​nahkwehtawaan: "Ninka​ishaa, ninka-antaminoayaa'aa." 8 Shimaakanihshiiwikimaa tahsh kii'ihkito: "Kaawiin ninte​ahpiihtentaakosihsii cipiintikeyan niwaahkaa'ikanink. Mihcikiikiton ehta, miitahsh ciminoayaatc nintanohkii'aakan. 9 Aaniihsh keniin nintayaawaak nintookimaamak, nintookimaahkantawaak kaye shimaakanihshak. Kiishpin peshik kii-inak: 'Maacaan,' mii'i eshi​maacaatc. Miinawaa peshik e'inak: 'Piishaan,' mii'i eshi​piishaatc. Wa'a kaye kiianoonak kaapamiihtamawitc kekoonini ci-ishihciketc, mii'i eshihciketc." 10 Ahpii tahsh Ciisahs ekii'noontank, aahpici kiihkihcimaamahkaatentam, ekii'inaatc i'i kaakii'wiiciiwikotc: "Kekoon kitinininim: kaawiin wiihkaa niwaapamaahsii awiya i'imaa Isriyalink (Israel) kaaonciitc ciahpiihci​tepweyentank taapishkoo wa'a kaaishi​waapamak noonkom. 11 Kakwe​maamihkawihk tahsh o'owe: Paanimaa maawacihsitootc Kishemanitoo otipencikewin, aahpici tapaahtiinowak awiyak waapanonk kaye nikaapii'anonk kepi​onciiwaatc ciwiitapimaawaatc ciwiiciwiihsiniimaawaatc Eparahaaman (Abraham), Aaisikoon (Isaac), Cekapoon (Jacob) kaye kaawii'ishi​wiihkwantinaaniwaninik. 12 Iki tahsh mayaa kekii'ayaawaahpan i'imaa Kishemanitoo oTipencikewinink, miiwakiki keishi​wepinintwaa i'imaa wanitipihkanonk, miitahsh weti keshi​mawiwaatc, oka​matwentaanaawaan kaye wiipitiwaan," okii'inaa'. 13 Miitahsh okii'inaan ini shimaakanihshiiwikimaan: "Maacaan, mii'i ishi​kiiwen, mii ko piko keishinaakwahk kaa'ishi​tepwehtaman," okii'inaan. Otanohkii'aakanan tahsh kii'minoayaawan i'iwe ahpii peshikwan entahso​tipa'ikaneyaanik. 14 Ciisahs itahsh kii'ishaa Piitaroon (Peter) eshitaanitc. Okii'waapamaan Piitaroon osikohsini ehkishisowaahpinenitc e'mihcipimihshininitc i'imaa nipewinaahkonk. 15 Okiih​saaminaan oninciiniink ini ihkwewan. Shemaak itahsh okii'nakanikoni i'i otaahkosiwinini. Miitahsh kaa'ishi​wanishkaanitc shemaak ekiih​pami'ikowaatc. 16 Ahpii tahsh e'ani​onaakohshininik awiyak okiih​piitamawaawaan Ciisahsoon i'iweniwa' kaakiih​kikishkaakonitc maciahcaahkwa'. Ciisahs tahsh peshik ihkitowin okii'aapacihtoon ehsaakiciwepinaatc i'i maciahcaahkwa', ekii'minoayaa'aatc kaye kahkina kaa-aahkosinitc. 17 Miitahsh o'o kaakii'onci-ishihciketc, mayaa piko ci-ishihsenik aaniin kaakii'ihkitokopanen a'a otipaacimo Aaiseya (Isaiah) a'a kaakiih​kanootamawaatc Kishemanitoon mewisha: "Wiin ihsa piko kikii'otaahpinamaakonaan kitaahkosiwininaanin kaye okii'maaciitoonan kahkina kitinaahpinewininaanin." 18 Ciisahs tahsh ekii'waapamaatc ehpiihci​paahtiinonitc awiya' e'waahkaashkaakotc okiih​kanoonaa' okihkino'amawaakana' akaamisaaka'ikan ci-ishaawaatc. 19 Peshik itahsh kaakihkino'amaakenitc Onahshowewin okiih​pinaasihkaakoon ekii'ikotc: "Kihkino'amaake, kikawiiciiwin aanti piko keishaayan." 20 Ciisahs tahsh okii'ishi​nahkwehtawaan: "Iki waakohshak owaashiwak, iki kaye pinehshiinshak owasihswaniwak. Niin tahsh Inini oKosihsan kaawiin nintayaahsiin aanti keshi​pimihshinaan cianwehshinaan," kii'ihkito. 21 Iniweniwan itahsh peshik okihkino'amawaakanan kaakiih​piminisha'okotc okiih​kanoonikoon: "Tepencikeyan, taka pakitinihshin ahkawe ciwii'awi​na'inak nintete," okii'ikoon. 22 Ciisahs itahsh okii'ishi​nahkwehtawaan: "Piminisha'ohshin. Nakash iki kaanipowentaakosiwaatc. Wiinawaa ko oka​tashiihkaanaawaa cina'inaawaatc otinawemaakaniwaa' kaawii'niponitc," okii'inaan. 23 Ciisahs tahsh kii'ani​poosi i'imaa ciimaanink kaye okihkino'amawaakana' okii'ani​wiiciiwikoo'. 24 Aahpici tahsh kiihsesakooci​pakamaanimanini i'imaa saaka'ikaniink. Aahpici tahsh kiihkihcimamaankaashkaani, ekiih​kihci​saahsiika'okowaatc. Aanciko tahsh wiin Ciisahs kii'nanipaa. 25 Iki tahsh kihkino'amawaakanak pehsho okii'naasihkawaawaan ekii'aamaci'aawaatc kaye ekii'inaawaatc: "Tepencikeyan, pimaaci'ihshinaam! Aasha kinihshiwanaatisimin!" 26 Ciisahs okii'inaa': "Kiinawaa kaa-akaahsink kitepweyentamowiniwaa! Wekonen wenci​sekisiyek?" Kii'waanishkaa tahsh ekiih​kanootank nootinini, saaka'ikanini kaye, wiinke tahsh kii'ani​anwaahtinini. 27 Kahkina tahsh kiihkihcimaamahkaatentamook ekii'ihkitowaatc: "Kaanaka awekwen entinoowikwen wa'a inini? Awaac kaye nootin, saaka'ikan kaye ehpisintaakotc!" 28 Ciisahs tahsh ahpii kaahpi​takohshink i'imaa Kaatara (Gadara) ahkiink akaamink okii'nakishkaakoo' niishin ininiwa' ekii'onciinitc i'imaa kaaishitaanitc na'initiiwikamikonk e'ayaanikin kaashi​wiimpahkamikaanikin. I'i tahsh kaa'ahpiihci​kohtaanentaakosinitc ininiwa' kaawiin awiya kii'ishaahsii i'imaa ciikaya'ii, aaniihsh maciahcaahkwa' okiih​kikishkaakoni. 29 Miitahsh kaa'ishipiipaakiwaatc: "Aaniin waahtootawiyaank kiin Kishemanitoo oKosihsan! Mii na 'i aasha ewiih​kakwaataki'iyaank cipwaa ocihcihsek ahpii kaawiih​kakwaatakihtooyaank?" 30 Kaawiin aahpici waahsa i'imaa kiihtashi​wiihsiniwak ekiih​paahtiinowaatc koohkoohshak. 31 Iki tahsh maciahcaahkwak okii'inaawaan: "Kiishpin wiih​saakicinisha'ohshiyaank i'imaa ishi​piintikenisha'ohshinaam koohkoohshihkaank." 32 Ciisahs tahsh okii'inaa': "Maacaak." Miitahsh kaa'ishi​saaka'aminitc, ekii'awi​piintikeshkawaanitc i'i koohkoohsha'. Shemaak tahsh kahkina kaaohkwenonitc koohkoohsha' kii'maaciipa'itiwa' eshi​kiishkaamatinaanik ekiih​kahkaciwe pahkopiipahtoonitc i'imaa saaka'ikaniink, kahkina tahsh kii'nihsaapaawewa'. 33 Kaakiih​kanawenimaawaatc itahsh i'i koohkoohsha' kiihtapasiiwak. Ootenaank kii'ishaawak ekiih​caakitipaacimowaatc aaniin kaa'inahkamikaninik. Okiih​tipaacimaawaa' kaye aaniin kaa'ishihsenitc i'i ininiwa' kaakiih​kikishkaakonihpan maciahcaahkwa'. 34 Kahkina tahsh i'imaa kaakii'onciiwaatc ootenaank okiihpianta​nakishkawaawaan Ciisahsoon. Ahpii tahsh kaawaapamaawaatc, okii'antawenimaawaan inkoci 'imaa cionci-ishaanitc otahkiimiwaank.

Maahtiyo 9

1 Ciisahs tahsh kiihpoosi ciimaanink akaamink ekii'ishaatc ekiih​kiiwetc kaakii'onciitc ootenaank. 2 Kiihpiitamawaa tahsh peshik ininiwan ekaa ekiih​pimohsehsinik, ekii'mihcipimihshininitc nipewinink. Ahpii tahsh Ciisahs ekii'waapantamawaatc aaniin ehpiihci​tepweyentaminitc iniweniwa' kaapiinikonitc, okii'inaan ini kaa-aahkosinitc: "Mashkawentan, niicii! Kimacitootamowinan poonencikaatewan." 3 Aaninta tahsh iki kaakii'ayaawaatc i'imaa kaakihkino'amaakewaatc Onahshowewin, kii'ayinentamook: "Wa'a inini opaahpinenimaan Kishemanitoon!" 4 Ciisahs okiih​kihkenimaa' aaniin enentaminitc. Miitahsh kaa'inaatc: "Wekonen noociko wenci-inentamek? 5 Aaniin i'iwe kewentahkipan ci-ihkitoyaampaan? 'Poonencikaatewan kimacitootamowinan,' maakishaa kaye ci-ihkitoyaampaan: 'Pasikwiin cipimohseyan'? 6 Ciwaapantamek itahsh e'ayaatc mashkawisiiwin a'a Inini oKosihsan o'omaa ahkiink cipoonentamaakenitc ini macitootamowinan," miitahsh kaa'inaatc ini kaa-aahkosinitc: "Pasikwiin, otaahpinan kinipewin, kiiwen!" okii'inaan. 7 A'a tahsh inini kiihpasikwii shemaak ekiih​kiiwetc. 8 Iki tahsh i'imaa kaamaamawenowaatc ahpii kaa'waapantamowaatc kaakii'inahkamikaninik, aahpici kiihsekisiwak, ekii'miikwehciwenimaawaatc Kishemanitoon kaamiinaatc ininiwa' o'o tino kashki'ewisiwin. 9 Miitahsh imaa Ciisahs e'anionci​maacaatc, okii'waapamaan ininiwan e'namatapinitc i'imaa kaakiih​tananohkiinitc, Maahtiyo (Matthew) ekii'ishinihkaasonitc. Maahtiyo tahsh kiihtinowi kaamaawantoonaatc tipa'ikewishooniyaan. Ciisahs okii'inaan: "Piminisha'ohshin." Shemaak itahsh kiihpasikwiiwan ekiih​piminisha'okotc. 10 Mekwaa tahsh Ciisahs okihkino'amawaakana' kaye e'wiihsiniwaatc i'imaa Maahtiyoon owaahkaa'ikaniniink, kiihpaahtiinowa' kaamaawantoonaanitc taakihs (tax) shooniyaan, kotak kaye kaa-aanawenimimintc, ekii'wiici​wiihsiniimikowaatc. 11 Ahpii tahsh Perahsiik (Pharisees) kaa'waapankewaatc okii'inaawaan kihkino'amawaakana': "Wekonen tahsh kikihkino'amaakemiwaa wenci​wiitoohpamaatc i'i tino kaamaawantoonaanitc taakihs shooniyaan, kotak kaye awiya' kaa-aanawenimimintc?" 12 Ciisahs ekii'noontawaatc okii'inaa': "Iki ekaa kaa-aahkosihsikwaa kaawiin onantawenimaahsiwaawaan mashkihkiiwininiwan, kaa-aahkosiwaatc ehta. 13 Ani​maacaak itahsh cikakwe​kihkentamek wekonen o'o kaaonci-ishipii'ikaatek: 'O'o kaa-antawentamaan i'i cishawenintiyek, kaawiin wiin ehta awahkaanak cinihsekwaa cipakitinikaakeyek.' Kaawiin tahsh wiin ninkii'onci​piishaahsii ciantomakwaa okwayahkwaatisiik, iki hsa ciantomakwaa kaa-aanawenimintwaa." 14 Iki kaakiih​piminisha'waawaatc Cwaanan (John) Siika'antaakewininiwan okiih​pinaasihkawaawaan Ciisahsoon ekii'inaawaatc: "Niinawint iki kaye Perahsiik (Pharisees) mooshak nintoonci​anami'emantawii'itisomin. Wekonen tahsh wiinawaa kikihkino'amawaakanak wiihkaa wenci​anami'emantawii'itisohsikwaa?" kii'ihkitowak. 15 Ciisahs okii'ishi​nahkwehtawaa': "Minihk iko keayaatc i'imaa a'a inini kaakihciwiitiketc, kitinentaam ina cimaanentaminihpan i'i kaapi​antawaapamikotc? Kaawiin iitok! Ninkotink itahsh taishihseni cimaaciicikaniwitc a'a kaakihciwiitiketc i'imaa kaashi​ayaanitc, miitahsh i'i ahpii kemaanentaminitc cionci​wiihsinihsinik. 16 "Awiya ehpakwa'ank kehtepiinsihkawaakanini, kaawiin wiin otaapacihtoohsiin oshki-ishiikinooni. Aaniihsh kiishpin pehkwacihsek i'i pakwa'ikan taakiki​pahkwacihse i'i kehtepiinsihkawaakan. Aanciihke tahsh taamankipakonehse. 17 Kaawiin kaye awiya osiikinansiin oshkishoominaapo i'imaa kehteshoominaapowashink. Aaniihsh kiishpin ishihcikehpan taakiih​piikohsewan shoominaapowashan, kaye oshkishoominaapo taakiih​siikihse, ini tahsh shoominaapowashan tanihshiwanaacihcikaatewan. Imaa tahsh oshkishoominaapoowashiink ishipiincisiikinikaate i'i oshkishoominaapo, miitahsh minciniish eshi​minokanawencikaatekin shoominaapo kaye shoominaapowashan." 18 Mekwaa tahsh o'o Ciisahs e'ihkitotc, peshik Coowan kaaokimaawentaakosinitc okiih​pinaasihkaakoon ekii'ociciinkwanapiihtaakotc ekii'ikotc: "Nintaanihs kii'ishkwaapimaatisi noonkom. Taka pisaamin cipimaatisitc," okii'ikoon. 19 Shemaak itahsh Ciisahs kiihpasikwii ekii'ani​wiiciiwaatc. Okihkino'amawaakana' kaye kii'ishaawa'. 20 Peshik itahsh ihkwe mitaahshiniishopipoon ekii'oncikawininik omiskwi, otaanaank okiihpionci​naasihkawaan Ciisahsoon. A'a tahsh ihkwe okiih​saaminamawaan Ciisahsoon kaashi​kiihkeyiikaninik okashkiikiiwinini. 21 Aaniihsh kii'itiso: "Kiishpin ehta saaminamowak i'i okashkiikiiwin, mii'i ciminoayaayaan." 22 Ciisahs ekiih​kwehkihtaatc okii'waapamaan ekii'inaatc: "Mashkawentan! kitepweyentamowin kiminoayaa'ikon." Shemaak itahsh kii'minoayaa a'a ihkwe. 23 Ahpii tahsh Ciisahs ekiih​piintiketc kaaokimaawentaakosinitc owaahkaa'ikaniniink, okii'waapamaa' kaakiih​kitohcikepootaacikenitc awiya' kaye e'mikoshkaacihcikenitc. 24 Okii'inaa' itahsh: "Kahkina kaatahshiyek saaka'amok! A'a ihkwesenhs kaawiin nipohsii, mihcinipaa ohsha." Kahkina tahsh okiih​paahpi'ikoo' ekii'maanenimikotc. 25 Ekiih​saakicinisha'ontwaa tahsh kahkina, Ciisahs kiihpiintike aanti kaakii'ishi​pimihshininitc ihkwesenhsan, miitahsh kaakii'ishi​otaahpinamawaatc oninciini. Shemaak itahsh kii'wanishkaawan. 26 Misiwe tahsh i'imaa ahkiink kii'noontaakaaniwanini o'o kaakii'inahkamikahk. 27 Ahpii tahsh Ciisahs kaa'anionci​maacaatc, mekwaa tahsh e'ani​pimohsetc, niishin kaakii'waapihsinik okiih​piminisha'okoo' ekii'ishi​shaakowenitc: "Kiin Tepitink (David) kaaontahkaanesiyan! Kohpaatenimihshinaam!" 28 Ahpii tahsh Ciisahs ekii'ani​piintiketc waahkaa'ikanink okiih​pinaasihkaakoo' i'i kaakii'waapihsinik. Miitahsh kaakii'ishi​kakwecimaatc: "Kitepwehtaam ina cikashkihtooyaan o'o ci-ishihcikeyaan?" Miitahsh kaakii'ikotc: "Eha'." 29 Ciisahs tahsh okiih​saaminaa' oshkiinshikoniink ekii'inaatc: "Taishinaakwan aaniin kaaishi​tepweyentamek." 30 Shemaak itahsh kii'waapiwa'. Aahpici tahsh okii'ayaankwaamimaa' ekii'inaatc: "Keko wiin wiintamawaahkekwaanik awiyak." 31 Pisaan itahsh iko mii'i kaa'ishi​papaa​tipaacimikotc i'imaa misiwe ahkiink. 32 Ahpii tahsh kaa'ani​maacaanitc i'i ininiwa' kaakii'waapi'aatc, awiyak okiih​piitamawaawaan Ciisahsoon peshik ininiwan kaakiikitohsinik, aaniihsh okiih​kikishkaakoni maciahcaahkwan. 33 Ahpii tahsh kaa'ishkwaa​saakiciwepinikaniwitc a'a maciahcaahk, shemaak tahsh kiihkakito a'a inini. Kahkina awiyak kiihkihcimaamahkaatentamook. "Kaawiin wiihkaa waapancikaatehsinoon kekoon ci-ishinaakwahk o'omaa Isriyalihkaank (Israel)!" kii'ihkitowak. 34 Perahsiik (Pharisees) tahsh wiinawaa kii'ihkitowak: "Kihciokimaa​maciahcaahkwan ohsha omiinikoon mashkawisiiwin kaaonci​kashki'aatc ehsaakiciwepinaatc i'i maciahcaahkwa'." 35 Misiwe tahsh Ciisahs kiihpapaa​ishaa ootenawan kaye kaa-ayishitaaniwaninik ekiih​papaakihkino'amaaketc Coowak otanami'ewikamikowaank ekiih​kakiihkwaatank minwaacimowin, i'iwe Kishemanitoo wiipa kaawii'oshihsitootc oTipencikewin. Okii'minoayaa'aa' kaye kahkina kaakii'aahkosinitc aaniiniko kaakii'inaahpinenitc. 36 Ekii'waapamaatc itahsh ehpiihci​paahtiinonitc awiya', aahpici okiih​kihcikoohpaatenimaa'. Aaniihsh kii'mikoshkaaci'aawa', kiihpwaanawihcikewa' kaye, taapishkoo maanahcaanihshak kaa-ayaawaahsikwaa kaakanawenimikowaatc. 37 Miitahsh kaakii'onci​kanoonaatc okihkino'amawaakana': "Inashke paahtiinat kemanishikaatek. Aahpici tahsh pankiiwiwak kaamooshakinikewaatc. 38 Kakwecimihk itahsh Kishemanitoo kaatipentank manishikewin ci-ishinisha'waatc keyaapi otanohkii'aakana' kemooshakinaminitc kemanishikaatenikin," okii'inaa'.

Maahtiyo 10

1 Ciisahs tahsh okii'antomaa' i'i kaamitaahshiniishinitc okihkino'amawaakana' ekii'miinaatc kashki'ewisiwin cisaakiciwepinaanitc maciahcaahkwa', ciminoayaa'aanitc kaye awiya' aaniin iko kaa'inaahpinenitc. 2 Miitahsh o'o kaa'ishinihkaasonitc iniweniwa' mitaahshiniishin otishinisha'waakana': a'awe nihtam, Saaiman (Simon) kaakii'oshinihkaanintc Piitar (Peter), kaye wiicihkiwensiwan Entaroon (Andrew), shikwa Ciimis (James) kaye wiicihkiwensiwan Cwaanan (John) kaakii'otetewaatc Sepatiin (Zebedee). 3 Shikwa Pilap (Philip) kaye Paarhtaalamiyo (Bartholomew), shikwa Twaamahs (Thomas), kaye Maahtiyo (Matthew) kaakiih​tipa'ike'iwetc, shikwa Ciimis (James) kaakii'otetetc Aalpiyahsan (Alphaeus), kaye Taatiyahs (Thaddeus). 4 Shikwa Saaiman (Simon) mii 'awe peshik kaawiih​kakwe​aancihsehtootc okimaawiwin kaatinoowitc. Kaye Cootahs Iskeriyat (Judas Iscariot) kaawii'mamishi'aatc Ciisahsoon. 5 Ciisahs okii'maacinisha'waa' i'i kaamitaahshiniishinitc o'o ekii'inaatc: "Keko wiin ishaahkek kaainamok kaaCoowiwihsikwaa kaaishi​ayaawaatc, i'imaa kaye kaaishi​ootenawi'itiwaatc Sameriyaawininiwak (Samaritans). 6 I'imaa tahsh ehta ishaak, Isriyalininiwak (Israel) kaashi​ayaawaatc, taapishkoo maanahcaanihshak kaawanihshinowaatc kaaishinaakosiwaatc. 7 Maacaak itahsh cishi​wiintamaakeyek o'o ihkitowin: 'Asha pehshonaakwan Kishemanitoo ewii'oshihsitootc oTipencikewin.' 8 Minoayaa'ihkok otaahkosiik, pimaaci'ihkok kaanipowaatc, minoayaa'ihkok kaaomikiiwaahpinewaatc, saakiciwepinihkok maciahcaahkwak. Kaawiin kikiih​tipa'ansiim kaakii'miinikooyek: miihsh i'i peshikwan ishi​miikiwek. 9 Keko wiin kipiintaahsoniwaank ishi​maaciinaahkek osaawishooniyaa, waapaapihko​shooniyaa kaye, keko kaye maaciinaahkek pankii kaainakinsotc osaawaapihko​shooniyaa. 10 Keko wiin kaye maaciitoohkek mashkimot, kotak papakiwayaan, kotak mahkisinan, sahka'onaahk kaye. Aaniihsh otanohkii taamiinaa aaniin eshi​noontehsetc. 11 "Ahpii anitakohshinek weti ootenaank komaa kaye taawinink, nanaantawaapamihk awiya keinaatisitc kepiintikaninek. Miitahsh i'imaa keayaayek paamaa ocihcihsek cini​maacaayek. 12 Ahpii tahsh piintikanikooyek i'imaa waahkaa'ikanink, miitahsh keihkitoyek: 'Pisaanisiwin kikawiiciiwikom.' 13 Kiishpin tahsh minowiiciiwinekwaa i'imaa kaa-ayaawaatc waahkaa'ikanink, i'imaa ishinakatamok i'iwe kaakii'ihkitoyek kiipi​piintikeyek. Kiishpin tahsh inaatisihsikwaa i'imaa waahkaa'ikanink, kiiwe​otaahpinamok i'iwe kaakii'ihkitoyek: 'Pisaanisiwin kikawiiciiwikom.' 14 Kiishpin tahsh piintikanikoohsiwek, pisintaakoohsiwek kaye i'imaa ootenaank, komaa kaye taawinink, miitahsh ishi​paahpaawisitehshimoonok, cini​maacaayek. 15 Nawac niipiwa' oka​inaahkonaa' Kishemanitoo i'imaa kaa-ayaanitc ootenaank, ahpiihc wiin i'imaa kaakii'ayaanitc Swaatamiink (Sodom), Kamwaara (Gomorrah) ootenaank kaye." 16 "Pisintawihshik! O'o kaaishinisha'onakook, mii'i eshinaakosiyek taapishkoo kenaatamaatisohsikwaa maanahcaanihshak kaaishaawaatc mekwe ma'iinkanihkaank. Kaa-ahpiihci​ayaankwaamisitc itahsh kinepik mii'i nahke ishi​ayaankwaamisik; kaa-ahpiihci​noohkaatisitc a'a omiimiinhs, mii'i ahpiihci​noohkaatisik. 17 Ayaankwaamisik! Ayaawak ohsha ininiwak ketahkoninekwaa keishiwininekwaa kaye tipaahkonikewikamikonk, kikapahpahshanshe'okowaak kaye otanami'ewikamikowaank. 18 Niin ehtipeniminakook kikaonci-ishiwinikoom aanti keishi​tipaahkoninekwaa iki kaaokimaawentaakosiwaatc, kihciokimaak kaye, ciwiintamawekwaa i'i minwaacimowin iki kaakiih​piininekwaa kaye iki kaaCoowiwihsikwaa. 19 Keko wiin wawaanentankek aaniin keihkitoyek, aaniin kaye mayaa keihkitoyek. Kika​miinikoom ohsha aaniin keihkitoyek ahpii ocihcihsek. 20 Kaawiin tahsh kiinawaa kaakiikitoyek, ini hsa kiTetewaa otAhcaahkwan kikawiici'ikowaa aaniin keihkitoyek. 21 "Ininiwak kaye pisaaniko tamiikiwewak wiicihkiwewaa' cinihsimintc. Otetemaak kaye mii peshikwan ketootawaawaatc oniicaanihsiwaa'. Apinoonciishak kaye oka​shiinkenimaawaa' oniiki'ikowaa', oka​pakitinaawaa' kaye pisaaniko cinihsimintc. 22 Kahkina awiyak kikashiinkenimikowaak niin onci ehtipeniminakook. A'a tahsh kemashkawentank ehpakiciihsik, piinihsh weti kahkina kekoon kii-ishkwaahsenik, mii 'awe kepimaaci'intc. 23 Kakwaataki'ikooyek kaye i'imaa peshik ootenaank, pahkaan ootenaank ahpa'iwek. Kitishi​wiintamawininim, kaawiin kikatekiishihtoohsiim kitanohkiiwiniwaa i'imaa ootenaahkaank Isriyalihkaank (Israel), mii aasha citakohshininitc Inini oKosihsan. 24 "A'a kihkino'amawaakan kaawiin awahshime ahpiihtentaakosihsii kaa-ahpiihtentaakosinitc ini kaakihkino'amaakotc. A'a kaye kaapamiihtaaketc kaawiin awahshime ahpiihtentaakosihsii kaa-ahpiihtentaakosinitc ini otookimaaman. 25 Miitahsh i'i teminihk ci-inentankipan ci-ishi​ayaatc a'a kihkino'amawaakan kaaishi​ayaanitc kaakihkino'amaakotc, a'a kaye kaapamiihtaaketc ci-ishi​ayaatc kaaishi​ayaanitc ini otookimaaman. Kiishpin maciaya'aa Pi'elsipol (Beelzebul) ishinihkaacikaniwitc a'a kaaniikaanishkank i'i taawin, awahshime tahsh takihci-ishinihkaacikaniwiwa' kaaniikaanishkawaatc." 26 "Keko wiin kohsaahkekwaanik ininiwak. I'i tahsh kaa-akwana'ikaatek piinihsh tani​mohshehsin. Kahkina kaye kekoon kaakiimootentaakwahk misiwe takihkencikaate. 27 Wekonen kaawiintamawinakook ehtipihkahk, tipaatotamok mekwaa ehkiishikahk. Wekonen kaye kaakiimoocinoontamek, wakiciwaahkaa'ikanihkaank kikaonci​kishiiwewiintamaakem. 28 Keko tahsh wiin kohsaahkekwaanik iki kaanihtoowaatc wiiyawimaani, kaapwaanawi'aawaatc tahsh cinihsaawaatc ini ahcaahkomaan. A'a tahsh kohsihk Kishemanitoo kaakashkihtootc cinihshiwanaacihtootc wiiyawini kaye kaakashki'aatc cinihshiwanaaci'aatc ahcaahkomaan i'imaa maci-ishkotenk. 29 Kiishpin peshik piiwaapihkoonhs ayaawatc, niishin miskominihkehsiwak kitaatetipa'waak. Mihsawaa piko peshik miskominihkehsi kiipankihshink mihtahkamikaank, kiTetewaa ohsha okihkenimaan. 30 Kiinawaa tahsh wiin, kaatahsopeshikwahkin kiinisihsiwaan kahkina kihkencikaatewan. 31 Keko tahsh kiinawaa sekisihkek, nawac kiinawaa kikihci-inentaakosim ahpiihc wiin miskominihkehsiwak." 32 "A'awe hsa kewiinshitc ehpiminisha'otc enaahsamiinitc awiya', mii'i keniin ninka​wiinaa ehtipenimak enaahsamiinitc ninTeten kihcikiishikonk kaa-ayaanitc. 33 A'a tahsh wiin keihkitotc ehpiminisha'ohsik enaahsamiinitc awiya', miitahsh keniin peshikwan keinak ehtipenimaahsiwak 'imaa enaahsamiinitc ninTeten kihcikiishikonk kaa-ayaanitc." 34 "Keko wiin inentankek ciminowiiciintiwaatc awiyak ci-ishi'akwaa kaakii'onci​piishaayaan o'omaa ahkiink. Kaawiin wiin minowiiciintiwin ninkiih​piitoohsiin, i'i hsa miikaatiwin. 35 Kaakii'onci​piishaayaan, a'a inini cionci​maanenimaatc ini oteten, otaanihsimaa kaye cionci​maanenimaatc omaamaan, ohshimihsimaa kaye cionci​maanenimaatc osikohsan. 36 Inini tahsh maawac keshiinkenimikotc i'imaa taonciiwa' kaashitaatc. 37 "Awenen nawac kesaaki'aatc ini oteten komaa kaye omaamaan ahpiihc niin kaaishi​saaki'itc, kaawiin teahpiihtentaakosihsii cipiminisha'otc. Awenen kaye nawac kesaaki'aatc ini okosihsan komaa kaye otaanihsan ahpiihc niin kaaishi​saaki'itc, kaawiin teahpiihtentaakosihsii cipiminisha'otc. 38 Awenen kaye ekaa kepimiwinaahsik otaashiteyaahtikoman, kaapiminisha'ohsik kaye, kaawiin tateahpiihtentaakosihsii cipiminisha'otc. 39 A'a tahsh kemanaawanihtootc opimaatisiwin, aanciko kaawiin tatepinamaasohsii tepwe keonci​pimaatisitc. A'a tahsh kepakitinank opimaatisiwin niin onci, tatepinamaaso tepwe keonci​pimaatisitc." 40 "Awenen iko kaapiintikanihk, nimpiintikanik. Awenen iko kaapiintikashitc opiintikanaan ini kaakiih​piicinisha'omitc. 41 Awenen iko kaapiintikanaatc ini Kishemanitoo otipaacimowininiiman aaniihsh ehkanoocikehtamawaanitc Kishemanitoon, kewiin hsa tatako​tipa'amawaa. Awenen iko kaapiintikanaatc kaakwayahko​pimaatisinitc aaniihsh ehkwayahko​pimaatisinitc, kewiin hsa tatako​tipa'amawaa. 42 Maamihkawihk itahsh o'o! Awenen iko kemina'aatc tahkipiini ini peshik kaapiminisha'omitc mihsawaa ko pankii kaa-ahpiihtentaakosinitc, e'onci​mina'aatc ehpiminisha'omitc, kekeht iko kewiin tatipa'amaakoowisi."

Maahtiyo 11

1 Ahpii tahsh Ciisahs kaa'ishkwaakanoonaatc okihkino'amawaakana', kii'ani​maacaa ehpapaa​kihkino'amaaketc, ehpapaa​wiintamaaketc kaye otipaacimowin i'imaa pepahkaan ootenaahkaank. 2 Cwaan (John) Siika'antaakewinini tahsh kipaahkwa'otiiwikamikonk ekii'ayaatc, ekii'noontank aaniin enanohkiinitc ini Christan, okii'ishinisha'waa' okihkino'amawaakana' kaaishi​ayaanitc, 3 ekii'inaawaatc Ciisahsoon: "Kiin ina Cwaan kaakiih​tipaacimaatc ewiih​takohshininitc, komaa kaye kotak ninka​pii'aanaan?" 4 Ciisahs tahsh okii'inaa': "Maacaak, kiiwek, wiintamawihk Cwaan wekonen kaanoontamek, kaawaapantamek kaye. 5 Iki kaawaapihsikwaa e'waapiwaatc, kaapimohsehsikwaa ehpimohsewaatc, kaaomikiiwaahpinewaatc ekii'minoayaa'intwaa, kaanoontansikwaa e'noontamowaatc, kaanipowaatc ehpimaaci'intwaa, iki kaye kaakitimaakisiwaatc e'wiintamawintwaa minwaacimowin. 6 Aahpici taminwentam a'a wiihkaa kepooni​tepweyenimihsik." 7 Cwaan itahsh kaa'ani​maacaanitc okihkino'amawaakana', Ciisahs okiih​kanoonaa' kaamaamawenonitc ekiih​tashimaatc ini Cwaanan: "Ahpii kii'antawaapamek a'a Cwaan weti pikwatahkamik, wekonen nika​waapantaamin kaa'inentamek? Mashkohsiiw na ciwewepaahsink? 8 Wekonehsh kaa'antawaapantamek? Awiya na ciminohkonayetc kikii'antawaapamaawaa? Iki kaaminohkonayewaatc i'imaa ayaawak kihciokimaa' kaashi​ayaanitc. 9 Wekonen tahsh kaa'antawaapantamek? Kishemanitoo na otipaacimowininiiman? Tepwe kitinininim, mii 'awe tino inini kaakii'antawaapamek! A'a tahsh Cwaan nawac kihci-inentaakosi ahpiihc wiin kotak tipaacimowininiwa' kaakanoocikehtamawaanitc Kishemanitoon. 10 I'iwe tahsh kaa'ishipii'ikaatek: 'Kishemanitoo ihkito, Mii 'awe kaapimiwitootc nintipaacimowin, ninka​niikaaninisha'waa cioshiihtaahtamawihk aanti keishaawatc.' Cwaan tahsh a'awe kaatashimintc. 11 Maamihkawihk o'o! Cwaan Siika'antaakewinini nawac kihci-inentaakosi ahpiihc wiin minihk ininiwa' kaakiih​pipimaatisinitc. Shaakooc itahsh awenen iko pankii kaa-ahpiihtentaakositc i'imaa Kishemanitoon oTipencikewininiink, nawac ishpentaakosi ahpiihc wiin Cwaanan. 12 I'i tahsh ahpii Cwaan kaakii'maacii​wiintamaaketc otipaacimowin piinihsh o'o ishi ahpii noonkom kaakiishikahk, ehpiihciiwaatc awiyak ishikakwe​piintikewak Kishemanitoon oTipencikewininiink, kaamashkawihcikewaatc kaye otootaahpinaanaawaa. 13 Kahkina Kishemanitoo otipaacimowininiima', Moosihs (Moses) otOonahshowewin kaye okii'niikaanitipaatotaanaawaa keishihsenik, piinihsh Cwaan kiitakohshink. 14 Kiishpin tahsh wiihtepwehtamek kaakii'ihkitowaahpan, miihsa Cwaan a'a Ilaaica (Elijah) kaakii'wiinsotc ewiih​takohshink. 15 Pisintamok kiinawaa kaaohtawakaayek! 16 "Aaniihsh keishi​naapinaako'akwaa okoweniwak noonkom kaapimaatisiwaatc? Mii taapishkoo apinoonciishak kaa-ayoohkwapiwaatc i'imaa akwaciink kaatanataawenk, ehshaakowaanaawaatc kaawiiciiwaawaatc e'otaminowaatc: 17 'Nintaanakii'inwewemohcike​pootaacikemin ciniimiyek, kaawiin hsa naa kikii'niimihsiim. Nintaanakii'ina'aamin kaye na'inikenikamonan, kaawiin hsa naa kikii'mawihsiim.' 18 Cwaan tahsh kiihtakohshin, kii'mantawi​anami'aa, kaawiin kaye kii'minihkwehsii shoominaapo. Miitahsh kaaicikaniwitc 'Maciahcaahkwan okikishkawaan.' 19 Inini oKosihsan itahsh kiihtakohshin, kii'wiihsini, kii'minihkwe kaye, miitahsh kaa'icikaniwitc: 'Kaashakeshki, minihkweshki, osaakiwiiciiwaa' taakihs (tax) kaatipa'ike'iwenitc, i'i kaye kotak kaa-aanawenimimintc.' Shaakooc itahsh awiya peminisha'ank Kishemanitoon okakiihtaawentamowinini, piciinak tanipehtenaakwanini tepwe i'i ehtinowaninik ahpii kota aninaakwaninik wekonen i'imaa otishihcikewinink wencihsenik." 20 Imaa tahsh kaashi​ootenaawankin nawac kaakiihtashi​maamahkaacihciketc kaawiin kii'nehpici​kwehkaatisihsiiwa' awiya', miitahsh kaakii'onci​kihcinooci'aatc, o'o ekii'inaatc: 21 "Kiinawaa Kwaraasin (Chorazin) kaa-ayaayek kikaocaanimisim! Kekiinawaa kikaocaanimisim Pehseta (Bethsaida) kaa-ayaayek! Kiishpin ini kaa'waapantamek maamahkaacihcikewinan kiinaakohcikaatekopanenan i'imaa ootenaank Tayarink (Tyre), Saaitanink (Sidon) kaye, aasha mewisha otaakiih​pihsihkaanaawaa kaa-ahsapiwekaninikin kaye mewisha otaakiih​piiwiwepinaanaawaa piinkwiini ohtikwaaniwaank cinaakohtoowaatc kaakiih​kwehkaatisiwaatc. 22 Maamihkawik itahsh o'o: Ahpii tipaahkonikewikiishikahk, Kishemanitoo nawac oka​koohpaasinawaa' i'i Tayarink, Saaitanink kaye kaaishi​ayaanitc ahpiihc kiinawaa. 23 Kiinawaa tahsh Kaparniyamiink (Capernaum) kaa-ayaayek! Kikii'inentaam ina ewii'ishpenintisoyek kihcikiishikonk inahke maawac cikihci-inentaakwahk kitootenaamiwaa? Weti onipook kaashi​ayaawaatc kikaishiwepinikoom! Kiishpin naakohcikaatekopanenan ini maamahkaacihcikewinan i'imaa Swaatamiink (Sodom) taapishkoo kaashi​waapantamek, keyaapi Swaatam taakii'ayaa noonkom. 24 Maamihkawik itahsh o'o! Ahpii tipaahkonikewikiishikahk, Kishemanitoo nawac oka​koohpaasinawaa' Swaatamiink kaakii'ayaanitc ahpiihc kiinawaa Kaparniyamiink kaa-ayaayek." 25 Amiitahsh i'i ahpii Ciisahs kii'ihkito: "NinTete! Kiin kaatipentaman kiishik, ahki kaye, kinanaahkomin aaniihsh kaawiin kikiih​kihkentamoonaahsiik ono kekoonan ikiweniwak kaakakiihtaawentamowaatc kaakihkentaahsowaatc kaye, iki tahsh wiin aahpici kaakihkentansikwaa kekoonini kikii'waapanta'aak. 26 Aaniihsh kiin ninTete, mii 'owe maawac eshi​minwaapantaman." 27 Miitahsh kaa'ani-ihkitotc: "NinTete tahsh kahkina kekoonini nikii'miinik. Kaawiin awiya okihkenimaahsiin ini oKosihsimaan, mii ehta a'a Kaaoyoohsimintc. Kaawiin kaye awiya okihkenimaahsiin ini Kaaoyoohsimimintc, mii ehta a'a oKosihsimaa. I'i tahsh ehta kaye kaainentank oKosihsimaa cikihkentamoonaatc. 28 "Pinaasihkawihshik kahkina kiinawaa kaa-ayehkosiyek, ehpwaawaneyek kaye, kikamiinininim itahsh anwepiwin. 29 Otaahpinamok, pihsihkamok nintahpihkanaahtik kihkinawaapamihshik, aaniihsh ninoohkaatis, nintapahsenim kaye. Kika​mihkaanaawaa tahsh anwepiwin. 30 I'i tahsh ahpihkanaahtik kemiininakook aahpici kikaminowane'ikom, niin kepimiwane'inakook aahpici tanaankan," kii'ihkito.

Maahtiyo 12

1 Ninkotink itahsh e'ani-ishihsenik, Ciisahs okihkino'amawaakana' kaye ehpimohsewaatc i'imaa pahkweshikani​kihtikaanink okii'maaci​ociihshipitooni pahkweshikani​mashkohsiwan ekii'onci​wiihsininitc, aaniihsh kii'noonteskatewa' i'i ahpii. Kii'Anwepiiwi​kiishikanini tahsh. 2 Ahpii tahsh Perahsiik (Pharisees) kaawaapankewaatc okii'inaawaan Ciisahsoon: "Inashke kikihkino'amawaakanak opiikonaanaawaa Onahshowewin, aaniihsh Anwepiiwi​kiishikan noonkom." 3 Ciisahs tahsh okii'inaa': "Kaawiin ina wiihkaa kitanamihtoohsiim aaniin Tepit (David) kaakii'ishihciketc i'i kaye kaakii'wiiciiwikotc ahpii ewii​wiihsiniwaatc? 4 Ekiih​piintiketc i'imaa pakwaanekamikonk Kishemanitoon kaaishianami'ehtawimintc, ekii'amwaawaatc pahkweshikana' kaakii'miinimintipan ini Kishemanitoon, aanawiin ekiih​piikonamowaatc Onahshowewinini. Aaniihsh anami'ewikimaak ehta kiihpakitinaawak ciamwaawaahpan i'i pahkweshikana'. 5 Kaawiin ina kitanamihtoohsiim Moosihs (Moses) otOonahshowewin e'ishipii'ikaatenik, anami'ewikimaak ehpiikonamowaatc Anwepiiwi​kiishikani Onahshowewin i'imaa Kihcianami'ewikamikonk entahso Anwepiiwi​kiishikaninik, shikwa tahsh kaawiin kekoon inaahkonikaniwihsiiwak. 6 Kiwiintamawininim, kekoon o'omaa ayaa nawac ehkihci-inentaakwahk ahpiihc wiin i'iwe Kihcianami'ewikamik. 7 O'o aaniihsh ishipii'ikaate: 'Kaawiin iki awahkaanak cipakitinaahswaaniwiwaatc ninantawenimaahsiik, i'i tahsh kaa-antawentamaan, ciminotootaakeyekipan.' Kiishpin kihkentamekipan aaniin o'o ehkitoomakahk, kaawiin kitaa​maci-inaahsiwaawaak iki kekoon kaakii'ishi​mamaashiihsikwaa. 8 Inini oKosihsan ohsha otipentaan kaa-Anwepiiwi​kiishikaninik." 9 Ciisahs kii'anionci​maacaa ekii'ani​piintiketc i'imaa anami'ewikamikonk. 10 Inini tahsh i'imaa kii'ayaa ekiih​shiikoshkaanik oninc. Kii'ayaawak kaye ininiwak ekii'mihsawentamowaatc ewii​anaamimaawaatc Ciisahsoon cimacitootaminitc. Miitahsh kaakii'inaawaatc: "Mii na 'i cipiikonikaatekipan kitOonahshowewininaan kiishpin awiya minoayaa'intc e'Anwepiiwi​kiishikaninik?" 11 Ciisahs tahsh kii'ishi​nahkwehtam: "Kiishpin awiya piintaanihkaanehsenitc, pwaanawi'onitc omaanahcaanihshiman e'Anwepiiwi​kiishikaninik, kaawiin ina otaatepinaahsiin cikitaanihkaanepinaatc? 12 Inini tahsh nawac ishpentaakosi ahpiihc wiin a'a maanahcaanihsh! Miitahsh pisaaniko Onahshowewinink eshi​pakitinikaatek ciwiici'intc awiya Anwepiiwi​kiishikaninik." 13 Miitahsh kaa'inaatc ini ininiwan: "Niiminihkenin!" Shemaak itahsh kii'niiminihkeniwan. Miitahsh kaa'ishi​minoayaanitc oninciiniink taapishkoo i'i peshik kotak oninciini. 14 Perahsiik (Pharisees) itahsh kii'ani​maacaawak ekii'naanaakatawentamowaatc aaniin kekii'ishi​nihsaawaatc Ciisahsoon. 15 Ciisahs tahsh okiih​kihkentaan. Miihsh i'i kaa'ishi​maacaatc. Aahpici kaye kiihpaahtiinowa' kaakiih​piminisha'okotc. Okii'minoayaa'aa' kaye kahkina otaahkosii'. 16 Miitahsh kaa'inaatc awiya' citipaacimikohsik. 17 Mii'iwe kaakii'onci​tootank, ci-ishihsenik mayaa piko Kishemanitoon kaakii'ihkitonikopanen, Aaiseyawan (Isaiah) ekii'aapaci'aanikopanen kaakiih​kanootamaakonitc. 18 "Mii a'awe nintAnohkii'aakan, kaakii'onenimak, mii 'awe kaasaaki'ak kaaminwentamo'itc. Ninka​pakitinamawaa nintAhcaahkwan, oka​wiintamawaa' nintinaahkonikewin kahkina entahswewaanakisinitc awiya'. 19 Kaawiin takakwe shaakoosohtaakosihsii, kaawiin kaye tapiipaakihsii, kaawiin kaye takishiiwehsii cimaamiihkwaanitisotc i'imaa miihkanaahkaank. 20 I'i kaye kaapoohkoshkaanik mashkohsiiwaahtik kaawiin awahshime oka​piikonansiin, waahsahkonencikaneyaapiini kaye kaani​aahtawenik kaawiin oka-aahtawe'ansiin. Kaawiin tapakiciihsii paamaa kiikashkihtootc kwayahk inaahkonikewin misiwe ciayaanik. 21 Kahkina tahsh entahswewaanakisiwaatc kaapimaatisiwaatc oka-ahpenimonotawaawaan." 22 Ciisahs tahsh kiihpiitamawaa peshik awiyan e'waapihsinik, ehkiikitohsinik, aaniihsh okiih​kikishkaakoni maciahcaahkoni. Shemaak itahsh okii'minoayaa'aan. Miitahsh kaa'ishi​waapinitc, ekiih​kiikitonitc kaye. 23 Aahpici tahsh kiihkihci​maamahkaatentamook ehkihcipaahtiinowaatc awiyak, ekii'ihkitowaatc: "Koonike mii wa'a Tepitink (David) kaaontahkaanesitc?" 24 Perahsiik (Pharisees) tahsh ekii'noontamowaatc kii'ihkitowak: "Kihciokimaa maciahcaahkwan Pi'elsipoloon (Beelzebul) ohsha omiinikoon mashkawisiiwin cisaakiciwepinaatc maciahcaahkwa'." 25 Ciisahs okiih​kihkenimaa' aan enentaminitc. Miitahsh kaa'inaatc: "Kiishpin hsa tipencikewinink awiyak kaa-ayaawaatc wiihpepahkaanihtoowaatc cimiikaatiwaatc, aahpici wiipa tanihshiwanaatanini i'i tipencikewin. Kiishpin kaye ootena komaa kaye taawin pepahkaani'itisoomakahkin, maamiikaatinaaniwank kaye, aahpici wiipa tanihshiwanaatanoon. 26 Kiishpin Setan (Satan) kaatashiokimaawitc maamiikaatinaaniwaninik, aahpici wiipa tapankihsinini. 27 Kitishim itahsh kaye e'miishitc Pi'elsipoloon mashkawisiiwin kaaonci​saakiciwepinimak maciahcaahkwa'. Aanti tahsh kiinawaa wentinamowaatc iki kaapiminisha'onekwaa mashkawisiiwin cisaakiciwepinaawaatc maciahcaahkwa'? Iki hsa kaapiminisha'onekwaa onaakohtoonaawaa kiinawaa anihshaa e'ishiyek. 28 Kishemanitoo otAhcaahkwan ohsha niin kaamiishimitc mashkawisiiwin cisaakiciwepinimak i'i maciahcaahkwa'. Miitahsh o'omaa eshinaakwahk Kishemanitoo oTipencikewin aasha ekii'naasihkaakoyek. 29 Kaawiin kaye awiya otaakashkihtoohsiin cipiintiketc cikii​mahkamaatc otaya'iimini owaahkaa'ikaniniink ini kaamashkawisiinitc ininiwan. Pinamaa ehta tahkopinaatc ini ininiwan mii'i paamaa cikashkihtoohpan cikii​mahkamaatc otaya'iimini owaahkaa'ikaniniink. 30 Awenen ihsa kaawiiciiwihsik mii'i eshinaakositc e'nishkenimitc, awenen kaye kaawiici'ihsik kiimaawantoonikeyaan mii'i eshinaakositc kaaohswewepiniketc. 31 Miitahsh kaaonci​wiintamawinakook o'o: aaniiniko inini eshi​maci-ishihciketc, aaniiniko kaye eshi​maci-ihkitotc tapoonentamawaa. Awiya tahsh wiin maci-inaatc Kishemanitoon otAhcaahkoni kaawiin tapoonentamawaahsii. 32 Awiya piko kemaci-inaatc ini Inini oKosihsini, tapoonentamawaakaniwi. Awiya tahsh wiin maci-inaatc Kishemanitoon otAhcaahkoni kaawiin tapoonentamawaahsii, kaawiin noonkom tapoonentamawaahsii kaye kaawiin wiihkaa tapoonentamawaahsii." 33 "Minomihtik onihtaawikihtoon minoshiiwimiicim. Macimihtik itahsh wiin onihtaawikihtoonan wiihsakiminan. Aaniihsh a'a mihtik aaniin eshi​nihtaawikihciketc onci​kihkencikaniwi awenen ehtinowaahtikowitc. 34 Kiinawaa kinepikook! Aaniin itahsh kwayahk keonci-ihkitoyekipan e'maci-ininiiwiyek. Aaniihsh awiya kaaishi​mooshkinenik ote' ishikiikito. 35 Kwayahk inini otooncipiitoonan kwayahk kekoonan i'imaa kaaishi​kanawenciketc ote'ink, kaye a'a maci-inini otooncipiitoonan macikekoonan i'imaa kaaishi​kanawenciketc ote'ink. 36 Kiwiintamawininim, awiya kaatahso​ishikiishwetc, mihsawaa ko tepinaahk e'ishikiishwetc tatakwakintamawaa ahpii tipaahkonikewikiishikaninik. 37 Kitihkitowinan ohsha ta-aapatanoon ahpii wiihtipaahkonikooyan. Komaa kaye kitihkitowinink kikaonci-ikoo ehkwayahkwaatisiyan, komaa kaye kitihkitowinink kikaonci-ikoo ekaa ehkwayahkwaatisihsiwan." 38 Iki tahsh onahshowewi kihkino'amaakewininiwak, Perahsiik (Pharisees) kaye okii'inaawaan: "Okihkino'amaake, kimihsawenimikoo ewii​waapamikooyan cimaamahkaacihcikeyan." 39 Ciisahs tahsh kii'ihkito: "Aahpici maci-inahke, anoociko kaye ishipimaatisiwak noonkom kaapimaatisiwaatc, mii ehta ko eshihcikewaatc e'nanaantawaapantamowaatc maamahkaacihcikewinan. I'iweni tahsh ehta maamahkaacihcikewin kewaapantamowaatc, taapishkoo Coona (Jonah) kaakii'ishi​maamahkaacihsetc. 40 Coona kaakiih​piinsotc kihcikiikooyan omihsataaniink nihsokiishik (3) nihsotipihk kaye, mii taapishkoo Inini oKosihsan nihsokiishik nihsotipihk kaye keishi​ayaanitc anaamahkamik. 41 Ahpii tahsh tipaahkonikewikiishikahk, Ninipe (Nineveh) ootenaank kaakiih​taawaatc awiyak tapasikwiiwak cianaamiminekwaa, aaniihsh kiihkwehkaatisiwak wiinawaa ahpii ekii'noontawaawaatc Coonawan ehkakiihkwenitc. Kitinininim itahsh, nawac kekoon ehkihci-inentaakwahk ahpiihc wiin Coona o'omaa ayaa. 42 Ahpii tahsh tipaahkonikewikiishikahk kihciokimaahkwe shaawanonk kaakii'onciitc tapasikwii cianaamiminek. Aaniihsh wiin waahsa kiihpi-ishaa ewii​noontawaatc Swaalamanan (Solomon) kaakii'ishi​kakiihtaawi​kihkino'amaakenitc. Kiwiintamawininim itahsh nawac ehkihci-inentaakwahk ahpiihc wiin Swaalaman o'omaa ayaa noonkom." 43 "Ahpii maciahcaahk kii'onci​saakiciwepinikaniwitc ininiink, mii'i misiwe eshi​papaami​ayaatc pikwatahkamik kaaishi​paahtenik ehkakwe​mihkank aanti keishi​anwepitc, kaawiin tahsh kekoonini omihkansiin. 44 Miitahsh ehkitotc: 'Ninka​kiiwe niwaahkaa'ikanink aanti kaakii'onci​saaka'amaan.' Miitahsh eshi​kiiwetc e'mihkank owaahkaa'ikan wiinke ehpishihshikwaanik, ekiih​pehkihcikaatenik, ehsakahkihcikaatenik kaye. 45 Miitahsh eshi​kiiwe​takohshink ehtakopiinaatc niishwaahso maciahcaahkwa' nawac e'macaatisinitc ahpiihc wiin. Miitahsh eshi​piintikewaatc i'imaa e'ishitaawaatc. A'a tahsh inini nawac kihci-ishi​ayaa ahpiihc wiin kaakii'ishi​ayaahpan nihtam. Miitahsh mayaa keshinaakosiwaatc oko kaamacaatisiwaatc noonkom kaapimaatisiwaatc." 46 Mekwaa tahsh Ciisahs ehkakanoonaatc i'i kaamaamawenonitc, omaamaan, wiicihkiweya' kaye kiihpi​takohshinoo' ewiih​kanoonikotc. Akwaciink itahsh kii'niipawiwa'. 47 Peshik itahsh awiyan okii'ikoon: "Taka pinamaa, kimaamaa kiicihkiweyak kaye akwaciink niipawiwak ewiih​kanoonihkwaa." 48 Ciisahs tahsh okii'inaan: "Awenen itahsh nimaamaa, awenenak kaye niicihkiweyak?" 49 Kii'ishinihkeni tahsh inahke eshi​ayaanitc i'i okihkino'amawaakana', miitahsh kaa'ihkitotc: "Miiwak ohsha oko nimaamaa, niicihkiweyak kaye. 50 Awenen itahsh kaaishihciketc kaashi​antawenimikotc ninTeten kihcikiishikonk kaa-ayaanitc, mii'i ohsha a'awe niicihkiwensi, nintawemaa, nimaamaa kaye."

Maahtiyo 13

1 Peshikwan tahsh ehkiishikaninik, Ciisahs okii'nakataan i'i waahkaa'ikanini, miitahsh kaa'ishi​naasipiitc, ekii'onapitc ewiih​kihkino'amaaketc. 2 Ekiih​paahtiinonitc itahsh kaakiih​pinaasihkaakotc, ciimaanink kiihpoosi ekii'onapitc ewiionci​kihkino'amaaketc. Iki tahsh wiin awiyak ciikipiik kii'niipawiwak. 3 Awehcikanan tahsh okii'aapacihtoonan niipowa' kekoonan ehtatipaacimohtawaatc. "Kii'ayaa hsa inini ekiih​kihtikaatank kihtikaanenhsan. 4 Mekwaa tahsh e'ohswewepinank kihtikaanenhsan, aaninta miihkanaank kii'ishi​pankihsininiwan. Pinehshiinshak itahsh okiih​kitaanaawaan. 5 Aaninta tahsh kihtikaanenhsan, eshi​ahsiniihkaak kaa'ishi​tapahsahkamikaak kii'ishi​pankihsinoon. Wiipa tahsh kii'nihtaawikinoon kihtikaanan. Aaniihsh onsaam kiihtapahsahkamikaa. 6 Ahpii tahsh kiisihs eni-ishpakoocink kahkina kiihcaakitewan ini kihtikaanan aaniihsh kaawiin waahsa kiihkotaawikihsinoonan. 7 Aaninta tahsh kihtikaanenhsan okaawiminakashiihkaank kii'ishi​pankihsinoon. Okaawiminakashiin tahsh e'ompikihkin okiih​kipishkaanaawaan ini kihtikaanenhsan. 8 Aaninta tahsh kihtikaanenhsan, maawac iko eshi​minohkamikaak kii'ishi​pankihsinoon. Wiinke tahsh kii'minokinoon ini kihtikaanan. Ninkotwaahk (100) tahsin iko aaninta kii'ontinikaatewan ini kihtikaanan, kotak ninkotwaahsimitana (60), kotak nihsimitana (30)." 9 Ciisahs tahsh kii'ihkito: "Pisintamok kiinawaa kaaohtawakaayek." 10 Ciisahs tahsh okiih​pinaasihkaakoo' okihkino'amawaakana' ekii'ishi​kakwecimikotc: "Wekonen wenci​aapacihtaawatc awehcikanan kiikanoonatwaa pemaatisiwaatc?" 11 Ciisahs tahsh okii'ishi​nahkwehtawaa': "Kiinawaa ohsha kipakitinamaakoom cikihkentamek ini kaakiih​kihkencikaatehsinokin kekoonan Kishemanitoo oTipencikewin kaatashintekin. Wiinawaa tahsh wiin kaawiin pakitinamawaahsiiwak cinihsitohtamowaatc. 12 A'a hsa kaa-ayaatc kekoonan tamiinaakaniwi kekoonan aanciko ciwenootisitc. A'a tahsh wiin pankii ehta kekoonini kaa-ayaatc taotaahpinamawaa kahkina kekoonini kaa-ayaatc. 13 Miitahsh kaaonci​aapacihtaawak awehcikanan kekoonini ekii'inakwaa: mihsawaa aana inaapiwaatc, kaawiin waapihsiiwak; mihsawaa aana noontamowaatc, kaawiin pisintansiiwak, kaawiin kaye nihsitohtansiiwak. 14 A'a tahsh Aaiseya (Isaiah) Kishemanitoo otipaacimowininiiman kaakii'ihkitokopanen mayaa ishihseni: 'Pishihshik aana naanoontamek, kaawiin itahsh kikanihsitohtansiim. Pishihshik itahsh aana waapancikeyek kaawiin kikanihsitawinansiim kaawaapantamek. 15 Aanciko kakaancihc inentansikwaa cinihsitohtamowaatc, okiih​kipinaanaawaan kaye ohtawakiwaan, pasankwaapiwak kaye. Kiishpin o'o ishihcikehsikwaapan taawaapiwak, taanoontamook kaye, taanihsitohtamook kaye, nintaapi​kwehkiihtaakook kaye, ciminoayaa'akwaapan kaye,' kii'ihkitonikopan Kishemanitoon. 16 "Kiinawaa tahsh wiin kishawentaakosim, aaniihsh kishkiinshikowaank e'onci​waapantamek ini kaawaapantamek, kihtawakiwaank e'onci​noontamek ini kaanoontamek. 17 Maamihkawik itahsh o'owe: Aahpici niipowa' Kishemanitoo otipaacimowininiima' kaye okwayahkwaatisiima' kaye, okii'mihsawentaanaawaa cikii'waapantamowaahpan kaawaapantamek, cikii'noontamowaahpan kaye kaanoontamek; kaawiin tahsh okii'nootansiinaawaa." 18 "Weweni tahsh pisintamok cinihsitohtamek a'a inini kaa-awehcikaasotc ekiih​kihtiketc. 19 Awiya kaanoontank ehtipaatotenik Kishemanitoon oTipencikewinini, e'nihsitohtansik itahsh, mii taapishkoo eshinaakositc ini hsa kaakiih​pankihsinkin kihtikaanenhsan i'imaa miihkanaank. Maciaya'aa ehpi​takohshink e'otaahpinank i'i aasha kaakiih​kihtikaatenikin. 20 Ini tahsh kaakiih​pankihsinkin kihtikaanenhsan kaashi​ahsiniihkaak, mii'i eshinaakositc a'a shemaak kaaotaahpinank Kishemanitoo otipaacimowin ahpii e'noontank, aahpici e'minwentank. 21 Kaawiin itahsh waahsa kotaawiimakahsinini i'i tipaacimowin ote'ink. Aahpici tahsh acina ehta niipawi. Ahpii tahsh aanamisiwin, kakwaatakihtoowin kaye ehpinaasihkaakotc tipaacimowin onci, mii'i eshi​pakiciitc. 22 Ini tahsh kaakiih​pankihsinkin kihtikaanenhsan kaashi​okaawiminakashiihkaak, mii'i eshinaakositc a'a kaanoontank Kishemanitoo otipaacimowin, onsaam itahsh e'ocaanimentank, onsaam kaye ehsaakihtootc wenootisiwin. Miitahsh kaaonci​saakiciwepishkikaatek i'i tipaacimowin, kaawiin kaye kekoon oka​naakohtoohsiin. 23 Ini tahsh kaakiih​pankihsinkin kihtikaanenhsan i'imaa kaashi​minohkamikaak mii'i eshinaakositc awiya kaanoontank Kishemanitoo otipaacimowin, kaanihsitohtank kaye. Aahpici oka​naakohtoonan kekoonini wenishihshininikin. Aaninta awiya ninkotwaahk (100) awahshime ishinaakwanini i'i kaakii'miinintc, aaninta kaye ninkotwaahsimitana (60) awahshime, aaninta kaye nihsimitana (30)." 24 Ciisahs tahsh okii'wiintamawaa' kotak awehcikanini. "Mii'i keishinaakwahk ahpii Kishemanitoo pioshihsitootc otOokimaawiwin, taapishkoo inini kaakihtikaatank ini sasekaa kihtikaanenhsan i'imaa otahkiimink. 25 Aapitink itahsh ehtipihkaninik, kahkina e'nipaawaatc, awiyan kaashiinkenimikotc kiihpiishaawan ekiih​kihtikaataminitc macikihtikaanini i'imaa kaakii'ishi​kihtikaanaahpan ini pahkweshikanan. Miitahsh kaa'ani-ishi​maacaanitc ini ininiwan. 26 Ahpii tahsh e'ani​saakahkiinikin ini kaakiih​kihtikaatankipan, miitahsh ini macikihtikaanan kaye kiihpi​saakikinoon. 27 A'a tahsh kihtikewinini otanohkii'aakana' okiih​pinaasihkaakoo' ekii'ikotc: 'Okimaa, ekiih​kihtikaataman itahsh ini sasekaa kihtikaanenhsan, aanti tahsh kaaonciikin ini macikihtikaanan?' 28 Miitahsh kaa'inaatc: 'Kaashiinkenimitc kehcinaac a'a kaakiih​kihtikaatank ini macikihtikaanan.' Okii'inaawaan itahsh otookimaamiwaan: 'Kinantaweniminaam ina cipapaahkwacipitooyaank ini macikihtikaanan?' 29 O'o tahsh okii'inaa': 'Kaawiin. Kiishpin pahkwacipitooyek macikihtikaanan, kikatako​pahkwacipitoonaawaan ini pahkweshikani kihtikaanan. 30 Maano pahkweshikan, ini kaye macikihtikaanan taishi​niishonihtaawikinoon piinihsh ahpii cimanishikenaaniwank. I'i tahsh ahpii ninka​inaak otanohkiik: "Ini pinamaa macikihtikaanan mamanipitook, ohkwahpitook cimacohtewepinamek. A'a tahsh pahkweshikan maawantoonihk, cina'inek i'imaa nintahtaahsowikamikonk." ' " 31 Miinawaa tahsh Ciisahs kii'awehcike ekii'ihkitotc: "Kishemanitoo otookimaawiwin miihsa eshinaakwahk taapishkoo inini kaakihtikaatank okihtikewahkamikonk ahpancikanikihtikaanenhs mastart (mustard) kaaishinihkaatenik kihtikaanenhs. 32 Miitahsh o'o maawac ekaahsink ahpiihc wiin kotak kihtikaanenhsan. Ahpii tahsh e'ani​kiishikihk, nawac kinwaahkwan ahpiihc pahkaan kekoonan kaanihtaawikihkin, taapishkoo mihtikonk e'inikohkwaak. Miitahsh i'imaa eshi​pooniiwaatc pinehshiinshak, keshi​wasihsonihkewaatc watihkwanihkaank." 33 Miinawaa tahsh Ciisahs okiih​tipaatotaan kotak awehcikanini. "Miihsa eshinaakwahk Kishemanitoo oTipencikewin taapishkoo ompisikanenhsink, a'a ihkwe kaaotaahpinank ehtakonank i'imaa peshikoshkimot pahkweshikanink, miitahsh piinihsh misiwe eshi​ompishkaanitc opahkweshikanihkaana'." 34 Ciisahs tahsh okii'aapacihtoonan awehcikanan kekoonini e'inaatc awiya'. Kaawiin kekoonini kii'ihkitohsii kiishpin awehcikanini e'aapacihtoohsik. 35 Miitahsh kaakii'onci-ishihciketc, mayaa piko ci-ishihsenik kaakii'ihkitonikopanen ini Kishemanitoo otipaacimowininiiman: "Awehcikanan ihsa ninka-aapacihtoonan ahpii kanoonakwaa, ninka​wiintamawaak kekoonan kaakiihpi​kihkencikaatehsinokin ahpii kiimaaciiahkiiwank." 36 Ciisahs tahsh okii'nakanaa' i'i kaapaahtiinonitc, miitahsh kii'ani​piintike waahkaa'ikanink. Okihkino'amawaakana' itahsh okiih​pinaasihkaakoo' ekii'ikotc: "Nihsitohtamooshihshinaam i'i awehcikan, macikihtikaanan kaakiih​kihtikaatekin i'imaa kihtikaanahkamikonk." 37 Ciisahs tahsh okii'wiintamawaa': "A'a hsa inini kaakiih​kihtikaatank ini sasekaa kihtikaanenhsan miihsa a'a Inini oKosihsan. 38 I'i tahsh kihtikaanahkamik miihsa i'iwe ahki. Ini tahsh sasekaa kihtikaanenhsan mii'i ikiweniwak opimaatisiik Kishemanitoo oTipencikewinink kaaonci​tipentaakosiwaatc. Ini tahsh macikihtikaanenhsan, miiwakiki kaamaciaya'aawinitc kaatipenimikowaatc. 39 A'a tahsh kaakiih​shiinkenimiwetc kaakiih​kihtikaatank macikihtikaanenhsan, miihsa a'a maciaya'aa wiiniko. I'i tahsh kaamaawantoonikenaaniwank, miihsa i'i ahpii keishkwaahsekin ono noonkom kaapimihsekin. Iki tahsh encalak miihsa ikiweniwak kaamaawantoonikewaatc. 40 Taapishkoo kaawii'ishi​ohkonikaatekin ewiih​caakisikaatekin ini macikihtikaanenhsan, miihsa keishiwepahk ahpii ishkwaahsekin ono noonkom kaapimihsekin. 41 Inini oKosihsan ihsa oka​ishinisha'waani otencalimini cionci​maamooshakinaanitc i'imaa oTipencikewinink kahkina kaakakwe​macitootamo'iwenitc, i'i kaye kotak omacitootamoo'. 42 Miitahsh keshi​macohtewepinimintc i'imaa kaaishi​kishahkwanenik ishkoteni. Miitahsh i'imaa keshi​mawinitc, cimatwentaminitc kaye wiipitaani. 43 Iki tahsh kwayahk kaapimaatisiwaatc taapishkoo kiisihsonk tashi​waahsenaakosiwak ahpii oTetewaan oshihsitoonitc oTipencikewinini." 44 "I'i hsa Kishemanitoo oTipencikewin mii'i eshinaakwahk taapishkoo shooniyaa ekii'ninkwa'ontc i'imaa kihtikaanahkamikonk. Ahpii tahsh inini ehpihci​mihkawaatc, mii'i kaaishi​kiiwe​ninkwa'waatc. Ehpiihci​minwentank tahsh mii'i kaaishi​ataawaaketc kahkina kekoonini kaatipentank. Miitahsh kaaishi​ataawetc i'iweni kihtikaanahkamikoni." 45 "Mii hsa 'i miinawaa Kishemanitoo oTipencikewin eshinaakwaninik taapishkoo ataawewinini kaapapaa​nanaanta-ataawetc maawac kaaonishihshinitc miikihsa'. 46 Ahpii tahsh e'mihkawaatc maawac e'aahkwakinsonitc, miihsh kaa'awi-ishi​ataawaaketc kahkina kekoonan kaa-ayaatc, e'ataawetc ini kaaonishihshinitc miikihsan." 47 "Mii kaye keishinaakwahk ahpii Kishemanitoo kiishihsitootc oTipencikewin, taapishkoo ehpahkopii'ontc ahsap saaka'ikaniink, kiikooyak itahsh ehpita'wewaatc. 48 Ahpii tahsh e'mooshkinepita'wewaatc kiikooyak, miihsh ininiwak eshi​akwaahshimaawaatc ini ahsapiin. Miitahsh pepahkaan eshi​ahsaawaatc i'i kiikooya'. Iki tahsh kaaonishihshiwaatc ahkihkonk ishiahsaawak. Iki tahsh kaamaanaatisiwaatc wepinikaniwiwak. 49 Miitahsh mayaa keishinaakwahk ahpii ishkwaahsenikin ono noonkom kaapimihsekin o'omaa ahkiink. Encalak oka​maawantoonaawaa' omaci-ishiwepisii' pahkaan ciahsaawaatc. Okwayahkwaatisii' itahsh kaye pahkaan ta-ayaawa'. 50 Miitahsh omaci-ishiwepisiik keishi-ishiwepinintwaa i'imaa kaaishi​kishahkwanenik ishkoteni. Tamawiwak tahsh, oka​matwentaanaawaan kaye wiipitiwaan." 51 Ciisahs tahsh okii'inaa': "Kinihsitohtaam ina kaaininakook?" Miitahsh kaa'ikotc: "Kekeht." 52 Miitahsh kaa'inaatc aanciko: "Miitahsh o'owe kaawiintamawinakook: entahshitc a'a kaakihkino'amaaketc Kishemanitoon otOonahshowewinini, ahpii kehkino'amawintc aaniin enentaakwaninik Kishemanitoon oTipencikewinini, mii'iwe eshinaakositc taapishkoo awiya taawin kaatipentank kaaonci​saakisihtootc oshkaya'iiwi kekoonan kaye kehteaya'iiwi kekoonan i'imaa otahtaahsowikamikonk." 53 Ahpii tahsh Ciisahs kaa'ishkwaa​kihkino'amaaketc ini awehcikanan, kii'ani​maacaa. 54 I'iweti tahsh kii'ishaa kaakii'onciitc ootenaank, ekiih​tashikihkino'amawaatc kaa-ayaanitc otanami'ewikamikoniink. I'i tahsh kaakii'noontaakotc kii'ihkitowa': "Kaanaka aanti kaa'ontinamokwen i'iweni kakiihtaawentamowin, ini kota kaye omaamahkaacihcikewinan? 55 Mihtikonaape iitok ini okosihsan, Meri (Mary) iitok ishinihkaasowan ini omaamaan. Ciimis (James), Coosap (Joseph), Saaiman (Simon), Cootahs (Judas) iitok ishinihkaasowa' wiicihkiweya'. 56 Shikwa otawemaa' kaye kahkina o'omaa ishitaawa'. Aanti tahsh wiin kaa'ontinamokwen kahkina onoweniwan?" kii'ihkitowa'. 57 Miitahsh kaa'ishi​aanawenimikotc. Ciisahs tahsh kii'ihkito: "A'a hsa kaakanootamawaatc Kishemanitoon kihci-inencikaniwi pahkaan inkoci kii'ishaatc, i'imaa tahsh wiin otootenaamink, otaawinink kaye, kaawiin kihci-inencikaniwihsii." 58 Kaawiin itahsh aahpici kii'maamahkaacihcikehsii i'imaa, aaniihsh kaawiin okiih​tepweyenimikohsii'.

Maahtiyo 14

1 Miihsh peshikwan ahpii Herat (Herod) kaakii'aanihke​wikimaawi'intc i'imaa Kaalaliink (Galilee), kii'naanoontam e'inaacimimintc ini Ciisahsoon. 2 Miitahsh kaa'inaatc otanohkii'aakana': "Mii hsa 'awe Cwaan (John) Siika'antaakewinini ekiih​kiiwepimaatisitc, mii maawiin i'iwe kaaonci​ayaatc mashkawisiiwin kaaonci​naakohtootc maamahkaacihcikewinan," kii'ihkito. 3 Miitahsh o'owe Cwaan kaakii'onci​kipa'ikaniwikopanen, Herat kii'wiiwikopan ini ihkwewan Hirootiyahsan (Herodias), ini wiicihkiweyan Pilap (Philip) wiiwini. 4 Cwaan tahsh kii'inaakopan ini Heratan: "Kaawiin kitaa​ishihcikehsii i'i kaaishihcikeyan ciotaahpinimatc kiicihkiwesi Pilap wiiwan," mii'i kaa'inaakopanen. 5 Herat ihsa wii'nihsaakopan Cwaanan shaakooc itahsh okiih​kohsaa' Coowa' aaniihsh Kishemanitoo otipaacimowininiiman okii'inenimaani Cwaanan. 6 Ahpii tahsh Herat ekiih​tipishkank, Hirootiyahs otaanihsan kii'niimiwan enaahsamapiwaatc, Herat itahsh wiinke kii'minwentam. 7 Okii'ahshotamawaan tahsh ini oshkiniikihkwen ewii​miinaatc wekoneniko kekakwecimikotc. 8 Ekiih​kihkino'amaakotc itahsh omaamaan a'a oshkiniikihkwe, mii'i kaa'ihkitotc: "Cwaan Siika'antaakewinini ohtikwaan miishihshin o'omaa shemaak onaakanink cipiicikaatek," ekii'ihkitotc. 9 Kihciokimaa tahsh wiinke kii'mincinawesi. Aasha tahsh ekiih​paahkaci​ahshotamaaketc, ehpaahtiinonitc kaye kaakii'mawatihsikotc, kii'ihkito pisaaniko cimiinimintc ini oshkiniikihkwen kaakii'ishi​kakwetwenitc. 10 Kihciokimaa tahsh kii'anoohkii cikiishkikweta'omintc Cwaanan i'imaa kipa'otiiwikamikonk. 11 Onaakanink itahsh kii'ishi​piitamawaa i'iweni ohtikwanimaa. Oshkiniikihkwe tahsh kii'miinaakaniwi. Miitahsh kaa'ishi​miinaatc ini omaamaan. 12 Cwaan itahsh okihkino'amawaakana' kiihpi​takohshinoo' ekii'maaciitoowaatc Cwaanan owiiyawini, ekii'ninkwa'amowaatc kaye. Miitahsh okii'awi​wiintamawaawaan Ciisahsoon. 13 Ahpii tahsh Ciisahs kaa'noontank, ciimaanink kiihpoosi pahkaan ekii'ishaatc wiinehta keshi​papeshikotc. Ekii'noontamowaatc itahsh iki pemaatisiwaatc aanti eyaanitc Ciisahsoon, kii'inaashakaamewak ekii'naasihkawaawaatc. Misiwe tahsh ootenaahkaank kiihpi​onciiwak. 14 Ekiih​kapaatc itahsh ciimaanink, ekii'waapamaatc pemaatisinitc ehpiihci​paahtiinonitc, aahpici okiih​kihcikoohpaatenimaa', ekii'minoayaa'aatc kaye kahkina 'imaa kaakii'aahkosinitc. 15 E'ani​onaakohshininik ahpii okihkino'amawaakana' okiih​pinaasihkaakoo' ekii'ikotc: "Aahpici ohsha aasha onaakohshin, pikwacaya'ii kaye o'o kaa-ayaayank. Inkoci tahsh ishinisha'o, eyishitaaniwaninik ci-ishaawaatc ciataawewaatc kemiiciwaatc," ekii'ikotc. 16 Ciisahs tahsh okii'inaa': "Kaawiin memwehc inkoci taishaahsiiwak, kiinawaa ahshamihkok," mii kaa'inaatc. 17 Okii'ishi​nahkwehtaakoo' itahsh: "Naanan (5) ohshehta nintayaawaanaanik pahkweshikanak, niishin (2) itahsh kiikooyak," kii'ihkitowa'. 18 Ciisahs tahsh okii'inaa': "O'omaa hsa pimiishihshik," okii'inaa'. 19 Okiih​kanoonaa' itahsh kahkina awiya' cinamatapinitc i'imaa mashkohsiihkaank. Ekii'otaahpinaatc itahsh ini naanan pahkweshikana', i'i kaye niishin kiikooya', ishpimink kii'inaapi ekii'nanaahkomaatc Kishemanitoon. Miitahsh kaa'ishi​pahpahkwepinaatc i'i pahkweshikana' ekii'maamiinaatc okihkino'amawaakana', miitahsh kaa'ishi​maamaata'oonaanitc kahkina kaakii'namatapinitc. 20 Kahkina tahsh awiya kiihtewiihsini. Kihkino'amawaakanak tahsh okii'maamooshakinaanaawaa kaakii'ishkohsenik miicim. Mitaahshiniisho (12) wiikopiimahkahk minihk kii'ishkohseni. 21 Komaa naanink mitaahswaahk (5,000) kiihtahshiwa' ininiwa' kaakii'ahshamaatc, shikwa kaye ihkwewa', apinoonciisha' kaye. 22 Ciisahs itahsh okiih​poosinisha'waa' ekii'niikaani​nisha'waatc okihkino'amawaakana' akaamink ci-ishaanitc, ekiih​kanoonaatc i'i kaye kaamaamawenonitc awiya' ciani​maacaanitc. 23 Ahpii tahsh kaahpakitinaatc cimaacaanitc, wakitatin kii'ishaa wiinehta ekii'anta-anami'aatc. E'onaakohshininik tahsh wiinehta Ciisahs kii'mihcipeshiko i'iweti. 24 O'o tahsh ahpii aasha waahsa mihshawakaam kii'ani​ayaawak kihkino'amawaakanak i'imaa saaka'ikaniink, aahpici ekii'ocaanima'okowaatc ekiih​kihcinootininik, ekii'oncishkawaanimaninik. 25 Ninkociko kekaa e'ani​piitaapaninik, Ciisahs okii'naasihkawaa' wakicinipiink itahsh ekiih​pimohsetc. 26 Kihkino'amawaakanak itahsh e'waapamaawaatc ehpinaakosinitc wakicinipiink, wiinke kiihkihci​sekisiwak, "Ciipay!" ekii'ihkitowaatc. Miitahsh kaa'ishi​shaakowewaatc ehsekisiwaatc. 27 Ciisahs itahsh shemaak okiih​kanoonaa': "Mashkawentamok! Niin ohsha! Keko sekisihkek," okii'inaa'. 28 Okiih​kanoonikoon itahsh Piitaroon (Peter): "Tepencikeyan, kiishpin kiin aawiwanen, kanooshihshin cipinaasihkawinaan nipiink," okii'ikoon. 29 Ciisahs tahsh okii'inaan: "Haw ihsa ampe!" Piitar tahsh kiihkapaa ciimaanink ekiih​pimohsetc wakicinipiink e'naasihkawaatc Ciisahsoon. 30 E'waapantank itahsh ehkihcinootininik, kiihsekisi. Miitahsh kaakii'ani​konsaapiitc. Kii'ishi​shaakowe tahsh: "Tepencikeyan pimaaci'ihshin!" kii'ihkito. 31 Shemaak itahsh Ciisahs okiih​tepinaan ekii'wiihkopinaatc ekii'inaatc kaye: "Kiin kaa-akaahsink kitepweyentamowin, wekonen kaa'onci​aanwehtaman?" okii'inaan. 32 Ekiih​poosiwaatc itahsh ciimaanink, mii hsa wiinke kaa'ishi-ishkwaa​kihcinootininik. 33 Ini tahsh kaakiih​poosinitc i'imaa ciimaanink, okii'ociciinkwanapiihtaakoo' ekii'ikotc: "Tepwe hsa kiin Kishemanitoo oKosihsan kitinow!" okii'ikoo'. 34 Ahpii tahsh ekii'ishkwaa-aashawishkaawaatc i'iweni saaka'ikan, Kenehsaritihkaank (Gennesaret) itahsh kii'ishi​mishakaawak. 35 Ekii'nihsitawinawaawaatc tahsh Ciisahsoon iki ininiwak i'imaa kaakii'ayaawaatc, miihsh kaa'ishi​maaciiyaacimowaatc. Miihsh kahkina otaahkosiik kaakiih​piicikaniwiwaatc eshi​ayaanitc Ciisahsoon. 36 Miitahsh kaa'inaawaatc Ciisahsoon: "Taka pakitin otaahkosiik pisaan cisaaminamowaatc kaaishi​naniihsiikikwaatenik kikashkiikiiwin," mii kaa'ikotc. Minihk itahsh kaakiih​saaminaminitc kahkina kii'minoyayaawa'.

Maahtiyo 15

1 Perahsiik (Pharisees) iki kaye onahshowewi kihkino'amaakek Ceroosalamink (Jerusalem) kiihpi​onciiwak ekiih​pinaasihkawaawaatc Ciisahsoon ekii'inaawaatc: 2 "Wekonenini tahsh kikihkino'amawaakanak wenci​tootansikwaa i'i kaakiihpi​aayaanihke kihkino'amaakooyank kaakiihpi​nihtaa​ishihcikenitc i'iweniwa' otaanaank kaakiih​pimaatisinitc. Kaawiin iitok kwayahk inahke ishikisiininciihsiiwak kikihkino'amawaakanak cipwaa wiihsiniwaatc," okii'inaawaan. 3 Ciisahs itahsh kii'ihkito: "Wekonen itahsh kekiinawaa wenci​tootansiwek Kishemanitoo okakiihkimiwewin, nawac ini kitaanihke​kihkino'amaatiwiniwaa ehkanawentamek? 4 Kishemanitoo tahsh kii'ihkito: 'Kihtenim kitete, kimaamaa kaye. Kiishpin itahsh awiya maci-inaatc oteten, omaamaan kaye, taka tanihsaakaniwi.' 5 Kiinawaa tahsh o'o kitishihcikem, awiya kekoonini e'ayaatc kekii'onci​wiici'aahpan ini oteten komaa kaye omaamaan, kiishpin tahsh ihkitotc, 'Kekii'miininaampaan aasha ninkii'miinaa Kishemanitoo,' 6 miitahsh kaawiin memwehc oka​kihtenimaahsiin ini oteten, ehkitoyek. Miitahsh eshi​piikonamowek Kishemanitoo otihkitowin, i'iwe nawac ewiih​piminisha'amek kiinawaa kitishihtwaawiniwaan. 7 Kiinawaa ominwaatisiihshihtook! Aahpici kwayahk kikii'ikowaakopan Aaiseya (Isaiah) ekiih​kanootamawaakopanen Kishemanitoon: 8 'Kishemanitoo ihkito, oko pemaatisiwaatc nintikook ehkihci-inenimiwaatc. Ote'iwaank itahsh wiin nahpaac inahke inentamook kaainentamowak. 9 Anihshaa hsa nintanami'ehtaakook, aaniihsh awahshime kihkino'amaakewak ini ininiiwi kihkino'amaakewinan taapishkoo e'inwaatamowaatc ihsa ini Kishemanitoon okihkino'amaakewinini.' " 10 Ciisahs itahsh okiih​kanoonaa' awiya' cinaasihkaakotc, ekii'inaatc: "Pisintamok, nihsitohtamok o'o! 11 Kaawiin wiin awiya kaainanciketc onci-inakimaahsii ehteahpiihtentaakosihsik cianami'ehtawaatc Kishemanitoon, i'iweni hsa kaaonci​kiikitotc otoonink onci-inakimaa ehteahpiihtentaakosihsik." 12 Kihkino'amawaakanak itahsh okii'inaawaan Ciisahsoon: "Kikihkenimaak ina Perahsiik (Pharisees) aaniin ehpiihci​maanentamowaatc kaakii'ihkitoyan?" okii'inaawaan. 13 Ciisahs tahsh kii'ihkito: "Kihtikaanan kaakiih​kihtikaatansik a'a ninTete kihcikiishikonk kaa-ayaatc, kahkina tamanipicikaatewan. 14 Keko papaa​pisiskenimaahkekwaanik! Kaawiin ohsha waapihsiiwak mihsawaa aanakakwe​niikaaniihtawaawaatc kaawaapihsinik. Kiishpin kaawaapihsik niikaaniihtawaatc ini kotak kaawaapihsinik, minciniish tapiintaanihkaanehsewak." 15 Piitar (Peter) tahsh kii'ihkito: "Wiintamawihshinaam aaniin mayaa ehkitoomakahk i'i eshi​kihkino'ikeyan." 16 Ciisahs tahsh okii'inaa': "Kaawiin ina kekiinawaa mahshi kitoonihsitohtamaawinihsiim? 17 Kaawiin ina kinihsitohtansiim? Kekoonini awiya kaamiicitc omihsataank ishihseni, tani​saaka'amoomakanini tahsh. 18 I'iweni tahsh kekoonini kaapi​onciinik i'imaa ote'ink, miihsa i'iweni keonci​teahpiihtenimikohsik Kishemanitoon. 19 Miitahsh onoweniwan kaaonci-ikin i'imaa awiya ote'ink, maci-inentamowinan, nihshiwewin, kaapimenimaatc pahkaan awiyan owiitikemaakanini, anoociko awiya kaashi​pihshikwaatisitc, kimootiwin, kiiwanimowin, macitashimiwewin. 20 Miiwan itahsh ini kaaonciinakimintc awiya ehteahpiihtenimikohsik Kishemanitoon. A'a tahsh wiin kaakisiininciihsik cipwaa wiihsinitc, kaawiin i'imaa i'i inahke taonci-inakimaahsii," kii'ihkito. 21 Ciisahs tahsh kii'anionci​maacaa weti ekii'ishaatc ahkiink Tayar (Tyre) shikwa Saaitan (Sidon) kaakii'ishi​ayaanikin. 22 A'a tahsh ihkwe i'imaa Kenan (Canaan) ahkiink kaakii'onciitc, kaakiih​Coowiwihsik i'imaa kaaishitaatc ahkiink, okiih​pinaasihkawaan Ciisahsoon ekiih​kishiiwetc: "Kiin Tepitink (David) kaaontahkaanesiyan! Kohpaasinawihshin! Nintaanihs ohsha okikishkaakoon maciahcaahkwan, maawac iko ehkihci​maashi​ayaatc," ekii'inaatc. 23 Ciisahs tahsh kaawiin okii'nahkwehtawaahsiin. Okihkino'amawaakana' itahsh okii'ikoo': "Inkoci ishinisha'o a'a ihkwe! Kinipaacinisha'okonaan, ompiikisi kaye," ekii'ikotc. 24 Ciisahs tahsh kii'ihkito: "Iki ohsha kaapimaatisiwaatc i'imaa Isriyalihkaank (Israel), kaawanihshinowaatc maanahcaanihshak, kaakii'onci​piicinisha'okooyaan." 25 O'o tahsh ahpii a'a ihkwe okiih​pinaasihkawaan ekii'ociciinkwanapiihtawaatc, ekii'ihkitotc: "Taka naatamawihshin." 26 Ciisahs tahsh kii'ihkito: "Iki hsa apinoonciishak omiicimimiwaa kaawiin taaminonaakwahsinoon ciotaahpinamawintwaapan ciahpakitamawintwaapan iki animohshak." 27 Ihkwe tahsh kii'ihkito: "Tepwe i'i kaaihkitoyan, shaakooc itahsh animohshak omiicinaawaan ini ishkwancikanan wiihsiniwinaahtikonk kaaonci​pankihsininikin kiiwiihsininitc i'i kaatipenimikowaatc." 28 Ciisahs okii'inaan: "Aahpici kimashkawitepweyentam! Miihsa ketootaakooyan kaashi​mihsawentaman," okii'inaan. Miitahsh ahpii kaakii'minoayaanitc ini otaanihsan a'a ihkwe. 29 Ciisahs tahsh kii'anionci​maacaa. Weti tahsh saaka'ikaniink Kaalaliink (Galilee) kii'ani-ishi​pimaashakaame. Kii'ahkwaamaciwe tahsh ekii'onapitc. 30 Kiihpaahtiinowa' itahsh kaakiih​pinaasihkaakotc, ekiih​piinaanitc kaamaahkishkaanitc, kaawaapihsinik, kaamaahkisinitc, kaakiikitohsinik, kotak kaye otaahkosii', ekii'ishi​pakitinimintc i'imaa eshi​sitepitc. Miitahsh kaa'ishi​minoayaa'aatc. 31 Oko tahsh kaakii'maamawi​ayaawaatc wiinke kiihkihci​maamahkaatentamook ahpii e'waapamaawaatc kaakiikitohsinik ehkiikitonitc, kaamaahkisinitc kaye e'minoayaanitc, kaapimohsehsinik kaye ehpimohsenitc, kaawaapihsinik kaye e'waapinitc, e'nanaahkomaawaatc ini Isriyalak (Israel) oKishemanitoomiwaan. 32 Ciisahs tahsh okiih​kanoonaa' okihkino'amawaakana' ekii'inaatc: "Aahpici hsa ninkohpaatenimaak oko kaapaahtiinowaatc, aaniihsh aasha nihsokiishik nimpimi​wiiciiwikook, kekoonini tahsh e'ayaahsikwaa kemiiciwaatc. Kaawiin kaye nintinentansii cikiiwe​nisha'wakwaa ahkawe wiihsinihsikwaa. Tanoontepwaanawihcikewak." 33 Kihkino'amawaakanak tahsh kii'ihkitowak: "Pikwatahkamik itahsh e'ayaayank, aanti tahsh inaa keontinamankipan miicim ciahshamintwaapan oko kaapaahtiinowaatc?" 34 Ciisahs kii'ihkito: "Aaniiminihk pahkweshikan eyaawek?" Okii'inaawaan tahsh: "Niishwaahso (7) pahkweshikanihkaanak pankii kaye kiikooyenhsak." 35 Ciisahs tahsh okiih​kanoonaa' kahkina cinamatapinitc i'imaa mihtahkamik. 36 Okii'otaahpinaa' itahsh i'i niishwaahso (7) pahkweshikanenhsihkaana', i'i kaye kiikooyenhsa', ekii'nanaahkomaatc Kishemanitoon. Miitahsh kaa'ishi​pahpahkwepinaatc ekii'maamiinaatc i'i okihkino'amawaakana'. Oko tahsh kihkino'amawaakanak okii'ahshamaawaa' i'imaa kaakii'ayaanitc. 37 Kahkina tahsh kiihtewiihsiniwak. Kihkino'amawaakanak tahsh okii'otaahpinaanaawaa niishwaahso mashkohsiimahkahk kaakii'ishkohsenik miicimini. 38 Niiwink mitaahswaahk (4,000) tahsh kiihtahshiwak iki ininiwak kaakii'ahshamintwaa, kaawiin tahsh wiin ehtakwakimintwaa iki ihkwewak, iki kaye apinoonciishak. 39 Miitahsh Ciisahs kaa'ishi​kiiwenisha'waatc i'i kaapaahtiinonitc, ciimaanink itahsh kiihpoosi, weti hsa ekii'ishaatc ahkiink Maakatanink (Magadan).

Maahtiyo 16

1 Perahsiik (Pharisees), iki kaye Saacahsiik (Sadducees) okiih​pinaasihkawaawaan Ciisahsoon ekiih​kakweci'aawaatc, ehkakwecimaawaatc maamahkaacihcikewin citootaminitc, miitahsh ciwaapantamowaatc Kishemanitoon e'minwaapamikonitc. 2 Ciisahs tahsh okii'inaa': "Kiishpin ihsa kiimiskwahkwahk e'ani​onaakohshik, mii'i ehkitoyek: 'Miihsa 'i ewii​minokiishikahk.' 3 Kiishpin kaye kiimisko​mahkatewaanahkwahk wiipa kikishep, mii'i ehkitoyek: 'Wii'maashikiishikan noonkom.' Kinihsitawinaam ihsa aaniin keani-ishiwepahk e'mihcikanawaapantamek i'i kiishik. Aana tahsh wiin waapantamek ono kekoonan mekwaa kaapimihsekin, shaakooc kaawiin i'imaa kitoonci​nihsitohtansiim aaniin waani-ishiwepahk. 4 Aahpici hsa macipimaatisiwak ekii'wepinaawaatc Kishemanitoon noonkom kaapimaatisiwaatc. Kinantawenimihshim kihkinawaasinaakohcikan ciwaapanta'inakook kekoon waaonci​kihkenimiyek. Miitahsh ehta kaakii'ishihsekopanen a'a Coona (Jonah), mii ehta 'i keshi​kihkinawaacihtamaakooyek aaniin keonci​kihkenimiyek." Mii'i kaa'inaatc. Miitahsh kaa'ishi​nakanaatc ekii'ani​maacaatc. 5 Ahpii tahsh ekii'mishakaawaatc weti akaamink, kihkino'amawaakanak kiihkihkentamook ekii'wanisiwaatc pahkweshikanan. 6 Ciisahs tahsh okii'inaa': "Ayaankwaamisik, keko papaamentankek otoompisikaniwaa iki Perahsiik (Pharisees), iki kaye Saacahsiik (Sadducees)." 7 Kihkino'amawaakanak tahsh kii'itiwak: "Pahkweshikanan ohsha ekiih​pinawahpohsiwank, kaaonci-ininank." 8 Okiih​kihkenimaa' itahsh enentaminitc, miitahsh kaa'inaatc: "Wekonen wenci​kakanoonitiyek ekiih​pinawahpohsiwek pahkweshikan? Aahpici akaahsentaakwan kitepweyentamowiniwaa. 9 Kaawiin ina mahshi kinihsitohtansiim? Kaawiin ina aasha kimaamihkawihsiim, naanink mitaahswaahk (5,000) ininiwak ekii'onci​wiihsiniwaatc i'imaa naanan pahkweshikanihkaanink? Aaniin minihk kaakii'mooshkinahtooyek wiikopiimahkahkoon kiimaamooshakinamek ishkwancikanan? 10 Miinawaa tahsh niiwink mitaahswaahk (4,000) ininiwak ekii'onci​wiihsiniwaatc i'imaa niishwaahso pahkweshikanihkaanink, aaniin minihk kaa'mooshkinahtooyek mashkohsiimahkahkoon? 11 Wekonen tahsh mahshi wenci​nihsitohtawihsiwek? Kaawiin kitashintamawihsinooninim a'a pahkweshikan. Ayaankwaamisik keko cipapaamentansiwek otoompisikaniwaa iki Perahsiik, iki kaye Saacahsiik." 12 Miitahsh kihkino'amawaakanak kaa'ishi​nihsitohtamowaatc, kaawiin wiin ciayaankwaamisiihkantamowaatc i'i pahkweshikaniwi ompisikanini, i'iweni hsa kaakii'ishi​kihkino'ikenitc i'i Perahsii', i'i kaye Saacahsii'. 13 Ahpii tahsh Ciisahs kaahpi​takohshink i'imaa Sehsariiya Pilipaayink (Caesarea Philippi), okiih​kakwecimaa' okihkino'amawaakana': "Awenen ehkitowaatc awiyak ehtinowinitc ini Inini oKosihsan?" 14 O'o tahsh okii'inaawaan: "Aaninta kitikook, Cwaan (John) Siika'antaakewinini. Kotak kitikook Ilaaica (Elijah). Kotak kitikook Ceramaaya (Jeremiah), komaa kaye peshik iki kaakiih​kanootamawaakopanen Kishemanitoon e'aawiyan." 15 Ciisahs itahsh okii'inaa': "Awenen tahsh kiinawaa ehkitoyek ehtinowiyaan?" 16 Saaiman Piitar (Simon Peter) tahsh okii'inaan: "Kiin ihsa a'a Kishemanitoon kaakiih​kiishaaci​onenimikotc cipimaaci'iwetc, kiin Kishemanitoo kaaPimaatisitc oKosihsan." 17 Ciisahs tahsh okii'inaan: "Saaiman, Cwaan (John) kaaokosihsimihk, aahpici kishawentaakos! Kaawiin wiin ininiihkaank kikii'ontinansiin i'i ihkitowin, a'a hsa ninTete kihcikiishikonk kaa-ayaatc, tipinawe kikii'miinik i'iweni kaawiintaman. 18 O'o tahsh kitinin, Piitar, kiin ihsa ahsin, miihsa i'imaa kihtaapihkonk keishih​maawantoonakwaa kahkina kaatipenimakwaa. Mihsawaa ko nipowin kaawiin oka​shaakooci'ikohsiinaawaa. 19 Kika​miinin ini aapaapihka'ikanan keonci​paahkinamawintwaa awiyak Kishemanitoo oTipencikewinink. Wekonen iko kekipihtinaman o'omaa ahkiink kehcinaac takipihtinikaate kaye kihcikiishikonk. Wekonen iko kepakitinaman o'omaa ahkiink kehcinaac tapakitinikaate kaye kihcikiishikonk," okii'inaan. 20 Miitahsh Ciisahs okii'ayaankwaamimaa' okihkino'amawaakana' citipaacimikohsik wiin e'aawitc Kishemanitoon kaakiih​kiishaaci​onenimikotc cipimaaci'iwetc. 21 Miitahsh i'i ahpii Ciisahs kaakii'maacii​wiintamawaatc okihkino'amawaakana' ekii'inaatc: "Oncita hsa ko ishinaakwan Ceroosalamink (Jerusalem) ci-ishaayaan, cikakwaataki'iwaatc iki kaaniikaanisiwaatc Coowak, iki kaye Kihcianami'ewikimaak, iki kaye kaakihkino'amaakewaatc Onahshowewin. Ninkanihsikook itahsh, aninihsokiishikahk itahsh nika​kiiwepimaatis." 22 Piitar (Peter) itahsh pahkeya'ii okii'ishiwinaan ekii'maaci​onci'aatc ekii'inaatc: "Tepencikeyan, kaawiin tainentansii Kishemanitoo i'i ci-ishihseyan!" 23 Ciisahs tahsh kiihkwehkihtaa ekii'inaatc Piitaran: "Setan (Satan), inkoci ishaan! Kiin ohsha kaakipishkawiyan, ininiwak aaniihsh kaashi​naakatawentamowaatc kitishi​naakatawentam, kaawiin wiin Kishemanitoo kaashi​naakatawentank." 24 Ciisahs tahsh okii'inaa' okihkino'amawaakana': "Kiishpin awiya wii'wiiciiwitc, mii ehta ko ciaanawenintisotc, cipimiwinaatc otaashiteyaahtikoman, cipiminisha'otc itahsh. 25 A'a hsa inini kaakakwe​pimaacihtootc opimaatisiwin aanciko kaawiin tatepinamaasohsii tepwe cionci​pimaatisitc, a'a tahsh wiin kepakitinank opimaatisiwin niin onci tatepinamaaso tepwe keonci​pimaatisitc. 26 Wekonenini keontisihpan awiya mihsawaa ko aana tepinank kahkina kekoonini kekii'ayaakaatenikipan, kiishpin tahsh tepinamaasohsik tepwe keonci​pimaatisitc? Wekonenini meshkwac kemiikiwehpan citeahpiihtentaakwaninik i'i hsa keonci​miinintipan tepwe cipimaatisitc? 27 Aaniihsh wiipa ninka​pi​takohshin, niin Inini oKosihsan kaatinowiyaan. Ninkapi​wiiciiwaak iki nintencalimak. Kaashi​waahsenaakositc a'a ninTete keniin ninka​ishi​waahsenaakos. Miitahsh i'i ahpii citipa'amawakwaa kahkina entahsopeshikowaatc aaniin kaahpi-ishihcikewaatc. 28 Maamihkawik itahsh o'owe! Aaninta hsa o'omaa kaa-ayaawaatc kaawiin tanipohsiiwak paanimaa waapamaawaatc ini Inini oKosihsan pitakohshininitc cikihciokimaawinitc."

Maahtiyo 17

1 Paanimaa tahsh ninkotwaahsokiishik e'ishihsenik Ciisahs okii'maaciinaan Piitaroon (Peter), iniweniwa' kaye kaawiicihkiwentinitc Ciimisan (James) shikwa Cwaanan (John), wakitatin tahsh ekii'ishiwinaatc, wiinehtawaa weti ekii'ishaawaatc kaakii'ishi-ishpatinaanik. 2 Mekwaa tahsh ehkanawaapamikotc, pahkaan kii'ani-ishinaakosi taapishkoo kiisihs kaa-ahpiihci​waahsenaakositc, miihsh i'i kaa'ahpiihci​waahsenaakositc a'a Ciisahs. Okikishkikanan kaye wiinke kii'waapishkiwaahsenaakwaniniwan. 3 Iki kaye nihsin kihkino'amawaakanak okii'waapamaawaan Moosihsoon (Moses) shikwa Ilaaicawan (Elijah) ekii'wiiciiwaanitc Ciisahsoon, ehkakanoonitinitc. 4 Piitar tahsh okii'onci​kanoonaan Ciisahsoon: "Tepencikeyan, aahpici hsa mii'i kwayahk o'omaa kaa-ayaayank, kiishpin ishi​mihsawentaman, nihsin akawaahte'ikanan ninka​patahkitoonan, kiin peshik ciayaayan, Moosihs kaye peshik, Ilaaica kaye peshik," kii'ihkito. 5 Mekwaa tahsh ehkakitotc, waahsewahkwiini okii'aakawishkaakonaawaa. Miitahsh i'imaa kaakii'onci​noontawimintc awiyan ehkiikitonitc: "Mii hsa a'a tipinawe ninKosihs kaasaaki'ak, kaaminwaapamak kaye. Pisintawihk." 6 Ekii'noontawaawaatc tahsh awiyan ehkiikitonitc, wiinke kiihkihci​sekisiwak kihkino'amawaakanak. Miitahsh kaa'ishi​animihkopani'owaatc i'imaa mihtahkamik. 7 Ciisahs okiih​pinaasihkawaa' ekiih​saaminaatc ekii'inaatc: "Pasikwiik. Keko sekisihkek," okii'inaa'. 8 E'inaapiwaatc itahsh, kaawiin pahkaan awiyan okii'waapamaahsiwaawaan, Ciisahsoon ehta. 9 Ehpi​niihsaamaciwewaatc tahsh Ciisahs okii'inaa': "Keko wiin wiintamawaahkek awiya o'owe kaa'ishi​waapanta'ikoowisiyek, paanimaa hsa kiikiiwepimaatisii'imintc ini Inini oKosihsan." 10 Kihkino'amawaakanak itahsh okiih​kakwecimaawaan Ciisahsoon: "Wekonenini wenci-ihkitowaatc iki kaakihkino'amaakewaatc Onahshowewin, Ilaaica pinamaa tatakohshin?" 11 Ciisahs tahsh okii'inaa': "Ilaaica hsa nihtam tatakohshin cipi​onahtootc kahkina kekoonini. 12 O'owe tahsh kiwiintamawininim: Ilaaica hsa aasha kiihtakohshin, pemaatisiwaatc tahsh kaawiin okii'nihsitawinawaahsiwaawaan, okiih​tootawaawaan kaye wiinawaa aaniin kaakii'ishi​mihsawentamowaatc. Miitahsh peshikwan ketootawaawaatc ini Inini oKosihsan." 13 Kihkino'amawaakanak itahsh kii'onci​nihsitohtamook Cwaan (John) Siika'antaakewininiwan ihsa kaakiih​tashimimintc. 14 Ahpii tahsh ekiih​pinaasihkawaawaatc i'i kaapaahtiinonitc, inini okiih​pinaasihkawaan Ciisahsoon ekii'ociciinkwanapiihtawaatc, 15 ekii'inaatc: "Tepencikeyan, kohpaatenim ninkosihs! Ocipinikowaahpine ohsha, kaye mooshak ehkihci-ishiayaatc. Macohtehse mooshak, pahkopiihse kaye mooshak. 16 Nintaanakiihpiitamawaak ihsa iki kikihkino'amawaakanak, kaawiin tahsh okiih​kashki'aahsiwaawaan ciminoayaanitc." 17 Ciisahs tahsh kii'ihkito: "O'omaa kahkina eyaayek, etatawe kaawiin kitepwehtansiim, kaawiin kaye kwayahk kitishi​ayaahsiim! Kaanaka naa minihk kewiiciiwinakookipan? Kaanaka naa mii na kitaa​shashiipenimininim! Piitamawihshin o'omaa a'a kwiiwisenhs!" 18 Ciisahs tahsh okiih​kanoonaan ini maciahcaahkwan, miitahsh shemaak kaa'ishi​saaka'aminitc. Shemaak tahsh wiinke kii'minoayaa a'a kwiiwisenhs. 19 Kihkino'amawaakanak tahsh okiih​kiimooci​naasihkawaawaan ekii'inaawaatc: "Wekonen kaa'onci​pwaanawi'ankitc a'a maciahcaahk cisaakiciwepinankitc?" 20 Ciisahs tahsh okii'ishi​nahkwehtawaa': "Aaniihsh onsaam pankii kitepweyentaam. Kiishpin ihsa saapiayaayek tepweyentamowin, taapishkoo kaaishi​naakwahk i'i maawac kaa-akaahsink kihtikaanenhs mastart (mustard), pisaaniko kitaakanootaam ehpihkwatinaak cikii'ihkitoyekipan: 'Taka o'omaa oncimaacaan, weti ishaan!' Miitahsh iko keshi​maacaamakahk. Kahkina kekoon kitaa​ishihcikem," okii'inaa'. 21 ["Awiya ohsha ehta anami'ehtawaatc Kishemanitoon, wiihsinihsik kiianami'aatc, mii ehta 'imaa keonci​saakiciwepinaahpan ono tino maciahcaahkwan," okii'inaa'.] 22 Ahpii tahsh iki kahkina kihkino'amawaakanak e'maawaci'itiwaatc i'imaa Kaalaliink (Galilee), Ciisahs okii'inaa': "Niin Inini oKosihsan ninka​pakitinikoo ciotaahpiniwaatc 23 iki kaawii'nihshiwaatc. Nihsokiishik itahsh ishihsek miinawaa ninka​kiiwepimaatis," kii'ihkito. Kihkino'amawaakanak tahsh wiinke kii'maanentamook. 24 I'imaa tahsh ootenaank Kaparniyamiink (Capernaum) kiihpi-ishi​takohshinook. Piitar (Peter) tahsh okiihpi​antawaapamikoo' i'i kaakiih​tipa'ike'iwenitc shooniyaan Kihcianami'ewikamikonk kaakii'ishi​aapatisinitc, miihsh o'o kaa'ikotc: "Kaakihkino'amawinek ina otipa'aan i'i kaatipa'ikaatenik Kihcianami'ewikamikonk?" okii'ikoo'. 25 "Miinanke," tahsh Piitar kii'ishi​nahkwehtam. Ehpi​piintiketc itahsh, cipwaa kiikitotc Ciisahsoon okii'ikoon: "Saaiman (Simon), aaniin enentaman? Iki hsa kaa-ataawaakewaatc kekoonan ishi'aawak citipa'amawaawaatc wekimaawaatisinitc. Kahkina hsa kaye entahshiwaatc awiyak otipa'amawaawaan wekimaawaatisinitc. Awenenak itahsh kaatipa'amawaawaatc o'oweni ahkiiwi kihciokimaa'? A'a na kihciokimaa okosihsa' owaahkaa'ikanink kaa-ayaanitc tipa'ike'aawa', komaa kaye kotak awiyak?" okii'ikoon. 26 Piitar tahsh kii'ihkito: "Kotak ihsa awiyak tipa'ike'aawak." Ciisahs tahsh okii'inaan: "Tepwe hsa, kihciokimaa okosihsa' kaawiin memwehc otipa'ansiini. 27 Kaawiin tahsh wiin kinantawenimaahsiwaanaanik cimaanaapaminankwaa kaawiih​tipa'ike'inankwaa Kihcianami'ewikamikonk kaaonciiwaatc. Maacaan itahsh, antakwaashkwepiciken weti saaka'ikaniink. Nihtam itahsh kekwaashkwepinatc kiikooy, okatahkwamaan shooniyaanhsan. Miitahsh citetipa'amank i'i anami'ewikamikonk kaawii'onci​tipa'ike'ikooyank o'o kaaishi​niishiyank. Ishiwitaaw ciawi​miinatwaa i'iwe kitipa'ikewininaan," okii'inaan.

Maahtiyo 18

1 Mii'i tahsh ahpii kihkino'amawaakanak okii'naasihkawaawaan Ciisahsoon ekiih​kakwecimaawaatc: "Awenen maawac kekihci-inentaakositc i'imaa Kishemanitoo oTipencikewinink?" 2 Ciisahs tahsh okii'antomaan apinoonciishan, ekii'niipawi'aatc enaahsamikaapawinitc, 3 ekii'inaatc: "Tepwe kitinininim, kiishpin kwehkaatisihsiwek, ishi​ayaahsiwek kaye kaaishi​ayaawaatc apinoonciishak, kaawiin wiihkaa kikaonci​tipentaakosihsiim Kishemanitoo oTipencikewinink. 4 A'a hsa kaatapahsenimo'itisotc taapishkoo wa'a apinoonciish kaashi​tapahsenimotc, miihsa a'a maawac kaakihci-inentaakositc i'imaa Kishemanitoo oTipencikewinink. 5 Awenen ihsa kaaotaahpinaatc ono tino apinoonciishan nintishinihkaasowinink, niin ohsha kaaotaahpinitc." 6 "Awiya hsa kaawanishkwe'aatc peshik ono kaa-akaahshiinshinitc kaatepweyeniminitc cipoonihcikenitc, nawac taaonishihshinini kaamihcaapihkisinitc piihsipoocikanahsiniin citahkopicikaniwinihpan ohkwekanink cinihsaapaawacikaniwihpan i'imaa kaashi​kiishkaayawaanik kihcikamiink, ahpiihc wiin cipankihshimaahpan ini kaatepweyeniminitc. 7 Koohpaasinaakwan ihsa o'omaa ahkiink, e'ayaakin ini kaaonci​macitootamink! Ishinaakwan kaye oncita piko citakohshinoomakahkin. Aahpici tahsh takoohpaasinaakosi a'a awiya wiin kaaonci​otihshiwemakaninikin. 8 "Kiishpin kininciink komaa kaye kisitink onci​macitootaman, miihsa ishikiishkishan, wepinan kaye. Nawac taaonishihshin cipiintikeshkaayampan i'imaa pimaatisiwinink cikiishkininciiyan, cikiishkisiteyan kaye, ahpiihc wiin cikiki​macohtewepinikooyan i'i kininc komaa kaye kisit i'imaa maci-ishkotenk wiihkaa keaahtawehsinok. 9 Kiishpin kaye kishkiinshikonk oncimacitootaman, otaahpinan, inkoci kaye ahpakitoon. Nawac taaonishihshin cipiintikeshkaayampan i'imaa pimaatisiwinink cimihcipeshikoshkiinshikweyan, ahpiihc wiin cikiki​macohtewepinikooyan ini minciniish kishkiinshikoon i'imaa maci-ishkotenk kaanehpici​piskanenik." 10 "Ayaankwaamisik itahsh citapahsenimaahsiwek wa'a peshik oko tino kaa-akaahshiinshiwaatc. Kitishiwiintamawininim itahsh, otencalimiwaa' mooshak weti ayaawa' kaashi​ayaanitc ninTeten kihcikiishikonk. 11 [Inini oKosihsan kiihpiishaawan cipimaaci'aanitc i'i kaawanihshininitc.] 12 "Aaniin enentamek? Kiishpin inini ayaawaatc ninkotwaahk (100) maanahcaanihsha', peshik tahsh wanihshininitc, aaniin keishihcikehpan? Otaanakanaa' maawiin i'i shaankahsimitanahshishaankahso (99) maanahcaanihsha' i'imaa aahsamatinaank ciantone'waahpan ini peshik kaawanihshininitc. 13 Kiwiintamawininim itahsh ahpii mihkawaatc, nawac ini taonci​ciihkentam ahpiihc wiin i'i shaankahsimitanahshishaankahso kaakii'wanihshinsinik. 14 Miitahsh peshikwan kiTetewaa kihcikiishikonk kaa-ayaatc kaawiin onantawenimaahsii' o'o kaa-akaahshiinshinitc ciwanihshininitc." 15 "Kiishpin kiitanami'aa macitootawihk, naasihkaw ciwaapanta'atc aaniin kaakii'ishi​macitootawihk, kiimooc itahsh kiinehtawaa cikakanoonitiyek. Kiishpin tahsh pisintawihk, miihsa 'i kiikashki'atc miinawaa cimino​wiiciiwihk. 16 Kiishpin tahsh pisintawihsinohk, peshik maaciish komaa kaye kotak niishin ciantawaapamek, aaniihsh ishipii'ikaate Kihcimasina'ikanink, kiishpin niishiwaatc komaa kaye nihsiwaatc awiyak, otihkitowiniwaa hsa tamincimencikaateni. 17 Kiishpin tahsh pisintawaahsik, tipaatotamowaahk tahsh o'o i'imaa otepwehtamook kaaishi​maawaci'itiwaatc. Kiishpin tahsh keyaapi pisintansik, taapishkoo hsa awiya kaakihkenimaahsik Kishemanitoon komaa kaye kaamaawantoonaatc taakihs shooniyaan kikainakimaawaa." 18 "O'owe hsa tepwe kiwiintamawininim: wekonen kekipihtinamek o'omaa ahkiink takipihtinikaate kihcikiishikonk. Wekonen kaye kepakitinamek o'omaa ahkiink, tapakitinikaate kihcikiishikonk. 19 "Keyaapi tahsh kitinininim: kiishpin niishiyek kekoon peshikwan inentamek ewii​anami'aayek, ninTete kihcikiishikonk kaa-aayaatc oka​tootaan kaaishi​mihsawentamek. 20 Aanti piko niishin komaa kaye nihsin eshi​maawaci'itiwaatc nintishinihkaasowinink, mii'imaa keniin eyaawak eshi​ayaawaatc." 21 Okiih​pinaasihkaakoon tahsh Piitaroon (Peter) ekii'ikotc: "Aaniin tahswaa kepoonentamawak niicihkiwe kiishpin macitootawitc? Niishwaahcink ina?" 22 Ciisahs tahsh okii'inaan: "Kaawiin wiin niishwaahcink ehta, niishwaahsimitana tahsink niishwaahcink ohsha. 23 Miitahsh o'o eshinaakwaninik Kishemanitoo oTipencikewin, taapishkoo kihciokimaa ewiih​sakahkakintank otanohkiiwinini i'i otanohkii'aakana'. 24 Aasha tahsh ekii'maacii​sakahkakinciketc, kiihpiitamawaa hsa peshik ini kaakiih​kayeshimikotc maawac iko niipowa' tahswaapihk shooniyaan. 25 Ekii'ayaawaahsinik tahsh ini shooniyaan citipa'amaakotc, kihciokimaa tahsh kii'ihkito ciataawaakaaniwinitc ini otanohkii'aakanan, shikwa owiitikemaakanini, shikwa oniicaanihsini, kahkina kekoonini kaye kaakiih​tipentaminitc, miihsa 'imaa cionci​tipa'aminitc kaakiih​kayeshimikotc. 26 A'a tahsh anohkii'aakan kii'ociciinkwanipani'o enaahsamapinitc ini otookimaaman ekii'inaatc: 'Taka shashiipenimihshin, kikatipa'amawin ihsa kahkina kekoon kaamasina'amawinaan!' 27 Kihciokimaa tahsh okiih​kohpaatenimaan, miitahsh kaa'ishi​pakitinaatc, ekiih​poonentamawaatc kaye i'iweni kaakii'masina'amaakotc. 28 "Miitahsh kaa'ishi​maacaatc a'a anohkii'aakan ekii'nakishkawaatc ini owiitanohkiimaakanan kaakii'masina'amaakotc pankii ehta tahswaahpihk. Miitahsh kaa'ishi​sakaahkikanenaatc ekiih​kipinewenaatc ekii'inaatc kaye: 'Tipa'amawihshin kahkina kaamasina'amawiyan!' 29 Owiitanohkiimaakanan tahsh kii'ociciinkwanapipani'owan ekii'ikotc: 'Shiipipii'ihshin kikakiiwetipa'amawin ihsa.' 30 Kaawiin tahsh kii'inentansii. Miitahsh kaa'ishi​anoohkiitc cipiintikekoonkowepinimintc i'imaa kipaahkwa'otiiwikamikonk, paamaa hsa tipa'ikenitc cipooni​kipa'omintc. 31 Iki tahsh kotak anohkii'aakanak ekii'waapankewaatc aaniin enahkamikaninik, wiinke kii'maanentamook. Miitahsh kaa'ishi​wiintamawaawaatc ini kihciokimaan kahkina kekoonini kaakii'waapantamowaatc. 32 Kihciokimaa tahsh okii'antomaan ini otanohkii'aakanan ekii'inaatc: 'Etatawe anoociko anohkii'aakan kitinow! Kikiih​poonentamawin hsa minihk kaakiih​kayeshimiyan, aaniihsh kikiih​kakwecim. 33 Miitahsh peshikwan kekii'ishi​koohpaatenimatipan a'a kiwiitanohkiimaakan taapishkoo kaakii'ishi​koohpaateniminaan.' 34 Wiinke tahsh kii'nishkaatisi a'a kihciokimaa. Miitahsh kaa'inaahkoniketc cikipa'omintc ini macianohkii'aakanan, cikakwaataki'imintc paanimaa hsa kiimisiwe​tipa'amawintc minihk kaakiih​kayeshimintipan. 35 "Miihsa peshikwan kaatahshiyek ketootawinek ninTete kihcikiishikonk kaa-ayaatc kiishpin awiya ote'ink tepwe onci poonentamawaahsik ini wiitanami'aan."

Maahtiyo 19

1 Ahpii tahsh Ciisahs ekii'ishkwaakakitotc kii'anionci​maacaa Kaalaliink (Galilee) i'iweti ekii'ishi​kiiwetc ahkiink Cootiiyaahkaank (Judea) akaamisiipi Cwaartan (Jordan). 2 Aahpici tahsh kiihpaahtiinowa' pemaatisinitc kaakiih​piminisha'okotc kaye ekii'minoayaa'aatc otaahkosii'. 3 Perahsiik (Pharisees) tahsh okiih​pinaasihkawaawaan ekiih​kakweci'aawaatc ekii'inaawaatc: " Onahshowewin ina ihkitoomakan pisaaniko inini ciwepinaatc wiiwan wekonen iko onci?" 4 Ciisahs tahsh okii'inaa': "Kaawiin ina kitanamihtoohsiim e'ishipii'ikaatek, ahpii tahsh kahkina kekoon kiioshihcikaatek Kishemanitoo okii'oshi'aan ininiwan ini kaye ihkwewan? 5 Ekii'ihkitotc kaye: 'Miitahsh o'oweni keonci​nakanaatc ini oteten, omaamaan kaye a'a inini, ciwiiciiwaatc ihsa ini wiiwan. E'niishiwaatc tahsh tapeshikwakinteniwan owiiyawiwaan.' 6 Kaawiin tahsh niishihsiiwak, miitahsh eshi​peshikowaatc. Awenena' ihsa kaakii'maamawiniishoopakitinaatc Kishemanitoo, kaawiin hsa awiya okapahkewiniti'aahsii'." 7 Perahsiik tahsh okii'ishi​kakwecimaawaan: "Wekonenini tahsh Moosihs (Moses) kaa'onci-inaahkoniketc, inini hsa cimiinaatc wiiwan i'i wepiniwewimasina'ikanenhsini cisaakicinisha'waatc kaye ini wiiwan?" 8 Ciisahs tahsh okii'inaa': "Moosihs hsa kikiih​pakitinikowaa cipahkewinimek kiwiiwiwaa', aaniihsh wiinke kishashiipihtaam. Kaawiin tahsh wiin i'iwe kii'ishihsehsinoon nihtam kiimaacihsek kahkina kekoon. 9 Kiwiintamawininim itahsh, kiishpin inini wepinaatc wiiwan, mihsawaa ko aana pihshikwaatisihsinik, wiitikemaatc itahsh kotak ihkwewan, miihsa 'i ekiih​pihshikwaatisitc." 10 Kihkino'amawaakanak itahsh kii'ihkitowak: "Kiishpin ihsa i'i eshinaakwaninikwen a'a inini a'a kaye ihkwe e'wiitikentiwaatc, nawac iinsan taaonishihshinini wiihkaa ciwiitikentinaaniwansinokipan." 11 Ciisahs tahsh okii'inaa': "O'o hsa kihkino'ikewin kaawiin kahkina awiya miinikoowisihsii, iki ehta kaashi​miinikowaatc Kishemanitoon. 12 Paahtiinatinininiwan ohsha aaninta ininiwak kaaonci​wiitikehsikwaa. Aaninta ishi​nihtaawikiwak, aaninta kaye ishihcikaniwiwak ciwiitikehsikwaa, aaninta tahsh kaaonci​wiitikehsikwaa miihsa i'iweni weweni cianohkiihtamowaatc Kishemanitoon oTipencikewinini. A'a tahsh kaakashkihtootc ciotaahpinank o'o kihkino'ikewin, pisaaniko oka​otaahpinaan." 13 Ciisahs tahsh kiihpiitamawaa apinoonciisha' cisaaminaatc, cianami'ehtamawaatc kaye. Kihkino'amawaakanak tahsh okiih​kishiikanoonaa' i'i kaakiih​piinaanitc. 14 Ciisahs tahsh kii'ihkito: "Maano apinoonciishak ninka​pi​naasihkaakook. Keko wiin kipihtinaahkekwaanik. Aaniihsh miiwak ihsa iki tino pemaatisiwaatc oko kaainaatisiwaatc apinoonciishink ketipenimikowaatc Kishemanitoon." 15 Miitahsh i'i kaa'ishi​saahsaaminaatc, ekii'ani-ishi​maacaatc. 16 Aapitink tahsh inini okii'naasihkawaan Ciisahsoon ekii'inaatc: "Okihkino'amaake, wekonen sasekaa ishihcikewin keishihcikeyaampaan keonci​miinikooyaan pimaatisiwin wiihkaa kepoonihsehsinok?" 17 Ciisahs okii'ishi​nahkwehtawaan: "Wekonen wenci​kakwecimiyan kekoon kaasasekaawank? Mihcipeshiko ohsha kaasasekaawentaakositc. Kiishpin ihsa antawentaman pimaatisiwin cimiinikooyan, tootan Moosihs (Moses) otoonahshowewinan." 18 A'a tahsh inini kii'ishi​kakwetwe: "Aaniin iniweniwan?" Ciisahs tahsh okii'inaan: "Keko nihshiwehken, keko papaamenimimaahken pahkaan awiya wiiwan, keko kimootihken, keko kaye awiya noociko inaacimaahken tipaahkonintc, 19 kihci-inenim kitete, kimaamaa kaye, saaki' kaye kiwiicitaamaakan taapishkoo kaashi​saaki'itisoyan." 20 Oshkiniiki tahsh kii'ihkito: "Kahkina ohsha ini onahshowewinan ninihtaa​tootaanan. Aaniihsh awahshime keishihcikeyaampaan?" 21 Ciisahs tahsh okii'inaan: "Kiishpin wiinke wiihkwayahkonaakosiyan, maacaan, awi​ataawaaken kahkina kekoonan kaa-ayaayan, cimiinatwaa kaye shooniyaan okitimaakisiik. Wenootisiwin tahsh kika-ayaan weti kihcikiishikonk. Miitahsh ishipiishaahkan cipiminisha'oyan." 22 Ekii'noontank itahsh a'a oshkiniiki ekii'icikaniwitc, kii'ani​maacaa, ekii'maanentank, aaniihsh wiinke kii'wenootisi. 23 Ciisahs itahsh okii'inaa' okihkino'amawaakana': "Kiwiintamawininim tepwewin: aahpici sanakanini kaawenootisitc ciokimaahkantaakotc Kishemanitoon. 24 Keyaapi kekoon kiwiintamawininim, nawac taawentanini pihkwaawikanemihtatim cishiipaashkaahpan i'iweni kaashi​pakoneyaanik shaaponikanini, ahpiihc wiin kaawenootisitc inini ciokimaahkantaakohpan Kishemanitoon." 25 Okihkino'amawaakana' itahsh e'noontaakotc kiihkihcimaamahkaatentamoo', ekii'ihkitonitc: "Awenen tahsh inaa kepimaaci'ikoowisihpan?" 26 Ciisahs okiih​kanawaapamaa' ekii'inaatc: "Inini wiin kaawiin otaa​kashkihtoohsiin o'o ci-ishihciketc, Kishemanitoo tahsh wiin kahkina kekoonini owencihtoon." 27 Okii'ikoon itahsh Piitaroon (Peter): "Inashke, kahkina kekoon ninkii'nakataamin ewiih​piminisha'okooyan. Wekonen tahsh keayaayaank?" 28 Ciisahs tahsh okii'inaa': "Tepwe hsa kitinininim: ahpii hsa Inini oKosihsan apinitc otookimaawapiwininiink keshi​kihci-inentaakosinitc, ahpii kahkina kekoon oshkioshihcikaatek, kekiinawaa kaamitaahshiniishiyek kaapiminisha'oyek, kika-apim okimaawapiwinink cionahshowaanekwaa iki kaamitaahshiniishwewaanakisiwaatc Isriyalak (Israel). 29 Awiya hsa kaanakatank owaahkaa'ikan, kaanakanaatc kaye wiicihkiweya', otawemaa' kaye, oteten kaye, omaamaan kaye, oniicaanihsa' kaye, komaa kaye okihtikaanahkamik, niin e'onci​tootank, ninkotwaahk awahshime tahsink tamiinaa, tatako​miinaa kaye pimaatisiwin wiihkaa kepoonihsehsininik. 30 Iki hsa noonkom kaaniikaanisiwaatc, ishkwaac ta-ayaawak, iki kaye noonkom ishkwaac kaa-ayaawaatc taniikaanisiwak."

Maahtiyo 20

1 "Ahpii Kishemanitoo kiishihsitootc oTipencikewin, miihsa 'iwe keishinaakwahk, taapishkoo kihtikewikimaa kaatipentank shoominaahtikoowi kihtikaanini ekii'ani​maacaatc wiipa kikishep ekii'nanaantawaapamaatc awiya' cianohkiinitc i'imaa okihtikaanink. 2 Ekii'ahshotamawaatc tahsh peshik waapaapihko​shooniyaanhsan ewii-ishi​tipa'amawaatc peshikokiishik. Miihsh i'i kaa'ishi​na'entaminitc. Miitahsh okii'ishinisha'waa' cianohkiinitc i'imaa oshoominaahtikowi kihtikaanink. 3 Miinawaa tahsh ehshaankahso​tipa'ikaneyaanik kihtikewikimaa weti akwaciink kaatanataawenk kii'ishaa. Okii'waapamaa' tahsh ininiwa' e'naaniipawinitc. 4 Miitahsh kaa'inaatc: 'Maacaak kekiinawaa, antawanohkiik ninshoominaahtikoowi kihtikaanink, kwayahk kaye kikatipa'amawininim.' 5 Shemaak tahsh kii'antawanohkiiwa'. Miitahsh peshikwan kaa'ishihciketc e'naawahkwenik, e'nihsotipa'ikaneyaanik (3) kaye. 6 Kekaa tahsh e'naanotipa'ikaneyaanik miinawaa kii'ishaa weti kaashi​ataawenk. Okii'waapamaa' tahsh kotak ininiwa' e'mihci​naaniipawinitc. Miitahsh ekii'inaatc: 'Wekonen wenci​kihtimikaapawiyek kapekiishik kekoon e'ishihcikehsiwek?' 7 Miitahsh kaa'ishi​nahkwehtaakotc: 'Kaawiin awiya nintanohkii'ikohsiinaan.' Okii'ani-inaa' itahsh: 'Maacaak, kekiinawaa antawanohkiik ninshoominaahtikoowi kihtikaanink.' 8 "Ahpii tahsh e'ani​onaakohshininik, kihtikewikimaa okiih​kanoonaan aanihkewikimaan: 'Kanoosh iki otanohkiik, tipa'amaw kaye otanohkiiwiniwaan. Iki hsa ishkwaac kaakii'anohkii'intwaa miiwakiki nihtam tipa'amaw, piinihsh cini​tipa'amawatwaa iki nihtam kaakii'anohkii'intwaa,' ekii'inaatc. 9 Iki tahsh otanohkiik kaakii'maatanohkiiwaatc e'naanotipa'ikaneyaanik kii'ontisiwak pepeshik waapaapihko​shooniyaanhsan. 10 Iki tahsh nihtam kaakii'maatanohkiiwaatc ewiih​tipa'amawintwaa mii'i kaa'inentamowaatc: 'Nawac niinawint awahshime ninka​tipa'amaakoomin.' Kewiinawaa tahsh pepeshik ehta waapaapihko​shooniyaanhsan kiihtipa'amawaawak. 11 Okii'otaahpinaawaan tahsh oshooniyaamiwaan ekii'maashikanoonaawaatc ini otookimaamiwaan: 12 'Oko hsa ishkwaac kaakii'maatanohkiiwaatc peshikotipa'ikan ehta kii'anohkiiwak. Niinawint tahsh kapekiishik aahsamaahtenk ninkii-ishi​kihci​anohkiimin. Shaakooc itahsh peshikwan kitishi​tipa'amawaak taapishkoo kaa'ishi​tipa'amawiyaank!' 13 Kihtikewikimaa tahsh okii'inaan ini peshik: 'Niicii, pisintawihshin! Kaawiin kikii'wayeshimihsinoon. Kikii'inentam iitok ewii​anohkiiyan ciontisiyan peshik waapaapihko​shooniyaanhs. 14 Otaahpin tahsh a'a kishooniyaam, anikiiwen kaye. Ninkii'inentam ohsha peshikwan ewii-ishi​tipa'amawak taapishkoo peshikwan kaakii'ishi​tipa'amawinaan a'a ishkwaac kaakii'maatanohkiitc. 15 Niin ihsa ninshooniyaam, waahtootawak iko nintaa​tootawaa. Miinahsh kaaonci​maanaapamiyan e'minwaatisiyaan?' " 16 Ciisahs tahsh kiini-ihkito: "Mii'iwe eshinaakwahk, iki hsa otaanaank kaainentaakosiwaatc taniikaanisiwak, iki hsa kaye kaaniikaanisiwaatc otaanaank tainakinsowak." 17 Ciisahs tahsh e'ishaawaatc weti Ceroosalamink (Jerusalem) pahkeya'ii okii'ishiwinaa' i'i mitaahshiniishin okihkino'amawaakana', ekiih​kiimooci​kanoonaatc hsa mekwaa ehpimohsewaatc, ekii'inaatc: 18 "Inashke pisintawihshik, o'o hsa kaaishaayank weti Ceroosalamink, miihsa'i niin Inini oKosihsan cipakitinikooyaan ciotaahpiniwaatc iki Kihcianami'ewikimaak, iki kaye kaakihkino'amaakewaatc Onahshowewin, miitahsh ci-ihkitowaatc pisaaniko cinihsikoowak. 19 Miinawaa tahsh weti ninkashi​pakitinikook ekaa kaaCoowiwihsinik ciotaahpinimitc. Miiwa' itahsh i'i kemaanenimimitc, kepahpahshanshe'omitc, miiwa'i'i kaye keakosaka'omitc aashiteyaahtikonk. Nihsokiishik tahsh ishihsek Kishemanitoo ninka​kiiwepimaatisii'ik," kii'ihkito. 20 Okiih​pinaasihkaakoon tahsh Sepatiin (Zebedee) wiiwini ekiihpi​wiiciiwaanitc kaakii'niishinitc (2) okosihsini. Miitahsh kaa'ishi​ociciinkwanapiihtaakotc ehkakwecimikotc: "Kekoon kinantawenimin citootawiyan." 21 Ciisahs tahsh okii'inaan: "Wekonen entawentaman?" Miitahsh kaa'ikotc ihkwewan: "Ihkiton oko niishin (2) ninkosihsak ciwiitapimihkwaa ahpii maaciiokimaawiyan. A'a hsa peshik kikihcinihkink inahke ci-ishi​apitc, a'a tahsh kotak kinamantinihkink," okii'ikoon. 22 Ciisahs tahsh kii'ishi​nahkwehtam: "Kaawiin ihsa kikihkentansiim aaniin eshi​kakwetweyek. Kitaa​kashkihtoom ina niminihkwaakanink cionci​minihkwaatamek i'i kaawii'ishi​kakwaatakihtooyaan?" Miihsh kaa'ihkitonitc: "Miinanke nitaa​kashkihtoomin." 23 Ciisahs tahsh okii'inaa': "Tepwe hsa kikaonci​minihkwem i'imaa niminihkwaakanink. Kaawiin tahsh niin nintoonenimaahsiik awenenak keapiwaatc ninkihcinihkink inahke, ninamantinihkink inahke kaye. Aasha ohsha ninTete okii'onenimaa' awenena' keapinitc." 24 Ahpii e'noontamowaatc iki kotak mitaahso kihkino'amawaakanak okii'nishki'ikowaa' i'i niishin (2) kaaowiicihkiwentinitc. 25 Ciisahs tahsh okii'antomaa' i'i kahkina okihkino'amawaakana' ekii'inaatc: "Kikihkentaanaawaa iitok iki kaatipenimaawaatc pemaatisinitc kaakihkenimaahsinik Kishemanitoon, wiinke otipenimaawaa', ikihsh kaye kaakihci-inentaakosiwaatc wiinke omino​tipenimaawaa' pemaatisinitc. 26 Kiinawaa tahsh wiin kaawiin i'i kikaishihcikehsiim. Kiishpin awiya mihsawentank wiihkihci-inentaakositc, miihsa 'awe kepami'inek kotak kaatahshiyek. 27 Kiishpin ihsa awiya wii'niikaanentaakositc i'imaa kaatahshiyek, miihsa 'awe keinenintisotc kahkina awiyan e'otookimaamitc. 28 Mii niin eshihcikeyaan Inini oKosihsan kaatinowiyaan. Kaawiin wiin ninkiih​piishaahsii cipami'ikooyaan, cipami'iweyaan ihsa kaa'onci​piishaayaan, ewiih​pakitinamaan kaye nimpimaatisiwin ewiih​tipa'wakwaa niipowa' pemaatisiwaatc cipimaaci'intwaa," kii'ihkito. 29 Ekii'anionci​maacaawaatc itahsh i'imaa Cerahkonk (Jericho), kiihpaahtiinowa' tahsh pemaatisinitc kaakiih​piminisha'okotc. 30 Niishin (2) tahsh ininiwak kaakii'waapihsikwaa ciikihkana e'namatapiwaatc kii'noontamook Ciisahsoon ehpimiayaanitc. Miitahsh kaa'ishi​shaakowewaatc: "Tepitink (David) kaaontahkaanesiyan! Koohpaatenimihshinaam!" ekii'inaawaatc. 31 I'imaa tahsh kaapaahtiinonitc kaakii'ayaanitc okiih​kishiikanoonikowaa': "Kitoompiikisim!" okii'ikowaa'. Aanciko tahsh awahshime kiihkishiiwewak: "Tepitink kaaontahkaanesiyan! Koohpaatenimihshinaam!" 32 Miitahsh kaa'ishi​kipihciitc Ciisahs ekii'antomaatc: "Aaniin eshi​antawenimiyek citootawinakook?" okii'inaa'. 33 Miitahsh kaa'ikotc: "Tepencikeyan, kinantawenimikoo ciwaapi'iyaank." 34 Ciisahs tahsh okiih​koohpaatenimaa', okiih​saaminaa' oshkiinshikoniink. Shemaak itahsh kii'waapiwa', miitahsh kaa'ishi​piminisha'okotc.

Maahtiyo 21

1 Ahpii tahsh kekaa e'ani​takohshinowaatc Ceroosalamink (Jerusalem), okii'ani​otihtaanaawaa Pehpaci (Bethphage) kaakii'ishinihkaatenik kaakii'ishitaaniwaninik. I'i hsa Pehpaci kii'ishiayaamakan i'imaa kaakii'ishi​pihkwatinaak Aalip (Olive) Kihtikaanaahtikohkaank kaakii'ishinihkaatenik. Ciisahs tahsh okii'niikaaninisha'waa' niishin (2) okihkino'amawaakana', 2 o'o ekii'inaatc: "Ani​niikaani-ishaak kaamatweayaak kaaishitaaniwank, kikawaapamaawaa tahsh maashimihtatim ciwiicisakaahkohpisoomaatc ini maashimihtatimoonhsan. Aapa'ohkwak tahsh piinaahkekwaanik. 3 Kiishpin tahsh awiya kekoonini ininek, mii​hsa keinek: 'Nintookimaaminaan ohsha owii'aapaci'aa',' shemaak tahsh oka​piicinisha'waa'," okii'inaa'. 4 Miitahsh o'o kaa'onci-ishihsek, ci-ishihsenik kaakii'ihkitonikopanen Kishemanitoo otipaacimowininiiman: 5 "Wiintamawihkwak iki Saayan (Zion) ootenaank kaa-ayaawaatc, Inashke waapamihk kikihciokimaamiwaa, kipinaasihkaakowaa! Aahpici noohkaatisi, ehpimiwanaasotc i'imaa maashimihtatimonk, ehpimiwanaasotc i'imaa maashimihtatimoonhsink, maashimihtatim otooshkaya'aanhsiman." 6 Miitahsh iki kihkino'amawaakanak kaa'awi-ishi-ishihcikewaatc aaniin kaa'ikowaatc Ciisahsoon. 7 Okiih​piinaawaan tahsh maashimihtatimoon, ini kaye maashimihtatimoonhsan. Miitahsh kaa'ishi​wakitahtoowaatc okashkiikiiwiniwaan; miitahsh i'i kaa'ishi​ahpapinitc Ciisahsoon. 8 Pemaatisiwaatc ekiih​paahtiinowaatc okiih​tashwekihsitoonaawaan okashkiikiiwiniwaan i'imaa miihkanaank. Aaninta tahsh okiih​kiishkika'aanaawaan watihkwanan ekii'ahpakitoowaatc miihkanaank kaawiihpi-ishaanitc Ciisahsoon. 9 Kaapaahtiinowaatc tahsh kaakii'niikaanishkawaawaatc, otaanaank kaye kaakiih​pimohsewaatc kii'ishi​shaahshaakowewak: "Hosaana!" kii'ihkitowak. "Tananaahkomaa a'a Tepitink kaaontahkaanesitc. Shawentaakosi hsa a'a kaapi​takohshink otishinihkaasowininiink ini Tepencikenitc. Tananaahkomaa Kishemanitoo!" 10 Ahpii tahsh ekii'ani​takohshink i'imaa Ceroosalamink, kahkina hsa awiyak kiihkihci-inwewi'itiwak ekii'ihkitowaatc: "Awenen tahsh a'a?" 11 Kaapaahtiinowaatc tahsh kaakiihpi​wiiciiwaawaatc Ciisahsoon kii'nahkweshaakowewak: "Mii​hsa wa'a Kishemanitoon kaakanoocikehtamawaatc, Ciisahs kaaishinihkaasotc, Naasarit (Nazareth) ootenaank, Kaalalii (Galilee) ahkiink kaaonciitc," kii-ihkitowak. 12 Ciisahs kiihpiintike i'imaa Kihcianami'ewikamikonk, ekiih​saahsaakicinisha'waatc kahkina i'i kaakii'ataawewikamikohkenitc kaye kaakii'ataawenitc i'imaa piinci Kihcianami'ewikamikonk, ekii'ohpimewepinank toohpowinaahkoon kaakii'ishi​ayaanitc i'i kaameshkotoonikenitc, ekii'ohpimewepinank kaye tehsapiwinan kaakii'ishi​ayaanitc i'i kaakii'ataawaakenitc omiimii'. 13 Okii'inaa' itahsh: "Mii​hsa eshipii'ikaatek Kihcimasina'ikan Kishemanitoo ekii'ihkitotc: 'Niwaahkaa'ikan hsa taishinihkaate anami'ewaahkaa'ikan,' kiinawaa tahsh e'ishinaakohtooyek taapishkoo ciokaasowikamikowaatc omahkancweshkak!" 14 Kaawaapihsinik i'i kaye kaamaahkisinitc okiih​pinaasihkaakoo' i'imaa piinci anami'ewikamikonk, miitahsh kaa'ishi​minoayaa'aatc. 15 Kihcianami'ewikimaak, iki kaye kaakihkino'amaakewaatc Onahshowewin kiinishkaatisiwak e'waapantamowaatc aaniin Ciisahsoon kaakii'ishi​maamahkaacihcikenitc, i'i kaye apinoonciisha' ekiih​shaakowenitc i'imaa piinci Kihcianami'ewikamikonk: "Tananaahkomaa a'a Tepitink kaaontahkaanesitc!" 16 Miitahsh kaa'inaawaatc Ciisahsoon: "Kinoontawaak ina ehkitowaatc?" Ciisahs tahsh okii'ishi​nahkwehtawaa': "Miinanke ninoontawaak. Kaawiin ina kitoonci​anamihtoohsiim o'o eshipii'ikaatek: 'Kikii'ishi​kihkino'amawaak ihsa iki apinoonciishak, pooshke kaye kaanooniwaatc, cinihtaakwayahk​nanaahkomiwewaatc,' " okii'inaa'. 17 Miitahsh i'i kaa'ishi​nakanaatc, i'imaa ootenaank ekii'onci​maacaatc. Weti tahsh Pehtaniink (Bethany) kii-ishaa ekii'anta​nipaatc. 18 E'ani​waapaninik tahsh Ciisahs kiihkiiweishaa weti kihci'ootenaank. Enipimi​ayaatc tahsh kii'noontewii'wiihsini. 19 E'waapamaatc itahsh shoomini kihtikaanaahtikoon pik (fig) ehtinowaahtikowinitc, ekii'mihkansik tahsh kekoonini, aniipiihshan ehta, miitahsh kaakii'inaatc ini mihtikoon: "Kaawiin ihsa miinawaa wiihkaa kikashoominiwihsii." Miitahsh i'i shemaak a'a mihtik kaa'ishi​paahsotc. 20 Kihkino'amawaakanak tahsh kiimaamahkaatentamook e'waapamaawaatc mihtikoon kaaishihsenitc, ekii'ihkitowaatc: "Wekonen wencikishiipaahsotc a'a mihtik?" 21 Ciisahs tahsh okii'inaa': "Mii hsa piko eshi​tepweyaan o'o kaaininakook, kiishpin tepweyentamek, aanwehtansiwek kaye, kitaa​kashkihtoom ci-ishihcikeyek taapishkoo kaakiih​tootawak a'a shoominikihtikaanaahtik. Kaawiin ehta i'i kitaaishi​kashkihtoohsiim. Kiishpin hsa itamek i'i pihkwatinaa: 'Mayaawiin, antapahkopiikwaashkwanin kihcikamiink,' mii​hsa​'i keishihsekipan. 22 Kiishpin tepwehtamek, kikamiinikoowisim wekonen​iko kekakwetweyek ahpii anami'aayek," okii'inaa'. 23 Miinawaa tahsh Ciisahs okiih​pikiiwe​naasihkaan i'i Kihcianami'ewikamik. Mekwaa tahsh ekihkino'amaaketc, Kihcianami'ewikimaa' i'i kaye kaaniikaanisinitc Coowa', okiih​pinaasihkaakoo' ekii'ishi​kakwecimikotc: "Wekonen tino kashki'ewisiwin kaa-aapacihtooyan ono kaaishihcikeyan? Awenen kaye kaamiinihk i'i kashki'ewisiwin?" 24 Ciisahs tahsh okii'ishi​nahkwehtawaa': "Peshik tahsh kekoon keniin kiwiih​kakwecimininim. Kiishpin nahkwehtawiyek, kikawiintamawininim tahsh wekonen tino kashki'ewisiwin kaaonci-ishihcikeyaan o'o kaaishihcikeyaan. 25 Aanti kaaonciinik a'a Cwaan (John) osiika'antaakewin? Kishemanitoonk ina komaa kaye ininiihkaank?" okii'inaa'. Miitahsh kaa'ishi​maacii​kakanoonitinitc ekii'wawaanentaminitc. Miitahsh kaa'ihkitonitc: "Kiishpin ihkitoyank 'Kishemanitoonk', kikaikonaan tahsh 'Wekonen tahsh kaaonci​tepwehtawaahsiwek a'a Cwaan?' 26 Kiishpin kaye ihkitoyank 'Ininiihkaank', kikohsaanaanik ihsa iki kaapaahtiinowaatc, aaniihsh kahkina Kishemanitoo otipaacimowininiiman otinakimaawaan ini Cwaanan," kii-ihkitowa'. 27 Miitahsh kaa'ikotc Ciisahs: "Kaawiin ninkihkentansiimin." Miitahsh kaa'inaatc: "Kaawiin tahsh keniin kikawiintamawihsinooninim wekonen tino kashki'ewisiwin kaa-aapacihtooyaan o'o kaaishihcikeyaan." 28 "Aaniin enentamek? Kii'ayaa hsa inini ekii'niishinitc 2 okosihsa'. Okii'inaan tahsh ini kaakiih​sasiihkisinitc: 'Ninkosihs, taka antawanohkiin shoominaahtikowikihtikaanink noonkom kaakiishikahk.' 29 Miitahsh kaa'ikotc: 'Taka mii​'i.' Naanaake tahsh kiiaantentamoon, ekii'anta​wanohkiinitc. 30 Otetemaa tahsh okii'naasihkawaan ini kotak okosihsan ekii'inaatc ciantawanohkiinitc. Miitahsh kaa'ikotc: 'Haw, ninka​ishaa.' Kaawiin tahsh kii-ishaahsiiwan. 31 Aan enentamek a'aweti okosihsimaa kaa'ishihciketc kaakii'ishi​mihsawentaminitc oteten?" Miitahsh kaa'ikotc: "Kaasasiihkisitc maawiin." Ciisahs tahsh okii'ani-inaa': "Tepwe kiwiintamawininim, kaatipa'ike'iwewaatc, pihshikwaacihkwek kaye kitaacina'ikowaak e'otookimaahkantaakowaatc Kishemanitoon. 32 Cwaan (John) Siika'antaakewinini ohsha kiihpiishaa ekii'waapanta'inek i'i kekii'ishikwayahkwaatisiyekipan. Kaawiin tahsh kikiih​tepwehtawaahsiwaawaa. Iki tahsh wiin kaatipa'ike'iwewaatc iki kaye pihshikwaacihkwek okiih​tepwehtawaawaan. Kiinawaa tahsh wiin mihsawaa ko ekii'waapamekwaa kaawiin kikii'aantentansiim, pooshke naake piko cikiih​tepwehtamekipan." 33 Ciisahs tahsh kii-ihkito: "Pisintawihshik miinawaa ewii'awehcikeyaan. Kiiayaa hsa kihtikewikimaa ekiih​kihtikaanaatc shoomina' kaaishi​kihtikaasonitc oshoominikihtikaanink. Ahsinii' itahsh kaye okii'waahkaayaapihkihshimaa' okihtikaanink ekii'menikanihketc. Kiiwaanihke kaye ketashisiiskopiikishkawimintc i'i shoomina', onsaapiwin kaye okii'oshihtoon. Miitahsh kaa'ishi​awi'aatc okihtike' cinaakacihtamaakotc, paanimaa kewiin i'imaa meshkwac cionci​ontisitc. Miitahsh kaa'ishi​maacaatc. 34 Ahpii tahsh e'ocihcihsenik cimawinswaasonitc i'i shoomina', okii'ishinisha'waa' ihsa otanohkii'aakana' i'imaa kaaishi​kihtikaasonitc shoomina' kewiin i'imaa ewii'ontisitc minihk kekii'ontisihpan. 35 Kaakii'awi'intwaa tahsh okii'otihtinaawaa' i'i anohkii'aakana', ekiih​kihciniiwana'waawaatc peshik, ekii'nihsaawaatc ini kotak peshik, ekiih​papiimwahsina'aawaatc kaye peshik. 36 Miinawaa tahsh a'a kihtikewikimaa okii'ishinisha'waa' otanohkii'aakana' awahshime ekiih​paahtiinonitc, miitahsh iki kihtikewininiwak peshikwan kaahtootawaawaatc. 37 Ishkwaac tahsh okii'ishinisha'waan okosihsan, ekii'ihkitotc: 'Oka​kihtenimaawaan ihsa ini ninkosihsan.' 38 Ahpii tahsh kihtikewininiwak e'waapamaawaatc ini okosihsimaan, miitahsh kaa'ihkitowaatc: 'Mii​hsa ini kihtikewikimaa okosihsan. Ampeyohk taka nihsimaataanin, ciayaawank i'i kaawiih​tipinawewisinitc!' 39 Miitahsh okii'otihtinaawaan, ekiih​saakiciwepinaawaatc i'imaa kihtikaanink, ekii'nihsaawaatc kaye. 40 "Aaniin tahsh ketootawaatc a'a kihtikewikimaa kaatipentank shoominikihtikaanini i'i kaakii'awi'aatc ahpii takohshink?" okii'inaa'. 41 Miitahsh kaa'ikotc: "Kekeht ihsa maawiin oka​kakwaatakinihsaa' i'i macikihtikewininiwa', kotak tahsh kihtikewininiwa' oka-awi'aa' kemiinikotc kekii'onci​ontisihpan ahpii mawinswaaniwaninik," kii-ihkitowa'. 42 Ciisahs tahsh okii'inaa': "Kaawiin ina kitonci​anamihtoohsiim kaaishipii'ikaatek Kehtemasina'ikanink? 'Ini hsa ahsiniin kaakii'aanawenimaawaatc iki owaahkaa'ikek mii​hsa 'a maawac kaakiih​kihci-inentaakositc ahsin. Aaniihsh kaaTipenciketc i'i otishihcikewin. Aahpici tahsh maamahkaasinaakwan,' ishipii'ikaate. 43 "Miitahsh o'owe wenci-ininakook: Kika​mahkamikoom ihsa i'i Kishemanitoo oTipencikewin meshkwac cimiinintwaa iki kotak pemaatisiwaatc kenaakohtoowaatc Kishemanitoon kaa-antawentaminitc," okii'inaa'. 44 ["Awenen hsa kepankihshink i'imaa wakiciahsin tapikishkihshin. A'a tahsh kepatakoshkaakotc ini ahsiniin, wiinke tashikoshkooso, taapishkoo kekoon kaapaashkinehsek taishinaakosi."] 45 Kihcianami'ewikimaak tahsh, Perahsiik (Pharisees) kaye, ekii'noontawaawaatc Ciisahsoon o'o e'ishi​awehcikenitc, okiih​kihkentaanaawaa hsa wiinawaa ekiih​tashimikowaatc. 46 Miitahsh kaa'ishi​kakwetahkonaawaatc, shaakooc itahsh okiih​kohsaawaa' i'i kaakiih​paahtiinonitc, aaniihsh okii'inakimaani ini Ciisahsoon Kishemanitoo otipaacimowininiiman ehtinowinitc.

Maahtiyo 22

1 Miinawaa hsa Ciisahs kii'awehcike ehkakanoonaatc awiya': 2 "Ahpii Kishemanitoo kiishihsitootc oTipencikewin, mii​'i keishinaakwahk, taapishkoo kihciokimaa kaakii'wiihkwanketc ewiih​kihciwiitikenitc okosihsan. 3 Okii'maacinisha'waa' tahsh otanohkii'aakana' cipapaa-antonkenitc cipishaaniwaninik i'imaa kaawii'ishi​wiihkwantinaaniwaninik. Kaawiin tahsh kiiwiih​piishaahsiiwa' i'i kaakii'antomaahpan. 4 Kotak itahsh otanohkii'aakana' okii'maacinisha'waa' ekii'inaatc: 'Kanoonihkwak iki aasha kaakii'antomintwaa: "Aasha ohsha kiihkiishihcikaate kaawii'wiihkwankaakeyaan. Nintaapepishihkiimak, iki kaye kaakii'aanciponintwaa pishihkiinhsak aasha kiihkiishishikaniwiwak. Aasha hsa kahkina kekoon kiihkiishihcikaate. Haw pimianta​wiihsinik kaawii'ishi​wiihkwankeyaan!" ' 5 Iki tahsh kaakii'antomintwaa kaawiin kiihpapaamihtansiiwak, aanciko hsa ekii'anohkiiwaatc, peshik ekii'ishaatc okihtikaanahkamikonk, kotak tahsh otataawewikamikonk; 6 kotak tahsh ekii'otihtinaawaatc i'i anohkii'aakana' kaakiih​papaa-antonkenitc, ekiih​pahpahkihte'waawaatc, ekii'nihsaawaatc kaye. 7 Kihciokimaa tahsh wiinke kiinishkaatisi, ekii'ishinisha'waatc oshimaakanihshiima', cinihsaanitc i'i kaakii'nihshiwenitc, ekiih​sahka'aminitc kaye otootenaamini. 8 Okiih​kanoonaa' tahsh otanohkii'aakana': 'I'i hsa wiitikewiihkwantiwin aasha kiihkiishihcikaate, shikwa tahsh i'i kaakii'antomintwaapan kaawiin kiihte​ahpiihtentaakosihsiiwak. 9 Maacaak tahsh kihcimiihkanaank ci-ishaayek, minihk iko kewaapamekwaa pemaatisiwaatc, antomihkwak cipi​wiihsiniwaatc kaawii'ishi​wiihkwankeyaan,' okii-inaa'. 10 Miitahsh iki anohkii'aakanak kaa'ishi-ishaawaatc misiwe miihkanaank ekii'antomaawaatc, aaninta hsa kwayahk ekiih​pimaatisinitc, kotak kaye ekii'macipimaatisinitc peshikwan okii'ishi​maamawiantomaawaa', piinihsh wiinke kiimooshkinepiwak kaakii'ishi​kihciwiitikentinaaniwank. 11 "Kihciokimaa tahsh kiihpiintike ewii'waapamaatc i'i kaakiihpianta​wiihsininitc. Okii'waapamaan tahsh peshik ininiwan kaakii'mino'ohsinik. 12 Okii'inaan tahsh: 'Niicii, aanti kaaonci​piintikeyan e'mino'ohsiwan?' A'a tahsh inini kiihkwiinawi-ihkito. 13 Kihciokimaa tahsh okii'inaa' otanohkii'aakana': 'Mamaancikwahpinihk a'a inini oninciink, ositink kaye, akwaciink ishiwepinihk kaashi​kashkiitipihkaninik! Miitahsh weti kaashi​mawinaaniwank, mii kaye weti keshi​mamatweyaapitehsenaaniwank keahpiihci​wiihsakentamonaaniwank.' " 14 Ciisahs kii'ani-ihkito: "Niipowa' hsa aana antomaawak, ta-akaahsiinowak tahsh ehta keotaahpinintwaa." 15 Perahsiik (Pharisees) tahsh inkoci kii'ishaawak ekii'awi​tashintamowaatc aaniin keishi​kakwecihcikaniwinitc Ciisahsoon sesik keshi​nahkwehtansinik. 16 Okihkino'amawaakaniwaa' itahsh okii'ishinisha'waawaa', ekiih​takowiiciiwaanitc aaninta Heratan (Herod) kaawiici'ikonitc. Miitahsh ekii'inaanitc: "Okihkino'amaake, kikihkenimikoo aahpici e'nihtaatepweyan, kwayahk e'ishi​kihkino'amaakewatc kaye aaniin Kishemanitoo kaashi​antawenimaatc awiyan ci-ishipimaatisinitc, kaawiin kaye kiwanishkwe'ikohsiik aaniin awiyak enenimihkwaa, kikihkenimikoo kaye kahkina awiya peshikwan ehtootawatc kaatootawatc a'a peshik awiya. 17 Wiintamawihshinaam tahsh aaniin enentaman: kekiinawint ina ishinaakwan citipa'amank i'i taakihs (tax) kaatipa'ike'iwetc a'a Maawac iko Kihciokimaa weti Oroomink kaa-ayaatc?" okii'inaani. 18 Ciisahs tahsh okiih​kihkenimaa' ekii'maci-inentaminitc, miitahsh kaa'inaatc: "Kiinawaa ominwaatisiihshihtook! Wekonen wenci​kakweci'iyek? 19 Waapanta'ihshin a'a waapaapihko​shooniyaanhs kaa-aapatisitc kiitipa'amawimintc wekimaawaatisinitc," okii'inaa'. Okiih​piitamaakoo' itahsh peshik waapaapihko​shooniyaanhsan. 20 Miitahsh kaa'inaatc: "Awenen wa'a kaamasinihshink? Awenen o'oweni owiinsowin?" okii'inaa'. 21 Okii'ikoo' itahsh: "Maawac iko Kihciokimaa." Miitahsh kaa'inaatc: "Miinihk hsa a'a Maawac iko Kihciokimaa kaatipentank, miinihk itahsh kaye wiin Kishemanitoo kaatipentank," okii'inaa'. 22 Ahpii tahsh e'noontaakotc, wiinke kiihkihcimaamahkaatentamoo'. Okii'nakanikoo' itahsh ekii'ani​maacaanitc. 23 Peshikwan tahsh ehkiishikaninik aaninta Saacahsiik (Sadducees) okiihpi​antawaapamaawaan Ciisahsoon. Miiwak okoweniwak kaaishi​kihkino'ikewaatc: kaawiin awiya miinawaa takiiwepimaatisihsii ishkwaapimaatisitc. 24 Okiih​kakwecimaawaan: "Okihkino'amaake, Moosihs (Moses) tahsh kii'ishi​kihkino'amaake, kiishpin inini nipotc e'nakanaatc ini wiiwan, ekii'ayaawaahsikwaa apinoonciisha', wiicihkiweyan hsa oka​wiitikemaani ini wiiwan ciayaahtamaakotc apinoonciisha'. 25 Inashke tahsh kii'niishwaahciwak iki ininiwak ekii'wiicihkiwentiwaatc o'omaa kaashi​ayaayaank. Kaasasiihkisitc tahsh nihtam kii'wiiwi, ekii'nipotc tahsh ekii'ayaawaahsik apinoonciisha'. Miitahsh kaa'ishinaakwaninik ini kaakii'ani​ohshiimenshitc ciwiitikemaanitc ini kaakii'wiiwitc. 26 Miitahsh peshikwan a'a ohshiimenshimaa kaa'ishihsetc ekii'nipotc, a'a kaye kotak, piinihsh tahsh kahkina kaakii'niishwaahciwaatc kaakii'wiicihkiwentiwaatc ekii'ishihsewaatc. 27 Kewiin tahsh a'a ihkwe ishkwaac kii'nipo. 28 Kiiwepimaatisinaaniwank itahsh, awenen tahsh a'a mayaa kewiiwitc ini ihkwewan? Aaniihsh minciniishwaahso okii'wiitikemaawaan." 29 Ciisahs tahsh okii'inaa': "Etatawe hsa kikihciwanikihkino'ikem i'i kaaihkitoyek awiya cikiiwepimaatisihsik. Miitahsh i'i nahke kaaonci-ishikihkino'ikeyek ehkihkentansiwek aaniin eshipii'ikaatek Kihcimasina'ikan, ehkihkentamowaahsiwek kaye Kishemanitoo omashkawisiiwin. 30 Ahpii hsa kiiwepimaatisiwaatc, kaanipowaatc ininiwak, ihkwewak kaye kaawiin tawiitikehsiiwak. Aaniihsh encala' enaatisinitc kihcikiishikonk eyaanitc tainaatisiwak. 31 I'i tahsh kaakiiwepimaatisinaaniwank, kaawiin ina wiihkaa kitanamihtoohsiim aaniin kaakii'ininek Kishemanitoo, ekii'ihkitotc: 32 'Niin ihsa Eparahaam (Abraham) oManitooman, Aaisik (Isaac) oManitooman, Cekap (Jacob) kaye oManitooman.' Mii​'owe ehkitonk, oko kaaoKishemanitoomiwaatc, mihsawaa aana inintwaa e'nipowaatc, keyaapi ohsha pimaatisiwak," okii'inaa'. 33 Ekii'noontaakotc tahsh kaapaahtiinonitc, okii'maamahkaatenimikoo' i'i kaakii'ishi​kihkino'iketc. 34 Perahsiik (Pharisees) tahsh kii'ohkonaasihkotaatiwak ahpii ekii'noontamowaatc Ciisahsoon ekiih​shaakoosomaanitc i'i Saacahsii' (Sadducees). 35 Peshik tahsh kaakihkino'amaaketc Onahshowewin okiihkakwe​wanikiishwe'aan ekiih​kakwecimaatc: 36 "Okihkino'amaake, wekonen maawac kehci-inentaakwahk i'imaa Onahshowewinink?" kii'ihkito. 37 Ciisahs tahsh okii'inaan: " 'Kitaasaaki'aa Tepenciketc kiKishemanitoom i'imaa misiwe kite'ink, i'imaa kaye misiwe kitahcaahkonk, i'imaa kaye misiwe kinaakatawentamowinink.' 38 Mii ohsha i'iwe maawac kaaniikaanentaakwahk, kehci-inentaakwahk onahshowewin. 39 Kotak itahsh eni​aanihke​kihci-inentaakwahk onahshowewin, kekaa mii peshikwan eshihsink: 'Cisaaki'atipan kiicipimaatis taapishkoo kaaishi​saaki'itisoyan.' 40 Ono ohsha niishin onahshowewinan kaawiintamaan, mii 'imaa eshi​maamawahtenikin kahkina otOonahshowewin Moosihs, kaashi​kihkino'ikenitc kaye Kishemanitoo otipaacimowininiima'," kii'ihkito. 41 Mekwaa tahsh e'maawaci'itinitc Perahsii' (Pharisees), Ciisahs okiih​kakwecimaa': 42 "Aaniin enenimimek Kishemanitoo Kaaonaapamaatc? Aanti kepiontahkaanesitc?" Okii'ikoo' itahsh: "Tepitink (David) ohsha taontahkaanesi." 43 Ciisahs tahsh kii'ishi​kakwetwe: "Wekonenini tahsh Tepit ehkikishkaakotc ini Kishemanitoon otAhcaahkoni, kaa'onci-ishinihkaanaatc, 'Tepencikeyan'? Inashke Tepit kii'ihkito: 44 'KaaTipenciketc okii'inaan ini kaaTipenimimitc: I'imaa ishinamatapin ninkihcinihkink inahke, paanimaa hsa kikaishi'in cishaakooci'atwaa kaanishkenimihkwaa.' 45 Miihsh i'i a'a Onaapamaakan kaaonci-ikotc Tepitan 'Tepencikeyan' e'ikotc. Aaniin tahsh inaa keishihsekipan ci-ishi​ontahkaanesitc Tepitink?" kii'ihkito. 46 Kaawiin tahsh awiyan aapiinc iko okii'nahkwehtaakohsiin. Miitahsh i'i ahkonaak ehkiishikaninik kaawiin awiyan miinawaa wiihkaa kekoonini awahshime okii'onci​kakwecimikohsiin, aaniihsh kaawiin awiyan kiihte​pakenimohsiiwan cikakwecimikotc.

Maahtiyo 23

1 Ciisahs tahsh okiih​kakanoonaa' kaamaamawiinonitc, i'i kaye okihkino'amawaakana' 2 ekii'inaatc: "Iki hsa kaakihkino'amaakewaatc Onahshowewin, iki kaye Perahsiik (Pharisees), inanohkiiwak ciwaawiintamaakewaatc aaniin kaaishipii'ikaatek Moosihsoon otOonahshowewinini. 3 Ishihcikewaahk tahsh kaaininekwaa, tootamowaahk kaye kaashi​anooninekwaa. Keko tahsh wiin ishihcikehkek kaaishihcikewaatc. Aaniihsh mihci-inwaanitisowak, kaawiin tahsh ishihcikehsiiwak kaaihkitowaatc. 4 Miitahsh kaye eshihcikewaatc, ehkosikwaninik kekoonini opihciwane'aawaa' pemaatisinitc, e'akohpitamawaawaatc ohpihkwaniniink kehcinaac iko cipimiwitoonitc. Kaawiin tahsh wiinawaa kanake peshik ciwii'aapacihtoowaatc oniihsiikinincaaniwaa ciwii'wiici'aawaatc ehpimiwanenitc. 5 Kahkina kaye kekoonini ishihcikewak ciwaapamikowaatc pemaatisinitc. Inashke waapantamowaahk ehpiihci​mihcaanikin ini anami'emashkimootenhsan kaanaapishkamowaatc oskahtikowaank, onihkiwaank kaye. Inashke kaye ehpiihci​kinwaapiikaninikin kaashi​niihsiikikwaacikaatenikin okikishkikaniwaan. 6 Aahpici kaye ewii'minwapiwaatc mooshak kiiwiihkwantinaaniwaninik, kaye mamayehc iko kaaishpentaakwaninikin apiwinan ehta ewii'ishi​apiwaatc i'imaa anami'ewikamikonk. 7 Mii ehta eshi​antawentamowaatc cikihtenimintwaa ehpooshoo'intwaa ataawewikamikohkaank, mamayehc iko kaye ehta ci-inintwaa 'okihkentaahso'. 8 Kiinawaa tahsh wiin kaawiin okihkentaahso kikaishinihkaanikoohsiim, aaniihsh kiinawaa kahkina kitoowiicihkiiwentim. Mihcipeshiko ehta kaakihkino'amawinek. 9 Kaawiin kaye 'ninTetenaan' kikaishinihkaanaahsiwaawaa awiya o'omaa ahkiink. Aaniihsh mihcipeshiko kiTetewaa kihcikiishikonk kaa-ayaatc. 10 Keko kaye kikaishinihkaanikoohsiim kaaniikaanishkaaketc. Aaniihsh mihcipeshiko a'a kaaniikaanishkawinek, mii​hsa Kishemanitoon Kaakii'onaapamikotc ciTipenciketc. 11 Awiya hsa kaakihci-inentaakositc, mii​hsa a'a kepami'inek. 12 Awiya hsa kaaishpenintisotc, tatapahsenimaa. Awiya hsa kaatapahsenintisotc, mii hsa 'awe keishpentaakositc." 13 "Aahpici hsa kikaocaanimisim, kiinawaa kaakihkino'amaakeyek Onahshowewin, kekiinawaa Perahsiik (Pharisees)! Kiinawaa kaaminwaatisiihshihtooyek! Aaniihsh kikipa'amowaam Kishemanitoo eshi-ishkwaantemiwaninik oTipencikewin cipiintikehsikwaa pemaatisiwaatc, kaawiin tahsh kekiinawaa kipiintikehsiim. Kaawiin kaye kipakitinaahsiwaawaak iki kaawiih​piintikewaatc. 14 [Kika​ocaanimisim Onahshowewikihkino'amaakek, Perahsiik kaye, kaaminwaatisiihshihtooyek! Aaniihsh kitootaahpinamawaawaak owaahkaa'ikaniwaan iki kaakiiwaacihtoowaatc ihkwewak, miitahsh kinwesh eshi​kaakiikitoyek kiianami'aayek ciwaapamikooyek. Aahpici tahsh kikanankimiinikoom kakwaatakihtoowin.] 15 "Kika​ocaanimisim, kaakihkino'amaakeyek Onahshowewin, kekiinawaa Perahsiik! Kiinawaa kaaminwaatisiihshihtooyek! Misiwe kipapaaishaam kihcikamiink, misiwe kaye ahkiink, ehkakwekashkimek awiya cipiminisha'onek. Ahpii tahsh ehkashkimek, miitahsh awahshime eshinaakositc ci-ishaatc maci-ishkotenk ahpiihc kiinawaa. 16 "Kika​ocaanimisim, kiinawaa kaawaapihsiwek e'niikaaniihtamaakeyek tahsh, o'o hsa e'ishi​kihkino'ikeyek: 'Awiya hsa kiiahpi​ahshotamaaketc kaashi​kohtaanentaakwahk piintik Kihcianami'ewikamikonk, kaawiin memwehc taishihcikehsii kaaishi​ahpimotc. Awiya tahsh kiiahpi​ahshotamaaketc ini osaawishooniyaan i'imaa piintik kaa-ayaanitc Kihcianami'ewikamikonk, mii​hsa 'iweni ketootank kaakii'ahshotamaaketc,' mii 'i eshi​kihkino'ikeyek. 17 Kiinawaa kekiipaatisiyek, e'waapihsiwek kaye! Aaniin i'iwe maawac kehci-inentaakwahk? Osaawishooniyaa, komaa kaye kaakohtaanentaakwahk Kihcianami'ewikamik kaashi​aapatisitc osaawishooniyaa? Mii iitok i'imaa kaaonci-inencikaniwitc osaawishooniyaa ehtipenimikotc Kishemanitoon. 18 E'ihkitoyek kaye: 'Kiishpin hsa awiya ahpi​ahshotamaaketc i'iweni kaashi​pakitinikenk, kaawiin memwehc taishihcikehsii i'i kaakii'ihkitotc. Awiya hsa kaa-ahpi​ahshotamaaketc miikiwewin i'imaa kaashi​pakitinikenk kaa-ahtenik, mii​hsa 'awe keishihciketc,' e'ihkitoyek. 19 Kiinawaa kaawaapihsiwek! Wekonen kehci-inentaakwahk maawac, i'iwe na miikiwewin, komaa kaye kaashi​pakitinikenaaniwank? Awahshime iitok kihci-inentaakwan i'iwe kaashi​pakitinikenk, aaniihsh mii​'imaa ahpii kiitashi​miikiwaaniwank Kishemanitoo eshi​maaciitipentank. 20 Awiya hsa kaa-ahpi​ahshotamaaketc i'iweni kaashi​pakitinikenk, mii​hsa e'ishi​ahshotamaaketc i'iweni kaashi​pakitinikenaaniwaninik, iniweniwan kaye kahkina pakitinikewinan. 21 Awiya kaye kaa-ahpi​ahshotamaaketc i'i kaashi​kohtaanentaakwaninik Kihcianami'ewikamikonk, mii​hsa e'ishi​ahshotamaaketc i'iweni Kihcianami'ewikamikoni, ini kaye Kishemanitoon i'imaa kaaishitaanitc piintik. 22 Awiya kaye kaa-ahpi​ahshotamaaketc i'iweni kihcikiishikoni, mii​hsa eshi​ahshotamaaketc Kishemanitoon otookimaawapiwininiink, ini kaye i'imaa kaa-apinitc. 23 "Kika​ocaanimisim, kaakihkino'amaakeyek Onahshowewin, kekiinawaa Perahsiik! Ominwaatisiihshitook! Weweni hsa kitoonci​miinaawaa Kishemanitoo peshik kekoonini entahsomitaahcink kaanihtaawikihtooyek, taapishkoo kaashi​miikiweyek takosehkwaanan mint (mint), til (dill), kamin (cummin) kaaicikaatekin. Shikwa tahsh ehtootansiwek ini mayaa kaakihci-inentaakwahkin i'imaa kaaoshipii'ikaatekin Onahshowewinink kekiih​tootamekipan. Miiwan ihsa ini weweni cionaahkonekwaapan awiyak, cikoohpaasinaakeyekipan, cikishewaatisiyekipan, citepweyentaakosiyekipan kaye. Miiwan ohsha ono kekii'ishihcikeyekipan, ini kaye kotak citootamekipan onahshowewinan. 24 Kiinawaa kaawaapihsiwek, e'niikaaniihtamaakeyek tahsh! Kisiiskoopiikinaam hsa nipi cipwaa minihkweyek cikonaahsiwek pihkociinhsi, shaakooc tahsh kikonaawaa pihkwaawikanemihtatim. 25 "Kika​ocaanimisim, kaakihkino'amaakeyek Onahshowewin, kekiinawaa Perahsiik! Kiinawaa kaaminwaatisiihshihtooyek! Saakicaya'ii aaniihsh kitishi​pehkihtoom kiminihkwaakaniwaan, kitoonaakaniwaan kaye. Piincaya'ii tahsh kimooshkinahtoom kekoonan kaakii'ontinamek kimahkantwewiniwaank, kitayoonsaamisiwiniwaank kaye. 26 Kiin kaawaapihsiwan Perahsii! Pinamaa hsa pehkihtoon kiminihkwaakanink, kitoonaakanink kaye piincaya'ii kaa-ayaakin, miitahsh i'i payesh cipehkinaakwahkin saakicaya'ii. 27 Kika​ocaanimisim kaakihkino'amaakeyek Onahshowewin, kekiinawaa Perahsiik! Kiinawaa kaaminwaatisiihshihtooyek! Taapishkoo hsa mii​'iwe enaatisiyek, kaawaapishkipii'ikaatekin ini na'initiiwikamikoon, mii​hsa ehpiihci​minonaakwahkin akwaciink. Piintik tahsh wiinke mooshkinewan nipowikanan, wiinke kaye ehpikishkanatahkin e'wanaatahkin. 28 Miitahsh peshikwan ehpiihci​minonaakosiyek awiyak e'waapaminekwaa. Piincaya'ii tahsh kitishite'em misiwe e'minwaatisiihshihtooyek, wiinke kaye paahtiinatin macitootamowin." 29 "Kika​ocaanimisim kiinawaa kaakihkino'amaakeyek Onahshowewin, kekiinawaa Perahsiik! Kiinawaa kaaminwaatisiihshihtooyek! Aahpici hsa kiminohtoom kaa'ishina'inintwaa iki Kishemanitoon kaakiih​kanootamawaawaahpan, aahpici kaye ehkakweminonaako'ekwaa ahsinii' kaakihkinawaacihshimimintc aanti eshi​pimihshinowaatc iki kaakiih​kwayahkwaatisiwaatc. 30 Kaye hsa e'ihkitoyek: 'Kiishpin niinawint pimaatisiyankipan ahpii kiipimaatisiwaatc iki mewisha kaakii'okehteya'aamiyank, kaawiin niinawint nintaakii'ishihcikehsiimin kaakii'ishihcikewaahpan, ekii'nihsaawaatc kaakiih​kanootamawaanihpan Kishemanitoon.' 31 Miitahsh e'wiintamek kiinawaa ekiihpi​onciiyek i'imaa hsa iki kaakii'nihsaawaatc kaakiih​kanootamawaanihpan Kishemanitoon. 32 Pisaan tahsh iko kiishihtook kaakii'maacii-ishihcikewaakopanen mewisha kikehteya'aamiwaak! 33 Kiinawaa hsa kinepikook, macikinepikook kaye kaanihtaawiki'inekwaa! Aanti tahsh enentamek keonci​kashkihtooyek ci-inaahkonikoohsiwek maci-ishkotenk ci-ishaahsiwek? 34 Kiwiintamawininim tahsh, kikaishinisha'amawininim hsa iki otipaacimook, kaakakiihtaawentamowaatc kaye, okihkino'amaakek kaye. Aaninta tahsh kikanihsaawaak, aaninta kaye aashiteyaahtikonk kika-akosaka'waawaak, aaninta tahsh kikapahpahshanshe'waawaak i'imaa kaashi​ayayaanikin kitanami'ewikamikowaank cipapaamaamohkiiyek eshi​ayootenaawaninik. 35 Miitahsh o'o kiinawaa keonci​nana'ahsikooyek, kaakiih​tootawintwaa kahkina kaakiih​kwayahkwaatisiwaatc kaakiih​pinihsintwaa. Kaakiih​kwayahkwaatisitc Epal (Abel) nihtam kii'nihcikaniwi. A'a tahsh Sehkaraaya (Zechariah) kaakii'okosihsimikotc Perahkaayawan (Berechiah), ishkwaac kiinihcikaniwi. Mii hsa 'awe Kihcianami'ewikamikonk kaakiih​tashinihsintc i'imaa nahsawaya'ii kaakii'ishi​ayaanik kaakii'ishi​kohtaanentaakwaninik piintik, i'imaa tahsh kaye kaakii'ishi​pakitinaahsonaaniwaninik. Kiinawaa hsa iitok tino kaakii'nihsek. 36 Kekeht tahsh kitinininim: i'iweni hsa okakwaataki'ikoowiniwaa iki kahkina kaakii'nihshiwewaatc, oka​pakamishkaakonaawaa noonkom kaapimaatisiwaatc." 37 "Oo Ceroosalam (Jerusalem)! Kiinawaa Ceroosalamink kaa-ayaayek! Kiinawaa kaanihsekwaa kaakanootamawaawaatc Kishemanitoon, kaapapiimohsina'ekwaa kaye owiintamaake' Kishemanitoo kaaishinisha'amawinek! Mooshak hsa ekii'ishi​mihsawentamaan ewii'maawantooninakook taapishkoo nooshe paahka'aahkwaan kaaishi​tapinawishkawaatc oniicaanihsa' i'imaa anaami ninkwiikanink. Kaawiin tahsh kikiih​pakitinihsiim. 38 Miitahsh kiKihcianami'ewikamikowaa tanakacikaate, tapishihshikwaa kaye. 39 Kitinininim, kaawiin tahsh wiihkaa miinawaa kikawaapamihsiim, paamaa hsa ahpii ocihcihsek kii-ihkitoyek: 'Tashawentaakosi wa'a kaapi​takohshink i'imaa otishinihkaasowininiink ini kaaTipencikenitc.' " Mii 'i kaa'ihkitotc.

Maahtiyo 24

1 Ciisahs tahsh ekii'anionci​maacaatc i'imaa Kihcianami'ewikamikonk okihkino'amawaakana' okiihpi​antawaapamikoo' ewii'waapanta'ikotc aaniin kaaishihcikaatenikin Kihcianami'ewikamikonk kaakii'onci​tipentaakwaninikin ishimaaciiwinan. 2 Okii'inaa' itahsh: "Pisaan​iko waapantamohk ono ishimaaciiwinan. Kiwiintamawininim tahsh, iki hsa ahsiniik kaawaapamekwaa i'imaa kaaishi​apiwaatc kaawiin ta-apihsiiwak, aaniihsh kahkina tanaaniihsiwepinikaasowak." 3 E'namatapitc itahsh i'imaa pihkwatinaank Aalip (Olive) Kihtikaanaahtikohkaank e'ishinihkaatenik, okihkino'amawaakana' okiih​pinaasihkaakoo' ekiih​kiimooci​kakwecimikotc: "Wiintamawihshinaam aaniin ahpii keishihsek i'iwe kaa'ihkitoyan. Aaniin keonci​nihsitawinaakwahk wiihpi​takohshinan, wii'ishkwaahsekin ono kekoonan mekwaa kaawaapantamank." 4 Ciisahs hsa kii'ihkito: "Ayaankwaamisik, ciwaniwinihsinowinek awiya. 5 Aaniihsh tapaahtiinowak cipi​takohshinowaatc i'imaa nintishinihkaasowinink ci-ihkitowaatc: 'Niin hsa Kishemanitoo otOonaapamaakanan.' Niipowa' itahsh oka​waniwinaawaa' pemaatisinitc. 6 Kika​tepihtaam hsa 'i miikaatiwin, kikanaanoontaam kaye e'maamiikaatinaaniwank. Keko tahsh sekisihkek. Pinamaa hsa o'o taishihse cipwaa ishkwaahsekin ono kekoonan mekwaa kaawaapantamank. 7 Takihci​miikaatiwak hsa pepahkaan kaatahswewaanakisiwaatc o'omaa ahkiink, kaye kaatahsinkin okimaawiwinan. Pepahkaan misiwe miicim tanaanoontehse, pepahkaan kaye ahkiink taishi​kohkoshkohse. 8 Ono tahsh kaawiintamaan mii keshinaakwahkin taapishkoo ihkwe kaamaaciaahkositc ewii'waapamaawahsotc. 9 "Kika​tahkonikoom, kikamiikiwaaniwim kaye cikakwaataki'ikooyek, miitahsh keshi​nihsikooyek. Kahkina awiya entahswewaanakisitc kikashiinkenimikowaa niin onci. 10 Tapaahtiinowak kaye keaanawencikewaatc i'i ahpii. Tamamishintiwak kaye, tashiinkenintiwak kaye. 11 Miitahsh aahpici tapaahtiinowak keinwaanitisowaatc kaakanootamawaawaatc Kishemanitoon. Miitahsh niipowa' keshi​wanihshimaawaatc pemaatisinitc. 12 Keni​ahpiihci​paahtiinatihk itahsh macitootamowin, i'i hsa niipowa' pemaatisiwaatc kaaishi​saaki'itiwaatc, piinihsh kaawiin tani​saaki'itihsiiwak. 13 Awiya hsa keshashiipentank piinihsh weti ishiahpii kaawii'ishkwaahsek kekoonan noonkom kaawaapancikaatek, mii​hsa a'a kepimaaci'intc. 14 Pinamaa hsa o'o kaashi​minwaatotek o'o Kishemanitoo oTipencikewin tapapaatipaatote misiwe ahkiink kahkina pemaatisiwaatc cinoontamowaatc. Miitahsh i'i payesh kahkina kekoon ci-ishkwaahsek." 15 "Kika​waapantamowaam ihsa i'iweni kaawiih​kakwaanihsakinaakwaninik kaanihshiwanaacihcikemakaninik Taaniyoo (Daniel) kaakiih​tashintank kaakiih​kiikitohtamawaatc Kishemanitoon. I'imaa hsa Kihcianami'ewikamikonk taishi​niipawiimakanini." Kiinawaa keanamihtooyek o'o, nihsitohtamohk! 16 "Miihsh i'iwe ahpii, iki hsa kaataawaatc i'imaa Cootiiyaahkaank (Judea) weti hsa ta-ahpa'iwewak kaashi​papiihkwatinaanik. 17 Awiya kaye kaashi​napakaanik wakiciwaahkaa'ikan kaa-ayaatc, kaawiin taishihsehsii aniniihsaantawetc cini​maaciitoohpan otaya'iiman i'imaa owaahkaa'ikanink. 18 Awiya kaye kaa-anohkiitc weti okihtikaanink kaawiin oka​pikiiwenotansiin cipinaasihkank i'i kaakiih​kiihcikoshkank okashkiikiiwin. 19 I'iwe tahsh ahpii kiishikahk, aahpici taocaanimisiwak iki ihkwewak kaakikishkawaawahsowaatc, iki kaye omaamaamaak kaanooni'aawaatc oniicaanihsiwaa'. 20 Anami'ehtawihk tahsh Kishemanitoo, cipipoonsinok, ciAnwepiiwi​kiishikahsinok kaye i'i ahpii maaciipa'iweyek. 21 I'iwe hsa maawac kaawiih​kihci'ocaanimahkamikahk, kaawiin wiihkaa pimi-ishiwepahsinoon ahpane kaaonci​maaciahkiiwank piinihsh noonkom kaakiishikahk. Kaawiin kaye miinawaa wiihkaa tani-ishiwepahsinoon. 22 Kishemanitoo aasha okiih​tahkwakintaan aaniin tahsokiishik kekihci-ishikiishikaninik. Kiishpin tahsh i'i ishihcikehsikipan, kaawiin awiya taapimaatisihsii. I'i tahsh aasha kaakii'onaapamaatc ewiih​pimaaci'aatc pemaatisinitc, miitahsh keonci​tahkwakintank tahsokiishik kekihci-ishikiishikaninik. 23 "Kiishpin tahsh awiya ininek: 'Ina onoweniwan Kishemanitoo otOonaapamaakanan!' komaa kaye: 'A'aweti hsa kaamatweayaatc!' keko awaac pankii tepwehtankek. 24 Tapaahtiinowak ihsa keinwaanitisowaatc Kishemanitoon otOonaapamaakanini, iki kaye keinwaanitisowaatc ehkiikitohtamawaatc Kishemanitoon. Mii​hsa iki kaawaniwishiwewaatc. Aahpici hsa tamamaantawihcikewak, miitahsh keonci​maamahkaacihcikewaatc, ciwaniwinaawaatc pooshke aasha Kishemanitoon kaakii'onaapamaanitc pemaatisinitc, kiishpin kashkihtoowaatc. 25 Pisintawihshik! Kikiishaaci​wiintamawininim hsa waa'ishiwepahk. 26 "Kiishpin tahsh awiya ininek: 'Weti hsa pikwatahkamik ayaa,' keko tahsh kiinawaa ishaahkek. Komaa kaye kikaikowaak: 'Inashke kiimooci​ayaa ihsa piintik i'imaa.' Keko tahsh tepwehtankek. 27 Taapishkoo hsa waapanonk e'onci​waahtehsek, ninkaapii'anonk itahsh e'inaahsahkwanehsek, mii​hsa keishinaakwaninik ahpii pitakohshink a'a Inini oKosihsan. 28 "Aanti hsa kaashi​ahtek kaanipoomakahk wiiyawimaa, mii​hsa i'imaa keshi​ohkopiicihsewaatc iki mihtashkihtikwaanaankek." 29 "Shemaak itahsh kii-ishkwaahsekin ini kaawii'ocaanimikiishikahkin, kiisihs ihsa takashkiitipihkisi, tipihkikiisihs kaye kaawiin tasaakaahsikehsii, wanankohshak kaye ishpimink taonci​pankihshinook, kaamashkawentaakwahkin ishpimink tapepahkaanihsewan. 30 Kekoon hsa tanaakwan keonci​nihsitawinikaatenik ewiih​takohshink a'a Inini oKosihsan i'imaa kiishikonk. Entahswewaanakisiwaatc pemaatisiwaatc o'omaa ahkiink hsa tamawiwak ahpii waapamaawaatc ini Inini oKosihsini pimi-ishi​takohshininitc i'imaa wahkwiink ishpimink kaa-akootenikin, eshi​mashkawisiinitc kaye eshi​kihciokimaawentaakosinitc. 31 Kihcipootaacikan ihsa tanoontaakwan, miitahsh a'a kepitakohshink keshi-ishinisha'waatc i'i otencalima' niiwink inahke kaaontaanimaninik, misiwe ahkiink cionci​maamooshakinaanitc i'i aasha kaakii'onaapamaatc pemaatisinitc ewiih​pimaaci'aatc." 32 "Kekoon tahsh onci​kihkentamohk a'a kaa-awehcikaasotc kihtikaanaahtik, pik (fig) kaatinwaahtikowitc. Kiishpin hsa i'i watihkwan kiiani​noohkahk, e'ani​saakipakihk, mii​hsa​'i aasha ewii'niipink. 33 Kekiinawaa tahsh waapantamek i'i kahkina kekoonan, mii​hsa cikihkentamek aasha e'ocihcihsek cimaacihsekin ini kaaininakook. 34 Maamihkawik tahsh o'o! Kaawiin hsa tacaakinipohsiiwak oko kaapimaatisiwaatc, mii​'i aasha kahkina ci-ishiwepahkin ono kaawiintamawinakook. 35 Mihsawaa ko kiishik, ahki kaye ishkwaahsekin, nintihkitowinan tahsh wiin kaawiin wiihkaa taishkwaahsehsinoonan kaashi​tepwemakahkin." 36 "Kaawiin hsa awiya okihkentansiin ahpii kiishikaninik, aaniin kaye ketahsotipa'ikaneyaanik i'i ahpii ocihcihsenik. Encalak kihcikiishikonk kaa-ayaawaatc kaawiin okihkentansiinaawaa, kaye niin oKosihsimaa kaawiin ninkihkentansiin. Mii ehta a'a Weyoohsimintc kehkentank. 37 I'i hsa kaakii'ishiwepahk mewisha ahpii Noowa (Noah) kiipimaatisitc, miihsa keishiwepahk ahpii Inini oKosihsan pitakohshininitc. 38 Ahpii tahsh cipwaa nihkipiik i'i ahki mewisha pemaatisiwaatc kii'waawiihsiniwak, kii'minihkwewak kaye, kii'wiitikentiwak kaye, piinihsh ahpane ehkiishikaninik Noowa kiipoositc i'imaa kihciciimaanink. 39 Kaawiin tahsh okiih​kihkentansiinaawaa aaniin kaainahkamikaninik, paanimaa hsa nipiini ekii'nihkipanikowaatc ekii'maaciiyaapokowaatc kahkina. Miitahsh peshikwan keishiwepahk ahpii Inini oKosihsan pitakohshininitc. 40 Niishin (2) hsa ininiwak anohkiiwaatc kihtikaanink, peshik hsa tamaaciicikaniwi, kotak tahsh tanakacikaniwi. 41 Niishin (2) ihkwewak pahkweshikanan kaapikishkataawanka'waawaatc, peshik hsa tamaaciicikaniwi, kotak tahsh tanakacikaniwi. 42 Ahshawaapik itahsh, aaniihsh kaawiin kikihkenimaahsiwaawaa ahpii kiishikaninik ketakoshink kiTipencikemiwaa. 43 Maamihkawik tahsh o'o, kiishpin inini kaatipentank waahkaa'ikanini kihkenimaatc ahpii waahpitakohshininitc okimoocishkan, kaawiin taanipaahsii, kaawiin kaye otaa​pakitinaahsiin ini okimoocishkan cipiikwa'aminitc cipipiintikenitc owaahkaa'ikanink. 44 Miitahsh peshikwan kekiinawaa keshi​oshiihtaayekipan mooshak, aaniihsh Inini oKosihsan tatakohshinoon ahpii tipa'ikanink kepii'imaahsiwek." 45 "Awenen hsa 'a kwayahk kaakakiihtaawentank anohkii'aakan? Mii​hsa a'awe kaamiinikotc otookimaaman kaamaacaanitc, citipenimaatc kotak anohkii'aakana' ciahshamaatc ahpii ocihcihsenik ciwiihsininaaniwaninik. 46 Aahpici hsa taminohse a'a anohkii'aakan ahpii takohshininitc otookimaaman e'waapamikotc e'ishihciketc kaakii'ishi​anoonikohpan. 47 Kekeht hsa kitinininim, a'a anohkii'aakan oka​miinikoon otookimaaman kahkina otaya'iimini cinaanaakacihtootc. 48 Kiishpin tahsh wiin macianohkii'aakan tinowihpan taainentam: 'Kaawiin hsa wiipa tatakohshinsii nintookimaam.' 49 Miitahsh keshi​maaciipahpahkihte'waatc owiitanohkiimaakana', ciwiiciwiihsiniimaatc ciwiiciminihkwemaatc kaye i'i ominihkwe'. 50 A'a tahsh tino anohkii'aakan tatakohshinoon otookimaaman ninkotink kiishikaninik ahpii ehpii'aahsik, ehkihkenimaahsik aaniin ahpii tahsotipa'ikaneyaanik ketakohshininitc. 51 Wiinke oka​kakwaataki'ikoon otookimaaman, miitahsh kaye ketootaakotc taapishkoo kaatootawimintc ominwaatisiihshihtoo'. Miitahsh weti ketashimawitc, mii kaye weti ketashimatweyaapitehsetc keahpiihcimincinawesitc."

Maahtiyo 25

1 "Ahpii hsa Inini oKosihsan piokimaahkantamintc kahkina kekoon, amii​hsa keishinaakwahk taapishkoo mitaahso pehkioshkiniikihkwek kaakii'maaciitoowaatc opimitewaahsahkonencikaniwaan, ekii'maacaawaatc e'anta​mekwaashkawaawaatc ini ininiwan kaa-anta​kihciwiitikenitc ewii'ani​wiiciiwaawaatc. 2 Naanan tahsh kiihkakiihtaawentamook, iki tahsh kotak naanan kaawiin kii'ehshaawaatisihsiiwak. 3 Iki tahsh kaakii'ehshaawaatisihsikwaa kii'maaciitoowaatc opimitewaahsahkonencikaniwaan, kaawiin tahsh pimiteni okiih​takomaaciitoohsiinaawaa. 4 Iki tahsh wiin kaakiih​kakiihtaawentamowaatc okiih​takomaaciitoonaawaa pimiteni kii'maaciitoowaatc ini owaahsahkonencikaniwaan. 5 Kaawiih​kihciwiitikenitc tahsh ininiwan kiihpesihkaawan. Mekwaa tahsh ehpii'aawaatc mii​'i kaaishi​kawiinkwahshiwaatc iki oshkiniikihkwek. 6 "E'aapihtaatipihkaninik tahsh awiya kiihshaakowe: 'Mii ohsha​'i aasha ehtakohshink a'a kaawiih​kihciwiitiketc! Ampeyohk hsa, antamekwaashkawihk!' 7 Miitahsh kahkina oshkiniikihkwek kii'ishi​wanishkaawak ekii'nana'aanshenamowaatc owaahsahkonencikaniwaan. 8 Kaakakiipaatisiwaatc tahsh okiih​kanoonaawaa' i'i kaakakiihtaawentaminitc: 'Taka miishihshinaam pankii kipimitemiwaa, niwaahsahkonencikaninaanin ohsha aniaahtawewan!' kii'ihkitowak. 9 Kaakakiihtaawentamowaatc tahsh kii'ishi​nahkwehtamook: 'Taka mii​'i! Kaawiin ohsha kitaa​tepihsehsiimin mihsawaa ko miinikooyek pimite. Inashke ishaak ataawewininiwak cianta-ataawehtamaasoyek,' kii'ihkitowak. 10 Mekwaa tahsh e'ontentinitc, ekii'naasihkaminitc pimiteni, mii​hsa 'i ahpii ini kaa-anta​kihciwiitikenitc ininiwan kiihpi​takohshinoon. Iki tahsh kotak oshkiniikihkwek kaakiih​kiishiihtaawaatc okii'ani​piintikewiiciiwaawaan i'imaa kaakii'ishi​kihciwiitike​wiihsininaaniwaninik. Ishkwaantem tahsh kiihkipa'ikaate. 11 "Naanaake tahsh iki kotak oshkiniikihkwek kiihpi​takohshinook ekiih​kanoonaawaatc ininiwan kaakihciwiitikenitc: 'Taka keniinawint paahkinamawihshinaam!' okii'inaawaan. 12 O'o tahsh okii'ikowaan: 'Kaawiin awaac nintaa​tootansii, kaawiin kikihkenimihsinooninim,' mii kaa'ikowaatc." 13 Ciisahs tahsh kii'ani-ihkito: "Ayaankwaamiahshawaapik, aaniihsh kaawiin kikihkentansiim ahpii kiishikahk, tahsotipa'ikaneyaak kaye kepi​takohshinaan." 14 "Mii​hsa keshinaakwahk, taapishkoo inini kaawii'maacaatc, ekiih​kanoonaatc hsa otanohkii'aakana', ekiih​kanawenta'aatc cinaakacihtoonitc i'i kaatipentank. 15 Miitahsh kaa'ishi​kanawenta'aatc otanohkii'akana' aaniiminihk kekashkihtoonitc kekoonini cinaakacihtoonitc. Peshik tahsh okii'miinaan naanink mitaahswaahk (5,000) osaawaapihko​shooniyaanhsa'. Kotak tahsh okii'miinaan niishink mitaahswaahk (2,000) osaawaapihko​shooniyaanhsa', kotak kaye mitaahswaahk (1,000) osaawaapihko​shooniyaanhsa' okii'miinaan. Miitahsh kaa'ishi​maacaatc. 16 A'a tahsh anohkii'aakan kaakiih​kanawenta'intc naanink mitaahswaahk osaawaapihko​shooniyaanhsa', shemaak kii'maacaa ekiih​pakitinaatc ini shooniyaan aanti keshi​kashkihcikenitc miinawaa naanink mitaahswaahk osaawaapihko​shooniyaanhsa'. 17 Miitahsh peshikwan kaa'ishihciketc a'a anohkii'aakan kaakiih​kanawenta'intc niishink mitaahswaahk osaawaapihko​shooniyaanhsa', ekiih​kashki'aatc kotak niishink mitaahswaahk osaawaapihko​shooniyaanhsa'. 18 A'a tahsh anohkii'aakan mitaahswaahk kaakiih​kanawenta'intc osaawaapihko​shooniyaanhsa', kii'awi​waanihke mihtahkamikonk, kaa'ishi​kaanaatc otookimaaman oshooniyaamini. 19 "Naanaake tahsh wiihkaa e'ishihsenik, okimaa kiihpi​takohshin ewii'anta​kihkenimaatc i'i anohkii'aakana' aaniin minihk kaakashkihcikenitc. 20 A'a tahsh anohkii'aakan naanink mitaahswaahk osaawaapihko​shooniyaanhsa' kaakiih​kanawenta'intipan kiimatekaapawi ekii'miinaatc otookimaaman ini kotak naanink mitaahswaahk tahswaapihk ekii'ihkitotc: 'Nintookimaam, iki tahsh naanink mitaahswaahk osaawaapihko​shooniyaanhsak kaakiih​kanawenta'ihshiyampan, naanink mitaahswaahk miinawaa 'imaa ninkii'onci​kashkihcike,' kii'ihkito. 21 Okimaa tahsh okii'inaan: 'Aahpici hsa kwayahk kikii'ishihcike! Aahpici kaye kwayahk kaatepweyenimintwaa anohkii'aakan kitinow. Kwayahk tahsh ekiih​kanawaapantaman kekoonenhsan, kikamiinin hsa kihcikekoonan cikanawaapantaman. Haw ampe piwiiciwiihsiniimihshin eshi​wiihkwankeyaan kekiin ciwiiciminwentamoomiyan!' okii'inaan. 22 A'a tahsh anohkii'aakan kaakiih​kanawenta'intipan niishink mitaahswaahk tahswaapihk kiimatekaapawi, ekii'ihkitotc: 'Nintookimaam, ekiih​kanawenta'ihshiyampan niishink mitaahswaahk osaawaapihko​shooniyaanhsak, inashke ninkiih​kashki'aa kotak niishink mitaahswaahk!' kii'ihkito. 23 Okimaa tahsh okii'inaan: 'Aahpici hsa kwayahk kikii'ishihcike! Aahpici kaye kwayahk kaatepweyenimintwaa anohkii'aakan kitinow. Kwayahk tahsh ekiih​kanawentaman kekoonenhsan, kikamiinin hsa kihcikekoonan cikanawaapantaman. Haw ampe piwiiciwiihsiniimihshin eshi​wiihkwankeyaan, kekiin ciwiiciminwentamoomiyan!' okii'inaan. 24 A'a tahsh wiin kaakiih​kanawenta'intc mitaahswaahk osaawaapihko​shooniyaanhsa' ekii'matekaapawitc, kii'ihkito: 'Nintookimaam, kikiih​kihkenimin hsa ehkakwaanihsakisiyan, e'ishi​mooshakinikeyan hsa kaakii'ishi​kihtikehsiwan, e'otaahpinaman kaye kihtikaanan kaakiih​kihtikaatansiwan. 25 Kikiih​kohsin itahsh, miihsh kaakii'onci​kaanak kishooniyaam i'imaa mihtahkamik. Inashke tahsh, ina wa'awe hsa kishooniyaam kaatipenimatc,' kii'ihkito. 26 Okimaa tahsh okii'inaan: 'Aahpici hsa kimaciayaa, kaakihtimiwaatc hsa anohkii'aakan kitinow. Ekiih​kihkenimiyan hsa e'ishi​mooshakinikeyaan hsa kaakii'ishi​kihtikehsiwaan, e'otaahpinamaan kaye kihtikaanan kaakiih​kihtikaatansiwaan, 27 kitaakiih​pakitinaa ohsha a'a ninshooniyaam i'imaa shooniyaawikamikonk cikii'ani​paahtiinohpan. Inashke tahsh kiipi​takohshinaan kahkina nintaakii'otaahpinaa,' okii'inaan. 28 Miitahsh o'o kaa'ani-ihkitotc: 'Otaahpinamawihk hsa ini shooniyaan, a'a hsa mitaahcink mitaahswaahk osaawaapihko​shooniyaanhsa' kaa-ayaawaatc, oka-ayaawaan ini shooniyaan. 29 Awiya hsa kekoonini kaa-ayaatc, tamiinaa kekoonini awahshime, weweni hsa citepihsetc. A'a tahsh wiin kekoonini kaa-ayaahsik, mihsawaa ko pankii kekoonenhsini ayaatc hsa taotaahpinamawaa. 30 A'a hsa kekoonini kaainaapatisihsik anohkii'aakan, ishiwepinihk i'imaa kaashi​kashkiitipihkaninik. Miitahsh i'imaa ketashimoohkokitaasotc, ketashimamatweyaapitehsetc kaye.' " 31 "Ahpii hsa Inini oKosihsan pitakohshininitc kaawiihpi​kihciokimaawinitc, okapi​wiiciiwikoni hsa i'i kahkina encala'. Mii​hsa i'imaa kaakihciokimaawentaakwaninik otapiwininiink keshi​apinitc. 32 Kahkina tahsh pemaatisiwaatc misiwehkamik kaatahswewaanakisiwaatc taohkoayaawak aanti keayaanitc. Mii​hsa 'awe kaaokimaawapitc niishwayek okaishi​papaahpakitinaa' ini pemaatisinitc, taapishkoo hsa okanawimaanahcaanihshiwe pepahkaan kaaishi​ahsaatc maanahcaanihsha' i'i kaye maanatihkwa'. 33 Kaakwayahkwaatisinitc hsa okihcinihkink inahke okaishi​ahsaa', kotak tahsh onamantinihkink okaishi​ahsaa'. 34 Kihciokimaa tahsh oka​inaa' i'i pemaatisinitc okihcinihkink kaa-ayaanitc: 'Piishaak hsa kiinawaa kaashaweniminek ninTete, piishaak citipentamek i'i okimaawiwin kaakiihpi​oshiihtamaakooyek ahpii kiimaaciiahkiiwank. 35 Aaniihsh ewii'wiihsiniyaan, kikii'ahshamihshim, ewii'minihkweyaan kaye kikii'mina'ishim. Ehpiiwitewiyaan kaye kikiih​piintikashim kitaawiniwaank. 36 Ekiih​kikihkonayehsiwaan kaye kikiih​pihcihkonaye'im, e'aahkosiyaan kaye kikii'naakaci'ihshim, ekiih​kipa'okooyaan kaye kikii'antawaapamihshim,' okainaa'. 37 Okwayahkwaatisiik tahsh okaishi​kakwecimaawaan: 'Tepencikeyan, aanahpii kaa'waapamikooyan ehkawaskateyan, ekii'ahshamikooyan tahsh, e'noontayaapaakweyan kaye, ekii'mina'ikooyan tahsh? 38 Aanahpii kaye kaa'waapamikooyan ehpiiwitewiyan ekiih​piintikanikooyan tahsh nintaawininaanink, ekiih​kikihkonayehsiwan kaye ekiih​pihcihkonaye'ikooyan tahsh? 39 Aanahpii kaye kaa'waapamikooyan e'aahkosiyan, ehkipa'okooyan kaye, miitahsh ekii'antawaapamikooyan?' oka​inaawaan. 40 Kihciokimaa tahsh taishi​nahkwehtam: 'Kiwiintamawininim hsa, ahpii hsa o'o kaakiih​tootawek wa'a peshik kekoon kaa-ahpiihtentaakosihsik, niicihkiwensi kaainak, niin hsa kaakiih​tootawiyek,' oka​inaa'. 41 I'i tahsh onamantinihkink inahke kaa-ayaanitc oka​inaa': 'Ninkoci kiinawaa ishaak, kaainakimikooyek cinihshiwanaatisiyek! Ishaak weti wiihkaa keshi​aahtawehsinok ishkote, kaakiih​kwayaanciihtamawintwaa maciaya'aa, i'i kaye otencalima'. 42 Aaniihsh e'noonteskateyaan kaawiin kikii'ahshamihsiim, e'noontayaapaakweyaan kaye kaawiin kikii'mina'ihsiim. 43 Ehpiiwitewiyaan kaye kaawiin kikiih​piintikashihsiim kitaawiniwaank, ekiih​kikihkonayehsiwaan kaye kaawiin kikiih​pihcihkonaye'ihsiim, e'aahkosiyaan kaye, ekiih​kipa'okooyaan kaye kaawiin kikii'antawaapamihsiim,' oka​inaa'. 44 Kewiinawaa tahsh okashi​nahkwehtawaawaan: 'Tepencikeyan, aanahpii hsa kaa'waapamikooyan e'noonteskateyan, e'noontayaapaakweyan, ehpiiwitewiyan, ekiih​kikihkonayehsiwan, ekii'aahkosiyan, ekiih​kipa'okooyan kaye, ekii'ishi​wiici'ikoohsiwanen itahsh?' oka​inaawaan. 45 Kihciokimaa tahsh okashi​nahkwehtawaa': 'Kiwiintamawininim hsa, i'i hsa kaakii'ishi​wiici'aahsiwek peshik iko wa'a kekoon kaa-ahpiihtentaakosihsik, niicihkiwensi kaainak, niin hsa kaakii'wiici'ihsiwek,' oka​inaa'. 46 Miiwak itahsh oko keishinisha'ontwaa i'imaa wiihkaa keishi-ishkwaahsehsininik kakwaataki'ikoowin. Iki tahsh kaakwayahkwaatisiwaatc taishaawak wiihkaa keishi-ishkwaahsehsininik pimaatisiwin."

Maahtiyo 26

1 Ekii'ishkwaa​kihkino'amaaketc tahsh Ciisahs kahkina kekoonini, okii'inaa' tahsh okihkino'amawaakana': 2 "Niishokiishikwakaanik ihsa ehkihkentamek mii​'i aasha ciPimaaci'ikoowi​Wiihkwantinaaniwank, miitahsh Inini oKosihsan ci-ishiwicikaniwinitc ciakosaka'omintc aashiteyaahtikonk," mii kaa'ihkitotc. 3 I'ihsh peshikwan ahpii, Kihcianami'ewikimaak, iki kaye kaaniikaanisiwaatc onahshowewinink kii'nakishkotaatiwak cionaahkonikewaatc i'imaa owaahkaa'ikaniniink ini Maawac Kihcianami'ewikimaan Keyahpahs (Caiaphas) kaakii'ishinihkaasonitc, 4 ekii'onentamowaatc aaniin kekii'ishi​kiimooci​kaahcitinaawaatc Ciisahsoon ewii'nihsaawaatc. 5 "Kaawiin i'i kitaakii'ishihcikehsiimin mekwaa e'wiihkwantinaaniwank, maakishaa onsaam taaompwehkamikisinaaniwan," kii'ihkitowak. 6 Mekwaa tahsh Ciisahs e'ayaatc i'imaa Saaimanan (Simon) kaakii'omikiiwaahpinenihpan owaahkaa'ikaniniink i'imaa Pehtaniink (Bethany) ootenawenhsink, 7 ihkwewan okiih​pinaasihkaakoon ekiih​piitoonitc poosiminaakwa'onini wiinke ekii'aahkwakintenik, kaakii'ishi​piintenik aalapaastar (alabaster) ahsiniiwi​omootayaapihkonk. Miitahsh kaa'ishi​siikinaminitc minaakwa'onini ohtikwaanink, mekwaa e'ayoohpimehshink e'wiihsinitc. 8 Kihkino'amawaakanak ekii'waapantamowaatc kii'ihkitowak ekii'maanaapantamowaatc: "Etatawe kiihkihciwanihcikem! 9 I'i hsa minaakwa'on aahpici niipowa' taakii'inakinte kiishpin ataawaakaaniwankipan. Shooniyaan tahsh taakii'miinaawak kaakitimaakisiwaatc." Mii kaa'ihkitowaatc. 10 Ciisahs okiih​kihkenimaa' aaniin kaa'ihkitonitc, miitahsh ekii'inaatc: "Wekonen wencikakwewanaa'ek a'a ihkwe? Aahpici hsa onishihshin, minonaakwanini kaye i'i kaatootawihshitc. 11 Kaakitimaakisiwaatc ihsa mooshak kiwiiciiwaawaak, niin tahsh kaawiin mooshak kikawiiciiwihsiim. 12 O'oweni hsa kaasiikinank minaakwa'onini niwiiyawink, mii​hsa piko taapishkoo ehkwayaancihtootc niwiiyaw ewii'ninkwa'okooyaan. 13 Kekeht tahsh kitinininim, tashintek hsa i'i minwaacimowin misiwe ahkiink, tatipaacimaa hsa a'a ihkwe aaniin kaa'ishihciketc cimaamihkawinotawintc," kii'ihkito. 14 Miitahsh i'i, peshik iki kaamitaahshiniishiwaatc kihkino'amawaakanak, Cootahs Iskeriyat (Judas Iscariot), kaa'ishi​antawaapamaatc Kihcianami'ewikimaa' 15 ekiih​kanoonaatc: "Wekonen kemiishiyekipan ishiwininakook kaashi​ayaatc Ciisahs?" okii'inaa'. Miitahsh kaa'ishi​sakahkakimaanitc ini shooniyaan, nihsimitana kihciwaapaapihko​shooniyaanhsa' ekii'miinikotc. 16 Miitahsh i'i ahpii Cootahs kaa'ishi​maaciiantawaapantank kiishpin ishihsenik ewii'ishiwinaatc aanti eshi​ayaanitc ini Ciisahsoon. 17 Nihtam itahsh e'wiihkwantiiwikiishikaninik ahpii kii'amomintc pahkweshikanan kaakii'ompisikaniwihsinik, kihkino'amawaakanak okii'naasihkawaawaan Ciisahsoon ekii'inaawaatc: "Aanti tahsh niinawint keshi​kwayaancihtamaakooyan ciPimaaci'ikoowi​Wiihkwantink?" kii'ihkitowak. 18 O'o tahsh okii'inaa': "Antawaapamihk hsa peshik inini i'imaa ootenaank. O'o tahsh kikainaawaa: 'Ninkihkino'amaakeminaan hsa ihkito: "Aasha pehshonaakwan i'i kaawii'ishihseyaan, niwii'wiitoohpamaak hsa ninkihkino'amawaakanak i'imaa kiwaahkaa'ikanink, ewii'wiiciwiihsiniimakwaa o'o Pimaaci'ikoowi​Wiihkwantiwin." ' " 19 Kihkino'amawaakanak tahsh kii'ishihcikewak kaakii'ikowaatc Ciisahsoon ekiih​kwayaancihtoowaatc kaawii'ishi​Pimaaci'ikoowi​Wiihkwantiiwaatc. 20 E'ani​onaakohshininik itahsh kii'oshihshinook Ciisahs, okihkino'amawaakana' kaye, ewii'wiihsiniwaatc. 21 Mekwaa tahsh e'wiihsiniwaatc Ciisahs kii'ihkito: "Kitinininim, peshik o'omaa ninka​tootaak citahkonikoowak," kii'ihkito. 22 Kihkino'amawaakanak tahsh kii'maanentamook ekii'ishi​kakwecimaawaatc memeshkwac: "Tepencikeyan, kaawiin iitok niin kaaishiyan?" 23 Ciisahs tahsh kii'ishi​nahkwehtam: "Kiinawaa hsa kaawiiciwiihsiniiminakook peshik kaacehkipiinaatc opahkweshikaniman, keniin kaaishi​cehkipiinimak nimpahkweshikaniman onaakanink, mii​hsa 'awe kaawiih​tootawitc. 24 Kihcimasina'ikan hsa ishipii'ikaate ciniponitc ini Inini oKosihsan. Tepwe hsa ninka​nip. Aahpici hsa takoohpaasinaakosi a'a inini kaawiih​tootawaatc ini Inini oKosihsan citahkonimintc. Aahpici taakii'onishihshinini wiihkaa nihtaawikihsikipan a'a inini," kii'ihkito. 25 Cootahsan (Judas) tahsh kaawii'mamishimikotc okii'ikoon: "Okihkino'amaake, kaawiin iitok niin kaaishiyan?" okii'ikoon. Ciisahs okii'inaan: "Kiin iitok kaaitisoyan." 26 Mekwaa tahsh e'wiihsiniwaatc Ciisahs okii'otaahpinaan pahkweshikanan ekii'nanaahkomotc. Miitahsh kaa'ishi​pahpahkwepinaatc, ekii'maamiinaatc okihkino'amawaakana' ekii'inaatc: "Otaahpinihk a'a pahkweshikan, amohk, mii iitok i'i niwiiyaw," kii'ihkito. 27 Miinawaa tahsh okii'otaahpinaan minihkwaakan, ekii'nanaahkomotc, ekii'miinaatc ekii'inaatc: "Mii hsa 'imaa onci minihkwek kahkina kaatahshiyek. 28 Mii​hsa 'iwe nimiskwiim. Mii 'imaa Kishemanitoo otAhshotamaakewin kaaonci​maaciianohkiimakaninik. Mii​'i kaapaahtiinowaatc kaaonci​siikinamawintwaa miskwiini cipoonentamawintwaa omacitootamowiniwaan. 29 Kiwiintamawininim itahsh, kaawiin hsa wiihkaa miinawaa ninka​minihkwehsii o'o shoominaapo, paamaa hsa weti kikawiiciminihkwemininim ciminihkweyank oshkishoominaapo ahpii ninTete kiishihsitootc oTipencikewin." 30 Miitahsh kaa'ishi​anami'enikamowaatc, ekii'ani​maacaawaatc weti ekii'ishaawaatc pihkwatinaank Aalip (Olive) Kihtikaanaahtikohkaank kaakii'ishinihkaatek. 31 Ciisahs tahsh okii'inaa' okihkino'amawaakana': "Noonkom hsa kaatipihkahk kahkina kaatahshiyek kikatapasiim, cinakashiyek. Aaniihsh Kihcimasina'ikan ishipii'ikaate, 'Kishemanitoo hsa oka​pahkihte'waan okanawimaanahcaanihshiwen, kaaohkoayaanitc tahsh maanahcaanihsha' tamihcipiiwipa'iwewa',' ihkitoomakan. 32 Ahpii tahsh kiiwepimaatisiyaan, kika-awipii'ininim weti Kaalalii (Galilee) ahkiink," okii'inaa'. 33 Okii'ikoon itahsh Piitaroon (Peter): "Mihsawaa hsa kiishpin kotak nakanihkwaa, kaawiin niin wiihkaa kikanakanihsinoon," okii'ikoon. 34 Ciisahs tahsh okii'inaan: "Kitinin hsa, o'o hsa noonkom kaatipihkahk, cipwaa noontaakositc naapepaahka'aahkwaan, mii hsa aasha nihsink (3) ci-ihkitoyan ehkihkenimihsiwan," okii'inaan. 35 Piitar tahsh kii'ihkito: "Kaawiin wiihkaa nintaa​ihkitohsii i'i kaaishiyan, mihsawaa piko wii'wiici​nipoominaan," kii'ihkito. Miitahsh peshikwan kotak kihkino'amawaakanak kaa'ihkitowaatc. 36 Ciisahs tahsh okii'ishiwinaa' okihkino'amawaakana' ayaawinink Kehsemani (Gethsemane) kaaishinihkaatenik. O'o tahsh ekii'inaatc: "Mii​hsa o'omaa apik, weti tahsh niin niwii'ishaa ewii'anta-anami'aayaan," kii'ihkito. 37 Miitahsh o'o ehta kaa'maaciinaatc, Piitaroon (Peter), inihsh kaye niishin (2) Sepatiin (Zebedee) okosihsini. Kakwaatakentamowin, wiihsakentamowin kaye okii'otihsikon Ciisahs. 38 Miitahsh kaa'inaatc: "Kekaa ohsha ninihsikon nimaanentamowin ehpiihci​kakwaatakentamaan. Miitahsh o'omaa ayaak, keko kekiinawaa nipaahkek," okii'inaa'. 39 Naake tahsh wiin waahsa kii'ishaa ekii'animihkohtaatc, ekii'ishi​anami'aatc: "NinTete! Kiishpin hsa ishinaakwahkipan, taka otaahpinamawihshin o'o minihkwaakan kaawii'ishi​kakwaatakihtooyaan. Kaawiin hsa niin eshi​mihsawentamaan, kiin hsa eshi​antawentaman taishihcikaaniwan," kii'ihkito. 40 Ekiih​kiiwenaasihkawaatc tahsh i'i nihsin (3) okihkino'amawaakana', okii'waapamaa' e'nipaanitc. Piitaroon hsa okii'inaan: "Wekonen itahsh wenci​pwaanawihtooyek cinipaahsiwek kanake peshiko tipa'ikan? 41 Ahshawaapik hsa, anami'aak kaye, ciotihsikohsiwek i'i kaawii'ishi​koci'ikooyek. Aanawiin e'mihsawentamek citootamekipan i'i kaakwayahkonaakwahk, kaawiin tahsh kiteahpiihcite'ehsiim i'i ci-ishihcikeyek," kii'ihkito. 42 Miinawaa tahsh Ciisahs kii'ani​maacaa ekii'anta-anami'aatc. "NinTete! Kiishpin ishinaakwahk ciotaahpinikaatehsinok o'o minihkwaakan kaawii'ishi​kakwaatakihtooyaan, ishinaakwahk itahsh ciminihkwaatamaan, kitinentamowin hsa tatoocikaate," kii'ihkito. 43 Ekiih​kiiweantawaapamaatc itahsh okihkino'amawaakana', okii'waapamaa' e'nanipaanitc ekiih​kawiinkwahshinitc. 44 Miinawaa tahsh Ciisahs okii'nakanaa', nihsink (3) ekii'anami'aatc, peshikwan ekii'awi-ihkitotc. 45 Miinawaa tahsh okii'naasihkawaa' okihkino'amawaakana' ekii'inaatc: "Keyaapi na kinipaam, e'anwehshinek kaye? Inashke mii ohsha 'i aasha ehpehshonaakwahk kaawii'ishihseyaan. Inini oKosihsan ihsa taotaahpinikaniwiwan, miitahsh omacitootamook citootawaawaatc aaniin iko eshi​antawentamowaatc. 46 Wanishkaak, ani​maacaataa! Inaapik, mii​hsa wa'a inini kaamamishi'itc!" kii'ihkito. 47 Mekwaa tahsh Ciisahs ehkaakiikitotc, Cootahs (Judas) kiihpi​takohshin, mii hsa ini peshik kaamitaahshiniishinitc Ciisahs okihkino'amawaakana'. Cootahs itahsh okiihpi​wiiciiwaa' ininiwa' ehpaahtiinonitc, pashipa'ikewihkomaanan, pakamaakanan kaye ekiih​piitoonitc. Oko hsa kahkina okiih​piicinisha'okowaa' Kihcianami'ewikimaa', i'i kaye kaaniikaanisinitc onahshowewinink. 48 Kaakii'mamishimiwetc itahsh okii'inaakopan: "A'a hsa inini keociimak, mii​hsa a'awe kaa-antawenimek, otaahpinaahkek itahsh." 49 Shemaak itahsh a'a Cootahs okii'naasihkawaan Ciisahsoon ekii'inaatc: "Pooshoo, okihkino'amaake!" okii'inaan. Miitahsh kaa'ishi​ociimaatc. 50 Ciisahs tahsh okii'inaan: "Niicii, weyiip hsa ishihciken kaawii-ishihcikeyan!" okii'inaan. Ininiwak itahsh kiihpiishaawak, ekii'otaahpinaawaatc ekii'mamaancikonaawaatc. 51 Peshik tahsh Ciisahs kaakii'wiiciiwikotc, okii'manipitooni pashipa'ikewihkomaanini, ekiih​pahkihte'waanitc peshik otanohkii'aakanini ini Maawac Kihcianami'ewikimaan, miitahsh ekiih​kiishkiwepakanaantamawaatc ohtawakaani. 52 Ciisahs tahsh okii'inaan: "Piina'an hsa i'i kipashipa'ikewihkomaan aanti eshipiintek. Kahkina hsa kaa-aapacihtoowaatc i'i pashipa'ikewihkomaan, mii​hsa i'imaa keonci​nihshiwanaatisiwaatc. 53 Kaawiin ina kikihkentansiin cikanoonakipan ninTete cinaatamawitc? Shemaak ihsa otaa​piicinisha'waa' kaamitaahshiniishwewaanakisinitc kaa-ayoohkopaahtiinonitc encala'. 54 Kiishpin hsa 'i ishihcikeyaampaan, kaawiin hsa iinsan taaishihsehsinoon kaaishipii'ikaatek Kihcimasina'ikan, mii iitok kaaishipii'ikaatek ci-ishihsekipan," kii'ihkito. 55 Ciisahs i'i ahpii okiih​kanoonaa' i'i kaapaahtiinonitc kaakiih​pinaasihkaakotc: "Taapishkoo kimoocishkiiwininiink kitootawihshim, pashipa'ikewihkomaanan, ini kaye pakamaakanan e'aapacihtooyek ehpi​kaahcitiniyek. Entahsokiishik tahsh ekii'namatapiyaan i'imaa Kihcianami'ewikamikonk ehkihkino'amaakeyaan, kaawiin kikii'otaahpinihsiim. 56 Miitahsh i'i kaakii'onci-ishihsek, mayaa hsa ko ci-ishihsenik aaniin kaakii'ishipii'ikewaatc iki kaakiih​kanootamawaawaatc Kishemanitoon," okii'inaa'. Miitahsh kahkina okihkino'amawaakana' kaa'ishi​nakanikotc ekiih​tapasiinitc. 57 Keyahpahs (Caiaphas) Maawac Kihcianami'ewikimaa owaahkaa'ikanink hsa kii'ishi​maawantoopi'itiwak onahshowewikihkino'ikek, iki kaye kaaniikaanisiwaatc. Miitahsh i'imaa kaa'ishiwinikotc a'a Ciisahs i'i kaakiih​tahkonikotc. 58 Piitar (Peter) tahsh ehkotepaapitc kiihpiminisha'ike. I'imaa hsa Maawac Kihcianami'ewikimaan owaahkaa'ikaniniink akwaciink kaakii'ishi​wiimpihcikaatenik kii'ishaa. Okii'wiitapimaa' kaye i'i shimaakanihsha' kaakii'nihtaa​kanawencikenitc i'imaa Kihcianami'ewikamikonk, ewii'waapanketc aaniin keshi-ishkwaahkamikaninik. 59 Kihcianami'ewikimaak tahsh iki kaye kahkina Kaanihtaa​onaahkonikewaatc okiih​kakwemihkaanaawaa kekoonini kaatepwewiniwansininik ci-inaacimimintc Ciisahsoon cionci​nihsimintc. 60 Aana tahsh wiin ekiih​paahtiinowaatc awiyak ekiihpi​niminaawekaapawiwaatc ekiih​kiiwanimowaatc noociko ekii'inaawaatc Ciisahsoon, kaawiin hsa shaakooc kiihtepimimaahsii aaniin kaa'inimintc. Niishin itahsh ininiwak kiihpasikwiiwak 61 ekii'ihkitowaatc: "A'a hsa inini kii'ihkito: 'Nintaa​kashkihtoon hsa cipiikopitooyaan i'i Kishemanitoo otAnami'ewikamik, cikiiwepatahkitooyaampaan tahsh nihsokiishikwakaak,' kii'ihkito," okii'inaawaan. 62 Maawac Kihcianami'ewikimaa tahsh kiihpasikwii ekii'inaatc Ciisahsoon: "Kaawiin ina kekoon kiwii'ihkitohsii o'o kaaishi​anaamimikooyan?" okii'inaan. 63 Ciisahs tahsh kaawiin kiinoontaatihsii. Maawac Kihcianami'ewikimaan tahsh okiih​kanoonikoon miinawaa. "Otishinihkaasowinink hsa Kaapimaatisitc Kishemanitoo kitishi​kanoonin ci-ishitepweyan! Wiintamawihshinaam kiishpin kiin entinowiwanen Kishemanitoo kaaonenimaatc cipimaaci'iwenitc, Kishemanitoo oKosihsan," okii'ikoon. 64 Ciisahs tahsh okii'inaan: "Mayaa kitepwe kaaihkitoyan! O'o tahsh kitinininim: wiipa hsa taishihse ciwaapamimek Inini oKosihsan ciapinitc okihcinihkiniink inahke Maawac​iko KaaMashkawisiinitc pitakohshininitc i'imaa kihcikiishikoowahkwiink," kii'ihkito. 65 Maawac Kihcianami'ewikimaa tahsh e'noontank o'oweni, ehpiihci​shiinkihtank, okiih​taashkipitoonan okikishkikanan, ekii'ihkitotc: "Mii​hsa o'o ehpaahpinotawaatc Kishemanitoon! Kaawiin hsa awahshime kinantawenimaahsiwaanaanik otipaacimook. Kikii'noontawaawaa iitok ehpaahpinotaaketc. 66 Aaniin hsa ketootawintipan?" okii'inaa' kaaonaahkonikenitc. Miitahsh o'o kaa'ikotc: "Mii​hsa 'i ehkashkihtamaasotc cikii'nipohpan." 67 Miitahsh kaa'ishi​sasiihkwaanaawaatc Ciisahsoon owiinkwaaniniink, ekiih​pahpahkihte'waawaatc kaye. Iki tahsh kaakiih​pahpahkihte'waawaatc 68 okii'inaawaan: "Kiin iitok Kishemanitoo kaaonenimihk cipimaaci'iweyan! Wiintamawihshinaam hsa awenen a'a kaapahkihte'ohk!" 69 Piitar (Peter) mekwaa e'namatapitc i'imaa akwaciink kaashi​wiimpihcikaatenik, peshik Maawac Kihcianami'ewikimaa otanohkii'aakanan kaakii'ihkwewinitc okiih​pinaasihkaakoon ekii'ikotc: " Kaalaliink (Galilee) hsa kaaonciitc Ciisahs, kekiin hsa kikii'wiiciiwaa," okii'ikoon. 70 Kii'aanwehtam itahsh ekiih​kanawaapamikotc kahkina awiya'. Miitahsh kaa'ihkitotc: "Anihshaa ohsha kitihkit kaaihkitoyan," okii'inaan. 71 Ishkwaantenk itahsh kii'ani-ishaa kaakii'onci​piintikenaaniwaninik. Kotak itahsh anohkii'aakanan kaakii'ihkwewinitc okii'waapamikoon, ekii'inaanitc i'imaa kaakii'ayaanitc: "Kewiin ohsha wa'a okii'wiiciiwaan ini Naasaratink (Nazareth) kaaonciinitc Ciisahsoon," kii'ihkitowan. 72 Miinawaa tahsh Piitar kii'aanwehtam ekii'ihkitotc: "Tepwe hsa nintihkit kaaihkitoyaan! Kaawiin ninkihkenimaahsii a'a inini!" kii'ihkito. 73 Naanaake tahsh e'ani-ishihsenik, ininiwa' i'imaa kaanaaniipawinitc okiih​pinaasihkaakoo' ekii'ikotc: "Kekeht hsa kiin peshik, aaniihsh kitishikiishwewinink kitoonci​kihkenimikoo," okii'ikoo'. 74 Piitar tahsh kii'ihkito: "Wiinke piko nintepwe kaaihkitoyaan! Kishemanitoo hsa ninka​kakwaataki'ik kiishpin tepwehsiwaan. Kaawiin hsa ninkihkenimaahsii a'a inini!" Miitahsh kaakii'noontaakositc a'a naapepaahka'aahkwaan. 75 Piitar tahsh kii'maamihkawi kaakii'ikotc Ciisahsoon: "Cipwaa noontaakositc hsa naapepaahka'aahkwaan, mii​hsa aasha nihsink (3) ci-ihkitoyan ehkihkenimihsiwan," ekii'ikotc. Miitahsh kaa'ishi​saaka'ank ekii'awi​kihcimawitc.

Maahtiyo 27

1 Wiipa kikishep, kahkina Kihcianami'ewikimaak, kaaniikaanisiwaatc kaye onahshowewinink okii'onentaanaawaa cinihsimintc Ciisahsoon. 2 Piiwaapihkweyaapiin tahsh kii'aapataniniwan ekiih​tahtahkopinintc, weti hsa ekii'ishiwicikaniwitc kaakii'ishi​ayaanitc Paailatoon (Pilate), kihci'onahshowewikimaan Oroomink (Rome) kaaonci​tipentaakosinitc. 3 Ahpii tahsh Cootahs (Judas) kaakii'mamishi'iwetc ekiih​kihkentank ewii'nihcikaniwinitc Ciisahsoon, kii'maanentam. Miitahsh kaa'ishi​kiiwemiinaatc Kihcianami'ewikimaa', i'i kaye kaaniikaanisinitc onahshowewinink ini nihsimitana kihciwaapaapihko​shooniyaanhsa' kaakii'miinintipan. 4 Miihsh kaa'inaatc: "Ninkii'mamaashii hsa ekii'mamishi'ak a'a inini kekoonini kaakii'ishi​mamaashiihsik, cinihsintc," okii'inaa'. O'o tahsh okii'ishi​nahkwehtaakoo': "Kaawiin niinawint kekoon nintinentansiimin, aaniihsh kiin i'i kitishihcikewin," okii'ikoo'. 5 Miitahsh Cootahs kaa'ishi​piintike​pahkihtehsakihshimaatc i'imaa Kihcianami'ewikamikonk i'i kihciwaapaapihko​shooniyaanhsa', ekii'ani​maacaatc ekii'awi​akoonitisotc. 6 Kihcianami'ewikimaak tahsh okii'otaahpinaawaa' i'i shooniyaanhsa' ekii'ihkitowaatc: "Mii hsa wa'a shooniyaa kaakii'inaapatisitc cionci​nihsintc awiya. Kaawiin hsa inahtehsinoon Onahshowewin ciahsankipan i'imaa anami'ewipakitinikewinink." 7 Miitahsh kaa'ishi​onentamowaatc ewii'inanohkaanaawaatc ini shooniyaan ciataawewaatc i'i ahki Otoonaakanihke otAhkiim kaaishinihkaatenik. Miitahsh kaakii'onci​ataawewaatc ke'ishi​na'inimintc kaaniponitc piiwite'. 8 Miitahsh kaa'onci-ishinihkaatek i'i pankii ahkiini, Kaaishi​miskwiiwahkamikaak, piinihsh o'o ahpii noonkom kaakiishikahk. 9 Miitahsh o'o kaa'onci-ishihsek, ci-ishihsenik hsa Kishemanitoo otipaacimowininiiman Ceramaaya (Jeremiah) kaakii'ihkitonikopanen: "Okii'otaahpinaawaa' i'i nihsimitana kihciwaapaapihko​shooniyaanhsa' kaa'inakimaanitc Isriyala' (Israel) kaa'ishi-inahsaawaatc ci-inataawaakaaniwinitc. 10 Miitahsh kaa'inaapaci'aawaatc ini shooniyaan ekii'ataawewaatc i'i pankii ahkiini kaakii'ontinaawaatc waapikanan onaakanihkek, taapishkoo kaaTipenciketc kaakii'ishihpan ci-ishihcikenaaniwaninik." Mii kaakii'ihkitonikopanen. 11 Ciisahs itahsh kii'niipawi enaahsamiinitc ini Paailatoon (Pilate) kihci'onahshowewikimaan, ekii'ikotc: "Kiin ina kitinow Coowak okihciokimaamiwaan?" okii'ikoon. Ciisahs tahsh kii'ishi​nahkwehtam: "Kitepwe kaaihkitoyan," okii'inaan. 12 I'i tahsh Kihcianami'ewikimaa', i'i kaye kaaniikaanisinitc onahshowewinink okii'anaamimikoo' sesik ekii'ishihcikehsik, kaawiin tahsh kekoonini okii'ishi​nahkwehtawaahsii' i'i kaakii'ishi​anaamimikotc. 13 Paailat tahsh okii'inaan: "Kaawiin ina kinoontawaahsiik i'i kahkina eshi​anaamimihkwaa?" okii'inaan. 14 Shaakooc tahsh Ciisahs kaawiin awaac pankii kiihkiikitohsii, ekii​nahkwehtansik aapiinc iko peshik kaakii'ishi​anaamimintc. Aahpici tahsh kihci'onahshowewikimaa kiihkihcimaamahkaatentam. 15 A'a tahsh kihci'onahshowewikimaa kii'nihtaa​ishihcike ekiih​pakitinaatc peshik kipa'waakanan. Kiishaac awiyan okii'onenimaawaan awenenan kepakitinimintc. Mii hsa 'o kaanihtaa'ishihciketc entahswaa kaaPimaaci'ikoowi​Wiihkwantink. 16 I'i tahsh ahpii kii'ayaa peshik kipa'waakan Paraapahs (Barabbas) ekii'ishinihkaasotc. Kahkina hsa awiya' okiih​kihkenimikoo'. 17 Ekii'ohkwiinonitc tahsh awiya', Paailat (Pilate) okiih​kakwecimaa': "Awenen entawenimiyek cipakitinamawinakook? Paraapahs ina? komaa kaye Ciisahs, ini Kishemanitoo kaa'onaapamaatc kaainintc?" okii'inaa'. 18 Okiih​kihkenimaa' aaniihsh i'i kaaniikaanisinitc Coowa' ekii'mihciontenimaanitc Ciisahsoon. Miitahsh kaakii'onci​piitamawintc Ciisahsoon. 19 Mekwaa tahsh e'namatapitc tipaahkonikewapiwinink, awiyan okiihpi​kanoonikoon ekii'inwehtamawaanitc wiiwan: "Keko papaamenimaahken a'a kwayahk inini, aaniihsh niipiwa' ninkiih​kakwaatakihtoo ekiih​pawaanak tipihkonk." 20 Kihcianami'ewikimaak, iki kaye kaaniikaanisiwaatc, okii'ompwe'aawaa' i'i kaapaahtiinonitc o'o ekii'ihkitowaatc: "Wiintamawihk Paailat cipakitinaatc ini Paraapahsan, meshkwac itahsh cinihsimintc Ciisahsoon." 21 Paailat tahsh okiih​kakwecimaa': "Awenen hsa kepakitinak iki kaaniishiwaatc?" Miitahsh kaa'ikotc: "Paraapahs pakitin!" 22 Paailat tahsh kii'ishi​kakwetwe: "Aaniin tahsh wiin ketootawak Ciisahs, Kishemanitoo Kaaonaapamaatc kaaicikaniwitc?" Miitahsh kaa'ihkitonitc kahkina awiya': "Ta-akosaka'waa!" 23 Paailat hsa miinawaa kii'ishi​kakwetwe: "Aaniin tahsh kaa'ishi​mamaashiitc?" Miitahsh aanciko enikohk kaa'ishi​maaciishaahshaakowenitc: "Ta-akosaka'waa!" kii'ishi​shaakowewa'. 24 Ahpii tahsh Paailat ekii'waapantank awahshime kekoonini ci-ishihcikehsik, ekii'naniisaanentank kaye cikihci-inahkamikisinitc kaakii'ohkwiinonitc, miitahsh kaa'ishi​otaahpinank nipiini ekiih​kisiininciitc enaahsamiinitc ekii'ihkitotc: "Keko tahsh niin kekoon ninka​pakamishkaakohsiin wa'a kaawii'nihsek inini! Kiinawaa aaniihsh i'i kitishihcikewiniwaa." 25 Miitahsh o'o kahkina kaa'ishi​nahkweshaakowaanikotc: "Taka niinawint pisaan ninka​inakimikoomin, ekii'nihsankitc, niniicaanihsinaanik kaye," okii'ikoo'. 26 Miitahsh Paailat kaa'ishi​pakitinamawaatc i'i Paraapahsan. Ekii'ishkwaa​pahpahshanshe'omintc tahsh Ciisahsoon, miitahsh kaa'ishi​pakitinamawaatc shimaakanihsa' ciakosaka'waanitc. 27 Paailat (Pilate) oshimaakanihshiima' okii'ishiwinaani Ciisahsoon otoonahshowewi waahkaa'ikanink. I'i tahsh shimaakanihsha' i'imaa kaakii'ayaanitc okii'waahkaashkawaani Ciisahsoon. 28 Miitahsh iki shimaakanihshak kaa'ishi​kiicihkonayepinaawaatc ekiih​pihsihkamo'aawaatc e'miskwekaninik naapishkikan. 29 Okaawiminakashiink kaye ekii'onci​oshihtoowaatc pahsihkwepison ekii​naapinaakohtoowaatc kihciokimaawipahsihkwepisonink, ekiih​pihsihkamo'aawaatc. Mihtikonhsini kaye okii'miinaawaan citahkonaminitc okihcinihkink. Miitahsh kaa'ishi​ociciinkwanapiihtawaawaatc ekii'maanenimaawaatc ekii'ihkitowaatc: "Kikihci-inenimikoo, kaakihciokimaahkantawatwaa Coowak!" 30 Miitahsh kaa'ishi​sasiihkwaanaawaatc, ekii'mahkamaawaatc i'i mihtikoonhs kaakii'miinaawaahpan, ekiih​pahpahkihteyaahkohtikwaane'waawaatc. 31 Miitahsh ekiih​temiihkinci'aawaatc ekiih​kiicihkonayepinaawaatc naapishkikan, kaa'ishi​kiiwepihsihkamoonaawaatc ini okikishkikanini. Miitahsh kaa'ishi​maaciinaawaatc ewii'akosaka'waawaatc. 32 Ekii'ani​maacaawaatc itahsh, okii'nakishkawaawaan ininiwan Saaiman (Simon) ekii'ishinihkaasonitc, Saairiiniink (Cyrene) ekii'onciinitc. Miitahsh ini shimaakanihshak kaa'ishi'aawaatc cipimiwitamawaanitc Ciisahsoon otaashiteyaahtikomini. 33 Weti tahsh eni​otihtamowaatc hsa Kaalkahtaa (Golgotha) kaakii'icikaatek. Mii​hsa 'iwe Ohtikwaanikekan kaaicikaatek. 34 Miitahsh i'imaa kaakii'ishiwii'mina'aawaatc Ciisahsoon shoominaaponi kaakiih​takwaakaminikaatek kekoonini kaawiihsakaninik. Ekii'mansihpitank tahsh kaawiin kiiwii'minihkwehsii. 35 Miitahsh kaa'ishi​akosaka'waawaatc i'imaa aashiteyaahtikonk, shikwa ekii'nenaawinamaatiwaatc okikishkikanini ekii'ahpakicikewaatc ekii'anta​pana'amowaatc awenen keayaatc i'i okikishikanini. 36 Miitahsh kaa'ishi​onapiwaatc ekiih​kanawenimaawaatc. 37 Enihkwekoocink itahsh kii'akooteni oshipii'ikan otanaamimikoowin ekii'ishipii'ikaatenik: "Mii hsa wa'a Ciisahs kaakihciokimaahkantawaatc Coowa'." 38 Niishin (2) hsa okimoocishka' okiihtakowiici​akosaka'okoomaa', peshik okihcinihkink inahke ekii'ishi​akoocininitc, kotak tahsh onamantinihkink. 39 Awiya' hsa kaakii'mayaashkaakotc kii'wewepihkwepani'owa' ekiih​kakaansomikotc 40 ekii'ikotc: "Kiin ihsa kaawiih​piikopitooyampan i'i Kihcianami'ewikamik, kaawiih​kiishahkitooyampan kaye nihsokiishikwakaak! Pimaaci'itison! Kiishpin Kishemanitoo oKosihsan tenowiwanen, niihsaantawen i'imaa aashiteyaahtikonk!" okii'ikoo'. 41 Kihcianami'ewikimaak, iki kaye onahshowewikihkino'amaakek, iki kaye kaaniikaanisiwaatc Coowak, mii​hsa peshikwan kewiinawaa kaa'ishi​miihkinsomaawaatc: 42 "Ekiih​pimaaci'aatc tahsh kotak awiya', shikwa tahsh kaawiin okashkihtoohsiin cipimaaci'itisotc. Wiin iitok inaa ehkihciokimaahkantawaatc i'i Isriyala'. Kiishpin hsa kashki'otc ciniihsaantawetc i'imaa aashiteyaahtikonk, mii hsa 'i payesh citepwehtawank. 43 Kishemanitoon iitok otahpenimonotawaan. Taka hsa shemaak oka​naatamaakoon kiishpin entawenimikokwen. Mii iitok kaa'ihkitotc: 'Kishemanitoo nintooKosihsimik,' " kii'ihkitowak. 44 Iki hsa okimoocishkak kaakii'wiiciakoocinoomaawaatc, peshikwan okii'ishi​miihkinsomaawaan. 45 E'naawahkwek tahsh misiwe i'imaa ahkiink kiihkashkiitipihkan nihsotipa'ikan minihk. 46 E'nihsotipa'ikaneyaanik tahsh Ciisahs enikohk kii'ihkito: "Iilaai, Iilaai! Lamaa sapaahtaanii? (Eli, Eli, lama sabachtani?)" Mii hsa i'i kaa'icikaatek: "NinKishemanitoom, ninKishemanitoom! Wekonen kaakii'onci​nakashiyan?" 47 Iki tahsh aaninta i'imaa kaakii'niipawiwaatc e'noontawaawaatc e'ihkitonitc kii'ihkitowak: "Ilaaicawan (Elijah) ohsha onantomaan cipinaatamaakotc." 48 Peshik tahsh kii'ahpahtoo ekii'otaahpinaatc iska'ipaanan, shoominaapo kaawentakintek tino ekiih​shaapopanaatc ekiih​cehkipiinaatc, ekii'niimaahkwa'amawaatc Ciisahsoon, ekiih​kakwemina'aatc. 49 Kotak tahsh kii'ihkitowak: "Taka pii'imaataanin Ilaaicawan cipipimaaci'ikotc." 50 Ciisahs tahsh miinawaa enikohk kiihkishiiwe, miitahsh kaa'ishi​poonipimaatisitc. 51 I'imaa tahsh Kihcianami'ewikamikonk piintik, kipiika'ikan kiihtashwekakoote, ekii'aakawakootek kaashi​kohtaanentaakwahk piintik. Mii hsa i'i ahpii i'i kaa'ishi​taashkiikihsek, ishpimink ekii'onci​maacitaashkihsek piinihsh tapashiihsh ekii'ishi​taashkiikihsek. Mii kaye 'i ahpii kaakoshkwahkamikihsek. Ahsiniik kaye kiihtaahtaashkihsewak. 52 Ciipekamikoon kaye kiihpaahkihsewan, niipowa' tahsh Kishemanitoo okwayahkwaatisiima' kaakii'niponihpan kiihkiiwepimaatisi'aawa', 53 ekiih​saaka'amowaatc ciipekamikonk. Kiikiiwepimaatisi'imintc Ciisahsoon kii'ishi​piintikewak i'imaa Kishemanitoo otootenaamink. Kiihpaahtiinowa' tahsh kaakii'waapamikowaatc. 54 Ahpii tahsh a'a shimaakanihshiiwikimaa, i'i kaye oshimaakanihshiima' kaakii'wiiciiwikotc kaakiih​kanawenimaanitc Ciisahsoon e'waapantamowaatc ahkiini ehkoshkohsenik, kahkina kekoonini kaye kaakii'ishihsenik, wiinke hsa kiihkihcisekisiwak, ekii'ihkitowaatc: "Tepwe hsa Kishemanitoo ini oKosihsan!" 55 Kiihpaahtiinowak hsa kaye ihkwewak weti waahsa ekii'onsaapiwaatc, Kaalaliink (Galilee) kaakiihpionci​piminisha'waawaatc Ciisahsoon ekiihpi​pimiwiici'aawaatc. 56 Miiwak​ihsa oko kaakiih​takwiinowaatc i'imaa, Meri (Mary) Maakatala (Magdala) ootenaanhsink kaaonciitc, shikwa kotak Meri kaakii'okosihsitc Ciimisan (James), Coosapoon (Joseph) kaye. Sepatii (Zebedee) tahsh, wiiwan tahsh kaye i'imaa kii'ayaawan. 57 Ahpii tahsh e'ani​onaakohshininik, kiihtakohshin e'wenootisitc inini Coosap (Joseph) ekii'ishinihkaasotc, weti ekii'onciitc ootenaank Eramahtiiya (Arimathea) kaakii'icikaatenik. 58 Okii'naasihkawaan tahsh Paailatoon (Pilate) ekiih​kakwetwetc cimiinintc i'i Ciisahsoon owiiyawini. Miitahsh kaa'ikotc pisaan​iko cimiinintc. 59 Okii'awi​otaahpinaan tahsh wiiyawini ekiih​tatipahpitootc oshki waapishkiikinooni ekii'aapacihtootc. 60 Miitahsh i'imaa kaakii'ishi​na'inank na'initiiwikamikonk wiin hsa kaakii'anoohkiikopanen cioshihtamawintc i'imaa kiishkaapihkaank. Kihciahsiniin hsa okii'ishi​kipitihtipinaan i'imaa ishkwaantenk. Miitahsh kaa'ishi​maacaatc. 61 Kii'ayaawak itahsh i'imaa Meri Maakatalawihkwe (Mary Magdalene) a'a tahsh kotak Meri (Mary) ekii'inaahsamapiihtamowaatc i'i ciipekamikoni. 62 Ekii'ani​waapaninik tahsh e'Anwepiiwi​kiishikaninik, Kihcianami'ewikimaak, iki kaye Perahsiik (Pharisees), okii'naasihkawaawaan Paailatoon (Pilate), 63 ekii'inaawaatc: "Kehci-inentaakosiyan, nimaamihkawimin hsa ekii'ihkitotc a'a okakiinawishk mekwaa kiipimaatisitc. O'o hsa kii'ihkito: 'Nihsokiishikwakaak (3) hsa ninka​kiiwepimaatis.' 64 Inaahkoniken tahsh aahpici weweni cikanawencikaatek i'i ciipekamik piinihsh cinihsokiishikahk. Maakishaa hsa okihkino'amawaakana' takimootiwa' i'i wiiyaw ci-inaacimonitc hsa ekiih​kiiwepimaatisitc. I'i tahsh keishi​kiiwanimonitc nawac iitok i'i tamaashipicikemakanini ahpiihc wiin nihtam i'i kaakii'inwaanitisokopanen a'a okakiinawishk," kii'ihkitowak. 65 Paailat hsa kii'ihkito: "Ayaawak iitok kaakanawencikewaatc, miiwak​iki aapaci'ihkwak ciaayiici​kanawencikaatek aaniin i'i keahkokashkihcikaatek," okii'inaa'. 66 Miitahsh kaa'ishi​maacaawaatc ekii'akwaskiwahsamowaatc awiyan cipaahkinansinik. Iki tahsh kaakanawencikewaatc shimaakanihshak weweni okiih​kanawentaanaawaa.

Maahtiyo 28

1 E'ishkwaa​Anwepiiwi​kiishikaninik tahsh e'ani​waapaninik e'anami'ekiishikaninik, Meri Maakatalawihkwe (Mary Magdalene), a'a kaye kotak Meri (Mary) kii'ishaawak ekii'antawaapantamowaatc ciipekamik. 2 Sesakooc tahsh kiih​koshkwahkamikihseni. KaaTipenciketc otencaliman kihcikiishikonk kiihpi​onciiwan, ninkoci okii'ishi​tihtipinaani ini ahsiniin, miitahsh i'imaa ahsiniink kaa'ishi​namatapinitc. 3 Mii​hsa taapishkoo kaawaahtehsek kaa'ahpiihciwaahsenaakosinitc, okikishkikanini kaye taapishkoo koonink ekii'ahpiihciwaapishkinaakwaninikin. 4 Iki tahsh kaakiih​kanawencikewaatc shimaakanihshak wiinke kiinininkaanimisiwak kaa'ahpiihci​sekisiwaatc, ekiih​kawihsewaatc, taapishkoo ekii'nipowaatc ekii'ishinaakosiwaatc. 5 A'a tahsh encal okiih​kanoonaa' i'i ihkwewa': "Keko sekisihkek," okii'inaa'. "Kikihkenimininim aaniihsh e'nanaantawaapamek Ciisahs kaakii'akosaka'ontc. 6 Kaawiin hsa o'omaa ayaahsii. Kiihkiiwepimaatisi ohsha taapishkoo kaakii'ihkitotc. 7 Weyiip tahsh anta​wiintamawimihk okihkino'amawaakana', ekiih​kiiwepimaatisitc. Aasha tahsh weti Kaalaliink (Galilee) kitawipii'ikowaa. Mii 'imaa keshi​waapamek. Maamihkawik tahsh i'i kaa'ininakook," okii'ikowaan. 8 Miitahsh shemaak kaa'ishi​nakatamowaatc i'i ciipekamik ekiih​kohtaaciwaatc. Shaakooc itahsh wiinke kiihciihkentamook, ekii'ahpahtoowaatc ewii'wiintamawaawaatc i'i kihkino'amawaakana'. 9 Sesakooc tahsh okii'nakishkaakowaan Ciisahsoon: "Pooshoo," e'ikowaatc. Okiih​sakisitenaawaan hsa ekii'ociciinkwaniihtawaawaatc. 10 Miitahsh kaa'ikowaatc: "Keko sekisihkek! Maacaak hsa, awikanoonihkwak niicihkiweyak ci-ishaawaatc Kaalaliink, miitahsh weti keshi​waapamiwaatc," okii'ikowaan. 11 Mekwaa tahsh e'ani​pimiayaawaatc iki ihkwewak, aaninta tahsh shimaakanihshak kaakiih​kanawentamowaatc ciipekamik, kiihkiiweishaawak weti Ceroosalamink (Jerusalem) ekii'wiintamawaawaatc Kihcianami'ewikimaa' kahkina kekoonini kaakii'inahkamikaninik. 12 Kihcianami'ewikimaak, iki kaye kaaniikaanisiwaatc Coowak kii'onentamook aaniin keishihcikewaatc. Miitahsh kaa'ishi​miinaawaatc niipowa' shooniyaan ini shimaakanihsha', 13 e'inaawaatc: "O'o hsa kikaihkitom: 'Okihkino'amawaakana' kiihpi​takohshinoo' ehtipihkaninik mekwaa e'nipaayaank, miitahsh iinsan kaa'ishi​kimootinitc i'i owiiyaw.' 14 Kiishpin tahsh kihcionahshowewikimaa noontank o'oweni, niinawint hsa ninka​kashkimaanaan kiinawaa kekoon cipakamishkaakohsiwek," okii'inaawaa'. 15 Iki tahsh okanawencikek okii'otaahpinaawaan ini shooniyaan, ekii'ishihcikewaatc kaakii'inintwaa. Miitahsh Coowak keyaapi noonkom kaakiishikaninik o'o pepaaihkitowaatc. 16 Iki tahsh mitaahshipeshik (11) kihkino'amawaakanak kii'ishaawak weti kaaishi​pihkwatinaanik Kaalaliink (Galilee) kaakii'ikowaatc Ciisahsoon ci-ishaawaatc. 17 Ahpii tahsh e'waapamaawaatc okii'ociciinkwaniihtawaawaan. Aaninta tahsh kaawiin okiih​kwayahkwenimaahsiwaawaan. 18 Ciisahs itahsh pehsho okiih​pinaasihkawaa' ekii'inaatc: "Kahkina hsa kashki'ewisiwin ninkii'miinikoowis kahkina kekoon citipentamaan kihcikiishikonk, ahkiink kaye. 19 Maacaak tahsh, naasihkawihkwak iki kahkina kaatahswewaanakisiwaatc pemaatisiwaatc, kihkino'amawihkwak cipiminisha'owaatc. Siika'antawihkwak kaye otishinihkaasowininiink ini Weyoohsimimintc, ini kaye Wekosihsimimintc, ini kaye Kishemanitoo otAhcaahkwan. 20 Cikihkino'amawekwaa kaye citootamowaatc kahkina kekoonini kaakii'ininakook. Mooshak tahsh eyaantahsokiishik kikawiiciiwininim piinihsh i'i ahpii ci-ishkwaahsekin ono kaapimihsekin o'omaa ahkiink," kii'ihkito.

Maarhk 1

1 Mii 'iwe minwaacimowin kaaishi​tipaacimintc a'awe Ciisahs Christ weKosihsimikotc Kishemanitoon. Mii'iwe kaaishi​maacihsek i'i tipaacimowin, 2 mayaa kaainahtenik otooshipii'ikewin Aaiseya (Isaiah) otipaacimo weshkac kaakiih​kanootamawaatc Kishemanitoon. "Niin Kishemanitoo niniikaaninisha'waa niwiintamaakewininiim. Nahkawe kikakwayaancihtamaak miihkana keshi​takohshinan," ishipii'ikaate. 3 Shikwa kii'ihkito Aaiseya: "Matweayaa awiya pikwatahkamikaank ehshaahshaakowetc: 'Kwayaancihtamawihk omiihkanaam a'a Tepenciketc, cikwayahkwamoninik keishi​pimiayaatc,' " ihkitoomakan. 4 Paanimaa tahsh a'a Cwaan (John) Siika'antaakewinini kii'naanaakosi i'imaa pikwatahkamikaank. Kii'ishi​wiintamaake tahsh e'ihkitotc: "Kwehkipimaatisik, siika'antaasok, Kishemanitoo kikapoonentamaakowaa kimacitootamowiniwaan," kii'ihkito. 5 Misiwe ko kiihpi​onciiwak awiyak i'imaa Cootiiyaawi​ahkiink (Judea) kaye ko i'imaa Ceroosalamiiwi​ootenaank (Jerusalem), ekiih​pinaasihtawaawaac ini Cwaanan. Shikwa ekiihpi​tatipaatotamowaatc omacitootamowiniwaan, okiih​siika'antaakowaan ini Cwaanan i'imaa Cwaartanawi​siipiink (Jordan). 6 Shikwa otaakoo'on a'a Cwaan, pihkwaawikanewimihtatim opiiwayink kii'onciimakanini tinowekin kaahkikishkank, ekiih​kitimaakinaakositc ekii'ishi'otc. Shikwa kaye kiihkihcihpiso i'i pashkwekinooni. Shikwa tahsh kii'ishi​omiicimimi kihcipahpahkine' ekii'amwaatc kaye pikwaci aamoowi​siinsipaahkwat. 7 Shikwa kii'ishi​wiintamaake o'owe: "Piayaahpiihtenti hsa piciinak kepitakohshink inini, nawac keishpentaakositc ahpiihc itahsh niin. A'awe hsa ko kaapi​piminisha'otc, inashke ko kaawiin niin kanake ninteahpiihtentaakosihsii cinawakiiyaampaan ciaapa'amowak omahkisineyaapiin. 8 Kitishi​siika'antawininim niin nipiink. Wiin itahsh wiin kikakikishkamoonikowaa Kishemanitoon otAhcaahkoni. Mii 'owe kaawii'ishi​siika'antawinek," kii'ihkito a'a Cwaan. 9 Kii'ishihse tahsh i'i ahpii, ekiih​takohshink a'awe Ciisahs, ekiihpi​onciitc weti ootenawenhsink Naasarit (Nazareth) e'ishinihkaatenik, i'imaa Kaalaliiwi ahkiink (Galilee) e'ayaanik ootenawenhs. Okiih​pinaasihkawaan tahsh ini Cwaanan (John), ekiih​siika'antaakotc i'imaa Cwaartanawi siipiink (Jordan). 10 Piciinak itahsh e'akwaasiitc a'a Ciisahs, okii'waapantaan i'i kiishik ehpaahkihsenik. Shikwa okii'waapamaan ini Kishemanitoon otAhcaahkoni ehpinaashiinitc, omiimiinhsink e'ishinaakosinitc ehpi​pooniihsantaakotc ehpi​piincishkaakotc ini Ahcaahkwan. 11 Shikwa kiihtepihtaakwan inwewin kiishikonk: "Kiin ihsa ninKosihs siyaaki'inaan, kiin kaana'entami'iyan." 12 Shemaak tahsh weti okii'ishi​wiihkoshkaa'ikoon Ciisahs ini Ahcaahkwan, pikwatahkamikaank ekii'ishi​maacaatc. 13 Miitahsh i'imaa kaa'ishi​niimitana​tahsokonitc pikwatahkamikaank. Amiitahsh i'imaa Setan (Satan) okiih​kakwe​kashki'aan Ciisahsoon cimacitootaminitc. Pikwaci​aya'aawihshak kaye kii'ayaawak weti kaakii'ishi​ayaanitc. I'imaa tahsh encalak okiihpi​kanawenimaawaan Ciisahsoon. 14 Paanimaa tahsh kaahkipa'ontc a'a Cwaan (John) Siika'antaakewinini, kii'ani​takohshin a'a Ciisahs i'imaa Kaalaliiwi ahkiink (Galilee) e'wiintamaaketc i'i Kishemanitoo ominwaacimowin, 15 o'owe e'ihkitotc: "Mii aasha e'ocihcihsek! Aasha pehshonaakwanini 'i Kishemanitoo ciokimaahkantaaketc! Kwehkipimaatisik, tepwehtamohk o'o minwaacimowin!" kii'ihkito. 16 Mekwaa tahsh ekiihpi​pimaashakaametc Ciisahs Kaalaliiwi Saaka'ikaniink okii'ani​waapamaa' Saaimanan (Simon) kaye Saayiman wiicihkiweyan Entaroon (Andrew), mekwaa ehpahkopii'waanitc ahsapiin. Aaniihsh i'i mii 'owe otanohkiiwiniwaa i'i pakita'wewin. 17 Okiih​kanoonaa' itahsh: "Haw ampeyohk, piwiiciiwihshik," okii'inaa'. "Inashke hsa kaapi-inanohkiiyek ehpakita'waayek, noonkom itahsh kikamaaciikihkino'amawininim cipiitamawiyek pemaatisiwaatc," okii'inaa'. 18 Miitahsh shemaak kaa'ishi​nakanaawaatc otahsapiiwaa', ekii'ani​wiiciiwaawaatc ini Ciisahsoon. 19 Miinawaa tahsh iko naakewaahsa e'ani​takohshink Ciisahs, okii'waapamaa' ini Ciimisan (James) kaye Cwaanan (John), e'wiicihkiweyintinitc, okosihsa' a'a Sepatii (Zebedee). I'imaa kii'ayaawa' piintoonak, mekwaa ehkwayaanci'aanitc otahsapiini. 20 Shemaak itahsh Ciisahs okii'antomaa'. Miitahsh kaa'ishi​nakanaawaatc otetewaan Sepatiin, i'imaa ciimaanink e'ayaanitc, i'iweniwa' kaye anohkii'aakana'. Miitahsh kaa'ani-ishi​wiiciiwaawaatc ini Ciisahsoon. 21 Miitahsh weti kaani-ishi​takohshinowaatc ootenaank, Kaparniyam (Capernaum) e'ishinihkaatenik. Miitahsh piciinak e'ishikiishikahk kaaotAnwepiiwi​Kiishikanoomiwaatc iki Coowak, mii'imaa kaa'ishi​piintiketc a'a Ciisahs i'imaa Coowa' otanami'ewikamikoniink, ekii'maaciikihkino'amaaketc. 22 Okii'maamahkaasihtaakoo' itahsh i'i pemaatisinitc eshi​kihkino'amaaketc. Wiin aaniihsh okii'ishi​kihkino'amawaa' taapishkoo mii wa'awe e'okimaawentaakositc. Kaawiin wiin taapishkoo kii'ishi​ayaahsii oko kaakihkino'amaakewaatc i'i Coowa' otOonahshowewinini. 23 Mii'i ahpii kiihpiintike 'imaa anami'ewikamikonk a'a peshik inini ehkikishkawaatc maciahcaahkwan, ekii'ishi​shaakowetc: 24 "Kiin Ciisahs Naasaritink (Nazareth) wenciiyan! Wekonehsh wenci​papaamenimiyaank? Kipionci-ishaa na cinihshiwanaaci'iyaank? Kikihkenimin kiin aweneniwiyan, kiin a'a KaaPehkisitc Kishemanitoonk kaaonciitc!" kii'ishikishiiwe. 25 Ciisahs itahsh okiih​kishiikanoonaan: "Pisaan! Keko kekoon ihkitohken! Nakash a'a inini!" okii'inaan ini maciahcaahkwan. 26 Miitahsh ekii'ocipinikoshkawaatc ini ininiwan a'a maciahcaahk, ekiih​kihcinoontaakositc, mii'i kaa'ishi​nakanaatc. 27 Kiihkihcikoshkwentamook itahsh kahkina iki pemaatisiwaatc, kaa'onci​kakwecintiwaatc: "Wekonehsh o'owe? Mii hsa 'owe oshkikihkino'amaakewin! Taapishkoo e'okimaawentaakositc otishikanoonaa' i'i maciahcaahkwa', kaye ona'ihtaakoo'!" kii'ihkitowak. 28 Miitahsh i'i weyiip ekiih​papaatipaacimintc misiwe i'imaa Kaalaliiwi ahkiink (Galilee). 29 Miitahsh i'i e'anionci​maacaawaatc i'imaa Coowa' otanami'ewikamikoniink, weyiip iko kii'ani-ishi​piintikewak i'imaa eshitaanitc Saaiman (Simon) kaye Entaroo (Andrew), ekii'ani​wiiciiwikowaatc Ciimisan (James) kaye Cwaanan (John). 30 Ini tahsh Saaiman osikohsan kiihkishisowaahpinewan ekiih​pimihshininitc. Miitahsh i'i shemaak kaa'ishi​wiintamawintc a'a Ciisahs e'ishi​ayaanitc. 31 Miitahsh kaa'ishi​naasihkawaatc ekiih​sakinihkenaatc ekii'ishi​wanishkaapinaatc. Miitahsh shemaak kaa'ishi​nakanikonitc i'i kishisowaahpinewin. Miitahsh kaa'ishi​maaciipami'ikowaatc ini ihkwewan. 32 Ahpii tahsh wenaakohshininik, aasha ekiih​pankihshimonitc kiisihsoon, kiihpaapiitamawaa Ciisahs kahkina kaa-aahkosinitc kaye awiya' kaakikishkawaanitc maciahcaahkwa'. 33 Piinihsh iko kahkina minihk eyaawaatc i'imaa ootenawenhsink kiihpi​maawaci'itiwak i'imaa akwaci-ishkwaantenk. 34 Niipiwa' itahsh okiih​pimaaci'aa' Ciisahs i'i aaniin iko enaahpinenitc. Kaye niipiwa' okiih​saakicinisha'amawaa' maciahcaahkwa' kaakikishkawaanihpan awiya'. Kaawiin itahsh okiih​pakitinamawaahsii' cikiikitonitc i'i maciahcaahkwa', aaniihsh okiih​kihkenimikoo' e'oKosihsimikotc Kishemanitoon. 35 Wiipa tahsh ehkishepaawakaninik cipwaa piitaapaninik, kii'wanishkaa, ekii'ani​saaka'ank, ekii'nihshihkeishaatc inkoci. Miitahsh i'imaa kaa'ishi​anami'aatc. 36 Paanimaa tahsh a'a Saaiman (Simon) kaye iniweniwa' kaawiiciiwikotc okiih​pima'anaawaan ini Ciisahsoon ekii'nanaantone'waawaatc. 37 Miitahsh e'mihkawaawaatc okiih​kanoonaawaan: "Kahkina awiya kinaanaantonaak," okii'inaawaan. 38 Ciisahs itahsh okii'inaa': "Taka weti ishi​maacaataa ciikaya'ii eyaakin ayaawinan, i'imaa kaye citashi​wiintamaakeyaan Kishemanitoo otihkitowin. Aaniish mii'iwe kaaonci​piishaayaan," kii'ihkito. 39 Miitahsh i'i kaa'ishi​papaamiayaatc i'imaa Kaalaliiwi ahkiink (Galilee) misiwe, ekiih​papaakakiihkwetc i'imaa Coowa' otanami'ewikamikoniink. Shikwa tahsh kaye okiih​saakicinisha'amawaa' maciahcaahkwa' awiya'. 40 Aapitink itahsh ehkiishikaninik okiihpi​otihsikoon Ciisahs peshik ininiwan ekii'omikiiwaahpinenitc, ehpi​pakohsenimikotc kaye ko e'ociciinkwanapiihtaakotc, e'ikotc: "Kiishpin inentaman kitaa​kashkihtoon cipehki'iyan," kii'ihkitowan. 41 Ciisahs itahsh wiinke ekiih​kitimaakenimaatc, okiih​shiipinihkehtawaan ekiih​saaminaatc. Shikwahsh ekii'inaatc: "Eha', nintinentam. Kika​pehki'ikoowis," okii'inaan. 42 Miitahsh i'i shemaak kaa'ishi​nakanikonitc i'i otinaahpinewinini ini ininiwan. Kii'minoayaawan e'naapinaakosinitc. 43 Shemaak itahsh okii'maaciinisha'waan a'a Ciisahs ini ininiwan. Ahkawe tahsh wiinke okii'ayaankwaamimaan o'o: 44 "Ayaankwaamisin," okii'inaan. "Keko kekoon awiya wiintamawaahken. Ishaan itahsh anami'ewikimaa ciwaapamihk. Moosihs (Moses) kii'inaahkonike i'i pakitinikewin cimiikiwetc awiya ahpii kiiminoayaa'intc. Mii'iwe miikiwen cikihkenimihkwaa pemaatisiwaatc e'minoayaayan," okii'inaan. 45 Wiin itahsh a'a inini kaakii'minoayaa'intc, aanciko kii'ani​tipaacimohtaake misiwe ekiih​kihkentamooshiwetc. Miitahsh o'o onci, kaawiin kii'mihcicehkishkaahsii ootenawenhsink a'a Ciisahs, ekaa cikihkenimaahsiwintc. Miitahsh intawaac i'imaa pikwacaya'ii ekaa kaaishitaaniwansininik kii'ayayaa. Misiwe tahsh okiihpi​ayonciotihsikoo' awiya'.

Maarhk 2

1 Paanimaa pankii kiihtahsokoonakaanik miinawaa kii'anionci​takohshin i'imaa Kaparniyamiiwi ootenaank (Capernaum). Kiihtanaacimaa tahsh e'ayapitc kaashitaatc. 2 Niipiwa' itahsh kiihpi​maawaci-ishaawa', piinihsh wiinke kiihsaakitashkinewa', ampooshke akwaci-ishkwaantenk. Ciisahs itahsh mekwaa okiih​kakakanoonaa' ekiih​tashintank Kishemanitoon otihkitowinini. 3 Kiihpiishaawak itahsh awiyak ehpiinaawaatc peshik e'nipowaahpinenitc. Kii'niiwiwak itahsh iki kaapimiwinaawaatc. 4 Kaawiin itahsh okiih​kashkihtoohsiinaawaa pehshoo cinaasihkawaawaatc Ciisahsoon, kaa-ahpiihci​mooshkinenik i'i waahkaa'ikanini. Miitahsh i'i kaa'ishi-ihkwaantawewaatc e'napakaanik wakiic waahkaa'ikan ekiih​pahpahkwacipitoowaatc ahpahkwaan tipishkoo Ciisahsoon kaaishi​niipawinitc. Miihsh i'imaa kaa'ishi​pakonepicikewaatc, kaa'ishi​pakitaapiikinaawaatc ini kaanipowaahpinenitc ahpihshimonink kaapimihshininitc. 5 Ahpii tahsh Ciisahs e'waapantank e'ishihcikenitc ehtepweyenimikotc i'i ininiwa', miitahsh kaa'ishi​kanoonaatc ini kaanipowaahpinenitc: "Niicii! Poonencikaatewan kimacitootamowinan," okii'inaan. 6 Aaninta tahsh iki kaakihkino'amaakewaatc Coowa' otOonahshowewinini i'imaa kii'namatapiwak, mii 'owe ekii'ishi​naanaakatawentamowaatc: 7 "Aaniihsh wa'a wenci-ishikiishwetc? Opaahpinenimaan ini Kishemanitoon!" kii'inentamook. "Kaawiin pahkaan awiya otaa​kashkihtoohsiin cipoonentamawaatc awiyan omacitootamowinini; wiinehta Kishemanitoo okashkihtoon," kii'inentamook. 8 Shemaak itahsh Ciisahs okiih​kihkenimaa' o'owe e'ishi​naanaakatawentaminitc. Okiih​kanoonaa': "Wekonehsh wenci-ishinaanaakatawentamek?" okii'inaa'. 9 "Aaniin tahsh eshi​wentahkipan? Cikii-inakipan a'a kaanipowaahpinetc: 'Kipoonentamawin kimacitootamowinan,' kemaa cikii-inakipan: 'Pasikwiin, otaahpinan kitahpihshimon, pimohsen?' 10 Niin ini Inini oKosihsan; kikakihkenimim e'miinikooyaan kashki'ewisiwin o'omaa ahkiink e'ayaayaan cipoonentamawak awiya omacitootamowinan," okii'inaa'. Miitahsh okiih​kanoonaan ini kaanipowaahpinenitc: 11 "Haw pasikwiin, kitinin! Otaahpinan i'i kitahpihshimon, anikiiwen!" okii'inaan. 12 Miitahsh kaa'ishi​pasikwiitc a'a inini. Shemaak okii'onci​otaahpinaan otahpihshimon ekii'ani​saaka'ank, kahkina awiya' e'waapamikotc. Kii'onci​maamahkaatentamook itahsh kahkina. "Tepwe maamahkaasinaakwan Kishemanitoo kaatootank!" kii'ihkitowak. "Kaawiin wiihkaa kitishi​waapantansiimin!" kii'ihkitowak. 13 Miitahsh i'i miinawaa kii'ani​naasipii Kaalaliiwi Saaka'ikaniink (Lake Galilee), ekiih​pimaashakaametc a'a Ciisahs. Kiihpi​maawaci-ishaawa' itahsh kahkina ini pemaatisinitc, ekii'maaciikihkino'amawaatc. 14 Miitahsh i'i kaa'ani-ishi​maacaatc, okii'ani​waapamaan ininiwan kaaotaahpinamawaanitc taakihs (tax) shooniyaan kihciokimaan citipa'amawimintc. Liipay (Levi) kii'ishinihkaaso a'a inini, e'oyoohsitc Aalpiyahsan (Alphaeus). Mekwaa kii'namatapi a'a Liipay i'imaa entashi​tipa'amawintc. Okiih​kanoonikoon itahsh ini Ciisahsoon: "Piminisha'ohshin," okii'ikoon. Miitahsh kaa'ishi​pasikwiitc a'a Liipay, e'ani​wiiciiwaatc. 15 Naanaake tahsh kiihtashiwiihsini a'a Ciisahs i'imaa eshitaanitc ini Liipayan. Niipiwa' itahsh i'imaa kii'ayaawak iki kaamaawantoonaawaatc taakihs shooniyaan kaakii'aanawentaakosiwaatc, iki kaye kotak awiyak kaakii'aanawentaakosiwaatc, i'imaa kii'ayaawak. Okii'wiitapimaawaan ini Ciisahsoon kaye okihkino'amawaakanini. Aaniihsh kiihpaahtiinowak oko tino kaapiminisha'waawaatc ini Ciisahsoon. 16 Iki tahsh kaakihkino'amaakewaatc Onahshowewin, miiwakiki i'imaa Perahsiiwininiwa' (Pharisees) kaaonci​tipentaakosiwaatc, okii'waapamaawaan ini Ciisahsoon e'wiiciwiihsiniimaanitc i'i tino kaa-aanawentaakosinitc, ini kaye kaamaawantoonaanitc taakihs shooniyaan. Miitahsh kaa'ishi​kanoonaatc ini Ciisahsoon okihkino'amawaakanini: "Aaniihshwiin wenci​wiiciwiihsiniimaatc Ciisahs iniweniwa' kaatipa'ike'iwenitc, i'i kaye kaa-aanawentaakosinitc?" okii'inaawaa'. 17 Okii'noontaan itahsh a'a Ciisahs. Okiih​kanoonaa' i'i kaakihkino'amaakenitc Onahshowewin: "Iki kaaminoayaawaatc kaawiin onantawenimaahsiwaawaan ini mashkihkiiwininiwan, ikiweniwak ihsa kaa-aahkosiwaatc. Kaawiin kaye niin ninkii'onci​piishaahsii cipiantomakwaapan iki kweyahkopimaatisiwaatc kaainakimintwaa cikwehkaatisiwaatc, iki hsa wiin kaa-aanawentaakosiwaatc," okii'inaa'. 18 I'i tahsh ahpii Cwaan (John) Siika'antaakewinini okihkino'amawaakana' kaye iki Perahsiiwininiwak (Pharisees) kaawiin kii'onci​wiihsinihsiiwak e'ishihtwaawaatc mekwaa. Okiihpi​kakwecimikoo' itahsh Ciisahs awiya': "Ini Cwaan okihkino'amawaakana' kaye iki Perahsiiwininiwak kahkina kaawiin onci​wiihsinihsiiwak e'ishihtwaawaatc. Aaniihshwiin kiin wenci​tootansikwaa kikihkino'amawaakanak?" okii'ikoo'. 19 Ciisahs itahsh okii'ishi​nahkwehtawaa': "Iki kaawiihkwamintaa ehkihciwiitikentink, taamantawii'itisowak ina mekwaa e'wiiciiwikowaatc ini kaawiikihtoonitc ininiwan? Kaawiin kanake! Minihk hsa ko kewiiciiwikowaatc kaawiin kehcinaac taishihcikehsiiwak. 20 Inkotink itahsh tamaaciinaa 'awe kaawiikihtootc inini. Miihsa ahpii cimantawii'itisowaatc," okii'inaa'. 21 Miinawaa kii'ani-ihkito: "Kaawiin awiya otakohta'ansiin pakwa'ikan e'oshki-ishiikinowank kehtekikishkikanink," kii'ihkito. "Kiishpin o'o ishihcikenk, i'i oshkipakwa'ikan tanaanikishkikemakan i'imaa kehteishiikinonk. Miitahsh i'i nawac cipiikoshkaak," kii'ihkito. 22 "Kaawiin kaye awiya opiina'ansiin oshkishoominaapo i'imaa kehte pashkwekinoahtoopaanink. Kiishpin o'o ishihcikenkipan, paanimaa animashkawaanik i'i shoominaapo, tataatoshkikemakan ini pashkwekino ahtoopaanan. Miitahsh i'i cinihshiwanaatahkin i'i shoominaapo kaye ini pashkwekinoahtoopaanan. Oshkipashkwekinoahtoopaanink ehta taishipiina'ikaate 'iwe oshkishoominaapo," kii'ihkito. 23 Aapitink itahsh ekii'Anwepiiwi​kiishikaninik, kii'ani-ishaa Ciisahs i'imaa pahkweshikanikihtikewinink. Miitahsh e'ani​wiiciiwikotc okihkino'amawaakana', kaa'ishi​maaciiociihshipitoonitc pahkweshikanimashkohsiwan ekii'onci​wiihsiniwaatc. 24 I'i tahsh Perahsiiwininiwa' (Pharisees) okii'ikoo': "Inashke hsa, aaniin wenci-ishihcikewaatc oko kikihkino'amawaakanak ekaa cikii-ishihcikehsikwaapan e'inahtenik Anwepiiwi​kiishikaninik?" okii'ikoo'. 25 O'o tahsh okii'inaa' Ciisahs: "Kaawiin ina wiihkaa kikii'anamihtoohsiim i'iwe kaakii'ishihcikekopanen a'awe Tepit (David) ahpii kiimanesitc, ekiih​takomantawiitc kaye tahsh i'iweniwa' kaakii'wiiciiwikotc? Kikii'anamihtoom kehcinaac, 26 ekiih​piintiketc i'imaa pakwaanekamikonk Kishemanitoon kaashi​anami'ehtawimintc, i'i ahpii eyaanikopanen ini kaakii'niikaanentaakosinitc Kihcianami'ewikimaan Apaayahtar (Abiathar) ekii'ishinihkaasonitc. I'imaa tahsh kii'ahsaawa' pahkweshikanihkaana' enaahsamiitc a'a Kishemanitoo. Kaawiin kii'inentaakosihsii awiya ciamwaahpan o'o pahkweshikanihkaana', mii ehta anami'ewikimaak kiihpakitinaawak ciamwaawaatc. Tepit itahsh okii'amwaa' ini pahkweshikanihkaana' kaye i'iweniwa' kaawiiciiwaatc okiih​takomaata'oonaa' ciamwaanitc," kii'ihkito. 27 Miitahsh okii'inaa': "Inashke Kishemanitoo okii'inwaataan ciAnwepiiwi​kiishikaninik ciwiici'ikowaatc iki pemaatisiwaatc. Kaawiin ohsha wiin ehta kii'inahsaahsiiwak iki pemaatisiwaatc cimihci​Anwepiiwi​kiishikanohkewaatc. 28 Niin ini Inini oKosihsan. Nintishiokimaahkantawaak iki pemaatisiwaatc, impooshke enakwaa e'Anwepiiwi​kiishikaninik keishihcikewaatc," kii'ihkito Ciisahs.

Maarhk 3

1 Miinawaa tahsh kii'ani​piintike Ciisahs i'imaa Coowa' otanami'ewikamikoniink. Kii'ayaa tahsh i'imaa peshik inini ehshiikooshkaanik oninc. 2 Aaninta tahsh i'imaa kii'ayaawak kaawiih​kakwe​mamishimaawaatc ini Ciisahsoon. Okiih​kanawaapamaawaan, taka ciminoyayaa'aanikwen mekwaa e'anwepiiwi​kiishikaninik. 3 Ciisahs itahsh okiih​kanoonaan ininiwan kaashiikooshkaanik oninciini: "Piishaan o'omaa niikaanaya'iink," okii'inaan. 4 Miitahsh kaa'ishi​kakwecimaatc i'i pemaatisinitc: "Kii'inaahkonikaate na e'Anwepiiwi​kiishikahk ciminohcikenk, kemaa cimaashihcikenk? Kii'inaahkonikem ina cipimaaci'iwenk kemaa cinihshiwenk?" okii'inaa'. Kaawiin itahsh kii'nawiintaatihsiiwa'. 5 Ciisahs itahsh ekii'waahkaayaapamaatc okii'nishkaapamaa', ekii'onci​wahsitaawenimaatc ekaa ehkitimaakinaakehsinik. Miitahsh okiih​kanoonaan ini ininiwan: "Niiminihkenin," otinaan. Miitahsh ekii'niiminihkeninitc kii'minoyayaahseni 'iweni oninciini. 6 Mii'i kaani-ishi​saaka'amowaatc iki Perahsiiwininiwak (Pharisees), weyiip iko kii'maawaci'itiwak tako kaye ikiweniwak kaawiiciiwaawaatc Heratan (Herod) kihciokimaan. Oko kahkina okiih​tashimaawaan Ciisahsoon, aaniin i'i keishi​nihsaawaahpan. 7 Ciisahs itahsh kaye okihkino'amawaakana' kii'ani-ishi​maacaawa' i'imaa Kaalaliiwi Saaka'ikaniink (Lake Galilee). Kihciniipiwa' itahsh ini pemaatisinitc okiih​piminisha'okoo', i'imaa Kaalaliiwi ahkiink e'onciinitc, kaye Cootiiyaawi ahkiink (Judea), 8 Ceroosalamiiwi ootenaank (Jerusalem), Icomiiyaawi ahkiink (Idumea) shikwa weti awahsinahke Cwaartanawi siipiink (Jordan) kiihpi​onciiwak aaninta, shikwa miitaak ini ootenaank Tayar (Tyre), Saaitan (Sidon) e'ishinihkaatenikin. Kiihkihcipaahtiinowak iki kaakii'noontamowaatc i'i kaani-ishihcikenitc Ciisahsoon, ekiihpi​onci​otihsaawaatc. 9 Okiih​kanoonaa' itahsh Ciisahs i'i okihkino'amawaakana' ciwehpemihsitamaakotc ciimaanini, ekaa onsaam cisiincishkaakohsik, ekii'ahpiihci​paahtiinonitc. 10 Aaniihsh aasha okiih​pimaaci'aa' niipiwa' awiya'. Miitahsh i'i kaakiihpi​onci​siincishkaakotc kahkina kaa-aahkosinitc ekiihpi​kakwesaaminikotc. 11 Shikwa ahpii piko e'waapamikotc ini maciahcaahkwa' kaakikishkaakonitc awiya', kii'ishi​kawipani'owa' i'imaa Ciisahs enaahsamikaapawitc, ehkishiiwenitc: "Kiin Kishemanitoo oKosihsan!" e'ikotc. 12 Ciisahs itahsh kihciweweni okii'onci'aa': "Keko ihkitohkek 'Kiin Kishemanitoo oKosihsan,' " okii'inaa'. 13 Paanimaa tahsh kii'ani​aamaciwe Ciisahs i'imaa ehpihkwatinaanik. Shikwa okii'antomaa' iniweniwa' wiin iko kaakii'onaapamaatc. Shikwa tahsh okiih​pinaasihkaakoo' otoonaapamaakana'. 14 Okii'onakimaa' itahsh mitaahshiniishin ininiwa', e'inaatc: "Kiinawaa nintishinisha'waakanak. Kikii'onakimininim cipimi​wiiciayaamiyek. Kaye tahsh kikaishinisha'oninim cipapaakakiihkweyek, 15 kaye kikamiinikoom kashki'ewisiwin cisaakicinisha'amawekwaa maciahcaahkwa' awiyak," okii'inaa'. 16 Okii'onaahkonaa' o'o mitaahshiniishin. Peshik ini kaakii'onaahkonaatc Saaiman (Simon) kii'ishinihkaasowan. Piitar (Peter) kaye okii'ishi​nankinihkaanaan. 17 Shikwa kii'ayaawak Ciimis (James), Cwaan (John), kaawiicihkiweyintiwaatc. Miiwa' okosihsa' 'awe Sepatii (Zebedee). Mii hsa 'i kaa'ishi​nankinihkaanaatc Ciisahs, Powanerciisak (Boanerges), owahkenishkaatisiik o'o ecikaatek ishinihkaasowin. 18 Shikwa oko kii'ayaawak, Entaroo (Andrew), Pilap (Philip), Paarhtaalamiyo (Bartholomew), Maahtiyo (Matthew), Twaamahs (Thomas), Ciimis (James) kaaokosihsimikotc Aalpiyahsan (Alphaeus), Taatiyahs (Thaddeus), Saaiman (Simon) kaye, mii 'awe peshik kaawiih​kakwe​aancihsehtootc okimaawiwin kaatinowitc. 19 Shikwa Cootahs Iskeriyat (Judas Iscariot), mii 'awe paanimaa keishihcike'aatc citahkonimintc Ciisahsoon. 20 Miitahsh kaa'ishkwaa​onaahkonaatc o'o ininiwa', kii'ani​kiiwe 'awe Ciisahs kaashitaatc. Miitahsh miinawaa kiihpi​maawaci-ishaawa' pemaatisinitc i'imaa eshi​ayaawaatc Ciisahs, okihkino'amawaakana' kaye. Piinihsh kaawiin kii'ishihsehsinini impooshke ciwiihsiniwaatc. 21 I'i tahsh otinawemaakana' Ciisahs, ahpii kaa'noontaminitc, okiih​kakwetepipinikoo', "Kiiwashkwe iitok," ekii'ikotc. 22 Weti tahsh kiihpi​onciiwak Ceroosalamink (Jerusalem) aaninta iki kaakihkino'amaakewaatc i'i Coowa' otOonahshowewinini. O'o tahsh kii'ihkitowak ehtashimaawaatc Ciisahsoon: "Okikishkawaan ini maciaya'aan Pi'elsipoloon (Beelzebul)," kii'ihkitowak. Shikwa kii'ihkitowak aaninta: "Miiwanini otookimaamini ini maciahcaahkwa' kaawiici'ikotc Ciisahs cisaakicinisha'amawaatc maciahcaahkwa' awiya'," kii'ihkitowak. 23 Ciisahs itahsh okii'antomaa' i'i pemaatisinitc. Okiih​kakanoonaa' ekii'awehciketc: "A'awe maciaya'aa Setan kaawiin otaa​kashkihtoohsiin cisaakicinisha'amaasohpan i'i wiicimaciahcaahkwa', mii kaawiin inahsh i'i? 24 Shikwa kiishpin nehpicimiikaatink i'imaa okimaawiwinink, kaawiin keyaapi taaokimaahkantaatihsiim. 25 Shikwa tahsh ikiweniwak kaapeshikwewaanakitaawaatc, kiishpin nehpicimiikaatiwaatc kaawiin keyaapi ciwiicitaantiwaatc, cimiiwe'itiwaatc itahsh. 26 Kiishpin tahsh kaye 'awe Setan miikaanaahpan otooshkiniikiima' kaye pepahkaanenintiwaatc, kaawiin keyaapi tamashkawisiihsii, mii'i cipooniyayaa'itisotc. 27 Shikwa kaawiin awiya okashkitoohsiin cipiintiketc otaawininiink ini kaamashkawisiinitc cimahkamaatc otaya'iimini, paanimaa ehta ahkawe mamaancikwahpinaatc ini kaamashkawisiinitc, miitahsh payesh cisaakisihtoohpan otaya'iimini. 28 "Kwayahk kiwiintamawininim: kahkina macitootamowinan taakiih​poonentamawaawak pemaatisiwaatc, kaye minihk iko kekii​maci-inaawaakwen ini Kishemanitoon ehpaahpinotawaawaatc takiih​poonentamawaawak. 29 A'awe tahsh wiin kemaci-inaakwen ini Kishemanitoon otAhcaahkoni, kaawiin wiihkaa tapoonentamawaahsii. Pishihshik itahsh iko takikisi omacitootamowin," okii'inaa' 'awe Ciisahs. 30 Aaniihsh okii'inaawaan ini Ciisahsoon: "Okikishkawaan ini maciahcaahkwan." 31 Kiihpitakohshinoo' itahsh i'i wiicihkiweya' Ciisahs kaye ini omaamaan. Akwaciink itahsh kii'niipawiwa' ekii'ishinisha'owenitc ehpiantomikotc. 32 Ciisahs itahsh mekwaa okii'waawiitapimikoo' iniweniwa' kaamaamawiinonitc. Miitahsh kaa'inintc: "Na! Kimaamaa kaye kiicihkiweyak kipi​antawenimikook i'imaa akwaciink," kii'inaa. 33 O'o tahsh kii'ishi​nahkwehtam: "Awenen a'a nimaamaa? Awenenak iki niicihkiweyak?" kii'ihkito. 34 Okii'waahkaayaapamaa' iniweniwa' kaawiitapimikotc ekii'ihkitotc: "Mii hsa wiinawaa nimaamaa kaye oko niicihkiweyak. 35 Awenenak iko keishihcikewaatc i'i kaainentank a'a Kishemanitoo, miiwakoko keinakwaa, niicihkiwe, kaye nintawemaa, kaye nimaamaa," kii'ihkito.

Maarhk 4

1 Miinawaa tahsh kii'maaciikihkino'amaake a'a Ciisahs i'imaa ciikipiik Kaalaliiwi Saaka'ikaniink (Lake Galilee). Miitahsh kaa'ishi​maawaci'itinitc kehcipaahtiinonitc i'imaa e'ayaatc, ekii'onci​poositc ciimaanink. Mii kaa'ishi​onapitc ekii'akomotc ciikakaam. I'imaa tahsh kahkina kii'ayaawa' i'i piyaahtiinonitc mihtahkamik ehkoahkiiwaninik. 2 Niipiwa' itahsh kekoonan okii'onci​wiintamawaa' e'awehciketc. Miitahsh ekiih​kihkino'amaaketc okii'inaa': 3 "Inashke pisintamohk! Aapitink kii'ishaa peshik kihtikewinini ekii'awi​sasiihswewepinank kihtikaanenhsan. 4 Ehsasiihswewepinank kihtikaanenhsan, kiihpankihsinoon aanint i'imaa kaaishi​mashkawamok miihkanenhs. Pinehshiinshak itahsh i'imaa kiihpi​pooniihsewak ekii'anikitaawaatc. 5 Shikwa aanint kaye kii'ishi​pankihsinoon ini kihtikaanenhsan i'imaa shooshkwaapihkaank ehpipakahkamikaanik. Shemaak itahsh kiihpisaakahkiiwan. Aaniihsh kaawiin kiihkipakahkamikaahsinoon. 6 Ahpii tahsh eni-ishpakoocink kiisihs, kii'ani​paahtewan, kii'ani​papiihkwaahkwatooshkaawan. Pankii aaniihsh ehta kii'ociipihkoowanoon. 7 Shikwa aaninta kaye kii'ishi​pankihsinoon ini kihtikaanenhsan i'imaa okaawiminakishiik kaashi​nihtaawikiwaahpan. Ahpii tahsh miinawaa eshi​saakahkiiwaatc oko okaawiminakishiik, okii'wanaahtoonaawaan ini kaakiih​kihtikaatenikin. Miitahsh kaawiin kiihkiishi​nihtaawikihsinoonan, kaawiin kaye miinawaa kihtikaanenhsan kii'onci​nihtaawikihsinoonan i'imaa. 8 Shikwa aanint kaye kiihpankihsinoon i'imaa eshi​onishihshink ahki. Miitahsh kiihsaakahkiiwan, piinihsh kaye kii'ani​kiishikinoon; kaye keyaapi kii'onci​nihtaawikinoon kihtikaanenhsan, piinihsh aanint nihsimitana (30) tahsin kii'onci​nihtaawikinoon, kaye aanint ninkotwaahsimitana (60), kaye aanint ninkotwaahk (100) tahsin kii'onci​nihtaawikinoon entahsink," kii'ihkito. 9 Shikwa tahsh okii'inaa': "Taka pisintamohk, minihk wehtawakaayek," kii'ihkito. 10 Ahpii tahsh nihshihke kaa'ayaawaatc kaakii'wiiciiwikotc, maamaw i'i mitaahshiniishin okihkino'amawaakana', okiih​kakwecimikoo' aaniin keishi​nihsitohtaakwaninikipaniin ini awehcikanan. 11 O'o tahsh okii'inaa': "Kiinawaa kikihkentamo'ikowaa Kishemanitoo kaasanakaninikin kekoonan kaakiih​kihkentaakwahsininikipaniin, mii'iweni Kishemanitoo oTipencikewin entashintenik. Ikiweniwak itahsh ekaa kaawiiciiwihsinowankwaa, kahkina kekoon awehcikanink ishikihkino'amawaawak. 12 Mii 'owe kaaonci-ishihcike'intwaa: 'Mihsawaa hsa ko aana waawaapantamowaatc, kaawiin okanihsitaawentansiinaawaa. Shikwa, mihsawaa hsa ko aana naanoontamowaatc, kaawiin tanihsitohtansiiwak. Kiishpin nihsitohtamowaahpan otaapikiiwenotawaawaan Kishemanitoon, miitahsh cikiipoonentamaakowaatc,' " kii'ihkito. 13 Shikwa tahsh okii'inaa': "Kaawiin ina kinihsitohtansiim? Aaniin tahsh kekii'onci​nihsitohtamekipan kahkina ini awehcikanan kiishpin nihsitohtansiwek o'o peshik awehcikan? 14 A'a kihtikewinini, mii kaaicikaasotc awiya ehpapaawiintank Kishemanitoon otipaacimowinini. 15 Inashke aaninta awiyak taapishkoo ishi​ayaawak i'iwe kaaishi​mashkawamok i'imaa kihtikaanenhsan e'ishi​pankihsinkin. Onoontaanaawaa 'iwe Kishemanitoon otipaacimowinini. Piciinak itahsh e'noontamowaatc, opi​otaahpinamaakowaan ini Setanan (Satan) ciwaniihkewaatc i'i kaakii'noontamowaatc tipaacimowin. 16 Shikwa aaninta awiyak inentaakosiwak taapishkoo kihtikaanenhsan ehpankihsinkin i'imaa eshipipakahkamikaak ehshooshkwaapihkaak. Kiinoontamowaatc tipaacimowin, shemaak iko otootaahpinaanaawaa e'moocikentamowaatc. 17 Miitahsh taapishkoo kaanihtaawikinkin e'ociipihkaawansinokin, kaawiin kinwesh ayaahsiiwak. Acina ehta tepwehtamook. Paanimaa tahsh otoonci​mikoshkaaci'ikowaan awiyan komaa kaye otoonci​kakwaataki'ikowaan ekii'otaahpinamowaatc Kishemanitoon otipaacimowinini. Miitahsh weyiip iko ishi​pakiciiwak. 18 Shikwa aanint taapishkoo ishi​ayaawak ekii'ishi​pankihsinkin kihtikaanenhsan i'imaa ahkiink eshi​okaawiminakishiihkaak. Otaana​noontaanaawaa Kishemanitoon otipaacimowinini. 19 Otoonsaamentaanawaan itahsh ono kekoonan o'omaa ahkiink kaa-ayaanikin, kaye ominwentaanaawaa wenootisiwin, kaye pahkaan kekoonan onanaantawentaanaawaan. Mii hsa ono kekoonan kaawanaa'ikowaatc ekaa cipapaamihtansikwaa Kishemanitoon otipaacimowinini, miitahsh kaawiin kekoon taonciimakahsinoon. 20 Aanint itahsh ishiayaawak taapishkoo ekii'ishi​pankihsinkin kihtikaanenhsan i'imaa eshi​minohkamikaak. Miiwak oko kaanoontamowaatc i'i Kishemanitoon otipaacimowinini, e'otaahpinamowaatc kaye. Miitahsh e'ani​piicinishkaawaatc, taapishkoo kaanihtaawikinkin e'ishinaakosiwaatc i'imaa keyaapi kaanihtaawikinkin kihtikaanenhsan, aanint nihsimitana (30) tahsin, aanint kaye ninkotwaahsimitana (60) tahsin, aanint kaye ninkotwaahk (100) tahsin, mii'i eshinaakosiwaatc," kii'ihkito. 21 Shikwa tahsh kii'ani-ihkito Ciisahs: "Awiya piintikatootc waahsahkonencikan, oka-animihkohshimaan ina ahtoopaanahkihkwan cikaatootc? Shiipaanipewinaahk ina okashi​shekonaan? Kaa maawiin. Inwaate aaniihsh ciakootekipan waahsahkonencikanaahtikonk. 22 Kahkina kekoon kaakaacikaatek, mii'iwe piciinak cimohsheyaapancikaatek. Shikwa kiishpin aanakii'aakwana'ikaatekipan kekoon, mihsawaa tanaakwan waahseyaank. 23 Minihk wehtawakaayek, weweni pisintamohk!" kii'ihkito. 24 Shikwa tahsh okii'inaa': "Ayaankwaamentamohk o'o kaapisintamek. I'iwe inaahkonikewin keonci​tipaahkonekwaa kiicipimaatisiiwaak, amii'iwe peshikwan inaahkonikewin kekiinawaa keonci​tipaahkoninek Kishemanitoo, kaye awahshime kikainakintamaakowaa. 25 A'awe hsa kaaminoaapacihtootc 'iwe kaanihsitohtank, mii'awe keyaapi kemiinintc nihsitohtamowin. A'awe tahsh kaamanaa-aapacihtootc 'iwe kaanihsitohtank, ampooshke taotaahpinamawaa 'i minihk aanakii'nihsitohtankipan," kii'ihkito. 26 O'o tahsh kaye kii'ani-ihkito: "Mii hsa 'owe eshi​ayaanik Kishemanitoo oTipencikewin, taapishkoo awiya inini i'imaa e'ahpakitootc kihtikaanenhsan ahkiink. 27 Nipaa ehtipihkaninik, wanishkaa ehkiishikaninik. Piinihsh iniwe kihtikaanenhsan ani​saakahkiiniwan, e'ani​nihtaawikininikin, aanawiin ehkihkentansik a'a inini aaniin eshi​maaciikinkin. 28 Tipinawe aaniihsh o'o ahki nihtaawikihcikemakan, nihtam e'ani​mashkohsiwank, piinihsh e'ani​niiskanakihkink, miitahsh piinihsh ehkiishikik. 29 Ahpii tahsh kaahkiishikik, miitahsh weyiip eshi​kiishkishiketc inini, aaniihsh mii 'o ahpii cimaawacihciketc," kii'ihkito. 30 Shikwa kaye kii'ihkito Ciisahs: "Wekonehsh miinawaa kewiintamawinakookipan cikihkentamooninakook Kishemanitoo otipencikewin? Wekonehsh tino pahkaan awehcikan keonci​waapanta'inakookipan aaniin i'i eshinaakwahk? 31 Mii 'owe eshinaakwahk: taapishkoo 'iwe peshik kihtikaanenhs, 'iwe maawac kaa-akaahsink o'omaa ahkiink kaapakitinikaatek kihtikaanenhs. 32 Mii hsa 'o kaaonci​piicinikik o'o maawac kaamihcaahkwahk, ini tahsh wiin kahkina kaamihcipimiayaamakahkin. Kihcimamaankatihkwanakisi. Iki tahsh pinehshiinshak pi-ishiwasihswanihkewak eshi​akawaahtenik," kii'ihkito. 33 Niipiwa' ihsa ono tino awehcikanan okii'ishi​wiintamawaa' 'iwe Kishemanitoon otipaacimowinini, minihk ihsa kaaishi​kashkihtoonitc ci-ishi​nihsitohtaminitc. 34 Awehcikewinink ehta okii'onci​kakanoonaa'. Ahpii tahsh e'nihshihkeayaawaatc okii'nihsitohtamoonaa' kahkina kekoon i'i okihkino'amawaakana'. 35 Miitahsh i'i peshikwan ehkiishikaninik, ahpii wenaakohshininik, okiih​kanoonaa' i'i okihkino'amawaakana': "Haw ihsa ishaataa weti akaamink," okii'inaa'. 36 Miitahsh i'i kaa'ishi​nakanaawaatc i'i miyaamawenonitc, ekii'ishi​maacii'oonaawaatc Ciisahsoon i'imaa kaakii'ishi​namatapinitc piintoonak. Pahkaan itahsh kaye kii'ayaawan ciimaanan kaawiita'oomikotc. 37 Miitahsh ketahto kiihkihcipakamaaniman ekiih​kihcimamaankaashkaanik itahsh, kiihsaahsiika'okowak ekii'ani​mooshkinepiik i'i ciimaan. 38 Wiin itahsh Ciisahs i'imaa kiihtashinipaa otaahkaanink, ahpapiwinink ekii'ahpihkwehshink. Miitahsh okii'aamaci'ikoo' e'ikotc: "Okihkino'amaake! Kaawiin ina kiwiih​papaamentansiin ewii'nihsaapaaweyank?" okii'ikoo'. 39 Miitahsh kaa'ishi​wanishkaatc. Okiih​kishiikanootaan nootin, kaye okiih​kanootaan i'i nipi: "Mii'i minihk! Mii'i keshi​aanwaahtink!" okii'itaan. Miitahsh kaa'ishi​kipihtaanimaninik, wiinke kaye kaa'ishi​aanwaayaashkaanik. 40 O'owe tahsh okii'inaa' Ciisahs okihkino'amawaakana': "Aaniihshwiin wenci​sekisiyek? Kaawiin ina mahshi kitahpenimonotawaahsiwaawaa Kishemanitoo?" kii'ihkito. 41 Aahpici tahsh kiihkihcisekisiwak. O'owe tahsh kii'itiwak: "Awenen wa'a? Ampooshke nootin kaye saaka'ikan ona'ihtaakon!" kii'ihkitowak.

Maarhk 5

1 Miitahsh kaa'ani​aashawa'amowaatc Ciisahs kaye okihkino'amawaakana' weti akaamink, e'ani​mishakaawaatc i'imaa ahkiink kaa-ayaanitc i'i Kerahsaawininiwak (Gerasenes). 2 Piciinak itahsh iko ehkapaatc a'a Ciisahs, okiihpianta​nakishkaakoon peshik ininiwan pikwacaya'ii kaapi​onciinitc na'initiiwikamikoon eyaanikin kaashi​wiimpahkamikaanikin, ehkikishkawaanitc maciahcaahkwan. 3 Mii'imaa kaaishitaatc a'a inini mekwe na'initiiwikamikohkaank. Kaawiin keyaapi okiih​kashki'ikohsiin awiyan cimamaancikwahpinikohpan, ampooshke sakaapaanan aana-aapataninikin. 4 Sahsakwanaa kiihtahtahkopinaa tahkopisonaapihkoon miina sakaapaanan, ositink kaye oninciink a'a inini. Okiih​poohpoohkwaapihkipitoonan itahsh ini sakaapaanan, kaye tahkopisonaapihkoon ekii'aapataninikin wiinke okiih​piihsipitoonan. Shikwa kaawiin awiya kiihteahpiihciihsii ciwaankawi'aahpan. 5 Mii'imaa mooshak kaa-ayaatc a'a inini mekwe na'initiiwikamikonk kaye eshi​papiihkwatinaanik, kapekiishik, kapetipihk, anoociko ehkihci-inihtaakositc, ehpehpehshisotisotc ahsinii'. 6 Miitahsh ehko​tepinaakwaninik ekii'onci​waapamaatc ini Ciisahsoon, kaa'ishi​ahpahtootc, ekii'ahpakisotc eshi​sitekaapawinitc. 7 Ehpiihtowetc itahsh okii'ishi​shaakowaanaan: "Kiin Ciisahs weKosihsimihk Kishemanitoo maawac kaaishpentaakositc! Wekonen waahtootawiyan? Kipakohsenimin ci-inahshotamawiyan, ahpimon 'awe Kishemanitoo ekaa cikakwaataki'ihsiwan!" kii'ihkito. 8 Aaniihsh Ciisahs aasha okiih​kanoonaan ini maciahcaahkwan: "Nakash a'a inini, kiin maciahcaahk," okii'inaan. 9 Shikwa tahsh okiih​kakwecimaan: "Aaniin eshinihkaasoyan?" okii'inaan. Miitahsh eshi​nahkwehtaakotc: "Opaahtiino nintishinihkaas, aaniihsh nimpaahtiinomin," kii'ihkitowan. 10 Enikohk itahsh okiih​pakohsenimikoon a'a Ciisahs ini maciahcaahkwan: "Keko inkoci ishinisha'ohshinaahkaank o'omaa ayaawinink niwiicimaciahcaahkwak!" okii'ikoon. 11 I'imaa tahsh newatatin kihciniipiwa' kii'ishi​ohkwenowak koohkoohshak ekii'ontancikewaatc. 12 Okiih​pakohsenimikoo' itahsh Ciisahs i'i maciahcaahkwa': "Mii'imaa ishinisha'ohshinaam koohkoohshak kaaishi​ayaawaatc, ninka-anta​kikishkawaanaanik," kii'ihkitowa'. 13 Miitahsh kaa'ishi​pakitinaatc a'a Ciisahs i'i maciahcaahkwa'. Miitahsh kaa'ishi​nakanaanitc ini ininiwan, ekii'ani-ishi​piintikeshkawaawaatc itahsh i'i koohkoohsha'. Miitahsh kahkina koohkoohshak i'imaa kaa'ishi​naasipiipa'itiwaatc eshikiishkaamatinaanik ekiih​pahkopiipa'itiwaatc saaka'ikaniink. Kahkina tahsh kii'nihsaapaawewak, niishink mitaahswaahk (2,000) kanapac ekiih​tahshiwaatc. 14 Ikiweniwak itahsh kaakiih​kanawikoohkoohshiwewaatc kii'maaciipa'iwewak, ekii'awi​wiintamawaawaatc iniweniwa' i'imaa ootenaank kaa-ayaanitc kaye anoociko piko kaashitaaniwaninik kaa-ayaanitc. Miitahsh kaahpi-ishi​waapantaminitc i'iwe kaa'ishiwepaninik. 15 Okiih​pinaasihkawaawaan itahsh ini Ciisahsoon, ekii'waapamaawaatc ini ininiwan kaakiih​kikishkawaanihpan ini maciahcaahkwa', i'imaa e'ishi​koshkwaawaatapinitc, ekiih​kikihkonayenitc, ekwa' kwayahk ekii'ishiayaatc otinentamowinink. Miihsh i'i kahkina kaa'ishi​sekisiwaatc. 16 Miitahsh iki nihtam kaakii'waapantamowaatc, okii'wiintamawaawaa' kahkina awiya' aaniin kaa'ishiwepisinitc ini ininiwan kaakiih​kikishkawaanihpan maciahcaahkwa', kaye 'iwe kaa'ishiwepisinitc i'i koohkoohsha'. 17 Miitahsh kaa'ishi​maacii​pakohsenimaawaatc ini Ciisahsoon cionci​maacaanitc i'imaa otahkiimiwaank. 18 Miitahsh ekii'ishi​kiiwepoositc a'a Ciisahs, okiihpi​pakohsenimikoon kaakiih​kikishkawaanihpan i'i maciahcaahkwa': "Ampe hsa kikani​wiiciiwin!" okii'ikoon. 19 "Kaawiin," okii'inaan a'a Ciisahs. "Ishaan weti kiwaahkaa'ikanink, awi​wiintamaw kitinawemaakanak i'iwe kaakihtootawihk kihcikekoon a'a Kishemanitoo, kaye kaakii'ishi​shawenimihk," okii'inaan. 20 Miitahsh kaa'ani-ishi​maacaatc a'a inini ekiih​papaaishaatc i'imaa ahkiink, Mitaahso Ootenawi ahki (Decapolis) e'ishinihkaatenik, ekiih​papaawiintamaaketc aaniin kaakii'ishihcike'ikotc ini Ciisahsoon. Wiinke tahsh kiihkihcimaamahkaatentamook kahkina awiyak. 21 Miitahsh i'i kaani-ishi​kiiweaashawa'ank akaamink i'imaa ciimaanink a'a Ciisahs. Ekiih​pimishakaatc itahsh wiinke kihciniipiwa' okii'naasipiiwamikoo'. 22 Peshik itahsh kiihpitakohshin iki kaakii'okimaahkantamowaatc i'i Coowa' otanami'ewikamikoni, Ceirahs (Jairus) ekii'ishinihkaasotc a'a inini. E'waapamaatc itahsh ini Ciisahsoon, kiihpi​ahpakiso i'imaa enaahsamikaapawinitc, ekiih​kihcipakohsenimaatc: 23 "Nintaanihsenhs aasha akaawaa pimaatisi. Taka pitaankin cipimaaci'atc cinipohsik!" okii'inaan. 24 Miitahsh kaani-ishiwiiciiwaatc a'a Ciisahs ini Ceirahsan. Okii'ani​kohpi​siincishkaakoo' itahsh kihciniipiwa' awiya' kaapi​ohkwenonitc. 25 Peshik itahsh ihkwe i'imaa mekweya'ii kii'ayaa. Mitaahswahshiniishoyahki (12) kii'miskwiiwi e'nehpici-ishiayaatc. 26 Aanciko tahsh kii'wiihsakaahpine aanakii'antawi'ikotc niipiwaa mashkihkiiwininiwa'. Wiinke tahsh okihcaakinaan kahkina oshooniyaaman minihk eyaawaakopanen. Kaawiin itahsh awahshime kii'ani​minoayaahsii, aaniihsh awahshime kii'ani​aahkosi ahpiihc nihtam kiimaataahpinetc. 27 Wa'a tahsh ihkwe kii'noontam ehpiitaacimimintc ini Ciisahsoon. Miitahsh i'i ekiih​pinaasihkawaatc i'imaa ishkweaya'iink e'mekweyenowaatc ekiihpi​saaminamawaatc okikishkikanini, 28 e'itisotc: "Kiishpin ehta saaminamawak okikishkikan, ninka​minoayaa," kii'ihkito. 29 Miitahsh shemaak iko kiihkipiskwakisi. Okii'mooshihtoon wiiyawink ekii'minoayaatc i'i otinaahpinewin. 30 A'a tahsh Ciisahs kiihkihkenintiso ekiih​saaka'amoomakaninik okashki'ewisiwin i'imaa wiiyawink. Kiihkwehkikaapawi tahsh i'imaa mekweyenonitc e'ihkitotc: "Awenen a'a kaahsaaminank i'i ninkikishkikan?" kii'ihkito. 31 O'owe tahsh okii'ikoo' okihkino'amawaakana': "Kiwaapamaak iitok iki kaasiincishkawihkwaa, kitihkit ina tahsh, Awenen kaahsaminitc?" okii'ikoo'. 32 Keyaapi tahsh kii'ayinaapi 'awe Ciisahs ewii'waapamaatc awenenan kaahtootaminitc. 33 Wa'a tahsh ihkwe okiih​kihkentaan i'iwe kaakii'ishihcike'intc. Miitahsh i'imaa kaahpi-ishi​ahpakisotc enaahsamikaapawinitc Ciisahsoon, ehsekisitc e'onci​nininkishkaatc. Shikwa tahsh okiih​caakiwiintaan aaniin i'i mayaa kaakii'ishiwepisitc. 34 Miitahsh kaa'inaatc a'a Ciisahs ini ihkwewan: "E'ahpenimonotawiyan kitoonci​minoayaa. Animaacaan, minwentan. Kaawiin keyaapi kikainaahpinehsii," okii'inaan. 35 Mekwaa tahsh ehtanwewehtootc Ciisahs, aanint awiya kiihpi​ontohsewak i'imaa eshitaanitc ini ininiwan kaaokimaahkantaminitc i'i anami'ewikamik. Okiih​kanoonaawaan ini ininiwan: "Aasha kii'nipo kitaanihs. Keko keyaapi ontami'aahken a'a okihkino'amaake," okii'inaawaan. 36 Kaawiin itahsh okiih​papaamihtawaahsii' 'awe Ciisahs. Okiih​kanoonaan itahsh ini Ceirahsan: "Keko sekisihken, ahpenimonotawihshin ehta," okii'inaan. 37 Kaawiin awiya okii'inaahsiin ciwiiciiwikotc, mii ehta Piitaroon (Peter), Ciimisan (James), Cwaanan (John), miiwanini wiicihkiweyan a'a Ciimis. 38 E'ani​takohshinowaatc itahsh i'imaa kaaishitaanitc ini anami'ewikamik kaaokimaahkantaminitc, okii'ishi​waapantaan a'a Ciisahs, wiinke ekiih​kihci-inahkamikaninik ehkihcimawinaaniwaninik kaye ehkihcinoontaakosinitc awiya'. 39 Miitahsh ekiih​piintiketc okiih​kanoonaa' i'i kaamawihkaanaanitc ihkwesenhsan: "Aaniihshwiin wenci​kihci-inwewitamek ehkihcimawiyek? Kaawiin nipohsii a'a ihkwesenhs, nipaa ohsha," okii'inaa'. 40 Miitahsh i'i kaa'ishi​mihci​kakaanci'ikotc kahkina. Miitahsh kaa'ishi​saakicinisha'waatc. Miitahsh kaa'ishi​wiiciiwaatc ini oteteni kaye omaamaani ini ihkwesenhsan, kaye iniweniwa' kaawiiciiwikotc a'a Ciisahs, i'imaa ekii'ishaawaatc kaakii'ishi​pimihshininitc ini ihkwesenhsan. 41 Miitahsh kaa'ishi​sakinihkenaatc ekii'inaatc: "Taalihta kom!" Mii'iwe e'ihkitotc: "Ihkwesenhs, wanishkaan, kitinin!" okii'inaan. 42 Shemaak kii'wanishkaa 'awe ihkwesenhs, kiihpimohse. Kii'mitaahswahshiniishopipoonwe (12). Wawiinke tahsh kiihkihcimaamahkaatentamook ikiwe kaawaapantamowaatc. 43 Ciisahs itahsh okii'ayaankwaamimaa': "Keko awiya kihkentamoonaahkek. Ahshamihk wa'a ihkwesenhs," okii'inaa'.

Maarhk 6

1 Kii'anionci​maacaa tahsh a'a Ciisahs ekii'ishaatc i'imaa otayaawinink kaakiih​tashiompikitc, ekii'ani​wiiciiwikotc ini okihkino'amawaakana'. 2 Miitahsh ekii'ishikiishikahk kaaotAnwepiiwi​kiishikanohkewaatc iki Coowak, kii'maaciikihkino'amaake Ciisahs i'imaa Coowa' otanami'ewikamikoniink. Niipiwa' itahsh i'imaa kii'ayaawak. Kahkina tahsh awiya okii'maamahkaasihtawaawaan ini Ciisahsoon, e'ihkitowaatc: "Aaniinti naa wentinank wa'a inini ono kekoonan? Wekonen tino kakiihtaawentamowin kaamiinintc? Ina kaa-ahpiihci​maamahkaacihciketc!" kii'ihkitowak. 3 "Kaawiin ina mii wa'a mihtikonaape, kaaokosihsimikotc Meriin (Mary)? Mii wa'a kaaohshiimenshitc Ciimisan (James), Coosihsan (Joses), Cootahsan (Judas), Saayimanan (Simon). Kaawiin ina kaye mii wa'a otawemaa' kaawiiciayaamankwaa o'omaa ootenawenhsink?" kii'ihkitowak. Miitahsh i'i kaawiin okiiwii'otaahpinaahsiwaawaan. 4 Miitahsh kaa'ihkitotc Ciisahs: "Awiya otipaacimo Kishemanitoon kaakanootamawaatc omacenimikoo' owiicionciimaakana' ehta, kaye otinawemaakana', iniweniwa' kaye kaawiiciyayaamikotc. Pahkaan awiyan otishpenimikoon," kii'ihkito. 5 Kaawiin i'imaa okiih​kashkihtoohsiin kihcianohkiiwin citootank, mii ehta cimihci-ishininciinitc pankii awiya' e'aahkosinitc, ekii'minoayaa'aatc. 6 Kii'maamahkaatentam itahsh awiyan ekiih​tepweyenimikohsik. Miitahsh i'i kiihpapaaishaa i'imaa ootenawenhsan ekiih​kihkino'amaaketc. 7 Okii'antomaa' i'i kaamitaahshiniishinitc okihkino'amawaakana', ekii'maacinisha'waatc ekii'neniishinitc, ekii'inaahkonaatc cishaakooci'aanitc maciahcaahkwa'. 8 Okii'inaa' itahsh: "Keko kekoon pimiwitoohkek e'maacaayek, mii ehta sahka'onan. Kaawiin kaye pahkweshikan, kaawiin kaye pakohsencikewipiina'ikan. 9 Kika​kikahkisinem itahsh. Keko tahsh niishwekihkonayehkek. Eshi'oyek ehta ko ishi​maacaak," kii'ihkito. 10 Mii 'o kaye kaa'inaatc: "I'imaa keishi​kiiyooteyek waahkaa'ikanink, mii'imaa peshikwan ayaak piinihsh i'imaa cionci​maacaayek ootenaank. 11 Kiishpin itahsh inkoci ani​takohshinek otaahpinikoohsiwek, nehpicipisintaakoohsiwek, inkoci 'imaa onci-ishaak. Paahpaawisitehshimoonok cionci​kihkentamowaatc e'wanitootamowaatc," okii'inaa'. 12 Miitahsh kaa'ishi​maacaawaatc iki kihkino'amawaakanak, ekii'ishi​kakiihkwewaatc, i'i pemaatisinitc cikwehkaatisinitc. 13 Miitahsh niipiwa' okiih​saakicinisha'amawaawaa' maciahcaahkwa' awiya', ekiih​poosinaawaatc kaye niipiwa' kaa-aahkosinitc ekii'minoayaa'aawaatc. 14 A'a tahsh Herat (Herod) kihciokimaa okii'noontaan ehpapaamimimintc ini Ciisahsoon. Aanint kii'ihkitowak: "Mii nankwana wa'a Cwaan (John) Siika'antaakewinini ekiih​kiiwepimaatisitc. Mii maawiin i'imaa wentinamokwen cimaamahkaacihciketc," kii'ihkitowak. 15 Aanint tahsh wiin kii'ihkitowak: "Mii wa'a Ilaaica (Elijah)." Aanint kaye kii'ihkitowak: "Mii wa'a peshik otipaacimo peshikwan e'ishinaakositc iki weshkac kaakiih​kanootamawaawaakopanen Kishemanitoon," kii'ihkitowak. 16 Ahpii tahsh e'noontank a'awe Herat, kii'ihkitoo: "Mii wa'a Cwaan Siika'antaakewinini kaakiih​kiishkikweta'wak. Kiihkiiwepimaatisi kehcinaac!" kii'ihkito. 17 Wiin aaniihsh Herat kii'anoohkiipan citepipinimintc ini Cwaanan kaye citashimamaancikwahpisonitc kipaahkwa'otiiwikamikonk ciayaanitc. Mii hsa 'owe kaakii'onci-ishihciketc Herat, ciminwentaminitc ihkwewan Hirootiyahs (Herodias) kaaishinihkaasonitc. Aaniihsh mekwaa okii'wiitikemaan. Wa'a tahsh ihkwe aasha kii'onaapemi ini Pilapoon (Philip), miiwan ini wiicihkiweyan a'a Herat. 18 Cwaan itahsh okii'inaapaniin ini Heratan: "Kaawiin inahtehsinoon kiicihkiwe owiitikemaakanan ciwiiciyayaamatipan," okii'inaan. 19 A'a tahsh ihkwe, mii 'awe Hirootiyahs, okiionci​nishkenimaan ekiiwii'nihsaatc ini Cwaanan. Kaawiin itahsh okiih​kashkihtoohsiin. 20 A'awe aaniihsh Herat okiih​kohsaan ini Cwaanan, ekiih​kihkenimaatc kwayahk e'ishiwepisinitc, kaye e'onakimikonitc ini Kishemanitoon. Mii'i kaa'ishi​kanawenimaatc. Okii'minohtawaan ini Cwaanan ehpisintawaatc. Ahpii tahsh iko e'noontawaatc, kii'mikoshkaatentam. 21 Inkotink itahsh kii'ani​kashkihcikaateni 'iwe kaamihsawentank a'a ihkwe. Inkotink ehkiishikaninik Herat kii'wiihkwanke ehtipishkank. Miitahsh ekii'wiihkwamaatc iniweniwa' kaaniikaanentaakosinitc okimaawiwinink, kaye shimaakanihshiiwikimaa', iniweniwa' kaye kaaniikaanentaakosinitc Kaalaliiwi ahkiink (Galilee). 22 Hirootiyahs itahsh otaanihsan kiihpi​piintikewan ekii'niimihtawaanitc, ekii'minwentami'aanitc ini Heratan, iniweniwa' kaye kaakii'wiihkwamimintc. Miitahsh kaa'inaatc a'a Herat ini oshkiniikihkwen: "Wekonen iko mehsawentaman kakwecimihshin, kikamiinin," kii'ihkito. 23 Shikwa tahsh kiihkihciahshotamaake, ekii'ahpimotc Kishemanitoon: "Wekonen iko kekakwecimiyan kikamiinin, impooshke kakwecimiyan aapihta kaatipentamaan kikamiinin," okii'inaan. 24 Miitahsh kaa'ishi​saaka'ank a'a oshkiniikihkwe, ekii'awi​kanoonaatc ini omaamaan: "Wekonen kekakwecimak?" okii'inaan. Miitahsh kaa'ikotc: "Cwaan Siika'antaakewinini ohtikwaan, mii'iweni kakwetwen," okii'ikoon. 25 Miitahsh weyiip kaa'ishi​naasihkawaatc ini kihciokimaan e'inaatc: "Shemaak ninantawentaan i'i Cwaan Siika'antaakewinini ohtikwaan kihcionaakanink ciahtenik, cimiishiyan," kii'ihkito a'a oshkiniikihkwe. 26 Miitahsh kaa'ishi​kihci​mincinawesitc a'a kihciokimaa. Kaawiin itahsh kii'inentansii ciaanwehtawaatc, ekiih​kihciahshotamawaatc ekii'noontaakotc kahkina iniweniwa' kaakii'wiihkwamaatc. 27 Shemaak itahsh peshik okii'antomaan shimaakanihshan ekii'anoonaatc cipiitoonitc i'i Cwaanan ohtikwaanini. Miitahsh shemaak kaa'ishi-ishaanitc weti kipaahkwa'otiiwikamikonk ekii'awi​kiishkikweta'waanitc. 28 Miitahsh kaa'ishi​piitoonitc i'i ohtikwaanimaa onaakanink, ekii'miinaanitc ini oshkiniikihkwen. Mii'i kaa'ishi​miinaatc omaamaan i'i ohtikwaanimaa, a'a oshkiniikihkwe. 29 Ahpii tahsh kaa'noontaminitc i'i Cwaan okihkino'amawaakana' okiih​pinaasihkamini i'i wiiyaw, ekii'ninkwa'aminitc. 30 Iniweniwa' itahsh Ciisahs kaakii'maacinisha'waahpan kiihpi-ishikiiwewa' i'imaa eshi​ayaatc, ekiihpi​wiintamaakotc kahkina kekoon kaahpapaaishihcikenitc, kaye tahsh kaahpapaaishikihkino'amaakenitc. 31 Miitahsh kaa'inaatc: "Ampeyohk, inkoci ishaataa kiinehtawint nihshihkeaya'ii ciayaayank pinamaa cianwepiyek," okii'inaa'. Aaniihsh niipiwa' okiih​pinaasihkaakowaa' kaye kii'ani​maamaacaawa', ekii'ishi​ocaanimahkamikisiwaatc Ciisahs kaye okihkino'amawaakana'. Ampooshke kaawiin kiihtawihsehsiiwak ciwiihsiniwaatc. 32 Miitahsh i'i ciimaanink kaa'ishi​maacii'owaatc weti nihshihkeaya'iink ewii'ishaawaatc wiinehtawaa. 33 Niipiwa' itahsh okii'waapamikowaa' e'ani​maahkwakomowaatc, ekiih​kihkenimikowaatc. Miitahsh kaani-ishi​pimaashakaamepa'itinitc ekii'aasihkaakowaatc ekii'onciinitc i'imaa kahkina ootenaank. 34 Ahpii ehpimishakaatc aasha okii'waapamaa' Ciisahs ehpaahtiinonitc awiya' kaapimaawaci'itinitc. Okiih​kitimaakenimaa' e'ishi​ayaanitc maanahcaanihshink ekaa awiya ehkanawenimikohsinik. Miitahsh kaa'ishi​maacii​kihkino'amawaatc niipiwa' kekoon. 35 Aasha tahsh e'ani​onaakohshininik okiihpi​kanoonikoo' okihkino'amawaakana': "Pikwacaya'ii o'omaa, aasha tahsh naacionaakohshin. 36 Taka maaciinisha'o weti eshi​pehshowankin ayaawinan kaye ootenawenhsan, ciwii'ataawewaatc kemiiciwaatc," okii'ikoo'. 37 Miitahsh kaa'inaatc: "Kiinawaa ko miinihkook kemiiciwaatc," okii'inaa'. O'o tahsh okii'ikoo': "Aaniin tahsh niinawint keshi​ataaweyaankipan a'a minihk pahkweshikan ciahshamankitwaa? Inkotwaahsokiisihs awahshime taakii'anohkii awiya ini minihk cikashki'aahpan shooniyaan," okii'ikoo'. 38 Miitahsh kaa'inaatc: "Awi​waapamihkook aaniin tahswaahtik pahkweshikan eyaawek," ihkito. Ahpii tahsh kaahkihkenimaawaatc aaniin minihk eyaawaawaatc okiihpi-inaawaan: "Naanan ayaawak, shikwa niishin (2) kinooshek," ihkitowak. 39 Ciisahs itahsh okii'inaa' kahkina ciayoohkwapinitc i'imaa eshi​minwashkohsiwaninik. 40 Miitahsh kaa'ishi​ayoohkwapinitc, aanint neninkotwaahk, aanint nenaanimintana ekiih​tetahsopiwaatc. 41 A'a tahsh Ciisahs okii'otaahpinaa' i'i naanan pahkweshikana' kaye i'i niishin kinooshe'. Ishpimink itahsh kii'inaapi, ekii'nanaahkomotc, ekiih​pahpahkwepinaatc pahkweshikana', ekii'nenaawinamawaatc okihkino'amawaakana' cimaamaata'oohkiinitc. Kaye ko 'i niishin kinooshe' okii'nenawinamawaa' cimaamaata'oonimintc entahshinitc. 42 Miihsh i'i kahkina kaa'onci​tewiihsininitc. 43 Miitahsh kaa'ishi​papaa​maawantoonamowaatc ishkwancikanan ikiwe kihkino'amawaakanak, pahkeshikana' kaye kinooshe'. Mitaahshiniishin wiikopiimahkahkoon kii'mooshkineniwan. 44 Ikiweniwak itahsh kaakii'wiihsiniwaatc, naanink mitaahswaahk (5,000) kiihtahshiwak iki ininiwak. 45 Miihsh i'i shemaak kaa'ishi​kanoonaatc okihkino'amawaakana' 'awe Ciisahs: "Mii'i kiinawaa ani-ishimaacii'ok. Weti akaamink ootenawenhsink ani-ishimishakaak Pehseta (Bethsaida) kaaishinihkaatek. Paanimaa kaye niin ninkapi-ishi​takohshin," okii'inaa'. Ahkawe tahsh wiin okiih​kanoonaa' ini kaamaamawenonitc ciani​kiiwenitc. 46 Ahpii tahsh kaahpooshoo'aatc, wiinehta kii'ishaa ehpihkwatinaanik ekii'awi​anami'aatc. 47 Ahpii tahsh enimikiishikaninik aasha mihshawakaam kii'ayaawa' okihkino'amawaakana' i'imaa ciimaanink. Wiin itahsh wiin Ciisahs nihshihke kii'ayaa mihtahkamik. 48 Okii'waapamaa' itahsh okihkino'amawaakana' ekii'ocaanima'okonitc ehkakwe​ashepoyenitc e'oncishkawa'aminitc. Paanimaa tahsh ahpii paataapaninik okii'naasihkawaa', ekiih​pimohsetc wakicipiik ekiiwii'ani​mayaashkawaatc. 49 Ahpii tahsh kaa'waapamaawaatc e'wakicipiikinaminitc, "Ciipay maawiin a'awe," kii'inentamook, ekiih​shaakowewaatc. 50 Aaniihsh kahkina okii'waapamaawaan, kaakii'onci​sekisiwaatc. Shemaak itahsh okiih​kanoonikowaan Ciisahsoon: "Mashkawite'ek!" okii'ikowaan. "Niin ohsha! Keko sekisihkek," okii'ikowaan. 51 Miitahsh kaa'ishi​poosinotaakowaatc. Mii kaa'ishi​kipihtaanimahk. Wiinke tahsh kiihkwiinawi-inentamook. 52 Kaawiin aaniihsh mahshi okii'nihsitaawentansiinaawaa 'iwe kaahtoocikaniwinitc pahkweshikana', onsaam ekiih​petentamowaatc. 53 Mii hsa kaa'ishi​aashawa'amowaatc, ekii'ishi​mishakaawaatc ahkiink Kenehsarit (Gennesaret) e'ishinihkaatek, ekiih​kihciwaahkwahpitoowaatc ociimaaniwaa. 54 Piciinak iko ehkapaawaatc okii'nihsitaawinaakoo' Ciisahs i'i pemaatisinitc. 55 Misiwe ayaawinink awiyak okiih​papaa​ishi​naacipa'aawaa' otaahkosii' ehpi-ishiwinaawaatc otahpihshimoniniink ehpimihshininitc i'imaa e'noontamowaatc Ciisahsoon e'ayaanitc. 56 Miitahsh aanti ko kaa'ishaatc Ciisahs, ootenawenhsink kaye kihciootenaank, kaye ohpimeya'ii, okii'ishi​pimihshimaawaa' otaahkosii' i'imaa entashi​ataawenk. Shikwa tahsh okiih​pakohsenimaawaan Ciisahsoon: "Taka oka​mihcisaaminaanaawaa wanahkwek kikikishkikanink," okii'inaawaan. Awenenak itahsh iko kaahsaaminank wawiinke kii'minoayaawak.

Maarhk 7

1 Inkotink itahsh ehkiishikahk okiihpi​otihsikoo' Ciisahs i'i Perahsiiwininiwa' (Pharisees) kaye aanint kaakihkino'amaakenitc Onahshowewin, Ceroosalamink (Jerusalem) ekiihpi​onciinitc. 2 Okii'waapamaani aanint i'i Ciisahs okihkino'amawaakana' ekii'wiihsininitc ekaa ehpehkininciihsinik, ekaa ahkawe ekii'ishi​kisiininciihsinik taapishkoo e'ishihtwaawaatc iki Perahsiiwininiwak. 3 Iki aaniihsh Perahsiiwininiwak kaye iki Coowak kahkina kaawiin wiihsinihsiiwak ekaa mahshi weweni ehkisiininciihsikwaa, e'ishi​kanawentamowaatc i'i kaa'ishi​aayaanihke​kihkino'amaatiwaatc iki mewisha kaah​pimaatisiwaakopanen. 4 Ahpii tahsh iko i'imaa kaapionci​takohshinowaatc i'imaa ataawewikamikonk, kaa mahshi wiihsinihsiiwak, pinamaahsh cikisiiyaapaawanitisowaatc. Niipiwa' kaye kekoonan kaa'otaahpinamowaatc cikanawentamowaatc, 'owe taapishkoo weweni cikisiihsipatoowaatc minihkwaakanan, ahtoopaanan, osaawaahpihkonaakanan, niipewinaahkoon kaye. 5 Miitahsh kaa'ishi​kakwecimaawaatc iki Perahsiiwininiwak kaye kaakihkino'amaakewaatc onahshowewin: "Wekonehsh kaaonci-ishihcikehsikwaa iki kikihkino'amawaakanak i'iwe kaakii'aanihkekakanooniminankwaa iniweniwa' mewisha kaapimaatisinikopanen, mii ko kiki​wiinininc e'ishiwiihsiniwaatc?" kii'ihkitowak. 6 Okii'nahkwehtawaa' itahsh Ciisahs: "Kiinawaa ominwaatisiishihtook! Kwayahk kikiih​tipaacimikowaa 'awe Aaiseya (Isaiah) ekiih​kanootamawaatc Kishemanitoon, mii hsa 'o kaa'ishipii'ank: 'Kishemanitoo ihkito: Wakicaya'ii nintaana-ahpiihciminotashimikook oko pemaatisiwaatc, Ote'iwaank itahsh ninaawaapamikook. 7 Anihshaa nintanami'ehtaakook, Aaniihsh ishikihkino'amaakewak ininiinaank e'onciimakaninikin inaahkonikewinan, Taapishkoo e'aawaninikin Kishemanitoo okihkino'amaakewinan,' ishipii'ikaate. 8 Mii'i kiinawaa ko kitaanawentaanaawaa 'iwe Kishemanitoo otinaahkonikewin. Meshkwac kikanawentaanaawaan ini ininiwak otaanihke​kihkino'amaatiwiniwaan," okii'inaa'. 9 Shikwa tahsh kii'ani-ihkito: "Maamahkaac kitishihcikem! Weweni e'aanawentamek Kishemanitoo otinaahkonikewin, nawac ewiih​kanawentamaatisoyek kiinawaa kitaanihke kihkino'amaatiwiniwaan! 10 Moosihs (Moses) aaniihsh o'o kii'inaahkonike: 'Kika​kihci-inenimaa kitete kaye kimaamaa.' O'owe kaye kii'ihkito: 'Awenen keinaatc oteten komaa kaye omaamaan: "Kinantawenimin cimaashihseyan" inaatc, kehcinaac cinihsaakaniwitc,' kii'ihkito. 11 Kiinawaahsh wiin kitihkitom: 'Inini oka​inaan oteten komaa kaye omaamaan: "O'owe kaawii'miininakookipan ciwiici'ikoyekipan, mii 'owe Kwaarpaan (Corban)," oka​inaan.' Mii 'owe kaaicikaatek, Kishemanitoo kaatipentank. 12 Miitahsh 'owe nahke eshi​kipihtinek awiya ekaa ciwiici'aahsik ini oteten kaye omaamaan. 13 Aaniihsh mii'iwe kaaonci​aanihsihtooyek Kishemanitoo otihkitowin, kiinawaa ko ehkihkino'amaakeyek kitaanihke kihkino'amaatiwiniwaa. Niipiwa' 'owe tino keyaapi kitishihcikem," kii'ihkito Ciisahs. 14 Miitahsh miinawaa kaa'ishi​antomaatc Ciisahs i'i kaamaamawenonitc, ekii'inaatc: "Pisintawihshik kahkina entahshiyek! Kakwenihsitohtawihshik waa'ininakook. 15 Kaawiin onci​wiinaatisihsii awiya i'iweni kaamiicitc. Inashke mii'iwe otinentamowin kaye otootamowin kaaonci​wiinaatisitc," kii'ihkito. 17 Paanimaa tahsh kiinakanaatc Ciisahs o'o kaaohkwenonitc, ekiih​pipiintiketc waahkaa'ikanink, okiih​kakwecimikoo' okihkino'amawaakana': "Aaniihsh ecikaatek o'o kihkino'amaakewin?" okii'ikoo'. 18 Okii'inaa' itahsh: "Kaa mahshi kekiinawaa kinihsitohtansiim. Kaawiin ina mahshi kikihkentansiim? I'i miicim wakicaya'ii e'onciimakahk, ahpii miicitc awiya, kaawiin otaa​wiinaaci'ikohsiin. 19 Aaniihsh kaawiin ishaamakahsinini i'i miicim i'imaa kaaonci​naanaakatawentank, i'imaahsh wiin omihsataank ishaamakanini. Mii'imaa enionci​saaka'amoomakaninik," kii'ihkito. Mii 'owe kaa'itank Ciisahs, kahkina ko tino miicim ehpehkentaakwaninik. 20 Shikwa kii'ani-ihkito: "I'iwe kaainentank miina kaatootank awiya, mii'iwe kaaonci​wiinaatisitc. 21 Mii aaniihsh i'imaa wenci​naakatawentamink wenciimakaninikin omaci-inentamowiniwaan awiyak. Mii 'owe kaaonci​macitootamowaatc. Pihshikwaatisiwak, kimootishkiwak, nihshiwewak, pahkaan awiya owiitikemaakanini opimentamawaawaa'. 22 Shikwa omihsawentamawaawaa' pahkaan awiya' otaya'iimini, shikwa anoociko ishihcikewak. Wayeshinkewak, anoociko ominwentaanaawaa, ontentamook, tashimiwewak, ishpenintisowak, kakiipaatisiwak. 23 Miiwanono kahkina wenciimakahkin wenci​naakatawentank awiya. Mii'i kaaonci​wiinentaakositc inini," kii'ihkito Ciisahs. 24 Kii'anionci​maacaa Ciisahs, weti nahke e'ani-ishaatc ayaawinink, pehsho 'imaa kaaishi​ootenawaninik, Tayar (Tyre) e'ishinihkaatenik ootena. Miitahsh kii'ani​piintike waahkaa'ikanink, ekii'inentank ekaa awiyan cikihkenimikohsik i'imaa e'ayaatc. Kaawiin itahsh okiih​kashkihtoohsiin cikiimooci​ayaatc. 25 Peshik itahsh kii'ayaa ihkwe, ekiih​kikishkawaanitc maciahcaahkwan otaanihsenhsan. Shemaak e'noontank a'a ihkwe i'imaa e'ayaanitc Ciisahsoon, kiihpi-ishi​animihkopani'o eshi​sitekaapawinitc. 26 Kaawiin Coo ahkiink kii'onciihsii a'a ihkwe, i'imaa tahsh kii'ayintaa Piniihshiya (Phoenicia) ahkiink Siiriya (Syria) ahkiink kaaonci​tipentaakwaninik. Okiih​pakohsenimaan ini Ciisahsoon, inkoci cionci​maaciinisha'waanitc ini maciahcaahkwan kaakikishkawaanitc otaanihsenhsan. 27 Ciisahs itahsh okii'inaan ini ihkwewan: "Kaawiin kwayahkohcikenaaniwansinoon ciotaahpinamawintwaapan iki apinoonciishak omiicimimiwaa ciahshamintwaapan iki animoonhsak. Ahkawe nihtam ta-ahshamaawak iki apinoonciishak," okii'inaan. 28 Okii'nahkwehtaakoon itahsh ini ihkwewan: "Kitepwe, ampooshkehsh wiinawaa animoonhsak omiicinaawaa apinoonciisha' kaapiiwantaminitc shiipaawiihsiniwinaahtik," okii'ikoon. 29 Miitahsh kaa'inaatc Ciisahs ini ihkwewan: "Pisaan anikiiwen, onci 'iwe ekii'minonahkwehtaman. Mii'i kiinakanikotc kitaanihs ini maciahcaahkwan," okii'inaan. 30 Miitahsh kaa'ani-ishikiiwetc a'a ihkwe. Okii'mihkawaan ini otapinoonciishiman ehpimihshininitc nipewinink, ekii'nakanikonitc ini maciahcaahkwan. 31 Miinawaa tahsh kii'anionci​maacaa Ciisahs i'imaa ahkiink kaatakoninik Tayar (Tyre), weti ekii'ani-ishaatc Saaitaniiwi ootenaank (Sidon), piinihsh weti Kaalaliiwi saaka'ikaniink (Galilee), ekii'ani​takohshink kaye ahkiink, Mitaahso Ootenawi Ahki (Decapolis) kaaishinihkaatek. 32 Kiihpi-ishiwitawaa tahsh ininiwan kaakakiipihtenitc, pankii ehta e'okakitowininitc, ehpakohsenimintc cisaaminaatc ciminoayaa'aatc. 33 Ohpimeya'ii tahsh okii'ishiwinaan eshi​ayaahsinik i'i kaaishi​maamawenonitc. Miitahsh kaa'ishi​papiincihtawakenaatc. Miitahsh kaa'ishi​sihkwaatank a'a Ciisahs oninc, ekii'ishi​saaminamawaatc otenaniwini. 34 Miitahsh kihcikiishikonk inahke e'inaapitc, kiihkihcipakitanaamo. Okii'inaan itahsh ini ininiwan: "Ehpaahtaa!" mii 'owe kaaitank, "Shehsen!" 35 Shemaak kiihshehtawakehse a'a inini, kaye otenaniw kii'noohkanini. Miitahsh kaye kwayahk kii'maaciikiikito. 36 Miitahsh Ciisahs kaa'ishi​ayaankwaamimaatc kahkina ekaa ciwiintamawaahsinik awiyan. Aanakiih​kihci​ayaankwaamimaatc, aancikohsh awahshime kiihkihciwiintamaakewa'. 37 Wiinke tahsh kahkina kiihkihcikoshkwentamook e'ihkitowaatc: "Misiwe kii'minohcike! Ampooshke okashki'aa' iniweniwa' kaakakiipihtenitc cinoontamaanitc, kaye kaanihtaawehsinik cikakitonitc!" kii'ihkitowak.

Maarhk 8

1 Miitahsh paanimaa eni​kiishikaninikin kihciniipiwa' kaamaawaci'itiwaatc, kaawiin kekoon okii'ayaahsiinaawaa kemiiciwaatc. Okii'antomaa' itahsh Ciisahs i'i okihkino'amawaakana' ekiih​kanoonaatc: 2 "Ninkitimaakenimaak ihsa oko pemaatisiwaatc. Nihsokiishik aasha niwiiciiwikook, ekaa keyaapi kekoon e'ayaahsikwaa kemiiciwaatc. 3 Kiishpin ishikiiwenisha'wakwaa, ekaa ahkawe wiihsinihsikwaa, tanoontehshinook, aaniihsh waahsa aaninta kii'onciiwak," kii'ihkito. 4 Miitahsh kaa'ishi​nahkwehtaakotc: "Aan tahsh teminihk keonci​ahshamankwaapan pahkweshikana', o'omaa pikwatahkamikaank e'ayaayank?" okii'ikoo'. 5 Miitahsh okiih​kakwecimaa': "Aaniin minihk eyaawek pahkweshikan?" okii'inaa'. "Niishwaahswaahtik," okii'ikoo'. 6 Miitahsh kaa'inaatc i'i kaamaamawenonitc cionapinitc i'imaa mihtahkamik. Miitahsh kaa'ishi​otaahpinaatc Ciisahs i'i pahkweshikana' niishwaahswaahtik, ekii'nanaahkomotc, ekiih​pahpahkwepinaatc, ekii'maamiinaatc okihkino'amawaakana' cimaata'oonaanitc i'i kaamaamawenonitc. Miitahsh i'i kaa'ishihcikenitc. 7 Pankii kaye okii'ayaawaawaa' kinooshenhsa'. Miitahsh kaa'ishkwaananaahkomotc Ciisahs, okii'inaa' okihkino'amawaakana' onoweniwa' kaye ciahtamawaanitc. 8 Miitahsh kaa'ishi​wiihsininitc kahkina. Wiinke kiihtewiihsiniwa'. Inkoci ko niiwink mitaahswaahk (4,000) kiihtahshiwa'. 9 Miitahsh kaa'ishi​mooshakinamowaatc ishkwancikanan iki kihkino'amawaakanak. Niishwaahso (7) kii'mooshkineniwan mashkohsiimahkahkoon. Miitahsh kaa'ishi​kiiwenisha'waatc Ciisahs kahkina awiya'. 10 Wiin itahsh wiin kiihpoosi kaye okihkino'amawaakana', weti nahke Taalmanoohta ahkiink (Dalmanutha) ekiihpi-ishimishakaawaatc. 11 I'i tahsh Perahsiiwininiwa' (Pharisees) okiihpi​otihsikoo' ehpi​kakweshaakoosomikotc, ekii'antawaapantamaakotc ishpimink wenciinik kihkinawaacihcikan. 12 Ciisahs tahsh wiinke kiihkihciniihsanaamo ekii'inamanci'otc, e'ihkitotc: "Aaniihsh oko noonkom pemaatisiwaatc wenci​antawaapantamowaatc kihkinawaacihcikan? Nintepwe e'ininakook, kaawiin kekoon kihkinawaacihcikan tamiinaahsiiwak oko noonkom pemaatisiwaatc," kii'ihkito. 13 Miitahsh kaa'ishi​nakanaatc ekii'maacii'otc miinawaa akaamink. 14 Kaawiin itahsh kii'maamihkawihsiiwa' Ciisahs okihkino'amawaakana' cimaaciinaanitc pahkweshikana'. Mii ehta peshikwaahtik okii'maaciinaawaan ciimaanink. 15 Okiih​kanoonaa' itahsh okihkino'amawaakana': "Ayaankwaamisik!" okii'inaa'. "Keko pimentankek i'i otoompisikanenhsimiwaa iki Perahsiiwininiwak (Pharisees) kaye Herat (Herod)," okii'inaa'. 16 Miitahsh e'nihsitohtansinik Ciisahs okihkino'amawaakana' kaa'ishi​maacii​tashintamaatinitc, e'opahkweshikanimihsinik. 17 Ciisahs itahsh ehkihkenimaatc ekaa e'nihsitohtansinik okii'onci​kanoonaa': "Aaniin eshi​papaamintiyek e'ayaawaahsiwek pahkweshikan? Kaawiin ina mahshi kikihkentansiim? Kaawiin ina kinihsitaawentansiim? Onsaam ina kipetentaam? 18 Kitayaanaawaan kishkiinshikowaan! Kaawiin ina kiwaapihsiim? Kaye kitoohtawakaam! Kaawiin ina kinoontansiim? Kaawiin ina kaye kimaamihkawihsiim 19 naanink mitaahswaahk (5,000) ekiih​tahshiwaatc, ekiih​pahpahkwepitamawakwaa naanan pahkweshikana'? Aaniihsh minihk kaa'ishkohsekin ishkwancikanan minihk kaamooshkinekin wiikopiimahkahkoon?" okii'inaa'. Miitahsh kaa'ikotc: Mitaahshiniishin (12). 20 Shikwahsh okii'inaa': "Miinawaa iki niiwink mitaahswaahk (4,000), niishwaahso (7) pahkweshikana' ekiih​pahpahkwepitamawakwaa, aaniin minihk kaamooshkinekin ini mashkohsiimahkahkoon kaamooshakinamek ini ishkwancikanan?" okii'inaa'. "Niishwaahso (7)," kii'ihkitowa'. 21 "Kaawiin ina mahshi kinihsitaawentansiim?" okii'inaa'. 22 Miitahsh i'imaa kiihpimishakaawak ootenawenhsink Pehseta (Bethsaida) e'ishinihkaatenik. Kiihpiitawaa tahsh Ciisahs peshik wiyaapihsinik ininiwan, ehpakohsenimintc citaankinaatc. 23 Miitahsh kaa'ishi​sakinihkenaatc ekii'ishiwinaatc ohpimeya'ii ootenawenhsink. Miitahsh kaa'ishi​sihkwaatamawaatc oshkiinshikoni, minciniish oninciin okiih​saaminaan, ehkakwecimaatc: "Kiwaapantaan ina kekoon?" okii'inaan. 24 Miitahsh e'inaapinitc, kii'ihkitowan: "Niwaapamaak pemaatisiwaatc. Mihtikook itahsh ehpapaamohsewaatc nintishinawaak," okii'ikoon. 25 Miitahsh miinawaa aapitink okiih​saaminamawaan Ciisahs ini oshkiinshikoni ini ininiwan. Miitahsh kwayahk kii'inaapiwan, ekii'minoayaanitc ini oshkiinshikoni. 26 Miitahsh kaa'ishi​kiiwenisha'waatc Ciisahs weti eshitaanitc ini ininiwan. "Keko ahkawe cehkishkanken ootenawenhs," okii'inaan. 27 Miitahsh kii'ani​maacaa Ciisahs kaye okihkino'amawaakana', weti ekii'ishaawaatc ootenawenhsink pehshoo 'imaa Sehsariiya Pilipaayink (Caesarea Philippi) kaa-ayaanikin. Miitahsh e'ani​pimohsewaatc okiih​kakwecimaa': "Aaniin eshiwaatc pemaatisiwaatc e'aawiyaan?" okii'inaa'. 28 "Cwaan (John) Siika'antaakewinini kitikook," okii'ikoo'. "Aanint kaye awiya kitikook Ilaaica (Elijah), kaye aanint, 'Peshik ini mewisha Kishemanitoo otipaacimowininiima' kaakiih​kanootamaakotc aawiwitok,' kitikook," okii'ikoo'. 29 Miitahsh kaa'ishi​kakwecimaatc: "Awenen kiinawaa enentamek ciaawiyaan?" okii'inaa'. Miitahsh kaa'ishi​nahkwehtaakotc ini Piitaran (Peter): "Kiin kitaaw Kishemanitoon kaakii'onenimikotc ciPimaaci'iwetc," okii'ikoon a'a Ciisahs ini Piitaran. 30 Okii'ayaankwaamimaa' itahsh Ciisahs i'i okihkino'amawaakana': "Keko awiya wiintamawaahkek e'aawiyaan," okii'inaa'. 31 Miitahsh okii'maacii​kihkino'amawaa' ekii'inaatc: "Niin Inini oKosihsan, oncita hsa ko niipiwa' cikakwaataki'ikoyaan, kaye cipahkeyaahkoniwaatc iki Coowak oniikaanisiimiwaa', iki kaye Kihcianami'ewikimaak, iki kaye kaakihkino'amaakewaatc Onahshowewin. Shikwa ninka​nihsikoo. Miinawaa tahsh nihsokiishikwakaak ninka​kiiwepimaatis," kii'ihkito. 32 Mii'iwe kwayahk okii'wiintamawaa' Ciisahs okihkino'amawaakana'. Piitar (Peter) itahsh ohpimeya'ii okii'ishiwinaan ini Ciisahsoon e'maaciikihcikanoonaatc cionci'aatc. 33 Miitahsh ehkwehkikaapawitc Ciisahs e'waapamaatc kotak okihkino'amawaakana', okiih​kihcikanoonaan Piitaran: "Inkoci hsa ishaan, Setan!" otinaan. "Kaawiin kiin kiwiici'aahsii Kishemanitoo enentank, ikihsh wiin kiwiici'aak ininiwak enentamowaatc," okii'inaan Ciisahs ini Piitaran. 34 Miitahsh kahkina okii'antomaa' i'i kaaohkwenonitc kaye okihkino'amawaakana', ekiih​kanoonaatc: "Kiishpin awiya wiihpimiwiiciiwitc, oncita ko ishinaakwanini ciaanawenintisohpan, cipakitinitisohpan, ampooshke piinihsh ci-ishi​nipohpan aashiteyaahtikonk. Mii'i ci-ishi​pimiwiiciiwitc," okii'inaa'. 35 "Awenehsh iko waa'manaacihtootc i'i opimaatisiwin, taishi​tipa'amawaa ciwanihtootc opimaatisiwin. Awenen itahsh kepakitinank opimaatisiwin niin onci kaye 'i minwaacimowin onci, oka​pimaacihtoon opimaatisiwin," okii'inaa'. 36 "Wekonehsh i'i keontisihpan awiya kahkina kekoon aanakiih​tepipitamaasotc o'omaa ahkiink, kiishpin wanihtootc i'i opimaatisiwin? Kaawiin kekoon taontinamaasohsii. 37 Wekonehsh kemiikiwehpan miinawaa cikiiwe​miinintipan i'i opimaatisiwin? Kaawiin kekoon," okii'inaa'. 38 "Inashke niipiwa' oko noonkom pemaatisiwaatc okii'nakanaawaan Kishemanitoon, e'nihtaa​maci-ishiwepisiwaatc. Awenen itahsh iko noonkom pemaatisitc keakatenimitc kaye keakatentank nintihkitowinan, mii 'awe keniin keakatenimak pi​takohshinaan. Niin aaniihsh Inini oKosihsan ehtinowiyaan ninka​pikikis kihciwaahsesiwin taapishkoo eshi​waahsesitc a'a ninTete, piwiiciiwimak kaye i'i Kishemanitoo otencalima'," mii'i kaa'inaatc.

Maarhk 9

1 Shikwa tahsh kii'ani-ihkito 'a Ciisahs: "Nintepwe ehkanooninakook. Aanint kiinawaa o'omaa kaa-ayaayek kaawiin tanipohsiiwak, paanimaa waapantamowaatc i'i Kishemanitoo otipencikewinini pinaakwaninik, kikimashkawisiiwin ciokimaawinitc," okii'inaa'. 2 Paanimaa tahsh nenkotwaahsokonakaanik, Ciisahs okii'wiiciiwaa' Piitaran (Peter), Ciimisan (James), Cwaanan (John), weti kaaishi​kihcipihkwatinaanik ekii'ishiwinaatc, wiinehtawaa ekii'ani​aamaciwewaatc. Miitahsh mekwaa ehkanawaapamikotc, pahkaan kii'ishinaakosi a'awe Ciisahs. 3 Wawiinke kii'waahsikonayeso e'ahpiihci​waapishkaanikin okikishkikanan. Kaawiin awiya o'omaa ahkiink i'i taa-ahpiihciwaapishkipiikinikehsii 'iwe kaa'ishi​waapishkaanikin Ciisahs okikishkikanan. 4 Okii'waapamaa' itahsh e'naakosinitc Ilaaicawan (Elijah) kaye Moosihsoon (Moses) ehkanoonaanitc ini Ciisahsoon. 5 Piitar itahsh okiih​kanoonaan Ciisahsoon: "Okihkino'amaake, onishihshin o'omaa e'ayaayank. Taka ninka-akawaahte'ikemin. Nihsin (3) ninka​oshihtoomin, peshik kiin, kaye Moosihs peshik, kaye peshik Ilaaica." 6 Aaniihsh kiihkwiinawi-ihkito, ekiih​sekisiwaatc. 7 Miitahsh kiihpi-ishinaakwanini wahkwi, ekiihpiaakawishkaakowaatc. Miitahsh i'imaa kaakii'onci​noontawimintc awiyan ehkiikitonitc: "Mii wa'a ninKosihs. Nisaaki'aa. Mii 'awe pisintawihk!" kii'inaawak. 8 Sesakooc itahsh kii'ayinaapiwak. Kaawiin keyaapi awiyan okii'waapamaahsiwaawaan, mii ehta Ciisahsoon kaawiiciiwikowaatc. 9 Paanimaa tahsh mekwaa e'niihsaciwewaatc, weweni okii'aayiisomaa' Ciisahs i'i nihsin okihkino'amawaakana': "Keko awiya wiintamawaahkek i'i kaa'waapantamek, paanimaa kiihkiiwepimaatisiyaan, niin Inini oKosihsan e'aawiyaan," kii'ihkito. 10 Miitahsh okii'nana'ihtawaawaan i'iwe kaa'ikowaatc, wiinawaa tahsh iko okiih​tashintaanaawaa, wekonen itahsh o'owe kaa'itaminitc Ciisahsoon, "Ninka​kiiwepimaatis," e'ihkitonitc. 11 Okiih​kakwecimaawaan itahsh: "Iki kaakihkino'amaakewaatc i'i Coowa' otoonahshowewinini ihkitowak o'o: 'Ahkawe nihtam tapi​takohshin a'a Ilaaica. Aaniihshwiin oko wenci-ihkitowaatc?' " okii'inaawaan. 12 Okii'nahkwehtawaa' itahsh Ciisahs: "Tepwe kii'inahteni 'awe Ilaaica nihtam citakohshink ciwaawenahtootc kahkina kekoon. Aaniin tahsh enentamek i'iwe niin e'ishipii'ikaasoyaan, Inini oKosihsan ciwiih​kakwaataki'imintc ciaanawenimimintc e'ihkitoomakahk? 13 Kiwiintamawininim itahsh, aasha tepwe kiihpitakohshin a'a Ilaaica. Wekonen iko kaa'inenimintc kiihtootawaa. Mii'iwe mayaa kaa'ishipii'ikaatenik ekiih​tashimintc," okii'inaa'. 14 Ahpii tahsh kaahpi​otihsaawaatc i'i kotak kihkino'amawaakana', okii'waapamaawaa' ekii'waahkaashkaakonitc kihciniipiwa' kaamaamawenonitc, i'i kaye kaakihkino'amaakenitc Coowa' otOonahshowewinini ekiih​kakwe​shaakoosomikonitc. 15 Ahpii tahsh e'waapamikotc Ciisahs i'i kaamaamawenonitc, kiihciihkentamohsewa', kii'ahpa'itiwa' kahkina, ekiihpi​pooshoo'ikotc. 16 Ciisahs itahsh okiih​kakwecimaa' okihkino'amawaakana': "Wekonen i'i kaa'ishi​kanoonekwaa?" okii'inaa'. 17 Peshik itahsh i'i kaaohkwenonitc okii'nahkwehtaakoon: "Okihkino'amaake kitaanawiih​piitamawin ninkosihs ehkikishkawaatc maciahcaahkwan tino kaanihtaaweshkaakohsik. 18 Piko aanti e'otihsikotc, opankihshimikoon. Piihtewitoone kaye mamaatweyaapiteshkaa e'ocipinikoshkaakotc. Nintaanakiih​kakwecimaak iki kikihkino'amawaakanak cisaakicinisha'amawaawaatc ini maciahcaahkwan. Okiih​pwaanawi'aawaan itahsh," otikoon. 19 Okiih​kanoonaa' itahsh Ciisahs: "O'omaa kahkina eyaayek! Etatawe kaawiin kinihtaa​tepweyentansiim! Kaanaka naa minihk kewiiciiwinakookipan cipwaa maacii​tepweyentamek? Kaanaka naa minihk keshashiipeniminakook? Taka piitamawihshik a'a kwiiwisenhs," okii'inaa'. 20 Miitahsh kaa'ishi​piinaawaatc ini kwiiwisenhsan. Ahpiihsh wiyaapamaatc a'a maciahcaahk ini Ciisahsoon, shemaak okii'ocipinikoshkawaan ini kwiiwisenhsan. Miitahsh kaa'ishi​kawihsenitc ekiih​tihtihtipipani'onitc ekiih​piihtewitoonenitc. 21 Miitahsh Ciisahs okiih​kakwecimaan ini weniicaanihsinitc: "Aanahpii 'i wenci-ishiayaatc?" okii'inaan. Miitahsh kaa'ikotc: "Ahpane ko wenci​apinoonciishiwitc. 22 Niipiwa'aank okii'ahpakinikoon i'imaa ishkotenk kaye i'imaa nipiink ewii​nihsikotc. Kiishpin itahsh kiin kekoon kashkihtooyan, kitimaakenimihshinaam, wiici'ihshinaam!" ihkitowan ini ininiwan. 23 Ciisahs itahsh okii'inaan: "Kiishpin kiin kashkihtooyan kitinin! Awiya tepweyenimaatc Kishemanitoon, kahkina kekoon takashkihcikaateni," kii'ihkito. 24 Shemaak kiihkishiiwe a'a wekosihsitc e'ihkitotc: "Nintepweyenimaa! Wiici'ihshin onsaam pankii ehtepweyenimak!" kii'ihkito. 25 Miitahsh e'waapamaatc Ciisahs maamaw ehpiicipa'itinitc i'i pemaatisinitc, okiih​kihcikanoonaan ini maciahcaahkwan: "Kiin nehtaawe'iwehsiwan kaye kekiipihte'iweyan maciahcaahk! Oncinakash a'a kwiiwisenhs kitinin! Keko miinawaa wiihkaa pikikishkawaahken!" okii'inaan. 26 Miitahsh kiihkishiiwe a'a maciahcaahk, ekii'ahpiihci​ayocipinikoshkawaatc ini kwiiwisenhsan. Okii'nakanaan itahsh. Taapishkoo tahsh ekii'nipotc kii'ishinaakosi a'a kwiiwisenhs. Miitahsh kaa'ihkitowaatc niipiwa': "Aasha nipo," kii'ihkitowak. 27 Ciisahs itahsh okiih​sakinihkenaan ekiih​pasikwii'aatc ini kwiiwisenhsan. Miitahsh kaa'ishi​niipawinitc. 28 Ahpii tahsh kaahpiintiketc Ciisahs i'imaa waahkaa'ikanink, nihshihke okiih​kanoonikoo' okihkino'amawaakana': "Aaniihsh niinawint kaa'onci​kashkihtoohsiwaank cisaakicinisha'amawankitc a'a kwiiwisenhs ini maciahcaahkwan?" okii'ikoo'. 29 Miitahsh okii'inaa': "Ono tino maciahcaahkwan kaawiin awiya otaa​kashki'aahsiin cisaakicinisha'waatc; mii ehta anami'ehtawaatc Kishemanitoon kekiionci​saakicinisha'waatc awiya ini maciahcaahkwan," kii'ihkito. 30 Miitahsh i'imaa kaa'anionci​maacaawaatc ekii'ani​shaaposhkaawaatc Kaalaliiwi ahkiink (Galilee). Kaawiin itahsh kii'inentansii awiya cikihkentaminitc. 31 Aaniihsh okiih​kihkino'amawaa' i'i okihkino'amawaakana' e'inaatc: "Niin Inini oKosihsan ninkaishi​pakitinikoowis citahkoniwaatc ininiwak, kaye ninka​nihsikook. Miitahsh kiinihsokiishikwakaak miinawaa ninka​kiiwepimaatis," okii'inaa'. 32 Wiinawaahsh wiin kaawiin kii'nihsitohtansiiwak i'i kaakii'itank. Kiihshaakwenimowak itahsh ekii'onci​manaasomaawaatc. 33 Weti tahsh kiihpitakohshinook ootenawenhsink, Kaparniyam (Capernaum) e'ishinihkaatenik. Miitahsh ekiih​piintikewaatc i'imaa waahkaa'ikanink, okiih​kakwecimaa' Ciisahs i'i okihkino'amawaakana': "Wekonehsh kaahpi​tashintamek kiihpi​pimohseyank?" okii'inaa'. 34 Kaawiin tahsh inkotano kii'ihkitohsiiwak. Mii aaniihsh i'i kaakiih​tashintamowaatc, awenen nawac a'a keniikaanisitc, ekiih​kakweshaakoosontiwaatc. 35 Miitahsh kaa'ishi​onapitc, ekii'antomaatc Ciisahs i'i kaamitaahshiniishinitc. Miitahsh kaa'inaatc: "Awiya wii'niikaanentaakositc, maamaw otaanaank tainenintiso, kahkina awiya' oka-anohkiihtawaa'," okii'inaa'. 36 Miitahsh kaa'ishi​sakinihkenaatc apinoonciishan, e'inaatc itahsh i'i okihkino'amawaakana': 37 "Awenen iko kewiici'aatc peshik o'o apinoonciisha', niin onci e'onci-ishihciketc, mii peshikwan keniin e'ishi​wiici'itc. Awenen ihsa waaci'ikwen, kaawiin niin ehta niwiici'ikohsii, iniweniwan ihsa owiici'aan Kishemanitoon, miiwan ini kaapi-ishinisha'onitc," okii'inaa'. 38 Miitahsh kaa'ishi​kanoonikotc ini Cwaanan (John): "Okihkino'amaake, ninkii'waapamaanaan peshik inini ehsaakicinisha'amawaatc maciahcaahkwa' awiya', kiin e'ahpimotc kitishinihkaasowin. Intawaahsh ninkii'onci'aanaan, aaniihsh kaawiin kipapaawiiciiwikohsiinaan," okii'ikoon. 39 Ciisahs itahsh o'owe okii'inaan: "Keko onci'aahkek. Awiya kaakii'ishi​maamahkaacihciketc niin e'ahpimotc nintishinihkaasowin, kaawiin wiipa ninka​macitashimikohsii. 40 A'awe hsa wiin awiya ekaa kaakakwekipihtinihsinowank, kiwiici'ikonaan. 41 Tepwe kitinininim, awenen iko kemina'inowekwen peshikominihkwaakan nipi, ehkihkeniminek niin Kishemanitoo oPimaaci'iwewininiiman kaapiminisha'oyek, e'onci-ishihciketc, tatipa'amawaa kehcinaac." 42 "Shikwa kiishpin awiya macitootamo'aatc peshik onoweniwa' kaa-akaahshiinshinitc kaatepwehtawinitc, nawac taaonishihshin kaamihcaapihkisinitc ahsiniin citahkopicikaniwinihpan ohkwekanink cipahkopiiwepinikaniwihpan kihcikamiink, ahpiihc wiin cimacitootamo'aatc apinoonciishan. 43 Kiishpin wenci​macitootamo'ikowanen 'iwe kaainaapacihtooyan kininc, kiishkata'an! Nawac taaonishihshin napaneninciiyampan ciotihtaman pimaatisiwin kepooni​ayaahsinok, ahpiihc wiin niishoninciiyan ci-ishaayampan maci-ishkotenk, i'iwe ekaa wiihkaa iyaahtawehsinok. 45 Kiishpin kaye wenci​macitootamo'ikowanen kisit kaainaapacihtooyan, kiishkishan! Nawac taaonishihshin cimaahkihseyan, ciotihtaman i'i pimaatisiwin wiihkaa kepooni​ayaahsinok, ahpiihc wiin minciniish ciayaayampan kisitan ciahpakinikooyan i'imaa maci-ishkotenk. 47 Kiishpin kaye wenci​macitootamo'ikowanen kishkiinshik kaainaapacihtooyan, kicaapiwepa'otison! Nawac taaonishihshin peshikwahk ehta kishkiinshik, ciotihtaman Kishemanitoo entashi​okimaawitc, ahpiihc itahsh wiin niishoshkiinshikweyan ciahpakinikooyampan i'imaa maci-ishkotenk, 48 i'imaa wiihkaa eshi​nipohsinik i'i oohkwe' kaapanaaci'ikotc awiya, kaye wiihkaa kaaishi​aahtawehsinok ishkote kaacaakisokotc," kii'ihkito. 49 Shikwa kii'ihkito: "Kahkina pakitinaahsowinan shiiwihtaakana'ikaatewan keonci​pehkahkin keonci​otaahpinikaatekin. Miitahsh peshikwan kahkina awiya eshinaakwaninik kakwaatakihtoowin ciotihsaapantank taapishkoo ishkoteni ehpehki'ikotc. 50 "Onishihshin i'i shiiwihtaakan. Kiishpin itahsh wii'aanihsihpokwahk i'i shiiwihtaakan, aaniihsh ketootamampan miinawaa cishiiwihtaakanihpokwahkipan? Taapishkoo kaashi​minohpokwahk i'i miicim ehshiiwihtaakanihpokwahk, mii'i ishi​minowiiciintik entahsopeshikoyek, ciminohseyek," kii'ihkito.

Maarhk 10

1 Kii'ani​onci​maacaa tahsh i'imaa ayaawinink. Weti kii'ishaa Cootiiyaawi ahkiink (Judea) inahke, shikwa kii'aashawishkaa Cwaartanawi siipiink (Jordan). Miinawaa okiih​pinaasihkaakoo' i'i kaapimaamawenonitc. Shikwa tahsh i'iwe kaakii'nihtaa​ishihciketc, okii'ani-ishikihkino'amawaa'. 2 Aanint tahsh okiihpi​kakwewanikiishwe'ikoo' i'i Perahsiiwininiwa' (Pharisees), ekiih​kakwecimikotc: "Inaahkonaa na inini ciwepinaatc owiitikemaakanan?" okii'ikoo'. 3 Ciisahs itahsh okii'nahkwehtawaa': "Aaniin kaakii'inaahkoninek Moosihs (Moses)?" okii'inaa'. 4 O'owe tahsh kii'ihkitowa': "Moosihs okiih​pakitinaan ininiwan cioshipii'aminitc i'i wepiniwewimasina'ikan, shikwa cipahkenisha'waanitc ini owiitikemaakanini," okii'ikoo'. 5 Ciisahs itahsh okii'inaa': "Kikii'onci-inaahkonikowaa Moosihs o'o kishashiipihtamowiniwaa onci. 6 Ahpii tahsh kaa'oshihtootc kahkina kekoon Kishemanitoo, kii'ihkitom o'owe: 'Okii'oshi'aa' cinaapeya'aawinitc kaye cinoosheya'aawinitc.' 7 Shikwa kii'ihkitom: 'Mii 'owe keonci​nakanaatc inini oteten kaye omaamaan, cinehpici​wiiciyayaamaatc ini owiitikemaakanan, 8 miitahsh noonkom cipeshikwentaakwaninik opimaatisiwiniwaa,' kii'ihkitom. Mii'i kaawiin keyaapi niishwentaakosihsiiwak a'a inini kaye owiitikemaakanan. Noonkom itahsh peshikwentaakosiwak. 9 Mii'i awiya keonci​pahkewinaahsik ini owiitikemaakanan, aasha Kishemanitoo ekiih​peshiko'aatc ininiwan kaye owiitikemaakanini," kii'ihkito Ciisahs. 10 Miinawaa piintik e'ayaawaatc okiih​kakwecimikoo' okihkino'amawaakana' i'iwe wepinitiwin. 11 Miitahsh o'o okii'inaa': "Awiya owiitikemaakanan wepinaatc, miinawaahsh peshik otaahpinaatc ihkwewan, omacitootawaan ini nihtam kaakii'wiitikemaatc. 12 Komaa kiishpin ihkwe wepinaatc onaapeman, shikwa peshik miinawaa wiitikemaatc ininiwan, macitootam kaye wiin a'a ihkwe," kii'ihkito. 13 Mii 'o ahpiihsh aanint awiyak okiih​paapiitamawaawaan apinoonciisha' Ciisahsoon cisaahsaaminaanitc. Iki tahsh kihkino'amawaakanak okii'onci'aawaa' kaakiih​piinaanitc apinoonciisha'. 14 Ciisahs itahsh ekii'waapantank kii'nishkaatentam. Okiih​kanoonaa' itahsh okihkino'amawaakana': "Maano kikapakitinaawaak iki apinoonciishak cipinaasihkawiwaatc. Keko kipihtinaahkekwaanik. Ikiweniwak aaniihsh apinoonciishink enentaakosiwaatc, miiwak iki mayaa kaaokimaahkantaakowaatc Kishemanitoon. 15 Tepwe kitinininim: Awiya wii'ishi​otaahpinaahsik Kishemanitoon ciokimaahkantaakotc taapishkoo apinoonciish e'ishi​otaahpinaatc, kaawiin wiihkaa okaotihtansiin awiya i'imaa entashi​okimaawinitc ini Kishemanitoon," kii'ihkito. 16 Miitahsh pepeshik okiihtahkonaa' i'i apinoonciisha' ehsaaminaatc, "Kishemanitoo kashawenimik ciminohseyan," ekii'inaatc. 17 Miinawaa ekii'ayaancimaacaatc Ciisahs, peshik okiih​pinaacipahtwaanikoon, ekiihpi​ociciinkwanapiihtaakotc ini ininiwan, ehkakwecimikotc: "Kiin menwaatisiyan okihkino'amaake!" e'ikotc. "Aaniin keishihcikeyaan ciotihsikoyaan pimaatisiwin kepooni​ayaahsinok?" okii'ikoon. 18 Ciisahs itahsh okii'inaan: "Aaniin wenci-ishiyan ominwaatisii? Kaawiin ohsha awiya minwaatisihsii, mii ehta 'awe Kishemanitoo kaaminwaatisitc. 19 Kikihkentaanan ono onahshowewinan: 'Keko nihshiwehken, keko pimentamawaahken pahkaan awiya owiitikemaakanan, keko kimootihken, keko kiiwanimohken cianaamimatc awiya tipaahkonitiwinink, keko wayeshihtaakosihken, kikakihci-inenimaa kitete kaye kimaamaa,' " okii'inaan. 20 Miitahsh kaa'ikotc: "Okihkino'amaake, ono kahkina ninkiihpi​onci​naakacihtoonan ahpane pemi​onci​oshkiniikiiwiyaan," okii'ikoon. 21 Ciisahs okiih​saaki'aan ehkanawaapamaatc, e'inaatc: "Peshik kekoon kinoontehse," okii'inaan. "Awi​ataawaaken kahkina kaatipentaman. I'iwe tahsh kitoontisiwin kahkina miish iki ketimaakisiwaatc, weti kika-ayaan wenootisiwin kihcikiishikonk. Miitahsh pipiminisha'ohshin cikihkino'amawinaan," okii'inaan Ciisahs ini ininiwan. 22 Miitahsh e'noontank, kaa'ishiniihsentamohsetc a'a inini. Miitahsh kii'maacaa, ekii'onci​kihcikashkentank. Aaniihsh kiihkihciwenootisi. 23 Ciisahs itahsh okiih​kanawaapamaa' i'i kaawaahkaanikaapawinitc. Okiih​kanoonaa' itahsh i'i okihkino'amawaakana': "Mii'i ehpiihci​sanakaninik iki kaakihciwenootisiwaatc ciotihtamowaatc entashi​okimaawinitc Kishemanitoon," okii'inaa'. 24 Okii'maamahkaasihtaakoo' itahsh okihkino'amawaakana'. Ciisahs itahsh kii'ani-ihkito: "Siyaaki'inakook, wiinke ahpiihci​sanakanini awiya ciokimaahkantaakotc Kishemanitoon! 25 Inashke otaapwaanawihtoon pihkwaawikanewimihtatim aana​kakwe​tepa'oosotc eshi​pakoneyaanoweyaanik shaaponikan. Nawac itahsh awahshime oka​pwaanawihtoon kaawenootisitc awiya ciokimaahkantaakotc Kishemanitoon," kii'ihkito. 26 Miitahsh kaa'ahpiihcimaamahkaatentamowaatc iki kihkino'amawaakanak, ekiih​kakwecintiwaatc: "Miitahsh cikashkihtoohsikipan awiya cipimaaci'intc!" kii'ihkitowak. 27 Miihsh i'i kaa'ishi​kanawaapamaatc a'a Ciisahs e'inaatc: "Awiya hsa ko opwaanawihtoon. A'ahsh wiin Kishemanitoo kaawiin opwaanawihtoohsiin. Kishemanitoo kahkina kekoon okashkihtoon," kii'ihkito. 28 Piitar (Peter) itahsh okii'onci​kanoonaan Ciisahsoon: "Inashke kahkina kekoon ninkii'nakataamin ekiihpi​wiiciiwikooyan," okii'inaan. 29 "Tepwe," kii'ihkito 'awe Ciisahs. "O'owe tahsh kiwiintamawininim: awenen iko kaanakatank otayaawin, komaa kaye nakanaatc wiicihkiweya', otawemaa', omaamaan, oteten, oniicaanihsa', komaa kaye okihtikewinan, niin kaye minwaacimowin e'onci-ishihciketc, 30 wa'a tino takihcitipa'amawaa noonkom mekwaa pimaatisitc. Tamiinaa inkotwaahk awahshime ayaawinan, wiicihkiweya', otawemaa', omaamaa', oniicaanihsa', kihtikewinan. Tako kaye tashiinkenimaa cionciihkikaniwitc i'iwe ehpiminisha'otc. Shikwa paanimaa weti niikaanaya'ii keni-ishihsek tamiinaa pishihshik cipimaatisitc. 31 Niipiwa' itahsh iki noonkom kaakihci-inentaakosiwaatc ta-akaahsentaakosiwak, kaye oko noonkom kaa-akaahsentaakosiwaatc, mii ahpii weti takihci-inentaakosiwak," kii'ihkito Ciisahs. 32 Kii'ani-ishaawak weti miihkanaank kaainamoninik Ceroosalamiiwi ootenaank (Jerusalem), Ciisahs itahsh ekii'niikaanohsetc. Kii'onci​mikoshkaatentamook itahsh iki kihkino'amawaakanak. Iki tahsh kotakiyak otaanaank kaapimohsewaatc kiihkohtaaciwak. Miitahsh miinawaa ohpimeya'ii ekii'ishiwinaatc Ciisahs i'i mitaahshiniishin okihkino'amawaakana', okii'maaciiwiintamawaa' aaniin keishihcike'intc ekii'inaatc: 33 "Inashke noonkom iko kitani-ishaamin weti Ceroosalamink. Niin Inini oKosihsan ninka​ishihcike'ikoo citahkoniwaatc iki Kihcianami'ewikimaak kaye iki kaakihkino'amaakewaatc onahshowewin. Ninka​inaahkonikook itahsh cinihsikooyaan. Kaye ta-anoohkiiwak citahkonimitc i'i Coowak kaapiiwiteyenimaawaatc. 34 Miitahsh ikiweniwak ninka​nihshipaahpinotaakook kaye ninka​sasiihkwaanikook, shikwa ninka​pahshanshe'okook, shikwa ninka​nihsikook. Paanimaa tahsh kiinihsokiishikwakaak ninka​kiiwepimaatis," okii'inaa'. 35 Miitahsh pehsho okiihpi​kanoonikoo' Ciimisan (James) kaye Cwaanan (John), Sepatii okosihsa'. "Okihkino'amaake," okii'ikoo'. "Ninantawentaamin wekonen iko kekakwecimikooyan ci-ishihcike'iyaank," ihkitowa'. 36 Miitahsh kaa'inaatc a'a Ciisahs: "Aaniin eshi​antawentamek ci-ishihcike'inakook?" otinaa'. 37 Miitahsh okii'ikoo': "Taka keniinawint ciayokimaawapiyaank, peshik kikihcinihkink inahke, peshik kaye kinamantinihkink, ahpii kiiahpiihci​okimaawiyan," okii'ikoo'. 38 Okii'nahkwehtawaa' itahsh a'a Ciisahs: "Kaawiin kikihkentansiim wekonen kekwecimiweyek. Kitaa​kashkihtoom inahsh i'imaa waa'onci​minihkweyaan kekiinawaa cionci​minihkweyek i'i kaawiihsakaakamik? Kitaa​kashkihtoom ina ci-ishi​siika'antaakooyek niin waa'ishi​siika'antaakooyaan?" kii'ihkito, mii 'owe ekii'itank: "Kitaa​kashkihtoom ina kekiinawaa cikakwaataki'ikooyek keniin taapishkoo keshi​kakwaataki'ikooyaan?" 39 Kii'nahkwehtamook itahsh Ciimis, Cwaan: "Eha', ninka​kashkihtoomin." Ciisahs itahsh okii'inaa': "Tepwe hsa kikaonci​minihkwem kaawiihsakaakamik i'imaa minihkwaakanink kaawii'onci​minihkweyaan, kekiinawaa kikaishi​siika'antaakoom keniin kaawii'ishi​siika'antaakooyaan. 40 Niin itahsh kaawiin awiya nintoonaapamaahsii kenamatapitc i'imaa ninkihcinihkink inahke, ninamantinihkink kaye. Iki hsa ehta kaakii'ahtwaakanihkawintwaa, tanamatapiwak," okii'inaa'. 41 Iki tahsh mitaahso kotak kihkino'amawaakanak, ekii'noontamowaatc okii'nishkaatenimaawaa' Ciimisan kaye Cwaanan. 42 Ciisahs itahsh maamaw okii'antomaa' kahkina okihkino'amawaakana', ekii'inaatc: "Kikihkenimaawaak iki mincikahkina pahkaan kaatahswewaanakisiwaatc ahkiink, aaniin eshi​okimaahkantaatiwaatc. Osanakisiihkantaakoo' iniweniwa' kaaokimaawenimaawaatc. Shikwa oniikaanisiimiwaa' omashkawaahkonikowaa'. 43 Kaawiin itahsh kekiinawaa kitaaishihcikehsiim. Awenen iko i'imaa kaatahshiyek waahkihci-inentaakositc, oncita hsa ko kika-anohkiihtaakowaa awiya. 44 A'awe kaye kaawii'niikaanentaakositc, oncita hsa ko kahkina awiyan cianohkii'ikotc ekaa memwehc ciontisihsik. 45 Aaniihsh niin Inini oKosihsan e'aawiyaan, kaawiin niin ninkii'onci​piishaahsii cianohkiihtawiwaatc kotak awiyak, i'i tahsh wiin cianohkiihtawakwaa, kaye ninka​pakitinitisohkantawaak citipa'ikaakewak nimpimaatisiwin niipiwa' awiyak kewiinawaa cionci​pimaaci'intwaa," kii'ihkito. 46 Kiihtakohshinook i'iweti Cerahkonk (Jericho) kaaishinihkaatenik ootena. Shikwa tahsh e'onci​maacaatc Ciisahs e'wiiciiwikotc okihkino'amawaakana' kaye pahkaan awiya' ekii'ani​paahtiinonitc, peshik itahsh awiyan okii'mayaashkawaawaan ekaa e'waapihsinik, ehpakohsencikenitc i'imaa ciikihkana e'namatapinitc. Paarhtimiiyahs (Bartimaeus) kii'ishinihkaasowan, Timiiyahsan (Timaeus) e'otetemaanitc. 47 Wa'a tahsh Paartimiiyahs okii'noontaan mii 'awe Ciisahs Naasaritiiwinini (Nazarene) e'ihkitowintc. Ihkito tahsh ehkishiiwetc: "Ciisahs! Kiin Tepitink (David) kaaOntahkaanesiyan! Kitimaakinawihshin!" kii'ishi​shaakowe. 48 Miitahsh okii'onci'ikoo' niipiwa': "Etatawe kinipaatwewitam!" okii'ikoo'. Nawac itahsh aanciko enikohk kiihshaakowe: "Kiin Tepitink kaaOntahkaanesiyan, kitimaakinawihshin!" e'ihkitotc. 49 Miitahsh kaa'ishi​kipihcikaapawitc Ciisahs. "Antomihk," kii'ihkito. Miitahsh kaa'ishi​antomaawaatc ini wiyaapihsinik: "Mashkawite'en! Pasikwiin, kinantomik," okii'inaawaan. 50 Miitahsh kaa'ishi​pakiciwepinank okashkiikiiwin a'a wiyaapihsik, ekiih​pasikwincihsetc ekii'ishaatc Ciisahsoon. 51 Miitahsh Ciisahs okiih​kakwecimaan: "Wekonehsh keishihcike'inaan?" okii'inaan. Okii'ikoon itahsh ini kaawaapihsinik: "Okihkino'amaake, ampehsh miinawaa waapiyaan!" ihkitowan. 52 Miitahsh kaa'inaatc Ciisahs: "Amii'i pisaaniko ani​maacaan. Kiminoayaa'ikon i'i kaashi​ahpenimonotawiyan," okii'inaan. Shemaak itahsh kii'waapi a'a inini. Okiih​piminisha'waan itahsh Ciisahsoon i'imaa miihkanaank.

Maarhk 11

1 E'ani​pehsho​ishaawaatc Ceroosalamink (Jerusalem), kekaa e'ani​otihtamowaatc Pehpaci (Bethphage) kaye Pehtani (Bethany) e'ishinihkaatenikin ootenawenhsan, i'imaa newatatin kaa-ayaanikin Aalip (Olive) Kihtikaanaahtikohkaank e'ishinihkaatenik pihkwatinaa, Ciisahs itahsh okii'niikaaninisha'waa' niishin okihkino'amawaakana' 2 e'inaatc: "Ishaak i'imaa weti ootenawenhsink kaapehshoayaak," otinaa'. "Ani​ahpiihcitakohshinek iko kikawaapamaawaa maashimihtatimoonhs, wiihkaa awiyan ekiih​tehsapinotaakohsik. Mii 'awe aapa'waahkek, piinaahkek itahsh. 3 Kiishpin awiya ininek: 'Wekonen i'i wenci-ishihcikeyek?' o'o kikaihkitom: 'KaaTipenciketc onantawenimaan, shemaak itahsh oka​pikiiwenisha'waan,' inihk," okii'inaa' Ciisahs i'i niishin okihkino'amawaakana'. 4 Miitahsh kaa'ishi-ishaawaatc. Miitahsh kaakii'waapamaawaatc ini maashimihtatimoonhsan ehsakaakwahpisonitc i'imaa ciikishkwaant naawihkana. Miitahsh kaa'ishi​aapa'waawaatc. 5 Awiya' itahsh i'imaa kaanaaniipawinitc okiih​kanoonikowaa': "Aan eshihcikeyek e'aapa'wek a'a maashimihtatimoonhs?" okii'ikoowaa'. 6 Miitahsh kaa'ishi​nahkwehtawaawaatc kaakii'ikowaatc Ciisahsoon. Miitahsh kaa'ishi​poonimikowaatc. 7 Miitahsh i'i kaa'ishi​piitamawaawaatc Ciisahsoon ini maashimihtatimoonhsan. Owakiicihkonayaaniwaan okii'ahpakitoonaawaan wakitaawikan. Miitahsh kaa'ishitehsapitc Ciisahs. 8 Niipiwa' kaye okiih​tashwekihsitoonaawaan owakiicihkonayaaniwaan miihkanaank. Aanint kaye okii'onci​kiishkiishkika'aanaawaan weti ohpimeya'ii watihkwanenhsan kaa-aniipiihshiwaninikin, ekiih​tashwekipakihsitoowaatc miihkanaank. 9 Iki tahsh kaaniikaaniiwaatc kaye otaanaank kaapimiayaawaatc kii'ani​shaahshaakowewak: "Nanaahkomihk Kishemanitoo!" kii'ihkitowak. "Tashawentaakosi 'awe kaapitakohshink ehpi​oncinisha'okotc kaaTipencikenitc!" kii'ihkitowak. 10 "Kishemanitoon oka​shawentamaakoon otaanihkekimaawiwin a'a Tepit (David) kikehteya'aaminaapan. Wiipa tapinaapihseni otookimaawiwin!" kii'ihkitowak. "Kihcinanaahkomihk Kishemanitoo!" kii'ishi​shaahshaakowewak. 11 Miitahsh ekiih​cehkishkaatc i'imaa Ceroosalamink, kiihpiintike Ciisahs i'imaa Coowa' oKihcianami'ewikamikoniink. Kaa'ishkwaa​waawaapantank i'imaa piintik minihk kekoon i'imaa eyaanik, miitahsh kii'ani​maacaa kaye okihkino'amawaakana' mitaahshiniishin, ekii'ani-ishaawaatc ootenawenhsink, Pehtani kaaishi​wiintenik. Aaniihsh aasha kii'ani​naacionaakohshinini. 12 Miitahsh eni​waapaninik e'anionci​maacaawaatc Pehtaniink (Bethany), kii'noonteskate Ciisahs. 13 Okiih​tepaapamaan itahsh ehpatahkisonitc kihtikaanaahtikoon, pik (fig) e'ishiwiinsonitc tinowaahtikoon, e'aniipiihshiwinitc. Miitahsh e'ani​naasihkawaatc, taka kekoon cikii'mihkank ewii​amominetc. E'otihsaatc itahsh, kaawiin kekoon okii'mihkansiin. Kii'mihcianiipiihshiwiwan. Aaniihsh kaa mahshi cikiih​shoominiwinitc. 14 Okii'onci​kanoonaan itahsh ini mihtikoon: "Keko miinawaa wiihkaa awiya taonci​amominehsii," okii'inaan. Okii'noontaakoo' itahsh okihkino'amawaakana'. 15 Ahpii tahsh miinawaa eni​takohshinowaatc Ceroosalamink (Jerusalem), kiihpiintike Ciisahs i'imaa Coowa' oKihcianami'ewikamikoniink. Miitahsh okii'maacii​saahsaakicinisha'waa' iniweniwa' kaatashi​ataawenitc kaye kaatanataawaakenitc Kihcianami'ewikamikonk. Okii'ohpimewepinamawaa' otahtaahsonaahkoni iniweniwa' kaameshkotoonikenitc, kaye otehsapiwinini iniweniwa' kaa-ataawaakenitc omiimiinhsa'. 16 Kaawiin kaye okiihpakitinamawaahsiin awiyan cishaapowitoonitc opiina'ikanini i'imaa Kihcianami'ewikamikonk. 17 Mii kaa'ishi​kihkino'amawaatc i'i kaatanenonitc e'ihkitotc: "Ishipii'ikaate ohsha, Kishemanitoo e'ihkitotc: 'Niin niwaahkaa'ikan taishinihkaate anami'ewikamik kahkina awiya entahswewaanakisitc ahkiink citashi​anami'aatc,' ishipii'ikaate. Kiinawaa tahsh wiin kikii'aancihtoom, taapishkoo ciokaasowikamikowaatc omahkantwek!" okii'inaa'. 18 Iki tahsh Kihcianami'ewikimaak, iki kaye kaakihkino'amaakewaatc Onahshowewin, okii'noontaanaawaa 'iwe kaakii'ishihcikenitc ini Ciisahsoon. Shikwahsh okii'aatone'aanaawaa aaniin keshi​nihsimintc. Aaniihsh okiih​kohsaawaan. Aaniihsh kahkina pemaatisiwaatc okii'maamahkaasihtawaawaan Ciisahsoon ekiih​kihkino'amaakenitc. 19 Ahpii tahsh eni​tipihkaninik kii'maacaawak Ciisahs kaye okihkino'amawaakana' onci 'imaa ootenaank. 20 Eni​kishepaawakaninik itahsh ehpimi-ayaawaatc okii'waapamaawaan ini kihtikaanaahtikoon aasha ehpaahsonitc wiinke, ampooshke i'imaa ociipihkaanink. 21 Piitar (Peter) itahsh kii'maamihkawi, e'inaatc Ciisahsoon: "Okihkino'amaake, inashke kikii'inaa cinihshiwanaatisitc a'a kihtikaanaahtik. Aasha paahsoo!" kii'ihkito. 22 Ciisahs itahsh okii'inaa' okihkino'amawaakana': "Ahpenimonotawihk Kishemanitoo. 23 Tepwe kiwiintamawininim, awenen iko keitamokwen o'o pihkwatinaa: 'Awi​pahkopiihsen i'imaa kihcikamiink!' e'itank, ekaa niishwayakentansik, tepweyentank i'i ci-ishiwepaninik otihkitowin, tepwe taishi​waapanta'ikoowisi. 24 Mii'iwe kaaonci-ininakook: Anami'aayek, wekonen iko kekakwetweyek, tepweyentamohk aasha ekiih​tepinamek, kikawaapanta'ikoom. 25 Shikwa ahpii niipawianami'aayek kaye awiya nishkenimek, ahkawe poonentamawihk. Miitahsh kiTetewaa kihcikiishikonk kaa-ayaatc cipoonentamawinek kekiinawaa kimacitootamowiniwaan." 27 Miinawaa tahsh kiihpitakohshinook i'imaa Ceroosalamink (Jerusalem). Miitahsh i'imaa piintik ehpimohsetc Ciisahs Coowa' oKihcianami'ewikamikoniink okiihpi​kanoonikoo' Kihcianami'ewikimaa' kaye iniweniwa' kaakihkino'amaakenitc Onahshowewin, kaye i'i Coowa' oniikaanisiimini. 28 Miitahsh okakwecimikoo': "Aanti wenci-inaahkonikooyan ci-ishihcikeyan ono kekoonan? Awenen kaa'inaahkonihk citootaman?" okii'ikoo'. 29 Miitahsh kaa'inaatc Ciisahs: "Keniin peshik kikakwecimininim, nahkwehtawihshik. Miitahsh kikawiintamawininim aanti o'o wenci-ishihcikeyaan. 30 Awenenan kaakii'inaahkonikotc 'awe Cwaan (John) cisiika'antaaketc? Komaa Kishemanitoon, komaa kaye ininiwa'? Nahkwehtawihshik!" okii'inaa' Ciisahs. 31 Miitahsh kiih​kakwecintiwak e'ihkitowaatc: "Kishemanitoo kaakii'inaahkonikotc aana​inank, kitaa​ikonaan: 'Aaniihsh kaa'onci​tepwehtawaahsiwek?' 32 Kaawiin itahsh kitaaihkitohsiimin 'Ininiwa' okii-inaahkonikoo' a'a Cwaan,' " kii'ihkitowak. Aaniihsh okiih​kohsaawaa' i'i pemaatisinitc, kahkina awiya ekii'inakimaanitc Cwaanan ehtinowinitc peshik kaakanootamawaanitc Kishemanitoon. 33 Miitahsh kaa'ishi​nahkwehtawaawaatc ini Ciisahsoon: "Kaawiin ninkihkenimaahsiwaanaan, awekwenan kaakii'inaahkonikotc a'a Cwaan cisiika'antaaketc," okii'inaawaan. Miitahsh kaa'ikowaatc: "Miihsh i'i kaawiin keniin kikawiintamawihsinooninim aanti kaaonci-inaahkonikooyaan ci-ishihcikeyaan," okii'ikowaan.

Maarhk 12

1 Miitahsh okii'maaciikanoonaa' Ciisahs e'awehciketc. O'o kii'ihkito: "Aapitink peshik inini okiih​kihtikaanaa' shoominaahtikoo'. Shikwa okii'waahkaamenikanihkantaan okihtikewin. Shikwa tahsh kii'waanaapihka'ike keshi​siinipiikishkawintwaa shoominak e'minwatihsowaatc. Shikwa tahsh okii'oshihtoon otahshawaapiiwikamik. Miitahsh okii'aawi'aa' kihtikewininiwa' i'i kihtikewin cikanawentamaakotc, shikwa paanimaa cipahkwenamaakotc keontisitc kihtikewinink. Miitahsh pahkaan ahkiink e'ishaatc waahsa. 2 Ahpii tahsh wecihcihsek cimawinswaanintwaa shoominak e'mekwaatihsowaatc, okii'ishinisha'waan ini peshik otanohkii'aakanan cipahkwenamaakotc kihtikewininiwa' otoontisiwinini, minihk wentinaminitc i'imaa e'ataawaakenitc i'i shoomina'. 3 Iki tahsh kihtikewininiwak okii'otihtinaawaan ini anohkii'aakanan ekiih​pahpahkihte'waawaatc. Miitahsh pishihshikwaya'ii kaa'ishi​kiiwenisha'waawaatc ekaa kekoon ekii'miinaahsikwaa. 4 Miitahsh miinawaa peshik okii'anoonaan anohkii'aakanan a'a inini kaatipentank kihtikewin. Iki tahsh kihtikewininiwak okiihkihci​pahpahkihteyaahkohtikwaane'waawaan kaye ehkihci​akaciwinaakwaninik okiih​tootawaawaan ini anohkii'aakanan. 5 Shikwa miinawaa peshik okii'ishinisha'waan a'a inini. Miitahsh kaa'ishinihsikonitc kihtikewininiwa'. Niipiwa' keyaapi okii'anoonaa' anohkii'aakana' 'awe kaatipentank. Aanint itahsh okiih​pahpahkihte'okoni, aanint kaye okii'nihsikoni i'i kihtikewininiwa'. 6 Piinihsh itahsh peshik ehta awiyan okii'ayaawaan, miiwanini kaakiih​saaki'aatc okosihsan a'a inini. Miiwan itahsh ini kekahpii okii'ishinisha'waan, 'Kehcinaac oka​kihci-inenimaawaan ninkosihsan,' e'ihkitotc. 7 Miitahsh aanciko kii'ihkitowak kihtikewininiwak: 'Miiwan ohsha ono okosihsan a'a kaatipentank 'owe kihtikewin! Taka nihsimaataanin, citepipitaawank kaawiih​tipinawewisinihpan,' kii'ihkitowak. 8 Miitahsh tepwe kaa'ishi​kaahcitinaawaatc ini kaatipentank okosihsan, ekii'nihsaawaatc, weti ohpimekihtikewin ekii'ahpakitoowaatc i'i miiyaw. 9 "Aaniin itahsh kiinawaa enentamek keishihcikehpan a'a kaatipentank kihtikewin? Tapi​takohshin hsa cipinihsaatc i'i kihtikewininiwa', shikwa oka-aawi'aa' pahkaan awiya' i'i shoominikihtikewin cikanawentamaakotc. 10 Kehcinaac kikii'anamihtoom o'owe eshipii'ikaatenik Kishemanitoo otihkitowin: 'Iki kaawaahkaa'ikewaatc anihshaa okii'wepinaawaan ini peshik kaaonishihshinitc ahsiniin, miiwanini mayaa kaa-aapaci'aatc kaaTipenciketc cikiishihcikaatek i'i waahkaa'ikan. 11 Mii'owe kaamaamahkaaci-ishihciketc a'a kaaTipenciketc,' ihkitoomakan," kii'ihkito Ciisahs. 12 Ikiweniwak itahsh kaaniikaanakinsowaatc Coowak otaanawiih​tahkonaawaapaniin Ciisahsoon. Okiih​kihkenimaawaan aaniihsh e'awehcikenitc wiinawaa ehtashimikowaatc. Onsaam itahsh okiih​kohsaawaa' i'i kaamaamawenonitc. Miitahsh kaani-ishinakanaawaatc ekii'ani​maacaawaatc. 13 Miitahsh kii'anoonaawak iki aanint Perahsiiwininiwak (Pharisees), i'i kaye Herat (Herod) owiiciiwaakana' kekoon cikakakwecimaawaatc Ciisahsoon ewiionci​kaahcitinaawaatc. 14 Ahpii tahsh wetihsaawaatc okii'inaawaan: "Okihkino'amaake, ninkihkentaamin e'nihtaatepweyan kaye ekaa wiihkaa awiya ehpapaapisiskenimaahsiwatc aaniin keinenimihk. Taapishkoo kahkina awiya kitishi​kanoonaa. Kaawiin aaniihsh kipapaapisiskentamowaahsiin awiya wakicaya'ii eshi​ayaatc. Kwayahk itahsh kikihkino'amaake Kishemanitoo kaashi​antawenimaatc awiyan ci-inaatisinitc. Wiintamawihshinaam itahsh: Inahte na citipa'amawank taakihs shooniyaan a'awe Maawac iko Kihciokimaa, kemaa kaawiin? 15 Kika​tipa'amawaanaan ina, kemaa kaawiin?" okii'inaawaan. Ciisahs itahsh ehkihkenimaatc ehkakwewayeshimikotc, okii'inaa': "Aaniihsh wenci​koci'iyek? Taka piitamawihshik peshik waapaapihko​shooniyaanhs ciwaapamak," okii'inaa'. 16 Okiih​piitamaakoo' itahsh. Miitahsh kaa'inaatc: "Awenehsh wa'a kaamasinihsininik ohtikwaan, awenehsh kaye 'owe owiinsowin?" okii'inaa'. Miitahsh kaa'ishi​nahkwehtaakotc: "Maawac iko Kihciokimaa 'awe," okii'ikoo'. 17 Miitahsh kaa'inaatc: "Kitaa​miinaawaa ohsha a'awe Maawac iko Kihciokimaa kaatipinawewisitc, kaye 'awe Kishemanitoo kitaa​miinaawaa i'i wiin kaatipinawewisitc," okii'inaa'. Okii'maamahkaasihtaakoo' itahsh. 18 Okiihpi​otihsaawaan itahsh iki Saacahsiiwininiwak (Sadducees). Miiwak ikiweniwak kaaihkitowaatc ekaa awiya cikiiwepimaatisii'intc kii-ishkwaanipotc. Miitahsh ehkakwecimaawaatc Ciisahsoon: 19 "Okihkino'amaake, kikii'oshipii'amaakonaan o'owe onahshowewin a'a Moosihs (Moses): awiya niponitc wiicihkiweyan, ekaa kaa'onicaanihsihsinik, ciotaahpinamawaatc ini owiitikemaakanini kaye cioniicaanihsitc, cinihtaawikihtamawaatc ini wiicihkiweyipaniin. 20 Aapitink itahsh kii'niishwaahciwak (7) e'owiicihkiweyintiwaatc. Shikwa kii'wiitike a'a kaasasiihkisitc. Miitahsh kaa'ishi​noontenipotc ekii'oniicaanihsihsik. 21 Miitahsh miinawaa 'a kotak i'imaa kaakii'ani​onci​ohshiimenshimaawitc kaa'ishi​wiitikemaatc ini ihkwewan. Miitahsh kewiin peshikwan kaa'ishi​nipotc. Kaawiin kewiin kii'oniicaanihsihsii. Miitahsh miinawaa peshikwan kaa'ishiwepisitc a'a ehkonihsiwaatc. 22 Miitahsh piinihsh iki kaaniishwaahciwaatc kaakii'wiitikemaawaatc kiihcaakinipowak, kaawiin kii'oniicaanihsihsiiwak. Miitahsh kekahpii kaa'ishi​nipotc kewiin a'a ihkwe ishkwaac. 23 Awenen itahsh keowiitikemaakanihpan ini ihkwewan paanimaa pi​kiiwepimaatisiiwikiishikahk?" kii'ishi​kakwetwewak iki Saacahsiiwininiwak. 24 Ciisahs itahsh okii'nahkwehtawaa': "Mii ohsha 'iwe wenci​wanikiishweyek, ekaa ehkihkentansiwek Kishemanitoo otihkitowin, kaye eshi​kashki'ewisitc Kishemanitoo. 25 Ahpii tahsh kiiwepimaatisink, kaawiin awiya inini tawiitikehsii, kaawiin kaye ihkwe tawiitikemaahsii. Taapishkoo taishipimaatisiwak encala' kihcikiishikonk eyaanitc e'wiitikentihsinik. 26 Shikwa tahsh 'iwe kaanipowaatc cikiiwepimaatisi'intwaa, kehcinaac kikii'anamihtoom i'i masina'ikan Moosihs (Moses) kaakii'oshipii'ank, i'imaa entashintenik i'i pihkohkohpaanhs ekiih​sahkitenik ekii'ankwaahkitehsininik, kaakii'ishi​kaanoonikotc Kishemanitoon: 'Niin oManitooman Eparahaam (Abraham), shikwa oManitooman Aaisik (Isaac), shikwa oManitooman Cekap (Jacob),' mii'i kaa'ikokopanen Moosihs ini Kishemanitoon. 27 Mii'owe ehkitonk, oko kaaoKishemanitoomiwaatc, mihsawaa aana inintwaa e'nipowaatc, keyaapi ohsha pimaatisiwak. Wawiinke kiwanikihkino'amaakem e'ihkitoyek ekaa kiiwepimaatisiwin e'ayaamakahsinok," okii'inaa' Ciisahs i'i Saacahsiiwininiwa'. 28 Peshik itahsh inini kaakihkino'amaaketc Onahshowewin okii'naasihtawaa' ehkakanoonitinitc. Shikwa okii'nihsitohtawaan e'onishihshininik eshi​nahkwehtaminitc wiin Ciisahsoon. Miitahsh i'i opikakwecimaan: "Wekonen naakaanentaakwahk onahshowewin?" okii'inaan. 29 Miitahsh eshi​nahkwehtank Ciisahs: "O'o hsa naakaanentaakwahk onahshowewin: 'Pisintamohk kiinawaa Isriyal (Israel) ininiwak! Peshik ehta ayaa kaaTipenciketc. Mii'awe Kishemanitoo kaaTipeniminank. 30 Misiwe tahsh kite'iwaank kikasaaki'aawaa 'awe kaaTipenciketc kiKishemanitoomiwaa. Kika​saaki'aawaa minihk kepimaatisiyek. Shikwa kahkina kekoon eshi​naakatawentamek, kaye kahkina kekoon eshihcikeyek minihk keshi​kashkihtooyek, kikasaaki'aawaa kaaTipenciketc.' 31 O'o miinawaa peshik kehci-inentaakwahk onahshowewin: 'Kika​saaki'aawaak kiicipimaatisiiwaak, aaniin ehpiihci​saaki'itisoyek, mii'i ciahpiihci​saaki'ekwaa,' ihkitoomakan. Kaawiin awahshime ahpiihtentaakwahsinoon onahshowewin ahpiihc wiin ono," okii'inaan. 32 Miitahsh e'ikotc ini ininiwan kaakihkino'amaakenitc Onahshowewin: "Okihkino'amaake, kwayahk kitihkit. Tepwe peshik ehta ayaa Kishemanitoo, kaawiin pahkaan awiya ayaahsii. 33 Kaye kikasaaki'aanaan Kishemanitoo eni​kohkote'eyank kaye kahkina kekoon eshi​naakatawentamank, kaye minihk eshi​kashkihtooyank. Kaye kikasaaki'aanaan a'a kiicipimaatisiinaan taapishkoo eshi​saaki'itisoyank. Awahshime kihci-inentaakwan ishihcikeyank ono niishin onahshowewinan, ahpiihc wiin kahkina piinankwa awahkaanak cicaakisontwaa ehpakitinikaakaaniwiwaatc, kaye ahpiihc wiin pahkaan kekoonan pakitinikewinan aana​miinank Kishemanitoo," kii'ihkito 'awe inini. 34 Ciisahs itahsh e'waapantamawaatc weweni e'nahkwehtaminitc, otinaan: "Aasha kekaa ciotookimaamiyan Kishemanitoo," okii'inaan. Miitahsh kaawiin awaac kii'inamanci'ohsiiwak awiyak keyaapi cikakwecimaawaatc Ciisahsoon kekoon. 35 Paanimaa tahsh ehkihkino'amaaketc Ciisahs i'imaa Kihcianami'ewikamikonk, o'owe kii'ani-ihkito: "Iki kaakihkino'amaakewaatc Onahshowewin o'owe ihkitowak: 'A'awe Kishemanitoon kaaonaapamikotc cipimaaci'iwetc, i'imaa Tepitink (David) taontahkaanesi.' Aaniin tahsh wenci-ihkitowaatc o'o? 36 Wiin Tepit kaakiih​kihciokimaawikopanen, ekiih​kanootamawaatc Kishemanitoon, kii'ihkitoopan o'owe: 'KaaTipenciketc okii'inaan ini kaaTipeniminitc: "I'imaa ishi​namatapin ninkihcinihkink inahke, piciinak kikaishi'in wiinke cishaakooci'atwaa citahkohkaanatwaa iki kaanishkenimihkwaa," mii'i kaa'ihkitokopanen. 37 Wiin Tepit ehtashimaatc ini Kishemanitoon kaakii'onaapamaanitc, 'Mii'awe kaaTipenimitc,' otinaan. Kaawiin tahsh awiya opiiwesiiman ehtashimaatc, 'Nintipenimik' otaa​inaahsiin," kii'ihkito Ciisahs. Iki tahsh kaamaamawenowaatc okii'minohtawaawaan ini Ciisahsoon. 38 Shikwa tahsh ekii'ani​kihkino'amaaketc o'o kii'ihkito: "Ahshowinihkook iki kaakihkino'amaakewaatc Onahshowewin, iki kaaminwentamowaatc cikakaanwaapiika'ashewaatc, kaye ehkihcipooshoo'intwaa entashi​ataawenk. 39 Ahpii tahsh kaye eshaawaatc i'imaa anami'ewikamikonk, okakwe​wiitapimaawaa' i'i kaaniikaanakinsonitc. I'imaahsh kaye kaatashi​wiihkwantiwintc maawac wiihkakwe​niikaanapiwak. 40 Shikwa owayeshimaa' i'i kaakiiwaatisinitc ihkwewa' cikii'mahkamaawaatc kahkina ataaya'iimini. Miitahsh i'i kakaanwesh enikohk kaaonci​anami'aawaatc oko kaakihkino'amaakewaatc onahshowewin, ehkwayahkohcikehkaasowaatc. Wiinke tahsh awahshime takihci​tipaahkonikaniwiwak," kii'ihkito Ciisahs. 41 Ciisahs itahsh kii'onapi i'imaa ishitipishkoo eshi​ahtenik i'i eshi​pakitinikenk Kihcianami'ewikamikonk. Okii'waapamaa' itahsh i'i pemaatisinitc ehpakitinaanitc shooniyaan. Iki tahsh kaakii'wenootisiwaatc niipiwa' kiihpakitinikewak. 42 Kiihpiayaa tahsh peshik okiiwaatisiihkwe ekiih​kitimaakisitc, ehpi​pakitiniketc niishin osaawaapihkoonhsa', maakishaa peshik piiwaapihkoonhs e'inakinsonitc. 43 Miitahsh kaa'ishi​antomaatc Ciisahs okihkino'amawaakana' e'inaatc: "Ina wa'aweti! Tepwe kekoon kiwiintamawininim. Wa'aweti okiiwaatisiihkwe ehkitimaakisitc, nawac kihtakinteni 'owe wiin kaakiih​pakitiniketc, ahpiihc iki minihk kaapakitinikewaatc. 44 Ikihsh wiin kahkina kiihpakitinikewak ehkihci-inashkina'aawaatc oshooniyaamiwaan. A'ahsh wiin okiiwaatisiihkwe, aana​kitimaakisitc okii'ishi​pakitinaan kahkina, ampooshke ko kekii'onci​pimaatisihpan," kii'ihkito.

Maarhk 13

1 Ahpii Ciisahs eni​saaka'ank i'imaa Coowak oKihcianami'ewikamikowaank okiih​kanoonikoon peshik okihkino'amawaakanan: "Okihkino'amaake, oko kiniin wenishihshiwaatc kihciahsiniik, kaye ono wenishihshinkin kihciwaahkaa'ikanan!" okii'ikoon. 2 Ciisahs itahsh okii'inaan: "Kiwaapantaan ina ono kehci-ishinaakwahkin waahkaa'ikanan? Kaawiin kanake awaac peshik ahsin ta-akwiihtawaapihkihshinsii. Kahkina taniihsiwepa'ikaniwiwak," kii'ihkito. 3 Miitahsh ekii'ishi​namatapitc Ciisahs i'imaa newatatink ehpihkwatinaak Aalip (Olives) Kihtikaanaahtikohkaank kaaishinihkaatek, ekii'inaahsamapiihtank Kihcianami'ewikamik eshi​ayaanik. Okiih​pinaasihkaakoo' itahsh Piitaran (Peter), Ciimisan (James), Cwaanan (John), Entaroon (Andrew), kiimooc ekii​wiihkanoonikotc. 4 "Wiintamawihshinaam, aanahpii ono keishiwepahkin? Wekonehsh kekihkinawaacihsek i'i ahpii waaocihcihsekin?" ekii'ikotc. 5 Miitahsh okii'maaciikihkino'amawaa' Ciisahs: "Ayaankwaamisik, keko awiya kikawayeshimikohsiiwaa. 6 Niipiwa' ihsa okapi​aapacihtoonaawaa niwiinsowin i'iwe ci-ihkitowaatc: 'Niin a'a nintaaw.' Niipiwa' awiya' oka​wayeshimaawaa'. 7 Shikwa ahpii noontamek pehsho e'matwemiikaatink, kemaa kaye mihcitipaatotek waahsa e'miikaatink, keko mikoshkaatentankek. Aaniihsh kehcinaa'owentaakwanoon ciocihcihsekin. Kaawiin itahsh mahshi taishkwaahsehsinoon o'o kaapimihsek ahki. 8 Takihci​miikaatiwak awiyak pepahkaan kaatahswewaanakisiwaatc kaye kaatahsinkin okimaawiwinan. Ayaanint ayaawinink takoshkwahkamikihse i'i ahki, shikwa tamantawiinaaniwan. Ono tahsh kepi-ishiwepahkin taapishkoo inentaakwanoon emaacii​wiihsakaahpinetc ihkwe ewii​waapamaawahsotc. 9 "Kiinawaa tahsh ayaankwaami'itisok. Kika​ishiwinikoom i'imaa entashi​onahshowenk. Kaye kikatashi​pahpahshanshe'okoom i'imaa Coowak otanami'ewikamikowaank. Shikwa 'iwe niin ehtepwehtawiyek kikaonci-ishiwinikoom i'imaa eshi​ayaawaatc kihcionahshowewikimaak kaye kihciokimaak. Miitahsh i'i ci-ishihseyek ciwiintamawekwaa i'i minwaacimowin. 10 O'o tahsh minwaacimowin ahkawe tawiintamawaawak kahkina kaatahswewaanakisiwaatc pemaatisiwaatc. 11 Ahpii tahsh tahkonikooyek kaye ishiwinikooyek i'imaa tipaahkonitiwinink, keko kiishaac naanaakatawentankek aaniin keishi​nahkwehtamek. Wekonen iko kemiinikoowisiyek i'i ahpii e'ishihsek, mii'i ihkitok. Kaawiin kiinawaa kitihkitowiniwaa kika-aapacihtoohsiim. Ini hsa wiin Kishemanitoo otAhcaahkwan okiikitowinini kika-aapacihtoom. 12 Ininiwak oka​mamishimaawaa' ini wiicihkiweyiwaa' cinihsimintc. Iki kaye otetemaak oka​tootawaawaa' oniicaanihsiwaa', shikwa iki apinoonciishak oka​shiinkenimaawaa' oniiki'ikoowaa'. Oka​ishihcike'aawaa' i'i cinihsimintc. 13 Kaye kiinawaa ehtepwehtawiyek kikaonci​shiinkenimikowaa kahkina awiya. A'a hsa wiin keshashiipentank piinihsh kahkina kekoon ci-ishkwaahsenik, tapimaaci'aa." 14 "Kika​waapamaawaa 'awe ehkakwaanihsakentaakositc kaawii'nihshiwanaatahkamikisitc. Taniipawi i'imaa kekii'ishi​niipawihsikipan," kii'ihkito. (Taka 'awe enamihtootc o'oweni kaaishipii'ikewak oka​nihsitohtaan wekonen kaa'itaminitc Ciisahsoon.) "Ahpii tahsh waapantamek," kii'ihkito, "maano iki eyaawaatc Cootiiyaawi ahkiink (Judea) tayahpa'iwewak i'imaa eshi​ayishpatinaanik. 15 Awiya tahsh keayapitc eshi​tahtakwaanik wakiciwaahkaa'ikan i'i ahpii, shemaak iko takishiiniihsaantawe cimaaciipa'iwetc. Kaawiin ahkawe tapiintikehsii owaahkaa'ikanink cimanipitootc kekoon cimaaciitootc. 16 Shikwa awiya mekwaa e'anohkiitc kihtikewinink i'i ahpii, keko ahkawe takiiwehsii owaahkaa'ikanink cimanipitootc opiinsihkawaakan. 17 Taocaanimisiwak itahsh iki kekikishkawaawahsowaatc kaye kenooni'aawahsowaatc i'i ahpii keni-ishiwepaninik! 18 Ishi​anami'aak itahsh ekaa cini-ishiwepahsinok mekwaa ehpipoonk. 19 I'iwe keahpiihci​kakwaataki-ishiwepahk, kaawiin wiihkaa kii'onci​kihkentaakwahsinoon, ahpane kaakii'oshihtootc Kishemanitoo i'i ahki, piinihsh kaye noonkom 'owe ahpii, kaawiin kaye miinawaa wiihkaa taishi​kihkentaakwahsinoon. 20 A'a tahsh wiin kaaTipenciketc tipinawe, okii'onci​onentaan acina ehta ci-ishikiishikaninik. Kiishpin o'owe kii'ishihsehsikipan, kaawiin awiya taakiih​shaapwiihsii. I'i tahsh wiin otoonaapancikana' kaakii'onci​onakimaatc tipinawe, okii'onci​onentaan ekaa onsaam kinwesh ci-ishikiishikahsininikin. 21 "Kiishpin awiya i'i ahpii ininek: 'Inashke 'omaa ayaawan ini Kishemanitoo kaakii'onenimaatc cipimaaci'iwenitc!' Komaa kaye ihkitotc awiya: 'Inashke ayaa weti!' ihkitotc, keko tepwehtawaahkek. 22 Tepwe tapiyayaawak awiyak 'Niin Kishemanitoo kaapiicinisha'otc cipimaaci'iwewak,' keinwaanitisowaatc. Komaa kaye 'Niin kaakanootamawak Kishemanitoo,' taitisowak, ciwayeshinkewaatc itahsh. Tawaapanta'iwewak kihkinawaacihcikewinan kaye maamahkaacihcikewinan keonci​wayeshinkewaatc. Ampooshke Kishemanitoon otoonaapancikanini okawii'wayeshimaawaa' kiishpin cikiih​kashki'aawaatc. 23 Kiinawaa tahsh ahshwiik! Aasha kahkina kekoon kikii'niikaanaacimohtawininim keni-ishiwepahk." 24 "I'i tahsh ahpii naake, kii'ishkwaa​ocaanimisink, tani​kashkiitipihkihse kiisihs, kaye 'awe tipihkikiisihs kaawiin tasaakaahsikehsii. 25 Iki tahsh wanankohshak tamatwe​pankihshinook i'imaa onci kiishikonk. Shikwa ini kekoonan kaasoonkentaakwahkin kiishikonk kaayayaakin, tawashkihsewan i'imaa onci eshi​kishipaashkaamakahkin. 26 Shikwa mii'i ahpii cipayahtenaakosiyaan niin Inini oKosihsan, cipiyayaayaan i'imaa wahkwiihkaank. Kihcimashkawisiiwin kaye waahsesiwin ninkapi​kikinaakos. 27 Miitahsh i'i ahpii ninkapi-ishinisha'waak nintencalimak, ninkaishi​maawantoonaak iki pemaatisiwaatc kaakii'onaapamakwaa, misiwe ko ciontinintwaa kaaontaanimaninik eshi​misiwehkamikaanik." 28 "Taka kakwekihkentamohk e'ishi​kihkinawaasinaakositc a'a kihcishominaahtik pik (fig) kaatinwaahtikowitc, e'ishihciketc. Kikihkentaanaawaa ahpii e'noohkatihkwanakisitc ehsaakipakaak, aasha pehsho ewii​niipink. 29 Miihsako taapishkoo, ani-ishi​waapantamek ono keni-ishiwepahkin, kikaonci​kihkentaanaawaa aasha ehpehshwentaakwahk ciocihcihsek. 30 Tepwe kiwiintamawininim: kahkina ono kekoonan tani-ishiwepanoon cipwaa nipowaatc oko noonkom kaapimaatisiwaatc. 31 Kiishik miina ahki kahkina ta-ankwanoon, inihsh wiin niin nintihkitowinan kaawiin taishkwaahsehsinoonan, pishihshik tatepwewiniwanoon." 32 "Shikwa kaawiin awiya okihkentansiin i'i ahpii ehkiishikaninik keishiwepaninik, kaye ketahsotipa'ikaneyaanik. Ampooshke encalak kihcikiishikonk eyaawaatc kaawiin okihkentansiinaawaa, kaye niin oKosihsimaa kaawiin ninkihkentansiin. NinTete, mii ehta 'awe kehkentank. 33 Ayaankwaamisik, ahshawaapik. Kaawiin aaniihsh kikihkentansiim aanahpii keocihcihsek. 34 Taapishkoo taishinaakwan a'a peshik inini waahsa kaaishaatc, kaanakatank otaawin, ehkanawenta'aatc otanohkii'aakana' entahsopeshik ci-inanohkiinitc, e'inaatc ini kaakanawentaminitc ishkwaantem ciahshawaapinitc. 35 Kekiinawaa tahsh ahshawaapik. Niin taapishkoo nintinentaakos a'a inini kaatipentank waahkaa'ikan. Kaawiin kikihkenimihsiim aanahpii ketakohshinaan, komaa ani​onaakohshik, komaa aapihtaa​tipihkahk, komaa kaye ani​piitaapank, komaa kaye wiipa kikishep. 36 Ahshawaapik, sesakooc takohshinaan ekaa cimekwaanipaahsiwek ahpii pi​otihsinakook. 37 O'o tahsh kaaininakook, mii'i kahkina awiya enak: Ahshawaapik!" kii'ihkito Ciisahs.

Maarhk 14

1 Keyaapi kii'niishokiishikwakaa cipwaa ocihcihsenik kaawii'ishi​ciihkahkamikisinaaniwank Pimaaci'ikoowi​Wiihkwantiwin kayehsh e'ishi​kiishikahk e'ompisikaniwihsik pahkweshikan ciamontc. I'i tahsh Coowak oKihcianami'ewikimaamiwaa' kaye iki kaakihkino'amaakewaatc Onahshowewin, okii'naanaantone'aanaawaa keishi​kiimooci​tahkonaawaatc ini Ciisahsoon, ekiiwii'nihsaawaatc. 2 Kii'ihkitowak itahsh: "Kaawiin kitaatahkonaahsiwaanaan mekwaa e'wiihkwantinaaniwank, maakishaa takihci​ompwehkamikisiwak, cipiikwahkamikisiwaahpan," kii'ihkitowak. 3 Kii'ayaa tahsh Ciisahs i'imaa Pehtaniink (Bethany) e'ishinihkaatenik ootenawenhs, i'imaa kaaishitaanitc peshik ininiwan, Saaiman (Simon) e'ishinihkaasonitc, mii 'awe kaakii'omikiiwaahpinehpan. Mekwaa tahsh ehtashi​wiihsininitc Ciisahs, kiihpi​piintike peshik ihkwe ekii'ayaatc kaayaahkwakintenik minaakwa'onini, ekii'ishi​piintenik i'imaa ahsiniiwi omootayaapihkonk aalapaastar (alabaster) tino ahsiniink kaakii'onci​oshihcikaatenik. Naart (Nard) kaakiih​tinowaakamik minaakwa'on, kaawiin kekoon kiihtakwaakaminikaatehsinoon. Okiih​poohkwaapihkinaan itahsh eshi​akaahsiciipwaapihkaninik i'i omootayaapihk a'a ihkwe, ekiih​siikinamawaatc i'i minaakwa'on i'imaa Ciisahsoon ohtikwaaniniink. 4 Aanint itahsh i'imaa piintik kaayayaawaatc kii'wahsitaawentamook e'aayitiwaatc: "Aaniihshwiin wenci​nihshiwanaacihtootc i'i minaakwa'on? 5 Niipiwa' shooniyaa taakii'inataawaakaaniwan. Kekaa peshikoahki taayanohkii awiya cikashki'aatc ini minihk shooniyaan. Taakii'onci​miinaapaniik ketimaakisiwaatc kii'inataawaakaaniwankipan minaakwa'on," kii'ihkitowak. Mii'i ekiih​kishiikanoonaawaatc ini ihkwewan. 6 Ciisahs itahsh kii'ihkito: "Poonimihk! Aaniihshwiin wenci​mikoshkaasomek? kehcionishihshininik kaakiih​tootawitc," okii'inaa'. 7 "Mooshak ayaawak o'omaa kaashi​ayaayek iki ketimaakisiwaatc, piko ahpii ciminohcike'ekwaapan inentamek. Niin itahsh kaawiin pishihshik kika-ayaawihsiim. 8 Kii'ishihcike hsa wa'a ihkwe 'iwe minihk eshi​kashkihtootc. Kiishaac okiih​siikinaan i'i minaakwa'on i'imaa niiyawink ewii​na'ahsikooyaan. 9 Tepwe kiwiintamawininim: Aanti ko keshi​tipaatocikaatek i'i minwaacimowin misiwehkamik, kaye o'o kaakii'ishihciketc tatashimaa wa'a ihkwe cimaamihkoomintc," kii'ihkito. 10 Miitahsh kaa'ishi​maacaatc a'a peshik iki kaakii'mitaahshiniishiwaatc kihkino'amawaakanak, Cootahs Iskeriyat (Judas Iscariot) kaaishinihkaasotc, ekii'ishaatc i'i Coowak oKihcianami'ewikimaamiwaa', ekii'awi​kanoonaatc: "Kika​kihkinowinininim i'imaa keshi​kaahcitinek a'a Ciisahs," ekii'inaatc. 11 Wiinke tahsh kii'minwentamook iki Kihcianami'ewikimaak, ekii'inahshotamawaawaatc shooniyaan citipa'amawaawaatc ini Cootahsan. Miitahsh kaa'ishi​antone'ank a'a Cootahs aaniin keshi​kaahcitinimintc ini Ciisahsoon. 12 Maawac itahsh iko nihtam ehkiishikahk e'maatahkamikahk wiihkwantiwin mii'i ahpii e'maaciiamontc pahkweshikan ekaa e'ompisikaniwihsik, kaye mii'i ahpii kaaishi​nihsintwaa maanahcaanihshensak kaawii'amontwaa ehPimaaci'ikoowi​Wiihkwantinaaniwank, mii'i ahpii Ciisahs okiih​kakwecimikoo' okihkino'amawaakana': "Aaniinti tahsh eshi​antawentaman ci-ishi​oshiihtamaakooyan ketashiwiihsiniyan ehPimaaci'ikoowi​Wiihkwantink?" okii'ikoo'. 13 Miitahsh kaa'ishi​anoonaatc niishin okihkino'amawaakana' e'inaatc: "Ishaak ootenaank, kikamekwaashkawaawaa inini ekii'naata'ipiitc otahtoopaan. Mii 'awe piminisha'ohk. 14 Aanti tahsh iko keishi​piintiketc a'a inini, mii'imaa ishi​kakwecimihk a'a kaatipentank waahkaa'ikan: 'Okihkino'amaake ihkito: "Aanti eyaak taawin ketashiwiihsiniyaank ninkihkino'amawaakanak ehPimaaci'ikoowi​Wiihkwantink" kitik,' mii'iwe inihk. 15 Kika​waapanta'ikowaa tahsh i'imaa ishpimink e'mihcaak pahkehcikan aasha ehtashi​waweshihcikaatenik kaye kahkina kekoon ehkwayaantahtek. Mii'imaa ishi​oshiihtaak ciwiihsiniyank," okii'inaa'. 16 Miitahsh kaa'ishi​maacaawaatc ekii'ishi​takohshinowaatc ootenaank. Mayaa tahsh okii'ishi​mihkaanaawaa 'iwe kaa'ishi​wiintamaakowaatc Ciisahsoon. Miitahsh kaa'ishi​oshiihtaawaatc ciwiihsiniwaatc ehPimaaci'ikoowi​Wiihkwantink. 17 Ahpii tahsh wenaakohshininik okiihpi​wiicitakohshinoomaa' Ciisahs i'i mitaahswahshiniishin okihkino'amawaakana'. 18 Mekwaa tahsh e'ohpimehshinowiihsiniwaatc, okii'inaa' Ciisahs: "Pisintamohk o'o: peshik a'a ninka​ishihcike'ik kiinawaa kaawiiciwiihsiniiminakook citahkonikooyaan," kii'ihkito. 19 Miitahsh kaa'ishi​mikoshkaatentaminitc kahkina, ekii'onci​kakwecimaawaatc pepeshik e'inaawaatc: "Kaa maawiin niin, ina?" okii'ikoo'. 20 Okii'nahkwehtawaa' itahsh a'a Ciisahs: "Peshik kiinawaa kaamitaahswahshiniishiyek, peshik kaakintaanaatc opahkweshikaniman e'wiitoohpamitc, mii'awe keishihcike'itc. 21 Niin Inini oKosihsan, tepwe nintawinip taapishkoo kaaishipii'ikaatenik Kishemanitoo otihkitowin, e'inaacimikooyaan. Kakwaanihsakahkamik itahsh a'a inini keishihcike'itc! Nawaciko taaonishihshin ekaa wiihkaa cikii'nihtaawikihsikopanen a'a inini," okii'inaa'. 22 Mekwaahsh e'wiihsiniwaatc okii'otaahpinaan Ciisahs ini pahkweshikanan, ekii'nanaahkomotc, ekiih​pahpahkwepinaatc, e'ishi​maamiinaatc okihkino'amawaakana', e'inaatc: "Otaahpinihk. Miihsa 'owe niiyaw," kii'ihkito. 23 Miitahsh kaa'ishi​otaahpinank minihkwaakan, e'nanaahkomotc. Miitahsh kaa'ishi​miinaatc. Kahkina kii'onci​minihkwewa'. 24 Miitahsh e'ihkitotc: "Miihsa 'owe nimiskwiim, kaawii'oncikawik ahpii nipohtamawakwaa niipiwa' awiyak. Mii 'owe cikihtahtek i'i ahshotamaatiwin kaamiinaatc Kishemanitoo i'i pemaatisinitc. 25 Weweni pisintamohk o'o: Kaawiin keyaapi nanaash ninka​minihkwaatansiin shoominaapo, paanimaa weti ehkiishikahk ciminihkwaatamaan i'i oshkishoominaapo, weti ahpii kii​kiishi​oshihsitootc Kishemanitoo oTipencikewin," kii'ihkito. 26 Miitahsh kaa'ishkwaa​nanaahkomiwewi nikamowaatc kii'maacaawak weti pihkwatinaank Aalip (Olive) Kihtikaanaahtikohkaank e'ishinihkaatek. 27 Miitahsh kaa'inaatc Ciisahs okihkino'amawaakana': "Kahkina kikanakashim. Mii'i aaniihsh eshipii'ikaatenik Kishemanitoo otihkitowin: 'Kishemanitoo oka​nihsaan ini okanawimaanahcaanihshiwen, miitahsh iki maanahcaanihshak kahkina keishi​ohswepa'iwewaatc,' ihkitoomakan. 28 Paanimaa tahsh Kishemanitoo kiihkiiwepimaatisi'itc, kika-awi​pii'ininim Kaalaliiwi ahkiink (Galilee)," kii'ihkito. 29 Okiih​kanoonikoon itahsh Piitaroon (Peter): "Kahkina awiyak aana nakanihkwaa, kaawiin keniin i'i nintaa​ishihcikehsii," okii'ikoon. 30 Ciisahs itahsh okii'inaan: "Weweni maamihkawin! Noonkom kaatipihkahk, cipwaa ahkawaapanwetc niishwaa (2) a'a naapepaahka'aahkwaan, 'Kaawiin ninkihkenimaahsii,' nihswaa (3) kikaish," okii'inaan. 31 Nawac miinawaa enikohk kii'ishi​nahkwehtam a'a Piitar: "Mihsawaa aana wiicinipoominaan, kaawiin wiihkaa niin nintaa​ihkitohsii ekaa cikihkenimihsinowaan!" okii'inaan. Miihsa ko peshikwan kahkina kaa'ayihkitowaatc iki kihkino'amawaakanak. 32 Kii'ani​takoshinook itahsh i'imaa ayaawinink, Kehsemani (Gethsemane) e'ishinihkaatenik. Miitahsh kaa'inaatc Ciisahs okihkino'amawaakana': "O'omaa nanamatapik mekwaa anami'aayaan," okii'inaa'. 33 Okii'wiiciiwaa' itahsh Piitaroon (Peter), Ciimisan (James), Cwaanan (John). Miitahsh kiihkihcikohtaacihse a'a Ciisahs, e'ahpiihci​mikoshkaatentank. 34 Shikwa 'owe okii'inaa': "Aasha taapishkoo e'nihsikoyaan i'i nimaanentamowin," okii'inaa'. "O'omaa ayaak, ahshawaapik," okii'inaa'. 35 Pankii ko awahsweti kii'ani-ishaa Ciisahs. Kii'animihkopani'o mihtahkamik ekii'anami'aatc, ehpakohsenimotc, kiishpin ishihsekipan, ampehsh cipakitinaahsiwintc i'imaa ci-ishaatc kakwaatakihtoowinink kaawii'ocihcihsenik. 36 "Aapa (Abba), ninTete!" kii'ihkito. "Kahkina kekoon kikashkihtoon. Ampehsh inkoci cionci​otaahpinamawiyan o'o minihkwaakan ekaa cionci​minihkwehsiwaan! Niin itahsh kaamihsawentamaan kaawiin taishiwepahsinoon. Kiin ihsa kaa-antawenimiyan, taishiwepan," kii'ihkito. 37 Miitahsh okiih​pikiiwenotawaa' Ciisahs i'i nihsin (3) okihkino'amawaakana'. Okii'waapamaa' e'nipaanitc. Okii'inaan itahsh Piitaroon: "Saaiman (Simon), kinipaa na? Kaawiin ina kikiih​kashkihtoohsiin peshikotipa'ikan ehta cishiipinkwahshiyan?" okii'inaan. 38 "Ahshawaapik," okii'inaa'. "Anami'aak ekaa ciani​kakweci'ikoohsiwek. Aanawii'mashkawentamek, kaawiin teahpiihciimakahsinoonan kiwiiyawiwaan," okii'inaa'. 39 Miinawaa kii'ishaa Ciisahs kaakiih​tashianami'aatc, peshikwan ekii'ihkitotc. 40 Miitahsh miinawaa ehpikiiwetc okii'waapamaa' e'nipaanitc, ekiih​kawinkwahshinitc. Okiih​kwiinawi-ikoo' itahsh. 41 Miitahsh nihswaa (3) ekiihpi​kanoonaatc okihkino'amawaakana': "Keyaapi na kinipaam? Kitanwehshinim inahsh? Mii kishke minihk nipaak! Mii aasha e'ocihcihsek! Na! Aasha niin Inini oKosihsan nimpakitinikoowis citahkoniwaatc omacitootamook," okii'inaa'. 42 "Haw pasikwiik, ishaataa! Na 'aweti! Aasha takohshin a'a kaakihkinowinaatc i'i ketahkonimitc!" kii'ihkito. 43 Miitahsh mekwaa ehkakitotc Ciisahs, kiihpitakohshin a'a Cootahs (Judas), mii 'awe peshik iki mitaahshiniishin kihkino'amawaakanak. Kiihpi​kiki​takohshin niipiwa' awiya' ekiih​kikoohkomaanenitc. Miihsa weti kaahpionci​maacinisha'okowaatc i'i Kihcianami'ewikimaa' kaye kaakihkino'amaakenitc Onahshowewin kaye Coowa' oniikaanisiimini. 44 A'awe tahsh Cootahs, mii 'awe kaakiihpi-ishiwinaatc i'i ketahkonaanitc Ciisahsoon, okiih​kiishaaci​kihkino'amawaa': "Mii 'awe keociimak otihtinaahkek, weweni maaciinaahkek," okii'inaapanii' 'awe Cootahs iniweniwa' kaawiiciiwikotc. 45 Miitahsh piciinak iko e'otihtank i'i ayaawin opikanoonaan Ciisahsoon: "Okihkino'amaake!" otinaan, e'ociimaatc. 46 Miitahsh okiih​tepipinaawaan Ciisahsoon, ekii'mamaancikonaawaatc. 47 Peshik itahsh a'a kaaciikikaapawiwaatc okiih​kihcikopitoon pashipa'ikewihkomaan ekiih​pahkihte'waatc ini otanohkii'aakanini ini Maawac Kihcianami'ewikimaan, ekii'mashihtawakewepa'waatc. 48 Ciisahs itahsh okiih​kanoonaa' iniweniwa' kaatahkonikotc: "Kipi​kaahcitinim ina taapishkoo kimoocishkiiwinini ehtinowiwaanen, ehkikisiyek kihcimoohkomaanan kaye pakamaakanan? 49 Tahsokiishik kikii'wiiciiwininim i'imaa Kihcianami'ewikamikonk ekiih​kihkino'amaakeyaan. Kaawiinhsh wiihkaa kikiih​tahkonihsiim. Miitahsh iko 'i ciocihcihsek i'i kaaishipii'ikaatenik Kishemanitoo Otihkitowin," okii'inaa'. 50 Miitahsh kahkina kii'maaciipa'iwewa' okihkino'amawaakana', ekii'nakanikotc. 51 Peshik itahsh okiih​piminisha'waan Ciisahsoon oshki-inini, waapishkiikin ehta ekiih​kashkiikiitc. Okii'otihtinikoo' i'i ininiwa' ewiih​kakwe​tahkonikotc. 52 Miitahsh kaa'ishi​nakacipahtwaatc oshki-inini i'i waapishkiikin, ekii'maaciipa'iwetc kekoon ekiihkikishkansik. 53 Miitahsh eni-ishiwinintc Ciisahs weti e'ayaanitc ini kaaniikaanentaakosinitc Kihcianami'ewikimaan. I'imaa tahsh aasha kii'maawaci'itiwak iki Kihcianami'ewikimaak, kaye Coowak oniikaanisiimiwaa', kaye iki kaakihkino'amaakewaatc Onahshowewin. 54 Ahpii tahsh kaahpimiwinimintc Ciisahsoon, a'a Piitar (Peter) kii'ani​mihciayoonsaapi, piinihsh i'imaa owaahkaa'ikaniniink ini Maawac Kihcianami'ewikimaan, akwaciink i'imaa kaashi​wiimpihcikaatenik ekii'ishi​piintiketc. Mii'imaa kaa'ishi​wiitapimaatc i'i kanawencikewishimaakanihsha' ekii'onci​awansotc ciikishkote. 55 Weti tahsh piintik iki Kihcianami'ewikimaak kaye kahkina iki onahshowewininiwak okii'nanaantaontinaanaawaa keishi​maanaahkonaawaahpan ini Ciisahsoon keonci​nihsaawaatc. Kiihkwiinawi​ontinikewak itahsh. 56 Aaniihsh niipiwa' awiyak okiih​kakiinawishki-inwe'aawaan Ciisahsoon, kaawiin itahsh peshikwan kii'inaacimohsiiwak. 57 Aanint itahsh kiihpipasikwiiwak ekiih​kakiinawishkiwaatc e'ishi​tipaacimaawaatc Ciisahsoon e'inaawaatc: 58 "Ninkii'noontawaanaan e'ihkitotc: 'Ninka​piikopitoon o'o Kishemanitoo kaashi​anami'ehtawintc ininiink kaakii'onci​oshihcikaatenik. Kiinihsokiishikwakaak (3) itahsh ninka​kiishi​oshihtoon peshik mehci​oshihcikaatehsinok,' kii'ihkito," okii'inaawaan. 59 O'o hsa wiin kaawiin peshikwan kii'ihkitohsiiwak kewiinawaa. 60 Miitahsh kaa'ishi​pasikwiitc a'a Maawac Kihcianami'ewikimaa. Naawaya'ii kii'niipawi ekiih​kanoonaatc ini Ciisahsoon: "Kaawiin ina kekoon kiwii'ishi​nahkwehtansii kaaishi​macaacimihkwaa?" okii'inaan. 61 Ciisahs itahsh kaawiin awaac kekoon kii'ihkitohsii. Kaawiin kii'nahkwehtansii. Miinawaa tahsh a'a Maawac Kihcianami'ewikimaa okiih​kakwecimaan ekii'inaatc: "Kiin ina 'awe Kishemanitoo kaa'onaapamaatc cipimaaci'iwenitc? Kiin ina oKosihsan a'a Kishemanitoo kaaishpentaakositc?" okii'inaan. 62 Ciisahs itahsh okii'inaan: "Mii 'awe nintinow. Niin Inini oKosihsan kikawaapamim ciokimaawapiyaan okihcinihkink inahke a'a kaaMaamawiMashkawentaakositc. Mekwe wahkwiink ninka​pinaakos kiishikonk," kii'ihkito. 63 Miitahsh eshi​taashkipitootc okikishkikanan a'a Maawac Kihcianami'ewikimaa e'nishkaatisitc, e'ihkitotc: "Awenen awahshime kekii'ihkitohpan? 64 Aasha kikii'noontaanaawaa ekii'macikiishwaanaatc Kishemanitoon. Aaniihsh kiinawaa enentamek?" okii'inaa'. Miitahsh kahkina kaa'ishi​paahtaayaahkonaawaatc ini Ciisahsoon, e'inaawaatc ehkashkihtamaasonitc nipowin. 65 Shikwa aanint okii'maacii​sasiihkwaanaawaan ini Ciisahsoon. Shikwahsh ekiih​kipwaapahpinaawaatc, okiih​pahpahkihte'waawaan. "Kiin okihkentamaa!" okii'inaawaan. "Wiinsh awenen kaapahkihte'ohk!" okii'inaawaan. Shikwa iki kaye kanawencikewi​shimaakanihshak okiih​pahpahsiinkwekanaamaawaan. 66 Piitar (Peter) itahsh i'imaa niihsaya'ii kii'ayaa akwaciink i'imaa kaashi​wiimpihcikaatenik i'i waahkaa'ikan. Okii'mayaashkaakoon itahsh peshik oshkiniikihkwen, miiwanini peshik otanohkii'aakanan a'a Maawac Kihcianami'ewikimaa. 67 Miitahsh e'waapamikotc e'awansotc, okiih​kanawaapamikoon: "Kaye kiin iitok kikii'wiiciiwaa 'awe Ciisahs, 'awe Naasaritiiwinini (Nazarene)," okii'ikoon ini oshkiniikihkwen. 68 Miitahsh kaa'ishi​aanwehtank a'a Piitar: "Aaniin ehkitoyan? Kaawiin ninkihkentansiin," okii'inaan. "Kaawiin kinihsitohtawihsinoon i'i kaaihkitoyan," okii'inaan ini oshkiniikihkwen. Miihsh eni-ishi​saaka'ank i'imaa nahsawaya'ii kaani​onci​saakitamok. 69 Miitahsh i'imaa miinawaa kaa'ishi​waapamikotc ono anohkii'aakanihkwen, shikwa miinawaa ekiih​kanoonaanitc iniweniwa' i'imaa kaawiicikaapawiihtawaanitc: "Mii wa'a peshik kaawiiciiwaawaatc," kii'ihkitowan. 70 Miinawaa tahsh kii'aanwehtam a'a Piitar. Naakeyihsh miinawaa okii'ikoo' iniweniwa' kaawiicikaapawiihtaakotc: "Tepwe ohsha kiin peshik kitaaw! Kaalaliiwi ahkiink (Galilee) kekiin kitooncii!" okii'ikoo'. 71 Miitahsh kaa'ishi​mashkawikiishwetc a'a Piitar: "Maano kekoon Kishemanitoo ninka​tootaak kiishpin tepwehsiwaan! Kaawiin ninkihkenimaahsii wa'a inini kaatashimek!" okii'inaa'. 72 Miitahsh i'i shemaak kii'noontaakosi miinawaa a'a naapepaahka'aahkwaan. Miitahsh kaa'ishi​maamihkawihsetc Piitar i'i kaakii'ikohpan Ciisahsoon: "Cipwaa noontaakositc a'a naapepaahka'aahkwaan niishwaa (2), aasha nihswaa (3) ciaanwehtaman cikihkenimiyan," ekii'ikotc. Miitahsh kaa'ishi​moohkwentank kaa'ani-ishi​kihcimawitc.

Maarhk 15

1 Piciinak itahsh ehpimoohka'aminitc, ehpapaashiink, kii'maawaci'itiwak iki Kihcianami'ewikimaak, iki kaye kaaniikaanakinsowaatc Coowak, kaye kaakihkino'amaakewaatc Onahshowewin, kahkina kaye kaanihtaa​onaahkonikewaatc, mincikahkina ekii'naanaakasowewaatc. Miitahsh kaa'ishi​mamaancikwahpinaawaatc Ciisahsoon, inkoci e'ishiwinaawaatc e'miinaawaatc ini Paailatan (Pilate). 2 Miitahsh eshi​kakwecimaatc a'a Paailat ini Ciisahsoon: "Kiin ina iki Coowak okihciokimaamiwaan?" okii'inaan. Ciisahs okii'ishi​nahkwehtawaan: "Mii'iwe ehkitoyan," okii'inaan. 3 Iki tahsh Kihcianami'ewikimaak niipiwa' kekoonini okakwecimaawaan ini Ciisahsoon. 4 Miinawaa tahsh kii'onci​kakwetwe a'a Paailat: "Kaawiin ina kekoon kiwii'ishi​nahkwehtansii? Inashke minihk eshi​anaamimikooyan!" okii'inaan. 5 Keyaapi tahsh Ciisahs kaawiin kekoon kii'nahkwehtansii. Maamahkaac okii'onci-inenimikoon ini Paailatan. 6 Tahsink itahsh e'ishi​ciikahkamikisinaaniwank Pimaaci'ikoowi​Wiihkwantiwin, kii'nihtaa​ishihcike a'a Paailat (Pilate), ekiih​pakitinaatc peshik awiyan kaakipa'omintc, awenenan iko mehsawenimaanitc i'i Coowa'. 7 I'i ahpii kiihkipaahkwa'ikaniwi a'a peshik inini, Paraapahs (Barabbas) e'ishinihkaasotc. Okiih​takokipa'okoomaa' kotak awiya' kaakii'nihshiwenitc ekii'miikaanaanitc ini wekimaawaatisinitc, ekii'nihshiwanaatahkamikisiwaatc. 8 Miitahsh kaahpi-ishi​maawaci-ishaawaatc niipiwa' awiyak i'imaa Paailatan owaahkaa'ikaniniink, e'maaciikakwecimaawaatc: "Ishihcike'ihshinaam taapishkoo mooshak eshihcike'iyaank o'o ahpii!" kii'ihkitowak. 9 Miitahsh kaa'ishi​nahkwehtawaatc a'a Paailat: "Kika​pakitinamawininim ina ini Coowak okihciokimaamiwaan?" okii'inaa'. 10 Aaniihsh Paailat wiinke okiih​kihkenimaa' i'i Kihcianami'ewikimaa' e'ontenimaanitc ini Ciisahsoon, mii'iwe kaa'onci-ishiwitamaakotc. Aaniihsh kahkina awiya okii'minohtawaawaan Ciisahsoon. 11 Iki tahsh Kihcianami'ewikimaak okiih​kakaansomaawaa' i'i kaaohkwenonitc cikakwe​tepimaanitc ini Paailatan, meshkwac cipakitinamawintwaa ini Paraapahsan. 12 Miitahsh miinawaa kaa'ishi​kanoonaatc a'a Paailat i'i kaaohkwenonitc: "Aaniin tahsh enentamek ci-ishihcike'ak a'awe kaainek okihciokimaamiwaan iki Coowak?" 13 Miitahsh kaa'ishi​nahkweshaakowewaatc: "Saka'o aashiteyaahtikonk!" 14 Kii'ishi​nahkwehtam itahsh Paailat: "Aaniin itahsh? Aaniihsh kaa'ishi​macihciketc?" okii'inaa'. Nawac itahsh awahshime kiihkihcishaahshaakowewak, "Saka'o aashiteyaahtikonk!" e'ihkitowaatc. 15 Miitahsh i'i kaa'ishi​pakitinaatc a'a Paailat ini Paraapahsan, e'inentank ciminwentaminitc i'i kaaohkwenonitc. Miitahsh kaa'ishi​anoohkiitc cipahshanshe'omintc ini Ciisahsoon. Shikwa okiih​pakitinamawaa' shimaakanihsha' cisaka'waanitc aashiteyaahtikonk. 16 Iki tahsh shimaakanihshak okii'ishiwinaawaan ini Ciisahsoon i'imaa piintikamik, mii'imaa kihcionahshowewinini kaaishitaatc, Pariihtwaariyam (Praetorium) kaaishinihkaatek ekii'antomaawaatc i'i enikohkwenonitc shimaakanihsha'. 17 Miitahsh ekiih​kiicihkonaye'aawaatc ini Ciisahsoon, kaa'ishi​pihsihkamo'aawaatc i'i kaamahkatemiskwekaninik kashkiikiiwin. Shikwa okii'ahpihkaanaawaa' e'oshihtoowaatc okaawiminakashii' wiiwahkwaan, ekiih​pihsihkamo'aawaatc. 18 Miitahsh kaa'ishi​anamihkawaawaatc e'inaawaatc: "Pooshoo kiin kehciokimaahkantawatwaa Coowak!" okii'inaawaan. 19 Miitahsh kaa'ishi​pahpahkihte'waawaatc i'imaa ohtikwaaniniink i'i wiihsikop, kaye ehsasiihkwaanaawaatc kaye e'ociciinkwanapiihtawaawaatc, e'nanaawakiihtawaawaatc kaye. 20 Miitahsh kaa'ishkwaa​nihshipaahpinotawaawaatc okiih​kiicihkonaye'aawaan i'i kaamahkatemiskwekaninik kashkiikiiwin, miinawaa wiin iko okikishkikanini ekiih​pihsihkamo'aawaatc. Miitahsh kaa'ishi​maaciinaawaatc ekii'anta-akosaka'waawaatc aashiteyaahtikonk. 21 Kiihpimiayaa tahsh peshik inini mekwaa ehpimahkamikaninik, Saaiman (Simon) e'ishinihkaasotc, i'imaa Saairiiniink (Cyrene) kaakii'onciitc. Mii'awe kaaokosihsitc Aalikihsaantaroon (Alexander) kaye Oroohpahsan (Rufus). I'imaa ohpimeaya'ii kiihpionci​takohshin ewii​anicehkishkank ootena. Mii'awe kaa'ishi​koonkonikotc shimaakanihsha' cipimiwitamawaatc Ciisahsoon otaashiteyaahtikomini. 22 Miitahsh weti kaa'ishiwinintc Ciisahs i'imaa eshi​pihkwatinaanik Kaalkahtaa (Golgotha) e'ishinihkaatenik, mii'iwe ehkitonk Ohtikwaanikekanihkaank. 23 Otaanakiiwii'mina'aawaan i'i shoominaapo ekii'waninaweyaakaminikaatenik kekoon ekaa keonci​nihsitosihsinik, mar (myrrh) e'ishinihkaatenik. Kaawiin itahsh kiiwii'minihkwehsii. 24 Miitahsh ekiih​kiicihkonayepinaawaatc kaa'ishi​akosaka'waawaatc aashiteyaahtikonk. Miitahsh kaa'ishi​ahpakicikewaatc keonci​kihkentamowaatc wekonen i'i kikishkikan keotaahpinamowaatc entahsopeshikowaatc. Mii'i nahke kaa'ishi​nenaawa'oonitiwaatc okikishkikanini. 25 Kiihshaankahso​tipa'ikaneyaani ehkishepaawakaninik, mii'i ahpii kaakii'akosaka'waawaatc. 26 Shikwa kii'oshipii'ikaate kihkinawaacihtamaakewin, wekonen kaaonci​akosaka'ontc a'a Ciisahs. "Mii wa'a Coowak okihciokimaamiwaan," kii'ihkitoomakan. 27 Shikwa niishin (2) omahkantweshkak kewiinawaa kii'akosaka'ikaasowak, keyaapi e'niishinitc aashiteyaahtikoo', peshik i'imaa okihcinihkiniink inahke, peshik itahsh kaye onamantinihkiniink inahke eshi'akoocininitc Ciisahsoon. 28 [Mii 'i wiinke ekii'ishihsenik i'i kaakiih​kiishaacipii'ikaatenik Kishemanitoo otihkitowin: "Kiihtakwakimaa iniweniwa' kaapiikonaminitc inaahkonikewin," kii'ihkitoomakanini.] 29 Miitahsh iki kaamayaashkawaawaatc okii'nihshipaahpi'aawaan ekii'nanaamihkweniwaatc e'inaawaatc: "Yohoo! Kiwiih​piikopitoonaapan iitok i'i Kishemanitoo kaashi​anami'ehtawintc, miinawaa kiinihsokiishikwakaak ewiih​kiiwe​oshihtooyampan! 30 Kiin pimaaci'itison! Piniihsaantawen i'imaa aashiteyaahtikonk!" kii'ihkitowak e'ishi​miihkinsomaawaatc. 31 Shikwa peshikwan iki Kihcianami'ewikimaak, iki kaye kaakihkino'amaakewaatc onahshowewin okiih​paahpi'aawaan Ciisahsoon e'itiwaatc: "Pahkaan awiya' okiih​pimaaci'aa'. Wiin itahsh kaawiin okashkihtoohsiin cipimaaci'itisotc! 32 Mii 'awe kaaitisotc Kishemanitoo kaa'onenimaatc cipimaaci'iwenitc e'aawitc, kaye kekihciokimaahkantawaatc Isriyalininiwa' (Israel). Taka cikii'onci​niihsaantawetc i'imaa aashiteyaahtikonk, kikatepwehtawaanaan e'aawitc, waapantamowank!" kii'itiwak. Iki kaye niishin ininiwak kaakii'wiici​akosaka'okoomaawaatc Ciisahsoon, kaye wiinawaa peshikwan okii'ishi​kakaansomaawaan. 33 Miitahsh e'aapihta​kiishikahk kii'maacii​kashkiitipihkan misiwe ahkiink, piinihsh e'nihsotipa'ikaneyaak. 34 E'nihsotipa'ikaneyaak itahsh kiihkishiiwe a'a Ciisahs: "Ilooi! Ilooi! Lamaa sapaahtanii?" kii'ihkito. Mii'i ehkitonk: "NiManitoom! NiManitoom! Aaniin tahsh kaaonci​nakashiyan?" 35 Miitahsh kaa'ihkitowaatc aanint i'imaa kaaciikikaapawiwaatc: "Ina tahsh, onantwewemaan Ilaaicawan (Elijah)!" 36 Miitahsh peshik inini kaa'ishi​piicipahtwaatc iska'ipaan ekiih​kintaapiikinank shoominaapoonk, ekii'niimaahkwa'ank mihtikoonhsink, ekii'inaahkwa'amawaatc otooniniink ini Ciisahsoon ewii​mina'aatc, e'ihkitotc: "Taka cipiniihsinikotc ini Ilaaicawan!" 37 Ciisahs itahsh kiihkihcikishiiwe. Miitahsh kaa'ishi​poonipimaatisitc. 38 Miitahsh i'i ahpii weti Kihcianami'ewikamikonk kaa'ishi​taashkiikihsek kaakihpakaak aakawekinikan i'imaa piintik kaa-akootek Kishemanitoo owaahkaa'ikaniink. Ishpimink inahke kiihpionci​maacii​taashkiikihse piinihsh weti naashaya'ii. 39 I'imaa tahsh pehsho aashiteyaahtikonk kaakii'niipawitc okimaawishimaakanihsh kaainaahsamikaapawiihtawaatc ini Ciisahsoon, ahpii e'waapamaatc eshi​poonipimaatisinitc, kii'ihkito: "Tepwe iinsan wa'a inini Kishemanitoon okii'oKosihsimikoon!" kii'ihkito. 40 Shikwa kii'ayaawak ihkwewak i'imaa ehkotepinaakwaninik ekii'onsaapiwaatc. Mekweya'ii ko kii'ayaawak oko nihsin (3) Saloomi (Salome), shikwa Meri (Mary) mii'awe Maakatala (Magdala) ootenawenhsink kaakii'onciitc, shikwa kotak a'a miinawaa peshik Meri mii'awe okosihsa' kaaishinihkaasonitc Coosihs (Joses) kaye Ciimis (James) ohshiimenshimaa. 41 Miiwakoko ihkwewak kaakiih​piminisha'waawaatc ini Ciisahsoon Kaalaliiwi ahkiink (Galilee) mekwaa i'imaa ekii'ayaanitc, ekiih​papaapami'aawaatc. Shikwa keyaapi niipiwa' kii'ayaawak ihkwewak kaakiihpi​wiici​takohshinoomaawaatc ini Ciisahsoon i'imaa Ceroosalamink (Jerusalem). 42 Aasha kii'ani​onaakohshin, ekaa mahshi ehpankihshimohsik ekiih​pahkweshikanikiishikahk. Mii'i ahpii ekii'waweshiihtaawaatc Coowak cipwaa Anwepiiwi​kiishikaninik. 43 Kii'ayaa tahsh peshik ehkihci-inentaakositc onahshowewinini, Coosap (Joseph) kaaishinihkaasotc, ekii'onciitc ootenawenhsink Eramahtiiya (Arimathea) e'ishinihkaatenik. Kewiin okii'ahshawaapantaan Kishemanitoon cioshihsitoonitc otipencikewinini. Kiihsoonkite'e Coosap ekii'ishaatc Paailatan (Pilate), ekiih​kakwecimaatc i'i Ciisahsoon wiiyawini cina'inank. 44 Kiihkoshkwentam itahsh a'a Paailat aasha e'niponitc ini Ciisahsoon e'wiintamawintc. Shikwa kii'anoohkii cipinaasihkaakotc ini okimaawishimaakanihshan. Miitahsh ehkakwecimaatc: "Aasha na kinwesh kaakiinipotc Ciisahs?" okii'inaan. 45 "Eha', aasha kii'nipo," okii'ikoon. Miitahsh kaa'ishi​kanoonaatc a'a Paailat ini Coosapoon: "Haw kikana'inaan i'i miiyaw," okii'inaan. 46 Miitahsh kaa'awi-ishi​ataawetc Coosap i'i waapishkiikin. Miitahsh kaa'ishi​onci​pina'ank i'i wiiyawini Ciisahsoon kaakii'ishi​akootenik aashiteyaahtikonk, shikwa ekiih​titipeyiikinank waapishkiikinonk. Miitahsh kaa'ishi​na'inank i'imaa na'initiiwikamikonk kaa'ishi​wiimpaapihka'ikaatenik. Miitahsh kaa'ishitihtipinaatc ini kihciahsiniin kaakipa'ikaakaaniwinitc i'imaa eshi-ishkwaantemiwaninik na'initiiwikamik. 47 Shikwa kaye kii'ayaawak Meri Maakatalawihkwe (Mary Magdalene) kaye a'a kotak Meri (Mary) kaaokosihsitc Coosihsan (Joses). Okii'waapantaanaawaa eshi​pimihshimimintc ini Ciisahsoon.

Maarhk 16

1 Kaa'ishkwaahsenik itahsh kaakii'Anwepiiwi​kiishikaninik mii'i ahpii kaa'ishaawaatc Meri Maakatalawihkwe (Mary Magdalene), kaye Meri (Mary) Ciimis (James) omaamaan, kaye Saloomi (Salome), ekii'awi​ataawewaatc ini minaakwa'onan ewiiawi​minaakwa'amawaawaatc Ciisahsoon wiiyawini. 2 Miitahsh weyaapaninik e'anami'ekiishikaninik, piciinak iko ehpimoohka'aminitc ehkishepaawakaninik, kii'ishaawak iki ihkwewak i'imaa na'initiiwikamikonk. 3 Kii'ani​kakwecintiwak itahsh: "Awenehsh inkoci keshi​tihtipinamawinank ini ahsiniin kaakipihshininitc na'initiiwikamikonk?" kii'itiwak. 4 Aaniihsh wiinke kii'mihcaapihkisiwan. Ahpii tahsh weti e'inaapiwaatc, okiih​tepaapamaawaan aasha inkoci ekii'matwe​apinitc. 5 Miitahsh ehpiintikewaatc okii'waapamaawaan oshki-ininiwan i'imaa nahke okihcinihkiwaank e'namatapinitc, ehkinwaapiika'ashenitc e'waapishki'onitc. Wiinke kiihsekisiwak. 6 Okiih​kanoonikowaan itahsh: "Keko sekisihkek. Kipi​antawaapamaawaa 'awe Ciisahs Naasaritink (Nazareth) kaaonciitc, aashiteyaahtikonk kaakii'ishi​akosaka'ontipan. Aasha kiihkiiwepimaatisi! Kaawiin awiya o'omaa ayaahsii. Inashke tahsh o'omaa kaakii'ishi​pimihshimintipan! 7 Ani​maacaak itahsh, awi​wiintamawihkook i'i okihkino'amawaakana' kaye wiin Piitar (Peter). Mii 'owe inihkook, e'niikaani-ishaatc Ciisahs weti Kaalaliiwi ahkiink (Galilee), keni-ishaayek. Mii weti keishi​waapamek taapishkoo kaa'ininekipan," okii'ikowaan ini oshki-ininiwan. 8 Miitahsh kaa'ishi​saaka'amowaatc na'initiiwikamikonk, ekii'maaciipa'iwewaatc ekii'nininkihsewaatc ekiih​kihcisekisiwaatc. Kaawiin awiya kekoon okii'inaahsiwaawaan kaa-ahpiihci​sekisiwaatc. 9 [Ahpii tahsh a'a Ciisahs kaahkiiwepimaatisitc wiipa kikishep e'anami'ekiishikaninik, nihtam okii'naakosiihkantawaan Meri Maakatalawihkwen (Mary Magdalene), miiwan iniweniwan niishwaahso (7) kaakiih​saakicinisha'amawaatc maciahcaahkwa'. 10 Wiin a'a ihkwe okii'awi​kanoonaa' i'i Ciisahs kaakii'nihtaawiiciiwaatc, mekwaa ehtanatemonitc e'mawinitc. Okii'wiintamawaa' o'owe kaa'ishiwepaninik. 11 Ahpii tahsh kaa'noontamowaatc ehpimaatisinitc Ciisahsoon kaye ekii'waapamikonitc Meriin (Mary), kaawiin kiihtepwehtansiiwak. 12 Paanimaa tahsh naake kii'ani-ishaawa' niishin Ciisahs okihkino'amawaakana', ohpimeya'ii kaaishi​ootenawaninik ekii'ishaanitc. Miitahsh i'imaa ekii'naako'itisotc 'awe Ciisahs kaaishi​pimohsenitc. Pahkaan itahsh kii'ishinaakosi. 13 Miitahsh kaa'ishi​kiiwewaatc iki niishin kihkino'amawaakanak, ekii'awi​wiintamawaawaatc i'i kotak kihkino'amawaakana'. Kaawiin itahsh okiih​tepwehtaakohsiiwaa'. 14 Paanimaa miinawaa Ciisahs okii'naakosiihkantawaa' i'i mitaahshipeshik okihkino'amawaakana' mekwaa e'wiihsininitc. Okii'onci​kishiikanoonaa' i'iwe ekiih​tepweyentansinik, ehpeci​nihsitohtaminitc kaye, aaniihsh kaawiin okii'nehpici​tepwehtawaahsiini i'iweniwa' kaakii'waapamikotc kiikiiwepimaatisi'intc. 15 Okii'inaa' itahsh Ciisahs: "Ishaak i'imaa misiwehkamik. Wiintamawihkook kahkina pemaatisiwaatc o'o minwaacimowin. 16 Awenen iko ketepwehtank, kesiika'antaasotc kaye, tapimaaci'aa. Awenen itahsh iko ketepwehtansik tatipaahkonikaniwi. 17 Iki tahsh otepwehtamook oka​wiiciiwikonaawaan ono maamahkaacihcikewinan cikihkenimintwaa ehtepwewaatc: niin niwiinsowin ahpiwiintamowaatc oka​saakicinisha'amawaa' maciahcaahkwa' awiya', shikwa taoshki-ishikiishwewak. 18 Shikwa kiishpin otaahpinaawaatc kinepikoo' kaawiihsakiciihsowenitc, kaawiin inkotano oka​tootaakohsiiwaa'. Kiishpin kaye kekooniniko minihkwewaatc pehcipowaakamininik, kaawiin awaac oka​maanishkaakohsiinaawaa. Kaye saaminaawaatc otaahkosii', taminoayaawa'," kii'ihkito. 19 Miitahsh ahpii kaa'ishkwaa​kanoonaatc a'a Tepenciketc Ciisahs, kii'otaahpinikaniwi kihcikiishikonk, weti Kishemanitoon okihcinihkiniink inahke ekii'ishi​wiitapimaatc. 20 Iki tahsh kihkino'amawaakanak kii'ishi​maacaawak misiwe, e'awi​wiintamaakewaatc minwaacimowin. Shikwa okii'wiitanohkiimikowaan ini Tepencikenitc maamahkaacihcikewinan ekii'miinikowaatc citootamowaatc, ekii'ishi​kihkentamo'iwenitc ehtepwemakaninik otihkitowiniwaa.]

Lok 1

1 Kiin Tiyaahpilahs (Theophilus) kaaniikaanentaakosiyan, kitooshipii'amawin. Pipaahtiinowak ihsa kaapi​oshipii'ikewaatc ehtipaatotamowaatc onoweniwan kekoonan kaakiiayishihsekin o'omaa kaaishi​ayaayaank. 2 Wiinawaa ekii'ishipii'ikewaatc aaniin kaakiihpi'ishi​wiintamaakowaatc i'i kaawiintamaakenitc Kishemanitoon ehkitonitc kaakii'waapantaminitc nihtam kekoonan kiimaacihsenikin. 3 Kiin kehci'inentaakosiyan, keniin ohsha weweni nimpikakwe​kihkentaanan kahkina onoweniwan kaakiih​pionci​maacihsekin. Miihsh kaakii'inentamaan cioshipii'amawinaan weweni ciwiintamawinaan mayaa eshihsekin. 4 Miitahsh kaaonci'ishihcikeyaan kekiin cimisiwe​kihkentaman kahkina kekoonan kaakiihpi'ishi​kihkino'amaakooyan. 5 Mekwaa kihciokimaa Herat (Herod) kaatipentank Cootiiya (Judea) ahki, kii'ayaa peshik anami'ewikimaa Sehkaraaya (Zechariah) eshinihkaasotc. Mii 'awe kaakii'onci​tipentaakositc kaakii'ishi​anami'ewikimaawinikopanen Apaaicawan (Abijah). Wiiwaan tahsh Ilisipaht (Elizabeth) kii'ishinihkaasowan. Kewiin a'a ihkwe ekii'ontahkaanesitc kaakii'ishi​anami'ewikimaawinitc Eranan (Aaron). 6 Minciniish itahsh kiihkwayahkwaatisiwak enaahsamiinitc Kishemanitoon, kekoon ekii'ishi​anaamentaakosihsikwaa eshi​pimaatisiwaatc. Ekii'ishihcikewaatc kahkina eshihsininikin onahshowewinan, enaahkonikenitc kaye kaaTipencikenitc. 7 Kaawiin tahsh apinoonciishan cikii'ayaawaawaatc, aaniihsh wiin Ilisipahtan kaawiin okiih​kashkihtoohsiini ciayaawaanitc apinoonciishan. Minciniish itahsh kiihkihci​aya'aawiwak. 8 Peshikwaa tahsh ehkiishikaak Sehkaraaya kii'anami'ewanohkii Kihcianami'ewikamikonk, ekii'ishi​kiishikaninik wiin nihtam i'i ci'inanohkiitc. 9 I'iwe kaakii'ahpakicikewaatc e'anta​kihkencikewaatc anami'ewikimaak wiin mayaa kiimiihkohse cipiintiketc oKihcianami'ewikamikoniink kaaTipencikenitc ciminaahsiketc. 10 Kiipaahtiinowa' itahsh awiya' akwaciink Kihcianami'ewikamikonk enami'aanitc mekwaa eminaahsiketc. 11 Miitahsh kaakii'otihsikotc ekii'naakosinitc Tepencikenitc otencalimini eniipawinitc kihcinihkink inahke minaahsikan eshi​pakitinaahswaatenik. 12 Ahpii tahsh Sehkaraaya ewaapamaatc kiimikoshkaatentam ekiih​sekisitc. 13 Okii'ikoon tahsh encalan: "Sehkaraaya, keko sekisihken. Kishemanitoo ohsha kinoontaak kaaishi​pakohsenimoyan. Inahshke tahsh kiwiiw Ilisipaht kikanihtaawikihtamaak ciokosihsiyan. Cwaan (John) kikaishinihkaanaa. 14 Wiinke hsa kikaciihkentam ciminwentaman. Niipiwa' tahsh awiyak taminwentamok ahpii nihtaawikinitc. 15 A'a kikosihs okakihci'inenimikoon kaaTipencikenitc. Kaawiin taminihkwehsii shoominaapo, komaa kaye kaamashkawaakamininik minihkwewin. Ahpii piko nihtaawikitc oka​mooshkineshkaakoon Kishemanitoon otAhcaahkoni. 16 Okakwehkaaci'aa' ihsa niipiwa' awiya' Isriyalihkaank (Israel) kaaonci​tipentaakosinitc cipikiiwenotawaanitc kaaTipencikenitc oKishemanitoomiwaan. 17 Wiin taniikaani​takohshin cipwaa takohshininitc kaaTipencikenitc. Taapishkoo Ilaaica (Elijah) kaakii'ishi​wiiciiwikotc Kishemanitoon otAhcaahkoni ekii'mashkawisiitc, mii hsa peshikwan keishinaakositc kikosihs. Oka​kwehkinaan otetemaan kaye tahsh otapinoonciishimini miinawaa cipisaani​wiiciintinitc. Okakwehkinaan kaye awiyan kaashashiipihtaminitc cipisintaminitc eshi​kakiihtaawentaminitc kweyahkwaatisinitc. Wiin cikwayaanciihtamawaatc kaaTipencikenitc opimaatisiimini," okii'ikoon encalan. 18 Miitahsh Sehkaraayah kaa'inaatc ini encalan: "Aaniin tahsh keonci​kihkentamaan tepwe o'o ci-ishiwepahk, aaniihsh ekihci​aya'aawiyaan niwiiw tahsh kewiin tepwe ekihciaya'aawitc." 19 Miitahsh kaa'ikotc encalan: "Niin ohsha Kepariyal (Gabriel)," okii'ikoon. "Nintinaahsamikaapawihtawaa ohsha Kishemanitoo. Mii 'awe kaakiih​piicinisha'otc cipi​wiintamawinaan o'owe mino​tipaacimowin. 20 Shaakooc tahsh kaawiin kitepwehtansiin o'owe kaainaacimohtawinaan, i'i kehcinaac kaawii'ishiwepahk ahpii ocihcihsek. Ehtepwehtansiwan itahsh, kaawiin kikakashkihtoohsiin cikakitoyan, kaawiin kaye kikanoontaakosihsii. Paanimaa piko kiishikaak ocihcihsek kaainahshotamawinaan ci'ishiwepahk, miihsh miinawaa cikashkihtooyan cikakitoyan," okii'ikoon encalan. 21 Sehkaraaya hsa okiih​pii'ikoo' pemaatisinitc, ekii'wawaanentaminitc wekonen wentami'ikotc i'imaa Kihcianami'ewikamikonk. 22 Ahpii tahsh kiipi​saaka'ank kaawiin okiih​kashkihtoohsiin cikakanoonaatc. Miihsh kaakiih​kihkenimikotc kekoon ekii'waapantank Kihcianami'ewikamikonk. Kaawiin okii​kashkihtoohsiin kekoon ci'ihkitotc, mii ehtako ekii'mihci​ayishinihkenitc. 23 Sehkaraaya tahsh kaa'ishkwaahsenik otanami'ewanohkiiwin i'imaa Kihcianami'ewikamikonk, mii 'i kaa'ani'ishi​kiiwetc. 24 Naanaake tahsh e'ani'ishihsek, mii 'i wiiwaan Ilisipahtan kaakiih​kikishkawaawahsonitc. Kaawiin ninkoci kii'ishaahsiiwan naanokiisihs minihk. 25 Miihsh kaa'ihkitotc: "Miitahsh o'owe nahke kaaTipenciketc eshihcikehtamawitc e'minwaapamitc noonkom kaakiishikaninik. Kaawiin tahsh miinawaa wiihkaa ninka'akacihsii awiyak ci'ishiwaatc ehkashkihtoohsiwaan iinsan ciayaawak apinoonciish," kii'ihkito. 26 Ahpii tahsh aasha ninkotwaahsokiisihs Ilisipaht (Elizabeth) ehkikishkawaawahsotc, Kishemanitoo okii'ishinisha'waan otencaliman Kepariyal (Gabriel) kaaishinihkaasonitc, Kaalalii (Galilee) ahkiink ci'ishaanitc i'imaa Naasarit (Nazareth) ootenaank. 27 Ekii'ishinisha'ontc a'a encal eshiayaanitc ini pehki​oshkiniikihkwewan Meri (Mary) kaaishinihkaasonitc. Aasha iitok kii'ahshotamaatiwaakopan Coosap (Joseph) eshinihkaasonitc ciwiitikentiwaatc. A'a hsa Coosap kiiontahkaanesi Tepitink (David) kaakiih​kihciokimaawinikopanen. 28 Miitahsh encal kaakiihpi​naasihkawaatc ini oshkiniikihkwewan ekii'inaatc: "Kipooshoo'in, kaaTipenciketc ohsha kiwiiciiwik kaye tahsh aahpici kikihci​shawenimik," okii'inaan. 29 Meri tahsh kii'onci​mikoshkaatentam i'i kaakii'ikotc encalan, kii'wawaanentam kaye wekonen i'i nahke kaakii'ishi​pooshoo'ikotc. 30 Miitahsh o'o encalan kaa'ikotc: "Meri, keko i'iwe onci​sekisihken Kishemanitoo ohsha kimino​kanawaapamik. 31 Inahshke tahsh kikakikishkawaawahs cinihtaawiki'atc keokosihsiyan. Ciisahs tahsh kikaishinihkaanaa. 32 Wiinke hsa takihci'inentaakosi, miihsh kaye keshinihkaanintc Maawac kaaIshpentaakositc Kishemanitoo oKosihsan. KaaTipencikenitc Kishemanitoon kaye oka​kihciokimaawi'ikoon taapishkoo peshikwan Tepitan okehteya'aamipaniin kaakii'ishi​kihciokimaawinitc. 33 Wiin itahsh kaye nehpic oka​okimaahkantawaa' Cekapoonk (Jacob) wentahkaanesinitc. Kaawiin wiihkaa ta'ishkwaahsehsinini okihciokimaawiwin," kii'ihkito encal. 34 Miitahsh Meri kaa'inaatc ini encalan: "Aaniin tahsh i'i ke'onci'ishihsek? Keyaapi iitok pehki​oshkiniikihkwe nintinow," okii'inaan. 35 Miitahsh encalan kaa'ishi​nahkwehtaakotc: "Kishemanitoo otAhcaahkwan kikapi​naasihkaak kaye tahsh omashkawisiiwin a'awe Maawac kaaIshpentaakositc kikapi​akawaahteshkaakowaan. Miitahsh o'oweni onci, a'a kaawii​nihtaawiki'atc, misiwe kaawiih​tipenimikotc Kishemanitoon ciaapaci'ikotc, Kishemanitoo oKosihsan taishinihkaacikaniwi. 36 Inahshke a'a kitinawemaakan Ilisipaht (Elizabeth) kaaishinihkaasotc aana ekihci​aya'aawitc aasha ninkotwaahsokiisihs pikikishkawaawahso. Aanawiin e'inintc ekashkihtoohsik ciayaawaatc apinoonciishan. 37 Aaniihsh kaawiin kekoon Kishemanitoo opwaanawihtoohsiin kaawii'ishihciketc," okii'ikoon encalan. 38 "Kinoontawin, niin hsa kaaTipenciketc otanohkii'aakanan," kii'ihkito Meri. "Maano ninka​ishihsewaan aaniin ehkitoyan." Miitahsh ahpan encalan kaa'ishinakanikotc. 39 Miitahsh iko weyiip Meri (Mary) kaakii'maacaatc ekii'ishaatc weti ootenaank eshi​papiihkwatinaanik Cootiiya (Judea) ahkiink. 40 Miitahsh kaakii'ani​piintiketc i'imaa Sehkaraayawan (Zechariah) owaahkaa'ikaniniink, kaye tahsh ekiih​pooshoo'aatc otinawemaakanan Ilisipahtan (Elizabeth). 41 Ahpii tahsh Ilisipaht e'nootawaatc Meriin ehpooshoo'ikotc, miihsh kaakii'matwe​toohkipani'onitc apinoonciishan anaamink omihsataank, miitahsh Ilisipaht kaakii'mooshkineshkaakotc Kishemanitoon otAhcaahkoni. 42 Miitahsh kaa'ihkitotc ekiih​kishiiwetc: "Kiin maawac kitoonci​kihci​shawentaakos kaatahshiwaatc ihkwewak kaye tahsh ehkihci​shawentaakositc apinoonciish kenihtaawiki'atc. 43 Wekonen itahsh o'o kihcikekoon wenci'ishihseyaan, ninTipencikem omaamaan ehpi​mawatihshimitc? 44 Ahpii piko kaa'noontawinaan kaakiihpi​pooshoo'iyan mii 'i a'a apinoonciish kaakikishkawak kaakiih​toohkipani'otc ehpiihci​ciihkentank. 45 Aahpici shawentaakosi a'a ihkwe kaatepwehtank kahkina cimoshkinehsenik kaakii'ikotc kaaTipencikenitc." 46 Meri (Mary) tahsh kii'ihkito: "Ninte'ink nintooncinanaahkomaa kaaTipenciketc, 47 Nintahcaahkonk nintooncitepinawe'ik Kishemanitoo nintOopimaaci'iwem! 48 Aaniihshwiin kaamaamihkawinotawitc niin kaatapahsentaakosinitc otanohkii'aakanihkweman ehtinowiyaan. Miitahsh noonkom kahkina awiyak kemaacii-ishinihkaashiwaatc 'kaashawentaakositc'! 49 Tepwe hsa kihcikekoonan a'a Kehcimashkawisiitc Kishemanitoo ninkii'ishihcikehtamaak. Miihsh eshinihkaasotc 'Kehtentaakositc.' 50 Oshawenimaan iniweniwan kaakohtaanenimikotc, iniweniwa' kaye kahkina keani​aayaanihkepimaatisinitc. 51 Tetako soonkentaakosi ekii'mashkawitootank, ekii'ohswenisha'waatc kahkina kaakihtenimonitc ote'iniink. 52 Okii'niihsinaan kaamashkawisiinitc kihciokimaan i'imaa onci kaakii'ishi​okimaawapinitc. Okii'ompinaan tahsh iniweniwan kaatapahsentaakosinitc. 53 Okiih​tewiihsini'aan iniweniwan kaawiiwiihsininitc pishihshik e'ahshamaatc wenishihshininikin kekoonan, Ini tahsh wiin kaawenootisinitc piniskwe inkoci otishinisha'waan. 54 Kii'ishihcike kaye kaakii'ishi​ahshotamawaatc kikehteya'aaminaapanii', ekiihpi-ishaatc cipiwiici'aatc otanohkii'aakana' Isriyalink wenci​tipentaakosinitc. 55 Okii'ishimaamihkwentaan okishewaatisiwinink ciwiici'aatc Eparahaaman i'i kaye kahkina keniopiiwesiiminitc nehpic iko." Mii 'oweni kaa'ishinanaahkomotc Meri. 56 Meri okii'wiiciayaamaan ninkoci ko nihsokiisihs Ilisipahtan (Elizabeth), miitahsh Meri kaa'anishi​kiiwetc otaawinink. 57 Ahpi tahsh kaa'ocihcihsenik Ilisipaht (Elizabeth) cinihtaawikinaawahsotc, miihsh kaakii'ayaawaatc keokosihsitc. 58 E'noontaminitc tahsh owiicitaamaakana', i'i kaye otinawemaakana' kaa'ahpiihci​minotootaakotc kaaTipencikenitc, kahkina hsa okii'wiici​ciihkentamoomikoo'. 59 Nihshwaahsokiishik (8) itahsh e'ishihsenik, okiih​kihkinawaatashakeshwaawaan ini oshkapinoonciishan. Miihsh kaye kaa'inentamowaatc ci'ishinihkaanimintc Sehkaraaya (Zechariah) aaniihsh mii 'i kaa'ishinihkaasonitc oteten. 60 "Kaawin," kii'ihkitowan omaamaan. "Cwaan (John) taishinihkaaso," kii'ihkitowan. 61 Miitahsh kaa'inaawaatc Ilisipahtan: "Kaawiin iitok awiya kitinawemaakan i'i ishinihkaasohsii!" 62 Miitahsh ekii'ayishinihkehtawaawaatc ini otetemaan ehkakwecimaawaatc aaniin keshi​antawenimaanitc okosihsan ci'ishinihkaasonitc. 63 Sehkaraaya tahsh kii'antotamaake keshi​oshipii'iketc, miitahsh kaa'ishipii'iketc: "Cwaan ishinihkaaso." Aahpici tahsh kahkina kiihkoshkwentamoo'. 64 Miitahsh shemaak Sehkaraaya ekiih​kashkihtootc miinawaa cikakitotc kaye ekiimaacii​kihcinanaahkomaatc Kishemanitoon. 65 Aahpici tahsh kahkina owiicitaamaakana' kiihsekisiwa'. Misiwe hsa tahsh kiihtashincikaate i'i kaakii'ishiwepahk i'imaa Cootiiya (Judea) pepiihkwatinaak. 66 Kahkina hsa awiyak kaakii'noontamowaatc o'o okii'naanaakatawentaanaawaa ekii'ishi​kakwetwewaatc: "Kaanaka awekwen kenitinowikwen a'a apinoonciish?" Kiihpayahtenaakwanini kaaTipencikenitc eshi​mashkawisiinitc ewiiciiwikotc a'a apinoonciish. 67 Miihsh Cwaan (John) oteten Sehkaraayawan (Zechariah) kaakii'mooshkineshkaakonitc Kishemanitoo otAhcaahkoni, kaye tahsh ekiih​kanootamawaanitc Kishemanitoon ekii'ihkitonitc: 68 "Taka tananaahkomaakaniwi kaaTipenciketc kaaoKishemanitoomiwaatc Isriyalak wiin ekiih​piishaatc, ekiihpi​antanaatamawaatc opimaatisiima' cipimaaci'imintc. 69 Wiin hsa piko kii'miikiwe meshkawentaakosinitc Opimaaci'iwen wentahkaanesinitc Tepitihkaank kaakii'otanohkii'aakanimikopanen. 70 Mewisha o'o kikii'ahshotamaakonaan Kishemanitoo ekii'aapaci'aatc kweyahkwaatisinitc kenootamaakotc, 71 ewii'naatamawinank onci kaamiikaaniyamintwaa, i'i kaye eshimashkawisiinitc kaashiinkenimiyamintwaa. 72 Kii'ihkitokopan cikohpaatenimaatc iniweniwa' kikihciaya'aaminaapanii', kaye tahsh cikanwiihketc kaakihci'inentaakwaninik otahshotamaakewin. 73 Ekii'aayiiciahshotamawaakopanen kikihciaya'aaminaapaniin Eparahaaman, 74 ewiinaatamawinank i'i onci kaashiinkenimiyamintwaa, kaye tahsh pisaan cikashkihtaawankitc anohkiihtawankitc memwehc cisekisihsiwaank. 75 Miitahsh kiinawint cipehkentaakosiyank, cikwayahkwaatisiyank kaye Kishemanitoo enaahsamiitc, minihk hsako entahsokiishik keani​pimaatisiyank. 76 Kiin, niniicaanihs, kikaishinihkaanikoo kaakanootamawaatc Maawac kaaIshpentaakosinitc Kishemanitoon. Kiwii​niikaani'ishinisha'on hsa nintipaacimowininiim, mii hsa 'awe kekwayaancihtamawatc aanti keni'ishaatc. 77 Ciwiintamawimatc opimaatisiima' pimaaci'ikoowisiwin, tako cipoonencikaatenikin omacitootamowiniwaan. 78 KiKishemanitoominaan aahpici koohpaatenimiwe ehkishewaatisitc. Eshinaakwaninik taapishkoo kaapi​saakaahtek kesaakaahsokoyank. 79 Tasaakaahtenamawaawak hsa iki kaaishi​pimaatisiwaatc kaashi​kashkiitipihkaninik, kaa-ayaawaatc kaye kaaishi​aakawaahtehsininik nipowin, kaye tahsh cikihkinowinikoyank miihkana kaainamok peyahtakenimowinink." 80 Miitahsh a'a apinoonciish kii'ani​mintito, kii'ani​mashkawisii kaye owiiyawink, otahcaahkonk kaye. Pikwatahkiink tahsh kiihtashi​pimaatisi, paanimaa piko ekii'ocihcihsenik mekweya'ii cinaakositc kaaishi​ayaanitc Isriyalihkaank.

Lok 2

1 Mekwaa ahpii kiikihciokimaawitc Akastahs (Augustus) kii'inahshowe kahkina pemaatisinitc otipencikewinink kaa'ayaanitc ciakincikaasonitc. 2 Miitahsh o'owe nihtam ekii'ishihcikaaniwank masina'ikanink cioshipii'omintc awiya' mekwaa Kwiriiniyahs (Quirinius) kiitipentank Siiriya (Syria) ahki. 3 Kahkina tahsh awiyak kii'ishaawak ootenaank kaaonci​tipentaakosiwaatc cioshipii'ikaniwiwaatc. 4 Coosap (Joseph) tahsh kii'onci​maacaa i'imaa Naasarit (Nazareth) ootenaank Kaalalii (Galilee) ahkiink, ekii'ishaatc Pehtalihem (Bethlehem) ootenaank Cootiiya (Judea) ahkiink. Mii 'i iitok i'imaa kaakiihtashi​nihtaawikopanen kihciokimaa Tepit (David). Miitahsh weti Coosap kaa'ishaatc, aaniihsh Tepitihkaank kii'ontahkaanesi. 5 Coosap tahsh okii'wiiciiwaan Meriin (Mary) ciantawi​oshipii'ikaasowaatc, aasha wiin ekii'ahshotamaatiwaatc ciwiitikentiwaatc, kaye tahsh Meriin aasha ehkikishkawaawahsonitc, aasha kekaa cinihtaawikinaawahsonitc. 6 Mekwaa tahsh e'ayaawaatc i'imaa Pehtalihemiink mii 'i kaakiih​tipihsenik cinihtaawikinaawahsonitc. 7 Miitahsh kaakii'nihtaawiki'aatc nihtam okosihsan. Miihsh kaakiih​kashkiikinaatc tahkopisoniikinonk kaye ekiih​pimihshimaatc pishihkiwa' nehtaatashi​wiihsininitc. Kaawiin kiihtawaahsinini ninkoci nipewikamikonk. 8 Miitahsh i'imaa inahkehkamik kii'ayaawak okanawi​maanahcaanihshiwek niikateya'ii eshi​mashkohsiihkaanik e'niipaa​kanawenimaawaatc omaanahcaanihshimiwaa' eayoohkwiinonitc. 9 Sesakooc itahsh okii'onci​waapamaawaan kaaTipencikenitc otencalimini, kaye tahsh misiwe ekii'waahseshkaakowaatc kaaTipencikenitc owaahseyaasiwinini, aahpici tahsh kiihsekisiwak. 10 Miitahsh kaa'ikowaatc encalan: "Keko sekisihkek! Nimpiitoon minwaacimowin kewiintamawinakook, aanti keonci​kihci​ciihkentamowaatc kahkina pemaatisiwaatc. 11 Noonkom kaakiishikahk weti ootenaank kaakiihtashi​nihtaawikikopanen Tepit (David) mii 'imaa kaahtashi​nihtaawikitc Opimaaci'iwe, mii 'awe Christ Kishemanitoon kaakii'onaapamikotc ciTipenciketc. 12 Miitahsh o'o keonci​kehcinaa'oyek: kikamihkawaawaa oshkapinoonciish cikashkiikahpisotc cipimihshink i'imaa pishihkiwak kaanihtaa​tanancikewaatc," kii'ihkito a'a encal. 13 Miitahsh kwetahto kaakiinaakosiwaatc aahpici ehpaahtiinowaatc kihcikiishikowi​encalak enanaahkomaawaatc Kishemanitoon, o'o ekii'ihkitowaatc: 14 "Tawiihkihci'inentaakosi Kishemanitoo kihcikiishikonk maawac ishpimink, tamiinikoowisiwak kaye pisaanisiwin iki ahkiink eyaawaatc, awenenan ihsa piko Kishemanitoo keminwaapamaatc," kii'ihkitowan. 15 Ahpii tahsh kaanakanikowaatc ini encalan kihcikiishikonk ekii'ishi​kiiwenitc, miitahsh kaa'ayitiwaatc okanawi​maanahcaanihshiwek: "Taka hsa ishaataa weti Pehtalihemiink (Bethlehem) cianta​waapantamank kaakii'ishiwepahk, aaniin i'iweni kaaTipenciketc kaakiih​kihkentamoo'inank." 16 Miitahsh iko shemaak kaa'ani-ishimaacaawaatc. Ekii'mihkawaawaatc Meriin (Mary) kaye Coosapoon (Joseph) ini kaye oshkapinoonciishan ehpimihshininitc i'imaa pishihkiwa' nehtaatanancikenitc. 17 Ahpii tahsh kaawaapamaawaatc, kiihtipaacimowak aaniin encalan kaakii'ikowaatc iniweniwan apinoonciishan onci. 18 Kahkina tahsh awiyak kaakii'noontamowaatc kiimaamahkaatentamowak i'iweni kaakii'wiintamaakowaatc okanawi​maanahcaanihshiwe'. 19 Meri tahsh okiimanaa​wanihkenotaanan kahkina onoweniwan, mooshak ekii'naanaakatawentank. 20 Miitahsh kaa'ani'ishi​kiiwewaatc okanawi​maanahcaanihshiwek ekiihkihci-inenimaawaatc, enanaahkomaawaatc kaye Kishemanitoon i'iwe kahkina kekoonan kaakii'ishi​noontamowaatc. Ekii'waapantamowaatc kaye mayaa ekii'ishihsenik encalan kaakii'ishi​wiintamaakowaatc. 21 Nihshwaahsokiishik tahsh e'ishihsenik, mii 'i ekii'ocihcihsenik a'a oshkapinoonciish cikihkinawaatashakeshikaniwitc. Ciisahs tahsh kii'ishi​nihkaacikaniwi, mii 'iweni ishinihkaasowin encalan kaakiiwiinikotc cipwaa kikishkawaawahsomintc. 22 Miitahsh ekii'ocihcihsek Coosap (Joseph), a'a kaye Meri (Mary) ci'ishihcikewaatc Moosihsoon (Moses) kaakii'inaahkonikenitc i'iwe pehki'iwewin kaanihtaa​ishihcikaaniwank kaaishkwaa​waapamaawahsotc ihkwe. Miitahsh kaaishi-ishiwinaawaatc apinoonciishan Ceroosalamink (Jerusalem) ekii​anta​pakitinamawaawaatc kaaTipencikenitc. 23 Aaniihsh mii 'i eshipii'ikaatenik otinaahkonikewinink kaaTipenciketc: "Maawac iko nihtam kwiiwisenhs kaanihtaawikitc, kaaTipencikenitc otipenimikoon tainakimaakaniwi," e'ihkitoomakahk. 24 Kaye tahsh kii'anta​pakitinaahsowak ekii'ishihcikewaatc aaniin kaa'ihkitoomakaninik kaaTipenciketc otinaahkonikewin cipakitinaawaatc niishin (2) omiimiisiwa' kaa-akaahshiinshinitc tino, komaa kaye niishin omiimiinhsenhsa'. 25 Peshik itahsh inini kii'ayaa i'imaa Ceroosalamink, Simiyan (Simeon) eshinihkaasotc. Kwayahk kii'ishi​pimaatisi, kaye tahsh ekiih​kosikwenimaatc Kishemanitoon. Ekiih​piihtootc kaawiih​pimaaci'imintc Isriyala' (Israel) kaye tahsh ekiih​kikishkaakotc Kishemanitoon otAhcaahkoni. 26 Okiih​kihkentamoo'ikoon iinsan Kishemanitoo otAhcaahkoni cinoonte​nipohsik, paanimaa piko kii'waapamaatc kaaTipencikenitc kaakiih​piitaacimimintc Opimaaci'iwen. 27 Simiyan tahsh okii'ishinihsha'okoon Kishemanitoo otAhcaahkoni kihcianami'ewikamikonk ciantawi​piintiketc. Ahpii a'a apinoonciish Ciisahs kaapi​piintikanikotc oniiki'ikoo', e'ishihsenik citootaminitc inaahkonikewin eshihsininik. 28 Miihsh Simiyan kaakii'otaahpinaatc apinoonciishan ehtahkonaatc pehkihsh enanaahkomaatc Kishemanitoon ekii'ihkitotc: 29 "Tepencikeyan, miitahsh pisaan ishi​pakitinihshin kitanohkii'aakan kaatinowiyaan ci'ishkwaa​pimaatisiyaan, ci'ishihsek kaakii'ihkitoyan. 30 Aaniihsh tipinawe piko niin nishkiinshikonk nintoociwaapantaan kipimaaci'iwewin, 31 i'iwe kaakii'kwayaancihtamawatwaa ikiweniwak kahkina pemaatisiwaatc awiyak. 32 Miitahsh o'oweni kewaahseshkaakowaatc kaaCoowiwihsikwaa cikihkentamowaatc kitinentamowin, kaye tahsh keonci​kihci'inentaakosiwaatc kipimaatisiimak Isriyalak," kii'ihkito. 33 Ini tahsh oteten, omaamaan kaye a'a apinoonciish kiihkihci​maamahkaatentamoo' kekoonan Simiyanan kaakii'inaanitc Ciisahsoon. 34 Simiyan tahsh okii'inaa': "KaaTipenciketc kikashawenimikowaa." Miihsh o'o kaa'inaatc Meriin a'a apinoonciish omaamaan: "Wiin Kishemanitoo okii'onenimaan ini apinoonciishan niipiwa' awiya' keonci​pwaanawihcikenitc, kaye tahsh niipiwa' awiya' keonci​pimaaci'imintc Isriyalink kaa-ayaanitc. Wiin cikihkinawaacinaakohtootc otinentamowinini Kishemanitoon. Tapaahtiinowa' itahsh kaye keaanawenimikotc. 35 Miitahsh kaapaahtiinatininikin okiimooci-inentamowiniwaan cinaakohcikaatenikin. Kekiin itahsh kikainentam ehpashipa'okooyan pashipa'ikewihkomaan keahpiihci​mincinawesiyan." 36 Kii'ayaa tahsh kaye i'imaa ihkwe kaakanootamawaatc Kishemanitoon, Aana (Anna) e'ishinihkaasotc, Paaniyowelan (Phanuel) ekii'otetetc, Aahshirink (Asher) wentahkaanesitc. Aahpici kiikihci​koohkominaaniwi, niishwaahso​pipoon (7) ehta ekii​wiitikekopan. 37 Nihshwaahsimitanahshi​niiwi​pipoon (84) aasha ekiih​kiiwaacihkwewitc. Mii 'imaa pishihshik kaa'ayaatc kihcianami'ewikamikonk ehtipihkaninik, kaye tahsh ehkiishikaninik ehpamiihtawaatc Kishemanitoon, ekii'mantawii'itisotc, ehta ko anami'aatc. 38 Miitahsh mayaa kewiin peshikwan kaakiihpi​takohshink, miihsh kaa'ishi​nanaahkomaatc Kishemanitoon. Okiih​tashimaan ini apinoonciishan, ekii'wiintamawaatc kahkina iniweniwa' kaapiihtoonitc Kishemanitoon cipimaacihtoonitc Ceroosalam kaaishi​maashihsenik. 39 Ahpii tahsh Coosap (Joseph), a'a kaye Meri (Mary) kaahkiishihtoowaatc kahkina kaainahtenik otoonahshowewinini kaaTipencikenitc citootamowaatc ini onci apinoonciishan, mii 'i kaa'ani'ishi​kiiwewaatc otaawiniwaank Naasaritink (Nazareth) ootenaank, Kaalalii (Galilee) ahkiink. 40 A'a hsa apinoonciish kii'ani​ompiki kaye ekii'ani​mashkawisiitc, kaye kakiihtaawentamowin okii'ani​mooshkineshkaakon, Kishemanitoon kaye okii​shawenimikoon. 41 Entahsopipoon Ciisahs oniiki'ikoo' kii'ishaawa' Ceroosalamink (Jerusalem) emayaahsenik Pimaaci'ikoowi​Wiihkwantiwin kaaicikaatek. 42 Ahpii tahsh Ciisahs mitaahshiniishin (12) kiitahsopipoonwetc, kii'ishaawak maamaw entashi​Pimaaci'ikoowi​Wiihkwantinaaniwaninik. 43 Ahpii tahsh kaa'ishkwaa​wiihkwantiiwahkamikaninik, mii 'i kaa'ani-ishi​kakiiwewaatc. A'a tahsh wiin kwiiwisenhs Ciisahs kii'ayaa i'imaa Ceroosalamink. Kaawiin tahsh oniiki'ikoo' okii​kihkentansiini o'o. 44 "Mii maawiin iko kewiin i'imaa mekweya'ii piayaatok," okii'inenimikoo'. Aasha tahsh kapekiishik ekiihpimi'ayaanitc, miitahsh payesh ekii'maacii​nanaantawaapamikotc i'imaa kaaishi​ayaanitc otinawemaakanini ini kaye kaanakatenimaanitc. 45 Kaawiin itahsh okii'mihkawaahsiwaawaan. Miihsh kaaishi​kiiwewaatc Ceroosalamink ekii'ishi​nanaantawaapamaawaatc. 46 Paanimaa tahsh nihsokiishik (3) eishihsenik piintik Kihcianami'ewikamikonk okii'ishi​mihkawaawaan, e'wiitapimaanitc Coowikihkino'amaake'. Ekiih​pisintaakonitc, ekiih​kakwecimikonitc kaye kekoonan. 47 Kahkina tahsh awiya' kaakii'noontaakonitc okii'maamahkaasihtaakoni aaniin kaa'ahpiihci​kwayahko​nihsitohtank kaye ehkakiihtaawi​nahkwehtank. 48 Oniiki'ikoo' tahsh wiinke kiimaamahkaatentamoo' ahpii e'waapamikotc. Miitahsh kaa'ikotc omaamaan: "Ninkosihs, wekonen tahsh o'o wenci​tootawiyaank? Etatawe ohsha ninkii'mikoshkaatentaamin kitete ehkakwe​mihkaakooyan," okii'ikoon. 49 Miitahsh kaaishi​nahkwehtaakotc: "Wekonen tahsh wenci​nanaantawaapamiyek? Kaawiin ina kikihkenimihsiim ci'ishihcikewak ninTete opapaamisiwin?" okii'ikoon. 50 Kaawiin tahsh okii'nihsitohtaakohsii' i'i kaa'inaatc. 51 Miitahsh Ciisahs kaaishikiiwe​wiiciiwaatc weti Naasaritink (Nazareth), weti ekiihtashi​na'ihtawaatc oniiki'ikoo'. Omaamaan tahsh okiih​saakihtooni o'o i'imaa ote'iniink. 52 Ciisahs tahsh kii'ani​ompiki owiiyawink, awahshime kaye ekii'ani​kakiihtaawentank. Kishemanitoon okii'minwaapamikoon, i'i kaye kahkina awiya'.

Lok 3

1 Mii hsa 'i mitaahshinaanopipoon (15) Taaipiiriyahs (Tiberius) Maawac ekiih​kihciokimaawitc, i'imaa tahsh Cootiiya (Judea) ahkiink kiihtashi​kihci​onahshowewininiiwi Paantiyahs Paailat (Pontius Pilate). I'imaa kaye Kaalalii (Galilee) ahkiink kiihtashi​kihciokimaawi Herat (Herod) kaaishinihkaasotc. Owiicihkiweyan Pilap (Philip) kaaishinihkaasonitc tahsh wiin Icoriiya (Iturea) kaye Coraahkonaaitihs (Trachonitis) inahkehkamik kiihtashi​kihciokimaawiwan. A'a tahsh wiin Lihseniyahs (Lysanias) Aapaliin (Abilene) ahkiink kiihtashi​kihciokimaawi. 2 Aanahs (Annas) a'a kaye Keyahpahs (Caiaphas) ekiimaawac​kihcianami'ewikimaawiwaatc, miitahsh i'i ahpii a'a Cwaan (John) Sehkaraayawan (Zechariah) kaakii'otetetc kaakii'otihsikotc Kishemanitoon otihkitowinini mekwaa pikwatahkiink e'ayaatc. 3 Miitahsh Cwaan kaakii'ishaatc i'imaa misiwe nahkehkamik Cwaartan (Jordan) siipiink eishi​wiintamaaketc: "Nakatamok kimaci'ishiwepisiwiniwaan kaye tahsh siika'antaakoowisik, miihsh kaye Kishemanitoo cipoonentamawinek kimaci'ishiwepisiwiniwaan," kii'ihkito. 4 Mii'owe eshipii'ikaatenik masina'ikan kaakii'ihkitokopanen Aaiseya (Isaiah) kaakiih​kanootamawaatc Kishemanitoon: "Awiya weti pikwatahkiink kii'matweshaakowe: 'Kiishihtamawihk kaaTipenciketc omiihkanaam, oshihtamawihk cikwayahkwaanik miihkana keishi​pimi​ayaatc. 5 Kahkina kaashi​waawaanatinaakin tamooshkinahcikaatewan, kahkina pimatinaan kaye kaakihci'ishpatinaakin tatapahsinikaatewan, kaawaawaakaashkamokin miihkanaan takwayahkohcikaatewan, kaamaanamokin miihkanaan tashooshkohcikaatewan. 6 Kahkina tahsh awiyak kaapimaatisiwaatc okawaapantaanaawaa Kishemanitoon eshi​pimaaci'iwenitc,' " ishipii'ikaate. 7 Niipiwa' tahsh awiyak okiihpi​antawaapamaawaan Cwaanan cisiika'antaakowaatc. "Kiinawaa kinepikook," ekii'inaatc. "Awenen kaakiiwiintamawinek cikashkihtooyek cishaapooshkamek Kishemanitoo otipaahkonikewin, aasha kekaa o'owe kaawiih​takohshinoomakaninik? 8 Ishihcikek kekoonan keonci​naakwahk ekii'nakatamek kimacitootamowiniwaan. Keko kaye itisohkek: 'Eparahaam (Abraham) ohsha ninkihciaya'aaminaan.' Miihsh eshi​wiintamawinakook, Kishemanitoo ohsha otaa​kashki'aa' i'i ahsinii' cikii'ompiki'aahpan cikii​ontahkaanesinitc Eparahaamihkaank. 9 Aasha waakaahkwat aapatan keonci​kiishkika'ontwaa mihtikook ociipihkowaank. Entahsopeshikotc itahsh mihtik kaaonci​nihtaawikihtoohsik wenishihshininikin miinenhsan, cikiishkata'waakaniwitc cimacihtewepinikaniwitc," kii'ihkito. 10 Miitahsh awiya' kaaishi​kakwecimikotc: "Aaniin tahsh keishihcikeyaank?" 11 Miitahsh kaaishi​nahkwetawaatc: "Piko awenen eyaakwen niishin (2) naapishkikanan, peshik okamiinaan awiyan eyaahsinik naapishkikan. Awiya kaye eyaakwen miicim oka'ahshamaan eyaahsinik miicim." 12 Aaninta kaye kaamaawantoonaawaatc taakihs (tax) tipa'ikewishooniyaan kiihpianta​siika'antaasowak. Miitahsh kaa'ishi​kakwecimaawaatc: "Okihkino'amaake, aaniin keishihcikeyaank?" okii'inaawaan. 13 "Keko paashitc awahshime tipa'ike'iwehkek, kaaikooyek ehta ishi​tipa'ike'iwek," okii'inaa'. 14 Aaninta kaye shimaakanihshak okii'ishi​kakwecimaawaan: "Niinawint itahsh wiin aaniin keishihcikeyaank?" Miitahsh kaa'inaatc: "Keko wiin awiya mahkamaahken oshooniyaaman, keko kaye awiya ishianihshaa anaamimaahken. Mii piko 'i ishina'entamok kitoontisiwiniwaa," okii'inaa'. 15 Awiyak tahsh pemaatisiwaatc kii'ocaanimipii'owak, kaye tahsh ekii'naanaakatawenimaawaatc Cwaanan, "Mii maawiin a'awe Kishemanitoo kaakii'ahshotamaaketc kepimaaci'iwenitc," e'inenimaawaatc. 16 Miitahsh Cwaan kaa'inaatc kahkina: "Nipi nintaapacihtoon ehsiika'antawinakook. A'a tahsh wiin kaawiih​piishaatc nawac kihci-inentaakosi ahpiihc niin. Kaawiin awaac nintepakentaakosihsii kanake ciaapa'amowak omahkisinan. Wiin tahsh siika'antawinek oka-aapaci'aan Kishemanitoon otAhcaahkoni, kaye tahsh ishkoteni. 17 Taapishkoo inentaakosi kihtikewinini kaatahkonank opawiwepa'ikanaahtik, ewiih​pawaahshimaatc opahkweshikaniman. Oka​na'inaan tahsh opahkweshikaniman ahtaahsowikamikonk. Oka​macohte​wepinaanan itahsh wiin ohkonoyaanan i'imaa ishkotenk wiihkaa kaashi​aahtawehsininik," okii'inaa'. 18 Cwaan itahsh niipiwa' inahke okii'ishi​ayaankwaamimaa' pemaatisinitc ekii'waawiintamawaatc minwaacimowin. 19 Shaakooc itahsh Cwaan okiih​kanoonaan Herat (Herod) eshinihkaasonitc wekimaawaatisinitc, ekii​onci'aatc, aaniihsh Heratan okii'wiitikemaani Herootiyahsan (Herodias) wiicihkiwensiwan owiiwini, kaye tahsh niipiwa' maci'ishihcikewinan ekii'ishihcikenitc. 20 Piko tahsh nawac keyaapi kiimaci'ishihcike Herat kipa'otiiwikamikonk ekiih​kipa'waatc Cwaanan. 21 Ahpii tahsh kahkina awiyak kaaishkwaa​siika'antaakoowisiwaatc, Ciisahs kewiin kiihsiika'antaakoowisi. Mekwaa e'anami'aatc kihcikiishik kiihpaahkinteshkaani. 22 Miitahsh Kishemanitoon otAhcaahkoni kaakiihpi​naasihkaakotc taapishkoo omiimiink eishinaakosinitc kaye tahsh kihcikiishikonk awiyan eonci​kiikitonitc: "Kiin tipinawe kaasaaki'inaan ninkosihs, kiin kaana'entami'iyan," kii'ihkitowan. 23 Nihsimitana 30 maawiin ehtahsopipoonwetc Ciisahs kaakiimaacii​kihkino'amaaketc. Miihsh awiyak kaakii'inentamowaatc Coosapoon (Joseph) ekii'okosihsimikotc Ciisahs. Coosap itahsh kii'otete Hiilaayoon (Heli). 24 Hiilaai kii'otete Maahtatoon (Matthat). Maahtaat kii'otete Liipaayan (Levi). Liipaai kii'otete Melhkaayoon (Melchi). Melhkaai kii'otete Caanaayoon (Jannai). Caanaai kii'otete Coosapoon (Joseph). 25 Coosap kii'otete Maatahtaayahsoon (Mattathias). Maatahtaayahs kii'otete Emahsoon (Amos). Emahs kii'otete Nehamoon (Nahum). Neham kii'otete Eslaayoon (Esli). Eslaai kii'otete Naakaayoon (Naggai). 26 Naakaai kii'otete Meyaahtoon (Maath). Meyaaht kii'otete Maatahtaayahsoon (Mattathias). Maatahtaayahs kii'otete Semiyanoon (Semein). Semiyan kii'otete Coosehkoon (Josech). Coosehk kii'otete Cootawan (Joda). 27 Coota kii'otete Coohenanoon (Johanan). Coohenan kii'otete Oriihsawan (Rhesa). Oriihsa kii'otete Sirapapalan (Zerubbabel). Sirapapal kii'otete Shiyaaltiiyaloon (Shealtiel). Shiyaaltiiyal kii'otete Niiraayoon (Neri). 28 Niiraai kii'otete Melhkaayoon (Melchi). Melhkaai kii'otete Aataayoon (Addi). Aataai kii'otete Koohsamoon (Cosam). Koohsam kii'otete Elmataamoon (Elmadam). Elmataam kii'otete Ehroon (Er). 29 Ehr kii'otete Caahshowaahoon (Joshua). Caahshowaa kii'otete Eli'iisaroon (Eliezer). Eli'iisar kii'otete Cwaarimoon (Jorim). Cwaarim kii'otete Maahtatoon (Matthat). Maahtat kii'otete Liipaayan (Levi). 30 Liipaai kii'otete Simiyanan (Simeon). Simiyan kii'otete Cootawan (Judah). Coota kii'otete Coosapoon (Joseph). Coosap kii'otete Coonamoon (Jonam). Coonam kii'otete Ilaayahkiman (Eliakim). 31 Ilaayahkim kii'otete Meliiyawan (Melea). Meliiya kii'otete Menawan (Menna). Mena kii'otete Maatahtawan (Mattatha). Maatahta kii'otete Nehtanoon (Nathan). Nehtan kii'otete Tepitan (David). 32 Tepit kii'otete Cehsiwan (Jesse). Cehsi kii'otete Oopetoon (Obed). Oopet kii'otete Poowaasan (Boaz). Poowaas kii'otete Saalmanan (Salmon). Saalman kii'otete Nahshanoon (Nahshon). 33 Nahshan kii'otete Aminataapoon (Amminadab). Aminataap kii'otete Aatiminoon (Admin). Aatimin kii'otete Aarnayoon (Arni). Aarnai kii'otete Hiisiranoon (Hezron). Hiisiran kii'otete Piirisan (Perez). Piiris kii'otete Cootawan (Judah). 34 Coota kii'otete Cekapoon (Jacob). Cekap kii'otete Aaisikoon (Isaac). Aaisik kii'otete Eparahaaman (Abraham). Eparahaam kii'otete Tirawan (Terah). Tira kii'otete Nehoran (Nahor). 35 Nehor kii'otete Siiraakoon (Serug). Siiraak kii'otete Riioon (Reu). Riio kii'otete Piilekoon (Peleg). Piilek kii'otete Hiiparoon (Heber). Hiipar kii'otete Shiilawan (Shelah). 36 Shiila kii'otete Kiinanoon (Cainan). Kiinan kii'otete Aarhpaakihsaatoon (Arphaxad). Aarhpaakihsaat kii'otete Sheman (Shem). Shem kii'otete Noowawaan (Noah). Noowa kii'otete Lemehkoon (Lamech). 37 Lemehk kii'otete Miihtoosalawan (Methuselah). Miihtoosala kii'otete Iinaahkoon (Enoch). Iinaahk kii'otete Ceretoon (Jared). Ceret kii'otete Mahelaliiyalan (Mahalaleel). Mahelaliiyal kii'otete Kenanoon (Cainan). 38 Kenan kii'otete Iinoshoon (Enosh). Iinosh kii'otete Sehtoon (Seth). Seht kii'otete Aatamoon (Adam). Aatam okii'otetemaan Kishemanitoon.

Lok 4

1 Ciisahs tahsh kiihkiiwe Cwaartan (Jordan) siipiink ekii'onci​maacaatc, emooshkineshkaakotc Kishemanitoon otAhcaahkoni. Miiwan itahsh Ahcaahkwan kaakii'ishi​niikaaniiwinikotc pikwatahkamik. 2 Mii weti kaakiihtashi​kakweci'ikotc maciaya'aan niimitana (40) tahsokiishik minihk. Kaawiin kekoon okii'onci​miicihsiin i'iwe minihk. Ahpii tahsh kaaishkwaahsenik, wiinke kii'noontehskate. 3 Miitahsh kaa'ikotc maciaya'aan: "Kiishpin Kishemanitoo oKosihsan tenowiwanwen, anoosh a'a ahsin cipahkweshikaniwitc." 4 Miitahsh Ciisahs kaaishi​nahkwehtawaatc: "Mii 'owe Kihcimasina'ikan eshipii'ikaatek: 'Kaawiin awiya pahkweshikanink ehta taonci​pimaatisihsi,' " okii'inaan. 5 Miinawaa tahsh maciaya'aan okii'ishi​wiiciiwikoon wakitatin, kiishaahtap iko ekii'waapanta'ikotc kahkina kaakihciokimaawentaakwaninik o'omaa ahkiink kaa'ayaanikin. 6 Miitahsh kaa'ikotc: "Kika​miinin o'o kahkina kashki'ewisiwin, i'i kaye citipentaman eshi​wenootisiimakahk o'o ahki. Niin kahkina ninkii'miinikoo ono, cikashkihtooyaan awenen iko enenimak cimiinak. 7 Miiwan itahsh onoweniwan kahkina ketipinawewisiyan kiishpin niin ociciinkwaniihtawiyan cianami'ehtawiyan," okii'ikoon. 8 Miitahsh Ciisahs kaa'ishinahkwehtawaatc: "Kihcimasina'ikan ishipii'ikaate: 'KaaTipenciketc kiKishemanitoom kikaociciinkwaniihtawaa, wiin ehta kaye kika-anohkiihtawaa,' " kii'ihkito. 9 Miinawaa tahsh maciaya'aan Ceroosalamink (Jerusalem) okii'ishiwinikoon, ekii'ishi​pakitinikotc maawac kaaishi-ishpahkitenik Kihcianami'ewikamik. Miitahsh kaa'ikotc: "Kiishpin Kishemanitoo oKosihsan tenowiwanwen, mii 'omaa onci​kwaashkwanin. 10 Aaniihsh Kihcimasina'ikan ishipii'ikaate: 'Kishemanitoo hsa oka'anoonaa' otencalima' cinaanaakaci'imihk, cikanawenimimihk aaniin piko keni-ishihcikewatc.' 11 Ihkitoomakan kaye: 'Miiwak itahsh iki keminciminihkwaa ciwiihsakisitehshinowaahsiwatc i'imaa kaashi​ahsiniihkaanik,' " okii'ikoon. 12 Ciisahs tahsh okii'ishi​nahkwehtawaan: "Ihkitoomakan kaye: 'Kaawiin kikakotenimaahsii kaaTipenciketc kiKishemanitoom,' " okii'inaan. 13 Ahpii tahsh Ciisahs kaakii'ishkwaa​kakweci'ikotc maciaya'aan misiwe kekoonink, mii 'i pinamaa acina kaaishi​nakanikotc. 14 Miitahsh Ciisahs kaaishi​kiiwetc weti Kaalaliink (Galilee), ekiih​kikishkaakotc eshi​maskawisiinitc Kishemanitoon otAhcaahkoni. Otipaacimikoowin tahsh misiwehkamik kiimisiteshkaamakanini. 15 Miitahsh kaakii'maacihtaatc ekiih​kihkino'amaaketc i'imaa Coowa' otanami'ewikamikoniink, kahkina kaye awiya' okiihkihci​nanaahkomikoo'. 16 Ciisahs tahsh kiihpitakohshin i'imaa Naasarit (Nazareth) ootenaank, kaakiihtashi​ompikitc. Ahpii tahsh e'Anwepiiwi​kiishikaninik, peshikwan kaanihtaa​ishihciketc, kii'ishaa anami'ewikamikonk. Kiihpasikwii ekii'ishaatc enaahsamapinitc cianamihtootc Kihcimasina'ikan. 17 Miihsh kaakii'miinintc titipiikinoomasina'ikan Aaiseyawan (Isaiah) okanootamaaken kaakii'ishi​oshipii'ikenikopanen. Okii'aapinihskwekinaan itahsh i'iweni kaatitipiikinikaatenik masina'ikan. Okii'mihkaan tahsh i'imaa kaaishipii'ikaatenik: 18 "Niwiiciiwimik kaaTipenciketc otAhcaahkwan. Niin aaniihsh ninkii'onenimik cipiitamawakwaa kaakoohpaatisiwaatc minwaacimowinini. Ninkiih​piicinisha'ok ciwiintamawakwaa kipa'waakanak cipakitinintwaa, kaye cikiiwe​ontinamowaatc owaapiwiniwaan ikiweniwak kaawaapihsikwaa, cipakitinakwaa ikiweniwak kaakakwaataki'intwaa, 19 kaye tahsh ciwiintamaan i'iwe aasha eishihsek ahpii kaaTipenciketc keshawenimaatc opimaatisiima'." 20 Ciisahs tahsh okiihkiiwe​titipiikinaan i'i masina'ikan ekii'miinaatc ini owiici'iwen i'imaa kaa-anohkiinitc. Miitahsh i'imaa niikaanaya'ii kaaishi​onapitc ewii​kihkino'amaaketc. Kahkina awiya' i'imaa kaa-ayaanitc anami'ewikamikonk okiih​kanawaapamikoo'. 21 Miitahsh kaa'inaatc emaacii​kakanoonaatc: "Mii 'i noonkom kaakiishikaak o'o kaanoontamek ekii'ocihcihsek i'i kaaihkitoomakahk kihci​oshipii'ikewin." 22 Kahkina tahsh okii'minwaapamikoo' ekii'maamahkaasihtaakotc kaye kaa'ahpiihci​minohtaakositc kaakii'ihkitotc. Miitahsh kaa'ihkitonitc: "Kaawiin ina wiin Coosap (Joseph) ini okosihsan?" 23 Miitahsh kaa'inaatc: "Kehcinaac iko kikawiintamawihshim i'iwe kakiihtaawi​kiishwewin, 'Haw kiin mashkihkiiwinini, antawi'itison.' Kaye tahsh kikaishim, 'Taka o'omaa kaaonciiyan ootenaank ishihciken ini peshikwan kaanoontamaank kekoonan kaaishihcikewanen Kaparniyam (Capernaum) ootenaank.' " 24 Miihsh kaa'ani-inaatc: "Tepwe o'owe kaawiintamawinakook, kaawiin wiihkaa minwenimaakaniwihsii awiya kaakanootamawaatc Kishemanitoon otootenaamink kaaonciitc. 25 Inashke pisintawihshik: tepwe aahpici kiipaahtiinowak kiiwaacihkwek Isriyalink (Israel) mekwaa ahpii Ilaaica (Elijah) kiiayaatc. Kaawiin kii'onci​kiminwansinoon nihsopipoon aapihta minihk. Wiinke ekii'noontehsek miicim misiwehkamik, Isriyal ahkiink. 26 Kaawin tahsh Ilaaica kii'ishinisha'waahsii kanake peshik cianta​wiici'aatc. Mii ehta 'imaa kaakii'ishinisha'ontc eshiayaanitc peshik kiiwaacihkwen ciawi​wiici'aatc Serahpat (Zarephath) ootenaank i'imaa pehsho kihciootenaank Saaitan (Sidon) kaaicikaatek. 27 Aahpici kaye kiipaahtiinowak awiyak wemikiiwaahpinewaatc mekwaa ahpii Kishemanitoo okanootamaaken Ilaaihshahoon (Elisha) kiiayaanitc. Kaawiin tahsh kanake peshik kiionci​pehki'aakaniwihsii i'iweni kaakii'inaahpinetc, mii ehta Neaman (Naaman), Siiriya (Syria) ahkiink kaaonciitc kaakii'antawi'intc," kii'ihkito. 28 Ikiweniwak itahsh i'imaa anami'ewikamikonk kaa-ayaawaatc ahpii e'noontamowaatc o'o, aahpiciko kahkina kii'nishkaatisiwak. 29 Miihsh kaa'ishi​pasikoncihsewaatc ekiihsaakici​wepinaawaatc Ciisahsoon i'imaa ootenaank, ekii'ishiwinaawaatc wakitatin i'imaa eshiayaanik otootenaamiwaa, ewiipiniwepinaawaatc kaashi​kiishkatinaanik. 30 Shaakooc itahsh Ciisahs kii'ani​shaaposhkaa mekweya'ii awiya' eshi​paahtiinonitc, ekii'ani​maacaatc. 31 Miitahsh Ciisahs kii'ishaa weti Kaparniyam (Capernaum) ootenaank, Kaalalii (Galilee) ahkiink, mii weti kaakiihtashi​kihkino'amawaatc pemaatisinitc e'Anwepiiwi​kiishikaninik. 32 Tepwe hsa kahkina awiya' okii'maamahkaasihtaakoo' i'iweni eshi​kihkino'amawaatc, aaniihsh i'i otihkitowin kii'inihtaakwanini ekii'miinikotc Kishemanitoon kashki'ewisiwin. 33 Peshik itahsh inini kii'ayaakopan i'imaa piintikamik anami'ewikamikonk, ekiih​kikishkaakotc maciahcaahkwan kaapehkentakosihsinik, enikohk ekii'noontaakosinitc ehshaakowenitc, 34 o'o e'ihkitonitc: "Aai! Aaniin waahtootawiyaank, Ciisahs Naasarit (Nazareth) kaaonciiyan? Kipianta​nihshiwanaaci'inaam ina? Kikihkenimin aweneniwiyan Kiin Kishemanitoo kaakiih​piicinisha'waatc Okwayahkwaatisiiman!" okii'ikoon. 35 Ciisahs tahsh okiih​kanoonaan iniweniwan maciahcaahkwan: "Kitoompiikihs, onci​saaka'an i'imaa a'a inini opimaatisiwinink," okii'inaan. Miitahsh a'a maciahcaahk kaaishi​ahpakinaatc ini ininiwan i'imaa mekwe eshiayaanitc pemaatisinitc, kaye ekii'nakanaatc. Kaawiin tahsh kekoon okiih​tootawaahsiin ini ininiwan. 36 Kahkina tahsh kii'maamahkaatentamook o'o ekii'ayitiwaatc: "Wekonen tahsh o'o tino kihkino'ikewin, e'ayaatc a'a inini kashki'ewisiwin, tako kaye mashkawisiiwin ekashki'maatc kaapehkisihsinik maciahcaahkwa', cisaaka'aminitc!" kii'ihkitowak. 37 Ciisahs tahsh otinaacimikoowin misiwehkamik kii'ani​kihkentaakwanini. 38 Miitahsh Ciisahs kaa'ishisaaka'ank i'imaa anami'ewikamikonk, Saaimanoon (Simon) eshitaanitc ekii'ishaatc. Saaiman tahsh osikohsan kii'aahkosiwan, aahpici ekiihkihci​kishisowaahpinenitc. Ciisahs itahsh kii'wiintamawaa aaniin eshi​ayaanitc ini ihkwewan. 39 Miitahsh Ciisahs kaaishianta​waapamaatc ihkwewan, ekii'niipawitc ciiki​nipewinink. Miitahsh kaaishi​kanootank i'iweni kishisowaahpinewin. Miitahsh a'a ihkwe kaakii'nakanikotc otaahkosiwin. Miihsh shemaak ekii'wanishkaatc ekiih​pami'aatc Ciisahsoon, i'i kaye kaakiiwiiciiwikonitc. 40 Ahpii e'ani​pankishimotc kiisihs, kahkina awiyak kaakiih​kanawenimaawaatc kaa-aahkosinitc pepahkaani​aahkosiwin enaahpinenitc okiih​piitamawaawaan Ciisahsoon. Kahkina tahsh okiih​saaminaani entahso​peshikonitc ekii'minoayaanitc. 41 Kiipaahtiinowa' kaye maciahcaahkwa' kaakii'nakanaanitc pemaatisinitc, "Kiin Kishemanitoo oKosihsan," ekii'ishi​shaakowaanikotc. Ciisahs tahsh okii'onci'aa' kekoon ci'ihkitohsinik, aaniihsh okiih​kihkenimikoo' ekii'onenimikotc Kishemanitoon ciPimaaci'iwewininiiwitc. 42 Ahpii e'ani​kiishikaninik Ciisahs i'imaa ootenaank kii'onci​maacaa ekii'ishaatc eshinihshihke​ayaanik. Awiya' itahsh okii'maaci​nanaantawaapamikoo'. Ahpii tahsh kaa'mihkaakotc otaanakiih​kakwe​kihciwimikoo' cimaacaahsik. 43 Miitahsh kaa'inaatc: "Ishihse kaye oncita kotak ini ootenawan ciwiintamaakeyaan i'iweni minwaacimowin Kishemanitoo kaawii'ishi​oshihsitootc oTipencikewin, mii 'i Kishemanitoo kaakiihonci​piicinisha'otc ci'ishihcikeyaan," kii'ihkito. 44 Miitahsh kaa'ishi​papaakakiihkwetc anami'ewikamikohkaank i'imaa Cootiiya (Judea) ahkiink.

Lok 5

1 Peshikwa Ciisahs mekwaa e'niipawitc i'imaa kohpaya'ii Kenehsarit (Gennesaret) Saaka'ikaniink, awiya' kaapaahtiinonitc okii'miiwishkaakoo' ehpisintaakotc ewiintamawaatc Kishemanitoon otihkitowinini. Ehkopiihkaanik kii'ishiniipawi. 2 Okii'waapantaanan niishin (2) ciimaanan ecehkihsininikin ciikipiik, opakitawaa' ekii'nakataminitc iinsan, ekii'anta​kisiihsipanaanitc otahsapiini. 3 Miitahsh kaa'ishi​poositc i'i peshik ciimaan, Saaimanoon (Simon) tepentaminitc. Miitahsh kaa'inaatc: "Niminaawepinan pankii." Ciisahs piintoonak kii'namatapi ekii​kihkino'amawaatc kaapaahtiinonitc pemaatisinitc. 4 Ahpii tahsh kaaishkwaa​kakitotc, mii 'i kaa'inaatc Saaimanoon: "Niminaaweya'ii kaa-ahkokiishkaayawaak, mii weti ishi​pahkopii'o kitahsapiim, cipita'anaayan kiikooyak." 5 Miitahsh kaa'ikotc: "Okihkino'amaake kapetipihk ohsha nintaanakiih​kihcianohkiimin ehpakita'waayaank. Kaawiin kekoon nintoonci​pita'anaahsiimin. Kiishpin tahsh wiin pakita'waan ishiyan, miinawaa ninka​pahkopii'waa nintahsapiim." 6 Miitahsh kaa'ishi​pakita'waawaatc. Niipiwa' kiikooya' ekiih​pita'anaawaatc, miihsh kaakii'maacii​piikoshkoosonitc otahsapiiwaa'. 7 Okii'waahta'amawaawaa' itahsh owiiciiwaakaniwaa' kotak ciimaanink metwe​ayaanitc cipiantawi​wiici'ikowaatc. Miitahsh kaa'ishi​piishaanitc ehpi​wiici'ikowaatc emaamawi​anohkiiwaatc ekii​mooshkina'aawaatc kiikooya' niishoonak. Miihsh kaakii'ani​konsaapiinikin ociimaaniwaan, kaa'ahpiihci​kihci​pita'anaawaatc. 8 Ahpii tahsh Saaiman Piitar (Simon Peter) kaa'waapantank aaniin kaa'ishihsenik kii'ociciinkwanapihtaa enaahsamiinitc Ciisahsoon. Miihsh kaa'inaatc: "Tepencikeyan niin hsa wiinke nimacipimaatis. Ishinaakwan hsa cinakashiyampan." 9 Aaniihsh wiinke kiikihci​maamahkaatentam, i'i kaye kahkina kaakiihpi​wiici'ikotc, aaniin minihk kaa'ahpiihci​kihci​pita'anaawaatc. 10 Miitahsh peshikwan iki kaa'inentamowaatc Ciimis (James), a'a kaye Cwaan (John) kaaokosihsimikowaatc Sepatiin (Zebedee). Miiwa' iitok o'o Saaiman (Simon) kaakii'wiici'ikotc. Miitahsh Ciisahs kaa'inaatc Saaimanoon: "Keko sekisihken, miitahsh noonkom cikaahcitinatwaa awiyak pemaatisiwaatc," okii'inaan. 11 Miitahsh kaaishi-ihkopitoowaatc ociimaaniwaa i'imaa mihtahkamik. Kahkina kekoon ekii'nakatamowaatc, ekiih​piminisha'waawaatc Ciisahsoon. 12 Peshikwaa tahsh Ciisahs e'ayayaatc peshik kihci​otenaank, kii'ayaawan i'imaa peshik ininiwan misiwe enihshimikiinitc. Ahpii ewaawaapamikotc mii 'i kaakiihpi​ahpakinitisonitc enaahsamiitc ehpakohsenimikotc ekii'ikotc: "Tepencikeyan, kiishpin inentaman kitaa​kashkihtoon cikiih​pehki'iyampan." 13 Miitahsh Ciisahs kaa'ishi​niiminihkenitc ehsaaminaatc ekii'inaatc: "Mii 'i tepwe enentamaan, kikapehki'ikoowis," okii'inaan. Miitahsh iko shemaak kaakii'nakanikonitc i'iweni eshi​omikiiwinihpan. 14 Miihsh Ciisahs kaa'ishi​onci'aatc ekii'inaatc: "Keko awiya wiintamawaahken o'o. Maacaan ishaan antawaapam anami'ewikimaa ciwaapamihk, cipakitinaahsoyan kaye ekiih​pehki'ikooyan. Ishihciken mayaa enahtenik Moosihs (Moses) kaakii'inahshowetc, cionci​kehcinaa'owaatc kahkina awiyak tepwe noonkom eminoayaayan," okii'inaan. 15 Shaakooc itahsh Ciisahs otipaacimikoowin aanciihke waahsa kiiani​ompweshkaamakanini. Niipiwa' kaye awiya' kiihpiishaawa' ehpianta​pisintaakotc, kaye tahsh ciminoayaa'aatc i'iweni otaahkosiwinini. 16 Ciisahs itahsh wiin ehta kii'nihtaaishaa i'imaa pikwatahkamik ekii'awi​anta-anami'aatc. 17 Peshikwaa ehkiishikaninik mekwaa Ciisahs ekihkino'amaaketc aaninta Perahsiwa' (Pharisees) kaye kaakihkino'amaakenitc Onahshowewin kii'namatapiwa' i'imaa kaakiihpi​onciinitc entahso-ootenaahkaank Kaalaliink (Galilee) kaye Cootiiya (Judea) kaye tahsh Ceroosalamink (Jerusalem). Omashkawisiiwinini kaaTipencikenitc hsa kii'miinaakaniwi Ciisahs cionci​minwaaci'imintc kaa-aahkosinitc. 18 Aaninta tahsh ininiwak kiihpiishawak ekii'ishi​pimiwinaawaatc onipewininiink ininiwan kaanipowaahpinenitc, ekiih​kocihtoowaatc cipiintikanaawaatc i'imaa waahkaa'ikanink, ewiih​pimihshimaawaatc i'imaa pehsho Ciisahsoon eshi​ayaanitc. 19 Onsaam tahsh epaahtiinonitc awiya' kaawiin okii'mihkansiinaawaa aanti keani-ishiwinaawaatc. Miitahsh wakitapahk enapakaanik waahkaa'ikan kaaishi-ishiwinaawaatc waapikani​apahkwaan ekiih​pakonepitoowaatc. Miihsh i'imaa kaaishi​pakitaapiikinaawaatc mekweya'ii eshi​paahtiinonaaniwaninik Ciisahsoon enaahsamikaapawinitc. 20 Ahpii tahsh Ciisahs e'waapamaatc ehpiihci​tepweyentaminitc, miihsh kaa'inaatc ini ininwan: "Niicii, kimacitootamowinan kipoonentamaakoo." 21 Kaakihkino'amaakewaatc Onahshowewin, iki kaye Perahsiik (Pharisees) o'o kii'ayihkitowak: "Awenen tahsh a'a inini Kishemanitoonk kaa'inakintisotc? Kaawiin awiya otaa​kashkihtoohsiin cipoonentamaaketc macitootamowinan, mii ehta ko a'a Kishemanitoo." 22 Ciisahs okiih​kihkenimaa' eshi​naanaakatawentaminitc, miihsh kaa'inaatc: "Wekonen itahsh i'i nahke wenci'ishi​naanaakatawentamek? 23 Nawac ina taawentan ci'ihkitoyaampaan: 'Kimacitootamowinan kipoonentamaakoo,' komaa kaye ci-ihkitoyaampaan: 'Pasikwiin cipimohseyan'? 24 Cikihkentamek itahsh Inini oKosihsan eyaatc kashki'ewisiwin o'omaa ahkiink cipoonentamaaketc macitootamowinan." Miitahsh kaaishi​kanoonaatc iniweniwan ininiwan kaanipowaahpinenitc "Miitahsh eninaan, pasikwiin, otaahpinan kitahpihshimon, miitahsh ishikiiwen," okii'inaan. 25 Miitahsh iko shemaak kaaishi​pasikwiinitc i'imaa kahkina enaahsamiiwaatc. Ekii'otaahpinaminitc otahpihshimonini eshi​pimihshininihpan, miihsh kaa'ani-ishikiiwenitc ekihci​nanaahkomaanitc Kishemanitoon. 26 Kahkina tahsh i'imaa kaakii'ayaawaatc okiihkihci​maamahkaatentaanaawaa o'oweni, kaye tahsh ekii'mooshkineshkaakowaatc sekisiwin. Miihsh kaa'ishi​kihci​nanaahkomaawaatc Kishemanitoon ekii'ihkitowaatc: "Tepwe hsa maamahkaac kekoonan kiwaapantaamin noonkom kaakiishikahk." 27 Ahpii tahsh o'o e'ishkwaahsek Ciisahs kiihsaaka'am, ekii'ani​maacaatc. Miihsh kaakii'waapamaatc ininiwan enamatapinitc i'imaa eshi​tipa'ikewintc kaamaawantoonaanitc taakihs (tax) tino shooniyaan Liipaai (Levi) eishinihkaasonitc. Miitahsh kaa'inaatc: "Piminisha'ohshin." 28 Miitahsh Liipaayan kaaishi​pasikwiinitc kahkina kekoon ekii'nakataminitc ekiih​piminisha'okotc. 29 Miitahsh Liipaai kaaishi​kihci​ahshanketc ekii'ahshamaatc Ciisahsoon i'imaa piintik owaahkaa'ikanink. Kiipaahtiinowak itahsh iki kaamaawantoonaawaatc taakihs​shooniyaan i'imaa ekii'ayaawaatc, iki kaye kotak awiyak ekii'wiitapimaawaatc. 30 Aaninta Perahsiwak (Pharisees), iki kaye kaakihkino'amaakewaatc Onahshowewin okii'onci​kihci​kanoonaani Ciisahsoon okihkino'amawaakanini: "Wekonen wenci​wiici​wiihsiniimekwaa, kaye tahsh wenci​wiici​minihkwemekwaa kaatipa'ike'iwewaatc, iki kaye awiyak omacitootamook?" 31 Miitahsh Ciisahs kaaishi​nahkwehtawaatc: "Awiyak kaaminoayaawaatc kaawiin onantawenimaahsiwaawaan mashkihkiiwininiwan, ikiweniwak ehta kaa-aahkosiwaatc. 32 Kaawiin wiin kaakii'onci​piishaayaan ciantomakwaa ikiweniwak kaakwayahkwaatisiwaatc, iki hsa piko omacitootamook cikwehkaatisiwaatc." 33 Aaninta awiyak okii'inaawaan Ciisahsoon: "Cwaan wiin okihkino'amawaakana' eshkam kaawiin onci​wiihsinihsiiwa', kaye tahsh e'anami'aanitc. Mii peshikwan Perahsiik (Pharisees) okihkino'amawaakaniwaa' eshihcikenitc. Kiin tahsh wiin iki kikihkino'amawaakanak wawiihsiniwak, tako kaye maminihkwewak." 34 Ciisahs tahsh kii'ishinahkwehtam: "Kitinentaam ina cikashki'ekwaapan ciwiihsinihsikwaapan ikiweniwak awiyak kaa-antomintwaa i'imaa kaashiwiitike​wiihsininaaniwank mekwaa wiiciiwaawaatc ini ininiwan kaaoshkiwiitikenitc? Kaawiin iitok. 35 Ninkotink hsa taishikiishikanini ahpii keotaahpinamawintwaa iniweniwan ininiwan kaaoshkiwiitikenitc. Miitahsh ahpii kewiinawaa ciwiihsinihsikwaa." 36 Ciisahs tahsh kii'wiintamaake ekii'ishi​awehciketc: "Kaawiin awiya otaaonci​pahkwepitoohsiin oshkikikishkikanink cipakwa'ank kehtekikishkikan. Kiishpin i'i tootank otaapiikopitoon i'iweni oshkikikishkikan, kaye tahsh i'iwe oshkipakwa'ikan kaawiin mihsawaa mayaa taishinaakwahsinoon kehtekikishkikanink. 37 "Kaawiin kaye awiya otaaishi​siikinansiin oshki​shoominaaponi i'imaa kehteshoominaapo​pashkwekinowashink. Kiishpin i'i tootank taatamakohseniwan iniweniwan pashkwekinowashan. Miihsh cisiikihsekipan oshkishoominaapo, kaye tahsh pashkwekinowashan tanihshiwanaatanoon. 38 Nawac oshkishoominaapo ishinaakwan ci'ishi​siikinikaatekipan oshkipashkwekinowashink. 39 Kaawiin kaye awiya onantawentansiin oshkishoominaapo kii'ishkwaa​minihkwaatank kehteshoominaapo. Kehteya'ii nawac minohpokwan taihkito," okii'inaa'.

Lok 6

1 Ciisahs ehpimohsekopanen i'imaa pahkweshikaniwi​kihtikewinink, mekwaa e'Anwepiiwi​kiishikaninik, okihkino'amawaakana' itahsh okiih​ciihshipinaani kaaishi​ohtikwaaniwaninikin ini pahkweshikaniwi​kihtikaanan, miitahsh kaa'ishi​shikonaminitc oninciiniink ekii'miicinitc. 2 Aaninta tahsh Perahsiwak (Pharisees) kii'ihkitowak: "Aaniin wenci-ishihcikehsiwek kaainahtek i'i Inaahkonikewin kekiihtootamekipan e'anwepiiwi​kiishikahk?" 3 Ciisahs itahsh okii'ishi​nahkwehtawaa': "Kaawiin ina kikihkentansiinaawaa eshipii'ikaatek aaniin Tepit (David) kaa'ishihciketc ahpii kiinoonteskatetc, i'i kaye owiiciiwaakana'? 4 Ekiihpiintiketc kihcipakwaanekamikonk Kishemanitoon kaaishianami'ehtawimintc ekii'otaahpinaatc pahkweshikanan ekii'amwaatc, ekii'ahshamaatc kaye kaawiiciiwikotc kaapakitinamawimintc Kishemanitoon. Kaawiin iitok Inaahkonikewin ihkitoomakahsinoon i'iwe cikii'ishihcikehpan. Anami'ewikimaak iitok ehta cikii'amwaawaahpan ini pahkweshikanan," okii'inaa'. 5 Miitahsh eni'inaatc: " Inini oKosihsan ohsha otipentaan kaa-Anwepiiwi​kiishikaninik." 6 Miinawaa kotak e'Anwepiiwi​kiishikaninik Ciisahs kiihpiintike anami'ewikamikonk ehkihkino'amaaketc. Kii'ayaawan hsa i'imaa ininiwan okihcininciini ekii'mamaancikoshkaanitc. 7 Iki tahsh kaakihkino'amaakewaatc Onahshowewin iki kaye Perahsiik (Pharisees) okiihkakwe​kaahcici'aawaan Ciisahsoon taka ciminoayaa'iwenitc Anwepiiwi​kiishikaninik. Okiihkakwe​mihkaanaawaa kekoon keonci​anaamimaawaatc. 8 Ciisahs itahsh okiih​kihkenimaa' i'i kaa'ishi​naanaakatawentaminitc. Miihsh kaakiih​kanoonaatc ini ininiwan kaamamaancikoshkaanik oninciini: "Pasikwiin, piishaan o'omaa niikaanaya'ii," okii'inaan. Miitahsh kaaishi​pasikwiinitc ekiihpi​niipawinitc. 9 Miitahsh kaaishi​kanoonaatc kaakihkino'amaakenitc Onahshowewin i'i kaye Perahsii': "Miitahsh eshi​kakweciminakook, aaniin enahtek Inaahkonikewin keishihcikenaaniwankipan Anwepiiwi​kiishikahk? Awiya ciminotootawintipan, komaa kaye cimaanshi​tootawintipan. Cipimaacihcikaatekipan pimaatisiwin, komaa kaye cinihshiwanaacihcikaatenik?" okii'inaa'. 10 Miitahsh misiwe kaakii'ayinaapitc kahkina ekiih​kanawaapamaatc i'imaa kaa-ayaanitc miihsh kaa'inaatc ini ininiwan: "Niiminihkenin." Miitahsh kaa'ishi​niiminihkeninitc, wiinke ekii'minoayaanik oninciini. 11 Miitahsh kaaishi​mooshkineshkaakonitc kihci​nishkaatisiwin ekii'ani​maacii​tashintaminitc aaniin kekiih​tootawaawaahpan Ciisahsoon. 12 Mii 'iwe ahpii Ciisahs kaakii'ishaatc wakitatin ekii'antawi​anami'aatc. Kapetipihk tahsh weti kii'ayaa ekii'anami'ehtawaatc Kishemanitoon. 13 Ahpii tahsh e'ani​kiishikaninik okii'antomaa' pehshoo cipiishaanitc okihkino'amawaakana'. Mitaahshiniishin (12) ekii'otaahpinaatc ishinisha'waakanak kaakii'ishinihkaanaatc. 14 Miitahsh o'o kaa'ishi​nihkaasowaatc kaakii'onenimintwaa. Saaiman (Simon) mii 'awe Piitar (Peter) kaakii'ishinihkaanikotc Ciisahsoon. Ini tahsh kaye Saaiman wiicihkiwensiwan Entaroo (Andrew). A'a kaye Ciimis (James), Cwaan (John) kaye, Pilap (Philip) kaye, a'a kaye Paarhtaalamiyo (Bartholomew). 15 Maahtiyo (Matthew) tahsh, a'a kaye Twaamahs (Thomas), Ciimis (James) wetetetc Aalipiyahsan (Alphaeus), a'a kaye Saaiman (Simon) kaakiih​takoinintc kaawiihkakwe​aancihsehtootc okimaawiwin. 16 A'a kaye Cootahs (Judas) wetetetc Ciimisan (James). A'a kaye kotak Cootahs Iskaariyat (Judas Iscariot) kaakii'mamishimaatc Ciisahsoon. 17 Ahpii tahsh Ciisahs ehpi​niihsaamaciwe​wiiciiwaatc otishinisha'waakana', mii 'i kaa'ani-ishi​kipihcikaapawitc eshi​tahtakwaanik. Miitahsh i'imaa aahpici kiihpaahtiinowa' kotak okihkino'amawaakana'. Aahpici kaye ehpaahtiinonitc awiya' i'imaa ekii'ayaanitc misiwe Cootiiya (Judea) ekiih​pionciinitc, kaye tahsh Ceroosalamink (Jerusalem). Weti kaye kiihpionciiwa' naanew kihcikamiink ootenawan eyaanikin eshinihkaatenikin Tayar (Tyre), i'i kaye Saaitan (Sidon). 18 Okiihpi​anta​pisintawaawaan (Ciisahsoon), kaye tahsh ciminwaaci'intwaa aaniin kaa'ishi​aahkosiwaatc. Miihsh kaye ikiweniwak kaamacitootaakowaatc maciahcaahkwa' kewiinawaa kii'minwaaci'aawak. 19 Kahkina tahsh awiyak okiih​kakwe​saaminaawaan Ciisahsoon. Aaniihsh esaaminaawaatc mii 'imaa kaa'onciimakaninik mashkawisiiwin kaakii'antawi'ikowaatc. 20 Miitahsh Ciisahs kaa'ihkitotc ehkanawaapamaatc okihkino'amawaakana': "Kishawentaakosim kiinawaa kaakitimaakentamek kiinawaa kitipinawewisim Kishemanitoo otookimaawiwin. 21 "Kishawentaakosim kiinawaa noonkom kaanoonteskateyek, piciinak kikatewiihsinim. "Kishawentaakosim kiinawaa noonkom kaamawiyek, piciinak kikapaahpim. 22 "Kishawentaakosim ahpii awiyak kiishiinkeniminekwaa, kaye tahsh kiiwiiciiwihsinowinekwaa, kiimaci-ininekwaa kaye, noociko kaye kii-itamowaatc kiwiinsowiniwaa ini onci Inini Okosihsan. 23 Minwentamok ahpii o'owe ishihseyek, kaye tahsh ciniimiyek keahpiihci​ciihkentamek aaniihsh kihci​ontisiwin kikanawentamaakoom kihcikiishikonk. Aaniihsh mii'iwe peshikwan kaahpi​tootawintwaa okehte​kihciaya'aamiwaapanii' ikiweniwak kaakiih​kanootamawaanitc Kishemanitoon. 24 "Aaniin iitok keahpiihci​kakwaatakentaakosiyek, kiinawaa noonkom kaawenootisiyek; aasha kaawentahk pimaatisiwin ekiihpi​ayaayek. 25 "Aaniin iitok keahpiihci​kakwaatakentaakosiyek kiinawaa noonkom kaatewiihsiniyek: piciinak ahpii kikanoonteskatem. "Aaniin iitok keahpiihci​kakwaatakentaakosiyek kiinawaa noonkom kaapaahpiyek: piciinak ohsha kikamoohkonem, kikamawim kaye. 26 "Aaniin iitok kiinawaa keahpiihci​kakwaatakentaakosiyek kahkina awiyak minotashiminekwaa. Mii 'i iitok peshikwan kaa'inaawaatc okehte​kihciaya'aamiwaa' kaakii'inwaasonitc ehkanootamawaanitc Kishemanitoon." 27 "Miitahsh eninakook kaapisintawiyek: saaki'ihkwak iki kaashiinkeniminekwaa, minotootawihkwak kaye iki kaanishkeniminekwaa. 28 Kiishpin awiya inihk: 'Kinantawenimin cimacihseyan,' kiin tahsh kikainaa: 'Kinantawenimin Kishemanitoo cishawenimihk.' Anami'ehtamawihkwak iki kaamacitootawinekwaa. 29 Kiishpin awiya pahsiinkwekanaamihk pakitinamaw pisaan kaye kwehkinahke ci-ishi​pahsiinkwekanaamihk. Kiishpin awiya mahkamihk kipinsihkawaakan, pisaan kaye kikamiinaa kipapakiwayaan. 30 Miish kahkina awiya kekoon kakwecimihk. Kiishpin awiya mahkamihk kekoon kaatipentaman keko kiiwe​antotamawaahken. 31 Ishitootamawihkwak kotak awiyak kaaishi​antawenimekwaa citootawinekwaa. 32 "Kiishpin ehta ehsaaki'ekwaa ikiweniwak kaasaaki'inekwaa, wekonen tahsh keonci​shawentaakosiyekipan? Inashke kewiinawaa kaamacitootamowaatc osaaki'aawaan ini kaasaaki'ikowaatc. 33 Kiishpin kaye minotootawekwaa ehta ikiweniwak kaaminotootawinekwaa wekonen tahsh keonci​shawentaakosiyekipan? Mii hsa kewiinawaa peshikwan kaamacitootamowaatc eshihcikewaatc. 34 Kiishpin kaye awi'ekwaa ehta ikiweniwak kaatanenimekwaa cikiiwenamawinekwaa, wekonen tahsh keonci​shawentaakosiyekipan. Miihsh kewiinawaa kaamacitootamowaatc eshi​awi'aawaatc kotak kaamacitootaminitc peshikwan ci'ishi​kiiwe​miinintwaa minihk kaakii'awi'iwewaatc. 35 Saaki'ihkwak itahsh iki kaashiinkeniminekwaa, minotootaakek kaye. Pisaan kaye awi'iwek, keko kekoon kiiwe​antawentankek. I'i tahsh kitipa'amaakoowiniwaa takihci​wenootan. Miihsh keikooyek e'oniicaanihsiminek Maawac kaaIshpentaakositc Kishemanitoo. Wiin iitok kaye kaaminotootawaatc awiya' kaatepinawewisihsinik, i'i kaye kaamaci-ishiwepisinitc. 36 Koohpaatenimiwe Koohsiwaa, miitahsh kekiinawaa ishi​koohpaatenimiwek." 37 "Keko onahkonaahkekwaanik awiyak, kaawiin itahsh Kishemanitoo kikaonaahkonikohsiiwaa. Keko kaye inaahkekwaanik awiyak Kishemanitoon cinipoomikowaatc, kaawiin itahsh kekiin Kishemanitoo kikanipoomikohsii. Poonentamaw kotak awiyak, miitahsh kekiin cipoonentamawihk Kishemanitoo. 38 Miikiwek, miitahsh cikiiwe​miinikoowisiyek. Tamino​mooshkine i'i kemiinikooyek, cikinikawi​wepinikaatek, kaye tahsh cimaamaakonikaatek, cionsaamashkinek i'iwe kaashina'inikeyek. Aaniihsh minihk iko awiyak kaatootamawekwaa mii 'iwe kewiin minihk Kishemanitoo ketootamawinek." 39 Miitahsh Ciisahs okii​wiintamawaa' o'owe awehcikewin: "Otaa​kashkihtoon ina awiya kaawaapihsik ciniikaaniihtamawaahpan kotak ini kaawaapihsinik? Minciniish iitok taapiintaanihkaanehsewak. 40 Kihkino'amawaakan kaawiin nawac kihkentaasohsii ahpiihc wiin ini kaakihkino'amaakotc. Shaakooc tahsh wiin a'a kaakihkino'amawintc ahpii tekiishihtootc okihkino'amaakoowin, miihsh peshikwan kewiin keahpiihci​kihkentaasotc taapishkoo ini kaakihkino'amaakotc. 41 "Wekonen wenci​kanawaapantamowatc kaapisinitc kiicihkiwensi oshkiinshikonk, kiin itahsh wiin ekihkentansiwan kihcimihtik e'ayaak kishkiinshikonk? 42 Aaniin tahsh wenci​kashkihtooyan e'inatc kiicihkiwensi: 'Niicihkiwensi pakitinihshin ciotaahpinamaan i'iwe kaapisiniyan,' kiin itahsh e'waapantansiwan i'i kihcimihtik kishkiinshikonk kaa'ayaak? Kiin kaaminwaatisiihkaasoyan pinamaa otaahpinan i'i mihtik kishkiinshikonk kaa'ayaak, miihsh payesh ciwaapiyan ciotaahpinamowatc kaapisinitc kiicihkiwensi oshkiinshikonk." 43 "Kaaminonihtaawikitc mihtik kaawiin macimiiniwihsii. Kaamacinihtaawikitc mihtik kaawiin onihtaawikihtoohsiinan minomiinan. 44 Entahshitc mihtik onci​kihkenimaakaniwi aaniin eshinaakwaninik omiiniman kaanihtaawikihtootc. Kaawiin pemaatisiwaatc otoontinansiinaawaan pik tinowiminan i'imaa kawiminakishiiwaahtikonk, komaa kaye shoominaahtikonk. 45 Minokekoon onciimakanini i'imaa opimaatisiwinink a'awe inini kaamino​pimaatisitc aaniihsh kaaishi​mooshkineshkaakotc mino​kekoon ote'ink naakwanini. Miinawaa maci​kekoon tahsh wiin onciimakanini i'imaa awiya kaamaci​pimaatisitc aaniihsh kaaishi​mooshkineshkaakotc maci​kekoonan ote'ink kaanaakwaninik aniihsh inini ihkitoomakanini otoon kaaishi​mooshkinenik ote'ink." 46 "Wekonen wenci-ishinihkaashiyek 'Tepencikeyan, Tepencikeyan!' e'ishihcikehsiwek itahsh kaaininakook? 47 Awenen hsa piko kaapinaasihkawitc, kaa'ishihciketc itahsh aaniin eshi​noontank nintihkitowinan, miihsh o'o eshinaakositc. 48 Taapishkoo inini kaaoshihtootc waahkaa'ikan, anaamink kaainaanihketc eshi​ahsiniihkaanik. Miihsh i'imaa kihtahsiniink eshi​onaahkosiciketc. Ahpii tahsh siipi kiimooshka'ank, kaawiin ciwahkawisek i'i waahkaa'ikan ahpii aanakiiocihcipiik aaniihsh kwayahk kii'onahkicikaate. 49 A'a tahsh wiin kaanoontank nintihkitowinan kaa'ishihcikehsik itahsh ehkitowak, mii 'i eshinaakositc taapishkoo inini kaaonaahkohsitootc waahkaa'ikan eshi​ahsiniihkaahsininik. Ahpii tahsh kiinihkipiik, kiiani​ocihcipiik i'iwe waahkaa'ikan shemaak iko takawihse cipiisihsek."

Lok 7

1 Ahpii Ciisahs kaakii'ishkwaa​wiintamawaatc kahkina onoweniwa' pemaatisinitc kii'ishaa Kaparniyamink (Capernaum) ootenaank. 2 Kii'ayaakopan peshik shimaakanihshiiwikimaa ekii'ayaawaatc anohkii'aakanan wiinke ekiihkihci​saaki'aatc, wiinke tahsh ekii'aahkosinitc aasha kekaa ciniponitc. 3 Ahpii shimaakanihshiiwikimaa enoontank pehsho ehtanaacimimintc Ciisahsoon okii'ishinisha'waa' aaninta kaaniikaanentaakosinitc Coowa' cikakwecimaanitc Ciisahsoon cipiishaanitc cipiminwaaci'aanitc otanohkii'aakanan. 4 Ekiihpi​naasihkawaawaatc Ciisahsoon enikohk okiih​pakohsenimaawaan: "Tepwe teahpiihtentaakosi o'o ci'ishihcikehtamawatc. 5 Aaniihsh wiin nisaaki'ikonaan kaaCoowiwiyaank, wiin kaye kaakii'oshihtamawiyamintc anami'ewikamikoni," okii'inaawaan. 6 Miitahsh Ciisahs kaakii'ani​wiiciiwaatc aasha pehsho e'ani​otihtaminitc waahkaa'ikanini. Miihsh shimaakanihshiiwikimaa kaakii'ishinisha'waatc seyaaki​wiiciiwaatc o'o ci'awi-inaanitc: "Tepencikeyan, keko wiin keyaapi mikoshkaaci'itisohken. Kaawiin iitok nintepakentaakosihsii cikii​piintikeyan o'omaa niwaahkaa'ikanink. 7 Kaawiin kaye nintinenitisohsii ehtepakentaakosiyaan cikiihpi​naasihkawinaan. Mihci-ihkiton ehta, miihsh ciminoayaatc nintanohkii'aakan. 8 Mii 'i keniin eshinaakosiyaan inini ekii'miishitc tipencikewin nintookimaamak itahsh ninkanawaapamikook. Nintayaawak kaye shimaakanihshak kaakanawaapamakwaa. O'o peshik kii'inak: 'Maacaan,' mii 'i eshimaacaatc. Miinawaa kotak kii'inak: 'Piishaan,' mii 'i eshi​piishaatc. Nintanohkii'aakan kaye kii'inak: 'O'o ishihciken,' mii piko 'i entootank." 9 Ciisahs tahsh kii'maamahkaatentam ahpii kaa'noontank o'oweni. Okiih​kwehkikaapawihtawaa' ekii'inaatc kaapaahtiinonitc kaapiminisha'okotc: "Kiwiintamawininim, kaawiin wiihkaa awiya nimpimihkawaahsii o'o nahke cishi​tepweyentank o'omaa Isriyal ahkiink." 10 I'i tahsh kaakiih​piicinisha'ontwaapan ahpii ehkiiwewaatc owaahkaa'ikaniniink shimaakanihshiiwikimaan, miihsh kaakii'mihkawaawaatc ini anohkii'aakanan eminoayaanitc. 11 Wiipa naake Ciisahs kii'ishaa ootenaank Nen (Nain) eshinihkaatenik ewiiciiwikotc okihkino'amawaakana' i'i kaye kaapaahtiinonitc pemaatisinitc. 12 Aasha tahsh e'ani​otihtank eshi-ishkwaantemiwaninik i'i ootena, na'itaak okii'mekwaashkaan ena'inikewintc. A'a hsa tahsh inini kaakii'nipotc iinsan kii'mihci​peshiko e'okosihsimikotc kiiwaacihkwewan. Kiihpaahtiinowa' awiya' e'wiiciiwikonitc ootenaank wenciinitc. 13 Ahpii tahsh kaaTipenciketc ewaapamaatc ini ihkwewan aahpici okiih​koohpaasinawaan, miihsh kaa'inaatc: "Keko mawihken." 14 Miitahsh pehsho kaakii'ishaatc, ekiih​saaminank pimaahkwa'ikan. Miihsh kaakiih​kipihciinitc i'i kaapimiwitoonitc pimaahkwa'ikan. Ciisahs tahsh kii'ihkito: "Oshkiniiki, wanishkaan kitinin." 15 Miitahsh ini kaakii'niponihpan kiionci​mayaawapiwan, kaye tahsh ekii'maacii​kakitonitc. Ciisahs tahsh okii'ishi​pakitinaan ini ininiwan eshi​ayaanitc omaamaani. 16 Kahkina tahsh okii'mooshkineshkaakonaawaa kohtaanentamowin, ekii'nanaahkomaawaatc Kishemanitoon ekii-ihkitowaatc: "Kishemanitoo kimiinikonaan kehci-inentaakosintc kenootamaakotc eshi​ayaawank," miihsh kaye kaaihkitowaatc: "Kishemanitoo kiihpiishaa ewiih​pimaaci'aatc opimaatisiima'." 17 I'i hsa tahsh Ciisahs enaacimintc kii'noontaakaaniwanini misiwe Cootiiya (Judea) ahkiink, misiwe kaye waahkaaya'ii i'imaa ahkiink. 18 Okihkino'amawaakana' itahsh Cwaan (John) okii'wiintamaakoo' kahkina onoweniwan. 19 Miihsh kaakii'antomaatc niishin (2) okihkino'amawaakana' ekii'ishinisha'waatc ciawi​kakwecimaanitc kaaTipencikenitc: "Kiin ina a'a kaaikooyan kaawiihpi​takohshink, komaa kaye kotak awiya cipii'intipan?" 20 Ahpii ehpi​naasihkawaawaatc Ciisahsoon kii'ihkitowak: "Cwaan Siika'antaakewinini ninkiih​piicinisha'okonaan cikakwecimikooyan kiishpin kiin a'a kaaikooyan kaawiihpi​takohshink komaa kaye kotak awiya cipii'intipan?" 21 Mii'iwe ahpii Ciisahs kaakii'minwaaci'aatc niipiwa' pemaatisinitc entahso​inaahpinenitc, aaniin kaye eshi​aahkosinitc. I'i kaye kekishkaakonitc maciahcaahkwa'. Kaye tahsh ekii'waapi'aatc niipiwa' awiya' kaawaapihsinik. 22 Okii'aashitemaa' Cwaanan kaakiih​piicinisha'waanitc: "Kiiwek, wiintamawihk Cwaan wekonen kaakii'waapantamek, kaakii'noontamek kaye. Ewaapi'intwaa iki kaawaapihsikwaa, iki kaye ehpimohse'intwaa kaapimohsehsikwaa, iki tahsh kaye wemikiiwaahpinewaatc epehki'intwaa. Ehkiiwe​pimaatisii'intwaa kaye kaanipowaatc, iki kaye ketimaakisiwaatc e'wiintamawintwaa minwaacimowin. 23 Aaniin keahpiihci​minwentamowaatc ikiweniwak kaa-aanwehtansikwaa ehtashimikoowak." 24 Ahpii tahsh Cwaanan kaakiih​piicinisha'waatc ekii'maacaanitc Ciisahs okii'maacii​wiintamawaa' kaapaahtiinonitc awiya' ehtashimaatc Cwaanan: "Ahpii kaakii'ishaayek Cwaan kaashi​ayaatc pikwatahkiink wekonen kaa'inentamek ciwaapantamek, cipeshikwahkitek ina mashkohsi ewahkawaahsink? 25 Wekonen tahsh kaa'anta​waapantamek kii-ishaayek? A'a ina inini wenishihshininikin okikishkikanan? Miiwak iitok iki tino kaakihci​minohkonayewaatc kaawenooci​pimaatisiwaatc eshitaawaatc okimaawikamikonk. 26 Wiintamawihshik, wekonen kaa'anta​waapantamek weti kii-ishaayek? Awiya na kaakanootamawaatc Kishemanitoon? Miitahsh eshi​wiintamawinakook, kikii'waapamaawaa iitok awiya nawac kehci-inentaakositc ahpiihc wiin iki kenootamawaawaatc Kishemanitoon. 27 Cwaan ohsha kaatashimintc aaniin Kihcimasina'ikan kaaihkitoomakahk: 'Kishemanitoo ihkito, ninkaishinisha'waa ninkanoocikehtamaake ciniikaaniitc ciahpiihci​oshihtamawihk keani-ishaawatc,' ihkitoomakan. 28 Kiwiintamawininim tahsh Cwaan maawac kihci-inentaakosi ahpiihc kotak ininiwak kaakiihpi​pimaatisiwaatc. Shaakooc tahsh a'a maawac pankii kaainentaakositc Kishemanitoo otipencikewinink nawac kihci-inentaakosi ahpiihc wiin ini Cwaanan," kii'ihkito. 29 Ahpii tahsh iki pemaatisiwaatc, iki kaye kaamaawantoonaawaatc tipa'ikewishooniyaan (tax) o'o enoontamowaatc, mii 'i kaakiih​kihkentamowaatc Kishemanitoon kwayahk e'inaahkoniwenitc, ekiih​siika'antaakowaatc Cwaanan. 30 Iki tahsh Perahsiik (Pharisees) iki kaye kaamisiwe​kihkentamowaatc Onahshowewin okii'aanwehtawaawaan Kishemanitoon eshi​antawentaminitc, kaawiin kaye kii'inentansiiwak cisiika'antaakowaatc Cwaanan. 31 Ciisahs kii'ani​'ihkito: "Aaniin itahsh keihkitoyaampaan iinsan e'ishinaakosiwaatc oko ininiwak noonkom kaapimaatisiwaatc? Aaniin tahsh enentaakosiwaatc? 32 Miihsh enentaakosiwaatc taapishkoo apinoonciishak kaa-apiwaatc kaashi​ataawaaniwaninik. Miihsh o'o eshi​shaahshaakowaanitiwaatc: 'Kikiih​kitohcikehtamaakoom wiitikewi​kitohcikewin kaawiin cikii'onci​niimiyek, kaye tahsh ninkii'nikamomin na'inikewi​nikamowinan kaawiin tahsh cikiiwii'mawiyek,' ihkitowak. 33 Inashke Cwaan Siika'antaakewinini kiihpiishaatc kaawiin kii'onci​wiihsinihsii, kaawiin kaye kii'onci​minihkwehsii shoominaapo. Miitahsh kaakii'inek: 'Okikishkaakoon maciahcaahkwan.' 34 Ini tahsh wiin Inini oKosihsan kiihpiishaawan ehpi​wiihsininitc, kaye tahsh ehpi​minihkwenitc. Miihsh enimek: 'Kanawaapamihk a'a maawac enihtaa​wiihsinitc, kaye enihtaa​minihkwetc, ehsaaki​wiiciiwaatc kaamaawantoonaanitc tipa'ikewishooniyaan, i'i kaye omacitootamoo',' mii'i enek. 35 Ikiweniwak tahsh kaaotaahpinamowaatc Kishemanitoon okakiihtaawentamowinini, miiwak iki kaanaakohtoowaatc ehkwayahkwaanik," okii'inaa'. 36 Peshik tahsh Perahsiin (Pharisee) okii'antomikoon ci'antawi​wiici​wiihsiniimaatc. Miihsh Ciisahs kaakiih​piintiketc Perahsiin owaahkaa'ikaniniink ekii'wiici​wiihsiniimaatc, ekii'ohpimehshink tapahsi​toopowinaahkonk. 37 I'imaa tahsh ootenaank kii'ayaa ihkwe maci-ishiwepisiwinink eshi​pimaatisitc. Kii'noontam iinsan a'a ihkwe Ciisahsoon ewiihsininitc i'imaa Perahsiin owaahka'ikaniniink. Miihsh kaakiih​piitootc minaako'on ahsiniiwi​waapaapihko-omootayaapihkonk emoshkinenik. 38 Kiihpiishaa, otaanaank inahke ekii'ishi​niipawitc Ciisahsoon eshi​sitehshininitc. Kii'mawi, otooncikawaapiwinan ekii'aapacihtootc ehkisiipiikisitenaatc. Wiinisihsan itahsh okii'aapacihtoonan ehpaankwa'ank ositini. Miihsh kaa'ishi​ociimaatc ositiniink, ekiih​siikinank kaye minaako'on ositiniink. 39 Iniweniwan itahsh Perahsiin Ciisahs kaakii'antomikotc ciwiici​wiihsiniimaatc ahpii ewaapamaanitc ihkwewan eshihcikenitc kii'inentamoon: "Kiishpin wa'a inini tinowihpan Kishemanitoon kaakanootamawaatc otaa​kihkenimaan aweneniwinitc ini ihkwewan kaasaaminikotc. Otaa​kihkenimaan iitok e'maci-ishi​wepisinitc." 40 Miitahsh Ciisahs o'o kaa'inaatc: "Saaiman (Simon) kekoon kiwii'inin," okii'inaan. "Haw, wiintamawihshin waa'ishiyan," okii'ikoon. 41 Miihsh kaa'inaatc: "Kii'ayaawak iinsan niishin (2) ininiwak ekii'masina'amawaawaatc kaamasina'ike'iwenitc shooniyaan. A'a peshik okii'masina'amawaan minihk naanwaahk (500) waapaapihko​shooniyaanhsa', a'a tahsh kotak naanimitana (50) ehta. 42 Kaawiin tahsh okiih​kashkihtoohsiinaawaa cikiiwe​tipa'amawaawaatc. Miihsh kaamasina'ike'iwenitc kaakiih​kisii'amaakowaatc ehpoonentamaakowaatc omasina'ikewiniwaan. Awenen itahsh enentaman maawac kesaaki'aatc," okii'inaan. 43 Miitahsh kaa'ikotc: "Mii 'i enentamaan, a'a maawiin peshik niipiwa' kaakiih​poonentamawintc." "Kitepwe," kii'ihkito Ciisahs. 44 Miitahsh kaa'ishi​kwehkihkwenitc ekiih​kanawaapamaatc ini ihkwewan. Miihsh kaa'inaatc Saaimanoon: "Kiwaapamaa na wa'a ihkwe? Ninkiihpi​piintike kiwaahkaa'ikanink kaawiin tahsh kitoonci​miishihsii nipi cikisiipiikisiteyaan. Wa'a tahsh wiin ihkwe okisiihsipatoonan ninsitan osipiinkwaanan eaapacihtootc, wiinisihsan kaye ehpaankwa'ikaaketc. 45 Kaawiin kaye kikii'onci​ociimihsii ahpii kaapiintikeyaan. Wa'a tahsh wiin ihkwe kaawiin onci​kipihciihsii e'ayociintank nisitinan ahpii kaahpiintikewak. 46 Kaawiin kanake kikiihsiikinansiin Aalip (Olive) tino pimite nihtikwaanink. Wa'a tahsh wiin ihkwe okiih​siikinaan minaako'on nisitink. 47 Kiwiintamawin tahsh i'iweni okihci​saaki'iwewin mii 'imaa wenci​kihkentaakwaninik ekiih​poonentamawintc niipiwa' omacitootamowinan. Awiya tahsh wiin pankii ehta kaapoonentamawintc, pankii ehta onaakohtoon saaki'iwewin," kii'ihkito. 48 Miihsh kaa'inaatc ini ihkwewan: "Kimacitootamowinan kipoonentamaakoo." 49 Kotak tahsh iki kaakii'apiwaatc toohpowinaahkonk kii'ayitiwak: "Awenen itahsh wa'a kaapoonentamaaketc macitootamowinan?" kii'ihkitowak. 50 Miitahsh Ciisahs kaa'inaatc ini ihkwewan: "Kitepwewakentamowin kipimaaci'ikon. Mii 'i pisaan anishi​maacaan," okii'inaan.

Lok 8

1 Naanaake tahsh e'ani-ishihsenik, Ciisahs kiihpapaa​ishaa otenaahkaank, eshi​kakapehshiwintc kaye. Kiihpapaa​wiintamaake minwaacimowin, i'iweni kaye Kishemanitoon oTipencikewinini, ekii'wiiciiwikotc mitaahshiniishin (12) okihkino'amawaakana'. 2 I'i kaye aaninta ihkwewa' okiih​piminisha'okoo' kaakiihpi​minwaaci'aatc aahkosiwinink, aaninta kaye maciahcaahkwa' kaakiih​saakicinisha'amawaatc. Mii 'awe peshik Meri Maakatalawihkwe (Mary Magdalene) kaaishinihkaanintc mii 'awe niishwaahso (7) maciahcaahkwa' kaakiih​saakicinisha'amawintc. 3 A'a tahsh peshik Coaana (Joanna) kii'ishinihkaaso, onaapeman Koosa (Chuza) kii'ishinihkaasowan kaakii'okimaahkantaminitc Heratan (Herod) otayaawinini, a'a tahsh kaye Sosaana (Susanna) eshinihkaasotc. Iki tahsh kaye kotak ihkwewak kaakii'aapacihtoowaatc otaya'iimiwaan ewiici'aawaatc Ciisahsoon, i'i kaye okihkino'amawaakanini. 4 Wiinke tahsh kiihpaahtiinowak pemaatisiwaatc ekii'ohkwiino'itiwaatc ekiihpi​anta​waapamaawaatc Ciisahsoon. Pepahkaan ootenaank ekiihpi​ayonciinitc. Miihsh Ciisahs kaakii'wiintamawaatc o'o awehcikewin: 5 "Kii'ayaa hsa inini ekiih​kihtikaatank kihtikaanenhsan. Mekwaa tahsh e'ohswe​wepinank kihtikaanenhsan, aaninta miihkanaank kii'ishi​pankihsininiwan. Miiwan tahsh ini kaakiitahtahkohkaatekin, pinehshiinshak kaye okiih​kitaanaawaan. 6 Aaninta tahsh kihtikaanenhsan, eshi​ahsiniihkaak kaa'ishi​tapahsahkamikaak kii'ishi​pankihsinoon. Wiipa tahsh kii'nihtaawikinoon kihtikaanan. Miihsh kaa'ani-ishi​paahtekin kaawiin aaniihsh kii'nipiiwansinoonan. 7 Aaninta tahsh kihtikaanenhsan okaawiminakashiihkaank kii'ishi​pankihsinoon. Okaawiminakashiin tahsh e'ompikihkin okiih​kipishkaanaawaan ini kihtikaanenhsan, miihsh kaa'ishi​nipoomakaninikin. 8 Aaninta tahsh kihtikaanenhsan, maawac iko eshi​minohkamikaak kii'ishi​pankihsinoon. Wiinke tahsh kii'minokinoon ini kihtikaanan. Ninkotwaahk (100) tahsink kii'ontinikaatewan minihk kaakiikihtikaatekopanen ini kihtikaanan." Miihsh kaa'ani-ihkitotc: "Awenen hsa piko wenoontamaawinitc taka tapisintam," kii'ihkito. 9 Miitahsh okihkino'amawaakana' kaakiih​kakwecimikotc aaniin ehkitoomakaninik i'iweni awehcikewin. 10 Miihsh Ciisahs kaa'ishi​nahkwehtawaatc: "Kiinawaa ohsha kipakitinamaakoom cikihkentamek ini kaakiih​kihkencikaatehsinokin kekoonan Kishemanitoo oTipencikewin kaatashintekin. Wiinawaa tahsh wiin awehcikewinan nintaapacihtaawaanan ehkanoonakwaa: mihsawaa aana inaapiwaatc, kaawiin waapihsiiwak; mihsawaa aana noontamowaatc, kaawiin nihsitohtansiiwak." 11 "Mii'owe ehkitoomakahk o'o awehcikan, i'i hsa kihtikaanenhs, mii 'iweni Kishemanitoo otihkitowin. 12 Awiya kaanoontank ehtipaatotenik Kishemanitoon oTipencikewinini, e'nihsitohtansik itahsh, mii taapishkoo eshinaakositc ini kaakiih​pankihsinkin kihtikaanenhsan i'imaa miihkanaank. Maciaya'aa pitakohshin e'otaahpinank ini aasha kaakiih​kihtikaatenikin ote'imaank awiyan citepwehtansinik, kaye tahsh cipimaaci'aahsiwimintc. 13 Ini tahsh kaakiih​pankihsinkin kihtikaanenhsan kaashi​ahsiniihkaak, mii 'i eshinaakositc a'a shemaak kaaotaahpinank Kishemanitoo otipaacimowin ahpii e'noontank, aahpici e'minwentank. Kaawiin itahsh waahsa cikotaawikiink. Aahpici tahsh acina ehta tepwehtam. Ahpii tahsh koci'ikoowisiwin e'otihsikotc, mii 'i eshi​pakiciitc. 14 Ini tahsh kaakiih​pankihsinkin kihtikaanenhsan kaashi​okaawiminakashiihkaak, mii 'i eshinaakositc a'a kaanoontank Kishemanitoo otipaacimowin. E'ani​pimaatisitc itahsh onsaam e'ocaanimentank, onsaam kaye ehsaakihtootc wenootisiwin, i'iweni kaye ahkiiwi​ciihkentamowin, mii 'i kaawiin cini​kiishikitc. 15 Ini tahsh kaakiih​pankihsinkin kihtikaanenhsan i'imaa kaashi​minohkamikaak mii 'i eshinaakositc awiya kaanoontank Kishemanitoo otipaacimowin. Miiwak iki weweni kaakihciwentamowaatc, kaamino​kanawentamowaatc kaye ote'iwaank. Ehshashiipentamowaatc itahsh, mii 'i kaaonci​nihtaawikihtoowaatc shiiwimiicim." 16 Miitahsh o'o Ciisahs kaa'ani-ihkitotc: "Kaawiin awiya otahtoohsiin waahsahkonencikan anaami​ahkihkonk, komaa kaye anaami​nipewinaahkonk. Wakici​waahsahkonencikanaahkonk ohsha ishi​pakitinikaate i'i waahsahkonencikan, iki kaapiishaawaatc ciwaapantamowaatc e'waahsahkonenik. 17 Kahkina kekoon kaakaacikaatek, mii 'iwe piciinak cimohsheyaapancikaatek. Kiishpin kaye aanakii'akwana'ikaatekipan kekoon, mihsawaa tanaakwan waahseyaank. 18 Ayaankwaamisik itahsh aaniin eshi​pisintamek. Awiya hsa kekoonini kaa-ayaatc, tamiinaa kekoon awahshime. A'a tahsh wiin kekoonini kaa-ayaahsik, mihsawaa ko pankii kekoonenhsini eyaatc taotaahpinamawaa." 19 Ciisahs tahsh omaamaan, wiicihkiweya' kaye kiihpi​takohshinoo' ewii'waapamikotc, kaawiin kiikashki'ohsiiwa' onsaam aaniihsh kiihpaahtiinowa' awiya'. 20 Peshik itahsh awiyan okii'ikoon: "Taka pinamaa, kimaamaa, kiicihkiweyak kaye akwaciink niipawiwak ewii'waapamihkwaa," okii'ikoon. 21 O'o tahsh Ciisahs kii'ishinahkwehtam: "Miiwak ohsha oko nimaamaa, niicihkiweyak kaye kaaishihcikewaatc aaniin eshinoontamowaatc Kishemanitoon ehkitonitc. Iki ohsha kaana'ihtawaawaatc kaaishihcikewaatc kaye ehkitonitc Kishemanitoon, mii ohsha 'awe nimaamaa, niicihkiweyak kaye." 22 Aapintink tahsh ehkiishikaninik Ciisahs kiihpoosi ciimaan ekii'wiiciiwikotc okihkino'amawaakana'. Miihsh kaa'inaatc: "Haw, taka ishaataa weti akaamink," okii'inaa'. Miihsh kaa'ishi​aashawa'amowaatc. 23 Mekwaa tahsh ehpimaashiwaatc Ciisahs kii'nipaa piintoonak. Miitahsh ketahto kiihkihci​pakamaaniman ekiihkihci​mamaankaashkaanik. Kiihsaahsiika'okowak ekii'ani​mooshkinepiik i'i ciimaan. Kahkina kii'naniisaanisiwak. 24 Kii'ishaawak tahsh eshi​nipaanitc Ciisahsoon ekii'amaci'aawaatc e'inaawaatc: "Okihkino'amaake aasha kekaa ninka​nihsaapaawemin," okii'inaawaan. Ciisahs tahsh kiihpasikwii ekiih​kanootank kihci​noontin, nipiini kaye kehci​mamaankaashkaanik. Miitahsh kaa'ani-ishi​anwaanoowenik, wiinke tahsh kii'anwaahtin. 25 Miihsh kaa'inaatc okihkino'amawaakana': "Aanti tahsh i'i kitepwehtamowiniwaa?" Wiinke tahsh kii'maamahkaatentamoo', ekiih​sekisinitc ekii'ayitinitc: "Kaanaka awenen tenowikwen wa'a inini. Ehkanootank kihci​nootin, kaamamaankaashkaanik kaye, miihsh eshi​na'ihtaakotc!" 26 Miitahsh kaa'ishi​aashawa'amowaatc i'i Kaalaliiwi Saaka'ikan, ekii'ishi​mishakaawaatc i'imaa Kerahsaawahkiink (Gerasenes). 27 Ciisahs tahsh ehpi​kapaatc, okiihpi​anta​nakishkaakoon peshik ininiwan ehkikishkaakonitc maciahcaahkwan i'imaa ootenaank e'onciinitc. Aasha kinwesh ekiihpi​onci​kikihkonayehsinik, kaawiin kaye waahkaa'ikanink kii'ishitaahsiiwan. Ciipekamikonk kii'ishitaawan, eshi​na'inimintc kaaniponitc kii'ishitaa. 28 Ahpii tahsh a'a ini ewaapamaatc Ciisahsoon ehpiihtowetc kii'ishi​shaakowe: "Kiin Ciisahs weKosihsimihk Kishemanitoo maawac kaaishpentaakositc. Aaniin waahtootawiyan? Kipakohsenimin cikakwaataki'ihsiwan," okii'ikoon. 29 Ciisahs iitok okiih​kanoonaan ini maciahcaahkwan cisaakici​nakanaanitc ini ininiwan. Mooshak ekii'otihtinikonitc, mooshak kaye ekiih​kanawencikaniwinitc. Kaye tahsh ekii'mamaancikwahpinimintc sakaapaanan e'aapataninikin, ekiih​kihciosite'omintc kaye mihtikonk. Mooshak itahsh okiih​piikopitooni. Maciahcaahkwan ekii'ishi​wiihkoshkaa'ikonitc pikwacaya'iink. 30 Ciisahs tahsh okii'ishi​kakwecimaan: "Aaniin eshinihkaasoyan?" Miihsh kaa'ikotc: "Opaahtiino nintishinihkaas, aaniihsh nimpaahtiinomin," okii'ikoon. 31 Ciisahs tahsh okiih​pakohsenimikoo' ci-ishinisha'waahsik kaashi​wiimpaanik kaashi​mishahkiiyaahsininik. 32 I'imaa tahsh newatatin kiihpaahtiinowak koohkoohshak ekii'ontancikewaatc. Okiih​pakohsenimikoo' itahsh Ciisahs cipakitinaatc i'i maciahcaahkwa' i'imaa koohkoohshink cishi​piintikeshkaanitc. Miihsh kaakiih​pakitinaatc. 33 Miitahsh kaa'ishi​nakanaanitc ini ininiwan, ekii'ani-ishi​piintikeshkawaanitc i'i koohkoohsha'. Miitahsh kahkina koohkoohshak i'imaa kaa'ishi​naasipiipa'itiwaatc eshi​kiishkaamatinaanik ekiih​pahkopiipa'itiwaatc saaka'ikaniink. Kahkina tahsh kii'nihsaapaawewak. 34 Ikiweniwak itahsh kenawenimaawaatc koohkoohsha' e'waapantamowaatc o'o, kii'maaciipa'itiwak ekii'awi​papaa​tipaacimowaatc, ootenaahkank, i'imaa kaye waahkaaya'ii ahkiink. 35 Pemaatisiwaatc tahsh kii'ishaawak ekii'anta​waapantamowaatc aaniin kaa'inahkamikaninik. Okiihpi​naasihkawaawaan Ciisahsoon, okii'waapamaawaan kaye ini ininiwan kaakiih​kikishkawaanihpan ini maciahcaahkwa' e'namatapinitc eshi​sitekaapawinitc Ciisahsoon. Kiihkikihkonayewan, kwayahk ekii'inentaminitc. Miihsh kahkina kaakiih​sekisiwaatc. 36 Miitahsh iki kaakii'waapantamowaatc o'o e'inahkamikaninik okiih​tipaacimaawaan ini ininiwan kaakiih​kikishkawaanihpan maciahcaahkwan aaniin kaye kaa'ishi​pimaaci'imintc. 37 Miitahsh kahkina i'imaa kaakii'ayaanitc Kerahsaa (Gerasenes) ahkiink kaakiihpi​kanoonikotc ciani​maacaatc, onsaam aaniihsh kiikihci​sekisiwa'. Miitahsh Ciisahs kaa'ishi​poositc ciimaan ekii'ani​maacaatc. 38 Ciisahs tahsh okiihpi​pakohsenimikoon ini ininiwan maciahcaahkwa' kaakii'onci​saakicinisha'omintc opimaatisiwininiink ekii'ikotc: "Taka pakitinihshin ciwiiciiwinaan," okii'ikoon. Ciisahs tahsh okii'maacinisha'waan ekii'inaatc: 39 "Maacaan anikiiwen, cini​wiintamaakeyan aaniin Kishemanitoo kaa'ishihcikehtamawihk," okii'inaan. Miitahsh kaa'ani-ishi​maacaanitc ini ininiwan ekiih​papaa​tipaacimotc i'imaa misiwe ootenaank aaniin kaa'ishihcikehtamaakonitc Ciisahsoon. 40 Ahpii kaahpikiiwe​aashawa'ank i'i saaka'ikan, kiihpaahtiinowa' pemaatisinitc menwentaminitc e'mishakaatc, aaniihsh kahkina okiih​pii'ikoo'. 41 Peshik itahsh kiihpi​takohshinoon ininiwan kaaniikaaniskaminitc i'i Coowa' otanami'ewikamikoni, Ceirahs (Jairus) eshinihkaasonitc. Eshi​sitekaapawitc inahke ekii'ahpakisonitc ehpakohsenimikotc ci'ishaatc otaawininiink. 42 Kii'mihci​peshikowan iitok otaanihsan a'a inini ekii'mitaahshiniisho​pipoonwenitc (12), ewii'ani​niponitc. Ciisahs tahsh e'ani​pimi​ayaatc, wiinke okiih​siincishkaakoo' kaakiih​paahtiinonitc awiya'. 43 Peshik itahsh ihkwe i'imaa mekweya'ii kii'ayaa mitaahshiniisho​pipoon (12) ekii'wiihsakentank emiskwiiwaahpinetc. Aanciko tahsh kii'wiihsakaahpine aanakii'antawi'ikotc mashkihkiiwininiwa', ekiih​caakinaatc kaye oshooniyaaman minihk eyaawaakopanen. Kaawiin awiyan okii​kashki'ikohsiin ciminoayaatc. 44 Wa'a tahsh ihkwe otaanaank inahke okii'ishi​naasihkawaan Ciisahsoon ekii​saaminank wanahkweyiik owakici​kashkiikiiwinini. Miitahsh iko shemaak kaakiihpooni​miskwiiwitc. 45 Miihsh Ciisahs kaa'ishi​kakwetwetc: "Awenen kaahsaaminitc?" Kahkina awiya' okii'aanwehtaakoo'. Piitaroon (Peter) tahsh okii'ikoon: "Okihkino'amaake, kiwaapamaak iitok ehpaahtiinowaatc awiyak waahkaaya'ii kaasiincishkawihkwaa," okii'ikoon. 46 Miihsh Ciisahs kaa'ihkitotc: "Awiya ohsha ninkiih​saaminik; ninkihkentaan nimashkawisiiwin ehsaaka'amoomakahk," kii'ihkito. 47 Wa'a tahsh ihkwe okiih​kihkentaan awahshime ehkaaci​ayaahsik, miihsh kaakiih​piishaatc ehsekisitc ekii'ahpakisotc enaahsamiinitc. Kiihtipaacimo kahkina awiya' enaahsamiinitc wekonen kaa'onci​saaminaatc Ciisahsoon, aaniin kaye shemaak kaa'ishi​minoayaatc. 48 Miitahsh Ciisahs kaa'inaatc ini ihkwewan: "Nintaanihs, kitepwehtamowinink kitoonci​minoayaa, mii 'i pisaan anishi​maacaan." 49 Mekwaa tahsh Ciisahs ehtanwewehtootc, awiyan kiihpionci​takohshinoon eshitaanitc ini ininiwan kaaniikaanishkaminitc i'i anami'ewikamik ekii'ihkitonitc: "Aasha kii'nipo kitaanihs. Keko awahshime ontami'aahken a'a okihkino'amaake," kii'ihkitowan. 50 Ciisahs tahsh e'noontank o'o, okii'inaan ini Ceirahsan: "Keko sekisihken, mihci​tepwehtan, miihsh ciminoayaatc," okii'inaan. 51 Ahpii tahsh ehtakohshinowaatc owaahkaa'ikaniniink, kaawiin awiyan okiih​pakitinaahsiin ciwiici​piintikemikotc, mii ehta Piitaroon (Peter), Cwaanan (John), Ciimisan (James) kaye. Okiih​pakitinaan kaye ini otetemaan, ini kaye omaamaamaan wetaanihsinitc ini ihkwesenhsan. 52 Kahkina i'imaa kaakii'ayaawaatc okii'mawimaawaan ekii'onci​mincinawesiwaatc ini ihkwesenhsan. Miihsh Ciisahs kaa'inaatc: "Keko mawihkek, kaawiin ohsha nipohsii, mihci​nipaa iitok," ekii'inaatc. 53 Kahkina tahsh okiih​paahpinotaakoo' aaniihsh okii​kihkenimaani ekii'niponitc ini ihkwehsenhsan. 54 Miitahsh Ciisahs kaakiih​sakinihkenaatc ihkwesenhsan ekii'inaatc: "Ihkwesenhs, wanishkaan," ekii'inaatc. 55 Shemaak tahsh kiihkiiwe​pimaatisiwan ekii'wanishkaanitc. Ciisahs tahsh okii'anoonaa' i'imaa eyaanitc ciahshamaanitc ini ihkwesenhsan. 56 Oniiki'ikomaa' itahsh kiikihci​maamahkaatentamoo'. Ciisahs itahsh okiih​kanoonaa' awiyan ciwiintamawaahsinik o'o kaakii'ishihsenik.

Lok 9

1 Ciisahs tahsh okii'antomaa' mitaahshiniishin (12) okihkino'amawaakana' ekii'miinaatc mashkawisiiwin, kashki'ewisiwin kaye cisaakicinisha'waanitc maciahcaahkwa', cikashkihtoonitc kaye ciminoayaa'iwenitc. 2 Miitahsh kaakii'ishi​maacinisha'waatc cipapaawiintamaakenitc i'i Kishemanitoon ewii'oshihsitoonitc oTipencikewinini, kaye tahsh ciminwaaci'aanitc kaa-aahkosinitc. 3 Miitahsh Ciisahs kaa'inaatc: "Keko kekoon maaciitoohkek ahpii ani​maacaayek, sahka'onaahtik, pashkwewash, kemiiciyek, shooniyaa, kekoon kaye kemeshkocishkamek. 4 Piko aanti keshi​antomikooyek cipiintikeyek, mii 'imaa ishi​kapehshik, miihsh i'imaa kenionci​maacaayek. 5 Aaniinti tahsh iko keshi​piintike​antomikoohsiwek, ahpii tahsh ani​nakatamek i'i ootena, miihsh ishi​paahpawisitehshimoonok cionci​kihkentamowaatc e'wanitootamowaatc." 6 Miitahsh okihkino'amawaakana' kaaishi​maacaanitc ekii'ishaanitc misiwe eshi​ayishitaaniwaninik ewiintamaakenitc minwaacimowin, kaye tahsh eminwaaci'aanitc awiya' piko aanti eyaanitc. 7 Ahpii Herat (Herod) kaakihciokimaawitc Kaalaliink (Galilee) enoontank kahkina kekoon kaa'ayishihsenik kii'onci​wawaanentam i'iwe aaninta awiya' kaakii'ihkitonitc. Ekii'ihkitonaaniwaninik iinsan Cwaanan (John) Siika'antaakewininiwan ekiih​pikiiwe​pimaatisinitc. 8 Kotak tahsh ekii'ihkitonitc: "Ilaaica (Elijah) kii'naakosi," aaninta tahsh ekii'ihkitonitc mii hsa 'awe peshik ekiihkiiwe​pimaatisitc mewisha kaakiih​kanootamawaatc Kishemanitoon. 9 Miitahsh Herat kaa'ihkitotc: "Cwaan wiin ninkiih​kiishkikweta'waa, awenen tahsh a'a tino inini kaanaanoontamaan." Miitahsh mooshak kaakiihkakwe​waapamaatc Ciisahsoon. 10 Ishinisha'waakanak tahsh ekiih​pikiiwewaatc, okii'wiintamawaawaan Ciisahsoon kahkina kekoon kaakii'ayishihcikewaatc. Miitahsh kaa'ishi​maacii​wiiciiwaatc otishinisha'waakana' wiinehtawaa ko ekii'ishaawaatc ootenaank Pehseta (Bethsaida) eshinihkaatenik. 11 Okiih​kihkenimikoo' tahsh kaapaahtiinonitc pemaatisinitc weti ekii'ishaatc, miihsh kaa'ishi​piminisha'okotc. Miitahsh Ciisahs kaakii'inaatc e'minwentank ehpiishaanitc, ekiih​tashintamawaatc kaye Kishemanitoon oTipencikewinini, kaye tahsh ekii'minwaaci'aatc iniweniwa' kaakiih​kakwecimikotc ciminoayaanitc. 12 Ahpii tahsh e'ani​onaakohshininik, okiihpi​naasihkaakoo' i'i kaamitaahshiniishinitc (12) okihkino'amawaakana' ekii'ikotc: "Kanoosh pemaatisiwaatc cimaacaawaatc ci-ishaawaatc eshi​ootenaahsiwaninik, kaashi​ayaaniwaninik kaye, ciawi​nanaanta​waapantamowaatc miicim, aaniinti kaye keshi​nipaawaatc. Pikwacaya'ii iitok kitayaamin," ekii'ikotc. 13 Miihsh Ciisahs kaa'inaatc: "Kiinawaa miinihkwak kekoonini kemiiciwaatc." Miihsh kaa'ikotc: "Naanan ehta pahkweshikanihkaanenhsak nintayaawaanaanik, niishin kiikoyak. Kinantawenimihshinaam ina ciawi​ataaweyaank miicim citepihsek kahkina oko ciwiihsiniwaatc?" 14 Ninkociko naanan mitaahswaahk (5,000) kiihtahshiwa' ininiwa' i'imaa. Miihsh Ciisahs kaa'inaatc okihkino'amawaakana': "Nenaanimitana (50) ishi​ayoohkwapi'ihkwak," okii'inaa'. 15 Miitahsh o'o kaahtootaminitc. Kahkina tahsh kii'onapiwa' i'imaa kaakii'ayaanitc. 16 Miitahsh Ciisahs kaakii'otaahpinaatc ini naanan pahkweshikanihkaanenhsa', ini kaye niishin kiikooya' kihcikiishikonk ekii'inaapitc ekii'nanaahkomaatc Kishemanitoon iniweniwa' onci. Miihsh kaa'ishi​pahkwepinaatc, ekii'miinaatc okihkino'amawaakana', cimaamaata'oonaanitc ini i'imaa kaakii'ayaanitc. 17 Kahkina hsa kiihtewiihsiniwak. Kihkino'amawaakanak tahsh okii'maawantoonaanaawaa i'i miicim kaakii'ishkohsenik mitaahshiniishin (12) mashkohsiiwi​miicimiwashan, ekii'mooshkinekin. 18 Aapintink itahsh Ciisahs wiin ehta e'anami'aatc, ewiiciiwikotc okihkino'amawaakana', miihsh kaa'ishikakwecimaatc: "Awenenan ehkitowaatc awiyak ehtinowiwak?" 19 Miihsh o'o tahsh kaa'ikotc: "Aaninta kitikook, Cwaan (John) Siika'antaakewinini. Kotak kitikook Ilaaica (Elijah). Kotak kitikook Cerimaaya (Jeremiah), komaa kaye peshik kiihkiiwe​pimaatisiiwitok kaakiih​kanootamawaakopanen Kishemanitoon kitikoo," okii'ikoo'. 20 Ciisahs itahsh okii'inaa': "Awenen tahsh kiinawaa ehkitoyek ehtinowiyaan?" Saaiman Piitar (Simon Peter) tahsh okii'inaan: "Kiin ihsa a'a Kishemanitoon kaakiih​kiishaaci​onenimikotc ciPimaaci'iwetc." 21 Ciisahs tahsh okiih​kanoonaa' okii'aayicikanoonaa' ciwiintamawaahsinik o'oweni awiyan. 22 Miitahsh kaye kaa'inaatc: "Oncita piko Inini oKosihsan takihcikakwaatakihtoowan, oka-aanawenimikoo' kaye kaaniikaanisinitc, i'i kaye anami'ewikimaa', i'i kaye onahshowewiniwaa' kaakihkino'amaakenitc onahshowewin. Miihsh cinihsimintc. Nihsokiishik tahsh ishihsenik takiiwe​pimaatisi'aawan." 23 Miitahsh o'o kahkina kaa'inaatc: "Kiishpin awiya wiihpiminisha'otc, taka ta-aanawenintiso, oka​otaahpinaan otaashiteyaahtikoman kepimiwinaatc entahsokiishik cipiminisha'otc. 24 A'a tahsh kemanaa​wanihtootc opimaatisiwin, aanciko kaawiin tatepinamaasohsii tepwe keonci​pimaatisitc. A'a tahsh kepakitinank opimaatisiwin niin onci, tatepinamaaso tepwe keonci​pimaatisitc. 25 Wekonen kekashkihtamaasohpan awiya kiishpin aanatepinamaasotc kahkina kekoon o'omaa ahkiink, wiin itahsh iko nihshiwanaaci'itisotc, kaye tahsh onci​kakwaatakihtootc? 26 Awenen hsa piko keonci​akacitc niin onci, ini kaye ninkihkino'amaakewinan, miihsa'we keakaciihtaakotc kehci-inentaakosinitc Inini oKosihsini ahpii pitakohshininitc, kaye tahsh okihci-inentaakosiwininiink Weyoohsimimintc, i'i kaye kehtentaakosinitc encala'. 27 Tepwe tahsh o'o kaaininakook. Aaninta hsa o'omaa kaaniipawiwaatc kaawiin tanipohsiiwak paanimaa kii'waapantamowaatc i'i Kishemanitoon otookimaawiwinini." 28 Nihshwaahsokiishik (8) tahsh e'ishihsenik Ciisahs okii'maaciinaan Piitaroon (Peter), Ciimisan (James), ini kaye Cwaanan (John). Kii'ishaawak eshi-ishpatinaanik ekii'awi​anami'aawaatc. 29 Mekwaa tahsh e'anami'aatc pahkaan kii'ani-ishinaakosi owiinkwaank, okikishkikanan wiinke kii'waapishkiwaahsenaakwaniniwan. 30 Miitahsh kihkino'amawaakanak kaakii'waapamaawaatc niishin ininiwa' ehkakanoonikonitc. Moosihsoon (Moses) ini kaye Ilaaicawan (Elijah). 31 Wiinke kiikihci​waahsenaakosiwa', ekiih​tashintaminitc aaniin keshi​nihsimintc Ciisahsoon aasha kekaa kaawii'ishihsenik i'imaa Ceroosalamink (Jerusalem). 32 Piitar tahsh i'i kaye kaakii'wiiciiwikotc kiikihpakinkwashiwak. Ahpii tahsh ekoshkosiwaatc okii'waapamaawaan Ciisahsoon eshikihci-inentaakosinitc, i'i kaye niishin kaakii'wiici​kapawihtaakonitc. 33 Aasha tahsh kekaa ewii'ani​nakanikonitc, Piitar o'o okii'inaan Ciisahsoon: "Tepencikeyan, aahpici hsa mii 'i kwayahk o'omaa kaa-ayaayank, kiishpin ishimihsawentaman, nihsin akawaahte'ikanan ninka​patahkitoomin, kiin peshik ciayaayan, Moosihs kaye peshik, Ilaaica kaye peshik," kii'ihkito. (Kaawiin iitok okii​kihkentansiin aaniin kaa'ihkitotc.) 34 Mekwaa tahsh ehkakitotc, wahkwiini okii'akawaahteshkaakonaawaa. Kihkino'amawaakanak itahsh kiihsekisiwak ekii'aakawishkaakowaatc wahkwiini. 35 Miitahsh kaakii'noontawaawaatc awiyan wahkwiink e'onci​kiikitonitc: "Mii ohsha wa'a Ninkosihs, kaakii'onaapamak; pisintawihk." 36 Ahpii tahsh awiyan kaa'ishkwaa​kiikitonitc, Ciisahsoon ehta imaa kii'ayaawan. Kihkino'amawaakanak kaawiin kii'noontaatihsiiwak. Kaawiin kaye awiyan okii'wiintamawaahsiwaawaan o'o kaakii'inaapihshinowaatc. 37 Miitahsh o'o kaa'ishihsenik e'aniwaapaninik ahpii Ciisahs, i'i kaye nihsin okihkino'amawaakana' ishpatinaank ehpionci​niihsaciwewaatc. Kiihpaahtiinowa' pemaatisinitc kaakii'nakishkaakowaatc. 38 Peshik tahsh ininiwan i'imaa mekweya'ii eshi​paahtiinonaaniwaninik kii'onci​kishiiwe​kiikitowan ekii'ihkitonitc: "Okihkino'amaake, kipakohsenimin cikanawaapamatc ninkosihs, mii ehta 'awe niniicaanihs. 39 Ketahto onihtaa​otihtinikoon ini maciahcaahkwan, miihsh eshishaakowetc. Ocipiniko kaye piinihsh ehpiihtewaninik otoon. Owiihsakentami'ikoon kaye, kaawiin nanaash cipooni'ikotc. 40 Nintaanakiihpakohsenimaak kikihkino'amawaakanak cisaakicinisha'waawaatc ini maciahcaahkwan, kaawiin tahsh okiih​kashki'aahsiwaawaan," okii'ikoon. 41 Ciisahs tahsh kii'ihkito: "Etatawe kaawiin kitepwehtansiim, kaawiin kaye kwayahk kitishiayaahsiim! Kaanaka naa minihk kewiiciiwinakookipan? Kaanaka naa miina kitaashashiipenimininim?" Miitahsh Ciisahs kaa'inaatc ini ininiwan: "Piitamawihshin o'omaa a'a kwiiwisenhs." 42 Miitahsh kaakiih​piishaanitc ini kwiiwisenhsan. Miihsh kaakii'otihtinikonitc maciahcaahkwan mitahkamik ekii'ishi​kawiwepinikonitc, tako kaye ekii'ocipinikonitc. Ciisahs tahsh okiih​kanoonaan ini maciahcaahkwan. Miitahsh shemaak kaa'ishi​saaka'aminitc. Shemaak tahsh kii'minoayaawan ini kwiiwisenhsan. Miihsh kaa'ishimiinaanitc ini oteteni. 43 Kahkina tahsh i'imaa kaakii'ayaawaatc kii'maamahkaatentamook aaniin ehpiihci​kihci-inentaakosinitc Kishemanitoon. Mekwaa tahsh awiya' emaamahkaatentaminitc o'o kahkina Ciisahs kaakii'ishihciketc, miihsh o'o kaa'inaatc okihkino'amawaakana'. 44 "Weweni pisintawihshik o'o kaawii'ininakook, Inini oKosihsan ohsha tashi​pakitinikaasowan ininiihkaank," okii'inaa'. 45 Kihkino'amawaakanak itahsh kaawiin okii'nihsitohtansiinaawaa o'o ihkitowin, kaawiin aaniihsh o'o kii'ishi​miinikoowisihsiiwak cinihsitohtamowaatc o'oweni. Kiihshaakwenimowak kaye cikakwecimaawaatc o'oweni. 46 Kihkino'amawakanak itahsh kii'maacii​kihcikakanoonitiwak awenen a'a mayaa kehci-inentaakositc. 47 Ciisahs tahsh okiih​kihkentaan aaniin enentaminitc. Miitahsh kaakii'otaahpinaatc apinoonciishan ekii'niipawi'aatc ciwiicikaapawihtaakotc. 48 Miitahsh o'o kaa'inaatc: "Awenen iko kewiici'aatc peshik o'o apinoonciisha', niin onci e'onci-ishihciketc, mii peshikwan keniin e'ishiwiici'itc. Awenen ihsa waaci'ikwen, kaawiin niinehta niwiici'ikohsii, iniweniwan ihsa owiici'aan Kishemanitoon, miiwan ini kaapi-ishinisha'omitc. Awenen hsako maawac pankii enentaakosikwen kaatahshiyek, mii hsa 'awe kehci-inentaakositc," okii'inaa'. 49 Miitahsh kaa'ishi​kanoonikotc ini Cwaanan (John): "Okihkino'amaake, ninkii'waapamaanaan peshik inini ehsaakicinisha'amawaatc maciahcaahkwa' e'ahpimotc kitishinihkaasowin. Intawaa tahsh ninkii'onci'aanaan, aaniihsh kaawiin kipapaawiiciiwikohsiinaan," okii'ikoon. 50 Ciisahs itahsh o'owe okii'inaan: "Keko onci'aahkek. Awiya kaanakaashkawihsinowinankitc ohsha kiwiici'ikonaan," okii'inaan. 51 Aasha tahsh kekaa e'ocihcihsenik Ciisahs ci-ishiwinintc kihcikiishikonk, kii'inentam ewii'ishaatc Ceroosalamink (Jerusalem). 52 Okii'niikaaninisha'waa' tahsh keniniikaanaacimonitc kaawii'ani-ishaatc ci-ishaanitc Sameriya (Samaria) ahkiink cikwayaancihtamaakotc kahkina kekoon. 53 I'i tahsh pemaatisinitc i'imaa eyaanitc kaawiin okii'minwaapamikohsii', aaniihsh kii'mihci​pimiayaa i'imaa ekii'ishaatc Ceroosalamink. 54 Ahpii tahsh kihkino'amawaakanak Ciimis (James) a'a kaye Cwaan (John) ewaawaapantamowaatc o'o mii 'i kaa'ihkitowaatc: "Tepencikeyan, kinantawenimihshinaam ina cikanootamaank ishkote cipioncinaashiimakahk kihcikiishikonk kenihshiwanaaci'ikowaatc?" 55 Ciisahs tahsh kiihkwehkihtaa ekiihkishii​kanoonaatc, [ekii'inaatc: "Kaawiin kikihkenimaahsiwaawaa eshiayaanitc Kishemanitoo otAhcaahkwan wenci​tipentaakosiyek, aaniihsh niin Inini oKosihsan kiihpiishaawan cipi​pimaaci'iwenitc, kaawiin wiin cinihshiwanaaci'iwenitc," okii'inaa'.] 56 Miitahsh pahkaan eyaawinik kaakii'ishaawaatc. 57 E'anipimiayaawaatc itahsh miihkanaank, peshik ininiwan okii'ikoon: "Kihkino'amaake, kikawiiciiwin aanti piko keishaayan." 58 Miitahsh o'o Ciisahs kaa'ishinahkwehtawaatc: "Iki waakohshak owaashiwak, iki kaye pinehshiinshak owasihswaniwak. Niin tahsh Inini oKosihsan kaawiin nintayaahsiin aanti keshi​pimihshinaan cianwehshinaan," kii'ihkito. 59 Ciisahs tahsh kotak ininiwan okii'inaan: "Piminisha'ohshin." Miihsh kaa'ishi​nahkwehtaakotc: "Pakitinihshin pinamaa cikiiweyaan ciantawi​na'inak nintete." 60 Miihsh o'o Ciisahs kaa'ishi​nahkwehtawaatc: "Taka wiinawaa piko okatashiihkaanaawaa cina'inaawaatc otinawemaakaniwaa' kaawii'niponitc, kiin itahsh wiin maacaan cipapaawiintamaakewatc Kishemanitoo otookimaawiwin," okii'inaan. 61 Miinawaa tahsh awiyan okii'ikoon: "Tepencikeyan, kikapiminisha'on. Pinamaa tahsh nihtam pakitinihshin cikiiweyaan ciawi​pooshoo'akwaa nintaawinink eyaawaatc," okii'ikoon. 62 Miihsh Ciisahs kaa'ihkitotc: "Piko awiya kaamaacii​ompwehkamikipiciketc kiishpin itahsh ishi​aapanaapitc kaawiin tateahpiihtentaakosihsii Kishemanitoon oTipencikewininiink cishi​aapatisitc."

Lok 10

1 Ahpii kaaTipenciketc kaa'ishkwaa​kakanoonaatc, miihsh kaakii'onakimaatc niishwaahsimitanashiniishin (72) ininiwa' cineniishinitc cikii​niikaani​ayishaanitc misiwe ootenaahkaank, ayaawinink kaye wiin iko waa'ani-ishaatc. 2 O'o ekii'inaatc: "Paahtiinat kemanishikaatekipan, aahpici tahsh akaahsiinowak otanohkiik. Kakwecimihk Kishemanitoo kaatipentank manishikewin ci-ishinisha'waatc otanohkii' cimaamooshakinikenitc okihtikewinink. 3 Miitahsh ishi​maacaak. Mii 'i eshinaakosiyek taapishkoo maanahcaanihshak kaaishaawaatc mekwe ma'iinkanihkaank. 4 Keko maaciitoohkek kishooniyaawashiwaan, kipiina'ikaniwashiwaan kaye, kaakikishkamek ehta kimahkisiniwaan kikamaaciitoom. Keko kipihciihkek ciontamwewehtooyek kiishpin awiya nakishkawek. 5 Aanti tahsh iko keshi​piintikeyek waahkaa'ikanink, mii 'owe nihtam keihkitoyek: 'Kikashawentaakosim o'omaa waahkaa'ikanink eyaayek.' 6 Kiishpin tahsh minowiiciiwinekwaa i'imaa kaa-ayaawaatc waahkaa'ikanink, i'imaa ishinakatamok i'iwe kaakii'ihkitoyek kiipipiintikeyek: 'Pisaan pimaatisik.' Kiishpin tahsh inaatisihsikwaa i'imaa waahkaa'ikanink, kiiwe​otaahpinamok i'iwe kaakii'ihkitoyekipan. 7 Miihsh i'imaa kaakii'ishi​piintikanikooyek keshi​ayaayek, pisaan iko inancikek, ishiminihkwek kaye aaniin iko enahshamikooyek, aniihsh citipa'amawintipan awiya kaa-anohkiitc. Keko wiin paapiintikehkek pepahkaan waahkaa'ikanihkaank. 8 Aanti piko ootenaahkaank eshi​piintikeshkaayek, kiishpin tahsh iki pemaatisiwaatc ineniminekwaa pisaan cipiishaayek, pisaan iko miicik kekoon keahshamikooyek. 9 Minwaaci'ihkwak kaa-aahkosiwaatc i'imaa ootenaank kaa-ayaawaatc o'o cishi​wiintamawekwaa: 'Aasha kipehshwaapantamowaam Kishemanitoo citipeniminek.' 10 Ahpii tahsh anipiintikeshkaayek ootenaank, awiyak tahsh inentansikwaa i'imaa cipiishaayek, miihkanaank ishaak o'o ci-ihkitoyek: 11 'I'i hsa kaapaashkinehsek kitootenaamiwaank kaa-akohkek nisitinaank nintooci​paahpaawisitehshimoonomin cionci​kihkinawaacinaakohtooyaank enaatisiyek. Keko tahsh waniihkehkek aasha ehpehshwaapantamowek Kishemanitoo citipeniminek.' 12 Kiwiintamawininim ahpii tipaahkonikewikiishikahk Kishemanitoo nawac okakoohpaasinaan i'i Swaatam (Sodom) ahpiihc wiin i'i ootenaani." 13 "Kiinawaa Kwaraasin (Chorazin) kaa-ayaayek kikaocaanimisim. Kekiinawaa kikaocaanimisim Pehseta (Bethsaida) kaa-ayaayek. Kiishpin ini kaawaapantamek maamahkaacihcikewinan kiinaakohcikaatekopanenan i'imaa ootenaank Tayarink (Tyre), Saaitanink (Sidon) kaye, aasha mewisha otaakiih​pihsihkaanaawaan kaa-ahsapiiwekaninikin kaye mewisha otaakiih​piiwiwepinaanaawaa piinkwiini ohtikwaaniwaank cinaakohtoowaatc kaakiih​kwehkaatisiwaatc. 14 Maamihkawik itahsh o'o: Ahpii tipaahkonikewi​kiishikahk, Kishemanitoo nawac oka​koohpaasinawaa' i'i Tayarink, Saaitanink kaye kaaishi​ayaanitc ahpiihc kiinawaa. 15 Kiinawaa tahsh Kaparniyamink (Capernaum) kaa-ayaayek; kikii'inentaam ina ewii'ishpenintisoyek kihcikiishikonk inahke maawac cikihci-inentaakwahk kitootenaamiwaa? Weti onipook kaashi​ayaawaatc kikaishi​wepinikoom." 16 Miihsh Ciisahs kaa'inaatc okihkino'amawaakana': "Awenen iko kepisintawinek, niin kaapisintawitc. Awenen iko kaa-aanaweniminek, niin ohsha kaa-aanawenimitc. Awenen itahsh iko kaa-aanawenimitc otaanawenimaan iniweniwan kaapiicinisha'omitc," kii'ihkito. 17 Iki tahsh niishwaahsimitanahshiniishin ininiwak kaahpikiiwewaatc wiinke kiihpi​ciihkentamook ekii'ihkitowaatc: "Tepencikeyan, maciahcaahkwak hsa kiihpatapiiwak cisaaka'amowaatc ahpii kiikanoonankitwaa kiwiinsowinink onci," kii'ihkitowak. 18 Miitahsh Ciisahs kaa'inaatc: "Ninkii'waapamaa Setan (Satan) kihcikiishikonk e'onci​pankihshink taapishkoo kaanaashahkiiyaahtehsek ekii'ishinaakositc. 19 Pisintawihshik, kikii'miinininim ohsha kashki'ewisiwin citahkohkaanekwaa kaakohtaanentaakosiwaatc kinepikook, iki kaye osowiwaank kaaonci​ciihsowewaatc, kaye tahsh cishaakoocihtooyek misiwe eshi​mashkawisiitc a'a Setan kaanakaaniwetc. Kaawiin kekoon kikawiihsakaahpinanikohsiim. 20 Keko tahsh wiin onci​ciihkentankek ehpisintawinekwaa maciahcaahkwak, nawac onci​minwentamok kiwiinsowiniwaan e'oshi'pii'ikaatekin kihcikiishikonk." 21 Miitahsh i'i peshikwan tipa'ikan Ciisahs okii​ciihkentamoshkaakoon Kishemanitoon otAhcaahkoni. Miihsh kaa'ihkitotc: "NinTete, miikwehc kitinin, kaatipentaman kiishik, ahki kaye, aaniihsh kaawiin kikiih​kihkentamoonaahsiik ono kekoonan ikiweniwak kaakakiihtaawentamowaatc kaakihkentaahsowaatc kaye, iki tahsh wiin aahpici kaakihkentansikwaa kekoon kikii'waapanta'aak. NinTete, mii 'owe eshi​minwaapantaman." 22 Miitahsh kaa'ani-ihkitotc: "NinTete tahsh kahkina kekoonini ninkii'miinik. Kaawiin awiya okihkenimaahsiin ini oKosihsimaan, mii ehta a'a Kaaoyoohsimintc. Kaawiin kaye awiya okihkenimaahsiin ini Kaaoyoohsimimintc, mii ehta a'a oKosihsimaa. I'i tahsh ehta kaye kaainentank oKosihsimaa cikihkentamoonaatc." 23 Ciisahs okiih​kwehkikaapawihtawaa' okihkino'amawaakana' e'inaatc: "Etatawe kiinawaa kishawentaakosim ewaapantamek o'o kaawaapantamek. 24 Kiwiintamawininim pipaahtiinowak Kishemanitoon kenootamawaawaatc, iki kaye kihciokimaak ekii'ishi​mihsawentamowaatc ciwaapantamowaatc noonkom kiinawaa kaawaapantamek, kaawiin itahsh okii'waapantansiinaawaa. Kaye tahsh cinoontamowaatc kekoonan kiinawaa kaanoontamek, kaawiin tahsh okii'noontansiinaawaa," okii'inaan. 25 Peshik tahsh kaakihkino'amaakenitc Onahshowewin okiihkakwe​wanikiishwe'ikoon ekii'ishi​kakwecimikotc: "Okihkino'amaake, aaniin keishihcikeyaan ciayaayaan kaakike​pimaatisiwin," okii'ikoon. 26 Miihsh Ciisahs kaa'inaatc: "Aaniin tahsh eshipii'ikaatek i'i kehte​Onahshowewin? Aaniin eshinihsitohtaman?" 27 Miitahsh kaa'ikotc: "Kitaa​saaki'aa Tepenciketc kiKishemanitoom i'imaa misiwe kite'ink, i'imaa kaye misiwe kitahcaahkonk, i'imaa kaye misiwe kimashkawisiiwinink, i'imaa kaye misiwe kinaakatawentamowinink. Cisaaki'aatc kaye kiicipimaatis taapishkoo kaashi​saaki'itisoyan," okii'ikoon. 28 Miihsh Ciisahs kaa'inaatc: "Kwayahk kitishinahkwehtam. Mii 'owe ishihciken, miihsh ciayaayan pimaatisiwin," okii'inaan. 29 Ini tahsh kaakihkino'amaakenitc Onahshowewin kiiwiihkakwe​kehcina'owan, miihsh kaa'ishi​kakwecimikotc: "Awenen tahsh a'a niicipimaatis?" 30 Miitahsh o'o Ciisahs kaa'inaatc: "Peshikwaa inini Ceroosalamink (Jerusalem) kii'onci​maacaa ekii'ishaatc Cerahkoo (Jericho) ootenaank. Mekwaa tahsh ehpimi​ayaatc okimoocishka' okii'otihtinikoo' ekii'mahkamikotc, kaakiih​kikishkank kaye ekii'mahkamintc, kaye tahsh ekiih​pahpahkihte'okotc. Miihsh kaa'ishi​nakanikotc, ekii'aapihtoonipotc. 31 Na'itaak tahsh anami'ewikimaa kewiin kiihpipima'atoo i'i miihkanaani. Ahpii tahsh e'waapamaatc ehpimihshininitc ini kaakii'miikaacikaniwinitc, mii 'i nahpaac inahke kaa'ishi​wemaashkawaatc. 32 Miitahsh kewiin a'a anami'ewanohkii'aakan Liipayink (Levite) wentahkaanesitc okiihpi​otihtaan i'imaa. Ahpii tahsh ewaapamaatc ehpimihshininitc ini ininiwan, mii 'i kewiin nahpaac inahke kaa'ishi​wemaashkawaatc. 33 Peshik tahsh inini Sameriya (Samaria) wenciitc ehpimi​ayaatc i'imaa miihkanaank okiihpi​otihtaan eshi​pimihshininitc ini ininiwan. Ewaapamaatc itahsh okiih​koohpaasinawaan. 34 Miihsh kaakii'naasihkawaatc epimihshininitc. Okiih​siikinaan shoominaapooni, pimiteni kaye ekii'aapacihtootc ekiih​poosinaatc kaaishi​nameyaahpinanimintc. Miihsh kaye kaa'ishi​siitoohpinaatc, ekii'ani​wakicishimaatc i'imaa mihtatimoonhsink. Okii'ishiwinaan kaye kapehshiiwikamikonk, ekii'awi​naanaakaci'aatc. 35 Ahpii tahsh e'ani​waapaninik ewii'ani​maacaatc, okiih​kitinaa' niishin (2) waapaapihko​shooniyaanhsa' ekii'miinaatc kaakanawentaminitc kapehshiiwikamik ekii'inaatc: 'Kwayahk kanawenim. Ahpii tahsh pikiiweyaan pikipihciiyaan o'omaa, kikatipa'amawin aaniin minihk kemehtinike'ihk ehkanawenimatc, okii'inaan.' " Mii 'i Ciisahs kaa'inaacimotc. 36 Miitahsh Ciisahs kaa'ishikakwecimaatc: "Aaniin kiin enentaman ikiweniwak nihsin (3) kaakiihpimi​ayaawaatc, awenen a'a kaakiih​tootank taapishkoo ewiicipimaatisiimaatc iniweniwan ininiwan kaakiimiikaanikonitc okimoocishka'?" okii'inaan. 37 Miitahsh kaa'ikotc: "A'awe hsa kaakiih​koohpaasinawaatc ini ininiwan," okii'ikoon. Miihsh Ciisahs kaa'inaatc: "Mii 'i anishi​maacaan, peshikwan o'o ci-ishihcikeyan," okii'inaan. 38 Ciisahs tahsh okihkino'amawaakana' kaye mekwaa ehpimi​ayaawaatc okiihpi​otihtaanaawaa ootenawenhs. Mii 'imaa kaakiih​piintikanikotc ihkwewan Maarhta (Martha) eshinihkaasonitc. 39 Maarhta kii'ayaawan wiicihkwen Meri (Mary) eshinihkaasonitc. Miiwan ini kaakii'apinitc eshisitepinitc kaaTipencikenitc ehpisintaawaanitc aaniin eshi​kihkino'amaakenitc. 40 Maarhta kiionci​ocaanimentam wiin ehta cianohkiitc ehpamiihtaaketc. Pehsho kiihpiishaa ekiihpi​'ihkitotc: "Tepencikeyan, kaawiin ina kekoon kitinentansii ewiici'ihsik nicihkwe o'owe anohkiiwin kaatootamaan. Wiintamaw cipi​wiici'itc," kii'ihkito. 41 Miihsh kaaTipenciketc kaa'ishi​nahkwehtawaatc: "Maarhta, Maarhta, etatawe niipiwa' kekoon kimikoshkaaci'ikon, ewanashkwe'ikoyan kaye. 42 Peshik ehta shaakooc kekoon niikaanentaakwan. Meri tahsh wiin okii'otaahpinaan ewii'ishihciketc kaaminonaakwaninik, kaawiin tahsh tamahkamaahsii i'iweni," okii'inaan.

Lok 11

1 Aapitink tahsh Ciisahs kii'anami'aa peshik ayaawinink. Ahpii kaa'ishkwaa-anami'aatc peshik okihkino'amawaakanan okii'ikoon: "Tepencikeyan, kihkino'amawihshinaam aaniin keshi​anami'aayaank taapishkoo Cwaan (John) kaakii'ishi​kihkino'amawaatc okihkino'amawaakana'." 2 Miitahsh kaa'inaatc: "Ahpii anami'aayek, mii 'owe keihkitoyek: Kaaoyoohsimikooyan, Kahkina awiyak okakihci-inentaanaawaa kitishinihkaasowin, Pioshihsitoon kiTipencikewin. 3 Miishihshinaam entahso​kiishik keonci​pimaatisiyaank. 4 Poonentamawihshinaam kaye nimacitootamowininaanin, Aaniihsh niinawint nimpoonentamawaanaanik, ikiweniwak kaawanitootawiyamintwaa. Keko ishiwishihshinaahkaank kakweci'ikoowinink." 5 Miitahsh Ciisahs kaa'inaatc okihkino'amawaakana': "Kiishpin o'omaa kaatahshiyek peshik ayaawaakwen kaasaaki​wiiciiwaatc, anta​waapamaatc itahsh owaahkaa'ikaniniink aapihtaa​tipihkaninik o'o inaatc: 'Kaasaaki​wiiciiwinaan, taka awi'ihshin nihsin (3) pahkweshikanak? 6 Nisaaki​wiiciiwaakan ohsha kiihtakohshin ehpimi​ayaatc, kaawiin tahsh kekoon nintayaahsiin keahshamak,' e'inatc. 7 O'o tahsh kiicipimaatis piintik matweonci​kanoonihk: 'Keko mikoshkaaci'ihshihken. Ishkwaantem aasha ninkiih​kipa'aan. Aasha kaye ninkiih​kawihshimomin nintapinoonciishimak. Kaawiin ninka​wanishkaahsii cimiininaan kekoon,' e'inihk. 8 Miitahsh eshi​wiintamawinakook, kaawiin iitok tainentansii ciwanishkaatc cimiinihk kekoonini mihsawaa iko esaaki​wiiciiwihk. Shaakooc itahsh tawanishkaa cimiinihk aaniin eshi​noontehsewatc aaniihsh kaawiin kipakiciiwaahsiin ehkakwecimatc. 9 "Miitahsh eninakook: Kakwetweyek ihsa, kikamiinikoom. Nanaantonikeyek, kikamihkikem itahsh. Matweaahkwa'ikeyek, kikapaahkintenamaakoom itahsh. 10 Awenen a'a kaakakwetwetc, mii 'awe kemiinintc. A'a kaananaantoniketc omihkaan. Kaye 'awe kaapaahpaawa'iketc tapaahkintenamawaa. 11 Kiinawaa kaaotetemaawiyek kiishpin kikosihs kakwecimihk kiikooyan, meskwac ina kitaa​miinaa kinepikoon? 12 Komaa kaye kikosihs kakwecimihk waawan, meshkwac ina kitaamiinaa kaaciihsowenitc manicoohshan? 13 Nashke kiinawaa aana​ishimaci-ininiiwiyek, eniwehk kikihkentaam kaaonishihshininikin keishi​miinekwaa kiniicaanihsiwaak. Kehcinaatc awahshime kiTetewaa kihcikiishkonk kaa-ayaatc tamiikiwe otAhcaahkwan, cimiinaatc awenenan iko kekakwecimikotc," kii'ihkito Ciisahs. 14 Ciisahs tahsh okiih​saakicinisha'waan maciahcaahkwan kanihtaawehsinik. Ahpii maciahcaahkwan kaasaaka'aminitc, miihsh ini ininiwan kaakiih​kashkihtoonitc cikakitonitc. Iniweniwa' tahsh kaapaahtiinonitc kiikihci​maamahkaatentamoo'. 15 Aaninta tahsh kii'ihkitowa': "Kihciokimaa maciahcaahkwan Pi'elsipoloon (Beelzebul) ohsha omiinikoon mashkawisiiwin cisaakici​wepinaatc maciahcaahkwa'," kii'ihkitowa'. 16 Kotak itahsh okiih​kakweci'ikoo' ekiih​kakaansomikotc Ciisahs cimaamahkaacihciketc kihcikiishikonk cipi​onciinik. Cinaakohtootc Kishemanitoon ekii'onaapamikotc. 17 Ciisahs tahsh okiih​kihkenimaa' aaniin enentaminitc, miitahsh kaa'inaatc: "Kiishpin hsa tipencikewinink awiyak kaa-ayaawaatc wiihpepahkaanihtoowaatc cimiikaatiwaatc, aahpici wiipa tanihshiwanaatan i'i tipencikewin. Kiishpin kaye taawin pepahkaani'itisoomakahk aahpici wiipa tapankihsin. 18 Kiishpin Setan (Satan) kaatashi​okimaawitc maamiikaatinaaniwaninik, aahpici wiipa tapankihsinini. Kitishim itahsh kaye e'miishitc Pi'elsipol mashkawisiiwin kaaonci​saakici​wepinimak maciahcaahkwa'. 19 Kiishpin itahsh iinsan wiici'itc Pi'elsipol kiisaakici​wepinimak maciahcaahkwa', aanti tahsh iki kaapiminisha'onekwaa wentinamowaatc mashkawisiiwin cisaakici​wepinaawaatc maciahcaahkwa'? Iki hsa kaapiminisha'onekwaa onaakohtoonaawaa kiinawaa aanihshaa e'ishiyek. 20 Kiishpin itahsh wiin aapacihtaawak Kishemanitoo omashkawisiiwin esaakicinisha'wakwaa iki maciahcaahkwak, miitahsh iinsan kehcinaac e'otihsikowek Kishemanitoo oTipencikewin. 21 "Ahpii kaamashkawisiitc inini, weweni piko ehkikiitc omiikaasoowi​aapacihcikanan ehkanawentank owaahkaa'ikan, kaatipentank pisaan ayaaniwan. 22 Kaawiin kaye awiya otaa​kashkihtoohsiin cipiintiketc cikii​mahkamaatc otaya'iimini owaahkaa'ikaniniink ini kaamashkawisiinitc ininiwan. Pinamaa ehta tahkopinaatc ini ininiwan mii 'i paanimaa cikashkihtoohpan cikii​mahkamaatc otaya'iimini owaahkaa'ikaniniink. 23 Awenen hsa piko kaawiiciiwihsik mii 'awe kaanakaashkawitc, awenen kaye kaawiici'ihsik kiimaawantoonikeyaan, mii 'awe iinsan kaaohswe​wepiniketc." 24 "Ahpii maciahcaahk kii'onci​saakici​wepinikaniwitc ininiink, mii 'i misiwe eshi​papaami​ayaatc pikwatahkamik kaaishi​paahtenik ehkakwe​mihkank aanti keshi​anwepitc, kaawiin tahsh kekoonini omihkansiin. Miitahsh ehkitotc: 'Ninka​kiiwe niwaahkaa'ikanink aanti kaakii'onci​saaka'amaan.' 25 Miitahsh eshi​kiiwetc e'mihkank owaahkaa'ikan wiinke ekiih​pehkihcikaatenik, kaye tahsh ehsakahkihcikaatenik. 26 Miitahsh eshikiiwe​takohshink ehtako​piinaatc niishwaahso maciahcaahkwa' nawac e'macaatisinitc ahpiihc wiin. Miitahsh eshi​piintikewaatc i'imaa e'ishitaawaatc. A'a tahsh inini nawac kihci-ishiayaa ahpiihc wiin kaakii'ishi​ayaahpan nihtam." 27 Mekwaa tahsh Ciisahs o'o e'ihkitotc, peshik ihkwewan okii'onci​kanoonikoon i'imaa mekweya'ii eshi​paahtiinonaaniwaninik e'ikotc: "Kaanaka ehpiihci​shawentaakosikwen a'a ihkwe kaakii'nihtaawiki'ihk, kaakii'nooni'ihk kaye," okii'ikoon. 28 Miihsh o'o Ciisahs kaa'ishi​nahkwehtawaatc: "Nawac iitok iki shawentaakosiwak kaanoontamowaatc Kishemanitoon ehkitonitc, kaye tahsh kaana'ihtamowaatc." 29 Ahpii tahsh awiya' aanciihke e'ani​paahtiinonitc, Ciisahs kii'ani-ihkito: "Aahpici maci-inahke, anoociko kaye ishipimaatisiwak noonkom kaapimaatisiwaatc, mii ehta ko eshihcikewaatc e'nanaanta​waapantamowaatc maamahkaacihcikewinan. I'iweni tahsh ehta maamahkaacihcikewin kewaapantamowaatc, taapishkoo Coona (Jonah) kaakii'ishi​maamahkaacihsetc. 30 Taapishkoo Coona kaakii'inwaanintc maamahkaacihcikewinink keonci​waapinitc kaakii'ayaanitc Ninipa (Nineveh) kihci​ootena, miihsh kewiin peshikwan ini Inini oKosihsan keonci​waapancikaasonitc o'o noonkom kaapimaatisiyank. 31 Ahpii tahsh tipaahkonikewi​kiishikahk kihciokimaahkwe shaawanonk kaakii'onciitc tapasikwii cianaamiminek. Aaniihsh wiin waahsa kiihpi-ishaa otahkiimink ekiihpi​onciitc ewii'noontank Swaalamanan (Solomon) eshi​kakiihtaawi​kihkino'ikenitc. Kiwiintamawininim itahsh nawac kehci-inentaakositc awiya ayaa o'omaa noonkom ahpiihc wiin a'a Swaalaman. 32 Ahpii tipaahkonikewi​kiishikahk pemaatisiwaatc Ninipa ootenaank kaaonciiwaatc tipaahkonitiwinink taishaawak cianaamiminekwaa noonkom kaapimaatisiyek. Kiihkwehkaatisiwak iitok wiinawaa ahpii enoontawaawaatc Coonawan ehkakiihkwenitc. Tepwe tahsh o'o kaaininakook, kitayaawaawaa awiya nawac kehci-inentaakositc ahpiihc wiin a'a Coona," kii'ihkito Ciisahs. 33 "Awiya kiisahka'ank waahsahkonencikan kaawiin otishi​ahtoohsiin i'imaa anaamimahkahk. I'imaa hsa otishi​ahtoon waahsahkonencikanaahtikonk ciwaapinitc iniweniwa' kaapi​piintikenitc e'waahseyaanik. 34 Kishkiinshikoon hsa taapishkoo waahsahkonencikan ishinaakwanoon e'waahsenamaakoyan kiwiiyawink. Ahpii kishkiinshikoon minoayaamakahkin misiwe kiwiiyawink mooshkinemakan waahseyaa. Kiishpin tahsh kwayahk anohkiimakahsinokin kishkiinshikoon, misiwe iinsan kiwiiyawink mooshkinemakan wanitipihkan. 35 Ayaankwaamisin tahsh i'iwe kaawaahseyaak kaakikishkaakoyan citinowansinok kaakashkii​tipihkahk. 36 Kiishpin misiwe kiwiiyawink mooshkinemakahk waahseyaa, awaac iko pankii ayaahsinok kaakashkii​tipihkahk, mii'i misiwe cimooshkinek waahseyaa kiwiiyawink taapishkoo waahsahkonencikan kaapakahkaahtek kaawaahtenamaakoyan." 37 Kaa'ishkwaa​kakitotc tahsh Ciisahs, peshik Perahsiin (Pharisee) okii'antomikoon ewii'wiici​wiihsiniimikotc. Miihsh kaa'ishi-ishaatc ekii'awi​onaapitc ciwiihsinitc toohpowinaahkonk. 38 Wiinke tahsh ini Perahsiin kiikoshkwentamoon ewaapamikotc pinamaa ehkisiininciihsik cipwaa wiihsinitc. 39 Miitahsh kaaTipenciketc kaa'inaatc: "Tepwe hsa kiinawaa Perahsiik kikisiiyaapihkinaanaawa saakicaya'ii nahke onaakan i'i kaye minihkwaakan, piincaya'ii tahsh e'mooshkinemakahk onsaamisiwin, i'i kaye macaatisiwin. 40 Aaniin ehpiihci​kakiipaatisiyek? Kishemanitoo iitok kaakii'oshihtootc saakicaya'ii kaa-ayaanik, i'iweni kaye piincaya'ii kaa-ayaanik. 41 Miinihkwak itahsh kaakitimaakisiwaatc i'iweni eyaanik piincaya'ii kiminihkwaakaniwaank, kitoonaakaniwaank kaye, miitahsh kahkina kekoon cipehkinaakwahk kiinawaa onci. 42 "Kika​ocaanimisim, kiinawaa Perahsiik, emiikiweyek peshik kekoon entahso​mitaahcink kaanihtaawikihtooyek takosehkwaanan, mint (mint), i'i kaye oroo (rue) tino. Kaawiin itahsh kipapaapisihskentansiim Kishemanitoo osaaki'iwewin, aaniin kaye weweni enaahkoniketc. Mii hsa 'i keishihcikeyekipan, kaawiin wiin kaye ciaansweyaapamekwaa kotak awiyak. 43 "Kika​ocaanimisim kiinawaa Perahsiik, esaakihtooyek e'ishi​apiyek kaakihtakintek apiwin anami'ewikamikonk, kaye tahsh e'minwentamek kiipooshoo'ikooyek citako​kihtenimikooyek i'imaa kaatashi​ataawenaaniwank. 44 Kika​ocaanimisim, kiinawaa kitishinaakosim taapishkoo kaakihkinawaacihcikaatehsinokin ninkwa'ahkaanan. Pemaatisiwaatc tahsh i'imaa e'ishi​pimohsewaatc ekihkentansikwaa," kii'ihkito. 45 Peshik tahsh kaamisiwe​kihkentaminitc onahshowewin okii'ikoon: "Okihkino'amaake ahpii o'oweni kii-inatwaa Perahsiik keniinawint ohsha nintoonci​macihtaamin," okii'ikoon. 46 O'o tahsh Ciisahs okii'ishi​nahkwehtawaan: "Kekiinawaa kikaocaanimisim kaamisiwe​kihkentamek onahshowewin, aaniihsh kitoonahtamawaawaak pemaatisiwaatc kaakosikwaninikin kepimiwitoowaatc, kaawiin itahsh kiinawaa peshikwaahkoninc kitaapacihtoohsiinaawaa ciwiici'ekwaapan iki kaapimiwitoowaatc kaakosikwaninikin. 47 "Aahpici kikaocaanimisim aaniihsh kimino​naakohtoom kaakii'ishi​na'inintwaa Kishemanitoo kenootamaakotc. Kikehteya'aamiwaapaniik iitok okii'nihsaawaa' i'i okanootamaake'. 48 Kiinawaa iitok kikihkentaam, kitishi​na'entaam kaye aaniin kaa'ishihcikewaatc kikehteya'aamiwaapaniik ekii'nihsaawaatc kenootamaakenitc. Miihsh kaakii'onci​oshihtooyek keshi​na'inintwaa. 49 Miitahsh o'oweni onci Kishemanitoo kekiihtaawentank kaa'onci-ihkitotc: 'Ninka​ishinisha'amawaak hsa kekanootamawimitc, i'i kaye kepimiwitoonitc tipaacimowin. Miiwa' itahsh i'i aaninta kenihsaawaatc.' 50 Inashke tahsh wiinawaa awiyak noonkom kaapimaatisiwaatc oka​pakamishkaakonaawaa i'iweni kaakiihpi​nihsimintc kenootamawaanitc Kishemanitoon ahpii kaakii'oshihcikaatek o'o ahki piinihsh o'o ishiahpii. 51 I'imaa onci ahpii Epal (Abel) kaakii'nihsintc piinihsh itahsh ahpii Sehkaraaya (Zechariah) kaakii'nihsintc i'imaa ishinahsawaya'ii pakitinaahsowinaapihkonk, i'i kaye kaaishi​kohtaanentaakwahk i'imaa piintik Kihcianami'ewikamikonk. Tepwe tahsh o'o kaawiintamawinakook, noonkom kaapimaatisiwaatc oka​pakamishkaakonaawaa i'iweni kahkina kaakiihpi​nihsimintc kenootamawaanitc Kishemanitoon. 52 "Aaniin keahpiihci​ocaanimisiyek kiinawaa kaamisiwe​kihkentamek onahshowewin. Kiinawaa iitok kaakii'otaahpinamek aapaapihka'ikan kaaonci​kihkencikaatek kekoon, kaawiin kiinawaa kikiiwiih​piintikehsiim, ehkipishkawekwaa tahsh iki kaawiih​piintikewaatc." 53 Ahpii Ciisahs kaaonci​maacaatc i'imaa ayaawinink, kaakihkino'amaakenitc onahshowewin, iki kaye Perahsii' okii'maanshi​wiiciiwikoo', ekiih​kakaansomikotc citashintank niipiwa' kekoon waa'onci​kakwecimikotc. 54 Ekiih​pii'ikotc iniweniwa' ewii​kaahcici'ikotc, kiishpin kekoon ishi​wanikiishwetc ewii'onci​kihci​nooci'ikotc.

Lok 12

1 Miitahsh ahpii i'iwe niipiwa' mitaahswaahk ehpi​maawaci'itinitc wiinke ekiih​siincishkotaatinitc kii'ani​tahtahkohkaanitiwa' kaye. Miihsh Ciisahs kaakii'maacii​kakanoonaatc okihkino'amawaakana' ekii'inaatc: "Ayaankwaamisik ci-ishinaakosihsiwek Perahsiik (Pharisees) kaainwaanitisowaatc ominwaatisiik. Taapishkoo ompisikanenhs misiwe kaaishaamakahk anaamink pahkweshikanink, mii 'i eshinaakwaninik opimaatisiwiniwaa. 2 Kekoon hsa piko kaa-akwana'ikaatek tamohshe​naakohcikaate, kekoon kaye kaakiimootentaawahk takihkentaakwan. 3 Aaniin ihsa ko ehkitoyek kiitipihkahk tanoontaakaaniwan kiishikahk. Aaniin kaye eshikiimooci​kiikitoyan pahkehcikanink wakici​waahkaa'ikanihkaank taonci​kishiiwe​tashincikaate." 4 "Miitahsh eninakook, keko tahsh wiin kohsaahkekwaanik iki kaanihtoowaatc wiiyawimaa, ekashkihtoohsikwaa tahsh awahshime ciani-ishihcikewaatc. 5 Kiwiintamawininim itahsh awenen kekohsekipan. Kohsihk Kishemanitoo, wiin iitok kaakashkihtootc kii-ishkwaa​nihsaatc awiyan ci-ishi​wepinaatc maci-ishkotenk. Tepwe tahsh kiwiintamawininim cikohsek Kishemanitoo. 6 Kaawiin ina naanan miskominihkehsiwak niisho​piiwaapihkoonhs inakinsohsiiwak? Shaakooc itahsh kaawiin awaac peshik owaniihkentaakohsiin Kishemanitoon. 7 Inashke tahsh kiinawaa kaatahso​peshikwahkin kiinisihsiwaan kahkina kihkencikaatewan entahsinkin. Keko tahsh kiinawaa sekisihkek, nawac kiinawaa kikihci-inentaakosim ahpiihc wiin iki miskominihkehsiwak!" 8 "Miitahsh eninakook, a'awe hsa kewiinshitc ekihkenimitc enaahsamiinitc pemaatisinitc, mii 'i keniin Inini oKosihsan ninka​wiinaa ekihkenimak enaahsamiinitc Kishemanitoon otencalimini. 9 A'a tahsh wiin kaa-aanawenimitc enaahsamiinitc pemaatisinitc, miitahsh kewiin peshikwan keshi​aanawentaakositc enaahsamiinitc Kishemanitoon otecalimini. 10 "Awiya piko kemaci-inaatc ini Inini oKosihsimaan tapoonentamawaakaniwi. Awiya tahsh wiin maci-inaatc Kishemanitoon otAhcaahkoni kaawiin tapoonentamawaahsii. 11 "Ahpii hsa ishiwinikooyek entashi​maawaci'itiwaatc ewiih​tipaahkoninekwaa enaahsamiiwaatc wekimaawentaakosiwaatc, iki kaye kihciokimaak, keko wiin wawaanentankek aaniin keishi​naatamaasoyek, aaniin kaye keihkitoyek. 12 Kishemanitoo otAhcaahkwan ohsha kikakihkino'amaakowaa aaniin keihkitoyek i'i ahpii." 13 Peshik tahsh ininiwan kii'onci​kiikitowan i'imaa eshi​paahtiinonaaniwaninink ekii'ikotc: "Okihkino'amaake, taka kanoosh niicihkiwensi cinenaawinamawitc i'iweni minihk kekoon kaakii'nakatamawiyamintc nintetenaan ahpii kaakii'ishkwaa​pimaatisitc." 14 Ciisahs tahsh okii'ishi​nahkwehtawaan: "Niicipimaatis, awenen kaa'inakimitc citipaahkoniweyaan, komaa kaye cionentamaan aaniin keshi​nenaawinamaatiyek ini kaakii'nakatamaakooyek?" 15 Miitahsh kaa'inaatc kahkina i'imaa kaakii'ayaanitc: "Ayaankwaamisik, kanawenintisok ciayonsaamisihsiwek, aaniihsh kaawiin awiya onci​pimaatisihsii aaniin minihk kekoon eyaatc, mihsawaa ko aana kihci​wenootisitc." 16 Ciisahs tahsh okii'wiintamawaa' o'o awehcikan: "Aapitink kii'ayaa inini ekii'wenootisitc, okihtikewahkamik ekii'mino​nihtaawikihcikemakaninik. 17 Miihsh iinsan kaa'inentank: 'Aaniin tahsh keishihcikeyaan? Kaawiin awahshime nintayaahsiin ahtaahsowikamik keshi​ahtooyaan kaanihtaawikihkin nikihtikewahkamikonk.' 18 Miihsh iinsan kaa'itisotc: 'Mii'owe keishihcikeyaan, ninka​piikopitoonan nintaahtaahsowikamikoon, miihsh cioshihtooyaan kotak nawac cimamihcaakin keshi​kanawentamaan kahkina kaanihtaawikihkin ninkihtikewahkamikonk, ini kaye kotak kekoonan kaatipentamaan. 19 Mii hsa keitisoyaan: "Oowa, etatawe kiminohse, niipiwa' kekoonan e'ayaayan kaaonishihshinkin, kinwesh tahsopipoon wiihkaa cinoontehsehsiwan. Miihsh ishi​mihci​ayayaan, ciwiihsiniyan, ciminihkweyan kaye tahsh ciciihkentaman ehpimaatisiyan," ' kii'ihkito. 20 Miitahsh Kishemanitoon kaa'ikotc: 'Kiin kaakakiipaatisiyan. Noonkom kaawiih​tipihkahk kipimaatisiwin taotaahpinikaate. Awenen tahsh keayaatc iniweniwan kiin kaakiih​kwayaancihtamaasoyan ewii'ayaayan?' " okii'ikoon. 21 Miihsh Ciisahs kaa'ani-ihkitotc: "Mii 'owe keishinaakositc a'awe kaakwayaancihtamaasotc wenootisiwin, kaawiin wenootisihsii enaahsamiinitc Kishemanitoon." 22 Miitahsh o'o Ciisahs kaa'inaatc okihkino'amawaakana': "Keko onci​mikoshkaatentankek kipimaatisiwiniwaan, wekonen kemiiciyek, wekonen kaye keminihkweyek. Keko kaye onci​ocaanimentankek kiwiiyawiwaan, wekonen kaye kekikishkamek. 23 Nawac ohsha pimaatisiwin kihci-inentaakwan ahpiihc wiin miicim, i'i kaye miiyaw nawac kihci-inentaakwan ahpiihc wiin kikishkikanan. 24 Inashke kaakaakiwak kaapapaamihsewaatc, kaawiin kihtikehsiiwak, kaawiin kaye maawacihcikehsiiwak. Kaawiin kaye otayaahsiinaawaa miicimikamik, ahtaahsowikamik kaye. Shaakooc tahsh Kishemanitoon otahshamikowaan. Kaawiin ina kiinawaa awahshime kitahpiihtentaakosihsiim ahpiihc iki pinehshiinshak? 25 Kinwesh ina kitaaonci​pimaatis e'mikoshkaatentaman? Kekeht ina kinwesh tapimaatisi? 26 "Kiishpin tahsh ekashkihtoohsiwek citootamek i'iwe kaa-akaahsink, wekonen tahsh weci​ocaanimentamek kotak kekoonan? 27 Inashke waapantamok waapikwaniin ehpimikihkin. Kaawiin anohkiimakahsinoonan, kaawiin kaye oshihtamaatisoomakahsinoonan kikishkikanan. Kiwiintamawininim itahsh, ampooshke 'awe kihciokimaa Swaalaman (Solomon) aana​kiihkihci​wenootisitc, kaawiin i'i kii'ishi​minonaakwahsininiwan okikishkikanan taapishkoo peshik o'o waapikwan kaaishi​minonaakwahk. 28 Kishemanitoo iitok kaapihcikonayehtootc mashkohsiin eyaanikin pikwacaya'ii. Noonkom kaakiishikahk eyaanikin ini mashkohsiin, waapaninik tahsh e'macohte​wepinikaatekin. Nawac itahsh kiinawaa kikapihcikonaye'ikowaa. Etatawe akaahsentaakwan kitepwehtamowiniwaa. 29 Keko tahsh onci​mikoshkaatentankek wekonen kemiiciyek, keminihkweyek kaye? Keko ocaanimentankek. 30 Miiwan ono mooshak kaananaantone'amowaatc iki kaakihkenimaahsikwaa Kishemanitoon. Koohsiwaa ohsha okihkentaan e'noontehseyek onoweniwan. 31 Nawac tahsh antone'amowaahk otookimaawiwin, kikamiinikoowisim tahsh onoweniwan kaye." 32 "Keko tahsh sekisihkek, kiinawaa kaa-akaahsiinoyek maanahcaanihshenhsak Koohsiwaa ohsha otishi​minwaapantaan cimiininek kekiinawaa citipencikeyek i'imaa oTipencikewinink. 33 Ataawaakek kahkina kitaya'iimiwaan cimiinekwaa tahsh shooniyaan iki kaakitimaakisiwaatc. Kwayaancihtamaasok tahsh shooniyaawashan wiihkaa kenoonte​nihshiwanaatansinokin. Ciahtamaasoyek kaakihci-inentamek kihcikiishikonk wiihkaa keshi​caakihsehsinok. Kaawiin weti okimoocishk taotihtansii, kaawiin kaye miikwanashk oka​nihshiwanaacihtoohsiinan. 34 Aanti hsa piko keayaak kaakihci-inentamek, mii hsa 'imaa keayaakin kite'iwaan." 35 "Kikihkonayek mooshak ciayehpemiiyek, maano ciwaahsahkonekin kiwaahsahkonencikaniwaan. 36 Taapishkoo anohkii'aakanak kaaniipepiwaatc ehpii'aawaatc kaatipenimikowaatc cipikiiwenitc kaakii'ishaanitc kihci​wiitike​wiihsiniwinink. Ahpii tahsh ehpi​takohshininitc ehpi​paahpaawa'ikenitc shemaak iko opaahkintenamawaawaan ishkwaantem. 37 Aahpici hsa tashawentaakosiwak iki anohkii'aakanak mihkaakowaatc kaatipenimikowaatc ehpii'aawaatc cipitakohshininitc. Kiwiintamawininim tahsh, miihsh keshi​pihsihkaminitc aakoopison ewii'ahshamikowaatc. Oka-api'ikowaan tapahsi​toohpowinaahkonk ewiih​pami'ikowaatc ciwiihsiniwaatc. 38 Aahpici hsa tashawentaakosiwak iki anohkii'aakanak e'mihkaakowaatc ehkwayaanciiwaatc, mihsawaa ko aapihtaa​tipihkaninik pitakohshininitc, mihsawaa ko kaye paanimaa nawac naake wiihpi​takohshininitc! 39 Kihkentamok itahsh o'o, kiishpin inini kaatipentank waahkaa'ikan kihkenimaatc ahpii tipa'ikan waahpi​takohshininitc okimoocishkan, kaawiin otaa​pakitinaahsiin ini okimoocishkan cipiikwa'aminitc cipi​piintikenitc owaahkaa'ikanink. 40 Miitahsh peshikwan kekiinawaa keshi​oshiihtaayekipan mooshak, aaniihsh Inini oKosihsan tapi​takohshinoon ahpii tipa'ikanink kepii'imaahsiwek." 41 Piitar (Peter) tahsh kii'ishi​kakwetwe: "Tepencikeyan, niinawint ina piko kaawiintamawiyaank o'o awehcikewin, komaa kaye kahkina awiyak kaawiintamawatwaa?" 42 Miihsh kaaTipenciketc kaa'ihkitotc: "Awenen hsa 'a kwayahk kaakakiihtaawentank anohkii'aakan? Mii hsa a'awe kaamiinikotc otookimaaman kaamaacaanitc, citipenimaatc kotak anohkii'aakana' ciahshamaatc ahpii ocihcihsenik ciwiihsininaaniwaninik. 43 Aahpici hsa tashawentaakosi a'a anohkii'aakan mihkaakotc otookimaaman pikiiwenitc e'ishihciketc kaakii'inanohkii'intipan. 44 Kekeht hsa kitinininim, a'a anohkii'aakan oka​miinikoon otookimaaman kahkina otaya'iimini cinaanaakacihtootc. 45 Kiishpin tahsh wiin a'a anohkii'aakan inentank: 'Kaawiin hsa wiipa tatakohshinsii nintookimaam.' Miitahsh ishimaacii​pahpahkihte'waatc owiitanohkiimaakana' kaaininiiwinitc, i'i kaye kaaihkwewinitc. Miihsh eshi​wiihsinitc, eshi​minihkwetc kaye, tako kaye ehkiiwashkwepiitc. 46 A'a tahsh anohkii'aakan tatakohshinoon otookimaaman ninkotink kiishikaninik ahpii ehpii'aahsik, ehkihkenimaahsik aaniin ahpii tahso​tipa'ikaneyaanik ketakohshininitc. Otookimaaman tahsh oka​piihsishokoon ci-ishiwepinikotc eshi​ayaanitc kaatepwehtansinik. 47 A'a tahsh anohkii'aakan kaakiih​kihkentank otookimaaman aaniin kaashi​nantawenimikotc citootank, ishi​kwayaanciihsik tahsh ciwiih​tootank, eshi​antawenimikotc otookimaaman ci-ishihciketc tawiih​kakwaataki'aa paahtiinwaa cikihci​pahpahshanshe'ontc. 48 A'a tahsh wiin anohkii'aakan kaakihkentansik aaniin eshi​antawenimikotc otookimaaman, tootank itahsh kekoon kekiionci​pahpahshanshe'ontipan, shaakooc pankii ehta tapahshanshe'waa. A'a hsa niipiwa' kaamiinikoowisitc antawenimaa niipiwa' cipakitiniketc. A'a kaye kihci​niipiwa' kaamiinintc antawentaakosi awahshime wiin niipiwa' cipakitiniketc." 49 "Ninkiih​piishaa ewiih​sahka'amaan o'owe ahki, aaniin ehpiihci​mihsawentamaan aasha cipiskanekipan! 50 Ayaa kakwaatakentamowin kaawiih​siika'antaakooyaan, etatawe tahsh nintoonci​mikoshkaatentam ehpiihtooyaan ci-ishkwaahsek. 51 Kitinentam ina ekiih​piitooyaan pisaanisiwin o'omaa ahkiink? Kaawiin pisaanisiwin ninkiih​piitoohsiin, i'i mawineshkotaatiwin ninkiih​piitoon. 52 O'o tahsh ishinoonkom naananiwaatc (5) awiyak peshik taawinink ishitaawaatc tamawineshkotaatiwak. Nihsin (3) iki oka​mawineshkawaawaa' i'i kotak niishin (2) eyaanitc. Iki kaaniishiwaatc (2) oka​mawineshkawaawaa' i'i kaanihsinitc (3). 53 Otetemaa oka​mawineshkawaan okosihsan, okosihsimaa oka​mawineshkawaan oteten. Omaamaamaa oka​mawineshkawaan otanihsan, otaanihsimaa oka​mawineshkawaan omaamaan. Osikohsimaa oka​mawineshkawaan ohshimihsan, ohshimihsimaa oka​mawineshkawaan osikohsan." 54 Ciisahs tahsh okii'inaa' pemaatisinitc: "Ahpii ewaapantamek wahkwi ehpi​saakaanahkwahk ninkaapii'anonk inahke, mii 'i ehkitoyek ewiih​kimiwank, miihsh tepwe eshi​kimiwank. 55 Ahpii kaye ehkihkentamek shaawanonk eoncinowek, mii 'i miinawaa ehkitoyek ewiih​kishaahtek, miihsh tepwe eshi​kishaahtek. 56 Kiinawaa kaawiin ninihsitohtansiimin kaainwaanitisoyek, ehkanawaapantamek o'owe ahki, kaye tahsh ishpimink kiishikonk e'inaapiyek kitoonci​kihkentaam kaawii'ani-ishiwepahk. Aaniin tahsh wiin wenci​kihkentansiwek aaniin keitamek o'owe noonkom kaa-ani-ishiwepahk!" 57 "Wekonen itahsh kiinawaa piko wenci​onentansiwek kwayahk cikii'ishihcikeyekipan? 58 Kiishpin awiya wiihtipaahkonihk e'nehpitasina'amawatc, ishiwinihk tahsh i'imaa tipaahkonikewikamikonk, minihk iko ehko​kashkihtooyan kocihtoon cikwayahkohtamawatc cipwaa ishiwinihk weti tipaahkonikewikamikonk. Kiishpin o'owe ishihcikehsiwan kikaishiwinik enaahsamiinitc tipaahkonikewininiwan miitahsh keishi​pakitinamawaatc shimaakanihshan kaye cipiinci​wepinikooyan kipa'otiiwikamikonk. 59 Miihsh i'imaa keayaayan, kaawiin kikasaaka'ansii paanimaa ishkwaa​tipa'ikeyan tahso​piiwaapihkoonhs kaakii'inaahkonikooyan," kii'ihkito Ciisahs.

Lok 13

1 I'iwe ahpii e'ishihsek aaninta i'imaa kii'ayaawak kaakii'wiintamawaawaatc Ciisahsoon aaniin kaa'ishihsenitc Kaalaliink (Galilee) kaakiionciinitc pemaatisinitc. A'a iitok Paailat (Pilate) kii'inaahkonike cinihsimintc mekwaa ehpakitinaahsonitc omiskwiimini ekii'takwaakaminikaatenikin. 2 O'o tahsh Ciisahs kii'ishi​nahkwehtam: "Kitinentaam ina iki kaakii'nihsintwaa Kaalaliink kaaonciiwaatc kaakii'onci​kakwaatakihtoowaatc nawac wiinawaa ekihci​omacitootamowiniwaatc ahpiihc wiin kotak Kaalaliink kaaonciinitc? 3 Kaawiin i'iweni kaakii'onci-ishihsewaatc. Miitahsh wiin eshi​wiintamawinakook, kiishpin onci​kwehkipimaatisihsiwek cinakatemek kimacitootamowiniwaan mii 'i kekiinawaa kahkina cinihshiwanaatisiyek. 4 Iki tahsh wiin mitaahshinihshwaahso (18) pemaatisiwaatc kaakiiaahpisihkoosowaatc kiikawihsenik i'i ishpahkicikan i'imaa Siloowamiink (Siloam), kitinentaam ina nawac wiinawaa ekii'macaatisiwaatc ahpiihc kahkina kotak pemaatisiwaatc i'imaa Ceroosalamink kaakii'ishitaawaatc? 5 Kaawiin i'iweni kaakiionci-ishihsewaatc. Miitahsh wiin eshi​wiintamawinakook, kiishpin onci​kwehkipimaatisihsiwek cinakatemek kimacitootamowiniwaan mii 'i kekiinawaa kahkina cinihshiwanaatisiyek." 6 Ciisahs kii'wiintamaake o'oweni awehcikewin: "Kiiayaa peshik inini ekii'ayaawaatc miinishaahtikoon oshoominikihtikewinink. Okii'antawaapamaan ini mihtikoon taka cinihtaawikihtoonikwen miinishan. Kaawiin tahsh okii'mihkansiinan. 7 Miitahsh kaa'inaatc okihtikewanohkii'aakanan: 'Inashke aasha nihso​pipoon (3) mooshak ehpi​anta​waapantamaan miinishan o'omaa miinishaahtikonk, kaawiin tahsh wiihkaa nimihkansiinan. Kawa'ohk a'a mihtik. Anihshaa okipishkaan i'i kihtikewahkiini.' 8 A'a tahsh kihtikewanohkii'aakan kii'ishi​nahkwehtam: 'Okimaa, keko papaamenimaahken. Taka maano peshiko​pipoon tapatahkiso a'a mihtik. Ninka​piikwahkamikiwepa'ike waahkaaya'ii mihtikonk, kaye tahsh ninka-ahtoon kaamino​nihtaawikihcikemakahk. 9 Kiishpin a'a mihtik miinihshiwitc miinawaa ani​niipininik, aahpici taonishihshin. Kiishpin tahsh wiin miinihshiwihsik, miihsh intawaa cikawa'ontc kaashi​antawentaman,' " okii'inaan. 10 Peshikwaa tahsh e'Anwepiiwi​kiishikaninik Ciisahs kiikihkino'amaake i'imaa anami'ewikamikonk. 11 Ihkwe i'imaa kii'ayaa ekiih​kikishkaakotc maciahcaahkwan ekii'mamaancikonikotc, kaye tahsh ekii'miinikotc aahkosiwin mitaahshinihshwaahso (18) tahsopipoon. Kiipihskiiciishkaa, kaawiin kaye okii​kashkihtoohsiin citashohtaatc. 12 Ahpii tahsh Ciisahs e'waapamaatc ini ihkwewan okiih​kanoonaan cipiishaanitc ekii'inaatc: "Noonkom kaashi​aahkosiyan kikaminoayaa, kaawiin keyaapi kika-aahkosihsii." 13 Miihsh Ciisahs kwehkwehkininc kaaishi​saaminaatc ihkwewan, miitahsh shemaak ini ihkwewan kaa'ishi​tashwaahkokaapawinitc kaye tahsh ekii'nanaahkomaanitc Kishemanitoon. 14 Kaaniikaanishkaminitc anami'ewikamik kii'onci​nishkaatisiwan i'iwe Ciisahs ekii'minwaaci'iwetc e'Anwepiiwi​kiishikaninik. Miitahsh kaa'ihkitonitc ehkanoonaanitc pemaatisinitc kaapi​maawaci'itinitc: "Ninkotwaahso​kiishik iitok ayaawan awiya keanohkiihpan. Miitahsh i'iwe ahpii kepiishaayekipan ciminwaaci'ikooyekipan, kaawiin wiin Anwepiiwi​kiishikahk." 15 KaaTipenciketc tahsh okii'ishi​nahkwehtawaan: "Kiinawaa kaa-anami'ehkaasoyek, kiinawaa kaatahshiyek, kiiAnwepiiwi​kiishikahk iitok kitaapa'waawaa kipishihkiimiwaa, komaa kaye kimaanshimihtatimoomiwaa aanti eshi​kanawentaakosiwaatc e'ishiwinekwaa aanti keonci​minihkwewaatc. 16 Inashke tahsh wa'a peshik ihkwe Eparahaamink (Abraham) wentahkaanesitc Setanan (Satan) kaapi​mamaancikwahpinikotc aahkosiwinink mitaahshi​nihshwaahso tahsopipoon (18). Kaawiin ina tahsh taaonci​aapa'okoowisihsii ciminoayaatc e'Anwepiiwi​kiishikaninik?" 17 Ciisahs tahsh kaa'ishi​nahkwehtawaatc i'i kaa-aanwaapamikotc okii'kakaansomaa'. I'i tahsh wiin kotak awiya' kii'onci​minwentamoo' kahkina maamahkaacihcikewinan kaakii'ishihcikenitc. 18 Ciisahs tahsh kiihkakwetwe: "Aaniin tahsh Kishemanitoo oTipencikewin enentaakwaninik? Aaniin itahsh keshi​tipihsitooyaampaan? 19 Miitahsh eshinaakwahk taapishkoo inini kaakihtikaatank kaa-akaahsininik kihtikaanenhs okihtikewahkiink i'i kihtikaanenhs kii'ani​ompikin, piinihsh ekii'ani​mihtikowank. Miitahsh i'imaa watihkwanink pinehshiinshak kaa'ishi​akoosiwaatc ekii'oshihtoowaatc owasihswaniwaan." 20 Miinawaa Ciisahs kii'ishi​kakwetwe: "Aaniin keshi​tipihsitaawak Kishemanitoo oTipencikewin? 21 Mii 'i eshinaakwahk taapishkoo ihkwe kaaotaahpinank pankii ompihsicikan e'ishi​kinikawinank i'imaa naanimitana tahso​tipaapiishkoocikan pahkweshikaniwashink piinihsh misiwe ini pahkweshikanihkaanan e'ompihshininitc." 22 Ciisahs kii'ani-ishaa inahke kaashi​waootenaawaninik, i'imaa kaye kaa-ayishitaaniwaninik ekihkino'amawaatc pemaatisinitc ekii'ani-ishaatc tahsh Ceroosalamink (Jerusalem). 23 Peshik tahsh awiyan okii'onci​kakwecimikoon: "Tepencikeyan, ta-akaahsiinowak ina pemaatisiwaatc kepimaaci'ikoowisiwaatc?" Miihsh Ciisahs kaa'ishi​nahkwehtawaatc: 24 "Maawac kocihtook cikakwe​piintikeyek i'iwe kaa-akaahsateyaak ishkwaantem. Paahtiinowak ohsha pemaatisiwaatc i'imaa kaakakwe​piintikewaatc, kaawiin tahsh oka​kashkihtoohsiinaawaa. 25 Ahpii a'a kaatipentank waahkaa'ikan kiihpasikwiitc kiikipa'ank tahsh ishkwaantem, miihsh akwaciink ciniipawiyek cimatwe​yaahkwa'ikeyek cimatwe​pakosentamowihtaakosiyek kaye o'o ci'ihkitoyek: 'Tepencikeyan, paahkinamawihshinaam.' Miihsh kematwe​ininek: 'Kaawiin kikihkenimihsinooninim, aanti kaye kaahpi​onciiyek'. 26 Miitahsh keinek: 'Kikii'wiici​wiihsiniimikoo iitok, kikii'wiici​minihkwemikoo kaye. Kikiihpi​kihkino'amaake kaye nintaawininaanink.' 27 Miihsh o'o keininek: 'Kaawiin kikihkenimihsinooninim, aanti kaye wenciiwekwen. Ninkoci 'omaa onci-ishaak, kahkina kiinawaa omacitootamook.' 28 Miitahsh cikihci​mawiyek cikaciishkantamek kaye kiipitiwaan ahpii waapamek Eparahaam (Abraham), Aaisik kaye (Isaac) a'a kaye Cekap (Jacob). Iki kaye waapamekwaa kahkina kaakiih​kanootamawaawaatc Kishemanitoon ayaawaatc i'imaa Kishemanitoon oTipencikewininiink, kiinawaa tahsh wiin saakici​wepinikooyek. 29 Pemaatisiwaatc hsa tapi​onciiwak waapanonk, ninkaapii'anonk, kiiwetinonk, shaawanonk kaye cipi​apiwaatc i'imaa eshi​wiihkwantiwintc Kishemanitoon oTipencikewinink. 30 Miitahsh ikiweniwak ishkwaac kaakiihpi​ayaawaatc nihtam ta-ayaawak, iki tahsh wiin nihtam kaakiihpi​ayaawaatc ishkwaac ta-ayaawak." 31 Mekwaa i'iwe eshihsenik aaninta Perahsiik (Pharisees) okiihpi​nakishkawaawaan Ciisahsoon e'inaawaatc: "Inkoci 'omaa onci​maacaan pahkaan inkoci ciawiayaayan, kihciokimaa Herat (Herod) ohsha kinantone'ok ewii'nihsihk." 32 Ciisahs tahsh okii'ishi​nahkwehtawaa': "Awi​wiintamawihk a'a waakohsh ehsaakicinisha'wakwaa maciahcaahkwak, kaye tahsh eminwaaci'iweyaan noonkom kaakiishikahk. Nihso​kiishik (3) tahsh kii'ishihsenik, mii 'i cikiishihtaawak nintahkohkiiwin. 33 Miitahsh wiin iko aasha eshihsek ciani​maacaayaan noonkom kaakiishikahk, waapank kaye, miinawaa tahsh kotak ani​waapank. Kaawiin wiin taaishihsehsinoon awiya kaakanootamawaatc Kishemanitoon piko anti citashi​nihsintipan, mii ehta ko Ceroosalamink (Jerusalem). 34 "Kiinawaa eyaayek Ceroosalamink. Kikii'nihsaawaak kaakanootamawaawaatc Kishemanitoon, kikiih​papiimwahsina'aawaak kaye ikiweniwak Kishemanitoo kaakiih​piicinisha'amaawinek. Aaniin tahsink kaa'ishi​antawentamaan cikii'maamawininakook taapishkoo nooshe​ahpaahka'aahkwaan kaashi​maawaci'aatc oniicaanihsa' shiipaaya'ii oninkwiikanink. Kaawiin tahsh kikii'onci-inentansiim cimaamawi-ininakook. 35 Miitahsh Kishemanitoo cinakatank kitanami'ewikamikowaa cipapaapisiskentansik. Tepwe tahsh wiin kaaininakook kaawiin kikaonci​waapamihsiim paanimaa ocihcihsek o'o ci-ihkitoyek: 'Kishemanitoo oka​shawenimaan iniweniwan kaapi-ishaanitc kaaTipencikenitc otishinihkaasowininiink.' "

Lok 14

1 Peshikwaa e'Anwepiiwi​kiishikaninik Ciisahs kii'anta​wiihsini kaaishitaanitc peshik kaaniikaanentaakosinitc Perahsiin (Pharisee). I'imaa tahsh kaakii'ayaanitc pehsho wiinke okii'naakaci'ikoo'. 2 Kii'ayaa tahsh i'imaa peshik inini ohkaatan, onihkan kaye ekiih​paakihsenikin. Miiwan itahsh ini kaakiihpi​naasihkaakotc Ciisahs, 3 Ciisahs tahsh kiihkiikito ehkakwecimaatc kaakihci​kihkentaminitc Onahshowewin, i'i kaye Perahsii': "Inahte na kitOonahshowewininaan awiya pisaan cimino'ayaa'intipan Anwepiiwi​kiishikaninik, komaa kaye kaawiin." 4 Kaawiin tahsh kii'noontaatihsiiwa'. Ciisahs okiih​tepinaan ini ininiwan ekii'minwaaci'aatc, miihsh kaa'ishi​maacinisha'waatc. 5 Miitahsh o'o kaa'ani-inaatc: "Kiishpin kikosihsiwaa komaa kaye kipishihkiimiwaa piincihsetc waanihkaanink Anwepiiwi​kiishikaninik kaawiin ina tahsh shemaak kitaa​kakwe​kashki'aahsiwaawaa?" 6 Kaawiin tahsh kekoon okii'ayaahsiini keshi​nahkwehtaakotc. 7 Ciisahs tahsh ehkanawaapamaatc okii'nihsitawinaan aaninta antomaakana' e'ishi​api'itisonitc maawac kehtakintenikin apiwinan toohpowinaahkonk. Miitahsh Ciisahs kaa'ishi​wiintamawaatc awehcikewin kahkina i'imaa kaa-ayaanitc: 8 "Ahpii piko awiya antomihk ci-ishaawatc wiitike​wiihkwantiwinink keko wiin ishi​onapihken kaashi​kihtentaakwahk apiwin. Maakisha taishihse kotak awiya nawac ehkihtentaakositc iinsan ekii'antomintc ahpiihc kiin. 9 A'a tahsh kaakii'antomihk maakishaa kikapi​naasihkaak o'o ci-inihk: 'Taka tawihskaw wa'a inini i'imaa kaashi​apiyan.' Miihsh ciakaciyan cishi​apiyan kaashi​tapahsentaakwahk apiwin. 10 Ahpii tahsh antomikooyan, ishi​onapin kaashi​tapahsentaakwahk apiwin. Miitahsh a'awe kaakii'antomihk kikapi​naasihkaak o'o ci-inihk: 'Niicii piishaan weti kwayahk apiwin kaaishi​ayaak.' Miitahsh kiin ciwaapamihkwaa emiinikooyan kihtenimikoowin enaahsamiiwaatc kahkina kotak antomaakanak. 11 Awiya hsa kaaishpenintisotc, tatapahsenimaa. Awiya hsa kaatapahsenintisotc, mii hsa 'awe keishpentaakositc." 12 Miitahsh o'o Ciisahs kaa'inaatc ini ininiwan kaakii'antomikotc: "Ahpii ahshankeyan, komaa kaye wiihkwankeyan, keko wiin antomaahken kaasaaki'atwaa, kiicihkiwensiwak, pehsho kaainawematwaa, iki kaye kaawenootisiwaatc pehsho kaawiicitaamatwaa. Kiishpin i'i ishihcikeyan, kikakiiwe​antomikook ohsha, miihsh iinsan ci-ishinaakwahk ehkiiwe​tipa'amaakooyan. 13 Kiin tahsh ahpii wiihkwankeyan, antom ikiweniwak kaakitimaakisiwaatc, kaamaahkisiwaatc, kaapimohsehsikwaa, iki kaye kaawaapihsikwaa. 14 Kika​shawentaakos. Kaawiin iitok okashkihtoohsiinaawaa cikiiwe​tipa'amawihkwaa. Kika​tipa'amaakoowis ohsha ahpii kiishikahk kaawiih​kiiwe​pimaatisi'intwaa okwayahkwaatisiik," okii'inaan. 15 Peshik tahsh kaawiitapimikotc i'imaa toohpowinaahkonk e'noontaminitc o'oweni mii 'i kaaikotc: "Aahpici shawentaakosiwitok awiya kaatashi​wiihsinitc Kishemanitoon eshi​Tipencikenitc." 16 Miihsh Ciisahs kaa'inaatc: "Kii'ayaa peshik inini ekiih​kihci​wiihkwanketc niipiwa' awiya' ekii'antomaatc cipi​wiihsininitc. 17 Ahpii tahsh e'ocihcihsek ciwiihsiniwaatc okii'ishinisha'waan otanohkii'aakanan ciantawi​wiintamawaanitc kaakii'antomaatc: 'Piishaak, aasha kahkina kekoon kwayaantahte.' 18 Miitahsh kahkina kaakiih​tahshinitc kaakii'maaci-ihkitonitc e'ontamihsenitc. Ini nihtam ininiwan okii'inaani anohkii'aakanan: 'Ninkii'ataawe kihtikewahki, oncita ko ishinaakwan cikii-ishaayaan cianta​waapantamaan. Kipakohsenimin kekoon ci'inenimihsiwan o'owe kaashi​ontamihseyaan.' 19 Ini tahsh kotak kii'ihkitowan: 'Ninkii'ataawe naanan pishihkiwak. Miihsh e'ani​maacaayaan e'anta​kakweci'akwaa. Kipakohsenimin tahsh kekoon ci'inenimihsiwan o'owe kaashi​ontamihseyaan.' 20 Miinawaa kotak kii'ihkitowan: 'Noonkom iko ninkii'ishkwaa​kihciwiitike. Kaawiin tahsh ishihsehsinoon cikiih​piishaayaampaan.' 21 "A'a tahsh anohkii'aakan kiihkiiwe ekii'awi​wiintamawaatc otookimaaman kahkina kaakii'inintc. Miitahsh a'a kaatipentank waahkaa'ikan kii'nishkaatisi. Miihsh miinawaa kaa'inaatc otanohkii'aakanan: 'Taka weyiip ishaan i'imaa kaaishi​pimamohk kihci​miihkana, i'imaa kaye kaashi​pahpahkemohkin miihkanan ootenaank. Piish ikiweniwak kaakitimaakisiwaatc, kaamaahkihsewaatc, kaawaapihsikwaa, iki kaye kaakashkihtoohsikwaa cipimohsewaatc,' okii'inaan. 22 Wiipa tahsh iko anohkii'aakan okiihpi​kanoonaan otookimaaman: 'Aasha kii'ishihcikenaaniwan kaakii'ishi​anoohkiiyan. Keyaapi tahsh tawaa keshi​apinaaniwank,' okii'inaan. 23 Miitahsh a'a Okimaa kaa'inaatc otanohkii'aakanan: 'Taka ishi​maacii'atoon miihkanaank kaamaaciimohkin, ishaan kaye kaapahpahkemohkin cipiicinisha'watwaa awiyak, miitahsh o'owe ishihcikeyan niwaahkaa'ikan cimooshkinek. 24 Miitahsh eshi​wiintamawinakook kahkina ikiweniwak nihtam kaakii'antomintwaa kaakiih​piishaahsikwaa kaawiin oka​kocihpontansiinaawaa miicim eshi​wiihkwankewak,' " kii'ihkitoo. 25 Peshikwaa Ciisahs ehpimi​wiiciiwikotc kaapaahtiinonitc awiya' kii'onci​kwehki​kaapawi ekiih​kanoonaatc: 26 "Kiishpin awiya kaapi​naasihkawitc shiinkenimaahsik tahsh oteten, omaamaan kaye, wiiwan, oniicaanihsa' kaye, komaa kaye wiicihkiwensiwan, otawemaan kaye, kiishpin kaye shiinkentansik opimaatisiwin kaawiin a'a tatinowihsii ninkihkino'amawaakan. 27 Awiya kepimiwinaahsik otaashiteyaahtikoman, kaapiminisha'ohsik kaye, kaawiin tatinowihsii ninkihkino'amawaakan. 28 Kiishpin kiinawaa kaatahshiyek peshik inentank ewii'oshihtootc kaaishpahkitenik ahshawaapiwin, pinamaa na taaonapi cikakwe​kihkentank aaniin minihk keinakintenik kaawii'oshihtootc, taka ciayaawaakwen shooniyaan cikiishihtootc i'i kaawii'oshihtootc? 29 Kiishpin tahsh ehta ekii'mihci​onahtootc waa'ishi​oshihtootc otahshawaapiiwikamik, kiishihtoohsik itahsh, miihsh kahkina kaawaapantaminitc aaniin kaaishi​maaciitc cipaahpi'ikotc. 30 Miihsh o'o ke'ikotc: 'Inakiniin wa'a inini ekii'maacii​oshihciketc, kaawiin tahsh okiih​kiishihtoohsiin kaakiimaacihtootc.' 31 Kiishpin kihciokimaa ayaawaatc mitaahcink mitaahswaahk (10,000) shimaakanihsha' ewii'anta​miikaanaatc tahsh kotak kihciokimaan eyaawaanitc niishtana mitaahswaak (20,000) shimaakanihsha', pinamaa na tanamatapi cionentank taka cite​ahpiihciikwen cishaakooci'aatc ini kotak kihciokimaan? 32 Kiishpin tahsh tepakenimohsik miihsh keshi-ishinisha'waatc tipaacimowininiwa' cianta​nakishkawaanitc ini kihciokimaan mihsawaa ko enaawinaakosinitc, eishi​pakohsenimaatc pisaan ciwiiciiwikotc. 33 Miitahsh peshikwan eshinaakwahk, awiya kaapakitinansik kahkina kekoonan otaya'iiman kaawiin tatinowihsii ninkihkino'amawaakan." 34 "Aahpici onishihshin shiiwihtaakan. Kiishpin tahsh ani​nihsitohpokwahsinok, aaniin itahsh miinawaa keshi​kiiwe​shiiwihtaakaniwankipan? 35 Kaawiin ahpiihtentaakwahsinoon ci​aapatahkipan kihtikewahkiink, komaa kaye kaashi​ohkohsink moow, mii ehta ko ciwepinikaatekipan. Taka awiya kaaohtawakaatc tapisintam."

Lok 15

1 Peshikwaa ehkiishikahk taakihs (tax) shooniyaan kaamaawantoonaawaatc, iki kaye kotak kaa-aanawenimintwaa okiihpi​naasihkawaawaan Ciisahsoon ehpi​pisintawaawaatc. 2 Miitahsh iki Perahsiik (Pharisees) iki kaye kaakihkino'amaakewaatc onahshowewin kii'ayihkitowak e'aanwaapancikewaatc: "A'awe inini ominwentaan ewiiciiwaatc omacitootamoo', kaye tahsh ewiici​wiihsiniimaatc." 3 Miitahsh Ciisahs kaakii'wiintamawaatc o'oweni awehcikewin: 4 "Kiishpin kiinawaa awiya ayaawaatc ninkotwaahk (100) maanahcaanihsha', peshik tahsh wanihshininitc, aaniin keishihcikehpan? Otaa​nakanaa' maawiin i'i shaankahsimitanahshi​shaankahso (99) maanahcaanihsha' i'imaa mihshawahkamik ciantone'waahpan ini peshik kaawanihshininitc, ekiih​pakiciihsik paanimaa kaa'mihkawaatc. 5 Ahpii tahsh mihkawaatc, taciihkentam, miihsh keshi​wakitahsaatc otinimaakanink, 6 miihsh kenishi​kiiwewinaatc. Oka​maamawi​antomaa' tahsh kaasaaki​wiiciiwaatc, i'i kaye pehsho owiicitaamaakana' o'o ci'inaatc: 'Wiici​minwentamoomihshik, ninkii'mihkawaa kaakii'wanihshink nimaanahcaanihshim!' 7 Miitahsh eshi​wiintamawinakook, miihsh peshikwan eshi​ciihkentamonaaniwank weti kihcikiishikonk a'a onci kaamacitootank kiikwehkaatisitc, ahpiihc wiin iniweniwa' shaankahsimitanahshi​shaankahso (99) kweyahkwaatisinitc memwehc kekwehkaatisihsinik." 8 "Inashke ihkwe kiiayaawaatc mitaahso waapaapihko​shooniyaanhsa', peshik tahsh wani'aatc, aaniin tahsh keishihciketc? Mii 'i keshi​sahka'ank owaahsahkonencikan, ewepa'iketc kaye owaahkaa'ikanink, weweni ehkakwe​mihkawaatc ehpakiciihsik paanimaa ekii'mihkawaatc. 9 Ahpii tahsh kaa'mihkawaatc, mii 'i eshi​maamawi​antomaatc kaasaaki​wiiciiwaatc, i'i kaye pehsho kaawiicitaamikotc o'o e'inaatc: 'Wiici​minwentamoomihshik, ninkii'mihkawaa ohsha kaakii'wani'ak niwaapaapihko​shooniyaanhsim.' 10 Miitahsh peshikwan weti kihcikiishikonk Kishemanitoo otencalima' eshi​ciihkentaminitc ini onci peshik omacitootamoon kaakwehkaatisinitc." 11 Ciisahs tahsh kii'ani-ihkito: "Kii'ayaa inini ekii'niishinitc (2) okosihsa'. 12 Ini kaaohshiimenshimaawinitc okii'ikoon: 'Nintete, taka noonkom kiishaac miishihshin minihk kekoon kaawii'miishiyan kitipencikewinink onci ketipentamaan.' Miitahsh a'a otetemaa kaaishi​nenaawinank i'i owenootisiwin ekii'maamiinaatc kaaniishinitc okosihsa'. 13 Kaawiin tahsh tashi​naanaake, mii 'i aasha kaakii'ataawaaketc minihk kaakiih​tipentank. Miitahsh kaa'ishi​maacaatc waahsa pahkaan ahkiink ekii'ishaatc. Miitahsh weti kaahtashi​caakinaatc oshooniyaaman, ekiih​kiiwashkwe​pimaatisitc. 14 Kahkina tahsh kekoon kaakii'ayaatc kiihcaakihse. Miihsh i'i ahpii kaakiikihci​noontehsek miicim i'imaa misiwe ahkiink. Wiinke kewiin kiihkoohpaaci​noontehse. 15 Miitahsh kaakii'ishaatc ekii'awi​anohkiihtawaatc ininiwan i'imaa ahkiink eyaanitc. Miihsh kaakii'ishinisha'ontc i'imaa kihtikewikamikonk cipami'aatc ciahshamaatc koohkoohsha' ciwiihsininitc. 16 Okii'mihsawentaan tahsh kewiin cikii'miicihpan i'iweni koohkoohsha' kaamiicinitc. Kaawiin tahsh awiyan okii'miinikohsiin kekoon kemiicitc. 17 Ahpii tahsh kaa'ani​pakahkentank o'o kii'itiso: 'Inashke wiin nintete ehpaahtiinonitc otanohkii'aakana tewiihsiniwa', ishkohsewa' kaye miicim, niin tahsh wiin ehkawaskateyaan. 18 Taka hsa ninka​maacaa cikiiweyaan ci-ishaayaan nintetehkaank o'o ci-inak: "Nintete, ninkii'macitootawaa Kishemanitoo, kekiin kaye kikii'macitootawin. 19 Kaawiin tahsh nintepakentaakosihsii ninkosihs ci-ishinihkaashiyan. Kipakohsenimin tahsh kitanohkii'aakanak kaatootawatwaa keniin citootawiyan," ' kii'inentam ewii'inaatc. 20 Miitahsh tepwe kaa'ishi​pasikwiitc ekii'maacaatc ekiih​kiiwenotawaatc oteten. "Keyaapi tahsh enaawinaakwaninik cipwaa otihtank oteten otayaawinini, mii 'i aasha ekii'waapamikotc oteten ehpi​naakositc ekiih​koohpaasinaakotc. Miihsh kaakii'ahpatoonitc ehpi​naakositc ekiih​kihkinciciinikotc e'ociimikotc. 21 Okosihsimaa tahsh kii'ihkito: 'Nintete, ninkii'macitootawaa Kishemanitoo, kekiin kaye kikii'macitootawin. Kaawiin tahsh nintepakentaakosihsii ninkosihs ci-ishinihkaashiyan,' kii'ihkito. 22 A'a tahsh otetemaa okii'inaa' otanohkii'aakana': 'Taka weyiip piitook maawac wenishihshik kikishkikan, pisihkamo'ihk. Pisihkamo'ihk kaye naapininciipisonan oninciink, mahkisinan kaye pitahkisine'ihk. 23 Miitahsh ishi​maacaak cinaasihkawek kaaminonaakositc kaa-aancipotc pishihkiinhs cinihsek. Maawaw kikakihci​wiihsinimin ehpiihci​minwentamank. 24 Wa'a hsa ninkosihs ekii'nipohpan noonkom tahsh pimaatisi. Ekii'wanihshinkipan noonkom tahsh ekii'mihkawintc.' Miitahsh kaa'ishi​maaci​kihci​wiihsiniwaatc. 25 "Mekwaa tahsh ekihci-inahkamikaninik a'a wiin kaaohsayensimaawitc okosihsimaa kii'anohkii kihtikewahkiink. Ahpii tahsh ehpikiiwetc pehsho e'ani​otihtank waahkaa'ikan, okii'noontaan ematwe​kitohcikaaniwaninik, kaye ematwe​niiminaaniwaninik. 26 Miitahsh kaakii'antomaatc peshik anohkii'aakanan ehkakwecimaatc aaniin eshihcikaaniwaninik. 27 Miitahsh kaa'ikotc: 'Kihshiimensh ohsha kiihtakohshin. Kitete tahsh okii'nihsaan ini maawac kaaminonaakosinitc, kaawiininonitc pishihkiinhsan aaniihsh minwentam ehpikiiwenotaakotc okosihsan ehpimaatisinitc kaye tahsh e'minoayaanitc.' 28 A'a tahsh kaaohsayensimaawitc kii'nishkaatisi ekiiwiih​piintikehsik waahkaa'ikanink. Oteten tahsh okiihpi​naasihkaakoon ekiihpi​kaakiinsomikotc pisaan cipiintiketc. 29 Miitahsh kaa'inaatc ini oteten: 'Inashke aaniin tahsopipoon aasha kaapi​anohkiihtawinaan taapishkoo a'awe peshik kitanohkii'aakan kaa-anohkiihtawihk, mooshak ehpi-ishihcikeyaan kaashi​antawenimiyan. Wekonen tahsh kaapi​miinihshiyan? Kaawiin kanake peshik kikii'miishihsii maanahcaanihshenhs cikiiwiici​wiihsinimakwaapan nisaaki​wiiciiwaakanak! 30 A'a tahsh wiin kikosihs ekii'nihshiwanaacihtootc kahkina kitipinawewisiwin ekii'mihci​caakiniketc ehpapaa​nootihkwewetc. Ahpii tahsh ehpikiiwetc mii 'i kaaishi​nihtamawatc kaaonishihshinitc, kaawiininonitc pishihkiinhsan!' 31 O'o tahsh okii'ishi​nahkwehtaakoon oteten: 'Ninkosihs, mooshak o'omaa kipiwiici​ayaamihsh. Minihk hsa kekoon kaatipinawewisiyaan mii hsa 'iwe kekiin tepinawewisiyan. 32 Oncita tahsh iko ishi​na'inaakwan cikihci​wiihsiniyankipan, ciminwentamankipan kaye aaniihsh kihshiimensh ekii'nipohpan, noonkom tahsh ehpimaatisitc. Ekii'wanihshinkipan kaye, noonkom tahsh ekii'mihkawintc,' okii'ikoon."

Lok 16

1 Ciisahs okii'inaa' okihkino'amawaakana': "Peshikwaa kii'ayaa inini aahpici ekii'wenootisitc kaye tahsh ekii'ayaawaatc anohkii'aakanan kaakiih​kanawentamaakotc otipentaahsowinan. A'a tahsh inini kiihpi​wiintamawaa kaakanawentamaakotc kwayahk ekii'inaapacihtoohsinik otaya'iiman kaatipentank. 2 Miitahsh kaakiih​kanoonaatc cipiintikenitc o'o ekii'inaatc: 'Wekonen o'o kaaishi​noontamaan e'ishihcikewanwen? Piwaapanta'ihshin misiwe aaniin enaapacihtooyan nintipentaahsowinan. Kaawiin tahsh awahshime kikakanawentansiinan nintipentaahsowinan.' 3 A'a tahsh anohkii'aakan kii'itiso: 'Nintookimaam kaa-anohkiihtawak niwiih​pakitinik i'i enanohkiiwak. Aaniin tahsh keishihcikeyaan? Onsaam niniinamaatis ciwaanihkeyaampaan, nintaa-akac kaye cipapaa​pakohshi'iweyaan. 4 Aasha ninkihkentaan aaniin keishihcikeyaan kaasaaki​wiiciiwiwaatc keonci​piintikashiwaatc otaawiniwaank ahpii pakitinikooyaan o'o enanohkiiyaan.' 5 "Miitahsh kaa'ishi​kanoonaatc kahkina awiya' iniweniwa' kaamasina'amawaanitc otookimaaman. Miihsh kaa'ishi​kakwecimaatc ini nihtam ininiwan: 'Aaniin minihk mesina'amawatc nintookimaam?' okii'inaan. 6 Miitahsh kaa'ikotc ini ininiwan: 'Nihshwaaswaahk (800) tahso tipa'oopaan aalip (Olive) tino pimite nimasina'amawaa,' okii'ikoon. Miitahsh kaa'inaatc: 'O'omaa ishi​apin. Shemaak iko niiwaahk (400) ishipii'an i'i kimasina'ikewin,' okii'inaan. 7 Miinawaa tahsh kotak okii'ishi​kakwecimaan: 'Kiin tahsh wiin aaniin minihk mesina'amawatc?' okii'inaan. 'Mitaahswaahk (1,000) tahso mahkahk pahkweshikanan nimasina'amawaa,' okii'ikoon. Miihsh kaa'inaatc: 'Ina 'owe kimasina'ikewin, nihshwaahswaahk (800) ishipii'an,' okii'inaan. 8 "Miitahsh a'a okimaa kaakii'antomaatc ini kaakanawentamaakotc otaya'iiman kaakii'wayeshihcikenitc: 'Wiinke kikakiihtaawihcike ehkanawaapantisoyan,' okii'inaan. Inashke wiin iko pemaatisiwaatc noonkom ahkiink kaaonci​tipentaakosiwaatc nawac kwayahk okanawentaanaawaa kaashi​anohkiiwaatc ahpiihc wiin ikiweniwak waahseyaank kaaonci​tipentaakosiwaatc." 9 Miihsh Ciisahs keyaapi kaa'ani-ihkitotc: "Miitahsh o'owe eshi​wiintamawinakook. Ahkiiwi​wenootisiwin aapacihtook ciontinamaasoyek kesaaki​wiiciiwinekwaa, ahpii hsa tahsh kiihcaakihsek, miitahsh ciminwentamonaaniwank cipiintikanikooyek taawinink wiihkaa keishkwaahsehsinok. 10 Piko awenen keayaankwaamisiihkantamokwen kaa-akaahsentaakwaninik mii peshikwan keshi​ayaankwaamisiihkantank kaakihci-inentaakwaninik kekoon. Awenen kaye keonci​wayeshi'iwekwen mihsawaa akaahsentaakwaninik mii peshikwan keishi​wayeshi'iwetc i'iweni kaakihci-inentaakwaninik. 11 Kiishpin tahsh tepweyentaakosiyek cinanaakacihtooyek ayaankwaamisiihkantansiwek eshi​aapacihtooyek ahkiiwi wenootisiwin, aaniin tahsh wiin keshi​pakitinamaakooyekipan kaakwayahkwahk wenootisiwin? 12 Kiishpin tahsh tepweyentaakosihsiwek cinaakacihtooyek ekiionci​ayaankwaami​aapacihtooyek kotak awiya otaya'iiman, aaniin itahsh kekii'ishi​pakitinamaakooyekipan kekoon citipentamek? 13 "Kaawiin anohkii'aakan oka​tipenimikohsii' niishin okimaa'. Aaniihsh peshik oka​shiinkenimaan, shikwa peshik okasaaki'aan. Peshik iniwe oka​kihciwinaan, shikwa peshik oka​wepinaan. Kaawiin kitaa​tipenimikohsii Kishemanitoo kayehsh citako​tipenimihkipan shooniyaa." 14 Ahpii tahsh iki Perahsiik (Pharisees) enoontamowaatc kahkina o'oweni, okiih​paahpinotawaawaan Ciisahsoon, aaniihsh okiih​saaki'aawaan shooniyaan. 15 Miitahsh Ciisahs kaa'inaatc: "Kiinawaa ohsha kaakakwe​minonaako'itisoyek enaahsamiiwaatc pemaatisiwaatc, Kishemanitoo tahsh wiin kikihkenimikowaa enaatisiyek kite'iwank. I'iweni ohsha awiyak kaakihci-inentamowaatc, mii 'iweni Kishemanitoo kaashiinketank. 16 "Moosihs (Moses) OtOonahshowewinan, i'i kaye kaakii'ishipii'ikewaatc kenootamawaawaatc Kishemanitoon kiihpi​tashinteni piinihsh kiihpi​ayaatc Cwaan siika'antaakewinini. Miitahsh i'i ahpii kaakii'maacii​tashintenik eshiminwaatotenik Kishemanitoo oTipencikewin. Miihsh kahkina awiyak enikohk eshi​kakwecihtoowaatc cipiintikewaatc i'imaa cionci​tipentaakosiwaatc. 17 Nawac wentan i'iwe kiishik, ahki kaye cipoonihsek, ahpiihc i'iwe peshik cahkipii'ikan ciotaahpinikaatek Onahshowewinink onci. 18 "Awenen iko inini kaawepinaatc wiiwan kotak tahsh ihkwewan kaawiitikemaatc pihshikwaatisi. A'a tahsh inini kaawiitikemaatc ihkwewan kaakiiwepinikonitc onaapemini pihshikwaatisi." 19 "Peshik kii'ayaa inini aahpici ekii'wenootisitc ehkikishkank kaye maawac kaa-aahkwakintenikin kikishkikanan. Maawac iko ekiikihci​wenootaatisitc entahso​kiishik. 20 Kii'ayaa tahsh kaye ehkitimaakisitc inini Laasarahs (Lazarus) eshinihkaasotc, misiwe owiiyawink ekii'omikiiwitc. Kii'nihtaa-api otishkwaanteminiink ini kaawenootisinitc ininiwan. 21 Kii'ishi​mihsawentam cimiicitc ishkwancikanan kaaonci​pankihsininikin otoohpowinaahkoniink ini kaawenootisinitc. Animoo' itahsh kiihpiishaawaa' ekiihpi​nooskwaata'aminitc Laasarahs kaashi​omikiiwitc. 22 Kaakitimaakisitc inini kii'ishkwaa​pimaatisi. Encala' tahsh okii'maaciinikoo' ekii'ishiwinikotc kihcikiishikonk ciawi​wiitapimaatc Eparahaaman (Abraham). A'a tahsh kewiin kaawenootisitc inini kii'ishkwaa​pimaatisi, miihsh kaa'ishi​na'inintc. 23 I'imaa hsa tahsh kii'ishi​ayaa kaashi​kanawentaakosiwaatc kaanipowaatc. Wiinke kiihkakwaataki​wiihsakentam. Ishpimink tahsh e'inaapitc okii'waapamaan Eparahaaman waahsa ematwe​ayaanitc, e'matwe​wiitapimaanitc Laasarahsan. 24 Miitahsh kaakiih​shaakowaanaatc: 'Nintete Eparahaam koohpaasinawihshin, taka piicinisha'o Laasarahs cicehkipiininciinitc nipiink cipi​tahkaapaawatootc nintenaniw, etatawe ohsha niwiihsakaahkis o'omaa ishkotenk.' 25 O'o tahsh Eparahaaman okii'ikoon: 'Ninkosihs, maamihkwentan mekwaa kiipimaatisiyan kaaonishihshinkin kekoonan kikii'ayaanan. A'a tahsh wiin Laasarahs kaaonishihshinsinikin okii'ayaanan. Noonkom tahsh wiin minwentami'aa, kiin tahsh wiin ekihci​wiihsakentaman. 26 Kaawiin tahsh ehta i'i minihk, ayaamakan hsa 'iwe emishahkiiyaahsinok waana'ikan o'omaa nahsaw kaashi​ayaayank. Miitahsh o'omaa kaashi​ayaayaank kaaonci​kashkihtoohsikwaa weti ci-ishaatc kaashi​ayaayek, miihsh kaye weti kaa'ayaawaatc eshi​ayaayek kaaonci​kashkihtoohsikwaa o'omaa nahke cipiishaawaatc.' 27 Kaawenootisitc inini tahsh kii'ihkito: 'Nintete, Eparahaam kipakohsenimin ehkakweciminaan ci-ishinisha'watc Laasarahs ninteten owaahkaa'ikaniniink. 28 Mii ohsha weti eyaawaatc naanan niicihkiwensiwak. Pakitin ci-ishaatc ciantawi​wiintamawaatc, cipiishaahsinik o'omaa kakwaataki​wiihsakentamowin eshi​ayaanik,' okii'inaan. 29 Miitahsh o'o kaa'ikotc Eparahaaman (Abraham): 'Kiicihkiwensiwak iitok otayaawaawaan Moosihsoon (Moses), i'i kaye kaakanootamawaanitc Kishemanitoon. Miiwa' iniweniwa' kepisintawaawaatc.' 30 Miihsh kaa'ishi​nahkwehtawaatc: 'Nintete Eparahaam kaawiin i'iwe teminihk. Kiishpin hsa awiyan nipowinink pionci​naasihkaakowaatc, mii 'i kehcinaac cikwehkaatisiwaatc,' okii'inaan. 31 Miitahsh kaa'ikotc Eparahaaman: 'Kiishpin wiihpisintawaahsikwaa Moosihsoon, i'i kaye kaakanootamawaanitc Kishemanitoon, kaawiin taakashkimaahsiiwak mihsawaa ko awiyan nipowinink onci​wanishkaanitc,' okii'ikoon."

Lok 17

1 Miitahsh Ciisahs kaa'inaatc okihkino'amawaakana': "Kekoonan hsa tatakohshinoomakanoon keonci​macitootamink. Aahpici tahsh takohpaasinaakosi a'a awiya wiin kaaonci​otihshiwemakaninikin. 2 Nawac iitok taaonishihshinini kaamihcaapihkisinitc piihsipoocikanahsiniin citahkopicikaniwinihpan ohkwekanink cinihsaapaawacikaniwihpan i'imaa kaashi​kiishkaayawaanik kihcikamiink, ahpiihc wiin cipankihshimaahpan ini kaatepweyenimimitc. 3 Kanawenintison tahsh eshihcikeyan. "Kiishpin kiicihkiwensi macitootank, kitaa​kanoonaa ohsha, kiishpin tahsh wiihpoonihtootc otishihcikewin, kikapoonentamawaa. 4 Kiishpin tahsh macitootawihk niishwaahcink aapitink ehkiishikaninik, niishwaahcink tahsh pinaasihkawihk o'o inihk: 'Taka poonentamawihshin.' Pisaan hsa kikapoonentamawaa." 5 Ishinisha'waakanak okii'inaawaan kaaTipencikenitc: "Wiici'ihshinaam cimashkawisiimakahk nintepwehtamowininaan." 6 KaaTipenciketc tahsh kii'ishi​nahkwehtam: "Kiishpin ayaayekipan tepwewakentamowin taapishkoo peshikomin maawac kaa-akaahsink kihtikaanenhs kitaainaawaa wa'aweti kihci​mihtik: 'Pahkwaciciipihkepinitison antawi​patahkison kihcikamiink,' kita​na'ihtaakowaa ohsha," okii'inaa'. 7 "Kaanika wiin kiinawaa peshik ayaawek anohkii'aakan e'ompwehkahkamikipitootc kihtikewahkiini, kaye tahsh e'nanaakaci'aatc maanahcaanihsha'. Ahpii tahsh ehpi​onci​takohshink kihtikewahkamikonk kitaainaa na: 'Taka weyiip kakihtaahtapiin ciwiihsiniyan'? 8 Kaawiin i'iwe kitishihcikehsii. Nawac o'oweni kitaainaa: 'Kwayaancihtamawihshin keonaakohshi​miiciyaan. Pihsihkan aakoopison cipami'iyan ewiihsiniyaan, kaye tahsh eminihkweyaan. Paanimaa tahsh ishkwaa​wiihsiniyaan, mii kiin i'i payesh ciwiihsiniyan,' kikainaa. 9 Kaawiin ina tahsh miikwehc taaicikaniwihsii a'a anohkii'aakan ekii'ishihciketc kaakii'ishi​anoonintc? 10 Miitahsh peshikwan kekiinawaa keishihcikeyekipan. Ahpii kii'ishkwaa​ishihcikeyek kahkina kaakii'ikooyek, mii 'i keihkitoyekipan: 'Niinawint hsa piko anohkii'aakanak nimihci​tinowimin, ekii'mihci-ishihcikeyaank ehta kekii'inanohkiiyaankipan.' " 11 Ciisahs tahsh e'anipimi​ayaatc Ceroosalamink (Jerusalem) e'ishaatc, nahsawaya'ii inahke kii'ani-ishaa eshi​ayaanik Sameriya (Samaria) ahki, i'i kaye Kaalalii (Galilee) ahki. 12 Aasha tahsh kekaa e'ani​otihtank eshitaaniwaninik, mitaahso ininiwa' wemikiiwaahpinenitc okiihpi​anta​nakishkaakoo'. Waahsayiihsh iko kii'matwe​niipawiwa'. 13 Miitahsh kaa'matweikotc: "Ciisahs Okihkino'amaake, taka koohpaasinawihshinaam!" 14 Ciisahs e'waapamaatc mii 'i kaa'inaatc: "Maacaak, anta​waapamihk anami'ewikimaa cianta​kihkeniminek." Mekwaa tahsh e'ani​pimi​ayaawaatc, mii 'i kaakiih​pehki'ikoowisiwaatc eshi​omikiiwaahpinewaahpan. 15 Peshik itahsh a'a ewaapantank ehpehki'ikoowisitc, okiihkiiwe​naasihkawaan Ciisahsoon, ekiihkishiiwetc e'nanaahkomaatc Kishemanitoon. 16 Eshisitekaapawinitc Ciisahsoon kii'ishi​animihkopani'o ekii'nanaahkomaatc. A'a hsa tahsh inini Sameriya ahkiink kii'oncii. 17 Miitahsh Ciisahs kaa'ihkitotc: "Mitaahso ohsha ininiwak kiihpehki'ikoowisiwak, Aanti tahsh wiin iki kotak shaankahso? 18 Aaniin tahsh wiin ehta wa'a pahkaan ahkiink kaaonciitc wenci​pikiiwetc ehpi​nanaahkomaatc Kishemanitoon?" 19 Miihsh kaa'inaatc ini ininiwan: "Pasikwiin mii 'i ishi​maacaan. Kitepwewakentamowin kikii'minwaaci'ikon," okii'inaan. 20 Aaninta Perahsiik (Pharisees) okiih​kakwecimaawaan Ciisahsoon aanahpii keoshihsicikaatenik Kishemanitoo oTipencikewin. O'o tahsh Ciisahs okii'inaa': "Ahpii Kishemanitoo pioshihsitootc oTipencikewin kaawiin iitok tanihsitawinaakohsinini. 21 Kaawiin kaye awiya taaihkitohsii: 'Inashke, mii 'oweni, komaa kaye ina 'iweni Kishemanitoo oTipencikewin.' Kishemanitoo oTipencikewin ohsha ayaamakan kipimaatisiwiniwaank." 22 Miitahsh Ciisahs kaa'inaatc okihkino'amawaakana': "Taocihcihse ohsa tipa'ikan ahpii cimihsawentamek cikii'waapantamekipan peshik okiishikanom Inini Okohsihsan, kaawiin tahsh kikawaapantansiim. 23 Tani​ayaawak tahsh o'o keininekwaa: 'Inashke weti inaapin.' 'Inashke 'omaa inaapin.' Keko tahsh weti ishaahkek ciawi-inaapiyek. 24 Taapishkoo kaashi​waahtehsek weti ishpimink, kwehkwehk itahsh inahke weti ishpimink e'ishi​mamishahkii​waahseyaak, miihsa keishinaakwaninik ahpii pitakohshininitc Inini oKosihsan. 25 Pinamaa tahsh nihtam niipiwa' tashi​kakwaatakihtoo, ciaanawenimikotc pemaatisinitc o'o noonkom kaakiishikaninik. 26 I'iwe hsa kaakiihpi​ayishihsenik mekwaa ahpii Noowa (Noah) kiihpi​pimaatisitc, miitahsh peshikwan keishinaakwaninik Inini oKosihsan okiishikanom. 27 Pemaatisiwaatc kii'wiihsiniwak, kii'minihkwewak kaye. Ininiwak, ihkwewak kaye ekii'waawiitikentiwaatc piinihsh ahpii Noowa kaakiih​poositc kihciciimaan. Miitahsh kaakii'nihkipiik misiwe ahkiink kahkina pemaatisiwaatc kii'nihshiwanaatisiwak. 28 Miitahsh i'iwe keishihsek kaakiihpi-ishihsek mekwaa Laat (Lot) kiipimaatisitc. Pemaatisiwaatc iitok kii'wiihsiniwak, kii'minihkwewak kaye. Kii'ataawewak, kaye tahsh kii'ataawaakewak. Kiikihtikewak, kaye tahsh kii'waahkaa'ikewak. 29 Ahpii tahsh ehkiishikaninik Laat i'imaa kiionci​maacaatc Swaatam (Sodom) ootenaank, miihsh ishkote, a'a kaye ahsin kaawiihsakaapahsowetc kaakii'onci​pankihshink kiishikonk kahkina i'imaa eyaawaatc ekii'nihsikowaatc. 30 Miitahsh i'iwe peshikwan keishinaakwahk kiishikahk ahpii Inini oKosihsan naakosinitc. 31 "Ahpii i'i ishi​kiishikahk, awiya wakici​waahkaa'ikanink kaa-ayaatc taka kaawiin tapi​niihsaantawehsii pinamaa cipi​naasihkank otaya'iiman. A'a kaye weti kaa-ayaatc mishawahkamik kaawiin takiiwehsii cinaasihkank kekoon. 32 Maamihkwenimihk kaakii'ishiwepisinitc Laat wiiwan. 33 Awenen hsa piko kekakwe​kihciwinank opimaatisiwin kaawiin oka​ontinansiin cipimaatisitc. A'a tahsh kaye kepakitinank opimaatisiwin niin onci, mii 'awe kepimaatisitc. 34 Miihsh eshi​wiintamawinakook. Niishin awiyak tanipaawak nipewinaahkonk ehtipihkaninik. Peshik taonci​otaahpinaa, kotak itahsh tanakanaa. 35 Niishin ihkwewak ta-anohkiiwak ehpiihsipoocikewaatc. Peshik taonci​otaahpinaa, a'a tahsh kotak tanakanaa." 36 [Niishin hsa ininiwak ta-ayaawak ishipeshikwan mihshawahkamik, peshik taonci​otaahpinaa, a'a tahsh kotak tanakanaa."] 37 Okihkino'amawaakana' itahsh okii'ishi​kakwecimikoo': "Tepencikeyan, aanahpii i'iwe keishihsek?" O'o tahsh Ciisahs kii'ishinahkwehtam: "Aanti hsa piko keshiahtek kaanipoomakahk miiyaw, mii hsa 'imaa ketashi​maawaci'itiwaatc iki mihtaskihtikwaanehsiwak."

Lok 18

1 Ciisahs okii'wiintamawaa' okihkino'amawaakana' awehcikan keonci​kihkino'amawaatc mooshak cianami'ehtawaanihpan Kishemanitoon, wiihkaa ciaanawencikehsinik. 2 "Kii'ayaa iinsan inini ootenaank ekiih​kohtaanenimaahsik Kishemanitoon, ekiih​papaa​pisiskenimaahsik kaye ininiwa'. 3 Kiiwaacihkwe kaye i'imaa kii'ayaa peshikwan ootenaank ekii'nihtaa​naasihkawaatc ini otipaahkoniwen ekiih​kakwecimaatc e'antawentank kwayahk citootawintc o'o ekii'inaatc: 'Wiici'ihshin cishaakooci'ak kaakakwe​macihse'ihshitc!' 4 Kaawiin tahsh nanaansh otipaahkoniwe kii'inentansii. Kekahpii tahsh o'o kii'inentam: 'Aanawiin ekohtaanenimaahsiwak Kishemanitoo, ehpapaa​pisiskenimaahsiwakwaa kaye awiyak 5 shaakooc itahsh a'a kiiwaacihwe nimikoshkaasomik, intawaa hsa ninka​wiici'aa citepinank i'i kaashi​antawentank. Kehcinaac maawiin ninka​noonte​caakii'ik e'nipaaci​piishaatc.' " 6 Miihsh Tepenciketc kaa'ani-ihkitotc: "Inashke pisintamok aaniin ehkitotc a'a kaakwayahkohcikehsik otipaahkoniwe. 7 Miitahsh i'i nahke Kishemanitoo kwayahk keshi​onaahkonaatc i'i kaakii'onaapamaatc kaashaakowaanikotc ciwiici'aatc entahsokiishik, entahsotipihk kaye. Tapwaahtawii na ciwiici'aatc? 8 Miihsh eninakook, aahpici ohsha takitaahtapii kwayahk cishi​wiici'imintc. Ahpii tahsh pitakohshink a'a Inini oKosihsan, oka​mihkaan ina tepweyentamowin o'omaa ahkiink?" 9 I'imaa tahsh kii'ayaawaa' aaninta awiya' kaakiih​kwayahkwaatisiiwi​tepakenintisonitc, ekii'aanwaapamaanitc tahsh kotak awiya' eshihcikenitc. Miitahsh Ciisahs o'o kaakii'ishi​awehciketc. 10 "Aapitink kii'niishiwak ininiwak ekii-ishaawaatc Kihcianami'ewikamikonk ekii'anta-anami'aawaatc. Peshik kiihPerahsiiwi, (Pharisee) a'a tahsh kotak kaatipa'ike'iwetc taakihs​shooniyaan (tax) ekiih​tinowitc. 11 A'a tahsh Perahsii kii'niikatekaapawi o'o ekii'ishi​anami'aatc: 'Kishemanitoo miikwehc hsa kitinin ehtinowihsiwaan taapishkoo kotak awiyak kaakimootiwaatc, kaamacitootamowaatc, kaapihshikwaatisiwaatc kaye. A'a kaye kaatipa'ike'iwetc taakihs​shooniyaan kaamatwe​ayaatc. 12 Niishokiishik entahso​tawahte kaawiin nintoonci​wiihsinihsii piko e'anami'aayaan. Kaye tahsh peshik mitaahso ehpakitinikeyaan misiwe minihk kaakashkihcikeyaan,' kii'ihkito. 13 A'a tahsh wiin kaatipa'ike'iwetc taakihs​shooniyaan nawac waahsa kii'matwe​niipawi. Kaawiin kaanake ishpimink kii'inaapihsii. Kiihpahkihte​yaahkikane'otiso ehkihci​mincinawesitc e'ihkitotc: 'Kishemanitoo koohpaasinawihshin, niin emacaatisiyaan,' kii'ihkito. 14 Miitahsh eninakook, wa'a tahsh kaatipa'ike'iwetc taakihs​shooniyaan ahpii ani​kiiwetc nawac okii'minwaapamikoon Kishemanitoon ahpiihc wiin a'a Perahsii. Awiya hsa kaaishpenintisotc, tatapahsenimaa. Awiya hsa kaatapahsenintisotc, mii hsa 'awe keishpentaakositc." 15 Aaninta tahsh awiyak okiih​piinaawaa' apinoonciisha' eshi​ayaanitc Ciisahsoon cisaaminaanitc. Kihkino'amawaakanak tahsh o'o ewaapantamowaatc, okiih​kishii​kanoonaani i'i kaakiih​piinaanitc. 16 Ciisahs tahsh okii'antomaa' apinoonciisha' cinaasihkaakotc o'o ekii'ihkitotc: "Maano apinoonciishak ninkapi​naasihkaakook. Keko wiin kipihtinaahkekwaanik. Miiwak iitok iki kaatipentami'ikoowisiwaatc Kishemanitoon oTipencikewinini. Aaniihsh miiwak ihsa iki tino pemaatisiwaatc oko kaainaatisiwaatc apinoonciishink ketipenimikowaatc Kishemanitoon. 17 Tepwe hsa kaaininakook, awenen hsa piko keotaahpinansik Kishemanitoon oTipencikewinini taapishkoo kaaishi​otaahpinank wa'a apinoonciish, kaawiin wiihkaa oka​kashkihtoohsiin cipiintiketc Kishemanitoo oTipencikewinink." 18 Aapitink tahsh inini okii'naasihkawaan Ciisahsoon ekii'inaatc: "Osasekaakihkino'amaake, wekonen sasekaa ishihcikewin keishihcikeyaampaan keonci​miinikooyaan pimaatisiwin wiihkaa kepoonihsehsinok?" 19 Ciisahs okii'ishi​nahkwehtawaan: "Wekonen wenci-ishiyan ehsasekaawiyaan. Kaawiin awiya sasekaawihsii, mii ehta ko Kishemanitoo. 20 Kikihkentaanan iitok ini onahshowewinan: 'Keko papaamenimimaahken pahkaan awiya wiiwan, keko nihshiwehken, keko kimootihken, keko kaye awiya noociko inaacimaahken tipaahkonintc, kihci-inenim kitete, kimaamaa kaye.' " 21 Oshkiniikiwan okii'ikoon: "Kiipi​oshkaatisiyaan ohsha piko ono kahkina onahshowewinan nimpi​na'ihtaanan." 22 Ciisahs tahsh o'o e'noontank, mii 'i kaa'inaatc: "Peshik kekoon kinoontehse kekii'ishihcikeyampan. Ataawaaken kahkina kekoonan kaa-ayaayan, cimiinatwaa shooniyaan ketimaakisiwaatc. Wenootisiwin tahsh kika-ayaan weti kihcikiishikonk. Miitahsh ishi​piishaahkan cipiminisha'oyan." 23 E'noontaakotc itahsh ini ininiwan o'o e'inaatc, wiinke kii'maanentamoon aaniihsh kiikihci​wenootisiwan. 24 Ahpii tahsh Ciisahs e'waapamaatc e'maanentaminitc mii 'i kaa'ihkitotc: "Aahpici sanakanini kaawenootisitc cikiih​piintikehpan Kishemanitoon eshi​tipencikenitc. 25 Nawac sanakanini kaawenootisitc cipiintikehpan Kishemanitoon eshi​tipencikenitc, ahpiihc wiin pihkwaawikanemihtatim cishiipaashkaahpan i'iweni kaashi​pakoneyaanik shaaponikan." 26 I'i tahsh pemaatisinitc e'noontaakotc o'o e'ihkitotc mii 'i kaa'ihkitonitc: "Awenen tahsh inaa kekiihpimaaci'ikoowisihpan?" 27 Miihsh Ciisahs kaa'ishi​nahkwehtank: "Inini wiin kaawiin otaa​kashkihtoohsiin o'o ci-ishihciketc, Kishemanitoo tahsh wiin kahkina kekoon owencihtoon." 28 Okii'ikoon itahsh Piitaroon (Peter): "Inashke, kahkina kekoon ninkii'nakataamin ewiih​piminisha'okooyan." 29 Miitahsh Ciisahs kaa'ihkitotc: "Tepwe o'owe kaawiintamawinakook, awenen iko kenakatank otayaawin, kenakanaatc kaye wiiwan, wiicihkiwensiwan kaye, oniiki'ikoo' kaye, kaye tahsh otapinoonciishima' cikiih​tipenimikoohpan Kishemanitoon; 30 Mii 'awe awahshime tahsink kemiinintc mekwaa o'omaa pimaatisiwinink. Miihsh kaye citako​miinintc pimaatisiwin wiihkaa kepoonihsehsininik." 31 Ciisahs tahsh pahkeya'ii okii'ishiwinaa' mitaahshi​niishin (12) okihkino'amawaakana' ekii'inaatc: "Pisintawihshik, Ceroosalamink (Jerusalem) kika-ani-ishaamin. Kahkina kekoon kaakii'ishipii'ikewaatc iki kenootamawaawaatc Kishemanitoon tamooshkinehseni ekiih​tashimaawaatc ini Inini oKosihsan enimintc. 32 A'a tahsh Inini oKosihsan tashi​pakitinaa eshi​ayaanitc kaaCoowiwihsinik. Miitahsh cipaahpi'intc, cimaanshi​tootawintc kaye, miihsh kaye cisasiihkwaanintc. 33 Miitahsh kaye cipahpahshanshe'ontc, miihsh kaye keshi​nihsintc. Nihso​kiishihk (3) tahsh ishihsenik, takiiwe​pimaatisi," okii'inaa'. 34 Kihkino'amawaakanak tahsh kaawiin cikii'nihsitohtamowaatc kekoon kaakiih​tashintaminitc aaniihsh kiihtootawaawak cinihsitohtansikwaa ini ihkitowinan. Kaawiin kaye cikii​kihkentamowaatc wekonen kaakiih​tashintaminitc. 35 Aasha Ciisahs pehsho e'ani​otihtank Cerahko (Jericho) ootena, peshik ininiwan kaawaapihsinik kii'namatapiwan ciiki​miihkana ehpakohshi'iwenitc. 36 Ahpii tahsh a'a inini e'noontank ehpaahtiinonitc awiya' ehpimi​ayaanitc kiihkakwetwe aaniin enahkamikaninik. 37 Miihsh kaa'inintc: "Ciisahs Naasaritink (Nazareth) kaaonciitc pimi​ayaa," kii'inaa. 38 Miitahsh kaa'ishi​shaakowetc: "Ciisahs, Tepitink (David) kaaontahkaanesiyan koohpaasinawihshin." 39 I'i tahsh awiya' kaaniikaaniinitc okiih​kishii​kanoonikoo' ekii'ikotc ciompiikisihsik. Aanciko tahsh enikohk kiihshaakowe ekii'ihkitotc: "Tepitink kaaontahkaanesiyan koohpaasinawihshin." 40 Miitahsh Ciisahs kaakiih​kipihciitc ekii'anoohkiitc cipiitamawintc ini ininiwan Ahpii tahsh pehsho ehpi​ayaanitc mii 'i kaa'ishi​kakwecimaatc: 41 "Aaniin eshi​antawenimiyan ci-ishihcikehtamawinaan?" okii'inaan. "Tepencikeyan, ninantawentaan ciwaapiyaan," okii'ikoon. 42 Miitahsh kaa'inaatc: "Miitahsh ishiwaapin. Kitepwewakentamowin hsa kiminwaaci'ikon." 43 Shemaak tahsh a'a inini okiikashkihtoon ciwaapitc, ekiih​piminisha'waatc Ciisahsoon. Kaye tahsh ekii'nanaahkomaatc Kishemanitoon. Ahpii tahsh iki kaapaahtiinowaatc awiyak ewaapantamowaatc o'oweni, mii 'i kewiinawaa kahkina kaa'ishi​nanaahkomaawaatc Kishemanitoon.

Lok 19

1 Ciisahs okiihpi​otihtaan Cerahko (Jericho) ootena ekii'mihci​shaaposhkaatc. 2 Kii'ayaa tahsh i'imaa inini Saahkiiyahs (Zacchaeus) eshinihkaasotc maawac kaaniikaanishkawaatc kaamaawantoonaanitc taakihs​shooniyaan (tax) kaye tahsh wiinke ekii'wenootisitc. 3 Okiihkakwe​waapamaan aweneniwinitc Ciisahsoon. Kaawiin tahsh okii'waapamaahsiin aaniihsh kiitahkoosii, onsaam kaye kiipaahtiinowa' pemaatisinitc. 4 Miitahsh kii'niikaanipahtoo ehpimohsenaaniwaninik kaye tahsh ekii'ahkwaantawetc Sikamwariwaahtikonk (Sycamore) waa'onci​waapamaatc Ciisahsoon mayaa i'iweti wiiani-ishi​pimohsenitc eshi​akoositc. 5 Ahpii Ciisahs kaapi​otihtank eshi​akoosinitc Saahkiiyahsan, ishpimink kii'inaapi ehkanoonaatc: "Saahkiiyahs, weyiip piniihsaantawen. Noonkom kaakiishikahk oncita ninkapi​ayaa i'imaa kitayaawinink," okii'inaan. 6 Saahkiiyahs tahsh kiihpapaashii e'niihsaantawetc, kaye tahsh ekii'minwentank Ciisahsoon pisaan cipiintikaakotc. 7 Kahkina tahsh awiyak o'o e'ishi​waapankewaatc kii'maacii​kihci​kaakiikitowak ekii'ihkitowaatc: "Mii 'i ahpan Ciisahs e'anta​mawahtihsaatc otaawininiink omacaatisan," kii'ihkitowak. 8 Saahkiiyahs tahsh kiihpasikwii ehkanoonaatc kaaTipencikenitc: "Inashke Tepencikeyan aapihta ninka​pakitinaanan nintaya'iiman cimiinakwaa kaakitimaakisiwaatc. Minihk kaye kaakiihpi​wayeshimakwaa awiyak niiwink (4) awahshime minihk ninkashi​kiiwe​tipa'amawaak," okii'inaan. 9 Miitahsh Ciisahs kaa'inaatc: "Pimaaci'ikoowisiwin otootihsikonaawaa o'omaa kaa-ayaawaatc taawinink noonkom kaakiishikahk aaniihsh kewiin a'a inini Eparahaamink (Abraham) nihtaawikihcikanink ontahkaanesi. 10 Niin aaniihsh Inini oKosihsan ninkiih​piishaa ehpi​antone'wakwaa, kaye tahsh ewiih​pimaaci'akwaa kaawanihshinowaatc," kii'ihkito. 11 Mekwaa tahsh pemaatisinitc ehpisintaakotc Ciisahs keyaapi okii'ani​wiintamawaa' awehcikewin aasha epehshonaakwaninik ciotihtank Ceroosalam (Jerusalem). Mii 'iitok kaa'inentaminitc aasha shemaak cinaakwaninik Kishemanitoon oTipencikewinini. 12 Miitahsh kaa'ihkitotc: "Peshikwaa kii'ayaa inini maawac ehkihci-inentaakositc. Kiihkwayaancii waahsa ahkiink ewii'ishi​maacaatc, weti ewii'awi​tashi​kihciokimaawi'intc. Ahpii tahsh kii'ishkwaa​onakimintc, ewiih​pikiiwetc ciokimaahkantank ahkiink kaaonciitc. 13 Cipwaa maacaatc tahsh okiih​kanoonaa' mitaahso otanohkii'aakana' kahkina ekii'maamiinaatc pehpeshik osaawishooniyaanhsa'. Miihsh kaa'inaatc: 'Ishi​pakitinihk wa'a shooniyaa keonci​shooniyaahkeyaan minihk iko keontentiyaan piiniihsh cipitakohshinaan,' okii'inaa'. 14 A'a tahsh inini kaashiinkenimikotc owiici​pimaatisiimaakana' okii'ishinisha'waani kaatipaacimonitc o'o ciawi-ihkitonitc: 'Kaawiin ninantawenimaahsiwaanaan wa'a inini cikihci​otookimaamiyaank.' 15 Shaakooc itahsh a'a inini kiihkihciokimaawi'aa, miihsh kaahpishi​kiiwetc. Shemaak itahsh kii'inaahkonike otanohkii'aakana' cipi​niipawinitc enaahsamiitc ewii'anta​kihkentank aaniin minihk kaahkashkihcikenitc. 16 Ini nihtam kaapiishaanitc kii'ihkitowan: 'Nintookimaam, kotak mitaahso nintayaawaak osaawishooniyaanhsak kaakii'onci​kashkihcikeyaan a'a peshik kaakii'miishiyan onci,' okii'ikoon. 17 Miitahsh kaa'inaatc: 'Mii 'iwe ekii'minohcikeyan, kiin kwayahk anohkii'aakan kitinow. Ehkwayahko​tootaman tahsh mihsawaako kaa-akaahsentaakwahk, kimiinin cinaanaakacihtooyan mitaahso kihciootenawan,' okii'inaan. 18 Ini kotak otanohkii'aakanan kiihpiishaawan ekii'ikotc: 'Nintookimaam kotak naanan nintayaawaak osaawishooniyaanhsak kaakii'onci​kashkihcikeyaan a'a peshik kaakii'miishiyan onci,' okii'ikoon. 19 Miitahsh wiin ini kaa'inaatc: 'Kiin tahsh wiin kikamiinin naanan cinaanaakacihtooyan kihci​ootenawan,' okii'inaan. 20 Iniweniwan itahsh kotak anohkii'aakanan kiihpiishaawan ekii'ikotc: 'Nintookimaam, ina wa'a kitoosaawishooniyaanhsim. Aapihkaakanink ninkii'kashkiikinaa ekiih​kanawenimak, 21 ekiih​kohsinaan aaniihsh kikihkenimin aaniin ehpiihci​aahkwaatisiyan e'otaahpinaman kiin kaatipentansiwan, kaye tahsh e'maawantoonaman e'manishaman kiin kaakiih​kihtikaatansiwan,' okii'ikoon. 22 Miitahsh kaa'ikotc otookimaaman: 'Kiin maawac noociko anohkii'aakan. Kitihkitowinan ninka-aapacihtoonan keonci​onaahkoninaan. Kikihkentaan aahpici e'aahkwaatisiyaan, e'otaahpinamaan kaye kaatipentansiwaan, e'manishamaan kaye kaakiikihtikaatansiwaan. 23 Wekonen tahsh kaa'onci​ahsaahsiwatc nishooniyaam kekii'onci​kashkihcikeyaampaan ahpii tahsh kiipitakohshinaan cikii​saakisi'akipan nishooniyaam, minihk kaye kaa-aanihke​kashkihciketc?' 24 Miitahsh kaa'inaatc i'imaa kaakii'niipawinitc: 'Otaahpinimihk ini osaawishooniyaanhsan kaa-ayaawaatc, ini tahsh miinimihk anohkii'aakanan mitaahso osaawishooniyaanhsa' kaa-ayaawaanitc.' 25 Miihsh kaa'inintc a'a kihciokimaa: 'Nintookimaaminaan, aasha iitok wiin mihtaahso shooniyaanhsa' otayaawaa',' kii'inaa. 26 Kihciokimaa tahsh kii'ihkito: 'Kiwiintamawininim o'o, kahkina awiya kekoon kaa-ayaatc aanciihke awahshime tamiinaakaniwi, a'a tahsh wiin kekoon kaa-ayaahsik, taotaahpinamawaa mihsawaa ko pankii kekoon kaa-ayaatc. 27 Ikiweniwak tahsh wiin kaashiinkenimiwaatc kaakii'antawenimihsikwaa ciokimaahkantawakwaa, piinihkwak o'omaa eshi​ayaawak. Nihsihkwak enaahsamiiwak,' " kii'ihkito. 28 O'o tahsh Ciisahs kaa'ishkwaa​ihkitotc, kii'ani​niikaani​maacaa Ceroosalamink (Jerusalem) e'ishaawaatc. 29 Ahpii tahsh kekaa e'ani​takohshink Pehpaci (Bethphage) eshinihkaatenik ishitaawinink kaye Pehtani (Bethany) eshi​ayaanikin ehpihkwatinaanik Aalip (Olive) ecikaatenik, Ciisahs tahsh okii'niikaaninisha'waa' niishin (2) okihkino'amawaakana', 30 o'o ekii'inaatc: "Ani​niikaani-ishaak kaamatwe​ayaak kaaishitaaniwank. Ahpii tahsh ani​piintikeshkaayek kikawaapamaawaa maanshimihtatim cisakaakwahpisotc mahshi awiyan ehpoosonotaakohsik. Aapa'waahkek tahsh cipiinek. 31 Kiishpin tahsh awiya o'o ishi​kakweciminek: 'Wekonen wenci​aapa'wek a'a maanshimihtatim?' O'o hsa kikainaawaa: 'KaaTipenciketc owii'aapaci'aan,' " okii'inaa'. 32 Iki tahsh kaakii'niikaaninisha'ontwaa kii'ishaawak ekii'ishi​mihkamowaatc kahkina kaakii'inintwaa. 33 Mekwaa tahsh e'aapa'waawaatc ini maanshimihtatimoon, tepenimikonitc okii'ikowaan: "Wekonen tahsh wenci​aapa'wek maanshimihtatim." 34 Miihsh kaa'inaawaatc: "KaaTipenciketc owii'aapaci'aan," okii'inaawaan. 35 Okiih​piinaawaan tahsh ini maanshimihtatimoon eshi​ayaanitc Ciisahsoon. Miitahsh kaa'ishi​wakitahtoowaatc okashkiikiiwiniwaan, miihsh i'imaa kaa'ishi​ahpapinitc Ciisahsoon. 36 E'ani​pimi​ayaatc itahsh, pemaatisinitc okiih​tashwekiikihsitooni okashkiikiiwinini i'imaa miihkanaank. 37 Ahpii pehsho e'ani​otihtank Ceroosalam eshi​niihsaciwemoninik miihkana kaashi-ishpatinaanik Aalip Kihtikaanaahtikohkaank ecikaatenik, aahpici kiihpaahtiinowa' kaapiminisha'okotc ekii'maacii​ciihkentaminitc enikohk ekiih​shaakowenitc e'nanaahkomaanitc Kishemanitoon kahkina maamahkaacihcikewinan kaakii'waapantaminitc: 38 "Shawentaakosi a'a kihciokimaa kaapi​takohshink otishinihkaasowininiink kaaTipencikenitc. Pisaanisiwin ayaamakan kihcikiishikonk, kaye tahsh maawac kihci-inentaakosiwin otayaan Kishemanitoo maawac ishpimink kaa-ayaatc," kii'ishi​shaakowewak. 39 Aaninta tahsh Perahsiik (Pharisees) mekweya'ii kaashi​paahtiinonaaniwaninik okii'onci​kanoonaawaan Ciisahsoon ekii'inaawaatc: "Okihkino'amaake, kanoosh kikihkino'amawaakanak cinoontaatihsikwaa." 40 Ciisahs tahsh kii'ishi​nahkwehtam: "Kiwiintamawininim, kiishpin wiinawaa noontaatihsikwaa, ahsiniik ohsha tashaahshaakowewak." 41 Ahpii Ciisahs aasha pehsho e'ani​otihtank Ceroosalam (Jerusalem) kihciootena, ahpii ehtepaapantank okii'mawintaan, 42 ekii'ihkitotc: "Kiishpin tahsh kiikihkentamekipan noonkom kaakiishikahk aanti keonci​miinikooyekipan pisaanisiwin; kaawiin tahsh kikii​waapanta'ikoohsiim iniweniwan. 43 Kika​otihsaapantaam ohsha kiishikahk, ahpii kaashiinkeniminekwaa ciwaahkaa​pihkwahkamika'ikewaatc keonci​miikaaninekwaa. Kika​waahkaashkaakowaak kaye, misiwe kaye inahke kikaonciihkaakowaak. 44 Wiinke hsa ko oka​nihshiwanaacihtoonaawaa kitootenaamiwaa. Kika​nihsikoom, apinoonciisha' kaye oka​nihsaawaa'. Kaawiin kanake peshik ahsin tainapihsii kaakii'ishi​kihtapihpan, onsaam aaniihsh kaawiin kikii'nihsitawinansiim ahpii kiishikaninik Kishemanitoo kekiih​pimaaci'inekipan." 45 Ciisahs kiihpiintike i'imaa Kihcianami'ewikamikonk, ekii'maacii​saahsaakicinisha'waatc kahkina kaakiiataawewikamikohkenitc. 46 Miihsh o'o kaa'inaatc: "Mii hsa eshipii'ikaatek Kihcimasina'ikan Kishemanitoo ekii'ihkitotc: 'Niwaahkaa'ikan hsa taishinihkaate anami'e​waahkaa'ikan,' kiinawaa tahsh e'ishi​naakohtooyek taapishkoo ciokaasoowikamikowaatc omahkantweshkak." 47 Tahso​kiishik Ciisahs kiihkihkino'amaake Kihcianami'ewikamikonk. I'i tahsh kihcianami'ewikimaa', i'i kaye kaakihkino'amaakenitc Onahshowewin, i'i kaye kaaniikaaniihtamawaanitc pemaatisinitc okiih​kakwe​nihsikoo'. 48 Kaawiin okiih​kihkentansiini aaniin kekii'onci​nihsikohpan aaniihsh kahkina pemaatisinitc okii​kihciwentamini kaakii'ihkitotc. Kiikihciwi​ayaawa' ekiih​pisintaakotc aaniin ehkitotc.

Lok 20

1 Aapitink ehkiishikaninik Ciisahs kii'ayaa Kihcianami'ewikamikonk ekihkino'amaaketc, ekiih​tashintank kaye minwaacimowin. Miihsh kaakiihpi​naasihkaakotc Kihcianami'ewikimaa', kaakihkino'amaakenitc onahshowewin, i'i kaye kaaniikaanisinitc onahshowewinink, 2 miitahsh kaa'ikotc: "Wiintamawihshinaam, wekonen tino kashki'ewisiwin kaa-aapacihtooyan ono kaaishihcikeyan? Awenen kaye kaamiinihk i'i kashki'ewisiwin?" 3 Ciisahs tahsh okii'ishi​nahkwehtawaa': "Peshik tahsh kekoon keniin kiwiih​kakwecimininim. Nahkwehtawihshik itahsh. 4 Aanti kaa'onciinik a'a Cwaan (John) osiika'antaakewin? Kishemanitoonk ina komaa kaye ininiihkaank?" okii'inaa'. 5 Miitahsh kaa'ishi​maacii​kakanoonitinitc ekiih​tashintamaatinitc ekii'ihkitonitc: "Kiishpin ihkitoyank 'Kishemanitoonk,' kika'ikonaan tahsh 'Wekonen tahsh kaa'onci​tepwehtawaahsiwek a'a Cwaan?' 6 Kiishpin tahsh ihkitoyank 'Ininiihkaank,' kahkina iki kaapaahtiinowaatc kikapapiimwahsina'ikonaanik aaniihsh kahkina otinakimaawaan ini Cwaanan Kishemanitoon kaakanootamawaanitc." 7 Miitahsh kaa'ikotc: "Kaawiin ninkihkentansiimin aanti weciimakanokwen." 8 Miitahsh kaa'inaatc: "Kaawiin tahsh keniin kikawiintamawihsinooninim wekonen tino kashki'ewisiwin kaa-aapacihtooyaan o'o kaaishihcikeyaan." 9 Ciisahs tahsh okii'wiintamawaa' pemaatisinitc o'o awehcikewin: "Kii'ayaa peshik inini ekiih​kihtikaatank shoominikihtikewin. Miihsh kaa'ishi​awi'aatc kotak kihtikewininiwa'. Miitahsh kaa'ishi​maacaatc kinwesh ekii'inentitc. 10 Ahpii tahsh e'ocihcihsenik cimawinswaasonitc i'i shoomina', okii'ishinisha'waan ihsa otanohkii'aakana' i'imaa kaaishi​kihtikaasonitc shoomina' kewiin i'imaa ewii'ontisitc minihk kekii'ontisihpan. Kaakii'awi'intwaa tahsh okii​pahpahkihte'waawaan ini anohkii'aakanan, kekoon aapiinc ekii'maaciitoohsinik. 11 Miinawaa tahsh a'a kihtikewikimaa okii'ishinisha'waan kotak otanohkii'aakanan, miitahsh kaakii'awi'intwaa peshikwan kaa'ishi​pahpahkihte'waawaatc, ekii'maanshi​tootawaawaatc kaye, kekoon aapiinc ekii'maaciitoohsinik. 12 Miinawaa kotak otanohkii'aakanan okii'ishinisha'waan, miihsh kaa'ishi​maahki​tootawimintc ekiih​saakici​wepinikaniwinitc kaye. 13 Miitahsh a'a kihtikewikimaa kaa'ihkitotc: 'Aaniin tahsh inaa keishihcikeyaan? Ninkosihsan ninka​ishinisha'omaan kaasaaki'imak, maakishaa tahsh oka​kihtenimaawaan.' 14 Ahpii tahsh kaakii'awi'intwaa ewaapamaawaatc ini okosihsimaan, miitahsh kaa'ihkitowaatc: 'Mii hsa ini kihtikewikimaa okosihsan. Ampeyohk taka nihsimaataanin, ciayaawank i'i kaawiih​tipinawewisinitc!' 15 Miitahsh kaakii'otihtinaawaatc ekiih​saakici​wepinaawaatc i'imaa shoominikihtikaanink, ekii'nihsaawaatc kaye. "Aaniin tahsh ketootawaatc a'a kihtikewikimaa kaatipentank shoominikihtikewin i'i kaakii'awi'aatc? 16 Tapi​takohshin iitok cipi​nihsaatc i'i kaakii'awi'aahpan shoominikihtikewin, kotak awiya' cimiinaatc," okii'inaa'. E'noontaakotc itahsh pemaatisinitc o'o kii'ihkitowa': "Taka kaawiin wiihkaa i'i taishihsehsinoon!" 17 Ciisahs tahsh okiih​kanawaapamaa' ekiih​kakwecimaatc: "Aaniin tahsh ehkitoomakahk o'o kaaishipii'ikaatek Kehtemasina'ikanink? 'Ini hsa ahsiniin kaawaahkaa'ikewaatc kaa-aanawenimaawaatc, miiwan ihsa ini maawac kaaniikaanentaakosinitc ahsiniin.' 18 Awenen itahsh iko 'imaa keshi​pankihshink ahsiniink, tapiisihshin. A'a tahsh kaye kepihsihkoosotc ini ahsiniin tashikociishkooso." 19 Iki tahsh kaakihkino'amaakewaatc Onahshowewin, iki kaye kihcianami'ewikimaak shemaak okiihkakwe​kaahcitinaawaan Ciisahsoon aniihsh okiih​kihkentaanaawaa wiinawaa ehtashimikowaatc kiiawehcikenitc. Okiih​kohsaawaa' itahsh pemaatisinitc. 20 Wiinke tahsh okii'naakaci'aawaan ekii'ishinisha'waawaatc kaye awiya' ci'inwaanitisonitc kwayahk tino enaatisinitc kekiimooci​naakaci'aanitc Ciisahsoon. Okii'ishi​antawentaanaawaa ewiih​kaahcici'aawaatc kekoon ihkitonitc, ewii'ishi​pakitinaawaatc itahsh cionaahkonikonitc keshki'ewisinitc, meshkawisiinitc kaye kihci​onahshowewininiwan Oroomink (Rome) wenciinitc. 21 Iki tahsh kaakii'ishinisha'ontwaa okiimooci​naanaakatisiik o'o okii'ishi​kakwecimaawaan Ciisahsoon: "Okihkino'amaake, kikihkenimikoo kwayahk e'ihkitoyan, kwayahk kaye e'ishi​kihkino'amaakeyan. Kikihkenimikoo kaye kahkina awiya peshikwan ehtootawatc kaatootawatc a'a peshik awiya. Tepwewin kaye ekihkino'amaakeyan aaniin Kishemanitoo kaashi​antawenimaatc awiyan ci-ishi​pimaatisinitc. 22 Wiintamawihshinaam tahsh aaniin enentaman: kekiinawint ina ishinaakwan citipa'amank i'i taakihs (tax) kaatipa'ike'iwetc a'a Maawac iko Kihciokimaa weti Oroomink kaa-ayaatc, komaa kaye kaawiin nintaa​tipa'ansiimin?" okii'inaawaan. 23 Ciisahs tahsh okiih​kihkenimaa' ekii'maci-inentaminitc, miitahsh kaa'inaatc: 24 "Waapanta'ihshin a'a waapaapihko​shooniyaanhs. Awenen wa'a kaamasinihshink? Awenen o'oweni owiinsowin kaaoshipii'ikaatenik?" okii'inaa'. "Maawac iko kihciokimaa," okii'ikoo'. 25 Miitahsh kaa'inaatc: "Miinihk hsa a'a Maawac iko Kihciokimaa kaatipentank, miinihk itahsh kaye wiin Kishemanitoo kaatipentank," okii'inaa'. 26 Kaawiin tahsh okii​kashkihtoohsiinaawaa cionci​kaahcici'aawaatc aaniin keihkitonitc. Wiinke kiikihci​maamahkaatentamook kaakii'ishi​nahkwehtaakowaatc, kaawiin tahsh cikii'noontaatiwaatc. 27 Aaninta Saacahsiik (Sadducees) okiihpi​anta​waapamaawaan Ciisahsoon. Miiwak okoweniwak kaaishi​kihkino'ikewaatc: kaawiin awiya miinawaa takiiwe​pimaatisihsii ishkwaa​pimaatisitc. 28 Okiih​kakwecimaawaan: "Okihkino'amaake, Moosihs (Moses) tahsh kii'ishipii'ike otoonahshowewinink, kiishpin inini nipotc e'nakanaatc ini wiiwan, ekii'ayaawaahsikwaa apinoonciisha', wiicihkiweyan hsa oka​wiitikemaani ini wiiwan ciayaahtamaakotc apinoonciisha'. 29 Inashke tahsh kii'niishwaahciwak iki ininiwak ekii'wiicihkiwentiwaatc. Kaasasiihkisitc tahsh nihtam kii'wiiwi, ekii'nipotc tahsh ekii'ayaawaahsik apinoonciisha'. 30 A'a tahsh eniohshiimenshimaawitc kewiin kii'ani​wiiwi ini ihkwewan. 31 Miitahsh peshikwan a'a ani​aanihke ohshiimenshimaa kaa'ishihsetc. Kahkina iki kaakii'niishwaahciwaatc kaakii'wiicihkiwentiwaatc peshikwan kii'ishihsewak ekii'nipowaatc, ekii'onci​ayaawaahsikwaa tahsh apinoonciisha'. 32 A'a tahsh ihkwe ishkwaac kii'nipo. 33 Ahpii tahsh kiiwe​pimaatisinaaniwank, awenen tahsh a'a mayaa kewiiwitc ini ihkwewan? Aaniihsh minciniishwaahso okii'wiitikemaawaan." 34 O'o tahsh Ciisahs okii'inaa': "Ininiwak, ihkwewak kaye waawiitikentiwak o'o noonkom kaapimihsek ahki. 35 Iki tahsh ininiwak, iki kaye ihkwewak kaatepakentaakosiwaatc takiiwe​pimaatisiwak. Ta-ani​pimaatisiwak kaye weti niikaanaya'ii keni​pimihsenik kaawiin iitok tawiitikenaaniwansinoon. 36 Miitahsh encalink citinowiwaatc, kaawiin wiihkaa tanipohsiiwak. Kishemanitoon otooniicaanihsimikowaan, aaniihsh nipowinink kii'onci​kiiwe​pimaatisiwak. 37 I'imaa hsa kaashi​tashintek i'i kaakiih​piskanek eshi​pihkwahkopaak, mii 'imaa Moosihs eshi​pehtenaakohtootc iki kaanipowaahpan ehkiiwe​pimaatisiwaatc. Moosihs kii'ihkitokopan: 'KaaTipencikenitc hsa oKishemanitoomi Eparahaam (Abraham), Aaisik (Isaac) kaye, a'a kaye Cekap (Jacob).' 38 Kaapimaatisinitc ihsa otooKishemanitoomikoo', kaawiin wiin i'i kaaniponitc. Wiin iitok kahkina awiyan kaaonci​pimaatisinitc," kii'ihkito. 39 Aaninta tahsh kehkino'amaakenitc onahshowewin okii'ikoo': "Okihkino'amaake, kwayahk i'i kaaihkitoyan." 40 Kaawiin tahsh kiikashkite'ehsiiwa' awahshime kekoon cikakwecimikotc. 41 Miitahsh Ciisahs kaa'inaatc: "Aaniin tahsh wenci-ihkitonaaniwank Kishemanitoo Kaaonaapamaatc e'okosihsimikonitc Tepitan (David)? 42 Wiin iitok iko Tepit ihkito i'imaa Nikamonink kehte​masina'ikanink: 'KaaTipenciketc okii'inaan ini kaaTipenimimitc: I'imaa ishinamatapin ninkihcinihkink inahke, 43 Paanimaa hsa kikaishi'in cishaakooci'atwaa kaanishkenimihkwaa.' 44 Tepit tahsh ekii'ishinihkaanaatc: 'KaaTipenciketc.' Aaniin tahsh inaa Kishemanitoon kaakii'onaapamikotc keshi​okosihsimikohpan Tepitan?" 45 Mekwaa tahsh kahkina pemaatisinitc ehpisintaakotc Ciisahs okii'inaa' okihkino'amawaakana': 46 "Ayaankwaamisiihtawihkwak iki kaakihkino'amaakewaatc Onahshowewin. Ominwentaanaawaa ehpapaamohsewaatc ehkikishkamowaatc kenwaapiikaninikin kashkiikiiwinan. Ominwentaanaawaa kaye ehpoosho'intwaa akwaciink kaatanataawenk. Kaye tahsh e'ishi​apiwaatc maawac kehci-inentaakwaninikin apiwinan i'imaa Coowi anami'ewikamikonk, i'imaa kaye kaatashi​wiihkwantiwintc. 47 Miiwak iitok iki kaawehsaani'aawaatc kiiwaacihkwewa' ehkimootimaawaatc otayaawinini, kaye tahsh kinwesh e'anami'aawaatc ciwaapamintwaa. Awahshime tahsh wiinawaa oka​onci​ayaanaawaa kakwaataki'ikoowin," kii'ihkito.

Lok 21

1 Ciisahs e'ayinaapitc okii'waapamaa' kaawenootisinitc awiya' ehpakitinaminitc opakitinikewinini kaaishi​kanawenimimintc shooniyaan Kihcianami'ewikamikonk. 2 Miitahsh kaakii'waapamaatc ekitimaakisinitc kiiwaacihkwewan ehpakitinaanitc niishin 2 osaawaapihkoonhsa'. 3 Miitahsh kaa'ihkitotc: "Tepwe 'owe kaawiintamawinakook, a'awe kaakitimaakisitc kiiwaacihkwe nawac niipiwa' pakitinike ahpiihc wiin iki kahkina kotak awiyak. 4 Ikiweniwak hsa wiin kotak owenootisiwiniwaank onci​pakitinikewak, a'a tahsh wiin ihkwe ehkitimaakisitc omisiwe​pakitinaan otoontaatisiwin." 5 Aaninta tahsh okihkino'amawaakana' okiih​tashintamini Kihcianami'ewikamik aaniin kaa'ahpiihci​minohcikaatenik. Okiih​tashintamini kaye pakitinikewinan kaakiih​pakitinamawimintc Kishemanitoon. Miitahsh Ciisahs kaa'ihkitotc: 6 "Onoweniwan tahsh kaawaapantamek, ninkotink iko taocihcihse, awaaciko peshik ahsin ci-ishi​apihsik kaakii'ishi​apihpan. Kahkina ohsha ahsiniik tanaaniihsi​wepinikaasowak." 7 Miitahsh okihkino'amawaakana' kaa'ishi​kakwecimikotc: "Okihkino'amaake, wiintamawihshinaam aaniin ahpii keishihsek i'iwe kaa'ihkitoyan. Aaniin kaye niiyaak keonci​nihsitawinaakwahk i'iwe ahpii wii'ishiwepahk?" 8 Miihsh Ciisahs kaa'inaatc: "Ayaankwaamisik, ciwaniwinihsinowininek awiya. Aaniihsh tapaahtiinowak awiyak cipi​takohshinowaatc i'imaa nintishinihkaasowinink ci-ihkitowaatc: 'Niin hsa Kishemanitoo otOonaapamaakanan.' 'Aasha pehshonaakwan i'i ci-ishihsek.' Keko tahsh piminisha'waahkekwaanik. 9 Kika​noontaam hsa 'i miikaatiwin, kikanaanoontaam kaye e'maamiikaatinaaniwank. Keko tahsh sekisihkek. Pinamaa hsa o'o taishihse cipwaa ishkwaahsekin ono kekoonan mekwaa kaawaapantamank." 10 Miitahsh kaa'ani-inaatc: "Tamaamiikaatiwak hsa pepahkaan kaatahswewaanakisiwaatc o'omaa ahkiink, okimaawiwinan kaye tamaamiikaatiimakanoon. Pepahkaan ahkiin tamaamiikaatiimakanoon. 11 Taishiwepan cikakoshkohsek ahki, misiwe kaye miicim tanaanoontehse, pepahkaan ahkiink. Ta-ayaamakan kaye kihci​aahkosiwin misiwe pepahkaan ahkiink. Keishiwepahk kaye takohtaanentaakwan, kiishikonk kaye tapionci​maamahkaasinaakwan. 12 O'o tahsh kahkina cipwaa ishihsek kikatahkonikoom, kaye tahsh cikakwaataki'ikooyek. Kikashi​pakitinikoom Coowi anami'ewikamikohkaank, kipa'otiiwikamikonk kaye. Kikaishiwinikoom kaye enaahsamiiwaatc kihciokimaak, iki kaye kaaniikaanisiwaatc nintishinihkaasowinink onci. 13 Miitahsh i'i ahpii kena'ihsek ciwiintamaakeyek minwaacimowin. 14 Kiishaac itahsh onentamok cimikoshkaatentansiwek aaniin keihkitoyek naatamaasoyek. 15 Niin hsa piko kikamiinininim ihkitowinan, kakiihtaawentamowin kaye. Kaawiin tahsh oka​kashkihtoohsiinaawaa iki kaashiinkeniminekwaa cipapaamihtansikwaa ehkitoyek, kaawiin kikashaakoosomikohsiiwaak. 16 Kikamamishi'ikowaak kiniiki'ikowaak, kiicihkiwensiwaak, kitinawemaakaniwaak, iki kaye kaasaaki​wiiciwinekwaa. Aaninta tahsh kiinawaa kikanihsikoom. 17 Kahkina awiya kikashiinkenimikowaa niin onci. 18 Kaawiin tahsh kanake awaac peshik kiinisihsiwaa kihtikwaaniwank tawanihsehsinoon. 19 Aayiicikaapawik itahsh, miitahsh i'imaa keonci​pimaatisiyek." 20 "Ahpii tahsh waapamekwaa shimaakanihshak waahkaashkamowaatc Ceroosalam mii 'i cikihkentamek aasha ehpehshonaakwahk cinihshiwanaacihcikaatek Ceroosalam. 21 Iki hsa kaataawaatc i'imaa Cootiiyaahkaank (Judea) weti ta-ahpa'iwewak kaashi​papiihkwatinaanik. Iki kaye piinci​kihci​ootena kaa-ayaawaatc taka tasaakicipa'iwewak, iki kaye pikwacaya'ii eyaawaatc kaawiin tapiintikehsiiwak i'imaa kihci​ootenaank. 22 Miitahsh o'owe kiishikan kaaishinihkaatek: 'Kishemanitoo Onana'ahshiwewin.' Miitahsh i'i ahpii cimooshkinehsek kahkina kaaishipii'ikaatek Kihcioshipii'ikanink. 23 I'iwe tahsh ahpii kiishikahk, aahpici takoohpaacihsewak iki ihkwewak kaakikishkawaawahsowaatc, iki kaye omaamaamaak kaanooni'aawaatc oniicaanihsiwaa'. Wiinke hsa takihci​wahsitaawentaakwan o'omaa ahkiink, Kishemanitoo onihshkaatisiwin oka​pakamishkaakonaawaa oko pemaatisiwaatc. 24 Aaninta kaye taonci​nihsaawak pashipa'ikewihkomaanink, aaninta kaye tamaaciicikaniwiwak ehtahkonintwaa ciayishiwicikaniwiwaatc misiwe pepahkaan ahkiink. Wiinke okapi​tahtahkohkaataanaawaa Ceroosalam iki kaaCoowiwihsikwaa piinihsh kewiinawaa ciocihcihsenik ci-ishkwaa​tipentamowaatc." 25 "Tamayaki​naakosi kiisihs, tipihki​kiisihs kaye, iki kaye wanankohshak. Kahkina kaapepahkaanwewaanakisiwaatc pemaatisiwaatc takakwaatakentamook, ciwaanentami​kohtamowaatc e'matweyaakamishkaanik kihcikam, kaye ehkihci​mamaankaashkaanik. 26 Pemaatisiwaatc tawaniihkewak keahpiihci​sekisiwaatc aaniihsh okakihkentaanaawaa aaniin wa'ani-ishiwepaninik o'omaa misiwe ahkiink. Kiishikonk kaye eyaamakahkin meskawentaakwahkin takoshko​wepinikaatewan. 27 Miitahsh i'i ahpii Inini oKosihsan kenaakosinitc i'imaa wahkwiink cipi​pimi​ayaanitc cipi​kikiinitc kihci​mashkawisiiwin, kaye tahsh kihci​kihtentaakosiwin. 28 Ahpii onoweniwan maacii-ishihsekin, mii 'i ishi​pasikwiik ishpimink ci-inaapiyek, aasha pehshonaakwan kipimaaci'ikoowiniwaa." 29 Ciisahs tahsh okii'wiintamawaa' o'oweni awehcikewin: "Kanawaapamihk a'a miinishaahtik pik (fig) tinowaahtik, iki kaye kotak mihtikook. 30 Ahpii ewaapamekwaa ehsaakipakiiwaatc, mii 'i ekihkentamek aasha wiipa ewii'niipink. 31 Miitahsh i'i peshikwan, ahpii ani​waapantamek ono ani-ishihsekin, mii 'i cikihkentamek aasha ehpehshonaakwaninik Kishemanitoo oTipencikewin. 32 "Tepwe 'owe kaaininakook, kaawiin hsa tacaaki​nipohsiiwak oko kaapimaatisiwaatc, mii 'i aasha kahkina ci-ishiwepahkin ono kaawiintamawinakook. 33 Mihsawaa ko kiishik, ahki kaye ishkwaahsekin, nintihkitowinan tahsh wiin kaawiin wiihkaa taishkwaahsehsinoonan kaashi​tepwemakahkin." 34 "Ayaankwaamisik onsaam ci'ontamentansiwek kakiipaatisiwin, i'i kaye minihkwewin. Keko kaye onsaamentankek o'o ahkiiwi​pimaatisiwin, maakishaa i'iwe kaawii'ishi​kiishikahk kikakwetahto otihsikom, cikaahcitinikoyek taapishkoo wanii'ikan. 35 Kahkina hsako pemaatisiwaatc o'omaa ahkiink eyaawaatc okaotihsikonaawaa o'oweni. 36 Ahshawaapik, mooshak kaye cianami'aayek ciayaayek mashkawisiiwin cikashkihtooyek cishaaposhkamek i'i kahkina kaawii'ishiwepahk, cikashkihtooyek kaye ciniipawiyek enaahsamiinitc Inini oKosihsan," kii'ihkito. 37 Entahsokiishik tahsh Ciisahs kiikihkino'amaake i'imaa Kihcianami'ewikamikonk. E'ani​onaakohshininik tahsh ahko kii'maacaa ekii'awi​tipihkihshitc eshi-ishpatinaanik Aalip (Olive) Kihtikaanaahtikohkaank kaaishinihkaatek. 38 Wiipa tahsh ehkishepaawakaninik kahkina pemaatisiwaatc kii'ishaawak Kihcianami'ewikamikonk ewiih​pisintawaawaatc Ciisahsoon.

Lok 22

1 Aasha e'ani​pehshonaakwahk i'iwe kaakii'nihtaa​maawaci'itinaaniwank kiiamontc kaaompihsikaniwihsik pahkweshikan, mii 'i kaa'ishinihkaatek Pimaaci'ikoowi​Wiihkwantiwin. 2 Kihcianami'ewikimaak, iki kaye kaakihkino'amaakewaatc Onahshowewin okiih​kohsaawaa' pemaatisinitc, miitahsh kaa'ishikakwe​mihkamowaatc aaniin inahke keshi​kiimooci​nihsaawaatc Ciisahsoon. 3 Miitahsh Setanan (Satan) kaakiih​piintikeshkaakotc Cootahs Iskeriyat (Judas Iscariot) kaainintc, kewiin iitok Cootahs peshik kiihtinowi kaakii'mitaahshi​niishinitc (12) kihkino'amawaakana'. 4 Miitahsh Cootahs kaa'ishi​maacaatc ekii'awi​kanoonaatc kihcianami'ewikimaa', i'i kaye shimaakanihshan kaanihtaa​kanawentaminitc Kihcianami'ewikamikoni aaniin keshi​wiici'aatc cikaahcitinaanitc Ciisahsoon. 5 Wiinke hsa kii'minwentamoo', miihsh kaakii'ahshotamaakotc ewii'miinikotc shooniyaan. 6 Cootahs tahsh okii​na'entaan, miihsh kaa'ishi​maacii​naanaakaci'aatc aaniin ahpii kena'ihsenik cikaahcitinaatc Ciisahsoon, ahpii kaye ewii'mamishi'maatc cikihkentansinik pemaatisinitc. 7 Kiihpi​ocihcihse ekii'ishi​kiishikahk ahpii kiiamontc kaaompihsikaniwihsik pahkweshikan. Mii 'iitok i'i ahpii kaakii'nihsintwaa maanahcaanihshensak keaapatisiwaatc Pimaaci'ikoowi​Wiihkwantink. 8 Ciisahs tahsh okii'ishinisha'waan Piitaroon (Peter) ini kaye Cwaanan (John) o'o ekii'inaatc: "Maacaak, antawi​kwayaancihtook Pimaaci'ikoowi​Wiihkwantiwin ketashi​wiihsiniyank," okii'inaa'. 9 "Aanti eshi​antawentaman ci-ishi​kwayaancihtooyaank?" okii'ikoo'. 10 Miihsh kaa'inaatc: "Ahpii ani​piintikeshkaayek kihci​ootena kikawaapamaawaa cimekwaashkawek inini iinsan ekii​naata'ipiitc ahtoopaanink. Kika​piminisha'waawaa tahsh aanti piko enishi​piintiketc waahkaa'ikanink. 11 O'owe kika'inaawaa: 'Okihkino'amaake kitik, aanti mawatihshiwewikamik eyaak ketahshi​wiici​wiihsiniimakwaa ninkihkino'amawaakanak ewiih​Pimaaci'ikoowi​Wiihkwantiyaank,' mii 'i keinek. 12 Kika​waapanta'ikowaa ishpimink eyaanik e'mihcaanik mawatihshiwewikamik kahkina kekoon i'imaa ehkwayaantahtenik. Miitahsh i'imaa keshi​kwayaantahtooyek kahkina kekoon," okii'inaa'. 13 Miitahsh kihkino'amawaakanak kaa'ishi​maacaawaatc ekii'ishi​mihkamowaatc kahkina kekoon i'iweni Ciisahsoon kaakii'ishi​wiintamaakowaatc. Miihsh i'imaa kaahtashi​kwayaanciiwaatc ketashi​Pimaaci'ikoowi​Wiihkwantiiwaatc. 14 Ahpii tipa'ikan e'ishihsenik ciwiihsininaaniwank Ciisahs kii'onaahkohshin ishi​ohpime tapahsi​toohpowinaahkonk. Otishinisha'waakana' kaye kii'onapiwa'. 15 Miitahsh kaa'inaatc: "Maawac ekii'antawentamaan o'owe ciwiici​wiihsiniiminakook o'owe kaatootamank Pimaaci'ikoowi​Wiihkwantiwin cipwaa kakwaatakihtooyaan. 16 Tepwe 'owe kaawiintamawinakook, kaawiin miinawaa o'o ninkaishi​wiihsinihsii kaawiihkwantiyank paanimaa kiihtipi​kiishinaakwaninik Kishemanitoo oTipencikewin." 17 Miitahsh Ciisahs kaakii'otaahpinank minihkwaakan ekii'nanaahkomaatc Kishemanitoon kaye tahsh ekii'ihkitotc: "Otaahpinamok o'owe kaatahshiyek cionci​maamawi​minihkweyek. 18 Miihsh eshi​wiintamawinakook, kaawiin miinawaa ninkaonci​minihkwehsii o'o tino shoominaapo paanimaa Kishemanitoo oTipencikewin pitakohshinoomakaninik." 19 Okii'otaahpinaan kaye pahkweshikanan ekii'nanaahkomotc ekiih​pahkwepinaatc ekii'maamiinaatc ciamwaanitc ekii'inaatc: "Mii 'owe niwiiyaw kaapakitinamaakooyek. Mooshak o'o ishihcikek cimaamihkawinotawiyek." 20 Kaa'ishkwaa​wiihsiniwaatc tahsh, mii 'i peshikwan Ciisahs kaa'ishi​miinaatc i'i minihkwaakan ekii'ihkitotc: "Mii 'owe minihkwaakan Kishemanitoo otooshki​ahshotamaakewin nimiskwiimink kaaonci​aayiicinaakwahk kaasiikinikaatek kiinawaa onci. 21 "Inashke kiwiici​wiihsiniimikonaan o'omaa toohpowinaahkonk a'a kaawii'mamishi'itc. 22 Ini hsa Inini oKosihsan taishihsewan taapishkoo Kishemanitoo kaakii'ishi​onentank. Aahpici tahsh takihci​koohpaacihsewan iniweniwan kemamishimikotc." 23 Miitahsh kaakii'maacii​kakwecintinitc kaanika awenen o'owe keishihcikekwen. 24 Miitahsh okihkino'amawaakana' ekii'maacii​kakanoonitinitc awenen a'a kaatahshinitc maawac kekihci-inentaakosinitc. 25 Miitahsh o'o Ciisahs kaa'inaatc: "Iki hsa kaatipenimaawaatc pemaatisinitc kaakihkenimaahsinik Kishemanitoon, wiinke otipenimaawaa', iki tahsh kaaokimaahkantaakewaatc ishinihkaanitisowak kaaminohse'iwewaatc. 26 Kiinawaa tahsh wiin kaawiin i'i kikaishihcikehsiim. Tekwac hsa kiin kehci-inentaakosiyan cikii'inentaakosiyampan taapishkoo maawac kaaoshkaatisitc. A'a tahsh kaye kaatipenimiwetc cikii'inentaakosihpan taapishkoo kaapamiihtaaketc. 27 Awenen tahsh nawac kehci-inentaakositc? A'a na kaanamatapitc kaawii​wiihsinitc, komaa kaye a'a kaapamiihtaaketc? A'awe iitok kaanamatapitc. E'wiiciiwinakook tahsh niin kipamiihtawininim. 28 Kiinawaa tahsh kaapi​wiiciiwiyek i'i kahkina kaapishi​kakweci'ikooyaan. 29 Taapishkoo Noohs kaakii'ishi​miishitc ciokimaahkantaakewak, miihsh peshikwan kekiinawaa eshi​miininakook. 30 Kiinawaa tahsh kikatashi​wiihsinim, kikatashi​minihkwem kaye nintoohpowinaahkonk kaatashi​tipencikeyaan. Kiinawaa kikashi​apim kihciokimaawapiwinink cionaahkonekwaa mitaahshi​niishin (12) kaatahswewaanakisiwaatc Isriyalak (Israel) pemaatisiwaatc." 31 "Saaiman (Simon), Saaiman pisintawihshin, Setan ohsha kiihkakwetwe, kiihpakitinamawaa kaye ewiih​koci'ihk taapishkoo kihtikewinini kaashi​nenaawinank wenishihshininikin, kaamacinaakwaninikin kaye pahkweshikaniminan. 32 Saaiman, aasha tahsh kikii'anami'ehtamawin, cipwaanawihcikemakahsinok kitepwehtamowin. Ahpii tahsh kaye pikiiwenotawiyan, wiici'aahkan kiwiici​kihkino'amawaakanak cimashkawisiiwaatc." 33 O'o tahsh Piitar (Peter) kii'ishi​nahkwehtam: "Tepencikeyan, ninka​kwayaancii ohsha ewii'ishi​wiiciiwinaan kipa'otiiwikamikonk, kaye tahsh nipowinink," kii'ihkito. 34 Miitahsh Ciisahs kaa'inaatc: "Kiwiintamawin Piitar, cipwaa noontaakositc aape​ahpaahka'aahkwaan noonkom kaatipihkahk, mii 'i aasha nihsink (3) ci-ihkitoyan ekihkenimihsiwan," okii'inaan. 35 Miitahsh kaa'ishi​kakwecimaatc kahkina: "Ahpii kaakii'maacinisha'onakookipan weti otaanaank, kiimaaciitoohsiwekipan shooniyaawash, pashkwewash kaye, ini kaye mahkisinan, kekoon ina kikii'noontehsem?" "Kaawiin kekoon ninkii'noontehsehsiimin," okii'ikoo'. 36 Miitahsh kaa'inaatc: "Noonkom itahsh awenen iko eyaakwen shooniyaawash, komaa kaye pashkwewash pisaan oka​maaciitoon. Awenen itahsh iko eyaahsik pashipa'ikewihkomaan, oka-ataawaaken okashkiikiiwin ci'ataawetc pashipa'ikewihkomaan. 37 Miitahsh eshipii'ikaatek: 'Kewiin iitok kii-inakintiso ewiiciiwaatc omacitootamoo'.' Miihsh eshi​wiintamawinakook niin i'i kaatashimikooyaan citipihsek. I'i hsa tepwe kaashi​tashimikooyaan mii 'i aahsa cimooshkinehsek." 38 Miitahsh kaa'ikotc okihkino'amawaakana': "Tepencikeyan, inashke piinaapin. Ina ono niishin pashipa'ikewihkomaanan," okii'ikoo'. "Mii 'i teminihk," kii'ihkito. 39 Ciisahs tahsh kiiani​maacaa ekii'ishaatc kaakii'nihtaa​ishaawaatc kaashi-ishpatinaanik Aalip (Olive) Kihtikaanaahtikohkaank, okihkino'amawaakana' ewiiciiwikotc. 40 Ahpii weti kaatakohshink kaakii'nihtaa​ishaawaatc, o'o okii'inaa' okihkino'amawaakana': "Anami'aak cinaasihkaakohsiwek kakweci'ikoowin." 41 Miitahsh wiin keyaapi awahshime kii'ani​maacaa ekii'nakanaatc okihkino'amawaakana'. Ehko​tepi​wepinikaaniwank minihk kii'ishaa, ekii'ociciinkwanapihtaatc ekii'anami'aatc: 42 "Noohs, kiishpin hsa ishinaakwahkipan, taka otaahpinamawihshin o'o minihkwaakan kaawii'ishi​kakwaatakihtooyaan. Kaawiin hsa niin eshi​mihsawentamaan, kiin hsa eshi​antawentaman taishihcikaaniwan," kii'ihkito. 43 Encalan tahsh kihcikiishikonk okiihpi​onci​naasihkaakoon emiinikotc siitonikoowi​mashkawisiiwin. 44 Wiinke hsa kiikihci​wiihsakentam ekii'anami'aatc tepwe piko, miihsh otaapwesowin kaakiih​pimaashikawininik taapishkoo miskwi kaapankikawink ahkiihkaank. 45 Kiihpasikwii tahsh kaa'ishkwaa-anami'aatc ekii'ishaatc eshi​ayaanitc okihkino'amawaakana'. Okii'otihsaa' e'nipaanitc, aaniihsh kii'ayehkosiwa' kaa'ahpiihci​mincinawesinitc. 46 Miihsh kaa'inaatc: "Wekonen wenci​nipaayek? Wanishkaak, anami'aak cinaasihkaakohsiwek kakweci'ikoowin." 47 Mekwaa tahsh Ciisahs ehkakiikitotc, kiihpionci​takohshinoo' ehpaahtiinonitc awiya' Cootahs (Judas) eshinihkaasonitc peshik kaakii'mitaahshi​niishinitc okihkino'amawaakanan ekiih​piinaanitc. Miiwan tahsh ini Ciisahs kaakii'ociimikotc. 48 Miitahsh Ciisahs kaa'inaatc: "Cootahs, kitoociimimaan ina Inini Okosihsan cimamishi'imatc?" 49 Ahpii tahsh kihkino'amawaakanak ewaapantamowaatc aaniin waa'ishihsenik mii 'i kaa'ihkitowaatc: "Tepencikeyan, nimpashipa'ikewihkomaaninaanin ina ninka-aapacihtoomin cimiikaasoyaank." 50 Peshik tahsh Ciisahs okihkino'amawaakanan okiih​pahkihte'waani ini peshik otanohkii'aakanini ini Maawac Kihcianami'ewikimaan, miitahsh ekiih​kiishki​wepakanaantamawaatc ohtawakaani. 51 Ciisahs tahsh kii'ihkito: "Mii 'i minihk!" Miihsh kaa'ishi​saaminaatc ohtawakaaniink ini anohkii'aakanan ekii'minwaaci'aatc. 52 Miitahsh Ciisahs kaa'inaatc Kihcianami'ewikimaa', i'i kaye kenawentaminitc Kihcianami'ewikamik, i'i tahsh kaye kaaniikaanentaakosinitc kaakiihpi​naasihkaakotc: "Niin ina okimoocishk, epiishaayek ehpi​kikiiyek pashipa'ikewihkomaanan, ini kaye pahkihte'ikanaahtikoon? 53 Entahsokiishik iitok kikii'wiiciiwininim Kihcianami'ewikamikonk, kaawiin tahsh kikiih​papaamenimihsiim. Miitahsh o'owe kiinawaa kitipa'ikaniwaa, ahpii kaakashkii​tipihkahk kiimaacii​tipencikemakahk." 54 Miihsh kaakii'otaahpinaawaatc Ciisahsoon ekii'ishiwinaawaatc owaahkaa'ikaniniink Maawac Kihcianami'ewikimaan. Piitar (Peter) tahsh nawac iko waahsa otaanaank kii'onci​piminisha'ike. 55 Akwaciink tahsh kiihpootawewa' Maawac Kihcianami'ewikimaan owaahkaa'ikaniniink naawaya'ii kaashi​waahkaa​menikanaahkoonikaatenik ekii'waahkaanapinitc. Miihsh kewiin i'imaa Piitar kaahtakwapitc. 56 Peshik tahsh ini oshkiniikihkwewi​anohkii'aakanan okii'waapamikoon i'imaa e'namatapitc ciikishkote. Weweni okiih​kanawaapamikoon miihsh kaa'ihkitonitc: "Wa'a hsa inini kewiin okii'wiiciiwaan Ciisahsoon." 57 Piitar tahsh kii'aanwehtam: "Ihkwe, kaawiin ohsha ninkihkenimaahsii," okii'inaan. 58 Naanaake tahsh e'ani-ishihsek ininiwan Piitar (Peter) okii'waapamikoon ekii'ikotc: "Kekiin iitok peshik kaatinowiyan." Miihsh Piitar kaa'inaatc: "Inini, kaawiin niin nintaawihsii!" 59 Naanaake tahsh peshiko​tipa'ikan e'ishihsenik kotak ininiwan kiihkakwe​tepwewan ekii'ihkitonitc: "Wa'a hsa inini kewiin okii'wiiciiwaan Ciisahsoon, kewiin iitok Kaalaliiwininiiwi (Galilean)!" 60 Miitahsh kaa'ishi​nahkwehtawaatc: "Kaawiin kanake ninkihkentansiin i'i kaatashintaman." Mekwaa tahsh ehkiikitotc, aape​aahpahka'aakwaanan kiionci​noontaakosiwan. 61 KaaTipenciketc kiikwehkikaapawi ekiih​kanawaapamaatc Piitaroon. Miitahsh Piitar kaakii'maamihkawitc kaakii'ikotc kaaTipencikenitc: "Cipwaa noontaakositc naape​ahpaahka'aahkwaan noonkom kaatipihkahk, mii 'i aasha nihsink (3) ci-ihkitoyan ekihkenimihsiwan." 62 Piitar tahsh kiihsaaka'am ekii'awi​wiihsakatemotc. 63 Iki tahsh ininiwak kaakiih​kanawenimaawaatc Ciisahsoon okii'maacii​miihkinsomaawaan kaye tahsh ekii​pahpahkihte'waawaatc. 64 Okii'aakawaapahpinaawaan ekiih​kakwecimaawaatc: "Antakihkentan, wiintamawihshinaam awenen kaapahkihte'ohk." 65 Niipiwa' kaye kotak kekoonan okii'ayinaawaan ekii'maanenimaawaatc. 66 Ahpii e'ani​kishepaawakaninik kaaniikaanisiwaatc onahshowewinink, Kihcianami'ewikimaak kaye, iki kaye kaakihkino'amaakewaatc Onahshowewin kiimaamawi​nakishkotaatiwak. Ciisahs tahsh kewiin i'imaa kiihpiicikaniwi cioncishkawi​kaapawihtawaatc kaanihtaa​Onaahkonikenitc. 67 Miihsh kaa'inaawaatc: "Wiintamawihshinaam, kiin ina Kishemanitoo kaakii'onaapamaatc cipimaaci'iwenitc?" Miitahsh kaa'ishi​nahkwehtawaatc: "Kiishpin aana wiintamawinakook, kaawiin kitaa​tepwehtawihsiim. 68 Kakweciminakook kaye kekoon kaawiin kitaa​nahkwehtawihsiim. 69 O'o tahsh ishiahpii mii 'i cimaacihsek Inini oKosihsan ci'apinitc okihcinihkiniink inahke kaakihci-inentaakosinitc Kishemanitoon," Ciisahs kii'ihkito. 70 Miihsh kahkina kaa'ihkitonitc: "Kiin ina tahsh Kishemanitoo oKosihsan?" O'o tahsh kii'ishi​nahkwehtam: "Mii 'i ehkitoyek Niin eaawiyaan." 71 Miitahsh kaa'ihkitonitc: "Kaawiin awiyan awahshime otaa​tipaacimikohsiin aaniihsh kiinawint iko kinoontawaanaan aaniin i'iweni kaa'ihkitotc."

Lok 23

1 Kahkina hsa kaaonahshowewaatc maamaw kiihpasikwiiwak ekii'ishiwinaawaatc Ciisahsoon enaahsamiinitc Paailatoon (Pilate). 2 Miitahsh i'imaa kaakii'maacii​anaamimaawaatc Ciisahsoon ekii'ihkitowaatc: "Ninkiih​kaahcitinaanaan ohsha wa'a inini e'wanimaatc kipimaatisiiminaani', e'wiintamaaketc citipa'amawaahsiwimintc Maawac Kihciokimaan taakihs​shooniyaan. Miitahsh kaye enwaanitisotc wiin e'aawitc Kishemanitoon kaaonaapamikotc, wiin iinsan ekihciokimaawitc." 3 Paailat tahsh okiih​kakwecimaan Ciisahsoon: "Kiin ina okihci​otookimaamiwaan Coowak?" Miitahsh kaa'ikotc: "Mii kwantosha 'i ehkitoyan." 4 Miitahsh Paailat kaa'inaatc Kihcianami'ewikimaa' i'i kaye kaapaahtiinonitc: "Kaawiin kekoon nimihkamowaahsiin keonci​tipaahkonintipan wa'a inini," kii'ihkito. 5 Aanciko tahsh kiihkakwe​shaakoosohtaakosiwa' ekii'ihkitonitc: "Wa'a inini eshi​kihkino'amaaketc kii'onci​ompwehkamikanini misiwe Cootiiya ahkiink. Weti hsa kii'ishi​maacihtaa Kaalaliwi​ahkiink (Galilee) piiniihsh tahsh o'omaa ekiih​pitakohshink." 6 Ahpii tahsh Paailat kaa'noontank o'o kiihkakwetwe: "A'awe inini Kaalaliink (Galilee) ina oncii?" 7 Ahpii Paailat kaakihkentank Ciisahsoon e'onciinitc Heratan (Herod) kaaishi​tipencikenitc, mii 'i kaakii'ishinisha'waatc eshi​ayaanitc Heratan. Ceroosalamink iitok na'itaak kii'ayaawan i'i ahpii. 8 Wiinke tahsh Herat kii'minwentam ewaapamaatc Ciisahsoon. Aasha kinwesh kiihpionci​naanoontam ehtashimimintc, okii'ishi​mihsawentaan kaye ewii'waapamaatc Ciisahsoon maamahkaacihcikenitc. 9 Niipiwa' itahsh kekoonan okiih​kakwecimaan, kaawiin tahsh Ciisahsoon okii'onci​nahkwehtaakohsiin. 10 Iki tahsh Kihcianami'ewikimaak iki kaye kaakihkino'amaakewaatc Onahshowewin kii'mate​kaapawiwak ekiihkakwe​mashkawi​anaamimaawaatc. 11 Miihsh Herat i'i kaye oshimaakanihshiima' okiih​paahpinotawaawaan Ciisahsoon kaye tahsh ekiih​miihkinsomaawaatc. Okii​pihsihkamoonaawaan kaye maawac wenishihshininik kashkiikiiwin. Miihsh kaa'ishi​kiiwenisha'waawaatc miinawaa eshi​ayaanitc Paailatoon. 12 Miitahsh i'i ahpii ehkiishikaninik Herat a'a kaye Paailat kaakii'mino​wiiciintiwaatc, otaanaank iitok kiihshiinkenintiwak. 13 Paailat (Pilate) okii'maamawi​antomaa' Kihcianami'ewikimaa', kaaniikaanihtamawaanitc kaye Coowa', i'i kaye pemaatisinitc. 14 Miihsh kaa'inaatc: "Kikiih​piitamawihshim wa'a inini ekii'ihkitoyek e'wanimaatc pemaatisinitc kaaonci​ompwehkamikisinitc. Enaahsamiiyek tahsh kii'antakihkenimaa, kaawiin tahsh kekoon nintishi​mihkamowaahsiin keonci​tepimekipan i'iweni kaainek. 15 Kaawiin tahsh kaye Herat (Herod) okii'mihkansiin kekoon cikii'wanitootaminitc miihsh kaakiihpi​onci​kiiwenisha'waatc. Kaawiin mihkikaatehsinini kekoon keonci​nihsintipan. 16 Miitahsh keishihcikeyaan cipahpahshanshe'ontc, miihsh keshi​pakitinak," kii'ihkito. 17 Mii 'i iitok kaa'ishihsenik oncita ko peshik tahkonikanan cikiih​pakitinaahpan i'i ahpii ewiihkwantiiwahkamikisiwintc. 18 Iki tahsh kahkina kaamaawaci'itiwaatc kiimaamawi​shaakowewak: "Nihsihk wiin a'a inini. Pakitinamawihshinaam a'a Paraapahs (Barabbas)!" kii'ihkitowak. 19 A'a iitok Paraapahs kiihpiinci​wepinaa kipa'otiiwikamikonk ekii'mamaanshiitc ekii'ompwehkamisikopanen i'imaa ootenaank. Kaye tahsh ekii'nihshiwekopanen. 20 Paailat okii'antawentaan cikiih​pakitinaahpan Ciisahsoon, miihsh miinawaa kaakiih​kanoonaatc kaapaahtiinonitc pemaatisinitc. 21 Miitahsh enikohk kaakiih​shaakowenitc ekii'ihkitonitc: "Akosaka'o, akosaka'o!" 22 Miitahsh o'o nihsink Paailat kaa'inaatc: "Aaniin tahsh kaa'ishi​mamaanshiitc? Kaawiin kekoon nimihkamowaahsiin keonci​nihsintipan. Ninka-anoohkii cipahpahshanshe'ontc, miihsh keshi​pakitinintc," kii'ihkito. 23 Aanciko tahsh enikohk kiihkishiiwewa' ehshaakowenitc ekii'ihkitonitc ciakosaka'omintc Ciisahsoon, piinihsh ekii​shaakoosohtaakosinitc. 24 Paailat tahsh okii'inaahkonaan Ciisahsoon i'i kaakii'ishi​kakwetwenitc. 25 Miitahsh kaakiih​pakitinaatc ini ininiwan kaakii'antawenimimintc kaakii'mamaanshiinihpan e'ompwehkamikisinitc i'imaa ootenaank. Okiih​pakitinaa' pisaan iko enentaminitc citootawaanitc Ciisahsoon. 26 Shimaakanihshak tahsh okii'maaciinaawaan Ciisahsoon. Mekwaa e'ani​pimi​ayaawaatc okii'mekwaashkawaawaan ininiwan Sairiiniink (Cyrene) wenciinitc, Saaiman (Simon) eshinihkaasonitc, ehpi​takohshininitc i'imaa ootenaank pikwacaya'iink ekiihpii​onciinitc. Miiwan ini kaakii'manipinaawaatc ekiih​pihciwane'aawaatc aashiteyaahtikoon cipimiwitamawaanitc otaanaank inahkeya'ii Ciisahsoon kaa'ishi​pimohsenitc. 27 Aahpici tahsh kiihpaahtiinowak pemaatisiwaatc ehpiminisha'waawaatc Ciisahsoon. Aaninta kaye ihkwewak ekii'mawiwaatc, ekii'mincinawesiwaatc kaye. 28 Ciisahs tahsh kiihkwehki​kaapawi ekii'inaatc: "Kiinawaa ihkwewak Ceroosalamink wenciiyek, keko niin mawimihshihkek. Kiinawaa piko mawintisok, kitapinoonciishimiwaak kaye mawimihkwak. 29 Ninkotink ohsha taocihcihse cishi​kiishikahk ahpii pemaatisiwaatc ci-ihkitowaatc: 'Aahpici shawentaakosiwak iki ihkwewak kaapwaanawi​otapinoonciishimiwaatc, iki kaye kaanihtaawiki'aahsikwaa apinoonciisha', wiihkaa kaye kaapi​nooni'aawahsohsikwaa.' 30 Miitahsh i'i ahpii pemaatisiwaatc keitamowaatc kihciwaciin: 'Patakoshkawihshinaam. Miihsh kaye ci-itamowaatc kaapihkwatinaanikin: Aakawishkawihshinaam.' 31 Kiishpin tahsh o'oweni ishihcikewaatc mekwaa mihtikoon e'ashkaahtikowinitc, aaniin tahsh wiin keishiwepahk ahpii paahsotc a'a mihtik?" 32 Niishin tahsh (2) kotak ininiwak kaakiih​kihci​mamaanshiiwaatc kewiinawaa kii'ishiwicikaniwiwak ciwiici​nipoomaawaatc Ciisahsoon. 33 Ahpii kaa'otihtamowaatc i'imaa Ohtikwaanikekanihkaank eshinihkaatenik mii 'imaa Ciisahs kaakiihtashi​akosaka'ontc, i'i kaye niishin omamaanshii'. Peshik okihci​nihkink inahke, kotak itahsh onamanti​nihkink inahke kii'ishi​akosaka'omaawa'. 34 Miihsh Ciisahs kaa'ihkitotc: "Noohs, poonentamaw, kaawiin okihkentansiinaawaa aaniin eshihcikewaatc." Shimaakanihshak tahsh kiihkakwe​pahkinaatiwak ekii'ahpakicikewaatc ekii'nenaawinamaatiwaatc i'i okikishkikanini. 35 Ikiweniwak tahsh pemaatisiwaatc, iki kaye kaaniikaaniihtamaakewaatc Coowak kii'niipawiwak ehkanawaapiwaatc okiih​pahpinotawaawaan Ciisahsoon ekii'inaawaatc: "Okiih​pimaaci'aa' iitok kotak awiya'. Taka tahsh tapimaaci'itiso kiishpin wiin tepwe ayaawikwen Kishemanitoo otonaapamaakanan cipimaaci'iwenitc." 36 Shimaakanihshak tahsh kewiinawaa okiih​paahpinotawaawaan. Ekiihpi​naasihkawaawaatc ekiiwi'mina'aawaatc shoominaapo kaawiihsakaakamininik 37 ekii'inaawaatc: "Pimaaci'itison kiishpin kiin okihciotOokimaamiwaan Coowak," okii'inaawaan. 38 Ishpimink inahke kaaishi​akoocink kii'akooteni oshipii'ikan ekii'ishipii'ikaatenik: "Miiwan ono okihciotOokimaamiwaan Coowak." 39 Peshik tahsh omamaashiin kaakii'wiici​akosaka'okoomaatc okii'onci​kanoonikoon: "Kaawiin ina kiin kaaonaapamintc cipimaaci'iwetc? Pimaaci'itison, keniinawint tahsh pimaaci'ihshinaam." 40 Ini tahsh kotak omamaashiin okiih​kishii​kanoonaani: "Kaawiin ina kikohsaahsii Kishemanitoo? Kahkina o'o kaashi​nihsiyank (3) peshikwan kikii'ishi​onahshowaanikoomin keshi​kakwaataki'ikooyank. 41 Kiinawint wiin kwayahk kitinaahkonikoomin, kitishihcikewininaanink e'onci​kashkihtamaasoyank o'o. Wiin tahsh kaawiin kekoon kii'ishi​wanitootansii." 42 Miihsh kaa'inaatc Ciisahsoon: "Ciisahs, maamihkawenimiihshiihkan ahpii pitakohshinan kitookimaawiwinink." 43 Ciisahs tahsh okii'inaan ini ininiwan: "Kitahshotamawin, noonkom kaakiishikahk kikawiiciiwihsh i'imaa Parataaisink (Paradise) kaaishiwinintwaa kaashawentaakosiwaatc." 44 Miitahsh i'iwe ninkoci ko ahpii eaapihta​kiishikahk kii'ani​kashkii​tipihkan misiwe ahkiink piinihsh ekii'ani​nihsotipa'ikaneyaak (3). 45 Kiisihs kaye kiihpooni​saakaahsike. Miitahsh i'i kihcianami'ewikamikonk kihcikipiika'ikan naawaya'ii kaakiih​taashkiikihsek. 46 Miitahsh Ciisahs enikohk kaakiih​shaakowetc e'ihkitotc: "Noohs, kikanawenta'in nintahcaahk!" Ahpii 'i kaa'ishkwaa​ihkitotc, mii 'i kaa'ishi​nipotc. 47 A'a tahsh shimaakanihshiiwikimaa kaawaapantank aaniin kaa'ishihsenik okii'nanaahkomaan Kishemanitoon ekii'ihkitotc: "Tepwe iinsan kwayahk kii'ininiiwi wa'a!" 48 Iki tahsh pemaatisiwaatc kaakiih​paahtiinowaatc emaawaci'itiwaatc e'waapantamowaatc o'oweni, aaniin kaye kaaishihsenik, kii'ani​kiiwewak ekiih​pahpahkihte​yaahkikane'otisowaatc kaa-ahpiihci​mincinawesiwaatc. 49 Kahkina iki kaakiikihkenimaawaatc Ciisahsoon, iki kaye ihkwewak Kaalaliink (Galilee) kaakiionci​piminisha'waawaatc waahsayiish iko kiiniipawiwak kaa'onsaapiwaatc. 50 Kii'ayaa inini Coosap (Joseph) ekii'ishinihkaasotc. Kwayahk kii'ininiiwi, kaye tahsh kii'minwaatisi, ekiih​takwapitc kaanihtaa​onaahkonikenitc. 51 Eramahtiiya (Arimathea) ootenaank, Cootiiya ahkiink kii'oncii. Kewiin iitok okiih​piihtoon i'i kaawii'maacii​tipencikenitc Kishemanitoon. Kaawiin kaye wiin okii'na'entansiin kaakii'inentaminitc, i'i kaye kaakii'ishihcikenitc. 52 Kii'ishaa enaahsamiinitc Paailatoon (Pilate) ekiih​kakwetwetc owiiyawini Ciisahsoon. 53 Miitahsh kaakiih​pina'ank, ekii'wiihkweyiikinank waapishkiikinonk. Miihsh kaa'ishi​ahtootc na'initiiwikamikonk kaakii'ishi​wiimpaapihka'ikaatenik ahsiniihkaank, wiihkaa ekiih​pionci​aapatahsininik. 54 Mii 'i ekii'ishi​kiishikahk kaanihtaa​kwayaanciiwaatc, aaniihsh aasha kekaa kiimaacihse ciAnwepiiwi​kiishikahk. 55 Ikiweniwak tahsh ihkwewak kaakiihpi​onci​piminisha'waawaahpan Ciisahsoon Kaalaliink (Galilee) onci, okiih​piminisha'waawaan Coosapoon. Okii'waapantaanaawaa tahsh i'i na'initiiwikamik, kaye tahsh okii'waapantaanaawaa aaniin Ciisahsoon owiiyawini kaa'inahcikaatenik. 56 Miitahsh kaa'ishi​kiiwewaatc ekiih​kwayaancihtoowaatc minaako'onan, kaye tahsh tino menomaakwaninik poosiiwin kaa-ahcikaatek wiiyawimaank. E'Anwepiiwi​kiishikaninik kii'anwepiwak Onahshowewin kaainahtek citoocikaatek.

Lok 24

1 Wiipa kikishep e'anami'ekiishikaninik, ihkwewak kii'ishaawak na'initiiwikamikonk e'ishiwitoowaatc takosehkwaanan kaakiih​kwayaancihtoowaatc. 2 Okii'mihkawaawaan ahsiniin ekii'maaci​tihtipinikaasonitc i'imaa kaakiih​kipapinihpan kaaonci​piintikaaniwank na'initiiwikamikonk. 3 Miitahsh kaaishi​piintikewaatc, kaawiin tahsh okii'mihkansiinaawaa owiiyawini kaaTipencikenitc Ciisahsoon. 4 Mekwaa tahsh eniipawiwaatc i'imaa emaamahkaatentamowaatc o'o kaakii'ishihsenik, miitahsh ketahto niishin (2) ininiwa' ewaahseyaanikin okikishkikanini kaakii'onci​wiici​kaapawihtaakowaatc. 5 Emooshkineshkaakowaatc tahsh sekisiwin iki ihkwewak mii 'i kaakii'animihkohtaawaatc mihtahkamik. Miihsh o'o kaa'ikowaatc ini ininiwa': "Wekonen wenci​nanaantawaapamek kaapimaatisitc i'imaa mekweya'ii kaaishiayaanitc kaaniponitc? 6 Kaawiin o'omaa ayaahsii. Aasha kiihkiiwe​pimaatisi. Kaawiin ina kimaamihkawihsiim kaakii'ininekipan mekwaa kiiwiiciiwek weti Kaalaliink (Galilee)? 7 'Inini oKosihsan tashi​pakitinimaawan eshi​ayaanitc cionahshowaanikonitc kaamacitootaminitc ininiwa', ciakosaka'ontc kaye. Nihso​kiishik (3) tahsh ishihsenik cikiiwe​pimaatisitc.' " 8 Miitahsh ihkwewak kaakii'maamihkawiwaatc kaa'ihkitonihpan Ciisahsoon. 9 Miihsh i'imaa iki ihkwewak kaa'onci​kiiwewaatc na'initiiwikamikonk ekii'awi​wiintamawaawaatc kaamitaahshi​peshikonitc (11) kihkino'amawaakana' kahkina kekoon kaakii'ishi​waapantamowaatc. I'i kaye kahkina kotak okii'wiintamawaawaa'. 10 Miiwak tahsh oko ihkwewak kaakii'ishaawaatc Meri Maakatalawihkwe (Mary Magdalene), Coaana (Joanna), a'a kaye Meri (Mary) omaamaan Ciimis (James); i'i tahsh kaye kotak ihkwewa' kaakii'wiiciiwikowaatc okii'wiintamawaawaa' Ishinisha'waakana' kaakii'inaapihshinowaatc. 11 Iki tahsh Ishinisha'waakanak kaawiin okiih​tepwehtawaahsiwaawaa' i'i ihkwewa' aaniihsh okiih​kakiipaasihtawaawaa'. 12 Piitar (Peter) tahsh kiihpasikwii, ekii'ahpahtootc na'initiiwikamikonk. Ahpii weti kaa'otihtank kiinawakihtaa ekii'inaapitc. Miihsh kaakii'waapantank ehta na'inikewi-ishiikinoon e'ahtenikin. Kii'maamahkaatentam aaniin kaakii'ishihsenik. 13 I'iwe tahsh peshikwan ehkiishikahk, niishin (2) Ciisahs okihkino'amawaakana' kii'ishaawa' Imeyahs (Emmaus) eshinihkaatenik ayaawin. Kekaa maawiin niishwaahso (7) tipa'ikan (mile) kii'ahpiihcaani Ceroosalamink (Jerusalem) onci. 14 Kiihkakanoonitiwa' ehpapimohsenitc ekiih​tashintaminitc kahkina kekoon kaakii'ishihsenik. 15 Mekwaa tahsh ehkakanoonitinitc ehtashintamaatinitc onoweniwan, Ciisahs okiihpi​atimaa', ekii'ani​wiita'atoomaatc. 16 Okii'waapamikoo', kaawiin tahsh okii'onci​nihsitawinaakohsii'. 17 Miitahsh Ciisahs kaa'ishi​kakwecimaatc: "Wekonen i'i kaapimi​tashintamaatiyek ehpimohseyek?" Miihsh kaa'ishi​kipihciinitc ekii'maanentamowinaakosinitc. 18 Ini peshik Kaliiyahpahs (Cleopas) eshinihkaasonitc okii'ishi​kakwecimikoon: "Mii na kiin ehta ehpapeshikooyan ehpi​kiiyooteyan Ceroosalamink (Jerusalem), ekihkentansiwan tahsh onoweniwan kaapi-inahkamikahk noonkom kaapi​kakiishikahkin," okii'ikoon. 19 "Wekonenan kaaitaman," okii'inaan? Miitahsh kaaishi​nahkwehtakootc: "I'iweni aaniin kaakiih​tootawintc Ciisahs Naasaritink (Nazareth) kaaonciitc. Kiihtinowi kakanootamawaatc Kishemanitoon. Aahpici kii'mashkawikiishwe, kii'mashkawihcike kaye enaahsamiinitc Kishemanitoon, i'i kaye kahkina pemaatisinitc. 20 Kihcianami'ewikimaak, iki kaye kaatipenimiyamintwaa okii'ishi​pakitinaawaan cionahshowaanimintc cinihsimintc. Miitahsh kaakii'akosaka'waawaatc. 21 Mii hsa 'i kaa'ishi​pakohsenimoyaankipan wiin cikiih​pimaaci'aahpan Isriyala' (Israel). O'o tahsh kahkina kaakii'ishihsek, mii 'i aasha nihsokiishik kaakii'inahkamikahkipan. 22 Aaninta tahsh kaye ihkwewak kaawiiciiwiyamintwaa ninkii'maamahkaatentami'ikonaanik. Wiipa kikishep kii'ishaawak na'initiiwikamikonk. 23 Kaawiin tahsh okii'mihkansiinaawaa owiiyawini. Miihsh ehpikiiwewaatc kaa'ihkitowaatc ekii'waapamaawaatc iinsan encala', ekii'ikowaatc ehpimaatisinitc Ciisahsoon. 24 Aaninta tahsh kaye kaawiiciiwiyamintwaa kii'ishaawak na'initiiwikamikonk. Miitahsh kaakii'mihkamowaatc mayaa ekii'ishinaakwaninik kaakii'ihkitonitc ihkwewa', kaawiin tahsh wiin okii'onci​waapamaahsiwaawaan," okii'ikoon. 25 Miitahsh Ciisahs kaa'inaatc: "Aaniin ehpiihci​kakiipaatisiyek. Etatawe kipapeciim kite'iwaank citepwehtamek kahkina kaakiihpi-ihkitowaatc kenootamawaawaatc Kishemanitoon. 26 Kaawiin ina oncita pinamaa Christ o'onahke cikii'ishi​kakwaatakihtoohpan, cikii'anishi​piintikehpan tahsh okihci-inentaakosiwinink?" 27 Miitahsh Ciisahs awahshime kaa'anishi​wiintamawaatc wiin ekiih​tashimintc i'imaa misiwe KihciOshipii'ikewinink. I'imaa ekii'onci​maacii​tashimintc Moosihsoon eshipii'ikenitc piinihsh kahkina kaakii'ishipii'ikenitc kenootamawaanitc Kishemanitoon. 28 Aasha e'ani​pehshonaakwaninik i'imaa ayaawinink kaaishaawaatc, Ciisahs okii'ishinaakohtoon taapishkoo keyaapi waahsa ewii'ani-ishaatc. 29 Okiihkakwe​kashkimaawaan tahsh ekii'inaawaatc: "Mii 'omaa ishinipaan kaawii'ishi​nipaayaank. Aasha iitok ani​ahpiihcinaakohshin, aasha kaye kekaa tatipihkan," okii'inaawaan. Miihsh Ciisahs kaaishi​piintiketc ciwiici​kapehshiimaatc. 30 Ciisahs tahsh kii'onapi ewii'wiitoohpamaatc. Okii'otaahpinaan pahkweshikanan kaye tahsh ekii'nanaahkomotc. Okii​pahkwepinaan tahsh pahkweshikanan ekii'ani​ahshamaatc. 31 Miitahsh kaakiih​paahkaapi'intwaa ekii'nihsitawinawaawaatc. Ciisahs tahsh kii'onci​ankonaakosi. 32 Miitahsh kaa'ayitiwaatc: "Kaawiin ina taapishkoo ishkote kaapiskanek kikii'onci-inamanci'ohsiimin kite'inaank mekwaa i'i kaapi​kakanooninank miihkanaank kaye tahsh kaapi​wiintamawinank ehkitoomakaninik kihciOshipii'ikan?" 33 Shemaak tahsh kii'wanishkaawak Ceroosalamink (Jerusalem) ekii'ishi​kiiwewaatc. Miitahsh i'imaa kaa'ishi​mihkawaawaatc mitaahshi​peshik (11) kihkino'amawaakana', i'i kaye kotak awiya' emaawaci'itinitc. 34 Miihsh kaa'ihkitonitc: "Tepwe kaaTipenciketc kiihkiiwe​pimaatisi. Okii'naakosiihtawaan tahsh Saaimanoon (Simon)!" 35 Iki tahsh kaashi​niishiwaatc kii'wiintamaakewak aaniin kaakiiayishihsenik mekwaa ehpimohsewaatc miihkanaank, aaniin kaye kaa'ishi​nihsitawinawaawaatc kaaTipencikenitc ahpii kaapahkwenaanitc pahkweshikanan. 36 Mekwaa tahsh i'i niishin 2 e'waawiintamaakenitc o'oweni ketahto kaaTipenciketc wiin kii'onci​niipawi i'imaa mekweya'ii eshi​ayaanitc ekii'maamawi-inaatc: "Pisaanentamowin kikawiiciiwikom!" 37 Kiikihci​sekisiwa' ciipay niwaapamaanaan e'inentaminitc. 38 Miitahsh Ciisahs kaa'inaatc: "Wekonen wenci​mikoshkaatentamek? Wekonen kaye wenci​aanwehtamek kitinentamowiniwaank? 39 Inashke waapantamok nininciin, nisitan kaye. Niin ohsha piko niin. Inashke saaminihshik. Kaawiin iitok ciipay wiiyaasiwihsii, kaawiin kaye ohkaniwihsii i'iwe niin kaashi​waapamiyek." 40 O'o tahsh kaa'ishkwaa​ihkitotc, mii 'i kaa'ishi​waapanta'aatc oniciin, ositan kaye. 41 Kaawiin keyaapi kiihtepwehtansiiwa' kaa'ahpiihci​minwentaminitc kaye tahsh kaa'ahpiihci​maamahkaatentaminitc. Miihsh o'o Ciisahs kaa'inaatc: "Kitayaam ina kekoon kemiiciyaan?" 42 Okii'miinaawaan tahsh kiikooyan aasha kaakiih​kiishisonitc. 43 Miitahsh i'i kaakii'otaahpinaatc ekii'amwaatc mekwaa ehkanawaapamikotc okihkino'amawaakana'. 44 Miitahsh o'o kaa'inaatc: "Mii hsa 'owe kaakii'wiintamawininakook mekwaa kaapi​wiiciiwininakook. Kahkina kekoon kaaoshipii'ikaatek ehtashimikooyaan i'imaa otoonahshowewinink Moosihs (Moses) iki kaye otooshipii'ikaniwaank iki kenootamawaawaatc Kishemanitoon, i'imaa kaye masina'ikanink Nikamonan, nintashimikoo." 45 Miitahsh kaakii'miinaatc cinihsitohtaminitc kihcioshipii'ikewinan. 46 Miihsh kaa'ani-inaatc: "Miitahsh o'o eshipii'ikaatek, ekii'ishinaakwahk Kishemanitoo kaakii'onaapamaatc cikiih​kakwaatakihtoonitc kaye tahsh nipowinink cionci​kiiwe​pimaatisinitc nihso​kiishihk (3) ishihsenik. 47 Kwehkaatisiwin, i'i kaye awiya kaapoonentamawintc omacitootamowinan cikakiihkwaatenik owiinsowinink onci ciwiintamawintwaa kahkina kaapepahkaanwewaanakisiwaatc pemaatisiwaatc i'imaa Ceroosalamink (Jerusalem) cionci​maacii​kakiihkwaatek. 48 Kiinawaa tahsh kiwaapantaanaawaan onoweniwan. 49 Niin itahsh iko kikapiicinisha'amawininim Noohs kaakii'ahshotamaaketc. I'imaa tahsh kihci​ootenaank kikatashi​pii'om paanimaa kiihpi​otihsikoyek i'i mashkawisiiwin ishpimink kaawiihpi​onciimakahk." 50 Miitahsh i'imaa kihci​ootenaank kaa'onci​maaci​wiiciiwaatc piinihsh weti e'ani​otihtamowaatc Pehtaniink (Bethany). Miitahsh i'imaa kaakii'ompinihkehtaatc kwehkwehkinihk ekiih​shawenimaatc. 51 Mekwaa tahsh ehshawenimaatc, okiionci​nakanaa' ekii'ompishkaatc kihcikiishikonk e'ishiwinintc. 52 Miitahsh kaa'ishi​anami'ehtawaawaatc, Ceroosalamink (Jerusalem) ekii'ani-ishi​kiiwewaatc ekii'moshkineshkaakowaatc kihci​minwentamowin. 53 I'imaa tahsh mooshak kii'ayaawak Kihcianami'ewikamikonk enanaahkomaawaatc Kishemanitoon.

Cwaan 1

1 Maawac nihtam cipwaa maacihsek ahki aasha kii'ayaa a'a Ihkitowin kaaishinihkaasotc. Wa'a tahsh Ihkitowin okii'wiiciyayaamaan ini Kishemanitoon, shikwahsh wa'a Ihkitowin kiihKishemanitoowi. 2 Mii hsa ko wa'a maawac nihtam kaahpiwiiciiwaatc Kishemanitoon. 3 A'a tahsh Ihkitowin kii'aapatisi kahkina kekoon kiioshihcikaatenik. Wiin anohkiihsikipan kaawiin kekoon taakii'oshihcikaatehsinoon i'i minihk kaakii'oshihcikaatek. 4 Wiin kaaoncipimaatisinaaniwaninik. O'o tahsh pimaatisiwin okiihpiitamaakonaawaa waahseyaa kahkina pemaatisiwaatc. 5 I'i tahsh waahseyaa saakaahte i'imaa kashkiitipihkisiwinink. Shikwahsh i'iwe kashkiitipihkisiwin kaawiin wiihkaa okiihpiaahtawe'ansiin i'i waahseyaa. 6 Kiihpiayaa peshik inini Cwaan (John) e'ishinihkaasotc, Kishemanitoon ekiihpi-ishinisha'okotc. 7 Mii hsa wa'a kaakiihpiayaatc ciwiintamaaketc aweneniwinitc ini Waahseyaan, kahkina tahsh pemaatisinitc wiin cioncitepweyentaminitc. 8 Kaawiin Cwaan kii'aawihsii i'iwe waahseyaa. Wa'a tahsh inini kiihpi-ishinisha'waa citipaacimaatc ini Waahseyaan. 9 Mii hsa wa'a tepaacimintc tepwe mayaa kwayahk Waahseyaa ehpitakohshink omaa ahkiink, mii 'awe kaawaahseshkawaatc kahkina kaapimaatisinitc ahkiink. 10 O'omaa ahkiink kii'ayaa a'a Ihkitowin. Wiin kii'oncioshihcikaateni ahkiini. Kaawiin tahsh okiihkihkenimikohsii' o'omaa ahkiink kaa-ayaanitc. 11 Okiihpiotihtaan tipinawe otanahkiiwin, wiin tipinawe owiicionciimaakana' kaawiin okii'otaahpinikohsii'. 12 Kahkina tahsh kaakii'otaahpinikotc, miiwa' kaakiihtepweyenimikotc, okii'miinaa' cioniicaanihsimikonitc Kishemanitoon. 13 I'iwe tahsh e'oniicaanihsimikowaatc Kishemanitoon, kaawiin i'imaa ininiinaank kii'onciimakahsinoon, pemaatisiwaatc e'ayaanihkenihtaawiki'itiwaatc. Kaawiin i'imaa omihsawencikewinink inini ewii'oniicaanihsitc kii'oncinihtaawikihsiiwak. Wiin Kishemanitoon okii'miinikowaan cioyOohsimaawaatc. 14 Wa'a Ihkitowin kiihpi-ininiiwi, shikwahsh kikiihpiwiiciyayaamikonaan e'mooshkinetc kishewaatisiwin, tepwewin. Okihtakinsowin kaye kikii'waapantamowaamin, mii 'iwe okihtakinsowin kaaoncimiinikotc ini Weyoohsimimintc, e'mihcipeshikotc kaaoKosihsimikotc ini oTeten. 15 Cwaan okiihtipaacimaan e'matweshaakowetc: "Miitahsh 'aweti kaakiihtipaacimak e'ihkitoyaan: 'Piayaahpiihtenti kepinaapishkawitc awiya awahshime kaakihci-inentaakositc ahpiihc niin. Aasha aaniihsh kii'ayaa cipwaa nihtaawikiyaan,' " kii'ihkito. 16 Wiin e'ishipaahtiinatininik okishewaatisiwin kahkina kiinawint kikii'oncishawenimikonaan, ayaakwiihtaw ekiihpishaweniminank. 17 Kishemanitoo okii'aapaci'aan ini Moosihsoon (Moses) cipiitoonitc onahshowewin. Ciisahs Christan tahsh wiin okii'aapaci'aan ciwaapanta'iwetc okishewaatisiwin, cinaako'ikotc kaye aaniin tepwe eshiayaatc. 18 Kaawiin awiya wiihkaa okii'onciwaapamaahsiin Kishemanitoon. A'a ehta piyeshikotc kaaoKosihsimaawitc, wiin ehKishemanitoowitc kaye kaasaaki'ikotc ini Weyoohsimimintc, wiin mayaa kwayahk okiihtipaacimaan Kishemanitoon. 19 Aapitink itahsh kaaniikaanisiwaatc Coowak Ceroosalamink (Jerusalem) kaa-ayaawaatc okii'ishinisha'waawaa' anami'ewikimaa' kaye anami'ewanohkii'aakana' cikakwecimaanitc Cwaanan (John): "Awenen kiin?" ci-inaanitc. 20 Miihsh i'i kaa'ishitipaacimotc Cwaan, kaawiin kii'manaaihkitohsii, kwayahk kii'ihkito: "Kaawiin niin ini Kishemanitoo kaakii'onenimaatc cipimaaci'iwenitc," kii'ihkito. 21 Shikwahsh okiihkakwecimikoo': "Awenen itahsh kiin? Ilaaica (Elijah) na?" Miitahsh kaa'inaatc: "Kaawiin nintaawihsii." Miinawaahsh okii'ikoo': "Kiin ina kaa-ahshawaapamintc kaawiihpiTipaacimowininiiwitc?" Kii'nahkwehtam itahsh: "Kaawiin." 22 Miinawaa tahsh okii'ikoo': "Wiintamawihshinaam awenen eyaawiyan, ninkawiintamawaanaanik itahsh kaapi-ishinisha'oyamintwaa. Aaniin keishiwiinitisoyan?" 23 Cwaan tahsh kii'ihkito: "Niin a'a kaamatwetepihtaakositc pikwatahkiink: Kwayahkwamohtawihk Tepenciketc otishaawin!" Mii peshikwan kaakii'ihkitokopanen Aaiseya (Isaiah) Kishemanitoo otipaacimowininiiman. 24 Okoweniwak itahsh kaakiihpikakwetwewaatc okiihpianoonikowaa' i'i Perahsii' (Pharisees). 25 Miitahsh miinawaa kaa'ishikakwecimaawaatc Cwaanan: "Kiishpin eyaawihsiwanen Kishemanitoo kaa'onaapamaatc cipimaaci'iwenitc, kemaa Ilaaica kemaa Kishemanitoo oTipaacimowininiiman, wekonen wencisiika'antaakeyan?" kii'ihkitowak. 26 Cwaan okii'ishiwiintamawaa': "Nipi hsa niin nintaapacihtoon ehsiika'antaakeyaan. Peshik itahsh kiwiicikaapawihtaakowaa, ekaa kaakihkenimaahsiwek. 27 Mii hsa wa'a kepikihkentaakositc cikihci-inentaakositc ishkwaawanentaakosiyaan. Kaawiin tahsh niin ninteinakinsohsii ciaapa'amowakipan omahkisineyaap," kii'ihkito. 28 I'imaa tahsh kiihpiayishiwepan Pehtaniink (Bethany), weti akaamink Cwaartanawi siipiink (Jordan) ootenawenhs kaa-ayaak, miihsh i'imaa Cwaan kaakiihtashisiika'antaaketc. 29 Miinawaa tahsh eniwaapaninik Cwaan (John) okii'waapamaan Ciisahsoon ehpinaasihkaakotc. O'o tahsh kii'ihkito: "Ina 'aweti Maanahcaanihshenhs Kishemanitoo keoncipoonentamawaatc omaa ahkiink kaa-ayaanitc omaci-ishiwepisiwinini. 30 Mii hsa wa'a kaakii'inak: 'Ninkapinaapishkaak a'awe inini kepikihkentaakositc, awahshime ehkihci-inentaakositc ahpiihc itahsh niin.' Aaniihsh aasha wiin kii'ayaa cipwaa nihtaawikiyaan. 31 Kaawiin itahsh mahshi ninkiihkihkenimaahsii awenen a'awe ketinowitc. O'o tahsh kaakiihpioncisiika'antaakeyaan nipi, cikihkentamoonakwaa Isriyal (Israel) ininiwak awenenan eyaawinitc." 32 Shikwahsh okii'ishitipaacimaan Cwaan: "Ninkii'waapamimaan Kishemanitoon otAhcaahkoni ekiihpioncinaashahkiinitc kihcikiishikonk, omiimiinhsink e'ishinaakosinitc ekiihpooniihsantaakonitc, miihsh kaa'ishinehpicikikishkaakonitc. 33 Keyaapi kaawiin nintaakiihkihkenimaahsii awenen kaatinowitc. A'a tahsh kaakiihpi-ishinisha'otc cisiika'antaakeyaan nipiini, aasha mii 'owe ninkii'ik: 'Kikawaapamaa awiya cipooniihsantaakotc ini Ahcaahkwan, nehpic i'imaa ciayaanitc, mii wa'a kesiika'antaakaaketc Kishemanitoon otAhcaahkoni,' ninkii'ik. 34 Ninkii'waapantaan, miitahsh wencitipaacimak mii 'awe kaaoKosihsimikotc Kishemanitoon," kii'ihkito Cwaan. 35 Miinawaahsh eniwaapaninik Cwaan (John) okii'wiicikaapawihtawaa' niishin okihkino'amawaakana'. 36 Okiihkanawaapamaan Ciisahsoon i'imaa ehpimohsenitc. Miitahsh kaa'ihkitotc Cwaan: "Ina iniweniwan oMaanahcaanihshenhsiman Kishemanitoo kaaontinamaaketc!" kii'ihkito. 37 Iki niishin kihkino'amawaakanak okii'noontawaawaan Cwaanan ehtipaacimaanitc Ciisahsoon, miihsh kaani-ishipiminisha'waawaatc Ciisahsoon. 38 Miitahsh Ciisahs kaapi-ishikwehkikaapawitc, ehkanawaapamaatc ehpiminisha'okotc, shikwa okii'inaa': "Wekonen nentawaapantamek?" Miihsh kaa'ikotc: "Oraapaai (Rabbi), aanti eshitaayan?" okii'ikoo'. O'owehsh Oraapaai kaaicikaatek, okihkino'amaake. 39 "Piishaak, waapantamohk," okii'inaa'. Kanapac aasha kii'niiyotipa'ikaneyaa 'i ahpii. Okii'aniwiiciiwaawaan itahsh e'awiwaapantamowaatc eshitaanitc. Piinihsh inaakohsh itahsh okii'wiiciiwaawaan. 40 Oko niishin ininiwak kaa'noontawaawaatc Cwaanan kaye kaahpiminisha'waawaatc Ciisahsoon, mii 'awe peshik Entaroo (Andrew) Saaiman (Simon) wiicihkiweyan. 41 Kwayahk hsa okii'mihkawaan Saaimanan wiicihkiweyan ekii'inaatc: "Ninkii'mihkawaanaan a'a Kishemanitoon kaakii'onaapamikotc cipimaaci'iwetc," okii'inaan. Mii 'owe Christ kaaicikaatek Kishemanitoo kaakii'onaapamaatc. 42 Miitahsh kaa'ishi-ishiwinaatc ini Saaimanan eshiayaanitc Ciisahsoon. Ciisahs itahsh okiihkanawaapamaan Saaimanan, miitahsh ekii'inaatc: "Kiin Saaiman okosihsan Cwaan. Mii 'omaa ahkonaak kikaishinihkaas Siihpahs (Cephas)," kii'ihkito. Mii peshikwan ekii'ishinihkaasotc Piitar (Peter), ahsin e'ishinihkaatek wiinsowin. 43 Miinawaa eniwaapaninik Ciisahs kiiwii'ishaa Kaalalii (Galilee) ahkiink. Okii'mihkawaan ini Pilapoon (Philip). "Wiiciiwihshin," okii'inaan. 44 A'ahsh Pilap kii'oncii i'imaa ootenawenhsink Pehseta (Bethsaida) ekii'ishinihkaatenik. Mii 'iwe peshikwan ootenawenhs kaaonciiwaatc Entaroo (Andrew) kaye Piitar (Peter). 45 Pilap itahsh okii'mihkawaan ini Nahtaaniyalan (Nathanael), miihsh kaa'inaatc: "Ninkii'mihkawaanaan a'a kaatipaacimintc Moosihs (Moses) otinaahkonikewinink, Kishemanitoo kaye otipaacimowininiima' kaakiihtashimaanitc. Mii hsa wa'a Ciisahs Naasaritink (Nazareth) kaaonciitc, Coosap (Joseph) okosihsan," kii'ihkito. 46 Okii'ikoon itahsh ini Nahtaaniyalan: "Kekoon ina taaonciimakan i'iwe wenishihshink i'imaa Naasaritink?" okii'ikoon. "Inashke piwaapam," itahsh okii'inaan a'a Pilap. 47 Miihsh Ciisahs ekii'waapamaatc Nahtaaniyalan ehpinaasihkaakotc, okii'inaan: "Mii wa'a tepwe Isriyal (Israel) inini," okii'inaan. "Kaawiin kekoon okikishkaakohsiin wayeshimiwewin!" okii'inaan. 48 Miihsh kaa'ishikanoonikotc Nahtaaniyalan: "E, aanti wencikihkenimiyan enaatisiyaan?" Miihsh eshinahkwehtawaatc: "Cipwaa antomihk Pilap, kikii'waapamin kaakii'namatapiyan i'imaa eshiaakawahkisotc shoominaahtik," okii'inaan. 49 Miihsh kaa'ikotc: "Okihkino'amaake! Kiin Kishemanitoo oKosihsan! Kiin Isriyalak keokihciokimaamiwaatc!" kii'ihkito. 50 Ciisahs itahsh okii'inaan: "Kitooncitepweyentam ina ekii'ininaan ekii'waapaminaan i'imaa eshiaakawahkisotc shoominaahtik? Awahshime tahsh kikawaapantaanan kehci-inentaakwahkin ahpiihc itahsh wiin o'o kaawaapantaman." 51 Shikwahsh okii'inaa': "Tepwe kiwiintamawininim o'o: piciinak kikawaapantaam kihcikiishik cipaahkinikaatek, kaye kikawaapamimaawaa' Kishemanitoo otencalima' pisaan​iko ishpimink ci-inaapiikamonitc kaye cipiontaapiikamonitc i'imaa eshiayaanitc ini Inini oKosihsan," kii'ihkito.

Cwaan 2

1 Eniniishokiishikwakaanik itahsh kiihkihciwiitikenaaniwan i'imaa ootenawenhsink Kena (Cana) ekii'ishinihkaatek, Kaalaliiwi ahkiink (Galilee) kaa-ayaak. Omaamaan a'a Ciisahs i'imaa kii'ayaawan. 2 Kewiinawaa ekii'antomintwaapan Ciisahs kaye okihkino'amawaakana' kii'ayaawak kihciwiitikentiwinink. 3 Ahpiihsh e'aninoontehsenik shoominaapo, Ciisahs omaamaan okiihkanoonikoon: "Kaawiin tepihsehsinoon shoominaapo," okii'ikoon. 4 Ciisahs kii'ihkito: "Aaniin niin eshipapaamimiyan," okii'inaan. "Kaa mahshi tipihsehsinoon cimaatanohkiiyaan," okii'inaan omaamaan. 5 Miitahsh kaa'ishikanoonaanitc omaamaan i'i anohkii'aakana': "Aaniin​iko keininek, mii 'i ishihcikek," okii'inaa'. 6 Kii'ayaawan i'imaa ninkotwaahso ahsiniiwi ahtoopaanan e'mihshaakin, nipi kaashiahtek tino. Wiinawaa Coowak otanami'aawiniwaank okii'inwaataanaawaan ahsiniiwi ahtoopaanan ekiihpehkaapaawacikaakewaatc kaye ehkisiiyaapaawasowaatc. Kanapac niishtana tahso tipa'oopaaneyaa kemaa nihsimitana pepeshik kiihtepipiiwan. 7 Ciisahs itahsh okiihkanoonaa' ini anohkii'akana': "Mooshkinepatook nipi ahsiniiwi ahtoopaanink." Wiinkehsh okiihtipimooshkinepatoonaawaa. 8 Miihsh okii'inaa': "Haw kwaapa'amohk, awimiinihk itahsh awe wiihkwankewikimaa," okii'inaa'. Okii'ishiwitawaawaan itahsh i'i nipi 9 aasha ekiihshoominaapowaninik. Miihsh ehkoocihpitank a'a wiihkwankewikimaa, kaawiin okiihkihkentansiin aanti kaaonciinik i'i shoominaapo. Ikihsh wiin kaakiihkwaapa'amowaatc anohkii'aakanak okiihkihkentaanaawaa kaaonciinik. A'a tahsh wiihkwankewikimaa okiihkanoonaan ini wiikihtoowininiwan: 10 "Kotak awiya e'wiihkwanketc, niikaan kaaonishihshininik mina'iwe shoominaapo, paamaahsh niipiwa' e'animinihkwenitc, kaawentakintek shoominaapo ishkwaac okamina'aa'," okii'inaan. "Kiin itahsh kikiihkanawentaan wenishihshink shoominaapo, noonkom o'owe ishkwaac mena'iweyan," kii'ihkito. 11 Mii 'owe nihtam maamahkaacihcikewin Ciisahs kaa'ishihciketc i'imaa Kenaank Kaalaliink ekii'ayaatc. Mii 'omaa kaa'ishinaakohtootc okihci-inentaakosiwin. Shikwahsh okii'oncitepweyenimikoo' okihkino'amawaakana'. 12 Miihsh kaa'ishkwaaishiwepahk o'o, weti kii'ishaa Kaparniyamiink (Capernaum). Okii'aniwiiciiwikoo' omaamaan, wiicihkiweya' kaye okihkino'amawaakana'. Kaawiin tahsh aahpici kinwesh imaa tahsokon kii'ayaahsiiwak. 13 Aasha kekaa kii'ocihcihseni kaaishiwiihkwantiiwahkamikisinaaniwank Pimaaci'ikoowi​Wiihkwantiwin kaaishinihkaatek, ekii'nihtaaishihcikewaatc Coowak. Mii 'o ahpii Ciisahs kii'ishaatc Ceroosalamink (Jerusalem). 14 Miihsh i'imaa okii'otihsaa' Ciisahs iniweniwa' ehtanataawaakenitc Kihcianami'ewikamikonk pishihkiwa', maanahcaanihsha', omiimiinhsa', kaye iniweniwa' shooniyaan kaameshkotoonikenitc e'namatapinitc. 15 Miihsh okii'oncioshihtoon pahshanshe'ikan piiminahkwaanink, ekiihsaakicipahshanshe'waatc i'imaa Kihcianami'ewikamikonk kahkina, maanahcaanihsha' kaye pishihkiwa'. Shikwahsh okiihkwanapowepinamawaa' ini wiihsiniwinaahtikoon kaatashimeshkotoonikenitc, ekii'ohswewepinamawaatc kaye oshooniyaamini. 16 Miihsh kaa'inaatc i'i ininiwa' omiimiinhsa' kaakii'ataawaakenitc: "Maaciinihkook! Saakisi'ihkook! Keko ishihtoohkek ninTete owaahkaa'ikan citashiataawewikamikohkeyek!" okii'inaa'. 17 Kii'maamihkawiwa' okihkino'amawaakana' eshipii'ikaatenik Kihcimasina'ikanink: "Oo Kishemanitoo, taapishkoo kekoon kaacaakitek nintinamanci' ehpiihcisaakihtooyaan kiWaahkaa'ikan," ishipii'ikaate. 18 Miitahsh kaa'ishikakwecimikotc Ciisahs ini Coowa' oniikaanisii': "Wekonen tino maamahkaacihcikewin ketootaman kewaapanta'iyaank ehtepakentaakosiyan o'o kaatootaman?" okii'ikoo'. 19 Miihsh kaa'ishinahkwehtawaatc Ciisahs: "Piikopitooyek o'o Anami'ewikamik, nihsokiishikahk (3) itahsh aasha ninkakiishipatahkitoon," okii'inaa'. 20 Miihsh okii'ikoo': "Niimitanahshininkotwaahso (46) ahki ohsha kiihtashiihkikaate 'o Kihcianami'ewikamik, nihsokiishikahk (3) itahsh kiin ewiihkiiwepatahkitooyan?" okii'ikoo'. 21 Wiin itahsh i'i wiiyaw kaakii'itank Kihcianami'ewikamik. 22 Paanimaahsh ekiihkiiwepimaatisi'intc kii'ishkwaanipotc, kii'maamihkawiwa' okihkino'amawaakana' 'iwe kaakii'ihkitotc. Miihsh i'i kiihtepweyentamowaatc i'i kaaishihsink kihcioshipii'ikewin, kaye kaakii'ihkitonitc Ciisahsoon. 23 Ahpii e'ayaatc i'imaa Ciisahs Ceroosalamink ehPimaaci'ikoowi​Wiihkwantinaaniwank, okiihtepweyenimikoo' niipiwa' e'waapantaminitc omaamahkaacihcikewinan. 24 Kaawiin tahsh Ciisahs okiihtepwewakenimaahsii' ciwiiciiwaatc, aaniihsh kahkina wiinke okiihkihkenimaa' eshiayaanitc. 25 Kaawiin kaye awiyan okii'antawenimaahsiin ciwiintamaakotc eshiayaanitc i'i pemaatisinitc. Wiin kahkina okiihkihkenimaa' wekonen kekishkaakonitc ote'iniink.

Cwaan 3

1 Kii'ayaa 'a peshik Perahsii (Pharisee) Nihkatiimahs (Nicodemus) ekii'ishinihkaasotc. Mii hsa wa'a peshik otoonahshowewininiimiwaan Coowak. 2 Amii wa'a okii'naasihkawaan Ciisahsoon ehtipihkaninik, mii 'iwe ekii'inaatc: "Okihkino'amaake, kikihkenimikoo e'okihkino'amaakewiyan Kishemanitoo ekiihpiicinisha'ohk. Kaawiin awiya inini taatootansii ono maamahkaacihcikewinan kiin kaatootaman, Kishemanitoon ehta wiiciiwikotc taatootam." 3 Ciisahs okii'nahkwehtawaan: "Tepwe kiwiintamawin, kiishpin ekaa awiya miinawaa nihtaawikihsik, kaawiin okawaapantansiin Kishemanitoon oTipencikewinini," okii'inaan. 4 Nihkatiimahs kii'ihkito: "Aaniihsh keishinihtaawikihpan inini aasha ehkihtaatisitc? Kehcinaac kaawiin otaakashkihtoohsiin cipiinsihkawaahpan ini omaamaan miinawaahsh cinihtaawikihpan." 5 Ciisahs itahsh okii'nahkwehtawaan: "Tepwemakan o'o kaawiintamawinaan, kiishpin ekaa awiya nipiink kaye Kishemanitoon otAhcaahkoniink oncinihtaawikihsik, kaawiin tapiintikehsii Kishemanitoon oTipencikewininiink. 6 Awiya oniiki'ikoo' kaaoncinihtaawikitc, mii 'imaa wentinank wiiyawink ehpimaatisitc. Shikwa tahsh Kishemanitoon otAhcaahkoniink e'oncinihtaawikitc awiya, mii 'imaa keontinank tepwe cipimaatisinitc otahcaahkwan. 7 Keko maamahkaatentanken e'ininaan oncita piko miinawaa cinihtaawikiyek. 8 Inashke tahsh waa'ayishinoowek nootin ayishinoowe. Kinoontaan e'matwenoowek, kaawiin itahsh kikakii'wiintansiin aanti wenciik kaye aanti eshaamakahk. Mii 'iwe eshiayaatc kahkina awiya Kishemanitoon otAhcaahkoniink kaaoncinihtaawikitc." 9 Nihkatiimahs okii'nahkwehtawaan: "Aaniihsh o'o keishiayaak kaaihkitoyan?" 10 Ciisahs itahsh okii'inaan: "Kiin kikihkino'amawaak Isriyalak (Israel). Kaawiin ina kikihkentansiin o'o? 11 Tepwe kiwiintamawin, niwiintaamin ini kaakihkentamaank, nintipaatotaamin kaye kaakii'waapantamaank. Kaawiin tahsh kiwii'otaahpinansiinaawaa nintipaacimowininaan. 12 Kiishpin tepweyentansiwek ahpii wiintamawinakook ahkiink kaa-ayishiwepahk, aaniihsh keshitepweyentamekipan wiintamawinakook kihcikiishikonk kaa-ayishiwepahk? 13 Kaawiin awiya wiihkaa kihcikiishikonk kii'ishimaacaahsii, mii ehta 'a kihcikiishikonk kaakiihpionciniihsiitc, mii 'awe Inini oKosihsan, weti kihcikiishikonk kaa-ayaatc. 14 "Shikwa kaakii'ishiompaahkwa'waatc Moosihs (Moses) okinepikohkaanan pikwatahkamikaank, mii 'iwe keshiompaahkwa'ikaniwitc Inini oKosihsan. 15 Miitahsh o'owe keoncitoocikaniwitc, piko awiya ehtepweyenimaatc pishihshik ciayaatc pimaatisiwin ekaa wiihkaa keishkwaahsehsinok. 16 Aaniihsh Kishemanitoo ehpiihcishawenimaatc pemaatisinitc ahkiink, kii'miikiwe ehpeshikonitc oKosihsan, awenenan itahsh iko ketepweyenimaatc, ekaa cinihshiwanaatisihsik, ciayaatc itahsh i'iweni pimaatisiwin wiihkaa keishkwaahsehsininik. 17 Kishemanitoo okiihpi-ishinisha'waan oKosihsan omaa ahkiink, kaawiin wiin cipitipaahkonaanitc i'i ahkiink kaa-ayaanitc, wiin cioncipimaatisinitc i'i ahkiink kaa-ayaanitc. 18 A'a tahsh tiyepweyenimaatc ini oKosihsimaan kaawiin tatipaahkonaahsii. A'a tahsh ekaa kaatepweyenimaahsik, mii wa'a aasha kiihtipaahkonikaniwi, ekiihtepwehtawaahsik eshinihkaasonitc kaaopeshikoKosihsaamikonitc Kishemanitoon. 19 Amii 'owe eshihsek i'i tipaahkonikoowin, waahseyaa ekiihpimi​takohshinoomakaninik omaa ahkiink, iki tahsh pemaatisiwaatc nawac okiihsaakihtoonaawaa kashkiitipihkan. Kaawiin okii'minwentansiinaawaa 'iwe waahseyaa, aaniihsh otootamowiniwaank kii'maci-ishiwepisiwak. 20 Tahsin awiyak kaamacitootamowaatc oshiinkentaanaawaa 'i waahseyaa. Kaawiin owii'naasihkansiinaawaa 'i waahseyaa, ekaa cinaakwahsininik otishihcikewiniwaan. 21 A'awehsh wiin kwayahk kaatootank onaasihkaan 'i waahseyaa cinaakwaninik otishihcikewinan, Kishemanitoonk kaakii'onciimakaninik ekii'nana'ihtawaatc." 22 Ahpii 'owe e'ishkwaaishihsek, Ciisahs kaye okihkino'amawaakana' kii'ishaawak i'imaa Cootiiya (Judea) ahkiink. Kinweshiihsh i'imaa okii'ishiwaawiiciiwaa' okihkino'amawaakana' kaye ekiihtashisiika'antaaketc. 23 Cwaan (John) kewiin kiihtashi​siika'antaake Iinanink (Aenon) ciikaya'ii 'imaa Selim (Salim) ekii'nipiihkaanik i'imaa. Kiihpaapiishaawak awiyak ewiihsiika'antawintwaa. 24 Kaa mahshi o'o ahpii kiihkipa'waahsii Cwaan. 25 Aanint Cwaan okihkino'amawaakana' kaye peshik Coo kii'ishikakwe​shaakoosontiwak aaniin e'inentamowaatc i'iweni kiikisiiyaapaawacikenk kaye kiikisiiyaapaawasonk i'imaa kaaishianami'aawaatc. 26 Okii'naasihkawaawaan ini Cwaanan ekii'inaawaatc: "Okihkino'amaake, kikihkenimaa na a'a kaakii'wiiciiwihk akaamink Cwaartanink (Jordan), a'a tahsh kaakiihtipaacimatc? Nashke noonkom siika'antaake, kahkina opinaasihkaakoo'." 27 Cwaan okii'nahkwehtawaa': "Kaawiin awiya okakashkihtoohsiin kekoon ciayaatc, paanimaa ehta Kishemanitoon miinikotc. 28 Kiinawaahsh iko kikatipaacimim ekii'ihkitoyaan: 'Kaawiin niin Kishemanitoo oPimaaci'iwewininiiman. Niin tahsh ninkiihpi​niikaaninisha'okoo kepi-ishaatc,' ninkii'ihkit. 29 A'a kaakihciwiikihtootc inini, mii wa'a waatikemaatc ini ihkwewan. Inihsh owiiciiwaakanan a'a kaaoshkihkwewetc owiicikaapawiihtaakoon ehpisintaminitc. Minwentamoon itahsh e'noontaakotc a'a weshkihkwewetc. Mii 'owe peshikwan keniin nimooshkine​minwentam. 30 Nawac wiin awahshime taishpentaakosi, niin itahsh wiin pankii ninkani-inentaakos." 31 "A'a tahsh ishpimink kaaonciitc amii 'awe maawac kehci-inentaakositc. A'awe tahsh ahkiink kaaonciitc, ahkiink oncitipentaakosi, kaye ahkiink kaaishihsenikin otashintaanan. A'a tahsh kihcikiishikonk kaaonciitc amii 'awe maawac kihci-inentaakosi ahpiihc kahkina awiya'. 32 'Iwe kaakii'waapantank kaye kaakii'noontank, amii 'owe tepaatotank. Kaawiin tahsh awiyan otootaahpinamaakohsiin otipaacimowin. 33 Awenen itahsh iko kaaotaahpinamawaatc otipaacimowinini, amii 'imaa eshikihkinawaacihtootc ehtepweyenimaatc Kishemanitoon ehtepwewiniwinitc. 34 A'awe Kishemanitoon kaakiihpi-ishinisha'okotc otashintaan Kishemanitoon otihkitowinini, aaniihsh wiinke piko eshi​mooshkine​ishiayaanitc otAhcaahkoni okii'miinikoon Kishemanitoon. 35 A'a Weyoohsimintc osaaki'aan oKosihsan, kahkina hsa ko kekoon ekii'miinaatc citipentaminitc. 36 A'a tahsh tiyepweyenimaatc ini Wekosihsimimintc otayaan pimaatisiwin wiihkaa keishkwaahsehsininik. A'a tahsh ekaa kaatepweyenimaahsik ini oKosihsimaan kaawiin wiihkaa okawaapantansiin pimaatisiwin. Kishemanitoon onishkaatisiwinini okapatakoshkaakon mooshak pishihshik."

Cwaan 4

1 Kii'noontamook iki Perahsiiwininiwak (Pharisees), nawac Ciisahsoon niipiwa' kihkino'amawaakana' ehkashki'aanitc kayehsh ekiihsiika'antawaanitc ahpiihc wiin ini Cwaanan Siika'antaakewininiwan. 2 Kaawiin wiin Ciisahs okiihsiika'antawaahsiin awiyan, okihkino'amawaakana' ehta kiihsiika'antaakewa'. 3 Ahpiihsh Ciisahs kaa'noontank i'i kaaicikaniwitc, miihsh kaa'ishimaacaatc ekii'nakatank i'i Cootiiyawahki (Judea), ekii'ishaatc weti Kaalaliink (Galilee). 4 Weti e'ani-ishaatc oncita piko cini-ishishaapopimohsetc i'imaa Sameriyaank (Samaria). 5 Kii'anitakohshin itahsh i'imaa Sameriyaank ootenaank, Saaihkaar (Sychar) kaaishinihkaatenik, ciikaya'ii 'imaa e'ayaanik ahkiinhs a'a Cekap (Jacob) kaakii'miinaakopanen okosihsan Coosapoon (Joseph). 6 Kii'ayaani i'imaa onta'ipaan kaakiihtipentank a'a Cekap. Ciisahs kii'onapi pehsho 'imaa onta'ipaanink e'ayehkositc ekiihkihcipimohsetc. Komaa kii'aapihtakiishikan 'i ahpii. 7 Kiihpitakohshin tahsh imaa Sameriyaawihkwe (Samaritan) ehpinaata'ipiitc. Ciisahs tahsh okiihkanoonaan: "Mina'ihshin," okii'inaan. 8 Mekwaahsh okihkino'amawaakana' e'ontentinitc ootenaank e'anta-ataawenitc kemiiciwaatc. 9 'Owehsh okii'ikoon Sameriyaawihkwen: "Kiin Coowinini (Jew), niin itahsh ehSameriyaawihkwewiyaan. Wekonen wenciantotamawiyan cimina'inaan?" Mii 'o wenci-ihkitotc, Coowak kaawiin peshikwan okii'ishiaapacihtoohsiinaawaan onaakanan, kwaapa'oopaanan Sameriyaawininiwa' (Samaritans) kaaishiaapacihtoonitc. 10 Ciisahs tahsh okii'nahkwehtawaan ini ihkwewan: "Kiishpin kiikihkentamowatc Kishemanitoo kaamiikiwetc kaye kiikihkenimatc awenen tenowitc 'mina'ihshin' kaainihk, kitaanantotamawaa, kitaamiinik itahsh i'i nipiini tino kaapimaatisiishkaakemakaninik," okii'inaan. 11 Ihkwe tahsh kii'ihkito: "Kaawiin kekoon kitayaahsiin cikwaapa'ikaakeyan, naawinaakwan nipi onta'ipaanink! Aanti tahsh kiin keontinaman i'i nipi kepimaatisiishkaakemakahkipan kaawiintaman?" okii'inaan. 12 "Noohsinaapan Cekap wiin ninkii'miinikonaapan 'owe onta'ipaan. O'omaa kaakii'ontinank nipi kii'minihkwe, kaye okosihsa', otawahkaana' kaye, kahkina ko kii'minihkwewa' kaa'ontinikaatek nipi. Awahshime na kiin kikihci-inentaakos ahpiihc wiin Cekap?" okii'ikoon. 13 Ciisahs itahsh okii'nahkwehtawaan: "Awenen iko 'omaa keonciminihkwekwen o'o nipi miinawaa tanoontayaapaakwe. 14 Awenen itahsh iko keminihkwekwen nipi niin kemina'ak kaawiin miinawaa wiihkaa tanoontayaapaakwehsii. I'ihsh nipi kemiinak, okakikishkaan onta'ipaan e'moohkiciwanipiinik. Okaontinaan i'imaa kaapimaatisiishkaakemakahk nipi. Okamiinikon itahsh i'iweni pimaatisiwin ekaa wiihkaa keishkwaahsehsininik," okii'inaan. 15 Miihsh 'iwe ihkwe kii'ihkito: "Miishihshin 'i nipi, ekaa miinawaa wiihkaa cinoontayaapaakwehsiwaan, kaye ekaa cipinaasihkansiwaan nipi 'omaa," okii'ikoon. 16 Ciisahs itahsh kii'ihkito: "Awiantom kinaapem, miinawaahsh piishaahkan omaa." 17 Okii'nahkwehtaakoon tahsh ini ihkwewan: "Kaawiin awiya ninaapem," okii'ikoon. Ciisahs tahsh kii'ihkito: "Kwayahk kitihkit, 'Kaawiin awiya ninaapem,' kaaihkitoyan. 18 Aaniihsh aasha kii'naananiwak kinaapemak, a'ahsh noonkom kaawiiciiwatc kaawiin mayaa kinaapem, wiinke piko ehtepweyan kaaihkitoyan." 19 Okii'ikoon tahsh ini ihkwewan: "Ninihsitawinaan kiin peshik kaakanootamawaatc Kishemanitoon ehtinowiyan," okii'ikoon. 20 "Noohsinaapaniik kiihtashianami'aawak omaa waciink. Kiinawaa tahsh kitihkitom Ceroosalamink (Jerusalem), mii piko 'imaa ketashianami'ehtawintc Kishemanitoo," okii'ikoon. 21 Ciisahs kii'ihkito: "Tepwehtawihshin. Taocihcihse 'i ahpii kaawiin keyaapi tatashianami'ehtawaahsii 'a Weyoohsimintc omaa waciink, kaawiin kaye 'imaa Ceroosalamink. 22 Kiinawaa Sameriyaank kaaonciiyek kitanami'ehtawaawaa 'awe ekaa kaakihkenimaahsiwek. Niinawint kaaCoowiwiyaank wiin ninkihkenimaanaan kaa-anami'ehtawankitc. Aaniihsh pimaaci'iwewin Coowinaank onciimakan. 23 Piciinak tawii'ocihcihse, aasha hsa ko ocihcihse 'i ahpii ikiweniwak kwayahk keanami'aawaatc okashiwiitoohkaakowaan Kishemanitoon otAhcaahkoni cianami'ehtawaawaatc ini Weyoohsimimintc. Shikwa kaye kwayahk iko eshiayaanitc okainenimaawaan e'anami'ehtawaawaatc. Aaniihsh miiwa'​i'i tino awiya' Weyoohsimintc kaa-antawenimaatc cianami'ehtaakotc. 24 Aaniihsh ahcaahkowi Kishemanitoo, mii ehta 'owe nahke weweni awiyak keshianami'ehtawaawaatc Kishemanitoon otAhcaahkoni kaawiitoohkaakowaatc, mii 'imaa kaaoncikihkenimaawaatc tepwe eshiayaanitc," okii'inaan. 25 Okii'ikoon itahsh ini ihkwewan: "Ninkihkentaan citakoshink Kishemanitoo kaakii'onaapamaatc cipimaaci'iwenitc, Christ keishinihkaasotc. Ahpii takohshink ninkawiintamaakonaan kahkina kekoon." 26 Ciisahs okii'inaan: "Niin a'a kaa'ikooyaan o'o kaakanooninaan." 27 Miihsh i'i ahpii kiihpitakohshinoo' okihkino'amawaakana'. Kii'maamahkaatentamoo' e'wiicikakitoomaatc ihkwewan. Kaawiin tahsh awiya okii'inaahsiin ini ihkwewan: "Wekonehsh entawentaman?" Kaawiinhsh kaye okii'inaahsiwaawaan Ciisahsoon: "Wekonehsh wenciwiicikakitoomatc?" 28 Okii'nakataan a'a ihkwe otahtoopaan ekii'ishaatc ootenaank ekii'awi'inaatc ini pemaatisinitc: 29 "Ampe piishaak," okii'inaa'. "Piantawaapamihk a'a inini kaawiintamawitc kahkina kekoon kaakiihpiayishihcikeyaan. Kaawiin ina mii wa'a Kishemanitoo kaakii'ahshotamaaketc cipimaaci'iwenitc?" 30 Kaakii'wiintamawaatc itahsh ootenaank kiihpioncimaacaawa' ehpiantawaapamaawaatc ini Ciisahsoon. 31 Mekwaa tahsh i'i kaainahkamikaninik okihkino'amawaakana' okiihkanoonikoo': "Okihkino'amaake, wiihsinin!" okii'ikoo'. 32 Ciisahs itahsh okii'inaa': "Nintayaan miicim cimiiciyaan ekaa kiinawaa kaakihkentansiwek." 33 'Owehsh kii'ishikakwecintiwak kihkino'amawaakanak: "Koonike awiya kekoon okiihpiitamaakoon cimiicitc?" 34 Ciisahs o'owe kii'ihkito: "Amii 'owe niin nimiicimim, ci-ishihcikeyaan otinentamowin a'a kaahpi-ishinisha'otc kaye anohkiiwin cikiishihtooyaan kaakii'miishitc. 35 Kaawiin ina kinihtaaihkitohsiim: 'Keyaapi niiyokiisihs, miitahsh i'i cimanishikenk'? Inashke kitinininim, inaapik weti, kanawaapantamohk kihtikewinan! Aasha waapashkohsiwahtewan ehkiishikikin, aasha ishinaakwan ciawimanishikenk! 36 A'awe kaamanishiketc anitipa'amawaa e'anohkiitc. Omaawacihtoonan ini kaakihtikaatenikin pishihshik pimaatisiwinink ciayaanikin. Maamaw itahsh a'a kaakihtiketc miinawaa 'a kaamanishiketc taminwentamook. 37 Mii 'owe tiyepwemakahk ihkitowin: 'Peshik kihtike, kotak kaye manishike.' 38 Kikii'maacinisha'oninim ciawimanishikeyek ekaa mahshi kaakiihtashianohkiihsiwek. Kotak awiya kii'ishianohkiiwak, kiinawaahsh kitooncikashkihcikem i'i otanohkiiwiniwaa." 39 Niipiwa' Sameriyaawininiwa' (Samaritans) 'imaa ootenaank kaakii'ayaanitc okiihtepweyenimikoo' ekiihtipaacimikotc ini ihkwewan i'iwe ekii'inaacimonitc: "Ninkii'waawiintamaak kahkina kaakiihpiayishihcikewak." 40 Ahpii Sameriyaawininiwa' kaahpiotihsikotc okiihpakohsenimikoo' ciwiiciyayaamaatc. Shikwa kii'ayaa 'imaa keyaapi niishokiishik (2) minihk. 41 Keyaapi niipiwa' awahshime okiihtepweyenimikoo' wiin otihkitowinink onci. 42 Miihsh i'i okii'inaawaan ini ihkwewan: "Ekwa' nintepwehtaamin, kaawiin kiin i'iwe kitihkitowin. Aaniihsh niinawint tipinawe ninoontawaanaan, ninkihkentaamin tepwe mii​wa'a kaawiihpimaaci'aatc ahkiink kaa-ayaanitc." 43 Niishokiishik (2) i'imaa kaa'ayaatc, mii 'imaa kaanioncimaacaatc ekii'ishaatc i'imaa Kaalaliink (Galilee). 44 Wiin tipinawe Ciisahs kii'ihkitoopan, awiya kaakanootamawaatc Kishemanitoon kaawiin takihci-inencikaniwihsii wiiniko tipinawe otahkiink. 45 Ahpii kaahtakohshink imaa Kaalaliink, Kaalaliiwininiwak kii'minwentamook e'otihsikowaatc, aasha ekii'waapantamowaatc kahkina kekoon kaakii'ayintootaminitc Ceroosalamink (Jerusalem) mekwaa e'wiihkwantink. Aaniihsh kaye wiinawaa kii'ishaawak wiihkwantiwinink. 46 Miitahsh miinawaa Ciisahs i'imaa kii'ani-ishaa Kena (Cana) ootenawenhsink Kaalaliiwi ahkiink kaaishiayaanik, i'imaa kaakii'ishishoominaapohkaaketc nipiini. Kii'ayaa 'imaa okimaawinink ekii'niikaanisitc okosihsan e'aahkosinitc i'imaa Kaparniyamiink (Capernaum). 47 Ahpii kaa'noontank ekiihpitakohshininitc Ciisahsoon Kaalalii ahkiink, Cootiiyaank (Judea) itahsh ekiihpiontohsenitc, okii'naasihkawaan ekii'awipakohsenimaatc, cikiiwewiiciiwikotc i'imaa Kaparniyamiink cipimaaci'aanitc ini okosihsan, aasha kekaa e'niponitc. 48 Ciisahs okii'inaan: "Kiishpin ekaa waapantansiwek maamahkaacihcikewinan kaye kaamaamahkaatentaakwahkin kaawiin kikatepwehtansiim," okii'inaan. 49 Okii'ikoon tahsh ini kaaokimaawentaakosinitc: "Taka hsa piishaan cipwaa nipotc nintapinoonciishim." 50 Ciisahs itahsh owe okii'inaan: "Pisaan anikiiwen, tapimaatisi kikosihs." A'a tahsh inini okiihtepwehtaan i'i Ciisahsoon kaakii'ikotc, miihsh kaani-ishimaacaatc ekii'anikiiwetc. 51 Mekwaa tahsh iko e'anikiiwetc okii'nakishkawaa' otanohkii'aakana' ehpiwiintamaakotc: "Tapimaatisi ohsha kikosihs," ekii'ikotc. 52 Okiihkakwecimaa' aaniin mayaa e'ishihsenik ahpii kaa'animinoayaanitc okosihsan. 'Owehsh kii'ihkitowa': "Piciinaako eni-ishkwaa-aapihtakiishikahk ehpeshikotipa'ikaneyaanik, mii ahpii kaa'nakanikotc okishisowaahpinewin," okii'ikoo'. 53 Okiihkihkentaan a'a otetemaa mayaa mii 'iwe ahpii kaakii'ikotc Ciisahsoon 'iwe, "Tapimaatisi kikosihs," kaakii'ikotc. Miitahsh i'i wiin kaye kahkina entaatc kaakii'ayaanitc kiihtepwehtamoo'. 54 Miitahsh aasha niishwaa Ciisahs ekiihpionciitc Cootiiyaank ekiihpitakohshink i'imaa Kaalaliink ekiihtootank i'imaa maamahkaacihcikewinan.

Cwaan 5

1 Ahpii e'ishkwaaishiwepahk kii'maacaa Ciisahs weti Ceroosalamink (Jerusalem) ekii'ishaatc, ekii'ocihcihsenik kaashiwiihkwantiiwahkamikisiwaatc iki Coowak otanami'aawiniwaank. 2 I'imaa tahsh Ceroosalamink ayaa peshik saaka'ikanihkaanenhs i'imaa waahkaaya'ii e'ayaakin e'naanwewaanakahkin kaashitapinawahkitekin. Mii 'imaa takwan i'i saaka'ikanihkaanenhs i'imaa pehsho KihciMaanahcaanihshiwi Ishkwaantemink. Peht Saahta (Bethzatha) ishinihkaate 'i saaka'ikanihkaanenhs, Hiiparoo (Hebrew) ishikiishwewinink. 3 Mii 'imaa kaa'ishipimihshinowaatc kaakiihpaahtiinowaatc otaahkosiik, ekaa kaakii'waapihsikwaa kaye kaamaahkishkaawaatc kaye kaanipowiayaawaatc. 5 Kii'ayaa 'imaa peshik inini aasha nihsimitanahshinihshwaahso (38) tahsoahki e'aahkositc. 6 Ciisahs itahsh okii'waapamaan ehpimihshininitc, shikwahsh ehkihkenimaatc aasha kinwesh mii 'iwe ekii'ishiayaanitc, okiihkanoonaan: "Kinantawentaan ina ciminoayaayan?" okii'inaan. 7 Miitahsh kaa'ikotc ini kaa-aahkosinitc: "Kaawiin awiya nintayaawaahsii cipahkopii'otc ahpii e'maataakamishkaak nipi. Mekwaa tahsh iko ehpiishaayaan, aasha kotak awiya nintaacinaa'ik ehpahkopiitc." 8 Ciisahs itahsh okii'inaan: "Wanishkaan, otaahpinan kitahpihshimon, pimohsen," okii'inaan. 9 Shemaak a'a inini kii'minoayaa. Okii'otaahpinaan otahpihshimon ekiihpimohsetc. Mii 'iwe e'Anwepiiwi​kiishikaninik ahpii kaakiihpimohse'intc. 10 Miitahsh i'i kaa'oncikanoonikotc oniikaanisiiwi Coowa': "Anwepiiwi​kiishikan ohsha," okii'ikoo'. "Kaawiin inahtehsinoon kitOonahshowewininaan cipimiwitooyampan kitahpihshimon," okii'ikoo'. 11 Miihsh kaa'ishinahkwehtawaatc: "A'awe kaakiihpimaaci'itc mii 'owe kaakii'ishitc: 'Otaahpinan kitahpihshimon, pimohsen, ninkii'ik.' " 12 Miihsh okihkakwecimikoo': "Awenen a'a kaakii'inihk?" 13 A'a tahsh kaakiihpimaaci'intc kaawiin okiihkihkenimaahsiin awenenan ini. Aasha aaniihsh Ciisahs i'imaa kii'oncimaacaa, mii 'imaa eshipaahtiinonitc mekweya'ii ekii'ishiwaninaako'itisotc. 14 Naake tahsh miinawaa Ciisahs okii'mihkawaan Kihcianami'ewikamikonk ini ininiwan. O'owehsh okii'inaan Ciisahs: "Inashke aasha kiminoayaa. Keko miinawaa animacitootanken, nawac awahshime kekoon kikamaashiotihsikon," kii'ihkito. 15 Miihsh kaa'ishi-ishaatc a'a inini ekii'awiwiintamawaatc i'i oniikaanisiiwi Coowa', Ciisahsoon iniweniwan kaakiihpimaaci'ikotc. 16 Miitahsh o'omaa onci oniikaanisiik kaa'oncimaaciimikoshkaaci'aawaatc ini Ciisahsoon, ekiihtootaminitc i'iwe ekiihpimaaci'iwenitc e'Anwepiiwi​kiishikaninik. 17 O'o tahsh Ciisahsoon okii'ishinahkwehtaakowaan: "NinTete ahpane piko pitootam 'owe anohkiiwin, miihsh keniin eshinaakwahk ci-inanohkiiyaan." 18 Miihsh o'owe onci ekii'ihkitonitc, oniikaanisiiwi Coowak awahshime okii'nanaantone'aanaawaa ewii'nihsaawaatc Ciisahsoon, kaawiin wiin ehta 'iwe ekiihpiikonaminitc Anwepiiwi​kiishikani Onahshowewin, i'iwe ohsha kaye "Kishemanitoo ninTete" ekii'ihkitonitc; mii 'iwe "Kishemanitoo kaashiahpiihtentaakositc, kaye niin peshikwan nintahpiihtentaakos" ekii'ishikiishwenitc. 19 Miihsh imaa 'owe okii'inaa': "Tepwemakan i'i kaawiintamawinakook. A'awe oKosihsimaa kaawiin tipinawe kekoon taatootansii, piko eshiwaapamaatc oTeten e'ayintootaminitc. 'Iwe kaa-ayishihciketc Weyoohsimintc, amii kewiin mayaa peshikwan 'iwe kaa-ayintootank a'a oKosihsimaa. 20 A'a tahsh Oyoohsimaa osaaki'aan ini oKosihsimaan, shikwa kahkina kekoon owaapanta'aan eshihciketc. Shikwa keyaapi awahshime kaakihci-inentaakwaninikin okawaapanta'aan kihcianohkiiwinan citootaminitc ahpiihc ono kaahtoocikaatekin, cimaamahkaatentamek. 21 Shikwa 'awe Weyoohsimintc kaaishi​kiiwepimaatisi'aatc kaaniponitc awiya' e'miinaatc pimaatisiwin, kewiin peshikwan oKosihsimaa omiinaa' pimaatisiwin awenena' iko kaainenimaatc. 22 Shikwa 'awe Oyoohsimaa kaawiin wiin awiyan otipaahkonaahsiin. Okii'miinaan tahsh kahkina tipaahkoniwewin ini oKosihsimaan wiin citipaahkoniwenitc. 23 Mii peshikwan kahkina iki pemaatisiwaatc cikihci-inenimaawaatc ini oKosihsimaan taapishkoo kaaishi​kihci-inenimaawaatc ini Oyoohsimaan. A'a tahsh kaakihci-inenimaahsik oKosihsimaan kaawiin okihci-inenimaahsiin kaye Oyoohsimaan kaakiihpi-ishinisha'okonitc. 24 "Tepwemakan o'o kaawiintamawinakook: awenen iko kenoontank nintihkitowinan kaye tiyepweyenimaatc ini kaakiihpi-ishinisha'onitc, otayaan pimaatisiwin wiihkaa keishkwaahsehsinok. Kaawiin tatipaahkonikaniwihsii, aasha 'imaa nipowinink ekii'onciaashawishkaatc, weti e'ayaatc pimaatisiwinink. 25 Tepwewin kiwiintamawininim: piciinak hsa tapiocihcihse, aasha hsa ko ocihcihse ahpii, ikiweniwak aasha kaanipowaatc cinoontamowaatc otinwewinini ini Kishemanitoo oKosihsan. Ikiweniwak itahsh kaanoontamowaatc tapimaatisiwak. 26 Shikwa 'awe Weyoohsimintc kaashikashkihtamawaatc pimaatisiwin awiya', mii peshikwan okii'inahsaan ini oKosihsan kewiin cikashkihtamawaanitc pimaatisiwin. 27 Kaye okii'miinaan ini oKosihsimaan citipaahkoniwenitc, aaniihsh Inini oKosihsan tinowiwan. 28 Keko maamahkaatentankek o'o kaaininakook, aaniihsh aasha weyiip taishihse ahpii kahkina kaakii'ishkwaapimaatisiwaatc kenoontamowaatc nintinwewin. 29 Tapionciwanishkaawak i'imaa kaa'ishina'inintwaa. Iki kaakii'minoishihcikewaatc tawanishkaawak cikiiwepimaatisiwaatc tepwe pimaatisiwinink. Ikihsh kaye kaakii'macihcikewaatc taishikiiwepimaatisiwak wiinawaa wiin cionahshowaanintwaa." 30 Shikwa kii'ani-ihkito: "Kaawiin niin kekoon e'mihcipeshikoyaan nintaakashkihtoohsiin. Eshinoontawak ehta 'a ninTete, nintishitipaahkonike. Kwayahkwan hsa kaaishitipaahkonikeyaan, aaniihsh kaawiin ninantonansiin niin nintinentamowin, otinentamowin hsa 'a kaakiihpi-ishinisha'otc. 31 "Kiishpin niinehta tipaacintisoyaan cikanootamaatisoyaan, kaawiin iinsan tepwe kitaainihtawihsiim. 32 Ayaa tahsh kotak kaatipaacimitc. Ninkihkentamowaan otipaacimowin kaainaacimitc ehtepwemakaninik. 33 Kikii'ishinisha'waawaak awiyak cikakwecimaawaatc Cwaanan (John). Okiihtipaatotaan 'iwe tepwewin. 34 Kaawiin wiin awiya inini nimpakohsenimaahsii citipaacimitc, mii 'iwe ehta wencitipaacimak Cwaan kaakii'ishitashimitc, kiinawaa cipimaaci'ikooyek. 35 Waahsahkonencikan e'minwaahsahkonek kii'inwaanaa 'a Cwaan citinowitc. Kikii'inentaanaawaa noomake cionciminwentamek owaahsesiwin. 36 Nawac itahsh nintayaan kihcitipaacimikoowin ahpiihc a'a Cwaan kaa'inaacimitc. Ini hsa anohkiiwinan kaakii'miishitc a'a ninTete cikiishihtooyaan, miiwan​ono anohkiiwinan noonkom entootamaan kaatipaacimikoyaan tepwe ekiihpi-ishinisha'otc a'a Weyoohsimintc. 37 Wiin a'a Weyoohsimintc kaakiihpi-ishinisha'otc kaye wiin nintipaacimik. Kaawiin wiihkaa kikii'oncinoontansiinaawaa otinwewin, kaye kaawiin kikii'onciwaapamaahsiwaawaa eshinaakositc. 38 Kaye kaawiin kikiih kikishkaakohsiinaawaa otihkitowin, aaniihsh kaawiin kitepwehtawimaahsiwaawaan ini kaakiihpi-ishinisha'waatc. 39 Kinanaantone'ike i'imaa kihcioshipii'ikewinink aaniihsh mii 'imaa nintoonciayaamin pimaatisiwin keishkwaahsehsinok kitinentaam. Mii ohsha 'imaa kihcioshipii'ikewinink kaaishitipaacimikooyaan. 40 Kaawiin itahsh kiwiihpinaasihkawihsiim ciayaayek pimaatisiwin. 41 "Kaawiin wiin 'imaa ininiink nintoonciantone'ansiin kihci-inentaakosiwin. 42 Kikihkenimininim itahsh aaniin entinowiyek, ekaa ehkikishkansiwek Kishemanitoo cisaaki'ek. 43 NinTete otishinihkaasowin ninkiihpikikis, kaawiin itahsh kiwii'otaahpinihsiim. Kiishpin tahsh kotak awiya tipinawe wiiniko otishinihkaasowin pikikisitc, amii wa'a kikaotaahpinaawaa. 44 Kiinawaa kiminwentaanaawaa e'miinitiyek i'i minwakimikoowin, kaawiin itahsh kitoonciantone'ansiinaawaa minwakimikoowin 'awe kaashipeshikotc Kishemanitoo kemiininekipan. Aaniihsh​i'i keshitepwehtawiyek i'iwe kaaishiayaayek? 45 "Keko niin inenimihshihkek cimaci-inaacimohtawak a'a ninTete kiinawaa enaatisiyek. Ayaa hsa peshik e'maashitipaaciminek, amii wa'a Moosihs (Moses) kaa-ahpenimonotawek. 46 Kiishpin tepwe kiitepwehtawaawekopanen a'a Moosihs, keniin kitaakiihtepwehtawim. Niin aaniihsh kaakiihtipaacimitc i'imaa otooshipii'ikewinink. 47 Iniwe tahsh ekaa ehtepwehtansiwek otooshipii'ikewinan, aaniin itahsh niin kekii'ishitepwehtamek nintihkitowin?" okii'inaa' Ciisahs i'i niikaanisiiwi Coowa'.

Cwaan 6

1 Paanimaahsh naake Ciisahs kii'maacaa akaamink i'i Kaalaliiwi Saaka'ikan (Sea of Galilee), mii 'iwe Taaipiiriyahs (Tiberius) Saaka'ikan e'ishinihkaatek. 2 Kiihkihcipaahtiinowa' kaakii'ayoohkwenonitc kaakiihpapaaminisha'okotc, aaniihsh ekii'waapantaminitc omaamahkaacihcikewinan kaakii'ayintootawaatc i'i kaa-aahkosinitc. 3 Ciisahs kii'aamaciwe pihkwatinaank, miihsh i'imaa ekii'wiitapimaatc okihkino'amawaakana' kaakiihpiwiiciiwaatc. 4 Mii aasha kekaa cianiocihcihsenik Coowak kaawii'ishiciihkahkamikisiwaatc ewiihPimaaci'ikoowi​Wiihkwantinaaniwaninik. 5 Ciisahs itahsh e'ayinaapitc okii'waapamaa' ehpipaahtiinonitc ehpinaasihkaakotc. Miitahsh kaa'ishikanoonaatc Pilapoon (Philip): "Aanti keonciataaweyank miicim ciwiihsiniwaatc oko?" okii'inaan. 6 O'owe kaa'onci-ihkitotc ewiihkoci'aatc Pilapoon, aaniihsh wiin okiihkihkentaan aasha waa'ishihciketc. 7 Pilap itahsh okii'nahkwehtawaan: "Mihsawaa niishwaahk (200) waapaapihko​shooniyaanhsak awahshime aana-ataawenk pahkweshikan kaawiin taatepihsehsiiwak pepankii kahkina cikii'wiihsiniwaahpan oko kaapaahtiinowaatc," kii'ihkito. 8 Peshik itahsh kii'oncikiikito kihkino'amawaakan Entaroo (Andrew), Saaiman Piitar (Simon Peter) wiicihkiweyan, ekii'ihkitotc: 9 "Ayaa 'omaa oshkiniiki naanan e'ayaawaatc pahkweshikanihkaanenhsa' parlii (barley) manooninink kaaoncioshihcikaniwinitc, kaye niishin kinooshenhsa'. Aaniin tahsh keshitepihsewaahpan oko kaaonsaamiinowaatc ciahshamintwaapan?" 10 Ciisahs itahsh kii'ihkito: "Kanoonihkook, onapi'ihkook oko kahkina," okii'inaa'. Kii'mashkohsiihkaani tahsh i'imaa. Miihsh kaa'ishionapiwaatc kahkina, naanink mitaahswaahk (5,000) ininiwak ekiihtahshiwaatc kanapac. 11 Ciisahs itahsh okii'otaahpinaa' ono pahkweshikanihkaanenhsa'. Miitahsh kaa'ishinanaahkomotc ekii'nenaawinamawaatc i'i kaanamatapinitc aaniin minihk kaawii'amwaanitc. Miihsh peshikwan miinawaa i'i niishin kinooshenhsa' kaahtootawaatc ekii'nenaawinaatc, minihk kaa-antawenimaanitc. 12 Miihsh i'i kahkina kaahtewiihsiniwaatc, okiihkanoonaa' okihkino'amawaakana': "Maamooshakinamohk ini kaaishkohsekin, miinawaa cimiicinaakaatekin," okii'inaa'. 13 Okii'maamooshakinaanaawaan itahsh. Mitaahshiniishin (12) wiikopiimahkahkoon okii'mooshkinahtoonaawaan kaakii'ishkwamaanitc i'i naanan parlii pahkweshikanihkaanenhsa' iki kaakii'wiihsininitc. 14 Okoweniwak itahsh kaawaapantamowaatc omaamahkaacihcikewinini Ciisahsoon kaakiihtootaminitc, kii'ihkitowak: "Wa'a tepwe Kishemanitoo oTipaacimowininiiman aawiwitok," kii'ihkitowak. 15 Ciisahs tahsh okiihkihkenimaa' ketahto ewii'otaahpinikotc ewiihkakwe kihciokimaahkaaniwi'ikotc aanainentansik. Kii'ishaa tahsh weti papihkwatinaank ekii'awipeshikotc weti. 16 Kii'anionaakohshininik kihkino'amawaakanak kii'naasipiiwak i'imaa saaka'ikaniink. 17 Kiihpoosiwak itahsh i'imaa ciimaanink ekii'aniaashawa'amowaatc i'imaa Kaparniyamiink (Capernaum) inahke. Aaniihsh aasha e'anitipihkaninik kaa mahshi i'imaa okiihpiotihsikohsiiwaan ini Ciisahsoon. 18 Aasha kii'anikihcinootin, ekiinimamaankaashkaak 'i saaka'ikan. 19 Aasha maawiin nihsin komaa niiwin tahsotipa'ikan kaa'anipimishkaawaatc ekii'ashepoyewaatc, okii'waapamaawaan Ciisahsoon ehpimohsenitc i'imaa saaka'ikaniink ehpinaasihkaminitc 'i ciimaan. Miitahsh kiihkihcisekisiwak. 20 Okiihkanoonikowaan itahsh: "Niin ohsha! Keko sekisihkek!" okii'ikowaan. 21 Shemaak kii'inentamook ewiihpoosi'aawaatc. Shemaak itahsh weti kii'mishakaawak i'imaa kaawii'ishaawaatc. 22 Miinawaa e'anikishepaawakaninik weti nahke nahpaac inahkekaam saaka'ikaniink weti Ciisahs kaakiihpionciitc, ekiihpaahtiinowaatc awiyak ekii'ayaawaatc, ekiihkihkentamowaatc ekii'mihcipeshikwaninik ciimaanini ekii'ayaanik i'imaa, shikwahsh okiihkihkenimaawaan Ciisahsoon ekii'anipoosihsinik, ekii'nakata'okonitc itahsh okihkino'amawaakana', iniweniwa' ehta ekii'animaacii'onitc. 23 Kotak itahsh miinawaa kiihpionci​takohshinoomakanoon ciimaanan, weti Taaipiiriyahs (Tiberius) ootenaank e'ishinihkaatek ekii'onta'owaatc iki kaapipimaahshiwaatc. Pehsho 'imaa kii'ishimishakaawak i'imaa ini kaapaahtiinonitc kaakiihtashiamwaanitc ini pahkweshikanan kaakii'ishinanaahkomonitc Ciisahsoon. 24 Ahpii tahsh ikiweniwak kaakiihpaahtiinowaatc kaakii'waapantamowaatc ekaa e'ayaahsinik i'imaa Ciisahsoon kaye okihkino'amawaakanini, miitahsh kewiinawaa kaa'ani-ishipoosiwaatc i'imaa ini ciimaanink, ekii'ani-ishiaashawa'amowaatc weti Kaparniyamiink, ekii'nanaantonawaawaatc Ciisahsoon. 25 Ahpii tahsh kaamihkawaawaatc i'imaa akaamink, miihsh okiihkakwecimaawaan: "Okihkino'amaake, aanahpii 'omaa kaahtakohshinan," okii'inaawaan. 26 Ciisahs okii'nahkwehtawaa': "Nintepwe e'wiintamawinakook: kaawiin kitooncinanaantone'ohsiim ekii'nihsitawentamek nimaamahkaacihcikewinan. O'ohsh kitooncinanaantonawim, ekii'amwek pahkweshikan kaye ekiihtewiihsiniyek. 27 Keko wiin ishianohkiihkek i'iwe miicim kaawii'nihshiwanaatahk cikakwekaahcicihtooyek, i'iwehsh kotak miicim kenehpici onciinik pimaatisiwin keishkwaahsehsinok, mii 'iwe kaahcicihtook. Mii 'owe miicim niin Inini oKosihsan kemiininakook. Niin aaniihsh ninkiihkihkinawaaci'ik a'a Weyoohsimintc Kishemanitoo, ekiihtepakenimihshitc," okii'inaa'. 28 Miitahsh kaa'ihkitonitc: "Wekonen ketootamaank cianohkaatamaank Kishemanitoo eshiantawentank?" okii'ikoo'. 29 Ciisahs tahsh okii'inaa': "Mii 'owe anohkiiwin kaashiantaweniminek Kishemanitoo: tepweyenimimihk ini kaakiihpiicinisha'waatc," okii'inaa'. 30 Miihsh kaa'ikotc: "Wekonehsh maamahkaacihcikewin ketootaman cionciwaapantamaank, cioncitepwehtaakooyan kaye? Aaniin tahsh ketootaman? 31 Koohsinaapaniik iitok mewisha pikwatahkamikaank okii'amwaawaapaniin ini Mena (Manna) kaainimintc pahkweshikanan. Mii aaniihsh o'o kaaishipii'ikaatek kihcioshipii'ikewin: 'Okii'ahshamaa' pahkweshikanan kihcikiishikonk onci ciamwaanitc,' ihkitoomakan," okii'ikoo'. 32 Ciisahs o'owe kii'ihkito: "Tepwemakan o'owe kaaininakook: kwayahk pahkweshikan kaakii'onciitc kihcikiishikonk, kaawiin wiin a'awe pahkweshikan Moosihs (Moses) kaakii'miininek; a'awe tahsh pahkweshikan mayaa kaakii'onciitc kihcikiishikonk, amii 'awe Noohs kaamiininek. 33 Amiiwan​ini Kishemanitoo opahkweshikaniman kaapimiikiwetc, mii 'awe kihcikiishikonk kaapionciitc kaye kaamiinaatc pimaatisiwin i'i ahkiink kaa-ayaanitc," kii'ihkito. 34 O'owehsh okii'ikoo': "Mii 'i pishihshik ishimiishihshinaam wa'a pahkweshikan," kii'ihkitowa'. 35 Ciisahs itahsh 'owe kii'ihkito: "Niin pahkweshikan kaamiikiwetc pimaatisiwin. Awiya tahsh kaapinaasihkawitc, kaawiin wiihkaa tanoonteskatehsii; kaye kaatepweyenimitc kaawiin wiihkaa tanoontayaapaakwehsii. 36 O'owe tahsh kikii'wiintamawininim: kitaanapiwaapamim, shaakooc itahsh kaawiin kiwiihtepweyenimihsiim. 37 Iniweniwa' itahsh kaakii'miishitc a'a Noohs, kahkina ninkapinaasihkaakook. 'Awehsh kaapinaasihkawitc kaawiin wiihkaa ninka-aanawenimaahsii. 38 Aaniihsh kihcikiishikonk ninkiihpioncii, kaawiin niin i'i enentamaan cipi-ishihcikeyaan, otinentamowin tahsh a'a kaakiihpiicinisha'otc citootamaan. 39 Amii o'o otinentamowin a'a kaakiihpi-ishinisha'otc: kahkina ini kaakii'miishitc ekaa awiya ciwani'aahsiwak, miinawaahsh kahkina cikiiwepimaatisi'akwaa ishkwaac kiishikahk. 40 Aaniihsh mii o'owe otinentamowin a'a Noohs, minihk awiya nehsitawinawitc Kishemanitoon e'oKosihsiminitc kaye tiyepweyenimitc, mii 'awe keayaatc pimaatisiwin wiihkaa keishkwaahsehsininik; kaye ninkakiiwepimaatisi'aa ishkwaac kiishikaninik," kii'ihkito. 41 Oko tahsh kaakii'noontawaawaatc okii'oncitashimaawaan i'i ehkitonitc: "Niin a'a pahkweshikan kihcikiishikonk kaaonciitc," ekii'ihkitonitc. 42 O'owe tahsh kaye kii'ihkitowak: "Kaawiin ina mii wa'a Ciisahs, Coosap (Joseph) okosihsan? Kikihkenimaanaanin oteten kaye omaamaan. Aaniihsh noonkom wenci-ihkitotc: 'Kihcikiishikonk ninkiihpioncii'?" kii'itiwak. 43 Ciisahs okii'nahkwehtawaa': "Keko nishkikakanoonitihkek, poonihtook! 44 Kaawiin awiya ninkapinaasihkaakohsii, kiishpin paanimaa ehta Noohsan wiihkopinikotc ninkapinaasihkaakook; shikwahsh mii 'awe ninkakiiwepimaatisi'aa ishkwaac kiishikahk. 45 Mii 'owe kaakii'ishipii'ikenitc Kishemanitoo otipaacimowininiima': 'Kahkina awiya kaatahshiwaatc okakihkino'amaakowaan Kishemanitoon,' ishipii'ikaate. Mii kahkina ninkapinaasihkaakook kaanoontawaawaatc ini Weyoohsimimintc kaye kaakihkino'amaakowaatc. 46 Kaawiin wiin i'i kaaitamaan awiya ekii'waapamaatc ahpii piko Weyoohsimimintc. Niin kaakiihpionciiyaan Kishemanitoonk, niin​itahsh ehta kaakii'waapamak Weyoohsimintc. 47 Tepwemakan o'owe kaaininakook: kaatepweyenimitc otayaan pimaatisiwin wiihkaa keishkwaahsehsinok. 48 Niin pahkweshikan kaamiikiwetc pimaatisiwin. 49 Mihsawaa kikihciaya'aamiwaapaniik aanakii'amwaawaatc Mena (Manna) pahkweshikanan pikwatahkamikaank, kaawiin kiihpisonipohsiiwak. 50 Wa'a tahsh wiin pahkweshikan kihcikiishikonk kaakiihpionciitc, awiya amwaatc kaawiin tanipohsii. 51 Niin ihsa wa'a pahkweshikan pemaatisiishkaaketc kihcikiishikonk kaakiihpionciitc. Piko awenen iko amwaatc pishihshik tapimaatisi. Ono tahsh pahkweshikanan kemiinak, mii 'owe niwiiyaw kemiikiweyaan cipimaatisiwaatc ahkiink kaa-ayaawaatc," kii'ihkito. 52 Okii'nishkimikonaawaan tahsh kaakii'ihkitonitc ekii'oncikiihkaantiwaatc Coowak: "Aaniin itahsh wa'a inini keishikashkihtoohpan cimiininank owiiyaw cimiiciwankipan," kii'itiwak. 53 Ciisahs itahsh o'owe okii'inaa': "Tepwemakan kaaininakook: kiishpin ekaa miicihsiwek owiiyawini a'a Inini oKosihsan kaye minihkwehsiwek omiskwiini, kaawiin kikakikishkaakohsiinaawaa pimaatisiwin. 54 Awenen iko kaamiicitc niwiiyaw kaye kaaminihkwetc nimiskwi, otayaan pimaatisiwin wiihkaa keishkwaahsehsininik. Ninkakiiwepimaatisi'aa tahsh kaye cipimaatisitc ishkwaac kiishikahk. 55 Aaniihsh niwiiyaw amii 'owe tepwe tinowan ciwiihsinink, kaye nimiskwi, mii 'owe tepwe tinowaakamin ciminihkwenk. 56 Piko awiya kaamiicitc niwiiyaw kaye kaaminihkwetc nimiskwi ninkikishkaak, kaye niin tahsh ninkikishkawaa. 57 A'awe kaapimaatisitc Weyoohsimintc kaakiihpi-ishinisha'otc. Mii 'awe kaye niin wencipimaatisiyaan. Miihsh peshikwan iko awiya amotc, mii kewiin i'imaa keoncipimaatisitc niin onci e'miinak pimaatisiwin. 58 Mii hsa wa'a kaatashimak pahkweshikan kihcikiishikonk kaakiihpionciitc. Kaawiin wiin taapishkoo ishinaakosihsii kikihciaya'aamiwaapaniik ini kaakii'amwaawaatc Mena (Manna) pahkweshikanan. Mihsawaa aanakii'amwaawaatc, shaakooc kii'nipowak. Ono tahsh wiin noonkom kaa-amwaatc pahkweshikanan pishihshik tapimaatisi." 59 Amii 'owe kaakii'ayihkitotc a'a Ciisahs mekwaa ehkihkino'amaaketc i'imaa Coowa' otanami'ewikamikoniink, Kaparniyamiink (Capernaum) kaa-ayaanik. 60 Niipiwa' i'imaa okihkino'amawaakana' okii'noontamini o'o, miihsh 'owe kaa'ihkitowaatc: "Onsaam sanakan o'o ihkitowin! Awenen itahsh inaa kepisintankipan?" 61 Ciisahs itahsh ekii'nihsitawentank o'o okihkino'amawaakana' ehtashintaminitc, miihsh o'owe kaa'inaatc: "Kitoonciwii'aanawencikem ina o'o kaa'ihkitoyaan? 62 Aaniin itahsh keinentamek waapamimek Inini oKosihsan ani-ishiompishkaanitc weti kaakii'ishiayaanihpan? 63 Kishemanitoo otAhcaahkwan miiwan​ini kaamiikiwenitc pimaatisiwin. Awiya wiin​iko otishiayaawin, kaawiin kanake kekoon inaapatahsinini. Ono tahsh niin nintihkitowinan kaakii'wiintamawinakook, keonciotihsinek a'a Kishemanitoo otAhcaahkwan, pimaatisiwin kemiininek. 64 Aaninta tahsh kiinawaa kaawiin kitepwehtansiinaawaa," okii'inaa'. Aaniihsh aasha weti ahpane kaa'ahkopimiwiiciiwaatc okiihkihkenimaa' 'awe Ciisahs awenena' i'i kaawiihtepwehtaakohsik. Okiihkihkenimaan kaye awenenan ini kemamishimikotc. 65 Miihsh kaa'ani-ihkitotc: "Mii hsa 'owe kaa'onciwiintamawinakook, kaawiin awiya okakashkihtoohsiin cipinaasihkawitc, kiishpin ehta miinikotc ninTeten okakashkihtoon." 66 Miitahsh i'i ahpii ahpane niipiwa' okihkino'amawaakana' okii'nakanikoo', kaawiin itahsh miinawaa okiihpionciwiiciiwikohsii'. 67 Miitahsh i'i kaa'oncikakwecimaatc i'i kaamitaahshiniishinitc okihkino'amawaakana': "Kiinawaa tahsh wiin, kekiinawaa na kiwii'nakashim?" okii'inaa'. 68 Saaiman Piitar (Simon Peter) okii'nahkwehtawaan: "Tepencikeyan, awenen pahkaan kenaasihkawankitc? Kiin iitok ehta kitayaan ihkitowin kaaonciimakahk pimaatisiwin wiihkaa keishkwaahsehsinok. 69 Nintepweyentaamin kaye kikehcinaa'enimikoo kiin e'aawiyan Kishemanitoo kaakiihpi-ishinisha'waatc kaaKihtentaakositc," okii'inaan. 70 Miitahsh kaa'ihkitotc Ciisahs: "Niin iitok kikii'onenimininim kiinawaa kaamitaahshiniishiyek, peshik itahsh iinsan kaatahshiyek maciaya'aa tinowi," okii'inaa'. 71 Miiwan​ini Cootahsan (Judas) kaakiihtashimaatc kenimamishimikotc. Aanawiin peshik ekiihtinowinitc i'i kaamitaahshiniishinitc okihkino'amawaakana'. Cootahs oteten Saaiman Iskeriyat (Simon Iscariot) kii'ishinihkaasowan.

Cwaan 7

1 Kaaishkwaahsek o'o Ciisahs kiihpapaamohse i'imaa Kaalaliink (Galilee). Kaawiin kii'inentansii i'imaa cipapaaishaatc Cootiiyaank (Judea) aaniihsh weti Coowa' oniikaanisiimini okii'ahkamaakoo' ekii'nanaantone'okotc ewii'nihsikotc. 2 Aasha kekaa kii'aniocihcihseni Coowak ewii'ishiwiihkwantiiwahkamikisiwaatc akawaahte'ikanikiwaamink ekii'ayishitaawaatc acina. 3 Okiihkanoonikoo' Ciisahs wiicihkiweya': "'Omaa oncimaacaan, ishaan weti Cootiiyaank, wiinawaa weti kaakiihpiminisha'ohkwaapan ciwaapantamowaatc ini kimaamahkaacihcikewinan kaatootaman," okii'ikoo'. 4 "Awiya misiwe wiihkakwekihkenimintc kaawiin okaatoohsiin ominohcikewinan. Kiishpin aaniihsh ono eshihcikewanen, naakosin misiwe ahkiink ehtootamowanen," okii'ikoo'. 5 Aaniihsh ampooshke kewiinawaa wiicihkiweya' kaawiin okiihtepweyenimikohsii'. 6 Ciisahs itahsh 'owe okii'inaa': "Kaawiin niin mahshi na'ihsehsinoon ci-ishaayaan. Kiinawaa wiin aaniin​iko 'iwe ahpii taishihse," okii'inaa'. 7 "Kaawiin aaniihsh kiinawaa kikashiinkenimikohsiiwaak ahkiink kaaoncitipentaakosiwaatc. Niin itahsh wiin ninshiinkenimikook, aaniihsh nintipaatotamowaan otishihcikewiniwaan e'maci-ishiwepaninikin. 8 Ishaak kiinawaa 'imaa kaashiwiihkwantiiwahkamikisinaaniwank. Kaa mahshi niin ninkaishaahsii 'imaa kaawii'inahkamikisinaaniwank. Kaa mahshi niin ishihsehsinoon ci-ishaayaan," okii'inaa'. 9 Ahpii 'owe kaa'ihkitotc keyaapi 'imaa kii'ayayaa Kaalaliink (Galilee). 10 Ahpiihsh i'i wiicihkiweya' kaa'animaacaanitc ekii'ishaanitc kaawii'ishiwiihkwantiiwahkamikisinaaniwaninik, kewiin tahsh kii'ishaa, kiimoociko, kaawiin wiin mohsheya'ii, cikihkenimikohsik awiya' aweneniwitc. 11 Weti tahsh kaashiwiihkwantiiwahkamikaninik okii'nanaantonikoo' i'i Coowa' oniikaanisiimini, 'iwe ekii'ihkitonitc: "Aanti eyaatc?" 12 Niipiwa' i'imaa kiihkiimooci​kanoonitiwak iki piiyaahtenowaatc wiin onci: "Kwayahk ininiiwi," kii'ihkitowak aaninta. Kotak itahsh: "Kaawiin," kii'ihkitowak, "owayeshimaa' ini pemaatisinitc." 13 Kaawiin iko awiya mohshe okiihtashimaahsiwaawaan, aaniihsh okiihkohsaawaa' oniikaanisiiwi Coowa'. 14 Ahpii kekaa aapihta e'ani-ishihsek kaashiwiihkwantiiwahkamikaninik, kii'ishaa Ciisahs i'imaa Kihcianami'ewikamikonk, amiihsh i'imaa kii'maaciikihkino'amaake. 15 Oniikanisiiwi Coowak itahsh kii'maamahkaatentamook: "Aaniin itahsh wencikihkentaahsotc wa'a inini, wiihkaa e'oncikihkino'amawaahsiwintc," kii'ihkitowak. 16 Ciisahs okii'nahkwehtawaa': "Kaawiin niin ninkihkino'amaakewin, a'awe hsa kaakiihpiicinisha'otc, mii'awe okihkino'amaakewin," okii'inaa'. 17 "Kiishpin awiya wiihtootank kaainahtenik otinentamowinini Kishemanitoon, okakihkentaan kiishpin Kishemanitoonk wenciimakanokwen ninkihkino'amaakewin, kemaa niin piko wenciimakanokwen ninkiikitowin. 18 A'awe wiin​iko i'imaa kaaoncikiikitotc, wiin​iko onantonaan okihci-inentaakosiwin. A'ahsh wiin kaa-anohkiitc cioncikihci-inentaakosinitc ini kaakiihpi-ishinisha'okotc, mii wa'a wiinke misiwe kaakwayahkotepwetc inini. Kaawiin tahsh kekoon wayeshinkewin otayaahsiin kaaishihciketc," okii'inaa'. 19 "Moosihs (Moses) iitok kikii'miinikowaa 'iwe Onahshowewin. Kaawiin tahsh awiya kaatahshiyek otipitootansiin 'iwe Onahshowewin. Wekonen tahsh waaoncinihshiyek?" okii'inaa'. 20 Okii'nahkwehtaakoo' itahsh i'i kaapaahtiinonitc: "Kehcinaac iitok maciahcaahk kitayaawaatok! Awenen waahkakwenihsihk?" okii'ikoo'. 21 Ciisahs itahsh okii'nahkwehtawaa': "Peshik kihcianohkiiwin ninkii'ishihcike e'Anwepiiwi​kiishikahk, kahkina tahsh kikii'maamahkaatentaanaawaa. 22 Moosihs (Moses) kikii'inaahkonikowaa cikihkinawaatashakeshontiyek. Kaawiin wiin mayaa Moosihs otInaahkonikewinink kii'onciimakahsinoon, ikiweniwak koohsiwaapaniik, mii weti kaa'oncimaacihsek. Mooshak kikihkinawaatashakeshwaawaak kwiiwisenhsak aanawiin e'Anwepiiwi​kiishikaninik. 23 Kiishpin awiya kwiiwisenhs ishihcike'intc e'Anwepiiwi​kiishikaninik ekaa cipoonihcikaatehsininik Moosihs otInaahkonikewin, wekonen itahsh wencinishkenimiyek misiwe ekii'minoayaa'ak a'a inini e'Anwepiiwi​kiishikaninik?" okii'inaa'. 24 "Keko wiin ehta wakicaya'ii eshiwaapantamek ishionahshowaashiwehkek, i'iwe eshikwayahkwahk ishionahshowaashiwek," okii'inaa'. 25 Mekwaa aaninta kii'ihkitowak i'imaa Ceroosalamink kaa-ayaawaatc: "Kaawiin ina miiwan ono kaawiihkakwenihsaawaatc kiniikaanisiiminaanik? 26 Nashke pisaaniko mohshe piko kiikito! Kaawiin awiya' kekoon otikohsii'. Koonike mii 'i ehkihkenimaawaatc oniikaanisiik miiwan ono Kishemanitoo kaakii'onaapamaatc cipimaaci'iwenitc e'aawinitc? 27 Ahpii tahsh takohshink a'a kaakii'Onaapamintc, kaawiin awiya okakihkenimaahsiin aanti wenciitc. Kahkina tahsh kiinawint kikihkenimaanaan a'a inini wenciitc," kii'itiwak. 28 Mekwaa tahsh ehkihkino'amaaketc Kihcianami'ewikamikonk Ciisahs kiihshaakowe e'ihkitotc: "Tepwe na kikihkenimim? Kikihkentaanaawaa na wenciiyaan? Kaawiin niin tipinawe nintinentamowinink nintooncipiishaahsii. A'awe tahsh kaahpi-ishinisha'otc tepwewiniwi, kaawiin tahsh kiinawaa kikihkenimaahsiwaawaa. 29 Niin itahsh wiin ninkihkenimaa. Wiin kaashiayaatc nimpioncii, ninkiihpi-ishinisha'ok itahsh," kii'ihkito. 30 Miihsh miinawaa okiihkakwe​tahkonaawaan. Kaawiin tahsh awiya okii'otihtinaahsiin. Kaawiin aaniihsh mahshi kwayahk kii'ocihcihsehsinini i'iwe ci-ishiwepisitc. 31 Niipiwa' itahsh iki kaakii'maawaci'itiwaatc okiihtepweyenimaawaan i'iwe e'ihkitowaatc: "Ahpii takohshininitc Kishemanitoo kaakii'onaapamaatc cipimaaci'iwenitc, awahshime na tamaamahkaacihcikewan ahpiihc wiin wa'a inini aasha kaa'ishihciketc?" kii'itiwak. 32 Iki aaninta Perahsiik (Pharisees) okii'noontawaawaa' kaapaahtiinonitc ehkiimoocitashimaanitc ini Ciisahsoon. Miihsh 'i ahpii oko Perahsiik kaye Kihcianami'ewikimaak okii'maaciinisha'waawaa' kanawencikewishimaakanihsha' ciawitahkonaanitc ini Ciisahsoon. 33 Ciisahs itahsh kii'ihkito: "Kaawiin aahpici kinwesh kikawiiciiwihsinooninim, aasha kekaa e'ocihcihsek cimaacaayaan cinaasihkawak a'awe kaakiihpiicinisha'otc. 34 Kikananaantonawim itahsh 'i ahpii, kaawiin tahsh kikamihkawihsiim. Aaniihsh weti niin keshiayaayaan kaawiin kiinawaa kikakashkihtoohsiim cipiishaayek," okii'inaa'. 35 Kiihkakwecintiwak itahsh iki oniikaanisiiwi Coowak: "Tipi waa'ishaakwen, cimihkawaahsiwank itahsh? Koonikehsh weti wii'ishaatok Kariihka' (Greeks) otootenaaminiink kaashisasiihswetataanitc kiwiicitinohkaaniminaani'? Koonike owiihpapaa​kihkino'amawaatokena' i'i Kariihka'? 36 Wekotokwen o'o tino kaaitank: 'Kikananaantonawim, kaawiin itahsh kikamihkawihsiim,' shikwa: 'I'imaa keshiayaayaan kaawiin kiinawaa kikapiishaahsiim,' kaaininank?" kii'itiwak. 37 Ishkwaac itahsh ekii'ishikiishikahk ekii'wiihkwantiiwahkamikisinaaniwank, amii 'iwe maawac kaakihci-inentaakwahk ekii'ishikiishikahk, mii 'i ahpii Ciisahs kii'niipawi ekiihshaakowetc e'ihkitotc: "Kiishpin awiya nwaantaayaapaakwekwen, maano ninkapinaasihkaak, miihsh 'i taminihkwe. 38 Mayaa kaaihkitoomakahk 'iwe kihcioshipii'ikewin: 'A'a hsa kaatepweyenimitc, i'imaa ote'ink taonciciwaniniwan siipiiwan kaapimaatisiishkaakemakaninik nipi,' " kii'ihkito. 39 Kishemanitoon otAhcaahkwan ini kaa'inaatc a'a Ciisahs, miiwan​ini Ahcaahkwan keotaahpinaanitc awenena'​iko ketepweyenimikotc. Kaawiin aaniihsh mahshi kii'oncimiikiwaaniwihsii a'a Ahcaahk, aaniihsh kaa​mahshi Ciisahs kii'ompinaahsii okihci-inentaakosiwinink. 40 Niipiwa' itahsh i'imaa okii'noontawaawaan i'i kaa'ihkitonitc, miihsh i'i ehkitowaatc: "Amii wa'a tepwe kaa-ahshawaapamimintc Kishemanitoo oTipaacimowininiiman!" kii'ihkitowak. 41 Kotak itahsh kii'ihkitowak: "Kehcinaac amii wa'a Kishemanitoo kaakii'onaapamaatc cipimaaci'iwenitc!" Aaninta miinawaa kii'ihkitowak: "Kaawiin ohsha tapionciihsii Kaalaliink (Galilee) a'a kaaOnaapamintc! 42 Kaawiin ina kihcioshipii'ikewin ihkitoomakahsinoon a'a kaakii'Onaapamintc ciontahkaanesitc Tepitink (David), shikwa Pehtalihemiink (Bethlehem) citashinihtaawikitc, mii 'iwe ootenawenhs i'imaa Tepit (David) kaakii'ishiotaawinitc," kii'ihkitowak. 43 Miihsh i'imaa pepahkaan okii'ayinenimaawaan oko kaapaahtiinowaatc, awenen eyaawinikwen. 44 Aanint awiya okiiwiihtahkonaawaan, kaawiin tahsh awiya kekoon okiihtootawaahsiin. 45 Miitahsh Kanawencikewi​shimaakanihshak kaa'ishikiiwe​ naasihkawaawaatc i'i Perahsii' (Pharisees) kaye Kihcianami'ewikimaa' kaakii'ishinisha'okowaakopanen. Miitahsh kaa'ikowaatc: "Wekonehsh wencipiinaahsiwek?" okii'ikowaa'. 46 Iki tahsh shimaakanihshak okii'nahkwehtawaawaa': "Kaawiin wiihkaa inini ishikiikitohsii o'o kaashikiikitotc wa'a inini," kii'ihkitowak. 47 Perahsiik (Pharisees) itahsh okii'nahkwehtawaawaa': "Kekiinawaa na tahsh kiwanihshimikowaa? 48 Wiihkaa na awiya onahshowewinini komaa kaye Perahsiik okiihtepweyenimaawaan? Kaawiin awiya! 49 Oko pemaatisiwaatc kaawiin okihkentansiinaawaa Moosihs (Moses) otInaahkonikewin. Kishemanitoon okii'inakimikowaan cinihshiwanaatisiwaatc!" okii'inaa'. 50 Nihkatiimahs (Nicodemus) kewiin kiihtinowi Perahsiik. Mii wa'a kaakii'naasihkawaatc Ciisahsoon otaanaank 'iweti. Okiihkakwecimaa' itahsh owiicionahshowewininiima': 51 "Kaawiin inahtehsinoon kitInaahkonikewininaan cionahshowaanank awiya, paanimaa ehta ko kiinoontawintc kaye kiikihkenimintc eshihciketc," okii'inaa'. 52 Kii'nahkwehtamook itahsh: "Kekiin ina kitooncii Kaalaliink (Galilee)? Haw kakwemihkan, antone'an kihcioshipii'ikewinink, kikawaapantaan. Kaawiin wiihkaa awiya Kishemanitoo otipaacimowininiiman i'imaa onciihsiiwan Kaalaliink," okii'inaawaan. 53 [Miitahsh kahkina i'imaa entahshiwaatc kaani-ishikakiiwewaatc entaawaatc.

Cwaan 8

1 Ciisahs itahsh kii'ishaa Aalip (Olive) Pihkwatinaank. 2 Wiipa kikishep miinawaa kiihpiishaa Kihcianami'ewikamikonk. Kahkina tahsh i'i pemaatisinitc okiihpinaasihtaakoo'. Amiitahsh kaa'ishionapitc ehkihkino'amawaatc. 3 Iki tahsh kaakihkino'amaakewaatc Inaahkonikewin, Perahsiik (Pharisees) kaye, okiihpi-ishiwitawaawaan ihkwewan ekii'onciotaahpinaawaatc mekwaa pihshikwaatisiwinink e'wiiciiwaanitc ininiwan kaaonaapemihsinik. I'imaahsh naawaya'ii okii'oshikaapawi'aawaan. 4 Miihsh 'iwe kaa'ihkitowaatc: "Okihkino'amaake! Wa'a ihkwe kii'mihtinaa pihshikwaatisiwinink. Kii'mihkawaa mekwaa e'ishihciketc ekii'wiiciiwaatc ininiwan kaaonaapemihsik. 5 Moosihs (Moses) ninkii'inaahkonikonaan wa'a tino cinihsipapiimwahsina'intc. Aaniin itahsh kiin ehkitoyan?" 6 O'owehsh wenci-inaawaatc, ewiihkakwekashki'aawaatc ciwanikiishwenitc, ewii'ontinamowaatc keoncitipaahkonaawaatc Ciisahsoon. Ciisahs itahsh kii'nawakikaapawi, oninc ekii'oshipii'ikaaketc 'imaa mihtahkamik. 7 Keyaapi tahsh ehkakwecimikotc kiihtashokaapawi, mii 'iwe ekii'inaatc: "Awiya kiinawaa ekaa wiihkaa meci-ishihcikehsiikwen maano miiwa'a niikaan okapimwahsina'aan," okii'inaa'. 8 Miinawaa kii'nawakikaapawi ekii'oshipii'iketc mihtahkamik. 9 Iki tahsh ahpii kaanoontawaawaatc kiinioncimaamaacaawak eshipepeshikowaatc, nihtam kaakehteyaatisiwaatc piinihsh ekiihcaakimaacaawaatc. Piinihsh Ciisahs kii'mihcipeshiko, ini kaye ihkwewan i'imaa e'niipawinitc. 10 Ciisahs ehtashokaapawitc okii'inaan ini ihkwewan: "Aanti ahpan iki kaawiihtipaahkonihkwaapan? Kaawiin inahsh awiya nipowinink kikainakimikohsii?" 11 Miihsh kaa'ikotc ini ihkwewan: "Kaawiin awiya." Ciisahs itahsh 'owe kii'ihkito: "Kaawiin tahsh keniin kikainakimihsinoon. Animaacaan," okii'inaan. "Keko miinawaa wiihkaa maci-ishihcikehken."] 12 Ciisahs miinawaa okiihkanoonaa': "Niin kaapiwaahseshkawakwaa ahkiink kaa-ayaawaatc. A'a tahsh kepiminisha'otc kaawiin kashkiitipihkanonk tapimohsehsii," kii'ihkito. "Oka-ayaan waahseyaa tepwe keoncipimaatisinaaniwank," kii'ihkito. 13 Perahsiik (Pharisees) itahsh okii'inaawaan: "Kiin kaatipaacintisoyan, kaawiin taoncikihkencikaatehsinoon ehtepweyan." 14 Ciisahs itahsh o'owe okii'inaa': "Aanawiin niin nintipaacintis, eniwehk itahsh tepwemakan nintipaacimowin. Aaniihsh ninkihkentaan pemionciiyaan miinawaa kaye eshaayaan. Kiinawaa kaawiin kitaawiintansiinaawaa wenciiyaan miinawaa kaye eshaayaan. 15 Ininiiwi inentamowinink itahsh kiinawaa kiwii'oncitipaahkoniwem. Kaawiin niin awiya niwiihtipaahkonaahsii. 16 Kiishpin itahsh niin tipaahkoniweyaampaan, taatepwemakan keshitipaahkoniweyaan, aaniihsh kaawiin nimpeshikohsii. Niwiiciiwik a'awe Weyoohsimak kaakiihpi-ishinisha'otc. 17 Miihsh 'owe eshipii'ikaatek kitOonahshowewiniwaank, 'Tatepwehtawaawak enaacimowaatc niishin ininiwak peshikwan kii-inaacimowaatc.' 18 Niin peshik kaatipaacintisoyaan, miinawaa Weyoohsimintc kaakiihpi-ishinisha'otc kewiin nintipaacimik," kii'ihkito. 19 Okii'ikoo' itahsh o'oweniwa': "Aaniin a'a Weyoohsimatc?" Ciisahs itahsh okii'nahkwehtawaa': "Kaawiin kikihkenimihsiim, kaawiin kaye kikihkenimaahsiwaawaa 'a Weyoohsimak. Kiishpin kiikihkenimiwekopanen, Noohs kaye kitaatako-kiihkihkenimaawaa," okii'inaa'. 20 Miiwan onoweniwan kahkina kaakiihtashikihkino'amaaketc i'imaa e'ayaatc Kihcianami'ewikamikonk. Pehsho na'itaak kii'ayaa 'imaa shooniyaanhsak kaatashipakitinintwaa. Kaawiin mahshi okii'onciotihtinikohsiin awiyan. Kaawiin mahshi kii'ocihcihsehsinini i'i cishiwepisitc. 21 Ciisahs miinawaa okii'inaa': "Nimaacaa, kikananaantonawim. Shikwa kikakikinipom ini kimacihcikewiniwaan. Shikwa weti eshaayaan kaawiin kikakashkihtoohsiinaawaa cipiishaayek." 22 Kii'ihkitowak itahsh niikaanisiiwi Coowak: "Wii'nihsitiso maawiin kaaonci-ihkitotc: 'Weti eshaayaan kaawiin kikakashkihtoohsiinaawaa cipiishaayek.' " 23 Ciisahs itahsh 'owe kii'ihkito: "O'omaa niihsaya'iink kiinawaa kitoonciim," okii'inaa'. "Niin itahsh ishpimink ninkiihpioncii. Kiinawaa tahsh wiin ahkiink kitooncitipentaakosim," okii'inaa'. "Kaawiin niin ahkiink nintooncitipentaakosihsii. 24 Mii 'owe kaaonci-ininakook, kikakikinipom kimacihcikewiniwaan. Kiishpin ekaa tepweyentansiwek niin A'awe mayaa ehTinowiyaan, kikakikinipom kimacihcikewiniwaan." 25 Miihsh i'i kaa'inaawaatc: "Awenen a'a ehtinowiyan?" Ciisahs itahsh o'owe kii'ihkito: "Mii 'awe peshikwan kaakiihpiwiintamawinakook ehtinowiyaan, taapishkoo kaakiihpi-ishimaaciiwiintamawinakook. 26 Niipiwa' kekoon nintayaan ci-ininakook kaye cioncitipaahkoninakook. A'awe kaahpi-ishinisha'otc tepwewiniwi. Mii 'awe kaashinoontawak ehta niwiintamawaak 'omaa ahkiink kaa-ayaawaatc," kii'ihkito. 27 Kaawiin itahsh okii'nihsitohtawaahsiwaawaan ehtipaacimaanitc Weyoohsimimintc, "a'a kaahpi-ishinisha'otc" ehkitotc. 28 Miihsh i'i kaa'onci-ihkitotc: "Paamaa ahpii kiiompaahkonimek Inini oKosihsan, mii 'i ahpii kekihkenimiyek niin A'awe mayaa ehTinowiyaan. Kikakihkenimim itahsh niin enentamaan kekoon e'onci-ishihcikehsiwaan; kaashikihkino'amawitc ohsha ehta Weyoohsimintc, mii 'i ehkitowak. 29 A'a kaakiihpi-ishinisha'otc niwiiciiwik. Kaawiin tahsh nimpeshikohsii, kaawiin wiihkaa ninakanikohsii. Aaniihsh mooshak nintootamowaan i'iwe kaaminwaapantank," okii'inaa'. 30 'Oweni tahsh Ciisahs e'ishikakitotc, niipiwa' awiya' kaakii'noontaakotc okiihtepweyenimikoo'. 31 Okii'inaa' i'i Coowa' kaatepweyenimikotc: "Kiishpin 'iwe anitootamek ninkihkino'amaakewin, mii 'iwe tepwe kikaokihkino'amawaakanimininim. 32 Kikakihkentaanaawaa tahsh i'i tepwewin, tepwewin itahsh kikapakitinikom keyaapi citipenimaakaniwihsiwek," okii'inaa'. 33 O'owehsh okii'nahkwehtaakoo': "Niinawint Eparahaamink (Abraham) nintoontahkaanesimin. Kaawiin wiihkaa awiya ninkiihpakitinaahsiwaanaan citipenimiyamintc. Aaniihsh kiin eshiyaank, 'kikapakitinikoom citipenimaakaniwihsiwek'?" okii'ikoo'. 34 Ciisahs tahsh okii'inaa': "Tepwemakan o'o kaaininakook, awiya e'maci-ishihciketc otipenimikon i'i macihcikewin. 35 Kaawiin awiya anohkii'aakan ahpane tatipentaakosihsii i'imaa owaahkaa'ikaniniink ini kaatipenimikotc. A'awe wiin okosihsimaa pishihshik tatipentaakosi oteten owaahkaa'ikaniniink. 36 Kiishpin itahsh Kishemanitoo oKosihsan pakitininek onci 'iwe kaawiihkakwetipenimikoyek, miitahsh i'i tepwe keishinaakosiyek taapishkoo awiya kaatipenimikohsik awiyan. 37 Kikihkenimininim Eparahaamink e'ontahkaanesiyek. Kikii'nanaantonaanaawaa tahsh ewii'nihshiyek, aaniihsh ninkihkino'ikewinan kaawiin kiwii'otaahpinansiinaawaa. 38 Iniweniwan niiniko kaakii'waapantamowak Noohs ekii'wiiciiwak, mii 'owe tepaatotamaan. Kekiinawaa tahsh koohsiwaa kaakii'ishinoontawek kitishihcikem," okii'inaa'. 39 Okii'nahkwehtaakoo' itahsh: "Eparahaam nintooyoohsimin kaaontahkaanesiyaank." Ciisahs itahsh okii'inaa': "Kiishpin tepwe Eparahaam weyoohsiwekwen, kitaakii'naapitootaam a'a Eparahaam kahkina kaakii'ishihciketc. 40 Noonkom itahsh waa'ishihcikeyek kikakwenihshim, niin kaakii'wiintamawinakook ehta tepwewin kaakii'ishinoontawak Kishemanitoo. Kaawiin wiin Eparahaam okiihtootansiin o'owe kaaishihcikeyek. 41 I'iwehsh kitishihcikem kiinawaa piko koohsiwaa kaatootank," okii'inaa'. O'owehsh kii'ihkitowak: "Kaawiin wiin niinawint i'imaa pikwatooshaaniwiwinink ninkii'oncinihtaawikihsiimin. Peshiko a'awe nOohsinaan, mii 'awe ehta Kishemanitoo," kii'ihkitowak. "Tepwe piko nintookosihsimikonaan." 42 Ciisahs i'iwe okii'inaa': "Kiishpin Kishemanitoo kiioyOohsiyekipan kitaakiihsaaki'im, aaniihsh Kishemanitoonk ninkiihpioncii, miihsh noonkom o'omaa kaaonciayaayaan. Kaawiin niin enentamaan ninkiihpioncipiishaahsii. Wiin ninkiihpi-ishinisha'ok. 43 Wekonen itahsh 'iwe kaaoncinihsitohtansiwek nintipaacimowin? Kaawiin kiwiihpisintansiinaawaa ini nintihkitowinan, mii 'i wencinihsitohtansiwek. 44 Kiinawaa kitooncitipentaakosim a'a koohsiwaa kaaishiayaatc, amii wa'a maciaya'aa. I'iwe kaawiihtootank, miihsh kekiinawaa waahtootamek. Weshkac pishihshik kiihpioncinihtaanihshiweshki. Kaawiin wiihkaa tepwewin okiihpiwiicihtoohsiin, aaniihsh kaawiin kanake kekoon tepwewin okikishkansiin. Ahpii ewiihkiiwanimotc, mii piko ehta ehtootank i'iwe kaainaatisitc. Aaniihsh pishihshik kakiinawishki. Otootetemikon kahkina kiiwanimowin. 45 Niin itahsh kiikiikitoyaan ehtepweyaan, amii 'iwe kaawii'oncitepwehtawihsiwek. 46 Awenen itahsh kaatahshiyek ketipaacimitc 'kikii'macihcike' cikii'ishihpan? Kiishpin tahsh tiyepwewaanen, wekonen tahsh i'i wencitepwehtawihsiwek? 47 Kishemanitoonk kaaonciitc opisintaanan Kishemanitoon otihkitowinini. Kiinawaa tahsh wiin wencipisintansiwek, aaniihsh Kishemanitoonk kaawiin kitooncitipentaakosihsiim," okii'inaa'. 48 Okiihkakwecimaawaan tahsh iki Coowak: "Kaawiin ina kwayahk nintihkitohsiimin ehSameriyaawininiiwiyan (Samaritan) kaye ehkikishkawatc maciahcaahk?" okii'ikoo'. 49 Ciisahs okii'inaa': "Kaawiin, kaawiin nintayaawaahsii maciahcaahk. Ninkihci-inenimaa 'a Noohs; kiinawaa tahsh anoociko kitishim. 50 Kaawiin niin tipinawe ninantone'ansiin ninkihci-inentaakosiwin. Ayaa 'awe entone'ank i'iwe kaakihci-inentaakosiyaan, kaye kwayahk enaahkoniwetc. 51 Tepwemakan 'owe kaawiintamawinakook: kiishpin awiya tootank ini ninkihkino'ikewinan, kaawiin wiihkaa tanipohsii." 52 Miinawaa okii'nahkwehtaakoo' ini Coowa': "Miitahsh i'i ehkihkentamaank e'ayaawatc maciahcaahk," kii'ihkitowa'. " Eparahaam (Abraham) kii'nipo, kaye Kishemanitoo otipaacimowininiima' kii'nipowa'. Kiin tahsh wiin kitihkit: 'Kiishpin awiya kanawentank ninkihkino'ikewinan, kaawiin wiihkaa tanipohsii.' 53 Awahshime nahsh kiin kikihci-inentaakos ahpiihc a'a noohsinaapan Eparahaam kaakii'nipotc, kaye Kishemanitoo otipaacimowininiima' kaakii'niponitc? Awenehsh kiin enenintisoyan?" okii'ikoo'. 54 Ciisahs okii'nahkwehtawaa': "Kiishpin niin kihci-inakintisoyaampaan kaawiin kekoon taainaapatahsinoon ninkihci-inakimikoowin. Noohs itahsh a'a kaakihci-inakimitc, mii 'awe kaainek 'ninKishemanitoominaan'. 55 Kaawiin wiihkaa kitooncikihkenimaahsiwaawaa. Niin tahsh wiin ninkihkenimaa. Kiishpin 'Kaawiin ninkihkenimaahsii' ihkitoyaampaan ninkamihcikiiwanim taapishkoo kiinawaa kaaishihcikeyek. Tepwe tahsh niin ninkihkenimaa kaye ninkanawentamowaanan otihkitowinan. 56 A'a tahsh Eparahaam koohsiwaapan kiihciihkentam piciinak ewii'waapantank ninkiishikaam ahpii ketakohshinowak. Tepwe okii'niikaaniwaapantaan, kii'minwentam itahsh," okii'inaa'. 57 O'owehsh okii'ikoo' Coowa': "Kaawiin iitok mahshi naanimitana kitahsopipoonwehsii. Aanti tahsh inaa kekii'onsaapamatipan Eparahaam?" okii'ikoo'. 58 Ciisahs tahsh kii'ihkito: "Nintepwe e'wiintamawinakook: cipwaa ayaatc Eparahaam, aasha o'o kaaTinowiyaan ninkiihTinow," kii'ihkito. 59 Okii'otaahpinaawaa' itahsh ahsinii' iki Coowak ewiihpapiimwahsina'aawaatc. Ciisahs itahsh kiihtapasii ekii'anioncimaacaatc i'imaa Kihcianami'ewikamikonk onci.

Cwaan 9

1 Ciisahs enipimohsetc okii'waapamaan peshik ininiwan ekaa e'waapihsinik ekii'ishinihtaawikinitc. 2 Okihkino'amawaakana' okiihkakwecimikoo': "Okihkino'amaake (Rabbi), awenen a'a kaa'macitootank, kaakii'onci-ishinihtaawikitc ekaa kiiwaapihsik? Komaa wa'a inini, komaa oniiki'ikoo'?" okii'ikoo'. 3 Ciisahs okii'nahkwehtawaa': "Kaawiin wiin wa'a inini ekii'macitootank kaye i'i oniiki'ikoo'. Mii 'iwe kaaonci-ishiayaatc ciwaapancikaatenik Kishemanitoo omashkawisiiwin aaniin i'i keshiwiici'ikotc. 4 Nantawentaakwan citootamank otanohkiiwin a'a kaapi-ishinisha'otc mekwaa hsa kaakiishikahk. Tapitipihkan ihsa, miitahsh i'i ahpii awiya keanohkiihsik. 5 Minihk keayaayaan o'omaa ahkiink niwaahseshkawaak o'omaa kaa-ayaawaatc ahkiink," okii'inaa'. 6 Ahpii 'o kaa'ihkitotc, kiihsihko 'imaa mihtahkamik, ashishki okii'oncioshihtoon osihkowinink, ekiihshishoonamawaatc oshkiinshikoniink ini ekaa kaawaapihsinik ininiwan. 7 O'owehsh okii'inaan: "Maacaan, awikisiiyiinkwen 'imaa saaka'ikanihkaanenhsink Siloowam (Siloam) kaaishinihkaatek," okii'inaan. Mii 'owe e'inwehtamawaatek ishinihkaasowin, "Maaciinisha'ikan." Amiihsh 'iwe kii'ishaawan 'imaa, ekii'awikisiiyiinkwenitc. Miinawaa tahsh ehpiishaanitc kii'waapiwan. 8 I'i kaawiicitaamaanitc i'i kaye kayahte kaakii'nihtaawaapamikonitc i'imaa ekiihpakohsenimonitc, mii 'owe kiihkakwetwewa': "Kaawiin ina mii wa'a kaakii'namatapitc ehpakohsenimotc?" kii'ihkitowa'. 9 Aanint kii'ihkitowak: "Eha', mii wa'a." Kotak miinawaa kii'ihkitowak: "Kaawiin wiin a'a, mihci-ishinaakosi ohsha." Wiin itahsh kii'ihkito: "Niin ohsha wa'a," kii'ihkito. 10 Miinawaa tahsh kii'ishikakwetwewa': "Aaniin itahsh kaaonciwaapiyan?" okii'ikoo'. 11 Miihsh okii'nahkwehtawaa': "A'a inini Ciisahs kaaishinihkaasotc, ashishki okii'oshihtoon ekiihshishooyaapinitc, amiitahsh ninkii'ik: 'Ishaan 'imaa Siloowam saaka'ikanihkaanenhsink, kisiiyiinkwen,' ninkii'ik. Ninkiihtootam ekii'awikisiiyiinkweyaan, shemaak itahsh ninkii'waap," kii'ihkito. 12 "Aanti tahsh eyaatc?" okii'ikoo'. "Kaawiin ninkihkenimaahsii eyaatc," kii'ihkito. 13 Okii'ishiwinaawaan itahsh ini kaakii'waapihsinik, i'imaa Perahsii' (Pharisees) eshiayaanitc. 14 E'Anwepiiwi​kiishikaninik mii 'i ahpii Ciisahs kaakii'oshihtootc ashishki kaye kaakii'waapi'aatc ini ininiwan. 15 Iki tahsh Perahsiik okiihkakwecimaawaan: "Aaniin itahsh wenciwaapiyan?" okii'inaawaan. Miihsh 'iwe kaa'ihkitotc: "Ninkiihshishooyaapinik ashishki, amii ninkiihkisiiyiinkwe, miihsh iko noonkom eshiwaapiyaan," kii'ihkito. 16 Aaninta tahsh Perahsiik kii'ihkitowak: "A'awe inini kaawiin Kishemanitoonk kii'onciihsii, aaniihsh kaawiin okanawentansiin onahshowewin kaainahtenik aaniin kekii'ishihcikehsikipan e'Anwepiiwi​kiishikaninik." Kotak itahsh kii'ihkitowak: "Aaniin tahsh wa'a inini keishikashkihtoohpan ono tino maamahkaacihcikewinan, kiishpin anoociko e'ishipimaatisitc?" kii'ihkitowak. Miihsh i'i pepahkaan okii'ayinenimaawaan. 17 Miinawaahsh 'owe okii'inaawaan ini kaakii'waapihsinikipan ininiwan: "Aaniin tahsh enenimatc kiin a'a kaakii'waapi'ihk?" O'ohsh kii'ihkito: "Mii 'awe tinowi peshik kaakanootamawaatc Kishemanitoon," kii'ihkito. 18 Oniikaanisiiwi Coowak itahsh kaawiin kiiwiihtepwehtansiiwak kaainaacimimintc ini ekaa kaakii'waapihsinik, ekii'miinintc waapiwin, paanimaa piko kaa'nantomaawaatc oniiki'ikoni ini ininiwan. 19 Okiihkakwecimaawaa': "Tepwe na mii wa'a kikosihsiwaa? Wa'a na kaainek ekaa ekii'waapihsik ekii'ishinihtaawikitc? Aaniin tahsh ekwa' wenciwaapitc?" 20 Oniiki'ikoo' itahsh kii'ishinahkwehtamoo': "Ninkihkentaamin niinawint wa'a ninkosihsinaan, kaye ekii'waapihsik ekii'ishinihtaawikitc. 21 Kaawiin tahsh ninkihkentansiimin wenciwaapitc. Kaawiin ninkihkenimimaahsiwaanaanin awenenan kaakii'minoayaa'ikotc oshkiinshikonk. Aasha kiishaapewi, kakwecimihk! Wiin kikawiintamaakowaa." 22 Amiihsh 'owe kaakii'onci-ihkitonitc oniiki'ikoo', ekiihkohsaawaatc oniikaanisiiwi Coowa', aaniihsh aasha ekii'inaahkonikenitc, kiishpin awiya inaatc Ciisahsoon mii wa'a Kishemanitoo kaaonaapamaatc cipimaaci'iwenitc, taoncisaakiciwepinaa awiya anami'ewikamikonk. 23 Mii 'owe kaa'onci-ihkitonitc oniiki'ikoo' kaakii'waapi'intc: "Aasha kiishaapewi, kakwecimihk!" 24 Miinawaa iki Coowak okii'antomaawaan ini ininiwan kaakii'waapihsinikipan. "Kishemanitoo ahshotamaw citepweyan!" okii'inaawaan. "Ninkihkenimaanaan wa'a inini anoociko e'ishipimaatisitc." 25 O'owe okii'inaa': "Kiishpin anoociko eshipimaatisikwen komaa kaawiin, kaawiin ninkihkenimaahsii. Peshik ehta kekoon ninkihkentaan: kaawiin ninkii'waapihsii, shikwa noonkom niwaap!" kii'ihkito. 26 O'o tahsh okii'ikoo': "Aaniihsh kaahtootawihk? Aaniihsh kaa'ishiminoyayaa'ihk ini kishkiinshikoon?" okii'ikoo'. 27 Okii'nahkwehtawaa' itahsh: "Aasha ohsha kitaanakii'wiintamawininim," okii'inaa'. "Kaawiin tahsh kikiihpisintansiinaawaa. Wekonehsh waa'oncinoontamek miinawaa? Kekiinawaa na kinantawentaam ciokihkino'amawaakaniminek?" 28 Okiihkihcinooci'aawaan itahsh: "Kiin peshik okihkino'amawaakanan a'a inini! Niinawint wiin Moosihs (Moses) okihkino'amawaakana'! 29 Ninkihkentaamin Kishemanitoo ekiihkanoonaatc Moosihsoon. Wa'a tahsh inini kaawiin ninkihkentamowaahsiimin aanti kaahtashinihtaawikitc ootenaank," kii'ihkitowak. 30 A'a tahsh inini okii'nahkwehtawaa': "Maamahkaac tepwe 'owe, ekaa ehkihkenimaahsiwek aanti wenciitc, eniwehk itahsh ekii'waapi'itc! 31 Kikihkentaamin Kishemanitoo ehpisintawaahsik awiyan anoociko kaaishipimaatisinitc. Kiishpin tahsh awiya kaakihci-inenimaatc Kishemanitoon, tootank itahsh kaye otinentamowinini, mii 'awe pesintaakotc Kishemanitoon. 32 Ahpan kaapionciahkiiwank kaawiin wiihkaa kii'onciahkonoontaakwahsinoon awiya ciwaapi'aatc awiyan ekii'ishinihtaawikinitc e'waapihsinik. 33 Kiishpin wa'a inini Kishemanitoonk onciihsikipan, kaawiin kekoon otaakiihkashkihtoohsiin citootank." 34 Okii'nahkwehtaakoo' itahsh: "Wawiinke anoociko kikiihpi-ishipimaatis ahpane kaakii'nihtaawikiyan! Kiwiihkakwekihkino'amawinaam inahsh!" Miitahsh kaa'ishisaakiciwepinaawaatc anami'ewikamikonk onci. 35 Ahpii tahsh Ciisahs kaa'noontank ekiihsaakiciwepinimintc, okii'awimihkawaan, ekii'inaatc: "Kitepweyenimaa na Inini oKosihsan kaainintc?" okii'inaan. 36 O'o tahsh okii'ikoon: "Awenen a'a? Wiintamawihshin, keniin citepweyenimak." 37 Ciisahs o'owe okii'inaan: "Kikii'waapamaa, mii wa'a kaakakanoonihk." 38 O'o kii'ihkitowan: "Tepencikeyan! Nintepweyentam!" Amiihsh i'i kaashiociciinkwanapiihtaakotc. 39 Ciisahs kii'ihkito: "Mii 'owe kaakii'oncipiishaayaan o'omaa ahkiink, oko pemaatisiwaatc cinaakwaninikin omacitootamowiniwaan; miitahsh ikiweniwak kaawaapihsikwaa ciwaapiwaatc, iki tahsh kaawaapiwaatc ciwaapihsikwaa," kii'ihkito. 40 Aanint iki Perahsiik (Pharisees) i'imaa kaawiicikaapawihtawaawaatc, ekii'noontamowaatc 'owe ihkitowin, miihsh kaa'ihkitowaatc: "Kaawiin maawiin kitishihsiiminaatok keniinawint e'waapihsiwaank?" kii'ihkitowak. 41 Ciisahs o'owe kii'ihkito: "Kiishpin waapihsiwekipan kaawiin kitaaonci-inakimikoohsiim cikikishkaakoyek macihcikewin. Niwaapimin itahsh e'ihkitoyek, mii'iwe kaaonci-inentaakosiyek keyaapi ehkikishkaakoyek macihcikewin," okii'inaa'.

Cwaan 10

1 Miitahsh kaa'ihkitotc: "Tepwewiniwan 'owe kaawiintamawinakook: awiya ekaa kaapiintikehsik e'ishi-ishkwaantemiwaninik ahsiniiwiwaahkaayaapihkihsicikan maanahcaanihsha' kaashipiinsonitc, pahkaan itahsh kaaoncipaashitaantawetc, mii wa'a kimoocishkiiwinini komaa omahkantwe. 2 A'a tahsh ishkwaantemink kaaoncipiintiketc, mii wa'a okanawimaanahcaanihshiwe. 3 Wiin kaapaahkintenamaakotc ini okanawishkwaantawen, shikwa eshipepeshikonitc e'ishinihkaasonitc otishiantomaa' wiin tipinawe omaanahcaanishima'. Onoontaakoo' itahsh kaainihtaakositc. Miihsh i'i eshisaakisi'aatc. 4 Ahpii tahsh siyaakisi'aatc, aniniikaani-ishaa. Miihsh enipiminisha'okotc omaanahcaanihshima', wiin e'nihsitohtaakotc enihtaakositc a'a kaakanawenimaatc. 5 Pahkaan awiyan kaawiin owiihpiminisha'waahsiwaawaan, tapasiiwak itahsh, aaniihsh opahkaanihtawaawaan enihtaakosinitc," kii'ihkito. 6 Mii 'owe awehcikan Ciisahs kaakii'wiintamawaatc. Kaawiin tahsh okii'nihsitohtaakohsii' wekonen kaakii'wiintamawaatc. 7 Miitahsh 'i miinawaa kaa'ishiwiintamawaatc Ciisahs. "Tepwewiniwan 'owe kaawiintamawinakook: niin 'iwe otishkwaantemiwaa maanahcaanihshak. 8 Kahkina iki kaakiihpiayaawaatc cipwaa ayaayaan, okimoocishkak, omahkantweshkak kiihtinowiwak. Maanahcaanihshak itahsh kaawiin okiihpisintawaahsiwaawaa'. 9 Niin ishkwaantem. Kiishpin niin awiya oncipiintiketc, mii 'awe kepimaatisitc. Tapiintike miinawaa tasaaka'am. Okamihkaan itahsh keontanciketc. 10 A'a tahsh okimootishk, amii ehta 'o wencipiishaatc, ewiihkimootitc, ewii'nihshiwetc, ewiihpinihshiwanaaci'iwetc kaye. Niin itahsh ninkiihpiayaa cionciayaayek pimaatisiwin, cionciwenoociayaayek itahsh kaye. 11 "Niin a'a kaakwayahkokanawenimaatc omaanahcaanihshima'. A'a kwayahk kaakanawimaanahcaanihshiwetc kaawiin inkotano wanihtootc opimaatisiwin cipimaaci'aatc omaanahcaanihshima'. 12 A'a tahsh kaamihcianohkiitc, ekaa kaatinowihsik ciokanawimaanahcaanihshiwewitc, ekaa wiin ehtipinawewisihsik i'i maanahcaanihsha', e'waapamaatc ma'iinkanan ehpiicipahtoonitc, amii eshitapasiitc, amii eshinakacipa'aatc i'i maanahcaanihsha'. Miihsh a'a ma'iinkan eshikaahcitinaatc i'i maanahcaanihsha' e'ompwenisha'waatc. 13 'Awe kaamihtanohkiitc, mii eshimaaciipa'iwetc. Kaawiin weweni onaakatawenimaahsii', aaniihsh mihcianohkii. 14 Niin tahsh kwayahk kaakanawimaanahcaanihshiwetc. Ninkihkenimaak nimaanahcaanihshimak, kaye ninkihkenimikook iki kaa-ayaawakwaa, 15 taapishkoo kaashikihkenimitc a'a ninTete, kaye niin tahsh kaashikihkenimak ninTete. Kaye nintinentam kaawiin inkotano wanihtooyaan nimpimaatisiwin cioncipimaatisiwaatc nimaanahcaanihshimak. 16 Ayaawak itahsh kotak maanahcaanihshak kaatipenimakwaa, o'omaa kaa-ayaahsikwaa waahkaayaapihkihsicikanink kaashikanawenimintwaa maanahcaanihshak. Miiwak okoweniwak kaye ninkapiinaak, ninkapisintaakook enwewak. Maamaw itahsh tamihcipeshikwewaanakisiwak, shikwa tamihcipeshikowan ini kekanawenimikowaatc. 17 "Mii 'owe wencisaaki'itc ninTete, aaniihsh nintinentam ewiihpakitinamaan nimpimaatisiwin, miinawaahsh ewiihkiiwepimaatisiyaan. 18 Kaawiin awiya okakashkihtoohsiin ciotaahpinamawitc nimpimaatisiwin. Niin aaniihsh e'inentamaan iko nimpakitinaan. Nintayaan itahsh kashki'ewisiwin cipakitinamaan, shikwahsh nintayaan kashki'ewisiwin miinawaa cikiiwepimaatisiyaan. Mii 'owe kaakii'ishikanooshitc a'a ninTete citootamaan," kii'ihkito. 19 Mii miinawaa pepahkaan kii'ayinenintiwak iki Coowak, onoweniwan kaakii'ihkitonitc Ciisahsoon. 20 Niipiwa' itahsh kii'ihkitowak: "Okikishkawaan maciahcaahkwan, kiiwashkweyentam!" okii'inaawaan. "Aaniihshwiin wencipisintawek?" kii'ihkitowak. 21 Kotak itahsh kaye kii'ihkitowak: "Kaawiin i'i taainihtaakosihsii awiya maciahcaahkwan kaa-ayaawaatc! Aaniin o'o kekii'ishikashkihtoohpan maciahcaahk ciwaapi'aatc ini kaawaapihsinik?" kii'ihkitowak. 22 Kiihpipoon 'iwe ahpii. Kii'wiihkwantiiwahkamikisinaaniwan itahsh i'imaa Ceroosalamink (Jerusalem), Coowak e'maamihkawinotamowaatc kaakii'onaapihkihsitoowaakopanen i'i Kihcianami'ewikamik Kishemanitoon citipentaminitc. 23 Ciisahs itahsh kiihpimohse 'imaa Swaalaman (Solomon) oTapinawahkicikanink eshiwiintek Kihcianami'ewikamikonk kaakii'ayaanik. 24 Coowak itahsh kiihpiwaahkaakaapawi'itiwak i'imaa eshiayaanitc ehpikakwecimaawaatc: "Aaniin minihk keyaapi kewawaanentami'iyaank? Kwayahk wiintamawihshinaam! Tepwe na kiin a'a kitaaw Kishemanitoon kaakii'onenimikotc cipimaaci'iwetc?" okii'inaawaan. 25 Ciisahs okii'nahkwehtawaa': "Aasha ohsha kikii'wiintamawininim. Kaawiin tahsh kikiiwiihtepwehtawihsiim. Ini anohkiiwinan kaakiihtootamaan ninTete kaakii'ishikanooshitc, amiiwan ono kaatipaacimikoyaan ehtepwewiniwiyaan. 26 Kaawiin tahsh kiwiihtepwehtawihsiim, aaniihsh kaawiin kiinawaa kitinowihsiim nimaanahcaanihshimak. 27 Inashke nimaanahcaanihshimak opisintaanaawaa nintinwewin, kaye ninkihkenimaak, kaye nimpimiwiiciiwikook. 28 Nimiinaak 'iwe wiihkaa keishkwaahsehsininik pimaatisiwin. Kaawiin wiihkaa tanipohsiiwak. Kaawiin awiya otaakashkihtoohsiin cimahkamitc ehkanawenimimak. 29 Shikwa 'awe ninTete kaakii'miishitc nimaanahcaanihshima', mii 'awe awahshime meshkawentaakositc ahpiihc wiin kahkina kekoon, kaye kaawiin awiya okakashkihtoohsiin ciotaahpinamawaatc ninTeten ehkanawenimaanitc. 30 Niin kaye ninTete mii eshipeshikwentaakosiyaank," kii'ihkito. 31 Coowak itahsh miinawaa okii'otaahpinaawaa' ahsinii' ewiihpapiimwahsina'aawaatc ewii'nihsaawaatc. 32 Ciisahs itahsh okii'inaa': "Niipiwa' minoanohkiiwinan kikii'waapamim ekii'ishihcikeyaan, ninTete kaakii'miishitc ini citootamaan. Wekonehsh ono waa'oncipimwahsina'iyek?" okii'inaa'. 33 Miihsh Coowak okii'inaawaan: "Kaawiin wiin minoanohkiiwinan kaawii'oncipimwahsina'ikooyan," okii'inaawaan, "ehpaahpinotawatc ohsha Kishemanitoo wencitootaakooyan. Kiin aaniihsh e'mihci-inininiiwiyan, 'Niin Kishemanitoo' kitihkit," okii'inaawaan. 34 Ciisahs okii'inaa': "Kaawiin ina inahtehsinoon 'imaa kiinawaa kitOonahshowewiniwaank, Kishemanitoo ekii'ihkitotc, 'Kimanitoowim'? 35 Kaawiin ohsha wiihkaa tapoonitepwewiniwansinoon 'iwe Kihcioshipii'ikewin. Ikiweniwak itahsh Kishemanitoon otihkitowinini kaa'otihsikowaatc, 'Kimanitoowim' kii'inaawak. 36 Niin a'a Kaakii'onenimikotc ini Wetetemimintc, kayehsh a'a ekiihpiicinisha'okotc o'omaa ahkiink. Kitishim ina tahsh, 'Kipaahpinotawaa Kishemanitoo', i'iwe ekii'ihkitoyaan, 'Kishemanitoo oKosihsan nintaaw'? 37 Kiishpin ekaa entootansiwaanen otanohkiiwinan ninTete kaashiantawenimitc citootamaan, amii 'iwe ci-ishinaakwahk citepwehtawihsiwek. 38 Kiishpin tahsh tepwe ehtootamowaanen, aanawiin niin ehtepwehtawihsiwek, eniwehk itahsh kitaatepwehtaam ini anohkiiwinan kaatootamaan, miihsh cikehcinaa'entamek tepwe ehkikishkawitc ninTete, kaye niin itahsh ehkikishkawak," kii'ihkito. 39 Miinawaa tahsh keyaapi okiihkakwetahkonikoo'; okiihpaninikoo' itahsh. 40 Ciisahs itahsh miinawaa kii'ishaa weti akaamink Cwaartanawi​siipiink (Jordan), Cwaanan (John) nihtam i'imaa kaakii'ishisiika'antaakenitc. Mii 'iweti kii'ayayaa Ciisahs. 41 Niipiwa' itahsh 'imaa okiihpinaasihkaakoo', o'owehsh ekii'ihkitonitc: "Cwaan kaawiin wiin kii'maamahkaacihcikehsii. Kahkina tahsh kekoon kaakii'ishitipaacimaatc ono ininiwan kiihtepwe!" kii'ihkitowa'. 42 Niipiwa' itahsh i'imaa okii'oncitepweyenimaawaan Ciisahsoon.

Cwaan 11

1 Kii'ayaa peshik inini ekii'aahkositc, Laasarahs (Lazarus) e'ishinihkaasotc. Kii'ishitaa 'imaa Pehtaniink (Bethany), mii​'imaa ootenaanhsink kaye wiinawaa kaa'ishitaawaatc Meri (Mary) ini kaye wiicihkwen Maarhta (Martha). 2 Mii wa'a Meri kepoosisitenaatc Ciisahsoon i'iwe minaakwa'on kaye kekaahsisite'waatc wiinisihsan keaapacihtootc. Miiwan ini kaakii'aahkosinitc Laasarahsan kaakii'otawemaatc. 3 Oko ihkwewak okii'ishinisha'waawaan awiyan ciawiwiintamawaanitc Ciisahsoon, citipaacimaanitc otawemaawaan. "Tepencikeyan, aahkosi kaasaaki'atc," okii'inaawaan. 4 Ahpii tahsh kaa'noontank, mii 'iwe kii'ihkito Ciisahs: "O'owe kaashiaahkositc kahkina 'iwe kii'ishkwaahsenik kaawiin tanipohsii. Cionciwaapancikaatenik itahsh okihci-inentaakosiwin Kishemanitoo 'owe onci-ishiayaa, kayehsh Kishemanitoo oKosihsan cioncikihci-inencikaniwinitc." 5 Ciisahs aaniihsh okiihsaaki'aa' ini Maarhtawan kaye ini wiicihkweni kaye ini Laasarahsan. 6 'Iwehsh ahpii kaakii'noontank e'aahkosinitc, keyaapi niishokon i'imaa kii'ayaa kaakii'ishiayaatc. 7 Miitahsh kekahpii okiihkanoonaa' okihkino'amawaakana': "Haw, miinawaa kiiwenotantaa Cootiiya (Judea)," okii'inaa'. 8 Okihkino'amawaakana' itahsh okii'ikoo': "Okihkino'amaake!" okii'ikoo'. "Mii weti Coowak kii'inentamook ewiihpimwahsina'ihkwaa! Kiwii'ishaa na miinawaa weti?" okii'ikoo'. 9 Ciisahs itahsh okii'nahkwehtawaa': "Kaawiin ina mitaahswahshiniisho tipa'ikaneyaahsinoon ehpeshikokiishikahk? Awiya piko ehpimohsetc ehkiishikaninik kaawiin tapisohshinsii, e'waapantank e'waahseyaanik o'o ahki. 10 Kiishpin tahsh niipaapimohsetc tapisohshin. Aaniihsh kaawiin owiiciiwikohsiin i'i waahseyaa ehtipihkaninik," kii'ihkito. 11 O'owehsh kii'ani-ihkito: "Kiiciinaan Laasarahs nipaa. Niwii'ishaa tahsh, niwii'anta-amaci'aa," kii'ihkito. 12 Okihkino'amawaakana' itahsh kii'ihkitowa': "Kiishpin hsa nipaakwen taminoayaa," okii'ikoo'. 13 Ciisahs itahsh okii'itaan 'iwe ekii'ishkwaapimaatisinitc Laasarahsan, wiinawaa tahsh okii'inihtawaawaan Ciisahsoon ekii'inaanitc e'mihciaahtehshininitc e'nipaanitc. 14 Miitahsh Ciisahs kwayahk okii'wiintamawaa': "Laasarahs kii'nipo," okii'inaa'. 15 "Niminwentam itahsh kiinawaa onci i'imaa ekii'ayaahsiwaan, cioncitepweyentamek. Haw itahsh, antawaapamaataa," okii'inaa'. 16 Twaamahs (Thomas) itahsh, Niishoote kaa'ishiwiinsotc, okiihkanoonaa' owiicikihkino'amawaakana': "Mii ko maano wiiciiwaataa okihkino'amaake, citashiwiicinipoomank," okii'inaa'. 17 Ahpiihsh weti tekwihshink a'a Ciisahs, okii'noontaan aasha niiyokon ahpan ekii'na'inikaniwinitc Laasarahsan (Lazarus). 18 'Iwe tahsh Pehtani (Bethany) kaawiin kii'onciwaahsawansinoon 'imaa Ceroosalamink (Jerusalem). Kaawiin kiihte​niishotipa'ikaneyaahsinoon minihk. 19 Niipiwa' 'imaa Cootiiyaank (Judea) kaaonciiwaatc okiihpioncinaasihkawaawaa' Maarhtawan (Martha) kaye Meriin (Mary) ewiihkakwepisaani'aawaatc ini otawemaani ekii'ishkwaapimaatisinitc. 20 Piciinak iko Maarhta ekii'noontank ehpitakohshininitc Ciisahsoon, shemaak kii'anisaaka'am e'antanakishkawaatc ini Ciisahsoon. A'ahsh Meri keyaapi kii'ayapi 'imaa owaahkaa'ikaniwaank. 21 Maarhta tahsh okiihkanoonaan Ciisahsoon: "Tepencikeyan!" okii'inaan. "Kiishpin o'omaa kiiayaayampan, kaawiin taakii'nipohsii nintawemaa," okii'inaan. 22 "Ninkihkentaan tahsh ampooshke noonkom iko keyaapi, piko kekoon kakwecimatc Kishemanitoo, kikamiinik," okii'inaan. 23 "Takiiwepimaatisi kitawemaa," okii'inaan Ciisahs ini Maarhtawan. 24 Miihsh kaa'ikotc: "Ninkihkentaan miinawaa cikiiwepimaatisitc ishkwaac kiishikaninik," okii'ikoon. 25 Ciisahs itahsh kii'ihkito: "Niin wa'a kaakiiwepimaatisi'akwaa awiyak, niin kemiikiwetc pimaatisiwin. 'Awehsh kaatepweyenimitc, aana nipotc, keyaapi tapimaatisi. 26 Awiya ehpimaatisitc tepweyenimitc, kaawiin wiihkaa tanipohsii. Kitepweyentaan inahsh o'o?" okii'inaan. 27 "Eha'," okii'ikoon. "Nintepweyentaan, Tepencikeyan. Kiin wa'a kitaaw Kishemanitoo kaakii'onenimaatc cipimaaci'iwenitc," okii'ikoon. "Kiin oKosihsan Kishemanitoo kaakiiwiihpi-ayaanitc omaa ahkiink," okii'ikoon Maarhtawan. 28 Ahpii tahsh o'o kaa'ishkwaaihkitotc Maarhta (Martha), kii'anikiiwe ekii'awiantomaatc wiicihkwen Meriin (Mary), kiimooc ekiihkanoonaatc. "Okihkino'amaake takohshin, kiwii'waapamik," okii'inaan. 29 Ahpiihsh kaa'noontaakotc, shemaak kiihpasikwincihsewan ekii'awinaasihkawaanitc Ciisahsoon. 30 Ciisahs itahsh kaa mahshi i'imaa kiihpi-ishaahsii ootenawenhsink. Keyaapi weti kii'ayaa Maarhtawan kaakii'ishinakishkaakotc. 31 Iki tahsh Coowak kaakii'wiitapimaawaatc Meriin owaahkaa'ikaniniink ewiihpisaani'aawaatc itahsh ekiihpasikwincihsenitc e'animaacaanitc, okii'anipiminisha'waawaan. "Ishaatok kaashina'initink e'awimawitc weti," kii'inentamook. 32 Meri ahpii tekwihshink i'imaa e'ayaanitc Ciisahsoon, e'waapamaatc kii'ahpani'o kaashisitekaapawinitc. "Tepencikeyan," okii'inaan, "kiishpin 'omaa ayaayampan, kaawiin taakii'ishkwaapimaatisihsii nintawemaa," okii'inaan. 33 Ciisahs itahsh ekii'waapamaatc e'mawinitc, i'i kaye Coowa' kaakiihpiwiiciiwikonitc e'mawinitc, kii'wiihsakamanci'o. Wiinke kii'mikoshkaatentam otahcaahkonk. 34 "Aanti tahsh kaa'ishina'inek?" okii'inaa'. "Piwaapantan, Tepencikeyan," okii'ikoo'. 35 Ciisahs kii'oncikawaapi. 36 Miihsh 'iwe kii'ihkitowak: "Inashke kaa'ahpiihcisaaki'aatc!" kii'itiwak. 37 Aaninta tahsh kii'ihkitowak: "Mii wa'a inini kaakii'waapi'aatc ini kaawaapihsinik. Koonike tahsh otaakiihkashkihtoon cikiinipohsinikipan kaakii'niponitc?" 38 Ciisahs miinawaa ahpii ekii'mikoshkaatentank piincinaw, kii'ishaa tahsh kaaishina'inimintc. Kii'wiimpahkamikaa 'imaa, ahsin itahsh i'imaa kiihkipapi e'ishkwaantemiwank. 39 Ciisahs itahsh okiihkanoonaa': "Tawihshimihk a'a ahsin!" okii'inaa'. Maarhta (Martha), otawemaani ini kaakii'niponitc, okiihkanoonaan: "Tepencikeyan, aasha maashimaakwanotok, aasha niiyokon ahpan kaakii'ayaatc i'imaa," okii'inaan. 40 Ciisahs kii'ihkito: "Kaawiin ina kikii'inihsinoon, kiishpin tepweyentaman kikawaapamaa Kishemanitoo cinaakohtootc okihci-inentaakosiwin?" okii'inaan. 41 Miitahsh kaa'ishitawihshimaawaatc ahsiniin. Ciisahs itahsh ishpimink ekii'inaapitc kii'ihkito: "NinTete! Kimiikwehciwi'in ehpisintawiyan! 42 Ninkihkentaan mooshak ehpisintawiyan. Oko tahsh kaaniipawiwaatc 'omaa kaaonci-ihkitoyaan, citepweyenimiwaatc kiin ekiihpiicinisha'oyan." 43 Ahpiihsh 'owe kaa'ihkitotc, kiihshaakowe: "Laasarahs! (Lazarus) pisaaka'an!" 44 Miihsh kiihpisaaka'amoon ini kaakii'ishkwaapimaatisinitc, onihkiniink, ositiniink keyaapi e'mincimahpisonitc na'initiiwi titipeyiikinikanan, kaye e'akawaapahpisonitc waapishkiikinooni. Miitahsh Ciisahs kii'ihkito: "Aapiskonihk, pakitinihk!" okii'inaa'. 45 Niipiwa' iki awiyak kaakiihpimawatihsaawaatc Meriin (Mary) okii'waapamaawaan i'i kaakii'ishihcikenitc Ciisahsoon. Kewiinawaa tahsh okiihtepweyenimaawaan. 46 Aaninta tahsh kii'animaacaawak ekii'antawaapamaawaatc i'i Perahsii' (Pharisees) ekii'wiintamawaawaatc kaakii'ishihcikenitc Ciisahsoon. 47 Miihsh kii'maamawi maawaci'itiwak Perahsiik kaye Kihcianami'ewikimaak kaye Kaanihtaaonaahkonikewaatc, ekii'naanaakasowewaatc. "Aaniin ketootamank?" kii'itiwak. "Niipiwa' ohsha anitootam maamahkaacihcikewinan wa'a inini," kii'ihkitowak. 48 "Kiishpin iko ishipakitinamawank, kahkina awiya' okanitepweyenimikoo'! Iki tahsh Oroomink (Rome) kaaoncitipentaakosiwaatc kaaokimaawentaakosiwaatc tapinana'ihcikewak, kikapinihshiwanaacihtamaakonaan kitahkiiminaan kaye kiKihcianami'ewikamikonaan," kii'itiwak. 49 Peshik itahsh a'a, Keyahpahs (Caiaphas) kaa'ishinihkaasotc, Maawac kiihKihcianami'ewikimaawi i'iwe kaakii'ahkiiwank. Mii 'iwe kii'ihkito: "Kaawiin awaac kekoon kikihkentansiinaawaa!" kii'ihkito. 50 "Kaawiin ina kiwaapantansiinaawaa? Nawac i'i taaminoaapatanini meshkwac peshik a'a inini cinipoohtamawaahpan i'i pemaatisinitc, kahkina tahsh wiin kaatahshiyank o'omaa kitahkiiminaanink cinihshiwanaatisihsiwank," kii'ihkito. 51 Kaawiin aaniihsh wiin iko i'imaa kii'oncikiikitohsii i'iwe ekii'ihkitotc. Maawac ekiihKihcianami'ewikimaawitc i'iwe kaakii'ahkiiwank, kii'miinikoowisi Kishemanitoonaank cioncikiikitotc, ekii'onciniikaanitipaacimaatc Ciisahsoon cinipoohtamawaanitc kahkina Coowa' kaatahswewaanakisinitc. 52 Kaawiin itahsh iniweniwa' ehta cinipoohtamawaanitc, kahkina hsa wiin Kishemanitoo oniicaanihsa' misiwe pepahkaan ahkiink kaashiayohswe-otayaawininitc, cimaamawi'aanitc cipeshikwentaakosinitc oniicaanihsa'. 53 Miihsh 'owe onci ahpii ehkiishikaninik, okii'ani-ishioonentaanaawaa oniikaanisiik cinihsaawaatc Ciisahsoon. 54 Miihsh 'owe onci, Ciisahs kaawiin keyaapi 'imaa kiiwiihpapaanaakosihsii i'imaa Cootiiyaank (Judea). Kii'maacaa tahsh, iweti ekii'ishaatc ahkiink eshipehshowaninik pikwatahkamikaank, ekiihtakohshink weti ootenawenhsink Iihpariyam (Ephraim) e'ishinihkaatenik. Miihsh i'imaa kii'ayayaa ekii'wiiciayaamaatc okihkino'amawaakana'. 55 Aasha kekaa kii'aniocihcihseni ewii'ishiciihkahkamikisiwaatc Coowak ewiihPimaaci'ikoowi​Wiihkwantinaaniwank. Niipiwa' itahsh kiihpiayoonciiwak kaashiootenawansininik kaashitataaniwaninik, ekii'ishaawaatc i'imaa Ceroosalamink (Jerusalem), pinamaa ahkawe ewiihpehki'itisowaatc cipwaa wiici'iwewaatc Pimaaci'ikoowi​Wiihkwantiwinink ciminwaapamikowaatc Kishemanitoon. 56 Okii'nanaantawaapamaawaan Ciisahsoon; shikwahsh e'naaniipawiwaatc iko Kihcianami'ewikamikonk kii'ishikanoonitiwak: "Aaniin kiin enentaman? Kaa maawiin tapi-ishaahsii 'omaa wiihkwantiwinink," kii'ihkitowak. 57 Kihcianami'ewikimaak itahsh kaye Perahsiik aasha kii'ishionahshowewak: "Kiishpin awiya kihkentank aanti eyaanitc ini Ciisahsoon, tatipaacimo, ninkapiwiintamaakonaan, ninkatahkonimaanaanin," kii'ihkitowak.

Cwaan 12

1 Keyaapi ninkotwaahsokon cipwaa maatahkamikaninik Pimaaci'ikoowi​Wiihkwantiwin, kii'ishaa Ciisahs i'imaa Pehtaniink (Bethany) i'imaa kaa'ishitaanitc Laasarahsan (Lazarus), miiwan​ini kaakiihkiiwepimaatisi'aatc kaakii'niponitc. 2 'Imaa kii'oshiihtamawaa wiihsiniwin ewii'maamawiwiihsiniwaatc. Miihsh 'imaa Maarhta (Martha) kiihpami'iwe. Laasarahs itahsh amii 'awe peshik kaakii'wiiciwiihsiniimaatc ini Ciisahsoon. 3 A'a tahsh Meri (Mary) okiihpiotaahpinaan peshikokosikwan minaakwa'on, naart (nard) e'ishinihkaatenik, mii ehta ko 'i kaatinowaakamik, aahpici ekii'aahkwakintenik. Okiihsiikinamawaan tahsh ositiniink ini Ciisahsoon. Kayehsh okiihkaahsiisite'waan wiinisihsan ekii'aapacihtootc. Miihsh kiihtepimaakwan misiwe 'imaa waahkaa'ikanink i'i minaakwa'on. 4 Peshik itahsh 'imaa kii'ayaawan Ciisahs okihkino'amawaakanan, Cootahs Iskeriyat (Judas Iscariot), miiwan itahsh ini keishihcikenitc citahkonikaniwitc a'a Ciisahs. Mii 'awe Cootahs kii'oncikiikito: 5 "Wekonen tahsh wenciataawaakaaniwansinok o'o minaakwa'on?" kii'ihkito. "Nihswaahk (300) ohsha minihk taakii'ishihsewak waapaapihko​shooniyaanhsak! Nawac cikiimiinintwaapan iki ketimaakisiwaatc," kii'ihkito. 6 O'owe tahsh kaa'ihkitotc, kaawiin okii'naakatawenimaahsii' i'i ketimaakisinitc, aaniihsh kiihkimootishki, aaniihsh wiin okiihkanawentaan i'i oshooniyaawashiwaa. Wiin iko 'imaa kii'anioncikimooti ini shooniyaan. 7 Ciisahs itahsh kii'ihkito: "Poonimihk! Mii 'iwe citashikanawentank kaa-ayaatc a'a ihkwe onci ahpii kiishikahk na'inikooyaan. 8 Mooshak kiwiiciiwikowaak iki ketimaakisiwaatc. Kaawiin tahsh niin mooshak o'omaa kikawaapamihsiim," kii'ihkito. 9 Niipiwa' itahsh iki Coowak kii'oncinoontamook i'imaa e'ayaanitc Ciisahsoon. Kiihpi-ishaawak itahsh kaawiin ehta piko ini Ciisahsoon ciwaapamaawaatc, tako piko ini Laasarahsan (Lazarus) ewii'waapamaawaatc, kaakiihkiiwepimaatisi'aatc Ciisahs nipowinink onci. 10 Miitahsh 'iwe Kihcianami'ewikimaak ekii'onenimaawaatc Laasarahsan kewiin cinihsaawaatc. 11 Aaniihsh kiihpaahtiinowak iki Coowak ekii'aanawenimaawaatc kihcianami'ewikimaa', miitahsh meshkwac kaa'ishimaaciitepweyenimaawaatc Ciisahsoon. 12 Eniwaapaninik itahsh niipiwa' ekiihpitakohshinowaatc ewii'ishiciihkahkamikisiwaatc Pimaaci'ikoowi​Wiihkwantiwinink, kii'noontamook Ciisahsoon i'imaa e'anitakohshininitc Ceroosalamink (Jerusalem). 13 Okii'otaahpinaanaawaan itahsh ini watihkwanan, a'a paam (palm) tinowaahtikonk ekii'ontinamowaatc, ekii'ani-ishikikimaacaawaatc ootenaank onci, ewii'antanakishkawaawaatc ini Ciisahsoon, ekii'ani-ishishaahshaakowewaatc: "Hosaana! Nanaahkom Kishemanitoo! Kishemanitoon okashawenimikoon 'awe kaapitakohshink kaaTipencikenitc owiinsowininiink, Isriyala' (Israel) keokimaahkantawaatc!" kii'ishishaakowewak. 14 Ciisahs itahsh okii'mihkawaan oshki maashimihtatimoonhsan. Kiihpimitehsapi tahsh. Mii 'iwe kaaishipii'ikaatek kihcioshipii'ikewin: 15 "Keko kekoon kohtankek kiinawaa Saayan (Zion) kaaotootenaamiyek! Waapamihk kiKihciokimaamiwaa ehpitakohshink, ehpimitehsapitc ini oshki maashimihtatimoonhsan." 16 Kaawiin 'iwe ahpii okii'ishinihsitawinansiini okihkino'amawaakana'. Paanimaa kiikiiwepimaatisitc kiiompishkaa'intc otishpentaakosiwinink, ekwa' kii'maamihkawiwa' mii 'owe e'ishipii'ikaatenik ehtipaacimintc, kayehsh ono ekii'ayintootawintc. 17 Okoweniwak kaakii'wiiciiwaawaatc Ciisahsoon ahpii kaakii'antomaanitc Laasarahsan (Lazarus) i'imaa ciipekamikonk cipisaaka'aminitc ekiihkiiwepimaatisi'aanitc nipowinink onci, aasha okiihtipaacimaawaan i'i kaakii'ishihcikenitc. 18 Mii 'owe kaakii'onciantanakishkawaawaatc kaapaahtiinowaatc, ekii'noontamowaatc i'i kaakiihtootaminitc i'iwe ekii'maamahkaacihcikenitc. 19 Miitahsh Perahsiwak kaa'onci-ishikanoonitiwaatc: "Ina! Kaawiin kekoon kikashkihtoohsiimin! Inashke aasha kahkina awiya ahkiink opiminisha'okoo'!" 20 Aaninta tahsh kiihtakoayaawak i'imaa Kariihkak (Greeks) ekiihpiwiiciiwaawaatc i'i kaapitakohshininitc 'imaa Ceroosalamink (Jerusalem) ehpianta-anami'aanitc mekwaa e'wiihkwantiiwahkamikisinaaniwank. 21 Okoweniwak itahsh okii'awikanoonaawaan ini Pilapoon (Philip), miiwan​ono Pehseta (Bethsaida) Kaalaliink (Galilee) i'imaa kaa'onciinitc. "Taka niwii'waapamaanaan a'a Ciisahs," okii'inaawaan. 22 Pilap itahsh okii'awiwiintamawaan Entaroon (Andrew), eshiniishiwaatc itahsh ekii'awiwiintamawaawaatc ini Ciisahsoon. 23 Ciisahs okii'nahkwehtawaa': "Aasha hsa ocihcihse 'i ahpii Inini oKosihsan cimiinimintc otishpentaakosiwinini. 24 Tepwewiniwan 'owe kaawiintamawinakook: peshikomin pahkweshikani-kihtikaanenhs pakitinikaatek, ninkwa'ikaatek ahkiink taapishkoo kaanipotc awiya, niipiwa' tanihtaawikihcikemakan. Kiishpin itahsh ishinipoomakahsinok, tamihcipapeshikoayaa. 25 Shikwa 'awe kaakihciwinamaasotc opimaatisiwin, okawanihtoon. A'a tahsh kaapakitinamaaketc opimaatisiwin 'omaa ahkiink, okaishikanawentaan pishihshik cipimaatisitc. 26 Kiishpin awiya piko inentank cipami'itc, maano cipiminisha'otc. Iweti tahsh keishiayaawak, miihsh weti kaye wiin keayaatc a'a kaapami'itc. Awenen itahsh iko kewiihpami'itc, amiitahsh a'awe kekihci-inentaakosi'ikotc ninTeten." 27 "Noonkom iko nimikoshkaatentam," kii'ihkito. "Aaniin itahsh keihkitoyaan? 'NinTete,' inahsh ninkainaa, 'pimaaci'ihshin ekaa ciotihtansiwaan 'owe kaawii'ishihsek noonkom'? Amiihsh o'owe kaahpioncipiishaayaan cishaaposhkamaan 'owe waa'ishiwepisiyaan. 28 NinTete, maano kihci-inentaakohtoon kiwiinsowin!" kii'ihkito. Miihsh kihcikiishikonk kii'oncinoontaakwan inihtaakosiwin: "Aasha ninkiihkihci-inentaakohtoon, miinawaahsh ninkaishihcike cikihci-inentaakohtooyaan," kii'inwemakan. 29 Iki piyaahtiinowaatc i'imaa kaakii'niipawiwaatc okii'noontaanaawaa 'iwe inihtaakosiwin. Miihsh, "Intiko naa kiihpinehsihkaa," kii'ihkitowak aaninta. Kotak itahsh kaye, " Encalan okiihkanoonikoon," kii'ihkitowak. 30 Ciisahs itahsh okii'inaa': "'Owe inihtaakosiwin kaawiin niin onci ciwiici'ikoyaan kii'ishinoontaakwahsinoon. Kiinawaa ohsha kii'oncikiikito kekoon cikihkentamek. 31 Noonkom o'o ishihse Kishemanitoo ciwiintank keshitipaahkonimintc 'omaa ahkiink kaa-ayaanitc. Amiihsh i'i noonkom cimaaciiyaamohkaanimintc iniweniwan kaaokimaahkantaminitc o'o ahkiini, ciokimaahkantansinik. 32 Niin itahsh ahpii ahkiink onciompinikooyaan, kahkina entahswewaanakisiwaatc pemaatisiwaatc ninkawiihkoshkaa'aak cinaasihkawiwaatc." 33 Mii 'owe kaa'ihkitotc cikihkencikaatek keishinaakwaninik onihsikoowin. 34 Miihsh 'owe kaa'ihkitowaatc iki kaapaahtiinowaatc: "Ninkii'noontaamin kitOonahshowewininaanink ehtipaacimimintc ini Kishemanitoo kaakii'onenimaatc cipimaaci'iwenitc, pishihshik tapimaatisiwan e'ihkitoomakahk. Wekonen tahsh wenci-ihkitoyan, Inini oKosihsan ciompinikaniwinitc? Awenen tahsh a'a Inini oKosihsan?" kii'ihkitowak. 35 Ciisahs itahsh okii'inaa': "Keyaapi acina kiwiiciiwikonaawaa 'i waahseyaa. Ishipimohsek keyaapi eshkwaa-ayaayek i'i waahseyaa, ekaa cinoontetipihkihshinsiwek. 'Awe hsa kashkiitipihkanonk kaapimohsetc, kaawiin onihsitawinansiin aanti eshaatc. 36 Mekwaa tahsh keyaapi e'ayaayek i'i waahseyaa, tepweyentamohk i'i waahseyaa. Miitahsh i'iwe ketinowiyek i'imaa cioncitipentaakosiyek waahseyaank," okii'inaa'. 'Owehsh kaa'ishkwaawiintank Ciisahs, inkoci ko 'imaa kii'ani-ishaa ekiihkaasoohtawaatc cimihkaakohsik. 37 Aanawiin aasha niipiwa' omaamahkaacihcikewinan ekii'ayintootank ehkanawaapamikotc, kaawiin shaakooc okiihtepweyenimikohsii' aanakii'waapamikotc. 38 Mii 'owe cioncitipihsek i'i kaakii'ihkitohpan Aaiseya (Isaiah) Kishemanitoo otipaacimowininiiman: "Tepencikeyan, awenen kaatepwehtank nintipaacimowininaan? Awenenan kaakiih kihkentamoonaatc kaaTipenciketc omashkawisiiwin ciwaapantaminitc?" 39 Mii 'owe ekaa kaakii'oncikashkihtoohsikwaa citepweyentamowaatc, aaniihsh miinawaa pahkaanonk kii'ihkito Aaiseya: 40 "Kishemanitoo okii'ishihcike'aa' ekaa ciwaapihsinik kayehsh okii'mashkawite'e'aa', ekaa ciwaapantansikwaa oshkiinshikowaank, ekaa cioncinihsitohtansikwaa onaakatawentamowiniwaank. Ninkii'ishihcike'aak ciwiihpikwehkiinotawihsikwaa. Nintaakii'minoayaa'aak itahsh ishihcikewaahpan, ihkito Kishemanitoo." 41 Miihsh 'owe kaakii'onci-ihkitotc Aaiseya, 'iwe kaakii'niikaaniwaapantamawaatc Ciisahsoon okihci-inentaakosiwinini, miihsh ini kaakiihtipaacimaatc. 42 Eniwehk itahsh niipiwa' iki kaakii'niikaanakinsowaatc okiihtepweyenimaawaan Ciisahsoon. Perahsii' (Pharisees) itahsh ekiihkohsaawaatc, kaawiin okii'onci mohshe wiintansiinaawaa ekiihtepweyenimaawaatc, ekiihkohtaaciwaatc cioncisaakiciwepinikaniwiwaatc i'imaa anami'ewikamikonk. 43 Awahshime aaniihsh okiihsaakihtoonaawaa e'mihciminwaacimikowaatc ininiwa', ahpiihc itahsh wiin Kishemanitoon cikihtakimikowaahpan. 44 Ciisahs itahsh kiihkishiiwe e'ihkitotc: "A'a kaatepweyenimitc, kaawiin niin ehta nintepweyenimikohsii, ini hsa mayaa kaakiihpi-ishinisha'onitc. 45 Awenen itahsh iko wiyaapamitc owaapamaan kaye ini kaapiicinisha'onitc. 46 Niin nintinow ciwaahseshkawakwaa ahkiink kaa-ayaawaatc. Miitahsh piko awiya kaatepweyenimitc ekaa keyaapi i'imaa tipihkanonk ciayaahsik. 47 Kiishpin awiya noontank nitipaacimowin, ekaa tahsh kanawentansik, kaawiin niin ninkatipaahkonaahsii. Kaawiin nimpioncipiishaahsii cionaahkonakwaa iki ahkiink pemaatisiwaatc, cipimaaci'akwaa tahsh. 48 A'a tahsh kaa-aanawenimitc, ekaa kaye otaahpinansik nintipaacimowin, ayaawan peshik keonaahkonikotc. Onowe nintihkitowinan kaakii'wiintamaan, mii 'oweni ketipaahkonikotc ishkwaac kiishikahk. 49 Kaawiin niin kaainentamaan ninkii'oncikiikitohsii. A'awe hsa wiin ninTete kaakiihpi-ishinisha'otc, wiin ninkiihkihkino'amaak keayihkitoyaan, kayehsh ketashintamaan. 50 Ninkihkentamowaan i'iwe otinahshowewinink e'onciimakaninik pimaatisiwin keishkwaahsehsininik. Mii​hsa​ko mayaa eshikiishweyaan a'a ninTete kaakii'ishitc ciayihkitoyaan."

Cwaan 13

1 Noonkom itahsh miihsh i'i aniwaapank Pimaaci'ikoowi​Wiihkwantiwin ci-ishihsek. Ciisahs itahsh okiihkihkentaan aasha cianiocihcihsenik cioncinakatank o'o ahki ewii'naasihkawaatc ini Weyoohsimimintc. Mooshak okiihpioncisaaki'aa' ini ahkiink kaa-ayaanitc wiin iko kaatipenimaatc. Piinihsh itahsh kahkina ekii'ani-ishkwaahsek okii'aniahpiihcisaaki'aa'. 2 Mekwaa kii'onaakohshiwiihsiniwak Ciisahs kaye okihkino'amawaakana'. A'awe tahsh Cootahs (Judas), Saaiman Iskeriyatan (Simon Iscariot) kaaoyoohsitc, aasha mii wa'a okii'inite'eshkaakoon ini maciaya'aan ekii'ishionentank ewii'ishihcike'aatc citahkonimintc ini Ciisahsoon. 3 Ciisahs itahsh okiihkihkenimaan ini Weyoohsimimintc misiwe ekii'miinikotc cikashki'ewisitc. Kaye okiihkihkentaan weti ekiihpionciitc Kishemanitoonk, miinawaahsh ewiihkiiwenaasihkawaatc Kishemanitoon. 4 Miitahsh kaa'oncipasikwiitc 'imaa kaaishiohpimeyaahkohshink wiihsiniwinaahtikonk. Miihsh ekiihkiihcikoshkank okashkiikiiwin kaa'ishiotaahpinaatc kisiihsipasowikisiinkwaanan ekiihkihcihpiswaaketc. 5 Amiihsh kaa'ishisiikinank nipiini kisiinkwaninaakanink, ekii'maacii​kisiipiikisitenaatc okihkino'amawaakana'. Miitahsh kaa'ishipaankosite'waatc ekii'aapaci'aatc kisiinkwaanan kaakiihkihcihpiswaaketc. 6 Miitahsh piinihsh itahsh okii'aninaasihkawaan Saaiman Piitaroon (Simon Peter) eshisitehshininitc. "Tepencikeyan," okii'ikoon, "kiin ina kiwiihkisiipiikisitenihsh?" okii'ikoon. 7 Ciisahs okii'nahkwehtawaan: "'Owe kaatootawinaan kaawiin noonkom kikihkentansiin. Paanimaa tahsh kikakihkentaan," okii'inaan. 8 "Kaawiin!" okii'ikoon. "Kaawiin wiihkaa kikakisiipiikisitenihsii," okii'ikoon ini Piitaroon. Miitahsh kaa'inaatc: "Kiishpin ekaa kisiipiikinihsinowinaan, kaawiin iinsan awaac kitaawiitoohkawihsii," okii'inaan a'a Ciisahs. 9 Miitahsh kaa'ikotc ini Saaiman Piitaroon: "Tepencikeyan, kaawiin ehta ninsitan kikakisiipiikinansiinan, nininciin kaye, nihtikwaan kaye," okii'ikoon. 10 Ciisahs itahsh okii'inaan: "'Awe aasha kaakiihkisiipiikiitc, kaawiin memwehc miinawaa onantawentansiin cikisiipiikiitc, piko ositan ehta, aasha misiwe ehpehkisitc," okii'inaan. "Kiinawaa hsa kipehkisim," okii'inaan. "Kaatahshiyek peshik kaawiin pehkisihsii," kii'ihkito. 11 Aaniihsh okiihkihkenimaan iniweniwan waa'ishihcike'ikotc citahkonintc. Mii 'iwe wenci-ihkitotc: "Kaatahshiyek peshik kaawiin pehkisihsii." 12 Ahpii kaa'ishkwaakisiipiikisitenaatc kii'anipihcihkonaye. Miihsh 'i miinawaa kiihkiiweonaahkohshin. "Kikihkentaanaawaa na 'o kaa'ayintootawinakook?" okii'inaa'. 13 "Okihkino'amaake kaye Tepencikeyan kitishinihkaashim. Kwayahk ihsa kitihkitom. Mii wa'a aaniihsh entinowiyaan. 14 Noonkom iko niin kikiih kisiipiikisitenininim, niin Tepencikeyan kaye Okihkino'amaake kaaishiyek," kii'ihkito. "Kekiinawaa tahsh kitaaishi kisiipiikisitenitim. 15 Aaniihsh ninkii'ishihcike kekihkinawaapantamek, peshikwan tahsh ciayintootamek taapishkoo 'owe kaahtootawinakook. 16 Nintepwe kaaininakook: a'a anohkii'aakan kaawiin awahshime inentaakosihsii ahpiihc ini otookimaaman. Kaawiin awahshime inentaakosihsii opiitaacimo ahpiihc ini kaapi-ishinisha'okotc. 17 Aasha tahsh ono ekiihpikihkentamek, wawiinke kikashawentaakosim ono tootamek," okii'inaa'. 18 "Kaawiin tahsh kahkina kitinihsinooninim," kii'ihkito. "Ninkihkenimaak iki kaakii'onenimakwaa. Taishiwepan itahsh citipihsek o'o kihcioshipii'ikewin: 'A'a kaawiiciwiihsiniimak e'amwaatc nimpahkweshikaniman, maano ninkii'inenimik ewii'macitootawitc,' ihkitoomakan. 19 Noonkom kiishaac kiwiintamawininim cipwaa ishiwepahk. Ahpii tahsh kii-ishiwepahk kikatepweyenimim niin A'awe mayaa ehTinowiyaan. 20 Tepwemakan o'o kaawiintamawinakook: a'awe wetaahpinaatc awiyan kaapi-ishinisha'omak, niin nintootaahpinik. A'awehsh wetaahpinitc otootaahpinaan ini ninTeten kaakiihpi-ishinisha'onitc." 21 Kaa'ishkwaaihkitotc itahsh o'o Ciisahs kiihkihcimikoshkaatentam. Miitahsh okii'mihcitipaatotaan o'owe e'ihkitotc: "Tepwemakan o'owe kaaininakook: peshik iko 'omaa kaatahshiyek ninkamamishimik citahkonikoowak." 22 Kihkino'amawaakanak itahsh kiihkakanawaapantiwak e'wawaanentamowaatc, awekwenan kaainaatc e'inentamowaatc. 23 Peshik itahsh kihkino'amawaakan, onoweniwan Ciisahs nawac kaakiihsaaki'aatc, pehsho 'imaa okii'wiitaahkohshinoomikoon. 24 Miitahsh Saaiman Piitar (Simon Peter) kaa'ishi-inihkwehtaatc ini kihkino'amawaakanan cikakwecimaanitc Ciisahsoon awenenan kaatashimaanitc. 25 Miitahsh a'a kihkino'amawaakan kaa'ishi-inihtaatc pehsho ohkaahkikaniniink Ciisahsoon, ehkanoonaatc: "Tepencikeyan, awenen a'a ketootawihk?" okii'inaan. 26 Ciisahs itahsh okii'nahkwehtawaan: "Kiikintaanak a'a pahkweshikan 'imaa apoopiink, mii 'awe ninkamiinaa. Mii 'awe ketootawitc." Miihsh okiihpahkwepinaan ini pahkweshikanan. Miihsh kaahkintaanaatc okii'miinaan Cootahsan (Judas), Saaiman Iskeriyat (Simon Iscariot) okosihsan. 27 Ahpii kaa'amwaatc ini pahkweshikanan a'a Cootahs, okiihpiincinaweshkaakoon ini Setanan (Satan). Ciisahs tahsh okii'inaan Cootahsan: "Kaawiihtootaman weyiip ishihciken." 28 I'iweniwa' itahsh kaawiiciwiihsiniimikotc kaawiin awaac peshik awiyan okii'nihsitohtansiini wekonen i'i kaaonci-inaatc. 29 Aaniihsh mii 'oweni kaa'inentamowaatc aaninta: okii'inaatokenan Cootahsan: "Awiataawen keaapacihtooyank e'mekwaawiihkwantiiwahkamikisink." Maakishaa kaye, "Awimiish kekoon kaakitimaakisiwaatc," ekii'inaakwen, kii'inentamook. Aaniihsh okii'inanohkii'aawaan Cootahsan cikanawentaminitc oshooniyaawashiwaa. 30 Kaa'otaahpinaanitc itahsh ahpii ini kaakiihkintaanimintc pahkweshikanan, amiihsh i'i shemaak kaa'ani-ishi​saaka'aminitc. Aasha ehtipihkaninik. 31 Ahpii tahsh kaa'animaacaanitc Cootahsan Ciisahs kii'ihkito: "Mii aasha ciwaapancikaatenik okihci-inentaakosiwin Inini oKosihsan. Kishemanitoo tahsh kaye taonci​waapancikaateni okihci-inentaakosiwin i'iwe kaawii'ishihcikenitc oKosihsan. 32 Kiishpin tahsh Kishemanitoo okihci-inentaakosiwin ishiwaapancikaatenik 'iwe oKosihsan kaatootaminitc, kaye wiin Kishemanitoo tipinawe okanaakohtamawaan okihci-inentaakosiwinini ini oKosihsan. Shemaak itahsh taishihcike. 33 Kiinawaa niniicaanihsak kaashaweniminakook! Acina ehta keyaapi kikawiiciiwininim. Piciinak kikananaantone'ohshim. Miihsh o'owe mayaa kaakii'inakwaa oniikaanisiiwi Coowak: ''Iweti waa'ishaayaan kaawiin kikapiishaahsiim,' ekii'inakwaa, peshikwan o'owe noonkom kekiinawaa eninakook. 34 Oshki-inaahkonikewin itahsh kimiinininim: cisaaki'itiyek. Mayaa kaakii'ishisaaki'inakook, amiitahsh kekiinawaa ci-ishisaaki'itiyek. 35 Miitahsh o'owe kahkina kikaoncikihkenimikowaak niin ninkihkino'amawaakanak ehtinowiyek, ishihcikeyek saaki'itiyek," okii'inaa'. 36 Okii'ikoon itahsh Saaiman Piitaroon (Simon Peter): "Tepencikeyan, aanti eshaayan?" okii'ikoon. Ciisahs okii'nahkwehtawaan: "'Iweti waa'ishaayaan, kaawiin noonkom kikapiminisha'ohsii. Paanimaa tahsh kikapiminisha'," okii'inaan. 37 Miihsh 'iwe kaa'ikotc: "Tepencikeyan, wekonen tahsh ekaa keoncipiminisha'ohsinoowaan noonkom? Ninkapakitinaan nimpimaatisiwin kiin onci," okii'ikoon. 38 Ciisahs itahsh okii'nahkwehtawaan: "Kikapakitinaan ina kipimaatisiwin niin onci? Tepwehtan o'o kaaininaan: naapepaahka'aahkwaan noontaakositc, mii aasha nihswaa (3) kaawiin ninkihkenimaahsii ci-ishiyan," okii'inaan.

Cwaan 14

1 "Keko wiin mikoshkaatentankek. Nashke tepweyenimihk Kishemanitoo. Kaye niin itahsh tepweyenimihshik. 2 NinTete kaashiayaatc paahtiinatinoon ayaawinan. Amii ohsha e'animaacaayaan e'antakwayaancihtooyaan i'imaa keshiayaayek. Kaawiin ohsha kitaaishiwiintamawihsinooninim kiishpin o'owe ishinaakwahsinokipan. 3 Paamaa kiimaacaayaan kiiawikwayaancihtooyaan keshiayaayek, ninkapikiiwe miinawaa cipiotaahpininakook. 'Imaa tahsh niin kaawii'ishiayaayaan, amii 'imaa kaye kiinawaa ciayaayek. 4 Kikihkentaam iitok i'iwe keni-ishaayek keni-ishitakohshinek weti niin kaawii'ishaayaan," okii'inaa'. 5 Twaamahsoon (Thomas) itahsh okii'ikoon: "Tepencikeyan, kaawiin ohsha ninkihkentansiimin kaawii'ishaayan. Aaniinti tahsh keoncikihkentamaank 'imaa keshitakohshinaank?" okii'ikoon. 6 Ciisahs itahsh okii'nahkwehtawaan: "Niin ohsha ishaawin. Niin tepwewin. Niin kaye pimaatisiwin. Niinehta awiya okaoncikashkihtoon ci-ishaatc ini Weyoohsimimintc. 7 Niin aasha ehkihkenimiyek, miitahsh i'imaa keoncikihkenimek a'a ninTete. Noonkom itahsh tepwe kimaaciikihkenimaawaa, aasha tahsh kikii'waapamaawaa." 8 Okii'ikoon itahsh Pilapoon (Philip): "Taka hsa waapanta'ihshinaam 'awe Weyoohsimintc, mii ehta 'i eshiantawentamaank." 9 'Owe tahsh okii'inaan: "Pilap, aasha ohsha mewisha kipionciwiiciiwininim. Keyaapi nahsh kaawiin kikihkenimihsii aweneniwiyaan? Awenen ihsa 'awe kaawaapamitc, owaapamaan Weyoohsimimintc. Aaniihshwiin wenci-ihkitoyan, 'Waapanta'ihshinaam Weyoohsimintc'? 10 Kaawiin ina mahshi kitepwehtansii, maawac pehsho e'wiiciiwak a'a Weyoohsimintc, kaye wiin itahsh pehsho e'wiiciiwitc? Ini ihkitowinan kaakiihpi-ishikanooninakook, kaawiin niin ini nintihkitowinan. A'awe ohsha Weyoohsimintc kaawiiciiwitc, wiin ohsha otootaanan tipinawe otanohkiiwinan. 11 Tepwehtawihshik maawac pehsho e'wiiciiwak a'a Weyoohsimintc, kaye wiin peshikwan e'ishiwiiciiwitc. Kiishpin o'o ishitepwehtansiwek, taka kanake tepwehtamohk ono anohkiiwinan kaatootamowak. 12 Tepwemakan o'o noonkom kaawiintamawinakook: awenen ketepweyenimitc, kewiin okatootaanan ini tino anohkiiwinan niin kaatootamaan. Ampooshke nawac wiin kehci-inentaakwahkin okatootaanan, aaniihsh nintishaa 'iweti Weyoohsimintc kaaishiayaatc. 13 Shikwa wekonen iko keshikakwetweyek niin niwiinsowinink, mii​hsa​ko 'iwe ketootamaan. Shikwa tahsh Weyoohsimintc taoncikihci-inentaako'aa niin Kishemanitoo oKosihsan i'i ehtootamowak. 14 Kiishpin kekoon iko ishikakwecimiyek niwiinsowinink, mii 'iwe ketootamaan." 15 "Kiishpin saaki'iyek, kikakanawentaanaawaa kaaininakook," okii'inaa'. 16 "Niin tahsh ninkakanoonaa 'awe Weyoohsimintc, kikamiinikowaa tahsh kotak kepiwiici'inek, ahpan iko kewiiciiwinek wiihkaa kenakanihsinowek. 17 Mii 'awe Ahcaahk kaawaapanta'iwetc i'i tepwewin eshikihkenimintc Kishemanitoo. Iki tahsh ahkiink kaa-ayaawaatc kaawiin okakashkihtoohsiinaawaa ciotaahpinaawaatc ini Ahcaahkwan, kaawiin aaniihsh owaapamaahsiwaawaan kaye kaawiin okihkenimaahsiwaawaan. Kiinawaa tahsh wiin aasha kikihkenimimaawaan, aaniihsh mooshak iko kiwiiciiwikowaa kaye kikikishkaakowaa. 18 "Ahpii maacaayaan kaawiin cikiiwahshishaaniwiyek inahke kikashinakanihsinooninim. Miinawaa ohsha kikapikiiwenotawininim. 19 Acina piko keyaapi 'omaa ninka-ayaa, miitahsh kaawiin miinawaa wiihkaa ninkawaapamikohsiik iki ahkiink kaa-ayaawaatc. Kikawaapamim itahsh kiinawaa. Niin onci ehpimaatisiyaan, kekiinawaa kikapimaatisim. 20 Paanimaa 'iwe ahpii kiishikahk kikakihkenimim pehsho e'wiiciiwak a'a ninTete, kaye kikakihkenintisom pehsho e'wiiciiwiyek, taapishkoo kaye niin pehsho e'wiiciiwinakook. 21 "'Awe kaaotaahpinank kaaihkitoyaan kaye kaakanawentank ehtootank, amii ohsha 'awe siyaaki'itc. A'a tahsh siyaaki'itc osaaki'ikoon ninTeten, kaye niin itahsh ninkasaaki'aa, ninkakihkentamoonaa e'wiiciiwak," okii'inaa'. 22 Okiihkanoonikoon itahsh peshik ini Cootahsan (Judas). Kaawiin wiin a'a Iskeriyat (Iscariot) kaaishi-ishkwenihkaasonitc. "Tepencikeyan," okii'ikoon, "aaniin tahsh i'i kekii'ishikihkentamooshiyaank e'wiiciiwiyaank, iki tahsh ahkiink kaa-ayaawaatc ciwaapamihsinohkwaa?" okii'ikoon. 23 Ciisahs okii'nahkwehtawaan: "Awiya piko saaki'itc okakanawentaan ninkihkino'ikewinan citootank. NinTeten itahsh okasaaki'ikoon. Ninkapinaasihkawaanaan itahsh a'a kaasaaki'itc, ciwiiciayaamankitc kaye. 24 A'a tahsh ekaa kaasaaki'ihsik kaawiin otootansiin eshikihkino'ikeyaan. Ono tahsh ninkihkino'ikewinan kaashinoontawiyek kaawiin niin ini nintihkitowinan; a'awe hsa ninTete kaakiihpiicinisha'otc, mii 'awe otihkitowinan kaa-aapacihtaawak. 25 "Amii 'owe kaawaawiintamawinakook mekwaa e'wiiciiwinakook. 26 'Awe tahsh Owiici'iwe kahkina kekoon kikakihkino'amaakowaa. Kahkina kaye kekoon kikamaamihkawaasomikowaa kaakii'ishikakanooninakook. Mii 'awe Owiici'iwe, Kishemanitoo otAhcaahkwan, kepi-ishinisha'waatc a'a ninTete, niwiinsowinink kepi-ishinisha'amawinek. 27 "Pisaanentamowin kinakatamawininim. Niin i'i nimpisaanentamowin kaamiininakook. Kaawiin wiin i'i kaashimiininakook kaashipisaani'itiwaatc o'omaa ahkiink. Keko tahsh mikoshkaatentankek, keko kaye sekisihkek. 28 Kikii'noontawim kaakii'ininakook: 'Nimaacaa, miinawaa tahsh kikapikiiwenotawininim,' kikii'inininim. Kiishpin saaki'iyekipan, kitaakii'minwentaam e'ishaayaan a'a Weyoohsimintc. Wiin aaniihsh a'a Weyoohsimintc awahshime kihci-inentaakosi ahpiihc niin. 29 Aasha ohsha noonkom kikii'wiintamawininim cipwaa ocihcihsek, ahpii tahsh iko ocihcihsek, citepwehtamek. 30 Kaawiin aahpici kinwesh keyaapi kikakanoonihsinooninim. Aaniihsh pitakohshin a'a kaaokimaahkantank o'o ahkiini. Kaawiin kekoon otayaahsiin niin i'imaa cioncitipenimitc. 31 Ishinaakwan itahsh ahkiink cikihkentaakwahk ehsaaki'ak a'a Weyoohsimintc. Mii 'iwe wencitootamaan kahkina kekoon kaashikihkino'amawitc a'a Weyoohsimintc. "Hawiyohk, mii 'i ishisaaka'antaa, ishimaacaataa!" kii'ihkito.

Cwaan 15

1 "Niin tepwe a'a kwayahk shoominaahtik. A'ahsh ninTete Kihtikewininiiwi kaakanawenimaatc shoominaahtikoon. 2 Minihk itahsh entahso watihkwaniwiyaan kaashoominiwansinok opahkwacipitoon. Tahsin itahsh kaashoominiwaninik, pankii okiishkishaan, mii ehkiishaacihtootc awahshime ciminoshoominiwaninik. 3 Kekiinawaa aasha kikiihkiishaaci'ikoom ekiihpehki'ikoyek o'owe kaapiwiintamawinakook. 4 Mooshak​iko wiiciiwihshik. Kekiinawaa hsa kikawiiciiwininim. Inashke, kaawiin taanihtaawikihcikemakahsinoon piniskweayaak watihkwan. Mii ehta keoncishoominiwank ahpan​iko 'imaa oncinihtaawikik shoominaahtikonk. Amiihsh i'i peshikwan kekiinawaa kaawiin kekoon kikakashkihtoohsiim, pishihshik ehta wiiciiwiyek kikakashkihtoom. 5 Niin shoominaahtik, kiinawaa tahsh watihkwanan. A'a tahsh pishihshik kaawiiciiwitc, kaye niin e'wiiciiwak, miitahsh a'awe niipiwa' kekoon cikashkihtootc, taapishkoo watihkwan ehshoominiwank. Aaniihsh kaawiin kekoon kikakashkihtoohsiinaawaa ekaa wiiciiwihsiwek. 6 Awiya piko ahpane​ko wiiciiwihsik, mii​'i keishinaakositc taapishkoo watihkwan kaashoominiwansinok kaawepinikaatek e'ani-ishipaahtek itahsh. Ono tahsh tino watihkwanan maamawinikaatewan, macohtewepinikaatewan, miihsh eshicaakitekin. 7 Kiishpin itahsh pishihshik wiiciiwiyek kaye nintihkitowinan wiiciiwikoyek, piko kekoon kaa-antawentamek kikakanoonaawaa Weyoohsimintc, kikamiinikowaa tahsh. 8 Miihsh 'owe keshikihkencikaatenik okihci-inentaakosiwin a'a ninTete, niipiwa' kekoon kashkihtooyek. Amiitahsh 'imaa kikaishi​okihkino'amawaakanimininim. 9 Kaaishisaaki'itc itahsh a'a Weyoohsimintc, mii keniin peshikwan eshisaaki'inakook. Ahpan​iko ayaak ninsaaki'iwewinink. 10 Kiishpin kanawentamek ini kaaihkitoyaan citootamek, ahpan​iko kika-ayaam ninsaaki'iwewinink. Mii kaye niin kaaishikanawentamowak kaaishitc a'a ninTete kaye e'ayaawak osaaki'iwewinink. 11 "Miihsh o'owe kaaonciwaawiintamawinakook, peshikwan kaye niin kaashiciihkentamaan, kaye kiinawaa ciwiiciiwikoyek ciihkentamowin, kaye kiciihkentamowiniwaa misiwe cimooshkineshkaakoyek. 12 Mii 'owe eshianooninakook: ishisaaki'itik taapishkoo kaashisaaki'inakook. 13 Kaawiin aaniihsh awahshime awiya osaaki'iwewinihsii, ahpiihc wiin cipakitinank opimaatisiwin, awiya' kaasaaki'aatc cipimaatisinitc. 14 Kiinawaa hsa kaasaaki'akwaa, kiishpin ishihcikeyek i'iwe kaaishiwiintamawinakook. 15 Kaawiin wiin ekwa' nintanohkii'aakanak kitinihsinooninim. Awiya mihcianohkii'aakaniwitc, kaawiin tepwe okakihkentansiin otinentamowinini ini kaatipenimikotc wekonen i'i waahtootaminitc. Kiinawaa tahsh ekwa' kaasaaki'inakook kitishinihkaanininim. Aaniihsh kahkina kekoon kaakii'noontawak ninTete, kikiihkihkentamoonininim. 16 Inashke hsa, kaawiin kiinawaa niikaan kikii'onaapamihsiim. Niin aaniihsh kikii'onaapamininim, kaye kikii'onahsininim cimaacaayek, niipiwa' ciantakashkihtooyek. 'Iwe tahsh aaniin​iko kekoon keshikashkihtooyek, miitahsh ciayaamakahk pishihshik. Amiitahsh piko kekoon keoncikakwecimek Weyoohsimintc, niin ehpiminisha'oyek, kikamiinikowaa. 17 Amiihsh 'owe eshikanooninakook, cisaaki'itiyek." 18 "Kiishpin ahkiink kaa-ayaawaatc shiinkeniminekwaa, maamihkawik itahsh niin niikaan ekiihshiinkenimiwaatc. 19 Kiishpin kiiwiicitipentaakosiimekwaapan iki ahkiink kaa-ayaawaatc, kitaakiihsaaki'ikowaak. Aaniihsh niwiicitipentaakosiimikonaanik kitaaikowaak. Kaawiin itahsh 'imaa kitooncitipentaakosihsiim ahkiink. Niin itahsh kikii'onaapamininim 'imaa ahkiink cioncitipentaakosihsiwek. Miihsh o'owe wencishiinkeniminekwaa. 20 Maamihkawik itahsh o'o kaakii'ininakook: 'Kaawiin awahshime inentaakosihsii anohkii'aakan ahpiihc otookimaaman, kikii'inininim.' Kiishpin niin ahkiink ekiihpi-ishikakwaataki'iwaatc, mii kekiinawaa peshikwan keni-ishikakwaataki'inekwaa. Kiishpin kaye ehkanawentamowaatc nintihkitowinan, kaye kiinawaa tahsh kikakanawentamaakowaak keihkitoyek. 21 'Owe tahsh kahkina kikaonciayintootaakowaak kaawiihkakwaataki'iwewaatc, niin onci ehtipeniminakook. Aaniihsh kaawiin okihkenimaahsiwaawaan ini kaakiihpiicinisha'onitc. 22 Kiishpin kiipikakanoonaahsiwakwaapan, kaawiin taakii'inentaakosihsiiwak macitootamowin cikikishkamowaatc. Aasha tahsh okii'noontaanaawaa ekiihkakanoonintwaa, kaawiin taaihkitohsiiwak, 'Kaawiin ninkiihkihkentansiimin,' cikii'ihkitowaahpan, 'iwe kaaishihcikewaatc. 23 Awiya kaashiinkenimitc, ninTeten kaye oshiinkenimaan. 24 Ninkiihpimiayishihcike i'iwe ekaa wiihkaa awiya kaa'ishihcikehsik. Kiishpin itahsh i'iwe kaa'ishihcikehsiwaampaan, kaawiin omacihcikek taakii'inentaakosihsiiwak. Aasha tahsh tepwe ninkii'waapamikook onoweniwan e'ishihcikeyaan, nishiinkenimikook itahsh niin, kaye ninTeten oshiinkenimaawaan. 25 Mii piko keishiwepahk, citipihsek 'iwe kaakii'oshipii'ikaatenik otOonahshowewiniwaa e'ihkitoomakahk: 'Anihshaa hsa ko ninkiihshiinkenimikook, kekoon ekii'onciwanitootansiwaan,' ihkitoomakan. 26 "Piciinak tapitakohshin a'awe Owiici'iwe, mii 'awe Ahcaahk kaawaapanta'iwetc i'i tepwewin eshikihkenimimintc Kishemanitoon, kaye Weyoohsimimintc wenciitc. Kikapi-ishinisha'amawininim wa'a Ahcaahk 'imaa Weyoohsimimintc cipionciitc cipiotihsinek. Amiihsh wa'a niin ninkatipaacimik. 27 Kekiinawaa tahsh kikatipaacimim kaaishiwaapamiyek, aaniihsh ahpan​iko kaakiihpi-ishimaatanohkiiyaan kikiihpionciwiiciiwihshim," okii'inaa'.

Cwaan 16

1 "Mii 'owe kaakii'ayininakook ekaa cionciaanawencikehsiwek 'iwe kaashitepweyenimiyek. 2 Aaniihsh kikaoncisaakiciwepinikowaak otanami'ewikamikowaank. Taishiwepan hsa ko, awiya e'nihsinek, 'Nintanohkiihtawaa Kishemanitoo,' tainentam. 3 Amii 'owe keoncitootamowaatc ekaa ehkihkenimaahsikwaa ini Weyoohsimimintc, kaye niin itahsh ehkihkenimihsikwaa. 4 Miitahsh o'owe kaakii'onciwiintamawinakook onoweniwan, ahpii tahsh o'owe ishiwepahk tootawinekwaa, miitahsh i'i cimaamihkawiyek onoweniwan kaakii'ishiwiintamawinakook." "Ahpii kaapimaatanohkiiyaan kaawiin memwehc ono kikii'wiintamawihsinooninim, aaniihsh kikii'wiiciiwininim. 5 Noonkom itahsh niwii'ishaa kaakiihpi-ishinisha'otc. Kaawiin tahsh awaac peshik kiinawaa kikakwecimihsiim: 'Aanti waa'ishaayan?' 6 O'owe tahsh noonkom kaakii'wiintamawinakook, wiinke kimincinawesim. 7 O'owe tahsh wiin wiinke nintepwe kaashiwiintamawinakook: nawac kikaminohse'ikonaawaa maano cimaacaayaan. Aaniihsh kiishpin ekaa maacaahsiwaan kaawiin kikapiotihsikohsiiwaa 'awe Owiici'iwe. Kiishpin tahsh maacaayaan, kikapiicinisha'amawininim. 8 Wiin tahsh ahpii takohshink, mohshe piko okawaapanta'aa' ahkiink kaa-ayaanitc, okakihkentamoonaa' e'waninaminitc wekonen i'i macitootamowin, kaye kwayahk ishihcikewin, kaye eshiayaanik Kishemanitoo otipaahkonikewin. 9 Amii 'imaa wenciwaninamowaatc wekonen i'i macitootamowin, aaniihsh ewiihtepweyenimihsikwaa. 10 Shikwa mii 'imaa keoncikihkentaakwahk e'waninihsitohtamowaatc awenen a'a kwayahk eshihciketc, aaniihsh nintishaa 'awe Weyoohsimintc, kaye kaawiin miinawaa mooshak kikawaapamihsiim. 11 Kaye owaninaanaawaa tipaahkonikewin enentaakwahk, aaniihsh 'awe kaaokimaahkantank o'o ahki aasha kii'onahshowaanaa. 12 Keyaapi niipiwa' kekoon nintayaan ci-ishikanooninakookipan. Kaawiin tahsh wiin iko noonkom kikakii'wiintamawihsinooninim. Onsaam kitaakosikwentamo'ikonaawaa wiintamawinakookipan. 13 Paanimaa tahsh piotihsinek a'a Ahcaahk kaawaapanta'iwetc i'i tepwewin enentaakosinitc Kishemanitoon, kikakihkinowinikowaa cikihkentamek misiwe tepwewin kahkina kaaonciimakahk Kishemanitoonk. Aaniihsh kaawiin wiin​iko tipinawe taoncikiikitohsii: i'iwe hsa ko kenoontank, mii 'iwe ketipaatotank. Kaye kikanitipaatotamaakowaa niikaanaya'iink keni-ishiayaakin. 14 Wiin a'a Ahcaahk okaotaahpinaan i'i niin kaaihkitoyaan, miitahsh i'iwe kekiinawaa kikatipaatotamaakowaa. Miihsh i'i keishikihci-inentaako'itc. 15 Kahkina kekoon Weyoohsimintc kaa-ayaatc, niin nintipentaan. Amii 'owe kaa'onci-ihkitoyaan, a'awe Ahcaahk okaotaahpinaan i'i kaa-ayaayaan kaye kikatipaatotamaakowaa." 16 "Acina piko kiwiiciiwim, miitahsh kaawiin kikawaapamihsiim. Paanimaahsh naakeyihsh miinawaa kikawaapamim," okii'inaa'. 17 Aanint itahsh i'i okihkino'amawaakana' kiihkakwecintiwa': "Wekotokwen o'o wenci-ininank? 'Acina piko kiwiiciiwim, miitahsh kaawiin kikawaapamihsiim,' ihkito, kaye, 'Paanimaahsh naakeyihsh miinawaa kikawaapamim,' e'ihkitotc. Miinawaahsh kaye kitikonaan, 'Nintishaa 'awe Weyoohsimintc, mii 'i kaaonci-ishihsek,' ihkito. 18 Wekotokwen i'i kaaitank: 'Acina piko, naakeyihsh,' e'ihkitotc? Wekotokwen iitok o'o kaaihkitotc? Kaawiin kikihkentansiimin," kii'itiwak. 19 Ciisahs okiihkihkenimaa' ewiihkakwecimikotc, miihsh i'i kaa'inaatc: "O'owe na kaa'ihkitoyaan, 'Acina piko kiwiiciiwim, miitahsh kaawiin kikawaapamihsiim, paanimaa tahsh naakeyihsh miinawaa kikawaapamim,' mii na 'iwe kaakakwecintiyek?" kii'ihkito. 20 "Nintepwe kaawiintamawinakook, kikamawim kaye kikakakwaatakentaam. Ahkiink itahsh kaa-ayaawaatc taciihkentamook. Kiinawaa pinamaa kikamincinaweyentaam. Kikapoonimincinawesim itahsh, kikaniciihkentaam itahsh. 21 Inashke ihkwe ewii'waapamaawahsotc, pinamaa kakwaatakentam e'otihsikotc ciwiihsakaahpinetc. Kaaishkwaanihtaawikinaawahsotc itahsh kaawiin otaamihkawinotansiin kaakii'ahpiihci wiihsakaahpinetc, ehpiihciminwentank ehpinihtaawiki'aatc apinoonciishan 'omaa ahkiink. 22 Inashke peshikwan kekiinawaa mekwaa noonkom kikakwaatakentaam. Miinawaa tahsh kikawaapamininim. Miitahsh wiinke kikaciihkentaam. I'iwehsh kiciihkentamowiniwaa kaawiin awiya kikaotaahpinamaakohsiiwaa. 23 "Mii 'iwe ahpii kiishikahk, kaawiin memwehc kekoon kikakakwecimihsiim ciwiintamawinakook. Nintepwe kaaininakook: piko kekoon kekwecimek a'a Weyoohsimintc, niin ehtipeniminakook ishiantotamaakeyek, kikamiinikowaa. 24 Kaa mahshi noonkom kipionciantotamaakehsiim i'iwe ehtipeniminakook. Antotamaakek, kikamiinikoom, kikamooshkineminwentaam itahsh." 25 "Ninkiihkihkinawaasihtaakos onoweniwan e'waawiintamawinakook. Taishihse tahsh ekaa keyaapi cikihkinawaasihtaakosihsiwaan. Mii 'iwe ahpii kikashiwiintamawininim keshikwayahkonihsitohtawek a'a Weyoohsimintc enentaakositc. 26 Miihsh i'iwe ahpii kiishikahk kwayahk kikaishikanoonaawaa Weyoohsimintc. Kikawaawiinshim ehtipeniminakook e'antotamaakeyek. Kaawiin kitinihsinooninim niin cikanoocikehtamawinakook cimiininek kekoon a'a Weyoohsimintc. 27 A'awe Weyoohsimintc wiin kisaaki'ikowaa. Kiinawaa aaniihsh kikiihsaaki'im kaye ekiihpitepwehtamek i'imaa Kishemanitoonk ekiihpionciiyaan. 28 Tepwe 'imaa ninkiihpioncii Weyoohsimintc, o'omaa ahkiink ekiihpiishaayaan. Noonkom itahsh ninakataan o'o ahki e'ishaayaan 'awe Weyoohsimintc," kii'ihkito. 29 Okii'ikoo' itahsh okihkino'amawaakana': "Oo, ekwa' kipakahkikiishwe! Kaawiin ekwa' kikihkinawaacikiishwehsii. 30 Aasha noonkom kikihkenimikoo kahkina kekoon ehkihkentaman. Kaawiin memwehc awiya cikakwecimihk kekoon cikihkenimatc aaniin enentank. Mii 'owe wencitepwehtaakooyan Kishemanitoonk ekiihpionciiyan." 31 Ciisahs okii'nahkwehtawaa': "Ekwa' inahsh kitepweyenimim? 32 Tapi-ishihse 'i ahpii, aasha hsa aniocihcihse, kahkina kikaohsweyaamo'okoom. Entahsopepeshik i'imaa entahshiyek kikaishaam kaaishitaayek. Miihsh niin o'omaa kepeshikonakashiyek. Kaawiin tahsh tepwe nimpeshikohsii. Aaniihsh Weyoohsimintc mooshak niwiiciiwik. 33 Mii 'owe kikii'ishiwiintamawininim, niin i'imaa ciontinamek pisaanentamowin e'wiiciiwinakook. O'omaa ahkiink kaa-ayaayek kitoontinaam ocaanimentamowin. Haw ampe mashkawentamohk! Aasha niin ninkiihshaakoocihtoon kahkina 'iwe ahkiink kaa-ayaak kashki'ewisiwin," okii'inaa'.

Cwaan 17

1 O'oweniwan kaa'ishkwaa​ihkitotc Ciisahs, miitahsh ishpimink kii'inaapi kihcikiishikonk, owe e'ihkitotc: "NinTete! Aasha tipihse 'iwe tipa'ikan. Noonkom waapanta'iwen eshikihci-inentaakositc kiKosihs, kaye wiinihtam itahsh kiKosihs cikiionciwaapanta'iwetc kiin eshikihci-inentaakosiyan. 2 Aaniihsh niin kiKosihs kikii'miish citipenimakwaa kahkina pemaatisiwaatc, miitahsh kahkina niin cimiinakwaa pimaatisiwin wiihkaa keishkwaahsehsinok, kahkina kaatahshiwaatc kaakii'miishiyan cimiinakwaa. 3 Mii aaniihsh 'owe pimaatisiwin wiihkaa keishkwaahsehsinok, ehkihkenimikooyan kiin piko tepwe kaaKishemanitoowiyan, kaye ehkihkenimintc Ciisahs Christ, kiin kaakiihpiicinisha'watc. 4 O'omaa ahkiink ninkii'waapanta'iwe eshikihci-inentaakosiyan. Aasha ninkiihkiishihtoon i'i anohkiiwin kaakii'miishiyan citootamaan. 5 NinTete! Noonkom miishihshin citashi​kihci-inentaakosiyaan 'imaa kiin eshiayaayan. I'iwe kihci-inentaakosiwin peshikwan ishimiishihshin kaakii'ayaayaan weti kaakii'wiiciyayaaminaan cipwaa pimaaciahkiiwank, taka miinawaa mii 'iwe kiiwemiishihshin! 6 Ninkiihkihkentamoonaak eshiayaayan, cioncikihkenimihkwaa oko ininiwak kaakii'oncimishiiyan 'imaa ahkiink kaa-ayaawaatc. Kiin kikiihtipenimaak. Kikii'miish itahsh, kaye okiihtootaanaawaa 'iwe kaakii'ihkitoyan. 7 Amiitahsh noonkom okihkentaanaawaa kahkina kekoon kaakii'miishiyan kiin e'onciimakahk. 8 I'ihsh tipaacimowin kaakii'miishiyan, ninkii'animiinaak oko ininiwak. Okii'otaahpinaanaawaa tahsh, kaye ninkihkenimikook kehcinaac tepwe 'imaa kiin ekiihpionciiyaan, kaye tepwehtamook ekiihpi-ishinisha'oyan. 9 "Nintanami'ehtamawaak itahsh okoweniwak. Kaawiin wiin o'omaa ahkiink kaaoncitipentaakosiwaatc nintanami'ehtamawaahsiik, ikiweniwak ihsa kaakii'miishiyan. Aaniihsh kiin kitipenimaak. 10 Kaye kahkina kekoon niin kaa-ayaayaan, kiin 'iwe kitipentaan. Kaye kiin kaa-ayaayan, niin nintipentaan. Okoweniwak itahsh kaa-ayaawakwaa, mii 'imaa wencikihkentaakwahk ninkihci-inentaakosiwin. 11 Niin tahsh kaawiin keyaapi ninka-ayaahsii o'omaa ahkiink. Wiinawaa tahsh ahkiink ayaawak, niin itahsh ninkapiishaa eshiayaayan. Kiin Weyoohsimikooyan Maawac Eshpentaakosiyan! I'imaa eshikashki'ewisiimakahk kiwiinsowin, i'iwe kaakii'miishiyan, mii 'imaa ishikanawenim okoweniwak, kewiinawaa cimihcipeshiko​wiiciintiwaatc, taapishkoo kekiinawint kaaishiwiiciintiyank. 12 Mekwaa ekii'wiiciiwakwaa ninkii'oncikanawenimaak imaa eshikashki'ewisiimakahk kiwiinsowin, mii 'owe kiwiinsowin kaakii'miishiyan, ninkii'ishikanawenimaak. Kaawiin awiya wani'aahsii cinihshiwanaatisitc, mii 'awe ehta kaakii'inentaakositc cinihshiwanaatisitc. Mii 'iwe keishitipihsek 'iwe kihcioshipii'ikewin. 13 Noonkom tahsh ninkapiishaa eshiayaayan. Nintipaatotaanan tahsh ono kekoonan o'omaa ahkiink, wiinawaa tahsh cimooshkineshkaakowaatc enikohkwaak 'iwe ninciihkentamowin. 14 Ninkii'miinaak i'i kitipaacimowin. Okiihshiinkenimikowaa' itahsh iniweniwa' o'omaa ahkiink kaa-ayaanitc. Kaawiin aaniihsh oko 'omaa ahkiink oncitipentaakosihsiiwak, taapishkoo kaye niin ekaa kaashitipentaakosihsiwaan ahkiink. 15 Kaawiin wiin kitinihsinoon ci-ishiotaahpinatwaa ciayaahsikwaa ahkiink. Kitishikakwecimin tahsh cikanawenimatwaa, ekaa kekoon citootaakohsikwaa ini maciaya'aan kaaishinihkaasonitc. 16 Kaawiin ihsa 'omaa ahkiink oncitipentaakosihsiiwak, taapishkoo kaye niin kaashitipentaakosihsiwaan 'omaa ahkiink. 17 Kiin itahsh 'imaa kitepwewinink ishiotaahpinamaason okoweniwak, kiin ehta citipenimatwaa. Tepwewin ihsa 'iwe kitihkitowin. 18 Taapishkoo kiin kaakiihpi-ishinisha'oyan 'omaa ahkiink, mii 'i niinihtam keniin ninkii'ishinisha'waak ahkiink. 19 Kaye niin itahsh ninkii'onahsitis citipenimiyan. Wiinawaa hsa ko nintoonci-ishihcike, mii kewiinawaa peshikwan kitepwewinink cioncionahsintwaa misiwe citipenimatwaa. 20 "Kaawiin wiinehtawaa nintanami'ehtamawaahsiik: kahkina hsa ko kaye kenioncitepweyeniminitc otipaacimowiniwaank oko kaatipenimakwaa, amiiwa' ihsa 'i kaa-anami'ehtamawimak. 21 Kikakwecimin kahkina cimihcipeshikowiiciintiwaatc. NinTete! Maano kewiinawaa pehsho kikawii'wiiciiwikonaanik taapishkoo kiin maawac pehsho kaashiwiiciiwiyan, kaye niin kaashipeshikowiiciiwinaan. Miitahsh ikiweniwak ahkiink kaa-ayaawaatc cioncitepweyentamowaatc kiin ekiihpi-ishinisha'oyan. 22 I'iwe kihci-inentaakosiwin kaakii'miishiyan, mii 'iwe peshikwan ninkii'miinaak ciwiiciiwikowaatc, kewiinawaa cimaamawi peshiko wiiciintiwaatc, taapishkoo kekiinawint eshipeshikwentaakosiyank. 23 Miitahsh o'owe keshiayaak i'i peshikwentaakosiwin, niin ehpeshikowiiciiwakwaa, kaye kiin itahsh ehpeshikowiiciiwiyan, piinihsh iko wawiinke cimaamawipeshikwentamowaatc. Miitahsh ahkiink kaa-ayaawaatc cioncikihkentamowaatc kiin ekiihpi-ishinisha'oyan, kaye ehsaaki'atwaa oko kaatepweyenimiwaatc, peshikwan iko keniin kaashisaaki'iyan. 24 "NinTete! Kikii'miish okoweniwak. Ninantawenimaak i'imaa keayaayaan, kewiinawaa 'imaa ciwiiciayaamiwaatc, mii 'imaa ciwaapantamowaatc ninkihci-inentaakosiwin kaakii'miishiyan. Aaniihsh kikiihsaaki' cipwaa oshihcikaatek ahki. 25 Oo ninTete, kwayahk enaatisiyan! Kaawiin kikiihpi​kihkenimikohsiik ahkiink kaatipentaakosiwaatc. Niin wiin kikihkenimin. Okoweniwak itahsh kaye kaatepwehtawiwaatc okihkentaanaawaa kiin ekiihpi-ishinisha'oyan. 26 Ninkiihkihkentamoonaak kiin enentaakosiyan. Keyaapi tahsh ninkanikihkentamoonaak. Miitahsh peshikwan kaakii'ishisaaki'iyan kewiinawaa kotak awiya' cisaaki'aawaatc, kaye niin itahsh pehsho ciwiiciiwakwaa," kii'ihkito.

Cwaan 18

1 Kaa'ishkwaakakitotc, kii'animaacaawak Ciisahs, okihkino'amawaakana', akaamink siipiinhs Kitaran (Kidron) ekii'ishinihkaatenik, ekii'aniaashawishkaawaatc. I'imaa tahsh kii'ayaa kihtikewin ekiihkihtikaanaahtikohkaak. Miihsh i'imaa kii'ani-ishaawak Ciisahs, okihkino'amawaakana'. 2 A'a tahsh Cootahs (Judas) kaaishinihkaasotc, amii wa'a kaakii'ishihcike'aatc Ciisahsoon ciotaahpinimintc, kaye wiin okiihkihkentaan i'i ayaawin, aaniihsh niipiwa'aank i'imaa aasha Ciisahs okii'ishiwiiciiwaa' okihkino'amawaakana'. 3 Amiihsh i'imaa kaa'ishaatc a'a Cootahs kihtikewinink, aasha ekii'miinintc peshikwewaan shimaakanihsha' kaa​Oroom​ininiiwinitc (Roman), ahshic kaye kanawencikewi​shimaakanihsha' tino kaatananohkiinitc Kihcianami'ewikamikonk. Miiwa' o'o kaakii'ishinihsha'okonitc Kihcianami'ewikimaa' kaye Perahsii' (Pharisees). Miiwak itahsh iki kiihtakohshinook ekiihkikihkomaanewaatc kaye waahsahkonencikanan ekiihtahkonamowaatc, kaye aaninta ekii'niimaahkwa'amowaatc ishkoten ekii'waahsahkonencikaakewaatc. 4 Ciisahs itahsh aasha ekiihkihkentank kahkina kekoon waa'ishiotihsikotc, pankii niikaanaya'ii kii'ishaa ekiihkanoonaatc: "Awenen entone'wek?" okii'inaa'. 5 "Ciisahs Naasaritink (Nazareth) kaaonciitc," okii'ikoo'. "Niin ohsha," okii'inaa'. A'a tahsh Cootahs kaakii'ishihcike'aatc Ciisahsoon ciotaahpinimintc, mii 'imaa kewiin kiihtakokaapawi mekwe shimaakanihsh. 6 Ahpii tahsh enaatc Ciisahs, "Niin ohsha," kii'asheshkaawak, mihtahkamik kii'ishipankihshinook. 7 Miinawaa okiihkakwecimaa': "Awenen entone'wek?" okii'inaa'. Miihsh kii'ihkitowa': "Ciisahs Naasaritink kaaonciitc," okii'ikoo'. 8 Ciisahs okii'nahkwehtawaa': "Aasha kiwiintamawininim niin ohsha wa'a. Kiishpin niin entone'oyek, pakitinihkook oko kaawiiciiwakwaa," okii'inaa'. 9 Mii 'owe kaa'onci-ihkitotc citipihsenik i'i kaakii'ihkitotc: "NinTete, iki kaakii'miishiyan, kaawiin awaac peshik ninkii'wani'aahsii." 10 Saaiman Piitar (Simon Peter) kihcimoohkomaan e'ayaatc, okii'manipitoon ekiihpahkihte'waatc Maawac Kihcianami'ewikimaan otanohkii'aakanini, ehpahkwaciwepa'amawaatc ohtawakini okihcinihkiniink inahke. Mii 'owe kaa'ishinihkaasotc anohkii'aakan, Maalhkahs (Malchus). 11 Ciisahs itahsh okiihkanoonaan Piitaroon: "Kiiwepiina'an i'i kimoohkomaan! Kaawiin ina ninkaminihkwehsii 'i niminihkwaakan a'a Noohs kaakii'miishitc?" okii'inaan, okakwaatakihtoowin i'i kaa'itank 'iwe minihkwaakan. 12 Miihsh kaa'ishitahkonaawaatc Ciisahsoon iki shimaakanihshak kaaOroomininiiwiwaatc (Roman), maamaw kaye oshimaakanihshiiwikimaamiwaan kaye kanawencikewi​shimaakanihshak kaakii'ishinisha'okowaatc Coowa'. Okii'mamaancikwahpinaawaan itahsh. 13 Miitahsh i'i okii'ishiwitawaawaan Aanahsan (Annas) nihtam. Aaniihsh mii ono kaaoshihshenshitc a'a Keyahpahs (Caiaphas). Mii wa'a Keyahpahs Maawac kaaKihcianami'ewikimaawitc mii 'iwe ahpii e'ahkiiwank. 14 Shikwa mii wa'a Keyahpahs kaakii'wiintamawaatc Coowa': "Nawac taaminwaapatan meshkwac peshik a'a inini cinipoohtamawaatc kahkina pemaatisinitc," ekii'inaatc. 15 Weti tahsh Saaiman Piitar (Simon Peter) okii'anikanawaapamaan Ciisahsoon, kotak kaye peshik kihkino'amawaakan ekiihpiminisha'ikewaatc. A'a tahsh kihkino'amawaakan okii'nanamaayenimikoon Maawac Kihcianami'ewikimaan. Miitahsh kaa'ishiwiicipiintikemaatc Ciisahsoon i'imaa piihtawiya'ii 'imaa waahkaa'ikan e'menikanihkantek, Maawac Kihcianami'ewikimaan kaashiayaanitc. 16 A'a tahsh Piitar i'imaa kii'niipawi akwaci-ishkwaantemink. Wa'a kotak kihkino'amawaakan kaananamaayenimikotc Maawac Kihcianami'ewikimaan, miinawaa kiihkiiwesaaka'am. Miihsh okii'awikanoonaan ini oshkiniikihkwen kaakanawentaminitc kihcimenikani-ishkwaantem. Miihsh a'awe kihkino'amawaakan kaa'ishipiintikanaatc Piitaroon. 17 Okiihkanoonikoon tahsh Piitar ini oshkiniikihkwen kaakanawishkwaantawenitc: "Kaawiin ina kiin peshik ini okihkino'amawaakan a'a inini?" okii'ikoon. Miihsh kii'ihkito: "Kaawiin niin," kii'ihkito. 18 Ikihsh anohkii'aakanak kaye kanawencikewishimaakanihshak i'imaa kii'naaniipawiwak, ekiihpootawewaatc ahkahkanshewi-ishkote, ekii'awasowaatc. Aaniihsh kii'onsaamitahkaayaa. Kaye wiin tahsh a'a Piitar okii'awiwiicikaapawiihtawaa' ekii'awasotc. 19 Miitahsh Maawac Kihcianami'ewikimaa okiihkakwecimaan Ciisahsoon keinaacimaanitc okihkino'amawaakanini, keitaminitc kaye okihkino'ikewinini. 20 Ciisahs itahsh okii'nahkwehtawaan: "Mohshe piko ninkiihkaakiikit kahkina awiya cinoontawiwaatc. Mooshak ninkiihpapaakihkino'amaake anami'ewikamikonk kaashiayaakin kaye 'omaa Kihcianami'ewikamikonk kahkina kaashimaawaci'itiwaatc. Kaawiin kekoon ninkiihkiimoocikihkino'amaakehsii. 21 Wekonen tahsh niin wencikakwecimiyan?" okii'inaan. "Kakwecim iki kaakii'noontawiwaatc aaniin kaakii'inakwaa. Okihkentaanaawaa kaakii'inakwaa," okii'inaan. 22 'Iwehsh ekii'ihkitotc, peshik iniweniwan kanawencikewishimaakanihshan e'niipawinitc okiihpahsiinkwekanaamikoon. "Mii na 'i eshinahkwehtawatc a'a Maawac Kihcianami'ewikimaa?" okii'ikoon. 23 Ciisahs 'iwe okii'inaan: "Kiishpin mecikiikitowaanen, tipaatotan tahsh miyaanaatanokwen, kahkina cinoontawihkwaa. Kiishpin itahsh kwayahk ehkitowaanen, wekonen itahsh wencipahkihte'oyan?" okii'inaan. 24 Miitahsh a'a Aanahs (Annas) okii'ishinisha'waan Ciisahsoon keyaapi ekii'mamaancikwahpisonitc, i'imaa ci-ishiwinimintc kaashiayaanitc Keyahpahsoon (Caiaphas), mayaa Maawac kaaKihcianami'ewikimaawinitc. 25 Keyaapihsh 'imaa Piitar (Peter) kii'naaniipawi kaaishiawasotc. I'ihsh kotakiya' okiihkanoonikoo': "Kaawiin ina kekiin peshik okihkino'amawaakanan?" okii'ikoo'. Kii'aanwehtam: "Kaawiin niin," kii'ihkito. 26 Peshik itahsh otanohkii'aakanan a'a Maawac Kihcianami'ewikimaa, otinawemaakanan ini ohtawakaani Piitar kaakii'maniwepa'amawaatc, okiihkanoonikoon: "Kaawiin ina kikii'waapamihsinoon ekii'wiiciiwatc kihtikewinink?" okii'ikoon. 27 Piitar miinawaa kii'aanwehtam: "Kaawiin," kii'ihkito. Miihsh shemaak inkoci ko 'imaa kiihtepihtaakosi naapepaahka'aahkwaan e'noontaakositc. 28 Wiipa kiihkishepaawakan i'i ahpii. Miitahsh i'imaa Keyahpahsoon (Caiaphas) kaakii'ishiayaanitc okii'anioncimaaciinaawaan Ciisahsoon, ekii'ishiwinaawaatc tipaahkonikewikamikonk, Pariihtooriyam (Praetorium) e'ishinihkaatek. Kaawiin wiinawaa kiihpiintikehsiiwak oniikaanisiiwi Coowak, ekii'inentamowaatc ewii'manaawiini'itisowaatc, ewiihpehkisiwaatc 'imaa ewii'ishiwiihsiniwaatc Pimaaci'ikoowi​Wiihkwantiwinink ekii'inentamowaatc. 29 A'a tahsh kihcionahshowewikimaa Paailat (Pilate) kiihpisaaka'am ekiihkanoonaatc: "Wekonen tahsh eshianaamimek wa'a inini?" okii'inaa'. 30 Okii'nahkwehtaakoo' itahsh: "Kiishpin ekaa kiimacitootansikipan, kaawiin kitaakiihpi-ishiwitamaakoohsii a'a inini," kii'ihkitowa'. 31 Okii'inaa' itahsh Paailat: "Kiinawaa otaahpinihk, tipaahkonihk enahtek i'i kiinawaa kitoonahshowewiniwaa," okii'inaa'. Coowak itahsh kii'nahkwehtamook: "Kiinawaa kaa-Oroom-ininiiwiyek (Romans) kaawiin kipakitinihsiinaam niinawint awiya citipaahkonankitc cinihsankitc," kii'ihkitowak. 32 O'owe tahsh kii'ishiwepan citipihsenik i'i Ciisahs kaakii'ihkitotc ekii'niikaaniwiintank aaniin keishinipotc. 33 Miitahsh miinawaa Paailat kiihkiiwepiintike otipaahkonikewikamikonk, ekii'antomaatc ini Ciisahsoon, miitahsh ekiihkanoonaatc: "Kiin ina kaawii'okimaahkantawatwaa iki Coowak?" okii'inaan. 34 Ciisahs okii'nahkwehtawaan: "Kiin ina 'o kitinentamowin kaaihkitoyan? Komaa na awiyak kekoon kikii'wiintamaakook ehtashimiwaatc?" 35 Paailat itahsh okii'inaan: "Coowak ina tinowi kitinenim? Kiin kiwiicitanahkiimaakanak kaye Kihcianami'ewikimaak, miiwak ohsha iki kaakii'miishiwaatc citipaahkoninaan! Wekonehsh kaa'ishimamaashiiyan?" okii'inaan. 36 Ciisahs itahsh kii'nahkwehtam: "Kaawiin o'omaa ahkiink nintooncimiinikoohsii eshiokimaawiyaan. Kiishpin ahkiink oncimiinikooyaampaan, taakii'miikaasowak iki kaawiici'iwaatc cikiinaatamawiwaahpan. Kaawiin tahsh nintaakiihkaahcitinikohsiik iki niikaanisiiwi Coowak. Kaawiin tahsh wiin o'omaa ahkiink nintooncimiinikoohsii nintookimaawiwin," okii'inaan. 37 Amiihsh kaa'ikotc Paailatoon: "Mii na tahsh tepwe kihciokimaa ehtinowiyan?" okii'ikoon. Ciisahs tahsh okii'inaan: "Kiin kitish kihciokimaa ehtinowiyaan. O'owehsh ehta wencitakohshinaan o'omaa ahkiink, kaye mii 'owe kaakii'oncinihtaawikiyaan, citipaatotamaan i'i tepwewin. Awiya piko tepwewinink oncitipentaakositc ninkapisintaak i'i ehkitoyaan," okii'inaan. 38 Paailat itahsh kii'ihkito: "Wekonehsh i'i tepwewin?" Ahpiihsh 'iwe kaa'ihkitotc Paailat (Pilate), miinawaa kiihsaaka'am ekiihkanoonaatc Coowa' kaamaamawenonitc: "Kaawiin kekoon nimihkamowaahsiin a'a inini cioncinihsintipan," okii'inaa'. 39 "I'iwe tahsh kaanihtaa ishihcike'ikooyek, tahsink iko ehPimaaci'ikoowi​Wiihkwantinaaniwank mooshak kipakitinamawininim peshik kaakipa'ontc. Kinantawenimaawaa na 'owe ahpii cipakitinamawinakook kiinawaa Coowak kikihciokimaamiwaa?" okii'inaa'. 40 Kiihshaakowewak itahsh: "Kaawiin wiin wa'a inini!" kii'ihkitowak. "Paraapahs (Barabbas) pakitinamawihshinaam!" kii'ishishaakowewak. Omahkantweshk itahsh kiihtinowihkaaniwi a'a Paraapahs.

Cwaan 19

1 Miitahsh kii'anoohkii Paailat (Pilate) ci-ishiwinimintc Ciisahsoon cipahpahshanshe'ikaniwinitc. 2 Shimaakanihshak itahsh okiihtatipaninaanaawaan kihciokaawiminakashiiwatihkwanan, ekii'oncioshihtoowaatc pahsihkwepisowaanohkwaan. Okiihpihtaanohkwaane'aawaan Ciisahsoon. Miitahsh kaa'ishipihcihkonaye'aawaatc e'mahkatemiskwaanik ehkinwekaninik kihciokimaank ci-ishinaakosinitc. 3 Okii'naanaasihkawaawaan tahsh ekii'inaawaatc: "Kihcipooshoo kiin okihciokimaamiwaan Coowak!" okii'ayinaawaan. Ekiihpahpahsiinkwekanaamaawaatc kaye. 4 Miinawaa tahsh a'a Paailat kiihsaaka'am ekiihkanoonaatc i'imaa kaaishimaamawenonitc: "Inashke hsa, miinawaa kikasaakisiihtamawininim, cikihkenimek ekaa e'mihkamowaahsiwak kekoon cioncinihsintipan," okii'inaa'. 5 Miitahsh kaa'ishisaaka'ank Ciisahs ehkikishkank i'iwe okaawiminakishiiwaanohkwaan kaye kaamahkatemiskwaanik ehkinwekaninik. Amiihsh i'iwe kaa'ihkitotc Paailat: "Ina wa'a inini!" 6 Ahpii tahsh Kihcianami'ewikimaak kaye kanawencikewi​shimaakanihshak e'waapamaawaatc Ciisahsoon, kiihshaakowewak: "Akosaka'o aashiteyaahtikonk! Akosaka'o!" kii'ihkitowak. Paailat itahsh kii'ihkito: "Kiinawaa ko ishiwinihk, awiakosaka'ohk. Niin wiin kaawiin nimihkamowaahsiin keoncikiishaahkonikaniwitc cioncinihsintc," okii'inaa'. 7 Kii'nahkwehtamook itahsh iki kaamaamawenowaatc: "Niinawint nintayaamin i'iwe Onahshowewin. Inahte piko cinihsintc, aaniihsh Kishemanitoo oKosihsan kii'ishinihkaanitiso," okii'inaawaan. 8 Ahpii tahsh Paailat kaa'noontank o'owe ihkitowin, awahshime kiihkihcisekisi. 9 Miinawaa kiihpiintike otipaahkonikewikamikonk ekiihkanoonaatc Ciisahsoon: "Aanti wenciiyan?" okii'inaan. Kaawiin tahsh kekoon okii'ikohsiin. 10 Paailat itahsh kii'ihkito: "Kaawiin ina kiwiihkanooshihsii? Kaawiin inahsh kikihkentansiin cikashkihtooyaan cipakitininaan kaye cikashkihtooyaan ciakosaka'okooyan aashiteyaahtikonk?" okii'inaan. 11 Miitahsh kaa'ishinahkwehtaakotc: "Kaawiin kitaakashkihtoohsiin kekoon citootawiyan, mii ehta ishpimink oncimiinikooyan. Miitahsh o'oweni onci kaakiihpakitinamawihk a'a inini citipaahkonikooyaan, nawac mii 'aweti inentaakosi ehkikisitc i'i macitootamowin," okii'ikoon Ciisahsoon. 12 Miitahsh ekii'noontank a'a Paailat, otaanakiihkakwemihkaan keshipakitinaatc Ciisahsoon. Coowak itahsh kaakiihpaahtiinowaatc kiihshaakowewak: "Kiishpin pakitinatc a'a inini kaawiin kiwii'minwenimaahsii Maawac Kihcikokimaa. Kahkina awiya kaaitisotc wiin ehkihciokimaawitc e'itisotc, otaanawenimaan ini Maawac Kihciokimaan." 13 Ahpiihsh a'a Paailat kaa'noontank kaaihkitonitc, okiihsaakisi'aan miinawaa Ciisahsoon. Amiihsh kaa'ishionapitc otipaahkonikewapiwinink i'imaa kaa-ayaanik, Kaa-Ahsiniiwaapihkahk kaaishinihkaatek. Amii 'iwe Hiiparoo (Hebrew) kaaishikiishwemakahk, Kaapahtaa (Gabbatha). 14 Mii 'iwe ahpii kekaa e'aapihtakiishikahk, ekii'ishikiishikahk e'waweshihcikewaatc ewiihPimaaci'ikoowi​Wiihkwantink. Miihsh 'owe Paailat okii'inaa' Coowa': "Wa'a kikihciokimaamiwaa!" 15 Kiihshaakowewa' itahsh: "Inkoci weti maaciish! Awinihshi! Aashiteyaahtikonk ciakosaka'watc!" Paailat itahsh kii'ihkito: "Ninka-akosaka'waa na kikihciokimaamiwaa?" Kihcianami'ewikimaak itahsh okii'nahkwehtawaawaan: "Kaawiin awiya ninkihciokimaaminaan nintayaawaahsiwaanaan, mii ehta Maawac Kihciokimaa." 16 Miitahsh kekahpii Paailat kaa'ishipakitinamawaatc ciakosaka'waanitc Ciisahsoon. Shimaakanihshak itahsh okii'maaciinaawaan Ciisahsoon, 17 wiin ekiihpiminikehtamaasonitc otaashiteyaahtikomini, ekii'anisaaka'aminitc ootenaank, piinihsh ekii'ani-ishaatc weti Ohtikwaanikekanihkaank kaaishinihkaatenik pihkwatinaa, mii 'iwe Coowak kaaishikiishwewaatc Kaalkahtaa (Golgotha). 18 Amiitahsh weti kaahtashiakosaka'waawaatc Ciisahsoon aashiteyaahtikonk. Tako ahshic niishin ininiwa' okiihsaka'waawaa'. Kwehkwehk inahke kii'akoocinoo' kaa'ishipatahkisonitc aashiteyaahtikoo'. Ciisahs itahsh nahsawaya'ii 'imaa kii'akoocin. 19 Paailat (Pilate) tahsh okii'oshipii'aan kihkinawaapancikan. Kii'anoohkii ciahcikaatenik 'imaa aashiteyaahtikonk. Miihsh 'iwe kaa'ishipii'ikaatek: "Ciisahs Naasaritink (Nazareth) wenciitc, Coowak Okihciokimaamiwaan." 20 O'o kihkinawaapancikan okii'anamihtoonaawaa niipiwa' awiya, aaniihsh pehsho 'imaa ootenaank kii'ayaa Ciisahs ekiihtashiakosaka'ikaniwitc. Miitahsh 'iwe nihswayak e'ishikiishwenk kii'ishipii'ikaate kihkinawaapancikan, Hiiparoo (Hebrew), Laahtin (Latin), Kariihk (Greek) kaa-ayishikiishwenk kii'ishipii'ikaate. 21 Okihcianami'ewikimaamiwaa' itahsh iki Coowak okiihkanoonaani Paailatoon: "Keko wiin ishipii'anken, 'Coowak Okihciokimaamiwaan!' 'Owe wiin ishipii'an: 'Wa'a kaa'ihkitotc, niin Coowak okihciokimaamiwaan,' mii 'iwe ishipii'an," okii'ikoo'. 22 Paailat tahsh okii'nahkwehtawaa': "I'iwe kaakii'oshipii'amaan, aaniihsh inaa ninkii'oshipii'aan," okii'inaa'. 23 Shimaakanihshak itahsh ahpii kaa'ishkwaa-akosaka'waawaatc Ciisahsoon, okii'otaahpinaanaawaan ini Ciisahsoon okikishkikanini 'imaa kaa-ahtenikin. Okii'niiwihtoonaawaan tahsh tetak pepankii ciayaawaatc iki shimaakanihshak ekii'niiwiwaatc. Takohsh kaye kii'ayaani kaakii'naapishkaminitc. Mihcipeshikwan kii'oshihcikaate misiwe piinihsh mishakaameyiik. Kaawiin kii'niishokwaatehsinoon. 24 Mii 'iwe kaa'ishikanoonitiwaatc shimaakanihshak: "Kaawiin kikapiikopitoohsiimin, mihcishinawiwepiniketaa, awenen keayaatc," kii'ihkitowak. Mii 'iwe kaa'ishiwepahk citipihsek i'i Kihcioshipii'ikewin kaaihkitoomakahk: "Kii'nenaawinamaatiwak ini ninkikishkikanan kaye kaakii'naapishkamaan kii'oncishinawiwepinikewak," ihkitoomakan. Mii 'iwe tepwe shimaakanihshak kii'ishihcikewak. 25 'Imaa tahsh otaashiteyaahtikomink Ciisahs, ciikaya'ii kii'niipawiwan omaamaan, kaye omaamaan wiicihkweni kiihtakoniipawiwan. Shikwa Meri (Mary) Kaloohpahs (Clopas) wiiwan, kaye kotak Meri Maakatalaank (Magdala) kaaonciitc, kii'ahshicikaapawiwak. 26 Ciisahs okii'waapamaan ini omaamaan kaye ini peshik okihkino'amawaakanan maawac kaasaaki'aatc ehciikikaapawinitc i'imaa. Miitahsh kaa'ishikanoonaatc ini omaamaan: "Nimaamaa!" okii'inaan, "kikosihs wa'a." 27 Shikwa okiihkanoonaan okihkino'amawaakanan: "Wa'a kimaamaa," okii'inaan. Miitahsh 'imaa ahpan​iko wa'a kihkino'amawaakan okii'ishiwinaan wiin kaaishitaatc ekiihtashikanawenimaatc ini omaamaani Ciisahsoon. 28 Ciisahs tahsh okiikihkentaan aasha kahkina kekoon ehkiishihcikaatenik, miihsh citipihsek i'i Kihcioshipii'ikewin kii'onci-ihkito: "Ninoontewii'minihkwe." 29 Kii'ahte 'imaa onaakan e'mooshkinepiik kaawentakintek shoominaapo. Iska'ipaan itahsh kiihcehkipiinikaate shoominaaponk, miitahsh okii'ahtoonaawaan aanihkawashkwaahtikonk, ihsap (hyssop) e'ishinihkaatek, ekii'niimaahkwa'amawaawaatc itahsh otooniniink Ciisahsoon e'mina'aawaatc. 30 Ahpii tahsh kaakii'minihkwetc, mii 'iwe kaa'ihkitotc: "Aasha kahkina kiishihse!" Kii'acitawihkweni tahsh, amii ko ekii'nipotc. 31 Coowak kaaniikaanisiwaatc okiihkakwecimaawaan Paailatoon (Pilate) cipoohkokaatekanaamimintc i'i kaakii'akosaka'ikaniwinitc, kaye cionciotaahpinikaatenikin aashiteyaahtikonk wiiyawini. Mii 'owe kaakii'oncikakwecimaawaatc, ekiihPahkweshikanikiishikahk ekii'ishikiishikahk ekii'waweshihcikewaatc ewii'Anwepiiwi​kiishikaninik. Aaniihsh kaawiin kii'inentansiiwak keyaapi ciakootenikin ewii'Anwepiiwi​kiishikaninik, aaniihsh aahpici kiihkihci-inentaakwan i'i kaawii'Anwepiiwi​kiishikahk. 32 Miitahsh i'iwe kaakii'onci-ishaawaatc shimaakanihshak ekii'awipoohkokaate'waawaatc ini nihtam kaye ini kotak kaakiihtako akosaka'okoomaanitc Ciisahsoon. 33 Ahpii tahsh wiin wetihsaawaatc Ciisahsoon okii'waapamaawaan aasha ekii'niponitc. Mii'i kaawiin okiihpoohkokaate'waahsiwaawaan. 34 Peshik itahsh iki shimaakanihshak, pashipa'ikan okiihpashipa'waan Ciisahsoon ohpimenaw. Shemaak kii'oncisaakiciciwan nipi kaye miskwi. 35 A'a tahsh kaakii'waapantank okiihtipaatotaan, kekiinawaa tahsh cionciotepwehtamowiniyek. Tepwemakanini otipaacimowin. Okihkentaan iko ehtepwetc. 36 O'o kii'onci-ishihcike'aa Ciisahs citipihsek i'iwe Kihcioshipii'ikewin kaaishipii'ikaatek: "Kaawiin awaac peshik ohkan cipiikonikaatenik," ihkitoomakan. 37 Miinawaa tahsh kotak Kihcioshipii'ikewin ihkitoomakan: "Okakanawaapamaawaan ini kaakiihpashipa'waawaatc." 38 Kahkina kaa'ishkwaaishihsek o'o, kii'ishaa Coosap (Joseph), mii weti Eramahtiiya (Arimathea) ootenaank kaakii'onciitc. Miiwan​ini peshik Ciisahs kaakiihpiminisha'okotc. Kiimooc itahsh kiihpiminisha'ike Coosap, ekiihkohsaatc oniikaanisiiwi Coowa'. Mii wa'a okii'awikakwecimaan Paailatoon (Pilate) ewii'otaahpinank wiiyawini Ciisahsoon. "Eha' kikaotaahpinaan," okii'ikoon. Miitahsh kaa'ishi-ishaatc Coosap ekii'awiotaahpinank i'i wiiyawini ekii'animaaciitootc. 39 Kiihpiishaa kewiin Nihkatiimahs (Nicodemus), a'a nihtam ehtipihkaninik kaakii'antawaapamaatc Ciisahsoon. Okiihpiitoon kaaminomaakwaninikin. Mar (myrrh), aaloos (aloes) kaakinikawinikaatekin kiihtinowan, maakishaa ninkotwaahk tahsokosikwan minihk. 40 Miitahsh oko niishin okii'otaahpinaanaawaa wiiyawini Ciisahsoon, ekiihtitipeyiikinamowaatc waapishkiikin, tako 'i kaaminomaakwaninik ekii'mashkihkiiwihtoowaatc. Mii 'i kaa'ishihcikewaatc Coowak e'na'inamowaatc miiyaw. 41 I'imaa kaakiihtashinihsintc Ciisahs, pehsho 'imaa kii'ayaa kihtikewin. I'imaahsh kihtikewinink wiimpaapihkohkaan tino kaashina'initink kii'ayaa, ekaa wiihkaa mahshi awiya 'imaa ekii'na'inaahsiwintc. 42 Mii 'imaa kaa'ishina'ihsitoowaatc Ciisahsoon wiiyawini, aaniihsh aasha kii'ishikiishikan cipwaa Anwepiiwi​kiishikahk, kaye kiihpehshowan i'i kaashina'initink i'imaa kaakiihtashiniponitc.

Cwaan 20

1 Paanimaa e'aniAnami'ekiishikahk wiipa cipwaa piitaapaninik, Meri (Mary) Maakatalaank (Magdala) kaaonciitc kii'ishaa weti na'initiiwikamikonk. Okii'waapamaan ini ahsiniin aasha ekiihtawinikaniwinitc 'imaa na'initiiwikamikonk kaahkipapinihpan. 2 Kii'maaciipahtoo, ekii'naacipa'aatc Saaiman Piitaroon (Simon Peter) kaye kotak kihkino'amawaakanan ini maawac Ciisahs kaakiihsaaki'aatc. Miihsh okii'wiintamawaa': "Awiyak okii'otaahpinaanaawaa kaaTipencikenitc wiiyawini, kaawiin tahsh ninkihkentansiimin aanti kaa'ahtoowaatc," okii'inaa'. 3 Miitahsh kii'animaacaawak Piitar kaye kotak a'a kihkino'amawaakan, ekii'ishaawaatc na'initiiwikamikonk. 4 Minciniish kii'anipimipahtoowak. A'ahsh kotak kihkino'amawaakan okii'nakacipa'aan Piitaroon. Niikaan okii'aniotihtaan i'i na'initiiwikamik. 5 Kii'nawakii ekiihpiinsaapitc. Okii'waapantaanan ini waapishkiikinoon ehta e'ahtenikin. Kaawiin wiin kiihpiintikehsii. 6 Miihsh Piitar otaanaank kiihpioncitakohshin. Kwayahk iko kiihpiintike 'imaa na'initiiwikamikonk. Okii'waapantaanan ini waapishkiikinoon e'ahtenikin. 7 Kaye okii'waapantaan waapishkiikinoonhs kaakiih titipeyiikihtikwaanehpisonitc Ciisahsoon. Kaawiin 'imaa kiihtakwahtehsinoon ini waapishkiikinoon kaashiayaakin, pihkihsh itahsh 'imaa kii'ahte ekiihtitipeyiikihsink. 8 Miitahsh kewiin kaa'ishipiintiketc a'a kotak kihkino'amawaakan nihtam kaakiihtakohshink i'imaa na'initiiwikamikonk. Okii'waapantaan tahsh, miitahsh kiihtepweyentam. 9 Kaawiin aaniihsh mahshi okiikihkentansiinaawaa Kihcioshipii'ikewin, oncita piko cikiiwepimaatisinitc ahpii ishkwaaniponitc kaaihkitoomakahk. 10 Miihsh iki kihkino'amawaakanak kii'anikiiwewak 'imaa kaa'ishitaawaatc. 11 Meri (Mary) tahsh kii'niipawi akwaciink na'initiiwikamikonk e'mawitc. Mekwaa tahsh e'mawitc kii'nawakii, ekiihpiinsaapantank na'initiiwikamikonk, 12 ekii'waapamaatc itahsh niishin encala' e'waapishki kikishkikenitc, e'namatapinitc i'imaa kaakii'ishiahtenikopanen wiiyawini Ciisahsoon. Peshik 'imaa kaakii'ishihtikwaanehsininikopanen kii'ishinamatapiwan, shikwa peshik kaakii'ishisitehsininikopanen. 13 Okiihkanoonikoo' itahsh: "Wekonen wencimawiyan?" okii'ikoo'. 'Owehsh okii'inaa': "Awiyak okii'maaciitoonaawaa ninTipencikeman wiiyawini, kaawiin tahsh ninkihkentansiin aanti kaa'ishiahtoowaatc." 14 Miitahsh kiihkwehkikaapawi, e'waapamaatc Ciisahsoon e'niipawinitc. Kaawiin tahsh okiihkihkenimaahsiin Ciisahsoon e'aawinitc. 15 Okiihkanoonikoon: "Wekonen wencimawiyan," okii'ikoon. "Awenen nenaantawaapamatc?" okii'ikoon. Wiin tahsh a'a ihkwe, kihtikewinini maawiin ekii'inenimaatc ciaawinitc, mii 'o kaa'inaatc: "Kiishpin kaa'maaciitoowanen i'i wiiyaw, wiintamawihshin aanti kaa'ahtooyan, ninka-awiotaahpinaan," okii'inaan. 16 Ciisahs itahsh okii'inaan: "Meri!" Meri tahsh kiihkwehkikaapawi. "Oraapooni!" kii'ihkito. Miihsh i'iweni kaa'itank "ninKihkino'amaakem" 'imaa Hiiparoo (Hebrew) ishikiishwewinink. 17 Okii'ikoon tahsh: "Keko minciminihshihken. Kaa mahshi nintishiompishkaahsii cinaasihkawak a'awe ninTete. Awikanoohsh itahsh iki niicihkiweyak kaaishinihkaanakwaa, 'owe ciawi-inatwaa: 'Niwii'ishpishkaa, ninkiiwenotawaa 'awe ninTete kaye kiinawaa kaaoTeteyek. Mii wa'a niin ninKishemanitoom kaye kiinawaa kiKishemanitoomiwaa,' nintinaak." 18 Miitahsh Meri Maakatalawihkwe (Mary Magdalene) okii'awiwiintamawaa' kihkino'amawaakana'. "Ninkii'waapamaa kaaTipenciketc," kii'ihkito. Shikwa okii'wiintamawaa' 'iwe Ciisahsoon kaakii'ikotc. 19 Miitahsh 'iwe e'anionaakohshik i'iwe e'anami'ekiishikahk, kihkino'amawaakanak piintik kii'maawaci'itiwak, ekiihkipaahkwa'amowaatc ishkwaanteman, ekiihkohsaawaatc aaniihsh oniikaanisiiwi Coowa'. Ciisahs itahsh 'imaa naawaya'ii kiihpiniipawi, miihsh ekiihkanoonaatc: "Pisaanentamowin kikawiiciiwikom," okii'inaa'. 20 Ahpiihsh 'iwe kaa'inaatc okii'waapanta'aa' oninciin kaye 'i ohpimenaw kaashiena'ikaniwitc e'ociihshisitc. Kiihkihciminwentamook kihkino'amawaakanak ahpii e'waapamaawaatc kaaTipencikenitc. 21 Miinawaa keyaapi okii'inaa' Ciisahs: "Pisaanentamowin kikawiiciiwikom. Kaakii'ishipiicinisha'otc a'a ninTete, keniin itahsh kitishimaacinisha'oninim kekiinawaa." 22 Miitahsh okiihpaapootaanaa', miihsh kaa'inaatc: "Otaahpinihk Kishemanitoo otAhcaahkwan cipiincishkawinek. 23 Awiyak omacitootamowiniwaan inekwaa ehpoonentamawintwaa, kewiin okapoonentamawaa' Kishemanitoo, ahpan​iko poonentamawaawak. Kiishpin poonentamawaahsiwek, takihciwinamawaawak." 24 Peshik a'a kaakii'mitaahshiniishiwaatc kihkino'amawaakanak, Twaamahs (Thomas), Niishoote kaa'ishi nekaaminihkaacikaniwitc, kaawiin 'imaa kii'wiici'iwehsii ahpii Ciisahsoon kiipinaakosinitc. 25 Kotak itahsh kihkino'amawaakanak kiihtipaacimowak: "Ninkii'waapamaanaan kaaTipenciketc," okii'inaawaan Twaamahsoon. Miihsh i'i kaa'ihkitotc Twaamahs: "Kiishpin waapantamowaahsiwak oninciink eshieshihsininikin saka'ikanan kaye nininc saaminamawaahsiwak kaashiena'ikaniwitc kaye ohpimenaw saaminamawaahsiwak, kaawiin wiihkaa ninkatepwehtansii," kii'ihkito. 26 Nihshwaahsokiishik itahsh e'ishihsenik miinawaa kii'maawaci'itiwak. Twaamahs kaye wiin kii'wiici'iwe. Aanawiin kiihkipa'ikaatewan ishkwaanteman, kii'onciayaa 'imaa piintik a'a Ciisahs, naawaya'ii 'imaa e'niipawitc. "Pisaanentamowin kikawiiciiwikom," okii'inaa'. 27 Miitahsh okiihkanoonaan Twaamahsoon: "Pi-ishininciinin o'omaa, waapantan nininciin," okii'inaan. "Kaye pi-ishinihkenin, pisaaminihshin 'imaa ohpimenaw. Keko keyaapi ihkitohken e'aanwehtaman, tepwehtan," okii'inaan. 28 Miitahsh okii'ikoon Twaamahsoon: "Kiin ninTipencikem! Kiin ninKishemanitoom!" kii'ihkitowan. 29 Ciisahs itahsh okii'inaan: "Ekii'waapamiyan ina kitooncitepwehtam? Aahpici tahsh tashawentaakosiwak iki ekaa kaawaapamihsikwaa, shaakooc itahsh kaashitepwehtamowaatc!" 30 Niipiwa' itahsh kotak kekoonan kii'maamahkaacihcike Ciisahs ekii'waapamikotc okihkino'amawaakana', ekaa kaaoshipii'ikaatehsinokin o'omaa masina'ikanink. 31 Onoweniwan tahsh oshipii'ikaatewan citepwehtawek Ciisahs, amii wa'a Kishemanitoo oKosihsan kaakii'onenimaatc cipimaaci'iwenitc. O'owe tahsh e'ishitepweyenimek, wiin cioncimiinikooyek pimaatisiwin.

Cwaan 21

1 Kii'ishkwaahsek o'o, miinawaa Ciisahs okii'naakosiihkantawaa' okihkino'amawaakana' Taaipiiriyahs (Tiberius) Saaka'ikaniink ekii'ayaanitc. Mii 'owe kaakiihpi-ishiwepahk weti kaakii'ishiwaapamintc Ciisahs. 2 Kii'maamawiayaawak Saaiman Piitar (Simon Peter) kaye Twaamahs (Thomas) Niishoote kaaishinihkaasotc, kaye Nahtaaniyal (Nathanael) i'imaa Kena (Cana) kaakii'onciitc Kaalaliiwi-ahkiink (Galilee), kaye Sepatii (Zebedee) okosihsa' kaye niishin kotak Ciisahs okihkino'amawaakana'. 3 Saaiman Piitar okiihkanoonaa': "Niwii'antapakita'waa," kii'ihkito. "Haw kikawiiciiwikoo," okii'ikoo'. Miitahsh i'i kii'anipoosiwak, kii'animaaci'owak. Kapetipihk itahsh aanakiihtanahkamikisiwaatc, kaawiin awaac peshik kiihpita'anaahsiiwak kinooshen. 4 Aasha tahsh e'animoohka'aninik, Ciisahs kii'niipawi ciikipiik. Kihkino'amawaakanak itahsh kaawiin okiikihkenimaahsiwaawaan e'aawinitc Ciisahsoon. 5 Ciisahs itahsh okiihkanoonaa': "Niiciitok! Kikiihpita'anaam ina?" okii'inaa'. "Kaawiin," okii'ikoo'. 6 Miitahsh kii'ihkito: "Kihcinihkink inahkeyoonak ishipahkopiiwepinihk ahsap, kikapita'anaam," okii'inaa'. Miitahsh miinawaa kaa'ishipakita'waanitc. Miihsh ekiihpwaawipinaanitc owiimpahsapiini kaa'ahpiihcikihcipita'anaanitc kinooshe' 'imaa. 7 A'ahsh kihkino'amawaakan Ciisahsoon maawac kaakiihsaaki'ikotc okiihkanoonaan Piitaroon: "Mii nankwana 'a kaaTipenciketc," ihkito. Ahpii kaa'noontank Saaiman Piitar miiwan​ini e'aawinitc kaaTipencikenitc, miitahsh kaa'ishinaapiwepishkank opiinsihkawaakanishkikan kaakiihkiihcikoshkank, miitahsh kaa'ishipahkopiikwaashkwanitc. 8 Kotak itahsh kihkino'amawaakanak kiihpinaatakaa'amook ciimaanink, e'naatakaameyoonaawaatc ini ahsapiin, wiinke e'mooshkinenitc kinooshe' 'imaa ahsapiink. Kaawiin aahpici waahsa mihshawakaam kii'ayaahsiiwak, maakishaa ninkotwaahk tahsonihk i'iweti. 9 Ahpii tahsh kaaniakwaatahkohkiiwaatc okii'waapantaanaawaa ishkotewiahkahkanshe, shikwa wakitahkahkanshe kinooshe' ehkishisonitc, pahkweshikana' kaye e'apinitc. 10 Miitahsh Ciisahs kii'ihkito: "Piinihkok aaninta kinooshek noonkom kaakiihpita'anaayek," okii'inaa'. 11 Miihsh i'i Saaiman Piitar miinawaa kiihkiiwepoosi ekii'akwaasitaapiitc ini ahsapiin, e'mooshkinenitc kihcikinooshe', inkotwaahk naanimitanahshinihsin (153) ehtahshinitc. Aanakii'ahpiihcipaahtiinonitc, kaawiin tahsh kiihpiikoshkaahsii a'a ahsap. 12 Miitahsh kii'ihkito Ciisahs: "Piwiihsinik," okii'inaa'. Kaawiin awaac awiya kihkino'amawaakanak kiihteinenintisohsiiwak: "Awenen kiin," ci-inaawaatc, aaniihsh okiihkihkenimaawaan e'aawinitc kaaTipencikenitc. 13 Miihsh i'i Ciisahs okii'awiotaahpinaan ini pahkweshikanan ekii'ahshamaatc. Miihsh i'i kaye ini kinooshe'. 14 Amii 'iwe nihsink Ciisahs ekii'naako'itisohtawaatc i'i okihkino'amawaakana' aasha ekiihkiiwepimaatisitc. 15 Kaa'ishkwaawiihsiniwaatc itahsh Ciisahs okiihkanoonaan Saaiman Piitaroon (Simon Peter): "Kiin tahsh Saaiman, okosihsan Cwaan, awahshime na kisaaki' ahpiihc oko kaashisaaki'iwaatc?" Miihsh 'iwe ihkitowan: "Eha', Tepencikeyan, kikihkentaan ehsaaki'inaan," otikoon. Miihsh kii'ihkito Ciisahs: "Ahsham, kanawenim nimaanahcaanihshenhsimak," okii'inaan. 16 Miitahsh miinawaa okanoonaan: "Saaiman," okii'inaan, "kiin okosihsan Cwaan, kisaaki' ina?" Miihsh kii'ihkitowan: "Eha', Tepencikeyan, kikihkentaan ehsaaki'inaan." Miitahsh Ciisahs okii'inaan: "Kanawenim nimaanahcaanihshimak." 17 Keyaapi aapitink okiihkakwecimaan, mii nihsink: "Saaiman, kiin okosihsan Cwaan, kisaaki' ina?" okii'inaan. Kii'maanentam itahsh a'a Piitar, aaniihsh aasha nihsink ekiihkakwecimikotc: "Kisaaki' ina?" Miihsh i'iwe kaa'inaatc: "Tepencikeyan, kikihkentaan iitok kahkina kekoon. Kikihkenim ehsaaki'inaan." Miitahsh Ciisahs okii'inaan: "Kanawenim nimaanahcaanihshimak. 18 Nintepwe e'wiintamawinaan: mekwaa e'oshkiniikiyan kikii'oshiihtaa hko, waa'ishaayan hsa ko kikii'ishaa. Ahpii tahsh e'aniahkiwensiwiyan, kikashashiipinihkehtaa, kotak awiya kikamamaancikwahpinik, kikaishiwinik kaawii'ishaahsiwan." 19 'Owehsh ekii'inaatc, okiihkihkinawaaciwiintamawaan aaniin keishiniponitc, keishikihci-inentaako'aanitc Kishemanitoon. Miitahsh o'owe kaa'ihkitotc Ciisahs: "Piminisha'ohshin." 20 Piitar (Peter) ehkwehkikaapawitc okii'waapamaan ehpipiminisha'ikenitc ini kotak kihkino'amawaakanan maawac Ciisahs kaakiihsaaki'aatc, miiwan​ini kaakii'inihtaanitc pehsho ohkaahkikaniniink Ciisahsoon mekwaa e'onaakohshiwiihsiniwaatc ekiihkakwecimaanitc: "Tepencikeyan, awenen kaawii'mamishimihk?" 21 Ahpiihsh Piitar ekii'waapamaatc ehpiminisha'okowaatc okii'inaan Ciisahsoon: "Tepencikeyan, aaniin tahsh wa'a keishihcike'intc?" kii'ihkito. 22 Ciisahs kii'ihkito: "Kiishpin inentamaan keyaapi cipimaatisitc piinihsh iko cipitakohshinaan, wekonehsh kiin keoncipapaamisiwiniyan? Kiin piminisha'ohshin," otinaan. 23 O'o tahsh kii'maaciiyaatote ekii'aniwiintamaatiwaatc otepwehtamook, ekaa cinipohsik a'a kihkino'amawaakan. Ciisahs itahsh kaawiin kii'onci-ihkitohsii ekaa cinipohsinik. O'owe hsa mayaa kii'ihkito: "Kiishpin itahsh inentamaan keyaapi cipimaatisitc piinihsh cipitakohshinaan, wekonehsh kiin wepapaamisiwiniyan?" kii'ihkito. 24 Amii wa'a kihkino'amawaakan kaakiih​tipaatotank ono, kaye kaakii'oshipii'ank ono. Ninkihkentaamin ihsa otipaacimowin ehtepwemakaninik. 25 Inashke tahsh ayaaniwan niipiwa' kotak kekoonan Ciisahs kaakii'ayintootank o'omaa e'wiintehsininikin. Ampooshke iitok kahkina entahsopeshik oshipii'ikaatekipaniin, kaawiin awaac taakiihtepashkinehsinoonan misiwe ahkiink ini masina'ikanan kekii'oshipii'ikaatekipaniin nintinentam.

Ishihcikewinan 1

1 Kiin Tiyaahpilahs (Theophilus) nihtam kaakii'oshipii'amawinaan masina'ikan ekiih​tashintamawinaan kahkina Ciisahs kaakii'ishihciketc, aaniin kaye kaa'ishi​kihkino'amaaketc ahpii kiimaatanohkiitc. 2 Piinihsh itahsh i'i ahpii ehkiishikaninik kaakii'ishpihshkaatc kihcikiishikonk. Cipwaa ompishkaa'intc itahsh okiih​kanoona' otishinisha'waakana' kaakiionaapamaatc, Kishemanitoon otAhcaahkoni ekii'onci​kihkino'amawaatc keishihcikenitc. 3 Ahpii tahsh kaapoonihsenik okakwaatakihtoowin, okiinaakosiihtawaa' niipiwa' pemaatisinitc ke'onci​kehcinaa'entaminitc. Niimitana tahsokiishik minihk ekii'waapamikotc, ekiih​tashintamawaatc enentaakwaninik Kishemanitoon otipencikewinini. 4 Aapitink tahsh ewiici​wiihsiniimaatc, Ciisahs okii'ayenkwaamimaa' ekii'inaatc: "Keko onci​maacaahkek o'omaa Ceroosalamink (Jerusalem), cipiihtooyek i'i ninTete kaakii'ahshotamaaketc ewii'miikiwetc, kaakiinoontawiyek ehtashintamawinakook. 5 Inashke wiin Cwaan (John) Osiika'antaake nipiini okii'aapacihtoon esiika'antaaketc. Kiinawaa tahsh wiin wiipa kikakikishkaakowaam Kishemanitoo otAhcaahkwan, mii 'i nahke kiinawaa keshi​siika'antaakooyek," okii'inaa'. 6 Ishinisha'waakanak tahsh ahpii emaamawi​ayaawaatc o'o okii'ishi​kakwecimaawaan Ciisahsoon: "Tepencikeyan, mii na 'i aasha e'ocihcihsek cikiiwe​miinatwaa Isriyalak (Israel) citipenintisowaatc ciokimaahkantaasowaatc?" 7 O'o tahsh Ciisahsoon okii'ishi​nahkwehtaakowaan: "Kaawiin kiinawaa kimiinikoowisihsiim cikihkentamek aaniin ahpii mayaa 'i ke'ishihsek. Weyoosimintc iitok tipinawe okii'onahtoon cikashkihtootc i'i ahpii ci-ishihsenik. 8 Kika​miinikoowisim itahsh kashki'ewisiwin ahpii otihsinek Kishemanitoo otAhcaahkwan. Miitahsh i'i citipaacimiyek ekihkenimiyek, i'imaa Ceroosalamink (Jerusalem) misiwe kaye Cootiiya (Judea) ahkiink, Sameriya (Samaria) ahkiink, piinihsh itahsh ehko​kakishipahkamikaak ahki," okii'ikowaan. 9 Ahpii tahsh o'o kaa'ishkwaa'ikowaatc, mekwaa ehkanawaapamaawaatc, ishpimink kii'ishi​ompishkaawan piinihsh wahkwiink ekii'ani-ishi​ankonaakosinitc. Piinihsh tahsh kaawiin okii'waapamaahsiwaawaan. 10 Mekwaa tahsh ishpimink kihci​weweni e'inaapiwaatc kaakii'ishi-ishpishkaanitc, kwetahto niishin awiya' okii'onci​wiicikaapawihtaakowaa' ewaapishkikonayenitc. 11 Miitahsh o'o kaa'ikowaatc: "Kiinawaa Kaalaliiwininiwak (Galilee) wekonen wenci'ishikaapawiyek ishpimink e'inaapiyek? A'a Ciisahs noonkom kaanakaninek kihcikiishikonk kaashi​ompishkaa'intc, mii 'i nahke miinawaa peshikwan kepishi​takohshink kaashi​waapamek kihcikiishikonk e'ishaatc," okii'ikowaan. 12 I'imaa tahsh Aalip pihkwatinaank kaakii'ishi​ayaawaatc kii'onci​maacaawak, Ceroosalamink (Jerusalem) ekii'ishi​kiiwewaatc ekii​pehshowaninik, aapihta tipa'ikan ehta ekii'ahpiihcaanik. 13 Ahpii tahsh tekohshinowaatc Ceroosalamink, kii'ani​ahkwaantawewak waahkaa'ikanink eshi-ishpimiihkantenik eshi​ayaanitc Piitaroon (Peter), ini kaye Cwaanan (John), Ciimisan (James), Entaroon (Andrew), Pilapoon (Philip), Twaamahsoon (Thomas), Paarhtaalamiyoon (Bartholomew), Maatiyoon (Matthew), Ciimisan (James) kaakii'okosihsimikonitc Aalpiyahsan (Alphaeus); a'a tahsh kaye Saaiman (Simon) kaakii'wiici'iwetc emawineshkawimintc pahkaan ahkiink eyaanitc kihciokimaan kaatipenimikowaatc; Cootahs (Judas) kaye kaakii'okosihsimikotc kotak Ciimisoon (James). 14 Kahkina hsa okoweniwak kiinakishkotaatiwak ekiimaamawi-inentamowaatc ekii'nihtaa'anami'aawaatc, ekii'wiiciiwaawaatc Meriin (Mary) Ciisahs omaamaan, ini kaye wiicihkiweyini. 15 Miihsh i'i ahpii ehkiishikaninik e'maawaci'itiwaatc niipiwa' otepwehtamook, ninkoci ko ninkotwaahk niishtana (120) kiihtahshiwak. Piitar tahsh kiihpasikwii ehkanoonaatc i'imaa eyaanitc, o'o ekii'inaatc, 16 "Niici​otepwehtamook, oncitako ishinaakwan cikii'ishihsekipan kaainahtek Kihcimasina'ikan, Kishemanitoo otAhcaahkwan kaakii'ihkitonikopanen mewisha, Tepitoon (David) eyaapaci'aanitc ekiih​tashimaanitc Cootahsan. Mii 'i iitok a'a Cootahs kaakiih​kihkinowinaatc i'i kaakiih​tahkonaanitc Ciisahsoon. 17 Cootahs (Judas) ohsha kewiin kii'ishi​takwakinso kiinawint eshi​ayaayank, ekii'onapamintc kewiin ciwiitoohkaasohpan o'o enanohkiiyank." 18 A'awe tahsh Cootahs kii'ataawekopan kihtikewahkiini ekiih​tipa'ikaaketc omacitootamowinik kaakii'onci​kashkihciketc. Miitahsh kaakii'acicipankishink ekiih​paashkiciishink, kahkina omihsataank eyaanikin kiihsaakicihseniwan. 19 Kahkina tahsh i'imaa Ceroosalamink (Jerusalem) kaakii'ayaawaatc kii'noontamook o'o ekii'ishihsenik. Miitahsh otishikiishwewiniwaank kaakii'wiintamowaatc i'i kihtikewahkamik Hakeltamaahk (Akeldama) ekii'ihkitoomakaninik, Ahki Miskwi Kaashisiikihsek. 20 Aaniihsh mii 'i eshipii'ikaatek i'imaa Nikamonan kaa'icikaatek Kihcimasina'ikanink: "Taka owaahkaa'ikan tanehpici​pishihshikwaani, awiyan i'imaa ci'ishitaasinik." Miihsh eni'ihkitoomakahk, "Kotak awiyan oka​otaahpinamini otanohkiiwin." 21 "Miitahsh eshinaakwahk peshik awiya cionaapamintipan kewiiciiwiyamintc. Ci'ontinintc i'imaa kaakii'nihtaa​wiiciiwiyamintc mekwaa Ciisahsoon kiipapaa-ayaanitc mekweya'ii eshi​ayaawankitc, 22 Cwaanan (John) Siika'antaakewininiwan ahpii kiimaacii​siika'antaakenitc piinihsh Ciisahsoon kii'onci​wanishkaanitc nipowinink. Mii hsa 'awe kewiiciiwiyamintc tipaatotenik kiiwepimaatisiwin," kii'ihkitoo. 23 Niishin tahsh ininiwa' okii'onaapamaawaa', Coosap Paarsapasoon (Joseph Barsabbas) kaakii'inimintc, Castahs (Justus) kaye kii-ishinihkaacikaniwi, ini tahsh kaye Mahtaayahs (Matthias) kaakii'inimintc. 24 Miitahsh kaa'ishi​anami'aawaatc ekii'ihkitowaatc: "Tepencikeyan, kiin kikihkenimaa awiya aaniin eshi​ayaatc ote'ink. Waapata'ihshinaam awenen wenaapamatc oko kaashi​niishiwaatc. 25 Cinaapishkawaatc, ci'inanohkiitc Cootahsan (Judas) ishinisha'waakan kaakiih​tinowinitc, ekii'ishaanitc kaakii'ishikashkihtamaasonitc," kii'ishi​anami'aawak. 26 Miitahsh kaa'ishi​otaahpinamowaatc wiinsowinan. Maahtaayahs itahsh mayaa kiimiihkawi​otaahpinikaateni owiinsowin. Kewiin tahsh i'imaa kii'ishi​takwakimaa eshi​ayaanitc mitaahshipeshik ishinisha'waakana.

Ishihcikewinan 2

1 Ahpii tahsh e'ocihcihsenik i'i Pentikwaast (Pentecost) Kiishikan kaakii'icikaatenik, peshikwanonk kahkina kii'ishi​maawaci'itiwak otepwehtamook. 2 Ketahto itahsh kekoon kihcikiishikonk kiihpi'onci​noontaakwan taapishkoo ekihci​matwenoowek ekii'inihtaakwahk, misiwe i'imaa waahkaa'ikanink kiimooshkinehtaakwan kaakii'ishi​apiwaatc. 3 Miitahsh kaakii'waapantamowaatc kekoonan taapishkoo ishkotewitenaniwimaank e'ishinaakwaninikin, eniikateshkaanikin. Pepeshik tahsh okiihpi​naasihkaakonaawaa ekiih​saamishkaakowaatc kaakiih​tahshiwaatc. 4 Kahkina tahsh okii'mooshkineshkaakowaan Kishemanitoon otAhcaahkoni. Miitahsh kaa'ishi​maacii​kakitowaatc pepahkaan ekii'ishikiishwewaatc Kishemanitoon otAhcaahkoni ekii'miinikowaatc o'o cishi​kashkihtoowaatc. 5 I'imaa tahsh Ceroosalamink (Jerusalem) kii'ishitaawa' Coowa' (Jews) ekii'anami'ewaatisinitc misiwe e'onciinitc eshi​pepahkaanwewaanakisinitc pemaatisinitc o'omaa ahkiink. 6 Ahpii tahsh enoontaaminitc aaniin enihtaakwaninik, pemaatisinitc kaakiih​paahtiinonitc kiimaamawi​piishaawa' ekii'wawaanentaminitc. Aaniihsh kahkina kaakiih​tahshinitc okii'noontaakowaa' e'ishikiishwewaatc tipinawe otishikiishwewininiink. 7 Kahkina hsa ko kii'maamahkaatentamoo', ekii'wawaanentaminitc e'ihkitonitc: "Kaawiin ina kahkina okoweniwak Kaalaliiwininiwak (Galilee) kaakaakiikitowaatc? 8 Aaniin itahsh wenci​noontawankitwaa e'ishikiishwewaatc kahkina okoweniwak pepahkaan kiinawint tipinawe kaaishi​kiishweyank? 9 Pepahkaan iitok kita'ayonciiwaamin: Paarhtiya (Parthia), Miitiya (Media), Iilam (Elam), iki kaye kaakii'onciiwaatc Mehsopohtemiya (Mesopotamia), Cootiiya (Judea), Kaahpatoohsha (Cappadocia), Paantahs (Pontus), Eshiya (Asia), 10 Pariciya (Phrygia), Paampiliya (Pamphylia), Iicip (Egypt), i'imaa kaye pepahkaan kaashi​ayaaniwank pehsho Saairiini (Cyrene) ootenaank Lipya (Libya) ahkiink. Iki tahsh kaye Oroomink (Rome) kaakiihpionci​kiiyootewaatc. Iki kaye aaninta Coowak kaakiih​kwehkinintwaa cipiminisha'amowaatc Coowi anami'aawin. 11 Aaninta tahsh Kariihtink, Arepiya ahkiink e'onciiyank. Wawiinke tahsh kinisitohtawaanaanik mayaa kitishikiishwewininaanink e'ishi​tashintamowaatc Kishemanitoon eshi​mashkawihcikenitc," kii'ihkitowak. 12 Kahkina tahsh kiimaamahkaatentamook ekii'wawaanentamowaatc kaye. Miitahsh kaa'ihkitowaatc: "Kaanaka wekotokwen o'o wenci-ishihsekwen?" 13 Aaninta tahsh kiihpaahpinotaakewak ekii'ihkitowaatc: "Onsaam ohsha niipiwa' minihkwewak oshki​shoominaapooni," kii'ihkitowak. 14 Piitar (Peter) tahsh kiihpasikwii kaakiiwiiciiwaatc i'i kotak mitaahshipeshik ishinisha'waakana'. Kiihkishiiwe tahsh o'o ekii'inaatc kaakiih​paahtiinonitc: "Kiinawaa niiciCoowak, kahkina kaye o'omaa Ceroosalamink (Jerusalem) eshitaayek! Weweni pisintawihshik o'owe kaawii'wiintamawinakook. 15 Kaawiin ohsha kiiwashkwepiihsiwak okoweniwak kiiwashkwepiiwak kaa'inenimekwaa. Payish iitok inaa shaankahso tipa'ikaneyaa ehkishepaawakahk. 16 Mii hsa 'oweni kaa'ihkitokopanen Coowal (Joel) Kishemanitoon kaakiih​kanootamawaatc: 17 'Tayishihse ishkwaac anikakiishikahk, ihkito Kishemanitoo, cisiikinamawakwaa nintAhcaahkwan kahkina pemaatisiwaatc. Kikosihsiwaak, kitaanihsiwaak itahsh kaye oka​kanootamawaawaan Kishemanitoon kitooshkiniikimiwaak tahsh kekoonan oka​waapantaanaawaan ishinamowinan, kikihciaya'aamiwaak tahsh wiin tapawaacikewak. 18 Iki hsa kaye kitanohkii'aakanak kaaininiiwiwaatc, kaaihkwewiwaatc itahsh kaye, weti anikakiishikaninik ninka​miinaak kahkina cinaasihkaakowaatc nintAhcaahkwan. Kahkina tahsh oka​kanootamawaawaan Kishemanitoon. 19 Ninka​ishihcike tahsh kekoonan cimaamahkaasinaakwahkin ishpimink tapahsaya'ii kaye ahkiink. Tawaapancikaate miskwi, ishkote, takihci'inaapahte tahsh kaye. 20 Kiisihs tahsh takashkiitipihki'aa, tipihkikiisihs miskwiink tashi​miskonaakosi. Mii'iwe tahsh keishiwepahk cipwaa ocihcihsenik ahpii kaaTipenciketc okiishikanom kaawiikihci'inentaakwaninik, kaawiimashkawentaakwaninik kaye. 21 Ta'ishihse tahsh, awenen iko kekanoonaatc kaaTipencikenitc cinaatamaakotc tapimaaci'aa.' 22 "Kiinawaa Isriyalak (Israel), pisintamok kaawii'ihkitoyaan: Ciisahs (Jesus) Naasaritink (Nazareth) kaakii'onciitc ininiink kii'inentaakosi ekii'onaapamikotc Kishemanitoon. Kishemanitoo tahsh kikiih​peteyaapanta'ikowaa ekii'onaapamaatc Ciisahsoon, ekii​aapaci'aatc cimaamahkaacihcikenitc, cimamaantaawihcikenitc, cikihkinawaacihcikenitc kaye. Kahkina iitok kikihkentaam o'o. 23 Kishemanitoo iitok niiyak kii'ishi​onentamokopan, niiyak kaye kiikihkentamokopan pisaan cikaahcitinimintc. Kiinawaa tahsh kaakii'akosaka'omek aashiteyaahtikonk ekii'nihsimek, ekii'wiici'inekwaa iki ininiwak peminisha'ansikwaa eshi​antawentaminitc Kishemanitoon. 24 Kishemanitoo tahsh okiihkiiwe​pimaatisi'aan, ekiih​kipihtinank cikakwaataki'ikohsinik i'i nipowin. Aaniihsh kaawiin kekoon otaa​kashki'ikohsiini cikihciwinikonitc i'imaa nipowinink. 25 Tepit (David) tahsh wiin kii'ihkitokopan ehtashimaatc onoweniwan: 'Nikanawaapamaa kaaTipenciketc mooshak e'oncishkawishkawitc. Nikihcinihkink inahke e'ishi​wiici'itc, kaawiin tahsh awiya ninka​wahkawinikohsii. 26 Miitahsh i'iwe wiinke misiwe ninte'ink wenci​moocikentamaan, maawac iko ehciihkentamaan o'o kaakakitoyaan. Mihsawaa piko niwiiyaw cinipoomakahk, tepwe hsa ninkehcina'aa Kishemanitoo i'iwe ci'ishihcike'itc. 27 Kaawiin iitok awaac kikaishi​nakashihsii anaamahkamik weti onipook kaaishi​ayaawaatc. Kaawiin kaye kiin Kishemanitoo kikapakitinihsii kaana'entami'inaan citashiwanaatahk niwiiyaw i'imaa nipowinink. 28 Kikiih​kihkentamo'ish keni'ina'atooyaan tepwe cipimaatisiyaan, wiinke hsa kikatepimoocikentamo'ish e'wiiciiwiyan.' 29 "Niici​otepwehtamook, oncita iko kiwii'wiintamawininim kikehteya'aaminaapan kaakiih​kihtentaakositc Tepit (David) ekii'nipotc, kaye tahsh ekii'ninkwa'ontc. Kaakii'ishi​na'inintc keyaapi o'o ishiahpii e'ayaanik o'omaa. 30 Kewiin iitok kiihtinowi kaakanootamawaatc Kishemanitoon. Okiikihkentaan kaakii'ishi​ahshotamaakotc Kishemanitoon, peshik opiiwesiiman ciani​kihciokimaawinitc, taapishkoo Tepit kaakii'ishikimaawitc. 31 Tepit niiyak okii'waapantaan aaniin waa'ishihcikenitc Kishemanitoon. Miitahsh kaakiih​tashintank keshi​kiiwe​pimaatisi'imintc ini oPimaaci'iwen Kishemanitoonk kepi'onciinitc. Miitahsh Tepit kaakii'ihkitotc: 'Kaawiin kii'nakanaahsii cinehpiciayaatc anaamahkamik eshi​ayaanitc kaaniponitc, kaawiin itahsh kaye owiiyaw tawanaatahsinini.' 32 Miitahsh Kishemanitoon kaakiih​kiiwe​pimaatisi'ikotc. Niinawint iitok ninkii​waapamaanaan a'a Ciisahs. 33 Miitahsh kaakii'ompinintc i'imaa nahke okihcinihkiniink Kishemanitoon cishikihci-inentaakositc. Miihsh i'i kaakii'miinikoowisitc Weyoosimimintc otAhcaahkoni kaakiiahshotamawintipan. Miitahsh i'iweni omiinikoowin kaasiikinank kiinawaa noonkom kaawaapantamek, kaanoontamek kaye. 34 Kaawiin iitok wiin Tepit (David) kihcikiishikonk kaakii'ishi​ompishkaatc, o'owe tahsh wiin kii'ihkito: 'KaaTipenciketc okii'inaan ini kaaTipenimimitc: I'imaa ishinamatapin ninkihcinihkink inahke, 35 paanimaa hsa kikaishi'in cishaakooci'atwaa kaanishkenimihkwaa.' 36 "Taka tahsh kahkina kiinawaa Isriyalak (Israel) kaatinowiyek kehcinaac kihkentamok, mii 'awe Ciisahs kaatashimak kaakii'akosaka'wek aashiteyaahtikonk, okii'onahsikoon Kishemanitoon cimaamawi​Tipenciketc, wiin kaye okii'onaapamikoon ciPimaaci'iwetc." 37 Aahpii tahsh pemaatisiwaatc enoontamowaatc o'o, kii'onci​mikoshkaatentamook ekii'inaawaatc Piitaroon, i'i kaye kotak ishinisha'waakana': "Niici​otepwehtamoominaanik, aaniin tahsh keishihcikeyaank?" 38 Piitar (Peter) tahsh okii'ishi​nahkwehtawaa': "Kwehkipimaatisik, siika'antaasok itahsh kaye kahkina kaatahshiyek otishinihkaasowinink Ciisahs, cipoonencikaatekin kimacitootamowiniwaan; miitahsh i'i cimiinikoowisiyek Kishemanitoo otAhcaahkwan. 39 Mii 'oweni Kishemanitoo kaakii'ahshotamawinek ewiimiininek, i'i kaye kiniicaanihsiwaa', i'i kaye waahsa eyaanitc. Kahkina hsa ko awiya' kaaTipenciketc kiKishemanitoominaan ke'antomaatc cipinaasihkaakotc," kii'ihkito. 40 Niipiwa' tahsh Piitar kii'ayihkito ekii'ayenkwaamimaatc ekiih​kakwe​kashkimaatc: "Tapasiinotamowahk otishiwepisiwiniwaan kaamacaatisiwaatc, ci'ishihsehsiwek keshihsewaatc." 41 I'i tahsh kaakiih​tepwehtaakotc ehkitotc kiisiika'antaasowa' nihsink mitaahswaahk (3,000) ekiih​tashinitc. Miihsh kaa'ishi​takwakimimintc i'imaa eshi​ayaanitc otepwehtamoo'. 42 Miitahsh iko mooshak i'imaa kaa-ayaanitc ekiih​pisintaminitc eshi​kihkino'amaakewaatc ishinisha'waakanak. Ekii'ishi​wiitoohkaasonitc itahsh kaye eshi​wiihsininaaniwaninik pehkihsh ekii'anami'enaaniwaninik. 43 Kahkina tahsh pemaatisiwaatc kiimaamahkaatentamook ishinisha'waakana' niipiwa' ekiih​tootaminitc maamahkaacihcikewinan, ini kaye kihkinawaacihcikewinan. 44 Kahkina tahsh otepwehtamook kiimaamawi'itiwak. Kahkina kaye otaya'iimiwaan pehpeshikwan ekii'ishi​maamawihcikewaatc. 45 Okii'ataawaakenaawaan tahsh otaya'iimiwaan, tepentamowaatc kaye. Miitahsh kaa'ani-ishi​ayaanihke​maamaawata'oonitiwaatc aaniin hsa ko awiyan eshi​noontehsenitc. 46 Entahsokiishik itahsh kii'nihtaa​maawaci'itiwak piincaya'ii kihcianami'ewikamikonk. Otaawiniwaank ekiihtashi​pahkwepinaawaatc pahkweshikanan ekii'maamawi​wiihsiniwaatc, wiinke ekiih​ciihkentamowaatc ote'iwaank. 47 Ekii'nanaahkomaawaatc Kishemanitoon, kahkina kaye awiya' ekii'minwaapamikowaatc. KaaTipenciketc tahsh okii'ani​takwakimaa' i'i entahsokiishik kaakiih​pimaaci'imintc.

Ishihcikewinan 3

1 Aapintink ehkiishikaninik Piitar (Peter), a'a kaye Cwaan (John) kii'ishaawak kihcianami'ewikamikonk e'ishkwaa​naawahkwenik ahpii kaakiinihtaa-anami'aaniwaninik enihso​tipa'ikaneyaanik. 2 Peshik tahsh inini kaakiih​kashkihtoohsik cipimohsetc ekii'maahkinihtaawikitc kii'nihtaa​piicikaniwi i'imaa wenci​piintikenk kihcianami'ewikamikonk "Wenishihshink" ecikaatenik. Mii 'imaa kaa'ishi​nihtaa​pakohsenimotc cimiinikotc iniweniwa' kihcianami'ewikamikonk kaapiintikenitc. 3 A'a tahsh inini ewaapamaatc Piitaroon, Cwaanan kaye e'ani​piintikenitc kihcianami'ewikamikonk okiih​kakwecimaa' ciimiinikotc shooniyaan. 4 Piitar ewiiciiwikotc Cwaanan okiih​kanawaapamaawaan ini ininiwan ekii'inaawaatc: "Kanawaapamihshinaam!" 5 Okiih​kanawaapamikowaan itahsh, kekoon ninka​miinikook e'inentaminitc. 6 Piitar tahsh okii'inaan: "Kaawiin nintayaawaahsii waapaapihko​shooniyaa, osaawaapihko​shooniyaa kaye cimiininaampan. Kaa'ayaayaan tahsh wiin kekoon kikamiinin. Ciisahs Christ otishinihkaasowinink Naasaritink (Nazareth) kaaonciitc kitishikanoonin: Pasikwiin cipimohseyan!" 7 Okiih​tepinaan itahsh okihcinihkiniink ekiih​pasikoncipinaatc. Shemaak tahsh ositini, onaanini kaye ini ininiwan kiimashkawi​ayaamakaniniwan. 8 Shemaak itahsh a'a inini kiihpasikoncihse ekii'ayishpikwaashkwanitc, miihsh kaa'ishi​pimohsetc ekii'ani​piintikewiiciicwaatc i'imaa kihcianami'ewikamikonk. Wiinke kiihkihci​ayishpikwaashkwani ekii'miikwehciwenimaatc Kishemanitoon. 9 Kahkina tahsh awiyak ewaapamawaatc ehpimohsenitc, enanaahkomaanitc kaye Kishemanitoon, 10 okii'nihsitawinawaawaan eyaawinitc kaakii'nihtaa​namatapinitc ehpakohsenimiwenitc i'imaa "Wenishihshink Ishkwaantem" eicikaatenik kihcianami'ewikamikonk. Wiinke tahsh kii'wawaanentamook, kiimaamahkaatentamook kaye aaniin i'i kaakii'ishihsenitc. 11 Mekwaa tahsh a'a inini kaakiiminoayaa'intc ekihciwinaatc Piitaroon, Cwaanan kaye, kahkina awiya' kiimaamawi​piicipa'itiwa' i'imaa kaakii'ishi​ayaawaatc eshi​patahkitenik Swaalaman (Solomon) otaanihkawihcikan ecikaatenik ekiikihci​maamahkaatentaminitc. 12 Ahpii tahsh Piitar ewaapamaatc okiih​kanoonaa' o'o ekii'inaatc: "Kiinawaa Isriyalak, wekonen wenci​maamahkaatentamek o'o, wekonen kaye wenci​kihci​kanawaapamiyaank taapishkoo e'inentamek niinawint iko nimashkawisiiwininaaniink, komaa kaye eshi​kwayahko​anami'aayaank e'onci​kashkihtootc cipimohsetc. 13 OKishemanitoomiwaan ohsha Eparahaam (Abraham), Aaisik (Isaac), Cekap (Jacob), iki kaye oKishemanitoomiwaan kikehteya'aaminaapaniik, mii ohsha 'awe Kishemanitoo kaawaapanta'iwetc aaniin ehpiici​kihci'inentaakosinitc ini otAnohkii'aakanan Ciisahsoon. Kiinawaa iitok kaakiih​pakitinimek ci'onahshowaasonitc, ekii'aanawenimimek kaye enaahsamiinitc onahshowewikimaan Paailatoon (Pilate) aanakii'inentaminitc cipakitinimintc. 14 Shaakooc itahsh kiinawaa kikii'aanawenimaawaa a'a kehtentaakositc, kweyahkwaatisinitc kaye, meshkwac ekii'antotamaakeyek cimiinikooyek onihshiwe. 15 Kikii'nihsaawaa tahsh a'a Tepentank pimaatisiwin, Kishemanitoon itahsh okiihkiiwe​pimaatisii'ikoon. Niinawint ohsha o'o ninkiihpi​waapantaamin. 16 Inashke kiwaapamaawaa wa'a inini, kikihkenimaawaa kaye. Ekiih​tepweyentank owiinsowinini Ciisahsoon, mii 'i wenci​minoayaatc. Ekiih​tepweyenimaatc Ciisahsoon, mii 'i wa'a inini wiinke wenci​minoayaatc kahkina awiyan kaawaapamikotc. 17 Nintinawemaakanak, ninkihkentaan ohsha ekii'nihsitohtansiwek i'i kaakii'ishihcikeyek. Miitahsh peshikwan kaa'ishihcikewaatc kiniikaanisiimiwaak. 18 Miitahsh i'i nahke Kishemanitoo kaa'ishi​mooshkinehsenik kaakii'ihkitokopanen kiiaapaci'aatc kahkina kenootamaakotc. Ekiihpi'ihkitonitc cikakwaatakihtoonitc ini kaakii'onaapamaatc. 19 Kwehki​pimaatisik itahsh, pikiiwe​naasihkawihk kaye Kishemanitoo cipoonencikaatekin kimacitootamowiniwaan. Miitahsh ci'ishihsenik kaaTipenciketc cimiininek anwehshinowin i'imaa kitahcaahkowaank, 20 ekiih​piicinisha'waatc Ciisahsoon. Miiwan iitok ini Kishemanitoo kaakiih​kiishaaci​onaapantamawinek. 21 Miitahsh weti Ciisahs keayaatc kihcikiishikonk piinihsh ahpii ocihcihsenik Kishemanitoon kaawiih​kiiwe​oshihtootc kahkina kekoon. Mii 'i iitok kaa'ishi​ahshotamaakekopanen mewisha kiiaapaci'aatc kehtentaakosinitc okanootamaake'. 22 Moosihs (Moses) iitok kii'ihkito: 'KaaTipenciketc kiKishemanitoomiwaa kika'ishinisha'amaakowaa okanootamaaken taapishkoo niin tino ci'ontinaatc mekweya'ii kipimaatisiimiwaank. Miiwan tahsh ini kepisintawimek kahkina kekoon eshi​wiintamawinimek. 23 Awenen tahsh iko kepisintawaahsik ini okanootamaaken tatootawaa ciwiiciiwaahsik Kishemanitoon opimaatisiimini.' 24 Saamiyoo (Samuel) kaakiih​pi'ihkitotc, iki kaye kahkina okanootamaakek kaakiih​pi'aawaatc kii'ishkwaa'ayaanitc, okiih​tashintaanaawaa o'o noonkom kaa'ishihsenik. 25 Kiinawaa tahsh kimiinikoom iniweniwan Kishemanitoo otahshotamaakewinan kenootamaakotc kaakii'ihkitonitc. Miitahsh kaye kaa'onci​tipentaakosiyek Kishemanitoo kaakii'ishi​ahshotamawaatc kikehteya'aaminaapanii' ekii'inaakopanen Eparahaaman (Abraham): Kiin hsa kipiiwesiimak onci, kahkina kaapepahkaanwewaanakisiwaatc pemaatisiwaatc ta'onci​shawentaakosiwak. 26 Miitahsh Kishemanitoo kaakii'onaapamaatc otAnohkii'aakanan. Ekii'ishinisha'amawinek kiinawaa nihtam aaniihsh kikiih​shawenimikowaa entahso​peshikoyek, cinakatamowek kimaci'ishiwepisiwiniwaan," kii'ihkito Piitar (Peter).

Ishihcikewinan 4

1 Mekwaa tahsh ehkanoonaawaatc pemaatisinitc okiihpi​otihsikowaan anami'ewikimaan, ini kaye kaakii'okimaahkantawaanitc kenawentaminitc kihcianami'ewikamik, i'i tahsh kaye Saacahsii' (Sadducees). 2 Kaawiin okii'minohtaakohsiiwaa' ekii'onci​mikoshkaatentaminitc ekihkino'amawaawaatc pemaatisinitc. Aaniihsh okiih​tashintaanaawaa ekiihkiiwe​pimaatisinitc Ciisahsoon, awiyan kaye nipowinink e'onci​kiiwe​pimaatisinitc. 3 Miitahsh kaa'ishi​otihtinikowaatc ekiih​kipa'okowaatc kapetipihk, aaniihsh aasha kii'onaakohshinini. 4 Niipiwa' itahsh kaakii'noontaminitc i'i tipaacimowin kiihtepwehtamoo', ninkociko naaniink mitaahswaahk 5,000 ekiih​tahshinitc. 5 E'ani​waapaninik tahsh iki wekimaawiwaatc Coowak, kaaniikaanisiwaatc kaye, iki tahsh kaye kehkino'amaakewaatc onahshowewin kiimaawaci'itiwak i'imaa Ceroosalamink (Jerusalem). 6 Aanas (Annas) kihcianami'ewikimaa tahsh kaye i'imaa kii'ayaa, Keyahpahs (Caiaphas) kaye, a'a kaye Cwaan (John), a'a tahsh kaye Aalikihsaantar (Alexander). Iki tahsh kaye kahkina enawemaawaatc kihcianami'ewikimaan. 7 Naawaya'ii tahsh eshi​ayaawaatc okii'ishi​niipawi'aawaa' ishinisha'waakana' o'o ekii'ishi​kakwecimaawaatc: "Wekonen tino mashkawisiiwin o'o wenci​tootamek, awenen itahsh kaye owiinsowin kaayaapacihtaawek?" okii'inaawaa'. 8 Piitar tahsh emooshkineshkaakotc Kishemanitoon otAhcaahkoni o'o okii'ishi​nahkwehtam: "Kiinawaa wekimaawiyek Isriyalak, kaaniikaanisiyek kaye, 9 kiishpin wiihkakwecimiyaank o'owe noonkom kaakiishikahk kaakii'minotootawintc wa'a inini kaamaahkisitc aaniin kaa'ishi​minoayaa'intc, 10 taka hsa kihkentamok o'o kahkina kaatahshiyek, kekiinawaa tahsh Isriyalak (Israel): wa'a inini kaaniipawitc o'omaa wiinke kii'onci​minoayaa owiinsowininiink Ciisahs Christan Naasaritink (Nazareth) kaakii'onciinitc. Miiwan ini kaakii'akosaka'omek, Kishemanitoon itahsh kaakiih​kiiwe​pimaatisii'ikotc. 11 Ciisahs hsa kaatashimintc o'o kaaishipii'ikaatek Kihcimasina'ikan: 'A'a hsa ahsin kaakii'aanawenimek kaawaahkaa'ikeyek, mii'awe mayaa kepi​maacii​kihci'inentaakositc ahsin,' ishipii'ikaate. 12 Kaawiin iitok kotak awiya otayaahsiin pimaaci'iwewin, aaniihsh kaawiin kotak ayaahsinoon ishinihkaasowin o'omaa ahkiink awiya ke'onci​pimaaci'ikoowisihpan." 13 Ahpii tahsh ewaapantamowaatc aaniin ehpiihci​soonkite'enitc Piitaroon, ini kaye Cwaanan, mii 'i kaakiikihkentamowaatc kekoon ekii'inakinsohsinik, ekiih​kihkino'amawaahsiwimintc itahsh kaye, wiinke kiikihci​maamahkaatentamook. Miitahsh kaakiikihkenimaawaatc ekii'wiiciiwaanitc ini Ciisahsoon. 14 Ewaapamaawaatc itahsh kaye ini ininiwan kaakii'minoayaa'imintc ewiicikaapawihtaakonitc, mii 'i wiinke kaa'ishi​kwenawi'ihkitowaatc. 15 Miitahsh kaa'ishi​kanoonaawaatc ohpimeya'ii ci'ishaanitc kaakii'ishi​maawaci'itiwaatc onahshowewikamikonk, miihsh kaa'ishi​maacii​kakanoonitiwaatc. 16 Miihsh kaa'ihkitowaatc: "Aaniin tahsh ketootawankwaa oko ininiwak. Kahkina awiya' kaataanitc Ceroosalamink (Jerusalem) okihkentamini o'o kaakii'ishihcikewaatc kihci​maamahkaacihcikewin, kaawiin tahsh kikakashkihtoohsiimin ciyaanotamank. 17 O'o tahsh awahshime cimisihteshkaamakahsinok eshi​ayaawaatc pemaatisiwaatc, taka hsa kihci​nooci'aataanik miinawaa citashintamawaahsikwaa awiya' o'o wiinsowin." 18 Okiihkiiwe​antomaawaa' itahsh miinawaa ishinisha'waakana' cipiintikenitc, miihsh kaa'ishi​ayenkwaamimaawaatc awahshime citashintansinik, cikihkino'ikehsinik otishinihkaasowininiink Ciisahsoon. 19 Piitar tahsh, a'a kaye Cwaan kii'ishi​nahkwehtamook: "Kiinawaa onentamok aaniin eshi​minonamokwen Kishemanitoo. Maakishaa kiinawaa cina'ihtaakooyek, komaa kaye Kishemanitoo cipisintawankipan. 20 Kaawiin ohsha niinawint nintaa​kashkihtoohsiimin cipooni​tashintamaank kaakii'waapantamaank, kaakii'noontamaank itahsh kaye," kii'ihkito. 21 Aahpii kaa'ishkwaa-ayenkwaamimintwaa awahshime ewiih​kakwaataki'intwaa, miitahsh kaa'ishi​pakitinintwaa. Kaawiin kekoon kii'mihkikaatehsinini ke'onci​onaahkonintwaapan aaniihsh kahkina pemaatisinitc okii'nanaahkomaani Kishemanitoon o'o onci kaakii'ishihsenik. 22 A'a tahsh kaye inini kaakii'maamahkaaciminoayaa'intc awahshime niimitana (40) kiitahsopipoonwe. 23 Ahpii kaa'ishkwaa​pakitinintwaa kii'ishi​kiiwewak eshi​ayaanitc owiici​otepwehtamoomiwaa' ekiih​tipaacimowaatc kahkina kekoon aaniin kaa'ikowaatc i'i kihcianami'ewikimaa', i'i kaye kaaniikaanisinitc Coowa'. 24 Ahpii otepwehtamook enoontamowaatc o'o, okii'maamawi​anami'ehtawaawaan Kishemanitoon e'ihkitowaatc: "Oo Tepencikeyan, kiin kaakii'oshihtooyan kihcikiishik, ahki, kihcikam kaye, kahkina kaye i'imaa eyaakin, 25 Kiin Kishemanitoo kitAhcaahk kikii'aapaci'aa kiimiinatc kitanohkii'aakan Tepit (David) ninkehteya'aaminaapan o'o kii'ihkitokopanen: 'Wekonenini wenci​kitaasowaatc pahkaan wenciiwaatc ahkiink, wekonenini hsa kaye ishianihshaa wenci'inentamowaatc i'i ewii'ishihcikewaatc. 26 Kihciokimaak o'omaa ahkiink kii'oshiihtaawak, tepenimiwewaatc kaye kiimaawaci'itiwak ewii'miikaanaawaatc kaaTipencikenitc, iniweniwan kaye kaakii'onaapamaanitc.' 27 O'omaa hsa otenaank tepwe tashi​maawaci'itiwak a'a Herat (Herod), Paantiyahs Paailat (Pontius Pilate) kaye, iki tahsh kaye kaaCoowiwihsikwaa. Ewii'maanshi​tootawaawaatc kaana'entami'imihk kehtentaakosinitc kitAnohkii'aakanan Ciisahsoon kaakii'onaapamimatc. 28 Ekii'ishihcikewaatc kimashkawisiiwinink, kitinentamowinink kaye niiyaak kaakii'onci​onahtoowampanen ci'ishihsek. 29 Inashke tahsh noonkom Tepencikeyan, waapantamow eshi​ahshotamawiyamintwaa ewiih​tootawiyamintwaa. Taka hsa tahsh miishihshinaam soonkite'ewin e'otanohkii'aakanimiyaank ciwiintamaakeyaank kitihkitowin. 30 Waapanta'iwen kashki'ewisiwin e'ayaayan ciminoayaa'iweyan. Pakitinan kaye kihkinawaacihcikewinan, maamahkaacihcikewinan kaye citoocikaatekin owiinsowinink kaakihtentaakositc kitAnohkii'aakan Ciisahs." 31 Ahpii tahsh kaaishkwaa-anami'aawaatc kiikoshkohseni i'imaa eshi​ayaawaatc. Kahkina tahsh okii'mooshkineshkaakowaan Kishemanitoon otAhcaahkoni, miihsh kaa'ishi​waawiintamowaatc Kishemanitoon otihkitowinini ekiih​soonkite'ewaatc. 32 Emaamawi​ayaawaatc tahsh otepwehtamook peshikwan kii'inentamook, peshikwan kii'ishite'ewak. Kaawiin tahsh awiya cikii'ihkitotc kekoonan e'ayaatc wiin ehta ehtipinawewisitc, kahkina hsa ko kekoonan kiimaamawihcikewak. 33 Aahpici tahsh kiihkihci​mashkawihcikewak ishinisha'waakanak ehtipaatotamowaatc kaakii'ishi​kiiwepimaatisinitc kaaTipencikenitc Ciisahsoon. Kahkina tahsh kaye kaatahshiwaatc okii'otihsikonaawaa Kishemanitoon okihci​shawencikewinini. 34 Kaawiin tahsh awiya kiihkitimaakisihsii eshi​ayaawaatc, aaniihsh kahkina kaakiih​tipentamowaatc ahkiin, waahkaa'ikanan itahsh okii'ataawaakenaawaan. Shooniyaan tahsh kaakiih​tipa'amawintwaa okiih​piinaawaan, 35 ekii'ishi​pakitinaawaatc eshi​ayaanitc ishinisha'waakana'; miitahsh kaakii'ishi​maamaata'ohkiinitc. 36 Miitahsh o'o Coosap (Joseph) kaa'ishihciketc, anami'e​anohkii'aakan Liipait (Levite) kaatinowitc kaakii'onciitc Saaiparahs (Cyprus) minihsink, Paarnapahs (Barnabas) kaakii'ishinihkaanikotc ishinisha'waakana'. Owiinsowin tahsh "Menwentami'iwetc" kii'ihkitoomakanini. 37 Kihtikewahkiini okii'ayaan, miihsh kaa'ishi​ataawaaketc ekiih​piinaatc shooniyaan kaakiih​tipa'amawintc i'imaa eshi​ayaanitc ishinisha'waakana'.

Ishihcikewinan 5

1 Peshik tahsh inini Aananaayahs (Ananias) eshinihkaasotc, wiiwan tahsh ewiiciiwikotc Sapaira (Sapphira) eishinihkaasonitc, okii'ataawaakenaawaa aaninta otahkiimiwaa tepentamowaatc. 2 Wiiwan tahsh ekii'wiici'inentamoomikotc kiihkanawentamaaso aaninta shooniyaan kaakii'ontisitc. Minihk itahsh kaa'ishkohsenitc okii'ishiwinaan ekiih​pakitinaatc eshi​ayaanitc ishinisha'waakana'. 3 Piitar (Peter) tahsh okii'inaan Aananaayahsoon: "Wekonen tahsh wenci​pakitinamawatc Setan (Satan) citipentank kite'ini ekiiwanimohtawimatc Kishemanitoo otAhcaahkwan, ekiih​kihciwinamaasoyan aaninta shooniyaa kaakii'inakintek kitahkiim. 4 Kiin iitok kikiih​tipinawewihs i'i ahki cipwaa ataawaakeyan. Kii'ishkwaa-ataawaakweyan tahsh, kiin kikihtipenimaa a'a shooniyaa. Wekonen tahsh kaa'onci-inentaman sesik ewii'ishihcikehsiwan? Kaawiin wiin inini kaakiiwanimohtawatc, Kishemanitoo ohsha," okii'inaan. 5 Ahpii tahsh Aananaayahs enoontank aaniin ecikaniwitc, mii 'i kaa'ishi​kawihsetc ekii'nipotc. Kahkina tahsh kaakii'noontamowaatc o'o wiinke kiihsekisiwak. 6 Oshkiniikiwak tahsh kiihpipiintikewak ekiih​titipeyiikinamowaatc i'i wiiyaw. Miitahsh kaa'ishi​saakisihtoowaatc ekii'awi​na'inamowaatc. 7 Paanimaa tahsh ninkoci ko nihsotipa'ikan (3) e'ishihsenik, kiihpipiintikewan Aananaayahs wiiwan ekiih​kihkentasinik aaniin kaakii'inahkamikaninik. 8 Piitar tahsh okii'inaan ini ihkwewan: "Wiintamawihshin, mii na 'owe minihk kaa'ontisiyek kiiataawaakeyek kitahkiimiwaa?" O'o tahsh okii'ikoon: "Eha', mii 'iwe minihk kaa'ontisiyaank," okii'ikoon. 9 Piitar tahsh okii'inaan: "Wekonen tahsh minciniish kaa'onci-inentamek ewiih​kotenimimek kaaTipenciketc otAhcaahkwan? Inashke iki ininiwak kaakii'awi​na'inaawaatc kinaapeman aasha o'omaa ishkwaantenk pimi'ayaawak, kekiin tahsh kikasaakisi'ikook," okii'inaan. 10 Shemaak itahsh kiihkawihsewan eshi​sitekaapawitc ekii'niponitc. Oshkiniikiwak ehpipiintikewaatc okii'waapamaawaan eniponitc. Miitahsh kaa'ishi​saakisi'aawaatc ekii'awi​na'inaawaatc ishiohpime onaapemipanini kaakii'ishi​na'inimintc. 11 Sekisiwin tahsh okii'otihsikonaawaa kahkina otepwehtamook kaashi​maawaci'itiwaatc, iki kaye kahkina kaakii'noontamowaatc o'o. 12 Ishinisha'waakanak tahsh okiih​tootaanaawaan niipiwa' maamahkaacihcikewinan, kihkinawaasaapanta'iwewinan eshi​ayaanitc pemaatisinitc. Kahkina tahsh otepwehtamook kii'ishi​maawaci'itiwak i'imaa Swaalaman (Solomon) otapinawihcikan eicikaatenik. 13 Iniweniwa' itahsh wiin pehkaanisinitc kaawiin kiihtepakenimohsiiwa' ciwiiciiwikowaatc. Shaakooc hsa ko pemaatisinitc okiikihtakimikowaa'. 14 Awahshime hsa kii'ani​paahtiinowak otepwehtamook kaakiih​tepwehtawaawaatc kaaTipencikenitc, ininiwak, ihkwewak kaye. 15 Miitahsh kaa'ishihcikewaatc ekii'ishiwinaawaatc kaa'aahkosinitc miihkanaahkaank. Ekii'ishi​pimihshimaawaatc nipewinink, ahpishimonink kaye, kanake hsa ko cisaamishkaakonitc otakawaahteshinowinini Piitaroon i'imaa pimohsenitc. 16 Kiihpaahtiinowa' hsa pemaatisinitc kaakiih​piishaanitc, waahkaaya'ii ootenawan eyaanikin Ceroosalamink (Jerusalem) ekii'ayonciinitc. Okiihpiinaani kaakii'aahkosinitc, kaakiih​kakwaataki'ikonitc kaye maciahcaahkwa', kahkina tahsh kii'minoayaawaa'. 17 Miitahsh a'a kihcianami'ewikimaa, i'i kaye kahkina kaakii'wiiciiwikotc Saacahsiihkaank (Sadducees) kaakii'ishi​wiicihtwaanitc, wiinke hsa okii'ayaashenimaawaa' ishinisha'waakana'. Kekoon itahsh okii'wiihtootawaawaa'. 18 Okii'otihtinaawaa' itahsh ishinisha'waakana' ekiih​tahkonaawaatc, ekii'ishi​piinciwepinaawaatc nehtaatashiayaanitc kaakipa'omintc kotak awiya'. 19 Ehtipihkaninik tahsh kaaTipenciketc otencaliman kiihpiishaawan ekiih​paahkintenaminitc kipa'otiiwi-ishkwaantem. Miitahsh kaa'ishi​saakiciwinaatc ishinisha'waakana' ekii'inaatc: 20 "Maacaak, awiniipawik kihcianami'ewikamikonk ciwiintamawekwaa pemaatisiwaatc, cimooshkineyaatotek o'o oshki​pimaatisiwin," okii'inaa'. 21 Kii'ishihcikewak kaakii'inintwaa. Kiihtipihkinaakwanini piko ehpiintikewaatc kihcianami'ewikamik, miihsh kaa'ishi​maacii​kihkino'ikewaatc. Kihcianami'ewikimaa tahsh, kaawiiciiwikotc kaye, okii'maamawi​antomaawaa' i'i kahkina kaaonahshowenitc, i'i kaye kaaniikaanisinitc Coowa' ci'onaahkonikewaatc. Kii'ishinisha'owewak tahsh kiipa'otiiwikamikonk cipiinimintc tahkonikana'. 22 Shimaakanihshak tahsh e'ishaawaatc, kaawiin okii'mihkawaahsiwaawaa' ishinisha'waakana'. Kiihkiiwewak itahsh e'awi​tipaacimowaatc ekii'ihkitowaatc: 23 "Nikii'waapantaamin kipa'otiiwi'ishkwaanteman eyaayiici​kipaapihka'ikaatekin, okanawencikek kaye eniipawiwaatc ishkwaantemihkaank. Ahpii tahsh epaahkintenamaank, kaawiin awiya piintik ninkii'mihkawaahsiwaanaan," kii'ihkitowak. 24 Ahpii tahsh kanawencikewi​shimaakanihshiiwikimaa kihcianami'ewikamikonk, a'a tahsh kaye kihcianami'ewikimaa enoontamowaatc o'o e'ihkitonitc, wiinke kii'mikoshkaatentamook ekiih​kihkentansikwaa aaniin keni'ayishiwepanokwen. 25 Peshik itahsh awiyan okiihpi​wiintamaakowaan: "Inashke naa iki ininiwak kaakiih​tahkonekwaa kipa'otiiwikamikonk, kiimatwe​niipawiwak inaa kihcianami'ewikamikonk ehkihkino'amawaawaatc pemaatisinitc," okii'ikowaan. 26 Kii'ishaa tahsh a'awe shimaakanihshiiwikimaa ekii'wiiciiwaatc oshimaakanihshiima'. Miitahsh kaa'ishi​piinaawaatc ishinisha'waakana' weweni ekiih​tootawaawaatc aaniihsh okiih​kohsaawaa' pemaatisinitc cipapiimwahsina'ikowaatc. 27 Ahpii tahsh kaahpiinaawaatc, okii'inaahsamikaapawi'aawaa' eshi​apinitc onahshowewininiwa'. Kihcianami'ewikimaa tahsh okiih​kakwecimaa', 28 ekii'ihkitotc: "Wiinke iitok kitaanakii'ayenkwaamimikoom awahshime cishi​kihkino'amaakehsiwek Ciisahs owiinsowinink. Inashke tahsh misiwe ayaamakan i'i kikihkino'amaakewiniwaa i'imaa Ceroosalamink (Jerusalem). Miitahsh kekwetootawiyaank niinawint cianaamentaakosiyaank i'i kaakii'ishinihsintc," kii'ihkito. 29 Piitar (Peter) tahsh, iki kaye kotak ishinisha'waakanak kii'ishi​nahkwehtamook ekii'ihkitowaatc: "Nawac taaishinaakwaan cina'ihtawankitipan Kishemanitoo ahpiihc ininiwak. 30 Kaakii'oKishemanitoomiwaatc kikehteaya'aaminaapaniik ohsha okiihkiiwe​pimaatisi'aan Ciisahsoon, kiinawaa kaakii'nihsimek aashiteyaahtikonk. 31 Miiwan itahsh ini Kishemanitoo kaakii'ishi​pakitinaatc okihcinihkinink inahke ekii'inakimaatc Oniikaaniihtamaake, kaye tahsh Opimaaci'iwe cimiinikoowisinitc Isriyala' cikwehkaatisinitc cipoonentamawimintc eshi​macitootaminitc. 32 Niinawint tahsh nintipaatotaamin iniweniwan kaawaapantamaank, Kishemanitoo otAhcaahkwan kaye tipaacimowan. Miiwan ihsa ini kaamiikiwaaketc emiinaatc i'i kaana'ihtaakotc," kii'ihkitowak. 33 Iki tahsh kaaonahshowewaatc ahpii enoontamowaatc i'i, wiinke hsa okii'nishkimikowaa' ekii'inentamowaatc cinihsaawaatc ishinisha'waakana'. 34 Peshik tahsh Perahsii (Pharisee) Kameliyal (Gamaliel) eshinihkaasotc ekii'nihtaa​kihkino'amaaketc onahshowewin, kahkina kaye awiya' okiikihtenimikoo'. Miitahsh a'a kaakiih​pasikwiitc ekii'anoohkiitc pinamaa cisaakisi'imintc ishinisha'waakana'. 35 Miitahsh o'o kaa'inaatc: "Kiinawaa Isriyalak (Israel), ayenkwaamisik aaniin kaawiih​tootawekwaa oko ininiwak. 36 Inashke mewishayiishko kiihpi'ayaa Tiyootahs (Theudas) ekiihkihci-inwaanintisotc, kekaa maawiin niiwaahk ininiwa' okiih​piminisha'okoo'. Miitahsh i'i kaakii'nihsintc, kaakiih​piminisha'okotc itahsh kii'ohsweyaamohkaasowa'. Kaawiin tahsh kiikihkentaakwahsinini otishihcikewin. 37 Kaa'ishkwaa​nihsintc tahsh a'a inini, Cootahs (Judas) kewiin kiihpi'ayaa Kaalaliiwiahkiink (Galilee) ekii'onciitc ahpii kii'akimintwaa kahkina awiyak. Niipiwa' itahsh awiya' okiikashkiaa' cipiminisha'okotc. Kewiin tahsh kiinihcikaniwitc, kahkina kaakiih​piminisha'okotc kii'oswepa'iwewa'. 38 O'o tahsh noonkom kaainahkamikahk, mii 'owe eninakook, keko kekoon tootawaahkekwaanik iki ininiwak. Kiishpin hsa i'i enentamowaatc, eshihcikewaatc kaye, ininiink wenciimakaninikwen, kaawiin tani​kihkentaakwahsinini. 39 Kiishpin tahsh wiin Kishemanitoonk wenciimakaninikwen kaawiin kikashaakoociaahsiwaawaak. Miitahsh i'i cikoshkwentamek Kishemanitoo iinsan emiikaanek," Kameliyal kii'ihkito. Kii'ishihcikewak itahsh kaakii'inintwaa. 40 Miihsh kaa'ishi​kiiwepiintikanaawaatc ishinisha'waakana' ekiih​pahshanshe'waawaatc, ekiihkishii​kanoonaawaatc kaye awahshime ci'onci​kaakiikitohsinik owiinsowininiink Ciisahsoon. Miitahsh kaa'ishi​pakitinaawaatc. 41 Ishinisha'waakanak tahsh kii'onci​maacaawak eshi​ayaanitc onahshowewininiwa', wiinke ekii'minwentamowaatc ekii'inakimintwaa ehte​ahpiihtentaakosiwaatc ci'onci​akaci'intwaa owiinsowininiink Ciisahsoon onci. 42 Kaawiin tahsh cikiihkipihciiwaatc entahsokiishik ekiih​kihkino'amaakewaatc, ekiih​kakiihkwewaatc kaye i'imaa kihcianami'ewikamikonk, eyishitaanitc kaye pemaatisinitc ekii'ihkitowaatc: "Ciisahs ohsha mii 'awe Kishemanitoon kaakii'onaapamikotc cipimaaci'iwetc."

Ishihcikewinan 6

1 Mekwaa hsa ahpii kiini​paahtiinowaatc kihkino'amawaakanak kaakiih​tepwehtawaawaatc Ciisahsoon. Kariihk (Greek) tahsh kaakii'ishikiishwewaatc Coowak okii'aanwaapamaawaa' Hiiparoo (Hebrew) eshikiishwenitc Coowa'. Mii 'i kaa'ihkitowaatc ehpapaa​pisiskencikaniwihsinik okiiwaacihkwemiwaa' ahpii kiiahshantinaaniwaninik i'i miicim kaakiinihtaa​pakitinikaatenik entahsokiishik. 2 Iki tahsh kaamitaahshiniishiwaatc (12) ishinisha'waakanak okii'antomaawaa' emaamawi​ayaanitc otepwehtamoo' o'o ekii'inaawaatc: "Kaawiin hsa tamino​naakwahsinoon niinawint cikipihciiyaankipan ewiintamaakeyaank Kishemanitoo otihkitoowin, cikiih​tipentamaankipan eshi​naanaakaci'intwaa kaanoontehsewaatc. 3 Haw hsa niici​otepwehtamook, kiinawaa hsa onaapamihkwak niishwaahso (7) kaaminwaatisiiwakimintwaa, kekiihtaawentamowaatc, kaamooshkineshkaakowaatc kaye Kishemanitoon otAhcaahkoni. Miiwak itahsh iki kenaanaakacihtoowaatc i'i anohkiiwin. 4 Niinawint tahsh wiin mooshak iko ninka'anami'aamin, ci'inanohkiiyaank kaye ciwiintamaakeyaank Kishemanitoo otihkitowin." 5 Kaamaamawiinowaatc otepwehtamook tahsh okii'minohtaanaawaa kaakii'inintwaa. Miitahsh o'o kaakii'ishinihkaasonitc ininiwa' kaakii'onaapamaawaatc, Istiipin (Stephen) eshinihkaasonitc kaakii'mooshkine​tepweyentaminitc, kaakii'mooshkineshkaakonitc kaye Kishemanitoon otAhcaahkoni. Pilap (Philip), Paraahkorahs (Prochorus), Nihkenar (Nicanor), Taaiman (Timon), Paarminahs (Parmenas), Nihkalahs (Nicolaus) kaye KaakiihCoowiwihsik kii'otaahpinamokopanen Coowianami'aawin Entiyaahk (Antioch) ootenaank ekii'onciitc. 6 I'i tahsh kaakii'onaapamaawaatc ininiwak, okiih​piinaawaa' eshi​ayaanitc ishinisha'waakana'. Miitahsh kaa'ishi​anami'ehtamawaanitc ehsaaminaanitc. 7 Keyaapi tahsh Kishemanitoo otihkitowin kii'ani​misihteshkaamakanini. Aanciihke kii'ani​paahtiinowak otepwehtamook Ceroosalamink (Jerusalem). Kii'ani​paahtiinowak itahsh kaye anami'ewikimaak kaakii'ani​tepwehtamowaatc. 8 Istiipin (Stephen) iitok wiinke okiimooshkineshkaakoon Kishemanitoon okishewaatisiwinini, okashki'ewisiwinini kaye. Miitahsh kaakii'ishihciketc niipiwa' maamahkaacihcikewinan, maamahkaaciwaapanta'iwewinan kaye mekweya'ii eshi​ayaanitc pemaatisinitc. 9 Aaninta tahsh Coowa' kaawiin okii'minwaapamikohsii' i'imaa peshik anami'ewikamikonk kaakii'onciinitc, Kaatatipenintisoomakahk Anami'ewikamik ecikaatek. Miiwa' ihsa 'i Coowa' kaakii'onciinitc Saairiini (Cyrene), Aalikihsaantariya (Alexandria), i'i tahsh kaye Coowa' kaakii'onciinitc Silihshiya (Cilicia) ahkiink weti kaye Eshiya (Asia) ahkiink. Miiwa' itahsh i'i kaakiih​kakwe​shaakoosomikotc. 10 Kaawiin itahsh okiikashkihtoohsiini cishaakoosomikotc kaa'ahpiihci​kakiihtaawentank, i'i kaye kaakii'ishi​miinikotc Kishemanitoon otAhcaahkoni ci'shi​kaakiikitotc. 11 Miitahsh kaa'ishi​kiimooci​tipa'amawaanitc aaninta ininiwa' o'o ci'ihkitonitc: "Ninkii'noontawaanaan Istiipin (Stephen) ehpaahpinotawaatc Moosihsoon (Moses), Kishemanitoon kaye." 12 Miitahsh i'i kaakii'onci​ompwe'aanitc pemaatisinitc, i'i kaye kaaniikaanisinitc Coowa', i'i kaye kaakihkino'amaakenitc onahshowewin. Miiwa' itahsh i'i Istiipin kaakiih​pi'anta​waapamikotc ekii'otihtinikotc ekii'ishiwinikotc eshi​ayaanitc onahshowewininiwa'. 13 Miihsh kaakiih​piinimintc iniweniwa' noociko ke'inaacimikotc o'o ekii'ikotc: "Kaawiin hsa wa'a inini onci​kipihciihsii ehpaahpinotank o'o kihcianami'ewikamikoni Kishemanitoon tepentaminitc, i'i kaye Moosihsoon enahshowenitc. 14 Ninkii'noontawaanaan kaye e'ihkitotc a'awe Ciisahs Naasaritink (Nazareth) kaaonciitc oka​nihshiwanaacihtoon o'oweni kihcianami'ewikamik, oka​yaancihtoonan kaye ishihcikewinan Moosihsoon kaakii'miininimank," kii'ihkitowa'. 15 Kahkina tahsh i'imaa kaakii'apiwaatc kaatashi​onahshowenk okiihkihci​kanawaapamaawaan Istiipinan (Stephen), miitahsh kaakii'waapamaawaatc e'ishiinkwenitc taapishkoo e'ishinaakosinitc encalan.

Ishihcikewinan 7

1 Kihcianami'ewikimaan tahsh okiih​kakwecimikoon: "Tepwewak ina 'i kaa'inihkwaa?" okii'ikoon. 2 Miihsh Istiipin (Stephen) kaa'ihkitotc: "Nintinawemaakanak, kehciaya'aawiyek kaye! Kishemanitoo kehci'inentaakositc okii'naakosiihtawaan kikehteya'aaminaapaniin Eparahaaman (Abraham) mekwaa Mesopohtemiyahkiink (Mesopotamia) kiiayaanitc, cipwaa ishitaanitc ootenaank Heranink (Haran). 3 Miihsh o'o kaa'inaakopanen: 'Nakatan i'i kitahkiim, nakash kaye kitinawemaakanak ci'ishaayan weti ahkiink kaawii'waapanta'inaan.' 4 Miitahsh i'i tepwe kaakii'nakatank Kaaltiya (Chaldea) ahkiini ekii'awi-ishi​kapehshitc weti Heranink (Haran). Ahpii tahsh Eparahaam oteten kaaniponitc, Kishemanitoon okiih​piicikosii'ikoon o'omaa ahkiink, kiinawaa noonkom kaataanotamek. 5 Kaawiin tahsh kekoon okii'miinikohsiin citipinawewisitc, kaawiin iko kanake enikohkositetc citahkohkaatank okii'ishi​miinikohsiin. Okii'ahshotamaakoon itahsh ewiimiinikotc citipinawewisitc, i'i kaye keniopiiwesiimitc, aanawiin mahshi ekii'ayaawaahsik apinoonciishan. 6 Miitahsh o'o kaa'ikotc Kishemanitoon: 'Kipiiwesiimak hsa tapiiwitewiwak mayakiahkiink, miitahsh weti ketashi​kakwaatakanohkii'intwaa, pehkihsh cikakwaataki'intwaa niiwaahk (400) tahsopipoon minihk. 7 Ninka​nana'ahsimaa' tahsh pemaatisinitc kekakwaatakanohkii'ikowaatc, miitahsh cinakatamowaatc i'i ahki, cipiishaawaatc o'omaa cipi​anami'ehtawiwaatc.' 8 Miitahsh i'i kaakiimiinikotc kihkinawaatashakeshokoowin ekihkinawaacihtoonitc aaniin kaa'ishi​ahshotamaakotc. Eparahaam tahsh kii'ani​okosihsi Aaisikoon (Isaac), nihshwaahsokiishik (8) tahsh e'ishihsenik okiikihkinawaatashakeshwaan. Aaisik tahsh kii'ani​okosihsi Cekapoon (Jacob), miihsh peshikwan kaahtootawaatc. Cekap tahsh kewiin mii peshikwan kaahtootawaatc mitaahshiniishin (12) okosihsa'. Miiwak iitok iki kikehteya'aaminaapaniik. 9 "Miiwak itahsh iki kikehteya'aaminaapaniik kaakii'ayaashenimaawaatc peshik wiicihkiweyiwaan Coosap (Joseph) kaakii'ishinihkaasonitc. Kii'ishiataawaakewak tahsh weti ci'ishitipenimimintc Iicipahkiink (Egypt). Shaakooc itahsh Coosap okii'wiiciiwikoon Kishemanitoon. 10 Miitahsh i'i kaakiinaatamaakotc aaniin kahkina kaakii'ishi​wahsitaawihsetc. Okiihkakiihtaawentamo'ikoon itahsh kaye, ekiih​tootawaanitc kaye ciminwaapamikotc ini Peroon (Pharaoh) kaakiih​kihciokimaawinitc i'imaa Iicipahkiink. Miitahsh kaakii'ishi'ikotc citipentank kahkina Iicipahkiini, kahkina kaye owaahkaa'ikanini. 11 Mii hsa 'i kaakiinoontehsek miicim misiwe Iicipahkiink, misiwe kaye Kenan ahkiink, wiinke tahsh kiikihci​kakwaatakashkatenaaniwan. Kikehteya'aaminaapaniik tahsh kaawiin inkoci okii'mihkansiinaawaa miicim. 12 Ahpii tahsh Cekap kaanoontank e'ayaanitc pahkweshikanan Iicipahkiink, mii 'i kaakii'ishinisha'waatc okosihsa' kikehteya'aaminaapani' ci'ishaanitc. Mii 'i nihtam i'i ekii'ishaanitc. 13 Miinawaa tahsh e'ishaanitc Coosap okiih​kihkentamo'aa' wiicihkiweya' wiin e'owiicihkiwemikotc. Miitahsh i'i Coosap kaakiih​kihkenimikotc Peroon kihciokimaan aanti wentahkaanesitc. 14 Coosap tahsh okii'antomaan oteten Cekapoon, i'i kaye kahkina otinawemaakana', niishwaahsimitanahshinaanan (75) ekiih​tahshinitc. 15 Miitahsh Cekap kaakii'ishaatc Iicipahkiink. Miihsh weti kaahtashi-ishkwaa​pimaatisitc, iki kaye kikehteya'aaminaapaniik. 16 Owiiyawiwaan tahsh kii'ishiwicikaateniwan weti Shehkam (Shechem) ahkiink eshi​ayaanikin na'initiiwikamikoon ekii'awi​na'inikaatenikin. Mii iitok o'o ahkiini Eparahaam kaakii'ataamaakopanen okosihsimaa' wetetenitc Hemoran (Hamor) shooniyaan ekii'ataawaakekopanen. 17 "Ahpii tahsh aasha e'ani​pehshonaakwaninik Kishemanitoo citootank kaakii'ishi​ahshotamawaatc Eparahaaman (Abraham), wiinke hsa Isriyalak (Israel) kii'ani​paahtiinowak i'imaa Iicipahkiink (Egypt). 18 Mii hsa 'iwe ahpii kii'ani​ayaa kotak kihciokimaa Iicipahkiink kaakiih​kihkenimaahsik Coosapoon (Joseph). 19 Miitahsh a'awe kaakiih​kayeshitootawaatc kiwiici​onciimaakaninaanii'. Kaawiin tahsh kaye sesik okiih​tootawaahsii' kikehteya'aaminaapanii', ekii'ishihcike'aatc cipahkopii​wepinaanitc otooshkapinoonciishimini cinihsaapaawenitc. 20 Mii hsa 'i ahpii Moosihs (Moses) kaakii'nihtaawikitc, wiinke tahsh kii'minonaakosi enaahsamiinitc Kishemanitoon. Nihsokiisihs (3) itahsh okiih​kanawenimikoo' oniiki'ikoo' otaawininink. 21 Ahpii tahsh kaa'nakanintc akwaciink, okii'otaahpinikoon otaanihsini Peroon (Pharaoh) kihciokimaan. Miiwan tahsh ini kaa'ompiki'ikotc ehkanawenimikotc ekii'okosihsimikotc. 22 Moosihs tahsh misiwe kii'ishi​kihkino'amawaa eshi​kakiihtaawentaminitc Iicipahkiink wenciinitc. Kii'ani​tinowi hsa inini kaamashkawikiishwetc, kaamashkawihciketc kaye. 23 "Ahpii tahsh niimitana (40) ehtahsopipoonwetc kii'inentam ci'anta​waapamaatc owiici​onciimaakana' Isriyala'. 24 Okii'waapamaan tahsh peshik Iicipahkiink wenciinitc kwayahk ehtootaakohsinik. Miitahsh kaa'ishi​naatamawaatc ekiih​tipa'ikehtamawaatc, miihsh kaa'ishi​nihsaatc ini Iicipihshiwininiwan. 25 Moosihs maawiin kii'inentam cikihkentaminitc owiici​onciimaakana' Kishemanitoon ewii'aapaci'ikotc cinaatamawimintc, kaawiin tahsh okii'onci​kihkentansiini. 26 E'ani​waapaninik tahsh okii'otihsaa' niishin (2) emiikaatinitc. Miihsh kaa'ishi​kipihtinaatc emiikaatinitc o'o ekii'inaatc: 'Aaniin inaa onsosaamahkamik, kitoowiicihkiwentim iitok! Wekonen tahsh wenci​miikaatiyek?' okii'inaa'. 27 Iniweniwan tahsh mayaa kaakii'miikaanaanitc wiici​pimaatisiini, inkoci okii'ishi​kaanci​wepinikoon ekii'ikotc: 'Awenen kaa'ishi'ihk citipenimiyaank, cinaanaakaci'iyaank kaye? 28 Kiwii'nihshish ina taapishkoo kaakii'ishi​nihsatc Iicipahkiink wenciitc piciinaako?' okii'ikoon. 29 Miitahsh Moosihs kaakiih​tapasiitc o'o e'noontank e'inintc. Mitiyan (Midian) ahkiink tahsh kii'ahpa'iwe, miiweti kaa'ishi​kapehshitc. Niishin (2) okosihsa' weti kiihtashi​nihtaawikiwa'. 30 Ahpii tahsh niimitana (40) tahsopipoon kaa'ishihsenik, encalan okii'naakosiihtaakoon mekwe​pihkohkopaank ehpiskanenik i'imaa pikwatahkamik ciikaya'ii Saainai (Sinai) kihciwaciink. 31 Ahpii tahsh Moosihs ewaapantank okii​maamahkaatentaan i'i kaakii'ishinank. Pehsho tahsh kii'ani-ishaa ewii​waapantank. Okii'onci​noontawaan tahsh kaaTipencikenitc ehkanoonikotc: 32 'Niin oKishemanitoomiwaan kaakii'okehteya'aamiyan, Eparahaam, Aaisik kaye, a'a tahsh kaye Cekap.' Moosihs tahsh kii'naninkaanimisi, kaawiin tahsh awahshime kiiwii'inaapihsii. 33 Miitahsh o'o kaa'ikotc kaaTipencikenitc: 'Kiihtahkisinen! I'imaa ohsha kaashi​niipawiyan, wiinke kihtentaakwan. 34 Tepwe hsa niwaapantamowaan eshi​kakwaataki'intwaa nimpimaatisiimak Iicipahkiink kaa'ayaawaatc, ninoontawaak kaye kaashi​moohkonewaatc. Miitahsh kaapionci​naashiyaan ewiih​pimaaci'akwaa. Haw hsa ampe, kiin tahsh kiwii'ishinisha'on ci'ishaayan Iicipahkiink.' 35 Mii hsa wa'a Moosihs kaakii'aanawenimikotc Isriyala' o'o ekii'ikokopanen: 'Awenen kiin kaa'ishi'ihk citipenimiyaank, cinaanaakaci'iyaank kaye?' Mii 'awe Kishemanitoon kaakii'ishinisha'okotc citipenimiwetc, cinaatamaaketc kaye ekii​wiici'ikotc encalan kaakiinaakosiihtaakotc weti pihkohkopaank. 36 Mii hsa 'awe inini kaakiih​saakiciwinaatc Isriyala' Iicipahkiink. Kiimamaantaawihcike, kiimaamahkaacihcike kaye weti Iicipahkiink, KihciMiskokamiink tahsh kaye, weti tahsh kaye pikwatahkamik niimitana (40) tahsopipoon. 37 Miitahsh o'o Moosihs kaa'inaatc Isriyala': 'Kitinawemaakaniwaank kikaonci​miinikowaa peshik Kishemanitoo kekanootamaakotc, taapishkoo niin tino,' kii'inaakopan. 38 Mii hsa 'awe kaakii'wiiciiwaatc kiimaawaci'itinitc Isriyala' pikwatahkamik; ekii'wiiciiwaatc kikehteya'aaminaapanii', ini kaye encalan kaakiih​kanoonikotc weti waciink Saainai (Sinai). Miitahsh i'i kaakiimiinikoowisitc tipaacimowin mooshak ke'ayaanik, miihsh o'o kaakiihpi​ayaanihke​miinikooyank. 39 Kaawiin tahsh kikehteya'aaminaapaniik kii'inentansiiwak cina'ihtawaawaatc, miitahsh kaakiih​pahke​wepishkawaawaatc Moosihsoon. Tekwac itahsh ekii'mihsawentamowaatc Iicipahkiink cishi​kiiwewaahpan. 40 Miitahsh o'o kaakii'inaawaatc Eranoon (Aaron): 'Oshihtamawihshinaam manitoohkaanak keniikaaniihtamawiyamintwaa. A'awe wiin Moosihs kaakiih​saakiciwishiyamintc Iicipahkiink kaawiin ninkihkenimaahsiwaanaan aaniinti eyaakwen,' okii'inaawaan. 41 Miihsh i'i ahpii kaakii'oshi'aawaatc pishihkihkaanan, ekiih​piitoowaatc kepakitinaahsohtamawaawaatc manitoohkaanan, wiinke kaye ekiihkihci​ciihkahkamikisiwaatc ekiihkihci'inentamowaatc oninciiwaank kaakii'onci​oshihtoowaatc. 42 Kishemanitoo tahsh kiihkwehkihtaa, pisaan ekiihpakitinaatc ci'anami'ehtawaanitc kaapaahtiinonitc wanankohsha' kiishikonk eyaanitc. Miitahsh mayaa eshipii'ikaatenik omasina'ikaniwaa Kishemanitoon kaakanootamawaawaatc: 'Kiinawaa hsa Isriyalak! Kaawiin ina kikii'nihtaa​piitamawihshim kaakii'nihsekwaa aya'aawihshak epakitinaahsohtamawiyek niimitana (40) tahso pipoon weti pikwatahkamik? 43 Tekwac iitok kikii'maaciitaawaam Moolehk opakwaanekamik, kimanitoohkaaniwaa wanankohshink enwaanek Orehpan kaainek. Kikii'oshi'aawaak manitoohkaanak keanami'ehtawekwaa, miihsh kaawii'onci​tootawinakook waahsa awahsinahke Paapilan ci'ishiwinikooyek.' 44 Kikehteya'aaminaapaniik tahsh kiipimi​ayaawaatc pikwatahkamik okiih​pimiwitoonaawaa kihcipakwaanekamikoni ekii​naakohtoowaatc ewiiciiwikowaatc Kishemanitoon. Mayaa kii'ishihcikaateni Kishemanitoo kaakii'ishi​wiintamawaatc Moosihsoon ci'ishihtoonitc, mayaa ekii'ishinaakwaninik i'i kaakii'ishi​waapanta'aatc. 45 Mii 'iweni peshikwan kihcipakwaanekamikoni kitehteya'aaminaapaniik kaakii'aanihke​miinikowaatc kaakii'okehteya'aamiwaatc. Miitahsh i'i kaakiih​piintikatoowaatc mekwaa ewiiciiwaawaatc Caahshowaan (Joshua), ahpii kiimahkamaawaatc otaahkiimini i'imaa kaakii'ayaanitc kaapepahkaanwewaanakisinitc pemaatisinitc. Kishemanitoon hsa okiisaakitaama'waani ahpii kiinipiintikeshkaawaatc Isriyalak. Miitahsh i'imaa kaa'ayaanik i'i pakwaanekamik piinihsh kiini​ayaanitc Tepitoon (David). 46 Miitahsh a'a Tepit kaakii'minwaapamikotc Kishemanitoon, okiih​kakwecimaan kaye cipakitinikotc cioshihtamawaatc kihcianami'ewikamik ketanentaakosinitc oKishemanitoomini Cekapoon. 47 Swaalaman (Solomon) tahsh mayaa kaakii'oshihtamawaatc kihcianami'ewikamik. 48 Shaakooc itahsh Maawac Eshpentaakositc Kishemanitoo kaawiin ayaahsii waahkaa'ikanink ininiwan weshihtoonitc. Mii 'owe Kishemanitoo kenootamaakotc kaa'ihkitonitc: 49 'Kihcikiishik ohsha nintookimaawapiwin ahki tahsh nintahpisitepiwin. Wekonen tahsh inaa tino waahkaa'ikan ke'oshihtamawiyekipan? Aanti tahsh keshi​anwepiyaan? 50 Kaawiin ina niin nininciink ninkii'onci​osihtoohsiinan ono kahkina kekoonan?' ihkito Kishemanitoo." 51 "Etatawe kiinawaa kinihtaa​shashiipihtaam, e'ishi​ayaahsiwek kite'iwaank ciwiih​tepwehtamek, enoontansiwek kaye tepwewin. Pishihshik kinakaashkawimaawaan Kishemanitoo otAhcaahkwan, e'ishihcikeyek mayaa kaakii'ishihcikewaatc kikehteya'aamiwaapaniik. 52 Konike tahsh kii'ayaatokwenan Kishemanitoo kenootamaakotc kaakiih​kakwaataki'aahsikwaa kikehteya'aamiwaapaniik? Okii'nihsaawaa' iitok i'i niiyaak kaakiiwiintamaakenitc citakohshininitc Kishemanitoon kepiicinisha'waanitc oKwayahkwaatisiimini. Miiwan ini oKwayahkwaatisiiman kiinawaa kaakii'mamishi'imek, miihsh kaa'ishi​nihsimek. 53 Kiinawaa iitok kaakiimiinikooyek Moosihs otoonahshowewin encalak kaakiianihke​miikiwewaatc, kaawiin itahsh awaac kikii​na'ihtansiim," okii'inaa'. 54 Ahpii tahsh onahshowewininiwak enoontamowaatc o'o, wiinke kiinishkimaawak, ekii'matwentamowaatc wiipitiwaan kaa'ahpiihci​nishkimikowaatc. 55 Istiipin (Stephen) tahsh emooshkineshkaakotc Kishemanitoon otAhcaahkoni, ishpimink kihcikiishikonk kii'ishi​kihciwaapi. Miitahsh kaakii'waapantank Kishemanitoon okihci'inentaakosiwinini, Ciisahsoon kaye eniipawinitc okihcinihkiniink inahke Kishemanitoon. 56 Miihsh o'o kaa'ihkitotc: "Inashke niwaapantaan kihcikiishik epaahkishkaak, niwaapamimaan Inini oKosihsan eniipawinitc okihcinihkink inahke Kishemanitoo," kii'ihkito. 57 Kahkina tahsh onahshowewininiwak kiishaakowewak, ekiih​kipihtenintisowaatc, miitahsh kaa'ishi​moohkiihtawaawaatc. 58 Miitahsh kaa'ishi​saakiciwepinaawaatc i'imaa ootenaank, ekiimaacii​papiimwahsina'aawaatc. Iki tahsh kaakiih​kakiinawishkaacimowaatc okiih​kiicikoshkaanaawaan okashkiikiiwiniwaan ekii'ishi​pakitinamowaatc eshi​sitekaapawinitc oshkiniikiwan Swaal (Saul) eshinihkaasonitc. 59 Istiipin tahsh mekwaa epapiimwahsina'intc okii'anami'ehtawaan kaaTipencikenitc ekii'ihkitotc: "Tepencikeyan Ciisahs, otaahpin nintahcaahk!" 60 Kii'ociciinkwanapi tahsh ekiih​kishiiwetc ekii'ihkitotc: "Tepencikeyan, keko akintamawaahken o'o maci'ishihcikewin kaaishihcikewaatc," kii'ihkito. O'o tahsh kaa'ishkwaa​ihkitotc, mii 'i kaa'ishi'ishkwaa​pimaatisitc.

Ishihcikewinan 8

1 Swaal (Saul) tahsh okii'minwaapantaan enihsimintc. Miitahsh i'i ahpii ehkiishikahk kaakii'maacihsek ekiikihci​kakwaataki'intwaa otepwehtamook Ceroosalamink (Jerusalem) eyaawaatc. Kahkina kaye otepwehtamook misiwe kii'ishi​ayohswetapasiiwak Cootiiya (Judea) ahkiink, Sameriya (Samaria) ahkiink kaye. Ishinisha'waakanak ehta kaawiin kiihtapasiihsiiwak. 2 Aaninta tahsh weweni enami'ewaatisiwaatc okii​na'inaawaan Istiipinan (Stephen), wiinke tahsh okiihkihci​moohkawaanaawaan. 3 Swaal tahsh wiin okii'wesaani'aa' otepwehtamoo' ekiih​paapiintiketc kahkina waahkaa'ikanihkaank, ekii'otihtinaatc ininiwa', ihkwewa' kaye kipa'otiiwikamikonk ekii'ishi​piinciwepinaatc. 4 Ikiweniwak tahsh kaakii'ohswe​tapasiiwaahpan misiwe kiihpapaa​ishaawak ekii'wiintamaakewaatc minwaacimowin. 5 Pilap (Philip) itahsh kii'ishaa weti kaashi​niikaanentaakwaninik ootenaank Sameriyahkiink ekiih​tashimaatc Christan (Christ). 6 Kiihpaahtiinowa' ihsa kaakii'noontaakotc Pilap, ewaapantaminitc kaye maamahkaacihcikewinan kaakiih​tootank, miihsh kahkina weweni kaa'ishi​pisintaminitc aaniin kaa'ihkitotc. 7 Niipiwa' aaniihsh kaakiih​kikishkaakonitc maciahcaahkwa' okii'nakanikoni ekiih​shaakowenitc ehkishiiwenitc. Niipiwa' kaye memaancikwaahpinenitc, kaakii'maahkishkaanitc kaye kii'minoayaawa'. 8 Ahpici tahsh kiihpaahtiinat minwentamowin i'imaa ootenaank. 9 Kii'ayaa tahsh peshik inini i'imaa ootenaank Saaiman (Simon) ekii'ishinihkaasotc, mewisha ekiih​pi'onci​aapacihtootc mitewiwin. Okii'maamahkaatentamo'aa' itahsh pemaatisinitc Sameriyahkiink (Samaria) eyaanitc, aaniihsh kii'inwaanintiso ekihci'inentaakositc. 10 Kahkina tahsh pemaatisinitc kehci'inentaakosinitc, tepahsentaakosinitc kaye okiikihci-inihtaakoo' o'o ekii'ihkitonitc: "Mii hsa wa'a inini kaainintc okihci​mashkawisiiwin Kishemanitoo." 11 Aahpici tahsh okiihkihci-inihtaakoo' aaniihsh aasha mewisha okiihpi​onci​maamahkaatentamo'aa' i'i kaakii'ishi​mitewihciketc. 12 Ahpii tahsh kaahtepwehtamowaatc Pilapoon eshi​tashintaminitc eshi​minwaatotenik Kishemanitoon otipencikewinini, owiinsowinini kaye Ciisahs Christan, mii hsa 'i kaa'ishi​siika'antaasowaatc ininiwak, ihkwewak kaye. 13 Kewiin tahsh Saaiman kiihtepwehtam, miihsh kaa'ishi​siika'antaasotc. Misiwe okii'ishi​papaa​wiiciiwaan Pilapoon. Kiimaamahkaatentam ekii'waapantank eshihcikenitc mamaantaawihcikewinan, maamahkaacihcikewinan itahsh kaye. 14 Ahpii tahsh Ishinisha'waakanak Ceroosalamink eyaawaatc enoontamowaatc Sameriya wenciinitc ehtepwehtaminitc Kishemanitoon otihkitowinini, miihsh kaa'ishi-ishinisha'waawaatc Piitaroon, Cwaanan kaye ci'anta​waapamaanitc Sameriya wenciinitc. 15 Ahpii tahsh e'ani​takohshininitc okii'anami'ehtawaani kaakiih​tepwehtaminitc cimiinikoowisinitc Kishemanitoon otAhcaahkoni. 16 Kaawiin mahshi i'i ahpii cikii'otihsikonitc Kishemanitoon otAhcaahkoni, kii'ishi​siika'antaasowa' ehta owiinsowininiink Tepencikenitc Ciisahsoon. 17 Piitar tahsh, a'a kaye Cwaan okiih​saaminaawaa', miihsh kaa'ishi​otihsikonitc Kishemanitoon otAhcaahkoni. 18 Ahpii tahsh Saaiman ewaapamaatc ishinisha'waakana' ehsaaminaanitc otepwehtamoo' i'imaa tahsh e'onci​miinikoowisinitc Kishemanitoon otAhcaahkoni, mii 'i kaakii'miinaatc shooniyaan Piitaroon, Cwaanan kaye, 19 ekii'ihkitotc: "Keniin miishihshik i'i kashki'ewisiwin, awiya piko kesaaminak ciotihsikotc Kishemanitoon otAhcaahkoni," okii'inaa'. 20 Piitar tahsh o'o oki'inaan: "Kishooniyaam kikakikinihshiwanaatis, e'inentaman shooniyaank ci'onci​ataawewatc Kishemanitoo omiikiwewin! 21 Kaawiin kanake kitakwakimikoohsii, pooshke kaawiin kiwiitoohkaasohsii o'o anohkiiwin, aaniihsh kaawiin kwayahkonaakwahsinoon kite' enaahsamiitc Kishemanitoo. 22 Inashke kwehkaatisin cinakataman i'i kikihcimaci-ishiwepisiwin. Anami'ehtaw kaaTipenciketc maakishaa ta'inentam ciwiih​poonentamawihk enentamowatc kite'ink. 23 Niwaapantaan ohsha emooshkineshkaakoyan nishkentamowin eminciminikoyan kaye maci-ishiwepisiwin," okii'inaan. 24 O'o tahsh Saaimanan kii'ishi​nahkwehtam: "Taka anami'ehtawihk kaaTipenciketc niin onci kekoon ci'ishihsehsiwaan i'i kaaihkitoyan," okii'ikoon. 25 Ahpii tahsh kaa'ishkwaa​tipaacimaawaatc kaaTipencikenitc, kaa'ishkwaa​wiintamaakewaatc kaye otihkitowinini, kii'ani​kiiwewak Ceroosalamink. Kii'ani​wiintamaakewak itahsh minwaacimowin niipiwa' eshi​ayayaanikin ootenawan Sameriya ahkiink. 26 Pilap (Philip) ihsa okiih​kanoonikoon kaaTipenciketc otencalimini: "Taka shaawanonk inahke ishimaacaan, cimekwaashkaman weti i'i miihkana kaainamok Ceroosalamink (Jerusalem) piinihsh weti Kesa (Gaza)." I'i iitok miihkana pikwacaya'ii ishipimamon. 27 Miitahsh kaa'ishi​oshiihtaatc ekii'ani​maacaatc. Miihsh kaakii'mekwaashkawaatc wekimaawentaakosinitc ininiwan Iihtiyoohpiya (Ethiopia) ahkiink wenciinitc. Aahpici ekiihtakimikonitc kihciokimaahkwen Kaantahs (Candace) kaaishinihkaasonitc kaakiih​tipenimaanitc Iihtiyoohpiya ahkiink wenciinitc. Miiwan ini kaye kaakiih​kanawentamawaanitc owenootisiwinini. Ceroosalamink (Jerusalem) ekiih​piishaanitc ekiipianami'ehtawaanitc Kishemanitoon. 28 Kiihpimi​kiiwewan tahsh enamatapinitc otootaapaanaahkoniink, e'anamihtoonitc kaakii'ishipii'ikenitc Aaiseyawan (Isaiah) kaakiih​kanootamawaanitc Kishemanitoon. 29 Kishemanitoon otAhcaahkoni tahsh Pilap o'o okii'ikoon: "Pehsho naasihkaw a'a kaapimitaapaasotc, aniwiiciw itahsh kaye," okii'ikoon. 30 Miihsh Pilap pehsho kii'ahpahtoo piinihsh ekii'noontawaatc e'anamihtoonitc kaakii'ishipii'ikenitc Aaiseyawan okanootamaaken. Miihsh o'o kaaishi​kakwecimaatc: "Kinihsitohtaan ina ehkitoomakahk kaa'anamihtooyan?" okii'inaan. 31 Miitahsh kaa'ikotc: "Aaniin tahsh keshi​nihsitohtamaampaan, kaawiin iitok awiya ninkihkino'amaakohsii?" okii'ikoon. Miihsh kaakii'ishikanoonikotc cipoositc ciwiitapimaatc. 32 I'imaa tahsh kaakii'ishi​anamihtoonitc Kihcimasina'ikan o'o kii'ishipii'ikaateni: "Taapishkoo hsa maanahcaanihsh kaaishiwinintc waahtashi​nihsintc, taapishkoo maanahcaanihshenhs kaanootaatihsik epashkoshontc, kaawiin awaac kekoon kii'onci-ihkitohsii. 33 Kii'akacitootawaakaniwi tahsh, kaawiin kii'ayaahsinini inaahkonikewin kekii'onci​naatamawintipan, kaawiin awiyan tatipaacimohsiiwan citashimaanitc opiiwesiima', aaniihsh aasha kii'ishkwaahseni opimaatisiwin o'omaa ahkiink." Mii 'i kaa'ishipii'ikaatenik kaakii'anamihtoonitc. 34 Ini tahsh wekimaawentaakosinitc okii'ikoon: "Kinantawenimin ciwiintamawiyan awenenan o'o kaainaatc wa'a okanootamaake. Wiin ina 'i kaaitisotc, komaa kaye pahkaan awiyan kaatashimaatc?" okii'ikoon. 35 Miitahsh Pilap (Philip) kaa'ishi​maacii​kakitotc, ekiimaacii​tashintank eshi​anamihtoonitc i'i kihcioshipii'ikan, ekii'wiintamawaatc eshi​minwaacimimintc Ciisahsoon. 36 E'anipimi​ayaawaatc tahsh miihkanaank okii'otihtaanaawaa enipiihkaanik. Ini tahsh wekimaawentaakosinitc okii'koon: "Inashke kiniin inaa o'o nipi! Kekoon ina tahsh ayaa ke'onci​siika'antaasohsiwaampaan?" 37 Pilap tahsh okii'inaan: "Kiishpin misiwe kite'ink ishitepwehtaman, pisaan kikasiika'antaas," okii'inaan. O'o tahsh okii'ikoon: "Nintepwehtaan Ciisahs Christ eokosihsimikotc Kishemanitoon," kii'ihkitowan. 38 Miitahsh kaa'ishi​anoonaanitc wetaapa'iwenitc cikipihtinaanitc tihtipitaapaanan. Minciniish tahsh kiipahkopiiwak Pilap, a'a kaye wekimaawentaakositc. Miihsh kaa'ishi​siika'antawaatc. 39 Ahpii kaahpi​akwaasiiwaatc, Kishemanitoon otAhcaahkoni Pilap ketahto okii'maaciinikoon. Kaawiin tahsh awahshime okii'waapamikohsiin wekimaawentaakosinitc, miihsh kaa'ani-ishimaacaanitc ekihci​minwentaminitc. 40 Pilap tahsh ketahto okiikihkentaan Asootahs (Azotus) ootenaank e'onci​ayaatc. Miitahsh i'imaa kaaonci​maacaatc ekiiani​waawiintamaaketc minwaacimowin kahkina taawinihkaank piinihsh Sehsariiya (Caesarea) ootenaank ekii'ani​takohshink.

Ishihcikewinan 9

1 Swaal (Saul) tahsh keyaapi okii​aahkwaatisiihkantawaa' e'ahshonaatc ewii'nihsaatc i'i kaaTipencikenitc okihkino'amawaakanini. Okii'anta​waapamaan tahsh maawac kihcianami'ewikimaan, 2 ekiih​kakwetwetc cimiinintc masina'ikanan keonci​kihkenimikotc Timaaskahs (Damascus) ootenaank kaa'ayaanitc Coowianami'ewikamikonk. Kiishpin tahsh mihkawaatc awiyan piko pepiminisha'aminitc Ishaawin, ininiwan, komaa kaye ihkwewan, ewii'mamaancikwahpinaatc ci'ishiwinaatc Ceroosalamink (Jerusalem). 3 Pehsho tahsh e'ani​pimiayaatc ootenaank Timaaskahsink, okii​koshkowinikon e'waahtehsenik eshi​ayaatc, kihcikiishikonk ekii'oncihsenik. 4 Mihtahkakamik tahsh kii'ishi​pankihshin, awekwenan tahsh okii'noontawaan ehkanoonikotc: "Swaal, Swaal, wekonen wenci​kakwaataki'iyan?" ekii'ikotc. 5 Miihsh kaa'ihkitotc: "Tepencikeyan, awenen kiin?" O'o tahsh okii'ikoon: "Niin ohsha a'a Ciisahs kaakakwaataki'atc. 6 Taka tahsh, pasikwiin. Weti ootenaank ishaan, miitahsh weti keshi​wiintamaakooyan aaniin keishihcikeyan," okii'ikoon. 7 Iniweniwa' tahsh ininiwa' kaakii'wiiciiwikotc kiihkipihciiwa' kekoon ekii'ihkitohsinik, enoontaminitc i'i kaakii'ihkitowintc. Kaawiin tahsh awiyan okii​waapamaahsiini. 8 Swaal tahsh mihtahkamik kii'onci​pasikwii. Ahpii tahsh e'inaapitc, kaawiin kiiwaapihsii. Weti tahsh ootenaank Timaaskahs kii'ishiwicikaniwi ekiih​sakinihkenintc. 9 Nihsokiishik tahsh kaawiin kiiwaapihsii, kaawiin cikiiwiihsinitc, kaawiin kaye cikii'onci​minihkwetc. 10 I'imaa tahsh ootenaank Timaaskahsink kii'ayaa peshik otepwehtamoo, Aananaayahs (Ananias) eshinihkaasotc. Ishinamowinink tahsh okii'onci​kanoonikoon kaaTipencikenitc e'ikotc: "Aananaayahs!" okii'ikoon. "Wekonen, Tepencikeyan?" kii'ihkito. 11 KaaTipencikenitc tahsh o'o okii'ikoon: "Ishaan weti pimohsehkanaank Kwayahkwamon ecikaatek. Cootahs (Judas) owaahkaa'ikanink ishipiintiken. Miitahsh i'imaa keshiantooshkawatc Swaal (Saul) eshinihkaasotc Taarsahs (Tarsus) kaaonciitc. Mekwaa ohsha anami'aa. 12 Kii'ishinam hsa ewaapamaatc ininiwan Aananaayahs (Ananias) eishinihkaasonitc ehpi​naasihkaakotc ehsaaminikotc cikiiwe​waapitc," okii'ikoon. 13 Aananaayahs tahsh kii'ishi​nahkwehtam: "Tepencikeyan, niipiwa' ohsha ninaanoontam enaacimintc a'a inini, aaniin eshi​maanshi​tootawaatc kaatipenimimatc otepwehtamoo' eyaanitc Ceroosalamink. 14 Okii'miinikoon iitok kihcianami'ewikimaan kashki'ewisiwin citahkonaatc kahkina kaashi​kanoonimihk kiwiinsowininiink," okii'inaan. 15 Miihsh o'o kaa'ikotc kaaTipencikenitc: "Maacaan, ishaan! Wiin ohsha ninkii'onaapamaa ewii'aapaci'ak cikihkentamoonaatc niwiinsowin kaaCoowiwihsinik (Gentiles), kihciokimaa' kaye, i'i tahsh kaye Isriyala'. 16 Niin ohsha piko niwii'waapanta'aa aaniin minihk keshikakwaatakihtootc niwiinsowinink onci," okii'ikoon. 17 Aananaayahs (Ananias) tahsh kii'ani​maacaa ekii'awi​piintiketc waahkaa'ikanink eshi​ayaanitc Swaalan. Okiih​saaminaan tahsh ekii'inaatc: "Niici​otepwehtamo, Swaal, kaaTipenciketc Ciisahs kaakiinaakosiihtawihk weti miihkanaank, ninkiih​piicinisha'ok miinawaa ciwaapiyan, cimooshkineshkawihk tahsh kaye Kishemanitoo otAhcaahkwan," okii'inaan. 18 Shemaak itahsh oshkiishikonk kekoonan kii'onci​pankihsininiwan taapishkoo wanakayak e'ishinaakwaninikin. Shemaak tahsh kiiwaapi. Miitahsh kaa'ishi​pasikwiitc ekiih​siika'antaasotc. 19 Kaa'ishkwaa​wiihsinitc tahsh miinawaa kiihkiiwe​mashkawaatisi. Acina tahsh okii​wiiciiwaa' otepwehtamoo' Timaaskahsink (Damascus) kaakii'ayaanitc. 20 Miitahsh shemaak Coowi anami'ewikamikohkaank kaa'ishi​papaa​wiintamaaketc Ciisahsoon e'okosihsimikonitc Kishemanitoon. 21 Kahkina tahsh kaakiinoontaakotc kiimaamahkaatentamoo' ekii'ihkitonitc: "Kaawiin ina mii 'awe Ceroosalamink kaakiih​kakwaataki'aatc i'i kaawiintaminitc Ciisahsoon owiinsowinini enami'aanitc? Kaawiin ina mii 'i kaaonci​piishaatc o'omaa ewiitahkoniwetc ci'ishiwinaatc eshi​ayaanitc kihcianami'ewikimaan?" kii'ihkitowa'. 22 Swaal (Saul) tahsh aanciihke kii'ani​mashkawaani eshi​kakiihkwetc. Okii'wawaanentami'aa' itahsh Coowa' eshitaanitc i'imaa Timaaskahsink ekiih​pehtenaakohtootc Ciisahsoon eyaawinitc kaakiih​piicinisha'okonitc Kishemanitoon cipimaaci'iwenitc. 23 Naanaake tahsh e'ani​kakiishikaninik Coowa' kiimaawaci'itiwa' e'onaahkonikenitc ewiinihsikotc Swaal. 24 Okii​kihkentaan tahsh aaniin waahtootaakotc. Entahsokiishik, entahsotipihk kaye okii'ahkamaakoo' eshi​ayishkwaantemiwaninik i'i ootena ewiinihsikotc. 25 Swaal tahsh kaakiih​piminisha'okotc okii'naasihkaakoo' mekwaa etipihkaninik. Eshi​pakoneyaanik tahsh waahkaayaapihkinikan okii'onci​niihsaapiikinikoo' mashkohsiimahkahkonk ekii'ishi​namatapitc. 26 Swaal tahsh kii'ishaa Ceroosalamink (Jerusalem), ekiihkakwe​wiiciiwaatc ishinisha'waakana'. Kahkina tahsh okiih​kohsikoo', ekiih​tepwehtansinik kewiin iinsan ishinisha'waakan ehtinowitc. 27 Paarnapahs (Barnabas) hsa okii'wiici'aan ekii'ishiwinaatc eshi​ayaanitc ishinisha'waakana'. Okii'wiintamawaa' mekwaa ehpimiayaanitc aaniin kaa'ishi​waapamaanitc kaaTipencikenitc, ekii'kakanoonikonitc itahsh kaye. Okii'wiintamawaa' kaye aaniin weti Timaaskahsink (Damascus) kaakii'ishi​soonkite'enitc ehkakiihkwenitc owiinsowininiink Ciisahsoon. 28 Swaal tahsh okii​wiiciiwaa' ishinisha'waakana' misiwe ekiihpapaa​ishaatc Ceroosalamink, ekiih​soonkite'etc ehkakiihkwetc owiinsowininiink kaaTipencikenitc. 29 Okiih​kakanoonaa' tahsh ekiihkakwe​shaakoosomaatc i'i Kariihk (Greek) kaaishikiishwenitc Coowa'. Shaakooc itahsh okiihkakwe​nihsikoo'. 30 Ahpii tahsh otepwehtamoo' kaakihkentaminitc aaniin waahtootawintc okii'ishi​wiiciiwikoo' Sehsariiyaink (Caesarea), miihsh weti kaakii'ishinisha'ontc ci'ishaatc Taarsahs (Tarsus) ootenaank. 31 Otepwehtamook tahsh misiwe Cootiiyahkiink (Judah), Kaalaliink (Galilee) kaye, Sameriyahkiink (Samaria) itahsh kaye pisaan kii'ayayaawak. Kii'ani​mashkawisiiwak kaye, pehkihsh itahsh kii'ani​paahtiinowak ewiici'ikowaatc Kishemanitoon otAhcaahkoni. Kii'ishipimaatisiwak itahsh kaye ekii​kohtaanenimaawaatc kaaTipencikenitc. 32 Kii'ani​ayishihseni tahsh Piitar (Peter) misiwe ekii'ishaatc i'imaa ahkiink, ekii'ani​otihsaatc otepwehtamoo' Kishemanitoon tepenimikonitc Lita (Lydda) kaapehshiwinink eyaanitc. 33 Okii'otihsaan tahsh peshik ininiwan Iiniiyahs (Aeneas) eshinihkaasonitc emamaancikwaahpinenitc. Aasha nihshwaahso​pipoon (8) i'i kiishi​ayaawan ekiimihci​pimihshininitc ehpimohsesinik. 34 Piitar tahsh okii'inaan: "Iiniiyahs, Ciisahs Christ kiminoayaa'ik. Wanishkaan, cina'iikihsitooyan kinipewin," okii'inaan. Shemaak tahsh kii'wanishkaawan. 35 Kahkina tahsh i'imaa pemaatisinitc kaakii'ishitaanitc Lita kapehshiwinink, i'i kaye Sheranink (Sharon) o'o e'ishi​waapantaminitc, okii​kwehkiinotawaani kaaTipencikenitc. 36 Weti tahsh ootenaank Caahpa ecikaatek, kii'ayaa peshik ihkwe otepwehtamoo Taapihta (Tabitha) e'ishinihkaasotc. Kariihkak (Greeks) otishikiishwewiniwaank Twaarkas (Dorcas) kii'ihkitowak, Waawaashkeshi ekii'icikaatenik. Mii 'awe ihkwe mooshak kiinihtaa​minohcike, ekii​nihtaa​wiici'aatc kaye ketimaakisinitc. 37 Miitahsh i'i ahpii kii'ani​aahkosi a'a ihkwe, ekii'ani​nipotc. Owiiyaw itahsh kiihkisiisipacikaateni, ishpimink eshi​pahkehcikaatenik waahkaa'ikan ekii'ishi​ahcikaatenik. 38 Lita ayaawinink itahsh kii'onci​pehshowan i'imaa onci Caahpa (Joppa) ootenaank. Ahpii hsa otepwehtamook e'noontamowaatc Piitaran (Peter) e'ayaanitc weti Lita kapehshiwinink, niishin 2 ininiwa' okii'ishinisha'waawaa' o'o ci'awi'inaanitc: "Keko ayontamiihken cipi​naasihkawiyaank," ci'inaanitc. 39 Shemaak itahsh Piitar kii'oshiihtaa ekii'ani​wiiciiwaatc. Ahpii tahsh ehtakohshink, kii'ishiwicikaniwi pahkehcikanink ishpimink. Kahkina tahsh kiiwaacihkwewa' okii'waahkaashkaakoo' ekihci​mawinitc ewaapanta'ikotc naapishkikanan, kikishkikanan kaye kaakii'oshihtoonihpan mekwaa ehpimaatisinitc. 40 Miihsh Piitar kaa'ishi​kanoonaatc kahkina cisaaka'aminitc. Miitahsh kaa'ishi​ociciinkwanapihtaatc ekii'anami'aatc. Kiihkwehkii tahsh eshi​ahtenik i'i wiiyawimaa ekii'ihkitotc: "Taapihta wanishkaan." Miihsh kaa'ishi​paahkaapinitc. Ewaapamikotc itahsh, mii 'i kaaishi​mayaawapinitc. 41 Okiih​sakinihkenaan tahsh ewiici'aatc ekiih​pasikwii'aatc. Miitahsh kaa'ishi​antomaatc otepwehtamoo', i'i kaye kiiwaacihkwe' ekii'waapanta'aatc ehpimaatisinitc. 42 Misiwe tahsh i'imaa Caahpa ootenaank kiikihkentaakwan o'o. Niipiwa' tahsh pemaatisiwaatc okiih​tepwehtawaawaan kaaTipencikenitc. 43 Kinweshiihsh tahsh iko i'imaa Piitar kii'ayaa Caahpa ootenaank, ekiiwiiciayaamaatc kaapashkwekinohkenitc Saaiman (Simon) eshinihkaasonitc.

Ishihcikewinan 10

1 Kii'ayaa tahsh peshik inini Sehsariiya (Caesarea) ootenaank Kwaarniiliyahs (Cornelius) e'ishinihkaasotc. Kiishimaakanihshiiwikimaawi ninkotwaahk (100) shimaakanihsha' ekiih​tipenimaatc. I'i hsa shimaakanihsha' Itali (Italy) kaakii'onciinitc okii'naanaakaci'aa'. 2 A'a hsa inini kii'anami'ewaatisi, ekiih​kohtaanenimaatc Kishemanitoon, kahkina kaye eyaanitc otaawinink. Niipiwa' hsa kii'ishihcike ekiiwiici'aatc ketimaakisinitc Coowa', mooshak kaye ekii'anami'ehtawaatc Kishemanitoon. 3 Aapitink tahsh ehkiishikaninik ninkociko enihso​tipa'ikaneyaanik e'ishkwaa​naawahkwenik, okii'waapantaan ishinamowin. Okii'waapamaan encalan epipiintikaakotc Kishemanitoon ekiih​piicinisha'okonitc o'o e'ikotc: "Kwaarniiliyahs!" 4 Wiinke tahsh kiisekisi ekiih​kanawaapamaatc ekii'ihkitotc: "Wekonen entawentaman nintookimaam?" kii'ishi​sekihtaakosi. O'o tahsh okii'ikoon encalan: "Kishemanitoo ohsha kiminwaapamik i'i kaashi​anami'aayaan, i'i kaye kaashi​wiici'atwaa ketimaakisiwaatc, kaye tahsh emaamihkwenimihk. 5 Taka hsa ishinisha'o ininiwak Caahpa (Joppa) ootenaank cinaasihkawaawaatc ininiwan Saaimanan Piitar (Simon Peter) kaainimintc. 6 Ini hsa kaapashkwekinohkenitc Saaiman (Simon) eshinihkaasonitc owiiciayaamaan, cikikihcikamiink kaaishitaanitc," okii'ikoon. 7 Ahpii tahsh kaanakanikotc ini encalan kaakiih​kanoonikotc, Kwaarniiliyahs okii'antomaa' niishin (2) otanohkii'aakana' owaahkaa'ikanink eyaanitc, ini kaye enami'ewaatisinitc shimaakanihshan mooshak kaakiih​pami'ikotc. 8 Kaa'ishkwaa​waawiintamawaatc tahsh kahkina kekoon, mii 'i kaa'ishi'ishinisha'waatc Caahpa ci'ishaanitc. 9 E'ani​waapaninik tahsh e'ani​naawahkwenik kekaa e'ani​otihtaminitc i'i ootena Caahpa, mii 'i na'itaak ahpii Piitar kaakii'ishaatc wakici​napaki​waahkaa'ikanink ekii'anta-anami'aatc e'ani​naawahkwenik. 10 Piitar tahsh kii'noonteshkate ekii'antawentank kekoon ewii'miicitc. Mekwaa tahsh ehkwayaancihcikaatenik miicim, kekoon kii'ishinam e'nipaawi-ishiayaatc. 11 Miitahsh kaakii'waapantank kiishik epaahkishkaanik, kekoon kaye ekii'waapantank taapishkoo waapishkiikinonk, eshiniiwi​kiihkeyiikaninik itahsh kii'onci​pakitaapiikinikaateni. 12 Miitahsh i'imaa kii'ayaawa' kahkina kaaniiwikaatenitc aya'aawihsha', i'i kaye kiinepikoo' ahkiink eyaanitc, pinehshiinsha' kaye ishipimink pepaamihsenitc. 13 Miihsh kaakii'noontawaatc awiyan e'ihkitonitc: "Wanishkaan Piitar, nihshi ciamwatwaa." 14 Piitar tahsh kii'ishi​nahkwehtam: "Kaawiin Tepencikeyan! Kaawiin iitok wiihkaa nimpimiicihsiin kekoon nintanami'aawininaanink wenci​manaamiicinaakaatek kaawiinentaakwahk." 15 Miinawaa tahsh okii'noontawaan awiyan ehkanoonikotc: "Keko inentanken cimanaa​miicinaakaatek Kishemanitoo kaaitank ehpehkaninik," kii'inaa. 16 Nihswaa (3) tahsh o'o kiihtoocikaateni, miitahsh miinawaa kiishikonk kaaishi​kiiweishpishkaanik i'i kaakiiwaapantank. 17 Mekwaa tahsh Piitar ewawaanentank aaniin enwaatenikwen i'i kaakii'ishinank, iniweniwa' ininiwa' kaakiih​piicinisha'okonitc Kwaarniiliyahsan, okii​mihkamini Saaimanan (Simon) owaahkaa'ikanini. Akwaciink itahsh kiiniipawiwa'. 18 Miitahsh kaakiih​kishiiwenitc ehkakwetwenitc kiishpin eyaanikwen i'imaa Saaimanan Piitar kaaishinihkaasonitc. 19 Mekwaa tahsh Piitar (Peter) enaanaakatawentank i'i kaakii'ishinank, Kishemanitoo otAhcaahkoni okiih​kanoonikoon ekii'ikotc: "Nihsin ohsha ininiwak kipinanaantawaapamikook. 20 Wanishkaan, ciniisaantaweyan. Keko pwaahtawentanken ciwiiciiwatwaa, aaniihsh niin ninkiih​piicinisha'waak," okii'ikoon. 21 Piitar tahsh kiiniihsaantawe. Miitahsh kaa'inaatc iniweniwa': "Niin ohsha kaananaantawaapamek. Wekonen tahsh wenci​piishaayek?" ekii'inaatc. 22 Miihsh o'o kaa'ikotc: "A'awe hsa Kwaarniiliyahs (Cornelius) shimaakanihshiiwikimaa ninkiih​piicinisha'okonaan. Kwayahkwaatisi, okohtaanenimaan kaye Kishemanitoon. Kahkina hsa Coowa' okihtenimikoo'. Kishemanitoon tahsh otencalimini okii​wiintamaakoon cipiishaawatc owaahkaa'ikanink cinoontawihk aaniin ke'ihkitowatc," okii'ikoo'. 23 Piitar tahsh okiih​piintikeantomaa' ekii'nipe'aatc. E'ani​waapaninik tahsh okiimaacii​wiiciiwaa'; aaninta kaye owiici​otepwehtamoo' Caahpa ootenaank wenciinitc ekii'ani​wiiciiwikotc. 24 Miinawaa tahsh e'ani​waapaninik kiihtakohshinook Sehsariiya ootenaank. Kwaarniiliyahsan i'imaa kiihtashi​pii'owan, ekii'antomaanitc otinawemaakanini, kaakiih​saaki​wiiciiwaanitc kaye. 25 Ahpii tahsh Piitar kaahpiintiketc owaahkaa'ikaniniink, Kwaarniiliyahsan okii'nakishkaakoon, eshi​sitekaapawitc ekii'ishi​animihkohtaanitc. 26 Piitar okiih​pasikwii'aan ekii'inaatc: "Pasikwiin! Keniin ohsha nintininiw," okii'inaan. 27 Ehkakanoonaatc itahsh, kii'ani​piintike. Miitahsh kaakiiwaapamaatc niipiwa' awiya' emaawaci'itinitc. 28 Miitahsh kaa'inaatc: "Kikihkentaanaawaa iitok nintoonahshowewininaan einahtek awiya kaaCoowiwitc ciwiiciiwaahsik, cipiintikawaahsik kaye pahkaan awiyan wenciinitc. Kishemanitoo tahsh ninkii'waapanta'ik pahkaan awiya noociko ci'inakimaasiwak, ci'ihkitohsiwaan tahsh kaye pahkaan awiya cimanaawiiciiwakipan. 29 Miitahsh kaakii'onci​pwaahtawiihsiwaan ahpii kiiantomikooyaan kekoon ekii'ontamentansiwaan. Kikakwecimininim tahsh wekonen kaaonci​antomiyek?" okii'inaa'. 30 Kwaarniiliyahsan tahsh o'o okii'ikoon: "Niiwikiishik aasha ishihse kaakii'anami'aayaampaan niwaahkaa'ikanink o'o ahpii enihso​tipa'ikaneyaak eishkwaa​naawahkwek. Miitahsh i'i ahpii kaakii'waapamak inini e'oncishkawikaapawitc ewaahsitenikin okikishkikanan. 31 Miitahsh o'o kaa'ishitc: 'Kwaarniiliyahs Kishemanitoo ohsha onoontaanan kitanami'aawinan, omaamihkawinotaan tahsh kaye kaashi​miinimatc ketimaakisinitc. 32 Ishinisha'owen tahsh Caahpa ootenaank ci'antomatc cipi'anta'waapamihk Saaiman Piitar kaa'icikaniwitc. Iniweniwan tahsh owiiciayaamaan Saaimanan kaapashkwekinohkenitc ciikipiik kihcikamiink kaaishitaanitc,' ninkii'ik. 33 Shemaak tahsh kikii​naacinisha'on. Kiminohcike tahsh kiipiishaayan. Kahkina tahsh o'omaa nintayaamin enaahsamiitc Kishemanitoo ewiih​pisintamaank kahkina kekoon kaaTipenciketc kaakii'ishi​anoonihk cishi​wiintamawiyaank," okii'ikoon Kwaarniiliyahsan. 34 Piitar (Peter) tahsh kiimaacii​kakito o'o ekii'ihkitotc: "Tepwe ninihsitawinamowaan Kishemanitoo kahkina awiyan peshikwan e'inenimaatc. 35 Kahkina tahsh iko kaatahswewaanakisinitc awiyan kwehtaanenimikotc, ketootaminitc itahsh kaye kaakwayahko​naakwanink otootaahpinaan. 36 Kikihkentaam iitok i'i tipaacimowin kaakii'ishinisha'amawaatc pemaatisinitc Isriyala', ekii'wiintamawimintc eshi​minwaatotenik pisaanisiwin onci Ciisahs Christink kaamaamawi​tipencikenitc. 37 Kikihkentaam kaye aaniin kaaishiwepahk misiwe Cootiiyahkiink (Judea), ekii'onci​maacihsenik i'imaa Kaalaliiwahkiink (Galilee) ahpii Cwaanan (John) Osiika'antaaken kii'ishkwaa​tashintaminitc siika'antaasowin. 38 Kikihkentaam kaye aaniin enaacimintc Ciisahs Naasaritink (Nazareth) kaaonciitc, Kishemanitoon ekii'onaapamikotc ekii​miinikotc otAhcaahkoni, mashkawisiiwin kaye. Misiwe ekiihpapaa​ishaatc eminotootaaketc, ekii​minoayaa'aatc kaye kahkina kaakitima'ikonitc maciaya'aan, aaniihsh Kishemanitoon okii'wiiciiwikoon. 39 Niinawint tahsh nintipaatotaamin kahkina kekoon kaakii'ishi​waapamankitc eishihciketc i'imaa Coowak otahkiimiwaank, i'imaa kaye Ceroosalamink (Jerusalem). Miitahsh i'i kaakiinihsikotc Coowa', aashiteyaahtikonk ekii'akosaka'okotc. 40 Kishemanitoon tahsh okiihkiiwe​pimaatisii'ikoon nihsokiishik e'ishihsenik, ekiih​tootaakotc kaye cinaakositc. 41 Kaawiin kahkina awiyan okii'waapamikohsiin. Niinehtawint ehta niikaan kaakii'onaapamiyamintc citipaatotamawaank kaakiiwaapantamaank, kaakii'wiici​wiihsiniimankitc, kaakiiwiici​minihkwemankitc kaye kii'ishkwaa​kiiwe​pimaatisii'intc. 42 Niinawint kaye ninkii'anoonikonaan cikakiihkimimankitc pemaatisinitc, citipaacimowankitc kaye wiin eyaawitc Kishemanitoon kaakii'onakimikotc cionaahkonaatc pemaatisinitc, iki kaye kaaniponitc. 43 Miiwan hsa ini kaakiih​tashimaawaatc Kishemanitoon kenootamawaawaatc o'o kii'ihkitowaakopanen, kahkina awiya entahso​peshikotc ketepweyenimaatc oka​tepinaan cipoonentamawintc omacitootamowinan, owiinsowininiink onci." 44 Mekwaa tahsh keyaapi Piitar (Peter) ehtashintank kaakii'ishiwepaninik, Kishemanitoon otAhcaahkoni okii'otihsikoni kahkina kaakiinoontaminitc i'i tipaacimowin. 45 Iniweniwa' tahsh kaaCoowiwinitc otepwehtamoo' Piitar kaakiihpi​wiiciiwikotc kiimaamahkaatentamoo', aaniihsh i'i kaaCoowiwihsinik kiimiinikoowisiwa' ekiih​siikinamawimintc Kishemanitoon otAhcaahkoni. Kaakiih​kihkinawaatashakeshomintc otepwehtamoo' 46 Okiinoontawaani aaniihsh pepahkaan e'ayishikiishwenitc, emiikwehciwenimaanitc tahsh kaye Kishemanitoon. 47 Piitar tahsh kii'ihkito: "Awiya na taaonci'iwe nipiink cishi​siika'antaasohsinikipan onoweniwa' kaamiinikoowisinitc Kishemanitoon otAhcaahkoni taapishkoo kiinawint." 48 Piitar tahsh kii'anoohkii cisiika'antaasonitc owiinsowininiink Ciisahs Christan onci. Okiihkakwecimikoo' itahsh acina ciwiiciayaamaatc.

Ishihcikewinan 11

1 Ishinisha'waakanak tahsh, otepwehtamook kaye Cootiiyahkiink (Judea) kaa'ayaawaatc kiinoontamook i'i kaaCoowiwihsinik ekii'otaahpinaminitc Kishemanitoon otihkitowinini. 2 Ahpii tahsh Piitar (Peter) kaatakohshink Ceroosalamink (Jerusalem) okii'aanwaapamikoo' i'i kaakihkinawaatashakeshwaahswimintc otepwehtamoo' ekii'ikotc, 3 "Kikiih​piintikawaak i'i kaakihkinawaatashakeshwaahswintwaa, kikiiwiici​wiihsiniimaak itahsh kaye," okii'ikoo'. 4 Piitar tahsh kii'maacii​kakito ekii​wiintamawaatc aaniin mayaa kaa'ishihsenik ekii'ihkitotc: 5 "Mekwaa Caahpa (Joppa) ootenaank e'ayaayaan e'anami'aayaan, kekoon ninkii'ishinam. Ninkii​waapantaan kekoon kiishikonk ehpiinaakwahk e'ishinaakwahk ishiikinonk kaashi​naniiwikiihkeyiikahk ehpi'onci​niihsaapiikinikaatek. Niin ninkiihpi​naasihkaakon. 6 Ehkanawaapantamaan tahsh, ninkii​waapamaak kaaniiwi​kaatewaatc aya'aawihshak, pikwaciaya'aawihshak kaye, kinepikook kaye, pinehshiinshak kaye ishpimink pemaamihsewaatc. 7 Ninkiinoontawaa tahsh awiya ehkanooshitc e'ihkitotc: 'Wanishkaan Piitar! Nihshi ci'amwatwaa,' ninkii'ik. 8 O'o tahsh ninkii'inaa: 'Kaawiin Tepencikeyan! Kaawiin wiihkaa nimpimiicihsiin kaawiinentaakwahk, kaamanaa​miicinaakaatek miicim.' 9 Miinawaa tahsh kihcikiishikonk awiya ninkii'onci​kanoonik: 'Kekoo itanken ewiinentaakwahk Kishemanitoo kaapehkihtootc,' ninkii'ik. 10 Nihswaa o'o kiihtoocikaate, miitahsh kiishikonk kaa'ishi​kiiwe​ishpipicikaatek. 11 Inashke mii 'i ahpii nihsin ininiwak kiihtakohshinook kaakiih​piicinisha'ontwaa. Kiihpiniipawiwak i'imaa waahkaa'ikanink kaakii'ishi​kapehshiyaan, Sehsariiya (Caesarea) ootenaank kiihpi'onciiwak ekiihpi​naasihkawiwaatc. 12 Kishemanitoo otAhcaahkwan tahsh ninkii'wiintamaak cipwaahtawiihsiwaan ciwiiciiwimak. Oko tahsh kaye ninkotwaahso niici​otepwehtamook ninkii​wiiciiwikook. Miihsh kaakiih​piintikeyaank Kwaarniiliyahs (Cornelius) owaahkaa'ikan. 13 Ninkii'wiintamaakonaan tahsh kaa'ishi​waapamaatc encalan eniipawinitc owaahkaa'ikanink ekii'ikotc iinsan: 'Ishinisha'owen Caahpa ootenaank Saaiman Piitar kaaishinihkaasotc ci'antomatc. 14 Miitahsh a'awe kewiintamawihk ihkitowinan ke'onci​pimaaci'ikoowisiyan, iki kaye kahkina eyaawaatc i'imaa kaashi'ayaayan,' okii'ikoon iinsan. 15 Ahpii tahsh kaa'maacii​kaakiikitoyaan, Kishemanitoon otAhcaahkoni okii'otihsikowaan taapishkoo kiinawint nihtam kaakii'ishi​otihsiyamintc. 16 Miitahsh kaakii'maamihkawiyaan o'o kaakii'ihkitohpan kaaTipenciketc: 'Cwaan (John) nipiini okii​yaapacihtoon siika'antaaketc, kiinawaa tahsh wiin siika'antaakooyek, Kishemanitoon otAhcaahkwan tayaapatisiwan,' kii'ihkitopan. 17 Kiishpin tahsh Kishemanitoo miinaatc i'i kaaCoowiwihsinik i'i peshikwan tino miikiwewin kaakii'ishi​miinikoowisiyank ahpii kiitepweyenimank Ciisahs Christ, awenen tahsh niin ketinowiyaampaan cikakwe​nakaaskawakipan Kishemanitoo," kii'ihkito Piitar. 18 Ahpii tahsh kaanoontaakotc o'o enaacimotc kaawiin kii'noontaatihsiiwa'. Miitahsh kaa'ishi​nanaahkomaanitc Kishemanitoon e'ihkitonitc: "Kishemanitoo ohsha iinsan opakitinamawaa' i'i kaaCoowiwihsinik cikwehkaatisinitc, ci'onci​pimaatisinitc kaye," kii'ihkitowa'. 19 Ahpii tahsh Istiipin (Stephen) kiinihsintc, mii 'i ahpii kaakii'maacii​kakwaataki'intwaa otepwehtamook. Aaninta tahsh otepwehtamook kaakiih​piiwipa'iwewaatc kii'ishaawak Piniihshiya (Phoenicia), minihsink kaye Saaiparahs (Cyprus) eshinihkaatenik, Entiyaahk (Antioch) ootenaank kaye ekiihpapaa​minwaacimowaatc, Coowa' ehta ekii'wiitamawaawaatc. 20 Aaninta tahsh otepwehtamook kiihpii'onciiwak Saaiparahs, Saairiini (Cyrene), Entiyaahk ootenaank ekii'ishi​takohshinowaatc. KaaCoowiwihsinik itahsh Kariihk (Greek) tino okii'wiintamawaawaa' i'i eshi​minwaacimimintc kaaTipencikenitc Ciisahsoon. 21 Okashki'ewisiwinini tahsh kaaTipencikenitc okii​wiiciiwikonaawaa, niipiwa' tahsh pemaatisinitc kiihtepwehtamoo' ekiih​kwehkiinotawaanitc kaaTipencikenitc. 22 Otepwehtamook tahsh Ceroosalamink (Jerusalem) kaa'ayaawaatc kiinoontamook o'o e'ishihsenik. Miitahsh kaakii'ishinisha'waawaatc Paarnapahsan (Barnabas) ci'ishaanitc weti Entiyaahk ootenaank. 23 Ahpii tahsh Paarnapahs ehtakohshink okii​waapamaa' otepwehtamoo' ekiih​shawenimikonitc Kishemanitoon. Wiinke tahsh kiihciihkentam ekii'ayaankwaamimaatc kaye mooshak iko tepwe cipiminisha'waanitc Kishemanitoon. 24 Aahpici hsa kiihsasekaa​ininiiwi, ekii'mooshkineshkaakotc Kishemanitoon otAhcaahkoni, tepwehtamowin kaye. Kii'ani​nanki​paahtiinowak tahsh kaakiih​tepwehtawaawaatc Kishemanitoon. 25 Kii'ishaa tahsh Taarsahs (Tarsus) ootenaank ekii'antone'waatc Swaalan (Saul). 26 Ahpii tahsh kaamihkawaatc okiih​piinaan i'imaa Entiyaahk ootenaank. Peshiko​pipoon tahsh i'imaa kii'ayaawak ekii'maamaawaci'aawaatc otepwehtamoo', niipiwa' kaye ekiih​kihkino'amawaawaatc. Miitahsh i'imaa ootenaank Entiyaahk otepwehtamook nihtam kaakii'ishinihkaanintwaa Christ opiminisha'waakana'. 27 Miitahsh i'i ahpii aanintaa kaakiih​takohshinowaatc kaakanootamawaawaatc Kishemanitoon i'imaa Entiyaahk, ekii'onciiwaatc Ceroosalamink. 28 Peshik tahsh inini Aakapahs (Agabus) eshinihkaasotc kiihpasikwii. Kishemanitoon otAhcaahkoni tahsh okiimiinikoon ciwiintank ewii'noontehsenik miicim misiwe ahkiink. Miitahsh tepwe kaa'ishiwepaninik mekwaa ahpii Kalaatiyahsan (Claudius) kiikihciokimaawinitc. 29 Otepwehtamook tahsh pepeshik kii'inentamook ehko​kashkihtoowaatc ci'ishinisha'amawaawaatc wiici'iwewin otepwehtamoo' eyaanitc Cootiiyahkiink (Judea). 30 Miitahsh o'o kaa'ishihcikewaatc ekii'ishinisha'amawaawaatc kaaniikaanentaakosinitc anami'aawinink. Paarnapahs tahsh, Swaal (Saul) kaye kii'anoonaawak ci'ishiwitoowaatc i'i wiici'itiwin.

Ishihcikewinan 12

1 Miitahsh o'o ahpii Herat (Herod) kihciokimaa kaakiimaacii​kakwaataki'aatc aaninta otepwehtamoo'. 2 Kii'anoohkii tahsh pashipa'ikewihkomaanink ci'onci​nihsimintc Ciimisan (James) kaakii'wiicihkiwemikonitc Cwaanan (John). 3 Ahpii tahsh ewaapantank Coowa' eminwentaminitc, kii'anoohkii Piitaroon (Peter) ci'otaahpinimintc. Mii 'i ahpii kiimayaahsek ewiihkwantiiwahkamikisinitc Coowa' e'amwaanitc pahkweshikanan kaaompisikaniwihsinik. 4 Ahpii tahsh kaakaahcitinaatc okiih​kipa'waan. Okii'ishi​pakitinaan tahsh cishi​kanawencikaniwinitc niiwayek eshi​neniiwinitc shimaakanihsha'. Herat kii'inentam mohshe citipaahkonimintc kahkina awiya' ciwaapamikonitc ishkwaa Pimaaci'ikoowi​Wiihkwantiwintc. 5 Piitar tahsh kiihkanawenimaa kipa'otiiwikamikonk. Otepwehtamoo' tahsh weweni kiikihci​anami'aawa' ekiih​kakwecimaanitc Kishemanitoon cipakitinikaasotc. 6 Ehtipihkaninik tahsh, mii 'i waapaninik Heratan (Herod) citipaahkonikotc, Piitar (Peter) kiinipaa nahsawaya'ii niishin shimaakanihsha'. Niishin tahsh piiwaapihkweyaapiin kiiaapataniniwan emamaancikwahpisotc. Kanawencikewishimaakanihsha' kaye kii'ayaawa' eshi'ishkwaantemiwaninik kipa'otiiwikamik. 7 Kwetahto tahsh okii'naakosiihtaakoon otencalimini kaaTipencikenitc, kipa'otiiwikamik tahsh kii'waahseyaani. Okiih​toohkiwepinikoon tahsh ohpimenaw ekii'amaciwepinikotc e'ikotc: "Weyiip wanishkaan." Piiwaapihkweyaapiin itahsh onihkink kii'onci​pankihsininiwan. 8 Miihsh encalan kaa'ani'ikotc: "Kihkinciciihpinintison, pihtahkisinen itahsh kaye. Pihsihkan kikashkiikiiwin, piminisha'ohshin itahsh," okii'ikoon. Miitahsh iko Piitar kaa'ishihciketc. 9 Piitar tahsh okiih​saakiciwiiciiwaan ekiih​piminisha'waatc. Kaawiin tepwe okii​kihkentansiin i'i ekii'ishihsenik. Nimihci'ishinam kii'inentam. 10 Okii'ani​mayaashkaanaawaa tahsh i'i nihtam eshi​ayaanitc okanawencike', i'i tahsh kaye kotak eshi​ayaanitc okanawencike', piinihsh weti eshi​ayaanik piiwaapihko​ishkwaantem wenci​saakiciayaanik inahke kii'ishaank ootenaank. Eshkwaat tahsh iko kiihpaahkihseni, miihsh kaa'ishi​shaaposhkaawaatc. E'ani​pimohsewaatc itahsh miihkanaani, kwetahto okii'nakanikoon ini encalan. 11 Miihsh Piitar kaakii'waapaahkamentank o'o ekii'ihkitotc: "Miitahsh tepwe ekihkentamaan kaaTipenciketc ekiih​piicinisha'waatc otencaliman cinaatamawimitc okashki'ewisiwininiink Heratan (Herod) onci, i'i kaye kahkina Coowa' eshi​pakohsentaminitc." 12 Ahpii tahsh kaanihsitawentank kii'ishaa owaahkaa'ikaniniink Meriin (Mary), Cwaan (John) omaamaan, Maarhk (Mark) kaakii'inimintc. Miihsa 'imaa niipiwa' awiya' kaahtashi​maawaci'itinitc e'anami'aanitc. 13 Ahpii tahsh eotihtank akwaciink kaashi'ishkwaantemiwaninik menikan okiih​paahpaawa'aan. Oshkiniikihkwewan tahsh Oroota (Rhoda) eshinihkaasonitc kiihpiianta​kihkencikewan awenenan kaapaahpaawa'ikenitc. 14 Ahpii tahsh Oroota enihsitohtawaatc Piitaran eyaawinitc, kaa'ahpiihci​minwentank tahsh, kaawiin okiih​paahkinamawaahsiin. Kiihkiiwe​piintikepahtoo ekiih​tipaacimotc Piitar eniipawinitc akwaciink. 15 O'o tahsh okii'ikoo': "Anihsha iitok i'i kaaihkitoyan, kikiiwashkwe maawiin!" okii'ikoo'. Aanciko tahsh okiihkakwe​tepimaa' ehtepwetc i'i kaa​ihkitotc. Miitahsh aanciko kaa'ikotc: "Otencaliman maawiin ini," okii'ikoo'. 16 Piitar aanciko kiihpaahpaawa'ike. Ahpii tahsh kaahpaahkintenamawintc ewaapamintc itahsh wiinke kiimaamahkaatentamoo'. 17 Kii'ishinihkehtaa tahsh cimanaa​noontaatinitc. Miitahsh kaakii'wiintamawaatc aaniin kaa'ishi​saakisi'ikotc kaaTipencikenitc i'imaa kipa'otiiwikamikonk. Miihsh kaa'inaatc: "Wiintamawihk o'o Ciimis iki kaye kotak otepwehtamook." Miitahsh kaa'ani'ishi​maacaatc pahkaan inkoci ekii'ishaatc. 18 E'ani​kishepaawakaninik tahsh etatawe kii'ocaanimahkamikisiwak shimaakanihshak. Kaanaka tipi ayaakwen Piitar ekii'inentamowaatc. 19 Herat tahsh okii'nanaantone'waan, kaawiin tahsh okii​mihkawaahsiin. Weweni hsa okii'anta​kihkenimaa' kaakiih​kanawenimaanitc. Miitahsh kaakii'anoohkiitc cinihsimintc. Herat tahsh Cootiiyahkiink kii'onci​maacaa weti Sehsariiya (Caesarea) ekii'awi​ayayaatc acina. 20 Herat (Herod) tahsh kaawiin okii'minwaapamaahsii' pemaatisinitc eyaanitc Tayar (Tyre) ootenaank, Saaitan (Sidon) ootenaank kaye. Miihsh kaakiih​pianta​waapamikotc. Pinamaa hsa okiih​shaakoosomaani Palaastahs (Blastus) eshinihkaasonitc kaakii'naakacihtoonitc kihciokimaawikamik cikanoocikehtamaakonitc. Miihsh Herat kaakiih​pi'anta​waapamikotc ekiih​kakwecimikotc pisaan ciwiiciiwaatc aaniihsh mii weti kaa'ontinamowaatc miicim otahkiiminiink. 21 Ahpii tahsh ehkiishikaninik kaakii'onaapantenik, Herat okii​pihsihkaanan okihciokimaa​kikishkikanan ekii'onapitc okihciokimaa​wapiwinink. Miitahsh mohshe kaakiih​kanoonaatc kaakiihpi​naasihkaakotc. 22 Pemaatisinitc itahsh kiihshaakowewa' ekii'ihkitonitc: "Manitoo hsa 'a kaainwetc, kaawiin ininiiwihsii," kii'ihkitowa'. 23 Shemak itahsh iko kaaTipencikenitc otencalimini okiih​tootaakoon ciaahkositc, aaniihsh kaawiin okii'miikwehciwenimaahsiin Kishemanitoon. Manicoosha' tahsh okii'amokoo', miihsh piinihsh kaa'ishi​nihsikotc. 24 Kishemanitoo tahsh otihkitowin kii'ani​misihteshkaani, niipiwa' ekii'ani​tepwehtaminitc. 25 Paarnapahs (Barnabas) tahsh, a'a kaye Swaal (Saul) Ceroosalamink kiihpi'onci​kiiwewak ahpii kaahkiishihtoowaatc otanohkiiwiniwaa. Cwaan Maarhk (Cwaan Mark) tahsh kaainimintc okii'maacii​wiiciiwaawaan.

Ishihcikewinan 13

1 I'imaa tahsh Entiyaahk (Antioch) otepwehtamook kiimaawaci'itiwak. Kii'ayaawak tahsh i'imaa aaninta tino kaakanootamawaawaatc Kishemanitoon, kaamiinikoowisiwaatc kaye cikihkino'amaakewaatc. Miiwak hsa iki Paarnapahs (Barnabas), Simiyan (Simeon) Mahkatewis kaa'ishinihkaacikaniwitc, a'a tahsh Loohshiyahs (Lucius) Saairiini (Cyrene) ootenaank kaaonciitc. A'awe tahsh kaye Manehan (Manaen) kaakiiwiicinihtaawikimaatc ini kotak Heratan (Herod), a'a tahsh kaye Swaal (Saul). 2 Mekwaa tahsh otepwehtamook e'anami'ehtawaawaatc kaaTipencikenitc, emantawii'itisowaatc kaye, okii'onci​kanoonikowaan Kishemanitoon otAhcaahkoni: "Onakimihk Paarnapahs, a'a kaye Swaal ci'inanohkiiwaatc i'i anohkiiwin kaashi​antomakwaa," okii'ikowaan. 3 Keyaapi tahsh kimantawii'itisowak, kii'anami'aawak tahsh kaye. Miihsh kaa'ishi​saaminaawaatc ekii'maacinisha'waawaatc. 4 Paarnapahs tahsh, Swaal kaye kaaishkwaa​maacinisha'okowaatc Kishemanitoon otAhcaahkoni, kii'ishaawak hsa weti Silooshiya (Seleucia) ootenaank. Miitahsh weti kaa'onci​maaciiyaahshiwaatc ekii'ishaawaatc minihsink Saaiparahs (Cyprus). 5 Ahpii tahsh ehtakohshinowaatc Saalamihs (Salamis) ootenaank, kii'wiintamaakewak Kishemanitoon otihkitowinini otanami'ewikamikoniink Coowa'. Cwaanan (John) hsa okii'wiiciiwaawaan ekii'wiici'ikowaatc. 6 Kii'ani​kahkiiwewak itahsh i'i minihs piinihsh ekii'ani​takohshinowaatc ootena Pehpahs (Paphos). Miihsh kaakii'nakishkawaawaatc Coowi'ininiwan memaantaawisinitc, e'inwaanintisonitc kaakanootamawaatc Kishemanitoon, Paar-ciisahs (Bar-jesus) eishinihkaasonitc. 7 Okiihsaaki​wiiciiwaani tahsh ini wekimaahkantaakenitc Sarciyahs Pwaalahs (Sergius Paulus) kaainimintc kaakiih​kihkentaahsonitc. Miiwan itahsh ini Paarnapahs, Swaal kaye kaakii'antomikowaatc ekii'antawentaminitc cinoontaminitc Kishemanitoon otihkitowinini. 8 Iniweniwan tahsh memaantaawisinitc okiihkakwe​kipihtinikowaan Elimahs (Elymas) eshinihkaasonitc, mii 'i kaa'ishinihkaasotc Kariihk (Greek) otishikiishwewininiink. Okiihkakwe​wanishkwe'an itahsh kaye kaaokimaahkantaakenitc citepweyenimaahsinik Ciisahsoon. 9 Swaal tahsh, Pwaal (Paul) kaainintc, emooshkineshkaakotc Kishemanitoon otAhcaahkoni, okiih​kanawaapamaan Elimahsan, 10 miihsh kaa'inaatc: "Kiin tepenimihk Maciaya'aa, kaashiinkentaman kaye kaakwayahkonaakwahk! Kimooshkineshkaakon kaye kahkina kakayenisiwin, maci'ishiwepisiwin kaye. Mooshak kikakwe​kwehkinamowaan cipahkaaninaakwaninik Kishemanitoo otihkitowin! 11 Inashke tahsh kaaTipenciketc oninc kikamaakoshkaakon. Kaawiin tahsh kikawaapihsii, acina kaawiin kikaonci​waapamaahsii kiisihs," okii'inaan. Shemaak tahsh ekashkii​tipihki'ishi​ayaanik kekoon okii'otihsikoni, miihsh kaa'ishi​papaa​nanaantone'waanitc kepapaa​sakinihkenikonitc. 12 Ahpii tahsh a'a wekimaahkantaaketc e'waapantank i'i kaakii'ishihsenik kiihtepwehtam emaamahkaatentank kaakii'ishi​kihkino'amawintc onci kaaTipencikenitc. 13 Pwaal (Paul) tahsh i'i kaye kaakii'wiiciiwikotc kii'onci​maaciiyaahshiwak i'imaa Pehpahs (Paphos) ekii'ishi​takohshinowaatc Perka (Perga) ootenaank Paampiliya (Pamphylia) ahkiink. Cwaan Maarhkan (Cwaan Mark) tahsh i'imaa okii'nakanikowaan, Ceroosalamink (Jerusalem) ekii'ishi​kiiwenitc. 14 I'imaa tahsh Perka kii'onci​maacaawak ekii'ishaawaatc Entiyaahk (Antioch) ootenaank Pihsitiya (Pisidia) ahkiink. Kii'Anwepiiwi​kiishikanini tahsh kiipiintikewaatc anami'ewikamikonk, miihsh kaa'ishi​onapiwaatc. 15 Kaa'ishkwaa-anamihcikaatenik tahsh otonahshowewin Moosihs (Moses), i'i kaye kaakii'ishipii'ikenitc kaakiih​kanootamawaanitc Kishemanitoon, miihsh kaakiiniikaanishkaminitc anami'aawin okiih​piicinisha'waani awiyan o'o ekiih​pi'ikowaatc Pwaal, Paarnapahs: "Niici​otepwehtamonaanik, kiishpin eyaawekwen ihkitowin ke'onci​mashkawentamowaatc oko awiyak, pisaan iko kakitok," kiihpi'inaawak. 16 Pwaal kiihpasikwii, ekii'ayishinihkenitc cipisintawintc, miihsh kaa'ihkitotc: "Kiinawaa Isriyal (Israel) kaatinowiyek, kekiinawaa kaye kaaCoowiwihsiwek enami'ehtawek Kishemanitoo, pisintawihshik! 17 Kishemanitoo tahsh weKishemanitoomikotc pemaatisinitc Isriyala' okii'onaapamaa' kikehteya'aaminaapanii', okii'ishi'aa' kaye cimashkawentaakosinitc mekwaa Iicipahkiink (Egypt) kiitashi​piiwitewentaakosinitc. Okihci​mashkawisiiwinink itahsh okii'onci​saakiciwinaa' weti ahkiink. 18 Niimitana (40) tahsh tahsopipoon okiih​shashiipenimaa' kaakii'ishihcikenitc mekwaa pikwatahkamik kiiayaanitc. 19 Miihsh kaakii'nihshiwanaaci'aatc kaakii'niishwaahswewaanakisinitc (7) pemaatisinitc Kenan (Canaan) ahkiink kaakii'ayaanitc. Meshkwac itahsh ekii'miinaatc opimaatisiima' Isriyala' citipinawewisinitc i'i ahkiini. 20 Niiwaahk naanimitana (450) tahsopipoon tahsh kiihpimihse o'o ci'ishihsek. Miihsh kaakii'miinaatc keonaahkonikonitc piinihsh kiiniayaanitc Saamiyoon (Samuel) Kishemanitoon kaakiih​kanootamawaanitc. 21 Pemaatisinitc tahsh okiih​kakwecimikoo' cimiinaatc kihciokimaan. Swaalan (Saul) tahsh kiimiikiwe cikihciokimaawinitc kaakii'otetenitc Kihshan (Kish) Pencimanink (Benjamin) kaakii'ontahkaanesinitc. Niimitana (40) tahsopipoon tahsh kiikihciokimaawiwan. 22 Ahpii tahsh kaa'ishihciketc awahshime cikihciokimaawihsinik, Tepitoon tahsh okiih​kihciokimaawi'aan. Miiwan tahsh ini kaakiih​tashimaatc o'o kii'ihkitokopanen: 'Ninkii'mihkawaa hsa Tepit (David) wekosihsimikotc Cehsiin (Jesse), menwentami'ishitc, mii hsa 'awe ketootank kahkina enentamowak.' 23 Miitahsh i'imaa Tepitink kaakii'ontahkaanesitc Ciisahs, Kishemanitoon kaakii'ahshotamaakenitc cipimaaci'aanitc pemaatisinitc Isriyala'. 24 Cipwaa takohshininitc tahsh Ciisahsoon, Cwaan wiin niikaan okiih​kakiihkimaa' pemaatisinitc Isriyala' cikwehki​pimaatisinitc, cisiika'antaasonitc itahsh kaye. 25 Cwaan tahsh e'ani​kiishihtootc otanohkiiwin okii'inaa' kaakiihpi​naasihkaakotc: 'Awenen kiinawaa enenimihshiyek? Kaawiin niin nintaawihsii kaapii'ek! Kii'ishkwaa'ayaayaan hsa kotak tapi'ayaa. Kaawiin tahsh ninte'ahpiihtentaakosiwaahsiin omahkisinan ciyaapa'amowakipan,' Cwaan kii'ihkitokopan. 26 Niici​onciimaakanak, Eparahaamink (Abraham) wentahkaanesiyek, kekiinawaa tahsh kaaCoowiwihsiwek kaakohtaanenimek Kishemanitoo, kiinawint ohsha kaakiihpi'ishinisha'amaakoyank o'o Kishemanitoo otipaacimowin keshi​pimaaci'ikooyank. 27 Inashke iki Ceroosalamink (Jerusalem) kaataawaatc, iki tahsh kaaokimaahkantaakewaatc kaawiin okii'nihsitawinawaahsiwaawaan Ciisahsoon. Kaawiin kaye okii​nihsitohtansiinaawaa kaakii'ishipii'ikenitc Kishemanitoon kenootamawaanitc aanawiin entahso​Anwepiiwi​kiishik ekii'anamihtamawintwaa. Miitahsh o'o mayaa kaakii'ishihsenik kaakiihpi'ihkitonitc ahpii kii'inaawaatc Ciisahsoon cinihsimintc. 28 Ekii'mihkansikwaa tahsh wiinawaa kekoonini ke'onci​nihsaawaatc, Paailatoon (Pilate) hsa okiih​kakwecimaawaan ci'inaahkonaanitc cinihsimintc Ciisahsoon. 29 Kaa'ishkwaa​ishihcikenitc tahsh kahkina eshipii'ikaatenik ini onci, ashiteyaahtikonk tahsh okii'onci​pina'waawaan, miihsh kaa'ishi​na'inaawaatc na'initiiwikamikonk. 30 Kishemanitoon tahsh okiihkiiwe​pimaatisii'ikoon. 31 Niipiwa' itahsh tahsokiishik okii'naakosiihtawaa' i'i kaakii'wiiciiwikonitc i'imaa Kaalaliiwahkiink (Galilee) piinihsh weti Ceroosalamink. Miiwa' itahsh i'i noonkom kaakiishikaninik kaatipaacimikotc, ewiintamawaanitc Isriyala'. 32 Noonkom tahsh kiwiitamaakoom i'i minwaacimowin: aaniin Kishemanitoon kaakii'ishi​ahshotamawaakopanen i'i kikehteya'aaminaapanii', 33 kiinawint ekii'otihsaapantamowankitc ekiihkiiwe​pimaatisi'aatc Ciisahsoon. Mii 'i iitok o'o nahke eshi​tashinsonitc i'imaa Nikamonink: 'Kiin ninkosihs. Noonkom kaakiishikahk kitookosihsimin.' 34 Ahpii tahsh Kishemanitoon kiikiiwe​pimaatisii'ikotc nipowinink onci kaawiin miinawaa wiihkaa tawaanaatisihsii na'initiiwikamikonk, mii 'owe kaakii'itaminitc o'o kii'ihkitonikopanen: 'Tepwe hsa kikamiinikoowisim kehtentaakwahk, kaakehcinaa'wentaakwahk kaye kaakii'ishi​ahshotamawakipan Tepit.' 35 Miinawaa tahsh pahkaan nikamonink ishipii'ikaate: 'Kaawiin kikapakitinaahsii kaatipenimatc kitanohkii'aakan cinihshiwanaataninik owiiyaw i'imaa nipowinink.' 36 Inashke wiin Tepit (David) kaa'ishkwaa​ishihciketc kaakii'inenimikotc Kishemanitoon citootank, mii 'i kaakii'ishkwaa​pimaatisitc. Kii'ishi​na'inikaateni tahsh owiiyaw kaakii'ishi​na'inimintc okehteya'aama', miihsh kaakii'wanaataninik owiiyaw na'initiiwikamikonk. 37 A'awe tahsh kaakiih​kiiwe​pimaatisii'ikotc Kishemanitoon kaawiin miinawaa wiihkaa tanipohsii cikii'wanaataninikipan owiiyaw. 38 Kinantawenimininim tahsh kiinawaa nintinawemaakanak cikihkentamek, mii 'awe Ciisahs kaawiintamaakooyek, wiin onci e'onci​poonencikaatekin macitootamowinan. 39 Inashke awiya kiikanawentank Moosihsoon (Moses) otoonahshowewinini, kaawiin i'imaa ta'onci​pakitinikaasohsii. Mii ehta ko awiya tepweyenimaatc Ciisahsoon ke'inakimintc emino​wiiciiwaatc Kishemanitoon. 40 Ayenkwaamisik tahsh kiinawaa ci'ishiwepisihsiwek o'o kaakii'ihkitowaakopanen iki Kishemanitoon kenootamawaawaatc: 41 'Pisintamok, kiinawaa kaanihtaa​maanencikeyek, wewaanentamek, kaye tahsh kaanipoyek! Kekoon hsa niwii'ishihcike noonkom kaakiishikahk mekwaa ehpimaatisiyek ketepwehtansiwek, mihsawaa ko awiya aana waawiintamawinek,' " Pwaal kii'ihkito. 42 Pwaal tahsh, a'a kaye Paarnapahs e'ani​saaka'amowaatc i'imaa anami'ewikamikonk, pemaatisinitc miinawaa okii'antomikowaa' Anwepiiwi​kiishikanink cipitashintamowaatc ini aasha kaakii'wiintamaakewaatc. 43 Ahpii tahsh ehsaaka'aminitc kaakii'ishi​piintikenk, niipiwa' Coowa', i'i kaye kaakiih​Coowiwihsinik kaakii'otaahpinaminitc Coowianami'aawin, okiih​piminisha'okowaa' a'a Pwaal, a'a kaye Paarnapahs. Miitahsh kaakiiwiintamawaawaatc wiihka cipooniahpenimontansinik eshi​kishewaatisinitc Kishemanitoon. 44 Miinawaa tahsh e'Anwepiiwi​kiishikaninik, kekaa kahkina ootenaank eyaanitc kiihpiishaawa' ewii'noontaminitc kaaTipencikenitc otihkitowinini. 45 Ahpii tahsh Coowak ewaapankewaatc ehpaahtiinonaaniwaninik, wiinke kii'moshkinewi​ontentamook. Okii'aanwehtawaawaan kaye Pwaalan kaakii'ihkitonitc, noociko kaye ekii'ayinaawaatc. 46 Miihsh Pwaal, a'a kaye Paarnapahs kaakiihsoonkite'e​nahkwehtamowaatc ekii'ihkitowaatc: "Kiinawaa iitok nihtam kaaCoowiwiyek kii'ishinaakwanoopan cikii'wiintamaakooyekipan Kishemanitoo otipaacimowin. E'aanawentamowek tahsh, ehteahpiihtenintisohsiwek kaye cikii'ayaayekipan pimaatisiwin wiihkaa kepoonihsehsinok, meshkwac tahsh noonkom kaaCoowiwihsikwaa ninka​naasihkawaanaanik. 47 Aaniihsh mii 'oweni kaaTipenciketc kaa'inanooshiyamintc o'o kii'ihkitotc: 'Kika'ishi'ininim hsa ciwaahseshkamawekwaa kaaCoowiwihsikwaa, kahkina pemaatisiwaatc kaa'ayaawaatc o'omaa misiwe ahkiink ci'onci​pimaaci'ikoowisiwaatc,' " okii'inaa'. 48 Ahpii tahsh kaaCoowiwihsikwaa enoontamowaatc o'o wiinke kiikihci​ciihkentamook, okiihkihci'inentaanaawaa kaye Kishemanitoon otihkitowinini. Kahkina tahsh kaakiikiishaaci'onakimintwaa ci'ayaawaatc pimaatisiwin kepoonihsehsininik kii'ani​tepwehtamook. 49 KaaTipenciketc tahsh otihkitowin misiwe kii'ani​misihteshkaani i'imaa nahkehkamik. 50 Coowak tahsh okii'ompwe'aawaa' ihkwewa' kaakiih​kihtaanenimaanitc Kishemanitoon, i'i kaye ininiwa' kaakiiniikaanentaakosinitc i'imaa ootenaank. Okii'ompwe'aawaa' kaye awiya' cimaanshi​tootawaanitc Pwaalan (Paul), ini kaye Paarnapahsan (Barnabas). Miitahsh kaakiih​saakici​wepinaawaatc i'imaa otahkiiwaank onci. 51 Ishinisha'waakanak tahsh kiihpaapaawisitehshimoonowak cikihkentaminitc ekii'macitootaminitc. Kii'ani'ishaawak tahsh weti Aaihkooniyam (Iconium) ootenaank. 52 Otepwehtamook tahsh i'imaa Entiyaahk (Antioch) eyaawaatc wiinke okii'mooshkineshkaakonaawaa ciihkentamowin, okii'mooshkineshkaakowaan kaye Kishemanitoon otAhcaahkoni.

Ishihcikewinan 14

1 I'imaa tahsh Aaihkooniyam (Iconium) ootenaank, Pwaal (Paul) a'a kaye Paarnapahs (Barnabas), kiihpiintikewak ekii​nihtaa'ayintiwaatc otanami'ewikamikoniink Coowa'. Kaa'ahpiihci​weweni tahsh kakitowaatc kiihpaahtiinowa' Coowa', i'i kaye kaaCoowiwihsinik kaakiih​tepwehtaminitc. 2 Iniweniwa' tahsh Coowa' kaakiih​tepwehtansinik okii'ompwe'aani kaaCoowiwihsinik ekiih​shaakoosomaanitc cimaci'inenimaanitc otepwehtamoo'. 3 Kinwesh tahsh i'imaa kii'ayaawak ekiih​soonkite'ewaatc ekiih​tashimaawaatc kaaTipencikenitc. Miiwan hsa ini kaa'miinikowaatc cikashkihtoowaatc citootamowaatc maamahkaacihcikewinan, meyaamahkaatentaakwaninikin kaye, kaaTipencikenitc ekii'naakohtoonitc ehtepwemakaninik enwaatotamowaatc okishewaatisiwinini. 4 Kahkina tahsh awiyak kii'nenaawi'itiwak; aaninta Coowa' ekii'wiiciiwaawaatc, aaninta tahsh kaye ishinisha'waakana'. 5 Coowa' itahsh i'i kaye kaaCoowiwihsinik i'i kaye tako kaaniikaanihtamaakonitc kiimaawaci'itiwa' ewii'mamaanshiihkantaakowaatc, ewiih​papiimwahsina'ikowaatc kaye. 6 Okii​kihkentaanaawaa tahsh i'i ewiih​tootawintwaa, weti tahsh kii'ahpa'iwewak Lihkeyooniya (Lycaonia) ahkiink, eshi​ayaanikin ootenawan Listara (Lystra), Tarpi (Derbe) eshinihkaatenikin, ishiwaahkaaya'ii kaye weti. 7 Miitahsh weti kaa'ishi​waawiintamowaatc minwaacimowin. 8 Weti tahsh Listara (Lystra) ootenaank kiinamatapiwan peshik ininiwan ekii​maahkisinitc ositiniink, ekii'ishi​nihtaawikinitc i'i nahke wiihkaa ekiih​pimohsehsinik. 9 Pwaal (Paul) tahsh okiih​pisintaakoon ehkakitotc ini ininiwan. Okiih​kanawaapamaan tahsh, enihsitawinawaatc tahsh e'ayaanitc tepweyentamowin ciminoayaa'imintc, 10 miihsh kaa'inaatc: "Pasikwiin ciniipawiyan!" okii'inaan. Shemaak tahsh iko kiihpasikwiiwan, ekii'maacii​pimohsenitc. 11 Ahpii tahsh kaakiimaamawi​ayaanitc ewaapantaminitc Pwaal kaakii'ishihciketc, Lihkeyooniya ishikiishwewin hsa okii​yaapacihtooni e'ihkitonitc: "Manitook kitootihsikonaanik ininiink e'ishinaakosiwaatc," kii'ihkitowa'. 12 Paarnapahsan (Barnabas) tahsh Soohs (Zeus) okii'ishinihkaanaawaan. Pwaalan (Paul) tahsh Armiis (Hermes) okii'ishinihkaanaawaan aaniihsh kii'niikaanikakitowan. 13 Kii'ayaawan tahsh i'imaa ininiwan kaakii'anami'enohkiihtawaanitc manitoon Zoohs enimintc. Otanami'ewikamikoni tahsh akwaciink ootenaank kii'ishi​patahkiteni. Miiwan tahsh ini kaakiih​piinaanitc aape​pishihkiinsan, kaakiih​piitoonitc kaye i'imaa eshi'ishkwaantemiwaninik ootena. Okii'antawentamini, i'i kaye kaapaahtiinonitc ewiih​pakitinaahsoohtamaakowaatc. 14 Ahpii tahsh Paarnapahs (Barnabas), a'a kaye Pwaal (Paul) enoontamowaatc waa'ishihcike'intwaa, okii​taashkiikipitoonaawaan okikishkikaniwaan ekii'onsonsaamentamowaatc. Kii'ahpahtoowak tahsh mekweya'ii eshi​maamawi​ayaanitc ekii'ishi​shaakowewaatc: 15 "Aaniin inaa onsonsaamahkamik eshihcikeyek! Nimihci'ininiiwimin ohsha keniinawint taapishkoo kiinawaa kaaishi​ayaayek. Kipi​wiintamaakoom ohsha minwaacimowin ewiintamaakooyek cipoonihtooyek kekoon enentaakwahsinohkin, meshkwac itahsh cinaasihkawekipan Kishemanitoo kaapimaatisitc, kaakii'oshihtootc kiishik, ahki, kihcikam kaye, kahkina kaye i'imaa eyaanikin. 16 Inashke otaanaank okiih​pakitinaa' kaapepahkaanwewaanakisinitc pemaatisinitc pisaan iko nahke waa'ishipimaatisinitc ci'ishihcikenitc. 17 Inashke kaawiin kekoon kii'ishko​ishihcikehsii kehcinaac iko ke'onci​kihkentaakositc e'minohciketc. Wiin iitok kiishikonk kaaonci​kimiwanohketc, kaamiininek kaye kihtikaanan kemanishamowek, wiin kaye kaamiininek miicim, ke'onci​minwentamowek kaye," okii'inaawaa'. 18 O'oweni tahsh aanakii'ihkitowaatc, akaawaa okiih​kashkimaawaa' kaamaamawiinonitc cipakitinaahsohtamaakohsikwaa. 19 Aaninta tahsh Coowa' kiihpitakohshinoo' Entiyaahk (Antioch) ootenaank, Aaihkooniyam (Iconium) ootenaank kaye ekiihpi'onciinitc. Okiih​shaakoosomaani itahsh kaamaamawiinonitc. Miitahsh Pwaal kaakiih​papiimwahsina'ikotc ekiih​saakici​taapiipa'ikotc i'imaa ootenaank, nipowitok maawiin ekii'inenimikotc. 20 Otepwehtamoo' itahsh kaa'ishkwaa​waahkaakaapawihtaakotc, kii'wanishkaa ootenaank ekiihkiiwe'ishaatc. E'ani​waapaninik tahsh okiimaacii​wiiciiwaan Paarnapahsan (Barnabas) Tarpi (Derbe) ootenaank ekii'ishaawaatc. 21 Ahpii tahsh kaawiintamaakewaatc i'i minwaacimowin i'imaa kihci​ootenaank, niipiwa' awiya' kiimaacii​tepwehtamoo'. Weti tahsh inahke kii'ishi​ashe​kiiwewak Listara (Lystra) ootenaank, Aaihkooniyam ootenaank, weti kaye Entiyaahk ootenaank. 22 Miitahsh i'imaa kaahtashi​wiiciiwaawaatc otepwehtamoo' keyaapi cimashkawentaminitc, cipakiciihsinik i'i kaakii'ishi​tepwehtaminitc ekii'ihkitowaatc: "Oncitako ishinaakwan niipiwa' wahsitaawihsewin cinakishkamank wiihpiintikeyank Kishemanitoo Otipencikewin." 23 Ahpii tahsh kaa'onakimaawaatc keniikaanisinitc kaashi​maamaawaci'itinitc otepwehtamoo', kii'anami'aawak tako kaye kiimantawii'itisowak ekiih​pakitinamawaawaatc kaaTipencikenitc cikanawenimaanitc i'i kaakiih​tepwehtaakonitc. 24 Kii'ani​shaaposhkaawak itahsh Pihsitiya (Pisidia) ahkiink, i'imaa tahsh Paampiliya (Pamphylia) ahkiink kii'ishi​takohshinook. 25 Miitahsh i'imaa Perka (Perga) ootenaank kaahtashi​wiintamaakewaatc minwaacimowin. Kii'ani'ishaawak tahsh weti Ataaliya (Attalia) eshitaaniwaninik. 26 Miitahsh i'imaa kihciciimaanink kii'onci​kiiweyaahshiwak Entiyaahk inahke ekii'ishaawaatc. Mii iitok i'imaa kaakii'onci​maacaawaahpan kaakiih​pakohsenimimintc Kishemanitoon okishewaatisiwininiink cishi​kanawenimikowaatc citootamowaatc i'i anohkiiwin noonkom kaakiih​kiishihtoowaatc. 27 Ahpii tahsh kaatakohshinowaatc okiimaamawiantomaawaa' otepwehtamoo' ekiih​tipaacimowaatc aaniin kahkina kekoon kaakii'ishihcikenitc Kishemanitoon ewiitanohkiimikowaatc, aaniin kaye kaakii'ishi​paahkinamawaanitc i'i kaaCoowiwihsinik citepweyentaminitc. 28 Kinwesh tahsh i'imaa kii'ayaawak ekii'wiiciiwaawaatc otepwehtamoo'.

Ishihcikewinan 15

1 Aaninta tahsh ininwak kiihtakohshinook i'imaa Entiyaahk (Antioch) ekiihpi​onciiwaatc Cootiiyahkaank (Judea). Miiwak itahsh iki kaakiih​kihkino'amawaawaatc otepwehtamoo' ekii'ihkitowaatc: "Kihkinawaatashakeshokooyek ehta kikapimaaci'ikoowisim ishihcikeyek kaainahtenik Moosihs (Moses) otoonahshowewin." 2 Mii hsa 'i Pwaal (Paul) a'a tahsh kaye Paarnapahs (Barnabas) kaakiikihci​kakanoonaawaatc kaye tahsh ekiikihci​tashintamowaatc o'oweni. Miitahsh kaakii'inentamonaaniwaninik Pwaal a'a kaye Paarnapahs, i'i kaye kotak otepwehtamoo' ci'ishaawaatc Ceroosalamink (Jerusalem). Ekii'inintwaa ci'anta​waapamaawaatc Ishinisha'waakana', i'i kaye kaaniikaanisinitc o'oweni onci kaakiih​tashintamowaatc. 3 Miitahsh kaakii'maacinisha'okowaatc otepwehtamoo', ekii'ani​shaaposhkaawaatc Piniihshiya (Phoenicia) ahki, i'i kaye Sameriya (Samaria). Ekiih​tipaacimowaatc aaniin kaaCoowiwihsinik kaa'ishi​kwehkiinotawaanitc Kishemanitoon. Wiinke tahsh kiikihci​ciihkentamoo' otepwehtamoo' enoontaminitc o'o. 4 Ahpii tahsh tekohshinowaatc Ceroosalamink (Jerusalem), okiih​piintikanikowaa' otepwehtamoo', Ishinisha'waakana' kaye, iniweniwa' kaye kaaniikaanisinitc, ekii'wiintamawaawaatc aaniin kahkina kaa'ishihcikenitc Kishemanitoon wiinawaa onci. 5 Kii'ayaawak itahsh i'imaa aaninta otepwehtamook Perahsiink (Pharisee) kaakii'ishi​wiicihtwaawaatc. Miiwak itahsh oko kaakiih​pasikwiiwaatc ekii'ihkitowaatc: "Oncitako ishinaakwanini cikihkinawaatashakeshontwaa, ciayaankwaamimintwaa kaye cipiminisha'amowaatc kaye Moosihsoon kaakii'inahshowenitc." 6 Miitahsh Ishinisha'waakanak, iki kaye kaaniikaanisiwaatc kaakii'maawaci'itiwaatc ewii'naanaakatawentamowaatc o'oweni. 7 Kaa'ishkwaa​kihci​tashintenik itahsh o'o, Piitar (Peter) kiihpasikwii o'o ekii'ihkitotc: "Niici​otepwehtamook, kiinawaa iitok kikihkentaam mewisha Kishemanitoo ekii'onci​onaapamitc eshi​ayaawek. Niin ewiiaapaci'itc cionci​noontaminitc minwaacimowin i'i kaaCoowiwihsinik, kaye tahsh citepwehtaminitc. 8 Kishemanitoo kehkentank ote'imaa okii'ishinaakohtoon ekii'otaahpinaatc ekii'miinaatc ciotihsikonitc Kishemanitoon otAhcaahkoni taapishkoo kaakiih​tootawinankitc. 9 Kaawiin pahkaan kitinenimikohsiinaan i'i kaye kaaCoowiwihsinik, awiya otepwehtamowinink e'onci​pehkihcikaniwitc omacitootamowinink onci. 10 Wekonen itahsh wenci'ishihcikeyek ehkakweci'ek Kishemanitoo ehtootawekwaa otepwehtamook ci'ishihcikewaatc senakaninikin. Kaawiin iitok kikehteya'aaminaapaniik, kekiinawint itahsh kikashkihtoohsiimin i'i ci'ishihcikeyank. 11 Kiinawint itahsh kitepwehtaamin e'onci​pimaaci'ikooyank okishewaatisiwinink onci kaaTipenciketc Ciisahs taapishkoo kewiinawaa kaashi​pimaaci'ikoowisiwaatc." 12 Kahkina tahsh kaakii'maamawi​ayaawaatc i'imaa kaawiin kii'noontaatihsiwak ekiih​pisintawaawaatc Paarnapahsan, Pwaalan kaye ehtashintaminitc aaniin kaa'ishi​maamahkaacihcikenitc, aaniin kaye kaa'ishi​kihkinawaacihcikenitc Kishemanitoon mekweya'ii eshi​ayaanitc kaaCoowiwihsinik. 13 Ahpii kaa'ishkwaa​kakitonitc, Ciimis (James) kewiin o'o kii'ihkito: "Niici​otepwehtamook, taka pisintawihshik. 14 Saaiman (Simon) iitok weweni okiih​tashintaan aaniin maawac iko nihtam Kishemanitoo kaa'ishi​shawenimaatc kaaCoowiwihsinik ekii'otaahpinaanitc wiin iko ewiih​tipinawewisitc owiinsowinink onci. 15 Miiwan itahsh ono mayaa ihkitowinan peshikwan inahke kaainentamowaatc Kishemanitoon kenootamawaawaatc o'o e'ishipii'ikaatek: 16 'Ani'ishkwaahsekin ihsa ini, mii 'i cipikiiweyaan. Ninka​kiiweoshihtaawaan kaye Tepit (David) okihcianami'ewikamik kaakiih​kawihsenikipan. Ninka​kiiwe​patahkitoonan kaye kaapiikoshkaakin, ewii​naapahtooyaan. 17 Miitahsh kotak kahkina pemaatisiwaatc cinanaantone'waawaatc kaaTipencikenitc, iki kaye kaaCoowiwihsikwaa kaakii'antomakwaa niwiinsowinink ewiih​tipinawewisiyaan. 18 Mii 'i ehkitotc kaaTipenciketc, kaakihkenimintc mewisha ekiih​pionci​oshihtootc ono kahkina kekoon.' " 19 Ciimis (James) kii'ani'ihkito: "Aasha ninkiih​kiishentam awahshime cimikoshkaaciaahsiwankwaapan iki kaaCoowiwihsikwaa kaakwehkiinotawaawaatc Kishemanitoon. 20 Meskwac itahsh cioshipii'amawintwaa ciwiintamawintwaa cipapaamentansikwaa kekoonan kaaonci​wiinentaakwaninikin manitoohkaanink, pishikwaatisiwinink itahsh. Cipapaamentansikwaa kaye miicim kepinewe​nihcikaatenik, cipimentansikwaa kaye miskwiini. 21 Inashke Moosihs (Moses) otoonahshowewin mewisha pi'onci​anamihcikaateni entahso​Anwepiiwi​kiishik Coowi anami'ewikamikohkaank. Otihkitowinan kaye tashincikaateniwan entahso-ootenaahkaank." 22 Miitahsh Ishinisha'waakanak, kaaniikaanisiwaatc kaye, iki kaye otepwehtamook kaakii'maawaci'itiwaatc kii'maamawi'inentamook cionci'ishinisha'waawaatc ininiwa' eshi​ayaawaatc. Miiwa' itahsh o'o niishin kaaniikaanisinitc kaakii'onenimaawaatc, Cootahs (Judas) Paarsapas (Barsabas) kaakii'inimintc, ini kaye Saailahsan (Silas) ciani​wiiciiwaanitc Pwaalan (Paul), Paarnapahsan (Barnabas) kaye ishaanitc weti Entiyaahk (Antioch) ootenaank 23 Ekii'miinaawaatc cimaaciitonitc oshipii'ikan o'o eshipii'ikaatenik: "Niinawint otepwehtamook, Ishinisha'waakanak, kaaniikaanisiwaatc kaye, kitooshipii'amaakoom kiinawaa otepwehtamook kaaCoowiwihsiwek wenciiyek Entiyaahk, Siiriya (Syria) ahkiink, Silihshiya (Cilicia) kaye. Pooshoo kitikoom. 24 Ninoontaamin aaninta awiyak emikoskaasominekwaa wenci​mikoshkaatentamek o'omaa tahsh iinsan e'onciiwaatc kaashi​ayaayaank. Kaawiin niinawint ninkii'ishinisha'waahsiwaanaanik. 25 Ninkii'maamawi-inentaamin tahsh ci'onaapamankitwaa ininiwak kepianta​waapaminekwaa cipi​wiiciiwaawaatc Pwaalan, Paarnapahsan kaye kaasaaki'imankitc. 26 Miiwak ihsa oko kaapi​naniisaanihtoowaatc opimaatisiwiniwaan otishinihkaasowininiink onci kaaTipencikenitc Ciisahsoon Christan. 27 Miitahsh kaaonci'ishinisha'wankitc Cootahs a'a kaye Saailahsan, wiinawaa piko otooniwaank cionci​wiintamawinekwaa peshikwan e'ihkitoyaank. 28 Miitahsh o'oweni Kishemanitoo otAhcaahkwan kaaminwaapantank, miihsh peshikwan keniinawint enentamaank onsaam paashitc ci'ishihcikehsiwek, ini hsa ehta entawentaakwahkin. 29 Cipapaamentansiwek miicim kaapakitinamawintwaa manitoohkaanak, i'i kaye miicim kaakipinewe​nihcikaatek, cinoocihtohsiwek kaye pihshikwaatisiwin. Kiishpin itahsh ishihcikeyek kaaikooyek, aahpici kikakihci​minohcikem. Pooshoo kitikoom," mii 'i kaa'ishipii'ikaatek i'i oshipii'ikan. 30 Miitahsh kaakii'maacinisha'ontwaa iki pemiwitoowaatc oshipii'ikan ci-ishaawaatc weti Entiyaahk (Antioch). Ahpi tahsh tekohshinowaatc weti okii'antomaawaa' otepwehtamoo' cimaawaci'itinitc. Miihsh kaakii'miinaawaatc i'i oshipii'ikan. 31 Ahpii hsa tahsh kaa'anamihtoonitc i'i oshipii'ikan, wiinke kii'onci​minwentamoo' ekii'noontaminitc i'i minwaacimowin. 32 A'a hsa Cootahs (Judas) a'a tahsh kaye Saailahsan (Silas), kewiinawaa kiihtinowiwak kenootamawaawaatc Kishemanitoon. Niipiwa' kii'ayihkitowak keonci​mashkawentaminitc, cimashkawi​tepwehtaminitc kaye otepwehtamoo'. 33 Kinweshiihsh itahsh iko 'imaa kii'ayaawak, miihsh kaakii'nakanaawaatc otepwehtamoo' ekii'ishaawaatc cianta​waapamaawaatc kaakiih​piicinisha'okowaahpan. Otepwehtamoo' itahsh okii'ikowaa' cianimino​pimiayaawaatc. 34 [Saailahs iitok kii'antawentamokopan i'imaa cikii'ayaahpan.] 35 Pwaal hsa wiin a'a kaye Paarnapahs kii'ayaawak i'imaa Entiyaahk i'i kaye kotak kaapaahtiinonitc otepwehtamoo'. Kiikihkino'amaakewak, ekiih​tashintamowaatc kaye kaaTipencikenitc otihkitowinini. 36 Naanaake tahsh e'ani'ishihsek Pwaal (Paul) okii'inaan Paarnapahsan (Barnabas): "Taka kiiwe​ishaataa kahkina ootenawan kaakiih​pitashi​kakiihkwaanotamowank kaaTipenciketc otihkitowin cimawatihsankwaa kahkina otepwehtamook cikihkenimankwaa aaniin eshihsewaakwen," okii'inaan. 37 Paarnapahs tahsh kii'ishi​antawentam ciwiiciiwikowaatc Cwaan Maarhk (Cwaan Mark) kaainimintc. 38 Pwaal tahsh wiin kaawiin i'i kii'inentansii cikii'wiiciiwikowaahpan aaniihsh okii'noontenakanikowaakopan weti Paampiliya (Pamphylia) ahkiink kaawiin okii'wiici'ikohsiiwaan enanohkiiwaatc. 39 Kaa'ahpiihci​kihci​kakanoonitiwaatc tahsh mii 'i kaakiipahkewinitiwaatc. Paarnapahs okii'otaahpinaan Maarhkan ciwiiciiwikotc, miihsh kaakii'ishaawaatc minihsink Saaiparahs (Cyprus) ciimaanink ekii'onci'inaahshiwaatc. 40 Pwaal tahsh wiin Saailahsan okii'otaahpinaan ciwiiciiwikotc. Miihsh kaa'ishi​maacaawaatc otepwehtamoo' ekii'ikowaatc e'ishi​pakitinikowaatc eshi​kishewaatisinitc kaaTipencikenitc. 41 Okii'ani​shaaposhkaan itahsh Siiriya (Syria) ahkiini, i'i kaye Silihshiya (Cilicia) ahkiini, ekii'mashkawentamo'aatc otepwehtamoo' entashi​maawaci'itinitc.

Ishihcikewinan 16

1 Pwaal (Paul) hsa kiihpitakohshin i'imaa eshi​ootenaawaninik Tarpi (Derbe), Listara (Lystra) kaye kaaicikaatenikin. Kii'ayaawan itahsh i'imaa peshik otepwehtamoon Timahti (Timothy) eshinihkaasonitc. Omaamaani hsa Coo kiihtinowihkwewiwan, oteteni tahsh wiin Kariihk (Greek) kiihtinowiwan. 2 Kahkina hsa otepwehtamook eyaawaatc i'imaa Listara ootenaank, Aaihkooniyam (Iconium) ootenaank kaye okii'mino​tashimaawaan Timahtiin. 3 Miiwan tahsh ini Pwaal kaakii'antawenimaatc ciwiiciiwikotc, miihsh kaakiih​kihkinawaatashakeshwaatc. Miitahsh kaakii'onci​tootawaatc aaniihsh kahkina Coowa' i'imaa kaakii'ayaanitc okii​kihkentamini Timahtiin oteteni Kariihk ekiih​tinowinitc. 4 Kii'ani​ayishaawak itahsh eshi​waootenaawaninik, ekii'wiintamaakewaatc aaniin kaakii'ishi​onentaminitc ishinisha'waakana' ke'ishihcikenaaniwaninik, kaaniikaanisinitc kaye Ceroosalamink (Jerusalem) kaa'ayaanitc. Miitahsh kaakii'inaawaatc cikanawentaminitc ini inaahkonikewinan. 5 Otepwehtamook tahsh entashi​maamaawaci'itiwaatc awahshime kii'ani​mashkawi​tepwehtamook, kii'ani​paahtiinowak kaye entahsokiishik. 6 Misiwe tahsh kii'ishaawak i'imaa Pariciya (Phrygia) ahkiink, i'imaa kaye Kalehshiya (Galatia) ahkiink. Kaawiin tahsh okiih​pakitinikohsiiwaan Kishemanitoon otAhcaahkoni citashintamowaatc kaaTipencikenitc otihkitowinini Eshiya (Asia) kihci​ahkiink. 7 Ahpii tahsh kaamayaashkamowaatc Mihshiya (Mysia) ahkiink kiihkakwe​ishaawak Pihtiniya (Bithynia) ahkiink. Kaawiin tahsh okiih​pakitinikohsiiwaan Ciisahsoon otAhcaahkoni i'imaa ci'ishaawaatc. 8 Okiih​shaaposhkaanaawaa tahsh Mihshiya ahki, weti tahsh kii'ishi​takohshinook Caroowahs (Troas) ootenaank. 9 Ahpii tahsh ehtipihkaninik Pwaal okii'waapantaan ishinamowin. Okii'waapamaan ininiwan ematwe​niipawinitc Maahsitooniya (Macedonia) ahkiink ehpakohsenimikotc o'o ekii'matweikotc iinsan: "Piishaan cipi​yaashawishkaayan ciwiici'iyaank," okii'ikoon. 10 Ahpii tahsh kaawaapantank i'i ishinamowin shemaak iko ninkii'oshiihtaamin ewii'ishaayaank Maahsitooniyaa ahkiink. Ninkiih​kecinaa'omin tahsh Kishemanitoo weti ekii'ishi​antomiyamintc ciwiintamawimankitc minwaacimowin weti eyaanitc. 11 Caroowahs (Troas) ootenaank tahsh ninkii'onci​maaciiyaahshimin tiwehk iko Saamohtaarehs (Samothrace) minihsink ekii'ishi​pakamaahshiyaank. E'ani​waapank itahsh Niyaahpolihs (Neapolis) ootenaank ninkii'inaahshimin. 12 Miitahsh weti kaa'onci​kohpiiyaank ekii'ishaayaank ootenaank Pilipaai (Philippi) eshinihkaatek. I'i hsa ootena kiiniikaanentaakwan kii'onci​tipentaakwan Maahsitooniyaa ahkiink, Oroomink (Rome) kaa'onciiwaatc okii'oshihtoonaawaakopan. Paahtiino​kiishik tahsh i'imaa ninkii'ayaamin. 13 Ahpii tahsh e'Anwepiiwi​kiishikahk ninkii'ishaamin akwaciink kaashi-ishkwaantemiwank ootena, eshi​siipiiwank inahke ekii'ishaayaank, ekii'inentamaank kehcinaac maawiin cimihkamaank Coowak entashi​anami'aawaatc. Ninkii'onapimin tahsh ekiih​kakanoonankitwaa ihkwewak i'imaa kaakiimaawaci'itiwaatc. 14 Peshik tahsh ihkwe kaakiih​pisintawiyamintc Litiya (Lydia) kii'ishinihkaaso, Tayahtaira (Thyatira) ootenaank ekii'onciitc. Mii hsa kaa'inanohkiitc e'ataawaaketc mahkatemiskwekinoni, kaa'anami'ehtawaatc Kishemanitoon hsa kiihtinowi. Miitahsh kaakii'miinikoowisitc cinihsitohtank, citepwehtank kaye kahkina Pwaalan kaakii'ihkitonitc. 15 Ahpii tahsh kaahsiika'antaasotc, i'i kaye otaawinink eyaanitc, ninkiih​kakaansomikonaan ekii'ishiyanmintc: "Kiishpin enakimiwekwen kwayahk ehtepweyenimak kaaTipenciketc, piintikek nintaawinink, ciwiici'ayaamiyek," ninkii'ikonaan. Ninkii​kashkimikonaan itahsh ci'ishaawankitc. 16 Aapitink tahsh ehkiishikahk e'ishaayaank entashanami'aaniwank, ninkii'mekwaashkawaanaan oshkiniikihkwe kaapamiihtaaketc ekikishkaakotc maciahcaahkwan, ekii'inishkaakotc cikashkihtootc ciwiintank niiyaak keni'ishihsenik. Niipiwa' kii'onci​shooniyaahkewa' otookimaama' a'a oshkiniikihkwe ekiih​kashkihtootc ciniikaaniwiintank aaniin kekoon keni'ishihsenik. 17 Mii 'awe kaakiih​piminisha'waatc Pwaalan (Paul) e'wiiciiwimankitc o'o ekii'ishi​shaahshaakowetc: "Miiwak hsa oko ininiwak kaa'anohkiihtawaawaatc Maawac Eshpentaakosinitc Kishemanitoon, kewiintamawinekwaa aaniin inahke keshi​pimaaci'ikoowisiyek!" ekii'ihkitotc. 18 Paahtiino​kiishik tahsh o'o kii'ishihcikewan. Kekahpii tahsh Pwaal okii'mikoshkaatentamo'ikoon, miihsh kaakiih​kwehkikaapawihtawaatc ekii'inaatc ini maciahcaahkwan kaakikishkawaanitc oshkiniikihkwewan: "Ciisahs Christ owiinsowinink kitishi​kanoonin cinakanatc a'a ihkwe," okii'inaan. Shemaak itahsh okii'nakanaani. 19 Ahpii tahsh oshkiniikihkwe otookimaama' ekihkentaminitc e'wanihtoonitc kaashi'ahpenimonotaakotc kaanihtaa​onci​shooniyaahkenihpan, okii'otihtinaani Pwaalan, Saailahsan kaye. Okii'ishi​waawiihkopinaani tahsh i'imaa kaaishi​nihtaa​tanataawenk mekwe ootenaank eshi​ayaanitc otoonahshowe'. 20 Okiih​piinaani tahsh eshi​ayaanitc onahshowewikimaan Oroomink (Rome) kaaonci​tipentaakosinitc o'o ekii'inaanitc: "Oko hsa ininiwak kaaCoowiwiwaatc wawaanentamihcikewak kitootenaaminaanink, 21 ekihkino'amaakewaatc ishihtwaawinan ci'otaahpinamowank citako​ishihcikewank itahsh. Kaawiin kiinawint iitok kitaa​otaahpinamowaahsiimin ehkitowaatc aaniihsh Oroomink kitoonci​tipentaakosimin," kii'ihkitowa'. 22 Ikiweniwak tahsh kaakii'maamawi​ayaawaatc i'imaa kiihtakwiiwak emiikaanimintc Pwaalan, Saailahsan kaye. Onahshowewikimaak kii'anoohkiiwak cikiihcikonayepicikaniwinitc cipahpahshanshe'omintc, cipapahkihte'omintc kaye. 23 Kaa'ishkwaa​kihci​pahpahshanshe'waawaatc itahsh okiihpiinci​wepinaawaa' kipa'otiiwikamikonk. Kanawencikewi​shimaakanihsh tahsh kii'anoonaa ciyaayiici​kipa'waatc cikashki'ohsinik. 24 Ahpii tahsh a'a kanawencikewi​shimaakanihsh i'i kaa'ishi​anoonintc okiih​piintike​wepinaa' maawac anaamink kipa'otiiwikamikonk, ositiniink kaye ekii'ishi​kihciwaahkwa'waatc. 25 Ninkoci ko e'ani​aapihtaatipihkaninik Pwaal, Saailahs kaye kii'anami'aawak, ekii'anami'e​nikamoohtawaawaatc kaye Kishemanitoon. Kotak tahkonikana' okiih​pisintaakowaa'. 26 Miitahsh i'i kwetahto kaakii'kihci​koshkohsek ahki. Kiiwahkawihse kaye kaakii'ishi​patahkitek kipa'otiiwikamik. Ishishemaak tahsh kahkina kipa'otiiwi'ishkwaanteman kiihpaahkihsewan, kahkina kaye omamaancikwahpisowiniwaan kiipahkihseniwan. 27 Kanawencikewi​shimaakanihsh tahsh ekoshkohsetc ekii'waapantank ishkwaanteman epaahkihsininikin, kii'inentam tahkonikana' ekii'maaciipa'iwenitc. Miitahsh kaakiih​kicipitootc opashipa'ikewihkomaan ewii'nihsitisotc. 28 Pwaal tahsh okiih​shaakowaanaan: "Keko kekoon tootaasohken! Kahkina ohsha 'omaa nintayaamin," okii'inaan. 29 Kii'anoohkiiwan tahsh cipiicikaatenikin waahsahkonencikanan, miihsh kaakiih​piintikepahtoonitc ekii'animihkohtaanitc eshi​ayaawaatc Pwaal, Saailahs kaye, ekii'nininkishkaanitc ehpiihcisekisinitc. 30 Okiih​saakisi'ikowaan tahsh ekii'ikowaatc: "Aaniin keishihcikeyaan cipimaaci'ikoyaan?" okii'ikowaan. 31 O'o tahsh okii'ishi​nahkwehtawaawaan: "Tepweyenim kaaTipenciketc Ciisahs, miitahsh i'i cipimaaci'ikooyan, iki kaye kitaawinink eyaawaatc," okii'inaan. 32 Okiih​kakanoonaawaan tahsh ekii'wiintamawaawaatc otihkitowinini kaaTipencikenitc, i'i kaye kahkina i'imaa eyaanitc otaawininiink. 33 Shemaak tahsh iko i'i ahpii etipihkaninik kanakwencikewi​shimaakanihshan okii'ishiwinikowaan ekiih​kisiihsipatoonitc kaakii'ishi​ayenakanaasowaatc. Shemaak tahsh kaye kiihsiika'antaasowan, ini kaye kahkina otaawininiink eyaanitc. 34 Okii'ishiwinikowaan tahsh eshitaanitc ekiih​piintikanikowaatc ekii'ahtamaakowaatc kemiiciwaatc. Wiinke kiikihci​minwentamoon kahkina ko entahshinitc aaniihsh okiih​tepweyenimaani Kishemanitoon. 35 E'ani​waapaninik tahsh onahshowewikimaak okii'ishinisha'waa' aanihkewikimaa' ci'awi​kanoonaanitc kanawencikewi​shimaakanihshan: "Mii 'i ishipakitin iki ininiwak," ci'inaanitc. 36 Kanawencikewi​shimaakanihsh tahsh okii'wiintamawaan Pwaalan ekii'inaatc: "Onahshowewikimaak kiihpi'ihkitowak pisaan cipakitinikooyan, a'a kaye Saailahs. Saaka'amok tahsh weweni cini​maacaayek," kii'ihkitowan. 37 Pwaal o'o okii'inaa' aanihkewikimaa': "Wiinke hsa mohsheya'ii ninkiih​pahpahshanshe'okonaanik, kaawiin kanake ninkiih​tipaahkonikohsiinaanik, Oroomink (Rome) tahsh e'onci​tipentaakosiwankitc. Kaawiin i'i nintinentansii ci'ishihsekipan. Wiinawaa hsa piko ninka​pinaasihkaakonaanik cisaakici​wiiciiwiyamintwaa," okii'inaa'. 38 Anihkewikimaak tahsh okii'awi​wiintamawaawaa' onahshowewikimaa' aaniin Pwaalan kaa'ihkitonitc. Wiinke tahsh kiihsekisiwa' ahpii enoontaminitc Oroomink ekii'onci​tipentaakosinitc Pwaalan ini kaye Saailahsan. 39 Kiihpiishaawa' itahsh ekiihpi​kakwe​waankawi'ikowaatc pehkihsh ekiihpi​saakisi'ikowaatc kaye. Miihsh kaakiih​kanoonikowaatc ninkoci 'imaa ootenaank ci'onci'ishaawaatc. 40 Kipa'otiiwikamikonk tahsh kaa'ishkwaa​onci​saaka'amowaatc, kii'ishaawak Litiyawan (Lydia) owaahkaa'ikaniniink. Miihsh weti kaa'ishi​waapamaawaatc otepwehtamoo' ekiih​kanoonaawaatc cimashkawentaminitc. Miihsh kaa'ani'ishimaacaawaatc.

Ishihcikewinan 17

1 Pwaal (Paul), a'a tahsh kaye Saailahs (Silas) ehpimi​ayaawaatc kiihshaaposhkaawak ootenawan Aampihpalihs (Amphipolis), Aahpalooniya (Apollonia) eshinihkaatenikin. I'imaa tahsh ootenaank Tehsalanaihka (Thessalonica) eshinihkaatenik kii'ishi​takohshinook. Kii'ayaani 'imaa Coowak otanami'ewikamikowaa. 2 Pwaal tahsh kaakiinihtaa​ishihciketc, nihso​Anwepiiwi​kiishik kiihpiintike Coowi anami'ewikamikonk, ekiih​tashintamaatiwaatc Kihcimasina'ikan, 3 weweni ekii'wiintamawaatc, ekii'waapanta'aatc kaye aaniin kaakii'onci'ishihsenik cikakwaataki'imintipan Kishemanitoo kaakii'Onaapamaatc cikiiwe​pimaatisinitc itahsh onci nipowinink, o'o ekii'inaatc: "Mii hsa wa'a Ciisahs kaatashintamawinakook, Kishemanitoon kaakii'Onaapamikotc ciPimaaci'iwetc." 4 Aaninta tahsh Coowak kiikashkimaawak citepwehtamowaatc, miihsh kaakii'wiiciiwaawaatc Pwaalan, Saailahsan kaye. Miihsh peshikwan kaa'ayintiwaatc kaakiih​paahtiinowaatc kaaniikaanisiwaatc ihkwewak. Iki kaye kiihpaahtiinowak kaakiih​kohtaanenimaawaatc Kishemanitoon Kariihkak (Greek) tenowiwaatc. 5 Coowak itahsh kii'aayaahshentamook. Kaakii​nihtaa​tanataawenk tahsh okii'ishi​naasihkawaawaa' awiya' kekoon enentaakosihsinik ekii'ohkwiino'aawaatc, miihsh kaa'ishi​ompwehkamikisiwaatc i'imaa ootenaank. Kii'ishi​mawine'ikewak tahsh owaahkaa'ikaniniink Cehsanan (Jason) ekii'antone'waawaatc Pwaalan, Saailahsan kaye, ewii'ishiwinaawaatc eshi​paahtiinonitc awiya'. 6 Ahpii tahsh emihkawaahsikwaa, Cehsanan hsa i'i kaye kotak otepwehtamoo' okii'ishi​waawiihkopinaawaa' eshi​ayaanitc ootenaawikimaa' o'o ekii'ishi​shaahshaakowewaatc: "Iki hsa ininiwak misiwe ahkiink kaapapaa​ompehkamikisiwaatc kitootihsikonaanik. 7 Wa'a tahsh Cehsan okiih​piintikanaa' owaahkaa'ikanink. Nahpaac inahke ishikihkino'ikewa' kaa'inahtenikin Maawac Kihciokimaan enahshowenitc, e'ihkitonitc kotak kihciokimaan e'ayaanitc Ciisahs e'ishinihkaasonitc," kii'ishi​shaakowewa'. 8 Iki tahsh kaakiih​paahtiinowaatc awiyak, iki kaye ootenaawikimaak ahpii enoontamowaatc o'o, wiinke kiinihshiwanaatentamook. 9 Okiih​tipa'ike'aawaan itahsh Cehsanan minihk kaakii'nihtaa​tipa'ikewintc, i'i kaye kaakii'wiiciiwikonitc, miihsh payish kaa'ishi​pakitinaawaatc. 10 Shemaak tahsh ehtipihkaninik otepwehtamoo' Pwaal (Paul), Saailahs (Silas) kaye okii'ishinisha'okowaa' ci'ishaawaatc Piriiya (Berea) ootenaank. Ahpii tahsh tekohshinowaatc weti kiihpiintikewak Coowi anami'ewikamikonk. 11 Nawac tahsh i'i Piriiya eyaanitc kiihpisintamoo', ekii'moocikentaminitc kaye enoontaminitc i'i tipaacimowin ahpiihc wiin i'i Tehsalanaihka (Thessalonica) eyaanitc. Entahsokiishik Kihcimasina'ikanink okii'ishi​antakihkentamini taka citepwewaninikwen Pwaal kaakii'ihkitotc. 12 Niipiwa' tahsh Coowa' kiihtepwehtamoo', i'i kaye kaakii'niikaanentaakosinitc ihkwewa', niipiwa' kaye kaaininiiwinitc Kariihka' (Greek) tenowinitc. 13 Coowak tahsh Tehsalanaihka kaakii'ayaawaatc kiinoontamook Pwaalan Piriiya ootenaank ehtashintaminitc Kishemanitoon otihkitowinini. Kii'ishaawak tahsh weti ekii'awi​ompwe'aawaatc kaakiih​paahtiinonitc awiya' ekii​mikoshkaatentamo'aawaatc. 14 Shemaak tahsh ehtipihkaninik otepwehtamoo' Pwaal, okii'ishinisha'oko' ci'ishaatc kihcikamiink inahke. Saailahs itahsh wiin a'a kaye Timahti (Timothy) kii'apiwak i'maa Piriiya ootenaank. 15 Ininiwa' tahsh kaakii'wiiciiwikotc Pwaal okii'ishi​pakamiwiiciiwikoo' Aahtins (Athens) ootenaank. Miihsh i'imaa kaa'onci​kiiwenitc ekii'inaatc ciwiintamawaanitc Saailahsan, ini kaye Timahtiin wiipa cipi​naasihkaakotc. 16 Mekwaa tahsh Pwaal (Paul) epapii'otc, aahpici kii'onci​mikoshkaatentam ewaapantank i'i ootena misiwe e'ayaanitc manitoohkaana'. 17 Miitahsh kaakiih​kakanoonaatc Coowa' otanami'ewikamikoniink, i'i kaye kaaCoowiwihsinik kwehtaanenimaanitc Kishemanitoon. Entahsokiishik tahsh kaye okiih​kakanoonaa' i'i kaakii'mayaashkaanitc i'imaa kaakiih​tanataawenk. 18 Aaninta tahsh kihkino'amaakewininiwa' kaakii'inimintc Ehpihkoriiyawak (Epicureans) i'i kaye Istooihkwak (Stoics), okii'maacii​kakwe​shaakoosomikoo'. Aaninta tahsh kii'ihkitowa': "Aaniin tahsh inaa ehkitotc a'a kaakihkentamoohkaasotc?" kii'ihkitowa'. Aaninta tahsh kaye kii'ihkitowa': "Mii 'i enihtaakositc ehtashimaatc mayaki​manitoo," kii'ihkitowa'. Miitahsh kaakii'onci-ihkitonitc aaniihsh Pwaal okiih​tashimaan Ciisahsoon, okiih​tashintaan kaye kiiwe​pimaatisii'ikoowin. 19 Okii'maacii​wiishaamikoo' tahsh ekii'ishiwinikotc ootenaawi​onahshowewininiwa' kaakii'ishi​nihtaa​maawaci'itinitc, Eriyaahpakahs (Areopagus) Pihkwatinaa ecikaatenik. Miitahsh i'imaa kaa'ishi​kakwecimikotc: "Niwii​kihkentaamin o'o oshki​kihkino'ikewin kaawiintamaakeyan. 20 Aaninta hsa kekoonan kaawiintaman pahkaan nintinihtaamin, niwii​kihkentaamin tahsh aaniin ehkitoomakanokwenan," okii'ikoo'. 21 Kahkina hsa Aahtins wenciiwaatc, iki tahsh kaye pahkaan wenciiwaatc i'imaa kaakii'ishi​ootenaahkewaatc kaawiin kekoon okii'noocihtoohsiinaawaa, mii ehta ko ekiih​tashintamowaatc, ekiih​pisintamowaatc kaye oshki kekoonan. 22 Miihsh Pwaal kaakiih​pasikwiitc enaahsamapinitc kaakii'maawaci'itinitc i'imaa Eriyaahpakahsink o'o ekii'ihkitotc: "Kiinawaa Aahtins wenciiyek! Misiwe hsa nahke nintishiwaapantaan e'anami'ewi'ishiayaayek. 23 Ehpapaamohseyaan hsa, e'waapantamaan kaye iniweniwan aanti entashi​anami'aayek, niwaapantaan kaye kaashi​pakitinaahsoyek o'o e'ishipii'ikaatek: 'Kaapakitinamawintc kehkencikaniwihsik Manitoo.' I'i hsa tahsh kekoon kaa'anami'ehtamek kehkentansiwek, mii 'iwe kaawiih​tashintamawinakook. 24 Kishemanitoo okii'oshihtoon ahkiini, kahkina kaye kekoon i'imaa eyaanik, otipentaan kiishik, ahkiini kaye. Kaawiin ishitaahsii anami'ewikamikonk oninciimaank kaaonci​oshihcikaatenik. 25 Kaawiin awiyan noontehsehsii cipami'ikohpan, taapishkoo kekoon enoontehsetc. Wiin iitok kaamiinaatc kahkina awiyan pimaatisiwin, pakitanaamowin kaye, wiin kaye kahkina kekoon kaamiikiwetc. 26 Peshik tahsh ininiink okii'onci​oshiaa' kahkina kaatahswewaanakisinitc pemaatisinitc misiwe o'omaa ahkiink citashi​pimaatisinitc. Wiin okii'onahtamawaa' aaniin mayaa ahpii, aaniinti kaye mayaa keshi​kapehshinitc. 27 Miitahsh kaakii'onci'ishihciketc, aanti piko eshi​antone'okotc, cimihkaakotc. Kaawiin iitok waahsa tenentaakosihsii. 28 O'o hsa awiya kii'ihkitokopan: 'Wiin iitok onci kaa'onci​pimaatisiyank, kaaonci​wahkawiiyank kaye, kaye tahsh kaa'onci​ayaayank.' Miihsa'i kaa'ihkitowaakopanen kinikamoowininiimiwaak: 'Kiinawint hsa kitooniicaanihsimikonaan,' kiihkitoowaakopan. 29 "Kishemanitoo tahsh e'oniicaanihsiminank, kaawiin kitaa​inenimaahsiwaanaan ehtinowitc osaawaapihkonk, komaa kaye waapaapihkonk kaaonci​oshihcikaniwitc, komaa kaye ahsin kaamasinaapihka'okotc ininiwa' eshi​wawiishiinitc. 30 Kaawiin iitok Kishemanitoo kiihpapaapisiskentansii otaanank ekii​kihkenimaahsiwintc. Noonkom tahsh wiin okanoonaa' kahkina pemaatisinitc misiwe eyaanitc cikwehki​pimaatisinitc. 31 Aasha ohsha okii'onahtoon kiishikan okwayahkwaatisiwinink ewii'onci​tipaahkonaatc kahkina awiya' eyaanitc ahkiink, ewii​yaapaci'aatc ini ininiwan kaakii'Onaapamaatc. Wiinke okiihpehtaa​naakohtamawaan kahkina awiyan i'i ewii'ishihciketc, miihsh kaakii'onci​kiiwe​pimaatisi'aatc Ciisahsoon nipowinink onci," okii'ishi​kakanoonaa'. 32 Aahpii tahsh Pwaal enoontaakotc ehtashintank kiiwe​pimaatisiwin, aaninta tahsh okiih​paahpinotaakoo'. Aaninta tahsh wiin okii'ikoo': "Miinawaa hsa kiwii'noontaakoo o'o citashintaman," okii'ikoo'. 33 Miitahsh i'imaa Pwaal kaa'onci​maacaatc. 34 Aaninta tahsh awiya' okii'wiiciiwikoo', ekiih​tepwehtaminitc kaye. Ini tahsh kaye peshik kaakii'onci​tipentaakosinitc onahshowewinink Eriyaahpakahs (Areopagus) kaashi​maawaci'itinitc, ini kaye ihkwewan Taamarihs (Damaris) eshinihkaasonitc, kotak kaye awiya' okii'wiiciiwikoo'.

Ishihcikewinan 18

1 Ahpii tahsh o'o kaa'ishkwaa​ishihsek, Pwaal (Paul) okii'nakataan Aahtins (Athens) ootena. Weti tahsh kii'ishi​takohshin Kwaarint (Corinth) ootenaank. 2 Miitahsh kaakiiwaapamaatc peshik Coowan Ahkwila (Aquila) eshinihkaasonitc Paantahs (Pontus) ahkiink wenciinitc. Noomayiihke Itali (Italy) ahkiink kiihpiionci​takohshinoon ekiihpi​wiiciiwaanitc wiiwini Parihsila (Priscilla) eshinihkaasonitc. Maawac Kihciokimaan Kalaatiyahsan (Claudius) iitok kii'inaahkonikewan kahkina Coowa' ninkoci Oroom ootenaank ci'onci'ishaanitc. 3 Miiwan itahsh ini kaa'wiiciayaamaatc ekii'wiitanohkiimaatc aaniihsh peshikwan kii'inanohkiiwak ekii'oshihtoowaatc pakwaanekamikoon. 4 Entahso​Anwepiiwi​kiishikaninik tahsh anami'ewikamikonk okiih​tashikakwe​kashkimaa' Coowa', i'i kaye Kariihk (Greek) tenowinitc. 5 Ahpii tahsh Saailahsan (Silas), Timahtiin (Timothy) kaye Maahsitooniya ahkiink (Macedonia) kaahpi'onci​takohshininitc, Pwaal mii 'i pishihshik kaa'ishihciketc ekiih​tashintamawaatc Coowa' otihkitowinini kaaTipencikenitc, ekii'wiintamawaatc Ciisahsoon ayaawinitc kaakii'Onaapamikonitc Kishemanitoon. 6 Ahpii tahsh enanaahkwehtaakotc Coowa', noociko kaye e'ikotc, miihsh kaa'ishi​paahpaawiwepinank okikishkikanan o'o ekii'inaatc: "Kiinawaa hsa piko kikanaasihkaakom kekashkihtamaasoyek, kaawiin kekoon i'i ninka​papaamisihsii. Miitahsh intawaa meshkwac cinaasihkawakwaa kaaCoowiwihsikwaa," okii'inaa'. 7 Miitahsh i'imaa kaa'ishi​nakanaatc. Ininiwan itahsh Tiitiyahs Castahs (Titius Justus) eshinihkaasonitc okiih​piintikawaan owaahkaa'ikaniniink pehsho eshitaanitc anami'ewikamikonk. Miiwan ini kaakii'anami'ehtawaanitc Kishemanitoon. 8 Karispahs (Crispus) tahsh kaatipentank anami'ewikamik okiih​tepweyenimaan kaaTipencikenitc, kahkina kaye eyaanitc otaawinink. Niipiwa' tahsh Kwaarint ootenaank wenciinitc kaakii'noontaminitc kiihtepwehtamoo', kiihsiika'antaasowa' kaye. 9 Ehtipihkaninik tahsh Pwaal ishinamowinink okii'onci​kanoonikoon kaaTipencikenitc ekii'ikotc: "Keko sekisihken, maano ko kaakiikiton, keko noontepakiciihken. 10 Niin ohsha kiwiiciiwin, kaawiin awiya kikamiikaanikohsii ciwiihsakaahpinanihk, niipiwa' ohsha o'omaa ootenaank ayaawak awiyak tepenimakwaa," okii'ikoon. 11 Pwaal i'imaa kii'ayaa peshiko aapihta pipoon ekiih​kihkino'amawaatc pemaatisinitc Kishemanitoon otihkitowinini. 12 Ahpii tahsh Kaalio (Gallio) kiionahshowewikimaawitc Ahkeya (Achaia) ahkiink, Coowa' okiimaamawi​otihtinikoo' Pwaal ekii'ishiwinikotc onahshowewikamikonk 13 ekii'ihkitonitc: "Wa'a hsa inini okakwe​kashkimaa' awiya' nahpaac inahke cishi​anami'ehtawaanitc Kishemanitoon, kaawiin eshihsininik onahshowewin," kii'ihkitowa'. 14 Pwaal tahsh iko ewii'ani​kiikitotc, Kaalion kii'onci​kiikitowan e'inaanitc Coowa': "Kiishpin ihsa 'owe noociko kekoon, komaa kaye mamaanshiiwin tinowankipan, taakii'ishinaakwanoopan iitok cikiih​pisintawinakookipan. 15 Kiishpin tahsh wiin ehta ihkitowinan, wiinsowinan kaye, i'i kaye otoonahshowewiniwaa onci​kiihkaantiyek, kiinawaa piko wiin i'i nana'ahtook. Kaawiin niin kekoon niwii'inaahkonikehsii," okii'inaa'. 16 Miitahsh kaa'ishi​saakicinisha'waatc i'imaa onahshowewikamikonk. 17 Okii'otihtinaani tahsh Saastiniisan (Sosthenes) kaatipentaminitc anami'ewikamik ekiih​pahpahkihte'waawaatc i'imaa akwaciink onahshowewikamikonk. Kaawiin Kaalio awaac okiih​papaapisiskenimaahsii'. 18 Kinwesh tahsh i'imaa Kwaarint (Corinth) ootenaank Pwaal (Paul) kii'ayaa. Miitahsh kaa'ishi​nakanaatc otepwehtamoo' ekii'inaahshitc weti Siiriya (Syria) ahkiink, ekii'wiiciiwikotc Ahkwilawan (Aquila), Parihsilawan (Priscilla). Cipwaa maaciiyaahshitc tahsh weti Senkariiya (Cenchreae) okiipashkoshaan ohtikwaan, aaniihsh kii'ishi​ahpimonotawaakopan Kishemanitoon. 19 Kiihpi​takohshinook tahsh i'imaa Ehpihsahs (Ephesus) ootenaank ecikaatenik. Miitahsh i'imaa kaakii'ishi​nakanaatc Ahkwilawan, Parihsilawan kaye. Wiin tahsh wiin kiihpiintike Coowi'anami'ewikamikonk ekiih​tashintamawaatc Coowa' kekoonan. 20 Ahpii tahsh ehkakwecimikotc keyaapi kinwesh i'imaa cikii'ayaahpan, kaawiin kii'inentansii. 21 Ahpii tahsh kaahpooshoo'aatc okii'inaa': "Miinawaa kikapianta​waapamininim kiishpin Kishemanitoo inentank," okii'inaa'. Ehpihsahsink tahsh kii'onci​maaciiyaahshi. 22 Ahpii tahsh kaahkapaatc Sehsariiyaink (Caesarea) kiikohpii ekii'ishaatc weti Ceroosalamink (Jerusalem) ekiih​pooshoo'aatc otepwehtamoo' kaamaawaci'itinitc. Miihsh kaa'ishi'ishaatc weti Entiyaahk (Antioch) ootenaank. 23 Kinweshiihsh itahsh iko i'imaa kii'ayaa. Miitahsh kaakii'maacaatc misiwe ekiihpapaa​ishaatc Kalehshiya (Galatia) ahkiink, Pariciyahkiink (Phrygia) kaye, ekiihpapaa​mashkawisii'aatc kahkina otepwehtamoo'. 24 Peshik tahsh Coo Apaalahs (Apollos) eshinihkaasotc, Aalikihsaantariya (Alexandria) ootenaank e'onciitc kiihpi​takohshin i'imaa Ehpihsahs ootenaank. Wiinke kiinihtaa​kakito, niipiwa' kaye okii​kihkentaan Kihcimasina'ikan. 25 Wa'a hsa inini kiihkihkino'amawaawintipan inahke keshi​naasihkawimintc kaaTipencikenitc, wiinke tahsh kiiaahkohcike ehtashintank, ekihkino'amaaketc enaacimimintc Ciisahsoon. Cwaanan tahsh kaakii'ishi​siika'antaakenitc ehta okii​kihkentaan. 26 Kii'maacii​kakiihkwe tahsh i'imaa anami'ewikamikonk ekiih​soonkite'etc. Ahpii tahsh Ahkwilawan (Aquila), Parihsilawan (Priscilla) kaye enoontaakotc okiihkiiwe​wiishaamikoo' eshitaanitc awahshime ekiihpehte​wiintamaakotc inahke kaashi​naasihkawimintc Kishemanitoon. 27 Apaalahs tahsh kii'inentam ci'ishaatc Ahkeya ahkiink (Achaia), otepwehtamoo' tahsh okiih​kakaansomikoo' pisaan ci'ishaatc, ekii'oshipii'amawaanitc otepwehtamoo' weti eyaanitc cipiintikanikotc. Ahpii tahsh weti kaahtakohshink okiikihci​wiici'aa' i'i kaakii'onci​tepwehtaminitc Kishemanitoon okishewaatisiwininiink. 28 Wiinke tahsh kiimashkawikiishwe ekiih​shaakoosomaatc Coowa' eshi​paahtiinonaaniwaninik, Kihcimasina'ikanink ekii'onci​pehtenaakohtootc Ciisahsoon eyaawinitc Kishemanitoo otoOnaapancikanan ciPimaaci'iwenitc.

Ishihcikewinan 19

1 Mekwaa tahsh Apaalahsan (Apollos) e'ayaanitc Kwaarint (Corinth) ootenaank, Pwaal (Paul) kiihshaaposhkaa i'imaa ahkiink, Ehpihsahs (Ephesus) ootenaank tahsh kii'ishi​takohshin. Okii'mihkawaa' tahsh aaninta otepwehtamoo'. 2 Miitahsh kaa'inaatc: "Kikii'miinikoowisim ina Kishemanitoo otAhcaahkwan ahpii kiitepweyentamek?" Miihsh kaa'ikotc: "Kaawiin kanake ninoontansiimin e'ayaanikwen Kishemanitoo otAhcaahkwan," okii'ikoo'. 3 Okii'ishi​kakwecimaa' itahsh: "Aaniin tahsh kaa'ishi​siika'antaakooyek?" "Cwaan osiika'antaakewinink," okii'ikoo'. 4 Pwaal tahsh okii'inaa': "Cwaan hsa okiih​siika'antawaa' i'i kaakiih​kwehkiinotaminitc omacitootamowinini. Cwaan okii​wiintamawaa' pemaatisinitc kii'ishkwaa'ayaatc citepweyenimaanitc ini kepi​takohshininitc, Ciisahsoon tahsh ini kaakii'inaatc," okii'inaa'. 5 Ahpii tahsh o'o enoontaminitc, kiihsiika'antaasowa' owiinsowininiink kaaTipencikenitc Ciisahsoon. 6 Ahpii tahsh Pwaal kaahsaaminaatc okii'otihsikoni Kishemanitoon otAhcaahkoni, miihsh pepahkaan kaaishi​ayiishikiishwenitc, ekii'wiintamaakenitc kaye Kishemanitoon otihkitowinini. 7 Ninkoci ko kiimitaahshiniishiwa' (12) tahsh i'i ininiwa'. 8 Pwaal kiihpiintike Coowi anami'ewikamikonk. Nihsokiisihs (3) tahsh minihk okiihkakwe​shaakoosomaa' ekiih​tashintank enahtenik Kishemanitoon otipencikewinini. 9 Aaninta tahsh kiimamayehciwiwa', ekiih​shashiipihtaminitc kaye, mohshe tahsh eshi​paahtiinonaaniwaninik okii'maci'itamini wenci​naasihkawimintc inahke Kishemanitoon. Miitahsh kaa'ishi​nakanaatc, ekii'maaciinaatc otepwehtamoo'. Entahsokiishik tahsh kiihtashi​kakanooshiwe i'imaa waahkaa'ikanink Tairaanahsan (Tyrannus) kaakiinihtaa​tashi​kihkino'amaakenitc. 10 Niisho​pipoon tahsh i'i kii'ishihse, kahkina tahsh Coowak, Kariihk (Greek) kaye tino kaakii'ishitaawaatc i'imaa Eshiya (Asia) ahkiink okii'noontaanaawaa otihkitowinini kaaTipencikenitc. 11 Kishemanitoo tahsh niipiwa' maamahkaacihcikewinan kii'ishihcike Pwaalan (Paul) ekii'aapaci'aatc. 12 Naapihkaakanenhsa', aakoopisonan kaye kaakiih​saamishkaakotc Pwaal kii'ishiwitawaawa' otaahkosii', miihsh kaakii'nakanikonitc enaahpinenitc, maciahcaahkwa' kaye ekii'nakanikonitc. 13 Aaninta tahsh Coowak kiihpapaami​ayaawak ekiihpapaa​saakicinisha'waawaatc maciahcaahkwa'. Okiihkakwe​aapacihtoonaawaa owiinsowinini kaaTipencikenitc Ciisahsoon cikashki'aawaatc iniweniwan kaakiih​kikishkaakonitc maciahcaahkwan, o'o ekii'ihkitowaatc: "Kitoonci​kanoonin Ciisahs owiinsowinink, Pwaal kaakakiihkwaanaatc, ci'onci​saaka'aman i'imaa," kii'ihkitowak. 14 A'a tahsh Coowianami'ewikimaa Siipa (Sceva) kaakii'ishinihkaasotc, okosihsa' kaakii'niishwaahcinitc (7) o'o kii'ishihcikewa'. 15 Maciahcaahkwan tahsh okii'ikowaan: "Ciisahs ninkihkenimaa, Pwaal kaye ninkihkenimaa. Awenenak tahsh kiinawaa?" okii'ikowaan. 16 Iniweniwan tahsh ininiwan kaakiih​kikishkaakonitc maciahcaahkwan okii'otihtinikowaan ekii​miikaanikowaatc, kahkina ekiih​shaakooci'ikowaatc. Waahkaa'ikanink tahsh kii'onci​maaciipa'iwewak ekii​maahkaahpinanikowaatc, wiinke ekii'waahsaahkona​wepinikowaatc. 17 Kahkina tahsh Coowak, kahkina kaye kaaCoowiwihsikwaa Ehpihsahs (Ephesus) ootenaank kaa'ayaawaatc enoontamowaatc o'o, wiinke kiihsekisiwak. KaaTipenciketc Ciisahs tahsh owiinsowin kiikihtencikaateni. 18 Niipiwa' tahsh kaakiih​tepwehtaminitc kiihpiishaawa' mohsheya'ii ekiih​tipaatotaminitc, ekii'wiintaminitc kaye aaniin kaakii'nihtaa​ishihcikenihpan. 19 Niipiwa' kaye kaakiinoocihtoonitc mitewiwin okii​maamawi​piitooni omasina'ikanini ekiih​sahka'aminitc mohsheya'ii. Ekiih​sakahkakintamowaatc tahsh enakintenikin ini masina'ikanan, naanimitana tahsink mitaahswaahk (50,000) tahso waapaapihko​shooniyaanhs kii'ishihseniwan. 20 Miitahsh o'o nahke kaaTipenciketc otihkitowin kaa'anishi​awahshime​misihteshkaanik, niipiwa' kaye pemaatisinitc ekii'ani​tepwehtaminitc. 21 O'o tahsh kaahpoonihsenik Pwaal (Paul) kii'inentam ewii'ishaatc Ceroosalamink (Jerusalem) ewii'ani​shaaposhkaatc Maahsitooniya ahkiink (Macedonia) kayesh Ahkeya (Achaia) ahkiink. O'o tahsh kii'ihkito: "Ahpii weti kii'ishkwaa​ishaayaan, miihsh eshinaakwahk cikii'waapantamaampaan Oroom (Rome) ootena," kii'ihkito. 22 Niishin itahsh kaakii'wiici'ikotc, Timahtiin (Timothy), ini kaye Iiraastahsan (Erastus) okii'ishinisha'waa' Maahsitooniyaa ahkiink ci'ishaanitc. Wiin tahsh keyaapi kii'ayaa i'imaa Eshiya (Asia) kihci​ahkiink. 23 Miitahsh i'i ahpii kaakii'maacii​ompwehkamikahk Ehpihsahs ootenaank i'i onci kaashi​naasihkawintc inahke kaaTipenciketc. 24 Peshik inini kii'ayaa i'imaa Timiitariyahs (Demetrius) ekii'ishinihkaasotc ekiih​piiwaapihkohkewininiiwitc. Waapaapihko​shooniyaawaapihkonk hsa okii'onci​oshitoonan enami'ewikamikoonhsan ekii'ishinaakwaninikin taapishkoo anami'ewikamikonk kaakiih​tashi​anami'ehtawimintc ihkwewi​manitoohkaanan Aartimahs (Artemis) eshinihkaanimintc. Niipiwa' hsa i'imaa kii'onci​kihci​shooniyaahkewa' otanohkii'. 25 Miihsh kaakii'maamawi​antomaatc i'i peshikwan inahke kaakii'inanohkiinitc ekii'inaatc: "Kiinawaa, kikihkentaam iitok o'o anohkiiwin e'onci​sasekaa​kashkihcikeyank. 26 Inashke tahsh kiwaapantaam, kinoontaam kaye, kaawiin wiin ehta 'omaa Ehpihsahs ootenaank, misiwe hsako Eshiya ahkiink, aaniin a'a inini Pwaal eshi​shaakoosomaatc pemaatisinitc. Niipiwa' ehtepwehtaakotc i'i kaa'ihkitotc: 'Oninciimaank kaa'onci​oshi'intwaa kaawiin tepwe manitoowihsiiwak,' eihkitokwen. 27 Kaawiin wiin ehta kitanohkiiwininaan naniisaanentaakwahsinoon noociko ci'icikaatek, i'i hsa kaye anami'ewikamik kaawiin kekoon ta'ahpiihtentaakwahsinoon kaatashi​anami'ehtawintc ihkwewi​manitoo Aartimahs eshinihkaasotc. Kewiin tahsh a'a ihkwewi​manitoo enami'ehtawintc misiwe Eshiya ahkiink, misiwe kaye ahkiink, kaawiin kekoon tani​ahpiihtentaakosihsii," okii'inaa'. 28 Ahpii tahsh enoontaminitc o'o kiihkihci​nishkaatisiwa', o'o ekii'ishi​shaakowenitc: "Kihci'inentaakosi Aartimahs Ehpihsahsink kaatashi​anami'ehtawintc," kii'ihkitowa'. 29 Misiwe tahsh i'imaa ootenaank kii'ayaa wawaanentamowin. Miitahsh kaa'ishi​otihtinaawaatc Keyaahsan (Gaius), ini kaye Eristaarhkahs (Aristarchus) kaakii'onciinitc Maahsitooniyaa ahkiink, Pwaalan owiiciiwaakanini. Weti tahsh okii'ishi​kaahkaanciwepinaawaa' kaakii'ishi​nihtaa​maamawishkaank otaminowikamikonk. 30 Pwaal tahsh kii'inentam cikiih​piintikehpan i'imaa eshi​ayaaniwaninik ewii'awi'inaahsamikaapawihtawaatc ewiih​kakanoonaatc Otepwehtamoo' itahsh kaawiin okiih​pakitinikohsii'. 31 Aaninta hsa kaakii'niikaanentaakosinitc i'imaa ahkiink kehkenimikotc, kaasaaki​wiiciiwikotc kaye, kiihpiicinisha'owewa' emihsawenimikotc cipiintikehsik i'imaa kaakii'ishi​nihtaa​maamawishkaank kiiotaminonk. 32 Iki tahsh i'imaa kaakii'maamawi​ayaawaatc kii'wawaanentamook. Aaninta peshikwan kii'ishi​shaakowewak, kotak itahsh kaye pahkaan kewiinawaa kii'ishi​shaakowewak. Kekaa kahkina i'imaa kaakii'ayaawaatc kaawiin okiih​kihkentansiinaawaa wekonen kaakii'onci​maamawi​ayaawaatc. 33 Aaninta tahsh i'imaa kaakii'ayaawaatc kii'inentamook Aalikihsaantaran (Alexander) maawiin i'i kaakii'onci'inahkamikaninik, aaniihsh Coowa' okii'ishi​kaanciwepinaani i'imaa niikaanaya'ii. Miihsh Aalikihsaantar kaakii'ishinihkepani'otc cinoontaatihsinik ewiih​kakitotc ewiih​kanootamawaatc Coowa'. 34 Ahpii tahsh ewaapantamowaatc ehCoowiwinitc kahkina kiipeshikohtaakosiwak ekii'ishi​shaakowewaatc niishotipa'ikan minihk: "Kihci'inentaakosi Aartimahs Ehpihsahsink kaatashi​anami'ehtawintc." 35 Ootenaawikimaa tahsh okii​kashkimaa' kaakiih​paahtiinonitc pisaan ciayaanitc ekii'inaatc: "Kiinawaa 'omaa Ehpihsahsink wenciiyek, kahkina iitok awiya okihkentaan Ehpihsahs ootenaank e'onci​kanawentaakwahk i'i anami'ewikamik kaatashi​anami'ehtawintc kehci'inentaakositc Aartimahs, a'awe ahsin enami'ehtawintc kihcikiishikonk kaakii'onci​pankihshink. 36 Kaawiin tahsh awiya otaayaanwehtansiinan ono. Miitahsh i'i pisaan ishi​kakwe​ayaak, ci'ishihcikehsiwek kekoon kemincinawe'ikoyek. 37 Kikiih​piinaawak tahsh oko ininiwak, aanawiin ekii'onci​kimootihsikwaa anami'ewikamikonk, kekoon kaye ekii'ishi​maci-inaahsikwaa kitihkwe​manitoominaanin. 38 Kiishpin tahsh Timiitariyahs (Demetrius) i'i kaye kaawiitanohkiimikotc kekoon wa'ishi​anaamimaawaakwen awiyan, paahkihsininiwan ohsha onahshowewikamikoon, ayaawa' kaye onahshowewikimaa', pisaan tahsh tamamishihtaakosiwak. 39 Kiishpin tahsh keyaapi kekoon eyaakwen waahtashintamek, mii 'i eshinaakwahk inaahkonikewinink ci'onci​nana'ahcikaatekipan. 40 Inashke wiinke kinaniinsaani'itisomin cimamishi'itisoyank ci'inaahkonikooyank kiinawint e'ompwehkamikisiyank o'o kaa'inahkamikahk noonkom kaakiishikahk. Kiishpin tahsh i'i ishihsek, kaawiin kekoon kitaa​ihkitohsiimin ke'onci​shaakoosohtaakosiyankipan, aaniihsh anishaa o'o kitishihcikemin," okii'inaa'. 41 Ahpii tahsh o'o kaa'ishkwaa​ihkitotc, okiih​kanoonaa' ci'ani​maacaanitc.

Ishihcikewinan 20

1 Ahpii tahsh o'o kaa'ishkwaa​inahkamikaninik, Pwaal okii'antomaa' otepwehtamoo', kaa'ishkwaa​kanoonaatc itahsh cimashkawentaminitc, okiih​pooshoo'aa' ekii'ani​maacaatc Maahsitooniyaa ahkiink ekii'ishaatc. 2 Misiwe tahsh i'imaa nahkehkamik kii'ishaa, ekiihpapaa​kanoonaatc otepwehtamoo' cimashkawentaminitc, piinihsh ekiih​takohshink Kariihs (Greece) ahkiink. 3 Nihso​kiisihs (3) tahsh i'imaa kii'ayaa. Aasha tahsh kekaa e'ani​kiishiihtaatc ekiiwii'ishaatc Siiriya (Syria) ahkiink, okii'noonte​kihkentaan kekoon ewiih​tootaakotc Coowa', miihsh kaakii'inentank Maahsitooniyaa ahkiink inahke cini'ishaatc. 4 Miiwa' itahsh o'o kaa'wiiciiwikotc, Soohpataran (Sopater) wenciinitc Piriiya (Berea) ootenaank kaakii'otetenitc Pirahsan (Pyrrhus). Eristaarhkahsan (Aristarchus) kaye, ini kaye Sihkantahsan (Secundus) wenciinitc Tehsalanaihka (Thessalonica) ootenaank. Ini kaye Keyahsan (Gaius) wenciinitc Tarpi (Derbe) ootenaank, Tiimahti (Timothy) tahsh kaye. Ini tahsh kaye Tikihkahsan (Tychicus), Caroohpimahs (Trophimus) kaye Eshiya (Asia) ahkink wenciinitc. 5 Miihsh oko ininiwak kii'niikaani​maacaawak, ekiih​pii'inankitwaa weti Caroowahs (Troas) ootenaank. 6 Pilipaai (Philippi) ootenaank tahsh ninkii'onci​maaciiyaahshimin ahpii kaa'ishkwaahkamikahk kaa'amontc pahkweshikan wempisikaniwihsik. Naanokiishik tahsh e'ani'ishihsek Caroowahs ootenaank ninkii'ishi​otihsaanaanik. Niishwaahsokiishik (7) tahsh i'imaa ninkii'ayaamin. 7 Kaanihtami​kiishikahk tahsh kiitawahtek ninkii'maamawi​ayaamin ekii'amwankitc pahkweshikan. Pwaal tahsh okiih​kakanoonaa' pemaatisinitc, piinihsh kii'ani​aapihtaa​tipihkanini ehkakitotc, aaniihsh aniwaapaninik ewii'maacaatc. 8 Kiihpaahtiinatinoon tahsh waahsahkonencikanan eshi'ishpimiihkantek i'imaa kaakiihtashi​maawaci'itiyaank. 9 Oshkiniiki tahsh kii'namatapi waahsehcikanink Iyootikahs (Eutychus) e'ishinihkaasotc, wiinke ekii'noontenkwahshitc, kinwesh aaniihsh Pwaalan kiihkakitowan. Ehkawinkwahshitc tahsh mihtahkamik kii'ishi​pankihshin ekii'inakoocink nihso​ishpimiihkante. E'otaahpinintc tahsh kiiwaapamaa enipotc. 10 Pwaal tahsh kiiniihsaantawe ekii'ahpakisotc eshi​pimihshininitc ekii'otaahpinaatc miihsh kaa'ihkitotc: "Keko kekoon inentankek, keyaapi ohsha pimaatisi," okii'inaa'. 11 Miihsh miinawaa kii'ishi​ahkwaantawetc ekiih​pahkwepinaatc pahkweshikanan ewiici​wiihsiniimaatc otepwehtamoo', piinihsh tahsh kiihpiitaapanini ekiih​kakanoonaatc. Miihsh kaa'ishi​maacaatc. 12 Kiihkiiwe​wiiciiwimaawan tahsh ini oshkiniikiwan ehpimaatisinitc, wiinke ekii'minwentamonaaniwaninik. 13 Ninkii'niikaani​poosimin tahsh ciimaan ekii'inaashiyaank Aahsahs (Assos) ootenaank, mii weti ewii'onci​poosi'ankitc Pwaal. Ninkii'anoonikonaan o'o ci'ishihcikewankitc aaniihsh wiin kiimihtohse weti e'ishaatc. 14 Ahpii tahsh kaamekwaashkawankitc Aahsahs ootenaank ninkiih​poosi'aanan, ninkii'anishi​pakamaahshimin tahsh weti Mihtiliini (Mitylene) ootenaank. 15 E'ani​waapank tahsh mii 'imaa kaa'onci​maaciiyaahshiyaank Kiiyahs (Chios) minihsink ekii'ishi​pakamaahshiyaank. E'ani​waapank tahsh Semahs (Samos) ecikaatek minihs ninkii'ishi​pakamaahshimin. Miinawaa tahsh e'ani​waapank ninkii'ishi​pakamaahshimin Maailiitahs (Miletus) ootena ecikaatek. 16 Pwaal kii'inentam cishaapwaahshitc ciimaanink Ehpihsahs (Ephesus) ootenaank, kaawiin kii'inentansii kinwesh ciani​ontamiayaatc i'imaa Eshiya (Asia) ahkiink. Kii'weyiipisi aaniihsh ekiihkakwe​tetakohshink Ceroosalamink (Jerusalem), kiishpin kota te'ayishiitc cimekwaashkank maatahkamikaninik Pentikwaastiwi-ishikiishikaninik. 17 Maailiitahs ootenaank hsa Pwaal (Paul) kii'onci'ishinisha'owekopan ci'ishaaniwaninik Ehpihsahs ootenaank, mii 'weti cishinakishkaakotc kaaniikaanishkawaanitc kaamaawaci'itinitc otepwehtamoo'. 18 Ahpii tahsh wetihsikotc o'o okii'inaa': "Minihk kaapi​wiiciiwinakook iitok kikihkentaam maawac iko nihtam kiitahkohkiiyaan o'omaa Eshiya (Asia) ahkiink, aaniin kaa'ishihcikeyaan. 19 Ekii'anohkiihtawak kaaTipenciketc misiwe ekii'ishi​tapahsenimoyaan, mooshak kaye ekii'oncikawaapiyaan mekwaa kiiwawaanentamihseyaan aaniihsh Coowak kiihkiimoocihcikewak kekoon ewiih​tootawiwaatc. 20 Kikihkentaam iitok kaye ekiih​kihciwinamawihsinoonakook kekoon kewiici'ikoyekipan kiiwaawiintamawinakook, mohsheya'ii kaye ekii​kihkino'amawinakook kaa'ayishitaayek. 21 Ninkiih​kanoonaak Coowak, iki kaye kaaCoowiwihsikwaa cikwehkiinotawaawaatc Kishemanitoon cinakatamowaatc omaci'ishihcikewiniwaan, citepweyenimaawaatc tahsh kaaTipenimiminank Ciisahs Christan. 22 Noonkom tahsh niwii'ishaa Ceroosalamink (Jerusalem) e'ishi​wiishaamimitc kaaTipenciketc otAhcaahkwan, kaawiin tahsh ninkihkentaansiin amanc ke'ishihsewaanen weti. 23 Mii ehta eshi​kihkentamaan tahsin ootenawan kaapi​mayaashkamaan, Kishemanitoo otAhcaahkwan e'ayenkwaamiminitc maamaancikwahpisonan, kakwaataki'ikoowin kaye e'ahshonikowak. 24 Kaawiin tahsh niin kekoon nintinentansiin nimpimaatisiwin cikihci'inentamaampaan; mii ehta waa'ishihcikeyaan cikiishihtaawak pimipahtoowin, anohkiiwin kaye kaakii'miishitc kaaTipenciketc. Ninkii'ishimiinik citipaatotamowak eshi​minwaatotenik Kishemanitoo okishewaatisiwin. 25 "Ninkiih​papaa​ishaa hsa mekweya'ii kahkina kaashi​ayaayek, ekiih​tashintamaan Kishemanitoo otipencikewin. Noonkom tahsh ninkihkentaan kiinawaa miinawaa wiihkaa ciwaapamihsiwek. 26 Miitahsh eninakook noonkom kaakiishikahk, kaawiin niin ninka'anaamentaakosihsii awiya nihshiwanaatisitc. 27 Kaawiin iitok kekoon ninkiih​kihciwinansiin kiiwiintamawinakook kahkina Kishemanitoo otinentamowin. 28 Ayenkwaamikanawenintisok tahsh, kanawenimihkwak tahsh kaamaamawi​ayaawaatc otepwehtamook Kishemanitoo otAhcaahkwan kaakiimiiniminek cinaanaakaci'ekwaa. Taapishkoo okanawi​maanahcaanihshiwe kaaishihciketc, mii 'inahke ishi​kanawenimihkwahk Kishemanitoo omaawaciaakana', omiskwiimink kaakii'onci​tipa'waatc. 29 Ninkihkentaan ahpii maacaayaan ciotihsinekwaa kaayaahkwaatisiwaatc ma'iinkanink enentaakosiwaatc eshi​ayaayek, kaawiin tahsh oka​manaaci'aahsiwaawaa' otepwehtamoo'. 30 Aaninta hsa kiinawaa eshi​ayaayek tani​onciiwak sesik keshi​kihkino'ikehsikwaa, ciwanihshimaawaatc otepwehtamoo' cipiminisha'okowaatc. 31 Ayenkwaamisik itahsh. Maamihkawik nihsopipoon minihk ekii'onci​kipihciihsiwaan e'ayenkwaamiminakook entahsotipihk, entahsokiishik kaye, ekii'oncikawaapiyaan ehkakwaatakentamaan. 32 Noonkom tahsh kitishi​pakitinininim Kishemanitoo cikanaweniminek, cikanawenimikowek kaye otihkitowin kaashi​tashintenik okishewaatisiwin. Mii 'iwe keompiki'ikoyek, mii kaye i'imaa ke'onci​miinikoowisiyek citipinawewisiyek Kishemanitoo kaawii'miinaatc kahkina opimaatisiima'. 33 Kaawiin nimihsawenimimaahsiin awiya owaapaapihko​shooniyaaman, otoosaawishooniyaaman, kaawiin kaye nimihsawentamoowaahsiinan okikishkikanan. 34 Kikihkentaanaawaa iitok niin ekii'ontinamaasoyaan aaniin eshi​noontehseyaan, ekiih​pami'akwaa kaye niwiiciiwaakanak. 35 Kahkina kekoon ninkii'ishihcike ciwaapantamek o'o nahke cishikihci​anohkiinaaniwankipan ciwiici'intwaapan meshkawaatisihsikwaa, cimaamihkawinotenik o'o kaakii'ihkitotc kaaTipenciketc Ciisahs: "Nawac minwentaakwan kaamiikiwenaaniwank kekoon ahpiihc wiin kiitepinikaatek kekoon." 36 Ahpii tahsh o'o Pwaal kaa'ishkwaa​ihkitotc, okii'wiici​ociciinkwanapiihtawaa' ekii'anami'aatc 37 Kahkina tahsh kiihkihci​mawiwa' ekiih​kihkincikwenikotc e'ayoociimikotc. 38 Miitahsh kaakii'onci​maanentaminitc ekii'inaatc wiihkaa miinawaa ciwaapamikohsik. Okii'ishi​wiiciiwiko' itahsh kihciciimaanik.

Ishihcikewinan 21

1 Ahpii tahsh kaa'nakanankitwaa ninkii'maaciiyaahshimin, kwayahk ekii'inaahshiyaank weti minihsink Koohs (Cos) kaaicikaatek. E'ani​waapank tahsh Orootis (Rhodes) minihs ninkii'otihtaamin, miihsh weti kaa'onci​tepishkaayaank ekii'ishi​pakamaahshiyaank Paatara (Patara) ootenaank. 2 Ninkii'mihkaamin tahsh i'imaa ciimaan ewii'ishi​aahshawikaameyaahsink Piniihshiya (Phoenicia) ahkiink inahke, miihsh i'imaa kaa'ishi​poosiyaank ekii'maaciiyaahshiyaank. 3 Ahpii tahsh kaahtepaapantamaank Saaiparahs (Cyprus) minihs shaawanonk inahke ninkii'ishipimi'ayaamin piinihsh ekii'otihtaahshiyaank Siiriya (Syria) ahkink. I'imaa tahsh Tayar (Tyre) ootenaank ninkii'ishi​kapaamin ekii'akwaasicikaatekin poosihtaahsonan. 4 Kaa'mihkawankitwaa tahsh i'imaa otepwehtamook, niishwaahso​kiishik (7) ninkii​wiiciayaamaanaanik. Miiwak itahsh iki otepwehtamook kaakii'wiintamaakowaatc Kishemanitoon otAhcaahkoni cikakaansomaawaatc Pwaalan (Paul) ci'ishaahsinik Ceroosalamink (Jerusalem). 5 Ninkii'ani​maacaamin tahsh ahpii e'ocihcihsek cimaacaayaank ekii'ani​pimi'ayaayaank. Kahkina Otepwehtamook, owiiwiwaa' kaye, iki kaye apinoonciishak ninkii'ishi​wiiciiwikonaanik saakicaya'ii ootenank. I'imaa tahsh ciikipiik ninkii'ishi​animihkohtaamin ekii'anami'aayaank. 6 Ninkiih​papooshoo'itimin tahsh, niinawint ekiih​poosiyaank ciimaanink, wiinawaa tahsh wiin ekii'ani​kiiwewaatc. 7 Ninkii'ani​maacaamin tahsh Tayar ootenaank ekii'onci​maaciiyaahshiyaank, weti ekii'ishi​pakamaahshiyaank Toolimeyihs (Ptolemais) ecikaatek ootena. Ninkiih​pooshoo'aanaanik tahsh otepwehtamook i'imaa eyaawaatc, peshiko​kiishik tahsh ninkii'wiiciayaamaanaanik. 8 E'ani'waapank tahsh ninkii'ani​maacaamin ekii'ani​takohshinaank Sehsariiya (Caesarea) ootenaank ecikaatek. Ninkiih​piintikewaamin tahsh Pilap (Philip) Ominwaacimoowinini owaahkaa'ikanink ekii'wiiciayaamankitc. Mii wa'a peshik inini kaakii'niishwaahciwaatc (7) kaakii'inakimaawintwaapanen cinaakacihtoowaatc miicim i'imaa Ceroosalamink. 9 Wa'a tahsh inini kiiniiwiwa' otaanihsa' e'oshkiniikihkwewinitc mahshi ewiitikehsinik kii'ishi​miinikoowisiwa' cikanootamawaanitc Kishemanitoon. 10 Niipiwa' tahso​kiishik i'imaa ninkii'ayaamin. Peshik inini kaakanootamawaatc Kishemanitoon Aakapahs (Agabus) e'ishinihkaasotc ninkii'otihsikonaan Cootiiya (Judea) ahkiink ekiihpi​onciitc. 11 Ekiihpi​naasihkawiyamintc tahsh okii'otaahpinaan Pwaalan (Paul) okihcihpisonini ekiih​tahkopitootc ositan, oninciin kaye. Miihsh o'o kaa'ihkitotc: "O'o hsa ihkitowan Kishemanitoo otAhcaahkwan, mii 'owe ketootaakotc Coowa' Ceroosalamink (Jerusalem) eyaanitc kaatipentank o'o kihcihpison, ci'ishi​miikiwaaniwitc citepinikotc kaaCoowiwihsinik citahkonikotc," kii'ihkito. 12 Enoontamaank tahsh o'o, iki kaye kaakii'ayaawaatc i'imaa nintaanakiih​kakwe​kashkimaanaan Pwaal (Paul) ci'ishaahsik weti Ceroosalamink. 13 O'o tahsh kii'ishi​nahkwehtam: "Wekonen wenci'ishihcikeyek emawiyek, emaanentami'iyek kaye. Kaawiin wiin ehta nintishi​kiishentansii cimamaancikwahpinikooyaan weti Ceroosalamink, pisaan hsako kaye ci'onci​nihsikooyaan owiinsowinink kaaTipenciketc Ciisahs," kii'ihkito. 14 Ekiih​waapamankitc tahsh, intawaa ninkiih​poonimaanaan ekii'ihkitoyaank: "KaaTipenciketc otinentamowin tawii'ishihseni," ninkii'ihkitomin. 15 Kinweshiihsh tahsh iko weti kaa'ishkwaa'ayaayaank, ninkii'oshiihtaamin ekii'ishaayaank Ceroosalamink (Jerusalem). 16 Aaninta tahsh otepwehtamook Sehsariiya (Caesarea) wenciiwaatc ninkii'wiiciiwikonaanik, ekii'ishiwishiyamintwaa eshi​ayaanitc ini Nehsanan (Mnason) ciwiiciayaamimankitc. Saaiparahs (Cyprus) kii'onciiwan aasha kinwesh ekii'onci​tepweyentaminitc. 17 Ahpii tahsh kaahtakohshinaank Ceroosalam (Jerusalem) ootenaank, otepwehtamook kii'minwentamook e'otihsankitwaa. 18 E'ani​waapank tahsh Pwaal (Paul) ewiiciiwankitc okiih​piintikawaan Ciimisan (James), kahkina kaye kaakii'niikaanentaakosinitc otepwehtamoo' i'imaa kii'ayaawa'. 19 Okiihpooshoo'aa' tahsh weweni ekii​wiintamawaatc aaniin Kishemanitoon kaa'ishihcike'aanitc kaaCoowiwihsinik otanohkiiwinink onci. 20 Ahpii tahsh enoontaminitc okii'nanaahkomaani Kishemanitoon, o'o kaye ekii'ikotc: "Niiciinaan Pwaal, inashke ehpiicini​niipiwa'mitaahswaahk Coowak pemi​tepwehtamowaatc, weweni tahsh kaye kakwe​ishihcikewak enahtenik onahshowewin. 21 Kiihwiintamawaawak tahsh kiin e'ishi​kihkino'amawatwaawen kahkina Coowak kaa'ayaawaatc eshi​ayaanitc kaaCoowiwihsinik cinakatamowaatc Moosihsoon (Moses) otoonahshowewinini. E'ishi​kihkino'ikewanen kaye cikihkinawaatashakeshwaahsikwaa oniicaanihsiwaa', ci'ishihcikehsikwaa kaye Coowi'ishihtwaawin. 22 Aaniin tahsh keishihcikenaaniwank? Kehcinaac maawiin tanoontamook ekiih​takohshinan. 23 Ishihciken tahsh kaa'ikooyan. Niiwin ohsha nintayaawaanaanik ininiwak ekiihkihci​ahshotamawaawaatc Kishemanitoon kekoon. 24 Maacaan ishiwiiciw oko, kekiin ciwiitoohkaasoyan kaashi​anami'e​pehki'itisonk. Kaye tahsh citipa'amowatc pehki'itisowaatc, cipashkoshamowaatc kaye ohtikwaaniwaan. Miihsh kahkina cikihkentamowaatc ehtepimikoohsiwan iinsan i'i kahkina kaa'inaacimikoowatc. Kekiin itahsh piko ewiih​tootaman, ehkanawentamowatc Moosihs otoonahshowewin. 25 Ikiweniwak tahsh wiin kaaCoowiwihsikwaa kaatepwehtamowaatc ninkii'oshipii'amawaanaanik ekii'ishi​onentamaank cipapaamentansikwaa miicim kaapakitinamawimintc manitoohkaana'. Cipapaamentansikwaa kaye miskwiini, kekoon kaye kaakipinewe'oocikaatenik, cinoocihtoohsikwaa kaye pihshikwaatisiwin," mii'i kaa'ikotc. 26 Miihsh e'ani​waapaninik Pwaal kaakii'ishiwinaatc i'i ininiwa' kewiin ekii'wiitoohkaasotc e'anami'e​pehki'itisonitc. Kiihpiintike tahsh anami'ewikamikonk ekiih​tipaacimotc aaniin ahpii ishi​kiishikaninik keishkwaahsenik opehki'itisowiniwaa, ahpii kaye kepakitinaasoohtamawaatc entahso​peshikonitc kaakii'wiiciiwikotc. 27 Ahpii tahsh kekaa e'ani'ishkwaahsenik niishwaahso​kiishik, Coowa' Eshiya (Asia) ahkiink kaakii'onciinitc okii'waapamikoo' i'imaa anami'ewikamikonk e'ayaatc. Okii'ompwe'aani tahsh kaakiih​paahtiinonitc awiya', miihsh kaa'ishi​otihtinikotc, 28 o'o ekii'ishi​shaakowenitc: "Mii ohsha wa'a inini misiwe kaapapaa​kihkino'amaawaatc kahkina awiya' cimacenimimintc Isriyala' (Israel), cimacencikaatenik kaye Moosihsoon (Moses) otoonahshowewin, o'o tahsh kaye kihcianami'ewikamik. Pehkihsh tahsh kaye ekiih​piintikanaatc Kariihka' (Greek) o'omaa kihcianami'ewikamikonk, ekii'wiinentaakohtoonitc o'o kaatanentaakosinitc Kishemanitoon," kii'ihkitowa'. 29 Aaniihsh kii'waapamaawaakopan i'imaa ootenaank Pwaalan e'wiiciiwaanitc Caroohpimahsan (Trophimus) Ehpihsahs (Ephesus) ootenaank kaakii'onciinitc, miihsh iinsan kaa'inentamowaatc ekiih​piintikanaanitc i'imaa kihcianami'ewikamikonk. 30 Kahkina tahsh i'imaa ootenaank awiyak kaakiiayaawaatc kii'ompwe'aawak. Kiimaamawahpa'itiwak tahsh ekii'otihtinaawaatc Pwaalan, kihcianami'ewikamikonk ekii'onci​saakici​taapiipa'aawaatc. Shemaak tahsh ishkwaanteman kiihkipa'ikaatewan. 31 Mekwaa tahsh ekakwe​nihsaawaatc, kii'awi​wiintamawaawaan Oroomink (Rome) kaaonciinitc tepenimaanitc shimaakanihshaa' ekii'inimintc misiwe Ceroosalamink (Jerusalem) ekii'ompwehkamikisinaaniwaninik. 32 Shemaak tahsh okiih​pimaaciinaani aaninta shimaakanihsha', shimaakanihshiiwikimaa' ekiihpi​takohshininitc eshi'ayaawaatc. Ewaapamaawaatc tahsh shimaakanihshiiwikimaan, shimaakanihsha' kaye, okiih​pooni'aawaan Pwaalan epahpahkihte'waawaahpan. 33 Shimaakanihshiiwikimaa tahsh okii'naasihkawaan Pwaalan ekiih​tahkonaatc, ekii'anoohkiitc cimamaancikwahpisonitc piiwaapihkweyaapiin ciyaapataninikin. Kiihkakwetwe kaye awenenan tenowinitc, aaniin kaye kaa'ishihcikenitc. 34 Pepahkaan tahsh kii'ishi​shaahshaakowewa' kaakiih​paahtiinonitc. Ahpii tahsh emihkansik tepwe kekoon kaa'onci​ompwehkamikaninik, kii'anoohkii Pwaalan ci'ishiwinimintc shimaakanihshiiwikamikonk. 35 Ahpii tahsh e'ocihciwinaawaatc kaashi​maacii​yaantawemoninik tahkohkiiwinan, kii'ishinaakwanini shimaakanihshak cipimiwinaawaatc onsaam aaniihsh kiiyaahkwentaakosiwa' kaakiih​paahtiinonitc. 36 Kaakiih​paahtiinonitc tahsh ehpiminisha'ikenitc kii'ishi​shaakowewa': "Maaciinihk ci'awi​nihsek," okii'ihkitowa'. 37 Pwaal (Paul) kekaa e'ani​piintikanikotc shimaakanihsha' shimaakanihshiiwikamikonk, okiih​kanoonaan shimaakanihshiiwikimaan ekii'inaatc: "Konike kekoon kitaa'inin?" okii'inaan. Miihsh kaa'ikotc: "Kikihkentaan ina Kariihk (Greek) ishikiishwewin? 38 Kaawiin iinsan kiin kitaawihsiinaatok a'a Iicipihshiwinini (Egyptian) kaakiihpi'ompwehkamikisitc mewisha cimiikaanimintc wekimaawinitc, kaye tahsh kaakii'ishiwinaatc pikwatahkamik niiwiink mitwaahswaahk (4,000) kaanihshiweshkinitc," okii'ikoon. 39 Pwaal o'o okii'inaan: "Niin ohsha Coo nintinow. Taarsahs (Tarsus) ootenaank Silihshiya (Cilicia) ahkiink nintooncii. Kihci'inentaakwan ootena kaa'onciiyaan. Taka pakitinihshin pisaan cikakanoonakwaa kaapaahtiinowaatc," okii'inaan. 40 Ahpii tahsh kaahpakitinikotc shimaakanihshiiwikimaan cikakitotc, Pwaal kiiniipawi tahkohkiiwinink ekii'inaahta'amawaatc cinoontaatihsinik; ahpii tahsh kaanoontaatihsinik okiih​kanoonaa' Hiiparoo (Hebrew) ishikiishwewin ekii​yaapacihtootc:

Ishihcikewinan 22

1 "Niici​onciimaakanak, kehtaatisiyek tahsh, pisintawihshik o'o noonkom kaawii'ininakook ewii'naatamaasoyaan," okii'inaa'. 2 Ahpii tahsh enoontaakotc Hiiparoo (Hebrew) ishikiishwewinink e'ishi​kanoonaatc, kaawiin kii'ani​noontaatihsiiwa'. Miitahsh o'o kaa'ihkitotc: 3 "Keniin hsa Coo nintinow, ekiih​tashi​nihtaawikiyaan Taarsahs (Tarsus) ootenaank Silihshiya (Cilicia) ahkiink, o'omaa tahsh ootenaank Ceroosalamink (Jerusalem) ninkiih​tashi​ompik. Kameliyal (Gamaliel) ohsha ninkii​kihkino'amaak, ekiih​sanakaninik ekihkino'amawitc eshihsininik onahshowewin kaakiimiinimintc kikehteya'aaminaapanii'. Wiinke tahsh kaye ninkii'aahkwentaan ekiihkakwe​na'entamiak Kishemanitoo taapishkoo kahkina kekiinawaa o'omaa kaa'ayaayek noonkom kaakiishikahk. 4 Ninkiih​kakwaataki'aak hsa iki kaapiminisha'amowaatc ishaawin piinihsh ekii'ani​onci​nihsakwaa, ekiih​tahkonakwaa ihkwewak, ininiwak kaye. Miitahsh kaa'ishi​piinciwepinakwaa kipa'otiiwikamikonk. 5 Kihcianami'ewikimaa ohsha taatipaacimo ehtepwewak, iki kaye kahkina Coowi​onahshowewininiwak. Miiwak ohsha iki kaakiimiishiwaatc oshpii'ikanan cimiinimak kiwiici​Coowiminaani' Timaaskahs (Damascus) ootenaank kaakii'ayaanitc. Niin tahsh ninkii'ishaa weti ekii'nanantone'wakwaa ikiweniwak ekiih​piinakwaa o'omaa Ceroosalamink cikakwaataki'intwaa piiwaapihkweyaapiink ekii'ishi​mamaancikwahpisowaatc." 6 "Kekaa tahsh e'ani​naawahkwek pehsho e'ani​pimi​ayaayaan Timaaskahs ootenaank, mii 'i kwetahto kihcikiishikonk kaakii'onci​aahkwaahtek waahkaaya'ii i'imaa eshi​ayaayaan. 7 Mihtahkamik tahsh ninkii'ishi​pankihshin ekii'noontawak awekwen ehkanooshitc e'ishitc: 'Swaal, Swaal (Saul), wekonen wenci​kakwaataki'iyan?' ekii'ishitc. 8 'Awenen tahsh kiin, Tepencikeyan?' ninkii'ishi​nahkwehtawaa. Miihsh kaa'ishitc: 'Niin Ciisahs Naasaritink (Nazareth) kaaonciiyaan, kaakakwaatakentami'iyan,' ninkii'ik. 9 Ikiweniwak tahsh kaakiiwiiciiwiwaatc okii'waapantaanaawaa ewaahseyaanik, kaawiin tahsh okii'noontawaahsiwaawaan awekwenan kaakiih​kanooshimitc. 10 'Tepencikeyan, aaniin tahsh ke'ishihcikeyaan?' ninkii'inaa. O'o tahsh ninkii'ik: 'Pasikwiin, animaacaan ci'ishaayan Timaaskahs ootenaank, miitahsh weti kahkina keshi​wiintamaakooyan aaniin eshi​onahtamaakooyan ci'ishihcikeyan,' ninkii'ik. 11 Kaawiin tahsh ninkii'waapihsii kaa'ahpiihci​aahkwahtek. Niwiiciiwaakanak tahsh ninkii'ishi​sakinihkenikook Timaaskahs (Damascus) ootenaank. 12 "Peshik tahsh inini Aananaayahs (Ananias) eshinihkaasotc, kwayahk kaakii'anami'ehtawaatc Kishemanitoon, kaakiih​kanawentank kaye onahshowewin, kaakiih​kihtenimikotc kaye kahkina Coowa' i'imaa kaakii'ishitaanitc. 13 Mii 'awe kaakiih​pianta​waapamitc ekiihpi​niipawitc eshi​ayaawak ekii'ihkitotc: 'Swaal (Saul) niici​otepwehtamoo, taka miinawaa waapin,' kii'ihkito. Shemaak tahsh ninkii'waap, ekii'waapamak. 14 O'o tahsh kii'ani'ihkito: 'OKishemanitoomiwaan kikehteya'aaminaapaniik ohsha kikii'onakimik cikihkentamowatc otinentamowin, ciwaapamimatc kaye kwayahk Otanohkii'aakanan, cinoontawimatc itahsh kaye kanoonimihk. 15 Mii hsa 'i ke'inanohkii'ihk citipaacimatc, citipaacimohtawatwaa kahkina awiyak aaniin kaakii'ishi​waapantaman, aaniin kaye kaakii'inihtaman. 16 Wekonen tahsh noonkom keyaapi payaahtooyan? Pasikwiin, cisiika'antaasoyan, cipehki'ikooyan kaye kimacitootamowinink onci, cikanoonatc kaaTipenciketc cinaatamawihk,' ninkii'ik." 17 Miihsh kaa'ani-ihkitotc: "Ahpii tahsh kaahpikiiweyaan o'omaa Ceroosalamink (Jerusalem), mekwaa e'anami'aayaan kihcianami'ewikamikonk, ishinamowin ninkii'otihsikon. 18 Miitahsh kaakiiwaapamak kaaTipenciketc ekii'ishitc: 'Weyiip, ninkoci o'omaa Ceroosalamink oncimaacaan aaniihsh kaawiin kikatepwehtaakohsiik aaniin enaacimiyan,' ninkii'ik. 19 O'o tahsh ninkii'inaa: 'Tepencikeyan, wiinawaa iitok okihkentaanaawaa ekiihpapaa​ishaawak anami'ewikamikohkaank ekiih​kipa'wakwaa, kaye tahsh ekiih​pahpahkihte'wakwaa iki kaatepwehtawihkwaa. 20 Ahpii kaye kiiniiwano'ontc Istiipin (Stephen) kaakiih​tipaacimihk, ninkii'niipaw weti ekii'minwaapantamaan kaakiih​tootawintc, ekiih​kanawentamowak okashkiikiiwinini i'i kaakiiniiwana'okotc.' 21 O'o tahsh ninkii'ik: 'Mii 'i ishimaacaan, waahsa ohsha kiwii'ishinisha'on ci'anta​waapamatwaa kaaCoowiwihsikwaa,' ninkii'ik." 22 O'o tahsh ekii'ihkitotc, mii 'i kaawiin awahshime okiih​pisintaakohsii' aaniin kaakii'inaatc. Miitahsh kaa'ishi​maacii​shaahshaakowenitc ekii'ihkitonitc: "Ninkoci ishiwinihk, awinihsihk! Kaawiin inentaakwahsinini cipimaatisihpan!" kii'ihkitowa'. 23 Kiihshaahshaakowewa' tahsh ekiih​kiihcikowepishkaminitc okashkiikiiwinini, mihtaawank kaye ekii'ayishpi​wepinaminitc. 24 Kihci​shimaakanihshiiwikimaan tahsh kii'anoohkiiwan Pwaal cipiintikanintc shimaakanihshiiwikamikonk, ekii'ihkitonitc cipahpahshanshe'ontc, cikakwecimintc kaye wekonen i'i nahke kaa'onci​shaahshaakowaanikotc pemaatisinitc. 25 Ahpii kaamamaancikwahpinintc ewii​pahpahshanshe'ontc, Pwaal okii'inaan shimaakanihshiiwikimaan i'imaa kaaniipawinitc: "Inahte na inaahkonikewin cipahpahshanshe'ontipan awiya Oroomink wenci​tipentaakositc, mahshi kota kaatipaahkonaahsiwintc cimihkikaatenikipan aaniin kaa'ishi​mamaanshiitc?" 26 Ahpii tahsh shimaakanihshiiwikimaan kaanoontaminitc o'o, okii'anta​waapamaani kihci​shimaakanihshiiwikimaan ekii'inaanitc: "Aaniin tahsh waa'ishihcikeyan? Oroomink ohsha a'a onci​tipentaakosi," okii'inaani. 27 Kihci​shimaakanihshiiwikimaan tahsh okiih​pianta​waapamikoon ekii'ikotc: "Wiintamawihshin, Oroomink ina kitoonci​tipentaakos?" okii'ikoon. "Eha'," tahsh okii'ishi​nahkwehtawaan. 28 Kihci​shimaakanihshiiwikimaan tahsh kii'ihkitowan: "Niipiwa' hsa niin ninkiih​tipa'ike i'imaa Oroomink ci'onci​tipentaakosiyaan," okii'ikoon. Pwaal kii'ihkito: "Niin tahsh wiin ninkii'ishi​nihtaawik i'imaa ci'onci​tipentaakosiyaan," okii'inaan. 29 Iniweniwa' tahsh kaawiih​kakwecimikohpan shemaak okiih​pooni'ikoo'. Iniweniwan tahsh wiin kihci​shimaakanihshiiwikimaan wiinke kiihsekisiwan ahpii enoontamintc Oroomink e'onci​tipentaakositc aaniihsh piiwaapihkweyaapiin okii​yaapacihtooni ekii'mamaancikwahpinikotc. 30 E'ani​waapaninik tahsh kihci​shimaakanihshiiwikimaan okii'wiih​kakwe​kihkentamini wekonenini mayaa Coowa' kaakii'ishi​anaamimikotc. Okiih​pakitinikoon tahsh ekii'inaahkonikenitc kihci'anami'ewikimaa', i'i kaye kahkina Coowa' otoonahshowewininiimini cimaamawapinitc. Pwaal tahsh kii'ishiwicikaniwi i'imaa ekii'ishi​niipawi'intc enaahsamiinitc.

Ishihcikewinan 23

1 Pwaal (Paul) tahsh ekihci​kanawaapamaatc onahshowewininiwa' o'o ekii'inaatc: "Niici​onciimaakanak, weti hsa piko kaaonci​naanaakatawentamaan nintooncikihkentaan kwayahk iko ekiihpi'ishipimaatisiwak enaahsamiitc Kishemanitoo piinihsh noonkom kaakiishikaak." 2 Iniweniwan tahsh kihcianami'ewikimaan Aananaayahs (Ananias) eshinihkaasonitc okiih​kanoonaani i'i kaawiicikaapawihtaakonitc cipahsitoonekanaamikotc a'a Pwaal. 3 Pwaal tahsh okii'inaan: "Kishemanitoo kikapahkihte'ok, kiin kaawaapishkipii'ikaatek ahsinimenikan. Kimihci​namatap weti ewii'onaahkoniyan enahtek onahshowewin, kiin tahsh iko ehpiikonaman onahshowewin e'anoohkiiyan cipahsitoonekanaamikooyaan," okii'inaan. 4 Iniweniwa' tahsh i'imaa pehsho kaakiiwiicikaapawihtaakotc Pwaal kii'ihkitowa': "Kaawiin iitok ishinaakwahsinoon Kishemanitoo okihcianami'ewikimaaman noociko ci'inimintipan," kii'ihkitowa'. 5 Miitahsh Pwaal kaa'ihkitotc: "Niwiici​onciimaakanak, kaawiin ninkiih​kihkentansiin ekihcianami'ewikimaawitc aaniihsh mii 'owe eshipii'ikaatek: 'Kaawiin noociko kika'inaahsiwaawaa kaaniikaanihshkawaatc kiwiici​pimaatisiimaakanini,' " okii'inaa'. 6 Ahpii tahsh Pwaal kaakihkentank peshikwewaan Saacahsiiwa' (Sadducees) ehtinowinitc, kotak tahsh Perahsii' (Pharisees) ehtinowinitc, o'o kii'ishi​shaakowe i'imaa eshi​maawaci'itiwintc: "Niwiici​onciimaakanak, keniin ohsha Perahsii nintinow, niniiki'ikook kaye Perahsiik kiihtinowiwak. Miitahsh kaa'onci​tipaahkonikooyaan epiihtooyaan ehkehcinaa'oyaan kaanipowaatc cikiiwe​pimaatisiwaatc," kii'ihkito. 7 Ahpii tahsh o'oweni kaa'ihkitotc kiimaacii​kakanoonitiwa' i'i Perahsii', i'i kaye Saacahsiiwa' kaakiimaawaci'itinitc miihsh kaa'ishi​nenaawi'itinitc. 8 Saacahsiiwak aaniihsh kii'ihkitowak e'ayaahsininik kiiwe​pimaatisiwin, kii'ihkitowak kaye encala' (angels) e'ayaahsinik, ahcaahkwa' kaye e'ayaahsinik. Perahsiik itahsh wiin okiih​tepwehtaanaawaan kahkina ono. 9 Kii'ani​kishiiwewak ehkakanoonitiwaatc. Aaninta tahsh kaakihkino'amaakewaatc onahshowewin Perahsiihkaank kaakii'onci​tipentaakosiwaatc kiihkakwe​shaakoosohtaakosiwak ekii'ihkitowaatc: "Kaawiin kekoon nimihkamowaahsiimin ci'ishi​ayaatc wa'a inini, komaahsh kaye tepwe ahcaahkwan kaahkanoonikokwen, komaa kaye encalan," kii'ihkitowak. 10 Ahpii tahsh wiinke e'anikihci​kiihkaantinaaniwaninik, a'a kihci​shimaakanihshiiwikimaa okii'naniisaanenimaan Pwaalan cipiihsipicikaniwinitc. Miitahsh kaakii'anoonaatc oshimaakanihshiima' ci'ishaanitc kaakii'ishi​maamawi'itinitc maano ko cinaasihkawaanitc Pwaalan i'imaa tahsh cishi​piinaanitc shimaakanihshiiwikamikonk. 11 Ehtipihkaninik ihsa Pwaal okii'wiicikaapawihtaakoon kaaTipencikenitc o'o ekii'ikotc: "Keko sekisihken, mashkawentan. Kaakii'ishi​tipaacimiyan weti Ceroosalamink (Jerusalem), mii hsa 'i peshikwan keishi​tipaacimiyan Oroomink (Rome)," okii'ikoon. 12 E'ani​kishepaawakaninik tahsh aaninta Coowa' kiihkihci​ahshotamaatiwa' ekii'ihkitonitc ewii'onci​wiihsinihsinik, ewii'onci​minihkwehsinik kaye paanimaa kii'nihsikotc Pwaal. 13 Awahshime tahsh niimitana (40) kiihtahshiwa' i'i kaakii'ishi​kiimooci​ahshotamaatinitc. 14 Okii'anta​waapamaani tahsh kihcianami'ewikimaa', ini kaye kaaniikaanentaakosinitc Coowa' o'o ekii'inaanitc: "Ninkii'ishihcikemin hsa ninkiihkihci​ahshotamaatimin kekoon ewii'onci​miicihsiwaank paanimaa piko Pwaal kiinihsankitc. 15 Kiinawaa tahsh, iki kaye otoonahshowek wiintamawihk kihci​shimaakanihshiiwikimaa cipi​niihsaatawewinaanitc Pwaalan i'imaa eshi​ayaayek ci'ishihcikehkaasoyek awahshime ewiih​kihkentamowek kaa'ishi​mamaanshiinitc. Niinawint tahsh wiin aasha ninkiih​kiishiimin ewiinihsankitc cipwaa'otihtank o'omaa," kii'ihkitowa'. 16 Pwaal tahsh otawemaan okosihsini okii'noontawaani i'imaa e'ahkamawintc. Miitahsh kaakiih​piishaanitc i'imaa shimaakanihshiiwikamikonk ekiihpi​wiintamaakotc. 17 Pwaal tahsh okii'antomaan peshik shimaakanihshiiwikimaan o'o ekii'inaatc: "Ishiwish wa'a oshkiniiki ciwaapamaatc kihci​shimaakanihshiiwikimaan, kekoonini ohsha otayaan kewiintamawaatc," okii'inaan. 18 Tepwe tahsh okii'ishiwinaani weti eshi​ayaanitc kihci​shimaakanihshiiwikimaan o'o ekii'inaanitc: "Pwaal kaatahkonintc ninkii'antomik ekiih​kakwecimitc cipiinimak ono oshkiniikiwan e'ayaanitc kekoon ciwiintamawimihk," okii'inaani. 19 Kihci​shimaakanihshiiwikimaa tahsh okiih​sakinihkenaan pahkaan ekii'ishiwinaatc ekiih​kiimooci​kakwecimaatc ekii'inaatc: "Wekonen i'i eyaayan kaawii'wiintamawiyan?" okii'inaan. 20 O'o tahsh okii'ikoon: "Kaaniikaanisiwaatc Coowak kii'onentamook cikakwecimihkwaa waapaninik cipiinimatc Pwaalan kaashi​onahshowenk, ewii'ishihcikehkaasowaatc awahshime kekoon ewiihkakwe​kihkenimaawaatc aaniin kaa'ishi​mamaanshiinitc. 21 Keko tahsh tepwehtawaahken. Awahshime ohsha niimitana (40) tahshiwak ininiwak kaa'ahkamawaawaatc. Kiimaamawi​kihci​ahshotamaatiwak ewii'onci​wiihsinihsikwaa, ewii'onci​minihkwehsikwaa kaye paanimaa kii'nihsaawaatc. Aasha tahsh kiihkiishiiwak i'i ewii'ishihcikewaatc, miihsh emihci​pii'ihkwaa aaniin ke'ihkitowatc," okii'ikoon. 22 Kihci​shimaakanihshiiwikimaa tahsh okii​maacinisha'waan ini oshkiniikiwan ekii'ayenkwaamimaatc ekii'inaatc: "Keko awiya wiintamawaahken ono ekiihpi​wiintamawiyan," okii'inaan. 23 Kihci​shimaakanihshiiwikimaa tahsh okii'antomaa' niishin shimaakanihshiiwikimaa' ekii'anoonaatc: "Taka takwayaanciiwak niishwaahk (200) shimaakanihshak ci'ishaawaatc Sehsariiya (Caesarea) ootenaank. Niishwaahsimitana (70) kaye mihtatimoo' kaapimiwanepa'ikowaatc, niishwaahk (200) kaye shimaakanihshak ciipowepinikanan kaayaapacihtoowaatc ci'oshiihtaawaatc cimaacaawaatc shaankahso (9) tipa'ikaneyaanik noonkom onaakohshininik. 24 Ontinamawihk kaye mihtatimoo' a'a Pwaal (Paul) keni​aayaanihke​pimiwanaanikotc kehcinaac iko weweni ci'ishiwinek eshi​ayaanitc Piilikihsan (Felix) kaakii'aanihkewikimaawinitc," kii'ihkito. 25 Miitahsh o'onahke kaa'ishipii'iketc emaaciipii'iketc: 26 "Niin Kalaatiyahs Lihsiyahs (Claudius Lysias) kitooshipii'amawin, kiin Piilikihs Keci'inentaakosiyan kaatipentaman Cootiiya ahki, pooshoo kitinin. 27 Wa'a hsa inini okii'otihtinikoo' Coowa' kekaa tahsh okii'nihsikoo'. Ekiih​kihkentamowak tahsh Oroomink (Rome) e'onci​tipentaakositc, ninkii'ishaawaan ekii'ishiwinimak nishimaakanihshiima' ekii'awi​naatamawak intawaa. 28 Ninkiiwiih​kihkentamowaan tahsh aaniin kaakii'ishi​anaamimintc, miihsh kaakii'ishiwinak eshi'ayaanitc onahshowewininiwa'. 29 Miitahsh kaakiih​kihkentamowak kaawiin kekoon kii'ishihcikehsii kekii'onci​tahkonintipan, kekii'onci​nihsintipan kaye. I'i hsa kaakii'ishi​anaamimintc enahshowenitc ehta kii'onciimakanini. 30 Ahpii tahsh kaakiih​kihkentamowak aaniin waahtootawintc ewiih​kiimooci​nihsintc wa'a inini, shemaak tahsh ninkii'inentam ci'ishinisha'wak eshi​ayaayan. Ninkii'wiintamawimaa' tahsh kaye i'i kaamamishimikotc ciwiintamawimihk aaniin eshi​anaamimikotc." 31 Shimaakanihshak tahsh kii'ishihcikewak i'i kaakii'inintwaa, ekii​maaciinaawaatc Pwaalan mekwaa etipihkaninik ekii'ishiwinaawaatc Antiihpatarihs (Antipatris) kaaicikaatenik ootena. 32 Weyaapaninik tahsh iki kaamihtohsewaatc shimaakanihshak kii'ashe​kiiwewak ekii'ishaawaatc shimaakanihshiiwikamikonk, iki tahsh wiin kaapimiwanepa'ikowaatc shimaakanihshak keyaapi okii'ani​wiiciiwaawaan Pwaalan. 33 Ahpii tahsh oko kaatakohshinowaatc Sehsariiyaink, okii'miinaawaan oshipii'ikan ini kaatipentaminitc i'i ahki, miihsh kaye 'imaa kaa'ishi​pakitinaawaatc Pwaalan eshi​ayaanitc. 34 Ahpii tahsh Piilikihs kaa'anamihtootc i'i oshipii'ikan okiih​kakwecimaan Pwaalan aaniin eshinihkaatenik ahki wenci​tipentaakosinitc. Ahpii tahsh kaawiintamawintc Silihshiya (Cilicia) ahkiink e'onci​tipentaakosinitc, 35 o'o tahsh okii'inaan: "Ninka​noontaan ihsa aaniin ekoowanen ahpii takohshinowaatc ikiweniwak kaamamishimihkwaa." Kii'ihkito tahsh Pwaalan cishi​kanawenimimintc Heratan (Herod) okihci​waahkaa'ikaniniink.

Ishihcikewinan 24

1 Naanokiishik tahsh e'ani'ishihsenik kihcianami'ewikimaa Aananaayahs (Ananias) eshinihkaasotc kiihpiishaa e'wiiciiwikotc aaninta kaaniikaanentaakosinitc Coowa', ini kaye peshik onaatamaaken Tartalahs (Tertullus) eishinihkaasonitc. Miitahsh kaakiih​tashintamawaawaatc Piilikihsan kaatipentaminitc ahki, aaniin eshi​anaamimaawaatc Pwaalan. 2 Miitahsh Pwaal kaashi​antomintc. Tartalahsan kiimaacii​kakitowan e'mamishimikotc e'ihkitonitc: "Kiin kehci'inentaakosiyan Piilikihs (Felix)! Kiin hsa ekakiihtaawi​okimaahkantaakeyan aasha kinwesh kaaonci​pisaanahkamikahk nintahkiinaanink, miihsh kaye kaanionci​minohsehcikaatekin kekoonan kaamaanshihse'ikoyaank awahshime ciminohseyaank o'omaa nintahkiinaanink. 3 Misiwe tahsh niminwentaamin ono mooshak; kihci​miikwetc tahsh kitikoo. 4 Kaawiin tahsh awahshime nintinentansii ciontaminamawinaan kitipa'ikan, miihsh eshi​pakohseniminaan kaashi​nihtaa​minohcikeyan acina cipisintawiyaank kaawii'ikooyan. 5 Nikii'mihkawaanaan hsa wa'a inini enihshiwanaatahkamikisitc, mii iitok wa'a kaapapaa​ompwehkamikisitc misiwe ahkiink eshi​ayaanitc Coowa'. Oniikaanishkawaa' kaye wehkwiinonitc Naasariiwininiwa' (Nazarene). 6 Wa'a tahsh kaye inini okiihkakwe​wiinentaakohtoon kihcianami'ewikamik, intawaa tahsh ninkii'otihtinaanaan. [Niinawint hsa ko niwiih​tipaahkonaanaapan eshihsininik nintoonahshowewininaan. 7 Kihci​shimaakanihshiiwikimaa tahsh Lihsiyahs (Lysias) ninkii'moohkiihtaakonaan ekii​manaacihcikehsik emahkamiyamintc Pwaalan, 8 Ekii'inaahkoniketc i'i kaamamishimiwenitc o'omaa cipiishaanitc eshi​ayaawatc.] Anta​kihkenimatc tahsh kiin iko kikakihkentaan ehtepimankitc kahkina ono kaashi​anaamimankitc," kii'ihkito a'a onaatamaake. 9 Coowak tahsh kewiinawaa okii​wiicihtoonaawaa i'iweni kaakii'ishi​anaamimimintc, ekii'ihkitowaatc kahkina ini ehtepwewaninikin. 10 Ahpii tahsh kaatipentaminitc i'i ahki kaawaahta'amaakotc cikiikitotc, Pwaal (Paul) kii'ishi​nahkwehtam: "Ninkihkentaan aasha kinwesh tahsopipoon epionaahkonatwaa o'omaa ahkiink wenci​tipentaakosiwaatc. Wiinke tahsh niminwentam cikiikitoohtamaasoyaan. 11 Kiin hsako kikawencimihkaan kaawiin awahshime mitaahshiniisho​kiishik (12) kii'ishihsehsinoon kaakii'ishaayaan Ceroosalamink (Jerusalem) ekii'awi​anami'aayaan. 12 Kaawiin ninkii'mihkaakohsiik Coowak cikakwe​shaakoosomimak awiya' piinci​kihcianami'ewikamikonk, ci'ompwehkamikisiwak kaye eshi​maamawiayaaniwaninik. Kaawiin kaye anami'ewikamikohkaank, kaawiin kaye piko aanti ootenaank. 13 Kaawiin kaye oka​kashkihtoohsiinaawaa ciwaapanta'ihkwaa ehtepimiwaatc i'i noonkom kaashi​mamishimiwaatc. 14 O'owe tahsh wiin kiwiintamawin, niin e'anami'ehtawimak kaaoKishemanitoomiwaatc ninkehteya'aaminaapaniik ehpiminisha'amaan i'i ishaawin, Coowak kaaitamowaatc ehtepwewansininik. Nintepwehtaan tahsh kaye kahkina kekoon enahtenik Moosihs otoonahshowewin, i'i kaye masina'ikan kaashi​oshipii'ikaatenikin otihkitowiniwaan kaakiih​kanootamawaawaatc Kishemanitoon. 15 Miitahsh keniin peshikwan eshi​tepweyenimak Kishemanitoo taapishkoo okoweniwak kaashi​tepweyentamowaatc: cikiiwe​pimaatisiwaatc okwayahkwaatisiik, iki kaye omaci'ishiwepisiik kaanipowaatc. 16 Miitahsh mooshak kaaonci'ishihcikeyaan, ekakwe​kanawenintisoyaan kwayahk ci'ishinaakwahk kaashi​naanaakatawentamaan enaahsamiitc Kishemanitoo, iki kaye pemaatisiwaatc. 17 Kinwesh tahsh tahsopipoon ekii'ontentiyaan, Ceroosalamink (Jerusalem) ninkiihpishi​kiiwe ekiih​piitamawakwaa kaakitimaakisiwaatc miikiwaanan, kaye tahsh cipakitinaahsoyaan. 18 Mekwaa tahsh o'o e'ishihcikewak, mii 'i kaakiimihkawiwaatc kihcianami'ewikamikonk aasha ekiihkiishi'ishihcikewak i'i ishihcikewin kaanihtaa​ishihcikenk ke'onci​pehkentaakosinaaniwank enaahsamiitc Kishemanitoo. Kaawiin ninkii'wiiciiwikohsiik awiyak cipaahtiinowaatc, kaawiin kaye ninkii'ompwehkamikisihsii. 19 Ayaawak tahsh aaninta Coowak Eshiya (Asia) ahkiink wenciwaatc o'omaa kewiinawaa kekii'ayaawaahpan eshi​ayaawatc cikii'wiintamawihkwaapan kiishpin kekoon ayaanikwen eshi​mamishimiwaatc. 20 Komaash kaye okoweniwak ininiwak o'omaa kaa'ayaawaatc otaawiintaanaawaa wekonen tino mamaanshiiwin kaa'ishihcikewak ahpii kii'inaahsamikaapawihtawimak otoonahshowe'. 21 Komaa tahsh kaye o'o ninkii'ishi​mamaanshiinaatok peshik ihkitowin kaakii'ishi​shaakoweyaan mekwaa weti e'niipawiyaan: 'Ehtepwehtamaan nipowinink ci'onci​kiiwe​pimaatisinaaniwank, mii 'i kaaonci​tipaahkoniyek noonkom kaakiishikahk o'o e'inaahsamikaapawihtawinakook,' " Pwaal kii'ihkito. 22 A'a tahsh Piilikihs (Felix) eshinihkaasotc, kaanakacikihkentank ishaawin kii'ihkito cipoonihcikaatenik i'i maawaci'itiwin. Miitahsh kaa'ihkitotc: "Ahpii Lihsiyahs (Lysias) kihci​shimaakanihshiiwikimaa takohshink ninka​onentaan aaniin ke'inaahkonikooyan," kii'ihkito. 23 Okii'anoonaan tahsh shimaakanihshiiwikimaan kwayahk cikanawenimaanitc Pwaalan, pisaan kaye wa'ishihcikenitc ci'ishihcikenitc, pisaan kaye cipakitinaanitc i'i kaasaaki​wiiciiwikonitc cipami'ikonitc. 24 Naanaake tahsh e'ani'ishihsenik, Piilikihs kiihpiishaa e'wiiciiwaatc wiiwan Carohsila (Drusilla) kaaishinihkaasonitc, ehCoowihkwewinitc. Miitahsh kaakii'antomaatc Pwaalan cinaasihkawimintc. Okiih​pisintawaan tahsh ehtashintaminitc eshi​tepweyenimimintc Christ Ciisahsoon. 25 Okiih​tashintamini kwayahkwaatisiwin, kwayahko​tipenimitisowin, i'i kaye piciinak kaawiih​tipaahkonikewi​kiishikaninik. Piilikihs tahsh kiihsekisi ekii'ihkitotc: "Mii 'i teminihk! Animaacaan. Ahpii na'ihseyaan miinawaa kika'antomin," okii'inaan. 26 Kiihtako​pakohsenimo shooniyaan cikiimooci​miinikotc Pwaalan. Miitahsh i'i wawiipa kaakii'onci​nihtaa​naacinisha'waatc, ekiinihtaa​kakanoonaatc kaye. 27 Ahpii tahsh niisho​pipoon e'ishihsenik Piilikihs okii'naapishkaakoon ini Pwaarhshiyahs Pestahs (Porcius Festus) eshinihkaasonitc. Ciminwaapamikotc tahsh Coowa' Piilikihs kaawiin okiih​papaamenimaahsiin Pwaalan etahkonimintc.

Ishihcikewinan 25

1 A'awe tahsh Pestahs (Festus) ekiih​takohshink i'imaa Cootiiya (Judea) ahkiink kaashi​tipentank, nihso​kiishik eshihsenik Sehsariiya (Caesarea) ootenaank kii'onci​maacaa Ceroosalamink (Jerusalem) ekii'ishaatc. 2 Kihcianami'ewikimaa' tahsh, i'i kaye kaaniikaanisinitc Coowa' okii'anta​waapamikoo' ekiih​tipaacimohtaakotc eshi​mamishimimintc Pwaalan (Paul). 3 Okiih​pakohsenimikoo' tahsh ekiih​kakwecimikotc kekoon ci'ishihcikehtamawaatc cinaacinisha'waatc Pwaalan cipiinimintc i'imaa Ceroosalamink. Okii'ahkamawaani iitok ninkoci piko ewii'nihsaanitc pipimi​ayaanitc. 4 Pestahs tahsh okii'ishi​nahkwehtawaa': "Pwaal hsa kanawentaakosi weti Sehsariiya ootenaank, aasha tahsh kekaa niin iko weti niwii'ishaa. 5 Inashke kiniikaanisiimiwaak ninkashi​wiiciiwikook ishaawak weti cimamishimaawaatc ini ininiwan kiishpin kota kekoon kaa'ishi​mamaanshiinikwen," kii'ihkito. 6 Nihshwaahso​kiishik (8), komaa kaye mitaahso​kiishik (10) tahsh i'imaa kii'ayaa, miihsh kaa'ishi'ishaatc Sehsariiya ootenaank. E'ani​waapaninik tahsh kii'onapi onahshowewapiwinink miihsh ekii'anoohkiitc Pwaalan cipiinimintc. 7 Miitahsh Pwaal kaakiih​piinintc. Coowa' tahsh Ceroosalamink kaakiih​pionci​takohshininitc okii'waahkaa​kaapawihtaakoo' niipiwa' kekoonan senakaninikin ekii'ishi​anaamimintc kaawiin okiih​tepimikohsii'. 8 Pwaal wiin iko kiihkanootamaaso ekii'ihkitotc: "Kaawiin kekoon nintooci'ishihcikehsii cikii'mamaanshiihkantamaampaan i'i Coowi​onahshowewin, i'i kaye kihcianami'ewikamik, cikii'mamaanshiihkantawakipan kaye maawac kihciokimaa," kii'ihkito. 9 Pestahsan tahsh e'inentaminitc cina'entami'aanitc Coowa' okii'aashitemikoon ekii'ikotc: "Pisaan ina tahsh kitaa​ishaa weti Ceroosalamink ci'awi​tipaahkonikooyan i'i kaashi​anaamimikooyan, niin tahsh ci'oncishkawi​kaapawihtawiyan citipaahkoninaan?" okii'ikoon. 10 Pwaal tahsh kii'ihkito: "Noonkom iitok ninipaw maawac kihciokimaa otipaahkonikewikamikonk, mayaa keshi​tipaahkonikooyaampaan. Kaawiin kanake kekoon ninkii'ishi​mamaanshiihkantawaahsiik Coowak, kekiin iitok kikihkentaan. 11 Kiishpin hsa tepimikooyaan ekii'wanitootamowaanen, kii'ishihcikewaanen kaye ke'onci​kashkihtamaasoyaan cinipoyaan, kaawiin ninka​shaakwenimohsii cinipoyaan. Kiishpin tahsh wiin tepwehsikwaa i'iweni kaashi​anaamimiwaatc Coowak, kaawiin iinsan awiya otaa​kashkihtoohsiin cishi​pakitinikoowakipan keonci​otaahpinikoowak. Ninantawentaan tahsh maawac kihciokimaa citipaahkonitc," kii'ihkito. 12 Ahpii tahsh Pestahsan kaa'awi'ishkwaa​kakanoonaanitc otoonahshowewininiimini ekiih​tashintaminitc o'o, miitahsh o'o kaa'ishi​aashtemikotc: "Kikii'antawentaan maawac kihciokimaa citipaahkonihk. Miitahsh a'a keanta​waapamatc maawac kihciokimaa," okii'ikoon. 13 Naanaake tahsh e'ishihsenik kihciokimaa Aakarihpa (Agrippa) eshinihkaasotc, a'a kaye ihkwe Pernaihsi (Bernice) kiihtakohshinook i'imaa Sehsariiya ootenaank, ewii'waapamaawaatc Pestahsan (Festus) ewii'inaawaatc eminwentamowaatc ciwaapamaawaatc. 14 Niipiwa' tahso​kiishik itahsh i'imaa kaa'ayaawaatc, Kihciokimaa okii'wiintamaakoon Pestahsan aaniin Pwaalan (Paul) kaa'ishi​wahsitaawihsenitc ekii'ikotc: "Ayaa 'omaa peshik inini etahkonikaniwitc ekiih​pakitinikohsik ini Piilikihsan (Felix). 15 Weti tahsh Ceroosalamink mekwaa e'ayaayaan kihcianami'ewikimaak, iki kaye kaaniikaanentaakosiwaatc Coowak okiihpi​mamishimaawaan ekii'antawentamowaatc ci'inaahkonimintc cinihsimintc. 16 Ninkii​wiintamawaak tahsh niinawint Oroomink (Rome) kaaonci​tipentaakosiyaank i'i nahke e'ishihcikehsiwaank, awiya kota cipakitinikaasohpan kotak awiya' citepinikohpan. Pinamaa a'a kaamamishimintc ci'oncishkawishkawaatc i'i kaamamishimikotc, citawinamawintc cikakanootamaasotc i'i kaashi​anaamimintc. 17 Ahpii tahsh o'omaa kiimaamawi​piishaawaatc kaawiin ninkiih​pwaahtawiihsii, shemaak tahsh e'ani​waapank ninkii'onap tipaahkoniwewikamikonk, miihsh kaakii'inaahkonikeyaan cipiintikanintc a'a inini. 18 Ahpii tahsh kaakii'mamishimikotc kaahpasikwiinitc ehkakitonitc, kaawiin okii'ishi​anaamimikohsii' cikii'ishi​mamaanshiikwen inahke kaakii'inentamowak. 19 Miitahsh ehta kaakiih​tashintamowaatc kekoonan ekii'onci​kakanoonaawaatc otanami'aawiniwaank onci. Okiihtashimaawaan tahsh ini awiyan Ciisahs e'ishinihkaasonikwen ekii'niponitc, Pwaal tahsh wiin ekii'ihkitotc ehpimaatisinitc iinsan. 20 Niin tahsh ewawaanentamaan keonci​kihkentamaan iniweniwan, ninkiih​kakwecimaa tahsh kiishpin ci'inentamokopanen ciwii'ishaakwen Ceroosalamink weti tahsh citashi​tipaahkonitc i'i kaashi​anaamimintc. 21 Pwaal tahsh kii'ishi​kakwetwe cikanawenimintc ekii'antawentank Maawac Kihciokimaan citipaahkonikotc. Miitahsh kaakii'anoohkiiyaan cikanawenimintc piinihsh ci'ocihcihsenik ahpii ke'anta​waapamaatc Maawac Kihciokimaan," kii'ihkito. 22 Aakarihpa okii'inaan Pestahsan: "Keniin hsa piko nintaaminwentaan cikii'noontawakipan a'a inini," okii'inaan. Miitahsh kaa'ikotc: "Waapaninik hsa kikanoontawaa," okii'ikoon. 23 Weyaapaninik tahsh ahpii Aakarihpa kaahtakohshink ekii'wiiciiwikotc Pernaihsiwan, kiihpiintikewak i'imaa kihci​apiiwikamikonk. Ekiih​kihtenimintwaa tahsh kekoon kii'ishihcikenaaniwanini. Okiihtako​piintikewiiciiwaawaa' tahsh kihci​shimaakanihshiiwikimaa', i'i kaye ininiwa' kaaniikaanishkaminitc ootena. Pestahsan tahsh kii'anoohkiiwan, Pwaalan cipipiinimintc. Miihsh kaa'ishi​naasihkawimintc. 24 Pestahs tahsh kii'ihkito: "Kihciokimaa Aakarihpa, kahkina kaye 'omaa eyaayek! Kiwaapamaawaa wa'a inini. Mii 'i kaakiihpi​onci​anta​waapamiwaatc kahkina Coowak wenciiwaatc Ceroosalamink o'omaa kaye Sehsariiya ootenaank. E'ishi​shaahshaakowenitc awahshime cipimaatisihsikipan. 25 Kaawiin tahsh niin kekoon nimihkamowaahsiin cikii'ishihcikekwen keonci​kashkihtamaasotc cinihsintipan. Wiin itahsh iko ekii'ishi​kakwetwetc citipaahkonikotc Maawac Kihciokimaan, ninkii'inentam pisaan ci'ishinisha'wak weti Oroomink. 26 Kaawiin hsa kekoon kehcinaac nintayaahsiin ke'inaacimimakipan oshipii'amawak maawac kihciokimaa. Miitahsh o'o kaaonci​piinak enaahsamiiyek, memintakeko kiin kihciokimaa Aakarihpa ci'oncishkawi​kaapawihtawihk. Ahpii tahsh kii'ishkwaa-anta​kihkenimatc, ninka'ayaan maawiin kekoon keishipii'ikeyaan. 27 Nintinentam aaniihsh kaawiin taamino​naakwahsinoon tahkonikan ci'ishinisha'ontipan ciwiincikaatehsininikipan aaniin mayaa eshi​anaamimintc," kii-ihkito.

Ishihcikewinan 26

1 Aakarihpawan (Agrippa) tahsh okii'ikoon Pwaal (Paul): "Kipakitinamaakoo cikanootamaasoyan," okii'ikoon. Pwaal tahsh kii'ishinihkeni miitahsh kaa'ishi​maacii​kanootamaasotc: 2 "Kiin kihciokimaa Aakarihpa, aahpici niminohsewentam e'oncishkawi​kaapawihtawinaan noonkom kaakiishikahk cikanootamaasoyaan i'i kahkina kekoonan kaashi​anaamimiwaatc Coowak, 3 memintakeko kiin e'nakaci​kihkentaman kahkina Coowi'ishihtwaawinan, ini kaye kaawawaanentamo'ikowaatc. Kipakohsenimin tahsh cishi​shiipenimiyan cipisintawiyan. 4 "Kahkina ohsha Coowak okihkentaanaawaa aaniin kaahpi'ishi​pimaatisiwak kiioshkaatisiwak, ekii'onci​maacii​pimaatisiwak nintahkiimink, i'imaa kaye Ceroosalamink (Jerusalem). 5 Aasha tahsh kinwesh nimpi'onci​kihkenimikook, taatipaacimowak ohsha kiishpin kota inentamowaatc e'onci​tipentaakosiwak Perahsii' (Pharisee) kaa'ishihtwaanitc eyaahkwanami'aanitc, i'i kaye nahke ekii'ishi​pimaatisiwak. 6 E'ahpenimonotamowak tahsh Kishemanitoo kaakii'ishi​ahshotamawaatc ninkehteya'aaminaapanii', mii 'omaa noonkom kaakiishikahk kaaonci​niipawiyaan ehtipaahkonikooyaan. 7 Mii hsa 'oweni ahshotamaakoowin kaamitaahso​niishwewaanakisiwaatc niwiitaatisiimaakaninaanik kaakiiaahkopiihtoowaatc citepinamowaatc. Miihsh kaakii'anohkiihtawaawaatc Kishemanitoon ehtipihkaninik ehkiishikaninik kaye. Kiin hsa wekimaawiyan! O'o tahsh inahke e'ishi​ahpenimowak, mii 'i Coowak kaaonci​mamishimiwaatc. 8 Wekonen itahsh wenci​kashkihtoohsiwek citepwehtamek Kishemanitoo ehkiiwe​pimaatisi'aatc kaaniponitc! 9 "Tepwe niin ninkii'ishi​tepwehtaan ehko​kashkihtooyaan cikii'nakaashkamowakipan owiinsowin Ciisahs Naasarit (Nazareth) ootenaank kaaonciitc. 10 Miitahsh o'o kaa'ishihcikeyaampaan Ceroosalamink. Kihcianami'ewikimaak tahsh ninkii'ishi​miinikook pisaan cikipa'owewak. Niipiwa' tahsh Kishemanitoo opimaatisiima' kipa'otiiwikamikonk ninkii'ahsimaa'. Ahpii tahsh e'inaahkonintwaa cinihsintwaa, keniin hsa ninkii​na'entaan i'iwe ci'ishihcikenaaniwank. 11 Ninkii'anoohkiiwaan itahsh mooshak citashi​kakwaataki'intwaa Coowi anami'ewikamikohkaank. Ninkiihkakwe​kashki'aak kaye maano ci'ihkitowaatc ehtepwehtawaahsikwaa Christan. Kaa'ahpiihci​nishki'iwaatc tahsh mii 'i kaakii'ishaayaan mamayaki​ootenaahkaank ekii'nanaantone'wakwaa," kii-ihkito Pwaal. 12 Keyaapi kii'ani-ihkito: "Mii 'i kaakii'onci'ishaayaan Timaaskahs (Damascus) ootenaank, kihcianami'ewikimaak ekii'anooshiwaatc, kaye tahsh ekii'miishiwaatc kashki'ewisiwin. 13 Inashke tahsh kihciokimaa! E'ani​aapihtawi​kiishikahk tahsh miihkanaank e'anipimi​ayaayaan ninkii'waapantaan kihcikiishikonk e'onci​waahseyaak, nawac e'waahsenaakwahk ahpiihc wiin kiisihs. Ninkii'waahkaashkaakon e'waahseyaak, iki kaye kaakii'wiiciiwiwaatc. 14 Kahkina tahsh kaakiih​tahshiyaank mihtahkamik ninkii'ishi​pankihshinimin, ninkii​noontawaa tahsh awiya ehkanooshitc Hiiparoonk (Hebrew) e'ishikiishwetc: 'Swaal! Swaal! (Saul) Wekonen wenci​maanshitootawiyan. Kiin ohsha ko kaawiihsaka'otisoyan i'i kaatootaman, taapishkoo pishihki kaatankishkank i'i okaancinisha'ikanaahkoni ini kaatipenimikotc,' ninkii'ikoo. 15 O'o tahsh ninkii'inaa: 'Awenen kiin, Tepencikeyan?' KaaTipenciketc tahsh ninkii'ik: 'Niin Ciisahs kaamaanshi​tootawiyan. 16 Pasikwiin! Mii ohsha kaaonci​naakosiihtawinaan e'onakiminaan nintanohkii'aakan citinowiyan citipaacimiyan, citipaatotaman kaye o'o noonkom kaaishi​waapamiyan, ini kaye keni​waapanta'inaan. 17 Kikanaatamawin tahsh kaye kekoon citootawihsinowihkwaa iki Coowak, iki kaye kaaCoowiwihsikwaa. Kitishinisha'on tahsh 18 ciwaapi'atwaa, cikwehkii'atwaa kaye kashkiitipihkanonk onci, meshkwac tahsh waahseyaank ci'ishi​pimaatisiwaatc, cinakatamowaatc kaye kaatipenimikowaatc eshi​mashkawisiinitc maciaya'aan, Kishemanitoon tahsh meshkwac cinaasihkawaawaatc. Miitahsh tepweyenimiwaatc cipoonentamawintwaa omacitootamowiniwaan, kewiinawaa tahsh citakwakimintwaa i'imaa eshi​ayaanitc Kishemanitoon opimaatisiimini kaakiionaapamaanitc,' ninkii'ik," ihkito Pwaal. 19 Keyaapi tahsh kii'ani-ihkito: "Kihciokimaa Aakarihpa (Agrippa)! Kaawiin tahsh ninkiih​shashiipihtansiin i'i ishinamowin kihcikiishikonk kaakii'onci​waapanta'ikoowisiyaan. 20 I'imaa tahsh niikaan Timaaskahs (Damascus) ootenaank, Ceroosalamink (Jerusalem) kaye, misiwe Cootiiya (Judea) ahkiink kaye, kaashi​ayaawaatc kaye kaaCoowiwihsikwaa, ninkiih​tashi​wiintamawaak cikwehkaatisiwaatc cinakatamowaatc omacitootamowiniwaan. Cikwehkiihtawaawaatc kaye Kishemanitoon citootamowaatc ke'onci​naakohtoowaatc ekiih​kwehki​pimaatisiwaatc. 21 Mii 'oweni onci Coowak kaakii'onci​otihtiniwaatc kihcianami'ewikamikonk e'ayaawakipan, ekii'onci​kakwe​nihshiwaatc. 22 Piinihsh tahsh noonkom o'o ishiahpii kaakiishikaninik nimpiwiici'ik Kishemanitoo, miitahsh o'omaa kaaonci​niipawiyaan kahkina peshikwan e'ishi​tipaacimohtawakwaa kaa'akaahsentaakosiwaatc iki kaye kaakihtentaakosiwaatc. Kaawiin awahshime kekoon payesh nintihkitohsii kaakii'ihkitowaakopanen Kishemanitoo kaakiih​kanootamaakotc, a'a kaye Moosihs (Moses) kaakii'ihkitokopanen ewiintamowaatc keani'ishihsek. 23 O'o ekii'ihkitowaakopanen: Ini hsa Kishemanitoo keonaapamaatc cipimaaci'iwenitc, kii'inentaakosiwan cikakwaatakihtoonitc, wiin kaye nihtam cikashkihtoonitc cikiiwe​pimaatisitc nipowinink onci. Ciwiintamawaanitc kaaCoowiwinitc, i'i kaye kaaCoowiwihsinik pimaaci'ikoowin ciwaahseshkaakonitc," Pwaal kii'ihkito. 24 Mekwaa tahsh Pwaal o'o e'ihkitotc ehkanootamaasotc okii'onci​kanoonikoon Pehtahsoon ehshaakowenitc: "Pwaal, kikiwashkwe maawiin siiyaaken! Kaashikihci​kihkentaahsoyan ohsha kikiiwashkwe'ikon!" okii'ikoon. 25 Pwaal tahsh kii'ihkito: "Kehtentaakosiyan Pestahs! Kaawiin niin ninkiiwashkwehsii. Mii hsa piko eshi​tepweyaan o'o kaaihkitoyaan. 26 Kihciokimaa Aakarihpa (Agrippa) ohsha okihkentaanan ono kaatashintamowak, miitahsh kaaonci​wencihtaawak ehkakanoonak. Nintishi​kehcinaa' kaye kekoonini ehpanaapantansik aaniihsh kaawiin kekoon kaacaya'ink ishihcikenaaniwansinini. 27 Kihciokimaa Aakarihpa! Kitepwehtamowaan ina kaaihkitonitc Kishemanitoo kenootamaakotc. Kikihkenimin iitok ehtepwehtawatwaa!" okii'inaan. 28 O'o tahsh okii'ikoon Aakarihpawan: "Kitinentam ina cikashkimiyan Christ opiminisha'waakanan citinowiyaan, acina ehta ehkanooshiyan?" okii'ikoon. 29 Pwaal tahsh okii'inaan: "Kiishpin acina komaa kaye kinwesh ishihsek, mii 'i eshi​pakohsenimak Kishemanitoo kaawiin kiin ehta, oko hsa kaye kahkina o'omaa kaa'ayaawaatc kaanoontawiwaatc noonkom kaakiishikaninik, citinowiwaatc kaatinowiwak, kaawiin wiin onoweniwan piiwaapihkweyaapiin kaaitamaan!" okii'inaan. 30 Miitahsh kaakiih​pasikwiitc kihciokimaa, a'a kaye ahkiini kaatipentank, a'a kaye Pernaihsi (Bernice), i'i kaye kahkina i'imaa kaakii'ayaanitc kiihpasikwiiwa'. 31 Ahpii tahsh pahkaan pahkehcikanink kaa'ishaawaatc kiihkakanoonitiwak ekii'ihkitowaatc: "Wa'a inini kaawiin kekoon kii'ishihcikehsii ke'onci​nipohpan, ke'onci​kipa'ikaniwihpan kaye," kii'ayitiwak. 32 Aakarihpa tahsh okii'inaan Pestahsoon: "Taakiih​pakitinaakaniwi wa'a inini kiishpin antawentansikipan citipaahkonikotc Maawac Kihciokimaan."

Ishihcikewinan 27

1 Ahpii tahsh kaakiishencikaatek Itali (Italy) ahkiink ci'inaahshiyaank, Pwaal (Paul) i'i kaye kotak kipa'waakanak kii'ishi​pakitinikaniwiwak cikanawenimikowaatc shimaakanihshiiwikimaan Cooliyahs (Julius) eshinihkaasonitc. Kii'onci​tipentaakosiwan kaaohkwakimintwaa shimaakanihshak, Maawac Kihciokimaan Oroomink kaa'ayaanitc kaatipenimikowaatc. 2 I'imaa tahsh kihciciimaanink Aataramitiyam (Adramyttium) wencimakahk ninkii'ishi​poosimin ewii'ani​naaneweyaahshiwaatc weti ewii'ani​kakaapihciiwaatc pepahkaan ayaawinink Eshiya (Asia) ahkiink. Miitahsh kaakiimaaciiyaahshiyaank. Ninkii'wiiciiwikonaan tahsh Eristaarhkahs (Aristarchus) kaaishinihkaasotc ekii'onciitc Maahsitooniya ahkiink (Macedonian) weti Tehsalanaihka (Thessalonica) ootenaank. 3 Eni​waapank tahsh ninkii'ishi​pakamaahshimin Saaitan (Sidon) ootenaank. Cooliyahsan tahsh wiinke okii'minotootaakoon a'a Pwaal, ekiih​pakitinikotc ci'anta​waapamaatc kaakihkenimaatc cimino​pami'ikonitc aaniin eshi​noontehsetc. 4 Miitahsh i'imaa kaa'onci​niminaaweyaahshiyaank eshi​tapinawaak inahke ninkii'ani'inaahshimin shaawanonk Saaiparahs (Cyprus) minihsink, aaniihsh onsaam kiikihci​nootin e'oncishkawa'amaank. 5 Miitahsh kaa'ishi​aashawakaame​yaahshiyaank kihcikamiink Silihshiya (Cilicia) ahkiink inahke, Paampiliya (Pamphylia) ahkiink kaye. I'imaa tahsh ninkii'ishi​pakamaahshimin Maira (Myra) ootenaank Lihshiya (Lycia) ahkiink. 6 Miitahsh i'imaa shimaakanihshiiwikimaa kaakiimihkank kihciciimaan Aalikihsaantariya (Alexandria) e'onciimakaninik, Itali ahkiink ewii'ishaamakaninik. Amiitahsh i'imaa kaa'ishi​aanci​poosi'ikooyaank. 7 Niipiwa' tahsh tahso​kiishik ninkiihpimi​ayaamin, ekiih​petaahshiyaank ekii'nanakaayaahshiyaank. Kekahpii tahsh ninkii'otihtaahshimin eshi'ayaak Naitahs (Cnidus) ootena. Wiinke kiikihci​nootin ekiih​sanakahk cikii'oncishkawa'amaankipan. Intawaa tahsh weti ninkii'ani'inaahshimin ciikaya'ii kaashi​neyaahshiwank Salmooni (Salmone) eshi​tapinawaak shaawanonk inahke Kariiht (Crete) minihsink ekiiani'inaahshiyaank. 8 Aahpici pehsho ninkiih​cikeweyaahshimin ekiih​sanakahk epimaahshiyaank. Ninkii'otihtaamin tahsh eishinihkaatek Wenishihshik Tapinawihshimoonowin, pehsho imaa Lahsiiya (Lasea) ootenaank eshi​ayaak. 9 Onsaam tahsh kinwesh i'imaa ninkii'ayaamin, aasha ekii'ocihcihsek onsaam enaniisaanentaakwahk keyaapi cipimaahshink aaniihsh aasha kii'ahpiihci​takwaakin. Aasha kaye kii'ishkwaa​ishikiishikan Coowak kaashi​nihtaa​maawaci'itiwaatc i'i kaapoonentamawintwaa omacitootamowiniwaan. Miitahsh Pwaal okii'ayenkwaamimaa' pimaahshiiwininiwa'. 10 Miitahsh owe kaa'inaatc: "Niwaapantaan owe kaapimi​ayaayank aahpici enaniisaanisiyank, cikihci​wanihcikeyank kaye. Poosihtaahsonan tanihshiwanaacihsewan, kihciciimaan kaye. Kipimaatisiwininaanin hsa kaye naniisaanentaakwanoon." 11 Ini tahsh shimaakanihshiiwikimaan nawac okiih​pisintawaani kihciciimaaniiwikimaan, ini kaye kaatipentaminitc i'i kihciciimaan, ahpiihc wiin i'i kaakii'ihkitotc Pwaal. 12 I'imaa Tapinawihshimoonowinink kaawiin aahpici kii'onishihshisinoon citashi​pipoonihshinaaniwank. Miitahsh nawac niipiwa' kaakii'inentamowaatc ciniminaawe​yaahshinaaniwaninik ewiikakwe​tetakohshinowaatc weti ootenaank Ihpiinikihs (Phoenix) kaaicikaatenik. I'i tahsh tapinawihshimowin Kariiht (Crete) minihsink kii'ishi​ayaa, ekii​nihtaa-aahsama'ank shaawanoninkaapii'anonk, kiiwetino​ninkaapii'anonk kaye. 13 Ahpii tahsh nihshihkaac ehpakaminoowenik ehshaawaninootink, mii 'i ciminohseyaank e'inentamowaatc, okii'akwaasipinaawaan kihciwaamihka'ikanan. Aahpici tahsh ciikew kii'ishi​pimaahshiwak i'imaa Kariiht minihsink. 14 Kaawiin itahsh tashinaanaake kii'ishihsehsinoon mii 'i aasha noohpimink inahke kaakii'onci​pakamaanimahk nootin Kiiwetino​waapaninoowehse kaakii'icikaatek. 15 Ahpii tahsh kaamekwaashkamaank i'i ehkihci​nootink, ekiih​kashkihtoohsiwaank tahsh ci'oncishkawa'amaank, intawaa tahsh ninkii'naamiwana'aamin, ekii'mihci​pimaa'okoyaank. 16 Ekiih​tapinawaak tahsh minihsehsink Kwaata (Cauda) eshinihkaatek, ninkiikihci​anohkiimin ekiih​kashkihtooyaank ciwanihtoohsiwaank mihtiko​ciimaanenhs kaasakahpitek. 17 Ahpii tahsh kaa'ihkwaapiikipitoowaatc i'i mihtiko​ciimaanenhs, wiinke okii'aayiitahpitoonaawaa ekii​titipahpitoowaatc kihciciimaan. Ekiih​sekisiwaatc tahsh cimishahkiihshinaank kaaishi​paakwaantaawankaak pehsho i'imaa Lipiya (Libya) ahkiink. Okii'niihsaapiikipitoonaawaan tahsh pimaahshiiwekinoon miitahsh kaa'ishi​mihci​pimaa'okoyaank. 18 Wiinke tahsh ninkiikihci​ocaanimaa'okomin. Weyaapaninik tahsh okiimaacii​papaahkopii​wepinaanaawaan poosihtaahsonan. 19 Nihso​kiishik 3 tahsh eshihsenik, okiih​papaahkopii​wepinaanaawaan kihciciimaaniwi​aapacihcikanan. 20 Ekii'onci​naakosihsik tahsh kiisihs, wanankohshak kaye niipiwa' tahso​kiishik, ekii'onci​anwaanoowehsinok kaye, mii 'i kekahpi kaakiih​pakiciiyaank cipimaatisihsiwaank. 21 Aasha tahsh kinwesh ekii'onci​wiihsinihsinik ininiwa', Pwaal kii'antawi​niipawi mekweya'ii eshi​ayaanitc ekii'inaatc: "Ininiwak kitaakii'ohsa​pisintawihshim kaakii'ininakook cimaaciiyaahshihsiwankipan weti Kariiht (Crete) minihsink. Kaawiin tahsh o'o kitaakii'ishi​wahsitaawihsehsiimin, kaawiin kaye kitaakii'wanihcikehsiimin. 22 Maano tahsh kikakaansomininim cimashkawentamek cipakitenimohsiwek, aaniihsh kaawiin awiya kaatahshiyek oka​wanihtoohsiin opimaatisiwin. Kihciciimaan ehta tanihshiwanaatan. 23 Tipihkonk ohsha ninkii​niipawiihtaakowaan otencaliman Kishemanitoo kaaTipenimitc kaa'anohkiihtawak. 24 O'o ekii'ishimitc: 'Pwaal, keko sekisihken! Oncita ko ishinaakwan ci'oncishkawi​kaapawihtawatc Maawac Kihciokimaa citipaahkonihk, inashke tahsh Kishemanitoo kiminotootaak ehpakitinaatc kahkina iniweniwa' kaawiiciiwimihk cipimaatisinitc.' 25 Kiinawaa tahsh ininiwak mashkawentamok! Aaniihsh nintepwehtawaa Kishemanitoo mayaa ci'ishihsenik kaakii'ishitc. 26 Shaakooc tahsh ninkoci ko minihsink kikamishakaameyaa'okomin," okii'inaa'. 27 Ahpii tahsh mitaahshiniiwikon (14) eshihsek keyaapi ninkiih​pimaa'okomin i'imaa Etariyaa (Adria) kihcikamiink. Ninkoci kekaa e'ani​aapihtaa​tipihkaak ciimaaniiwininiwak okii'onci​kihkentaanaawaa pehsho maawiin ehpimakaameyaanik. 28 Miitahsh kaakiih​kotahkii'ikewaatc ninkociko niishtana (20) tahsonihk kii'ahpiihtaayawaani. Miinawaa tahsh naake kiihkotahkii'ikewak ninkociko tahsh mitaahshinaanaan (15) tahsonihk kii'ahpiihtaayawaani. 29 Ekii'naniisaanentamowaatc tahsh eshi​ahsiniihkaanik cishi'akwaayaa'okowaatc okii​pahkopii'aanaawaan niiwin kihciwaamihka'ikanan otaahkeyoonak inahke. Wiinke okii'noonte​antawentaanaawaa ciwaapaninik. 30 Ciimaaniiwininiwak tahsh kii'inentamook ewiih​kiimooci​maaciipa'iwewaatc. Okii'niisaapiikinaanaawaa tahsh mihtiko​ciimaanenhs e'ishihcikehkaasowaatc epahkopii'amowaatc kihciwaamihka'ikanan nimihtaamoonak inahke. 31 Pwaal tahsh okii'inaan shimaakanihshiiwikimaan i'i kaye shimaakanihsha': "Kiishpin iki ininiwak ayaahsikwaa o'omaa kihciciimaanink, kaawiin kekiinawaa kikapimaatisihsiim," okii'inaan. 32 Shimaakanihshak tahsh okiih​pahkishaanaawaa kaaonci​sakahpitenik mihtiko​ciimaanenhs pisaan citashi​maaciiyaa'aninik. 33 Ahpii tahsh e'ani​waahseyaapaninik Pwaal okiih​pakohsenimaa' kahkina ciotaahpinaminitc miicim ciwiihsininitc ekii'ihkitotc: "Mii 'i noonkom kaakiishikahk aasha mitaahshiniiwikiishik (14) e'ishihsek emihci​pii'oyek, e'onci​wiihsinihsiwek kekoon cikii'miiciyekipan. 34 Kimihsawenimininim tahsh ci'otaahpinamek miicim aaniihsh mii 'imaa ke'onci​pimaatisiyek. Kaawiin ohsha kanake peshik awiya owiinisihs ohtikwaanink ta'onci​nihshiwanaatahsinini o'omaa kaatahshiyek," okii'inaa'. 35 Ahpii tahsh i'i kaa'ishkwaa​ihkitotc okii'otaahpinaan pahkweshikanan ekii'nanaahkomaatc Kishemanitoon. Kahkina tahsh okiih​kanawaapamikoo'. Miihsh kaa'ishi​pahkwepinaatc pahkweshikanan ekii'maacii​wiihsinitc. 36 Kahkina tahsh kii'onci​soonkite'ewa', miihsh kahkina kaa'ishi​wiihsininitc. 37 Kahkina tahsh maamaw kaakiih​poosiyaank i'imaa kihciciimaanink niishwaahk niishwaahsimitanahshi​ninkotwaahso (276) ninkiih​tahshimin. 38 Ahpii tahsh kaahte​wiihsiniwaatc okiih​papaahkopii​wepinaawaan pahkweshikaniwi​kihtikaanan kaaonci​oshi'imintc pahkweshikanan cinaankwakontenik kihciciimaan. 39 Ahpii tahsh e'ani​piitaapaninik kaawiin okii'nihsitawinansiinaawaa i'i ahkiini. Okii'waapantaanaawaa tahsh wiin eshi​waaninikamaanik ematwe​mihtaawankaanik. Miitahsh kaakii'inentamowaatc kiishpin kashkihtoowaatc cikiihcehkihsitoowaahpan kihciciimaanini i'imaa. 40 Okii​pahkishaanaawaan tahsh ini kihciwaamihka'ikanan nipiink iko ekii'ishi​nakatamowaatc. Okii'aapa'waawaan kaye tahkwa'ikanan etahkopisonihpan. Okii'ihkwaapiiki​pitoonaawaa tahsh pimaahshiiwekin nimihtaamoonak kaakii'ayaanik niikaanaya'ii nahke cimaaciiyaahshiwaatc. Miihsh kaakiinaatakaameyaahshiyaank. 41 Kiinoonte​mishahkiihsin tahsh i'i kihciciimaan eshi​paakwaak. Nimihtaamoonak tahsh kiikihciwataawankihse. Otaahkeyoonak tahsh kii'ani​piikwa'an kaa'ahpiihci​soonkaashkaak. 42 Shimaakanihshak tahsh kii'inentamook cinihsaawaatc kipa'waakana' ekii'naniisaanentamowaatc cikiimooci​maaciiyaatakenitc cishipaninaawaatc itahsh. 43 Shimaakanihshiiwikimaa tahsh ewiih​pimaaci'aatc Pwaalan okiih​kipihtinaa' kaawii'ishihcikenihpan. Kii'ihkito tahsh i'i nehtaawaatakenitc niikaan cipahkopii​kwaashkwaninitc cinaatakaameyaatakenitc. 44 Ini tahsh kotak cishimincimiinitc napakihsakonk kekoonan kaye kaapiiwa'aninikin ciminciminaminitc. Kii'ishihse tahsh kahkina awiya ekii'mishakaameyaataketc, kekoon ekii'ishihsehsik.

Ishihcikewinan 28

1 Ahpii tahsh kahkina kaa'akwaasiiyaank mii 'i kaakii'wiintamaakooyaank i'i minihs Maalta (Malta) inakwana e'ishinihkaatek. 2 Kaakiih​tashiihkewaatc tahsh i'imaa wiinke ninkii'minotootaakonaanik. Kiihpootawewak ci'awasoyaank aaniish kiihkimiwan, kiikihsinaa kaye. Kii'ihkitowak kaye e'minwentamowaatc kahkina ewaapamiyamintwaa. 3 Pwaal (Paul) tahsh okii'maamooshakinaanan mihtikoonhsan. Epakitinihsetc kinepikoon kiihsaakaapiikipani'owan e'ani​kishitenik i'i pootawaan, okii'maakwamikoon tahsh kinepikoon oninciink ekii​kihciwamikotc. 4 Ahpii tahsh i'imaa kaakiih​tashiihkenitc ewaapamikotc kinepikoon e'akoocininitc oninciink kii'ihkitowa': "Wa'a inini tepwe kiinihshiwetok! Aanawiin ekiih​shaapwiitc kihcikamiink onci, shaakooc tahsh okiiwe​naasihkaakon otishihcikewin, enana'ahsikotc. Kaawiin tahsh inentaakosihsii cikiih​pimaatisihpan," kii'ihkitowa'. 5 Ishkotenk tahsh okii'ishi​wepinaan ini kinepikoon, kaawiin tahsh kekoon kii'ishi​ayaahsii. 6 Okii'ahkawaa'ikoo' tahsh cipaakihsetc, komaa kaye kwetahto cikawihsetc cinipotc. Ahpii tahsh kinwesh kaahpii'ikotc, e'waapamikotc tahsh kekoon e'ishi​ayaahsik, pahkaan kii'inentamoo' e'ihkitonitc: "Manitoowi iinsan wa'a," kii'ihkitowa'. 7 Pehsho tahsh i'imaa kii'ayaani ahkiini ehtipentank kaaokimaahkaaniwitc i'imaa minihsink Papiliyahs (Publius) e'ishinihkaasotc. Ninkiih​piintikanikonaan otaawinink, nihsokiishik (3) wiinke ninkiimino​pami'ikonaan. 8 Kii'ani​ayishihse tahsh Papiliyahs oteten ekiih​pimihshininitc ehkishisowaahpinenitc kaye tahsh kiimiskwiiwanini okishiwashkateyaahpinewinini. Miiwan iniweniwan Pwaal kaakiih​piintikawaatc ekii'anami'aatc. Ehsaaminaatc tahsh kii'minoayaawan. 9 Ahpii tahsh o'o kaa'ishihsek kotak awiyak aahkosiwinan kaa'ayaawaatc i'imaa minihsink kiihpiishaawak miihsh kaa'ishi​minoayaa'intwaa. 10 Niipiwa' tahsh kekoonan ninkii'miinikonaanik enaakohtoowaatc ekihtenimiyamintwaa. Ahpii kaahkiishiiyaank cimaaciiyaahshiyaank, ninkii'maaciinta'ikonaanik kekoon keyaapacihtooyaank. 11 Nihso​kiisihs (3) tahsh i'imaa kaa'ishkwaa-ayaayaank ninkiih​poosimin kihciciimaan ekii'maaciiyaahshiyaank. I'i hsa kihciciimaan kiihtashi​pipoonihshiimakan i'imaa ekii'onciimakahk Aalikihsaantariyaahkaank. Niishotewi​manitoohkaanak kiimasinihshinook i'imaa kihciciimaanink. 12 Sirahkiyoos (Syracuse) ootenaank tahsh ninkii'ishi​takohshinimin. Nihsokiishik (3) tahsh i'imaa ninkii'ayaamin. 13 Miitahsh i'imaa miinawaa kaa'onci​maaciiyaahshiyaank piinihsh ekii'otihtamaank Oriiciyam (Rhegium) kaaicikaatek ootena. E'ani​waapank tahsh kii'maacii​shaawaninootin. Miinawaa e'ani​waapank ninkii'otihtaahshimin Potiyali (Puteoli) tapinawihshinowinink. 14 Ninkii'mihkawaanaank tahsh i'imaa otepwehtamook. Ninkii'ikonaanik tahsh ciwiici​ayaamankitwaa peshikotawahte. Miitahsh kaakii'ani​takohshinaank weti Oroomink (Rome). 15 Otepwehtamook tahsh Oroomink kaakii'ayaawaatc kii'noontamook iinsan ewiihpi​takohshinaank. Ninkiih​pianta​nakishkaakonaanik tahsh waahsa ekiihpi​onciiwaatc ootenawan kaaicikaatenikin otAtaawewikamik Aapiyahs, i'i tahsh kaye Nihso​kapehshiwin. Ahpii tahsh Pwaal kaa'waapamaatc okii'onci​miikwehciwenimaan Kishemanitoon, kii'onci​mashkawiayaa kaye. 16 Ahpii tahsh kaatakohshinaank Oroom ootena, Pwaal (Paul) kiihpakitinamawaa pisaan cinishihkeayaatc waahkaa'ikanink. Shimaakanihshan tahsh i'imaa okiih​kanawenimikoon. 17 Nihsokiishik (3) e'ani-ishihsenik Pwaal okii​maamawi​antomaa' kaaniikaanisinitc Coowa'. Ahpii tahsh kaapi​maamawi​piishaanitc okii'inaa': "Niwiici​onciimaakanak, aanawiin kekoon e' kii'ishi​mamaanshiihkantawaahsiwakwaa kiwiici​onciimaakaninaanik, ishihtwaawinan kaye kaakiihpi​miininankwaa kikehteya'aaminaapaniik, miitahsh kaakiih​kipa'okooyaan weti Ceroosalamink (Jerusalem), ekii'ishi​pakitinikooyaan citahkonimitc Oroomink kaaonciinitc. 18 Miiwak tahsh iki kaakii'anta​kihkenimiwaatc. Kii'inentamook tahsh cikiih​pakitinikoowakipan, aaniihsh kaawiin kekoon ninkii'ishi​mamaanshiiwaahsiin keonci​nihsikoowakipan. 19 Ahpii tahsh Coowak kaa'inentansikwaa cipakitinikoowak, intawaa tahsh ninkii'ihkit maawac kihciokimaa citipaahkonitc, kaawiin wiin kekoon e'ayaayaan keonci​maci'inakwaapan niin ko niwiici​onciimaakanak. 20 Miitahsh kaakii'onci​antominakook ewii'waapamininakook, ewiih​kakanooninakook kaye. Aaniihsh nintepwehtawimaan Isriyalak (Israel) kaa'ahpenimonotawaawaatc, mii 'i kaaonci​tahkopisoyaan ono piiwaapihkweyaapiin," okii'inaa'. 21 O'o tahsh okii'ikoo: "Kaawiin Cootiiya (Judea) ahkiink nintonci​oshipii'amaakoohsiimin citashimikooyan. Iki kaye weti Coowak kaakiihpi​onci​takohshinowaatc kaawiin kekoon cikii'inaacimowaatc, kaawiin kaye noociko awiya kitikohsii. 22 Kiwii'noontaakoo tahsh aaniin enentaman, aaniihsh ninkihkentaamin misiwe awiyak emaci​tashintamowaatc i'i ishihtwaawin wenci​tipentaakosiwatc," okii'ikoo'. 23 Okii'onahtooni tahsh ahpii kiishikaninik kepi'anta​waapamikotc. Kiihpaahtiinowa' tahsh kaakiih​pianta​waapamikotc i'imaa eshi​ayaatc. Ekishepaawakaninik tahsh piinihsh e'ani​onaakohshininik kwayahk ekii'waawiintamawaatc ehtipaacimohtawaatc aaniin eshinaakwaninik Kishemanitoo otookimaawiwin. Okiihkakwe​kashkimaa' tahsh kaye citepwehtaakotc ehtashimaatc Ciisahsoon ekii'wiintank eshihsininik otoonahshowewinini Moosihsoon, kaakii'ishipii'ikenitc kaye kenootamawaanitc Kishemanitoon. 24 Aaninta tahsh okiih​tepwehtamini i'i kaakiiwiintamawaatc, aaninta tahsh kaawiin kiihtepwehtansiiwa'. 25 Kaawiin tahsh taapishkoo kii'inentansiiwa' e'ani​maacaanitc o'o Pwaal kaa'ishkwaa​ihkitotc: "Peshik kekoon nintayaan ci-ininakook: Tepwe kwayahk kii'ihkitonikopan Kishemanitoo otAhcaahkwan kiiyaapaci'aanitc kenootamaakotc Aaiseyawan (Isaiah) kiikanoonaakopanen kikehteya'aaminaapanii': 26 'Maacaan antawaapam iki pemaatisiwaatc o'o ci'inatwaa: Mihsawaako mooshak aana noontamek, kaawiin tahsh kikanihsitohtansiim. Mihsawaako kaye mooshak aana waapantamek, kaawiin tahsh kikanihsitawinansiim. 27 Aaniihsh otinentamowiniwaan aahpici peci​nihsitohtamoomakaniniwan, okipinaanaawaan tahsh kaye ohtawakaawaan. Akawaapinitisowak tahsh kaye. O'o tahsh e'ishihcikewaatc mii 'i kaa'onci​waapihsikwaa, mii kaye kaa'oncinoontansikwaa, mii kaye 'i kaa'oncinihsitohtansikwaa otinentamowiniwaank. Piikwehkiinotawiwaatc tahsh nintaapimaaci'aak,' kii'ihkitokopan Kishemanitoo." 28 Pwaal tahsh kii'ani'ihkito: "Kihkentamok itahsh o'o minwaacimowin kaashi​tashintenik Kishemanitoo opimaaci'iwewin kewiinawaa kaaCoowiwihsikwaa e'ishinisha'amawintwaa, tanoontamook tahsh wiinawaa!" okii'inaa'. 29 Ahpii tahsh o'owe kaa'ishkwaa​ihkitotc, Coowa' kii'ani​maacaawa', wiinke ehkihci​kakanoonitinitc. 30 Niisho​pipoon (2) tahsh i'imaa kii'ayaa waahkaa'ikanink kaakii'awi'aasotc, kahkina kaye ekiih​piintikanaatc kaakiihpi​naasihkaakotc. 31 Kiihsoonkite'e tahsh, kaawiin kaye awiyan okiih​kipihtinikohsiin ewiintamaaketc Kishemanitoon otookimaawinini, ekiih​kihkino'amaaketc kaye ini kaashi​tipaacimimintc kaaTipencikenitc Ciisahs Christan.

Oroomink 1

1 Niin Pwaal (Paul) Christ Ciisahs otanohkii'aakanan. Kishemanitoo ninkii'onaapamik ekii'inanooshitc ciotishinisha'waakanimitc ciwiintamaakewak ominwaacimowin. 2 Wiin kihcimewisha Kishemanitoo kii'inahshotamaake o'o minwaacimowin ciayaamakaninik, ekii'inanoonaatc otipaacimowininiima' i'imaa ci-ishioshipii'aminitc kaakihtentaakwaninik Kehtemasina'ikanink. 3 Mii 'imaa minwaacimowinink eshitashimimintc Kishemanitoo oKosihsan Ciisahs Christan kaaTipenimiminank. Miitahsh enaacimintc Christ owiiyaw Tepitink (David) ekii'ontahkaanesiimakaninik. 4 Ahcaahkomaank tahsh wiin inahke inakimaa Kishemanitoonk e'ontahkaanesitc. Okihcimashkawisiiwininiink iitok kii'oncikihkencikaniwi e'oKosihsimikotc Kishemanitoon, aaniihsh okiihkiiwepimaatisi'ikoon ahpii kiinipotc. 5 Wiin Ciisahs Christ ekii'ishihciketc, Kishemanitoo ninkii'miinik ishinisha'waakanink ci-inanohkiiwak, 'awe Christ ci-inanohkawak, kahkina kaapimaatisiwaatc kaatahswewaanakisiwaatc cioncitepwehtamowaatc kaye citootamowaatc otihkitowinini. 6 Kaye kiinawaa 'imaa kitakwakinsom Kishemanitoo kaakii'antominek, Ciisahs Christink cioncitipentaakosiyek. 7 Mii hsa 'owe kitooshipii'amawininim kiinawaa kahkina i'imaa Oroomink (Rome) kaa-ayaayek, Kishemanitoo kaasaaki'inek, kaakii'antominek opimaatisiima' ci-inakimikoowisiyek. Maano oKishewaatisiwinink kaye opisaanentamo'iwewin kikamiinikowaa Kishemanitoo kiTetenaan, a'a kaye kaaTipeniminank Ciisahs Christ. 8 Nihtam iko nimiikwehciwi'aa Kishemanitoo, wiin Ciisahs Christ kaakii'onci-ishihsenik, kahkina kiinawaa e'miikwehciwentamawininakook, misiwe ahkiink e'anioncinoontaakaaniwank i'iwe eshitepwehtamek. 9 Kishemanitoo nintaatipaacimik ehtepwewak. Mii a'awe enikohkote'eyaan kaashianohkawak e'wiintamaakeyaan eshiminwaacimimintc oKosihsan. Kishemanitoo ninkihkenimik mooshak e'maamihkweniminakook 10 tahsink e'anami'aayaan. Nintishikakwecimaa wiiniko ci-inentamokwen kekahpii ci-ishihsenik cianimawatihsinakook. 11 Aahpici ko kiwii'noontewaapamininim. Kiwii'ishiwiici'ininim wekonen hsa ko shawenimikoowin Kishemanitoo otAhcaahkwan keshimiininek, miihsh i'i kiinawaa cioncisoonkikaapawiyek. 12 Mii 'owe kaaihkitoyaan, peshikwan iko 'imaa kikaonciwiici'ikoomin. Kiinawaa 'imaa niin eshitepweyentamaan cioncisoonkite'eshkaakooyek kaye niin i'imaa kiinawaa kaashitepweyentamek ninkaoncisoonkite'eshkaakoo. 13 Niiciotepwehtamook! Kinantawenimininim cikihkentamek o'o: paahtiinwaa nintaanakii'inentam ewii'mawatihsinakook. Mooshak itahsh kekoon ninkii'wanaa'ikon. Ninantawentaan kaye kiinawaa ci-ishikashkihtooyaan minoanohkiiwin kaashiayaayek, taapishkoo kaapi-ishikashkihtooyaan pahkaan ayaawinink kotak kaaCoowiwihsikwaa entashipimaatisiwaatc. 14 Ninantawentaakos kahkina cikakwewiici'akwaa kaatahswewaanakitinowiwaatc. Inentaakwan e'masina'amawakwaa ciwiici'akwaa, ikiweniwak kaaootenaawaatisiwaatc kaye kaapikwataatisiwaatc, ikiweniwak itahsh kaye kaakihkino'amawintwaa kaye kaakihkino'amawaahsiwintwaa. 15 Mii hsa 'owe eshiantawentamaan, kaye kiinawaa Oroomink (Rome) kaashiayaayek citashiwiintamawininakook i'i minwaacimowin. 16 Misiwe nintishiahpenimonotaan o'o minwaacimowin. Mii 'iwe e'aawaninik Kishemanitoo omashkawisiiwin, wencipimaaci'intwaa kahkina awiyak kaatepwehtamowaatc, iki Coowak nihtam ekii'otihsikowaatc, miihsh iki kaye kahkina awiyan pahkaan kaatinowiwaatc. 17 Mii 'imaa minwaacimowinink oncikihkentaakwan aaniin Kishemanitoo keishi'aatc awiyan kwayahk ciwiiciiwikotc. O'oweni kaatootawaatc Kishemanitoo, mii ehta 'imaa onciimakanini ehtepwehtaakotc. Mii 'imaa tepwehtamowinink eshimaacihsink kaye 'imaa tepwehtamowinink entashikiishihsink. Mii 'iwe kaaishihsink i'iwe oshipii'ikewin: "Awenen hsa ko otepwehtamowinink wencikwayahkwakimikotc Kishemanitoon ciminowiiciiwaatc, mii 'awe tepwe kepimaatisitc." 18 Kishemanitoo kihcikiishikonk kii'oncikihkentamooshiwe onishkentamowinink kaawii'oncitipa'amawaatc o'o pemaatisinitc kaamaci-inentaminitc kaye kaamacihcikenitc. Wiinawaa omacihcikewiniwaank okii'oncikipa'aanaawaa i'i tepwewin cikihkencikaatehsininik. 19 Miitahsh o'oweni keoncitipa'amawaatc Kishemanitoo onoweniwa', aaniihsh okiihkaayaapantamini keshikihkenimintipan, wiin aaniihsh okiihkiihkaayaapanta'aa'. 20 Ahpane ko kaakii'ahko-oshihtootc ahki kii'mohshenaakwaniniwan otishiayaawinan tino kaanaakwahsininikin, mii 'iweni omashkawisiiwin keninehpiciayaanik kaye oKishemanitoowaatisiwin. Oko pemaatisiwaatc otishinihsitawinamawaawaan e'waapantamawaawaatc Kishemanitoon otooshihcikanini. Miihsh i'i cikwiinawi-ihkitowaatc aaniin kaaishihcikewaatc. 21 Aanawiin ehkihkenimaawaatc Kishemanitoon, kaawiin okii'inakimaahsiwaawaan ehKishemanitoowinitc. Kaawiin kaye omiikwehciwenimaahsiwaawaan. Meshkwac itahsh wiinke kakiipaatisiimakaniniwan onaakatawencikaniwaan, wiinke kiihkashkiitipihkentaakwaniniwan kaapishihshikwaanikin onaakatawentamowiniwaan. 22 Ninkakiihtaawentaamin aana inenintisowaatc, kakiipaatisiwak itahsh. 23 I'imaa kekiihkihtakimaawaahpan Kishemanitoon okii'meshkotakimaawaa' oshihcikana' kaaishinaakosinitc taapishkoo inini tino kenipotc, pinehshiinshink kaye kaaishinaakosinitc, aya'aawihshink kaye kaapimohsenitc, kapapaamootenitc kaye kaaishinaakosinitc. 24 I'iwe e'inaatisiwaatc, okii'oncipakiciihkantaakowaan Kishemanitoon, maano wiinawaa waa'ishihcikewaatc wiinaatisiwin e'ishimihsawentamowaatc. Mii 'iwe piinihsh nahpaac kekoon ehtootaatiwaatc mii 'iwe e'akaciwentaakwaninik. 25 Kaatepwewiniwaninik itahsh enaacimintc Kishemanitoo okii'meshkotoonaanaawaa nawac i'iweni ekii'otaahpinamowaatc i'i kaatepwewiniwansininik. Takwac otooshihcikanini Kishemanitoon okakanootaanaawaan ehkihtakintamowaatc. Kaawiin wiin Kishemanitoon otanami'ehtawaahsiwaawaan kaakii'oshihtoonitc kahkina kekoon. Wiin a'awe mooshak ahpane kekihtakimintc, mii hsa 'owe ehtepwemakahk. 26 O'owe tahsh kaaishihcikewaatc pemaatisiwaatc, okii'oncipakiciihkantaakowaan Kishemanitoon, i'iweni kaa-akaciwentaakwaninik ehtootamowaatc e'nahpaacimihsawenintiwaatc. Ampooshke iki ihkwewak okii'nahpaacihsitoonaawaa otihkwewiwiniwaa, anooc ewii'ishihcike'itiwaatc. 27 Shikwa peshikwan kewiinawaa ishihcikewak iki ininiwak. Opoonihtoonaawaa kwayahk keshiwiiciiwimintc ihkwewa', meshkwac e'macimihsawenimaawaatc wiici-ininiimiwaa', i'iwe kaa-akaciwentaakwaninik e'ishihcike'itiwaatc. Mii 'imaa omacihcikewiniwaank oncitipa'amawaawak kaashikashkihtamaasowaatc. 28 I'iwe tahsh ewiihpapaamentansikwa kwayahk eshikihkenimimintc Kishemanitoon, okii'oncipakiciihkantaakowaan ekaa cikwayahko naanaakatawentansikwaa, mii 'i eshitootamowaatc ini kwayahk kaainentaakwahsininikin. 29 Omooshkineshkaakonaawaan kahkina kaakwayahkonaakwahsininikin – maci-ishiwepisiwin, mihsawinamaakewin, macihcike'itiwin. Mooshak aayaahshenintiwak, nihsitiwak, aayaanoontiwak, kakweciihshi'itiwak. Mooshak iko macinaakewak, papaatitakwaacimowak, 30 macitashintiwak. Oshiinkenimaawaan kaye Kishemanitoon. Kakwenishkimiwewak, kihtenimowak, mamiihkwaanitisowak. Okakwemihkwentaanaawaa keshimacihcikewaatc. Kaawiin owii'na'ihtawaahsiwaawaa' oniiki'ikowaa'. 31 Kaawiin inkotano inentansiiwak e'macihcikewaatc. Opiikonaanaawaan otahshotamakewiniwaan. Kaawiin nihtaa​saaki'iwehsiiwak. Kaawiin kaye kitimaakinaakehsiiwak. 32 Aanawiin ehkihkentamowaatc otinaahkonikewinini Kishemanitoon e'inahtenik, nipowin cikashkihtamaasowaatc awiyak kaatootamowaatc, maano tahsh otanitootaanaawaan iniweniwan, kaye tahsh "Kikwayahkohcikem" otinaawaa' iniweniwa' kaanekaami-ishihcikenitc.

Oroomink 2

1 Kiin itahsh niicipimaatis, kinaanaakaci'aa na kiicipimaatis? Kaawiin kiin kikakiikitohtamaasohsii ishihcikeyan, awenen kiin tenowiwanen. I'imaa eshimacakimatwaa pehkaanisiwaatc, peshikwan tahsh ishihcikeyan wiinawaa kaatootamowaatc, kaye kiin iitok i'imaa citakwakintisoyan. 2 Kikihkentaamin kwayahk e'ishihciketc Kishemanitoo ehtipaahkonaatc iniweniwa' i'i kaatootaminitc. 3 Kiin itahsh peshikwan kitashi-ishihcike kaashinaanaakaci'atwaa kiicipimaatisiik. Kitinentam ina tahsh cioshintaman keinaahkonihk Kishemanitoo? 4 Kaawiin maawiin aahpici kisaapentamowaahsiwaanaatok ehpiihciminotootaaketc Kishemanitoo ehshashiipitipaahkoniwetc, kinwesh ehshashiipenimihk. Kehcinaac kitaakihkenimaa aaniin wenci minotootawihk ewiihkakweishiwinihk kwehkaatisiwinink. 5 Kiin itahsh wawiinke kishashiipihtam. Kitishinankinamaas awahshime cikosikwahk kitipa'amaakoowin, mii 'iwe keishihsek ahpii ishikiishikaninik Kishemanitoo naakohtootc eshinishkentank maci-ishiwepisiwin i'i kaye ahpii kaawii'ishinaakwaninik kwayahk iko ewii'ishitipaahkoniketc. 6 Kahkina awiyan tahsh kwayahk owii'ishitipa'amawaan aaniin kaa'ishihcikenitc. 7 Aaninta shashiipentamook ehkakweminohcikewaatc. Miiwan itahsh ono entone'amowaatc minwakinsowin, cikakweminwaacimikowaatc Kishemanitoon, kaye kenihshiwanaatahsininik pimaatisiwin cimiinikowaatc. Wiinawaa ko tamiinikoowisiwak pimaatisiwin wiihkaa kepoonihsehsininik. 8 Ikiweniwak itahsh pehkaanisiwaatc wiinawaa ko ehta wiihkakweminotootaasowak, e'otaahpinansikwaa kaakwayahkwaninik, nawac i'iwe ewii'noocihtoowaatc kaakwayahkonaakwahsininik. Miiwak​iki kekihcitipa'amaakowaatc Kishemanitoon onishkentamowininiink. 9 Kakwaataki'ikoowin, wiihsakentamowin tamiinaawak awiyak kaanihtaamacitootamowaatc. Iki Coowak niikaanenimaawak citipaahkonintwaa, ikiweniwak itahsh kaye kaaCoowiwihsikwaa mii peshikwan ketootawintwaa. 10 Ikiweniwak itahsh kaaminohcikewaatc minwaacimikoowin, minwakinsowin, pisaanisiwin okamiinikowaan Kishemanitoon. Iki tahsh Coowak niikaan tamiinaawak, ikiweniwak itahsh kaye kaaCoowiwihsikwaa tamiinaawak. 11 Aaniihsh mihcipeshikwanini i'i kaaoncitipaahkonaatc Kishemanitoo kahkina awiyan. 12 Iki kaaCoowiwihsikwaa kaawiin otayaahsiinaawaa i'iwe Inaahkonikewin Moosihsihkaank (Moses) kaakii'onciimakaninik. I'imaa tahsh ekii'macihcikewaatc taoncinihshiwanaatisiwak aanawiin ekii'ayaahsikwaa Inaahkonikewin. Ikiweniwak itahsh Coowak kaa-ayaawaatc i'i Inaahkonikewin, ahpii e'macihcikewaatc, i'imaa Inaahkonikewinink okaishi​ahpi​tipaahkonikowaan Kishemanitoon. 13 Kaawiin aaniihsh i'imaa e'mihcinoontamowaatc Inaahkonikewin kaainahtenik otoonci-inakimikohsiiwaan e'minowiiciiwaawaatc Kishemanitoon, i'imaa ehta ehtootamowaatc i'i kaainahtenik otInaahkonikewinini. 14 Iki kaaCoowiwihsikwaa kaawiin kii'oncimiinaahsiiwak i'i Moosihs otInaahkonikewin. Wiinawaa hsa ko ahpii hko ishionentamaasowaatc ewii'ishihcikewaatc i'i kaainahtenik Inaahkonikewin, mii 'iwe eshinaakosiwaatc wiinawaa piko ekii'oshihtamaasowaatc Inaahkonikewin, aanawiin ekii'oncimiinaahsiwintwaa i'iweni Inaahkonikewin Moosihsihkaank kaakii'onciimakaninik. 15 Otishihcikewiniwaank hsa ishinaakwanini ote'iwaank ehtashiayaamakaninik i'iweni kaainahtenik Inaahkonikewin, kaye 'imaa onaanaakatawenintisowiniwaank oncikihkentaakwanini o'owe e'ishihsek. Inkotink aaniihsh kimaashihcike otikonaawaa otinentamowiniwaa, inkotink kaye kiminohcike e'inamanci'oshkaakowaatc. 16 Mii 'iwe keishihsek ahpii 'iwe kiishikahk tipaahkoniketc Kishemanitoo. Ciisahs Christan oka-aapaci'aan, ahpii ehtipaahkonaatc ini pemaatisinitc kaashikiimooci-inentaminitc kahkina. Mii 'owe enahtek i'iwe minwaacimowin kaawiintamaakeyaan. 17 Kiin itahsh, "Niin Coo nintinow" e'ihkitoyan, kitahpenimonotaan i'iwe Moosihs (Moses) otInaahkonikewin. Kaye kitishimamiihkwaanitis, niin peshik ikiweniwak awahshime kaasaaki'ikowaatc Kishemanitoon e'ihkitoyan. 18 Kikihkenimaa kaye kaashiantawenimihk Kishemanitoo, kaye kikiihpi-ishikihkino'amaakon i'iwe Inaahkonikewin wekonen wenishihshink ciotaahpinikaatek. 19 Kaye kiteinenintis kiin cikihkinowinatwaa ikiweniwak kaawaapihsikwaa, ciwaahseshkamawatwaa ikiweniwak kashkiitipihkanonk kaa-ayaawaatc. 20 Kiteinenim ehkashkihtooyan cikwayahkonatwaa kaakakiipaatisiwaatc, kaye iki mahshi kaakiishaapewihsikwaa cikihkino'amawatwaa. Kitayaan i'i Inaahkonikewin. Miitahsh i'imaa kitinentam kahkina kekoon e'wehkwaakihkentaman kaye kahkina ehkikisiyan i'i tepwewin. 21 Aanawiin kotak awiyak ehkihkino'amawatwaa, kaawiin ina kiin i'imaa kitashikihkino'amaasohsii? Kaye i'imaa kotak awiyak kekiihkimatwaa ekaa cikimootihsikwaa, kaye kiin inahsh kikimoot? 22 Kayehsh keko tootanken pihshikwaatisiwin aanaihkitoyan, kitootam inahsh kiin? Kishiinkinawaak manitoohkaanak; kitashikimoot ina tahsh kaashipiintikanintwaa kaamanitoohkewaatc? 23 Kiin kimaminwaacintis e'ayaayan Kishemanitoo otInaahkonikewin – taoncipaahpinotawaa na tahsh Kishemanitoo kiin ehpiikonamowatc i'i Inaahkonikewin? 24 Mii 'owe kaainasina'ikaatek Kihcimasina'ikanink: "I'imaa kiinawaa kaa-ayintiyek ikiweniwak kaaCoowiwihsikwaa otooncimacakintamawaawaan Kishemanitoon owiinsowinini." 25 Kiishpin tootaman Inaahkonikewin kaainahtek, mii 'imaa ehta keshikihtaapatahk kikihkinawaatashakeshokoowin. Kiishpin itahsh piikonaman iwe Inaahkonikewin, nawac iinsan kihkinawaatashakeshokoohsiwampan taakii'onishihshin. 26 A'awehsh wiin kaaCoowiwihsik, aanawiin ekaa ekiihkihkinawaatashakeshwaahsiwintc, kiishpin itahsh tootank i'i kaainahtenik Inaahkonikewin, kaawiin ina otaaishinaakohsiin Kishemanitoon taapishkoo aasha kewiin ehkihkinawaatashakeshikaniwitc? 27 Kiinawaa tahsh kaaCoowiwiyek, aanawiin e'ayaayek i'iwe kaaoshipii'ikaatek Inaahkonikewin, kaye aanawiin i'imaa kiwiiyawiwaank ekiihkihkinawaatashakeshokooyek, shaakooc kitanipiikonaanaawaa i'iwe Inaahkonikewin. Ikihsh wiin kaaCoowiwihsikwaa, aanawiin wiiyawiwaank ekaa ehkihkinawaatashakeshwaahsiwintwaa, wiinawaa ko otootaanaawaa kaainahtenik Inaahkonikewin. Miihsh i'iwe kiinawaa keoncitipaahkonikooyek. 28 Awenen tahsh a'a tepwe kaaCoowiwitc? Kaawiin memwehc awiya taatinowihsii wakicaya'ii ehta kaaishinaakositc, i'imaa wiiyawink ehta kaatashikihkinawaatashakeshontc. 29 A'awehsh wiin piincinaw kaaCoowiwitc, mii 'awe tepwe kaatinowitc, ote'ink ehkihkinawaaci'intc ehtipenimikotc Kishemanitoon, otAhcaahkoni ekii'ishianohkiinitc. Kaawiin tahsh wiin awiya i'iweni kaaoshipii'ikaatenik Inaahkonikewin otishi'ikohsiin. Ominwaapamikoowin a'a kaatinowitc kaawiin ininiinaank onciimakahsinini, Kishemanitoonaank ihsa onciini.

Oroomink 3

1 Kekoon ina tahsh ayaamakan ci-ishiniikaanentaakosiwaatc iki Coowak, otaanaank itahsh wiin ci-inentaakosiwaatc iki kaaCoowiwihsikwaa? Awaac ina kekoon ontisi awiya ehkihkinawaatashakeshontc? 2 Tepwe misiwe ontisiwak ehCoowiwaatc. Mii aaniihsh o'owe nihtam, okiihkanawenta'ikowaan Kishemanitoon cipaminamowaatc otihkitowinini. 3 Aaniin itahsh keishihsewaatc aaninta ekii'noonteaanawencikewaatc? Kaye wiin ina Kishemanitoo taishihcike'itiso citepweyentaakosihsik? 4 Kaawiin kanake! Mihsawaa hsa ko tatepwewiniwi Kishemanitoo, kahkina aana kiiwanimowaatc ininiwak. Amii 'owe kaaishihsink oshipii'ikewin: "Ahpii hko ehkakitoyan, kahkina kikaishinaakook ehkwayahkotepweyan. Ahpii anaamimikooyan kikapahkinaake." 5 Aaniin itahsh keihkitoyank kiishpin kaashimacihcikeyank nawac i'imaa oncipayahtenaakwaninik Kishemanitoo okwayahkohcikewin? Kitaaihkitomin ina ehkwayahkohcikehsik ehtipa'amawinank? Mii 'iwe piko awenen keshikakwetwetc. 6 Kaawiin itahsh kanake taaishinaakwahsinoon! Kiishpin kwayahkohcikehsikipan Kishemanitoo, aaniin kekii'ishitipaahkonaahpan kahkina ahkiink kaa-ayaanitc? 7 Komaa kaye kitaaihkitomin: "Inashke tepwehsiwak, mii 'imaa eshipayahtenaakohtaawak Kishemanitoo ehtepwetc, miihsh i'imaa cioncikihtenimintc. Kiishpin o'oweni ishihsenik, wekonen tahsh niin wenci-inakimikooyaan omacaatis?" 8 O'owe ishihsek, kaawiin ina kitaaihkitohsiimin: "Haw, macihciketaa, kaaonishihshik i'imaa taonciimakan." Aaniihsh awiyak ninkii'ishimaci-ikook i'iwe nahke ekii'ihkitowaanen. Mii 'iwe keishitipaahkonintwaa eshikashkihtamaasowaatc. 9 Naahsaap itahsh miinawaa kaatashintamaan: kiinawint kaaCoowiwiyank, awahshime na kiminwakinsomin ahpiihc wiinawaa kaaCoowiwihsikwaa? Kaawiin kanake. Aasha ninkii'wiintaan i'i kaaishiwepisiwaatc Coowak kaye kaaCoowiwihsikwaa, kahkina peshikwan iko e'ishitipenimikowaac macitootamowin. 10 Mii 'owe kaaishihsinkin kihcioshipii'ikewinan: "Kaawiin awiya okwayahkonaakohsiin Kishemanitoon, kaawiin awaac peshik. 11 Kaawiin awiya onihsitawinansiin kaakwayahkonaakwaninik, kaawiin awiya onantone'waahsiin Kishemanitoon. 12 Kahkina kaawiin owii'naanaakatawenimaahsiwaawaan Kishemanitoon. Kiini-ishihsewak piinihsh kekoonini e'inaapatisihsikwaa. Kaawiin kwayahkohcikehsiiwak, kaawiin awaac peshik. 13 Otooniwaank oncinoontaakwanini i'i kaanihshiwanaaci'iwemakaninik, otenaniwaank oncimaacihseni wayeshimiwewin. Taapishkoo kinepik kaaciihsowetc mii 'iwe eshipihcipooshiwemakaninikin otihkitowiniwaan, e'nihshiwemakaninikin. 14 Mooshak iko maashikanooshiwewak, e'wiihsakaninikin otihkitowiniwaan. 15 Papaashiko wiihkakwewiihsakentamo'iwewak, nihtaanihshiwewak. 16 Nihshiwanaaci'iwewin, kakwaataki'iwewin opimihkawaataanaawaa aanti piko kaashipimiayaawaatc. 17 Kaawiin minowiiciintiwin otakopimiwitoohsiinaawaa. 18 Kaawiin okiihpikihkentansiinaawaa cikohtaanenimaawaatc Kishemanitoon," e'ayishipii'ikaatek. 19 Kikihkentaamin kahkina ono kekoonan Inaahkonikewinan kaaishipii'ikaatekin, mii ekowaatc iki kaainentaakosiwaatc Inaahkonikewin cikanawentamowaatc. Miitahsh i'i enwaatek Inaahkonikewin, ekaa awiya cimihkansik keoncikanoocikehtamaasohpan. Miihsh i'i kahkina pemaatisiwaatc ci-ishinaakosiwaatc citipaahkonikowaatc Kishemanitoon. 20 Aaniihsh aanakashkihtootc awiya citootank i'i Inaahkonikewin kaainahtenik, kaawiin i'imaa okaonci-inakimikohsiin ciminowiiciiwaatc Kishemanitoon. Aaniihsh mii i'i enaapatahk Inaahkonikewin awiya cioncikihkenintisotc e'macitootank. 21 Aasha tahsh noonkom okii'naakohtoon Kishemanitoo aaniin entootawaatc awiyan kwayahk ciminowiiciiwikotc. Kaawiin ahkawe 'iwe otaapacihtoohsiin Inaahkonikewin cionci-inahsaatc awiyan ciminowiiciiwikotc. Mii aaniihsh i'iwe eshihsininik Inaahkonikewin kaye kaa'ishipii'ikenitc Kishemanitoo otipaacimowininiima'. 22 Aaniihsh mii i'imaa ehtepwehtawimintc Ciisahs Christan wencikwayahkwaatisiiwenimaatc i'i pemaatisinitc. Kahkina awiyan otishihcike'aan kaatepwehtaminitc. Kaawiin pepahkaanentaakosihsiiwa'. 23 Kahkina awiya kii'macitootam. Kaawiin awiya okiihtepishkansiin Kishemanitoon okihci-inentaakosiwininiink ci-ishinaakositc. 24 Wiin itahsh iko okishewaatisiwinink Kishemanitoo omihcishawenimaa' kahkina kwayahk e'inahsaatc ciminowiiciiwikotc. Wiin Christ Ciisahs otishihcike'aa' cimihcipakitinikaniwinitc ekaa cionahshowaanimaahsiwintc. 25 Wiin iko Kishemanitoo kii'ontinamaake Ciisahsoon cinihsimintc pakitinaahsowinink citinowinitc, i'imaa tahsh omiskwiiminiink cioncipoonencikaatenikin omacitootamowiniwaan iki pemaatisiwaatc ehtepwehtawaawaatc. Mii 'owe kaahtootank Kishemanitoo ciwaapancikaatenik eshikwayahkohciketc. Otaanaank itahsh cipwaa nihsimintc Christan oncita okii'aansweyaapantamawaa' kaakii'ishimacitootaminitc, aaniihsh okiihshashiipenimaa'. 26 Noonkom itahsh pahkaan ishihcike ehkihkentaakohtootc okwayahkohcikewin. Mii 'owe eshiwaapanta'iwetc wiin iko ehkwayahkwaatisitc, kwayahk kaye e'inahsaatc kahkina awiyan ciminowiiciiwikotc kaatepwehtawaanitc Ciisahsoon. 27 Wekonen tahsh awiya keoncimamiihkwaanitisotc? Kaawiin kekoon. Aaniihshwiin i'i? Kaawiin ina kitaaihkitohsiimin cioncikwayahkwakimikooyank ehkanawentamank Inaahkonikewin? Kaawiin kanake. Kaawiin aaniihsh oncikwayahkwakimaahsii awiya ehkanawentank Inaahkonikewin. Otepwehtamowinink hsa wiin okaonci-inahsikoon Kishemanitoon kwayahk ciminowiiciiwaatc. 28 Mii aaniihsh o'owe kaaoncinihtaaihkitoyaank, piko hsa ko e'otepwehtamowinitc awiya kwayahk okaonci-inahsikoon Kishemanitoon ciminowiiciiwaatc. Kaawiin wiin ekiihkanawentank Inaahkonikewin taonci-ishihcikaniwihsii awiya. 29 A'a tahsh Kishemanitoo, inenimaa na ehta ini Coowa' cioKishemanitoomikotc? Kaawiin ina kaye iniweniwa' kaaCoowiwihsinik? Tepwe hsa kaye kaaCoowiwihsinik okaoKishemanitoomikoo'. 30 Ayaa hsa peshik cioKishemanitoomikotc kahkina pemaatisinitc, shikwa wiin Coowa' otepwehtamowininiink okaonci-inahsaa' ciminowiiciiwikotc, ini tahsh kaye kaaCoowiwihsinik mii peshikwan ketootawaatc tepwehtaminitc. 31 Kaawiin tahsh i'imaa tepwehtamowinink kitoonciaanihsentaakohtoohsiimin Inaahkonikewin. Nawac iitok kitaayiicihtoomin Inaahkonikewin.

Oroomink 4

1 Aaniin tahsh keinak a'a kaakii'okehteaya'aamiyaank Eparahaam (Abraham), niinawint kaaCoowiwiyaank kaaontahkaanesiyaank? Wekonehsh wiin kaa'aniotihtaapantank? 2 Kiishpin wiin otishihcikewinink kaakii'onci-inahsikotc cionciminowiiciiwaatc Kishemanitoon, otaakii'ontinaan kekoon ciminomaamiihkwaatankipan. I'imaa tahsh kaashiwaapancikenitc Kishemanitoon kaawiin kekoon okii'ayaahsiin cimaamiihkwaatank. 3 O'owe aaniihsh ihkitoomakan kihcioshipii'ikewin: "Eparahaam okiihtepwehtawaan Kishemanitoon, miitahsh i'imaa kaakii'onci-inakimikotc ehkwayahkwaatisitc." 4 Inashke, kaa-ayanohkiitc awiya, otipa'amaakoowin kaawiin miinikoowin inakintehsinini, mii hsa enakintenik ekiihkashkihtamaasotc. 5 Inashke tahsh wiin awiya kaakashkihtamaasohsik ciminwaapamikotc Kishemanitoon, e'ahpenimonotawaatc itahsh, owaapamikoon ehtepwehtawaatc. Miitahsh aanawiin ekiihpimaci-ishiwepisitc, mii 'owe otikoon: "Kaawiin kekoon kitinenimihsinoon, kikainakimin ehkwayahkwaatisiyan," e'ikotc. Mii 'iwe otepwehtamowinink a'a inini kaaonci-inahsikotc kwayahk ciminowiiciiwaatc Kishemanitoon. 6 Mii 'iweni kaa'itank a'a Tepit (David) ekiihtashintank kaaishishawenimimintc ini ininiwan kwayahkwaatisiwinink kaainenimikonitc Kishemanitoon aanawiin kekoon ekii'anohkaatansinik ini ininiwan cionciotaahpinikonitc Kishemanitoon. Mii 'owe ehkitotc: 7 "Shawentaakosiwak ikiweniwak omacihcikewiniwaan kaapoonentamawintwaa, omacitootamowiniwaan wiinke kaakiihkaahsiinamawintwaa! 8 Shawentaakosi a'a inini omacitootamowin ekaa wiihkaa ewii'akintamaakohsik kaaTipencikenitc!" kii'ihkito Tepit. 9 O'owe tahsh shawentaakosiwin, ikiweniwak ina ehta kaakihkinawaatashakeshikaniwiwaatc oka-ayaanaawaa? Kaawiin. Kaye hsa ko kewiinawaa kaakiihkihkinawaaci'aahsiwintwaa oka-ayaanaawaa. Aaniihsh ninkiihtashimaanaan a'awe Eparahaam ekiihtepwehtawaatc Kishemanitoon, miitahsh kaakii'onci​inakimikotc ehkwayahkwaatisitc. 10 Aaniin mayaa ahpii kaa'maacii-inakimikotc ehkwayahkwaatisitc? Cipwaa kihkinawaatashakeshikaniwitc ina? Kaa'ishkwaa kihkinawaatashakeshikaniwitc ina? Kaawiin kaa'ishkwaatootawintc, cipwaa tootawintc ihsa kii'inakimaa cikwayahkwaatisitc. 11 Naanaake tahsh kiihkihkinawaatashakeshikaniwi. Mii 'iwe kaa'ishihcike'intc, mooshak iko cikihkencikaatek mii 'imaa otepwehtamowinink ekii'onci-inakimintc ehkwayahkwaatisitc. Aaniihsh cipwaa kihkinawaacishontc okii'ishiotaahpinikoon Kishemanitoon. Miitahsh i'iwe e'inentaakositc Eparahaam e'oyoohsimikotc kahkina awiya' kaatepwehtawaanitc Kishemanitoon. Kewiinawaa hsa otishiotaahpinikowaan Kishemanitoon cikwayahkwaatisiwaatc aanawiin wiihkaa ekiihkihkinawaatashakeshwaahsiwintwaa. 12 Shikwa ikiweniwak kaakiih kihkinawaatashakeshikaniwiwaatc kaye wiinawaa peshikwan otooyoohsimaawaan Eparahaaman. Kaawiin ehta okihkinawaaci'ikoowiniwaank onci oyoohsihsiiwak, i'iwe hsa wiin e'naapa'amaanaawaatc ini Eparahaaman kaakii'ishi​otepwehtamowininitc, kaakii'ishipimaatisinitc cipwaa kihkinawaaci'imintc. 13 Inashke Kishemanitoo okiihpiitahshotamawaan Eparahaaman (Abraham) miinawaa opiiwesiimini piciinak citipentaminitc o'o ahkiini. O'owe tahsh kaakii'inahshotamawintc Eparahaam, kaawiin i'imaa ekiihkanawentank Inaahkonikewin kii'oncimiinikowisihsii. I'imaa hsa wiin ekiihtepwehtawaatc Kishemanitoon kayehsh ekii'onci-inakimikotc ehkwayahkwaatisitc, mii hsa wiin i'imaa kaa'onciahshotamaakotc. 14 Taka tahsh o'owe ishi-ihkitoyankipan Kishemanitoo e'ahshotamawaatc kekoon cimiinaatc awiyan i'imaa ehta kaashikanawentaminitc Inaahkonikewin. Kiishpin i'iwe ishihsekipan, anihshaa 'iwe taaishinaakwan awiya ciotepwehtamowinitc. Shikwa aanawiin Kishemanitoo e'ahshotamawaatc kekoon ini kaatepwehtaakotc, kaawiin kekoon taainaapatahsinini otahshotamaakewin. 15 I'imaa hsa e'ayaanik i'i Moosihs (Moses) otInaahkonikewin, awiya ehpiikonank e'maashihciketc, okaoncitipa'amaakoon Kishemanitoon onishkaatisiwininiink. I'imaa tahsh ayaahsinok inaahkonikewin, kaawiin taatanencikaatehsinoon maashihcikewin. 16 Miitahsh wiin i'imaa otepwehtamowinink a'a Eparahaam kaakii'onciahshotamawintc. Mii 'iwe cioncikehcinaa'owentaakwaninik i'iwe Kishemanitoo otahshotamaakewin, oshawencikewinink ewii'oncimihcimiinaatc kahkina awiyan opiiwesiimini ini Eparahaaman. Kaawiin ehta tamiinaahsiiwak iki kaakanawentamowaatc Moosihsoon otInaahkonikewinini, ikiweniwak itahsh kaye kaanaapitepwehtamowaatc ini Eparahaaman kaakii'ishitepwehtaminitc. Aaniihsh otepwehtamowinink Eparahaam kiinawint kahkina kaaoncioyoohsimank. 17 Mii aaniihsh o'o eshipii'ikaatenik Kishemanitoo otihkitowin: "O'owe hsa kaa'ishihcike'inaan, niipiwa' ketahswewaanakisiwaatc pemaatisiwaatc kikaoyoohsimikook," ekii'inintc Eparahaam. Tepwe hsa ko kiinawint kitooyoohsimaanaan Eparahaam, eshiwaapancikenitc Kishemanitoon kaakiihtepwehtawaatc. Mii 'awe Kishemanitoo kaapimaatisiishkawaatc i'i kaakii'niponitc, kaye kaaihkitotc: "Taka 'iwe tanaakwan mahshi kaa-ayaahsinok," miitahsh i'i kaa'ishihsenik. 18 A'a tahsh Eparahaam kiihtepwehtam, okii'ahshawaapantaan mahshi kekoon aapiinc ekii'naakwahsininik cikii'ocihcihsenikipan i'i kaakiihpiihtootc. Miihsh i'i piinihsh tepwe okii'oyoohsimikoo' niipiwa' kaatahswewaanakisinitc. Mii hsa mayaa kaa'ani-ishihsenik kaakii'inintc: "Mii 'i ketahshiwaatc kipiiwesiimak," ekii'inintc. 19 Ahpii kaa'ahshotamawintc, aasha kekaa ninkotwaahk kiihtahsopipoonwe. Kaawiin itahsh wiin kii'oncimehcihsehsinini otepwehtamowin ekii'naakatawentank tipinawe owiiyaw aasha taapishkoo nipoomakan ekii'ishinank, kaye ini Serawan (Sarah) aasha mewisha ekii'ishkwaahsenik opimoonshewinini. 20 Kaawiin awaac pankii kii'oncipoonitepwehtansii, kaawiin okii'aanwehtansiin i'i Kishemanitoon kaakii'ahshotamaakotc. Awahshime hsa wiin kii'anisoonkitepwehtam, okii'anikihtakimaan Kishemanitoon. 21 Wawiinke kiihkehcinaa'o, "Tepwe Kishemanitoo ninkakashkihtamaak i'i kaakii'ishiahshotamawitc," kii'inentam a'a Eparahaam. 22 Mii 'owe otepwehtamowinink kaakii'onciotaahpinikotc Kishemanitoon ekii'inakimikotc ehkwayahkwaatisitc. 23 O'o tahsh kaa'ihkitoomakahk: "Kii'ishi-inakimaa ehkwayahkwaatisitc," kaawiin wiin Eparahaam ehta kaaoncioshipii'ikaatenik. 24 Kiinawint ohsha kaye kaaonci-ishipii'ikaatek, keishi-inakiminank Kishemanitoo cikwayahkwaatisiwank, aaniihsh kitepwehtawaanaan Kishemanitoo kaakiihkiiwepimaatisi'aatc Ciisahsoon kaaTipenimiminank. 25 Kishemanitoo aaniihsh okiihpakitinaan Christan cioncinihsimintc kimacihcikewininaanink onci. Okiihkiiwepimaatisi'aan tahsh kiinawint ewii'onci-inahsinank ciminowiiciiwank Kishemanitoo.

Oroomink 5

1 O'owe tahsh aasha kaa'ishihcike'inank Kishemanitoo ekiihtepwehtawank ekii'ishi'inank kwayahk ciminowiiciiwank, noonkom pisaanentamowinink kitishiwiiciiwaanaan Kishemanitoo, a'awe tahsh kaaTipeniminank Ciisahs Christ kaakii'ishihcike'inank. 2 Miitahsh a'awe ekiihtepwehtawank Christ, kikii'ishipiintikanikonaan i'imaa eshiwaapantamowank okishewaatisiwin a'a Kishemanitoo, miitahsh i'imaa noonkom eshipimaatisiwank. Kaye kimoocikentaamin e'ahshawaapantamank ewii'wiici'iweyank Kishemanitoo okihci-inentaakosiwinink. 3 Kayehsh kitooncimoocikentaamin ehkakwaatakentamank. Aaniihsh kikihkentaamin o'o, ahpii ehkakwaatakentamank kitooncikihkino'amaakoomin cishashiipentamank. 4 Shashiipentamowank itahsh, mii 'imaa cioncikwayahkonawinank Kishemanitoo. Ehkihkentamowank itahsh e'minonawinank, mii 'imaa wentinamank keoncikehcinaa'oyank. 5 O'owe tahsh e'ishikehcinaa'oyank, kaawiin wiihkaa kikaniihsentansiimin. Aaniihsh Kishemanitoo kikiihsiikinamaakonaan osaaki'iwewin i'imaa kite'inaanink, otAhcaahkwan ekii'aapaci'aatc. Miiwan itahsh ini kaakii'miininank. 6 Mekwaa tahsh keyaapi ekiihkashki'itisohsiwank ciwiici'itisoyankipan, a'awe Christ kikii'nipohtamaakonaan kaamaci-ishiwepisiyank. Mayaa hsa i'i ahpii kiihtootam kaakii'onahtoonitc Kishemanitoon. 7 Inashke taasanakanini awiya cinipohtamawaatc awiyan aanawiin mayaa kaapiminisha'aminitc i'i Inaahkonikewin kaainahtenik. Inkotink itahsh wiin maawiin awiya taa-ayinentam cinipoohtamawaahpan awiyan kaanihtaaminotootaakenitc. 8 A'awe tahsh wiin Kishemanitoo kikii'waapanta'ikonaan aaniin ehpiihcisaaki'inank. Aaniihsh mekwaa keyaapi omaci-ishiwepisiik ekiihtinowiwank, kikii'nipoohtamaakonaan a'a Christ. 9 Aasha wiin omiskwi ekii'ishi-inahsikoowank kwayahk ciminowiiciiwimank Kishemanitoon, nawac hsa wiin iitok Christ e'wiiciiwank kikaoncipimaaci'ikoomin ekaa ciotihsaapantamowaahsiwank Kishemanitoon onishkaatisiwinini. 10 Mekwaa tahsh kiinawint Kishemanitoo kaashiinkenimikotc kiitinowiwank, wiin tahsh wiin onipowininiink ini oKosihsan aanciko kikii'ishikashki'ikonaan cisaakiwiiciiwank. Noonkom itahsh osaaki'aakana' ehtinowiyank, nawac hsa wiin opimaatisiwininiink Christan kikaoncipimaaci'ikoomin. 11 Keyaapi tahsh kekoon awahshime anitakoayaamakan kaamiinikooyank. Kitoonci minwentami'ikonaan a'a Kishemanitoo i'i kaakii'ishihcike'iminank kaaTipenimiminank Ciisahs Christan. Miiwan ini Ciisahsoon aasha kaakii'oncitepinamowank Kishemanitoo osaakiwiiciiwaakana' citinowiyank. 12 I'imaa peshik inini kaa'ayintikopanen, mii 'imaa kaaoncinaakwahk maci-ishiwepisiwin ahkiink. Miihsh i'imaa kahkina awiyak kaakii'ani-ishiotihsikowaatc nipowin, aaniihsh kahkina awiya kii'macitootam. 13 Tepwe cipwaa miikiwaaniwank i'i Inaahkonikewin Moosihs (Moses) kaakii'oshipii'ank, aasha tepwe kii'maci-ishiwepisiwak kaakiihpimaatisiwaatc ahkiink. I'imaa tahsh mahshi e'ayaahsinok inaahkonikewin, kaawiin inakincikaatehsinoon i'i maci-ishihcikewin awiya kaatootank. 14 I'imaa tahsh ahkonaak kaakiihpimaatisitc Aatam (Adam) kahkina awiyak kaapiahkopimaatisiwaatc piinihsh ekii'anipimaatisitc Moosihs, mincikahkina kiihtaapitawinipowak, ampooshke intawaa kewiinawaa kii'nipowak ikiweniwak peshikwan kaakii'ishimacitootansikwaa, Aatam kaakii'ishihciketc ekiihpisintansik i'i kaakii'ikotc Kishemanitoon. Mii 'awe Aatam kiihkihkinawaasinaakosi keinentaakosinitc ini peshik kepiayaanitc. 15 Kaawiin tahsh misiwe peshikwentaakosihsiiwak oko kaaniishiwaatc. Aaniihsh Kishemanitoo omiikiwewin kaawiin peshikwan inentaakwahsinoon Aatam omacitootamowin kaainentaakwaninik. Tepwe niipiwa' awiyak kii'oncinipowak i'iwe kaakii'ishimacitootank a'a peshik inini. I'i tahsh Kishemanitoo okishewaatisiihkantaakewin wawiinke awahshimewentaakwanini kaaishihcikemakaninik. Omiikiwewin kaye awahshimewentaakwanini, aahpici niipiwa' iki pemaatisiwaatc ekiihtepinamowaatc, e'oncimiinintwaa okishewaatisiwininiink ini peshik ininiwan Ciisahs Christan. 16 Miinawaa pepahkaanentaakwanoon Kishemanitoo omiikiwewin kaye omacitootamowin a'a peshik inini Aatam. Aaniihsh aapitink iko ekii'macitootank a'a peshik inini, "Kikikis macitootamowin," kii'inaa a'a inini. Noonkom itahsh wiin i'i ekii'ahpiihci paahtiinatininikin ini omacitootamowiniwaan iki pemaatisiwaatc, aanawiin iko ehteinentaakosihsikwaa shaakooc itahsh iko okiihshawenimikowaan Kishemanitoon: "Kaawiin kekoon kitinakincikaasohsiim," inaawak. 17 Tepwe hsa a'awe peshik inini kaakii'macitootank, mii 'imaa kaa'oncikashkihcikemakahk nipowin, kahkina pemaatisiwaatc e'oncinipowaatc a'a peshik kaakiihtootank. Nawac itahsh wiin takihcikashkihcikemakanini i'i kaahtootank a'a Peshik Inini Ciisahs Christ. Aaniihsh kahkina kaamiinintwaa Kishemanitoon oshawencikewinini eshiwenootaninik, kaye kaashimiinintwaa kwayahkwakimikoowin, pahkinaakewinink taishipimaatisiwak, aaniihsh okashkihtamaakowaan Christan kaaTipenimiminank. 18 Mii 'owe eshiwiintamaan: o'o peshik macitootamowin Aatam kaakiihtootank, kii'oncinipowakimaawak kahkina pemaatisiwaatc. Peshikwan itahsh kaye i'i peshik kwayahkohcikewin kaakiihtootank a'a Peshik, kahkina "Kipakitinikoom" onci-inaawak, miinaawak itahsh cipimaatisiwaatc. 19 Shikwa 'awe peshik inini ekii'na'ihtansik i'i kaakii'ikotc Kishemanitoon, niipiwa' awiyak okii'oncikashki'ikonaawaa cimaci-ishiwepisiwaatc. A'awe tahsh miinawaa peshik inini Ciisahs Christ kii'na'ihtam, miitahsh peshikwan niipiwa' awiyak taonci-inahsaawak ciminowiiciiwaawaatc Kishemanitoon. 20 Kishemanitoo okiihpakitinaan i'i otInaahkonikewin cianiawahshimeshkaanik macitootamowin. Ahpiihsh kaa'ani-ishinankishkaak i'i macitootamowin, awahshime kii'ani-ishinaakwanini Kishemanitoo oshawencikewin. 21 Mii aaniihsh o'owe ishkwaac eshiwiintamaan: macitootamowin aahpici kiihkashkihcikemakan, aaniihsh kahkina piko awiyak kii'nipowak. Miitahsh kaye peshikwan niipiwa' kashkihcikemakanini Kishemanitoo oshawencikewin, aaniihsh otishi'aa' i'i pemaatisinitc kwayahk ciminowiiciiwikotc. Kitishi'ikonaan ahpane ko cipimaatisiwank, i'iwe Ciisahs Christan kaakiihtootawiminank.

Oroomink 6

1 Aaniin itahsh keihkitoyankipan? Keyaapi na kikani-ishipimaatisimin macitootamowinink awahshime piko cianiayaamakaninik Kishemanitoo oshawencikewin? 2 Kaawiin kanake taishinaakwahsinoon! Kitinentaakosimin iitok ekii'ishinipoyank macitootamowin citipenimikohsiwank: kaawiin tahsh ishinaakwahsinoon keyaapi ci-ishipimaatisiyankipan ehtipenimikoyank macitootamowin. 3 Kehcinaac aasha kikihkentaanaawaatok o'o: kahkina kaatahshiyank kaakii'ishisiika'antaakooyank ciwiiciiwank a'a Christ Ciisahs, tako kaye 'iwe kikii'ishisiika'antaasomin ciwiiciiwikowank onipowin. 4 Ahpii tahsh kaakiihsiika'antaasoyank, kikii'wiicina'inikoomaanaan a'a Christ ekii'wiici'iweyank i'imaa onipowinink. Shikwa tahsh peshikwan a'awe Weyoohsimintc ekii'aapacihtootc i'iwe maawac kaakihci-inentaakwaninik omashkawisiiwin ekiihkiiwepimaatisi'aatc Christan kaakii'niponitc, miitahsh i'i kekiinawint peshikwan oshkaya'iink ci-ishipimaatisiyank. 5 Inashke hsa peshikwan kikashitakowiiciiwaanaan, peshikwan ekii'ishionipowiniyank wiin kaakii'ishinaakwaninik onipowin Christ. Miihsh i'i taapishkoo peshikwan kikashitakowiiciiwaanaan ci-ishikiiwepimaatisi'ikooyank wiin iko kaakii'ishi​kiiwepimaatisi'intc. 6 Aaniihsh kikihkentaamin o'o: i'iwe otaanaank kaakii'ishipimaatisiyankipan kii'wiitaahpinacikaate i'imaa Ciisahs kaakii'ishiakosaka'ikaniwitc aashiteyaahtikonk. Mii 'iwe cionciaanihsahk i'i kaawii'nihtaa macihcikemakahk pimaatisiwinimaank, miihsh i'iwe ekaa miinawaa keyaapi ciawahkaanikohsiwank i'i macitootamowin. 7 Aaniihsh awiya kaanipotc kaawiin awiyan otipenimikohsiin, macitootamowin kaawiin oka-awahkaanikohsiin. 8 Kiishpin i'iwe ishinaakosiyank ekii'wiicinipoomank a'a Christ, miitahsh i'i kitepwehtaamin kaye ciwiicipimaatisiimank. 9 Kikihkentaamin a'a Christ ekiihkiiwepimaatisi'intc nipowinink onci, miinawaa wiihkaa cinipohsik. Kaawiin miinawaa wiihkaa okakashki'ikohsiin i'i nipowin citipenimikotc. 10 I'iwehsh ekii'nipotc a'a Christ, kii'ishinipo ekaa miinawaa wiihkaa cikakwetipenimikohsik macitootamowin. I'iwehsh noonkom eshipimaatisitc opimaatisiihtawaan Kishemanitoon. 11 Miihsh peshikwan kekiinawaa kitaainenintisom, ekii'ishinipoyek wiihkaa miinawaa cikashki'ikohsiwek macitootamowin, shikwa meshkwac cipimaatisiihtawek Kishemanitoo, mii 'iwe e'wiiciiwinek Christ Ciisahs. 12 Keko miinawaa keyaapi macitootamowin tatashi​okimaahkantaakemakahsinoon i'imaa kiwiiyawiwaank kenipoomakahkin, miinawaa cina'ihtansiwek i'iwe kikehteinaatisiwiniwaa waahkakweishihcikemakahk. 13 Kaawiin kekoon eshipahkesiwiniyek kikamiikiwaatamawaatansiim i'i macitootamowin citashiaapatahk macihcikewinink inahke. Meshkwac itahsh kikamiinaawaa Kishemanitoo kiwiiyawiwaan wiiniko citipentank. Kiinawaa kikii'inentaakosim ekii'nipoyek, noonkom itahsh kipimaatisim. Mii 'iwe misiwe ishipakitinitisohkantawihk Kihshemanitoo i'imaa ci-inaapatisiyek kwayahkohcikewinink. 14 Keko wiin macitootamowin kikaniokimaahkantaakohsiinaawaa. Aaniihsh kaawiin inaahkonikewinink kitashi​tipentaakosihsiim, i'imaa tahsh Kishemanitoo oshawencikewinink. 15 Aaniin tahsh keinentaakwahk? Mii na pisaan​iko cianimacitootamank, i'iwe ehkihkentamank ekaa inaahkonikewinink e'oncitipentaakosihsiwank, i'imaahsh ehta Kishemanitoo oshawencikewinink e'ishitipentaakosiyank? Kaawiin kanake taainentaakwahsinoon. 16 Kaawiin ina kikihkentansiim? Kiishpin pakitinitisoyek pahkaan awiya ciotawahkaaniminek kaye cina'ihtawek awiya, miitahsh i'i tepwe ciotanohkii'aakaniminek a'a kaatipeniminek e'na'ihtawek. Komaa macitootamowin kikana'ihtaam, mii iitok i'imaa wenciik nipowin. Komaa kaye Kishemanitoo kikana'ihtawaawaa, miitahsh i'imaa cionci-inahsikooyek kwayahk ciminowiiciiwek. 17 Noonkom itahsh Kishemanitoo tananaahkomaa! Weti otaanaank kikiihpiayintim macitootamowin ekii'otawahkaanimikoyek, ekiihtashitipenimikoyekipan. Miinawaa tahsh inkotink pahkaan kikii'ishinana'ihtaam, enikohkote'eyek ekiihtootamek kaaishiwaapantamek i'i kihkino'amaakewin kaakii'miinikooyek. 18 Kaye 'iwe ahpii kikii'aapiskonikowaa Kishemanitoo macitootamowin citipenimikohsiwek. Miitahsh ekwa' Kishemanitoo ciotanohkii'aakaniminek kaakwayahkwahk itahsh citootamek. 19 Taka tahsh kaanihtaaishikiishwenaaniwank niwii'aapacihtoonan e'wahkenihsitohtansiwek e'mihci-ininiiwi​pimaatisiyek. Inkotink iko misiwe kikiihpakitinitisom kaawiinentaakwahk ci-inaapaci'ikoyek ekii'otawahkaanimikoyek, kaye kahkina kekoon macihcikewin ekii'ani​wenooci​tootamek. Miitahsh peshikwan noonkom ishimisiwepakitinitisok kwayahkohcikewinink, mii 'imaa ci-ishiaapatisiyek, cipahkaaniawahkaanikooyek, misiwe piko Kishemanitoo citipeniminek. 20 Inashke mekwaa otaanaank ekii'otawahkaanimikoyek macitootamowin, kaawiin 'iwe ahpii kikiihtipenimikohsiiwaam kaaishiantawentank Kishemanitoo citootamowek. 21 Wekonen tahsh kaakii'ontinamek ekii'nihtaatootamek ini kekoonan noonkom kaa-akatentamek? Inashke iniweniwan ehtootank awiya, mii ehta nipowin ciontinank. 22 Aasha tahsh Kishemanitoo kikii'aapa'okowaa i'imaa kaakii'ishitipenimikoyekipan macitootamowin, wiin itahsh meshkwac ehtipeniminek taapishkoo e'otanohkii'aakanitc. Noonkom itahsh mii 'owe eshiontisiyek, misiwe Kishemanitoo ehtipentank kipimaatisiwiniwaan, piinihsh kaye ewii'miininek i'i pimaatisiwin ekaa kewehkwaa-ayaahsinok. 23 Nashke macitootamowin awiya ehtootank nipowinini taontisi. I'iweni tahsh wiin Kishemanitoo kaamihcimiikiwetc pimaatisiwin, kaawiin wiihkaa tawehkwaahsehsinini. Mii 'iwe kitooncimiinikoomin Christ Ciisahs kaaTipeniminank e'wiiciiwinank.

Oroomink 7

1 Niiciotepwehtamook! Kehcinaac kikanihsitohtaam i'iwe waa'ihkitoyaan aaniihsh kahkina kikihkentaanaawaa inaahkonikewin enentaakwahk, mekwaa ehpimaatisitc ehta a'awe inini, owiintamaakon keishihciketc. 2 Mii 'owe enentaakwahk, a'a ihkwe kaaonaapemitc, inaahkonikaaniwan taapishkoo e'mincimahpisotc a'a ihkwe ekaa wiihkaa cinakanaahsik ini onaapeman mekwaa ehpimaatisinitc. Kiishpin tahsh noonteishkwaapimaatisinitc, miitahsh i'i enaahkonikaniwitc a'a ihkwe cipapiniskweayaatc i'imaa kaakii'ishitipenimikohpan onaapeman. 3 Kiishpin itahsh keyaapi ehpimaatisinitc onaapeman, anikaanciwiiciiwaatc pahkaan ininiwan, anoociko inaatisi tainaa 'a ihkwe. Kiishpin itahsh wiin niponitc onaapeman, miitahsh i'i ci-inaahkonikaniwitc tepwe ehpiniskweayaatc a'a ihkwe. Miitahsh aniwiitikemaatc pahkaan ininiwan, kaawiin ekwa' kekoon tainenimaahsii. 4 Niiciotepwehtamook, kekiinawaa peshikwan kitinentaakosim taapishkoo ekii'nipoyek, cioncitipenimikohsiwek Inaahkonikewin, aaniihsh kitooncisakentaakosim i'imaa owiiyawink Christ. Miihsh i'imaa ahkonaak wencitipeniminek a'awe kaakiihkiiwepimaatisi'intc nipowinink onci. Mii hsa 'owe kaa'oncikiiwepimaatisi'intc, cioncikihtaapaci'inank Kishemanitoo. 5 Weti otaanaank kaapi-ishipimaatisiyank, aaniin iko waa'ayintiyank kikii'ayintimin. Mii 'iwe ahpii macimihsawentamowinan kii'moohkiimakanoon, miitahsh i'iwe Inaahkonikewin kaahtootaakoyank. Kiwiiyawinaanink kaye kii'ishianohkiimakanoon, piinihsh nipowin ekii'anionciimakahk i'imaa kitishihcikewininaanink. 6 Aasha tahsh kikii'aapa'okonaan Kishemanitoo, ekaa miinawaa cimincimahpinikohsiwank Inaahkonikewin. Kikii'nipomin inentaakwan, ekaa keyaapi citipenimikohsiwank i'iwe kaakii'mincimahpinikoyank. Kaawiin keyaapi kitishianohkawaahsiwaanaan Kishemanitoo kehteaya'iink inahke Inaahkonikewin kaaishipii'ikaatek. Oshkaya'iink inahke kitishianohkawaanaan, oshkaya'iink e'ishi'iminank Kishemanitoo otAhcaahkwan. 7 Aaniin itahsh keitamank Inaahkonikewin? Mii nahsh i'iwe tipinawe e'maciaya'iiwank Inaahkonikewin? Kaawiin taainentaakwahsinoon. Mii iitok i'imaa Inaahkonikewinink wencikihkentamaan wekonen i'i macitootamowin. Inashke kaawiin nintaakiihkihkentansiin wekonen i'i mihsawinamaakewin, mii ehta Inaahkonikewin ekii'ihkitoomakahk: "Kaawiin kikamihsawinaakehsii," ekii'ikoyaan. 8 I'iwe macitootamowin kii'ishihsemakan cioncikaahcici'ikoyaan, ekii'ishimihkawaa'ikoyaan i'imaa Inaahkonikewinink kaaihkitoomakahk: "Kaawiin kikamihsawinamaakehsii," ekii'ihkitoomakahk. Mii 'imaa kaa'ishikashki'ikoyaan kahkina kekoon cimihsawinamaan ekaa keishimihsawentansiwaampaan. I'imaa tahsh inaahkonikewin ayaahsinok, mii 'imaa eshipwaawaatahk i'i macitootamowin. 9 Niin aaniihsh ninkiihpimaatis cipwaa maaciikihkentamaan inaahkonikewin: "Keko maashihcikehken," e'ikoyaan. Paanimaahsh ekiihkihkentamaan i'i Inaahkonikewin: "Keko wiin ishihcikehken," e'ikoyaan, mii payesh ekii'maaciimihsawentamaan i'iwe citootamaan kaakii'onci'ikoyaan. 10 Amii 'i ninkii'nip e'inentaakwahk. I'iwe tahsh Inaahkonikewin pimaatisiwin kekii'miinikoyaampaan, niin itahsh ninkii'inahsikon cinipoyaan. 11 I'iwe macitootamowin kii'ishihsemakan Inaahkonikewinink aaniin keshikashki'ikoyaan ekii'ishiwayeshimikoyaan. Miitahsh i'imaa ekii'ishianohkiimakahk Inaahkonikewinink ninkii'nihsikon. 12 Mii 'owe ehkitoyaan: ini Inaahkonikewinan mii 'imaa maamaw onciimakanoon Kishemanitoonk. Entahsopeshikwahkin tahsh Inaahkonikewinan e'maamawahtekin kaye onciimakanoon Kishemanitoonk ehkwayahkwahkin kaye tahsh e'onishihshinkin. 13 Mii na tahsh ci-ihkitoyaan, i'iwe kaaonishihshink Inaahkonikewin ekii'inanohkiimakahk cinipoyaan? Kaawiin wiin taainentaakwahsinoon. Macitootamowin kaakikishkaakoyaan ohsha kii'ishihcikemakan. I'imaa kii'ishianohkiimakan kaaonishihshininik Inaahkonikewinink ekii'ishikashki'ikoyaan cinipoyaan. Mii 'owe kii'ishihcikaate, i'i macitootamowin cikihkencikaatek aaniin mayaa entinowank. Amiitahsh i'i Inaahkonikewin kii'ishiaapatan nawac cikiihkaayencikaatek aaniin ehpiihcimaciaya'iiwank i'i macitootamowin. 14 Kikihkentaamin i'i Inaahkonikewin ekii'onciimakahk Kishemanitoonk. Niin itahsh wiin peshik kenipotc nintinow. Ninkiihpi-ishinaakos macitootamowin ekii'otawahkaanimikoyaan ekii'na'ihtamaan. 15 Kaawiin ninkihkentansiin o'o wencitootamaan. I'i aaniihsh kaaminwaapantamaan kaawiin nintootansiin. I'i tahsh wiin kaashiinkinamaan, mii 'iwe entootamaan. 16 Ahpiihsh ehtootamaan i'i kaaminwaapantansiwaan, mii peshikwan eshinaakwahk e'ihkitoyaan: "Haw, kwayahkwan i'i Inaahkonikewin." 17 Miitahsh kaawiin niin tepwe kaatootamaan i'iwe ekaa kaaminonansiwaan. I'iwe tahsh macitootamowin kekishkaakoyaan, mii ohsha 'iwe kaatootamoomakahk. 18 Ninkihkenintis ekaa niin kanake ehkikishkaakohsiwaan keoncikashkihtooyaampaan minohcikewin, niin kaakii'ishinihtaawiki'ikooyaampaan kaaitamaan. Aanawiin niin e'mihsawentamaan minohcikewin citootamaan, kaawiin i'i nintishikashkihtoohsiin. 19 I'iwe wenishihshink aanawiihtootamaan, kaawiin tahsh nintootansiin. Meshkwac itahsh i'iwe ekaa wenishihshinsinok waahtootansiwaan, mii 'iwe mayaa enitootamaan. 20 Kiishpin ehtootamaan i'iwe entawentansiwaan, kaawiin iitok niin kaatootamaan, i'iwe ohsha macitootamowin kaatoocikemakahk kaakikishkaakoyaan. 21 Niwaapantaan itahsh mooshak o'o e'nihtaa ishiayaayaan, ahpii hsa ko e'antawentamaan i'iwe wenishihshink ci-ishihcikeyaan, mii ehta eshikashkihtooyaan citootamaan ekaa kaaonishihshinsinok. 22 Piincaya'ii eshitinowiyaan, ninciihkentamoshkaakon Kishemanitoo otInaahkonikewin. 23 Shaakooc itahsh miinawaa kekoon niwaapantaan e'nihtaaishiayaayaan. Mii 'iwe eshianohkiimakahk niwiiyawink, e'miikaatamoomakahk i'iwe inaahkonikewin kaaminwaapantamaan nintinentamowinink. Miitahsh eshimincimahpinikoyaan i'i ishiayaawin kaaishianohkiimakahk i'imaa niwiiyawink. Amii 'owe ishiayaawin wencinihtaamacitootamaan. 24 Iyoohoo ninkitimaakinaakos! Nipowinink nintishiwinikon o'o niwiiyaw! Awenehsh kekashki'itc? 25 Oo miikwehc nintinentam, Kishemanitoo ninkakashki'ik. KaaTipeniminank Ciisahs Christ taishihcike. Miitahsh o'owe ehkitoyaan: o'owe nintishiayaa, niin iko ninkainaapatis Kishemanitoo otInaahkonikewin citootamaan. Nintinentamowinink ehta nintooncikashkihtoon. I'imaa tahsh eshiwiiciiwikoyaan nintishi'ikoowin kaakii'ishinihtaawiki'ikoowaampaanen nintootaan i'iwe kaaikoyaan nintishiayaawin i'imaa wenciik macitootamowin.

Oroomink 8

1 Miitahsh okoweniwak kaakikipimaatisiwaatc Ciisahs Christan kaawiin Kishemanitoon okaikohsiiwaan: "Kikanihshiwanaatisim." 2 Aaniihsh ninkii'aapa'okoo ekaa miinawaa citipenimikohsiwaan i'iwe kehteishiayaawin, i'iwe maci-ishiwepisiwin, nipowin kaaonciimakahk. Mii 'owe kaa'aapa'okoyaan i'iwe oshki-ishiayaawin Kishemanitoo otAhcaahkwan kaamiiniminank, kaaishi'iminank wawiinke cipimaatisiyank e'wiiciiwimank Christ Ciisahsoon. 3 Mii 'owe kaakiihpwaanawihcikemakaninik Moosihs (Moses) otInaahkonikewin, aaniihsh onsaam kii'niinaman kikehteinaatisiwininaan. Kishemanitoo tahsh wiin okiihkashkihtoon kaakii'ishiaanawewisiimakaninik Inaahkonikewin, ekiihpiicinisha'waatc ini tipinawe oKosihsan, kewiin ci-inentaakosinitc kaaishiayaanitc i'i pemaatisinitc kaamaci-ishiwepisinitc, o'owe ekiihtootaminitc ekii'nana'ihsitamawaanitc omacitootamowinini i'i pemaatisinitc. 4 Mii 'owe kaahtootank Kishemanitoo, kiinawint cioncitipitootamank ini kwayahkohcikewinan eshiantawentaakosiyank Inaahkonikewinink kaaishiwiintekin. Kiinawint kitinowimin kaaishipimaatisiyank Kishemanitoo otAhcaahkwan kaaininank. 5 Ikiweniwak itahsh kaaniayintiwaatc eshiayaamakahk i'i kehteinaatisiwin, mii ehta 'i eshinaakwaninik onaanaakatawentamowiniwaa kaaishiantawentamoomakaninik i'i kehteinaatisiwin. Ikiweniwak itahsh wiin kaaishipimaatisiwaatc Kishemanitoo otAhcaahkwan kaaikowaatc, mii kaye wiinawaa eshinaakwaninik onaakatawentamowiniwaa kaashiantawentaminitc ini Ahcaahkwan. 6 Awiya ishionaakatawencikanitc i'i kehteinaatisiwin kaaishiayaamakahk, miihsh i'iwe piciinak cinipowiniwank. Awiya tahsh kaaishionaakatawencikanitc Kishemanitoon otAhcaahkoni kaaishiantawentaminitc, mii 'imaa taonciimakan pimaatisiwin, pisaantentamowin kaye. 7 Kiishpin ehta awiya ishinaakatawentank eshinaanaakatawentamoomakaninik i'i kehteinaatisiwin, okashiinkenimaan ini Kishemanitoon. Kaawiin i'iwe okatootansiin Kishemanitoon otInaahkonikewinini kaaikotc, kaawiin otaakashkihtoohsiin i'i ci-ishihciketc. 8 Ikiweniwak wiinawaa piko kaaishihcikewaatc kaaishiantawentamowaatc okehteinaatisiwiniwaank kaawiin okakashkihtoohsiinaawaa ci-ishihcikewaatc keshiminwaapamikowaahpan Kishemanitoon. 9 Kiishpin tahsh tepwe ehkikishkawimek Kishemanitoo otAhcaahkwan, kaawiin i'iwe kikashipimaatisihsiim kiinawaa kikehtepimaatisiwiniwaa kaaishiantawentamoomakahk, a'awe wiin Christ otAhcaahkwan kaaishiantawentaminitc kikashipimaatisim. Kiishpin tahsh awiya kikishkaakohsik Christan otAhcaahkoni, mii kaawiin kanake kitipenimikohsiiwaa. 10 Kiishpin itahsh o'owe ishikikishkawinek Christ, aanawiin itahsh kiwiiyawiwaan ewii'oncinipoomakahkin macitootamowinink onci, shaakooc itahsh Kishemanitoo otAhcaahkwan kipimaatisiishkaakowaa. Aaniihsh aasha kwayahk kikii'inahsikowaa Kishemanitoo ciminowiiciiwek. 11 Kishemanitoo aaniihsh kaakiihkiiwepimaatisi'aatc Ciisahsoon nipowininiink onci, kiishpin otAhcaahkwan kiwiiyawiwaank e'ishitaanitc, a'awe tahsh kaakiihkiiwepimaatisi'aatc Christan nipowininiink onci mii 'awe kekiinawaa okapimaatisiishkaanan ini kiwiiyawiwaan kaawii'nipoomakaninikin, ini aaniihsh otAhcaahkwan kaakikishkawiminek kikaishihcike'ikowaam. 12 Miitahsh o'owe ehkitonk, niiciotepwehtamook, kinantawentaakosimin cina'ihtawimank Kishemanitoo otAhcaahkwan, kaawiin wiin ci-ishipimaatisiyank kaaishihsink kehteinaatisiwin. 13 Aaniihsh ishipimaatisiyek kehteinaatisiwin kaaishihsink, kehcinaac kikanipom. Kiishpin tahsh Kishemanitoo otAhcaahkwan e'wiici'iminek, ishinihtooyek kimaci-ishiwepisiwiniwaan kiwiiyawiwaank kaanihtaatootamek, kikapimaatisim. 14 Aaniihsh miiwak ikiweniwak Kishemanitoo okosihsa', kaapiminisha'waawaatc Kishemanitoon otAhcaahkoni aaniin ekowaatc. 15 Ini aaniihsh Ahcaahkwan kaamiininek Kishemanitoo, kaawiin miinawaa kitishi'ikohsiiwaa cikiiwenotamowek kohtaaciwin cikiiwetipenimikowek. A'awe Ahcaahk kaamiinikooyek kikii'ishi'ikowaa Kishemanitoo okosihsa' citinowiyek. Amiitahsh a'awe Ahcaahk kitishikiishwe'ikonaan, "Noohs! NinTete!" ci-inimank Kishemanitoon. 16 Ini aaniihsh Kishemanitoo otAhcaahkwan owiicikiishwemaa' kitahcaahkonaani', tepwe Kishemanitoo e'oniicaanihsiminank e'ininank. 17 Miihsh i'i tepwe aasha e'oniicaanihsiminank, kikamiinikoomin citipinawewisiwank ini kekoonan Kishemanitoo waa'ishishawenimaatc opimaatisiima', kaye kikatakomiinikoomin kaye wiin Christ waa'ishimiinikotc Kishemanitoon. Kiishpin aaniihsh onciwiiciiwank Christ okakwaataki'ikoowinink, kikatashiwiiciiwaanaan kaye okihci-inentaakosiwinink kaawii'miinintc. 18 Nintinentam itahsh o'owe noonkom kaaishikakwaatakihtooyank, wawiinke tapahkaanentaakwan i'iwe keishihsek kihci-inentaakosiwin Kishemanitoo kenaakohtamawinank. 19 Kahkina kekoon kaa'oshihcikaatek aahkopii'oomakan ciocihcihsek i'i ahpii Kishemanitoo kenaako'aatc kahkina okosihsa'. 20 Wiin Kishemanitoo okii'inahshowaataan kahkina kaa'oshihcikaatenik ekaa kekoon ci-inentaakwahsininik. Kaawiin wiin kaa'oshihcikaatek kiiwiihtootamaasoomakahsinoon. Kishemanitoo wiin okii'ishihsitoon ci-ishihsenik. 21 Shaakooc tahsh okii'ahshawaapantaan i'iwe inkotink keishihsenik kaakii'oshihtootc. Noonkom ishinaakwan kahkina kekoon oncitako cinihshiwanaatahk. Inkotink itahsh Kishemanitoo okaishihsitoon ekaa miinawaa kekoon cinihshiwanaatahsininik. Mii 'i ahpii kahkina kaaoshihcikaatek kaye taishinaakwan Kishemanitoo oniicaanihsa' keishinaakosinitc. Aaniihsh i'i ahpii kaawiin kekoonini okatipenimikohsiini, aahpici kaye takihcionishihshiwentaakwan keinahkamikahk. 22 Kikihkentaamin tahsh kahkina kaa'oshihcikaatek e'moohkwaahpinemakahk taapishkoo ihkwe kaaishimoohkwaahpinetc ewii'nihtaawikinaawahsotc. 23 Kaawiin tahsh ehta kaa'oshihcikaatekin ishimoohkwaahpinemakahsinoonan. Kekiinawint iitok aasha kikikishkawimaanaan Kishemanitoo otAhcaahkwan. Wiin iitok nihtam kaamiinikooyank keoncimiininank kekoonan Kishemanitoo. Kekiinawint anaamink kimoohkwaahpinemin ehpiihtooyank tepwe ci-inahsinank Kishemanitoo e'okosihsiminank. I'iwe ahpii misiwe kiwiiyawinaanink kikapiniskwe'ikonaan ekaa kekoon citipenimikohsiwank. 24 Mii 'owe kaakii'oncipimaaci'ikooyank, ekii'ahshawaapantamowank keishihcike'inank. Kekoon itahsh kiiahshawaapantamank, kiishpin aasha kiiwaapantamank, kaawiin keyaapi kitahshawaapantansiimin. Inashke awiya aasha kiiwaapantank kekoon kaawiin keyaapi oka-ahshawaapantansiin, aaniihsh aasha owaapantaan. 25 Kiishpin tahsh ahshawaapantamank i'iwe mahshi kaawaapantansiwank, shashiipentamowinink kikaishiahshawaapantaamin. 26 Miitahsh peshikwan a'awe Ahcaahk kikapinaatamaakonaan kaaishiniinamisiyank. Kaawiin aaniihsh kwayahk kikihkentansiimin aaniin keshianami'aayank. Tipinawe tahsh a'a Ahcaahk kikanoocikehtamaakonaan ehpakohsenimaatc Kishemanitoon. I'i e'ishimoohkonemotc kaawiin taakashkihcikaatehsinini ciwiincikaatenik. 27 A'a tahsh Kishemanitoo kaakihkenimaatc eshinaanaakatawencikenitc i'i pemaatisinitc, okihkenimaan kaye ini tipinawe otAhcaahkwan aaniin enentaminitc. Aaniihsh a'a Ahcaahk okanoocikehtamawaa' Kishemanitoon opimaatisiima', mayaa ehpakohsenimaatc eshiantawentaminitc Kishemanitoon. 28 Kikihkentaamin tahsh aaniin​iko keishiwepisiwankwen, Kishemanitoo mekweya'ii kitanohkaatamaakonaan keshiminoyaapaci'ikoyank, kiinawint hsa kaakii'antominank niiyaak kaakii'ishionentamokopanen. 29 Iniweniwa' aaniihsh niiyaak kaakii'onenimaatc Kishemanitoo, niiyaak​iko okii'inahsaa' e'inenimaatc inkotink ci-ishinaakosinitc oKosihsan kaaishinaakosinitc, wiin maawac ciniikaanentaakosinitc i'imaa keshipaahtiinonitc kaawii'owiicihkiweyintinitc. 30 Miitahsh iniweniwa' niiyaak​iko kaakii'onaapamaatc, miiwa'​ono kaakii'antomaatc. Onoweniwa' itahsh kaakii'antomaatc okii'inahsaa' kwayahk ciwiiciiwikotc. Onoweniwa' itahsh kaakii'inahsaatc kwayahk ciwiiciiwikotc, miiwa'​i'i kaye kaakii'miinaatc ciwiici'iwenitc okihci-inentaakosiwinink. 31 Aasha onoweniwan ehkihkentamank, mii 'owe keihkitoyank: Kishemanitoo ishiwiici'inank, awenen keshaakooci'inankipan? Kaawiin awiya! 32 Kishemanitoo kaawiin ampooshke okii'manaaci'aahsiin tipinawe ini oKosihsan, ekiihpakitinaatc itahsh, kiinawint ekii'ishihcikehtamawinank. Tako kaye tepwe kikashishawenimikonaan kahkina kekoon cimiininank. 33 Awenen kekoon kemaci-inaatc iniweniwa' Kishemanitoon kaakii'onaapamaanitc? Kishemanitoo aaniihsh kaawiin inkotano otinakintamawaahsii'. 34 Owe tahsh ishihsek, awiya na okainaa' citipaahkonikaniwinitc? Kaawiin i'iwe taihkitohsii awiya. Christ Ciisahs ina inkotano okainakintamawaa'? Kaawiin. Mii aaniihsh a'awe Christ Ciisahs kaakii'nipotc. Nawac itahsh wiin nintaakii'ihkit: Mii 'awe kaakiihkiiwepimaatisi'intc, noonkom itahsh i'imaa okihcinihkiniink Kishemanitoon e'ishiapitc, ehtashikanoocikehtamawinank. 35 Kekoon ina kitaapahkewinikomin ekaa ciwiiciiwikohsiwank Christ kaashishaweniminank? Kiishpin wahsitaawihseyank, ocaanimihseyank, kiishpin kakwaataki'inank awiya, kiishpin ekaa omiicimimihsiwank, noontehkonayeyank kaye, naniisaanisiyank kaye, ampooshke kaye nihsikooyank, mii na 'i eshinaakwaninik ciminciminikohsiwank kaaishishaweniminank? Kaawiin! 36 Inashke ishipii'ikaate Kehtemasina'ikanink: "Entahsokiishik ninaniisaaninaakosimin kiin ewii'oncinihsikooyaank; mii 'iwe entootaakooyaank taapishkoo maanahcaanihshak kaawii'nihsintwaa," ihkitoomakan. 37 Ono tahsh kahkina aanaishiwepisiyank, shaakooc wawiinke kitooncipahkinaakemin wiin onci e'wiici'inank kaakiihshaweniminank. 38 Wawiinke aaniihsh ninkehcinaa'entaan: kaawiin kekoon kitaapahkewinikohsiimin ciwiiciiwikohsiwank Christ kaaishishaweniminank. Kaawiin nipowin taaishihcikemakahsinoon, kaawiin kaye pimaatisiwin, kaawiin kaye encalak, ishpimink kaye kaatashitipencikewaatc, kaatashimashkawentaakosiwaatc kaye, kaawiin taakashkihcikehsiiwak. Kaawiin kaye noonkom kaapi-ishihsek, niikaanaya'ii kaye taaishihcikemakahsinoon. 39 Kaawiin tahsh kaye ishpimink kaa-ayaakin, weti kaye niihsaya'ii kaaishiayaakin, kaatahsinkin iko kaye aanti hsa ko kaaoshihcikaatekin. Kaawiin kanake wiihkaa kekoon kitaapahkewinikohsiimin ekaa ciwiiciiwikohsiwank Kishemanitoo oshawenimiwewin i'imaa kaaoncimiinikooyank Christ Ciisahs kaaTipeniminank.

Oroomink 9

1 Nintepwe tahsh o'o kaaihkitoyaan, Christink aaniihsh nintooncitipentaakos, kaawiin tahsh ninkiiwanimohsii. Nintishikashkimikon kaye kaaoncinaanaakatawentamaan, Kishemanitoo otAhcaahkwan e'wiici'imitc ci-inentamaan. 2 Aahpici tahsh wiinke nintooncimaanentam, mooshak kaye wiihsakentamowin e'ayaak i'imaa ninte'ink. 3 Miitahsh wiinawaa onci keshimihsawentamaampaan nawac niin Kishemanitoo ci-ishihpan cinihshiwanaatisiyaan, cikiihpahkehseyaampaan kaye kaashiwiiciiwintc Christ, onci iki niicihkiweyak kaainawemakwaa kaawiiciontahkaanesiimakwaa. 4 Aaniihsh Kishemanitoon okii'onenimikowaan Isriyalak (Israel), okii'inenimikowaan kaye ewii'okosihsimikowaatc, okii'ishi'ikowaan kaye ciwiitoohkaasowaatc eshikihci-inentaakosinitc. Kaawiin wiin aapitink ehta okii'ashotamaakohsiiwaan ewii'wiiciiwikowaatc. Kii'miinaawak kaye Moosihsoon (Moses) otOonahshowewinini, tepwe kaye keishianami'aawaatc Kihcianami'ewikamikonk. Kii'inentaakosiwak kaye citepinamowaatc Kishemanitoon kaakii'ishiahshotamaakenitc. 5 Miiwak itahsh iki Isriyalak kaatashimintwaa, mii 'imaa kaakiihpionciiwaatc kaakii'niikaanentaakosinitc kikehteya'aaminaani'. I'imaa tahsh wiin Christ kii'ontahkaanesi Isriyalihkaank, ininiink iko kii'inentaakositc. Taka tahsh Kishemanitoo kahkina kekoonini kaatipentank mooshak iko tamiikwehciwenimaa. Emen. 6 Kaawiin wiin nintihkitohsii Kishemanitoo ekiihpwaanawihcikemakaninik otahshotamaakewin. Aaniihsh iki pemaatisiwaatc Isriyalihkaank kaaontahkaanesiwaatc, kaawiin iitok aaninta tepwe Isriyaliwihsiiwak citinowiwaahpan kaakaakiikinikowaatc Kishemanitoon. 7 Kaawiin kaye kahkina Eparahaamink (Abraham) kaaontahkaanesiwaatc, otooniicaanihsimikohsiiwaan Kishemanitoon. Aaniihsh Kishemanitoo okii'inaan Eparahaaman: "I'imaa hsa Aaisikonk (Isaac) kenionciiwaatc, miiwak ihsa iki mayaa kipiiwesiimak keinintwaa." 8 Iki tahsh oniicaanihsimaak Eparahaamink kaanionci​nihtaawikiwaatc kaawiin kahkina inakimaahsiiwak Kishemanitoon e'oniicaanihsimikowaatc. Iki tahsh wiin oniicaanihsimaak kaaonci​nihtaawikiwaatc i'imaa Kishemanitoon kaakii'ishiahshotamawaanitc Eparahaaman, mii hsa iki mayaa oniicaanihsimaak. 9 Miitahsh o'o Kishemanitoo otahshotamaakewin kaaihkitoomakaninik: "O'o tahsh ahpii miinawaa ocihcihsek, ninkapikiiwe, Sera (Sarah) tahsh oka-ayaawaan kwiiwisenhsan." 10 Inashke tahsh wiin Oripehka (Rebekah) kaakii'niishinitc (2) okosihsa', okiihpeshiko'aani oteteni, miihsa ini Aaisikoon, niinawint tahsh wiin kaaCoowiwiyaank kaaokehteya'aamiyaank. 11 - 12 Kishemanitoo tahsh mayaa piko cianohkiimakaninik i'i otinentamowin i'imaa peshik okosihsimaank, miitahsh o'o Kishemanitoo kaakii'onci-inaatc ini ihkwewan: "A'a hsa kesasiihkisitc kikosihs, okapamiihtawaan ini keohshiimenshimaawinitc." Miitahsh o'o kaakii'ihkitotc cipwaa nihtaawikinitc i'i kwiiwisenhsa', cipwaa kaye noociko ishihcikenitc, cipwaa kaye kwayahk ishihcikenitc. Miitahsh o'omaa eshinaakwaninik Kishemanitoo ekii'ishihciketc aaniin niiyaak kaakii'inentamokopanen ewiihkanoonaatc peshik okosihsimaan, kaawiin wiin kii'onci-inentansii otishihcikewininiink i'i kwiiwisenhsa'. 13 Miitahsh o'o Kihcimasina'ikan eshipii'ikaatek, Cekap (Jacob) hsa ninkii'onenimaa, Iihswaa (Esau) tahsh wiin ninkii'aanawenimaa. 14 Mii na tahsh keihkitoyank Kishemanitoo kwayahk e'ishihcikehsik? Keko inahke inenimaahkek Kishemanitoo. 15 Miitahsh o'o Kishemanitoo kaainaatc Moosihsoon: "Ninkashawenimaa hsa awenen iko kaamihsawenimak ewiihshawenimak, ninkakoohpaatenimaa kaye awenen iko kemihsawenimak." 16 Miitahsh i'imaa eshiwaapantamank, Kishemanitoo otoonencikewin e'ishianohkiimakaninik i'imaa oshawencikewinink, kaawiin wiin ininiwan eshimihsawencikenitc, kaawiin kaye ininiwan otishihcikewininiink ishianohkiimakahsinini. 17 Aaniihsh Kihcimasina'ikan ihkitoomakan Kishemanitoo ekii'inaatc ini kaakiihkihciokimaawinitc Iicipahkiink (Egypt): "Niin iitok kikiihkihciokimaawi'in ewii'onci waapanta'iweyaan i'i nimashkawisiiwin, misiwe kaye cikihkencikaatek nintishinihkaasowin o'o kaainikohkwaak ahki." 18 Miitahsh o'omaa eshiwaapantamowank Kishemanitoo ehshawenimaatc awenenan iko kaawiihshawenimaatc, otishi'aan kaye awenenan iko cishashiipihtaminitc. 19 Kiinawaa tahsh oncita piko awiya peshik ninkakakwecimik o'o ci-ihkitotc: "Kiishpin tahsh i'i ishihsek kaaihkitoyan, wekonenini tahsh Kishemanitoo keyaapi wenciaanwaapamaatc awiyan aaniin awiyan eshihcikenitc? Awenen tahsh kaye kekashkihtoohpan cinakaanankipan Kishemanitoon otinentamowinini?" 20 Niicii, awenen tahsh kiin entinowiyan cinanaahkwehtawatipan Kishemanitoo? Inashke a'a ahkihk waapikanink kaakii'oncioshihcikaniwitc kaawiin otinaahsiin ini kaakii'oshi'ikotc: "Wekonen o'o kaa'onci-ishi'iyan kaaishinaakosiyaan?" 21 Aaniihsh a'a inini kaaoshi'aatc ahkihkwa' eshimihsawentank iko otinaapaci'aan ini waapikanan. Wiin iko kaye otoonentaan kiishpin niishin (2) ahkihkwa' wii'oncioshi'aatc i'imaa peshikwan waapikanink, komaa kaye peshik wii'oshi'aatc cikihci-inentaakosinitc, kotak tahsh cimihciayaapatisinitc. 22 Miitahsh peshikwan eshinaakwaninik kewiin Kishemanitoo kaakii'ishihciketc. Okii'antawentaan onishkaatisiwin cinaakwaninik, omashkawisiiwin kaye, aahpici tahsh okiihshashiipenimaa' i'i kaakii'nishki'ikotc kaawiihtipaahkonaatc. 23 Okii'antawentaan tahsh kaye cinaakwaninik kaawenootaninik okihci-inentaakosiwin, i'i kaakii'miininank. Aaniihsh kishawenimikonaan, kikiihkwayaanci'ikonaan kaye citepinamowank i'i okihci-inentaakosiwin. 24 Kiinawint aaniihsh kaapimaatisiyank kikiihkanoonikonaan. Kaawiin ehta Coowa' okiihkanoonaahsii', i'i hsa kaye kaatinowihsinik okiihkanoonaa'. 25 Miitahsh o'oweni Kishemanitoo kaakii'ihkitotc i'imaa masina'ikanink Hooseyawan (Hosea) kaakii'oshipii'aminitc: "Iki hsa pemaatisiwaatc kaakiihtipenimaahsiwakwaa miiwak​iki keishinihkaanakwaa, 'nimpimaatisiimak.' Iki kaye kotak pemaatisiwaatc kaakiihshawenimaahsiwakwaa, ninkaishinihkaanaak, 'Wiinke kaashawenimakwaa.' 26 I'imaa tahsh mayaa kaashiayaawaatc iki kaa'inakwaa, 'Kaawiin kiinawaa kitipenimihsinooninim,' miihsa i'imaa keshi-ishinihkaacikaniwiwaatc 'Kishemanitoo kaapimaatisitc hsa i'i okosihsa'.' " 27 O'o tahsh Aaiseya (Isaiah) kii'ihkito ekiihtashimaatc Isriyala' (Israel): "Aanawiin pemaatisiwaatc Isriyal e'ahpiihcipaahtiinowaatc taapishkoo kaa-ahpiihcipaahtiinatink newank kaashinaanaanewaamok kihcikamiink, aahpici tahsh ta-akaahsiinowak keishkohsewaatc kepimaaci'intwaa. 28 KaaTipenciketc kaawiin tapwaahtawiihsii cipinana'ahsaatc aaniin eshihcikenitc pemaatisinitc o'omaa ahkiink." 29 Miitahsh o'owe aasha Aaiseya kaakii'ishiniikaanaacimokopanen: "Kiishpin tahsh kaaTipenciketc kaaKihciMashkawentaakositc ishkonaahsikipan awiya' kaawiiciontahkaanesiimimank, aasha kaakii'ishihsekin ini ootenawan Swaatam (Sodom) Komwaara (Gomorrah) kaye, kekiinawint iitok aasha i'iwe kitaakii'ishinihshiwanaaci'ikoomin." 30 Miitahsh o'o keihkitoyank, iki hsa kaaCoowiwihsikwaa kaawiin okiihkakwecihtoohsiinaawaa ciminowiiciiwikowaatc Kishemanitoon, Kishemanitoo tahsh wiin okii'inahsaa' kwayahk ciminowiiciiwikotc aaniihsh okiihtepweyenimikoo'. 31 Iki tahsh wiin Kishemanitoon kaakiihtipenimikowaatc pemaatisiwaatc Isriyalak (Israel) okiihkakwemihkaanaawaan onahshowewinan aaniin kekii'ishiminowiiciiwikowaahpan Kishemanitoon, kaawiin tahsh okii'mihkansiinaawaa. 32 Wekonenini tahsh kaa'oncimihkansikwaa? Aaniihsh otanohkiiwiniwaan awahshime okii'ahpenimonotaanaawaan, kaawiin wiin otepwehtamowiniwaan. Miitahsh i'i kaakii'oncipisokeshkaakowaatc ini ahsiniin kaapisokehshimiwenitc. 33 Aaniihsh Kihcimasina'ikan ishipii'ikaate: "Inashke nintahsimaan ini ahsiniin i'imaa Saayanink (Zion) kepisokeshkaakowaatc pemaatisiwaatc, ahsiniin kekawiwepishkaakowaatc. A'a tahsh wiin ketepwehtawaatc kaawiin tamincinawesihsii."

Oroomink 10

1 Niiciotepwehtamook! Miitahsh maawac eshimihsawentamaan ninte'ink iki pemaatisiwaatc kaawiicitinowiimakwaa cipimaaci'ikoowisiwaahpan, miitahsh i'i eshianami'ehtamawakwaa. 2 Nintaatipaacimaak hsa wiinke ehkakweishihcikewaatc keshiminwaapamikowaatc Kishemanitoon, kaawiin tahsh tepwe weweni okihkentansiinaawaa aaniin keishihcikewaahpan. 3 Kaawiin tahsh mayaa okihkentansiinaawaa keishihcikewaatc aaniin keshiminowiiciiwikowaahpan Kishemanitoon, miitahsh eshihcikewaatc wiinawaa piko ehkakwekashkihtoowaatc aaniin keonciminowiiciiwikowaatc. Kaawiin tahsh i'imaa kii'ishipakitinitisohsiiwak Kishemanitoon kaaishionahsaanitc awiyan keonciminowiiciiwikonitc. 4 Christ tahsh okii'ishihsitoon i'i Onahshowewinini cipooniaapataninik. Awenen tahsh iko ketepwehtank tainahsaa ciminowiiciiwaatc Kishemanitoon. 5 Moosihs (Moses) tahsh okiihtashintaan i'i awiyan keonciminowiiciiwaanihpan Kishemanitoon na'ihtank i'i Onahshowewinini, miitahsh o'o kaa'ihkitotc: "Awenen hsa piko kaana'ihtank kaainahtenik i'i Onahshowewinini mii 'imaa keontinank pimaatisiwin." 6 I'i tahsh kwayahkwakimikoowin tepwehtamowinink kaaonciik mii o'o ishitashinte: "Keko o'o ihkitohkek kite'iwaank: 'Awenen tahsh keishaahpan kihcikiishikonk?' " Miitahsh o'o kaaicikaatek, cinaasihkawaatc Christan cipiinaatc o'omaa ahkiink. 7 "Keko kaye ihkitohkek: 'Awenen tahsh keshinaashiihpan weti onipoo' kaashiayaanitc?' " Miitahsh o'o kaaicikaatek, cioncipiinaatc Christan i'imaa onipoo' kaaishiayaanitc. 8 O'o tahsh wiin Kihcimasina'ikan ihkitoomakan: "I'i hsa Kishemanitoo otipaacimowin aahpici kipehshwaapantamowaam, kitooniwaank iitok kitayaam, kite'iwaank kaye," miitahsh i'i minwaacimowin tepwehtamowin kaashitashintek kaatashintamaank. 9 Kiishpin mohshewiinatc Ciisahs ehtipenciketc, wiinke kaye tepwehtaman kaye Kishemanitoo ekiihkiiwepimaatisi'aatc Christan i'imaa nipowinink, mii hsa 'i cipimaaci'ikooyan. 10 Aaniihsh wiinke tepwehtamank mii'imaa wencikwayahkwaaci'inank ciminowiiciiwinank Kishemanitoo; e'mohshewiintamaakeyank tahsh kaye kitooncipimaaci'ikoomin. 11 Aaniihsh Kihcimasina'ikan ihkitoomakan: "Awenen hsa piko kaatepwehtawaatc, kaawiin tamincinawesihsii." 12 Kaawiin tahsh pepahkaan inentaakosihsiiwak iki Coowak iki kaye kaaCoowiwihsikwaa. Kishemanitoo hsa peshikwan kahkina awiya' otishitipenimaa', aahpici kaye owenoocishawenimaa' i'i kahkina kaakanoonikotc. 13 Kihcimasina'ikan hsa ihkitoomakan: "Awenen hsa piko awiya kekanoonaatc kaaTipencikenitc cinaatamaakotc tapimaaci'aa." 14 Aaniin tahsh keoncikanoonaawaahpan ciwiici'ikowaatc mahshi ehtepwehtawaahsikwaa? Aaniin tahsh keoncitepwehtawaawaahpan mahshi kaanoontansikwaa ehtipaacimimintc? Aaniin tahsh keoncinoontamowaahpan i'i minwaacimowin mahshi e'wiintamawaahsiwintwaa? 15 Aaniin tahsh keonciwiintamaakewaahpan i'i minwaacimowin iki ominwaacimook mahshi kaamaacinisha'waahsiwintwaa? Kihcimasina'ikan hsa e'ishipii'ikaatek: "Aahpici hsa taminonaakosiwak kaapiiciminwaacimowaatc!" 16 Kaawiin tahsh kahkina okii'otaahpinansiinaawaa minwaacimowin. O'owe iitok Aaiseya (Isaiah) kii'ihkito: "Awenen tahsh kaahtepwehtank nintinaacimowininaan?" 17 Nashke tahsh, awiya e'noontank i'i minwaacimowin, mii hsa i'imaa wencioshi'oomakaninik otepweyentamowin. I'iweni tahsh tipaacimowin kaanoontamowaatc mii 'imaa Christan kaaishitipaacimimintc. 18 O'o tahsh nintihkit: Tepwe na kaawiin okii'noontansiinaawaa i'i minwaacimowin? Okii'noontaanaawaa iitok, aaniihsh Kihcimasina'ikan ihkitoomakan: "Ini okiikitowiniwaan misiwe ahkiink kii'noontaakwaniniwan, ini kaye otihkitowiniwaan kii'ishaamakaniniwan kaa-ahkotanentaakosinitc pemaatisinitc." 19 Keyaapi tahsh o'o nintishikakwetwe: Kaawiin ina pemaatisiwaatc i'imaa Isriyal (Israel) ahkiink kii'nihsitohtansiiwak? Moosihs tahsh wiin nihtam kii'nahkwehtam ekii'ihkitotc: "Ninka-aapaci'aak hsa kotak kaapeshikwewaanakisiwaatc, kekoonini kaainenimaahsiwekwaa, cionciaayaahshentamek kiinawaa kaatipeniminakook pemaatisiyek. Miiwak itahsh iki kaatashimakwaa kaa-ayaahsikwaa nihsitohtamowin ninka-aapaci'aak cinishki'inakook." 20 Awahshime tahsh Kishemanitoo kii'mashkawikiishwe o'o kii'ihkitotc Aaiseyawan kiiaapaci'aatc: "Ninkii'mihkaakook itahsh iki kaakii'nanaantawaapamihsikwaa, Ninkii'naakosiihtawaak tahsh iki kaakiihkakwetwehsikwaa niin onci." 21 O'o tahsh otinaa' Isriyala': "Kapekiishik hsa kishiipinihkehtawininim cinaasihkawiyek kiinawaa kaashashiipihtamek, kiinawaa kaananaahkwehtamek pemaatisiyek."

Oroomink 11

1 Miitahsh ehkitoyaan, Kishemanitoo na tahsh okii'wepinaa' pemaatisinitc kaatipenimaatc Isriyala' (Israel)? Kaawiin iitok awaac. Keniin ohsha peshik Isriyal nintinow, Eparahaamink (Abraham) kaye nintoontahkaanes, Penciman (Benjamin) kaye kaaishiopiiwesiimitc kaye niin nintooncitipentaakos. 2 Kaawiin tahsh Kishemanitoo okii'wepinaahsii' opimaatisiima' mewisha kaakiihkiishaacionenimaatc. Kikihkentaam iitok Kihcimasina'ikan e'ishipii'ikaatek, aaniin Ilaaica (Elijah) kaakii'inaatc Kishemanitoon ahpii ehtashimaatc i'i Isriyala'. 3 Miitahsh o'o kaa'ihkitotc: "Tepencikeyan, okii'nihsaawaa' ihsa i'i kitipaacimowininiima', opiikopitoonaawaan kaye kaaishipakitinaahsonaaniwaninik kaanihtaaishianami'ehtaakooyan. Mii hsa tahsh niin ehta e'mihcipeshikoyaan, ninkakwenihsikook itahsh keniin." 4 Aaniin tahsh Kishemanitoon kaa'ishinahkwehtaakotc? "Keyaapi ohsha niishwaahcink mitaahswaahk ininiwak ninkanawentamaas mahshi enami'ehtawaahsikwaa ini manitoohkaanan Peyal (Baal) kaaishinihkaanimintc." 5 Miitahsh peshikwan noonkom keyaapi, aahpici eshiakaahsiinowaatc iki Kishemanitoon kaakii'onenimikowaatc, aaniihsh okishewaatisiihkantaakowaan. 6 Kishemanitoo otoonentamowin oncianohkiimakanini okishewaatisiwinink, kaawiin wiin eshihcikenitc awiyan. Kiishpin hsa otinentamowin oncianohkiimakaninikipan aaniin eshihcikenitc awiyan, kaawiin iinsan okishewaatisiwin tepwe kishewaatisiwiniwansinini. 7 Aaniin tahsh kaaishihsek? Iki hsa pemaatisiwaatc Isriyalak kaawiin okiihtepinansiinaawaa wekonen ini kaakiihkakwemihkamowaatc. Iki hsa kaakii'akaahsiinowaatc kaakii'onaapamikowaatc Kishemanitoon miiwak​iki kaakii'mihkamowaatc. Iki tahsh wiin kotak awiyak kiihshashiipihtamook. 8 Aaniihsh Kihcimasina'ikan ishipii'ikaate: "Kishemanitoo tahsh okii'ishihtamawaa' cisaapikihkentamaawihsinik. O'o tahsh ishi ahpii kaawiin mahshi waapihsiiwak, kaawiin kaye onoontamaawinihsiiwak." 9 Tepit (David) iitok kaye kii'ihkito: "Taka i'imaa kaaishinihtaawiihkwantiiwaatc tashinakwaasowak, tashitahsoosowak kaye, tashipisokehshinook kaye, taoncikakwaataki'aawak kaye otishihcikewiniwaan! 10 Taka kaye oshkiinshikowaan takipinikaateniwan ciwaapihsikwaa, mooshak kaye tawaakiciishkoosowak ehkosikowanewaatc." 11 O'o tahsh miinawaa nintishikakwetwe: Ahpii Coowak kiipisokehshinowaatc, mii na 'i wawiinke cinihshiwanaatisiwaatc? Keko 'i nahke inentankek! Aaniihsh iki kaaCoowiwihsikwaa meshkwac okii'naasihkaakonaawaa pimaaci'ikoowin ahpii Coowa' kiimacitootaminitc. Miitahsh o'o kaakii'onci-ishihsek Coowak cionciaayaahshentamowaatc. 12 Ahpii Coowak kiimacitootamowaatc, meshkwac kahkina hsa pemaatisiwaatc o'omaa ahkiink kiiwenooci shawentaakosiwak. Ekiihkitimaakinaakosiwaatc kaye otahcaahkowaank kaakii'onciwenoocishawentaakosiwaatc ekaa kaaCoowiwihsikwaa. Aahpici hsa awahshime tapaahtiinatin i'i shawencikewin ahpii takwakimintwaa kewiinawaa kahkina kaatahshiwaatc Coowak! 13 Kiinawaa tahsh kaaCoowiwihsiwek, noonkom kikanoonininim: o'o tahsh e'ishihsek niin ishinisha'waakan ekii'ishionaapamikooyaan cinaasihkawakwaa kaaCoowiwihsikwaa, mii 'i waaoncikihci-inentamaan nintanohkiiwin. 14 Maakishaa iki pemaatisiwaatc nintaakashki'aak kaawiicionciimakwaa ciaayaahshentamowaatc, miitahsh o'omaa o'o kaaishihcikewak, kewiinawaa cioncipimaaci'intwaa. 15 Ahpii tahsh Coowak kiiaanawenimikowaatc Kishemanitoon, mii 'imaa kotak pemaatisiwaatc kaakiihshiinkenimaawaatc Kishemanitoon noonkom wenciminowiiciiwaawaatc. Aaniin tahsh keishihsek ahpii kewiinawaa kiiweotaahpinintwaa, mii hsa keishinaakwahk taapishkoo kaakiinipowaahpan ekiihkiiwepimaatisiwaatc. 16 Kiishpin tahsh awiya pankii ehpahkwepinaatc pahkweshikanan e'miinaatc Kishemanitoon, mii hsa piko enentaakwaninik taapishkoo e'misiwemiinaatc kahkina pahkweshikanan. Kiishpin kaye kiimiinintc Kishemanitoo kaaishiociipihkaawinitc mihtikoon mii 'i enentaakwaninik misiwe e'miinintc cinitipentank kahkina watihkwanan. 17 Nashkehsh kaye iki Isriyalak (Israel) mii enentaakosiwaatc a'a aalip (olive) shoominaahtik kaakihtikaasotc aaninta ekiihpoohkonikaatekin owatihkwanan. A'a tahsh wiin kotak pikwacaya'ii shoominaahtik kaakiihkihtikaasohsik kiinawaa kaaCoowiwihsiwek kaaishinaakosiyek owatihkwanan piincikihtikaateniwan i'imaa kaakii'oncipoohkonikaatekin ini watihkwanan. Kekiinawaa tahsh i'imaa eshiwiitoohkaasoyek kaakii'oncimashkawaatisiwaatc Coowak, kaakii'onciwenootaninik opimaatisiwiniwaa. 18 Keko tahsh aanawenimaahkekwaanik iki Coowak kaaishinaakosiwaatc taapishkoo kaakiihpoohkonikaatekin watihkwanan. Keko tahsh kihci-inenintisohkek. Kimihciwatihkwaniwim iitok. Kaawiin iitok ociipihk watihkwanink oncipimaatahsinoon, i'i watihkwan ociipihkonk oncipimaatan. 19 Shaakooc itahsh o'o kitihkitom: "Tepwe kiihpoohkonikaatewan hsa ini watihkwanan niinawint i'imaa cioncimaaciikiyaank." 20 Kitaakiihtepwem ihsa i'i ihkitoyekipan. Taapishkoo kaakii'ishipoohkonikaatekin ini watihkwanan, mii hsa kaakii'ishiaanawenimintwaa Coowak, aaniihsh kaawiin kiihtepwehtansiiwak. Kiinawaa tahsh wiin ehtepwehtamek keyaapi i'imaa kaaonciayaayek. Keko tahsh kihci-inenintisohkek, nawac iko kohtaanentamok. 21 Kishemanitoo iitok kaawiin okii'manaaci'aahsii' Coowa' kaaishinaakosiwaatc ini mayaa kaakii'watihkwaniwaninikin. Kitinentaam inahsh kekiinawaa cimanaaci'inek? 22 Miitahsh o'omaa eshiwaapantamank Kishemanitoo aaniin eshiminotootaaketc, e'manaaci'aahsik kaye awiya'. Kaawiin hsa omanaaci'aahsii' kaakii'macitootaminitc. Kiinawaa tahsh wiin kiminotootaakowaa. Mii 'i ketootawinek mooshak ehta ani-ishipimohsewek keonciminotootawinek. Kiishpin tahsh i'i ishihcikehsiwek, miitahsh peshikwan kekiinawaa ketootaakooyek taapishkoo kaakiihpoohkonikaatekin watihkwanan. 23 Kiishpin tahsh Coowak nakatamowaatc oshashiipihtamowiniwaa, mii hsa tahsh i'i cikiiweahsintwaa aanti nihtam kaakii'ishiayaawaahpan, aaniihsh Kishemanitoo okashkihtoon i'i cikiiweahsaatc. 24 Kiinawaa hsa kaaCoowiwihsiwek mii 'i eshinaakosiyek taapishkoo watihkwan i'imaa kaa'oncipoohkonikaatek shoominaahtikonk kaakiihkihtikaasohsik, i'imaa tahsh eshipiincikihtikaatek shoominaahtikonk kaakihtikaasotc, ekii'mayakihseyek. Iki tahsh wiin Coowak mii 'i eshinaakosiwaatc taapishkoo watihkwanan kaaoncitipentaakwahkipaniin i'imaa shoominaahtikonk kaakiihkihtikaasonitc. Nawac itahsh taawentanini Kishemanitoo cikiiwekihtikaatankipan ini watihkwanan shoominaahtikonk kaakiihkihtikaasonitc kaakii'onciinikin. 25 Niiciotepwehtamook! Kinantawenimininim hsa cikihkentamek i'i tepwewin otaanaank kaakiihkihkencikaatehsinok. Kaawiin iitok kiinawaa kikaoncimamiihkwaanitisohsiim. I'i tahsh kaaishishashiipihtamowaatc iki Isriyalak (Israel) pemaatisiwaatc, kaawiin i'i mooshak taishiayaahsiiwak. Paanimaa tahsh tapooni-ishiayaawak ahpii kiimooshkinehsenitc i'i kaaCoowiwihsinik, kaapinaasihkawaanitc Kishemanitoon. 26 Miitahsh i'i nahke kahkina Isriyalak kaawii'ishipimaaci'intwaa, aaniihsh Kihcimasina'ikan ishipii'ikaate: "Opimaaci'iwe hsa Saayanink (Zion) tapioncii, ciotaahpinank i'i macitootamowin kaakii'ishimacitootaminitc Cekapoon opiiwesiimini. 27 Ninkaoshihtamawaak i'i aayiici​ahshotamaatiwin ahpii otaahpinamowak ini omacitootamowiniwaan." 28 Ekii'aanawentamowaatc tahsh minwaacimowin, miitahsh i'i Coowak kaaishinaakosiwaatc taapishkoo ekiihshiinkenimaawaatc Kishemanitoon, kiinawaa ekaa kaaCoowiwihsiwek cionciminohseyek. Shaakooc itahsh Kishemanitoo okii'onenimaa' Isriyala' ciopimaatisiimitc, miitahsh enentaakosinitc kaasaaki'aatc aaniihsh okii'ishiahshotamawaa' kaakii'okehteya'aaminitc ciwiiciiwaatc. 29 Aaniihsh kaawiin Kishemanitoo aantentansii awenenan iko kiiwii'onenimaatc, kiiwiihshawenimaatc kaye awiyan. 30 Kiinawaa tahsh kaaCoowiwihsiwek, kikiihshashiipihtawaawaa Kishemanitoo otaanaank. Noonkom itahsh aasha kikii'oncitepinamowaam Kishemanitoo okoohpaasinaakewin, Coowak ekiihshashiipihtamowaatc. 31 Miitahsh peshikwan kiinawaa ekiihtepinamek i'i koohpaasinaakoowin, noonkom itahsh wiin Coowak ehshashiipihtamowaatc, mii 'iwe kaaonci-ishihsewaatc kewiinawaa noonkom citepinamowaatc Kishemanitoon okoohpaasinaakewinini. 32 Miitahsh i'i Kishemanitoo kaaonci-inakimaatc kahkina awiya' shashiipihtamowinini citipenimikonitc, amii 'oweni kaaonci-ishihciketc, kahkina awiyan mayaa peshikwan cioncitepinaminitc okoohpaasinaakewin. 33 Aahpici kihci-ishpentaakwanini kaashiwenootaninik Kishemanitoo okakiihtaawentamowin, okihkentamaawin kaye. Kaawiin tahsh kaye awiyan otaawiintansiini aaniin eshionentank, kaawiin kaye awiyan otaanihsitohtansiini aaniin eshihciketc! 34 Kihcimasina'ikan hsa ishipii'ikaate: "Kaawiin hsa awiyan okihkentansiini kaaTipenciketc aaniin enentank, kaawiin kaye awiyan wiihkaa otaawiintamaakohsiin aaniin keni-ishihciketc. 35 Kaawiin kaye wiihkaa awiyan kekoonini omiinikohsiin, keoncimasina'amawaahpan awiyan." 36 Wiin kahkina kekoon okii'oshihtoon, kahkina kaye kekoonini kii'onciayaani wiin onci, wiin kaye kahkina kekoonini kii'oshihtamaaso. Kishemanitoo hsa nehpic iko tanikihci-inentaakosi. Emen.

Oroomink 12

1 Miitahsh niiciotepwehtamook, Kishemanitoo e'wenootaninik okoohpaasinaakewin, kikakaansomininim cipakitinitisoyek enaahsamiitc Kishemanitoo. I'i hsa kaapimaatahk pakitinikewin ci-ishinaakosiyek, wiin ehta ko eshionahtamaasoyek ciaapaci'inek anohkiihtawek, miitahsh i'iweni kaaminwaapantank Kishemanitoo. Mii hsa tahsh i'i tepwe kwayahk anami'aawin kemiinekipan Kishemanitoo. 2 Keko tahsh naapinaakosihkek o'o kaaishihcikewaatc o'omaa ahkiink kaapimaatisiwaatc. Maano pakitinihk Kishemanitoo ciaanci'inek i'imaa piincaya'ii kipimaatisiwiniwaank, cioshkihtootc kaye kitinentamowiniwaan. Mii hsa tahsh cioncikihkentamowek Kishemanitoo otinentamowin, mii hsa 'iweni kaaonishihshininik, i'i kaye kaaminwaapantank, i'i kaye kaakiishinaakwaninik. 3 Kishemanitoo ninkii'miinik okishewaatisiwin, miitahsh o'o eninakook kahkina kaatahshiyek, keko awahshime inenintisohkek i'i kaa-ahpiihtentaakosiyek. Weweni naanaakatawentamohk mooshak. I'i tahsh tepweyentamowin Kishemanitoo kaamiininek, mii hsa 'imaa ishitipaacintisok. 4 I'imaa tahsh kiwiiyawinaanink aahpici paahtiinatinoon ini pepahkaan kaainwaatekin. Onoweniwan tahsh kahkina pepahkaan inanohkiimakanoon. 5 Aana tahsh wiin ehpaahtiinoyank, mii hsa eshinaakosiyank taapishkoo owiiyawimaa kaapeshikwahk e'ishipeshikoyank, aaniihsh Christ kahkina kiwiiciiwaanaan. Miitahsh eshinaakosiyank e'wiiciintiyank kahkina kaatahshiyank taapishkoo kaashiwiiciintiimakahkin ini pahkesiwinan i'imaa wiiyawimaank. 6 Kishemanitoo tahsh ekiihshaweniminank kikii'miinikonaan omiikiwewinan pepahkaan kaaishianohkiimakaninikin ci-ishihcikewank. Kiishpin awiya kii'ishimiinikoowisitc citashintank Kishemanitoon otipaacimowinini, taka mii keahpiihtaacimotc aaniin ehpiihcitepweyentank. 7 Kiishpin tahsh awiya kii-ishimiinikoowisitc cipami'iwetc, taka hsa tapami'iwe. Kiishpin tahsh ishimiinikoowisitc cikihkino'amaaketc, taka hsa takihkino'amaake. 8 Kiishpin tahsh ishimiinikoowisitc cimashkawite'e'aatc awiyan, mii hsa 'i keishihcikehpan. A'a kaye kaapakitiniketc, pisaan​iko ciciihkentankipan ehpakitiniketc. A'a kaye kaaniikaaniitc, pisaan​iko takihcianohkii. A'a kaye kaaminotootaaketc, ciminwentankipan i'i e'ishihciketc. 9 Tepwe piko kaye wiinke saaki'itik. Shiinkentamok i'i kaamacinaakwahk, kihciwinamok itahsh i'i kaaonishihshik. 10 Wiinke kaye saaki'itik taapishkoo kaaowiicihkiwentiwaatc kaashisaaki'itiwaatc. Niikaanikihtenimihkwak kiiciotepwehtamoomiwaak ahpiihc kiinawaa kaainenintisoyek. 11 Mooshak kaye anohkiik, keko wiihkaa kihtimihkek. Wiinke piko misiwe kite'iwaank oncianohkiihtawihk kaaTipenciketc. 12 E'ayaayek tahsh i'i ahpenimowin, mooshak iko ciihkentamok. Aayiitentamok kaye aanimisiwin otihsikoyek. Mooshak iko kaye anami'aak. 13 Miinihkwak kaye iki otanami'aak kekoonini kaaishinoontehsewaatc, weweni naakaci'ihkwak kiiotihsinekwaa iki piiwitek kitaawiniwaank. 14 Kakwecimihk kaye Kishemanitoo cishawenimaatc i'i kaakakwaataki'iminek, tepwe kakwecimihk cishawenimaatc, kaawiin wiin cimacakimaatc. 15 Wiiciminwentamoomihkwak hsa iki kaye kaaminwentamowaatc, wiicimawimihkwak kaye iki kaamawiwaatc. 16 Peshikwan kaye inenintik kahkina kaatahshiyek, keko wiin kihci-inenintisohkek. Pisaan​iko ishihcikek ini kaatapahsentaakwahkin anohkiiwinan. Keko kaye ninkakiihtaawentaamin inenintisohkek. 17 Kiishpin awiya macitootawinek, keko kakwenaapinamawaahkek i'i kaatootawinek. Kakweishihcikek itahsh i'i wenishihshink kahkina awiya kaaminwaapantank. 18 Maawac iko kihcianohkiik ehkokashkihtooyek, pisaan ciwiicipimaatisiimekwaa kahkina awiyak. 19 Kaasaaki'inakook, keko kakwetipa'ikehkek awiya kekoonini tootawinek. Tawinamawihk Kishemanitoo onishkaatisiwin cinana'ahcikemakaninik. Kihcimasina'ikan aaniihsh ishipii'ikaate: "Niin ninkanana'ahcike, niin ninkakiiwetipa'ike, ihkito kaaTipenciketc." 20 O'o tahsh ihkitoomakan Kihcimasina'ikan: "Kiishpin hsa a'a kaashiinkenimihk noonteskatetc, ahsham kekoonini. Kiishpin kaye noontewiiminihkwetc, pisaan​iko cimina'atc. Kiishpin tahsh i'i ishihcikeyan, taapishkoo hsa ehcaakisotc taishiayaa keahpiihtakacitc." 21 Keko kaye pakitinankek i'i kaamacinaakwahk cishaakooci'ikoyek. O'o tahsh ishihcikek, kaaonishihshik aapacihtook cishaakoocihtooyek i'i kaamacinaakwahk.

Oroomink 13

1 Miitahsh eshinaakwahk kahkina awiya cina'ihtankipan i'i okimaawiwin, aaniihsh kiishpin Kishemanitoo inentansikipan ciayaahsininik i'i okimaawiwin kaawiin taakii'ayaahsinini. Miitahsh kaaonciayaanik okimaawiwin Kishemanitoo wiin iko ekiihpakitinank o'omaa ahkiink. 2 Awiya tahsh kaamiikaatank okimaawiwin miihsa taapishkoo e'miikaatank i'i Kishemanitoon kaakii'onahtoonitc. A'a tahsh o'o kaaishihciketc wiin ihsa piko takashkihtamaaso aanti keoncionahshowaasotc. 3 Iki tahsh weweni kaaishihcikewaatc kaawiin memwehc okakohsaahsiwaawaa' i'i ahkiiwiokimaa'. Iki tahsh kaanihtaa mamaashiiwaatc ehta okakohsaawaa'. Kinantawentaam ina cikohsaahsiwek a'a ahkiiwiokimaa? Inashke kwayahk ishihcikek, miitahsh keininek ekii'minohcikewek. 4 Aaniihsh mii 'i taapishkoo eshinaakositc a'a ahkiiwiokimaa e'anohkiihtawaatc Kishemanitoon, e'anohkiitc kiin ciminohsewatc. Kiishpin mamaashiiyan, mii hsa tahsh i'i cikohsatc, aaniihsh mashkawisiiwinini otayaan weweni piko cinana'ahsihk, kaawiin kikamanaaci'ikohsii. Kishemanitoon iitok otanohkiihtawaan. Pisaan itahsh iko okanana'ahsaan awiyan kaamamaashiinitc. 5 Miitahsh o'o kaaonci-ishinaakwahk cina'ihtaman i'i okimaawiwin, kaawiin wiin ehta cikohtamowatc Kishemanitoo kaawii'ishinana'ahsaatc awiya', i'i hsa kaye cikihkenintisoyan kwayahk e'ishihcikeyan. 6 Miitahsh kaaonci-ishinaakwahk citipa'amek i'iweni kaanihtaa​tipa'amawintc wekimaawaatisitc, aaniihsh iki ahkiiwiokimaak otanohkiihtawaawaan Kishemanitoon ehtootamowaatc otanohkiiwiniwaa. 7 Tipa'amok itahsh wekonenini ko kaa-antaweniminekwaa citipa'amowek. Tipa'amok kaye i'i kitahkiimiwaa, ini kaye pepahkaan kekoonan kekiihtipa'amekipan. Kihtenimihkwak itahsh kaye iki kekihtenimekwaapan, miitahsh kaye peshikwan tootawihkwak kekihci-inenimintwaapan. 8 Keko awiya kekoonini masina'amawaahkek, kinantawentaakosim itahsh mooshak cisaaki'itiyek, taapishkoo awiya mooshak kaatipa'iketc. Awenen tahsh iko kaasaaki'aatc owiicipimaatisiin mii hsa 'awe kaatipitootank Moosihsoon (Moses) otOonahshowewinini. 9 O'o tahsh peshik onahshowewin kaaihkitoomakahk: "Saaki'ihkwak iki kiicipimaatisiimiwaak taapishkoo kaa-ahpiihcisaaki'itisoyek," mii hsa peshikwan ahpiihtentaakwan ono maamaw kaa-ahpiihtentaakwahkin onahshowewinan kaawii'wiintamaan: "Keko papaamenimimaahken pahkaan awiya owiiciiwaakanan, keko nihshiwehken, keko kaye mihsawentamowaahken awiya pahkaan otaya'iiman kaatipentank." 10 Kiishpin tahsh awiya saaki'atc, kaawiin wiihkaa kikamacitootawaahsii. Mii hsa tahsh eshinaakwahk awiya kaasaaki'iwetc ehtipitootank kahkina onahshowewin. 11 Miitahsh o'owe eshinaakwahk ci-ishihcikeyek, aaniihsh kikihkentaam aasha tipa'ikan e'ocihcihsek cikoshkosiyek. Nawac iitok noonkom kipehshwaapantaam kaawii'ishipimaaci'ikooyek ahpiihc wiin kaakii'ahpiihsaapantamekipan nihtam kiimaaciitepwehtamek. 12 Aasha ohsha kekaa ishkwaatipihkan, aasha ohsha piitaapan. Taka tahsh mii 'i ishipoonitootaanin ini kekoonan tipihkanonk kaaoncitipentaakwahkin. Taka pihsihkantaanin ini miikaasowiaapacihcikanan waahseyaasiwinink kaaoncitipentaakwahkin. 13 Taka tahsh weweni pimaatisitaa, ci-ishihcikeyank kaaishihcikewaatc waahseyaank kaaishitipentaakosiwaatc. Taka kaawiin onoweniwan kikaishihcikehsiimin: papaakakiipaacihcikewin, minihkwewin, wiinaatisiwin, pihshikwaacihcikewin, kiihkaantiwin, aayaahshenintiwin. 14 O'o tahsh kikaishihcikemin: taka hsa pihsihkamowaahk kaaTipenciketc Ciisahs Christ opimaatisiwin. Kaawiin tahsh awahshime kikaishihcikehsiimin kaawii'ishihcikemakahk o'o kiwiiyawinaan aaniin kaye eshimihsawentamoomakahk.

Oroomink 14

1 Otaahpinihk hsa a'a mahshi kaamashkawitepwehtansik, keko tahsh wiin kakweshaakoosomaahken aaniin enentank kekoonini. 2 Peshik itahsh ishitepwehtam pisaan​iko kahkina kekoonini cimiicitc. A'a tahsh mahshi kaamashkawi​tepwehtansik kaakihtikaatenik miicim ehta omiicin. 3 Kaawiin tahsh ishinaakwahsinini a'a kahkina kekoonini kaamiicitc ciaanawenimaatc ini kahkina kekoonini kaamiicihsinik. A'a tahsh kaye kaakihtikaatenik miicim ehta kaamiicitc kaawiin kaye wiin ishinaakwahsinini ci-inaahpan e'macitootaminitc ini kahkina kekoonini kaamiicinitc. Kishemanitoon iitok okii'otaahpinikoni. 4 Awenen itahsh kiin entinowiyan cinaanaakasaapamatipan pahkaan awiyan kaapamiihtawaatc? Otookimaaman ohsha onaanaakaci'ikoon tepwe kwayahk eshihcikekwen komaa kaye kwayahk eshihcikehsikwen. Weweni hsa taishihcike, aaniihsh kaaTipencikenitc okawiici'ikoon ciminohsetc. 5 Peshik itahsh inini awahshime otinentaan peshik ehkiishikaninik, kaawiin tahsh aahpici opapaapisiskentansiinan kotak kaakiishikaninikin. A'a tahsh kotak peshik miinawaa kahkina peshikwan otinentaanan ini kaakiishikaninikin. Mii hsa tahsh eshinaakwaninik entahsopeshikotc piko ciaayiitentankipan aaniin waa'ishikiishikanohketc. 6 Awenen hsa piko kaakihci-inentank ehkiishikaninik, mii hsa eshihciketc ewiihkihtenimaatc kaaTipencikenitc. A'a kaye kahkina kekoonini kaamiicitc, mii hsa eshihciketc ehkihtenimaatc kaaTipencikenitc, aaniihsh omiikwehciwenimaan Kishemanitoon e'miinikotc miicim. A'a tahsh kaye kotak aaninta kekoonini kaamanaamiicitc, mii hsa kewiin eshihciketc, ehkihtenimaatc kaaTipencikenitc, kewiin e'miikwehciwenimaatc Kishemanitoon. 7 Kaawiin tahsh kaatahshiyank awiya wiin ehta piko pimaatisiihtamaasohsii. Kaawiin kaye awiya wiin iko nipoohtamaasohsii. 8 Aaniihsh kiishpin kiipimaatisiyank, kaaTipenciketc ohsha kaaoncipimaatisiyank cikihtenimintc. Kiishpin tahsh nipoyank, cikihtenimintc ohsha kaye kaaoncinipoyank. Komaa hsa pemaatisiwankwen, komaa kaye nepowankwen, kaaTipenciketc ohsha kitipenimikonaan. 9 Mii hsa Christ kaakii'oncinipotc, kaakii'oncikiiwepimaatisitc kaye, citipenimaatc i'i kaapimaatisinitc, i'i kaye kaaniponitc. 10 Wekonen itahsh kiin wencinaanaakasaapamatc aaniin kiitanami'aa eshipimaatisitc? Wekonen tahsh kaye kiin wenciaanawenimatc kiiciotepwehtamo? Kahkina iitok kikaniipawiwaamin enaahsamiitc Kishemanitoo ahpii tipaahkoninank. 11 Kihcimasina'ikan hsa ishipii'ikaate: "Niin kaaTipencikeyaan nintahpiwiintaan nimpimaatisiwin, maawac iko ninkihcitepwe kaaihkitoyaan, kahkina hsa awiya taociciinkwanapihtaa enaahsamiiwak, kahkina kaye awiya taihkito niin ehKishemanitoowiwak." 12 Inashke tahsh, kahkina kaatahsopeshikoyank ishinaakwan ciwiintamawank Kishemanitoo aaniin kaakiihpi-ishihcikewank. 13 Taka tahsh i'i ishipoonihciketaa o'o kaanihtaanaanaakasaapantiyank. Taka hsa onentantaa ci-ishihcikehsiwank aaniin awiya keoncipisokehshink, aaniin kaye keoncipankihshink a'a kiitanami'aanaan. 14 KaaTipenciketc Ciisahs tahsh e'wiiciiwak kaaoncikihkentamaan, kaaoncikehcina'oyaan kaye, kahkina miicim kaakii'oshihcikaatek ehpehkahk, pisaan​iko cimiicinaakaatek. Kiishpin tahsh wiin awiya ishitepwehtank aaninta kekoon cimanaaishihcikehpan, mii hsa ko 'i cimaashipinitisohpan kiishpin ishihciketc kaamanaaishihciketc. 15 Kiishpin tahsh oncimaashihsetc kiitanami'aa kiwiihsiniwinink, kaawiin itahsh iinsan saaki'iwewinink kitoonci-ishihcikehsii i'i kaaishihcikeyan. Keko i'imaa kitinancikewinink oncinihshiwanaaci'aahken kiitanami'aa. Christan iitok kewiin okii'nipohtamaakoon. 16 Keko tahsh kekoon ishihcikehken cioncimacitashincikaatek i'i kaaonishihshentaman. 17 I'iwe hsa kiitashintenik aaniin Kishemanitoo eshiokimaahkantawinank, kaawiin wiin aaniin keinancikeyank, aaniin kaye keshiminihkweyank kaatashintek, i'iwe ohsha kaaicikaatek, kii-ishihcikenaaniwank Kishemanitoo kaaminwaapantank, pisaan kaye ciwiiciiwank Kishemanitoo, minwentamowinini kaye kaamiiniminank Kishemanitoo otAhcaahkwan. 18 Awiya tahsh o'o nahke kii-ishianohkiihtawaatc Christan, Kishemanitoon ominwaapamikoon, pemaatisinitc kaye ominwaapamikoo'. 19 Taka tahsh mooshak i'i kakweishihciketaa, aaniin pisaan​iko keshiwiiciintiyank, ciwaawiici'itiyank kaye cinimashkawikiyank. 20 Keko tahsh wiin i'imaa kimiicimimink oncinihshiwanaacihtaawaahken Kishemanitoo kaakii'oshihtootc. Kahkina miicim kiihpakitinikaate cimiicinaakaatek, kaawiin itahsh taaonishihshinsinoon cimiicinaakaatekipan i'i miicim kiishpin awiya i'imaa oncimacitootank. 21 Kiishpin kiitanami'aa oncipisokehshink i'imaa, kaawiin taaonishihshinsinoon cimiiciyampan wiiyaahs, ciminihkweyampan kaye shoominaapo, ci-ishihcikeyampan kaye kekoon iko keoncipisokehshinkipan. 22 I'i tahsh inahke kaye kaashitepwehtaman ono, taka kiinehtawaa piko Kishemanitoo kikakihkentaam. Aahpici hsa taminwentam a'a inini kaamaanentamoshkaakohsik e'ishihciketc wiin iko kaashiminwaapantank. 23 Kiishpin tahsh oncikehcinaa'owenintisohsik wekonenini kaamiicitc, Kishemanitoon ihsa okawiintamaakoon sesik e'ishihcikehsik. Aaniihsh i'i kaaishihciketc kaawiin tepwehtamowinink onciimakahsinini. Kekoon tahsh tepwehtamowinink e'onciihsinok mii hsa i'i macitootamowin.

Oroomink 15

1 Kiinawint itahsh kaamashkawitepwehtamank, mii hsa eshinaakwahk cikii'wiici'ankwaapan iki mahshi kaamashkawitepwehtansikwaa. Kaawiin wiin kiinawint ehta ci-ishihcikeyankipan kekoon keminwentamo'ikoyank. 2 Takwac itahsh ishihciketaa keminwaapantank kiicipimaatisiinaan keonciminohsetc, keoncimaaciikitc kaye otepwehtamowinink. 3 Wiin Christ aaniihsh kaawiin kii'minwentamo'itisohsii, o'o iitok kii'ishihcike kehteoshipii'ikan kaaishipii'ikaatenik: "I'i hsa kaakii'ishimaci-ikooyan niin ninkiihpakamishkaakonan." 4 Kahkina kekoon tahsh kaakii'oshipii'ikaatek i'imaa kehteoshipii'ikanink, ekii'oshipii'amaakooyank cioncikihkentamank cishashiipentamank, cimashkawentamank kaye. Miitahsh i'imaa keonciahpenimoyank. 5 Taka tahsh Kishemanitoo kaamiikiwetc shashiipentamowin, mashkawentamowin kaye, kikaishi'ikowaa peshikwan inahke ci-ishinaanaakatawenintiyek, aaniihsh kipiminisha'amowaam Christ Ciisahsoon kaakii'ishipimaatisinitc. 6 Taka tahsh kaatahshiyek maamaw iko inentamok cipeshikohtaakosiyek e'miikwehciwenimek Kishemanitoo kaaTipenciketc Ciisahs Christ Kaaoyoohsitc. 7 Otaahpinitik itahsh kaatahshiyek pisaan ciwaawiiciintiyek, taapishkoo Christ kaakii'ishiotaahpininek, Kishemanitoo cikihci-inentaakositc. 8 Kiwiintamawininim Christ ekiihpitinowitc awiya kaaminotootawaatc Coowa', ewii'naakohtootc Kishemanitoon otepweyentaakosiwinini, cionci-ishihsenik aaniin Kishemanitoo kaakii'ishiahshotamawaakopanen kikehteya'aaminaani'. 9 Christ tahsh kaye kii'ishihcike ekaa kaaCoowiwihsinik cimiikwehciwenimaanitc Kishemanitoon, aaniihsh okoohpaasinaakoni. Kihcimasina'ikan iitok ishipii'ikaate: "Niin hsa kikamiikwehciwenimin ekaa kaaCoowiwihsikwaa kaaishiayaawaatc, ninkaina'am kaye cimiikwehciwentamaan kiwiinsowin." 10 Miinawaa tahsh pahkaan ishi-ishipii'ikaate: "Kiinawaa ekaa kaaCoowiwihsiwek, wiiciminwentamoomihkwak Kishemanitoo kaakii'onenimaatc pemaatisinitc ewiihtipenimaatc." 11 Pahkan itahsh kaye miinawaa ishioshipii'ikaate: "Kiinawaa ekaa kaaCoowiwihsiwek, miikwehciwenimihk kaaTipenciketc, miikwehciwenimihk, kahkina kaapimaatisiyek!" 12 O'o tahsh Aaiseya (Isaiah) kii'ishipii'ike: "Awiya hsa tapitakohshin Cehsiink (Jesse) keontahkaanesitc, mii hsa tahsh a'a kaawiihpitakohshink citipenimaatc ekaa kaaCoowiwihsinik, miitahsh a'awe keahpenimonotaakotc ini ekaa kaaCoowiwihsinik." 13 Taka Kishemanitoo kaamiikiwetc ahpenimowin, kikamooshkinemiinikowaa ciihkentamowin, pisaanisiwin kaye kaashitepwehtawek. Kishemanitoo hsa otAhcaahkwan omashkawisiiwininiink kikaonciwiiciiwikowaa, kitahpenimowiniwaa mooshak ciniwenootahk. 14 Niitanami'aak, niin hsa wiinke ninkehcinaa' e'mooshkineshkaakoyek i'i kaaonishihshink i'i kaye kahkina kihkentamaawin, ehkashkihtooyek kaye cikakihkino'amaatiyek. 15 O'o oshipii'ikan kaaoshipii'amawinakook aahpici ninsoonkite'e e'wiintamawinakook kekoonan keoncimaamihkawiyek. Kishemanitoo iitok ninkii'ishishawenimik ekii'inanohkii'itc 16 cipamiihtawimak Christ Ciisahsoon ciwiici'imak i'i ekaa kaaCoowiwihsinik. Taapishkoo hsa anami'ewikimaa kaainanohkiitc mii hsa 'i enanohkiiyaan o'o kaatashintamowak Kishemanitoo ominwaacimowin, iki hsa kewiinawaa ekaa kaaCoowiwihsikwaa ci-ishinaakosiwaatc pakitinaahsowinink, keminwaapantaminitc Kishemanitoon. Aaniihsh Kishemanitoon otAhcaahkoni opehki'ikowaan. 17 O'o tahsh kaashiwiiciiwak Christ Ciisahs, tepwe hsa ishinaakwan cikihci-inentamaan o'o kaashianohkiihtawak Kishemanitoo. 18 Kaawiin tahsh nintaateinenintisohsii kekoon citashintamaampaan, mii ehta ko Christ kaapi-ishianohkiitc nimpimaatisiwinink, ekii'aapacihtootc nintihkitowinan, nintishihcikewinan kaye, ciwiici'imak ekaa kaaCoowiwihsinik cina'ihtawaanitc Kishemanitoon. 19 Miiwan tahsh kaye ono kaayaapacihtootc kaamashkawinaakwaninikin kihkinawaacihcikanan, maamahkaacihcikewinan kaye, eshimashkawanohkiitc kaye Kishemanitoo otAhcaahkwan. I'imaa Ceroosalamink (Jerusalem) ekii'oncimaacaayaan, piinihsh misiwe weti Iliirihkam (Illyricum) ahki kaaishinihkaatek ekiihpapaawiintamaakeyaan i'i minwaacimowin kaashitashimintc Christ. 20 Niin itahsh i'i mooshak peishimihsawentamaan ewiihpapaawiintamaakeyaan minwaacimowin aaniinti Christ eshikihkenimaahsiwintc, aaniihsh kaawiin nintishihcikehsii ciaakwiihtawimaacihtaawak awiya aasha kaakii'ishimaatahkiciketc. 21 Kehtemasina'ikanink itahsh ishi-ishipii'ikaate: "Iki hsa mahshi kaakii'wiintamawaahsiwintwaa ehtashimimintc tawaapankewak, iki tahsh kaye mahshi kaanoontansikwaa tanihsitohtamook," ishipii'ikaate. 22 Mooshak itahsh e'ontamiiyaan weti ehpapaamaacimoyaan, kaaonci-ishihsehsiwaan ciantawaapaminakook. 23 Aasha tahsh ekiihkiishihtooyaan o'o nintanohkiiwin i'iweti nahke ahkiink, aasha tahsh niipiwa' tahsopipoonakaa kaakii'inentamaan ewii'waapaminakookipan, 24 miitahsh enentamaan ci-ishihcikeyaan ahpii ishaayaan Ispen (Spain) ahkiink. Nimpakohsentaan itahsh cimawatihsinakook ahpii weti anipimiayaayaan, ciwiici'iyek kaye weti kaawii'ishaayaan. Paanimaa kota kii'ishkwaa-temawatihsinakook. 25 Pinamaa tahsh noonkom weti Ceroosalamink (Jerusalem) nintishaa, ewii'wiici'imak Kishemanitoo opimaatisiima' weti kaa-ayaanitc. 26 Iki tahsh otanami'aak weti Maahsitooniya (Macedonia) ahkiink kaa-ayaawaatc, weti kaye Ahkeya (Achaia) ahkiink kaa-ayaawaatc wiinawaa hsa piko kii'inentamook ewiihpakitinikewaatc shooniyaan ewii'wiici'aawaatc kaakoohpaatisinitc kaatakwiinonitc Kishemanitoo opimaatisiima' kaaishiayaanitc weti Ceroosalamink. 27 Wiinawaa tahsh iko kii'inentamook ewii'ishihcikewaatc, aaniihsh oncita piko ishinaakwanini cikii'wiici'aawaahpan. Aaniihsh iki Coowak okii'miinaawaa' nihtam i'i ekaa kaakiihCoowiwihsinik i'i kaakii'ishishawenimikowaatc Kishemanitoon. Miitahsh eshinaakwaninik ekaa kaaCoowiwihsikwaa wiinihtamawaa ciwiici'aawaahpan ini Coowa' aaniin kewiinawaa otaya'iimiwaan kaakii'ishishawentaakosiwaatc. 28 Ahpii tahsh kiihkiishihtooyaan i'i nintanohkiiwin, kii'ishkwaamisiwemiinakwaa ini shooniyaan kaakii'maawacihcikaniwinitc, miitahsh i'i cinimaacaayaan Ispen ahkiink ci-ishaayaan. Ninka-anikipihcii tahsh ewii'mawatihsinakook. 29 Ahpii tahsh weti otihsinakook, ninkihkentaan hsa cipiitaawak Christ kaawenootaninik oshawencikewin. 30 Niitanami'aak kitishikanoonininim e'wiiciiwank kaaTipenciketc Ciisahs Christ, i'imaa kaye saaki'itiwinink Kishemanitoo otAhcaahkwan kaamiininank. Kitishikakaansomininim, wiici'ihshik kaashianami'ehtawak Kishemanitoo, wiinke piko weweni cianami'ehtamawihshiyek. 31 Anami'ehtamawihshik cipapaamenimihsikwaa iki kaatepwehtansikwaa weti Cootiiya (Judea) ahkiink kaa-ayaawaatc, i'i tahsh kaye kaashikakwewiici'imak Kishemanitoo opimaatisiima' i'imaa Ceroosalamink kaa-ayaanitc mii 'iweni kaa-antawentamowak ciotahpinaminitc. 32 Miitahsh i'i ahpii kewaapaminakook Kishemanitoo inentank, ciihkentamowin tahsh kaye ninkapikikii. Ahpii tahsh weti mawatihsitiyank, wiinke kikaoncioshkiminwamanci'omin. 33 Taka Kishemanitoo kaamiikiwetc pisaanentamowin kikawiiciiwikowaa kahkina kaatahshiyek. Emen.

Oroomink 16

1 Kinantawenimininim itahsh cikihkenimek a'a ihkwe kaaotawemaayank Piipi (Phoebe) kaaishinihkaasotc. I'iweti hsa Senkoriiyaahkaank (Cenchreae) ishipamiihtaake otanami'aa' kaaishinihtaa maawaci'itinitc. 2 Weweni piintikanihk, kaaTipencikenitc iitok kewiin otipenimikoon. Aaniihsh mii 'i keishihcikewaahpan pemaatisiwaatc kaatipenimikowaatc Kishemanitoon. Wiici'ihk kaye aaniin iko eshinoontehsetc, aahpici ohsha niipiwa' okii'wiici'aa' pemaatisinitc, keniin hsa piko ninkii'wiici'ik. 3 Nimpooshoo'aa hsa Parihsila (Priscilla), Ahkwila (Aquila) kaye, amiiwak ihsa iki kaawiitanohkiimakwaa e'anohkiihtawankitc Christ Ciisahs. 4 Okiinaniisaanihtoonaawaan ihsa opimaatisiwiniwaan mekwaa ekii'wiici'iwaatc. Kaawiin niin ehta miikwehc nintinaahsiik, ekaa kaaCoowiwihsikwaa otepwehtamook pepahkaan kaaishimaamaawaci'itiwaatc kewiinawaa omiikwehciwenimaawaa'. 5 Nimpooshoo'aak itahsh kaye otanami'aak owaahkaa'ikaniniink kaaishipiintikewaatc. Impooshoo'aa kaye a'a inini kaasaakiwiiciiwak Ehpiinatahs (Epaenetus) kaaishinihkaasotc. Wiin aaniihsh nihtam okiihtepwehtawaan Christan weti ahkiink Esha (Asia) kaaicikaatek. 6 Nimpooshoo'aa kaye Meri (Mary) kaakihcianohkiitc mooshak kiinawaa onci. 7 Nimpooshoo'aa tahsh Entaronaaihkahs (Andronicus), Cooniyahs (Junias) kaye. Miiwak hsa iki kaawiicitinowiimakwaa ehCoowiwiyaank, ninkii'wiicitahkonikoomikook itahsh kaye. Okoweniwak itahsh wawiinke kihkencikaniwiwak, ishinisha'waakanink e'ishitakwakimintwaa. Wiinawaa tahsh kaye nihtam okiihtepweyenimaawaan Christan cipwaa tepweyenimimak. 8 Nimpooshoo'aa kaye Empaliyetahs (Ampliatus), aaniihsh ninsaakiwiiciiwaa, owiiciiwaan kaye kaaTipencikenitc. 9 Nimpooshoo'aa kaye Orpenahs (Urbanus) niwiitanohkiimaakaninaan e'anohkiihtawankitc Christ. A'a kaye Istehkihs (Stachys) kaasaaki'ak. 10 Nimpooshoo'aa kaye Ahpeliis (Apelles), kaaonciminwaapancikaniwitc ehpiminisha'waatc Christan. Nimpooshoo'aak kaye kahkina Eristaapiyalahs (Aristobulus) otaawinink kaa-ayaanitc. 11 Nimpooshoo'aa kaye Hirootiyan (Herodion), kaawiiciCoowimak. Nimpooshoo'aak kaye iki otanami'aak kaawiiciiwaawaatc kaaTipencikenitc, Naarhsihsahs (Narcissus) otaawinink kaaonciinitc. 12 Nimpooshoo'aa kaye Caraaihpiina (Tryphena), Caraaihpoohsa (Tryphosa) kaye, kaakiihkihcianohkiihtawaawaatc kaaTipencikenitc. Nimpooshoo'aa kaye a'a ihkwe Parhsihs (Persis) kaaishinihkaasotc, kaasaaki'ak, kaakiihkihcianohkiihtawaatc kaaTipencikenitc. 13 Nimpooshoo'aa kaye Oroohpahs (Rufus), mii 'awe iitok kaakihci-inakimintc ehpiminisha'waatc kaaTipencikenitc. Omaamaan tahsh kaye nimpooshoo'imaan, aaniihsh taapishkoo e'okosihsimimitc ninkiihpitootawimik. 14 Nimpooshoo'aak kaye Ahsinkaritahs (Asyncritus), Palekan (Phlegon) kaye, Harmiis (Hermes) kaye, Paacaropahs (Patrobas) kaye, Harmahs (Hermas) kaye, ini kaye kahkina otepwehtamook kaawiiciiwaawaatc. 15 Nimpooshoo'aa kaye Pilaalakahs (Philologus), a'a kaye ihkwe Cooliya (Julia), Niiriyahs (Nereus) kaye, otawemaan kaye nimpooshoo'imaan. Nimpooshoo'aa kaye Oliimpahs (Olympas), ini kaye kahkina weti kaawiiciiwaawaatc pemaatisinitc Kishemanitoon kaatipenimikonitc. 16 Otepwehtamook anami'eociimihkwak kiipooshoo'ekwaa, mii'i nahke ishipooshoo'itik. Kahkina tahsh Christ kaatipenimaatc pepahkaan kaaishimaamaawaci'itinitc otepwehtamoo' kipooshoo'ikowaak kahkina kaatahshiyek. 17 Kikakaansomininim itahsh, niitanami'aak, ahshowinotawihkwak iki awiyak kaakashki'aawaatc awiya' cipahkewinitinitc, kaawanishkweminekwaa kaye, e'ishikihkino'ikewaatc kihcipahkaan i'i kaakii'ishinoontamek. Keko naasihkawaahkekwaanik iki tino awiyak. 18 Iki tahsh o'o kaaishihcikewaatc kaawiin otanohkiihtawaahsiwaawaan Christan kaaTipenimiminank, mii hsa ehta owiiyawiwaan eshimihsawentamoomakaninikin eshihcikewaatc. Aahpici tahsh maminokiishwewak, e'minoinaawaatc kaye awiya', anihshaa tahsh e'inaawaatc ewii'onciwayeshimaawaatc, miitahsh kaaonciwaniwinaawaatc pemaatisinitc kaakihkentansinik aaniin keishihcikenitc. 19 Kahkina hsa awiyak aasha noontamook aaniin ehpiihcina'ihtamowek i'i minwaacimowin. Wiinke tahsh nintooncikihci​ciihkentam i'i e'ishihcikeyek. Kinantawenimininim itahsh kaye cikakiihtaawikihkentamek i'i kaaonishihshink, cisaapikihkentansiwek itahsh i'i kaamaanaatahk. 20 Kishemanitoo hsa kaamiininek pisaanisiwin kikashikoshkamaakowaa Setanan kiinawaa citahkohkaanimek. Taka tahsh okishewaatisiwin kaaTipenciketc Ciisahs Christ kikawiiciiwikowaam. 21 Timahti (Timothy) tahsh kaawiitanohkiimak, kaye wiin kipooshoo'ikowaa. Okoweniwak kaye kipooshoo'ikowaak Loohshiyahs (Lucius), Cehsan (Jason), Sohsiipatar (Sosipater). Miiwak ihsa oko niiciCoowak. 22 Keniin tahsh Tarhshiyahs (Tertius) kaaoshipii'ikehtamawak Pwaal (Paul) kitakopooshoo'ininim, keniin iitok kaawiiciotepwehtamoominakook. 23 A'a tahsh kaye Keyahs (Gaius) kaapiintikashitc owaahkaa'ikanink, kipooshoo'ikowaa. Mii hsa wa'a owaahkaa'ikanink kaaishinihtaapiintikenitc kahkina otepwehtamoo'. Iraastahs (Erastus) kaanaakaci'aatc shooniyaan i'imaa ootenaank, aya'aa kaye Kwaartahs (Quartus) kiitanami'aanaan, kewiinawaa hsa pooshoo kitikowaak. 25 Taka tahsh kihci-inenimaataa Kishemanitoo. Wiin ohsha kaakashkihtootc cimashkawitepwehtamo'inek, mii iitok i'iwe minwaacimowin kaapitashintamowak, mii hsa 'imaa kaashitashincikaniwitc Ciisahs Christ. Miitahsh kaye ehkitoomakahk i'i tepwewin kaakii'naakohcikaatek, kaakiihkihkencikaatehsinok mewisha otaanaank kaakiihpimiahkiiwank. 26 Noonkom itahsh i'i tepwewin kii'oncinaakohcikaate kaakii'ishipii'ikenitc Kishemanitoo otipaacimowininiima'. Ekii'inaahkoniketc itahsh Kishemanitoo kaanehpiciayaatc, kahkina awiyak oncikihkentamo'aawak kaapepahkaanwewaanakisiwaatc pemaatisiwaatc, kahkina hsa ko cioncitepwehtamowaatc, cina'ihtamowaatc kaye. 27 Wiin itahsh ehta ehKishemanitoowitc, wiin ehta kaye kaamaawacikakiihtaawentank, taka tainakimaa ehkihci-inentaakositc onci Ciisahs Christan otishihcikewininiink, mooshak iko ahpane! Emen.

1 Kwaarintink 1

1 Niin Pwaal (Paul) o'o nintooshipii'ikan, niin kaa'onaapamitc Kishemanitoo e'inentank ciopapaamisiwiniyaan Christ Ciisahs ciotishinisha'waakanimitc. A'a tahsh kiwiiciotepwehtamoominaan Saastiniis (Sosthenes) kaawiiciiwak. 2 Kitooshipii'amaakoom kiinawaa otanami'aak i'imaa Kwaarintink (Corinth) kaa-ayaayek, Kishemanitoo kaatipeniminek kaamaawacianami'aayek. Kiinawaa kaa-antominek Kishemanitoo okwayahkwaatisiima' citinowiyek, wiin ekii'onahsinek ci-ishitipeniminek, e'wiiciiwimek Christ Ciisahsoon. Tako kaye kahkina nintooshipii'amawaanaanik pahkaan kaatanahkiiwaatc kaa-anami'ehtawaawaatc Christ Ciisahsoon kaaTipeniminank. Mii 'awe kahkina peshikwan kaashitipeniminank. Kahkina o'o kaatinowiyek kitooshipii'amaakoom. 3 Maano kikashawenimikowaa, kikamaminohse'ikowaa Kishemanitoo Koohsinaan kaye kaaTipenciketc Ciisahs Christ. 4 Mooshak nintooncinanaahkomaa ninKishemanitoom kiinawaa weti eyaayek ekii'onciihtamawinek oshawencikewin e'oncimiinikowisiyek Christ Ciisahs onci. 5 Wiin iko e'wiiciiwinek kikii'wenooci'ikowaa misiwe kipimaatisiwiniwaank tako kaye kahkina kitishikiikitowiniwaank kaye kahkina kikihkentamowiniwaank. 6 Ekii'ahpiihciaayiitentamek Christ otinaacimikoowin, 7 kaawiin awaac pankii kikii'noontehsehsiim kishawenimikoowiniwaa cimiinikoowisiyek, ehpii'ek Ciisahs Christ cipinaakositc weti ishpimink. 8 Wiin kika-aayiici'ikowaa cimashkawisiiyek piinihsh iko ciwehkwaa-ayaak, mii hsa 'iwe ekaa kekoon ci-ishianaamentaakosihsiwek ahpii okiishikaamitc a'a kaaTipeniminank Ciisahs Christ. 9 Tepweyentaakosi hsa 'awe Kishemanitoo, mii 'awe kaakii'antominek ciwiiciiwimek ini oKosihsan Ciisahs Christan, miiwan​ini kaaTipenimiminank. 10 Niiciotepwehtamook! Kitishikanoonininim owiinsowinink kaaTipeniminank Ciisahs Christ. Kipakohsenimininim, peshikwan kahkina ci-ihkitoyek, ekaa kekoon pahkewinitiwin ciayaamakahsinok i'imaa eshiayaayek, kwayahk hsa ko cinaapihsek kiwiici'itiwiniwaa, peshikwan ci-inentamek, peshikwan kaye cikakweishihcikeyek. 11 Aaniihsh, niiciotepwehtamook, kekoon nimpiwiintamaakook aanint weti pemionci-ishaawaatc Kaloowi (Chloe) owaahkaa'ikanink. Kwayahk iko niwiintamaakook, aanwaapantiwin kiinawaa i'imaa e'ayaamakahk, ihkitowak. 12 Mii 'owe kaaitamaan: kaatahsopeshikoyek pepahkaan e'ishiwiintamowaatc eshipiminisha'ikewaatc. Peshik ihkito: "Niin okihkino'amawaakanan a'a Pwaal (Paul)." Kaye peshik, "Niin Ahpwaalahs (Apollos) okihkino'amawaakanan," ishiwiinitiso. Peshik kaye, "Niin Piitar (Peter) okihkino'amawaakanan," ihkito. Peshik itahsh kaye ihkito: "Niin Christ ehta nimpiminisha'waa." 13 Na! Tapapiikihshipinaa na 'a Christ, pepahkaan ciayoohkweno'intc? Pwaal ina 'a kaakii'nipohtamawinek aashiteyaahtikonk? Kikii'ishisiika'antaakoom ina ciahpiwiinintc Pwaal cionciokihkino'amawaakaniminek? Kaawiin iitok! 14 Ninanaahkomaa Kishemanitoo ekaa ekiihsiika'antawaahsiwak awiya kaatahshiyek, mii ehta oko Karispahs (Crispus), Keyahs (Gaius) kaye. 15 Keko wiin awiya ninkaikohsii niin nintishinihkaasowinink ekiihsiika'antaakooyek ciokihkino'amawaakaniminakook. 16 A'awe tahsh kaye ninkiihsiika'antawaa Istehpanahs (Stephanas) kaye iniweniwa' owaahkaa'ikanink kaashitaanitc. Kaawiin miinawaa nimaamihkawihsii kotak awiya i'imaa cikiihsiika'antawaawakipanen. 17 Kaawiin wiin cipapaamisiika'antaakeyaan ninkiihpionci-ishinisha'okohsii 'a Christ, i'ihsh wiin minwaacimowin ciwiintamaakeyaan, mii mayaa enanooshitc. Kaawiin wiin ninkiihkakweinihtaakosihsii e'okihkentaahsowiniyaan, aaniihsh kaawiin ninkii'antawentansiin cikipishkamowak Christ onipohtamaakewin aashiteyaahtikonk kaashimashkawisiimakaninik cianohkiimakahsininik. 18 I'iwe aaniihsh kaainaacimintc Christ ekii'nipotc aashiteyaahtikonk, o'owe otinihtaanaawaa ikiweniwak kaaniwanihshinowaatc, taapishkoo ehkakiipaataninik. Kiinawint itahsh wiin kaanipimaaci'ikooyank, mii 'imaa tipaacimowinink e'ahtenik omashkawisiiwin Kishemanitoo. 19 Ishipii'ikaate aaniihsh i'i Kihcimasina'ikan: "A'a kaakakiihtaawisitc ninkanihshiwanaacihtaawaan okakiihtaawisiwin, a'a tahsh kaaokakiihtaawentamowinitc ninka pahkaan ahtaawaan okihkentaahsowin," ihkito Kishemanitoo. 20 Aaniin kaye iki waa'inwaasowaatc kaakakiihtaawisiwaatc, kaye iki niyaakacihtoowaatc masina'ikanan, kaye ikiweniwak o'omaa ahkiink kaakakiihtaawihtaakosiwaatc? Aanakiihkakiihtaawisiwaatc iki noonkom pemaatisiwaatc ahkiink, Kishemanitoo otinakintaan ehkakiipaataninik okakiihtaawisiwinini. 21 Wiin aaniihsh Kishemanitoo maawac ehkakiihtaawentank, kaawiin okiihpakitinaahsii' o'o pemaatisinitc wiinawaa ko okakiihtaawisiwiniwaank cioncikihkenimikohpan. Kii'inentam itahsh ewiihpimaaci'aatc i'i ketepwehtaminitc. Okii'aapacihtoon o'o tipaacimowin kaawiintamaakeyaank, i'i ko e'inentamowaatc ehkakiipaataninik o'omaa ahkiink. 22 Coowak (Jews) aaniihsh owii'waapantaanaawaa maamahkaacihcikewinan, mii payesh citepakentamowaatc. Ikihsh kaye Kariihkak (Greeks) onantone'aanaawaa minihk hsa ko kaakakiihtaawaninik. 23 Niinawint itahsh kaawiintamaakeyaank, nintashimaanaan a'a Christ kaakii'ishi akosaka'ikaniwitc aashiteyaahtikonk. O'owe tahsh ehtashintek oshiinkihtaanaawaa iki Coowak, oko tahsh kaye kaaCoowiwihsikwaa okakiipaasihtaanaawaa. 24 Iki tahsh Kishemanitoon kaa-antomikowaatc, kemaa Coowiwaatc kemaa Kariihkiwiwaatc, onihsitohtaanaawaa Christ wiin Kishemanitoon e'omashkawisiimimikotc, kaye Kishemanitoon e'okakiihtaawentamowinikotc. 25 Inashke Kishemanitoonaank aanaishinaakwahkipan kekoon cikakiipatahk, awahshime taakakiihtaawan ahpiihc ininiinaank kaa-ayaamakahk. I'iwehsh e'niinamahk aanaishinaakwahk kekoon Kishemanitoonaank, awahshime mashkawisiimakan ahpiihc ininiinaank keshimashkawisiimakahk kekoon. 26 Niiciotepwehtamook! Maamihkawiyohk aaniin kaakii'inaatisiyek i'i ahpii e'antominek Kishemanitoo. Kaawiin kikiihpaahtiinohsiim kaakakiihtaawisiyek o'omaa ahkiink awiyak kaaishinaakosiwaatc, kaawiin kaye i'iwe kikii'ishiokimaawentaakosihsiim, kaawiin kaye niipiwa' i'iwe nahke kikii'ishikihci-inentaakosihsiim. 27 O'omaa tahsh awiyak ahkiink kaainentamowaatc kakiipaatan kaye niinaman, mii 'oweni Kishemanitoo kaakii'onaapantank cioncitapahsinaatc o'o kaakakiihtaawisinitc kaye kaamashkawaatisinitc. 28 Kaye iniweniwan ahkiink kaatapahsentaakwahkin kaye kaa-aanwaapancikaatekin, kaye kekoonan kaa-ayaamakahsinokin, Kishemanitoo okiihkakiikinaanan, cipoonihsenik itahsh wekonen hsa ko ahkiink kaashikihci-inentaakwaninik. 29 Mii 'owe kaaoncitootank ekaa awiyan pemaatisinitc cimaamiihkwaanitisohsinik imaa Kishemanitoo enaahsamiitc. 30 Mii 'awe Kishemanitoo kaaishihcike'inek cimaaciiwiiciiwek Christ Ciisahs. Okii'ishi'aan Christan mii 'imaa ciayaamakahk kikakiihtaawisiwininaan. Mii 'awe Christ eshicike'inank cikwayahkwakiminank Kishemanitoo, wiin okwayahkwaatisiima' citinowiyank, kaye mii 'awe Christ kaakiihpakitininank i'imaa kaakiihkihciwinikoyank macitootamowin. 31 Mii aaniihsh o'o ehkitoomakahk Kihcimasina'ikan: "Awenen hsa ko kekihci-inentank kekoon, okakihci-inentaan ehta kaatootaminitc kaaTipencikenitc."

1 Kwaarintink 2

1 Niiciotepwehtamook! Ahpii kaahpimiotihsinakook, kikiihpiwiintamawininim i'iwe kaatipaatotenik Kishemanitoo otishihcikewin. Kaawiin 'i ahpii ninkiihkakweaapacihtoohsiinan ehkakaanwaakin ihkitowinan taapishkoo ehkikisiyaan kihcikihkentaahsowin. 2 Aaniihsh ninkii'onentaan kahkina kekoon ciwaniihkenotamaan mekwaa e'wiicitaaminakook, mii ehta 'owe ciwiintamaakeyaan Ciisahs enaacimintc, memintake kaashinipotc aashiteyaahtikonk. 3 Ahpii tahsh e'otihsinakook, ninkii'niinamis, ninkiihkihcinininkishkaa ehpiihcisekisiyaan. 4 Ahpii tahsh ehkakitoyaan, ehkakiihkweyaan kaye, kaawiin ninkiihkakwe inihtaakosihsii cikihcikihkentamaan kekoon cioncikashkimakwaa awiyak. I'imaa tahsh ninkakiihkwewinink kii'waapancikaate ehteahpiihciinitc Kishemanitoo otAhcaahkwan. 5 Mii 'owe wenci-ishihcikeyaan, ekaa wiin ciontinansiwek kitepwehtamowiniwaa onci awiya inini okihkentaahsowinink, i'imaahsh wiin mayaa omashkawisiiwinink Kishemanitoo. 6 Tepwe hsa ko kakiihtaawisiwin nintishikakiihkimaanaanik iki anami'ewaatisiwinink kaamashkawikiwaatc, o'o tahsh kakiihtaawisiwin kaawiin imaa onciimakahsinoon o'omaa noonkom ahkiink, kaawiin kaye oncitipentaakwahsinoon iki kaaniikaanisiihkantamowaatc o'o ahki. Aanawiin e'mashkawisiiwaatc, kaawiin taniayaahsiiwak. 7 I'iwe tahsh ninkakiihkwenotaan i'i Kishemanitoo okakiihtaawisiwin, i'iwe ekaa ininiinaank kekii-inamancikaatehsininik, Kishemanitoo ekiihkaatamaaketc. Niiyaak itahsh cipwaa animaacihsek o'o ahki, kikii'onentamaakonaan okakiihtaawentamowinink keishihcike'inank cionciayaawank kihci-inentaakosiwin. 8 O'o kakiihtaawentamowin kaawiin okiihkihkentansiinaawaa oko kaaniikaanisiihkantamowaatc o'o ahki. Kiishpin kiikihkentamowaahpan, kaawiin otaakii'akosaka'waahsiwaawaan ini kaaTipencikenitc maawac kaakihci-inentaakosinitc. 9 O'owe tahsh ishipii'ikaate: "I'iwe ekaa wiihkaa awiya kaawaapantansik kaye ekaa awiya ekii'oncinoontansik i'iwehsh kaye wiihkaa awiya kaa'inentansik ci-ishiwepahkipan, mii 'i mayaa Kishemanitoo kaakiihkwayaanciihtamawaatc i'i kaasaaki'ikotc." 10 Kiinawint itahsh kikiihkihkentamo'ikonaan Kishemanitoo, ini otAhcaahkwan ekii'waapanta'inank. 'Awe Ahcaahk ocaakikihkentaan kahkina kekoon, ampooshke eshi-ishpaanik Kishemanitoo otinentamowin. 11 Inashke awenen ini kekihkentamaakotc aaniin enentank awiya? Miiwan ehta ini otahcaahkwan kaapapaakikisiinotawaatc okihkentamaakoon. Mii 'i peshikwan Kishemanitoo kaainentank kaawiin pahkaan awiyan okakihkentamaakohsiin. Miiwan ehta ini Kishemanitoo otAhcaahkwan kahkina okihkentamaakoon. 12 I'iwe tahsh inentamowin misiwe kaa-aapacihtoowaatc omaa ahkiink kaapimaatisiwaatc, kaawiin kiinawint i'i kikii'otaahpinansiimin. Kiinawint meshkwac kikii'otaahpinaanaan a'a Ahcaahk kaapi-ishinisha'okotc Kishemanitoon, mii 'awe Ahcaahk kaamiinikooyank cikihkentamowank onoweniwan kaakii'miininank ekiihshaweniminank Kishemanitoo. 13 Iniweniwan hsa ko kaashikakitoyaank, kaawiin wiin nintaapacihtoohsiimin ini kakiihtaawikiishwewinan ininiinaank wencikihkino'ikaatenikin. Ini tahsh Kishemanitoo otAhcaahkwan ninkihkino'amaakonaan ci-ishikakitoyaank, kaye ini kaa-ahcaahkowaninikin nintishipayahtenihsitohtamoonaanaanik iki kaakikishkawaawaatc Kishemanitoon otAhcaahkoni. 14 Awiya tahsh ekaa kaakikishkawaahsik Kishemanitoon otAhcaahkoni, kaawiin okaotaahpinansiinan ini kekoonan i'imaa Ahcaahkonk kaaonciimakaninikin. Aaniihsh otinihtaanan ehkakiipaatentaakwaninikin. Kaawiin kanake onihsitohtansiinan. Mii ehta wiiciiwikotc Kishemanitoon otAhcaahkoni okaoncinihsitohtaan. 15 Miitahsh awiya eyaawaatc Kishemanitoon otAhcaahkoni, wiin okanihsitawentaan kahkina kekoon aaniin eshiayaanik. Kaye kaawiin okanihsitawenimikohsiin awiyan kaakikishkaakohsinik ini Ahcaahkwan. 16 Inashke mii 'owe kaaishipii'ikaatek: "Awenen kehkentamawaatc kaaTipencikenitc aaniin enentaminitc? Awenen kekoon kekihkino'amawaahpan?" ishipii'ikaate. Kiinawint itahsh kitayaawaamin i'i Christ otinentamowin.

1 Kwaarintink 3

1 Niiciotepwehtamook! Weti otaanaank kaakiihpiwaapaminakook, kaawiin i'iwe kikiihteahpiihtaatisihsiim ci-ishikanooninakook taapishkoo kaa-ayaawimek Kishemanitoo otAhcaahkwan. Mii piko ehta taapishkoo kaa-ahkiiwaatisiwaatc kikii'ishikanoonininim, aaniihsh kikii'apinoonciishiwentaakosim i'i ahpii e'maaciipiminisha'wek Christ. 2 Mii ehta coocoohshaapo kikii'mina'ininim, kaawiin iko kaamashkawaak miicim kikii'ahshamihsinooninim, ekaa mahshi ekiihteishiayaahsiwek. Noonkom hsa ko kaa mahshi kitishiayaahsiim. 3 Keyaapi aaniihsh kitishipimaatisim taapishkoo ahkiink kaaishitipentaakosiwaatc. Aaniihsh kiinawaa ko ayaamakan ontenintiwin, ayaanoontiwin, kaawiin ina ishinaakwahsinoon o'o hsa ahkiink e'oncitipentaakosiyek? Kaawiin ina kitinaatisihsiim kaamihciahkiiwaatisiwaatc? 4 I'i peshik ihkitotc: "Niin Pwaal (Paul) nimpiminisha'waa," kaye kotak, "Niin Ahpwaalahs (Apollos) nimpiminisha'waa," ihkitotc, kaawiin ina ininiinaank kitishiayaahsiim? 5 Awenen tahsh a'a Ahpwaalahs? Awenen a'a kaye Pwaal? Niinawint ehta Kishemanitoo otanohkii'aakana' nintinowimin kaa'ontinamek kitepwehtamowiniwaa. Pepahkaan tahsh nintinanohkiimin 'iwe kaashipaminamo'iyamintc a'a kaaTipenciketc. 6 Niinihtam ninkiihkihtikaataanan kihtikaanenhsan, miihsh wiinihtam Ahpwaalahs okiihtihpaapaawatoonan. Wiin itahsh iko Kishemanitoo okii'maaciikihtoonan. 7 Mii hsa 'i kaawiin kekoon inentaakosihsiiwak a'awe kaakihtiketc, a'awe kaye kaatihpaapaawaciketc, a'awehsh ehta Kishemanitoo kihci-inentaakosi e'maaciikihciketc. 8 Kaawiin pepahkaan tainentaakosihsiiwak a'a kaakihtiketc, a'a kaye kaatihpaapaawaciketc: pepeshik okatipa'amaakowaan ini Kishemanitoon aaniiniko eshinaakwaninikin otanohkiiwiniwaan. 9 Niinawint ihsa niwiitanohkiintimin e'anohkawankitc Kishemanitoo. Kiinawaa tahsh wiin Kishemanitoo kaashikihtiketc kitinentaakosim. Kaye hsa kitinentaakosim Kishemanitoo e'oshihtootc waahkaa'ikan. 10 Niin ninkii'ishihcike 'iwe kaaishimiishitc a'a Kishemanitoo. Taapishkoo awiya wawiinke kaanakaciwaahkaa'iketc niin nihtam ninkii'onaahkohsitoon i'imaa keshiwaahkaa'ikaatek. Pahkaan miinawaa awiya wakitaapihk kii'maaciiwaahkaa'ike i'imaa kaakii'ishionaahkohsicikeyaampaan. Tahsopeshik itahsh weweni takakweishimaacii. 11 Kishemanitoo aasha nihtam okii'inahsaan Ciisahs Christan wiin cionaahkohsicikaakaaniwinitc. Kaawiin taapahkaanahsinoon kekoon awiya ci-inahtootc. 12 Iki tahsh o'omaa wakitaapihk kaashiwaahkaa'ikewaatc, aanint osaawishooniyaawahsiniin otishiaapaci'aawaan, kaye waapishkishooniyaawahsiniin, kaye ehkihtakinsonitc ahsinii'. Aanint itahsh kaye mihtikoon, mashkohsiin, kaanoohkashkaninikin otaapacihtoonaawaan. 13 Kahkina tahsh awiya tawaapancikaateni otanohkiiwin. Tawaapanta'iwemakan i'i kiishikan kepiokiishikaamitc a'a Christ. Mii 'iwe ahpii kahkina awiya i'imaa ishkotenk taoncikihkencikaateni aaniin mayaa eshiayaanik otanohkiiwin. 14 I'iwe wakitaapihk kaawaahkaa'ikaatek, kiishpin ishkwaahkitek, tatipa'amawaa 'aweti otanohkii. 15 Caakaahkitenik itahsh awiya otooshihcikewin, mii 'i ciwanihtootc. Wiin ehta tapimaaci'aa. Taapishkoo mekweshkote e'oncipahpiitc taishinaakosi. 16 Kaawiin ina kikihkentansiim maamaw e'inwaanikooyek Kishemanitoo okihcianami'ewikamik? Wiin aaniihsh Kishemanitoo otAhcaahkwan ishitaawan i'imaa kaashimaamawi'itiyek. 17 Kiishpin awiya nihshiwanaacihtamawaatc 'oweni okihcianami'ewikamikoni Kishemanitoon, kaye wiin okanihshiwanaaci'ikoon Kishemanitoon. Aaniihsh inahcikaate ehta Kishemanitoo citipentank okihcianami'ewikamik. Mii 'iwe entinowiyek. 18 Keko wiin awiya tawayeshintisohsii. Kiishpin awiya inenintisotc e'ishikakiihtaawisitc noonkom okoweniwak kaapimaatisiwaatc eshinamowaatc kakiihtaawisiwin, maano ciwepinank i'i kaashikihkentamaasotc. Miihsh i'imaa tepwe cioncinikakiihtaawentank. 19 Iwe aaniihsh omaa ahkiink kaaishinamowaatc cikakiihtaawaninik, mii 'iwe eshinank Kishemanitoo ehkakiipaataninik. Aaniihsh o'owe ishipii'ikaate: "Ikiwe okakiihtaawisiik wiinawaa ko owayeshimiwewiniwaank okashitahsonikowaan Kishemanitoon." 20 Kaye ishipii'ikaate: "KaaTipenciketc okihkentamawaa' onaanaakatawentamowinini ini okakiihtaawisii', ekaa kekoon e'inwaatehsininik." 21 Keko wiin awiya okamamiihkwaatansiin i'iwe kekashkihtootc pemaatisitc. Aasha kahkina kekoon kimiinikoom: 22 Pwaal, Ahpwaalahs, Piitar, o'o noonkom ahkiink kaa-ayaak, pimaatisiwin, nipowin, i'iwe kaye noonkom kaani-ishiwepahk, niikaanaya'ii kaye keishiwepahk, kahkina kekoon kitipentaanaawaa. 23 Kiinawaa tahsh kitipenimikowaa Christ, shikwa Christ wiin Kishemanitoon otipenimikoon.

1 Kwaarintink 4

1 Mii 'iwe keinenimikooyaank e'otanohkii'aakanimiyamintc Christ, ekiihkanawenta'ikooyaank ini kekoonan payesh kaakihkentaakohtootc Kishemanitoo. 2 Shikwa kaye antawentaakosi 'awe kaakanawenta'intc misiwe ko cikehcinaa'entaakositc. 3 Niin itahsh kaawiin niwiinaahpakentansiin kiishpin kekoon ishinaanaakasawaapamiyek nintanohkiiwinink, kaye piko awiya pemaatisitc, aaniin iko keinenimihshitc. Kaawiin niin iko ninaanaakaci'itisohsii. 4 Kaawiin kekoon nintishikihkenintisohsii kekoon ci-ishiayaayaan. Kaawiin tahsh i'imaa oncikihkentaakwahsinoon ehkwayahkohsink nintishiayaawin. KaaTipenciketc mii ehta kekwayahkonihsitawinawitc. 5 Mii 'i kekiinawaa, keko onsaam wiipa anoociko inenimaahkek awiya otishihcikewin cipwaa na'ihsek. Paanimaa ehta takohshink kaaTipenciketc, okapitootaan waahseyaank cimohshenaakwaninik kahkina kekoon, mihsawaako wanitipihkanonk aana kaatoonitc awiyan otishihcikewinini. Kaye okatootaan cimohsheyaapancikaatenik aaniin enentamowaatc awenenak ote'iwaank. Mii 'iwe ahpii kahkina awiya keshiminwaacimikotc Kishemanitoon aaniiniko kaashikashkihtamaasotc. 6 Niiciotepwehtamook, onoweniwan kaapitashintamaan ninkii'awehcikaakenan taapishkoo niinehtawint Ahpwaalahs (Apollos) kaakii'ikooyaank, cioncikihkinawaapamihshinaayaank keshiayaayek, cionsaamihcikehsiwek, i'iwe hsa ehta ko kaaishipii'ikaatek i'i Kihcimasina'ikan. 'Imaa tahsh kaatahshiyek kaawiin awiya taishinaakehsii ini peshik ci-ishpenimaatc kaye kotak citapahsenimaatc, kaawiin kaye ci-ishiaanwaapantiyek. 7 Inashke awenen kaa'ishi'ihk awahshime cikii'inentaakosiyan? Wekonehsh wiin i'i eyaayan wiihkaa kaa'miinikoohsiwan? Kiishpin tahsh tepwe kaa'miinikoowanen kahkina kekoon, aaniin tahsh keoncimamiihkwaasoyan taapishkoo ekii'mihciayaayan? 8 Aasha na kahkina kekoon kitayaam kaa-antawentamek? Aasha na kitewenootisim? Aasha na kitookimaawim keniinawint itahsh ehtinowihsiwaank? Ampehsh tepwe kiikihciokimaawiyekipan, kitaakii'wiiciiwikoom eshiokimaawapiyek. 9 Mii 'owe eshinamaan: niinawint Kishemanitoo otishinisha'waakana' maawac otaanaank mohsheaya'ii ninkii'inahsikonaan. Nintishinaakosimin taapishkoo ikiweniwak nipowinink kaainaahkonikaniwiwaatc ewiihkihtaapamintwaa aaniin keshinihsintwaa. Kahkina misiwehkamik kaatahswenowaatc iki pemaatisiwaatc kaye encalak ninkihtaapamikonaan eshihcike'ikooyaank. 10 Okakiipaatisiik nintinentaakosimin e'anohkawankitc a'a Christ. Kiinawaa tahsh "Ninkakiihtaawentaamin e'wiiciiwinank Christ" kitinentaam. Niinawint nimacentaakosimin, kiinawaa tahsh wiin kitishpentaakosim. 11 Piinihsh hsa ko o'o noonkom nimpapaanoonteskatemin, ninoonteyaapaakwemin, ninoontehkonayemin, kaye nimpahpahkihte'okoomin, ninkwiinawi-ishitaamin, 12 kaye ninihtaa​caakii'itisomin ehkihcianohkiiyaank. Aanawiin e'maciahshotamaakooyaank, aanciko tahsh niinawint "kikashawenimikoom" nintinaanaanik. Ahpii tahsh ahko e'onciihkaakooyaank, ninkakwemashkawentaamin. 13 Miihkinsomikooyaank kaye, aanciko niwaankawimaanaanik. Taapishkoo wepinikanak nintinenimikoomin, maawac iko nintapahsenimikoomin, piinihsh iko noonkom. 14 Kaawiin wiin cimenihshi'ikooyek kitishipii'amawihsinooninim. Taapishkoo niniicaanihsak kiwii'ishikihkino'amawininim. 15 Aaniihsh mitaahcink mitaahswaahk aana tahshiwaatc ehkanawenimaawahswaaninekwaa e'wiiciiwek a'a Christ, peshik ehta kitooyoohsim. Niin hsa kikii'oniicaanihsimininim ekiihpiwiintamawinakook i'i minwaacimowin. Mii 'imaa kaapionciwiiciiwek a'a Christ Ciisahs. 16 Mii 'iwe kaaoncipakohseniminakook cikihkinawaapamiyek. 17 Mii 'iwe nintinanoonaa 'awe Timahti (Timothy) ciantawaapaminek. Mii 'awe ninkosihs kaasaaki'ak, kaakwayahkwentaakositc ehpiminisha'waatc ini kaaTipencikenitc. Mii 'awe kemihkawaasominek aaniin kaaishipiminisha'ikeyaan e'aniwiiciiwak Christ Ciisahs. Kaye kikashiwiintamaakowaa aaniin keniin kaashikihkino'amaakeyaan aanti hsa ko kaaishimaawaci'itiwaatc otanami'aak. 18 Aaninta tahsh kiinawaa aasha kitepakenintisom. Kikii'inenimim ekaa miinawaa wiihkaa cipimawatihsihsinoonakook. 19 Inentank itahsh kaaTipenciketc, piciinak kikapiantawaapamininim. Mii ahpii ketashikihkentamawakwaa oko kaakihtenimowaatc, aaniin i'i tepwe eshimashkawisiiwaatc, kaawiin ehta otihkitowiniwaa. 20 Kaawiin aaniihsh imaa kakitowinink ehta tawaapancikaatehsinini entashikimaawitc Kishemanitoo, imaahsh wiin omashkawisiiwin entashianohkiimakaninik takihkencikaateni. 21 Aaniin tahsh keshiminwentamek cipi-ishiotihsinakook? Pahshanshe'ikan ina ninkapikikis, komaa kaye saaki'iwewinink cipi-ishiminokanooninakook?

1 Kwaarintink 5

1 Aayiintiwin ihsa tahsh pi-inaatote e'ayaamakahk kaashiayaayek, awiya hsa ko e'ishipihshikwaatisitc i'i tino maawac kaamacinaakwahk, ampooshke ikiweniwak kaa-anami'aahsikwaa keishihcikehsikwaapan: mii 'iwe e'ihkitonk awiya 'a peshik e'wiiciiwaatc oteten wiiwini. 2 Aaniihshwiin kaaoncikihtenimoyek! Nawac iitok kitaakii'maanentaam! Nawac taaonishihshin ci-inaahkonikeyekipan ciwiiciiwihsinowekipan a'a kaatootank. 3 Aanawiin itahsh waahsa ontentiyaan, kiwiiciiwininim nintinentamowinink, kaye taapishkoo e'wiiciiwinakook, aasha kiTipencikeminaan Ciisahs owiinsowinink ninkii'onahshowaanaa 'awe inini o'o e'maaninaakwaninik kaahtootank. 4 Ahpiihsh e'maawaci'itiyek kikawiiciiwininim nintinentamowinink, kaye kikawiiciiwikomin omashkawisiiwin a'a kiTipencikeminaan Ciisahs. 5 Miihsh 'i ahpii kikashipakitinamawaawaa a'a Setan (Satan) citootawaatc ono ininiwan cioncinihshiwanaataninik wiiyawini. Mii 'owe citootawek a'a inini cipimaatisitc otahcaahkonk paanimaa piokiishikaamitc kaaTipenciketc. 6 Kaawiin onishihshinsinoon cimamiihkwaanitisoyekipan. Kikihkentaam o'owe e'nihtaaihkitonk: "Pankii ahcikaatek i'i ompisikanenhs, misiwe kihcipahkweshikan ishiompishkaa ehkiishisotc." 7 Taapishkoo ompisikanenhsink inentaakwan i'i maci-ishiwepisiwin, mii 'i onciwepinamok i'i kaakiihpiaapacihtooyek ompisikanenhs, misiwe cipehkaatisiyek, taapishkoo oshkipahkweshikanink ci-inentaakosiyek ekaa e'ayaahsinok i'i ompisikanenhs. Aaniihsh mii 'iwe aasha entinowiyek. Aasha kiihkiishihcikaate kiinawint keshiwiihkwantiyank, aasha Christ ekiihpakitinaahswaaniwitc, kimaanahcaanihshenhsiminaan e'inentaakositc tino kaanihsintc ehPimaaci'ikoowi​Wiihkwantinaaniwank. 8 Miitahsh o'o keishinaakosiyank taapishkoo e'ishiwiihkwantiyank ompisikanenhs e'ayaahsinok. Kaawiin miinawaa maci-inentamowin, macihcikewin kika-aapacihtoohsiimin, otaanaank kaakiihpi-inaatisiyank. Kwayahkoinentamowin, kwayahkohcikewin kika-aapacihtoomin, taapishkoo e'amontc a'a pahkweshikan e'ompisikaniwihsik. 9 Pahkaan i'i ahpii ekii'oshipii'amawinakook: "Keko wiici'aahkekwaanik awiyak kaapihshikwaatisiwaatc," kikii'inininim. 10 Kaawiin wiin i'i nintihkitohsii iki kaa-anami'aahsikwaa cimanaawiiciiwekwaa, kiishpin pihshikwaatisiwaatc kaye e'ayoonsaamisiwaatc kaye ehkimootishkiwaatc kaye e'manitoohkewaatc. Kaawiin kitaa pooniwaapamaahsiwaawaak iki tino 'omaa ahkiink ayaayek. 11 I'iwehsh kaaishipii'amaan, awiya kaaitisotc ciowiicishaanimintc anami'aawinink, pihshikwaatisitc itahsh kemaa ayoonsaamisitc kemaa kaye manitoohketc, tashimiwetc, nihtaakiiwashkwepiitc, mahkantwetc: keko 'awe wiici'aahkek. Ampooshke kaawiin kitaa wiiciwiihsiniimaahsiwaawaa a'a tino. 12 - 13 Inashke kaawiin niin nintoopapaamisiwinihsii cionahshowaanakwaa kaawiici​tipentaakosiimihsinoowankwaa. Wiin ohsha okaonahshowaanaa' 'awe Kishemanitoo. Kiinawaa tahsh wiin kitaa onahshowaanaawaak iki kaawiici​tipentaakosiimekwaa. Mii 'iwe kaaoshipii'ikaatek: "A'awe kaanihtaa macihciketc, inkoci ishinisha'ohk!"

1 Kwaarintink 6

1 Kiishpin awiya ontenintiwaatc e'ayaayek, kaawiin ina taashaakwenimohsii awiya ciahsaatc owiiciotepwehtamoon i'imaa tipaahkonitiwinink kaashionaahkoniwenitc awiya' ekaa kaa-anami'aahsinik? Kaawiin ina taakii'nana'ahtamaasohsiiwak e'wiici'ikowaatc Kishemanitoo okwayahkwaatisiima'? 2 Kaawiin ina kikihkentansiim Kishemanitoo okwayahkwaatisiima' cionahshowaanaanitc kahkina ahkiink kaa-ayaanitc? Kiishpin tepwe awiyak keonahshowaanekwaa kahkina ahkiink kaa-ayaawaatc, kaawiin ina kiteahpiihtentaakosihsiim kekoon kaa-akaahsentaakwahk cinana'ihsitooyek? 3 Kaawiin ina kikihkentansiim kiinawint inkotink cionahshowaanankwaa encalak? Mii 'i awahshime keshikashkihtooyek onoweniwan noonkom pimaatisiwinink citeonahshowaatamank! 4 Kiishpin kiinipasikwiimakahk o'o tino, kitaainahsaawaak ina iki ekaa kanake kaainentaakosihsikwaa eshimaawaci'itiyek, wiinawaa cikakwe nana'ihsitoowaatc? 5 'Owe kitishikanoonininim cimenihshentamek. Kehcinaac peshik taakii'ayaa kaatahshiyek e'ishiayaankwaamisitc cinana'ihsitamawaatc wiiciotanami'aa' kekoonan eshiontenitinitc. 6 Aanciko pahkaan kitishihcikem, peshik i'imaa tipaahkonitiwinink e'ahsaatc wiiciotepwehtamoon, ekaa kaatepwehtansinik e'anoonaatc cinana'ihsitoonitc. 7 I'imaa ohsha oncikihkentaakwan aasha ekii'wanihcikeyek, ahpii e'ontenintiyek, e'onaahkonitiyek. Kaawiin ina awahshime taakii'onishihshinsinoon aana maashitootawintc awiya cinanaahkwiihsik? Kaawiin ina taakii'onishihshinsinoon aana wayeshimikotc awiyan ekaa cimaanaahkonaahsik? 8 Aanciko meshkwac kitootaam e'maashitootaakeyek, e'wayeshinkeyek, ampooshke kiwiiciotepwehtamoomiwaak ehtootawekwaa. 9 Kehcinaac kitaa kihkentaam: iki kaamaci-ishiwepisiwaatc kaawiin ta-ayaahsiiwak i'imaa entashitipencikenitc Kishemanitoon. Keko kekoon kikawanihshimikohsiim: kaawiin oko tamiinaahsiiwak Kishemanitoon oTipencikewinini: iki kaapihshikwaatisiwaatc, kaye kaamanitoohkewaatc, kaye awiya kaakiimoociwiiciiwaatc pahkaan awiyan owiitikemaakanini, kaye ininiwak kaaihkwehshihtoowaatc, kaye kaawiicipihshikwaacihkotaatiwaatc iki ininiwak, 10 shikwa kaakimootishkiwaatc, kaaonsaamisiwaatc, kaanihtaa minihkwewaatc, kaatashimiwewaatc, kaawanihcike'iwewaatc kaye. Kahkina oko tino kaawiin tamiinaahsiiwak Kishemanitoon otipencikewinini. 11 Aanint hsa kiinawaa o'o kikiihtinowim. Aasha tahsh kikii'anta pehkaapaawanikoom, aasha kikii'onahsikoom Kishemanitoo citipeniminek, aasha kikii'ishihcike'ikoom cikwayahkwakiminek Kishemanitoo. KaaTipenciketc Ciisahs Christ owiinsowinink kaa'ishihcike'inek kaye iniwe otAhcaahkwan kiKishemanitoominaan. 12 O'owe maawiin awiya taihkito: "Kahkina kekoon nintawinamaakoo citootamaan." Eha', kaawiin itahsh kahkina kikaminoshkaakohsiin ehtootaman. Kaye niin nintaakii'ihkit kahkina kekoon ehtawinamaakooyaan citootamaan. Kaawiin itahsh kekoon nintaa pakitinamawaatansiin citipenimikoyaampaan. 13 Kaye ihkitom: "Mii 'i wencikwayaantahtek i'i miicim cimiicinaakaatek, mii 'i enwaatek omihsataamaa cionciwiihsinink." Eha', nintihkit, ninkotink itahsh Kishemanitoo mincikahkina okakipihtinaanan miicim kaye omihsataamaa. Kaawiin ohsha 'iwe kii'onci inahcikaatehsinoon i'i wiiyawimaa cipihshikwaatisiwiniwank, i'ihsh wiin kaaTipenciketc cianohkaakotc. Kaye kaaTipenciketc wiin otoonciihtamawaataan i'i wiiyawimaa. 14 Kaye Kishemanitoo okiihkiiwepimaatisi'aan ini kaaTipencikenitc kaakii'niponitc. Kaye kiinawint tipinawe omashkawisiiwinink kikaonci kiiwepimaatisii'ikonaan. 15 Kaawiin ina kikihkentansiim kiwiiyawiwaan e'opahkewisiwinitc Christ? Nintaaotaahpinamawaan ina Christ opahkewisiwin ciaantahtamawak opihshikwaatisiihkwen ciopahkewisiwininitc? Kaawiin 'iwe ci-ishinaakwahkipan! 16 Kaawiin ina kikihkentansiim? Awenen hsa ko kaawiiciiwaatc opihshikwaatisiihkwen, inentaakwan cipeshikowiiyaahsewaatc. Aaniihsh Kishemanitoo kii'ihkito kihcioshipii'ikewinink: "Iki kaaniishiwaatc cipeshiko​wiiyawiwaatc." 17 Awiya tahsh kaawiiciiwaatc kaaTipencikenitc, peshikwentaakosiwak i'imaa ahcaahkonk. 18 Mooshak maaciipa'iwaatamohk pihshikwaatisiwin. Kahkina hsa ko 'iwe macitootamowin kaatootank awiya, mii hsa 'iwe saakici nahke wiiyawink kaainentaakwahk. A'awehsh pihshikwaatisiwin kaatootank owanitootaan tipinawe owiiyaw. 19 Kaawiin ina kikihkentansiim kiwiiyawiwaan e'otanami'ewikamikominitc Kishemanitoo otAhcaahkwan kaakikishkawinek, Kishemanitoo kaa'miininek? Kaawiin kiinawaa tipinawe kitipenintisohsiim. 20 Aaniihsh kikiihtipa'okowaa Kishemanitoo, wiin ekii'ahtootc tipa'ikewin. Mii 'iwe inaapacihtaawaahk kiwiiyawiwaan cionci kihci-inentaako'ek Kishemanitoo.

1 Kwaarintink 7

1 Shikwa ninkanahkwehtaanan ini kekoonan kaakiihpioshipii'amawiyek. Onishihshin a'a inini pisaaniko wiihkaa e'otaahpinaahsik ihkwewan. 2 Paahtiinatin itahsh pihshikwaatisiwin e'ayaak, maano kahkina 'awe inini okatipenimaan tipinawe wiiwan. Miinawaa a'awe ihkwe citipinawewisitc onaapeman. 3 A'awe inini mii 'i citipitootank i'i kaainentaakositc e'wiiwitc cinana'entami'aatc, kayehsh awe ihkwe okanana'entami'aan onaapeman. 4 A'awe ihkwe kaawiin wiinehta otipentansiin owiiyaw, wiin tahsh kaye onaapeman otipentamini. Peshikwan a'awe inini kaawiin wiinehta otipentansiin owiiyaw. Inihsh kaye wiiwan otipentamini. 5 Keko wiin waniihkenotawaahken kiwiitikemaakan, paanimaa ehta kiikanoonitiyek nahkontiyek, cikakwe teishihsek eshipehpeshikoyek cikanoonek Kishemanitoo. Miihsh i'i miinawaa ciwiiciintiyek. Mii 'i ekaa cioncikashki'ihsinowek a'a Setan (Satan) kiniinamisiwiniwaank. 6 Kaawiin wiin ci-inaahkonikeyaan kahkina awiya ciwiitikehpan. Kimihciwiintamawininim itahsh ketootamekipan. 7 Ampehsh kahkina awiya ishiayaawaahpan niin kaashiayaayaan e'wiitikehsiwaan. Entahshitc itahsh awiya mayaa otayaan omiinikoowisiwin, entahsopehpeshik otishimiinikoon Kishemanitoon otishi'ikoowin. 8 O'o hsa tahsh nintinaak iki kaamihcipehpeshikowaatc kaye okiiwaatisiik: taaonishihshin ahpane hsa ko ci-ishipehpeshikoyekipan taapishkoo keniin kaaishiayaayaan. 9 Kiishpin wiin kashkihtoohsiwek cikanawenintisoyek, mii 'i pisaan ciniwiitikeyek. Nawac onishihshin awiya ciwiitikehpan, ahpiihc wiin cikakwaataki'ikohpan i'i omihsawentamowin. 10 Kiinawaa tahsh kaawiitikentiyek kitishiwiintamawininim o'o inaahkonikewin – kaawiin niin o'owe nintihkitowin, a'awehsh kaaTipenciketc: kaawiin okanakanaahsiin a'a ihkwe onaapeman, kitikoom. 11 Kiishpin tahsh nakanaatc, mii 'iwe cipapeshikotc, kemaa miinawaa cikiiwenotawaatc onaapeman. Awiya kaye wiiwitc kaawiin okawepinaahsiin. 12 Miinawaa iki pehkaanisiwaatc niin o'owe nintinaak – kaawiin wiin kaaTipenciketc mayaa okii'wiintansiin: a'a otepwehtamo ayaawaatc ehtepwehtansinik wiiwan, kiishpin inentaminitc pisaaniko ciwiiciiwikotc, kaawiin okawepinaahsiin ini wiiwan. 13 Kaye a'a ihkwe kaaishionaapemitc ekaa ehtepwehtansinik, kiishpin inentaminitc ciwiiciiwikotc, kaawiin otaawepinaahsiin. 14 Inashke aaniihsh a'awe onaapemimaa kaatepwehtansik, kaye wiin inentaakosi ehtipenimikotc Kishemanitoon e'wiiwitc ihkwewan e'otepwehtamowininitc. Shikwa kaye ihkwe kaaotepwehtamowinihsik, onaapemitc itahsh otepwehtamoon, kaye wiin inentaakosi ehtipenimikotc Kishemanitoon. Inashke kiishpin o'owe ishihsehsinokipan, iki oniicaanihsimaak taapishkoo taainentaakosiwak ehtipenimikohsikwaa Kishemanitoon. Ishihse hsa ko, mii 'i wenci-inentaakosiwaatc kewiinawaa ehtipenimikowaatc Kishemanitoon. 15 Kiishpin itahsh kaatepwehtansik wiinakanaatc ini wiitikemaakanan kaatepwehtaminitc, pisaaniko tamaacaa. Kiishpin o'owe ishihsek, a'awe kaanakanintc ishipakitinaa aaniiniko ci-ishihciketc, aaniiniko a'awe kemaa inini, kemaa ihkwe. Aaniihsh Kishemanitoo kikii'ishiantomikonaan misiwe ko cikakwe minowiiciintiyank. 16 Kiin otepwehtamoohkwe, aanti keoncikihkentamampan cipimaaci'atc kinaapem? Kaye kiin onaapemimaa, aanti keoncikihkentamampan cipimaaci'atc kiwiiw? 17 O'owe tahsh wiin kitikoom: entahshitc awiya tani-ishipimaatisi kaaishimiinikotc kaaTipencikenitc, kaye kaakii'ishiayaahpan ahpii kii'antomikotc ini Kishemanitoon. Mii 'owe niin kaaishionakintamaan misiwe entashianami'aank. 18 Awiya inini aasha kaakiih kihkinawaatashakeshontc kiiantomikotc Kishemanitoon, kaawiin otaakakwe aancihtoohsiin okihkinawaacishokoowin. Awehsh kaye inini ekaa mahshi ehkihkinawaatashakeshwaahsiwintc ahpii e'antomintc, kaawiin memwehc taakihkinawaatashakeshwaahsii. 19 Kaawiin inkotano inentaakwahsinoon kemaa ehkihkinawaatashakeshontc inini kemaa cikihkinawaatashakeshwaahsiwintc. Mii 'iwe kaakihci-inentaakwahk: awiya cina'ihtankipan Kishemanitoon otinaahkonikewinini. 20 Kahkina awiya peshikwan taishiayaa otishi'ikoowinink kaakii'ishiayaatc ahpii kaa'antomintc. 21 Kiin ina kikii'anohkii'aakaniw ahpii kii'antomikooyan? Keko wiin i'i papaapisiskentanken. Kiishpin itahsh ishihsek cipakitinikooyan, mii 'i otaahpinan. 22 Awiya hsa ko anohkii'aakan ehtinowitc ahpii kiiantomikotc kaaTipencikenitc, kaaTipenciketc otaapa'waakanan inentaakosi. Peshikwan itahsh awiya kaa-awahkaaniwihsik ahpii kiiantomikotc Christan, noonkom itahsh otootanohkii'akanimikoon ini Christan. 23 Kishemanitoo kikiihtipa'okowaa citipeniminek. Kaawiin kikatipenimikohsiiwaak ininiwak. 24 Niiciotepwehtamook! Kahkina awiya peshikwan otaa-ani-ishiwiiciiwaan ini Kishemanitoon taapishkoo kaakii'ishiayaatc ahpii kaa'antomikotc. 25 Shikwa kaa'ishikakwecimiyek aaniin keishihcikewaatc oshki-ihkwewak mahshi kaapapaamenimaahsiwintwaa. Kaawiin nintayaawaahsiin amanc kaainaahkonikekopanen kaaTipenciketc. Kiwiintamawininim itahsh niin enentamaan. KaaTipenciketc oshawencikewinink nintoonci-inentaakos citepweyenimikooyaan. 26 Mekwaa hsa ko noonkom mikoshkaaci'iwewin e'ayaamakahk, nintinentam e'onishihshink awiya peshikwan​iko ci-ishiayaahpan. 27 Kiwiiw ina? Kaawiin kitaakakwe pahkewinaahsii. Keyaapi na kipapeshik? kaawiin kitaa-antone'waahsii kewiiwiyan. 28 Kiishpin itahsh maano aniwiiwiyan, kaawiin i'imaa kitishiwanitootansii. Kiishpin kaye oshki-ihkwe wiitiketc, kaawiin kewiin wanitootansii. Nawac itahsh nintaaminwentam cikihciwininakook cianimekwaashkansiwek i'iwe sanakisiwin kaaniotihtamowaatc owiitikek. 29 Mii 'owe etamaan, niiciotepwehtamook! Kaawiin keyaapi kinwesh tatawaahsinoon. Mii 'omaa ahkonaak ikiweniwak kaawiiwiwaatc taishipimaatisiwak taapishkoo e'ontami'ikohsikwaa wiiwiwaa'. 30 Ikihsh kaye kaamawiwaatc ekaa cinaa'ikohsikwaa kashkentamowin. Ikiwehsh kaye kaaciihkentamowaatc ekaa ciontami'ikohsikwaa 'iwe kaaonciminwentamowaatc. Iki tahsh kaye kaa-ataawewaatc kekoonan kaawiin otaaonsaamentansiinaawaa, taapishkoo ehtipentansikwaa kekoon taainentamook. 31 Ikiweniwak kaye ahkiiwi​kekoonan kaa-anohkaatamowaatc, kaawiin otaaonsaamiihkansiinaawaa. O'owe aaniihsh kaaishinaakwahk o'o ahki, kaawiin kinwesh taniayaamakahsinoon. 32 Kinantawenimininim ekaa mikoshkaatentamowin ciayaahsiwek. Mahshi awiya e'wiitikehsik otayaankwaamentaan kaainentaminitc ini kaaTipencikenitc, aaniin keishina'entami'aatc. 33 A'awe hsa kaawiitiketc kaye opimentaan ahkiiwi​anohkiiwin, ewiihkakwe nana'entami'aatc ini wiiwan, 34 mii 'iwe kaa-aayaashawentank. Shikwa kaye 'awe kaaonaapemihsik kemaa kaye kihcioshkiniikihkwe nawac otayaankwaamentamawaan kaaTipencikenitc otishianohkiiwinini, misiwe ewiihpakitinitisohkantawaatc wiiyawink kaye otahcaahkonk. A'a tahsh wiin kaaonaapemitc otayaankwaamentaan ahkiiwi​anohkiiwin ewii'nana'entami'aatc onaapeman. 35 Kiwiihkakwe wiici'ininim 'iwe kaaonci-ihkitoyaan. Kaawiin kiwii'mihci​onci'ihsinooninim, i'iwehsh kaakwayahkonaakwahk citootamek kaye misiwe cianohkawek kaaTipenciketc, ekaa pahkaan kekoon ciontamentami'ikohsiwek. 36 Shikwa awiya otaanihsitc e'oshkiniikihkwewinitc, kiishpin enentank ehkwayahkonaakwahsininik kaatootawaatc e'wiitike'aahsik aasha ehtetahsopipoonwenitc cikii'wiitikenihpan, kiishpin ishiantawentaakwahk, pisaaniko okatootawaan eshiantawentank: okawiitike'aan. Kaawiin wani-ishihcikehsii e'wiitike'aatc. 37 Awiya tahsh e'aayiitentank ekaa ciwiitike'aahsik ini oshkiniikihkwen, wiin iko e'ayinentank, ekaa awiya e'ishi'ikohsik, kaye wiin ehkashkihtootc eshiantawentank, mii 'i cionishihshininik e'wiitike'aahsik. 38 Mii hsa ko minotootam a'awe kaawiitike'aatc ini oshkiniikihkwen. A'awe tahsh kawiitike'aahsik nawac taminotootam. 39 Shikwa 'awe ihkwe kaaonaapemitc inentaakosi 'imaa ciayayaatc ini onaapeman keahkopimaatisinitc. Kiishpin niponitc onaapeman, mii 'i ehpakitinintc piko awiyan miinawaa cionaapemitc eshiantawenimaatc. Mii ehta otepwehtamoon ciwiitikemaatc. 40 Nawac itahsh taminwentam peshikwan​iko ci-ishiayaahpan. Mii 'iwe niin enentamaan. Nintinentam itahsh keniin wencikiikitoyaan ehkikishkawimak Kishemanitoo otAhcaahkwan.

1 Kwaarintink 8

1 Shikwa 'iwe kaakii'ishipii'amawiyek, aaniin enentaakwahk i'i miicim ehpakitinamawintwaa manitoohkaanak: tepwemakan o'owe ihkitowinenhs: "Kahkina kitayaamin kihkentamowin." 'Owe tahsh ishikihkentamowin okihtenimo'ikon awiya e'ayaatc. A'awe tahsh saaki'itiwin kaa-aapacihtootc, okakwe mashkawiki'aan owiiciotepwehtamoon. 2 Awiya "ninkihkentaan kekoon" kaainentank, kaawiin hsa tepwe kekoon otekihkentansiin i'i kaaishiantawentaakositc. 3 Awiya tahsh kaasaaki'aatc Kishemanitoon, okihkenimikoon. 4 I'iwehsh miinawaa enentaakwahk e'miicinaakaatek kekoon kaakiihpakitinamawintwaa manitoohkaanak: kikihkentaamin i'iwe eshiaapatisitc manitoohkaan. Kaawiin tepwe ayaahsii awiya. Kikihkenimaanaan peshik ehta e'ayaatc Kishemanitoo. 5 Aanawiin e'ayaawaatc manitook kaainintwaa kiishikonk kemaa ahkiink ehtanentaakosiwaatc, kaye aana paahtiinowaatc manitook kaye otipencikek kaainintwaa, 6 kiinawint itahsh peshik ehta ayaa Kishemanitoo, mii 'awe Kaaoyoohsimintc, kahkina kekoon kaakii'oshihtootc. Kaye wiin kitooncipimaatisimin cianohkiihtawank. Shikwa kaye peshik ehta ayaa kaaTipenciketc, mii 'awe Ciisahs Christ. Mii ohsha 'awe kahkina kekoon kaakii'onciimakahk kaakii'oshihcikaatek, shikwa wiin a'awe kipimaatisiwininaan kaaonciimakahk. 7 Kaawiin tahsh kahkina awiya otayaahsiin o'o kihkentamowin. Aaniihsh aaninta awiyak onanamaayaapantaanaawaa manitoohkewin, piinihsh​iko noonkom awiya e'miicitc kekoon, mii 'i eshinank tepwe ehtipentaminitc ini manitoohkaanan. Miitahsh ehkwayahkwenintisohsik kaaoncimaanenintisotc i'i ekii'miicitc. 8 I'iwe tahsh miicim eshiaapacihtooyank, kaawiin o'owe kitishi'ikohsiimin awahshime ciminowiiciiwank Kishemanitoo. Kiishpin manaamiiciyank kaawiin i'imaa awahshime kikatapahsentaakosihsiimin. Shikwa miiciyank kaawiin awahshime kikaminoishiwepisihsiimin. 9 Kiinawaa tahsh aanawiin ehpakitinikooyek aaniiniko eshiantawentamek, ayaankwaamisiyohk! Maakishaa kekoon ehtootamek taakii'onci pisokehshin awiya tino kaamashkawitepwehtansik. 10 Kiin kitayaan i'iwe kihkentamowin, pahkaan itahsh awiya kaakwayahkwentansik i'i otishihcikewin, kiishpin e'waapamihk i'imaa manitoohkewikamikonk ehtashiwiihsiniyan, kaye wiin maawiin tainentam pisaan iko 'imaa ciontancikehpan i'iwe kaakiihpakitinamawimintc manitoohkaana'? 11 Miitahsh i'i cioncinihshiwanaaci'ikotc a'a kiwiiciotepwehtamo e'niinamisitc, onsaam iko ekii'naakohtooyan kikihkentamowin. Mii ohsha 'awe peshik kaakii'nipoohtamaakotc Christan. 12 O'owe tahsh ishihcikeyekipan, kitaawanitootawaawaa Christ, aaniihsh kitishiwanitootawaawaak kiwiiciotepwehtamoomiwaak, e'wahke-maanenintisowaatc ehkwayahkwentansikwaa otishihcikewiniwaa, e'ishimaanihse'ekwaa. 13 Mii 'owe niin enentamaan: kiishpin awiya macitootamo'ikotc i'iwe kaamiicinaatek, nintaainentam wiihkaa miinawaa wiiyaahs cimiicihsiwaampaan, ekaa cipankihshimaahsiwakipan a'a niiciotepwehtamo.

1 Kwaarintink 9

1 Kaawiin ina nintipenintisohsii? Kaawiin ina nintishinisha'waakanimikoohsii? Kaawiin ina niin ninkii'waapamaahsii 'awe Ciisahs Christ kaaTipeniminank? Kaawiin ina kiinawaa kaaoncitepwehtamek e'anohkiihtawak kaaTipenciketc? 2 Aanawiin pahkaan awiya ishiotaahpinihsikwaa ci-ishinisha'waakaniwiyaan, kiinawaa eniwehk kitinenimim, aaniihsh kiinawaa kaaTipenciketc e'wiiciiwek oncikihkencikaate e'ishinisha'waakaniwiyaan. 3 Ahpii hko ehkakwe naanaakaci'iwaatc awiyak, amii 'owe eshinahkwehtamaan: 4 Kaawiin ina nintinakinsohsii o'o kaashianohkiihtamaakeyaan cionciahshamikooyaampaan? 5 Kaawiin ina niin nintinakinsohsii cinaapihcikeyaan kaatootamowaatc iki kotak ishinisha'waakanak kaye kaaTipenciketc wiicihkiweya', kaye wiin Piitar (Peter) kaatootank? Kaawiin ina kaye niin peshikwan nintaapapaami wiiciiwaahsiipan otepwehtamoohkwe wiiwiyaampaan kewiin ciahshamintipan? 6 Komaa niinawint ehta Paarnapahs (Barnabas) intawaa e'anohkiihtamaasoyaank ciahshantisoyaank? 7 Awenen tipinawe keontaaci'itisohpan ehshimaakanihshiiwitc? Awenen a'a kihtikewinini keamoominehsikipan tipinawe oshoominikihtikewinink? Awenen a'awe okanawimaanahcaanihshiwe keaapacihtoohsikipan i'i coocoohshaapooni wiin i'imaa e'ontinank omaanahcaanihshimink? 8 Kaawiin wiin memwehc ininiinaank ninkaontinansiin ihkitowin. Aaniihsh peshikwan ihkitoomakan kehteinaahkonikewin. 9 Mii 'iwe eshipii'ikaatenik Moosihs (Moses) otInaahkonikewin: "Keko kipitoonehpinaahken a'a pishihki ehpawishkawaatc pahkweshikanan," ihkitoomakan. Kaa maawiin mayaa pishihkiwa' ehsaaki'aatc kaaonci-ihkitotc Kishemanitoo. 10 Kaawiin ina tepwe kiinawint kaakii'onci-ihkitotc? Kehcinaac kiinawint kii'oncioshipii'ikaate. Inashkehsh awe kihtikewinini kaapikishkahkamikipiciketc, kaye piinihsh awe kaapawishkiketc, kahkina kekoon taishianohkiiwak ehpiihtoowaatc i'i ahpii keontancikewaatc. 11 Inashke niinawint i'iwe kaa-ahcaahkwentaakwahk ninkiihkihtikaataamin i'imaa kaashiayaayek. Onsaam ina kitaa​sanakentaam pimanishikeyaankipan kitahkiiwi kekoonimiwaan ciwiici'ikoyaankipan? 12 Pehkaanisiwaatc o'owe ishitipeniminekwaa, kaawiin ina niinawint nawac nintinentaakosihsiimin? Kaawiin itahsh niinawint i'iwe ninkii'aapacihtoohsiimin. Maano tahsh ninkii'inentaamin kahkina kekoon cipimiwitooyaank, ekaa kekoon cikipishkansiwaank iwe ominwaacimowin Christ. 13 Kehcinaac kikihkentaanaawaatok, awiyak Kihcianami'ewikamikonk kaatananohkiiwaatc, i'imaa ontancikewak. Iki tahsh kaye kaapaminamowaatc kaaishipakitinikenk, pahkwenamawaawak pakitinikewinink cionciwiihsiniwaatc. 14 Mii ko peshikwan kaaTipenciketc okii'inahtoon i'iweniwa' kaawiintamaakenitc i'i minwaacimowin i'imaa ciontaatisinihpan. 15 Onoweniwan itahsh kaainahtekin, kaawiin niin ninkii'aapacihtoohsiinan. Kaawiin kaye noonkom nintoonci-ishipii'ansiin ciotaahpinamaasoyaan o'o kaainahtek ciwiici'ikoyaan. Nawac nintaanip ahpiihc awiya "anihshaa ihkito" ci-ishihpan o'o kaashikihci-inentamaan. 16 Aanawiin i'i e'minwaacimoyaan, kaawiin nintayaahsiin keoncimamiihkwaasoyaampaan. Inashke nintahpiihci antawenimikoo mii 'iwe citootamaan i'i kaaikooyaan. Takohtaanentaakwan i'i keishihseyaampaan wiintamaakehsiwaan minwaacimowin. 17 Ishianohkiiyaampaan niin iko kaashionentamaan taapishkoo anohkiiwin e'otaahpinamaan, nintaainentam ciontisiyaan. O'owe tahsh kaatootamaan ninantawentaakos. Aaniihsh ninkii'opapaamisiwini'ik Kishemanitoo. 18 Wekonen itahsh i'i ketipa'amaakooyaan? Mii 'iwe maanikooyaan, ciwiintamaakeyaan i'i minwaacimowin, kekoon e'ontisihsiwaan, kaye hsa ko e'aapacihtoohsiwaan niwiici'ikoowin kaainahtamaakooyaan, 'iwe minwaacimowin ehpapaamisiinotamaan keoncimiinikooyaampaan. 19 Kaawiin awiya inini nintipenimikohsii. Nintishi'itis itahsh kahkina awiyak ciotanohkii'aakanimiwaatc, amii 'iwe awahshime niipiwa' cikashki'akwaa citepwehtamowaatc. 20 Mekwaa e'wiiciiwakwaa Coowak, mii 'iwe nintishipimaatis ci-ishikashki'akwaa. Aanawiin niin Moosihs (Moses) otInaahkonikewin ehtipenimikohsiwaan, kaye niin nintishipimaatis cikashki'akwaa kaatipenimikowaatc. 21 Shikwa peshikwan iki kaa-aapacihtoohsikwaa Coowa' otinaahkonikewinini, wiiciiwakwaa, keniin nintishipimaatis, ekaa keniin e'aapacihtoohsiwaan i'i inaahkonikewin, mii 'i nawac cikashki'akwaa. Kaawiin nintihkitohsii ehkanawentansiwaan Kishemanitoo otinaahkonikewin, aaniihsh a'a Christ nintipenimikowaan otinaahkonikewin. 22 Kaye awiyak kaawahkewisiwaatc otepwehtamowiniwaank wiiciiwakwaa, kaye niin nintaapacihtamawaak otishiayaawiniwaa, mii 'iwe ci-ishikashki'akwaa. Aaniin​iko ninkakwetinowi'itis kahkina awiyak kaatinowiwaatc, aaninta hsa ko cipimaaci'akwaa. Wekonen iko nintootaan keoncikashkihcikeyaan. 23 Kahkina kekoon nintishihcike cipapaawiintek i'i minwaacimowin, kaye niin i'imaa citako shawentaakosiyaan. 24 Kehcinaac kikihkentaanaawaa wiihkakwecihkanitink, niipiwa' awiya wiici'iwewak e'maaciipa'itiwaatc. Peshik itahsh ehta tapahkinaake citipa'amawintc. Mii 'iwe kiinawaa kwayahk kakwepimipahtook cipahkinaakeyek. 25 Shikwa kahkina kaakakwecihkashiwetc, mekwaa e'oshiihtaa'itisotc, weweni ko naakacihtamaaso; mii paanimaa kiipahkinaaketc cimiinintc opahkinaakewaanohkwaan wiipa kenihshiwanaataninik. Kiinawint itahsh kikamiinikoomin peshik wiihkaa kenihshiwanaatahsinok. 26 Mii 'iwe niin kaaoncikwayahkopahtooyaan weti ciniikaaniocihcihseyaan. Taapishkoo kaye nintishiayaa ehkakwetakaneyaan. Kaawiin anihshaa nimihcipapanakanehsii. 27 Miitahsh kaaoncipahpahkihte'amaan i'i niwiiyaw cikashkihtooyaan misiwe ci-ishitipentamaan. Kiishpin i'i ishihcikehsiwaan maakishaa "kinoontehse" nintaaikoo, aanawiin pehkaanisiwaatc ekii'antomakwaa cikakwecihkashiwewaatc.

1 Kwaarintink 10

1 Niiciotepwehtamook! Mooshak kitaamaamihkawim ikiweniwak kaakiihpi-inaatisiwaakopanen kikehteaya'aaminaapaniik kaakiihpiminisha'waawaatc ini Moosihsoon (Moses) shiipaa wahkwiink ekii'aniayaawaatc ekiihtapinawishkaakowaatc, kaye ekiinishaaposhkamowaatc i'i kihcikam. 2 I'i wahkwi ekii'aakawakootenik kaye 'iwe kihcikam ekiihshaapooshkamowaatc, mii kaainentaakwahk ekiihsiika'antaasowaatc Moosihsink cionci​tipentaakosiwaatc. 3 Shikwa kahkina peshikwan kaa-ahcaahkowank miicim kii'ishiwiihsiniwak. 4 Kaye kahkina peshikwan kii'ishiminihkwewak e'ahcaahkowaninik minihkwewin. Kii'onciminihkwewak 'imaa e'ahcaahkwentaakositc kihtaapihkonk kaapimiwiiciiwikowaatc, amii 'awe kihtaapihk Christ e'aawitc. 5 Aanawiin iko i'iwe kaaishiwepisiwaatc, niipiwa' kaatahshiwaatc kaawiin okii'minonawe'aahsiwaawaan Kishemanitoon. Amii 'iwe kaa'onci paapiiwehsininikin wiiyawiwaan pikwatahkamikaank. 6 Kahkina tahsh onoweniwan kii'ishiwepisiwak kiinawint kihkinawaacihcikan keayaankwaamaapantamank, ekaa kekiinawint cimihsawentansiwank kaaonishihshinsinok wiinawaa aanint kaa'ishihcikewaatc; 7 ekaa kaye oshihcikanak cimanitoohkaakehsiwank, wiinawaa aanint kaa'ishihcikewaatc. Aaniihsh mii 'owe eshipii'ikaatek: "Kii'ohkwapiwak ekiihkihciwiihsiniwaatc kaye ekii'animinihkwewaatc piinihsh ekii'aniompweishiayaawaatc ekii'aniniimiwaatc," ihkitoomakan. 8 Keko kiinawint kitaapihshikwaacihcikehsiimin taapishkoo wiinawaa aanint kaakiihtootamowaatc. Mii ahpii peshik ehkiishikahk niishtanahshinihsin tahso mitaahswaahk (23,000) kiihtahshiwak ekiih ketahtwaahpinewaatc ekii'nipowaatc. 9 Kaawiin kaye kika kakaanci'aahsiwaanaan a'awe kaaTipenciketc, aaniin minihk kepakitininank citootamowank, wiinawaa aanint kaakii'ishihcikewaatc. Kinepikoo' okii'nihsikowaa'. 10 Kaawiin kaye kikamintawimaahsiwaanaan, aanint wiinawaa kaakii'ishihcikewaatc. Okii'nihshiwanaaci'ikowaan itahsh ini nihshiwanaaci'iwewi encalan. 11 Inashke kahkina onoweniwan kii'ishiwepisiwak, pahkaan awiyak keonciayaankwaamisiwaatc. Shikwa kiinawint kii'oshipii'ikaatewan ciayaankwaamimikoyank. Noonkom iko aaniihsh eshipimaatisiyank, piciinak wii'ani-ishkwaahsewan ono kaapimihsekin o'omaa ahkiink. 12 Ina tahsh, a'awe "ninsoonkikaapaw" kaainenintisotc, weweni taa-ayaankwaamisi ekaa cipankihshinsik. 13 Kahkina koci'ikoowin aniwaapantamek, mii peshikwan kahkina awiya ciniotihtank. 'Awe tahsh Kishemanitoo kaawiin wiihkaa owii'aancihtoohsiin kaashiahshotamaaketc. Kaawiin awahshime kikapakitinamaakohsiiwaa cikakweci'ikooyek keshimashkawikaapawiyek. Ahpii tahsh ehkakweci'ikooyek, Kishemanitoo kikateahpiihcii'ikowaa citekashkihtooyek. Mii 'iwe kikaishimiinikowaa aaniin keshishaapooshkamek. 14 Haw itahsh kaasaaki'inakook! Keko awaac pankii wiicihtwaahkek i'i manitoohkewin. 15 Kitishikanoonininim ehkakiihtaawentamek. Kiinawaa ko cionentamek o'o kaaininakook. 16 I'iwe ohsha minihkwaakan kaanihtaa otaahpinamank ehtakomiikwehciwi'ank Kishemanitoo, ahpii onciminihkweyank, kaawiin ina kiwiitoohkamowaahsiimin Christ omiskwiim? A'awehsh kaye pahkweshikan kaanihtaa pahpahkwepinank, ahpii e'amwank, kaawiin ina kiwiitoohkamowaahsiimin Christ owiiyaw? 17 Peshik ehta aapatisi 'awe pahkweshikan. Miitahsh 'iwe aana paahtiinoyank, kahkina kimaamawihtoomin i'i peshik wiiyawimaa, aaniihsh peshik a'a pahkweshikan kitoontamaanaan. 18 Ina 'iwe kaaishihcikewaatc Isriyal (Israel) ininiwak: ikiweniwak kaaontantamowaatc i'i kaapakitinaahswaaniwaninik, owiitoohkaanaawaa 'iwe ehpakitinaahsohkantawintc Kishemanitoo. 19 Aaniin tahsh ehkitoyaan? A'awe oshihcikan kaamanitoohkaakaaniwitc, tepwe na pimaatisi? Kaawiin ohsha kekoon inaapatisihsii. I'iwe tahsh kaye miicim kaapakitinaahsohkantawintc oshihcikan, kekoon ina inaapatan? 20 Kaawiin kekoon! Inashke hsa i'iwe kaapakitinaahsowaatc omanitoohkek entashipakitinikewaatc, maciahcaahkwa' mayaa kaamiinimintc. Kaawiin tashimiinaahsii Kishemanitoo. Shikwaa kaawiin kinantawenimihsinooninim maciahcaahkwak ciwiitoohkawekwaa. 21 Kaawiin wiin kitaakashkihtoohsiim cionciminihkweyekipan minciniish kaaTipenciketc ominihkwaakanink kaye maciahcaahkwak ominihkwaakaniwaank. Kaawiin kitaakashkihtoohsiim minciniish kaaTipenciketc owiihsiniwinaahtikonk cionciwiihsiniyekipan kaye maciahcaahkwak owiihsiniwinaahtikowaank. 22 Kemaa, kitaakakaanci'aanaan kaaTipenciketc ciontentank? Nawac ina kimashkawisiimin ahpiihc wiin kaaTipenciketc kitaainentaamin? 23 Maakishaa awiya ihkitotc: "Kahkina kekoon nimpakitinamaakoomin citootamaank." "Tepwe," nintaainaa, "kaawiin itahsh kahkina kekoon onishihshinsinoon citootamaan." Aanawiin e'ihkitonk kahkina kekoon ehpakitinamaakooyank, kaawiin tahsh kahkina kekoon ehtootamank okawiici'ikohsiin pahkaan awiya. 24 Kaawiin aaniihsh kitaa-antawentansiimin ehta cipeshikominohseyank, pahkaan itahsh awiyak kaye wiinawaa ciminohsewaatc. 25 Piko kekoon kikamiicim kaatanataawaakenk i'imaa miicimikamikonk. Keko memwehc kakwetwehkek aanti kaaontinikaatek, mii 'i ekaa cioncimaanentansiwek. 26 "Aaniihsh kahkina otipentaan kaaTipenciketc o'o ahki, kahkina kaye kekoon wakitahkamik kaa-ayaanik," ishipii'ikaate. 27 Awiya tahsh kaatepwehtansik antominek ciwiiciwiihsiniiminek, inentamek itahsh ci-ishaayek, pisaan​iko miiciyohk i'i kaa-ahshamikooyek. Keko kakwetwehkek kaamiiciyek, maakishaa kitaaoncimaanentaam noontamek. 28 Maakishaahsh awiya kikaikowaa: "Mii 'owe miicim manitoohkaanink kaakii'ishi pakitinikaakaaniwank." Kiishpin o'o ininek, kaawiin kitaamiicihsiim, ekaa kekoon ci-inentansik a'awe kaawiintamawinek, kaye ekaa maanenintisowin cionciimakahsinok. 29 Kaawiin kaaitamaan kiinawaa i'iwe cimaanentamek kiishpin miiciyek, a'awe hsa kaakii'wiintamawinek maakishaa taoncimikoshkaatentam waapaminek. Maakishaa taihkito awiya: "Niin kekoon ehpakitinamawaatamaan, aaniihshwiin keoncikipishkawihpan pahkaan awiya e'maanaasinank cimanaamaanentami'ak? 30 Kiishpin miikwehc ekii'inak Kishemanitoo i'iwe kaawii'miiciyaan, aaniihshwiin awiya kekoon keonci'ihshihpan aasha ekii'oncinanaahkomoyaan i'i miicim?" 31 Mii 'i ehkitoyaan, wekonen hsa ko eshihcikeyek, maakishaa wiihsiniyek, maakishaa minihkweyek, kahkina ko ishihcikeyohk Kishemanitoo cikihtentaako'intc. 32 Mii 'iwe inaatisik, ekaa kekoon ci-inenimihsinowekwaa Coowak kaye kaaCoowiwihsikwaa, kaye Kishemanitoo omaawaci'aakana'. 33 Niin eshihcikeyaan, mii 'iwe tootamok. Kahkina awiya ninkakwe nana'entami'aa aaniiniko eshihcikeyaan, kaawiin ehta cikakwepeshikominohsa'itisoyaan, ikihsh wiin kahkina ciminohsa'intwaa cipimaaci'intwaa.

1 Kwaarintink 11

1 Kiinawaa kaye kihkinawaapamihshik kaye niin e'ishikihkinawaapamak Christ. 2 Kinanaahkomininim mooshak e'mihkwenimiyek kaye ehkakwe mincimentamek minihk kekoon kaakii'aanihke wiintamawinakook. 3 O'owe tahsh kinantawenimininim cikihkentamek: a'awe Christ e'niikaanisiihkantawaatc kahkina ininiwan. Shikwa 'awe inini wiin oniikaanisiihkantawaan ini wiiwan, shikwa wiin a'awe Kishemanitoo oniikaanisiihkantawaan ini Christan. 4 Mii hsa 'iwe kiishpin kikaanohkwaanetc inini e'anami'aatc kaye ehkanootamawaatc Kishemanitoon, kaawiin okihci-inentaako'aahsiin ini Christan kaaniikaanisiishkaakotc. 5 A'awe tahsh ihkwe kiishpin shaahshaakanihtikwaanetc e'anami'aatc kaye ehkanootamawaatc Kishemanitoon, kaye wiin kaawiin okihci-inentaako'aahsiin ini onaapeman kaaniikaanisiishkaakotc. Kaawiin pahkaan taainentaakosihsii awiya ihkwe kaamihtaskihtikwaaneshontc. 6 Miitahsh i'i kiishpin wiihkikaanohkwaanehsik a'a ihkwe, intawaa piko cimashashkoshankipan wiinisihsan. Onci hsa ko e'menihshentaakwahk e'mihtaskihtikwaaneshontc kemaa ehkiishkishank wiinisihsan a'a ihkwe, mii hsa ko 'i cikikaanohkwaanetc. 7 A'awe tahsh inini kaawiin antawentaakosihsii cikikaanohkwaanetc, aaniihsh onci-ishiayaa Kishemanitoon e'inaatisinitc kaye eshiahpiihci kihci-inentaakosinitc. A'awe tahsh ihkwe onci-ishiayaa kaashikihci-inentaakosinitc ini ininiwan. 8 Kaawiin ohsha ihkwenk kii'oncioshi'aahsii 'awe inini; ininiink hsa wiin kii'oncioshi'aa a'a ihkwe. 9 Kaawiin aaniihsh ciwiici'aahpan ini ihkwewan kii'oncioshi'aahsii 'awe inini; a'ahsh wiin ihkwe kii'oncioshi'aa ciwiici'aatc ini ininiwan. 10 Mii 'iwe keonciaakawa'ank ohtikwaan a'a ihkwe, e'ishinaakohtootc okihci-inentaakosiwin. Mii 'iwe memintake taishihcike a'a ihkwe, ehkanawaapamikowaatc i'i encala'. 11 I'imaa tahsh eshiwiiciiwinank kaaTipenciketc, kaawiin tapiniskwepimaatisihsii a'a ihkwe ininiwan iko ciwiici'ikohpan. A'awehsh kaye inini kaawiin kewiin tapiniskwepimaatisihsii ihkwewan iko ciwiici'ikohpan. 12 Aaniihsh peshikwan a'a ihkwe i'imaa ininiink ekii'oncioshi'aakaniwitc, mii kaye wiin peshikwan a'a inini i'imaa ihkwenk ontaatisi. Kishemanitoonaank itahsh wiin onciimakanini kahkina kekoon. 13 Kiinawaa hsa ko kakwekwayahkonamok: Minonaakwan ina 'awe ihkwe ehshaahshaakanihtikwaanetc ehkanoonaatc Kishemanitoon? 14 Inashke eshi'ikoowisiyank kitaaoncikihkentaam e'menihshentaakositc kaatankaanihkwetc a'a inini. 15 A'a tahsh ihkwe kaakaanwaanisihsetc, mii 'iweni okihci-inentaakosiwin. Aaniihsh ishimiinikoowisi cikaakaanwaanihkwetc ciakwana'ank ohtikwaan. 16 Kiishpin awiya ewii'aanwehtank o'o kihkino'amaakewin, kaawiin pahkaan nintayaahsiimin, kaawiin kaye aantiko i'imaa eshimaamaawaci'itiwaatc eshianami'ehtawaawaatc Kishemanitoon. Kaawiin kaye wiinawaa pahkaan ishihcikehsiiwak. 17 Ono tahsh kaawiihkihkino'amawinakook kaawiin kiwaawishenimihsinooninim. Kaawiin aahpici onishihshinsinoon eshipiintikanitiyek, nawac hsa ko maaninaakwan. 18 Niikaan iko kitinininim, ninkii'wiintamaakoo e'ayohkoayaanontiyek e'maawaci'itiyek. Nawac iko nintepwehtaan. 19 Oncita ko tani-ishihse pahkewinitiwinan ciayaamakahkin e'ayaayek, mii ehta 'imaa cipayahtenaakosiwaatc ikiweniwak kaakwayahkohcikewaatc. 20 Ahpii ko e'maawaci'itiyek, kaawiin wiin kaaTipenciketc otahshankewin kitishinaakohcikehsiim kiiwiihsiniyek. 21 Aaniihsh kahkina ko pehpeshik onoonte​otaahpinaanaawaa wiinawaa ko ewii'wiihsiniwaatc. Miihsh i'i aaninta awiyak keyaapi noonteskatewaatc, aasha aanint ehkiiwashkwepiiwaatc. 22 Kaawiin ina kitoowaahkaa'ikanihsiim citashiwiihsiniyek kaye citashiminihkweyek? Kemaa na nawac kiwii'maanenimimaawaa' Kishemanitoo omaawaci'aakana'? Kikamenihshi'aawaak ina tahsh iki ekaa kekoon kaa-ayaahsikwaa? Aaniin keininakook? Kiminohcikem ina kikainininim? Kaawiin awaac kanake! 23 Nashke aaniihsh kaaTipenciketc niin iko ninkii'wiintamaak, mii 'iwe aasha kekiinawaa kaakii'aanihke wiintamawinakook, i'iwe kaakii'ishihciketc kaaTipenciketc Ciisahs mii 'iwe ahpii ehtipihkaninik cipwaa otaahpinikaniwitc. Pahkweshikanan okii'otaahpinaan. 24 Ekii'nanaahkomotc itahsh okiihpahpahkwepinaan, o'owe e'ihkitotc: "Mii hsa 'owe niiyaw, onci kiinawaa. Mii 'owe anioncitootamok amwek cimaamihkawinotawiyek." 25 Mii 'i peshikwan kaa'ishkwaawiihsiniwaatc okii'otaahpinaan i'i minihkwaakan, kaashimooshkinepiik shoominaapo, o'owe e'inaatc: "O'o minihkwaakan kaaishinaakohtootc Kishemanitoo otooshkiahshotamaakewin, nimiskwiink keaayiicihtootc otahshotamaakewin. Ahpii piko minihkweyek o'o tootamok cimaamihkawinotawiyek." 26 Mii 'i enentaakwahk, tahsink iko amwek wa'a pahkweshikan kaye e'onciminihkweyek o'o minihkwaakanink, mooshak kikaishinaakohtamaakem kaakii'ishinipoohtamaaketc kaaTipenciketc, piinihsh iko citakohshink. 27 Mii 'iwe kiishpin awiya tepinaahk amwaatc kaaTipencikenitc opahkweshikanimini, kaye ishiminihkwetc ominihkwaakaniniink, ekaa kwayahk ehkihtenimaahsik kaaTipencikenitc, tainakimaa awiya ekiihpaahpinotamawaatc kaaTipencikenitc wiiyawini kaye omiskwiimini. 28 Miitahsh i'i kahkina awiya ahkawe takakwe kwayahkwenintiso aaniin eshiayaatc, miitahsh i'i ciamwaatc ini pahkweshikanan kaye cionciminihkwetc i'i minihkwaakanini. 29 Kiishpin itahsh kwayahk ishinansik aaniin enwaatenik kaaTipencikenitc wiiyawini ahpii e'amwaatc ini pahkweshikanan kaye onciminihkwetc i'i minihkwaakanini, taoncikashkihtamaaso citipaahkonikaniwitc mekwaa e'wiihsinitc kaye e'minihkwetc. 30 Mii 'owe niipiwa' kaaonciaahkosiwaatc kaye e'onciniinamisiwaatc kiinawaa i'imaa kaatahshiyek, kaye teminihk ekii'nipowaatc awiyak. 31 Kiishpin itahsh ahkawe kakwekwayahkonaasoyank, kaawiin memwehc kitaa​tipaahkonikoohsiimin. 32 KaaTipenciketc itahsh kikakwekwayahkonaakonaan kaye kikwayahkonikonaan, ekaa citakwaahkonikoohsiwank keinaahkonintwaa ikiweniwak ahkiink kaatipentaakosiwaatc. 33 Ina tahsh, niiciotepwehtamook! Ahpii anta​maawaciwiihsiniyek kaaTipenciketc otahshankewin, pii'itiyohk! 34 Awiya tahsh noonteskatetc, ahkawe wiin otaawinink tatashiwiihsini. Mii 'iwe ishimaawaci'itiyohk, ekaa inaahkonikoowin ciotihsikohsiwek. Pahkaan itahsh kekoonan ninkanana'ihsitoonan paanimaa takohshinaan.

1 Kwaarintink 12

1 Shikwa 'owe niwii'nahkwehtaan kaa'ishipii'amawiyek, aaniin enentaakwahk ahcaahkowi ishiayaawin. Niiciotepwehtamook, kinantawenimininim i'i cikihkentamek. 2 Kikihkentaanaawaa cipwaa mahshi anami'aayek, inkoci 'imaa kikii'wawanihshimikoom cipamiihtawekwaa manitoohkaanak kaapimaatisihsikwaa ehkiikitohsikwaa. Aanti hsa ko kikii'ishiwinikoom. 3 Mii 'iwe kaaoncinihsitohtamooninakook o'owe: awiya Kishemanitoo otAhcaahkonk e'ontinank ihkitowin, kaawiin "Tanihshiwanaatisi" okainaahsiin Ciisahsoon. Awiya tahsh "Mii 'awe Ciisahs kaaTipenciketc" ihkitotc, mii ehta Kishemanitoo otAhcaahkonk kaaoncikiikitotc. 4 Inashke pepahkaan tinowanoon ahcaahkowi miinikoowinan, miitahsh ehta Kishemanitoo otAhcaahkwan eshipeshikonitc kaaona'ooshiwenitc. 5 Pepahkaan kaye tinowanoon eshipamiihtaakewaatc awiyak, miihsh ehta kaaTipenciketc eshipeshikotc kaa-anohkiihtawintc. 6 Shikwa pepahkaan tinowanoon eshikashkihtoowaatc awiyak otanohkiiwiniwaan, miitahsh ehta 'awe Kishemanitoo eshipeshikotc eshianohkiitc entahsopeshikonitc opimaatisiwininiink kahkina kekoon cikashkihtoonitc. 7 Entahsopeshikotc awiya ishimiinaa kekoon Kishemanitoo otAhcaahkwan e'naakohtoonitc otishiayaawinini. Miitahsh kahkina awiya cionciminohsewaatc. 8 A'a peshik omiinikoon Kishemanitoon otAhcaahkoni minokihkencikewinink ci-ishikiishwetc. Miinawaa peshik payahtenihsitohtamowin omiinikoon ini peshikwan Ahcaahkwan ci-ishikiishwetc. 9 Miinawaa peshik awiya kihcitepwehtamowin omiinikoon ono peshikwan Ahcaahkwan, shikwa pahkaan awiya minoayaa'iwewinan omiinikoon ono peshikwan Ahcaahkwan. 10 Miinawaa tahsh peshik cikashkihtootc maamahkaacihcikewinan ishimiinaa, miinawaa peshik Kishemanitoon cikanootamawaatc ishimiinaa. Miinawaa tahsh peshik cinihsitaaweyentank ehtinowaninikin ini miinikoowinan, kiishpin tepwe Kishemanitoon otAhcaahkoni e'onciimakaninikwen kemaa kaawiin. Shikwa miinawaa peshik pepahkaan ishikiishwewinan ishimiinaa, peshik itahsh kaye ishimiinaa ciaanihkanoohtank ini ishikiishwewinan. 11 Miitahsh i'i kahkina ono enanohkiitc 'awe kaapeshikotc Ahcaahk maamiinaatc kahkina awiya', wiin iko enentank. 12 Inashke mii 'owe enentaakositc a'a Christ taapishkoo awiya wiiyawink. Aana peshikwahk o'o wiiyaw, paahtiinatinoon itahsh pepahkaan eshinaakwahkin kaaishiaapatahkin. Kahkina tahsh wiin onoweniwan aanawiin aanapaahtiinatinkin, miihsh ehta eshipeshikwahk o'owe wiiyaw. 13 Mii hsa ko peshikwan kekiinawint minihk eshipepahkaanwewaanakisiyank, kemaa Coowak kemaa kaye kaaCoowiwihsikwaa, kaye tipenimaakanak kaye kaatatipenintisowaatc, kahkina kikii'ishisiika'antaakonaan ini peshikwan Kishemanitoo otAhcaahkwan i'imaa peshik wiiyawimaank cioncitipentaakosiyank. Shikwa peshikwan kikii'ishimina'ikoomin a'a peshikwan Ahcaahk ciminihkwaanank. 14 Inashke aaniihsh 'owe wiiyawimaa eshinaakwahk kaawiin mihcipeshikonaakwahsinoon, paahtiinatinoon ohsha 'omaa kaatahsoishinaakosink. 15 A'a tahsh ositimaa ihkitotc: "Niin e'oninciimaawihsiwaan, kaawiin i'imaa nintooncitipentaakosihsii wiiyawink," o'o aanaihkitohpan, mashkawaac iko oncitipentaakwan i'imaa wiiyawink i'i ositimaa. 16 Kemaa kaye ohtawakaamaa aanaihkitohpan: "Niin aaniihsh e'oshkiinshikowihsiwaan, kaawiin niin i'imaa nintooncitipentaakosihsii wiiyawink," o'owe aanaihkitotc, mashkawaac iko oncitipentaakwan i'imaa wiiyawink i'i ohtawakaamaa. 17 Inashke kiishpin misiwe oshkiinshikowankipan i'i wiiyawimaa, aaniinti keoncinoontamoomakahkipan? Misiwehsh kaye ohtawakaawankipan, aanti kekii'onci​minaancikemakahkipan? 18 Wiin itahsh wiin a'a Kishemanitoo entahsopeshik okii'maamawihtoonan ini kaapepahkaanatininikin kaatahsoishinaakosink cipeshikwaninik i'i wiiyaw, wiin iko e'ishionentank. 19 Kiishpin ehta peshikoayaak 'iwe pahkesiwin kaawiin wiiyawimaa taishinaakwahsinoon. 20 Paahtiinatinoon itahsh wiin ini ishinaakosiwinan, ehpeshikwahk itahsh i'i wiiyawimaa. 21 Miitahsh i'i oshkiinshikomaa kaawiin okakii'inaahsiin ini oninciimaan: "Kaawiin kekoon kitinaapaci'ihsinoon!" A'awehsh kaye ohtikwaanimaa kaawiin otaaninaahsii' osita': "Kaawiin kiinawaa kekoon kitinaapaci'ihsinooninim." 22 Kaawiin i'i tainentaakwahsinoon. Nawac itahsh wiin kihtaapatanoon ini kekoonan wiiyawimaank kaawahkewinaakwahkin. 23 Iniweniwan itahsh pankii kaa-ahpiihtentamank, nawac iko ciminoahpiihtentaakwahkin kitishihtoomin. Iniwehsh kaye ekaa kaaminonaakwahsinokin, keyaapi weweni kitishikikishkikemin kwayahk ci-ishinaakwahkin. 24 Inihsh wiin kaaminonaakwahkin kaawiin memwehc ci-ishi'oomakahsinokin. Wiin tahsh Kishemanitoo okii'ishimaamawihtoon i'i wiiyawimaa, onoweniwan inkotano kaainentaakwahsinokin, nawac ekii'ishihtootc cikihci-inentaakwaninikin. 25 Mii 'iwe enentaakwahk ekaa pahkewinitiwin ciayaamakahsinok wiiyawimaank, kahkina tahsh kaapepahkaanatinkin ishinaakosiwinan peshikwan iko ci-ishinaakaci'itiimakahkin. 26 Ahpii ko e'macihsek peshik pahkesiwin, mii peshikwan iko kahkina pahkesiwinan wiici-inamanci'ontiimakanoon. Peshik itahsh kaye kihci-inencikaatek pahkesiwin, mii peshikwan iko kahkina eshimaamawi ciihkentamoomakahkin. 27 Kiinawaa kaatahshiyek mii 'iweni owiiyaw Christ. Entahsopeshikoyek kitooncitipentaakosim mii 'imaa Christ owiiyawink kaatahsoishinaakosiyek. 28 I'imaa tahsh eshimaawaci'itiwaatc otepwehtamook kahkina awiya' Kishemanitoo okii'inahsaa' keoncitipentaakosinitc. Nihtam okii'inahsaa' ishinisha'waakana' ciniikaanentaakosinitc. Miinawaa tahsh otipaacimoo' kaakanoocikehtamaakotc okii'inahsaa' ciaanihke​niikaanentaakosinitc. Miitahsh miinawaa okihkino'amaake' okii'inahsaa' cianiaanihke niikaanentaakosinitc. Miitahsh 'imaa eniaanihkawishkaakewaatc kaamaamahkaacihcikewaatc, miinawaa tahsh iki kaashimiinikoowisiwaatc ciminoyayaa'iwewaatc kaye kaawiici'iwewaatc, miinawaa tahsh aaninta kaaniikaanisiihkantaakewaatc inahsaawak, kaye pepahkaan ishikiishwewinan kaamiinintwaa. 29 Kaawiin kahkina awiya ishinisha'waakan tinowihsiiwak. Kaawiin kahkina ishimiinaahsiiwak cikanootamawaawaatc Kishemanitoon. Kaawiin kaye kahkina okihkino'amaakewihsiiwak, kaawiin kahkina maamahkaacihcikehsiiwak. 30 Kaawiin kahkina miinikoowisihsiiwak ciminoyayaa'iwewaatc. Kaawiin kaye kahkina ishikiikitohsiiwak pepahkaan ayishikiishwewinan. Kaawiin kahkina awiya aanihkanoohtamaakehsiiwak. 31 Ini tahsh maawac kaaonishihshinkin miinikoowisiwinan, miiwan​ini kakwe antawentamok. Peshik itahsh ishiayaawin kiwii'aniwaapanta'ininim maawac e'niikaanionishihshink.

1 Kwaarintink 13

1 Aanawiin kashkihtooyaan pepahkaan kaaishikiishwewaatc ininiwak kaye encalak, kiishpin itahsh ekaa saaki'iwehsiwaan, mii anihshaa cimihci​naanoontaakosiyaan. Taapishkoo kaamihci​paahpaawaapihka'ikaatek kaye e'mihci​pahpahsweweyaapihkihsek e'wanishkwewehtaakwahkin taainentaakwan ninkakitowin. 2 Maakishaa kaye ayaayaan miinikoowisiwin cikanootamawak Kishemanitoo, maakishaa kaye kahkina kekoon kihkentamowin ayaayaan, kaye kahkina kekoonan cioncinihsitohtamaan ekaa mahshi kaakihkentaakwahsinokin, kaye ehtepihseyaan tepweyentamowin cikanootamaan waciwan ciaantahtekin; kahkina ini aanakashkihtooyaan, kiishpin tahsh ekaa saaki'iwehsiwaan, kaawiin iinsan kekoon nintaainaapatisihsii. 3 Kaye kahkina aana maamaata'oohkiiyaan nintipinawewisiwin, pooshke niwiiyaw pakitinamaan cicaakisikaatek, kiishpin tahsh saaki'iwehsiwaan kaawiin kekoon i'imaa ninkaontinansiin. 4 Saaki'iwetc awiya tashashiipentam, takishewaatisi. Kaawiin okaontenimaahsiin awiyan. Kaawiin mamiihkwaanitisohsii, kaawiin kaye ishpenintisohsii. 5 Saaki'iwetc awiya tamanaa​maashiwaapanta'iwe. Kaawiin niikaanenintisohsii, kaawiin wiipa nishkaatisihsii. Kaawiin opapaamentansiin kekoon e'ishihcike'intc. 6 A'a siyaaki'iwetc kaawiin onciminwentansii awiyan e'macihcikenitc. Nawac itahsh onciminwentam i'i tepwewin ehtoocikaatenik. 7 Kaawiin taoncipakiciihsii. Kapeaya'ii tepweyentam, mashkawiahpenimo, pishihshik iko mashkawentam. 8 Kaawiin wiihkaa taishkwaahsehsinoon i'i saaki'iwewin. Aaninta anaishimiinintwaa keishikanoocikehtamawaawaatc Kishemanitoon, paanimaa tahsh tapooniayaa 'iwe ishikiikitowin. Aaninta kaye pahkaanikiishwewin e'miinintwaa, paanimaa ahpii tapoonikiishwem. Aaninta kihkentamowin aana-ayaawaatc, paanimaa tanakacikaate 'iwe noonkom kaakihkentaakwahk. 9 O'owe aaniihsh noonkom kaakihkentamank, pankii ehta 'iwe kikihkentaamin. Shikwa aanawiin ishimiinikooyank Kishemanitoo ehkanoocikehtamawank, pankii ehta kiwiintaamin otinencikewin. 10 Ahpii tahsh piocihcihsek i'i kaa-ahpiihci​misiweayaak, kaawiin keyaapi tanaakwahsinoon i'iwe pankii kaa-ayaak. 11 Ahpii kiiapinoonciishiwiyaampaan, apinoonciishink ninkii'ishikakit, ninkii'ishinam, ninkii'inentam. Paanimaa tahsh ekiihkihci-ininiiwiyaan, aasha ninkii'nakataan nintapinoonciishiwi aayintiwin. 12 I'iwe noonkom kaawaapantamank taapishkoo waapamonink e'mihcipawinaakwahk kitishinaamin. Piciinak itahsh ocihcihsek, kwayahk iko pehsho kikawaapamaanaan. Mekwaa piko o'o ahpii pankii ehta nintishikihkentam. Paanimaa tahsh ahpii ninkamisiwe kihkentam taapishkoo Kishemanitoo kaaishishaapokihkikenimihshitc. 13 Mekwaa tahsh ayaawan ono nihsin ekaa keishkwaahsehsinokin: tepweyentamowin, ahpenimowin, saaki'iwewin. I'iwe tahsh saaki'iwewin maawac kihci-inentaakwan.

1 Kwaarintink 14

1 Mii 'iwe saaki'iwewin piminisha'amok. Antawentamok itahsh kaye ahcaahkowi miinikoowinan. Mii 'iwe nawac ishiantawentamok cikanootamawek Kishemanitoo. 2 A'awe aaniihsh e'ishikakitotc pepahkaan ayishikiishwewinan, kaawiin mayaa otishikanoonaahsii' ini pemaatisinitc, Kishemanitoon ehta ko. Kaawiin pahkaan awiyan onihsitohtaakohsiin. Eshimiinikotc itahsh ini Kishemanitoon otAhcaahkwan, mii 'iwe eshiwiintank ini kekoonan kaakaacikaatenikin. 3 Awiya tahsh kaakanootamawaatc Kishemanitoon otishikanoonaa' 'i pemaatisinitc cikakwe​mashkawiki'aatc. Okakwemiinaa' mashkawentamowin, okakwenana'entami'aa'. 4 Awiya kaapahkaanikiishwetc wiin iko ehta mashkawiki'itiso. Awiya tahsh kaakanoocikehtamawaatc Kishemanitoon, kahkina awiya' omashkawiki'aa' otepwehtamoo' kaatashimaawaci'itinitc. 5 Nintaaminwentam kahkina awiya pepahkaanikiishwewinan aapacihtooyek. Nawac itahsh nintaaminwentam kanootamawek Kishemanitoo. Nawac aaniihsh kihtakimaa 'awe kaakanootamawaatc Kishemanitoon ahpiihc wiin a'a kaapepahkaanikiishwetc. Mii ehta keshikihtaapatisitc, i'imaa ayaatc awiya keanihkanoohtamaaketc, kahkina 'imaa kaatashimaawaci'itiwaatc otepwehtamook cioncimashkawi'ikowaatc i'iwe ihkitowin. 6 Aaniin, niiciotepwehtamook! Ahpii otihsinakook aaniin keinaapatisiyaampaan pahkaani-ishikiishwewinan ehta ishikiikitoyaan? Kiishpin ehta ishikanooninakook Kishemanitoo kaaishikihkentamooshiwetc, kaye kihkencikewin miininakook, kaye kekoon Kishemanitoo ishikanootamawak kemaa kaye kekoon kihkino'amawinakook, mii ehta 'imaa keishiminohse'inakook. 7 Inashke aaniihsh kitohcikanak ehpimaatisihsikwaa, maakishaa pootaacikan kaye matweyaapiikipicikan – okanihsitaawihtaan ina awiya 'i nikamon noowaahc iko inwewemohcikenaaniwaninik? Kaawiin iitok. 8 Ampe kaye e'antamiikaasonaaniwank, a'awe kaanoontaakohtamawaatc shimaakanihsha', kiishpin noowaahc ishinoontaakohtootc i'i pootaacikan, awenenan itahsh kekihkentaminihpan ciwaweniinitc? 9 Mii peshikwan kekiinawaa. Kiishpin ishikiishwehsiwek cipakahkihtaakwahk, aanti keoncikihkencikaatekipan i'iwe kaaihkitoyek? Anihshaa kikamihcikakitom. 10 Paahtiinatinotokenan ishikiishwewinan o'omaa ahkiink. Kaawiin awaac peshik ishikiishwewin anihshaa inwemakahsinoon. 11 Kiishpin itahsh kihkentansiwaan ishikiishwewin, ninkamayakihtawaa 'awe kaaishikiishwetc, shikwa kewiin ninkamayakihtaak. 12 Kiinawaa tahsh e'aahko​antawentamek ahcaahkowi​miinikoowinan, miiwanini maawac kakwenakacihtook ini miinikoowisiwinan awahshime keonciminohse'ikowaatc kahkina otepwehtamook i'imaa kaamaawacianami'aawaatc. 13 Miitahsh i'i awenen nehtaa-aapacihtootc pahkaan ishikiishwewin okakakwecimaan Kishemanitoon cimiinikotc ciaanihkanoohtamaasotc. 14 Kiishpin aaniihsh ishianami'aayaan pahkaan ishikiishwewinink, nintahcaahkonk iinsan nintoncianami'aa. Kaawiin i'imaa kaashinaakatawentamaan ishiwiici'iwemakahsinoon. 15 O'o tahsh ishihsek, aaniin keishihcikeyaan? Nintahcaahkonk ninkaoncianami'aa, kaye hsa ko kaashinaakatawentamaan ninkaoncianami'aa. Nintahcaahkonk ninkaoncinikam, 'imaahsh kaye kaashinaakatawentamaan ninkaoncinikam. 16 Kiishpin itahsh kitahcaahkonk ehta oncinanaahkomatc a'a Kishemanitoo, piintiketc itahsh awiya kaawiici-inentaakosiimihsinowek, aaniin keshinahkotank "emen" ci-ihkitotc? Kaawiin aaniihsh okihkentansiin i'i kaaihkitowintc. 17 Aanawiin ehteonishihshink kinanaahkomiwewin, kaawiin kanake ominose'ikohsiin a'awe kaakihkentansik. 18 Niin iko ninanaahkomaa Kishemanitoo, awenen iko kaatahshiyek pepahkaani-ishikiishwewinan eshiaapacihtootc, nawac niin niipiwa' nintishikiishwe. 19 Ahpiihsh e'maawaci'itinaaniwank, nawac nintaainentam naanan ciaapacihtooyaan ihkitowinan keishinihsitohtaakwahkin, pahkaan awiya cikihkino'amawakwaa, ahpiihc wiin mitaahcink mitaahswaahk tahsinkin nintihkitowinan e'mayakikiishweyaan. 20 Niiciotepwehtamook, keko 'iwe apinoonciiwi inentamowin ishiaapacihtoohkek. Mii 'owe tahsh ehta cikakweishiayaayek oshkapinoonciishink, cimanaakihkentamek kaamaashinaakwahkin. Kinaakatawencikaniwaank itahsh taapishkoo kaakiishaapewitc ishiayaayohk. 21 Kehtekihcioshipii'ikewinink ishipii'ikaate o'owe: "KaaTipenciketc ihkito: 'Kaamayakikiishwewaatc ninka-anoonaak cikanoonaawaatc nimpimaatisiima'. Mihsawaa piiwitek otooniwaank ninkaishikanoonaak oko nimpimaatisiimak, keyaapi tahsh kaawiin ninkapisintaakohsiik,' ihkito." 22 Miitahsh o'owe ishimiinikoowisiwin pepahkaanikiishwewinan e'aapatahkin e'noontaakwahkin, taoncikihkenintisowak iki kaaotepwehtamowinihsikwaa ehtinowiwaatc. Kaawiin wiin inaapatahsinoon otepwehtamook cikihkenintisowaatc. I'iwe tahsh ishimiinikoowisiwin Kishemanitoo ehkanootamawaatc awiya, mii 'imaa taoncikihkenintisowak otepwehtamook, ishikanoonintwaa. Kaawiin wiin i'imaa kaaotepwehtamowinihsikwaa taoncikihkenintisohsiiwak. 23 Miitahsh kiishpin kahkina e'maawantoopiintikewaatc otepwehtamook, kahkina tahsh tashipepahkaanikiishwewaatc, kiishpin itahsh oncipiintikewaatc aaninta ikiweniwak ekaa mahshi e'wiici-inentaakosiimihsinowekwaa kemaa kaye kaaotepwehtamowinihsikwaa, kaawiin ina kiiwashkweyaatisiwak kitaaikosiiwaak? 24 Kiishpin itahsh kahkina oncikanootamawaawaatc Kishemanitoon otihkitowininiink, miihsh ahpii ehpiintiketc awiya ekaa mahshi kaawiici-inentaakosiimiwehsik kemaa kaye kaaotepwehtamowinihsik, okamamiihkwa'okon i'iwe kaanoontank, i'iweni tahsh kahkina kaaihkitonitc kwayahk okawaapanta'ikon aaniin kaainaatisitc. 25 I'iweni kaakiihkaatoohpan otinentamowin mohsheaya'ii taishihsicikaateni. Ta-animihkohtaa, okakihci-inenimaan itahsh Kishemanitoon, kaye kikainaacimikowaa tepwe e'wiiciiwinek Kishemanitoo. 26 Aaniin itahsh, niiciotepwehtamook? Ahpii waa'maawaci'itiyek peshik otayaan nikamowin, shikwa peshik otayaan kihkino'amaakewin, shikwa kaye peshik okihkentamo'ikoon Kishemanitoon ciwiintamaaketc. Shikwa peshik pahkaan ishikiishwewin ishimiinaa, miinawaahsh a'a peshik otaanihkanoohtamawaan ini pahkaan kaaishikiishwenitc. Mii ko 'i kahkina tatoocikaatewan cimaamawi mashkawiki'itiyek. 27 Kiishpin awiyak wiipahkaanikiishwewaatc, maakishaa niishin maakishaa kaye nihsin ehta takakitowak, kaawiin awahshime. Pahkaan itahsh iko awiya oka-aanihkanoohtaan 'iwe kaaihkitowintc. 28 Ayaahsik itahsh awiya keaanihkanoohtank, maano tamihcinamatapi 'awe pahkaanikiishwewin kaa-ayaatc. Wiinehta takanoonitiso kaye Kishemanitoon okakanoonaan. 29 Ikiweniwak itahsh kaanihtaa​kanootamawaawaatc Kishemanitoon taniishiwak kemaa tanihsiwak kekakitowaatc. Kotak itahsh awiyak okakakwesihtaanaawaa. 30 Awiya tahsh iko e'mekwenamatapitc, kiishpin oncikihkentamo'ikotc Kishemanitoon kekoon ciwiintamaaketc, niikaan a'a kaakakitotc takipihcikakito. 31 Kahkina pehpeshik kaatahshiyek kikapakitinamaakoom cikanootamawek Kishemanitoo, miitahsh 'iwe kahkina awiya ci-ishikihkino'amaakoowisitc kaye kahkina cioncimashkawentamowaatc. 32 Awiya tahsh ishimiinikoowisitc cikanoocikehtamawaatc Kishemanitoon, okakashkihtoon citipentank i'i otishimiinikoowisiwin kwayahk ci-inaapacihtootc. 33 Inashke kaawiin 'iwe nihshiwanaatahkamikisiwin otooshihtoohsiin Kishemanitoo, i'iwe hsa cisakahkamikisink. Miinawaa tahsh 'owe eshihcikewaatc Kishemanitoo opimaatisiima' aanti piko kaaishimaawaci'itinitc, peshikwan kekiinawaa ci-ishihcikeyek: 34 Taka takoskwaawaatapiwak iki ihkwewak. Kaawiin tapakitinamawaahsiiwak cikakitowaatc. Inaawak hsa otaanaank ci-inentaakosi'itisowaatc. Mii 'iwe eshihsink Kishemanitoo otInaahkonikewin. 35 Kiishpin itahsh kekoon wii'antakihkentamowaatc ekiihtenihsitohtansikwaa, okatashikakwecimaawaan onaapemiwaan paanimaa kiikiiwewaatc owaahkaa'ikaniwaank. Akaciwentaakwan ihsa 'awe ihkwe ehkakitotc 'imaa entashimaawaci'itink. 36 Komaa kiinawaa ehta kii'onciimakanotok i'i Kishemanitoo otihkitowin? Kiinehtawaa na kikiihpiotihsikom? 37 Kiishpin awiya niin kaakanootamawak Kishemanitoo e'inentank, komaa niin nintahcaahkowaatis inentank, otaanihsitaawinaanan ini niin weshipii'amawinakook kaaTipenciketc otinaahkonikewin e'aawaninikin. 38 Kiishpin itahsh awiya wii'noontansik ono ihkitowinan, kaawiin kewiin tapisintawaakaniwihsii. 39 Kiinawaa tahsh niiciotepwehtamook, maawac mihsawentamohk cikanootamawek Kishemanitoo. Kaawiin kaye kikaonci'aahsiwaawaak awiyak cipepahkaanikiishwehsikwaa. 40 Maano hsa kahkina kekoon kwayahk ciminonaakwahk, ahpane hsa ko ciminotoocikaatek kahkina kekoon.

1 Kwaarintink 15

1 Niiciotepwehtamook, kiwii'waapanta'ininim aaniin eshinaakwahk i'i minwaacimowin, mii 'iwe nihtam kaakiih kakiihkiminakookipan kaye kaakii'otaahpinamek, amii 'imaa entashimashkawikaapawiyek. 2 Mii hsa 'o minwaacimowin kaapimionciimakahk cipimaaci'ikooyek kiishpin nehpic iko kihciwinamek. Kiishpin itahsh kekoon inaapatahsinok kaakiihpitepwehtamek kaawiin kikapimaaci'ikoohsiim. 3 I'iwe hsa tahsh kaamaawaci niikaanentaakwahk kaakii'miinikooyaan, kekiinawaa kikii'aniwiintamawininim. Mii 'owe e'ihkitoomakahk: a'a Christ ekii'ishinipotc onci kimacitootamowininaanin, mii 'iwe niiyaak kaakii'ishipii'ikaatek Kehtemasina'ikan. 4 Shikwa i'i ekii'na'inintc, ekiinihsokiishikwakaanik itahsh ekiihkiiwepimaatisi'intc mayaa ekii'ani-ishihsek i'i niiyaak kaakii'ishipii'ikaatek kehtemasina'ikan. 5 Shikwa ekii'waapamikotc ini Piitaroon (Peter), miitahsh kaye kotak i'iweniwa' mitaahshiniishin kaakii'inimintc okii'waapamikoo'. 6 Miihsh i'i paanimaa naake naanwaahk awahshime okii'waapamikoo' otepwehtamoo', peshikwan iko 'iyahpii okii'waapamikoo'. Kekaa kahkina noonkom keyaapi pimaatisiwak. Aaninta tahsh aasha kii'ishkwaapimaatisiwak. 7 Miinawaa tahsh okii'waapamikoon ini Ciimisan (James), naake mincikahkina otishinisha'waakana'. 8 Kaye niin itahsh ayotaanaank ninkii'waapamaa, niin aana inentaakosiyaan awiya ehkwayahko nihtaawikihsik. 9 Niin maawac otaanaank nintinentaakos kahkina iki enakimintwaa ishinisha'waakanak. Kaawiin ninteahpiihtentaakosihsii ishinisha'waakan ci-ikooyaampaan. Aaniihsh ninkiihkakwaataki'imaa' Kishemanitoo kaamaawacitepwehtaakotc. 10 Ninkiihshawenimik itahsh Kishemanitoo, e'onci-ishiayaayaan noonkom enaatisiyaan. I'iwe tahsh oshawencikewin kaamiinikooyaan kaawiin kanake kii'aanawewansinoon. Awahshime ninkiihkihcianohkii ahpiihc wiin kahkina pehkaanisiwaatc ishinisha'waakanak. Aanawiin kaawiin niin tipinawe tepwe ninkii'anohkiihsii, i'iwe hsa wiin Kishemanitoo oshawencikewin kii'anohkiimakanini e'wiitoohkaakoyaan. 11 Mii hsa tahsh o'owe, awenen iko wencinoontamowek minwaacimowin, kemaa niin aawiyaan, kemaa wiinawaa pahkaan ishinisha'waakanak, miiwan​ini peshikwan eshikakiihkwenotamaank. Mii 'iwe mayaa kaatepwehtamek. 12 Miitahsh i'i nintinaacimowininaan eshihsink, Christ ekiihkiiwepimaatisi'intc onci nipowinink. Aaniihshwiin aaninta kiinawaa wenci-ihkitoyek e'ayaamakahsinok cikiiwepimaatisink onci nipowinink, aasha ohsha ekiihkashkihtootc Christ? 13 Kiishpin ayaamakahsinokipan cikiiwepimaatisink onci nipowinink, mii 'i kewiin Christ cikiihkiiwepimaatisihsikipan. 14 Kiishpin itahsh Christ kiihkiiwepimaatisihsikipan, kaawiin kekoon taakii'inaapatahsinoon ninkakiihkwewininaan, kitepwehtamowiniwaa kaye. 15 Kaye hsa tahsh, okakiinawishkaacimook nintaaishinaakosimin, aaniihsh ninkii'inaanaan Kishemanitoo ekiihkiiwepimaatisi'aatc Christan. Kiishpin itahsh tepwewiniwankipan ekaa awiya cikiiwepimaatisihsik, kaawiin iinsan kewiin Kishemanitoo okiihkiiwepimaatisi'aahsiin ini Christan. 16 Inashke hsa kiishpin kiiwepimaatisi'aahsiwintwaa iki kaaishkwaapimaatisiwaatc, kaawiin iinsan kaye wiin Christ taakiihkiiwepimaatisi'aahsii. 17 Kiishpin itahsh Christ kaahkiiwepimaatisi'aahsiwintipanen, kaawiin awaac kekoon inaapatahsinoon kitepwehtamowiniwaa. Keyaapi iinsan 'imaa kitayaam kimaci-ishiwepisiwiniwaank. 18 Mii hsa 'iwe kaye keishinaakwahkipan, iki kaakii'ahpinipowaatc Christan aanakiihtepwehtawaawaatc, aasha ekii'nihshiwanaatisiwaatc. 19 Kiishpin 'omaa pimaatisiwinink ehta ishiwiici'ikowankwen e'ahpenimonotawank Christ, mii​'i kiinawint awahshime ci-ishikoohpaatentaakosiyankipan ahpiihc wiin kahkina awiya. 20 Tepwe tahsh kii'oncikiiwepimaatisi'aa nipowinink a'a Christ! Miitahsh i'imaa cionciaayiicikihkentaakwahk miinawaa cikiiwepimaatisiwaatc kaakii'ishkwaapimaatisiwaatc. 21 Inashke aaniihsh i'imaa kaa'ayishihcikekopanen a'a peshik inini, amii 'imaa kaa'onciimakaninik i'i nipowin, a'a tahsh wiin kotak inini kaakii'ishihciketc, mii 'imaa wenciimakahk cioncikiiwepimaatisi'ikooyank nipowinink. 22 I'imaa hsa Aatamink (Adam) e'ontahkaanesiwaatc, mii 'imaa wencinipowaatc kahkina awiyak. Mii peshikwan e'wiiciiwikowaatc Christan, mii 'imaa kahkina keoncimiinintwaa pimaatisiwin. 23 Kwayahk itahsh iko ta-anikiiwepimaatisiwak: a'awe Christ maawac nihtam kiihkiiwepimaatisi. Paanimaahsh miinawaa takohshink, miiwa' i'iweniwa' kenikiiwepimaatisinitc Christ kaatipenimaatc. 24 Miitahsh i'i ahpii ta-aniwehkwaashkaamakan kahkina kekoon. Ahkawe kahkina Christ okashaakooci'aa' iniweniwa' kaaokimaawentaakosinitc kaye kaakashki'ewisinitc kaye kaamashkawentaakosinitc. Mii ahpii otipencikewin cimiinaatc ini Kishemanitoon Weyoohsimimintc. 25 Wiin ihsa Christ antawentaakosi ciokimaawitc piinihsh iko kahkina Kishemanitoon kaacaakishaakoocihtamaakotc i'i kaamiikaanikotc. 26 I'iwe tahsh ishkwaac misiwe keshaakooci'aakaniwitc kaamiikaasotc, mii hsa 'awe nipowin. 27 Aaniihsh Kihcimasina'ikan ishipii'ikaate a'a Christ ehtashimintc: Kahkina kekoon ciahpisitepitc citipentank ekii'ishihtamaakotc Kishemanitoon. I'iwe tahsh kaaihkitoomakahk: "Kahkina kekoon citipentank ekii'ishihtamaakotc," mii 'imaa eshikihkentaakwahk Kishemanitoo ehtakwakincikaasohsik citipenimikohpan Christan. Wiin aaniihsh kahkina otahtamawaan ini Christan. 28 Paanimaa tahsh kahkina kekoon ekii'ahtamawintc Christ citipentank, mii ahpii a'awe oKosihsimaa keinahsitisotc Kishemanitoon citipenimikotc, miiwan iniweniwan kaakii'ahtamaakotc kahkina kekoon citipentank. Miitahsh i'i ahpii misiwe kemaaciitipentaminitc kahkina kekoon Kishemanitoon. 29 Kiishpin itahsh o'owe eshihsekwen, aaniin keinintwaa oko kaaishihcikewaatc kaaoncisiika'antaatiwaatc i'i kaakii'niponitc ehkakwewiici'aawaatc? Aaniin itahsh inaa enwaatamowaatc? O'o tahsh ishihsekipan iki kaakii'nipowaatc miinawaa cipimaatisihsikwaapan, aaniin enentamowaatc kaaoncisiika'antaatiwaatc i'i neponitc? 30 Kaye niinawint, aaniihsh wencitootamaank entahsotipa'ikan e'naniisaani'itisoyaank nihshiwanaatisiwinink? 31 Niiciotepwehtamook, entahsokiishik nimpehshwaapantaan i'i nipowin. Inashke hsa wiinke kikihci-inenimininim i'imaa e'onciimakahk e'wiiciiwinank a'a Christ Ciisahs kaaTipeniminank, mii 'iwe enamanci'oshkaakoyaan ciwiintamawinakook. 32 I'iwe hsa ko ekiihpimiikaanakwaa pikwaciaya'aawihshak kaainentaakosiwaatc o'omaa Ehpihsahsink (Ephesus), kiishpin ininiinaank ehta ontinamaan nintinamanci'owin ishipimaatisiyaan, kaawiin awaac kekoon nintaainaapacihtoohsiin. Kiishpin kiiwepimaatisi'aahsiwintwaa kaakii'ishkwaapimaatisiwaatc, mii​hsa intawaa ishihciketaa e'nekaami-ihkitonk: "Haw wiihsinitaa, minihkwetaa, mihsawaa ohsha kikanipomin!" 33 Keko wayeshintisohkek. Aana minoishiwepisiyan, maci-ishiwepisiwaatc itahsh kaawiitoohkawatwaa, kikanihshiwanaaci'ikon. 34 Kwayahk iko moohkentamok, poonihtook kimaci-ishiwepisiwiniwaan. Inashke ciakaciwentamek o'o kaawiintamawinakook: aaninta kaawiin kikihkenimaahsiwaawaa Kishemanitoo. 35 Awiya tahsh taihkito: "Aaniin itahsh kekii'ishi kiiwepimaatisi'intwaapan ikiweniwak nepowaatc? Aaniin itahsh keshiwiiyawewaatc ahpii kiishpin tepwe kiiwepimaatisiwaatc?" 36 Kiin kekiipaatisiyan, nintaainaa. I'i hsa wiin kehtikaataman, kaawiin tapimaatisiihkantehsinoon, paanimaa ehta kiininkwa'ikaatek e'nipoomakahk e'ishinaakwahk. 37 I'iwe hsa kaakihtikaataman kaawiin i'iwe ehkiishikik kaaishinaakwahk kitaa​ninkwaawanka'ansiin, kihtikaanenhs ohsha ehta kipakitinaan, maakishaa pahkweshikan ehkihtikaanenhsiwitc, maakishaa kaye pahkaan kaatinowank. 38 Kishemanitoo otinahtoon i'i kihtikaanenhs keshiwiiyawiimakahk aaniin​iko kaainentank. Entahsink hsa ko kihtikaanenhs ishiwiiyawiwan mayaa ehtinowank. 39 Shikwa kaye kaawiiyaahsiwiwaatc, kaawiin peshikwan kahkina ishiwiiyaahsiwihsiiwak. A'awe hsa ko inini wiin ehtinowitc ishiwiiyaahsiwi. Ikihsh kaye aya'aawihshak pahkaan ishiwiiyaahsiwiwak. Kaye pinehshiinshak pahkaan kewiinawaa ishiwiiyaahsiwiwak. Iki tahsh kaye kinooshek pahkaan kewiinawaa tinowiwak e'oskawiwiwaatc. 40 Ayaamakanoon tahsh kaye kiishikonk kaatinowankin wiiyawiwan kaatashipimaatisiwaatc kaye ahkiink kaatinowankin kaashiayaawaatc. Shikwa pahkaan ishionishihshininiwan kiishikonk kaatashiowiiyawiwaatc, kaye 'omaa ahkiink kaatashiowiiyawiwaatc eshionishihshininikin. 41 A'awe tahsh kaye kiisihs wiin iko tipinawe inaahsike. A'awehsh kaye tipihkikiisihs kaye wiin pahkaanatinini otinaahsikewin. Ampooshke kaye wanankohshak pepahkaan iko kewiinawaa ishiayinaahsikewak. 42 Mii 'owe keishinaakwahk kekiiwepimaatisi'intwaa kaa'ishkwaapimaatisiwaatc. Ahpii e'na'inikaatek i'i wiiyawimaa, tinowan ahkawe cinihshiwanaatahk. Paanimaahsh kiiwepimaatisinaaniwank mii 'iwe keishiayaakin wiiyawimaan wiihkaa cinihshiwanaatahsinokin. 43 Koohpaatentaakwan i'i e'na'ihcikaatek, miinawaa tahsh pimaacihcikaatek wiinke taonishihshin. Wahkewan i'i kaana'ihcikaatek, pimaacihcikaatek itahsh tasoonkentaakwan. 44 I'i wiiyaw kaana'inikaatek mii​'iwe kaa-ayaamakahk o'o noonkom pimaatisiwinink. Ahpiihsh i'iwe kiiwepimaacihcikaatek mii​'iwe tino wiiyaw keshiminwaapatahk ahcaahkomaank. Ayaa i'iwe wiiyaw kaa-ayaamakahk o'o onci noonkom pimaatisiwinink, kaye 'iwe tino ayaamakan wiiyaw keshiminwaapatahk ahcaahkonk onci. 45 O'owe aaniihsh ihkitoomakan Kehtemasina'ikan: "A'awe maawac niikaan kaa'oshi'intc inini Aatam (Adam), kii'ishi'aa pemaatisitc ehkikahcaahkwetc," ishipii'ikaate. A'awe tahsh wiin ishkwaac kaa-aawitc Aatam, mii 'awe ahcaahk kaapimaatisiishkaaketc. 46 Kaawiin weti nihtam onciimakahsinoon i'i kaa-ahcaahkwentaakwahk, kaawiiyaahsiwank hsa wiin nihtam kii'ayaamakan, miitahsh i'i kii'aniayaa naake kaa-ahcaahkwentaakwahk. 47 'Awe nihtam inini Aatam kaakii'ishiayaatc, mihtahkamikonk kii'oncioshihcikaaso o'omaa ekii'onciitc ahkiink. A'awe tahsh kotak inini kaakii'ishiayaatc kiihpioncii kihcikiishikonk. 48 Iki 'omaa ahkiink kaaoncitipentaakosiwaatc, mii'i enaatisiwaatc a'awe mihtahkamikonk kaakii'onci​oshihcikaasotc. Ikiweniwak itahsh kihcikiishikonk kaaoncitipentaakosiwaatc, mii'i enentaakosiwaatc enaatisitc a'a kihcikiishikonk kaakiihpionciitc. 49 Shikwa peshikwan iko ehpikikishkamowaatc otishinaakosiwin a'a nihtam mihtahkamikonk kaakii'oncioshi'intc, kaye kikanaapi kikishkamowaamin otishinaakosiwin a'awe inini kihcikiishikonk kaapionciitc. 50 Niiciotepwehtamook, mii 'owe ehkitoyaan: a'awe kaa-ayaatc wiiyaahs, miskwiini tahsh kaye ehta, kaawiin otaaishikashkihtoohsiin cimiinintc ci-ishiwiitoohkaasotc i'imaa Kishemanitoo otipencikewinink. I'i tahsh kaye kenipoomakahk kaawiin wiihkaa tamiinaakaniwansinoon i'i pishihshik cipimaatahk. 51 Aaniihsh, kiwiintamawininim i'i mahshi kaakiihpayahte kihkencikaatehsinok: kaawiin kahkina kikaishkwaapimaatisihsiimin. Kahkina tahsh kika-aanci'ikoomin. 52 Kesihkaa, peshiko pahsankaapink taishikitaahtapihse, ani-ishkwaahsek kahkina kekoon kenoontaakwaninik Kishemanitoo okihcipootaacikan. Aaniihsh tamatweinwemakan, miihsh i'i ahpii kekiiwepimaatisiwaatc iki nepowaatc ekaa miinawaa cinipohsikwaa. Miitahsh mincikahkina maamaw kika-aanci'ikoomin. 53 'Owe aaniihsh kaawahkenihshiwanaatahk nantawentaakwan ciaancihcikaatek wiihkaa cinihshiwanaatahsinok, i'ihsh kaye kaawahkenipoomakahk taishiaancihcikaate wiihkaa cinipoomakahsinok. 54 Ahpii tahsh kii'ishihsek kaawahkenihshiwanaatahk kaye kaaninipoomakahk ekii'aancihcikaatekin cinihshiwanaatahsinok kaye cinipoomakahsinok, mii ahpii tatipihse o'owe ihkitowin kaakii'ishipii'ikaatek: "Nipowin nihshiwanaacihcikaate, Kishemanitoo oshaakoocihtwaawin aasha kiihkiishihcikaate." 55 "Kiin nipowin, aanti tahsh keoncishaakoocihtwaayampan? Kiin nipowin, aanti keonciwiihsakiciihsoweyampan?" 56 I'imaa maci-ishiwepisiwinink oncikashkihtoomakan i'i nipowin ciwiihsaka'owemakahk, i'iwehsh kaye maci-ishiwepisiwin oncimashkawisiimakan i'imaa Onahshowewinink. 57 Miikwehc itahsh tainaa Kishemanitoo kaashimiininank kiinawint cishaakoocihtwaayank onci 'awe kaaTipeniminank Ciisahs Christ. 58 Haw ihsa niiciotepwehtamook kaasaaki'inakook! Soonkikaapawik, keko kekoon kikawahkawii'ikohsiim, mooshak hsa ciwenoocianohkiihtawek a'a kaaTipenciketc. Kikihkentaanaawaa ohsha ekaa anihshaa e'anohkiihtawaahsiwek kaaTipenciketc.

1 Kwaarintink 16

1 Shikwa 'iwe ehtashincikaatek ewii'maamawi pakitinikenk ciwiici'imintc Kishemanitoo opimaatisiima' eshinoontehsenitc Cootiiya (Judea) ahkiink kaa-ayaanitc: i'iwe hsa kaakii'ishi kihkino'amawakwaa pepahkaan kaaishimaawaci'itiwaatc otepwehtamook Kalehshiya (Galatia) ahkiink, mii'iwe kekiinawaa citootamek. 2 Entahso anami'ekiishikahk kaatahsopeshikoyek pahkaan ishiahsihk pankii kishooniyaamiwaa. Aaniin​iko awiya eshikashkihcikekwen cimanaaci'aatc, ekaa memwehc cimaawacihcikehsiwek ahpii takohshinaan. 3 Ahpii tahsh takohshinaan, awenenak iko kekwayahkwenimekwaa ninkamiinaak nintooshipii'ikewin ciwiintenik eshiopapaamisiwiniwaatc. Miihsh ninkaishinisha'waak Ceroosalamink (Jerusalem) ci-ishiwitoowaatc kikishewaatisiwi pakitinikewiniwaa. 4 Kiishpin tahsh keniin na'inaakwahk ci-ishaayaan ninkaniwiiciiwaak. 5 Piciinak itahsh kikapiotihsininim paanimaa kiishaapooshkaayaan Maahsitooniyaawahkiink (Macedonia). Mii aaniihsh weti enentamaan Maahsitooniyaawahkiink cianipimiayaayaan. 6 Maakishaa ishihsek kikawiiciyayaamininim, maakishaa kaye citashipipoonihshiyaan, miitahsh i'i ahpii ciwiici'iyek aanti hsa ko keishaayaan. 7 Kaawiin nintinentansii ehta cipimimekweyaapaminakook. Nawac nintinentaan kinweshiihsh ciwiiciyayaaminakook, kiishpin ishipakitinamawitc kaaTipenciketc. 8 Keyaapi ahkawe o'omaa ninka-ayayaa Ehpihsahsink (Ephesus) piinihsh iko aniocihcihsek Pentikwaastiwi kiishikan (Pentecost). 9 Aaniihsh inahte keyaapi 'omaa ehpaahkihsink niipiwa' cikashkihtooyaan kaakihci-inentaakwahkin. Niipiwa' itahsh awiya ayaawak ehkakwekipishkawiwaatc. 10 Kiishpin i'imaa pi-ishitakohshink a'a Timahti (Timothy) kaashiayaayek, kakweminowiici'ihk ekaa cisekisihsik. Aaniihsh taapishkoo kaye niin eshianohkawak kaaTipenciketc, kaye wiin tahsh otanohkawaan a'a Timahti. 11 Kaawiin otaa-aanwaapamikohsiin awiyan. Wiici'ihk itahsh, cinionciminomaacaatc cipiotihshitc miinawaa. Aaniihsh nimpii'aa cipiwiiciiwikotc i'i otepwehtamoo' kaawiihpiishaanitc. 12 A'awe tahsh kiicihkiweyinaan Apwaalahs (Apollos) kaainintc, niipiwa'aank nintaanakii'inaa ciniwaapaminek ciniwiiciiwaatc kotak wiicihkiweyimaa', kaawiin tahsh kanake mahshi inentansii noonkom ci-ishaatc. Aaniin ihsa ko ahpii ishina'ihsek, taishaa. 13 Ahshawaapiyohk, mashkawikaapawiyohk tepwehtamowinink, ahpane cisoonki-ininiiwiyek. Mashkawisiik! 14 Kahkina kekoon saaki'itiwinink ishitootamok. 15 Niiciotepwehtamook, kekoon kiwiihpakohsenimininim. Kikihkenimaawaa Istehpanahs (Stephanas) kaye owaahkaa'ikanink kaawiicitaamaatc. Miiwakiki niikaan kaakiihtashi kwehkaatisiwaatc i'imaa Ahkeyaawahkiink (Achaia), shikwa weweni ekii'inahsitisowaatc e'wiici'aawaatc i'i Kishemanitoo opimaatisiima'. 16 Kinantawenimininim ciniikaanakimekwaa cipisintawekwaa okoweniwak tino, kaye kahkina awiya' kaawiitanohkiimikowaatc e'ishipamiihtaakenitc. 17 Nintooncina'entam ekiihpiotihshiwaatc Istehpanahs kaye Pwaarcanetahs (Fortunatus) kaye Ahkeyihkahs (Achaicus). Kikii'naapishkaakowaak o'omaa e'ayaahsiwek. 18 Ninkiih kishishawisiishkaakook mii peshikwan iko kekiinawaa kaakii'ishihcike'inekwaa. Kitaakihkenimaawaak oko kaatinowiwaatc. 19 Kipooshoo'ikowaak otepwehtamook pepahkaan eshimaawaci'itiwaatc Eshaawahkiink (Asia). Pooshoo kaye kitikowaak Ahkwila (Aquila) kaye Parihsila (Priscilla) kaye iki 'omaa owaahkaa'ikaniwaank kaatashimaawaci'itiwaatc otepwehtamook. KaaTipencikenitc kitishiahpipooshoo'ikowaak. 20 Kaye kahkina o'omaa kaa-ayaawaatc owiicihkiweyimaak kewiinawaa kipooshoo'ikowaak. Otepwehtamook anami'eociimihkwak. Kiipooshoo'ekwaa, mii'i nahke ishipooshoo'itik. 21 Niin Pwaal (Paul) kipooshoo'ininim, niin tipinawe nininciink e'oshipii'amaan. 22 Awenen hsa ko siyaaki'aahsik ini kaaTipencikenitc, taicikaaso cinihshiwanaatisitc! "Marana taa!" – NinTipencikeminaan, wiihpitakohshinin! 23 Maano okishewaatisiwin a'a kaaTipeniminank Ciisahs Christ kikawiiciiwikowaam. 24 Kahkina kiinawaa nisaaki'iwewin kikawiihtashi wiiciiwikom e'ishimaamawi wiiciintiyank i'imaa Christ Ciisahsonk.

2 Kwaarintink 1

1 Niin Pwaal Ciisahs Christ otishinisha'waakanan Kishemanitoo kaakii'inentank, Timahti (Timothy) kiitanami'aanaan hsa niwiiciiwaa. Kitooshipii'amawininim kiinawaa otepwehtamook Kwaarintink (Corinth) kaaishimaawaci'itiyek, Kishemanitoo kaatipeniminek, kahkina kaye Kishemanitoo kaatipenimaatc pemaatisinitc misiwe kaa-ayaanitc weti Ahkeyaawahkiink (Achaia). 2 Taka Kishemanitoo Koohsinaan, kaaTipenciketc Ciisahs Christ kaye kikakishewaatisiihkantaakowaa; pisaanisiwinini kaye kikamiinikowaa. 3 Taka miikwehciwenimaataa Kishemanitoo, kaaTipenciketc Ciisahs Christ Kaaoyoohsitc, kaashawenciketc Weyoohsimintc, aaniihsh mii 'i weti kahkina wenciik naatamaakoowin. 4 Niwiici'ikonaan hsa kiiwawaanentamimaashihseyaank, keniinawint ciwiici'ankitwaa kotak iki wiinke kaakakwaatakimaashihsewaatc, ciaapacihtoowaatc hsa i'i wiici'ikoowin Kishemanitoonk kaakii'ontinamaank. 5 Taapishkoo hsa kaashi​wiici​kakwaatakihtoomankitc a'a Christ okakwaatakihtoowinink, mii hsa peshikwan i'imaa Christink Kishemanitoo ninkawiici'ikonaan. 6 Kiishpin kakwaatakihtooyaank, mii hsa kaaoncikakwaatakihtooyaank, kiinawaa ciwiici'ikooyek cipimaaci'ikoowisiyek kaye. Kiishpin tahsh wiici'ikooyaank, miitahsh kekiinawaa ciwiici'ikoowisiyek, e'miinikooyek mashkawisiiwin cikashkihtooyek cishashiipentamek ini kikakwaatakihtoowiniwaan, keniinawint kaashikakwaatakihtooyaank. 7 Kehcinaac itahsh kitepweyenimikoom ehkihkenimikooyek kekiinawaa e'ishikakwaatakihtooyek taapishkoo kaaishikakwaatakihtooyaank, kaye e'ishiwiici'ikoowisiyek taapishkoo kaashiwiici'ikooyaank. 8 Niitanami'aanaanik! Kiwii'wiintamaakoom aahpici ekiihkakwaatakihtooyaank weti Eshaawahkiink (Asia) kiiayaayaank, mii hsa kaa'ahpiihcimihcaakin ini kakwaatakihtoowinan, ekiihkosikwentaakwahkin kaye kaakii'miinikooyaank, mii hsa kaa'inentamaank kehcinaac mii 'i cinipoyaank. 9 Miitahsh kaa'ishinaakosiyaank taapishkoo ekii'inakimikooyaank cinipoyaank. Miitahsh o'o kaakii'onci-ishihseyaank, a'a hsa Kishemanitoo ciahpenimoyaank kaakiiwepimaatisi'aatc kaaniponitc, kaawiin wiin niinawint ciahpenimonotaasohsiwaank. 10 Aahpici tahsh ninkiihpehshwaapantaamin i'i nipowin. Kishemanitoo tahsh ninkiihshaapwii'ikonaan. Kaye ninkashaapwii'ikonaan. Wiin tahsh nintahpenimonotawaanaan miinawaa cinishaapwii'iyamintc. 11 Kekiinawaa hsa kiwiici'ihshinaam kiianami'ehtamawiyaank. Mii hsa kaye eshinaakwahk kaapaahtiinatinkin kaakii'ishianami'ehtamawiyaank hsa tanahkwehcikaatewan, Kishemanitoo tahsh ninkashawenimikonaan. Aahpici hsa tapaahtiinowak kenanaahkomiwewaatc niinawint onci. 12 O'owe tahsh wiinke ninkihci-inentaamin, ehkihkenintisoyaank kwayahk ekii'ishipimaatisiyaank o'omaa ahkiink, kwayahk kaye ekii'wiiciiwikooyek. Aahpici hsa weweni kikii'wiiciiwikoom, aaniihsh Kishemanitoo okishewaatisiwin ninkii'wiici'ikomin. Kaawiin wiin ininiiwikakiihtaawentamowin ninkii'wiici'ikohsiimin. 13 Keshianamihtooyek, keshinihsitohtamek ihsa ehta kitishipii'amaakoom, miitahsh eshipakohsenimikooyek cinihsitohtamek piinihsh weti ishkwaac. 14 Aanawiin pankii ehta e'nihsitohtawiyaank, kiinawaa ohsha cishikihci-inenimiyaank taapishkoo keshikihci-inenimikooyek ahpii Ciisahs kaaTipenciketc pitakohshink. 15 Nihtam hsa kehcinaac ninkii'inentaanaapan ewii'mawatihsinakook cionciminwentamek niishwaa. 16 Weti hsa Maahsitooniya (Macedonia) ahkiink kaawii'ishaayaampaan, ninkii'inentaanaapan ewii'waapaminakook, miinawaa pikiiweyaampaan ewii'waapaminakookipan cikii'wiici'iyekipan weti kaawii'ishaayaampaan Cootiiya (Judea) ahkiink. 17 O'o hsa ekii'ishihcikehsiwaan kaakii'inentamaampaan, mii na'i kaa'ishinaakosiyaan taapishkoo kekoon ehta e'mihci-inentamaan, e'ishihcikehsiwaan kaakii'inentamaan? Taapishkoo e'mihciwawaanentamaan ina nintishinaakos? Mii na'i eshinaakosiyaan "mii nanke" kii-ihkitoyaan, ehtootansiwaan tahsh i'i kaakii'ihkitoyaan? 18 Kehcinaac hsa Kishemanitoo kaashitepweyentaakositc, mii hsa 'iwe keniinawint eshitepweyaank kaainaacimohtaakooyek. 19 A'a hsa Ciisahs Christ Kishemanitoo oKosihsan kaakiihkakiihkwaanankitc Timahti (Timothy), Saailahs (Silas), keniin tahsh, kaawiin wiin Christ kaamihciwawaanentaakositc, wiin ihsa a'a Tepwewin. 20 Mii hsa a'a kaatepweyentamohtootc kahkina Kishemanitoon otahshotamaakewinini. Miitahsh "emen" wenci-ihkitoyaank, Christ Ciisahs ehtepweyenimankitc. Mii hsa eshinaakwahk e'naakohtaawankitc Kishemanitoo okihci-inentaakosiwin. 21 Wiin ohsha Kishemanitoo otishihcikewin kaaoncimashkawikaapawiyaank, kaye kiinawaa kaaoncimashkawikaapawiyek Christ e'wiiciiwinank. Kishemanitoo ohsha pahkaan kikii'ishioninikonaan ci-inanohkawank. 22 Wiin ohsha Kishemanitoo kikii'miinikonaan otAhcaahkwan, ekii'ishikihkinawaaci'inank, taapishkoo ekiihkihciwitipa'ank, ninkotink kehcinaac citipentamowank kaakii'ahshotamawinank. 23 Kishemanitoo hsa kitaawiintamaakowaa ehtepweyaan kaaihkitoyaan, okihkentaan kaye enentamowak. Ekaa cimaanentansiwek ohsha kaakii'oncipiishaahsiwaan Kwaarintink (Corinth). 24 Kaawiin wiin ninkakwetipentansiimin kitepwehtamowiniwaa. Ninkihkentaamin hsa e'mashkawikaapawiyek i'imaa kitepwehtamowiniwaank. Kiwiitanohkiimikoom kaye awahshime ciminwentamek.

2 Kwaarintink 2

1 Miitahsh kaakii'onci-inentamaan ciantawaapamihsinowinakook miinawaa, maakishaa hsa kitaaoncimaanentaam. 2 Aaniihsh kiishpin oncimaanentamekipan e'waapaminakook, awenen tahsh awiya keminwentami'ihpan, aaniihsh kahkina nintaamaanentamo'aak kekiiminwentami'iwaahpan. 3 Miitahsh kaakii'onci​oshipii'amawinakook, kaawiin ninkii'inentansii ahpii otihsinakook cimaanentami'iwaahpan iki pemaatisiwaatc kekiiminwentami'iwaahpan. Miitahsh eshikehcinaa'oyaan kiishpin kiiminwentamaan kekiinawaa e'minwentamek. 4 Ahpii hsa kii'oshipii'amawinakook, aahpici ninkiihkihcimikoshkaatentam, ekiihkosikote'eyaan kaye, aaniihsh kaawiin nintinentansii ewii'maanentami'inakook. I'i hsa ciwaapantamek cikihkentamek kaye aaniin ehpiihcisaaki'inakook. 5 Kiishpin tahsh awiya kiimaanentami'iwetc, kaawiin tahsh niin ehta ninkii'maanentansii, kekiinawaa hsa kahkina kaatahshiyek kikii'maanentaam. Miitahsh kaaonci-ihkitoyaan, kaawiin nintinentansii cisanaki'ak. 6 Miitahsh wa'a kaakiihtootawinek, aasha teminihk kikiihkakwaataki'aawaa i'i kaakiihtootawek. 7 Noonkom itahsh poonentamawihk, kanoonihk kaye weweni cipimaatisitc; maakishaa o'o tootawaahsiwek tanimaanentam piinihsh kaye wiinke tanipakicii. 8 Miitahsh eshipakohsenimininakook, cikihkentank wiinke ehsaaki'ek. 9 Kikii'oshipii'amawininim hsa o'o oshipii'ikan ekii'antakihkenimininakook kiishpin tepwe mooshak ciahshwiiyek ci-ishihcikeyek i'i kaakii'ishikihkino'amawinakook. 10 Ahpii hsa kiipoonentamawek awiya aaniin​iko kaakii'ishihciketc, keniin hsa nimpoonentamawaa. Ahpii hsa keniin kiipoonentamaakeyaan, kiishpin kota kiiayaak kekoon cipoonentamaan, nintishihcike hsa o'o Christ enaahsamiitc kiinawaa onci. 11 Aaniihsh kaawiin kinantawenimaahsiwaanaan maciaya'aa Setan cishaakooci'inank. Kikihkentamowaamin aaniihsh aaniin waa'ani-ishihciketc. 12 Ahpii hsa ekiihtakohshinaan weti Caroowahs (Troas) ootenaank ewiihkakiihkwaatamaan minwaacimowin ewiihtashimak Christ, ninkii'ishimihkaan hsa aasha kaaTipenciketc ekiihtawinamawitc pisaan​iko niin cianohkiiwak. 13 Miitahsh i'i kaa'ocaanimentamaan aaniihsh kaawiin ninkii'mihkawaahsii niitanami'aa Taitahs (Titus). Miitahsh ninkiihpooshoo'aak pemaatisiwaatc weti ekii'nakanakwaa, Maahsitooniya (Macedonia) ahkiink inahke ekii'ani-ishimaacaayaan. 14 Taka miikwehciwenimaataa Kishemanitoo. Wiin iitok kaakii'ishinaakosi'iyamintc ci-ishinaakosiyaank tahkonikanak kaapimiwinintwaa Christ e'niikaaniitc ekiihshaakoocihtwaatc. Wiin nintaapaci'ikonaan misiwe cioncikihkenimintc taapishkoo kekoon kaaminomaakwahk. 15 Christ nintaapaci'ikonaan e'minaahsamawintc Kishemanitoo. Iki tahsh kaapimaaci'intwaa iki kaye kaani​nihshiwanaatisiwaatc ominaantaanaawaa minaahsikan. 16 Iki aaniihsh kaaninihshiwanaatisiwaatc taapishkoo nipowinink otishimaantaanaawaa, iki tahsh kaapimaaci'intwaa, pimaatisiwinink otishimaantaanaawaa. Awenen tahsh ketepihsehpan o'owe ci-inanohkiitc? 17 Kaawiin itahsh wiin nintootansiimin i'i Kishemanitoo otihkitowin taapishkoo aaninta kaapaahtiinowaatc kaatootamowaatc ewii'ontinaawaatc tepinaahk shooniyaan. Kaawiin niinawint i'i nintishihcikehsiimin. Aaniihsh Kishemanitoo ninkii'ishinisha'okonaan weweni cikaakiikitoyaank enaahsamiitc, taapishkoo Christ otanohkii'aakana'.

2 Kwaarintink 3

1 Mii na'i enihtaakosiyaank miinawaa e'mihcikihci-inenintisoyaank? Mii na'i keniinawint eshinaakosiyaank taapishkoo kotak kaaishinaakosiwaatc memwehc oshipii'ikanan cipimiwitooyaank ciwaapantamek, komaa kaye oshipii'ikan cimiishiyaank keoncikihkenimikooyaank? 2 Kiinawaa hsa eshipimaatisiyek mii 'iwe oshipii'ikan wencikihkenimikooyaank, ninte'inaanink e'oshipii'ikaasoyek. Miitahsh kahkina awiyak okihkentaanaawaa, owaapantaanaawaa, taapishkoo e'anamihtoowaatc. 3 Aahpici payahtenaakwan Christ ekii'oshipii'ank o'o oshipii'ikan. Kaawiin wiin oshipii'ikanaapooni okii'aapacihtoohsiin, ini hsa okii'aapaci'aan otAhcaahkoni kaapimaatisinitc Kishemanitoon. Kaawiin wiin napakaapihkahsiniink kii'ishioshipii'ikehsii, pemaatisinitc ote'iniink ohsha kii'ishioshipii'ike. 4 Miitahsh o'o kaa'onci-ihkitoyaank, aaniihsh ninkehcinaa'aanaan Kishemanitoo e'wiiciiwankitc Christ. 5 Kaawiin tahsh kekoon nintayaahsiimin keonci-ihkitoyaankipan ehkashkihtooyaank citootamaank o'o anohkiiwin, Kishemanitoo hsa wiin nimiinikonaan cikashkihtooyaank. 6 A'a hsa kaakii'oshi'iyamintc kaaoncikashkihtooyaank cianohkaatamaank i'i oshkiahshotamaatiwin, kaawiin wiin i'i kaamihcioshipii'ikaatek Onahshowewin, i'i hsa Kishemanitoo otAhcaahkwan kaamiikiwenitc. I'i hsa kaamihcioshipii'ikaatek Onahshowewin nipowin i'imaa onciimakan. A'a tahsh wiin Ahcaahk miikiwe pimaatisiwin. 7 I'i hsa Onahshowewin ekii'mihcioshipii'ikaatek i'imaa napakahsiniink, Kishemanitoo hsa kaye okihci-inentaakosiwin kii'naakwanini ahpii i'i Onahshowewin kii'miikiwetc. A'a hsa kaye Moosihs (Moses) kaakii'ishiwaahsiinkwesotc aahpici wiipa kii'aniankonaakwanini. Miitahsh kaa'ahpiihci​mashkawinaakwaninik Isriyalak (Israel) kaawiin okiihkashkihtoohsiinaawaa cikanawaapamaawaatc Moosihsoon. Kiishpin tahsh i'i Onashowewin kaapiitamaakowaatc nipowin ekii'ahpiihci​kihci-inentaakwahk mekwaa e'anohkiimakahk, 8 nawac hsa i'imaa kaaishianohkiitc a'a Ahcaahk awahshime takihci-inentaakwan. 9 Kiishpin hsa i'i kaapiitamaakoyank nipowin ekiihkihci-inentaakwahk, nawac iitok i'i kaapimaaci'iwemakahk takihci-inentaakwan. 10 Noonkom tahsh e'ayaayank i'i nawac kaakihci-inentaakwahk, i'i hsa kaakiihkihci-inentaakwahkipan kaakii'waahseyaakipan aasha kii'ishkwaahse. 11 Kiishpin hsa i'i kaakiihkihci-inentaakwahk acina ehta ekii'ayaak, nawac i'i noonkom mooshak kaa-ayaak takihci-inentaakwan. 12 O'o tahsh e'ishiahpenimoyaank, mii hsa kaaoncisoonkite'eyaank kiikiikitoyaank. 13 Kaawiin wiin nintishinaakosihsiimin taapishkoo Moosihs kaakiihkipiinkwehpinitisotc kipiikinikanini ekii'aapacihtootc, mii hsa i'i kaakii'onci-ishihciketc ciwaapantansinik i'i Isriyala' (Israel) pemaatisinitc i'i kaakii'ishiwaahsiinkwesotc ekii'aniankonaakwaninik. 14 Mii hsa kaa'ishinaakwaninikin ini otinentamowiniwaan taapishkoo ekiihkipiikinikaatenikin. Miitahsh kaye noonkom kaakiishikaninik keyaapi i'i kipiikinikanini eshikipiikinikaatenik i'imaa otinentamowiniwaank kiianamihtoowaatc i'i masina'ikanini, kehteahshotamaakewinini kaashitashintenik. Paanimaa hsa awiya kiiwiiciiwaatc Christan, mii hsa paanimaa i'i kipiikinikanini e'otaahpinikaatenik. 15 Mihsawaa ko noonkom kaakiishikaninik kiinoontamowaatc e'anamihcikaatenik i'i Moosihs otOonahshowewinini, kaawiin nihsitohtansiiwak, taapishkoo keyaapi ehkipakootenik i'i kipiikinikanini i'imaa otinentamowiniwaank. 16 Ahpii tahsh awiya kiikwehkiihtawaatc kaaTipencikenitc, kipiikinikan otaahpinikaateni. 17 A'a tahsh kaaTipenciketc kaatashinsotc mii hsa a'awe Kishemanitoo otAhcaahkwan. Aanti tahsh iko a'a Ahcaahk eyaatc, mii hsa 'imaa eyaamakahk pakitinikoowin. 18 Kiinawint tahsh kahkina kimohsheyiinkwewaahseshkamowaamin kaaTipenciketc okihci-inentaakosiwin. Kitishi'ikonaan ci-ishinaakosiyank ciayaawank okihci-inentaakosiwin, mooshak kaanikihci-inentaakwaninik. KaaTipenciketc otAhcaahkwan ohsha kaaishi'inank.

2 Kwaarintink 4

1 Kishemanitoo hsa kaashawenciketc ninkii'miinikonaan o'o anami'ewianohkiiwin cianohkaatamaank. Miitahsh kaaoncipakitentansiwaank. 2 Kahkina hsa ninkii'wepinaamin kiimoocihcikewinan, kaa-akasinaakwahkin kaye ishihcikewinan, kaawiin wiin kaye niwayeshimiwehsiimin. Kaawiin wiin kaye pahkaan nintinwehtaawaahsiimin Kishemanitoo otihkitowin. I'imaa hsa kaaishipayahtehtaakwaninik Kishemanitoo otepwewin mii hsa 'imaa eshipimaatisiyaank, Kishemanitoo enaahsamiitc, kwayahk hsa ci-ishinaakosiyaank kahkina awiya kaaishiminwaapantank. 3 Kiishpin hsa minwaacimowin kaakakiihkwaatamaank kaacikaatek, mii hsa ehkaatamawintwaa iki kaawanihshinowaatc. 4 Aaniihsh a'a maciaya'aa kaamanitoowitc o'omaa ahkiink okii'ishi'aa' ciwaapihsinik i'imaa otinentamowininiink, mii hsa tahsh kaaoncitepwehtansinik. Kaawiin tahsh kaye onantawenimaahsii' ciwaapantaminitc i'i kaaishiwaahseyaanik i'i minwaacimowinini, i'imaa kaaishitashintenik Christ okihci-inentaakosiwin. Aaniihsh mayaa piko Kishemanitoonk ishinaakosi a'a Christ. 5 Kaawiin tahsh wiin niinawint ninkakiihkwaanitisohsiimin, Ciisahs Christ hsa nintihkitomin ehTipenciketc, niinawint itahsh nintihkitomin ehpamiihtaakooyek Ciisahs onci. 6 Kishemanitoo hsa kaakii'ihkitotc: "I'imaa hsa kaaishikashkiitipihkahk, kaawaahseyaak tasaakaahte," mii hsa a'awe peshikwan Kishemanitoo kaakii'waahseyaahtootc ninte'inaanin cikihkentamowankitc Kishemanitoo okihci-inentaakosiwin, Christ e'waahsiinkweshkaakotc. 7 Niinawint hsa kaa-ayaayaank o'o kaakihci-inentamaank wenootisiwin, mii hsa eshinaakosiyaank taapishkoo waapikaniwahkihkonk eshipiina'amaank, cinaakwaninik Kishemanitoo maawac e'mashkawisiitc, kaawiin niinawint. 8 Misiwe nintoonci​mikoshkaaciihkaakoomin, kaawiin tahsh nishaakoocishkaakoohsiimin; e'waanentamaank kaye ninkotink, kaawiin tahsh mahshi nimpakiciihsiimin. 9 Mooshak kaye ninkakwaataki'ikoomin, shaakooc tahsh kaawiin wiihkaa ninakanikoohsiimin; ehkawiwepinikooyaank kaye kaawiin tahsh mahshi ninihshiwanaaci'ikoohsiimin. 10 Miitahsh eshinaakwahk mooshak ehpimiwitaawankitc Ciisahs onipowin i'imaa niwiiyawinaanink, i'i hsa kaaonci-ishinaakwahk opimaatisiwin ciwaapancikaatenik i'imaa niwiiyawinaanink. 11 I'imaa hsa nimpimaatisiwininaanink, mii hsa eshinaakosiyaank taapishkoo mooshak e'naniisaanisiyaank e'ahshonipoyaank Ciisahs onci. I'i hsa opimaatisiwin ciwaapancikaatenik i'imaa niwiiyawinaanink kaawahkenipoomakahkin. 12 Mii hsa 'o kaaicikaatek, nipowin niinawint ninooci'ikoomin i'imaa nimpimaatisiwininaanink, kiinawaa tahsh pimaatisiwin anohkiimakan kipimaatisiwiniwaank. 13 Keniinawint tahsh peshikwan eshitepweyentamaank Kihcimasina'ikan eshipii'ikaatek: "Ninkiihkiikit aaniihsh ehtepwehtamaan." Miitahsh peshikwan keniinawint e'ishitepwehtamaank kaaoncikiikitoyaank. 14 A'a hsa Kishemanitoo kaakiihkiiwepimaatisi'aatc ini kaaTipencikenitc Ciisahsoon, ninkihkenimaanaan hsa cikiiwepimaatisi'iyamintc aaniihsh niwiiciiwaanaan Ciisahs. Kikaishiwinikonaan tahsh maamaw ci-ishiayaawank weti kaashiayaatc. 15 Kiinawaa o'o kahkina kaaonci-ishihsek; iki hsa kaapaahtiinowaatc pemaatisiwaatc e'anitepinikowaatc Kishemanitoon okishewaatisiwinini aahpici tahsh tapaahtiinatinoon ini anami'aawinan cinanaahkomintc Kishemanitoo kaakihci-inentaakositc. 16 Miitahsh o'o wiihkaa kaaoncipakitentansiwaank. Aanawiin niwiiyawinaanin e'aninipoomakahkin, shaakooc tahsh nintahcaahkonaanik nimpimaatisiwininaanink anioshkioshihcikaniwiwak entahsokiishik. 17 O'o hsa kaaishiaanimisiyaank ninaankentaamin, aaniihsh acina ehta ninooci'ikomin. Miitahsh keonciotihsikoyaank maawac kaakihci-inentaakwahk kihci-inentaakosiwin wiihkaa kepoonihsehsinok. 18 Kaawiin tahsh wiin ini kaanaakwahkin ninkanawaapantansiimin, ini hsa kaanaakwahsinokin; ini hsa kaanaakwahkin acina ehta ayaawan, ini tahsh wiin kaanaakwahsinokin pishihshik ayaawan.

2 Kwaarintink 5

1 Kikihkentaamin hsa o'o pakwaanekamik kaataanotamank o'omaa ahkiink, mii hsa i'i kiwiiyawinaan, piikopicikaatek, kitayaamin waahkaa'ikan Kishemanitoo wiin iko kaakii'oshihtamawinank weti kihcikiishikonk ci-ishitaawank. Kaawiin tahsh wiin oninciimaank kii'oncioshihcikaatehsinoon, mooshak​iko ahpane ta-ayaamakan. 2 Kaawiin tahsh kitanihsaa'ohsiimin e'moohkoneyank e'mihsawentamank ini kitaawininaanin kihcikiishikonk kaaonciikin, cipihsihkamoonikooyank. 3 Ahpii hsa pihsihkamank, kaawiin kikaishinaakosihsiimin kekoon ehkikishkansiwank. 4 O'omaa hsa e'ayaayank ahkiiwipakwaanekamikonk, kitinamanci'omin ewii'moohkoneyank onsaam ehkakwaatakihtooyank. Kaawiin tahsh wiin kitinentansiimin cikiihcikoshkamoonikooyank ono kitahkiiwiwiiyawinaanin, i'i hsa e'antawentamank ewii'ayaayank i'i kihcikiishikonk kaa-ayaak cipihsihkamoonikooyank, i'i hsa kaaninipoomakahk cini-ishiankonaakwahk i'imaa pimaatisiwinink. 5 Kishemanitoo hsa kaakiihkwayaanci'inank pahkaan ci-ishinaakosiyank, kikii'miinikonaan otAhcaahkwan ewiihkihkinawaacihtootc i'i kaakii'ishiahshotamawinank. 6 Miitahsh mooshak kaaoncimashkawentamank, kikihkentaamin kaye minihk iko ketaayank kiwiiyawinaanink, kaawiin kitayaahsiimin weti kaaTipenciketc otaawinink. 7 Tepwehtamowinink hsa kitishipimohsemin, kaawiin wiin kaaishiwaapantamank. 8 Aahpici hsa kimashkawentaamin e'ishimihsawentamank kaye ewii'nakatamank ono kiwiiyawinaanin, ewii'wiiciayaamank kaaTipenciketc weti kaashiayaatc. 9 Maawac tahsh eshimihsawentamank citootamank, mii hsa i'i ciminwaapaminank o'omaa kaashitaayank, komaa kaye weti. 10 Aaniihsh kahkina kaatahshiyank oncitako ishinaakwan cinakishkawank Christ enaahsamiitc, citipaahkoninank. Awiya hsa tashitipa'amawaa kahkina kekoonini kaakii'ishihciketc i'imaa ahkiink mekwaa owiiyawink kiipimaatisitc, komaa kaye kaaminohcikekopanen, komaa kaye kaamaashihcikekopanen. 11 Ninkihkentaamin hsa wekonen kaaicikaatek cikohsintc a'a kaaTipenciketc, miitahsh kaye kaaoncikakwekashkimankitwaa kotak awiyak. Mii hsa eshipakohsenimikooyek i'imaa kite'iwaank cikihkenimiyaank taapishkoo Kishemanitoo kaashikihkenimiyamintc. 12 Kaawiin niinawint miinawaa niwii'mihci​minotashintisohsiimin, kiwii'miinikoom kekoon keoncikihtakimihshiyaank, cikashkihtooyek hsa kwayahk cinahkwehtawekwaa iki kaakihci-inentamowaatc aaniin eshinaakosinitc ininiwan akwaciink inahke, i'imaa tahsh opimaatisiwininiink cikii'ishikanawaapamaawaahpan. 13 Kiishpin tahsh ishinaakosiyaank ehkiiwashkweyaatisiyaank, Kishemanitoo ohsha kaaonci-ishiayaayaank kaa-anohkiihtawankitc. Kiishpin kaye pakahkentamaank, kiinawaa ohsha ciwiici'ikooyek kaaonci-ishiayaayaank. 14 Christ ihsa osaaki'iwewin nintipenimikomin, ehkihkentamaank kaye peshik hsa inini ekii'nipoohtamawaatc kahkina ininiwa'. Miitahsh kahkina hsa awiyak kaakii'onciwiiciiwaawaatc i'imaa onipowininiink. 15 Kahkina hsa awiya' okii'nipohtamawaa', iki hsa kaapimaatisiwaatc ci-ishipimaatisiwaatc ciminwaapamikowaatc ini kaakii'nipohtamaakowaatc, kaakiihkiiwepimaatisi'imintc wiinawaa onci. Kaawiin wiin wiinawaa ehta kaaoncipimaatisiwaatc. 16 Kaawiin tahsh noonkom nintishikanawaapamaahsiwaanaan awiya taapishkoo inini kaaishikanawaapanciketc. Kiishpin hsa i'i aapitink kii'ishikanawaapamankitipan a'a Christ, kaawiin noonkom i'i nintishihcikehsiimin. 17 Kiishpin hsa awiya ayaatc i'imaa Christink, mii hsa 'i kii'oshkioshihcikaniwitc. Kahkina hsa kehteya'iin kii'ishkwaahsewan, oshkaya'iin tahsh kiihtakohshinoomakanoon. 18 Kishemanitoo hsa o'o kahkina otishihcikewin, i'imaa Christink kaakii'naaciwiihkopininank ciminowiiciiwankitc, kaakii'miininankitc kaye o'o anohkiiwinini cinaaciwiihkopinankitwaa pemaatisiwaatc cinaasihkawaawaatc Kishemanitoon. 19 Kishemanitoo hsa i'imaa Christink kii'ayaa ekii'naaciwiihkopitamaasotc pemaatisinitc cikiiwewiiciiwikotc o'omaa ahkiink kaa-ayaanitc. Kaawiin okii'akintamawaahsii' i'i kaakii'ishimacitootaminitc. Ninkiihpakitinamaakonaan hsa i'iweni ihkitowinini kaaishitashintenik ewii'minowiiciiwaatc pemaatisinitc. 20 Niinawint hsa kaakiikitohtamawankitc a'a Christ, Kishemanitoo hsa nintaapaci'ikonaan ehkanooninek, miitahsh eshipakohsenimikooyek aaniihsh ninkiikitoohtamawaanaan Christ: "Kiiwenaasihkawihk Kishemanitoo." 21 Christ tahsh wiihkaa kaakiihkihkentansik macitootamowinini, shaakooc itahsh macitootamowinink okiihtinowi'ikoon Kishemanitoon kiinawint onci, kiinawint meshkwac Kishemanitoo okwayahkwaatisiwinink citinoowiyank e'wiiciiwank Christ.

2 Kwaarintink 6

1 I'imaa hsa kaaishiwiitanohkiimankitc a'a Kishemanitoo, miitahsh eshipakohsenimikooyek kiinawaa aasha kaakii'miininek Kishemanitoo okishewaatisiwin, keko anihshaa otaahpinamowaahkek. 2 Kishemanitoo hsa ihkito: "Ahpii hsa ekii'ocihcihsek ciwaapanta'inakook niminohcikewin, kikii'noontawininim. Ahpii hsa ekii'ishikiishikahk cipimaaci'inakook, kikii'wiici'ininim." Inashke pisintamohk! Tipa'ikan ohsha aasha kii'ocihcihse citepinamowek Kishemanitoo ominohcikewin, mii hsa noonkom kaakiishikahk eshikiishikahk cipimaaci'ikooyek! 3 Aahpici tahsh nintayaankwaamisimin cikipishkawaahsiwankitc awiya, aaniihsh kaawiin ninantawenimaahsiwaanaan awiya cimihkank macikekoonini i'imaa nintanohkiiwininaanink. 4 Mii hsa eshinaakohtooyaank Kishemanitoo e'anohkiihtawankitc i'imaa kaaishishashiipentamaank ini aanimisiwinan, kaaishikakwaatakihseyaank, kaaishisanakihseyaank kaye. 5 Ekiihpahpahkihte'okooyaank, ekiihkipa'okooyaank, ekii'maamawiotihtinikooyaank, mooshak kaye ehkaashihpo​anohkiiyaank, ekaa e'nipaahsiwaank kaye mooshak, miicim kaye ekaa ekii'ayaahsiwaank. 6 Pehkaatisiwinink, kihkentamaawinink, shashiipentamowinink, minotootaatiwinink kaye, mii hsa i'imaa eshinaakohtooyaank Kishemanitoo otanohkii'aakana' ehtinoowiyaank; i'imaa kaye Kishemanitoo otAhcaahkwan e'wiitanohkiimiyamintc, tepwe kaye kaaishisaaki'iweyaank; 7 i'imaa kaye kaaishitipaatotamaank tepwewin, Kishemanitoo kaye omashkawisiiwinink. Mii hsa i'i kwayahkwaatisiwin kaa-aapacihtooyaank kiimiikaasoyaank, mii kaye 'iwe kaa-aapacihtooyaank kiinaatamaasoyaank. 8 Ninkotink tahsh ninkihtenimikoomin, ninkotink kaye kaawiin sesik nintootaakoohsiimin, ninkotink noociko nintikoomin, ninkotink kaye niminotashimikoomin. Taapishkoo hsa ehkakiinawishkiyaank nintootaakoomin aanawiin ehtashintamaank tepwewin. 9 Miitahsh entootaakooyaank taapishkoo ehkihkenimikoohsiwaank, shaakooc tahsh kahkina awiyak ninkihkenimikonaanik. Taapishkoo kaye e'ishinaakosiyaank e'nipoyaank, shaakooc tahsh nimpimaatisimin kaaishiwaapamiyaank. Ehkakwaataki'ikooyaank kaye, kaawiin tahsh mahshi ninihsikoohsiimin. 10 Aana kaye e'macentamaank shaakooc tahsh mooshak ninciihkentaamin. Ehkitimaakinaakosiyaank kaye, shaakooc tahsh nipiwa' pemaatisiwaatc niwenootisi'aanaanik. E'ishinaakosiyaank kaye kekoon e'ayaahsiwaank, shaakooc tahsh kahkina kekoon nintayaamin. 11 Kiinawaa hsa weti Kwaarintink (Corinth) kaa-ayaayek, waa'ikooyek hsa kikii'ikoom, kikiihpaahkinamaakoom ninte'inaanin ehsaaki'ikooyek. 12 Kaawiin tahsh niinawint kaakiihkipa'amaakooyek ninte'inaanin, kiinawaa ohsha kaakiihkipa'amawiyaank kite'iwaan. 13 Taapishkoo tahsh e'oniicaanihsiminakook kitishikanoonininim – kekiinawaa tahsh waapanta'ihshinaam ewiihsaakiwiiciiwihshiyaank, otaahpinihshinaam kite'iwaank. 14 Keko wiin peshikwan ishikakwewiiciiwaahkekwaanik iki kaatepwehtansikwaa, aaniihsh kaawiin taaishihsehsinoon. Taaishinaakwan ina ciniishinkipanen i'i kwayahkwaatisiwin i'i tahsh macipimaatisiwin? Tawiiciintiimakanoon ina i'i kaawaahseyaak i'i tahsh kaakashkiitipihkahk? 15 Peshikwan ina Christ a'a tahsh kaye maciaya'aa taainentamook? Peshikwan ina ishihcikewak a'a kaatepwehtank a'a kaye kaatepwehtansik? 16 Kishemanitoo na okihcianami'ewikamik ishihcikemakanini, kaaishihcikenitc i'i manitoohkaana'? Kiinawint hsa kaaPimaatisitc Kishemanitoo okihcianami'ewikamik! Kishemanitoo hsa wiin ekii'ihkitotc: "Ninkawiicikapehshiimaak hsa iki kaatipenimakwaa pemaatisiwaatc, ninkawiicitaamaak kaye mekweya'ii, Ninkaomanitoomikook tahsh, kewiinawaa tahsh ninkatipenimaak." 17 KaaTipenciketc hsa e'ihkitotc: "Nakanihkwak, pahkaan kiinawaa ishipimaatisik, Keko wiin papaamentankek kekoon kaawiinentaakwahk. Miitahsh keshiotaahpininakook, 18 KikaoTetemim itahsh, kiinawaa tahsh kikaokosihsimininim, kikaotaanihsimininim kaye, kii'ihkito kaaTipenciketc kaaMaamawi​mashkawisiitc."

2 Kwaarintink 7

1 Kaasaaki'inakook, o'owe tahsh ekii'ishiahshotamaakooyank, taka hsa pehkihtootaanin kipimaatisiwininaanin. Taka kaawiin kikapapaamentansiimin kekoon kewiinishkaakoyank i'imaa kiwiiyawinaanink, kitahcaahkonaanink kaye. Taka weweni pimaatisiihkantawaataa ehkihci-inenimank Kishemanitoo. 2 Tawinamawihshinaam ihsa i'imaa kite'iwaank, kaawiin iitok awiya ninkii'maashiwiiciiwaahsiwaanaan, kaawiin kaye awiya ninkii'nihshiwanaaci'aahsiwaanaan, kaawiin kaye awiya ninkii'wayeshimaahsiwaanaan. 3 I'i hsa aasha otaanaank kaakii'ikooyek, kaawiin tahsh wiin ewii'nihshiwanaasominakook kaakii'onci-ihkitoyaan. Ninte'inaanink hsa kisaaki'ikoom, ewii'wiicinipoomikooyek, ewii'wiicipimaatisiimikooyek kaye. 4 Aahpici hsa kikehcinaa'ininim, kikihci-inenimininim kaye, miitahsh i'imaa kaaoncimashkawentamaank. Kahkina kaaishiocaanimihseyaank aahpici hsa nimooshkineshkaakon minwentamowin. 5 Mihsawaa hsa ekiihtakohshinaank weti Maahsitooniyaahkaank (Macedonia) kaawiin weweni ninkii'anwepihsiimin. Misiwe hsa aanamisiwin kii'ayaa, taapishkoo ekii'miikaasoyaank ekii'ishinaakosiyaank, ekiihkohtaaciyaank kaye ninte'inaanink. 6 Kishemanitoo tahsh kaamashkawite'e'aatc awiya' kaapakitentaminitc, ninkiihpiicinisha'amaakonaan Taitahsan (Titus) keonciminwentamaank. 7 Kaawiin tahsh wiin ehta ekiihtakohshink kaakii'onciminwentamaank, i'i hsa kaye ekiihtipaaciminek aaniihsh kaa'ishiwiici'ek cimashkawentank. Ninkii'wiintamaakonaan kaye aahpici ekii'antawentamek ewii'waapamiyek, e'maanentamek kaye, e'ishinaakosiyek ihsa ewii'naatamawiyek, miitahsh awahshime kaakii'onciciihkentamaan. 8 Mihsawaa ko kii'oncimaanentamekipan i'i oshipii'ikan niin kaakii'oshipii'amaan, kaawiin hsa nimaanentansii ekii'oshipii'amaan. Acina ninkii'maanentam ekii'waapaminakookipan e'maanentamek. Acina tahsh ehta kikii'maanentaam. 9 Kaawiin tahsh wiin ekii'maanentamek kaakii'onciminwentamaan, i'imaa hsa kimaanentamowiniwaank ekii'oncipahkaanishiayaayek. Kishemanitoo tahsh kikii'miinikowaa i'i maanentamowin. Kaawiin tahsh kekoon kikii'ishimaashitootaakoohsiim. 10 Aaniihsh i'i Kishemanitoo kaamiikiwetc tino maanentamowin mii hsa 'imaa wenciik kwehkaatisiwin, miitahsh imaa keoncipimaaci'intc awiya. Miitahsh awiya kaawiin tawiiyakentansii pimaaci'intc. Ahkiink itahsh kaaonciik tino maanentamowin mii 'imaa nipowin wenciik. 11 Kiwaapantaam inahsh aaniin Kishemanitoo kaa'inaapacihtootc i'i kimaanentamowiniwaa? Miitahsh kaa'onciwewenipimaatisiyek. Mii kaye kaaonci​kakwe​pehkinaakosiyek, mii kaye kaakii'oncinishkentamek o'o kaakii'ishihsek, mii kaye kikii'oncinaniisaanentaam, mii kaye kaakiioncimihsawentamek ewii'waapamiyek, aahpici kaye kwayahk kikiihkakwekiishihtoom kekoon kiinoocihtooyek ewii'nana'ihtooyek kaamamaashiimakahk. Miitahsh i'imaa eshinaakohtooyek misiwe kwayahk ehpimaatisiyek. 12 Kaawiin tahsh wiin ehta kaakii'oncioshipii'amawinakook a'a kaakii'maashitootank, a'a kaye kaakii'maashitootawintc. Mii aaniihsh o'o kaakii'onci-ishihcikeyaank, kiinawaa ciwaapantisoyek enaahsamiitc Kishemanitoo aaniin ehpiihcisaaki'iyaank. 13 Miitahsh i'i kaakii'oncimashkawentamaank. Kaawiin wiin ehta niinawint kaakii'onciminwentamaank. Taitahs ohsha ekii'minwentank kaakii'onciciihkentamaank. Aaniihsh pisaan kii'onci-inentam kiinawaa kahkina kaakii'ishihcikeyek. 14 Aahpic ohsha kikiihkihci​minotashimininim ahpii kaakiihkakanoonak Taitahs. Kaawiin ninkii'onciakacihsii, aaniihsh ninkiihtepwe kaakii-ishitashiminakook. Mooshak ohsha tepwewinink kikii'ishikanoonikoom. I'i tahsh kaye kaakii-ishikihci​minotashimikooyek Taitahs ekii'noontank, aasha kiihkihkentaakwan ekiihtepweyaank. 15 Aahpici tahsh awahshime kitanisaaki'ikowaa e'ishimaamihkawitc aahpici ekii'na'ihtawek kekoonini ekii'ishikanooninek, weweni ekiihpiintikanek kaye taapishkoo ekiihkohtaanenimek, ekii'naninkishkaayek kaye. 16 Aahpici tahsh niminwentam misiwe e'ishitepweyeniminakook!

2 Kwaarintink 8

1 Kiinawaa tahsh niitanami'aanaanik, kinantawenimikoom cikihkentamek aaniin Kishemanitoo okishewaatisiwin eshianohkiimakaninik pepahkaan otepwehtamook kaaishimaawaci'itiwaatc i'imaa Maahsitooniya (Macedonia) ahkiink. 2 Aana tahsh wiin ekii'maashihsewaatc onsaam ekiihpaahtiinatinkin aanamisiwinan, shaakooc tahsh kaa'ahpiihciminwentamowaatc, aahpici hsa kii'minohcikewak ahpii e'miikiwewaatc shooniyaan aanawiin ekiihkitimaakisiwaatc. 3 Kiwiintamawininim tahsh, ekii'miikiwewaatc tahsh minihk iko ehkokashkihtoowaatc, awahshime kaye kii'miikiwewak, wiinawaa hsa ko ekii'inentamowaatc. 4 Miitahsh ninkiihpakohsenimikonaanik, ninkiihkakwecimikonaanik kaye ewii'wiici'aawaatc i'i Kishemanitoo opimaatisiima' kaakitimaakisinitc Cootiiya (Judea) ahkiink kaa-ayaanitc. 5 Awahshime tahsh kii-ishihcikewak kaakii'ishi​pakohsentamaankipan, pinamaa hsa okiih​pakitinamawaawaan opimaatisiwiniwaan kaaTipencikenitc, kaye niinawint ninkiih​pakitinamaakonaanik kaaishi​antawentaminitc Kishemanitoon. 6 Mii hsa tahsh maano kaakii'oncikanoonankitc Taitahs (Titus) ciwiici'inek cikiishihtooyek ewii'naakohtooyek kisaaki'iwewiniwaa, wiin aaniihsh okiimaacihtoon i'i kipakitinikewiniwaa. 7 Aahpici hsa misiwe e'ishiwenootisiyek, i'imaa kitepwehtamowiniwaank, kikiikitowiniwaank, kikihkentamaawiniwaank, i'imaa kaye weweni kaaishiwiitoohkaasoyek, kaaishisaaki'iyaank tahsh keniinawint; miitahsh kaye eshiantawenimikooyek aahpici cinaakwahk kisaaki'iwewiniwaa o'o waa'ishiminohcikeyek. 8 Kaawiin tahsh wiin kekoon nintoonahtoohsiin aaniin keishihcikeyekipan! Kikii'wiintamawininim aaniin kewiinawaa otepwehtamook kaakii'ishiwiicihtwaawaatc ehpakitinikewaatc, keoncikihkentamaan aaniin mayaa kekiinawaa ehpiihcisaaki'iweyek. 9 Kikihkenimaawaa aaniin kaa-ahpiihci​kishewaatisitc Tepenciketc Ciisahs Christ, aanawiin ekii'wenootisitc, miitahsh kaa'ishi'itisotc cikitimaakisitc kiinawaa onci, i'imaa hsa okitimaakisiwinink kiinawaa cionci​wenootisiyek. 10 Miitahsh niin enentamaan: aahpici taaonishihshin cikiishihtooyekipan i'i kaakii'maacihtooyek pipoononk. Kiinawaa aaniihsh nihtam kikii'maaciipakitinikem, ekii'minwentamek kaye ewii'ishihcikeyek. 11 Kiishiihtook tahsh i'i anohkiiwin. Taapishkoo hsa kaakii'ishimoocikentamek kiimaacihtooyek, mii hsa peshikwan ishikiishiihtook ciaapacihtooyek ini noonkom kaa-ayaayek. 12 Kiishpin hsa ciihkentamek e'miikiweyek, Kishemanitoo hsa okaotaahpinaanan kimiikiwewiniwaan aaniihsh i'imaa kekoonan kaa-ayaayek kitooncimiikiwem, aaniihsh kaawiin memwehc kekoon kitaamiikiwehsiim kiishpin kekoon eyaahsiwek. 13 Kaawiin tahsh wiin iki kaawiici'ekwaa cimihciayayaawaatc, kiinawaa ehkihcianohkiiyek e'miinekwaa kekoon. Peshikwan iitok taaishiwiici'itim. 14 Aaniihsh mekwaa noonkom kiinawaa wiinke kiminohsem, e'wenootisiyek kaye, miitahsh eshinaakwahk ciwiici'ekwaa iki kaanoontehsewaatc. Ninkotink maawiin taishihse kiinawaa cinoontehseyek, wiinawaa tahsh ciwenootisiwaatc. Mii​hsa tahsh wiinihtamawaa kikawiici'ikowaak. Miihsa tahsh pepeshikwan keshiwiitoohkotaatiyek. 15 Kihcimasina'ikan hsa e'ishipii'ikaatek: "Awiya niipiwa' kaakii'mooshakiniketc kaawiin niipiwa' awahshime kekoonini okii'ayaahsiin. A'a tahsh wiin pankii kaakii'mooshakiniketc kaawiin kii'manesihsii kekoonini." 16 Miikwehc hsa nintinaanaan Kishemanitoo ekii'miinaatc Taitahsan (Titus) kewiin peshikwan ci-ishimoocikentaminitc ciwiici'iminek taapishkoo niinawint kaawii'ishiwiici'ikooyek. 17 Shemaak tahsh kaye kii'inentam ewii'ishihciketc kaakii'inankitc, wiin hsa ko ekii'inentank ewii'wiicihtwaatc, aahpic kaye ekii'inentank ewii'antawaapaminek. 18 Otihsinek itahsh okapakamiwiiciiwaan ini kaakihtenimimintc kiitanami'aanaanin. Niinawint hsa ninkii'ishinisha'waanaan a'a kiitanami'aanaan, aaniihsh aahpici kihtenimaa i'imaa pepahkaan kaaishimaawaci'itiwaatc otepwehtamook otanohkiiwinink onci kaye ehkakiihkwaatank minwaacimowinini. 19 Kaye tahsh i'imaa otepwehtamook kaaishimaamaawaci'itiwaatc kii'otaahpinikaniwi ekii'inakimintc kaye ciwiiciiwinankitc ehpimiwitooyaank saaki'iwewinink kaaonciimakahkin pakitinikewinan, kaanaakacihtooyaank kaaTipenciketc hsa cioncikihci-inentaakositc, enaakohtooyaank itahsh kaye e'antawentamaank ewii'wiitoohkaasoyaank. 20 Aahpici tahsh nintayaankwaamihcikemin o'o kaaonci-ishihcikeyaank. Kaawiin aaniihsh ninantawenimaahsiwaanaan awiya ci-inentank kwayahk e'naanaakacihtoohsiwaank o'o kaawenootahk pakitinikewin. 21 Miitahsh maawac eshimihsawentamaank kwayahk ewii'ishihcikeyaank. Kaawiin wiin ehta kaaTipenciketc ciminwaapantank, ininiwak hsa kaye ciminwaapantamowaatc. 22 Miinawaa tahsh kotak peshik niitanami'aanaan nintakoishinisha'waanaan cipiwiiciiwikotc i'i kaa-antawaapamiminek. Ninkii'antakihkenimaanaan hsa mooshak, ninkihkenimaanaan kaye aahpici ewii'wiitoohkaasotc. Aasha tahsh kikehcinaa'ikowaa, miitahsh awahshime kaaoncimoocikentank ewii'wiitoohkaasotc. 23 Taitahs tahsh wiin, mii hsa a'a niwiiciiwaakan, e'wiitanohkiimitc o'o kaawiici'ikooyek. Iki tahsh kotak niishin kiitanami'aanaanik kaawiihpiwiiciiwaawaatc Taitahsan otishinisha'okowaa' otepwehtamoo' pepahkaan kaaishimaawaci'itinitc. Kaye opimaatisiwiniwaank Christ oncikihci-inenimaa. 24 Waapanta'ihkok tahsh ehsaaki'ekwaa. Kehcinaac hsa misiwe kaa-ayaawaatc otepwehtamook cikihkentamowaatc ehtepweyaank ihsa kaaishiminotashimikooyek mooshak.

2 Kwaarintink 9

1 Kaawiin tahsh wiin memwehc cioshipii'amawinakook ciwiintamaakooyek, iki hsa kaaishiwiici'intwaa Kishemanitoon kaatipenimikowaatc Cootiiya (Judea) ahkiink kaa-ayaawaatc. 2 Aaniihsh ninkihkentaan ewii'wiitoohkaasoyek. Ninkii'wiintamawaak kaye weti Maahsitooniyaawahkiink (Macedonia) kaa-ayaawaatc awiyak aaniihsh mooshak kiwii'wiitoohkaasom. O'o tahsh ekii'ihkitoyaan: "Kiitanami'aanaanik hsa Ahkeyaawahkiink (Achaia) kaa-ayaawaatc pipoononk ihsa aasha kiihkiishihtaawak ewii'wiitoohkaasowaatc." I'iweni tahsh ekii'waapantamowaatc aahpici ewii'wiitoohkaasoyek, miitahsh kewiinawaa peshikwan enentamowaatc ewii'ishihcikewaatc. 3 Mii hsa tahsh kaa'onci​niikaaninisha'wakwaa oko kiitanami'aanaanik, cikiiwanimohsiwak i'i mooshak kaaishiminotashimikooyek. Mii​hsa tahsh keyaapi ehkitoyaan, kikakiishihtaam iitok aasha ewii'miikiweyek. 4 Kiishpin tahsh pakamiwiiciiwakwaa Maahsatooniyaank kaaonciiwaatc, mihkaakooyek tahsh ekiihkiishiihtaahsiwek, aahpici nintaakihciakacimin. Kekiinawaa tahsh kitaa-akacim, aaniihsh wiinke kikihci-inenimininim! 5 Miitahsh kaa'onciniikaaninisha'wakwaa oko kiitanami'aanaanik ciotihsinekwaa cipwaa takohshinaan. Miitahsh cikiishioshiihtaanotamek i'i kaakii'ahshotamaakeyek ewii'miikiweyek. Ahpii weti pitakohshinaan aasha kikakiishihtaam. Miitahsh i'imaa keshinaakwahk ehsaakihtooyek e'miikiweyek, kaawiin wiin e'miikiweyek aaniihsh e'ishinaakwahk cimiikiweyek. 6 O'o tahsh kitinininim, awiya hsa pankii kaakihtikaatank kihtikaanenhsan, aahpici pankii okamoona'aanan kihtikaanan. A'a tahsh niipiwa' kaakihtikaatank kihtikaanenhsan aahpici niipiwa' okamoona'aanan kihtikaanan. 7 Awiya hsa cishimiikiwehpan minihk iko wiin enentank, kaawiin wiin cinishkentank, kaawiin wiin kaye ci-inentank mii hsa miinawaa cimiikiweyaan. Kishemanitoo hsa oshawenimaan ini kaaminwentaminitc kiimiikiwenitc. 8 Kishemanitoo hsa okashkihtoon cimiininek awahshime ahpiihc wiin kaaishinoontehseyek, mooshak hsa weweni citepihseyek kaaishinoontehseyek, citepihseyek kaye kotak awiyak cimiinekwaa. 9 Kihcimasina'ikan hsa e'ishipii'ikaatek: "A'a hsa kwayahk inini kaamanaacihcikehsik e'miinaatc kaakitimaakisinitc. I'i hsa okwayahkohcikewin kaawiin wiihkaa tapoonihsehsinini." 10 Kishemanitoo hsa kaamiinaatc kihtikewininiwan kihtikaanenhsini, pahkweshikanan kaye ciwiihsininitc, mii hsa keshimiininek i'i kihtikaanenhsini minihk kenoontehseyek. Miitahsh i'imaa kaashiminohcikeyek kimiikiwewiniwaank, mii hsa i'imaa keoncimaaciikihkin, aahpihci tahsh ciwenootisiyek ahpii moona'ikeyek. 11 Kishemanitoo hsa kikamiinikowaa mooshak awahshime keyaapi nawac cimiikiweyek. Inashke tahsh ahpii hsa miinankitwaa awiyak i'i kimiikiwewiniwaan, okakihcimiikwehciwenimaawaan Kishemanitoon. 12 I'i tahsh kaaishihcikeyek i'imaa kitanohkiiwiniwaank e'miikiweyek, mii hsa 'imaa wencikihcimamihcimintc Kishemanitoo. 13 Iki hsa kaawiici'ekwaa aahpici taminwentamook. Kaawiin ehta i'i kaashiminohcikeyek kiimiinekwaa kimiikiwewiniwaan, okamiikwehciwenimaawaan hsa Kishemanitoon e'naakohtooyek e'ishihcikeyek i'i kaaishitepwehtamek. 14 Aahpici hsa weweni kika-anami'ehtamaakowaak aaniihsh wiinke Kishemanitoo okishewaatisiwin anohkiimakanini kipimaatisiwiniwaank. 15 Taka hsa miikwehc inaataa Kishemanitoo kaamihcimiininank kihcikekoonini!

2 Kwaarintink 10

1 Niin ihsa piko Pwaal (Paul) e'ishiyek tahsh ehkohtaaciyaan ahpii weti kii'ayaayaan weti kaaishiayaayek, aahpici tahsh e'aahkwaatisiihkantawinakook waahsa kii'ayaayaan. Kitishikakwecimininim tahsh i'imaa Christ enoohkaatisitc eminwaatisitc kaye. 2 Keko kekoon ci-ishihcikehsiwek keonci​aahkwaatisiihkantawinakook ahpii otihsinakook. Ninkihkentaan kaye cikashkihtooyaampaan cinana'ahsakwaa "Ahkiink ohsha otoontinaanaawaa kaaishihcikewaatc" kaaishiyamintwaa. 3 Tepwe hsa kiwiiyawinaanink kitishipimaatisimin. Kaawiin tahsh wiin ahkiiwi miikaasowin kitaapacihtoohsiimin. 4 Kaawiin tahsh wiin ahkiiwi aapacihtaakanan nintaapacihtoohsiimin i'i e'miikaasoyaank. Kishemanitoo hsa kaamashkawisiimakaninikin omiikaasowi​aapacihtaakanan nintaapacihtaawaamin, cinihshiwanaacihtaawankitc kaamashkawentaakwaninikin owaahkaa'ikanan kaamiikaaninank. 5 Ninkanihshiwanaacihtoomin kaye ini macikiihkaantiwinan. Ini hsa kaye ninkapiikonaamin kaakihci-inenintisoomakahkin kekoonan kaamiitaakweshkaakemakahkin cikihkenimaahsiwintc Kishemanitoo, kahkina kaye inentamowinan ninkihciwinaamin Christ cina'ihtaakotc. 6 Ahpii tahsh kiihkehcinaa'ikooyek aasha ekii'na'ihtamek, aasha ohsha ninkiihkiishihtaamin ewii'nihshiwanaacihtooyaank kahkina shashiipihtamowin. 7 Kiinawaa tahsh wiin akwaciink ehta kitishikanawaapantaam. Awiya na weti ayaa e'inenintisotc Christink e'ishitipentaakositc? Taka miinawaa tanaanaakatawenintiso aaniihsh mii peshikwan keniinawint Christink nintishitipentaakosimin taapishkoo kewiin kaaishitipentaakositc. 8 Kaawiin tahsh ninshaakwenimohsii niipiwa' tashintamawinakook kaaTipenciketc kaakii'miininankitc kashki'ewisiwin. Kiinawaa hsa ciompikiyek kaakii'oncimiinikooyaank, kaawiin wiin ewii'nihshiwanaaci'ikooyek. 9 Kaawiin tahsh wiin ninantawentansiin ci-ishinakosiyaan taapishkoo ehkakweseki'inakook nintooshipii'ikanan e'aapacihtooyaan. 10 E'ihkitowaatc hsa kaye: "Aahpici hsa niipiwa' ishipii'ike i'imaa otooshipii'ikanink, aahpici kaye mashkawikiishwemakaniniwan. Kiishpin tahsh wiiyawink kiiwaapamankitc o'omaa kiiayaatc, aahpici hsa macentaakosi, i'i kaye kaaihkitotc kaawiin kekoon ahpiihtentaakwahsinini," nintikook. 11 Taka keko o'o awiya tainentansii! Aaniihsh kaaishimashkawipii'ikeyaank i'imaa nintooshipii'ikaninaanink, mii hsa peshikwan keshimashkawikiishweyaank ahpii waapamikooyek. 12 Kaawiin tahsh wiin nintaaishihcikehsiimin ci-inenintisoyaank taapishkoo hsa iki kaaishi-ishpenintisowaatc, aahpici kaye ehkakiipaatisiwaatc. Wiinawaa hsa kaye e'oshihtoowaatc aaniin waa'ishitipaapantisowaatc. Miitahsh i'imaa kaye eshitipaapantisowaatc. 13 Niinawint itahsh wiin kaawiin awahshime ninkatashintisohsiimin, aaniihsh Kishemanitoo kaakii'ishionahtamawiyamintc ehta ninkaihkitomin. Miitahsh kaye peshikwan eshihcikeyaank i'imaa kaaishianohkiiyaank weti kaaishiayaayek. 14 Kiinawaa tahsh i'imaa e'ayaayek Kishemanitoo kaakii'ishionahtamawinankitc, kaawiin hsa awahshime ninkii'ishihcikehsiimin ahpii kaakii'otihsikooyek, ekii'wiintamaakooyek i'i minwaacimowin Christ kaaishitashinsotc. 15 Kaawiin kaye niwiihtashintamowaahsiimin otanohkiiwiniwaan ikiweniwak kotak kaakakiihkwewaatc, Kishemanitoo kaakii'ishi​onahtamawinankitc ehta nintashintamowaamin. Awahshime hsa nimpakohsentaamin cimaaciikihkin kitepwehtamowiniwaan, awahshime cianohkiiyaank i'imaa kaaishiayaayek, cipiminisha'amawankitc Kishemanitoo kaakii'ishimiishiyamintc. 16 Miitahsh kaye ewiihkakiihkwaatamaank i'i minwaacimowin pepahkaan ahkiink nawac iko waahsa ewii'ishaayaank. Kaawiin tahsh kaye kotak inini otanohkiiwin kaakii'miinintc niwiihtashintamowaahsiimin. 17 Kihcimasina'ikan tahsh e'ishipii'ikaatek: "Awiya hsa kekoonini kaawiihtashintank taka okatashintaan aaniin kaaTipencikenitc kaakii'ishihcikenitc." 18 Awiya hsa kii'inentank ekii'minotootank kaawiin wiin i'imaa onciminwakimaahsii. Paanimaa hsa kaaTipencikenitc kii'inenimikotc, miitahsh i'i payesh e'minwaakimintc.

2 Kwaarintink 11

1 Miitahsh eshimihsaweniminakook, cishashiipenimiyek i'i ehkakiipaatenimoyaan pankii. Ninkehcinaa' itahsh ehshashiipenimiyek. 2 Kitoontenimininim hsa keniin taapishkoo Kishemanitoo kaaishionteniminek! Mii 'i aaniihsh eshinaakosiyek taapishkoo kaapehkisitc ihkwe ekii'ahshotamawakipan Christ wiin ehta ciwiitikeminek. 3 Kiinawaa tahsh e'mihcipeshiko'ek weweni kaye e'wiiciiwek Christ, kinaniisaanenimininim kekiinawaa ciwanimikooyek kitinentamowiniwaank taapishkoo Iip (Eve) kaakii-ishiwanimikotc kaakakiihtaawiinitc macikinepikoon. 4 Awiya hsa kii'otihsinek pahkaan Ciisahsoon kiitashimaatc, mii hsa 'awe eshitepwehtawek, kaawiin niinawint kaakiihtashimankitc mayaa Ciisahs, kitootaahpinaawaa kaye pahkaan ahcaahk, kaatinowihsinik Kishemanitoo otAhcaahkwan kaakii'otaahpinimekipan, kitootaahpinaam kaye pahkaan minwaacimowin, niinawint tahsh wiin kwayahk ekiihkakiihkimikooyek. 5 Kaawiin tahsh kaye nintinenintisohsii nawac niin ehtapahsentaakosiyaan ahpiihc wiin iki kaamihci-inwaanitisowaatc eniikaanentaakosiwaatc ishinisha'waakanak. 6 Komaa kaye kaawiin ninihtaakaakiikitohsii, kaawiin tahsh wiin kihkentamaawin ninoontehsehsii. Misiwe iitok kikii'ishiwaapanta'ikoom kaakii'ishihcikeyaank ehtepweyaank o'o kaakii'ihkitoyaank. 7 Kaawiin tahsh kekoon kikii'inakintamawihsinooninim ahpii ekiihkakiihkwaatamaan o'o minwaacimowin, ekiihkakiihkwaanak Kishemanitoo. Aahpici kaye ninkiihtapahsenintis kiinawaa cikihci-inentaakosiyek. Mii na tahsh ekii'mamaashiiyaan? 8 Ahpii hsa weti kaakiihtananohkiiyaan kaashiayaayek, kotak hsa pepahkaan otepwehtamook kaaishimaawaci'itiwaatc ninkiihtipa'amaakook. Miitahsh ekii'ishinaakosiyaan taapishkoo ekiihkimootimakwaa shooniyaan. Miitahsh i'i ewii'wiici'inakook kaakii'onci-ishihsek. 9 Weti tahsh ahpii kaakii'wiiciiwinakook, kaawiin hsa awiya kaatahshiyek ninkii'mikoshkaasomaahsii ciwiici'itc ahpii shooniyaa ekii'noontehseyaan. Kiitanami'aanaanik hsa Maahsitooniyaawahkiink (Macedonia) kaa'ayaawaatc ninkiihpiitamaakook kahkina kekoonini kaakii'ishinoontehseyaan. Kaawiin hsa wiihkaa kekoon kika-antotamawihsinooninim. Mii hsa 'i mooshak keishihcikeyaan. 10 I'i tahsh Christ otepwewin ehkikishkaakoyaan, kaawiin hsa wiihkaa ninkapakiciihsii citashintamaan o'o kaakii'ishiminohcikeyaan i'imaa misiwe Ahkeyaawahkiink (Achaia) ishaayaan. 11 Aaniin itahsh? Onsaam ina ehsaaki'ihsinowinakook? Kishemanitoo hsa okihkentaan ehsaaki'inakook. 12 Miitahsh iko keishihcikeyaan i'i mooshak kaa'ishihcikeyaan. Aaniihsh kaawiin ninantawenimaahsiik iki kaainwaanitisowaatc ishinisha'waakanak ci-ishimamiihkwaanitisowaatc, ci-ihkitowaatc kaye kewiinawaa hsa e'inanohkiiwaatc peshikwan kaainanohkiiyaank. 13 Kaawiin hsa kwayahk ishinisha'waakanak tinowihsiiwak. Mii hsa iki kaainwaanitisowaatc ishinisha'waakanak, kaakiiwanimowaatc ehtashintamowaatc otanohkiiwiniwaan. Taapishkoo tahsh kaye tepwe Christ otishinisha'waakana' e'ishinaakosi'itisowaatc. 14 Keko tahsh maamahkaatentankek, aaniihsh maciaya'aa kewiin ishi'itiso taapishkoo encal kaawaahsenaakositc. 15 Keko kaye kihci-inentankek kiishpin otanohkii'aakana' ishi'itisonitc taapishkoo e'ishiwiicihtwaanitc i'imaa kwayahkwaatisiwinink. Weti hsa ishkwaac tatipa'amawaawak kahkina kekoonini kaakii'ishihcikewaatc. 16 Miinawaa tahsh nintihkit, keko awiya tainentansii ehkakiipaatisiyaan. Kiishpin tahsh i'i inenimihshiyek, mii hsa 'i pisaan​iko ishiotaahpinihshik, keniin hsa pankii cimamiihkwaanitisoyaan. 17 O'o tahsh kaawii'ihkitoyaan noonkom, kaawiin iitok wiin a'a kaaTipenciketc kaaishiantawenimitc ci-ihkitoyaan. O'o tahsh kaaishimamiihkwaanitisoyaan, mii hsa eshinaakosiyaan taapishkoo ehkakiipaatisiyaan. 18 Aahpici tahsh ehpaahtiinowaatc awiyak kaamaamiihkwaanitisowaatc i'imaa wiiyaahsipimaatisiwinink onci, mii hsa keniin keishihcikeyaan. 19 Kitinentaamowaatok maawiin aahpici ehkakiihtaawentamek ehshashiipenimekwaa kekiipaatisiwaatc! 20 Kishashiipenimaawaa hsa kaye awiya kaa-ayaanooninek e'mikoshkaasominek kekoonini ci-ishihcikeyek, awiya kaye kaawayeshiminek, awiya kaye kaamamaancikoninek, awiya kaye kaamacinawinek komaa kaye kaapahsiinkwe'onek. 21 Aahpici hsa nintakac e'ihkitoyaan ekiihshaakwenimoyaank niinawint o'o citootaakooyek. Kiishpin awiya wii'maamiihkwaatank kekoonini, keniin hsa mii peshikwan keishihcikeyaan. Aahpici maawiin ninkakiipaasinaakos. 22 Hiiparoowiwak (Hebrews) ina? keniin hsa Hiiparoo nintinow. Isriyaliiwiwak (Israelites) ina? Keniin hsa Isriyal nintinow. Eparahaamink (Abraham) ina kii'onciiwak? Keniin hsa mii 'imaa wentahkaanesiyaan. 23 Christ ina i'i otanohkii'aakana'? Ninkakakiipaasihtaakos maawiin o'o kaawii'ihkitoyaan! Nawac itahsh niin kwayahk anohkii'aakan ahpiihc wiinawaa! Nawac niin ninkiihkihcianohkii! Nawac niin paahtiinwaa ninkiihkipa'okoo, nawac niin kaye paahtiinwaa ninkiihpahpahshanshe'okoo, nawac niin kaye paahtiinwaa kekaa ninkii'nip. 24 Coowak nihsimitanahshishaankahcink (39) hsa awiyan opahpahshanshe'waawaan aapitink ehpahshanshe'waawaatc. Naanink itahsh i'iwe ninkiihtootaakook Coowak. 25 Nihsink (3) kaye ninkiihpahpahkihte'okoo mihtikoon ekii'aapacihcikaatekin. Aapitink kaye ninkiihpapimwahsina'ikoo, nihswaa (3) kaye ekiihpiikwa'ank ninkihciciimaaninaan, aapitink tahsh kapetipihk, kapekiishik kaye ninkiihpapaamaa'ok kihcikamiink. 26 Mooshak kaye ehpapaamiayaayaan, ekii'naniisaanisiyaan cinihkipiiyaan siipiihkaank, ekii'naniisaani'iwaatc kaye kimoocishkak, ekii'naniisaani'iwaatc kaye Coowak kaye ekaa kaaCoowiwihsikwaa, ekii'naniisaanisiyaan kaye kihciootenaahkaank, ekii'naniisaanisiyaan kaye pikwatahkamikonk, ekii'naniisaanisiyaan kaye kihcikamiink, ekii'naniisaani'iwaatc kaye iki kaakii'anami'ehkaasowaatc. 27 Aahpici tahsh kaye ekiihkihcianohkiiyaan, ekiihkakwaatakihseyaan kaye, mooshak kaye weweni ekii'nipaahsiwaan, mooshak kaye ekiiwii'wiihsiniyaan, ekiiwii'minihkweyaan kaye, mooshak kaye miicim teminihk ekii'ayaahsiwaan, akwaciink kaye mooshak ekii'ayaayaan, ekiihkiihkaciyaan kaye mooshak. 28 Kaawiin tahsh wiin kahkina kekoonan niwii'wiintansiinan. Entahsokiishik kaye e'oncikosikwentamaan e'naanaakatawenimakwaa otepwehtamook kahkina ayaawinink kaaishimaawaci'itiwaatc. 29 Awiya hsa kiimacenimotc aahpici hsa ninkohpaatenimaa. Awiya kaye kii'ishiwinintc macitootamowinink, aahpici hsa ninkihcimaanentam. 30 Kiishpin tahsh wii'mamiihkwaanitisoyaan, mii hsa ini ketashintamaan ciwiintamaan aaniin eshiniinamisiyaan. 31 Kishemanitoon kaaTipenciketc Ciisahs Kaaoyoohsitc mooshak kaamiikwehciwenimimintc, ninkihkenimik ekaa ehkiiwanimohsiwaan. 32 Weti tahsh mekwaa Timaaskahsink (Damascus) kii'ayaayaan, a'a hsa aanihkeokimaa kaakiihtipenimikotc ini kihciokimaan Ariitahsan (Aretas) okii'ahsaa' shimaakanihsha' misiwe kihci-ishkwaantemihkaank ewiihkakwetahkonitc. 33 I'imaa tahsh kaakii'ishipakoneyaak kaashiwaahkaayaapihkinikaatek ootena mii 'imaa ninkii'onci​niihsaapiikinikoo, kihciwiikopiimahkahkonk ekii'ishikaanikooyaan. Miitahsh i'imaa kaakii'oncishaapwiihkantawak a'a kihciokimaa.

2 Kwaarintink 12

1 Oncita tahsh iko cimamiihkwaanitisoyaan ishinaakwan. Aanawiin kaawiin kekoon tainaapatahsinoon. Niwiihtashintaanan tahsh ini inaapantamowinan ini kaye waapanta'ikoowinan kaaTipenciketc kaakii'miishitc. 2 Ninkihkenimaa hsa peshik inini Christan kaawiiciiwikotc mitaahshiniiwipipoonakaani maawiin ekii'ishiwicikaniwitc weti maawac kaaishi-ishpaanik kiishikonk. –Kaawiin tahsh mayaa ninkihkentansiin kiishpin o'o kaa'ishihsekopanen, komaa kaye kaa'inaapantamokopanen, Kishemanitoo hsa ehta okihkentaan.– 3 Ehkihkenimak tahsh wa'a inini, Kishemanitoo hsa okihkentaan komaa kaye kaa'ishihsenikwen komaa kaye kaa'inaapantaminikwen. 4 Ninkihkenimaa hsa ekii'ishiwicikaniwitc weti kaaishiwinintwaa kaashawentaakosiwaatc, ekii'noontank hsa kekoonan kaakashkihcikaatehsininikin mayaa citashintenikin, kaawiin kaye awiya pakitinaahsii citipaatotank ini kekoonan. 5 Niwii'mamiihkwaanaa tahsh a'a tino inini. Kaawiin tahsh niin niwii'mamiihkwaanitisohsii, ini hsa ehta cinaakwahkin kaaishiniinamisiyaan. 6 Mihsawaa ko kiishpin wii'mamiihkwaanitisoyaan, kaawiin nintaakakiipaasinaakosihsii. Aaniihsh nintepwe i'i kaawii'ihkitoyaan. Kaawiin tahsh niwii'mamiihkwaanitisohsii aaniihsh kaawiin awiya ninantawenimaahsii awahshime ci-inenimitc o'o kaaishiwaapamitc i'i kaye kaaishinoontawitc e'ihkitoyaan. 7 Ekii'waapantamaan tahsh kekoonan maawac iko e'minonaakwahkin, cioncikihci-inenimohsiwaan tahsh, mii hsa ninkii'miinikoo keonciwiihsakentamaan i'imaa niwiiyawink. Mii 'i maciaya'aa (Satan) kaakiihpiicinisha'amawitc mooshak ehpahpahkihte'okowak niwiiyawink, mii hsa tahsh i'i kaaoncikihci-inenimohsiwaan. 8 Nihswaa (3) tahsh nintaanakiihkanoonaa kaaTipenciketc ekiihkakwecimak ciotaahpinank i'i niwiihsakentamowinini. 9 O'o tahsh ninkii'ishinahkwehtaak: "Ninkishewaatisiwin ohsha ehta kitepihse'ikon, mii hsa i'imaa kiniinamisiwinink maawac eshinaakwahk nimashkawisiiwin." Mii hsa tahsh i'i keshiciihkentamaan cikihci-inentamaan i'i kaaishiniinamisiyaan, aaniihsh Christ omashkawisiiwin ninantawentamowaan cikikishkaakowak. 10 Miitahsh i'i keshina'entamaan i'imaa kaaishiniinamisiyaan, noociko kaye kaaishi-ikooyaan, kaaishikakwaatakihseyaan kaye, kaaishikakwaataki'ikooyaan kaye, mooshak kaye kaaishisanakihseyaan Christ onci. Ahpii tahsh kiiniinamisiyaan, miitahsh maawac eshimashkawisiiyaan. 11 Aahpici tahsh ninkakiipaasinaakos, kiinawaa aaniihsh kaakii'ishi'iyek ci-ishihcikeyaan! Kiinawaa ohsha ishinaakwan kwayahk citashimiyekipan. Kekoon tahsh wiin e'ahpiihtentaakosihsiwaan, shaakooc tahsh kaawiin awahshime nintapahsentaakosihsii i'i kaa-ahpiihtentaakosiwaatc kaakihci-inentaakosiwaatc ishinisha'waakanink kaainwaanitisowaatc. 12 Ini hsa kihkinawaacihcikewinan ini kaye maamahkaacihcikewinan kaye mashkawi-ishihcikewinan kaakii'ishihcikeyaan i'imaa kaashiayaayek wiihkaa ekiihpakiciihsiwaan, mii hsa i'imaa eshinaakwahk keniin hsa kwayahk ishinisha'waakan ehtinowiyaan! 13 Wekonen tahsh wenci-inentamek kiinawaa pahkaan ekiihtootaakooyek ahpiihc wiin iki kotak otepwehtamook kaaishipiintikewaatc? Onsaam ina ekiihkakwecimihsinowinakook ciwiitoohkawiyek kaaonci-inentamek? Taka tahsh poonentamawihshik kaakii-ishimamaashiihkantawinakook! 14 Miitahsh aasha nihsink (3) ekiihkiishiihtaayaan ewii'antawaapaminakookipan. Kaawiin tahsh wiin kekoon kika-antotamawihsinooninim. Kiinawaa ohsha kaa-antaweniminakook, kaawiin wiin kitayi'iimiwaan. Aaniihsh apinoonciishak kaawiin otahshamaahsiwaawaa' i'i oniiki'ikoowaa', iki hsa oniiki'ikoomaak otahshamaawaa' oniicaanihsiwaa'. 15 Aahpici hsa ninkaminwentaan kahkina kekoon cipakitinamaan, cipakitinitisoyaan kaye ciwiici'inakook. Aana tahsh wiinke kitaanasaaki'ininim kiinawaa tahsh pankii kisaaki'ihshim. 16 Siiyaaken maawiin aasha kitepwehtaam ekii'mikoshkaaci'ihsinowinakook. Awiya tahsh taihkito ekii'nakacikayenisiyaan, kaye ehkashkiminakook e'wayeshihtaakosiyaan. 17 Mii na 'i kaa'ishihcikeyaan ekii'wayeshiminakook, ekii'aapaci'akwaa iki kaakii'ishinisha'wakwaa weti kaaishiayaayek? 18 Taitahs (Titus) ohsha ninkiihkanoonaa ci-ishaatc peshik kotak otanami'aan cipiwiiciiwaatc. Mii na tahsh ehkitoyek Taitahs ekii'wayeshiminek? Pepahkaan ina nintinentaamin, pepahkaan ina nintishihcikemin? 19 Mii maawiin mooshak enenimiyaank ehkakwenaatamaasoyaank. Kaawiin hsa i'i nintishihcikehsiimin! Christ ohshehta kaaishiantaweniminankitc ci-ihkitowankitc nintihkitomin, Kishemanitoo enaahsamiitc. Kiinawaa tahsh ciompikiyek! 20 Aahpici tahsh ninaniisaanentam ahpii weti otihsinakook kihcipahkaan ci-ishiayaayek, ekaa ci-ishiayaahsiwek kaa'ishiantaweniminakook, keniin tahsh kihcipahkaan ci-ishiayaayaan ahpii waapamiyek. Miitahsh kaye eshinaniisaanentamaan cimihkamaan kiihkaantiwin, ayaahshenintiwin, wahkewikitaasowin, kakweniikaanenintisowin, anoociko itiwin, tashintiwin, kihci-inenintisowin, kekoon kaye sesik e'ishihsehsinok. 21 Miitahsh eshisekisiyaan miinawaa ahpii otihsinakook, Kishemanitoo ci-ishi'itc ciakaahsinaakosiwak i'imaa enaahsamiiyek, mii 'i keoncimawiyaan iki niipiwa' kaakii'macitootamowaatc otaanaank, mahshi tahsh kaye e'wepinansikwaa ini kaawiinentaakwaninikin otishihcikewiniwaan, kaye ekiihpihshikwaatisiwaatc, kaawiin kaye kiimanaaishihcikehsiiwak kekii'ishihcikehsikipan.

2 Kwaarintink 13

1 Miitahsh o'o nihsink (3) aasha e'ishihsek ewiihpiantawaapaminakook. Kihcimasina'ikan hsa e'ishipii'ikaatek: "Kiishpin niishiwaatc (2) komaa kaye nihsiwaatc (3) awiyak mii hsa citepwehtawintwaa tipaatotamowaatc kaakii'waapantamowaatc." 2 Kiwiintamawininim tahsh kiinawaa kaakii'macitootamek, iki kaye kotak kaakii'macitootamowaatc otaanaank. Mihsawaa ko weti ayaahsiwaan kaaishiayaayek, mii hsa miinawaa peshikwan eninakook kaakii'ininakookipan ishkwaac weti kii'ayaayaan. Ahpii hsa weti takohshinaan, kaawiin hsa tashaapwiihsiiwak iki kaawiihkihcinooci'akwaa. 3 Kahkina hsa kekoon kinantawaapantaam keoncikihkentamek Christ e'aapaci'itc kekoonini kiiwii'ihkitotc. Ahpii tahsh kanooninek kikawaapamaawaa hsa e'mashkawisiitc, aaniihsh kaawiin maciiwakiihsii. 4 Kehcinaac hsa taapishkoo e'maciiwakiitc kii'ishinaakosi ahpii Christ kiiakosaka'ontc i'imaa aashiteyaahtikonk. Noonkom tahsh Kishemanitoon omashkawisiiwininiink ishipimaatisi. Keniinawint hsa e'wiiciiwankitc Christ mii hsa peshikwan eshinaakosiyaank e'maciiwakiiyaank. I'imaa tahsh wiin Kishemanitoo omashkawisiiwinink ninkaishiwiicipimaatisiimaanaan Christ, ahpii wiiciiwikooyek. 5 Taka antakihkenintisok, kanawaapantisok kaye tepweyentamowinink ci-ishipimaatisiyek. Kikihkentaam maawiin siyaaken Ciisahs Christ ehkikishkawek. Komaa kaye aasha kaahpapwaanawihcikewekopanen. 6 Miitahsh eshikehcinaa'oyaan cikihkenimiyaank keniinawint ekiihpwaanawihcikehsiwaank ciminwaapamikooyaank. 7 Miitahsh eshianami'ehtawankitc Kishemanitoo kiinawaa ekaa noociko ci-ishihcikehsiwek. Kaawiin wiin e'antawentamaank nintanohkiiwininaan ciminonaakwahk. Kiinawaa hsa weweni cipimaatisiyek, aana maawiin ishinaakosiyaank niinawint ekiihpwaanawihcikeyaank. 8 Kaawiin aaniihsh kekoon nintaatootansiimin cikipihtinamaank i'i tepwewin, mii ehta ko eshihcikeyaank ewiicihtooyaank cimaaciishkaak. 9 Niminwentaamin kaye niinawint e'ishinaakosiyaank e'mashkawisiihsiwaank, kiinawaa tahsh e'mashkawisiiyek. Mii kaye eshianami'ehtamaakooyek misiwe kwayahk cini-ishinaakosiyek. 10 Miitahsh kaaoncioshipii'amawinakook mekwaa waahsa e'ayaayaan. Kaawiin hsa nintinentansii cikihcinooci'inakook cikii'aapacihtaawakipan Kishemanitoo okashki'ewisiwinini kaakii'miishitc. Mii 'i aaniihsh kaakii'oncimiinikooyaank kiinawaa ciwiici'ikooyek, ciompikiyek kaye, kaawiin wiin cipiikopinikooyek. 11 Pooshoo tahsh kitinininim niicitepwehtamook! Wiinke hsa kwayahk kakwekwayahkwaatisik! Pisintamok kaaihkitoyaan. Weweni kaye pisintaatik aaniin ehkitoyek. Weweni kaye wiiciintik. Kishemanitoo hsa kaasaaki'iwetc, kaamiikiwetc kaye pisaanisiwin kikawiiciiwikowaa! 12 Otepwehtamook anami'e​ociimihkok kaapooshoo'ekwaa, mii nahke ishipooshoo'itik. Kahkina hsa Kishemanitoo ominwaatisiima' kipooshoo'ikowaak. 13 KaaTipenciketc Ciisahs Christ okishewaatisiwin, Kishemanitoo kaye osaaki'iwewin, Kishemanitoo otAhcaahkwan kaye ominowiiciiwiwewinini kikawiiciiwikom kahkina kaatahshiyek.

Kalehshiya 1

1 Niin Pwaal (Paul) kaaoshipii'amawinakook. Kaawiin inini ninkiihkanoonikohsii, kaawiin kaye ininiihkaank ninkii'onci-inentaakosihsii ishinisha'waakan citinowiyaan. Kishemanitoo ohsha, ini kaye oKosihsan Ciisahs Christan kaakiihkiiwepimaatisi'aatc kaakii'niponihpan, ninkiihkanoonikook. 2 Kahkina hsa niiciotepwehtamook o'omaa kaa-ayaawaatc kitakopooshoo'ikowaak. Kiinawaa otepwehtamook weti kaa-ayaayek Kalehshiya (Galatia) ahkiink pepahkaan kaaishimaamaawaci'itiyek kitooshipii'amawininim. 3 Taka Kishemanitoo Kaaoyoohsiyank, kaaTipenciketc kaye Ciisahs Christ, kikamiinikowaa kishewaatisiwin, pisaanentamowin kaye. 4 Christ tahsh ekii'na'ihtawaatc kiKishemanitoominaanin Kaaoyoohsimimank kaakii'oncipakitinank opimaatisiwin kimacitootamowininaanin kiinawint onci cishaapwiiwank o'omaa kaaishimacinaakwaninik o'o noonkom kaapimi-ishiwepahk ahki. 5 Taka Kishemanitoo takihci-inentaakosi ahpane pishihshik. Emen! 6 Aahpici hsa kikoshkowishim i'i kaakii'ishihcikeyek! Aahpici wiipa e'nakanek a'a Kishemanitoo kaakiihkanooninek i'imaa Christan kaaishikishewaatisinitc, pahkaan tahsh minwaacimowin e'otaahpinamek! 7 Kekeht hsa, kaawiin kotak minwaacimowin ayaahsinoon! Kiwiintamawininim tahsh e'ayaawaatc pemaatisiwaatc ehkakwewanishkwe'inekwaa, ehkakweaancihtoowaatc kaye i'iweni Christan ominwaacimowinini! 8 Kiishpin tahsh niinawint pahkaan inwehtooyaank komaa kaye mihsawaa ko encal kihcikiishikonk pionciitc pahkaan tahsh inwehtootc i'i minwaacimowinini aasha kaakii'wiintamaakooyek, taka tanihshiwanaatisiwak ninkaikoomin. 9 Aasha tahsh o'o ekii'ihkitoyaan, miinawaa tahsh niwii'ihkit: kiishpin hsa awiya kakiihkiminek pahkaan tahsh inwehtootc i'i aasha kaakii'otaahpinamek minwaacimowinini, taka tainakimaa cinihshiwanaatisitc. 10 Mii na 'i enihtaakosiyaan taapishkoo e'antawenimak inini ciminwaapamitc? Kaawiin! Kishemanitoo ohsha ninantawenimaa ciminwaapamitc. Mii na 'i eshinaakosiyan ehkakweishihcikeyaan inini ciminwaapamitc? Kiishpin hsa 'i ishihcikeyaampaan, kaawiin iinsan Christ nintaa-anohkiihtawaahsii. 11 Niitanami'aak! Kiwiintamawininim tahsh, i'i hsa minwaacimowin kaakakiihkwaatamaan kaawiin ininiihkaank kii'onciihsinoon. 12 Kaawiin kaye ininiihkaank ninkii'ontinansiin, kaawiin kaye awiya inini ninkiihkihkino'amaakohsii. Ciisahs Christ ohsha wiin iko ninkii'waapanta'ik. 13 Aasha iitok kikii'noontaam aaniin kaa'ishipimaatisiyaan, aahpici weweni ekiihpiminisha'amaan i'i Coowi anami'ehcikewin. Aahpici kaye ekii'manaaci'aahsiwakwaa ekiihkakwaataki'akwaa otepwehtamook kaaishiayoohkoayaawaatc kaatipenimikowaatc Kishemanitoon, ekiihkakwenihshiwanaaci'akwaa kaye. 14 Iki kaye niici-Coowak kaakii'wiiciahpiihtaatisiimakwaa, nawac niin awahshime ninkii'ishihcike ekiihtootamaan i'i Coowi anami'ehcikewin. Nawac niin kaye ninkiihkihci-inentaanan ini kaakii'ishihtwaawaatc iki mewisha kaakiihpimaatisiwaatc. 15 Kishemanitoo tahsh okishewaatisiwinink ninkii'oncionenimik cipwaa nihtaawikiyaan, okishewaatisiwinink kaye ninkii'oncikanoonik cianohkiihtawak, ekii'inentank tahsh kaye nimpimaatisiwinink ciwaapamimintc ini oKosihsan, 16 ekii'inentank kaye ciwiintamawimak i'i ekaa kaaCoowiwihsinik citashintamawimak i'i minwaacimowin, citashimimak ini Kishemanitoo oKosihsan. Ahpii tahsh kaakii'waapamimak kaawiin awiya ninkii'naasihkawaahsii ciwiintamawitc aaniin keishihcikeyaan. 17 Kaawiin kaye Ceroosalamink (Jerusalem) ninkii'ishaahsii ciantawaapamakwaa iki ishinisha'waakanak aasha mewisha kaakiihpionci-inanohkiiwaatc. Takwac tahsh pikwatahkamik Arepiya (Arabia) ahkiink kaaishinihkaatek ninkii'ishaa. Miitahsh kaa'ishikiiweishaayaan miinawaa Timaaskahs (Damascus) ootenaank ekii'ishaayaan. 18 Paanimaa tahsh nihsopipoon (3) ekii'ishihsek Ceroosalamink ninkii'ishaa, ekii'antawaapamak Piitar (Peter) ewiihkihkenimak. Mitaahshinaanokiishik (15) tahsh ninkii'wiiciayaamaa. 19 Kaawiin tahsh kotak ishinisha'waakanak ninkii'waapamaahsiik, mii ehta ko Ciimis (James) kaaTipenciketc wiicihkiweyan kaawaapamak. 20 Tepwe ohsha o'o kaaishipii'amawinakook. Kishemanitoo ninkihkenimik ehkiiwanimohsiwaan. 21 Naanaake tahsh weti ninkii'ani-ishaa Siiriya (Syria) ahkiink shikwa Silihshiya (Cilicia) ahkiink. 22 Kaawiin tahsh weweni i'i ahpii ninkiihkihkenimikohsiik kaatepwehtawaawaatc Christan weti Cootiiyaahkaank (Judea) pepahkaan kaaishiayoohkwiinowaatc. 23 I'imaa tahsh ehta kaakii'inaacimikoowak ninkii'oncikihkenimikook. Miitahsh o'o kaakii'inaacimikooyaan: "A'a hsa inini kaakiihkakwaataki'inank, noonkom opapaatashintaan i'i tepwehtamowinini kaakiihkakwenihshiwanaacihtoohpan." 24 Miitahsh i'imaa kaa'ishimiikwehciwenimaawaatc Kishemanitoon i'i kaakiihtootawimitc i'imaa nimpimaatisiwinink.

Kalehshiya 2

1 Mitaahshiniiwipipoon (14) tahsh ekii'ani-ishihsek ninkiihkiiweishaa weti Ceroosalamink (Jerusalem). Paarnapahs (Barnabas) hsa ninkii'wiiciiwaa, Taitahs (Titus) kaye ninkiihtakowiiciiwaanaan. 2 Kishemanitoo tahsh ekii'waapanta'itc ci-ishaawak kaakii'onci-ishaawak. Ninkiihkiimoocinakishkawaak tahsh iki oniikaanisiik ekii'wiintamawakwaa aaniin mayaa kaaishikakiihkimimak i'i ekaa kaaCoowiwihsinik, ekiihtashintamawimak i'i minwaacimowinini. Aaniihsh ninkii'naniisaanentaan i'i otaanaank kaakii'inanohkiiyaan noonkom kaye kaaishihcikeyaan, ekaa kekoon cionciihsinok. 3 A'a tahsh Taitahs kaakii'wiiciiwak Kariihk (Greek) kiihtinowi. Kaawiin tahsh kiihkakaanci'aahsii cikihkinawaatashakeshikaniwitc. 4 Aaninta hsa aanakii'inentamook i'i cikii'ishi'imintipan. Iki tahsh ininiwak ekii'anami'ehkaasowaatc ninkii'wiiciiwikonaanik ekiihkiimoocipiintikanitisowaatc, ekiihkiimoocinaanaakaci'inankitwaa ekiihkakwemihkamowaatc aaniin eshitipenimikohsiwaank i'i Moosihs (Moses) otOonahshowewin, aaniihsh Christ Ciisahsoon kaa-aapa'omiyamintc niwiiciiwikonaanin. Miitahsh i'i kaakii'onci-ishihcikewaatc ekii'antawenimankitwaa miinawaa citipenimikoyaank Onahshowewinini. 5 Kaawiin tahsh ninkiihpakitinitisohsiimin i'i ci-ishihseyaank. Kaawiin iko peshikotipa'ikanenhs ninkiihpisintawaahsiwaanaanik. Miitahsh i'i kaakii'onci-ishihcikeyaank: i'i minwaacimowin kaaishitepwemakahk ninkii'antawentaamin keyaapi ciwiiciiwikoyek. 6 Iki tahsh kaainintwaa e'niikaanentaakosiwaatc – mii o'o tahsh kaaonci-ihkitoyaan, kaawiin niin kekoon nintinenimaahsiik aaniin kaahtinowiwaatc, aaniihsh Kishemanitoo kaawiin otishikanawaapamaahsiin awiyan aaniin eshinaakosinitc saakicaya'ii – Iki kaaniikaanentaakosiwaatc kaawiin awahshime kekoon ninkii'miinikohsiik kekihkino'amaakeyaan. 7 Shaakooc tahsh okii'waapantaanaawaa ekii'miinikoowak ciwiintamaakeyaan minwaacimowinini, cikakiihkimimak i'i ekaa kaaCoowiwihsinik, taapishkoo kewiin Piitar (Peter) kaakii'ishimiinintc ciwiintamaawaatc minwaacimowinini i'i Coowa'. 8 Kishemanitoo ohsha omashkawisiiwinink ishinisha'waakan kaa'oncitinowiyaan, cinaasihkawakwaa iki ekaa kaaCoowiwihsikwaa, taapishkoo kewiin Piitar ishinisha'waakan kaakii'oncitinowitc cikakiihkimaatc i'i Coowa'. 9 Ciimis (James), Piitar, Cwaan (John) kaainakimintwaa e'niikaaniiwaatc okii'nihsitaawinaanaawaa Kishemanitoon kaakii'ishishawenimimitc. Ninkii'onci​sakininciinikonaanik itahsh Paarnapahsan keniin, ewii'naakohtoowaatc ewii'wiitanohkiintiyaank. Miitahsh kahkina kaa'inentamaank niinawint Paarnapahs citananohkiiyaank ekaa kaaCoowiwihsinik kaaishiayaanitc, kewiinawaa tahsh Coowa' kaaishiayaanitc. 10 Miitahsh ehta kaa'ishipakohseniminankitwaa cimaamihkawinotawimankitc i'i kaakitimaakisinitc otepwehtamoo' kaakii'ayaanitc kaakii'ishiayaawaatc. Miitahsh i'iwe maawac iko kaakii'antawentamaan ewii'ishihcikeyaan. 11 Ahpii tahsh Piitar (Peter) kiipitakohshink i'imaa Entiyaahkohkaank (Antioch), ninkiihkihcinooci'aa. Kahkina tahsh awiyak kii'noontamook. Aaniihsh kii'naakwanini wiin sesik ekii'ishihcikehsik. 12 Miitahsh o'o Piitar kaa'ishihciketc: cipwaa takohshininitc tahsh i'i ininiwa' Ciimis (James) kaakiihpiicinisha'waatc, Piitar pisaan​iko okii'wiiciwiihsiniimaa' i'i ekaa kaaCoowiwihsinik otepwehtamoo'. Ahpii tahsh kaahpitakohshininitc, mii 'i kaawiin okii'wiiciwiihsiniimaahsii' aaniihsh kiihkohtaaci. Aaniihsh okiihkohsaa' i'i kaakiihkihci-inentaminitc kihkinawaatashakeshokoowinini. 13 Miitahsh kotak kaakii'anami'aawaatc Coowak kaa'ani-ishihcikewaatc Piitaroon kaakii'ishihcikenitc ekii'wepi'ikowaatc ekaa sesik e'ishihcikehsinik. Paarnapahs (Barnabas) hsa kewiin kii'ishihcike kaakii'ishihcikenitc i'i kaakohsaanitc Coowa'. 14 Ahpii tahsh ekii'waapamakwaa ekaa ekii'ishihcikehsikwaa aaniin kaainahtenik i'i tepwewin kaatashintek minwaacimowinink, Piitar ninkiihkanoonaa enaahsamiinitc kahkina i'imaa kaakii'ayaanitc. Miitahsh o'o kaa'inak: "Kiin iitok kiCoowiw, kaawiin tahsh i'i kitishihcikehsii. Ekaa kaaCoowiwihsikwaa hsa kaaishipimaatisiwaatc kitishihcike. Aaniin tahsh keshikashki'atwaapan iki ekaa kaaCoowiwihsikwaa ci-ishihcikewaatc Coowa' kaapimaatisiwaatc?" ninkii'inaa. 15 Niinawint tahsh tepwe kaaCoowiwiyaank ninkii'ishinihtaawikimin. Kaawiin wiin nintinowihsiimin taapishkoo iki ekaa kaaCoowiwihsikwaa omacitootamook kaaishinihkaanintwaa. 16 Ninkihkentaamin aaniihsh awiya kiitepwehtawaatc Ciisahs Christan, mii hsa 'i wenciminowiiciiwikotc ini Kishemanitoon, kaawiin wiin ehtootank i'i Onahshowewinini kaainahtenik. Keniinawint tahsh ninkiihtepwehtawaanaan Christ Ciisahs. I'imaa tahsh ehtepwehtawankitc Christ, mii 'i keonciminowiiciiwinankitc Kishemanitoo, aaniihsh kaawiin awiya otoonciminowiiciiwikohsiin Kishemanitoon e'mihcitootank kaainahtenik i'i Onahshowewinini. 17 Keniinawint tahsh e'antone'amaank i'i minwaapamikoowin ehtepwehtawankitc Christ, miitahsh iinsan keniinawint eshinaakosiyaank kaamacitootamowaatc. Mii na tahsh eshinaakwaninik taapishkoo Christ wiin e'animaaciikihtootc macitootamowinini? Keko i'i inentankek! 18 Kiishpin kiiweoshihtooyaan i'i kaakii'nihshiwanaacihtooyaan, mii 'imaa eshinaakwahk niin ehpiikonamaan Kishemanitoo otOonahshowewin. 19 Miitahsh taapishkoo eshinaakosiyaan aasha ekii'nipoyaan, taapishkoo Onahshowewin hsa ekii'nihsikoyaan. Miitahsh i'i kaaoncitipenimikohsiwaan Onahshowewin. Miitahsh i'i kaakii'onci-ishihsek ci-ishipimaatisiyaan kaashiantawenimitc Kishemanitoo. 20 Christ hsa ninkii'wiicinipoomaa ahpii ekii'nihsintc i'imaa aashiteyaahtikonk. Kaawiin tahsh niin wa'a kaapimaatisiyaan, wiin ohsha Christ kaapimaatisitc nimpimaatisiwinink. Ehtepwehtawimak Kishemanitoo oKosihsan, kaaoncipimaatisiyaan o'o noonkom pimaatisiwin kaapimaatisiyaan. Aaniihsh Christ ninkiihsaaki'ik, okiihpakitinaan kaye opimaatisiwin niin onci. 21 Kaawiin nintaanawentamowaahsiin Kishemanitoo okishewaatisiwin. Kiishpin kwayahkwaatisiwin onciimakahkipan i'imaa Onahshowewinink, anihshaa iinsan Christ kiinipokopan.

Kalehshiya 3

1 Etatawe hsa kikakiipaatisim kaa-Kalehshiyawininiiwiyek (Galatians)! Awenen tahsh aasha kaahshaakooteniminek? Aaniihsh taapishkoo ekii'waapamek Ciisahs Christ e'nipotc aashiteyaahtikonk inentaakwan aahpici kihciweweni kaa'wiintamaakooyek aaniin Christ kaa'ishihciketc. 2 Peshikwayak tahsh kekoon wiintamawihshik: aaniinti kaa'oncitepinimek Kishemanitoo otAhcaahkwan? Ehtootamek ina kaainahtek i'i Onahshowewin, komaa kaye ekii'noontamek i'i minwaacimowin, ekiihtepwehtamek tahsh? 3 Etatawe hsa kikakiipaatisim! Kishemanitoo otAhcaahkonk ekii'oncimaacihtaayek, mii na tahsh waa'ishihcikeyek wakicaya'ii kiwiiyawiwaank kaanihtaaishihcikeyek ewii'ishikiishikiyek anami'aawinink? 4 Kaawiin inahsh kekoon kitinentansiim i'i kaakiihpiayishihseyek otaanaank? Kehcinaac maawiin kekoon i'imaa kikii'ontinaam kekihtaapacihtooyek. 5 Kikii'miinikowaa Kishemanitoo otAhcaahkwan shikwa kii'mashkawanohkii ekii'maamahkaacihciketc kaaishiayaayek. Mii na tahsh kaaonci-ishihciketc e'ishihcikewek ehtootamek kaainahtek Coowiwi Onahshowewin, komaa kaye ehtepwehtamek tipaacimowin kaakii'noontamek? 6 Inashke mii peshikwan Eparahaam (Abraham) kaakii'ishihsetc, e'ishipii'ikaatek: "Eparahaam okiihtepwehtawaan Kishemanitoon, ekiihtepwehtawaatc tahsh Kishemanitoon, miitahsh kaakii'onci-inakimintc okwayahkwaatis." 7 Kikihkentaam iitok o'o, iki hsa kaatepwehtamowaatc pemaatisiwaatc miiwak ihsa iki mayaa Eparahaamink kaaontahkaanesiwaatc. 8 Kihcimasina'ikan aaniihsh niiyaak kiihtipaacimoomakan Kishemanitoo ewiihtinowaanaatc ehkwayahkwaatisinitc i'i ekaa kaaCoowiwihsinik otepwehtamowininiink onci. Aaniihsh kewiin Eparahaam niiyaak okii'minwaacimohtaakon Kihcimasina'ikan ekii'ikotc: "Kiin hsa Kishemanitoo kaawii'oncishawenimaatc kahkina pemaatisinitc." 9 Eparahaam okiihtepwehtawaan Kishemanitoon, miitahsh kaakii'oncishawentaakositc. Miitahsh kaye noonkom kahkina kaaotepwehtamowiniwaatc takoshawentaakosiwak taapishkoo kaakii'ishishawentaakositc. 10 Iki tahsh wiin kaa-ahpenimonotamowaatc ewii'na'ihtamowaatc kaainahtenik i'i Onahshowewinini, miitahsh mooshak inentaakosiwak ewii'nihshiwanaatisiwaatc, aaniihsh Kihcimasina'ikan ishipii'ikaate: "Awenen hsa mooshak ekaa kaapisintansik ehtootansik kaye kahkina kekoonini kaaishipii'ikaatenik i'i Onahshowewimasina'ikanini, inakimaa cinihshiwanaatisitc." 11 Aahpici hsa wiinke payahtenaakwan, kaawiin hsa awiya otooncikwayahkwakimikohsiin Kishemanitoon e'mihcitootank kaainahtenik i'i Onahshowewinini, aaniihsh Kihcimasina'ikan ishipii'ikaate: "Awiya hsa kaaoncikwayahkwakimintc otepwehtamowinink tapimaatisi." 12 Awiya hsa kaakanawentank Onahshowewin kaawiin memwehc otaapacihtoohsiin otepweyentamowin. O'o iitok Kihcimasina'ikan ihkitoomakan: "Awenen hsa piko kaatootank kahkina kekoonini kaainahtenik i'i Onahshowewinini, mii hsa i'imaa eshipimaatisitc." 13 Christ kikiihtipa'okonaan cipakitinikoowank Onahshowewin kaakii'ishinipoomikooyankipan, aaniihsh kiihtinowi'aa wiin kaananipoomintc kiinawint onci. Aaniihsh Kihcimasina'ikan ishipii'ikaate: "Awiya hsa ko mihtikonk kaa-akoonintc mii hsa 'awe kaananipoomintc." 14 Miitahsh o'o Christ Ciisahs kaakii'onci-ishihciketc, ekaa kaaCoowiwihsikwaa kewiinawaa cimiinintwaa i'i shawentaakosiwinini, taapishkoo Kishemanitoo kaakii'ishiahshotamawaatc ewiihshawenimaatc Eparahaaman, kekiinawint tahsh tepweyentamowinink kikaoncitepinaanaan a'a Kishemanitoo otAhcaahkwan kaakii'ahshotamawinank. 15 Niitanami'aak, kiwii'wiintamawininim hsa kekoon aaniin keoncinihsitohtamek o'o kaawiintamawinakook. Ahpii hsa niishin (2) ininiwak ekiihkiishentamowaatc kekoonini, ekii'oshipii'amowaatc kaye, kaawiin hsa awiya okapiikonansiin. Kaawiin kaye awiya awahshime otaanankihtoohsiin i'i aasha ahshotamaatiwinink kaakii'oshipii'ikaatenik. 16 Inashke tahsh Kishemanitoo okii'ahshotamawaan Eparahaaman (Abraham) ewiihshawenimaatc, ini kaye opiiwesiimini. Kaawiin tahsh Kihcimasina'ikan ishipii'ikaatehsinoon, "Kipiiwesiimak" kaapaahtiinowaatc. "Kipiiwesiim" ohsha ishipii'ikaate, mii hsa a'awe peshik awiya, Christ kaatashimintc. 17 Miitahsh o'o kaaitamaan, Kishemanitoo ahpii kiimiinaatc Eparahaaman i'i ahshotamaatiwinini, kii'ihkito kaye ewiihkanawentank. Niiwaahk nihsimitana (430) tahsopipoon tahsh ekii'ani-ishihsek, Onahshowewin kii'onahcikaate. Kaawiin tahsh i'imaa Onahshowewinink taonciaanawencikaatehsinini Kishemanitoo aasha kaakii'aayiici ahshotamaaketc, kaawiin kaye taoncikaahsi'ikaatehsinini kaakii'ihkitotc. 18 Kiishpin tahsh Kishemanitoo omiikiwaan oncianohkiimakaninikipan i'imaa ehta ehkanawencikaatenik Onahshowewin, kaawiin iinsan awahshime Kishemanitoo kaakii'ishiahshotamaaketc anohkiimakahsinini. Aasha tahsh Kishemanitoo ekii'ahshotamaaketc, kaakii'oncimihcimiinaatc Eparahaaman i'i omiikiwaan. 19 Aaniin tahsh kaainahtek i'i Onahshowewin? Mii 'i iitok kaakii'oncinankihtootc Onahshowewinini ewiihpeyahtenaakohtootc i'i macitootamowinini. Mii kaye kaakii'inahcikaatek, paanimaa hsa Eparahaam opiiwesiiman pitakohshininitc niiyaak kaakiiahshotamawimintc, miitahsh 'i paamaa cipoonanohkiimakahk i'i Onahshowewin. Encalak tahsh kii'aapatisiwak cionahtoowaatc i'i Onahshowewinini. Peshik itahsh inini kii'aapatisi ciaanihkemiinaatc i'i pemaatisinitc. 20 Kaakiikitohtamaaketc tahsh kaawiin aapatisihsii awiya kiimihcipeshikotc kekoonini kii-ishihciketc. Kishemanitoo tahsh a'a kaamihcipeshikotc. Wiin iko kiikitohtamaaso e'miikiwetc otahshotamaakewin. 21 Onahshowewin ina tahsh omiitaakweshkaan i'i Kishemanitoo otahshotamaakewinini? Kaawiin i'i wiihkaa taaishihsehsinoon! Aaniihsh kiishpin ayaanikipan onahshowewin awiya kekiiontinankipan pimaatisiwin miitahsh i'imaa Kishemanitoon kekiioncikwayahkwakimikohpan ehtootank kaainahtenik i'i onahshowewin. 22 Kihcimasina'ikanink itahsh ishipii'ikaate, kahkina hsa pemaatisiwaatc ahkiink okihciwishkaakonaawaa macitootamowin. Miitahsh i'i Kishemanitoo kaakii'ahshotamawaatc awenena'​iko ketepwehtawaanitc Ciisahs Christan, mii i'iwe tamiinaawak, aaniihsh tepwehtamook. 23 I'i tahsh cipwaa ishihsek tepweyentamowin cianohkiimakahk, Onahshowewin ihsa kikiihtahkonikomin. Paanimaa hsa tepweyentamowin ekii'naakwahk miitahsh i'i kaa'ishipakitinikooyank. 24 Christ tahsh cipwaa takohshink, Onahshowewin kikiihtipenimikomin cikihkinowinikoyank Christ ketashitipeniminank. Miitahsh i'i kaakii'onci-ishihsek, Kishemanitoo cioncikwayahkwakiminank i'imaa tepweyentamowinink. 25 Inashke tahsh aasha ekii'ocihcihsek tepweyentamowin ciaapatahk, kaawiin Onahshowewin awahshime kitipenimikohsiimin. 26 Ehtepweyenimek ohsha Christ Ciisahs, kahkina kaaonciokosihsiminek Kishemanitoo. 27 Kahkina hsa kaatahshiyek, kaakiihsiika'antaasoyek ciwiiciiwek Christ, miitahsh eshinaakosiyek, ehkikishkamowek wiin iko Christ opimaatisiwin. 28 A'a tahsh Coo, a'a kaye kaaCoowiwihsik, a'a kaye opamiihtaake, a'a kaye kaatipenintisotc, a'a inini, a'a ihkwe, kaawiin pepahkaan inentaakosihsiiwak. Kahkina hsa kiinawaa kipeshikwentaakosim i'imaa Christink. 29 Kiishpin tahsh Christink ishitipentaakosiyek kiinawaa iinsan Eparahaamink (Abraham) kitoontahkaanesim, kikatepinamowaam kaye Kishemanitoo kaakii'ahshotamaaketc.

Kalehshiya 4

1 O'o tahsh nintihkit, a'a hsa okosihsimaa mekwaa ehkwiiwisenhsiwitc kaawii'nakatamaakotc oteten otaya'iimini citipentank, mii hsa kewiin ehtoocikaniwitc taapishkoo opamiihtaaken kaatoocikaniwinitc, aanawiin kahkina kekoonini ehtipentank a'a okosihsimaa. 2 Mekwaa tahsh ehkwiiwisenhsiwitc, ayaawa' hsa ininiwa' kenawenimikotc, kenaakacihtamaakotc kaye ini oteten kaakii'nakatamaakotc. Paanimaa tahsh e'ocihcihsenik ahpii kaakii'ihkitonitc oteten cipooninaanaakaci'intc, mii hsa ahpii kepooninaanaakacihcikaniwitc. 3 Miitahsh peshikwan kekiinawint, kikiihtipenimikonaanik iki ahcaahkwak kaatipentamowaatc o'o misiwe ahkiini cipwaa kihkentamank i'i tepwewin. 4 Ahpii tahsh tipa'ikan ekii'ocihcihsenik, Kishemanitoo wiin iko oKosihsan okiihpiicinisha'waan. I'imaa tahsh ihkwenk kii'ishinihtaawiki. Miitahsh kaye ekii'ishipimaatisitc kaakii'ishikanawencikaatenik Moosihs (Moses) otOonahshowewinini. 5 Miitahsh ewiihtipa'waatc cipakitinikonitc i'i opimaatisii' kaakiihtipenimikonitc Onahshowewinini kaakii'oncipiishaatc, mii hsa tahsh Kishemanitoo kahkina kekiinawint tipinawe ciokosihsiminankitc. 6 E'okosihsiminek itahsh Kishemanitoo kikii'ishinisha'amaakonaan hsa ini oKosihsan otAhcaahkoni i'imaa kite'inaanink. Miitahsh a'a Ahcaahk kaaihkitotc: "Aapa, Kiin ninTete!" 7 Kaawiin tahsh keyaapi opamiihtaake kitinowihsii, Kishemanitoo hsa noonkom kitookosihsimik. E'okosihsimihk itahsh kiwii'miinik kaamiinaatc i'i okosihsa'. 8 Otaanaank tahsh kaawiin kikiihkihkenimaahsiwaawaa Kishemanitoo. Iki hsa kikiihtipenimikowaak ekii'anohkiihtawekwaa awiyawak ekaa tepwe kaamanitoowihsikwaa. 9 Aasha tahsh kikihkenimaawaa tipinawe Kishemanitoo – nawac maawiin taaonishihshin ci-ihkitoyaan kikihkenimikowaa Kishemanitoo. Wekonen tahsh wenciwiihkiiwenotawekwaa oko tino ahcaahkwak kaaniinamisiwaatc, iki kaye kaakohpaasinaakosiwaatc kaakakwetipencikewaatc? Mii na 'i eshiantawenimekwaa miinawaa citipeniminekwaa? 10 Aahpici hsa weweni kikanawentaam ono kaakihci-ishikiishikahkin, kiisihsook kaye, waa'ani-ishiwepahk kaye, ini kaye aaninta kaakihci-inentamek kihkinoonowinan. 11 Aahpici hsa kitoocaanimenimininim, koonike mii'i eshinaakwahk anihshaa ekii'oncianohkiiyaan ekiihkakwewiici'inakook. 12 Niitanami'aak! Miitahsh eshipakohseniminakook, kaaishipimaatisiyaan ci-ishipimaatisiyek, aaniihsh keniin kaatinowiyek nintinow. Kaawiin aapiinc​iko kikii'macitootawihsiim. 13 Kikihkenimihshim iitok ekii'aahkosiyaan kaakii'onci-ishihsek ciwiintamawinakook minwaacimowin, miitahsh i'i payehsh ekii'noontawiyek. 14 Aana tahsh ekiihsanaki'ikooyek i'i kaakii'ishiayaayaan i'imaa niwiiyawink, kaawiin tahsh shaakooc kikii'aanawenimihsiim, kaawiin kaye kikiihshiinkentansiim kaakii'inaahpineyaan. Miitahsh kaa'ishihcikeyek, ekii'otaahpiniyek taapishkoo kekii'ishiotaahpinekipan encal Kishemanitoonk kaakii'onciitc, ekii'ishiotaahpiniyek kaye taapishkoo kekii'ishiotaahpinekipan Christ Ciisahs. 15 Aahpici hsa ekiihciihkentamekipan! Aaniin tahsh kaa'ishihseyek? Miitahsh o'o keinaaciminakook, kiishpin kashkihtooyekipan ciotaahpinamekipan kishkiinshikowaan, kitaakii'miishim iitok. 16 Mii na tahsh o'o noonkom kaaonci'inenimiyek ehshiinkeniminakook, e'wiintamawinakook i'i tepwewin? 17 Miitahsh kaaoncikakwesaaki'inekwaa iki kotak ininiwak pahkaan kaainwehtoowaatc i'i minwaacimowin, kaawiin aaniihsh kinantawenimikohsiiwaak ciwii'wiiciiwiyek. Kinantawenimikowaak ohsha ciwii'wiiciiwekwaa. Kaawiin tahsh tepwe kwayahk kiwiihsaaki'ikohsiiwaak. 18 Aahpici tahsh onishihshinini awiyak kiiwiihsaakiwiiciiwinekwaa, kaawiin ehta weti kii'ayaayaan, kiishpin kota kwayahk wiiwiiciiwinekwaa. 19 Niniicaanihsak kaainaweniminakook! Taapishkoo ihkwe kaa-ahpiihciwiihsakentank kiiwiiwaapamaawahsotc, mii keniin peshikwan ehpiihciwiihsakentamaan kiimihkweniminakook, e'mihsawentamowak Christ otishiayaawin cinihtaawikininik i'imaa kipimaatisiwiniwaank. 20 Ampehsh tahsh noonkom wiiciiwinakook weti kaashiayaayek! Pahkaan iitok kitaainininim. Aahpici hsa kikwiinawitootaakoom! 21 Taka kiwiihkakwecimininim kekoon kiinawaa kaa-antawentamek Onahshowewin citipenimikoyek: Kaawiin ina kinoontansiim aaniin ehkitoomakahk i'i Onahshowewin? 22 O'o iitok ishipii'ikaate, Eparahaam (Abraham) kii'niishiwa' (2) okosihsa'. Ini tahsh ihkwewan kaakiihpamiihtaakotc, mii 'imaa peshik okosihsan kaa'ontinaatc. Ini tahsh kotak peshik okosihsan, wiiwink hsa piko okii'ontinaan. 23 A'a tahsh kwiiwisenhs i'imaa opamiihtaakewihkwenk kaakii'oncinihtaawikitc, kahkina awiya kaaishinihtaawikinitc ihsa kii'ishinihtaawiki. A'a tahsh kotak kwiiwisenhs i'imaa Eparahaam wiiwink kaakii'onciitc, Kishemanitoo hsa otahshotamaakewinink kii'oncii. 24 Tipaacimowin tahsh kimiinikoom keoncinihsitohtamek. Iki hsa niishin ihkwewak mii taapishkoo eshinaakosiwaatc ini niishin ahshotamaatiwinan Kishemanitoon kaakii'onahtoonitc. Hekaar (Hagar) tahsh kii'ishinihkaaso a'a ihkwe kaakii'nihtaawiki'aatc oniicaanihsa' cipamiihtaakenitc. Miitahsh kaye eshinaakositc taapishkoo i'i ahshotamaatiwin kaakii'onahcikaatek i'imaa kihciwaciwink Saainai (Sinai). 25 Hekaar tahsh kaye ishinaakosi taapishkoo i'i kihciwaciw Saainai kaakii'ishinihkaatenik weti Arepiya (Arabia) ahkiink kaa-ayaanik. Mii hsa kaye taapishkoo eshinaakositc i'i kihciootenaani Ceroosalam (Jerusalem) noonkom kaawaapantamek. Ceroosalam ihsa ishinaakwan taapishkoo opamiihtaake, iki kaye kahkina pemaatisiwaatc imaa kaaishitipentaakosiwaatc. 26 I'iwe tahsh wiin Ceroosalam kihcikiishikonk kaaoncitipentaakwahk piniskwe piko tipenintisoomakan. Mii hsa eshinaakosiyank e'omaamaantamank. 27 Aaniihsh Kihcimasina'ikan ishipii'ikaate: "Ciihkentan tahsh kiin ihkwe wiihkaa kaa'ayaawaahsiwatc apinoonciish! Shaakowen, ciihkihtaakosin, kiin wiihkaa kaamooshihtoohsiwan i'i kaaishiwiihsakentamowaatc ihkwewak kaawii'oniicaanihsiwaatc! A'a hsa ihkwe kaakii'nakacikaniwitc nawac niipiwa' oka-ayaawaa' apinoonciisha' ahpiihc wiin a'a ihkwe wiihkaa kaakii'nakanikohsik onaapeman." 28 Noonkom tahsh kiinawaa niitanami'aak, Kishemanitoo otahshotamaakewinink kitooncioniicaanihsimikoom, taapishkoo Aaisik (Isaac) ahshotamaakewinink kaakii'ishioniicaanihsimintc. 29 I'i tahsh ahpii, a'a hsa kwiiwisenhs kaakii'ishinihtaawikitc kahkina awiya kaaishinihtaawikinitc, okiihkakwaataki'aan ini kotak kwiiwisenhsan kaakii'oncinihtaawikinitc Kishemanitoon otAhcaahkoni otishihcikewininiink. Miitahsh keyaapi noonkom eshihsek. 30 Mii hsa o'o Kihcimasina'ikan eshipii'ikaatek: "Ninkoci hsa ishinisha'ohk a'a kaapamiihtaaketc ihkwe, ini kaye okosihsan. Aaniihsh a'a kwiiwisenhs kaakii'omaamaatc ini ihkwewan kaakiihpamiihtaakenitc, kaawiin tamiinaahsii kekoonini oteten otaya'iimini taapishkoo kaawii'ishimiinintc a'a kwiiwisenhs kaakii'omaamaatc ini ihkwewan kaapamiihtaakehsinik." 31 Niitanami'aak, kaawiin tahsh a'a ihkwe kaapamiihtaaketc kitooniicaanihsimikohsiinaan, a'a hsa ihkwe kaapamiihtaakehsik kitooniicaanihsimikonaan.

Kalehshiya 5

1 Christ hsa kikii'aapa'okonaan ekaa miinawaa citipenimikohsiwank Onahshowewin. Mashkawikaapawik itahsh i'imaa kaakii'ishiaapa'okooyek. Keko miinawaa pakitinitisohkek citipenimikoyek Onahshowewin. 2 Inashke pisintawihshik, niin Pwaal (Paul) kiwiintamawininim! Kiishpin pakitinitisoyek cikihkinawaatashakeshokooyek, kaawiin i'imaa kanake Christ kikaonciwiici'ikohsiiwaa. 3 Miinawaa kitayaankwaamimininim, kiishpin awiya pakitinitisotc pisaaniko cikihkinawaatashakeshontc, mii hsa eshinaakwaninik oncitako cina'ihtank kahkina i'i Onahshowewin kaainahtenik. 4 Kiinawaa tahsh kaakakwecihtooyek cionciminwakiminek Kishemanitoo ehpiminisha'amek i'i Onahshowewin kaainahtek, mii hsa 'i taapishkoo e'ishihcikeyek e'nakanek Christ e'wiiciiwaahsiwek. Mii hsa e'ayaayek aanti Kishemanitoo okishewaatisiwin keshiwiici'ikohsiwek. 5 Niinawint tahsh wiin, mii 'i eshiahpenimoyaank Kishemanitoo cioncikwayahkwakimiyamintc. OtAhcaahkwan itahsh niwiicii'ikowaamin ehtepweyentamaank kaaoncipiihtooyaank i'i kwayahkwaatisiwin. 6 Ahpii hsa kiiwiiciiwintc Christ Ciisahs, a'a hsa kaakihkinawaatashakeshikaniwitc a'a kaye ekaa kaakihkinawaatashakeshikaniwihsik kaawiin peshik awahshime ahpiihtentaakosihsii. Kaawiin tahsh wiin i'i kaakihci-inentaakwahk. Tepwehtamowin hsa i'i saaki'iwewinink kaaishianohkiimakahk, mii hsa 'i kaakihci-inentaakwahk. 7 Aahpici tahsh wiinke weweni eminopahtooyekipan ehkakwecihkashiweyek e'ishihcikeyekipan! Awenen tahsh kaakipihtininek ehpiminisha'amekipan i'i tepwewin? Aaniin tahsh kaa'ihkitotc kaakii'oncikashkiminek? 8 Kaawiin tahsh wiin Kishemanitoo kaa-antominek i'i kikii'ikohsiiwaa! 9 "Aahpici hsa pankii ompisikan e'aapatahk, mii hsa misiwe pahkweshikan eshiompishkaatc," maawiin taaihkitom. 10 Kitooncikehcinaa'ininim ewiiciiwek kaaTipenciketc, ciotaahpinansiwek kekoon pahkaan kaaishitepwehtansiwaan. Kishemanitoo hsa okanana'ahsaan ini ininiwan aweneniwinikwen kaamikoshkaaci'inek. 11 Niitanami'aak, kiishpin tahsh niin keyaapi kakiihkwaatamaampaan i'i kihkinawaatashakeshokoowin, wekonen tahsh keyaapi wencikakwaataki'ikooyaan? Kiishpin tahsh i'i tepwe ishikakiihkweyaan, kaawiin iitok awiya nintaamaanihtaakohsii kakiihkwaanimak ini Ciisahsoon kaakii'niponitc aashiteyaahtikonk. 12 Miitahsh eshimihsawentamaan iki hsa kaamikoshkaaci'inekwaa pisaaniko cianimanishamowaatc otininiiwiniwaan. 13 Kiinawaa tahsh wiin niitanami'aak, Kishemanitoo ohsha kikii'antomikowaa i'imaa aapa'okoowinink citipenintisoyek. Keko tahsh wiin i'i kitipenimitiso'ikoowiniwaa aapacihtoohkek cioncimacitootamek, keko kaye pakitinankek ini kimacimihsawentamowiniwaan citipenimikoyek. O'o tahsh ishihcikek, saaki'itiwinink ishinaanaakaci'itik. 14 Aaniihsh kahkina Onahshowewin taaishimooshkinetoocikaate o'o ishihcikenaaniwank: "Saaki' kiicipimaatis taapishkoo kaaishisaaki'itisoyan." 15 Ayaankwaamisik! Kiishpin aya'aawihshink tootaatiyek, maamaakwanitiyek, wiihsakaahpinanitiyek, mii maawiin i'i cicaakinanitiyek! 16 Miitahsh o'o eninakook: Pakitinihk hsa a'a Kishemanitoo otAhcaahkwan cipimiwitootc ini kipimaatisiwiniwaan. Kaawiin tahsh kikaishihcikehsiim kaaishimacimihsawentamoomakahk kikehteinaatisiwiniwaa. 17 Awiya hsa okehteinaatisiwin nahpaac inahke ishimihsawentamoomakanini, kaawiin wiin Kishemanitoo otAhcaahkwan kaaishimihsawentaminitc ishihcikemakahsinini. A'a tahsh kaye Kishemanitoo otAhcaahkwan kaawiin ishimihsawentansiiwan i'i kehteinaatisiwin kaawii'ishihcikemakaninik. A'a tahsh Ahcaahk omihsawentamowin i'i kaye kikehteinaatisiwiniwaa miitahsh mooshak miikaatiimakanoon. Miitahsh i'i kaaoncikashkihtoohsiwek i'i kaashiantawentamek ewii'ishihcikeyek. 18 Kiishpin tahsh Kishemanitoo otAhcaahkwan pimiwitoonitc kipimaatisiwiniwaan, kaawiin iinsan kitipenimikohsiim i'i Onahshowewin. 19 Aahpici tahsh peyahtenaakwan i'i kehteinaatisiwin eshihcikemakahk. Miitahsh o'o eshianohkiimakahk: pihshikwaatisiwin, wiinaatisiwin, nahpaacipihshikwaacihcikewin, 20 manitoohkewin, mamaantawihcikewin, shiinkenintiwin, kiihkaantiwin, ayaahshenintiwin, wahkewikitaasowin, kakweniikaanenintisowin, kakweshaakoosontiwin, pahkewinitiwin, 21 mihsawinaakewinan, kiiwashkwepiiwin, papaakakiipaatisiwin kaye taapishkoo miiwan​ono tino. Miitahsh niiyaak eshiayaankwaamiminakook, awiya kaatootank ini kaawiintamaan, kaawiin tawiicihtwaahsii Kishemanitoon otOokimaawiwininiink. 22 Ini tahsh Kishemanitoo otAhcaahkwan, miiwan​ono nehtaawikihtoonitc: saaki'iwewin, minwentamowin, pisaanisiwin, shiipentamowin, kishewaatisiwin, minotootaatiwin, tepweyentaakosiwin, 23 noohkaatisiwin, weweni kanawenintisowin. Iki tahsh o'o kaaishipimaatisiwaatc kaawiin okapapaamenimikohsiinaawaa Onahshowewinini. 24 Iki tahsh Christ Ciisahsonk kaaishitipentaakosiwaatc aasha aashiteyaahtikonk okii'ishinihtoonaawaan okehteinaatisiwiniwaan, ini kaye kaakii'ishitakoantawentamoomakaninikipaniin, kaye kaakii'ishimihsawencikemakaninikipaniin. 25 Ahcaahkonk itahsh e'oncipimaatisiyank, taka tahsh kaye Ahcaahkonk ishipimohsetaa. 26 Taka kaawiin kikawawishwaasohsiimin kaawiin kaye kikakakwenishki'itihsiimin, kaawiin kaye kika-ayaahshenintihsiimin.

Kalehshiya 6

1 Niitanami'aak, kiishpin tahsh awiya oncimihkawintc aaniin iko ishimaci-ishihciketc, kiinawaa hsa kaana'ihtawimek Kishemanitoo otAhcaahkwan wiici'ihk a'a kaakii'mamaashiitc miinawaa kwayahk cipimohsetc. Weweni hsa tootawihk ahpii wiici'ek. Kaatahsopeshikoyek itahsh naanaakaci'itisok kekiinawaa cikoci'ikoohsiwek. 2 Waawiici'itik tahsh cipimiwitamaatiyek ini kaapimiwitooyek. O'o tahsh kii'ishihcikeyek mii hsa 'i e'na'ihtamowek Onahshowewin Christ kaakii'ishikihkino'iketc. 3 Kiishpin tahsh inini kihcikekoonini inenintisotc, kekoonini tahsh e'ahpiihtentaakosihsik, aahpici kihciwanenintiso. 4 Mii hsa eshinaakwaninik awiya wiin iko cikanawaapantank aaniin eshihciketc. Kiishpin tahsh minonaakwaninik i'i otishihcikewin, otayaan hsa kekoonini cioncikihci-inentank. Kaawiin tahsh wiin memwehc pahkaan awiyan okakanawaapamaahsiin taka kwayahk ci-ishipimaatisikwen. 5 Mii hsa eshinaakwaninik kahkina awiya wiin iko cipimiwitamaasohpan opimiwanaan. 6 A'a tahsh inini kaakihkino'amawintc i'i Kishemanitoo otipaacimowinini, mii hsa eshinaakwaninik i'imaa kaaonishihshininikin kekoonan kaatipentank cionciwiici'aatc ini kaakihkino'amaakotc. 7 Keko tahsh wiin wanentankek o'o: Kishemanitoo hsa kaawiin tinowihsii cipaahpinotawintipan. Wekonen hsa ko inini kehtikaatank, mii hsa i'iweni kemoona'ank. 8 A'a hsa awiya kaaishikihtiketc okehteinaatisiwinink, nipowinini tahsh okamoona'aan i'imaa kaakii'ishikihtiketc. A'a hsa wiin awiya i'imaa kaaishikihtiketc, kaaishiwiici'iwenitc Kishemanitoon otAhcaahkoni, mooshak keayaanik pimaatisiwinini okamoona'aan i'imaa kaakii'ishikihtiketc. 9 Taka tahsh kiinawint kaawiin kikapakitentansiimin i'i kaaishikakweminotootamank mooshak. Aaniihsh taocihcihse ahpii kekiinawint cimoona'ikeyank, kiishpin noontepakiciihsiwank. 10 Taka tahsh kiishpin ishihsek awiya ciminotootawankitc, taka kwayahk tootawaataanik kahkina pemaatisiwaatc, iki hsa awahshime wiici'aataanik kaaonci-inawemankwaa tepwehtamowinink kaaishitipentaakosiwaatc. 11 Kiwaapantaam iitok niin aaniin ehpiihcimankipii'ikeyaan o'o ishkwaac kaaoshipii'amawinakook, niin iko nininc e'aapacihtooyaan. 12 Iki tahsh awiyak kaakakwekashkiminekwaa cikihkinawaatashakeshikaniwiyek, miiwak hsa iki ehta kaakakweminonaakohtoowaatc ciwaapancikaatenikin otishihcikewiniwaa wiiyawimaank inahke, ewii'oncimamiihkwaanitisowaatc itahsh. Miitahsh i'i ehta kaaonci-ishihcikewaatc, kiishpin aaniihsh tashimaawaahpan Christan kaakii'onciniponitc aashiteyaahtikonk kewiinawaa taakiihkakwaataki'aawak. 13 Iki hsa kaakihkinawaatashakeshowewaatc kaawiin tahsh kaye wiinawaa otootansiinaawaa i'i Onahshowewinini kaainahtenik. Mii hsa ehta tahsh kaaonciantaweniminekwaa cikihkinawaatashakeshokooyek ewii'mamiihkwaanitisowaatc ekiihkashkiminekwaa ciotaahpinamowek kaaishikihkinawaacihtoowaac wiiyawimaan. 14 Kaawiin itahsh niin wiihkaa nintaaishihcikehsii. Niin itahsh wiin i'i ehta ninkatashintaan Ciisahs Christ ekii'nipotc i'imaa aashiteyaahtikonk. O'omaa ahkiink kaakihci-inentaakwahk niin wiin nintinakintaan taapishkoo enipoomakahk. Mii kaye niin eshinaasoyaan ekii'nipoyaan citootansiwaan kaakihci-inentaakwahk o'omaa ahkiink. 15 A'a tahsh kaakiihkihkinawaatashakeshikaniwitc, kaye kaakihkinawaacihcikaniwihsik kaawiin kanake kekoon inaapatahsinini kaatootawintwaa. Awiya ohsha kaaoshkioshihcikaniwitc mii hsa o'owe kaakihci-inentaawahk. 16 Iki hsa kaawii'ishipimaatisiwaatc i'i kaakii'ishkwaatashintamaan pisaanentamowinini, shawentaakosiwinini kaye tamiinaawak, iki kaye kahkina Isriyal (Israel) kaainentaakosiwaatc, Kishemanitoon kaatipenimikowaatc. 17 Miitahsh o'o ehkitoyaan ishkwaac, taka keko awiya awahshime ninkamikoshkaaci'ikohsii, aaniihsh naakwanoon ini ninkakwaataki'ikoowinan i'imaa niwiiyawink. Miitahsh i'imaa eshikihkinawaasinaakwahk e'anohkiihtawak Ciisahs. 18 Taka tahsh kaaTipenciketc Ciisahs Christ okishewaatisiwin kikawiiciiwikom kitahcaahkowaank kahkina kaatahshiyek, niitanami'aak! Emen.

Ehpihsahsihkaank 1

1 Niin Pwaal (Paul), Ciisahs Christ otishinisha'waakanan. Kishemanitoo hsa wiin iko ninkii'inenimik i'i ci-inanohkiiyaan. Kiinawaa hsa kitooshipii'amawininim weti kaa-ayaayek Ehpihsahsihkaank (Ephesus), Kishemanitoo kaatipeniminek kaye aahpici ehtepweyentaakosiwek ewiicipimaatisiimek a'a Christ Ciisahs. 2 Taka Kishemanitoo Kaaoyoohsimank, kaaTipenciketc Ciisahs Christ kaye, kikamiinikowaa okishewaatisiwin, pisaanisiwinini kaye. 3 Taka tamiikwehciwentaakosi Kishemanitoo Kaaoyoohsimikotc kaaTipencikenitc Ciisahs Christan. Aaniihsh e'wiiciiwimank Christan kaaoncishaweniminank, kaaoncimiininank kaye kahkina kaashishawencikenitc Kishemanitoo otAhcaahkwan kihcikiishikonk kaaonciimakaninikin. 4 Wiin aaniihsh kikiihkiishaacionenimikonaan ciwiiciiwimank Christan cipwaa maacihsenik o'o ahkiini, cipehkisiwank, kekoon kaye aapiinc ci-ishianaamentaakosihsiwank enaahsamiitc. 5 Kishemanitoo tahsh ehsaaki'iwetc kaakii'oncikiishaaci-inentank ewii'okosihsiminank. Ciisahs Christan otishihcikewininiink otooncikashkihtoon. Wiin itahsh iko kaye ekii'minwaapantank i'i kaakii'onci-ishihciketc. 6 Taka tahsh miikwehciwenimaataa Kishemanitoo aaniihsh kihci-inentaakwanini i'i okishewaatisiwin, kaakii'ishimihcimiininank i'imaa oKosihsink kaasaaki'aatc. 7 Christ itahsh omiskwiim ekii'oncikawininik mii​'imaa wenciik i'i pimaaci'iwewin, mii kaye 'imaa wencipoonentamaakooyank macitootamowin, aaniihsh Kishemanitoo wenootanini okishewaatisiwin. 8 Aaniihsh aahpici niipiwa' kikihcimiinikonaan i'i okishewaatisiwin. Kishemanitoo tahsh wiinke ehkakiihtaawentank, kahkina kaye kekoonini e'nihsitohtank, kii'ishihcike kaakii'inentank: 9 kikiihkihkentamo'ikonaan i'i kaakiihkihkencikaatehsininik otinentamowin ekiihkiishaacionentank ewiihkiishihtootc i'imaa Christink. 10 Amiitahsh o'owe kaakii'inentank, ewii'maawantoonank kahkina kekoonan kaakii'oshihtootc kihcikiishikonk ahkiink kaye kaa-ayaanikin, Christan ciniikaanishkaminitc. Kishemanitoo wiin iko okakiishihtoon otinentamowin ahpii na'ihsenik tipa'ikan. 11 I'imaa tahsh kaye Christink kikiihkiishaacionenimikonaan ewiihtipeniminank, mii aaniihsh i'i mayaa kaakii'inentank Kishemanitoo kaakashkihtootc kahkina kekoonini ci-ishihsenik aaniin kaaishiantawentank. 12 Wiin iitok okii'onentaan niinawint nihtam kaakii'ahpenimonotawimankitc Christan cioncimiikwehciwenimankitc, aaniihsh kihci-inentaakosi. 13 Kekiinawaa tahsh Kishemanitoo iitok kikii'oncimaaciitipenimikowaa ahpii kiipisintamowek i'i minwaacimowin, aaniihsh mii 'imaa kaaoncipimaaci'ikooyek. Ekiihtepwehtawek itahsh Christ, Kishemanitoo kikii'miinikowaa otAhcaahkwan kaakii'ahshotamaaketc, ewiihkihkinawaaci'inek ehtipeniminek. 14 A'a tahsh Ahcaahk kaakii'miinikooyank mii 'imaa eshinaakwahk ekiihkihciwitipa'ank ninkotink citepinamowank i'i kaawii'miininank, mii kaye i'imaa wencikihkentamowank Kishemanitoo wiinke ewiihpimaaci'aatc ini pemaatisinitc kaatipenimaatc. Taka tahsh miikwehciwenimaataa aaniihsh kihci-inentaakosi. 15 Ahpii tahsh ekii'noontamaan aaniin ehpiihcitepwehtawek kaaTipenciketc Ciisahs, aaniin kaye ehpiihcisaaki'ekwaa pemaatisiwaatc Kishemanitoon kaatipenimikowaatc, 16 miitahsh i'i mahshi kaaoncikipihciihsiwaan emiikwehciwenimak Kishemanitoo kiinawaa onci. Mooshak kaye kimihkoomininim kiianami'aayaan, 17 ehkakwecimak Kishemanitoo kaaoKishemanitoomikotc kaaTipeniminank Ciisahs Christan, kaakihci-inentaakositc Kaaoyoohsimintc, cimiininek ini Ahcaahkwan kaamiikiwenitc kakiihtaawentamowin, kewaapanta'inek Kishemanitoon awahshime cikihkenimimek. 18 Mii hsa tahsh eshianami'aayaan, ciwaahsenikaatekin kaaoncinihsitohtamoomakahkin kite'iwaan, cipeyahteyaapantamowek wekonen i'i kaapiihtaawek Kishemanitoo ewii'miininek kaaishiantominek, ciwaapantamowek kaye aaniin ehpiihciwenootaninik, ehpiihcikihci-inentaakwaninik kaye kaawii'miinaatc Kishemanitoo opimaatisiima'; 19 cikihkentamowek kaye aaniin ehpiihciawahshimewentaakwanininik omashkawisiiwin kaa-anohkiimakaninik i'imaa kipimaatisiwininaanink aasha kaakiihtepwehtawank. Aaniihsh mii​'i eshiwiici'iwemakaninik i'i kaatipentank okihcimashkawisiiwin, 20 kaakii'aapacihtootc ahpii kiikiiwepimaatisi'aatc Christan ahpii kiiniponitc, ekii'okimaawapi'aatc kaye okihcinihkink inahke weti kihcikiishikonk. 21 Christ itahsh kahkina opaashicishkaanan okimaawiwinan, kashki'ewisiwinan kaye, mashkawisiiwinan kaye, tipenimiwewinan kaye, ini kaye kahkina wiinsowinan kaakihtakintenikin kemiinintc awiya. Kaawiin wiin ehta noonkom kaa-ahkiiwaninik, i'i hsa kaye piciinak kaawii'ahkiiwaninik. 22 Kishemanitoo okiihpakitinaanan kahkina kekoonan Christan citahtahkohkaataminitc, okii'miinaan kaye kahkina kekoonini citipentaminitc i'imaa kaashiayaanitc eshimaamawiinonitc otepwehtamoo'. 23 Aaniihsh miiwa' i'iweni owiiyaw, mii 'imaa wencimooshkineyentaakositc, wiin kaye misiwe kahkina kekoonini kaamooshkineshkank.

Ehpihsahsihkaank 2

1 Kiinawaa tahsh kikii'nipom kimacitootamowiniwaank, kiwanihcikewiniwaank kaye. 2 I'i hsa ekii'ishipimohseyek kaaishihcikaaniwank o'omaa ahkiink, ekii'ishihcikeyek kaye kaaishihciketc a'a kaatipenimaatc kaatipentaminitc kashki'ewisiwin o'omaa mishahkiishikonk, a'a ahcaahk kaatipenimaatc i'i pemaatisininitc kaashashiipihtaminitc. 3 Kahkina tahsh kekiinawint i'i kikii'ishipimaatisimin kaaishipimaatisiwaatc, ekii'ishihcikeyank aaniin eshipihshikwaatentamoomakahkin kikehteinaatisiwininaanin, ekii'ishihcikeyank kaye eshimihsawentamoomakahkin kikehteinaatisiwininaanin, kitinentamowininaanin kaye. Ekii'ishinihtaawikiwankopanen kaye kikii'inaatisimin cipakamishkaakoyank Kishemanitoo onishkaatisiwin, taapishkoo kotak awiyak kaashipimaatisiwaatc. 4 Kishemanitoo tahsh aahpici e'wenootaninik okoohpaasinaakewin, aahpici kaye ekiihpaahtiinahtootc oshawencikewin kaakii'ishishaweniminank, 5 mekwaa tahsh kii'nipowank i'imaa kimaci-ishihcikewininaanink, wiin ihsa Kishemanitoo kikiihpimaatisi'ikonaan kaakiihpimaatisi'aatc Christan. Okishewaatisiwin aaniihsh kitooncipimaaci'ikoom. 6 Kikii'ishi'ikonaan kaye ciwiicikiiwepimaatisiimimank ini Christan, kikii'ishi'ikonaan kaye ciwiitapimimank weti kihcikiishikonk ci-ishiayaawank Christ Ciisahsoon kaaishiayaanitc. 7 Miitahsh i'i kaakii'onci-ishihciketc, i'i hsa piciinak kaawiihpiahkiiwaninik ewii'waapanta'iwetc kaakihciwenootaninik okishewaatisiwin, i'imaa tahsh Christ Ciisahsoon opimaatisiiwininiink mii 'imaa eshinaakohtootc. 8 Okishewaatisiwinink ohsha kikii'oncipimaaci'ikoom, aaniihsh kikiihtepweyentaam. Kaawiin wiin kiinawaa i'i kikashkihtamaasohsiim, Kishemanitoo ohsha i'i omiikiwewin. 9 Kaawiin wiin kaye anohkiiwinink onciihsinoon pimaaci'ikoowin, awiya hsa inini ekaa cioncikihcikaakiikitohsik. 10 Kiinawint itahsh Kishemanitoo otishimaaciiwin, Christ Ciisahsonk kikii'oshi'ikonaan ciminohcikewank, wiin aaniihsh kikiihkwayaanciihtamaakonaan keishipimaatisiwank. 11 Taka tahsh maamihkawik kiinawaa ekii'ishinihtaawikiyek ekaa Coo citinowihsiwek, "ekaa kaakihkinawaatashakeshokoohsiwek" kaye ekii'ishinihkaaninekwaa iki kaakihkinawaatashakeshontwaa, oninciimaank iitok onciini i'i kaatootawintwaa i'imaa owiiyawimaank. 12 I'i tahsh ahpii kaawiin kikii'wiiciiwaahsiwaawaa Christ, kaawiin kaye kikii'oncitipentaakosihsiim Isriyalak (Israel) kaaishitipentaakosiwaatc, kaawiin imaa kikiihtakonikoohsiim i'imaa kaakii'ishiahshotamaatinaaniwankipan, kaakii'ishiahshotamawaatc Kishemanitoo opimaatisiima', ekii'ayaahsiwek kaye ahpenimowin, ekii'oKishemanitoomihsiwek kaye o'omaa ahkiink. 13 Kikii'naawinaakosim i'iwe ahpii. Noonkom itahsh i'imaa Christ Ciisahs omiskwiimink, aasha pehsho kaakii'oncipiinikoyek. 14 Wiin aaniihsh Christ kaapiitamawinank pisaan ciwiiciintiyank, wiin kaakii'ishi'aatc cipeshikwentaakosinitc i'i kaakiihshiinkenintinitc, wiin kaye kaakiihpiikopitootc maashiwiiciintiwin taapishkoo pahkehcikanink kaakii'inentaakwaninik. 15 Wiin kaye owiiyawink okiihkaahsii'aan Onahshowewin aaniin kaakii'inaahkonikemakaninik, aaniin kaye eshihcikemakaninik. Miitahsh kaakii'inentank cipeshikwentaakosinitc pemaatisinitc ekiiwii'oncioshkioshi'aatc kaaishiniishwewaanakisinitc, ewii'ishi'aatc pisaan ciwiiciintinitc Coowa' i'i kaye ekaa kaaCoowiwihsinik. 16 Wiin iitok kaye Christ ahpii kiinipotc aashiteyaahtikonk okii'nihtamawaa' i'i kaakii'ishishiinkenintinitc, ekii'naacipinaatc kwayahk ciwiiciintinitc. Ekii'ishi'aatc kaye cipeshikwentaakosinitc peshikwan wiiyawimaank cioncitipentaakosinitc. Aashiteyaahtikonk kaye okii'oncinaacipinaa' kwayahk ciwiiciiwaanitc Kishemanitoon. 17 Kiihpitakohshin Christ ekiihtashintamawinek kaashiminwaatotenik pisaan wiiciintiwin kiinawaa ekaa kaaCoowiwihsiwek kaakii'naawentaakosiyek kaye, kewiinawaa tahsh kaaCoowiwiwaatc kii'wiintamawaawak pisaan wiiciintiwin wiinawaa kaakiihpehshwentaakosiwaatc. 18 Wiin itahsh onci, kaaoncikashkihtaawank kiinawint kaashiniishwewaanakisiyank mincikahkina cipinaasihkawank a'a Kaaoyoohsimintc, aaniihsh kipeshikwentaakosiwaamin e'wiiciiwiminank kaapeshikonitc otAhcaahkwan. 19 Nashke tahsh kiinawaa ekaa kaaCoowiwihsiwek kaawiin awahshime kipiiwitewihsiim, kaawiin kaye kimayakentaakosihsiim, noonkom itahsh wiin kekiinawaa kitooncitipentaakosim i'i Kishemanitoo opimaatisiima' kaaishiayaanitc, Kishemanitoo kaye owaahkaa'ikanink kaaoncitipentaakosinitc. 20 Miitahsh i'imaa kekiinawaa eshiahsikooyek ciwaahkaa'ikaniwiyek i'imaa kaakii'ishionaahkohsicikewaatc ishinisha'waakanak, i'i kaye Kishemanitoo otipaacimowininiima', Christ Ciisahs wiiniko Kaanihtamaapihkihshink Ahsin tinowi waahkaa'ikanink. 21 Aaniihsh mii 'imaa Christink kaaonciminwahtek i'i kahkina waahkaa'ikan, piinihsh e'animaaciikik, piinihsh itahsh Kishemanitoo okihcianami'ewikamik cianitinowaninik, kaaTipenciketc ketashianami'ehtawintc. 22 Christ e'wiiciiwinek kekiinawaa tahsh kaaoncimaamawionahkinikooyek e'oshihcikaatek waahkaa'ikan, mii 'imaa Kishemanitoo entaatc aaniihsh otAhcaahkwan i'imaa ayaawan.

Ehpihsahsihkaank 3

1 Mii hsa o'o niin Pwaal (Paul) kaa'oncitahkonikooyaan e'anohkiihtawak Christ Ciisahs kiinawaa onci ekaa kaaCoowiwihsiwek. 2 Kehcinaac maawiin aasha kikii'noontaam Kishemanitoo kaakishewaatisitc ekii'miishitc o'o anohkiiwinini kiinawaa ciminohseyek. 3 Wiin ihsa piko Kishemanitoo ninkii'waapanta'ik cikihkentamowak i'i kaakiihkihkencikaatehsininik otinentamowin. Aasha pankii ninkiihtashintaan o'o kaakii'oshipii'amawinakook. 4 Kiishpin hsa anamihtooyek kikanihsitohtaam ihsa, kikakihkentaam kaye aaniin eshikihkentamowak i'i Christ otinentaakosiwin kaakiihkihkencikaatehsininik. 5 Weti tahsh otaanaank ininiwak kaawiin kii'waapanta'aahsiiwak cikihkentamowaatc o'o. Kishemanitoo tahsh wiin iko ekii'aapaci'aatc otAhcaahkwan okii'waapanta'aa' i'i otishinisha'waakana' otipaacimowininiima' kaye kaakihtentaakosinitc. 6 Miitahsh o'o kaaitamaan: Iki hsa kaye kaaCoowiwihsikwaa minwaacimowinink kewiinawaa okaoncitepinaanaawaa kaawiihtepinaminitc Coowa' Kishemanitoon kaawii'miinikonitc. Mii hsa kaye wiinawaa i'imaa eshiwiitoohkaasowaatc Christ owiiyawininiink. Kii'inentaakosiwak kaye wiinawaa cimiinintwaa Kishemanitoon kaakii'ishiahshotamaakenitc i'imaa Christ Ciisahsonk. 7 Niin ninkiihtinowi'ikoo cianohkaatamaan Minwaacimowin, Kishemanitoo ekii'ishishawenimitc ci-inanohkiiwak, ekii'oncimiishitc kaashianohkiimakaninik omashkawisiiwin. 8 Niin itahsh nawac nintapahsentaakos ahpiihc wiin iki maawac kaatapahsentaakosiwaatc Kishemanitoo opimaatisiima'. Shaakooc itahsh ninkii'ishimiinikoowis ci-ishiwitawakwaa ekaa kaaCoowiwihsikwaa minwaacimowinini, cikihkentamowaatc wiihkaa kaatetakowiintehsininik aaniin ehpiihciwenootisinitc ini Christan. 9 Kishemanitoo niin ninkii'aapaci'ik kahkina pemaatisinitc cipeyahteyaapantaminitc aaniin waaishianohkiihtootc kaakiihkihkencikaatehsininik otinentamowin. I'iweni tahsh otinentamowin mewisha otaanaank Kishemanitoo kahkina kekoonini kaaoshihtootc, mii 'iweni mooshak kaakiihpikaatootc cikihkencikaatehsininik. 10 Noonkom itahsh Kishemanitoo, otanami'aa' otaapaci'aa' e'waapanta'iwetc okakiihtaawentamowin. Miitahsh i'i kaa-ahcaahkowentaakosinitc kaaokimaahkantaakenitc kaainintwaa, kaakashki'ewisinitc kaye, kihcikiishikonk kaa-ayaanitc cipikihkentaminitc Kishemanitoo e'ayaatc kakiihtaawentamowin. 11 Kishemanitoo hsa kii'ishihcike mewisha otaanaank kaakiihpi-inentamokopanen i'imaa tahsh Christ Ciisahsonk kaaTipeniminank, mii​'imaa eshinaakwaninik i'i ekiihkiishihtootc kaawii'ishihcikekopanen. 12 Christ tahsh e'wiiciiwank, ehtepwehtawank kaye kaaoncisoonkite'eyank, kaaoncikehcinaa'oyank kaye ahpii kiipinaasihkawank Kishemanitoo weti kaaishiayaatc. 13 Miitahsh eshipakohsenimininakook, cipiikote'ehsiwek o'o kiinawaa kaaoncikakwaatakihtooyaan, kiinawaa hsa kikaonciminohsem o'o kaashikakwaatakihtooyaan. 14 Miitahsh o'o kaaonci ociciinkwanapihtaayaan enaahsamiitc Kaaoyoohsimintc, 15 mii​'i iitok kahkina awiyak wentinamowaatc owiinsowiniwaan kihcikiishikonk, ahkiink kaye kaa-ayaawaatc, kaatahsopepahkaanwewaanakisiwaatc kaaotetewaatc. 16 Nimashkawikakwecimaa Kaaoyoohsimintc cimiininek, kaaishiwenootaninik okihci-inentaakosiwin cioncimashkawisii'ikoyek i'imaa kaashimashkawisiinitc otAhcaahkwan. Cimashkawisiiyek i'imaa piincaya'ii kipimaatisiwiniwaank. 17 Ehtepwehtamek kaye Christ ci-ishitaatc i'imaa kite'iwaank, kiinawaa kaye taapishkoo watapiin kaakotaawikihkin, cikotaawikiyek saaki'iwewinink, kaashionahtek kaye saaki'iwewin mii 'imaa ci-ishiaayiitapiyek. 18 Cikashkihtooyek kaye ciwiicikihkentamoomimek i'i Kishemanitoo kahkina otanami'aama' aaniin enikohkwentaakwaninik Christ osaaki'iwewin, aaniin ehpiihcimankateyentaakwaninik, aaniin kaye ehpiihcikinwewentaakwaninik, aaniin kaye ehpiihci-ishpentaakwaninik, aaniin kaye ehpiihciwaahsawentaakwaninik anaamaya'ii inahke. 19 Kekeht kaye cikihkentamowek Christ osaaki'iwewin, wiihkaa ketepikihkencikaatehsininik, cimooshkineshkaakowek kaye kahkina Kishemanitoo otinaatisiwin eshimooshkinewentaakwaninik. 20 A'a tahsh Kishemanitoo kaa-anohkiimakaninik omashkawisiiwin i'imaa kipimaatisiwininaanink, okashkihtoon awahshime ci-ishihciketc kaaishikakwecimank, aaniin kaye enentamowank, 21 taka hsa wiin mooshak iko takihci-inentaakosi i'imaa otanami'aa' kaaishiayaanitc, i'imaa kaye Christ Ciisahsonk mooshak iko ahpane keniayayaanik. Emen.

Ehpihsahsihkaank 4

1 Niin itahsh kaaTipenciketc e'anohkiihtawak kaaoncikipa'okooyaan, kitishipakohsenimininim, aahpici ehkihci-inentaakwahk kaashikanoonikooyek, kiiantominek Kishemanitoo, miitahsh inahke ci-ishipimaatisiyek. 2 Mooshak kakwetapahsenimohk, kakwenoohkaatisik, shashiipentamohk kaye, kakweshashiipenintik ciwaapanta'itiyek ehsaaki'itiyek. 3 Maawac hsa ko kihcianohkiik cikanawentamowek wiiciintiwin Kishemanitoo otAhcaahkwan kaamiininek, pisaanisiihkantaatiwin aapacihtook kaaoncimincimishkaak kaaishiminowiiciintiyek. 4 Mihcipeshikwan hsa wiiyawimaa, mihcipeshiko kaye a'a Ahcaahk, mihcipeshikwanini kaaishiantominek Kishemanitoo, miitahsh i'imaa eshiahpenimoyek. 5 Mihcipeshiko kaye kaaTipenciketc, mihcipeshikwan kaye tepweyentamowin, mihcipeshikwan kaye siika'antaasowin, 6 mihcipeshiko kaye Kishemanitoo, kahkina awiyan Kaaoyoohsimikotc, wiin kaye kahkina awiya' otipenimaa', misiwe kaye tananohkii, wiin kaye kahkina awiya' opimaatisiwininiink ayintaa. 7 Kahkina tahsh kaatahsopeshikoyank Christ omiikiwewinink kikii'ishishawentaakosimin, ekii'ishimaamaata'ooninank omiikiwewinan kaakii'onentank ci-inanohkiiyank. 8 Kihcimasina'ikan tahsh ishipii'ikaate: "Ahpii hsa weti ishpimink kii'ishaatc, kaahcitinikana' niipiwa' okii'maaciinaa', miikiwewinan tahsh okii'miinaa' ininiwa'." 9 Wekonen tahsh "ishpimink kii'ishaatc" kaaicikaatek? Mii hsa o'o kaaicikaatek, pinamaa hsa maawac iko tapahsahkiink kiihpiishaa. 10 A'a tahsh kaakiihpinaashiitc o'omaa ahkiink, mii hsa a'a peshikwan ishpimink kaakii'ishaatc, waahsa weti awahshime kihcikiishikonk ekii'ishaatc, kahkina kekoonini ewii'mooshkineshkank. 11 Wiin itahsh kaakii'miinaatc ininiwa' anohkiiwinan, aaninta ishinisha'waakan citinowinitc, aaninta citinowinitc kaakanoocikehtamawaanitc Kishemanitoon, aaninta cipapaawiintamaakenitc minwaacimowin, aaninta cikanawenimaanitc otanami'aa', aaninta kaye cikihkino'amaakenitc. 12 Miitahsh i'i kaakii'oncimiinaatc ewiihkwayaanci'aatc Kishemanitoo otanami'aama' citootaminitc owaawiici'iwewianohkiiwin, cioncikiishinaakwaninik e'ompihcikaatenik Christ owiiyaw, 13 paanimaa kahkina kiipeshikwentaakwahk kitepwehtamowininaan, kaaishikihkenimank kaye Kishemanitoo oKosihsan, miitahsh i'i payesh cinikiishaapewiwank, ciocihcishkaawank omooshkinewentaakosiwinink Christ mayaa kekiinawint ci-ishinaakosiyank. 14 Taka tahsh kaawiin apinoonciishink kikaishiayaahsiimin, cipapaamaa'okohsiwank, cipapaamiwepaahshihsiwank aanti piko wentaanimahk, aaniihsh taapishkoo nootinonk inentaakwanini okihkino'ikewiniwaan iki kaawanikihkino'ikewaatc. Aaniihsh okashki'aawaa' aaninta e'wanimaawaatc e'aapacihtoowaatc kaakakayentaakwaninikin otishihcikewiniwaan. 15 Kiinawint tahsh wiin saaki'iwewinink e'onciimakahk kaatashintamank tepwewin, misiwe kikaishimaaciikimin inahke Christ kaaishiayaatc, kaaniikaanishkank owiiyaw. 16 Wiin itahsh kahkina kekoonini e'naakacihtootc, mii 'i kaaonci maamawi minohsinkin ini pepahkaan kaainwaatekin i'imaa wiiyawimaank. Mii 'imaa kahkina wencimincimishkaak kaaishiayoonahcikaatekin ayaanihkawikanaanan. Entahso peshikwahk hsa inaapatan kekii'inanohkiimakahkipan. Miitahsh o'o saaki'itiwin enanohkiimakahk, kaaoncimaaciikihk wiiyawimaa, kaaonci mashkawi'itisoomakahk kaye. 17 Kitayaankwaamimininim itahsh kaaTipenciketc otishinihkaasowinink: keko awahshime ishipimaatisihkek taapishkoo iki ekaa kaaCoowiwihsikwaa kaaishihcikewaatc, aaniihsh otinentamowiniwaan kaawiin kekoon ahpiihtentaakwahsininiwan. 18 Kashkiitipihkaniniwan kaye onaakatawentamowiniwaan, kaawiin kaye i'imaa Kishemanitoo kaashipimaaci'iwenitc ishitipentaakosihsiiwak, aaniihsh kaawiin oncita owiihkakwekihkenimaahsiwaawaan aaniihsh kaye ehshashiipihtamowaatc. 19 Kaawiin kaye awaac pankii akaciwin otayaahsiinaawaa, pisaan​iko wiinke anoociko e'ishihcikewaatc aaniin wiinehtawaa ko keonciminwentamowaatc, e'ishihcikewaatc kahkina ini tino kaawiinentaakwaninikin, aahpici kaye e'onsaamentamowaatc keyaapi ewii'ishihcikewaatc. 20 Kaawiin tahsh wiin i'i nahke kikii'ishikihkino'amaakohsiwaa Christ. 21 Tepwe iitok kikii'noontawaawaa a'a Christ, kikiikihkino'amaakowaa kaye. Mii​hsa 'iwe kaanoontamek tepwewin kaamihkikaatek Ciisahsonk, 22 ekiihkihkino'amaakooyek ketootamek ini kikehteinaatisiwiniwaan, pahkeya'ii ci-ishiwepinamek, aaniihsh mii​'imaa kaaishikakayenisiimakahkin macimihsawentamowinan kaakii'anionci nihshiwanaacihcikaatek. 23 Noonkom itahsh anioshki'ikoowisik kitahcaahkowaank kaaoncinaanaakatawentamek. 24 Pihsihkamok kaye i'i oshkipimaatisiwin kaakii'oshihcikaatek ci-ishinaakwahk Kishemanitoo kaaishinaakositc, tepwe cikwayahkwaatisiihkantawekwaa pemaatisiwaatc, tepwe cikwayahkotootamowek Kishemanitoo kaaishiantaweniminek. 25 Haw itahsh poonihtook kikiiwanimowiniwaan! Kaatepweyentaakwahk tahsh waawiintamawihk kahkina kaatahsopehpeshikoyek kiicipimaatisiik, aaniihsh kahkina kaatahshiyank peshikwan kitishitipentaakosimin. 26 Kiishpin tahsh nishkaatisiyek, keko i'imaa kinishkaatisiwiniwaank oncimacitootankek. Poonikitaasok cipwaa pankihshimotc kiisihs. 27 Keko kaye tawinamawaahkek maciaya'aa kipimaatisiwiniwaank. 28 Taka kaye a'a kaanihtaakimootitc tapoonikimooti, nawac anohkiitc taonishihshinini oninciin ciaapacihtoohpan. Aaniihsh mii 'imaa keonciayaatc kekoonini cimiinaatc i'i kaanoontehsenitc. 29 Keko kaye kaanihshiwanaaci'iwemakahkin ihkitowinan aapacihtoohkek kiikiikitoyek, ini hsa kaawiici'iwemakahkin ihkitowinan aapacihtook, ciwiici'intwaa noonkom iko kaaishinoontehsewaatc, iki hsa kaapisintawinekwaa cionciminohsewaatc. 30 Keko kaye maanentamo'imaahkek kaapehkaatisinitc Kishemanitoo otAhcaahkwan, mii 'i aaniihsh i'imaa wencikihkinawaaci'ikooyek aanti wencitipentaakosiyek, ninkotink hsa Kiishikaninik Kishemanitoo okakiishihtoon kipimaaci'ikoowiniwaa. 31 Wepinamohk tahsh kahkina nishkentamowinan, aahkokitaasowin kaye, nishkaatisiwinan kaye, nishkikishiiwekiihkaantiwin kaye, macitashintiwinan kaye, ini kaye kiimoocishiinkencikewinan. 32 Minotootaatik, kohpaatenintik kaye weweni ciwiici'itiyek, poonentamaatik kaye taapishkoo Kishemanitoo kaakii'ishipoonentamawinek i'imaa Christink.

Ehpihsahsihkaank 5

1 Kiinawaa tahsh kaashaweniminek Kishemanitoo e'oniicaanihsiminek, nanaapinawihk eshipimaatisitc. 2 Saaki'itiwinink kaye ishipimohsek taapishkoo Christ kaakii'ishishaweniminek, ekiihpakitinank opimaatisiwin kiinawint onci, pisaan iko cinihsintc ekiihpakitinamawaatc Kishemanitoon, okii'minaahsamawaan, mii hsa i'iweni Kishemanitoo kaaminomaantank. 3 Kaawiin iitok awaac ta-ayaahsinoon pihshikwaatisiwin, wiinaatisiwin kaye, aaskonisiwin kaye citakowiintek i'imaa kaashiayaayek, ehtinowiyek Kishemanitoo opimaatisiima'. 4 Keko kaye wiinikiishwehkek, keko kaye kakiipaacikiishwehkek, keko kaye noociko ishimiihkinsihtaakosihkek, aaniihsh kaawiin i'i onishihshinsinoon. Mooshak itahsh tashintamok keoncimiikwehciwentamek. 5 Kehcinaac iitok kikihkentaam awiya kaapihshikwaatisitc, kaawiinaatisitc kaye, kaamihsawentank kekoonini pahkaan awiyan otaya'iimini, mii​'i aaniihsh eshimanitoohketc, kaawiin iki kaatootamowaatc okatepinansiinaawaa i'i kaawii'miinitinaaniwaninik i'imaa otOokimaawiwininiink Christan shikwa kaye Kishemanitoon. 6 Keko kaye pakitinaahkek awiya ciwaniwininek kakiipaacikiishwewinan aapacihtootc, aaniihsh miiwan​ono kaaishihcikewaatc, kaashashiipihtamowaatc kaawii'oncipakamishkaakowaatc Kishemanitoon onishkaatisiwinini. 7 Keko tahsh wiiciiwaahkekwaanik iki o'o kaaishihcikewaatc. 8 Kiinawaa tahsh kashkiitipihkanonk kikii'ishipimaatisim otaanaank, noonkom itahsh kiwaahsenaakosim kaaTipenciketc onci. Miitahsh i'imaa ishipimohsek kaaishipimaatisiwaatc waahseyaank kaaishitipentaakosiwaatc. 9 Aaniihsh kaawaahseyaak oncinihtaawikimakanoon kahkina kaaonishihshik minotootamowin, kwayahkwaatisiwin, tepwewin kaye. 10 Kakwekihkentamohk itahsh kaye wekonen ini kaaTipenciketc kaaminwaapantank. 11 Keko kaye wiici'aahkekwaanik iki pemaatisiwaatc otishihcikewiniwaan kashkiitipihkanonk kaaoncitipentaakwaninikin, aaniihsh kaawiin kekoonini i'imaa otoontinansiinaawaa. O'o tahsh ishihcikek, mohshenamawihkwak ini otishihcikewiniwaan. 12 Aaniihsh tepwe wiinke akatentaakwaniniwan citashincikaatenikin okiimooci-ishihcikewiniwaan. 13 Kahkina tahsh kekoonan naakwanoon kiipiicikaatekin kaaishiwaahseyaak, kahkina tahsh kekoon kiinaakwahk mii​'imaa wencikihkencikaatek entinowank. 14 Miitahsh o'o kaaonci-ishipii'ikaatek Kihcimasina'ikan: "Koshkosin kaanipaayan! Kiiwepimaatisin onci 'imaa kaaishinipoyan, Christ itahsh kikawaahseshkaak." 15 Aahpici tahsh ayaankwaamisik aaniin eshipimaatisiyek, keko ishipimaatisihkek taapishkoo kaakakiipaatisiwaatc. Kaaishipimaatisiwaatc itahsh okakiihtaawentamook ishipimaatisik. 16 Kakweminwaapacihtook hsa minihk kaashitawinamaakooyek ciminohcikeyek, aaniihsh aahpici mooshak macikiishikan. 17 Keko tahsh kakiipaatisihkek. Nihsitohtamowaahk ihsa kaaTipenciketc otinentamowin. 18 Keko kiiwashkwepiinotankek i'i shoominaapo, kikanihshiwanaaci'itisom. O'o tahsh ishihcikek, pakitinimihk Kishemanitoo otAhcaahkwan mooshak cimooshkineshkawiminek. 19 Ishikakanoonitik ehkitoomakahkin Kihcimasina'ikani Nikamonan, anami'enikamonan kaye, ci-ina'amowek kaye Kishemanitoo otAhcaahkwan kaamiininek nikamonan, cinanikamoyek, cinanikamohtawek kaaTipenciketc kite'iwaank. 20 Mooshak kaye miikwehciwenimihk Kishemanitoo Kaaoyoohsimaawitc, wekonen​iko wetihsikoyek ishimiikwehciwenimihk otishinihkaasowininiink kaaTipencikenitc Christ Ciisahsoon. 21 Kaye tahsh pakitinitisohkantaatik kaatahshiyek ehkohtaanenimek Christ. 22 Kiinawaa wiiwimaak pakitinitisok cina'ihtawekwaa kinaapemiwaak taapishkoo ketootawekipan kaaTipenciketc. 23 Aaniihsh onaapemimaa oniikaanishkawaan wiiwan taapishkoo Christ kaaishiniikaanishkawaatc kaamaamawenonitc otanami'aa', wiin aaniihsh okiihpimaaci'aa' i'i otanami'aa', mii 'i aaniihsh i'i owiiyaw. 24 Taapishkoo otanami'aak kaaishipakitinitisohkantawaawaatc Christan, mii hsa peshikwan wiiwimaak ketootawaawaahpan onaapemiwaa' misiwe piko. 25 Kiinawaa kaye onaapemimaak, shawenimihkwak kiwiiwiwaak taapishkoo Christ kaakii'ishishawenimaatc kaamaamawiino'aatc otanami'aa', ekii'oncipakitinank opimaatisiwin kaye. 26 Mii hsa tahsh kaaoncipakitinitisotc, ewii'onahsaatc otanami'aa' Kishemanitoon citipinawewisinitc, ekii'aapacihtootc otihkitowin, ekii'ishipehkaapaawanaatc nipiink, 27 ewiihpiitamaasotc i'i otanami'aa' taapishkoo e'oshkihkwewetc wiin ewii'onaapemimintc, wiinke cipehkinaakosinitc i'imaa kaaishiayaatc, kanake cipaahpaahtewinaakosihsinik, ciayoosiikinaakosihsinik kaye, wiinke hsa ciminonaakosinitc. Miitahsh eshiantawenimaatc wiin ehta ko ewiihtipinawewisitc, kekoonini kaye ci-ishianaamentaakosihsinik. 28 Miitahsh eshinaakwaninik onaapemimaak cishawenimaawaahpan wiiwiwaa' taapishkoo kaaishisaakihtoowaatc owiiyawiwaan. A'a hsa kaashawenimaatc wiiwan, mii hsa a'awe kaasaaki'itisotc. 29 Aaniihsh kaawiin awiya wiihkaa oshiinkentansiin owiiyaw. Aahpici hsa weweni ahshantiso, weweni kaye onaanaakacihtoon i'i owiiyaw. Miitahsh entootawaatc Christ otanami'aa'. 30 Aaniihsh kahkina Christ owiiyawink kitishitipentaakosimin. 31 O'o tahsh ishihsin: "Miitahsh o'o inini kaaoncinakanaatc oteten, omaamaan kaye ciwiiciiwaatc ini wiiwan. I'i e'niishiwaatc miitahsh eshinaakosiwaatc ehpeshikowaatc wiiyawiwaank." 32 O'o tahsh kaakiihkihkencikaatehsinok otaanaank, aahpici kihci-inentaakwan. O'o tahsh kaatashintamaan, aaniin Christ eshiwiiciiwaatc otanami'aa'. 33 Taka tahsh kiinawaa kaatahshiyek shawenimihkwak kiwiiwiwaak taapishkoo kaaishisaaki'itisoyek, taka kaye wiiwimaak okakihtenimaawaa' onaapemiwaa'.

Ehpihsahsihkaank 6

1 Kiinawaa tahsh apinoonciishak, na'ihtawihkwak kiniiki'ikowaak, aaniihsh kaaTipenciketc okii'ishionentaan, aahpici hsa kaye onishihshin i'i ci-ishihcikeyekipan. 2 Kihtenimihkwak kitetewaak, kimaamaawaak kaye, mii​hsa o'owe payesh inaahkonikewinink kaaishitashintek ahshotamaakewin: 3 "Aahpici hsa kikaminohsem, kinwesh kaye kikapimaatisim o'omaa ahkiink," e'ishihsink. 4 Kiinawaa otetemaak keko kakaanci'aahkekwaanik kiniicaanihsiwaak cinishkaatisiwaatc. Ishiompiki'ihkwak, ishimaamiinomihkwak, ishikihkino'amawihkwak kaye ci-ishihcikewaatc kaaTipencikenitc kaakii'ishionahcikenitc. 5 Kiinawaa opamiihtaakek na'ihtawihkwak iki kaaotookimaamiyek, o'omaa ahkiink kaa-ayaawaatc. Kihtenimihkwak, kohtaanenimihkwak kaye tepwe i'imaa kite'iwaank, citootawekwaa taapishkoo kaatootawek Christ. 6 Kaawiin wiinehta ehkanawaapaminekwaa, ci-ishihcikehsiwek ininiwak ehta ciminwaapaminekwaa. I'imaa hsa kite'iwaank ishihcikek Kishemanitoo kaaishiantawentank, aaniihsh Christ kitanohkiihtawaawaa. 7 Ciihkentamok itahsh i'i kaaishipamiihtaakeyek, ci-ishihcikeyek taapishkoo kaaTipenciketc e'anohkiihtawek, kaawiin wiin ininiwak. 8 Kihkentamok itahsh o'o, aaniin hsa ko awiya eshiminotootank, kaaTipencikenitc hsa okakiiwetootaakoon, komaa kaye enohkiihtamaakekwen ehtipenintisohsik, komaa kaye tepenintisokwen. 9 Kiinawaa tahsh kaaokimaawiyek, mii hsa peshikwan tootawihkwak kaa-anohkiihtamawinekwaa. Keko kaye kakwesekimaahkekwaanik, aaniihsh otOokimaamiwaan kaye kiinawaa tahsh kitOokimaamiwaa kihcikiishikonk ayaa. Kahkina hsa awiyan peshikwan otinenimaan. 10 Miitahsh o'o ishkwaac waa'ininakook, kaaTipenciketc okihcimashkawisiiwinink, mii​'imaa ontinamok kimashkawisiiwiniwaa. 11 Pihsihkamowaahk tahsh misiwe piko Kishemanitoo kaamiininek miikaasowi kikishkikan, cikashkihtooyek cioncimashkawikaapawiihtawek maciaya'aa, ini kaye okakayenisi-ishihcikewinan. 12 Kaawiin iitok owiiyawihsiiwak iki kaamiikaaninankwaa, aaniihsh ahcaahkowiwak kaaokimaahkantaakewaatc, kaakashki'ewisiwaatc kaye, iki kaye kaatipentamowaatc noonkom kaakashkiitipihkentaakwaninik ahkiini, iki kaye maciahcaahkwak kaamacinoocihcikewaatc pepahkaan ayaawinink kiishikonk kaaishiayayaawaatc. 13 Otaahpinamowaahk itahsh kahkina Kishemanitoo miikaasowi kikishkikanan kaamiininek cimisiwe aakooshkaakoyek, cikashkihtooyek cinanaahkwiiyek ahpii kiishikahk macikekoon nooci'ikoyek, kahkina kaye kekoon ci-ishihcikeyek cimashkawikaapawiyek. 14 Mashkawikaapawik itahsh wiinke, ehkihcihpisoyek i'i tepwewin, ehkikishkamek kaye i'i kwayahkwaatisiwin taapishkoo i'i piiwaapihk shimaakanihshak kaapihsihkamowaatc ohkaahkikaniwaank. 15 Mooshak ahshowisik ciwiintamaakeyek minwaacimowin kaaishitashintek keshipisaaniwiiciiwintc Kishemanitoo, mii 'i inahkisinek. 16 O'o tahsh maawac iko ishihcikek: otaahpinamok i'i tepweyentamowin, cionakaa'ikaniyek, cikashkihtooyek ciaahtawe'amowek kahkina kaaishkotewaninikin maciaya'aa opihkwahkoon kaapimonek. 17 Pimaaci'ikoowin tahsh kaye pihsihkamok ciomiikaasowaanohkwaaniyek. Taka tahsh kaye Kishemanitoo otIhkitowin opashipa'ikewihkomaanik, otAhcaahkwan kaamiiniminek. 18 Kishemanitoo tahsh otAhcaahkwan kaaishiwiici'iminek mooshak anami'aak ehkakwetweyek kekoon piko. O'o tahsh e'ishihcikeyek, mooshak ahshawaapik, keko kaye pakiciihkek e'anami'aayek, e'anami'ehtamawimek kahkina Kishemanitoo opimaatisiima'. 19 Anami'ehtamawihshik itahsh Kishemanitoo cimiishitc kwayahk ihkitowinan keaapacihtaawak ahpii kiikitowak, cisoonkite'ewak citashintamowak kaakiihpikihkencikaatehsininik tepwewin kaatashintenik i'imaa minwaacimowinink. 20 Mii hsa tahsh kaaoncimaamaancikwahpisoyaan, ehkiikitoohtamaakewininiiwiyaan e'anohkiihtawak kaaTipenciketc, o'o kaye kaatashintamaan minwaacimowin, cisoonkite'eyaan ci-ihkitoyaan aaniin kaaishiantawentaakosiyaan. 21 Tihkihkahs (Tychicus) kaasaaki'ankitc niitanami'aanaan, aahpici kaye kaatepweyentaakositc kaa-anohkiihtawaatc kaye kaaTipencikenitc, kikawiintamaakowaa kahkina kekoonini cikihkenimiyek aaniin eshiwepisiyaan, aaniin kaye eshiayaayaan. 22 Mii hsa tahsh i'i kaakii'onci-ishinisha'wak weti kaaishiayaayek, ciwiintamawinek aaniin kahkina eshiayaawankitc kaye kiinawaa cimashkawentamek. 23 Kahkina kaawiicitepwehtamoomintwaa, taka Kishemanitoon Kaaoyoohsimimintc, kaaTipencikenitc Ciisahs Christan kaye okamiinikowaan pisaanentamowinini, saaki'iwewinini kaatakohsininik tepweyentamowinini. 24 Taka Kishemanitoon okishewaatisiwinini okawiiciiwikonaawaa kahkina kaasaaki'aawaatc kaaTipencikenitc Ciisahs Christan, wiihkaa osaaki'iwewiniwaa kaanipoomakahsininik.

Pilipaai 1

1 Niinawint Pwaal (Paul) kaye Timahti (Timothy) otanohkii'aakana' Christ Ciisahs. Kiinawaa kitooshipii'amaakoom i'imaa Pilipaai (Philippi) ootenaank kaa-ayaayek, kiinawaa Kishemanitoo opimaatisiima' kaawiiciiwek Christ Ciisahs, tako kaye ikiweniwak oniikaanisiik kaye owiici'iwek nintooshipii'amawaanaanik. 2 Shawentaakosiwin kaye pisaanentamowin kikaonciihtamaakowaa Kishemanitoo 'awe Koohsinaan kaye kaaTipenciketc Ciisahs Christ. 3 Tahsink iko e'mihkweniminakook nimiikwehciwi'aa Kishemanitoo. 4 Tahsink iko mooshak e'anami'aayaan ninciihkentam ehkanoocikehtamawinakook 5 onci 'iwe kaapi-ishiwiici'iweyek ehpimiwiincikaatek minwaacimowin, nihtam iko ekii'maaciiotaahpinamek piinihsh iko noonkom. 6 Mii 'owe ehkehcinaa'entamaan, i'iwe ominoanohkiiwin Kishemanitoo kaakii'maatanohkaatank ekiihkikishkamo'inek, keyaapi cini-ishianohkaatank piinihsh iko ahpii kiishikaninik Christ Ciisahs kaawiihtipentank, amii 'i ahpii cikiishihcikaatek. 7 Kwayahkwan ihsa 'owe ci-ineniminakook, mooshak ehtaneniminakook ninte'ink. Aaniihsh kahkina kaatahshiyek kikiihpi-ishiwiici'iwem nimiinikoowisiwinink kaaishipakitinamawitc Kishemanitoo, aaniihsh noonkom ehkipa'okooyaan kaye otaanaank mekwaa ekiihpiniskwesiyaan ekiihkanoocikehtamawaatamaan i'i minwaacimowin ekiihpimiaayiitahtooyaan, mooshak kikiihpiwiitoohkawim. 8 Kishemanitoo nintaatipaacimik aahpici ko ewii'waapaminakook. I'imaa wiin Christ Ciisahs osaaki'iwewinink onciimakanini o'o kaaineniminakook. 9 O'o tahsh nintishianami'aa, keyaapi awahshime cianiwenoociayaamakahk kisaaki'iwewiniwaa, tako kaye ciokihkentamaawiniyek kaye wiinke cinihsitawinamek, 10 mii 'iwe ci-ishikashkihtooyek maawac kaaonishihshinkin ciotaahpinamek. Miitahsh 'iwe misiwe keshitepweyentaakosiyek kaye ekaa kekoon ci-ishianaamentaakosihsiwek ahpii okiishikaamitc Christ. 11 Kikaishimooshkineshkaakoom kekoonan kwayahkopimaatisiwin wiin Christ Ciisahs kaanihtaawikihtootc, mii 'iwe keoncikihtakimintc Kishemanitoo kaye keoncinanaahkomintc. 12 Niiciotepwehtamook, kinantawenimininim cikihkentamek 'owe kaapi-ishihseyaan, mii 'imaa keyaapi wencinikihkentaakwahk i'i minwaacimowin. 13 I'iwe onci kahkina shimaakanihshak kaakanawentamowaatc okimaawikamik ninkihkenimikook Christan e'otanohkii'aakaniminitc e'oncikipa'okooyaan, kaye kahkina pehkaanisiwaatc ninkihkenimikook. 14 Shikwa niipiwa' iki owiicihkiweyimaak kaaTipencikenitc ehtepweyenimaawaatc, e'waapamiwaatc eshikipa'okooyaan, onciteinenimowak, awahshime e'animashkawenimowaatc ciwaawiintamowaatc Kishemanitoo otipaacimowin, ekaa ehkohtaacihsikwaa. 15 Tepwe miinawaa aaninta otishikakiihkwenotawaawaan Christan aayaahshentamowinink kaye kakwepahkinaatiwinink. Aanint itahsh kwayahk wiiminowiici'iwewak, e'oncikakiihkwewaatc. 16 Okoweniwak saaki'iwewinink ishihcikewak. Okihkentaanaawaa Kishemanitoo ekii'inanohkii'itc cikanoocikehtamawaatamaan i'i minwaacimowin. 17 Iki tahsh pehkaanisiwaatc kaawiin tepwewinink otishikakiihkwenotawaahsiwaawaan Christan. Wiinawaa tahsh iko ehta wii'niikaanentaakosiwak. Inentamook aaniihsh keyaapi sanakisiwin ewiihkakwe kashkihtamawiwaatc o'omaa eshikipa'okooyaan. 18 Kaawiin inkotano nintinentansiin. Niminwentam kiishpin ehta kakiihkwenotawintc a'a Christ, aaniin​iko keishihsenik, maakishaa nahpaac inentamowinink, maakishaa kaye kwayahk inentamowinink oncikakiihkwenotawintc. Shikwa keyaapi ninkani-ishiminwentam. 19 Ninkihkentaan aaniihsh e'anami'ehtamawiyek kaye ehpiwiici'imitc Ciisahs Christ otAhcaahkwan, ninkaoncipakitinikoo. 20 Mii 'owe ehkihcimihsawentamaan ehpakohsenimoyaan, ekaa wiihkaa kekoon cioncimenihshentansiwaan, mooshak itahsh cimashkawenimoyaan, memintake ko kaye noonkom, enikiniyaan iko cikihtentaako'ak a'a Christ, kemaa pimaatisiyaan kemaa nipoyaan. 21 Wekonen aaniihsh niin waa'oncipimaatisiyaan? Christ ehta 'awe kaaoncipimaatisiyaan. Miitahsh i'i nipoyaan nawac nintaaminohsa'ikon. 22 Kiishpin tahsh keyaapi kashkihtooyaan minoanohkiiwin keyaapi niwiiyawink pimaatisiyaan, miihsh i'i eshiwawaanentamaan aaniin mayaa keishihcikeyaan. 23 Niishwayak nintoonciwiihkopinikoo. Maawac nimihsawentaan cimaacaayaan ciawiwiiciiwak 'awe Christ, mii 'iwe maawac keonishihshink. 24 Kiinawaa tahsh nawac taa-antawentaakwan keyaapi niwiiyawink cipimaatisiyaan. 25 Mii 'iwe ehkwayahkwentamaan, e'ishikihkentamaan keyaapi ciniayaayaan. Keyaapi kikaniwiicipimaatisiimininim kahkina, kikaishiwiici'ininim cinimaaciishkaayek kaye cini-ishimoocikentamek kitepwehtamowiniwaank. 26 Ahpiihsh miinawaa wiiciayaaminakook nawac keyaapi kekoon kika-ayaanaawaa cionci-ishpenimek Christ Ciisahs e'aniwiiciiwek. 27 O'owe ehta kitinininim: ishipimaatisiyok cipeshikonaakwahk eshiayaanik ominwaacimowin a'a Christ. Miihsh kiishpin ishaayaan ciwaapaminakook, kiishpin kaye waapamihsinowinakook, ninkanoontaan eshiayaayek, keyaapi ehsoonkikaapawiyek peshikwan iko maamaw e'inentamek, peshikwan ehta kinantawentamowiniwaank enikohk cimaamawiwiici'itiyek, ehkakwemaacaahtooyek i'i tepwewin kaaishitepwehtamank 'iwe kaaishinoontamank minwaacimowinink. 28 Keko kohsaahkekwaanik ikiweniwak kenakaashkawinekwaa. Taoncikihkentamook wiinawaa ewii'nihshiwanaatisiwaatc, kiinawaa tahsh cipimaaci'ikoowisiyek. Kishemanitoo aaniihsh a'awe kaawiici'inek. 29 Kikii'miinikoowisim cipamiihtawek 'awe Christ. Kaawiin ehta ehtepwehtawek, i'iwehsh kaye cioncikakwaatakihtooyek. 30 Kaye kiinawaa ciwiici'iweyek i'imaa miikaatiwinink, i'iwe niin otaanaank kaakii'ishiwaapamiyek kaye hsa ko noonkom eshinoontamek ehtashimiikaasoyaan.

Pilipaai 2

1 Kiishpin tepwe oncimashkawisiiwekwen e'wiiciiwinek a'a Christ, kiishpin kaye oncisoonkite'eyek onci 'iweni osaaki'iwewinink, kiishpin kaye menowiiciiwaawekwen ini Kishemanitoo otAhcaahkwan, kiishpin kaye oncishawenintiyek kaye tahsh cioncikitimaakenintiyek, 2 kiishpin onoweniwan tepwe eshiayaawekwen, mii 'owe kitishikanoonininim wiinke cikakwemoocikentami'iyek, mayaa peshikwan ci-inentamek kaye peshikwan ciahpiihcisaaki'itiyek kaye wiinke cipeshikwewaanakentamek, wiinke ciwiici-inentamoontiyek. 3 Keko kaye kekoon ishihcikehkek cikakweniikaanentaako'itisoyek, nawac 'iwe kakwetapahsenimohtaatik, mooshak itahsh "Kiin nawac kikihtakins" ishinaatik. 4 Kaawiin awiya wiin iko tipinawe ehta taakakweminohsa'itisohsii, kahkinahsh iko cikakwenaanaakatawenintiyek. 5 Christ Ciisahs kaakii'inaatisitc kitaakakweinaatisim kekiinawaa: 6 Aanawiin Kishemanitoonk ekiihpi-inaatisitc, kaawiin itahsh kii'inentansii cimashkawikanawentank 'iwe kaaishiKishemanitoowentaakositc. 7 Wiin itahsh iko meshkwac kii'inenintiso kahkina cipakitinank, kaye okii'otaahpinaan anohkii'aakanink ci-ishipimaatisitc. Ininiink itahsh iko kii'ishinihtaawiki kaye ininiink kii'ishinaako'aakaniwi. 8 Kiihtapahsentaako'itiso, kiihkapenana'ihtam, piinihsh iko cinipotc, ekiihtashinetc aashiteyaahtikonk. 9 Mii​hsa tahsh okii'oncikihtentaako'ikoon ini Kishemanitoon, maawac ishpimink ciniikaanakinsotc. Kaye okii'miinikoon maawac ehkihtakintenik minowiinsowin kaatahsinkin wiinsowinan. 10 Mii​hsa tahsh 'awe Ciisahs owiinsowin wiincikaatenik, kahkina awiya taociciinkwaniihtaawak kihcikiishikonk kaa-ayaawaatc, kaye tahsh ahkiink kaye anaamahkamik kaa-ayaawaatc, 11 kaye kahkina entahsopeshikotc okatipaacimaawaan Ciisahs Christan ehTipencikenitc, mii 'iwe Kishemanitoo Weyoohsimintc cioncikihtenimintc. 12 Mii​hsa 'iwe siyaaki'inakook, i'iwe ekii'ishipisintawiyek kiiwiiciyayaaminakook, awahshime noonkom e'wiiciayaamihsinowinakook antawentaakwan citootamek i'i kaaininakook. Kohtaanentamowinink, nininkishkaawinink ishikapeanohkaatamaasok kipimaaci'ikoowiniwaa piinihsh​iko cikiishinaakwahk. 13 Aaniihsh Kishemanitoo 'awe kaainanohkiitc i'imaa kipimaatisiwiniwaank. Kikikishkamo'ikowaa ci-inentamek kaye citootamek otishiantawentamowin. 14 Kahkina kekoon kakwetootamok ekaa wiihkaa kekoon citashintansiwek, kaye wiihkaa ciaayaanoontihsiwek. 15 Mii 'i Kishemanitoo oniicaanihsa' citinowiyek, ekaa kekoon ci-ishiayaahsiwek kaye cipehkinaakosiyek, kaye ekaa kekoon citashimikoohsiwek. I'imaa mekweaya'ii kitayintaam e'ayaawaatc iki kaakwayahkohcikehsikwaa kaye anooc kaainaatisiwaatc. Kikatashisaakaahtesim taapishkoo wanankohshak e'ishiwaahsaanshewaatc kiishikonk, 16 kaye e'niiminamawekwaa i'i tipaacimowin keoncipimaatisiwaatc. Kiishpin tepwe o'owe ishihcikeyek kikaonciwaawishenimininim ahpii okiishikaamitc Christ. Taishikihkentaakwan 'i ahpii ekaa anihshaa ekiihpimanohkiihsiwaan kaye anihshaa ekii'oncicaakii'itisohsiwaan. 17 Maakishaa ninkaishinip taapishkoo ehpakitinaahswaaniwiyaan, nimpimaatisiwin cisiikinikaatek wakic i'imaa kiinawaa eshipakitinikeyek, aaniihsh kitepwehtamowiniwaa kaamiinek Kishemanitoo e'anami'ehtawek. Kiishpin i'iwe ishihsek ninkaminwentam, kaye kiinawaa kahkina ciwiici'iweyek ninciihkentamowinink, 18 mii 'i peshikwan kaye kiinawaa kitaaciihkentaam, kaye niin ciwiicimoocikentamawinakook. 19 Nimpakohsenim kiishpin inentank kaaTipenciketc ci-ishinisha'wak a'awe Timahti (Timothy) ciawiotihsinek, miitahsh cioncimashkawentamaan noontamaan eshipimaatisiyek. 20 Aaniihsh mii ehta 'awe Timahti kewiici-inamanci'oomak. Mii ehta 'awe tepwe kaanaakatawentamawinek kiinawaa eshiwepisiyek. 21 Kahkina aaniihsh pehkaanisiwaatc wiinehtawaa kanawaapantamaasowak otishiwepisiwiniwaa. Kaawiin wiin opimentamawaahsiwaawaan Ciisahs Christan otaayintiwinini. 22 Kiinawaa tahsh kikihkenimaawaa otishihcikewin a'a Timahti, ekii'naakohtootc ominwakinsowin. Taapishkoo okosihsimaa e'wiici'aatc oteten, kaye wiin ninkii'wiitanohkiimik cimaaciishkaamakahk i'i minwaacimowin. 23 Miihsh i'i piciinak iko kihkentamaan keishiwepisiyaan, ninkainentam wiipa cikakweishinisha'wak. 24 Nintahpenimonotawaa tahsh kaaTipenciketc kaye niin wiipa ci-ishihseyaan ciotihsinakook. 25 Ninkiihteishinaan itahsh e'antawentaakwahk i'imaa ci-ishinisha'wak a'awe kiiciotepwehtamoominaan Ipaahparataitahs (Epaphroditus) ciantawaapaminek. Mii aaniihsh a'awe kaakiihpiwiitanohkiimitc kaye niwiicimiikaasowininiim e'inenimak. Kaye kiinawaa kikiihpianoonaawaa ehpi-ishiwitootc kiwiitoohkaakewiniwaa e'miishiyek. 26 Aahpici onantawentaan ciwaapaminek. Kaye kii'mikoshkaatentam ehkihkentank ekii'noontamek e'aahkosihpan. 27 Tepwe hsa ko kii'aahkosi, kekaa piko ekii'oncinipotc. Okiihkitimaakinaakoon itahsh Kishemanitoon. Kaawiin tahsh wiinehta, kaye niin itahsh ninkiihkitimaakinaakoo, ekaa ciayaakwiihtawaahsinokin nimpiikwentamowinan. 28 Mii​hsa 'owe nawac iko ninkiihpapaashentaan ci-ishinisha'wak, kekiinawaa ciminwentamek miinawaa kiiwaapamek. Shikwa keniin cioncimaacaamakahk nimikoshkaatentamowin. 29 Miitahsh a'awe otaahpinihk kikiciihkentamowinink, mincikahkina kaaTipenciketc eshiwiiciiwinek. Kaye kihtakimihk kahkina awiya 'awe kaatinowitc. 30 Wiin aaniihsh maano ko intawaac okiihpakitinaan opimaatisiwin, piinihsh ekii'oncipehshwaaci'ikotc nipowin, nawac wiin Christan ewii'anohkiihtawaatc. Mii 'owe kaa'ishihciketc ekii'naapitootank kiinawaa ko kekii'ishiwiici'iyekipan ekiihkashkihtoohsiwek.

Pilipaai 3

1 'Owe tahsh ishkwaac kitishiwiintamawininim, niiciotepwehtamook: onciciihkentamok 'iwe eshiwiiciiwek kaaTipenciketc. Kaawiin inkotano nintinentansiin miinawaa peshikwan ciwiintamaan i'iwe otaanaank kaakii'ishipii'amawinakook, nawac i'imaa ci-ishikanawentaakosiyek. 2 Na'aasiihkantawihkok iki kaatootamowaatc ekaa kaakwayahkwahsininik, iki animohshink kaainentaakosiwaatc. Na'aasiihkantawihkok iki kaawiihpehshishamowaatc wiiyawiwaan. 3 Kiinawint ohsha kitaawimin kaamiinikoowisiyank kwayahk kihkinawaatashakeshokoowinink kaainentaakwahk. Aaniihsh kiinawint kitishianami'ehtawaanaan Kishemanitoo e'ishikashkihtoo'iminank otAhcaahkwan. Shikwa kitooncimoocikentaamin 'iwe e'wiiciiwinank Christ Ciisahs. Kaawiin kanake kitahpenimonotansiimin kekoon wakicinaw ehta ehtoocikaatek. 4 Keniin hsa ko nintaakashkihtoonaapan i'imaa ciahpenimoyaan ishihtwaawinink wakicinaw kaatoocikaatek. Kiishpin awiya inentank ehkashkihtootc ci-ishiahpenimonotank i'i wakicinaw kaatoocikaatek, nawac niin iko nintaateinakins. 5 Kaye niin ninkiihkihkinawaatashakeshokoo kiinihshwaahsokiishikahk (8) ahpane ekii'nihtaawikiyaan. Kaye niin i'imaa Isriyal (Israel) ininiinaank ninkii'oncii, kaye i'imaa tahswewaanakisiwinink Penciman (Benjamin) e'ontahkaanesiyaan. Nimisiwes Hiiparoo (Hebrew) ehtinowiyaan. Kaye tahsh ninkiihPerahsiiwininiiw (Pharisee) kaakii'ishikanawentamaan Coowak otInaahkonikewiniwaa. 6 Wiinke ninkii'ishionsaamentaan nintanami'aawin ekii'oncikakwaataki'imak Christ otanami'aakana'. Shikwa minihk eshikashkihtootc awiya ehkanawentank i'i Inaahkonikewin, wawiinke 'imaa ninkiihkwayahkotootam. 7 Ono tahsh kahkina ontisiwin kekii'inakintamaampaan, noonkom nintishinaanan ekii'wanihcikeyaan, nawac Christ ewiihkihkenimak. 8 Kaawiin iniweniwan ehta nintishinansiinan, kahkina kekoon aanatootamaan nintishinaan misiwe ekii'wanihcikeyaan, nawac iko ewii'ayaayaan kekoon maawac kaaonishihshink, mii 'iwe cikihkenimak Christ Ciisahs kaaTipenimitc. Wiin ewii'ayaawak ninkii'onciwepinaan kahkina. Cimihciwepinikaatek ehta nintinakintaan kahkina, nawac ewii'ontinak a'a Christ. 9 Misiwe peshikwan niwii'ishitakowiiciiwaa. Kaawiin keyaapi niin nintooshihtamaasohsii ninkwayahkwaatisiwin, 'iwe tino kaaonciimakahk Inaahkonikewin ehkanawencikaatek kaawiin nintayaahsiin. Noonkom itahsh nintayaan i'i kwayahkwaatisiwin i'imaa hsa e'onciimakahk ehtepwehtawintc a'a Christ. Mii 'iwe kwayahkwaatisiwin Kishemanitoo kaamiishitc kaatepwehtamowak. 10 O'owe hsa ehta ninantawentaan, wiin Christ cikihkenimak kaye cipikihkentamawak 'iwe mashkawisiiwin i'imaa wenciimakahk okiiwepimaatisiwinink. Kaye niwii'wiici'iwe okwatakihtoowinink Christ, niwii'naapaatisiimaa kaainaatisitc onipowinink, 11 o'owe e'inentamaan aaniin​iko kaye niin ci-ishiotihtamaan cionciwanishkaanikooyaan nipowinink cikiiwepimaatisiyaan. 12 Kaawiin 'iwe nintaaihkitohsii aasha cikashkihtooyaan, kaawiin kaye ehkiishi'ikoowisiyaan. Enikohk itahsh nintanikakwekaahcitinamaas i'iwe kaakiiwii'miishitc kaakii'oncikaahcitinitc Christ Ciisahs. 13 Niiciotepwehtamowitok! Kaawiin aasha nintinentansiin ehkaahcitinamaasoyaan. Peshik itahsh kekoon nintootam: niwiihkakwenakataanan otaanaank kaa-ayaakin cimaamihkawihsiwaan, niikaanaya'ii ka-ayaamakahkin ninkakwekaahcitinaanan. 14 Kwayahk iko ahpane nintahpahtoo ciocihcipahtooyaan weti kaaishikihkinawaasinaakwahk pahkinaakewin, mii 'imaa citashimiinikooyaan nintipa'amaakoowin, mii 'iwe ishpimink citanaatisiyaan, mii 'iwe kaaishiantomitc Kishemanitoo Ciisahs Christink. 15 Tahsin iko kiinawint kaakiishianami'ewaatisiyank peshikwan o'owe kakweinentantaa. Kiishpin itahsh pahkaan inentamowin ayaawekwen aaninta, mii 'iwe kikawaapanta'ikowaa Kishemanitoo. 16 Maano tahsh keyaapi ciani-ishimaacaayank peshikwan i'iwe aasha kaapi-ishiotihtamank. 17 Niwiiciotepwehtamook! Naanaapinawihshik kaaishihcikeyaan, kanawaapamihkok ikiweniwak kaainaatisiwaatc niinawint kaakii'ishihcikeyaank, ekiihkihkinawaapanta'ikooyek. 18 'Iwe tahsh niipiwa'aank aasha kaakii'wiintamawinakook, noonkom miinawaa kiwiintamawininim, kaye niwiihsaka'okon e'wiintamawinakook o'owe: niipiwa' ishipimaatisiwak ewiinaahpakentansikwaa Christan otashinipowinini aashiteyaahtikonk. 19 Piciinak tapaahkaciayaawak nihshiwanaatisiwinink. Aaniihsh omanitoomiwak wiiyawiwaan kaaishiantawentamoomakaninikin. I'iwe kekiimenihshentamowaahpan nawac itahsh owaawishentaanaawaa, ahkiiwaya'iin ehta ehpapaamentamowaatc. 20 Kiinawint itahsh imaa kihcikiishikonk kitooncitipentaakosimin. Kitaahkopii'aanaan kitOopimaaci'iweminaan i'imaa cioncitakohshink, mii​'awe kaaTipenciketc Ciisahs Christ. 21 Wiin kika-aanciihtamaakonaan kiwiiyawinaanin kaamacentaakwaninikin. Okaoshihtoonan wiin ehkihtentaakwaninik wiiyaw ci-ishinaakwaninikin. Omashkawisiiwin oka-aapacihtoon i'iwe e'oncikashkihtootc kahkina kekoon ehtipentank.

Pilipaai 4

1 Niwiiciotepwehtamook! Kiinawaa kaasaaki'inakook, aahpici kinantawenimininim, aahpici kiminwentami'im, aahpici kiwaawishenimininim. Siyaaki'inakook, mii 'owe ishisoonkikaapawik i'iwe kaapi-ininakook ciani-ishiwiiciiwek kaaTipenciketc. 2 Shikwa kiin Yo'ootiya (Euodia), kaye kiin Sintihki (Syntyche), kikakaansomikoom: kakwepeshikwentamok, mii 'i ishiwiiciiwihk kaaTipenciketc. 3 Kaye kiin niwiitanohkiimaakan, kaakwayahkwentaakosiyan, wiici' oko ihkwewak. Enikohk ninkii'wiitanohkiimikook cimaaciishkaanik i'i minwaacimowin. Kaye okii'wiitanohkiimaawaan ini Kalemantan (Clement) kaye ini kotak niwiitanohkiimaakana', iniweniwa' owiinsowinini kaa-ayaanikin i'imaa omasina'ikanink Kishemanitoo kaaishioshipii'waatc awenena' kaakii'miinaatc pimaatisiwin. 4 Mooshak ciihkentamok e'wiiciiwek kaaTipenciketc. Miinawaa nintihkit: ciihkentamok! 5 Misiwe noohkaatisik kahkina awiya cikihkeniminekwaa. Pehshonaakwanini citakohshink kaaTipenciketc. 6 Keko kekoon kitaawanaayentami'ikohsiim. Anami'aak itahsh, kakwecimihk Kishemanitoo wekonen iko kaaishinoontehseyek pehkihsh kaye cimiikwehciwentamek. 7 Kikaotihsikom opisaanentamo'iwewin Kishemanitoo, wawiinke kaapahkinaakemakaninik eshiayaak kikihkentamowininaan. Kikashikanawentamaakom kite'iwaank kaye kinaakatawencikaniwaank, ekaa kekoon i'imaa ci-ishihsehsiwek e'wiiciiwek Christ Ciisahs. 8 Miinawaa ishkwaac, niwiiciotepwehtamoomak, naanaakatawentamohk ono kaatinowiwankin, wekonen​iko kaatepwewakentaakwahk, shikwa kaakihtentaakwahk, wekonen iko kaakwayahkwahk, kaye kaapehkentaakwahk, kaye kaaminonaakwahk, kaye kaaminwaatotek. Wekonen hsa ko minoishiwepisiwin kaainentaakwahk kaye kaaminohcikewakentaakwahk, mii 'iwe ishinaakatawentamohk. 9 Kakwenihtaatootamohk wekonen iko kaakiihkihkino'amaakooyek kaye kaakii'miinikooyek, kemaa kaakiihpisintawiyek kemaa kaye kaakii'ishiwaapamiyek niin ehtootamaan. Kikaishiwiiciiwikowaa 'awe Kishemanitoo 'awe kaapisaanentamo'inank. 10 Niin itahsh e'wiiciiwak kaaTipenciketc, ninciihkentamo'ikon noonkom miinawaa ehpiminotootawiyek, aasha kinwesh ekii'nehpici-ishihsehsinok citootawiyek. Aanawiin kaawiin wiihkaa kikiihpoonimaamitonenimihsiim, kaawiinhsh nanaash kii'ishihsehsinoon nintihkit. 11 Kaawiin ihsa noontehsewin nintoonci-ihkitohsii, aaniihsh ninkiihkihkino'amaakoowis citepihsewakentamaan aaniin​iko eshiwepisiyaan. 12 Ninkii'ani-ishiwaapantaan inkotink cinoontehseyaan, kaye inkotink ciwenoocihseyaan. Kayehsh ninkii'mihkwentaan keishina'entamaan piko ahpii, aanti ko ayaayaan, maakishaa tewiihsiniyaan, maakishaa kaye noonteskateyaan; kemaa wenoocihseyaan kemaa kaye noontehseyaan, nina'entam. 13 Kahkina kekoon ninkashkihtoon e'ishi'itc a'a Christ kaamashkawisii'itc. 14 Wawiinke tahsh kikii'minohcikem ekii'minowiici'iyek mekwaa nintoocaanimisiwinink. 15 Kiinawaa Pilipaayink (Philippi) kaaishimaawaci'itiyek, kiminokihkentaam aaniin kaaishiwepisiyaan 'iwe ahpii ekii'oncimaacaayaan Maahsitooniyaawahkiink (Macedonia), weti nihtam ekii'maaciiwiintamaakeyaan minwaacimowin. Kiinawaa ehta kikii'wiici'im, kaawiin pahkaan awiya otanami'aak ninkii'onciwiici'ikohsiik. Kiinehtawaa nihtam kikii'ishiwiici'iwem miinikoowinink kaye onciihtamaakewinink. 16 Kaye ahpii kaa'ayaayaan Tehsalanaihkaank (Thessalonica), kaawiin ehta aapitink kikiihpi-ishinisha'amawihsiim kaa'noontehseyaan. 17 Kaawiin wiin i'i cimiinikooyaan nintinentansiin. Nawac itahsh kinantawenimininim minokekoon cinankakinsoyek. 18 Ninkiihtipimiinikoo, kii'awahshimehse kaamiishiyek. Ninkiihpiwenoocimiinik 'awe Ipaahparataitahs (Epaphroditus), kahkina ekii'miishitc kaakiihpi-ishinisha'amawiyek. Inentaakwanoon taapishkoo pakitinikewin e'minomaakwahk, keshiotaahpinank Kishemanitoo kaye keshiminonank. 19 Shikwa kahkina kiinawaa keshinoontehseyek kikaonciihtamaakowaa ninKishemanitoom, i'imaa cionciimakaninik e'onishihshininik owenootisiwin, i'imaa kaa-ayaamakaninik Christ Ciisahs e'ayaatc. 20 KiKishemanitoominaan kaye Koohsinaan kihtentaakosiwinink tainakimaa pishihshik iko ahpane. Emen. 21 Kahkina tapooshoo'aawak Kishemanitoo opimaatisiima' ikiweniwak Christ Ciisahsoon kaatipenimikowaatc. Kaye owiicitepwehtamoomaak o'omaa kaawiiciayaamiwaatc kewiinawaa kipooshoo'ikowaak. 22 Kaye kahkina Kishemanitoo opimaatisiima' o'omaa kaa-ayaawaatc kipooshoo'ikowaak, memintake ikiweniwak i'imaa kaatipentaakosiwaatc maawac kihciokimaa owaahkaa'ikanink. 23 Okishewaatisiwin kaaTipenciketc Ciisahs Christ kikawii'wiiciiwikom kitahcaahkowaank.

Kalaahsiink 1

1 Niin Pwaal (Paul) Kishemanitoo wiin ninkii'onenimik Christ Ciisahs otishinisha'waakanan citinowiyaan. Timahti (Timothy) kiicitepwehtamoonaan tahsh kaye kaawiiciiwak, kipooshoo'ikowaa. 2 Kitooshipii'amaakoom kiinawaa Kishemanitoo kaatipeniminek weti Kalaahsiink (Colossae) kaa-ayaayek, aaniihsh kaawiitanami'aamikooyek kitepweyentaakosim e'wiiciiwek Christ. Taka Kishemanitoo Kaaoyoohsiyank kikaminotootaakowaa, pisaanisiwin kaye kikamiinikowaa. 3 Mooshak itahsh nimiikwehciwenimaanaan Kishemanitoo kaaTipeniminank Ciisahs Christ Kaaoyoohsitc, ahpii kii'anami'ehtamaakooyek, 4 aaniihsh ninkii'noontaamin ehtepwehtawek Christ Ciisahs, kaye ehsaaki'ekwaa kahkina Kishemanitoo kaatipenimaatc pemaatisinitc. 5 I'i tahsh tipaacimowin kaatepweyentaakwahk, i'i minwaacimowin nihtam kii'otihsikoyek, mii hsa i'imaa kaaonciahpenimoyek ekii'noontamek. Miitahsh i'imaa kitepwehtamowiniwaa, kisaaki'iwewiniwaa kaye eshiniipawiimakahkin, aaniihsh kipiihtoom kaakanawentamaakooyek ewii'miinikooyek weti kihcikiishikonk. 6 I'i tahsh minwaacimowin kaakii'otihsikoyek, mooshak animinotootaakemakan, misiwe kaye ani-ishimisihteshkaamakan o'omaa ahkiink, taapishkoo kaakiihtootaakoyek minwaacimowin nihtam ehkiishikahk kaakii'noontamek, ekiihkihkentamowek kaye aaniin mayaa enentaakwaninik Kishemanitoo okishewaatisiwin. 7 A'a tahsh kaashawenimankitc niwiitanohkiimaakaninaan Ehpahparahs (Epaphras) kikiihkihkino'amaakowaa Kishemanitoon okishewaatisiwinini. Aahpici tahsh weweni tepweyentaakosi e'anohkiihtawaatc Christan kiinawaa onci. 8 Ninkiihtashintamaakonaan i'i kisaaki'iwewiniwaa Kishemanitoo otAhcaahkwan kaamiiniminek. 9 Mii hsa tahsh mooshak kaaoncianami'ehtamaakooyek ahpii ekii'noontamaank enaacimikooyek. Ninkakwecimaanaan Kishemanitoo cimooshkinekihkentamowek aaniin eshimihsawentank, citakoayaayek kaye kakiihtaawentamowin, nihsitohtamowin kaye otAhcaahkwan kaamiikiwenitc. 10 Miitahsh i'i cikashkihtooyek ci-ishipimaatisiwek kekii'ishipimaatisiwaahpan kaatipenimikowaatc kaaTipencikenitc, mooshak kaye ci-ishihcikewek kaaishiminwentank. Oshkipimaatisiwinink itahsh noonkom e'ishipimaatisiyek, minohcikewinan kikatootaam, piinihsh kaye wiinke kikakihkenimaawaa Kishemanitoo. 11 Mii 'i kaye cimashkawisiishkaakowek i'i kaakihci-inentaakwaninik omashkawisiiwin, cikashkihtooyek cishashiipentamek kahkina kekoon kaanakishkamek, 12 e'minwentamek kaye e'miikwehciwenimek Kaaoyoohsimintc. Wiin aaniihsh kikii'ishi'ikowaa citeahpiihtentaakosiyek kekiinawaa citakotepinamowek Kishemanitoo kaakiikwayaanciihtamawaatc pemaatisinitc kaatipenimaatc ewii'miinaatc weti otookimaawiwinink a'a kaaWaahseyentaakositc. 13 Wiin aaniihsh kaye kikii'wiici'ikonaan cipahpiiwankitc i'imaa kaaishimashkawitipencikemakaninik kashkiitipihkisiwin. Miitahsh kaakii'onci-ishiaancipakitininank i'imaa kaatashikihciokimaawinitc ini kaasaaki'aatc oKosihsan. 14 Mii hsa tahsh i'imaa oKosihsink kikii'aapa'okonaan kaakii'ishiaayiitahpisoyank, ekiihpoonentamaakooyank kimacitootamowininaanin. 15 Christ itahsh e'waapamintc mayaa onaako'aan aaniin eshinaakosinitc kaanaakosihsinik Kishemanitoon. Christ itahsh wiin maawac niikaan kii'oKosihsimaawi. Wiin kaye nawac ishpentaakosi ahpiihc wiin kahkina kekoonini kaakii'oshihcikaatenik. 16 Wiin itahsh onci Christ Kishemanitoo okii'oshihtoon kahkina kekoonini kiishikonk kaa-ayaanik, ahkiink kaye kaa-ayaanikin, kekoonan kaanaakwaninikin, kaanaakwahsininikin kaye. Okiihtako-oshi'aa' kaye kaa-ahcaahkowentaakosinitc kaaokimaawapinitc kaainimintc, kaatipenimiwenitc kaye, kaaokimaahkantaakenitc kaye, kaakashki'ewisinitc kaye – kahkina tahsh kekoonini kii'oshihcikaateni wiin onci, wiin kaye kahkina kekoonini kii'oshihtamawaa. 17 Christ itahsh aasha kii'ayaa kahkina kekoonini cipwaa ayaanik, wiin itahsh kaye kahkina kekoonini kaaoncimincimishkaanik. 18 Wiin itahsh oniikaanishkawaa' otepwehtamoo' kaamaamayenonitc, mii hsa i'iweni owiiyaw. Wiin kaye kaaoncipimaatisiimakaninik i'i owiiyaw. Wiin itahsh kaye maawac iko nihtam kaakii'oKosihsimaawitc, kiihkiiwepimaatisi aasha ekiinipotc, wiin iko ciniikaanikimaawitc citipentank kahkina kekoon kaatahsininik. 19 Kishemanitoo tahsh wiin iko kii'inentam oKosihsan cikikishkaminitc i'i kahkina oKishemanitoowaatisiwin kaashiwenootaninik. 20 Miitahsh kaye i'imaa oKosihsink Kishemanitoo kii'inentam kahkina kekoonini cikiiwenaasihkaakotc, oKosihsan tahsh ekii-ishisiikinaminitc omiskwiimini i'imaa aashiteyaahtikonk. Mii hsa tahsh kaakii'oncinaaciwiihkopitamaasotc kahkina kekoonini ciminowiiciiwikotc, kahkina ahkiink kekoonan kaa-ayaanikin, kiishikonk kaye. 21 Otaanaank itahsh kiinawaa kikii'naawaapamaawaa Kishemanitoo ekii'ishinaakosiyek taapishkoo e'miikaanek, aaniihsh noociko kikii'ishihcikem, noociko kaye kikii'inentaam. 22 Inashke tahsh ekii'niponitc ini oKosihsan ekiihkikishkaakotc otahkiiwiwiiyawini, Kishemanitoo tahsh kikii'ishinaaciwiihkopinikowaa ciminowiiciiwek, ewiihpiininek i'imaa kaaishiayaatc, mii 'i ci-inentaakosiyek ehtipeniminek, wiinke ehpehkaatisiwek, aapiinc​iko kaye e'anaamentaakosihsiwek. 23 Kiinawaa tahsh mii 'i eshinaakwahk kiishpin maano animaacaayek i'imaa kitepwehtamowiniwaank, mashkawikaapawiyek kaakii'ishionahsikooyek. Keko tahsh pakitinitisohkek cipahkenotamek i'i ahpenimowin kaakiihtepinamek ahpii kiinoontamek minwaacimowin. I'i tahsh minwaacimowin aasha kahkina awiya entahsopeshikotc kii'wiintamawaa misiwe o'omaa ahkiink. Niin tahsh Pwaal (Paul) mii 'iwe kaa-anohkiihtamaan. 24 Noonkom itahsh wiinke niminwentam i'i kaaishikakwaatakihtooyaan kiinawaa onci. O'o aaniihsh kaaishikakwaatakihtooyaan niwiiyawink, keniin niwiicihtwaa cikiishihcikaatek i'i kakwaatakihtoowin keyaapi kaawiihkakwaatakihtoonaaniwank, inahke Christ kaakii'ishikakwaatakihtootc. Miitahsh kaaonci-ishihcikeyaan cionciwiici'intwaa iki kahkina otepwehtamook, mii aaniihsh i'i Christ owiiyaw. 25 Kishemanitoo tahsh otishihcikewinink ninkii'oncionenimik ciwiici'imak otanami'aa' kaamaamawitipenimaatc, wiin ninkii'miinik o'o anohkiiwin citootamowak kiinawaa ciminohseyek, ciwiintamawinakook aaniin mayaa ehkitoomakaninik Kishemanitoo otihkitowin. 26 Mii hsa tahsh i'i kaakiihkihkencikaatehsininik otinentamowin, kaakiihkaatootc otaanaank kaakiihpiahkiiwaninik, kaakiihkaatamawaatc kaye ininiwa' otaanaank kaakii'ayaanitc. Noonkom itahsh aasha kahkina okii'waapanta'aa' i'i otishihcikewin kahkina kaatipenimaatc pemaatisinitc. 27 Miiwa' itahsh i'i Kishemanitoo kaakii'inenimaatc cikihkentaminitc otinentamowin kaakiihkihkencikaatehsininik. Aahpici tahsh wenootanini, kihci-inentaakwanini kaye otinentamowin kaawiihkihkentamoonintwaa entahswewaanakisiwaatc pemaatisiwaatc. Miitahsh o'o kaatashintamaank, Christ e'ayaatc kipimaatisiwiniwaank, wiin aaniihsh kaaoncikehcinaa'oyek citepinamowek Kishemanitoo okihci-inentaakosiwin. 28 Christ itahsh niinawint kaatashimankitc kahkina awiya e'wiintamawankitc. Kakiihtaawentamowinink itahsh nintashiayaankwaamimaanaanik, ninkihkino'amawaanaanik kaye, kaatahshiwaatc hsa cipiinankitwaa Kishemanitoon kaaishiayaanitc, citinowiwaatc aasha ehkiihkiishaapewiwaatc i'imaa Christink. 29 O'o tahsh ehkakwekiishihtooyaan aahpici ninkihcianohkii, ehkakwaatakanohkiiyaan kaye e'aapacihtaawak Christ omashkawisiiwin kaamiishitc, e'mashkawanohkiimakaninik kaye i'imaa nimpimaatisiwinink.

Kalaahsiink 2

1 Taka kiwii'wiintamawininim aaniin ehpiihcikihcianohkiiyaan kiinawaa onci, iki kaye otepwehtamook Leyaatihsiiyaank (Laodicea) kaa-ayaawaatc, iki kaye kahkina tipinawe mahshi kaawaapamihsikwaa. 2 Miitahsh o'o kaaonci-ishihcikeyaan kewiinawaa tahsh cimashkawentamowaatc ote'iwaank, maano kaye kahkina cimaamawiwiici'itiwaatc ehsaaki'itiwaatc. Miitahsh kaye wiinke nihsitohtamowaatc cionciwenoocihtoowaatc kehcinaa'owin. Miitahsh kewiinawaa cioncikihkentamowaatc Kishemanitoon otinentamowinini otaanaank kaakihkencikaatehsininik, mii hsa iitok a'a Christ wiin iko kaatashimintc. 3 Wiin iitok Christ kaapiniskonank cikihkencikaatenik Kishemanitoon kaawenootaninik okakiihtaawentamowinini, okihkentamaawinini kaye. 4 Kiwiintamawininim itahsh, keko pakitinaahkek awiya ciwaniminek ahpii kakweshaakoosominek, aanawiin wiinke maminokiishwetc. 5 Aanawiin e'wiiciiwihsinowinakook niwiiyawink weti kaaishiayaayek, shaakooc itahsh kiwiiciiwininim nintinentamowinink. Aahpici kaye niminwentam e'waapantamaan e'mashkawikaapawiyek ehtepwehtawek Christ. 6 Aasha tahsh ekii'otaahpinek Christ Ciisahs citipeniminek, ishipimohsewaahk itahsh Christ otinaatisiwinink, aaniihsh kiwiiciiwaawaa. 7 Taapishkoo tahsh watapiin waahsa kaakotaawikihkin ahkiink, mii hsa tahsh kekiinawaa peshikwan ishikotaawikik i'imaa Christ opimaatisiwinink. Taapishkoo kaye waahkaa'ikan kaaompahkicikaatek, mii kaye ishiompahkitook kipimaatisiwiniwaan i'imaa Christink, cinimashkawaakin kaye kitepwehtamowiniwaan, kaakii'ishikihkino'amaakooyek. Cimooshkineshkaakoyek kaye miikwehciwentamowin. 8 Ayaankwaamisik inkoci ci-ishiwinihsinowinek cimamaancikwahpinikohsiwek ewiihtipeniminek awiya. Aaniihsh ayaawak ininiwak kehkino'ikewaatc ininiiwikihkino'ikewinan kekoon kaa-ahpiihtentaakwahsininikin. Weti tahsh waahsa otaanaank otoontinaanaawaan ininiinaank kaapikihkino'ikaatenikin e'ishikihkino'ikewaatc, e'ontinamowaatc kaye ahcaahkwa' o'omaa ahkiink kaaishitipencikenitc, kaawiin tahsh wiin Christan kaaishikihkino'ikenitc. 9 Christ tahsh e'ininiiwaatisitc owiiyawi, kahkina hsa Kishemanitoon otinaatisiwinini okecishkikikishkaakon. 10 Kiinawaa tahsh e'wiiciiwek Christ, mii hsa i'imaa kaaoncimooshkineshkaakowek wenoocipimaatisiwin; wiin aaniihsh kahkina oniikaanishkawaa' kahkina kaa-ahcaahkwentaakosinitc kaaokimaawinitc, kaakashki'ewisinitc kaye. 11 E'wiiciiwek tahsh Christ, mii 'i kaaishinaakosiyek e'ayaayek kihkinawaatashakeshokoowin, kaawiin wiin inini kaaishikihkinawaatashakeshowetc, i'i hsa Christ kaaishikihkinawaaci'iwetc. Mii hsa eshihseyek ekiihshiikoshkamek kaakii'nihtaamaci-ishihcikemakahk kehteinaatisiwin. 12 Ahpii hsa kiihsiika'antaakooyek mii 'i kiiwiicininkwa'okoomek Christ, mii 'imaa kaye kaa'ishiwiicikiiwepimaatisiimek. Aaniihsh kikiihtepwehtamowaam Kishemanitoo omashkawisiiwin ekiihkiiwepimaatisi'aatc Christan kaakii'niponitc. 13 Kiinawaa tahsh aapitink kikiinipowakinsom, aaniihsh macitootamowin kikiihkikishkaakom, kikiihtinowim kaye kaakihkinawaatashakeshwaahsiwintwaa ekii'ayaahsiwek Kishemanitoo otOonahshowewin. Noonkom itahsh Kishemanitoo kikiihtakopimaatisi'ikowaa kaaishipimaatisinitc Christan, ekiihpoonentamawinank kahkina kimacitootamowininaanin. 14 Kishemanitoo tahsh kaye kikiihkaahsii'amaakonaan kahkina kaaishioshipii'ikaatekin ini kaakiihpwaanawihtooyank Onahshowewin kekiihkanawentamankipan, mii 'iweni kaakii'akosaka'ank i'imaa aashiteyaahtikonk. 15 Christ itahsh kiinipotc i'imaa aashiteyaahtikonk, kahkina okii'mashashkonamawaa' i'i omashkawisiiwinini kaa-ahcaahkwentaakosinitc kaaokimaawinitc ini kaye kaakashki'ewisinitc. Miitahsh kaa'ishihciketc, ekiihpimiwinaatc i'i kaakiihshaakooci'aatc piniskwe piko ciwaapancikaniwinitc. 16 Keko tahsh pakitinaahkek awiya cionentamawinek wekonen ini tino miicim kemiiciyek, wekonen ini kaye keminihkweyek, aaniin kaye keishihcikewek ahpii anami'ehkamikaninik. Keko kaye pakitinaahkek awiya cionentamawinek aaniin keishihcikewek kaanihtaainahkamikisiyek kiioshkiakoocink tipihkikiisihs, kiiAnwepiiwi​kiishikaninikin kaye. 17 Ini hsa inaahkonikewinan, mii hsa ehta niiyaak ehkakwenaapinaakwahkin aaniin piciinak mayaa kaawii'naakwahkin. Christ itahsh wiin a'a mayaa kaa-aawitc. 18 Keko tahsh pakitinaahkek awiya ciotahpinamawinek i'i kaawiihtipa'amaakooyek. Aaniihsh ayaawak ininiwak keoncina'enintisowaatc ehkakwaataki'itisowaatc citapahsinaakosiwaatc, e'anami'ehtawaawaatc kaye encala'. Wa'a tino otahpenimonotaan kaye otishinamowinan, anihshaa i'i kaaoncikihtenimotc i'i nahke ininiinaank e'ishinaanaakatawentamowaatc. 19 A'a tino inini kaawiin kaye keyaapi omincimenimaahsiin Christan, kaaohtikwaanishkaminitc wiiyawimaa, otepwehtamook kaainintwaa. Christ tahsh ehtipentank oncipimaatisiimakanini i'i wiiyawimaa, miitahsh i'imaa kaaishiayaanihkawikanenk, kaaishiociihtateyaapiink kaye wencimincimishkaak, e'oncimaaciikininik Kishemanitoon kaaishiantawentaminitc. 20 Kiinawaa itahsh wiin, kikii'wiicinipoomaawaa Christ, kaaoncitipenimihsinowinekwaa iki ahcaahkwak kaaokimaahkantamowaatc kekoonan kaaoshihcikaatenikin kiishikonk 'omaa kaye ahkiink. Wekonen itahsh wenci-ishipimaatisiyek taapishkoo o'omaa ahkiink keyaapi e'oncitipentaakosiyek? Wekonen kaye keyaapi wencina'ihtamek ono tino inaahkonikewinan: 21 "Keko papaamentanken o'o," "Keko kocihpitanken i'i," "Keko kaye 'i pahkaan kekoon saaminanken!" kaaihkitoomakahkin. 22 Ono tahsh kahkina kaatashintekin i'imaa inaahkonikewinink, kaaonci'ikooyek cipimentansiwek, aapitink iko kiiaapacihcikaatekin, mii 'i eshipoonihsekin. Ono tahsh inaahkonikewinan, kihkino'ikewinan kaye, ininiinaank onciimakanoon. 23 Aahpici tahsh ini okihkino'ikewiniwaan kakiihtaawinaakwaniniwan, miitahsh ehkakaansomiwewaatc encala' cianami'ehtawimintc, ehkakwetapahsinaakosiwaatc, ehkakwaataki'itisowaatc kaye owiiyawiwaank. Kaawiin itahsh wiin ono inaahkonikewinan okaoncikashkihtoohsiin awiya cipoonihtootc omacimihsawencikewinan.

Kalaahsiink 3

1 Aasha tahsh kikiihkiiwepimaatisii'ikoom kiikiiwepimaatisi'intc Christ. Mii hsa piko 'i mooshak iko ishiantone'amohk ishpimink kaa-ayaakin, aaniihsh mii 'i weti Christ eyaatc, e'ishiokimaawapitc okihcinihkiniink inahke Kishemanitoon. 2 Naanaakatawentamok kaye ishpimink kaa-ayaakin, kaawiin wiin kekoonan ahkiink kaa-ayaakin. 3 Aasha iitok kikii'nipom. Kaawiin itahsh mahshi naakwahsinoon aaniin keishinaakwahk kipimaatisiwiniwaa, e'ishiayaak i'imaa Christ kaaishiayaatc Kishemanitoonaank. 4 Ahpii tahsh Christ kaaopimaatisiwiniyek naakositc, mii hsa tahsh kekiinawaa cinaakosiyek i'imaa okihci-inentaakosiwinink. 5 Mii hsa tahsh eshinaakwahk cinihtooyek i'i kikehtepimaatisiwiniwaa kaanihtaaishihcikemakahk o'omaa ahkiink. Amiiwan tahsh ono kenihtooyek: pihshikwaatisiwin, wiininaakosiwin, pihshikwaacimihsawencikewin, macimihsawencikemooshi'owin, ayoonsaamisiwin kaye; aaniihsh awiya kaaonsaamisitc mii 'i eshihciketc taapishkoo e'manitoohketc. 6 Amii aaniihsh ono tino ishihcikewinan waa'oncipakamishkaamakaninik Kishemanitoo onishkaatisiwin cikakwaataki'aatc kahkina awiya' kaana'ihtaakohsik. 7 Kekiinawaa tahsh aapitink kikii'ishipimaatisim ahpii kiitipenimikoyek ini ishihcikewinan kaatashintamaakooyek. 8 Noonkom itahsh mii 'i oncita piko eshinaakwahk ciwepinamek: nishkaatisiwin, aahkokitaasowin, shiinkencikewi-inamanci'owinan, macitashinkewin. Keko kaye wiihkaa wiinikiishwewin taoncinooncikaatehsinoon i'imaa kitooniwaank. 9 Keko kaye kiiwanimohtaatihkek, aaniihsh aasha kikiihkiicikoshkaam i'i kikehtepimaatisiwiniwaa, tako kaye kaanihtaaishihcikemakahk. 10 Oshkipimaatisiwin aaniihsh kikiihpihsihkaam, Kishemanitoo mekwaa ehtashiihkank cioshkaya'iiwaninik, wiinke piko citaapitawikihkenimintc kaaishinaakositc. 11 Inashke tahsh noonkom kaawiin pahkaan ekaa kaaCoowiwihsikwaa, Coowak kaye inentaakosihsiiwak. Kaakihkinawaatashakeshikaniwiwaatc, iki tahsh kaye kaakihkinawaatashakeshikaniwihsikwaa kaawiin kewiinawaa pepahkaan inentaakosihsiiwak. Kaawiin kaye pepahkaan inentaakosihsiiwak iki kaamayakisiwaatc waahsa kaapionciiwaatc, iki kaye kaakihkentansikwaa ootenaawaatisiwin, kaatipenimintwaa kaye, iki kaye ininiwak kaatipenimaahsiwintwaa. Christ itahsh wiin maawac kaaniikaanentaakositc, Christ kaye kahkina kikikishkawaawaa. 12 Kiinawaa pemaatisiyek Kishemanitoo kitipenimikowaa; wiin kaye kisaaki'ikowaa, kikii'onenimikowaa kaye wiin iko ewiihtipeniminek. Mii hsa tahsh eshinaakwahk cipihsihkamek koohpaatencikewin, minotootaakewin, tapahsenimowin, noohkaatisiwin kaye, shashiipenintiwin kaye. 13 Kakweshashiipenintik kaye, poonentamaatik kaye, kiishpin mihkwentamowatc aaniin eshimaanaapamatc awiya. Taapishkoo hsa kaaTipenciketc kaakiihpoonentamawinek, mii hsa kekiinawaa ishipoonentamaatik. 14 Ono tahsh kaawiintamaan, awahshime nawac pihsihkamok saaki'itiwin, mii 'imaa kahkina kekoonan kaaoncimincimishkaakin, kaaoncimaamawikiishinaakwahkin kaye. 15 Taka pisaaniwiiciintiwin Christ kaamiininek kikakihkinowinikowaam i'imaa kite'iwaank; miitahsh o'omaa keoncionentamek aaniin waaishihcikeyek. Aaniihsh kahkina kikii'antomikowaa Kishemanitoo cipeshikwentaakosiyek i'imaa wiiyawimaank cipisaaniwiiciintiyek. Mooshak itahsh iko miikwehciwentamok! 16 Pakitinamowaahk itahsh Christ otihkitowin ciwenootaninik i'imaa kite'iwaank, ci-ishitaamakaninik. Kakiihtaawentamowin kaye ciaapacihtooyek kihkino'amaatiyek, waawiintamaatiyek kaye aaniin keishihcikeyek. Kihcimasina'ikani​nikamonan ina'amok, anami'enikamonan kaye, ci-ina'amowek kaye Kishemanitoo otAhcaahkwan kaamiininek nikamonan, e'miikwehciwentamek i'imaa kite'iwaank. 17 Kahkina kekoon kaaishihcikeyek, kekoon kaye kaaihkitoyek, kahkina kekoon onci-ishihcikek kaaTipenciketc Ciisahs owiinsowinink, wiin onci Christ e'miikwehciwenimek Kishemanitoo Kaaoyoohsimintc. 18 Kiinawaa wiiwimaak pakitinitisok cina'ihtawekwaa kinaapemiwaak. Miitahsh o'o eshinaakwahk ci-ishihcikeyek, aaniihsh kipiminisha'waawaa kaaTipenciketc. 19 Kiinawaa onaapemimaak saaki'ihkwak kiwiiwiwaak, keko kaye sanaki'aahkekwaanik. 20 Kiinawaa apinoonciishak, mooshak iko ishina'ihtawihkwak kiniiki'ikowaak; aahpici 'oweni kaaTipenciketc ominwaapantaan. 21 Kiinawaa otetemaak, keko onsaam kakaansomaahkekwaanik kiniicaanihsiwaak, maakishaa kikanishki'aawaak, aaniihsh piinihsh tanipakitentamook i'i tootawekwaa. 22 Kiinawaa opamiihtaakek kaatipenimikooyek, misiwe piko ishina'ihtawihkwak iki kaaotookimaamiyek o'omaa ahkiink. Kaawiin wiin ehta kiikanawaapaminekwaa cioncina'entamo'ekwaa. I'imaa hsa kite'iwaank onci na'ihtamok, ehkohtaanenimek kaaTipenciketc. 23 Aaniin iko eshihcikeyek, ehkokashkihtooyek iko kite'iwaank onci-inanohkiik, ci-ishihcikeyek taapishkoo kaaTipenciketc wiin e'anohkiihtawek, kaawiin wiin inini. 24 Maamihkawinotawihk kaaTipenciketc kikamiinikowaa i'i otipa'amaakewin kaakanawentamawaatc opimaatisiima' ewiihtipa'amawaatc. KaaTipenciketc Christ ohsha kaa-anohkiihtawek. 25 Kahkina tahsh awiya maano kaamacitootank, mii hsa 'i keshikiiwetipa'amawintc kahkina kekoonini kaaishimacitootank, aaniihsh peshikwaya'ii inahke kahkina awiyan Kishemanitoo otishitipaahkonaan.

Kalaahsiink 4

1 Kiinawaa kaaokimaawiyek, kwayahk tootawihkwak, weweni ko kaye tootawihkwak iki kaapamiihtawinekwaa kaatipenimekwaa. Ishimaamihkawik kekiinawaa e'ayaatc kitOokimaamiwaa kihcikiishikonk. 2 Keko pakiciihkek cianami'ehtawek Kishemanitoo, na'aasik kaye mekwaa e'anami'aayek, e'miikwehciwenimek kaye Kishemanitoo. 3 Mekwaa tahsh e'anami'aayek, anami'ehtamawihshinaam keniinawint, Kishemanitoo citawinamawinankitc ciwaawiintamaakeyaank otipaacimowin kaaishitashimimintc Christan, kaakiihkihkencikaatehsininik otaanaank. Miitahsh niin noonkom kaaoncikipa'okooyaan e'wiintamaakeyaan. 4 Miitahsh kaye ishianami'ehtamawihshik niin weweni cinihsitohtaakooyaan aaniin ehkitoyaan, aaniihsh mii 'iwe eshimiinikooyaan ci-ishihcikeyaan. 5 Kakiihtaawiik kaye aaniin entootawekwaa iki kaatepwehtansikwaa, aahpici hsa kwayahk inaapacihtook i'i kaashitawinamaakooyek. 6 Taka kaye kitihkitowiniwaan taminohtaakwanoon, ci-inihtaakwahkin awiya ciwii'noontank, miitahsh kaye eshinaakwahk cikihkentamek kwayahk ci-ishinahkwehtawek kahkina awiya. 7 A'a tahsh kaashawenimankitc niitanami'aanaan Tihkihkahs (Tychicus) aahpici tepwe anohkii, kaawiitanohkiimitc i'imaa kaaTipencikenitc otanohkiiwininiink. Kikawiintamaakowaa aaniin eshiayaayaan. 8 Miitahsh o'oweni kaaonci-ishinisha'wak weti kaaishiayaayek, ciwiintamawinek aaniin kahkina eshihseyaank o'omaa kaaishiayaayaank, kiinawaa cioncimashkawentamek. 9 Ini tahsh kiiciotepwehtamoonaanin Onehsimahsan (Onesimus) kaatepweyentaakosinitc kaasaaki'imintc kaye, okapiwiiciiwaan ahpii otihsinek. Aaniihsh Onehsimahs weti kaaishimaawaci'itiyek oncitipentaakosi. Kikawiintamaakowaak itahsh aaniin eshiwepaninik o'omaa kaaishiayaawankitc. 10 Eristaarhkahs (Aristarchus) kaawiicikipa'okoomak kewiin kipooshoo'ikowaa. Maarhk (Mark), Paarnapahs (Barnabas) wiicihkiwensiwan kaye kipooshoo'ikowaa. Aasha kikii'wiintamaakoom weweni ciotaahpinek kiishpin otihsinek. 11 Caahshowaa (Joshua), Castahs (Justus) kaaishinihkaacikaniwitc kewiin kipooshoo'ikowaa. Oko tahsh nihsin kaawiinakwaa, mii hsa iki ehta nihsin okwehkaatisiik kaaCoowiwiwaatc kaawiitanohkiimakwaa o'o kaa-anohkiihtamowak Kishemanitoo otOokimaawiwin. Aahpici kaye niipiwa' nintishiwiici'ikook cimashkawite'eyaan. 12 Ehpahparahs (Epaphras) itahsh kewiin kipooshoo'ikowaa, aaniihsh kewiin mii weti kaaishimaawaci'itiyek wencitipentaakositc, Christ Ciisahsoon itahsh kaye e'anohkiihtawaatc. Mooshak itahsh kewiin oncikakwaatakanohkii'itiso e'anami'ehtamawinek cimashkawikaapawiyek, cikiishaapewiwek, kehcinaac cikehcinaa'owek kaaishitepwehtamowek, wiinke piko cina'ihtamowek Kishemanitoo kaaishimihsawentank. 13 Keniin itahsh iko niwiintamowaan aahpici ehkihcianohkiitc kiinawaa onci, i'i kaye weti Leyaatihsiiyaahkaank (Laodicea) weti kaye Haayaraahpalihsihkaank (Hierapolis) kaa-ayaanitc. 14 Lok (Luke) kaye kaasaakihcikaniwitc mashkihkiiwinini kipooshoo'ikowaa. Tiimahs (Demas) kewiin kipooshoo'ikowaa. 15 Pooshoo kaye nintinaanaanik niitanami'aanaanik weti Leyaatihsiiyaahkaank (Laodicea) kaa-ayaawaatc, a'a kaye nimpooshoo'aanaan Nimpa (Nympha), otaawinink kaaishipiintikenaaniwaninik. 16 Ahpii tahsh kii-ishkwaa-anamihcikaatek o'o oshipii'ikan weti kaaishiayaayek, kehcinaac kaye weti kaaishipiintikewaatc iki Leyaatihsiiyaawininiwak (Laodiceans) ta-anamihcikaate. Kekiinawaa tahsh kika-anamihtoom i'i oshipii'ikan Leyaatihsiiyaawininiwak kaakii'oshipii'amawakwaa. 17 O'o tahsh inihk a'a inini Aarhkihpahs (Archippus): "Kehcinaac iko kiishihtoon i'i anohkiiwin kaakii'miinikooyan kaaTipenciketc e'anohkiihtawatc." 18 Niin itahsh iko nininc nintaapacihtoon ono ishkwaac ihkitowinenhsan kaaoshipii'amawinakook, Niin Pwaal (Paul) ehpooshoo'inakook. Keko waniihkehkek ehkipa'okooyaan. Taka Kishemanitoo okishewaatisiwin kikawiiciiwikom.

1 Tehsalanaihkaank 1

1 Niinawint o'owe nintooshipii'ikaninaan Pwaal (Paul), Saailahs (Silas), Timahti (Timothy). Kitooshipii'amaakoom kiinawaa otepwehtamook kaamaawacianami'aayek i'imaa Tehsalanaihkaawi ootenaank eyaayek, minihk kaawiiciiwinek Kishemanitoo Kaaoyoohsimintc, kaye kaaTipenciketc Ciisahs Christ. Kikawaapantamowaam okishewaatisiwin, opisaanisiwin kaye. 2 Mooshak nimiikwehciwi'aanaan Kishemanitoo e'maamihkwenimikooyek e'anami'aayaank. 3 Shikwahsh ahpii hko e'anami'ehtawankitc Kishemanitoo Kaaoyoohsimank, mooshak nimaamihkwentaamin i'iwe kaaonci-ishihcikeyek e'otepwehtamowiniyek, kaye e'oncikihcianohkiiyek saaki'iwewinink, kaye tahsh e'oncishashiipentamek, wawiinke ehkehcinaa'oyek ewiihpitakohshink a'a kaaTipeniminank Ciisahs Christ. 4 Kaawiiciotepwehtamoomikooyek! Kikihkenimikoom ehsaaki'inek Kishemanitoo ekii'onaapaminek. 5 Inashke hsa ekiihpi-ishiwiintamaakooyek minwaacimowin, kaawiin ehta nintooninaanink kikiihpi-ishikakanoonikoohsiim. I'iwe aaniihsh omashkawisiiwin Kishemanitoo ninkii'wiici'ikomin, Kishemanitoo otAhcaahkwan ekii'ishianohkiinitc, wawiinke ekiihkehcinaa'entamaank ehtepwehtamaank minwaacimowin. Kekiinawaa kikihkeniminaam aaniin eshiminopimaatisiyaank minihk​iko kaakii'wiicitaamikooyek, kiinawaa ko ekii'onci-ishihcikeyaank. 6 Niinawint kikii'naanaapinawinaam eshipimaatisiyaank, kaye kikii'naapihcikewaam kaaTipenciketc kaakii'ishiminohciketc. Shikwa aanawiin ekiihkihcikakwaatakihtooyek, weyiip kikii'otaahpinaanaawaa i'iwe kaaishiwiintamaakooyek, Kishemanitoo otAhcaahkwan ekii'onciciihkentamoshkaakooyek. 7 Miitahsh kaakii'onci​kihkinawaateniminekwaa kahkina awiya otepwehtamook, minihk i'imaa Maahsitooniyaawahkiink (Macedonia) kaa-ayaawaatc kaye Ahkeyaawahkiink (Achaia). 8 Kiinawaa aaniihsh kii'oncinoontaakwanini kaaTipenciketc otipaacimikoowin, kaawiin itahsh ehta 'imaa Maahsitooniyaawahkiink kaye Ahkeyaawahkiink ci-ishinoontaakwahk. Aasha misiwe kii'ishinoontaakaaniwan eshitepwehtawek Kishemanitoo. Kaawiin memwehc niinawint niwiintamawaahsiwaanaanik awiyak eshiwepisiyek. 9 Wiinawaa ko kahkina kitashimikowaak aaniin eshipiintikashiyaank ahpii kaakiihkiiyootamikooyek, kaye aaniin kaashikwehkentamek ekii'ishiwepinekwaa manitoohkaanak, ekiihtepwehtawek Kishemanitoo, ekiiwii'anohkiihtawek. Mii 'awe Kishemanitoo ehtepwewiniwitc kaye ehpimaatisiwiniwitc. 10 Kitipaacimikowaak kaye e'ahshawaapamimek Kishemanitoo oKosihsan, kihcikiishikonk cipioncinaakosinitc, mii 'awe Ciisahs weKosihsimaawitc, a'awe kaakiihkiiwepimaatisi'ikotc Kishemanitoon kii'ishkwaanipotc. Mii 'awe Ciisahs kaashaapwii'inank ekaa cipatakoshkaakohsiwank Kishemanitoo onishkaatisiwin kaawiihpitakohshinoomakaninik.

1 Tehsalanaihkaank 2

1 Kaawiiciotepwehtamoomikooyek, kiinawaa kikihkentaanaawaa ekaa anihshaa ekiihpi-ishikiiyootamikoohsiwek. 2 Kaye kikihkeniminaam aaniin kaa'ishiwepisiyaank cipwaa piotihsikooyek, weti kaakii'ishaayaank Pilihpaai (Philippi) ootenaank, i'imaa kaakii'ishikakwaataki'ikooyaank, ekii'akaciwentaakwahk kaahtootaakooyaank. Ahpii tahsh peotihsikooyek i'imaa Tehsalanaihkaank (Thessalonica), keyaapi soonkite'ewin ninkii'miinikonaan Kishemanitoo. Aanawiin ekiihkakwewanishkwe'iyamintwaa niipiwa' awiyak, maano kikiihkihciwiintamaakoom Kishemanitoo ominwaacimowin. 3 Kaawiin aaniihsh kakiinawishki-kihkino'amaakewin ninkiihtepwehtansiimin cioncikakiihkwenotamaank. Kaawiin kaye ekaa kaapehkentaakwahsinok nintooncikakiihkimiwehsiimin. Kaawiin kaye niwayeshimaahsiwaanaanik awiyak. 4 Wiin itahsh wiin Kishemanitoo ninkii'minwaapamikonaan – mii 'awe ekiihpaminamo'iyamintc i'i minwaacimowin ciwiintamaakeyaank. Miitahsh owe eshikiikitoyaan. Kaawiin ninkiiwiihkakwe nana'entami'aahsiwaanaanik iki kaakakanoonankitwaa. Nawac wiin Kishemanitoo niwii'nana'entami'aanaan. Mii 'awe nintinentamowininaanink kaaoncikoci'iyamintc. 5 Shikwa kikihkeniminaam aaniin kaakii'ishihcikeyaank: kaawiin wiihkaa kikii'mihcimamenwaasomikoohsiim cioncikashkimikooyek. Kaawiin pehkihsh kikiihpimihsawentamaakoohsiim kekoon ehpikanoonikooyek. Kishemanitoo niwaapamikonaan ehtepweyaank. 6 Shikwa kaawiin kikiihpikakwekashkimikoohsiim ciminwaacimiyaank, kaawiin kaye pehkaanisiwaatc ninkii'antawenimaahsiwaanaanik cimaminwaacimiyamintwaa. 7 Niinawint Christ otishinisha'waakana'. Ninteinentaakosimin cikii'ikooyekipan, "Miishihshinaam kekoon," kaye "Kihci-inenimihshinaam," cikii'ikooyekipan. Kaawiin itahsh ninkii'ishihcikehsiimin i'iwe. Inashke awiya ihkwe kaanoonaawahsotc, kihciweweni eshikanawenimaawahsotc, mii peshikwan kaye niinawint kikii'ishikanawenimikoom ekii'wiiciiwikooyek, noohkaac ekii'ishikanoonikooyek. 8 Kaawiin ninkii'inentansiimin ehta ciwiintamaakooyek Kishemanitoo ominwaacimowin. Kaawiin inkotano cioncipakitinamaank nimpimaatisiwininaanin i'iwe ehpiihcisaaki'ikooyek. 9 Kaawiiciotepwehtamoomikooyek, kehcinaac kimaamihkawinotawinaam eshikihcianohkiiyaank mekwaa ekii'wiiciayaamikooyek, ekii'oncicaakii'itisoyaank. Ehkiishikahk, ehtipihkahk ninkii'anohkiihtamaasomin ehkakwekashkihtamaasoyaank keaapacihtooyaank. Kaawiin aaniihsh ninkii'inentansiimin wakicaya'ii cinikosikwii'ikooyek mekwaa e'wiintamaakooyek Kishemanitoo ominwaacimowin. 10 Kiinawaa kikii'ishiwaapaminaam enaatisiyaank. Kishemanitoo kaye ninkii'waapamikonaan. Mekwaa ekii'wiiciayaamikooyek misiwe ninkiihkakwe kwayahkohcike'aanaan Kishemanitoo, kaye ninkiihkwayahkwaatisimin. Kaawiin kekoon ninkii'ishihcikehsiimin kekii'onci anaamenimikooyaankipan. 11 Kikii'ishitootaakoom entahsopeshikoyek taapishkoo inini kaaotetemaawitc kaatootawaatc oniicaanihsa'. 12 Kikii'aayiisomikoom, kikiihkaakiisomikoom, weweni kikii'ikoom cikakweminoishiwepisiyek, cikakwenana'entami'ek Kishemanitoo. Mii aaniihsh a'awe kaa'antominek ciotookimaamiyek kaye ciwaapantamowek okihcionishihshiwentaakosiwinink i'imaa entashikimaawitc. 13 O'owe tahsh kaye mooshak nintooncimiikwehciwi'aanaan Kishemanitoo. Ahpii pewiintamaakooyek o'o Kishemanitoo otihkitowin, kikii'otaahpinaa ekii'noontamek. Kaawiin kikii'inihtansii ininiinaank e'onciimakahk. Kikii'ishiotaahpinaam kaakii'wiintamaakooyek Kishemanitoo otihkitowin e'aawaninik, mii 'i tepwe kaatinowaninik. Kaye mayaa kaa-anohkiimakaninik ehtepwehtamek e'onciaancipimaatisiyek. 14 Kaawiiciotepwehtamoomikooyek, peshikwan kikii'ishiwepisim taapishkoo kaakii'ishiwepisiwaatc otepwehtamook i'imaa Cootiiyaawi ahkiink (Judea) kaa-ayaawaatc, miiwak​iki pepahkaan ayaawinink kaamaawacianami'ehtawaawaatc Kishemanitoon, ehtepwehtawaawaatc Christ Ciisahsoon. Aaniihsh kekiinawaa kitepwehtamowiniwaa kikii'onciihkaakowaak iki kiwiicionciimaakaniwaak Tehsalanaihkaank, taapishkoo wiinawaa Cootiiyaawi ahkiink kaakii'ishionciihkaakowaatc i'i Coowa'. 15 Mii aaniihsh oko tino Coowak kaakii'nihsaawaahpan i'i Kishemanitoon otipaacimowininiimipanii'. Kaye okii'nihsaawaan ini Ciisahsoon ini kaaTipencikenitc e'aawinitc. Shikwa keniinawint ninkii'onciihkaakonaanik ninkakiihkwewininaan. Kaawiin onehpiciminwentami'aahsiwaawaan Kishemanitoon. Omiiwenimaawaa' kahkina pemaatisinitc. 16 Inashke hsa, ninkii'onci'ikonaanik iki Coowak: "Keko kakiihkimaahkekwaanik iki kaaCoowiwihsikwaa," ninkii'ikonaanik, ekaa e'inenimaahsikwaa pehkaanisinitc awiya' cipimaatisinitc. Mooshak kii'nihtaamacitootamook okoweniwak, piinihsh o'o noonkom maawac e'aniompweyiimakaninikin omacitootamowiniwaan. Mii 'i kekahpii kaaoncipatakoshkaakowaatc i'i Kishemanitoo onishkaatisiwin! 17 O'owe tahsh kaye kiwiintamaakoom, kaawiiciotepwehtamoomikooyek: kaawiin niinawint kikiihpoonenimikoohsiim i'i ahpii acina ekiihpahkewinikooyek. Niwiiyawinaanink ehta kikiihpahkewinikoom. Kikii'antawenimikoom miinawaa ciwaapamikooyek, waawiinke ekii'mehtahsawenimikooyek. 18 Tepwe ninkii'antawentaamin cipikiiyootamikooyek. Niin Pwaal (Paul) mooshak niin iko nintaanawiihkakweishaa. A'a tahsh Setan (Satan) ninkii'wanishkwe'ikonaan ekaa ci-ishaahsiwaank. 19 Kiinawaa hsa iki mayaa kaakehcinaa'enimankitwaa e'otepwehtamowiniwaatc, kiinawaa hsa ko kaaoncikihciminwentamaank, kiinawaa hsa keonciwaawishentamaank nimpahkinaakewininaan paanimaa waapamankitc takohshink kaaTipenciketc Ciisahs. 20 Tepwe kiinawaa kiwaawishenimikoom, kiinawaa kikihciminwentami'inaam!

1 Tehsalanaihkaank 3

1 Onsaam itahsh kikiihkwiinomikoom ekii'noontansiwaank aaniin eshiayaayek. Mii'i kaa'oncikiishentamaank niinehtawint i'imaa Aahtinsiiwi ootenaank (Athens) ci-ishkwiiyaank. 2 A'a tahsh Timahti (Timothy) kikii'ishinisha'amaakoom cimaawatihsinek. Niicihkiwenaan nintinenimaanaan, kaye owiitoohkawaan Kishemanitoon e'wiintamaaketc i'iweni ominwaacimowinini Christan. Mii 'iwe ciaayiisominek kaakii'oncimawatihsinek kaye cimashkawikaapawiyek kitepweyentamowiniwaank. 3 Kaawiin ninkii'antawentansiimin peshik kaatahshiyek ciaanawenciketc onsaam e'onciihkikaniwitc otepwehtamowin. Inashke hsa kiinawaa kikihkentaam mii 'owe kaaineniminank a'a Kishemanitoo, cionciihkaakooyank kitepwehtamowininaan. 4 Aaniihsh mekwaa ekii'wiiciayaamikooyek, kiishaac kikii'wiintamaakoom: "Kikaonciihkaakoom o'o kitepweyentamowininaan," kikii'ikoom. Shikwa kikihkentaam mii 'iwe mayaa kaakii'ishiwepisiyek. 5 Mii 'owe kaakii'onci-ishinisha'amawinakook a'a Timahti: ninkiiwii'aahkokihkentaan kiishpin keyaapi e'otepwehtamowiniwekwen. "Maakishaa okiihkakwewanaa'ikowaan ini Setanan," kikii'inenimininim. Kiishpin aanawencikeyekipan, mii anihshaa cikii'anohkiiyaankipan. 6 Aasha tahsh ninkiihpikiiweotihsikonaan a'a Timahti, ekii'ishaatc kaaishiayaayek. Kitipaacimikowaa keyaapi eshitepweyentamek kaye eshisaaki'itiyek. Shikwa niwiintamaakonaan e'minomaamihkwenimiyaank kaye ewii'noontewaapamiyaank, mii peshikwan keniinawint eshiantawentamaank ciwaapamikooyek. 7 Kaawiiciotepwehtamoomikooyek, ahpii ko mecihseyaank ehkakwaataki'ikooyank, mii 'imaa wencihsek ninsoonkite'ewininaan, e'mihkwenimikooyek eshitepwehtamek. 8 Wawiinke hsa ko noonkom nintoonciminohsemin nimpimaatisiwininaanink ehkihkenimikooyek ehsoonkitepwehtawek a'a kaaTipenciketc. 9 Aaniin ehpiihcimiikwehciwi'ankitc Kishemanitoo kiinawaa onci! Aaniin keshinanaahkomankitc i'i minihk ciihkentamowin eshimooshihtooyaank e'mihkwenimikooyek ehkanoonankitc? 10 Tahsokiishik kaye tahsotipihk wawiinke nintishipakohsentaamin ciotihsaapamikooyek piciinak, kaye cinankinamaakooyek kitepweyentamowiniwaank aaniin​iko kaaishinoontehseyek. 11 Maano ninkaishiwinikonaan ciotihsikooyek, mii 'i eshipakohsenimankitwaa Kaaoyoohsimank Kishemanitoo kaye Ciisahs kaaTipeniminank. 12 KaaTipenciketc maano kikamiinikowaa awahshime cimaaciishkaamakaninik kisaaki'itiwiniwaa kaye kahkina pemaatisiwaatc cisaaki'ekwaa, taapishkoo keniinawint eshisaaki'ikooyek. 13 Piinihsh cimashkawisii'inek kite'iwaank, ekaa kekoon ci-ishiayaahsiwek, Kishemanitoonaank ehta cionciaapatisiyek, mii 'iwe ci-inaatisiyek paanimaa inaahsamikaapawiihtawek Kishemanitoo Kaaoyoohsimank, ahpii pitakohshink kaaTipeniminank Ciisahs – minihk itahsh iko kaaTipenimaatc okapiwiiciiwaa' i'i ahpii.

1 Tehsalanaihkaank 4

1 Shikwa o'o pahkaan kekoon kiwii'wiintamaakoom, kaawiiciotepwehtamoomikooyek. Kikii'ishikihkino'amaakoom aaniin keishikwayahkoshkaayek, aaniin keishi​kakwe​nana'entami'ek Kishemanitoo. Aasha o'owe kitishihcikem. O'o tahsh noonkom kipakohsenimikoom, kitoonciayaankwaamimikoom owiinsowinink kaaTipenciketc Ciisahs, keyaapi cinikihcionishihshink kitishihcikewiniwaa. 2 Aaniihsh kikihkentaam kaakii'ishikihkino'amaakooyek, kaaTipenciketc Ciisahs okashki'ewisiwinink ekii'oncikanoonikooyek. 3 Mii 'owe kaa-antawentaakosiyek, Kishemanitoonaank ehta cionciaapatisiyek, ekaa wiin cikakiipaacihcikehsiwek. 4 Kiinawaa kaaininiiwiyek kahkina kitaakihkentaam aaniin inahke kwayahk keshiwiiwiyekipan, eshiminwaapantank Kishemanitoo cikakwetootamek, minowiinsowin ciayaayek. 5 Keko nanaapinawaahkekwaanik kaaotepwehtamowinihsikwaa. Aaniihsh tepinaahk iko omihsawentamowiniwaank ishipimaatisiwak, ehkihkenimaahsikwaa Kishemanitoon. 6 Keko awiya okamacihcike'aahsiin wiiciotepwehtamoon cikimootitc wiiwini. Aaniihsh kikii'ayaankwaamimikoom o'owe: "Awenen iko ketootamokwen, ini kaaTipencikenitc oka-aahkwaahkonikoon," kikii'ikoom. 7 Inashkehsh kaawiin anooc ci-ishihcikeyankipan kaakii'oncinantominank Kishemanitoo, i'i hsa wiin cikwayahkwaatisiwank, Kishemanitoonk ehta ci-inaapatisiyank. 8 Kiishpin awiya wiihpiikonank o'o kihkino'amaakewin, kaawiin ehta ininiwan otaanawenimaahsiin, ini hsa wiin Kishemanitoon kaa-aanawenimaatc. Mii 'awe Kishemanitoo kaakikishkamooninek otAhcaahkwan maawac kaakwayahkwaatisiiwentaakosinitc. 9 Kaawiin memwehc kikaoshipii'amaakoohsiim cisaaki'ekwaa kiwiiciotepwehtamoomiwaak. Aasha Kishemanitoo kikiihkihkino'amaakowaa cisaaki'itiyek. 10 Kaye mii peshikwan eshisaaki'ekwaa kahkina kiwiiciotepwehtamoomiwaak misiwe Maahsitooniyaawahkiink (Macedonia) kaa-ayaawaatc. O'o tahsh kipakohsenimikoom, kaawiiciotepwehtamoomikooyek: keyaapi awahshime kakwesaaki'itik. 11 Shikwa kakweniikaanentamok o'owe kaakii'ishikakanoonikooyek: kakwesakahkamisik. Kakweminohcikek kiinawaa kitanohkiiwiniwaank, kiinawaa ko kiniinciiwaan cipami'ikoyek. 12 Mii 'iwe kikaishi minohcikewakenimikowaak iki ekaa kaaotepwehtamowinihsikwaa. Shikwa kaawiin memwehc kika-ahpenimohsiim pahkaan mininciin cipami'ikoyek. 13 Kaawiiciotepwehtamoomikooyek, kinantawenimikoom cikihkentamowek aaniin keishiwepisiwaatc iki otepwehtamook kaakii'ishkwaapimaatisiwaatc. Keko kihcikashkentankek taapishkoo eshihcikewaatc iki ekaa kaaotahpenimowinihsikwaa. 14 Kiinawint kitepweyenimaanaan Ciisahs tepwe ekii'nipohpan, miitahsh i'i miinawaa ekiihkiiwepimaatisitc. Shikwa mii 'i ta-ayintiwak ikiweniwak kaakii'ishkwaapimaatisiwaatc kaakiihtepwehtawaawaatc ini Ciisahsoon. Kishemanitoon okaishiwinikowaan ciniwiiciiwaawaatc ini Ciisahsoon i'i ahpii pitakoshininitc. 15 Kitoonciwiintamaakoom itahsh o'o kaa'ishiyamintc a'a kaaTipenciketc: kiinawint minihk keyaapi kepimaatisiyank piinihsh cipitakohshink kaaTipenciketc, kaawiin kikaniikaanishkawaahsiwaanaanik ikiweniwak aasha kaakii'noonteishkwaapimaatisiwaatc. 16 Tanoontaakwan shaakowewin i'i ahpii, takishiiwe peshik maawac wekimaawentaakositc encal. Tanoontaakohtamawaa Kishemanitoo 'iwe kihcipootaacikanink enwenik. Mii 'i ahpii kaaTipenciketc tipinawe kihcikiishikonk tapioncinoomakeishaa. Shikwa mii 'i ahpii wiinawaa nihtam takiiwepimaatisiwak ikiweniwak kaakiihtepwehtawaawaatc Christan kaakii'ishkwaapimaatisiwaatc. 17 Miitahsh kekiinawint, aaniin​iko minihk ketahshiyank keyaapi cipimaatisiyank i'i ahpii, kikaketahto ishpishkaa'ikoomin weti wahkwiihkaank ciniwiiciohkwenoomankwaa. Mii 'imaa newacikiishik mincikahkina kikakihsaapamaanaan a'a kaaTipenciketc. Shikwa mii 'iwe ahpane ko ciwiiciayaamank. 18 Mii 'owe ihkitowin ishimaamihkawaasontik cioncisoonkite'eshkotaatiyek.

1 Tehsalanaihkaank 5

1 Kaawiiciotepwehtamoomikooyek, kaawiin memwehc kekoon kikaoshipii'amaakoohsiim ciwiintamaank ini kekoonan keni-ishihsekin, kaye aaniin ahpii kepiocihcihsekin. 2 Aasha weweni kikihkentaam ekaa awiya mayaa ciwiintansik aanahpii keocihcihsenik. Taapishkoo ehkoshkowihciketc awiya kaaniipaakimootitc, takoshkotakohshin a'a kaaTipenciketc i'i kiishikaninik cinaakohtootc omashkawisiiwin. 3 Shikwa taapishkoo a'a ihkwe e'ahshonihtaawikinaawahsotc, e'mihciantapakwanoonotc ciwiihsakaahpinetc, mii 'iwe keishiwepisiwaatc iki pemaatisiwaatc. Mekwaa e'ihkitowaatc, "Niminohsemin, kaawiin ninaniisaanisihsiimin," miitahsh sesakooc okapiotihsikonaawaa onihshiwanaaci'ikoowiniwaa. Kaawiin okakashkihtoohsiinaawaa citapasiihtoowaatc. 4 Kaawiiciotepwehtamoomikooyek, kaawiin kiinawaa i'imaa kashkiitipihkanonk kitayaahsiim. Kaawiin taapishkoo awiya ehkoshkowinikotc okimoocishkan kitaaishiayaahsiim. Kaawiin kiinawaa kikakoshkowinikohsiim ahpii piocihcihsenik a'a kaaTipenciketc okiishikanoom. 5 Kahkina kitinentaakosim e'onciiyek waahseyaank kaye kiishikanonk. Kaawiin kiinawint i'imaa kitoonciihsiimin tipihkanonk. Kaawiin i'imaa ehkashkiitipihkahk kitishitipentaakosihsiimin. 6 Iki tahsh kotak mii 'i enentaakosiwaatc e'ontaminkwaamiwaatc. Keko tahsh kiinawint i'i kikanaapi-ishiayaahsiimin. Taka kikaishinaakosimin taapishkoo awiya mooshak e'ayinaapitc kaye ehkoshkwaawaaciayaatc. 7 Inashke ehtipihkahk, mii 'i ahpii nepaaniwank; mii 'o ahpii aanint eshikiiwashkwepiiwaatc ehtipihkaninik. 8 Kiinawint itahsh mii taapishkoo pishihshik ehkiishikahk i'iwe kitinaatisiwininaan. Mii 'iwe onci koshkwaawaaciayaataa. Inaapacihtootaa tepweyentamowin, saaki'iwewin taapishkoo shimaakanihsh piiwaapihk kaa-aakooshkaakotc ohkaahkikanink. Shikwa kehcinaa'entantaa ewiihshaapwii'ikooyank, taapishkoo miikaasowaanohkwaanan ehpihsihkamank kenaatamaakoyank. 9 Aaniihsh kaawiin kiinawint kikii'inahsikohsiinaan Kishemanitoo onishkaatisiwin cipatakoshkaakoyank, mii hsa 'iwe cioncishaapwii'inank kaaTipenciketc Ciisahs Christ onci. 10 Mii 'awe Ciisahs kaakii'nipohtamawinank, miitahsh kiishpin keyaapi pimaatisiwank ahpii takoshink, kiishpin kaye noonteishkwaapimaatisiyank, kikawiicipimaatisiimaanaan. 11 Mii 'iwe onci soonkite'eshkotaatik, wiici'itik entahsopeshikoyek cisoonkikaapawiyek, peshikwan​iko ehpi-ishiwiici'itiyek. 12 Shikwa kipakohsenimikoom, kaawiiciotepwehtamoomikooyek: minwakimihkwak iki oniikaanakinsook kaa-anohkiihtamowaatc anami'aawin i'imaa eyaayek. Aaniihsh okii'inahsikowaan kaaTipencikenitc cimaamiinominekwaa. 13 Wawiinke kihtenimihkwak okoweniwak, oncisaaki'ihkwak otanohkiiwiniwaa. Kaye kiinawaa minowiiciintik. 14 Shikwa kikakaansomikoom, kaawiiciotepwehtamoomikooyek: kiishpin wii'mihciontaaci'intwaa aanint, kika-ayaankwaamimaawaak cikwehkihcike'itisowaatc. Shikwa soonkite'eshkawihkwak iki kaawahkemikoshkaatentamowaatc. Iki tahsh kaye ekaa kaasaapiayaahsikwaa, wiici'ihkwak. Shashiipenimihkwak kahkina awiyak. 15 Keko awiya okanaapitootawaahsiin awiyan macihcike'ikotc. Mooshak itahsh kakweminohcike'itik, kaye kahkina pemaatisiwaatc minohcike'ihkwak. 16 Mooshak taapitawiciihkentamok. 17 Keko kipitanami'aahkek. 18 Aaniin​iko 'i ishiwepahk, miikwehciwentamok. Mii aaniihsh o'owe Kishemanitoo kaaineniminek, ci-inaatisiyek e'wiiciiwek Christ Ciisahs. 19 Keko kipihtinimaahkek Kishemanitoo otAhcaahkwan i'i kaawiihtootaminitc. 20 Kiishpin awiya wiihkanoocikehtamawaatc Kishemanitoon, keko shiinkihtawaahkek. 21 Mekwaa kiikitotc itahsh kahkina kekoon kikanaakasohtawaawaa. Kikaotaahpinaanaawaa wenishihshininik. 22 Minihk itahsh kekoon wenishihshinsininik kaawiin awaac pankii kikatawinamawaatansiinaawaa. 23 Shikwa nimpakohsenimaa Kishemanitoo, mii 'awe pisaanisiwin kaamiininank: maano wiin Kishemanitoo kikaishi'ikowaa misiwe wiinehta ci-inaapaci'inek. Maano kikakanawenimikowaa enikohkwentaakosiyek. Kaye kitahcaahkowaa', kipimaatisiwiniwaan, kiwiiyawiwaan kikakanawentamaakowaa, piinihsh ahpii takohshink kaaTipenciketc Ciisahs Christ, ekaa awaac kekoon cimihkikaatehsinok ci-ishiayaahsiwek. 24 Mii 'owe eshipakohsentamaakooyek. Kishemanitoo kikaishihcike'ikowaa, aaniihsh tepweyentaakosi Kishemanitoo kaa-antominek. 25 Kaawiiciotepwehtamoomikooyek, anami'ehtamawihshinaam. 26 Kishemanitoonk onci ociimihkwak kahkina kiwiiciotepwehtamoomiwaak taapishkoo e'wiicishaanintiyek. Mii 'owe nahke ishipooshoo'itik. 27 O'o hsa kaye kitayaankwaamimininim, kaaTipenciketc e'ahpimoyaan: entahsopeshikowaatc otepwehtamook ta-anamihtamawaawak o'o nintooshipii'ikaninaan. 28 Okishewaatisiwin Ciisahs Christ kaaTipeniminank kikawiiciiwikowaam. Mii 'iwe.

2 Tehsalanaihkaank 1

1 Niinawint iko nintooshipii'ikaninaan Pwaal (Paul), Silpenahs (Silvanus), Timahti (Timothy). Kiinawaa kitooshipii'amaakoom Tehsalanaihkaank (Thessalonica) kaatashianami'aayek, e'wiiciiwinek Kishemanitoo Kaaoyoohsimank kaye kaaTipenciketc Ciisahs Christ. 2 Shawenimikoowin, koshkwaawaatentamowin kikamiinikowaa Kishemanitoo Kaaoyoohsimaawitc kaye kaaTipenciketc Ciisahs Christ. 3 Kaawiiciotepwehtamoomikooyek, inahte mooshak cinanaahkomankitc Kishemanitoo e'mihkwenimikooyek. Kwayahk i'iwe citootamank aaniihsh awahshime kihcimaaciikin kitepweyentamowiniwaa kaye e'animihshaak kisaaki'itiwiniwaa kahkina eshisaaki'itiyek. 4 Aanti piko kaaishianami'ehtawintc Kishemanitoo kitishimamiihkwaanikoom, aaniihsh mihsawaa hsa wiin e'onciihkaakooyek kaye e'onci​kakwaataki'ikooyek, keyaapi kimashkawentaam, keyaapi kitepweyentaam. Mii 'o enaacimikooyek. 5 Mii 'o kaye kaaoncikihkentaakwaninik ehkwayahkwaninik Kishemanitoo otinaahkonikewin, aaniihsh i'iwe kaaishiwepisiyek kikaonci​te​inentaakosim i'imaa ciayaayek oTipencikewinink. Mii aaniihsh i'iwe wencikakwaatakihtooyek. 6 Kwayahk itahsh wiin okanana'ahtoon, meshkwac kakwaatakihtoowin okamiinaa' i'iweniwa' kaakakwaataki'inekwaa. 7 Kiinawaa kaakakwaatakihtooyek maamaw kikamiinikonaan cianwepiyank a'a Kishemanitoo, mii 'i ahpii kihcikiishikonk pioncinaakositc a'a kaaTipenciketc Ciisahs, ewiihkikitakohshinoomaatc i'i otencalima' e'mashkawisiinitc, 8 kaye ishkote kemashkawahkwanenik ehpikikisitc okameshkocitipa'amawaa' awenena' iko ekaa kaakihkenimaahsinik Kishemanitoon, kaye minihk hsa ko awiyan kaatepwehtansinik i'iwe ominwaacimikoowin kaaTipeniminank Ciisahs. 9 Oko taishitipa'amawaawak cinehpiciayaawaatc nihshiwanaatisiwinink. Tanehpicipahkewinaawak ekaa ciwaapamaahsikwaa kaaTipencikenitc kaye eshiwaahseyaanik omashkawisiiwinini. 10 Mii 'iwe ahpii eshikiishikahk ewiihpiishaatc kaaTipenciketc ewiihkihtakimikotc i'i okwayahkwaatisiima' kaye ewii'maamahkaasinaakotc i'i minihk kaatepwehtaakotc. Kaye kiinawaa kikatakoayaam i'i ahpii, aaniihsh kikiihtepwehtaam nintipaacimowininaan kaakii'wiintamaakooyek. 11 Mii hsa ko ahpane wencianami'ehtamaakooyek, a'a kiKishemanitoominaan ciahpiihtakiminek ciotihsaapantamek i'iwe pimaatisiwin kaaishiantominek, maano kaye okatipihsahtwaan wekonen iko minokekoon kaakii'inentamek citootamek, kaye kahkina kekoon kitepweyentamowiniwaank kaawii'oncianohkaatamek okatipihsahtwaan. 12 Miitahsh ono kekoonan ishihcikaatekin kiinawaa taoncikihtencikaateni owiinsowin a'a kaaTipeniminank Ciisahs, shikwa kaye kiinawaa kikatakomiinikowaa okihtentaakosiwin. Onohsh kahkina taonciimakanoon oshawencikewinink a'a kiKishemanitoominaan kaye kaaTipenciketc Ciisahs Christ.

2 Tehsalanaihkaank 2

1 Kaawiiciotepwehtamoomikooyek! Ninkawiihtashintaan aaniin enentaakwaninik otakohshinowin kaaTipeniminank Ciisahs Christ, i'i kaye keshimaamawinaasihkawank i'imaa eshiayaatc. Kipakohsenimininim 2 ekaa wiipa ciwahkawinikoohsiwek kinaanaakatawencikaniwaank. Kaawiin wiipa kikamikoshkaaci'ikohsiiwaa awiya e'ihkitotc aasha ehpiocihcihsenik kaaTipenciketc okiishikanoom, maakishaa awiya oncikakitotc ahcaahkonaank, maakishaa kaye kii'ihkitom niinawint ekii'ishipii'ikeyaank. 3 Keko kikawanimikohsiiwaa awiya aaniin​iko keihkitokwen. Kaawiin i'i taishihsehsinoon kiishikan, paanima ehta misiwehkamik kiiaanci'itisonaaniwank e'wepinaawaatc ini kaaTipencikenitc, kaye ahpii piayaatc a'a wawiinke kaatipenimikotc macihcikewin – mii 'awe piciinak nihshiwanaatisiwinink keishiwepinintc. 4 Wiin wii'ishpentaako'itiso, kahkina ewii'miikaatank kaa-anami'ehtamaatamowaatc iki pemaatisiwaatc, kaye kahkina kekoon kaamanitoowentaakwaninik. Wiin i'imaa wii'namatapi i'imaa piintik Kishemanitoo owaahkaa'ikanink, wiin ewii'inakintisotc ehKishemanitoowitc. 5 Kaawiin ina kimaamihkawihsiim? Kahkina kikii'wiintamawininim mekwaa kiiwiiciiwinakook. 6 Kekoon itahsh kipihcikemakan ekaa ciocihcihsehsinok. Kiinawaahsh kikihkentaanaawaa wekonen i'i kaakipiayaak. Mayaa tahsh iko ahpii kaaonencikaatek ciocihcihsenik, tanaakosi a'a kaaMaamawiMacaatisitc. 7 Aasha tahsh pimanohkiimakan i'i macihcikewin aakawaya'ii kaaishianohkiimakahk. Kaawiin wiin newacaya'ii taishiwepahsinoon i'i kaawii'ishiwepahk, paanimaa hsa ko inkoci maaciinintc a'awe kaakipishkiketc. 8 Miihsh i'i ahpii tanaako'itiso a'a kaaMaamawiMacaatisitc. A'a tahsh kaaTipenciketc piciinak okanihsaan ini kaamacihcikenitc, i'i opakitanaamowin otoonink e'oncihsenik ewii'aapacihtootc. Okanihshiwanaaci'aan, owaahsesiwin ewiihpiahshicinaakositc, takohshink. 9 A'a tahsh kaaMaamawiMacaatisitc kepinaako'itisotc, tawiihpikikii okashki'ewisiwinini ini Setanan (Satan). Okatootaanan mamaantawihcikewinan, kihkinawaacihcikanan kaye kaamamayakinaakwaninikin ewiihkakwewayeshinketc. 10 Kahkina ko ini macikekoonan oka-aapacihtoonan ewiihkakwe​kakiinawishkimaatc minihk awiyan kaawii'nihshiwanaatisinitc. Kaawiin aaniihsh okiihsaakihtoohsiinaawaa i'i tepwewin, kaawiin otootaahpinansiinaawaa i'i cioncipimaaci'intwaapan. 11 Mii 'iwe Kishemanitoo keoncipiicinisha'amawaatc i'i kewayeshi'ikowaatc, kekashki'ikowaatc citepweyentamowaatc i'i ekaa kaatepwemakahsininik. 12 Miitahsh i'i cipaahtaayaahkonikaniwiwaatc minihk iko ikiweniwak kaatepwehtansikwaa i'i tepwewin, nawac i'iweni ekii'minwentamowaatc maci-inaatisiwin. 13 Kaawiiciotepwehtamoomikooyek, kiinawaa kaasaaki'inek Kishemanitoo! Kiinawaa nintooncimiikwehciwi'aa Kishemanitoo, aaniihsh maawac niikaan kikii'onenimikowaa cipimaaci'ikoowisiyek, ekii'ishianohkiinitc otAhcaahkwan Kishemanitoo, wiin iko citipeniminek, kayehsh ekiihtepwehtamek tepwewin. 14 Mii 'owe kaaishiantominek, mii 'owe minwaacimowin niinawint kaakii'wiintamaakooyek, cionciantominek cioncitepipitamaasoyek okihtentaakosiwin kaawiihpahkwenamawinek kaaTipeniminank Ciisahs Christ. 15 Haw, kaawiiciotepwehtamoomikooyek! Aayiicikaapawik, minciminamok kahkina kaakii'aanihkekihkino'amaakooyek, minihk hsa ko kaahpisintawiyaank kayehsh kaa'ishipii'amaakooyek. 16 Nimpakohsenimaa wiin tipinawe kaaTipeniminank Ciisahs Christ kaye Kishemanitoo kiTetenaan kaakiihsaaki'inank, kaye ehshaweniminank kaakii'oncimiininank mashkawentamowin pishihshik kewiiciiwikoyank kaye mashkawi​ahpenimowin. 17 Nimpakohsenimaa cimashkawentami'inek kaye cimashkawisii'inek kahkina kekoon ciminotootamek kaye ciminokakitoyek.

2 Tehsalanaihkaank 3

1 Miinawaa tahsh kikakwecimininim, kaawiiciotepwehtamoomikooyek, anami'ehtamawihshinaam cimaaciishkaamakaninik kaaTipenciketc otipaacimowin, kayehsh cinikihci-inencikaatenik taapishkoo kaye kiinawaa eshikihci-inentamek. 2 Kaye cipahpii'iyamintc a'a Kishemanitoo ekaa ciotihsaahsiwankitwaa iki kaasanakisiwaatc, iki kaye kaamaci-ishiwepisiwaatc, ekaa kekoon citootawihsiyamintwaa. Aaniihsh kaawiin kahkina awiya otepwehtamowinihsii. 3 Tepwewiniwi tahsh a'a kaaTipenciketc. Mii 'awe kesoonkimashkawisii'inek kaye kemiitaakwenamawinek ini maciaya'aan. 4 Nintishi'ikonaan itahsh a'a kaaTipenciketc e'oncikwayahkwenimikooyek, aasha ekiihpi-ishihcikeyek kaakii'ishiwiintamaakooyek kaye keyaapi ciani-ishihcikeyek. 5 Maano tahsh kaaTipenciketc kikakihkino'amaakowaa peshikwan iko ci-ishisaaki'iweyek taapishkoo wiin Kishemanitoo eshihciketc, kayehsh ci-ishimashkawentamek taapishkoo kewiin Christ kaakii'ishimashkawentank. 6 Kaawiiciotepwehtamoomikooyek! Kitishikakaansomikoom owiinsowinink kaaTipeniminank Ciisahs Christ: kikamanaawiiciiwaawaa awenen ihsa ko otepwehtamo kaawii'mihciontaaci'ikositc ehsaapianohkiihsik, ehpisintansik i'i kihkino'amaatiwin kaakii'wiintamaakooyek. 7 Kiinawaa aaniihsh weweni kikihkentaam cinaapihcikeyek kaakii'ishiwaapamiyaank. Kaawiin 'imaa ninkiihtashikihtimihsiimin kaaishiayaayek. 8 Kaawiin ninkiiwii'mihciahshamikoohsiimin. Kaye ehtipihkahk kaye ehkiishikahk ninkiihkihcianohkiimin, niinawint ninkiiwii'aapacihtoomin nintayishiiwininaanin ekaa ewiihkosikwii'ikoohsiwek. 9 Aanawiin ninkiihteinentaakosimin cikiihpami'iyaankipan, shaakooc itahsh ninkii'anohkiihtamaasomin, kiinawaa cikihkinawaapamiyaank kaainaatisiyaank. 10 Mekwaa hsa ekii'wiiciayaamikooyek kikii'ishiayaankwaamimikoom: kiishpin awiya inentansik cianohkiitc, maano kaawiin tawiihsinihsii. 11 Aaniihsh ninoontaamin aaninta e'ayaayek kaamihciayaanihsipimaatisiwaatc, e'mihcinoocihtamawaawaatc pahkaan awiyan otayintiwinini. 12 Oko tino nintishikakaansomaanaanik kaaTipencikenitc Ciisahs Christan, koshkwaawaatisiwinink ci-inanohkiiwaatc cipami'itisowaatc. 13 Kaawiiciotepwehtamoomikooyek! Keko poonihtoohkek kiminoanohkiiwiniwaa. 14 Kiishpin awiya kaawii'nehpicipisintansik onoweniwan kaaishpii'amaank, kihkinawaatenimihk a'a ehtinowitc. Keko wiici'aahkek, ciakaci'ikotc otishihcikewin. 15 Keko wiin ishinawaahkek cishiinkenimek, aanciko kikakakiihkimaawaa, kiicishaaniwaa ci-inakimek. 16 A'a kaaTipenciketc kaanihtaa​miikiwetc koshkwaawaatentamowin, wiin iko tipinawe kikamiinikowaa mooshak, aaniiniko eshiwepisink. KaaTipenciketc kahkina kikawiiciiwikowaa. 17 Niin iko tipinawe nininc nintaapacihtoon e'oshipii'amaan o'o: Niin Pwaal kipooshoo'ininim. Mii ko 'iwe eshipii'ikeyaan. 18 Oshawencikewin kaaTipeniminank Ciisahs Christ mincikahkina kika-ahshiciwiiciiwikom.

1 Timahti 1

1 Niin Pwaal (Paul) otishinisha'waakanan a'a Ciisahs Christ, ci-ishianohkiiyaan mayaa eshi-inaahkoniketc a'awe Kishemanitoo kaapimaaci'inank, Ciisahs Christ kaye, mii 'awe kitahpenimowininaan. 2 Kitooshipii'amawin kiin Timahti (Timothy), tepwe piko tepweyentamowinink e'onciokosihsiminaan. Shawentaakosiwin, kitimaakinaakoowin, koshkwaawaatentamowin kikawii'onciihtamaak Kishemanitoo Kaaoyoohsimintc, Christ Ciisahs kaye ehTipeniminank. 3 Kitishinantawenimin keyaapi ci-ishikapehshiyan i'imaa Ehpihsahs (Ephesus) ootenaank, kaakii'ininaampaan ahpan kaakii'maacaayaan weti Maahsitooniya (Macedonia) ahkiink. Aaninta awiyak i'imaa pahkaan ishikihkino'amaakewak. Kitanoonin ci-ishiwiintamawatwaa cipoonihtoowaatc 'iwe nahpaac kihkino'amaakewin ekaa cikihkino'amaakehsikwaa miinawaa, 4 ekaa kaye cipisintansikwaa pahkaan tipaacimowinan ini kaye kaapoonihsehsinokin aayaanihketipaacimowinan. Mii 'owe kaaoncikakwepasikwiimakahkin kakwecintiwinan, kaawiin wiin i'iwe kaaishiantawentank Kishemanitoo 'iwe tepweyentamowinink kaa-ayaak. 5 Mii 'owe kaakakweontinikemakahk o'o ninkihkino'amaakewin, cipaahtiinahk saaki'itiwin, cionciayaamakahk minote'ewinink, minokihkenintisowinink kaye, kaatepwemakahk tepwehtamowinink kaye. 6 Aanint i'imaa awiyak kii'oncipahkewak ekii'ishiwanihshinowaatc, anihshaa ehkakweshaakoosontiwaatc. 7 Wii'noonte kihkino'amaakewak Kishemanitoon otInaahkonikewinini, aanawiin ehtashikihkentansikwaa wiinawaa ko otihkitowiniwaan kaye wekonen i'i kaatashintamowaatc ehkwayahkwenimowaatc. 8 Kiinawint itahsh kikihkentaamin e'onishihshik Inaahkonikewin, awenen iko kwayahk keaapacihtootc. 9 Kikihkentaamin kaawiin wiin onci kaaminoishiwepisiwaatc kii'oncioshipii'ikaatehsinoon Inaahkonikewin, iki hsa wiin kaanihtaamamaashiiwaatc, kaakakwetipenintisowaatc kaye, iki kaye kaakihtenimaahsikwaa Kishemanitoon, omacitootamook kaye, kaapehkipimaatisihsikwaa, kaamaanentamowaatc kaye anami'aawin, iki kaye kaanihsaawaatc oniiki'ikowaa', awenen hsa piko kaanihshiwetc, 10 shikwa kaapihshikwaatisiwaatc, kaamacimihsawenimaawaatc kaye wiicininiimiwaa', iki kaye kaakiimoocikimootiwaatc awiya' ciataawaakewaatc, iki kaanihtaa kakiinawishkiwaatc, kaakakiinawishkaacimowaatc kaye, awiya ko kaye kaakakwenakaashkank minokihkino'amaakewin. 11 Mii o'o kihkino'amaakewin kaainahtenik ominwaacimowin kaakihci-inentaakositc kaye kaananaahkomintc Kishemanitoo; mii 'owe minwaacimowin niin iko kaapaminamo'ikooyaan ciwiintamaakeyaan. 12 Nimiikwehciwenimaa tahsh Christ Ciisahs Tepeniminank kaamiishitc mashkawisiiwin, otayaankwaamisii kaakii'inakimitc, kaa'anooshitc cianohkawak, 13 niin kayahte kaakii'maci-inak. Ninkiihkakwaataki'aa, ninkiihpaahpinotawaa kaye. Ninkiihkoohpaatenimik itahsh 'iwe onci ekiihkihkentansiwaan kaa'ishihcikeyaan mekwaa ehtepwehtansiwaampaan. 14 Kayehsh kiihpaahtiinatinini oshawencikewin kaa'miishitc kaaTipeniminank, ahshic i'iweni tepweyentamowin, saaki'iwewin kaye, kaaonciihtamaakoyank Christ Ciisahs e'wiiciiwank. 15 Tepwemakan ihsa 'i ihkitowin, teahpiihtentaakwan kaye kahkina awiya ciotaahpinamowaatc: a'a hsa Christ Ciisahs ekiihpiishaatc o'omaa ahkiink omacitootamoo' cipimaaci'aatc, entahshiwaatc niin itahsh nimaamawentaakos ehtinowiyaan. 16 Mii mayaa 'owe kaakii'oncishawenimitc Kishemanitoo, ekii'inentank Christ Ciisahs wawiinke ciwaapanta'iwetc eshishashiipenimitc, niin aana maamawentaakosiyaan maci-ishiwepisiwinink. Mii 'iwe keoncikihkinawaapantamowaatc kahkina iki naake ketepweyenimaawaatc cimiinintwaa pimaatisiwin wiihkaa keishkwaahsehsinok. 17 Maano tahsh pishihshik ahpane takihci-inenimaa, tananaahkomaa a'a Kihciokimaa pishihshik kaapimaatisitc, wiihkaa kenipohsik, wiyaapamaahsiwintc, mii ehta 'awe kaaKishemanitoowitc. Emen. 18 Timahti (Timothy) ninkosihs, o'o kakiihkwewin kikanawenta'in: taapishkoo kiishaac iko kaakii'inaacimikooyan, miiwan ihkitowinan ciahshwiiwaakeyan mino miikaasowinink. 19 Minciminan i'i kitepweyentamowin, i'i kaye minoinenintisowin. Iki aanint e'wepinamowaatc okii'nihshiwanaacihtoonaawaa otepweyentamowiniwaan, 20 o'o eshiwepisiwaatc Haaiminiiyahs (Hymenaeus), a'a kaye Aalikihsaantar (Alexander). Ninkiihpakitinamawaak cikihkino'amaakowaatc ini Setanan (Satan), cikihkentamowaatc cipaahpinotaakehsikwaa.

1 Timahti 2

1 Niikaan itahsh ninkakaansontaan cianami'ehtamawintwaa kahkina awiya ehpakohsenimonk, e'nanaahkomonk, e'nantotamaakenk kaye. 2 Iki kaye ta-anami'ehtamawaawak kihciokimaak, kahkina kaye awiyak kaakihtentaakosiwaatc, pisaan cioncipimaatisiyank, misiwe kaye ci-ishianami'ewaatisiyankipan kaye ciayaankwaamisiyank. 3 Amiitahsh o'oweni kaaonishihshininik kaaminonank Kishemanitoo kaapimaaci'inank, 4 e'antawenimaatc kahkina awiyan cipimaaci'imintc, cianikihkentaminitc kaye i'i tepwewin. 5 Aaniihsh peshik ayaa Kishemanitoo, shikwa peshik ayaa kepeshiko'iwetc keonciwiiciintinitc Kishemanitoon, ininiwa' kaye. Mii 'awe Ciisahs kaaininiiwitc, 6 kaakiihpakitinitisotc ekiiwiihtipa'ikehtamawaatc kahkina awiyan, mayaa ekii'ocihcihsek cioncikihkencikaatek e'antawenimaatc Kishemanitoo kahkina awiyan cipimaatisinitc. 7 Mii 'owe onci ninkii'inanoonik ciotishinisha'waakanimitc Kishemanitoo, ciawikihkino'amawakwaa iki kaaCoowiwihsikwaa, owiintamaake kaye citinowiyaan, cipapaatashintamaan tepwehtamowin, tepwewin kaye. Kaawiin ninkiiwanimohsii, nintepwe hsa ko. 8 Misiwehkamik ninantawenimaak ininiwak cianami'aawaatc, wawiinke hsa ko kaatipenimikowaatc Kishemanitoon, kaakashkihtoowaatc ci-ishiompinihkeniwaatc e'anami'aawaatc, aaniihsh kaawiin nishkaatisihsiiwak, kaawiin kaye kakweshaakoosontihsiiwak. 9 Ninantawenimaak itahsh ihkwewak kwayahk iko cikakweishi'owaatc, nipwaahkaawinink ci-ishikakweminohkonayewaatc. Kaawiin kaye onsaam okakakweminwaahkwa'ansiinaawaan wiinisihsiwaan, kaawiin kaye osaawishooniyaan ciwaweshi'owaakewaatc, kaawiin kaye kaa-aahkwakinsonitc naapihkaakanimina', ini kaye e'aahkwakintenikin kikishkikanan okakakwekikishkansiinaawaan. 10 Nawac itahsh ishinaakwanini 'a ihkwe ci-ishiwaweshi'owaaketc minohcikewinan, kaainentaakosinitc ini tino ihkwewan ninkohtaanenimaa Kishemanitoo kaaihkitonitc. 11 Taka hsa noohkaatisiwinink okashikakwe kihkentaanaawaa kekoonan, awaac iko pankii cikakwetipeninkehsikwaa. 12 Kaawiin nimpakitinaahsii ihkwe cikihkino'amaakehpan kiimaawaci'itinitc otanami'aa'. Kaawiin oka-kakwe-kapihkawaahsii' ininiwa' cikakwetipenimaatc. Pisaan tapisintam. 13 Aaniihsh niikaan kii'oshi'aakaniwi a'a Aatam (Adam), miitahsh kewiin Iip (Eve) kii'oshi'aa. 14 Kaawiin wiin mayaa kii'wayeshimaakaniwihsii inini, 'awe hsa nihtam ihkwe kii'wayeshimaakaniwi. Mii 'awe nihtam ekiihpiikonank Kishemanitoon otinaahkonikewinini. 15 Iki tahsh ihkwewak tapimaaci'aawak aniokaakaamaawiwaatc kiishpin kaye kapeaya'ii aniayaawaatc tepwehtamowinink, saaki'iwewinink, minwaatisiwinink, anikikiayaawaatc kaye 'imaa ayaankwaamisiwinink.

1 Timahti 3

1 Tepwemakan o'owe ihkitowin: kiishpin inini antawentank ciniikaanisitc anami'aawinink, onishihshinini o'oweni anohkiiwin kaa-antawentank. 2 Antawentaakosi tahsh ekaa kekoon ci-inaatisihsik oniikaanisi. Tapeshikowan ehta wiiwan. Shikwa kaawiin inikaanc okatootansiin opimaatisiwin, tanipwaahkaa tahsh cisakahkamaatisitc. Okanekaamipiintikanaa' awiya' otaawinink, okakashkihtoon kaye cikihkino'amaaketc. 3 Kaawiin itahsh tanihtaa kiiwashkwepiihsii, kaawiin kaye ta-aahkwaatisihsii. Tanoohkaatisi tahsh, weweni kaye tatootaake. Kaawiin kaye okasaaki'aahsiin shooniyaan. 4 Shikwa kwayahk okatipenimaa' otaawinink kaatahshinitc, ehkashki'aatc oniicaanihsa' cipisintaakotc, ehkihci-inenimikotc. 5 Kiishpin aaniihsh a'a inini kihkentansik keshitipenimaatc otaawinink kaa-ayaanitc, aaniihsh ina keshikanawenimaahpan i'i Kishemanitoon kaa-anami'ehtawaanitc? 6 Shikwa kaawiin awiya kaaoshkikwehkaatisitc ta-aawihsii, maakishaa wiipa ko mii aasha e'ishpenintisotc, mii peshikwan keinaahkonintc ini kaakii'inaahkonimintc maciaya'aan ekiihkihtenimonitc. 7 Taonaapamaa tahsh awiya aasha kaaminwakimikotc i'i ekaa kaaotepwehtamowinihsinik, ekaa cipankihshinsik cimenihshentami'itisohsik, ekaa kaye cinakwaanikohsik ini maciaya'aan. 8 Iki tahsh kaye kaawiicihtwaawaatc, peshikwan iko taishiminwaatisiwak, ekaa cinihtaa minihkwehsikwaa shoominaapo, ekaa kaye ciaaskonaatisihsikwaa, 9 e'minciminamowaatc itahsh tepweyentamowin kaakihkentaakohtootc Kishemanitoo, ehkihkenintisowaatc ekaa kekoon e'ishiayaahsikwaa. 10 Pinamaa tahsh tamihcikoci'aawak. Paanimaa tahsh naake wawiinke hsa ko ehkwayahkwencikaasowaatc tainanohkiiwak. 11 Mii​hsa tahsh peshikwan ini wiiwiwaa' keinaatisinihpan, misiwe ko ciminwaatisinihpan. Kaawiin macikekoon tanihtaa aanihko-aacimohsiiwa'. Weweni okakanawentamini opimaatisiwinini, misiwe kaye citepwewiniwinitc. 12 A'a tahsh owiicihtwaa tapeshikowan ehta wiiwan, kwayahk iko ehtipenimaatc oniicaanihsa', otaawinink kaye minihk awiya' kaawiicitaamikotc. 13 Iki aaniihsh kaaminoanohkiiwaatc ishikashkihtamaasowak minwakimikoowin. Kaawiin kaye tashaakwenimohsiiwak ewii'mohshe wiintamaakewaatc aaniin i'i kaaishitepwehtawaawaatc Christ Ciisahsoon. 14 O'owe tahsh kitooshipii'amawin aanawiin wiipa ewiihkakweotihsinaan. 15 Kiishpin tahsh kinwesh ontentiyaan, kikaoncikihkentaan aaniin keishihcikewatc i'imaa Kishemanitoo kaaishitipenimaatc otepwehtamoo'. Mii 'owe otanami'aawin kaaPimaatisitc Kishemanitoo, miiwan ini kaamaamawitipenimaatc, kaa-aahswaahkwa'ikaakaaniwank i'i tepwewin, mii 'imaa wenciaayiicihsek i'i tepwewin. 16 Wawiinke hsa tepwemakan, aahpici kihci-inentaakwan kitanami'aawininaan Kishemanitoo kaakiikihkentaakohtootc: Tepwe kii'naako'itiso e'ininiiwitc, Kii'oncikwayahkwakimaa e'wiiciiwikotc Kishemanitoo otAhcaahkwan, Okii'waapamikoo' encala', Kiihtipaacimaa kaatahswewaanakisinitc ekii'wiintamawimintc, Kiihtepweyenimaa ahkiink, Kii'ishiompishkaa kihcikiishikonk.

1 Timahti 4

1 Kehcinaac aaniihsh ihkitowan Kishemanitoo otAhcaahkwan aaniin keishiwepaninik ishkwaac anikakiishikahk, aanint ewii'oncipahkewaatc otepwehtamowiniwaank, iniweniwa' kaawiihpisintawaawaatc maciaya'aank kaaonciinitc ahcaahkwa', ehkakiinawishkinitc eshikihkino'amaakenitc. 2 Mii 'imaa wenciimakaninikin ono kihkino'amaakewinan kaaishikakiinawishkiwaatc kaawayeshinkeshkiwaatc. Taapishkoo awiya e'nihsitosihsik e'onsaamaahkisotc, amii​'i eshiayaanik onaakatawentamowiniwaa, ekaa keyaapi e'nihsitaawentansikwaa minoishiwepisiwin. 3 Oko tino ishikihkino'amaakewak ekaa ciwiitikehsink, shikwa aanint kekoon cimanaamiicinaakaatek. Okii'oshihtoon itahsh Kishemanitoo kahkina kekoon miicim ciaapacihtoonitc i'i otepwehtamoo' kaakihkentaminitc i'i tepwewin. Paanimaa kiinanaahkomonitc miihsh​i'i cimiicinitc. 4 Aaniihsh kahkina kekoon kaakii'oshihtootc Kishemanitoo kii'onishihshininiwan, kaawiin kekoon awiyak ciaanawentamowaatc, kahkina tahsh ciontinamowaatc e'nanaahkomowaatc. 5 Aaniihsh kiishpin awiya aapacihtootc Kishemanitoon otihkitowinini, nanaahkomotc kaye, mii 'i eshionishihshentaminitc pisaan i'i nahke ci-inaapataninik i'i miicim. 6 Miiwan​ono kihkino'amaw kiwiiciotepwehtamoomak, miitahsh i'i kwayahk Christ Ciisahs otanohkii'aakanan citinowiyan, e'ahshantisoyan ini ihkitowinan kaaishitepwemakahkin, 'iwe kaye kwayahk kihkino'amaakewin kaapipiminisha'aman. 7 Kaawiin kikapimentansiinan ini pahkaan tipaacimowinan kaamaciaya'aawiwankin. Aaniihsh kaawiin tepakentaakwahsinoon ciwiintamaakenk. Mooshak itahsh ishikakwenakaciin anami'ewaatisiwinink. 8 Awiya wiiyawink ishinanamaa'itisotc tepwe acina ominoshkaakon. Kaawiin tahsh acina ehta ominoshkaakohsiin anami'aawin, aaniihsh pishihshik okawiici'ikon, o'o noonkom e'onciminopimaatisitc, i'iwehsh kaye niikaanaya'ii keniayaanik pimaatisiwinink okawiici'ikon. 9 Tepwemakan o'o ihkitowin, kahkina awiya citepwehtank. 10 Mii 'owe kaaoncikakwaatakiiyaank ehkihcianohkiiyaank ekii'ahpenimonotawankitc kaaPimaatisitc Kishemanitoo kaapimaaci'aatc kahkina, memintake ko otepwehtamoo'. 11 Mii hsa ono inaahkoniken, mii 'iwe ishikihkino'amaaken. 12 Keko awiya kikamacitootaakohsii ehteahpiihtaatisihsiwan. Kiin itahsh kakweminoishiwepisin minokakitowinink, ishihcikewinink, saaki'iwewinink, tepweyentamowinink, peyahtakaatisiwinink, ci-ishikihkinawaapamihkwaa kaaotepwehtamowiniwaatc. 13 Kiin iko ayaankwaamisiihkantan cianamihtamaakehtamawatwaa Kihcimasina'ikan, cikakiihkweyan, cikihkino'amaakeyan, piinihsh iko citakohshinaan. 14 I'iwe ahpii kaakii'onaapamikooyan kikiihkanoonikook iki kaakanootamawaawaatc Kishemanitoon, kikii'ohkosaaminikook kaye oniikaanisiik ekii'oncimiinikoowisiyan kekoon Kishemanitoonaank. Keko mihciwaniihkenotanken o'o kimiinikoowisiwin. 15 Ayaankwaamisiihkantan onoweniwan mooshak iko citashiihkaman; kahkina awiya cinikanawaapamihk e'ani-ishinakaciiyan. 16 Keko awaac pankii pakiciihken. Ayaankwaamentan tahsh aaniin eshipimaatisiyan, aaniin kaye eshikihkino'amaakeyan. Aaniihsh kiishpin kahkina ono enitootaman kikapimaaci'itis, iki kaye kaapisintawihkwaa kikapimaaci'aak.

1 Timahti 5

1 Keko wiihkaa kishiikanoonaahken okihtaatisiik, pekihkaac itahsh kikaishikanoonaak taapishkoo e'oyoohsiyan. Iki​tahsh kaaoshkaatisiwaatc taapishkoo kiicihkiweyak kikainenimaak. 2 Ikihsh kaye nawac kaakihtaatisiwaatc ihkwewak taapishkoo e'omaamaamatwaa kikainenimaak. Iki kaye kaaoshkaatisiwaatc ihkwewak taapishkoo e'otawemaamatwaa; mii​ehta​ko pehkaya'ii nahke keshinaanaakatawenimatwaa. 3 Kikakihci-inenimaak iki kaakii'niponitc onaapemiwaa' tepwe kaakiiwahshihsewaatc. 4 Kiishpin itahsh e'oniicaanihsitc a'a tino ihkwe, komaa kaye e'oyooshihsitc, wiinihtamawaa iki apinoonciishak okanikihkentaanaawaa keshipami'aawaatc ini okiiwaatisiihkwen, otanami'aawiniwaank cioncitootamowaatc. Okasakentaanaawaa otinawentiwiniwaa cinikiiwe-pami'aawaatc oniiki'ikowaa' kaye okihciaya'aamiwaa'. Mii aaniihsh 'iweni kaaminwaapantank Kishemanitoo ehtoocikaatenik. 5 A'a tahsh tepwe kaakiiwaatisiihkwewitc, awiyan ehpami'ikohsik, Kishemanitoon ehta otahpenimonotawaan, e'ahpisomaatc ciwiici'ikotc, ehtipihkaninik kayehsh e'anikiishikaninik e'anami'aatc. 6 A'a tahsh kiiwaacihkwe anoociko kaainaatisitc keonciminwentami'itisotc wiinehta, aanawiin ehpimaatisitc e'inintc, wakicaya'ii ehta ishipimaatisi. Aasha tahsh e'nipotc inentaakosi. 7 Miiwan ono ishiwiintamaw, kwayahk iko citootamowaatc, ekaa cimacaacimaahsiwintwaa. 8 Inashke kiishpin kwayahk kanawenimaahsik awiya otinawemaakana', memintake 'imaa otaawinink eyaanitc, kaawiin otaapacihtoohsiin otepweyentamowin, omihciwepinaan inentaakwanini. Awahshime ko ani-inaatisi taapishkoo awiyan kaaotepwehtamowinihsinik. 9 Awiya tahsh kiiwaacihkwe kaawiihpami'ikotc otepwehtamoo', kaa mahshi tatakwakinsohsii ehteahpiihtaatisihsik, ninkotwaahsimitana ehtahsopipoonwehsik. Miitahsh o'oweni keonci ahshitakimintc, kiishpin weweni kaahtootawaakwen kaakii'onaapemitc. 10 Taminwaacimaa kaye e'nihtaa minohciketc, ekii'mino-ompiki'aatc apinoonciisha', ekii'minopiintikanaatc piiwite', e'nihtaa kisiipiikisitenaatc ehpimiayaanitc Kishemanitoon otipenimaakanini, ekiihpiminowiici'aatc kaye ini kaamacihsenitc, ci-inintipan kaye kahkina minohcikewin ekiihkakwekashkihtootc. Mii​hsa 'awe ketakwakimintc. 11 Nawac itahsh kaaoshkiaya'aawitc ihkwe kaawiin taoshipii'waahsii. Aaniihsh e'ishimihsawentank ewii'onaapemitc, mii​hsa​'i keonciasheyiitc kaawii'ishianohkawaahpan Christan. 12 Miihsh i'i keshipiikonank nihtam kaakii'ishiahshotamawaahpan. Mii'i ehkashkihtamaasotc cionahshowaasotc. 13 Shikwa ishinanamaasi anihshaa ko cimihcikakiishikanihshitc, ehpapaa mihcimawatihshiwetc. Miitahsh awahshime e'naakohtootc kekii'inaapatisihsikipan, anihshaa ehpapaaontamisiihkaasotc, ehpapaa mihciaakineyaacimotc, ehpapaatashintank kekoon cipapaamintansikipan. 14 Nawac itahsh ninantawentaan ciwiitikehpan kaaoshkaatisitc kiiwaacihkwe, ciotapinoonciishimitc, cipamihtootc kaye otaawin. Mii 'iwe citootank ekaa cionci macaacimihsinowank awiya kaashiinkentank anami'aawin. 15 Aaninta tahsh kiiwaacihkwek aasha kii'oncipahkeshkaawak 'iwe kekii'inaatisiwaahpan. Miihsh kaaoncipiminisha'waawaatc ini Setanan (Satan). 16 Kiishpin ayaatc ihkwe kaaotepwehtamowinitc, e'okiiwaatisiihkwewinitc otinawemaakanan, wiin iko okakanawenimaan ini otinawemaakanihkwen. Kaawiin i'imaa taonciwiici'imaahsiiwan kaaishimaawaci'itinitc otepwehtamoo'. Mii iitok i'imaa keonciwiici'intwaapan iki tepwe kaakiiwahshihsewaatc. 17 Iki kaaniikaanisiwaatc ehkihkenimintwaa weweni ekiihkakwetootamowaatc otanohkiiwiniwaan kaaishiniikaanisiihkantaakewaatc tainakimaawak niishink (2) awahshime citipa'amawintwaa, memintake ikiweniwak niipiwa' e'anohkaatamowaatc kakiihkwewin, kihkino'amaakewin kaye. 18 Aaniihsh ishipii'ikaate Kihcimasina'ikan: "Keko takipitoonehpisohsii kipishihkiim mekwaa ehpawishkawaatc pahkweshikanimanoominan; pisaan iko oka-amwaan." Shikwa, "Otanohkii oncikashkihtamaaso citipa'amawintc," ishipii'ikaate. 19 Kiishpin awiya anaamimaatc oniikaanisiin, kaawiin aapiinc​iko kikapisintawaahsii. Paanimaa ehta niishin (2), komaa kaye nihsin (3) ehtahsoohkamowaatc i'i anaamimiwewin, tepwe ninkii'waapantaamin e'ihkitowaatc, miitahsh i'i payesh cipisintamampan. 20 Kahkina awiya kaamaashihciketc, mohsheaya'ii taonci'aa, kotak awiyak cikohtamowaatc ekaa ci-ishihcikehsikwaa. 21 Kitayaankwaamimin ehkanawaapamitc Kishemanitoo kaye Christ Ciisahs kaye otencalima' kaaishionakimimintc: onoweniwan kaawiintamawinaan, mooshak iko citootaman. Keko kiishaac onenimaahken keinaahkonatc awiya. Kaawiin awiya pepahkaan kikatootawaahsiik, aaniiniko kaawiihtootaman. 22 Keko wiin papaashiihken cisaaminatc awiya cionakimatipan cianami'ewanohkiitc. Kiishpin maashihciketc kaasaaminatc, kekiin i'imaa kikatakwentaakos. Kanawenintison itahsh cipehkaatisiyan. 23 Piko kaye kiwiintamawin e'maamihkawiyaan: kaawiin ehta nipi kitaa-aapacihtoohsiin. Pankii otaahpinan shoominaapo ciminohsink kiwiihsiniwin, ciantawi'owaakeyan eshinihtaa-aahkosiyan. 24 Aanint awiya omacihcikewinan mohsheaya'ii e'naakwaninikin oniikaanipii'ikonan citipaahkonikaniwitc. Aanint itahsh kaye pitashiayaaniwan otishihcikewinan 'iweti otaanaank, inkotink keatimikotc. 25 Mii 'i peshikwan iki kaaminohcikewaatc, noonkom iko payahtenaakwaniniwan otishihcikewiniwaan. Ampooshke ini mahshi kaanaakwahsinokin piciinak cinaakwaninikin.

1 Timahti 6

1 Kahkina awiya kaaotanohkii'aakaniwitc wiinke okakihtakimaan ini otookimaaman kaatipenimikotc, ekaa awiyan cimacikiishwaatansinik owiinsowinini Kishemanitoon, i'iweni kaye kaaishikihkino'amaakeyank. 2 Awiya tahsh kaaotanohkii'aakanimikotc otepwehtamoon, mii 'i e'ishiwiicihkiweyenimaatc, kaawiin itahsh okaoncimacakimaahsiin otookimaaman. Taka awahshime 'i takakweminoanohkii, aaniihsh otepwehtamoon ini kaawiici'aatc, ehsaaki'aatc. Miiwan​ono ishikihkino'amaaken, ishikakaansonken. 3 Maakishaa awiya wiihpahkaani-kihkino'amaaketc peshikwan kaaishihsitoohsik i'i kaamayaawihsininik kihkino'ikewin. Wiin itahsh iko nintoontinaamin tipinawe e'otihkitowinitc kaaTipeniminank Ciisahs Christ. Mii 'iwe kihkino'amaakewin kaaishikihkino'amaakemakahk aaniin kwayahk keshianami'ewaatisink. 4 Awiya tahsh pahkaan kaaishihsitootc okihkino'amaakewin, ishpenintiso, ekaa tepwe kekoon ehkihkentansik. Onsaam onantamihkwentaanan kaasanakaninikin citashintenikin, e'oshihtootc kaye cioncikakwe-shaakosontinaaniwaninik aaniin keshinihsitohtaakwaninikin ihkitowinan. Mii 'omaa ono wencihsekin ontenintiwin, pahkaanenintiwin, paahpinotaakewin, macikekoonan kaaishianaamenintink. 5 Mooshak itahsh kaye maashiwiiciintiwak. Miiwak​oko kaanihshiwanaacinaanaakatawentamowaatc. Kaawiin keyaapi owiiciiwikohsiinaawaa i'i tepwewin. Inentamook itahsh cionciontisiwaahpan otanami'aawiniwaank. 6 Tepwe hsa awiya okawenootisiinotaan i'i otanami'aawin, kiishpin tepihsewakentank 'iwe minihk kaa-ayaatc. 7 Wekonen i'i kaahpikikisiyank o'omaa ahkiink? Kaawiin kekoon! Wekonehsh kaye i'i kenimaaciitooyank? Kaawiin kekoon. 8 Mii 'iwe, kiishpin iniweniwan ayaayank, miicim, kikishkikan, mii​'i keshina'entamankipan. 9 Iki tahsh kaawii'aahkowenootisiwaatc, ahpan iko okapatakoshkaakonaawaa cikashki'ikowaatc i'i macihcikewin, ewiihtahsoonikowaatc macikekoonan kaaishimihsawentamowaatc ehkakiipaatentaakwaninikin. Mii​ko​'i piinihsh ewii'ishiniihsipinikowaatc keshipanaatisiwaatc ewii'nihshiwanaatisiwaatc. 10 Ina, e'onsaamenimintc shooniyaa mii 'iwe enentaakwahk e'ociipihkaawank kahkina wencisaakikinkin macikekoonan. Aaninta tahsh awiyak e'ahpiihci mihsawenimaawaatc shooniyaan okii'wawaanaayentami'ikowaan, ekii'onciaanawentamowaatc otepweyentamowiniwaa, mii piinihsh ehpiikwentami'itisowaatc niipiwa' kekoon e'mincinawesiwaatc. 11 Kiin itahsh kaa-anohkawatc Kishemanitoo, kahkina oshimonotan ono macikekoonan. Kakwe nakaciinotan minoishiwepisiwin, kwayahk anami'ewaatisiwin, tepweyentamowin, saaki'itiwin, mashkawentamowin, noohkaac ci-inaatisiyan kaye. 12 Minokakwecihkanitiwin hsa inentaakwan i'i kitepwehtamowin. Mii 'imaa ishikakwepahkinaaken pimaatisiwin cimiinikooyan keishkwaahsehsinok. Mii 'owe pimaatisiwin kaakii'ishiantomihk Kishemanitoo ciontinamowatc, 'iwe ahpii kaakii'minowiintaman kaaishitepwehtaman, niipiwa' awiyak ekii'noontawihkwaa. 13 'Owe tahsh kaaishikanooninaan kikanawaapamikonaan Kishemanitoo, mii​'awe kahkina kekoon kaapimaatisiishkank, a'a kaye Ciisahs Christ kaakii'minotipaacintisotc 'iwe ahpii ekii'inaahsamikaapawiihtawaatc ini Paantiyahs Paailatoon (Pontius Pilate). 14 Mii 'owe eshiayaankwaamiminaan, citipaatotaman kahkina 'iwe kaa'ishikanoonikooyan. Misiwe kakwe kwayahkohciken, ekaa kekoon cipana'ansiwan, misiwe cianiminwaapancikaatek, piinihsh iko cipinaako'itisotc 'awe kaaTipeniminank Ciisahs Christ. 15 Opinaakosiwin okaishihsehtooni Kishemanitoon mayaa kaakii'inentaminitc ci-ishihsenik. Mii hsa 'awe Kishemanitoo kaamisiweayaatc shawentaakosiwin, kaye kaamihcipeshikoayaatc tipencikewin. Wiin otookimaamimikoo' ini kahkina kihciokimaa'. Otipenimaa' ini tipencikewin eyaanitc. 16 Wiin ehta kaawiin otayaahsiin nipowin. Waahseyaank ishitaa. Kaawiin awiyan otaakashkihtoohsiini cinaasihkaminihpan. Kaawiin wiihkaa awiyan okii'waapamikohsiin, kaawiin kaye wiihkaa awiyan otaakiihkashkihtoohsiini cikiiwaapamikotc. Kahkina otayaan kihtentaakosiwin, mashkawisiiwin! Emen. 17 Oko tahsh kaatashiwenootisiwaatc o'omaa ahkiink ishikihkino'amaw ekaa ciahpenimonotansikwaa otipinawewisiwiniwaan. Kaawiin aaniihsh kwayahkwentaakwahsininiwan. Meshkwac itahsh oka-ahpenimonotawaawaan Kishemanitoon kaawenoocimiiniminank kahkina kekoon keonciminwentamowank. 18 Ishiwiintamaw itahsh ciminotootaakewaatc, minohcikewin citashiwenootisiinotamowaatc. Tanihtaa-miikiwewak itahsh, 'imaa otipinawewisiiwiniwaank cionciwiici'aawaatc kotak awiya'. 19 Mii 'imaa keishimaawacihtamaasowaatc i'iweni kaaonishihshininik, keshiaapacihtoowaatc niikaanaya'ii cinionciminopimaatisiwaatc. Miihsh i'imaa keni-ishi otihtinamowaatc tepwe 'i pimaatisiwin. 20 Haw, Timahti (Timothy)! Weweni kanawentan i'i kaakiihpaminamo'ikooyan. Keko pimentanken i'iweni aaninta ishianihshaa piko kaaishinoocikokakitowaatc. Onakaashkaanaawaa kwayahk i'i tepwehtamowin. Ishianihshaa inenintisowak ehkihkentaahsowaatc. Keko hsa ko pisintawaahken. 21 Aanawiin ninkihkentaahsomin e'ihkitowaatc, waahsa opanihsitoonaawaa i'i tepwehtamowinink kaainamoninik. Kishemanitoo okishewaatisiwin kikawiiciiwikom.

2 Timahti 1

1 Niin Pwaal (Paul) kitooshipii'amawin, niin Christ Ciisahs otishinisha'waakanan, wiin Kishemanitoo eshiantawenimitc ciwiintamaakeyaan o'o pimaatisiwin, kaakii'ishiniikaaniwiintamaakooyank e'ayaayank e'oncitipentaakosiyank Christ Ciisahsink. 2 Kiin tahsh Timahti (Timothy) kitooshipii'amawin, ninkosihs enaankominaan, kishawenimin. Ampe hsa ono kikamiinikoowis, wiitoohkaakoowin, shawenimikoowin, pisaanisiwin, maakiwetc Kishemanitoo Weyoohsimintc miinawaa Christ Ciisahs kaaTipeniminank. 3 Miiwan​ini peshikwan Kishemanitoon ninkihciaya'aaminaapaniik kaakii'anohkiihtawaawaatc, kaye wiin itahsh niin iko enohkiihtawak. Ninkwayahkwentaan itahsh kaye ehkwayahkohcikeyaan e'anohkiihtawak. Nimiikwehciwi'aa Kishemanitoo, mooshak e'mihkweniminaan e'anami'aayaan ehkiishikahk, ehtipihkahk kaye. 4 Nimaamihkaw ekii'oncikawaapiyan kiipahkewinitiyank. Kinoontewii'waapamin ihsa, miitahsh iko cikihciciihkentamaan. 5 Mooshak nimaamihkaw tepwe eshitepweyentaman, mayaa 'awe koohkom Loowihs (Lois) niikaan kaahtepweyentank, kewiin itahsh a'awe kimaamaa Iyoonihs (Eunice) kaaishitepweyentank, eshikehcinaa'eniminaan tahsh taapishkoo kekiin eshitepweyentaman. 6 Onci 'o kitepweyentamowin kitooncimaamihkawaamin ciompisiyan o'o kaakii'ishimiinihk Kishemanitoo i'iwe ahpii kaahsaamininaan ekii'onakiminaan cianami'ewanohkiiyan. 7 Ini aaniihsh otAhcaahkwan Kishemanitoo kaakii'miininank, kaawiin wiin cikohtaaciyank kitishimiinikohsiinaan, i'iwe hsa wiin mashkawisiiwin, saaki'iwewin, kakiihtaawisiwin cikikisiyank. 8 Miitahsh kaawiin kitaaoncishaakwenimohsii citipaacimintc a'a kaaTipeniminank. Keko kaye niin akatenimihshihken, wiin a'a kaaTipenciketc kaaoncikipa'okooyaan. Kaye kiin otaahpin eshititakwa'oonikoowisiyan cioncikotakihtooyan i'iwe onci minwaacimowin, e'ishimiinihk omashkawisiiwin Kishemanitoo. 9 Mii 'awe kaahpimaaci'inank, kaa'antominank kaye, wiin iko tipinawe citipeniminank ekii'ineniminank. Kaawiin kiinawint kitishihcikewininaan kitooncitootaakohsiinaan, wiin iko tipinawe okii'onentaan ekii'ishishaweniminank. Mewisha cipwaa animaacihsek kekoon, aasha kiishaac kikii'miinikonaan Kishemanitoo oshawencikewin, Christ Ciisahsoon ekii'oncimiininank. 10 Noonkom itahsh mohshenaakwanini oshawencikewin ekii'naakositc a'a kaaPimaaci'inank Christ Ciisahs. Wiin okii'aanihshihtoon i'i nipowin, i'iwehsh minwaacimowin ekii'oncimohshenaakohtootc i'i pimaatisiwin ekaa wiihkaa kepooniayaahsininik. 11 Mii 'iwe minwaacimowin nintinanoonik ciwiintamaakeyaan. Mii 'iwe pemionci-ishinisha'okooyaan otishinisha'waakanan citinowiyaan, cikihkino'amaakeyaan kaye. 12 Miihsh ono kaaoncikakwaatakihtooyaan. Kaawiin wiin nintoonciakacihsii ono aanatootaakooyaan, aaniihsh ninkwayahkwenimaa kaatepweyenimak, ehkashkihtootc i'iwe kaakiihkanawenta'ak, piinihsh iko 'iwe ehkiishikaninik cikanawentamawitc. 13 Kaye kiin ahpane ko kanawentan ini kwayahk ihkitowinan kaakii'ishinoontawiyan. Mii ko kekiin peshikwan ci-ishiwiintaman, cikikisiyan kaye tepweyentamowin, saaki'iwewin, Christ Ciisahs kaaonciihtamaaketc e'wiiciiwank. 14 Onishihshin i'i kikanawenta'ikoowin. Mii'i ishikanawentan, kikawiici'ik Kishemanitoo otAhcaahkwan kaakikishkawiminank. 15 Aasha kikihkentaan kahkina ekii'nakashiwaatc otepwehtamook Eshaawahkiink (Asia) kaa-ayaawaatc, tako kaye ekii'ishihcikewaatc Picelahs (Phygelus), Harmaaciniis (Hermogenes) kaye. 16 KaaTipenciketc itahsh okashawenimaa' kaatahshinitc otaawininiink Anehsihpwaarahsan (Onesiphorus). Niipiwa'aank ninkiihpisoonkite'eshkaak a'a inini, kaawiin kaye kii'onciakacihsii ekiihkipa'okoowak. 17 Weyiip itahsh iko ekiihtakohshink o'omaa Oroomink (Rome) weweni ninkii'nanaantone'ok piinihsh iko ekii'mihkawitc. 18 Maano okainenimikoon ini kaaTipencikenitc okitimaakinaakewinini cionciihtamaakotc paanimaa ocihcihsenik okiishikaamini. Wawiinke kaye kiin kikihkentaan aaniin iko minihk kaakii'ishiwiici'itc Anehsihpwaarahs i'imaa Ehpihsahsink (Ephesus) kaakii'ayaayaampaan.

2 Timahti 2

1 Ninkosihs, kitinin o'owe, kikawii'ishimashkawisii i'i oshawencikewin kaamiinihk Christ Ciisahs ehkikishkawatc. 2 Ono tahsh kekoonan kaakii'noontawiyan e'wiintamaakeyaan niipiwa' awiyak e'noontawiwaatc, miiwan​ono anikihkino'amaw ininiwak kaakwayahkwentaakosiwaatc, kekashkihtoowaatc cianikihkino'amawaawaatc kotak awiya'. 3 Kaye kiin, aaniin minihk kaamiinikooyan kakwaatakihtoowin, aniotaahpinan. Mii 'iwe cionciominoshimaakanihshiimihk a'a Christ Ciisahs. 4 A'awe hsa ko inini kaa-antashimaakanihshiiwitc, nawac wii'ishihcike ciwii'nana'entaminitc iniweniwan kaaonaapamikotc. Kaawiin okapimentansiin i'iweni opimaatisiwin weti kaaonciitc. 5 A'a kaye otamino kaakakwecihkashiwetc, mii ehta cipahkinaaketc na'ihtank i'iweni otaminowi-inaahkonikewin. 6 A'a kaye okihtike kaakihcianohkiitc, mii​'awe keotaahpinankipan ini nihtam onihtaawihcikanink kaaontinikaatenikin, aaniihsh kiihkashkihtamaaso. 7 Naanaakatawentan ono kaaihkitoyaan, kahkina kekoon kaaTipenciketc kikakihkentamoonik cishinihsitohtaman. 8 Maamihkwenim a'a Ciisahs Christ kaahpiontahkaanesitc Tepitihkaank (David), kayehsh ekii'nipohpan miinawaa kiihkiiwepimaatisi. Mii 'iwe eshiwiintamaan i'iwe minwaacimowin. 9 Mii 'iwe minwaacimowin kaaoncikotakihtooyaan, ampooshke e'oncikipa'okooyaan taapishkoo omacihcikeshk. Kaawiin itahsh wiin 'iwe inakintehsinini Kishemanitoo otihkitowin cikipa'ikaatenik. 10 Mii 'iwe kahkina kekoon nintooncishashiipentaan ciwii'wiici'imak ini Kishemanitoo otoonaapamaakana', kewiinawaa ciontinamowaatc i'i pimaaci'ikoowin kemiinikowaatc Christ Ciisahsoon, ahshic kaye kihtentaakosiwin wiihkaa kepooniayaahsininik. 11 Aaniihsh tepwemakan o'owe ihkitowin: Kiishpin tepwe kaawiicinipoomaawanken, kikawiicipimaatisiimaanaan tahsh kaye. 12 Kiishpin shashiipiayaayank mii 'i kaye ciwiicitipencikemank. Kiishpin aanawenimank, kaye wiin kika-aanawenimikonaan. 13 Kiishpin poonitepwehtawank, keyaapihsh wiin takehcinaa'entaakosi. Kaawiin wiihkaa oka-aancihtoohsiin otinaatisiwin. 14 Ono kekoonan maamihkawaasom iki kaanoontawihkwaa. Kishemanitoo enaahsamiitc kikaishiayaankwaamimaak ekaa cikakweshaakoosontihsikwaa ini ihkitowinan. Kaawiin inkotano taainaapatahsinoon, mii ehta cimihcinihshiwanaaci'intwaa kaapisintamowaatc. 15 Weweni kakwewiihkwacihtoon ci-ishikaapawi'itisoyan keshiminwaapamihk Kishemanitoo, taapishkoo anohkii'aakan ekaa kaa-akaci'ikohsik otanohkiiwin, kaye mii 'iwe e'ishiwiintamaakeyan eshikwayahkohsininik Kishemanitoo otepwewin. 16 Keko wiicitoonaamaahken awiyak e'macihtaakwaninik, ehkakiipaatentaakwaninik kaye entashintamowaatc. Nawac waahsa otishikaancishkaakon awiya i'imaa ciayaahsik Kishemanitoonaank. 17 'Iwe okihkino'amaakewiniwaa aanciko tanimaaciishkaamakanini taapishkoo e'inaahpinetc awiya ehpihcipohsenik. Tako kaye niishiwak o'o e'ishikihkino'amaakewaatc Haaiminiiyahs (Hymenaeus), Paailiitahs (Philetus). 18 Mii oko kii'oncipahkewak tepwewinink, o'oweni e'ishikihkino'amaakewaatc: "Aasha kii'ishkwaaishihse kaawii'ishikiiwepimaatisi'ikooyankipan," e'ihkitowaatc. Miitahsh o'o nahke eshinihshiwanaacihtamawaawaatc otepwehtamowinini aaninta. 19 O'o hsa Kishemanitoo ishinaakwanini kaaishitepwetc taapishkoo aayiicionaapihkihsicikan wiihkaa kewahkawishkaahsininik, o'owe e'ishikihkinawaacihsininik: "KaaTipenciketc okiihkaayenimaa' awenena' ini kaatipenimaatc." O'o kaye, "Awenen iko 'awe 'Nintipenimik kaaTipenciketc,' e'ihkitotc, okapoonihtoon omacitootamowin," eshihsininik. 20 Inashke awiya okihciwaahkaa'ikanink e'ayaatc ahcikanan, kaawiin ehta kaaosaawishooniyaa​waapihkaninikin kaye kaawaapaapihkaninikin otayaahsiinan, kaye hsa ko kaamihtikowaninikin kaye waapikaniahcikanan otayaanan. Aaninta eshikihtentaakwaninikin otishiaapacihtoonan, aaninta tahsh tahsokiishik kaaotaahpinank e'nekaamiaapacihtootc. 21 Kiishpin awiya miiwinishintank wekonen hsa ko waanentaakwaninik, taapishkoo minoahcikan tainentaakosi kehci-inentaakwaninik ci-ishiaapatisitc. Aasha aaniihsh okii'miinaan opimaatisiwin ini kaaTipenimikotc, kihtaapatisiwinink ci-inaapaci'ikotc, e'waaweniitc minoanohkiiwinink ci-inaapatisitc. 22 Mii 'iwe wenci-ininaan: keko kekiin pisintanken oshkaatisiiwi mihsawentamowinan. Piminisha'an tahsh minwaatisiwin, tepweyentamowin, saaki'iwewin, koshkwaawaatentamowin. Mii 'iwe ci-ishikakwe wiiciiwatwaa ikiweniwak kwayahkote'ewinink kaaishikanoonaawaatc ini kaaTipencikenitc. 23 Awenen iko kaakakwe​shaakoosonketc ehkakiipaacikiishwetc ehkihkentaahsohsik, keko 'owe pimentanken. Kikihkentaan mii 'imaa e'onciimakahk kiihkaantiwin. 24 Awiya kaa-anohkii'ikotc kaaTipencikenitc kaawiin tanihtaa kakweshaakoosonkehsii. Pekihkaac okakanoonaa' kahkina, tanihtaa kihkino'amaake, okashashiipenimaa', 25 noohkaatisiwinink cikakwemaamiinomaatc ini kaakakwewanaamikotc. Maakishaa Kishemanitoo okamiinaa' cikwehkaatisinitc cipikihkentaminitc i'i tepwewin. 26 Mii 'iwe e'ishipakahkentamowaatc keoncikashki'owaatc i'imaa kaaishitahsoonikowaatc ini Setanan (Satan) kaakii'ishikaahcitinikowaatc ekii'inanoonikowaatc aaniin​iko kaakii'inenimikowaatc.

2 Timahti 3

1 Kihkentan o'o, ishkwaac anikakiishikahk tapiici-ishiwepan cisanakahk i'iwe pimaatisiwin. 2 Aaniihsh iki pemaatisiwaatc wiinawaa piko tipinawe tasaaki'itisowak; okasaaki'aawaan kaye oshooniyaamiwaan. Taishpenintisowak, tamamiihkwaanitisowak, okapaahpinotawaawaan Kishemanitoon. Kaawiin kaye okapisintawaahsiiwaawaa' oniiki'ikowaa'. Kaawiin tanihtaa​miikwehciwentansiiwak; oka-aanawentaanaawaa kaye anami'aawin. 3 Kaawiin kaye okaote'inotawaahsiwaawaa' owiicipimaatisiimaakaniwaa', okasanaki'aawaa' itahsh, ehpapaatashimiwewaatc, ewii'nihtaapiikwahkamikisiwaatc. Omiikaasoshkak tainaawak. Okashiinkentaanaawaa kaaonishihshininik. 4 Tamamishi'iwewak. Kaawiin taonaanaakatawencikanihsiiwak. Okaonsaamentaanaawaa okihtenimowiniwaa. Nawac okaminwentaanaawaa otishihcikewiniwaan ahpiihc wiin cisaaki'aawaahpan Kishemanitoon. 5 Okicaya'ii ehta ko oka-ayaanaawaa anami'aawinink kaaishinaakwaninik, okawepinaanaawaa tahsh i'iwe mayaa kaaishimashkawisiimakaninik. Keko wiiciiwaahken oko tino. 6 Aanint hsa ko onanamaayenimaawaan awiyan piinihsh cinehpici​piintikanikowaatc owaahkaa'ikaniniink, i'imaa e'anitepimaawaatc ihkwewa' kaakakiihtaawentansinik cina'ihtaakowaatc. Oko tahsh ihkwewak otoonsaamentaanaawaa omacihcikewiniwaan. Otanikaancishkaakonaawaa kaye kekoonan anoociko eshimihsawentamowaatc. 7 Miiwak​iki tino ihkwewak kaananaantakihkentamowaatc, ekaa tahsh wiihkaa ehtipikihkentansikwaa 'iwe tepwewin. 8 Ikiweniwak itahsh okihkino'amaakek taapishkoo ishiayaawak Caaniis (Jannes), Caampariis (Jambres), mewisha kaakii'wanaa'aawaatc ini Moosihsoon (Moses). Noonkom peshikwan ishihcikewak oko okihkino'amaakek. Owanaahtoonaawaa 'i tepwewin. Nihshiwanaatanini otinentamowiniwaa. Ayinwaasowak otepweyentamowiniwaank. 9 Kaawiin aahpici kekoon okakashkihtoohsiinaawaa. Piciinak itahsh kahkina okamohshekihkenimikowaan ekiihkakiipaacihcikewaatc, taapishkoo kewiinawaa kaakii'ishiwepisiwaakopanen Caaniis, Caampariis kaye. 10 Kiin itahsh kipioncikihkenim e'aayiintiyaan, wekonen i'i kaaishikihkino'amaakeyaan, kaakakweishihtamaasoyaan kaye kikii'waapam, i'i kaye eshitepweyentamaan, eshishashiipentamaan, eshisaaki'iweyaan, eshimashkawentamaan, 11 kaa'ishionciihkaakooyaan kaye, kaa'ishikakwaatakihseyaan kaye. Kahkina kikihkenim aaniin kaahtootaakooyaan Entiyaahk (Antioch) ootenaank, Aaihkooniyamiink (Iconium), Listaraink (Lystra) kaye, aaniin kaakii'ahpiihcikakwaataki'ikooyaan. Kahkina tahsh ninkii'oncishaapwii'ik kaaTipenciketc. 12 Mii'i peshikwan awenen iko kaawii'oncianami'ewaatisitc Christ Ciisahsoon, kewiinawaa taoncikakwaataki'aawak. 13 Aaniihsh iki kaamacaatisiwaatc, iki kaye owayeshimiwek, awahshime tani-ishiayaawak, niipiwa' ewii'wayeshi'aawaatc. Kaye wiinawaa piko taniwayeshi'aawak. 14 Kiin itahsh, minihk kaapi-ishikihkino'amaakooyan, kaapi-ishitepweyentaman kaye, keyaapi anikakwewiicihtoon, aaniihsh kikwayahkwenimaak iki kaakihkino'amawihkwaa. 15 Shikwa kaapiahkoapinoonciishiwiyan kikiihpioncikihkentaanan ini maawac kaakihci-inentaakwahkin oshipii'ikewinan, ini kaakashkihtoomakahkin cikakiihtaawentamo'ikoyan cioncipimaaci'ikooyan ehtepwehtawatc Christ Ciisahs. 16 Kahkina Kihcioshipii'ikewin kiikihkentamo'iwe Kishemanitoo, kaye kihtaapatan cikihkino'amaakenk i'i tepwewin, awiya kaye wanikihkino'amaaketc ciwaapanta'intc ehkwayahkwahsininik. Inaapatan kaye cimaamiinomiwenk, cikihkino'amawintc kaye awiya aaniin keshikwayahko​ishiayaatc. 17 Mii 'iwe ishimiinaa a'awe kaa-anohkawaatc Kishemanitoon, citeayishiitc kaye kahkina kekoon cionciihtamawintc, kahkina ini wenishihshininikin citootank.

2 Timahti 4

1 Kitayaankwaamimin e'waapamitc Kishemanitoo, a'awe Christ Ciisahs kaye, ketipaahkonaatc ini pemaatisinitc, ini neponitc kaye. Otakohshinowin kaye otipencikewin Christ Ciisahs nintihkito'ikon o'o waa'ininaan. 2 Kiin wiintamaaken Kishemanitoo otihkitowin. Aaniin​iko 'iahpii eshina'inaakwahk wiintamaaken, maano hsa wiin ishinaakwahsinok, wiintamaaken. Kaye kakwekashkimiwen. Kaye maanaasinaman kekoon onci' 'awe kaatootank. Kakaansomiwen, kahkina kekoon cimaminawaakaatisiihkantaman kaye mooshak ci-ishikihkino'amaakeyan. 3 Aaniihsh inkotink taishiwepan cishikasihtamowaatc i'i kwayahk kihkino'amaakewin, nawac ewii'maawantoonaawaatc awiya' kekihkino'amaakowaatc i'iwe wiinawaa piko kaawiihpisintamowaatc. 4 Oka-aniwepinaawaa kwayahk tepwewin cinanaanta pisintamowaatc mayakaacimowinan. 5 Kiin itahsh keyaapi peshikwan iko kakweishikakiihtaawisin, kakweshashiipiayaan ahpii ehkakwaataki'ikooyan. Mii 'iwe ishianohkiin minwaacimowin ciwiintamaakeyan. Tipitootan 'iwe kaaishianohkii'ihk Kishemanitoo. 6 Niin itahsh iko, aasha kekaa mii'o ahpii cipakitinaahswaakaniwiyaan. Aasha tipihse cimaacaayaan. 7 Minokakwecihkanitiwinink ninkii'ahpahtoo. Ninkiihkiishihtoon, ninkiihpikanawentaan i'i kitepweyentamowininaan. 8 Aasha weti nimpii'ikon nintipa'amaakoowin kwayahk hsa ko ekiihtipihsahtwaayaan, keoncimiishitc a'awe kaaTipenciketc weti ahpii keokiishikanomitc. Mii 'awe Okihcitipaahkoniwe misiwe kaaishikwayahkohciketc. Kaawiin niinehta ninkaoncimiinikoohsii, ikiweniwak hsa kaye maawac kaapii'aawaatc cinaakosinitc ehsaaki'aawaatc, tamiinaawak. 9 Weyiip pikakweantawaapamihshin! 10 Aaniihsh ninkii'nakanik a'a Tiimahs (Demas), o'o noonkom iko kaaishiahkiiwaninik ekii'nawacisaakihtootc. Ahpanehsh i'imaa kii'ishimaacaa Tehsalanaihkaank (Thessalonica). Karehsenhs (Crescens) itahsh kii'ishaa Kalehshiyaank (Galatia). Shikwa Taitahs (Titus) kaye kii'ishimaacaa Taalmehshaank (Dalmatia). 11 Mii ehta 'awe waaciiwitc Lok (Luke). Kiin itahsh ontin a'a Maarhk (Mark) cipiwiiciiwihk, ninkawiici'ik e'anohkiiyaan. 12 A'ahsh Tihkihkahs (Tychicus) i'imaa ninkii'ishinisha'waa Ehpihsahsink (Ephesus). 13 Kiin itahsh ahpii pimaacaayan, piitoohkan ninkihcipiinsihkawaakan kaakii'nakatamowak a'a Kaarhpahs (Carpus) i'imaa e'ayaatc Caroowahsink (Troas). Piitoohkan kaye ini masina'ikanan, memintake ko ini pashkwekinonk kaaoshipii'ikaatekin. 14 Kiwiintamawin eshiayaatc a'a Aalikihsaantar (Alexander) Opiiwaapihkohke kaainintc. Aaniihsh ninkiihkihcimacitootaak. KaaTipencikenitc itahsh okatipa'amaakoon otishihcikewinan. 15 Kaye kiin itahsh ayaahshwiihkantaw, aaniihsh okiihkakwewanaahtoon nintipaacimowininaan. 16 Nihtam iko ekiihtipaahkonikooyaan niin iko ninkiihkanoocikehtamaatis, awiya ekiiwii'wiici'ihsik. Kahkina ninkii'nakanikook. Maano tahsh kaawiin oka-akintamaakohsiiwaan Kishemanitoon. 17 Wiin itahsh kaaTipenciketc mooshak ninkiihpiwiici'ik, ninkii'mashkawisii'ik, ekii'oncikashkihtooyaan kahkina cimooshkinewiintamaakeyaan Kishemanitoo otipaacimowin, mii 'i kahkina ko cioncinoontamowaatc iki kaakihkenimaahsikwaa Kishemanitoon. Shikwa ninkiihshaapwii'ikoo aasha ekiihtanentaakosiyaampaan otoonink a'a mihshipishiw. 18 Kaye ninkashaapwii'ik kaaTipenciketc kahkina ini aanawii'macitootaakooyaan, ninkakanawenimik itahsh 'imaa ciotihtamaan oTipencikewinink kihcikiishikonk entashikimaawitc. Mii 'awe ahpane ko mooshak takihtenimaa, wiihkaa hsa ko ciwehkwaahsehsinok! Emen. 19 Pooshoo nintinaak Parihsila (Priscilla), Ahkwila (Aquila) kaye, kahkina kaye entahshiwaatc Anehsihpwaarahs (Onesiphorus) owaahkaa'ikanink. 20 Shikwa kiwiintamawin, Iraastahs (Erastus) kii'ishkwii i'imaa Kwaarintink (Corinth). Caroohpimahs (Trophimus) ninkii'nakanaa 'imaa Maailiitahsink (Miletus) ehkishaataahpinetc. 21 Kiin pikakwetakohshinin cipwaa pipoonk. Kaye kipooshoo'ik Iyoopiyolahs (Eubulus), oko kaye Piyootenhs (Pudens), Laainahs (Linus), Kalwaatiya (Claudia), kahkina kiwiiciotepwehtamoomaakaninaanik o'omaa kaa-ayaawaatc. 22 Maano kitahcaahk okawiiciiwikoon kaaTipencikenitc. Okishewaatisiwin mincikahkina kika-ahshiciwiiciiwikom.

Taitahs 1

1 Niin Pwaal (Paul) Kishemanitoo otanohkii'aakanan, kaye Ciisahs Christ otishinisha'waakanan. Niin hsa kaye ninkii'onenimikoo, ciwiicihtaawak otepwehtamowiniwaan iki pemaatisiwaatc Kishemanitoon kaatipenimikowaatc, cikihkentamowaatc kaye tepwewinini i'iwe peshikwan kaainentaakwahk kitanami'aawininaan, 2 eshiahpenimonotamank kaye i'i wiihkaa keishkwaahsehsinok pimaatisiwin Kishemanitoo kaakii'ahshotamawinank mewisha cipwaa maacihsek kekoon. Kaawiin aaniihsh wiihkaa kiiwanimohsii. 3 Ahpii tahsh mayaa ekii'ocihcihsenik, okii'naakohtoon o'o pimaatisiwin otihkitowinink. Kaye niin tahsh ninkii'inakimikoo cipapaatashintamaan, aaniihsh Kishemanitoo kaapimaaci'inank kii'inaahkonike. 4 Kiin Taitahs (Titus) kitooshipii'amawin, kiin kaaokosihsiminaan i'imaa peshikwan e'ishitepwehtamank. Taka Kishemanitoo Kaaoyoohsimintc kaye Ciisahs Christ kitOopimaaci'iweminaan kikawaapanta'ik okishewaatisiwin kaye pisaanisiwin kikamiinik. 5 Mii hsa tahsh i'i kaakii'oncinakaninaan weti Kariiht (Crete) minihsink, cikwayahkonaman ono kaakiihkiishionahtehsinokin kaye cionaapamatwaa keniikaanisiwaatc anami'aawinink i'imaa kaatahsinkin ootenawan, ci-ishihcikeyan kaakii'ininaan. 6 Miitahsh a'a kaaniikaanisitc anami'aawinink eshinaakwaninik kekoon ci-ishianaamentaakosihsik, cimihcipeshiko'aatc kaye owiitikemaakanan, oniicaanihsa' kaye ciotepwehtamowininitc, citinowihsinikipan kaanihtaainimintc ehkiiwashkwenitc, ehshashiipihtaminitc kaye. 7 A'a hsa kaaniikaanikanawaapantank anami'aawin, ishinaakwanini wiinke piko kekoonini ci-ishianaamentaakosihsik. Aaniihsh Kishemanitoon okanawencikehtamawaan. Kaawiin kaye wiin ehta ko taishpenintisohsii, kaawiin kaye ciwahkewikitaasotc, kaawiin kaye cinihtaaminihkwetc. Kaawiin kaye ciaahkwaatisitc, kaawiin kaye cisaaki'aatc shooniyaan. 8 Mii hsa tahsh ciminwentank cipiintikanaatc awiya' otaawinink, cisaakihtootc kaye kaaonishihshininik, weweni cipimaatisitc, kwayahk kaye citootawaatc awiya', kaye Kishemanitoon kaaishiminwentaminitc ci-ishipimaatisitc. Cikashkihtootc kaye wiinke piko cikanawenintisotc aaniin eshipimaatisitc. 9 Oniikaanisii kaye okakihciwinaan i'i kaatepweyentaakwaninik ihkitowinini kaaishiayaanik kwayahk kihkino'amaatiwinink. Miitahsh keishikashkihtootc cikakaansomaatc awiya' kwayahk kihkino'amaakewinink kaye cishaakoosomaatc i'i kaa-aashitemiwenitc. 10 Aahpici tahsh paahtiinowak kaashashiipihtamowaatc anoociko kaye e'ihkitowaatc, e'waniwishiwewaatc kaye. Miiwak​oko kaakii'ishitipentaakosiwaahpan kaapioncikwehkaatisiwaatc i'imaa nahke Coowa' kaaishianami'aanitc. 11 Miitahsh eshinaakwaninik cikakwekipihtinintwaa, aaniihsh onihshiwanaacihtamawaawaa' awiya' otepwehtamowinini, ampooshke kaatatahshinitc i'imaa taawinan cipoonitepwehtaminitc, e'ishikihkino'ikewaatc aaniin kekii'ishikihkino'ikehsikwaapan. Kaawiin kwayahk tootansiiwak, shooniyaan itahsh ehta kaaonci-ishihcikewaatc. 12 Peshik itahsh ini Kariiht ininiwak kaainakimaawaatc ekiihkanoocikehtamawaanitc manitoon o'o kii'ihkitowan: "Iki hsa Kariihtink kaa-ayaawaatc mooshak kakiinawishkiwak, maciaya'aawihshink kaye inentaakosiwak, wiinke kaye ehkihtimishkiwaatc e'nihtaakaashakewaatc." 13 Tepwe tahsh i'i kaakii'ihkitotc. Mii hsa tahsh i'i keonciayaankwaamimatwaa kwayahk tepwehtamowinink ci-ishipimaatisiwaatc, 14 cipapaapisiskentansikwaa kaye ini Coowi atihsoohkewinan, cipisintawaahsikwaa kaye aaniin enaahkonikenitc i'i ininiwa' kaakii'nakataminitc tepwewinini. 15 Iki tahsh kaapehkaatisiwaatc, kahkina kekoon pehkanini, iki tahsh wiin kaawiinaatisiwaatc, kaatepwehtansikwaa kaye, kaawiin kekoonini pehkahsinini, aaniihsh onaanaakatawentamowiniwaan kaye okihkenintisowiniwaan wiinentaakwaniniwan. 16 Miitahsh ehkitowaatc ehkihkenimaawaatc Kishemanitoon, otanohkiiwiniwaan itahsh otishinaakohtoonaawaa ehkihkenimaahsikwaa e'ishihcikewaatc, ehshiinkentaakosiwaatc, ehshashiipihtamowaatc kaye. Kaawiin itahsh kekoon ahpiihtentaakosihsiiwak, mihsawaa piko kwayahk cikii-ishihcikewaahpan.

Taitahs 2

1 Kiin itahsh wiin ishikihkino'amaaken peshikwan ci-inentaakwahk i'i kaakwayahkohsink kihkino'ikewin. 2 Kihkino'amaw ahkiwensiwak cikanawentamowaatc otishihcikewiniwaan, cinipwaahkaapimaatisiwaatc, kwayahk ci-inentamowaatc, cimashkawitepwehtamowaatc kaye, cisaaki'iwewaatc, wiihkaa kaye cipakiciihsikwaa. 3 Iki kaye kaakihciaya'aawiwaatc ihkwewak cikii-inaatisiwaahpan ihkwewak tino kaakohtaanenimaawaatc Kishemanitoon, kaawiin wiin cipapaa anoociko ihkitowaatc, citipenimikohsikwaa kaye shoominaapo, cikihkino'ikewaatc tahsh kaaonishihshininik, 4 cikihkino'amawaawaatc kaaoshkaatisinitc ihkwewa' cisaaki'aanitc onaapemini, cisaaki'aanitc kaye oniicaanihsini, 5 kwayahk kaye cikanawentaminitc opimaatisiwinini, cipehkaatisinitc kaye, kaaishitaanitc kaye citananohkiinitc, ciminwaatisinitc, cina'ihtawaanitc kaye onaapemini, Kishemanitoo otihkitowin hsa anoociko cionci-icikaatehsininik. 6 Kakaansomihkwak itahsh kaye kaaoshkaatisiwaatc ininiwak kwayahk cikanawentamowaatc opimaatisiwiniwaan. 7 Kahkina tahsh kekoon kaaishihcikeyan, waapanta'iwen cikihkinawaapancikaatekin ini kiminohcikewinan, cikwayahkonaakwahkin ini kikihkino'ikewinan, cinipwaahkaapimaatisiyan. 8 Minokiishwewinan itahsh ehta aapacihtoon awiya anoociko ci-inihsinohk, iki hsa kaashiinkenimihkwaa ta-akaciwak, aaniihsh kikakwiinawi-ikonaanik. 9 Iki kaye anohkii'aakanak cipatapiihtawaawaatc otookimaamiwaa', misiwe piko ci-ishiminwaapamikowaatc, ciaayaashitemaahsikwaa kaye kiikanoonikowaatc. 10 Cikimootimaahsikwaa kaye otookimaamiwaa', i'i hsa ci-ishihcikewaatc mooshak iko ciwaapanta'iwewaatc kwayahk e'ishipimaatisiwaatc, ehtepweyentaakosiwaatc kaye. Mii hsa tahsh misiwe i'imaa keoncikihci-inencikaatek i'i kaaishikihkino'amaatinaaniwitc Kishemanitoo kitOopimaaci'iweminaan. 11 Kishemanitoo aaniihsh okii'naakohtoon oshawencikewin kahkina pemaatisinitc keoncipimaaci'intwaa. 12 Miitahsh i'imaa wencikihkentamank ciaanawentamank ini ishihcikewinan Kishemanitoo kaashiinkentank, ini kaye ahkiiwi-mihsawencikewinan. Miitahsh eshiantawenimikooyank weweni cikanawentamank kipimaatisiwininaan, cikwayahkwaatisiyank kaye, ci-ishipimaatisiyank kaye Kishemanitoo kaaishipakohseniminank o'omaa ahkiink, 13 e'ahshawaapantamank itahsh i'i kaapiihtooyank kitahpenimowininaan keahpiihciminwentaakwahk, kaye ciwaapantamowank okihci-inentaakowisin Christ Ciisahs kikihciKishemanitoominaan kaapimaaci'inank. 14 Wiin aaniihsh kiihpakitinitiso kiinawint onci, ekiihtipa'onank i'imaa kahkina macitootamowinink cioncitipentaakosihsiwank, kaye ekiihpehki'aatc pemaatisinitc wiin iko ewiihtipenimaatc, i'i mehsawentaminitc ewii'minohcikenitc. 15 Miiwan itahsh ono tashintan, kakaansom iki kaanoontawihkwaa kaye cionci'atwaa wanitootamowaatc. Aapacihtoon kaye kahkina kitahpiihtentaakosiwin kaaishiniikaanentaakosiyan. Keko pakitinaahken awiya ciaanawenimihk.

Taitahs 3

1 Wiintamawihkwak itahsh cipatapiihtawaawaatc kaatipenimiwenitc, i'i kaye kaaokimaawentaakosinitc, cinana'ihtawaawaatc mooshak iko ciwawehpemiiwaatc citootamowaatc kaaonishihshininik. 2 Wiintamaw kaye cimaci-inaahsikwaa awiyan, mooshak itahsh iko ciwaapanta'aawaatc kahkina awiya' e'noohkenimaawaatc, pisaan​iko kaye awiya' e'minowiiciiwaawaatc. 3 Aaniihsh kekiinawint aapitink kikiihkakiipaatisimin, ekiihshashiipihtamank, ekii'wanihshimikooyank kaye, ekiihtipenimikoyank wekonen iko mihsawencikanan, ekii'antawentamank mooshak ciminomanci'oyank. Kekiinawint iitok kikii'macitashinkemin, kikii'mihsawentamaakemin kaye, ekiihshiinkenimikooyank, ekii'nishkenintiyank kaye kahkina. 4 Ahpii tahsh Kishemanitoo kitOopimaaci'iweminaan okishewaatisiwin kiinaakohtootc, 'iwe nahke kaye kaaishishawenimaatc i'i pemaatisinitc, 5 kikiihpimaaci'ikonaan. Kaawiin tahsh wiin kiminoanohkiiwininaanink kaakii'ishihcikeyank, i'imaa hsa wiin iko okoohpaasinaakewin kikii'oncipimaaci'ikonaan. A'a hsa Kishemanitoo otAhcaahkwan kikii'ishihcike'ikonaan, kikiihkisiiyaapaawanikonaan ekii'oshkinihtaawiki'inank, oshkipimaatisiwin kaye ekii'miininank. 6 Miihsh ono otAhcaahkwan Kishemanitoo kaakii'wenoocisiikinamawinank Ciisahs Christ kaapimaaci'inank onci. 7 Mii hsa tahsh okishewaatisiwinink cionci-inakiminank kwayahk ciminowiiciiwank, kaye citepinamank i'i pimaatisiwin wiihkaa keishkwaahsehsinok kaa-ahpenimonotamank. 8 Tepweyentaakwan itahsh o'o ihkitowin. Kinantawenimin itahsh weweni ciwiintamaakeyan ono kihcikekoonan, iki hsa kaatepwehtawaawaatc Kishemanitoon ciayaankwaamisiwaatc aahpici ciminotootamowaatc mooshak. Aahpici aaniihsh minonaakwan i'i cikii-ishihcikenaaniwankipan, kahkina kaye awiya taonciminohse. 9 Keko tahsh wiin wiici'aahken awiyak anihshaa piko kaakiihkaantiwaatc kaye kaamihkootamowaatc aanti kaapiontahkaanesiwaatc, kaye maashikanoonitiwaatc. Keko kaye wiicihtoohken ehkakweshaakoosontink i'i onahshowewin kaaihkitoomakahk, aaniihsh kaawiin kekoon tainaapatahsinoon i'i ishihcikenk. Kaawiin kaye kekoon ahpiihtentaakwahsinoonan. 10 Kiishpin itahsh awiya kaawanishkwe'iwetc, ayaankwaamim aapitink, piinihsh itahsh niishwaa (2), mii hsa ishiaanawenim pisintawihsinohk. 11 Kikihkentaan aaniihsh a'a inini e'maci-ishiwepisitc, i'imaa hsa otishihcikewinink oncinaakwanini e'wanitootank. 12 Ahpii tahsh piicinisha'wak Aartimahs (Artemas) komaa kaye Tihkihkahs (Tychicus) weti kaaishiayaayan cinaapishkawihk, wiinke kakwekashkihtoohkan cipiantawaapamiyan weti Nihkaahpalihs (Nicopolis) ootenaank, aaniihsh aasha ninkii'inentam ewiihtashipipoonihshiyaan weti. 13 Wiinke tahsh kakwewiici' 'awe Siinahs (Zenas) onaatamaake, Ahpwaalahs (Apollos) kaye, cimaacaawaatc i'i kaawiihpapaami-ayaawaatc, kehcinaac kaye ciwiici'atwaa kekoonini cinoontehsehsikwaa. 14 Mii hsa eshinaakwaninik kiwiicitepwehtamoominaanik cikihkentamowaahpan mooshak iko cikakweminotootamowaatc, cikashkihtamaasowaatc kekoonini cinoontehsehsikwaa. Kaawiin wiin anihshaa piko cimihcipimaatisiwaahpan. 15 Oko tahsh kahkina kaawiiciiwiwaatc kipooshoo'ikowaak. Pooshoohtamawihshinaam itahsh cipooshoo'atwaa kaye oko kaasaaki'iyamintwaa onci 'iwe kitepwehtamowininaanink. Kishemanitoo okishewaatisiwin kikawiiciiwikom kahkina kaatahshiyek.

Paailiiman 1

1 Niin Pwaal (Paul), kaaonci​kipa'okooyaan Christ Ciisahs. Niwiiciiwaa Timahti (Timothy) kiicihkiwensinaan. Kitooshipii'amaakoo kiin Paailiiman (Philemon) kaasaaki​wiiciiwikooyan niwiitanohkiimaakaninaan. 2 Iki kaye nintako'oshipii'amawaanaanik otepwehtamook kaamaawaci'itiwaatc kiwaahkaa'ikanink a'a kaye nintawemaanaan Aahpiya (Apphia) onci Christink. A'a kaye niici​shimaakanihshiiminaan Aarhkhipahs (Archippus). 3 Taka Kishemanitoo Koohsinaan, kaaTipenciketc Ciisahs Christ kaye kikashawenimikowaa cimiininekwaa kaye pisaanentamowin. 4 Niicihkiwe Paailiiman entahswaa kiianami'aayaan kitanami'ehtamawin e'miikwehciwenimak kaye ninKishemanitoom. 5 Ninaanoontam ehshawenimimatc kahkina Kishemanitoo opimaatisiima', ehtepweyenimatc kaye kaaTipenciketc Ciisahs. 6 Miitahsh eshi​anami'aayaan o'o kaashi​wiiciintiyank i'imaa kitepwehtamowininaanink, miihsh aanciihke cinihsitohtamank kahkina eshi​shaweniminank e'wiici​pimaatisiimank Christ. 7 Niicihkiwensi, wiinke hsa nintooncikihciciihkentam, nintooncimashkawentam kaye i'i kaashi​saaki'iweyan. Kahkina kiciihki'aak ote'iwaank Kishemanitoo opimaatisiima'. 8 Miitahsh kaaonci​tepakenimoyaan e'owiicihkiwentiyank i'imaa Christink cikii'anooninaampaan aaniin kekii'ishihcikeyampan. 9 Ehsaaki'inaan tahsh, kiwii'mihci​kakwecimin. Niin iitok a'a Pwaal ahkiwensi, kipa'waakan onci Christ Ciisahs. 10 Miitahsh o'owe eshi​kakweciminaan, ehkakwetwehtamawak Onehsimahs kaaokosihsiyaan i'imaa Christink. Oteten ekii'inawemitc otahcaahkonk mekwaa ehkipa'okoowak. 11 Mii wa'a otaanaank kekoon kaakii'inaapaci'aahsiwatc. Noonkom tahsh kikihtaapaci'aa, keniin tahsh ninkihtaapaci'aa. 12 Miitahsh a'a kaakiiwenisha'amawinaan taapishkoo ninte' e'ishinisha'amawinaan. 13 Ninantawenimaa o'omaa cikii'ayaahpan ciwiici'ihpan o'o kaakipa'okooyaan minwaacimowin onci. Wiin ciwiici'ihpan cikii'naapishkawihkipan. 14 Kaawiin tahsh kekoon niwii'ishihcikehsii eshi​antawentansiwan. Miihsh eshi​mihsawentamaan kiin iko i'i kitinentamowinink ci'onci'ishihcikeyan. Kaawiin kekoon niwii'ishihcikehsii paanimaa kii'inentaman. 15 Mii maawiin i'i kaakii'onci​nakanihk acina, ahpii tahsh pikiiwetc mooshak ciwiiciiwihk. 16 Kaawiin wiin ehta anohkii'aakanink ci'inakimatc, kaasaaki'intc tino wiicihkiwemaa ci-inenimatc. Wiinke niin ninkihtaapatenimaa. Nawac tahsh kiin kikakihtaapatenimaa ehtinowitc anohkii'aakan kaye tahsh owiicihkiwensiimaa ehtepweyenimaatc Christan. 17 Kiishpin tahsh inenimiyan kiwiitanohkiimaakan, kiiwe​otaahpin tahsh taapishkoo niin kekiih​tootawiyampan. 18 Kiishpin tahsh kekoon kaa'ishi​wanitootawinokwen, kiishpin kaye kekoon masina'amawihk, niin i'i masina'ikeihshin. 19 Niin hsa piko kaaoshipii'amawinaan: "Niin iko kikatipa'amawin." Kaawiin memwehc cimaamihkoonotamawinaan, kiin iitok iko kimasina'amawihsh i'iwe kaakii'ishi​wiici'inaampaan. 20 Taka tahsh kaasaaki'inaan niicihkiwensi, minotootawihshin kaaTipenciketc onci. Kitoowiicihkiwensiimin iitok i'imaa Christink. Wiici'ihshin ciciihkentamaan. 21 O'o tahsh kaaishipii'amawinaan ehkakweciminaan, ninkihkentaan i'i ci'ishihcikeyan. Ninkihkentaan iko awahshime ci'ishihcikeyan. 22 Kaye tahsh kikakwecimin cikwayaancihtooyan pahkehcikan keshi​nipaayaan. Miihsh eshi​pakohsentamaan Kishemanitoo ci'ishihciketc kahkina kaashi​kakwecimek miinawaa cipikiiwenotawinakook. 23 Kewiin Ehpahparahs (Epaphras) kipooshoo'ikowaa kaawiicikipa'okoomitc o'omaa Christ Ciisahsink onci. 24 Iki kaye kaawiitanohkiimakwaa kipooshoo'ikowaak. Miihsh eshinihkaasowaatc Maarhk (Mark), Eristaarhkahs (Aristarchus), Tiimahs (Demas), a'a kaye Lok (Luke). 25 Taka kaaTipenciketc Ciisahs Christ kaashi​kishewaatisitc kikawiiciiwikowaam.

Hiiparoowiwak 1

1 Mewisha tahsh wiin Kishemanitoo pepahkaan inahke okii'ishikakanoonaa' kaakii'okehteya'aamiwank, okehtetipaacimowininiima' iitok ekii'aapaci'aatc, 2 noonkom itahsh ono ishkwaac kaanikakiishikaninik oKosihsan otaapaci'aan ehkanooninank. Kishemanitoo aaniihsh okii'onakimaan kahkina kekoonini piciinak citipentaminitc, mii kaye i'imaa oKosihsink kaa'oncioshihtootc ahkiini. 3 Miitahsh a'a oKosihsimaa kaanaakohtootc Kishemanitoon kaaishiwaahseyaanik okihci-inentaakosiwinini, mii kaye mayaa Kishemanitoon kaainentaakosinitc kaainaatisitc. Otihkitowin kaakashki'ewisiimakaninik hsa otoonciminciminaan kahkina kekoonini. Ahpii tahsh kaahkashkihtootc aaniin keshipehki'imintc ininiwa' omacitootamowininiink onci, miitahsh kaa'ishiapitc okihcinihkiniink inahke Kishemanitoon kaaishiapinitc, kaamaamawi​mashkawisiinitc i'imaa maawac ishpimink. 4 A'a hsa oKosihsimaa kiihpitinowi nawac ci-ishpentaakositc ahpiihc wiin i'i encala', amiitahsh kaye peshikwan awahshime e'ishi-ishpentaakwaninik owiinsowin Kishemanitoon kaakii'miinikotc, ahpiihc wiin i'i encala' kaaishiwiinsonitc. 5 Kishemanitoo hsa kaawiin wiihkaa okii'inaahsiin peshik encalan: "Kiin ninKosihs, Noonkom kaakiishikahk kimaaciioTetemihsh." Kaawiin kaye wiihkaa okii-ishitashimaahsiin encalan: "NinkaoTetemik hsa, Kewiin tahsh ninkaoKosihsimaa." 6 Miinawaa tahsh, ahpii Kishemanitoo kiihpiicinisha'waatc o'omaa ahkiink ini nihtam kaakii'oKosihsitc kii'ihkito: "Kahkina Kishemanitoo otencalima' oka-anami'ehtawaani." 7 O'o tahsh wiin Kishemanitoo otinaa' encala': "Kishemanitoo hsa mii 'i eshi'aatc i'i otencalima' cinootinowinitc, Kaapamiihtaakotc kaye otishi'aa' ci-ishkotewinitc." 8 O'o tahsh wiin Kishemanitoo otinaan ini oKosihsan: "Kiin Kishemanitoo! Kitookimaawiwin kaawiin wiihkaa tapooniayaamakahsinoon. Aahpici kaye weweni kikakwayahkotootawaak iki kaatipenimatwaa kitookimaawiwinink. 9 Aaniihsh kisaakihtoon i'i kaakwayahkonaakwahk, kishiinkentaan kaye i'i kaamaanaatahk. Miitahsh o'oweni Kishemanitoo kaaoKishemanitoomiyan, kaakii'oncionakimihk cikihciokimaawentaakosiwatc; Kaakii'oncimiinihk kaye ciminwentaman i'imaa kikihtentaakosiwinink; kaawiin itahsh wiin okii'ishimiinaahsii' i'i kiwiiciiwaakana'." 10 Kaye kii'ihkito: "Kiin, kaaTipencikeyan, kikii'onahtoon o'o ahki ahpii kiimaacihsek kahkina kekoon, Tapinawe hsa kininciin kikii'aapacihtoonan e'oshihtooyan ini kahkina ishpimink kiishikonk kaa-ayaakin. 11 Ini hsa tanihshiwanaatanoon, kiin itahsh keyaapi kika-ayaa. Taapishkoo kaaishicaakishkikaatekin kikishkikanan tani-ishiayaawan. 12 Kikana'iikinaan kaye kihcikiishik taapishkoo kaaishina'iikinikaatek kashkiikiiwin, Ta-aancihcikaatewan kaye taapishkoo kikishkikanan kaaishiaancishkikaatekin. Kiin itahsh wiin peshikwanonk kikaishiayaa, Kipimaatisiwin kaye kaawiin wiihkaa taishkwaahsehsinoon," ekii-inaatc. 13 Kishemanitoo kaye kaawiin wiihkaa otinaahsiin peshik encalan: "O'omaa hsa ishiapin ninkihcinihkink inahke, Paanimaa kiihshaakoocihtamawinaan kaamiikaanihkwaa ciayahpisitepiyan." 14 Awenenak itahsh iki encalak? Mii hsa e'ahcaahkowiwaatc e'anohkiihtawaawaatc Kishemanitoon e'ishinisha'ontwaa kaye ciwiici'aawaatc i'i kaawii'miinimintc pimaaci'ikoowin.

Hiiparoowiwak 2

1 Mii hsa tahsh keoncimashkawi​minciminamankipan ini kaakiihpinoontamank, ciwaniwinikohsiwank kotak kihkino'amaakewinan. 2 I'i tipaacimowin kaakii'aanihke wiintamaakewaakopanen iki encalak kiihkihciwentaakwanini. Awenen hsa kaakiihpiikonank, oncita kaakiihpisintansik kaye, okii'otihsikon kakwaataki'ikoowin. 3 Aaniin itahsh kekiinawint keoncishaapwiiyankipan kiishpin aanawentamank i'i kaamaawaci​niikaanentaakwahk pimaaci'ikoowin? Aaniihsh wiin iko kaaTipenciketc okiihtipaatotaan o'o pimaaci'iwewin, iki hsa kaye kaakii'noontamowaatc, miiwak ikiweniwak kaanaakohtamawinankitwaa ehtepweyentaakwaninik. 4 Kishemanitoo hsa kaye okiihtakowiicihtamawaa' otipaacimowinini kihkinawaacihcikanan ekii'aapacihtootc, kaamaamahkaasinaakwaninikin kaye, kihci-ishihcikewinan kaye, shikwa kaaishimiikiwenitc otAhcaahkwan kaakii'ishi​maamaata'oohkiitc wiin iko otinentamowin e'aapacihtootc. 5 I'i hsa kaatashintamaank oshkiahki ewiihpitakohshinoomakahk, kaawiin Kishemanitoo okii'ishipakitinaahsii' encala' citipentaminitc. 6 I'i hsa Kihcimasina'ikan ishipii'ikaate: "Kekoon ina inini inentaakosi, cinaanaakatawenimatipan? Aaniin itahsh enentaakositc awiya pemaatisitc cinaanaakaci'atipan? 7 Acina hsa ehta kikiihtapahsentaakosi'aa aaniin kaa-ahpiihtentaakosinitc encala', Kikiihkikipihtaanohkwaane'aa kihci-inentaakosiwin, kihtentaakosiwin kaye. [Kikii'ishi'aa kaye kahkina kekoonini citipentank kininciink kaakii'oncioshihtaawatc.] 8 Kikii'ishi'aa kaye kahkina kekoonini citipentank citahtahkohkaatank." E'ishipii'ikaatek hsa Kishemanitoo ekii'miinaatc ininiwan citipentaminitc kahkina kekoonini, kaawiin kekoon okii'ishkonansiin ketipentansinik. Kaawiin itahsh mahshi kiwaapamaahsiwaanaan inini citipentank kahkina kekoonini. 9 A'a tahsh wiin kiwaapamaanaan Ciisahs kaakii'ishi'intc acina citapahsentaakositc ahpiihc wiin i'i encala', miitahsh Kishemanitoon okishewaatisiwininiink ekii'oncinipoohtamawaatc kahkina awiyan pemaatisinitc. Inashke tahsh noonkom kiwaapamaanaan ehkikaanohkwaanaatank kihci-inentaakosiwin, kihtentaakosiwin kaye, aaniihsh wiin piko kiihkakwaatakihtoo ahpii kiiwii'nipoohtamaaketc. 10 Kishemanitoo hsa kahkina kekoonini kaaoshihtootc, kahkina kaye kekoonini kaakanawentank. Aahpici hsa kii'na'inaakwanini ci-ishi'aatc Ciisahsoon okakwaatakihtoowininiink misiwe ci-ishikiishinaakohcikaniwinitc, ewiihpiinaatc i'i kaapaahtiinonitc okosihsimaa' ciwiitoohkaasonitc okihci-inentaakosiwinink. Miiwan itahsh ini Ciisahsoon kaakihkinowinaanitc keshipimaaci'imintc i'i okosihsimaa'. 11 Wiin aaniihsh Ciisahs opehki'aa' pemaatisinitc omacitootamowininiink; a'a hsa kaapehki'iwetc iki kaye kaapehki'intwaa opeshiko'aawaan oTetewaan. Miitahsh Ciisahs kaaonciakacihsik ci-ishinihkaanaatc o'o kaakiihpehki'aatc tipinawe niicihkiweyak. 12 Aaniihsh o'o otinaan Kishemanitoon: "Ninkatashintamawaak hsa niicihkiweyak kiwiinsowin keoncikihkenimihkwaa aaniin nehtaaishihcikeyan, Eshimaawaci'itiwaatc hsa ninkaina'am kaaishi​miikwehciwenimikooyan." 13 O'owe hsa ekii'ani-ihkitotc: "Kishemanitoo hsa ninkatepweyenimaa." Miinawaa tahsh kii'ani-ihkito: "Inashke tahsh niin, niwiiciiwimaa' nimpimaatisiima' Kishemanitoo kaakii'miishitc, taapishkoo niniicaanihsa' enentaakosinitc." 14 O'o tahsh oniicaanihsimaa' e'ishiowiiyawinitc, e'ishiomiskwiiminitc kaye, miitahsh Ciisahs kewiin kaa'ishiotaahpinank ci-ishinaakositc taapishkoo kaaishinaakosinitc pemaatisinitc. Miitahsh o'o kaakii'onci-ishihciketc ekii'nipotc cionci nihshiwanaacihtamawaatc omashkawisiiwinini ini kaatipentaminitc kaashaakooci'iwemakaninik nipowin, amiiwan hsa ini maciaya'aan. 15 Miitahsh i'i kaakii'aapa'waatc i'i minihk kaapimaatisinitc kaakii'mincimahpinikonitc ekiihkohtaminitc nipowin. 16 Aahpici tahsh pehtentaakwanini: kaawiin tashintehsinini Kishemanitoo eshiwiici'aatc encala'; i'iweniwa' iitok Eparahaaman (Abraham) opiiwesiimini kaawiici'aatc. 17 Miitahsh i'i oncitako kii'ishinaakwanini ci-ishinaakositc kaaishinaakosinitc misiwe i'i owiicipimaatisiimaakana'. Mii hsa tahsh kaaoncitinowitc kaakoohpaasinaaketc kaatepweyentaakositc kaye, Maawac ehKihcianami'ewikimaawitc i'imaa kaaishianohkiihtawaatc ini Kishemanitoon, cipoonentamawimintc ini pemaatisinitc omacitootamowinini. 18 Kewiin hsa ekiihkakwaatakihtootc kiihkakweci'intc, mii hsa kaaoncikashkihtootc cinaatamawaatc i'iweniwa' kaakoci'imintc.

Hiiparoowiwak 3

1 Kiinawaa tahsh niitanami'aak kaatipeniminek Christ, kekiinawaa hsa kikiihkanoonikowaa Kishemanitoo! Naanaakatawenimihk Ciisahs Kishemanitoo oKihci​Ishinisha'waakanan kaatinowitc, Maawac Kihcianami'ewikimaa kaye, kekanawaapantank hsa kaye kitepweyentamowininaan kaawiintamank. 2 Aahpici hsa kiihtepweyentaakosi Kishemanitoon ekii'onakimikotc ekii'miinikotc anohkiiwin citootank, taapishkoo Moosihs (Moses) kaakii'ishi tepweyentaakositc i'imaa Kishemanitoon owaahkaa'ikaniniink. 3 Awiya hsa kaaoshihtootc waahkaa'ikanini nawac kihci-inentaakosi ahpiihc wiin i'iweni waahkaa'ikanini kaaoshihtootc. Miitahsh peshikwan Ciisahs nawac kihci-inentaakosi ahpiihc wiin a'a Moosihs. 4 Waahkaa'ikan hsa kiiayaak, awiya ohsha okii'oshihtoonaatok. Kishemanitoo tahsh wiin kahkina kekoonini kaaoshihtootc. 5 Moosihs itahsh anohkii'aakan ekiihtinowitc, aahpici weweni kii'anohkii i'imaa Kishemanitoon owaahkaa'ikaniniink, ekii'anitashintamaaketc aaniin Kishemanitoon paanimaa naake keni-ihkitonitc. 6 A'a tahsh wiin Christ aahpici weweni kii'oKosihsimaawi ekiihkanawentank Kishemanitoon owaahkaa'ikanini. Kiinawint hsa i'i waahkaa'ikan kiishpin kihciwinamank eshimashkawentamank, eshitepweyentamank kaye i'i kaakihci-inentamank ahpenimowin. 7 O'o hsa Kishemanitoo otAhcaahkwan ekii'ihkitonitc: "Kiishpin noontawek Kishemanitoo noonkom kaakiishikaninik, 8 Keko shashiipihtankek taapishkoo kikehteya'aamiwaak kaakii'ishi-shashiipihtawaawaatc Kishemanitoon, I'i ehkiishikaninik weti pikwatahkamik ekiihkakwetenimaawaatc taka kekoon cikiihtootaakowaatc." 9 O'o tahsh Kishemanitoo ihkito: "Mii hsa i'iweti kaakii'ishi kakwetenimiwaatc ekii'antakihkenimiwaatc kaye, Aana tahsh wiin niimitana tahsopipoon ekii'waapantamowaatc aaniin kaakiihpi-ishihcikewak. 10 Miitahsh ninkii'maanaapamaak iki pemaatisiwaatc ekii'ihkitoyaan: 'Mooshak hsa otinentamowiniwaan owaniwinikonaawaan, kaawiin kaye otootaahpinansiinaawaan kaanihtaaishihcikewak.' 11 Ekii'maanaapamakwaa tahsh mii hsa kaa'ishiahshotamaan: 'Kaawiin hsa wiihkaa tapiintikehsiiwak i'iweni ahkiini kekii'ishianwepiwaahpan kaawii'miinakwaapan.' " 12 Niicitepwehtamook! Aahpici hsa ayaankwaamisik, kaatahshiyek awiya cimacinaakwahsininik ote' citepwehtamoomakahsininik kaye, keoncinakanekipan kaapimaatisitc Kishemanitoo. 13 Mekwaa hsa keyaapi ehtawinamaatinaaniwank, "Noonkom kaakiishikahk" kaaishinihkaatek, entahsokiishik hsa waawiici'itik ekaa ciwayeshimikoohsiwek i'imaa macitootamowinink, cishashiipihtansiwek kaye, kahkina kaatahsopeshikoyek. 14 Aaniihsh kiwiiciiwaanaan Christ, kiishpin ehta mashkawiminciminamank i'i kikehcinaa'owininaan nihtam kaakii'ayaayank, piinihsh weti ishkwaac kiishikahk. 15 Miitahsh o'o kaakii'ishipii'ikaatek Kihcimasina'ikan: "Kiishpin noontawek Kishemanitoo ehkanooninek noonkom kaakiishikaninik, Keko shashiipihtankek taapishkoo kikehteya'aamiwaak otaanaank kaakiihpimaatisiwaatc, kaakii'ishi-shashiipihtawaawaatc Kishemanitoon." 16 Awenenak itahsh iki pemaatisiwaatc kaakii'noontawaawaatc Kishemanitoon, shaakooc itahsh ekiihshashiipihtawaawaatc? Mii hsa i'i Moosihs (Moses) kaakiihsaakiciwinaatc i'imaa Iicipahkiink (Egypt). 17 Awenena' itahsh Kishemanitoo kaakii'nishki'ikotc niimitana tahsopipoon? I'i hsa pemaatisinitc kaakii'macitootaminitc, i'i piinihsh kaakii'anicaakinenitc i'imaa pikwatahkamik. 18 Awenena' hsa kaakii'ahshotamawaatc cipiintikehsinik otanwepiwinink? Miiwa' hsa i'i kaakiihshashiipihtaakotc. 19 Miitahsh eshiwaapantamank, aaniihsh ekiihtepwehtansikwaa, kaakii'onci pwaanawihtoowaatc cipiintikewaatc i'imaa ahkiink kaawii'ishi​anwepi'intwaapan.

Hiiparoowiwak 4

1 Kekiinawint hsa noonkom Kishemanitoo kiwii'miinikonaan kaakii'ahshotamaaketc, anwepiwin kaakiihtashintank citepinamowankitc. Taka tahsh ayaankwaamisitaa, kiinawaa kaatahshiyek cimihkawaahsiwintc awiya cipwaa nawihtootc citepinank i'i anwepiwin kaakii'wiintenik. 2 Kikii'noontaamin hsa i'i minwaacimowin taapishkoo kewiinawaa kaakii'ishinoontamowaatc. Kaawiin itahsh kekoonini okii'inaapacihtoohsiinaawaa i'i tipaacimowin aanawiin ekii'noontamowaatc, aaniihsh kaawiin tepwehtamowinink okii'ishi​otaahpinansiinaawaa. 3 Kiinawint itahsh kaatepwehtamank kipiintikemin i'imaa anwepiwinink Kishemanitoo kaakii'ahshotamaaketc. Aaniihsh kii'ihkito: "Ekii'maanaapamakwaa tahsh mii'i kaa'ishiahshotamaan, 'Kaawiin hsa wiihkaa tapiintikehsiiwak i'iweni ahkiini kekii'ishi​anwepiwaahpan kaawii'miinakwaapan.' " Mii hsa o'o kaa'ihkitotc aanawiin ekii'ishi​kiishinaakwaninikin otanohkiiwinan ahpane kaakii'ishkwaaoshihtootc o'oweni ahkiini. 4 Ninkoci hsa Kihcimasina'ikanink Kishemanitoo okiihtashintaan i'i kaaniishwaahso-kiishikwakaanik: "Kishemanitoo kii'anwepi e'niishwaahso-kiishikwakaanik i'imaa onci otanohkiiwinink," e'ishipii'ikaatek. 5 I'i tahsh peshikwan keyaapi anitashincikaate: "Kaawiin hsa wiihkaa tapiintikeshkaahsiiwak i'iweni ahkiini kekii'ishianwepiwaahpan kaawii'miinakwaapan." 6 Keyaapi tahsh tawinikaate pisaan​iko awiya cipiintiketc i'imaa anwepiwinink. Iki tahsh kaakii'wiintamawintwaapan minotipaacimowin kaawiin kiihpiintikehsiiwak, aaniihsh kiihshashiipihtamook. 7 Mii hsa tahsh o'omaa tepwe eshiwaapantamowank Kishemanitoo ekiiwiintank peshik kotak kaakiishikaninik, "Noonkom kaakiishikahk" ekii'ishinihkaatank. Tepitoon (David) okii'aapaci'aan ekii'ihkitotc taapishkoo aasha mewisha kaakii'ihkitokopanen: "Kiishpin noontawek Kishemanitoo ehkanooninek noonkom kaakiishikaninik, Keko shashiipihtawaahkek." 8 Inashke kiishpin Caahshowaa (Joshua) kiimiinaakopanen anwepiwinini i'i pemaatisinitc kaakiihpimiwinaatc, kaawiin itahsh Kishemanitoo otaakiihtashintansiin miinawaa naanaake kotak kekiishikaninik cikii'Anwepiiwi​kiishikaninikipan. 9 Miitahsh eshinaakwahk pemaatisiwaatc kaatipenimikowaatc Kishemanitoon keyaapi e'ishkonamawintwaa cianwepiwaatc taapishkoo Kishemanitoo kaakii'ishi-anwepikopanen onci otanohkiiwinink e'niishwaahso-kiishikwakaanik. 10 Awiya hsa kaatepinank i'i anwepiwin Kishemanitoon kaakii'ahshotamaakenitc, kewiin hsa ta-anwepi onci otanohkiiwinink taapishkoo Kishemanitoon kaaishianwepinitc. 11 Taka tahsh kekiinawint, weweni ishihciketaa citepinamank i'i anwepiwin, awiya hsa kiinawint cinoontepwaanawi'ohsiwank, ci-ishihcikewaahsiwank kaakii'ishihcikewaatc ekiishashiipihtamowaatc. 12 Kishemanitoo kaaihkitotc hsa pimaatanini, anohkiimakanini kaye, nawac kaye kaahshaani ahpiihc wiin kaaiitawikaahshaanik pashipa'ikewihkomaan. Mii hsa ehpiihcikaahshaanik i'i otihkitowin, ehkashkihcikemakaninik ciocihcishikemakaninik aanti eshiaanihkawihsininik pimaatisiwinini i'imaa ahcaahkonk. Mihkoshikemakanini kaye aanti ohkanini i'i kaye paahsa'iwiinaanini eshiaanihkawihsininik. Kihkentamaamakan awiyan eshimihsawencikenitc ote'iniink, eshinaanaakatawencikenitc kaye. 13 Kaawiin hsa kekoonini kahkina kaaoshihcikaatenik taakaatamawaahsii Kishemanitoo ciwaapantansikipan. Kaawiin kaye kekoon opiswaapantansiin, kahkina hsa kekoonini mohshenaakwanini enaahsamiitc. Wiin hsa tapinawe kewiintamawank aaniin kaakiihpi-ishihcikewank. 14 Taka tahsh aayiiciminciminantaa i'i kitepwehtamowininaan kaawiintamank. Aaniihsh kitayaawaanaan ehkihci-inentaakositc Maawac kiKihcianami'ewikimaaminaan ishikwayahk ekii'ishaatc Kishemanitoon kaaishiayaanitc. Mii hsa a'a Ciisahs Kishemanitoo oKosihsan. 15 Wa'a tahsh Maawac kiKihcianami'ewikimaaminaan, kaawiin wiin kimihcikoohpaatenimikohsiinaan kaaishipimaatisiyank. Kewiin ohsha misiwe kii'ishikakweci'aa taapishkoo kiinawint kaaishikakweci'ikooyank, kaawiin itahsh wiihkaa kiimacitootansii. 16 Taka tahsh kiinawint soonkite'etaa cinaasihkamowank Kishemanitoo okihciokimaawapiwin, mii aaniihsh 'imaa wentinikaatek kishewaatisiwin, mii hsa 'imaa keshitepinamank koohpaasinaakoowin, kikamiinikoomin kaye kishewaatisiwin kewiici'ikoyank ahpii noontehseyank.

Hiiparoowiwak 5

1 Kaatahsopeshikotc ihsa Maawac Kihcianami'ewikimaa mekwe ininiihkaank onciotaahpinikaniwi e'otaahpinintc cikanoocikehtamawaatc ininiwan Kishemanitoon cikanoonaatc, cipakitinank kaye miikiwewinan, cipakitinikehtamawaatc kaye ininiwa' keoncipoonentamawimintc kaakii'ishi-macitootaminitc. 2 Miitahsh kaaoncikashkihtootc weweni ciwiiciiwaatc i'i kaa-ayehshaawaatisihsinik i'i kaye kaanihtaa​wanihshininitc, aaniihsh kewiin misiwe omatisiwin onihtaawanishkwe'ikon. 3 Kewiin tahsh e'wahkewawaniitc mii 'i eshinaakwaninik cipakitinikehtamaasotc kewiin cipoonentamawintc kaaishimacitootank, taapishkoo kaaishipakitinikehtamawaatc pemaatisinitc. 4 Kaawiin itahsh awiya onenintisohsii ciotaahpinank o'o kaakihtakintenik anohkiiwin. Paanimaa hsa awiya ehkanoonikotc ini Kishemanitoon, miitahsh i'i payesh ciKihcianami'ewikimaawitc taapishkoo Eran (Aaron) kaakiihtootawintc. 5 Miitahsh peshikwan a'a Christ kaa'ishihciketc, kaawiin wiin kiihkihci-inentaako'itisohsii Maawac ciKihcianami'ewikimaawitc. O'o tahsh Kishemanitoon okii'ikoon: "Kiin ninKosihs, noonkom hsa kaakiishikahk mii 'i cimaaciioTetemihshiyan." 6 O'o tahsh kaye Kishemanitoo kii'ihkito: "Kiin hsa kiKihcianami'ewikimaaw nehpic taapishkoo Melhkisitehk (Melchizedek) kaakii'ishi-Kihcianami'ewikimaawitc." 7 Ciisahs hsa mekwaa o'omaa ahkiink kiipimaatisitc, kii'ishinihtaa-anami'aa, kekoonini kaye ekiihkakwecimaatc ini Kishemanitoon, ekii'matwemoohkwentank kaye, ekii'oncikawaapitc kaye, ekiihkanoonaatc Kishemanitoon kaakiihkashkihtoonitc cipimaaci'ikotc i'imaa onci nipowinink. Miitahsh wiinke ekiihtapahsenimotc, weweni kaye ekiihkihtenimaatc Kishemanitoon kaakii'oncinoontaakotc. 8 Aana tahsh wiin Kishemanitoon ekii'oKosihsimikotc, i'i hsa kaakii'ishi kakwaatakihtootc, mii hsa i'imaa kaa'oncikihkentank i'i na'ihtamowin. 9 Miitahsh i'imaa ekii'oncikiishinaakositc, mii hsa i'imaa wenciik i'i pimaatisiwin keishkwaahsehsinok. Iki tahsh kena'ihtawaawaatc tapimaatisiwak. 10 Kishemanitoo tahsh okii'inaan Ciisahsoon ciKihcianami'ewikimaawinitc ci-inanohkiinitc i'i kaakii'inanohkiinikopanen ini Melhkisitehkoon Maawac kaakii'ishi-Kihcianami'ewikimaawinikopanen. 11 Aahpici tahsh niipiwa' nintaakii'ihkitomin, aahpici kaye sanakan ciwiintamaakooyekipan citashimankitc a'a inini, kaawiin tahsh misiwe kitishinaakosihsiim cinihsitohtamekipan, mihsawaa aanawiintamaakooyek. 12 Mii ohsha 'i eshinaakwahk, aasha kiinawaa cikiih​kihkino'amaakeyekipan, shaakooc itahsh keyaapi kinoontehsem awiya cikihkino'amawinek maawac iko nihtam kaaishikihkino'amaatinaaniwitc Kishemanitoo. Miitahsh eshinaakosiyek taapishkoo keyaapi e'noontehseyek coocoohshaapo e'mihciminihkweyek, aasha tahsh cikiimiiciyekipan kaamashkawaak miicim. 13 Awiya tahsh coocoohshaapooni ehta kaaminihkwaatank, miitahsh taapishkoo eshinaakositc keyaapi e'apinoonciishiwitc. Kaawiin onakaci​nihsitawinansiin kwayahkwaatisiwin. 14 Iki tahsh wiin aasha kaakiishaapewiwaatc, okashkihtoonaawaa e'miiciwaatc kaamashkawaanik miicim. Aaniihsh weweni onakaci​kihkentaanaawaa aaniin enentaakwaninik kwayahkwaatisiwin.

Hiiparoowiwak 6

1 Taka tahsh niikaanaya'ii inahke ishimaacaataa cinaasihkamank kaaishikihkino'amawintwaa kaakiishaapewiwaatc, cinakatamank ini maawac iko nihtam kaakii'ishi kihkino'amaakooyankipan kiimaaciianami'ewaatisiyank. Kaawiin miinawaa kika-kakwe-onahtoohsiimin ono kaawii'wiintamaan: eshikihkino'amaatink awiya cioncikwehkaatisihpan ishihcikewinan nipowinink kaaishiwishiwemakahkin, i'i kaye kaaishitepweyenimintc a'a Kishemanitoo, 2 i'i kaye kaaishi-anami'e-kisiiyaapaawasonk, awiya kaye kaaishi-anami'e-saaminintc, i'i kaye keishikiiwepimaatisiwaatc kaanipowaatc, i'i kaye kepoonihsehsininik wiihkaa tipaahkonikoowin. 3 Taka tahsh niikaanaya'ii ishimaacaataa. Mii hsa o'o keshihcikeyank kiishpin Kishemanitoo inentank. 4 Iki tahsh aasha kaakii'nihsitohtamowaatc, kaakii'mansihpotamowaatc kaye miikiwewin kihcikiishikonk kaakii'onciinik, kaakii'wiitoohkaasowaatc kaye Kishemanitoon otAhcaahkoni enanohkiinitc, 5 kaakii'minohpotamowaatc kaye Kishemanitoon kaaonishihshininik otihkitowinini, ekiihkihkentamowaatc kaye mashkawisiiwinan kaawiihpi​naakohcikaatenikin weti piciinak kaawii'ani-ishiwepaninik – 6 ono tahsh ekiihkihkentamowaatc, ishinakatamowaatc itahsh kaaishitepwehtawaawaatc Christan, kaawiin taishinaakwahsinini miinawaa cioshki​kwehkaatisi'intwaapan. Aaniihsh mii 'i taapishkoo wiinawaa piko e'ishihcikewaatc ehkiiwe​akosaka'waawaatc Kishemanitoon oKosihsini i'imaa aashiteyaahtikonk. Mii hsa kaye taapishkoo entootawaawaatc piniskwe piko cimaanencikaniwinitc. 7 I'i hsa kihtikaanahkamik kaaminihkwemakahk ahpii ehkimiwank, aahpici hsa ini miicimikihtikaanan taminokinoon i'imaa kihtikewahkamikonk. Iki hsa kaanaakacihtamawintwaa i'i kihtikewahkamikoni aahpici okakihtaapacihtoonaawaan ini miicimi kihtikaanan. Kishemanitoo kaye okaminohsehtoon i'i kihtikaanahkamik. 8 Kiishpin itahsh wiin okaawiminakashiik, macaahtikook kaye ehta nihtaawikiwaatc i'imaa kihtikaanahkamikonk, kaawiin kekoon tainaapatahsinoon i'i kihtikaanahkamik. Mii ehta ko eshinaakwaninik Kishemanitoo ci-itank cinihshiwanaataninik, miitahsh i'i kaye cicaakisikaatek. 9 Kaasaaki'ikooyek, aanawiin o'o e'ishikiishweyaank, shaakooc itahsh kitepweyenimikoom kiinawaa nawac ciminohseyek. Aaniihsh kikaotihsikom kaaonishihshinkin pimaaci'ikoowinink kaatako-onciikin. 10 Weweni aaniihsh Kishemanitoo awiyan otootawaan. Kaawiin okapanaapantansiin aaniin kaakii'inanohkiiyek. Kaawiin kaye tawaniihkehsii e'naakohtawek ehsaaki'ek ehpiwiitoohkawimek keyaapi kaye ehpami'imek Kishemanitoo opimaatisiima'. 11 Mii hsa tahsh eshipakohsenimikooyek kiinawaa kaatahsopeshikoyek citaapitawihcikeyek kaapi-ishihcikeyek piinihsh weti ishkwaac, kehcinaac ciwaapantamek i'i kaaishiahpenimoyek. 12 Kaawiin itahsh kinantawenimikoohsiim cianikihtimaatisiyek. Nanaapinawihkook itahsh iki kaakii'onci​tepinamowaatc Kishemanitoon otahshotamaakewinini otepwehtamowiniwaank, oshashiipentamowiniwaank kaye. 13 Ahpii tahsh Kishemanitoo kiiahshotamawaatc Eparahaaman (Abraham), wiin iko owiinsowin okii'aapacihtoon ekii'ahpimotc, aaniihsh kaawiin awiyan pahkaan owiinsowinini awahshime teahpiihtentaakwahsinini. 14 Miitahsh o'o kaakii'ihkitotc: "Tepwe hsa kitahshotamawin ewiihshaweniminaan, aahpici kaye tapaahtiinowak iki kipiiwesiimak." 15 Eparahaam itahsh wiinke kiihshashiipentam. Miitahsh i'i kaakii'oncitepinank i'i kaakii'ishi​ahshotamaakotc Kishemanitoon. 16 Ahpii hsa ininiwak kiiwii'aayiiciahshotamaatiwaatc, awiyan hsa pahkaan otakowiinaawaan nawac kehci-inentaakosinitc ahpiihc wiinawaa. Miitahsh i'imaa kaakii'ishionahtoowaatc ekii'ahpimowaatc, kaawiin awahshime takakweshaakoosontihsiiwak. 17 Miitahsh i'i Kishemanitoo kaakii'oncitootank ewii'naakohtamawaatc i'i kaawiihtepinaminitc otahshotamaakewin, ekii'antawenimaatc cikihkentaminitc wiihkaa ewii'aantentansik. Miitahsh i'imaa otahpimowinink kaakii'onciaayiitahtootc otahshotamaakewin. 18 Ono tahsh niishin kekoonan kaapitashintamaank kaawiin wiihkaa taa-aancihsehsinoonan. Kaawiin wiihkaa taaishinaakwahsinini Kishemanitoo cikiiwanimotc. Mii hsa tahsh kaaoncimashkawentamank, aaniihsh kikii'naacipa'iwaatamowaamin ehkakwetepinamowank ahpenimowin kaawii'miininank. 19 I'i hsa kihciwaamihka'ikan kaakihciwaamihkihsink, mii hsa taapishkoo eshinaakwahk i'i kitahpenimowininaan, kipimaatisiwininaan eshiaayiicimincimahpitek. Aahpici hsa kehcinaa'owentaakwan, kaawiin awiya okakashkihtoohsiin ciwahkawipitootc! O'o tahsh ahpenimowin ehtepaapiikamok weti maawac piintik kaaishikipiikakootek kihcikiishikonk kaaishi​Kihcianami'ewikamikowank. 20 Ciisahs itahsh kikii'niikaani​piintikehtamaakonaan aaniihsh wiin pishihshik Maawac taKihcianami'ewikimaawi, peshikwan ci-ishinaakositc i'i kaakii'inanohkiinikopanen ini Melhkisitehkoon (Melchizedek) kaakiih-kihcianami'ewikimaawinikopanen.

Hiiparoowiwak 7

1 A'a tahsh Melhkisitehk (Melchizedek) kaakii'ishinihkaasotc, kiihkihciokimaawi i'imaa ootenaank Selam (Salem) kaakii'ishinihkaatenik, miitahsh kaye kiihKihcianami'ewikimaawi ekii'anohkiihtawaatc maawac e'ishpentaakosinitc Kishemanitoon. Eparahaam (Abraham) tahsh ekiihpikiiwetc kii'ishkwaashaakooci'aatc niiwin kihciokimaa' Melhkisitehkoon okii'antanakishkaakoon, okii'ikoon kaye: "Kishemanitoo kikaminohse'ik." 2 Miitahsh kaye kaakii'ishihciketc Eparahaam, entahsomitaahcininikin kekoonini kaakii'mahkantwetc, peshikwayak itahsh kekoonini okii'oncimiinaan ini Melhkisitehkoon. Miitahsh o'o Melhkisitehk owiinsowin nihtam ehkitoomakaninik Kihciokimaa kaaKwayahkwaatisitc; miihsh kaye ehkihciokimaahkantank kihciootenaani Selam, pisaanisiwin kaaicikaatenik, mii 'i ecikaniwitc, Kihciokimaa kaamiikiwetc Pisaanisiwin. 3 Kaawiin inkoci oshipii'ikaatehsinini awenenan kaaotetekopanen, awenenan kaye kaaomaamaakopanen, aanti kaye kaapiontahkaanesikopanen. Onihtaawikiwin, onipowin kaye kaawiin inkoci oshipii'ikaatehsinini. Mii hsa taapishkoo Kishemanitoo oKosihsan eshinaakositc, ahpane ko mooshak e'anikihcianami'ewikimaawitc. 4 Inashke tahsh aanawiin Eparahaam okihcikehteya'aamimaa ekiihkihci-inentaakositc, shaakooc itahsh entahsomitaahcininik kahkina kekoonini kaakii'mahkantwetc ahpii kiishaakoocihtwaatc, peshik i'imaa okii'oncimiinaan Melhkisitehkoon. Miitahsh o'omaa eshipehtentaakositc a'a inini Melhkisitehk aahpici ehkihci-inentaakositc. 5 Iki tahsh anami'ewikimaak Liipaayink (Levi) kaaontahkaanesiwaatc, kaatepihsewaatc cianami'ewikimaawiwaatc, kii'inahtamawaawak hsa Onahshowewinink pisaan​iko ciotaahpinamawaawaatc pemaatisinitc peshik kekoonini entahsomitaahso kaatipentaminitc, e'inawemaawaatc Isriyala' (Israel) kaaotaahpinamaawaawaatc. Aanawiin Eparahaamink ekii'ontahkaanesinitc otinawemaakaniwaa'. 6 Melhkisitehk itahsh wiin kaawiin Liipaayink kii'ontahkaanesihsii. Shaakooc itahsh okii'otaahpinamawaan Eparahaaman peshik ekii'miinikotc kekoonini entahsomitaahso kaakii'ayaanitc, ekiihtakoshawenimaatc. Eparahaam iitok kaakiihtepinank Kishemanitoon otahshotamaakewinini. 7 Miitahsh o'o kekeht eshinaakwahk, a'a hsa kaashawenimiwetc nawac ishpentaakosi ahpiihc wiin a'a kaashawenimintc. 8 Iki tahsh wiin anami'ewikimaak kaanihtaaotaahpinamaakewaatc peshik entahsomitaahso kaanihtaaoncimiinitink, kahkina hsa tanipowak. A'a tahsh wiin Melhkisitehk kaakii'ishi​otaahpinamaaketc, mooshak tapimaatisi. Aaniihsh mii 'i Kihcimasina'ikan eshipii'ikaatek. 9 Ahpii tahsh Eparahaam kaakii'miinaatc Melhkisitehkoon i'i peshik entahsomitaahso kaakiihtepinank, mii hsa taapishkoo eshinaakwaninik Liipaai kewiin ekii'miikiwetc, mii 'omaa kaaontahkaanesiwaatc anami'ewikimaak kaanihtaa​otaahpinamaakewaatc. 10 Kaawiin iitok mahshi i'i ahpii Liipaai kii'ayaahsii Melhkisitehkoon kiinakishkawaanitc Eparahaaman. Piinci Eparahaamink iitok keyaapi kii'ayaa i'i ahpii. 11 Ini tahsh onahshowewinan kaakii'miinintwaa Isriyalak memwehc iko ehta kii'ishitako-anohkiimakaniniwan i'imaa kaakii'anami'ewikimaawinitc Liipaayink kaakii'onciinitc. Kiishpin itahsh wiinke minonaakwaninikipan otanohkiiwiniwaa iki Liipaai anami'ewikimaak, kaawiin iitok memwehc tino anami'ewikimaa taakii'naakosihsii ci-inentaakosihsikipan kaakii'inentaakosinitc Eranoon. Kaawiin memwehc taakii'naakosihsii awiya ci-inanohkiihpan taapishkoo Melhkisitehkoon kaakii'ishi​kihcianami'ewikimaawinitc, 12 aaniihsh mii 'i eshinaakwahk, kiishpin ihsa aancihcikaatek i'i anami'ewikimaawiwin, mii hsa kaye eshinaakwahk cikii'aancihcikaatekipan onahshowewin. 13 A'a tahsh wiin kaaTipeniminank kaatashimank pahkaan kii'ontahkaanesi. Kaawiin itahsh awaac peshik kaakii'wiiciontahkaanesiimaatc kii'anami'ewikimaawihsiiwan. 14 Kehcinaac itahsh wiinke kihkentaakwan a'a kaaTipenciketc Cootahkaank ekii'ontahkaanesitc. Kaawiin tahsh Moosihs (Moses) okii'mihkoomaahsiin i'i Cootahkaank kaakii'ontahkaanesinitc ahpii kiitashimaatc i'i anami'ewikimaa'. 15 Kihcikekoon itahsh o'omaa pehtenaakwan. Kotak hsa Kihcianami'ewikimaa kiihpiayaa ekii'ishinaakositc taapishkoo Melhkisitehkoon (Melchizedek) kaakii'ishinaakosinitc. 16 Kaawiin i'imaa kii'onci-ishi'aahsii cianami'ewikimaawitc kaakii'inaahkonikemakaninik memwehc Liipaayink (Levi) cionciihpan cikihcianami'ewikimaawihpan. I'imaa hsa kii'onci-ishi'aa kaashimashkawisiimakaninik pimaatisiwin wiihkaa kenihshiwanaacihcikaatehsininik. 17 Aaniihsh Kihcimasina'ikan ishipii'ikaate: "Kiin hsa kikanehpici-Kihcianami'ewikimaaw Taapishkoo Melhkisitehk kaakii'ishi-kihcianami'ewikimaawitc." 18 I'i tahsh kehteinaahkonikewin aasha kiihpooniaapatan, aaniihsh ekii'niinamentaakwahk, kekoon kaye ekii'inaapatahsinok. 19 Aaniihsh Moosihs otOonahshowewin kaawiin kiihkashki'ewisiimakahsinini kekoon i'imaa wiinke cikii'onciminohcikaatekipan. Inashke tahsh noonkom kimiinikoowisimin nawac kaatepweyentaakwahk ahpenimowin aanti pehsho keoncinaasihkawank a'a Kishemanitoo. 20 Shikwa tahsh kaye Kishemanitoo kiihtakomiikiwe i'i otaayiiciahshotamaakewin. Inashke kotak awiyak kii'anami'ewikimaawi'intwaa kaawiin wiihkaa kihciahshotamaakewin kii'aapatahsinini. 21 Ciisahs itahsh kii'onciKihcianami'ewikimaawi'aa, aayiiciahshotamaakewin ekii'aapataninik, ahpii Kishemanitoon kii'ikotc: "KaaTipenciketc hsa kikii'aayiiciahshotamaak, Kaawiin hsa ta-aantentansii: 'Kiin hsa kika-nehpici-Kihcianami'ewikimaaw.' " 22 O'o tahsh e'ayaak aayiiciahshotamaakewin, Ciisahs tahsh okihkinawaacishkaan ciwaapantamowank kehcinaac kaawiihtepinamowank kaakii'ishi​ahshotamawinank. Nawac itahsh o'oweni onishihshinini ahshotamaatiwinini. 23 Keyaapi tahsh kekoon kitaniwaapantaamin. Iki tahsh kaakiihpaahtiinowaatc anami'ewikimaak, kahkina kii'nipowak, miitahsh otanohkiiwiniwaan kaaishipoonihsenikin. 24 Ciisahs tahsh wiin nehpic pimaatisi, kaawiin kaye awiyan okanaapishkaakohsiin i'i kaainanohkiitc. 25 Miitahsh i'i kaaoncikashkihtootc noonkom, mooshak kaye cipimaaci'aatc i'i awiya' kaapinaasihkawaanitc Kishemanitoon wiin onci. Aaniihsh mii 'i eshihcikehtamawaatc mooshak e'anami'ehtamawaatc, ehkakanoonaatc Kishemanitoon. 26 Ciisahs itahsh Maawac ishiKihcianami'ewikimaawi kaakashkihtootc e'miininank kekoonini, aaniin eshinoontehseyank. Aahpici hsa ona'entami'aan Kishemanitoon. Kaawiin kaye macikekoon, macitootamowin kaye okikishkaakohsiin. Pahkaan kaye kii'ishipakitinikaniwi weti kaaishiayaahsinik omacaatisii'. Aahpici kaye nawac ishpimink paashic kihci-inentaakosi ahpiihc wiin i'i kaa-ahpiihtaanik kiishik. 27 Kaawiin kaye entahsokiishik kaaishihcikenitc kihcianami'ewikimaa' ishihcikehsii. Kaawiin memwehc wiin pinamaa pakitinaahsohsii omacitootamowin onci, miihsh i'i payesh cipakitinaahsohtamawaatc i'i kotak pemaatisinitc. Ciisahs itahsh wiin aapitink ehta kiihpakitinaahso, miitahsh i'i ekiihtetipa'ank kahkina kekoon kiipakitinank opimaatisiwin wiin piko ekiihtinowitc pakitinaahsowinink. 28 Inashke Moosihs (Moses) otOonahshowewinink kii'onci-inakimaawak ininiwak maawac cikihcianami'ewikimaawiwaatc, aanawiin ekiihkashkihtoohsikwaa mayaa kekii'ishihcikewaahpan. I'imaa tahsh wiin Kishemanitoo otaayiiciahshotamaakewinink kii'onci-inakimaa 'a oKosihsimaa Maawac ciKihcianami'ewikimaawitc, misiwe kaakiishinaakohcikaniwitc nehpic iko i'iwe keishiayaatc.

Hiiparoowiwak 8

1 Miitahsh o'owe kaatashintamaank, e'ayaawank hsa Maawac Kihcianami'ewikimaa. Mii hsa a'a tino weti kaakii'onapitc okihcinihkiniink inahke kaashiokimaawapinitc ini kaaKihciOkimaawaatisinitc kihcikiishikonk. 2 I'imaa tahsh tashianami'ewanohkii maawac iko kaaishikohtaanentaakwahk piintik i'imaa mayaa Kihcianami'epakwaanekamikonk. KaaTipenciketc hsa wiin iko okii'onahkitoon i'i Kihcianami'epakwaanekamikoni, kaawiin wiin inini okii'onahkitoohsiin. 3 Entahsopeshikowaatc hsa kihcianami'ewikimaak kii'inaahkonaawak cipiitamawaawaatc Kishemanitoon ini miikiwewinan, ini kaye pakitinaahsowinan. Miitahsh peshikwan eshinaakwaninik a'a Maawac kiKihcianami'ewikimaaminaan Ciisahs kekoonini ciayaatc cipakitinaahswaaketc. 4 Kiishpin itahsh o'omaa ahkiink ayaakopanen, kaawiin iitok taakii'anami'ewikimaawihsii. Aaniihsh ayaawak anami'ewikimaak kaapakitinamowaatc ini miikiwewinan, e'ishihcikewaatc i'i kaainahtenik Onahshowewin. 5 Iki tahsh anami'ewikimaak kaakii'inanohkiiwaatc, mii hsa noowaahc iko e'naapihcikewaatc aaniin eshiwepaninik weti kihcikiishikonk; kaawiin itahsh mayaa ishinaakwahsinini kaakakwenaapihtoowaatc. Miitahsh peshikwan Moosihs (Moses) ahpii kiiwii'onahkitootc i'i kihcianami'epakwaanekamikoni, Kishemanitoon o'o okii'ikoon: "Aahpici hsa ayaankwaamisin mayaa piko ci-ishihtooyan cinaapinaakwahk kaakii'ishi​kihkino'amawinaan weti kaaishipihkwatinaak." 6 A'a tahsh wiin Ciisahs i'i kaakii'miinintc anami'ewikimaawanohkiiwinini, awahshime ishpentaakwanini ahpiihc wiin iki ahkiiwi anami'ewikimaak kaainanohkiiwaatc. Miitahsh peshikwan ehpiihci​kihci-inentaakwaninik kaakii'onahtamawaatc aayiiciahshotamaatiwin Kishemanitoon keonciwiiciiwaatc i'i pemaatisinitc, aaniihsh mii 'imaa eshiahpihsininik iniweniwan nawac kaaonishihshininikin kaakii'ishiahshotamaaketc. 7 Kiishpin itahsh i'i nihtam ahshotamaatiwin kekoon ishimaashinaakwasinokipan, kaawiin iitok memwehc kotak taakii'miikiwaaniwansinoon. 8 O'oweni tahsh Kishemanitoo kii'ihkito ahpii e'waapamaatc kaakiihtipenimaatc pemaatisinitc e'macitootaminitc: "Ninkotink hsa taocihcihse kiishikahk, ihkito kaaTipenciketc, Ahpii cioshihtamawakwaa i'i oshkiahshotamaatiwin iki pemaatisiwaatc i'imaa Isriyalihkaank (Israel) iki kaye Cootahkaank (Judah) kaaonciiwaatc. 9 Kaawiin tahsh taapishkoo ahshotamaatiwin kaakii'miinimak i'i okehteya'aamiwaa' niwii'ishimiinaahsiik. Aaniihsh aapitink ehkiishikaninik ninkiihsaakici​sakinihkenaak i'imaa Iicipahkiink (Egypt) ekii'maaciinakwaa, Kaawiin tahsh weweni kii'ishihcikehsiiwak cikiihtootamowaahpan i'i ahshotamaatiwinini kaakii'miinakwaapan, Kaawiin tahsh keniin ninkiihpapaapiskenimikohsiik, kii'ihkito kaaTipenciketc. 10 Ninkotink itahsh kiishikaninik, ihkito kaaTipenciketc, ninkaoshihtamawaak i'i pemaatisiwaatc i'imaa Isriyalihkaank ahshotamaatiwin o'o keihkitoomakaninik: Ninka-ahtaawaanan nintoonahshowewinan i'imaa otinentamowiniwaank, ninkaoshipii'amowaanan kaye i'imaa ote'iwaank, Mii hsa tahsh ninkaoManitoomikook, kewiinawaa tahsh ninkatipenimaak. 11 Kaawiin itahsh memwehc awiya okainaahsiin wiicipimaatisiin, komaa kaye wiicihkiweyan ci-inaatc: 'Kakwekihkenim kekiin a'a kaaTipenciketc.' Aaniihsh kahkina pemaatisiwaatc ninkakihkenimikook, iki kaatapahsentaakosiwaatc iki kaye kaakihci-inentaakosiwaatc. 12 Ninkapoonentamowaanan tahsh kaaishikwayahkohcikehsikwaa, ninka-nehpici-waniihkenotamowaanan kaye kahkina omacitootamowiniwaan." 13 I'i tahsh ehtashincikaatek i'i oshkiahshotamaatiwin, miitahsh taapishkoo Kishemanitoo ekii'aanawentank i'i kehteahshotamaatiwin. Kekoon aaniihsh kaakehteya'iiwank, kaashiikoshkikaatek, aahpici wiipa taniankonaakwa n.

Hiiparoowiwak 9

1 I'i tahsh nihtam ahshotamaatiwin kaakii'ayaak aahpici hsa kiihpaahtiinatinoon inaahkonikewinan aaniin mayaa awiya kekii'ishihcikehpan antapiintiketc o'omaa ahkiink. Inini aaniihsh okii'oshihtoon aanti keshipiintiketc. 2 Kii'onahkicikaate tahsh i'i kihcianami'epakwaanekamik. I'imaa tahsh kaakii'ishinihtamipiintikenk, kaaishikohtaanentaakwahk kii'ishinihkaate. Miiwan itahsh ono i'imaa piintik kaa'ahtekin. Waahsahkonencikanaahk, toohpowinaahk, a'a kaye pahkweshikan kaakii'apitc toohpowinaahkonk kaakiihpakitinamawintc Kishemanitoo. 3 Maawac iko kaaishikohtaanentaakwahk itahsh awahsinahke kipiika'ikanink kii'ishiayaa. 4 Miitahsh o'omaa maawac iko kaaishikohtaanentaakwahk piintik ono kaa-ahtekin: i'i kaaosaawaapihko​shooniyaawank kaakii'ishi​minaahsikaatek i'i minaahsikan; i'i tahsh kaye anami'emahkahk kaakii'osaawaapihko​shooniyaawank kaakii'ishi​kanawencikaatenik Kishemanitoo otahshotamaakewin. Miiwan itahsh ono kekoonan kaakiihpiintekin i'imaa mahkahkonk: osaawishooniyaa​waapihko-onaakan mena (manna) pahkweshikan kaakii'ishipiinsotc; Eran (Aaron) osahka'onaahk kaakii'aniipiihshiwaninikipan; niishin kaye kaakii'mino​napakaapihkisinitc ahsinii' kaakii'ishi​oshipii'ikaatenik Kishemanitoo kaakii'ishi​ahshotamaatiwaakopanen ininiwa'. 5 I'imaa tahsh wakicimahkahkonk kii'apiwak niishin Cerapiihkaanak (Cherubim) aahpici ekii'minonaakosiwaatc. Oninkwiikaniwaan itahsh okii'aapacihtoonaawaan e'aakooshkamowaatc i'imaa kaakii'ishi​poonencikaatenikin macitootamowinan. Kaawiin itahsh wiin mayaa kekoon kiwii'wiintamawihsinooninim. 6 Miitahsh o'o kaakii'inahtenik ci-ishihcikewaatc i'imaa Kihcianami'epakwaanekamikonk. Anami'ewikimaak itahsh wiin kiihpiintikewak i'imaa kaaishikohtaanentaakwaninik entahsokiishik ekiihtootamowaatc otanohkiiwiniwaan. 7 I'imaa tahsh wiin maawac iko kaaishikohtaanentaakwaninik piintik, Maawac Kihcianami'ewikimaa ehta kiihpiintike aapitink entahsotakwaakin. Okiihtakopiitoon itahsh omiskwiini kaakiinihsimintc aya'aawihshan ekiihpakitinamawaatc Kishemanitoon wiin cipoonentamaakotc omacitootamowinan, miitahsh kaye peshikwan kaaishihciketc ahpii kiipakitinikehtamawaatc kotak pemaatisinitc, i'i kaakiihkihkentansinik ekii'macitootaminitc. 8 Kishemanitoo otAhcaahkwan itahsh pehtenaakwanini kekoonini e'oncikihkino'iketc i'imaa kihcianami'epakwaanekamikonk. Minihk iko kaapatahkitek i'i nihtam kihcianami'epakwaanekamik, mii hsa taapishkoo eshinaakwahk mahshi ekiihpaahkintenamawaahsiwintwaa pemaatisiwaatc cipiintikewaatc i'imaa mayaa maawac iko kaaishikohtaanentaakwaninik. 9 Miitahsh i'imaa eshiwaapantamank aaniin mayaa eshihseyank noonkom kaapimaatisiyank. Ini tahsh miikiwaanan, pakitinaahsowinan kaye kaapakitinamawintc Kishemanitoo, kaawiin i'i nahke awiya kaa-anami'ehtawaatc Kishemanitoon taoncikwayahkohcikaatehsinini kaaoncinaanaakatawentank. 10 Aaniihsh miicim, kaaminihkwaatekin kaye, kisiininciiwinan kiiaapatanoon ahpii kiipakitinaahsonk. Miiwan itahsh ono Kishemanitoo kaakii'miikiwetc ishihcikewinan ciaapataninikin. Onoweniwan itahsh kii'ishkwaahsewan ahpii Kishemanitoo kiionahtootc oshkikekoonini aaniin waa'ishinaakaci'aatc pemaatisinitc. 11 Aasha tahsh Christ kiihpitakohshin Maawac ekiihKihcianami'ewikimaawitc, ewii'naakacihtootc ini kaaonishihshininikin kekoonan aasha o'omaa kaa-ayaanikin. I'imaa tahsh noonkom kaatashipamiihtaaketc Kihcianami'epakwaanekamikonk, nawac kihci-inentaakwanini, nawac kaye weweni kiishinaakwanini. Aaniihsh kaawiin ininiinaank kii'oncioshihcikaatehsinini i'i Kihcianami'epakwaanekamik, kaawiin kaye kiihtako-oshihcikaatehsinoon ahpii kiioshihcikaatekin o'omaa ahkiink kaa-ayaakin. 12 Ahpii tahsh wiin Christ kaa'anipiintiketc i'imaa Kihcianami'epakwaanekamikonk, aapitink hsa ehta kiihpiintike i'imaa maawac iko kaaishikohtaanentaakwaninik. Wiin itahsh iko omiskwiim okii'aapacihtoon ekiihtepinamawinank pimaaci'ikoowin wiihkaa kepoonihsehsininik. Kaawiin wiin maanatihkwa', kaawiin kaye aape​pishihkiinhsa' omiskwiini okii'aapacihtoohsiin ahpii kiipakitinaahsotc. 13 Iki tahsh kaakiihpehkentaakosihsikwaa kiihsihswewepinamawaawak i'i maanatihk omiskwiini, aape​pishihkiinhsan kaye omiskwiini, i'i kaye otishkwaahkisowinini i'i nooshepishihkiinhsa'. Miitahsh i'i kaainwaatenik o'o ishihcikewin wakicaya'ii nahke cioncipehkakimintwaa kaakii'ishi​pehkentaakosihsikwaa. 14 Kiishpin itahsh o'o tepwe ishihsek, awahshime tahsh Christ omiskwiim niipiwa' takashki'ewisiimakanini. Aaniihsh Ahcaahkwan kaanehpiciayaanitc ekiihkikishkaakotc kaakii'oncikashkihtootc cipakitinank opimaatisiwin ekiihpakitinamawaatc Kishemanitoon, aahpici kwayahk ekii'ishinaakositc. I'imaa hsa tahsh kaaishinaanaakatawentamank, mii 'imaa Christ omiskwiim taishipehkihcikemakanini, cikikisiwaahsiwank kaapaahtaa'ikowank ishihcikewinan. Miitahsh i'i keishianohkiihtawank kaapimaatisitc Kishemanitoo. 15 Inashke tahsh Christ wiiniko onaakacihtoon i'i oshkiahshotamaatiwin. Iki hsa kaakiihkanoonikowaatc Kishemanitoon okatepinaanaawaa kaakii'ahshotamaakowaatc wiihkaa kepoonihsehsininik. Inashke tahsh kii'nipo ekiihtipa'waatc ciaapa'omintc kaakii'ishi macitootaminitc mekwaa kehteahshotamaatiwin kiiaapataninik. 16 Awiya tahsh kiioshihtootc nipowimasina'ikan aaniin ketoocikaatenikin otaya'iiman ishkwaapimaatisitc, mii hsa eshinaakwaninik pinamaa cinipotc cipwaa aapataninik i'i ahshotamaatiwin kaakii'oshihtootc. 17 Kaawiin itahsh kekoon inaapatahsinini ahshotamaatiwin, a'a kaakii'oshihtootc mekwaa ehpimaatisitc. Paanimaa tahsh kiinipotc ta-aapatanini. 18 Miitahsh i'i nihtam ahshotamaatiwin kaakii'ayaak kaakii'onci​maacii​anohkiimakahk ehta miskwi ekii'aapatahk. 19 Moosihs (Moses) itahsh ahpii kiiwaawiintamawaatc pemaatisinitc aaniin ehkitoomakaninik Onahshowewin, miitahsh o'o paanimaa kaakii'ishihciketc. Ini hsa aape​pishihkiinhsa', maanatihkwa' kaye omiskwiini okii'otaahpinaan. Nipiini tahsh okiihtakwaakaminaan. Miitahsh Moosihs kaa'ishititipinank i'imaa ihsap (Hyssop) miihshaahtikoonhsink opiiwayini maanahcaanihshan kaakii'miskwatahtenikin. Okiihcehkipiinaan itahsh i'imaa otakwaakaminikanink. Miitahsh kaa'ishiohswepiikiwepinank i'i otakwaakaminikan i'imaa Onahshowewi-Masina'ikanink, pemaatisinitc kaye ekiihsasiihswepiikiwepinamawaatc. 20 Miitahsh o'o Moosihs kaakii'ihkitotc: "Mii hsa o'oweni miskwiini Kishemanitoo eshionahtamawinek i'i ahshotamaatiwin. Kinantawenimikowaa kaye cina'ihtamowek." 21 Miitahsh kaye peshikwan kaahtootank i'i Kihcianami'epakwaanekamikoni, ini kaye kahkina kekoonan kaakii'aapataninikin kiianami'aank, miskwiini misiwe ekiihpiiwaakamiwepinank. 22 Miitahsh i'imaa Onahshowewinink eshinaakwahk, kekaa kahkina kekoon e'oncipehkihcikaatek i'imaa miskwiink. Kaawiin kaye macitootamowin taapoonencikaatehsinoon kiishpin miskwi siikinikaatehsinokipan. 23 Ono hsa ahkiiwikekoonan kaakiihkakwe naapihcikemakahkin aaniin eshiwepahk weti kihcikiishikonk, oncitako kii'ishinaakwanoon o'o nahke miskwiink cikii'ishipehkihcikaatekipanen. Ini tahsh wiin kihcikiishikoowi kekoonan wiihpehkihcikaatekin, mii 'i eshinaakwahk maawac iko wenishihshink pakitinaahsowin cikii'aapatahkipan. 24 Kaawiin itahsh wiin ininiwan okii'oshihtoohsiini i'i kaaishikohtaanentaakwaninik Christ kaakii'ishipiintiketc. I'i iitok ininiiwi oshihcikan kii'mihcikakwenaapinaakwan aaniin eshinaakwahk kihcikiishikonk. Weti tahsh iko mayaa kihcikiishikonk kii'ishipiintike, e'niipawiihtamawinank enaahsamiinitc Kishemanitoon. 25 A'a hsa Coowiwi Kihcianami'ewikimaa nihtaapiintike i'imaa maawac iko kaaishikohtaanentaakwaninik entahso peshiko takwaakin, ekiihpiintikatootc miskwiini kaatipinawewisihsik. A'awe tahsh Christ kaakii'ishipiintiketc kihcikiishikonk kaawiin paahtiinwaa cipakitinitisotc kaakii'oncipiintiketc. 26 Kiishpin itahsh o'o eshihcikekopanen, aasha maawiin paahtiinwaa taakiihpikakwaatakihtoo weti otaanaank nihtam kii'oshihcikaatenik ahkiini piinihsh noonkom. Inashke tahsh aasha kekaa e'ocihcihsek ewii'ishkwaahsek o'owe ahki, aapitink iko kii'naakosi cipoonencikaatenik pemaatisinitc kaakii'ishi macitootaminitc, pakitinaahsowinink ekiihtinowitc. 27 Oncitako ishinaakwanini awiya aapitink cinipotc. Kii'ishkwaanipotc itahsh mii 'i citipaahkonikotc Kishemanitoon. 28 Miitahsh peshikwan Christ kewiin aapitink kaakii'oncipakitinintc pakitinaahsowinink citinowitc, ekii'oncikakwaatakihtootc kaapaahtiinonitc pemaatisinitc kaakii'ishi macitootaminitc. Miinawaa tahsh pitakohshink kaawiin wiin macitootamowinan okapapaapisiskentansiinan. I'i hsa kaa-aaskonipii'ikotc okapimaaci'aa '.

Hiiparoowiwak 10

1 I'i hsa Coowiwi Onahshowewin mii 'i eshinaakwahk, taapishkoo kekoon kaa-akawaahtehsink ekiihkakwe​naapinaakwahk kaawii'ishinaakwahkin ini kaaonishihshinkin kekoonan kaawiihpi​takohshinoomakahkin. Aaniihsh Onahshowewin kaawiin mayaa aawansinoon kaawiihpi​takohshinoomakahk. Ini tahsh peshikwan pakitinaahsowinan pakitinikaatewan entahsokihkinoonowin. Ini tahsh pakitinaahsowinan mooshak ehpakitinikaatekin kaawiin tepwe oncikiishinaakosihsiiwak iki pehsho kaapinaasihkawaawaatc Kishemanitoon. 2 Kiishpin tahsh tepwe iki pemaatisiwaatc kaakii'anami'ehtawaawaatc Kishemanitoon kiihpehki'aawintwaapan omacitootamowiniwaank onci, kaawiin iitok otaakiimikoshkaatentamo'ikohsiinaawaan omacitootamowiniwaan. Kahkina tahsh pakitinaahsowinan taakiihpoonihsewan. 3 Ini tahsh kaaishi​pakitinaahsonaaniwaninik entahsokihkinoonowin, mii hsa i'imaa aanciko pemaatisiwaatc kaaishi​kiiwe​maamihkawiwaatc omacitootamowiniwaan. 4 Iki tahsh aape​pishihkiinhsak, maanatihkwak kaye omihskwiimiwaan kaawiin wiihkaa i'imaa macitootamowinan taaonci​otaahpinikaatehsinoonan. 5 Inashke tahsh wiin ahpii Christ kiiwiihpitakohshink o'omaa ahkiink, o'o hsa okii'inaan Kishemanitoon: "Kaawiin hsa kinantawentansiinan ini pakitinaahsowinan ini kaye pakitinikewinan. Kikiihkwayaanciihtamawihsh itahsh wiiyaw. 6 Kaawiin kaye kiminwaapamaahsiik aya'aawihshak kiimisiwecaakisontwaa i'imaa kaashipakitinaahsonk, Kaawiin kaye kiminwaapantansiinan ini pakitinaahsowinan kaapakitinikaatekin cionciotaapinikaatekin macitootamowinan. 7 Miitahsh o'o kaa'ihkitooyaan: 'Inashke tahsh niin nintakohshin, Ewiihtootamaan kaaishimihsawentaman, Kishemanitoo, Aaniihsh mii'i eshipii'ikaatek i'i Onashowewimasina'ikanink kaaishitashinsoyaan.' " 8 O'owe tahsh kii'ihkito: "Kaawiin kinantawentansiinan, kaawiin kaye kiminwaapantansiinan ini pakitinaahsowinan, miikiwewinan kaye. Kaawiin kaye kiminwaapamaahsiik kaamisiwecaakisontwaa aya'aawihshak i'imaa kaaishipakitinaahsonk, ini kaye pakitinaahsowinan kaapakitinikaatekin cionciotaahpinikaatekin macitootamowinan." Shaakooc itahsh o'o kii'ihkito aanawiin ini pakitinaahsowinan ekiihtoocikaatekin aaniin ehkitoomakahk i'i Onahshowewin. 9 Miinawaa tahsh kii'ihkito: "Inashke tahsh niin nintakohshin, ewiihtootamaan kaaishimihsawentaman." Kishemanitoo tahsh okii'wepentaanan ini kehtepakitinaahsowinan. I'iweni tahsh Christan kaakiihpakitinaahsonitc, mii hsa i'iweni kaaotaahpinank. 10 Ciisahs Christ tahsh ekii'ishihciketc aaniin kaakii'ishiantawentaminitc Kishemanitoon, mii hsa kiinawint kaaoncipehki'ikooyank macitootamowinink onci cinaasihkawimank Kishemanitoon. Aaniihsh okiihpakitinaan aapitink owiiyaw, mii 'i kahkina kekoonini wiinke kiihtekashkihtootc. 11 Miitahsh Coowi anami'ewikimaa niipawi eshianami'ewanohkiitc entahsokiishik ehpakitinank ini peshikwan pakitinaahsowinan. Kaawiin tahsh i'imaa wiihkaa inahke onciotaahpinikaatehsinoonan macitootamowinan. 12 Christ itahsh wiin aapitink ehta kiihpakitinaahso omacitootamowinini pemaatisinitc onci, wiin iko ekiihpakitinank opimaatisiwin; kaawiin itahsh wiihkaa taaishkwaahsehsinini i'i kaakii'ishihciketc. Miitahsh kaa'ishionapitc okihcinihkiniink inahke Kishemanitoon. 13 Miitahsh weti entashipii'aatc Kishemanitoon, cipatapinaanitc i'i kaashiinkenimikotc taapishkoo otahpisitepiwinink ci-ishinaakosinitc. 14 Aapitink itahsh ekiihpakitinaahsotc, mii hsa i'imaa kaaonci​nehpici​kiishinaakosi'imintc i'i kaapehki'imintc omacitootamowininiink onci. 15 Kishemanitoo tahsh kaye otAhcaahkwan kinaakohtamaakonaan ehtepwewaninik. Aaniihsh o'o nihtam kii'ihkitowan: 16 "Ninkotink itahsh kiishikaninik, ihkito kaaTipenciketc, Ninkaoshihtamawaak ihsa i'i ahshotamaatiwinini. Ninka-ahtaawaanan nintoonahshowewinan i'imaa ote'iwaank, Ninkaoshipii'amowaanan kaye i'imaa otinentamowiniwaank." 17 Miitahsh o'o eni-ihkitonitc: "Ninkanehpici waniihkenotamowaanan hsa omacitootamowiniwaan, ini kaye noociko otishihcikewiniwaan." 18 Ono tahsh aasha ekiihpoonencikaatekin, kaawiin miinawaa memwehc pakitinaahsowinan ta-aapatahsinoonan. 19 Niiciotepwehtamook, kekiinawint itahsh kitayaamin kehcinaa'owin keoncipiintikeyank maawac iko kaaishikohtaanentaakwahk piintik i'imaa Kishemanitoo kaaishianami'ehtawintc; aaniihsh Ciisahs omiskwi kii'miikiwe. 20 Kikiihpaahkintenamaakonaan itahsh oshki-ishaawin, kikii'miinikonaan kaye oshkipimaatisiwin. Christ itahsh owiiyawink kikaoncikashki'owaamin cipiintikewank i'imaa awahsinahke kipiika'ikanink kaakiihkipakootenik. 21 Kitayaawaanaan aaniihsh ehkihci-inentaakositc Anami'ewikimaa kenawaapantank Kishemanitoon owaahkaa'ikanini. 22 Ehkehcinaa'oyank itahsh kite'inaanink, kehcinaac kaye ehtepweyentamank, taka pehsho naasihkawaataa Kishemanitoo. Aaniihsh kaaoncinaanaakatawentamank kiihpehkaapaawacikaatewan wiihkaa miinawaa cinaanaakatawentansiwank kaakiihpi-ishi​macitootamank. Kiwiiyawinaanin kaye kiihpehkaapaawacikaatewan pehkinipi e'aapatahk. 23 Taka tahsh aayiiciminciminantaa i'i kaawiintamank kitahpenimowininaan, aaniihsh kitepwehtawaanaan Kishemanitoo citootank otahshotamaakewin. 24 Taka tahsh naanaakatawentantaa aaniin keshiwaawiici'itiyank cisaaki'itiyank, ciminotootaatiyank kaye. 25 Taka kaye kaawiin kiinawint kikapakiciihsiimin ci-ishaayank kaaishiayoohkwapiyank kaa-anami'aayank. Aaniihsh aaninta o'o ishihcikewak. Taka tahsh maano kakwewiici'ititaa entahsopeshikoyank, aaniihsh aasha kekaa ocihcihseni ninkotink kiishikaninik kaaTipenciketc citakohshink. 26 Kiishpin itahsh kakaancihc animacitootamank ekii'ishkwaakihkentamank i'i tepwewin, kaawiin miinawaa awahshime ayaahsinoon pakitinaahsowin keoncipoonencikaatekipan i'i macitootamowin. 27 Miitahsh ehta ko eshinaakwahk cikohtaanentamankipan i'i kaawiihpitakohshinoomakahk tipaahkonikewin, i'i kaye kaa-aahkwahkwanek ishkote kenihshiwanaaci'ikowaatc iki kaashashiipihtawaawaatc Kishemanitoon. 28 Awiya kiishashiipihtank Moosihs (Moses) otOonahshowewin mewisha, miitahsh o'o kaahtoocikaniwitc: kiishpin niishin (2), komaa kaye nihsin (3) awiyak kiitipaacimikotc, mii hsa shemaak iko kaa'ishinihsintc. Kaawiin wiin awiya kii'manaacihcikaniwihsii. 29 Awiya tahsh wiin kaa-aanawenimaatc Kishemanitoon oKosihsini, awiya kaye kaa-aanawentank i'i miskwiini Kishemanitoon kaakii'ishionahtamaakenitc ahshotamaatiwin, mii iitok i'imaa kaakii'oncipehki'intc, aanciko tahsh kaye ehpaahpinotawaatc ini kaakishewaatisinitc Kishemanitoon otAhcaahkoni – kaawiin ina kitinentansiim aahpici awahshime cikihcikakwaataki'intipan? 30 Kikihkenimaanaan tahsh a'a kaakii'ihkitotc: "Niin hsa ishinaakwan cinanaahkonamaakeyaan, niin kaye ninkakiiwetipa'ike." Miinawaa tahsh kii'ani-ihkito: "KaaTipenciketc hsa okatipaahkonaa' kaatipenimaatc opimaatisiima'." 31 Aahpici ohsha takihcikohtaanentaakwanini awiya tepinikotc kaapimaatisinitc Kishemanitoon. 32 Maamihkawik itahsh otaanaank kaakiihpi-ishihseyek ahpii kii'ishkwaa​kihkentamek kaawaahseyaak, aahpici hsa kikiihshashiipentaam ini kakwaatakihtoowinan, kaawiin kaye kikiihshaakooci'ikoowisihsiim. 33 Ninkotink kaye ekiiwaapamikooyek mohshe ekiihtashi​miihkinsomikooyek, noociko kaye ekiihtootaakooyek, ninkotink kaye ekiihkiishentamek ewii'wiici​kakwaatakihtoomekwaa iki noociko kaakiihtootawintwaa. 34 Kikii'wiici​kakwaatakihtoomaawaak kaye iki tahkonikanak kaaishikakwaatakihtoowaatc. Ahpii kaye kiimahkamikooyek kitaya'iimiwaan, aanciko kikiihciihkentaam, aaniihsh kikiihkihkentaam keyaapi e'ayaayek nawac kaaonishihshik wiihkaa kepooniayaahsinok. 35 O'o tahsh ehpiayishihseyek, keko tahsh wepinankek i'i kaaishikehcinaa'oyek, aaniihsh mii 'imaa keontinamek i'i kihcitipa'amaakoowin. 36 Ishinaakwan ohsha cishashiipentamek citootamowek Kishemanitoo kaaishimihsawentank, citepinamowek kaye i'i kaakii'ahshotamaaketc. 37 Aaniihsh Kihcimasina'ikan ishipii'ikaate: "Aahpici hsa wiipa tatakohshin a'a kaawiihtakohshink, Kaawiin tapwaahtawiihsii. 38 A'a hsa ninkwayahkwaatisiim otepwehtamowinink taishipimaatisi. Kiishpin tahsh awiya noonteashekiiwetc, kaawiin ninkaminwaapamaahsii." 39 Kiinawint itahsh kaawiin kitinowihsiimin kaanoontekiiwewaatc kenihshiwanaatisiwaatc. Iki ohsha kitinowimin otepwehtamowiniwaank keoncipimaaci'int waa.

Hiiparoowiwak 11

1 Inashke tahsh, kaaotepweyentamowiniyank kitoncikehcinaa'omin ini kekoonan kaa-ahpenimonotamank tepwe e'ayaakin, kitooncikihkentaamin kaye kehcinaac e'ayaakin kekoonan kaawaapancikaatehsinokin. 2 Otepweyentamowiniwaank iitok mewisha ininiwak kaakiihpimaatisiwaatc okii'onciminwaapamikowaan Kishemanitoon. 3 Tepweyentamowinink hsa nintooncinihsitohtaamin kahkina kekoonan kiishikonk kaa-ayaakin ahkiink kaye ekii'oncioshihcikaatekin i'imaa Kishemanitoo otihkitowinink. Ini tahsh kaanaakwahkin kii'oncioshihcikaatewan i'imaa kekoonink kaanaakwahsinokin. 4 Tepweyentamowinink hsa Epal (Abel) kaakii'oncipakitinamawaakopanen Kishemanitoon nawac kaakii'onishihshininik pakitinaahsowin ahpiihc wiin iniweniwan Kenan (Cain). Mii hsa tahsh i'i kaakii'onciminwaapamikookopanen Kishemanitoon ekii'inakimikotc okwayahkwaatis, aaniihsh okii'minwaapantamini omiikiwewin. Aana tahsh wiin noonkom ehpimaatisihsik mii 'iwe eshinaakwaninik otepweyentamowinink keyaapi e'oncikaakiikitotc. 5 Iinohk (Enoch) itahsh otepweyentamowinink kaakii'onci-ishiwinintc ishpimink, kaakii'onci​otihsaapantansikopanen cinipotc. Kishemanitoon hsa okii'mihci​otaahpinikoon, miitahsh awiya' kaakii'oncimihkaakohsik. Kihcimasina'ikan hsa ishipii'ikaate: "Aahpici Iinaahk okii'minwaapamikoon Kishemanitoon cipwaa maaciinikotc." 6 Kaawiin itahsh awiya otaaminwaapamikohsiin Kishemanitoon kiishpin ayaahsik tepweyentamowin. Awiya hsa kaapinaasihkawaatc Kishemanitoon mii 'i eshinaakwaninik citepweyenimaatc e'ayaanitc, ehtipa'amawaanitc kaye weweni kaa-antone'okonitc. 7 Noowa (Noah) ohsha otepweyentamowinink kaakii'oncinoontawaakopanen Kishemanitoon niiyaak ekii'wiintamaakotc aaniin waa'ani-ishiwepaninik, aanawiin ekii'waapantansik, okii'na'ihtawaan ehkohtaanenimaatc Kishemanitoon. Miitahsh kaakii'oshihtootc kihcimihtikociimaan aanti keoncipimaatisitc, i'i kaye kahkina kaatahshitc otaawinink. Miitahsh otepwehtamowinink kaakii'ishinaakohtamawaatc kotak pemaatisinitc sesik ekii'ishipimaatisihsinik, kaakii'oncitepinank kaye kwayahkwaatisiwin tepweyentamowinink kaaonciinik. 8 Eparahaam (Abraham) hsa otepweyentamowinink kaakii'oncina'ihtawaakopanen Kishemanitoon kiikanoonikotc pahkaan ahkiink ci-ishaatc, ekii'ahshotamaakotc ahkiini ewii'miinikotc ciayaatc. Okii'nakataan itahsh otahkiim ekiihkihkentansik aanti eshaatc. 9 Ekiihtepwehtank itahsh kaakii'onci​ayishitaatc i'imaa ahkiink Kishemanitoon kaakii'ishi​ahshotamaakotc, ekiihtashipiiwitewitc i'imaa ahkiink, pakwaanekamikonk ekii'ishitaatc. Miitahsh peshikwan Aaisik (Isaac), Cekap (Jacob) kaye kaa'ishihcikewaatc, kewiinawaa peshikwan ekiihtepinamowaatc otahshotamaakoowinini. 10 Eparahaam aaniihsh okiihpiihtoon i'i kaaonaapihkihsicikaatenik kihciootenaani kenehpiciayaanik, Kishemanitoon kaakii'onentaminitc aaniin keishinaakwaninik, kaakii'oshihtoonitc kaye. 11 Otepweyentamowinink itahsh kaakii'onciotetemaawitc aanawiin ekii'ahkiwensiiwitc, wiiwan itahsh kaye Serawan (Sarah) ekiihkashkihtoohsinik ciotapinoonciishiminitc, ekiihkehcinaa'aatc Kishemanitoon cikanawentaminitc kaakii'ishiahshotamaakenitc. 12 Inashke tahsh a'a peshik inini Eparahaam aasha paahkac kii'inentaakwaninikopan ciotetemaawihsik, mii hsa i'imaa takwac niipiwa' pemaatisinitc kaaonciinitc, ekii'ahpiihci paahtiinonitc taapishkoo kaatahshinitc wanankohsha' weti kiishikonk, ekiihtahshinitc kaye citepakimimaahsiwintc taapishkoo kaa-ahpiihci​paahtiinwewaawankaak i'i newank i'imaa kaaishi​nanaanewaawankaak kihcikamiink. 13 Iki tahsh kahkina kaakiihtepweyentamowaatc aasha kii'nipowak, ekiihtepinansikwaa kaakii'ahshotamawintwaapan, shaakooc itahsh niiyaak okii'mihcitepaapantaanaawaan ini kaakii'ishiahshotamawintwaa, waahsa kaye okii'onsaapantaanaawaan, okii'otaahpinaanaawaan itahsh kaye, ekii'ihkitowaatc ekiihpiiwitewiwaatc, e'oncitipentaakosihsikwaa aanawiin ekii'ishitaawaatc o'omaa ahkiink. 14 Iki tahsh i'i kaaihkitowaatc, mii 'imaa eshinaakwaninik e'nanaantawaapantamowaatc ahkiini wiinawaa piko ewiihtipinawewisiwaatc. 15 Kaawiin tahsh kaye mooshak okii'naanaakatawentansiinaawaa i'i ahkiini kaakiihpioncimaacaawaatc, aaniihsh kiishpin i'i ishihcikewaahpan, taakii'ishihseni iitok cikiihkiiwewaahpan. 16 I'iweni tahsh nawac kaaonishihshininik ahkiini okii'antawentaanaawaa. Kihcikiishikowi ahkiini okii'antawentaanaawaa. Miitahsh i'i Kishemanitoo kaaonciakacihsik, "Ninkishemanitoom" ci-ishinihkaanikotc, aaniihsh okiihkwayaancihtamawaa' kihciootenaani keishiayaanitc. 17 Eparahaam itahsh otepwehtamowinink kaakii'oncina'ihtawaatc Kishemanitoon ahpii kii'antakihkenimikotc, kiikanoonikotc cipakitinaatc ini okosihsan Aaisikoon ci-inwaanaatc pakitinaahsowinink. Wiin iitok kaakii'ahshotamaakotc Kishemanitoon, shaakooc itahsh kii'inentam ekiiwiihpakitinaatc okosihsan kaakii'mihcipeshikonitc. 18 Kishemanitoon hsa okii'ikopaniin: "Iki hsa kaakii'ahshotamawinaan keopiiwesiimiyan, Aaisikonk taonciiwak." 19 Eparahaam itahsh okiihkihkenimaan Kishemanitoon cikashki'aanitc cikiiwepimaatisi'aanitc Aaisikoon kii'ishkwaaniponitc. Inashke tahsh tepwe Eparahaam okii'ishinawaan Aaisikoon taapishkoo ekiiniponitc, ekiihkiiwemiinintc itahsh kaye kii'ishkwaa​kiiwepimaatisi'imintc. 20 Aaisik itahsh ekiihtepweyentank kaakii'onci​niikaani​shawenimaatc cianiminohsenitc Cekapoon, Iihswaan (Esau) kaye, ekiihtashintamawaatc aaniin niiyaak keni-ishihsenitc. 21 Cekap itahsh ekiihtepweyentank aasha piko kekaa ewii'nipotc kaakii'onci​shawenimaatc cianiminohsenitc Coosapoon (Joseph) okosihsini. Ekii'aahpataahkwiitc itahsh osahka'onaahkonk, ekii'anami'ehtawaatc Kishemanitoon. 22 Coosap itahsh otepweyentamowinink, aasha kekaa ewii'aninipotc, niiyaak okiihtashintaan Isriyala' (Israel) cinakataminitc Iicip ahkiini (Egypt). Miitahsh i'i kaakii'wiintank aaniin mayaa ketoocikaatenikin ohkanan. 23 Moosihs (Moses) itahsh oniiki'ikoo' ekiihtepweyentaminitc kaakii'oncikaanikotc nihsokiisihs (3) minihk kii'ishkwaa​nihtaawikitc. Aaniihsh okii'waapamikoo' ekii'minonaakositc. Kaawiin kaye kiihkohtaacihsiiwa' ekii'ishihcikehsinik kihciokimaan kaakii'inaahkonikenitc. 24 Moosihs itahsh otepweyentamowinink ahpii kiikiishaapewitc, kaakii'onci-inentansik ci-icikaniwitc Peroo (Pharaoh) otaanihsan hsa ini okosihsan. 25 Awahshime tahsh kii'inentam ewii'wiicikakwaatakihtoomaatc i'i wiicipimaatisii' Kishemanitoon kaakiihtipenimaanitc, ahpiihc wiin ciciihkentankipan acina kaaishiminwentaakwaninik macitootamowinini. 26 Miitahsh kaa'inakintank nawac e'onishihshininik ci-ishimacitashimintc ini Kishemanitoon KaaOnenimaanitc keishimacitashimimintc, ahpiihc wiin kekii'ishiwenootisihpan Iicipahkiink. Aaniihsh okii'ahshawaapantaan niikaanaya'ii kemiinintc tipa'amaakoowin. 27 Moosihs itahsh ekiihtepweyentank kaakii'oncinakatank Iicip ekiihsekisihsik, aanawiin kihciokimaan ekii'nishkaatisinitc. Kaawiin kii'inentansii cikiiwetc, aaniihsh okii'waapamaan kaanaakosihsinik Kishemanitoon. 28 Otepweyentamowinink itahsh kaakii'oncioshihtootc ci-ishihcikenaaniwaninik i'i Pimaaci'ikoowi​Wiihkwantiwin, i'i kaye kaakii'anoohkiitc miskwiini ciahcikaatenik ishkwaantemaahtikohkaank. Miitahsh kaakii'onci-ishihcikewaatc ini hsa Kaanihshiwenitc Encalan cinihsaahsinik i'i kaasasiihkisinitc kwiiwisenhsa' i'imaa Isriyalihkaank. 29 Otepweyentamowiniwaank itahsh Isriyalak kaakii'oncikashkihtoowaatc e'aashawishkaawaatc i'imaa KihciMiskokamiink (Red Sea), ekiihpaankwahkamikaanik kaakii'ishipimohsewaatc. Iicipiiwi (Egyptian) shimaakanihshak itahsh ekiihkakwekashkihtoowaatc kewiinawaa, kahkina hsa mii 'imaa kaa'ishinihsaapaawewaatc. 30 Otepweyentamowiniwaank itahsh i'i kihciootenaani Cerahko (Jericho) kaakii'ishi​waahkaayaapihkinikaatenik kaakii'onciniihsihsenik ahpii Isriyalak kii'ishkwaa​kishipaashkaawaatc niishwaahso (7) kiishik. 31 Orehaap (Rahab) kaakiihpihshikwaacihkwewitc, ekiihtepweyentank kaakii'oncinihsaahsiwintc ahpii kiinihshiwanaacihcikaniwinitc i'i kaakiihshashiipihtawaanitc Kishemanitoon. Aaniihsh weweni pisaan okiihpiintikanaa' ininiwa' kaakii'niikaani​ayinaapinitc, Isriyalihkaank kaakii'onciinitc. 32 Keyaapi na tahsh ninkawaawiinaak awiyak? Kaawiin itahsh nintepihsehsii citashimakwaapan Kiitiyan (Gideon), Perahk (Barak), Saamihsan (Samson), Cepihta (Jephthah), Tepit (David), Saamiyoo (Samuel), iki kaye kaakiihkanoocikehtamawaawaatc Kishemanitoon. 33 Otepweyentamowiniwaank itahsh ahpii kiimiikaasowaatc kaakii'oncishaakoocihtoowaatc ininiiwi okimaawiwinan. Okii'onahtoonaawaa kwayahk ci-ishihcikenaaniwaninik. Okiihtepinaanaawaa kaye Kishemanitoon otahshotamaakewinini. Okiihkipa'amawaawaa' kaye mihshipishiwa' otoonini. 34 Okii'aahtaweshkaanaawaan kaye kaakiihkishahkwanenikin ishkoten, ekii'maaciipa'iwaatamowaatc kaye pashipa'ikewihkomaanan. Ekii'ishi'intwaa kaye cimashkawentaakosiwaatc aanawiin ekii'macentaakosiwaatc; ekiihsoonkentaakosiwaatc kaye kiimiikaasowaatc; ekii'maaciiyaama'waawaatc kaye kaakii'mayakisinitc shimaakanihsha'. 35 Otepweyentamowiniwaank itahsh kaye ihkwewak kaakii'onci​kiiwe​waapamaawaatc otinawemaakaniwaa' kaakii'niponihpan ekiihkiiwepimaatisi'imintc. Aaninta tahsh kaye kiihkakwaatakihcikaniwiwak ekii'antawentansikwaa cipakitinintwaa, aaniihsh okii'antawentaanaawaa cikiiwepimaatisi'intwaa ciayaawaatc nawac kaawii'onishihshininik pimaatisiwin. 36 Aaninta tahsh kii'ishikakwaataki'aawak ekiihpaahpinotawintwaa, ekiihpahpahshanshe'ontwaa kaye. Kotak kaye piiwaapihkweyaapiini kii'aapatanini ekii'mamaancikwahpinintwaa, ekiihkipa'ontwaa kaye. 37 Aaninta tahsh kiihpapiimwahsina'aawak, kotak kiihtaashkipoocikaniwiwak, aaninta kaye kihcimoohkomaanini kii'aapatanini ekii'nihsintwaa. Misiwe tahsh kiihpapaamiayaawak maanahcaanihshiwayaana', maanatihkowayaana' ekii'okikishkikaniwaatc, ekiihkitimaakisiwaatc, ekiihkakwaataki'intwaa, noociko kaye ekiihtootawintwaa. 38 Aaniihsh kaawiin ahkiini kiihteahpiihtentaakwahsinini o'omaa cikii'ayaawaahpan. Pakwatahkamik hsa kiihtashipapaamipa'iwewak, kaaishipapiihkwatinaanik kaye kii'ahpa'iwewak. Kaaishiwawiimpaapihkaanik, kaaishipapakonehkamikaanik kaye ekii'ayishitaawaatc. 39 Okoweniwak itahsh aahpici kiihkihciminwaapancikaniwiwak otepweyentamowiniwaank onci. Shaakooc itahsh kaawiin okiihtepinansiinaawaa i'i Kishemanitoon kaakii'ahshotamaakenitc. 40 Kishemanitoo tahsh kii'inentam ewii'oshihtamawinank nawac kekoonini kaaonishihshininik. Aaniihsh kii'inentam paanimaa ko wiiciiwimank ewiihkiishinaako si'aat c.

Hiiparoowiwak 12

1 Kiinawint itahsh wiin, e'ayaawaatc ehpaahtiinowaatc awiyak waahkaaya'ii e'onsaapaminankwaa ehkanawaapaminankwaa, taka tahsh wepinantaa kahkina kekoon kaawanishkwe'ikoyank, i'i kaye macitootamowin kaakihciwishkaakoyank. Taka kakweshashiipentantaa o'o kaapimipa'itiyank ehkakwecihkashiweyank, niikaanaya'ii kaaonahtamaakooyank. 2 Taka mooshak kanawaapamaataa Ciisahs kaakii'maacihtootc, kaakiihkiishihtootc kaye kitepweyentamowininaanin. Kaawiin itahsh kiihpakiciihsii aanawiin ekiihkihkentank cinihsintc aashiteyaahtikonk, aanciko tahsh kaawiin okiihpapaapisiskentansiin kaakiiwii'ishiakaci'intc, aaniihsh okiihkihkentaan i'i minwentamowin kaakiihpii'ikotc. Inashke tahsh noonkom Kishemanitoon owiitapimaan, okihcinihkiniink inahke e'ishiapitc. 3 Taka naanaakatawentamowaahk aaniin kaa'ahpiihcishashiipentank maawac kaakii'ishishiinkenimikotc omacaatisii', keko tahsh kekiinawaa pakiciiwentankek, keko kaye noonteaanawencikehkek. 4 Kiinawaa aaniihsh kaawiin mahshi wiihkaa kitooncipehshwaapantansiim cinihsikooyek i'i kaamiikaatamek macitootamowin. 5 Aasha na kikii'waniihkem kaakii'ikooyek, ekiihkanoonikooyek cikakwemashkawentamek, Kishemanitoo e'okosihsiminek, e'ihkitotc: "Ninkosihs, pisintan ahpii kaaTipenciketc kiimaamiinomihk, Keko kaye macentanken ahpii kiikihcinooci'ihk, 6 Aaniihsh kaaTipenciketc omaamiinomaan awiyan kaasaaki'aatc, Omaamiinopahshanshe'waan kaye kahkina awiyan kaaotaahpinaatc, 'Ninkosihs' ewii'ishinihkaanaatc." 7 Shashiipentamok itahsh i'i kaaishikakwaatakihseyek e'maamiinopahshanshe'okooyek, aaniihsh Kishemanitoo kitootaakowaa taapishkoo e'oyOohsimek. Wiihkaa na ayaa okosihsimaa kemaamiinonikohsik oteten? 8 Kiishpin itahsh kiinawaa wiihkaa maamiinopahshanshe'okoohsiwek taapishkoo kaatootawintwaa iki kotak okosihsimaak, kaawiin iinsan tepwe kitookosihsimikoohsiim. Miitahsh taapishkoo pikwatoonshaanink enentaakosiyek. 9 Iki tahsh wiin kaakii'oteteyank o'omaa ahkiink kikii'maamiinopahshanshe'okonaanik, kikiihkihtenimaanaanik itahsh kaye. Nawac iitok taaonishihshin cipakitinitisohkantawankipan a'a kitahcaahkonaanink inahke kaashioTeteyank, cipimaatisiyank itahsh. 10 Iki hsa kaakii'oteteyank o'omaa ahkiink acina hsa ehta kikii'maamiinopahshanshe'okonaanik, wiinawaa kaakii'ishiminwaapantamowaatc. Kishemanitoo tahsh wiin ciminohsewank kaaoncitootawinank, ci-ishiwiitoohkaasowank kaye i'imaa oKishemanitoowaatisiwinink. 11 I'i hsa kahkina maamiinonikoowin mekwaa e'aapatahk kaawiin minwentaakwahsinoon, wiihsakentaakwan iitok. Shaakooc itahsh iki i'i nahke kaaishikihkino'amawintwaa naanaake kwayahkwaatisiwin okaontinaanaawaa, miitahsh i'imaa wenciik pisaanisiwin. 12 Inashke tahsh siitonihkenik kaa-ayehkonihkeyek, siitokaatehtaak kaye kiinawaa kaaniinamikaateyek. 13 Pimohsaatamok ehta ini miihkanawan kaakwayahkomohkin, miitahsh awahshime cini-ishiayaahsinok kaashimaahkisiteyek, ciniminoayaahcikaatek itahsh. 14 Weweni tahsh kakwewiicipimaatisiimihkwak kahkina ininiwak, kakwepehkaatisik kaye, aaniihsh kiishpin awiya ayaahsik pehkaatisiwin kaawiin okawaapamaahsiin Kishemanitoon. 15 Ayaankwaamisik itahsh awiya cinoonteaanawentansik Kishemanitoon okishewaatisiwinini. Keko kaye ta-ayaahsii awiya keishinaakositc taapishkoo macaahtik kaamoohkikitc keoncimaashihsewaatc awiyak. Tapaahtiinowak iitok keonciwiini'intwaa. 16 Keko kaye awiya tapihshikwaatisihsii, keko kaye awiya ta-ayaahsii ci-ishikakiipaatisitc taapishkoo Iihswaa (Esau). Peshik wiihsiniwinink iitok okii'inataawaaken kekiihtipinawewisihpan wiin nihtam ekii'nihtaawikitc. 17 Kikihkentaam itahsh naanaake ekii'antawenimaatc oteten cimiinikotc Kishemanitoon oshawencikewinini, kii'aanawentaakosi tahsh. Aaniihsh kaawiin okiihkashkihtoohsiin cikiihtootansikipan, aasha kaakii'ishihciketc, aanawiin ekii'mamawitc weweni ekiihkakweaancihtootc kaakiihtootankipan. 18 Kaawiin itahsh kiinawaa kipinaasihkansiim i'i kihciwaciw kekiihsaaminikaatekipan, kaaishikishahkwanek kaye ishkote, kaaishikashkiitipihkahk kaye, kaaishikashkiitipihkaanahkwahk, kaaishi​kihci​kishipaayaanimanohsek kaye. 19 Kaawiin kaye kipiishaahsiim kihcipootaacikan kaaishinoontaakohcikaatek, i'imaa kaye kaa'ishinoontawintc awiya ehkiikitotc. Iki iitok kaakii'noontawaawaatc ehkiikitonitc, kii'ishipakohsenimowak keyaapi ewii'noontawaahsikwaa. 20 Aaniihsh kaawiin okiihkashkihtoohsiinaawaa cinoontamowaatc kaakii'inintwaa: "Pooshke hsa aya'aawihsh saamishkank i'i kihciwaciw, mii hsa eshinaakwaninik ciniiwana'ikaniwitc ahsinii' ciaapatisinitc." 21 Miitahsh kaa'ahpiihci sekaapihshinowaatc, mii 'i Moosihs (Moses) kaa'ihkitotc: "Wiinke hsa ninininkishkaa ehpiihtaanimisiyaan." 22 I'imaa tahsh kiinawaa kihciwaciwink Saayan (Zion) kaaishinihkaatek kikii'ishitakohshinim. Mii 'i iitok i'i kihcikiishikoowi Ceroosalam (Jerusalem), okihciootenaam kaapimaatisitc Kishemanitoo, ekii'ishitakohshinek kaaishiayaawaatc mitaahswaahk mitaahswaahk encalak; 23 ekii'ishitakohshinek kaye kaaishiminwentamonaaniwank kaaishimaamawiinonitc Kishemanitoo nihtam kaaokosihsimaatc, owiinsowinini kaaoshipii'ikaatenikin kihcikiishikonk; ekiihpinaasihkawek kaye Kishemanitoo kaatipaahkonaatc kahkina pemaatisinitc. Kipitakohshinim kaye kaaishiayaanitc otahcaahkowaa' iki kwayahk pemaatisiwaatc aasha kaakiih​kiishi-ishinaakosi'intwaa. 24 Ekii'naasihkawek kaye Ciisahs kaanaakacihtootc oshkiahshotamaatiwin; ekiihpitakohshinek kaye kaakii'ishi​piiwaakamiwepinikaatenik omiskwiim, nawac kaaminwahshotamaakemakahk ahpiihc wiin Epal (Abel) kaakii'ishi​pakitinaahsokopanen. 25 Ayaankwaamisik itahsh, pisintawihk a'a kaakakanooninek. Iki hsa kaakiihpisintawaahsikwaa ini kaakiihtashintamaakowaatc i'i tipaacimowin o'omaa ahkiink, kaawiin kiihshaapwiihsiiwak. Nawac itahsh kiinawint kikananiisaanisimin cishaapwiihsiwank kiishpin pisintawaahsiwank a'a kihcikiishikonk kaaonciayaankwaamiminank. 26 Ahpii tahsh ekiihkiikitotc kiihkoshkohseni ahkiini. Noonkom itahsh wiin kii'ishiahshotamaake: "Keyaapi aapitink ninkaishihcike, kaawiin ehta i'i ahki ninkakoshkowepinansiin, i'i hsa kaye kihcikiishik ninka​tako​koshkowepinaan." 27 I'i tahsh kaakii'ihkitotc: "Keyaapi aapitink ninkaishihcike," mii 'imaa eshiwaapantamowank ini kaakii'oshihcikaatekin ewiihkoshkowepinikaatekin, ewii'otaahpinikaatekin kaye. Ini tahsh kekoonan kaakashkihcikaatehsinokin ciwahkawiwepinikaatekin, miiwan hsa ini ehta keayaakin. 28 Taka tahsh, miikwehciwentantaa kekiinawint e'miinikooyank ci-ishiwiitoohkaasoyank i'i Kishemanitoo kaashitipenciketc, kaakashkihcikaatehsinok ciwahkawiwepinikaatek. Taka kaye miikwehciwenimaataa, ci-ishianami'ehtawank Kishemanitoo inahke kaaishiminwaapaminank. Taka kaye anami'ewikihci-inenimaataa, cikohtaanenimank kaye. 29 Aaniihsh kiKishemanitoominaan ishikohtaanentaakosi taapishkoo ishkote kaa-ankwaahkisik emakah k.

Hiiparoowiwak 13

1 Kiinawaa tahsh keko wiihkaa poonihtoohkek i'i kaaishisaaki'ekwaa kaawiiciotepwehtamoomekwaa. 2 Maamihkawihk kaye cipiintikanekwaa piiwitek i'imaa kitaawiniwaank. Aaninta hsa i'i kii'ishihcikewak, ekiihkihkentansikwaa tahsh encala' ehpiintikanaawaatc. 3 Maamihkawinotawihkwak itahsh iki kaakipa'ontwaa, ci-inentamek taapishkoo e'wiiciiwekwaa. Maamihkawinotawihkwak kaye iki kaamaashitootawintwaa, taapishkoo kiinawaa piko 'i eshikakwaatakihseyek. 4 Wiitikentiwin tahsh maawac iko taakihci-inencikaate. Onaapemimaa, wiiwimaa kaye mii 'i eshinaakwaninik kwayahk tepwe citootaatiwaahpan. Kishemanitoo hsa wiin okatipa'amawaa' kaawiinaatisinitc i'i kaye awiya' kaapimenimaanitc pahkaan awiyan owiitikemaakanini. 5 Cisaaki'aahsiwek kaye shooniyaa ishipimaatisik, mii 'i teminihk inentamok kekoon kaa-ayaayek. Aaniihsh Kishemanitoo kii'ihkito: "Kaawiin wiihkaa kikanakanihsinoon, kaawiin wiihkaa kikawepinihsinoon." 6 Taka tahsh soonkite'etaa ci-ihkitoyank: "KaaTipenciketc ohsha kaawiici'itc, Kaawiin tahsh ninkasekisihsii. Aaniin tahsh inini ketootawihpan?" 7 Maamihkawinotawihkwak itahsh iki kaakii'niikaaniihtamawinekwaa, iki kaakii'waawiintamawinekwaa Kishemanitoon otihkitowinini. Kanawaapantamowaahk itahsh kaye wekonen kaakii'onciinik aaniin kaakii'ishipimaatisiwaatc. Kaaishitepwehtamowaatc kaye kekiinawaa mii inahke ishitepwehtamok. 8 Ciisahs Christ hsa peshikwan ishiaawi, kaakiihtinowitc otaanaank, mii hsa peshikwan noonkom kaakiishikaninik, mii kaye peshikwan mooshak keishiaawitc. 9 Keko tahsh ishipakitinitisohkek ciwanihshimikoyek kaapepahkaanatinkin kihkino'ikewinan, kaamayakihtaakwahkin kaye. Onishihshinini awiya kaaontinank mashkawisiiwin i'imaa Kishemanitoon okishewaatisiwininiink, kaawiin wiin i'imaa onciimakahsinoon kaaishipiminisha'ikaatek kaainahtek aaniin awiya keinancikehpan. Iki hsa 'i nahke kaaishihcikewaatc kaawiin i'imaa onciwiici'aahsiiwak. 10 Kiinawint hsa kitayaamin kaaishipakitinaahsonk, iki tahsh wiin kaatashipamiihtaakewaatc Coowi Anami'epakwaanekamikonk kaawiin wiinawaa ishinaakwahsinini cikiimiiciwaahpan i'i kaapakitinamowank. 11 Nashke tahsh Maawac Coowi Kihcianami'ewikimaa okii'nihtaa​piintikatoon aya'aawihshi​miskwiini ekiihpakitinank i'imaa maawac iko kaaishikohtaanentaakwahk, omacitootamowinini onci. Iki tahsh wiin aya'aawihshak owiiyawiwaan saakicaya'ii inahke kaakii'ishikapehshink kii'ishicaakisikaateniwan. 12 Miitahsh peshikwan Ciisahs kaakii'oncinipotc akwaciink inahke kihciootenaawishkwaantemink ewiihpehki'aatc pemaatisinitc omacitootamowininiink onci, wiin iko omiskwiim ekii'aapacihtootc. 13 Taka tahsh kekiinawint ishaawaataa saakicaya'ii kaaishikapehshink, kekiinawint pisaan citootaakoowank kaakii'menihshentaakwaninik kaakiihtootawintc. 14 Kaawiin iitok kiinawint ayaahsinoon nehpic kaa-ayaak kihciootena o'omaa ahkiink, i'i hsa kaananaantawaapantamank kihciootena kaawiihpitakohshinoomakahk. 15 Taka tahsh kiinawint mooshak Ciisahsonk oncimiinaataa Kishemanitoo i'i kaaishimiikwehciwenimank, kitooninaanink hsa e'onci-ihkitoyank, e'wiinank kaye ehtipeniminank. 16 Keko waniihkehkek ciminotootaakeyek ciwaawiitoohkaakeyek kaye, miitahsh ono tino ishihcikewinan Kishemanitoo pakitinaahsowinink kaaishinank kaaminwaapantank. 17 Na'ihtawihkwak hsa kaaniikaaniihtamawinekwaa, ishihcikewaahk kaye kaaininekwaa, aaniihsh kaawiin aahpici anwepihsiiwak e'naakacihtoowaatc kitahcaahkopimaatisiwiniwaan. Aaniihsh okatakwakintamaakowaan Kishemanitoon i'i kitishihcikewiniwaan. Kiishpin itahsh pisintawekwaa aahpici hsa taciihkanohkiiwak. Kiishpin itahsh shashiipihtawekwaa tamaanentamook, kaawiin itahsh i'i nahke kitaaonciminohsehsiim. 18 Keko tahsh pakiciihkek cianami'ehtamawiyaank. Wiinke kaye ninkehcinaa'omin awaac​iko pankii kekoon kaawahsitaawinaakwahk e'ayaahsinok nimpimaatisiwininaanink, mooshak kwayahk e'antawentamaank kwayahk ci-ishihcikeyaank. 19 Miitahsh i'i eshipakohseniminakook, weweni cikakwecimek Kishemanitoo miinawaa ci-ishinisha'otc weti kaaishiayaayek. 20 Kishemanitoo ohsha okiihkiiwepimaatisi'aan kaaTipencikenitc Ciisahsoon kaakii'nihsimintc. Miiwan​ini kaakihci-inentaakosinitc ehkanawenimaanitc i'i omaanahcaanihshimini, aaniihsh Ciisahsoon okiihpakitinamini omiskwiimini, kaaonciaayiicihsininik i'i Kishemanitoo kaakii'ishi​nehpici​ahshotamaaketc. Taka Kishemanitoo kaamiininank pisaan cipimaatisiwank, 21 kikaontinamaakowaa kahkina kaaonishihshininikin kekoonan citootamowek otinentamowin. Taka kaye Ciisahs Christink kikaonci-ishi'ikonaan citootamowank aaniin eshiminwaapantank. Taka Christ takihci-inentaakosi mooshak iko ahpane. Emen. 22 Niiciotepwehtamook! Kipakohsenimininim itahsh cishashiipentamek cipisintamek o'o kaaishikanooninakook cimashkawentamek. Aaniihsh nintahkoohsitoon o'o kaa'oshipii'amawinakook. 23 Kinantawenimininim itahsh cikihkentamek, kiitanami'aanaan Timahti (Timothy) ekiihsaaka'ank i'imaa kipa'otiiwikamikonk. Kiishpin itahsh wiipa piishaatc ninkapiwiiciiwaa ahpii antawaapaminakook. 24 Nimpooshoo'aak itahsh kahkina kaaniikaaniihtamawinekwaa, kahkina kaye Kishemanitoo kaatipenimaatc opimaatisiima'. Kiitanami'aanaanik kaye o'omaa Itali (Italy) ahkiink kipooshoo'ikowaa. 25 Taka Kishemanitoo okishewaatisiwin kikawiiciiwikom mooshak kaatahshiyek. Mii 'iwe.

Ciimis 1

1 Niin Ciimis (James) Kishemanitoo otanohkii'aakanan, a'a kaye kaaTipenciketc Ciisahs Christ. Kahkina kipooshoo'ininim kaamitaahshi​niishwewaanakisiyek Isriyalak (Israel) eyaayek misiwe pepahkaan ahkiink. 2 Niici​otepwehtamook, tepinawewakentamok kiinakishkamek kaapepahkaanatinkin kahkina koci'ikoowisiwinan. 3 Kihkentamok ahpii koci'ikoowisiimakahk kitepwehtamowiniwaa, mii 'imaa keonciimakahk shashiipentamowin. 4 Miitahsh ishikape​shashiipentamok misiwe piko cipakiciihsiwek, miihsh cikiishi'ikoowisiyek, cikiishinaakosiyek itahsh kaye kekoon cinoontehsehsiwek. 5 Kiishpin kaatahshiyek peshik noontehsetc kakiihtaawentamowin, oka'antotamawaan Kishemanitoon, miihsh cimiinintc eshi​kakwetwetc. Wiinke iitok Kishemanitoo wenooci​miikiwe, kaawiin kaye okakwe​mihkansiin keshi​anaamimiwetc. 6 Ahpii tahsh anami'aatc tatepweyentam, kaawiin tayaanwehtansii. Awiya kaatepwehtansik mii 'i eshinaakositc taapishkoo kaapimaashkaak kihcikamiink, aanti piko wentaanimaninik e'ishiwepaahshitc. 7 A'a tino kaawiin tainentansii kekoon cimiinikotc kaaTipencikenitc; 8 onsaam eniishininikin otinentamowinan, ehtepwewentaakwahsininik kahkina kaaishihciketc. 9 A'awe hsa wiin otepwehtamoo kaawenoocihtoohsik kekoonini, taminwentam e'ishpakimikotc Kishemanitoon. 10 A'a tahsh wiin kaawenootisitc taminwentam eniihsakimikotc Kishemanitoon taapishkoo tainentaakosi pikwaciwaapikwan kaani​kihkentaakwahsinok. 11 Ahpii e'ani'ishpakoocink kiisihs e'ani​kishaahsiketc mii 'i enishi​paahtek i'i waapikwanikihtikaan. Mii 'i enishi​pankihsink aanawiin emino​naakwahkipan enihshiwanaatahk. Miitahsh peshikwan kaawenootisitc eni'ishi​nihshiwanaatisitc mekwaa piko ehpimanohkiitc. 12 Shawentaakosi awiya kaapakiciihsik kiinakishkank wahsitaawihsewin. Kiishpin aaniihsh kashkihtootc cishaapwiihtank kaashi​koci'ikoowisitc, okatepinaan pimaatisiwi​okimaawaanohkwaan Kishemanitoon kaakii'ahshotamaakenitc ewii'miinaanitc i'i kaasaaki'ikonitc. 13 Ahpii awiya kotenimintc cimacitootank kaawiin taaihkitohsii: "Kishemanitoo ninkotenimik." Kaawiin iitok taakotenimaahsii Kishemanitoo cimacitootank, kaawiin kaye awiyan okotenimaahsiin cimacitootaminitc. 14 Awiya ohsha onci​kotenimaa eshimaci​mihsawentank, miihsh i'imaa wenci​kaahcitinintc kaye tahsh wenci​tahkonintc. 15 Maci​mihsawentamowinink ohsha onciimakan macitootamowin. Ahpii tahsh macitootamowin kiikiishanohkiimakahk, mii 'imaa wenciik nipowin. 16 Keko kikawanimikoohsiim, kaasaaki'inakook niici​otepwehtamook. 17 Kahkina miikiwaanan wenishihshinkin, kaakiishi​naakwahkin kaye ishpimink onciimakanoon. E'onciimakahkin Kishemanitoonk kaakii'oshihtootc kaawaahseyaanikin kiishikonk. Kaawiin wiihkaa pahkaan taishi​ayaahsii taapishkoo kaashi​ayaancishkaamakahk kaa'akawaahtek. 18 Miitahsh wiin eshi​minwentank Kishemanitoo ekii​miininank oshki​pimaatisiwin i'imaa onci kaatepwemakaninik otihkitowin. Miitahsh keishinaakosiyank taapishkoo eoshki​otapinoonciishiminank maawac eniikaaneniminank ahpiihc wiin kahkina kekoon kaakiioshihtootc. 19 Niici​otepwehtamook, nawac onishihshin cinihtaa​pisintamekipan ahpiihc wiin cikaakiikitoyekipan, keko kaye wahkewikitaasohkek. 20 Nishkaatisiwinink kaawiin onciimakahsinoon kikwayahkwaatisiwin Kishemanitoo kaa'antawentank. 21 Wepinamok tahsh kahkina kekoon kaawiinentaakwahk, i'i kaye kahkina macitootamowin. Tapahsenintisok ciotaahpinamowek otihkitowin kaakihtikaatek kipimaatisiwiniwaank, mii iitok i'i kepimaaci'ikoyek. 22 Keko wiin waniwinitisohkek, keko mihci​pisintankek i'i ihkitowin, tootamok aaniin ehkitoomakahk. 23 Awiya kaamihci​noontank i'i ihkitowin, ishihcikehsik tahsh kaaihkitoomakaninik, mii 'i eshinaakositc awiya kaawaapantisotc waapamonink. 24 Kaa'ishkwaa​waapamotc itahsh e'animaacaatc, mii 'i shemaak eshi​waniihketc aaniin eshinaakositc. 25 I'iwe ishipimaatisiwin kaaonahtootc Kishemanitoo misiwe minwaahshin. Kaawiin i'imaa awiya kekoonini otoonci​kipihtinikoohsiin kwayahk ci'ishi​pimaatisitc. Awenen itahsh peyahtak ehkanawaapantank, waniihkehsik i'i kaanoontank, Kishemanitoon itahsh okashawenimikoon aaniin piko kaaishihciketc. 26 Kiishpin hsa awiya inenintisotc e'anami'ewaatisitc, kashkihtoohsik itahsh ciminciminank otenaniw, mii 'i iinsan ewayeshintisotc, otanami'aawin kaawiin kekoon inaapatahsinini. 27 Kishemanitoo Koohsinaan hsa ominwaapantaan i'i tino anami'aawin kaapehkaninik, kaye tahsh kaatepwewaninik. Cinaanaakaci'intwaa kwiiwahshishaanak, iki kaye kiiwaacihkwewak kaakakwaatakihtoowaatc, awiya kaye kaakanawenintisotc ciwiinishkaakohsik ahkiiwi​pimaatisiwin.

Ciimis 2

1 Niici​otepwehtamook, ehtepweyenimank kaaTipeniminank Ciisahs Christ kaakihci'inentaakositc, keko pahkaanenimaahken awiya otishinaakosiwinink onci. 2 Kiishpin awiya otihsinek kaatashimaawaci'itiyek kikishkawaatc osaawishooniyaa​waapiko​naapininciipisonan, wiinke kaye minohkonayetc, onci​piintiketc itahsh awiya ehkitimaakisitc ehkoohpaacihkonayetc. 3 Kiishpin tahsh nawac kihtenimek a'a kaaminohkonayetc o'o inek: "O'omaa ishiapin minwapiwinink." O'o tahsh wiin inek kaakitimaakisitc: "Weti awi-ishi​niipawin," komaa kaye inek: "Eshisitepiyaan mihcihsak ishiapin." 4 Miitahsh eshihcikeyek epahkaanenimekwaa awiyak, e'onci​onahshowaanekwaa kimaci​'inentamowiniwaank. 5 Pisintawihshik, kaasaaki'inakook niici​otepwehtamook, Kishemanitoo ohsha okii'onaapamaa' ketimaakisinitc o'omaa ahkiink ciwenoocihtoonitc tepweyentamowin, citipinawewisinitc kaye oTipencikewin. Aaniihsh mii 'iweni kaakii'ahshotamawaatc kaasaaki'ikotc. 6 Kaawiin tahsh kikii​kihtenimaahsiwaawaa kaakitimaakisitc. Kaawenootisiwaatc iitok kaakakwaataki'inekwaa, miiwak kaye iki kaaishiwininekwaa eshi​ayaanitc otipaahkowe'. 7 Miiwak iitok iki kaamaci'itamowaatc i'iweni kehci'inentaakwaninik wiinsowin kaakii'miinikoowisiyek. 8 Kwayahk kikaishihcikem kiishpin na'ihtamek kehci'inentaakwahk onahshowewin kaaishipii'ikaatek: "Kikasaaki'aa kiwiicitaamaakan taapishkoo kaashi​saaki'itisoyan." 9 Miitahsh wiin eshinaakwahk ehpiikonamek Kishemanitoo otOnahshowewin kiishpin awiyak otishinaakosiwiniwaank ishi​kakiikinekwaa, mii 'i emacitootamek. 10 Awenen tahsh iko kiipiikonank peshik inaahkonikewin, mii 'i iinsan ehpiikonank kahkina inaahkonikewinan, mii 'i e'macitootank. 11 Kishemanitoo tahsh miinawaa kii'ihkito: "Keko pihshikwaaci'aahken ihkwe kaawiitiketc," miihsh kaye ehkitotc: "Keko nihshiwehken." Aanawiin epihshikwaatisihsiwan, nihshiweyan itahsh, mii 'i ehpiikonaman i'i inaahkonikewin. 12 Ishi​kaakiikitok itahsh, ishi​pimaatisik kaye taapishkoo iki tino pemaatisiwaatc kaawii'onci​onaahkonintwaa onahshowewinink awiya kaaonci​pakitinikoowisitc. 13 Kaawiin ohsha Kishemanitoo okakoohpaatenimaahsiin awiyan ahpii onaahkonaatc ini kaakoohpaatenikehsinik. Koohpaasinaakewin nawac mashkawentaakwan ahpiihc wiin onahshowaanikoowin. 14 Niici​otepwehtamook, aaniin tahsh inaa keinwaatankipan awiya kii'ihkitotc: "Nintayaan tepwewakentamowin," kiishpin tahsh ishihcikehsik aaniin kekii'ishi​pimaatisihpan? Otaa​pimaaci'ikon ina otepweyentamowin? 15 Kiishpin tahsh kiwiici​otepwehtamoo kaaininiiwitc komaa kaye ihkwewitc noontehsetc kikishkikanan, tepihsehsik kaye miicim entahsokiishik, 16 aaniin tahsh inaa keinaapatahkipan kiishpin o'o inekwaa: "Pisaan animaacaan, nimpakohsentaan ciminohseyan. Kwayahk kiishoosin, weweni kaye wiihsinin." Kiishpin tahsh wiici'aahsiwek aaniin eshi​noontehsetc, kaawiin kekoon ta'inaapatahsinoon. 17 Miitahsh mayaa eshinaakwahk tepwehtamowin. Kiishpin awiya kiimihci'ihkitotc ehtepwehtank eshihcikehsik tahsh ehkihtotc, nipoomakan i'i tino tepwehtamowin. 18 Peshik maawiin awiya taihkito: "Kiin hsa kitayaan tepwehtamowin, niin tahsh wiin nintayaan ishihcikewin." O'o maawiin ta'icikaniwi: "Waapanta'ihshin tahsh aanti wenci​ayaayan tepwehtamowin kekoon tahsh ishihcikehsiwan. Niin tahsh wiin nintishihcikewinink kikaonci​waapanta'in e'ayaayaan tepwehtamowin." 19 Kitepwehtam ehpeshikotc Kishemanitoo. Mii 'i kwayahk! Maciahcaahkwak kewiinawaa i'i ishi​tepwehtamook, miihsh kaaonci​nininkishkaawaatc ehsekisiwaatc. 20 Kiin kaakakiipaatisiyan! Kikihkentaan ina i'i tepwehtamowin kekoon e'inaapatahsinok kiishpin kekoon ishihcikemakahsinok? 21 Aaniin tahsh kikehte​aya'aaminaapan Eparahaam (Abraham) kaa'onci​minwakimikotc Kishemanitoon? Otishihcikewinink okii'onci​minwakimikoon ahpii kiipakitinaatc okosihsan Aaisikoon (Isaac) i'imaa pakitinaahsowinink. 22 Kiwaapantaan ina tahsh i'i otepwehtamowin, i'i otishihcikewin kaye ekii'niishoo​anohkiimakaninikin? Miitahsh i'imaa otishihcikewinink kaakii'onci​kiishinaakwaninik otepwehtamowin. 23 Miitahsh Kihcimasina'ikan ehtepwemakahk o'o kaaishipii'ikaatek: "Eparahaam okiihtepwehtawaan Kishemanitoon, miihsh kaakiionci'inakimikotc ehkwayahkwaatisitc," kaasaakiwiiciiwak kaye okii'ishinihkaanikoon. 24 Miitahsh i'imaa eshi​waapantamank kitishihcikewininaanink e'onci​minwakiminank Kishemanitoo, kaawiin wiin ehta kitepwehtamowininaanink. 25 Inashke, mii peshikwan a'a Orehaap (Rahab) pihshikwaacihkwe, okii'onci​minwakimikoon Kishemanitoon aaniin kaakii'ishihciketc ekiih​piintikanaatc i'i okiimoosaapii' owaahkaa'ikanink, pahkaan inahke ekii'ani'inaatc ciani'ishi​kiiwenitc. 26 Miitahsh taapishkoo miiyaw kaa'ahcaahkowansinok, nipoomakan, miihsh kaye tepwehtamowin kekoon kaaishihcikemakahsinok nipoomakan.

Ciimis 3

1 Niici​otepwehtamook! Keko wiin kakwe​paahtiinohkek ciwii​kihkino'amaakeyek. Kikihkentaam iitok kiinawint kaakihkino'amaakeyank nawac ta'aahkwentaakwan ahpii onaahkonikooyank ahpiihc wiin iki kotak awiyak. 2 Kiinawint tahsh kaapimaatisiyank mooshak kiwanitootaamin. Kiishpin tahsh wiin awiya wiihkaa wawaniihsik aaniin ehkitotc, mii 'awe kaakiishinaakwaninik opimaatisiwin, ehtetakokashkihtootc citipenintisotc misiwe opimaatisiwinink. 3 Inashke piwaapihkoonhs kitahtaawaamin mihtatim okonewink keonci​na'ihtawinank. Miihsh i'imaa wenci​kashki'ank a'a mihtatim ci'ishaatc eshi​antawenimank. 4 Inashke kihciciimaan aanamihcaak, kihci​nootinonk onci​maaciiyaahsin. Aahpici tahsh akaahsin i'i tahkwa'ikan, miihsh i'imaa ciimaaniiwikimaa otaahkewinini wenci​kwehkwehkaahsitootc i'i ciimaan aanti piko waa'inaahshitc. 5 Miitahsh mayaa eshinaakwahk mitenaniw aanawiin e'akaahsink i'imaa wiiyawimaank, shaakooc kihci​maamiihkwaanitisoomakan. Inashke aapitink kiipahkinek, mii 'imaa wencikihci​sahkitek. 6 Mitenaniw mayaa ishinaakwan kaapahkinek, e'onci​maaciishkaamakahk emisiweshkaamakahk maci​'ishihcikewin i'imaa kiiyawinaank. Miitahsh eshi​maaciihkonek misiwe kipimaatisiwininaank i'iwe ishkote kaaonciimakahk maci​'ishkotenk. 7 Kahkina aya'aawihsha', pinehshiinsha', kinepikowi​aya'aawihsha', i'i kaye aya'aawihsha' eyaanitc kihcikamiink kashki'aawak ciwaankawi'intwaa, inini kaye ewaankawi'aatc. 8 Kaawiin tahsh awiya okashkihtoohsiin ciwaankawihtootc mitenaniw. Macentaakwan, ekashkihcikaatehsinok citipencikaatek, mii 'imaa eshi​mooshkinek kaanihshiwemakahk pihcipowin. 9 Miitahsh i'imaa mitenaniwink wenci​nanaahkomank Kishemanitoon Koohsinaan. Mii kaye 'imaa wenci​maci'inankwaa awiyak kaakii'ishi'ikowaatc Kishemanitoon ci'ishinaakosiwaatc otishinaakosiwininiink. 10 Mii 'imaa peshikwan otoonimaank wencihsek mino​shawenimiwewin, miihsh kaye 'imaa wencihsek kiihkaantiwin. Niici​otepwehtamook, kaawiin i'i takii-ishihsehsinoopan. 11 Taaishihse na nipi kaapehkaakamik, i'i kaye nipi kaashiiwihtaakanaakamik peshikwan cionci​moohkiciwankin? 12 Kaawiin iitok pik (fig) tinowaahtik onihtaawikihtoohsiinan aalip (olive) tinowiminan. Kaawiin kaye shoominaahtik onihtaawikihtoohsiinan pik tinowiminan. Kaawiin nipi kaapehkaakamik taaonciihsinoon shiiwihtaakaniwinipi kaaonciciwank. 13 Awenen tahsh kaatahshiyek kekiihtaawentank, awenen kaye wenihsitohtamowinitc? I'imaa okashinaakohtoon okwayahkwaatisiwinink ehtapahsenimotc kaye tahsh ekakiihtaawentank aaniin eshi​pimaatisitc. 14 Kiishpin tahsh ontentamek, nishkentamek kaye, niikaanenintisoyek kaye kite'iwaank, keko tahsh wiin kihci​maamiihkwaanitisohkek keonci​piikonamek i'i tepwewin. 15 I'i hsa tino kakiihtaawentamowin kaawiin ishpimink onciimakahsinoon, o'omaa ahkiink onciimakan. Kaawiin kaye ahcaahkowansinoon, maciahcaahkonk onciimakan. 16 Aanti hsa piko eyaakwen ontentamowin, niikaanenintisowin kaye, mii 'imaa kaye keayaamakahk piikwahkamikisiwin kahkina kaye kaatahsink macitootamowin. 17 I'i tahsh kakiihtaawentamowin ishpimink kaaonciik maawac pehkentaakwan. Mii 'imaa wenciik pisaanentamowin, saaki​wiiciintiwin, koohpaatenimiwewin, minwanohkiiwinan, tepwewin kaye, kaawiin kaye awiya onci​pahkaanenimaahsii. 18 Iki hsa kaawiicihtwaawaatc cimino​wiiciintinaaniwaninik ahpii kihtikaatamowaatc pisaanentamowin, okanihtaawikihtoonaawaa kwayahkwaatisiwin.

Ciimis 4

1 Aanti tahsh wenciikin miikaatiwinan, kiihkaantiwinan kaye? I'imaa hsa onciimakanoon kaashi​mihsawentamek ewii'minwentami'itisoyek. Miiwan tahsh ini kaamaamiikaatiimakahkin kipimaatisiwiniwaank. 2 Kekoon hsa kinantawentaanaawaa, kaawiin tahsh kitepinansiim. Kinihshiwem, kimihsawencikem kaye, kaawiin tahsh kitepinansiim entawentamek. Kikiihkaantim, kimiikaatim kaye, kaawiin tahsh kitepinansiim entawentamek aaniihsh kaawiin kikakwecimaahsiwaawaa Kishemanitoo. 3 Aahpii tahsh kiikakwetweyek kaawiin kimiinikoohsiim onsaam aaniihsh kaawiin sesik kitinentansiim. I'iwe kaakakwetweyek kiwii'inaapacihtoom kiinawaa piko ewii'minwentami'itisoyek. 4 Kaawiin kitepweyentaakosihsiim taapishkoo ihkwe kaamino​wiiciiwaahsik onaapeman. Kaawiin ina kikihkentansiim awiya kiisaakihtootc o'o ahkiini mii 'i iinsan ehshiinkenimaatc Kishemanitoon? Awenen hsa piko kaashi​onentank ewiih​saakihtootc ahkiini mii 'i e'ani​tinowitc kaashiinkenimaatc Kishemanitoon. 5 Keko tahsh aanwehtankek Kihcimasina'ikan kii-ishipii'ikaatek: "Aahpici wiin onantawenimaan citipinawewisitc iniweniwan ahcaahkwan kaakikishkamooninankitc." 6 I'i hsa Kishemanitoo kaashi​shaweniminank maawac mashkawentaakwanini. Kihcimasina'ikan ishipii'ikaate: "Kishemanitoo onakaashkawaan kehci'inenintisonitc, oshawenimaan tahsh wiin ini tepahsenimonitc." 7 Pakitinitisohtawihk Kishemanitoo. Nakaashkawihk maciaya'aa, miihsh citapasiihkantawinek. 8 Pehsho pinaasihkawihk Kishemanitoo, kewiin tahsh pehsho kikanaasihkaak. Kisiininciik kiinawaa kaamacitootamek. Pehkihtook kite'iwaan kiinawaa niishwayek kaainentamek. 9 Kakwaatakentamok, maanentamok kaye cimawiyek. Kipaahpiwiniwaa tashi​kwehkinikaate cimaanentamek kaye tahsh kiminwentamowiniwaa tashi​kwehkinikaate cisiipiskaatentamek. 10 Tapahsenintisok enaahsamiitc kaaTipenciketc, miihsh ciompininek. 11 Niici​otepwehtamook, keko awiya maci'inaahkek. Kiishpin maci​tashimatc komaa kaye onaahkonatc kiitanami'aa mii 'i emaci'itaman e'onaahkonaman kaye Onahshowewin. Kiishpin tahsh onaahkonaman Onahshowewin kaawiin kiin kina'ihtansiin Onahshowewin, miihsh kiin iinsan e'onaahkoniweyan. 12 Peshiko ohshehta kaamiikiwetc onahshowewin, onaahkoniwetc kaye. Mii hsa 'awe kaakashkihtootc cipimaaci'iwetc, kaakashkihtootc kaye cinihshiwanaaci'iwetc. Awenen tahsh kiin enenintisoyan e'onaahkonatc kiicipimaatis? 13 Pisintamok kiinawaa kaaihkitoyek: "Noonkom kaakiishikahk komaa kaye waapank kikaishaamin weti kihci​ootenaank ciawi​ayaayank peshikopipoon ciawi​anohkiiyank kaye tahsh cishooniyaahkeyank." 14 Kaawiin iitok kikihkentansiim aaniin keishiwepahk waapank. Mii hsa 'i eshinaakosiyek taapishkoo kaapaashkinek, acina ehta e'ayaamakahk, miihsh eshi​ankonaakwahk. 15 O'owe ohsha kitaaihkitom: "Kiishpin kaaTipenciketc inentank, kikapimaatisimin, o'o kikaishihcikemin, i'i kaye kikaishihcikemin." 16 Miitahsh eshihcikeyek ekihci'inenintisoyek, kaye tahsh ekihci​kaakiikitoyek. I'i tino kihci​kaakiikitowin macitootamowiniwan. 17 Kiishpin tahsh kihkentamek ciminotootamekipan, ishihcikehsiwek itahsh, mii 'i emacitootamek.

Ciimis 5

1 Kiinawaa kaawenootisiyek, mawik cikakwaatakentamek. Kakwaatakihsewinan ohsha kiwii'otihsikom. 2 Kiwenootisiwiniwaan ohsha wanaatanoon, iki kaye pinehsiwiotihkomak okiihkitaanaawaan kikikishkikaniwaan. 3 Kitoosaawaapihko​shooniyaamiwaa, a'a kaye kiwaapaapihko​shooniyaamiwaa wiinke akwaakwaapihkihshinook. I'iweni tahsh kaashi​akwaakwaapihkihshinowaatc kitipaacimikowaam aaniin eshi​ayaayek, miihsh kaye 'iwe kenihshiwanaaci'ikoyek taapishkoo ishkote kaashi​caakaahkisowemakahk. 4 Kaawiin iitok kikiih​tipa'amawaahsiwaawaak kaakii'anohkiihtawinekwaa kikihtikewahkamikowaank kiimanishikewaatc. KaaTipenciketc Kaamaawaci​mashkawisiitc ohsha onoontawaa' ehshaakowenitc i'i kaakii'manishikenitc kikihtikewahkamikowaank. 5 Cikihci​wenootisiyek, ciminwentami'itisoyek ehta kitishi​pimaatisim o'omaa ahkiink. Eaancipoonitisoyek taapishkoo pishihki kaa'aancipoonintc kaashiwinintc tahsh ketashinihsintc cinanawishontc. 6 Kikiih​tepimaawaak cinihsintwaa kaye tahsh kikii'nihsaawaak ininiwak kekoon eshi​anaamentaakosihsikwaa, kaawiin kaye kikii'nanaahkonikohsiiwaak. 7 Niici​otepwehtamook, shashiipentamok piinihsh cipitakohshink kaaTipenciketc. Inashke kihtikewininiwak opiihtoonaawaan okihtikaaniwaan cionci​nihtaawikininikin okihtikewahkamikowaank. Shashiipentamok ehpiihtoowaatc cikimiwaninik ehtakwaakininik kaye tahsh ehsiikwaninik. 8 Miitahsh kekiinawaa ishi​shashiipentamok. Keko pakiciihkek eshi​ahpenimoyek, aasha ohsha peshonaakwanini kaaTipenciketc kaawiih​pitakohshink. 9 Keko onci​maanshikakanoonitihkek kiinawaa onci, kaawiin tahsh kikaonaahkonikoohsiim. I'imaa ohsha ishkwaantenk niipawi otipaahkoniwe. 10 Niici​otepwehtamook, kihkinawaapamihkwahk iki kekanootamawaawaatc Kishemanitoon kaakii'aapacihtoowaatc kaaTipencikenitc owiinsowinini aaniin kaakiih​shashiipentamowaatc aanawiin ekiih​kakwaatakihtoowaatc. 11 Shawentaakosiwak kitinaanaanik iki kaapi​shashiipentamowaatc. Kipi​noontaam kaye aaniin Coop (Job) kaaishi​shashiipentank, aaniin kaye kaaTipencikenitc kaaishi​wiici'ikotc weti ishkwaac. KaaTipenciketc ohsha owenoocihtoon koohpaasinaakewin, minotootaakewin kaye. 12 Niici​otepwehtamook, mii 'iwe maawac iko ishihcikek. Keko kekoon ahpimohkek ahpii ahshotamaakeyek. Keko ahpimohkek kiishik, ahki, kekoon ihsa piko. Eha' kii'ihkitoyan, mii piko 'i eha'; kaawiin ihkitoyan, mii piko 'o kaawiin. Kaawiin tahsh kikatipaahkonikoohsii. 13 Maanshihse na awiya kaatahshiyek? Taka ta'anami'aa. Awiya na minwentam? Tanikamo tino miikwehciwinikamonan. 14 Awiya na aahkosi kaatahshiyek? Oka'antomaa' kaaniikaanisinitc anami'ewikamikonk cipianami'ehtamaakotc tako kaye cipoosinikotc pimiteni otishinihkaasowininiink kaaTipencikenitc. 15 Tepweyentamonaaniwank itahsh ahpii anami'aaniwank, miihsh ciminoayaatc a'a kaa'aahkositc. KaaTipencikenitc okii​minoayaa'ikoon. Kiishpin tahsh kii'macitootank, tapoonentamawaakaniwi. 16 Waawiintamaatik itahsh eshimamacitootaatiyek, anami'ehtamaatik kaye, miitahsh ci'antawi'ikoowisiyek. Eshi​anami'aatc okwayahkwaatis mashkawaani, anohkiimakanini kaye. 17 Ilaaica (Elijah) hsa wiin kii'ishi'ininiiwi taapishkoo kiinawint. Weweni tahsh kii'anami'aa cionci​kimiwansininik. Nihsopipoon ishi​aapihta tahsh kaawiin kii'onci​kimiwansinini. 18 Miinawaa tahsh kii'anami'aa, miihsh kiishikonk kaakii'onci​kimiwaninik. Kii'nihtaawikinoon tahsh o'omaa ahkiink kihtikewinan. 19 Niici​otepwehtamook, kiishpin awiya kaatepwehtank pahkenotank tepwewin, awiyan ohsha otakakwe​pikiiwewinikoon. 20 O'o tahsh maamihkawik; Awenen iko kekwehkinaatc omacitootamoon eshi​wanihshininitc okapimaaci'aan cinipohsinik, miihsh kaye niipiwa' macitootamowinan cipoonencikaatenikin.

1 Piitar 1

1 Niin Piitar (Peter) Ciisahs Christ otishinisha'waakanan. Kitooshipii'amawininim kiinawaa Kishemanitoo kaakii'onaapaminek, kaapiiwitewentaakosiyek omaa ahkiink, misiwe kaye weti kaaishi'ayintaayek, Paantahs (Pontus) ahkiink, Kalehshiya (Galatia), Kaahpatoohsha (Cappadocia), Esha (Asia), Pihtiniya (Bithynia) kaye. 2 Kiinawaa iitok kikii'ishi-kiishaaci-onaapamikowaa otinentamowinink Kishemanitoo Kaaoyoohsimintc ewii'aapaci'inek. Kishemanitoo o+tAhcaahkwan kaye kikii'ishi'ikowaam ewiihtipeniminek, kiinawaa hsa cina'ihtawek Ciisahs Christ, cipehki'ikowek kaye omiskwiim. Taka shawentaakosiwin, pisaanisiwin kaye kikatipinawewisim kemooshkineshkaakoyek. 3 Taka tamikwehciwentaakosiwan kaaoKishemanitoomitc kaaoTetetc kaye kaaTipeniminank Ciisahs Christ. Kishemanitoo iitok kikii'miinikonaan oshkipimaatisiwin keonciayaawank i'i ahpenimowin kaakehcinaa'owentaakwaninik i'imaa kaa'onciinik kaakii'ishikiiwepimaatisi'aatc Ciisahs Christan nipowinink onci. 4 Miitahsh kaaoncipiihtaawank citipinawewisiwank i'iweni Kishemanitoo kaawii'miininank wiihkaa kenihshiwanaatahsininik, wiihkaa kaye keniankonaakwahsininik, kenehpici-onishihshininik kaye. Kiinawaa hsa ono kaakanawentamaakoowek kihcikiishikonk. 5 Kiinawaa iitok kitooncikanawenimikoowisim Kishemanitoo omashkawisiiwinink ehtepweyentamek kipimaaci'ikoowiniwaa aasha ekiih​kiishinaakwahk ewii'naakohcikaatek ishkwaac kiishikahk. 6 Miitahsh o'o wiinke onciminwentamok, aanawiin noonkom acina e'oncimaanentamek i'i kaaishikakwaatakihtooyek, misiwe e'ishikoci'ikoowisiyek. 7 Miitahsh i'i kaa'onci-ishihseyek cikihkentaakwahk kitepweyentamowiniwaa tepwe e'aawank. Inashke osaawaapihko​shooniyaawahsin pisaan​iko kenihshiwanaacihcikaniwihpan, ishkotenk ihsa ishikakweci'aakaniwi. Ini tahsh kitepweyentamowiniwaa nawac kaakihci'inentaakwahk ahpiihc wiin a'a osaawaapihko​shooniyaawahsin, mii​peshikwan eshikakwecihcikaatek, maano hsa cishashiipi-ayaayek. Kiinawaa tahsh kikatepinaam keonci​minwaapamikooyek, keoncikihci-inenimikooyek, keonci​kihtenimikooyek kaye ahpii Ciisahs Christ naakositc. 8 Aanawiin mahshi ekii'waapamaahsiwek shaakooc itahsh kisaaki'aawaa. Aanawiin kaye noonkom mahshi e'waapamaahsiwek, shaakooc kitepweyenimaawaa, kimooshkineshkaakowaam kaye i'i ketewiincikaatehsinokipan, kaakihci-inentaakwahk minwentamowin. 9 Aaniihsh aasha kitepinaam ehpimaaci'ikoowisiyek, kitepweyentamowiniwaank e'onciimakahk. 10 Mii hsa tahsh o'oweni pimaaci'ikoowisiwinini iki otaanaank kaakiihkiikitoohtamawaawaatc Kishemanitoon weweni kaakii'antoone'amowaatc, kaakiihkakwe​kihkentamowaatc kaye ekiiniikaanitashintamowaatc o'o miikiwewinini Kishemanitoon kemiiniminek. 11 Okiihkakwe​kihkentaanaawaa kaye awenenan kepitakohshininitc, aaniin kaye mayaa ahpii ishihsenik i'i keishiwepaninik. Ini hsa kaakiih​kikishkawaawaatc Christan otAhcaahkoni okii'wiintamaakowaan ewiihpi​kakwaatakihtoonitc Christan piinihsh tahsh ci'anikihci-inentaakosinitc. 12 Kishemanitoon tahsh okii'waapanta'ikowaan otanohkiiwiniwaan wiinehtawaa ci'onci​minohsehsikwaa, kiinawaa ohsha kaye ci'onci​minohsewek. Okiihtashintaanaawaan iniweniwan kiinawaa noonkom kaapinoontamek. Mii hsa 'iwe kaakii'oncinoontamek ikiweniwak minwaacimowin kaakii'wiintamawinekwaa kaapapaa​tipaacimowaatc kaamashkawisiishkaakowaatc Kishemanitoon Otahcaahkoni kihcikiishikonk kaakiihpionci​piicinisha'omintc. Miiwan tahsh onoweniwan wiinke kaye encalak kaamihsawentamowaatc cinihsitohtamowaatc. 13 Taka tahsh kinaanaakatawentamowiniwaank ishikiishentamok waa'ishihcikeyek. Mooshak iko waapaahkamentamok. Misiwe ishiahpenimonotamok shawentaakosiwin kaawii'miinikooyek ahpii Ciisahs Christ naako'intc. 14 Na'ihtawihk hsa Kishemanitoo, keko kaye pakitinitisohkek ci-ishinaapinaakosiyek kaakii'ishi​nihtaa​mihsawencikeyek mekwaa kiikakiipaatisiyekipan mekwaa kiikihkenimaahsiwek Christ. 15 A'a iitok kaakiihkanooninek aahpici pehkaatisi, miitahsh kekiinawaa peshikwan kahkina kekoon kaaishihcihcikeyek ishipehkaatisik. 16 Kihcimasina'ikan ishipii'ikaate: "Pehkaatisik aaniihsh niin nimpehkaatis." 17 E'ishinihkaanek tahsh ninTete kiianami'ehtawek a'a peshikwan kaaishikanawaapamaatc entahsopeshikonitc kahkina pemaatisinitc aaniin eshihcikenitc, taka tahsh minihk iko kepimaatisiyek o'omaa ahkiink kaaishipiiwitewentaakosiyek, ishipimaatisik ehkohtaanenimek Kishemanitoo. 18 Aaniihsh kaakii'ishipimaatisiyek otaanaank kaakii'inawekwaa kikehteya'aamiwaak, kaawiin kekoon kii'inaapatahsinoon. Kikihkentaam iitok wekonen kaahtipa'ikaakaaniwank citipenimikohsiwek kaakii'nihtaa​ishiwepisiyek. Kaawiin waapaapihko​shooniyaa, osaawishooniyaa kaye kii'aapatisihsiiwak. 19 I'iweni ohsha Christ kaa-aahkwakintenik omiskwiim kii'aapatanini. Wiin iitok kaakii'maanahcaanihshenhsiwitc kaapiikonaakosihsik, kaamaahkisihsik kaye kaakiihpakitinaahsowaakaniwitc. 20 Wiin Christ kiihkiishaaci'onaapamaa cipwaa oshihcikaatenik o'o ahkiini, noonkom tahsh kiinaakohcikaniwi aasha ehpehshonaakwaninik kaawiihkiishinaakwaninikin kahkina kekoonan. Kiinawaa hsa kaakii'oncinaakohcikaniwitc. 21 Wiin itahsh onci kaa'oncitepweyenimimek Kishemanitoon ekiihkiiwepimaatisi'ikotc i'imaa nipowinink onci, ekii'ishi'ikotc kaye cikihci-inentaakositc. Wiin hsa kaaoncitepweyenimimek, kaaonciahpenimonotawimek kaye Kishemanitoon. 22 Inashke tahsh noonkom kitooncipehki'itisom ena'ihtamek i'i tepwewin, miitahsh i'i weweni kaaoncisaaki'ekwaa kiiciotepwehtamoomiwaak. Wiinke hsa saaki'itik, misiwe piko kite'iwaank. 23 Aasha iitok kikii'aancinihtaawikim. Kaawiin tahsh kikii'ontinansiim kiniiki'ikowaank kenihshiwanaatahk. I'imaa ohsha kikii'ontinaam Kishemanitoo otihkitowinink kaapimaataninik, wiihkaa kaye kepoonihsehsininik. 24 Kihcimasina'ikan ishipii'ikaate: "Kahkina hsa pemaatisiwaatc mashkohsiink ishinaakosiwak; i'i tahsh kaaishikihci-inentaakosiwaatc mii​'i enentaakwaninik taapishkoo waapikwan pikwatahkamik kaa-ayaak. I'i tahsh mashkohsi paahte, i'i kaye waapikwan pankihsin, 25 i'iweni tahsh wiin otihkitowin a'a kaaTipenciketc nehpic taniayaani." Mii hsa tahsh o'o ihkitowin kaakii'minwaacimohtaakooyek.

1 Piitar 2

1 Taka hsa tahsh wepinamok kahkina kaamacinaakwahkin, kakiinawishkiwin, anami'ehkaasowin, aayaahshenintiwin, macitashintiwin kaye. 2 Taapishkoo oshkapinoonciishak kaanihtaawikiwaatc kaawii'noontenooniwaatc, mooshak iko noontayaapaakwenotamok i'i wiinke kaapehkaakamihk coocoohshaapo keminoshkaakowaatc kitahcaahkowaak, minihkwaatamok i'imaa cioncimaaciikiyek cipimaaci'ikoowisiyek. 3 Aasha iitok kiinawaa kikii'masihpitamowaam ominotootaakewin kaaTipenciketc. 4 Pinaasihkawihk kaaTipenciketc, kaapimaatisitc ahsin kaakii'aanawenimikotc pemaatisinitc, Kishemanitoon tahsh wiin kaakii'onakimikotc, ekiihkihci-inenimikotc kaye. 5 Miitahsh kekiinawaa peshikwan ehtinowiyek ahsiniik kaapimaatisiwaatc, kitishiaapatisim i'i kaaoshihcikaatek ahcaakowaahkaa'ikan. Miitahsh i'imaa ketashi-inwaasoyek anami'ewikimaak kaa-aapaci'ikowaatc Kishemanitoon, cipakitinamawek kaa-ahcaahkowentaakwaninikin pakitinaahsowinan, miiwan iitok kaaminwaapantank onci Ciisahs Christan. 6 Kihcimasina'ikan ishipii'ikaate: "Inashke nintahsaa ahsin Saayaniink (Zion) ekii'onaapamak kehci'inakinsotc kaaniikaaninihtamaapihkihshink. Awenen tahsh iko kaatepweyenimaatc kaawiin tamincinawesihsii." 7 Kiinawaa tahsh kaatepwehtamek wa'a ahsin aahpici kikihci-inenimaawaa. Iki tahsh wiin kaatepwehtansikwaa o'o ishitepimaawak: "Ini hsa ahsiniin kaawaahka'ikewaatc kaa-aanawenimaawaatc, miiwan ihsa ini maawac kaaniikaanentaakosinitc ahsiniin." 8 Kayehsh e'ani-ishipii'ikaatek, "Miiwan ihsa ini ahsiniin pemaatisiwaatc kepisokeshkaakowaatc, miiwan kaye ini kekawiwepishkaakowaatc." Miitahsh kaakii'oncipisokehshinowaatc, aaniihsh kaawiin okiina'ihtansiinaawaa i'i kaakii'ihkitonitc Kishemanitoon. Mii iitok i'i kaakii'inenimikowaakopanen Kishemanitoon ci-ishihsewaatc. 9 Kiinawaa tahsh kaaohko-onentaakosiyek, anami'ewikimaak ehtinowiyek kaa-anohkiihtawek Kishemanitoo kaaKihciokimaawitc, pahkaan kaye kaakii'inahsinek ewii'inaapaci'inek, Kishemanitoo kaye kaatipeniminek, kikii'onaapamikowaa citipaatotamowek ominohcikewinan. Kiinawaa kaye kaakiihkanooninek cisaaka'amowek i'imaa kaaishikashkiitipihkahk kaakii'ishi​ayaayekipan, i'imaa tahsh cishipiintikeshkaayek kaaishionishihshininik owaahseyaasiwin. 10 Aaniihsh otaanaank kaawiin kikiihtipenimikohsiiwaa Kishemanitoo; noonkom itahsh wiin kitipenimikowaa. Kaawiin kaye kikiihtepinamowaahsiim okoohpaasinaakewin; noonkom tahsh wiin aasha kikiihtepinamowaam. 11 Kaasaaki'inakook, kitishikaanoonininim kaapiiwitewentaakosiyek, o'omaa kaye ahkiink kaaoncitipentaakosihsiwek, cimiitaakwenotamek kimacimihsawencikewiniwan, miiwan iitok ini kaakakwe​shaakooci'ikoyek i'imaa kitahcaahkowaank. 12 Aahpici tahsh kwayahk ishipimaatisik kaaishiayaawaatc iki kaatepwehtansikwaa, aanawiin e'ininekwaa e'maci-ishiwepisiyek. Inashke hsa okanihsitawinaanaawaan ini kitishihcikewiniwaan kaaonishihshininikin, miitahsh keshimiikwehciwenimaawaatc Kishemanitoon ahpii kiishikaninik wiihpi​anta​tipaahkoniwenitc. 13 KaaTipenciketc tahsh e'wiiciiwek, na'ihtamok kahkina ininiiwionahkonikewinan; na'ihtawihk kaye a'a kaye Maawac kaaKihciokimaawitc kahkina kekoonini kaanaakacihtootc. 14 Na'ihtawihkwak kaye kaani​aanihke​okimaawiwaatc, aaniihsh Maawac​iko kaaKihciokimaawinitc okii'onakimikowaan cinana'ahsaanitc kaanihtaa​mamaashiinitc, ciminwaapamaanitc tahsh wiin i'i kwayahk kaaishihcikenitc. 15 Kishemanitoo hsa inentam i'i kaaishiminohcikeyek ci'onci​poonihtoonitc i'i kaakakiipaatisinitc pemaatisinitc kaaishinihtaa​kaakiikitonitc, kehkentansinik ehkitonitc. 16 Ishipimaatisik itahsh taapishkoo pemaatisiwaatc kaatipenimaahsiwintwaa, keko tahsh wiin nahpaac inaapacihtoohkek i'i kaaishitipenimikoohsiwek ci'oncikaatooyek macikekoon. Ishipimaatisik itahsh ehtinowiwek Kishemanitoo kaatipenimaatc otanohkii'aakana'. 17 Kihtenimihkwak kahkina awiyak, saaki'ihkwak kaye kiiciotepwehtamoomiwaak, kohtaanenimihk kaye Kishemanitoo. Kihtenimihk hsa 'a kaye Maawac iko Kihciokimaa. 18 Kiinawaa tahsh opamiihtaakek pakitinitisok pisaan​iko citipeniminekwaa kitookimaamiwaak, tako​kihtenimihkwak kaye. Kaawiin wiin ehta kaaminotootawinekwaa, kaanaanaakataweniminekwaa kaye; iki hsa ko kaye kaakakwaanihsakisiihtawinekwaa. 19 Kiishpin oncikakwaatakihtooyek e'naanaakatawenimek Kishemanitoo, shiipinenotamek itahsh o'o kakwaatakihtoowin kaakiih​kashkihtamaasohsiwek, Kishemanitoo hsa kikashawenimikowaa. 20 Kaawiin iitok kekoon kitaa​onci​minwakimikoohsiim kiishpin mihsawaa​ko shashiipentamek i'i kaaishipahpahkihte'okooyek kimamaashiiwiniwaan onci, aaniihsh kikashkihtamaasom. Kiishpin itahsh shashiipentamek i'i kaaishikakwaataki'ikooyek kikwayahkohcikewiniwaank onci, Kishemanitoo hsa kikaminwaapamikowaa. 21 Mii hsa tahsh kaakii'onci-ishiantomikooyek, aaniihsh Christ kiihkakwaatakihtoo kiinawaa onci, ekii'nakatamawinek kenaapaapantamowek cipiminisha'wek aaniin kaaishipimaatisitc. 22 Kaawiin iitok wiihkaa kii'macitootansii, kaawiin kaye wiihkaa kii'noontawaahsii cikiiwanimotc. 23 Ahpii hsa noociko kii-icikaniwitc, kaawiin kii'aashite-noociko-ihkitohsii. Ahpii kaye kiikakwaataki'intc, kaawiin okii'inaahsii' kaakiihkakwaataki'ikotc: "Haw meshkwac kiinawaa kikakakwaatakihtoom." Mii​'i iitok kaakiihpakitinitisotc keshinaatamaakotc Kishemanitoon kwayahk kaaonaahkoniwenitc. 24 Wiin hsa piko kikiihpimiwitamaakonaan kimacitootamowininaanin i'imaa owiiyawink ahpii kiinihsintc aashiteyaahtikonk, kiinawint cionci-inentaakosiwank ekii'nipowank, cipapaamentansiwank awahshime macitootamowin, meshkwac itahsh ci-ishipimaatisiwank cikwayahkwaatisiyank. I'i hsa tahsh kaakii'ishi​maahkihcikaniwitc kitoonci​minoayaa'ikoomin. 25 Taapishkoo maanahcaanihshak kaakii'wanihshinowaatc kikii'ishinaakosim, aasha tahsh noonkom kikiihpi​ashekiiwewinikoom cipiminisha'wek Okanawimaanahcaanihshiwe kaainintc, kaakanawentank kipimaatisiwiniwaan.

1 Piitar 3

1 Kiinawaa wiiwiimaak, miitahsh peshikwan ishipakitinitisok citipeniminekwaa kinaapemiwaak. Inashke mihsawaa ko tepwehtansikwaa Kishemanitoon otihkitowinini, kitishipimaatisiwiniwaa ohsha okakashki'ikonaawaa citepwehtamowaatc, kaawiin itahsh memwehc kekoon kikaihkitohsiim. 2 Aaniihsh okawaapantaanaawaa eshipehkaatisiyek, tepwe kaye ehkohtaanenimimek Kishemanitoon. 3 Taka kaye kiminonaakosiwiniwaan kaawiin ta'onciihsinoonan kaaishiwaweshi'itisoyek saakicaya'ii aaniin eshikakwe​minonaakohtooyek kiinisihsiwaan, ehkikishkamek kaye kaaosaawishooniyaawiwankin naapishkikanan, ini kaye kaa-aahkwakintekin kikishkikanan. 4 Taka hsa 'i kiminonaakosiwiniwaan taonciimakanoon piincaya'ii kite'iwank, mii hsa 'i tino minonaakosiwin wiihkaa kepoonihsehsinok kaaonciik kiinoohkaatisiyek, kiipisaanaatisiyek kaye. Mii hsa 'iweni Kishemanitoo maawac iko kaakihtakintank. 5 Inashke iki otaanaank kaakiihpimaatisiwaatc ihkwewak kaakii'anami'ewaatisiwaatc kaakii'ahpenimonotawaawaatc Kishemanitoon, kii'ishi​nihtaa​waweshi'itisowak, ekiihpakitinitisowaatc onaapemiwaa' citipenimikowaatc. 6 Sera (Sarah) hsa ekii'na'ihtawaatc Eparahaaman (Abraham) kaakii'onci-ishinihkaanaatc "nintookimaam." Miitahsh e'otaanihsiminek Sera kiishpin ishihcikewek kaakwayahkonaakwaninik, kiishpin kaye pakitinansiwek kekoon ciseki'ikoyek aaniin ketootawinekwaa kinaapemiwaak. 7 Kekiinawaa tahsh onaapemimaak, mii hsa peshikwan ishiwiicipimaatisiimihkwak kiwiiwiwaak weweni cinihsitawenimekwaa wiinawaa noonta' e'ahpiihciiwaatc, aaniihsh ihkwewiwak. Naakohtaaw tahsh ehkihtenimekwaa aaniin entootawekwaa. Kewiinawaa ohsha tatipinawewisiwak kaawiihtipinawewisiyek i'iweni pimaatisiwin Kishemanitoo kaamihcimiikiwetc. Kiishpin tahsh i'i ishihcikeyek, kaawiin kekoon tawanashkwe'iwemakahsinoon ahpii anami'ehtawek Kishemanitoo. 8 O'owe tahsh kitinininim ishkwaac, kahkina hsa kaatahshiyek peshikwan ishinaanaakatawentamok, cikoohpaatenintiyek. Ishisaaki'itik kaye kaaishisaaki'itiwaatc kaaowiicihkiwentiwaatc, minotootaatik kaye, tapahsenimok kaye. 9 Awiya kaye macitootawihk, keko macikekoon tipa'ikaakehken. Awiya kaye maci-inihk, keko aashite maci-inaahken. Takwac hsa kiin kakwecimim Kishemanitoon ciminohse'ikotc. Citepinamowek ohsha kaakii'onciantominek ciminohse'inek Kishemanitoo. 10 Kihcimasina'ikan hsa ishipii'ikaate: "Awenen hsa ko kewii'minwentank ehpimaatisitc, kaamihsawentank kaye ciwaapantank kaaminohsewikiishikaninik, mii​hsa​'i eshinaakwaninik cimacikiishwehsikipan, cipoonihtoohpan kaye kaaishinihtaakiiwanimotc. 11 Ishinaakwanini hsa cipoonihtoohpan macikekoonan, meshkwac tahsh citootankipan i'i kaaonishihshininik, cikakwe​mino​wiiciiwiwehpan, mooshak iko 'i cikakwe​ishihcikehpan. 12 KaaTipenciketc ohsha okanawaapamaa' kaakwayahkwaatisinitc, opisintawaa' kaye kiianami'ehtaakotc; kaawiin tahsh wiin ominwaapamaahsii' i'i kaamacitootaminitc." 13 Awenen tahsh kekashkihtoohpan cimaashitootawinek kiishpin mihsawentamek ewiihtootamek i'i kaaonishihshik? 14 Mihsawaa hsa ko oncikakwaataki'ikooyan ehtootaman i'i kaakwayahkonaakwahk, etatawe hsa kikihcishawentaakos. Keko kaye kohtamowaahkek awiya kaawiihtootawinek; keko kaye ocaanimentankek. 15 Anami'e​kohtaanenimihk itahsh Christ kite'iwaank, aaniihsh teahpiihtentaakosi ci-ishikihtenimintipan ehTipenciketc. Ahshwiin tahsh mooshak iko cinahkwehtawatipan awiya kaakakwecimihk ciwiintamawatc, i'iweni kaa'ahpite'ehshimoonowatc. 16 Weweni oncikanoosh kinoohkaatisiwinink. Weweni ishipimaatisin waawiinke cipehkiayaak kaa'oncinaanaakatawentaman. Iki hsa noociko kaaitamowaatc i'i kaaishiminotootamowatc e'wiiciiwimatc Christan, taonciakaci'itisowak i'i kaashimacitashimihkwaa. 17 Nawac iitok taonishihshinini kiishpin Kishemanitoon inentaminitc, awiya cioncikakwaatakihtoohpan ehtootank kaaonishihshininik, ahpiihc wiin awiya cioncikakwaatakihtoohpan macikekoonink. 18 Mii hsa Christ kewiin kaa'ishiwepisitc: Christ hsa aapitink kii'oncinipo, cipoonencikaatenikin macitootamowinan, mii 'i kiihtetipa'ank; wiin kaakwayahkwaatisitc ekii'nipoohtamawaatc i'i kaakwayahkwatisihsinik, ewii'ishipiininek Kishemanitoon kaashiayaanitc. Wiiyawimaank hsa inahke kii'ishinihcikaniwi, ahcaahkonk itahsh wiin inahke kiihpimaatisi'aa. 19 Miitahsh i'i nahke kaakii'ishi-ishaatc ekii'awi​wiintamawaatc ahcaahkwa' weti kaakiihtashikipa'omintc. 20 Miiwa' ihsa 'i otahcaahkowaa' iki otaanaank kaakii'na'ihtawaahsikwaa Kishemanitoon ahpii kiishashiipi​pii'onitc mekwaa Noowawan (Noah) kiioshihtoonitc kihciciimaanini. Aahpici tahsh pankii, nihshwaahso (8) ehta pemaatisiwaatc kii'oncipimaaci'aawak nipiink. 21 I'i tahsh nipi, mii 'i eshinaakwahk siika'antaasowin noonkom kaapimaaci'ikoyek. Kaawiin wiin ehta noociko kekoon kaakisiiyaapaawacikaatek kiwiiyawiwaank kitoonci​pimaaci'ikoowisihsiim. I'iwe ohsha awiya kaaonci​ahshotamawaatc Kishemanitoon kwayahk e'ishinaakwaninik kaaoncinaanaakatawentank. Christ hsa kaakii'ishi​kiiwepimaatisi'intc nipowinink onci, mii hsa 'imaa wencipimaaci'ikoowisiyek. 22 Wiin iitok Christ kaakii'ishaatc kihcikiishikonk ekii'awi​apitc okihcinihkiniink inahke Kishemanitoon, ekii'miinintc citipenimaatc encala', i'i kaye kaa-ahcaahkwentaakosinitc kaakashki'ewisinitc, i'i kaye kaamashkawentaakosinitc.

1 Piitar 4

1 Christ itahsh kewiin ekiihkakwaatakihtootc owiiyawink, miitahsh kekiinawaa eshinaakwahk ci-ishikiishiiyekipan peshikwan i'i nahke ci-ishinaanaakatawentamekipan. Aaniihsh awiya kaakakwaatakihtootc owiiyawink aasha okiihpoonihtoon macitootamowin. 2 Miitahsh i'i eshinaakwahk minihk iko kepimaatisiyek o'omaa ahkiink ci-ishipimaatisihsiwekipan kaaishi​nihtaa​mihsawencikewaatc pemaatisiwaatc; i'i hsa ci-ishipimaatisiyekipan Kishemanitoo kaaishiantawentank. 3 Aasha iitok teminihk otaanaank kikii'ishiwepisim kaaishiwepisiwaatc kaatepwehtansikwaa. Miitahsh o'o kaa'ishiwepisiyek, ekii'wiinaatisiyek, ekii'macimihsawencikeyek, ekii'nihtaa​kiiwashkwepiiyek, ekii'nanihtaa​ohkwiinoyek ekiihpaapaa-kiiwashkwepii-nihshiwanaatahkamikisiyek, ekii'ishi​nihtaa-anami'ehtawekwaa kaye manitoohkaanak ekii'ishihcikeyek kekii​manaa​ishihcikeyekipan. 4 Wiinke tahsh kimaamahkaatenimikowaak iki kaatepwehtansikwaa, e'wiiciiwaahsiwekwaa kaanihtaa​ishihcikewaatc kaaishinihtaa​osaamihcikewaatc, miitahsh i'i noociko kaaonci-ininekwaa. 5 Wiinawaa hsa piko okanahkwehtawaawaan Kishemanitoon i'i kaakii'ishihcikewaatc, aasha kaakiishiihtaanitc ewiihtipaahkonaanitc i'i kaapimaatisinitc, i'i kaye kaaniponitc. 6 Mii hsa tahsh kewiinawaa kaakii'onciwiintamawintwaa minwaacimowin iki aasha kaakii'nipowaatc. Aanawiin ininiinaank inahke ekii'ishitipaahkonintwaa owiiyawiwaank, shaakooc itahsh otahcaahkowaank taishipimaatisiwak Kishemanitoonaank inahke. 7 I'i hsa kahkina kekoon kaawii'ishkwaahsek aasha pehshonaakwan, kashkihtook itahsh kwayahk ci-ishitipenintisoyek, waapaahkamentamok kaye cikashkihtooyek cianami'aayek. 8 Maawac itahsh iko o'o ishihcikek, aahpici hsa saakiwiiciintik, aaniihsh mii 'imaa saaki'iwewinink eshiankonaakwahkin kaapaahtiinatihkin macitootamowinan. 9 Paahpaahkintenamaatik kaye kitaawiniwaan; keko tahsh i'i oncikihcikaakiikitohkek. 10 Entahsopeshikoyek itahsh kaakii'ishimiinikoowisiyek miikiwewinan cinaanaakacihtooyek, miitahsh eshinaakwahk ci-inaapacihtooyekipan kimiinikoowiniwaan Kishemanitoo kaakii'miininek cionciminohse'itiyek kaatahshiyek. 11 Awenen tahsh iko kaakiikitotc, ishinaakwanini citashintankipan Kishemanitoon ehkitonitc. Awenen tahsh iko kaye kaapamiihtaaketc ishinaakwanini ciaapacihtoohpan mashkawisiiwin Kishemanitoon kaamiinikotc, kahkina hsa piko kekoonink Kishemanitoo cimiikwehciwentaakositc onci ini Ciisahs Christan. Wiin iitok kaatipentank kihci-inentaakosiwin, mashkawisiiwin kaye, nehpic iko, emen. 12 Kaasaaki'inakook, keko maamahkaatentankek i'i kaa'otihsikoyek kaawiisakentaakwahkin koci'ikoowinan kaakakwaataki'ikoyek taapishkoo e'inentaakwahk ewii'mayaki-ishiwepisiyek. 13 Meshkwac ohsha kitaaciihkentaam e'inentakwahk e'wiitoohkaasoyek inahke Christ kaakii'ishi​kakwaatakihtootc, ci'oncimooshkineshkaakoyek minwentamowin ahpii naakohcikaatenik okihci-inentaakosiwin. 14 Kiishpin itahsh oncimaci-ikooyek Christ otishinihkaasowinink, mii​'i cishawentaakosiyek, aaniihsh a'a Ahcaahk kaakihci-inentaakositc kikikishkawaawaa, amiiwan ihsa ini Kishemanitoo otAhcaahkwan. 15 Kehcinaac maawiin kikakakwaatakihtoom. Keko tahsh wiin oncikakwaatakihtoohkek taapishkoo kaaoncikakwaatakihtootc awiya kaanihshiwetc, okimoocishk, kaanihtaa​mamaashiitc, a'a kaye kaawanashkwehkamikisitc eshiopapaamisiwinihsik. 16 Inashke hsa kiishpin awiya onci kakwaatakihtootc e'anami'ewaatisitc, taka keko ta-akatentansii, meshkwac hsa okamiikwehciwenimaan Kishemanitoon ehpimiwitootc Christan owiinsowinini. 17 Mii ohsha 'i aasha tipa'ikan e'ocihcihsek tipaahkonikewin cimaacihsek, iki tahsh Kishemanitoonk kaaoncitipentaakosiwaatc nihtam tatipaahkonaawak. Kiishpin tahsh kiinihtamawint tipaahkonikooyank, aaniin iitok keishihsewaakwen i'i kaakii'na'ihtansikwaa minwaacimowin Kishemanitoonk wenciinik. 18 Kihcimasina'ikan ishipii'ikaate: "Kiishpin okwayahkwaatis akaawaa pimaacihcikaniwitc, aaniin tahsh kaanaka keishihsewaakwen kaakihtenimaahsikwaa Kishemanitoon, kaamaci-ishiwepisiwaatc kaye." 19 Taka tahsh iki kaaonci​kakwaatakihtoowaatc ehtootamowaatc Kishemanitoon kaaishiantawentaminitc, okamiinaawaan opimaatisiwiniwaan kaatepweyentaakosinitc kaakii'oshi'ikowaatc, ehtootamowaatc i'iweni kaakwayahkonaakwaninik.

1 Piitar 5

1 Iki hsa kaaniikaanentaakosiwaatc kaa-ayaawaatc weti kaaishiayaayek, miiwak hsa iki kaakanoonakwaa; keniin iitok niniikaanentaakos ekii'waapamak Christ ehkakwaatakihtootc, niwii'wiitoohkaas tahsh okihci-inentaakosiwin kaawii'naakohcikaatenik. 2 Miitahsh enakwaa: Naakaci'ihkwak Kishemanitoo omaanahcaanihshima' kaamiininek cinaakaci'imek, keko wiin anihsaac ishihcikehkek, kiinawaa hsa piko kitinentamowiniwaank cionci-ishihcikeyek citootamowek Kishemanitoo otinentamowin. Keko wiin ehta cimihciontisiyek onci-ishihcikehkek, ciihkentamok hsa 'i e'anohkiihtawek e'naanaakaci'iweyek. 3 Keko wiin kaye kakwetipenimaahkekwaanik iki kaamiinikooyek cinaakaci'ekwaa, ishipimaatisik hsa keshikihkinawaapaminekwaa. 4 Ahpii tahsh naakositc a'a kaamaawaci​niikaanentaakositc Okanawimaanahcaanishiwe, kikatepinaam tahsh i'i cikikaanohkwaanaatamek i'i kihci-inentaakosiwin wiihkaa keniankonaakwahsinok. 5 Mii hsa peshikwan kekiinawaa kaaoshkaatisiyek na'ihtawihkwak iki kaakihtaatisiwaatc. Kahkina piko kaatahshiyek pihcihkonayaatamok tapahsenimowin ciwaawiitoohkotaatiyek, aaniihsh Kihcimasina'ikan ishipii'ikaate: "Kishemanitoo ohsha onakaashkawaa' kaakihci-inenintisonitc; ominotootawaa' itahsh wiin i'i kaatapahsenimonitc." 6 Kiinawaa tahsh tapahsenintisok pisaan citipeniminek Kishemanitoo kaaishimashkawisiitc, ciompininek wiin iko ahpii keshiminwaapantank. 7 Pakiciwanehtamawihk wiinihtam cipimiwanehtamawinek kahkina kaamikoshkaatentamo'ikoyek, aaniihsh wiin kinaanaakaci'ikowaa. 8 Waapaahkamentamok, ahshawaapik kaye, aaniihsh kaashiinkeniminek maciaya'aa papamiayaa taapishkoo mihshipishiw kaapapaanoontaakositc e'nanaantawaapamaatc awenenan waahkitamwaatc. 9 Aayiicikaapawik itahsh i'imaa kitepwehtamowiniwaank, cinakaashkawek maciaya'aa. Kikihkentaam iitok kewiinawaa kahkina kiwiiciotepwehtamoomaakaniwaak misiwe ahkiink mii peshikwan e'ishipimohsewaatc kakwaataki'ikoowinink. 10 Ahpii tahsh acina kiihkakwaatakihtooyek, Kishemanitoo kaawenooci​wii'miikiwetc kishewaatisiwin, kaakii'antoominek Christink ci-ishiwiitoohkaasoyek i'imaa kaaishinehpici​kihci-inentaakositc, wiin iko kikakiishinaako'ikowaa, kikaishi'ikowaa kaye ciaayiicikaapawiyek, cimashkawisiiyek, kikanehpicionahsikowaa kaye. 11 Taka Kishemanitoo tatipenimiwe nehpic iko, emen! 12 Saailahs (Silas) hsa kaatepweyentaakositc kiitanami'aanaan kaainakimak, niwiici'ik o'o pankii kaaoshipii'amawinakook, e'antaweniminakook cimashkawentamek, e'wiintamawinakook kaye Kishemanitoo okishewaatisiwin ehtepwemakaninik. Wawiinke tahsh i'imaa aayiicikaapawik. 13 Iki tahsh kaye otepwehtamook kaa-ayaawaatc Paapilanonk (Babylon) kaakii'wiicionentaakosiiminekwaa, kipooshoo'ikowaak. Kipooshoo'ikowaa kaye ninkosihsink kaainenimak Maarhk (Mark). 14 Ociimihkwak kaapooshoo'ekwaa otepwehtamook, cinaakwahk ehsaaki'itiyek. Taka pisaanentamowin kikawiiciiwikom kahkina kaawiiciiwek Christ.

2 Piitar 1

1 Niin Saayiman Piitar (Simon Peter), Ciisahs Christ otanohkii'aakanan, otishinisha'waakanan kaye. Kitooshipii'amawininim kiinawaa kaakiihtepinamek tepweyentamowin peshikwan kaakihtakintek taapishkoo niinawint tino kaa-ayaawankitc, kaakii'oncitepinamek okwayahkwaatisiwinink kiKishemanitoominaan, kiPimaaci'iweminaan kaye Ciisahs Christ. 2 Taka kishewaatisiwin, pisaanisiwin kaye kikakihcimiinikoowisim i'i onci kaaishikihkenimek Kishemanitoo a'a kaye Ciisahs kaaTipeniminank. 3 Kishemanitoo hsa omashkawisiiwinink kitooncimiinikoomin kahkina kekoon kaanoontehseyank o'o kaapimaatisiyank ci-ishimino​anami'ewaatisiyank. Miitahsh i'imaa wencimiinikoowisiyank i'i ehkihkenimank Kishemanitoo kaakii'antominank. Mii hsa tahsh kaakii'onciantominank, ciayaawank wiin iko okihci-inentaakosiwin, i'iweni kaye kaaishikwayahkonaakositc. 4 Miitahsh o'o kaakii'oncimiininank kaakihci-inentaakwaninikin, kaakihtakintenikin omiikiiwewinan kaakii'ahshotamaaketc. Kiinawaa hsa omiikiwewinink ci'onci​shaapwiihkantamowek i'i kaanihshiwaanaaci'iwemakahk mihsawencikewin o'omaa ahkiink kaa-ayaak, cishiwiitoohkaasoyekipan itahsh otinaatisiwinink Kishemanitoo. 5 Miitahsh o'o keonci kahkina kekoon ishihcikeyekipan kitepwehtamowiniwaank ciniayaayek kaakwayahkonaakwahk pimaatisiwin, i'i tahsh e'ayaayek aniayaak kihkentamaawin. 6 E'okihkentamaawiniyek itahsh aniayaak awiya kaakashkihtootc weweni citipenintisotc. O'o tahsh eshikashkihtooyek ani'ayaak shashiipentamowin. E'oshashiipentamowiniyek tahsh ani'ayaak minoanami'ewaatisiwin. 7 Eshiminoanami'ewaatisiyek itahsh ani-ishiayaak kaaishisaaki'itiwaatc kaawiitanami'aantiwaatc; o'o tahsh ishisaaki'itiyek, wiinke anishawenintik. 8 Kiishpin hsa ayaayek ono ishiayaawinan, aniwenoocihtooyek kaye kipimaatisiwiniwaank, mii hsa ini keinishkaakoyek cikihtaapatisiyek, niipiwa' kaye cininaakwahkin kiminohcikewiniwaan, i'i tepwe kaaishikihkenimek kaaTipeniminank Ciisahs Christ. 9 Awenen tahsh kaamanesitc ono mii​'i eshinaakositc taapishkoo awiya waahsa kaa-ahkwaapihsik, aapiinc​iko kaawaapihsik. Mii​hsa wa'a kaawaniihketc ekiihpehki'intipan kaakii'ishi​nihtaa​macitootankipan. 10 Niiciotepwehtamook, taka tahsh aaskonentamok cikehcinaa'owentaakwaninik Kishemanitoo kaakii'ishikanooninek. Kiishpin hsa 'o ishihcikeyek, kaawiin wiihkaa kikapankihshinsiim. 11 Miitahsh kekiinawaa kaawii'onci-wenooci-tawinamaakooyek cipiintikeshkaayek i'imaa wiihkaa keshipoonihsehsininik kaaishiKihciokimaawitc kaaTipeniminank kaaPimaaci'inank Ciisahs Christ. 12 Niin hsa piko mooshak nika-ahshwii cimaamihkootamawinakook onoweniwan, aanawiin aasha ehkihkentamek ono. I'i tahsh tepwewin kaakihkentamek, mii hsa i'imaa eshimashkawikaapawiyek. 13 Miitahsh enentamaan minihk iko kepimaatisiyaan o'omaa niwiiyawink kwayahk ci-ishihcikeyaampaan, ciompweminakookipan, cimaamihkootamawininakook onoweniwan. 14 Ekihkentamaan kota aasha kekaa ewiih​kiihcikoshkamaan o'o niwiiyaw o'omaa ahkiink kaataanotamaan, kaakii'ishi​pehtewiintamawitc a'a kaaTipenciketc Ciisahs Christ. 15 Cipwaa nipoyaan hsa weweni kekoon nikaishihcike onoweniwan keoncimaamihkawinotamek. 16 Kaawiin niinawint ninkii'aapacihtoohsimin ini kaakakiihtaawihtaakwahkin tipaacimowinan kekii​mihci​oshihtooyaankipan ahpii kiitashintamaakooyek kaawii'mashkaawentaakwaninik otakohshinowin kaaTipenciketc Ciisahs Christ. Niinawint ohsha nishkiinshikonaanink ninkii'onci​waapantamowaamin kaaishi​maawaci​kihciokimaawentaakositc. 17 Ahpii hsa Kishemanitoon Kaaoyoohsimimintc kiimiinikotc kihtentaakosiwin, kihci-inentaakosiwin kaye, ahpii kaye kiioncikanoonaa 'imaa kaakii'ishiayaanitc kaaMaawaciko Kihci-inentaakosinitc o'o ekii'inintc: "Mii hsa wa'a Niin iko ninKosihs kaasaaki'ak, wiin hsa piko kaaminwaapamak," kii'inaa. 18 Niinawint hsa piko ninkii'noontamowaamin kihcikiishikonk kaakiihpi​onci​kanoonintc, ahpii weti kiiwiiciiwankitc kihciwaciink kaakiihtanentaakosinitc Kishemanitoon. 19 Miitahsh niinawint kaaonci​kehcinaa'owentamowankitc otipaacimowiniwaan iki kaakiihkiikitoohtamawaawaatc Kishemanitoon. Aahpici hsa kitaaminohcikem pisintamek o'o, aaniihsh mii​'i eshinaakwahk taapishkoo waahsahkonencikan kaawaasahkonek kaaishikashkiitipihkahk piinihsh cinipiitaapank, piinihsh cipimoohka'ank Waapananank kaainintc, miihsh i'imaa kite'iwaan keonciwaahsenaakwahkin. 20 O'owe tahsh maawac iko kihkentamok: kaawiin awiya otaakashkihtoohsiin wiin​iko ciwiintankipan mayaa i'i kaaishi​kanootamawimintc Kishemanitoon Kehteoshipii'ikewinink. 21 Aaniihsh kaaishi​kanootamawintc Kishemanitoo kaawiin wiihkaa inini otinentamowinink kii'onciimakahsinoon. Ikiweniwak ohsha ininiwak kaakii'misiwetipenimikowaatc Kishemanitoon otAhcaahkoni kii'ihkitowak kaaishi'antawentaminitc Kishemanitoon.

2 Piitar 2

1 Inashke kii'oncikihkentaakosiwak iitok iki otaanaank kaakii'inwaanitisowaatc ehkiikitoohtamawaawaatc Kishemanitoon i'imaa mekweya'ii kaaishiayaanitc pemaatisinitc. Miitahsh peshikwan keshiayaawaatc owanikihkino'amaakek kaaishiayaayek. Miiwak hsa iki kepiitoowaatc kenihshiwanaaci'iwemakaninikin kihkino'ikewinan kaatepwewansininikin. Oka-aanawenimaawaan kaye kaaTipenimikowaatc Christan kaakiihtipa'okowaatc. Wiinawaa tahsh piko takashkihtamaasowak keonci​ketahto​nihshiwanaaci'itisowaatc. 2 Tapaahtiinowa' itahsh kaye kenanaapinaakowaatc i'i kaaishiwiinaatisiwaatc. Mii hsa tahsh i'imaa keoncipaahpinencikaatek i'i pimaatisiwin kaapimohsaatamank Tepwewinink kaaishihsink. 3 Oko tahsh kaawanikihkino'ikewaatc kaanihtaa-aaskonisiwaatc, mii ehta ko e'inwaaninekwaa ewii'oncikashkihcikewaatc. Aaniihsh oka-aapacihtoonaawaan ini wiinawaa piko okakayenisiwiniwaan. Aasha ohsha mewisha oko tino kiihkiishaahkonaawak ketootawintwaa; ini kaye kaawii'nihshiwanaaci'ikowaatc kaawiin nipaahsiiwan. 4 Inashke Kishemanitoo kaawiin okiimanaaci'aasii' encala' kaakii'macitootaminitc, kaaishikakwaatakihtoonk hsa okii'ishiniihsiwepinaa'. Miitahsh weti o'o ishiahpii eshikipa'omintc kaaishikashkiitipihkaninik, miihsh i'imaa keshikanawentaakosinitc piinihsh ciocihcihsenik kaawiihTipaahkonikewi​Kiishikaninik. 5 Kishemanitoo kaye kaawiin okii'manaaci'aahsii' mewisha kaakiihpimaatisinikopanen kaakehteahkiiwaninikopanen, ahpii kiinihkipanaakopanen o'omaa kehteahkiink kaakiihkihtenimikohsik. Mii ehta ko Noowawan (Noah) kaakii'nihtaa​tashintaminitc kwayahkwaatisiwin kaakiihpimaaci'aatc. Niishwaahso (7) kaye kotak awiya' okiihtakopimaaci'aa'. 6 Kishemanitoo itahsh kaye kiihtootawaakopan citakonihshiwanaaci'imintc i'i pemaatisinitc ahpii kiicaakaahkisank kihci'otenawan Swaatam (Sodom) i'i kaye Kamwaara (Gomorrah) kaakii'ishinihkaatenikin. Ishkoteni hsa okii'aapacihtoon. Miitahsh i'imaa eshiwaapanta'ikooyank aaniin keishihsewaatc kaakihtenimaahsikwaa Kishemanitoon. 7 Okiihshaapwii'aan tahsh kaye Laatan (Lot) kwayahk kaakii'ininiiwinitc. Laat iitok okiihkihci​maanentamo'ikoo' i'i pemaatisinitc kaakii'ishiwiinaatisinitc kaakii'ishihcikenitc waa'ishihcikenitc iko. 8 Wa'a tahsh kaakiihkwayahkwaatisitc mekweya'ii ekii'ishitaatc kii'onci​kakwaatakentam otahcaahkonk, entahsokiishik aaniihsh okii'waapaantaan, okii'noontaan kaye aaniin kaa'ishimaci-ishihcikenitc pemaatisinitc. 9 Miitahsh i'imaa wencinaakwaninik kaaTipenciketc e'nihtaa​shapwii'aatc pemaatisinitc kaakihtenimikotc i'imaa kaaishi​wahsitaawihsenitc. Okashkihtoon kaye e'mamaancikonaatc i'i kaamaci-ishiwepisinitc paanimaa Tipaahkonikewikiishikaninik ewii'nana'ahsaatc. 10 Ikiweniwak hsa memintake kaaishihcikewaatc aaniin eshimaci​mihsawentamoomakaninikin owiiyawiwaan; kaawiin kaye opapaamihtawaahsiwaawaa' awenena' iko kaaniikaanisinitc. Aahpici kaye soonkite'ewak, kakaancihc kaye kekoonini ishihcikewak; kaawiin kaye kohtaacihsiiwak e'manaasomaahsikwaa kaaniikaanentaakosinitc awekwena' ishpimink kaa-ayaanitc, takwac itahsh opaahpinotawaawaa'. 11 Iki tahsh wiin encalak nawac kaasoonkentaakosiwaatc, kaamashkawisiiwaatc kaye, kaawiin kanake omaci-inaahsiwaawaa' kaawanikihkino'ikenitc enaahsamiinitc kaaTipencikenitc. 12 Oko tahsh wiin kaawanikihkino'ikewaatc omaci-itaanaawaan kekoonan kaanihsitohtansikwaa. Mii 'owe eshinaakosiwaatc, taapishkoo kaaehshaawaatisihsikwaa aya'aawihshak, otishiayaawiniwaank iko kaaishihcikewaatc, mii ehta kaaoncinihtaawikiwaatc cikaahcitinintwaa, cinihsintwaa tahsh kaye. Miitahsh peshikwan keshinihsintwaa owanikihkino'ikek kaatootawimintc aya'aawihsha'. 13 I'i kaaishimamaashiihkantaakewaatc itahsh, mii peshikwan kewiinawaa keishitipa'amawintwaa. Mii​hsa​ko pisaan ehkiishikaninik e'ishihcikewaatc keminwentamoshkaakowaatc, wiinawaa piko kaainentamowaatc e'minwentaakwaninikin. Wiinawaa hsa kitakasinaakosi'ikowaak, kimaashishkaakowaak e'wiiciwiihsiniiminekwaa; miitahsh iko keyaapi eshiminwentamo'itisowaatc ehkakayenisiwaatc. 14 Mii ehta ko kaye 'i tino kaananaantawaapamaawaatc ihkwewa' noociko ketootawaawaatc. Kaawiin wiihkaa temacitootansiiwak. Aahpici kaye nakaciiwak ehtepinamowaatc kaa-antawentamowaatc. Kishemanitoon iitok okanihshiwanaaci'ikowaan. 15 Ekii'nakatamowaatc tahsh i'i kwayahk ishaawin, miitahsh kaa'ishiwanimaacaawaatc ekii'naapa'amaanaawaatc kaakii'ishipimohsenitc Pelamoon (Balaam), kaakiihkanoocikehtamawaatc Kishemanitoon. Aahpici iitok hsa okiihsaakihtooni noociko e'ishihcikenitc ekii'oncikashkihcikenitc. Pii'or (Beor) kaakii'ishinihkaasonikopanen oteteni. 16 Maashimihtatimoon iitok okiihkishiikanoonikoon a'a Pelam i'i kaakii'ishimamaashiitc, aya'aawihshan kaanihtaakiikitohsinik ininiink kii'inwewan ehkanoonikotc. Miitahsh kaa'ishikipihciitc Pelam awahshime noociko cikakiipaacihcikehsik. 17 Miitahsh kaye eshinaakosiwaatc kaawanikihkino'ikewaatc taapishkoo nipi kaaishimoohkiciwank kaaiskahtekin, i'i kaye kaapaashkineyaak kaapapaamiwepaahsink kiikihcinootink. Miiwak hsa iki kaatawinamawintwaa maawac iko kaaishi​kashkiitipihkaninik. 18 Aahpici kaye kishiiwewak ehkakiipaaci​mamiihkwaanitisowaatc, otaapacihtoonaawaan kaye wiiyawimaa kaaishi​maci​mihsawencikemakaninik e'oncikaahcici'aawaatc i'i payesh​iko kaanimaacihtaanitc kaatapasiinotawaanitc iniweniwa' pemaatisinitc kaanihtaa​wawaniinitc. 19 E'ahshotamawaawaatc kekoonan inaahkonikewinan citipenimikohsinik, shaakooc itahsh wiinawaa piko omisiwetipenimikonaawaa kenihshiwanaaci'ikowaatc. Wekonenini hsa ko awiya kaashaakoci'ikotc, mii hsa 'iweni tepenimikotc. 20 Awenenak hsa ko kaakiihshaapwihkantamowaatc i'i kaanihshiwaanaaci'iwemakaninik kaa'ishihcikenitc pemaatisinitc o'omaa ahkiink, ehkihkenimaawaatc kaaTipenimiminank Opimaaci'iwen Ciisahs Christan; kiishpin itahsh miinawaa otishihcikewiniwaank oncitahkopinikowaatc, shaakooci'ikowaatc kaye, nawac iitok noonkom kihci-ishinaakosiwak aahpiihc wiin weti nihtam kaakii'ishinaakosiwaatc. 21 Nawac iitok taakii'onishihshinini wiihkaa kihkentansikwaapan i'i kaakwayahkonaakwaninik pimaatisiwin, ahpiihc wiin ekii'ishkwaa​kihkentamowaatc cinakatamowaahpan i'i minwaacimowin Kishemanitoonk kaakii'onciinik kaakii'wiintamawintwaa. 22 Mii​hsa​ko mayaa tepwe eshihsewaatc kaa'ishihsininik i'i nanekaam​ihkitowin: "Animohsh okiiweantamiicin kaakiishihshikakowaatank," o'o tahsh kaye ihkitowin: "A'a koohkoohsh kii'ishkwaa​kisiihsipacikaniwitc, mii 'i miinawaa eshi​kiiwe​tihtipihshimoonotc ashashkiihkaank."

2 Piitar 3

1 Kaasaaki'inakook, mii hsa 'i 'owe aasha niishink (2) e'oshipii'amawinakook. Mii hsa tahsh kaakii'onci​oshipii'amawinakook niishwaa cimaamihkawaaminakook ciamacihtooyaan kinaanaakatawentamowiniwaan kwayahk ci-inentamek. 2 Kinantawenimininim kaye cimaamihkawinotamek kaakii'ihkitowaatc iki kaakihtentaakosiwaatc mewisha kaakiihkanootamawaawaatc Kishemanitoon. Cimaamihkawiyek kaye otipaacimowin kaaTipenciketc kaaOpimaaci'iwemiyank kaakii'miiniminek otishinisha'waakana'. 3 O'o tahsh maawac​iko mihkwentamok, ishkwaac anikakiishikahk taniayaawak pemaatisiwaatc ketipenimikowaatc omihsawencikewiniwaan. Miiwak hsa iki kepaahpinotawinekwaa. 4 Mii hsa tahsh keihkitowaatc: "Aaniin tahsh kaa'ishihsenik kaakii'ishi​ahshotamaakekopanen ewiihpitakohshink? Inashke kikehteya'aaminaanik aasha kiihcaakinipowak, mii​hsa​ko peshikwan keyaapi pemi-ishiwepahk kaakii'ishiwepahk kiioshihcikaatek o'o ahki," taihkitowak. 5 Oncita piko e'waniihkenotamohshihtoowaatc, Kishemanitoon otihkitowininiink ekii'onciayaanik kihcikiishik mewisha, i'iweni kaye ahki nipiihkaank e'oncisaakipiinik, nipiini ekii'aapataninik kii'oshihcikaatenik ahki. 6 Mii hsa i'imaa nipiink kaakii'ishi​nihkipacikaatekopanen i'i kehte​ahki kaakii'ayaakopanen, mii 'imaa kaakii'ishi​nihshiwanaacihcikaatek. 7 I'i tahsh kiishik, i'i kaye ahki noonkom kaa-ayaakin, mii hsa peshikwan Kishemanitoo otihkitowinink wencikanawentaakwaninikin piciinak ewiihcaakisikaatenikin. Mii hsa kaaonci​kanawentaakwahkin ewiihtako-nihshiwanaacihcikaatekin i'i ahpii Tipaahkonikewi​Kiishikaninik, kaawii'nihshiwanaaci'intwaa iki kaakihtenimaahsikwaa Kishemanitoon. 8 Kaasaaki'inakook, keko tahsh wiin o'o awaac pankii waniihkenotankek, kaaTipenciketc e'inentank peshiko kiishik, mitaaswaahk tahsopipoon. Mii kaye mitaahswaahk tahsopipoon enentank peshiko kiishik. 9 KaaTipenciketc hsa kaawiin papeciihsii ewii'ishihciketc i'i kaakii'ishi​ahshotamaaketc, taapishkoo kaaicikaniwitc ehpapeciitc. Kishashiipenimikowaa ohsha e'antawenimaahsik awiyan cinihshiwanaatisinitc. Kahkina hsa awiyan onantawenimaan cikwehkaatisinitc. 10 I'i hsa kiishikaninik kaaTipenciketc kaawiihtakohshink tasesakooci​ocihcihse, taapishkoo okimoocishk niiyaak kaakihkentaakosihsik ewiihtakohshink. Mii hsa tahsh i'i ahpii ishpimink kiishik keankonaakwahk kishiiwe​noontaakwahk kekoon. Mii kaye i'i ahpii kahkina kekoonan ishpimink kaa-ayaakin kaawii'nihshiwanaacihcikaatekin ishkote ewii'aapatahk. I'i kaye ahki, kahkina kaye kekoon i'imaa kaa-ayaakin kaawiin takihkentaakwahsinoonan. 11 O'owe tahsh inahke ewii'ishi​nihshiwanaacihcikaatekin ono kahkina, aaniin itahsh kiinawaa kekii'ishipimaatisiyekipan? Mii​iitok eshinaakwahk cipehkaatisiyek, cipakitinitisoyek kaye Kishemanitoo citipeniminek. 12 Ehpiihtaawek kiishikaninik Kishemanitoo kaawiihtipaahkoniwetc, kakwe weyiipihtook wiipa ci-ishihsek. Mii​ohsha​'i ahpii kiishik kaawii'ankwaahkitek, kaawii'nihshiwanaacihcikaatek kaye. Ini kaye kahkina ishpimink kaa-ayaakin taninkitewan keahpiihcikishitek. 13 Kaakii'ishi​ahshotamaakekopanen itahsh kiinawint kaaoncipiihtooyank i'i kaawii'oshki​oshihcikaatek kiishik, oshki​ahki kaye, mii hsa 'imaa kwayahkwaatisiwin keshitaamakahk. 14 Taka tahsh, kaasaaki'inakook, ehpiihtooyek ono, aahkohcikek ahpii Kishemanitoo takohshink cimihkawinek ehpehkaatisiyek, kekoon kaye ci-ishi​anaamentaakosihsiwek, pisaan​iko ciwiiciiwek. 15 Inentamowaahk itahsh i'i kaaTipenciketc eshishashiipentank, mii hsa 'imaa wenciik pimaaci'ikoowin. Taapishkoo kaasaaki'ankitc kiitanami'aanaan Pwaal (Paul) kaakii'ishipii'amawinek, ekii'aapacihtootc kakiihtaawentamowin Kishemanitoon kaakii'miinikotc. 16 Miitahsh peshikwan inahke eshipii'iketc kahkina otooshipii'ikanink onoweniwan kiitashintank. Ayaaniwan hsa aahpici kekoonan senakihtaakwaninikin otooshipii'ikanink. Miiwan hsa ini noociko kaa'inwehtoowaatc iki kaakakiipaatisiwaatc, kaakisihkawaatisihsikwaa. Mii hsa kaye entootamowaatc kotak kekoonan Kihcimasina'ikanink kaaishiayoshipii'ikaatenikin. Wiinawaa hsa kashkihtamaasowak nihshiwanaatisiwin. 17 Kiinawaa tahsh kaasaaki'inakook! Aasha ehkihkentamek ono, ayaankwaamisik citako​wanihshimihsinowekwaa kaaishiwayeshintisowaatc kaamaci-ishiwepisiwaatc, cionci​pankishinsiwek i'imaa kaaishi​aayiicikaapawiyek. 18 Ishipimaatisik hsa ciani-ishimaaciikiyek kitanami'ewaatisiwiniwaank, cinikihkenimek kaaTipeniminank kaaPimaaci'inank Ciisahs Christ. Taka wiin mooshak takihci-inenimaa noonkom nehpic iko kaye. Emen.

1 Cwaan 1

1 Kitooshipii'amawininim ehtashintamawinakook a'awe Kishemanitoo otIhkitowin kaaishinihkaasotc, wiin kaamiikiwetc pimaatisiwin. Wiin iitok maawac nihtam kii'ayaa. Niinawint iko ninkii'noontawaanaan, nishkiinshikonaanink ninkii'onciwaapamaanaan. Ninkii'naanaakatawaapamaanaan kaye, ninkiihsaaminaanaan kaye, mii​hsa a'awe kaaoncioshipii'amaakooyek! 2 Ahpii tahsh kiinaakosii'itisotc a'awe pimaatisiwin, ninkii'waapamaanaan, nintipaacimaanaan kaye, ehtashintamaakooyek a'awe mooshak iko pimaatisiwin kaa-ayaatc. Wiin kaakii'wiiciayaamikotc Kishemanitoon kaaoTetemaawinitc, ninkii'naakosiihtaakonaan. 3 I'i tahsh niinawint kaakii'waapantamaank, kaakii'noontamaank kaye, kaaonciwiintamaakooyek kekiinawaa ciwiiciiwiyaank, o'o kaashiwiiciiwankitc kaaoTetemaawitc, ini kaye kaashiwiiciiwimankitc oKosihsan Ciisahs Christan. 4 Miitahsh kaaoncioshipii'amaakooyek niinawint wiinke cikiishinaakwahk niminwentamowininaan. 5 Miitahsh o'oweni otipaacimowin kaakii'noontawankitc e'wiintamawinankitc, miitahsh o'o kaawiintamaakooyek; Kishemanitoo e'waahseyaasitc, kaawiin kaye awaac pankii kashkiitipihkisiwin otayaahsiin. 6 Kiishpin ihkitoyank e'wiiciiwank, kashkiitipihkanonk tahsh ishipimohseyank, kikakiinawishkimin iinsan; kaawiin kitishipimaatisihsiimin kaainahtek tepwewin. 7 Kiishpin tahsh waahseyaank ishipimaatisiyank, taapishkoo wiin iko a'a waahseyaank kaaishiayaatc, miitahsh e'minowiiciintiyank; Ciisahs tahsh omiskwiim Kishemanitoon kaaoKosihsimikotc, kipehki'ikowaamin macitootamowinink onci. 8 Kiishpin tahsh kaawiin wihkaa nimacitootansiimin ihkitoyank, mii 'i iinsan e'wayeshintisoyank, kaawiin tepwewin kikikishkaakohsiimin. 9 Kiishpin tahsh waawiintamawank Kishemanitoo kimacitootamowininaanin, wiin hsa kaatepweyentaakositc kwayahk kaatootank; miitahsh i'i kaaoncipoonentamawinank, kaaoncipehki'inank kaye kahkina onci kaaishikwayahkohcikehsiwank. 10 Kiishpin kaawiin ninkii'macitootansiimin ihkitoyank, amii 'i iinsan peshikwan ehkitoyank ehkakiinawishkitc Kishemanitoo. Kaawiin iinsan otihkitowin kikikishkaakohsiiwaamin.

1 Cwaan 2

1 Kiinawaa kaasaaki'inakook niniicaanihsak kaaineniminakook, kitooshipii'amawininim ono cimacitootansiwek. Kiishpin hsa awiya macitootank, kitayaawaanaan kaakiikitoohtamawinank ehkanoonaatc kaaoTetemaawinitc, mii hsa 'awe Ciisahs Christ, kwayahk kaaishihciketc. 2 Wiin hsa​ko kaaoncipoonentamaakoowank kimacitootamowininaanin, kaawiin wiin kiinehtawint ehta, i'i hsa kaye kaashimacitootaminitc kahkina pemaatisinitc o'omaa ahkiink cipoonentamawimintc. 3 Ehkanawentamowank itahsh Kishemanitoo otinaahkonikewinan, mii 'omaa wencikehcinaa'oyank ehkihkenimank. 4 A'awe tahsh wiin "Ninkihkenimaa" kaaihkitotc, ehkanawentansik tahsh otinaahkonikewinini mii​'i iinsan a'a kaakakiinawishkitc. Kaawiin iitok okikishkaakohsiin tepwewin. 5 A'awe tahsh wiin kaakanawentank otihkitowinini, Kishemanitoon hsa kekii'ishisaaki'aahpan kiihkiishihcikaateni opimaatisiwinink. Miitahsh i'i ishihcikeyank, mii 'omaa keoncikehcinaa'oyank e'wiiciayaamank Kishemanitoo. 6 A'awe tahsh kaaihkitotc ehtipiwiiciiwaatc Kishemanitoon, ishinaakwanini ko ci-ishipimohsehpan peshikwan kaashipimohsenitc Christan. 7 Kaasaaki'inakook, kaawiin wiin oshki-inaahkonikewin o'o kaaoshipii'amawinakook; kehteinaahkonikewin ohsha kaatashintamawinakook, mii hsa i'iwe kaa'maaciikihkentamek kiimaaciianami'ewaatisiyek. O'o tahsh kehteinaahkonikewin, mii​hsa 'iweni Kishemanitoo otipaacimowin aasha kaakii'noontamek. 8 Shaakooc itahsh oshkikekoonink inentaakwan o'o inaahkonikewin kaaoshipii'amawinakook. Tepwewin iitok i'imaa Christink ishinaakwanini, i'imaa kaye kipimaatisiwiniwaank. Aaniihsh kaakashkiitipihkahk aniankonaakwan, i'i tahsh kaawaahseyaak aasha anisaakaahte. 9 A'a tahsh kaaihkitotc e'ayaatc kaashiwaahseyaanik, shaakooc tahsh shiinkenimaatc wiitanami'aan, kaashikashkiitipihkaninik hsa keyaapi ishiayaa. 10 A'a tahsh wiin kaasaaki'aatc wiitanami'aan, kaashiwaahseyaanik ishipimaatisi. Kaawiin tahsh kekoonini otayaahsiin keoncipisokehshink. 11 A'awe tahsh wiin kaashiinkenimaatc wiitanami'aan, kaashikashkiitipihkaninik iinsan ishiayaa, kaashikashkiitipihkaninik kaye ishipimohse. Kaawiin okihkentansiin aaniinti eshaatc, aaniihsh kaakashkiitipihkaninik okipaapishkaakon. 12 Kaasaaki'inakook niniicaanihsak kaaineniminakook, mii ohsha kaaoncioshipii'amawinakook, cimaamihkawiyek ekiihpoonencikaatekin kimacitootamowiniwaan Christ otishinihkaasowinink onci. 13 Kekiinawaa hsa nawac kaakihtaatisiyek, kitooshipii'amawininim cimaamihkawiyek ehkihkenimek a'a kayehte kaakii'ayaatc kiimaacihsenik kahkina kekoon. Kekiinawaa kaaoshkaatisiyek, kitooshipii'amawininim cimaamihkawiyek ekiihshaakooci'ek maciaya'aa. Kitooshipii'amawininim kiinawaa kaaineniminakook apinoonciishak, cimaamihkawiyek ehkihkenimek kaaoTetemaawitc. 14 Kitooshipii'amawininim kiinawaa kaakihtaatisiyek, cimaamihkawiyek ehkihkenimek a'a kayehte kaakii'ayaatc kiimaacihsenik kahkina kekoon. Kitooshipii'amawininim kiinawaa kaaoshkaatisiyek, cimaamihkawiyek e'mashkawisiiyek, Kishemanitoo kaye e'ayaanik otihkitowin kipimaatisiwiniwaank, ekiihshaakooci'ek kaye maciaya'aa. 15 Keko saakihtoohkek kaanihtaainahkamikahk o'omaa ahkiink, ini kaye kekoonan kaa-ayaakin ahkiink. Kiishpin awiya saakihtootc ahkiiwihcikewinan, kaawiin iinsan osaaki'aahsiin kaaoTetemaawinitc. 16 Aaniihsh kahkina kekoonan onoweniwan o'omaa ahkiink kaa-ayaakin, awiya kaaishimacimihsawenciketc, oshkiinshikomaank kaye kaaoncimihsawinaakenk, ishipimaatisiwinink kaye kaashikihci-inenintisonk, kaawiin ono Otetemaank onciimakahsinoonan, ahkiink ohsha oncioshi'oomakanoon! 17 I'i hsa ahki, kaaishimihsawencikenaaniwank kaye, tapoonihsewan. A'a tahsh wiin kaatootank kaashiantawentaminitc Kishemanitoon nehpic tapimaatisi. 18 Kiinawaa kaasaaki'inakook apinoonciishak, mii​'owe ishkwaac e'ishihsek. Kaakii'ishinoontamek ewiihpitakohshink a'a kaakakwenakaashkawaatc Christan, aasha tahsh niipiwa' kaakakwenakaashkawaawaatc Christan kiihpitakohshinook. Miitahsh o'omaa wencikihkentaakwahk mii​'i aasha ishkwaac e'aniocihcihsek. 19 Kaawiin tahsh wiinawaa kiwiicitipentaakosiimikohsiinaanik, mii​hsa​'i kaakii'oncinakaninankwaa. Kiishpin kaaoncitipentaakosiyank tepwe ishitipentaakosiwaahpan, keyaapi iitok kitaakii'wiiciiwikonaanik. Ekii'nakaninankwaa tahsh mii​'imaa eshipehtenaakwaninik kaashitipentaakosiyank tepwe e'oncitipentaakosihsikwaa. 20 Kiinawaa tahsh wiin kikii'miinikoowisim Kishemanitoo otAhcaahkwan, kahkina kaye kikihkentaam. 21 Kaawiin tahsh kaakii'oncioshipi'amawinakook ehkihkentansiwek tepwewin, ekihkentamek ohsha. Kikihkentaam kaye kiiwanimowin tepwewinink e'onciihsinok. 22 Awenen tahsh kekiinawishkitc? Awiya hsa ko kaaihkitotc Ciisahsoon e'aawihsinik kaakii'onaapamikonitc Kishemanitoon, mii hsa 'awe kaakakwenakaashkawaatc Christan. Aaniihsh kaawiin otipaacimaahsiin Kaaoyoohsimimintc, oKosihsimaan kaye. 23 Awenen​itahsh​iko kaatipaacimaahsik oKosihsimaan kaawiin otayaawaahsiin Kaaoyoohsimimintc. A'a tahsh kaatipaacimaatc oKosihsimaan otakoayaawaan Kaaoyoohsimimintc. 24 Miitahsh eshinaakwahk cikikishkamekipan i'i nihtam kaakii'noontamek kiimaaciianami'ewaatisiyek. Kiishpin i'i ishihsek, miitahsh keshikihciwiayaayek kaashiayaatc oKosihsimaa, a'a kaye Kaaoyoohsimintc. 25 Miitahsh o'oweni wiin iko oKosihsimaa kaakii'ahshotamawinank, pimaatisiwin wiihkaa kepoonihsehsininik. 26 Kitooshipii'amawininim itahsh ehtashintamawinakook iki kaakakwewaniwininekwaa. 27 Kiinawaa tahsh wiin Christ kikiihsiikinamaakowaa otAhcaahkwan. Ehkikishkawiminek itahsh, kaawiin memwehc kikamanesihsiim awiya cikihkino'amawinek. OtAhcaahkwan tahsh kaakiihsiikinamawinek kikakihkino'amaakowaam kahkina kekoonini. I'i tahsh kaakihkino'amawiminek tepwewanini, kaawiin wiin kiiwanimowin tinowansinini. I'i tahsh kaashikihkino'amawiminek, mii 'imaa onci mooshak wiiciiwihk Christ. 28 Kiinawaa niniicaanihsak kaasaaki'inakook, taka mooshak wiiciiwaataa. Ahpii tahsh naakositc cisoonkite'eyank, ciakaciihtawaahsiwank kaye ahpii pitakohshink. 29 Kikihkentaam iitok Christ ehkwayahkwaatisitc; kikihkentaam kaye kahkina awiya kaaishihciketc kaakwayahkonaakwaninik otooniicaanihsimikoon Kishemanitoon.

1 Cwaan 3

1 Inashke pemiahpiihcishaweniminank Kaaoyoohsimintc! Kishemanitoo oniicaanihsa' kitishinihkaanikoomin. Tepwe aaniihsh kitinowiwaamin! Mii​hsa o'omaa ahkiink pemaatisiwaatc kaaoncikihkenimisinowinankwaa aaniihsh kaawiin okihkenimaahsiwaawaan Kishemanitoon! 2 Kaasaaki'inakook, aasha ohsha noonkom Kishemanitoo oniicaanihsa' kitinowiwaamin, weti tahsh niikaanaya'ii kaawiin mahshi kihkentaakwahsinoon aaniin mayaa keinentakosiwankwen. Shaakooc itahsh kikihkentaamin, ahpii naakositc, kaainentaakositc kekiinawint ci-inentaakosiyank; aaniin kaye mayaa eshinaakositc kikaishiwaapamaanaan. 3 Kahkina tahsh awiya o'o kaashiahpenimonotawaatc, ishipehki'itiso taapishkoo kaashipehkentaakosinitc Christan. 4 Kahkina tahsh awiya kaanihtaamacitootank, mii​'awe tino kaanihtaa-aanawentank Kishemanitoon otoonahshowewinini. Kiiaanawencikaatek ohsha onahshowewin, mii​hsa​'i e'macitootamonaaniwank. 5 Kikihkentaamin tahsh kaye ekiihpitakohshink ciwepinamawinank kimacitootamowininaanin. Kaawiin wiin Christ otayaahsiin macitootamowin. 6 Awiya hsa kaawiiciiwikotc Christan kaawiin nihtaamacitootansii, a'a tahsh awiya kaanihtaamacitootank, mii iinsan 'awe wiihkaa kaawaapamaahsik, kaakihkenimaahsik kaye. 7 Niniicaanihsak, taka keko awiya kikawanimikohsiiwaa. A'awe hsa kwayahk kaanihtaatootank, mii​hsa a'awe kaashikwayahkwaatisitc taapishkoo kaashikwayahkwaatisinitc Christan. 8 A'a tahsh wiin kaanihtaamacitootank maciaya'aank oncitipentaakosi, aaniihsh maciaya'aa kii'oncimacitootam kiimaacihsenik o'o ahkiini. Miitahsh o'o kaakii'oncinaakosinitc Kishemanitoo oKosihsan, ewii'nihshiwanaacihtamawaanitc enanohkiinitc maciaya'aan. 9 Awiya hsa Kishemanitoon kaa'oniicaanisimikotc kaawiin nihtaamacitootansii, aaniihsh Kishemanitoon kaaishiayaanitc okikishkaakon. Kaawiin otaakashkihtoohsiin keyaapi cianimacitootank, aaniihsh Kishemanitoonaank oncinihtaawiki. 10 Aahpici ohsha peyahtenaakosiwak iki Kishemanitoon kaaoniicaanihsimikowaatc, iki kaye maciaya'aan kaaoniicaanihsimikowaatc. Awiya hsa kaaishihcikehsik kaakwayahkonaakwaninik kaawiin Kishemanitoon otooniicaanihsimikohsiin, kaawiin kaye a'a tino osaaki'aahsii' wiitanami'aa'. 11 Miitahsh o'owe tipaacimowin kaakiihpinoontamek kiimaaciianami'ewaatisiyek, kiinawint hsa cisaaki'itiyankipan. 12 Keko tahsh wiin nanaapinawaahkek Ken (Cain), kaakii'oncitipentaakositc maciaya'aank, ekii'nihsaatc itahsh ini wiicihkiweyan. Wekonenini tahsh kaa'oncinihsaatc? Otishihcikewinan iitok kii'macinaakwaniniwan, wiicihkiweyan tahsh wiin otishihcikewinini kii'minonaakwaniniwan. 13 Niitanami'aak, keko maamahkaatentankek kiishpin shiinkeniminekwaa ahkiink kaa-ayaawaatc. 14 Kikihkentaamin tahsh kiinawint nipowinink ekii'oncisaakicishkaayank, ekii'ishipiintikeshkaayank tahsh pimaatisiwinink, aaniihsh kisaaki'aanaanik kiitanami'aanaanik. A'awe tahsh wiin kaasaaki'iwehsik, nipowinink tanentaakosi. 15 Awiya tahsh kaashiinkenimaatc wiitanami'aan mii​hsa taapishkoo enentaakositc kaanihshiwetc. Kikihkentaamin itahsh awiya kaanihshiwetc kaawiin okikishkaakohsiin i'i pimaatisiwin wiihkaa kepoonihsehsininik. 16 I'i tahsh Christ kaakii'ishipakitinank opimaatisiwin kiinawint onci, mii 'imaa keoncikihkentamankipan aaniin awiya kaasaaki'iwetc keishihciketc. Miitahsh kekiinawint eshinaakwahk cipakitinamankipan kipimaatisiwininaanin kiitanami'aanaanik onci. 17 Awiya tahsh kaatepihsetc kekoonan, waapamaatc wiitanami'aan noontehsenitc, ishikoohpaatenimaahsik tahsh, aaniin tahsh inaa keshikikishkaakohpan Kishemanitoon osaaki'iwewinini? 18 Kaaoniicaanihsiminakook, taka kaawiin wiin ehta kitihkitowininaanink kikaoncisaaki'iwehsiimin, kaawiin kaye kikamihcitashintansiimin; kikatootaamin hsa cinaakwahk tepwe saaki'iwewin. 19 O'o tahsh ishihcikeyank, mii 'omaa keoncikihkentamank tepwewinink e'oncitipentaakosiyank. Miitahsh kaye o'omaa keoncipisaanihtooyank kite'inaanin cishaakwenimohsiwank Kishemanitoo enaahsamiitc. 20 Kiishpin hsa ko kiimikoshkaatentami'ikoyank kite'inaanin, kimaci-ishiwepis e'ikoyank, nawac iitok Kishemanitoo kikihkenimikonaan ahpiihc wiin kaa-ahpiihci kihkenintisoyank kite'inaanink, wiin kaye kahkina kekoonini kaakihkentank. 21 Kaasaaki'inakook, kiishpin kimaci-ishiwepis ikohsiwank kite'inaanin, miitahsh i'i keoncisoonkite'eyank enaahsamiitc. 22 Miitahsh kaye wencitepinamowank wekonen​iko kaakakwecimank, aaniihsh kina'ihtamowaamin, e'ishihcikewank kaye kaaminwaapantank. 23 Miitahsh o'o enaahkoniketc, citepweyentamowank otishinihkaasowinini oKosihsan Ciisahs Christan, cisaaki'itiyankipan, kaakii'inaahkoninank. 24 A'a tahsh iko kaakanawentank aaniin enaahkonikenitc, otipiwiiciiwaan Kishemanitoon, owiiciiwikoon itahsh kaye. Ini tahsh otAhcaahkwan kaakii'miininank, mii​'imaa wencikihkentamank e'wiiciiwinank.

1 Cwaan 4

1 Kaasaaki'inakook, keko tepwehtawaahkekwaanik kahkina kaaihkitowaatc ehkikishkaakowaatc Kishemanitoon otAhcaahkoni. Antakihkenimihkok taka Kishemanitoonk cionciinikwen ini ahcaahkwan kaakikishkawaawaatc. Aaniihsh paahtiinowak kaainwaanitisowaatc ehkiikitoohtamawaawaatc Kishemanitoon, misiwe e'ishaawaatc o'omaa ahkiink. 2 O'o tahsh kikaoncikihkenimimaawaan kiishpin tepwe Kishemanitoo otAhcaahkwan e'aawinikwen. Entahsopeshik itahsh iko awiya kaawiintank Ciisahs Christan ininiinaank ekii'ishiowiiyawinitc, mii​hsa Kishemanitoonk kaaonciinitc ini Ahcaahkwan kaakikishkaakotc. 3 Entahsopeshik itahsh awiya keihkitohsik Ciisahsoon o'o e'ishiayaanitc, kaawiin iinsan Kishemanitoonk onciihsiiwan ini ahcaahkwan kaakikishkaakotc. Mii ohsha iinsan a'a kaakakwenakaashkawaatc Christan otahcaahkoni, kaakii'noontamek aasha ewiihpitakohshink. Inashke aasha iitok o'omaa ahkiink ayaa. 4 Niniicaanihsak, Kishemanitoonaank tahsh kiinawaa kitoonciim, kikiihshaakoci'aawaak kaye iki kaakii'inwaanitisowaatc ehkiikitoohtamawaawaatc Kishemanitoon, aaniihsh a'a kaakikishkawinek nawac soonkentaakosi ahpiihc wiin ini ahcaahkwan kaakikishkaakowaatc iki o'omaa ahkiink kaaoncitipentaakosiwaatc. 5 Ahkiink itahsh oncitipentaakosiwak, miitahsh kaye kaaonci-ishihcikewaatc kaa'ishikiishwenitc ahkiink kaainaatisinitc, mii​'i kaye kaaoncipisintaakowaatc o'omaa ahkiink kaa-ayaanitc. 6 Kiinawint tahsh wiin Kishemanitoonk kitooncitipentaakosimin. Awenen iko kaakiihkenimaatc Kishemanitoon kipisintaakonaan. A'a tahsh wiin Kishemanitoonk kaaoncitipentaakosihsik kaawiin kipisintaakohsiinaan. Miitahsh o'omaa keoncipehteyenimintwaa iki kaakikishkaakowaatc ini Ahcaahkwan tepwewin kaakihkino'ikenitc, iki tahsh kaye kaakikishkawaawaatc ahcaahkwan kaawaniwishiwenitc. 7 Kaasaaki'inakook, taka saaki'ititaa. Saaki'iwewin hsa Kishemanitoonk onciimakan. Kahkina tahsh awiya kaasaaki'iwetc otooniicaanihsimikoon Kishemanitoon, okihkenimaan kaye Kishemanitoon. 8 A'awe tahsh kaasaaki'iwehsik kaawiin okihkenimaahsiin Kishemanitoon. Kishemanitoo iitok ishiayaa ehsaaki'iwetc. 9 Kishemanitoo tahsh kikii'naakohtamaakonaan ehsaaki'inank, ekiihpiicinisha'waatc kaamihcipeshikonitc oKosihsan o'omaa ahkiink, kiinawint ciayayaawank pimaatisiwin oKosihsink onci. 10 Miitahsh o'owe saaki'iwewin, kaawiin wiin ekiihsaaki'ank Kishemanitoo, wiin iitok kikiihsaaki'ikonaan, kaakii'onci piicinisha'waatc oKosihsan keoncipoonentamaakooyank kimacitootamowininaanin. 11 Kaasaaki'inakook, kiishpin Kishemanitoo o'o nahke kii'ishisaaki'inank, kekiinawint tahsh ishinaakwan cisaaki'itiyankipan. 12 Kaawiin mahshi wiihkaa awiya owaapamaahsiin Kishemanitoon, kiishpin tahsh saaki'itiyank, Kishemanitoo iinsan kiwiiciayaamikonaan, mii​'i kiihkiishinaakwaninik osaaki'iwewin kipimaatisiwininaanink. 13 Miitahsh wencikihkentamank e'wiiciayaamank Kishemanitoo, e'wiiciayaaminank kaye, aaniihsh kikii'miinikonaan otAhcaahkwan. 14 Kiinawint hsa kikii'waapantaamin, kitipaacimomin kaye Kaaoyoohsimintc ekiihpiicinisha'waatc oKosihsan cipimaaci'aanitc pemaatisinitc o'omaa ahkiink kaa-ayaanitc. 15 Awenen tahsh iko kewiintank Ciisahsoon mayaa e'oKosihsimikonitc Kishemanitoon, mii iitok a'a e'wiiciayaamaatc Kishemanitoon, e'wiiciayaamikotc kaye. 16 Kiinawint tahsh kikiihpikihkentaamin, ekiihtepwehtamowank kaye aaniin eshisaaki'inank Kishemanitoo. Kishemanitoo hsa ishiayaa ehsaaki'iwetc. Awenen​itahsh​iko saaki'iwewinink entashipimaatisitc, owiiciayaamaan Kishemanitoon, owiiciayaamikoon tahsh iko kaye. 17 Kiishpin saaki'iwewin kipimaatisiwininaanink ishikiishinaakwahk, mii​'i keoncikehcina'owenimoyank ahpii tipaahkonikewikiishikahk, aaniihsh Christ kaaishinaakwaninik opimaatisiwin, mii kekiinawint eshipimaatisiyank o'omaa ahkiink. 18 A'awe kaasaaki'iwetc kaawiin kohtaacihsii. I'i hsa kaakiishinaakwaninik saaki'iwewin oncisaakicishkikaateni kohtaaciwin. Aaniihsh awiya kaananiisaanentank ewii'nana'ahsintc, mii 'imaa wenciik kohtaaciwin. Awiya tahsh kaakohtaacitc kaawiin mahshi kiishinaakohcikaatehsinini saaki'iwewin opimaatisiwinink. 19 Miitahsh kaaoncisaaki'iweyank, aaniihsh Kishemanitoo nihtam kikiihshawenimikonaan. 20 Kiishpin awiya ihkitotc ehsaaki'aatc Kishemanitoon, shiinkenimaatc itahsh wiitanami'aan, mii​hsa 'awe kaakakiinawishkitc. Aaniihsh awiya kaasaaki'aahsik wiitanami'aan kaawaapamaatc, aaniin itahsh inaa keishikashkihtoohpan cisaaki'aatc Kishemanitoon kaawaapamaahsik? 21 Miitahsh o'o Kishemanitoo kaakii'inaahkoninank, awenen hsa kesaaki'aatc Kishemanitoon, ishinaakwanini kaye cisaaki'aahpan wiitanami'aan.

1 Cwaan 5

1 Kahkina awiya kaatepwehtank Ciisahsoon e'aawinitc kaakii'onakimikonitc Kishemanitoon cipimaaci'iwetc, mii​hsa 'awe Kishemanitoon kaaoniicaanihsimikotc. Kahkina tahsh kaye awiya kaasaaki'aatc Kaaoyoohsimimintc, osaaki'aa' kaye awenena'​iko Kishemanitoon kaaoniicaanihsimikonitc. 2 Miitahsh o'o wencikihkentamank ehsaaki'imank Kishemanitoo oniicaanihsa', kiisaaki'ank Kishemanitoo, ehtootamowank kaye otinaahkonikewinan. 3 Ehkanawentamowank tahsh Kishemanitoo otinaahkonikewinan, mii 'imaa eshinaakohtaawank ehsaaki'ank. Otinaahkonikewinan tahsh kaawiin sanakentaakwahsininiwan. 4 Awenen​itahsh​iko kaaoniicaanihsimikotc Kishemanitoon oshaakoocishkaanan ahkiink kaatanentaakwaninikin. Aaniin itahsh mayaa wencipahkinawaatamank ahkiink kaatanentaakwahk? Kitepwehtamowininaanink ohsha! 5 Awenen tahsh keshaakoocishkankipan ahkiink kaatanentaakwaninikin? A'awe hsa ehta kaatepwehtank Ciisahsoon e'oKosihsimikonitc Kishemanitoon. 6 Ciisahs Christ ohsha kaakiihshaaposhkank nipiini kiisiika'antaasotc, miskwiini kaye kiinihcikaniwitc. Kaawiin wiin nipiink ehta kiipi-ishishaaposhkaahsii, minciniishwayek hsa nipiink, miskwiink kaye. Kishemanitoo otAhcaahkwan tahsh iko tipaacimowan ehtepwewaninik o'o, aaniihsh otAhcaahkwan tepwewin tinowiwan. 7 Nihswayek hsa oncitipaacimaa Ciisahs. 8 Kishemanitoo otAhcaahkwan, nipi, i'i kaye miskwi. Ono hsa nihswayek peshikwan onci-inaacimaa. 9 Inashke kitepwehtamowaamin inini otinaacimowin, shaakooc tahsh wiin Kishemanitoo otipaacimowin nawac mashkawitepwemakanini, wiin iitok mayaa kaatipaacimaatc oKosihsan. 10 A'a hsa kaatepweyenimaatc Kishemanitoon oKosihsini, otayaan ote'ink kaaishitepweyaacimimintc oKosihsimaan. Awenen​itahsh​iko kaatepwehtawaahsik Kishemanitoon, mii​'i okakiinawishkink ehtootawaatc, ehtepwehtansik Kishemanitoon enaacimaanitc oKosihsini. 11 Miitahsh o'o tipaacimowin ehshihsink, Kishemanitoo ekii'miininank pimaatisiwin wiihkaa kepoonihsehsininik. I'i hsa pimaatisiwin oKosihsink onciini. 12 A'a tahsh kaa-ayaawaatc oKosihsimaan otayaan pimaatisiwin. A'a tahsh wiin kaa-ayaawaahsik Kishemanitoon oKosihsini kaawiin otaayaahsiin pimaatisiwin. 13 Kitooshipii'amawininim itahsh ono kiinawaa kaatepwehtamowek owiinsowinini Kishemanitoo oKosihsan, cikihkentamek e'ayaayek pimaatisiwin wiihkaa kepoonihsehsinok. 14 Miitahsh kaye kaaoncikehcinaa'oyank kiinaasihkawank Kishemanitoo: kiishpin ishikakwecimank enahtenik otinentamowin, kikanoontaakonaan. 15 Kiishpin tahsh kihkentamank e'noontawinank aaniin iko kaashikakwecimank, kikihkentaamin cimiininank i'i kaakii'ishikakwecimank. 16 Kiishpin awiya waapamaatc wiitanami'aan tootaminitc macitootamowin tino kaaishiwishiwemakahsininik nipowinink, otaa-anami'ehtawaan ohsha Kishemanitoon, okamiinikoni tahsh pimaatisiwin. Iki kota kaainakwaa omacitootamowiniwaan kaaishiwinikohsikwaa nipowinink. Ayaa hsa macitootamowin kaaishiwishiwemakahk nipowinink. Kaawiin nintihkitohsii cikii'anami'ehcikaatekipan o'o tino. 17 Kahkina ohsha wanitootamowin macitootawin inakincikaate. Ayaa tahsh macitootamowin kaaishiwishiwemakahsinok nipowinink. 18 Kikihkentaamin iitok awiya Kishemanitoon kaaoniicaanihsimikotc kaawiin nihtaamacitootansii. Kishemanitoon oKosihsini ohsha okanawenimikoon, maciaya'aan tahsh kaawiin okakashki'ikohsiin cimaashihse'ikotc. 19 Kikihkentaamin Kishemanitoo e'oniicaanihsiminank; iki tahsh wiin o'omaa ahkiink kaaoncitipentaakosiwaatc maciaya'aan otipenimikowaan. 20 Kikihkentaamin kaye Kishemanitoo oKosihsan ekiihpitakohshininitc, ekii'miiniminank kaye nihsitohtamowin, cioncikihkenimank kaamayaawentaakositc Kishemanitoo. Kiwiiciayaamaanaan tahsh kaamayaawentaakositc Kishemanitoo, ini kaye oKosihsan Ciisahs Christan. Mii​hsa wa'a Kishemanitoo kaatepwewiniwitc, wiin hsa 'a pimaatisiwin wiihkaa kepoonihsehsininik. 21 Kaasaaki'inakook niniicaanihsak, keko papaamenimaahkekwaanik manitoohkaanak.

2 Cwaan 1

1 Niin Cwaan (John) kaaniikaanentaakosiyaan, kitooshipii'amawin, kiin kaakii'onentaakosiyan ihkwe, kiniicaanihsak kaye. Tepwe hsa kisaaki'ininim. Kaawiin niin ehta kaasaaki'inakook, kahkina hsa kaakihkentamowaatc tepwewin kisaaki'ikowaak. 2 Aaniihsh i'i tepwewin kikikishkaakomin, kikawiiciiwikomin kaye nehpic iko. 3 Kishewaatisiwin, koohpaasinaakoowin, pisaanisiwin kaye kikawiiciiwikomin, e'onciimakahk Kishemanitoonk Kaaoyoohsimintc, Ciisahs Christink kaye kaaoKosihsimikotc Kaaoyoohsimimintc, citakoayaayek tepwewin, saaki'iwewin kaye. 4 Aahpici tahsh ninkiikihciciihkentam ekii'noontamaan aaninta kiniicaanihsak e'ishipimohsewaatc tepwewinink taapishkoo Kaaoyoohsimintc kaakii'inaahkoninank. 5 Mii​hsa 'o eshikakweciminaan, kiin kaaihkwewiyan, maano cisaaki'itiyankipan kahkina kaatahshiyank. Kaawiin wiin oshki-inaahkonikewin kaatashintamaan, i'iwe ohsha kaatashintamaan aasha kaakii'maaciiayaayank kiimaaciitepwehtamank. 6 Miitahsh o'owe saaki'iwewin eshihsink, ci'ishipimohsewankipan Kishemanitoo otinaahkonikewinink. Miitahsh o'o inaahkonikewin aasha kaakii'noontamek kiimaaciianami'aayek, saaki'itiwinink ci-ishipimohseyek. 7 Aaniihsh paahtiinowak owanihshimiwek kaamaacaawaatc misiwe ahkiink ehpapaaishaawaatc, e'ishipapaakihkino'ikewaatc Ciisahs Christan tepwe ininiinaank ekii'ishiowiiyawihsinik. Mii​hsa wa'a tino owanihshimiwe, kaakakwenakaashkawaatc Christan, kaainintc. 8 Kanawenintisok tahsh ciwanihtoohsiwek niinawint kaakii'anohkaatamaank kiinawaa cikashkihtamaakooyek, ishihcikek itahsh cimooshkinetipa'amaakooyek. 9 Awiya tahsh paashicishkaatc, ishiayaahsik kaye kwayahk kihkino'amaakewinink kaainaacimimintc Christan, kaawiin iinsan otayaawaahsiin Kishemanitoon. A'a tahsh wiin mooshak kaa-ayaatc i'imaa nahke ishikihkino'ikewinink, otayaawaan Kaaoyoohsimimintc, ini kaye oKosihsimaan. 10 Kiishpin awiya pinaasihkawinek piitoohsik itahsh o'o tino ishikihkino'ikewin, keko piintikanaahkek kitaawiniwaank, keko kaye awaac iko inaahkek: "Poosho niicii." 11 Awiya hsa ko kaapooshoo'aatc kewiin hsa ishiwiici'iwe kwayahk kaaishihcikehsinik. 12 Niipiwa' hsa nintayaan keishipii'ikeyaampaan, kaawiin tahsh masina'ikan, oshipii'ikanaapo niwii'aapacihtoohsiin. Nimpakohsentaan ohsha ewii'mawatihsinakook, cioncishkawi kakanoonitiyank, kiinawint hsa wiinke ciminwentamank. 13 Iniweniwa' tahsh oniicaanihsa' kaaonaapamintc kiicihkwe, kipooshoo'ikowaam!

3 Cwaan 1

1 Niin Cwaan (John) kaaniikaanisiyaan kitooshipii'amawin. Kiin kaasaakiwiiciiwinaan Keyahs (Gaius), tepwe kaasaaki'ak. 2 Kaasaaki'inaan, nintishipakohsenim misiwe piko ci-ishiminohseyan, ciminoayaayan kaye, kaashikihkeniminaan e'ishiminohseyan kitahcaahkopimaatisiwinink. 3 Aahpici ninkii'minwentam ahpii otanami'aak kiipitakohshinowaatc ekiihtipaacimihkwaa ehkihciwentaman kaatepwewentaakwahk tipaacimowin, e'ishipimaatisiyan kaye kaainahtek tepwewin. 4 Miitahsh i'i maawac kekoon kaaminwentamo'ikoyaan kiinoontamaan niniicaanihsak kii-ishipimaatisiwaatc tepwewinink. 5 Kiin kaasaaki'inaan, aahpici hsa kwayahk kitishihcike i'i kaashinihtaa wiici'atwaa otanami'aak, ikiweniwak iko kaye kaapiiwitehkantawihkwaa. 6 Kiihpitipaacimowak tahsh kaye o'omaa kaashimaawaci'itiyaank otanami'aak ekii'wiintamaakewaatc aaniin eshisaaki'iweyan. Kikaminohcike wiici'atwaa cimaacaawaatc, Kishemanitoo nahke kaashiminwaapantank. 7 Mii'iitok kaakii'oncimaacaawaatc ehpapaa-anohkiihtawaawaatc Christan. Kaawiin hsa kekoonini okii'otaahpinamawaahsiwaawaa' kaa-anami'ewaatisihsinik kekii'ishiwiici'ikowaahpan. 8 Miitahsh eshinaakwahk kiinawint ciwiici'ankwaapan iki tino ininiwak miitahsh i'i ewiitanohkiimankitwaa i'i kaapapaatashintamowaatc tepwewin. 9 Ninkii'oshipii'amawaak tahsh iki otanami'aak kaashiohkwiinowaatc. A'a tahsh Tayaacarahpiis (Diotrephes) kaanihtaa kakwe nihtamentaakositc kaawiin oncita nimpapaapisiskihtaakohsiinaan. 10 Kiishpin tahsh pitakohshinaan, niwiihtashintamowaan aaniin eshihciketc, oncita​ko e'nihtaa anaamimiyamintc. Kaawiin tahsh tepwehsii 'i kaaihkitotc. Teminihk itahsh e'inentansik i'i kaaishihciketc, kaawiin kaye otaawinink opiintikanaahsii' otanami'aa' kaapimiayaanitc. Okipihtinaa' kaye i'i kaa antawentaminitc i'i ewii'ishihcikenitc. Miitahsh eshisaakiciwepinaatc i'imaa kaashimaawaci'itinitc otanami'aa'. 11 Kaasaakiwiiciiwinaan, keko kakwenaapitootanken kaamacinaakwahk. I'i tootan kaaonishihshik. Awiya hsa kaatootank kaaonishihshininik, Kishemanitoonk oncitipentaakosi. A'a tahsh wiin kaatootank kaamacinaakwaninik, kaawiin iinsan otoonciwaapamaahsiin Kishemanitoon. 12 Tamiicariyahs (Demetrius) tahsh kahkina awiyan ominwaacimikoon. Kaaishitepweyaatotenik kaye opimaatisiwin onciminwaapancikaniwi. Keniinawint tahsh nintakominwaacimaanaan. Kikihkentaan iitok nintipaacimowininaan ehtepwemakahk. 13 Niipiwa' ihsa kitaainin, kaawiin tahsh i'i niwii'ishipii'ikehsii. 14 Nimpakohsenim tahsh wiipa ciwaapaminaan, mii​hsa 'i ahpii kekakanoonitiyank. 15 Pisaan ayayaan. Kaasaakiwiiciiwakwaa o'omaa kipooshoo'ikook. Wiintamaw ehpooshoo'ankitwaa kaasaaki'ankitwaa weti kahkina kaa-ayawaatc. Mii​'i minihk eshipii'amawinaan.

Coot 1

1 Niin Coot (Jude) Ciisahs Christ otanohkii'aakanan. Ciimis (James) ishinihkaaso niicihkiwensi. Kitooshipii'amawininim kahkina kiinawaa kaa-antominek, kaasaaki'inek kaye Kishemanitoo Kaaoyoohsimintc, Ciisahs Christ itahsh kaakanaweniminek. 2 Miitahsh i'i eshipakohsenimoyaan mooshak​iko cikoohpaateniminek Kishemanitoo cianikaantentaakwahk kipisaanentamowiniwaa maano kaye cianikaancisaaki'itiyek. 3 Kaasaaki'inakook, aahpici ohsha weweni ninkiihkakwe'ishihcike cioshipii'amawinakook kipimaaci'ikoowininaan onci kaamaamawihtooyank. Noonkom itahsh ninkii'inamanci' cioshipii'amawinakook ehkaancikanooninakook kiinawaa cikakwenaatamaatamek i'i tepwehtamowin Kishemanitoo kaakii'miinaatc opimaatisiima'. 4 Aninta enami'ewaatisihsikwaa ohsha kikiihpiintikaakonaanik ekiihkihkentaakosihsikwaa entinowiwaatc. Miiwak itahsh i'i kaakiihkwehkinamowaatc enaatotenik Kishemanitoon okishewaatisiwinini, miihsh meshkwac enaapacihtoowaatc pisaan keoncitootamowaatc noociko otishihcikewiniwaan. Miiwak itahsh iki kaa-aanawenimaawaatc Ciisahs Christan kaamihcipeshikonitc kitOokimaaminaanin, kaaTipenimiminank kaye. Mewisha iitok kii'ishipii'ikaatekopan aaniin keshikakwaataki'intwaa. 5 Aanawiin aasha kahkina ehkihkentamek o'o, shaakooc itahsh nimihsawentaan cimaamihkawimininakook kaaTipenciketc ekii'oncishaapwii'aatc opimaatisiima' weti Iicipahkiink (Egypt) kiisaakiciwinaatc. Naanaake tahsh okii'nihshiwaanaaci'aa' i'i kaakiihtepweyentansinik. 6 Maamihkawinotawihkwak itahsh encalak kaakii'ishitashiihkehsikwaa kaakii'ishimiinintwaapan cishitipencikewaatc, kaakii'nakatamowaatc kekii'ishitaawaahpan. Noonkom itahsh piiwaapihkweyaapiin wiihkaa kepooniayaasininikin aapataniniwan e'mamaancikwahpisowaatc. Anaamink kaaishikashkiitipihkaninik itahsh Kishemanitoon otashikipa'okowaan ehkanawenimikowaatc ewiihtipaahkonikowaatc ahpii kihcitipaahkonikewikiishikaninik. Miitahsh i'i ahpii kenihshiwanaaci'intwaa. 7 Maamihkawik itahsh kaye Swaatam (Sodom), Kamwaara (Gomorrah), ini kaye ootenawan kaakii'ayaakin i'imaa ciikaya'ii. Ikiweniwak kaye kaakiihtashiihkewaatc i'imaa ootenaahkaank peshikwan kii'ishihcikewak kaakii'ishihcikenitc maciencala' noociko ekii'ishihcikewaatc, ekii'nahpaaci-pihshikwaacihcikewaatc kaye. Ini tahsh ootenawan, iki kaye kaakiihpimaatisiwaatc kii'nana'ahsaawak cinehpici-caakisontwaa. Miihsh i'imaa eshiwaapanta'ikooyank, pehkish itahsh e'ayaankwaamimikooyank. 8 Miitahsh peshikwan oko owanikihkino'ikek eshihcikewaatc, otishinamowiniwaank iko nahke e'ishinoocikotootamowaatc owiiyawiwaan. Kaawiin kaye opapaapisiskentansiinaawaan okimaawiwinan Kishemanitoon kaa'onahtoonitc. Noociko kaye otinaawaa' encala' kaakihtentaakosinitc ishpimink kaa-ayaanitc. 9 Inashke wiin a'a kaaniikaanentaakositc encal Mayihkal (Michael) kaawiin i'i kii'ishihcikesii. Ahpii kiikakweshaakoosomaatc maciaya'aan aaniin kekiihtoocikaatenikipan Moosihsoon (Moses) owiiyawini, kaawiin Mayihkal kanake okiihkakwe-nihshiwanaasomaahsiin maciaya'aan anoociko ishikiishwewinan cikii'aapacihtoohpan. Mii​ehta kaa'inaatc: "Taka kaaTipenciketc kikakihcinooci'ik," okii'inaan. 10 Okoweniwak itahsh wiin ininiwak mii​hsa​ko​'i eshimaci-itamowaatc kekoonan nehsitohtansikwaa. Ini hsa wiin pankii kekoon kaakihkentamowaatc, otishikihkentaanaawaa ehta taapishkoo aya'aawihsha' kaaishimihci-pawikihkencikenitc tepwe e'naanaakatawentansinik. Miiwan tahsh ini tino kenihshiwanaaci'ikowaatc. 11 Wiinke hsa takihcikoohpaasinaakosiwak! Mii​hsa mayaa eshihcikewaatc enaapihcikewaatc kaakii'ishihcikenikopanen Kenan (Cain) mewisha. Mii kaye peshikwan eshihcikewaatc kaakii'ishihcikenikopanen Pelamoon (Balaam) kaakii'ishimamaashiinitc shooniyaan onci. Miihsh kaye peshikwan eshishashiipihtamowaatc taapishkoo kaakii'ishishashiipihtamonikopanen Kwaara (Korah) kaakii'ishinihkaasonitc. Miitahsh peshikwan inahke keshinihshiwanaatisiwaatc kekii'ishihsenitc. 12 I'iweni hsa kaa-akatentansikwaa kaaishinihtaapapaamahkamikisiwaatc, mii​hsa 'imaa wenciwiinishkamowaatc kiinawaa e'wiitoohkaasowaatc kaaishisaaki'itiiwi-wiihkwantiyek, wiinehtawaa piko e'naanaakaci'itisowaatc. Miihsh eshinaakosiwaatc taapishkoo wahkwi kaapimiwepaahsink, kaakimiwanohkemakahsinok. Taapishkoo mihtikonk kiitakwaakihk ishinaakosiwak, kaanihtaawikihtoohsikwaa kaye kekoonini kekiimiicinaakaatenikipan, e'ishinaakosiwaatc kaye kikiciipihk kaapihkwatahkiipicikaniwiwaatc mihtikook, wiinke tahsh e'aayiicinipowaatc. 13 Mii kaye eshinaakosiwaatc taapishkoo kaakihcimamaankaashkaak kihcikamiink, otishihcikewiniwaan kaaishimoohkinaakwaninikin taapishkoo piihte kaamoohkinaakwahk kiikihcinootink. E'ishinaakosiwaatc kaye taapishkoo wanankohshak noociko kaapapaamakoocinowaatc, Kishemanitoo okii'onahsaa' nehpic iko ci'ayaanitc maawac iko waahsa anaamink kaaishikashkiitipihkaninik. 14 Miiwa'​itahsh o'o kaakiihtashimaakopanen Iinohk (Enoch), niiwink Aatamonk (Adam) kaakii'onciaanihkoopisotc, kaakii'ihkitokopanen: "KaaTipenciketc ohsha wiihpitakohshin ewiihpiwiiciiwaatc mitaahswaahk kihcimitaahswaahk Kishemanitoon okihtentaakosiimini, 15 ewiihpitipaahkonaatc kahkina, cionaahkonaatc kaye aaniin ketootawimintc i'i kahkina kaaishihcikehsinik Kishemanitoo kaaishi'antawentank, i'i kaye kahkina noociko kaa'inaahpinemikotc omaci-ishiwepisii'," kii'ihkitokopan. 16 Miiwak​ihsa oko mooshak kaanihtaakihcikaakiikitowaatc, kotak kaye awiya' kaa-anaamimaawaatc; wiinawaa​ko e'ishihcikewaatc eshimacimihsawentamowaatc. Aahpici oncita kaye eminoinaawaatc awiya' wiinawaa piko ehta ewii'onciminohse'itisowaatc. 17 Kiinawaa tahsh wiin kaasaaki'inakook, maamihkawiwaahk otaanaank kaakiihpi-ininekwaapan kaaTipenciketc Ciisahs Christ otishinisha'waakana'. 18 Mii​hsa 'oweni kaa'ininekwaa: "Ahpii tahsh ishkwaac anikakiishikahk, taniayaawak hsa kepaahpinotaakewaatc, keishihcikewaatc wiinawaa piko omacimihsawencikaniwaan, ehkohsaahsikwaa Kishemanitoon." 19 Miiwak​ihsa oko kaanihtaa-nenaawishkawaawaatc otepwehtamoo', wiinke kaatipenimikowaatc kaaishimihsawentamomakaninikin owiiyawiwaan. Kaawiin kaye otayaawaahsiwaawaan Kishemanitoon otAhcaahkoni. 20 Kiinawaa tahsh wiin kaasaaki'inakook, ehkihtentaakwahk kitepwehtamowiniwaa, e'inentaakwahk waahkaa'ikan kaaishionaapihkihsicikaatek, mii 'imaa ishiompikaapawi'itik. Ishianami'aak itahsh kaye kaaishikihkinowiniminek Kishemanitoo otAhcaahkwan. 21 Kishemanitoo osaaki'iweninink ishiayaak keshikanawentaakosiyek, ciaaskonipii'ek kaaTipenciketc Ciisahs Christ kaaishikoohpaasinaaketc kaawii'ishimiininek pimaatisiwin wiihkaa kepoonihsehsininik. 22 Koohpaatenimihkwak iki kaanihtaa-aanwehtamowaatc. 23 Aaninta tahsh wiin pimaaci'ihkwak, saakiciwiihkopinihkwak i'imaa maci-ishkotenk. Koohpaatenimihkwak itahsh kotak aaninta citakokohtaanentamek. Kakwaanihsakentamowaahk otishihcikewiniwaan. Ayaankwaamisik kiinawaa i'imaa cionciwiinishkaakoohsiwek. 24 - 25 Taka hsa noonkom miikwehciwenimaataa kaamihcipeshikotc Kishemanitoo Kaapimaaci'inank. Wiin iitok kaakashkihtootc cikanaweniminek cipankihshinsiwek, cipiininek kaye kaaishiokimaawentaakwaninik kaaishiayaatc, awaac iko kekoon cishianaamentaakosihsiwek, wiinke kaye ciminwentamowek. Ciisahs Christ kaaTipeniminank e'wiiciiwank, taka hsa oncimiikwehciwenimaataa Kishemanitoo aaniihsh kihci-inentaakosi, kihciokimaawentaakosi, mashkawentaakosi, wiin kaye kaakashki'ewisitc. Mii​hsa 'oweni kaa'inentaakositc cipwaa ayaanik ahki, noonkom kaye, mii kaye 'i nehpic iko keni-ishiayaatc! Emen!

Okihkentamooshiwewin 1

1 Okihkentamooshiwewin Ciisahs Christ Kishemanitoon kaakii'miinikotc ciwaapanta'aatc otanohkii'aakana' wiipa keni-ishiwepaninik. Otencaliman okiihpinaashinisha'waan ekiihkihkentamoonaanitc otanohkii'aakanan Cwaanan (John). 2 Shikwa Cwaan okiihtipaatotaanan kahkina ini kaakii'waapantank, mii 'oweni otihkitowinini Kishemanitoon kaye otepwewinini Ciisahs Christan kaakiihkihkentamooshiwenitc. 3 Shawentaakosi a'a keanamihtamaaketc o'o masina'ikan kaye kaapisintamowaatc ono ihkitowinan Kishemanitoo kaaishikanootamawintc, iki kaye kaakanawentamowaatc omaa kaaoshipii'ikaatenikin. Aaniihsh pehsho aasha cianiocihcihsenik. 4 Niin Cwaan nintooshipii'amawaak iki otepwehtamook imaa kaatashimaamaawaci'itiwaatc e'niishwaahcinkin (7) ootenawan Eshaawahkiink (Asia). Shawenimikoowin kaye pisaanentamowin kikaonciihtamaakowaa a'a Kishemanitoo omaa noonkom kaa-ayaatc kaye mewisha kaapionciayaatc kaye kaawiihpiayaatc, kaye ikiweniwak niishwaahso Ahcaahkwak kaainaahsamikaapawiwaatc Kishemanitoo okihtapiwinink, 5 Ciisahs Christ kaye kaaKwayahkwentaakositc Otipaacimo, a'awe nihtam kaa'nihtaawikitc Kishemanitoonaank, kaakiihkiiwepimaatisitc, kaatipenimaatc kihciokimaa' ahkiink kaa-ayaanitc. Kisaaki'ikonaan hsa, omiskwiimink kaye kikii'onciaapa'okonaan cipoonitipenimikoyank kimacitootamowininaanin kaakiihpitootamank. 6 Kikii'ishi'ikonaan itahsh citinowiyank citipenimiweyank, citashikihcianami'ewikimaawiyank, cianohkiihtawimank oKishemanitooman Kaaoyoohsimaatc. Wiin oka-ayaan kihci-inentaakosiwin kaye tipencikewin pishihshik iko ahpane. Emen. 7 Inashke tapinaakosi wahkwiink! Kahkina tahsh awiya okawaapamaawaan, impooshke kaye iki kaakiihpashipa'waawaatc. Kahkina tahsh kaatahswewaanakisitc ahkiink taoncimawiwak ahpii waapamaawaatc. Amii hsa ko taishiwepan. Emen. 8 "Niin a'awe nihtam kaakii'ayaatc miinawaa ishkwaac keayaatc, ihkito kaaTipenciketc Kishemanitoo maawac kaamashkawentaakositc. Mii a'awe noonkom kaa-ayaatc kaye otaanaank kaakii'ayaatc, kaye kepiayaatc." 9 Niin Cwaan (John) kiicihkiwensiwaa keniin e'wiiciiwak Ciisahs, kiwiiciiwininim e'ishishashiipentamek kimikoshkaaci'ikoowiniwaank, i'iwe ocaanimisiwin i'imaa kaaonciimakahk e'ayaak otipencikewinink Ciisahs. Ninkii'nakanikoo 'imaa minihsink Paatimahs (Patmos) kaaishinihkaatek. Ninkii'onciahsikoo ekii'wiintamaakeyaan Kishemanitoo otihkitowin kaye otepwewin Ciisahs. 10 Ahpii ehkiishikahk kaaTipenciketc oKiishikaam kaaishiwiintek ninkii'wiiciiwimik ini Kishemanitoo otAhcaahkwan. Ninkii'noontaan itahsh ehkihcikishiiwek inwewin taapishkoo kihcipootaacikanink, weti nimpihkwanink awiya ehkanooshitc. 11 Mii 'owe eshitc: "I'iwe kaawaapantaman mii 'iwe oshipii'an masina'ikanink. Mii 'imaa ishinisha'amaw iki otepwehtamook i'imaa kaatashimaamaawaci'itiwaatc e'niishwaahcinkin (7) ootenawan. Miiwan​ono ootenawan: Ehpihsahs (Ephesus), Simirna (Smyrna), Parkamam (Pergamum), Tayahtaira (Thyatira), Saartihs (Sardis), Pilatelhpiya (Philadelphia), Leyaatihsiiya (Laodicea)." 12 Miitahsh ninkiihkwehkikaapaw ewii'waapamak awenen otinwewin kaakanooshitc. Ninkii'waapantaanan itahsh niishwaahso waahsahkonencikanaahtikoon e'osaawishooniyaawankin. 13 Mekweya'ii 'imaa waahsahkonencikanaahtikonk awiya ninkii'waapamaa taapishkoo pemaatisitc, ehkikishkank kihcimakoot ositink e'ahkwekaninik, miinawaa ehkihcihpisotc ohkaahkikanehpison e'osaawishooniyaawinaakwaninik. 14 Ohtikwaanink itahsh wiinisihsan kii'waapishkaaniwan taapishkoo maanahcaanihshipiiwayink; taapishkoo koon kaawaapishkisitc kii'ahpiihciwaapishkaaniwan. Kii'waahsiteniwan itahsh ini oshkiinshikoon taapishkoo kaa-ahpiihciwaahsitek ishkote. 15 Ositan itahsh kaye taapishkoo osaawaapihk ekiihpehkaapihkitek kaye wiinke ehshooshkwaapihkahk kii'ishinaakwaniniwan. Mii kaye kaa'inihtaakositc taapishkoo kaamatweciwank kihcipaawihtik. 16 Okihcinihkink itahsh kii'apiwa' niishwaahso wanankohsha'. Amiihsh miinawaa otoonink kii'oncihseni kaaiitawikaahshaanik kihcimoohkomaan. Miihsh kaye eshinaakwaninik owatenk taapishkoo kiisihs kaa-ahpiihciwaahseyaahsiketc kii'ishinaakwanini. 17 Ahpii e'waapamak ninkiihkawipani'owaan ositink. Taapishkoo awiya e'nipotc ninkii'ishinaakos. Ninkiihtaankinik itahsh okihcinihkink, ekii'ishitc: "Keko sekisihken! Niin a'a Nihtam Kaakii'ayaatc kaye piinihsh Ishkwaac Keayaatc. 18 Niin a'a KaaPimaatisitc. Ninkii'nip, miinawaahsh nimpimaatis, kaye nehpic pishihshik ninkapimaatis. Niin ninteinentaakos citipentamaan nipowin kaye iki i'imaa kaanipowaatc kaaishiayaawaatc. 19 Oshipii'an itahsh ini kaawaapantaman, miiwan iniweniwan noonkom kaa-ayaakin kaye niikaan weti keni-ishihsek. 20 Kikihkentamoonin 'iwe enentaakosiwaatc oko niishwaahso (7) wanankohshak kaakii'waapamatwaa ninkihcinihkink e'apiwaatc, kaye ini niishwaahso osaawishooniyaawi waahsahkonencikanaahtikoon, i'iwe kaakaacikaatek. Oko niishwaahso wanankohshak, miiwa' otencalimiwaa' otepwehtamook kaatashimaawacianami'aawaatc kaaniishwaahcinkin ootenawan. Ini kaye niishwaahso waahsahkonencikanaahtikoon, miiwak​iki otepwehtamook e'niishwaahcinkin pepahkaan kaaishimaamaawaci'itiwaatc."

Okihkentamooshiwewin 2

1 "Oshipii'amaw ini otencalimiwaan otepwehtamook Ehpihsahs (Ephesus) ootenaank kaatashianami'aawaatc. Mii 'owe ishipii'amaw: O'o kitikowaa a'a kaaminciminaatc i'i niishwaahso (7) wanankohsha' okihcinihkink, a'a mekweya'ii kaapimohsetc kaaishiniishwaahcininikin osaawishooniyaawi waahsahkonencikanaahtikonk. 2 Ninkihkentaanan kitishihcikewiniwaan kaye kitanohkiiwiniwaan kaye kishashiipentamowiniwaa. Kaye kikihkenimininim ekaa awaac ewii'otaahpinamawaahsiwekwaa iki maciayi'iink kaaishipimaatisiwaatc. Kikoci'aawaak itahsh iki Kishemanitoo otishinisha'waakana' kaamihci-ishi'itisowaatc, ekaa ehtinohkaaniwihsikwaa. Kikii'mihkawaawaak kiiwanimowin e'aapacihtoowaatc. 3 Shikwa keyaapi kishashiipentaam kaye niin onci kikiihpioncikakwaatakihtoom, kaawiin itahsh kaye kikii'oncipoonihcikehsiim. 4 Ayaa tahsh peshik kekoon e'ineniminakook: nihtam kaakii'ishisaaki'iyek kaawiin noonkom kitishisaaki'ihsiim. 5 Maamihkwentamohk itahsh imaa kaakii'oncipankihshinek, kaye pakitinamohk kimacihcikewiniwaan, miitahsh nihtam kaakiihtootamek miinawaa mii 'i ishihcikek. Kiishpin itahsh oncikwehkiihsiwek, piciinak kikaotihsininim, ninkapionciotaahpinaan imaa kaaishiahtek kiwaahsahkonencikanaahtikowaa. 6 Peshik itahsh kekoon kwayahk kitootaam: kishiinkentaam otishihcikewiniwaa iki Nihkaleyatanak (Nicolaitans) kaye niin tahsh kaaishishiinkentamaan. 7 Kiinawaa tahsh kaaonoontamaawiniyek, pisintawihk Kishemanitoo otAhcaahkwan kaainaanitc i'i otepwehtamoo' pepahkaan kaaishimaamaawaci'itinitc. Keshaakoocihtwaawaatc miiwak ikiweniwak ninkamiinaak ciamominewaatc imaa pimaatisiwini mihtikonk, Kishemanitoo okihtikewinink kaatashinihtaawikinitc." 8 "Ini tahsh miinawaa otencalimiwaan otepwehtamook Simirnaank (Smyrna) kaaishimaawaci'itiwaatc oshipii'amaw: 'Owe ihkito 'awe Nihtam Kaakii'ayaatc miinawaa Ishkwaac Keayaatc, a'awe kaakii'nipotc, miinawaa tahsh kaakiihkiiwepimaatisitc: 9 Kikihkenimininim e'ocaanimisiyek kaye wiinke ehkitimaakisiyek. Kiwenootisim itahsh. Kaye ninkihkentaan i'i eshimacikiishwaaninekwaa iki ninCoowimin kaaihkitowaatc, kaawiin itahsh tepwe Coowak tinowihsiiwak, Setan (Satan) itahsh omaawaci'itiwinink ishiwiicihtwaawak. 10 Keko kohtankek kaawii'ani-ishikotaki'ikooyek. Inashke aaninta kaatahshiyek kiwiihtashikoci'ikowaa maciaya'aa kipa'otiiwikamikonk ewii'ishiwepinikooyek. Kikatashikakwaataki'ikowaa mitaahsokiishik minihk. Ayaankwaamisik itahsh, impooshke piinihsh anioncinipoyek, kikamiinininim itahsh pimaatisiwin, mii 'iwe kitipa'amaakowiniwaa ekiihshaakoocihtwaayek. 11 Awenen kaaonoontamaawinitc maano okapisintawaan ini Kishemanitoo otAhcaahkwan i'iwe kaainaanitc otepwehtamoo' pepahkaan kaaishimaamaawaci'itinitc. Amii 'owe ehkitotc Ahcaahk: A'awe keshaakoocihtwaatc kaawiin okawaapantansiin i'i niishwaa nipowin, kaawiin kaye okawiihsakishkaakohsiin." 12 "Ini kaye otencalimiwaan otepwehtamook kaamaamawianami'aawaatc imaa Parkamamiink (Pergamum), o'owe oshipii'amaw: O'o ihkito a'a kaa-ayaatc kaaiitawikaahshaanik kihcimoohkomaan: 13 Kikihkenimininim kaaishiotayaawiniyek i'imaa kaaishiayaanik Setan (Satan) okihciapiwin. Keyaapi tahsh weweni kipiminisha'om, kaawiin kaye kikii'aanawencikehsiim ekiihtepwehtawiyek, impooshke mekwaa ehpimikakiishikaninik ekii'nihsintc nintipaacimoom Entihpahs (Antipas) kaakii'ayaankwaamisiihtamawitc, ekiihtashinihsintc i'imaa kaaishiayaanik Setanan otayaawinini. 14 Pankii tahsh ayaamakan kekoonan kaaminwentansiwaan kaaishihcikeyek. Aanint i'imaa kaa-ayaayek opiminisha'aanaawaa okihkino'amaakewinini ini Pelamoon (Balaam). Wiin okiihkihkino'amawaan ini Perahkwan (Barak) aaniin keoncipankihshimaanitc Isriyal (Israel) ininiwa'. 'Awehsh Perahk okiihkashki'aa' cimiicinitc i'iwe manitoohkaanink kaakiihpakitinikaakaaniwaninik, kaye citootaminitc pihshikwaatisiwin. 15 Miihsh peshikwan iko ayaawak i'imaa kaatahshiyek kaapiminisha'amowaac okihkino'amaakewinini ini Nihkaleyatana' (Nicolaitans). 16 Oncikwehkiik itahsh! Kiishpin kwehkiihsiwek, weyiipiko kikapiotihsininim, ninkamiikaanaak itahsh iki kaamacihcikewaatc, ninka-aapacihtoon ninkihcimoohkomaan nintoonink kaaoncihsek. 17 Kaaonoontamaawinitc maano okapisintawaan ini Kishemanitoo otAhcaahkwan kaainaanitc otepwehtamoo' pepahkaan kaaishimaamaawaci'itinitc. A'awehsh keshaakoocihtwaatc imaa ninkaoncimiinaa mahshi kaanaakosihsinik pahkweshikanan Mena (Manna) kaainimintc. Kaye ninkamiinaa waapishkiahsiniin, otooshkiwiinsowin kaaishioshipii'ikaatenik, ekaa awiya ehkihkentansik, piko ehta kemiinintc okakihkentaan." 18 "Mii 'owehsh kaye oshipii'amaw ini otencalimiwaan iki otepwehtamook imaa Tayahtaira (Thyatira) kaatashimaawacianami'aawaatc. O'o ishiwiintamaw: 'Owe kitikowaa Kishemanitoo oKosihsan, kaaishinaakwaninik oshkiinshikoon pisaaniko e'waahsitek ishkote, kaye ositan pisaaniko ekiihshooshkwaapihka'ikaatek osaawaapihk: 19 Ninkihkentaanan kitishihcikewiniwaan, mii 'iwe kaaishisaaki'iweyek kaye kaaishitepwehtamek kaye kaaishipami'iweyek kaye kaaishishashiipentamek. Amiitahsh noonkom ishkwaac kaaishihcikeyek nawac awahshime paahtiinatin ahpiihc wiin i'i nihtam kaakii'ishihcikeyek. 20 Ayaa tahsh i'iwe ekaa kaaminwentansiwaan kaaishihcikeyek, ehpakitinek 'awe ihkwe Cesapel (Jezebel) pisaan​iko e'ishihciketc waa'ishihciketc. Taapishkoo wiin tepwe ehkanootamawaatc Kishemanitoon inwaanitiso. Wiin itahsh okihkino'amaakewinink otishiwanihshimaa' iniweniwa' kaapami'imitc, citootaminitc pihshikwaatisiwin miinawaa cimiicinitc i'iweni kaapakitinamawimintc ini manitoohkaana'. 21 Nintaanakiihtawinamawaa 'awe ihkwe cikwehkiitc, cipoonihtootc omacihcikewin. Kaawiin itahsh inentansii cipoonihtootc opihshikwaatisiwin. 22 Miitahsh i'imaa ninka-ahpakinaa nipewinink a'a ihkwe i'i kaye kaakii'wiicipihshikwaatisiimikotc citashiwiihsakaahpinewaatc i'imaa. Mii 'iwe ketootamaan kiishpin oncikwehkiihsikwaa i'imaa kaatootamowaatc ekii'wiici'iwewaatc kaaishimaci-ishihciketc a'a ihkwe. 23 I'iwe tahsh kaanihshiwanaaci'iwemakahk ninkaishinihsimaa' okihkino'amawaakana' a'a ihkwe. Iki tahsh kahkina otepwehtamook kaaishimaamaawaci'itiwaatc ninkakihkenimikook niin e'waapantamaan kahkina awiya kaainentamowaatc kaye kaaishimihsawentamowaatc. Keishiwaapantamaan itahsh iko kaatahshiyek mii ko 'i keshitipa'amawinakook kaainahtek kitishihcikewiniwaa. 24 Kiinawaa tahsh kitishikanoonininim kaapahkaanisiyek i'imaa kaa-ayaayek Tayahtaira. Kaawiin kikii'otaahpinansiim i'iwe macikihkino'amaakewin. Kaawiin kikiihpikihkentansiim otishihcikewinan Setan (Satan) kaaishpaanikin wiinawaa kaaitamowaatc. Miitahsh 'owe eninakook: Kaawiin miinawaa kekoon kimiinihsinooninim cipimiwitooyek. 25 I'iwe kaa-ayaayek mii piko 'iwe minciminamohk piinihsh miinawaa cipitakohshinaan. 26 - 27 A'awe tahsh keshaakoocihtwaatc kaye kaakanawentank misiwe nintishihcikewinan, miitahsh 'awe ninkamiinaa cionaahkoniwetc taapishkoo ninTete kaakii'ishimiishitc keniin. Mii 'iwe keinaahkonaatc kaatahsopepahkaanisinitc pemaatisinitc, okashionaahkonaa' piiwaapihkopakamaakan ehtahkonank. Kaye taapishkoo waapikaninaakan kaaishipikishkiwepa'ikaatek, okaishipiihsiwepa'waa'. 28 Kayehsh waapaniwanankohshan ninkamiinaa. 29 Kiinawaa tahsh kaaonoontamaawiniyek, pisintawihk Kishemanitoo otAhcaahkwan i'iwe kaainaanitc i'i otepwehtamoo' pepahkaan kaaishimaamaawaci'itinitc."

Okihkentamooshiwewin 3

1 "Ini otencaliman otepwehtamook kaatashimaamawianami'aawaatc i'imaa Saartihs (Sardis), 'owe oshipii'amaw: O'owe ihkito a'a kaa-ayaawaatc niishwaahso (7) Kishemanitoon otAhcaahkoni kaye i'i niishwaahso wanankohsha': Ninkihkentaan eshihcikeyek. Aanawiin ehpimaatisiyek e'inakinsoyek, kinipom itahsh. 2 Koshkosik, mashkawisiihtook keyaapi kaa-ayaayek kekaa kaanipoomakahkin. Kaawiin nintooncimihkansiin cikiishihtooyek kaakii'ineniminek ninKishemanitoom; otishiwaapantaan itahsh ehkiishihtaawaahsiwek. 3 Maamihkawik i'iwe kaakii'ishimiinikooyek kaye kaakii'ishinoontamek. Mii 'iwe kihciwinamohk, kaye pakitinamohk i'iwe kaaishimacitootamek. Kiishpin itahsh ekaa koshkosihsiwek, taapishkoo okimootishk kaaishikoshkowishiwetc takohshink mii 'iwe keinentaakosiyaan: kaawiin kikakihkentansiim ahpii mayaa kepiotihsinakook. 4 Pankii piko kitahshim imaa Saartihsink kaa-ayaayek mooshak ehpehkihtooyek kikikishkikaniwaan. Kiinawaa ko kikawaapishkihkonayem ciwiicipimohsemiyek, aaniihsh kiteahpiihtentaakosim. 5 Awenen iko kepahkinaaketc mii 'iwe keishihkonayetc: tawaapishkaaniwan okikishkikanan. Kaawiin kaye ninkakaahsi'amawaahsiin imaa masina'ikanink kaaoshipii'ikaasowaatc oko tepwe kaapimaatisiwaatc. Miiwak itahsh oko kewaawiinakwaa ehtipenimakwaa, i'imaa enaahsamiinitc ninTeten, i'i kaye kaaishiayaanitc ninTeten otencalimini ninkawaawiinaak. 6 A'awe tahsh kaaonoontamaawinitc maano okapisintawaan Kishemanitoon otAhcaahkoni kaainaanitc i'i otepwehtamoo' pepahkaan kaaishimaamaawaci'itinitc." 7 "Kaye ini otencalimiwaan otepwehtamook i'imaa Pilatelhpiyaank (Philadelphia) kaatashimaawaci'itiwaatc, owe ishipii'amaw: O'o kitikowaa 'awe misiwe kaakwayahkwaatisitc kaye kaatepwewiniwitc, a'a kaa-ayaatc aapaapihka'ikan Tepit (David) kaakii'ayaahpan. Wa'a tahsh inini ahpii paahkinank ishkwaantem, kaawiin miinawaa awiya okakashkihtoohsiin cikipa'ank, kaye ahpii kipa'ank kaawiin miinawaa awiya okakashkihtoohsiin cipaahkinank. 8 Wiin ihkito: Ninkihkentaan eshihcikeyek. Aanawiin pankii e'mashkawisiiyek, miinooc kikiihkanawentaam kaakii'ihkitoyaan. Kaawiin kaye kikii'aanawenimihsiim cipoonipiminisha'oyek. Nashke kikiihpaahkintenamawininim miinawaa awiya kekipa'ansik. 9 Inashke mii 'owe ketootawakwaa ikiweniwak kaawiici'iwewaatc i'imaa Setan (Satan) omaawaci'iwewinink. Miiwak​iki okiiwanimook, Coowak (Jews) nintinowimin kaaihkitowaatc, kaawiin tepwe tinowihsiiwak. Nashke ninkaishi'aak cipiociciinkwanapiwaatc imaa eshisitekaapawiyek. Okakihkentaanaawaa tahsh ehsaaki'inakook. 10 Kikiihkanawentaam kaakii'ininakook cishashiipentamek. Kaye niin kikakanawenimininim ahpii pakamishkaamakahk kakweci'iwewin, amiitahsh o'o kekakweci'ikowaatc omaa ahkiink kahkina kaaotaawiniwaatc. 11 Weyiip ninkapiishaa. Minciminamohk itahsh i'iwe kaa-ayaayek, ekaa awiya cimahkamihsinowek kitipa'amaakoowiniwaa kaawii'miinikooyek pahkinaakeyek. 12 A'awe tahsh kepahkinaaketc ninkaishi'aa peshik citinowitc ini kaashipatahkitekin kaa-aahswaahkwa'ikaakaaniwankin i'imaa okihcianami'ewikamikonk ninKishemanitoom. Kaawiin miinawaa wiihkaa tasaaka'ansii. Miitahsh o'o keishipii'wak: ninkaoshipii'amowaan owiinsowinini ninKishemanitooman, i'iwehsh kaye ninKishemanitooman otootenaamini kaaishinihkaatenik, mii 'iwe Oshki Ceroosalam (Jerusalem), i'imaa kihcikiishikonk kepioncinaashishkaanik, i'imaa ninKishemanitoomink kepionciinik. Nintooshkiwiinsowin kaye ninkaoshipii'amowaan opimaatisiwinink a'a kepahkinaaketc. 13 A'a kaaonoontamaawinitc maano okapisintawaan ini Kishemanitoon otAhcaahkoni i'i kaainaanitc otepwehtamoo' pepahkaan kaaishimaamaawaci'itinitc." 14 "Ini otencalimiwaan otepwehtamook kaamaamawianami'aawaatc Leyaatihsiiya (Laodicea) ootenaank, o'owe ishipii'amaw: O'o kitikowaa a'a Emen (Amen) kaaishinihkaasotc, kaa-ayaankwaamisitc kaye kaatepwetc Otipaacimo. Mii 'awe kaakii'oncimaacihsininik minihk kekoon Kishemanitoo kaakii'oshihtootc. 15 O'owe ihkito: Ninkihkentaan kaakiihpimi-ishihcikeyek. Miihsh 'iwe kitinenimininim i'i miicim ekaa e'minohpokwahsinok ekaa ehtekishitehsinok ekaahsh kaye ehtetahkaahsinok. Ampehsh kanake peshik o'o ishiayaayek kaakishitek kemaa kaye kaatahkaak kekoon. 16 Nimaashihpitaan itahsh i'i kaainentaakosiyek ekaa ehkishitehsinok kitishiayaawiniwaa kaye ekaa wawiinke ehtahkaahsinok, kikakitanewepamininim itahsh. 17 Aaniihsh mii 'iwe ehkitoyek: 'Niwenootisimin, ninkii'animaawacihcikemin, kaawiin kaye kekoon ninoontehsehsiimin.' Kaawiin itahsh kikihkentansiim eshiayaayek, ehkakwaatakipimaatisiyek kaye ehkoohpaasinaakosiyek. Kikitimaakisim itahsh, kiwaahsaahkonawem kaye, kaawiin kaye kiwaapihsiim. 18 O'owe tahsh kitishikihkino'amawininim keshihcikeyek: niin ataamihshik osaawishooniyaa kaakiihpehkaapihkaahkisotc ciwenootisiyek itahsh. Kaye ataamihshik waapishki kikishkikanan cikikishkikeyek, aakwanawahpisok iwe kaaishiwaahsaahkonaweyek ekaa ciakasinaakosihsiwek. Ataamihshik kaye poonsinikan cipoonsinamek kishkiinshikowaan ciwaapantamaayek. 19 Niin itahsh minihk hsa ko kaasaaki'akwaa nimaamiinokihkino'amawaak, nimpahshanshe'waak kaye. Ayaankwaamisik, pakitinamohk itahsh kaaishimacitootamek. 20 Inashke pisintamohk! Niniipaw akwaciink i'imaa ishkwaantenk, nimpaahpaawa'ike. Awiya tahsh noontawitc ehkiikitoyaan, paahkintenamawitc, ninkapiintikawaa tahsh, ninkawiiciwiihsiniimik, kaye wiin tahsh ninkawiiciwiihsiniimaa. 21 A'awe keshaakoocihtwaatc ninkashimiinaa ciwiitapimitc ninkihciapiwinink taapishkoo niinihtam kaakii'ishishaakoocihtwaayaan kaye noonkom e'wiitapimak ninTete okihciapiwinink. 22 A'a kaaonoontamaawinitc okapisintawaan Kishemanitoon otAhcaahkoni ini kaainaanitc otepwehtamoo' pepahkaan kaaishimaamaawaci'itinitc."

Okihkentamooshiwewin 4

1 Ishkwaahsekin ini kaakiihpiwaapantamaan, miitahsh miinawaa kekoon niwaapantaan. Ayaa 'iweti ehpaahkihsink ishkwaantem kihcikiishikonk. 'Iweti nihtam kaakii'noontawak kihcipootaacikanink kaakii'inwetc kaakiihkanooshitc, miinawaa kii'ihkito: "Piishaan o'omaa ishpimink, miihsh iwe kiwii'waapanta'in ini kekoonan kehcinaac iko ciani-ishiwepahkipan," nintik. 2 Shemaak itahsh ninkii'wiici-inentamoshkaakowaan Kishemanitoo otAhcaahkwan. Niwaapantaan e'onahtek kihcikiishikonk kihciapiwin, kaye awiya niwaapamaa e'namatapitc i'imaa, 3 e'waahsiinkwesotc; taapishkoo kaaishinaakosiwaatc oko tino niishin ahsiniik kaa-ahpiihcionishihshiwaatc, caaspar (jasper) eshioshaawashkwaapihkisitc, kaarniiliyan (carnelian) kaye eshimiskwaapihkisitc, mii 'i eshinaakositc e'waahsiinkwesotc. Kiisihsweyaap kaye i'imaa kii'ayaa waahkaaya'ii kihciapiwinink, taapishkoo e'inaahsahkonek kaaishinaakositc a'a emaralt (emerald) ahsin, shinkopiink eshishaapwaahtenaakositc. 4 Imaahsh kaashiahtek kihciapiwin kii'waahkaahtewan kihciapiwinan niishtanahshiniiwin (24) ehtahsinkin. Niishtanahshiniiwin itahsh i'imaa oniikaanisiik kii'namatapiwak ekii'waapishkaanikin okikishkikaniwaan kaye ekii'osaawishooniyaawiwaninikin ini otookimaawaanohkwaaniwaan kaakikishkamowaatc ohtikwaaniwaank. 5 Imaa tahsh kihciapiwinink kii'onciwaawaahtehse kaye kii'oncimatwewehtaakwan inihtaakosiwin kaye ehpinehsiiwank kaainihtaakwahk. Niishwaahso (7) tahsh imaa waahsahkonencikanan kiihtanahkonewan oncishkaw inahke kihciapiwinink. Amiiwa' ini kaaniishwaahcinitc otAhcaahkwa' Kishemanitoo. 6 Kaye e'inaahsamahtek kihciapiwin mii 'imaa kaa-ayaak saaka'ikaniink kaaishinaakwahk, taapishkoo waahsehcikanaapihk ehtinowank, taapishkoo mihkwamiink kaaishishaaponaakositc miihsh eshinaakwahk kaa-ahtek. Kaye mekwaya'ii kaye waahkaaya'ii kihciapiwinink niiwin awiyak opimaatisiik kii'ayaawak, misiwe e'oshkiinshikowaatc, niikaanaya'ii kaye otaanaank kii'oshkiinshikowak. 7 Awe tahsh nihtam opimaatisii taapishkoo mihshipishiw ishinaakosi. Awe tahsh kotak taapishkoo naapepishihki. Shikwa miinawaa 'a kotak kii'inatenkwe ininiink. Miinawaahsh a'a kotak mikisi ehpimihsetc ishinaakosi. 8 Mii entahshiwaatc opimaatisiik kaaniiwiwaatc ninkotwahcininiwan oninkwiikaniwaan. Misiwehsh oshkiinshikowak waahkaaya'ii kaye piincaya'ii. Kaawiin wiihkaa aahtenikamohsiiwak, ehkiishikaninik nikamowak kaye ehtipihkaninik, o'owe e'ina'amowaatc: "Wawiinke kwayahkwaatisi! Wawiinke kwayahkwaatisi! Wawiinke kwayahkwaatisi kaaTipenciketc Kishemanitoo wawiinke kaaMashkawaatisitc! aweti kaakii'ayaatc, omaahsh noonkom kaa-ayaatc, miinawaahsh cipiayaatc!" ina'amook. 9 Otipaacimaawaan eshi ahpiihci onishihshiwencikaniwinitc, kaye okihtakimaawaan kaye onanaahkomaawaan ini kihciapiwinink kaanamatapinitc ahpane pishihshik kaapimaatisinitc. 10 Ahpii hkwa eshihcikewaatc opimaatisiik, kaye wiinawaa kaaniishtanahshiniiwiwaatc (24) oniikaanisiik otoociciinkwanapiihtawaawaan ini kihciapiwinink kaanamatapinitc ahpane pishihshik kaapimaatisinitc, kaye otahpakitoonaawaan okihciokimaawaanohkwaaniwaan i'imaa enaahsamahtek i'i kihciapiwin e'ishpenimaawaatc. Mii 'owe ehkitowaatc: 11 "Kiin kaaTipenimiyaank ninKishemanitoominaan! Kiin kitepakentaakos ciwiincikaatek ciahpiihci onishihshiwencikaniwiyan, kaye ciahpiihci ishpenimikooyan, kaye ciahpiihci kihcimashkawentaakosiyan, aaniihsh kahkina kekoon kikii'oshihtoon. Kiin iko ekii'inentaman kii'onciayaawan kaye kii'oshihcikaatewan," amii 'iwe otinaawaan.

Okihkentamooshiwewin 5

1 Keyaapi 'imaa niwaapamaa a'awe kihciapiwinink kaanamatapitc okihcinihkink e'ahtenik titipiikinikani masina'ikan, anaamink kaye wakicaya'ii e'oshipii'ikaatenik, kaye ehkipishkiwahsikaatek niishwaahcink (7). 2 Niwaapamaa tahsh kaye e'mashkawentaakositc encal ehkishiiwetc e'ihkitotc: "Awenen keteinentaakositc cipapaahkwacipitootc ini kipishkiwahsikanan? Awenehsh kepaahkiikinank 'iwe masina'ikan?" 3 Kaawiin itahsh awiya kiimihkikaniwihsii kihcikiishikonk kaye ahkiink kaye anaamahkamik kekashkihtootc cipaahkiikinank 'iwe masina'ikan kaye cikanawaapantank. 4 Miitahsh ninkiihkihcimaw ekaa ekii'mihkawaahsiwintc ehteinentaakositc cipaahkiikinank i'i titipiikinikanimasina'ikan kaye ciwaapantank. 5 Peshik itahsh awe kaaniikaanentaakositc ninkiihkanoonik: "Keko mawihken. Ina 'aweti mihshipishiw, wiin a'awe i'imaa kaakii'onciitc opeshikwewaanakisiwinink Coota (Judah), kaye Tepitink (David) ekii'ontahkaanesitc, wiin e'aawitc a'a kaashaakoocihtwaatc, wiin okashkihtoon ehpapaahkwacipitootc kipishkiwahsikanan kaye ehpaahkiikinank i'i titipiikinikani masina'ikan," kii'ihkito. 6 Miitahsh i'imaa ninkii'waapamaa Maanahcaanihshenhs e'niipawitc mekweya'ii kihciapiwinink, e'waahkaakaapawiihtaakotc i'i niiwin (4) opimaatisii' kaye i'iweniwa' kaaniishtanahshiniiwinitc (24) oniikaanisii'. Pisaan​iko ekii'nihcikaniwikopanen kii'ishinihsitawinaakosi a'a Maanahcaanihshenhs. Kii'niishwaahciwa' (7) oteshkana', kii'niishwaahcininiwan (7) kaye oshkiinshikoon. Ono tahsh kaaniishwaahcininikin oshkiinshikoon mii 'i kaaicikaasonitc Kishemanitoo kaaniishwaahcinitc (7) otAhcaahkwa' misiwe ahkiink kaaishinisha'omintc. 7 Kii'ishaa tahsh a'a Maanahcaanihshenhs ekii'otaahpinamawaatc i'i titipiikinikan i'imaa okihcinihkiniink kaa-ahtenik ini kaanamatapinitc kihciapiwinink. 8 Ahpiihsh ekii'otaahpinank a'a Maanahcaanihshenhs, okii'ociciinkwaniihtaakoo' i'i niiwin (4) opimaatisii', i'i kaye niishtanahshiniiwin (24) oniikaanisii'. Oniikaanisiik itahsh okii'ayaawaawaa' pehpeshik matweyaapiikipicikana'. Okii'ayaanaawaan itahsh kaye kaaosaawishooniyaa​waapihkaninikin onaakanan eshimooshkinenik i'iwe kaaminomaahsikaatenik. Mii 'oweni otanami'aawinini Kishemanitoo opimaatisiima'. 9 Kii'nikamowak itahsh oshkinikamon o'owe e'ina'amowaatc: "Kiin kiteahpiihtentaakos ciotaahpinaman i'i titipiikinikan, kaye cipapaahkwacipitooyan ini kipishkiwahsikanan. Aaniihsh kikii'nihsikoo, kimiskwiim itahsh kikiihtipa'ikehtamawaak, i'imaa misiwe kaaonciiwaatc, Kishemanitoon citipenimikowaatc. Kahkina pepahkaan tahswewaanakisiwinink onciiwak, kahkina kaye pepahkaanikiishwewinink, kahkina kaye eshiwaawiintekin onciiwinink, kahkina kaye pepahkaanwewaanakinaakosiwinink. 10 Miiwak itahsh iki kaakii'ishi'atwaa citinowiwaatc ketipenimiwewaatc citashianami'ewikimaawiwaatc cianohkiihtawaawaatc kiKishemanitoominaanan. Kaye tahsh omaa wakitahkamik tatipencikewak," kii'ina'amook. 11 Miinawaahsh ninkii'inaap, ninkii'noontawaak itahsh encalak e'onsaamwewitamowaatc, maawac ehpaahtiinowaatc, kaawiin wiihkaa taatepakimaahsiiwak entahshiwaatc. Miihsh i'imaa kii'waahkaakaapawiwak oko kaaonsaamiinowaatc encalak i'imaa kihciapiwinink kaa-ahtek kaye iki niiwin opimaatisiik kaye iki niishtanahshiniiwin (24) oniikaanisiik kaaishiayaawaatc. 12 Kiihkihci-inwewak encalak e'ihkitowaatc: "Wiinke misiwe tepakentaakosi a'a Maanahcaanihshenhs kaakii'nihsintc: Tamiinaa wenootisiwin, kakiihtaawentaakosiwin, mashkawentaakosiwin kaye. Takihci-inenimaa, ta-ahpiihcionishihshiwencikaniwi, kaye tananaahkomaa." 13 Kaye kahkina awiya kaakii'oshi'intc imaa kihcikiishikonk, imaahsh kaye ahkiink, kaye anaamahkamik kaye kihcikamiink kaa-ayaawaatc, kaye kahkina kekoon misiwehkamik kaapimaatahkin, kahkina ninkii'noontawaak e'nikamowaatc: "A'awe kaanamatapitc okihciapiwinink a'a kaye Maanahcaanihshenhs tananaahkomaawak kaye takihtakimaawak, kaye ta-ahpiihcionishihshiwencikaniwiwak, tainakimaawak misiwe e'mashkawentaakosiwaatc, mooshak iko ahpane pishihshik," kii'ina'amook. 14 Ikiweniwak itahsh niiwin (4) opimaatisiik kaye wiinawaa kii'ihkitowak: "Emen." Iki kaye oniikaanisiik kii'ishiociciinkwanipani'owak ehkihci-inenimaawaatc.

Okihkentamooshiwewin 6

1 Miitahsh i'i ahpii ninkii'waapamaa 'awe Maanahcaanihshenhs peshik ehpahkwacipitootc i'i kipishkiwahsikan. Ninkii'noontawaa tahsh ehkakitotc peshik iki kaaniiwiwaatc opimaatisiik. Taapishkoo kihcipinehsiiwank kii'inwe: "Piishaan!" e'ihkitotc. 2 Ninkii'inaap itahsh, e'waapamak e'waapishkisitc mihtatim, ehpitehsapitc awiya mihtikwaapiin ehtahkonaatc. Kii'miinaa tahsh i'i shaakooci'iwewi aanohkwaan. Miitahsh pisaaniko kaanihtaashaakooci'iwetc kii'ishinaakosi, ekii'ani-ishitehsapitc keyaapi ewii'anishaakoocihtwaatc. 3 Miinawaa tahsh kotak kipishkiwahsikan okiihpahkwacipitoon a'a Maanahcaanihshenhs. Miinawaa peshik ninkii'noontawaa opimaatisi, "Piishaan!" e'ihkitotc. 4 Miitahsh miinawaa peshik kiihpioncisaakeweshkaa mihtatim e'miskositc. A'awe kaatehsapitc kii'miinaa cimaaciitootc cimacimiikaatinaaniwaninik i'imaa ahkiink, mii 'i cinihsitinaaniwank. Shikwa kii'miinaa 'i kaamihcaapihkaninik kihcimoohkomaan. 5 Miinawaa tahsh kotak okiihpahkwacipitoon kipishkiwahsikan a'a Maanahcaanihshenhs, mii 'iwe nihsink (3). Miinawaahsh peshik ninkii'noontawaa opimaatisi, "Piishaan!" e'ihkitotc. Ninkii'inaap itahsh, ina 'aweti kaamahkatewisitc mihtatim. A'awe tahsh kaatehsapitc otahkonaan tipaapishkoocikan. 6 Ninkii'noontaan itahsh taapishkoo inihtaakosiwin e'inwemakahk. Mekweya'ii 'imaa kiihtanihtaakwan iki niiwin (4) opimaatisiik kaa-ayaawaatc, mii 'owe e'inwemakahk: "Peshikokiishik ehkashki'aatc awiya shooniyaan, peshikokwaapa'ikan ehta ta-ataawe pahkweshikanikihtikaanenhsan cimiicitc, shikwa nihso (3) kwaapa'ikan parlii (barley) manoomin ehta ta-ataawe peshikokiishik ehkashki'aatc shooniyaan. Keko tahsh wiin nihshiwanaaci'aahken aalip (olive) kaatinowiwaatc kihtikaanaahtikook, kaye ini shoominikihtikewinan kaawiin tanihshiwanaatahsinoonan," kii'inwemakan. 7 Miitahsh miinawaa kotak okiihpahkwacipitoon a'a Maanahcaanihshenhs kipishkiwahsikan, mii 'i niiwink. Miinawaa tahsh ninkii'noontawaa a'a ehkoniiwitc (4) opimaatisi, "Piishaan!" e'ihkitotc. 8 Ninkii'inaap itahsh, ina 'aweti e'waapamak e'waapinawinaakositc mihtatim. Nipowin kii'ishinihkaaso a'a kaatehsapitc. Ini tahsh Hetiis (Hades) kaaishiwiinsonitc otaanaank opiwiiciiwikoon ehpimitehsapinitc. Oko tahsh niishin kii'miinaawak citashinihsaawaatc i'iweniwa' peshik kaatahsoniiwinitc (1/4) awiya' 'imaa ahkiink kaa-ayaanitc. Oka-aapacihtoonaawaa miikaatiwin, mantawiiwin, ocaanimaahpinewin, kaye kaamacaatisinitc aya'aawihsha'. 9 Miitahsh miinawaa kotak kipishkiwahsikan okiihpahkwacipitoon a'a Maanahcaanihshenhs, amii 'iwe aasha naanan. Shikwa ninkii'waapamaak ahcaahkwak shiipaaya'ii pakitinaahsowinaapihkonk e'ayaawaatc. Miiwa'​i'i otahcaahkowaa' kaakii'oncinihsintwaa otihkitowinini Kishemanitoon kaye otipaacimowiniwaa nehpic iko kaakii'wiintamaakewaatc. 10 Kiihkihci-inihtaakosiwak itahsh o'owe: "Kiin Tepencikeyan, kiin maawac kaamashkawentaakosiyan, misiwe kaakwayahkwaatisiyan kaye ehkwayahkwentaakosiyan! Aaniin minihk keni-ishihsek ahpii ketipaahkonatwaa iki ahkiink kaakii'nihshiyamintwaa?" 11 Kahkina tahsh pehpeshik kii'miinaawak waapishki kikishkikanan cikinwaapiika'ashewaatc. Kii'inaawak itahsh nahkawe acina keyaapi cianwepiwaatc, piinihsh itahsh cianitipihsenitc kaatahshinitc owiicianohkiimaakaniwaa' kaye owiiciotepwehtamoomiwaa' keninihsimintc, wiinawaa ko kaakii'ishinihsintwaa kaye iniweniwa' cinihsimintc, mii 'iwe cikiishakincikaasowaatc iki kenihsintwaa. 12 Miinawaa ninkii'waapamaa kotak kipishkiwahsikan ekiihpahkwacipitootc a'a Maanahcaanihshenhs, mii aasha ninkotwaahso. Miihsh i'i kiihkihcinininkihse ahki. Kiisihs itahsh taapishkoo e'mahkatewaak ahsapiiwekinwewash kii'ishimahkatewisi. Shikwa misiwe kii'miskonaakosi tipihkikiisihs taapishkoo miskwiink. 13 Wanankohshak itahsh kii'oncipankihshinook kiishikonk, taapishkoo ehkihcipankihshinowaatc ekaa e'atihsohsikwaa pik (fig) kaatinowiwaatc kihcishoominak e'wawaahkawaahkwaahshitc a'a kihtikaanaahtik. 14 Kiishik itahsh kii'maacaamakan taapishkoo 'i titipeyiikinikan e'anititipeyiikinikaatek, piinihsh ekii'naakwahsinok. Amiihsh ini kahkina waciwan kaye minihsan kii'aanciayaawan i'imaa kaakii'ayaakin. 15 Mii ahpii kihciokimaak ahkiink, ikiweniwak kaye kaaokimaawentaakosiwaatc kaye kihcishimaakanihshiiwikimaak kaye kaawenootisiwaatc kaye kaamashkawentaakosiwaatc kaye kahkina kotak pemaatisiwaatc, kemaa tipenimaakanak kemaa kaye kaatipenintisowaatc, kahkina kiihkaasowak, 'imaa kaaishiwaawiimpahkamikaak kaye anaamahsin kaaishipapiihkwatinaak kii'ishikaasowak. 16 Oshaakowaataanaawaan itahsh ini waciwan kaye ahsinii': "Aakawishkawihshinaam, kaashihshinaam ekaa ciwaapamihsiyamintc a'awe kihciokimaawapiwinink kaanamatapitc, ekaa kaye cipatakoshkaakohsiwank onishkaatisiwin a'awe Maanahcaanihshenhs. 17 Aasha ocihcihseni 'iwe ehkiishikaninik kaawiihkohtaanentaakwahk, ewii'naakwaninik onishkaatisiwiniwaa. Kaawiin awiya okakashkihtoohsiin i'imaa cishaapwiihpan."

Okihkentamooshiwewin 7

1 Kaa'ishkwaahsekin ono, ninkii'waapamaak niiwin (4) encalak niiwayak (4) ehko​kiihkihkamikaanik e'niipawiwaatc. Pehpeshik okiihkihciwinaanaawaa i'iwe e'ontaanimaninik, ekaa cinootinsinok ahkiink kaye kihcikamiink, ekaa kaye cipakaminoowehsinok imaa mihtikonk. 2 Miinawaa kotak peshik ninkii'waapamaa encal ehpiompishkaatc waapanonk ehpikikisitc i'i keishikihkinawaaci'aatc i'iweniwa' kaapimaatisinitc Kishemanitoon kaatipenimaanitc. Kiihkihcinoontaakosi wa'a encal ehshaakowaanaatc niiwin (4) kotak encala' kaakii'miinintwaa kaawii'maashitootamowaatc i'i ahki kaye kihcikam. 3 Amii 'owe kaa'inaatc: "Keko kekoon tootankek i'i ahki kaye kihcikam kaye iki mihtikook, paanimaa ehta kiKishemanitoominaan otanohkii'aakana' kiikihkinawaacipii'wankitwaa oskahtikoniink, cikihkentaakosiwaatc ehtinowiwaatc." 4 Ninkii'noontaan itahsh ehtahshiwaatc iki kaakii'ishikihkinawaacipii'ontwaa oskahtikowaank: ninkotwaahk niimitanahshiniiwink mitaahswaahk (144,000) mii 'iwe kaatahshiwaatc kaakiih kihkinawaacipii'ontwaa, i'imaa ekii'onciiwaatc mitaahshiniishin (12) kaatahswewaanakisiwaatc Isriyalak (Israel). 5 - 8 Mitaahshiniishink mitaahswaahk (12,000) kiihtahshiwak kaakiih kihkinawaacipii'ontwaa 'imaa kaakii'onciiwaatc entahso pehpeshikwewaanakisiwaatc. Miiwan​ono owiinsowiniwaan kaaontahkaanesiwaatc: Coota (Judah), Oroopan (Reuben), Ket (Gad), Aahshar (Asher), Naapihtalaai (Naphtali), Manaahsa (Manasseh), Simiyan (Simeon), Liipaai (Levi), Ihsahkaar (Issachar), Sepiyolan (Zebulon), Coosap (Joseph), Penciman (Benjamin). 9 Miinawaa tahsh kaa'ani-ishihsek, ninkii'inaap, inashke ninkii'waapamaak e'onsaamiinowaatc ekaa awiya cikiihkiishakimaahsik. I'imaa kii'onciiwak kahkina kaatahsopepahkaan ishinaakosiwaatc kaye kahkina pepahkaanonk kaaontahkaanesiwaatc kaye kahkina eshiwaawiintekin kaaonciiwaatc, kaye entahsopepahkaanikiishwewaatc. Mii 'imaa kii'inaahsamikaapawiwak kihciapiwinink, i'imaa kaye eshiayaanitc ini Maanahcaanihshenhsan. Waapishkiikinonk kiihkakaanwaapiika'ashewak kaye okiihtahkonaanaawaan watihkwanan e'aniipiihshiwaninikin paam (palm) ehtinowaahtikowankin. 10 Kiihkihcishaakowewak itahsh: "Pimaaci'iwewin onciimakan kiKishemanitoominaank, a'awe kaanamatapitc kihciapiwinink, a'awe kaye Maanahcaanihshenhs!" ihkitowak. 11 Kahkina tahsh iki encalak okii'waahkaakaapawiihtaanaawaa i'i kihciapiwin, kaye waahkaaya'ii 'imaa ekii'ayaanitc i'i kaaniikaanentaakosinitc kaye opimaatisii' e'niiwinitc. Kii'animihkopani'owak iki encalak ekii'ociciinkwanapipani'owaatc oncishkawaya'ii 'imaa kihciapiwinink ehkihci-inenimaawaatc Kishemanitoon, 12 ekii'ihkitowaatc itahsh: "Emen! Tananaahkomaa Kishemanitoo, ta-ahpiihcionishihshiwencikaniwi, ta-ahpiihcikakiihtaawencikaniwi, tamiikwehciwentaakosi! Takihtakimaa Kishemanitoo! Kashki'ewisiwin, mashkawentaakosiwin tainakimaa kiKishemanitoominaan mooshak ahpan iko pishihshik! Emen!" kii'ihkitowak. 13 Peshik itahsh a'a kaaniikaanisitc ninkiihkakwecimik e'ishitc: "Oko kaawaapishki kakaanwaapiika'ashewaatc, awenenak oko? Aaniinti tahsh wenciiwaatc?" ninkii'ik. 14 Miihsh i'i enak: " Nintookimaam, kiin kikihkenimaak." Miinawaahsh ninkii'ik: "Miiwak ikiweniwak kihciocaanimisiwinink wencishaapwiiwaatc. Okiihkisiihsipatoonaawaan okikishkikaniwaan, okii'onciwaapishkaapaawatoonaawaan i'imaa omiskwiiminiink ini Maanahcaanihshenhsan. 15 Miihsh i'iwe keonciayaawaatc i'imaa oncishkawaya'ii okihciapiwininiink Kishemanitoon. Oka-anohkiihtawaawaan itahsh ehkiishikaninik kaye ehtipihkaninik okihcianami'ewikamikoniink. A'awe tahsh kaanamatapitc kihciapiwinink okawiiciayaamaa' cikanawenimaatc. 16 Kaawiin miinawaa wiihkaa tanoontemantawiihsiiwak, kaawiin kaye tanoontewii'minihkwehsiiwak. Kaawiin kaye wiihkaa okaonsaamaahkisokohsiiwaan kiisihsoon, kaye ehkihcikishitenik kaawiin okatootaakohsiinaawaa. 17 A'a aaniihsh Maanahcaanihshenhs mii 'awe 'imaa mekweya'ii kihciapiwinink kaa-ayaatc, okanawimaanahcaanihshiwe okainaankomikoo'. Miitahsh okaishikihkinowinaa' i'imaa kaaishimoohkiciwankin ehpimaatisiishkaakemakahk i'i nipi. Kishemanitoo kaye okakisii'amawaa' kahkina otooncikawaapiwinini oshkiinshikoniink."

Okihkentamooshiwewin 8

1 Miinawaa kaapahkwacipitootc kotak kipishkiwahsikan a'a Maanahcaanihshenhs, mii 'iwe niishwaahso (7) kaakiihpaahkwacipitootc, mii 'i ahpii kaawiin kekoon kii'nawiintaatiimakahsinoon kiishikonk aapihta tipa'ikan minihk. 2 Miihsh ninkii'waapamaak ikiweniwak kaaniishwaahciwaatc encalak miiwak​iki kaanihtaa inaahsamikaapawiihtawaawaatc Kishemanitoon. Kii'miinaawak niishwaahso pootaacikanan. 3 Miinawaa tahsh kotak encal okiihpitahkonaan minaahsikanaapihk e'osaawishooniyaawaninik, ehpiantaniipawitc i'imaa pakitinaahsowinaapihkonk. Niipiwa' kii'miinaa minominaahsikan cikikitahkonank cianikikiayaanik i'imaa otanami'aawininiink kahkina Kishemanitoo okwayahkwaatisiima', mii 'imaa cikikipakitinank cicaakisank iwe minomaahsikan, i'iwe osaawishooniyaawi pakitinaahsowinaapihkonk kaa-ayaanik i'imaa inaahsamaya'ii 'i kihciapiwinink. 4 Miitahsh e'ishpaapahtenik i'iwe minomaahsikan, kii'anitakokikiompishkaani otanami'aawinini Kishemanitoo okwayahkwaatisiima'. Mii 'imaa oninciink a'a encal kii'anionci-ishpishkaaniwan i'imaa enaahsamiayaatc a'a Kishemanitoo. 5 Miitahsh a'a encal kaaishiotaahpinank minomaahsikanaapihk, okii'mooshkinahtoon itahsh i'iwe kaaishkotewaninik pakitinaahsowinaapihkonk kaa'ontinank. Miihsh i'imaa ahkiink kaakii'ishiwepinank. Miitahsh ahpii kii'noontaakwan ehpitihkowek kaye e'noontaakosiwaatc pinehsiwak kaye kii'waawaahtehse kaye kii'waawaahkawihse 'i ahki. 6 Iki tahsh kaaniishwaahciwaatc encalak kaa-ayaawaatc ini niishwaahso (7) pootaacikanan kii'oshikaapawi'itisowak ewii'ahshonoontaakohtoowaatc. 7 Miihsh iwe nihtam a'a encal okii'noontaakohtoon opootaacikan. Imaa tahsh ahkiink kii'ahpakicikaate 'i sehsekan kaye ishkote kaye miskwi ekii'maamawikinikawihsekin. Kekaa aapihta kiihcaakisikaate ahki, kaye kekaa aapihta piko mihtikook kiihcaakaahkisowak, kaye kahkina kiihcaakaahkite kaaoshaawashkwashkohsiwakaak. 8 Miitahsh awe kotak encal okii'noontaakohtoon opootaacikan, amii niishin (2) e'noontaakohtoowaatc. Taapishkoo kekoon kaaishinaakwahk kihciwaciw ehkihci-ishkotewank i'imaa kii'ahpakicikaate kihcikamiink. Miitahsh 'i kihcikam miskwiink kaa'ishi-inaakamihsek. 9 Miihsh kekaa aapihta iki kihcikamiink kaapimaatisiwaatc Kishemanitoon kaakii'oshi'ikowaatc kii'nipowak. Kaye kekaa aapihta naapihkwaanan kii'nihshiwanaatanoon. 10 Miitahsh kotak miinawaa kaa'ishinoontaakohtootc opootaacikan a'awe encal, mii nihsin (3) encalak. Miitahsh kii'oncipankihshin kihciwanankohsh kiishikonk ehpimaahkwanek. Kii'ishiwaahsahkonehkone taapishkoo wiikwaahs e'waahsahkonencikaaketc awiya. Mii 'imaa kaaishipankihshink kekaa aapihta ini siipiin, ini kaye kaamoohkiciwankin. 11 'Wiihsakaapo' ishinihkaaso 'a kihciwanankohsh. Amii kii'wiihsakaakamihse 'iwe nipi, kekaa aapihta 'i nipi kii'wiihsakaakamin. Niipiwa' itahsh iki pemaatisiwaatc okii'nihsikonaawaa i'i nipiini ekii'minihkwewaatc kaakii'wiihsakaakamihsenik. 12 Shikwa miinawaa kotak encal okii'noontaakohtoon opootaacikan, amii niiwin (4) encalak. A'ahsh kiisihs kiihpahkihte'waa, kekaa aapihta minihk kiihpahkihte'waa. Miinawaa kaye kekaa aapihta minihk a'a tipihkikiisihs kiihpahkihte'waa, iki kaye wanankohshak kekaa aapihta minihk kiihpahkihte'waawak. Miitahsh kekaa aapihta minihk ekiihtipihkinaakosiwaatc. Shikwa kii'naanoonte​tipihkan kekaa aapihta ehkiishikahk. Kaawiin kaye kii'waahseyaahsinoon kekaa aapihta eniahkotipihkahk. Wiinke hsa kiihkashkiitipihkan. 13 Ninkii'inaap, ninkii'noontawaa tahsh ehtepwewitank mikisi e'naawinaakositc ehpimiayaatc newacikiishikonk, ehkishiiwetc: "Kakwaanihsakentaakwan! Kakwaanihsakentaakwan! Takakwanihsaki ishiwepisiwak iki ahkiink kaapimaatisiwaatc. Ahpii noontaakwaninikin opootaacikaniwaan iki nihsin (3) encalak keyaapi kenoontaakohcikewaatc," kii'ihkito.

Okihkentamooshiwewin 9

1 Miinawaa kotak encal okii'noontaakohtoon pootaacikan, amii​'iwe naanan ekii'noontaakohtoowaatc. Ninkii'waapamaa tahsh wanankohsh aasha ekii'oncipankihshink kihcikiishikonk 'imaa ahkiink e'apitc. Mii​'awe kii'miinaa aapaapihka'ikan, mii​'iwe tino kaakipaapihka'ikaakaaniwank i'imaa kaaishiwiimpahkamikaak i'iwe ekaa kaamishahkiiyaahsinok. 2 Okiihpaahkinaan itahsh piintaapihkaanink kaaishiwiimpahkamikaanik. I'imaa tahsh kii'ontaapahte taapishkoo kaaishipaashkinek i'i ninkisikan kaaishi-ishpaapahtek. Kii'anitipihkinaakosi tahsh a'a kiisihs e'ankwaapahsotc, newacikiishik kaye kii'mahkatewaapahte. 3 Amiihsh imaa akwaapahtenk kii'onciiwak kihcipahpahkinek, ekiihpooniiwaatc ahkiink. Kii'ishimiinaawak itahsh taapishkoo kihcimanicoohshak kaaociihsowewiniwaatc mii​'i ci-ishihcikewaatc. 4 "Keko nihshiwanaacihtoohkek mashkohsiwan," kii'inaawak, kaye mihtikook kaye kahkina hsa kekoon kaanihtaawikinkin, mii piko tahsin awiya ekaa oskahtikowaank ekihkinawaacipii'waahsiwintwaa ehtipenimikohsikwaa Kishemanitoon, miiwak​iki keciihswaakaniwiwaatc. 5 Kaawiin itahsh kii'ishimiinaahsiiwak oko pahpahkinek cinihsaawaatc i'i ininiwa', cimihcikakwaataki'aawaatc itahsh naanokiisihs minihk. Taishikakwaatakentamook iki ininiwak taapishkoo eshikakwaataki'ikotc awiya kihcimanicoohshan kaaociihsowewininitc ehciihsokotc. 6 Mii​'iwe ehkakiishikaninik okananaantonaanaawaa keshinipowaatc, kaawiin itahsh okamihkansiinaawaa. "Ampehsh nipoyaan," tainentamook, okatapasii'ikonaawaa tahsh 'iwe nipowin. 7 Kii'ishinaakosiwak itahsh iki pahpahkinek taapishkoo mihtatimook e'oshiihtaa'intwaa ewii'antayaapatisiwaatc miikaatiwinink. Ohtikwaaniwaank kii'ishinaakosiwak taapishkoo osaawishooniyaawi pahsihkwepisonan e'ayaanikin. Ininiink itahsh kaye kii'inatenkwewak. 8 Kii'ishiowiinisihsiwak taapishkoo ihkwewa' kaaishikakaanwaanihkwenitc, shikwa mihshipishiwaapitink kii'inaapitewak. 9 Ohkaahkikaniwaank kii'ina'akayewak taapishkoo i'i piiwaapihk shimaakanihshak kaapihsihkamowaatc ohkaahkikaniwaank. Shikwa pisaaniko kii'inihtaakosiwak mihtatimook ehpimwewetaapiipa'aawaatc otootaapaanaahkowaa' ewii'moohkiihtaatiwaatc miikaatiwinink, mii​'i kaaishipimweweyaankewaatc oko pahpahkinek. 10 Kihcimanicoohshink kaaociihsowewininitc, mii​'i kaainaanowewaatc iki kihcipahpahkinek. Okiihciihswaakenaawaan osoowiniwaan. Miihsh i'imaa wencikashkihtoowaatc cikakwaataki'aawaatc i'i pemaatisinitc naanokiisihs minihk. 11 Otayaawaawaan kaaokihciokimaamiwaatc, miiwan​ini encalan kaatashiokimaahkantaminitc kaaishiwiimpahkamikaanik, 'iwe ekaa kaamishahkiiyaahsininik. Mii eshinihkaasotc a'awe encal, Apaatan (Abaddon) e'ishikiishwenk Hiiparoo (Hebrew). Ahpwaaliyan (Apollyon) itahsh kaye ishinihkaaso Kariihk (Greek) e'ishikiishwenk. Mii​'iwe ecikaniwitc Onihshiwanaaci'iwe. 12 Nihtam i'iwe kaakakwaanihsakentaakwahk aasha ahpan kii'ishkwaahse. Inashke keyaapi niishin ta-ayaawan kekakwaanihsakentaakwahkin. 13 Miinawaa tahsh encal okii'noontaakohtoon opootaacikan, mii aasha ninkotwaahso encalak ekiihpootaacikewaatc. Ninkii'noontaan inwewin i'imaa e'oncihsek kaaishioteshkaniwank kaaishiniiyokiihkeyaak i'i kaaosaawishooniyaawank pakitinaahsowinaapihk, mii​'iweni kaaoncishkawishkaakotc Kishemanitoo. 14 Kiihkanoonaa tahsh a'awe ishkwaac encal kaaopootaacikanitc, amii​'awe ninkotwaahso kaainakincikaasotc: "Haw, aapiskon iki niiwin encalak kaamamaancikwahpisowaatc i'imaa kihcisiipiink Iyoohparetiis (Euphrates) kaaishinihkaatek," okii'ikon i'i inwewin. 15 Miihsh kaa'ishiaapiskonintwaa iki niiwin encalak ciawinihsaawaatc kekaa aahpihta kaatahshinitc i'i pemaatisinitc ahkiink. Aaniihsh niiyaak iko kii'oshiihtaa'aawintwaapan i'i ci-ishihcikewaatc, mayaa ocihcihsenik kihkinoonowin, mayaa kaye kiisihsoon pimakinsonitc, mayaa kaye ehkiishikaninik, mayaa kaye ahpii kiishikaninik, piinihsh kaye mayaa tipa'ikan ciniocihcihsenik. 16 Ninkii'wiintamaakoo entahshiwaatc iki omiikaasook kaatehsapiwaatc mihtatimoo'. Niishwaahk minihk kihcimitaahswaahk tahsink kihcimitaahswaahk (200,000,000) kiihtahshiwak. 17 Ninkii'ishiwaapamaak nintinaapantamowinink kaaishinaakosiwaatc iki mihtatimook kaye iki kaapimiwanepa'ikowaatc. Taapishkoo ishkote kaaishimiskwahkonek kii'ishinaakwaniniwan otoohkaahkikaniaakawahpisoniwaan, e'mahkateoshaawashkwaanikin kaye e'aahko-osaawaanikin kaye. Mishipishiwihtikwaanink kii'ishinaakwaniniwan ohtikwaaniwaan iki mihtatimook. Kii'onciimakanini otooniwaank ishkote, kipwaapahte kaye, i'iweni kaye kaawiihsakaapahsowetc kaacaakisotc tino osaawiahsin. 18 Kekaa tahsh aapihta iki pemaatisiwaatc okii'nihsikonaawaa ono nihsin (3) macihsewinan kaapimiayaamakaninikin, miiwan​ono ishkote, kipwaapahte, kaawiihsakaapahsowemakaninik kaye. 19 Omashkawisiiwiniwaa iki mihtatimook i'imaa tako-ayaani otooniwaank kaye 'imaa osoowiwaank. Kinepikonk kii'ishinaakwaniniwan osoowiwaan, kaye kii'ohtikwaaniwaniniwan. Miitahsh ini iyaapacihtoowaatc ciwiihsakaahpine'aawaatc i'i pemaatisinitc. 20 Iki tahsh pemaatisiwaatc kaakii'ishko'intwaa kaakii'nihsikohsikwaa ono macihsewinan, kaawiin kii'oncikipihciihsiiwak eshianami'ehtamowaatc wiinawaa oninciiwaank kaakii'oncioshihtoowaatc. Aanciko kaawiin okii'onci poonikanoonaahsiwaawaa' maciahcaahkwa', i'i kaye omasinihkocikaniwaa' osaawishooniyaa​waapihkonk kaaoncioshi'aawaatc, waapaapihkonk kaye, osaawaapihkonk kaye, ahsiniink kaye, mihtikonk kaye kaakii'oncioshi'aawaatc. Kaawiin tahsh waapihsiiwa', kaawiin kaye noontamaahsiiwa', kaawiin kaye pimohsehsiiwa'. 21 Kaawiin kaye kii'oncikipihciihsiiwak i'iwe onci kaakii'ishi nihtaa nihshiwewaatc, kaakii'ishi macimashkihkiihkewaatc kaye. Kaawiin kaye okiiwiihpoonihtoohsiinaawaa i'iweni opihshikwaatisiwiniwaa, 'iwe kaye okimootiwiniwaa.

Okihkentamooshiwewin 10

1 Ninkii'waapamaa kotak ehkihcimashkawisiitc encal, kihcikiishikonk ekiihpioncinaashiitc, ekiih kikihkonayaatank wahkwi. Kiisihsweyaap itahsh kiihkishipaanaakwanini ohtikwaanink, kaye owatenkonk pisaan​iko kiisihsonk kii'ishinaakosi, ini kaye ohkaatan pisaan​iko ishkote ehpatahkahkonek kii'ishinaakwaniniwan. 2 Kaye ehpitahkonank titipiikinikani masina'ikanenhs ekiih paahkiikinikaatenik, oninciink e'ahtenik. Okihcinihkink inahke kii'ishitahkohkii kihcikamiink, onamantinihkink itahsh inahke ahkiink kii'ishitahkohkii. 3 Miitahsh kiihsoonkihtaakosi ekiihkihcishaakowetc taapishkoo mihshipishiw ehpitihkowenoontaakositc. Kaa'ishkwaanoontaakositc itahsh a'a encal, okii'nahkwewemikoo' ono niishwaahso (7) pinehsiwa' ekiihpitihkowenoontaakosinitc. 4 Weyiip iko kaakiihpitihkowewaatc iki niishwaahso pinehsiwak nintaanawii' oshipii'aanaapan kaakii'inihtamaan. Ninkii'noontaan itahsh inwewin kihcikiishikonk e'oncikanoonikoyaan: "Keko!" ninkii'ikon. "Kaakii'ihkitowaatc iki kaaniishwaahciwaatc pinehsiwak keko oshipii'anken. Manaatipaacimon awiya cikihkentansik," ninkii'ikoo. 5 A'ahsh kaakii'waapamak encal e'niipawitc kihcikamiink kaye ahkiink, kihcikiishikonk inahke kii'ishi-ishpinihkeni okihcinihk, 6 ekii'ihkitotc, ekii'ahpimotc ini Kishemanitoon ahpan​iko pishihshik kaapimaatisinitc, miiwan​ini kaakii'oshihtoonitc kihcikiishik kaye minihk kekoon weti kaa-ayaanik, ahki kaye ekii'oshihtoonitc kaye minihk kekoon i'imaa kaa-ayaanik, kaye kihcikam ekii'oshihtoonitc kaye kahkina kekoon i'imaa kaa-ayaanik. Kii'ihkito 'a encal: "Kaawiin ahkawe tapii'oomakahsinoon kekoon. 7 Ahpii tahsh anikakiishikaninik cimaaciipootaaciketc a'a encal, a'awe ishkwaac iki kaaniishwaahciwaatc (7) encalak, mii ahpii Kishemanitoo okatipihsehtoon 'iweni kaakii'inentank, 'iwe mahshi awiya kaakiih kihkentansik, mii​'iwe kaakii'wiintamawaatc a'a Kishemanitoo otanohkii'aakana' otipaacimowininiima' kaakiihkanootamaakotc," kii'ihkito. 8 Miinawaa tahsh ninkiihkanoonikon i'iwe inwewin, 'iwe nihtam kihcikiishikonk kaakii'oncinoontamaan, mii​'iwe ekii'ikoyaan: "Awiotaahpinan 'iwe titipiikinikani masina'ikanenhs kaapaahkiikinikaatek 'imaa oninciink kaa-ahtenik 'awe encal 'imaa kaaniipawitc kihcikamiink kaye ahkiink," ninkii'ikoo. 9 Ninkii'awikakwecimaa 'awe encal: "Miishihshin i'iwe titipiikinikani masina'ikanenhs," e'inak. Ninkii'ik itahsh: "Haw otaahpinan, miicin! Kimihsataank kikakishiwashkateshkaakon, kitoonink itahsh taapishkoo aamoowi​siinsipaahkwatonk taishi shiiwan." 10 Ninkii'otaahpinamowaan i'i titipiikinikani masina'ikanenhs oninciink kaa-ahtenik 'awe encal, kaye ninkii'miicin. Taapishkoo aamoowi​siinsipaahkwatonk kii'ihpokwan. Ahpiihsh kaahkontamaan ninkii'wiihsaki kishiwashkateshkaakon. 11 O'owehsh ninkii'ik: "Kinantawentaakos miinawaa cikanootamawatc Kishemanitoo keinaacimintwaa niipiwa' awiya' pepahkaan ahkiink kaaoncitipentaakosiwaatc, pepahkaan kaye kaatahswewaanakinaakosiwaatc, kaatahso ayishikiishwewaatc kaye, niipiwa' kaye kihciokimaak keinaacimintwaa." Mii 'i kaa'ishitc a'a encal.

Okihkentamooshiwewin 11

1 Miitahsh ninkii'miinikoo 'i tipa'ikanaahtik, taapishkoo sahka'onaahtik e'ishinaakwahk. Shikwahsh ninkiihkanoonikoo: "Pasikwiin, awitipa'an oKihcianami'ewikamik a'a Kishemanitoo kaye 'i pakitinaahsowinaapihk i'imaa kaa-ayaak. Ikiweniwak itahsh imaa piintik kaa-anami'aawaatc akim. 2 Iniwe tahsh kaawaahkaa'ikaatekin imaa akwaciya'ii Kihcianami'ewikamikonk, keko wiin iniwe pimentanken, keko tipa'anken. Kii'miinaawak iki tino pahkaan kaa-ayoonciiwaatc ekaa kaa-anami'aahsikwaa. 'Owe Ootena Kishemanitoo kaaTipentank okatataahkohkaataanaawaa niimitanahshiniishin (42) tahso kiisihs minihk. 3 Ninkamaacinisha'waak itahsh iki kaaniishiwaatc ketipaacimiwaatc. Ahsapiiwekin okapikikishkaanaawaa. Mitaahswaahk kaye niishwaahk ninkotwaahsimitana (1,260) tahso kiishik minihk okakanootamawaawaan Kishemanitoon," kii'ihkito. 4 Oko kaaniishiwaatc tipaacimowininiwak, amiiwak​oko ecikaasowaatc iki niishin aalip (olive) shoominaahtikook, iki kaye niishin waahsahkonencikanaahtikook imaa kaapatahkisowaatc imaa enaahsamiayaanitc ini kaaTipentaminitc 'iweni ahkiini. 5 Kiishpin awiyan kekoon wiihtootaakowaatc, ishkote taonciini otooniwaank citashi nihshiwanaatisinitc ini kaashiinkenimikowaatc. Amii 'owe nahke taishinihsimaawa' awenena' iko kaawii'macitootaakowaatc. 6 Otayaanaawaa okashki'ewisiwiniwaa cikipa'amowaatc i'i kiishik ekaa cikimiwansininik mekwaa e'anikanootamawaawaatc Kishemanitoon. Okashkihtoonaawaa kaye nipiin cikwehkihtoowaatc kaamoohkiciwanipiikowaninikin, miskwiink ci-inaakamininikin. Okashkihtoonaawaan kaye kahkina ciotihshiwemakaninikin kekakwaataki'iwemakaninikin o'omaa ahkiink, tahswaa piko keinentamowaakwen taishihcikewak. 7 Miihsh 'iwe ahpii kekiishihtoowaatc otipaacimowiniwaa, mii ahpii kemiikaanikowaatc ini pikwaciaya'aawihshan kaapioncimoohkiinitc i'imaa kaaishiwiimpahkamikaak i'iwe kaamishahkiiyaahsinok. Okashaakooci'ikowaan kaye okanihsikowaan. 8 Ini tahsh wiiyawiwaan kaakii'nipowaatc ta-ahteniwan mayaawihkana i'imaa kihciootenaank, i'imaa kaye kaakiitashi akwaahkosaka'ikaniwinitc ini kaaTipenimikowaatc. Mii 'owe eshikihkinawaaciwiintek i'i ootena, Swaatam (Sodom) kaye Iicip (Egypt). 9 Mii 'imaa nihsokiishik aapihta kahkina awiyak okashikanawaapantamawaawaa' kaakii'niponitc wiiyawini, misiwe kaaonciiwaatc pepahkaan kaaishiwiinsowaatc, kahkina kaye kaatahswewaanakinaakosiwaatc, pepahkaan kaye kaaishikiishwewaatc, mii oko kahkina okakanawaapantaanaawaan ini wiiyawimaan. Kaawiin kaye okapakitinansiinaawaa cina'ahcikaatenikin wiiyawini. 10 Iki 'imaa ahkiink kaa-ayaawaatc tamoocikentamook ekii'niponitc o'o niishin otipaacimoo'. Tamoocikahkamikisiwak, tamemeshkwacimiinitiwak kaye. O'owe taonci-ishihcikewak, aaniihsh kii'nipowa' o'o otipaacimoo' kaakiihkihci kakwaataki'ikowaahpan. 11 Nihsokiishik aapihta tahsh e'ishihsenik, kaakii'nihsintwaa oko otipaacimook, okiihpiincishkaakonaawaa pakitanaamowin Kishemanitoonk kaaonciinik ekiihkiiwepimaatisi'ikowaatc; kiihpasikwiiwak itahsh. Miitahsh kiihkihcisekisiwa' kahkina kaawaapamikowaatc. 12 Okii'noontaanaawaa tahsh iki otipaacimook ehkihcikishiiwek inwewin kihcikiishikonk inahke ehkanoonikowaatc: "O'omaa piishaak!" Miihsh i'i kii'animaacaawak kihcikiishikonk wahkwiink, mekwaa ehkanawaapamikowaatc i'i kaashiinkenimikowaatc. 13 Miitahsh 'iwe ahpii e'ishihsek, wiinke kiihkihcinininkihseni ahki. Miihsh i'i ahpii entahsomitaahcinkin waahkaa'ikanan i'imaa ehkihciootenawank peshik kii'nihshiwanaatan. Niishwaahcink mitaahswaahk (7,000) itahsh kiihtahshiwak kaakii'nihshiwanaatisiwaatc ehkihcinininkihsenik ahki. Kotak itahsh kaa'ishko'intwaa kiihkihcisekisiwak kaye okiihkihtakimaawaan Kishemanitoon kihcikiishikonk kaa-ayaanitc. 14 Mii​'iwe niishink aasha 'owe ekiihpoonihsek ocaanimisiwin kaakakwaanihsakentaakwahk. Nashke hsa! Keyaapi peshik kekakwaanihsakentaakwahk ocaanimisiwin kitaahtap​iko taishihse, mii'i nihsink (3) ci-ishihsek. 15 Miinawaa kotak encal okii'noontaakohtoon opootaacikan, mii niishwaahso encalak ekiihpootaacikewaatc. Miihsh ehkihci-inihtaakwahkin inwewinan kihcikiishikonk, o'owe e'ihkitowaatc e'maamawihtaakosiwaatc: "Kii'miinaa i'i ahki ciokimaahkantank a'a kaaTipeniminank kaye ini kaakii'onaapamaatc cipimaaci'iwenitc. Wiin iko ahpan​iko mooshak pishihshik tatipencike." 16 Ikiweniwak niishtanahshiniiwin (24) oniikaanisiik, miiwak​iki okihciapiwiniwaank kaainaahsamapiihtawaawaatc Kishemanitoon, kii'animihkopani'owak enaahsamapinitc, ehkihci-inenimaawaatc Kishemanitoon, 17 o'owe e'inaawaatc: "Miikwehc kitikoo kiin Tepencikeyan, Kishemanitoo Miyaamawi Mashkawisiiyan, kiin o'omaa noonkom kaa-ayaayan, mewisha ko kaye kaapionciayaayan, miikwehc e'maaciiaapacihtooyan kikihcimashkawisiiwin e'maaciitipencikeyan! 18 Kaatahswewaanakisiwaatc ikiweniwak kaakihkenimihsinohkwaa kii'oncikihcinishkaatisiwak, e'ocihcihsek kinishkaatisiwin cipitakohshinoomakahk, iki tahsh kaye kaanipowaatc citipaahkonintwaa. Aasha ocihcihse citipa'amawatwaa kitanohkii'aakanak kaakiihkanootamawihkwaa, iki kaye kahkina kaakwayahkopimaatisiwaatc kaatipenimatwaa, iki kaye kaakihci-inentamowaatc kiwiinsowin, kaakihci-inentaakosiwaatc, iki kaye pankii enentaakosiwaatc, kahkina tamiinaawak. Mii 'o ahpii e'ocihcihsek cinihshiwanaaci'intwaa iki kaanihshiwanaacihtoowaatc i'i ahki," ihkitowak oniikaanisiik. 19 Kiihpaahkinikaateni tahsh Kishemanitoo okihcianami'ewikamik kihcikiishikonk kaa-ayaanik. I'imaahsh kii'naakwanini anami'emahkahk kaaishipiintenik ahshotamaatiwin Kishemanitoo kaakii'miinaatc opimaatisiima'. Kii'oncii 'imaa e'waawaahtehsek, kiihpapiitihkowe tahsh kaye, pinehsiwak kaye kii'noontaakosiwak. Ahki kaye kii'nininkihse, wiinke kaye kiihkihcisehsekan.

Okihkentamooshiwewin 12

1 Miitahsh kihcimaamahkaasinamowin kii'naakwan kihcikiishikonk. Kii'naakosi peshik ihkwe kaaishihkonayetc ini kiisihsoon ehkikishkawaatc, kaye anaamink ositink kii'ayaawan tipihkikiisihsoon, ohtikwaanink kaye ehpahsihkwepisotc mitaahshiniishin (12) wanankohsha'. 2 Apinoonciishan okiihkikishkawaan, e'moohkwaahpinetc ewii'waapamaawahsotc. 3 Pahkaan miinawaa kekoon kiihkihkinawaasinaakwan kihcikiishikonk. I'imaa kii'ayaa maawac e'mintitotc ohkaatiikinepik e'miskositc, e'niishwaahcininikin (7) ohtikwaanan kaye e'mitaahcinitc oteshkana'. Shikwa kaatahsininikin ohtikwaanan okiihkikishkaanan ini pahsihkwepisonan. 4 Miihsh osoowink okii'niihsaakaapiikinaa' ini wanankohsha', kekaa aapihta kaatahshinitc kaa-akoocininitc kiishikonk okii'onciniihsiwepinaa' ahkiink. Kii'inaahsamikaapawi tahsh ini ihkwewan ewii'waapamaawahsonitc, ahpiihsh naakosinitc ewii'amwaatc ini apinoonciishan. 5 Kii'naakosiwan itahsh ekii'okosihsitc a'a ihkwe, amiiwan ini piiwaapihkosahka'on ketahkonaminitc keonaahkonaanitc kahkina kaatahswewaanakisinitc i'i pemaatisinitc. Kiihkesihkomanipinaa tahsh a'awe apinoonciish, ekii'ishiwinintc i'imaa Kishemanitoon kaaishiayaanitc, 'imaahsh kaye kaaishiayaanik okihciapiwinini. 6 A'awehsh ihkwe pikwatahkamik kii'ahpa'iwe, weti kaakii'ishi kiishaaci oshihtamaakotc Kishemanitoon i'imaa ciayaatc citashikanawenimintc, mitaahswaahk niishwaahk ninkotwaahsomitana (1,260) tahsokiishik 'imaa ciayaatc. 7 Mii 'i ahpii kii'maaciimiikaatinaaniwan kihcikiishikonk. A'a Mayihkal (Michael) kaye owiiciencalima' okii'awimiikaanaawaan ini kihciohkaatiikinepikoon. Kaye wiin kihciohkaatiikinepik kii'miikaaso e'wiici'ikotc otencalima'. 8 Kiihshaakoocihcikaniwi tahsh a'awe kihciohkaatiikinepik. Kaawiin miinawaa wiihkaa kiihtawinamawaahsii kihcikiishikonk ciayaatc, iniweniwa' kaye kaawiici'ikotc. 9 Wa'a kaamaawacimintitotc kihciohkaatiikinepik inkoci kii'ishiwepinaa. Mii 'awe kihcimewisha kaaonciitc kehtemacikinepikohsh, maciaya'aa, Setan (Satan) kaye kaaishinihkaanintc. Mii 'awe kaakii'wayeshimaatc awiya' misiwehkamik kaa-ayaanitc. Ahkiink itahsh kii'ishiwepinaa, tako kaye omaciencalima' kaakii'wiiciiwikotc. 10 Miitahsh ninkii'noontaan awiya ehkihcikishiiwetc kihcikiishikonk e'ihkitotc: "Noonkom ocihcihse opimaaci'iwewin kiKishemanitoominaan kaye ehpinaakwaninik omashkawisiiwin kaye otipencikewin. Ini kaye kaakii'onaapamaatc cipimaaci'iwenitc aasha onaakohtooni okashki'ewisiwinini. Aaniihsh kii'niihsiwepinaa 'awe maciaya'aa kaakii'mamishimaatc ini kiwiiciotepwehtamoominaani'. Amii 'awe maciaya'aa kaakii'inaahsamikaapawiihtawaatc kiKishemanitoominaanin, ehkiishikaninik, ehtipihkaninik kaye ekiihkakwemamishimiwetc. Aasha tahsh kii'onciniihsiwepinaa kihcikiishikonk. 11 Iki tahsh kiwiiciotepwehtamoominaanik okiihshaakooci'aawaan ini maciaya'aan. I'iwe Maanahcaanihshenhs omiskwiim kii'oncishaakoocihtwaawak, i'iweni tahsh kaye tepwewin kaakii'wiintamaakewaatc. Kaawiin aaniihsh okii'onsaamentansiinaawaan opimaatisiwiniwaan, kaawiin inkotano nipoyaank ekii'inentamowaatc. 12 Taminwentamoomakan kihcikiishik, kaye i'imaa kaa-ayaayek minwentamohk! Takakwaatakentaakwan itahsh i'imaa ahkiink kaye kihcikamiink, aaniihsh a'a maciaya'aa kikii'naasihkaakowaa 'imaa kaa-ayaayek, e'ayaatc kihcinishkaatisiwin ehkihkentank acina piko ehta ciayaatc," mii kaa'ihkitotc. 13 Ahpii tahsh a'awe kihciohkaatiikinepik e'waapantank ahkiink ekii'niihsiwepinintc, iniwenihsh itahsh ini ihkwewan okii'moohkiihtawaan kaakii'nihtaawiki'aanitc ini kwiiwisenhsan. 14 Kii'miinaa tahsh a'a ihkwe niishin ini mininkwiikanan kihcimikisi kaaishioninkwiikanitc, ci-ishihsewaaketc pikwaciahkiink kaakii'ishi kwayaancihtamawintc, i'imaa ciawiayaatc nihsoyahki aapihta, miihsh weti ci-ishikanawentaakositc citepinikohsik macikinepikohshan. 15 Okonewink itahsh a'a macikinepikohsh okii'noohsawisiihsopaanaan nipi pisaan​iko siipi kaaishipimiciwank, cioncimaaciiyaapokonihpan ini ihkwewan. 16 Miihsh 'iweni ahkiini okii'wiici'ikon a'a ihkwe. Ehtaawaniimakahk okii'iskantaan 'iwe nipiini macikinepikohsh okonewink kaakii'onciciwaninik. 17 A'a tahsh kihciohkaatiikinepik okiihkihcinishkenimaan ini ihkwewan. Miihsh kaa'ishi-ishaatc e'antamiikaanaatc i'i kotak kaaontahkaanesinitc i'imaa ihkwenk, iniweniwa' kaakanawentaminitc Kishemanitoon otoonahshowewinini kaye kaakihciwinaminitc kaaishitipaacimimintc Ciisahsoon.

Okihkentamooshiwewin 13

1 A'awe tahsh kihciohkaatiikinepik i'imaa kii'niipawi ciikew mihtaawankaank kihcikamiink. Ninkii'waapamaa tahsh peshik pikwaciaya'aawihsh ehpiakwaasiitc kihcikamiink, e'mitaahcinitc oteshkana' kaye e'niishwaahcininikin ohtikwaanan. Entahsopeshikonitc itahsh oteshkana' mii 'imaa peshik eyaanik okimaawi pahsihkwepison. Miitahsh kaatahsininikin ohtikwaanan maciwiinsowin e'macipaahpinemintc Kishemanitoo kii'ishipii'ikaate. 2 A'a tahsh pikwaciaya'aawihsh kaawaapamak kihcipooshenhsink kii'ishinaakosi, ositink kaye taapishkoo mahkositan, otoon kaye taapishkoo mihshipishiwitoon kii'ishinaakwanini. Ini tahsh kihciohkaatiikinepikoon okii'miinikoon tipinawe omashkawisiiwinini, okihtapiwinini kaye okihcitipencikewinini kaye. 3 Peshik itahsh i'iweni ohtikwaan a'a pikwaciaya'aawihsh pisaan​iko kii'ishinaakwanini ekii'maahkihcikaatenik cioncinipotc. Miinawaa tahsh kii'minoyayaahcikaateni kekii'nihsikohpan kaakii'ishimaahkihcikaniwitc ohtikwaanink. Kahkina tahsh misiwehkamik kaa-ayaawaatc okii'maamahkaatenimaawaan ini pikwaciaya'aawihshan ehpiminisha'waawaatc. 4 Kahkina iki pemaatisiwaatc okii'ociciinkwaniihtawaawaan ini kihciohkaatiikinepikoon ehkihci-inenimaawaatc, aaniihsh otipencikewinini ekii'miinaanitc ini pikwaciaya'aawihshan. Kaye wiin ini pikwaciaya'aawihshan okii'ociciinkwaniihtawaawaan e'ihkitowaatc: "Awenen eshiayaatc taapishkoo 'awe pikwaciaya'aawihsh? Awenehsh kekashkihtoohpan cimiikaanaatc?" 5 Kii'ishimiinaa cikakihcimotc cimacipaahpinemaatc ini Kishemanitoon. Kii'ishimiinaa kaye tipencikewin ciayaatc niimitanahshiniishin (42) tahsokiisihs. 6 Miitahsh e'maaciikakitotc okii'mamacitashimaan Kishemanitoon, kaye okii'mamacitashintamawaan owiinsowinini kaye otayaawinini, weti kaye kahkina kihcikiishikonk kaaotaawininitc. 7 Kii'miinaa kaye ciawimiikaatamawaatc Kishemanitoon opimaatisiimini kaye cishaakooci'aatc. Kii'miinaa kaye citipenimaatc kahkina pepahkaan kaa-aayoonciinitc kaye kahkina pepahkaan kaa-aayooncitipentaakosinitc kaye entahsopepahkaanikiishwenitc kaye kahkina kaatahswewaanakinaakosinitc. 8 Kahkina 'imaa ahkiink kaa-ayaawaatc okaociciinkwaniihtawaawaan ini pikwaciaya'aawihshan. Ikiweniwak ehta kaaoshipii'ikaasowaatc pimaatisiwinimasina'ikanink, kaawiin taishihcikehsiiwak. 'Awe aaniihsh Maanahcaanihshenhs kaakii'nihsintc otipentaan masina'ikan i'imaa kaaishioshipii'ikaasowaatc awenena' pishihshik kepimaatisiwaatc. Aasha kii'oshipii'waawak cipwaa oshihcikaatek ahki. Amiiwak ehta oko kaawiin okaociciinwaniihtawaahsiiwaawaan ini pikwaciaya'aawihsan. 9 Kiishpin awiya wenoontamaawinikwen maano okapisintaan! 10 Awenen iko enentaakositc cikaahcitinintc kehcinaac takaahcitinaa cimaaciinintc. Awenen iko enentaakositc moohkomaanink cioncinihsintc, taoncinihsaa moohkomaanink. Miihsh 'i eshiantawentaakosinitc Kishemanitoo okwayahkwaatisiima' cimashkawentaminitc kaye cikapetepwehtaminitc. 11 Niwaapamaa tahsh kotak pikwaciaya'aawihsh ahkiink ehpioncimoohkiitc, e'niishinitc oteshkana' taapishkoo kaaishiteshkanenitc maanahcaanihshenhsan. Kihciohkaatiikinepikonk itahsh kii'inihtaakosi ehkiikitotc. 12 Wa'a kotak aya'aawihsh okii'aapacihtamawaan okihcitipencikewinini ini nihtam aya'aawihshan mekwaa ehkanawaapamikotc. Okiihkashkihtoon ahkiini kaye iki ahkiink kaa-ayaawaatc ciociciinkwaniihtawaanitc ini nihtam pikwaciaya'aawihshan ini kaakii'minoyaayaahcikaatenik onihsikoowin kaa'ishimaahkihcikaniwitc. 13 A'a tahsh kotak pikwaciaya'aawihsh okiihtootaanan kihcimaamahkaacihcikewinan, pooshke awaac cipinaashahkiihsenik ishkote ahkiink, kiishikonk cioncihsenik, e'waapamikotc kahkina pemaatisinitc. 14 Miihsh i'i okii'onciwayeshi'aa' ini ahkiink kaa-ayaanitc ini omaamahkaacihcikewinan ekii'aapacihtootc kaakii'miinintc citootank e'waapamikotc ini nihtam pikwaciaya'aawihshan. Okii'wiintamawaa': "Oshi'ihk manitoohkaaniwihkocikan, cikihci-inencikaniwitc a'a peshik pikwaciaya'aawihsh kihcimoohkomaanink kaakii'oncimaahkakanaansotc, miinawaa tahsh ehpimaatisitc," kii'ihkito. 15 A'a tahsh kotak aya'aawihsh kii'miinaa ekiihpakitanaamonotawaatc ini oshihkocikanan cipimaatisinitc, miiwan​ini nihtam aya'aawihshan kaaishinaakosinitc oshihkocikanan. Wa'ahsh oshihkocikan okiihkashkihtoon cikakitotc kaye cinihsimintc awenenan iko kaawii'ociciinkwaniihtaakohsik. 16 A'awe tahsh aya'aawihsh okiihkashki'aa' kahkina awiya' cikihkinawaacihcikaniwinitc okihcinihkiniink kemaa oskahtikoniink. Kahkina awiya kiihkihkinawaaci'aa, kaa-akaahsentaakosiwaatc kaye kaakihci-inentaakosiwaatc, kaawenootisiwaatc kaye kaakitimaakisiwaatc, kaatipenintisowaatc kaye kaatipentaakosiwaatc. 17 Kiishpin awiya miinaahsiwintc i'iwe kihkinawaacipii'okoowin, kaawiin ta-ataawehsii, kaawiin kaye kekoon ta-ataawaakehsii, mii ehta awiya ishioshipii'ontc owiinsowinini ini pikwaciaya'aawihshan kemaa 'iweni otakintaahsowinini, mii 'owe owiinsowinini kaaicikaatenik. 18 Antawentaakosi awiya cikihkentamaawisitc: awenen iko a'a kaakihkentaahsotc okanioncimaamihkwentaan aaniin kaaicikaatenik 'iwe otakintaahsowinini ini pikwaciaya'aawihshan. Aaniihsh mii ecikaatek ininiiwi wiinsowin, amii 'owe e'inakintek i'i wiinsowin: ninkotwaahswaahk ninkotwaahsimitanahshininkotwaahso (666).

Okihkentamooshiwewin 14

1 Miitahsh ninkii'inaap. A'awehsh Maanahcaanihshenhs kii'niipawi ishpatinaank, Saayan (Zion) Waciw kaaicikaatek. Okii'wiiciiwikoo' awiya' ninkotwaahk niimitanahshiniiwink mitaahswaahk (144,000) ekiihtahshinitc. I'imaa tahsh oskahtikoniink kii'oshipii'ikaateniwan owiinsowin, oTeten kaye owiinsowinini. 2 Miihsh 'iwe ninkii'noontaan inihtaakosiwin kihcikiishikonk kaaonsihtaakwahk. Taapishkoo kihcipaawihtik e'matweciwank kii'inihtaakwan, kaye taapishkoo pinehsiwak kaa-ahpiihcisoonkihtaakosiwaatc. Shikwa pisaan​iko okitohcikek e'matweyaapiikipicikewaatc kii'inihtaakwan. 3 Iki tahsh ninkotwaahk niimitanahshiniiwink mitaahswaahk (144,000) kaatahshiwaatc i'imaa kii'oncishkawikaapawiwak kihciapiwin kaaishiahtenik kaye kaaishiayaanitc i'i niiwin opimaatisii' kaye oniikaanisii'. Oshkinikamowin okii'nikamonaakenaawaa. Wiinehtawaa hsa ko okakihkentaanaawaa 'i nikamon. Kaawiin pahkaan awiya otaakashkihtoohsiin, mii ehta ikiweniwak onci 'imaa misiwe ahkiink kaakii'oncitipa'ontwaa Kishemanitoonk citipentaakosiwaatc. 4 Miiwak okoweniwak kaye misiwe kaahkanawenintisowaatc ekaa kaakii'onciwiiciiwaahsikwaa ihkwewa' kaye ehpehkipimaatisiwaatc. Miiwak​oko pepaaminisha'waawaatc ini Maanahcaanihshenhsan misiwe ko piko aanti kaapapaaishaanitc. I'imaa onci kotak kaapimaatisinitc kii'oncitipa'waawak oko. Nihtam pakitinikewinink kii'inentaakosiwak ekii'miinintc Kishemanitoo kaye Maanahcaanihshenhs. 5 Miiwak​oko mooshak kaatepwewaatc; kaawiin wiihkaa kiihkihkencikaniwihsiiwak cikiiwanimowaatc, kaawiin kaye kekoon ishiayaahsiiwak. 6 Ninkii'waapamaa tahsh miinawaa peshik encal waahsa ishpimink ehpimiayaatc e'ayaatc pishihshik keayaanik minotipaacimowin kahkina ciwiintamawintwaa iki pemaatisiwaatc ahkiink. Kahkina kaatahswewaanakinaakosiwaatc, misiwe kaye kaaontahkaanesiwaatc, kahkina kaye kaatahsopepahkaanikiishwewaatc, kahkina kaye pepahkaan kaaoncitipentaakosiwaatc tawiintamawaawak. 7 Miihsh 'iwe ehkishiiwetc: "Kohtaanenimihk Kishemanitoo, kihci-inakimihk! Aasha ocihcihseni kaawiihtipaahkoniwetc. Ociciinkwaniihtawihk a'awe kaakii'oshihtootc kiishik, ahki kaye, kihcikam kaye, kaaishimoohkiciwaninikin kaye," kii'ihkito. 8 Kotak miinawaa peshik encal naawan kiihpimiayaa e'matweihkitotc: "Nihshiwanaatan 'iwe Paapilan (Babylon)! Amii 'i wiinke kiinihshiwanaatahk 'iwe kaakihci-inentaakwahkipan ootena! Aaniihsh o'owe inentaakwan i'i ootena, ehpihshikwaatisitc ihkwe ekii'miinaatc kahkina kaatahswewaanakisinitc pemaatisinitc oshoominaapoom ciminihkwenitc. Mii 'iwe ekiihkashki'aatc omacimihsawentaahsowin citootaminitc," kii'ihkito a'a encal. 9 Keyaapi tahsh kotak encal okii'naawanoonisha'waa' i'i niishin kaakiihpipimiayaanitc, ekiihkishiiwetc: "Kiishpin awiya ociciinkwaniihtawaatc ini pikwaciaya'aawihshan kaye omanitoohkewihkocikanini, kaye oncikihkinawaaci'intc i'i oskahtikonk komaa oninciink, 10 oko kaaishihcikewaatc miiwak​oko keishiminihkwewaatc Kishemanitoon oshoominaapoomini maawac e'mashkawaakamininik, kaakii'mooshkinepatoonitc omina'iwewi minihkwaakaniniink. Miiwak​oko kewaapantamowaatc Kishemanitoon onishkaatisiwinini maawac e'mashkawentaakwaninik, wawiinke ewiihpatakoshkaakowaatc, ewii'ishitipa'amaakowaatc otishihcikewiniwaan. Mii 'imaa taishikakwaataki'aawak i'imaa ishkotenk kaye kaatashininkisotc tino 'a ahsin kaawiihsakaapahsowetc kiicaakisotc. Taishikakwaataki'aawak i'imaa e'waapamikowaatc kaakwayahkwaatisinitc encala', ini kaye Maanahcaanihshenhsan. 11 Mooshak ahpane pishihshik taonciakwaapahte i'imaa kaatashikakwaataki'intwaa. Kaawiin wiihkaa ta-aahteayaahsiiwak. Ehkiishikaninik kaye ehtipihkaninik takakwaataki'aawak awenen hsa ko keociciinkwaniihtawaawaatc ini pikwaciaya'aawihshan, ini kaye omanitoohkaanihkocikanini, awiya kaye ishikihkinawaaci'intc owiinsowinini." 12 Mii 'owe eshiantawentaakwahk cimashkawentaminitc Kishemanitoo okwayahkwaatisiima', awenenak hsa ko kaakanawentamowaatc Kishemanitoon otoonahshowewinini kaye kaakapetepwehtawaawaatc ini Ciisahsoon. 13 Ninkii'noontaan inwewin kihcikiishikonk onci ehkanoonikoyaan: "Oshipii'an o'o: Noonkom 'omaa ahkonaak tashawentaakosiwak iki kenipowaatc mekwaa ehpimiwiiciiwaawaatc ini kaaTipencikenitc," ninkii'ikon. "Eha', miinanke," ishinahkotamoon Kishemanitoo otAhcaahkwan. "Okakwaatakanohkiiwiniwaank taoncianwepiwak. Okaminowiiciiwikonaawaan tahsh i'iweni kaaoncikashkihtoowaatc otanohkiiwiniwaank," ihkitowan. 14 Miitahsh ninkii'inaap, ninkii'waapantaan itahsh e'waahsitek wahkwi, 'imaahsh wakiciwahkwi Awiya e'namatapitc ininiink kaaishinaakositc, osaawishooniyaawi pahsihkwepison ehkikishkank, kaye ehtahkonank ehkaahshaanik kiishkishikan. 15 Miinawaa kotak encal kiihpioncisaaka'am i'imaa kihcianami'ewikamikonk onci ekiihkishiiweshaakowaanaatc ini wahkwiink kaanamatapinitc: "Haw aapacihtoon kikiishkishikan, awimanishiken! Aasha ocihcihse cimanishikenk, aasha kiishikin i'imaa kaaoncinihtaawikik ahkiink!" 16 Miitahsh a'awe wahkwiink kaanamatapitc okii'ishiwepinaan okiishkishikan, ekii'manishiketc ahkiink. Mii 'iwe ekiihkiishimanishikaatek 'iweni ahkiink kaakihtikaacikaatenik. 17 Miinawaa kotak encal kiihpioncisaaka'am 'imaa kihcianami'ewikamikonk kihcikiishikonk kaa-ayaanik, mii 'awe kaye wiin e'ayaatc kaakaahshaapihkaninik kiishkishikan. 18 Miinawaa tahsh peshik encal kiihpioncii i'imaa pakitinaahsowinaapihkonk kaatashitipentank i'i ishkoteni, ekiihkishiiweshaakowaanaatc ini kaakaahshaanik okiishkishikanini: "Ishiwepinan kikiishkishikan, manisho iki shoominak kaatashinihtaawikiwaatc shoominikihtikewinink ahkiink, aasha kiishiatihsowak!" 19 Amii 'iwe kaa'ishiwepinank okiishkishikan ahkiink e'manishwaatc i'i shoomina', miihsh ekii'ishiwepinaatc i'imaa i'i shoomina' cimaamaakoshkikaniwinitc ehshoominaapohkaakaaniwaninik, mii 'iweni enentaakwaninik Kishemanitoo okihcinishkaatisiwin. 20 Mii 'imaa akwaciink ootenaank kaaishiayaatc shoominaapoohkaan kiihtashimaamaakoshkikaniwiwak iki shoominak. Amii 'imaa maakoshkikanink kii'oncii miskwi ehkihcionciciwank, niishwaahk (200) tahsotipa'ikan ekii'ishiciwank, naanomisit ekii'ahpiihtaayawaak miskwi.

Okihkentamooshiwewin 15

1 Miinawaa peshik ninkii'waapantaan i'iwe e'ishimaamahkaasinaakwahk kihcikiishikonk e'ishikihci-inentaakwahk kaye e'ishimaamahkaatentaakwahk, niishwaahso (7) iki encalak e'ayaawaatc e'niishwaahcininikin kakwaataki'iwewinan, amiiwan​ono ishkwaac keniayaakin. Aaniihsh amii 'iwe keishi-ishkwaawaapanta'iwetc Kishemanitoo onishkaatisiwin. 2 Ninkii'waapantaan pisaan​iko e'waahsehcikanaapihkowank saaka'ikan e'ayaak ehkinikawinaakwahk ishkote. Awiyak itahsh ninkii'waapamaak ciikaya'ii waahsehcikanaapihkosaaka'ikaniink e'niipawiwaatc. Miiwak​oko kaakiihshaakooci'aawaatc ini pikwaciaya'aawihshan, omanitoohkaanihkocikanini kaye, ekiihshaakoocihtamawaawaatc kaye otakintaahsowinini kaaoncikihkentaakwaninik owiinsowinini. Oko 'imaa kaaniipawiwaatc okiihtahkonaawaa' matweyaapiikipicikana' Kishemanitoon kaakii'miinikowaatc. 3 Kii'ishinikamowak itahsh kaakii'ishinikamonitc Moosihsoon (Moses) Kishemanitoo otanohkii'aakanan, onikamonini kaye ini Maanahcaanihshenhsan. Mii 'owe kaa'ishinikamowaatc: "Kiin kaaTipencikeyan Keshemanitoowiyan, kiin MiyaamawiMashkawentaakosiyan! Kihci-inentaakwanoon maamahkaatentaakwanoon kaye kitishihcikewinan! Kwayahkwan kaye tepwewiniwan kitishipimaatisiwin, kiin kaakihciotookimaamiwaatc iki misiwehkamik kaa-aayooncitipentaakosiwaatc. 4 Awenehsh ekaa kekohtaanenimihsinohk, kiin Tepencikeyan? Awenen kekihci-inakintansik kiwiinsowin? Aaniihsh kiin ehta misiwe kikwayahkwaatisiwakentaakos. Kahkina piko awiyak entahswewaanakisiwaatc kikapiantaociciinkwanapiihtaakook, aaniihsh kaakwayahkwahkin kitishihcikewinan misiwe waapancikaatewan," kii'ina'amook. 5 Miinawaa tahsh naake ninkii'waapantaan ehpaahkihsink kihcianami'ewikamik kihcikiishikonk, mii 'iwe kihcipakwaanekamik Kishemanitoo keoncimaamihkawinotaakotc e'wiiciiwaatc opimaatisiima'. 6 Miitahsh 'imaa kihcianami'ewikamikonk ehpisaaka'amowaatc iki niishwaahso (7) encalak, miiwak​oko niishwaahso kakwaataki'iwewinan kaa-ayaawaatc. Kii'waapishkaaniwan okikishkikaniwaan kaye kii'waahsiteniwan. Shikwa kiihkihcihpisowak ohkaahkikaniwaank e'osaawishooniyaawinaakwaninikin ohkaahkikanehpisonan. 7 Peshik itahsh iki niiwin opimaatisiik pepeshik okii'miinaa' ini kaaniishwaahcinitc encala', ini niishwaahso osaawishooniyaawi kihcionaakanan e'mooshkinenik onishkaatisiwin Kishemanitoo, a'a kaapimaatisitc pishihshik ahpane piko. 8 I'imaa kihcianami'ewikamikonk kiihtashimooshkineyaapahte. Kii'oncii 'imaa akwaapahte owaahseyaawinink kaye okihcimashkawisiiwinink Kishemanitoo i'imaa kaa-ayaanik. Kaawiin itahsh awiya okiihkashkihtoohsiin cipiintiketc kihcianami'ewikamikonk, paanimaa ko kiipoonihsenikin ini niishwaahso kakwaataki'iwewinan kaapitahkonamowaatc iki kaaniishwaahciwaatc encalak.

Okihkentamooshiwewin 16

1 Ninkii'noontawaa tahsh awiya ehkihcinoontaakositc i'imaa kihcianami'ewikamikonk e'oncikiikitotc, ehkanoonaatc ono niishwaahso (7) encala': "Animaacaak, awisiikinamohk ahkiink iwe Kishemanitoo onishkaatisiwin imaa kaaishiahtenik kaaniishwahcinkin kihcionaakanink," inaawa'. 2 Amiitahsh kaa'ishimaacaatc a'a nihtam encal ekii'awisiikinank okihcionaakanink kaa-ahtenik, ekii'ishipakamihsenik ahkiink. Miitahsh i'imaa kaa'oncikihciomikiiwinaaniwank ahkiink e'maanaataninik, e'wiihsakentaakwaninik kaye. Tahsin iko awiyak kii'ishimaataahpinewak kaakii'oncikihkinawaacipii'ikaasowaatc pikwaciaya'aawihshan citipenimikowaatc, kaye kaakii'ociciinkwaniihtamawaawaatc omanitoohkaanihkocikanini. 3 Miinawaa 'a kotak encal okii'anisiikinaan i'imaa kaakii'ahtenik okihcionaakanink ekii'ishisiikihsenik kihcikamiink. Miskwiink itahsh kii'inaakamihse 'i nipi. Taapishkoo awiya kaanipotc kaaishinaakwaninik omiskwi kii'inaakamihse. Kahkina kekoon i'imaa kihcikamiink kaa-ayaak kii'nipoomakan. 4 Miinawaa 'a kotak encal kii'maacaa, mii 'awe nihsin (3) kaainakincikaasotc. Okiihsiikinaan itahsh miinawaa okihcionaakanink kaa-ahtenik, i'imaa tahsh ekiihsiikihsenik kahkina siipiink kaye kaaishimoohkiciwaninikin. Kii'miskwiiwaakamihsewan itahsh. 5 Ninkii'noontawaa 'awe encal kaatipentank i'iwe kahkina nipi ehkakitotc: "Kiin misiwe kaakwayahkwaatisiiwentaakosiyan!" kii'ihkito. "Kiin o'omaa noonkom kaa'ayaayan kaye mewisha iko kaapionciayaayan! Kwayahkwanoon ono kaapiayinaahkonikeyan! 6 Oko pemaatisiwaatc okiihsiikinamawaawaa' omiskwiimini kipimaatisiima' kaye otipaacimoo' kaakiihkanootamawihkwaa. Kiin itahsh kikii'mina'aak miskwi. Miihsh i'iweni keshkihtamaasowaatc," kii'ihkito. 7 Ninkii'noontaan itahsh pakitinaahsowinaapihkonk inwewin e'ihkitoomakahk: "Eha' mii nanke, Tepencikeyan Kishemanitoo kaaMaamawentaakosiyan! Tepwewiniwanoon kaye kwayahkwanoon kitinaahkonikewinan." 8 Miihsh awe miinawaa kotak encal kii'animaacaa, mii 'awe niiwin e'inakincikaasotc. I'imaahsh kiisihsonk okiihsiikinaan 'iwe okihcionaakanink kaa-ahtenik. Kii'ishimiinikoowisi tahsh 'awe kiisihs otishkotemink cioncicaakiswaatc i'i pemaatisinitc. 9 Amiitahsh kii'oncicaakisowak maawac ekiihkihcikishitek. Okii'mamacikiishwaanotamawaawaan owiinsowinini Kishemanitoon kaatipentaminitc ono kakwaataki'iwewinan, kaye aanciko kaawiin okiiwiihpoonihtoohsiinaawaa omacitootamowiniwaan. Kaawiin kaye okiiwiihkihci-inenimaahsiwaawaan Kishemanitoon. 10 Miitahsh miinawaa kotak encal kii'animaacaa, mii 'awe naanan kaa'inakincikaasotc. Okiihsiikinaan i'iweni okihcionaakanink kaa-ahtenik, ekii'ishipakamihsenik okihciapiwininiink ini pikwaciaya'aawihshan. I'imaa tahsh kii'wanitipihkihseni otipencikewininiink. Ikiweniwak itahsh i'imaa kaa-ayaawaatc okii'maamaakwantaanaawaan otenaniwiwaan e'ahpiihciwiihsakentamowaatc. 11 Okii'macikiishwaanaawaan itahsh Kishemanitoon kihcikiishikonk kaa-ayaanitc owiihsakentamowiniwaan onci, 'iwe kaye otoomikiiwaahpinewiniwaan kaakii'ayaawaatc. Shaakooc keyaapi kaawiin okiiwiihpoonihtoohsiinaawaan omacitootamowiniwaan. 12 Miitahsh kii'animaacaa encal inkotwaahso kaainakincikaasotc. I'i tahsh otonaakanink kaa-ahtenik okiihsiikinaan i'imaa kihcisiipiink Iyoohparetiis (Euphrates) kaaicikaatek. Miitahsh kaaishipaankohsek i'i siipi, ekii'ishikwayaancihcikaatek keishiaashawishkaawaatc iki kihciokimaak waapanonk kepionciiwaatc. 13 Ninkii'waapamaak itahsh nihsin (3) kaawiinaatisiwaatc ahcaahkwak taapishkoo omahkahkiink kaaishinaakosiwaatc. I'imaa otooniniink oncisaaka'amook kihciohkaatiikinepikoon, ini kaye pikwaciaya'aawihshan, ini tahsh kaye kaakanootamaakonitc kaawayeshinkenitc. 14 Miiwak​oko maciahcaahkwak tino kaanihtaamaamahkaacihcikewaatc. Okoweniwak itahsh animaacaawak e'naasihkawaawaatc kahkina kihciokimaa' ahkiink misiwehkamik kaa-ayaanitc, e'antamaawatoonaawaatc ci-ishaanitc keishimiikaatinaaniwaninik ahpii keokihcikiishikaamitc a'awe maawac Meshkawentaakositc Kishemanitoo. 15 "Inashke pisintan! Ninkapikoshkotakohshin taapishkoo kimootishk ehkihkentaakosihsik ewiihpimitakohshink. Taminwentam a'awe kaa-ahshawaapitc, weweni kaye kaakanawentank okikishkikanan ekaa ciwaahsaahkonawe papaamohsehsik, kaawiin ta-akacihsii e'waapancikaniwitc," ihkito kaaTipenciketc. 16 Iki tahsh nihsin (3) maciahcaahkwak okii'maawaci'aawaa' ini kihciokimaa' i'imaa ayaawinink Aarmaketan (Armageddon) kaaishinihkaatek Hiiparoo (Hebrew) e'ishikiishwenk. 17 Miitahsh kii'animaacaa 'awe encal niishwaahso (7) ekii'inakincikaasotc. Okiihsiikinaan i'iwe otoonaakanink kaa-ahtenik, newacikiishikonk okii'ishisiikinaan. Kihci-inwewin itahsh i'imaa kii'oncinoontaakwan kihciapiwinink kihcianami'ewikamikonk kaa-ayaak. Mii 'owe kaa'ihkitoomakahk: "Aasha kiihkiishihcikaate!" 18 Kii'waawaahtehse, kiihpitihkonoontaakwan, pinehsiwak kaye kii'noontaakosiwak. Kaye kii'wawaahkawihse 'i ahki, mii 'iwe kaa-ahpiihciwawaahkawihsek ekaa wiihkaa ehpimi-ishiwepahsinok ahpan​iko kaa'oshi'intwaa pemaatisiwaatc. Mii 'owe maawac ekiihkihcimashkawentaakwahk. 19 Nihswaa (3) 'iwe kii'ishitaahtaashkihse 'i kihciootena, kii'nihshiwanaatanoon itahsh kahkina ootenawan kahkina kaa-ayayaakin tipencikewinink ahkiink. Shikwa Kishemanitoo okii'maamihkawinotaan Paapilan (Babylon), i'iwe kaakihci-inentaakwaninik ootena. Maano okii'mina'aan i'iweni shoominaapo ominihkwaakanink cionciminihkwenitc, mii​'iwe eshitipa'amawaatc okihcinishkaatisiwin e'aapacihtootc. 20 Kahkina minihsan inkoci weti kii'ishaamakanoon, kaawiin inkoci waciin kii'naakwahsinoonan. 21 Kaye ehsehsekahk kii'ishipapaa pankihshinook kihcimihkwamiik e'mamaantitowaatc, aaninta piinihsh ninkotwaahk kii'ahpiihtinikwaniwak pehpeshik kiishikonk ehpionci pankihshinowaatc ekii'miihkoshkawaawaatc i'i pemaatisinitc. Aanciko okii'mamacikiishwaanaawaan Kishemanitoon ini onci ehsehsekaninik, aaniihsh wiinke kiihkihciocaanimentaakwan o'o kakwaatakihtoowin.

Okihkentamooshiwewin 17

1 Kiihpitakohshin peshik ikiweniwak kaaniishwaahciwaatc (7) encalak kaa-ayaawaatc kihcionaakanan niishwaahso, ehpikanooshitc a'a encal: "Piishaan o'omaa, kiwii'waapanta'in keishitipaahkonikaniwitc a'a pihshikwaacihkwe misiwe kehkencikaniwitc, amii 'awe ootena pehsho kaaishiayaak niipiwa' kaaishisasiipiiwank. 2 Iki kihciokimaak ahkiini kaatipentamowaatc okii'wiicipihshikwaatisiimaawaan ini ihkwewan. Ikiweniwak itahsh ahkiink kaapimaatisiwaatc okiihkiiwashkwepiishkaakonaawaa opihshikwaatisiwinini, ekii'minihkwaatamowaatc, mii 'iwe e'inentaakwaninik opihshikwaatisiwinini ini ihkwewan ehshoominaapowaninik." 3 Ninkii'wiiciiwimik itahsh ini Kishemanitoo otAhcaahkwan, pikwatahkamik itahsh ekii'ishiwishitc a'a encal. Mii 'imaa ninkii'waapamaa ihkwe ehtehsapaanaatc e'miskwatowenitc pikwaciaya'aawihshan, misiwe wiiyawiniink e'ayaanik maciwiinsowinan eshinihshipaahpinotawintc Kishemanitoo. A'a tahsh pikwaciaya'aawihsh kii'niishwaahcininiwan (7) ohtikwaanan, kii'mitaahciwa' kaye oteshkana'. 4 A'a tahsh ihkwe okiihkikishkaan e'mahkatemiskwekaninik, kaye wiinke e'miskwekaninik. Okii'waaweshi'owaaken kaye osaawishooniyaan kaye kaa-aahkwakinsonitc ahsinii' kaye miikihsa'. Okiihtahkonaan itahsh i'i osaawishooniyaawi minihkwaakan, kahkina e'mooshkinek kaakakwaanihsakentaakwaninikin kaye kaawiinentaakwaninikin. Amiiwan​ini opihshikwaacihcikewinink kaaonciimakahkin. 5 Oskahtikonk itahsh wiinsowin kii'oshipii'ikaateni, kaakiihkaacikaatenik cimanaakihkencikaatenik, mii​'owe kaaishihsininik: "Paapilan (Babylon) kaakihci-inentaakwahk ootena, mii 'awe kahkina kaaomaamaamikotc ini pihshikwaacihkwe' kaye kaakakwaanihsakihcikenitc ahkiink." 6 Shikwa ninkii'waapamaa 'a ihkwe ehkiiwashkwepiishkaakotc omiskwiini ini okwayahkwaatisiima' Kishemanitoo kaye omiskwiini iniweniwa' kaakii'oncinihsimintc ekiihkapewiiciiwaawaatc Ciisahsoon. Wiinke ninkiihkihcimaamahkaatentam ahpii kaawaapamak. 7 Ninkiihkanoonik itahsh a'a encal: "Aaniihshwiin wencikihcimaamahkaatentaman?" ninkii'ik. "Kikawiintamawin enentaakositc a'a ihkwe, ini kaye kaapimiwanaanikotc pikwaciaya'aawihshan, miiwan​ini kaaniishwaahcininikin (7) ohtikwaanini kaye kaamitaahcinitc oteshkana'. Kiihkaacikaate 'iwe cinihsitohtaakwahsinok, payesh e'wiintek cikihkencikaatek. 8 'Awe aya'aawihsh kaakii'waapamatc, aapitink kii'ayaa, kaawiin tahsh noonkom ayaahsii. Miinawaa 'imaa tapioncimoohkishkaa kaaishiwiimpahkamikaanik i'iwe kaamishahkiiyaahsinok. Tani-ishaa tahsh i'imaa keshinihshiwanaaci'intc. Iki tahsh 'imaa ahkiink kaa-ayaawaatc okamaamahkaasinawaawaan ini aya'aawihshan. Amiiwak ihsa iki owiinsowiniwaan kaakii'oshipii'ikaatehsininikin i'imaa masina'ikanink kaaishioshipii'ontwaa ikiweniwak tepwe kaa-ayaawaatc pimaatisiwin, cipwaa onahcikaatek o'o ahki ekii'oshipii'ikaatek i'i masina'ikan. A'awe tahsh pikwaciaya'aawihsh aapitink kii'ayaa. Kaawiin noonkom keyaapi ayaahsii. Miinawaa tahsh inkotink taoncinaakosi. 9 "Antawentaakosi awiya ciayaatc kihkentamaawin kaye nihsitohtamowin. Ini niishwaahso (7) ohtikwaanan a'a pikwaciaya'aawihsh, amiiwan​ini kaaniishwaahcinkin kaapihkwatinaakin mii 'imaa ihkwe eshitehsapitc. Inentaakwaniniwan kaye kaaniishwaahciwaatc kihciokimaak. 10 Naanan oko kihciokimaak aasha kii'nihshiwanaatisiwak. A'ahsh peshik kotak noonkom okimaawi, miinawaa tahsh a'a peshik kaa mahshi piayaahsii. Miihsh ahpii naakositc acina piko ta-ayaa. 11 A'awehsh pikwaciaya'aawihsh aapitink kaakii'ayaatc, noonkom itahsh ehpimaatisihsik, mii 'awe nihshwaahso (8) kaainakincikaasotc kihciokimaa. Owiiciiwikoo' ini kaaniishwaahcinitc (7) kihciokimaa', miitahsh i'imaa nihshiwanaatisiwinink ci-ishaatc. 12 "Ini tahsh kaamitaahcinitc oteshkana' kaakii'waapamimatc, miiwak mitaahso kihciokimaak ekaa mahshi e'maaciiokimaawihsikwaa. Paanimaa tahsh tamiinaawak kashki'ewisiwin peshiko tipa'ikan ciwiiciokimaawimaawaatc ini pikwaciaya'aawihshan. 13 Peshik ehta inentamowin otayaanaawaa. Okashki'ewisiwiniwaa kaye omashkawentaakosiwiniwaan kahkina opakitinamawaawaan citipentaminitc ini pikwaciaya'aawihshan. 14 Maamaw okamiikaanaawaan ini Maanahcaanihshenhsan. 'Awe tahsh Maanahcaanihshenhs okashaakooci'aa' o'o kihciokimaa'. Aaniihsh wiin otipenimaa' kahkina kaatipencikenitc, kahkina kaye otookimaahkantawaa' kihciokimaa'. Ini tahsh oshaakoocihtwaawinink kewiiciiwikotc, mii​hsa 'iweniwa' kaakii'antomaatc, kaaonaapamaatc, kaakapewiiciiwikotc kaye." 15 Miinawaa tahsh 'owe ninkii'ik a'a encal: "Ini siipiiwan kaakii'waapantaman i'imaa kaa-apiihtank pihshikwaacihkwe, miiwak​iki pemaatisiwaatc pepahkaan kaaonciiwaatc kaye kaaoncitipentaakosiwaatc, pepahkaan kaye kaatahswewaanakinaakosiwaatc, pepahkaan kaye kaaishikiishwewaatc. 16 A'a tahsh pikwaciaya'aawihsh kaakii'waapamatc, i'i kaye kaamitaahcinitc oteshkana', oko kahkina okashiinkenimaawaan ini pihshikwaacihkwewan. Owiihcaakiotaahpinamawaawaan kahkina ini kaa-ayaanitc, miitahsh kaye okanakanaawaan kekoon ekikishkansinik. Okamiicinaawaa tahsh kaye owiiyaahsini. Wiinke hsa ko okacaakiswaawaan ishkotenk. 17 Kishemanitoo aaniihsh okii'miinaa' 'iwe ci-ishite'enitc, mayaa piko kaainentank citootaminitc, cipeshikohtoonitc. Shikwa oko kaamitaahciwaatc okamiinaawaan okashki'ewisiwiniwaan ini pikwaciaya'aawihshan, mii piinihsh wawiinke cinaakwaninik ehtepwemakaninikin ini Kishemanitoo otihkitowinan. 18 "A'awe ihkwe kaakii'waapamatc, mii 'iweni kihciootena kaatipenimikowaatc kihciokimaak i'imaa ahkiink kaa-ayaawaatc."

Okihkentamooshiwewin 18

1 Miitahsh miinawaa kotak ninkii'waapamaa encal ehpioncinaashishkaatc kihcikiishikonk, tepwe e'ayaatc tipencikewin. Miitahsh kaa-ahpiihciwaahsesitc a'a encal kii'onciwaahseyaa 'imaa ahkiink. 2 Miitahsh enikohk kiihshaakowe ekii'ihkitotc: "Aasha nihshiwanaatan! nihshiwanaatan kaakihci-inentaakwahk ootena Paapilan (Babylon). Miihsh i'imaa ishiotaawiniwak maciahcaahkwak kaye kaawiinisiwaatc ahcaahkwak, kaye kahkina pinehshiinshak i'imaa ayaawak tino kaawiinentaakosiwaatc kaye kaaminwentaakosihsikwaa. 3 Kahkina pemaatisiwaatc pepahkaanonk kaaonciiwaatc okii'minihkwaataanaawaa kaamashkawaakamininik oshoominaapoomini, mii​hsa 'iweni opihshikwaaci​mihsawentamowinini. Iki kihciokimaak i'imaa ahkiink kaa-ayaawaatc okii'wiici​pihshikwaatisiintaanaawaa 'iwe kihciootena. Otataawek itahsh kii'onciwenootisiwak, aaniihsh kii'onsaamiinatinini kaaoncina'entamo'itisonaaniwank i'imaa ootenaank." 4 Ninkii'noontaan itahsh miinawaa kotak inwewin kihcikiishikonk e'oncinoontaakwahk: "Pioncimaacaak, nimpimaatisiimak! Pioncimaacaak i'imaa kihciootenaank! Keko omacihcikewinink ishiwiitoohkaasohkek, cikakwaatakihtoohsiwek ehkakwaataki'ikotc! 5 Aaniihsh kii'ani-ishpahteniwan ini omacihcikewinan piinihsh e'aniocihcihsininikin kihcikiishikonk. Kishemanitoo omihkawinotaanan kahkina kekoon kaakiihpi-ishiwanitootaminitc. 6 Mayaa kaahtootawinek a'a ootena kikakiiwetipa'amawaawaa. Niishwaa (2) minihk tootawihk kahkina kekoon 'iwe kaakii'ishihciketc. I'iwe minihkwaakan kaakii'ishimina'inek, kekiinawaa niishwaa kikakiiwemina'aawaa ciminihkwetc kakwaataki'ikoowin. 7 I'iwe minihk kaakihci-inakintisotc ehkashkihtamaasotc wenootisiwin kaakii'mihci na'entami'itisotc, mii 'i minihk kihcikakwaatakihtoowin, piikwentamowin kaye, tipa'amawihk! Aaniihsh mii 'iwe inenintiso: 'Okimaahkwenk nintinap. Kaawiin niin ninkiiwaacihkwewihsii. Kaawiin wiihkaa ninkawaapantansiin piikwentamowin.' 8 Mii 'iwe onci kaaihkitotc, peshiko kiishik ehta ishihsek kahkina okaotihsikonan ono kakwaatakihtoowinan: nipowin, piikwentamowin, ehkawaskatenaaniwank. Wawiinkehsh taoncicaakiso ishkotenk, aaniihsh mashkawisii kaaTipenciketc Kishemanitoo kaaonaahkonaatc ini ihkwewan." 9 Iki tahsh kihciokimaak ahkiink kaa-ayaawaatc, kaakii'wiiciiwaawaatc opihshikwaatisiwininiink kaye ona'entami'itisowininiink, tamawiwak, tamoohkwentamook, ahpii waapantamowaatc e'akwaapahtek ehsahkitek i'i kihciootena. 10 Waahsa ko ehkotepinaakwahk taniipawiwak ehkohtamowaatc okakwaatakihtoowinini kewiinawaa citootawintwaa. Miihsh ehkitowaatc: "Ooy! Kakwaanihsakentaakwan! O'o kaamashkawentaakwahk kihciootena Paapilan! Peshikotipa'ikan ehta ishihse, mii aasha kakwaatakihtoowin ehtipa'amaakooyan!" otitaanaawaa 'i ootena. 11 Kewiinawaa tamawiwak otataawek ahkiink kaa-ayaawaatc, tamoohkwentamook. Kaawiin aaniihsh awiyan keyaapi ayaahsiiwan ciataamikowaatc. 12 Kaawiin awiyan ta-ataawehsiiwan osaawishooniyaan, kaye waapishkishooniyaan, kaa-aahkwakinsonitc ahsinii' kaye miikihsa' kaye e'onishihshininik waapishkiikin, kaye e'mahkatemiskwaak ishiikin kaye senipaawekin, kaye pakahkimiskwekin, kaye kahkina kaaonishihshinkin mayakaahtikoon kahkina kaye kekoon misiwekan wiipitink kaaoncioshihcikaatek, kaye e'aahkwakintek mihtikonk e'oncioshihcikaatek, kaye e'osaawaapihkowankin kaye ehpiiwaapihkowankin kaye shooshkwahsiniik, 13 kaye wiihkenhsh sinaman (cinnamon) kaaicikaatek takonikan, kaye ahpancikanan, kaye wiinkimaahsikan, kaye pikiw minaakwa'on mar (myrrh) kaaishinihkaatek, kaye 'i minaahsikan parenkinsenhs (frankincense) kaaishinihkaatek. Kaawiin kaye shoominaapo, kaye pimite, kaye ehpiihsipoonintc pahkweshikan, kaye pahkweshikanikihtikaan, kaye awahkaanak, maanahcaanihshak, mihtatimook, tihtipitaapaanaahkwak, kaye kaa-awahkaasowaatc anohkii'aakanak, ampooshke kaye ininiwak opimaatisiwiniwaan. Ono kahkina kaawiin keyaapi tatashiataawaakaaniwansinoonan. 14 Miinawaahsh otataawek otinaawaan ini kihciootenawan: "Aasha ahpan kikii'nakanikonan ini kaaonishihshinkin kaakii'mihsawentaman kaawii'maawacihtooyampan, kaye kahkina kekoonan kaa-aahkwakintekin kaye kaaminonaakwahkin. Kaawiin miina wiihkaa kikamihkansiinan." 15 Iki otataawaakek miiwak okoweniwak i'imaa kaakii'onciwenootisiwaatc i'i ootena, waahsa taniipawiwak e'ahpiihcikohtamowaatc ekaa kewiinawaa citakokakwaatakihtoohsikwaa. Takakwaatakentamowak, tamoohkwentamowak 16 e'ihkitowaatc: "Ooy! Kakwaanihsakentaakwan i'iwe kaaishiwepisitc a'a kihciootena! 'Awe kaakii'ishikikishkiketc i'iwe kaaonishihshink waapishkiikin kaye e'mahkatemiskwaanik ishiikin kaye pakahkimiskwekin, kaakii'waweshi'owaaketc osaawishooniyaan kaye e'aahkwakinsonitc ahsinii' kaye miikihsa'. 17 - 18 Peshikotipa'ikan ehta ishihse e'nihshiwanaataninik kahkina owenootisiwin." Kahkina tahsh naapihkwaaniokimaak kaye kaapoosiwaatc, kaye pimaahshiwininiwak, kaye minihk i'imaa kaakiihkashkihcikewaatc kihcikamiink, waahsa kii'niipawiwak ehkanawaapantamowaatc i'iwe e'akwaapahtek ehsahkitek i'i ootena, kaye ehshaakowewaatc: "Kaawiin wiihkaa kii'ishinaakwahsinoon ootena kaakii'ahpiihci onishihshink o'owe ootena!" 19 Kiihpihtaanohkwaane'otisowak i'i mihtaawank kaa-ahpiihcimaanentamowaatc, ekiihkihcimawiwaatc ekiihkakwaatakihtaakosiwaatc. "Ooy!" ihkitowak, "Kakwaanihsakentaakwan i'i kihciootena kaaishiwepahk. Kahkina kihcikamiink ehpimiayaanikin onaapihkwaaniwaan kii'onciwenootisiwak i'imaa ehpiihciwenootahk i'i ootena. Peshikotipa'ikan ehta kii'ishihse kahkina kekoon ekii'nihshiwanaacihcikaatek kaakii'ayaak i'imaa ootenaank." 20 Minwentan kiin kihcikiishik! Kaye kiinawaa Kishemanitoo kaatipeniminek kaye otishinisha'waakana' kaye otipaacimook kaakanootamawek, aaniihsh aasha Kishemanitoo okiihkiiwetipa'amawaataan i'iwe ootena kaakiihtootaakoyek! 21 Miitahsh peshik kaamashkawentaakositc encal okii'otaahpinaan ahsiniin taapishkoo piihsipoocikanahsiniin enikohkwaapihkisinitc, kihcikamiink itahsh opahkopiiwepinaan, o'owe e'ihkitotc: "Mii 'iwe keishiwepinikaatek i'i kihciootena Paapilan. Kaawiin miinawaa wiihkaa tamihkikaatehsinoon. 22 Kiin kihciootena! I'imaa kaaishiayaayan kaawiin miina wiihkaa tanoontaakosihsiiwak iki kaamatweyaapiikipicikewaatc kaye onikamook. Pootaacikanenhs kaye kihcipootaacikan kaanoontaakohtoowaatc kaawiin miinawaa wiihkaa tanoontaakosihsiiwak. Kaawiin miinawaa wiihkaa tamihkawaahsiiwak kaanihtaaoshihcikewaatc, aaniin iko kekoon kaakiihpianohkaatamowaatc. Kaawiin miinawaa wiihkaa okatashinoontansiinaawaa enihtaakwaninik ehkishipaashkaanitc piihsipoocikanahsiniin. 23 Kaawiin kaye wiihkaa tanaakwahsinoon waahsahkonencikan ciwaahseyaak i'imaa kaaishiayaayan. Kaawiin miinawaa tanoontaakwahsinoon ciciihkahkamikisiwaatc e'wiikihtoowaatc inini kaye ihkwe. Kitataawewininiimak nawac kii'niikaani kihciokimaawiwak ahpiihc kahkina otataawek ahkiink kaa-ayaawaatc. Kaye kimacimamaantaawihcikewin kikii'onci​wayeshi'aak kahkina kaatahswewaanakisiwaatc ininiwak 'omaa ahkiink!" kii'ihkito a'a encal. 24 Mii 'iwe kii'ishinihshiwanaatan kihciootena Paapilan onci 'iwe ekii'mihkikaatek i'imaa omiskwiini Kishemanitoo otipaacimowininiima' kaye okwayahkwaatisiima', kaye omiskwiini kahkina awiya kaakiihpinihsintc ahkiink.

Okihkentamooshiwewin 19

1 Onoweniwan itahsh kaa'ishkwaahsekin, ninkii'noontaan taapishkoo ehkishiiwewaatc ehpaahtiinowaatc pemaatisiwaatc ehtanihtaakosiwaatc kihcikiishikonk: "Aalilooya! Pimaaci'iwewin, kihci-inentaakosiwin, kashki'ewisiwin otayaan kiKishemanitoominaan! 2 Tepwewaniniwan kaye kwayahkwaniniwan ini otinaahkonikewinan. Aaniihsh okii'ishionaahkonaan ini kihcipihshikwaacihkwewan, opihshikwaatisiwininiink kaakii'ishinihshiwanaaci'aanitc ahkiink kaa-ayaanitc. Kishemanitoo okiihtipa'amawaan ini pihshikwaacihkwewan ekii'nihsaanitc ini otanohkii'aakana'." 3 Miinawaa tahsh kiihkihcishaakowewak weti kihcikiishikonk: "Aalilooya! Mooshak ahpane taishpaapahte ehcaakitek kihciootena!" e'ihkitowaatc. 4 Kii'acicipani'owak itahsh ikiweniwak niishtanahshiniiwin (24) kaaniikaanakinsowaatc kaye iki niiwin opimaatisiik, e'ishpenimaawaatc Kishemanitoon i'imaa kaanamatapinitc kihciapiwinink. Shikwa kii'ihkitowak: "Emen! Aalilooya!" 5 Inwewin itahsh kihciapiwinink kii'oncinoontaakwan e'ihkitoomakahk: "Nanaahkomihk kiKishemanitoominaan, kahkina kiinawaa otanohkii'aakana' kaye kahkina awiya kaakohtaanenimek, kaa-akaahsentaakosiyek kaye kaakihci-inentaakosiyek, nanaahkomihk!" 6 Miitahsh ninkii'noontawaak taapishkoo e'onsaamiinowaatc awiyak, kaye taapishkoo e'matweciwank kihcipaawihtik, kaye taapishkoo kaakihcipinehsiiwank e'inwek, maamaw e'ihkitowaatc: "Aalilooya! Aasha noonkom maaciikihciokimaawi 'awe kaaTipenciketc, kiKishemanitoominaan kaaMaamawiMashkawentaakositc! 7 Minwentantaa! Kihciminwentantaa! Kihci-inakimaataa! Aasha tipihse cikihciwiikihtootc a'a Maanahcaanihshenhs. Aasha kii'waweshi'itisowan ini kaawii'wiitikemaatc. 8 'Awe ihkwe kii'miinaa cikikishkank e'onishihshink waapishkiikin e'waahsitek, ehpehkahk." 'Iwe kaaonishihshink waapishkiikin mii 'oweni kaaicikaatenik okwayahkohcikewinini Kishemanitoo okwayahkwaatisiima'. 9 O'ohsh ninkii'ik a'a encal: "Oshipii'an: Shawentaakosiwak iki kaawiihkwamintwaa 'imaa owiikihtoowi wiihkwantiwinink a'a Maanahcaanihshenhs." Miihsh 'owe miinawaa ninkii'ik: "Miiwan​ono otihkitowinan Kishemanitoo kaatepwemakaninikin." 10 Miitahsh ninkii'acicipani'owaan ositink a'a encal ewii'ishpenimak. Miihsh i'i ninkiihkanoonik: "Keko 'i tootanken! Niin kiwiitanohkiimaakan kaye owiitanohkiimaakaniwaan kiwiiciotepwehtamook, miiwak​oko kaakihciwinamowaatc Ciisahs otepwewi tipaacimowin. Kishemanitoo ehta ishpenim!" Aaniihsh otipaacimowin Ciisahs mii 'iwe eshikiikitowaatc kahkina kaakanootamawaawaatc Kishemanitoon. 11 Ninkii'waapantaan itahsh kihcikiishik ekiihpaahkintenikaatek. Mii weti kaa'ayaatc kaawaapishkisitc mihtatim. A'awehsh kaatehsapitc Okwayahkwentaakosii kaye kaaTepwetc ishinihkaanaa. Kwayahkwaatisiwinink ishionahshowe kaye ishiantamiikaaso. 12 Oshkiinshikoon taapishkoo kii'waahsiteniwan kaa-ahpiihciwaahsahkonek ishkote, kaye ohtikwaanink ekii'ayaanikin niipiwa' kihciokimaawaanohkwaanan, ekii'ishipii'ikaatenik owiinsowin pahkaan awiya kaakihkentansik, piko wiinehta. 13 I'iweni kaakiihkikishkank miskwiink kiihkintaanikaateni. Miihsh i'i ishinihkaanaa: "OtIhkitowin Kishemanitoo." 14 Iki tahsh kihcikiishikonk kaa-ayaawaatc shimaakanihshak okii'ayohkowiiciiwaawaan ekiihpiminisha'waawaatc, ehpitehsapiwaatc e'waapishkisinitc mihtatimoo'. Okikishkaanaawaa waapishkiikin e'waapishkaak ehpehkahk. 15 I'imaahsh otoonink a'awe kaapiminisha'ontc kii'onciimakanini ehkaahshaanik kihcimoohkomaan, mii 'iwe kaawii'oncishaakooci'aatc kahkina pemaatisinitc kaatahswewaanakisinitc. Okaishitipenimaa' itahsh ehpiiwaapihkowaninik osahka'onaahtik ketahkonank. Okatashi siiskoopiikishkawaa' i'i shoomina' entashi​shoominaapohkaakaaniwinitc, mii 'iwe enentaakwaninik okihcinishkaatisiwin a'a Kishemanitoo kaaMaamawiMashkawentaakositc. 16 'Awe tahsh kaatehsapitc okikishkikanink kaye opwaamink kii'oshipii'ikaateni 'owe wiinsowin: "Okihciokimaamiwaan kihciokimaak kaye kaaTipenimaatc otipencike'." 17 Ninkii'waapamaa tahsh encal e'niipawitc kiisihsonk. Enikohk ehkishiiwetc oshaakowaanaa' kahkina pinehshiinsha' kaapapaamihsenitc newacikiishikonk: "Piantamaamawi'itik, Kishemanitoo takihciwiihkwanke!" okii'inaa'. 18 "Piantamiicik owiiyaahsiwaan kihciokimaak, shimaakanihshiiwikimaak, shimaakanihshak. Kaye owiiyaahsiwaan mihtatimook, iki kaye kaatehsapiwaatc, kaye kahkina pemaatisiwaatc, iki kaatipenimintwaa kaye kaatipenintisowaatc, iki kaakihci-inentaakosiwaatc kaye kaa-akaahsentaakosiwaatc, owiiyaahsiwaan kahkina piantamiicik!" okii'inaa'. 19 Ninkii'waapamaak a'a pikwaciaya'aawihsh kaye kaakihciokimaawiwaatc ahkiink kaye oshiimaakanihshiimiwaa' kahkina e'maawaci'itinitc, ewii'antamiikaanaawaatc ini kaapimitehsapinitc kaye oshiimakanihshiimini kaaoohkowiiciiwikonitc. 20 A'ahsh pikwaciaya'aawihsh kii'otaahpinaa ahshic kaye ini aya'aan kaakiihkanootamaakotc kaakiiwanimonitc, miiwan​ini kaakii'mamaantawihcikenitc e'waapantank. Mii wa'a omamaantawihcikewinink ekii'onciwayeshi'aatc i'iweniwa' kaakii'oncikihkinawaacipii'ikaniwinitc pikwaciaya'aawihsh okihkinawaacihcikan, iniweniwa' omasinihkocikan kaakii'ociciinkwanapiihtaminitc. A'a tahsh pikwaciaya'aawihsh kaye ini kaakiihkanootamaakotc, minciniish ehpimaatisiwaatc i'imaa kii'ahpakinaawak ishkotewisaaka'ikaniink, i'imaa ehtakocaakisotc a'a ahsin kaaninkisotc e'wiihsakaapahsowetc. 21 Oshimaakanihshiimiwaa' itahsh okii'nihsikoni 'iwe omoohkomaan otoonink kaaonciimakaninik a'awe kaatehsapitc mihtatimonk. Miihsh kahkina pinehshiinshak wawiinke kiihtewiihsiniwak e'miiciwaatc owiiyaahsini.

Okihkentamooshiwewin 20

1 Miitahsh ninkii'waapamaa encal kihcikiishikonk ehpioncinaashahkiitc, ehtahkonank aapaapihka'ikan i'iwe kaaishiwiimpahkamikaak kaamishahkiiyaahsinok kekipa'ikaakaaniwank, kaye kihcisakaapaan ehtahkonank. 2 Okii'otihtinaan ini kihciohkaatiikinepikoon, miiwan​ini mewisha kaakii'onciinitc macikinepikohshan, mii​'awe maciaya'aa kaye Setan (Satan) kaatinowitc. Miiwan​ini okii'mamaancikwahpinaan 'awe encal, mitaahswaahk tahso ahki minihk cimamaancikwahpisonitc. 3 Okiihpiinciwepinaan i'imaa kaaishiwiimpahkamikaak. Amiihsh i'i okiihkipa'aan, okiihkipiakoshkiwahsaan, ekaa miinawaa wiihkaa cikashki'ohsinik cisaaka'ansinik, ciwayeshi'aahsinik ini kaapepahkaanwewaanakisinitc ahkiink, paanimaa mitaahswaahk tahso ahki kiikishipiayaak. Miitahsh i'i ahpii ciaapa'ontc acina. 4 Miitahsh ninkii'waapantaanan kihciapiwinan. Iki tahsh kaatehsapiwaatc kii'miinaawak cionaahkonikewaatc. Miinawaa kaye ninkii'waapamimaa' otahcaahkowaa' ikiweniwak kaakiihkiishkikweta'ontwaa, oko kaakii'oncinihsintwaa ekiihtipaacimaawaatc Ciisahsoon, ekii'wiintamaakewaatc kaye Kishemanitoon otihkitowinini. Kaawiin okii'ociciinkwaniihtawaahsiwaawaan ini pikwaciaya'aawihshan kaye omanitoohkewihkocikanini. Kaawiin kaye i'imaa kii'oncikihkinawaacipii'waahsiiwak oskahtikowaank kaye oninciiwaank citipenimikowaahpan. Okoweniwak miinawaa kiihpimaatisiwak, kaye mitaahswaahk tahso ahki okii'wiicitipencikemaawaan ini Christan. 5 Ikihsh wiin kotak kaanipowaatc, kaa mahshi kiihkiiwepimaatisihsiiwak, paanimaa ko kii-ishkwaahsek mitaahswaahk tahso ahki. Okoweniwak itahsh aasha kaakiiwepimaatisiwaatc, mii​'owe nihtam cikiiwepimaatisinaaniwank. 6 Shawentaakosiwak oko i'imaa kaa-ahshitakimintwaa nihtam kiiwepimaatisiwinink. Inakimaawak ehtipenimikowaatc Kishemanitoon. Amiiwak​oko niishwaa nipowin kaawiin okatipenimikohsiinaawaa. Kihcianami'ewikimaak itahsh okainanohkii'ikowaan Kishemanitoon kaye Christan. Mitaahswaahk tahso ahki okawiicitipencikemaawaan Christan. 7 Ahpii tahsh mitaahswaahk tahso ahki kepoonihsenik, miitahsh i'i Setan (Satan) ta-aapa'ikaniwi okipa'okoowinink onci. 8 Tapisaaka'am, tamaacaa ciwayeshi'aatc ini pemaatisinitc kahkina kaatahswewaanakisinitc misiwe ahkiink kaa-ayaanitc, miiwa'​i'i Kwaak (Gog), Mekwaak (Magog) kaainimintc. A'awe Setan okamaamawi'aa' kahkina cimiikaasonitc entahshinitc onoweniwa', taapishkoo entahswaawankaak ciikew mihtaawank kaaishinaakwahk, mii​'iwe keishinaakosiwaatc. 9 Kii'animooshkinenaakosiwak misiwehkamik, kaye okii'waahkaashkaanaawaa kaaishikapehshinitc i'i Kishemanitoon opimaatisiimini, 'iweni tahsh kaye ootena kaasaakihtoonitc. Ishkote tahsh kihcikiishikonk kiihpioncihse, amiitahsh Setan omiikaasowininiima' okiihcaakaahkisokoonaawaa. 10 Miitahsh wa'a maciaya'aa kaakii'wayeshi'aatc 'imaa kii'ishiwepinaa saaka'ikaniink, ishkote eshiayaanik kaye kaapiskanenitc ahsiniin kaawiihsakaapahsowenitc. Mii​'imaa aasha kaakiihpiinciwepinintwaa pikwaciaya'aawihsh kaye ini kaakiihkanootamaakotc kaakii'wayeshi'iweshkinitc. Mii​'imaa takakwaataki'aawak ehkiishikaninik kaye ehtipihkaninik, mii ko ahpan​iko pishihshik. 11 Miinawaa tahsh ninkii'waapantaan e'waapishkaak kihciapiwin e'mihshaak. Kaye ninkii'waapamaa 'awe kaatehsapitc. Onaakosiwinink itahsh kii'onci oshimoomakan ahki, i'i kaye kiishik. Kaawiinhsh miinawaa wiihkaa kii'naakwahsinoonan. 12 Ninkii'waapamaak onipook kahkina e'niipawiwaatc. Kaakihci-inentaakosiwaatc kaye kaa-akaahsentaakosiwaatc kahkina okii'oncishkawikaapawiihtaanaawaa 'i kihciapiwin. Kiihpaahkiikinikaatewan tahsh masina'ikanan. Kaye kotak miinawaa masina'ikan kiihpaahkiikinikaate. Mii​'owe masina'ikan kaaishioshipii'ontwaa tepwe kaa-ayaawaatc pimaatisiwin. Onipook itahsh kii'onci tipaahkonaawak i'iwe onci kaaoshipii'ikaatenikin masina'ikanihkaank, mii​'imaa eshiahtenikin otishihcikewiniwaan. 13 A'a kihcikam okiihpakitinaa' i'i kaaniponitc i'imaa kaa-ayaanitc miinawaa cinaakosinitc. Kaye nipowin kaye Hetiis (Hades) okiihpakitinaawaa' i'i onipoo' 'imaa kaa-ayaanitc. Miitahsh kahkina kaaishionahshowaanintwaa kaaishinaakwaninikin otishihcikewiniwaan. 14 Miihsh o'owe nipowin i'i kaye Hetiis (Hades) kii'ishiwepinikaatewan kaaishkotewank saaka'ikaniink. Amii​'owe tahsh niishwaa (2) nipowin, kaaishkotewank saaka'ikan. 15 Awenen itahsh iko ekaa e'oshipii'waahsiwintc 'imaa masina'ikanink iki tepwe kaapimaatisiwaatc kaaishipii'ontwaa, mii 'imaa kii'ishiwepinaa ishkotewisaaka'ikaniink.

Okihkentamooshiwewin 21

1 Miinawaa tahsh ninkii'waapantaan oshkikihcikiishik i'i kaye oshkiahki. I'i tahsh nihtam kihcikiishik i'i kaye nihtam ahki kii'ishkwaahsewan, kihcikam kaye kaawiin keyaapi kii'ayaahsinoon. 2 Ninkii'waapantaan tahsh i'i ootena Kishemanitoo kaaishiayaatc, mii 'iwe oshki Ceroosalam (Jerusalem), ehpioncinaashishkaak kihcikiishikonk, Kishemanitoonk e'onciik. Kii'waweshihcikaate taapishkoo ihkwe eshiwaweshi'ohtawaatc onaapeman ewiihkihciwiitikemaatc. 3 Ninkii'noontaan itahsh ehkihci-inihtaakwahk kihciapiwinink ekii'oncikiikitotc awiya o'owe e'ihkitotc: "Otaawin Kishemanitoo ininiinaank ayaani. Amiitahsh okawiicitaamaa', kaye wiin iko okatipenimaa' ciotininiimitc. Wiin iko tipinawe Kishemanitoo okawiiciayaamaa', cioKishemanitoomikotc. 4 Okakaahsi'amawaa' kahkina oncikawaapiwin oshkiinshikoniink onci. Kaye nipowin kaawiin kekoon takihkentaakwahsinoon, kaawiin kaye takihkentaakwahsinoon piikwentamowin. Ampooshke mawiwin, wiihsakentamowin kaawiin ta-ayaamakahsinoonan. Aaniihsh ini nihtam kaakiihpimiayaakin aasha kiihpoonihsewan." 5 A'a tahsh kaanamatapitc kihciapiwinink kii'ihkito: "Inashke kahkina kekoon nintooshihtoon cioshkaya'iiwank." Miitahsh i'iwe kaa'ishitc: "Oshipii'an onoweniwan. Aaniihsh tepwemakanoon ono ihkitowinan, tepweyentaakwanoon kaye." 6 Miinawaa tahsh ninkii'ik: "Tipihse! Niin a'awe nihtam kaakii'ayaatc kaye ishkwaac keayaatc. Niin kaamaacihsek miinawaahsh kekiishihsek. Ninkamihcimiinaa kaanoontewii'minihkwetc cionciminihkwetc i'imaa e'moohkiciwanipiikowank ehpimaatisiishkaakemakahk i'i nipi. 7 Awiya piko keshaakooci'iwetc okatipentaanan ono kaawii'miinak: NinkaoKishemanitoomik, wiin tahsh kaye ninkaokosihsimaa. 8 Ikiweniwak itahsh wiin kaashaakote'ewaatc, kaatepweyentaakosihsikwaa, kaanihtaa kakwaanihsakihcikewaatc, iki kaye onihshiwek, opihshikwaatisiik, okosaapancikek, omanitoohkeshkak, kaye kahkina kaakakiinawishkiwaatc, mii 'imaa wiinawaa keayaawaatc, i'imaa saaka'ikaniink kaashicaakitek i'iwe ishkote kaye 'awe ahsin kaapiskanetc e'wiihsakaapahsowetc. Mii 'owe ishkwaac niishwaa nipowin." 9 Peshik itahsh ninkiihpinaasihkaak kaaniishwaahciwaatc (7) encalak niishwaahso kaa-ayaawaatc onaakanan, niishwaahso (7) e'mooshkinenikin kakwaatakihtoowinan, amiiwan​ono ishkwaac keniayaanikin. Ninkiihkanoonik 'awe encal: "Piishaan o'omaa," e'ishitc, "kikawaapanta'in a'a kaaoshkiwiitikemintc ihkwe, kaawii'wiitikemikotc ini Maanahcaanihshenhsan," kii'ihkito. 10 Ninkii'wiiciiwik Kishemanitoo otAhcaahkwan, i'imaa e'ishiwishitc a'a encal wakici​pihkwatinaank ehkihci-ishpatinaak. Ninkii'waapanta'ik Kishemanitoo otootenaam Ceroosalam (Jerusalem) 'imaa ehpinaashishkaak kihcikiishikonk Kishemanitoonk e'onciik, 11 Kishemanitoo owaahsesiwinink e'onciwaahsitenik. Kii'ishiwaahsaapihkite taapishkoo ahsin kaa-aahkwakinsotc, taapishkoo caaspar (jasper) ahsin wiinke kaashaapona'inaakositc. 12 Kii'waahkaamenikanihkante 'i ootena, wiinke e'mihshaak kaye e'ishpaak ahsiniiwi menikanaapihk, mitaahshiniishin (12) e'ayaamakahkin kihci-ishkwaanteman. Pehpeshik i'imaa ishkwaantemink kii'ayaawak encalak e'mitaahshiniishiwaatc. Pehpeshik wiinsowinan kii'oshipii'ikaatewan i'imaa ishkwaantemink, miiwan​ono owiinsowiniwaan mitaahshiniishin kaapepahkaanwewaanakisiwaatc Isriyal (Israel) ininiwak. 13 Ini tahsh kihci-ishkwaanteman kii'nenihsinoon (3) waapanonk inahke 'iwe ahsiniiwi menikanaapihk kii'nihsinoon kihci-ishkwaanteman, miinawaa shaawanonk kii'nihsinoon, miinawaa kaye kiiwetinonk kii'nihsinoon, miinawaa ninkaapii'anonk inahke kii'nihsinoon. 14 Shikwa kii'mitaahshiniishiwak ahsiniik imaa kaakii'ishipatahkitek i'i ahsiniiwi menikanaapihk. Pehpeshik itahsh i'imaa kii'oshipii'ikaateniwan owiinsowiniwaan kaamitaahshiniishinitc otishinisha'waakana' 'awe Maanahcaanihshenhs. 15 'Awe tahsh encal kaawiicikakitoomitc okii'ayaan e'osaawishooniyaawaninik tipa'ikanaahtik, citipa'ank i'i ootena, kaye e'ishkwaantemiwaninik kaye e'waahkaa-ayaanik ahsiniiwi menikanaapihk. 16 Niiwink ehkahkahkeyaak kii'inahkite 'iwe ootena, peshikwan e'ahkwaak kaye peshikwan e'ahpiihtateyaak. Otipa'ikanaahk okii'ishitipa'aan 'awe encal 'iwe ootena, mitaahshiniishin tahso mitaahswaahk (12,000) istetiya (stadia) kii'ahpiihcaa e'ahkwaak 'i ootena. Peshikwan kii'ahkwaa kaye peshikwan kii'ahpiihtateyaa kaye peshikwan kii'ahpiihtaa. 17 Miinawaa okiihtipa'aan i'i ahsiniiwi menikanaapihk. Miihsh i'iwe ninkotwaahk niimitanahshiniiwin (144) tahso peminihk kii'ahpiihtaa. Peshikwan inini kaaishinihtaatipa'iketc kii'ishitipa'ike a'a encal. 18 Kii'oncioshihcikaate i'i ahsiniiwi​menikanaapihk a'a caaspar (jasper) ahsin. I'iwehsh ootena wiinke mayaa osaawishooniyaawahsiniink kii'oncioshihcikaate. Taapishkoo wiinke ko ehshaaponaakwahk waahsehcikanaapihk inaapihkisi osaawishooniyaa. 19 Iki tahsh ahsiniik kaaishionaapihkihsink i'i ahsiniiwi​menikanaapihk, kii'ishi​waweshihcikaniwiwak caakayak tino kaaonishihshiwaatc ahsiniinhsak. A'awe tahsh nihtam kihciahsin caaspar kiihtinowi, miinawaa 'a peshik ehshaapo-oshaawashkonaakositc saahpayar (sapphire) ahsin kiihtinowi. Miinawaahsh peshik ehpepahkaani pehpehshaapihkisitc ahsin ekit (agate) ehtinowitc, mii nihsin (3). Miinawaa 'a niiwin kaainakincikaasotc shiinkopiink e'ishishaapwaahtenaakositc ahsin, emaralt (emerald) kiihtinowi. 20 Miinawaahsh a'a naanink enakincikaasotc aanikihs (onyx) kiihtinowi ahsin, e'ishipehpehshaapihkisitc e'miskositc, e'waapishkisitc kaye. Miinawaa ninkotwaahso e'inakincikaasotc kaarniiliyan (carnelian) kiihtinowi ahsin e'miskwaapihkisitc. Miinawaa niishwaahso e'inakincikaasotc karihsalait (chrysolite) kiihtinowi ahsin e'osaawinaakositc ehshaaponaakositc. Miinawaa nihshwaahso (8) e'inakincikaniwitc peral (beryl) kiihtinowi ahsin e'oshaawashkwaapihkisitc. Miinawaa shaankahso e'inakincikaasotc toohpaas (topaz) kiihtinowi ehshaapo-osaawinaakositc ahsin. Miinawaahsh mitaahso e'inakincikaasotc karihsahpares (chrysoprase) ehtinowitc ehshiinkopii​oshaawashkositc a'a ahsin. Miinawaahsh mitaahshipeshik e'inakincikaasotc 'a kihciahsin, oshaawashkwahsin torhkoyis (turquoise) kiihtinowi. Miinawaa mitaahshiniishin kaainakincikaasotc kihciahsin aamahtist (amethyst) kiihtinowi shoominaaponk e'ishinaakositc a'a ahsin. 21 Ini tahsh kaamitaahshiniishinkin (12) kihci-ishkwaanteman, mitaahswahshiniishin miikihsak kiihtinowanoon. Pehpeshik i'i ishkwaantem peshik miikihsink kii'oncioshihcikaate. Shikwa 'iwe miihkana 'imaa kaapimamok ootenaank, wiinke mayaa osaawishooniyaawahsin kii'oncioshihcikaate miihkana, taapishkoo ehshaaponaakwahk waahsenikanaapihk kii'inaapihkisi osaawishooniyaa. 22 Kaawiin tahsh ninkii'waapantansiin 'iweti kihcianami'ewikamik ciayaamakahk. KaaTipenciketc Kishemanitoo maamaw ehkihcimashkawentaakositc, kaye 'a Maanahcaanihshenhs, miiwak oko aawiwak ehkihcianami'ewikamikowank i'i ootena. 23 Kaawiin memwehc i'imaa ootena tanantawentaakosihsii kiisihs kaye tipihkikiisihs 'imaa ciwaahseyaak. Mii ehta 'imaa taonciwaahseyaa Kishemanitoo owahseyaawinink, kaye mii 'awe wiyaahsahkonencikaniwitc a'a Maanahcaanihshenhs 'imaa ootena. 24 Kaatahswewaanakisiwaatc ahkiink tapimohsewak 'imaa eshiwaahseyaak i'i ootena. Kaye kihciokimaak ahkiink kaa-ayaawaatc okapiintikatoonaawaa i'imaa otoonishihshiwentaakosiwiniwaa. 25 Ini tahsh kihci-ishkwaanteman mooshak tapaahkihsinoon kapekiishik. Kaawiin wiihkaa cikipa'ikaatehsinokin. Kaawiin aaniihsh wiihkaa i'imaa tatipihkahsinoon. 26 Tapiintikacikaateniwan i'imaa ootenaank otoonishihshiwentaakosiwiniwaa iki kaapepahkaanwewaanakisiwaatc pemaatisiwaatc kaye owenootisiwiniwaan. 27 Kaawiin tahsh kekoon tapiintikacikaatehsinoon 'iwe kaawiinentaakwahk, kaawiin kaye tapiintikehsii kaatootank i'i kaashiinkentaakwahk kaye kaakiiwanimotc. Iki ehta kaaoshipii'ikaasowaatc i'imaa omasina'ikanink a'a Maanahcaanihshenhs kaaishioshipii'ontwaa ahpane piko kepimaatisiwaatc, miiwak ehta kepiintikewaatc i'imaa ootenaank.

Okihkentamooshiwewin 22

1 Miinawaa ninkii'waapanta'ik a'a encal i'i siipi kaapimaatisiishkaakemakahk i'i nipi ehpiihciwaahshekamik taapishkoo waahsehcikanaapihk ehshaapona'inaakwahk ishinaakwan 'i siipi, ehpionciciwank i'imaa okihciapiwinink Kishemanitoo kaye 'a Maanahcaanihshenhs. 2 Naawaya'ii i'imaa ishiciwan ehpimamok miihkana 'imaa ootenaank. Eyiitawakaam kii'ishipatahkiso pimaatisiwini mihtik. A'ahsh mihtik kiihkiishishoominiwi entahsokiisihs, mitaahswahshiniishink entahsoahki. Ini aniipiihshan e'aniipiihshiwitc a'a shoominaahtik inaapatanoonan cionciminoayaa'intwaa kahkina kaapepahkaanwewaanakisiwaatc pemaatisiwaatc. 3 Shikwa kahkina kekoon kaamacakintank Kishemanitoo kaawiin wiihkaa 'imaa tamihkikaatehsinoon ootenaank. Okihciapiwiniwaa Kishemanitoo kaye 'a Maanahcaanihshenhs i'imaa ta-ayaani ootenaank. Kaye otanohkii'aakana' okakihci-inenimikoo'. 4 Okawaapamikoo' owatenkonk, kaye owiinsowin Kishemanitoo taoshipii'ikaateni oskahtikoniink otanohkii'aakana'. 5 Kaawiin miinawaa wiihkaa tatipihkahsinoon. Kaawiin kaye oka-antawentansiinaawaa waahsahkonencikan cionciwaahseyaak, kaawiin kaye kiisihs owaahsesiwin. Aaniihsh kaaTipencikenitc Kishemanitoon okawaahseshkaakowaan. Miitahsh iwe takihciokimaawiwak ahpane piko pishihshik citipencikewaatc. 6 Ninkii'ik itahsh a'a encal: "Ayaankwaamentaakwanoon kaye tepwewiniwanoon ono ihkitowinan. KaaTipenciketc Kishemanitoo kaamiinaatc otAhcaahkwan ini otipaacimowininiima' kaakanootamaakotc, mii 'awe kaapi-ishinisha'waatc otencaliman ciwaapanta'aanitc otanohkii'aakana' 'iwe weyiip keni-ishihsenik." 7 "Pisintan!" ihkito 'a Ciisahs. "Weyiip ninkapiishaa! Tashawentaakosi a'a kaakanawentank ono ihkitowinan Kishemanitoo kaaishikanootamawintc o'omaa masina'ikanink kaaishipii'ikaatenikin," ihkito. 8 Niin Cwaan ninkii'noontaanan kaye ninkii'waapantaanan kahkina ono. Ahpii kaa'ishkwaanoontamaan kaye kaa'ishkwaawaapantamaan ninkiihpatapipani' imaa eshisitekaapawitc ewiihkihci-inenimak a'a encal kaakii'waapanta'itc ono. 9 Ninkii'ik itahsh: "Keko 'i tootanken! Niin 'a peshik kiwiicianohkiimaakan kaye owiitanohkiimaakaniwaan iki kiicihkiweyak, miiwak iki Kishemanitoo otipaacimowininiima' kaakanootamaakotc, kaye kahkina awiya kaakanawentank ini ihkitowinan o'omaa masina'ikanink kaa-ayaakin. Kihci-inenim Kishemanitoo, mii ehta 'awe." 10 Kayehsh ninkii'ik a'a encal: "Keko kipa'anken ini ihkitowinan Kishemanitoo kaaishikanootamawintc o'omaa masina'ikanink kaa-ayaakin. Aaniihsh pehshonaakwan ono kahkina citipihsekin. 11 'Awe kaawiihkwayahkopimaatisihsik, maano keyaapi tatashimaci-ishiwepisi. A'ahsh kaye kaawiinentaakositc maano keyaapi tatashiwiinaatisi. A'ahsh kaakwayahkopimaatisitc taka kaawiin okapoonihtoohsiin cikwayahkopimaatisitc. 'Awehsh miina kaainakintisotc citipenimikotc Kishemanitoon, taka mii 'i keinakintisotc," ninkii'ik a'a encal. 12 "Nashke pisintan!" ihkito Ciisahs. "Weyiip ninkatakohshin," ihkito. "Ninkapikikitakohshin nintipa'amaakewinan. Entahsopeshikowaatc ninkamiinaak kaaishinaakwaninik otishihcikewin. 13 Niin a'a nihtam kaakii'ayaatc, kaye piinihsh ishkwaac keayaatc. Niin a'a kaakii'maacihsek kahkina miinawaa kekiishihsek," ihkito. 14 Tashawentaakosiwak iki kaakisiipiikinamowaatc okikishkikaniwaan. Tatepakentaakosiwak itahsh iki cinaasihkawaawaatc ini pimaatisiwini mihtikoon cionciwiihsiniwaatc, kaye i'imaa kaaishi-ishkwaantemiwaninik cioncipiintikewaatc i'imaa ootenaank. 15 Akwaciink itahsh ta-ayaawak iki anoociko eshiwepisiwaatc, kaye kaakosaapantamowaatc, kaapihshikwaatisiwaatc, kaanihshiwewaatc, kaye kaamanitoohkewaatc kekoon, kaye awenen iko kaasaakihtootc ehkiiwanimotc kaye ehkakiinawishkiayishihciketc. 16 "Niin Ciisahs ninkii'ishinisha'waa nintencalim citipaacimohtawinek ono aanti piko kaamaawaci'itiwaatc otepwehtamook. Niin 'imaa onihtaawiki'aakanink Tepit (David) nintoontahkaanes. Niin a'a kaakiihkaayaahsiketc waapanank," ihkito. 17 "Pitakohshinin!" ihkitowak Kishemanitoo otAhcaahkwan kaye 'a Wiikihtoowihkwe. Kaye kahkina kaanoontank a'a maano taihkito: "Pitakohshinin!" Kaye kiin aweneniwiyan iko kaanoontayaapaakweyan, ampe piishaan. Piko awiya inentank pisaan iko okaotaahpinaan kaapimaatisiishkaakemakahk nipi. 18 Niin Cwaan (John) nintayaankwaamimaak kahkina kaanoontamowaatc ono ihkitowinan Kishemanitoo kaaishikanootamawintc, o'omaa masina'ikanink kaa-ayaanikin: Kiishpin nankihtootc awiya kekoon ono ihkitowinan, kewiin Kishemanitoon okanankihtamaakoon otipa'amaakoowinink ini kotakihtoowinan omaa kaaoshipii'ikaatekin masina'ikanink. 19 Kiishpin kaye awiya piko keaciwinamokwen ono ihkitowinan ekaa cimisiweyaahsininik Kishemanitoo okanootamaakoowin omaa masina'ikanink kaa-ayaanik, okaotaahpinamaakoon Kishemanitoon kewiin kewiici'iwehpan imaa pimaatisiwini mihtikonk cionciamominehsik, kaye kewiici'iwehpan Kishemanitoo otootenaamink, omaa kaatanaatotekin masina'ikanink. 20 Awe kaatipaatotank ehtepwemakahkin onoweniwan kaye wiin ihkito: "Tepwe! Wiipa ninkapitakohshin!" Haw, mii 'iwe keishiwepahk! Pitakohshinin, Ciisahs kaaTipencikeyan! 21 Oshawencikewin kaaTipenciketc Ciisahs okawii'wiiciiwikonaawaa kahkina awiya. Emen.