The New Testament of our Lord and Saviour Jesus Christ

Matthew 1

1 Ia atsh mahsi g Jesus Christ jewed thahm k ab d amjedkamaj hegai t-kekelibad ha-kownalig mash hab chehgig David. Kush g Davidbad ab d amjedkamaj hegai mash d t-shohshon ahchim Tutuligo ch hab chehgig Abraham. In ant wo o'oha g ha-chechgig hegam mash d Jesus Christ shohshonbad. 2 Abraham atsh wa an alitht g Isaac. Tsh g Isaac an alitht g Jacob. Tsh g Jacob an ha a'alitht hegam Judah. 3 Tsh g Judah an ha a'alitht g Perez ch Zerah heg ab mash d Tamar. Tsh g Perez an alitht g Hezron. Tsh g Hezron an alitht g Ram. 4 Tsh g Ram an alitht g Amminadab. Tsh g Amminadab an alitht g Nahshon. Tsh g Nahshon an alitht g Salmon. 5 Tsh g Salmon an alitht g Boaz heg ab mash d Rahab. Tsh g Boaz an alitht g Obed heg ab mash d Ruth. Tsh Obed an alitht g Jesse. 6 Tsh g Jesse an alitht g David. David atsh an alitht g Solomon heg ab mash d chum hohnigaj g Uriah. 7 Tsh g Solomon an alitht g Rehoboam. Tsh g Rehoboam an alitht g Abijah. Tsh g Abijah an alitht g Asa. 8 Tsh g Asa an alitht g Jehoshaphat. Tsh g Jehoshaphat an alitht g Joram. Kush ihtha Joram d shonaj g Uzziah. 9 Tsh g Uzziah an alitht g Jotham. Tsh g Jotham an alitht g Ahaz. Tsh g Ahaz an alitht g Hezekiah. 10 Tsh g Hezekiah an alitht g Manassah. Tsh g Manassah an alitht g Amos. Tsh g Amos an alitht g Josiah. 11 Kush ihtha Josiah d ha-shon hegam Jeconiah matsh eda gm hu hab i e juh g t-shohshonbad Babylon kihhim wui. 12 Jeconiah atsh an hahawa alitht g Shealtiel. Tsh g Shealtiel an alitht g Zerubbabel. 13 Tsh g Zerubbabel an alitht g Abiud. Tsh g Abiud an alitht g Eliakim. Tsh g Eliakim an alitht g Azol. 14 Tsh g Azol an alitht g Zadok. Tsh g Zadok an alitht g Akim. Tsh g Akim an alitht g Eliud. 15 Tsh g Eliud an alitht g Eliazar. Tsh g Eliazar an alitht g Matthan. Tsh g Matthan an alitht g Jacob. 16 Tsh g Jacob an alitht g Joseph. Kush ihtha Joseph d kunaj hegai mo d Jesus je'e ch hab chehgig Mary. K ihtha Jesus hab e a'aga Christ. 17 Pegih, nt gamai gi'ik an o'oha g ha-chechgig hegam mo d e-o'ogbad am i amjed mash eda am oimmed g Abrahambad ch am hugkam mash eda am oimmed g Davidbad. Kunt hab wa'ap gamai gi'ik an o'oha g ha-chechgig hegam mo d e-o'ogbad heg i amjed ch gm hu hugkam matsh eda gm hu hab i e juh g t-shohshon Babylon wui. Kunt gamai gi'ik an o'oha g ha-chechgig hegam mo d e-o'ogbad heg i amjed ch gm hu hugkam matsh ab mahsi hegai mo hab e a'aga Jiosh si Kehsha (Christ). 18 Ia ant wo o'oha matsh has e juh matsh eda mahsi g Jesus Christ. Am amtsh i ap'ech matsh ihtham Joseph ch Mary wo e hohont. Tsh am hahawa s-e mai mat g ali wo bei. 19 K hab chu'ig g chehanig mat chum pi wo ha bei g cheoj matp hab wo wa e juh. Kush g Joseph am wabsh si s-ap oith g chehanig ch hekaj hab e elith mat pi wo be k wabshaba pi hedai wo ha ahgi. T hab pi wo si e el g Mary. 20 Sh am oithahim ihtha g Joseph. Kutsh am haha wabsh ab wui i e chehgi g anghil am chehchkij ed k hab kaij, “Joseph map ab d Davidbad amjedkam, am g wabsh s-ap e tahtk k wo bei g Mary mat d wo m-wehm kihkamk. Hekia S-ap'ekam Gewkthag at hab juh ihtha ali mat g Mary wo bei. 21 Kut d wo cheojk. Kupt hab wo chehch Jesus mo hab d ahga ha-Tho'ibiakam. Bat wo chehgigk nat pi wo ha tho'ibia g e-hemajkamga ab ha-chu'ichig amjed.” Neh, bash kaij g anghil am Joseph wui. 22 Wehs atsh wa hab e juh ihtha hab masma mash wa hab masma heki hu hab kaij g Jiosh. Kelibad Jiosh ha'ichu i tashogiththam atki an o'oha mash wa hab kaij: 23 Hema g si s-ap chehia at wo bei g cheoj ali pi koi ab hu i miabithk g cheoj. Kumt hab wo a'agath Manuel mo hab d ahga Jiosh o t-Wehmaj. 24 Kutsh hekith am i nea g Joseph k atsh am ha hekaj hab e juh mash has i kaij g anghil ab wui matsh an bei g Mary. 25 Sh wabshaba pi am hu hab masma e wehm kih mo g e wehm kihkam am hugkam mat hekith ip bei g ali. Tsh g Joseph hab hahawa chehch Jesus.

Matthew 2

1 Jesus atsh am mahsi Bethlehem kihhim t am am Judea chekshani ch ed. Sh wenog am hema d kownal Judea ch ed ch hab chehgig Herod. Tsh ab ha'i hihi si'al tahgio amjed mash s-chu a'amichuth ab huhu'u t ab. K eda g Jerusalem d kownal thaikud am t-jewedga ed. Tsh am thatha ihtham k am ha kakke g haha'ichu ch hab kaij, 2 “Bah'o ha'ichug hegai ali matki hemu mahsi matsh d wo ge ha-kownaligk g Tutuligo. Am at thahiwua g hu'u matt heg amjed s-mai g mahsithaj. Kutt heg hekaj ab i hihi matt am hab wo juh g si has t-elitha ab wui.” 3 Kutsh si e kudu g kownal am i kahk. Tsh heg hekaj wehs g kihkam amai hab wa'ap e kudu. 4 Tsh g kownal am ha hekaj i ha hemapai g u'ugchu papal ch chehanig t-mashchamtham k ab ha kakke, “Bahtsh ab ha'ab wo mahsi hegai matsh g Jiosh d wo Kehshak mat d wo chum em-kownaligk?” 5 Sh hab ahg, “Ab Bethlehem t ab ith eda chekshani. Batki masma an hema o'oha g kelibad Jiosh ha'ichu i tashogiththam mo g Jiosh hab kaij: 6 Tho al chum kihhim g Bethlehem. Kut eda am hema wo i wuhsh mat d wo ha-kownaligk ch wo ha wanimedath g ni-hemajkamga.” 7 Tsh g Herod am s-a'agim i ha wai hegam s-chu a'amichuththam k ab ha amjed s-mai matsh hekith ab i e mahsith hegai hu'u. Tsh am ahgi. 8 Tsh g Herod am hahawa ha ahgi mat gm hu wo hihi Bethlehem wui hab ha ahgch, “Am g wo hihim k am wo si i gah hegai ali k hekith wo sha chehg k ia wo ni-ahgi. Kunt ahni am hab wa'ap wo him k ab wo ihm mani ab has elith.” 9 Kutsh gm hu hahawa hihim k gm hu hebai i hihim. Tsh ab ep i e mahsith hegai hu'u mash am wa heki hu neith. Kush si s-hehegig am i neithok. Tsh heg am ha ba'ich him k am thahiwua heg thahm mash am thadha hegam Joseph. 11 Tsh am thatha k am i wahp kih ch ed. Sh am wo'o hegai ali. Kush g je'ej am wehmaj. Tsh ihtham s-chu a'amichuththam am wui i shul g ali k am hab juh g ab si has e-elitha k am hahawa i ha wuwhas g s-namkig ha'ichu k ab mah. Sh ith d ohla ch hegai s-ap uhwchu mo hekaj e iagchulith ch hegai mo hekaj e huhud g muhki. 12 Sh g Jiosh am ha ahgith am ha-chehchki ed matsh pi am hu ep wo hihi Herod wui. Kutsh heg hekaj im hu wabsh hihi e-jewedga wui am hema wohg ch ed. 13 Tsh ab hahawa i e chehgi g anghil Joseph wui am chehchkij ed k ash hab kaij, “Kownal Herod at am wo i gahghi ihtha ali mat wo chum s-mu'am. Mt heg hekaj gm hu wo hihi Egypt jewed wui k am wo ha'ichugkath. Kunt am wo em-ahgi mamt hekith ep wo i hihi.” 14 Kutsh am ha hekaj i wami g Joseph k am bei g ali ch je'ej k heg wa'i s-chuhugam hihi am Egypt wui 15 k am wa thadha. Ith atki am hab e juh mat hekaj s-ap hab wo e juh hegai matki heki hu wa'i o'oha g kelibad Jiosh ha'ichu i tashogiththam. Bo chu'ig g o'ohanaj mash g Jiosh hab kaij: Am ant wo i wuhshath g ni-alithag Egypt jewed amjed. 16 Pegih, tsh pi am hu ep i hihi Herod wui hegam s-chu a'amichuththam mash wa am ha ahgith g Jiosh. Tsh heg hekaj bagat g Herod. Sh eda ihtham heki hu ahgith mo am hu d i gohk a'ahithag mat wa am cheh hegai hu'u. Kutsh heg hekaj ha cheha g e-shonthalig matsh wehs wo ha koktha g a'al wihpiop mash d gohk ahithkam ch am i wecho amai Bethlehem ch ed ch an i wehgaj. 17 Neh, ith atsh wa hab e juh hab masma mash wa g Jiosh heki hu wa'i hab kaij matsh hab masma hab wo e juh. Hegai kelibad Jiosh ha'ichu i tashogiththam mash hab chehgig Jeremiah atki an o'oha mash hab kaij g Jiosh: 18 Am ant wo kah g shoshaki Ramah ch ed. Rachelbad amjedkam at am wo shoanith g a'al ha wehhejed ch pi ha'as wo shosha nat pi wehs wo e koktha. 19 Sh am thadha hegam Joseph g ali wehm Egypt jewed ch ed. Sh am hu hebai, tsh g Herod muh. Tsh am hahawa ep i e chehgi g anghil am chehchkij ed g Joseph k ash hab kaij, 20 “Muh at hegai mat chum s-mu'am g ali. Mt heg hekaj wo wahpamig k wo uhpam hihi am e-jewedga wui.” 21 Kutsh am i wami g Joseph k am ha ui g ali ch je'ej k ep hihi am e-jewedga wui. 22 K wabshaba g Herodbad alithag wenog am d kownal Judea ch ed ch hab chehgig Arkelaus. Tsh g Joseph am i s-mai mo ith d kownal k atsh sha s-ehbeni mas am wo i thahiwua amai. Tsh g Jiosh am ep ahgi chehchkij ed matsh pi am hu ep wo hihi Judea wui. Tsh hekaj imhab ha'ab ep hihi Galilee chekshani wui 23 k am thadhaiwua Nazareth kihhim ch ed. Heki atki hu hema o'oha g kelibad Jiosh ha'ichu i tashogiththam mamt hab wo a'agath ihtha “Nazareth t am o'othham.”

Matthew 3

1 Tsh am hahawa jegko i wuhsh Judea chekshani ch ed ihtha mash d John ch ha pahl wapkon g hemajkam. 2 John jehnigitha ash hab chu'ig, “Gam g hu wo s-ohhoth g pi ap e-chegitoi. E o aihim mat in wo i wuhsh g Jiosh kownaltalig.” 3 Neh, ith o hab ahg John hegai kelibad Jiosh ha'ichu i tashogiththam mash hab chehgig Isaiah mash eda hab kaij: Hema atsh gm hu jeg ed wo ha mihshmath g hemajkam hab kaijch: Neh, in atsh wo i wuhsh jewed thahm hegai mo d ge kownal wehs ha'ichu thahm. Kumt heg wehhejed wo i e nako. 4 Sh ab e enigadathch g John g ka-mihyo wopo ikuskaj ch ge hogi giwud ch heg wa'i hekaj e gegosith kohktpul ch sit'ol. 5 Kutsh ab wui i hihi g hemajkam miajed ch an i a'ai wehskojed g Judea chekshani, chum hems ab Jerusalem t amjed. 6 Mu'i ash am ahg g pi ap e-chu'ichig am i kahkch g John. Kush heg am ha pahl wapkon Jordan akimel ch ed. 7 Ha'i atsh am thatha hegam mo d Palasi ch hegam mo d Sajusi matsh wo nei ihtha pahl wakona. Sh hab ha ahg g John, “Hah, ahpim mam pi ap chegitoithag, bamki e elith mamt wo e tho'ibia ab amjed g s-ko'ok e-namkithadag heg wabsh hekaj mam ab d Abrahambad amjedkam. Nt wabshaba wo em-ahgi mamt pi woho wo e tho'ibia, heg hi wa mamt am wo e chehgi am hab junihithch g s-ap'ekam mamt gm hu s-ohhoth g pi ap e-chegitoi. Wehs hegam mat gm hu wo s-ohhoth g pi ap e-chegitoi at d wo Jiosh hemajkamgak ch hekaj hab masma wo e kuint mo d Abrahambad amjedkam, chum wa g nahnko mahs hemajkam. 10 Kumt ahpim gm hu wo s-e ohhoth hab masma mat g pi kehg bahithkam u'us mamtp pi gm hu wo s-ohhoth g pi ap e-chegitoi k pi am hu hab wo junihith g s-ap'ekam.” 11 Kush hab ep kaij g John, “Pi g hab wo ni-elith manis ahni d si ha'ichu. Ab at hema wo i wuhsh ni-oithk k d wo si ha'ichuk. Ahni ani hi wa em-pahl wapkon mamt eda gm hu wo s-ohhoth g pi ap e-chegitoi. T wabshaba heg ab wo em-mah g Hekia S-ap'ekam Gewkthag k gm hu hab wo i juh g pi em-ap'ekam hab sha masma mat g mehi wo mehi g sha'i. 12 Nam hig pi nehnichuth g pilkan mamt g mohgaj gm hu wo i gawulkath k wo mehith k g pilkani gd hu wo i ba'iha. Pegih, t hab wa'ap am a'ai wo i ha gawulkai g hemajkam am lothaita ch ed ihtha mani em-ahgith k wo ha tho'ibia g s-ap'ekam k g pi ap'ekam s-ko'okam wo ha namkith. T g ha-namkithadag pi hekith wo huhug.” Neh, bash kaij g John. 13 Jesus atsh ab hahawa i hih Galilee chekshani t amjed mo hebai d i kihkam k ab jiwia Jordan akimel t ab matsh wo e pahl wako. 14 Sh g John chum pi pahl wakonamk hab kaijch, “Nis haschu ahgk wo m-pahl wako nap pi d hekia s-ap'ekam? Ahpi apt wo chum ni-pahl wako.” 15 Sh hab kaij g Jesus ab wui, “Bapt wo ni-juh no pi g Jiosh hab d elitha.” Tsh heg hekaj hab juh g John. 16 Tsh am haha wabsh i chum wuhsh g Jesus shuhthagi t amjed. Tsh g thahm kahchim gam i e kuhpi'o. Tsh ab i hud g Hekia S-ap'ekam Gewkthag ab ab g Jesus hab sha masma mat g hohhi. 17 Sh ab neok g Jiosh ab thahm kahchim t amjed ch hab kaij, “Ith o d si ni-tatchuithch ni-alithag ch am si ni-tatchui oithch hab masma.”

Matthew 4

1 Sh g Hekia S-ap'ekam Gewkthag hab hahawa ahg g Jesus mat gm hu hejelko wo hih mo am d tohono jewed matsh wo e a'appe. Tsh heg hekaj gm hu hih g Jesus 2 k am ha'ichugkahim gi'ikko wehst-mahm tash ab pi ha'ichu ko'athch nash pi e ho'ige'ithahun ab Jiosh wui. 3 Kutsh ab wui jiwia g jijawul ha-ge'ejig am chum s-wuimk pi ap'ekam ch ed k hab kaij, “Bap chum e elith map d Jiosh alithag. Pegih, ab g hig chehani ihtham hohothai mat wo e pahnch naptki pi bihugim.” 4 Kush hab kaij g Jesus, “Pi ant hab wo juh. An o hab chu'ig Jiosh o'ohana ed: Jiosh ne'oki o ba'ich d i si s-has ha'ichu mo hi g ha'ichu hugi. Kut g o'othham hemho ab wo wa s-wohog elithath.” 5 Kutsh g ge Jiawul am hahawa wuhpuij tahgio i mahsith g ge'e cheopi. Heg o am kehk amai mo hab e a'aga Si Hekia S-ap'ekam Kihhim ch d Jerusalem. 6 Kush hab ahg, “Maptp woho d wo Jiosh alithagk, pegih, am g i thah'i amjed mo gn hu si uhgk kihtas. No hig pi hab chu'ig an Jiosh o'ohana ed: Jiosh at ab wo ha cheha g mu'i anghil mat wo m-nuhkuth. Kut an hu wo m-u'ukchith mapt nih g sha'i e-tahtad ab hu wo shul hohothai t ab.” 7 Sh hab kaij g Jesus ab wui, “Pi ant wo pip'ich g Jiosh. An o hab chu'ig o'ohanaj ed: Pi g wo sha'i pip'ichuthath g e-kownalig Jiosh.” 8 Kutsh am hahawa wuhpuij tahgio wehs i mahsith g kokownaltalig ch kaistalig jewed thahm 9 k ab wui hab kaij, “Wehs ant am wo m-mah ihtha maptp ab ni-wui wo i gehsh k ab wo ni-ihmath.” 10 Kush hab kaij g Jesus, “Gam g hu hihm, ahpi ge Jiawul. An o hab chu'ig Jiosh o'ohana ed: Heg amt wa'i Jiosh ab wui wo i gehsh k ab wo ihmath ch heg ab wo wa'i s-wohog elithath.” 11 Kutsh wa woho gm hu hih g ge Jiawul. Tsh g anghil ab wui hihi g Jesus k am i wehmt. 12 Am hu hebai amtsh am kuh hegai John mo am wa ha pahl wapkon. Kutsh am i kah g Jesus mamtsh kuh k atsh gm hu hahawa hih Galilee chekshani wui 13 k am jiwia Nazareth t ab. K am hema ep d kihhim mo d Capernaum ch an hugithaj an g Galilee kahchki. Kutsh am i thahiwua g Jesus. 14 Neh, heki atki hu wa'i o'oha g Isaiabad matsh ith am hab wo e juh. K hegai o'ohanaj hab chu'ig: 15 Si ha'ichu at am hab wo e juh Galilee ch ed. Ihtha chekshani o an hab chu'ig kahchki hugith an ch am huduni tahgio amjed g Jordan akimel. K an kihthag hegam mo d Zebulonbad amjedkam ch hegam mo d Naphtalibad amjedkam ch hegam ehp mo d gawul mahs hemajkam. 16 Bo sha mahs mo am thadha s-chuhugam k ed no ge mahch g Jiosh. K g muhkig ab ha wui him. T wabshaba wo nei mat am ha'ichu wo i wuhshani k hab wo sha masmak mo g si ge'e tonlig. Neh, bash wa kaij g Isaiabad. 17 Kutsh wa woho am i wuhsh g Jesus k am i ahgahi g ha'ichu e-ahga hab kaijch, “Gam g hu wo s-ohhoth g pi ap e-chegitoi. E o aihim mat in wo i wuhsh g Jiosh kownaltalig.” 18 Sh an him g Jesus Galilee kahchki hugith an. Kush am ha'i oiopo g waptopi ha u'utham ch am wuhpa g chuagia shuhthagi ch ed ch hekaj am ha u'u g waptopi. Hema ash d Simon ch hab hahawa e chechcheg Peter. Kush hema d wehngaj ch hab chehgig Andrew. Jesus atsh am i ha nei ihtham 19 k hab ha ahg, “Ab g wo i ni-oith k wo ni-wehmajkath. Kunt ahni wo em-mashcha mamt g hemajkam wo i ha wanchkwua am s-ap'ekam wui.” 20 Kutsh am ha hekaj wabsh i thagito g e-chikpan k am i oi. 21 Tsh am sha'i hihi ha'as hu'i. Tsh g Jesus am i ha nei ihtham James ch John. Ihtham o hab wa'ap d e-wepngam ch ash am chikpan g e-ohg wehm wahlko ch ed ch am ap'echuth g e-chuagia. Tsh g Jesus ab ha wai mat am wo wehmajk. 22 Kutsh am ha hekaj wabsh i thagito g e-ohg ch e-chikpan k am i oi g Jesus. 23 Kush ihtham am hahawa hahasko oiopo Galilee chekshani ch ed. Kush g Jesus am ha mashcham g hemajkam ha-chechopi ed ch am ha ahgithahim g s-kehg ha'ichu ahgaj g Jiosh ab amjed g kownaltaligaj ch am ep ha thothajith g nahnko mahs kok'otham. 24 Tsh an wehsko i kaitha g ha'ichu ahga ab amjed am Syria jewed ch ed mo heg eda g Galilee d chekshani. Tsh g hemajkam heg hekaj wehs ab ha u'apa wui hegam mo nahnko masma kok'o ch hegam mo ha'ichukaj e kudut ch hegam mo g jijawul an u'ukch g ha-chegitoithag ch hegam mo s-ha chuhugchuth ch hegam mo pi himthag. Tsh g Jesus wehs ha thothaj. 25 Kutsh g hemajkam wehskojed i hihim k am oith g Jesus. Ihtham ash ha'i d Galilee t am o'othham ch ha'i ab amjed mo hab e a'aga Wehst-mahm Kihhim ch ha'i ab Jerusalem t amjed ch an wehskojed g Judea chekshani k ch ha'i ga hu aigojed g Jordan akimel.

Matthew 5

1 Tsh am i ha nei g Jesus ihtham mu'i hemajkam k ab i chesh kawulk t ab mat ab ha wui wo neo. Kutsh an wehgaj i e hemapai hegam mash ab si wecho e mashcham. 2 Tsh g Jesus am i ha mashcha. Kush ith d mashchamdaj: 3 Mt wo chum si s-ap e tahtkkath ahpim mam ab e sho'igchuth Jiosh wui. Tho em-wehhejedkam g Jiosh kownaltalig. 4 Mt wo chum si s-ap e tahtkkath ahpim mam hemuch pi ap e tahtk ab amjed g pi ap'ekam. Jiosh at ab wo em-mah g s-ap tahhathkam. 5 Mt wo chum si s-ap e tahtkkath ahpim mam ab wabsh i e sho'igchuthch. Wehs at ab wo em-mah g Jiosh hegai mo an o'ohanas mo ab em-makiog am jewed thahm. 6 Mt wo chum si s-ap e tahtkkath ahpim mam am si e gahgith mamt d wo s-ap'ekamk. Bat wo em-juh g Jiosh mamt d wo si hekia s-ap'ekamk. 7 Mt wo chum si s-ap e tahtkkath ahpim mam s-ha ho'ige'ith g hemajkam. Jiosh at hab wa'ap wo s-em-ho'ige'ithath. 8 Mt wo chum si s-ap e tahtkkath ahpim mamt gm hu s-ohhoth g pi ap e-chegitoi. Am o hiwgithas mamt ab wo neithath g Jiosh. 9 Mt wo chum si s-ap e tahtkkath ahpim mam am ha thotholimachuth g hemajkam. Mt wo s-em-mahchk mam d a'aligaj g Jiosh. 10 Mt wo em-sho'igch ahpim mamt hab wo junihith g Jiosh tatchui. K wabshaba d em-wehhejedkam g Jiosh kownaltalig. Kumt heg hekaj wo si s-ap e tahtkkath. 11 Mt wo s-ko'okam has em-ahgath ch wo em-sho'igchuthath ch nahnko masma hab wo wuath g iattogig ab em-ab nam pi ab s-ni-wohochuth. Kumt wabsh wo si s-ap e tahtkkath 12 ch wo si s-hehgigk no pi ge'e ha'ichu ab em-makiog g Jiosh. Heg at wa oithk am hihi g kekelibad Jiosh ha'ichu i tashogiththam. 13 “Neh, s-mahch am mat pi wo e padch g chuhkug mamtp wo si onmath. Pegih, mt hab wa masma ha'ichu wehhejed wo s-kehgajk am ha shahgith hegam mo pi mahch g Jiosh. Jiosh at gm hu hab wo i em-juh mamtp pi ha'ichu wehhejed wo s-kehgajk hab masma mamt hab wo juh g on matp wo kahko. 14 “Ahpim mam ab si ni-hiwig amt wehs wo ha tonolithath g hemajkam. Heg o wa wepo mam d tonlig am ha wehhejed. Pi g am wo ehstokch hegai mamt haschu hab wo junithath g Jiosh. Neh, no hig pi woho mat pi ap wo e ehsto g kihhim matp am wo thahmkath g tohnk. 15 T g lahmpa hab wa'ap pi wo e ehsto ha'ichu wecho. Mt an wo thai mat hebai wo em-tonolithath. 16 Pegih, mt ahpim pi wo ehsto g s-em-ap'ekam k wabsh wo ha hiwgithath g hemajkam mat wo nei. Kut hekaj ab wo si has elithath g em-ohg Jiosh. 17 “Pi ant hab ahgk ia jiwia jewed thahm manis gm hu hab wabsh wo i juh hegai chehanig ch mashchamadag matsh wa g kekelibad Jiosh ha'ichu i tashogiththam ab bei Jiosh t amjed. Heg eda o an o'ohanas mant has wo masmak ch has wo ni-juh k wo nahto g ni-chikpan. 18 Nt wo si shel em-ahgi mat pi hekith gm hu hab wo i e juh g Jiosh chehanig. Wehs at s-ap wo e nahto hegai mo an o'ohanas mat koi wo huhug g thahm kahchim ch jewed kahchim, chum hems g si al chu'uchum ha'ichu. 19 Kut d wabsh wo pi ha'ichuk am Jiosh nena ed hegai mat hedai pi am hu wo wohog elithath g Jiosh chehanig ch wo ha mashcha ha'ijj ehp mat hab wa'ap pi ab hu wo wohog elithath. Kut heg d wo si ha'ichuk am Jiosh nena ed mat hedai ab wo wohog elithath g Jiosh chehanig ch wo ha mashcha ha'ijj ehp mat ab wo wohog elithath. 20 Bo e elith g chehanig em-mashchamtham ch Palasi mo s-ap oith g Jiosh chehanig. Nt wabshaba wo em-ahgi mamt hemho wa ha ba'ich i s-ap wo oithath mamtp am s-wahpkim Jiosh kihthag ed. 21 “S-mahch am mo hab chu'ig g heki hu chehanig mamt pi wo ha mua g hemajkam. Kut hemho wa wo e lothai matp hedai wo sha ha mua. 22 Kunt ahni am ba'ich hab wo i ah mamt am wa hugkam ab wo moht g chu'ichig mo g ha mu'akam mamt chum hems wabsh wo bagat ab hema i wui k hab wo ah mo d wabsh pad ha'ichu. Ab o em-wui him mat g Jiosh wo em-lothai heg hekaj k gm hu wo i em-wua Jiawul kih ed. 23 “Am g wo ha'asa e ho'ige'ithahun mamtp wo s-chegito mamt hema i pi ap thohththa. Pi at ab hu wo em-kaiha g Jiosh. 24 Wehpeg amt am wo i e ap'ech heg wui mamt pi ap thohththa k am haha wo e-ho'ige'ithahu. 25 Mtp hems wo em-lothai mamtp pi am hu s-hohtam wo i e ap'ech. Kumt wo e kuhpach am hugkam mamt wehs wo namkith wehhejed mamt has i juh. Ba'ich at wo i s-ap'ek mamt wehpeg hejel am wo i e ap'ech a'ai e wui. 27 “S-mahch am mo hab chu'ig g heki hu chehanig mamt pi wo ha ehs g ha-wehm kihkam. 28 Kunt ahni am ba'ich hab wo i ah mo heg wa wepo mamt ha ehs mamtp am wabsh wehmaj wo s-wo'iwuim hegai mo pi d em-wehm kihkam. 29 Kut d wo em-wuikamk mamt gm hu wo i e wua Jiawul kih ed. Ba'ich at wo i s-ap'ek mamt chum hems wo heb hu wua g e-nenthag. 30 Tho em-wuikam mamt am hu wo i e wua Jiawul kih ed chum ams haschu pi ap'ekam hab wo juh. K ba'ich i s-ap'e mamt chum hems wo heb hu wua g e-nowi. 31 “S-mahch am mo hab chu'ig g heki hu chehanig mamt hemho wa am wo i wuhshath g ohhotha tapial e-hohnig wehhejed mamtp wo s-ohhoth. 32 Nt wabshaba am wo em-ahgi mat d wo pi ap'ekamk mamt wo s-ohhoth, heg hi wa mamt wo s-mai am i chum hohntk mat heki hu ha wehm wo'iwua. Kut d wo pi ap'ekamk mat g em-ohhotha hema ep wo kunt. Ith at d wo em-chu'ichigk mamtp wo s-ohhoth. Kut hegai mat wo hohnt hab wa'ap wo juh g pi ap'ekam. 33 “S-mahch am mo hab chu'ig g heki hu chehanig mamt pi wo ha iattogithath ch hemho am hab wo wa juh mam haschu ha ahgith ch chehcheg g Jiosh. 34 Nt wabshaba am wo em-ahgi mamt hemho am hab wo wa juh g e-ne'oki. Pi o ap'e mams wabsh chum haschu wehhejed wo gewkaj g e-ne'oki. Neh, am am wabsh pehegia gewkaj g e-ne'oki am chehchegch g thahm kahchim. K eda g thahm kahchim d Jiosh kihthag. K hab wa masma mamtp hems g Jiosh am chehch. 35 Kum am ep chehcheg g jewed. K eda heg d Jiosh nahtoi ch heg wa wepo mo d keishpakudaj. Kum am ep chehcheg g Jerusalem. K eda heg d kihhimaj g Jiosh. 36 E-mo'o am hab wa'ap a'aga hab kaijch mamt wo moht g chu'ichig mamtp pi hab wo juh g e-ne'oki. T eda g Jiosh wo wa'i e nako mat wo em-mohto'i g chu'ichig. Ith o wehs hab masma mamtp hems am chehch g Jiosh. 37 Neh, bamt wo chum juh g e-ne'oki, chum ams pi wo gewkaj am chehchegch g Jiosh. T d wabsh wo ge Jiawul amjedkamk mamtp wo ha iattogi. 38 “S-mahch am mo hab chu'ig g heki hu chehanig mamt wo ha lothai mat hedai s-ko'okam has em-juh. T ab wui hab epai wo e juh mat has i em-juh. 39 Nt wabshaba am wo em-ahgi mamt pi wo sha'i e agwuim. Tp hems hema ab wo em-shonihi em-kahm ab. Pegih, mt wabsh wo hiwigi mat ab ep wo em-shonihi. 40 Kumt ba'ich ha'ichu ab wo mah hegai matp hedai wo em-lothai ha'ichu s-em-wohppo'ithamch. 41 Kumt gm hu wo si ba'iwich mam haschu chikpan em-mohto'ith wabsh s-ap e tahtkch. 42 Pi g wo sha'i tha'ith matp haschu i tatchua g sho'igkam. 43 “S-mahch am mo e ahgachug mamt ab wo si ha tatchuath g e-naipijju ch wo s-ha keh'ithath g e-obga. 44 Nt wabshaba am wo em-ahgi mamt pi hegam wa'i ab wo si ha tatchuath e-naipijju. Chum o hems g pi ap hemajkam ab si ha tatchua g e-naipijju ch wabshaba pi heg hekaj wo e tho'ibia. Neh, ahpim amt chum hems g e-obga wo si ha tatchuath ch am ha wehhejed wo e ho'ige'ithahunath Jiosh wui. Jiosh o chum hems g pi ap hemajkam ab si ha tatchua ch ab ha mahk g tash tonlig ch juhki. Kumt ahpim hab wo chum masmak mo g Jiosh nam pi d a'aligaj. 48 Em-ohg Jiosh o d si hekia s-ap'ekam. Pegih, mt ahpim hab wa'ap d wo si hekia s-ap'ekamk.”

Matthew 6

1 Kush hab ep kaij g Jesus, “Am g wo s-e nen'oithath mamt pi am hu hab wabsh wo wuath g ha'ichu s-ap'ekam hab ahgk mat g hemajkam wo neithath mam haschu am hab junihim. Jiosh at pi ab hu wo em-mah g s-kehg mahkigdag mamtp hab masma wabsh wo s-e chehgitham. 2 “Pi g wo s-e chehgithamk mamt hekith wo i ha wehmt g sho'igkam. Hegam mo s-e chehgithamk mo i ha wehmt o am hab wua em-namki ed ch an kahya ch ed. K g hemajkam ab si has ha elith. Neh, ith o d ha-namkithadag. Nt wo si shel em-ahgi mat g Jiosh pi ab hu has wo ha el. 3 Ahpim amt wabsh s-a'agi wo i ha wehmtath g sho'igkam mat pi hedai wo s-mahchk. 4 T g em-ohg Jiosh wo em-neith k ab wo si has em-elithath. 5 “Pi g wo s-e chehgithamk mamt hekith wo e ho'ige'ithahu. Hegam mo s-e chehgithamk at wo gegokiwua k wo e ho'ige'ithahu am em-namki ed ch an kahya ch ed. Kut wehsijj wo ha neith k ab wo si has ha elithath. Neh, ith o d ha namkithadag. Nt wo si shel em-ahgi mat g Jiosh pi ab hu has wo ha elithath. 6 Ahpim amt am wo i wahp e-kih ed k ab wo si i kuh g kihjeg k am wabsh hejelko wo e ho'ige'ithahu Jiosh wui. Kut heg wo wa'i em-neithath ch ab wo has em-elithath. 7 “Hegam mo pi mahch g Jiosh o am wabsh mu'ikko e thahm hab ha'ichu chech'e hab elithch mat hab wa'i masma wo ha kah g Jiosh. Mt wabshaba ahpim pi hab masma hab wo e junihith. 8 Jiosh o d em-ohg ch heki hu s-mahch mam haschu i tatchua mam wa chum koi ab hu tahni ha'ichu. 9 Bamt masma am wo e ho'ige'ithahunath: T-ohg Jiosh, an ap kihthag thahm kahchim ch ed. Kuch ab si has m-elith ch si ha'ichuchuth g m-chehgig. 10 Ab ach m-tahni mapt wo i ge'ethaj g e-kownaltalig ia t-shahgith mat g m-tatchui am hab wo e junihith ia jewed thahm hab masma mo an hab e wua m-kihthag ed. 11 Ab g i s-t-ho'ige'ith k ab wo t-mahkath g ha'ichu hugi wehs tashkaj. 12 Gam g hu hab i juhni g pi ap t-chu'ichig hab masma mach gm hu pi chechegitod g ha-chu'ichig hegam mat hedai pi ap has chu'i ab t-wui. 13 Pi g am hiwgith g Jiawul mas am wo t-shul pi ap'ekam ch ed. [Ahpi ap d kownal wehs ha'ichu thahm ch wehs edgith g gewkthag. Kutt ab wo si has m-elithath chum hekith.] 14 Neh, bamt masma am wo e ho'ige'ithahunath Jiosh wui wabsh pi chegitok g pi ap ha-chu'ichig. T g Jiosh gm hu hab wo i juh g pi ap em-chu'ichig. 15 T wabshaba g em-chu'ichig pi gm hab wo i e juh mamtp pi wo pi chegito g ha-chu'ichig. 16 “Pi g wo s-e chehgithamk mam pi ap e tahtk mamt hekith he'ekkio pi wo e gegos e ho'ige'ithahunch. Hegam mat wo s-e chehgitham at wo nei g e-namkithadag mat g hemajkam ab wo si has ha el. Nt wabshaba wo si shel em-ahgi mat g Jiosh pi ab hu has wo ha el. 17 Am g wo wakon g e-wuhiosha k ab wo si i gaswua g e-mo'o. 18 T hab pi wo mahchk g hemajkam ab i em-neithk mam pi e gegosith. T heg wo wa'i s-mahchk em-ohg Jiosh ch ab wo si has em-elithath. 19 “Pi g an hu wo e to'ithahith g s-kaisthag ith thahm jewed. Tp hems wabsh wo padt o atp hems hema wo em-ehs. 20 Mt wabshaba wo hekaj g e-kaisthag am Jiosh wehhejed. T heg wo wa wepok mam heg an e to'ithahim Jiosh kihthag ed. T pi hekith wo padt. Kut pi hedai wo em-ehs. 21 Kumt am wo s-hihimim no pi g em-tatchuithag am ulinig mo hebai ha'ichug mam haschu hab i elith mo d em-kaisthag. 22 “Em-wuhpui at s-ap am wo i wahki g tonlig matp wo s-mamsk 23 k wabshaba pi am hu wo i wahki matp pi wo mamsk. Kum heg hekaj s-ap nuhkuth. Pegih, wahm amt wo si s-ap nuhkuthath g ha'ichu e-amichuthadag mat heg s-ap am wo i wahki g wohokam. That wo si ge'e s-chuhugamk em-wehhejed matp pi wo ap'ek g em-amichuthadag. 24 “Pi at hedai wo e nako mas ha wepo hab masma ab wo ha neithath g gohk e-a'amo. Hemho wa atp hems hema ba'ich wo i s-wohog elithath. Em-kaisthag o heg wa wepo mo d em-ahmo mamtp heg hekaj ba'ich wo i pihk e elithath mam hi g Jiosh. 25 “Neh, nt heg hekaj hab wo em-ah mamt pi wabsh wo i e kudutath heg hekaj mams haschukaj wo e gegos o mams haschukaj wo e enigadath. Jiosh at ab em-mah g em-thoakag, pegih, k ab hab wa'ap wo em-mah mamt haschukaj wo e thagio'ithath. 26 An g wo i ha neith hegam u'uwhig mo an nen'e. Ihtham o pi ha'ichu e'eshath ch pi od g ha'ichu esha ch pi gn hu e to'ithahim g ha'ichu bahithag. K wabshaba g em-ohg Jiosh ha nuhkuth. Kum eda ahpim ba'ich d i si ha'ichu mo g u'uwhig. 27 Pi amt wo e nako mams am ba'ich wo i himch g e-a'ahithagga, chum ams hems wo si e kudutath am chegitokch. 28 “Pi g am wo si e kudutath ab amjed mams haschu ab wo enigat. An g wo i neithath g ha'ichu heosig m an wehsko chuhch. Heg o wa wepo mo si s-kehg e enigadathch ch eda pi ha'ichu sha'i shohshom. 29 Solomonbad o pi hab masma s-kehg e enigadathch, chum as d si s-kais kownal. 30 Neh, ha'ichu wuhshanig o wabsh al he'ekia tash an hab chu'ig. K eda g Jiosh si s-kehg an wuhshath. Kum ahpim ba'ich d i ha'ichu am wehhejed. Kut woho ab wo em-enigadath. Pegih, mt heg hekaj ab wabsh wo si hiwgath 31 ch pi am hu wo e kudutath ab amjed mams hebai wo bei g e-gegosig o g e-wehschuga. 32 Hegam mo pi mahch g Jiosh o ith am wa si oith. M eda ahpim d Jiosh a'aliga. K heg s-mahch mam tatchua wehs ihtha. 33 Wehpeg g am wo i e thagitok Jiosh wui k hab d wo s-ap'ekamk. Kut heg wehs ab wo i em-mah mam haschu i tatchua. 34 “Pi g am wo sha'i e kudutath heg amjed mat haschu has wo i e juh ba'ich tash. Am o wa ha'ichug g em-kudutadag ith i tashkaj ch pi hab chum mahs mams g si'alim kudutadag ab wo i wehnath.

Matthew 7

1 “Pi g am hedai has wo ahgath nat pi ab uhpam wo i e nodagi em-wui. 2 Mamt has i masma wo has ha ahgath, t ab wo i nod em-wui g has ahgadag hab masma. Ab at wo i e nodagi em-wui mamt has i masma ab wo neithath hema. 3 “Pi g am wo si s-nen'oithath g hema chu'ichig. Tp hems ba'ich i ge'ej g hejel em-chu'ichig. Ith at heg wo wa wepok mam g chum ha'ichu ab i s-wuhshthamk wuhij ed mo eda ba'ich i ge'e ha'ichu ab wo'o em-wuhi ed. 4 Tho iattogi mamtp hab wo chei mamt ha'ichu ab wo i wuhshath wuhij ed mo eda g ba'ich i ge'e ha'ichu ab wo'o em-wuhi ed. Hemho wa amt wehpeg wo i ap'ech g pi e-ap'ethag k haha wo e nako mamt wo i ap'ech g hema pi ap'ethag. 6 “Pi g ab hu wo ha ahgith g Jiosh ha'ichu ahga hegam mo pi ab hu tatchua. Heg at wo wa wepok mamt g s-ta ke'itham gogogs ab wo ha mah g hekia s-ap'ekam ha'ichu o g kokji ab wo ha mah g si s-namkig babiuga. Gogogs at hi ab wabsh wo i nehni k wo s-ko'okam has wo em-juh. T g kokji hi wabsh wo kehiwia g babiuga. 7 “Ab g wo ha tahnith ha'ichu k ab wo bebheth. Am g wo e gahgithath ha'ichu k wo cheh. Ab g wo shontpagath. T ab wo i e kuhpi'o g pualit em-wehhejed. 9 Ahpim o'og, namt hig wabsh g hothai wo mah g e-alithag mat g simito wo em-tai 10 o wabsh g wamad wo mah mat g watopi hithod ab wo em-tai? 11 Chum ams d pi ap'ekam ch eda s-mahch mamt s-kehg ha'ichu wo ha mah g e-a'aliga. Wahm hig g em-ohg Jiosh at woho ba'ich i s-kehg ha'ichu ab wo em-mah mamt ab wo tahnith ha'ichu. 12 “Am g hab wo ha juhkchith g hemajkam mam has i chum ha elith mat hab wo em-juhkchith. Bamt masma wehs am hab wo juh mo haschu an o'ohanas Jiosh heki hu o'ohana ed. 13 “Am g wo i e thagitok Jiosh wui k ab wo s-wohog elithath. Ith at heg wo wa wepok mamt am i wahp al aj kihjeg t amjed k am aj wohg oithch hihim. Pi o mu'ijj hab masma hab e wua. Kumt hab wa'i masma am wo bei g pi ha huhugetham thoakag. (13) Pi o hasig mamt hab wabsh wo junihith g hejel e-tatchui. Ith at heg wo wa wepok mamt ab s-tadani kihjeg t amjed i wahp k am s-tadani wohg oithch hihim. Mu'ijj o hab masma hab e wua ch hab ab aihim g Jiawul kih. 15 “Mu'i at an wo i wuwha g s-chu i'attomkam k hab wo e a'agath mo d Jiosh ha'ichu i tashogiththam. Am g wo s-ha nen'oithath mat pi am hu wo i em-shul pi ap'ekam ch ed. T wo s-em-padchutham hab masma mat g sheh'e wo s-mu'am g kahwal. 16 Mt wo s-mahchk mo pi d wohokam am neithch mo has masma. Nat hig wo e nako g ho'i sha'i mat wo bahithagt g uhdwis o g suhna? Pegih, t hab wa masma pi wo e nako hegam s-chu i'attomkam mas wo em-oithk hab wo e juh. 17 Neh, heg at wo wa'i s-kehg bahithagt s-kehg ha'ichu wuhshanig. 18 T g pi kehg wuhshanig pi kehg wo bahithagt. 19 Kumt wo shonch k gm hu wo mei. 20 Neh, mt hab wa masma wo ha mai mas hu wa woho d Jiosh ha'ichu i tashogiththam mamt wo nei mas wa woho ab s-wohog elith g Jiosh. 21 “Mu'ijj at hab wo chum ni-a'agath mani d s-ap'ekam ha-kownalig ch wabshaba pi am hu hab wo junihith g ni-ohg Jiosh tatchui. Kut g Jiosh pi am hu wo i ha wahpki e-kihthag ed. 22 “T ab wo i e ai g lothaita tash. T ihtham hab wo chum kaijjith ab ni-wui, ‘S-ap'ekam ni-kownalig, m-gewkthagkaj ach am ahgachug g Jiosh ha'ichu ahga ch gm hu i ha wuwhasith g jijawul ch am hab junihim g s-hasig ha'ichu.’ 23 “Kunt hab wo chei ab ha wui, ‘Pi ani hekith sha'i s-em-mahch. Gam g hu wo hihim ab ni-amjed ahpim mam hab junihim g pi ap'ekam.’ T hemho wa gm hu wo hihi. 24 “Ab g wo s-wohog elithath g ha'ichu ni-ahga. T hab wo s-ap'ek g em-thoakag. Ith at heg wo wa wepok matp hems hema s-wihnam wo shondath g e-kihta. 25 T hab pi wo i gei mat hekith wo hewed k juh k wo s-gewkam mel g shuhthagi. Pegih, mt hab wa masma s-wihnam wo gegokkath mo ihtha kih mamtp ab wo s-ni-wohog elithath. 26 “T wabshaba pi wo ap'ek g em-thoakag mamtp pi ab hu wo wohog elithath g ha'ichu ni-ahga. Heg at wo wa wepok matp hems hema pi wihnam wo shondath g e-kihta. 27 T wo si hewed k juh k s-gewkam wo mel g shuhthagi. Kut g kihj wo i gehsh k am wabsh wo i e padch. Pegih, t hab wa masma wo i e padch g em-thoakag mo ihtha kih mamtp pi ab hu wo ni-wohog elithath.” 28 Neh, tsh am i ha'asa ha mashcha g Jesus. Tsh g hemajkam si has i el 29 no pi s-e mamachim ha mashcham. Sh eda hegam mo d chum chehanig ha mashchamtham pi hab masma s-e mamachim ha mashcham.

Matthew 8

1 Tsh ab hahawa i hud g Jesus kawulk t amjed. Tsh ab i oi hegam mu'i hemajkam mo an wehmaj. 2 Tsh am hema jiwia g o'othham mash mumku heg hekaj mumkithag mo g chuhkugaj muhkhim k atsh ab i gei Jesus wecho k hab kaij, “S-ap'ekam ni-kownalig, ab g si i s-ni-ho'ige'ith k i ni-thoajith, pej maptp wo tatchuath.” 3 Tsh g Jesus ab tahtam k hab kaij, “Am o wa s-ap'e. Thoajini.” Tsh am ha hekaj i thoa. 4 Sh hab hahawa kaij g Jesus ab wui, “Neh, pi apt hedai wo ahgith k wabshaba am ha hekaj wo hih pahl wui. T am wo m-chechga k wo wohokamch mapt thoa. Pt am hab haha wo juh hegai iagchulitha mo wa g Jiosh em-chehani Mosesbad o'ohana ed. T hab wo s-mahchk g hemajkam mapt woho thoa.” 5 Kutsh gm hu hahawa hihi ihtham Jesus k am thatha Capernaum t am. Sh amai am hema d shonthal ha-ge'ejig ch ab Rome t amjed am d ha kehsha ch ab si tahni g i wehmtadag ch hab kaij, 6 “S-ap'ekam ni-kownalig, mumku at g ni-pionag k ab wo'o ni-kih ab ch pi e nako mas an has wo i e juh k mu'i e sho'igchuth.” 7 Sh hab kaij g Jesus, “Am ant wo wa i him k wo thoaj.” 8 Sh hab kaij hegai shonthal ha-ge'ejig, “Pi ani am hu hugkam d ha'ichu maps am wo i wah ni-kih ed. Am apt hab wabsh wo chea. T wo thoa g ni-pionag. 9 Bo wa masma ab ha'ichu ni-chehani g ni-ge'ejig. Kuni ab s-wohog elith. K g ni-shonthalig hab wa'ap ab s-ni-wohog elith. Hema ant hab wo ah, ‘Am g hihm.’ T am wo hih. Nt hema hab ep wo ah, ‘Ab g i hihm.’ T ab wo i hih. Kuni g ni-pionag hab ep a'aga mat ha'ichu hab wo ni-juni. K am hab wua.” 10 Kutsh si has i el g Jesus am i kaiok k hab kaij ab ha wui hegam mo an wehmaj, “Neh, ab o si ni-hiwig ihtha gawul mahs o'othham. Pi ani hekith sha'i kah mas hab masma ab si ni-hiwig g Tutuligo. 11 Kunt hab wo em-ahgi mat mu'ijj ab wo i hihi si'al wecho amjed ch hudunig wecho amjed k am wo wehmaj thadhaiwua g Abrahambad ch Isaacbad ch Jacobbad an Jiosh kihthag ed. 12 Ith o d chum ha-ap'ethag g Tutuligo. T wabshaba mu'ijj pi am hu wo i wahp no pi pi ab hu ni-hiwig. T g Jiosh gm hu wo ha shul s-chuhugam k ed. Kut chum hekith am wo shoanith ch ga hu wabsh wo i si e ki'ishch nat pi wo sha'i si s-ko'ok ha'ichu nakogath.” 13 Kush hab hahawa kaij g Jesus heg wui shonthal ha-ge'ejig, “Gamai g hihm uhpam. T heg am hab wo e juh map haschu ab ni-tahni nap pi ab si ni-hiwig.” Kutsh heg wa'i ohla ab thoa g piongaj. 14 Kutsh amjed gm hu ha'i hihi ihtham Jesus Peter kih wui. Sh am wo'ok ch mumku g Peter hohnig je'e ch g s-toni iajithch. 15 Kush g Jesus an taht g nowij. Tsh ha hekaj huhug g s-tonjig ab ab. Kutsh am i wamig k ha hihithol. 16 Tsh gm hu i juh. Tsh g hemajkam mu'i am ha u'apa g kok'otham ch hegam mo g jijawul an ha u'ukch. Tsh g Jesus am i ha wuwhas g jijawul k am wehs ha thoaj g kok'otham. 17 Heki atki hu wa'i o'oha g Isaiabad matsh ith am hab wo e juh. K hegai o'ohanaj hab chu'ig: Heg at ab wo moht g t-mumkithag k im hu hab wo i juh ab t-amjed. 18 Sh mu'i hemajkam an ha wehgaj. Sh heg hekaj hab ha ahg g Jesus hegam mo si ha mashcham mat wo e nako. T gn hu aigojed wo i chehchsh g sikod shuhthagi. 19 Tsh wabshaba am hema jiwia g chehanig ha mashchamtham k hab kaij, “T-mashchamtham, ni-nahtokch ani mant am wo m-oi.” 20 Sh hab kaij g Jesus ab wui, “Napt hig wo e nako? Neh, chum o hems g gagso ch u'uwhig ge koksh. Ni wabshaba ahni Jiosh si Kehsha pi sha'i ha kih ia jewed thahm. K heg hekaj s-hasig maps am wo ni-oi.” 21 Sh hema hab kaij hegam mash ab wecho e mashcham, “S-ap'ekam ni-kownalig, chum ani hi wa am i s-m-oithamk ithani. T wabshaba ho'ipki hekith muh g ni-ohg. Nt wo hiashpok haha wo m-oi.” 22 Sh hab kaij g Jesus, “Am g ha hiwgith hegam mo pi u'ukch g wechij thoakag mat wo ha hiash g ko'i. Pt ahpi hi ab wo i him k wo ni-wehmajk.” 23 Sh g Jesus an hahawa thahiwua wahlko ch ed am ha wehm hegam mash ab si wecho e mashcham k am gahi i shul. 24 Kutsh haha wabsh si s-gewkam ab i meh g hewel shuhthagi thahm k ab i to'otonkai g shuhthagi matsh gm hu si i chesh wahlko thahm. Sh g Jesus am wo'ok ch kohsh. 25 Kutsh am wui hihim k am wuhan k hab kaij, “T-kownalig, t-tho'ibiani. Ttki wo t-ko'ij.” 26 Sh hab kaij g Jesus ab ha wui, “Shahchu amt ahgk si e totoths. Pi amki ab hu si ni-hiwig.” Bash kaij ch am wamig k ab si chehani g hewel ch shuhthagi to'otonk mat wo thotholimat. Kutsh gm hu wabsh i pi shahm. 27 Tsh wehsijj si has i elith k hab kaij, “S has mahs d o'othham ihtha mo chum hems g hewel ch shuhthagi to'otonk ab s-wohog elith.” 28 Tsh am aigo thatha. K amai d ha-chekshani g Gadarene hemajkam. Sh am ge chehchog mo am g ko'i e to'aw. Tsh gohk ab i wuwha g chechoj. Kush g jijawul an ha u'ukch. Kush sha'i s-ta ehbithama. Sh chum hedai s-ehbith matsh am ha'ab wo i bij. 29 Tsh ihtham an ha nam k si s-kaitham hab kaij ab Jesus wui, “Shahchu apt ahgk ab t-wui i hih, ahpi Jiosh alithag. Napt wo s-ko'okam t-namkith mat wa chum koi e ai g tash?” Bash kaij nash pi g Jesus s-ha wuwhasithamk g jijawul. 30 Sh eda mu'i an oiopo g kokji kawulk bahsho ch e gegosith. 31 Sh ihtham jijawul ab si tahni g Jesus ch hab kaij, “Pt hig wo t-hiwigi matt am wo i wahp hegam ha eda kokji.” 32 Sh hab ha ahg g Jesus, “Hijiwo.” Tsh wa woho gm hu i wuwha k am wahp kokji ha eda. Kutsh wehsijj ihtham kokji am agshp i wohp k am shul shuhthagi ch ed k wachkk. 33 Kutsh hegam mash am ha nuhkuth ihtham kokji gm hu si wohp k am thatha kihhim t am k am ha ahgith mat haschu has e juh am ha tahgio ihtham o'othham mash g jijawul an ha u'ukch. 34 Kutsh mu'ijj ab amjed hegai kihhim am i namkhi g Jesus k am i chehg k hab ahg mat wo si s-ha ho'ige'ith k gm hu wo hih ab ha-chekshani amjed.

Matthew 9

1 Tsh an hahawa gahi ep hihi g wahlkokaj ihtham Jesus k am thatha Capernaum t am mo am kih. 2 Tsh am ha'i thatha hema wo'ichugch wahkus ch ed nash pi ab wabsh i s-moik ch pi himith. Sh am neith g Jesus mo ab si hiwig ihtham mat am wui u'apa ch hab kaij ab wui g mumkutham, “Am g si e gewkaj, ni-nawoj. Gm ant hu hab i juh g pi ap m-chu'ichig.” 3 Sh ha'i gegok g chehanig ha mashchamtham ch hab kaij ab a'ai e wui, “Ih, sho'o wa'i si pi ap neok hab masma e wepogithch g Jiosh.” 4 Kush g Jesus s-mahch mo haschu am chegito ch hab kaij ab ha wui, “Am am g pi ap'ekam ha'ichu chegito 5 hab elithch mani hab wabsh kaij ch pi woho edgith g gewkthag mant gm hu hab wo i juh g pi ap ha-chu'ichig. Bam elith mo s-pehegim hab e kaij, ‘Gm ant hu hab i juh g pi ap m-chu'ichig,’ no ge hedai s-mahch mas s-wohom gm hu hab i e juh. 6 Pegih, nt wo em-chehgi mani woho ge gewkthag ch hab wua mani has i kaij ahni Jiosh si Kehsha,” k hab hahawa kaij ab wui ihtha mo ab wabsh i s-moik, “I g wamig k am beh'i g e-wahkus k hihm am uhpam.” 7 Kutsh am i wamig k gm hu hih uhpam. 8 Kutsh am i nei g hemajkam ihtha k si s-ehbeni k ab si has i el g Jiosh natki pi ab mah g Jesus ihtha gewkthag. 9 Tki amjed am hih g Jesus k am hu hebai himath ch ni-cheh ahni Matthew. Nid wa eda am chikpan mo am g kownal ha kowlant g hemajkam g lial. D hab kaij g Jesus ab ni-wui, “Ab g i hihm k ab si ni-wecho wo e mashchamath.” Nid am ha hekaj i wuhshani k am i oi. 10 Am hu hebai amjed, nid ab ha wai hegam Jesus mat am wo e gegos ni-kih am. D ab i hihi. Kud mu'i am thatha k am t-wehm e gegosith g lial ha kowlanttham ch hegam mo pi am hu si oith g t-shohshon ha-himthag. 11 Dki am ha'i thatha g Palasi. Kuchd eda am t-gegosith. D ihtham hab kaij ab t-wui, “Ih, k haschu ahgch g em-mashchamtham ha wehm e gegosith g pi ap hemajkam, chum hems g lial t-kowlanttham?” 12 D g Jesus am i ha kaiok hab kaij ab ha wui, “Ihtham pi ap hemajkam o s-e tho'ibiamk hab masma mat g kok'otham wo s-e thoajitham. Hegam mat hab wo e elithath mo s-ap'e at pi wo tatchua g mahkai. 13 Pi ant hab ahgk ia jiwia jewed thahm manis wo ha tho'ibia hegam mo pi e tho'ibiamk. Neh, an o o'ohanas mash wa hab kaij g Jiosh: S-ap am hab wua g iagchulitha ab ni-wui. K wabshaba ba'ich d i si ha'ichu mamt wo s-hehemajimak. Pegih, am g wo s-amichuth mo haschu hab ahg ch hab kaij.” 14 D am ha'i thatha hegam mo ab si wecho e mashcham hegai John mo wa ha pahl wapkon k ab kakke g Jesus ch hab kaij, “Neh, mu'ikko ach pi t-gegosith hab ahgch matt wo t-ho'ige'ithahu. K hegam Palasi hab wa'ap e wua. K eda haschu ahgch ihtham pi hab masma hab e wua mo ab si m-wecho e mashcham?” 15 D hab kaij g Jesus ab ha wui, “Nat hig pi wo e gegos g wo ha hohntam naipijju mat eda heg am wo ha wehmajk? T am wo i e ai mat pi am hu wo ha wehmajk. T am hahawa pi wo e gegos. Pegih, bat wo wa e juh ihtham ni-naipijju mant hekith pi ia hu wo ha wehmajk.” 16 D am hahawa chum ha tashogith g Jesus mat g wechij mashchama pi ap wo wehnath g heki hu himthag hab kaijch, “Pi at hedai g wechij ikuskaj wo shohsho g hekiuchij lihwa mat wo s-e wia nat pi wo i thahiwua hegai wechij ikus k ba'ich wo i wantp g hekiuchij. 17 K hab wa'ap pi hab mahs machs am wo toa g wechij uhdwis wadag am hekiuchij ha'ichu elithag kostal ch ed nat pi wo wantsh g hekiuchij am i e ak. Kut wo e iawua g uhdwis wadag. Wechij uhdwis wadag at am wo e toa wechij kokstal ch ed mat wehs wo s-ap e nuhkuth.” 18 D am wabsh kia ha wehm neok g Jesus. Kud am hema jiwia g t-haha'ichuga k ab i gei wui k hab kaij, “Ni-chehiaga atp hems heki hu muh. Pt wabshaba ab wo i him k ab wo taht. T wo e chegito.” 19 Kud gm hu wehmaj hih g Jesus. Kuchd ahchim gm hu ep ha oi. 20 Kudki eda am hema ha'ichug g uwi mash gamai gohk ahith ab wa'i mumku heg hekaj mo g eh'edaj jegwoni. Kuchd am hihim. Kudki ab i hih Jesus wui k ab taht g kahbaj hugithag 21 nash pi hab e elith matp hems an wabsh wo taht k wo thoa. 22 D g Jesus am sikol i kekiwua k neithok hab ahg, “Pegih, ni-uwiga, ab g si i e gewkath. Am apt wa thoa napt pi ab i s-ni-wohoch.” Kud amjed gm hu s-thoa. 23 D amjed gm hu hih g Jesus k am i wah heg kih ed matsh g chehiagaj muh. Sh am si s-nankosig g mumsigo ch shoanitham. 24 Sh hab kaij g Jesus ab ha wui, “Gam g hu wo i wuwhaki wehsijj. Heg o wa wepo ni-wehhejed mo wabsh kohsh g chehia.” Kush wehsijj si s-ko'okam ash nash pi s-mahch matsh muh. 25 Kumtsh am wabsh i chum ha wuwhas. Tsh g Jesus am i wah mo am wo'o g chehia k ab bei nowij ab. Kutsh i wami. 26 Kum amjed an a'ai wehsko a'agahim mat has e juh. 27 Kuchd am hu hebai ep hihim. D gohk pi neneatham o'othham ab i oi g Jesus k si s-kaitham hab kaij, “Ab g si i s-t-ho'ige'ith ahpi mapsh d t-kownaligbad David amjedkam.” 28 Kuchd gd hu i wahp kih ch ed. D ihtham gohk pi neneatham am thatha wui g Jesus. Kud heg ab ha kakke ch hab kaij, “Nam s-wohochuth mant wo ni-nako mant wo em-nench?” D hab kaij ihtham, “Heu'u, ab ach si m-hiwig, s-ap'ekam t-kownalig.” 29 Kud g Jesus ab ha taht g ha-wuhpui k hab kaij, “Am at hab wo e juh mam has i masma ab s-wohochuth.” 30 Kud wa woho ab bei g e-nenthag. D g Jesus ab si s-gewkam ha ahgith, “Pi g am hedai wo sha'i ahgith ihtha.” 31 D wabshaba am wabsh i chum thagito k gm hu hihim k am a'ai i ahgahi wehsko anai ab amjed g Jesus. 32 D am hahawa ha'i ep thatha g hemajkam Jesus wui am hema u'apathch mo pi ha neok nash pi jiawul an u'ukch. D g Jesus gm hu wabsh chum i wuhshath g jiawul ab amjed. 33 Kud ha hekaj wabsh neo ihtha o'othham. D wehsijj si e tothsith k hab kaij, “Pi ach hekith ha'ichu hab sha'i masma neith am t-shahgith.” 34 Kud wabshaba g Palasi hab kaij, “Jijawul ha-ge'ejig o ab mahkch g gewkthag. Kuki heg hekaj e nakog ch ab i ha wuwhasith g jijawul.” 35 Am achd hahawa hahasko oiopoth ch am thaiw wehs kihhim ch ed. Kud g Jesus am ha mashcham g hemajkam ha-chechopi ed ch am ha ahgithahim g s-kehg ha'ichu ahga ab amjed g Jiosh kownaltalig ch am ep ha thothajith g nahnko mahs kok'otham. 36 D mu'i ab wui e chehm g hemajkam. Kudki g Jesus si i s-ha ho'ige'el no pi si e kudut ch e sho'igchuth hab sha masma mat g kakawal hab wo e wuath pi e nuhkuthch. 37 D hab kaij g Jesus ab t-wui, “Neh, mu'ij o hegam mo e nahtokch mat wo e tho'ibia. Kuch eda pi mu'ij ahchim mach am ha ahgithahim g tho'ibiathag ahga. Ith o heg wa wepo mat hebai g ha-hihka wo si ge'ejk. T g ha-pionag pi wo mu'ijk. 38 Ab g wo si tahnith g Jiosh mat mu'i wo i ha chuhcha mat am wo i ha ahgithahith g s-kehg ha'ichu ahgaj ch ab wo i ha ba'ihamath hegam mo e nahtokch.”

Matthew 10

1 Ab ad hahawa i t-wai g Jesus ahchim mach ab si wecho t-mashcham k ab t-mah g gewkthag matt gm hu wo i ha wuwhas g jijawul ab ha amjed hegam mo an ha u'ukch k wo ha thothaj g kok'otham. 2 Thachd gamai gohk ahchim mach d si chuhchaij. Simon o d wehpegkam ch hab ep chehgig Peter. K g Simon shehpij hab wa'ap d Jesus kehsha ch hab chehgig Andrew. K ha'i ep d James ch John ch d e-wepngam. K g ha-ohg hab chehgig Zebedee. 3 K ha'i ep d Philip ch Bartholomew ch Thomas. Ni ahni hab wa'ap d kehshaj ch hab chehgig Matthew ch wa d ge lial ha kowlanttham. K hema d hegai James mo g ohgaj d Alphias. K hema hab chehgig Thaddaus. 4 K hema hab ep chehgig Simon ch d hema hegam mo tatchua matt ahchim Tutuligo hejel wo himchuthath g t-kownaltalig. K hema hab chehgig Judas Iscariot ch d ihtha matki wo gagda g Jesus. 5 D g Jesus am hahawa i t-shelini ahchim gamai gohk matt gm hu wo ahgachugath g ha'ichu ahgaj hab kaijch, “Pi g am hu wo hihim gawul mahs hemajkam ha wui ch Samaria hemajkam ha wui ia'i ithani. 6 Am amt wo wa'i hihi hegam ha wui e-wehm Tutuligo. Ihtham o hab sha masma mo g heb hu hihimkam kahwal. 7 Am g wo hihim k ith am wo i ha ahgithahi mat am wo i himch g Jiosh g e-kownaltalig jewed thahm. 8 Mt wo ha thothaj g kok'otham k ab uhpam wo i ha chechegitoich hegam mat wabsh chum koi k g jijawul ab wo i ha wuwhas ha amjed hegam mo an u'ukch k wo ha thothaj hegam mo kok'o heg hekaj mo g ha-chuhkug wabsh muhkhim. Ab ant wabsh em-mah ihtha gewkthag. Kumt pi ha'ichu wo ha kowlantath am hab ha junithch. 9 “K wabshaba ab d ha-wuikam hegam mat ab wo em-kaiha mat ab aigo wo i em-wehmaj k wo em-thagio'i. Mt heg hekaj ab wabsh wo e enigadathch ch wo hihi pi ha'ichu u'athch mams hekaj wo e thagio'i o ams wo ha namkith. T g Jiosh wo em-nuhkuth. Kumt pi wo u'ath g cheowikud mamt hekaj wo e nuhkuth. 11 “Mt am wo i wahp kihhim ch ed k an wo i ha gahghi hegam mat hedai s-ap ab wo i em-nei k ab ha wui hab wo chei, ‘Jiosh o ab em-makiog g si ge'e s-ap tahhathkam.’ Kut am wo i em-wahpkith k wo em-thagio'i am hugkam mamt hekith gm hu ba'ich ep wo i hihi. Kutp hems hebai pi ap ab hu wo i em-nei g kihkam. Kumt am wo si i shahmuth g jewed ab e-tahtad ab k hab wo ha chehgi mamt wo ha thagito. 15 Nt wo si shel em-ahgi mat g Jiosh ba'ich i s-ko'okam wo ha namkith hegam mat pi ab hu wo kaiha ihtha s-kehg ha'ichu ahgaj matsh hi hegam hab ha juh pi ap hemajkam mash am kih Sodom ch Gomorra kihhimbad ch ed. 16 “Neh, am amt wo oiopoth ha shahgith g hemajkam. Kut ha'i wo s-ta ehbithamak am em-wehhejed hab sha masma mo g shesh'e am ha wehhejed g kahwal. Mt wo si s-e nen'oithath hab masma mo g ban ch wo si s-hehemajimak hab masma mo g hohohi. 17 Ab o him g tash mamt an wo em-u'u k wo em-lothait k atp hems ep wo em-gewitta am chechopi ch ed. 18 Am amt wo em-lothai ha tahgio g haha'ichu ch kokownal heg hekaj mam ab ni-hiwig. Kumt wo s-ni-mahch k ah am ha tahgio ch am ha tahgio g gawul mahs hemajkam. 19 Pi g wo sha'i e kudut ab amjed mamt has masma e wehhejed wo neo. 20 Hekia S-ap'ekam Gewkthag at wo em-ahgi mamt has wo chei. 21 “Haha'ichu at wo em-koktha. Kut ab ha wui wo em-gagda chum hems g em-wepnag o g em-jehj o g em-a'aliga. 22 Mu'i hemajkam at wo s-em-keh'ithath ni-hekaj. Kumt wo sha e nakog k wo gahi wuwha g e-sho'igthag. T g Jiosh am wo i em-wahpki e-kihthag ed. 23 Neh, mtp hems wo em-sho'igch hasko. Pegih, mt wo ahhio heg amjed kihhim k gm hu ba'ich kihhim wui ep wo hihi. Nt wo shel em-ahgi mant ep wo jiwia ahni Jiosh si Kehsha mamt koi wo ha chehmo g e-wehm o'othham ha-kihhim. 24 “E mashchamtham o ab wabsh wecho hegai mo d ha mashchamtham ch heg hekaj wepo wo nako ha'ichu. T g pion hab wa'ap wepo ha'ichu wo nako g e-ahmo. Kumt ahpim hab wa'ap ni-wepo wo nako ha'ichu. Neh, bo ni-a'aga ha'i mani d ge Jiawul ch wahm s-ko'okam has wo em-ahgath ahpim mam ab si ni-wecho e mashcham. 26 “Pi g wo sha'i ha ehbithath g hemajkam nat pi wehs wo i e ma'ishpi'o mo haschu i e ma'ishch ch wehs wo s-e mai mo haschu s-e a'agchuth. 27 Si amt tasho wo i ahgahi wehsko mani haschu ab si hejel em-ahgith. 28 Pi g wo sha'i ha ehbithath hegam matp hedai wo chum s-em-kokthaim. Pi at wo e nako mas ba'ich i s-ko'okam has wo em-juh em-kokthak. Heg at wa'i Jiosh wo e nako mat am wo em-tha'ich Jiawul kih ed mamtp pi am hu wo wohog elithath. Kumt heg ab wo wa'i si has elithath. 29 “K wabshaba g Jiosh si s-hemajima ch pi tatchua mas wo s-ko'okam em-juh. Am g wo oithahim mo chum hems g al u'uwhig s-ap ha nuhkuth. K eda chum alo pi ha'ichu namkig ihtham. Kum ahpim d si ha'ichu am tahgio. Jiosh o wehs ha'ichu s-mahch ab em-ab. Mt heg hekaj pi ha'ichu wo sha'i ehbithath ab wui e thagitokch. 32 “Neh, am amt wo s-ni-mahch k ah hemajkam ha tahgio mam d ni-wohochuththam. Kunt ahni hab wa'ap wo s-em-mahch k ah am tahgio g ni-ohg Jiosh. 33 Kutp wabshaba hedai pi wo ni-mahch k ah am ha tahgio g hemajkam, nt ahni hab wa'ap pi wo mahch k ah am tahgio g ni-ohg Jiosh. 34 “Pi g hab wo e elithath mat wo thotholimat g hemajkam mant ia jiwia. Ab at em-wui wo gegokiwua hegam mo pi ab hu has ni-elith. 35 Wihpiop atp hems wo s-keh'ithath g e-ohg ch g chetcha g e-je'e o g e-kahkma je'e. 36 Em-wehm kihkam atp hems d wo si em-obgak. 37 “Pi at ha'ichu wo namkigk g em-wohochuthadag mamtp pi ba'ich wo i ni-tatchua mam hi g e-ohg ch e-je'e ch e-a'aliga. 38 Mt gm hu wo thagito g hejel hab e elitha k ahni hab ni-elitha hab wo junihith ni-wehhejed e sho'igchuthch. Heg at wo wa wepok mam ab mohto g kots ch ab ab wo e muhkith. Kut pi ha'ichu wo namkigk g em-wohochuthadag mamtp pi hab masma ab wo i ni-oi. 39 Pi amt wo heki wua g e-thoakag mamtp wo hekaj am ni-wehhejed. Heg at wo heki wua g e-thoakag matp hedai wo chum s-tha'ath. 40 “Heg o wa wepo mo s-ap ab ni-neith ahni matp hedai ahpim s-ap ab wo em-neithath. K hab wa'ap s-ap ab neith g Jiosh matp hedai s-ap ab wo ni-neithath. 41 Hegai mat hedai s-ap ab wo i ha nei g ni-chuhchai at ha wepo wo bei g s-kehg mahkigdag. Kut hegai mat hedai s-ap ab wo i nei g s-ap'ekam o'othham heg wepo wo bei g s-kehg mahkigdag. 42 Kut heg s-wohom ab wo bei g s-kehg e-mahkigdag mat hedai chum hems g s-hehpi shuhthagi ab wo hema ha wasibi ihtham al a'al am hema em-wehhejed ahpim mam ab si ni-wecho e mashcham.”

Matthew 11

1 Am ad i ha'asa ha'ichu t-shelini g Jesus ahchim gamai gohk e-chuhchai k gm hu hahawa him k atsh an i ha mashcham k ha mihshmath mo an a'ai mia kihhimag. 2 Kumd wa eda am wabsh kia kuhpch hegai John mad am i shonwuich g pahl wakona. Sh hegam mad ab si wecho e mashcham am ahgith mo haschu chikpan hab wua g Jesus. Kutsh am ha'i ha cheha mat am wo hihim k ab wo kakke mas woho d Jiosh si Kehsha. Kudki am thatha 3 k ab kakke g Jesus ch hab kaij, “Ab o t-chehani g John matt ab wo m-kakke maps woho d Jiosh si Kehsha aha nat ab hahawa hema wo i wuhsh mat d wo hegaik.” 4 D eda g Jesus am ahg g e-kehg ha'ichu e-ahga ch ha thothajith g kok'otham ch hab hahawa kaij ab ha wui hegam John chuhchai, “Am g uhpam wo hihim k wo ahgi g John mam haschu i kah ch haschu i neith. 5 Ha ani thothajith g pi ha thothajitham kok'otham ch pi neneatham ch pi hihimithkam ch pi chechkaithkam ch ha chechegitoichuth g ko'i ch am ha ahgith g sho'igkam mat g Jiosh wo ha tho'ibia. 6 T g Jiosh ab wo s-em-ho'ige'ithath mamtp hedai ab wabsh wo ni-hiwgath.” 7 Neh, d amjed gm hu uhpam hihi. D g Jesus am ha'ichu ha ahgith g hemajkam ab amjed g John ch hab kaij, “Neh, am amt wa hihim k ab kaiha g John. K wa eda am oimmelhim pi apkokam jewed ch ed. Kumt pi woho am hu wo i wuwha wui matp d wabsh s-pehegi o'othham ch am gawul wo wuath g e-ne'oki. Pi o an a'ai e wanchkwua g John. 8 Kumt pi hema s-neitham mo s-kakaisim e enigadathch. Hegam mo hab masma e enigadathch o si s-kakaisim kih. 9 Neh, heg amt s-kaim ha'ichu i tashogiththam k heg wa woho kah. K g John am ba'ich ha'ichu k ed ep kehk. 10 Heg o hab ahg g Jiosh ch hab kaij: Am ant wo hema i maskogi mat am wo i ha ap'ech g hemajkam am wehhejed g si ni-Kehsha jiwhiathag am jewed thahm. Neh, bash kaij g Jiosh. 11 Kunt wo em-ahgi mo g John wehs hemajkam ha ba'ich d i si s-has ha'ichu. T wabshaba am wo i e chehgi g Jiosh kownaltalig ith thahm jewed. T hahawa chum hems g si pi ha'ichukam Jiosh ab hiwigtham ba'ich d wo i s-has ha'ichuk mo hegai John. 12 Mu'i hemajkam, chum wa g pi ap hemajkam, o am i wahpk Jiosh kownaltalig ed ab i amjed mat g John ab i ahgahi g ha'ichu e-ahga. 13 Wehsijj g kekelibad Jiosh ha'ichu i tashogiththam o am ahgachug mat wo e chehgi g Jiosh kownaltalig. K hegai t-chehanig mat g Mosesbad ab bei Jiosh t amjed hab wa'ap tashogith mat wo e chehgi. 14 Neh, heki ash hu si ha mihshmath hegai kelibad Jiosh ha'ichu i tashogiththam mash hab chehgig Elijah. K g Jiosh o'ohana hab chu'ig matsh hema ep wo i wuhshani k hab wo masmak mash wa hegai. Pegih, ihtha John o d hegai mat an wo i wuhsh. 15 Neh, am g wo s-ap i a'amichuth ihtha.” 16 D hab ep kaij g Jesus, “Hegam mat pi ab hu wohog el g John k pi ab hu ni-bei o hab masma pi ta wepoma mo g a'al. Neh, tp hems am wo chichwith g a'al ch hab wo ha ah, 17 ‘Am att em-gehgeth g e hohontam ha-piastakaj. Kumt pi e waila. Am att nei g muhki ne'i. Kumt pi sha'i shoshani.’ 18 Ith ani hab ahg mat g John ab i wuhshani k pi ih'e g nawait ch mu'ikko pi e gegosith e ho'ige'ithahunch Jiosh wui. K mu'ijj hab kaij mo g jiawul an u'ukch g chegitoithaj. 19 Nt ahni ia jiwia Jiosh si Kehsha k wabsh chum hedai ha wehm ni-gegosith. K mu'ijj hab kaij mani s-banma ch s-i'ithag ch d ha-nawoj g s-ta keke'ithamakam lial ha kowlanttham ch hegam mo pi ap oith g t-chehanig. Neh, bo masma pi ta wepoma ch im hu hab wabsh i juh g Jiosh amichuthadag. K wabshaba hegam mo ab s-wohochuth g wohokam am chehgithch mo d wohokam.” 20 Mu'i kihhim ed ad wa am hab junihim g s-hasig ha'ichu g Jesus. D eda mu'ijj pi gm hu s-ohhoth g pi ap e-chegitoi ab kahk. D g Jesus si s-ha keh'ith 21 ch ab kaij, “Mu'i s-hasig ha'ichu ant am hab juh Korasin ch Bethsaida kihhim ch ed. Kutki eda muijj amai pi ab hu ni-wohochuth k heg hekaj ab wo bei g s-ko'ok e-namkithadag ge'e lothaita tash ch ed. Hegam mo am kih Tyre ch Sidon t am ch pi ge'e mahch ab amjed g Jiosh at pi am hu hugkam wo bei g s-ko'ok e-namkithadag. Tp hems ab wo i e sho'igchuth k gm hu wo s-ohhoth g pi ap e-chegitoi matp wo nei ihtha s-hasig ha'ichu. 23 Capernaum t am hemajkam o ab si e haschuth. T wabshaba g Jiosh gm hu wo shul Jiawul kih ed. Hegam mash wa am kih Sodombad t am at gm hu wo s-ohhoth g pi ap e-chegitoi matp wo nei ihtha s-hasig ha'ichu. Kut pi wo chum padch g ha-kihhim. 24 Ihtham at pi am hu hugkam wo bei g s-ko'ok e-namkithadag mat g Capernaum t am hemajkam mat hekith wo e ai g ge'e lothaita.” 25 D g Jesus am hahawa e ho'ige'ithahun k hab kaij, “Ni-ohg Jiosh, thap kownal wehs ha'ichu thahm. K hab d m-elitha mat pi hedai wo e nako mas hejel wo s-amich g ha'ichu m-ahga. E o ehstokch am ha wehhejed g s-chu a'amichuththam ch ha'ichu s-mahchim. Kup wabshaba am ha chehgith ihtham mo ha'ichu s-mahchimk hab masma mo g a'al. Ni heg hekaj ab si m-ho'ige'ith.” 27 D hab ep kaij ab ha wui g hemajkam, “Ni-ohg at wehs ha'ichu ab ni-mah. Pi o hedai s-ni-mahch ch heg wa'i ni-ohg s-ni-mahch. K pi hedai mahch g ni-ohg. Ni ahni wa'i s-mahch ch hegam ehp mani hedai i ha wui tashogith. 28 “Ab g wo i e thagito ni-wui wehsijj ahpim mam d gewpkokam. Kunt ahni ab wo i em-mah g ulinihogig. 29 Pi o hasig g ni-himthag ch pi wechima wo i em-mohto'i ha'ichu. Si ani s-hemajima ch ab wabsh ni-sho'igchuth. Kumt ab ni-amjed wo s-mahch k wo e ulinihogithath. Hegai mant ab hehe'ejel wo em-mohto'i at wo s-hawkk nant pi am wo i em-wehmajk hab sha masma matt wo t-makodathch g yehwakaj.” Neh, bo kaij g Jesus.

Matthew 12

1 Kuchd am hu hebai hihim t-mihshmetha tash ed. K am eshas g pilkani wohg huhugith an. Kutt bihugk k hekaj ab ha wohni g pilkani ch i mohon ch ko'a. 2 Kudki t-neith hegam Palasi ch hab kaij ab Jesus wui, “Neh'e, melchkwua o g t-chehanig mo ith hab wua mihshmetha tash ch ed.” 3 D g Jesus hab kaij ab ha wui, “Bo wabsh masma hab e wua matsh wa g Davidbad. Pi amtki chegitoi matsh heg has e juh am si i bihugimk. Bo chu'ig g Jiosh o'ohana 4 matsh am i wah ge'e cheopi ch ed k am ui g pahn k huh hegam ha wehm mash am wehmaj. K d hegai pahn mo am e to'aw k ch hegam d wa'i ha-wuikam papal. T eda hemho wa am hab e juh. K heg hekaj am wa s-ap'e. 5 “Am g ep wo oithahim mo g papal am hab junihim g e-chikpan ge'e cheopi ch ed mihshmetha tash ed. K eda g Jiosh pi ha mohto'ith g chu'ichig no pi hemho wa am hab junihim g e-chikpan ge'e cheopi ch ed. 6 Kuni ahni ba'ich d i si ha'ichu mo g ge'e cheopi. 7 “An o o'ohadag mo hab kaij g Jiosh: S-ap am hab wua g iagchulitha ab ni-wui. K wabshaba ba'ich d i si ha'ichu mamt wo s-hehemajimak. Neh, pi amt ab hu wo ha mohto'i g chu'ichig hegam mo pi d chu'ijkam mamtp woho wo s-amichuthath ihtha. 8 Pi am amichuth mani ahni d Jiosh si Kehsha ch gewkthag am thahm g mihshmetha tash.” 9 D am ha thagito g Jesus. Kuchd gm hu hihi hema wui g cheopi. 10 D am hema thaha g o'othham mad g nowij mahnikodag. D am ha'i g o'othham ab ha'ichu s-abchuthamk g Jesus ch ab kakke, “No hiwgithas am t-chehanig ed mamt wo ha thoaj mihshmetha tash ed?” 11 D hab kaij g Jesus ab ha wui, “Matp hems hema g em-kahwaliga am wo gei wag ch ed mihshmetha tash ed. Namt hig pi wo chikpan k wo i wuhshath? 12 O'othham o ba'ich d i si ha'ichu mo g kahwal. Pegih, k g t-chehanig am t-hiwgith matt am hema wo i wehmt mihshmetha tash ed.” 13 Neh, bad kaij ch hab hahawa ahg g mahnikokam, “Ab g si i shelin g e-nowi.” Kud am wabsh i chum shelin k am wa'i hekaj ap'et. 14 D amjed gm hu hihi g Palasi k e wehm a'aga mat has hig masma wo mua g Jesus. 15 D am i kah g Jesus mash am s-mu'amk k gm hu hih ab amjed amai. Kud mu'i hemajkam am i oi. D wehs ha thothaj g kok'otham 16 ab si ha chehanich mat pi hedai ha'ichu wo ahgithath ab amjed. 17 Neh, bad wa masma hab e juh hegai matki g Isaiabad heki hu wa'i o'oha matsh hab wo e juh. O'ohanaj o hab chu'ig mash g Jiosh an a'aga g si e-kehsha ch hab kaij: 18 Ith o d si ni-Kehsha mat d wo ni-pionagk. Ab ani si tatchua. K si ni-tatchui oithch hab masma. Ab ant wo mah g Hekia S-ap'ekam ni-Gewkthag. Kut am wo ha ahgi g wehs hemajkam mant s-ap wo ha a'appe. 19 Pi at wo ha ne'owinath ch pi wo hihnkath ch pi wo s-kaitham amogath am kahya ch ed. 20 T wo ha tho'ibia hegam mat chum alo pi wo e nako hab masma mamtp hems ahpim wo tho'ibia g e-e'es mo i gehsim. Am at wo ha gewkathch am hugkam mat wo gewito g pi ap'ekam. 21 T wehs nahnko mahs hemajkam ab ab wo i e gewpkai. 22 D ha'i g hemajkam am hema u'apa g o'othham Jesus wui. Kudki ith pi neath ch pi ha neok nadki pi g jiawul an u'ukch. D g Jesus thoaj ihtha o'othham. D hahawa e nako mad neok k ep ha'ichu neith. 23 D g mu'i hemajkam ab si has i el ihtha k hab kaij, “Shahag wepo mo ith d hegai Davidbad amjedkam mach ab nenida.” 24 D am i ha kah hegam Palasi k hab kaij, “Moki g jijawul ha-ge'ejig ab mahkch g gewkthag. Kuki heg hekaj gm hu hab i ha wua g jijawul ab ha amjed hegam mo an ha u'ukch.” 25 D g Jesus s-mahch mo haschu am chegito ch hab kaij ab ha wui. “S-mahch am mat g o'othham wo padch g hejel e-jewedga o g hejel e-kihhim mat ab a'ai wo e cheggia. T g e-wehm kihkam hab wa'ap wo padch g hejel e-kihthag mat ab a'ai wo e cheggia. 26 Pegih, t has hig masma g ge Jiawul pi wo padch g hejel e-kownaltalig matp ab wo sha ni-mah g gewkthag mant am wo i ha wuwhas g piongaj. 27 Neh, hegam mo ab si em-wecho e mashcham o hab wa'ap i ha wuwhasith g jijawul. Kum eda pi hab masma hab ha elith mo g Jiawul ab ha mahkch g gewkthag. Pegih, ith o am wohokamchuth mo pi woho hegai mam hab chum elith. 28 Hekia S-ap'ekam Gewkthag o ab ni-mahkch ihtha gewkthag mani hekaj gm hu hab i ha wua g jijawul. K ith am wohokamchuth mat heki hu in i wuhsh g Jiosh kownaltalig em-shahgith. 29 “Neh, wohppo'ith ani g ge Jiawul hegam mo an ha u'ukch. Kum s-mahch mat pi hedai wo e nako mas am hu wabsh wo wah hema kih ed mat wo s-ha'ahamak k am wo ui g enigaj, heg hi wa matp wehpeg wo wulsh. 30 “Hegai matp hedai pi ab hu wo i ni-wehmajk o ab ni-wui kehk ch wabsh ha gantan hegam mani s-ha tho'ibiamk. 31 Wehs o gm hu hab i junihog g pi ap ha-chu'ichig g Jiosh. K wabshaba si ge'ej g em-chu'ichig mamtp ab wo has ah g Hekia S-ap'ekam Gewkthag. T g Jiosh pi hekith gm hu hab wo i juh. 32 Im at hu hab wo i juh g Jiosh g chu'ichigaj hegai mat ab wo has ni-ah ahni Jiosh si Kehsha k wabshaba pi hekith gm hu hab wo i juh g chu'ichigaj hegai mat wo has ah g Hekia S-ap'ekam Gewkthag. 33 “Mt wo s-mai mas hedai d s-ap'ekam o'othham hab masma mamt wo s-mai mas s-kehgaj g bahithkam uhs. S-kehg uhs at wo s-kehg bahithagt. T g pi kehg uhs wo pi kehg bahithagt. 34 Ahpim Palasi am hab sha masma mam d kohk'oi ch pi wo sha'i e nako mams s-kehg ha'ichu hab wo chei nam pi d pi ap'ekam ch hemho wa am hab wo chei mo haschu am hab i chu'ig em-ihbthag ed. 35 S-kehg ha'ichu o am hab chu'ig ihbthaj ed g s-ap'ekam o'othham. Kut heg s-kehg ha'ichu hab wo kaijjith. K pi kehg ha'ichu am hab chu'ig ihbthaj ed g pi ap'ekam o'othham. Kut heg pi kehg ha'ichu hab wo kaijjith. 36 “Ith ant hab wo chei mat hemho wa wehs ha'ichu am wo mahsko e wua lothaita tash ch ed mam haschu has i kaij ith thahm jewed. Jiosh at wo hekaj g hejel em-ne'oki mat wo em-lothai, chum hems g s-pehegi em-ne'oki.” 38 D am ha'i ha'ichug g chehanig t-mashchamtham ch Palasi ch hab ahg g Jesus. “Ha mashchamtham, ab g t-chehgith g s-hasig ha'ichukaj maptp woho d Jiosh si Kehsha.” 39 D hab kaij g Jesus, “Si o hig woho pi ap'e ch mehk ab amjed g Jiosh hegam mat pi ab hu wo ni-hiwgam k ho'ip nei g s-hasig ha'ichu. Heg ant ab wo wa'i ha chehgi mant am oithk hab wo ni-juh hegai Jiosh ha'ichu i tashogiththam mash hab chehgig Jonah. 40 Ith ash wa waik tash oitham am ha'ichug ge'e watopi wohk ed. Neh, nt hab wa masma waik tash oitham am wo kahchk hiha'ini ch ed ahni Jiosh si Kehsha. 41 “Jonabad ash wa am ha ahgith g Ninevah t am hemajkam g Jiosh ha'ichu ahga. Kutsh wa gm hu s-ohhoth g pi ap e-chegitoi k hab pi ab hu wo e chu'ichigch ge'e lothaita tash ch ed. Ni ahni ba'ich d i si ha'ichu mo g Jonabad. Kum eda pi ab hu ni-kaiham ch heg hekaj ab wo motoig g chu'ichig lothaita tash ed. 42 “Mehkjed atsh ab i hih g uwi kownal ab Sheba jewed t amjed matsh ab wo kaiha g Solomonbad ha'ichu mahchig. Ni ahni ba'ich d i si ha'ichu mo g Solomonbad. Kum eda pi ab hu ni-kaiham ch heg hekaj ab wo motoig g chu'ichig lothaita tash ed.” 43 Kud hab ep kaij g Jesus, “Matp hems g jiawul an wo hema u'ukch g o'othham k wabsh wo thagito mat am hebai ep wo e ul. Kut hegai o'othham wo i chum kegch g e-thoakag. T wabshaba g jiawul pi hebai wo chehg. 44 K hekaj hab wo i e ah, ‘Mo hig woho d ni-kih hegai o'othham. Nt hig am uhpam wo hih wui.’ Kut wa woho am wo uhpam him k wo cheh mo am wabsh jeg ch si kegchuthas ch hehosimhunas. 45 T am haha wo him k wewa'ak ep wo ha u'apa g jijawul. T ihtham ba'ich wo i pi ap'ek ch am wehmaj wo i chiwia. T ihtha o'othham ba'ich wo i pi ap'ek mo wa ga hu i heki hu. Neh, bat wa masma hab wo e juh hegam mat pi gm hu wo s-ohhoth g pi ap e-chegitoi.” 46 Am ad wabsh kia ha wui neok g hemajkam g Jesus. Kud am haha wabsh thatha g je'ej ch wepngaj s-neithamk. D wabshaba si mu'ij g hemajkam an wehgaj. Kud heg hekaj gm hu wabsh mehk gegok. 47 D hema hegam mo an wehgaj gegok g Jesus hab kaij ab wui, “M-je'e ch m-wepnag ash am hu gegok ch s-m-neithamk.” 48 D g Jesus hab ahg, “Neh, ihtham mo ab ni-kaiham o heg wa wepo mo d ni-je'e ch ni-wepnag. 50 Hegam mat hab wo junihith g ni-ohg Jiosh tatchui o hab masma mo d ni-wepnag ch ni-je'e.”

Matthew 13

1 Heg wa'i tash ed achd gm hu hihi Galilee Kahchki wui. D am i chum thahiwua g Jesus mat wo t-mashcha. 2 Kud wabshaba sha'i mu'i hemajkam an e hemapai wehgaj. D heg hekaj gn hu i chesh g Jesus wahlko ch ed k an thahiwua k amjed ha mashcham. D g hemajkam an gegok shuhthagi koa an ch amjed ab kaiham. 3 Kud mu'i ha'ichu ha tashogith g wepogitha ahgakaj ab amjed g Jiosh kownaltalig. Ith o d ha'ichu ahgaj mo hab kaij: “Am ant he'es wo i em-tashogi g Jiosh kownaltalig wepogithch mat hema an i chum gantad g e-kaichka e-oith ed. 4 T ha'i gn hu shul wohg ch ed. T g u'uwhig am thatha k ko'ito. 5 T ha'i gn hu shul waw t ab mo pi ge'ej g jewed k ab ha hekaj hi wa chum i wuhsh no pi pi an hu juhk g jewed. 6 T ab i chesh g tash. Kut wabsh gaksh no ge mehk tatk. 7 T ha'i gn hu shul sha'i ch ed. Kut g sha'i ab i ge'ege k ha koktha g ha'ichu esha. 8 T wabshaba hegam mat an s-ap shul moihuna ch ed an wuhshani k mu'i ab kait. Ha'i at siant ab kait ch ha'i chuhthpo wehst-mahm ch ha'i waikko wehst-mahm.” 9 Kud hab hahawa ep kaij g Jesus. “Neh, am g wo s-ap i a'amichuth ihtha.” 10 D am hahawa i e hejelko. Kuchd am wui hihim k ab kakke mas haschu ahgch pi ta amichutham ha mashcham g ha'ichu wepogithakaj. 11 D hab kaij, “Nt wo em-ahgi mo has d ahga no pi g Jiosh em-hiwgith mamt wo s-mai mo haschu hemu am maskogith ab amjed g e-kownaltalig. Ni wabshaba heg wa'i ha ahgith ha'ichu wepogitha ahga hegam mo pi ab hu wohochuthamk. T hab pi wo amich ha'ichu ab amjed g Jiosh kownaltalig. 12 Hegam mat s-ap wo hekaj g e-ap'ethag at ba'ich ep wo i nei. T hegam mat pi ap wo hekaj wabsh wo heb hu wua. 13 Heg ani hekaj g ha'ichu wepogithakaj ha'ichu ha ahgith: Mat pi wo amich, chum as wo ha'ichu neith k wo ha'ichu kah 14 K hekaj am wohokamchuth hegai mo an hab chu'ig Isaiabad o'ohana ed mash wa hab kaij Jiosh. Bo chu'ig: Chum am hekith ab kah g ha'ichu ni-ahga ch ab neithchug g ni-ap'echutha ch wabsh pi amichuth 15 no pi g em-chegitoithag wabsh s-kohmagi. Heg o wa wepo mamt am si ha kuhkp g e-wuhpui ch e-nahnk mamt pi wo neith k pi wo kah k pi wo amich nam pi pi e nohnogithamk ab ni-wui. Kunt heg hekaj pi am hu wo i em-ap'ech. Neh, bo chu'i g g Jiosh o'ohana. 16 Kum eda ahpim pi hab sha'i mahs mo hegam mash pi amichuth. Jiosh o ab s-em-ho'ige'ith. Kum s-ap s-amichuth mam haschu i neith ch kah. 17 Nt wo si shel em-ahgi mo mu'ijj g kekelibad Jiosh ha'ichu i tashogiththam ch Jiosh hemajkamga chum si tatchua mat wo neith k wo kah ihtha mam haschu i neith ch kah ithani. K wa wabshaba pi hab mahs am ha wehhejed. 18 “Am ant haha wo em-ahgi mani haschu chum em-mashcham ith hekaj ha'ichu ni-ahga ab amjed g ha'ichu eshtham. Heg kaichka ani wepogith g Jiosh ha'ichu ahga. Ith o am e gantan ha shahgith g hemajkam hab masma mo g ha'ichu kai. 19 K eda ha'i pi amichuth no pi g ha-i'ibthag s-kawpk hab sha masma mo g wohg. K g Jiawul am wabsh s-pehegi ha wohppo'ith mo haschu i kah. 20 “K ha'i g ha-i'ibthag hab sha masma mo hebai pi ge'ej g jewed ab waw t ab. K ihtham si s-hohho'ith ch kah g Jiosh ha'ichu ahga 21 ch wabshaba pi wihnam ab hu u'ukch ch am hi wa he'es wo i s-chegitokahimch. T oi wa g kudutadag ab ha wui wo i hih. Kumt wo ha sho'igch ith hekaj Jiosh ha'ichu ahga. T ha hekaj wabsh wo ta'i i shul. 22 “K ha'i g ha-i'ibthag hab sha masma mo hebai s-sha'ig. K am ha sha'ijithch g pihk ha-elithadag ch s-ha-kaisthag. Kut pi ha'ichu wehhejed wo s-kehgajk am Jiosh wehhejed. 23 “K ha'i g ha-i'ibthag s-moik hab sha masma mo g moihuna. Ihtham at wo s-amich g Jiosh ha'ichu ahga k am wo ahgachugath matp hems ha'i siant ab ep wo ha ba'iha k atp hems ha'i chuhthpo wehst-mahm k ha'i g waikko wehst-mahm ab ep wo ha ba'iha.” 24 Jesus ad am hema ep ha ahgi g hemajkam g ha'ichu wepogitha hab kaijch, “Am ant ba'ichu ep wo i em-tashogi g Jiosh kownaltalig wepogithch mat hema ei g s-kehg kai e-oith ed. 25 T am hu hebai haha wabsh hema jiwia g obgaj chuhug ch ed mo wehsijj kohksh k g sha'i kai am ei ha shahgith g pilkani k gm hu hahawa ep hih. 26 Kut am i wuhsh g e'es k ab i mudatht. T am hahawa s-masma i wuhsh g sha'i. 27 “K hab kaij g eshtham pionag, ‘S hebai amjed i wuhsh g sha'i mapt wa eda t-mah g s-kehg kaichka.’ 28 “K hab kaij am ha wui, ‘Ni-obga at hab juh ihtha.’ “K hab hahawa ep kaij g piongaj, ‘Natt am wo i ha huhpsh hegam sha'i?’ 29 “K hab ha ahg, ‘Pia'a. Mt wo am hu wabsh g pilkani ha huhpsh. 30 Am g wabsh wo hiwgith mat am e wehm wo wuwha. T ab wo e ai mat wo e hih. Kunt hab haha wo ha ahgi g hihktham mat g sha'i wehpeg am wo ha huhpsh k am wo i hemapath k gd hu wo mehith k am haha wo i hemapai g pilkani k gd hu wo i ba'iha.’ Neh, bo kaij g ha-ahmo.” 31 D am hema ep ah g ha'ichu wepogitha g Jesus hab kaijch. “Am ant he'es wo i em-tashogi g Jiosh kownaltalig am wepogithch g ha'ichu kai. 32 Neh, heg am e'esha mo al chumaj ch oi wa am wo wuhshani k ha'as wo i ge'etha mo g s-ehheg uhs. Tp hems g u'uwhig an ab wo koksht. Pegih, t hab wa masma wo ge'e i ge'etha g Jiosh kownaltalig, chum as al chum am wo shonwua.” 33 D am hema ep ah g ha'ichu wepogitha g Jesus hab kaijch, “Jiosh kownaltalig o hab wa'ap wepogithas mo g jewajithakud. Heg amt wo be k am wo wah wehnathk g chu'i k am he'es wo i thai. T wo chehmo g wahga mat wehs am wo i kopothka. Pegih, t g Jiosh kownaltalig hab wa masma wo chehmo g jewed.” 34 Jesus ad haschu i ha ahgith g hemajkam ch heg wa'i hekaj ha'ichu wepogitha ahga. 35 Heki atki hu wa'i o'oha g kelibad Jiosh ha'ichu i tashogiththam mat ith am hab wo wa e juh. K hab chu'ig g o'ohanaj: Ha'ichu wepogitha ant wo hekaj k am wo ha ahgi g hemajkam hegai mo pi hekith sha'i s-e mahch ga hu i shohshonk amjed. 36 D g Jesus gm hu ha thagito g hemajkam k gd hu i wah kih ch ed. Kuchd am wehmaj hihim k ab hahawa kakke mas has d ahga hegai wepogitha ahga ab amjed g sha'i mo am t-ahgith. 37 D hab kaij, “Heg ani wepogithas mo g ha'ichu eshtham ahni Jiosh si Kehsha. 38 K g oithag d ihtha jewed. K g s-kehg kai d hegam mat wo e tho'ibia k am wo ha'ichugk Jiosh kownaltalig ed. K g ni-obga d jijawul ha-ge'ejig. K g eshaj d hegam mat pi wo e tho'ibia. Hihka tash o d lothaita tash. K hegam mat hab wo juh g hihka d anghil. 40 “Hegai sha'i mehiththa o hab d ahga mat g pi ap hehemajkam gm hu wo i e shul jiawul kih ed mat hekith wo i e ai g lothaita tash. 41 Am ant wo i ha chuhcha g anghil ahni Jiosh si Kehsha. Kut ab wo i hihi jewed wui k gm hu hab wo i juh hegai matp haschu am wo i em-wua pi ap'ekam ch ed 42 k gm hu wo ha shul g pi ap chu'ijkam mei ch ed. T ihtham wo si shoanith ch ga hu wabsh wo i si e ki'isch nat pi wo sha'i si s-ko'ok ha'ichu nakogath. 43 T am hahawa wo si tondath g s-ap'ekam hemajkam e-ohg Jiosh kownaltalig ed. Neh, am g wo i a'amichuth ihtha ahpim mam kah!” 44 D am hema ep ah g Jesus g ha'ichu wepogitha ahga hab kaijch, “Jiosh kownaltalig o heg wepogithas mo g s-namkig ha'ichu mat am hema ehsto oithag ch ed k hahawa muh. T am hema haha wabsh chehg k am wabsh uhpam i ma'ishp k si s-hehgig ch am i wehs gagda g ha'ichu e-eniga k am hahawa uhpam ep him k wabsh wehs ha nolawt ihtha oithag.” 45 Kud hab ep kaij g Jesus, “Bamt masma wo s-behim g Jiosh kownaltalig mat g s-namkig hohothai nolawttham wo s-behim hegai mat wehs ha ba'ich wo i s-kehgajk. Heg at wehs wo gagda g ha'ichu e-eniga mat wo e nakog k wo ha nolawt hegai s-namkigchu.” 47 D hab ep kaij g Jesus, “Am ant he'es wo i em-tashogi g Jiosh kownaltalig am wepogithch g waptopi u'ikud chuagia. Heg at am wo wua g waptopi ha u'utham shuhthagi ch ed. T am wo e ba'iha g nahnko mahs waptopi. 48 Kut am wo i wanchkwua shuhthagi hugith an k am wo thahiwua k wo i ha gawulkath k hegam wo e to'i mo s-kehgaj k g pi kehg waptopi gm hu wo nehnich. 49 Bat wo wa masmak mat hekith wo i e ai g lothaita tash. Anghil at am wo a'ai hihim k am wo i ha gawulkai g pi ap'ekam hemajkam 50 k gd hu wo ha shul mei ch ed. T ihtham wo si shoanith ch ga hu wabsh wo i si e ki'ishch nat pi wo sha'i si s-ko'ok ha'ichu nakogath.” 51 D g Jesus ab hahawa t-kakke, “Namt am wa s-amich wehs ihtha?” Kuchd hab kaij, “Heu'u.” 52 D hab hahawa ep kaij ab t-wui, “Pegih, mt hahawa pi wabsh g Jiosh heki hu o'ohana wo ha mashchamath ch wabshaba ith wehnathk ep wo ha mashchamath wechij mashchama ab amjed g Jiosh kownaltalig.” 53 D g Jesus am i ha'asa ah ihtham ha'ichu wepogitha ahga. 54 Kuchd gm hu hihi Nazareth wui mo am d si kihkam. D g Jesus am ha'ichu ha mashcham ha-cheopi ed. D si has elith hegam mo am kah ch ab wabsh a'ai i e kakke. “Kus hebai mai wehs ihtha amichuthadag ch ihtha s-hasig ha'ichu. 55 No hig pi woho d alithaj hegai t-nawojbad mo d huk chikpantham? No hig pi g Mary d je'ej ch g wepngaj d James ch Joses ch Simon ch Jude. 56 Ia o wa kih g u'uwigaj. Kus hebai mai wehs ihtha.” 57 Neh, bad kaij ch wabsh pi ha'ichuch. D hab kaij g Jesus ab ha wui, “Jiosh ha'ichu i tashogiththam at chum hebai ab wo si has e elithath. T wabshaba g si kih'amkam o'othham ch wehmaj kihkam pi ab hu has wo elithath.” 58 Neh, bad kaij ch pi mu'i s-hasig ha'ichu hab juh amai no pi pi ab hu wohochuth ihtham mas d Jiosh si Kehsha.

Matthew 14

1 D eda am hahasko ha'i d ha-kokownalig g Tutuligo ch d gi'ik. D ihtham am hema d kownal Galilee chekshani ch ed ch hab chehgig Herod. Kumd eda wehsko a'aga g Jesus. 2 Kush ith hab ha ahgith g e-haha'ichuga, “Heg oki d hegai mo wa ha pahl wapkonahim ch hab chehgig John. Mua ant. Kutki wabshaba uhpam e chegito k hekaj hab e nakog mat hab wo juh g s-hasig ha'ichu.” 3 Herod atsh wa an bei g John k wulshp k gd hu si kuh am wehhejed g e-hohnig. Ith ash hab chehgig Herodias ch ash d chum hohnigaj g Herod wehnag. Kush heg hab chehgig Philip. Tsh g Herod ehs g hohnigaj. 4 Sh amjed g John chum hekith hab a a'aga. “Mo pi sha'i hiwgithas maps g e-wehnag hohnig wo ehs.” Kush g Herodias heg hekaj ahgith g Herod mat gd hu wo si kuh. 5 Tsh g Herod chum s-mu'am nash pi am ahg g pi ap ha-chu'ichig. K wabshaba g Tutuligo hab kaij mo d Jiosh ha'ichu i tashogiththam. Kush s-ha ehbith ch hekaj pi mua. 6 Kutsh am i e ai g Herod mahsithag. Sh ge'e piastchuth. Tsh g Herodias uwi mad am e waila ha tahgio. Tsh g Herod si s-hohho'i ihtha 7 k wehs ha kaichuthch si s-kaitham hab kaij mat hemho wa wo mah mat haschu ab wo i tai. 8 Sh g je'ej hab ahg mat hab wo chei mat ab wo mah g mo'oj g John am hoas-ha'a ch ed thahshk. Tsh wa woho heg ab tai. 9 Kutsh si pi ap e taht g kownal. Sh wabshaba wehsijj kah mo has i kaij. Tsh heg hekaj pi e nako mas pi am hu hab wo juh 10 k am hahawa hema cheha g shonthal mat an wo him k wo shonch g John mo'o. 11 Tsh wa woho hab e juh k am hahawa u'apa g mo'oj am hoas-ha'a ch ed thahshch k ab mah ihtha uwi. Kut ihtha gd hu hahawa epai mah g e-je'e. 12 Kutsh am hahawa thatha hegam mad ab si wecho e mashcham g John k am bei g honshpadaj k gd hu chehg k am hahawa hihim k gd hu ahgith g Jesus. 13 D am i kah g Jesus mamt mua g John k am hahawa gm hu hejelko s-himimk. Kuchd an thadhaiwua wahlko ch ed k gm hu aigo i chehchsh ha'abjed. Dki wabshaba kah g hemajkam k gn hu i bihbij wabsh hihimk. 14 Kuchd am thatha k am wabsh i chum huhud. D eda mu'ijj am heki hu ha'ichug g hemajkam. D g Jesus si i s-ha ho'ige'ith k ha thothaj g kok'otham. 15 D gm hu si i juh. Kuchd am wui thatha g Jesus k hab chum ahg. “Neh, mehk at wa'i juh. K eda ia hu wabsh si jegko. Am g ha ahgith g hemajkam mat gm hu wo hihi kihhim wui k wo ha nolawt g ha'ichu hugi mat wo huh.” 16 D hab kaij g Jesus ab t-wui, “Ahpim amt wo ha'ichu ha mah mat wo huh.” 17 Kuchd hab kaij ab wui, “Pi ach ge'e ha'ichu edgith. Al hetasp sismito ch gohk waptopi ach am to'akch.” 18 D hab hahawa ep kaij g Jesus, “Ab g wo i u'uka'i.” Kud am e u'apa. 19 D am hahawa ha cheha g hemajkam mat am wo thadhaiwua washai ch ed. Kud am thadhaiwua. Kud am ui ihtha hetasp sismito ch gohk waptopi k am e thahm i nen k ab ho'ige'el g Jiosh k am hahawa hahain k ab t-mah. Kuchd gm hu a'ai ha mahkhi g hemajkam. 20 Kuchd wehsijj hug k kokwoth. Kuchd ahchim chuhchaij an hahawa i u'ihim k u'apa g wihpi'ithaj mat am hu'i gamai gohk hoha wo ha shuhshuth. 21 Kuchd am hu d i hetasp mihl chechoj ch mu'ijj g u'uwi ch a'al ehp. 22 D am hahawa t-ahgi g Jesus matt gm hu aigo wo hihi. Tsh heg am wo wi'i k am wo ha ahgi g hemajkam mat gm hu wo hihi e-kihki wui. Kuchd an i chehchsh wahlko ch ed k gm hu hihi. 23 D g Jesus am ha thagito g hemajkam. Kud gm hu himto. D am hahawa hejel i chesh kawulk thahm k am e ho'ige'ithahu. D am i hud. D am wabsh kia hejel ha'ichug. 24 D g t-wahlko gm hu si eda i cheka g shuhthagi. Kud g hewel ab si s-gewkam meh ab t-wui. D g shuhthagi to'otonk am si a'ai hab t-wua wehs s-chuhugam oithk. 25 Kud koi mahsi. D ab hema him t-wui an wabsh shuhthagi thahm. 26 Kuchd ab i neithok si s-ehbeni ch si hihnk ch hab kaij mo d wabsh kok'oi. 27 D ab hahawa si t-wui neok ch d Jesus ch hab kaij, “Pi g wo sha'i ni-ehbenith. Thani ahni. Mt oi wo s-ap e taht.” 28 Kud g Peter si s-kaitham hab kaij ab wui, “Ni-kownalig, maptp d wo ahpik ch ab wo i ni-wai. Nt ab wo i hih m-wui an wabsh shuhthagi thahm.” 29 D hab kaij g Jesus, “Oi g ab i hihm.” D wa woho ab i hud wahlko t-amjed k am wui i hih shuhthagi thahm. 30 D wabshaba am wabsh si s-gewkam hewed. D g Peter si s-ehbenith k gm hu wabsh i wachumkahi shuhthagi ch ed k ab si e sho'igchuth k hab kaij, “Ni-kownalig, ni-tho'ibiani.” 31 D ha hekaj am i wuhshath g Jesus k hab kaij ab wui, “Pi apki ab hu si ni-hiwig.” 32 D gd hu hahawa e wehm i chehchsh wahlko ch ed. D am wa'i hekaj huhug g hewel. 33 Kuchd ab hahawa si has elith ch ab ihm g Jesus ch hab kaij ab wui, “Woho apki d Jiosh alithag.” 34 Ga achd hu aigo i chehchsh k ab thatha Gennesaret t am. 35 Kud g hemajkam s-amich g Jesus k hekaj ab i ha wai g kok'otham wehsko an heg oithk chekshani. Md ha u'apa Jesus wui 36 k ab si e sho'igchuth k ab ahgith mat chum hems wabsh g kahbaj hugithag an wo taht. Kud s-ap ha thotha mad hedai an i taht.

Matthew 15

1 D am ha'i thatha g Palasi ch chehanig ha mashchamtham ab Jerusalem t amjed k ab kakke g Jesus hab kaijch, 2 “K haschu ahgch g m-pionag pi ab hu wohog elith g ha'ichu ha-mashchamadag g kekelibad? Neh, e o gegosith pi am hu t-himthag oithch ha wapkonk g e-nohnhoi.” 3 D hab kaij g Jesus ab ha wui, “M ahpim haschu ahgch pi ab hu wohog elith g Jiosh chehanig ch wabsh g hejel e-himthag am hab junihim? 4 Ith o d chehanigaj g Jiosh mo hab chu'ig: Ab g si has wo i ha elithath g e-ohg ch e-je'e, ch ith ehp, Mat hemho wo wa e muhkith hegai mat hedai wo sha s-ko'okam has ah g e-jehj. 5 Kum eda ahpim ha mashcham mat pi ab hu has wo ha elithath ch ab ha wui hab wo chei, ‘Mah ant g Jiosh hegai mat haschu ab d wo i chum em-wuikamk.’ 6 Kum hab masma im hu hab wabsh i wua g Jiosh ne'oki ch am ha mashcham hegai mo haschu d wabsh o'othham ha-nahtoi. 7 Bam wabsh s-e junimk mam ab has elith g Jiosh. Kuki wabshaba g Jiosh hab em-ahg ch hab kaij ihtha matki g Isaiabad an o'oha: 8 Ha'i ihtham mo d chum ni-hemajkamga o hab kaij mo ab si has ni-elith ch ab ni-ihm. K wabshaba g ha-i'ibthag si s-kawpk ch si mehk ab ni-amjed. 9 Pi o sha'i wohom ab has ni-elith no pi wabsh g hemajkam ha-chehanig ha mashcham hab chum masma mo d ni-chehanig.” 10 D g Jesus ab hahawa i ha wai g hemajkam k hab kaij ab ha wui, “Ab g wo ni-kaiham k wo s-amich. 11 Pi at im hu hab wo i em-juh g Jiosh heg hekaj mamt haschu wo huh k wabshaba im hu hab wo i em-juh heg hekaj pi kehg em-chegitoithag.” 12 Kuchd am thatha wui ahchim k hab kaij, “Nap s-mahch mat si e taht g Palasi heg hekaj map hab kaij?” 13 D hab kaij g Jesus, “Pi g has wo e tahtkkath ab ha amjed. Tho chum em-wanimedtham ch eda hab sha masma mo d pi neneatham ch chum ha wanimed g ha'i ep pi neneatham ch atp hems am wabsh ha wehm wo i shul hiktani ch ed. Ni-ohg Jiosh at gm hu hab wo i ha juh hab sha masma mamt wo huhpsh k gm hu wo nehnich g ha'ichu wuhshthag am e-esha ed.” 15 D g Peter ab neok ch hab kaij, “Am g t-ahgith maps haschu tashogith ch hab kaij mat pi im hu hab wo i t-juh g Jiosh heg hekaj matt haschu wo huh.” 16 D hab kaij g Jesus ab t-wui, “Kumt ahpim hab wa'ap pi koi sha'i amich hegai mani em-ahgith. 17 Pi at im hu hab wo i em-juh ab amjed g Jiosh mamtp haschu wo huh. 18 Heg at im hu hab wabsh wo i em-juh ab amjed g Jiosh mat wo pi ap'ek g em-chegitoi. 19 Heg at hab wo em-juh mamt hab wo juh g ha'ichu pi ap'ekam. Neh, mtp hems wo ha mua o wo ha ehs g ha-wehm kihkam o hab wo juh g s-tohntom ha'ichu o wo ha'ichu ha ehs o wo ha'ichu ha iattogi ab hema i ep amjed o wo pi ap neo. 20 Ith o d hegai mat im hu hab wo i em-juh ab amjed g Jiosh. Pi at heg im hu hab wo i em-juh mamt pi am hu ha-chehanig oithk wo wapko g e-nohnhoi k haha wo e gegos.” 21 Kuchd gm hu hahawa hihi Syria jewed wui k am miabi g Tyre ch Sidon kihhim. 22 D am hema d uwi ch pi d t-wehm o'othham ch am t-wui jiwia k hab kaij ab wui g Jesus, “S-ap'ekam ni-kownalig mapsh d Davidbad amjedkam, ab g si i s-ni-ho'ige'ith. Ni-chehiaga o g jiawul an u'ukch ch si sho'igchuth.” 23 D wabshaba g Jesus pi ab hu has sha'i kaij wui. Kuchd ab si ahgith mat hig wo cheha mat gm hu wo hih no pi an t-oithahim ch si s-nakosig. 24 D hab kaij g Jesus ab wui ihtha uwi, “Heg o d wa'i ni-chikpan ithani mant wo i ha wehmt g Tutuligo hemajkam.” 25 D ab ha hekaj i gei wecho ihtha uwi k hab kaij, “Am g hig i ni-wehmt.” 26 D hab kaij g Jesus, “Heg at wo wa wepok mamt ab wo ha mah g gogogs g ha-chechmait g a'al.” 27 D hab kaij hegai uwi, “Woho o wa. T wabshaba chum hems g gogogs am wo huh g a'al ha-ha'ichu hugi hahainig. Kunt ahni hab wa masma wo si s-ap ni-taht mapt ith am hab wo al i ni-juni.” 28 D hab hahawa kaij g Jesus ab wui, “Neh, m-ne'oki o am chehgith map ab si ni-hiwig. T heg hekaj am hab wo e juh ihtha map ab ni-tahni.” Kutsh am wa'i hekaj thoa hegai chehiagaj. 29 Amjed achd gm hu hahawa ep hihi Galilee shuhthagi babsho. D g Jesus am i chesh kawulk thahm. 30 Kud mu'ijj am thatha g hemajkam k am ha u'apa g pi hihimithkam ch pi neneatham ch pi neneokthan ch mu'i nahnko mahs kok'otham. D g Jesus ha thothaj. 31 Kud si has i elith g hemajkam neithok mo neneok g mumio ch g pi hihimithkam oiopo ch g momjo hahawa ab wehsig ch g pi neneatham s-ap ha'ichu neith. D wehsijj ab si has elith g Jiosh. 32 D g Jesus ab hahawa i t-waith k hab kaij, “Neh, waik tashkaj in o wa'i t-wehmaj ihtham hemajkam ch heki hu wa'i pi ha'ichu huh. Ni s-ha ho'ige'ith. Tp hems ha'i wo s-e chuhugi matp gm hu wo sha hihi pi ha'ichu hugok.” 33 Kuchd hab kaij ab wui, “Kuchs hebai hig wo ui g ha'ichu hugi ith eda tohono jewed matt hekaj wo ha gegos g ha'akia hemajkam?” 34 D hab kaij g Jesus. “He'ekia at am i wih g sismito?” Chd hab kaij, “Al wewa'ak sismito ch al he'ekia chu'uchum waptopi.” 35 D g Jesus am hahawa ha chehani g hemajkam mat wo thadhaiwua. Kud am thadhaiwua. 36 D am ha ui hegam wewa'ak sismito ch waptopi k ab ho'ige'el g Jiosh k am i hahain k ab t-mah. Kuchd an i ha mahkhi g hemajkam. 37 D wehsijj hug k oi wa hi si s-kokwoth chum as am hu hebai d gi'ik mihl chechoj ch mu'i ehp mo d u'uwi ch a'al ch pi kuintas. Kuchd an hahawa i u'ihi g wihpi'ithaj mat am hu'i wewa'ak hoha wo ha shuhshuth. 39 D g Jesus am hahawa ha ahgi g hemajkam mat gm hu wo hihi. Kuchd gn hu thadhaiwua wahlko ch ed k gm hu aigo i chehchsh Magadan chekshani am.

Matthew 16

1 D am ha'i thatha g Palasi ch Sajusi k ab ne'owin g Jesus ch ab chum si chehani mat am wo ha chehgi g si s-hasig ha'ichu matp woho d Jiosh si Kehsha. 2 D hab kaij g Jesus ab ha wui, “Neh, s-mahch am mat has mahs tash ab wo himath ab wabsh neithch mas hebaijed hewed ch has mahs chewagi i wushke. Pegih, mt hab wa'ap wo chum s-mahchk mo haschu has e junihog ia'i ithani am neithch mo haschu hab e junihim.” 4 D hab ep kaij, “Si o hig woho pi ap'e ch mehk ab amjed g Jiosh hegam mat pi ab hu wo ni-hiwgam k ho'ip nei g s-hasig ha'ichu. Heg ant ab wo wa'i ha chehgi mant am oithk hab wo ni-juh hegai kelibad Jiosh ha'ichu i tashogiththam mash d Jonah.” Bad che'iok k am ha thagito k gm hu hih. 5 Kuchd am gahi ep i shul wahlko ch ed k ga hu aigo thatha k s-mai machdki pi ha'i u'uk g sismito. 6 D am wa'i hekaj mad hab kaij g Jesus ab t-wui, “Si g wo s-e nen'oithk mat pi wo em-cheawogi g ha-jewajithakud hegam Palasi ch Sajusi.” 7 Kuchd am si a'aga ihtha k hab kaij, “Heg oki hekaj hab kaij mattki pi ha'i u'uk g sismito.” 8 Kudki s-t-amichuth g Jesus ch hab kaij, “Pi amki koi amichuth mani he'es edgith g gewkthag ch hekaj am a'aga mach pi ha sismitoga. 9 Am am wa chum neith mant al hetasp sismitokaj ha gegos g hetasp mihl chechoj ch mu'i ehp. Ms hu'i pi chegito mamt he'ekia i hoha an i ui g wihpi'ithaj. 10 Kum am wa chum neith mant al wewa'ak sismitokaj ha gegos g gi'ik mihl chechoj ch mu'i ehp. Ms hu'i pi chegito mamt he'ekia i hoha an i ui g wihpi'ithaj. 11 Pegih, mt wo chum s-mahchk mani pi wabsh g ha'ichu hugi hab ahg ch hab kaij mamt wo s-e nen'oithath ab amjed g Palasi ch Sajusi ha-jewajithakud.” 12 Kuchd am hahawa i s-amich moki pi heg hab ahg jewajithakud mo hekaj e pahnt ch oki heg hab ahg Palasi ch Sajusi ha-mashchamadag. 13 Kuchd gm hu hahawa hihim k am i miabi g Cesaria Philippi kihhim. D g Jesus ab t-kakke ch hab kaij, “Am g wo ni-ahgith Thoh'o ni-elith g hemajkam?” 14 Kuchd hab kaij, “Ha'ijj o hab m-elith map d hegai Johnbad mo wa chum t-pahl wapkonahim ch ha'ijj hab kaij map d Elijabad o Jeremiabad o hema i ep kekelibad Jiosh ha'ichu i tashogiththam.” 15 D ab hahawa ep t-kakke, “M ahpim hig hedai ni-elith?” 16 D ihtha Simon mamt hab hahawa chehch Peter hab kaij, “Thap Jiosh alithag ch d si Kehshaj g Jiosh,” 17 D hab kaij g Jesus, “Simon, Jiosh at si s-m-ho'ige'ith k am m-chehgi mani d si Kehshaj. Pi at wabsh g hemajkam am m-chehgi. 18 Kupt ab i s-wohoch g Jiosh k ab si ni-hiwig. Nt heg hekaj hab wo m-chehch Peter (Hothai). Neh, ith ab waw ant am wo i kei g ni-cheopiga. Bani ahgch hab kaij mat wehsijj hegam mat hab wa'ap ab wo si ni-hiwgath at d wo ni-hemajkamgak. Kut pi hedai wo sha'i e nako mas wo ha keshwua, chum hems g jijawul. 19 Kunt ab wo m-mah g gewkthag mapt wo s-mahch k ah g Jiosh ha'ichu ahga k hab wo yahwitpi'o g ap'ethag am ha wehhejed hegam mat ab wo s-wohoch. Ab ant wo m-mah g gewkthag mapt hab wo ah mo haschu shohbithas ch haschu hiwgithas am ha wehhejed hegam mat ab wo ni-hiwgath.” 20 Neh, bad kaij g Jesus ch ab hahawa si t-chehani matt pi hedai wo ahgi mo heg d Jiosh si Kehsha. 21 D am i amjed am hahawa si tasho t-ahgi g Jesus k hab kaij, “Hemho wa ant am wo hih Jerusalem wui. Kut mu'i wo ni-sho'igch g ge'eged ch u'ugchu papal ch chehanig ha mashchamtham k am wo i ni-thagito mant wo ni-muhkith. T wabshaba am wo him k d wo i waik tashk amjed. Nt ab wo uhpam i wuhsh muhkig amjed.” Neh, bo kaij g Jesus. 22 D g Peter im hu go'olko i be k ab si s-gewkam neok wui hab kaijch. “Pi at woho wo sha'i hiwigi g Jiosh mamt hab wo m-juh.” 23 D hab kaij g Jesus ab wui, “Pi g sha'i ni-shohbith. Tho wabsh hejel hab m-elitha ihtha. Kup ab wui kehk g Jiosh hab elitha hab masma mo g ge Jiawul.” 24 D hab hahawa ep kaij ab wehsijj t-wui, “Mamtp am wo s-oitham g ni'himthag k hemho wa gm hu wo thagito g hejel e-tatchui k ahni ni-tatchui hab wo junihith ni-wehhejed e sho'igchuthch. Heg at wo wa wepok mam ab mohto g kots ch ab ab wo e muhkith. 25 Pi amt wo heki wua g e-thoakag mamtp wo hekaj am ni-wehhejed am ahgachugch g Jiosh ha'ichu ahga. Heg at wo heki wua g e-thoakag matp hedai wo chum s-tha'ath. 26 Pi at ha'ichu wehhejed wo s-kehgajk matp g o'othham wehs wo bei mo haschu i tatchua ith thahm jewed k wabshaba pi wo e tho'ibia. Pi o an hu ha'ichug ith thahm jewed mas heg hekaj wo e tho'ibia g o'othham. 27 “Jiosh at ab uhpam wo ni-mah g si ge'e gewkthag an e-kihthag ed. Kunt heg hekaj si s-tondam wo tondath ch ia ep wo jiwia jewed thahm. T mu'i anghil wo i ni-wehmajk. Kunt wehs wo ha namkith g hemajkam heg hekaj mo haschu hab i junihim. 28 Nt wo si shel em-ahgi mamt ha'ijj an d wabsh wo kia thothakamk ch wo nei mant s-gewkam am wo chehgi g ni-kownaltalig em-shahgith.”

Matthew 17

1 D am d i chuhthp tash amjed. D g Jesus ab i ha wai g Peter ch James ch John. D am wehmaj ab i chehchsh hema uhgk tho'ag t ab k atsh gn hu thatha tho'ag thahm. 2 Kutsh g Jesus am hahawa gawul e juh. Sh g wuhioshaj hab wa'i masma tonod mo g tash ch g wehschugaj hab masma s-tohta mo g tonlig. 3 Kutsh ab haha wabsh i e chehgi g Mosesbad ch Elijabad k am wehmaj neneok g Jesus. 4 Sh g Peter hab kaij ab wui g Jesus, “T-kownalig, s-ap'e oki mach ia ha'ichug. Kutt ia waik wo ha chuhcha g al chechopi matt hekaj ab wo si has em-el ahpi ch Mosesbad ch Elijabad maptp wo tatchuath.” 5 Neh, sh am wabsh kia neok g Peter. Kutsh g si s-mahs chewagi ab i wuhshani k ab ehka ha thahm. Tsh g Jiosh ne'oki ab kaitha chewagi t amjed k hab kaij, “Jesus o d si ni-tatchuithch ni-alithag. Heg amt ab wo si kaihamath.” 6 Kutsh si s-ehbeni hegam Peter am i kahk g ne'oki k am wabsh si kupal shul jewedo. 7 Tsh am hahawa jiwia g Jesus k an ha tahtam k hab kaij, “Gegokiwuio. Pi g wo sha'i e tothsith.” 8 Tsh am hahawa i chum nenhog. Kush heg wa'i Jesus hejel am kehk. Sh pi am hu ha'ichug hegam gohk. 9 Sh ab hahawa i huhudkhim tho'ag t amjed. Sh ab si ha chehani g Jesus ch hab kaij. “Pi g am hedai wo sha'i ahgith mamt haschu nei, nt ho'ip kia uhpam i wuhsh ab muhkig amjed ahni Jiosh si Kehsha.” 10 Kush hab kaij ihtham ab wui g Jesus, “Neh, bo chech'e hegam chehanig t-mashchamtham matsh ia wehpeg wo e maskogi g Elijabad. Tsh g Jiosh si Kehsha ia haha wo e maskogi. Pegih, t haschu ahgk pi ia wehpeg m-ba'ich e maskogi hegai Elijabad?” 11 Sh hab kaij g Jesus, “Hema at woho wehpeg wo e maskogith k hab wo masmak mash wa g Elijabad ch wehs ha'ichu wo i ap'ech. 12 Kunt wo em-ahgi mat wa woho heki hu jiwia. K Wabshaba mu'ijj pi mahch mo hedai wud ch ab wui hab wabsh juh g pi ap e-tatchui. Pegih, k e aihim mat hab wa'ap wo ni-juh k wo ni-sho'igch ahni Jiosh si Kehsha.” 13 Kutsh am hahawa i amich ihtham moki heg hab ahg John mat wa am i shonwuich g pahl wakona. 14 D eda mu'i hemajkam am ha'ichug amai machd am wih. Kud am uhpam thatha hegam Jesus. D ab hema i tonwua Jesus wui 15 k hab kaij, “Ab g si i s-ho'ige'ith g ni-sulijga. Si o pi ap mumku ch hebai am wabsh s-e chuchkagith ch mu'ikko am gegshe nahtha ch ed o am shuhthagi ch ed. 16 Kunt ia chum u'apa ha wui ihtham m-chuhchai. T pi e nako mas wo thoaj.” 17 D hab kaij g Jesus ab t-wui, “Sho'o wa'i pi ge'ej g em-wohochuthadag. M im hu hab wabsh i si e Juhkch ab ni-amjed. Shahag wepo mant tash ia wo em-wehmajkath ch wo em-nakogath mat haha wo i ge'etha.” Bad kaij g Jesus ch hab hahawa ahg hegai o'othham. “Ab g i beka'i g e-alithag.” 18 D ab hahawa i bei wui. D g Jesus am si s-gewkam chehani g jiawul mat gm hu hab wo i e juh. Kud wa woho hab e juh. D am ha hekaj wabsh i thoa g ali. 19 Kuchd ab hahawa hejelko kakke g Jesus machs haschu ahgk ahchim pi t-nako matt gm hu hab wo i juh g jiawul. 20 D hab kaij g Jesus, “Heg amt hekaj pi e nako mam pi ab hu wohochuth mat hab wo e juh. Nt wo si shel em-ahgi mamt wo e nakog k wabsh chum haschu hab wo juh mamt hab wo chei s-wohochuthch mat hab wo e juh. Chum at hems g ge'e tho'ag gn hu hab wo i kekiwua mamt wabsh wo ahgi s-wohochuthch mat hab wo e juh. [ 21 T wabshaba ihtha hab mahs ha'ichu hab wa'i masma gm hu hab wo i juh mamt wo si e ho'ige'ithahunath Jiosh wui pi ha'ichu ko'athch.]” 22 Am achd wabsh kia oiopo Galilee chekshani ch ed. D hab kaij g Jesus ab t-wui, “E o aihim mat wo ni-bei hegam mo s-ni-keh'ith k ab wo ni-thagito 23 mant wo ni-muhkith. T wabshaba am wo him k d wo i waik tashk amjed. Nt ab wo uhpam i wuhsh muhkig amjed.” Neh, kuchd wehsijj si pi ap t-taht am i kaiok ihtha. 24 Kuchd gd hu thatha Capernaum t am. D am hema jiwia Peter wui hegam mo an hemapath g cheopi kowlanta k ab kakke ch hab kaij, “No ha namkith g cheopi kowlanta g em-mashchamtham?” 25 D hab kaij g Peter. “Hemho wa,” K amjed gd hu i wah kih ch ed. D g Jesus ab ha hekaj kakke ch hab kaij. “Simon Peter, nap hab elith mat g kokownal ab wo ha'ichu ha kowlant hegam mo d ha wehm kihkam?” 26 D hab kaij g Peter, “Pia'a.” D hab ep kaij g Jesus. “Pegih, t heg hekaj pi ha'ichu wo ni-kowlant g Jiosh. 27 Ch wabshaba pi tatchua machs wo ha kudu ihtham hemajkam. Kupt heg hekaj am wo hih shuhthagi wui k am wo wua g waptopi hukshpakud. Kut g si wehpeg watopi mapt wo huksh g lial ab wo kamshchith mat wo ai hegai cheopi kowlanta an ni-wehhejed ch ep m-wehhejed. Pt am wo be k hekaj wo ha namkith.”

Matthew 18

1 Kuchd ab kakke g Jesus ch hab kaij. “Thoht d wo si s-has ha'ichuk am Jiosh kownaltalig ed?” 2 D eda an hema kehk g al chum ali. D g Jesus am i waith k ab t-ba'ich i kehsh 3 k hab kaij, “Nt wo shel em-ahgi mamt hab wa'i masma am wo i wahp Jiosh kownaltalig ed mamt am gawul wo juh g e-chegitoithag k ab wabsh wo i pi e ha'ichuchuth k hab wo masmak mo ihtha al chum ali. 4 Hegai mat hab wo juh ihtha at d wo s-has ha'ichuk am Jiosh kownaltalig ed. 5 T hedai i s-ap ab wo i ha nei g a'al am ni-wehhejed o heg wa wepo mat ahni s-ap ab ni-nei. 6 “S-to'o ehbitham hab mahs am wehhejed hegai mat hema am wo i ha wanchkwua pi ap'ekam wui ihtham al a'al mo ab al ni-hiwig. Ba'ich at wo i s-ap'ek wehhejed matp hems wo e wachumchuth k wo e muhkith mat koi hab wo juh ihtha chu'ichig. 7 Chum o hekith an hab e wua g pi ap'ekam jewed thahm. K hegam mo hab wua am ha'i ep ha wanchshulig pi ap'ekam wui. T g Jiosh hemho wo wa ha namkith. 8 “Pi at hedai wo e nako mas ab uhpam wo i wuhsh Jiawul kih amjed. Kut pi hekith wo huhug g ha-sho'igchutha amai. Heg at wo wa wepok mat am mei ch ed wo e sho'igchuthath. Mt heg hekaj am wo i e nako mamt pi am hu wo gei heg eda. Ba'ich at wo i s-ap'ek mamt chum hems wo heb hu wua g e-nowi o g e-tad o g e-wuhi matp hema ihtham hab wo em-juh mamt am wo gei Jiawul kih ed k pi wo bei hegai pi ha huhugetham thoakag mo g Jiosh ab em-makiog. 10 “Am g wo s-nen'oithk mamt pi wo s-ha keh'ithath ihtham al chu'uchumchu. Jiosh o ab si has ha elith ch am ha nuhkuthachuth g anghil. [ 11 Ia ant jiwia jewed thahm mant wo ha tho'ibia g heb hu hihimkam. ] 12 “Neh, am g wo i oithahim ihtha. Mamtp hems hema ahpim siant wo kahwaligak. Kut hema wo heb hu hih. Namt hig pi woho am wo s-apko ha thagito hegam humukto gamai humukt k am wo hih tho'ag oithk k am wo i gahghi g heb hu himkam e-shoiga. 13 Kut woho d wo s-hehgigk mamtp wo cheh. 14 Bo wa masma pi sha'i tatchua g em-ohg Jiosh mat hema wo heb hu hih ihtham al chu'uchum a'al. 15 “Mt heg wa'i hejel wo ahgi e-wehm wohochuththam matp pi ap wo chu'i ab em-wui. Kutp hems ab s-ap wo em-kaiha. Kut ab hahawa ep wo i e hemakoch g em-chegitoithag, 16 Tp wabshaba pi ab hu wo em-kaiha, kumt hemako o gohk am ha wehm wo him k am wo ah g chu'ichigaj. Kut hab masma gohk o waik wo s-mahchk g chu'ichigaj mo ith hab masma an o'ohanas Jiosh o'ohana ed. 17 Kutp eda wa sha pi ab hu wo em-kaiha, kumt am wo ha ahgi wehsijj hegam mam am ha wehm e mihshmath. Kutp pi ab hu wo ha kaiha ihtham, kumt haha wo thagito hab masma mo pi d em-wehm wohochuththam. 18 Nt wo si shel em-ahgi mant ab wo em-mah g gewkthag mamt hab wo ah mo haschu shohbithas ch haschu hiwgithas am ha wehhejed g ni-hemajkamga. 19 Jiosh at am hab wo em-juni mamt haschu ab wo tahnith e wepo hab elithch. 20 Kunt am wo ha'ichugk em-shahgith mamt hebai am wo i e hemapai, chum ams d wo wa'i gohkk o waikk.” 21 D g Peter ab kakke g Jesus ch hab kaij, “Ni-kownalig, nant wewa'akko ab wabsh wo i s-ho'ige'el g ni-wehm wohochuththam matp ha'akkio hab wo juh g pi ap'ekam ab ni-wui?” 22 D hab kaij g Jesus, “Pi amt wabsh wewa'akko ab wo i s-ho'ige'el. Matp he'ekkio hab wo i juh g pi ap'ekam, mt ha'akkio wo s-ho'ige'el. 23 Bo wa e wua g em-kownalig Jiosh ch em-tatchuith mamt am hab wa'ap wo e junihith. “Ith ant am wo em-tashogi em-ahgithch matp hems hema d wo kownalk ch am wo i ha hoa g e-pionag ha-wulshpadag, 24 Kumt am hema u'apa g piongaj, K ith ab ab e wulshch g mu'i mi-yohn pihsh. 25 Kuki ihtha pi am hu hugkam edgith g lial mat wo namkith g e-wulshpadag. T hekaj g ahmoj am ha cheha mamt wo gagda k g wehmaj kihkam ch a'aligaj ch ha'ichu enigaj ep wo ha gagda. T d wabsh wo neneholk. 26 “Kut ihtha ha-pionag ab i gei e-ahmo wui k ab i tahni mat ab wabsh wo i s-ho'ige'el. Kut wo wa wehs ha namkith. 27 T am i s-ho'ige'el g ahmoj k im hu hab i juh g wulshpadaj k thagito. 28 Kut am hih ihtha o'othham. “K eda hema g wehmaj pion al he'ekia pihsh ab ab e wulshch hegai mamt ab i s-ho'ige'el. Kut heg nam k g ba'ichuj be k hab si ah mat wo namkith. 29 “Kut ihtha wehmaj pion ab i gei wecho k ab i e sho'igchuth wui mat ab wabsh wo i nenida. Kut wo wa uhpam namkith. 30 “Kut wabshaba pi ab hu kaiham k wabsh ha chehani mamt gd hu wo si kuh am hugkam mat hekith wo i namkith. 31 “Neh, t ha'i ehp g pion si pi ap e taht neithok mat has e juh k am hihim k am ahgith g e-ahmo wehs ha'ichu. 32 “T g ha-ahmo ab i wai ihtha e-pionag k hab kaij ab wui, ‘Ahpi si pi amkam ni-pionag, ab ant i si s-m-ho'ige'ith k im hu hab i juh wehs hegai m-wulshpadag heg wa'i hekaj map ab si ni-tahni. 33 Kupt hab wa masma wo chum s-ho'ige'el g e-wehm pion mant has i masma s-m-ho'ige'el.’ 34 Neh, bo kaij ch si bagat k gd hu si kuh am hugkam mat hekith wehs wo i namkith. 35 “Pegih, t hab wa masma am hab wo em-juh g ni-ohg Jiosh mamtp pi hab hu e-ihbthag amjed wo i s-ha ho'ige'el hegam mat ab em-wui pi ap wo chu'i.”

Matthew 19

1 Am ad i ha'asa ha mashcha g Jesus k am i thagito g Galilee chekshani. Kuchd gm hu aigo hihi Jordan akimel ha'abjed k am hihim k am thatha Judea chekshani ch ed. 2 D mu'i hemajkam an oithahim g Jesus. Kud ha thoajith. 3 D am ha'i thatha g Palasi hab chum ahgk mat ab wo ha'ichu kakke k hekaj wo heki himch. K g ha-kakkei hab chu'ig, “No hiwgithas an t-chehanig ed mat g o'othham wo s-ohhoth g e-hohnig?” 4 D hab kaij g Jesus, “An o hab chu'ig Jiosh o'ohana ed: Ga hu i wehpeg at am ha nahto g Jiosh g cheoj ch uwi mat d wo e wehhejedkamk 5 k hab kaij: I'ajed at g o'othham wo ha thagito g e-ohg ch e-je'e k ab wo i wehmt g e-wehm kihkam. T ihtham d haha wo hemakok. 6 Neh, bo kaij g Jiosh. K pi hab chum mahs mas g o'othham ab a'ai wo i ha gawulkai hegam mat g Jiosh ab i ha hemakoch.” 7 D hab kaij g Palasi ab wui, “K wabshaba an o'ohanas t-chehanig ed matsh g o'othham wo mah g e-hohnig g ohhotha tapial k wo s-ohhoth.” 8 D hab kaij g Jesus, “Heu'u, bo chu'ig mamt wo ha mah g ohhotha tapial mamtp pi ab hu wo kaihamath g Jiosh ch pi wo pihk e elithath ha hekaj. K wa eda chum pi hab masma ga hu i wehpeg mat in ha nahto g Jiosh g hemajkam. 9 Kunt ith hab wo em-ahgi mat d wo pi ap'ekamk mamt wo s-ohhoth g e-wehm kihkam k hema ep wo hohnt, heg hi wa mamt wo s-mai am i chum hohntk matki heki hu ha wehm wo'iwua.” 10 Kuchd hab kaij ab wui, “Kuki heg hekaj ba'ich i chum s-ap'e mat g o'othham pi wo ha hohnt.” 11 D hab kaij g Jesus, “Pi at wehsijj wo e nako hab masma, heg hi wa mat g Jiosh am wo i ha wehmt. 12 Ha'ijj at pi wo hohont no pi hab masma d mahsikam mo pi tatchua g hohnig ch ha'ijj d hegam mamt hab wabsh ha juh mat pi ap wo hohont. Ha'ijj o ep pi hohont heg hekaj mo g Jiosh kownaltalig ba'ich hab i elith. Kumt ith am hab wo juh mamtp wo e nako.” 13 Kud ha'i am ha u'apa g e-a'aliga mat ab wo ha taht g Jesus k wo e ho'ige'ithahu ha wehhejed. Kuchd chum s-ha keh'ith mo hab e wua. 14 D hab kaij g Jesus, “Ab g wabsh wo i ha hiwgith g a'al mat ab wo i hihi ni-wui k pi an hu wo sha'i ha shohbi. Am at wabsh s-moimam wo i wahp Jiosh kownaltalig ed ab ni-hiwigch. Kumt hab wa'i masma am wo i wahp.” 15 Neh, bad kaij ch ab hahawa ha tahtam k amjed gm hu hih. 16 D am hu hebai am hema jiwia g wechij o'othham Jesus wui k hab kaij, “Ha mashchamtham, shahchu ant am hab wo juh g s-ap'ekam mant ab wo bei g pi ha huhugetham thoakag?” 17 K hab kaij g Jesus, “Ab ap ni-kakke ab amjed g s-ap'ekam. K eda heg wa'i Jiosh d s-ap'ekam. Am g hab junihith g Jiosh chehanig maptp wo tatchuath mapt wo bei g pi ha huhugetham thoakag.” 18 D hab kaij g o'othham, “Hedai hegam chehanig?” D hab ep kaij g Jesus, “Ihtham mo hab chu'ig: Pi g am hu ha mua'i g o'othham. Pi g am hu ha ehsithath g ha-wehm kihkam. Pi g am hu ha'ichu ha ehsithath. Pi g am hu ha'ichu ha iattogithath. 19 Ab g si has ha elithath g e-ohg ch e-je'e. 20 D hab kaij g o'othham, “Wehs ani am hab wa chum ha junihim ihtham chehanig. Shahchu ant hab ep wo juh?” 21 D hab kaij g Jesus ab wui, “Pegih, pt am wo him k wo gagda wehs ha'ichu map haschu i eniga k wo ha mah g namkigaj g sho'igkam k ab wo i him k wo ni-oithath maptp woho s-behimk hegai map chum e gahgith.” 22 Kud si pi ap e taht am i kaiok k gm hu hih no pi d sha'i si s-kais ch si s-huwith g e-kaisthag. 23 D hab hahawa ep kaij g Jesus ab t-wui. “Neh, nt wo si shel em-ahgi mat wo sha'i si s-hasigk mas g s-kakais am wo i wahp Jiosh kownaltalig ed. 24 Mam hig hab elith mat wo e nako g ka-mihyo mas am wo gahi wuhsh ho'ipad jeg ed? Pegih, t hab wa masma pi wo e nako hegam mo hiwig g ha'ichu e-eniga mas am wo i wahp Jiosh kownaltalig ed.” 25 Kuchd am wabsh i pi amichuth k hab kaij ab wui, “A t hedai hig wo e tho'ibia.” 26 D g Jesus ab si shel i t-neith k hab kaij, “Pi at wo e nako wabsh g o'othham. T wabshaba g Jiosh wo e nako mat wabsh chum haschu am hab wo juh.” 27 D g Peter hab kaij, “Neh'e, ahchim att wehs ha'ichu thagito k am i m-oi. Tt haschu ab wo bei heg hekaj?” 28 D g Jesus hab kaij ab t-wui, “Woho o wa mamt ab si i ni-oi. Kunt am wo si shel em-ahgi mant an wo thahiwua s-kehg ni-kownal thaikud ed ahni Jiosh si Kehsha. Kumt ahpim an hab wa'ap wo thadhaiwua gamai gohk kownal thathaikud an k d wo u'usagakamk am ha thahm hegam gamai gohk thakam e-wehm Tutuligo. 29 Matp hedai am wo i thagito g e-kih o g e-wepnag o g e-jehj o g e-a'aliga o g e-oithag at ab wo ui siant e thahm ba'ich i mu'i k ab wo bei g pi ha huhugetham thoakag. 30 Mu'ijj hegam mo d wehpegkam hemu at d wo si ha oithchkamk ch mu'ijj hegam mo ga hu si ha oithch hemu d wo wehpegkamk.

Matthew 20

1 “Ith ant am wo em-tashogi ith hekaj mant wo ha'ichu wepogi g Jiosh kownaltalig. Heg o wepogithas mat g uhdwis oithag enigakam wabsh i si'alim am him k ha'i ha ui g o'othham mat am wo chikp oithaj ed. 2 T g ha-namkithadag d wo hegaik mo haschu i u'u g pion tash ab. T am ha hekaj hihim k chikp. 3 “T am hahawa ep hih humukt ohla ch ed. K am ha'i gegok g o'othham ch pi ha'ichu has wua. 4 K hab ha ahg, ‘Nt wo s-ap em-namkith mamt wo chikp am ni-oithag ed.’ 5 Kut wa woho am chikpano ihtham. T hab wa masma hab ep e juh am i gamai gohk ohla ch ed ch waik ohla ch ed. 6 “K am hu d i hetasp ohla. T am hih kahya wui. K am wabsh ha'i gegok. K hab kaij ab ha wui, ‘Shahchu am ahgch wabsh heki wua g tash pi ha'ichu has wuathch?’ 7 “K hab kaij ihtham, ‘Pi at hedai t-chikpanach.’ “K hab hahawa ep kaij ab ha wui, ‘Pegih, k am wo hihim k wo chikp am ni-oithag ed.’ 8 “Neh, t gm hu si i juh. Kut ihtha oithag enigakam hab ah g e-pionag ha-ge'ejig, ‘Ab g i ha waith g pion k ab wo i ha namkithahi. T hegam wehpeg wo e namkith mant si ha oithch an ha ui k amjed hegam ehp mant ep ha ui k hegam ga hu si ha oithk wo e namkith mant si wehpeg an ha ui.’ 9 “Kut hegam mat gm hu si i juhk chikp mo d i hetasp ohla ab ui g e-namkithadag ha'akia mo he'ekia u'u g pion tash ab ch amjed wehs g ha'i. 10 “Kut ab ha ai hegam mat wabsh i si'alim chikp. K hab e ahg mat ba'ich i mu'i wo ui g e-namkithadag. Mt wabshaba ha'akia wa ha namkith. 11 T ab ui g e-lialiga k babgat ab wui g e-ahmo k ab wui hab kaij, 12 ‘Neh, hegam o'othham mapt si oithk an ha ui al hemako ohla ab chikp. Kutt ahchim ge tash oithk chikp am s-toni k ed. Kupt eda am wo ha'akia t-namkith mapt hegam.’ 13 “K hab kaij g oithag enigakam ab wui hegai mo ha wehhejed neok, ‘Neh, ni-nawoj, pi ant sha'i em-iattogi namt pi am wa ap'ech mamt ha'akia k ab wo chikp ni-wehhejed. 14 Pegih, ab g wabsh wo uh'i g e-namkithadag k gm hu hihim uhpam no hig pi ab ni-ab ahni hejel mant ha'akia wo wa ha namkith hegam mant gm hu si i juhk ha ui mant ahpim he'ekia em-namkith. 15 Ab o ni-ab mant has masma wo hekaj g ni-lialiga. Aha nam wabsh s-ni-hehgamk mani s-hemajima?’ ” 16 D hab hahawa ep kaij g Jesus, “Neh'e, t hekaj hab hegam mo gm hu si i ha oithch d wo wehpegkamk ch hegam mo d wehpegkam ga hu wo si ha oithchk.” 17 Am achd i t-nakog k gm hu hihi. Kud g Jesus am hejelko t-wai ahchim gamai gohk 18 k hab kaij, “Neh, am att wo hihi Jerusalem wui. T hegam mo s-ni-keh'ith am wo ni-thagito ha wui g u'ugchu papal ch chehanig em-mashchamtham. Kut ihtham ab wo ha'ichu ni-abch s-ni-mu'amk 19 k am wo ni-thagito ha wui g go'ol hemajkam. T ihtham wo nahnko ni-ahgath ch wo ni-gewittan k amjed ab wo ni-sisish kots t ab. Nt ab wo muh. T am wo him k d wo i waik tashk amjed. Nt ab wo uhpam i wuhsh muhkig amjed.” 20 D eda am t-wehmaj g ha-je'e g James ch John. D ihtham am wehmaj hihi Jesus wui ab ha'ichu s-tahnimk. D g ha-je'e ab si has elith k ab wui hab kaij matsh ab wo ha'ichu tai. 21 D hab kaij g Jesus, “Shahchu ap tatchua?” D hab kaij ihtha, “Pt hig wo i ha chuhcha ihtham gohk ni-mahmad mat am m-oithch d wo haha'ichuk mapt hekith am wo i himch g e-kownaltalig.” 22 D hab kaij g Jesus ab ha wui, “Pi am sha'i ap mahch mam haschu ab ni-tahni. Wehpeg ant ab wo nako g ge'e sho'igthag. Kut hegam mat am ni-oithch d wo si haha'ichuk hab wa'ap wo e juh.” D hab kaij ihtham, “Pegih, tt wo t-nako.” 23 D hab hahawa ha ahg g Jesus, “Pegih, woho amt ab wo nako hegai hab mahs sho'igthag. K wabshaba pi ab hu ni-ab manis ahni am wo i ha chuhcha mat hedai am ni-oithch d wo haha'ichuk. Hegam at am wo i e chuhcha mat hedai i ha wehhejed am ap'ech g Jiosh.” 24 Kuchd ahchim ha'i babgat ab ha wui hegam gohk mad hab masma ab hejel chum e ha'ichuchuth. 25 D g Jesus ab hahawa wehs i t-hemapath k hab kaij ab t-wui, “S-mahch am mo g ha-maliomig s-gewkam ha chehani g e-pionag ch g ha wanimedtham am ha himchuthahim. 26 T wabshaba pi hab masma hab wo sha'i chum mahsk am em-shahgith. Mt wabsh si s-hemajim am wo i ha wehmtath g e-wehm wohochuththam hab sha masma mam d wabsh ha-pionag mamtp wo tatchuath mamt wo ha wanimedath. 28 Ahni ani hab wa masma si s-hemajim i em-wehmt ch pi ab hu ni-ha'ichuchuth em-thahm, chum anis d Jiosh si Kehsha. Ab o em-wui him g s-ko'ok namkithadag heg hekaj pi ap em-chu'ichig. Nt wabshaba ahni em-wehhejed wo nako mamt wo e wupul'o.” Neh, bad kaij g Jesus. 29 Kuchd gm hu i wuwha ab Jerico t amjed. D mu'i hemajkam ab i t-oi. 30 D am hu hebai wohg hugith an gohk am thadha g pi neneatham o'othham. Kuchd am hihim. D am i t-kah k s-mai mo an him g Jesus k si s-kaitham hab chech'e, “Ab g si i s-t-ho'ige'ith, ahpi map d s-ap'ekam t-kownalig ch apsh d t-kownaligbad David amjedkam.” 31 D hegam mo an ha wehgaj si s-ha keh'ith ch hab ha ahg mat wo pi shahmunik. D wabshaba ba'ich haha wabsh i s-kaitham hab kaij, “Ab g si i s-t-ho'ige'ith, ahpi Davidbad amjedkam.” 32 Kud am hahawa i kekiwua g Jesus k ab i ha waith k hab kaij, “Shahchu am tatchua mant hab wo em-juni?” 33 D hab kaij ihtham, “Si g s-t-ho'ige'ith k ab i t-nenchuth.” 34 Kud si s-ha ho'ige'el g Jesus k ab ha taht ha-wuhpui ab. D ha hekaj ha'ichu s-ap neith k ab i oi.

Matthew 21

1 Kuchd amjed am hihim Jerusalem wui k am ai g Olive U'us Kawulk. D heg mia kihhimag ch hab chehgig Bethphage. 2 D g Jesus gohk hab ha ah g e-chuhchai, “Am g wo hihim k ga hu wo thatha kihhim t am. Kut am hema wo wulshpik g wuhlu g e-mad wehm. Mt gam wo ha wul'o. 3 Kumt ab wo em-kakke mams has wo juh. Kumt hab wo ha ah mani ahni d em-mashchamtham ch tatchua. Kut ab wabsh wo i ha thagito mamt ab wo i ha wanim ni-wui.” Neh, bad kaij g Jesus. 4 K eda heki hu wa'i o'ohanas matsh ith am hab wo e juh. Hema atki wa an o'oha g kelibad Jiosh ha'ichu i tashogitham. K g o'ohanaj hab chu'ig: 5 Am g wo ha ahgith g hemajkam am Jerusalem kihhim t am: Ab at wo hih g s-ap'ekam em-kownalig em-wui k ab wabsh wo si e sho'igchuthch ch hab g wechij wuhlu wo cheshajhith. 6 Kud am hihi ihtham gohk k am hab juh mo haschu hab ha ahg g Jesus 7 k am ha u'apa hegam wuplu. Kuchd an toa g t-liliwa ha ab. D an thahiwua heg an mo d wechij. 8 Kud mu'i hemajkam an t-wehgaj ch am i tahtdahim g e-liliwa wohg ch ed. D ha'i g wechij u'us i'ibhonig an hikkumi'ak k am to'ahim wohg oithch. 9 D hegam mu'i hemajkam mo an t-wehgaj hihim si s-kaitham hihnk ch hab kaij, “T-tho'ibiakam! Thap amjedkamaj g t-kownaligbad David. Jiosh atki ia i m-wuhshath k ab si s-m-ho'ige'ith. Kuch ab si has elith g Jiosh.” 10 Kuchd am i thatha Jerusalem kihhim t am. D mu'ijj am wabsh i pi amich mo haschu has e wua k hab kaij, “Thoh'o wud hegai?” 11 D ha'ijj hab ep kaij, “Ith oki d Jiosh ha'ichu i tashogiththam ch hab chehgig Jesus ch am d kihkam Nazareth t am am Galilee chekshani ch ed.” 12 D am i wah g Jesus kolhai ch ed mo am kehk g ge'e cheopi. D eda am ha'i thadha mo am ha'ichu gagda ch ha'ichu ha nolawt cheopi miabithch. D g Jesus gm hu si ha shahmuth k g ha-thathaikud kuhkpal ha shul. D am ha'i ep thadha ch am kammialt g lial. Kud g ha-mimsa gm hu a'ai kuhkpal si ha shulig 13 k hab hahawa wehs ha ah, “Bo chu'ig an Jiosh o'ohana ed mo hab kaij g Jiosh: Ahni o d ni-wehhejedkam ihtha ge'e cheopi. Kut ith wui ab wo hihhimath g hemajkam mat ab wo ni-ihmath. Neh, bo kaij g Jiosh. Kumt wabshaba ahpim an be k am eda hab wabsh wua g hejel e-tatchui ch chum hems ha'ichu s-a'agi ha ehsith ab ha wui ha'ichu gagdach.” 14 Kumd am wui ha u'apa am ge'e cheopi t am hegam mo d pi neneatham ch hegam mo pi a'apkodag. Kud ha thothaj. 15 D g a'al am si hihnk ge'e cheopi t am ch hab kaij, “Ab ach si has elith ihtha mo d t-kownaligbad David amjedkam ch d Jiosh si Kehsha.” Kud g u'ugchu papal ch chehanig t-mashchamtham neith mo g s-hasig ha'ichu hab wua ch ha kah g a'al ch sha'i si babgat 16 k hab kaij ab Jesus wui, “Shahchu ap ahgch pi ha shohbith? Aha nap pi has sha'i elith mo has i kaij?” D hab kaij g Jesus, “Am o wa s-ap'e. Jiosh at hab masma ha nahto g a'al mat si s-ap ab wo hehgchulithath mo hab masma an hab chu'ig Jiosh heki hu o'ohana ed.” Neh, bad kaij g Jesus 17 ch am ha thagito. Kuchd gm hu hihi Bethany kihhim wui k am kohk. 18 Ba'ich tash, chd gm hu hebai uhpam hihim Jerusalem wui. Tsh bihugim g Jesus. 19 D eda am hu hema kehk g suhna uhs. Kuchd ab wui hihi no pi s-hahhagag ch ab wo chum bahithagk. D oi wa pi ab hu ha'ichu sha'i ihbthag. D hekaj hab kaij, “Pi at thahm ab hu ep wo bahithagt.” Kudki wa woho gaksh. 20 Kuchd am i neithok si has i elith k hab kaij, “S has masma sha'i si s-hohtam gaksh.” 21 D hab kaij g Jesus, “Nt wo si shel em-ahgi mamt ab wabsh wo hiwgath g Jiosh. Kut wabsh chum haschu hab wo em-juni. Mtp hems wo cheha ihtha tho'ag mat gm hu wo e wua ge shuhthagi ch ed. Kut wa woho hab wo e juh mamtp wo s-wohochuthath mat hab wo e juh. 22 Ab g wo tahnith g Jiosh mamt haschu wo i tatchua. T heg hab wo em-junithath mamtp woho wo s-wohochuthath mat hab wo e juh.” 23 Kuchd gd hu uhpam thatha mo am kehk g ge'e cheopi. D g Jesus am ha mashcham g hemajkam. D am ha'i thatha g u'ugchu papal ch ge'eged k ab kakke ch hab kaij, “Thohp amjed hab chum e elith map an u'ukch g e-gewkthag ch am hab ha'ichu wua? Oi g am t-ahgith.” 24 D hab kaij g Jesus ab ha wui, “Pegih, nt ahni wehpeg ab epai wo ha'ichu em-kakke. Mt am wo ni-ahgi. Nt am haha wo em-ahgi g em-kakkei. 25 Am g hig wo ni-ahgith mams hedai amjed hab elith mo wa g Johnbad ab u'ukch g e-gewkthag ch ha pahl wapkonahim. No ab Jiosh amjed aha no ab o'othham amjed?” D ihtham am wabsh chum hejel si a'aga ch hab kaij, “Shahtt hig wo chei? T wo s-t-keh'ith k ab wo t-kakke matt haschu ahgk pi ab hu wohoch g Johnbad mattp hab wo chei mo ab Jiosh amjed u'ukch g gewkthag. 26 T g hemajkam has wo t-juh mattp hab wo chei mo ab wabsh o'othham amjed u'ukch. Mu'ijj o hab elith mo d Jiosh ha'ichu i tashogitham.” 27 Neh, bad kaij ch ab hahawa uhpam i e nohnogi Jesus wui k hab kaij, “Pi ach sha'i mahch mas hedai amjed ab u'ukch g e-gewkthag.” D g Jesus hab epai kaij, “Pegih, nt ahni hab wa'ap pi wo sha'i em-ahgi mani hedai amjed u'ukch g ni-gewkthag ch hab wua wehs ihtha.” 28 D hab ep kaij g Jesus, “Am g wo oithahim ihtha mant wo em-ahgi. Matp hems hema g o'othham gohk wo a'alithagk ch hab wo ah g ge'echu, ‘Ni-sulijga, am g hihm k chikpan am uhdwis oithag ch ed ith i tashkaj.’ 29 “K hab kaij ihtha, ‘Pi ani tatchua mant am wo hih,’ ch wabshaba am sha'i he'es gawul juh g e-chegitoithag k am hih oithag wui. 30 “Kut ihtha ohg am hahawa hih heg wui alichu e-alithag k hab wa'ap kaij ab wui. “K hab kaij ihtha, ‘Heu'u, am ant wo wa hih,’ ch wabshaba pi am hu hih. 31 “Thohm hab elith mat ab s-wohog el g e-ohg?” D hab kaij hegam, “Hegai mo d ge'echu.” D hab hahawa ep kaij g Jesus ab ha wui, “Nt wo si shel em-ahgi mat g em-uhwaitha chechoj ch chechpa'awi u'uwi am wo i wahp Jiosh kownaltalig ed matp ab wo hiwgath g Jiosh. Mt wabshaba ahpim pi am hu wo i wahp mamtp pi ab hu wo hiwgath. 32 Ha pahl wapkontham John at wa ia jiwia em-wui k am chum em-chehgi g s-apkokam. Kumt pi ab hu wohoch. T wabshaba ihtham ab s-wohoch. Kumt wa chum nei ihtha k eda wa pi gawul juh g pi ap e-chegitoi mamt ab wo s-wohoch. 33 “Am g hema ep wo kaiham g ha'ichu wepogitha,” bad kaij g Jesus. “Neh, matp hems hema g jewed enigakam am wo ei g uhdwis e-oithag ed. T g piongaj an si kolhaidath k heg ep nahto mat hekaj am wo i wuhshath g wadgaj k am kei g uhgk kih mat heg amjed wo nuhkuthath g eshaj. “T gm hu hasko chihpia g enigakam k ha'i ha hiwigi g e-oithag. 34 T am i e ai mat g uhdwis bai. T am ha'i ha cheha g e-pionag mat am wo hihim k ab wo bei hegai wadgaj mo ab d i chum wuikamaj g enigakam. “T am hihim k am thatha. 35 Kut ihtham nuhkuththam an ha u'u k hema gewittan k hema mu'a k hema ep ma'ichkwua. 36 “Kut am hahawa ba'ich i mu'i ep ha cheha mat am wo hihi. Kut am hihim k am thatha. T am hab wa masma hab ep ha juh hegam nuhkuththam. 37 “T g e-alithag am hahawa ep cheha gm hu si ha oithch no pi hab ha elith mat ab wo wa has el. 38 “T wabshaba ihtham oithag nuhkuththam am i nei g alithaj k hab kaij ab a'ai e wui, ‘Ith o d enigakam alithag. Oi g wo, tt wo mu'a k wehs wo bei g enigaj.’ 39 Neh, t wa woho an be k gm hu si i wuhshath ab amjed g uhdwis oithag k mua. 40 “Pegih neh, shaht hig wo ha juh ihtham g enigakam hekith i jiwiak?” 41 D ha'ijj hab kaij hegam. “Hemho wa at wo ha koktha hegam si pi ap chechoj k gm hu ba'ich ha'ijj ab wo ha nuhkuthach mat ihtham ab hi wo mah hegai mo haschu ab d i wuikamaj.” 42 D hab ep kaij g Jesus, “Heu'u, nat pi s-ohhoth g enigakam alithag. Kumt hab wa masma wo s-ni-ohhoth. Ith o hab ahgch hab chu'ig g wepogitha ahga Jiosh o'ohana ed: Kihttham at wo hema chum s-ohhotham g hothai. T wabshaba ith d wo si s-has ha'ichu hothaik am ha-kihta wehhejed. Ith o hab d ahga mat si s-kehg ha'ichu hab wo juh g Jiosh. 43 “Neh, bo chu'ig g Jiosh o'ohana. T g Jiosh wo em-wohppo'i g e-kownaltalig ahpim Tutuligo k hegam ab wo ha mah mat s-ap am wo i chikp. 44 Neh, t wo e sho'igch hegam mat pi wo ni-amich. Ith at heg wo wa wepok mat ab wo e keiko hothai t ab. Kut hegam mat wo s-ni-ohhoth wo bei g s-ko'ok e-namkithadag. Ith at heg wo wa wepok mat g hothai ab ha ab wo gehsh k am wabsh wo s-ha wia.” 45 D hegam u'ugchu papal ch Palasi s-mahch mo g Jesus ha wepogith hegam pi ap pion 46 ch heg hekaj an chum s-behim. D wabshaba g hemajkam hab elith mo g Jesus d hema Jiosh ha'ichu i tashogiththam. K hegam u'ukchu papal s-ha gihug.

Matthew 22

1 Jesus ad am hema ep ha ahgith g ha'ichu wepogitha am neokch ha wui g hemajkam ch hab kaij, 2 “Bant masma am ep wo wepogi g Jiosh kownaltalig matp hems hema g kownal am wo i ap'ech g ge'e gegosig am wehhejed g e-alithag nat pi wo ha hohnt. 3 T am i e ai. Kut am ha cheha g e-pionag mat an wo ha ahgithahi hegam mam ab heki hu ha waith. Kut wabshaba ihtham pi ab hu i hihimim. 4 “Kut am hahawa ha'i ep ha cheha g e-pionag mat an ep wo i ha ahgithahi. K ihtham an ha ahgithahim ch hab kaij, ‘Heki at hu e chuama g s-gihgim ch e gag'e g wipsilo ch wehs ha'ichu e nahtokch. Kumt ab wo i hihim k wo e gegos.’ 5 “T wabshaba ihtham mam ab ha waith pi ab hu sha'i kaiham k gm hu hab wabsh wua g hejel e-chikpan. Hema at gm hu hih e-oithag wui. T hema gm hu ep hih e-tiannaga wui. 6 Kut ha'ijj an ha ui ihtham pion k ha gewittan k ha koktha. 7 Kut sha'i si bagat hegai kownal k am ha cheha g e-shonthalig mat am wo hihim k epai wo ha koktha hegam mat ha koktha g pion k wo mehi g ha-kihhim. T wa woho hab juh. 8 “T am hahawa i ha wai g e-pionag k hab kaij, ‘E at nahto g gegosig wehhejed g ni-alithag hohnta. T wabshaba hegam hemajkam mant ab i chum ha wai hab e juh mo pi d hahawa ha-wuikam. 9 Kumt am wo hihi wohg oithk k ab wo i ha wai gegosig wui mamtp he'ekia i hemajkam wo ha cheh.’ 10 “Kut am wa woho hihi g piongaj wohg oithk k ab wehs i ha wai hegam mat ha cheh, chum hems g pi ap hemajkam. T am hahawa mu'i thatha. Kumt wehsijj ab ha mah g s-kehg eniga heg wehhejed k am i ha wahpki. Kut shuhth g kih. 11 “Kut am i wah g kownal k am ha nei hegam mat am thatha. K am hahawa wabsh hema thaha g o'othham mo pi ab hu wahkch hegai s-kehg eniga. 12 K ab kakke ch hab kaij, ‘Ni-nawoj, shahpt masma ia i wah pi ab hu wahkch g s-kehg eniga ith wehhejed?’ “T am wabsh i pi amich ihtha o'othham mat has wo chei. 13 Kut ihtha kownal am hahawa ha ahgi g e-pionag k hab kaij, ‘Am g wo si wulshp k gm hu wo tha'ich s-chuhugam k ed. Kut am hu wo shoak k ga hu wabsh wo i si e ki'ishch nat pi wo sha'i si s-ko'ok ha'ichu nakogath.’ 14 “Pegih, nt wo em-ahgi mo mu'i ab ha waith g Jiosh. K wabshaba al he'ekia d i hemajkamgaj.” 15 Kutsh am i e hemapai g Palasi am i a'amich mat has masma wo heki himch g Jesus ab ha'ichu kakkek. 16 Tki am ha'i i ha wehmt hegam mo ab si has elith g kownal Herod k am ha wehm hihi ha'i hegam Palasi k am thatha k hab kaij, “Ha mashchamtham, s-mahch ach map s-ap d o'othham ch wabsh chum hedai ha mashcham g Jiosh himthag, chum as has wo chei hedai i. 17 Pegih, k am wo t-ahgi maps has elith g ge'e kownal lial kowlanta. No hig t-hiwgith g t-chehanig ahchim Tutuligo matt wo ha namkith aha no pi t-hiwgith?” 18 D wabshaba g Jesus am wa s-ha amichuth mo g pi ap'ekam hab elith ch hab ha ahg, “Ahpim s-chu i'attomkam am wabsh chum heki s-ni-himchuthamk. 19 Ab g wo hema ni-chehgith hegai lial mam hekaj ha namkith.” Kumd ab hema chehgi. 20 D hab ha ahg, “Am g hig wo ni-ahgith mo hedai wuhiosha ch hedai chehgig ab o'ohadag ith ab lial?” 21 D hab kaij ihtham, “Hegai mo d uhgchu t-kownalig.” D hab hahawa ep kaij g Jesus ab ha wui, “Pegih, ab g wo i thagito kownal wui hegai matp d enigaj k am epai wo i thagito Jiosh wui mo haschu d epai enigaj.” 22 Kud si has i el hegam k gm hu hihi ab amjed. 23 D heg wa'i tash ed am ha'i thatha g Sajusi Jesus wui. Hegam mo d Sajusi o pi wohochuth mat g muhki ab uhpam wo i wuhsh muhkig t amjed. 24 D hab kaij ihtham, “Ha mashchamtham, Mosesbad atki an o'oha hegai chehanigaj g Jiosh mo hab chu'ig matsh g am oithchkam wehngaj hegai mat wo muh pi ha a'alithagkch hemho wo wa bei g hohnigaj g e-wehnagbad. Tsh g ha-a'aliga hab masma wo e kuint mat d wo a'alithajk hegai mat muh. 25 “Pegih, k am hu hebai wewa'ak d e-wepngam ch am t-wehm kih. Kut g si ge'echu ge hohnt k pi ab hu ha a'alitht k muh k an thagito g e-hohnig. T g am oithchkam nawojij an hahawa ep bei g hohnigaj 26 k hab wa'ap pi ab hu ha a'alitht k hab wa'ap muh. Kut ihtha g oithchkam hab wa'ap hohnt k hab wa'ap muh pi ab hu ha a'alithtk. Neh, t hab masma i e oi ihtham wewa'ak k wehsijj ko'ok huhug. 27 K am hu'i hebai, t haha wabsh muh hab wa ehp ihtha uwi. 28 Pegih, am g hig t-ahgith mas hedai d wo hohnigkath ihtha matp ep wo e chegito g ko'i no pi wehsijj hohnigkahim.” 29 D hab kaij g Jesus ab ha wui, “Pi am ap chegito nam pi pi sha'i mahch g Jiosh o'ohana ch ep pi sha'i mahch mo he'es i gewkthag. 30 Woho at ab uhpam wo ha mah g ko'i g thoakag. T wabshaba hahawa pi wo hohontath hab masma mo g anghil pi hohont. 31 Mosesbad atki an o'oha mash wa hab kaij g Jiosh: 32 Ahni ani d ha-Jioshga hegam Abraham ch Isaac ch Jacob. Neh, ith o hab kaij g Jiosh, chum as heki hu koi, no pi am e wehm ha nuhkuth ch ab uhpam wo i ha wuwhas muhkig amjed. Pi amt woho wo i huhug am i ko'ok matp g Jiosh d em-Jioshga.” 33 Kud am i kah ihtha g hemajkam k si has i el g mashchamaj. 34 Kud am ha'i thatha g Palasi mat wo heki himch g Jesus am i kaiok mat ab si ha chehmo g Sajusi. 35 D hema hegam d Jiosh chehanig hudawogtham 36 ch hab kaij, “Ha mashchamtham, shahchu o d si ba'iwechkim ge'e chehanigaj g Jiosh?” 37 D hab kaij g Jesus, “Ith o d si ge'e ch ba'ich i si s-has ha'ichu chehanig: Hemho wa amt ab wo si tatchuath g e-kownalig Jiosh wehs e-ihbthagkaj ch ith am wo chehgithch wehs e-thoakagkaj ch wehs e-chegitoikaj. 39 K ith am oithch d si s-has ha'ichu chehanig ch wepo chu'ig: Hemho wa amt ab wo tatchuath g hemajkam hab masma mam ab hejel e tatchua. 40 Ihtham gohk chehanig o ab ab wehs shohshonas g Jiosh chehanig ch wehs hegai matki kekelibad Jiosh ha'ichu i tashogiththam an o'oha.” 41 D am i e hemapai g Palasi. D g Jesus hab ha ahg, 42 “Am g wo ni-ahgith mam hedai hab elith mat g Jiosh si Kehsha ab d wo amjedkamk?” D hab kaij hegam, “Heg atsh d wo amjedkamk t-kownaligbad mash hab chehgig David.” 43 D hab kaij g Jesus, “Pegih, sh wa eda g Davidbad hab a'aga, ‘ni-kownalig’ ch hab kaij g gewkthajkaj g Hekia S-ap'ekam Gewkthag: 44 Bo kaij g Jiosh ab ni-kownalig wui: In g thahiwua ni-wehm ni-kownal thaikud ed. Kunt wo ha gewito g m-obga mat ab wabsh wo m-wechok. 45 Neh, namt hig s-ap wo ah mat has masma d wo Davidbad amjedkamk ihtha mash d ge'e kownaligaj?” 46 Kud pi hedai e nako mas ab hu uhpam has wo chei Jesus wui nih hemako ne'oki. D heg i tashkaj amjed pi hedai e nako mas ab hu ha'ichu ep wo kakke.

Matthew 23

1 Mu'i hemajkam ad am ha'ichug t-wehm. 2 Kud hab kaij g Jesus ab wehsijj t-wui, “Hegam chehanig em-mashchamtham ch Palasi o d hegam mo ab mahks g gewkthag mat am wo i tashogi g chehanig. 3 Kumt heg hekaj ab wo s-ha wohog elithath. K wabshaba mu'ijj ihtham pi am hu hab junihim mo haschu em-mashcham. Kumt hekaj pi am hu ha oithk hab wo masmak. 4 Neh, mu'i s-hasig ha'ichu o ab em-chehani. K ith d s-wehch ha'ichu mohtoi am em-wehhejed. K eda pi ha'ichu hab sha'i wua mas hekaj em-wehm wo moht. 5 Wehs ha'ichu o heg wabsh hekaj am hab junihim mamt wo ha neithath. An o u'a g Jiosh o'ohana heg wabsh hekaj mamt hab wo ha elithath mo ab wohog elith. 6 Si o s-hohho'ith mat si s-apko wo thadhaiwua am ge'e gegosig ch ed ch am wa si hejelko thathaikud am cheopi ch ed. 7 Si o s-hohho'ith mamt ab wo si has ha elithath am hemajkam ha-shahgith ch hab wo ha a'agath mo d ge ha mashchamtham. 8 “Ahpim g pi wo sha'i tatchuath mams hab wo em-a'agath ‘ha mashchamtham’ nam pi d a'ai e-wepngam. Kuni ahni d wa'i em-mashchamtham. 9 Pi g hedai hab wo a'agath ‘ge ni-ohg’ ith thahm jewed. Heg amt wa'i Jiosh hab wo a'agath mo d ge em-ohg. 10 Pi g hab wo e a'agath mam d ha wanimedtham. Ahni ani d wa'i em-wanimedtham Jiosh si Kehsha. 11 Bamt wa'i masma d wo si ha'ichuk mamt d wabsh wo ha-pionagk. 12 Kut d wabsh wo pi ha'ichuk hegai matp hedai hab wo chum e elithath mo d si ha'ichu. Heg at d wo si ha'ichuk matp hedai ab wabsh wo i pi e ha'ichuchuthch.” 13 D hab hahawa ep kaij g Jesus, “Neh, mu'ijj ahpim chehanig ha mashchamtham ch ahpim Palasi am d wabsh s-chu i'attomkam. Ih, sho'ig! Jiosh at si s-ko'okam wo em-namkith heg hekaj. Pi am ha hiwgith hegam mo am i chum s-wahpkimk Jiosh kownaltalig ed ch hab wa'ap hejel pi am hu i wahp. Heg o wa wepo mam ab si yahwidathch g kihjeg am Jiosh kownaltalig wui. 14 [“Ha am iattogith g hehe'ejel wi'ikam u'uwi ch ha ehsith g ha-kihki ch eda am wabsh s-e chehgithamk mam si chew e ho'ige'ithahun. Ith at hekaj ba'ich wo i s-ko'okk g em-namkithadag.] 15 “Am am si i e nakog mamt chum hems hemako am wo i wanchkwua pi wohokam e-himthag ed. T ihtha ba'ich i s-gewkam wo wulshpik mam ahpim mat am wo gei Jiawul kih ed nat pi ba'ich i s-gewkam am wo oithath g pi wohokam em-himthag. T g Jiosh si s-ko'okam wo em-namkith heg hekaj. 16 “Neh, am am ha'i ep chum ha mashcham ch eda hab chech'e, ‘Pi att hemho wa hab wo juh g t-ne'oki mattp wabsh wo gewkaj chehchegch g ge'e cheopi, heg hi wa matt wo chehcheg hegai ohla mo hekaj e heosith.’ 17 K eda g ge'e cheopi ba'ich d i si ha'ichu mo hegai heosithakud. 18 “Kum hab ep chech'e, ‘Pi att hemho wa hab wo juh g t-ne'oki mattp wabsh wo gewkaj chehchegch hegai iagchulithakud mo am hab chu'ig ge'e cheopi t ab, heg hi wa matt wo chehcheg hegai mo an ab e iagchulith.’ 19 K eda g iagchulithakud ba'ich d i si ha'ichu mo hi hegai mo an ab e iagchulith. 20 K heg wa wepo mam heg chehcheg iagchulithakud mam eda chehcheg g iagchulitha. 21 Kum chehcheg g Jiosh mam eda chehcheg g ge'e cheopi no pi heg d Jiosh kih. 22 Kum hab wa'ap chehcheg g Jiosh mam eda chehcheg g thahm kahchim. 23 “Im am hu hab wabsh i juhkch hegai mo d chum si ha'ichu am Jiosh chehanig ed mamt hab wabsh wo juhkchith g al chum ha'ichu. Neh, wehs am ha'ichu hemako tahpani mahk g Jiosh mo wehst-mahm e tahpanch, chum hems g ha'ichu hahhag ch ha'ichu kai, ch wabshaba pi ap ha lothait ch pi ha ho'ige'ith ch pi ab hu wohochuth g Jiosh. T g Jiosh heg hekaj si s-ko'okam wo em-namkith. 24 Am am wabsh s-nen'oith g al chu'uchum ha'ichu ch g ge'eged ha'ichu pi chegito. Ith o heg wa wepo mamtp hems wo o'os g e-wasib mat am eda wo gei g al chukumug k wabshaba wabsh wo bah wehnathk g ka-mihyo matp heg am eda wo gei. 25 “Ba'ich at wo i s-ko'okk g em-namkithadag nam pi hi wa chum si s-ap e chehgith. K wabshaba am em-eda ha'ichug g pi amdag ch s-chu tha'athag. 26 Am g wo i e kegchuth e-i'ibthag ed. T g ha'ichu hab em-juni am haha wo s-ap'ek. 27 “Neh, nat hig pi wo i e kegch g hiha'ini an e thahm, chum as am eda wo wehchk g oh'o ch jewalig? Pegih, m ahpim hab sha masma mo g hiha'ini 28 nam pi ab chum e chehgithch mam d s-ap'ekam. K eda g em-chegitoi pi a'pe. Ih sho'ig! Jiosh at si s-ko'okam wo em-namkith. 29 “Em-shohshon at mu'i ha koktha g kekelibad Jiosh ha'ichu i tashogiththam. Kum ahpim si s-kehg ha hehosith g ha-hiha'iniga hegam mamt ha koktha ch hab chech'e mamt ahpim hi pi wo chum ha koktha. Tham s-chu i'attomkam ch ha wepo masma mash wa g em-shohshon. Ih, sho'ig! Jiosh at si s-ko'okam wo em-namkith namt pi am ha oithk hab wo e juh. 32 S-ap amt wo nahto hegai mat g em-shohshonbad i shonwuich. 33 Thamt wo ha mu'akamk hab masma mo g kohk'oi ch hekaj pi hab mahs mams wo e tho'ibia. 34 Pegih, nt wo em-ahgi mant am i ha wuwhas g ha'ichu i tashogiththam ch s-chu a'amichuththam ch ha mashchamtham am em-shahgith. Kumt ha'i wo ha gewitta am e-chechopi ed k ha'i an has wo ha shahmuthahim k ha'i wo ha koktha, chum hems ab ha sisishpk kots t ab. 35 T g s-ko'ok em-namkithadag ab em-ab wo gei hemu s-hohtam. Neh, Abelbad atsh wa wehpeg e muhkith. Tsh amjed mu'i ep e ko'ij. Tsh ga hu si ha oithch hegai Zecariabad mash d Barackiabad alithag e muhkith am ha shahgith g ge'e cheopi ch iagchulithakud, Kum ahpim ha wepo chu'ichig hegam matsh wa ha koktha ch ha wepo masma wo bei g s-ko'ok e-namkithadag mamtp hedai ha wepo elith ha'ichu.” 37 K hab ep kaij g Jesus, “Ih, sho'ig, ahpim Jerusalem t am hemajkam, nat pi g Jiosh s-ap wo em-thagito. Em-shohshon ash wa ha ma'ichshulig ch mu'i ha koktha g Jiosh ha'ichu i tashogiththam. Kumt ahpim am ha oithk hab wo e juh. Mu'ikko ani chum tatchua mant wo si s-ap em-nuhkuth hab sha masma mat g chuchul g e-mahmad ab e wecho wo ha hemapai. M wabshaba pi ab hu tatchua manis hab wo em-juh. 39 K eda an hab chu'ig Jiosh o'ohana ed mamt ab wo chum ni-ihmath ch hab wo chech'eth mat g Jiosh am ni-kehsh k si s-ni-ho'ige'ith. Kunt ia wo i s-ap em-thagito am hugkam mamt hab hahawa masma hab wo e juh.”

Matthew 24

1 Kud gm hu hahawa i wuhsh g Jesus ab amjed g ge'e cheopi. Kuchd am i oith k am wui thatha k am a'aga mo si s-kehg hab mahs g ge'e cheopi. 2 D hab kaij, “Heu'u, woho o hi wa si s-kehg hab mahs. Nt wabshaba si shel wo em-ahgi mo e aihim mat wehs wo i e shul ihtha.” 3 Kuchd amjed gm hu hejelko hihi wehmaj g Jesus k ab i chehchsh k ab thadhaiwua Olive U'us Kawulk t ab. Kuchd hab ahg g Jesus, “Am g hig t-ahgith mas hekith hab wo i e juh hegai map am t-ahgith. Kut haschu d wo chehgithak matt heg ab wo s-mahchk mo e aihim mapt ep wo jiwia. T g jewed wo huhug.” 4 D hab kaij g Jesus, “Mt wo si s-e nen'oithath mat pi hedai wo em-iattogi. 5 Mu'i at an wo i wuwha a'ahithag oitham k ni-wepo wo e chehcheg hab kaijch mo d Jiosh si Kehsha. Kut mu'ijj ab wo s-ha wohoch. 6 T g nahnko mahs hemajkam ch jejewed ab a'ai wo i e checheggia. Mt wabshaba pi wo e totoths. Hemho wa at hab wo e juh hab masma. K wabshaba pi hab d ahga mat e ai mat wo kuhgit. Bihugig at wo gehsh k g jewed wo u'ugij mu'ikpa. 8 Ith at d wabsh wo shohshonajk g sho'igthag nat pi ba'ich wo i ge'etha. 9 “T wo e ai mamt am wo em-u'u k wo em-thagito mamt wo em-sho'igchuth k wo em-koktha. Wehsko jejewed thakam hemajkam at wo s-em-keh'ithath ni-hekaj. 10 Mu'ijj at wo ni-thagito heg hekaj k wo a'ai e gagda k wo s-e keh'ithath. 11 Mu'i at an wo i wuwha g s-chu i'attomkam k hab wo e a'agath mo d Jiosh ha'ichu i tashogiththam. T mu'i hemajkam ab wo s-ha wohoch. 12 Pi ap'ekam at wo i ge'etha. T mu'ijj wo huhug g pihk ha-elithadag ab a'ai e wui. 13 “Mt wo sha e nakog k wo gahi wuwha g e-sho'igthag. T g Jiosh am wo i em-wahpki e-kihthag ed. 14 Ihtha s-kehg ha'ichu ahgaj g Jiosh ab amjed g kownaltaligaj at an wehsko wo e ah jewed thahm. T am haha wo e ai mat wo kuhgit. 15 “Am g wo amichuth ihtha mam in ne'okchulith. Hegai Danielbad mash d Jiosh ha'ichu i tashogiththam at an o'oha mat g em-obga am wo i kei g s-uam ha'ichu gd hu si eda g ge'e cheopi. 16 Kut hemho wa am wo ahhio thohtha'ag wui hegam mat hedai ia wo ha'ichugk Judea jewed ch ed. 17 Kut pi hedai am hu wo sha'i chum i wah e-kih ed mat am wo ha'ichu ui, chum as hems imhab wo wa'i oimmedath e-kih wehgaj o am wo chikpanath oithag ch ed. 19 S-ta at ehbitham wo mahsk am ha wehhejed hegam mat wo chu'uchum mahmadk ch hegam mat wabsh wo kia wo'ok g ali. 20 “Mt ab wo tahnith g Jiosh mat pi eda hab wo e juh ihtha em-mihshmetha tash ed o g s-hehpich'ed. 21 Ba'ich at d wo i si ge'e sho'igthagk mo pi hekith g hemajkam sha'i neith ch pi hekith hab masma ep wo nei. 22 Pi at hedai wo e nako mas am gahi wo wuhsh hegai sho'igthag matp tash wo hih. T g Jiosh heg hekaj wo i shopolkai am ha wehhejed g e-hemajkamga. 23 “Pi g wo sha'i ha wohochuth matp hema hab wo sha chei mo am hebai ha'ichug g Jiosh si Kehsha. 24 Mu'i at in wo i wuwhag k hab wo chei mo d ni-ahni Jiosh si Kehsha o d Jiosh ha'ichu i tashogiththam k am hab wo wuath g s-hasig ha'ichu mat hekaj wo i chum ha wanchshul g Jiosh hemajkamga matp wo e nako. 25 Neh, ni heki hu am em-ahgith mamt hekaj wo s-e nen'oithk. 26 “Tp hems ha'i hab wo chei mo am ha'ichug g Jiosh si Kehsha tohono jewed ch ed o am hebai e ehstokch. Kumt wabshaba pi wo ha wohochuth k pi am hu wo chum hihi. 27 Wehsko ant wo ni-chehgi mant hekith ep wo jiwia jewed thahm ahni Jiosh si Kehsha hab sha masma mat g wepgi s-masma an gahi wo kekiwua chewagi ch ed. 28 “Neh, s-mahch am mat hebai wo wo'ok g ha'ichu muhkig an wabsh ha neithch g nunuwi mat am wo e chehm. Pegih, mt hab wa'ap s-ap wo s-mahchk mant hebai wo ha'ichugk.” 29 D hab ep kaij, “T am wabsh wo i chum kuhgi hegai jewed shuhthgim sho'igthag. T g tash tonlig wo huhug. T g mashath ep pi wo ha ton. T g thahm kahchim wo ugij. T g huhu'u wo i shul. 30 Nt ab haha wo i ni-chehgi ab thahm kahchim t amjed k wo jiwia. T wehs hemajkam wo si shoanith ab i ni-neithok. Nt si s-masma ab wo hudunihi chewagi ch ed. Kut am wo e maskogi g ni-gewkthag. 31 T ab si s-kaitham wo e kuhu g kuikud. Kunt wo ha cheha g ni-anghiliga mat ab wehs wo i ha hemapai hegam mant am i ha chuhcha mat wo e tho'ibia. T am wo hihi imhab si'al tahgio ch imhab hudunig tahgio ch imhab wakolim tahgio ch imhab juhpin tahgio k wo ha hemapai.” 32 “Nt wo ha'ichu em-mashcha heg hekaj suhna uhs. Mt wo s-mahchk mo g toniabkam e aihim mamt wo nei mat ab wo i i'iwgi. 33 Pegih, mt hab wa'ap wo s-mahchk mo e aihim mat wehs wo kuhgit mamt wo nei mat hab wo e juh hegai mani em-ahgith. 34 Nt wo si shel em-ahgi mat d wabsh wo kia thothakamk hegam mat wo nei ihtha mani em-ahgith mat hekith wehs wo kuhgit. 35 Neh, wehs at gm hu hab wo i e juh ihtha Jiosh nahtoi mam in neith. T wabshaba g ni-ne'oki pi hekith gm hu hab wo i e juh.” 36 D hab ep kaij, “Heg o wa'i s-mahch ni-ohg Jiosh mant hekith ep wo jiwia. Pi o hedai ep s-mahch, chum hems g anghil nih ahni mani d hi wa chum alithaj. 37 Bat wo masmak ha'ichu mant hekith ep wo jiwia mash wa hab chu'ig mash eda g Noahbad in d thoakam. 38 Hemajkam ash wa gm hu wabsh i si neneath ch e gegosith ch ih'eth ch e hohont ch gm hu wabsh i pi chegito g Jiosh. T haha wabsh e ai g tash mat hegam Noahbad am i wahp ge'e wahlko ch ed. 39 Kut wehs ha wi'in g hemajkam k ha hugio. Kut hab wo wa masmak mant hekith ep wo jiwia. 40 Neh, gohkajj at am wo chikpanath oithag ch ed. T hema gm hu wo i e be k hema am wo wa i e wuiok. 41 Gohk u'uwi at am wo ha'ichu chu'ath. T hema gm hu wo i e be k hema am wo wa i e wuiok. 42 “Pegih, mt wo si s-e nen'oithath. Pi o ta machima am em-wehhejed mant haschu tash ed ep wo jiwia ahni em-kownalig. 43 Neh, pi o ta machima mas hekith hema wo jiwia g s-chu ehskam. Kum heg hekaj chum hekith nuhkuth g e-kihthag. 44 Pegih, k hab wa'ap pi ta machima em-wehhejed manis hekith wo uhpam jiwia jewed wui ahni Jiosh si Kehsha. Mt heg hekaj wo si e nahtokchith chum hekith. 45 “Chum amt hedai wo e nahtokch mamtp wo s-wapagimak ch wo s-chu a'amichuthath. S-mahch am mat g ha-ahmo hema wo e-gahgi g hab mahs pion k wo nuhkuthach g e-kihthag. T heg s-ap wo ha chikpanchuthath ch wo ha thagio'ithath g e-wehm pion mat eda pi an hu wo ha'ichugk g ha-ahmo. 46 T am ep wo jiwia k wo cheh mo s-ap am hab junihim g e-chikpan. Kut d wo si ge'e s-hehgigk heg wehhejed pion. 47 Nt wo si shel em-ahgi mat g ahmoj am hahawa wehs thahm wo kei g e-kihthag. 48 “T wabshaba pi ap d wo ha kehshak matp hedai hab wo i e ah, ‘Pi at oi wo jiwia g ni-ahmo,’ 49 k wo i ha sho'igch g e-wehm pion k g s-i'imkam ha wehm wo ih'eth ch wo e gegosithath. 50 T haha wabsh wo jiwia g ahmoj k wo cheh mo pi ap hab wua g e-chikpan 51 k wo si s-ko'okam namkith k gm hu hab wo i juh. Neh, bat wa masma hab wo e juh ha wehhejed hegam mat pi ab hu wo wohog elithath g Jiosh. Heg at s-ko'okam wo ha namkith. Kut heg hekaj wo shoakath ch ga hu wabsh wo i si e ki'ishch.”

Matthew 25

1 D hab ep kaij g Jesus, “Ba'ich ant am wo i em-tashogi g Jiosh kownaltalig am wepogithch hegai kih mat hebai ha'i wo e hohont. Mt am ha'i ha wai wehst-mahm chetcha. T am hihi ha u'athch g e-lalampa k am wo i wahp g wo ha hohntam wehm mat hekith wo jiwia. 2 Hetasp ihtham o pi ha'ichu nen'oith 3 ch ep pi ha wa'igchug g a-saithi. 4 Hetasp o s-chu nen'oith ch ep ha wa'igchug g a-saithi. 5 Kut pi oi jiwia g wo ha hohntam. T wehsijj s-ha kohksimch ihtham chetcha. T gm hu kohk. 6 “Neh, t am i e ai g eda hugkam g s-chuhugam. T ab kaitha ihtha, ‘Ab o him g wo ha hohntam. Oi g wo i hihim k ab wo namkhi.’ 7 T hegam wehst-mahm chetcha nehnen k i ha kegchuth g e-lalampa. 8 “K hab kaij hegam mo pi ha'ichu nen'oith, ‘Ab g wo i ha t-mahki g e-a-saithiga. Chuhchkim o g t-lalampa.’ 9 “K hab kaij hegam mo s-chu nen'oith, ‘Pi att wo t-nako. Am o wabsh i hejel t-wehhejed ahim am shuhthagi ch pi wo em-ai. Am amt wo hihi tianna wui k am hejel wo ha nolawt.’ 10 “T wa woho hab e juh hegam ha'i k gm hu hihi mat wo ha nolawt g a-saithi. Kut eda ia hu ha oithk jiwia g wo ha hohntam. Kut hegam hetasp mo e nahtokch gm hu wehmaj i wahp mat am wo e gegos wehmaj. T ab si e kuh g kihjeg. 11 “T am i uhpam thatha hegam ha'i k ab chum shoani ch hab kaij, ‘Ab g si s-t-ho'ige'ith k ab i kuhpi'oki matt am wo i wahp.’ “K hab kaij g wo ha hohntam, 12 ‘Nt wo si shel em-ahgi mani pi sha'i em-mahch mams hedai wud,’ ch am hahawa si kuh g kihjeg.” 13 Neh, d am i kuhgit g e-wepogitha g Jesus hab kaijch, “Neh, mt wo s-e nen'oithath nam pi pi sha'i mahch mant hekith ep wo jiwia. 14 “Bant masma ep wo i wepogi g Jiosh kownaltalig matp hems g o'othham hema hasko wo him k ab i ha wai g e-pionag mat ab wo ha nuhkuthach g ha'ichu e-eniga. 15 Hema at mah g hetasp mihl pihsh k hema gohk mihl pihsh k hema ep g hemako mihl pihsh no pi s-mahch mat he'ekia i s-ap wo chikpanath k amjed gm hu mehk jewed wui hih. 16 “Hegai piongaj mat g hetasp mihl pihsh ab ui at am ha hekaj i e nakog k hekaj ihtha lial mat am thahm hetasp mihl pihsh ep nahto. 17 Kut hegai mat g gohk mihl pihsh ab ui hab wa'ap e juh k gohk mihl pihsh am thahm nahto. 18 T wabshaba hegai mat g hemako mihl pihsh ab ui gm hu him k am hebai wagt k am ehsto. 19 “K mehk amjed mat jiwia g ha-ahmo ihtham k am ha ui mat wo s-mai mat has masma hekaj g lialigaj. 20 “Hegai piongaj mat g hetasp mihl pihsh ab ui at ab i wah k ab i mah g hetasp mihl pihsh am thahm hegai mat ab ui k hab kaij, ‘Ab apt wa ni-mah g hetasp mihl pihsh. Neh, nt am ba'ich hetasp mihl pihsh ab ep wo m-mah mant nahto.’ 21 “K hab kaij g ahmoj, ‘S-ap aptki hab e juh, s-ap'ekam ni-pionag, s-ap hekajk mant he'ekia ab i m-mah. Nt hekaj ab ba'ich i mu'i wo m-nuhkuthach. Am g ni-wehm s-hehgigkath.’ 22 “T heg ab hahawa ep i wah piongaj mat g gohk mihl pihsh ab mah k hab kaij, ‘Neh, gohk mihl pihsh apt wa ab ni-mah. Kunt am ba'ich gohk mihl pihsh ab ep wo m-mah mant nahto.’ 23 “K hab kaij g ahmoj, ‘S-ap aptki hab e juh, s-ap'ekam ni-pionag, s-ap hekajk mant he'ekia ab i m-mah. Nt hekaj ab ba'ich i mu'i wo m-nuhkuthach. Am g ni-wehm s-hehgigkath.’ 24 “T ab hahawa i wah hegai piongaj mat g hemako mihl pihsh ab mah k hab kaij, ‘Ni-ahmo, s-mahch ani map s-ta ke'ithama ch s-beihimk hegai map haschu pi ab hu chikpan. 25 Kunt heg hekaj gm hu s-a'agko e'esto g m-lialiga. Neh, m ia wehch mo haschu d m-eniga.’ 26 K hab kaij g ahmoj, ‘Si pi ap ch s-padmakam ni-pionag, kups wa chum s-mahch mani s-ta ke'ithama ch s-beihimk hegai mani haschu pi ab hu chikpan. 27 Pegih neh, pt hems am hi wo wa chum toa g ni-lialiga wahnko ch ed. Kunt ab wehs uhpam wo ui wehnathk mat haschu ab wo i mahmadt.’ 28 “K hab hahawa ha ahg g ha'i ep e-pionag, ‘Mt wo wohppo'ith k ab wo mah hegai mo wehst-mahm mihl pihsh edgith. 29 Ba'ich at ep wo nei g e-ap'ethag hegam mat hedai s-ap wo hekaj. T wabshaba wo e wohppo'ithach mo haschu al i edgith hegam mat pi ap wo hekaj. 30 Mt gm hu wo tha'ich hegai s-padmakam pion s-chuhugam k ed. T am wo si shoakath ch ga hu wabsh wo i si e ki'ishch nat pi wo sha'i si s-ko'ok ha'ichu nakogath.’ 31 “An ant wo thahiwua ni-kownal thaikud an mant hekith wo i jiwia ha wehm g ni-anghiliga. 32 T wehs hemajkam am wo e hemapai ni-ba'ich. Nt ab wo i ha gawulkai hegam mo d wohokam ab ha amjed hegam mo pi d wohokam hab masma mamt am wo i ha gawulkai g kahwal ch siswat. 34 Bant wo ha ahgi hegam mant ab i ha gawulkai, ‘Ab g wo i hihim. S-em-ho'ige'ith o g Jiosh. Ni-gegos amt mani wa d bihugimkam k ni-wasibi mani wa d tonomkam k am i ni-wahki e-kih ed mani wa d wabsh ge o'othham k ni-enigadath mani wa pi ha'ichu edgith k ni-nuhkuth mani wa mumku k am ni-chechga mani wa d lihso. K g Jiosh am nahtokch g kihthag em-wehhejed ga hu i amjed mat in i nahto g jewed. Ab g wo i wahpkith k wo edagi.’ 37 “Kut hab wo chei ab ni-wui, ‘T-kownalig, kuchs hekith i m-gegosith k m-wasbith k ab i m-wahki t-kih ed k ab m-enigadath k m-nuhkuth k am m-chechga?’ 40 “Nt hab wo chei, ‘Nt wo si shel em-ahgi mam ahni am i ni-wehmt hekith am i ha wehmtch hegam mo d sho'igkam ch ab ni-hiwig.’ 41 “Kunt hab haha wo chei ab ha wui hegam mant pi ab hu i ha gawulkai, ‘Gam g hu hab wo i e juhni. Ab o em-mohto'ith g Jiosh g s-ko'ok namkithadag. Pi amt ni-gegos mani wa d bihugimkam k pi ni-wasibi mani wa d tonomkam k pi am hu i ni-wahki e-kih ed mani wa d ge o'othham k pi ab hu ni-enigadath mani wa pi ha'ichu eniga k pi ni-nuhkuth mani wa mumku k pi am hu ni-chechga mani wa d lihso. Neh, am amt wo e shul heg eda mehi mo d ha wuikam g jijawul.’ 44 “Kut hab wo chei hegam ab ni-wui, ‘T-kownalig, ch hekith i m-neith maps d bihugimkam o d tonomkam o d ge o'othham o pi ha'ichu eniga o mumku o d lihso, kuchs pi am hu i m-wehmt.’ 45 “Nt hab wo chei, ‘Nt wo si shel em-ahgi mam ahni pi am hu i ni-wehmt, hekith pi am hu i ha wehmtch hegam mo d sho'igkam ch ab ni-hiwig.’ 46 “Kut ihtham am wo e shul pi ha huhugetham s-ko'ok namkithadag ed. T g s-ap'ekam an wo i wahp anai mat an hahawa chum hekith wo edgithath g s-ap'ekam thoakag.”

Matthew 26

1 D am i ha'asa ha'ichu ha mashcha g Jesus k hab hahawa kaij ab t-wui, 2 “S-mahch am mo gohk tash am wi'is matt wo wuhshath mat g Jiosh ha tho'ibia g t-shohshonbad. Kutki hab wo e juh mat an wo ni-bei hegam mo ab ni-wui gegok k ab wo ni-naggia kots t ab mat wo ni-mua.” Neh, heg o hab wa'i kaij. 3 Kumsh eda woho a'aga mamtsh has masma wo be k wo mua. Si uhgchu pahl atsh am i ha hemapai hegam ha'i u'ugchu papal ch ge'eged. Kutsh ab kihj ab nam 4 k am ap'ech mat s-a'agi an wo bei g Jesus k wo mua, 5 ash am wabsh a'ai e ahgith, “Hi wa pi am hu heg eda mat ia wo e hemapathch g hemajkam ith hekaj piast. T wo am hu e babgachuth k wo t-cheggia.” 6 Kuchd am hu hebai am thatha Bethany kihhim t am. D am d kihkam hegai mad hab chehgig Simon ch wa chum mumku heg hekaj mo g chuhkugaj wabsh muhkhim. 7 Ith ad ab i t-waith k t-gegos. Kuchd am thadhak ch t-gegosith. T ab haha wabsh hema i wah g uwi g si s-namkig s-ap uhw shuhthagi wa'igchugch am al s-toa hothai ha'a ch ed k ab iawua Jesus mo'o ab. 8 Kud ha'i si pi hohho'i g t-wehm e mashchamtham k hab kaij, “Ih, pt wabsh heki wua ihtha s-namkig ha'ichu. 9 Eda atp hu'i mu'i lial wo nam sha e gagdak. T heg wo e hekaj ha wehhejed g sho'igkam.” 10 Kud s-mahch g Jesus mach haschu am a'aga ch hab kaij ab t-wui, “Pi g am wo sha'i keh'ithath ihtha uwi. Si at s-kehg ha'ichu hab juh am ni-wehhejed. 11 Mt wabsh chum hekith wo i ha wehmt g sho'igkam. Kunt ahni hi pi tash ia hu wo em-shahgithk. 12 Ab at iawua g uhw shuhthagi mat wo i nako g ni-honshpadag hiashpa. 13 Nt wo si shel em-ahgi mat am wo s-e chegitok mat haschu has juh ihtha uwi mat hebai wo i e ahgachugath g s-kehg ha'ichu ahgaj g Jiosh an wehsko jewed thahm.” 14 D am ha hekaj t-thagito g Judas Iscariot k gm hu hih. Kuchd am i thahm s-mai matsh am hih u'ugchu papal ha wui 15 ash hab kaij, “He'ekia amt wo i ni-namkith mant an wo em-behi g Jesus?” Kutsh am chehgith k kuint g waikko wehst-mahm plahtha pihsh matsh ith wo mah. 16 Tsh ab i amjed g Judas am i e nako matsh wo gagda g Jesus. 17 D am hahawa s-ap i e ai hegai t-shohshonbad ha tho'ibiathag piast. K ith eda pi e ko'a hegai pahn mo jewajithas. Kud d wehpeg tash heg eda gegosig. Kuchd am thatha Jesus wui k ab kakke machs hebai wo i ap'ech matt am wo huh g kahwal mad iagchulig gegosig. 18 D gohkajj hab t-ahg, “Am amt wo hihi Jerusalem wui. K am hema d kihkam ch am wo e chehgi. Mt hab wo ah mani hab kaij mat e ai g ni-tashga. Kutt t-wehm wo huh g kahwal mad iagchulig gegosig am kihj am.” 19 Kud am hab e juh mad hab ha ahg g Jesus k am i ap'ech g gegosig. 20 D am i hud. Kuchd am thadhaiwua k am t-gegosith. 21 Kud hab haha wabsh kaij g Jesus, “Nt wo si shel em-ahgi mat has wo e juh hemu. Hema amt wo ni-gagda ahpim mam ab si ni-wecho e mashcham.” 22 Kuchd si pi ap t-taht k gn hu hab i che'iatahi, “Ih, hi wa pi ahni, ni-kownalig.” 23 D hab kaij g Jesus, “Heg at hab wo juh mat hedai am ni-wehm wo wakch g chemait hithod ch ed. 24 Bant masma wo ni-muhkith mo has masma heki hu o'ohanas Jiosh o'ohana ed mat g si Kehshaj wo e muhkith. T wabshaba wo si s-ko'okam e namkith hegai mat wo ni-gagda. Ba'ich at wo i chum s-ap'ek heg wehhejed mat hems wabsh pi wo chum mahsi.” 25 D hegai Judas matki gagda hab kaij, “Aha nap ahni hab ni-ahg, t-mashchamtham?” D hab kaij g Jesus, “Thap ahpi.” 26 Chd am wabsh kia t-gegosith. D g Jesus am bei g chemait k ab ho'ige'el g Jiosh k am hahawa i hahain k ab t-mah k hab kaij, “Oi g wo huhgi ihtha. Tho ni-honshpadag.” 27 D am hahawa bei g tahsa k ab ep ho'ige'el g Jiosh k ab t-mah g wasib k hab kaij, “Wehsijj g ab wo ih'e. 28 Ith o d ni-eh'ed. Ith ani hab ahgch hab kaij mant wo ni-muhkith em-wehhejed. T g ni-eh'ed wo e iawua. T g Jiosh heg hekaj am hab wo juh hegai mo wa hab kaij mat gm hu hab wo i juh g pi ap ha-chu'ichig g hemajkam. 29 Ia o i s-ap'e. Kunt pi hekith em-wehm hab ep wo juh ihtha k wabshaba em-wehm wo si s-hehgigk Jiosh kihthag ed.” 30 Neh, kuchd am hahawa kuhgit am hema ahgk g mihshmetha ne'i k am wuwhag k gm hu hihi Olive U'us Kawulk wui. 31 D hab t-ahg g Jesus, “An o o'ohanas mo hab kaij g Jiosh: Nt wo hiwigi mamt wo mua g kahwal ha nuhkuththam. T g kahwal wabsh a'ai wo wohp. K ith hab d ahga mamt wehsijj wabsh wo ni-thagito k gm hu a'ai wo wohp mant hekith wo ni-muhkith. 32 Kunt wabshaba ep wo ni-chegito k gm hu wo hih Galilee wui. Mt ab ha'ab wo ni-nei.” Neh, bad kaij g Jesus. 33 D g Peter hab kaij, “Ahni ant hi pi hekith wo sha'i m-thagito, chum as wehsijj wo m-thagito ihtham.” 34 D hab kaij g Jesus ab wui, “Nt wo si shel m-ahgi mat koi wo kuhu g keli chuchul ith i chuhug ab. Kupt waikko hab wo wa'i chei map pi sha'i ni-mahch.” 35 D hab kaij g Peter, “Pi ant hekith hab wo sha'i chei manis pi m-mahch, chum anis wo ni-muhkith m-wehm.” Kuchd wehsijj hab wa'ap kaij. 36 Kuchd gd hu thatha heg ab oithag mo hab e a'aga Gethsemane. D pi am hu t-wehmaj g Judas Iscariot. D hab kaij g Jesus ab t-wui, “Ia g hu wo i thadhak. Nt ahni am ba'ich wo i him k wo ni-ho'ige'ithahu.” 37 Bad kaij ch am ha u'uk g Peter ch James ch John. T ihtham gm hu oi. Kush s-masma si pi ap e tahtk g Jesus ch si e kudut 38 ch hab kaij ab ha wui, “Ab at wabsh i si ni-shuhth g pi ap tahhathkam ch si s-ni-mukima tahhathchuth. Ia g wabsh wo thadk ch wo ha'ichu si nenashanath.” Kutsh am thadhaiwua. 39 Tsh g Jesus ba'ich ep sha'i him k am i gei jewedo k hab kaij ab Jiosh wui, “Ni-ohg, matp am wo s-ap'ek, pt im hu hab wo i juh hegai si s-ko'ok sho'igthag mo ab ni-wui him. Kuni eda tatchua mat ahpi g m-tatchui hab wo e juh.” 40 Tsh am hahawa uhpam ep jiwia ha wui hegam waik. Kush am kohksh. Sh hab kaij ab ha wui, “Pi amtki sha'i e nako mamt wo ni-wehm nenead al hemako ohla ab. 41 Si g wo ha'ichu nenashanath ch ab wo tai g Jiosh g gewkthag mamt pi am hu wo shul pi ap'ekam ch ed. Chum am hi wa g s-ap'ekam hab elith ch eda pi e nakog.” 42 Bash kaij ch amjed gm hu hahawa ep him k hab kaij ab Jiosh wui, “Ni-ohg, am o wa s-ap'e ni-wehhejed matp d wo m-tatchuik mant hemho wa wo nako ihtha si s-ko'ok sho'igthag.” 43 Neh, k am hahawa uhpam ep jiwia ha wui. Kush ep kohksh no pi sha'i s-ha kohksimchuth. 44 Tsh gm hu hahawa ep hih g Jesus k heg hab kaij ab Jiosh wui matsh wehpeg 45 ch am hahawa uhpam ep jiwia ha wui k hab kaij, “Kumtki ep kohk. T eda e ai mamt ni-gagda ahni Jiosh si Kehsha am ha wui g pi ap'ekam hemajkam. 46 Oi g wo wahpamigi. Tt wo hihi. Neh, ia at hu jiwia hegai mat ni-gagda.” 47 Am ad wabsh kia neok. Kud am jiwia g Judas. D sha'i si mu'ijj wehmaj, ha'ijj g i'is-papayo uh'ukch ch ha'ijj g u'us. Ihtham atki g u'ugchu papal ch ge'eged am ha cheha matsh am wo hihim k wo bei. 48 Kuki eda g Judas heki hu ha ahgith ihtham mo am wehmaj mat ab wo chintath g Jesus kahmaj ab. T hab masma wo s-mahchk mat hedai an wo bei. 49 D am wabsh i chum jiwia g Judas k wabsh shel i hih ab Jesus wui k hab kaij, “Jiosh at wo s-m-ho'ige'el, ni-mashchamtham!” Neh, bad che'e k ab chintath. 50 D hab kaij g Jesus ab wui, “Ih, ni-nawoj, oi g s-hohtam am hab juhni hegai mapt haschu ahgk ia jiwia.” Kud ab ha'i hihim k an bei g Jesus k gn hu si s-wihnam u'ukch. 51 Kud hema g t-wehm e mashchamtham am i wuhshath g e-is-pahyo k ab si gehg g neholigaj g uhgchu pahl k an si hikuch g nahkaj. 52 D hab kaij g Jesus ab wui ihtha, “Ga g hu uhpam kehsh g e-is-pahyo. Hegam mat wo hekaj g is-pahyo at heg hekaj hab wa'ap wo e muhkith. 53 Aha nap pi mahch mantp ab wo tai g ni-ohg, t ha hekaj wo ha cheha g sha'i si mu'i mihl anghil mat ni-wehhejed wo ha cheggia. 54 K wabshaba an hab chu'ig Jiosh o'ohana ed mat hemho wa am ni-tahgio hab wo e juh ihtha mo hab e wua.” 55 Neh, bad kaij g Jesus ch hab hahawa ha ahg hegam mat an bei, “Wehs tashkaj ani am thahiwup ch ha mashcham ge'e cheopi t am. Kumt pi an hu ni-be k wabshaba hahawa ia thatha an uh'ukch g i'is-papayo ch u'us mamt wo ni-bei. 56 Pegih, bat wa masma an heki hu o'oha g kekelibad Jiosh ha'ichu i tashogiththam mant hab masma an wo ni-behij mat g pi ap hemajkam.” Neh, bad kaij g Jesus. Kuchd am haha wabsh i thagito k gm hu si a'ai wohp. 57 Kumtsh am i bei g Jesus heg kih wui uhgchu pahl mo hab chehgig Caiaphas. Tsh eda am heki hu i e hemapai g chehanig t-mashchamtham ch ge'eged. 58 Sh g Peter ga hu wabsh mehkjed ha oith ch am i wah kolhai ch ed. Sh am ha'i thadha g ha-pionag. Tsh g Peter am ha wehm i thahiwua s-neithamkch mams has wo juh g Jesus. 59 Sh g uhgchu pahl ch hegam e jehnigiththam am chum i e nakog mat g iattogi ha'ichu ab wo abch g Jesus mat heg hekaj wo mua. 60 Kutsh mu'i ehp am i gegokiwua k ab ha'ichu chum abch. Sh wabshaba pi e wepot g ha'ichu ha-ahga. Tsh am hahawa gohkajj i gegokiwua 61 k hab kaij, “Ihtha o'othham o hab kaij matsh wo e nako mat wo i wua g Jiosh ge'e cheopiga. Tsh am d wo i waik tashk, tsh am uhpam ep wo kei.” 62 Tsh am hahawa kekiwua g uhgchu pahl k hab kaij ab Jesus wui, “Napt pi am hu has wo chei heg amjed mam ab m-abchuth?” 63 Kush wabshaba g Jesus pi has sha'i kaij. Tsh am ep neo g uhgchu pahl k hab kaij ab wui, “Am g t-ahgith g wohokam am tahgio g Jiosh. Nap hab e elith map ahpi d Jiosh alithag matp am t-thahm wo i e kei?” 64 Sh hab kaij g Jesus, “Thani ahni. Kunt ab ep wo em-ahgi mat g Jiosh am wo e chehgi mo ab si has ni-elith an e-hugith an ni-thahshk e-kownal thaikud ed. T am wo i e ai mant ab wo i hud chewagi ch ed k am ep wo jiwia jewed thahm. Kumt wehsijj wo s-mai mani d ahni.” 65 Tsh g uhgchu pahl ab si wantsh g e-eniga no pi si pi hohho'ith g ne'okij k hab kaij, “Pi ach hedai ep sha'i tatchua mas am wo ah g chu'ichigaj. Am am wa kah g pi kehg ne'okij. 66 Shahm i elith?” Kush hab kaij g e jehnigiththam, “Ab at moht g chu'ichig am hugkam mat hemho wa wo e muhkith.” 67 Tsh ihtham ab si siswua wuhioshaj ab k an si ma'ishk wuh g wuhpuij k ab si shonikkash 68 ch hab ahg, “Am g hig t-ahgith mas hedai ab m-shonikka, ahpi Jiosh si Kehsha e ahga.” 69 Sh eda g Peter am thaha kih bahsho. Kutsh am hema jiwia g uwi piongaj g uhgchu pahl k hab kaij ab Peter wui, “Ahpi ap ep wehmaj hegai Jesus.” 70 Tsh wabshaba g Peter pi mahch k e ah g Jesus am ha tahgio hegam mo am thadha hab kaijch, “Pi ani sha'i mahch maps haschu hab ahg.” 71 Bash kaij ch ha hekaj gm hu hih mash am ha'i gegok kolhai kihjeg t ab. Kush hema hab ep kaij ab ha wui, “Ith o ep wehmaj hegai Jesus.” 72 Kutsh ep pi e edagi g Peter hab kaijch, “Tho si wohokam mani pi sha'i mahch hegai o'othham.” 73 Kutsh sha'i ha'as, tsh hegam chechoj mo am gegok am thatha Peter wui k hab ahg, “Pi g sha'i pi e edgith. Thapki woho hema hegam Jesus. Ab ap wabsh e ahgch e-ne'oki ab map d ha wehm o'othham.” 74 Tsh g Peter am ha hekaj si ha ahgi, “Pi ani sha'i mahch ihtha o'othham mam an a'aga. T g Jiosh wo si ni-jehka'ich mantp em-iattogith.” Tsh am hahawa hema si kuhu g keli chuchul. 75 Tsh am ha hekaj i chegito g Peter mo wa g Jesus ab wui hab kaij, “Pi at koi wo kuhu g keli chuchul. Kupt waikko hab wo wa'i chei map pi sha'i ni-mahch.” Tsh gm hu wuhsh g Peter k si pi ap e tahtk ch shoak.

Matthew 27

1 Tsh am wabsh i chum mahsi. Tsh am hahawa i ap'ech g u'ugchu papal ch ge'eged mat wo e muhkith g Jesus. 2 Tsh am i e kuhgit g ha-namki. Kutsh am si i maniadath g nohnhoij g Jesus k gm hu i wanim matsh am wo i bei heg wui mo d kownal heg eda chekshani ch hab chehgig Pilate. 3 Sh eda g Judas an himath ch ha neith. Sh am wanimed g Jesus kownal wui mat wo e muhkith. Kutsh si e toths g Judas k am him k am uhpam i ui hegai waikko wehst-mahm plahtha pihsh ha wui g u'ugchu papal ch ge'eged 4 k hab kaij, “Tki wo e muhkith hegai mo pi ha chu'ichig. K d ni-chu'ichig nant pi ab em-wui gagda.” Sh hab kaij hegam haha'ichu, “Pi ach has sha'i elith hegai. Heg o ahpi ab m-ab.” 5 Tsh g Judas am si nehnich hegai lial k am shul ge'e cheopi ch ed k gm hu hahawa wuhsh jeg ed k wabsh hejel e naggia. 6 Tsh g u'ugchu papal am ui hegai lial k hab kaij, “Ith o d namkigaj mat hema wo e muhkith. K g t-chehanig pi t-hiwgith matt am wo toa ge'e cheopi wehhejed.” 7 Bash kaij ch am ap'ech matsh heg hekaj wo hema ha nolawt g oithag mat d wo ha-simin-jihlok hegam mo d wabsh ge o'othham. Hegai mamt ha nolawt o heki hu hab e a'aga Haha'attham Oithag 8 ch wabshaba hab hahawa e a'aga Eh'ed Oithag. 9 Neh, ith atsh wa hab e juh hab masma mash wa g Jiosh heki hu wa'i hab kaij matsh hab masma hab wo e juh. Hegai kelibad Jiosh ha'ichu i tashogiththam mash hab chehgig Jeremiah atki an o'oha mash hab kaij g Jiosh: Tutuligo at wo hema nolawt g o'othham g waikko wehst-mahm plahtha pihshkaj. 10 Kumt ith am haha wo ui namkigaj k wo ha nolawt g haha'attham oithag. 11 Sh eda am kehk g Jesus kownal wui. Sh hegam mo s-mu'amk ab abchuth mo chum e kownalchuth. Sh g kownal ab kakke, “No wa woho mapsh hab chum e elith map d ha-kownalig ihtham Tutuligo?” Sh hab kaij g Jesus, “Thani ahni.” 12 Sh g u'ugchu papal ch ge'eged ab mu'i ha'ichu abchuth. Sh pi am hu has sha'i kaij g Jesus. 13 Sh hekaj hab kaij g Pilate ab wui, “Neh, mu'i ha'ichu o ab m-abchuth. Napt pi ab hu wo ha kaiha?” 14 Kush ep pi am hu has sha'i kaij g Jesus. Tsh heg hekaj si has i el g kownal. 15 K am hab e wua ahith ab ith eda gegosig mo g kownal hema thathagitod g lihso am ha wehhejed g hemajkam. 16 K am hema d lihso ch hab chehgig Barabbas. K wehsijj s-mahch ihtha. 17 Tsh am i e hemapai g hemajkam amai mash am thaha g Pilate ch hab wua g lothaita. Tsh ab ha kakke, “Nam hab elith mant wo thagito g Barabbas aha nam ith hab elith Jesus mo hab e a'aga Jiosh si Kehsha.” 18 Neh, bash kaij nash pi chum s-thagitoimk g Jesus ch hab ha elith mo hegam wa'i haha'ichu s-hehgamk ch s-mu'amk. 19 Sh am thaha g Pilate lothaita thaikud ed. Kutsh eda g wehmaj kihkam heki hu hema cheha matsh am wo him k wo ahgi mo hab kaij, “Pi g am hu has sha'i juhni hegai o'othham no pi pi ha chu'ichig. Mu'i ant ha'ichu nako chuhug chehchkch ab amjed.” 20 Sh eda hegam u'ugchu papal ch ge'eged ab ha chehani g hemajkam matsh ab wo tai g Pilate mat wo thagito g Barabbas k g Jesus hab wo juh mat wo e muhkith. 21 Pegih, sh g kownal ab ha kakke mas hedai am wo i thagito ha wui ihtham gohk. Sh hab kaij g hemajkam, “Barabbas”. 22 Sh hab hahawa ep kaij g Pilate mas has wo juh hegai Jesus mo hab e a'aga Jiosh si Kehsha. Sh hab kaij g hemajkam, “Mu'ani ab kots t ab.” 23 Kutsh hab chum chei g Pilate, “Haschu ahg? Shahchu at hig pi ap has juh?” Kutsh oi wa wabsh ba'ich i si s-kaitham hab ge kaij mu'ikko, “Mu'ani! Mu'ani ab kots t ab!” 24 Tsh am i nei g Pilate matki heki hu i babgat g hemajkam k am hu wo e cheggia. Tsh am ge was g shuhthagi k am hemajkam ha tahgio i ha wapko g e-nohnhoi k hab kaij ab ha wui, “Pi o ha'ichu d sha'i ni-chu'ichig matp wo e muhkith ihtha o'othham. Ahpim o d em-chu'ichig.” 25 Sh wehsijj hab kaij hegam mo am ha'ichug, “Ahchim g t-a'aliga ha wehm att ab wo moht g s-ko'ok namkithadag ith hekaj.” 26 Tsh g Pilate am hahawa i thagito g Barabbas ha wui k am ha cheha g shonthal mat wo gewitta g Jesus k am hahawa i thagito mat ab wo naggia kots t ab. 27 Tsh amjed g Pilate shonthaliga am i bei g Jesus k gd hu u'apa kownal ge'e kih am k am wehs ha wai g e-wehm shonthal. 28 Kutsh am i e hemapath k nahnko wua. Msh ab abchuth mash chum e kownalchuth. Pegih, tsh gam si wuashul g wehschugaj k g kownal eniga ab wahkith 29 k ge ho'i gihkot k ab wahki mo'oj ab k g uhs an behijel s-apko nowij an k wabsh nahnko ahg ch ab i tohtonwua wui k hab kaij, “Tash g d ha-kownaligk g Tutuligo.” 30 Sh ab si siswuimath k an si gewitta mo'oj an. 31 Tsh am i ha'asa nahnko juh k am wuahawua hegai kownal eniga k ab uhpam wahki g enigaj k gm hu hahawa i bei mat ab wo naggia kots t ab. 32 Tsh ab hema i ha nam g o'othham mo ab Cyrene kihhim t ab d kihkam ch hab chehgig Simon. Ith amtsh ab wabsh si kushwiotach hegai kots mamt ab ab wo naggia g Jesus. 33 Kumtsh gm hu i bei g Jesus mamtsh am wo naggia. K hab e a'aga amai Golgotha. K ith hab d ahga Koshwak. 34 Kumtsh ab chum i'ich g nawait mo g kulani am wehnags mat wo hehogi g s-ko'ok. Tsh ab chum jeh k pi ab hu ih. 35 Kumtsh ab hahawa sisish kots t ab k am i kei g kots. Tsh am ha'i e chichwi g shonthal k am a'ai e gehg g wehschugaj 36 k am hahawa i thadhaiwua k nuhkuth. 37 Kumtsh an o'oha mam haschu ab abchuth k ab sihsh kots t ab ab thahm mo ab i mo'okch g Jesus. Sh hab chu'ig, “Ith o d Jesus ch d Tutuligo ha-kownalig.” 38 Tsh gohk ab ep ha nahngia kokots t ab gn hu a'ai. Sh eda d s-chu e'eskam ihtham. 39 Sh hegam mo an bihbimhim si gahi e mo'ogith ch ab si s-ko'okam has ahg g Jesus 40 hab kaijch, “Naptsh woho wo i wua g ge'e cheopi k am uhpam ep wo kei waik tash ab? Pegih, ab g hig i huduni kots t amjed k wo e tho'ibia maptp woho d wo Jiosh alithagk.” 41 Sh g u'ugchu papal ch chehanig ha mashchamtham ch ge'eged hab wa masma ep nahnko ahg hab kaijch, 42 “Ith atsh ha'i ha tho'ibia k atki wabshaba pi wo e nako mas wo hejel e tho'ibia. Nash hig pi woho d t-kownalig? Pegih, tt ab wo s-wohoch matp ab wo i huduni k wo e tho'ibia. 43 Ab o si hiwig g Jiosh ch hab e ahg mo d alithaj. Pegih, tt hig wo nei mas hu wo tho'ibia g Jiosh hemu.” 44 Chum wa hema hegam s-chu e'eskam mamt ab hab wa'ap ha nahngia kots t ab hab wa'ap s-ko'okam has ahg. 45 T am i thahm juh. T wehsko gei g s-chuhugam waik ohla ab. 46 Kutsh am i e ai g waik ohla. Sh si s-kaitham hab kaij g Jesus, “Eli, Eli, lama sabaktani,” mo hab d ahga, “Ni-Jioshga, Ni-Jioshga, shahchu apt ahgk am wabsh i ni-thagito?” 47 Sh ha'ijj hab kaij hegam mo am gegok, “Elijabad o ab chum waith.” 48 Tsh ab hema ha hekaj i med k an ha'ichu usko mat am wakch nawait ch ed k am uhgk i be k ab chum i'ich g Jesus. 49 Kush ha'i hab kaij, “Kia koi, tt hig wo nei mas ia wo jiwia g Elijabad k wo tho'ibia.” 50 Kutsh am si s-kaitham hab ha'ichu ep chei g Jesus k am hahawa i muh. 51 Kutsh hegai s-kowk ikus kuhpadag mash am s-tadnim naggia gd hu si eda g ge'e cheopi ab si shel e wantsh. T g jewed u'ugij k gam si e hahai g ge'eged hohothai. 52 Kutki g hiha'ini gam si e kuhkpi'o. T mu'ijj hegam mat heki hu koi ab s-wohochuthch g Jesus ab i wuwha muhkig amjed 53 i thahm mat g Jesus i wuhsh k gm hu i wahp amai mo hab e a'aga Si Hekia S-ap'ekam Kihhim ch d Jerusalem. K mu'ijj ha neith amai. 54 Tsh ihtham shonthal g e-ge'ejig wehm am i nei mat g Jesus muh k taht g jewed u'ujig k sha'i si e totothsith k hab kaij, “Woho oki d Jiosh alithag.” 55 Sh eda mu'ijj am ha'ichug hegam u'uwi mo ga hu amjed wehmaj g Jesus ab Galilee t amjed ch am ha'ichukaj i wehmaj. Ihtham ash ga hu wabsh mehk gegok ch ab neith. 56 Sh am ha wehmaj g Mary Magdalene ch hegai Mary mo d ha-je'e g James ch Joses ch heg ehp mo d Zebedeebad wehm kihkam ch d ha-je'e g James ch John. 57 Tsh am hahawa jiwia ihtha s-kais o'othham mo hab chehgig Joseph ch ab Arimathea t amjed ch ab s-wohochuth mo g Jesus d Jiosh si Kehsha. K eda e aihim mat wo i hud. 58 Tsh heg hekaj gm hu hih ihtha Joseph ab Pilate wui k ab tahni g Jesus honshpadag. Kush g Pilate am ha chehani mamt wo mah. 59 Tsh gm hu uhpam jiwia. Kumtsh am wehhejed ab i huduni g Jesus honshpadag. K am mia hab chu'ig g Joseph hiha'ini ch ab heki hu cheotas hothai ch ed. Kumtsh am i bei g honshpadag k am i hobino g si s-kehg ikuskaj k am cheh heg eda cheo k ab hahawa g ge ge'e hothai i himchuth k ab hekaj kuh g hiha'ini. Tsh gm hu hahawa uhpam hihi hegam Joseph. 61 Kush am thadha g Mary Magdalene heg wehm hema Mary ch am neith mat hebai cheh. 62 Ba'ich tash o d shahwai. Tsh am thatha g u'ugchu papal ch Palasi Pilate wui 63 k hab kaij, “T-kownalig, s-chegito ach mo wa ihtha s-chu iattomkam hab kaij matsh uhpam wo e chegito matsh d wo waik i tashk. 64 Neh pt am wo ha cheha mat wo si e nuhkuth g hiha'ini waik tash ab. T hekaj hab pi wo e nako g piongaj mas ab wo ha ehs g honshpadag k hab wo ha ahgi g hemajkam matki i wuhsh ab muhkig t amjed. Neh, ihtha ha-iattogi at ba'ich wo i si pi ap'ek mo g wehpegkam.” 65 Kush hab kaij g Pilate ab ha wui, “Am g ha'i wo ha u'uk g shonthal k am has i masma ab wo nuhkuth g hiha'ini.” 66 Kutsh am ha oi g shonthal. Kutsh gm hu hihim k ab si s-wihnam i kuh g hiha'ini k an bithsh g hothai k ab si chepos. Sh ihtham shonthal am nuhkuth g hiha'ini tash oitham ch chuhug oitham.

Matthew 28

1 Sh am e aihim g thomig tash. Tsh am hiha'ini wui hihi g Mary Magdalene heg wehm hema Mary. 2 D am hahawa si u'ugij g jewed. Tsh g anghil ab i hud thahm kahchim t amjed k im hu hab i melch g hothai k an thahm thahiwua. 3 Sh g wuhioshaj si s-masma tonod hab masma mo g wepgi. Sh g wehschugaj hab masma s-toha mo g s-mohoni gew. 4 Kutsh wabsh woho'i totoths hegam shonthal mo ab nuhkuth k si gigiwek ch amjed hab sha e juh mo d wabsh ko'i. 5 Kush ab neok hegai anghil ch hab kaij ab ha wui hegam u'uwi, “Pi g am wo sha'i e totothsith. M ani wa s-mahch mam g Jesus chuhkug an chum gahghim. 6 Ab g wo i hihim k wo nei mo pi ia hu ha'ichug iia mat ia e cheh. Uhpam at ep i wuhsh muhkig amjed mo wa hab wa kaij. 7 Kumt am s-hohtam wo hihim k wo ha ahgi hegam mo am wehmajkahim mat uhpam e chegito k gm hu wo hih Galilee wui. Mt gm hu wo hihim k am ha'ab wo nei. Neh, am ani em-ahgith mo has i kaij.” Bash kaij g anghil. 8 Kutsh si e totothsith k si s-hohtam ga hu hihi ab amjed g hiha'ini k eda si s-hehgig ch ia hu chum wohp matsh wo t-ahgi. 9 Tsh wabshaba haha wabsh ha nam g Jesus k hab kaij, “T wo s-em ho'ige'el g Jiosh.” Tsh ab si i shul wui k an ui tahtdaj an k ab si ihm. 10 Sh hab kaij ab ha wui, “Pi g am wo ni-ehbenith. Am g wo hihim k wo ha ahgi g ni-wepnag mat am wo hihi Galilee wui k am ha'ab wo ni-nei.” 11 Kutsh gm hu hihi hegam u'uwi. Tsh hegam shonthal mash am nuhkuth g hiha'ini am ha'i hihim k gd hu thatha kihhim t am k am ha ahgi g u'ugchu papal wehs ha'ichu matsh haschu has i e juh. 12 Tsh g u'ugchu papal am ha wehm e nam g ge'eged k am e a'aga k am hahawa mu'i ha mah g lial ihtham shonthal 13 k hab ha ahg, “Bamt wo chei matki am thatha g piongaj chuhug ch ed k am em-ehs g honshpadag mam kohksh. 14 Kutp wo sha kah g kownal mam has i kaij, tt wo wa em-tho'ibia.” 15 Kutsh am ui g lial hegam shonthal k am hab e juh mam has i ha ahg. Ia o i ithani hab masma am e a'aga am ha shahgith g Tutuligo. 16 Kuchd ahchim gamai hemako am hihi heg wui tho'ag am Galilee ch ed mo wa hab kaij g Jesus matt am wo hihi. 17 D g Jesus am ha'ichug. Kuchd ab si ihm. D eda hi wa ha'i sha pi wohoch. 18 D ab si i t-miabi g Jesus k hab kaij ab t-wui, “Jiosh at ab ni-mah g gewkthag wehs ha'ichu thahm an thahm kahchim ch ed ch ith thahm jewed. 19 Gamai g wo hihim wehsko hemajkam ha wui k wo i ha mashcha g ha'ichu ni-ahga k ab wo i ha pahl wapko am chehchegch g ni-ohg Jiosh ch ahni ep ni-chehcheg mani d alithaj ch heg ehp Hekia S-ap'ekam Gewkthag. 20 Ab ani em-chehani mamt has wo masmak. Kumt ab wo i ha mashcha g hemajkam mat ab wo s-wohog elithath wehs ha'ichu mani haschu ab em-chehani. Kunt chum hekith wo em-wehmajk, chum as wo huhug g jewed.”

Mark 1

1 Ith o d s-kehg ha'ichu ahgaj g Jiosh ab amjed g alithaj Jesus Christ. Shonaj ihtha ha'ichu ahgaj. 2 o an hab chu'ig o'ohanaj ed hegai Jiosh ha'ichu i tashogiththam mash hab chehgig Isaiah. Heg atki an o'oha mash g Jiosh hab kaij ab e-alithag wui: An ant hema wo i wuhshath mat am wo i ha ap'ech g hemajkam mapt ahpi am wo i wuhsh jewed thahm. 3 Ith at gm hu jeg ed wo ha mihshmath g hemajkam hab kaijch: Neh, in atsh wo i wuhsh jewed thahm hegai mo d ge kownal wehs ha'ichu thahm. Kumt heg wehhejed wo i e nako. Neh, bash ahg g e-alithag g Jiosh. 4 Kutsh wa woho am hab e juh. M atsh hema i wuhshath g Jiosh g o'othham. K ith hab chehgig John ch am i e chehgi Judea chekshani ch ed miabithch hegai akimel mo hab chehgig Jordan. Ab ash e enigadathch g John g ka-mihyo wopo ikuskaj ch ge hogi giwud ch heg wa'i hekaj e gegosith kohktpul ch sit'ol. Kush mu'i hemajkam am wui hihim heg amjed chekshani chum hems ab Jerusalem kihhim t amjed. Sh g John am amog ch hab ha ahg, “Mamt gm hu wo s-ohhoth g pi ap e-chegitoi k wo e pahl wapko. T g Jiosh ab wo i s-em-ho'ige'ith k gm hu hab wo i juh g pi ap em-chu'ichig.” Neh, bash kaij g John ch am ep ha pahl wapkon akimel ch ed hegam mash ab wui hihimath ch am ahg g pi ap e-chu'ichig. 7 Sh hab ha ahg g John. “Pi g hab wo ni-elith manis ahni d si ha'ichu. Ab atsh hema wo i wuhsh ni-oithk mat d wo si s-has ha'ichuk. 8 Ahni ani hi wabsh em-pahl wapkon. Tsh wabshaba heg ab wo em-mah g Hekia S-ap'ekam Gewkthag matsh heg chum hekith wo em-wehmajk.” 9 Kush eda g Jesus wenog ab d kihkam heg eda al kihhim mash d Nazareth ch am eda g Galilee chekshani. Kutsh am i him k am jiwia mo am oimmed g John hab ahgk matsh wo e pahl wako. Tsh g John am pahl wako akimel ch ed. 10 Tsh ab wabsh i chum wuhsh ab amjed g shuhthagi. Tsh g thahm kahchim ab si i e kuhpi'o. Kutsh g Hekia S-ap'ekam Gewkthag i hud ab ab g Jesus hab sha masma mat g hohhi. 11 Sh ab neok g Jiosh thahm kahchim t amjed ch hab kaij ab wui g Jesus, “Ahpi ap d si ni-tachuithch ni-alithag ch am si ni-tatchui oithch hab masma.” 12 Am wa'i hekaj, sh g Hekia S-ap'ekam Gewkthag hab ahg g Jesus matsh gm hu hejelko wo hih. 13 Kutsh am hih tohono jewed wui k am ha'ichug gi'ikko wehst-mahm tash ab mo am ha'ichug g mischini ha'ichu thoakam. Sh heg i oitham g ge Jiawul am chum s-wuimk pi ap'ekam ch ed. Sh wabshaba g anghil am nuhkuth. 14 Sh am hu hebai, tsh e kuhpach hegai John mo am ha pahl wapkon. Tsh heg i thahm am jiwia g Jesus Galilee chekshani t am am ahgachugch g s-kehg ha'ichu ahgaj g Jiosh 15 hab kaijch, “Gam g hu wo s-ohhoth g pi ap e-chegitoi k ab wo i s-wohoch iththa s-kehg ha'ichu ahgaj g Jiosh. E at ai mat am ba'ich wo i e tashogi g Jiosh kownaltalig.” 16 Neh, bash kaijhim ch an him hugithaj an hegai al kahchki mo d Galilee Kahchki. Sh eda am ha'i oiopo g waptopi ha u'utham ch am wuhpa g e-chuagia shuhthagi ch ed. Tsh am ha cheh g Jesus. Kush d ihtham gohk e wepngam mo hab chehgig Simon ch Andrew. 17 Sh hab ha ahg g Jesus, “Ab g wo i ni-oith k pi hegam wa'i waptopi wo ha u'uth ch wabshaba g hemajkam wo i ha wanchkwua ab Jiosh wui.” 18 Kutsh ha hekaj thagito g e-chikpan k am i oi. 19 Tsh am sha'i hihim k haha wabsh gohk ep ha cheh. Ihtham ash am kegchuth g e-chuagia wahlko ch ed ch d James ch John. Kush g ohgaj hab chehgig Zebedee. 20 Tsh ab i ha wai g Jesus. Kutsh gm hu i oi am thagitok g e-ohg wahlko ch ed ha wehm g ha-pionag. 21 Kutsh am hihim k am thatha Capernaum kihhim t am. Tsh am i e ai g shahwai mach heg eda t-mihshmath. Kutsh am i wahp ha-cheopi ed. Tsh g Jesus am ha mihshmath. 22 Kutsh g hemajkam ab si e totoths ab mashchamathaj amjed nash pi ba'ich i si s-e mamachim ha mashcham mo hi hegam mo d chum chehanig ha mashchamtham. 23 Kush eda am hema ha'ichug g o'othham mash g jiawul u'ukch g chegitoithaj. 24 Tsh heg hab juh mash am si s-kaitham neok ch hab kaij, “Shahchu ap ahgch t-kudut, ahpi Jesus map ab Nazareth t amjed. Napt heg hekaj ia wabsh jiwia mapt gm hu hab wo i ni-juh ith amjed o'othham? S-m-mahch ani map d hekia s-ap'ekam ch ab d Jiosh amjedkam.” 25 Tsh g Jesus ab si s-keh'el g jiawul k hab kaij, “Ab g wabsh i pi shahmuni k gm hu hab wo i e juh.” 26 Tsh g jiawul si ugij ihtha o'othham. Kutsh si hihin. Tsh g jiawul hahawa thagito. 27 Kutsh wehsijj si e totothsith k ab a'ai i e kakke, “Shah'o d ahga ihtha? No d wechij mashchama? No pi ab kaiham g jijawul mo haschu ab i ha chehani.” 28 Kutsh an wehsko i e ahgithahi am Galilee ch ed matsh haschu s-kehg hab juh g Jesus. 29 Kutsh ab i wuwha hegam Jesus cheopi t amjed k gm hu wa hekaj hihi ha-kih wui hegam Simon ch Andrew. Tsh g James ch John ep i ha oi. 30 Kush eda am wo'o g Simon hohnig je'e ch g s-tonjigkaj mumku. Kumsh am ahgith g Jesus. 31 Tsh am i wah mo hebai wo'o k ab bei nowij ab k i wamigi. Kutsh ha hekaj am i ap'et k am ha'ichu ha hihithol. 32 Kutsh gm hu si i juh. Tsh g hemajkam ab i ha ui hegam mo kok'o ch hegam ehp mo g jijawul u'ukch g ha-chegitoithag. 33 k am i e hemapai ha-kih ab. 34 Kutsh g Jesus wehs ha thothaj ihtham k gm hu hab i ha juh g jijawul ab ha amjed. Sh g jijawul s-mahch mo d Jiosh alithag. Sh wabshaba pi ha hiwgith g Jesus mas ihtham am wo ah mo hedai wud. 35 Ba'ich si'alim mash wabsh kia s-chuhugam, tsh am i wami g Jesus k gm hu hejelko him k am e ho'ige'ithahun. 36 Kutsh ihtham Simon am i gahghio. 37 k am hebai chehg k am ahgith, “Mu'i hemajkam o an m-gahg.” 38 Kush hab kaij g Jesus, “Oi g wo. Tt hig wo hihi am ba'ich kihhim wui. Nt am ep wo ha mihshmath nant pi heg hekaj i wuhsh.” 39 Kutsh am i ha mihshmethahi ha-chechopi ed wehsko Galilee chekshani ch ed k gm hu hab i ha juh g jijawul ab ha amjed hegam mo an ha u'ukch. 40 Sh am hu hebai, tsh am hema jiwia Jesus wui k mumku heg hekaj mo hab e a'aga ‘leprosy’ ch chum pi ha thoajig. Ith ash ab wui e sho'igchuth g Jesus ch hab kaij, “Pt wo e nako mapt wo ni-thoaj maptp wo tatchuath.” 41 Kutsh ab si i s-ho'ige'ith k ab taht k hab ahg, “Mant hab wo wa m-juni.” 42 Kutsh ha hekaj thoa. 43 Jesus atsh am hahawa si shel ahgith k hab kaij, “Pi g hedai sha'i ahgith k wabsh am wo him k am wo i e chehgi pahl wui. T am wo m-chechga. Kupt wo ha mah hegai mo wa g Jiosh em-chehani hab masma mat g Mosesbad o'oha mamt heg hekaj wo wohokamch mamt thoa.” 45 Kutsh oi wa ihtha o'othham wehsko i ha ahgithahi g hemajkam ab amjed. Tsh heg hekaj pi e nako g Jesus mas am ep wo i wuhsh mo am hemajkamag kihhim ch ed k wabshaba gn hu hab wabsh jegko oimmed. Sh g hemajkam am wui himto ga hu wepsko amjed.

Mark 2

1 Kush d wabsh i he'ekia tash matsh am ep thatha hegam Jesus Capernaum t am. Tsh gn hu wa hekaj kaitha matsh am thatha. 2 Kutsh sha'i si mu'i e hemapai g hemajkam k am shuhthath g kih k ab kihjeg t ab ab wabsh i si s-kawkam gegokiwua. Kush g Jesus am ha mihshmath. 3 Tsh am ha'i thatha hema u'athch g pi himithkam. Ith ash ab wabsh i s-moik ch am wo'o e-wahkus ch ed. Kush gi'ik o'othham an u'a. 4 Sh wabshaba pi am hu sha'i jeg nash pi sha'i si s-hemajkamag. Kutsh gn hu i chehchsh kih thahm k am ge maggat g kih ma'ishpadag am hu i mash am thaha g Jesus k am i huduni g pi himithkam. 5 Kutsh g Jesus am i nei g ha-wohochuthadag k hab kaij heg wui pi himithkam, “Ni-nawoj, ab ani s-m-ho'ige'ith ch gm hu hab i juh g pi ap m-chu'ichig.” 6 Kush eda am ha'i thadha hegam mo d chehanig ha mashchamtham ch ash hab e ahg. 7 “Ih, pi oki ap neok hab masma e wepogithch g Jiosh. Heg at wa'i Jiosh wo e nako mat gm hu hab wo i juh g pi ap ha-chu'ichig.” 8 Kutsh ha hekaj ha amich g Jesus mo haschu am oithahim k hab kaij ab ha wui, “Pi g am wo sha'i oithahim 9 manis hab wabsh kaij ch pi woho edgith g gewkthag mant gm hu hab wo i juh g pi ap ha-chu'ichig. Bam elith mo s-pehegim hab e kaij mat gm hu hab i e juh g pi ap chu'ichigaj no ge hedai s-mahch mas s-wohom hab e juh. 10 Pegih, nt wo em-chehgi mani woho ge gewkthag ch hab wua mani has i kaij ahni Jiosh si Kehsha.” K hab hahawa kaij ab wui hegai pi himithkam, 11 “I g wamig k am beh'i g e-wahkus k gm hu hihm uhpam.” 12 Kutsh am ha hekaj bei g e-wahkus k gm hu hih uhpam am wehs ha-nena ed. Kutsh wehsijj si has i e tahtk k ab i si has elith g Jiosh ch hab kaij, “Pi ach hebai sha'i neith ha'ichu hab masma.” 13 Kutsh gm hu hahawa hihi hegam Jesus k gm hu thatha ge shuhthagi bahsho. Tsh mu'i am e chehm g hemajkam. Sh am ep ha mashcham. 14 Kush am hu hebai ep hihimath ch am bihbij amai mam am ha kowlant g lial kownal wehhejed. Sh am hema chikpan ch hab chehgig Levi (Matthew). Tsh g Jesus am jiwia wui k hab ahg, “Ab g i hihm k ab si ni-wecho e mashcham.” Kutsh am ha hekaj wabsh i oi. 15 Tsh am hu hebai i cheka. Kutsh g Levi am hab juh g gegosig ha wehhejed hegam Jesus. Kush am thadhak ch e gegosith. Sh am ha'i oiopo hegam mo d t-chehanig t-mashchamtham ch d ep Palasi. Ihtham Palasi o chum s-gewkam oithchug g t-himthag. K eda m u'i am oithchug g Jesus hegam mo pi am hu si oithchug g t-shohshon ha-himthag. Kush ha'i ihtham d lial t-kowlanttham heg wehhejed mash d ge'e kownal wehs jejewed thahm. Kush hegam t-chehanig t-mashchamtham hab ha ahg hegam mo ab si wecho e mashcham g Jesus, “Ih, k haschu ahgch g em-mashchamtham ha wehm e gegosith g pi ap hemajkam, chum hems g lial t-kowlantham?” 17 Tsh am i ha kaiok g Jesus k hab kaij ab ha wui, “Ihtham pi ap hemajkam o s-e tho'ibiamk hab masma mat g kok'otham wo s-e thoajitham. Hegam mat hab wo e elithath mo s-ap'e at pi wo tatchua g mahkai. Pi ant hab ahgk ia jiwia jewed thahm manis wo ha tho'ibia hegam mo pi e tho'ibiamk.” 18 Hebaichuj ach he'ekkio pi t-gegosith matt ab wo t-ho'ige'ithahu Jiosh wui. Kutsh am hu hebai am i e ai matsh hab wo chum e juh. Sh eda ihtham Jesus pi hab e wua. Kumsh hab kaij ab wui g Jesus, “Hemu o he'ekkio pi e gegosith hegam mo g Palasi ha mashcham ch hegam mo g John ha mashcham. K eda haschu ahgch ihtham pi hab masma hab e wua mo ab si m-wecho e mashcham?” 19 Sh hab kaij g Jesus ab ha wui, “Nat hig pi wo e gegos g wo ha hohntam naipijju mat eda heg am wo ha wehmajk? 20 T am wo i e ai mat pi am hu wo ha wehmajk. T am hahawa pi wo e gegos. Pegih, bat wo wa e juh ihtham mant hekith pi ia hu wo ha wehmajk.” 21 Sh am hahawa chum ha tashogith g Jesus mat g mashchamaj pi ap wo wehnath g ha-himthag ash hab kaijch, “Pi at hedai g wechij ikuskaj wo shohsho g hekiuchij lihwa mat wo s-e wia nat pi wo i thahiwua k ba'ich wo i wantsh g hekiuchij. 22 K hab wa'ap pi hab mahs machs am wo toa g wechij uhdwis wadag am eda g hekiuchij ha'ichu elithag kostal. T wo am hu wantsh g hekiuchij k wo iawua. Wechij uhdwis wadag at am wo e toa wechij kokstal ch ed.” 23 Sh am hu hebai hihim ihtham Jesus t-mihshmetha tash ed. Kush am eshas g pilkani wohg huhugith an. Sh ihtham ha'i ab ha wohni g pilkani ch i mohon ch ko'a. 24 Kush ha'i hegam Palasi ab ha neith ch ab kakke g Jesus, “Shahchu o ahgch hab ha'ichu junihim mo pi hab sha'i chum mahs t-mihshmetha tash ed?” 25 Kush hab kaij g Jesus ab ha wui, “Bo wabsh masma hab e wua matsh wa g Davidbad. Pi amtki chegito matsh heg has e Juh am i bihugimk. Bo chug'ig g Jiosh o'ohana 26 matsh wa am i wah ge'e cheopi ch ed k am ui g pahn k huh hegam ha wehm mash am wehmaj. K d hegai pahn mo am e to'aw k ch hegam d wa'i ha wuikam papal. T eda hemho wa am hab e juh. K heg hekaj am wa s-ap'e matsh ab mah g pahn hegai pahlibad mash am ha'ichug ch hab chehgig Abiathar. 27 Ith o am wohokamchuth mo g chehanig d i chum ha wehmtadag g hemajkam. Em-mihshmetha tash at am e ap'ech em-wehhejed. Kumt pi heg wehhejed e nahto e-mihshmetha tash. 28 Ni ahni d Jiosh si Kehsha ch gewkthag am thahm g em-mihshmetha tash.”

Mark 3

1 Sh am hu hebai, tsh am ep i wahp ihtham Jesus hema cheopi ch ed. Kush am hema thaha g o'othham mash g nowij mahnikodag. 2 Kush am ha'i thadha g Palasi ch am s-nen'eith mas hab wo juh g thoajitha am ha mihshmetha tash ed nash pi ab ha'ichu s-abchuthamk. 3 Sh g Jesus hab kaij heg wui mahnikokam, “Ia g hu i kekiwua.” Kutsh gm hu i kekiwua. 4 Sh ab hahawa ha kakke, “Shahchu am ahgch hab elith mo pi hiwgithas mihshmetha tash ed mamt wo i ha wehmt hegam mo e sho'igchuth? Ab o em-ab mamt wo i ha wehmt g sho'igkam k am wo i e nako mamt wo ha tho'ibia hegam mat am hu wo e ko'ij. Aha namt wabsh wo ha hiwigi mat wo e ko'ij?” Kush pi hedai has sha'i kaij 5 nash pi pi sha'i pihk e elith heg wui mahnikokam. Sh heg hekaj si s-ko'okam an i ha nenashad g Jesus ch eda ep pi ap e tahtk ha wehhejed ch ash hab kaij heg wui o'othham, “Ab g si i shelin g e-nowi.” Kutsh am wabsh i chum shelin k am wa'i hekaj ap'et. 6 Kutsh babgat g Palasi matsh ha thoaj ha mihshmetha tash ab k gm hu hihim k am ha wehm e nam g piongaj hegai mo wa d kownal heg eda chekshani ch hab chehgig Herod. Kush ihtham e wehm a'aga matsh has hig masma wo mua g Jesus. 7 Kutsh gm hu hahawa hihi hegam Jesus ge shuhthagi wui. Kutsh mu'i hemajkam am i oi ab Galilee t amjed 8 ch ab Judea t amjed, chum hems ab Jerusalem kihhim t amjed, ch Idumia chekshani ch gn hu aigojed g Jordan akimel ch gm hujed mash d Tyre ch Sidon kihhim. Ihtham mu'i atsh am himto am kaiok mo he'es i ge'e ha'ichu hab wuihim g Jesus. 9 Kush heg am ha ahgith hegam mo ab si wecho e mashcham matsh g wahlko an wo u'ukchith am wehhejed natsh pi g hemajkam wabsh wo i si chehmo. 10 Kush wehs am chum s-ahimk g kok'otham ch ab s-tahtmamk mat wo ha ap'et natsh pi mu'ijj ha thothaj. 11 Kutsh hekith wo sha nei g Jesus hegam mash g jijawul ha u'ukch k ab wo i e sho'igch wui k wo si hihin k hab wo chei, “Ahpi ap d Jiosh alithag.” 12 Sh g Jesus am si ha chehani mat pi hedai wo sha'i ahgi mo hedai wud. 13 Tsh am hu hebai, tsh ab i chesh g Jesus kawulk t ab k ab i wai hegam mash ab s-wohochuth. Tsh ab wui i hihi. Kutsh gamai gohk am i ha chuhcha ab ha wui hab kaijch, “Ahpim amt chum hekith wo ni-wehmajkath. Kunt hebaichuj am wo em-cheha mamt am hebai wo hihim k wo ha mihshmath. 15 Kumt wo edgithath g gewkthag mamt gm hu hab wo i ha juh g jijawul ab ha amjed hegam mo an ha u'ukch.” 16 Neh, bash kaij ch am i ha chuhcha hegam gamai gohk. Hema hegam o d Simon. Kutsh heg hab ep chehch Peter mo hab d ahga Hothai. 17 Ha'i ehp o d James ch John ch d Zebedee a'alithag. Kutsh ihtham hab ep ha chehch g Jesus ‘Tataniki Namkam.’ 18 Ha'i ehp o d Andrew, Philip, Bartholomew, Matthew, ch Thomas. K hema d hegai mo d James ch d alithaj hegai mo hab chehgig Alphias. K hema hab ep chehgig Simon ch d hema hegam mo tatchua matt ahchim Tutuligo hejel wo himchuthath g t-kownaltalig. K hema d Thaddaus 19 K hema d hegai mat gagda g Jesus k hab chehgig Judas Iscariot. Neh, ihtham gamai gohk ash d Jesus chuhchai. Kush an oithchug. 20 Kutsh am uhpam hih g Jesus mash am kih. Tsh hegam gamai gohk am i oi. Kutsh g hemajkam am ep i e hemapath k sha'i si mu'itha. Tsh heg hekaj pi e nako mas ep wo e gegos ihtham Jesus. 21 Kutsh am i kah g hahajunij k ab i hihim k am chum s-behimk hab elithch mat sha heb hu wua g e-chegitoi. 22 Sh am hai gegok g chehanig ha mashchamtham ch am thatha Jerusalem t amjed ch ash hab kaij, “Jijawul ha-ge'ejig oki an u'ukch g chegitoithaj ihtha.” Sh ha'i ep hab kaij, “Moki g jijawul ha-ge'ejig ab mahkch g gewkthag. K ith hekaj gm hu hab i ha wua g jijawul ab ha amjed hegam mo an ha u'ukch.” 23 Tsh oi wa g Jesus ab i ha waith k hab masma am i ha tashogi, “Kus haschu ahgk hig g Jiawul wo i wuhshath g hejel e-pionag? 24 S-mahch am mat g o'othham wo padch g hejel e-jewedga mat ab a'ai wo e cheggia. 25 Kut g e wehm kihkam hab wa'ap wo padch g hejel e-kihthag mat ab a'ai wo e cheggia. 26 Pegih, t has hig masma g jijawul pi wo padch g hejel e-gewkthag mat ab a'ai wo e cheggia? 27 Neh, wohppo'ith ani g ge Jiawul hegam mo an ha u'ukch. Kum s-mahch mat pi hedai wo sha'i e nako mas am hu wabsh wo wah hema kih ed mat wo s-ha'ahamak k am wo ui g enigaj, heg hi wa matp wehpeg wo wulsh. 28 “Wehs o gm hu hab i junihog g pi ap ha-chu'ichig g Jiosh. 29 K wabshaba si ge'ej g em-chu'ichig mamtp ab wo has ah g Hekia S-ap'ekam Gewkthag. T g Jiosh pi hekith gm hu hab wo i juh.” 30 Bash kaij g Jesus no pi hab ge ahg mash g ge Jiawul u'ukch. Kush eda d Hekia S-ap'ekam Gewkthag mo an u'ukch. 31 Kutsh am hahawa thatha g je'ej ch wepngaj g Jesus matsh wo nei. Sh wabshaba mu'ijj an wehgaj thadha g Jesus. Sh heg hekaj gm hu wabsh gegok jeg ed ch am chum waith. Kumsh am ahgith, “Neh'e, m-je'e ch m-wepnag o am gegok jeg ed ch ab m-waith.” 33 Sh g Jesus an i nenhoghi. Kush mu'i an wehgaj thadha hegam mo ab kaiham. Kush hab kaij, “Neh, ihtham mo ab ni-kaiham o heg wa wepo mo d ni-wepnag ch ni-je'e. 35 Hegam mat hab wo junihith g Jiosh tatchui o hab a masma mo d ni-wepnag ch ni-je'e.”

Mark 4

1 Sh am hu i hebai, sh g Jesus am ep ha mihshmath ge shuhthagi hugith an. Kush sha'i si mu'i hemajkam an wehgaj. Tsh heg hekaj gn hu i chesh g Jesus wahlko ch ed k an thahiwua k amjed ha mashcham. Sh hegam gn hu wabsh gegok shuhthagi hugith an. 2 Kush mu'i ha'ichu ha tashogith g wepogitha ahgakaj ab amjed g Jiosh kownaltalig. 3 Ith ash d ha'ichu ahgaj mo hab kaij: “Am ant he'es wo i em-tashogi g Jiosh kownaltalig wepogithch mat hema an i chum gantad g e-kaichka e-oith ed. 4 T ha'i gn hu wabsh shul wohg ch ed. T g u'uwhig am thatha k ko'ito. 5 Kut ha'i gn hu wabsh shul waw t ab mo pi ge'ej g jewed k ab ha hekaj hi wa chum i wuhsh no pi pi an hu juhk g jewed. 6 T oi wa hekith ab i chesh g tash. T ha hekaj wabsh gaksh no ge mehk tatk. 7 T ha'i gn hu wabsh ep shul sha'i ch ed. T oi wa hekith ab i ge'ege g sha'i k wabsh ha koktha. T pi ab hu ha kait. 8 T wabshaba hegam mat gn hu shul moihuna ch ed an i wuhshani k ab kait. Ha'i atp hems waikko wehst-mahm ab kait k ha'i ep chuhthpo wehst-mahm ab ep kait k ha'i siant ab ep kait. 9 Neh, am g wo i oithahim ahpim mam kah ihtha.” 10 Neh, bash kaij g Jesus ch amjed am hahawa i e hejelkai. Kutsh ab wui i hihi g chuhchaij ha'i ep ha wehm k ab kakke, “A tt has masma wo s-ha amich g ha'ichu wepogitha ahga?” 11 Kush hab kaij ab ha wui, “Nt wo em-ahgi mo has d ahga no pi g Jiosh em-hiwgith mamt wo s-mai hegai mo hemu am maskogith ab amjed g e-kownaltalig. Ni wabshaba heg wa'i ha ahgith ha'ichu wepogitha ahga hegam mo pi ab hu wohochuthamk. 12 T hab pi wo amich ha'ichu ab amjed g Jiosh kownaltalig, chum as wo ha'ichu neith k wo ha'ichu kah. T g Jiosh pi gm hu hab wo sha'i i juh g pi ap ha-chu'ichig, heg hi wa mat ab wui wo i e nohnogi.” 13 Kush hab ha ahg g Jesus, “Mu'i ani ha'ichu chum em-ahgith g ha'ichu wepogitha ahgakaj. Kumki eda pi amichuth. Nt hemho am wo wa em-tashogi. 14 Hegai ha'ichu eshtham ani wepogith hegai mat an wo ahgachugath g Jiosh ha'ichu ahga. K g kaichkaj d Jiosh ha'ichu ahga. Ith at am wo chum e ei o'othham amichuthadag ed. 15 K eda ha'i g ha-i'ibthag s-kawpk hab masma mo g wohg. T g Jiawul am wabsh s-pehegi wo ha wohppo'i mo haschu i kah. 16 “K ha'i g ha-i'ibthag hab sha masma mo hebai pi ge'ej g jewed ab waw t ab. T ihtham wo si s-hohho'i Jiosh ha'ichu ahga ab kaiok k wabshaba pi wihnam ab hu wo bebhe k ch ab hi wa al he'es wo s-wohochuthath. 17 T ab wabsh wo i chum hih g a'appema. T ha hekaj wabsh wo ta'i i shul. 18 “K ha'i g ha-i'ibthag hab sha masma mo hebai s-sha'ig 19 no pi e sha'ijithch heg hekaj kudutadag ch s-kaisthag ch s-tahhathkam. Kut pi ha'ichu hab wo juh am Jiosh wehhejed. 20 “K ha'i g ha-i'ibthag s-moik hab masma mo g moihuna. Kut ab wo kaiha g Jiosh ha'ichu ahga k am wo si i nuhkuth e-ihbthag ed k gm hu wo i ha ahgithahi g hemajkam k ha'akia ab wo wa'i ep ha ba'iha, Ha'i atp hems waikko wehst-mahm wo i ha ba'iha k ha'i chuhthpo wehst-mahm k ha'i siant ab ep wo i ha ba'iha.” 21 Kush hab hahawa ep kaij am ha wui, “Wohokam o wepogithas mo g lahmpa tonlig. Namt hig wo ehsto g lahmpa ab mehithk aha namt an wo thai mat hebai wo em-tonlithch. Pegih, mt hab wa masma pi wo chum ehsto g wohokam. 22 Wehs at wo s-e mai matp haschu chum e ehstokch. 23 Am g wo i oithahim ahpim mam kah ihtha.” 24 Sh hab ep kaij am ha wui, “Am g wo s-amichuth mam haschu i kah. Mamt has i masma s-ba'ama ab wo ha'ichu ha mah hedai i, t hab masma ab uhpam wo i e nodagi ha'ichu ab em-wui ch atp hems gm hu ba'ich i. 25 Hegam mat s-ap wo hekaj g e-ap'ethag at ba'ich ep wo i nei. T hegam mat pi ap wo hekaj wabsh wo heb hu wua.” 26 Sh hab ep kaij g Jesus, “Jiosh kownaltalig o heg wepogithas matp hems g o'othham am gantad g ha'ichu kai e-oith ed. 27 k am haha wabsh nenida he'ekia i tash. T g eshaj am i wuhshani k hahhagt k ab hahawa mudathagt k ab kait. K eda pi mahch g o'othham mo has masma hab e wua 28 no pi g ha'ichu kai wabsh hejel ab i wuhshani ab jewed t amjed. 29 T am wabsh i chum bai. Kut am ha hekaj ha cheha g e-chikpantham mat wo hihk k wo i ba'iha.” 30 Kush hab ep kaij, “Am ant ba'ich wo i em-tashogi g Jiosh kownaltalig am wepogithch g ha'ichu kai. 31 Neh, heg am e'esha mo al chumaj 32 ch oi wa am wo wuhshani k ha'as wo i ge'etha mo g s-ehheg uhs. Tp hems heg ab an wo koksht g u'uwhig. Pegih, t hab wa masma wo ge'e i ge'etha g Jiosh kownaltalig, chum as al chum wo shonwua.” 33 Neh, bash masma heg wa'i hekaj am ha mihshmath wepogitha ahga mat he'es wo i s-amich. 34 Tsh gm hu wo hihi g hemajkam. Kutsh am haha wabsh ba'ich wo i ha tashogi g e-chuhchai g ha'ichu e-ahga. 35 Tsh gm hu si i juh. Sh hab ha ahg g Jesus, “Oi g wo. Ga att hu shuhthagi aigojed wo i chehchsh.” 36 Kutsh am i ha thagito g hemajkam k ab i chehchsh wahlko ch ed wehmaj g Jesus. Kutsh eda am ha'i ep chum i ha oi g al wapalko. 37 Tsh ab haha wabsh i meh g s-gewk jegos k sha'i si hewed. Tsh g shuhthagi sha'i si uhgk hab i e juh k gd hu wabsh e was wahlko ch ed. 38 Sh eda am wo'ok ch kohsh g Jesus si baikko g wahlko. Kutsh am wuha g chuhchaij k hab ahg, “Nap pi has sha'i elith mattki wo wachkk.” 39 Tsh am hahawa wamig k ab si wui neo g hewel ch shuhthagi k hab ahg, “Am g wabsh i thotholimat k ha'asa i hewed.” Kutsh ab wabsh si heweto k g shuhthagi gm hu wabsh i pi hoini. 40 Sh hab hahawa kaij ab ha wui, “Pi g am wo ha'ichu ehbithath ch ab wabsh wo ni-hiwgath.” 41 Kutsh eda si s-ehbeni k wabsh ab a'ai i e kakke, “A kus hedai wud ihtha o'othham mat g hewel ch shuhthagi ab kaiha.”

Mark 5

1 Kutsh gm hu thatha miabithch mo am d Gerasa kihhim. 2 Tsh ab wabsh i chum hud g Jesus wahlko t amjed. Kutsh ab hema nam g cheoj mash ab e ulish cheo ch ed mash eda ab d hiha'ini. 3 Sh g jijawul an u'ukch ihtha. Kush pi hedai e nakog mas wo mahshoch. 4 Mu'ikko amsh chum wulshshap g e hukshchim wapainomikaj. Sh wabshaba wabsh wanikumiak. Sh pi hedai e nakog mas wo shohbi nash pi sha'i si s-gewk. 5 Tash oitham ch chuhug oitham ash am ulinig hiha'ini ch ed ch am tho'ag shahgith am hihnk ch e hikkumiak g hohothaikaj. 6 Tsh am jiwia g Jesus. Kutsh mehkjed chehg k am med k ab i gei wui. 7 k am si s-kaitham neok k hab ahg, “Ni-thagitoni, ahpi alithaj g si Jiosh. Bani m-ahgith ab si ihmch g Jiosh mapt pi ia hu wo ni-hudawogath.” 8 Bash kaij nash pi g Jesus ab i s-wuhshthamk g jiawul ith amjed o'othham. 9 Sh g Jesus ab hahawa kakke, “Shahp chehgig?” Sh hab kaij hegai o'othham, “Bani chehgig ‘Mu'ichu’ nach pi mu'ij,” 10 ch ab wui si e sho'igchuth mat pi mehk gm hu hab wo i ha juh hegam jijawul mo an u'ukch. 11 Kush eda inhab sha'i si mu'i kokji e nuhkuth kawulk huda. 12 Kutsh g jijawul ab si tahni g Jesus, “Am g hig t-hiwgith matt am wo i wahp ha eda hegam kokji.” 13 Kutsh ha hiwigi. Kutsh ab i wuwha heg amjed o'othham k gm hu hihim k am i wahp ha eda hegam kokji. Kutsh ihtham am e totothsith k am agshp i wohp k gd hu shul ge shuhdagi ch ed k wachkk k ash eda am hu d i gohk mihl. 14 Hegam mash am chum ha nuhkuth atsh e totothsith k wohp k gn hu wehsko ha ahgith mat has e juh. Kutsh am himto g hemajkam s-neithamk matsh haschu has e juh 15 k am hu thatha. Kush am thak ch e enigadathch ch ash wabsh s-ap'e. Kutsh wehsijj si e totoths. 16 Hegam mash am neith atsh an i ha ahgithahi mat has e juh hegai mo g jijawul an u'ukch k am ep ha ahgi mat has e juh g kokji. 17 Kutsh ab wabsh si s-bahbagi i ahgi g Jesus g hemajkam, “Mapt gm hig wo i e mehkoth ab t-amjed.” 18 Kush g Jesus an cheshajhim wahlko ch ed. Tsh ihtha o'othham mash g jijawul u'ukch ab chum ahgi, “Nt wo m-oi.” 19 Kutsh oi wa pi hiwgith k ash hab wabsh ahg, “Pt wabsh wo wa hih am e-kih wui k wo ha ahgi g e-nan'aipijju mat haschu si s-kehg hab m-juni g Jiosh.” 20 Kutsh gm hu hih ihtha o'othham k gn hu ha ahgithahi g hemajkam amai mash am d Wehst-mahm Kihhim matsh he'es ge'e ha'ichu hab juni g Jesus. Kutsh wehsijj ab si has i e taht hegam mash kah. 21 Kutsh an ep thadhaiwua ihtham Jesus wahlko ch ed k gn hu aigo i chehchsh. 22 Tsh ab hema i hih g o'othham k d ha'ichu amai ha-cheopi ed ch hab chehgig Jairus. Tsh ab i hud g Jesus. Kutsh ab wui i gehsh 23 k hab kaij, “Si g s-ni-ho'ige'ith. Ni-chehiaga o muhkhim. Pt am wo him k wo thoaj.” 24 Kutsh am i chum hih matsh wo oi ihtha o'othham. Kush eda g hemajkam gn hu wabsh i si bihagch. 25 Sh eda am hema ha'ichug g uwi ch mumku gamai gohk a'ahithagkaj. Sh heg wehs oitham g eh'edaj chum hekith jegwoni. 26 Kush mu'i ha'ichu nakog ab ha amjed g mamakai ch wabshaba wabsh ba'ich i mumku. Kutsh g lialigaj huhug. 27 Sh am hahawa i kah mash haschu has junihim g Jesus. Kutsh am s-apkot matsh am wo jiwia wui. Kutsh ab oithk i him k an taht g wehschugaj 28 hab e ahgch, “Chum anis hems an wabsh wo taht g wehschugaj, t wo ni-ap'et.” 29 Tsh ha hekaj am wabsh si huh g eh'edaj. Tsh e taht mat ap'et. 30 Kutsh g Jesus taht matsh g thoajig gewkthag sha wuhsh ab ab k am ha hekaj i sikoliwua hemajkam ha wui k hab kaij, “Thoht an ni-taht?” 31 Kush hema hab kaij g chuhchaij, “An o si i t-bihagch g hemajkam. Kup haschu ahgch hab kaij, Thoht an ni-taht?” 32 Kutsh an i nenhoghim k ab i nei hegai uwi matsh an taht. 33 Kutsh heg si e tothsith k ab wui i gehsh k am ahgi mat thoa. 34 Sh hab kaij g Jesus, “Pegih, ni-uwiga, am apt wa thoa nap pi ab si ni-hiwig. Gam g s-ap e-taht k hihm k am wabsh s-thoakath.” 35 Kush am wabsh kia neok. Tsh am ha'i thatha ab kihj amjed hegai Jairus k hab kaij, “Muh at g m-chehiaga. Kupt haschu hig ahgk am ba'ich wo i kudu g ha mashchamtham?” 36 Kush wabshaba hab kaij g Jesus ab Jairus wui, “Pi g am sha'i has e tahtkkath ch am wabsh i ni-hiwgath.” 37 Bash kaij ch am hahawa ha ui g Peter ch James ch John k am i oi. 38 Kutsh am hihim k gd hu thatha mash am kih g Jairus. Kush am wabsh si s-nakosigam hab e wua no pi si shoani g hemajkam. 39 Kutsh am i wah g Jesus kih ch ed k hab kaij ab ha wui, “Pi g am wo shoanith. Heg o wa wepo ni-wehhejed mo wabsh kohsh g chehia.” 40 Kush wehsijj si s-ko'okam ash nash pi s-mahch matsh heki hu muh. Kutsh gm hu i ha wuhwhasith k am i ha ui hegam mash am wehmaj k am i wahp amai mash am wo'o g muhki. Tsh g jehjij am ep i ha oi. 41 Tsh g Jesus ab bei nowij ab k hab kaij, “I wamigi, chehia.” 42 Kutsh ab ha hekaj i wami g chehia k ab i hih. Kutsh si has i e taht g hemajkam. 43 Sh hab kaij g Jesus, “Ab g wabsh mahki g chehia g ha'ichu hugi.” Kutsh ab mah. Sh hab ep ha ahg mat pi hedai wo sha'i ahgi mat has e juh. Kush d gamai gohk a'ahithag ihtha chehia.

Mark 6

1 Tsh gm hu hahawa hihi ihtham Jesus k gd hu thatha Nazareth t am mash am d si kihkam g Jesus. 2 Kush am d i t-mihshmetha tash. Tsh am ep ha mihshmath g Jesus ha-cheopi ed. Kush mu'i hemajkam am ha'ichug ch am kah ch si has i e tahtam k ab a'ai si e kakke, “ Kus hebai mai wehs ihtha amichuthadag k has masma hab wua ihtha s-hasig ha'ichu? 3 No hig pi woho d wabsh hegai huk chikpantham mo d madaj g Mary ch d ha-wehnag g James ch Joses ch Judas k ch Simon? No hig pi woho g u'uwi wepngaj ia kih?” Neh, bash kaij ch wabsh pi ha'ichuchuth. 4 Sh g Jesus si has i e tahtk ch hab kaij, “Jiosh ha'ichu i tashogiththam at chum hebai ab si has wo e elithath. T wabshaba g si kih'amkam o'othham ch wehmaj kihkam pi ab hu has wo elithath” 5 Kutsh heg hekaj pi e nako mas g si s-hasig ha'ichu hab wo junihith amai ch heg hab wa'i juh mat al he'ekia kok'otham ha thothaj. 6 Kutsh am hahawa i ha mihshmethahi g Jesus an wehgaj g Nazareth mo hebai i kihhimag. 7 Am hu hebai, tsh am ha cheha g e-chuhchai matsh go'ogok e wehm am wo ha mihshmethahi g hemajkam k gm hu hab wo i ha juh g jijawul ab ha amjed hegam mo an ha u'ukch. 8 Neh, bash ha ahg, “Gm amt hu wabsh wo i hihim k heg wa'i e-cheowikud wo u'ath ch pi wo bek g e-limoshan kostal o g lial o g ha'ichu hugi o g ha'ichu eniga. 9 Mt ab wo i em-wahpkith k wo em-thagio'ithath mamt hebai wo i ha mihshmath. 10 Kumt amokath k ab wo ai mamt ba'ich ep wo hihi. 11 Mt gm hu wabsh wo hihi mamt hebai pi ap ab hu wo i em-nei gm hu shahmuthk g e-shuhshk. T ith wo ha chehgi mamt wabsh wo ha thagito nat pi pi ap hab chu'i. Thohwai.” 12 Kutsh wa woho an a'ai i ha ahgithahi g hemajkam matsh gm hu wo s-ohhoth g pi ap e-chegitoi. 13 Kutsh ab iawua g huhudakud ha-mohmi ab g kok'otham. Kutsh thotha. Tsh mu'i gm hu hab ep i ha juh g jijawul ab ha amjed hegam mo an ha u'ukch. 14 An o wa wehsko hab kaithag mash has e junihim g Jesus. Kum am chum a'aga mas hedai wud. Ha'i o hab kaij matp hems d Elijabad o hema ehp hegam kekelibad Jiosh ha'ichu i tashogiththam. K ha'i hab ep kaij matp hems d hegai Johnbad mat wa am i shonwuich g pahl wakona. E atsh wa mu'ajith k atp hems uhpam e chegito k hab s-hasig ha'ichu hab junihim. 16 Sh hegai Herod mo am d wa kownal Galilee chekshani ch ed hab ep kaij, “Thoki hegai John mo wa ha pahl wapkonahim. Heg ant mua. Kutki wabshaba uhpam e chegito k hekaj hab e nakog mat hab wo juh g s-hasig ha'ichu.” 17 Ihtha Herod atsh wa heg hab juh am wehhejed g e-hohnig. Heg ash hab chehgig Herodias ch ash d chum hohnigaj g Herod wehnag. Kush heg hab chechgig Philip. Tsh g Herod ehs g hohnigaj. Sh amjed g John chum hekith hab chum a'aga. “Mo pi sha'i ap'e maps g e-wehnag hohnig wo ehs.” Sh g Herodias heg hekaj s-keh'ith ch am chehani g e-kun mat wo mua. Tsh Herod ha cheha g e-shonthalig mat wo be k wo kuh. K wabshaba si s-ap d o'othham g John. Kush heg hekaj s-ehbith g Herod ch wabsh kuhpch ch s-ap nuhkuth. Sh hab pi e nakog g Herodias mas wo mua. Kush g Herod s-hohho'ith ch kah g John mihshmetha, chum as si e kudut heg amjed. 21 Sh g Herodias am wabsh nenida mat am wo s-ap'et. Kutsh am hu hebai s-apkot wehhejed matsh e ai g Herod mahsithag tash. Kutsh g Herod ab i ha wai g e-shonthalig ha-ge'ege'ejig ch hegam mo d si haha'ichu am Galilee ch ed. Tsh ab i hihim k am wehmaj piast. 22 tsh am i wah g uwi madaj g Herodias k am e waila. Kush wehsijj s-hohho'ith. Sh g Herod hab ahg, “Maptp haschu hab wo i elithath ch ab wo i ni-tai, nt hab wo m-juni.” Sh pi has sha'i kaij ihtha uwi. 23 Kush hab hahawa ep si kaij, “Maptp haschu ab wo i ni-tai, nt wo m-mah, chum as hems eda hugkam g ni-kownaltalig.” 24 Kutsh am hahawa him k am kakke g e-je'e, “Shahchu ant wo tai?” Sh hab kaij g je'ej, “John mo'o apt wo tai” 25 Tsh ab uhpam i wah k hab ahg g Herod, “John mo'o apt wo ni-mah am hoas-ha'a ch ed thahshk” 26 Kutsh si pi ap e taht g Herod. Sh wabshaba wehsijj kah mo has i kaij. Tsh heg hekaj pi e nako mas pi am hu hab wo juh, 27 neh, k am hema cheha g shonthal mat am wo him k an wo shonchk g John mo'o k ab wo i bek. Kutsh am hih lilso ha-kih wui k an shonch g kuswoj g John 28 k am u'apa g mo'oj ab hoas-ha'a t ab k ab mah g uwi. Tsh g uwi am him k ab mah g e-je'e. 29 Kutsh am i kah hegam mo ab si wecho e mashcham g John matsh e muhkith k am hihim k am bei g honaj mat wo s-ap juh. 30 Tsh am i uhpam thatha g Jesus chuhchai k am wehs ahgith mat haschu has i juh k haschu ep ha mashcham. 31 Sh eda ia'i ithani mu'i am thaiw g hemajkam. Tsh pi am hu sha'i ha apkot mas wo e gegos ihtham Jesus. Sh hab ha ahg g Jesus, “Am att hig wo t-hejelkoth k wo sha'i t-uh'ulinihogi.” 32 Kutsh gm hu hejelko hihi g wahlkokaj. 33 Mu'ijj ash ha neith mat gm hu hihi ch gm hu ha ba'ich wohp k gm hu heki hu thatha. Kutsh ihtham am hahawa i thatha 34 k am i huhud. Tsh g Jesus am i ha nei. Kush hab sha masma mo g heb hu hihimkam kakawal. Kutsh ab si i s-ha ho'ige'ith k mu'i ha'ichu ha mashcha. 35 Kutsh gm hu si i juh. Tsh g Jesus chuhchai am wui thatha k hab chum ahg, “Neh, mehk at wa'i juh. K eda ia hu wabsh si jegko. 36 Am g ha ahgith g hemajkam mat gm hu wo hihi kihhim wui k wo ha nolawt hegai mat wo huh” 37 Kush hab ha ahg, “Ahpim amt wo ha'ichu ha mah mat wo huh.” Sh hema hab kaij ihtham, “A tt haschukaj wo ha gegos? Mu'i lial at wo nam g ha'ichu hugi matt hekaj wo ha gegos.” 38 Sh ab ha kakke, “Shahchu o am i kahch? Am g wo neith.” Kutsh am neith k hab ahg, “Hetasp sismito ch gohk waptopi.” 39 Kush hab ha ahg mat wo ha ahgi g hemajkam mat wehsijj am wo thadhaiwua jewedo he'ekiajj i e wehm. 40 Tsh am ha cheha. Kutsh am thadhaiwua he'ekiajj i e wehm, ha'i am hu i siant k ch ha'i am hu i hehetaspo wepst-mahm. 41 Kutsh g Jesus am ui hegai ha'ichu hugi k am e thahm i nen k ab ho'ige'el g Jiosh k am hahawa hahai hegai sismito k ab ha mah g e-chuhchai. Tsh an i ha mahkhi g hemajkam. Kutsh g waptopi an ep i hahain k ha mah. Tsh an i ha mahkhi. 42 Tsh wehsijj hug k oi wa hi si s-kokwoth. 43 Kutsh g chuhchaij an i u'ihim k u'apa g wihpi'ithaj mat am hu'i gamai gohk hoha wo ha shuhshuth. 44 Kush am hu d i hetasp mihl chechoj ch mu'ijj g u'uwi ch a'al hegam matsh am e gegos. 45 Tsh am hahawa ha ahgi g e-chuhchai matsh gm hu aigo wo hihi heg wui kihhim mo hab chehgig Bethsaida. Tsh heg am wo wi'i k am wo ha ahgi g hemajkam mat gm hu wo hihi e-kihki wui. Tsh heg hekaj an i chehchsh wahlko ch ed k gm hu hihi. 46 Tsh g Jesus am ha thagito g hemajkam. Tsh gm hu himto. Tsh am hahawa hejel i chesh kawulk thahm k am e ho'ige'ithahun. 47 Tsh am i hud. Sh am wabsh kia hejel ha'ichug. Tsh g wahlko gm hu si eda i cheka g shuhthagi. 48 Kush g hewel ab si s-gewkam med ha wui. Sh hekaj pi ap him. Kush s-ap ha neith g Jesus mash sha'i si s-wihnam himchuth g wahlko. Tsh koi mahsi. Kush ab him ha wui an wabsh shuhthagi thahm k hab e juh matsh an wabsh wo bij. 49 Tsh wabshaba am i nei s-chuhugam k ed k am si hihnk nash pi si s-ehbini hab e ahgch mash d wabsh kok'oi. 50 Kush hab ha ah, “Pi g wo sha'i ni-ehbenith. Thani ahni. Mt oi wo s-ap e taht,” 51 k gn hu hahawa i chesh wahlko ch ed. Kutsh am wabsh si heweto. Tsh ihtham si has i el 52 nash ge sha'i amichuth mokis ha'as edgith gewkthag. K eda d si s-hasig ha'ichu mat ha gegos hegam mu'i hemajkam. 53 Kutsh ga hu aigo i chehchsh k ab thatha amai mo am d Gennesaret k am wulsh g wahlko. 54 Tsh g hemajkam ha hekaj s-amich g Jesus 55 k gn hu a'ai wohp k an i ha u'ihi g kok'otham an ha-wohpikud ab k gd hu ha u'apa Jesus wui. 56 Kush an oiopo hegam Jesus ch am thaiw kihhim ch ed ch oithag ch ed. Kutsh g hemajkam ab wui wo ha u'apath g kok'otham ch ab wo ahgithath g Jesus mat wo ha hiwigi g kok'otham mat chum hems wabsh g hugithaj g enigaj an wo taht. Kush wehsijj thotha an tahtamk.

Mark 7

1 Kutsh ab ha'i hihi g Palasi ch chehanig ha mashchamtham k am e hemapai an ha wehgaj hegam Jesus. Tsh eda wo chum e gegos. 2 Kutsh ihtham am cheh matsh am ha'i wabsh thadhaiwua pi hab masma ha wapkonk g e-nohnhoi mo hab masma d ha-himthag g kekelibad. 3 Ahchim Tutuligo ach mu'i ha'ichu hab masma hab chum wua mo wa g t-kekelibadga. K ihtham Palasi wehs t-ba'ich i s-gewkam oith g ha-chehanig ch pi ha'ichu wo huh pi hab masma ha wapkonk g e-nohnhoi mash wa g kekelibad. 4 Kut g ha'ichu hugi hab wa'ap wo si e wapko mamt hekith ab wo i ui tianna t amjed. T g hohas-haha'a ch hihithodakud ch chum hems g wohpikud hab masma wo e wapko mash wa g kekelibad hab wua. 5 Kush heg hekaj ihtham Palasi ch chehanig ha mashchamtham ab kakke g Jesus. “K haschu ahgch pi ab hu wohog elith g ha'ichu ha-mashchamadag g kekelibad ihtham mo ab si m-wecho e mashcham? Neh, e o gegosith pi am hu t-himthag oithch ha wapkonk g e-nohnhoi.” 6 (8) Kush hab kaij g Jesus, “Kum ahpim haschu ahgch im hu hab wabsh wua g Jiosh chehanig ch im hu ha'ab ab s-wohochuth g ha-chehanig hegam mo d kekelibad ch d wabsh o'othham? (6) Isaiabad oki si s-ap hab em-ahg ahpim mam hab wabsh s-e junimk mat eda an o'oha mash hab kaij g Jiosh: Ha'i ihtham mo d chum ni-hemajkamga o hab kaij mo ab si has ni-elith ch ab ni-ihm. K wabshaba g ha-i'ibthag si s-kawpk ch si mehk ab ni-amjed. (7) Pi o sha'i wohom ab has ni-elith no pi wabsh g hemajkam ha-chehanig ha mashcham hab chum masma mo d ni-chehanig. Neh, bo kaij g Jiosh. Kum ahpim s-wohom hab masma mo wa an o'ohanas.” 9 K hab ep kaij g Jesus, “Si am s-e mahch mamt has masma im hu hab wabsh wo i juh g Jiosh chehanig ch am wo wa hekajith mo haschu d hejel em-mashchamig. 10 Mosesbad at an o'oha mo hab kaij g Jiosh: Ab g si has wo i ha elithath g e-ohg ch e-je'e, ch ith ehp: Mat hemho wo wa e muhkith hegai mat hedai wo sha s-ko'okam has ha ah g e-jehj. 11 Kum eda ahpim ha mashcham mat pi ab hu has wo ha elithath ch ab ha wui hab wo chei, ‘Mah ant g Jiosh hegai mat haschu ab d wo i chum em-wuikamk.’ 12 T hahawa pi ha'ichu hab wo ha juni g e-jehj. 13 Kum hab masma im hu hab wabsh i wua g Jiosh ne'oki ch am ha mashcham mo haschu d wabsh o'othham ha-nahtoi. K mu'i d ha'ichu mam hab masma hab ep wua” 14 Kutsh am hahawa ep ha wai g hemajkam k hab kaij am ha wui, “ Ab g wo i ni-kaiham wehsijj ahpim k wo s-amich ihtha. (15) Pi at im hu hab wo sha'i em-juh g Jiosh heg hekaj mamt haschu wo huh k wabshaba im hu hab wo i em-juh heg hekaj pi kehg em-chegitoithag.” 17 Tsh am i ha thagito g hemajkam k im hu wah kih ch ed. Kumsh ab hahawa kakke ith amjed. 18 Sh hab kaij, “Pegih, kumtp ahpim hab wa'ap pi amichuth. Pi at im hu hab wo sha'i i em-juh ab amjed g Jiosh mamt haschu wo huh 19 nat ge am hu wo i wah em-chegitoi ed k wabshaba gd hu em-wohk ed wo wah k amjed gm hu wabsh wo wuhsh.” Pegih, t hab masma am ha ahgi g Jesus mo wehs g ha'ichu hugi s-kehgaj. 20 k hab ep kaij, “Heg at im hu hab wabsh wo i em-juh ab amjed g Jiosh pi ap em-chegitoi 21 nat pi hab wo em-juh mamt hab wo juh g ha'ichu pi ap'ekam. Neh, mtp hems hema ha'ichu wo ehs o wo ha mua 22 o wo ha ehs g ha-wehm kihkam o wo tatchua g ha'ichu ha-eniga o wo s-chu iattomk o hab wo juh mat haschu si pi kehg hab wo mahsk o wo s-chu hehgamk o hema wabsh wo s-ko'okam has ahgath o wo chum si e haschuthath o wabsh pehegi has wo e wuath. 23 Ith at wehs ab wo i wuhsh ab amjed g pi kehg chegitoithaj g o'othham k im hu hab wabsh wo i juh ab amjed g Jiosh.” 24 Kutsh gm hu hahawa hihi hegam Jesus k am thadhaiwua hema kih am mash am miabithch g Tyre kihhim matsh wo sha'i e hejelkoch. Kush eda an wa s-nen'oith g hemajkam ch ha hekai s-mai mo am thaha g Jesus. 25 Kutsh am hema jiwia g uwi mash am kih heg eda jewed ch d gawul mahs o'othham ch gm hu d mahsikam Syria jewed ch ed. Sh g ne'okij d Greek. Kush g jiawul an u'ukch g chehiagaj. Tsh heg hekaj ab i hih g uwi k ab wui i gei g Jesus k ab si tahni mat gm hu hab wo i juh g jiawul ab amjed g chehia. 27 Sh wabshaba hab kaij g Jesus, “Heg at wo wa wepok mamt ab wo ha mah g gogogs g ha-chechmait g a'al. Wehpeg ant am wo i ap'ech g pi ha-ap'ethag g Tutuligo hemajkam no pi d chum Jiosh a'aliga.” 28 Kush hab kaij ihtha uwi, “Woho o wa. T wabshaba chum hems g gogogs am wo wa huh g a'al ha-ha'ichu hugi hahainig mat ab wo i shul mihsa wecho. Kunt ahni hab wa masma wo si s-ap ni-taht mapt ith am hab wo al i ni-juni.” 29 Sh hab hahawa kaij g Jesus ab wui, “M-ne'oki o am chehgith map ab si ni-hiwig. Nt heg hekaj gm hu hab wo i juh g jiawul ab amjed g m-chehiaga.” 30 Kutsh gm hu hih uhpam k s-mai matki gm hu hab i e juh g jiawul ab amjed g chehiagaj. Kush an wabsh s-ap wo'o. 31 Kutsh gm hu hahawa hihi hegam Jesus k am gahi wuwha g Sidon kihhim ch Wehst-mahm Kihhim chekshani k gm hu thatha Galilee kahchki am. 32 Kutsh am ha'i thatha g hemajkam k am hema u'apa g o'othham mash pi chekaithag ch ep pi ap neok k ab i tahni g Jesus mat ab wo taht k wo thoaj. 33 Kutsh imhab sha'i wuhshath hejelko k am i wahpki g al chu'uchum e-nohnhoi am nahnkaj ed k am hahawa sha'i wadagi g e-nowi g e-siswuadagkaj k ab hekaj taht g nehnij 34 k am i neh e thahm k si i ihbhuiwua k hab kaij, “Thoajini.” 35 Tsh hahawa chekaith. Tsh g nehnij ap'et matsh s-ap neo. 36 Kutsh g Jesus am hahawa wehs ha ahgi mat pi hedai wo sha'i ahgi ihtha. Sh oi wa haha wabsh wehsko ahg 37 nash pi si ge'e has elith ch hab kaij. “Sho'o wa'i si s-kehg ha'ichu hab junihim mo g pi chechkaithkam ha chechkaichuth ch pi neneoktham s-ap ha neokchuth.”

Mark 8

1 Kush pi sha'i tash amjed. Tsh mu'i am ep i e hemapai g hemajkam k ab kaiham g Jesus waik tashkaj. Sh hahawa pi an hu ha'ichug mas haschu wo huh. Tsh g Jesus am i ha wai g e-chuhchai k hah ha ahg. 2 “Neh, waik tashkaj o in wa'i t-wehmaj ihtham hemajkam ch heki hu wa'i pi ha'ichu huh. Ni s-ha ho'ige'ith. 3 Tp hems ha'ijj wo s-e chuhugi matp gm hu wo sha hihi pi ha'ichu hugok.” 4 Sh hegam ab i kakke, “Kuchs hebai hig wo ui g ha'ichu hugi mat wehs wo ha a'ahe ihtham?” 5 Sh ab ep ha kakke, “He'ekia at am i wih g sismito?” Sh hab kaij, “Wewa'ak” 6 Jesus atsh am hahawa ha ahgi g hemajkam mat am wo thadhaiwua. Kush am thadhaiwua. Tsh am ui g sismito k ab ho'ige'el g Jiosh k am hahawa hahain k ha mah g e-chuhchai. Kutsh an i ha mahkhi g hemajkam. 7 Kumsh am hi wa ha'i al to'akch g waptopi. Kutsh ab ep ho'ige'el g Jiosh k am ha ahgi mat an ep wo i ha mahkhi. Tsh hab e juh. 8 Tsh wehsijj hug k oi wa hi si s-kokwoth, chum as am hu hebai d i gi'ik mihl chechoj ch mu'ijj g u'uwi ch a'al. 9 Tsh g Jesus chuhchai an i u'ihi g wihpi'ithaj mat am hu'i wewa'ak hoha wo ha shuhshuth. Kutsh g Jesus am hahawa ha ahgi g hemajkam mat gm hu wo hihi. 10 Tsh ihtham Jesus am ha hekaj i chehchsh wahlko ch ed k gm hu hihi mash am Dalmanutha chekshani k am i huhud. 11 Kutsh am ha'i thatha g Palasi k ab ne'owin g Jesus ch ab chum si chehani mat g si s-hasig ha'ichu am wo ha chehgi matp woho d Jiosh si Kehsha. 12 Kutsh g Jesus am si ihbuiwua k hab kaij, “Kus haschu ahgch ab ni-kakke ihtham hemajkam mant g si s-hasig ha'ichu am wo ha chehgi. Si ant s-wohom hab wo chei mant pi am hu wo sha'i ha chehgi g si s-hasig ha'ichu.” 13 Neh bash kaij ch am hahawa ha thagito. Kutsh an ep i chehchsh wahlko ch ed k gm hu aigo ep hihi. 14 Tsh eda pi chegito ihtham mat wo ui g sismito. Kush hemako am kahch. 15 Sh hab kaij g Jesus am ha wui, “Si g wo s-e nen'oithk mat pi wo em-cheawuagi g ha-jewajithakud hegam Palasi ch hegam mo ab si has elith g Herod.” 16 Sh hegam chuhchaij am hahawa a'aga ch hab kaij ab a'ai e wui, “Heg oki hekaj hab kaij mach pi ha sismitoga” 17 Kush eda g Jesus s-ha amichuth mo has kaij ch hab ha ahg, “Pi amki koi amichuth mani he'es edgith g gewkthag ch hekaj am a'aga mach pi ha sismitoga. 18 Am am wa chum neith mant al hetasp sismitokaj ha gegos g hetasp mihl chechoj ch mu'i ehp. Pegih, namt pi chegito 19 mamt he'ekia i hoha shuhshuth k ui g wihpi'ithaj?” Kush hab kaij, “Gamai gohk.” 20 Sh hab ep kaij g Jesus, “Kumt he'ekia i hoha shuhshuth k ui g wihpi'ithaj mant al wewa'ak sismitokaj am ha gegos hegam gi'ik mihl chechoj ch mu'i ehp?” Sh hab kaij, “Wewa'ak.” 21 Kush hab kaij g Jesus, “Pegih, mt wo chum s-mahchk mani he'es i edgith g gewkthag ch hab wo s-amich mani pi heg hab ahg sismito ch wabshaba ha'ichu chum em-tashogith ch heg am wepogith g jewajithakud.” 22 Kutsh gm hu thatha Bethsaida t am k am i huhud. Kutsh g hemajkam am hema u'apa g o'othham Jesus wui mash pi nea k ab i e sho'igch wui mat ab wo taht. 23 Kutsh an bei g pi neatham nowij an k am i wanimed k gm hu i wuhshath ab kihhim t amjed k ab hahawa siswua wuhpuij ab k ab ep taht k ab kakke, “Shahchu ap hig neith?” 24 Tsh ab i nen k hab kaij, “Neith ani mo an oiopo g hemajkam ch wabshaba hab sha mahs mo g u'us wuhshanim.” 25 Tsh ab ep taht g wuhpuij. Kutsh ab ep i nea. Tsh g wuhpuij am i ap'et. Sh hahawa wehs ha'ichu si s-ap neith. 26 Sh g Jesus hab ahg matsh gm hu uhpam wo hih e-kihthag wui k pi am hu wo kia i wah kihhim ch ed. 27 Kutsh gm hu hahawa hihi ihtham Jesus am ha'i ep ha wui g kihhim am miabithch g Cesaria Philippi kihhim. Kush g Jesus ab ha kakke ch hab kaij, “Am g wo ni-ahgith, thoh'o ni-elith g hemajkam?” 28 Kush hab kaij, “Ha'ijj o hab m-elith map d hegai Johnbad mo chum t-pahl wapkonahim ch ha'ijj hab ep m-elith map d Elijabad o hema i ehp hegam kekelibad Jiosh ha'ichu i tashogiththam.” 29 Sh ab ep ha kakke g Jesus, “Kum ahpim hig hedai ni-elith?” Kush g Peter hab kaij, “Thap Jiosh si Kehsha maptsh ab wo i wuhsh si ha'ichu wehhejed.” 30 Kush hab ha ahg mat pi hedai wo sha'i ha ahgi hemu mo hedai wud. 31 Neh, tsh am i amjed am hahawa ha'ichu ha mashcha ab e amjed hab kaijch mat hemho wa mu'i wo e sho'igch g Jiosh si Kehsha. Kutsh pi ab hu wo tatchua g ge'eged ch u'ugchu papal ch chehanig t-mashchamtham k am wo i thagito mat wo e-muhkith. Tsh amjed d wo i waik tashk, tsh ep wo e-chegito. 32 Neh, sh ith am si tasho ha ahgith. Kutsh g Peter im hu go'olko i be k ab si s-gewkam neok wui hab kaijch mat pi woho hab wo e juh. 33 Kutsh wabshaba g Jesus ab ha'ab i kekiwua ha wui k ab epai si s-gewkam neo ab wui g Peter hab kaijch. “Pi g sha'i ni-shohbith. Tho wabsh hejel hab m-elitha ihtha. Kup ab wui kehk g Jiosh hab elitha hab masma mo g ge Jiawul.” 34 Sh eda mu'ij g hemajkam an ha wehgaj. Kutsh ab i ha waith k hab ha ahg, “Mamtp am wo s-oitham g ni-himthag k hemho wa gm hu wo thagito g hejel e-tatchui k ahni ni-tatchui hab wo junihith ni-wehhejed e sho'igchuthch. Heg at wo wa wepok mam ab mohto g kots ch ab ab wo e muhkith. 35 Pi amt wo heki wua g e-thoakag mamtp wo hekaj am ni-wehhejed. Heg at wo heki wua g e-thoakag matp hedai wo chum s-tha'ath. 36 “Pi at ha'ichu wehhejed wo s-kehgajk matp g o'othham wehs wo bei mo haschu i tatchua ith thahm jewed k wabshaba pi wo e tho'ibia. 37 Pi o an hu ha'ichug ith thahm jewed mas heg hekaj wo e tho'ibia g o'othham. 38 “Mu'i hemajkam at wabsh s-tahhatham hab wo junihith g pi ap'ekam ch wo pi em-ha'ichuchuthath. Kumt wabshaba ahpim pi wo si e elithath ni-hekaj ch hekaj g ni-mashchamadag. Nt ahni hab wa'ap pi wo si ni-elithath em-hekaj mant hekith ia ep wo jiwia. Ithani at ab ni-ab si s-tondam wo e chehgithath g ni-ohg gewkthag. T g mu'i anghil ni-wehm ab wo i hihi.”

Mark 9

1 Neh, bash kaij g Jesus ch hab ep kaij, “Nt wo si shel em-ahgi mo ia ha'i ha'ichug hemu mat pi koi wo koi k ho'ip nei mat ba'ich i s-gewkam inhab wo i e juh g Jiosh kownaltalig.” 2 Kush am d i chuhthp tash amjed. Tsh g Jesus ab i ha wai g Peter ch James ch John. Kutsh ihtham am wehmaj ab i chehchsh hema uhgk tho'ag t ab k gd hu thatha k haha wabsh nei. Tsh am gawul e juh g Jesus. 3 Tsh g wehschugaj hab e juh mash si s-tondam s-tohta mo pi hebai ha'ichu hab masma. 4 Kutsh ab haha wabsh i e chehgi g Elijabad ch Mosesbad k am wehmaj neneok g Jesus. 5 Kutsh si e totoths ihtham Peter. Tsh g Peter wabsh kohsh k tha'iwuni k hab kaij ab wui g Jesus, “T-mashchamtham, s-ap'e oki mach ia ha'ichug. Tt ia waik wo ha chuhcha g al chechopi matt hekaj ab wo si has em-el ahpi ch Mosesbad ch Elijabad.” 7 Tsh an hahawa si ha ehkaj g chewagi. Tsh g Jiosh ne'oki ab kaitha chewagi t amjed k hab kaij, “Jesus o d si ni-tatchuithch ni-alithag. Heg amt ab wo si kaihamath.” 8 Tsh am hahawa i chum nenhog hegam Peter. Kush hegai wa'i Jesus hejel am kehk. Sh pi am hu ha'ichug hegam gohk. 9 Sh ab hahawa i huhudkhim tho'ag t amjed. Sh ab si ha chehani g Jesus ch hab kaij, “Pi g am hedai wo sha'i ahgith mamt haschu i nei, nt ho'ip kia am uhpam i wuhsh ab muhkig amjed ahni Jiosh si Kehsha.” 10 Kutsh wa woho hab e juh k wabshaba hejel am a'aga mas has d ahga ihtha mo hab kaij matsh am uhpam wo i wuhsh muhkig t amjed. 11 Am hu hebai, sh hab kaij ab wui g Jesus, “Neh, bo chech'e hegam chehanig t-mashchamtham matsh ia wehpeg wo e maskogi g Elijabad. Tsh g Jiosh si Kehsha ia haha wo e maskogi. Pegih, t haschu ahgk pi ia wehpeg m-ba'ich e maskogi hegai Elijabad.” 12 Sh hab kaij g Jesus, “Hema at woho wehpeg wo e maskogith k hab wo masmak mash wa g Elijabad ch wehs ha'ichu wo i ap'ech. Kunt wo em-ahgi mat wa woho heki hu jiwia. T wabshaba g hemajkam am wui hab juh g pi ap e-tatchui mo hab masma an o'ohanas Jiosh heki hu o'ohana ed mat hab wo e juh. K an ep o'ohanas mat ep wo ni-sho'igchuth k wo s-ni-ohhoth ahni Jiosh si Kehsha.” 14 Sh gd hu ha aihim hegam mat am wih. Kush mu'i hemajkam am oiopo. Sh ha'i d chehanig t-mashchamtham ch am ha ne'owin hegam mat am wa'i wih. 15 Tsh g hemajkam am i nei mo ab him g Jesus k si s-ap i e taht k ab i wohp k ab nam. 16 Sh g Jesus ab ha kakke hegam e-chuhchai mat am wa'i wih, “Shahchu am ha wehm a'aga?” 17 Kush am hema g o'othham hab kaij ab Jesus wui, “Neh, ia ant heki hu chum u'apa g ni-alithag m-wui no pi g jiawul an u'ukch ch pi hiwgith mas wo neo. 18 Hebai atp am si has tahtchuth ch i wuhppa. K g totshagi i chechshshaj chinij ab. K g e-tahtami si kuhm ch ab wabsh wo i si gewka. Kuni heki hu am chum ha ahgith ihtham mat gm hu hab wo i juh g jiawul. T pi e nako.” 19 Sh hab kaij g Jesus am ha wui, “Sho'o wa'i pi ge'ej g em-wohochuthadag. Shahag wepo mant tash ia wo em-wehmajkath ch ab wo em-nakogath mat hekaj wo i ge'etha.” Sh hab hahawa kaij heg wui o'othham, “Ab g i beka'i ni-wui.” 20 Kutsh ab hahawa i bei wui. Tsh ab i nei g Jesus. Kutsh g jiawul ha hekaj i wua g ali. Kutsh am gehsh k am si banimmed jewedo. Tsh g totshagi i wuhsh ab chinij ab. 21 Jesus ash ab hahawa kakke g ohgaj, “K hekith i amjed hab masma ihtha?” Kush hab kaij g ohgaj, “Gd hu wa'i e-alijk amjed o hab masma. 22 Mu'ikko o wa'i chum s-mu'amk ch am wuhppa shuhthagi ch ed ch am nahtha ch ed. Si g s-ni-ho'ige'ith k i wuhshath maptp wo e nako.” 23 Sh g Jesus hab kaij, “Maptp ahpi wo e nako k ab wo i ni-hiw. Pi o ha'ichu sha'i wihnk am ni-wehhejed maptp ab wo ni-hiwgath.” 24 Kush hab kaij g ohgaj. “M ani wa he'es ab chum m-hiwig. Oi g i ni-wehmt. Nt ba'ich ab wo i m-hiwgath.” 25 Tsh eda ab a'aijed i wohp g hemajkam an ha wehgaj. Kush hekaj s-e hohtkith g Jesus ch si s-keh'el g jiawul k hab ahg, “Thagitoni g ali, ahpi jiawul, k pi thahm an hu ep wo sha'i u'ukchith.” 26 Tsh am si s-kaitham hihin k ab si s-gewkam e ugij g ali. Tsh am hahawa thagito. Tsh hab wabsh e juh mat muh g ali. Sh g hemajkam hab kaij, “Muh atki.” 27 Tsh wabshaba g Jesus ab bei nowij ab k i wamigi. Tsh i wamig k kekiwua. 28 Kutsh gd hu i wahp kih ch ed ihtham Jesus. Tsh g chuhchaij am hahawa hejelko kakke, “Tt haschu ahgk ahchim pi t-nako machs gm hu hab wo i juh g jiawul?” 29 Sh hab kaij g Jesus. “Jiawul at heg wa'i hekaj gm hu hab wo i e juh mamt ab wo e ho'ige'ithahu Jiosh wui.” 30 Tsh amjed gm hu hahawa hihim k gm hu gahi wuwha g Galilee chekshani. Tsh g Jesus pi am hu e chehgi hemajkam ha wui no pi ha mashchamahim g e-chuhchai ch hab ha ahg, 31 “E o aihim mat g s-ni-keh'iththam wo ni-bei ahni Jiosh si Kehsha k am wo ni-thagito ha'i ha wui mat wo ni-mua. Nt wabshaba ep wo ni-chegito mat d wo i waik tashk amjed.” 32 Sh oi wa pi sha'i amichuth mas haschu hab ahg ch wabshaba pi ab hu kakke nat pi e totoths. 33 Kutsh am hihim k gd hu thatha Capernaum t am k am i wahp kih ch ed mash hebai thadha. Sh eda ha'i ha'ichukaj e ne'owin hihimathch. Kush ab hahawa ha kakke ch hab kaij, “Shahchukaj am e ne'owinahim mach ab hihim?” 34 Kush oi wa pi hedai has sha'i kaij nash pi eda e ne'owinahim mas hedai ba'ich d wo i s-has ha'ichuk. 35 Kutsh am i thahiwua g Jesus k ab i ha wai. Tsh am i e hemapai wui. Kush hab ha ahg, “Pi g wo chum ge e ha'ichuchuthath mamtp hedai d wo uhgchuk am e-shahgith ch wabshaba hab wo e junihith mamt wehs d wo ha-pionagk.” 36 Sh am hema kehk g ali. Kutsh g Jesus an be k am kohm k hab kaij, 37 “Matp hedai hema wo ha thagio'ithath g ali am ni-wehhejed ch hekaj am wo e chehgithch mo ab si ni-tatchua ch ab ep si tatchua hegai mani d kehshaj.” 38 Kush g John hab kaij ab wui g Jesus, “Hema oki gm hu hab i ha wua g jijawul heg hekaj m-chehgig. Kuch am chum shohbith no ge m-wecho e mashcham.” 39 Kush hab ha ahg, “Pi g am wo sha'i shohbith. Pi at woho has wo ni-ah matp hedai hekaj g ni-chehgig ch hab wua g s-wihnk ha'ichu. 40 Tki wo i t-wehmt hegai matp hedai pi ab hu t-wui kehk. 41 Nt wo si shel em-ahgi matp hedai wo i em-wasibi g shuhthagi ahpim mam ab si ni-wecho e mashcham k wo bei g s-ap'ekam e-namkithadag.” 42 Sh hab ep kaij g Jesus, “Sho'o wa'i si s-ta ehbitham hab mahs am wehhejed hegai matp hedai hema am wo i ha wanchkwua pi ap'ekam wui ihtham al a'al mo ab al ni-hiwig. Ba'ich at wo i s-ap'ek wehhejed matp hems wo e wachumchuth k wo e muhkith mat koi hab wo juh ihtha chu'ichig. 43 “Pi at hedai wo e nako mas ab uhpam wo i wuhsh Jiawul kih amjed. Kut pi hekith wo huhug g ha-sho'igchutha amai. Heg at wo wa wepok mat wo waptopadt k chum hekith wo e sho'igchuthath am mei ch ed. Mt heg hekaj am wo i e nako mamt pi am hu wo gei heg eda. Ba'ich at wo i s-ap'ek mamt chum hems wo heb hu wua g e-nowi o g e-tad o g e-wuhi matp hema ihtham hab wo em-juh mamt am wo gei Jiawul kih ed k pi wo bei hegai wechij thoakag mo g Jiosh ab em-makiog. 49 “Hemho wa at wehs wo e maskogi g pi ap ha-chu'ichig g hemajkam. 50 Mt wabshaba hejel ab wo e abchuth k wo thagito hemu. T hab pi ab hu wo em-abch g Jiosh. Kumt ha'ichu wehhejed wo s-kehgajk hab masma mo g on. Heg at pi has masma ep wo i e kegch mat wo onko. Kumt wo s-e nen'oithath mamt pi wo heb hu wua g s-e-ap'ek am k wabshaba wo s-ap e tahtkkath ab a'ai e wui.” Neh, bash kaij g Jesus.

Mark 10

1 Tsh amjed gm hu hihi hegam Jesus k am gahi wuwha g Judea chekshani k am gahi i shul g Jordan akimel k gm hu aigo thatha. Kutsh g hemajkam am ep i e hemapai Jesus wui. Tsh am ep ha mashcha mash chum hekith hab e wua. 2 Kutsh ab ha'i i hihi g Palasi k ab ha'ichu chum s-abchuthamk g Jesus ch ash ab kakke, “No hiwgith g t-chehanig mat g o'othham wo s-ohhoth g e-hohnig?” 3 Sh g Jesus ab epai ha kakke, “Nam hig pi mahch mo has chu'ig g chehanig?” 4 Kush hab kaij g Palasi, “Heu'u, hiwgith o mat g o'othham wo bei g tapial k wo ha mah k gm hu wo s-ohhoth.” 5 Kush oi wa hab kaij g Jesus, “Heu'u, bo chu'ig mamt wo ha mah g ohhotha tapial mamtp pi ab hu wo kaihamath g Jiosh ch pi wo pihk e elithath ha hekaj. 6 K wabshaba gd hu i shohshonkam am ahgas: Jiosh at am ha nahto g cheoj ch uwi mat d wo e wehhejedkamk. 7 Kut ith hekaj g o'othham wo thagito g e-ohg ch e-je'e k am wo i e wehmt g e-hohnig wehm. 8 Kut hegam gohk hab wo e juh mat d wo hemakok. Pegih, t pi hab hahawa ep wo mahsk mat d wo gohkk ch wabshaba d wo hemakok. 9 Pi o hab sha'i mahs mas g o'othham wo ha gawulkai hegam mat g Jiosh ab i ha wehnath.” 10 Tsh gd hu hahawa i wahp kih ch ed. Tsh g chuhchaij ab i kakke mas haschu hab ahg. 11 Kush hab kaij, “Bo wua g pi ap'ekam matp hedai wo s-ohhoth g e-wehm kihkam k hema ep wo hohnt. 12 K g uwi hab wa'ap wua g pi ap'ekam matp wo s-ohhoth g e-wehm kihkam k hema ep wo kunt.” 13 Kutsh am ha'i ha u'apa g e-a'aliga Jesus wui hab ahgch mat ab wo ha taht k wo e ho'ige'ithahu ha wehhejed. Kumsh chum s-ha keh'ith mo hab e wua. 14 Kutsh oi wa pi hohho'i g Jesus matsh chum pi ha hiwigi k hab ha ahg, “Ab g wabsh wo i ha hiwgith g al a'al mat ab wo i hihi ni-wui k pi an hu wo sha'i ha shohbi. Am at wabsh s-moimam wo i wahp Jiosh kownaltalig ed ab ni-hiwigch. 15 Nt wo si shel em-ahgi mamt hab wa'i masma am wo i wahp.” 16 Neh, bash kaij ch an i ha kohmkahim k ab i ha tahtamahi ha-mohmi ab k ab i s-ha ho'ige'el. 17 Kutsh amjed haha wabsh i chum hihi. Kush ab hema med g o'othham ch ab i gei Jesus wui k ab kakke, “Ha mashchamtham map d s-ap'ekam, shahchu ant am hab wo juh mant ab wo bei g pi ha huhugetham thoakag?” 18 Sh g Jesus hab kaij, “Pi ap mahch map haschu ahgch hab ni-a'aga mani d s-ap'ekam. Heg o wa'i Jiosh d s-ap'ekam. Kup pi woho mahch mani hedai wud. 19 S-mahch ap g Jiosh chehanig. K hab chu'ig: Pi g am hu ha mua'i g o'othham. Pi g am hu ha ehsithath g ha-wehm kihkam. Pi g am hu ha'ichu ha ehsithath. Pi g am hu ha'ichu ha iattogithath. Ab g si has ha elithath g e-ohg ch e-je'e.” 20 Kush hab kaij ihtha o'othham, “Wehs ihtha ani hab junihim gd hu i ni-alijk amjed.” 21 Tsh Jesus ab i nei ihtha k ab si pihk i e el wui k hab kaij, “Hemako ha'ichu apki pi am hu hab wua. Him k gagda map haschu i eniga k ha mahki g namkigaj g sho'igkam k ab wo i him k ab si ni-wecho wo e mashchamath ch an haha wo edgithath g ba'ich i s-kehg kaisthag Jiosh kihthag ed.” 22 Kutsh ihtha o'othham si pi ap e taht k kah mo has i kaij nash pi d s-kais ch atsh im hu hih pi ap e tahtkk. 23 Tsh g Jesus an i nenhog e wehgaj k hab kaij am ha wui g e-chuhchai, “Neh, t wo sha'i si s-hasigk mas g s-kakais am wo i wahp Jiosh kownaltalig ed.” 24 Kutsh si has i e taht hegam chuhchaij am i kaiok mash has kaij. Sh oi wa hab ep kaij g Jesus, “Ni-naipijju, pi g hab wo elithath mat g o'othham wabsh s-pehegi am wo i wah Jiosh kownaltalig ed. 25 Nam hig hab elith mat wo e nako g kamihyo mas am wo gahi wuhsh mo am jeg g ho'ipad? Pegih, t hab wa masma pi wo e nako hegam mo hiwig g ha'ichu e-eniga mas am wo i wahp Jiosh kihthag ed.” 26 Kutsh ba'ich i si has i e taht k ab a'ai e kakke, “Pegih, kus hedai hig wo e tho'ibia?” 27 Kutsh ab i ha nei g Jesus k hab kaij, “O'othham wehhejed o s-hasig ch wabshaba am Jiosh wehhejed pi hasig. Jiosh at wo e nako mat wehs hab wo juh mo haschu i tatchua.” 28 Kutsh g Peter hab ha hekaj chei, “Neh'e, ahchim att hi wehs ha'ichu thagito k am i m-oi.” 29 Kush hab kaij g Jesus, “Nt wo si shel em-ahgi mamt ba'ich i mu'i ha'ichu wo edagi mo chum hegai mam tp haschu i thagito am ni-wehhejed, kihki, wepnag, jehj, a'al, o'oithag. Kumt mu'i ha'ichu wo nako mamt wo ahgahi g s-kehg ha'ichu ahgaj g Jiosh ab ni-amjed k am haha wo ai g pi ha huhugetham s-hehgig. 31 Kut wabshaba hegam mo wabsh hejel chum si e ha'ichuchuth hahawa pi d wo ha'ichuk. T hegam mo hejel pi e ha'ichuchuth am hahawa d wo si ha'ichuk.” 32 Kutsh gm hu i oi g wohg Jerusalem wui. Sh gm hu ha ba'ich him g Jesus. Kush si e totothsith g chuhchaij. Kush am ha'i ep ha wehm hihimath ch hab wa'ap e totothsith. Tsh g Jesus am i ha hemapai hegam gamai gohk k am ep ha ahgi mat haschu has wo e juh am tahgio, 33 ash hab kaij, “Neh'e, gm att hu wo hihi Jerusalem wui. Kut an wo ni-bei g u'ugchu papal ch chehanig em-mashchamtham k ab wo ni-mohto'i g chu'ichig ahni Jiosh si Kehsha no pi s-ni-mu'amk ch im hu hab hahawa ep wo ni-thagito ha wui g gawul mahs hemajkam. 34 Kut hegam wo nahnko ni-ahgath ch ab ni-ab wo siswuath ch ep wo ni-gewittan k haha wo ni-mua. Kut d wo waik i tashk, nt ep wo ni-chegito.” Neh, bash kaij g Jesus. 35 Tsh amjed ab wui thatha g James ch John k hab kaij, “T-mashchamtham, am ach ha'ichu chum s-m-kakkeimk mapt am hab wo t-juni.” 36 Sh hab kaij g Jesus, “Shahchu am hab elith mant am hab wo em-juni?” 37 Sh hab kaij, “Pt hig am wo i t-chuhcha matt ahchim gohk am m-oithch d wo haha'ichuk mapt hekith am wo i himch g e-kownaltalig.” 38 Kush hab kaij g Jesus, “Pi am sha'i ap mahch mam haschu ab ni-tahni. Wehpeg ant ab wo nako g ge'e sho'igthag. Kut hegam mat am ni-oithch d wo si haha'ichuk hab wa'ap wo e juh.” 39 Sh hab kaij, “Pegih, tt wo t-nako.” Kush g Jesus hab kaij, “Pegih, woho am t wo nako hegai mant ahni wo nako. 40 K wabshaba pi ab hu ni-ab manis ahni am wo i ha chuhcha mat hedai am ni-oithch d wo haha'ichuk. Hegam at am wo i e chuhcha mat hedai i ha wehhejed am e ap'ech.” 41 Kutsh hegam ha'i babgat ab ha wui g James ch John mash hab masma ab hejel e ha'ichuchuth. 42 Tsh g Jesus ab hahawa wehs i ha hemapath k hab kaij ab ha wui, “S-mahch am mo g ha-maliomig s-gewkam ha'ichu ha chehani g e-pionag ch g ha wanimedtham am ha himchuthahim. 43 T wabshaba pi hab masma hab wo sha'i chum mahsk am em-shahgith ahpim mam ab ni-hiwig. Mt wabsh si s-hemajim am wo i ha wehmtath g e-wehm wohochuththam hab sha masma mam d wabsh ha-pionag mamtp wo tatchuath mamt wo ha wanimedath. 45 Ahni ani hab wa masma si s-hemajim i em-wehmt ch pi ab hu ni-ha'ichuchuth em-thahm, chum anis d Jiosh si Kehsha. Ab o em-wui him g s-ko'ok namkithadag heg hekaj pi ap em-chu'ichig. Nt wabshaba ahni em-wehhejed wo nako mamt wo e wupul'o.” Neh, bash kaij g Jesus. 46 Kutsh am hihi ihtham Jesus k gm hu thatha Jerico t am. Sh am sha'i he'es. Tsh am ep i chum hihi hasko. Kutsh sha'i si mu'i hemajkam an ep i ha oithahi. Sh an hema thaha wohg hugith an ch ha limoshan nash pi d pi neatham. Ith amsh hab a'aga Bar Timaius nash pi d alithaj g Timaius. 47 Sh am hihim ihtham Jesus. Kutsh am i s-mai ihtha mash g Jesus an him k am ha hekaj si s-kaitham hab kaij, “Ab g si i s-ni-ho'ige'ith, Jesus, mapsh d t-kownaligbad David amjedkam.” 48 Kush mu'ijj s-keh'ith ch hab chum ahg matsh am wabsh wo i pi shahmunik. Tsh oi wabsh ba'ich i e gewkai, “Ab g si i s-ni-ho'ige'ith, ahpi Davidbad amjedkam.” 49 Kutsh am i kekiwua g Jesus k hab kaij, “Ab g wo i waith!” Kumtsh am ha hekaj wai hab ahgch, “S-ap g e tahtam k i wuhshani. Ab o m-waith.” 50 Kutsh heg am ha hekaj si wuahawua g e-lihwa k am si tha'iwuni k ab i him k am jiwia wui. 51 Sh hab kaij g Jesus, “Shahchu ant hab wo m-juni?” Sh hab kaij g pi neatham, “Ni-kownalig, ab g i ni-thoajith mant wo nent.” 52 Kush hab kaij g Jesus, “S-ap g e tahtk k hihm. Thoa apt nap pi ab ni-hiwig.” Tsh am ha hekaj wabsh i ap'et k nei ha'ichu k gm hu hahawa i oi g Jesus.

Mark 11

1 Sh amjed ab hihim ihtham Jesus Jerusalem wui. Tsh am hebai i cheka. Kutsh am ai g Olive U'us Kawulk. K heg mia gohk al kihhimag ch hab chehgig Bethphage ch Bethany. 2 Tsh g Jesus gohk hab ha ah g e-chuhchai, “Am g wo hihim k ga hu wo thatha kihhim t am. Kut am hema wo wulshpik g wechij wuhlu mo koi sha'i e chechshshaj. Mt gam wo wul'o. 3 T hema ab wo em-kakke mams has wo juh. Kumt hab wo ah mani ahni d em-mashchamtham ch tatchua ch am haha wo thagito mamt uhpam wo u'apa. Kut ab wabsh wo i thagito mamt ab wo i wanim.” 4 Neh, tsh wa woho gm hu hihi ihtham gohk k am cheh mo am wulshpi g wuhlu k am wul'o. 5 Kush eda inhab ha'i gegok g o'othham ch ha neith mash am wupul'ok. Sh hema hab kaij, “Shahchu am ahgch am wupul'ok g wuhlu?” 6 Sh am i ha ahgith mash has kaij g Jesus. Kutsh heg hekaj ha hiwigi matsh am wo bei. 7 Kutsh am i wanimed k gd hu u'apa Jesus wui k an toa g e-liliwa an ab. Tsh an thahiwua g Jesus. 8 Sh mu'i hemajkam an ha wehgaj ch am i ha tahtdahim g e-liliwa wohg ch ed ch ha'ijj g wechij u'us i'ibhonig an hikkumiak ch am to'ahim heg oithch wohg mash am him g Jesus. 9 Kush hegam mash an wehgaj hihim si s-kaitham hab kaij: “T-tho'ibiakam! Jiosh atki ia i m-wuhshath k ab si s-m-ho'ige'ith. 10 Kupt ep wo i himch kownaltaligaj g t-kownaligbad David k ab wo i s-t-ho'ige'ithath. T wo t-tho'ibia g Jiosh.” 11 Kutsh gm hu thatha Jerusalem t am. Tsh am i hud g Jesus k am i wah mo am kehk g ge'e cheopi k an i neithahi mo an haschu has e wua. Sh am i hudunihim. Tsh hekaj am i wuwhag k gm hu hihi Bethany wui matsh am wo thadkath. 12 Sh am ba'ich d i tash mash ab uhpam hihim Jerusalem wui. Tsh bihugim g Jesus. 13 Kush am hu hema kehk g suhna uhs. Tsh ab wui hihi nash pi s-hahhagag ch ab wo chum bahithagk, chum as pi koi e ai mat wo bai. Kush oi wa pi ab hu ha'ichu sha'i ihbthag. 14 Kush hekaj hab kaij, “Pi at hedai ab hu ep wo huh g bahithag.” Kush kah ihtham. 15 Kud gd hu thatha Jerusalem t am k am i wahp mo am kehk g ge'e cheopi. D eda am ha'i thadha ch am ha'ichu gagda ch ha'ichu ha nolawt ge'e cheopi miabithch. D g Jesus gm hu si ha shahmuth k gm hu a'ai kuhkpal si ha shul g ha-mimsa hegam mo g lial kammialt ch g ha thathaikud hegam mo g hohhi ha gagda. 16 D wenog g hemajkam ha'ichu gahi mohto mo am kehk g ge'e cheopi. Kud g Jesus am ha shohbith 17 k am hahawa ha mashcham g hemajkam ch hab kaij, “Bo chu'ig an Jiosh o'ohana ed mo hab kaij g Jiosh: Ahni o d ni-wehhejedkam ihtha ge'e cheopi. Kut ith wui ab wo hihhimath g wehs nahnko mahs hemajkam mat ab wo ni-ihmath. Neh, bo kaij g Jiosh. Kumt eda an be k am eda hab wabsh wua g hejel e-tatchui ch chum hems ha'ichu s-a'agi ha ehsith ab ha wui ha'ichu gagdach.” 18 D mu'ijj g hemajkam ab si has elith g mashchamigaj. Kudki heg hekaj s-ehbith g u'ugchu papal ch chehanig t-mashchamtham ch am i a'aga mas has masma wo mua. 19 Kud am i hud. D am hahawa i wuwha kihhim t amjed hegam Jesus. 20 Ba'ich mahsi, tsh am ep bihbij amai mash am kehk g suhna k nei matki gaksh. 21 Sh g Peter hab kaij, “Neh, t-mashchamtham, hegai suhna mapt ab si has ah atki gaksh.” 22 Sh hab kaij g Jesus, “Ab g wabsh wo hiwgath g Jiosh. 23 Kut wabsh chum haschu hab wo em-juni. Mtp hems wo cheha ihtha tho'ag mat gm hu wo e wua ge shuhthagi ch ed. Kut wa woho hab wo e juh mamtp ab wo hiwgath mat hab wo e juh. 24 Ab g wabsh wo s-wohochuthath mat g Jiosh am hab wo em-juni hegai mamt haschu ab wo i tai. Kut wa woho hab wo em-juni. 25 Mt wabshaba wehpeg wo pi chegito g pi ap ha-chu'ichig hegam matp hedai ab em-wui hab juh g pi ap'ekam. T g Jiosh em-ohg ab haha wo s-em-ho'ige'ith k gm hu hab wo i juh g pi ap em-chu'ichig. [ 26 Mtp wabshaba pi wo sha pi chegito g pi ap ha-chu'ichig, t g Jiosh g em-chu'ichig hab wa'ap pi gm hu hab wo i juh.]” 27 Kud gm hu ep thatha Jerusalem t am k gd hu i wahp mo am kehk g ge'e cheopi. Kutsh g u'ugchu papal ch chehanig t-mashchamtham ch ge'eged am thatha wui g Jesus 28 k ab kakke, “Thohp amjed hab chum e elith map u'ukch g e-gewkthag ch am hab ha'ichu wua? Oi g am t-ahgith.” 29 Kush oi wa hab kaij g Jesus, “Pegih, nt ahni wehpeg ab epai wo ha'ichu em-kakke. Mt am wo ni-ahgi. Nt am epai wo em-ahgi g em-kakkei. 30 Am g hig wo ni-ahgith mams hedai amjed hab elith mo wa g Johnbad ab u'ukch g e-gewkthag ch ha pahl wapkonahim. No ab Jiosh amjed aha no ab o'othham amjed?” 31 Kush ihtham am wabsh chum hejel si a'aga ch hab kaij, “Shahtt hig wo chei? T wo s-t-keh'ith k ab wo t-kakke matt haschu ahgk pi ab hu wohoch g Johnbad mattp hab wo chei mo ab Jiosh amjed u'ukch g gewkthag. 32 T g hemajkam has wo t-juh mattp hab wo chei mo ab wabsh o'othham amjed u'ukch. Mu'ijj o hab elith mo d Jiosh ha'ichu i tashogiththam.” 33 Neh, bash kaij ch ab hahawa uhpam i e nohnogi Jesus wui k hab kaij, “Pi ach sha'i mahch mas hedai amjed ab u'ukch g e-gewkthag.” Kush g Jesus hab epai kaij ab ha wui, “Pegih, nt ahni hab wa'ap pi wo sha'i em-ahgi mani hedai amjed ab u'ukch g ni-gewkthag ch hab wua wehs ihtha.”

Mark 12

1 Neh, bash kaij g Jesus ch am hahawa ha ahgith ihtha wepogitha ahga hab kaijch, “Matp hems hema hab i e ah mat am hig wo ge ei g uhdwis. T g piongaj an ge kolhaidath k heg ep nahto mat hekaj am wo i wuhshath g wadgaj k am i kei g uhgk kih mat heg amjed wo nuhkuthath g eshaj. T gm hu hasko chihpia g enigakam k ha'i ha hiwigi g e-oithag. 2 “T am i e ai mat g uhdwis wo bai. Kut am hema ahgi g e-pionag mat am wo him k ab wo bei hegai wadgaj mo ab d i chum wuikamaj g enigakam. 3 Kut am him k am jiwia. T wabshaba hegam mo am nuhkuth g oithag am wabsh be k am gewittan k hab ah mat gm hu wo hih. 4 “K am hu i hebai, t am hema ep cheha e-pionag mat am wo hih. T am him k am jiwia. Kut am hab wa'i ep juh mat hab juh g wehpegkam k s-ko'okam juh g mo'oj k s-ko'okam has ah. 5 “T g enigakam am hema ep cheha g e-pionag mat am wo hih. T g nuhkuththam hab wa'ap juh k mua. T g enigakam am ha'i ep ha cheha mat am wo hihi. T g nuhkuththam hab wa'ap s-ko'okam ha juh k ha'i ha koktha. 6 “K am hema wi'is ch d alithaj. T heg am cheha mat am wo hih hab elithch mat ab has wo i el. 7 “T wabshaba ihtham oithag nuhkuththam am wabsh e wehm neneok k hab kaij, ‘Ith o d ihtha mat ab wui wo i wuhsh g oithag. Tt hig wo mua. T d haha wo t-enigak.’ 8 Kut hab juh k mu'a k gm hu tha'ich ab kolhai amjed. 9 “Neh, m ant wo i em-tashogi mat has wo e juh g oithag enigakam. Ab at wo i him k wo ha koktha hegam mat am chum ha nuhkuthach g e-oithag k am ha'i ep wo ha nuhkuthach. 10 Pi amki sha'i amichuth mo has d ahga ihtha wepogitha ahga mo an hab chu'ig Jiosh o'ohana ed: Kihttham at wo hema s-ohhoth g hothai. T wabshaba ith d wo si s-has ha'ichu hothaik am ha-kihta wehhejed. 11 Ith o hab d ahga mat si s-kehg ha'ichu hab wo juh g Jiosh.” 12 Neh, bash wabsh ha ahg hegam t-u'ugchuga g Jesus nash pi chum s-ohhothamk. Kush heg hekaj an chum s-behimk mat wo kuh. K wabshaba mu'ijj g hemajkam ab si has elith g Jesus. Kush s-ha gihug ch am wabsh i thagito k gm hu hihi hasko. 13 Kumtsh am hahawa ha'i hab ha ah g Palasi ch Herod pionag matsh am wo hihi Jesus wui k wo ne'owin k wo ha'ichu cheh mat heg ab wo abch. 14 Kutsh am thatha wui k hab kaij, “Ha mashchamtham, s-mahch ach map s-ap d o'othham ch wabsh chum hedai ha mashcham g Jiosh himthag, chum as has wo chei hedai i. Pegih, k am wo t-ahgi maps has elith g ge'e kownal lial kowlanta. No hig t-hiwgith g t-chehanig ahchim Tutuligo matt wo ha namkith aha no pi t-hiwgith?” 15 Sh wabshaba g Jesus am wa s-ha amichuth mo g pi ap'ekam hab elith ch hab ha ahg, “Ahpim, s-chu i'attomkam am wabsh chum heki s-ni-himchuthamk. Ab g wo hema ni-chehgith hegai lial mam hekaj ha namkith.” 16 Kumtsh ab hema chehgi. Kush hab ha ahg, “Am g hig wo ni-ahgith mo hedai wuhiosha ch hedai chehgig ab o'ohadag ith ab lial” Sh hab kaij ihtham, “Hegai mo d uhgchu t-kownalig.” 17 Kush hab hahawa ep kaij g Jesus ab ha wui, “Pegih, ab g wo i thagito kownal wui hegai matp d enigaj k am epai wo i thagito Jiosh wui mo haschu d epai enigaj.” Kutsh wehsijj si has i el g ne'okij. 18 Kutsh am ha'i thatha Jesus wui hegam mash d Sajusi. K ihtham o pi d ha-wohochuthadag mat g muhki ab uhpam ep wo i wuhsh muhkig t amjed. 19 Kush hab kaij ihtham, “Ha mashchamtham, Mosesbad atki an o'oha hegai chehanigaj g Jiosh mo hab chu'ig: Matsh g am oithchkam wehngaj hegai mat wo muh pi ha a'alithagkch hemho wo wa bei g hohnigaj g e-wehnagbad. Tsh g ha-a'aliga hab masma wo e kuint mat d wo a'alithajk hegai mat muh. 20 Pegih, k am hu hebai wewa'ak d e-wepngam. Kut g si ge'echu hema hohnt g uwi k pi ab hu ha a'aligat k muh. 21 Kut g am oithchkam nawojij hahawa ep bei g hohnigaj k hab wa'ap pi ab hu ha a'alitht k hab wa'ap muh. Kut ihtha g oithchkam hab wa'ap hohnt k hab wa'ap muh pi ab hu ha a'alithtk. 22 Kut hegam ha'i hab wa'ap wehsijj i hohntahim k hab wa'ap koi pi ab hu ha a'alithtk. K am hu i hebai, t haha wabsh muh hab wa ehp ihtha uwi. 23 Pegih, am g hig t-ahgith mas hedai d wo hohnigkath ihtha matp ep wo e chegito g ko'i no pi wehsijj hohnigkahim.” 24 Kush hab kaij g Jesus ab ha wui, “Pi am ap chegito nam pi pi sha'i mahch g Jiosh ha'ichu ahga ch ep pi sha'i mahch mo he'es i gewkthag. 25 Woho at ab uhpam wo i ha wuwhas g ko'i. T wabshaba hahawa pi wo hohontath hab masma mo g anghil pi hohont. 26 Mosesbad atki an o'oha mash wa g Jiosh am e chehgith wui heg hekaj sha'i mash meihith ch pi meitto. Sh hab kaij g Jiosh: Ahni ani d ha-Jioshga hegam Abraham ch Isaac k ch Jacob. Neh, ith o hab kaij g Jiosh chum as heki hu koi, no pi am e wehm ha nuhkuth ch ab uhpam wo i ha wuwhas muhkig amjed. 27 Pi amt wabsh woho wo i huhug am i ko'ok matp g Jiosh d em-Jioshga. K heg hekaj pi sha'i woho hegai mam ahpim hab chum elith.” Neh, bash kaij g Jesus. 28 Kush am hema kehk g chehanig ha mashchamtham ch am ha kaiham. K eda tasho mo s-ap hab ha ahg g Jesus. Neh, tsh hab i e ah mat ab hig epai ha'ichu wo kakke, ash hab kaij, “Shahchu o d si ba'iwechkim ge'e chehanigaj g Jiosh?” 29 Kush hab kaij g Jesus, “Si ge'e chehanig o d ihtha: Ab g wo si tatchuath g e-kownalig Jiosh wehs e-ihbthagkaj ch ith am wo chehgithch wehs e-thoakagkaj ch wehs e-chegitoikaj ch wehs e-gewkthagkaj. Ith g ab wo si kaihamath ahpim mam d chum hemajkamgaj no pi pi hema ep d em-Jioshga. Neh, ith o d si ge'e chehanig. 31 K ith hab wa'ap d si ge'e chehanig ch hab chu'ig: Ab g wo si ha tatchuath g hemajkam hab masma mam has i masma ab hejel si e tatchua. Ihtham gohk o d si ge'e chehanig.” 32 Kush hab kaij ihtha, “S-ap ap hab kaij, t-mashchamtham. M o wa woho mo g Jiosh si s-wohom d Jiosh ch pi an hu hema ehp. 33 Kutt hemho wa ab wo si tatchuath g Jiosh wehs t-ihbthagkaj ch ith am wo chehgithch wehs t-chegitoikaj ch wehs t-gewkthagkaj ch ab wo si ha tatchuath g hemajkam mach has masma ab hejel si t-tatchua. Ihtham gohk o ba'ich d i si ha'ichu mo hegai chehanig matt g ha'ichu t-shoiga wo mu'a k am wo iagchul Jiosh wui k ha'ichu si t-eniga wo i thagito am Jiosh wui.” 34 Kutsh am i kah g Jesus mo s-ap hab kaij k hab epai ahg, “Pi apki sha'i mehk ab Jiosh kownaltalig amjed.” Kutsh amjed hahawa pi hedai sha'i nako mas ab hu ha'ichu ep wo kakke. 35 Kush am ha mashcham g Jesus ge'e cheopi ch ed ch hab kaij. “Am g wo oithahim mas hedai d wo Jiosh si Kehshak. Chehanig em-mashchamtham o em-mashcham matsh heg d wo amjedkamk hegai t-kownaligbad mash hab chehgig David. 36 Kush wa eda g Davidbad hab a'aga ‘ni-kownalig’ ch hab kaij g gewkthajkaj g Hekia S-ap'ekam Gewkthag: Bo Kaij g Jiosh ab ni-kownalig wui, In g thahiwua s-apkojed ni-hugith an. Kunt wo ha gewito g m-obga mat ab wabsh wo m-wechok. 37 Neh, namt hig s-ap wo ah mat has masma d wo Davidbad amjedkamk ihtha mash d kownaligaj?” Sh mu'ijj ab kaiham ch si s-ap e tahtk ch kah mo haschu ha mashcham. 38 Sh hab kaij g Jesus, “Hegam mo d chehanig em-mashchamtham o am si s-apko thadhaiwup mam am e hehemapath ch si s-kehg e enigadath ch an oiopo no pi si tatchua mamt ab wo si has ha elithath. S-e g wo nen'oithath mamt pi hab wo masmak. 40 Chum as si chew e ho'ige'ithahun am em-tahgio ch eda ha'ichu s-a'agi ha wohppo'ith hegam mo d hehe'ejel wihpkam. T g Jiosh ba'ich i s-ko'okam wo ha namkith heg hekaj pi ap ha-chu'ichig no pi wabsh pehegia e ho'ige'ithahun.” 41 Kutsh am thahiwua g Jesus miabithch g ge'e cheopi. K ab e to'aw hegai lial mo hekaj e nuhkuth g cheopi. Sh g Jesus am ha neith hegam mo am to'aw. Kush g s-kakais sha'i si mumu'i am to'aw. 42 Tsh am hema jiwia g hejel wi'ikam oks k am hi wa al toa g gohk s-wepegchu. 43 Sh g Jesus am ha ahgith g e-chuhchai, “Neh'e, hegam mo ha'ichu s-edgith o hi wa ba'ich i mumu'i am to'aw. T wabshaba ihtha al oks ba'ich i si ha'ichu hab juh nat pi am al toa wehs hegai mo haschu al i edgith.”

Mark 13

1 Kutsh gm hu hahawa i wuwha ihtham Jesus ab amjed g ge'e cheopi. Kush ihtham hema hab kaij, “Neh'e, t-mashchamtham, sho'o wa'i si ge'eged hohothaikaj in kihtas g ge'e cheopi ch si s-kehg hab mahs.” 2 Kush hab kaij g Jesus, “Heu'u, nt wabshaba si shel wo em-ahgi mo e aihim mat wehs wo i e shul ihtha.” 3 Tsh amjed gm hu hejelko hihi wehmaj g Jesus k ab i chehchsh Olive U'us Kawulk t ab k ab thadhaiwua ge'e cheopi wui. Kutsh ihtham Peter ch James ch John ch Andrew ab i hihi Jesus wui k hab ahg, 4 “Am g hig t-ahgith mas hekith am hab wo i e juh hegai map am t-ahgith. Kut haschu d wo chehgithak matt heg ab wo s-mahchk moki e aihim.” 5 Kush am ha ahgith g Jesus, “Mt wo si s-e nen'oithath mat pi hedai wo em-iattogi. 6 Mu'i at an wo i wuwha a'ahithag oitham k ni-wepo wo e chehcheg hab kaijch mo d Jiosh si Kehsha. Kut mu'ijj ab wo s-ha wohoch. 7 T g nahnko mahs hemajkam ch jejewed ab a'ai wo i e checheggia. Mt wabshaba pi wo e totoths. Hemho at hab wo wa e juh hab masma. K wabshaba pi hab d ahga mat e ai mat wo kuhgit. An at mu'ikpa wo u'ugij g jewed. T g bihugig an ep wo gei mu'ikpa. Ith at d wabsh wo shohshonajk g sho'igthag nat pi ba'ich wo i ge'etha. 9 “Kumt wo s-e nen'eithath namt pi wo em-u'u k wo em-lothait k am ep wo em-u'apa kokownal ha wui heg hekaj mam ab ni-hiwig. Mt wabshaba am wabsh wo ha ahgi g ha'ichu ni-ahga. 10 T an wehsko wo i e ahgahi ihtha s-kehg ha'ichu ahgaj g Jiosh mat koi wo kuhgit g jewed. 11 Pi g has wo sha'i e tahkkath mams has wo chei mat hekith wo em-u'apa k wo em-lothai. Hekia S-ap'ekam Gewkthag at ab wo i em-ahgi mamt has wo chei. 12 “Haha'ichu at wo em-koktha. Kut ab ha wui wo em-gagda chum hems g em-wepnag o g em-jehj o g em-a'aliga. 13 Mu'i hemajkam at wo s-em-keh'ithath nam pi ab ni-hiwig. Kumt wo sha e nakog k wo gahi wuwha g e-sho'igthag. T g Jiosh ab wo i em-wahpki e-kihthag ed.” 14 Kush hab ep kaij g Jesus. “Am g wo amichuth mamt haschu in wo ne'okchul Hegai kelibad Jiosh ha'ichu i tashogiththam Daniel at an o'oha mat g em-obga am wo i kei g s-uam ha'ichu gd hu si eda g ge'e cheopi. Kut hemho wa am haha wo ahhio thohtha'ag wui hegam mat ia wo ha'ichugk Judea jewed ch ed. 15 Kut pi hedai am hu wo sha'i chum i wah e-kih ed k am wo ha'ichu ui, chum as hems imhab wo wa'i oimmedath e-kih wehgaj o am wo chikpanath oithag ch ed. 17 S-ta at ehbitham wo mahsk am ha wehhejed hegam mat wo chu'uchum mahmadk ch hegam mat wabsh wo kia wo'ok g ali. 18 “Mt ab wo tahnith g Jiosh mat pi eda hab wo e juh ihtha s-hehpich'ed. 19 Ba'ich at d wo i si ge'e sho'igthagk mo pi hekith g hemajkam sha'i neith ch pi hekith hab masma ep wo nei. 20 Pi at hedai wo e nako mas am gahi wo wuhsh matp tash wo hih. T g Jiosh heg hekaj wo i shopolkai am ha wehhejed g e-hemajkamga. 21 “Pi g wo sha'i ha wohochuth matp hema hab wo sha chei mo am hebai ha'ichug g Jiosh si Kehsha. 22 Mu'i at in wo i wuwhag k hab wo chei mo d ni-ahni, Jiosh si Kehsha, o d Jiosh ha'ichu i tashogiththam k am hab wo wuath g si s-hasig ha'ichu mat hekaj wo i chum ha wanchshul g Jiosh hemajkamga matp wo e nako. 23 Ni wabshaba am heki hu em-ahgith ihtha mamt heg hekaj wo s-e nen'eithath.” 24 Sh hab ep kaij, “T am wabsh wo i chum kuhgit hegai jewed shuhthgim sho'igthag. Kut g tash tonlig wo huhug. T g mashath ep pi wo ha ton. 25 T g thahm kahchim wo ugij. T g huhu'u wo i shul. 26 Kunt ab hahawa si s-masma wo i hud chewagi ch ed ab Jiosh kihthag amjed ahni Jiosh si Kehsha. T am wo e maskogi g ni-gewkthag. 27 Kunt wo ha cheha g ni-anghiliga mat ab wehs wo i ha hemapai hegam mant am i ha chuhcha mat wo e tho'ibia. T am wo hihi imhab si'al tahgio ch imhab juhpin tahgio ch imhab huduni tahgio k ch imhab wakolim tahgio k wo i ha hemapai. 28 “Nt wo ha'ichu em-mashcha heg hekaj suhna uhs. Mt wo s-mahchk mo g toniabkam e aihim mamt wo nei mat ab wo i i'iwgi. 29 Pegih, mt hab wa'ap wo s-mahchk mo e aihim mat wehs wo kuhgit mamt wo nei mat hab wo e juh hegai mani em-ahgith. 30 Nt wo si shel em-ahgi mat d wabsh wo kia thothakamk hegam mat wo nei ihtha mani em-ahgith mat hekith wehs wo kuhgit. 31 Neh, wehs at gm hu hab wo i e juh ihtha Jiosh nahtoi mam in neith. T wabshaba g ni-ne'oki pi hekith gm hu hab wo i e juh.” 32 Kush hab ep kaij, “Heg o wa'i s-mahch ni-ohg Jiosh mant hekith ep wo jiwia. Pi o hedai ep s-mahch, chum hems g anghil nih ahni mani d hi wa chum alithaj. 33 Kumt wo si s-e nen'eithath ch ab wo neithachugath nam pi pi mahch mas hekith wo i k ihtha. 34 K hab sha masma am em-wehhejed matp hems hema wo ha hiwigi g e-kihthag g e-pionag k wo ha cheha mat has wo masmak hehemako k g kihjeg nuhkuththam ep wo cheha mat wo si s-e nen'eithath k gm hu hahawa mehk jewed wui wo hih. T ihtham chum hekith wo s-e nen'eithath no pi pi mahch mas hekith ep wo jiwia. 35 Pegih, mt ahpim hab wa masma wo s-e nen'eithath. Pi o ta machima am em-wehhejed mas hebai hab wo i e juh g tash an a'ai jejewed thahm mant hekith wo i uhpam jiwia. 37 Kuni wehs hab s-ha ahgithamk mani haschu hab em-ahg mat hab wa'ap wo s-e nen'eithath.”

Mark 14

1 K eda gohk tash am wi'is matt wo wuhshath g t-shohshon ha-tho'ibiathag. Kush ihtham u'ugchu papal ch chehanig t-mashchamtham am chum e nakog mas has hu'i masma s-a'agim wo bei g Jesus k wo mua, 2 ash am wabsh a'ai e ahgith, “Hi wa pi am hu heg eda mat ia wo e hemapathch g hemajkam ith hekaj piast. T wo am hu e babgachuth k wo t-cheggia.” 3 Tsh am hu hebai am thatha hegam Jesus Bethany t am. K am hema d kihkam mo hab chehgig Simon ch wa chum mumku heg hekaj mo g chuhkugaj wabsh muhkhim. Ith atsh ab i ha waith k ha gegos. Sh am thadhak ch e gegosith. Tsh ab haha wabsh hema i wah g uwi g si s-namkig s-ap uhw shuhthagi wa'igchugch am al s-toa hothai ha'a ch ed. K hab e a'aga ‘spikenard’ ihtha shuhthagi. Kutsh am si hai g al ha'a k an wehs iawua Jesus mo'o thahm. 4 Kutsh ha'i babgat am i neithok matsh has e juh k s-ju'ujpij e wehm neneok ch ash hab kaij, “T wabsh heki e wua ihtha s-namkig ha'ichu. 5 Eda atp hu'i chum waik siant pihsh wo nam sha e gagdak. T heg wo e hekaj ha wehhejed g sho'igkam.” Neh, bash kaij ch si s-keh'ith g uwi. 6 Kush oi wa hab ha ahg g Jesus, “Pi g am wo sha'i keh'ith ihtha uwi. Si at s-kehg ha'ichu hab juh am ni-wehhejed. 7 Chum o hekith ia em-shahgith g sho'igkam. Kumt wabsh chum hekith wo i ha wehmt. Kunt ahni hi pi tash ia hu wo em-shahgithk. 8 T ihtha uwi hab juh mat haschu i e nako mat am heki hu s-ap juh ni-chuhkug g ni-muhkig wehhejed. 9 Nt wo si shel em-ahgi mat am wo e ahgahith mat haschu has ni-juni mat hebai wo i e ahgahith g s-kehg ha'ichu ahgaj g Jiosh.” 10 Kutsh am ha hekaj ha thagito g Judas Iscariot k gm hu hih u'ugchu papal ha wui hab ahgk matsh hegam ha wui wo gagda g Jesus. 11 Sh am si s-hohho'ith ch kah ihtham mash has i kaij, ash ab si ahgith matsh wo namkith. Kutsh am hahawa si i e nako g Judas matsh hebai wo s-ap'ek. Kutsh ab ha wui wo gagda. 12 T am hahawa s-ap i e ai hegai t-shohshonbad ha-tho'ibiathag piast. K ith eda pi e ko'a hegai pahn mo jewajithas. K d wehpeg tash mat eda wo e koktha g kahwal mahmad. Sh g Jesus chuhchai ab wui hab kaij, “Bahp hab elith matt am wo huh g ha-tho'ibiathag gegosig?” 13 Kutsh am hahawa gohk hab ha ah, “Am amt wo hihi Jerusalem wui. T ab hema wo himath g cheoj ch wo wa'igchugath ab ha'a t ab. 14 Kumt am wo i oi. T am hu hebai wo him k am wo i wah hema kih ed. Kumt hab wo chei ab kihkam wui, ‘Neh, s-mahchimk o g t-mashchamtham mas an hebai i ha wi'is matt wo wuhshath g t-shohshon ha-tho'ibiathag.’ 15 Kut am wo hema em-chehgi g kih. T ith gn hu ha-kih thahm hab wo chu'igk ch wo ge'ejk ch am wo apchuthask. Kumt an ha'ab wo i ap'ech g t-gegosig.” 16 Kutsh wa woho am hihi ihtham gohk k gd hu thatha kihhim ch ed. Tsh wa woho s-ap am hab e juh mash has i ha ahg. Kutsh am i ap'ech g gegosig. 17 Tsh am i hud. Tsh am hahawa thatha hegam Jesus k am hu thadhaiwua k e gegosith. 18 Sh hab haha wabsh kaij g Jesus, “M ant wo si shel em-ahgi mat oi am hab wo e juh mamt hema wo ni-gagda ahpim mam ab si ni-wecho e mashcham.” 19 Kutsh wehsijj pi ap e taht k gn hu hab i che'iatahi, “Ih, hi wa pi ahni.” 20 Kush hab kaij g Jesus, “Heg at hab wo juh mat hedai am ni-wehm wo wakch g chemait hithod ch ed. 21 Bant masma wo ni-muhkith mo has masma heki hu o'ohanas Jiosh o'ohana ed mat g si Kehshaj wo e muhkith. T wabshaba wo si s-ko'okam e namkith hegai mat wo ni-gagda. Ba'ich at wo i chum s-ap'ek heg wehhejed mat hems wabsh pi wo chum mahsi.” 22 Sh am wabsh kia e gegosith. Tsh g Jesus am bei g chemait k ab ho'ige'el g Jiosh k am hahawa i hahain k an i ha mah k hab kaij, “Oi g wo huhgi ihtha. Tho ni-honshpadag.” 23 Tsh am hahawa bei g tahsa k ab ep ho'ige'el g Jiosh k ab ha mah. Kutsh wehsijj ab ih. 24 Kush hab ha ahg, “Tho ni-eh'ed ihtha nawait. Ith ani hab ahgch hab kaij mant wo ni-muhkith am em-wehhejed. T g ni-eh'ed wo e iawua. T g Jiosh heg hekaj am hab wo juh hegai mo wa hab kaij matsh hab wo em-juni. 25 Ia o i s-ap'e. Kunt pi hekith em-wehm hab ep wo juh ihtha k wabshaba em-wehm wo si s-hehgigk Jiosh kihthag ed.” 26 Neh, kutsh am hahawa kuhgit am hema ahgk g mihshmetha ne'i k am i wuwhag k gm hu hihi Olive U'us Kawulk wui. 27 Kush hab ha ahg g Jesus, “An o o'ohanas mo hab kaij g Jiosh: Nt wo hiwigi mamt wo mua g kahwal ha nuhkuththam. T g kahwal wabsh a'ai wo wohp. Neh, ith o d ha'ichu wepogitha ahga ch hab d ahga mamt wehsijj wabsh wo ni-thagito k gm hu a'ai wo wohp mant hekith wo ni-muhkith. 28 Kunt wabshaba ep wo ni-chegito k gm hu wo hih Galilee wui. Mt am ha'ab wo ni-nei.” 29 Kush g Peter hab kaij, “Ahni ant hi pi hekith wo sha'i m-thagito, chum as wehsijj wo m-thagito ihtham.” 30 Sh hab kaij g Jesus ab wui, “Nt wo si shel m-ahgi mat koi gokko wo kuhu g chuchul ith i chuhug ab, kupt eda heki hu waikko hab wo wa'i chei map pi sha'i ni-mahch.” 31 Kutsh am wa si e gewkai g Peter, ash hab si kaij, “Pi ant hekith hab wo sha'i chei manis pi m-mahch, chum anis wo ni-muhkith m-wehm.” Kush wehsijj hab wa'ap kaij. 32 Kutsh gd hu thatha heg ab oithag mo hab e a'aga Gethsemane. Sh pi am hu ha wehmaj g Judas Iscariot. Kush hab ha ahg g Jesus, “Ia g hu wo i thadhak. Nt ahni am ba'ich wo i him k wo ni-ho'ige'ithahu.” 33 Bash kaij ch am ha u'uk g Peter ch James ch John. Tsh ihtham gm hu oi. Kush s-masma si pi ap e tahtk g Jesus ch si e kudut 34 ch hab kaij ab ha wui, “Ab at wabsh i si ni-shuhth g pi ap tahhathkam ch s-ni-mukima tahhathchuth. Ia g wabsh wo thadk ch wo ha'ichu si nenashanath.” Kutsh am thadhaiwua. 35 Tsh g Jesus gm hu hahawa him k am i gei jewedo k hab kaij ab Jiosh wui, “Ni-ohg, wehs ha'ichu o pi sha'i hasig am m-wehhejed. Pt wo e nako mapt im hu hab wo i juh hegai si s-ko'ok sho'igthag mo ab ni-wui him. Kuni eda tatchua mat ahpi g m-tatchui hab wo e juh.” 37 Tsh am hahawa uhpam ep jiwia ha wui hegam waik. Kush am kohksh. Sh hab kaij ab wui g Peter, “Simon, pi aptki sha'i e nako maps am hu i hemako ohla ab wo s-nenashank,” 38 ch ab wehs ha wui hab kaij, “Si g wo ha'ichu nenashanath ch ab wo tai g Jiosh g gewkthag mamt pi am hu wo shul pi ap'ekam ch ed. Chum am hi wa g s-ap'ekam hab elith ch eda pi e nakog.” 39 Bash kaij ch amjed gm hu hahawa ep him k heg hab kaij ab Jiosh wui matsh wehpeg 40 ch am hahawa uhpam ep jiwia ha wui. Kush ep si kohksh ch pi sha'i nenashani ch pi sha'i mahch mas has wo chei ab wui. 41 Ash d i waikkokam, tsh am ep jiwia ha wui. Kush ep si kohksh. Kush hab kaij, “Kumtki ep kohk k e uh'ulinihogith. T eda e ai mamt ni-gagda k am wo i ni-thagito ha wui g pi ap'ekam hemajkam ahni Jiosh si Kehsha. 42 Oi g wo wahpamigi. Tt wo hihi. Neh, ia at hu jiwia hegai mat ni-gagda.” 43 Sh am wabsh kia neok. Tsh am jiwia g Judas. Kush sha'i si mu'ijj am wehmaj ha'ijj g i'is-papayo uh'ukch ch ha'ijj g u'us. Ihtham atsh g u'ugchu papal ch chehanig t-mashchamtham ch ge'eged am ha cheha matsh am wo hihim k wo bei. 44 Kush eda g Judas heki hu ha ahgith ihtham mo am wehmaj matsh ab wo chintath g Jesus kahmaj ab. Tsh hab masma wo s-mahchk mat hedai an wo bei. 45 Tsh am wabsh i chum jiwia g Judas k wabsh shel i hih ab Jesus wui k hab kaij, “Ni-mashchamtham.” Neh, bash kaij ch ab chintath. 46 Tsh ab ha'i hihim k an bei g Jesus k gn hu si s-wihnam u'ukch. 47 Kutsh hema hegam chuhchaij am i wuhshath g e-ispahyo k ab si gehg g neholigaj g uhgchu pahl k an si hikuch g nahkaj. 48 Sh g Jesus hab ha ahg ihtham hemajkam, “Wehs tashkaj ani am thahiwup ch ha mashcham ge'e cheopi t am. Kumt pi an hu ni-be k wabshaba hahawa ia thatha an uh'ukch g i'is-papayo ch u'us mamt wo ni-bei. Pegih, bat wa masma an heki hu o'oha g kekelibad Jiosh ha'ichu i tashogiththam mant hab masma wo ni-behij mat g pi ap hemajkam.” Neh, bash kaij g Jesus. 50 Kutsh am hahawa wehsijj wabsh i thagito hegam chuhchaij k gm hu si a'ai wohp. 51 Sh an hema oithahim g Jesus ch d wabsh wechij o'othham ch heg wa'i sawanokaj e hobinodch. Kutsh an chum bei g shonthal. 52 Tsh am wabsh i thagito g e-sawano k gm hu si meh ab wabsh i s-thahpkch. 53 Kumtsh am i bei g Jesus heg kih wui uhgchu pahl. Kush eda am e hemapthahim g u'ugchu papal ch ge'eged ch chehanig t-mashchamtham. 54 Sh g Peter ga hu wabsh mehkjed ha oith ch am i wah kolhai ch ed. Sh am ge nahthch g shonthal. Kush am ha wehm e huhkalith g Peter. 55 Kush eda ihtham e jehnigiththam am i chum ha'ichu gahg mat ab wo abch g Jesus mat heg hekaj wo mua. 56 Mu'ijj ash ab ha'ichu chum abchuth mash pi sha'i woho ch oi wa pi sha'i e wepo ha'ichu ahg. 57 Kutsh am hahawa ha'i gegokiwua k hab kaij, 58 “Kah ach mo hab kaij. ‘Nt wo padch ihtha ge'e cheopi mat g o'othham hab juh k hema ep wo nahto waik tash ab mat pi d wo o'othham nahtoik.’ ” 59 Kush ihtham hab wa'ap pi sha'i e wepot g ha'ichu ha-ahga. 60 Kutsh g si uhgchu pahl am i kekiwua ha shahgith k ab kakke g Jesus, “Napt pi am hu has wo sha'i chei ith amjed mo haschu ab m-abchuth ihtham?” 61 Kush oi wa pi am hu has sha'i ha kaij g Jesus. Kutsh ab ep si kakke, “Nap hab e elith map ahpi d Jiosh alithag matp am t-thahm wo e kei?” 62 Kush hab kaij g Jesus, “Thani ahni. T g Jiosh am wo e chehgi mo ab si has ni-elith an s-apkojed e-hugith an ni-thahshk e-kownal thaikud ed. T ab wo i e ai mant ab wo i hud chewagi ch ed k am ep wo jiwia jewed thahm. Kumt wehsijj wo s-mai mani d Jiosh si Kehsha.” 63 Kutsh g uhgchu pahl ab si wantsh g e-eniga hab elithch mo pi ap neok k hab kaij, “Pi ach hedai ep sha'i tatchua mas am wo ah g chu'ichigaj. 64 Am am wa kah g pi kehg ne'okij. Shahm i elith?” Kush wehsijj hab kaij matsh ab moht g chu'ichig am hugkam mat hemho wa wo e muhkith. 65 Kutsh ha'ijj ab si siswuimath g Jesus. Mtsh ab hahawa si ma'ishk wuh g wuhpuij k ab si shonikkash ch hab ahg, “Am g hig t-ahgith mas hedai ab m-shonikka.” Tsh g shonthal am hahawa be k ab si s-kapnim shonikkash. 66 Sh eda g Peter am thaha kih bahsho. Kutsh am hema jiwia g uwi piongaj g uhgchu pahl. 67 Sh am thaha g Peter ch e huhkalith. Tsh ith ab si i neith k hab kaij, “Ahpi ap ep wehmaj hegai Jesus.” 68 Kutsh pi mahch k e ah g Peter hab kaijch, “Pi ani sha'i mahch ch pi amichuth maps haschu hab ahg,” neh, k gm hu ha hekaj hih mash am ha'i gegok kolhai kihjeg t ab. Kush eda kuhu g keli chuchul. 69 Tsh am ep cheh g Peter hegai ha-pionag k hab kaij am ha wui hegam mash an gegok, “Ith o d ep hema hegam Jesus.” 70 Kutsh ep pi e edagi g Peter. Kutsh sha'i ha'as, sh hegam mash an gegok hab ep kaij ab wui, “Pi g sha'i pi e edgith. Thapki woho hema hegam Jesus napki pi ahpi hab wa'ap d Galilee t am o'othham.” 71 Kutsh g Peter am ha hekaj si ha ahgi, “Pi ani sha'i mahch ihtha o'othham mam an a'aga. T g Jiosh wo si ni-jehka'ich mantp em-iattogith.” 72 Kutsh am ha hekaj gokko kuhu g keli chuchul. Tsh g Peter am wabsh si i chegito mash wa hab kaij g Jesus, “Koi at gokko wo kuhu g chuchul kupt eda heki hu waikko hab wo chei map pi sha'i ni-mahch.” Tsh wabsh woho'i pi ap e taht k s-jupij shoak.

Mark 15

1 Tsh am wabsh i chum mahsi. Tsh am ep e nam hegam u'ugchu papal ch ge'eged ch chehanig t-mashchamtham mo d e jehnigiththam k atsh am i mamche mat has hahawa ep wo e juh. Tsh am i kuhgit g ha-namki. Kutsh am si maniadath g Jesus nohnhoi k gm hu be k am u'apa heg wui mo d kownal ch hab chehgig Pilate ab abchuthch mo chum e kownalchuth. 2 Kush ihtha Pilate ab kakke g Jesus, “No wa woho mapsh hab chum e elith map d ha-kownalig ihtham Tutuligo hemajkam?” Sh hab kaij g Jesus, “Thani ahni.” 3 Sh g u'ugchu papal mu'i ha'ichu ab abchuth. Sh pi am hu has sha'i kaij g Jesus. 4 Sh g Pilate ab ep kakke, “Neh. mu'i ha'ichu o ab m-abchuth. Napt pi am hu has wo sha'i chei ab amjed?” 5 Kush ep pi am hu has sha'i ha kaij g Jesus. Tsh g Pilate si has i e taht heg hekaj. 6 K am hab e wua ahith ab ith eda gegosig mo g kownal am hema i thathagitod g lihso am ha wehhejed g hemajkam. 7 Kush eda am ha'i kuhpi g lilso matsh ha'i ha koktha am i chum wushshathch g kownal. Sh hema hab chehgig ihtham Barabbas. 8 Kutsh g hemajkam ab i kakke g Pilate matsh am hab hig wo ha juni hegai mash chum hekith am hab ha wuijith. 9 Sh g Pilate ab ha kakke, “Pegih, nam hab elith mant ith am wo i thagito am em-wehhejed mash d em-kownalig?” nash pi chum s-thagitoimk g Jesus 10 ch hab ha elith mo d wa'i ihtham u'ugchu papal ch s-hehgamk ch s-mu'amk. 11 Kutsh wabshaba g u'ugchu papal am i ha cheha g hemajkam matsh hab wo chei matsh g Barabbas wo e thagito. Kutsh wa woho am hab e juh. 12 Kush hab ep kaij g Pilate, “Pegih, kunt has wo juh ihtha o'othham mam hab a'aga mo d em-kownalig?” 13 Kush si s-kaitham hab kaij g hemajkam, “Mu'ani ab kots t ab!” 14 Kutsh hab chum chei g Pilate, “Haschu ahg? Shahchu at hig pi ap has juh?” Kush oi wa wabsh ba'ich i si s-kaitham hab wabsh ge kaij mu'ikko, “Mu'ani! Mu'ani ab kots t ab.” 15 Kush g Pilate tatchua mat wo s-hohho'i g hemajkam ch atsh heg hekaj am i thagito g Barabbas am ha wui k am ha cheha g shonthal mat am wo gewitta g Jesus. Kumtsh wa woho hab juh. Tsh am hahawa ha wui thagito matsh gm hu wo be k ab wo naggia kots t ab. 16 Kutsh gm hu hahawa i bei g shonthal g Jesus kownal ge'e kih am k am wehs ha wai g e-wehm shonthal. 17 Kutsh am i e hemapath k nahnko wua. Msh wa ab abchuth mash chum e kownalchuth. Pegih, tsh ab wahki g kownal eniga k ge ho'i gihkot k ab wahki mo'oj ab. 18 Kush hab wabsh s-ahgamk ch hab kaij, “Tash g d ha-kownaligk g Tutuligo hemajkam.” 19 Tsh ha'i an si gewitta mo'oj an g uhskaj k ab siswuimath k ab wui i shul pehegia ab has elithch. 20 Kumtsh am i ha'asa nahnkogith k am si wuahawua hegai kownal eniga k ab uhpam wahki g enigaj k gm hu hahawa i bei mat ab wo naggia kots t ab. 21 D ab hema i ha nam g o'othham ch ab him Jerusalem wui ch ash hab chehgig Simon. Ith ad an bei g shonthal k ab kushwiotach hegai kots mamt ab ab wo naggia g Jesus. Ihtha Simon ash ab d kihkam Cyrene kihhim t ab ch d ha-ohg ihtham Alexander ch Rufus. 22 Kumd gm hu i bei g Jesus mam am ha nahngia. K hab e a'aga amai Golgotha mo ith hab d ahga Koshwak. 23 Kumd am chum i'ich g nawait ch kulani mat wo hehogih g s-ko'ok. Kud pi sha'i ih g Jesus. 24 Kumd ab hahawa sisish kots t ab k am kei g kots. D am ha'i e chichwi g shonthal k wo nei mas hedai haschu wo bei g ha'ichu enigaj. 25 K eda ga hu i juhk madki heki hu e ai g humukt ohla mamd ab naggia kots t ab. 26 D an o'ohanas g ha-abchutha ab thahm mo ab i mo'okch g Jesus ch hab chu'ig, “Ith o d ha-Kownalig g Tutuligo Hemajkam.” 27 Kumd gohk ab ep ha nahngia kokots t ab gn hu a'ai. Sh eda d s-chu e'eskam ihtham. [ 28 Kum hab masma am chehgithch mam hab elith mo g Jesus hab wa'ap d pi ap hemajkam. Neh, heki o hu an o'ohanas Jiosh o'ohana ed mat ith am hab wo e juh.] 29 D hegam mo am bihbimhim nahnko ahg ch hab ahg, “Naptsh woho wo i wua g ge'e cheopi k am uhpam ep wo i kei waik tash ab? 30 Pegih, ab g hig i huduni kots t amjed k wo e tho'ibia maptp wo e nako.” 31 D g u'ugchu papal ch chehanig t-mashchamtham am hab wa'ap nahnko ahg hab kaijch ab a'ai e wui, “Ith atsh ha'i ha tho'ibia k atki wabshaba pi wo e nako mas wo hejel e tho'ibia. 32 Nash hig pi woho d Jiosh si Kehsha ch d t-kownalig? Pegih, tt ab wo s-wohoch matp ab wo i huduni k wo e tho'ibia.” D hegam ehp mad ab wehmaj nahngia hab wa'ap nahnko ahg. 33 D am i thahm juh. D wehsko gei g s-chuhugam waik ohla ab. 34 D am i e ai g waik ohla. D si s-kaitham hab kaij g Jesus, “Eloi, Eloi, lama sabaktani.” Ith o hab d ahga, “Ni-Jioshga, ni-Jioshga, pt haschu ahgk wabsh ni-thagito?” 35 D ha'ijj hab kaij hegam mad am gegok, “Neh'e, Elijabad o ab chum waith.” 36 Kud am hema med k an ha'ichu usko mad am wakch nawait ch ed k am uhgk i be k ab chum i'ich g Jesus k hab chei, “Kia koi, tt hig wo nei mas ia wo jiwia g Elijabad k ab wo i huduni.” 37 Kud am si s-kaitham ha'ichu hab ep chei g Jesus k am hahawa i muh. 38 Kutsh hegai s-kowk ikus kuhpadag mash am s-tadnim naggia gd hu si eda g ge'e cheopi ab si shel e wantsh. 39 D hegai moki d shonthal ha-ge'ejig gahab kehk kots wui ch am kah g Jesus ch am neith mat has masma muh ch hab kaij, “Ihtha oki si s-wohom d alithaj g Jiosh.” 40 D ga hu sha mehkjed g u'uwi ab ha'i neith mat haschu has e juh. Ha'i ihtham o d Salome ch Mary Magdalene ch hegai Mary mo d ha-je'e ihtham James ch Joses. 41 Ihtham waik ash am wehmaj oiopohim g Jesus ch ha'ichukaj i wehmt mo eda gm hu oimmelhim Galilee chekshani ch ed. Kud mu'i ihtham u'uwi am wehmaj ab i hihi g Jesus Jerusalem wui. 42 D am ha'ichug hegai e jehnigiththam mo ab Arimathea t amjed ch hab chehgig Joseph. Ith o si s-ap d o'othham ch ab s-neithamk g Jiosh kownaltalig. D eda e aihim mat wo i hud. Kuchd eda am chum t-nakog matt ba'ich i tash wo chum t-mihshmath. D heg hekaj am hih ihtha Joseph k atsh ab tai g kownal g Jesus honshpadag. 44 Kush g Pilate hab kaij, “A nat wa s-wohom heki hu i muh?” atsh am hahawa wai g shonthal ha-ge'ejig. 45 Sh ith hab kaij mat heki hu muh. Kush hab hahawa ahg g Joseph mo am wa s-ape mat am wo bei. 46 Kutsh g Joseph am him k am ha nolawt g si s-kehg ikus k am ep jiwia. Kumd am wehhejed ab i huduni g Jesus honshpadag. K am mia hab chu'ig g hiha'ini ch ab heki hu cheotas hothai ch ed. Kumd am i be k gd hu heg eda cheh am i hobinodk heg hekaj s-kehg ikus. Kumd ab hahawa kuh g ge'e hothaikaj. 47 D g Mary Magdalene ch hegai Mary mo d ha-je'e g James ch Joses am wa neith mad hebai e cheh.

Mark 16

1 Kud am bij g shahwai machd eda t-mihshmath. Kutsh am hahawa hihi g Salome ch Mary Magdalene ch hegai hema Mary k am ha nolawt g si s-ap uhwchu matsh hekaj wo huhu g muhki. 2 Wabsh i si'alim mo e aihim g thomig, tsh gm hu hihi ihtham hiha'ini wui k am neneokhim ch hab kaij, “Kus hedai t-wehhejed gm hu wo i nu'ichkwua hegai hothai mat ab hekaj e kuh g cheo?” Tsh ab i chesh g tash matsh eda gd hu thatha. 4 Tsh chum nei matsh heki hu in hu hab i e nu'ichkwua. 5 Tsh am i wahp. Kush inhab hema thak ch hab sha mahs mo g wechij o'othham. Sh g enigaj wabsh si s-toa. Kutsh si e totoths g u'uwi. 6 Sh wabshaba hab ha ahg, “Pi g am wo sha'i e totothsith. M ani wa s-mahch mam g Jesus chuhkug chum gahghim. Am g wo neith mo pi ia hu ha'ichug iia mat ia e woi. Uhpam at ep i wuhsh muhkig t amjed. 7 Kumt gm hu wo hihim k wo ha ahgi g chuhchaij, chum wa g Peter, mat uhpam e chegito k gm hu wo hih Galilee wui. Mt gm hu wo hihim k am ha'ab wo nei.” Neh, bash kaij g anghil. 8 Kutsh i wuwhag k gm hu uhpam wohp pi hedai sha'i ha ahgithch wohg oithch nash pi si e totothsith. 9 Kutsh am hihi g u'uwi k am ha ahgi ihtham Peter mat haschu kah. 10 Tsh heg i thahm g Jesus am hahawa ha cheha g e-chuhchai mat gm hu wehsko wo i ahgahi g s-kehg ha'ichu ahgaj mat g hemajkam ab wo s-wohochuth k wo e tho'ibia.] 11 Sh wabshaba pi sha'i wohochuth. 12 Sh am i thahm ha'i gm hu hasko hihimath ch d gohk. Tsh g Jesus gawul masma am i e chehgi ha wui. 13 Kutsh ihtham am uhpam ep hihim k gd hu wehs ha ahgi g chuhchaij. Kush pi sha'i ha wohochuth. 14 Tsh am hahawa i e chehgi g Jesus hegam ha wui gamai hemako e-chuhchai. Sh ihtham am e wehm e gegosith. Tsh am s-ha keh'el nash ge ha wohochuth hegam mash neith mo d thoakam 15 ch hab hahawa ha ahg, “Am g wo a'ai hihim k am wo i ha ahgithahi wehs hemajkam ihtha s-kehg ha'ichu ahgaj g Jiosh ab ni-amjed. 16 Kut heg wo e tho'ibia matp hedai wo i s-wohochuth k wo e pahl wako. T wabshaba ab wo moht g pi ap e-chu'ichig k ab wo ai g pi ha huhugetham sho'igthag matp hedai pi ab hu wo wohoch. 17 T wo tashok mo hedai ab ni-hiwig nant pi ab wo ha mah g gewkthag. Kut am wo i ha wuwhasithath g jijawul ni-wehhejed ch ep wo neneokath g gawul kaitham ne'okikaj mat pi hebai mai. 18 Kut pi has wo e juh matp wo ha taht g kohk'oi o atp wo ih'eth g hialwui. Kut an wo ha taht g kok'otham. T wo thotha.” 19 Kutsh am i ha'as ha wehm neo g Jesus k am i thahm hahawa uhgk i e bei thahm kahchim wui k ga hu s-apkojed thahiwua e-ohg Jiosh hugith ab. 20 T ihtham gm hu a'ai ha ahgithahi g hemajkam g s-kehg ha'ichu ahgaj g Jiosh. Kut g Jiosh si s-hasig ha'ichu hab ha juni mat hekaj wo s-mahchk g hemajkam mo d wohokam g ha'ichu ha-ahga. [

Luke 1

1 Ni-nawoj map ab si tatchua g Jiosh: Ab apsh kaiham ihtha s-kehg ha'ichu ahga ab amjed g Jiosh alithag mach ab s-wohochuth. Kunt am wo ha'ichu m-o'ohani ab amjed mapt hekaj wo s-ap s-mahchk. Hegam mash am neith o am t-ahgith ab amjed. Kut mu'i am s-ap o'oha hegai mo haschu am t-ahgith. Nt ahni am si i hoa wehs ihtha k hekaj am wo m-o'ohanith k am ba'ich ha'ichu wo m-ahgi ab amjed. 5 Amjed atsh ab i shohshonwua ihtha mash eda g Herodbad am d kownal Judea chekshani ch ed am ha thahm g Tutuligo hemajkam. Sh am hema d ha-pahlig ch hab chehgig Zacaria. Sh g wehmaj kihkam hab chehgig Elisabeth. Ihtham ash ab d amjedkamaj hegai mash d ha-shohshonbad g papal ch hab chehgig Aaron. Kush g Zacaria ab hema d amjedkam mash hab chehgig Abia. 6 Kush ihtham Zacaria ch Elisabeth am si oith g s-ap'ekam ch s-ap am hab junihim wehs hegai mo g Jiosh ab ha chehani g Tutuligo. 7 Kutsh wabsh okst ihtha Elisabeth k pi ha mahmadt. Tsh g Zacaria hab wa'ap kelit. 8 Kutsh hema tash am i e ai matsh g Abiabad amjedkam am hab wo juh g e-chikpan ge'e cheopi ch ed. 9 Kumtsh am i kei g Zacaria matsh am wo ha mehmhei g s-ap uhw kuhbhonthakud. Tsh am i wah cheopi ch ed. 10 Kush am jeg ed gegok g hemajkam ch e ho'ige'ithahun. 11 Tsh am cheopi ch ed hema i e chehgi g anghil Zacaria tahgio k ash ab kehk s-apkojed abai mash ab kuhbhoni g s-ap uhw kuhbhonthakud. 12 Tsh am i nei g Zacaria k si e tothsith k si s-ehbeni ihtha. 13 Kush wabshaba hab kaij g anghil, “Pi g am sha'i e tothsith, Zacaria. Jiosh at kah g m-ho'ige'ithahuna. T g m-wehm kihkam wo wa hema madt. T d wo cheojk. Kupt hab wo chehch John. 14 Jiosh at ab a wo si has elithath. Kut pi koi wo mahsi. T g Jiosh ab wo mah g Hekia S-ap'ekam Gewkthag. Kupt heg hekaj wo si s-hehgigk. T g mu'i hemajkam hab wa'ap wo si s-hehgigk mat hekith wo mahsi. Kut ihtha em-aliga pi hekith wo ih'eth hegai mo s-nawmthag. 16 ch mu'i ab wo i ha nohnogi g Tutuligo hemajkam ab Jiosh wui. 17 T koi in hu wo i wuhsh g Jiosh si Kehsha jewed thahm. T g em-aliga ia wehpeg wo ahgachugath mat in wo i wuhsh. T g Hekia S-ap'ekam Gewkthag ab wo mah g gewkthag heg wehhejed hab masma mo wa ab mahkch g Elijabad. Kut hab wo ha juh g hemajkam mat ab wo si pihk e elithath ha hekaj g e-a'aliga k hegam hab wo ha juh mo d pi ap'ekam mat ab wo kaihamath g ha-amichuthadag hegam mo d s-ap'ekam. Neh, bat masma am wo i ha ap'ech g hemajkam heg wehhejed jiwhiathaj g Jiosh si Kehsha.” Neh, bash kaij hegai anghil. 18 Kush g Zacaria hab kaij, “Nt has hig masma wo si s-ap s-mahchk machs wo hema bei g ali natt pi kekelt?” 19 Sh hab kaij g anghil ab wui, “Thani Jiosh chikpantham, Gabriel. Kut ab ni-cheha mant ia wo m-ahgi ihtha si s-hehgig ha'ichu ahgaj. 20 Kupt eda pi ab hu ni-wohoch. T heg hekaj hab wo m-juh mapt pi wo sha'i e nako maps wo ha neokath ia'i amjed am hugkam mat hab wo e juh ihtha mani m-ahgith.” Neh, bash kaij hegai anghil. 21 Sh eda heg oitham am chum nenida g hemajkam g Zacaria ch si has i elith k hab kaij, “A t has e juh k pi oi ab hu i wuhsh?” 22 Tsh am hu hebai ab hahawa i wuhshani k chum neo am ha wui k wabsh pi sha'i e nako. Sh am ha hekaj wabsh i amich g hemajkam matki ab ha'ichu e chehgi wui no pi ab wabsh i ha magwuith g e-nowikaj ch pi ab hu has sha'i kaij. 23 Tsh am wabsh i chum huhug g tash mat he'es tash am hab wo juh g e-chikpan. Tsh gm uhpam hih e-kih wui. 24 Kush amai i mia amjed matsh wo'iwua g ali. Kush am wabsh s-ap e tahtk ch am e ehstokch g Elisabeth e-kih ed hetasp mashath hab kaijhim. “Chum ani hekith si ni-elith mani pi ha mahmadt. Kutki wabshaba ith hab ni-juni g Jiosh k hekaj gm hu hab i juh g si ni-edathag am hemajkam ha-nena ed.” 26 Neh, tsh am him k am d i chuhthp mashath am i thahm matsh am wo'iwua g Elisabeth mad. Tsh g Jiosh am chea hegai anghil mash d Gabriel matsh am wo u'apa g ha'ichu ahgaj hema wui g chehia. Sh hab chehgig ihtha chehia Mary ch am kih heg eda kihhim mash d Nazareth ch am eda g Galilee chekshani. Sh am hema ep d kihkam ch hab chehgig Joseph ch atsh wo hohnt hegai Mary. Ihtham ash ab hema d amjedkam mash kownalibad ch hab chehgig David. 28 Kutsh koi e ai matsh wo e hohont. Tsh am jiwia hegai anghil Mary wui k hab kaij. “Si g s-hehgigk Mary. Jiosh at ab i s-m-ho'ige'ith k am wo i m-wehmt.” 29 Tsh am wabsh i pi amich mas haschu hab ahg k si e kudu heg hekaj. 30 Sh hab ep kaij g anghil, “Pi g am sha'i e tothsith, Mary. Ab at i m-mah g Jiosh g ho'ige'ithadag. 31 Kut am wabsh wo e nahto g ali m-eda k wo mahsi k d wo cheojk. Kupt hab wo chehch Jesus. 32 Kut d wo si s-has ha'ichuk no pi d alithaj g Jiosh. T g Jiosh am wo i kei mat d wo kownalk am kehkud ed g e-shohshonbad David. 33 Kut chum hekith d wo ha-kownaligk g Jiosh hemajkamga. Pi at hekith wo huhug g kownaltaligaj.” Neh, bash kaij g anghil. 34 Sh hab kaij g Mary ab wui, “Nt has hig masma wo ge madt mani d wabsh kia chehia ch pi koi ha kun?” 35 Sh g anghil ab wui hab kaij, “Jiosh at ab wo cheha g Hekia S-ap'ekam Gewkthag. T heg hab wo juh g Jiosh gewkthagkaj. Mt heg hekaj wo s-mahchk mat d wo si hekia s-ap'ekam alik ch d wo Jiosh alithagk. 36 “Neh, s-mahch ap mat heki hu okst g m-hajuni Elisabeth k pi ha mahmadt. Kut eda g Jiosh ab s-ho'ige'el. Kut g cheoj ali wo bei. K d chuhthp mashath hemu mat am wo'iwua g ali. 37 Kupt ith amjed wo s-mahchk mat wo e nako g Jiosh mat am hab wo juh hegai mo haschu hab e ahgahim.” Neh, bash kaij g anghil. 38 Kush hab hahawa kaij g Mary, “Neh, thani piongaj g Jiosh. K am wa s-ap'e mat am hab wo juh g e-tatchui ab ni-ab” Tsh gm hahawa hih g anghil ab amjed. 39 Tsh ab ha hekaj i e nako g Mary mat am wo chehgim g Elisabeth. Sh hegam Elisabeth ch Zacaria am kih mash am hema kihhim ka'akwulk ch ed am Judea chekshani ch ed. Tsh am jiwia Mary ha-kih am k ab ha-ihm. 41 Tsh am i kah g Elisabeth k ab taht matsh g mathaj am si al i banimme eda. Tsh g Hekia S-ap'ekam Gewthag ab si i mah g gewthag. 42 Kush hekaj si s-hehgigam hab kaij ab wui g Mary. “Neh, ab atki si i s-m-ho'ige'el g Jiosh ba'iwechkim mo chum hedai uwi. Kutki wo mahsi m-amjed hegai mash ab mahks g si ge'e s-ap'ekam. 43 Kuptki d wo je'ejk hegai mat d wo ge t-kownalig. Kuni si s-ap ni-tahtk mapt ia'i ni-chehgim. 44 Neh. am at si i banimme g ni-mad mant am i m-kah mapt ab ni-ihm. K heg hekaj am ni-chehgith g Jiosh mo ab si s-m-ho'ige'ith. 45 Woho at hab wo e juh hegai mo ab m-chehgith g Jiosh. K d si ge'e ho'ige'ithalig mapt ab i s-wohoch.” Neh, bash kaij g Elisabeth. 46 Kush g Mary hab kaij: “Ab ani si hehgchulith g Jiosh 47 ch si s-ap ni-tahtk mo d ni-tho'ibiakam. 48 Thani wabsh sho'igkam. Kut eda ab si has i ni-elith k si ge'e ha'ichu ab hab ni-juni g si ge'e e-gewkthagkaj. T Hab i'ajed chum hekith hab wo chei g hemajkam imhab a'ahithag oitham mat ab si i s-ni-ho'ige'el g Jiosh. Tho si hekia s-ap'ekam g Jiosh 50 ch eda ia'i a'ahithag himtham oithch si pihk e elith ab wehs ha wui hegam mo ab si has i elith. 51 T am wo chehgi g si ge'e e-gewkthag k wo has gewito hegam mo si e hahaschuth 52 k wo ha wohppo'i g kokownal g ha-gewthag k g s-kakais s-ha-kaisthag gm hu hab wo i juh k wabshaba g sho'igkam ab has wo i ha elith k heg ab wo i ha mah mo haschu i s-kehgaj ha wehhejed. 54 Neh, bash wa am ha ahgith g t-shohshonbad gd hu i Abraham amjed matsh ith am hab wo e juh. Ab o i t-wehmt g Jiosh ahchim mach ab d ha-amjedkam k ab wehs t-wui si pihk e elith i'ajed chum hekith.” 56 Neh, bash hahawa g Mary ch amjed am ha wehm thakahim waik mashath ab ch gm hahawa hih uhpam. 57 Tsh am hahawa i e ai. Tsh madt g Elisabeth. Kush d cheoj ali. 58 Sh g hajunij ch hugithaj an kihkam si s-hehgig wehmaj am i kaiok matsh g Jiosh ab si i s-ho'ige'el. 59 Kush am d i gigi'ik tash g ali. Kumtsh wo pahl hikuch mo d ha-himthag. Tsh am e chehm g hemajkam k hab wo chum chehch Zacaria am oithk g ohgaj. 60 Kush wabshaba hab kaij g je'ej, “Pi atsh g e-ohg oithk wo chehgigk ch wabshaba hab wo chehgigk John.” 61 Sh hab kaij hegam, “Pi o hedai hab sha'i chehgig g m-hajuni,” 62 ch amjed ab wabsh i chum kakke g ohgaj mat am wo ha ahgi mas has wo chehch. 63 Sh heg hema ha tahni g o'ohanakud. Mtsh hema mah. Kutsh ith an o'oha, “Bo chehgig John”. Tsh wehsijj si e totoths. 64 Kutsh am wa'i hekaj s-ap neok k ab si ihm g Jiosh ch ab si ho'ige'ith. 65 Tsh wehsijj ab si has el g Jiosh hegam mo an ha wehgaj kih. Tsh gn hu a'ai s-e mai am Judea chekshani ch ed mat has i e juh. 66 Ab ash si s-ho'ige'ith g Jiosh ihtha ali. Kush wehsijj hegam mash am kah am si i oithahim ch hab kaij, “Kus has mahs wo ha'ichuk ihtha ali?” 67 Kutsh g Hekia S-ap'ekam Gewkthag g si ge'e gewkthag ab i mah g Zacaria. Tsh heg am si s-hewelim neok k gm hu ba'ich ah mat haschu has wo e juh hab kaijch: 68 “Ab ant wo si i hehgchul g s-ap'ekam t-kownalig Jiosh. E o nahtokch mat wo t-tho'ibia ahchim mach d hemajkamgaj 69 ch atsh hekaj am hema wo i maskogi mat d wo t-tho'ibiakamk. Heg at ab d wo kownal Davidbad amjedkamk ch wo u'ukch g si ge'e gewkthag. 70 Kekelibad Jiosh ha'ichu i tashogiththam o heki hu am ahgachug matsh g Jiosh wo t-tho'ibia ab ha amjed g t-obga ch hegam mo s-t-keh'ith. 72 Ab at wo i s-t-ho'ige'el g Jiosh mash wa hab masma ha ahgith g t-shohshon. 73 Bash si kaij ab Abrahambad wui mat wo t-tho'ibia ab ha amjed g t-obga. Tt hab pi hedai wo ehbithath ch ab si s-ap wo ihmath g Jiosh. 75 ch wo s-ap'ek am nenaj ed ch am hab wo junihith g s-ap'ekam chum hekith. 76 Ihtha ni-sulijga at d wo Jiosh ha'ichu i tashogiththamk ch wo ha ahgi g Jiosh hemajkamga mat g Jiosh ab wo s-ha ho'ige'ith k gm hu hab wo i juh g pi ap ha-chu'ichig k wo ha tho'ibia ab amjed g s-ko'ok ha-namkithadag. Kut heg hekaj wo e nahtokchith mat g tho'ibiakam am wo i e maskogi. Ith at am wo i wuhsh Jiosh t amjed k ab wo t-mah g amichuthadag. 79 hab masma mo g tash ab i chechshshaj ch ab t-mamka g tonlig. Ab ach wa hihim t-namkithadag wui mat g Jiosh gm hu hab wo i t-juh heg hekaj pi ap t-chu'ichig. Kut wabshaba g t-tho'ibiakam ab wo i t-chehgi matt has masma am wo i t-ap'ech Jiosh wui.” Neh bash kaij g Zacaria. 80 Kutsh si s-gegokim i ge'etha g ali am e tashogith mo am Jiosh tatchui oithch him. Kush am hebai d i himtham, tsh gm hu i e gawulkai tohono jewed ch ed k am ha'ichugkahim ch ab ai mat am i e maskogi Tutuligo ha wui.

Luke 2

1 Sh am hema d si ge'e lai wehs ha thahm g jejewed ch hab chehgig Augustus. Sha am hu hebai, tsh ith am hab juh g chehanig matsh wehs wo e o'ohan k wo e kuint g hemajkam hehe'ejel e-kihhim ab. 2 Ith ash d si wehpeg kuintadag. Kush am hema d kownal Syria jewed ch ed hab chehgig Quirinius. 3 Tsh am himto g hemajkam ab hehe'ejel e-kihhim wui matsh wo e o'ohan k wo e kuint. 4 Tsh hegai Joseph mash wa am kih Nazareth t am ch atsh wo hohnt g Mary gm hu hih Bethlehem wui am Judea chekshani ch ed nash pi ab d kownalibad David amjedkam. Sh g Davidbad am d kihkam Bethlehem t am. 5 Tsh g Mary am oi g Joseph. Sh eda e aihim matsh wo bei g e-mad. 6 Tsh am thatha Bethlehem t am. Sh eda pi am hu ha jeg am koksikud kih ch ed. Tsh heg hekaj am thadhaiwua ha'ichu thoakam kih ch ed. Kutsh si e ai. Tsh madt g Mary. Kush heg d wehpegkam ch d cheoj. Kutsh am si i hobino s-moik ikus ch ed k am heg eda woi mo g ha'ichu thoakam am e gegosith. 8 Sh am ha'i thadha g kahwal ha nuhkuththam gm hu jeg ed ch an ha nuhkuth g e-shoshoiga. 9 Tsh ab haha wabsh ha wui e chehgi g anghil ab thahm kahchim t amjed. Kutsh an si i ton ha wehgaj matsh am e chehgi g Jiosh gewkthag. Kutsh wabsh woho'i e totoths. 10 Sh hab hahawa kaij g anghil, “Pi g am wo sha'i e totothsith. Ia ant jiwia mant ha'ichu wo em-ahgi. K ith wehs hemajkam d ha wuikam. T wo si s-ap e tahtkkath ab amjed. 11 Ithani at am mahsi Davidbad kihhim ed hegai mo d Jiosh si Kehsha mat d wo em-tho'ibiakamk ch d wo ge'echu em-kownaligk. 12 Kumt ith ab wo s-mahchk mat am wo wo'ok heg eda mo am e gegosith g ha'ichu thoakam ch g s-moik ikuskaj wo e hobinodch.” 13 Tsh haha wabsh sha'i mu'i anghil ab ha wui i e chehgi wehmaj hegai hema k si ne'e ch ab hehgchulith g Jiosh ch hab kaij. 14 “Ab ach wehsijj hehgchulith g Jiosh an thahm kahchim ch ed. T hegam mo hohho'ithachuth g Jiosh an jewed thahm wo e tho'ibia k wo si s-ap e tahtkkath ab a'ai e wui.” 15 Neh, bash kaij g anghil ch gm hu hahawa i himto thahm kahchim wui. Sh hab kaij a kahwal ha nuhkuththam ab a'ai e wui, “Oi g wo hihim. Tt wo hihi am Bethlehem wui k am wo nei hegai matsh am hab e juh mo ab i t-ahgith g anghil am wehhejed g Jiosh.” 16 Tsh wa woho am si s-hohtam hihim k am i ha gahghim k ha cheh. Kush woho am wo'o g ali heg eda mo am e gegosith g ha'ichu thoakam. 17 Tsh hegam kahwal ha nuhkuththam am hahawa i ahgahi mash has kaij g anghil ab amjed. 18 Tsh wehsijj hegam mash ha kah ab si has i el mo haschu ha ahgith. 19 Kush am si oithahim g Mary ch am wabsh hejel i s-mahch. 20 Tsh g kahwal ha nuhkuththam gm hu uhpam hihi ab si hehgchulithch g Jiosh natsh pi wehs nei hegai mo haschu am ha ahgith g anghil. 21 Kush am d i gigi'ik tash g ali. Kumtsh an pahl hikuch mo d ha-himthag k hab chehch Jesus matsh wa g anghil ia u'apa g ahga mat eda koi wo'iwua. 22 Tsh am i e ai g tash matsh g Mary am wo e chehgi mo kegchuthas mat hab masma g Mosesbad an o'oha g Jiosh chehanig. Bo chu'ig matsh heg hekaj gohk wo ha koktha g hohhi o g pap-loloma k ab wo iagchul Jiosh wui. K hab ep chu'ig matp d wo cheojk g wehpeg mahsithkam ch ab wo i e thagito Jiosh wui. Tsh heg hekaj am bei g ali k am hihi ge'e cheopi wui ab Jerusalem t ab. 25 Sh am hema kih g keli ch hab chehgig Simeon ch ash d si s-ap'ekam ch ab si has elith g Jiosh ch ash ab si nenida mat wo ha tho'ibia g Tutuligo. Sh g Hekia S-ap'ekam Gewkthag ab si wehmaj 26 ch ash am i tashogi matsh pi wo muh k ab wo ai mat wo nei g Jiosh si Kehsha. 27 Neh, tsh am i e ai g tash. Tsh am hahawa i tashogi mat am wo i wah ge'e cheopi ch ed. Kutsh g Joseph ch Mary am u'apa g Jesus matsh am hab wo juni mo has i masma d ha-chehanig. 28 Tsh g Simeon an koh g ali k ab si e ho'ige'ithahun Jiosh wui hab kaijch. 29 “Pegih ia o i s-ap'e, ni-Jioshga. Pt ab haha wo i ni-hiwigi mant wo si s-ap ni-taht k ni-pihhu map hab masma heki hu am ni-ahgith. 30 Neh, ni-wuhpuikaj ani hahawa neith ihtha mapt hekaj wo t-tho'ibia. 31 Kut wehs hemajkam wo s-mai ab amjed 32 nat pi d wo ha-tonligk g nahnko mahs hemajkam ch ab wo si uhgk i ha bei g m-hemajkamga.” Neh, bash kaij hegai Simeon. 33 Sh g Joseph ch Mary si has e tahtk heg hekaj mo has i kaij ab amjed g ali. 34 Sh hab hahawa kaij g Simeon ab ha wui. “Jiosh at wo wa s-em-ho'ige'el,” ch ash hab ep kaij ab je'ej wui, “Neh, ihtha ali at g Jiosh am si i kei. Kut mu'i wo t-tho'ibia. T wabshaba mu'ijj g t-wehm Tutuligo pi ab hu wo wohochuth k im hu hab wo i e juh. Jiosh at ab wo e chehgi t-wui ith hekaj ali. T mu'ijj wo s-keh'ith 35 k hekaj wo mahsko wua g e-chegitoithag. Kut g m-ihbthag wo si s-ko'okkath hab wa'i masma matp hems g is-pahyo ab wo si m-chu'akath m-ihbthag ed.” Neh, bash kaij g Simeon. 36 Sh hema g oks am d Jiosh ha'ichu i tashogiththam ch hab chehgig Anna. Sh g ohgajbad hab chehgig Phanuel ch ab d amjedkamaj g Asherbad. Kush g keligaj ihtha Anna muh mash eda d haha wabsh i e wehm kihkam wewa'ak a'ahith ab. 37 Sh am haha d hejel wi'ikam gigi'ikko gamai gi'ik (84) a'ahith ab. Tash oitham ch chuhug oitham ash am ha'ichug ge'e cheopi t am ch ab si has elith g Jiosh ab wui e ho'ige'ithahunch ch hab al he'es ha'ichu ko'a. 38 Sh am ha'ichug g ali ch je'ej g Joseph wehm. Kutsh am jiwia hegai Anna k ash ab ho'ige'elith g Jiosh ch am hahawa wehsijj ha ahgith ab amjed g ali hegam mash hab wa'ap nenida matsh g Jiosh wo ha tho'ibia. 39 Neh, kutsh wehs am hab juh hegai mo an o'ohanas chehanig ch ed k gm hu hahawa uhpam hihi Galilee chekshani wui k am thatha e-kih am Nazareth kihhim t am. 40 Kutsh ab si s-gegokim i ge'elhi g ali k wabsh sha'i ha'ichu s-amichuth. Sh g Jiosh pihk elithadag am si e tashogith wehhejed. 41 Wehs ahith ab ash am e wushshath Jerusalem t am matsh wa ha tho'ibia g Jiosh g ha-shohshon ab ha amjed g Egypt t am hemajkam. Kush g Jesus jehj chum hekith am hihhim. 42 Kush am d i gamai gohk a'ahithag g Jesus. Tsh am i e ai hegai ha-tho'ibiathag wuhshtha. Tsh am ep hihi bekch g Jesus k am ha'ichugkahim mo he'es i tash am hab e wua. 43 Tsh am i kuhgit. Tsh gm hu i e nohnogi uhpam. Tsh eda am wa'i wih g Jesus Jerusalem t am. Sh g jehjij pi mahch mo pi am hu ha wehmaj 44 nash pi hab elith mash an wa hebai ha wehmaj g hihimtham mash am mu'i e wehm hihim. Kush hekaj hemako tash wa'i chihpia k an chum gahghi ha oithk g e-hajuni ch e-nan'aipijju. 45 Sh eda pi am hu ha'ichug. Kutsh oi wa gm hu uhpam hihi Jerusalem wui mat an wo i gahghi. 46 Kush am d i waik tash. Tsh gd hu hahawa cheh ge'e cheopi ch ed. Kush am thak ch ab ha kaiham g s-chu a'amichuththam ch ab si ha'ichu ha kakke mash am a'aga g Jiosh o'ohana. 47 Sh ihtham ab epai ha'ichu kakke. Kush si s-e mamachim neok ch si s-ap ab uhpam i nodgith g ha'ichu ha-kakkei. Sh wehsijj hegam mash kah ab wabsh i haha'athka si has i e tahtk. 48 Neh, tsh g Joseph ch Mary hab wa'ap si has i e taht am chehgiok. Sh g je'ej hab kaij, “Ni-sulijga, shahchu apt ahgk hab t-juh? Shelkam att nonda g m-ohg wehm pi m-edgithk.” 49 Kush hab kaij ab ha wui, “Chum am wa s-mahch mant hemho wa am wo ha'ichugk ni-ohg Jiosh kih ed.” 50 Sh eda pi sha'i amichuth mo haschu ahgch hab kaij. 51 Kutsh gm hu hahawa uhpam hih ha wehm Nazareth wui k ab ha wechokahim. Sh g je'ej pi hekith sha'i pi chegito ihtha matsh has e juh. 52 Neh, kutsh ab si s-gegokam i ge'ehogatahi g Jesus k ba'ich i edagi g amichuthadag k ash am si oith g Jiosh chehanig. Kush ab si s-ho'ige'ith g Jiosh. Sh g hemajkam ab si has elith.

Luke 3

1 Tsh am hebai i cheka. Kush am thaha ihtha John mo d Zacariabad alithag am tohono jewed ch ed. Sh wenog am hema d si uhgchu lai wehs ha thahm g jejewed ch hab chehgig Tiberius. Kush am hema ep d kownal Judea chekshani t am ch hab chehgig Pilate. Kush g Herodbad a'alithag hab wa'ap d kokownal. Hema ash hab wa'ap chehgig Herod ch ash am d kownal Galilee chekshani ch ed k ch hema hab chehgig Philip ch am d kownal Iturea ch ed ch Traconitis ch ed. Sh g Lisanias am d kownal Abelene ch ed. Kush ia'i ithani hegam am d si u'ugchu ha-papalig g Tutuligo mash hema hab chehgig Annas ch hema hab chehgig Caiaphas. Tsh g Jiosh ab mah g John g ha'ichu e-ahga mash eda hegai Tiberius am wa'i thaha gamai hetasp a'ahith ab. 3 Sh g John an wehsko ahgachug g Jiosh ha'ichu ahga anai Jordan akimel wo'oshani ed hab ha ahgch, “Gam g hu wo s-ohhoth g pi ap e-chegitoi k wo e pahl wapko. Tsh g Jiosh gm hu hab wo i juh g pi ap em-chu'ichig.” 4 Batsh wa e juh hab masma matki an heki hu o'oha hegai kelibad Jiosh ha'ichu i tashogiththam mash hab chehgig Isaiah. K hab chu'ig g o'ohanaj: Hema atsh gm hu jeg ed wo ha mihshmath g hemajkam hab kaijch, “Neh, in atsh wo i wuhsh jewed thahm hegai mo d ge kownal wehs ha'ichu thahm. Kumt heg wehhejed wo i e nako hab sha masma mamt am wo i ap'ech g pad wohg mat am oithk wo i hih g ge'e kownal. 5 Nat hig pi am wo i e ap'ech g wohg mo hebai pi apkothag mat hekith wo jiwia g ge'e kownal? Pegih, mt am hab wa'ap wo i ap'ech g e-thoakag am e tho'ibiak. 6 T hab wehs wo nei g hemajkam mat has masma wo chum ha tho'ibia g Jiosh.” Neh, batki masma an o'oha g Isaiabad. Kush g John woho hab masma hab e wua. 7 Tsh mu'i am wui e chehm g hemajkam matsh ab ab wo e pahl wapko. Ha'i ihtham o pi am hu gawul junimk g pi ap e-chegitoi. Kush hab ha ahg g John, “Hah, ahpim mam pi ap chegitoithag, bamki e elith mamt wo e tho'ibia ab amjed g s-ko'ok e-namkithadag heg wabsh hekaj mam ab d Abrahambad amjedkam. Nt wabshaba wo em-ahgi mamt pi woho wo e tho'ibia, heg hi wa mamt am wo e chehgi am hab junihithch g s-ap'ekam mamt gm hu s-ohhoth g pi ap e-chegitoi. Wehs hegam mat gm hu wo s-ohhoth g pi ap e-chegitoi at d wo Jiosh hemajkamgak ch hab masma wo e kuint mo d Abrahambad amjedkam, chum wa g nahnko mahs hemajkam. 9 Kumt ahpim gm hu wo s-e ohhoth hab masma mat g pi kehg bahithkam u'us mamtp pi gm hu wo s-ohhoth g pi ap e-chegitoi k pi am hu hab wo junihith g s-ap'ekam.” 10 Kush ha'i g hemajkam ab kakke, “Pegih, tt has hig wo chum t-juh?” 11 Kush hab kaij ab ha wui, “Mt am wo i ap'ech g e-chegitoi Jiosh wui k amjed pi wo tha'i g e-eniga. Neh, tp hems hema pi wo ha kotonik. Kumt ab wo hema mah. Tp hems hema pi wo ha'ichu chekk. Mt ab wo mah g ha'ichu hugi.” Neh, bash kaij g John. 12 Kush ha'i hegam matsh am wui thatha k wo e pahl wapko d lial ha kowlanttham am kownal wehhejed ch ash ab kakke, “T-mashchamtham, tt ahchim has wo chum masmak?” 13 Kush hab ha ahg, “Pi amt gamai hu wabsh ba'ich i mu'i wo ha kowlant mo he'ekkia i mohto'is g o'othham.” 14 Kush ha'i d shonthal ch ab epai kakke, “Tt ahchim has wo chum masmak?” Sh hab ha ahg, “Pi g hekith ha'ichu wo sha'i ha wohppo'ithath ch pi ab hu hema ha'ichu wo sha'i abch mat pi wo wohok ch ehp mamt wabsh wo s-ap e tahtkk ch ab u'u mam he'ekkia i em-namkith.” 15 Kush g hemajkam pi am hu thotholimath am oithahimch mas hu ith d Jiosh si Kehsha matsh wo ha tho'ibia. 16 Kush heg hekaj hab kaij g John, “Pi g hab wo ni-elith manis ahni d si ha'ichu. Ab at hema wo i wuhsh ni-oithk mat d wo si ha'ichuk. Ahni ani hi wa em-pahl wapkon. T wabshaba heg ab wo em-mah g Hekia S-ap'ekam Gewkthag k gm hu hab wo i juh pi em-ap'ekam hab sha masma mat g mehi wo mei g sha'i. 17 “Nam hig pi nehnichuth g pilkani mamt g mohgaj gm hu wo i gawulkath k wo mehith k g pilkani gd hu wo i ba'iha. Pegih, t hab wa'ap am a'ai wo i ha gawulkai g hemajkam am lothaita ch ed ihtha mani em-ahgith k wo ha tho'ibia g s-ap'ekam k g pi ap'ekam s-ko'okam wo ha namkith. T g ha namkithadag pi hekith wo huhug.” 18 Neh, bash kaij g John ch nahnko masma am i chum ha tashogith g hemajkam g s-kehg ha'ichu ahgaj g Jiosh. 19 Sh eda hegai kownal mash hab chehgig Herod ge'e hab junihim g pi ap'ekam ch atsh g e-wehnag ehs g hohnigaj. Sh hab chehgig hegai Herodias. Kush g John ab s-keh'ith g kownal ch hab kaij mat pi hab wo chum e juh. 20 Tsh g Herod am ba'ich i pi ap ha'ichu hab juh matsh gd hu si kuh g John. 21 Tsh wabshaba koi e kuh g John k wehs ha pahl wapko hegam matsh am wui e chehm ab s-wohochuthch g Jiosh. Tsh g Jesus hab wa'ap am wui jiwia k e pahl wakon k am e ho'ige'ithahun. Tsh g thahm kahchim gam i e kuhpi'o. 22 Kutsh g Hekia S-ap'ekam Gewkthag i hud ab ab g Jesus k hab sha mahs mo g hohhi. Sh ab neok g Jiosh ab thahm kahchim t amjed ch hab kaij ab wui g Jesus, “Ahpi ap d si ni-tatchuithch ni-alithag ch am si ni-tatchui oithch hab masma.” 23 Jesus ash am hu d i waikko wehst-mahm a'ahithag matsh eda am i himch g e-chikpan k am i ahgahi g Jiosh ha'ichu ahga. Kush ihtham d shohshonaj mant g ha-chechgig an wo ha o'oha. Bash masma s-e mahch mo d Josephbad alithag. Sh g Joseph ab d Heli amjedkam. 24 Kush g Heli ohgbad Matthat. Sh g Matthat ohgbad d Levi. Sh g Levi ohgbad d Melchi. Sh g Melchi ohgbad d Jannai. Sh g Jannai ohgbad d Joseph. 25 Sh g Joseph ohgbad d Mattathias. Sh g Mattathias ohgbad d Amos. Sh g Amos ohgbad d Nahum. Sh g Nahum ohgbad d Esli. Sh g Esli ohgbad d Naggai. 26 Sh g Naggai ohgbad d Maath. Sh g Maath ohgbad d Mattathias. Sh g Mattathias ohgbad d Semein. Sh g Semein ohgbad d Josech. Sh g Josech ohgbad d Joda. 27 Sh g Joda ohgbad d Joanan. Sh g Joanan ohgbad d Resa. Sh g Resa ohgbad d Zerubbabel. Sh g Zerubbabel ohgbad d Shealtiel. Sh g Shealtiel ohgbad d Neri. 28 Sh g Neri ohgbad d Melchi. Sh g Melchi ohgbad d Addi. Sh g Addi ohgbad d Cosam. Sh g Cosam ohgbad d Elmadam. Sh g Elmadam ohgbad d Er. 29 Sh g Er ohgbad d Joshua. Sh g Joshua ohgbad d Eliezer. Sh g Eliezer ohgbad d Jorim. Sh g Jorim ohgbad d Matthat. Sh g Matthat ohgbad d Levi. 30 Sh g Levi ohgbad d Simeon. Sh g Simeon ohgbad d Judah. Sh g Judah ohgbad d Joseph. Sh g Joseph ohgbad d Jonam. Sh g Jonam ohgbad d Eliakim. 31 Sh g Eliakim ohgbad d Melea. Sh g Melea ohgbad d Menna. Sh g Menna ohgbad d Mattatha. Sh g Mattatha ohgbad d Nathan. Sh g Nathan ohgbad d David. 32 Sh g David ohgbad d Jesse. Sh g Jesse ohgbad d Obed. Sh g Obed ohgbad d Boaz. Sh g Boaz ohgbad d Shela. Sh g Shela ohgbad d Nashon. 33 Sh g Nashon ohgbad d Amminadab. Sh g Amminadab ohgbad d Admin. Sh g Admin ohgbad d Arni. Sh g Arni ohgbad d Hezron. Sh g Hezron ohgbad d Perez. Sh g Perez ohgbad d Judah. 34 Sh g Judah ohgbad d Jacob. Sh g Jacob ohgbad d Isaac. Sh g Isaac ohgbad d Abraham. Sh g Abraham ohgbad d Terah. Sh g Terah ohgbad d Nahor. 35 Sh g Nahor ohgbad d Serug. Sh g Serug ohgbad d Reu. Sh g Reu ohgbad d Peleg. Sh g Peleg ohgbad d Eber. Sh g Eber ohgbad d Shelah. 36 Sh g Shelah ohgbad d Cainan. Sh g Cainan ohgbad d Arphaxad. Sh g Arphaxad ohgbad d Shem. Sh g Shem ohgbad d Noah. Sh g Noah ohgbad d Lamec. 37 Sh g Lamec ohgbad d Methusela. Sh g Methusela ohgbad d Enoc. Sh g Enoc ohgbad d Jared. Sh g Jared ohgbad d Mahalaleel. Sh g Mahalaleel ohgbad d Cainan. 38 Sh g Cainan ohgbad d Enos. Sh g Enos ohgbad d Seth. Sh g Seth ohgbad d Adam. Sh g Adambad d amjedkamaj g Jiosh.

Luke 4

1 Jesus atsh gm hu hih ab amjed g Jordan akimel matsh hebai e pahl wako. Kush g Hekia S-ap'ekam Gewkthag ab mahkch g si ge'e gewkthag ch hab ahg mat gm hu wo hih am tohono jewed wui. 2 Kush am ha'ichugkahim gi'ikko wehst-mahm tash ab. Sh heg oitham g jijawul ha-ge'ejig am chum s-wuimk pi ap'ekam ch ed. Jesus ash pi ha'ichu ko'a heg oitham ch hekaj bihugim. 3 Sh g ge Jiawul ab wui hab kaij, “Bap chum e elith map d Jiosh alithag. Pegih, ab g hig chehani ihtha hothai mat wo e pahnch naptki pi bihugim.” 4 Kush hab kaij g Jesus, “Pi ant hab wo juh. An o hab chu'ig Jiosh o'ohana ed: Jiosh ne'oki o ba'ich d i si ha'ichu mo hi g ha'ichu hugi. Kut g o'othham hemho ab wo wa s-wohog elithath.” 5 Neh, tsh g Jiawul am hahawa sha'i si s-hohtam wuhpuij tahgio wehs i mahsith g kokownaltalig ith thahm jewed 6 k ab wui hab ep kaij, “Wehs o ab ni-mahks ihtha gewkthag ch kaisthag ch d ni-eniga mant wo wa mah mani hedai hab i elith. 7 Kunt wehs ab wo m-mah mapt ab ni-wui wo i gehsh k ab wo has ni-el.” 8 Kush hab kaij g Jesus, “Pi ant hab wo juh. An o hab chu'ig Jiosh o'ohana ed: Heg amt wa'i Jiosh ab wui wo i gehsh k ab wo ihmath ch heg ab wo wa'i s-wohog elithath.” 9 Kutsh am hahawa wuhpuij tahgio i mahsith hegai ge'e cheopi mo am kehk Jerusalem t ab k hab ahg, “Maptp d wo Jiosh alithagk, pegih, am g i thah'i amjed mo gn hu si uhgk kihtas. 10 No hig pi an hab chu'ig Jiosh o'ohana ed: Jiosh at ab wo ha cheha g mu'i anghil mat wo m-nuhkuth. 11 Kut an hu wo si m-u'ukchith mapt nih g sha'i e-tahtad ab hu wo shul hohothai t ab.” 12 Sh hab kaij g Jesus ab wui, “Pi ant wo pip'ich g Jiosh. An o hab chu'ig o'ohanaj ed: Pi g wo sha'i pip'ichuthath g e-kownalig Jiosh.” 13 Kush g Jiawul am hahawa sha thagito g Jesus am i wehs nahnko masma chum s-wuimkk pi ap'ekam ch ed. 14 Tsh gm hu hahawa hih g Jesus Galilee chekshani wui. Sh g Hekia S-ap'ekam Gewkthag si ge'e mahkch g gewkthag. Tsh gm hu a'ai s-e mai g ha'ichu ahga ab amjed. 15 Kush am ha mashcham ha e'eda g ha-chechopi. Sh wehsijj ab si has elith g hemajkam. 16 Kush am him k am hekith. Tsh gm hu hih g Jesus Nazareth kihhim wui mash wa am d si kihkam. Tsh g shahwai am i e ai. Kutsh am i e chehm g hemajkam cheopi ch ed nash pi eda e mihshmath. Tsh am jiwia g Jesus k am thahiwua hab masma mash wa chum hekith am hab e junihim. Kumtsh am hiwigi. Tsh am kekiwua matsh wo ne'okchul g Jiosh heki hu o'ohana. 17 Kumtsh ab hema mah g holiwk o'ohana. Sh d o'ohanaj g Isaiabad. Tsh an ne'okchul mo an hab chu'ig matsh g Jiosh si Kehsha hab wo chei: 18 Jiosh at am i ni-kei mant am wo ha ahgithahith g sho'igkam g s-kehg ha'ichu ahgaj. K heg hekaj am ni-wehmaj g Hekia S-ap'ekam Gewkthag ch ab ni-mahkch g si ge'e gewkthag. K ab ni-chehani g Jiosh mant am wo ha ahgithahith g tho'ibiathag hegam mo ha'ichukaj e wupulshch ch wo ha nench g pi neneatham k ab wo i ha wuwhas hegam mo ha'ichukaj e kudut 19 k wo ahgachug mat e ai mat g Jiosh wo ha tho'ibia g e-hemajkamga. 20 Tsh g Jesus ab i holiwkai g o'ohana k ab uhpam mah g nuhkuththam k am hahawa thahiwua mat ha'ichu hab wo chei. Sh wehsijj ab si kaiham mat has wo chei. 21 Kutsh am i neok k hab kaij ab ha wui, “Neh, hemu at e ai. Ni ahni hab wua ihtha mant am ne'okchul em-wehhejed.” 22 Tsh wehsijj ab si has i el no pi si s-ap neok k wabshaba hab kaij, “Aha no hig pi woho d Josephbad alithag?” 23 Sh hab kaij g Jesus, “No hig pi woho mamt ab ni-wui hab wo chei hegai hab ha-che'ithag mo hab chu'ig, Am g i e maskogith maptp d ge mahkai, k hab ep wo chei, Ia g hu hig hab ep juhni g s-hasig ha'ichu e-kih am mapsh has masma am hab ge junihim Capernaum kihhim t am.” 24 Sh hab ep kaij g Jesus. “Mo wa woho mam pi ab hu has elith g Jiosh ha'ichu i tashogiththam amai mo hebai d i si kihkam. 25 Elijabad wehm o'othham ash wa hab masma pi ab hu has elith. Tsh heg hekaj pi am hu hema i wehmt matsh eda pi ha juh waik eda hugkam a'ahith ab. Tsh g bihugig i gei. Mu'ij ash g hehe'ejel wi'ikam u'uwi amai. 26 Tsh wabshaba g Jiosh am cheha g Elijabad matsh am wo hih Seraphath kihhim wui am Sidon jewed ch ed k am wo hema i wehmt g hejel wi'ikam uwi amai. 27 Kush mu'i kok'o g Tutuligo heg hekaj pi ha thoththakam mumkithag mo hab e a'aga ‘leprosy’. Tsh eda pi hema sha'i ha thoaj hegai kelibad Jiosh ha'ichu i tashogiththam mash hab chehgig Elisha. Sh hema heg hekaj mumku g gawul mahs o'othham ch hab chehgig Naaman ch am kih Syria jewed ch ed. Kutsh heg wa'i thoaj g Elishabad.” 28 Tsh wehsijj hegam mash am ha'ichug cheopi ch ed si babgat am i kaiok ihtha 29 k atsh gam si ne'iopa k am i chewaim g Jesus gm hu jegko. K eda g Nazareth an kehk kawulk t ab. Kutsh am i bei mo am hu hebai ge uhgk i koa g kawulk hab chum ahgk mat amjed wo i tha'ich. 30 Tsh wabshaba g Jesus am wabsh ha shahgith wuhshani k gm hu hih. 31 Tsh gm hu hahawa hih g Jesus Capernaum wui heg eda chekshani k am ha mashcha g hemajkam cheopi ch ed mo am d i ha-mihshmetha tash. 32 Kutsh wehsijj si has i el kaiok mo has masma ha mashcham no pi si s-e mamachim neok. 33 Sh am hema thaha mo g jiawul an u'ukch. Kush si s-kaitham hihnk ch hab kaij, 34 “Gam g hu hihm ahpi Jesus map ab Nazareth t ab d kihkam. A napt hab ahgk ia jiwia mapt wo t-koktha. S-mahch ani map hedai wud. Thap Jiosh si hekia s-ap'ekam kehsha.” 35 Tsh g Jesus ab si chehmo g jiawul k hab kaij, “Pi g shahmuni k ab i wuhshani ith amjed o'othham.” Tsh g jiawul am si wua hegai o'othham wehsijj ha tahgio k ab i wuhsh amjed k pi sha'i ko'okam has juh. 36 Kutsh wehsijj ab si has i el g Jesus k hab kaij ab a'ai e wui, “Sha'i si s-gewkthag g ne'okij. Ab o chehani g jijawul mat ab wo i wuwha. K wa woho hab e wua.” 37 Kutsh wehsko e kah ihtha anai heg oithk jejewed. 38 Tsh amjed gm hu hih g Jesus heg kih wui mo hab chehgig Simon. Sh eda g hohnigaj je'e ihtha si mumku k ch s-toni iajithch. Kumsh am ahgith g Jesus ab amjed. 39 Tsh am him k am i kekiwua heg wo'ikud hugith an k am e ho'ige'ithahu. Tsh am ha hekaj ap'et k am i wamig k ha hihithol. 40 Tsh gm hu hud g tash. Tsh wehsijj hegam mo g ha-naipijju kok'o g nahnko mahs mumkithagkaj am ha u'apa Jesus wui. Kut wehsijj ab i ha tahtmahim k ha thothaj. 41 Tsh mu'i ab wui i hihi hegam mo g jijawul an ha u'ukch. Sh ihtham jijawul si hihnk ch hab kaij, “Ahpi ap d Jiosh alithag.” Kush ab si s-ha keh'ith g Jesus ch gm hu i ha wuwhasith ch pi ha hiwgith mas am hu has wo kaijjith no pi s-mahch ihtham mo heg d Jiosh si Kehsha. 42 Sh am hu hebai wabsh i si'alim, tsh g Jesus gm hu jegko i wuhsh. Tsh am i gahghi g hemajkam k am i chehg k chum pi hiwigi mat wo hih ab ha amjed. 43 Kush wabshaba hab kaij ab ha wui, “Hemho wa ant am wo i ahgahi g s-kehg ha'ichu ahga ab amjed g Jiosh kownaltalig an a'ai kihhim ch ed hab wa ehp nat pi hab ahgk i ni-kei g Jiosh.” 44 Tsh wa woho am i ha mihshmethahi wehsko ha-chechopi ed amai Galilee chekshani ch ed.

Luke 5

1 Sh am hu hebai g Jesus an kehk mo an i koa hegai al kahchki mo hab chehgig Galilee Kahchki. Kutsh g hemajkam ab wabsh i shodbinithahi s-kaimkch g Jiosh ha'ichu ahga. 2 Sh neith mo gohk wapalko am wupulshpi shuhthagi ch ed. Tsh g enigakam am ha thagito k gd hu ha wapkon g e-chuchagia. 3 Kutsh am i chesh g Jesus hema ha eda ihtham wapalko. Sh heg d Simon eniga. Sh hab ahg matsh am wo sha'i nu'ichkwua shuhthagi ch ed. Tsh g Simon hab juh. Tsh ab i thahiwua g Jesus wahlko ch ed k am ha mashcha g hemajkam. 4 Tsh am i ha'asa ha'ichu ha ahgith k hab ahg ihtha Simon mat am wo i himch g e-wahlko mo am s-juhk g shuhthagi k am wo i huduni g e-chuchagia ha wehm g e-wehm chikpantham. 5 Sh hab kaij g Simon, “T-mashchamtham, ge att chuhug sha'i si chikpan k pi ha'ichu sha'i bei. P wabshaba am t-ahgith matt am ep wo i huduni g t-chuchagia. Pegih, tt am hab wo t-juh.” 6 Kutsh wa woho am hihim k am i ha huhuds ge e-chuchagia k atsh sha'i si mu'i waptopi ha ui matsh chum alo e wanikumia g ha-chuchagia. 7 Kush am ha'i ep chikpan hema wahlko ch ed. Kumtsh ihtham ab hahawa si ha wai mat am wo i ha wehmt. Tsh wa woho ab i himch g e-wahlko k wehs ha shuhshuth g waptopikaj mat chum alo wachkk g ha-wapalko. 8 Tsh am i nei g Simon mat haschu has i e juh k ab si i gei g e-tohtonkaj Jesus wui k hab wabsh kaij, “Ih, thani wabsh pi ap'ekam o'othham. K pi hab chum mahs maps wo ni-wehmajk ahpi s-ap'ekam ni-kownalig.” 9 Kutsh wehsijj hegam mash wehmaj si e totoths neithch mat has e juh. 10 Ha'i hegam wehmaj chikpantham g Peter ash d James ch John ch ash d a'alithaj hegai mash hab chehgig Zebedee. Sh g Jesus hab kaij ab Simon wui, “Pi g am sha'i has e tahtkkath. I'ajed apt imhab g o'othham an wo ha u'uth ni-wehhejed.” 11 Tsh am wabsh i chum ai g shuhthagi koa ihtham k am i ha wuwhas g wapalko k wehs ha'ichu am wabsh i thagito k gm hu i oi g Jesus. 12 Sh am hu hebai g Jesus am hasko kihhim ch ed oimmed. Kush am hema g o'othham wehsko ma'ishch hegai mumkithag mo g chuhkugaj muhkhim. Tsh am jiwia g Jesus. Kutsh heg am i chehg k ab si kupal i gei wui k hab kaij, “Ab g si i s-ni-ho'ige'ith k i ni-thoajith pej maptp wo tatchuath.” 13 Tsh g Jesus ab tahtam k hab kaij, “Am o wa s-ap'e. Thoajini.” Tsh am ha hekaj i thoa. 14 Tsh g Jesus ab chehani k hab kaij, “Pi g am hedai ahgith ab amjed ihtha k wabshaba am ha hekaj wo hih pahl wui. T am wo m-chechga k wo wohokamch mapt thoa. Pt am hab haha wo juh hegai iagchulitha mo wa g Jiosh em-chehani Mosesbad o'ohana ed. T hab wo s-mahchk g hemajkam mapt woho thoa.” 15 Tsh amjed gm hu hih hegai o'othham. Kutsh wehsko i e ahgahi ihtha matsh g Jesus hab juh. Tsh hekaj mu'i hemajkam am wui hihi mat wo kah g ha'ichu ahgaj k wo e thothaj. 16 Tsh g Jesus am wo ha mihshmath k wo ha thothajith k amjed gm hu hejelko wo him k wo e ho'ige'ithahu. 17 Sh am hu hebai ehp mash g Jesus am ha mashcham. Sh am ha'i thadha g chehanig ha mashchamtham ch hegam mo si oith g chehanig ch hab e a'aga Palasi. Ihtham atsh ga hu a'aijed am thatha ab amjed g Galilee chekshani ch Judea chekshani ch ab Jerusalem kihhim t amjed. Tsh g Jiosh ab si mah g gewkthag g Jesus mat wo ha thothaj g kok'otham. 18 Tsh am ha'i thatha g chechoj hema u'athch g pi himithkam. Ith ash ab wabsh i s-moik ch am wo'o e-wahkus ed. 19 Kush am i chum s-wahkithamk kih ch ed matsh wo chehgi g Jesus ab si hiwigch mat wo thoaj. Sh wabshaba sha'i si s-hemajkamag. Kutsh pi has masma am hu wo i e wahki. Tsh heg hekaj gn hu hahawa i cheshaj kih thahm k am ge maggad g kih ma'ishpadag k amjed ab i huduni g wo'ikudaj am ha shahgith g hemajkam k am woi mash am kehk g Jesus. 20 Tsh am i nei g Jesus moki ab si hiwig ihtham k hab kaij ab wui ihtha o'othham, “Ni-nawoj, ab ani s-m-ho'ige'ith ch gm hu hab i juh g pi ap m-chu'ichig.” 21 Kush hegam chehanig ha mashchamtham ch Palasi wabsh hejel hab e ahg, “Ih, sha'i si pi ap neok ihtha o'othham hab masma e wepogithch g Jiosh. Heg at wa'i Jiosh wo e nako mat gm hu hab wo i juh g pi ap ha-chu'ichig.” 22 Sh g Jesus s-mahch mo haschu am oithahim ch hab kaij ab ha wui, “Pi g am wo sha'i oithahim manis pi woho edgith g gewkthag mant gm hu hab wo i juh g pi ap ha-chu'ichig. 23 Bam elith mo s-pehegim hab e kaij mat gm hu hab i e juh g pi ap chu'ichigaj no ge hedai s-mahch mas s-wohom hab e juh. 24 Pegih, nt wo em-chehgi mani woho ge gewkthag ch hab wua mani has i kaij ahni Jiosh si Kehsha.” Neh, bash kaij ch hab hahawa kaij heg wui pi himithkam, “I g wamig k am beh'i g e-wahkus k hihm am uhpam.” 25 Tsh am ha hekaj i wami hegai o'othham k am bei g e-wahkus k gm hu uhpam hih ab si ihmch g Jiosh. 26 Tsh g hemajkam si has i elith k ab ihm g Jiosh hab kaijch, “Sha'i si s-kehg ha'ichu ach neith ith tashkaj.” 27 Sh hema d lial kowlanttham g kownal wehhejed ch hab chehgig Levi. Tsh g Jesus am cheh. Kush am thaha heg eda kih mo am chikpan. Sh hab kaij g Jesus ab wui, “Oi g i ni-oith.” 28 Tsh g Levi am ha hekaj i wuhshani k am wabsh i thagito wehs ha'ichu k gm hu i oi. 29 Am wa'i mia amjed, tsh g Levi am hab juh g ge'e gegosig am wehhejed g Jesus. Sh am ha'i oiopo g Palasi mash ihtham ha'i d chehanig ha mashchamtham. Sh eda mu'ijj hegam mash am ha wehm e gegosith d lial kowlanttham hab masma mo g Levi. Kush hegam Palasi am ha neith ch hekaj s-ha keh'ith g Jesus chuhchai hab ha ahgch, “Ih, shahchu am ahgch am ha wehm e gegosith ihtham pi ap hemajkam, chum hems am ha wehm g lial kowlanttham?” 31 Sh g Jesus hab kaij ab ha wui, “Ihtham pi ap hemajkam o s-e tho'ibiamk hab masma mat g kok'otham wo s-e thoajitham. Hegam mo hab e elith mo s-ap'e at pi wo tatchua g mahkai. 32 Pi ant hab ahgk ia jiwia manis wo ha tho'ibia hegam mo pi e tho'ibiamk.” 33 Sh ha'i g hemajkam hab kaij ab wui g Jesus, “Neh, mu'ikko o pi e gegosith ch wabsh e ho'ige'ithahun hegam mo ab wecho e mashcham g John ch hegam mo ab ha wecho e mashcham g Palasi. Kuki wabshaba ahpi g m-wohochuththam pi hab e wua.” 34 Sh hab kaij g Jesus ab ha wui, “Nat hig pi wo e gegos g wo ha hohntam naipijju mat eda heg am wo ha wehmajk? 35 T am wo i e ai mat pi am hu wo ha wehmajk. T am hahawa pi wo e gegos. Pegih, bat wo wa e juh ihtham ni-naipijju mant hekith pi ia hu wo ha wehmajk.” 36 Sh am hahawa chum ha tashogith g Jesus mat g mashchamaj pi ap wo wehnath g ha-himthag ash hab kaij, “Pi at hedai g wechij ikuskaj wo shohsho g hekiuchij lihwa mat wo s-e wia nat pi wo i thahiwua k ba'ich wo i wantsh g hekiuchij. T hab wa'ap pi wo ap'et g hekiuchij nat ge wo wepo mahsk g wechij ikus. 37 T pi hedai g wechij nawait am wo toa hekiuchij ha'ichu elithag kokstal ch ed. Tp hab wo sha e juh, t g wechij nawait wo wantsh g ha'ichu elithag. T g nawait wo iawua k g ha'ichu elithag wo e padch. 38 Neh, hemho wa at g wechij nawait am wo e toa wechij ha'ichu elithag kokstal ch ed. 39 “Pi o hedai tatchua mat wo ih g wechij nawait hekith ab i jehkiok g hekiuchij nawait nat pi hab wo chei mo ba'ich i s-ap hab kahk g hekiuchij.”

Luke 6

1 Sh am hu hebai hihim ihtham Jesus ha mihshmetha tash ed. Kush am eshas g pilkani wohg huhugith an. Sh hegam mash am wehmaj g Jesus ab ha wohni g pilkani ch i mohon g e-nohnhoikaj ch ko'a. 2 Sh ha'i g Palasi ha neith ch hab kaij, “Shahchu am ahgch hab wua hegai mo g t-chehanig pi t-hiwgith machs hab wo wuath mihshmetha tash ed?” 3 Kush hab kaij g Jesus, “Bo wabsh masma hab e wua matsh wa g Davidbad. Pi amtki chegito matsh heg has e juh am i bihugimk. Bo chu'ig g Jiosh o'ohana 4 matsh am i wah ge'e cheopi ch ed k am ui g pahn k huh hegam ha wehm mash am wehmaj. Kush d hegai pahn mo am e to'aw k ch hegam d wa'i ha wuikam mo d papal. T eda hemho wa am hab e juh. K heg hekaj am wa s-ap'e mat huh.” 5 Sh hab hahawa ep kaij g Jesus, “Thani Jiosh si Kehsha ch gewkthag am thahm g mihshmetha tash.” 6 Sh am hu hebai d ep mihshmetha tash. Tsh am i wahp ihtham Jesus hema cheopi ch ed. Kush g Jesus am ha mashcham g hemajkam. Sh am hema thaha g o'othham mash g s-apkojed nowij mahnikodag. 7 Sh am ha'i thadha g chehanig ha mashchamtham ch Palasi ch an wa s-nen'oith nash pi ab ha'ichu s-abchuthamk g Jesus ch hekaj an neith mas wo hi wa ha thoaj mihshmetha tash ch ed. 8 Sh g Jesus s-mahch mo haschu am chegito ch ash hab kaij heg wui mahnikokam, “Kekiwuani k ab i hihm ia hu ha ba'ich g hemajkam.” Tsh ab i kekiwua. 9 Sh g Jesus ab hahawa ha kakke ch hab kaij, “Shahchu am ahgch hab elith mo pi hiwgithas mihshmetha tash ed mamt wo i ha wehmt hegam mo e sho'igchuth? Ab o em-ab mamt wo i ha wehmt g sho'igkam k ep wo ha tho'ibia hegam mat am hu wo e ko'ij. Aha namt wabsh wo ha hiwigi mat wo e ko'ij?” 10 Neh, bash kaij ch an hahawa wehsijj i ha neith k hab hahawa kaij ab wui hegai o'othham, “Ab g si i shelin g e-nowi.” Kutsh am wabsh i chum shelin k am wa'i hekaj ap'et. 11 Tsh hegam haha'ichu wabsh woho'i babgat matsh ha thoaj ha mihshmetha tash ab k am ha hekaj i e wehm a'aga mas has wo juh g Jesus. 12 Tsh am wa'i mia amjed am hu hebai gm hu i chesh g Jesus kawulk thahm k ge chuhug oitham e ho'ige'ithahu Jiosh wui. 13 Kut am i mahsi. Tsh ab hahawa i ha wai hegam mash ab si wecho e mashcham k g gamai gohk am ha ui mat d wo si chuhchaij. 14 Hema hegam ash d Simon. Kutsh heg hab ep chehch Peter mo hab d ahga ‘Hothai.’ Kush hema d Andrew ch d si wehngaj g simon. Kush ha'i d James ch John ch Philip ch Bartholomew 15 ch Matthew ch Thomas. Sh hema d hegai James mash g ohgaj hab chehgig Alphias. Sh hema hab ep chehgig Simon ch d hema hegam mash tatchua mat g Tutuligo hejel wo himchuthath g e-kownaltalig. 16 Sh hema d hegai Judas mash g ohgaj hab chehgig James. Kush hema d Judas Iscariot ch d hegai matsh wa gagda g Jesus. Neh, ihtham gamai gohk ash am d hahawa si chuhchaij g Jesus. 17 tsh ab hahawa i huhud hegam Jesus. Sh mu'i am ep ha'ichug g hemajkam ab amjed g Judea chekshani ch Jerusalem kihhim ch ab amjed g ge shuhthagi hugithag an miabithch g Tyre ch Sidon kihhim. 18 Wehsijj ash s-kaimk g Jesus. Kush ab wui hihim g kok'otham ch hegam mash g jijawul an ha u'ukch. Sh g Jesus ha thothajith ch gm hu hab i ha wua g jijawul. 19 Kush wehsijj ab chum s-tahtmamk g Jesus nash pi g gewkthaj ab wuhshani amjed ch wehs ha thoajith. 20 Tsh g Jesus ab i ha nei hegam mash ab si hiwig k hab kaij: “Mt wo chum si s-ap e tahtkkath ahpim mam ab e sho'igchuth Jiosh wui. Ab at wo i em-wahpki e-kihthag ed. 21 Mt wo chum si s-ap e tahtkkath ahpim mam hemuch chum ha'ichu tatchua. B at wo wa em-mah g Jiosh mam haschu i tatchua. Mt wo chum si s-ap e tahtkkath ahpim mam shoani hemu no pi ab him g tash mamt wo wa si s-hehgigk. 22 T wo s-em-keh'ithath g hemajkam ch wo s-em-ohhoth ch wo s-ko'okam has em-ahgath ch hab wo chei mam d wabsh pi ap'ekam. 23 Mt wabsh wo s-ap e tahtkkath ch wo s-hehgigk ith hekaj. Bash wa masma e sho'igchuth hegam mash d kekelibad Jiosh ha'ichu i tashogiththam ch hekaj bei g Jiosh mahkigdag. T g Jiosh hab wa'ap wo em-mah g ge'e s-ap'ekam mo em-wehhejed an nuhkuth e-kihthag ed. 24 T wabshaba wo si pi ap e tahtkkath hegam mo hemu d s-kakais no pi ab heki hu neith g s-e-hehgig. 25 T wo si pi ap e tahtkkath hegam mo pi ha'ichu tatchua hemuch. Ab o him g tash mat wo pi ha'ichu edgithath. T wo si pi ap e tahtkkath hegam mo s-e tahhathchuth hemuch. Ab o him g tash mat wo shoanith. 26 T wo si pi ap e tahtkkath hegam mo wehs hemajkam ab si has ha elith hemuch. Em-shohshon ash hab masma si s-ap has ha ahg hegam mash hab wabsh s-e junimk mo d Jiosh ha'ichu i tashogiththam. 27 “Nt wo em-ahgi mamt has wo masmak am ha wui. Ab g wabsh wo i si pihk e elithath ha wui g e-obga k wabsh g s-ap ha'ichu hab wo ha juni hegam mo s-em-keh'ith. 28 Ihtham atp hems wo pi kehg neneokath ab em-wui ch wo em-sho'igchuthath. Mt wabshaba wabsh wo si s-hemajimak am ha wui ch wo e ho'ige'ithahu am ha wehhejed. 29 Tp hems s-ko'okam has wo em-juh. Mt wabshaba ab wabsh wo i s-ha ho'ige'el. Tp hems hema ab wo em-shonihi em-kahm ab. Kumt wabsh wo hiwigi mat aigojed ab ep wo em-shonihi. Tp hems hema wo em-wohppo'i g em-lihwa. Kumt g e-kotoni ep wo mah. 30 Tp hems hema ha'ichu wo i em-tai. Kumt wo mah. Kutp hems hema ha'ichu wo bei mo d em-eniga. Kumt pi uhpam wo tai. 31 Bamt wo ha juhkchith g hemajkam mam has i chum ha elith mat hab wo em-juhkchith. 32 “Pi at wo em-mah g s-ap tahhathkam g Jiosh mamtp hegam ab wo wa'i ha tatchuath mo ab uhpam em-tatchua. Chum o hems g pi ap hemajkam ab ha tatchua hegam mo ab uhpam ha tatchua. 33 Pi at wo em-mah g s-ap tahhathkam g Jiosh mamtp hegam wa'i ha wehhejed hab wo juh g s-ap ha'ichu mo s-ap ha'ichu hab em-junith. Chum o hems g pi ap hemajkam hab wa masma hab e wua. 34 Pi at wo em-mah g s-ap tahhathkam g Jiosh mamtp hegam wa'i ha'ichu wo ha hiwigi mam hab ha elith mat wo wa uhpam em-mah. Chum o hems g pi ap hemajkam hab wa'ap a'ai ha'ichu e hiwgith hab e elithch mat ab uhpam ep wo ui ha'akia mat he'ekia ha hiwigi. 35 “Neh, mt ab wo pihk e elithath ha wui g e-obga ch am hab wo ha junithath g s-ap ha'ichu ch wo ha'ichu ha mah mamt pi ab hu uhpam wo ge neithath. Bamt masma am wo e chehgi mam d a'aligaj g Jiosh. T heg mu'i s-kehg ha'ichu ab wo em-mah. Jiosh o hab wa masma s-ha ho'ige'ith g pi ap hemajkam ch hegam mo pi ab hu uhpam ho'ige'elith. 36 Am g hab wo juhkchith g ho'ige'ithadag hab masma mo g em-ohg Jiosh am hab juhkch. 37 “Pi g am hedai s-ko'okam has wo ahgath o ab wo ha mohto'ithath g pi ap'ekam. B at uhpam wo i e nodagi ab em-wui. Gam g hu wabsh wo pi chegito mat hema s-ko'okam has wo em-juh. Kut hab wa masma gm hu wabsh wo pi e chegito mamtp hems hema s-ko'okam has wo juh. 38 Ab g wo ha'ichu ha mahkath. T g Jiosh ab ha'ichu wo em-mahkath. Ab amt ba'ich i ge'e wo bei mamt he'es ab i ha mah no pi g Jiosh ba'ich i s-hemajima matp hems g hemajkam. Ab at wo i e nodagi em-wui mamt has i masma ab wo neithath hema. 39 “Pi at has masma wo em-wanimedath wohokam ch ed hegai mat hedai pi wo mahchk g wohokam. Heg at wo wa wepok matp hems hema g pi neatham ha'i ep wo i ha wanim g pi neneatham. Kutp hems wehsijj am wo i shul hiktani ch ed. 40 S-mahch am mat g ha mashchamtham ha ba'ich wo i chum s-mahchk hegai mo haschu i ha mashcham. E mashchamtham at am hugkam wo chum s-mahchk g e-mashchama am i s-ap nahtok mo hegai mat hedai i ha mashcha. 41 “Pi g am wo si s-nen'oithath g hema chu'ichig. Tp hems ba'ich i ge'ej g hejel em-chu'ichig. T heg wo wa wepok mam g chum ha'ichu ab i s-wuhshthamk wuhij ed mo eda ba'ich i ge'e ha'ichu ab wo'o em-wuhi ed. 42 Tho iattogi mamtp hab wo chei mamt ab wo ha'ichu i wuhshath ha-wuhi ed mo eda ba'ich i ge'e ha'ichu am wo'o em-wuhi ed. Hemho wa amt wehpeg wo i ap'ech g pi e-ap'ethag k haha wo e nako mamt ha'i ep wo i ha wehmt k wo i ap'ech g pi ha-ap'ethag. 43 “Mt wo s-mai mas hedai d s-ap'ekam o'othham hab wa masma mamt wo s-mai mas haschu d s-kehg uhs. S-kehg uhs at s-kehg wo bahithagt ch g pi kehg uhs pi kehg wo bahithagt. 44 Uhs o s-e mahch ab e-bahithag ab. Pi amt ab hu wo ui g suhna ho'i t ab o g uhdwis ab sha'i t ab. 45 K hab wa'ap masma g o'othham matp wo s-ap'ek ch s-kehg ha'ichu hab wo wuath o wo pi ap'ek ch pi kehg ha'ichu hab wo wuath. Matp has i masma ha'ichu chegito g o'othham, t hab masma wo neokath.” 46 Sh hab ep kaij g Jesus, “Ha'ijj am chum hekith hab ni-a'aga ‘ni-kownalig’ ch eda pi am hu hab wua mani haschu em-ahgith. 47 Ab g wo ni-hiwgath ch ab wo s-wohog elithath g ha'ichu ni-ahga. T hab wo s-ap'ek g em-thoakag. 48 Ith at heg wo wa wepok matp hems hema wo s-wihnam shondath g e-kihta. T hab pi wo i gei mat hekith wo hewed k juh k wo s-gewkam mel g shuhthagi. Pegih, mt hab wa masma s-wihnam wo gegokkath mo ihtha kih mamtp ab wo s-ni-wohog elithath. 49 “T wabshaba pi wo ap'ek g em-thoakag mamtp pi ab hu wo wohog ni-elithath. Ith at heg wo wa wepok matp hems hema pi wihnam wo shondath g e-kihta. T ab wo mel g shuhthagi. T ha hekaj wo i gei g kihj k am wabsh wo i e padch. Pegih, t hab wa masma wo i e padch g em-thoakag mamtp pi ab hu wo wohog ni-elithath.”

Luke 7

1 Neh, tsh am i ha'asa ha'ichu ha mashcha g Jesus amai k gm hu hahawa hih Capernaum wui. Kutsh g chuhchaij am wehmaj hihi. 2 Kush amai am hema d shonthal ha-ge'ejig ch ab d ha-kehsha Rome t amjed ch kah ab amjed g Jesus. Sh ith pionag hema muhkhim. Kush ab si tatchua g e-pionag ch hekaj ab ha tahni g Tutuligo ha-ge'egedga mat ab wo i wai g Jesus. T wo thoaj g piongaj. 4 Tsh hegam am thatha k ab si e sho'igch Jesus wui k hab kaij, “Am g i wehmt ihtha o'othham. 5 Ab o si t-tatchua ahchim Tutuligo ch am hema i kei g cheopi t-wehhejed.” 6 Kutsh gm hu ha oi g Jesus k am i aihi g kihj hegai shonthal ha-ge'ejig. Tsh heg am ha'i ha ahgi g e-naipijju matsh am wo hihim k wo ha'ichu ahgi g Jesus. Kutsh am wui hihim k hab kaij, “Bo kaij g t-nawoj, ‘Pi ani am hu hugkam d ha'ichu maps am wo i wah ni-kih ed 7 o manis hejel am wo hih m-wui. Am apt hab wabsh wo chea. T wo thoa g ni-pionag. 8 S-amichuth ani g m-gewkthag no pi g ni-ge'ejig gewkthag am ni-thahm. Ni ahni hab wa'ap gewkthag am ha thahm g ni-shonthalig ch ni-pionag. T hab wo juh mant haschu ab wo i ha chea. Ni heg hekaj s-mahch mat am hab wo e juh mapt haschu am hab wabsh wo i chei.’ Neh, bo kaij.” 9 Tsh g Jesus ab si has i el ab kaiok ihtha. Sh mu'i hemajkam an oithahim. Kush ab ha wui hab kaij, “Pi ani koi hebai sha'i neith mas hema ha'as ge'e ab si ni-hiwig, chum hems am ha shahgith g Tutuligo,” k am hahawa ha chea hegam mat ab thatha mat g m hu uhpam wo hihi. 10 Tsh am uhpam thatha k chum nei. Kutsh thoa g piongaj g shonthal ha-ge'ejig. 11 Kush am ba'ich d i tash. Tsh gm hu hihi hegam Jesus heg wui kihhim mash d Nain. Kutsh mu'i hemajkam ha oi. 12 Tsh am wabsh i chum thatha mo ab kihjeg g kolhai an wehgaj g kihhim. Sh ab g muhki e u'a. Sh g je'ej g muhki d hejel wi'ikam. K ith d si hemako madaj. Kush mu'i ha wehmaj g hemajkam ab kihhim t amjed. 13 Kutsh am i nei g Jesus ihtha uwi k si pi ap e taht wehhejed k hab wabsh kaij ab wui, “Pi g am shoakath,” 14 k ch amjed am him k an taht hegai mo an ab wo'ichug g muhki. Tsh ha hekaj gegokiwua hegam mo u'a. Kush hab hahawa kaij g Jesus, “Wechij o'othham, ab g i wamigi.” 15 Tsh am ha hekaj i thahiwua ihtha o'othham k ab ha hekaj wabsh neok. Tsh g Jesus am wamgith k hab ah mat gm hu wo i oi g e-je'e. 16 Kutsh wehsijj si e totothsith k ab si ihm g Jiosh ch hab kaij, “Ia atki hema jiwia t-shahgith g Jiosh ha'ichu i tashogiththam,” ch ha'i hab ep kaij, “Jiosh atki ia jiwia t-shahgith mat wo t-tho'ibia mattp hedai d hemajkamgaj.” 17 Kutsh ihtha mat haschu has e juh an wehsko e a'aga Judea chekshani oithk ch an wehgaj. 18 Sh eda gd hu e kuhpach hegai John mash am ha pahl wapkonahim g hemajkam. Kush am ahgith hegam mash ab si wecho e mashchamahim mash haschu has junihim g Jesus. Tsh heg gohk ab i ha waith 19 k am ha cheha mat am wo hihim k ab wo kakke g Jesus mas wa woho d Jiosh si Kehsha aha nat ab hahawa hema wo i wuhsh mat d wo hegaik? 20 Tsh ihtham am thatha Jesus wui k hab kaij, “Ab o t-chehani g John matt ab wo m-kakke maps woho d Jiosh si Kehsha aha nat ab hahawa hema wo i wuhsh mat d wo hegaik?” 21 Tsh g Jesus heg i tashkaj mu'i ha thothaj g kok'otham k mu'i ha wuwhas g jijawul ab ha amjed hegam mo an ha u'ukch k ha-nench g pi neneatham. Kush heg wehs neith ihtham John chuhchai. 22 Sh hab hahawa ha ahg g Jesus, “Am g uhpam wo hihim k wo ahgi g John mam haschu i neith ch haschu i kah. Ha ani thothajith g pi ha thothajitham kok'otham ch pi neneatham ch pi hihimithkam ch pi chechkaithkam ch ha chechegitoichuth g ko'i ch am ha ahgith g sho'igkam mat g Jiosh wo ha tho'ibia. 23 T g Jiosh ab wo s-em-ho'ige'ithath mamtp hedai ab wabsh wo ni-hiwgath ch pi wo ni-thagito.” 24 Tsh am i gm hu hihi hegam John chuhchai. Sh g Jesus am ha'ichu ha ahgith g hemajkam ab amjed g John ch hab kaij, “Neh, am amt wa hihim k ab kaiha g John. K wa eda am oimmelhim pi apkokam jewed ch ed. Kumt pi woho am hu wo i wuwha wui matp d wabsh s-pehegi o'othham ch am gawul wo wuath g e-ne'oki. Pi o an a'ai e wanchkwua g John. 25 Kumt pi hema s-neitham mo s-kakaisim e enigadathch. Hegam mo hab masma e enigadathch o si s-kakaisim kih. 26 Neh, heg amt s-kaim Jiosh ha'ichu i tashogiththam k heg wa woho kah. K g John am ba'ich ha'ichu k ed ep kehk 27 no pi d hegai mo ab amjed an o'ohanas mo g Jiosh hab ahg ch hab kaij: Am ant hema wo i maskogi mat am wo i ha ap'ech g hemajkam am wehhejed g si ni-Kehsha jiwhiathag am jewed thahm. Neh, bash kaij g Jiosh. 28 “Kunt wo em-ahgi mo g John wehs hemajkam ha ba'ich d i si ha'ichu am hugkam mat am i wuhsh g Jiosh kownaltalig ith thahm jewed. T hahawa chum hems g si pi ha'ichukam hemajkam am Jiosh kownaltalig ed ba'ich d wo i s-has ha'ichuk mo hegai John.” 29 Neh, bash kaij g Jesus. Kutsh wehs ab kaiha hegam mat ab s-wohog el g Jiosh k am e pahl wapko ab John wecho, chum hems hegam mo g lial ha kowlant g kownal wehhejed. 30 Tsh wabshaba pi ab hu wohog el g Jiosh tatchui pi e pahl wapkonk hegam mo d Palasi ch hegam mo d chehanig ha mashchamtham. 31 Kush heg hekaj hab kaij g Jesus, “Bo masma pi ta wepoma mo g a'al hegam mat pi ab hu wohog el g John k pi ab hu ni-bei. 32 Neh, tp hems am wo chichwith g a'al ch hab wo chei, ‘Am att em-gehgeth g e hohontam ha-piastakaj. Kumt pi e waila. Am att nei g muhki ne'i. Kumt pi sha'i shoshani.’ 33 “Ith ani hab ahg mat g John ab i wuhshani k pi ih'e g nawait ch mu'ikko pi e gegosith ab e ho'ige'ithahunch Jiosh wui. K mu'ijj hab kaij mo g jiawul an u'ukch g chegitoithaj. 34 Nt ahni ia jiwia Jiosh si Kehsha k wabsh chum hedai ha wehm ni-gegosith. K mu'ijj hab kaij mani s-banma ch s-i'ithag ch d ha-nawoj g s-ta keke'ithamakam lial ha kowlanttham ch hegam mo pi ap oith g t-shohshon ha-chehanig. Neh, bo masma pi ta wepoma 35 ch im hu hab wabsh i juh g Jiosh amichuthadag. K wabshaba hegam mo ab s-wohochuth am chehgithch mo d wohokam.” 36 Tsh hema g Palasi ab i wai g Jesus mat am wo wehmaj e gegos. Tsh am hih g Jesus kihj wui k am i thahiwua mat wo e gegos. 37 Kush eda am hema d uwi heg eda kihhim ch si pi ap d hemajkam. Sh am thak ch e gegosith g Jesus. 38 Tsh ith am jiwia k am wehgaj i kekiwua am u'athch g s-ap uhw shuhthagi al s-toa hothai ha'a ch ed. Sh eda am e shelinch g Jesus mo hab masma thadhaiwup ch e gegosith. K si shoak ihtha uwi. Kush g oh'ogaj an iawua tahtadaj an. Kutsh an i thagio g che'echew e-mo'okaj k an si ha chintath k an hahawa iawua ga s-ap uhw shuhthagi tahtadaj ab. 39 Kush hab wabsh hejel e ahg hegai kihkam, “T wo chum s-mahchk mo si pi ap d uwi ihtha matp woho d wo Jiosh ha'ichu i tashogiththamk ch pi wo hiwigi mas an wo taht.” 40 Sh g Jesus wabsh s-mahch mo hab masma oithahim ch ab wui hab kaij, “Simon, ab ant wo ha'ichu m-ahgi.” Sh heg hab kaij, “Oi g ab ni-ahgith, ha mashchamtham.” 41 Kutsh g Jesus am ahgi ihtha ha'ichu wepogitha e-ahga k hab kaij, “Matp hema ab wo e wulshch g hetasp siant pihsh heg ab mo g lial ha hiwgith ch hema ab ab wo e wulshch g hetaspo wehst-mahm pihsh 42 k pi wo e nako mat wo uhpam namkith. Kut im hu hab wo i juh g ha-wulshpadag. Neh, t hedai ihtham ba'ich ab wo i si tatchua?” 43 Sh hab kaij g Simon, “Na'as hegai mamt ba'ich i mu'i im hu hab i juh g wulshpadaj.” Sh hab kaij g Jesus, “Pegih, 44 ab g neith ihtha uwi. Ia ant jiwia m-kih am. Kupt pi ni-mah g shuhthagi mant wo i wapko g ni-tahtad. T wabshaba ihtha am i wapko g ni-tahtad g e-oh'ogkaj k am i ha thagio g che'echew e-mo'okaj. 45 Pi apt ab hu ni-chintath mant ia jiwia. K wabshaba ith g ni-tahtad chintath. 46 Pi apt ab hu i huhu g ni-mo'o. T wabshaba ith g uhw shuhthagi an iawua ni-tahtad an. 47 Neh, nt hab wo chei mat am ge'e chehgi mo ab si ni-tatchua. T heg am wohokamch mat g mu'i pi ap chu'ichigaj im hu hab i e juh. Hegai mam hedai pi sha'i ge'e im hu hab i wua g ha-chu'ichig o pi sha'i ge'e am hu chehgith g e-tatchuithag.” 48 Sh hab hahawa kaij g Jesus heg wui uwi, “Im ant hu hab i juh g pi ap m-chu'ichig.” 49 K hegam ha'i mo ab thadha mihsa wui hab kaij ab a'ai e wui, “K hedai e elith ihtha ch im hu hab i chum wua g pi ap ha-chu'ichig?” 50 Sh hab kaij g Jesus ith wui uwi, “Ab ap ni-hiwig ch hekaj e tho'ibia. Gamai g s-ap e tahtk hihm.”

Luke 8

1 Sh amjed am hu hebai, tsh g Jesus am hih ha oithk g kihhim k am ahgahim g s-kehg ha'ichu ahga ab amjed g Jiosh kownaltalig. Kush hegam gamai gohk chuhchaij am wehmaj. 2 Kutsh mu'i am ha oi g u'uwi. Ihtham atsh wa ha thothaj g Jesus. Kush am ha'ichukaj i ha wehmt. Hema ihtham ash d Mary Magdalene. Ith atsh g Jesus ab amjed i ha wuwhas g wewa'ak jijawul. 3 Kush hema d Joanna. Sh g wehmaj kihkam ihtha hab chehgig Chusa ch d ha'ichu am kownal wecho. Kush hema ehp d Susanna. Tsh ihtham u'uwi wo em-nolawt hegai mash haschu i tatchua hegam Jesus. 4 Kutsh mu'i hemajkam ab hihi Jesus wui ga hu a'ai kihhim amjed. Tsh am ha ahgi g Jesus ihtha wepogitha ahga: 5 “Nt wo ha'ichu em-mashcha ab amjed g Jiosh kownaltalig wepogithch mat hema an ei g ha'ichu e-kaichka e-oithag ed. T ha'i gn hu wabsh shul wohg ch ed. T g hemajkam am keish k g u'uwhig am huh. 6 T ha'i gn hu shul mo pi ge'ej g jewed ab waw t ab. T ab i chum wuhsh g e'es k wabsh gaksh no pi pi wadag amai. 7 T ha'i gn hu shul g kaichkaj sha'i ch ed. T heg am wabsh wehnathk i ge'ege k ha koktha g esha. 8 T wabshaba hegam mat an s-ap shul moihuna ch ed an wuhshani k siant ab kait hehemako.” Sh hab hahawa ep kaij g Jesus, “Neh, am g wo i a'amichuth ahpim mam kah ihtha.” 9 Kush g Jesus chuhchai ab kakke mas has d ahga ihtha wepogitha ahga. 10 Sh hab kaij g Jesus, “Nt wo em-ahgi mo has d ahga no pi g Jiosh em-hiwgith mamt wo s-mai hegai mo haschu hemu am maskogith ab amjed g e-kownaltalig. Ni wabshaba heg wa'i ha ahgith ha'ichu wepogitha ahga hegam mo pi ab hu wohochuthamk. T hab pi wo amich ha'ichu ab amjed g Jiosh kownaltalig, chum as wo ha'ichu neith k wo ha'ichu kah.” 11 Kush hab ep kaij g Jesus, “Neh, nt wo em-tashogi ihtha ha'ichu wepogitha ni-ahga. Jiosh ha'ichu ahga o wepogithas mo g ha'ichu kai ch am wo e gantad hemajkam ha-i'ibthag ed. 12 K eda ha'i g ha-i'ibthag s-kawpk hab masma mo g wohg. K g Jiawul am wabsh s-pehegi ha wohppo'ith hegai mo haschu i kah. T hab pi ab hu wo wohoch g Jiosh ha'ichu ahga k pi wo e tho'ibia. 13 “K ha'i g ha-i'ibthag hab sha masma mo hebai pi ge'ej g jewed ab waw t ab. T ihtham wo si s-hohho'i g Jiosh ha'ichu ahga ab kaiok k wabshaba pi wihnam ab hu wo bebhe k ch ab hi wa al he'es wo s-wohochuthath. T ab wabsh wo i chum hih g a'appema. T ha hekaj wabsh wo ta'i i shul. 14 “K ha'i g ha-i'ibthag hab sha masma mo hebai s-sha'ig no pi e sha'ijithch heg hekaj kudutadag ch s-kaisthag ch s-tahhathkam. Kut pi ha'ichu hab wo juh am Jiosh wehhejed. 15 “K ha'i g ha-i'ibthag s-moik hab masma mo g moihuna. Kut ab wo kaiha g Jiosh ha'ichu ahga k am wo si i nuhkuth e-ihbthag ed k am wo e nako mat am hab ha'ichu wo juh Jiosh wehhejed. 16 “Wohokam o wepogithas mo g lahmpa tonlig. Namt hig wo ehsto g lahmpa ab mehithk aha namt an wo thai mat hebai wo em-tonlithch. Pegih, mt hab wa masma pi wo chum ehsto g wohokam. 17 Wehs at wo s-e mai matp haschu chum e ehstokch. T haschu wo i chum e ma'ishchith wo e chehg k am wo i e wuhshath. 18 “Am g wo s-amichuth mam haschu i kah. Hegam mat s-ap wo hekaj g e-ap'ethag at ba'ich ep wo i nei. T wabshaba hegam mat pi ap wo hekaj wabsh wo heb hu wua.” 19 Tsh am chum thatha g Jesus je'e ch wepngaj. Sh wabshaba si mu'ij g hemajkam an wehgaj. Kutsh pi e nako matsh ab wo miabi. 20 Sh hema hab kaij ab wui g Jesus, “M-je'e ch m-wepnag o am gegok jeg ed s-m-neithamkch.” 21 Sh hab ahg g Jesus, “Neh, ihtham mo ab ni-kaiham ch ab s-wohog elith g Jiosh ha'ichu ahga o heg wa wepo mo d ni-je'e ch ni-wepnag.” 22 Sh am hu hebai hab ha ahg g Jesus g e-chuhchai, “Am att hu hig shuhthagi aigojed wo i chehchsh.” Tsh wa woho am thadhaiwua wahlko ch ed k am gahi i shul. 23 Sh am hebai him g wahlko shuhthagi ch ed. Tsh g Jesus am i wo'iwua k koi. Kutsh g hewel ab haha wabsh i meh. Tsh ab i to'otonkai g shuhthagi k am iawua wahlko ch ed mash s-ta ehbitham hab mahs ha wehhejed. 24 Kutsh g chuhchaij am wui thatha g Jesus k am wuhan k hab kaij, “T-mashchamtham, ttki wo t-ko'ij.” Tsh am i wami g Jesus k ab si cheha g hewel ch shuhthagi to'otonk. Tsh am i wehs ha'asa k gm hu wabsh i pi shahmuni. 25 Sh hab hahawa kaij ab ha wui, “Ab g wabsh wo ni-hiwgath.” Kutsh eda si has i elith k si s-ehbeni k ash hab kaij ab a'ai e wui, “Kus hedai wud ihtha o'othham ch ab si chehani g hewel ch to'otonk mat wo ha'asa. K ab s-wohog elith.” 26 Tsh am hihim k gm hu thatha ga hu aigojed g Galilee shuhthagi heg maibithch kihhim mash d Geresa. 27 Kush am hema oimmed g cheoj jeg ed ch am chum kih heg eda kihhim. Sh wabshaba g jijawul an u'ukch g chegitoithaj. Kush gn hu wabsh kih mash an chehchog ch an e hihashp g ko'i. Kutsh ab i hud g Jesus. 28 Tsh ith am chehg k si s-kaitham hihnk ch ab i meh pi ha'ichu enigadathch mash hab wa chu'ig k ab wui i gehsh k si s-kaitham hab kaij, “Jesus, alithaj g si uhgk Jiosh, gam g hu hihm k pi ko'okam has ni-juhni.” 29 Bash kaij nash pi g Jesus ab si ha chehani g jijawul mat ab wo i wuwha amjed. Kush wa eda g jijawul mu'ikko an bebhe ihtha. Kumsh gd hu chum si kukpathch ch g kakhioj ch nohnhoij g e hukshchim wapainomikaj gn hu si wupulshp. Kush wabsh ha wanikumiak g e hukshchim wapainomi. Tsh g jiawul gm hu wo i wushshath tohono jewed ch ed. 30 Sh hab kaij g Jesus ab wui, “Shahp chehgig?” Sh hab kaij, “Bani chehgig Mu'ichu,” nash pi mu'i jijawul an u'ukch. 31 Tsh g jijawul ab si e sho'igch Jesus wui matsh pi am hu wo ha shul Jiawul kih ed. 32 Sh eda mu'i an oiopo g kokji kawulk bahsho ch e gegosith. Sh ihtham jijawul ab si tahni g Jesus matsh am wo ha thagito. Tsh am wo i wahp ha eda ihtham kokji. Tsh am ha hiwigi g Jesus. 33 Tsh ab i wuwha ab amjed g o'othham k am i wahp ha eda g kokji. Kutsh wehsijj ihtham kokji am agshp i wohp k gm hu shul shuhthagi ch ed k wachkk. 34 Tsh hegam mo am ha nuhkuth gm hu uhpam wohp k am ahgahim ihtha kihhim ch ed ch an ha oithk hegam mo an o'oithag. 35 Tsh g hemajkam am himto mat wo nei mat haschu has e juh. Kush ihtha o'othham am thaha Jesus wui ch ab e enigadathch ch wabsh si s-ap ha'ichu chegito. Kutsh wabsh woho'i e totoths. 36 Kush hegam mash neith am ha ahgith mat has masma e thoaj ihtha o'othham. 37 Kush wehsijj ihtham Geresa t am hemajkam ab ahgith g Jesus mat gm hu wo hih ab ha amjed natsh pi sha'i si s-ehbeni. Tsh wa woho hab e juh k an thahiwua wahlko ch ed mat gm hu wo hih. 38 Kutsh hegai o'othham matsh ab i wuwha g jijawul amjed ab si e sho'igch Jesus wui k hab kaij, “Nt wo m-oi.” K wabshaba g Jesus hab ahg, 39 “Uhpam g hihm k am wo i ha ahgithahi mat haschu hab juh g Jiosh m-wehhejed.” Tsh wa woho hab e juh k am i ahgahi kihhim oithk matsh haschu si ge'e hab juh g Jesus am wehhejed. 40 Tsh ga hu aigojed hahawa ep thatha hegam Jesus. Kush mu'i hemajkam am nenida ch si s-ap i e taht k ab i nei. 41 Tsh am hema jiwia g o'othham k hab chehgig Jairus ch wabsh d ha'ichu am cheopi ch ed. Sh ith chehiaga muhkhim ch d gamai gohk a'ahithag. Kutsh ab wecho si i gei g Jesus k ab ahgith matsh gm hu wo oi kihj wui. Tsh gm hu chum wehmaj hih g Jesus. Tsh g hemajkam am wabsh kawod him k gn hu wabsh i biha. 43 Kush eda am hema ha'ichug g uwi ch gamai gohk a'ahithag mumku heg hekaj mo g eh'edaj jegwoni. Tsh pi hedai e nako mas wo thoaj, chum as wehs hugio g e-lialiga ha namkithch g mamakai. 44 Kutsh ab i hih Jesus wehgaj k an taht g kahbaj hugithag. Kutsh am wabsh si ha'asa g eh'ed jegwoni. 45 Sh hab kaij g Jesus, “Thoht an ni-taht.” Tsh pi hedai am hu e ah. Sh hab hahawa kaij g Peter, “T-mashchamtham, an o m-bihagch g hemajkam ch ab m-shodbinch.” 46 Sh wabshaba hab kaij g Jesus, “Ab at hema ni-taht. Ni s-mahch nat pi ab i wuhsh g gewkthag ab ni-amjed.” 47 Tsh am i nei hegai uwi mamt s-mai k ab hahawa i him k si gigiwek ch ab i gei Jesus wecho amai hemajkam ha tahgio k ash am ahgith g Jesus mat haschu ahgk ab taht k has masma ha hekaj thoa. 48 Sh hab kaij g Jesus ab wui, “Pegih, ni-uwiga, am apt wa thoa napt pi ab i ni-hiw. Gamai g s-ap e tahtk hihm k am wabsh s-thoakath.” 49 Kush hab wabsh kia kaij ihtha g Jesus. Tsh ab hema mel ab kihj amjed g Jairus k ash hab kaij, “Muh at g m-chehiaga. Kupt pi am hu ep wo kudu g ha mashchamtham.” 50 Kutsh kah g Jesus k hab kaij ab wui g Jairus, “Pi g am sha'i e tothsith. Ab g wabsh i ni-hiwig. Kut wabsh wo e chegito.” 51 Kutsh gd hu thatha kihj am. Tsh hegam wa'i ha ui g Jesus Peter ch James ch John ch hegam jehjij g chehia. Tsh am e wehm i wahp. 52 Kush eda wehsijj shoani ch pi ap e tahtk wehhejed g chehia. Kush hab kaij g Jesus, “Pi g am wo shoanith. Heg o wa wepo ni-wehhejed mo wabsh kohsh g chehia.” 53 Kush wabsh has ahg hegam nash pi si s-mahch mat muh. 54 Tsh wabshaba g Jesus ab bei nowij ab k ab si neok wui ch hab kaij, “I wamigi, chehia.” 55 Kutsh uhpam e chegito k ha hekaj i wami. Sh g Jesus am ha chehani mat wo ha'ichu mah. T wo huh. 56 Tsh hegam jehjij am wabsh e totoths matsh e chegito. Sh g Jesus am ha ahgith mat pi hedai wo ha ahgi mat haschu has e juh.

Luke 9

1 Am hu hebai, tsh am i ha wai g Jesus g e-chuhchai. Tsh am wui i e hemapai. Kutsh ab ha mah g gewkthag mat gm hu wo i ha wuwhas g jijawul ab ha amjed hegam mo an ha u'ukch k wo ha thothaj g kok'otham 2 k am hahawa ha cheha mat am wo i ahgahi ab amjed g Jiosh kownaltalig. 3 Pi atsh koi hihi, sh hab ha ahg, “Gm amt wabsh wo i hihim k pi ha'ichu wo u'uk, chum hems pi g cheowikud nih g limoshan kostal nih g ha'ichu hugi nih g lial nih chum hems hema ep lihwa. 4 Am amt wo thadkkath heg kih am mat hedai i si s-ap ab wo i em-nei am hugkam mamt hekith wo i hihi ab amjed hegai kihhim. 5 Kutp hebai pi ap ab hu wo i em-nei g hemajkam, mt am wo thagito hegai kihhim k ab wo si shahmuth g e-shuhshk mamt wo ha chehgi mamt wo ha thagito k pi wo ha ahgi ab amjed g Jiosh.” 6 Tsh wa woho am hihi ihtham chuhchaij ha oithk g kihhim k am ahgahim g Jiosh ha'ichu ahga ch ha thoajith g hemajkam wehsko. 7 Sh eda g Herod am wabsh kia d kownal Galilee ch ed ch am i kah wehs ihtha mash haschu has e wua. Am amsh wehsko a'aga mas hedai wud ihtha Jesus. Ha'ijj ash hab kaij, “Thoki hegai Johnbad mo wa ha pahl wapkonahim. Heg amt mua. Kutki wabshaba uhpam e chegito.” 8 Kush ha'ijj hab kaij, “Thoki Elijabad o hema ep hegam kekelibad Jiosh ha'ichu i tashogiththam.” Kutsh wa g Herod am i pi e amichuth 9 k hab kaij, “Am ant wa ha cheha mat an e hikuch g John mo'o. Kus hedai wud ihtha o'othham mani mu'i ha'ichu kah ab amjed?” bash kaij ch wabsh am chum i e nakog mat wo nei g Jesus. 10 Tsh am hu hebai am i uhpam thatha g Jesus chuhchai k am ahgith g Jesus wehs ha'ichu mat haschu has i juh. Tsh gm hu hahawa i ha ui matsh gm hu hejelko hasko hihi maibithch hegai kihhim mo hab chehgig Bethsaida. 11 Tsh am i kah g hemajkam k am i ha oi s-neithamk g Jesus. Tsh g Jesus si s-ap ab i ha neith k am ha ahgi ab amjed g Jiosh kownaltalig k ha thothaj g kok'otham. 12 Kutsh gm hu i juh. Tsh g chuhchaij am thatha wui k hab kaij, “Am g ha chehani g hemajkam mat am wo hihi kihhim wui o am hasko o'oithag wui k wo bei g ha'ichu hugi k an hasko wo kohk heg hekaj mo ia hu wabsh si heb hu iia.” 13 Sh wabshaba hab kaij g Jesus ab ha wui, “Ahpim amt wo ha'ichu ha mah mat wo huh.” Sh hab kaij ihtham, “Heg ach wa'i hetasp pahn ch gohk waptopi edgith. Aha nap tatchua matt am wo hihim k wo ha nolawt g ha'ichu hugi ha wehhejed ihtham mu'i hemajkam?” 14 Kush eda sha'i mu'ij g hemajkam mash hetasp mihl d chechoj. Sh hab kaij g Jesus, “Hab g wo ha ahgith g hemajkam mat wo thadhaiwua hehetaspo wepst-mahm e wehm.” 15 Tsh wa woho hab e juh g chuhchaij. Kutsh wehsijj am i thadhaiwua. 16 Tsh g Jesus am ha ui hegam hetasp pahn ch gohk waptopi k ab i nea thahm kahchim wui k ab ho'ige'el g Jiosh k am hahawa hahain k ab ha mah g e-chuhchai. Tsh ihtham ab i ha mahkhi g hemajkam. 17 Tsh wehsijj e gegosith k kokwoth. Tsh g chuhchaij an i u'ihi g ha wihpi'ithag g hemajkam ahim matsh wo shuhshuth g gamai gohk hoha. 18 Sh am hu hebai am hejelko e ho'ige'ithahun g Jesus. Tsh am wui thatha g chuhchaij. Kutsh am ha'asa e ho'ige'ithahun k hab kaij, “Thoh'o ni-elith g hemajkam?” 19 Sh hab kaij hegam, “Ha'ijj o hab kaij map d ha-wapkontham, Johnbad. K ha'ijj hab kaij map d Elijabad. K ha'ijj hab ep kaij map d hema ehp hegam kekelibad Jiosh ha'ichu i tashogiththam ch ia uhpam e chegito.” 20 Sh hab kaij ab ha wui, “Kum ahpim hedai ni-elith?” Sh hab kaij g Peter, “Bach m-elith map d Jiosh si Kehsha!” 21 Sh hab kaij, “Thani ahni. Kumt wabshaba pi hedai wo sha'i ahgi hemu mani hedai wud. 22 Wehpeg at hemho wo wa ni-bei g ge'eged ch u'ugchu papal ch chehanig em-mashchamtham ahni Jiosh si Kehsha k mu'i wo ni-sho'igchuth k am wo i ni-thagito mant wo ni-muhkith. Nt wabshaba uhpam wo i wuhsh muhkig amjed heg eda waik tash amjed mamt wo ni-mua.” 23 Sh hab hahawa ep kaij ab wehsijj ha wui, “Mamtp am wo s-oitham g ni-himthag k hemho wa gm hu wo thagito g hejel e-tatchui k ahni ni-tatchui hab wo junihith ni-wehhejed e sho'igchuthch. Heg at wo wa wepok mam ab mohto g kots ch ab ab wo e muhkith. 24 Pi amt wo heki wua g e-thoakag mamtp wo hekaj am ni-wehhejed. Heg at wo heki wua g e-thoakag matp hedai wo chum s-tha'ath. 25 “Pi at ha'ichu wehhejed wo s-kehgajk matp g o'othham wehs wo bei hegai mo haschu i tatchua ith thahm jewed k wabshaba pi wo e tho'ibia. 26 Pi g am wo si e elithath ni-hekaj ahni Jiosh si Kehsha ch hekaj g ni-mashchamadag. Nt ahni hab wa'ap pi wo si ni-elithath em-hekaj mant hekith ia ep wo jiwia. Ithani at si s-tondam ab wo e chehgi g ni-gewkthag ch ni-ohg gewkthag ch ha-gewkthag g s-ap'ekam anghil. 27 Neh, ia am ha'i ha'ichug mamt ho'ip kia nei g Jiosh kownaltalig k haha wo ko'ok. Am g wo s-chegitok mani ith am em-ahgith.” 28 Sh am hu d i hemako thomig amjed mash hab kaij ihtha. Kutsh g Jesus gn hu wo e ho'ige'ithahu uhgk tho'ag t ab k ab i ha wai hegam Peter ch John ch James matsh gn hu wehmaj wo i chehchsh. Kutsh gn hu thatha heg thahm tho'ag. 29 Tsh am i e ho'ige'ithahu g Jesus k atsh am gawul i e juh. Tsh g wehschugaj hab e juh mash si s-tondam s-tohta. 30 Tsh haha wabsh am wehmaj i e chehgi g Mosesbad ch Elijabad. 31 Kush g Jiosh gewkthag ab ha ab e chehgith hab masma mo g tonlig. Sh ihtham am wehmaj a'aga g Jesus matsh pi sha'i tash amjed am hab wo e juh hegai matsh haschu g Jiosh am ap'ech matsh wo muh am Jerusalem t am. 32 Sh eda hegam Peter sha'i si gewpkog ch s-kohksim ch wabshaba ab si i nehnea k nei g Jesus ch hegam gohk o'othham mash am wehmaj gegok. 33 Tsh gm hu wo hihi hegam gohk. Tsh g Peter wabsh kohsh k tha'iwuni k hab kaij, “T-mashchamtham, s-ap'e oki mach ia ha'ichug. Tt ia waik hab wo em-juni g al chechopi matt hekaj ab wo si has em-el ahpi ch Mosesbad ch Elijabad.” 34 Tsh g chewagi ab i wuhsh mash eda wabsh kia neok g Peter k ab ehka ha thahm. Kutsh si s-ehbeni hegam Peter matsh ab i hud g chewagi. 35 Tsh g Jiosh ne'oki ab kaitha chewagi t amjed k hab kaij, “Jesus o d si ni-tatchuithch ni-alithag. Heg amt ab wo si kaihamath.” 36 Sh am hahawa hejel kehk g Jesus. Kush pi am hu ha'ichug hegam gohk. Sh hegam Peter pi hedai sha'i ha'ichu ahgith ia'i ithani hegai mash haschu i neith. 37 Sh am ba'ich d i tash. Tsh ab hahawa i huhud tho'ag t amjed. Kush sha'i mu'i hemajkam am nenida g Jesus ch ab nam. 38 Kush hema si s-kaitham neok ch hab kaij, “Ha mashchamtham, ith o d wa'i ni-alithag m ia kehk. 39 K g jiawul an bebhe ch am si hihnk ch am i wuhpa jewedo. K g totshagi i chechshshaj chinij ab. S-ko'okam o has wua g jiawul ch chum alo pi thathagitosh. 40 Kuni ab wa chum si ha ahgith g m-pionag mat gm hu hab wo i juh. T wabshaba pi e nako.” 41 Sh hab kaij g Jesus ab ha wui g e-chuhchai, “Sho'o wa'i pi ge'ej g em-wohochuthadag. M im hu hab wabsh i si e juhkch ab ni-amjed. Shahag wepo mant hemho wa tash ia wo em-wehmajkath ch ab wo em-nakogath mat hekaj wo i ge'etha.” Bash kaij ch am hahawa ahgi hegai o'othham, “Ab g i beka'i g e-alithag.” 42 Sh ab chum him g ali. Sh haha wabsh ep i wua hegai jiawul am jewedo. Kush am si banimmed. Tsh g Jesus ab si s-keh'el g jiawul k i wuhshath k am hahawa bei g al k ab i wanim ohgaj wui. 43 Kutsh wehsijj si e totoths g hemajkam mat g Jiosh hab masma am i chehgi g e-gewkthag k ab si has elith wehs hegai mo g Jesus hab junihim. Sh g Jesus hab kaij ab ha wui g e-chuhchai, 44 “Am g wo s-chegitok ihtha mant am wo em-ahgi. E o aihim mat g s-ni-keh'iththam an wo ni-bei ahni Jiosh si Kehsha k am wo ni-gagda ha wui g haha'ichu.” 45 Kush pi sha'i amichuth mas haschu hab ahg ch wabshaba s-ehbith mas ab wo kakke. 46 Sh am hu hebai am e ne'owin hegam Jesus chuhchai mas hedai d wo si ha'ichuk. 47 Kush g Jesus s-ha amichuth mo haschu am chegito ch heg hekaj g al ali ab i kei e-hugith an 48 k ash hab kaij ab ha wui, “Hegai mat hedai am ni-wehhejed s-ap ab wo neithath g al ali ch hab wa'ap s-ap ab ni-neith. Kutp hedai s-ap ab wo ni-neithath ch hab wa'ap s-ap ab neith g Jiosh nani pi d Kehshaj. Hegai mo hedai i si pi e ha'ichuchuth am em-shahgith o d si ha'ichu.” 49 Sh am hu hebai g John hab kaij, “T-mashchamtham, hema ach neith g o'othham. K heg am m-chehcheg ch gm hu hab i ha wua g jijawul ab ha amjed hegam mo an ha u'ukch. Kuch hab ahg mat wo ha'asa no pi pi am hu t-wehmaj.” 50 Kush hab kaij g Jesus ab ha wui, “Pi g am wo sha'i shohbith. Tki wo i em-wehmt hegai matp hedai pi ab hu em-wui kehk.” 51 Kush s-mahch g Jesus mo e aihim mat g Jiosh am wo uhpam i bei e-kihthag wui ch heg hekaj am i e shelch mat am wo hih Jerusalem wui k am wo i e nako. 52 Sh am hihimath ch am hema miabith g kihhim Samaria chekshani ch ed. Kutsh g Jesus am ha'i ha cheha g e-chuhchai matsh ha ba'ich wo hihim k wo bei g koksikud ch ha'ichu hugi. Kutsh ihtham ha e juh. 53 Tsh wabshaba am i s-mai hegam hemajkam mash d gm hu himtham g Jesus Jerusalem wui k heg hekaj pi hohho'i mat am wo jiwia nash pi pi ha hohho'ith g Jerusalem t am hemajkam. 54 Kutsh hekith g James ch John am i s-mai mo pi hohho'ith k hab kaij, “T-kownalig, nap tatchua matt ab wo i tai g Jiosh. T ab wo i huduni g mei k wo ha koktha?” 55 Sh g Jesus si s-gewkam ha shohbith. 56 Tsh amjed gm hu hahawa hihi hema ep kihhim wui. 57 Sh am hu hebai hihim. Kush hema g o'othham hab kaij ab Jesus wui, “Ni-nahtokch ani ahni mant wo i m-oith k wo i m-wehmt.” 58 Sh hab kaij g Jesus ab wui, “Napt hig wo e nako? Neh, chum o hems g gagso ge wahpagga ch g u'uwhig ge koksh. Ni wabshaba ahni Jiosh si Kehsha pi sha'i ha kih ia jewed thahm. K heg hekaj s-hasig maps wo ni-oithath.” 59 Sh hab ep kaij g Jesus ab hema wui g o'othham, “Oi g ni-oith.” Kush wabshaba hab kaij, “Heu'u, ni-kownalig. T ho'ipki hekith muh g ni-ohg. Nt wo hiashpok haha wo m-oi.” 60 Sh hab kaij g Jesus, “Am g ha hiwgith hegam mo pi u'ukch g wechij thoakag mat wo ha hiash g ko'i. Pt ahpi hi am wo him k wo i ahgahi ab amjed g Jiosh kownaltalig.” 61 Sh hema hab ep kaij g o'othham, “Ni-kownalig, am ant wo i m-oith k wabshaba wehpeg wo hih uhpam k an wehs wo i ha neithok g ni-hajuni.” 62 Sh hab kaij g Jesus ab wui, “Neh, nat hig shelinim wo moihunath hegai mat hedai am uhpam wo nea amai mo hebaijed him? Pegih, t hab wa masma pi ha'ichu wehhejed wo s-kehgajk am Jiosh kownaltalig ed hegai mat am uhpam wo nea.”

Luke 10

1 Tsh amjed g Jesus am ha'i ep i ha chuhcha wewa'akko gamai gohk matsh go'ogok e wehm wo ahgahi g ha'ichu ahgaj am ha oithch hegam kihhim matsh hebai ap'ech matsh am epai wo hih. 2 Sh hab kaij g Jesus ab ha wui, “Neh, mu'ij o hegam mo e nahtokch mat wo e tho'ibia. Kuch eda pi mu'ij ahchim mach am ha ahgithahim g tho'ibiathag ahga. Ith o heg wa wepo mat hebai g ha-hihka wo si ge'ejk. T g ha-pionag pi wo mu'ijk. Ab g wo si tahnith g Jiosh mat mu'i wo i ha chuhcha mat am wo ha ahgithahith g s-kehg ha'ichu ahgaj ch ab wo i ha ba'ihamath hegam mo e nahtokch. 3 “Neh, bat masma wo s-ta ehbithamak g hemajkam am em-wehhejed mat g shesh'e am ha wehhejed g kahwal mahmad. 4 Mt wabshaba pi ha'ichukaj wo e kudut k pi ha'ichu wo u'ath nih g ha'ichu eniga nih chum hems g lial. Jiosh at hab wo ha juh g hemajkam mat wo em-thagio'i. Am amt wo s-e hohtmagi kihhim wui k pi hedai wo hiwigi mas wo em-shohbi wohg ch ed. 5 “Kumt hebai wo thatha ha-kih am k am hab wo chei, ‘Jiosh o ab em-makiog g s-ap tahhathkam.’ 6 Kut s-ap ab wo i em-nei matp ab wo s-em-wohoch k ab wo i em-wahpki mamt am wo thadkkath. Kumt pi has wo elith k am wo thadkkath ch wo e gegosithath ch an wo i ha ahgithahith g s-kehg ha'ichu ahgaj g Jiosh am hugkam mamt gm hu wo hihi ab amjed hegai kihhim. Chikpantham o ab d wuikam mat ab wo bei g e-nam-kithadag. K ihtham d ha wuikam mat am hab wo juh. Pi amt inhas wo wahpkith k am wo thadkkath am hugkam mamt ep wo ba'ich hihi. 8 Kut hebai g hemajkam s-ap ab wo i em-nei kihhim ch ed, mt wo huh mat haschu wo i em-gegos 9 k wo ha thoaj g kok'otham k wo ha ahgi g hemajkam mat ab i ha miabi g Jiosh kownaltalig. 10 “Kut hebai pi ap ab hu wo i em-nei g hemajkam, mt am wo i wuwha kahya ch ed 11 k ab wo si i shahmuth g e-shuhshk k hab wo chei, ‘Ith att hekaj am wo em-chehgi matt wo em-thagito. Mt wabshaba wo s-chegitok mat ab i chum em-miabi g Jiosh kownaltalig.’ 12 Neh, hegam si pi ap'ekam hemajkam mash wa am kihkahim Sodom kihhim ch ed at wo bei g s-ko'ok e-namkithadag mat hekith wo e ai g ge'e lothaita tash. T wabshaba ba'ich wo i s-ko'okam e namkith hegam mat pi ab hu wo em-kaiha. 13 “Mu'i s-hasig ha'ichu ant am hab juh Korasin ch Bethsaida kihhim ch ed. Kutki eda g hemajkam amai pi ab hu ni-wohoch. T heg hekaj ab wo bei g s-ko'ok e-namkithadag ge'e lothaita tash ch ed. Hegam mo am kih Tyre ch Sidon kihhim t am ch pi ge'e mahch ab amjed g Jiosh at pi am hu hugkam wo bei g s-ko'ok e-namkithadag. Tp hems ab wo i e sho'igchuth k gm hu wo s-ohhoth g pi ap e-chegitoi matp wo nei ihtha s-hasig ha'ichu. 15 Capernaum t am hemajkam o ab si e haschuth. T wabshaba g Jiosh gm hu wo i ha shul jiawul kih ed.” 16 Sh hab ep kaij ab e-chuhchai ha wui, “Heg o wa wepo mo ahni ab ni-kaiham hegai matp hedai ab wo em-kaiha. Kut ahni s-ni-ohhoth matp hedai wo s-em-ohhoth. Kutp hedai wo s-ni-ohhoth k hab wa'ap s-ohhoth g Jiosh nani pi d kehshaj.” 17 Tsh woho gm hu hihi hegam wewa'akko gamai gohk. Tsh am hebai i cheka. Tsh am i uhpam thatha k sha'i si s-hehgig ch hab kaij, “T-kownalig, chum hems g jijawul ab s-t-wohog elith mach am m-chechcheg ch ab si ha chehani mat gm hu hab wo i e juh.” 18 “Heu'u, nat pi hegai mo d ha-ge'ejig ch d Satan heb hu wua g e-gewkthag,” bash kaij g Jesus. “Neith ani mat ab i gei Jiosh kihthag amjed hab sha masma mat g wepgi. 19 Neh, ab ant em-mah g gewkthag mamt wo e nako mamt am wabsh wo ha keish g kohk'oi ch nanakshel ch wehs g gewkthag g ge Jiawul. Kut pi wo sha'i s-ko'okam em-juh. 20 Mt wabshaba pi heg hekaj wo s-hehgigk mo g jijawul ab s-em-wohog elith. Heg amt hekaj wo s-hehgigk mo gn hu o'ohanas g em-chechgig Jiosh kihthag an mam d e tho'ibiakam.” 21 Kutsh ia'i ithani g Hekia S-ap'ekam Gewkthag ab mah g Jesus g si ge'e s-hehgig. Kush am e ho'ige'ithahun ch hab kaij, “Ni-ohg Jiosh, thap kownal wehs ha'ichu thahm. K hab d m-elitha mat pi hedai wo e nako mas hejel wo s-amich g ha'ichu m-ahga. E o ehstokch ab ha amjed g s-chu a'amichuththam. Kup wabshaba am ha chehgith ihtham mo ha'ichu s-mahchimk hab masma mo g a'al. Ni heg hekaj ab si m-ho'ige'ith.” 22 Neh, bash kaij g Jesus ch am hahawa ha ahgith g hemajkam, “Ni-ohg Jiosh at ab ni-mah wehs ha'ichu. Pi o hedai ni-mahch ch hegai wa'i ni-ohg s-ni-mahch. K pi hedai mahch g ni-ohg. Ni ahni wa'i s-mahch ch hegam ehp mani hedai i wui tashogith.” 23 Tsh am hahawa i e hejelko hegam Jesus. Kush hab ha ahg, “Tho si s-ap tahhathkam mam am neith ch kah ihtha mam haschu i neith ch kah. 24 Mu'ijj g kekelibad Jiosh ha'ichu i tashogiththam ch kokownalbad o wa chum s-neithamk hegai mam haschu i neith ch chum s-kaimk mam haschu i kah.” 25 Tsh am hu hebai am hema jiwia g chehanig ha mashchamtham k wabsh chum heki s-himchutham g Jesus hab kaijch, “Ha mashchamtham, shahnt wo ni-juh. T hekaj ab wo i ni-wahki g Jiosh e-kihthag ed?” 26 Kush hab kaij g Jesus ab wui, “Nap hig pi mahch mo has chu'ig an Jiosh o'ohana ed heg amjed.” 27 Sh hab kaij hegai o'othham, “Heu'u. Bo chu'ig: Matt hemho wa ab wo si pihk t-elithath t-kownalig Jiosh wui wehs t-ihbthagkaj ch ith am wo chehgithch wehs t-thoakagkaj ch wehs t-gewkthagkaj ch wehs t-chegitoithagkaj. K hab ep chu'ig: Matt hemho wa ab wo si pihk t-elithath t-nawoj wui hab masma mach has i masma hejel t-wehhejed si pihk t-elith.” 28 Sh hab kaij g Jesus, “Heg o wud. Kut s-ap ab wo i m-wahki maptp heg am hab wo junihith.” 29 Kush ihtha o'othham s-mahch mo pi am hu hab junihim hegai chehanig ch wabshaba gm hu wabsh chum s-e oanamk ch ash ab kakke g Jesus, “K hedai d ni-nawoj?” 30 Sh g Jesus am ahgith ihtha ha'ichu wepogitha ahga, “Neh, matp hems am hema hih g t-wehm Tuhligo Jerusalem t amjed gm hu Jerico wui. T am haha wabsh g s-chu e'eskam am cheggia k ehs g ha'ichu enigaj k gewichkwua k chum alo mua. 31 K am wo'o. “T ab haha wabsh g pahl hema hih wohg oithch k nei mo am wo'o ihtha o'othham k gm hu wabsh mehk him k an bij. 32 T hab wa masma g papal ha wehm chikpantham ab hema him k am nei hegai o'othham mo am wo'o k gm hu wabsh bijim k gm hu hih. 33 T g hema Samaria t am o'othham am hahawa him k cheh ihtha o'othham. Kum ab a'ai s-e keh'ith g Samaria t am hemajkam ha wehm. T eda ihtha si s-ho'ige'ith 34 k ab i wako g eh'ed g nawaitkaj k ab i huhud k an i hobino g ikuskaj k an hahawa thai e-shoiga an k gm hu i bei kihhim wui mat am hebai wo ha nuhkuthach. 35 “K am ba'ich d i tash. T gm hu wo hih ihtha o'othham k wabshaba ab ha'i ha mah g lial mat wo nuhkuth k hab ha ah, ‘Am g wo nuhkuth. Kunt ia ep wo jiwia k wo wa em-namkith mamt haschu ba'ich wo i heki gei wehhejed.’ 36 “Neh, kup hedai hab elith ihtham waik mo s-ap d nawojij hegai mamt gewichkwua?” 37 Sh hab kaij hegai chehanig ha mashchamtham, “Hegai mo s-ho'ige'ith.” Sh hab kaij g Jesus, “Pegih, gamai g hihm k am hab e junihith hab masma.” 38 Sh amjed am hebai hihim ihtham Jesus ch am thatha hema kihhim t am. Sh am hema g uwi hab chehgig Martha ch ab i ha wahpki e-kih ed. 39 Kush am wehmaj thaha g wehngaj ch hab chehgig Mary ch ith ab i thahiwua Jesus wui k ab si kaiham g ha'ichu mashchamaj. 40 Sh eda g Martha si chikpan ch e kudut k am jiwia Jesus wui k hab kaij, “Ni-kownalig, nap pi sha'i has elith mat g ni-wehnag am wabsh i ni-thagito mant hejel hab wo juh g chikpan. Ab g ahgith mat ab wo i him k wo i ni-wehmt.” 41 Sh hab kaij g Jesus ab wui, “Ih, Martha, mu'i ap ha'ichukaj e kudut. 42 K eda am d wa'i hemako ha'ichu mo d si ha'ichu. Ith at g Mary ab bei. Kut pi wo sha'i e wohppo'ithach.”

Luke 11

1 Sh am hu hebai e ho'ige'ithahun g Jesus ch am i kuhgit. Sh hema hab kaij g chuhchaij ab wui, “T-kownalig, oi g hig t-mashcham matt has masma wo t-ho'ige'ithahu hab masma mo wa g John ha mashcham hegam mo ab si wecho e mashcham.” 2 Sh hab kaij g Jesus ab ha wui, “Ith amt hab wo chei am e ho'ige'ithahunch: Jiosh t-ohg, ab ach si has m-elith ch si ha'ichuchuth g m-chehgig ch tatchua mapt wo i ge'ethaj g e-kownaltalig ia t-shahgith. 3 Ab g i s-t-ho'ige'ith k ab wo t-mahkath g ha'ichu hugi wehs tashkaj. 4 Gam g hu hab i juhni g pi ap t-chu'ichig nach pi ahchim gm hu pi chechegitod g ha-chu'ichig hegam mat hedai i pi ap has chu'i ab t-wui. Pi g am hiwgith g Jiawul mas am wo t-shul pi ap'ekam ch ed.” 5 Sh hab ep kaij g Jesus ab ha wui hegam mo ab si wecho e mashcham, “Neh, tp hems hema pi am hu ge'e wo ha'ichu hugik. T am hema mehkjed wo jiwia hudunk ab mat ab i chehgim. Kut am wo hih g kihkam e-hugith am kihkam wui k ab wo ha'i tai g sismito mat wo gegos g e-nawoj. 7 “T hab haha wabsh wo chum chei g hugithaj am kihkam, ‘Pi g ia hu ni-kudut. Heki ant hu ab yahwidath g ni-kihjeg. Kutt heki hu wohpiwua g t-a'aliga ha wehm. Nt pi wo i wamig k wo m-mah ha'ichu.’ 8 “T wabshaba pi has wo e elith k ab wabsh wo kia tahnith. T am haha wo i wamig k ab wo mah nat pi pi ha'asa ab wo tahnith. 9 “Pegih, mt ahpim hab wa masma pi ha'asa ab wo tahnith g Jiosh mam haschu i tatchua. T ab wo em-mah. Am g wo ha'ichu i e gahgithath. T wo em-chehgi. Ab g wo shontpag g kihjeg. T ab wo i e kuhpi'o em-wehhejed. 11 “Neh, s-mahch am mat pi hedai wabsh g wamad ab wo mah g e-alithag mat g watopi ab wo tai. 12 Kut pi wabsh g nakshel ab wo mah mat g chuchul nonha ab wo tai. 13 Mam has i masma pi ap'e ch wabshaba s-mahch mamt g s-kehg ha'ichu ab wo ha mah g e-a'aliga. No hig pi g em-ohg Jiosh ba'ich i e nahtokch mat ab wo ha mah g Hekia S-ap'ekam Gewkthag hegam mat ab wo tai.” 14 Sh am hu hebai hema pi ha neok g cheoj nash pi g jiawul an u'ukch. Kutsh g Jesus gm hu hab i juh g jiawul. Tsh am ha hekaj i neo. Tsh g hemajkam si has i el. 15 Sh eda ha'i hab kaij, “Moki g jijawul ha-ge'ejig ab mahkch g gewkthag. K heg hekaj gm hu hab i ha wua g jijawul ab ha amjed hegam mo an ha u'ukch.” 16 Sh ha'ijj wabsh chum heki s-himchuthamk g Jesus ch ab chehani mat g s-hasig ha'ichu hab wo juh k hekaj am wo ha chehgi mo ab Jiosh t amjed. 17 Sh wabshaba g Jesus s-mahch mo haschu am chegito ch hab kaij ab ha wui, “S-mahch am mat g o'othham wo padch g hejel e-jewedga mat ab a'ai wo e cheggia. Kut g e-wehm kihkam hab wa'ap wo padch g hejel e-kihthag mat ab a'ai wo e cheggia. 18 Pegih, t has hig masma g Jiawul pi wo padch g hejel e-kownaltalig matp ab wo sha ni-mah g gewkthag mant am wo i ha wuwhas g piongaj? 19 Neh, em-pionag o hab wa'ap i ha wuwhasith g jijawul. Kum eda pi hab masma hab ha elith mo g Jiawul ab ha mahkch g gewkthag. Pegih, ihtham at wo em-ahgi mo pi woho hegai mam hab chum elith. 20 Jiosh gewkthagkaj ani gm hu hab i ha wua g jijawul. K ith am wohokamchuth mat heki hu in i wuhsh g Jiosh kownaltalig em-shahgith. 21 “Nat hig pi wo e nahtokch g si s-gegoki kownal g e-cheggiakudkaj mat wo nuhkuth g e-kih. T hab pi hedai wo wohppo'i g ha'ichu enigaj. 22 Tp wabshaba g ba'ich i s-gegoki kownal wo cheggia k wo gewito k gm hu wo i ui hegai cheggiakudaj mo ab chum si hiwig k am wo a'ai i tahp g ha'ichu enigaj am ha wehhejed g e-shonthalig. Neh, bani wa masma cheggia g ge Jiawul. 23 K hegam mat hedai pi ab hu wo i ni-wehmajk ab ni-wui gegok ch wabsh ha gantan hegam mani s-ha tho'ibiamk.” 24 Kush hab ep kaij g Jesus, “Matp hems g jiawul an wo hema u'ukch g o'othham ch wabsh wo thagito mat am hebai ep wo e ul. Kut hegai o'othham wo i chum kegch g e-thoakag. T wabshaba g jiawul pi hebai wo chehg k hekaj hab wo i e ah, ‘Mo hig woho d ni-kih hegai o'othham. Nt hig am uhpam wo hih wui.’ 25 Kut wa woho am uhpam wo him k wo cheh mo am wabsh jeg ch si kegchuthas ch hehosimhunas. 26 T am haha wo him k wewa'ak ep wo ha u'apa g jijawul. T ihtham ba'ich wo i pi ap'ek ch am wehmaj wo i chiwia. Neh, t ihtha o'othham hahawa ba'ich wo i pi ap'ek mo wa ga hu i heki hu.” 27 Sh an wehgaj gegok g hemajkam. Kush hema g uwi hab kaij am wui g Jesus, “Tho si ge'e s-hehgig heg wehhejed uwi mat an m-mahsith k m-si'ichuthahim.” 28 Sh wabshaba hab kaij g Jesus, “Ba'ich at wo i s-hehgigk hegam mat ab wo kaihamath g Jiosh ha'ichu ahga.” 29 Sh am i mu'ithahim g hemajkam. Kush hab kaij g Jesus, “Mu'ijj o g ha-chegitoithag pi ap'e. K heg hekaj s-neithamk mant hab wo juh g s-hasig ha'ichu k am wo wohokamch mani ab Jiosh amjed. Bant wa'i masma am wo ha chehgi mani d Jiosh si Kehsha matsh wa hab e juh hegai kelibad Jiosh ha'ichu i tashogiththam mash d Jonah. 30 Heg atsh wa am si has masma i e chehgi ha wui g Ninevah t am hemajkam. Nt ahni am si has masma wo i ni-chehgi am ha wui g hemajkam ia'i ithani. 31 “Hegam Ninevah t am hemajkam atsh gm hu s-ohhoth g pi ap e-chegitoi am i kahk g Jonabad k hab pi ab hu wo e chu'ichigch ge'e lothaita tash ch ed. Ni ahni ba'ich d i si ha'ichu mo g Jonabad. Kum eda pi ab hu ni-kaiham ch heg hekaj ab wo motoig g chu'ichig lothaita tash ch ed. (31) Mehkjed atsh ab i hih g uwi kownal ab wakolim tahgio amjed mat ab wo kaiha g Solomonbad ha'ichu mahchig. Ni ahni ba'ich d i si ha'ichu mo g Solomonbad. Kum eda pi ab hu ni-kaiham ch heg hekaj ab wo motoig g chu'ichig lothaita tash ed.” 33 Kush hab ep kaij g Jesus, “Wohokam o wepogithas mo g lahmpa. Kum s-mahch mo pi hab d ahga g lahmpa mas am wo e ehsto ha'ichu wecho. Mt an wo thai mat hebai wo ha tonlithath hegam mo ab i wahpk. 34 “Em-wuhpui at s-ap am wo i wahki g tonlig matp wo s-mamsk k wabshaba pi am hu wo i wahki matp pi wo mamsk. Kum heg hekaj s-ap ha nuhkuth. 35 Pegih, wahm amt wo si s-ap nuhkuthath g ha'ichu e-amichuthadag mat heg s-ap am wo i wahki g wohokam. 36 Bat wa'i masma ab wo i shuhthath g em-chegitoithag g wohokam.” 37 Tsh am i ha'asa neo g Jesus. Tsh am hema jiwia g Palasi k am waith mat wo wehmaj e gegos. Kutsh wa woho am i wahk k am i thahiwua matsh wo e gegos. 38 Tsh hegai Palasi si has i el neithok mat pi e wako hab masma mo d ha himthag. 39 Kush s-amichuth g Jesus ch hab kaij ab wui, “Neh, ahpim Palasi am si kegchuth g e-honshpadag. K wabshaba g em-chegitoi wabsh shuhthags g pi ap'ekamkaj. Heg o wa wepo mam an wa'i wehgaj si kegchuth g hohas-haha'a. K gd hu ha eda wabsh kia s-bibtagi. 40 Thamt wabsh wo totontok mamtp heg wo wa'i s-ap nuhkuth e-honshpadag. Jiosh at hab wa'ap nahto g em-thoakag. Kumt heg ep wo chum nuhkuth. 41 Am g wehs wo i thagito Jiosh wui k hab wo s-chechojimak ab sho'igkam ha wui ch wo nei mat wehs ha'ichu wo s-kehgajk am em-wehhejed. 42 “Neh, ahpim Palasi am ab mahk g Jiosh g hemako tahpani mo wehst-mahm e tahpanch g em-eniga, chum hems g nahnko mahs pi-mianthi ch ha'ichu tatk. T wabshaba g Jiosh s-ko'okam wo em-namkith nam pi pi ap'echuth hegai mam haschukaj ha sho'igchuth ha'i ch pi ab hu tatchua g Jiosh. 43 Sha'am wa'i s-hohho'ith mamt si s-apko wo thadhaiwua am cheopi ch ed ch s-hohho'ith mat ab wo si has em-elithath g hemajkam mamt an wo i wuwha kahya ch ed. 44 Ih, sho'ig! Mt wo si s-ko'okam e namkithach. Neh, pi at wo mahsk g hiha'ini matp pi am hu wo tohnkthask. Kumtp hems am wabsh thahm wo oiopoth. Pegih, bat sha masma pi wo mahchk g hemajkam mam d pi ap'ekam nam pi ehstokch g pi ap e-chu'ichig.” 45 Kush hema hab kaij g chehanig ha mashchamtham ab wui, “Ha mashchamtham, ahchim ap hab wa'ap has t-ahg hab kaijch.” 46 Sh hab kaij g Jesus, “Pegih, ab em-wui o hab wa'ap him g s-ko'ok em-namkithadag. Mu'i s-hasig ha'ichu am ab ha chehani g hemajkam. K ith d s-wehch ha'ichu mohtoi am ha wehhejed. M eda ahpim pi ha'ichu hab sha'i wua mams hekaj ha wehm wo moht. 47 “Em-shohshon at mu'i ha koktha g Jiosh ha'ichu i tashogiththam. Kum ahpim ha wepo masma, chum ams ha hehosith g ha-hiha'iniga hegam mamt ha koktha. K heg hekaj ab em-wui him g s-ko'ok em-namkithadag. 49 Heki o hu hab kaij g Jiosh, ‘Ab ant wo i ha wuwhas g ha'ichu i tashogiththam ha shahgith g hemajkam. Kut ha'i wo ha-koktha k ha'i wo ha sho'igch.’ 50 Neh, kum ha wepo chu'ichig mamtp ha wepo ha'ichu elith. Kut wepo masma wo em-ai g s-ko'ok ha-namkithadag heg hekaj wehs mat hab juh ga hu i amjed mat in i e nahto g jewed. 51 Abelbad atsh wa wehpeg e muhkith. Tsh amjed mu'i ep e ko'ij. Tsh g Zecariabad ga hu si ha oithch e muhkith amai shahgith g iagchulithakud ch ge'e cheopi. Kum ahpim ha wepo chu'ichig hegam matsh wa ha koktha ch ha wepo masma wo bei g s-ko'ok e-namkithadag mamtp hedai ha wepo elith ha'ichu. 52 “Ahpim chehanig ha mashchamtham amt wo i chum ha amichuthach g hemajkam mat has masma wo s-mahchk g Jiosh. Kum eda ahpim pi mahch ch ep ha shohbithch hegam mo s-mahchimk. Heg o wa wepo mam ab yahwidath g kihjeg mat pi hedai am hu wo i wah. Jiosh at s-ko'okam wo em-namkith heg hekaj.” 53 Tsh am i wuhsh g Jesus k gm hu chum hih. Tsh hegam chehanig ha mashchamtham ch Palasi ab hahawa si s-ta ke'itham has ahg k mu'i ha'ichu kakke 54 hab wabsh chum ahgch mat wo heki himch mat pi ap ha'ichu hab wo chei.

Luke 12

1 Kutsh sha'i si mu'i mihl hemajkam am i e hemapath k wabsh a'ai e keishshap. Sh hab kaij g Jesus ab ha wui g e-chuhchai, “Neh, hegam mo d Palasi o hab wabsh s-e junimk mo d s-ap'ekam. Mt wo s-e nen'oithk mamt pi am hu ha oithk hab wo masmak. 2 Hegai mo chum e ma'ishch at wehs wo e ma'ishpi'o. Pej, wehs s-a'agi ha'ichu at wo s-e mai. 3 Wehs at wo mahsko e wua mamtp haschu chum s-a'agi hab kaij. Kut wehs am si s-kaitham wo e ahgath kih thahm amjed mamtp haschu i chum s-jupij hab kaij gd hu si e-kih ed.” 4 Sh hab hahawa kaij g Jesus ab ha wui g hemajkam, “Neh, ni-naipijju, pi g wo sha'i ha ehbithath hegam matp hedai wo chum s-em-kokthaim. Pi at wo e nako mas ba'ich s-ko'okam has wo i em-juh em-kokthak. 5 Heg at wa'i Jiosh wo e nako mat am wo em-tha'ich Jiawul kih ed mamtp pi am hu wo wohog elithath. Kumt heg ab wo wa'i si has elithath. 6 K wabshaba g Jiosh si s-hemajima ch pi tatchua mas wo s-ko'okam em-juh. Am g wo oithahim mo chum hems g al u'uwhig s-ap ha nuhkuth. K eda chum alo pi ha'ichu namkig ihtham. Kum ahpim wehs ha'ichu ba'ich d i ha'ichu am tahgio. Jiosh o wehs ha'ichu s-mahch ab em-ab. Mt heg hekaj pi ha'ichu wo sha'i ehbithath ab wui e thagitokch.” 8 Sh hab ep kaij g Jesus, “Neh, am amt wo s-ni-mahch k ah hemajkam ha tahgio mani d em-tho'ibiakam. Kunt ahni hab wa'ap wo s-em-mahch k ah am ha tahgio g anghil ch am Jiosh tahgio. 9 Kutp wabshaba hedai pi wo ni-mahch k ah am ha tahgio g hemajkam, nt ahni hab wa'ap pi wo mahch k ah am ha tahgio g anghil ch am Jiosh tahgio. 10 “Jiosh at gm hu hab wo i juh g pi ap chu'ichigaj hegai mat hedai wo wa chum has ni-ah matp gm hu wo s-ohhoth g pi ap e-chu'ichig. T wabshaba pi gm hu hab wo i e juh g pi ap chu'ichigaj hegai mat hedai wo s-ko'okam has ah g Hekai S-ap'ekam Gewkthag. 11 “Pi g wo sha'i kudut ab amjed mamt has masma e wehhejed wo neo mamtp hems am wo em-lothai chechopi ch ed o am ha tahgio g kokownal. 12 Hekia S-ap'ekam Gewkthag at wo em-ahgi mamt has wo chei.” 13 Sh am hema g o'othham hab kaij ab wui, “Ha mashchamtham, hab g ahgith g ni-nawoj mat am wo i ha ni-tahpani hegai mat g t-ohg an thagito t-wehhejed.” 14 Sh hab kaij g Jesus ab wui, “Pi ant heg hekaj ia hu jiwia manis wo em-lothait k am wo i em-ap'echuthach g ha'ichu em-eniga am em-shahgith.” 15 Sh am ba'ich hab ep kaij ab wehs ha wui, “Am g wo s-e nen'oithk mamt pi heg wo wa'i hu'uithath s-kaisthag. Pi amt d wo s-ap thoakamk heg hekaj mam haschu i eniga, chum ams d wo s-kaisk.” 16 Sh ith am hahawa chum ha tashogith ch hab kaij, “Tp hems hema d wo s-kaisk. K g e'eshaj si ge'e babhe. 17 K hab e ahg, ‘Pi o an hu wi'is mant hebai ep wo toa g ha'ichu bahithag. Shuhshuth at g ni-waptto. 18 Nt hig wo i ha shulig k am ba'ich i ge'eged ha'i wo i chuhcha k am wo ba'iha g ha'ichu bahithag ch wehs ha'ichu ni-eniga. 19 Si at ha'ichu s-ni-abam. Nt mu'i a'ahithag ab wo hekaj ihtha s-i'owi ha'ichu k wo ni-ulinihogithath ch wo ni-gegosithath ch wo ih'eth ch wo si s-hehgigk.’ Neh, bo e ahg ihtha s-kais. 20 “K wabshaba ab wui hab kaij g Jiosh, ‘Thap wabsh tohnto. Ith i s-chuhugam ab apt wo muh. Kut d wabsh wo hemak ch wo ui g ha'ichu m-eniga map hejel am chum e wi'ithch.’ 21 Neh, bo wa chu'ig ch hab wa'ap wo wa chu'igk wehs ha wehhejed hegam mo hejel s-e kaischuthamk ch wabshaba pi am hu Jiosh wehhejed hekaj g s-e-kaisthag,” bo kaij g Jesus. 22 Sh hab hahawa ep kaij g Jesus ab ha wui g e-chuhchai, “Heg ani hekaj am em-ahgith ihtha mamt pi wo si e kudutath ab ha'ichu e-hugi ab o ab ha'ichu e-eniga ab. 23 Jiosh at ab em-mah g em-thoakag, pegih, k hab wa'ap ab wo em-mah mamt haschukaj wo e thagio'ithath. 24 “An g wo i ha neith g hahawani. Ihtham o pi ha'ichu e'eshath ch pi od g ha'ichu esha ch pi ha kihki o ha waptto mat am eda wo ba'iha. Jiosh o ha gegosith. Kum eda ahpim ba'ich d i si ha'ichu mo g u'uwhig am tahgio g Jiosh. T heg s-ap wo em-thagio'ithath. 25 Pi amt wo e nako mams am ba'ich wo i himch g e-a'ahithagga am wabsh hekaj e kudutch. 26 Mamtp pi wo e nako mamt hab wo juh ihtha al ha'as chum ha'ichu, pegih, k haschu ahgk wo e kudutath g ba'ich i ge'eged ha'ichukaj? 27 “An g wo i ha neith hegam ha'ichu wuhshanig m an chuhch. Pi o chikpan ch pi shohshom g ha'ichu eniga. Kuki eda g ha-heosig ba'ich i s-kehgaj mo g ha'ichu enigaj hegai s-kais kownalbad mash hab chehgig Solomon. 28 Neh, tp hems s-hohtam wo gaksh hegai sha'i m an chuhch k wo hekaj e nantha. K eda heg wa wepo mo g Jiosh si s-kehg enigadathch g heosigkaj. Pegih, am g wo s-wohochuth mat ab s-ap wo em-enigadathch. 29 Pi g heg wa'i hekaj wo e kudutath mamt wo e gahgi g ha'ichu hugi. 30 Wehs hemajkam an jewed thahm o chum hekith ith an si e gahgith. K wabshaba g em-ohg Jiosh s-mahch mam tatchua ihtha. 31 Mt g Jiosh kownaltalig wehpeg am wo ul e-thoakag ed. T g Jiosh ab epai wo em-mah mam haschu i tatchua. 32 “Pi g am wo sha'i ha'ichu ehbithath ahpim mam al he'ekiajj ab ni-hiwig. Em-ohg Jiosh o ab si tatchua mat ab wo i em-mah g e-kownaltalig. 33 Wehs g wo gagda mam haschu i edgith k wo ha mah g namkigaj g sho'igkam k an haha wo edgithath g ba'ich i s-kehg kaisthag Jiosh kihthag ed. T heg pi hekith wo huhug. T pi hedai wo em-ehs. T g hiopch pi hekith wo padch. 34 Kumt am wo s-hihimim no pi g em-tatchuithag am ulinig mo hebai ha'ichug hegai mam haschu hab elith mo d em-kaisthag.” 35 Kush hab ep kaij g Jesus, “Mt wo si e nahtokch mat haschu has wo e juh hab sha masma mat g pion wo si e nahtokch mat g ha-ahmo wo uhpam jiwia. Ha-ahmo atp hems am wui wo hih g wo ha hohntam gegosig k pi oi wo uhpam jiwia. T wabshaba g piongaj ab wo s-ap e enigadathch ch ab wo mehithch g e-kanjel ch g e-ahmo ab wo nenida. T am wo i jiwia k wo si shontpa. T ab ha hekaj wo i kuhpi'o g kihjeg wehhejed. 37 T wo si s-hehgigk hegam pion mat g ha-ahmo wo ha cheh mo neneath ch e nahtokch. Neh, t heg ab hab wo juh g bahshothag k wo si s-ap ha thadsh k wo ha gegos. 38 T wo si s-hehgigk hegam mat wo e nahtokch mat wo jiwia, chum as hems eda wo i huh g s-chuhugam o i ba'iwichkim. 39 “Neh, pi o ta machima mas hekith hema wo i jiwia g s-chu ehskam. Kum heg hekaj chum hekith nuhkuth g e-kihthag. 40 Pegih, k hab wa'ap pi ta machima em-wehhejed manis hekith wo uhpam jiwia jewed wui ahni Jiosh si Kehsha. Mt heg hekaj wo si e nahtokchith chum hekith.” 41 Sh hab kaij g Peter, “T-kownalig, nap ahchim wa'i hab t-ahg aha nap wehs hab ha ahg?” 42 Sh hab kaij g Jesus, “Chum amt hedai wo e nahtokch mamtp wo s-wapagimak ch wo s-chu a'amichuthath. S-mahch am mat g ha-ahmo hema wo e gahgi g hab mahs chikpantham k wo nuhkuthach g e-kihthag. T heg s-ap wo ha chikpanchuthath ch wo ha thagio'ithath g e-wehm pion mat eda pi an hu wo ha'ichugk g ha-ahmo. 43 T am ep wo jiwia k wo cheh mo ihtha s-ap am hab junihim g e-chikpan. Kut d wo si ge'e s-hehgigk heg wehhejed pion 44 nat pi g ahmoj am hahawa wehs thahm wo kei g e-kihthag. 45 “T wabshaba pi ap d wo ha-kehshak matp hedai wo i ha sho'igchuthath g e-wehm pion ch wo si e gegosithath ch wo nawmmukath hab e ahgch mat pi oi wo jiwia g ahmoj. 46 T haha wabsh wo jiwia k wo cheh mo pi ap hab wua g e-chikpan k wo si s-ko'okam namkith k gm hu hab wo i juh. 47 “T wo bei g s-ko'ok e-namkithadag hegai pion mat wo s-mahchk g e-ahmo tatchui ch eda pi am hu hab wo junihith. 48 T wabshaba pi am hu i si s-ko'okam wo bei g e-namkithadag hegai mo pi e mahch ch hab junihim g pi ap'ekam. Ba'ich i ge'e ha'ichu amt uhpam wo s-behim ab amjed hegai mamt ba'ich ha'ichu nuhkuthach.” 49 Kush hab ep kaij g Jesus, “Ia ant jiwia jewed thahm mant wo i ha chu'amu g hemajkam hab sha masma mant am wo si i nai ha-i'ibthag ed. T hab wo s-nenenashanik ab Jiosh wui. Mat hu'i heki hu hab wo e juh. 50 Am ant s-ta ehbitham ha'ichu gahi wo wuhshani k si ni-kudut heg hekaj. 51 Pi g hab wo e elithath mat wo thotholimat g hemajkam mant ia jiwia. 52 Ab at em-wui wo gegokiwua hegam mat pi wo ni-tatchuath, chum hems ha'akia em-wehm kihkam. 53 Cheoj atp hems wo s-keh'ithath g e-ohg o g e-alithag. T g uwi g e-je'e o g e-mad o g e-kahkma je'e wo s-keh'ithath.” 54 Sh hab hahawa ep kaij g Jesus, “Neh, mt wo s-mahchk mas wo juh o as wo tonih am neithk mas hebaijed hewed ch has mahs chewagi i wushke. M eda pi am hu i a'amichuth mo haschu has e junihog ia'i ithani neithch mani haschu hab wua. Shahag wepo mam pi mahchimk. 57 “E o aihim mat g Jiosh wo ha lothai g hemajkam. Am g wo a'amichuth mamt has wo chum masmak. 58 S-mahch am mamt hemho wa s-hohtam am wo i e ap'ech heg wehm mat ab wo ha'ichu i em-abch. Tp hems am wo i em-wahpki lothaita ch ed mamtp pi am hu wehmaj wo i e ap'ech. T g usagakam am wo i em-thagito chi-lihhi wui. T heg gd hu wo si em-kuh. 59 Kumt pi wo sha'i i e wuhshath am hugkam mamt hekith wo i wehs ha namkith mamt he'ekia i em-to'i.”

Luke 13

1 Kush ia'i ithani ha'i g o'othham am ahgith g Jesus matsh g kownal Pilate ha'i ha koktha g Galilee t am hemajkam mash eda ihtham am hab chum wua g iagchulitha Jiosh wui. 2 Sh g Jesus hab kaij am ha wui, “Kumtp hab elith mo ith am wohokamchuth mo ba'ich d i si pi ap'ekam mo hedai i Galilee t am kihkam namt pi hab masma ha koktha. 3 K eda pi woho. Wehsijj am hab masma d pi ap'ekam ch wo bei g s-ko'ok e-namkithadag mamt wo sha pi ohhoth g pi ap e-chegitoi. 4 “Neh, am atsh i gei g uhgk kih Siloam wo'o t am Jerusalem ch ed. Kutsh gamai gigi'ik e ko'ij. Kum hab elith mo ith am wohokamchuth mo ihtham ba'ich d i si pi ap'ekam mo hedai i hegam mo am kih Jerusalem t am. 5 K eda pi woho. Wehsijj am hab masma d pi ap'ekam ch wo bei g s-ko'ok e-namkithadag mamt wo sha pi ohhoth g pi ap e-chegitoi.” 6 Sh g Jesus am ha ahgith ihtha ha'ichu wepogitha ahga, “Neh, matp hema g o'othham ge suhnaga am uhdwis e-oithag ed ch am him k am s-u'im g suhna. K pi ab hu bahithag. 7 “K hab ahg g oithag nuhkuththam, ‘Neh, waik a'ahith ab ach am nenneith hegai suhna uhs ch pi koi ha'ichu sha'i bei ab amjed. Pt wo shonch. S haschu ahgk am hig wo kehkk oithag ch ed?’ 8 “K wabshaba hab kaij g oithag nuhkuththam, ‘Am att hig wabsh wo thagito hemako ahithag ehp. Nt am wo si i moihun k am wo iawua g haiwani biht an wehgaj. 9 Kut am wo s-ap'ek matp ab wo bahithagt. Nt wabshaba am haha wo si shonch matp pi ab hu wo bahithagt.’ ” 10 Sh am hu hebai mihshmetha tash ch ed g Jesus am ha mashcham cheopi ch ed. 11 Sh am hema ha'ichug g uwi mash g jiawul an u'ukch. Kush gamai gigi'ik a'ahith ab wa'i mumku mash ab wabsh i e olatch ch pi e nako mat wo shel i kekiwua. 12 Tsh am i cheh g Jesus k ab si wai. Tsh ab i hih. Kush hab kaij, “Ahpi uwi, ia at wo i thoa g m-mumkithag,” 13 K ab hahawa taht. Kutsh ha hekaj shel i kekiwua k ab si ihm g Jiosh. 14 Kutsh ab si bagat hegai mash d ha-wanimedtham am cheopi ch ed matsh g Jesus ha thoaj ha-mihshmetha tash ed k ash hab ha ah g hemajkam, “Am o ha'ichug g chuhthp tash matt heg eda wo chikpanath. Kunt heg oitham tash ia wo thatha k wo e thoaj, hi wa pi t-mihshmetha tash ed mo g Jiosh am kehshch.” 15 Sh hab kaij g Jesus ab wui, “Ih, pi ap sha'i woho ab hu has elith g Jiosh pi ab hu ho'ige'ithch ihtha uwi no pi d chum aligaj. S-mahch ap mat wabsh chum hedai g e-woiwisga o g e-wuhluga am wo wul'ok k am wo be k gd hu wo i'ich, chum hems e-mihshmetha tash ed. 16 Pegih, tt wahm wo i wehmt ihtha t-wehm o'othham. Jiawul o wa ab wulshch gamai gigi'ik ahith ab. Kutt hemho wa wo wul'o, chum hems mihshmetha tash ed.” 17 Kutsh si e el hegam mo s-keh'ith. Sh wabshaba g hemajkam si s-hehgig heg hekaj si s-kehg ha'ichu mat hab juh. 18 Sh hab ep kaij g Jesus, “Am ant he'es wo i em-tashogi g Jiosh kownaltalig 19 am wepogithch g ha'ichu kai. Neh, heg am e'esha mo al chumaj ch oi wa am wo wuhshani k ha'as wo i ge'etha mo g s-ehheg uhs. Tp hems g u'uwhig an ab wo koksht. Pegih, t hab wa masma wo ge'e i ge'etha g Jiosh kownaltalig, chum as al chum am wo shonwua.” 20 Sh hab ep kaij g Jesus, “Jiosh kownaltalig o hab wa'ap wepogithas mo g jewajithakud. Heg amt wo be k am wo wah wehnathk g chu'i k am he'es wo i thai. T g jewajithakud wo chehmo g wahga mat wehs am wo i kopothka. Pegih, t g Jiosh kownaltalig hab wa masma wo chehmo g jewed.” Neh, bash kaij g Jesus 22 Sh am hihimhim hegam Jesus ha oithk g kihhim. Sh g Jesus am ha'ichu ha mashcham g hemajkam ch am wabsh i si ha'ab e gewkathch Jerusalem wui. 23 Sh hema ab kakke ch hab kaij, “Ni-kownalig, nat pi sha'i mu'i wo e tho'ibia g hemajkam?” Sh hab kaij g Jesus ab wui, 24 “Heu'u. Kumt heg hekaj am wo si e nakogath mamt am wo i wahp Jiosh kownaltalig ed. Mu'ijj at am wo chum s-wahpkim k pi wo e nako. Heg o wa wepo mamt am wo i wahp al aj kihjeg t amjed. 25 Ith ant wo wepogi g kih enigakam mat am wo i ha wahpki g e-machiga k am haha wo si kuh g pualit. T ab ha'i ep wo i chum s-wahpkim. T hab wo ha ah, ‘Gam g hu wo hihim. Pi ani sha'i em-mahch.’ 26 “Neh, bat wa masma mu'i am wo i chum s-wahpkim ni-kownaltalig ed hab kaijch, ‘M-wehm ach t-gegosithahim. Kup am ha mashcham t-kihhim am.’ 27 “Kunt hab wo ha ah, ‘Pi ani sha'i em-mahch. Gam g hu wo hihim ab ni-amjed. Tham si pi ap hehemajkam.’ 28 “T haha wo si shoanith ch ga hu wabsh wo i si e ki'ishch nat pi wo sha'i si s-ko'ok ha'ichu nakogath. T eda am wo ha'ichugk g Abrahambad ch Isaacbad ch Jacobbad ch wehs g Jiosh ha'ichu i tashogiththam. 29 Kut g hemajkam ab wo i hihi si'al tahgio amjed ch huduni tahgio amjed ch ab juhpin tahgio amjed ch wakolim tahgio amjed k am wo thadhaiwua e wehm Jiosh kownaltalig ed. 30 Kut am d wo si haha'ichuk hegam mo hemuch d pi haha'ichu. T hegam mo hemuch d si haha'ichu d haha wo pi haha'ichuk.” 31 Tsh am ha hekaj ha'i thatha g Palasi k hab kaij ab Jesus wui, “Gam g hu hihm ia amjed nash pi s-m-mu'amk g Herod.” 32 Sh hab kaij g Jesus ab ha wui, “Herod o sha ban masma ch hab kaij. Him k ahgith mant ha'as tash am wabsh kia gm hu hab wo i ha junihith g jijawul ch wo ha thoajithath g kok'otham ch haha wo s-ap nahto g ni-chikpan. 33 Kunt pi wo sha'i ni-muhkith im hu haha wabsh i himathch. Am o wa'i Jerusalem t am e ko'ijith g Jiosh ha'ichu i tashogiththam. 34 “Ih, t wo si e sho'igch g Jerusalem t am hemajkam nat pi g Jiosh s-ap wo ha thagito. Ha-shohshon ash wa ha ma'ichshulig ch mu'i ha koktha g Jiosh ha'ichu i tashogiththam. T ihtham am ha oithk hab wo e juh. Mu'ikko ani hab chum si ni-tahtk mant wo si s-ap em-nuhkuth hab sha masma mat g chuchul g e-mahmad ab e wecho wo ha hemapai. M wabshaba pi ab hu tatchua manis hab wo em-juh. 35 K eda an hab chu'ig Jiosh o'ohana ed mamt ab wo chum ni-ihmath ch hab wo chech'eth mat g Jiosh am i ni-kehsh k si s-ni-ho'ige'ith. Kunt ia wo i s-ap em-thagito am hugkam mamt hab hahawa masma hab wo e juh.”

Luke 14

1 Sh hema d uhgchu ch d Palasi ch hebai hab juh g ge'e gegosig ha-mihshmetha tash ed k ash ab i wai g Jesus. Kutsh am jiwia. 2 Sh eda an hema ha'ichug g cheoj ch mahniko nash pi g kakhioj ch nohnhoij ge totskoni. Kumsh an si s-nen'oith g Jesus mas wo thoaj nash pi ab ha'ichu s-abchuthamk. 3 Sh hab kaij g Jesus ab ha wui hegam chehanig ha mashchamtham ch Palasi, “Shahchu am ahgch hab elith mo pi t-hiwgith g t-chehanig machs wo ha thoaj t-mihshmetha tash ed?” 4 Sh pi hedai has sha'i kaij. Tsh g Jesus ab hahawa i wai ihtha o'othham k thoajith k am hahawa thagito. Kutsh gm hu hih. 5 Sh hab hahawa kaij g Jesus ab ha wui, “Neh, namt hig pi woho ab ha hekaj wo i wuhshath g e-alithag o chum hems g e-woiwisga matp am wo sha gei wawhia ch ed, chum as d wo em-mihshmetha tashk?” 6 Kush pi hedai e nako mas has wo chei. 7 Kutsh ha'i hegam ha-waitha gn hu si wehpeg s-apko thadhaiwua. Kush am ha neith g Jesus ch hab kaij, 8 “Pi g am hu si s-apko wo thadhaiwua mamt hekith am wo hihi gegosig wui. Tp hems am hema wo jiwia mat am ba'ich d wo i s-has ha'ichuk. 9 Kut am haha wabsh wo jiwia hegai mat ab i em-wai k hab wo em-ah mamt wo hiwigi hegai s-has ha'ichu abai mamt ab chum thahiwua. Kumt wo si e el namt pi hahawa ga hu wabsh si ha oithk wo thahiwua. 10 “Ba'ich at wo i s-ap'ek mamt ga hu wabsh mehk wo thahiwua. Kut g kihkam ab wo i him k hab wo em-ah, ‘Ni-nawoj, oi g i hihm k ia hu s-apko ni-miabithch i thahiwua.’ Neh, t ith ab wo em-mah g si has elitha am ha tahgio hegam ha'i ha-waitha. 11 “Mt wo pi ha'ichuch hegai mat hedai wo chum si e ha'ichuch k ab wo si ha'ichuch hegai mat wo pi e ha'ichuch.” 12 Sh hab hahawa ep kaij g Jesus ab wui hegai mat ab i wai, “Pi g hegam ab wa'i ha waith e-naipijju o g e-wepnag o g e-hajuni o g s-kakais e-hugith an kihkam mapt hekith hab wo juh g gegosig. Ab at epai wo i m-wai ihtham. Kupt hab masma ab wo bei g e-namkithadag heg hekaj mapt ith hab juh. 13 Ab g i ha waith g sho'igkam ch mamaniko ch pi hihimithkam ch pi neneatham mapt hekith hab wo juh g gegosig. 14 Pi at wo e nako ihtham mat wo uhpam m-namkith. T g Jiosh ab wo m-mah g s-kehg m-mahkigdag mat hekith am wo i ha wuwhas g s-ap'ekam hemajkam ab muhkig amjed.” 15 Sh am hema thaha g o'othham ch kah ihtha. Tsh am i ha'asa neo g Jesus. Sh ith ab wui hab kaij, “Ttki wo si s-hehgigkath, am i wahpk Jiosh kihthag ed, heg wa wepo matt am wo thadhaiwua ge'e gegosig ch ed.” 16 Sh hab kaij g Jesus, “Heu'u, mamtp woho am wo i wahp. Ith o wepo masma matp hems hema hab juh g ge'e gegosig k mu'i ab ha waith g hemajkam. 17 T am i e ai. Kut am hema cheha g e-pionag. T heg am him k ha-ahgi mo wehs ha'ichu e nahtokch. 18 “K wabshaba ihtham am ahgith mat pi wo e nako mat am wo hihi. “Neh, tp hems hema am wo ahgi, ‘Ha ant nolawt g oithag k heg s-neithamk ch hekaj pi am hu wo hih.’ 19 “Kutp hems hema am wo ahgi, ‘Wehst-mahm woiwis ant am ha nolawt k hegam s-ha a'appemimk.’ 20 “Kutp hems hema am wo ahgi, ‘Ha ant hohnt k hekaj pi am hu wo hih.’ 21 “Neh, t am hahawa uhpam hih ihtha ha-pionag k am ahgi g e-ahmo. T g ahmoj wabsh woho i bagat k hab kaij ab e-pionag wui, ‘S-hohtam g am hihm kahya ch ed ch wohg ch ed k ab wo i ha ui g sho'igkam ch mamaniko ch pi neneatham ch pi hihimithkam.’ 22 “Kut wa woho hab juh k am hahawa jiwia k hab kaij, ‘Bant juh g m-chehanig. K wabshaba am wabsh kia wi'is g kih.’ 23 “K hab ep kaij g ahmoj, ‘Am g i wuhshani k an mehk hihm chu'uchum wopog oithch an sha'i ch ed k hab wo ha juh mat ab wo i hihi mat wo shuhth g ni-kih. 24 Pi at ab hu i hihi hegam mo d chum si ni-waitha. Kunt pi hema wo sha'i hiwigi mas wabsh wo i jeh g ni-gegosig.’ ” 25 Sh am hu hebai hihim hegam Jesus. Sh mu'i hemajkam am ha wehm hihim. Tsh ab i ha nei g Jesus k hab kaij ab ha wui, 26 “Pi am ab hu sha'i ni-tatchua mamtp pi ba'ich ab wo i ni-tatchua mam hi g e-jehj ch e-wepnag ch e-wehm kihkam ch e-a'aliga. 27 Hemho wa amt gm hu wo thagito g hejel hab e-elitha k ahni hab ni-elitha hab wo junihith ch ni-wehhejed wo e sho'igchuthath. Ith at heg wo wa wepok mam ab mohto g kots ch ab ab wo e muhkith. 28 “Neh, nat hig pi am hu wo i a'amich hegai matp hedai am hema ge'e wo kiht mas am hi wa ahim lialiga mat wo nahto g e-kihta? 29 Mt wo ashath matp am hab wabsh wo juh g shondaj k pi wo e nako mas am hu wo i nahto g e-kihta. 30 Kut hab wo e chech'eth, ‘Ihtha o'othham at am chum hema i kei g kih k wabshaba pi e nako mat wo nahto.’ Pegih, mt ahpim hab wa masma wo i a'amich mams wo e nakog k ab wo ni-hiwgath. 31 “Neh, matp hems hema g kownal wo s-cheggiam g e-obga k eda al wehst-mahm mihl (10,000) wo shonthaligak. T g obgaj gokko wehst-mahm mihl (20,000) wo shonthaligak ch ab him. T hegai kownal am wo i chum a'amich mas hu hi wo wa e nako mat wo cheggia. 32 Tp hab wo mahsk matki pi wo e nako, t hemho wa am wo ha'i ha cheha mat ab wo nam hegai hema kownal mat ga hu wabsh kia mehk wo himath k wo s-mai mas he'ekia wo i namkith. T pi wo cheggia. 33 Neh, bo chu'ig. Kumt ahpim pi wo e nako mamt ab wo ni-hiwgath, heg hi wa mamt wehs ha'ichu wo thagito am ni-wehhejed.” 34 Sh hab ep kaij, “Mt ha'ichu wehhejed wo chum s-kehgajk hab masma mo g on. 35 Heg at gm hu wabsh wo s-e ohhoth mat wo sha kahko. Kumt wo s-e nen'oithath namt pi wabsh wo s-e ohhoth mamtp pi ha'ichu wehhejed wo s-kehgajk. Ab g wo i a'amichuth ahpim mam kah ihtha.”

Luke 15

1 Sh am hu i hebai, sh mu'i lial ha kowlanttham ch pi ap hemajkam ab i miabi g Jesus mat ab wo kaiha. 2 Tsh g Palasi ch chehanig ha mashchamtham ab i s-babgam neneok k hab kaij, “Ihtha o'othham o wabsh s-ap ab ha neith g pi ap hemajkam ch ha wehm e gegosith.” 3 Tsh heg hekaj am ha ahgi ihtha ha'ichu wepogitha ahga, hab kaijch: 4 “Ith o wepo masma mamtp hems hema ahpim siant wo kahwaligak. Kut hema wo heb hu hih. Namt hig pi am wo ha thagito hegam humukto gamai humukt kolhai ch ed k am wo i gahghi hegai hema am hugkam mamt wo chehg 5 k an haha wo kushwiot k hih uhpam 6 k ab wo i ha wai g e-naipijju. T am wo i e hemapai. Kumt hab wo ha ah, ‘Si g wo s-hehgigk ni-wehm. Cheh ant g ni-shoiga mat chum heb hu hih.’ Kut am em-wehm wo si s-hehgigk. 7 Pegih, t hab wa masma d wo si s-hehgigk an eda g Jiosh kihthag chum hems hemako em-wehhejed mamt gm hu wo s-ohhoth g pi ap e-chegitoi. Kum eda ha'i hejel hab chum e elith mam d s-ap'ekam hemajkam ch pi tatchua mams gm hu wo s-ohhoth g pi ap e-chegitoi.” 8 Kush ith am ep ha ahgith g Jesus ch hab kaij, “Matp hema g uwi wehst-mahm wo enigak g lial ch hema wo heb hu wua. Tp hems wo mehi g e-lahmpa k an wo i wosu g e-kih k an wo i gahghi am hugkam mat wo chehg 9 k ab haha wo i ha wai g e-naipijju. T am wo i e hemapai. T hab wo ha ah, ‘Si g wo s-hehgigk ni-wehm. Cheh ant g ni-lialiga mant chum heb hu wua.’ Kut am wehmaj wo si s-hehgigk. 10 Pegih, t hab wa masma wo si s-hehgigk g anghil chum hems hemako em-wehhejed mamt gm hu wo s-ohhoth g pi ap e-chegitoi.” 11 Sh hab ep kaij g Jesus, “Matp hems hema g o'othham gohk wihpiopga. 12 T g chumchu ab wui i him k hab kaij, ‘Ni-ohg, wapt wo i ni-mah hegai mat d wo chum ni-wuikamk.’ Kut wa woho am i gawulkai g e-eniga k ab ha mah g e-wihpiopga hegai mo haschu d ha-wuikam. 13 “T ihtha chumchu am ha hekaj gagda g e-eniga k bei g namkigaj k gm hu simnolt mehk jewed wui k am heki wua g e-lialiga am hab wuathch g pi ap'ekam. 14 T am i huhug g lialigaj. T am hahawa gei ge'e bihugig. K ihtha simnolttham pi ha'ichu edgith mas wo huh. 15 K am hahawa hema chikpanachuth e-oithag ed mat wo ha nuhkuth g kokji. 16 Kut chum hems heg s-hugim mo haschu g kokji ko'a. T pi hedai ha'ichu mah mas wo huh. 17 “T am hahawa ha'ichu kop mo'oj ed. K hab e ahg, Wehs g ni-ohg pionag o s-edgith g ha'ichu hugi. Kuni eda ahni d bihugimkam. 18 Nt hig wo uhpam hih ni-ohg wui k hab wo chei, ‘Ni-ohg, pi ant ap has chu'i ab m-wui ch ab Jiosh wui. 19 K hahawa pi d ni-wuikam mams hab wo ni-a'agath mani d m-alithag. Chum anis hems d wabsh wo m-pionagk.’ 20 “Neh, t am ha hekaj i wuhshani k am wui hih g e-ohg. T heg cheh mo im hu wabsh kia him k ab si s-ho'ige'ith k ab wui med k gn hu kohm k ab chintath. 21 “K ab wui hab kaij g alithaj, ‘Ni-ohg, pi ant ap has chu'i am m-wui ch am Jiosh wui. K hahawa pi d ni-wuikam mams hab wo ni-a'agath mani d m-alithag…’ 22 “T wabshaba g ohgaj hab wabsh ha ah g e-pionag, ‘Ab g wo i bek g s-kehg eniga k an wo wahkith k g anilo an wo sha'ich nowij an k g shuhshk ab ep wo cheka 23 k wo mua g s-gihg wisilo. Kutt hab wo juh g ge'e gegosig k wo si s-hehgigk. 24 Uhpam at ep jiwia ihtha ni-alithag mat gm hu mehk hih. Ith o heg wa wepo mat muh k ep e chegito.’ Neh, t wa woho hab e juh g si ge'e s-hehgig. 25 “K eda gm hu chikpan g ge'echu alithaj oithag ch ed ch pihhun k ab hih. K eda si s-hehgig ch ne'eth ch keihin. 26 Kut kah k ab hema kakke g pion mas has d ahga ihtha. 27 “K heg hab kaij, ‘M-wehnag at jiwia. Kumt mua g s-gihg wisilo k hab juh g ge'e gegosig nat pi s-ap jiwia.’ 28 “Neh, t bagat ihtha ge'echu k pi am hu i wah. T am hahawa kah g ohgaj k am i wuhshani k am wabsh s-ap ab chum waith. 29 K wabshaba ab wui hab kaij, ‘Neh'e, ha'akia a'ahithag ani ab m-wecho ch chum hekith hab wua g m-tatchui. Kupt eda pi hekith chum hems g siwat mad ab ni-mah mant wo ni-gegosith k wo s-hehgigk am ha wehm g ni-naipijju. 30 T wabshaba ia jiwia ihtha m-alithag mat hedai heki wua g m-kihthag ha wehm g chechpa'awi. Kupt mu'ij g s-gihg wisilo.’ 31 “K g ohgaj ab wui hab kaij, ‘Ni-alithag, ahpi ap chum hekith ni-wehmaj. K wehs hegai mo d ni-eniga d m-eniga. 32 K wabshaba hemu am wa s-ap'e matt wo si s-hehgigk nat pi uhpam ep jiwia ihtha m-wehnag mat am simnolt. Heg o wa wepo mat muh k ep e chegito,’ bo kaij g ohgaj.”

Luke 16

1 Sh am ep ha ahgith g Jesus ihtha wepogitha ahga ch hab kaij, “Tp hems am hu hebai hema d wo s-kais o'othhamk. K hegai mat am i kei mo d maliom wabsh heki wua g lialigaj. 2 T am i wai e wui k hab kaij, ‘Am ant ha'ichu sha naksh ab m-amjed k antki hekaj hab wo chei mapt am wo i kuint k am wo o'oha wehs map has i masma nuhkuth g ha'ichu ni-eniga nantki pi wo m-thagito.’ 3 “T hab i e ah ihtha o'othham, ‘Tki wo i ni-wuhshath g ni-ahmo. Nis has wo ni-juh? Pi ant wo ni-nako manis wo waikkat k si ni-elith manis wo ha'ichu ha tahnith. 4 Neh, s-mahch ani mantki has wo ni-juh k mu'i wo naipijjuk. T ihtham ab wo i ni-wahki e-kihki ed mamt hekith wo i ni-wuhshath ith amjed ni-chikpan.’ 5 Bo kaij ch am hahawa hehemako ha waith hegam mo ab ab e wulshch g ahmoj. Kut am hema jiwia. K g maliom ab wui hab kaij, ‘Nap s-mahch map he'ekia ab ab i e wulshch g t-ahmo?’ 6 “K hab kaij ihtha, ‘Heu'u, hemako siant waplin g a-saithi ani ab ab ni-wulshch.’ “K hab kaij hegai maliom, ‘Ab ant wo i huduni. Pt am wa'i hetaspo wehst-mahm waplin ab ab wo e wulshch.’ “T gm hu hih hegai. Kut am hema ep jiwia. 7 “K g maliom ab wui hab kaij, ‘Nap s-mahch map he'ekia ab ab i e wulshch g t-ahmo?’ “K hab kaij ihtha, ‘Hemako mihl kokstal g pilkani.’ “K hab kaij hegai maliom, ‘Ab ant wo i huduni. Pt am wa'i gigi'ik siant kokstal ab ab wo e wulshch.’ 8 “Neh, t g ahmoj si has i el am i kahk mat has e juh ihtha s-chu banmathamkam maliom nat pi si s-e mahch k hab e juh. Neh, hegam mo pi mahch g Jiosh o em-ba'ich i s-e mahch ch hab wua ha'ichu. 9 “Ith ani em-ahgith mamt wo s-ap hekaj g e-kaisthag am ha wehhejed hegam mo tatchua g i wehmtadag. T g Jiosh s-ap am wo i em-wahpki e-kihthag ed mamt hekith wo muh. 10 “Hegai matp hedai s-ap wo nuhkuth g al chu'uchum ha'ichu at hab wa'ap s-ap wo nuhkuth g ge'eged ha'ichu. Kutp hedai wo ha banmath g al chu'uchum ha'ichukaj k hab wa'ap wo ha banmath g ge'eged ha'ichukaj. 11 Am g wo s-ap nuhkuthath hegai mam haschu em-nuhkuthachuth ith thahm jewed. T g Jiosh am wo ha'ichu em-nuhkuthach e-kownaltalig ed. Heg o d s-wohom kaisthag 12 ch d wo em-enigak mamtp wo s-ap nuhkuth hegai mam haschu em-nuhkuthachuth ith thahm jewed. 13 “Pion at pi wo e nako mat gohk wo a'amok. Hema at ba'ich ab wo i tatchuath ch ba'ich i s-ap wo chikpanithath. Kumt ahpim hab wa'ap pi wo sha'i e nako mams wepo ab wo ha tatchuath g Jiosh ch ihtha jewed thahm s-kaistalig.” 14 Sh am ha'i kah g Palasi wehs ihtha. K eda g Palasi si pihk e elith g s-kaisthagkaj. Kush ihtham heg hekaj nahnko ahg g Jesus. 15 Sh hab kaij g Jesus ab ha wui, “Ahpim am hab chum e wua mam d s-ap'ekam am ha tahgio g hemajkam. K wabshaba g Jiosh s-mahch g em-i'ibthag. Hegai mo haschu i g hemajkam hab chum elith mo d si ha'ichu o d wabsh pi ha'ichu am Jiosh nena ed. 16 “Mosesbad ch hegam ha'i kekelibad Jiosh ha'ichu i tashogiththam at an o'oha mamt has wo chum masmak. Kumt ith wo chum hekaj am hugkam mat ab i wuhsh hegai John mo em-pahl wapkonahim. K am i amjed ihtha s-kehg ha'ichu ahga ab amjed g Jiosh kownaltalig am e ahgahim. K wabsh chum hedai am chum e nakog mat am wo i wah. 17 T wabshaba pi wabsh wo huhug hegai chehanig. Ba'ich at wo i pi hasigk mat g thahm kahchim ch jewed wo huhug. 18 “That wo pi ap chu'ijkamk hegai matp hedai wo s-ohhoth g e-wehm kihkam k hema ep wo bei. K hab wa'ap wua g pi ap'ekam hegai matp hedai an wo bei g ha-ohhotha.” 19 Sh ith am ep ha ahgith g Jesus: “Tp hems hema d sha'i si s-kais o'othham ch chum hekith g si s-namkig eniga ab wahpkch ch wehs tashkaj si s-kakaisim kihthag. 20 K am hema d si sho'igkam o'othham ch hab chehgig Lazarus ch wehsko hihiwog. Kum ab i bebhe ch ab thathsha s-kais o'othham kihjego. 21 hab elithch mat he'es ha'ichu wo al huh mo ab i shulig s-kais o'othham mihsa t ab. K g gogogs ab winikon g hihiwthaj. 22 “T am i muh ihtha sho'igkam o'othham. T g anghil am i be k an u'apa anai mam am ha nuhkuth g s-ap'ekam. “Kut g s-kais o'othham hab wa'ap muh. Kumt gd hu cheh. 23 T am i e chegito k oki am ha'ichug mo am kuhkpi g pi ap'ekam ch sha'i si s-ko'ok ha'ichu tahtk ch ab i nea e thahm. K g Lazarusbad ab wehmaj thaha g t-shohshon Abraham. 24 K ihtha s-kais o'othham ab si s-kaitham hab kaij, ‘Ni-shohshon, Abraham, ge'e s-ko'ok ani nakog ith eda mehi. Ab g si i s-ni-ho'ige'ith k ab wo cheha g Lazarus mat am wo wahki g e-nowi shuhthagi ch ed k ab wo i him k ab wo iawua ni-nehni ab.’ 25 “K wabshaba hab kaij g Abrahambad, ‘Ni-hajuni, am g i chegito map wa in d thoakam ch wehs ha'ichu s-kehg edgith. K wa g Lazarus d wabsh si sho'igkam ch wabshaba hemuch ab si s-ap e tahtk iia. Kup ahpi g s-ko'ok tahtk. 26 Gamai wa ba'ich o an ge s'tadani ch s-juhk hiktani an t-tahgio. Kutt pi wo t-nako machs hedai am gahi wo i chesh em-wui o mamt ahpim ab gahi wo i chesh t-wui.’ 27 “K hab kaij g s-kais o'othham, ‘Pegih, ni-shohshon, am ani hetasp wepnag. K ihtham am wabsh kia d thothakam ch am kih ni-ohgbad kih am. Ab g si i s-ni-ho'ige'ith k am wo cheha g Lazarus mat am wo him k am wo ha shohbi. T pi ia hu ha'ab wo thatha mo ia g s-ko'ok e tahtk.’ 29 “K hab kaij g Abrahambad, ‘M-wepnag o edgith g Moses o'ohana ch Jiosh ha'ichu i tashogiththam ha-o'ohana. T heg am wo ha shohbi matp ab wo kaiha.’ 30 “K hab hahawa ep kaij g s-kais o'othham, ‘Ni-shohshon, Abraham, pi at woho ab wo kaiha. Pt wabshaba hema hab wo sha juh mat ep wo e chegito. T ab wo kaiham k gm hu wo s-ohhoth g pi ap e-chegitoi.’ 31 “K hab kaij g Abrahambad, ‘Pi o ab hu kaiham g Moses o'ohana ch Jiosh ha'ichu i tashogiththam ha-o'ohana. K am wa tasho mat hab wa'ap pi ab hu wo wohoch hegai matp hems ep wo e chegito.’ Neh, bo kaij ch am thagito.”

Luke 17

1 Sh hab hahawa ep kaij g Jesus ab ha wui hegam mash ab hiwig, “Chum o hekith ha'ichu hab e wua mamtp hems heg hekaj am wo i shul pi ap'ekam ch ed. T wabshaba s-ko'okam wo e namkith hegai mat hab wo em-juh mamt am wo i shul. 2 Ba'ich at wo i s-ap'ek wehhejed matp hems wo e wachumchuth k wo e mua. T hab pi am hu wo ha shul g al ni-wohochuththam pi ap'ekam ch ed. 3 Am g wo s-e nen'oithath! “Mt wo ahgi g e-wehm wohochuththam matp pi ap wo chu'i ab em-wui. Kutp hems ab s-ap wo em-kaiham k gm hu wo s-ohhoth g pi ap e-chegitoi. Kumt ab wo i s-ho'ige'el. 4 Tp hems mu'ikko hab wo juh g pi ap'ekam ab em-wui hemako tash ed. Mt wabshaba chum hekith ab wo i s-ho'ige'el mat hekith gm hu wo s-ohhoth g pi ap e-chegitoi k ab wo em-tai g ho'ige'elig.” 5 Sh hab kaij g Jesus chuhchai ab wui, “T-kownalig, ab g i ge'ethajith g t-wohochuthadag.” 6 Kush hab kaij g Jesus, “Pi am tatchua g ge'e wohochuthadag. Wehs at hab wo e juh hegai mamt hab wo che'e k wo s-wohoch mat hab wo e juh. Mtp hems am wo ahgi ihtha gohi uhs mat wo e huhpshan k gd hu wo e ei ge shuhthagi ch ed. Kut wa woho hab wo e juh.” 7 Sh g Jesus am ha'ichu ha wepogith ch hab kaij, “Pi o ab hu sha'i ab g ha-ahmo mas wo ha hihithol g e-pionag, chum as hegam ge tash oitham am chikpan oithag ch ed. 8 Pion at wo hihithol g e-ahmo k wo gegosith k hahawa hejel wo e gegos. 9 Ab o ha ab mat am hab wo wa juh hegai mo haschu am hab i ha chehani. Kut pi hab wo chum el mas ab wo ha ho'ige'el. 10 Pegih, bo wa masma am em-wehhejed. Wehs amt ha'ichu am hab wo juh mo haschu ab i em-chehani g Jiosh k hab wabsh wo e ahgath mam d wabsh pion ch am hab wabsh juh g e-chikpan.” 11 Sh am wabsh kia hihim hegam Jesus Jerusalem wui ch am hihi ha shahgith g Samaria chekshani ch Galilee chekshani. 12 Sh am hema d al kihhim. Kush am ha'i thadha jeg ed nash pi kok'o heg hekaj mo g ha chuhkug muhkhim ch chum pi ha thoajig. Tsh am i chum wahp hegam Jesus mash em kihjeg g kolhai. Tsh ihtham kok'otham am cheh g Jesus k i wahpamig k d wehst-mahm ch am nam k ga hu wabsh mehk gegok 13 ch amjed s-kaitham hab kaij, “Jesus, t-kownalig, ab g i s-t-ho'ige'ith.” 14 Sh ab ha neith g Jesus ch hab kaij, “Gamai g wo hihim k ab wo e-chehgi papal ha wui.” Tsh am he'es i hihim k s-mai matki ha thotha. 15 Kutsh hema ab uhpam i hih am i s-mahchk mat thoa k ab si ihm g Jiosh si s-kaitham 16 k atsh am si gei jewed thahm ab Jesus wecho k ab si ho'ige'el. Kush eda ihtha pi d Tuhligo ch d wabsh Samaria t am o'othham. 17 Kush hab kaij g Jesus, “A nant pi woho wehst-mahm o'othham ha thothaj. 18 T eda al hemako ia uhpam jiwia k ab ho'ige'el g Jiosh k d wabsh go'ol o'othham. 19 Kekiwuani k gamai hihm. Ab ap ni-hiwig ch heg hekaj thoa.” 20 Sh ha'i g Palasi hab si kaij ab wui g Jesus, “A pt hekith hig am wo i t-chehgi ihtha Jiosh kownaltalig map an ahgachug?” Kush hab kaij ab ha wui, “Pi amt g e-wuhpuikaj wo nei g Jiosh kownaltalig 21 mams hab wo chei, ‘Ia o ha'ichug’ o ‘Gd o hu ha'ab ha'ichug.’ K eda am em-shahgith.” 22 Sh amjed hab kaij hegam ha wui mash ab si wecho e mashcham, “Ab o him g tash mamt wo chum tatchuath mant ia wo em-wehmajk chum hems hemako tash ab ahni Jiosh si Kehsha. Nt wabshaba pi ia hu wo ha'ichugk. 23 Ha'i at hab wo kaijjith ‘Gad g hu wo neith g Jiosh si Kehsha’ o ‘Ia g hu wo neith.’ Mt wabshaba pi am hu wo i ni-gahghi. 24 Wehsko ant wo ni-chehgi mant hekith ep wo jiwia jewed thahm hab sha masma mat g wepgi s-masma an gahi wo kekiwua chewagi ch ed. 25 Nt wabshaba hemu mu'i wo ni-sho'igch. T pi ab hu wo ni-tatchua ihtham hemajkam ai'i ithani.” 26 Kush hab ep kaij g Jesus, “Bat wo masmak mant hekith ep wo jiwia mash wa hab chu'ig eda mash g Noahbad in d thoakam. 27 Hemajkam ash wa gm ha wabsh i si neneath ch e gegosith ch ih'eth ch e hohont ch gm hu wabsh i pi chegito g Jiosh. T haha wabsh e ai g tash mat hegam Noahbad am i wahp ge'e wahlko ch ed. Kut mel g shuhthagi k ha wi'in k wehs ha koktha. 28 “Bat ep wo masmak mash wa hab masma mash wa g Lotbad in d thoakam. Wehsijj ash gm hu wabsh i si neneath ch e gegosith ch ih'eth ch ha'ichu ha nolawt ch ha'ichu gagda ch ha'ichu e'esha ch kihkit. 29 Kutsh wa g Lotbad ab i wuhsh Sodom kihhim t amjed. Tsh g mei ch ha'ichu s-mehithkam ab ha thahmjed i e iawua hab sha masma mo g juhki. Kutsh wehs e koktha. 30 “Bat wo wa masmak heg i tash mant am wo i ni-maskogi. 31 Kut pi hedai am hu wo sha'i chum i wah e-kih ed mat am wo ha'ichu ui, chum as hems imhab wo wa'i oimmedath e-kih wehgaj o am wo chikpanath oithag ch ed. 32 Pi at chum hems wo s-huwi g e-kihthag. Batsh wa e juh g Lotbad hohnigbad k hekaj e muhkith. 33 Bat wa masma wo heb hu wua g e-thoakag hegai matp hedai wo chum s-huwithath g e-thoakag hejel e wehhejed. T wabshaba wo tho'ibia g e-thoakag hegai matp hedai wo hekaj ni-wehhejed. 34 Tp hems gohk am wo kohkshath e-kih ed ch hema gm hu wo i e be k hema am wo wih mant hekith ep wo jiwia. 35 Gohk u'uwi atp hems am e wehm wo chu'ath g pilkani. T hema gm hu wo i e be k hema am wo e wuiok. [ 36 Gohk o'othham at am wo oiopoth oithag ch ed. T hema gm hu wo i e be k hema am wo e wuiok.]” 37 Sh hab kaij g chuhchaij ab wui, “A t hebai hab wo i e juh ihtha?” Sh hab kaij g Jesus, “Am at wo tashok mat hebai hab e juh. Namt hig pi wo mahchk mat hebai wo kahchk g muhki am neithch mo am e hemapathch g nunuwi? Pegih, mt hab wa'ap wo s-ap s-mahchk mat hebai hab wo i e juh ihtha mani em-ahgith.

Luke 18

1 “Chum amt hekith wo e ho'ige'ithahunath am Jiosh wui ch pi hekith wo thagito,” bash kaij g Jesus ch am hahawa ha ahgith ihtha ha'ichu wepogitha ahga: 2 “Tp hems am hebai hema d usagakam ch wabshaba pi ab hu has elith g Jiosh ch pi ab hu ha ha'ichuchuth g hemajkam. 3 T am wui hema jiwia g hejel wi'ikam uwi k ab tai mat am wo i wehmt namsh pi s-lothaitamk. T pi ab hu wohog el. K wabshaba ith chum hekith ab wui jijiwhia. “Kut hab i e ah g usagakam, ‘Chum ani hi wa pi ab hu has elith g Jiosh ch pi ab hu ha ha'ichuchuth g hemajkam. 5 K wabshaba sha'i si ni-kudut ihtha uwi ch wo am hu ni-gewkoch pi ni-thagitok. Nt heg hekaj am hab wo juni hegai mo ab ni-chehani.’ ” 6 Sh hab hahawa ep kaij g Jesus, “Neh, bat wo ha juni g pi ap'ekam usagakam hegai mo haschu chum hekith ab tahni. 7 Pegih, bamt wa masma chum hekith ab wo tahnith g Jiosh g i wehmtadag. 8 Kut s-hohtam am wo i ap'ech ha'ichu am em-wehhejed. T eda mu'i am wo e chehgi mo pi woho ab hu ni-hiwig mant hekith ia ep wo jiwia jewed thahm.” 9 Ha'i ash hab e elith g hemajkam mo d s-ap'ekam ch eda hab ha elith ha'i ehp mo d pi ap'ekam. Sh g Jesus am ha ahgith ihtha ha'ichu wepogitha ahga: 10 “Neh, gohk o'othham at am hihi ge'e cheopi wui mat wo e ho'ige'ithahu. K hema d Palasi 11 ch am hejelko kehk ch am e ho'ige'ithahun ch hab kaij, ‘Ab ani si m-ho'ige'ith, Jiosh, mani pi s-banma ch pi hekith ha'ichu ha iattogith ch pi am hu hab junihim g s-uam ha'ichu hab masma mo chum hedai hab e junihim. Ab ani m-ho'ige'ith mani pi hab masma mo hegai pi ap ha kowlanttham m an kehk. 12 Gohk tash ani ni-ho'ige'ithahun ch pi ha'ichu ko'a thomig ed ch ab m-mahk g hemako tahpani mo wehst-mahm e tahpanch mani he'es ha'ichu ab i neith.’ Neh, bo wa masma e haschuth g Palasi. 13 “K wabshaba hegai hema ga hu wabsh mehk kehk ch pi e nako mas ab wo uhgk i nea thahm kahchim wui no pi si e sho'igchuth. Ith o hab kaij, ‘Jiosh, ab g si i s-ni-ho'ige'ith ahni pi ap'ekam hemajkam.’ Neh, bo kaij hegai hema. 14 “Kunt wo em-ahgi mat ith am i ap'ech g Jiosh e tahgio. T s-ap e taht k hih uhpam. T g Jiosh pi am hu i ap'ech hegai Palasi. Tho wohokam mat g Jiosh wo ha'ichuch hegai mat hedai hejel pi wo e ha'ichuch k wo pi ha'ichuch hegai mat hejel wo chum e-ha'ichuch.” 15 Sh ha'i g o'othham am ha u'apa g al chu'uchum a'al Jesus wui mat ab wo ha taht. Kush g chuhchaij ha neith ch chum s-ha keh'ith mo hab e wua. 16 Tsh wabshaba g Jesus ab i ha wai g a'al k hab kaij ab ha wui g e-chuhchai, “Ab g wabsh wo i ha hiwgith g a'al mat ab wo i hihi ni-wui k pi an hu wo sha'i ha shohbi. Am at wabsh s-moimam wo i wahp Jiosh kownaltalig ed ab ni-hiwigch. 17 Nt wo si shel em-ahgi mamt hab wa'i masma wo i wahp.” 18 Kush hema g Tutuligo ha wanimedtham ab kakke g Jesus ch hab kaij, “Ha mashchamtham map d s-ap'ekam, shahchu ant am hab wo juh mant ab wo bei g pi ha huhugetham thoakag?” 19 Sh hab kaij g Jesus, “Pi ap mahch map haschu ahgch hab ni-a'aga mani d s-ap'ekam. Heg o wa'i Jiosh d s-ap'ekam. Kup pi woho mahch mani hedai wud. 20 S-ha ap mahch ihtham chehanig mo hab chu'ig: Pi g am hu ha ehsithath g ha-wehm kihkam. Pi g am hu ha mua'i g o'othham. Pi g am hu ha'ichu ha ehsithath. Pi g am hu ha'ichu ha iattogithath. Ab g si has ha elithath g e-ohg ch e-je'e.” Neh, bash kaij g Jesus. 21 Sh hab kaij ihtha o'othham, “Wehs ihtha ani hab junihim gd hu i ni-alijk amjed.” 22 Tsh am i kah g Jesus ihtha k hab kaij ab wui, “Hemako ha'ichu o am wi'is mapt am hab wo juh. Wehs apt wo gagda map haschu i edgith k wo ha mah g namkigaj g sho'igkam k ab wo i ni-oith k am wo ni-wehmajk. Bapt masma wo edgithath g s-kaistalig an thahm kahchim ch ed.” 23 Tsh si pi ap e taht ihtha o'othham am i kaiok nash pi d sha'i si s-kais ch si s-huwith g s-e-kaisthag. 24 Tsh am i nei g Jesus mo pi ap e tahtk k hab kaij, “Sha'at wa'i si s-kawkam wo i wahp Jiosh kownaltalig ed hegam mo d s-kakais. 25 Nam hig hab elith mat wo e nako g ka-mihyo mas am wo gahi wuhsh ho'ipad jeg ed. Pegih, t hab wa masma pi wo e nako hegam mo hiwig g ha'ichu e-eniga mas am wo i wahp Jiosh kownaltalig ed.” 26 Sh hab kaij ihtham, “A t hedai wo e nako mat wo e tho'ibia.” 27 Sh g Jesus hab kaij, “Pi at hedai wo e nako mas hejel wo e tho'ibia. T wabshaba g Jiosh wo e nako mat wo ha tho'ibia.” 28 Sh g Peter hab kaij, “Neh, ahchim att am i thagito g t-kihthag matt wo i m-oi.” 29 Sh hab kaij g Jesus ab ha wui, “Woho amt hab e juh. Kunt am wo em-ahgi mat g Jiosh ba'ich i ge'e ha'ichu ab wo em-mah ia jewed thahm ahpim mamt hedai wo thagito g e-kihthag o g e-wehm kihkam o g e-wepnag o g e-jehj o g e-a'aliga wehhejed g Jiosh kownaltalig. T am i thahm g pi ha huhugetham ap'ethag ab wo em-mah e-kihthag ed.” 31 Kutsh am hejelko i ha ui hegam gamai gohk e-chuhchai k hab kaij ab ha wui, “Neh, am att wo hihi Jerusalem wui. T am hab wo e juh am ni-tahgio hegai mo wa g kekelibad Jiosh ha'ichu i tashogiththam an o'ohan ab ni-amjed. 32 Am amt wo i ni-thagito ha wui g gawul mahs hemajkam. T hegam wo nahnko ni-ahgath ch ab wo ni-siswuimath 33 ch wo ni-gewittan k hahawa wo ni-mua. Nt wabshaba ep wo ni-chegito mat d wo i waik tashk amjed.” 34 Kush wabshaba pi sha'i amichuth mas haschu hab ahg g Jesus. Heg o wa wepo mo e e'estokch g ha'ichu ahgaj. 35 Sh am hihim hegam Jesus miabithch g Jerico. Sh g pi neatham am hema thaha wohg hugith an ch ha'ichu ha nead. 36 Kutsh an bihbij. Sh ith ha kah ch ab ha kakke mas haschu an has e wua. 37 Kumsh hab ahgith, “An o him hegai Jesus mo ab Nazareth t amjed.” 38 Sh am si s-kaitham hab kaij, “Jesus, ab g si i s-ni-ho'ige'ith, ahpi map d t-kownaligbad David amjedkam.” 39 Sh hegam mash am ba'ich hihim g Jesus si s-keh'ith ch hab ahg mat wo pi shahmuni. Kush wabshaba haha wabsh ba'ich i s-kaitham hab kaij, “Ab g si i s-ni-ho'ige'ith, ahpi Davidbad amjedkam.” 40 Tsh am hahawa i kekiwua g Jesus k ha chehani mat ab wo i e bek g pi neatham o'othham. Tsh am i jiwia. Sh hab kaij g Jesus ab wui, 41 “Shahchu ant hab wo m-juni?” Sh hab kaij ihtha, “Ni-kownalig, chum ani tatchua mant ep wo ha'ichu neithath.” 42 Sh hab kaij g Jesus, “Ha'ichu g neith. Thoa apt nap pi ab ni-hiwig.” 43 Tsh am ha hekaj wabsh s-ap ha'ichu neith k ab si i ho'ige'el g Jiosh k gm hu i oi g Jesus. Tsh am i nei g mu'i hemajkam ihtha k wehsijj ab si ihm g Jiosh.

Luke 19

1 Tsh am thatha hegam Jesus Jerico t am k am wabsh gahi wo wuwha. 2 Sh am hema chum si s-neithamk g Jesus ch d uhgchu lial kowlanttham ch d si s-kais ch ash hab chehgig Zackias. 3 Sh wabshaba sha'i mu'ij g hemajkam. Kush eda al shopolk ihtha ch pi ap neith 4 ch hekaj gm hu ha ba'ich meh g hemajkam k an i chesh uhs t an. 5 Tsh am i ai g Jesus mo an tha k ash an uhgk i neith k hab kaij ab wui, “S-hohtam g ab i huduni, Zackias. Ab ant wo jiwia m-kih am.” 6 Kutsh ha hekaj ab i hud g Zackias k si s-hehgig ch ab i wahki e-kih ed. 7 Kush wehsijj g hemajkam si s-ju'ujpij neneok ch hab kaij, “Ihtha o'othham atki am wo i thahiwua heg kih am mo d wabsh pi ap hemajkam.” 8 Tsh am i kekiwua g Zackias k hab kaij ab Jesus wui. “Neh'e, eda hugkam ant wo ha mah g sho'igkam g ha'ichu ni-eniga k uhpam ep wo ha namkith gi'ikko e thahm mantp he'es i ha banmath.” 9 Sh hab kaij g Jesus ab wui, “Ith o am chehgithch map wepo wohochuthadag mo g t-shohshon Abraham ch hekaj e tho'ibia ith i tash ab. 10 Ith ant hekaj ia jiwia jewed thahm ahni Jiosh si Kehsha mant an wo i ha gahghim k wo ha tho'ibia g pi ap chu'ijkam.” Neh, bash kaij g Jesus. 11 Pi ash sha'i tash matsh gm hu wo thatha ihtham Jesus Jerusalem t am. Kush hab e ahg g hemajkam mat si e ai mat am wo i wuhsh g Jiosh kownaltalig. Tsh heg hekaj am ha ahgi g Jesus ihtha ha'ichu wepogitha ahga 12 k hab kaij: “Hema o d sha s-has ha'ichu ith eda ha'ichu ni-ahga. Kum am waith mehk jewed amjed mamt wo kownalch. 13 T pi koi him k ab i ha wai g wehst-mahm e-pionag k wehsijj g hemako ohla lial ab i ha mahkhi mat wo hekaj k am wo i mu'ithaj mat am wo i hih. 14 K eda mu'ijj pi hohho'ith g wehmaj o'othham ch am ha'i i e chuhcha mat am wo hihim k hab wo chei mo pi hohho'ith mat d wo ha-kownaligk ihtha o'othham. 15 “Kumt wa woho hab juh hegai s-has ha'ichu o'othham mamt kownalch. T am i uhpam jiwia k am ha hekaj ha wai hegam e-pionag mat am wo thatha k am wo e ah mat he'ekia i thahm nahto g lial heg amjed mat wa ab ha mah. 16 “K g wehpegkam hab kaij am jiwiak, ‘Ni-kownalig, wehst-mahm lial ant nahto am thahm hegai hemako mapt ni-mah.’ 17 “K hab kaij g ahmoj, ‘S-ap apt hab e juh k d si s-wagimakam ni-pionag. Bant wo m-juh mapt wehst-mahm kihhim wo nuhkuth napt pi s-ap nuhkuth g al chu'uchum ha'ichu.’ 18 “K hema ep hab epai kaij am jiwiak. ‘Ni-kownalig, hetasp lial ant nahto am thahm hegai hemako mapt ni-mah.’ 19 “K ith hab ahg g ahmoj, ‘Bant wo m-juh mapt hetasp kihhim wo nuhkuth.’ 20 “K hema ep hab epai kaij am jiwiak. ‘Ni-kownalig, m ia kahch g m-lialiga. Gd ant hu si wuh pa-nihtha ch ed k gd hu si ehsto. 21 S-m-ehbith ani heg hekaj map s-ta ke'ithama. Am ap wabsh u'u hegai map haschu pi chikpan ch am bahbhiam hegai ha'ichu bahithag mo pi d m-esha.’ 22 “K hab kaij g ahmoj ab wui, ‘Hegai map has i kaij ant hab masma wo m-mohto'i g chu'ichig, ahpi s-padmakam pion. S-mahch apki mani s-ta ke'ithama ch wabsh u'u hegai mani haschu pi chikpan ch ab i bahbhiam hegai ha'ichu bahithag mo pi d ni-esha. 23 Pegih neh, pt haschu ahgk pi am hu cheh g ni-lialiga wahnko ch ed mant ab uhpam wo ui wehnadk hegai mat haschu ab mahmadt.’ 24 k hab hahawa kaij ab ha wui hegam mo am gegok, ‘Gam g wo si wohppo'ith hegai lial k heg wo mah mat g wehst-mahm lial nahto.’ 25 “K hab kaij ihtham ab wui, ‘T-kownalig, heki o hu wehst-mahm lialiga.’ 26 “Sh hab kaij ab ha wui, ‘Pi at has e juh nat pi ba'ich ha'ichu ab ep wo i nei hegai mat s-ap wo nuhkuth g e-nuhkutha. T wabshaba wo e wohppo'ithach mo he'es al i chum nuhkuth hegai mat pi ap wo nuhkuth. 27 Kumt ab wo i ha u'u k wo ha koktha am ni-tahgio hegam ni-obga mo chum pi tatchua mant d wo ha-kownaligk,’ bo kaij g ha-ahmo ith eda ha'ichu ni-ahga.” 28 Kutsh gm hu hahawa hihi ihtham Jesus Jerusalem wui. Sh g Jesus am ha ba'ich him. 29 Kush gohk al kihhimag ch hab chehgig Bethphage ch Bethany ch ab hugithaj ab g Olive U'us Kawulk. Tsh gohk am ha cheha g e-chuhchai 30 k hab ha ahg, “Am g wo hihim heg wui kihhim m am mia kehk k am wo i wahp. T am wo hema e wulshch g wechij wuhlu mat koi sha'i e chesh. Ith amt wo wul'ok k ab wo i wanim. 31 Kutp hema wo sha em-kakke mams haschu ahgk wul'o, mt hab wo ah mani ahni em-mashchamtham tatchua.” 32 Kutsh wa woho am hihi hegam gohk. Kutsh hab masma hab e juh mash hab ha ahgith g Jesus. 33 Kush am wupul'ok hegai wuhlu. Sh hab kaij g enigakam mas haschu ahgk am wul'o. 34 Sh hab kaij hegam, “T-mashchamtham o tatchua.” Kutsh ha hiwigi. 35 Tsh gm hu i wanim g wuhlu Jesus wui k an toa g e-liliwa wuhlu thahm k an i cheshaj g Jesus. 36 Kush am him cheshajch. Sh ihtham g e-liliwa am i to'ahim wohg oithk. 37 Sh am i aihim g Jerusalem. K g wohg am agshp i huduni ab amjed g Olive U'us Kawulk. Sh mu'i hemajkam an ha wehgaj ch ab i ho'ige'ith g Jiosh ch ab si ihm si s-kaitham heg hekaj si ge'e ha'ichu mo neithchkahim ch hab kaij: 38 “Jiosh at wo s-m-ho'ige'el ahpi mapt ia jiwia wehhejed. 39 Sh am ha'i gegok g Palasi ch hab kaij ab wui g Jesus, “Ha mashchamtham, ha g chehani mat wo ha'asa hab chei.” 40 Sh hab kaij g Jesus, “Neh, matp ihtham wo ha'asa hab chei, kut chum hems g hohothai si s-kaitham ab wo ihmath g Jiosh ni-hekaj.” 41 Sh am i aihi g Jerusalem. Kutsh shosha g Jesus 42 k hab kaij, “Mat hu wo i s-mahchk g Jerusalem t am hemajkam ith i tashkaj mat has wo e juh k wo e tho'ibia. 43 Ab o him g tash mat wo ha biha g ha-obga k wo ka kuh 44 k s-ap wo ha hugio wehsijj hegam mat am wo ha'ichugk k wehs wo wuahawua g kihhim. K pi sha'i mahch mat ithani wo chum ha tho'ibia g Jiosh.” 45 Kutsh am hahawa hih g Jesus k gd hu jiwia ge'e cheopi t am. Sh eda am ha'i thadha ge'e cheopi wehgaj ch am ha'ichu gagda. Kutsh gm hu si i ha wuwhas 46 hab kaijch ab ha wui, “Bo chu'ig g Jiosh o'ohana mo hab kaij g Jiosh: ‘Ahni o d ni-wehhejedkam ihtha ge'e cheopi. T ab wui wo hihimath g hemajkam ch ab wo si has ni-elithath.’ Neh, bo kaij g Jiosh. Kumt eda an be k am eda hab wabsh wua g hejel e-tatchui ch chum hems ha'ichu s-a'agi ha ehsith ab ha wui ha'ichu gagdach.” 47 Kush wehs tashkaj am ha mashcham g Jesus ge'e cheopi ch ed. Sh hegam u'ugchu papal ch chehanig ha mashchamtham ch ha wanimedtham g hemajkam chum s-mu'amk. 48 Sh wabshaba g hemajkam chum hekith ab si kaiham. Kush heg hekaj pi e nakog hegam mash chum s-mu'amk.

Luke 20

1 Sh am hu hebai g Jesus am ha mashcham g hemajkam ge'e cheopi ch ed ch am ha ahgith g s-kehg ha'ichu ahgaj g Jiosh. Kutsh am thatha g u'ugchu papal ch chehanig ha mashchamtham ha wehm g ge'eged 2 k hab kaij ab wui, “Thohp hab chum elith map ab amjed ab u'ukch g e-gewkthag ch am hab ha'ichu wua. Oi g am t-ahgith.” 3 Sh hab kaij g Jesus ab ha wui, “Pegih, nt ahni wehpeg ab epai ha'ichu wo em-kakke. Am g wo ni-ahgith 4 mams hedai hab elith mat ab mah g Johnbad g gewkthag mat wo ha pahl wapko. Nat g Jiosh ab mah aha nat wabsh g o'othham?” 5 Kush ihtham am wabsh hejel si a'aga ch hab kaij, “Shahtt hig wo chei? T ab wo t-kakke matt haschu ahgk pi ab hu wohoch mattp hab wo chei mo ab Jiosh amjed u'ukch g gewkthag. 6 T g hemajkam wo t-ma'ichshul mattp hab wo chei mo ab wabsh o'othham amjed u'ukch. Mu'ijj o hab elith mo d Jiosh ha'ichu i tashogiththam.” 7 Neh, bash kaij ch ab hahawa uhpam i e nohnogi Jesus wui k hab kaij, “Pi ach sha'i mahch mas hedai amjed ab u'ukch g e-gewkthag.” 8 Sh hab kaij g Jesus ab ha wui, “Pegih, nt ahni hab wa'ap pi wo em-ahgi mani hedai amjed u'ukch g ni-gewkthag ch hab wua wehs ihtha.” 9 Neh, bash kaij g Jesus ch am hahawa ha ahgith g hemajkam ihtha ha'ichu wepogitha ahga hab kaijch: “Neh, matp hems hema am ei g uhdwis e-oith ed k hab hahawa i e ah mat gm hu hasko mehk wo him k pi oi wo jiwia. Kut ha'i wo nuhkuthath g oithaj ch wo namkith hegai mo haschu ab d i chum wuikamaj. Pegih, t am ha shulig k gm hu hih. 10 Kut am i e ai mat wo bai g uhdwis. T am hema cheha g e-pionag mat am wo him k ab wo i u'ithk g wuikamaj. T wabshaba g nuhkuththam gewichkwua g piongaj k pi ha'ichu sha'i mah. Kut gm hu uhpam hih. 11 “T g enigakam hema ep cheha g e-pionag mat am wo hih. T ith ep gewichkwua g nuhkuththam k si s-ta edam sho'igchuth k pi ha'ichu sha'i mah. T gm hu uhpam hih. 12 “T g enigakam hema ep cheha mat am wo hih. T hab wa'ap s-ko'okam has juh k gm hu si wuhshath. 13 “K hab hahawa kaij g uhdwis oithag enigakam, ‘Neh, si ni-tatchuithch ni-alithag ant wo cheha mat am wo hih. Heg at hemho ab wo wa has el.’ 14 “T heg gn hu hih. T wabshaba ab i nei hegam nuhkuththam k hab kaij ab a'ai e wui, ‘Ith o d enigakam alithag. Tt hig wo mua. T d wo t-enigak g uhdwis oithag.’ 15 T wa woho hab e juh k gm hu si i wuhshath ab amjed g uhdwis oithag k am i mua.” K hab hahawa ep kaij g Jesus, 16 “Neh, nat hig pi woho wo ha koktha g oithag enigakam k am ha'i ep wo ha hiwigi mat wo nuhkuth.” Tsh am i kah ihtha g hemajkam k hab kaij, “Ih, pi at woho hab wo e juh hegai map am t-ahgith.” 17 Kush ab si ha neith g Jesus ch hab kaij, “Woho at hab wo e juh. K g Jiosh o'ohana am tashogith mamt hab wa masma wo s-ni-ohhoth. Ith o hab ahgch hab chu'ig g wepogitha ahga Jiosh o'ohana ed: Kihttham at wo chum hema s-ohhotham g hothai. T wabshaba ith d wo si s-has ha'ichu hothaik am ha-kihta wehhejed. Neh, bo chu'ig g Jiosh o'ohana. 18 Kut wo e sho'igch hegam mat pi wo ni-amich. Ith at heg wo wa wepok mat ab wo e keiko hothai t ab. Kut wo bei g s-ko'ok e-namkithadag hegam mat wo s-ni-ohhoth. Ith at heg wo wa wepok mat g hothai ab ha ab wo gehsh k am wabsh wo s-ha wia.” 19 Neh, bash kaij g Jesus ch hegam hab ha ahg chehanig ha mashchamtham ch u'ugchu papal. Kutsh hegam heg hekaj wabsh chum si s-behim. Sh wabshaba mu'ijj g hemajkam ab si has elith g Jesus. Sh ihtham ha mashchamtham ch papal s-ha ehbith ch pi am hu be 20 k wabsh am s-nen'oith mat am wo ha ap'et. Tp hems ha'ichu hab wo chei mat heg ab wo abchuth k an wo be k am wo i thagito kownal wui. Tsh heg hekaj ha'i ha namkith mat am wui wo hihim k ab wo ha'ichu kakke k wo heki himch. 21 Sh hab kaij ihtham ab wui, “Ha mashchamtham, s-mahch ach map wabsh chum hedai ha mashcham g wohokam ab amjed g Jiosh himthag, chum as has wo chei hedai i. 22 Pegih, k am wo t-ahgi maps has elith g ge'e kownal kowlanta. No hig t-hiwgith g t-chehanig ahchim Tutuligo matt wo ha namkith aha no pi t-hiwgith?” 23 Sh wabshaba g Jesus s-ha amichuth mo g pi ap'ekam hab elith ch hab ha ahg, 24 “Ab g wo hema ni-chehgith hegai lial mam hekaj ha namkith.” Kumtsh ab hema chehgi. Kush hab ha ahg. “Am g wo ni-ahgith mo hedai wuhiosha ch hedai chehgig ab o'ohadag ith ab lial?” Sh hab kaij ihtham, “Hegai mo d uhgchu t-kownalig.” 25 Sh hab hahawa ep kaij g Jesus, “Pegih, ab g wo i thagito kownal wui hegai matp d enigaj k am epai wo i thagito Jiosh wui mo haschu d epai enigaj.” 26 Kutsh pi e nako ihtham mas wo heki himch am ha tahgio g hemajkam k oi wa am wabsh i pi has kaij ch si has i el mat has masma ab i nodagi g ha-kakkei. 27 Tsh am ha'i thatha Jesus wui hegam mash hab e a'aga Sajusi. Ihtham o d ha wohochuthadag mat g Jiosh pi ep wo ha chegitoich g ko'i. Sh ab kakke ihtham ch hab kaij, 28 “Ha mashchamtham, an o hab chu'ig ihtha chehanigaj g Jiosh Mosesbad o'ohana ed ch hab chu'ig matsh g oithchkam wehngaj hegai mat wo muh pi ha a'aligak hemho wo wa bei g hohnigaj g e-wehnagbad. Tsh g a'aligaj hab masma wo e kuint mat d wo a'aligajk hegai mat muh. 29 Pegih, k am hu hebai wewa'ak d e-wepngam. Kut g si ge'echu ge hohnt k pi ha a'alithtok am i muh. 30 T g oithchkam an bei ihtha uwi k hab wa'ap muh. 31 T amjed g waikkokam an be k hab wa'ap muh. T wehsijj hab e juh ihtham wewa'ak mat pi ha a'alithtok ko'o k huhug. 32 T gm hu si ha oithk heg ep muh uwi. 33 Pegih, k ihtham wehsijj hohnigkahim. Kut hedai d wo hohnigk matp g ko'i ep wo i wuwha?” 34 Sh g Jesus hab kaij ab ha wui, “Ia o wa'i e hohont g hemajkam jewed thahm. 35 K wabshaba pi hab chu'ig an Jiosh kihthag ed. Jiosh at uhpam wo ha chegitoich g e-tho'ibiakam k am wo i ha wahpki e-kihthag ed. T hahawa pi wo e hohontath ch pi wo ko'oth hab masma mo g anghil hab chu'ig. 37 Mosesbad atki wa an o'oha mash wa g Jiosh am e chehgith wui heg hekaj sha'i mash meihith ch pi meitto. Sh hab kaij g Jiosh: Ahni ani d ha-Jioshga hegam Abraham ch Isaac ch Jacob. Neh, ith o hab kaij g Jiosh, chum as heki hu koi, no pi am e wehm ha nuhkuth ch ab uhpam wo i ha wuwhas muhkig amjed. 38 Pi amt wabsh woho wo i huhug am i ko'ok matp g Jiosh d em-Jioshga.” Neh, bash kaij g Jesus. 39 Kush ha'i hegam mo d chehanig ha mashchamtham ab neneok ch hab kaij, “S-ap apt hab chei, ha mashchamtham.” 40 Tsh amjed pi hedai e nako mas ab ha'ichu ep wo kakke. 41 Sh hab kaij g Jesus ab ha wui, “Am g wo oithahim mas hedai d wo Jiosh si Kehshak. Bo e a'aga matsh d wo amjedkamk hegai t-kownaligbad mash hab chehgig David. 42 Kush wa eda g Davidbad hab a'aga ‘ni-kownalig’ natsh o'oha ihtha mo an hab chu'ig ne'i ed heg eda Jiosh heki hu o'ohana: Bo kaij g Jiosh ab ni-kownalig wui: In g thahiwua s-apkojed ni-hugith an. 43 Kunt wo ha gewito g m-obga mat ab wabsh s-ap wo m-wechok. 44 Neh, namt hig s-ap wo ah mat has masma d wo Davidbad amjedkamk ihtha mash d kownaligaj?” 45 Kush wehsijj ab si kaiham g Jesus hegam mu'i hemajkam. Kush ab ha ahgith g e-chuhchai ch hab kaij, 46 “Hegam mo d chum chehanig em-mashchamtham o am si s-apko thadhaiwup cheopi ch ed ch ge'e gegosig ch ed. Si o s-kehg e enigadath ch an oiopo no pi tatchua mamt ab wo si has ha elithath. Kumt wo s-e nen'oithath mamt pi hab wo masmak mo hegam. 47 Chum as si chew e ho'ige'ithahun am em-tahgio ch eda ha'ichu s-a'agi ha wohppo'ith hegam mo d hehe'ejel wi'ikam. T g Jiosh ba'ich i s-ko'okam wo ha namkith heg hekaj pi ap ha-chu'ichig no pi wabsh pehegia e ho'ige'ithahun ch hab wua ihtha pi ap'ekam.”

Luke 21

1 Sh am hu hebai thadha ihtham Jesus mash am e shulig g ha-mahkigdag am wehhejed g ge'e cheopi. Kush g s-kakais mu'i am shulig g lial. 2 Tsh am hema jiwia g al sho'igkam oks mash d hejel wi'ikam k atsh gohk s-o'amchu am shul. Kush am neith g Jesus 3 ch hab ha ahg g e-chuhchai, “Neh, ihtha al sho'igkam oks at ba'ich i ge'e mahkigdag hab juh mo hegam s-kakais. 4 Hegam o ab wabsh mahk hegai mo haschu i pi tatchua no pi wabsh s-lialiga. T wabshaba ihtha al oks wehs mah mo haschu al i edgith mat hekaj wo chum kihthagk.” 5 Kush am ha'i neneok ab amjed g ge'e cheopi ch am a'aga mo si s-kehg hab mahs ch si s-kehg hohothaikaj hab junis ch si s-kehg mahkigdagkaj e heosith. Sh hab kaij g Jesus, 6 “Heu'u. Nt wabshaba wo si shel em-ahgi mo e aihim mat wehs wo i e shul ihtha mam neith.” 7 Sh g chuhchaij ab kakke ch hab kaij, “Hekith at hab wo i e juh ihtha? Kut haschu d wo chehgithak matt heg ab wo s-mahchk mo e aihim matki am hab wo e juh?” 8 Sh hab kaij g Jesus, “Mt wo s-e nen'oithath ch pi am hu wo e iattogi. Mu'i at an wo i wuwha a'ahithag oitham k ni-wepo wo e chehcheg hab kaijch mo d Jiosh si Kehsha ch hab wo chei mat e ai g tash. Pi g am hu wo i ha oith ihtham. 9 An at wo kaitha mo am hahasko a'ai e cheggia g jejewed. Kumt wabshaba pi heg hekaj wo e kudutath, chum as hems wo wohok. Hemho wa at hab wo mahsk ha'ichu wehpeg. K wabshaba pi hab d ahga mat e ai mat wo huhug g jewed. 10 Jejewed at ab a'ai wo i e cheggia. 11 T an a'ai hab wo e juh mat g jewed sha'i s-ta ehbitham wo u'ugij. T g bihugig wo gehsh k g s-cheawagig ab wo i hih. S-ta ehbitham ha'ichu at am wo i e chehgi ab thahm kahchim t amjed. 12 “Mat koi hab wo e juh ihtha, kumt an wo em-u'u k wo em-sho'igchuth k am wo em-u'apa chechopi ha wui k wo em-kuh. Kumt wo e lothai am ha tahgio g kokownal nam pi ab s-ni-wohochuth. 13 Ith at am wo em-ap'et mamt am wo ah g s-kehg ha'ichu ahgaj g Jiosh. 14 Pi g am heki hu wo e kudutath heg hekaj mamt has wo chei hejel e wehhejed. 15 Ab ant wo em-mah g ne'oki ch amichuthadag. Kut pi wo e nako g em-obga mas ab wo wui kekiwua mamt has wo chei. 16 Em-jehj ch em-wepnag ch em-hajuni ch em-naipijju at am wo i em-thagito ha wui g haha'ichu. Kumt ha'ijj wo e ko'ij. 17 Mu'ijj at wo s-em-keh'el nam pi ab ni-hiwig. 18 Mt wabshaba s-ap am wo gahi wuwha mamtp has wo i em-juh 19 k wabsh wo s-ha bahbgi. T g Jiosh wo em-tho'ibia. 20 “Shonthal at an wo biha g Jerusalem. Kumt hab wo s-mahchk mo e aihim mat oi wo e padch g kihhim. 21 Hemho wa at am wo ahhio thohtha'ag wui hegam mat am wo ha'ichugk Judea chekshani ch ed. T hegam mo am ha'ichug Jerusalem kihhim t am hemho wa wo ahhio ab amjed. Kut hegam mo gm hu wabsh jegko kih pi am hu wo i wahp kihhim ch ed 22 nat pi wo e ai mat wo s-ko'okam ha namkith g Jiosh k am wo wohokamch wehs hegai mo an o'ohanas o'ohanaj ed. 23 Ih sho'ig! S-ta at ehbitham wo mahsk am ha wehhejed hegam mat wo chu'uchum mahmadk ch hegam mat wabsh wo kia wo'ok g ali. Ab at wo i hih g ge'e sho'igthag ith thahm jewed. T g s-ko'ok ha-namkithadag ab wo gei ha ab ihtham hemajkam heg hekaj ha-chu'ichig. 24 Mt wo ha'i ha koktha k wo ha'i ha lilsochuth k gm hu wo i ha ui mehk jewed wui. Kut g gawul mahs hemajkam an wo bei ihtha Jerusalem k ia wo i e chiwiadath am hugkam mat wo kuhgit g ha-ap'ethag g gawul mahs hemajkam. 25 “T wo e u'ugij mo haschu an hab chu'ig t-thahm. Kut s-ta ehbitham hab wo e juh g tash ch mashath ch huhu'u k wo thagito g e-wopogga. Kut g ge shuhthagi an wo wewgath ch an wo to'otonkath. T ith wehs wo chehgi mat ge'e ha'ichu hab wo e juh wehsko jewed thahm. T g hemajkam wo si s-ehbithath wehs jejewed ch ed ch wo s-e chuhug nat ge wo mahchk mat haschu has wo e juh. 27 Kunt ab hahawa si s-masma wo i hud chewagi ch ed ab Jiosh kihthag amjed ahni Jiosh si Kehsha. Kut am wo e maskogi g ni-gewkthag. 28 Bat masma wo e chehgi mo ab e aihim g ha-tho'ibiathag hegam mat ab wo ni-hiwgath. Kut heg hekaj wo chum si s-ap e taht mat hekith wo i shonwua ihtha mani em-ahgith.” 29 Tsh amjed g Jesus am ha ahgi ihtha ha'ichu wepogitha ahga, “Neh, mt wo s-mahchk mo g toniabkam e aihim mamt wo nei mat g suhna je'e ch nahnko mahs u'us ab wo i i'iwgi. 31 K hab wa masma hab mahs mamt wo nei mat hab wo e juh ihtham mani am heki hu em-ahgith k wo s-mahchk mo e aihim mant ep wo jiwia. 32 “Neh, hegam mat wo nei ihtha mani em-ahgith at d wabsh wo kia thothakamk jewed thahm mat hekith wehs am hab wo e juh. 33 Wehs am gm hu hab wo i e juh ihtha Jiosh nahtoi mam in neith. T wabshaba g ni-ne'oki pi hekith gm hu hab wo i e juh. 34 “Si g wo s-e nen'oithath mat haha wabsh wo em-ai hegai tash. Mt am hu pi wo mahchk. Pi g am wo sha'i e hiwgith mamt wabsh si mu'i ha'ichu k ed wo e nakogath ch wo si e gegosithath ch wo nawkko'oth ch g e-kihthagkaj wo e kudutath. 35 Hegai tash at am hab haha wabsh wo si e juh wehs hemajkam ha tahgio. 36 Mt wo si s-e nen'oithath ch wo e ho'ige'ithahunath chum hekith mamt ab wo u'ukch g gewkthag ch s-ap am gahi wo wuhsh wehs ihtha mat am hab wo e juh. Nt pi an hu ha'ichu wo em-abch ahni Jiosh si Kehsha mamt hekith wo ha lothai g hemajkam.” 37 Sh g Jesus wehs tashkaj am ha mashcham ge'e cheopi ch ed. Kush mu'ijj am wui thaiw wabsh i sisi'alimath mat ab wo kaiha. Sh am i huhuduk, sh gm hu hihhim ihtham Jesus Olive U'us Kawulk wui ch am koksho.

Luke 22

1 Sh am i e aihim mash eda e wushshath matsh wa g Jiosh ha tho'ibia g ha-shohshonbad. Sh heg eda pi e ko'a hegai pahn mo jewajithas. 2 Sh g u'ugchu papal ch chehanig ha mashchamtham am wabsh s-a'agi e nakog matsh wo mua g Jesus ch wabshaba s-ha ehbith g hemajkam. 3 Kutsh g ge Jiawul Satan an bei g Judas Iscariot. 4 Tsh ith am i ha thagito hegam Jesus k am him k am ha wehm a'aga g u'ugchu papal ch ge'e cheopi nuhkuththam ha-ge'ege'ejig mat has masma am wo i thagito g Jesus ha wui. 5 Tsh si s-hohho'i ihtham k ab si ahgi mat wo namkith. 6 Tsh amjed am i e nako g Judas mat am wo neithath mat s-a'agi wo gagda g Jesus ab ha wui. T pi wo mahchk g hemajkam ab amjed. 7 Tsh am hahawa s-ap i e ai hegai ha-shohshonbad ha-tho'ibiathag piast. Kush d wehpeg tash matsh eda wo e koktha g kahwal mahmad. 8 Sh g Jesus hab ha ahg g Peter ch John. “Am g wo hihim k am wo i ap'ech g t-gegosig matt wo wuhshath g t-shohshon ha-tho'ibiathag.” 9 Kush hab kaij hegam, “Bahtt hab wo juh g t-gegosig?” 10 Sh hab kaij, “Neh, am amt wo hihi Jerusalem wui. T ab hema wo himath g cheoj ch wo wa'igchugath ab ha'a t ab. Kumt am wo i oi. Kut am hu hebai wo him k am wo i wah hema kih ed. 11 Kumt hab wo chei ab wui g kihkam, ‘Neh, s-mahchimk o g t-mashchamtham mas an hebai i ha wi'is matt wo wuhshath g t-shohshon ha-tho'ibiathag.’ 12 Kut am wo hema em-chehgi g kih. T ith gn hu ha-kih thahm hab wo chu'igk ch wo ge'ejk ch am wo apchuthask. Kumt an ha'ab wo i ap'ech g t-gegosig” 13 Kutsh wa woho am hihi ihtham kihhim wui. Tsh wa woho s-ap am hab e juh mash has i ha ahg. Kutsh am i ap'ech g gegosig. 14 Tsh am i hud. Kutsh am hahawa thatha hegam ha'i. Tsh g Jesus am i thahiwua mihsa wui. Tsh g chuhchaij am ep thadhaiwua. 15 Kush hab kaij ab ha wui, “Si ani tatchua mant wo em-wehm huh ihtha gegosig mant koi wo ni-muhkith 16 nant pi pi hekith ia hu em-wehm ep wo huh ihtha hab mahs gegosig. T wabshaba ab wo e ai mat wo s-ap e nahto g em-tho'ibiathag. Kumt an wo ni-wehmajk thahm kahchim ch ed.” 17 Mtsh ab hahawa mah g nawait am tahsa ch ed. Kutsh ab i ho'ige'el g Jiosh k hab kaij ab ha wui, “Ab g wo beh'i ihtha k wehsijj ab wo ha ih. 18 Neh, ahni ant pi hekith ab hu ep wo ih ihtha uhdwis wadag k ab wo ai mat wo e nahto g Jiosh kownaltalig.” 19 Neh, bash kaij ch am hahawa bei g chemait k ab ho'ige'el g Jiosh k am i hahain k hab kaij, “Tho ni-honshpadag ihtha mant am i em-hahaini. Ith ani hab ahgch hab kaij mant wo ni-muhkith am em-wehhejed. Ab g wo huhgi ihtha hahainig k ith chum hekith am hab wo junihith mamt hekaj wo s-ni-chegitok.” 20 Tsh ab hahawa ep ha mah g wasib k hab kaij, “Tho ni-eh'ed ihtha nawait. Ith ani hab ahgch hab kaij mat g ni-eh'ed wo e iawua mat hekaj am hab wo e juh hegai mo wa g Jiosh hab kaij matsh hab wo em-juni. 21 “Neh, hegai mat wo ni-gagda o ia ni-wehm thaha mihsa wui. 22 Bant wa masma wo ni-muhkith mat has masma g Jiosh am i ap'ech mat g si Kehshaj wo e muhkith. T wabshaba wo si s-ko'okam e namkith hegai mat wo ni-gagda.” 23 Tsh ab ha hekaj a'ai i e kakke mas hedai wud wok ch hab wo e juh. 24 Kush am e ne'owin hegam Jesus chuhchai am a'agathch mas hedai d wo si ha'ichuk am ha shahgith. 25 Sh hab kaij g Jesus ab ha wui, “Neh, ab am si e ha'ichuchuth hab sha masma mo g kokownal. S-mahch am mo hegam si s-gewkam an ha u'ukch g e-hemajkamga. Kut hemho wa am hab wo junihith mo haschu ab ha chehani. Mt wabshaba ahpim pi hab masma am wo ha thahmkath g e-wehm wohochuththam. Si amt s-hemajim am wo i ha wehmtath. Hegam kokownal o tatchua mat g hemajkam hab wo ha elithath mo ge'e ha'ichu hab ha junith. Mt wabshaba ahpim pi hab masma hab wo e elithath mam ge'e ha'ichu hab ha junith g hemajkam. 27 Aha nam hig hab chum e elith mam d ha-a'amo ch am wo thadhaiwua mat g em-pionag wo em-gegos? Ni eda ahni pi hab masma hab ni-wua, chum anis d em-kownalig ch wabshaba heg ni-wepogith mani d em-pionag. 28 “Ahpim amt pi hekith sha'i ni-thagito am oitham g ha'ichu ni-nakogig, 29 Kunt heg hekaj wo em-kokownalch hab masma mat g ni-ohg Jiosh ni-kownalch. 30 Mt am ni-wehm wo e gegosithath ni-kownaltalig ed. Kunt hab wo em-juh mamt d wo u'usagakamk am ha thahm hegam gamai gohk kawod thakam Tutuligo hemajkam.” 31 Kush hab kaij g Jesus ab Simon Peter wui, “Ih, Simon, Jiosh at wo hiwigi g ge Jiawul mat wehsijj wo em-a'appe hab sha masma mat g pilkani hihktham wo nehnich g e-hihka k gm hu wo i gawulkai g mohgaj. Jiawul o hab chum e ahg mat gm hu hab wo i em-juh hab masma mo g mohg. 32 Nt wabshaba ab i tai g Jiosh mat wo i gewkaj g m-wohochuthadag, Simon. Kupt am wo i ha gewkemhu g e-wehm wohochuththam mapt hekith ab uhpam wo i e nodagi ni-wui.” 33 Sh hab kaij g Peter, “Ni-kownalig, ni-nahtokch ani mant wo ni-kuhpachuth k wo ni-muhkith m-wehm.” 34 Sh hab kaij g Jesus, “Neh, Peter, pi at koi am hu wo kuhu g keli chuchul ith i chuhug ab, kupt waikko hab wo chei map pi sha'i ni-mahch.” 35 Sh hab ep kaij g Jesus ab ha wui, “Neh, namd ha'ichu i pi edagi mam wa ahgachug g ha'ichu ni-ahga pi u'uk g e-lial kokstal o g limoshana kokstal o g shuhshk?” Sh hab kaij hegam, “Pi ha'ichu.” 36 Sh hab hahawa ha ahg, “Mt wabshaba hemu an wo u'ath g e-lial kih ch e-is-pahyo chum ams hems wo gagda g e-lihwa k hekaj wo hema ha nolawt g is-pahyo. 37 Hemho wa at am hab wo e juh ihtha mo ab ni-amjed o'ohanas ch hab chu'ig: Bamt masma ab wo mohto'i g chu'ichig g Jiosh si Kehsha mamt g pi ap hemajkam.” 38 Sh hab kaij hegam chuhchaij, “Pegih, t-kownalig, m ia gohk wehch g i'is-papayo.” Sh hab kaij g Jesus, “Neh, e at ai matt wo hihi.” 39 Tsh amjed gm hu hih g Jesus Olive U'us Kawulk t ab mash hab wa e wua. Kutsh oi hegam chuhchaij. 40 Tsh am i thatha amai. Sh hab kaij ab ha wui, “Am g wo e ho'ige'ithahun mamt s-ap wo nako g e-a'appema.” 41 Neh, tsh am hahawa ha thagito k am ba'ich sha'i him k am tonwua k e ho'ige'ithahun 42 hab kaijch, “Ni-ohg, matp am wo s-ap'ek, pt gm hu hab hig wo i juh hegai si s-ko'ok sho'igthag mo ab ni-wui him. Kuni eda tatchua mat ahpi g m-tatchui hab wo e juh.” [ 43 Tsh am haha wabsh hema jiwia g anghil ab wui k ab si i gewkaj. 44 Kutsh si e kudut k am ba'ich haha wabsh si e ho'ige'ithahu. Kush g wahudthaj am e iawua jewed thahm k d wabsh eh'ed.] 45 Tsh am i ha'asa e ho'ige'ithahun k am hih mash am thadha hegam chuhchaij. Kush am kohksh nash pi wabsh i ha ba'iwich g pi ap tahhathkam. 46 Sh hab kaij ab ha wui, “Shahchu am ahgch kohksh? Ab g wo nehnen k wo e ho'ige'ithahu mamt s-ap wo nako g e-a'appema.” 47 Sh am wabsh kia neok. Sh ab ha'i ge hihim g hemajkam. Kush heg ha wanimed Judas mash d chum hema kehshaj g Jesus ch ab wui i hih matsh ab wo chintath. 48 Sh hab kaij g Jesus, “Ih, Judas, pt wo ni-gagda ab ni-chintathk ahni Jiosh si Kehsha!” 49 Tsh am i nei hegam ha'i Jesus chuhchai mo haschu has e wua k hab kaij, “T-kownalig, natt wo ha cheggia g i'is-papayokaj?” 50 Kutsh hema ab si i widu g is-pahyo k g uhgchu pahl neholiga nahk an si hikuch. 51 Sh hab kaij g Jesus, “Am g wo wa i ha'asa,” k an taht ihtha cheoj nahk k thoaj. 52 Tsh am wui thatha g u'ugchu papal ch cheopi nuhkuththam ha-ge'ege'ejig ch g ge'eged mat an wo bei. Sh hab kaij g Jesus ab ha wui, “Bamki ni-elith mani d s-chu ehskam ch hab ia thatha u'ukch g i'is-papayo ch u'us. 53 Am ani em-wehm ha'ichug cheopi t am wehs tashkaj. Kumt pi an hu ni-bei. T wabshaba hemu am i em-ap'et. Pi ap'ekam at s-ap am hab wo e juh s-chuhugam k ed.” 54 Tsh an bei g Jesus k gm hu i bei uhgchu pahl kih wui. Sh g Peter ga hu wabsh mehkjed ha oith. 55 Kutsh eda am ge e nai kolhai ch ed. Kutsh am i jiwia g Peter k am ha wehm thahiwua hegam mo am thadha. 56 Kutsh am hema jiwia g chehia pion k am nei g Peter k ab si i neith k hab kaij, “Ihtha o'othham o wa an wehmaj hegai mamt an bei.” 57 Tsh wabshaba pi mahch k e ah g Peter hab kaijch, “Pi ani sha'i mahch hegai.” 58 Sh am sha'i ha'as. Kutsh am hema ep cheh g Peter k hab kaij, “Ahpi ap d hema hegam Jesus.” Sh wabshaba hab kaij g Peter, “Ih, pi o woho.” 59 Sh am hu d i hemako ohla amjed. Kush hema o'othham am si e gewkaj ch hab kaij, “Woho o wa mo ihtha o'othham hab d wa'ap ha wehm o'othham noki pi ab d kihkam Galilee chekshani ch ed.” 60 Sh hab kaij, “Pi ani sha'i mahch maps haschu hab ahg.” Neh, sh am wabsh kia neok. Tsh g keli chuchul am si ku. 61 Kutsh ab si e sikolkai g Jesus k ab si i nei g Peter. Tsh am wabsh si chegito g Peter g jesus ne'oki mo wa hab kaij, “Koi at wo kuhu g keli chuchul, kupt waikko hab wo wa'i chei map pi ni-mahch.” 62 Tsh gm hu hahawa i wuhsh g Peter k si pi ap e tahtk ch shoak. 63 Sh hegam mash am nuhkuth g jesus nahnko ahg ch an si ma'ish k wuh g wuhpuij 64 k ab si shonikkash ch hab ahg, “Am g hig t-ahgith mas hedai ab m-shonikka.” 65 Kush mu'i nahnko ep s-ko'okam ahg. 66 Tsh am i mahsi. Kutsh am e nam hegam ge'eged ch u'ugchu papal ch chehanig ha mashchamtham mash d e jehnigiththam. Kumtsh am ha wui u'apa g Jesus. 67 Sh ihtham hab kaij, “Am g t-ahgith maps d Jiosh si Kehsha.” Sh hab kaij g Jesus, “Pi amt woho ab hu wo ni-wohoch mantp am wo em-ahgi mani hedai wud. 68 Kumt pi woho ab hu wo i nodagi hegai mantp haschu wo em-kakke. 69 Nt wabshaba wo em-ahgi mant i'ajed an s-apkojed hugithaj an wo thak g Jiosh ahni si Kehshaj.” 70 Kush wehsijj hab kaij, “A kuptp d Jiosh alithag?” Sh hab kaij ab ha wui, “Thani ahni.” 71 Sh hab kaij hegam, “Neh, pi ach sha'i hema tatchua mat wo si s-mahch k ah. Ahchim ach hejel kah mo si pi ap neok ab Jiosh t amjed ch hekaj wo chum e muhkith.”

Luke 23

1 Kutsh wehsijj hegam haha'ichu ab si e wehmt k am i bei g Jesus heg wui mash d kownal am Judea chekshani ch ed ch hab chehgig Pilate. 2 Sh ab ha kaiham. Kush ab wui ab ha'ichu abchuthahim g Jesus hab kaijch, “Neh, ihtha o'othham o im hu hab wabsh i ha wawan g t-hemajkamga hab ha ahgch mat pi wo namkith g ge'e kownal. Kuch kah mo hab hejel e ahg mo d jiosh si Kehsha ch d uhg kownal. Kupt hemho wa wo mua.” 3 Kush ab kakke g Pilate g Jesus ch hab kaij, “Nap d ha-kownalig g Tutuligo hemajkam?” Sh hab kaij g Jesus, “Thani ahni.” 4 Tsh g Pilate am i mamche hegai mam ab abchuth. Sh eda mu'i an oiopo g hemajkam s-neithamk mo has e wua. Tsh g Pilate am ha kaichuthk hab ha ah g u'ugchu papal, “Pi ant ha'ichu sha'i cheh mas pi ap hab juh ihtha o'othham mat heg hekaj wo e muhkith.” 5 Kush wabshaba ba'ich i e gewpkath ch hab kaij, “Am o ha chu'amun g t-wehm o'othham ha'ichu ha mashchamch wehsko ga hu Galilee t amjed ch ia Judea ch ed ch chum hems iia Jerusalem ch ed.” 6 Tsh am i kah g Pilate ihtha k hab kaij ab ha wui, “Kutp ab Galilee chekshani ch ed d kihkam ihtha o'othham?” 7 Kumsh am ahgith mash am ha'ab d kihkam. Sh g Herod am d ha-kownalig Galilee chekshani ch ed ch ia'i ithani am hab wa'ap ha'ichug Jerusalem t am. Kumtsh heg hekaj am wui u'apa g Jesus. 8 Kush si s-hehgig g Herod nash pi tash wa'i chum s-neithamk hab chum e ahgch matp hems am tahgio hab wo juh g s-hasig ha'ichu. 9 Kumtsh am kei tahgio. Kush mu'i ha'ichu kakke. Sh wabshaba pi has sha'i kaij g Jesus. 10 Kush g u'ugchu papal ch chehanig ha mashchamtham am gegok ch si s-gewkam ab ha'ichu abchuth g Jesus. 11 Sh g Herod g e-shonthalig ha wehm haha wabsh nahnko ahg g Jesus ch si ash k ash g si s-kehg kahba ab wahki. Tsh ab hahawa ha cheha g Herod mat wo uhpam bei am Pilate wui. 12 Kutsh heg i tash ab g Pilate ch Herod ab hahawa e nawojt k ash eda chum s-e keh'ith. 13 Tsh g Pilate am i ha hemapai g u'ugchu papal ch ha wanimedtham g hemajkam 14 k ash hab kaij ab ha wui, “Ia amt u'apa ihtha o'othham ni-wui hab kaijch mo go'olko ha wanimed g hemajkam. Kunt hemuch ia em-kaichuthk am i mamche hegai mam ab abchuth k pi ha'ichu sha'i cheh mas pi ap hab junihim. 15 Kutsh Herod hab wa'ap pi ha'ichu sha'i cheh. T g shonthaligaj ab uhpam i u'apa t-wui. Pi atki ha'ichu hab juh ihtha mas heg hekaj wo e muhkith. 16 Kunt wabsh wo ha cheha mat wo gewittan k wo thagito.” [ 17 Neh, bash kaij nash pi am hema i thathagitosh g lihso ha wehhejed wehs ahith ab mo eda hab e wua hegai ge'e gegosig.] 18 Kush wehsijj hegam mu'i hemajkam mo am ha'ichug si s-kaitham hab kaij, “Pi ach tatchua ihtha. Barabbas apt wo i thagito t-wehhejed.” 19 Sh eda ihtha Barabbas am e kuhpch nash pi chum ha'i ha wehm cheggia g kownal ch ha'i ha koktha. 20 Sh am ep chum ha wehm neok g Pilate nash pi chum s-thagitoimk g jesus. 21 Sh wabshaba am ep si s-kaitham hab ge kaij mu'ikko, “Mu'ani! Mu'ani ab kots t ab!” 22 Sh hab ep chum kaij g Pilate, “A t haschu pi ap hab juh. Pi ant ha'ichu sha'i cheh mas heg hekaj wo e muhkith. Ab ant wo ha cheha mat wo gewittan k wo thagito.” 23 Sh wabshaba am wabsh si s-kaitham hab kaij matsh ab wo naggia kots t ab. Neh, tsh g ha-hihinki gewito g Pilate. 24 Tsh am i ap'ech mat am hab wo e juh g ha-tatchui. 25 Kumtsh gm hu i wuhshath hegai mash d ha cheggiadkam ch d ha mu'akam k amtsh g Jesus am i thagito ha wui mat am hab wo juh mo has i elith. 26 Kumtsh gm hu i bei g Jesus ab kushwiotachuthk g kots. Kush am hu hebai hihim. Tsh ab hema i ha nam g o'othham mash ab him Jerusalem wui. Ith ash hab chehgig Simon ch ab d kihkam mash am d Cyrene ch ash ab him ga hu o'oithag amjed. Kumtsh am wabsh si be k ab kushwiotach g kots k atsh hab juh mat ab oithk wo himath g Jesus. 27 Kush mu'i hemajkam ab oithch hihim. Sh g u'uwi si shoanihim wehhejed. 28 Tsh ab i ha nei g Jesus k hab kaij ab ha wui, “Pi g am ni-wehhejed wo shoanith, ahpim Jerusalem t am kihkam, ch wabshaba hejel e wehhejed ch e-a'aliga ha wehhejed. 29 Ab o him g tash mat hab wo chei g hemajkam mo si ha'ichu s-ha abamk hegam u'uwi mat pi hekith sha'i mahmadt. 30 Woho o wa mat s-ta ehbitham ha'ichu hab wo e juh am ni-tahgio. T wabshaba ba'ich i s-ta ehbitham ha'ichu hab haha wo juh am ha tahgio hegam mo d pi ap chu'ijkam ch pi ab hu ni-wui e nohnogimk. (30) Hegam at pi wo e nako mas heg wo nako k heg hekaj wo chum tatchua mat g thohtha'ag am ha thahm wo i shulig k wo ha ehsto.” 32 Kumsh gohk ep ha u'a mamtsh am wehmaj wo ha koktha. Sh ihtham d pi ap hehemajkam. 33 Kumtsh an thatha anai mash am hab e a'aga Koshwak. Tsh g shonthal ab hahawa sisish g Jesus kots t ab k am i kei g kots wag ch ed k gn hu a'ai hab wa'ap ha nahngia hegam pi ap hehemajkam kokots t ab. 34 Tsh ab hahawa e ho'ige'ithahu g Jesus k hab kaij, “Ni-ohg Jiosh, ab g wabsh si i s-ha ho'ige'ith hegam mat ab ni-naggia. Pi o sha'i mahch mani d si m-Kehsha ch d s-ap'ekam.” Kutsh g shonthal am e chichwi k g wehschugaj e to'i. 35 Sh g hemajkam am gegok ch neith wehs ihtha. Sh g ha wanimedtham nahnko ahg g Jesus ch hab kaij, “Ha at tho'ibia ha'i, pegih, k hejel wo e tho'ibia matp d Jiosh si Kehsha.” 36 Kush g shonthal hab wa'ap nahnko wua ch hab wabsh s-junim k ab chum mah g nawait 37 ch wabsh nahnko ahg hab kaijch, “Oi g hejel e tho'ibiad napsh pi d ge kownal.” 38 Sh am thahm o'ohadag ihtha, “Ith o d Tutuligo hemajkam ha-kownalig.” 39 Kush hema hegam pi ap hehemajkam mash ab hab wa'ap naggia kots t ab ab si s-ko'okam has ahg g Jesus ch hab kaij, “Neh, kuptp d ge Jiosh si Kehsha, pegih, k wo hejel e tho'ibia k ahchim ep wo t-tho'ibia.” 40 Kush g hema ab si s-keh'ith ihtha ch hab kaij, “Aha nap pi ehbith g Jiosh. Ia ach t-wehm nahngia ch ab t-wepo mohto'ithas g chu'ichig. 41 Kuch ahchim s-ap ab mohto'ithas nach pi wa woho d pi ap chu'ijkam. Kutsh eda ihtha pi hab sha'i juh g pi ap'ekam.” 42 Neh, bash kaij ihtha hema ch ab Jesus wui hab hahawa ep kaij, “Jesus, ab apt wo wa al s-ni-chegitok hekith ab bek g e-kownaltalig.” 43 Sh hab kaij g Jesus ab wui, “Neh, ni ab si m-ahgith mapt ith i tashkaj wo ni-wehmajk an Jiosh kihthag ed.” 44 Kutsh am i thahm juh. Tsh muh g tash k wehsko s-chuhugam ch ab ai g waik ohla. 45 Kutsh am ge'e cheopi ch ed g s-kowk ikus kuhpadag ab si shel e wantsh. 46 Kush am si s-kaitham e ho'ige'ithahun g Jesus Jiosh wui ch hab kaij, “Ni-ohg, ab ant i m-mah g ni-thoakag.” Neh, bash che'iok am i muh. 47 Kutsh am i nei g shonthal ha-ge'ejig matsh haschu has e juh k ab si ihm g Jiosh ch hab kaij, “Woho oki d s-ap'ekam o'othham ihtha.” 48 Tsh amjed mu'ijj gm hu uhpam hihi hegam mash ab neith ab wabsh e wecho wahpkch nash pi oi wa si ap e tatat. 49 Kush wehsijj hegam mo si s-mahch g Jesus ga hu wabsh mehk gegok ch ab neith wehs ihtha. Ha'i ihtham ash d hegam u'uwi mash ga hu Galilee t amjed an wehmajkahim g Jesus. 50 Sh eda wa hema hegam e jehnigiththam chum pi hohho'ith matsh g wehmaj e jehnigiththam s-mu'am k ah g Jesus. Ith ash hab chehgig Joseph ch ab d kihkam mash am d Arimathea ch s-ap d o'othham ch ab nenida g Jiosh kownaltalig. 52 Tsh hekith am i muh g Jesus, tsh ha hekaj am wui hih g Pilate k ab si e sho'igchuth k tahni g honshpadaj. Tsh am wa ap'ech matsh wo bei. 53 Tsh gm hu ep him k ab i huduni. Sh am mia hab chu'ig g hiha'ini ch ab heki hu cheotas hothai ch ed ch pi koi e hekaj. Tsh g Joseph am i bei g honshpadag k gd hu heg eda cheh am i hobinodk g s-kehg ikuskaj. 54 Tsh hegam u'uwi mo wehmajkahim g Jesus ab Galilee t amjed gm hu oi g Joseph k ash neith mat hebai e cheh g Jesus k has masma ab e woi. (54) Kush d wialos. Sh g hemajkam chum e nakog no pi g shahwai d ha-mihshmetha tash. 56 Kutsh gm hu uhpam hihi ihtham u'uwi mash hebai thadha k am i ap'ech ha'ichu mat hekaj wo s-ap hab juh mo hab masma hab ha wua g e-ko'ithag k ash am hahawa e ulinihogi mihshmetha tash ch ed mo hab masma d ha-chehanig.

Luke 24

1 Sh am e aihim g thomig tash. Tsh am hihi ihtham u'uwi hiha'ini wui k ash u'a hegai matsh am nahto matsh hekaj wo i ap'ech g muhki. 2 Kush gm hu e melchuthas hegai ge'e hothai mash ab hekaj e kuhpch g hiha'ini. 3 Tsh am i wahp k pi sha'i edagi g muhki 4 k am wabsh i gegok pi amichuthch ihtha. Tsh am haha wabsh gohk i e chehgi ha wui mo hab sha mahs mo g o'othham. Kush wabsh si tonod g ha'ichu ha-eniga. 5 Kutsh si e totoths ihtham u'uwi k ab si i shul jewedo. Sh hab kaij ihtham gohk ab ha wui, “Shahchu am ahgch ia gahg hiha'ini t am hegai mo d thoakam? 6 Pi o ia hu ha'ichug g Jesus nat pi i wuhsh ab muhkig amjed. Am g wo i chegito mo wa has kaij ab em-wui. Am am wa wabsh kia ha'ichug Galilee t am. 7 K wa hab kaij, ‘Hemho ant am wo wa i ni-thagito pi ap'ekam hemajkam ha wui ahni Jiosh si Kehsha. T hegam ab wo ni-naggia kots t ab mat wo ni-mua. Nt wabshaba wo i wuhsh muhkig amjed am heg eda waik tash amjed.’ Neh, bo kaij g Jesus ab em-wui.” 8 Kutsh ihtham u'uwi am i chegito mash wa hab kaij g Jesus 9 k ga hu uhpam hihim k ash am ha ahgith hegam gamai hemako Jesus chuhchai ch wehs g ha'i mat has e juh. 10 Ha'i ihtham u'uwi mash am ha ahgith ash d Mary Magdalene ch Joanna ch hegai Mary mash g madaj hab chehgig James. 11 Kush hegam Jesus chuhchai pi ab hu ha wohochuth nash pi hab ha elith mo wabsh pi e mahch ch hab kaij. 12 Tsh wabshaba g Peter am i e nakog k am meh hiha'ini wui k gd hu meliw k am i koachsh. Kush heg am wa'i kahch s-kehg ikus mash heg hekaj chum e hobinodch. Tsh amjed gm hu uhpam hih am wabsh i pi amichuthch matsh haschu has e juh. 13 Kush heg wa'i tash gohkajj am hihim Emmaus kihhim wui. Ith amt ab wo ai kihhim am hu i gohk ohla ab am hihimathch Jerusalem t amjed. 14 Sh ihtham am hihimath ch neneok ab amjed hegai matsh haschu has e juh am tahgio g Jesus. 15 Tsh g Jesus am ha a'a k am ha wehm hih. 16 Kush hi wa chum neith ch wabsh pi amichuth. 17 Sh hab kaij g Jesus ab ha wui, “Shahchu am am si a'agath ch ia hihim?” Tsh am wabsh i gegokiwua k si pi ap e tahtkam mahs. 18 Sh hema ihtham hab chehgig Cleopas ch ith hab kaij ab wui, “Aha nap ahpi wa'i hejel pi mahch mat haschu has e juh hemuch hu'i ch eda am thaha Jerusalem t am?” 19 Sh hab kaij g Jesus, “Shahchu ap hab ahg?” Kush hab kaij ihtha, “Hegai mat hab e juh am tahgio hegai mo hab chehgig Jesus ch ab d kihkam Nazareth t ab. Heg oki d Jiosh ha'ichu i tashogiththam. K wehsijj ab si has elith mo haschu hab junihim ch has i kaij. 20 Kut g u'ugchu papal ch t-wanimedtham am i thagito kownal wui mat wo mua. Kumt ab sisish kots t ab k mua. 21 Kuch eda ith hab chum si elith mo d hegai matsh wa wo t-tho'ibia ahchim Tutuligo hemajkam. K hemuch d i waik tash amjed mat hab e juh. 22 Kut am ha'i hihi g u'uwi t-wehm wohochuththam wabsh i si'alim 23 k atsh pi cheh g muhki k uhpam thatha k t-toths am t-ahgithch matsh am ha'i i e chehgi g anghil ha wui. Sh ihtham hab ha ahgith mo d thoakam g Jesus. 24 T am ha'i hihi g chechoj hiha'ini wui k am s-mai mash wa woho pi am hu ha'ichug g muhki mo hab chum kaij hegam u'uwi.” 25 Sh hab hahawa kaij g Jesus ab ha wui, “S-wohom am hig pi ha'ichu a'amichuth ch pi wohochuth hegai mo wa g kekelibad Jiosh ha'ichu i tashogiththam am ahg. 26 No hig pi hab wa mahs mat hab masma wo e sho'igch g Jiosh si Kehsha k am wo i wah si s-kehg e-ap'ethag ed.” 27 Neh, bash kaij g Jesus ch amjed am i wuhshath k am tashogi wehs hegai matki g Mosesbad ch wehs hegam kekelibad Jiosh ha'ichu i tashogiththam an o'oha ab amjed. 28 Kutsh am hihim k am i aihi hegai al kihhim mo am wui d hihimtham. Sh gm hu wabsh i si him g Jesus. 29 Kush wabshaba an shoshobith ch hab kaij, “Ia apt wo wa'i jiwia t-wehm. Hudunihim o k ch ab i s-chuhugamhi.” Kutsh wa woho am ha wehm i jiwia. 30 Tsh am wo i gegos. Tsh am bei g chemait k am e ho'ige'ithahun k am hahawa hahain k ab ha mah. 31 Kutsh am hahawa i amich. Tsh wabshaba am wabsh i pi'ata. 32 Sh hab hahawa kaij ab a'ai e wui, “Neh, ab at wa si i t-shuhthath g s-ap tahhathkam mo wa ab t-wehm neokhim ch am tashogith g Jiosh o'ohana mach ab hihim wohg oithch.” 33 Tsh am ha hekaj i e nakog k gm hu uhpam hihi Jerusalem wui. Kush am e hemapathch hegam gamai hemako Jesus chuhchai ha'i ha wehm g e-wehm wohochuththam. Tsh am thatha ihtham gohk. 34 Kush hegam am ha ahgith ch hab kaij, “Neh, woho atki i wuhsh g t-kownalig Jesus ab muhkig amjed. Kutsh g Simon nei.” 35 Kush ihtham gohk am hahawa epai ha ahgith matsh haschu has e juh am wohg ch ed ch heg ehp matsh amich g Jesus matsh am hahai g chemait. 36 Sh am wabsh kia a'aga ihtha. Sh am haha wabsh kehk ha shahgith g Jesus ch ash hab kaij ab ha wui, “Am g wo s-ap e tahtkkath.” 37 Kutsh sha'i si e totoths hab em-ahgch mo d wabsh kok'oi. 38 Sh hab kaij ab ha wui, “Pi g wo sha'i e kudut k ab wabsh wo s-ni-wohochuthath. 39 Ab g wo i neith g ni-nohnhoi ch ni-tahtad k wo s-mai mani d ahni. Ab g wo ni-tahtam k wo nei mani pi d kok'oi. Kok'oi o pi ha chuhkug ch pi ha oh'o mani ahni hemuch imhab chu'ig.” 40 Kush hab che'iok ab ha chehgi g e-nohnhoi ch e-tahtad. 41 Kush chum si s-ap e tahtk ch wabshaba wabsh i haha'athka natsh pi wabsh i pi mai mat has wo el. Kush heg hekaj ab ha kakke mas am ha'ichu chekch mat wo hu. 42 Kutsh ab ge mah g watopi ga'i. 43 Kutsh ab be k huh. Sh ith wehsijj neith. 44 Kush hab hahawa kaij ab ha wui, “Wehs ani am em-ahgith ihtha heki hu. Wehs ha'ichu at hemho wa am hab wo e juh mo an o'ohanas ab ni-amjed ha-o'ohana ed g Mosesbad ch hegam ha'i kekelibad Jiosh ha'ichu i tashogiththam ch heg eda nen'ei o'ohana mo an hab chu'ig Jiosh heki hu o'ohana ed.” 45 Neh, bash kaij ch ab hahawa i ha mah g amichuthadag mat wo s-amich g Jiosh o'ohana 46 k ash hab kaij ab ha wui, “Bant masma hab ni-juh mo wa hab chu'ig an Jiosh o'ohana ed mant hab wo wa ni-juh. An o o'ohanas mantsh wo ni-sho'igchuth k wo ni-muhkith. Kutsh d wo i waik tashk amjed. Ntsh ep wo ni-chegito. Neh, heg ant hab juh. 47 Kut ia Jerusalem t amjed am a'ai wo i e ahgahi gm hu wehsko jejewed ha thahm mat g hemajkam ab wo i ni-hiwig k gm hu wo s-ohhoth g pi ap e-chegitoi. T g Jiosh im hu hab wo i juh g pi ap ha-chu'ichig. 48 Ahpim amt am wo ahgahith ihtha si s-has ha'ichu mam neith ch kah. 49 T g Hekia S-ap'ekam Gewkthag ab wo em-mah g gewkthag mamt hab wo junihith. Heg ant am wo cheha mat wo em-wehmajkath hab masma mo g ni-ohg Jiosh hab kaij mat hab wo e juh. Mt heg hekaj ia wo thadkath Jerusalem t ab ch ab wo ai mamt ab wo bei hegai gewkthag.” 50 Tsh am hahawa i ha wanim amai mash am miabithch g Bethany. Tsh am hu hebai i thatha. Kutsh am uhgk ul g e-nohnhoi ha thahm k ab ha ho'ige'elith, 51 Tsh g Jiosh gm hu i bei thahm kahchim wui. 52 Sh ihtham ab si has elith ch gm hu hahawa hihi Jerusalem wui s-hehgigch 53 k amjed chum hekith am hihhim ge'e cheopi wui ch ab ho'ige'elith g Jiosh.

John 1

1 Gd hu i si wehpeg ash d thoakam hegai mach hab a'aga Jiosh Ne'oki. Ith ash d Jiosh ch am wehmaj g e-ohg Jiosh. 2 Jiosh ash am e wehm thahshch mash eda pi koi ha'ichu sha'i nahtois 3 ch am i kei matsh wehs ha'ichu wo nahto. Kutsh wa woho wehs ha'ichu nahto 4 k an u'ukch g gewkthag ch wehs ha mah g ha'ichu thoakam g thoakag. K ihtha thoakag am tonlithch g hemajkam chegitoithag. 5 K wabshaba g hemajkam pi e nakog hejel mas wo s-amich mo haschu chum ha tashogith. 6 Am ad hema i kei g Jiosh g o'othham mat wo t-mihshmath. D ith hab chehgig John. 7 D g mihshmethaj hab chu'ig matsh in wo i wuhsh jewed thahm hegai mo ab t-mahkch g t-thoakag. K hab d elithaj g Jiosh mat wehs hemajkam wo kah ihtha ha'ichu ahga k ab wo hiwgath hegai mat in i wuhsh. 8 Pi ad hejel hab e ahg g John ch wabsh heg an ahgachug mad in i wuhsh. 9 Ith o d wohokam tonlig ch am tonlithch g wehs hemajkam ha-chegitoithag. 10 Pegih, d ia ha'ichug g Jiosh Ne'oki jewed e-nahtoi thahm. D wabshaba hemajkam nahtoij pi amichuth. 11 Ia adki mahsi k d t-wehm o'othham. D eda mu'ijj g Tutuligo pi amichuth ch pi ab hu hiwig. 12 Kuchd wabshaba ha'ijj ab i s-wohoch mo d Jiosh si Kehsha k ab hiwig. Kud heg hekaj ab t-mah g ap'ethag matt d haha wo a'aligajk g Jiosh. 13 Pi ach heg wabsh hekaj d Jiosh a'aliga matt in mamsi o heg wabsh hekaj mo g t-jehj ab s-wohochuth g Jiosh o heg wabsh hekaj mach hab t-elith machs d a'aligaj. Jiosh at hab t-juh mach d hahawa a'aligaj. 14 Hegai mo d Jiosh Ne'oki ad e wepogi g hemajkam k woho t-wepo chu'ig ch ia t-shahgith d thoakam. D g John an a'aga k si s-kaitham hab kaij, “Ith o d hegai mani hab ahg ch am em-ahgith mat ab hema wabsh ni-oithk wo i e maskogith k eda woho d si s-has ha'ichu nash pi chum hekith an ha'ichug.” Neh, bo kaij g John. Kuchd heg amjed s-mahch g Jesus Christ ch am hahawa s-mai moki d Jiosh alithag ch si s-hemajima ch heg wa'i ahg wohokam ch woho ab si s-t-ho'ige'ith. 17 Thash Mosesbad matsh wa an o'oha g Jiosh chehanig am ha wehhejed g hemajkam. K wabshaba d Jesus Christ mad ia u'apa g Jiosh hemajimatalig ch wohokam. 18 Pi oki hekith hedai sha'i e-wuhpuikaj neith g Jiosh. K wabshaba g alithaj am wehmaj d hemako ch ab t-wui mahsko wua. 19 Am ad t-mihshmath ihtha John tohono jewed ch ed. K eda am Jerusalem kihhim t am thadha g t-ge'egedga ahchim Tutuligo. Tsh am i ha ai g ha'ichu kaitha ab amjed g John. Kutsh am ha'i ha cheha g papal ch hegam mo d papal ha wehm chikpantham matsh wo s-mai mas hedai wud hegai John. Tsh ihtham am hihim k am thatha k ab s-mahchim mas hedai chum e elith ab wui hab kaijch, “Nap hab chum e elith map d Jiosh si Kehsha?” 20 D ab wabsh si ha wehm neok g John ch am si tasho ha ahgith mo pi d hegai. 21 D ab ep kakke, “Aha nap d hegai Elijabad ch ia uhpam jiwia?” D g John hab kaij, “Pia'a, pi ani d hegai.” D ab ep kakke, “Nap d hegai Jiosh ha'ichu i tashogiththam matsh in wo i wuhsh?” D hab ep kaij, “Pia'a, pi ani d hegai.” 22 D hab hahawa kaij, “Pegih, k am wo t-ahgi map hedai wud. Hemho wa att am wo ha ahgi g t-ge'egedga map has e a'aga.” 23 D g John hab hahawa kaij, “Ahni ani wud mo hab ni-ahg ch an o'ohanas: Hema atsh gm hu jeg ed wo ha mihshmath g hemajkam hab kaijch, ‘Neh, in atsh wo i wuhsh jewed thahm hegai mo d ge kownal wehs ha'ichu thahm. Kumt heg wehhejed wo i e nako am thagitok g pi ap e-chu'ichig.’ Neh, ith o d ne'okij hegai kelibad Jiosh ha'ichu i tashogiththam mash hab chehgig Isaiah,” bad kaij g John. 24 Ihtham mad ab ha'ichu kakke g John o d ha'i hegam mo hab e a'aga Palasi. K hegam Palasi chum si nuhkuth g t-himthag. 25 D heg hekaj hab ep kaij ihtham ab John wui, “Pegih, p haschu ahgch ha pahl wapkon ch eda wa chum pi d Jiosh si Kehsha ch pi d Elijabad ch pi d hegai Jiosh ha'ichu i tashogiththam matsh in wo i wuhsh?” 26 D hab hahawa kaij ab ha wui, “Ha ani pahl wapkon mat wo i e nako. Hemu at in wo i wuhsh hegai mo hig woho d si s-has ha'ichu, pej hemu ia ha'ichug em-shahgith. Kum pi amichuth. 27 Pi g hab wo ni-elithath manis ahni d si ha'ichu. Ihtha mat am ni-oithk wo i wuhsh at wehs ha ba'ich d wo i si ha'ichuk.” 28 Neh, wehs ihtha ad hab e juh gn hu aigojed g Jordan akimel mo am d wahlko kih. 29 Am ba'ich d i tash, d am jiwia g Jesus John wui. D heg an a'aga ch hab kaij, “Neh, ith o d hegai mat wo e wepogi g kahwal mad k ab wo e iagchul Jiosh wui mat gm hu hab wo i juh g pi ap t-chu'ichig. 30 Ith ani hab ahg mani wa hab em-ahgith mat ab wabsh ni-oithk wo i wuhshani k wabshaba wehs ha ba'ich d i si ha'ichu no pi chum hekith an ha'ichug. 31 Pi ani hab wa sha'i mahch mas hedai d wo Jiosh si Kehshak. K wabshaba g Jiosh am ni-chehani mant wo ha pahl wapko g hemajkam. T hab wa masma am wo tashogi g si e-Kehsha am t-wui ahchim Tutuligo.” Neh, bad kaij g John. 32 D am hebai i cheka, d si s-mahch ch ahg g John hab kaijch, “Bo kaij g Jiosh ab ni-wui, ‘Ab at wo i hud g Hekia S-ap'ekam Gewkthag k ab wo e ul si ni-Kehsha ab. Kupt hab wo s-mahchk mo d ihtha mat wo ha mah g hemajkam g Hekia S-ap'ekam Gewkthag.’ Neh, bo kaij g Jiosh ab ni-wui. Kut wa woho si s-hemajim ab i hud g Hekia S-ap'ekam Gewkthag k ab e ul ith ab Jesus hab masma mat g hohhi an hasko wo i thahiwua ab i hudunik. 34 Kunt wa neith k heg hekaj si s-mahch mo ihtha Jesus d Jiosh alithag.” 35 Am ba'ich d i tash, d am ep ha'ichug g John. Kuchd gohkajj an wehmaj ahchim mach ab si wecho t-mashcham. 36 D ab him g Jesus. Kud g John neidok hab kaij, “Neh, m ia him hegai matsh kahwal mad wepo wo e iagchul am t-wehhejed.” 37 Kuchd am i kah ahchim gohk k gm hu i oi g Jesus. 38 D ab ha'ab i e wua k ab i t-neith k hab kaij, “Shahchu am tatchua?” Ch hab kaij, “Bahp thak ch amjed ha mashcham?” 39 D hab kaij, “Oi g wo ni-oith k wo nei mani hebai tha.” Kuchd gm hu oith k am wehmajkahim im hu i juhk amjed ch ga hu si ai g s-chuhugam. 40 Hegai mad ni-wehm kah g John ch am i oi g Jesus o hab chehgig Andrew. K g wehngaj ihtha hab chehgig Simon. 41 K g Andrew d wehpegkam mat am i gahghi g e-wehnag k hekith am i chehg k hab ahgith, “Cheh att hegai moki d Christ.” (Ith o hab d ahga ‘Jiosh si Kehsha.’) 42 D g Andrew am hahawa u'apa Jesus wui. T ab si shel i nei g Jesus k hab kaij, “S-mahch ahni map d Simon ch d alithaj hegai mo hab chehgig Jonas. I'ajed apt hab wo chehgigk Peter.” (Ith o hab d ahga ‘Hothai.’) 43 Am ba'ich d i tash, d hab i e ah g Jesus mat gm hu wo hih Galilee chekshani wui. K eda an oimmed hegai mo hab chehgig Philip ch am d kihkam Bethsaida t am. (Ahchim g Andrew ch Peter ha wehm ach am hab wa'ap d kihkam Bethsaida t am.) Jesus ad am cheh g Philip k hab kaij ab wui, “Ab g i ni-oith k wo ni-wehmajk.” 45 D g Philip gm hu i gahghi g Nathanael k am i chehgiok hab kaij, “Cheh att hegai matki wa ab amjed an o'oha hegam Mosesbad ch kekelibad Jiosh ha'ichu i tashogiththam. Heg oki wud mash d Jesus ch heg d alithag mash d Josephbad ch ab Nazareth kihhim t ab d kihkam.” 46 D ab wabsh ge i nen k hab kaij, “Ih, nat hig woho ha'ichu s-ap'ekam wo i wuhsh ab Nazareth t amjed?” D g Philip hab kaij, “Pegih, k ab wo i him k hejel e-wuhpuikaj wo nei.” 47 D ga hu haha wabsh i hihim. D g Jesus neith k hab kaij, “Neh, ith o d si o'othham m ab him.” 48 D g Nathanael hab kaij, “P has masma s-ni-mahch?” D hab kaij g Jesus, “M ani wabsh tonlith ch m-neith map am tha suhna wecho mat eda koi m-cheh g Philip.” 49 D hab kaij g Nathanael, “Ih, neh, kupki d Jiosh alithag ch d t-kownalig ahchim Tutuligo hemajkam.” 50 D hab kaij g Jesus, “Ab ap ni-hiwig nani pi am wabsh tonlith ch m-neith. Nt wo si shel m-ahgi mapt ba'ich i s-ta neithamam ha'ichu wo nei imhab i ba'ich. 51 Thani Jiosh si Kehsha ch am wo kuhpi'o g thahm kahchim am em-wehhejed. Kumt wo nei mat am wui wo i chehchsh g anghil ab ni-amjed k ab ni-wui ep wo i huhud.”

John 2

1 Am gohk d i tash amjed, tsh am ha'i wo e hohont Cana kihhim t am. Ihtha Cana o am Galilee chekchani ch ed. K am ha'ichug g Jesus je'e. 2 Kumd ahchim ab i t-wai. Chd am hihi g Jesus wehm k am ha'ichug. Kumd am hahawa hab juh g gegosig. 3 D wabshaba am i huh g nawait. D g Jesus je'e ab wui hab kaij, “Huh at g ha-nawait.” 4 D hab kaij g Jesus, “Pi o ab hu ha'ichu ni-him heg amjed. Pi at koi chum e ai mant am wo i ni-maskogi.” 5 D wabshaba g je'ej hab ha ahg g pion, “Am g hab wo juhni matp haschu wo i em-ahgi mamt am hab wo juh.” 6 K eda d t-himthag ahchim Tutuligo mach mu'i ha'ichu has masma wapkon. D g hohothai haha'a chuhthp am thadha mamt ab wo chum wa'ig k am hab wo junihith g t-himthag. D ihtham haha'a hemako am hu i waikko wehst-mahm walohn shuhthagi am wo e toa. 7 D hab kaij g Jesus am ha wui g pion, “Am g wo i ha shuhshuth g shuhthagikaj.” D wa woho am si i ha shuhshuth. 8 D hab hahawa ep ha ahg, “Am g wo wassibi k wo mah hegai mo nuhkuth g e-hohontam piast.” D wa woho hab e juh k am i wassibi k gd hu ha mah. 9 D ab jeh mo d si s-kehg nawait k eda pi mahch mas hebai wa'i. Hegam o hi wa s-mahch pion mat hebai wa'i. 10 D am i cheh g ha-hohntam am i jehk g nawait k hab kaij ab wui, “Sha'i s-ap ab kahk ihtha nawait. Ha'i at an hi wo wa i ha wassibi g s-kehg nawait ga hu i wehpeg k wabsh g pi kehg nawait wo ha wassibi im hu i oithch. Kuptki eda ahpi im hu i oithch g si s-kehg nawait ha wassibi.” 11 Neh, k ith d si wehpeg s-hasig ha'ichu hab junij g Jesus. D am mahsko wua g e-gewkthag. Kuchd ab si s-wohochuth mo woho d Jiosh si Kehsha. 12 D am hahawa hab i e ah g Jesus matt am wo hihi Capernaum kihhim wui. D g je'ej ch wepngaj ep t-oi. Ch am ha'ichugkahim he'ekia tash. 13 Wehs ahith ab o am e wushshath Jerusalem t am matsh wa g Jiosh ha tho'ibia g t-shohshon. Kud am i e ai. Kuchd gm hu hihim 14 k gd hu thatha ge'e cheopi t am. D eda am ha'i ha gagda g haiwani ch kahwal ch hohohi ch am ha'i kammialt g lial heg wehhejed. 15 Kud si pi hohho'i g Jesus mo ith am hab e wua ge'e cheopi t am k hekaj hema gewikudt g wijinakaj k gm hu wehs si ha shahmuth g haiwani ch kahwal k am gai ha shul g ha-mimsa hegam mo g lial kammialt k gm hu si gantad g ha-lialiga 16 k hab ha ahg hegam mo g hohohi ha gagda mat gm hu wo i ha wuwhas hab kaijch, “Pi g hab wo sha'i juhni g ni-ohg kih mat d wabsh wo ha'ichu gagdakudk.” 17 Kuchd am hahawa i chegito mo g Jiosh heki o'ohana hab chu'ig: Jiosh si Kehsha at ab wo si has elithath g ge'e cheopi. 18 D ab si chehmo g haha'ichu k hab ahg, “Shahchu ap ahgch hab wua ihtha? Am g hig t-chehgith g s-hasig ha'ichu. Kutt hab wo s-mahchk map u'ukch g e-gewkthag ab amjed g Jiosh.” 19 D hab kaij g Jesus, “Pegih oig, m ant wo wa em-chehgi g s-hasig ha'ichu. Mt wo padch ihtha mo g Jiosh am eda kih. Kunt ahni ep wo i kegch mat d wo i waik tashk.” 20 D ihtham si e sho'oshodkath k hab kaij, “Gi'ikko gamai chuhthp (46) a'ahith ab at hahawa i e nahto ihtha ge'e cheopi. Kuptp eda ahpi waik tash ab ia wo i kei.” 21 K eda g Jesus hejel hab e ahg mat wo e muhkith k uhpam ep wo e chegito. 22 Kutt s-chegito g ne'okij mat hekith uhpam e chegito am e muhkithk. Neh, bo chu'ig g Jiosh o'ohana mat uhpam wo e chegito g Jiosh si Kehsha. Kutt hahawa s-amichuth k ab s-wohoch. 23 Am achd ha'ichugkahim Jerusalem t am wehs oitham g t-shohshon ha-tho'ibiathag wuhshtha. Kud mu'ijj ab i s-wohoch g Jesus. D wabshaba pi am hu i e tashogi ha wui mas hedai wud no pi s-mahch mo heg wabsh hekaj ab s-wohochuth mo am neith mo hab juni him g s-hasig ha'ichu. 25 Pi o hedai ab hu hiwig g Jesus mas am wo ahgi g hemajkam ha-chegitoi no pi heki hu s-mahch.

John 3

1 Am ad hema d si s-has ha'ichu am t-himthag ed ch d ge Palasi ch hab chehgig Nicodemas. 2 Kuchd am hu hebai thadha chuhug ch ed. D ith am i chehgim g Jesus k hab kaij ab wui, “S-mahch ach mat am i m-kei g Jiosh mapt wo t-mashcha. Pi at hedai wo e nako mas hejel hab wo juh hegai s-hasig ha'ichu map hab junihim. Jiosh oki ab m-mahkch g gewkthag.” 3 D hab kaij g Jesus, “Nt wo si shel m-ahgi mat hegam d wo wa'i Jiosh hemajkamgak mat hedai gokko wo mamsi. Bo wa chu'ig g Jiosh kownaltalig.” 4 D hab kaij g Nicodemas, “Tt has hig masma ep wo mahsi heki hu kelitk. Aha natt am ep wo i wah t-je'e ed k ep wo mahsi?” 5 D g Jesus hab kaij, “Pia'a. Tham wabsh ha-a'aliga ab ha ab mamsik. Bani m-ahgith ab amjed g wechij thoakag. Ith at g Hekia S-ap'ekam Gewkthag ab wo em-mah mamt wo e chehgi g pahl wakonakaj mamt thagito g pi ap e-chu'ichig. Mt hab s-ap am wo i wahp Jiosh kownaltalig ed. 7 Pi g am e tothsith mani hab kaij mamt hemho wa ep wo mamsi. 8 Neh, kah ap g hewel m an hewelhog. Nap hig s-mahch mas hebai amjed med ch hebai wo meh? Pegih, k hab wa masma pi ta machima hab e junihim g Hekia S-ap'ekam Gewkthag ch an ha wechij mamsith mo hedai hab i elith.” 9 D g Nicodemas hab kaij, “A, kus has masma hab chu'ig?” 10 D hab kaij g Jesus, “Aha, nap pi amichuth ch eda d wa chum ge uhgk ha mashchamtham g Tutuligo? 11 Tho si wohokam ihtha mani m-ahgith. M ach ahgachug mach haschu s-ap s-mahch ch am em-ahgith mach haschu neith. M eda pi wohochuth g ha'ichu t-ahga. 12 Ihtha mani em-ahgith o in hab wa'i e junihim jewed thahm. M eda pi ni-wohochuth ch hab pi wo e nako mams wo s-ni-wohoch mant am wo em-ahgi mo haschu has e junihim an thahm kahchim ch ed. 13 An ani wa kih thahm kahchim ch ed ch d Jiosh si Kehsha. Kut pi hedai ep wo e nako mas hab masma wo em-ahgi ab amjed mant ahni.” 14 D hab ep kaij g Jesus, “An o hab chu'ig Jiosh o'ohana ed matsh wa g t-shohshonbad mu'i e ke'ij g kohk'oikaj mash eda am oiopo tohono jewed ch ed. Kutsh wa g Mosesbad am hema hab juh g ko'oi g kohwlikaj k ab uhgk ul uhs t ab. T hedai ab i neith k thoa. Pegih, kumt ahni hab wa'ap uhgk wo i ni-ul uhs t ab ahni Jiosh si Kehsha. 15 Kutp hedai ab wo ni-hiwig k wo e tho'ibia ab amjed g pi ap e-chu'ichig.” Neh, bad kaij g Jesus. 16 Pegih neh, ab o si t-tatchua g Jiosh ch hiwigi g e-alithag mat am i e thagito k e muhkith am t-wehhejed mach d pi ap chu'ijkam. Kut pi wo bei g s-ko'ok e-namkithadag matp hedai ab wo hiwig k wabshaba g pi ha huhugetham thoakag wo bei. 17 Jiosh at am cheha g e-alithag mat in wo i wuhsh jewed thahm k wo ha tho'ibia g hemajkam. Kut pi heg hekaj in i wuhsh mas ab wo ha'ichu t-mohto'i. 18 Pi o ab hu ha'ichu mohto'is hegam mo ab hiwig g Jiosh alithag. Hegam o ab heki hu ha'ichu mohto'is mo pi ab hu hiwig. 19 Ia at jiwia jewed thahm hegai mo woho tonlithch g t-chegitoithag. K wabshaba hegam mo hab s-junimk g pi ap'ekam pi tatchua g tonlig nat pi wo mahsko wua g pi ap ha'ichu hab ha-juni. K oi wa ab him g lothaita heg hekaj pi ap'ekam. 21 Hegam mo hab wua g s-ap'ekam o tatchua g tonlig mat wo mahsko e wua mo hab wua g Jiosh tatchui. 22 Am i thahm, kuchd am i wuwha Jerusalem kihhim t amjed k am oiopohim Judea chekshani ch ed ch ha pahl wapkon g hemajkam. 23 Md eda wenog koi kuh hegai John mad ha pahl wapkon. Sh am oimmed ch ha pahl wapkon Aenon t am miabithch g Salim kihhim no pi am ge shohshon ch s-shuhthagig. 25 Sh am ha'ichug hegam mash ab si wecho e mashcham. Kutsh am hema jiwia g t-wehm o'othham k ha wehm ne'owi ab amjed g pahl wakona. 26 Tsh ihtham am hahawa hihi John wui k hab kaij, “T-mashchamtham, hema at wa am m-wui jiwia map wa am ha pahl wapkon gm hu aigojed g Jordan akimel. Kup wa am si s-mahch ch ahg mo hig woho d si s-has ha'ichu. Pegih, heg ash hab wa'ap ha pahl wapkon. Kush wehsijj gm hu ha'ab him wui.” 27 Sh hab kaij g John, “Heg ach ab wa'i bekch mo haschu g Jiosh ab t-mahkch. 28 Bani wa kaij mani pi d Jiosh si Kehsha ch wabsh am ha'ichu i ap'echuth g ia jiwhiathaj wehhejed. Am am wa kah mani wa hab kaij. 29 Jiosh si Kehsha o heg wepogithas mo g wo ha hohntam. K g hemajkam heg wepogithas mo g wo ha hohnta. T g nawojij wo si s-hehgigk mat hekith s-ap wo e hohont. Bani wa masma si s-hehgig mo ab wui him g hemajkam nani pi d nawojij. 30 Heg at am wo e maskogi mo hig woho d si s-has ha'ichu. Kunt ahni im hu hab wabsh wo i ni-junihi.” Neh, bash kaij g John. 31 Nt ahni hab wo chei mo g John d wabsh o'othham ch am t-ahgith mo haschu i neith ch ep kah ia jewed thahm. T wabshaba g Jiosh alithag ia jiwia ab thahm kahchim t amjed k d si s-has ha'ichu wehs ha'ichu thahm 32 ch am t-ahgith mash haschu i neith ch ep kah an thahm kahchim ch ed. K wabshaba pi sha'i mu'ijj ab wohochuth g ahgaj. 33 Jiosh at am cheha g e-alithag mat ia wo jiwia jewed thahm k s-ba'ama ab mah g Hekia S-ap'ekam Gewkthag. K g alithaj heg hekaj ahg g ne'okij. (33) Pegih, kuch heg hekaj s-ap ab s-wohochuth g Jiosh ne'oki ahchim mach ab s-wohochuth g alithaj ahga. 35 Jiosh o si pihk e elith ab e-alithag wui ch wehs ha'ichu ab mah. 36 Kuch wehsijj u'ukch g pi ha huhugetham thoakag ahchim mach ab hiwig g alithaj. T hegam mat pi ab hu wo wohog el pi wo edagi g pi ha huhugetham thoakag k wabshaba g s-ko'ok e-namkithadag wo edagi. T heg hab wa'ap pi hekith wo huhug.

John 4

1 D ba'ich i mu'i hemajkam ab him Jesus wui mo ab wui g John kch ab wecho e mashcham. Kuchd ahchim ha pahl wapkon mach ab si wecho t-mashcham. D am i kah hegam Palasi ihtha k an si i neneo. 3 D hekaj g Jesus hab i e ah matt wo i wuwha ab Judea chekshani t amjed k gm hu uhpam wo hihi Galilee chekshani wui. 4 K eda ihtham ha shahgith chechkshani am hab chu'ig g Samaria chekshani. 5 Kuchd heg am gai hihimath ch gm hu ai g Sychar kihhim mat am thahm juh. K am wawhiag miabithch g kihhim. D am thahiwua g Jesus gewkok natt pi mehk wa'i hihi. 7 Kuchd ahchim gm hu hihi kihhim wui matt wo ha nolawt g ha'ichu hugi. D an hema i t-bij g uwi wa'igamedam k atsh am jiwia mo am thaha g Jesus. Sh hab kaij g Jesus ab wui, “Ab g i ha ni-wasbith g shuhthagi.” 9 Sh hab kaij g uwi, “Neh, thapki Tuhligo. Ni ahni d Samaria t am o'othham. P haschu ahgch ab ni-tahni g wasib?” Neh, bash kaij nach pi s-ha uhwaith ch chum hems g ha'u pi ha wehm wo ha hekaj. 10 Sh g Jesus hab epai kaij ab wui, “Ahpi apt aigo ab wo ha'ichu ni-tai maptp wo s-mahchk mani hedai wud ch haschu i m-makiog. Hegai mani m-makiog o ab Jiosh d amjedkam ch heg wepogithas mo g shonkam shuhthagi.” 11 Sh hab ep kaij g uwi, “Pt has hig masma wo wa'i map pi ha kuhwo? K eda s-juhk g wawhia. 12 Aha nap ba'ich i gewkthag mo g t-shohshon Jacobbad. Heg at ia wawhiat e-oith ed k ia ih'ehim g e-a'aliga ha wehm ch ha'ichu e-shoshoiga.” 13 Sh g Jesus hab kaij, “Huhume o g shuhthagi m-wa'igi. Kup ep tonommek. 14 T wabshaba pi hekith wo huhug hegai mani ahni m-makiog. Heg at am wo m-edak ch hab wo masmak mo g shonkam ch ab wo m-mah g pi ha huhugetham thoakag.” 15 Sh hab kaij g uwi, “Ih, pegih, si g s-ni-ho'ige'ith k ab i ni-mahki ihtha shuhthagi mant pi hekith ep wo tonom k pi wo ge i wa'igammedath.” 16 Sh hab kaij g Jesus, “Pegih, k ab wo i wai g e-kun.” 17 Sh g uwi hab kaij, “Pi ani ha kun.” Sh hab hahawa ep kaij g Jesus, “Wohokam ap ahg map hab kaij map pi ha kun. 18 Hetasp ap wa'i ha kuhkunkahim. K hegai map hemuch an wehm kih pi d m-kun.” 19 Tsh ab wabsh ge nen k kekiwua g uwi k hab kaij, “Ih, thapki ge Jiosh ha'ichu i tashogiththam! 20 Pegih neh, am g ni-ahgith mam haschu ahgch ahpim Tutuligo hab chech'e mo g Jerusalem d wa'i amai mat am wo e ihmath g Jiosh. Ch eda ahchim Samaria t am kihkam ia ha'ab ihm mo hebai g t-shohshon ihmahim ith ab tho'ag.” 21 Sh hab kaij g Jesus. “Nt wo si shel m-ahgi mo ab him g tash mat wabsh chum hebai wo e ihm g em-ohg Jiosh, pi iia wa'i ith ab tho'ag o am Jerusalem t am. 22 T wabshaba g Jiosh ab i t-gawulkai ahchim Tutuligo mat am gai t-wuhshanim wo e maskogi am ha wui g nahnko mahs hemajkam. M ahpim Samaria t am o'othham pi koi am hu i si s-mahch g Jiosh. 23 E at ai g tash mat g hemajkam si e-ihbthag amjed woho ab wo ihmath g e-ohg Jiosh. Bo masma hab ha elith g Jiosh mat hab masma ab wo ihmath. 24 Tho wabsh thoakag g Jiosh ch pi ha honshpadag mams am hebai wo kihchuth k heg wa'i eda wo ihmath. Pegih, mt wabsh chum hebai wo ihmath ch wehs e-ihbthag amjed.” 25 Sh am wabsh sha'i pi amichuth g uwi ch hab kaij ab wui, “Heg ani hi wa s-mahch mat wo jiwia hegai mo d Jiosh si Kehsha ch hab e a'aga Christ k wehs ha'ichu wo t-ahgi.” 26 Sh hab kaij g Jesus, “Thani ahni Jiosh si Kehsha.” 27 Kuchd edapk i thatha. D am wabsh kia wehmaj neok hegai uwi. Kuchd si has i t-elith k wabshaba pi has sha'i kaij. 28 D ihtha uwi am wabsh i thagito g e-ha'a k gm hu si s-hohtam uhpam hih kihhim wui k ash am ha ahgith k hab kaij, 29 “Oi g ab wo i hihim k wo nei hegai mo am wehs ni-ahgith mani has i ni-wua. Kutp hu d i Jiosh si Kehsha.” 30 Kudki ab ha hekaj i hihi g hemajkam s-neithamk g Jesus. 31 D koi e chehm g hemajkam, kuchd ab chum si ahgith g Jesus mat wo ha'ichu huh. 32 D wabshaba hab kaij, “Am o ha'ichug g hab mahs gegosig mam ahpim pi sha'i mahch.” 33 Chd hab kaij ab a'ai t-wui, “A nat ia heki hu hema gegos?” 34 D hab kaij g Jesus ab t-wui, “Ni-gegosig o d ihtha mant hab wo juh g Jiosh tatchui k wo nahto hegai chikpan mo ab ni-mohto'ith. 35 Neh, bo e chech'e mat g ha-esha wo i e ba'iha mat d wo gi'ik i mashathk. Nt wabshaba wo em-chehgi mat hemu si s-hohtam wo e ba'iha ha'ichu. 36 Ahni ant am ei g Jiosh ha'ichu ahga. Kumt ahpim wo ha ba'iha hegam mat wo bei g pi ha huhugetham thoakag. Kutt hekaj t-wehm wo s-hehgigk. 37 Ith o heg wepogithas hab che'ithag mo hab chu'ig, ‘Hema o'othham at am wo ha'ichu ei. T d wabsh wo hemak ch am wo hih g esha.’ 38 Ab g wo neith hegam mo ab hihim. Pi amt ha ahgi g Jiosh ha'ichu ahga k wabshaba wo ha ba'iha hegam mat wo e tho'ibia.” 39 Kud wa mu'ijj hegam kihkam ab i s-wohoch mo g Jesus d Jiosh si Kehsha heg hekaj mo hab kaij hegai uwi, “Heg o wehs ni-ahgith mani has i ni-wua.” 40 D heg hekaj ab si ahgith g Jesus am wui thathak mat wo si s-ha ho'ige'ith k am wo kia ha wehmajkahim he'ekia tash. Kuchd wa woho am ha wehmajkahim gohk tash. 41 D mu'ijj ab ep i s-wohoch ab i kaiok g ahgaj 42 k hab hahawa kaij ihtham heg wui uwi, “B att hahawa si hejel kah k ab s-wohochuth k s-mahch moki woho d wehs hemajkam t-tho'ibiakam ith thahm jewed.” 43 Kuchd amjed gm hu hahawa ha'ab hihi Galilee chekshani wui 44 no pi hab kaij g Jesus, “No hu d wabsh i neitha g Jiosh ha'ichu i tashogiththam amai mo hebai d si kihj am jewed.” 45 D wabshaba mu'ijj g hemajkam amai ab ha'ichugkahim Jerusalem t ab ch wuhshath g t-shohshon ha-tho'ibiathag ch am neith g Jesus. Kud wa am hab wua g s-hasig ha'ichu. D ihtham si s-hehgig ch ab neith g Jesus matt gd hu thatha. 46 Kuchd oi wa gm hu ha'ab hihi Cana kihhim wui mat wa am si wehpeg hab juh g si s-hasig ha'ichu mat wa wabsh g shuhthagi nawaitt. D am hema jiwia g kownal pionag ab Capernaum kihhim t amjed am i kaiok mo am ha'ichug g Jesus. Sh ith alithag muhkhim. D hab kaij ihtha ab wui g Jesus mat am wo hih Capernaum wui k wo thoaj g alithaj. 48 D hab wabsh kaij g Jesus ab wui, “Aha, namt pi hedai ab hu wo i s-ni-wohoch, mt hekith wo ipki nei mant hab wo juh g si s-hasig ha'ichu?” 49 D am hab wa'ap kaij g s-has ha'ichu, “Ab g si i s-ni-ho'ige'ith k wo ni-oi am ni-kih wui mat koi wo muh g ni-aliga.” 50 D hab hahawa kaij g Jesus ab wui, “Gamai g s-ap e tahtk hihm. T wo thoa g m-aliga.” D si i ihbheiwua ihtha s-wohochuthk k gm hu hahawa hih uhpam. 51 Sh am himath ch ab ha'i ha nam g e-pionag mash si s-hehgig ch hab kaij, “Tki wo thoa g m-aliga.” 52 Sh am hahawa ha kakke, “He'ekia ohla k ed at ab i ap'etahi.” Sh hab kaij g piongaj, “Tho i hemako ohla tako mat jumal gei g s-tonjig ab ab.” 53 Sh am ha hekaj i chegito g ohgaj mo am d wabsh i si hegai ohla mo hab ahgith g Jesus, “T wo thoa g m-aliga.” Tsh gd hu jiwia e-kih am k am si a'aga ihtha g e-wehm kihkam ha wehm. Tsh wehsijj ab i s-wohoch mo g Jesus d Jiosh si Kehsha. 54 Neh, ith o d i gokkokam s-hasig ha'ichu mat hab juh g Jesus ia Galilee chekshani ch ed.

John 5

1 D am hahawa hema i e aihi g t-mihshmetha piast. Kuchd hekaj gm hu hihi Jerusalem wui. 2 Am o hema wo'og kihhim ch ed ch hab e a'aga Bethsatha ch an miabithch hegai kolhai kihjeg mam an ha gagda g kahwal. K an hetasp wapttog heg wehgaj wo'o. 3 K ihtham ha wecho sha'i mu'i nahnko mahs kok'otham an wo'owop ch ha'i d pi neneatham ch ha'i d pi hihimithkam ch ha'i ab wabsh i s-momoik. [Kush ihtham nenida g shuhthagi matsh am wo i hoi 4 no pi hab elith mash hab hu g anghil am i huhuduk shuhthagi ch ed ch am i nonoig g shuhthagi. T hedai si wehpeg am wo hud shuhthagi ch ed mat am wabsh wo chum i nonoi k ash hab hu wo s-thoajima ab e-mumkithag amjed.] 5 D am hema wo'o g o'othham ch waikko wehst-mahm gamai gigi'ik (34) a'ahith ab wa'i mumku. 6 D g Jesus am neith ch s-mahch mo tash am wa'i wo'o ch hab kaij ab wui, “Nap tatchua mapt wo thoa?” 7 D hab kaij g mumkutham, “Ni-nawoj, pi o an hu hedaig mas am wo i ni-huduni shuhthagi ch ed mo hekith am i hoike. Ni im hu haha wabsh i ni-nakog mant am wo i hud, k gm hu heki hu hema ni-ba'iwichchek.” 8 D hab kaij g Jesus, “I wuhshani k am beh'i g e-wahkus k hihm!” 9 Neh, d ha hekaj thoa k am bei g e-wahkus k s-ap hih. Ith ad hab e juh chum t-mihshmetha tash ed ahchim Tutuligo. 10 D ha'i neith g t-wehm o'othham ch hab ahg, “Neh, ahpi, melchkwua ap g t-chehanig map kushwiotch g e-wahkus. A nap pi mahch mo d mihshmetha tash?” 11 D hab hahawa kaij hegai mo wa mumkuhim, “Hegai mat ni-thoaj o hab ni-ahg mant am wo bei g ni-wahkus k wo hih.” 12 D ab hahawa kakke mas hedai wud hegai mo hab ahg mat wo kushwiotk hih g e-wahkus. 13 D wabshaba am wabsh i pi e amich nad pi g Jesus im hu pi e mahsith hemajkam ha shahgith no pi sha'i mu'ijj g hemajkam amai. 14 D am hahawa g Jesus s-neitham k am cheh ge'e cheopi ch ed k hab ahg, “Neh, thoa apt. Pi g am hu hab i ep junihim g pi ap'ekam nat pi ha'ichu ba'ich i pi ap hab wo e juh am m-tahgio mapt am hab ep wo i junihi g pi ap'ekam.” 15 D am i wuhshani k gm hu him k am ha ahgi moki d Jesus mat thoaj. 16 D am i s-mai ihtham mash d Jesus mat hab juh ihtha mihshmetha tash ed k heg hekaj am i kudu ab ne'owinch. 17 D g Jesus hab kaij ab ha wui, “Ni-ohg Jiosh o chum hekith g s-ap'ekam chikpan. Ni ahni hab wa'ap chum hekith hab ni-wua.” 18 D am hahawa i si e gewpkai mat wo mua nad pi am i kah mo hab masma ihm g Jiosh ch heg hekaj e wepogith g Jiosh. 19 D hab hahawa kaij g Jesus ab ha wui, “Nt wo si shel em-ahgi mani pi ha'ichu hejel hab wua ch wabshaba hab wua mo haschu g ni-ohg Jiosh ni-chehani. 20 Ni-ohg o ab si pihk ni-elith ch am ni-chehgith mant has wo chum juni. T ab wo ni-mah g gewkthag mant ba'ich i ge'e ha'ichu hab wo juh mo ihtha. Mt ab wabsh wo i haha'athka. 21 Ni-ohg o i ha wuwhasith g ko'i ab muhkig amjed ch ab ni-mahkch g gewkthag mant s-ap hab wo juh. Nt hekaj ab wo i ha wuwhas mani hedai hab i elith. 22 K g ni-ohg pi hedai ha lothait ch wabshaba ahni ab ni-mah hegai ap'ethag mant wo ha lothai 23 no pi hab elith mat wehsijj ab wo si has i ni-el hab masma mo ab si has i elith g ni-ohg. Am at i ni-kei g Jiosh. T hedai pi ab hu has wo ni-elithath ch hab wa masma pi ab hu has elith g ni-ohg. 24 “Tho si wohokam ihtha mant hab wo chei. T wo edagi g pi ha huhugetham thoakag k am wo wehmajk g Jiosh hegam mat hedai ab wo kaihamath g ha'ichu ni-ahga ch ab wo hiwgath g Jiosh. Pi ant ab hu wo ha mohto'i g ha-chu'ichig mas hekaj gm hu hab wo i e juh ab amjed g Jiosh. 25 Nt wo si shel em-ahgi mo ab him g tash, pej heki hu e ai, mant ab wo i ha wai g ko'i ahni Jiosh alithag. T hegam mat ab i kaiha g ha'ichu ni-ahga ab wo i wuwha. 26 Ni-ohg o d hegai mo ab ha mahkch g thoakag ch ab ni-mahkch g gewkthag mant hab wa'ap wo ha mah g thoakag. 27 T ab ni-mah g gewkthag mant ahni hab wo juh g lothaita nani pi d si Kehshaj. 28 “Pi g am wo e totothsith ith hekaj mani has i kaij. Ab o him g tash mat wehs g ko'i s-ap wo ni-kah k ab wo i wuwha. 29 Hegam mo hab junihim g s-ap'ekam at ab wo i e wamgith k ab wo bei g e-ap'ethag. T hegam mo hab junihim g pi ap'ekam ab wo i e wamgith k ab wo bei g s-ko'ok e-namkithadag.” 30 D hab ep kaij g Jesus, “Pi ant wo sha'i ni-nako mant hejel ha'ichu hab wo juh k wabshaba am si ni-ohg oithk hab masma wo ha lothai. K hekaj hab s-ap'e g ni-lothaita. 31 “Pi amt wo mahchk manis am ahg g wohokam mantp wabsh hejel wo ni-wohokamch. 32 K heg hekaj am wa ni-wehhejed neok g ni-ohg Jiosh. Kuni s-mahch mo d wohokam mo am ahg ab ni-amjed. 33 “Neh, am amt wa ha'i hihi heg wui John mo wa em-pahl wapkonahim. K wa am em-ahgith g wohokam. 34 Ith ani hab wabsh kaij mamt hekaj wo e tho'ibia nam pi ahpim heg tatchua mat g o'othham am wo i wohokamch ha'ichu mamt ab haha wo i s-wohoch. Ni ahni hi heki hu s-mahch mani hedai wud ch pi sha'i tatchua mas am hema wo ge i ni-wohokamch. 35 John o wa ahgachug g wohokam ch hekaj em-tonlithch. Kumt wa ha'ijj ahpim he'es ab si s-hohho'i g ha'ichu ahgaj k an e hehemapaith wehgaj hab masma mat g hu'ul nahgi wo s-hohho'i g tonlig. 36 “John o s-ap ni-wohokamchuth. K wabshaba ahni ab ni-mahkch g Jiosh mani g s-hasig ha'ichu hab wua. K ith ba'ich i s-ap ni-wohokamchuth mani d ni-ohg kehsha. 37 Pi am hekith neith g Jiosh. K pi hekith ab hu em-wuhiosha neith ch neok ch wabshaba am ni-wohokamchuth mani d kehshaj. 38 Am o ni-wohokamchuth g Jiosh mani d si Kehshaj. Kum eda pi ab hu ni-tatchua nam ge wohochuth. 39 Am am si hoan g Jiosh o'ohana nam pi tatchua mamt wo e tho'ibia k wo edgithath g pi ha huhugetham thoakag. K g Jiosh o'ohana am ni-wohokamchuth 40 mani ahni d em-tho'ibiakam. M eda pi ab hu ni-hiwig. 41 “Neh, pi ani heg nen'oith mas g hemajkam ab wo si ni-ha'ichuch. Jiosh at ab wo si ni-ha'ichuch. 42 Kuni s-em-amichuth ch s-mahch mam pi ab hu sha'i tatchua g Jiosh. 43 Ia ant jiwia g ni-ohg si wehhejed. Kum pi ab hu has ni-elith. Hegam at ab has d wo em-elithak matp hedam wabsh hejel e wehhejed ab wo i wuwha. 44 Pi amt has masma ab hu wo s-wohoch g Jiosh nam pi heg am wa'i s-nen'oith mamt ab a'ai wo si has i e el. K eda d chum Jiosh mamt ab wo chum hehgchul. 45 Ni wabshaba pi d ahni manis ab wo ha'ichu em-abch am ni-ohg wui. Mosesbad chehanig am ab hiwig. K d hegai mat am wo tashogi g pi ap em-chu'ichig. 46 Mosesbad at ha'ichu o'oha ab ni-amjed. Kumt ab wo s-ni-wohoch mamt hems woho ab wo s-wohochuthath g Mosesbad o'ohana. 47 Pi amt has masma ab hu wo s-wohoch g ni-ahga namki pi woho wohochuth mat haschu an o'oha g Mosesbad.” Neh, bad kaij g Jesus am ha mihshmathch. Am i amjed, tt gm hu hahawa hihi Jerusalem t amjed.

John 6

1 Am hu hebai ep amjed machd an oiopohim Galilee Kahchki hugith an ch gm hu hahawa i chehchsh ha'abjed k am thatha. 2 D eda mu'i hemajkam chum hekith an oithahim g Jesus neithok mo g s-hasig ha'ichu hab wua ha thoajithch g kok'otham. 3 D ab i chesh g Jesus kawulk t ab. Kuchd ahchim wa'i mach ab si wecho t-mashcham am i oith k am wehmaj thadhaiwua. 4 D eda e aihim mat wo e wuhshath g t-shohshon ha-tho'ibiathag. 5 Kud mu'i hegam mad gm hu wo piasto ab i hihi s-kaimkch g Jesus. D am i ha nei g Jesus k hab kaij ab Philip wui, “Neh, Philip, chs hebai hig wo ui g ha'ichu hugi matt wo ha gegos ha'akia i hemajkam?” 6 Bo kaij ch wabsh s-a'appemamk g Philip no pi wa chum s-mahch mat has masma hab wo juh. 7 D hab kaij g Philip, “Pi att wo sha'i t-nako. Chum achs hems gohk siant pihshkaj wo ui g pahn, t eda pi wo ha ai g ha'akia hemajkam.” 8 D hegai mo d Simon Peter nawoj ch hab chehgig Andrew hab kaij, 9 “Ia o hema ha'ichug g ali ch hi wa hetasp sismito ch gohk waptopi u'a. T wabshaba pi ha'ichu ab hu wo sha'i ha nako ha'akia hemajkam ha wehhejed” . 10 D ab hahawa t-ahgith g Jesus matt wo ha cheha g hemajkam mat wo thadhaiwua no pi an s-washaig. D am i wehsijj thadhaiwua g hemajkam k d hetasp mihl chechoj ch mu'i ehp g u'uwi ch a'al. 11 D g Jesus am ui g sismito k ab ho'ige'el g Jiosh k ab t-mah. Kuchd ahchim an hahawa i ha mahkhi g hemajkam. D hab wa'ap juh hegam gohk waptopi. Kuchd wehsijj hug k si s-kokwoth. 12 D hab hahawa t-ahg g Jesus. “An g wo i u'ihim g ha-wi'a. Kutt pi ha'ichu wo sha'i heki wua.” 13 Kuchd an i u'ihim k gamai gohk wapshomi ha shuhshuth heg hekaj wihpi'ithag. 14 Neh, d am i nei g hemajkam mat si s-hasig ha'ichu hab juh g Jesus k hab kaij, “Neh, mo d wabsh i si shel moki ith d hegai Jiosh ha'ichu i tashogiththam mach nenida matsh ia wo jiwia ith thahm jewed.” 15 D g Jesus ha amich mat an wabsh wo si be k wo ge'e kownalch k hekaj gm hu hejel ba'ich i chesh tho'ag t ab. 16 Hudunihim o g tash. Kuchd gm hu i huhud 17 k am chum i chehchsh g wahlkokaj Capernaum wui nad pi hab t-ah g Jesus k hab kaij matsh pi oi gm hu wo hih. D am i s-chuk. 18 D g s-gewk hewel ab i med k ab i kudu g shuhthagi. 19 Kuchd am himchuth g wahlko am hu i gi'ik mihya. D ab haha wabsh hema him t-wui an wabsh shuhthagi thahm. Kuchd hab i neithok si t-totoths. 20 D ab hahawa t-wui neo k oki d Jesus ch hab kaij, “Pi g am wo e totothsith. Ahni ani wud” . 21 Kuchd si s-ap i t-taht k gn hu i cheshajch wahlko ch ed. Neh chd am wa'i hekaj gn hu aigo thatha mach am ha'ab t-tatchua. 22 Ba'ich i si'alim, d hegam hemajkam mad ab wih s-mahch mad pi i t-oi g Jesus no wa pi neith mo d hemako g wahlko. Kuchd ahchim wa'i heg ab an thadhaiwua k i hihi. 23 D ihtham an chum gagahim ch pi cheh g Jesus k nei matt pi am hu ep thatha. D oi wa am i ha'i thatha g wapalko ab Tiberias kihhim t amjed miabithk mat am ha gegos g Jesus hegam mu'i hemajkam. D ihtham hemajkam an e ba'iham k gm hu i gahgio Capernaum wui 25 K hekith am i chehg k hab kaij ab wui, “T-mashchamtham, hekith apt ia i jiwia?” 26 D hab kaij g Jesus, “Am ani woho ni-chehgithch em-wui heg hekaj s-hasig ha'ichu mani hab wua. M wabshaba pi heg hekaj ab s-ni-wohochuthamk. Neh am ant em-gegos. Kumt kokwoth k heg wai hekaj ni-gahg. 27 Pi g am wo si e kudutath wabsh g ha'ichu hugikaj ch wabshaba heg wo chum s-behim mo d pi ha huhugetham. Ahni ani em-makiog g pi ha huhugetham thoakag. Heg at hekaj am i ni-kei g Jiosh k am ni-wohokamch.” 28 D hab kaij g hemajkam, “Tt has wo t-juh k ab wo bei g pi ha huhugetham thoakag?” 29 D g Jesus hab ha ahg, “Ihtha wa'i mamt ab wo ni-hiwgath ahni Jiosh si Kehsha.” 30 D hab ep kaij g hemajkam, “Am g hig hab juhni g s-hasig ha'ichu. T heg am wo t-chehgi map woho d Jiosh si Kehsha. Tt ab wo s-m-wohoch. 31 Neh, ab ash gegshshe thahm kahchim t amjed hegai ha'ichu hugi mash hab e a'aga ‘manna’. Kush heg ko'a g t-shohshon mash am jeg ed oiopo. Bo chu'ig g Mosesbad o'ohana: Ab o ha mahk hegai ha'ichu hugi mo am gegshe ab thahm kahchim t amjed. Pegih, pt ahpi has hig wo juh?” 32 D hab ep kaij g Jesus, “Pi o d Mosesbad mo wa ab ha mahk hegai ha'ichu hugi. Tho ni-ohg mo wa hab wua. K heg d wabsh ha'ichu hugi mo wa heg hekaj d thothakam jewed thahm. K g ni-ohg ba'ich i s-kehg ha'ichu ab em-makiog 33 mamt heg hekaj d wo thothakamk chum hekith. Ith o heg wa wepo mo d s-kehg ha'ichu hugi. Kumt wo be k heg ab wo bei g s-kehg thoakag.” 34 D ab si tahni ch hab kaij ihtham, “Ih, pegih, ab g chum hekith t-mahkath ihtha map hab ahg.” 35 D hab kaij g Jesus, “Ahni ani wud mo g ni-ohg ab em-makiog. Ab g wo ni-hiwig. Nt wo em-mah g pi ha huhugetham thoakag. Ith at heg wo wa wepok mamt wo huh g hab mahs ha'ichu mamt chum hekith d wo thothakamk ch pi hekith ep wo bihugk. 36 Neh'e mani wa hab wa heki hu kaij mam wa chum ni-neith ch eda pi ab hu ni-wui e thagitokch. 37 T wabshaba wehs ab ni-wui wo i e thagito hegam mat g ni-ohg am ha eda wo i chikp. Nt pi hedai wo sha'i ohhoth mat ab wo i e thagito ni-wui. 38 Tho ni-ohg tatchui mamt ab ni-wui wo i e thagito ch hab wo edagi g pi ha huhugetham thoakag. Nt wo si em-nuhkuthath mamt pi hedai wo heb hu wua g e-tho'ibiathag. Kunt ab wo i em-wuwhas muhkig t amjed mat hekith wo huhug ihtha jewed. Ith o d ni-ohg tatchui. Kunt heg hekaj ia jiwia ab thahm kahchim t amjed.” 41 D g haha'ichu si gahghai e mohmgith ch s-babgam neneok 42 ch hab kaij, “K haschu ahgch hab kaij mat ia jiwia ab thahm kahchim t amjed? S-mahch ach ch ep s-ha mahch g jehj. Tho wabsh Jesus ch d alithaj g Josephbad.” 43 D hab kaij g Jesus, “Pi g am wo gahghai e mohmgith k s-babgam neneok. 44 Pi at hedai wo sha'i e nako mas ab wabsh hejel wo i e thagito ni-wui. Jiosh ni-ohg at am wo i chikp ha eda. T hekaj ab ni-wui wo i e thagito. T ab wo i e ai g si oithchkam tash. Nt ab wo i ha wuwhas muhkig t amjed. 45 Kekelibad Jiosh Ha'ichu i tashogiththam atki wa an o'oha: Wehsijj at wo ha mashcha g Jiosh g hemajkam. Neh, t ab ni-wui wo i e thagito matp hedai ab wo kaiha g Jiosh ni-ohg k ab wo mai g mashchamaj. 46 Pi am hedai g e-wuhpuikaj neith g ni-ohg. Ahni ani wa'i neith nant pi ab amjed ia jiwia. 47 “Neh, hegam mat ab wo i s-ni-wohochuth k wo ni-bei at hekaj wo edagi g pi ha huhugetham thoakag. 48 T-shohshon ash wa ko'a hegai manna ch wabshaba pi heg hekaj edagi g pi ha huhugetham thoakag. Mt wo edagi hegai pi ha huhugetham thoakag ab ni-bek. Ith o heg wa wepo mani d ha'ichu hugi em-wehhejed. 50 Ba'ich ani d i s-kehg ha'ichu hugi mo hi hegai manna namt pi g pi ha huhugetham thoakag wo edagi ab ni-bek. 51 I atsh gei g manna ab thahm kahchim t amjed k ab ha mahkch g thoakag. Ni wabshaba d ahni mant woho ia jiwia ab Jiosh kihthag amjed k ia u'apa g pi ha huhugetham thoakag. Nt wo thagito g ni-chuhkug mant wo ni-muhkith k hab wo ha tho'ibia g hemajkam.” 52 D ith kaiok am si s-babgam e ne'owi g haha'ichu hab kaijch, “Pi at has sha'i masma wo t-mah g e-chuhkug machs wo huh.” 53 D hab kaij g Jesus, “Pi amt wo edagi g pi ha huhugetham thoakag pi ab hu ni-bek ahni Jiosh si Kehsha. 54 Ab amt wo i s-wohoch mant wo iawua g ni-eh'ed k wo muh em-wehhejed k hab wo edagi g pi ha huhugetham thoakag. Ith at heg wo wa wepok mamt wo huh g ni-chuhkug k wo ih g ni-eh'ed. Kunt ab wo i em-wuwhas muhkig t amjed mat hekith wo kuhgit g jewed. 55 Ihtha ni-chuhkug ch ni-eh'ed o heg wa wepo mo d ha'ichu hugi ch ha'ichu i'ithag. 56 T wo edagi g wechij thoakag hegam mat ab wo ni-bei. Am ant ha eda wo ul g ni-thoakag. 57 Ni-ohg at wa am ni-cheha mant ia wo jiwia jewed thahm. Kuni d pi ha huhugetham thoakam no pi g ni-ohg d pi ha huhugetham thoakam. T hab wa'ap d wo pi ha huhugetham thoakamk matp hedam ab wo ni-bei nant pi am ha eda wo ni-ulinith chum hekith. 58 Heg ani hekaj pi hab masma mo hegai manna. Hegam mash wa ko'a hegai at pi heg hekaj edagi g pi ha huhugetham thoakag. T wabshaba wo edagi matp hedam ab wo ni-bei.” 59 Neh, bad kaij g Jesus mad eda am ha mashcham g hemajkam ha-cheopi ed amai Capernaum t am. 60 D mu'ijj hegam mo am t-wehm oith g Jesus hab hahawa kaij, “Sho'oki wa'i si s-hasig ihtha mashchamaj ch pi ab hu ta kaihama.” 61 D g Jesus wabsh ha amich mo has kaij an s-ju'ujpij neneokch k hab kaij ab ha wui, “Pi amki hohho'ith g ni-mashchama 62 ch eda wo nei mant am uhpam ep wo hih thahm kahchim wui ahni Jiosh si kehsha. 63 Pi amt wo bei g pi ha huhugetham thoakag ab amjed g ha'ichu hugi k wabshaba ab wo s-wohoch g ha'ichu ni-ahga. Kunt ab wo cheha g Hekia S-ap'ekam Gewkthag mat am em-eda wo i e ulin k wo em-mahkath g pi ha huhugetham thoakag. 64 Kum eda ha'ijj pi ab hu ni-wohochuth.” Neh, bo kaij g Jesus no pi s-mahch mat hedam pi ab hu wo wohoch ch ep s-mahch mat hedai wo gagda mat wo e muhkith. 65 D hab ep kaij, “Pi amt hedai wo e nako mams ab wo s-ni-wohochuth k wo ni-bei, heg hi wa mat g ni-ohg am wo i chikp em-eda.” 66 D mu'ijj hegam mo am t-wehm oith g Jesus thagito am i kaiok g s-hasig ha'ichu ahgaj k pi thahm an hu hahawa ep wehmaj. 67 D heg hekaj hab kaij g Jesus ab t-wui ahchim gamai gohk, “Mt ahpim has wo e juh? Namt hab wa'ap wo ni-thagito?” 68 D g Simon Peter hab kaij ab wui, “T-kownalig, pi o an hu hedai ehp machs heg wui wo hihi. Ahpi ap wa'i am ahgachug hegai matt hekaj wo bei g pi ha huhugetham thoakag. 69 Ch hahawa s-wohochuth ch s-mahch map ahpi d hekia s-ap'ekam ch ab amjed i hih g Jiosh.” 70 D hab kaij g Jesus, “Heu'u, woho o wa. Kunt am i em-chuhcha ahpim gamai gohk mamt ith an wo ahgachugath. M wabshaba hema d wabsh sha jiawul. 71 Pi achd mahch mas hedai hab ahg. Kuki eda heg hab ahg Judas mo d alithaj g Simon Iscariot ch d hema ahchim gamai gohk ch atki wo gagda g Jesus.

John 7

1 Am amsh chum s-mu'amk g Jesus Judea chekshani ch ed. D hekaj pi am hu himimk. Kuchd an oiopo Galilee chekshani ch ed. 2 D eda e aihim hegai piast mach ab ihm g Jiosh mo babhaijith g t-e'es. 3 D heg hekaj hab kaij g Jesus wepnag ab wui. “Pt hems gm hu wo hih i'ajed Judea wui. T wo nei g s-hasig m-chikpan hegam mo wa an m-oithahim Judea ch ed. 4 Pi apt wo ge ehstoth hegai map hab junihim maptp wo tatchuath mat ab wo i m-mai g hemajkam. Am g ha chehgith g hemajkam map hab wua g s-hasig ha'ichu.” 5 Neh, bad kaij noki pi koi wohochuth mo d Jiosh si Kehsha. 6 D hab kaij g Jesus ab ha wui, “Pi ant am hu wo em-oi ith wui gegosig nat pi koi e ai mant am wo si s-ap i ni-maskogi. Mt gamai wo hihi namt pi ahpim hi wa wabsh chum hekith am wo e chehgi. Pi o am hu ha'ichug mas heg hekaj wo s-em-keh'ithath g hemajkam. K wabshaba ahni s-ni-keh'ith nani pi chum hekith ab ha ahgith mo am hab junihim g pi ap'ekam.” 9 Neh, bad kaij ab ha wui ch am wabsh i wih Galilee ch ed. 10 Heg i thahm mad gm hu hihi g Jesus wepnag, d am hahawa epai him k wabshaba wabsh s-a'agi. Kuchd ahchim gm hu i oi. 11 Sh hegam mo d haha'ichu am Judea ch ed an gahg ch an kaiam mas hebai has chu'ig. 12 D eda an s-ju'ujpij neneok g hemajkam ch hab kaij, “Tho si s-ap o'othham.” D ha'i hab ep kaij, “Pi o ap d o'othham no pi t-iattogith.” 13 K wabshaba s-a'agi an a'aga no pi s-ha ehbith g haha'ichu. 14 Kud eda hugkam wa'i hih g piast. D am hih g Jesus ge'e cheopi wui k am i ha mashcha. 15 D hegam haha'ichu si has i elith k hab kaij, “S has hig masma ge'e ha'ichu s-mahch ihtha o'othham mat eda pi sha'i e mashcha g papal ha-mashchama?” 16 D hab kaij g Jesus ab ha wui, “Jiosh at ab ni-cheha mant ia wo jiwia jewed thahm. K d Jiosh mashchamadag ihtha mani i ha mashcham. 17 Tp hedai wo i tatchuath mat am hab wo juh g Jiosh tatchui wo chum s-mahchk mas wa woho d Jiosh amjedkam ihtha mani i ha mashcham. 18 Hegai mat wo ah g hejel e-mahchig at wabsh wo chum si e haschuth k atp hems d s-chu iattomkam. Nt wabshaba ahni ab ha'ichuchuth g Jiosh ch am ahg g wohokam. 19 Bam chum e wua mam am hab si junihim hegai chehanig mat wa g Jiosh ab mah g Moses am em-wehhejed. M wabshaba pi woho hab junihim nam pi s-ni-mu'amk.” 20 D ab si neneok g hemajkam ch hab kaij, “P haschu ahgch hab kaij mam s-m-mu'amk? Jiawul o an u'ukch g m-chegitoithag.” 21 D hab kaij g Jesus ab ha wui, “Woho am s-ni-mu'amk. Ha ant thothaj mihshmetha tash ed. Kum heg hekaj s-ni-mu'amk. 22 Neh, nt am wo em-chehgi mam ahpim hab wa'ap wua g chikpan mihshmetha tash ed. Mosesbad atki wa an o'oha mat haschu g Jiosh heki hu ab ha cheha g t-shohshon mamt wo ha pahl hikuch g e-chechoj a'aliga mat d wo i gigi'ik tashk ab ha-mahsithag amjed. Kum heg hab wua chum as hems d wo mihshmetha tashk 23 mamt pi wo mul hegai chehanig matki g Mosesbad an o'oha. Pegih, mt haschu ahgk babgat mant hema s-ap thoaj am mihshmetha tash ed? 24 Am g wo si i a'amichuth mamt s-ap wo s-mahchk ha'ichu.” 25 D ha'ijj hab kaij g Jerusalem t am kihkam, “Aha no hig pi woho d ihtha mam chum s-mu'amk. 26 K eda haschu ahgch pi hedai has ahg? K ia t-jehnigith. Aha no hab elith g haha'ichu mo wa woho d Jiosh si Kehsha? 27 S has hig masma d wo hegaik mach eda s-mahch mo hedai d amjedkam ch hebai d kihkam. Kutsh wa eda g Jiosh si Kehsha pi hedai wo mahchk mat hebaijed ia wo jiwia.” 28 D si s-kaitham hab kaij g Jesus, “Pegih, s-mahch am mani hedai wud ch hebaijed him. Nt wabshaba pi wabsh hejel ni-wehhejed i hih. Jiosh o ab ni-chehani mant ia wo i wuhsh jewed thahm. Kum pi mahch g Jiosh ch hekaj pi woho ni-mahch. Ahni ani hi s-mahch ch ep s-mahch mo d wohokam nant pi ab amjed i hih.” Neh, bad kaij g Jesus am ha mashchamch ge'e cheopi ch ed. 30 Kumd am hahawa chum bei. T wabshaba pi koi e ai g tashgaj. D pi e nako ihtham. 31 Kud mu'i ab i s-wohochuth k wabsh s-ju'ujpij hab kaij ab a'ai e wui, “Na'as woho d Jiosh si Kehsha nat pi pi hedai wo sha'i e nako mas hab wo juh hegai hab mahs s-hasig ha'ichu mo ihtha hab wua.” 32 D am ha'i oiopo g Palasi ch am i kah hegai mo hab e kaij k am hihim k atsh am ha ahgi g u'ugchu papal. Tsh hegam am ha cheha g ge'e cheopi nuhkuththam mat an wo bei g Jesus. 33 D hab kaij g Jesus, “Pi ant sha'i tash ia hu wo em-wehmajkahim ch gm hu hahawa uhpam wo hih heg wui mat ia i ni-ah'ath. 34 Kumt wo chum ni-gahgath ch wabshaba pi wo ni-edgith k pi wo e nako mams am wo hihi mant hebai wo ha'ichugk.” 35 D am wabsh i pi amich g hemajkam k hab kaij ab a'ai e wui, “A t hebai wo hih, chs hab pi wo edagi?” D ha'i hab ep kaij, “Na'as gm hu wo hih go'ol hemajkam ha-kihhim wui mo am ha'ichug g t-wehm o'othham k wo ha mashcha g go'ol hemajkam. 36 A shah'o d ahga mo hab kaij matt wo chum gahgath ch wabshaba pi wo edgith k pi wo t-nako machs am wo hihi mat hebai wo ha'ichugk.” 37 D am i e ai g si oithchkam tash mo ba'iwechkim d si ge'e tash heg eda piast. D am e hemapathch g hemajkam. Kud g Jesus am si amog ch hab kaij, “Ab g wo i e thagito ni-wui k ab wo bei g wechij thoakag hab masma mamt hemho wa wo ih am i tonomk. 38 Bo chu'ig g Jiosh o'ohana mamtp hedai ab ni-wui wo i e thagito k heg wa wepo mamt wo edgithath g shonkam shuhthagi am e-ihbthag ed. T heg chum hekith ab wo tha'iwunith.” 39 Bo kaij g Jesus ch hab ahg matt ab wui wo i t-thagito k hekaj wo bei g Hekia S-ap'ekam Gewkthag. K eda wenog koi ab hu t-mahks g Hekia S-ap'ekam Gewkthag nat pi koi gahi wuhsh g muhkig g Jesus k koi bei g e-kownaltalig. 40 D mu'i hab kaij am i kaiok, “Ihtha o'othham oki d wa woho hegai Jiosh ha'ichu i tashogiththam mach nenida.” 41 D hai hab ep kaij, “Thoki Jiosh si Kehsha.” D wabshaba ha'ijj hab epai kaij, “Pi oki d sha'i hegai no pi d Galilee t am o'othham. 42 K eda an hab chu'ig Jiosh o'ohana ed matsh g Jiosh si Kehsha ab d wo t-kownaligbad David amjedkamk ch ab wo amjedk g Bethlehem kihhim. Am ash d kihkam g Davidbad Bethlehem t am.” 43 D heg hekaj ab a'ai e wui gegokiwua g hemajkam. 44 Ha'ijj o chum s-kuhpamk. D wabshaba pi hedai sha'i e nako mas hab juh. 45 D am uhpam hihi g ge'e cheopi nuhkuththam am ha wui g u'ugchu papal ch Palasi. D ihtham ab ha kakke ch hab kaij, “Shahchu amt ahgk pi an hu bei?” 46 D hab kaij g ge'e cheopi nuhkuththam, “Pi o hekith hedai hab sha'i kaitham neok mo ihtha.” 47 D hab kaij hegam Palasi ab ha wui, “Aha nat hab wa'ap em-iattogi? 48 Pi ach hedai ab hu s-wohochuth ahchim Palasi o hegam mo d t-wanimedtham mas d Jiosh si Kehsha ihtha. 49 Ihtham pi ha'ichu a'amichuththam hemajkam o ab s-wohochuth no pi pi mahch g Mosesbad chehanig. T g Jiosh s-ko'okam wo ha namkith.” 50 D am ha wehmaj hegai mat wa am hu hebai chuhug ch ed am i chehgim g Jesus k hab chehgig Nicodemas. Ith o hab wa'ap d Palasi ch hab kaij ab ha wui, 51 “Bo chu'ig g t-chehanig matt pi hedai ab hu wo sha'i ha'ichu ha abch k ho'ipki am i mamche am lothaitk mas wa woho pi ap ha'ichu hab juh.” 52 D hab kaij ihtham, “Pegih, pki ahpi ab ep si ha wehmaj ihtham mo ab wabsh al Galilee t amjed. Am g i hoan g Jiosh ha'ichu ahga k wo s-mai mo pi hema g Jiosh ha'ichu i tashogiththam ab hu sha'i Galilee t amjed.” 53 [D amjed gm hu a'ai himto g hemajkam.

John 8

1 Kuchd ahchim gm hu hihim k an kohksh Olive U'us Kawulk t an. 2 D ab i chesh g tash. Kuchd gd hu uhpam thatha ge'e cheopi wui. D mu'i am e chehm g hemajkam Jesus wui k gn hu biha. D am thahiwua k ha mashcha. 3 D ab wui ha'i thatha g chehanig ha mashchamtham ch Palasi am hema u'apathch g uwi. Ith atsh ha ehs g ha-kun. Kud am t-shahgith i kehsh 4 K hab kaij ab wui g Jesus, “Neh, ahpi map ia ha mashcham, ihtha uwi att s-ap cheh mat ha ehs g ha-kun. 5 K eda hab chu'ig g t-chehanig matt hemho wo wa ma'ichkwua k wo mua g uwi mat hab wo sha e juh. Pt ahpi has wo chei?” 6 Neh, bo kaij no pi wabsh ha'ichu s-kaimk ch s-abchuthamk g Jesus. D wabshaba g Jesus pi ab hu sha'i ha hudawog k am wabsh Ha'ichu o'oha jewedo g e-nowikaj. 7 D oi wa ihtham pi thagito k ab ep kakke. D ab hahawa i e shel g Jesus k hab kaij ab ha wui, “Pegih, mt ahpim wehpeg ab wo ma'ihi g uwi mamt hedai pi hekith hab sha'i juh g pi ap'ekam.” 8 Bo kaij ch am hahawa i e jumalkath k am ep o'oha jewedo. 9 D am i kah ihtha g chehanig ha mashchamtham ch Palasi k wabsh sha hehemako gm hu a'ai hihi si e elithch. D hegam mo d ge'eged wehpegat k wehsijj himto. K heg am wa'i wih uwi Jesus wehm. 10 D ab i e shel g Jesus k ab wui hab kaij, “Baht hihi hegam mo ab ha'ichu m-abchuth? Nat pi ia hu hema wih mat ab wo m-ma'ihi?” 11 D hab kaij g uwi, “Pi at ia hu hema wih, ni-kownalig.” D hab hahawa ep kaij g Jesus, “Ahni ani hab wa'ap pi ab hu ha'ichu m-abchuth. Gamai g hihm k pi hab ep juhni g pi ap'ekam.”] 12 D hab ep kaij g Jesus ab ha wui g hemajkam, “Thani ge'e tonlig am wehs ha wehhejed g hemajkam. Kut s-ap am wo himath Jiosh ap'ethag ed ch pi hekith ha'ichukaj wo pi e amich hegam mat hedai ab ni-wui wo e thagitokchith.” 13 D eda am ha'i gegok g Palasi ch ab wui hab si kaij, “Ih, p wabsh chum hejel e wohokamchuth ch aptp hems wabsh t-iattogith.” 14 D hab kaij g Jesus, “Pi ani em-iattogith chum anis am hi wa hejel ni-wohokamchuth. Tho wohokam mani has i kaij. S-mahch ani mant hebaijed ia jiwia k hebai wo hih. Ahpim am hi pi mahch ihtha. 15 Am am chum ahg mani has chu'ig ab wabsh ni-neithch ch eda pi woho ni-mahch. Ni ahni hemu pi hedai em-lothait. 16 Kut wabshaba d wo wohokamk g ni-ahga mant hekith wo ah mam has chu'ig nat pi g Jiosh am ni-wehm wo em-a'appe. 17 Neh, an o o'ohanas em-chehanig ed mamt wo s-ha wohoch matp gohkajj am ha'ichu wo wohokamch. 18 Pegih, ni ahni hejel ni-wohokamchuth. K g ni-ohg am hab wa'ap ni-wohokamchuth.” Neh, bo kaij g Jesus. 19 D ab kakke ihtham, “A k hebai has chu'ig g m-ohg?” D hab kaij g Jesus, “Pi am sha'i ni-mahch ch ep pi mahch g ni-ohg. Mt hems wo s-ap s-ni-mahchk ch hab wa'ap wo s-mahchk g ni-ohg.” 20 Neh, ith ad wehs hab kaij g Jesus am ge'e cheopi t am heg eda kih mo g hemajkam am shulig g e-mahkigdag g ge'e cheopi wehhejed. T pi hedai e nako mas an wo bei nat ge koi e ai g tashgaj. 21 D hab ep kaij g Jesus ab ha wui, “Am ant hu wo hih. Kumt an haha wo i chum ni-gahghim k wabshaba wo koi pi e tho'ibiak. Pi amt wo e nako mamt am wo hihi mant hebai wo i hih.” 22 D heg hekaj hab kaij hegam haha'ichu, “Shah'o ahgch hab kaij matt pi wo t-nako matt am wo hihi mat hebai wo i hih. Aha nat wabsh hejel wo e mua.” 23 D hab kaij g Jesus ab ha wui, “Ia am wa'i amjed ith thahm jewed. Ni ahni hi ab thahm kahchim amjed. 24 Kum eda pi ni-wohochuth mani d ge ahni. Ni heg hekaj am em-ahgith mamt wo koi pi e tho'ibiak.” 25 D ab kakke, “Kup hedai wud higi?” D hab kaij g Jesus, “Ahni ani wud mani ga hu i wehpeg hab kaij mani hedai wud. 26 Mu'ijj o g em-chu'ichig. Kunt heg wo ah. K g ni-ahga d wohokam nani pi heg wa'i ahg mo haschu ni-ahgith hegai mat am i ni-kei. K heg chum hekith ahg g wohokam.” 27 D ihtham pi amichuth mo g Jiosh hab ahg. 28 D heg hekaj hab ep kaij g Jesus, “Mt wo mai mani d ge ahni mamt hekith ab uhgk wo ni-ul mamt wo ni-mua ahni Jiosh si Kehsha. Am amt haha wo mai mani pi hab wua g hejel ni-tatchui ch wabshaba hegai wa'i ni-ohg tatchui hab wua ch g mashchamaj ahgachug. 29 Chum ani hekith ab s-wohog elith. K heg hekaj ni-wehmaj.” Neh, bo kaij g Jesus. 30 T muijj hegam mat ab kah ihtha ab i s-wohoch. 31 D heg hekaj hab kaij g Jesus ab ha wui hegam mat ab i chum s-wohoch, “Mtki woho ab i e thagito ni-wui mamtp am hab wo i junihi g ni-mashchama. 32 Mt haha wo mai g wohokam. T heg hab wo em-juh mamt hahawa pi d wo neneholk.” 33 D ha'i hab kaij, “Pi ach hekith hedai d sha'i neneholiga nach pi d Abrahambad amjedkam. P haschu hab ahg ch hab kaij matt hahawa pi d wo neneholk?” 34 D g Jesus hab kaij, “Wehs am d nenehol mamtp hedai hab i junihim g pi ap'ekam nam pi heg hekaj e wulshch. 35 Pi o am hu ha wehm d si kihkam g nehol mo hig g ha-aliga. 36 Nt ahni woho wo i em-wul'o mamtp ab wo i e thagito ni-wui. Kumt hahawa pi d wo neneholk namt pi d wo a'aligajk g ni-ohg Jiosh. 37 S-mahch ani mam d Abrahambad amjedkam. M eda s-ni-mu'amk nam pi pi ab hu ap wohochuth g ni-mashchama. 38 Heg ani am ahgahim mo haschu g ni-ohg ab ni-chehgith. M ahpim hi heg wa wepo mam d ge Jiawul amjedkam nam pi hab wua g tatchuij.” 39 D hab kaij ab wui, “Pi ach d ge Jiawul amjedkam. Abrahambad o d t-shohshon.” D hab kaij g Jesus, “Pegih, m haschu ahgch pi hab masma hab e wua mo g Abrahambad no pi heg chum hekith hab wua g s-ap'ekam. 40 M eda am e nakog mamt wo ni-mua ahni mani heg wa'i em-ahgith wohokam mo g Jiosh ab ni-ahgith. 41 Heg am d wabsh amjedkam mam am oithch hab e junihim.” D hab kaij, “Ahchim ach hi pi d sha'i sha'i ch ed ha-a'aliga. Jiosh o d si t-ohg.” 42 D hab kaij g Jesus, “Ia ant jiwia ab amjed g Jiosh. Kumt heg hekaj ab wo si ni-tatchuath mamtp woho d wo a'aligajk. Pi ant wabsh hejel hab i ni-ah mant ab wo i hih. Jiosh at ab ni-chea. 43 Pi am amichuth mani has i kaij nam pi s-ko'okoth g ha'ichu ni-ahga. 44 Tham wabsh ge jiawul amjedkam ch s-hohho'ith mamt am hab wo wuath g tatchuij. Heg o d ha mu'akam gd hu i si wehpeg amjed ch d ep s-chu iattomkam ch pi has sha'i elith ha'ichu ha iattogithch no pi wehs g iattogig ab d amjedkamaj. 45 Kuni ahni g wohokam ahg. Kum heg hekaj pi ni-wohochuth. 46 Neh, namt hig wo e nako mamt am wo wohokamch mas haschu d i pi ap ni-chu'ichig? Pegih, ab o em-ab mamt ab wo s-ni-wohoch nani pi em-ahgith g wohokam. 47 Hegai mo ab d amjedkamaj g Jiosh o ab kaiham g Jiosh ne'oki. Kum pi ab hu kaiham nam pi pi ab hu d amjedkamaj. 48 D g haha'ichu ab hahawa si chehmo g Jesus ch hab kaij, “Thapki wabsh t-obga ch d wabsh sha jiawul.” 49 D hab kaij g Jesus, “Pi o woho mam has i kaij. Pi ani d sha'i jiawul. Ab ani si ha'ichuchuth g ni-ohg. M wabshaba ahpim wabsh pi ni-ha'ichuchuth. 50 Pi ani heg am hu neithahim mas hedai ab wo si has ni-elithath. K wabshaba am hema d hegai mo am ni-gahgith g ab has elithadag ch wo ha lothai hegam mo pi ab hu has ni-elith. 51 Nt wo si shel em-ahgi mat pi hekith wo huhug hegai mat hedai ab wo si i bei g ha'ichu ni-ahga.” 52 D hab kaij ab wui, “Si att hahawa s-ap s-mai mapki d wabsh sha jiawul. Neh, muh at g Abrahambad. T g kekelibad Jiosh ha'ichu i tashogiththam hab wa'ap ko'ok k huhug. P eda hab kaij mat pi hekith wo huhug hegai mat hedai ab wo si i bei g ha'ichu m-ahga. 53 Chum apki si e ha'ichuchuth ch hab kaij ihtha. Abrahambad atki muh. Nap hab e elith map gm hu ba'ich d i si ha'ichu mo hegai? T g Jiosh ha'ichu i tashogiththambad hab wa'ap ko'ok k huhug. Thohp hab chum e elith?” 54 D hab kaij g Jesus, “Nt wabsh wo pehegi neokath mantp ab hejel wo chum si ni-haschuthath. Heg o ab si has ni-elith ni-ohg mam e-Jioshga ahg. 55 Pi am hekith sha'i woho mahch hegai. Ni wabshaba ahni s-mahch. Kuntp hab wo chei mani pi mahch k d wabsh wo s-chu iattomkamk mam hab chu'ig ahpim. S-mahch ani ch ab si u'ukch g ha'ichu ahgaj. 56 Em-shohshon Abrahambad o si s-ap e tahtk mat wo nei mant an wo i wuhsh. T hekith i neithok si s-hehgig.” 57 D si has i el ihtham k hab kaij. “Ih, heki at hu wa'i muh. Aha nap neith ch eda pi koi ai g hetaspo wehst-mahm ahithag?” 58 D hab kaij g Jesus, “Nt wo si shel em-ahgi mani an ha'ichug ni-ohg kih ed mat eda koi mahsi g Abrahambad.” 59 Neh, d gn hu i u'ihi g hohothai mat hekaj wo ma'ichkwua g Jesus. D wabshaba wabsh s-a'agi am ha shahgith him k gm hu i wuhsh ge'e cheopi amjed.

John 9

1 Kuchd am hihim. D ab haha wabsh hema thaha g o'othham ch e-mahsithag amjed pi nea. 2 Kuchd ab kakke g Jesus, “Neh, t-mashchamtham, thoh'o d chu'ichig mo d pi neatham ihtha o'othham? No d hejel chu'ichigaj aha no d ge'egedgaj ha-chu'ichig?” 3 D hab kaij g Jesus, “Ith o pi hab d sha'i ahga mas d ha-chu'ichig. Heg o hekaj pi nea mat g Jiosh am wo chehgi g e-gewkthag ab amjed. 4 Am att hab wo junihith g chikpanaj hegai mat ia i ni-ah'ath mo ithani am kia wi'is g tash no pi ab him mamt hahawa pi wo e nako. 5 Thani tonlig am em-wehhejed mani ia em-wehmaj.” 6 D hab che'iok g Jesus k am siswua jewed thahm k am hab juh g bith k hekaj ab bithsh g wuhpuij hegai pi neatham 7 k hab ahg, “Am g him k ab i wakon g e-wuhiosha heg eda wo'o mo hab e a'aga Siloam.” (K hab d ahga ihtha “I Ah'ath.”) T wa woho am hih ihtha pi neatham k am wako g e-wuhiosha k am i uhpam jiwia s-ap ha'ichu neithch. 8 Hegam mo s-mahch ch hegam mo si neith mo wabsh ha'ichu ha tahni ad am i neithok hab kaij, “Aha no pi woho d hegai mo am thahiwup ch ha'ichu ha tahni?” 9 D ha'i hab kaij mo d hegai. D ha'i hab ep kaij, “Pi o d hegai. Ho o wabsh si wepo mahs.” D hekaj hab kaij ihtha mo wa pi neakahim, “Thani ahni.” 10 Kumd ab ep kakke, “Shahpt masma nent?” 11 D hab kaij, “Hegai mash d Jesus at ab bithsh g ni-wuhpui am jewedo siswuak k hab ni-ahg mant wo him k wo wako g ni-wuhiosha am Siloam wo'o ch ed. Kunt am him k hab wabsh chum ni-wakon k ha hekaj s-ap ha'ichu neith.” 12 D hab kaij ihtham, “T hebai hih?” Kud hab hahawa kaij mo pi mahch mas hebai hih. 13 D am wa ha'i bei ihtha o'othham mo wa pi nea am Palasi ha wui. 14 K d t-mihshmetha tash mad eda g Jesus hab juh ihtha. 15 D g Palasi ab hahawa kakke mas has masma nent. D hab kaij, “Hegai Jesus at ab bithsh g ni-wuhpui am siswuak jewedo. Nt ab i wako g ni-wuhiosha k hahawa s-ap ha'ichu neith.” 16 D ha'i hab kaij hegam Palasi, “Neh, pi o ab hu sha'i Jiosh amjed nat pi melchkwua g t-chehanig hab juhk ihtha t-mihshmetha tash ed.” D am a'ai e wui gegokiwua g hemajkam nad pi ha'ijj hab epai kaij, “Pi at wo e nako g pi ap chu'ijkam mas hab mahs s-hasig ha'ichu hab wo juh.” 17 D heg hekaj ab ep si kakke hegam Palasi, “Shahp i elith hegai o'othham map hab kaij mat m-nench.” D hab kaij, “Bani elith mo d ge Jiosh ha'ichu i tashogiththam.” 18 D wabshaba pi wohochuth ihtham haha'ichu mas wa woho d pi neatham ch am ha waith g ge'egedgaj 19 ch mu'i ha'ichu ha kakke mas d ha-aliga ihtha ch ga hu i e-mahsithag amjed pi nea, kch ehp mas has masma hahawa ha'ichu neith. 20 D hab hahawa kaij g ge'egedgaj mo d ha-aliga ch ga hu e-mahsithag amjed pi nea 21 ch wabshaba pi mahch mas has masma s-ap ha'ichu neith ch ep pi mahch mas hedai thoaj ch ab ha ahgith mat wo kakke no pi d ge'e k ch hejel am wo e ah. 22 Hegam haha'ichu ad wa am heki hu ap'ech mat pi wo ha hiwigi mat am hu ep wo i wahp cheopi ch ed hegam mat hedam hab wo chei mo g Jesus d Jiosh si Kehsha. D heg hekaj s-ha ehbith g ge'egedgaj ch hab kaij mat ab wo kakke, t hejel am wo e ah. 24 D ab ep i wai g Palasi ihtha mat bei g e-nenthag k hab ahg, “Am g t-ahgith g wohokam mapt ab wo hehgchul g Jiosh. S-mahch ach mo ihtha has chehgi d pi ap chu'ijkam.” 25 D hab kaij ihtha mat bei g e-nenthag: “Pi ani sha'i mahch mas d pi ap chu'ijkam ch wabshaba ith s-ap s-mahch mani pi neakahim ch hemuch haha wabsh si s-nea.” 26 D ihtham ab hahawa ep kakke, “T has m-juh k m-nench?” 27 D hab kaij, “M ani wa heki hu em-ahgith. Mt pi ab hu ni-kaiha. A m haschu ahgch ab ep ni-kakke? Aha namt ahpim hab wa'ap ab wo i s-wohoch mo d Jiosh si Kehsha?” 28 D ihtham ab si s-keh'ith ch hab kaij, “Ahpi apt ab i s-wohoch hegai hemajkam. Ahchim ach hi g Mosesbad ab s-wohochuth. 29 S-mahch ach mo g Jiosh g Mosesbad ab ha'ichu ahgith. Kuch pi sha'i mahch mas hebai amjed him hegai.” 30 D hab kaij ihtha, “M haschu ahgch pi mahch mas hebai amjed him. T eda ab i ni-nench. 31 S-mahch ach mo g Jiosh pi ab hu kaiham g pi ap chu'ijkam ch wabshaba ab ha kaiham hegam mo ab si has elith ch am hab junihim g tatchuij. 32 Pi ach hekith sha'i kah mas hedai i nench hegai mo e-mahsithag amjed pi nea. 33 T hi wo wa e nako hema mat hab wo juh ihtha hab mahs ha'ichu matp ab Jiosh amjed wo himath.” 34 D ab si s-ko'okam has ahg ch hab kaij, “Thap wabsh si hekia pi ap'ekam ga hu'i e-mahsithag amjed ch eda chum ha'ichu t-mashcham.” D amjed gm hu si i wuhshath cheopi t amjed k pi hiwigi mas am ep wo i wah. 35 D kah g Jesus mamt i wuhshath k am i gahghim k hab kaij am i chehgiok, “Nap ab si hiwig g Jiosh si Kehsha?” 36 D hab kaij ihtha o'othham, “A k hedai wud. Am g ni-ahgith. Nt ab wo si i hiw.” 37 D hab kaij g Jesus, “Thani ahni map hahawa s-ap ni-neith mant wa m-nench.” 38 D ab si i gei wui k hab kaij, “Ab ani si m-hiwig, s-ap'ekam ni-kownalig.” 39 D hab hahawa kaij g Jesus, “Ia ant jiwia jewed thahm mant wo mahsko wua mo hedai pi nea ch hedai s-nea ith eda Jiosh ap'ethag.” 40 D ha'i am gegok g Palasi ch si has i elith k hab kaij, “Nap ahchim hab ep chum t-ahg mach hab wa'ap pi nenea.” 41 D hab kaij g Jesus, “Pi amt ab hu wo em-abch mamtp wo wohokamch mam pi nenea am Jiosh ap'ethag ed. M wabshaba hab chum kaij mam s-nenea.”

John 10

1 D hab ep kaij g Jesus, “No hig pi woho mat g s-chu ehskam wabsh s-a'agi haskojed ab wo i wah heg eda kolhai mam am ha nuhkuth g kahwal k wo s-ha ehsitham? 2 T wabshaba g si ha nuhkuththam ab wo i wah kihjeg amjed. 3 T g kihjeg nuhkuththam ab wo i kuhpi'oki. K g ha nuhkuththam am si ha chehcheg ch gm hu i ha wanimed. 4 T am wo i wuwhag k gm hu wo i oi no pi s-mahch g ne'okij. T am ha ba'ich wo himath. 5 Pi at hedai ep wo i oi no pi pi mahch g ha-ne'oki k wabsh wo e gantad.” 6 Neh, ith ad hekaj am chum ha'ichu ha mashcham g Jesus. D wabshaba pi sha'i amichuth mo haschu hab ahg. 7 D heg hekaj hab ep kaij, “Ahni ani hab ni-ahg ch ni-wepogith g kolhai kihjeg. 8 Hegam mo hab e a'aga mo d em-wanimedtham ch eda pi ab hu ni-wohochuth o d s-chu e'eskam ch d ha mu'akam. K wabshaba g ni-wohochuththam pi ab hu ha kaiham. 9 Heg ani wepo mo g kihjeg. Kahwal o am wapke kolhai ch ed. K pi ha'ichu has e wua am ha tahgio. Kumt ahpim ab wo s-ni-wohochuth k hab wa'ap wo e tho'ibia. Kahwal o ab mahks g s-kehg ha'ichu hugi. Kum ahpim ab ep mahks mam haschu i tatchua. 10 S-chu ehskam at wo jiwia mat wo ha u'u k wo ha koktha. Nt ahni ia jiwia mant s-ba'ama ab wo i em-mah g thoakag 11 nani pi s-wohom d em-nuhkuththam. “Neh, kahwal ha nuhkuththam at chum hems ha wehhejed wo e muhkith. 12 Hegai mo d wabsh ha-pionag at am wabsh wo i ha thagito k wo meh mat am wo jiwia g sheh'e. T g sheh'e am wo wahk k wo mu'a k wo ha gantad. 13 Pion at wo heb hu meh no pi pi ha tatchua g ha-shoshoiga. 14 “Nt eda ahni wo i nako g sho'igthag am ha wehhejed g ni-wohochuththam hab masma mo g si ha nuhkuththam g kahwal chum anis wo ni-muhkith am ha wehhejed. Kahwal ch ha nuhkuththam o ab a'ai s-e mahch. Kuch g ni-wohochuththam ch ahni ab hab wa'ap a'ai s-t-mahch. Ch ahchim g ni-ohg wehm hab wa masma ab a'ai s-t-mahch. 16 Ha nuhkuththam at wehs ab wo i ha hemapai g e-kahwaliga. Nt ahni hab wa masma ab wo i ha hemapai wehs hegam mat ab wo i s-ni-wohoch, chum hems g gawul mahs hemajkam. 17 “Am ant wabsh wo i ni-thagito muhkig wui. K g ni-ohg heg hekaj si ni-tatchua. Nt ab uhpam ep wo i ni-chegito. 18 Pi at hedai wo sha'i e nako mas wabsh hejel wo e elith k wo ni-mua. U'ukch ani g ni-ap'ethag mant am wo i ni-thagito muhkig wui k ab uhpam ep wo i ni-chegito. Ab o ni-chehani g ni-ohg mant ith am hab wo juh.” 19 D am ep a'ai e ne'owi g hemajkam heg hekaj mo has i kaij. 20 Kud mu'ijj hab nahnko kaij babgatk, “Thoki wabsh jiawul. Pi o wehsig. Shahchu am ahgch ab kaiham?” 21 D wabshaba ha'ijj hab epai kaij, “Pi at wo e nako hegai mo d wabsh sha jiawul mas hab kaitham s-kehg wo neokath ch wo nench g pi neatham.” 22 D am i e ai g ge'e cheopi wakonadag tash. D eda d s-hehpich'edkam. 23 Kuchd am oiopo anai mo hab e a'aga Solomonbad watto am ge'e cheopi t am. 24 D am i e chehm g haha'ichu k hab kaij ab Jesus wui, “Tt he'es i tash wo m-nenida mapt wo t-ahgi maps wa woho d Jiosh si Kehsha.” 25 D hab kaij g Jesus, “Heki ani hu am em-ahgith. M eda pi ni-wohochuth. Ni-ohg o ab ni-mahkch g gewkthag mant hab wo juh g s-hasig ha'ichu. K heg am chum em-tashogith mani hedai wud. 26 M wabshaba pi ab hu ni-wohochuth nam d ge ni-hemajkamga. 27 Neh, am o oith g e-nuhkuththam g kahwal no pi s-mahch am i s-amichuthk g ne'okij. K hab wa'ap ni-oith g ni-wohochuththam no pi s-ni-mahch. Ni ahni ep s-ha mahch. 28 Ab ani ha mahkch g pi ha huhugetham thoakag. T hegam pi hekith wo huhug. T pi hedai wo sha'i ni-wohppo'i. 29 Ni-ohg o wehs ha'ichu thahm s-gewkthag ch si s-wihnam an ha u'ukch hegam mo ab ni-mahkch. T pi hedai wo wohppo'i. 30 Ahni g ni-ohg wehm ach d hemako.” Neh, ith ad hab wabsh chum chei g Jesus. 31 D g hemajkam am ep u'ihi g hohothai mat wo ma'ichkwua. 32 D hab kaij g Jesus, “Mu'i ant ha'ichu hab juh g s-ap'ekam nat pi ab ni-mah g ni-ohg g gewkthag. K haschu d hegai mamt heg hekaj wo ni-ma'ichkwua?” 33 D hab kaij g hemajkam, “Pi ach heg hekaj s-m-ma'ichkwuimk s-ap'ekam ch wabshaba heg hekaj map pad neok. Thap wabsh o'othham ch eda hab chum a'aga g Jiosh mo d si m-ohg ch hab ab chum e wepogith g Jiosh.” 34 D hab kaij g Jesus, “An o o'ohanas em-chehanig ed mo g Jiosh hab ha a'aga jijosh hegam mo u'achug g ha'ichu ahgaj, chum as d wabsh hemajkam. 36 T wahm ahni hig woho am si i ni-kehsh k ia i ni-ah'ath ith thahm jewed. M eda haschu ahgch hab ni-ahg mani pad neok mani hab kaij mani d Jiosh alithag? 37 Mantp wa woho pi am hu hab wo junihith g ni-ohg chikpan, mt s-ap pi wo ni-wohoch. 38 Ni wabshaba am hab junihim. Mt heg hekaj wo s-mahchk mach d hemako g ni-ohg wehm.” 39 D g haha'ichu am hahawa ep chum cheha g cheopi nuhkuththam mat am wo hihim k wo bei. D wabshaba ep e tho'ibia ab ha amjed. 40 Kuchd gm hu hahawa hihim k gm hu ai g Jordan Akimel k am aigo i chehchsh k am thatha mo wa g Johnbad am ha pahl wapkon k am thadha. 41 D mu'i hemajkam am wui thatha hab kaijch, “Pi at wa ha'ichu s-hasigam hab juh g John. Kuki wabshaba d wohokam mo haschu i t-ahgith ith amjed o'othham.” 42 D mu'i hemajkam ab i s-wohoch g Jesus amai.

John 11

1 Am ad wa hema kih Bethany kihhim t am ch hab chehgig Lazarus ch am hu hebai haha wabsh mumku. Lazarusbad u'uwiga ad d Martha ch Mary. 2 (Ihtha Mary o wa d hegai mad wa g uhw shuhthagi an iawua Jesus tahtad an k an i thagio wabsh g e-che'echew mo'okaj.) 3 Kudki ihtham u'uwigaj am hema cheha mad am wo him k wo ahgi g Jesus, “S-ap'ekam t-kownalig, si m-nawoj at mumku.” 4 D am i kah g ha-ahga g Jesus k am t-ahgith, “Lazarus ash mumku. K wabshaba pi hab d ahga mat gm hu hab wo i e juh. Nt wo tho'ibia mamt hekaj ab wo ihm g Jiosh. T g Jiosh heg hekaj ab epai wo ni-ihm.” 5 Jesus ad wa ab wa chum si pihk e elith ha wui ihtham Martha ch Mary ch Lazarus 6 ch wabshaba pi am hu wa hekaj i hih mo ab waith. K am d i gohk tash amjed. 7 D hab kaij ab t-wui, “M att hig ep wo uhpam hihi Judea chekshani wui.” 8 Kuchd ahchim chum pi hohho'ith ch hab kaij ab wui, “T-mashchamtham, pi o koi d sha'i tash mo wa am chum s-m-ma'ichkwuimk g hemajkam. Ttp eda am ep wo hihi!” 9 D hab kaij g Jesus, “T am wabsh s-ap wo himath g o'othham tash ch ed ch wabshaba wo e huchwua s-chuhugam k ed. Pegih, pi at has wo e juh mo eda ni-ap'echuthch g Jiosh mant hab wo junihith g chikpanaj.” 11 D hab ep kaij g Jesus, “Koi at g t-nawoj Lazarus. Nt wabshaba am wo uhpam him k wo wuha.” 12 Kuchd hab kaij, “Kohsig o s-kehgaj wehhejed. T wo wa hejel ap'et.” 13 D eda g Jesus heg hab ahg mat muh g Lazarus 14 ch heg hekaj hab kaij, “Neh, muh at g Lazarus. 15 Ni wabshaba wabsh s-ap ni-tahtk mani pi am hu wehmaj namt pi haha wo nei mant has wo ni-juh k ab ba'ich wo i s-ni-wohoch. Tt oi wo hihim k wo nei.” 16 D ihtha Thomas mam hab a'aga Kuathi hab kaij ab t-wui, “Pegih, ttp wo oi g t-mashchamtham k wehmaj wo t-ko'ij.” 17 Kuchd gd hu thatha Bethany t am k s-mai mash d wa'i gi'ik tash matsh gd hu e cheh g Lazarus. 18 Tki eda mu'ijj am thatha g hemajkam ab Jerusalem t amjed mat am wo i ha gewkemhu g Martha ch Mary no pi d wa'i gohk mihya. 20 D ga hu t-nam g Martha nash pi kah mo ab him g Jesus. Tki g Mary ga hu wa'i wih ha-kih ab. 21 D hab kaij g Martha ab wui g Jesus, “Neh, ni-kownalig, mapt hems s-hohtam wo jiwia, t chum pi wo muh g t-wehnag. 22 Ni wabshaba s-mahch mat g Jiosh ab wo m-mah mapt haschu ab wo i tai, chum hems hemuch mat i ge'etha g ha'ichu pi t-ap'ethag.” 23 D hab kaij g Jesus, “T wo uhpam e chegito g em-wehnag.” 24 Kud hab ep kaij g Martha, “S-mahch ani mat uhpam wo e chegito mat hekith wo i huhug g jewed.” 25 D hab kaij g Jesus ab wui, “Ia ani ha'ichug ahni mant wo i ha wuwhas g ko'i ab amjed g muhkig k ab wo i ha mah g thoakag. Ab ani ha mahkch g pi ha huhugetham thoakag hegam mo ab ni-hiwig. T wo uhpam e chechegito am i ko'ok. Nap s-wohochuth ihtha?” 27 Kud hab kaij g Martha, “Heu'u, ni-kownalig, s-wohochuth ani map d Jiosh si Kehsha ch d Jiosh alithag. An o o'ohadag Jiosh o'ohana ed maptsh ia wo jiwia jewed thahm.” 28 Kud gm hu hahawa uhpam hih g Martha k atsh am wabsh s-a'agi wai g Mary ash hab kaijch mo ab him g ha mashchamtham ch ab waith. 29 D am ha hekaj s-hohtam hih g Mary k gd hu jiwia mat am t-nam g Martha natt ge koi ai g kihhim. 31 Kud mu'ijj i oi g Mary hegam moki am ha wehm shoani ash hab em-ahgch mat gm hu uhpam ep wo hih hiha'ini wui mat am wo shoakath. 32 D am i cheh g Mary g Jesus k ab i gei wecho k hab kaij, “Ni-kownalig, mapt hems s-hohtam wo jiwia, t chum pi wo muh g t-wehnag.” 33 D am i nei g Jesus mo shoak g Mary. D hegam ep shoani mo wehmaj. D gd hu si ai g ihbthaj. D si has e tahtk 34 k ab ha kakke mas hebai ehsto g chuhkugaj. D hab kaij ihtham, “Oi g t-oith k am wo nei matt am ehsto.” Kuchd am hahawa hihim k am thatha k am nei mat am ehsto. 35 D am i shosha g Jesus. 36 D heg hekaj hab kaij g hemajkam, “Neh, kuki ab si pihk e elith wui.” 37 D wabshaba ha'ijj hab ep kaij, “Neh, t wa g pi neatham thoaj. T haschu ahgk pi thoaj g Lazarus mat pi wo muh?” 38 D am ep si has i e taht g Jesus k am i miabi g hiha'ini. Ith o ab cheho ch ed hab chu'ig ch g hothaikaj ab kuhpi. 39 D hab ha ahg g Jesus mat gm hu wo i nu'ichkwua g hothai. D g Martha hab kaij, “T-kownalig, heki at hu padt no pi d wa'i gi'ik tash mat am e cheh.” 40 D hab kaij g Jesus ab wui, “Napt pi chegito mani wa m-ahgith mapt wo nei g s-hasig ha'ichu k wo taht g Jiosh gewkthag maptp ab wo s-ni-wohoch.” 41 D gm hu hab i e nu'ichkwua g hothai. D am e thahm i nea g Jesus k hab kaij, “Ni-ohg, ab ani i m-ho'ige'elith map ab ni-kaiham. 42 S-mahch ani map chum hekith ab ni-kaiham ch wabshaba hab kaij ihtha ihtham ha wehhejed hemajkam. T hab wo s-wohoch mapt ahpi ia i ni-ah'ath,” 43 k am i ha'asa e ho'ige'ithahun k am hahawa si s-kaitham neok ch hab kaij, “Lazarus, ab g i wuhshani!” 44 D ab i wuhsh g Lazarus k an wabsh kia bihiwigs g i'ikuskaj mach hekaj ha bihiwig g t-ko'i ch ab wabsh kia ma'ishp g wuhioshaj g ikuskaj. D hab ha ahg g Jesus, “Gam g hu wo padch g i'ikus k wo hiwigi mat wo hih uhpam.” Neh, d wa woho hab e juh. 45 Mu'ijj hegam mad am i ha chehgio g Martha ch Mary ad ab i s-wohoch mo g Jesus d Jiosh si Kehsha am i neithok mad haschu hab juh. 46 Tki wabshaba ha'i ehp gm hu hihi Palasi ha wui k am ha ahgi mat haschu hab juh. 47 Kutsh am e nam g Palasi ch u'ugchu papal ha wehm g ge'e e jehnigiththam k am a'aga mas has wo juh ihtha s-hasig ha'ichu hab wuatham. 48 “Wehsijj at ab wo i s-wohoch mo d Jiosh si Kehsha mattp am wabsh wo neithath. T g Rome kokownal am wo i e nakog k wo i wua g ge'e t-cheopi k wo wehs t-koktha,” bad kaij ihtham am a'agathch. 49 Sh am ha'ichug hegai mad d si uhgchu pahl ch hab chehgig Caiaphas ch si s-gewkam hab ha ahg, “Kaij, ahpim am sha'i pi ha'ichu a'amichuth 50 ch pi mahch mo ba'ich i s-ap'e mat hemako o'othham wo muh wehs t-wehhejed kih hegai mattp wehsijj wo t-ko'ij.” 51 Neh, bad kaij ch eda pi mahch mo g Jiosh am tashogith heg hekaj ne'okij mo e aihim mat g Jesus wo e muhkith ha wehhejed g Tutuligo 52 ch wehs ha wehhejed g nahnko mahs hemajkam. T ihtham ha'i ab wo i s-wohoch g Jesus k ab wo i e hemakoj e wehm. 53 Neh, ia'i amjed ad g haha'ichu am i e nako mat wo mua g Jesus. 54 D heg hekaj hahawa pi an hu s-masma oimmed g Jesus Judea chekshani ch ed am i thagitok g Bethany. Chd gm hu hihim k am ha'ichugkahim mo am d Ephraim kihhim mo am miabithch g tohono jewed. 55 Kud eda e aihim mat wo e wuhshath g t-shohshon ha-tho'ibiathag. K mu'ijj am hihim gm hu a'aijed Jerusalem kihhim wui mat am wo i e nako heg wehhejed. 56 D chum hedai an chum neith g Jesus am i e hemapathk ge'e cheopi t am ch hab kaij ab a'ai e wui, “Pi atp hems ia hu wo sha'i jiwia. Shahm i elith.” 57 Kuki eda g u'ugchu papal ch Palasi am i ha chehani g hemajkam mat hemho wa wo ha ahgi sha s-mahchk mo hebai ha'ichug g Jesus. T an wo bei.

John 12

1 Chuhthp tash o wa am wi'is mat wo e ai g t-shohshon ha-tho'ibiathag wuhshtha. 2 Kud wa am hab e juh g ge'e gegosig Bethany t am wehhejed g Jesus. Kuchd gm hu hihim k am ha wehm t-gegosith. D g Lazarus am ep t-wehmaj. Martha ad am ha wehmaj hegam mad am hihithod ch an t-to'ith. 3 D g Mary gd hu jiwia Jesus wui k g si s-namkig uhw shuhthagi u'a ch an iawua Jesus tahtad an. K eda d hemako s-wehch. D an i thagio wabsh g e-che'echew mo'okaj. D wehsko uhwa ihtha uhw shuhthagi am kih ch ed. 4 D hab kaij hegai t-wehm kehshaj g Jesus mo hab chehgig Judas Iscariot, 5 “T haschu ahgk pi e gagda ihtha uhw shuhthagi matt wo ha mah g sho'igkam, natt pi ahim g waik siant pihsh namkigdag ab wo i nei g lial heg amjed.” 6 D eda pi woho s-ha ho'ige'ith g sho'igkam ch wabshaba s-behimk g lial nadki pi s-chu ehsk ch chum nuhkuth g t-lialiga ch wabsh hejel hekaj. 7 D hab kaij g Jesus ab wui, “Thagitoni. T-himthag oithk at hab juh g ni-muhkig wehhejed. 8 Chum o hekith ia em-shahgith g sho'igkam. Nt wabshaba ahni hi pi wabsh chum hekith ia wo em-shahgithk.” 9 D eda wehsko kaithag mad g Jesus ab i wuhshath g Lazarus muhkig amjed. Kud mu'i am thatha g Judea t am hemajkam s-ha neithamk. 10 Kud mu'ijj ab i s-wohoch mo g Jesus d Jiosh si Kehsha k am i ha thagito g e-wanimedtham am i neithok g Lazarus. D am i s-mai g u'ugchu papal k am i e nako mat g Lazarus hab wa'ap wo mua. 12 D am ba'ich i mahsi. Kuchd am i t-nakog k gm hu hihi Jerusalem wui. D eda mu'i am e hemapathch g hemajkam kihhim ch ed mat wo wuhshath g t-shohshon ha-tho'ibiathag. Chd am hihim wohg ch ed. D mu'ijj ga hu t-nam am i kaiok mat am wo jiwia g Jesus. 13 Ihtham ad ha uh'ukch g chukud shosha u'us i'ibhonig ch ab si has elith g Jesus si s-kaitham hab kaijch, “Ith o d s-ap'ekam t-kownalig ch ia jiwia am wehhejed g Jiosh. K g Jiosh si s-ho'ige'ith.” 14 D g Jesus am hema ha tai g wechij wuhlu k heg cheshathk. 15 Heki o hu an hab chu'ig Jiosh o'ohana ed matsh ith hab wo e juh ch hab chu'ig: Pi g am wo e totothsith, ahpim Tutuligo! Ithani at ia wo jiwia g ge'e em-kownalig an thaichugch wechij wuhlu t an. 16 Kuchd pi sha'i amichuth wehs ihtha. Kut wa wabshaba hekith ab uhgk i e bei g Jesus thahm kahchim wui, tt am hahawa i chegito mo an o'ohanas ihtha Jiosh o'ohana ed. Kutki heg hekaj hab e juh am wehhejed. 17 Ihtham mu'i hemajkam ad wa am nam g Jesus nash pi kah mat ab i wuhshath g Lazarus muhkig amjed. Hegam mo wa am neith ash am ha ahgith. 19 D hab kaij g Palasi ab a'ai e wui am i ha neithok, “Ha g wo neith matki wehsijj am i oi. Pi attki wo t-nako matt wo keshwua.” 20 D am ha'i thatha g Greek hemajkam Jerusalem t am mat ab wo has el g Jiosh heg eda tho'ibiathag wuhshtha piast. 21 Kuchd am oiopo. D ihtham am thatha k am cheh g Philip k am ahgi mo s-neithamk g Jesus. 22 D g Philip am ahgi g Andrew. (Ihtham ad am d chum kihkam Bethsaida t am am Galilee chekshani ch ed.) Kud am hahawa e wehm hihim k am ahgi g Jesus. 23 D hab kaij g Jesus ab ha wui, “Ithani at e ai g ni-tashga mat g ni-ohg wo ni-maskogi mani d si Kehshaj. 24 T wabshaba wehpeg ha'ichu hab wo e juh am ni-tahgio. Neh, nat hig am wo i wuhshani k ab wo mu'itha g pilkani pi am hu e eshk? Hemho wa at am wo e ei jewed wecho k wo muh k hab wa'i masma wo i wuhshani k ab wo mu'itha. 25 Ith ani hab ahg mat g o'othham wo heki wua g e-thoakag matp wo s-huwithath hejel e wehhejed k wabshaba wo edgithath g pi ha huhugetham thoakag matp wo hugio g e-thoakag am ni-wehhejed. 26 Bat wo junihith g ni-tatchui hegai matp hedai hab e elith mat d wo ni-pionagk. Kunt hab wo juh mat an wo ni-wehmajk mant hebai wo i ha'ichugk. Ni-ohg at ab wo si has i ha el hegam mo hab junihim g ni-tatchui.” 27 D hab ep kaij g Jesus, “Ni-ihbthag at ab si i e kudu. Ni hab chum ni-tahtk mant hab wo chei, ‘Ni-ohg, pi g hiwgith mas hab wo e juh ihtha am ni-tahgio.’ Nt eda heg hekaj ia jiwia mant am wo gahi wuhsh hegai s-ko'ok ha'ichu. 28 Pegih, ni-ohg, am g maskogith g e-gewkthag am gahi ni-wuhshanim.” D ab neo g Jiosh thahm kahchim t amjed k hab kaij, “Am ant heki hu i maskogith k am hab ep wo juh.” 29 Mu'i o wa am gegok g hemajkam ch kah hegai mo ab neok. Ha'ijj o hab kaij, “Ab o kaithaghim g tataniki.” Kud ha'ijj hab kaij, “Anghil at ab wui neo.” 30 D Wabshaba hab kaij g Jesus ab ha wui, “Ahpim at em-wehhejed ab s-kaitham neo, ch pi ahni ni-wehhejed. 31 E at ai mat ge'e wo bei g chu'ichig g hemajkam. Jijawul ha-ge'ejig o chum e kownalchuth ith thahm jewed. Nt wabshaba oi wo gewito. 32 Ab amt wo ni-naggia uhs t ab ahni Jiosh si Kehsha. Kunt ab haha wo i ha wanchshul g hemajkam ni-wui.” 33 Neh, bo wa kaij g Jesus ch oki heg hab ahg mat has masma wo muh. 34 D hab kaij g hemajkam, “An o hab chu'ig Jiosh o'ohana ed mat g Jiosh si Kehsha pi hekith wo muh. P haschu ahgch hab kaij mapt ab wo e naggia uhs t ab maptp woho d Jiosh si Kehsha?” 35 D hab kaij g Jesus ab ha wui, “Ia ant he'es i tash wo ha'ichugk em-shahgith ch heg wa wepo mani d tonlig em-wehhejed. Am g s-ap wo hihimath tonlig oithch. T hab pi wo em-ma'ish g s-chuhugam. Hegai matp hedai am wo himath s-chuhugam k ed o pi mahch mas hebai him. 36 Ab g wo i s-ni-wohochuth mani eda ia wabsh kia ha'ichug k hab masma tonlig ch ed wo hihimath.” Neh, bad kaij ch gm hu hahawa i e mehkoth ab ha amjed. 37 Mu'ikko ad wa hab juh g s-hasig ha'ichu g Jesus am ha-nena ed ihtham hemajkam. Kud wabshaba mu'ijj pi ab hu wohochuth mo d Jiosh si Kehsha. 38 Neh, d hab wa masma hab e juh hegai matki g kelibad Jiosh ha'ichu i tashogiththam Isaiah an o'oha. An o hab chu'ig: Pi o mu'i ab s-wohochuth g ha'ichu t-ahga ab m-amjed. K g m-gewkthag pi tasho am ha-wehhejed. 39 Tki an ep o'oha g Isaiabad: Jiosh at hab ha juh mo pi ap ha'ichu neith ch pi ha'ichu amichuth mat pi ab hu wui wo i e nohnogith k pi wo e tho'ibia ab pi ap'ekam t amjed. Isaiabad o wa ab amjed neok g Jesus gewkthag natsh pi Jiosh am tashogi. Kut ihtham hemajkam wa woho pi e nako mas ab wo s-wohoch g Jesus. 42 Kud mu'i ab hi wa chum s-wohoch g haha'ichu. Tsh wabshaba g Palasi gm hu wo i ha wuwhas matp wo s-mai mat ab s-wohoch. D heg hekaj pi am hu tasho e ahg 43 no pi s-hohho'ith g ab has ha-elitha g hemajkam ch g Jiosh ab has elitha wabsh pi ab hu ha'ichuchuth. 44 Jesus ad am ep ha jehnigith ch si s-kaitham hab kaij, “Matp hedai ab wo i s-ni-wohochuth k hab wa'ap s-wohochuth g ni-ohg Jiosh. 45 K hedai i ni-neith ch hab wa'ap neith. 46 Ia ant jiwia ith thahm jewed k hab sha masma mo g tonlig am em-wehhejed nani pi am tashogith g wohokam himthag. Kumt s-ap wo himath g e-thoakag hab masma mam am tonlig ch ed mamtp ab wo ni-hiwgath. 47 Mu'ijj o pi ab hu ni-kaiham ch pi ab hu ni-hiwig. Nt wabshaba pi heg hekaj ia jiwia manis wo ha lothai. S-ha ani tho'ibiamk. 48 T wo e lothai g ni-ne'okikaj mat hekith wo i huhug g jewed. 49 Ni-ohg o ab ni-chehani mant haschu hab wo chei. Ni pi g hejel ni-ne'oki hab kaij. 50 Kumt heg hekaj ab wo kaiham k hab wo bei g pi ha huhugetham thoakag. Heg ani wa'i hab kaij mo g Jiosh ab ni-chehani.” Neh, bad kaij g Jesus.

John 13

1 D am him k am i e ai matt ba'ich tash wo mua g kahwal mad k wo wuhshath g t-shohshon ha-tho'ibiathag. Kuki s-mahch g Jesus mat am wa e ai matki ia wo thagito ihtha jewed k wo hih am e-ohg wui. D eda si pihk e elith wehs e-thoakagkaj ab ha wui hegam mat ab i s-wohoch. 2 D am e ap'ech matt am wo t-gegos hema kih am gm hu i juhk. D wa eda heki hu ab i kaiha g Judas Iscariot g ge Jiawul k am i e shelch mat wo gagda g Jesus. 3 Ab atsh Jiosh amjed ia jiwia g Jesus k ab wui ep wo i e nodagi. Kush g Jiosh ab wehs mahkch g gewkthag. D ith s-mahch g Jesus 4 ch wabshaba am i kekiwua k am wuahawua g e-lihwa k g tuayakaj ab e bahshodath 5 k am ge was wakonakud ch ed k ab i wapkonahi g t-tahtad k heg hekaj ha thagio tuaya mat ab e bahshodath. 6 D ab i ai g Simon Peter. D heg si has e tahtk ch hab kaij, “Ih, napt wo wapko g ni-tahtad k eda d ge ni-kownalig!” 7 D hab kaij g Jesus ab wui, “Pi ap hi wa amichuth hemuch mani haschu chum em-tashogith ith hekaj ch wabshaba wo wa amich imhab i ba'ich.” 8 Kud hab hahawa kaij g Peter, “Pi apt hekith wo sha'i wapko g ni-tahtad.” D hab kaij g Jesus, “Pi apt d wo i ni-wehmtthamk mant wo sha pi wapko g m-tahtad.” 9 Kud hahawa si s-hohtam hab kaij g Peter, “Ni-kownalig, pi g heg wa'i ni-tahtad wapkon k wabshaba g ni-nohnhoi ch ni-wuhiosha ehp.” 10 D hab kaij g Jesus, “Heki apt hu e wako wehsko koi jiwiak. Heg at wa'i e-tahtad wo wapko hegai mat hedai heki hu wehsko e wako mat koi am hu wo jiwia kih t am. Ith ani hab ahgch hab kaij mat g em-thothakag wehs i e kegch, heg hi wa i hemako mat pi i e kegch.” Neh, bad kaij g Jesus no pi s-mahch mat hedai wo gagda. 12 T am i ha wapko g ha-tahtad k ab uhpam wah g e-lihwa k ga hu hahawa ep thahiwua mihsa wui k ab ha kakke, “Nam s-amichuth mant haschu ahgk hab em-juni ihtha? 13 Neh, bam ni-a'aga mani d em-kownalig ch d em-mashchamtham. K am wa s-ap'e no pi woho ihtha. 14 Thani wa chum em-kownalig ch d em-mashchamtham ch eda am i ni-jumalkath k heg ni-wepogi mani d wabsh em-pionag. Pegih, mt ahpim hab wa masma ab a'ai wo e neithath 15 mant am em-chehgi ch ab a'ai wo i e wehmtath 16 nam pi d ni-pionag. Kut pi hebai g pion hab wo chum e elithath mas ba'ich d i si ha'ichu mo hi g ahmoj. 17 M hahawa s-mahch mamt has wo chum masmak. Kut d wo s-ap tahhathkamk am em-wehhejed mamtp woho hab wo masmak. 18 “Mt wabshaba pi wehsijj ab hu wo bei ihtha no pi an hab chu'ig Jiosh o'ohana ed mamt hema ab ni-wui wo kekiwua ahpim mam ni-wehm e gegosith. Kuni s-mahch mat hedai hab wo e juh nani pi wehs s-em-mahch ahpim mant ab i em-gawulkai. 19 Kuni heki hu ab em-ahgith mat koi hab e juh. Kut hekith hab wo i e juh, mt ab haha wo s-wohoch mani woho d Jiosh si Kehsha. 20 Jiosh o ab ni-mahkch g ha'ichu e-ahga. Kuni ab epai em-mahk. K heg hekaj ab s-ap ni-neith ch ab s-ap neith g Jiosh hegam mat hedai ab wo s-ap em-neithath.” 21 D am hahawa si e kudu g Jesus k hab t-ahg, “Pi ant ap ni-taht k wo em-ahgi mamt hema ahpim wo ni-gagda.” 22 Kuchd si has i t-taht k ab wabsh a'ai si t-neith pi sha'i amichuthch mas hedai hab ahg. 23 Kunid eda an hugithaj an thaha g Jesus ahni mo ni-hekaj si pihk e elith. 24 D hekaj g Simon Peter wabsh s-a'agi ab ni-ahgith mant wo kakke mas hedai hab ahg. 25 Kunid wabsh s-a'agi ab epai kakke g Jesus mas hedai hab ahg. 26 D hab kaij ab ni-wui, “Hegai mant wehpeg ab wo bih o d hegai.” Kud wa woho am ge bia g hithod k ab mah g Judas Iscariot. 27 D am wabsh i chum huh g e-bih. D g ge Jiawul am ba'ich i chikp eda. D hab kaij g Jesus ab wui, “S-hohtam g am hab juhni hegai mapt hab wo juh.” 28 Kuchd pi sha'i amichuth mas haschu hab ahg ch hab kaij ihtha. 29 D eda nuhkuth g t-lialiga hegai Judas. Kuchd heg hekaj ha'i hab t-ahg mo hab ahg mat ep wo ha nolawt g ha'ichu hugi heg wehhejed ge'e gegosig o ha'ichu wo ha mah g sho'igkam. 30 D ha hekaj i wuhsh g Judas gm hu jeg ed. Kuki eda ab wabsh i si s-chuhugam. 31 D hab hahawa kaij g Jesus, “Neh, hemu at wehs wo e nahto hegai mat g Jiosh am i ni-kei mant hab wo juh ia jewed thahm. Am ani wa chehgith g Jiosh gewkthag. 32 T g Jiosh heg hekaj am wo tashogi g ni-gewkthag hemu s-hohtam. 33 “Pegih neh, ahpim mani ab si em-tatchua, pi ant sha'i tash ia hu wo e-wehmajk nant pi gm hu wo hih. Kumt pi wo e nako mams wo ni-cheh. Am ant hab ep wo chei em-wui mani wa haschu ha ahgith g hemajkam mamt pi wo e nako mamt hejel am wo hihi mant hebai wo i hih. 34 “Hemu ant ab wo em-mah g wechij chehanig. K d ihtha mamt ab a'ai wo si pihk e elithath hab masma mani ahni hab em-juhkch. 35 Wehsijj at wo s-mahchk mam ab i e thagitokch ni-wui mamtp ab a'ai wo si pihk e elithath.” 36 D hab kaij g Simon Peter, “A pt hebai wo hih, ni-kownalig?” Kud g Jesus hab kaij, “Pi apt wo e nako mapt wo ni-oi hemu amai mant am wo hih. K wabshaba ab him g tash mapt am haha wo i ni-oi.” 37 D hab kaij g Peter, “Nt haschu ahgk pi wo ni-nako mant wo m-oi hemuch? Ni-nahtokch ani mant wo m-wehhejed muh.” 38 D hab kaij g Jesus, “Ab ant wo si shel m-ahgi map pi woho e nahtokch mapt wo muh ni-wehhejed. Neh, waikko apt hab wo wa'i chei map pi sha'i ni-mahch mat koi wo kuhu g keli chuchul.”

John 14

1 D hab ep kaij g Jesus, “Pi g wo sha'i e kudut. Ab g wabsh i s-wohochuth mo an ha'ichug g Jiosh k ahni ab ep wo i s-ni-wohoch mani d si Kehshaj. 2 Am o wi'is ni-ohg kihthag ed am wehs ha wehhejed g ni-wohochuththam. Nt wo wa chum em-ahgi matp pi am hu wo wi'isk. Nt am wo him k am wo i ap'ech em-wehhejed 3 k ia ep wo jiwia k ia wo em-ui mamt an wo ni-wehmajk. 4 S-mahch am mamt has masma am wo hihi amai mant am wo hih.” 5 D hab kaij g Thomas ab wui, “Ih, ni-kownalig, pi ach sha'i mahch maps hebai wo hih ch hab pi mahch machs has masma wo thatha.” 6 D hab kaij g Jesus ab wui, “Ab amt wo ni-hiwgath. Nt ahni an wo wa'i em-u'apa anai ni-ohg kihthag ed. Ith o heg wa wepo mani d am wui himtham wohg em-wehhejed ch d Jiosh wohokam ch d m-wechij thoakag. 7 Matp hedai woho s-ap wo s-ni-mahchk ch hab wa masma wo s-mahchk g ni-ohg. Neith am g ni-ohg nam pi ni-neith.” 8 D hab kaij g Philip ab wui, “Pegih, t-kownalig, am g t-chehgith g e-ohg. Heg ach wa'i tatchua.” 9 D hab kaij g Jesus ab wui, “Tash ani ia em-wehmaj. Kupki eda pi woho ap ni-mahch, ahpi Philip. Hegai mo hedai i ni-neith ch hab masma ep neith g ni-ohg. P haschu ahgch ab ni-tahni mant wo em-chehgi g ni-ohg? 10 Ahni kch ni-ohg ach d hemako. Kupki pi koi ab hu s-wohochuth ihtha.” D hab ep kaij ab wehs t-wui, “Ni-ohg o ab ni-ahgith mant has wo che'e k has wo ni-juh. 11 Ab g wo s-wohochuth mach d hemako g ni-ohg wehm heg wabsh hekaj mani am em-ahgith, o amtp pi wo e nako hab masma k wo s-wohoch mach d hemako heg hekaj s-hasig ha'ichu mani hab junihim. 12 Nt wo si shel em-ahgi matp hedai ab wo s-ni-wohochuth k wo e nako mat hab wo junihith g s-hasig ha'ichu hab masma mani ahni, pej ba'ich i ge'e hab wo juh g s-hasig ha'ichu nant pi ahni hi wo hih am ni-ohg wui. 13 Kunt am hab wo em-juni mamtp haschu ab wo i tai g ni-ohg am ni-chehchegk. T heg hekaj g hemajkam ab wo si hehgchul g ni-ohg Jiosh. 14 Pegih, mt haschu ab wo i tai g ni-ohg am ni-chehchegk, nt ahni hab wo juh. 15 “Am g hab wo junihith g ni-chehanig mamtp woho ab wo si ni-tatchuath. 16 Nt ab wo tai g ni-ohg mat ab wo em-mah g Hekia S-ap'ekam Gewkthag. T heg chum hekith wo em-wehmajk ch am wo i em-tashogithath g wohokam. 17 Pi o ta neithagma g Hekia S-ap'ekam Gewkthag. T heg hekaj pi wo sha'i e nako mas wo s-mahchk hegam mo pi ni-mahch. M wabshaba ahpim hi s-mahch no pi em-wehmaj hemu ch am wo e ul em-thoakag ed. 18 “Pi ant ia hu hejel wo em-thagito k wabshaba ia wo wa em-wehm ha'ichugk am i thahm mant im hu wo uhpam hih. 19 Kumt wo s-mahchk mant ia wo em-wehmajk. T wabshaba hegam mo pi ab hu ni-wohochuth pi wo mahchk mani ia ha'ichug nat pi pi wo ni-neithath. Kumt d wo wechij thothakamk ab ni-amjed heg wa'i hekaj mant ab wo i wuhsh muhkig amjed k d ep wo thoakamk. 20 Ia'i amjed amt wo s-mahchk mach d hemako g ni-ohg wehm k ch ep wo s-mahchk mamt ahpim ab i e hemakoj ni-wehm. 21 “Am o e chehgith mo ab si ni-tatchua hegam matp hedai ab wo bei g ni-chehanig k hab wo junihith. Kunt ab ha wui wo si pihk ni-elithath g ni-ohg wehm ch ab ha wui wo i ni-tashogi.” 22 D hab kaij g Judas, hi wa pi hegai Judas Iscariot, “T-kownalig, pt has masma ahchim wa'i t-wui wo i e tashogith k pi ab hu wehs hemajkam ha wui?” 23 D hab kaij g Jesus ab wui, “Hegai mo hedai ab si ni-tatchua at wo wohog el g ha'ichu ni-ahga. Kut hahawa ab wui wo si pihk e elithath g ni-ohg. Kutt g ni-ohg wehm am haha wo i t-maskogi wui k am wo wehmajkath. 24 Pi at ab hu wo wohog el g ha'ichu ni-ahga hegai mat pi ab hu wo ni-tatchua. K eda g ni-ohg d amjedkam ihtha ha'ichu ni-ahga. 25 “Ith ani hi wa em-ahgith hemuch mani ia em-wehmaj. 26 T g ni-ohg ab haha wo cheha g Hekia S-ap'ekam Gewkthag mat heg am wo i em-wehmajk am ni-wehhejed ch wo em-gewkemhunath ch wo em-mashcha mani haschu i s-em-mashchamamk ch hab wo em-juh mamt wehs ha'ichu wo s-chegitok mani haschu i em-ahgith. 27 “Am g wabsh wo i s-ap e tahtkkath. Ab ant wo i em-mah hegai hab mahs s-ap tahhathkam mani ahni edgith. Pi at hedai wo e nako mat hab mahs s-ap tahhathkam wo em-mah. Pi g wo sha'i e kudutath ch pi ha'ichu wo ehbithath. 28 “Am am wa ni-kah mani wa hab kaij mant gm hu wo hih ab em-amjed k wabshaba ia wo wa ep em-wehmajk. Ni-ohg o ba'ich i s-gewkthag mani ahni. Kumt heg hekaj wo chum si s-hehgigkath mant im hu uhpam wo hih wui mamt hems g wehs e-ihbthagkaj ab wo ni-tatchuath. 29 Ith ani em-ahgith mat koi hab e juh. Mt hab ab wo i s-wohoch g ha'ichu ni-ahga mat hekith hab wo i e juh. 30 “Hemu at am ge'e wo chehgi g e-gewkthag g jijawul ha-ge'ejig no pi chum e kownalchuth ia jewed thahm. K heg hekaj pi am hu ge'e s-ni-ap'e mant tash am ha'ichukaj wo em-wehm neo. K eda pi u'ukch g gewkthag mas hab wo ni-juh manis ab wecho wo i ni-ul. 31 Wehs ani hab junihim mo haschu ab i ni-chehani g ni-ohg. K hab masma s-mahch g hemajkam mani ab si tatchua g ni-ohg. “Pegih neh, oi g wo, am att wo i t-nakog k wo hihi.”

John 15

1 D hab ep kaij g Jesus, “Thach wa'i hemako hab masma mo g uhdwis je'e d hemako g e-i'ibhonig wehm. Ahni ani heg wepogithas mo g uhdwis shon wa'ug. M ahpim heg wepogithas i'ibhonigaj. K g ni-ohg t-nuhkuth. 2 Hegai i'ibhonigaj at ab wo chum bahithagt. Mt ahpim hab wa'ap s-kehg ha'ichu hab wo chum junithahith g Jiosh. E'es nuhkuththam at an wo si hikkumia hegai i'ibhonig mat pi ab hu wo bahithagt k wo i kegch hegai mat ab wo bahithagt. T hab ba'ich i mu'i ab wo bahithagt. 3 “Heki am hu kegchuthas ahpim mam ab kaiham ch ab s-wohog elith g ha'ichu ni-ahga. 4 Pi g gm hu hab wo sha'i i e juhni ab ni-amjed. Nt ahni hab wa masma pi gm hu hab wo i ni-juh ab em-amjed. Mt hab s-ap hab wo juh ha'ichu k s-ap hab wo masmak hab masma mo hegai i'ibhonig mat s-ap ab wo bahithagt ab gi'ikch e-wa'ug ab. 5 “Pi at ab hu wo bahithagt g i'ibhonig pi ab hu gi'ikch e-wa'ug ab. Mt ahpim hab wa'ap pi wo e nako mamt ha'ichu s-kehg hab wo juh mamt gm hu hab wo i e juh ab ni-amjed. 6 Hegai i'ibhonig mat wo e hikkumia at am wo i e hemapath k wo e mei. Neh, ith o hab mahs matp hedai gm hu hab wo i e juh ab ni-amjed k ab wo e ahijithach mat hahawa pi ha'ichu wehhejed wo s-kehgajk am Jiosh wehhejed. 7 Ab ant wo i em-mah mamt haschu ab wo i ni-tai mamtp ab wo s-wohog elithath g ha'ichu ni-ahga ch ab wo ni-hiwgath. 8 Hegam matp hedai woho ab i e thagitokch ni-wui at mu'i ha'ichu hab wo junihith ni-wehhejed. T heg hekaj ab wo hehgchul g hemajkam g ni-ohg Jiosh. 9 “Bani masma si em-tatchua ch si pihk em-elith mo hab masma si ni-tatchua g ni-ohg. Ab ani si s-wohog elith g ni-ohg. Ch ab a'ai si pihk t-elith. Kumt ahpim hab wa'ap ab wo s-ni-wohog elithath. Tt ab a'ai wo si pihk t-elithath. 11 Ith ani em-ahgith mamt wo bei g s-hehgig am hab junihithch g ni-chehanig hab masma mani ahni s-hehgig am hab junihithch g ni-ohg chehanig. 12 Ab ani em-chehani mamt ab a'ai wo pihk e elithath hab masma mani ahni has i masma si pihk em-elith. 13 Hegai matp hedai wo e muhkith ha wehhejed g e-naipijju o d hegai mo woho si pihk e elith ha hekaj. 14 Ahpim am d ni-naipijju mamtp hab wo junihith g ni-chehanig. 15 Kuni hahawa pi hab em-a'aga mam d wabsh ni-pionag ch wabshaba hab em-a'aga mam d ni-naipijju nani pi ab em-ahgith wehs ha'ichu mani ab kah ni-ohg amjed. Neh, mo hema d wabsh pionag ch pi mahch mo haschu am hab i wua g ahmo. 16 Pi amt hejel e elith k am wo i gegokiwua ni-wehhejed. Ahni ant am i em-chuhcha mamt am wo hihim k hab wo juh g ge'e chikpan. Kut pi hekith wo huhug hegai mamt hab wo juh. T g ni-ohg am hab wo em-juni mamtp haschu ab wo i tai am ni-chehchegch. 17 Pegih, ith ani ab em-chehani mamt ab a'ai wo pihk e elithath.” 18 D hab ep kaij g Jesus, “Mt wo s-chegitok mo ahni wehpeg s-ni-keh'ith hegam mo pi ab hu tatchua g Jiosh ch hab wa'ap wo s-em-keh'ithath. 19 Ab at wo em-tatchua mamtp hems pi ab hu wo tatchua g Jiosh. Nt wabshaba ab si em-gawulkai ab ha amjed. Kum pi ha wepo chegito ha'ichu. K hekaj hab s-em-keh'ith. 20 Mt wo s-chegitok mani wa hab em-ahgith mat pi hebai g pion hab wo chum e elithath mas ba'ich d i ge ha'ichu mo g e-ahmo. T wo em-sho'igch hegam mo ni-sho'igchuth. Kut ab wo s-em-wohog el hegam mo ab s-ni-wohog elith. Hegam mo pi mahch g ni-ohg o ni-sho'igchuth ch hab wa'ap wo em-sho'igchuthath nam pi ab ni-wui e thagitokch. 22 Ia ant jiwia ha wui k am ha ahgi ab amjed g ni-ohg k am ha chehgi g s-hasig chikpan mat pi hedai hekith hab juh. K wabshaba s-ni-keh'ith. K heg hekaj tasho mo s-keh'ith g ni-ohg. Kut hab masma mahsko wua g pi ap e-chu'ichig. 25 An o hab chu'ig Jiosh o'ohana ed mat wo s-ni-keh'ithath pi haschu sha'i ahgk. Kut wa woho hab e juh. 26 “Ab ant wo cheha g Hekia S-ap'ekam Gewkthag mat am wo em-wehmajk. Heg o am wehmaj g Jiosh ch ab em-wui wo him k wo em-wehmajkath ch am wo i em-gewkemhunath ch am wo ha'ichu em-tashogithath ab ni-amjed. 27 Kumt ahpim wo i ahgahi ab ni-amjed nam pi ni-wehmajkahim ga hu i amjed mant am i shonwuich g ni-chikpan.”

John 16

1 D hab ep kaij g Jesus, “Am ani em-ahgith ihtha mamt heg hekaj pi wo ni-thagito. 2 T wo i em-wuwhas ab amjed g cheopi. K ab him g tash mamt wo em-mu'a k hab wo e ahgath mat wehhejed hab juh g Jiosh. 3 Ith amt hab wo em-juh heg hekaj mo pi ni-mahch ch ep pi mahch g ni-ohg. 4 Mt wabshaba wo s-chegitok mani ith am em-ahgith mat hekith hab wo i e juh.” D hab ep kaij g Jesus, “Pi ani em-ahgith ihtha ga hu i wehpeg heg hekaj mani ia em-wehmaj. 5 K wabshaba hemu e aihim mant uhpam wo hih am ni-ohg wui. M eda pi ab hu sha'i s-ni-kakkeimk manis hebai wo hih 6 ch wabsh pi ap e tahtk s-mahchok mant gm hu wo hih. 7 T eda pi ab hu wo i hih g Hekia S-ap'ekam Gewkthag em-wui nt ho'ip gm hu hih. K heg hekaj ba'ich i s-ap'e mant gm hu wo hih. 8 T ab haha wo i hih g Hekia S-ap'ekam Gewkthag k am wo i ha tashogi g hemajkam g s-ap'ekam ch pi ap'ekam ch Jiosh lothaita. 9 Ni-ohg at ab wo ni-ha'ichuch mant am wui wo him k pi ia hu wo ha'ichugk. T g Hekia S-ap'ekam Gewkthag heg hekaj wo wohokamch am ha wui g hemajkam mani d s-ap'ekam am Jiosh nena ed k ep wo wohokamch mo hab junihim g pi ap'ekam mo eda pi ab hu ni-wohochuth 11 k ep wo wohokamch mat wo e lothai hegam mo hab junihim g pi ap'ekam nat pi am wa e ai mat g Jiosh wo lothai g ge Jiawul. 12 “Mu'i ani ha'ichu ep s-em-ahgithamk. Mt wabshaba pi wo e nako mamt wo s-amich mant wo chum em-ahgi hemuch. 13 Hekia S-ap'ekam Gewkthag at am wo i em-tashogi g wohokam k am ep wo i em-ahgi mat haschu has wo e juh imhab em-ba'ich. Nt am wo ahgi mat has wo chei. Kut am wo em-tashogith k hab ab wo si ni-ha'ichuch. 15 Wehs g ni-ohg gewkthag o d ep ni-gewkthag. Ni hekaj hab kaij mat g Hekia S-ap'ekam Gewkthag am wo i em-tashogi mani haschu ab i ahgith.” 16 D hab ep kaij g Jesus, “Tho sha'i ha'as, mt pi an hu wo ni-neithath, ch am ep wo sha'i ha'as, mt hahawa ep wo ni-neithath.” 17 Kuchd hab kaij ab a'ai t-wui, “Shahchu o hab ahg ch hab kaij mas wo sha'i ha'as, tt pi an hu wo neithath, ch am ep wo sha'i ha'as, tt ep wo neithath. K wa hab ep kaij mat wo hih am e-ohg wui. 18 Pi ach sha'i amichuth mo haschu hab ahg ch hab kaij.” 19 D s-mahch g Jesus machd ab s-kakkeimk ch hekaj hab kaij, “Pi am sha'i amichuth mani haschu hab ahg ch hab kaij mat wo sha'i ha'as, mt pi wo ni-neithath, ch am ep wo sha'i ha'as, mt ep wo ni-neithath. 20 Pegih, nt wo ha'ichu em-ahgi mat woho hab wo e juh. Mt wo si pi ap e taht k wo si shoanith. T g s-ni-keh'iththam wabsh wo si s-hehgigk. T amjed ha'ichu hab wo e juh mat ab wo em-mah g si ge'e s-hehgig. 21 Neh, s-mahch am mat has wo e juh mat hekith wo e ai mat wo mahmadho g uwi. T wo pi ap e taht mat wo nako g s-ko'ok. T wabshaba am wo i mahsi g ali. T am wabsh wo i pi chegito g s-ko'ok heg hekaj mo si s-hehgig mat an i e mahsith g ali. 22 Bo wa masma am em-tahgio mam hemuch pi ap e taht. Nt wabshaba ab ep wo ni-chehgi em-wui. Kumt haha wo si s-hehgigk. T pi hedai wo sha'i padch hegai hab mahs s-hehgig em-wehhejed. 23 “Mt hahawa pi ab hu wo ge ni-kaiamath ha'ichu ch wabshaba ab wo e ho'ige'ithahunath ch ab wo kakke g ni-ohg am ni-chehchegch. T wa woho wo em-mah. 24 Pi am koi hekith ni-chehcheg am e ho'ige'ithahunch. Am g hab wo i e juhni. T g ni-ohg am hab wo em-juni. T ab wo si e shuhthath g em-thoakag g s-hehgigkaj.” 25 D hab ep kaij g Jesus, “Am ani ha'ichu i chum em-tashogith g ha'ichu wepogitha ahgakaj. Ab o him g tash mant hahawa si tasho wo em-ahgi ab amjed g ni-ohg. 26 T ab haha wo em-abk mamt ab wo i e ho'ige'ithahunath ni-ohg wui am ni-chehchegch. Pi amt heg wo wa'i hiwgath manis ahni am wo wa'i ni-ho'ige'ithahunath em-wehhejed. 27 Ni-ohg o ab si em-tatchua nam pi ab si ni-tatchua ch ab s-wohochuth mant ia jiwia ab amjed g Jiosh. 28 Ia ant woho jiwia ab amjed g ni-ohg ith thahm jewed. T e ai mant uhpam ep wo hih am ni-ohg wui.” 29 Kuchd ab wui hab kaij, “Neh'e, hemuch ap si tasho am ahg ha'ichu ch pi hekaj g wepogitha ha'ichu ahga. 30 Ch hahawa s-mahch map wehs ha'ichu s-mahch. Pi o hab hahawa mahs machs hedai ab wo ge ha'ichu m-kakke. Ch hekaj hahawa s-wohochuth map ab amjed g Jiosh.” 31 D hab kaij g Jesus, “Nam hig hab elith mam ith woho s-wohochuth? 32 Ab o e aihim mamt gm hu a'ai wo si e gantad k gm hu uhpam wo hihi e-kihki wui ia hejel ni-thagitok. Ni wabshaba pi hejelig. Ni-ohg o chum hekith ni-wehmaj. 33 “Wehs ani em-ahgith ihtha mamt heg hekaj wo si s-ap e tahtkkath. T wo em-sho'igch hegam mo pi ab hu tatchua g Jiosh. Mt wabshaba am wo si e gewpkai nant pi heki hu s-ap wo em-gewitojel g pi ap'ekam.”

John 17

1 D am i kuhgi g Jesus g ha'ichu e-ahga k am i nea thahm kahchim wui k am e ho'ige'ithahun k hab kaij, “Ni-ohg, ia at i e ai g ni-tashga. Ab g uhpam ni-mahki hegai ni-gewkthag mani wa an u'ukch m-hugith an. Nt ab haha wo si has m-elith k wo mahsko wua g m-gewkthag. 2 Ab apt i ni-mah g gewkthag am wehs ha thahm g hemajkam. Kut ha'i ab ni-wui e thagito no pi d m-hemajkamga. K hab d m-elitha mant wo ha mah g pi ha huhugetham thoakag. 3 Thap wohokam Jiosh ch am i ni-kei mant ia wo jiwia jewed thahm. Kut wehs wo bei g pi ha huhugetham thoakag hegam mat wo s-t-mahchk. 4 Ia ant ha chehgi g hemajkam g m-gewkthag k nahto hegai chikpan mapt ab i ni-cheha mant hab wo juh. 5 Pegih, ni-ohg, ab g uhpam ni-be k ep wo ni-mah hegai ni-gewkthag mani wa edgith an m-hugith an matt eda koi an hu nahto g jewed. 6 “Ab apt ni-wui i ha gawulkai ihtham chechoj mo ia ni-wehmaj. K d m-hemajkamga. Am ani i m-mahtchulith ha wui ch ha ahgith g ha'ichu m-ahga. Kut ab s-wohog elith 7 k hahawa s-mahch mo wehs g ni-mahchig ab d m-amjedkam. 8 Ab ap ni-mahkch g ha'ichu e-ahga. Kuni am ha ahgith. T ab i s-wohochuth k heg hekaj s-mahch mani ab d m-amjedkam. 9 “Ihtham o d m-hemajkamga. Kuni heg hekaj am ha wehhejed ni-ho'ige'ithahun ch pi ha wehhejed hegam mat pi ab hu wo m-tatchua. 10 Hegam o d wa'i m-hemajkamga mat ab wo ni-hiw mant wo ha tho'ibia. T g ni-gewkthag ab wo e chehgi ha ab. 11 T hemuch e ai mant wo hih am m-wui k pi ia hu haha wo ha'ichugk ith thahm jewed. T wabshaba ihtham ia hu wo ha'ichugk. Kuni ab m-tahni mapt wo ha nuhkuthath, ni-ohg. Thap hekia s-ap'ekam. Kut ab wo m-ihmath ch hab d wo hemakok hab masma mach ahchim d hemako. 12 Ia ani ha nuhkuthahim mat ab wo m-ihmath. Kut heg wa'i pi e tho'ibia mo an o'ohanas matki hab wo e juh. 13 “Ith ani hab kaij mani ia wabsh kia ha wehmaj ch koi ab hu m-wui hih mant hekaj ab wo si ha mah g s-ap tahhathkam. 14 Ab ant ha ahgi g ha'ichu m-ahga. T ab i s-ni-wohochuth k ab ni-hiwig ch ab i e gawulkai ha amjed hegam mo pi ab hu m-tatchua. K hegam heg hekaj s-ha keh'ith. 15 Pi ani heg hab ahg maps ia wo i ha wuwhas ab amjed g jewed ch wabshaba hab ahg mapt wo ha nuhkuthath. T hab pi gm hu wo i ha nu'ichshul g ge Jiawul. 16 Ab o gawulkthas ihtham pi ap'ekam t amjed hab masma mani ahni. 17 Ab g i ha gawulkath e wehhejed heg hekaj ha'ichu e-ahga. Ha'ichu m-ahga o d wohokam. 18 Am apt i ni-kei mant ia wo ahgath g ha'ichu m-ahga jewed thahm. Kunt hab wa masma am i ha chuhcha. 19 Ab ant si i ni-thagito m-wui mat ihtham wo s-mahchk g wohokam ch hekaj ab hab wa'ap wo i e thagito m-wui. 20 “Pi ani ihtham wa'i ha wehhejed ni-ho'ige'ithahun ch wabshaba hegam ehp mat ab wo i s-wohoch g ha'ichu ha-ahga k ab wo i e thagito ni-wui. 21 Ith o d ha'ichu ni-tahnig mat wehs am wo i e hemakoch hab masma mach ahchim d hemako. Kut hab wo s-mai g hemajkam map d ahpi ch am i ni-kei mant ia wo jiwia. 22 M-gewkthag o d ep ni-gewkthag nach pi d hemako. Kuni ab ha mahkch g t-gewkthag mat t-wehm d wo hemakok. 23 Thani hemako ha wehm hab masma mach ahchim d hemako. T hab wehs s-ap d wo hemakok ihtham. T heg hekaj wo s-mai g hemajkam mapt am i ni-kei mant ia wo jiwia jewed thahm k ep wo s-mai map ab si ha tatchua ihtham hab masma map ahni. 24 “Ni-ohg, ab apt i ni-mah ihtham mo ab si ni-tatchua. Kuni si tatchua mat am wo ni-wehmajk anai mant anai wok. An apt ni-mah g si s-kehg ap'ethag nap pi si ni-tatchua mat eda koi e nahto g jewed. Kuni ab m-tahni mat ihtham am wo ni-wehmajk ch heg wo neithath map haschu ab ni-mahkch. 25 Thap hekia s-ap'ekam, ni-ohg. K pi hi wa chum m-mahch hegam mo pi ab hu m-tatchua. Ni wabshaba ahni s-m-mahch. K ihtham ep s-mahch mapt am i ni-kei. 26 Am ant m-mahtchul ha wui k am ba'ich wo i m-mahtchul ha wui. T hab wo si pihk e elithath ni-hekaj hab masma map ahpi. Nt ahni am wo i ni-hemakoch ha wehm.”

John 18

1 D am i ha'asa e ho'ige'ithahu g Jesus. Kuchd gm hu aigo i chehchsh hegai aki mo hab e a'aga Kidron k am thatha mo am eshas g u'us. 2 D eda pi an hu t-wehmaj g Judas nadki pi gm hu him k am si gagda g Jesus ha wui g u'ugchu papal ch Palasi. Kudki ihtham ab mu'i ha cheha g shonthal ch cheopi nuhkuththam mat am wo oi g Judas. Dki heg ab i ha wanim no pi s-mahch matt hebai wo ha'ichugk no pi mu'ikko am t-wehm thahiwup amai. D ihtham ha'ijj ge i'is-papayo ch ha'ijj ge lalamba ch ha'ijj wabsh kuhthch. 4 D eda wa chum wehs s-mahch g Jesus mat haschu has wo e juh am tahgio ch wabshaba am i hih ha wui k hab kaij, “Thohm in gahg?” 5 D hab kaij ihtham, “Hegai Jesus mo ab Nazareth t ab d kihkam.” Kud hab kaij g Jesus, “Ahni ani wud.” 6 D haha wabsh e totoths hegam k ab ta'i si i gegokiwua k wabsh i shul. 7 D ab ep ha kakke g Jesus, “A m hedai in gahg?” D hab ep kaij, “Hegai Jesus mo ab Nazareth t ab d kihkam.” 8 D hab kaij g Jesus, “Am ani wa heki hu em-ahgith mani d ahni. Mtp ahni in wo ni-gahghith ch pi has wo ha juh ihtham.” 9 Neh, bo kaij no pi s-t-tho'ibiamk. Kud hab masma hab e juh g ne'okij mo wa hab kaij matt wehsijj wo t-tho'ibia. 10 D g Simon Peter ge is-pahyo ch ab i huhpan k ab hu wabsh si i widut k higshp an si hikuch g s-apkojed nahkaj hegai mo d uhgchu pahl neholiga ch hab chehgig Malcus. 11 D hab kaij g Jesus ab Peter wui, “Ga g hu uhpam hab juhni g e-is-pahyo. Pi apt wo e nako mapt wo ha shohbi nant pi hemho wa wo nako mo haschu g ni-ohg ap'echuthch am ni-wehhejed.” 12 D ab ha cheha g shonthal g ha-ge'ejig mat am wo i ha wehmt g cheopi nuhkuththam. D am bei g Jesus k gn hu si wulsh g nohnhoij k gm hu i wanim Jerusalem wui. 13 Am ad kih g u'ugchu papal. Kud gn hu wehpeg i bei heg wui mo hab chehgig Annas. Ihtha Annas o d ba'amad ohgaj hegai mo d si uhgchu pahl ch hab chehgig Caiaphas. 14 K d ihtha Caiaphas mad wa am ha shelinith g haha'ichu mat hemako wo muh g o'othham wehs ha wehhejed. 15 Kuchd gohkajj g Simon Peter wehm am i ha oi mo am bebhehim g Jesus. K eda g uhgchu pahl s-ni-mahch. Nid hekaj am i wah kolhai ch ed. 16 D g Peter ga hu wa'i kehk jeg ed ab kihjeg t ab. Nid am hahawa him k ab ahgith hegai chehia mad ab nuhkuth g kihjeg mat ab wo i wahki g Peter. 17 D hab kaij ihtha chehia ab wui g Peter, “Nap hig pi ahpi an ep wehmaj hegai mamt an bei?” D hab kaij g Peter, “Pi ani an hu sha'i wehmaj.” 18 D eda s-hehpith. D hekaj am ge nahthch g pion ch cheopi nuhkuththam ch am gegok ch e huhkalith. D g Peter am him k am ha wehm i kekiwua k e huhkal. 19 D g uhgchu pahl ab kakke g Jesus mas haschu ahgk ab ha'i i ha gawulkath k haschu ha mashcham. 20 D hab kaij g Jesus, “P haschu ahgch ahni ab ni-kakke? Pi ani hekith s-a'agi ha'ichu ahg ch wabshaba wehs hemajkam wui hab kaij ch am ha mashcham ha-cheopi ed ch ge'e cheopi ch ed mach am wehs t-hehemapath. Pegih, ab g hig ha kakke mani haschu i ha mashcham. S-mahch o mani haschu ha ahgith.” 22 D hab wabsh chum chei. D ab si shonikka g cheopi nuhkuththam k hab ahg, “Pi apt hab sha'i kaitham wo neokath ab uhgchu pahl wui.” 23 D hab hahawa kaij g Jesus, “Am g hig wehs wo ha ahgi manis ha'ichu pi ap hab kaij. Wohokam ani em-ahgith. Pt haschu ahgk ab ni-shonikka?” 24 D g Annas am hahawa ha cheha mat am wo u'apa Caiaphas wui. Kud an wabsh kia wulshch g Jesus. 25 D eda g Peter am wabsh kia e huhkalith ha-nahtha wui. D hab kaij hegam mad am wehmaj, “Nap hig pi ahpi an ep wehmaj hegai mamt an bei?” D wabshaba g Peter pi mahch k e ah hab kaijch, “Pi ani an hu sha'i wehmaj.” 26 D am hema kehk g neholigaj g uhgchu pahl ch d hajunij hegai mat g Peter hikuch g nahkaj ch hab kaij ab wui g Peter, “Nani pi woho m-neith amai matt am bei ihtha?” 27 D hab kaij g Peter, “Ih, pia'a.” D edapk am i kuhu g keli chuchul. 28 Wabsh i si'alim mad koi i chesh g tash, md gm hu i bei g Jesus kownal kih wui. D hab chehgig hegai Pilate. D pi am hu i wahp g Tutuligo kownal kih ed no pi g t-himthag hab chu'ig matt wo t-uamhu mattp am wo i wahp gawul hemajkam ha-kih ed. Kut pi wo ap'ethagk mat wo huh g kahwal mad iagchulig gegosig imhab i juhk matp am wo i wahp. 29 D heg hekaj gm hu i wuhsh g Pilate k am ha nam k hab kaij, “Shahchu am ab abchuth ihtha o'othham?” 30 D hab kaij ab wui, “Pi att woho ia wo u'apa ahpi m-wui hegai matt pi koi wo s-mai mo am hab junihim g pi ap'ekam.” 31 D hab kaij g Pilate, “Pegih, mt ahpim wo be k ab wo mah g s-ko'ok namkithadag mo has i mahs g em-himthag chehanig.” D hab kaij g Tutuligo, “Pegih, bo mahs g t-himthag chehanig mat wo e mua heg hekaj pi ap e-chu'ichig. K eda pi t-hiwgith g ge'e kownal ab Rome t ab machs hab wo juh. Tt heg hekaj ia u'apa mapt ahpi am hab wo juh.” 32 Ith ad wa hab e juh mat hab masma wo e muhkith g Jesus mo wa hab kaij no pi g kownal hab masma ha muhkith. 33 D g Pilate gm hu uhpam wah e-kih ed k ab i wai g Jesus k hab kaij ab wui, “Neh, nap hab e elith map d ha-kownalig g Tutuligo?” 34 D hab kaij g Jesus, “Nap ab ni-kakke ihtha ab hejel e amjed, aha no ha'ijj ab ha'ichu i m-ahgith ab ni-amjed?” 35 Kud hab kaij g Pilate, “Pi ani d sha'i Tuhligo manis wo s-mahchk ihtha. M-wehm hemajkam ha wehm g e-papalig at ia m-u'apa. Pt haschu has juh?” 36 D hab kaij g Jesus, “Ni-kownaltalig o pi hab chu'ig mo g ith thahm jewed kokownaltalig, Tp hems hab wo chu'igk, t wo ha cheggia hegam mo ab si ni-wecho e mashcham mamt pi am hu wo i ni-thagito haha'ichu ha wui. Pi o hab mahs g ni-kownaltalig.” Neh, bad kaij g Jesus. 37 D heg hekaj hab ep kaij g Pilate, “Kupki woho hab kaij map d kownal!” D hab kaij g Jesus ab wui, “Heu'u, thani kownal ch ia jiwia jewed thahm k ia mahsi mant wo ha ahgi g wohokam. Matp hedai ab wo tatchuath g wohokam at ab wo ni-kaiha.” 38 D gm hu hab si e widu g Pilate k hab kaij, “Mas haschu d i wohokam.” D am hahawa uhpam i wuhsh ha wui g hemajkam k hab ha ahg, “Pi ant ha'ichu sha'i cheh manis ab wo abch ihtha. 39 K eda wehs ahith ab am hema i e thathagitod g lihso em-wehhejed ia'i ithani mam wushshath g e-shohshon ha-tho'ibiathag. Pegih, nam tatchua mant ith wo thagito mash d em-kownalig ahpim Tutuligo?” 40 D si s-kaitham hihnk ch hab kaij, “Pi hegai. Barabbas ach tatchua.” D eda d s-chu ehskam ch d ha mu'akam ihtha Barabbas.

John 19

1 D am hahawa ha cheha g Pilate g shonthal mat wo s-ko'okam gewitta g Jesus. Kud wa woho hab e juh 2 k am hahawa ge ho'i gihkot k ab wahki mo'oj ab k ab wahki g kownal kahba 3 k wabsh has ahg ch hab kaij, “Wapt wo si tash d Tutuligo ha-kownaligk,” ch ab hahawa si shonikkash. 4 D am ep i wuhsh g Pilate k hab kaij am ha wui g hemajkam, “Neh'e, ab ant ep wo i wuhshath k wo em-chehgi mant pi ha'ichu sha'i cheh g pi ap chu'ichig mas hekaj wo e muhkith.” 5 Md am hahawa i wuhshath k ab wabsh kia wahkch g ho'i gihko ch hegai kownal kahba. D hab kaij g Pilate ab ha wui, “Ab g wo i neith mo d wabsh si sho'ig o'othham.” 6 D am i nei g u'ugchu papal ch cheopi nuhkuththam k si s-kaitham hab wabsh ge kaij mu'ikko, “Mu'ani! Mu'ani ab kots t ab!” D g Pilate hab kaij, “Pegih, k wo be k ahpim ab wo mua kots t ab. Ahni ant hi pi ha'ichu sha'i cheh mas melchkwua g kownal chehanig mat wo e muhkith.” 7 D hab kaij hegam Tutuligo, “Ahchim at hi melchkwua g t-chehanig am hugkam mat hemho wa wo e muhkith no pi hab e a'aga mo d Jiosh alithag.” 8 Neh, d am i ha kah g Pilate mad hab kaij ihtham k ba'ich i e ebkioth 9 k gm hu uhpam i wah k hab kaij ab Jesus wui, “Bahp amjed him?” D wabshaba g Jesus pi ab hu has sha'i chei. 10 D hab ep kaij g Pilate ab wui, “Aha, napt pi has wo chei ab ni-wui k eda s-mahch mani gewkthag mant wo m-thagito o ab wo m-mua kots t ab!” 11 D hab kaij g Jesus ab wui, “Jiosh at ab m-mah hegai gewkthag. K heg hekaj si pi ap hab e wua ihtham Caiaphas mo m-pi'ichuth mapt pi ap wo hekaj g e-gewkthag.” 12 D am i kah g Pilate ihtha k am ep i wuhsh ha wui k am chum si e nako mat wo thagito. D wabshaba si s-babgam hihnk hegam haha'ichu ch hab kaij, “Neh'e, ihtha hemajkam o hab e ahg mo d si ge'e kownal ch heg hekaj ab wui kehk hegai mo d si ge'e kownal ch ab Rome t ab. Kupki ahpi hab wa'ap ab wui kehk g si ge'e kownal mapt wo sha thagito ihtha.” 13 D am i kah g Pilate ihtha k am hahawa i wuhshath g Jesus k heg ga hu i thahiwua usagakam thaikud ed amai mach hab a'aga Gabbatha mo an sha uhgk i hothaitas. 14 D eda e aihim g thahm juhk. Kud wo e koktha g kahwal mahmad imhab i juhk mat wo e wuhshath g t-shohshon ha-tho'ibiathag. D hab kaij g Pilate ab ha wui g haha'ichu, “Ia g hu wo neith g e-kownalig.” 15 D ab ep si s-babgam hihnk ch hab kaij, “Mu'ani! Mu'ani ab kots t ab!” D hab kaij g Pilate, “Aha nam tatchua mant wo mua g si uhgk em-kownalig ab kots t ab?” D hab kaij g u'ugchu papal, “Heg o d wa'i si uhgk t-kownalig mo ab thaha Rome t ab.” 16 D am hahawa i thagito g Pilate g Jesus mamt ab wo mua kots t ab. D am hab hahawa e juh g ha-tatchui mamt ab ha mah g Jesus. D gm hu i wanim. 17 D g Jesus am kushwiot g hejel e-kots. Kuchd am thatha amai mo am e koktha. Bach a'aga amai Golgotha mo hab d ahga Koshwak. 18 Kumt gam si wuahawua g wehschugaj k ab sisish kots t ab k ab uhgk i bei. D eda gohk d ep lilso. Kumd ihtham hab wa'ap ab ha sisish kokots t ab k gn hu a'aijed ha chuhcha Jesus hugith an. 19 D an sisishp g tapial Jesus kots t ab. K an ab hab chu'ig: “Ith o d Jesus ch d ha-kownalig g Tutuligo.” 20 K eda pi mehk ab kihhim t amjed amai mam am ha koktha. D heg hekaj mu'ijj g t-wehm o'othham ab ne'okchul hegai mo haschu an o'ohanas. K an o'ohanas g t-ne'okikaj ch g Rome ne'okikaj ch g Greek ne'okikaj. 21 D gm hu uhpam ep hihi g u'ugchu papal Pilate wui am i ne'okchulithk ihtha k hab ahg, “Pi g hab masma an o'ohan mo d t-kownalig k wabshaba an o'ohan mo heg hejel hab kaij mo d t-kownalig.” 22 D hab kaij g Pilate ab ha wui, “Mant haschu an i o'oha, t heg an wo o'ohadagk.” 23 D hegam shonthal mad am naggia g Jesus d gi'ik ch hekaj am gi'ikpa e tahpath g Jesus wepschuga. K am hema d si s-namkig ha'ichu eniga ch pi hebai ha shohmas. 24 D ith hab ahg g shonthal ch hab kaij ab a'ai e wui, “Pi att am hu a'ai wo t-wanchith ihtha k am wabsh wo t-chichwi matt hedai wo t-gehg k heg wo bei.” Neh, bad kaij ch woho am hab e juh. Kud hab masma am e wohokamch g Jiosh o'ohana mo an o'ohanas hab masma: T am a'ai wo e tahpani g wehschugaj g Jiosh si Kehsha k am wabsh wo e chichwi k wo s-mai mat hedai wo bei g s-namkig ha'ichu enigaj. 25 D am gegok g je'ej ch jiskaj g Jesus miabithch amai mo am naggia. Kud gohk am ep ha wehmaj mo hema d hegai Mary mo g wehmaj kihkam d Clopas ch hema d ep Mary Magdalene. 26 Nid ahni am ha wehm kehk mo ni-hekaj si pihk e elith g Jesus. Kud g Jesus an ni-a'aga ch hab ahg g e-je'e, “Neh, ith at d haha wo m-madk m in kehk,” 27 ch hab ep ni-ahg, “Ith at d haha wo m-je'ek.” Neh, nid am i amjed bei g je'ej. Kud heg am t-wehm kih. 28 D hahawa s-mahch g Jesus mat wehs hab juh mat haschu hab wo chum juh mat koi wo muh ch hab kaij, “Tonom ant.” 29 D an hema thaha g ha'a mad am shuhthagi g pad nawait. D am hema g shonthal ha'ichu wakch pad nawait ch ed k an ha'ichu k an uskon k ab uhgk i be k ab kams hab masma mo an o'ohadag Jiosh heki hu o'ohana ed. 30 D ab i winiun k hab hahawa kaij, “Ia ant i wehs ha'ichu nahto.” Neh, bad kaij ch am hahawa jumal i mo'owua k am i muh. 31 D am e nakog g hemajkam mat wo e mihshmath nat pi g ba'ich tash d wo shahwaik ch d wo ge'e tashk. Kutsh g haha'ichu ab kakke g Pilate mat wo e ohmi g ha-kakhio hegam mad am nahngia. T hab wo e oiwigi g ha-muhkig mat gm hu wo i e u'u k pi ab wabsh wo kia nahngiak t-mihshmetha tash ed, wahm mat ith d wo si ge'e t-tashgak. 32 D ab ha chehani g Pilate g shonthal mat wo ha ohmi g ha-kakhio. Kud hab ha juh hegam gohk mo ab hugithaj ab nahngia g Jesus. 33 D wabshaba g Jesus heki hu muh. Kud pi ohmi g kakhioj. 34 D hema g shonthal g e-is-pahyokaj chu'akad g Jesus ab hudaj ab. Kud ab ha hekaj si e iawua g eh'ed ch shuhthagi. 35 Ith anid neith ch s-mahch mat woho muh. Kuni hab masma am em-ahgithahim mamt ahpim hab wa'ap wo s-mahch mat woho muh. 36 Jiosh o'ohana o hab chu'ig: Pi at hema wo sha'i e mul g oh'oj. Kut wa woho hab masma hab e juh. 37 K an ep o'ohanas ch hab chu'ig: Hemajkam at ab wo neithath hegai mamt ab chu'akad. 38 K hema d Joseph ch ab Arimathea t amjed ch s-wohochuth mo g Jesus d Jiosh si Kehsha ch wabshaba s-ha gihug hegam mo pi hohho'ith. D wabshaba hekith am i muh g Jesus, d ith am hih Pilate wui k ab e sho'igchuth k ab tahni g honshpadaj. D am i hiwigi. D ga hu ep jiwia k ab i huduni g muhki k gm hu i bei. 39 D heg am ep ha'ichug Nicodemus mat wa gd hu i wehpeg chehgim g Jesus chuhug ch ed. Ihtham atsh s-ap wo juh g muhki. D g Nicodemus heg hekaj u'a g siant s-wehch hegai mo d s-ap uhw ha'ichu ch d myrrh ch aloes. 40 S-e ad hohtkith nad pi hudunihim. D ba'ich tash d t-mihshmetha tash. K eda an mia cheotas hothai ch ed mamt am hab juh g hiha'ini k wabshaba koi sha'i hekaj. K an wehgaj eshas g u'us. Kumd am i bei g honshpadag k am i hobino g s-kehg ikuskaj heg wehnathk s-ap uhw ha'ichu mach hab masma hab ha wua g ko'i k am cheh heg eda hiha'ini k gm hu hihi.

John 20

1 Thomig wabsh i si'alim mad wabsh kia s-chuhugam, tsh gm hu hihi hegam Mary Magdalene k am thatha cheo t am. Kutsh heki hu gm hu i e nu'ichkwua g hothai mad hekaj ab chum kuhpi. 2 Tsh am chum neith k am hahawa uhpam meh kihhim wui k ad gd hu t-wui mel ahni John ch Simon Peter k am t-ahgith ch hab kaij, “Am atki i e wuhshath g t-kownaligbad hon heg amjed hiha'ini mat am e cheh. Kuch pi sha'i mahch mas hebai has e juh.” 3 Kuchd g Peter wehm am ha hekaj wohp. 4 Nid ahni wehpeg gd hu mel nanid pi ahni ba'ich i s-hohtam meh mad g Peter. 5 Nid am i koachsh k nei mo am wehch hegai s-kehg ikus k wabshaba pi am hu i wah. 6 D am hahawa mel g Peter k am wabsh si i wah k cheh hegai ikus 7 ch heg ehp mat hekaj e hobino g Jesus mo'o. D ith gd hu hab wabsh hejelko holiwek ch kahch. 8 Kunid ahni am hahawa epai i wah k am i neithok ab hahawa i s-wohoch mat woho i wuhsh ab muhkig amjed. 9 Kuchd eda pi koi s-amichuth hegai Jiosh o'ohana mo hab chu'ig mat hemho wa wo i wuhsh ab muhkig amjed. 10 Kuchd gm hu hahawa hihi uhpam. 11 Sh am ep oimmed g Mary cheo kihjego ch shoak ch atsh am i e jumalkath k am i koachsh hiha'ini ch ed 12 ch ash gohk ha neith g anghil. Ihtham ash s-tohtam e enigadathch ch ga hu a'ai thadha, hema ab mo'oshko ch hema ga hu aigo 13 ch hab kaij, “Uwi, shahchu ap ahgch shoak?” Sh hab kaij ab ha wui, “Heg hekaj matki gm hu i e bei g ni-kownalig muhki. Kuni pi mahch mas hebai e cheh.” 14 Tsh hab che'iok ab sikol i kekiwua k ash neith mash ab hema kehk ch ash wabshaba pi sha'i mahch mo hedai wud. 15 Sh eda d Jesus ch ab kakke ch hab kaij, “Uwi shahchu ap ahgch shoak? Thohp in gahg?” Kush hab e ahg mo d e'es nuhkuththam ch hab kaij ab wui, “Ab g si s-ni-ho'ige'ith k am ni-ahgith mapt hebai hab cheh. Nt am wo him k am wo bei.” 16 Sh hab kaij g Jesus ab wui, “Mary.” Tsh ab hahawa ep i neith k hab kaij e-ne'oki ed, “Raboni!” mo hab d ahga “Ni-mashchamtham!” 17 Sh hab kaij g Jesus, “Pi g am hu ni-shohbith. Koi ant am hu hih ni-ohg wui. Pt wabshaba am wo him k am wo ha ahgi g ni-naipijju mant wo uhpam i ni-nodagi heg wui mo d ni-ohg ch ahpim d ep em-ohg. Heg o d ni-Jioshga ch ahpim d ep em-Jioshga.” 18 D wa woho am uhpam hih g Mary Magdalene k am t-ahgi mo neith g t-kownalig Jesus. K heg am ahgith ihtha. 19 D gm hu si i juh thomig hudunk. Kuchd am t-nam hema kih am. D ga hu si yahwidag g kihkjeg nachd pi s-ha ehbith g haha'ichu. D wabshaba am haha wabsh jiwia g Jesus t-wui k hab kaij, “Am g wabsh wo s-ap e tahtk,” 20 ch ab hahawa t-chehgith g e-nohnhoi ch e-huda. Kuchd si s-hehgig ab i neithok. 21 D hab ep kaij ab t-wui, “Am g wabsh wo s-ap e tahtk. Am ant i em-chuhcha hab masma mat g ni-ohg am i ni-kei. Kumt hab wa'ap am wo ahgachugath g ha'ichu ahgaj.” 22 T hab chei ihtha k ab t-thahm ihbheiwua k hab kaij, “Ab g wo i beh'i g Hekia S-ap'ekam Gewkthag. 23 Kumt wo s-mahch k ah mas hedai g pi ap chu'ichigaj gm hu hab i juni g Jiosh ch hedai pi gm hu hab i juni.” Neh, bad kaij ch am hahawa i pi'ata. 24 D g Thomas pi am hu t-wehmaj mad wa am jiwia g Jesus. 25 Kuchd am hahawa chum ahgith matt nei g t-kownalig. D hab kaij g Thomas, “Bant wa'i masma wo s-wohoch mat uhpam i wuhsh mant wo nei g nohnhoij mat ab wo s-babaliwanik mamt ab sisish k ab wo taht abai k ab ep wo taht hudaj ab.” 26 Hemako thomig amjed, chd am ep i t-hemapai kih ch ed. D am hahawa t-wehmaj g Thomas. Chd ab ep si yahwidathch g kihkjeg. D wabshaba ab i wah g Jesus k am jiwia t-wui k hab kaij, “Am g wabsh wo si s-ap e tahtk.” 27 D hab hahawa kaij ab Thomas wui, “Ab g i ni-neith k ab tahtam g ni-nohnhoi ch ni-huda k ab wo s-ni-wohochuthath.” 28 D hab hahawa chei g Thomas, “Ni-kownalig ch ni-Jioshga!” 29 D hab ep kaij g Jesus ab wui, “Ab apt i s-ni-wohoch nap pi ni-neith. Ba'ich at wo i s-hehgigk hegam mat ab wo i s-ni-wohoch wa chum pi g e-wuhpuikaj ni-neithch.” 30 Mu'i s-hasig ha'ichu ad hab ep juh g Jesus am t-nena ed mant pi o'oha ith eda o'ohana. 31 Nt ith in hi wa ha o'oha mamt ab amjed wo s-wohoch mo g Jesus d Jiosh si Kehsha ch d alithaj k hab masma ab wo bei g wechij thoakag.

John 21

1 Am wa'i hebai amjed, d am ep i e chehgi g Jesus t-wui amai al kahchki am am Galilee jewed ch ed. 2 Am achd wa oiopo g ni-nawoj James wehm. K g Simon Peter ch Thomas Kuathi ch Nathanael ch gohk ep g t-wehm e mashchamtham am t-wehmaj. 3 D hab kaij g Simon Peter ab t-wui, “Ih, nt hi wo sha ha u'im g waptopi.” Kuchd hab kaij, “Pegih, tt wo m-oi.” Chd am hahawa thadhaiwua wahlko ch ed k am i himch shuhthagi oithch k ge chuhug oitham am wuakch g t-chuagia shuhthagi ch ed ch pi ha'ichu sha'i bei. 4 D ab i chesh g tash. D ab hema kehk shuhthagi hugithgo. Kuchd pi sha'i mahch mo hedai wud. 5 D hab kaij, “Wihpiop, namt pi ha'ichu sha'i bei?” Chd hab kaij, “Pi ha'ichu.” 6 D hab hahawa kaij, “An g wo tha'ichuth g e-chuagia inhab s-apkojed g e-wahlko k wo ha'i ha ui.” Kuchd wa woho hab t-juh k pi t-nako machs ab uhpam wo i cheshaj nad pi sha'i si mu'i am e ba'iha g waptopi. 7 Nid hab hahawa kaij ab Peter wui, “Thoki t-kownalig Jesus!” D am i kah g Simon Peter moki d Jesus k ab wah g e-eniga mat wuahawua k am i thah shuhthagi ch ed k am i e wachwihim k ga hu jiwia wui. 8 Chd ahchim ha'i ab hahawa i himch g wahlko ab chewaimedch g chuagia waptopi shuhthch nachd pi am wa'i waik siant keishpa ab amjed mo an i hug g shuhthagi. 9 Kuchd an i huhud shuhthagi koa an k nei mo g chuhthagi am wehch. D am thahm kahch g watopi. D g pahn am ep wehch. 10 D hab kaij g Jesus ab t-wui, “Ab g wo ha'i u'uk g waptopi em-u'i.” 11 Ab ad wabsh i si shuhthags g chuagia g ge'eged waptopikaj. Kud g Simon Peter gn hu i chesh wahlko ch ed k ab i chewaim. Kud d siant hetaspo wehst-mahm gamai waik (153). D eda pi e wantsh g chuagia. 12 D hab t-ahg g Jesus, “Oi g wo i hihim k e gegosith.” Kuchd pi hedai ab kakke mo hedai wud nach pi wa chum s-mahch mo d Jesus. 13 D am hih g Jesus k am bei g pahn k an i t-hainithahim k g watopi am ep be k an i ha t-mahkhi. 14 Ith o d wa'i waikkokam mad am i e chehgi g Jesus t-wui amjed mad ab i wuhsh muhkig amjed. 15 Kuchd am i t-nahto t-gegosithk. D hab kaij g Jesus ab Simon Peter wui, “Simon map d Jonas alithag, nap ba'ich i si pihk e elith ni-hekaj mo hi ihtham?” D hab kaij g Peter, “Heu'u, ni-kownalig, s-mahch ap mani ab si m-tatchua.” D hab kaij g Jesus ab wui, “Am g i ha nuhkuth g wechij ni-wohochuththam no pi hab wa'i masma mo g kahwal mahmad.” 16 D hab ep kaij g Jesus ab wui, “Simon, nap woho si pihk e elith ni-hekaj?” D hab kaij g Peter, “Heu'u, ni-kownalig, s-mahch ap mani ab si m-tatchua.” D hab ep kaij g Jesus, “Am g i ha nuhkuth g ni-wohochuththam.” 17 D ith d i waikko mad hab kaij g Jesus, “Simon, nap ab si ni-tatchua?” D si pi ap e tahtk g Peter mat waikko ab wa'i kakke ch hab kaij, “Ni-kownalig, wehs ap ha'ichu s-mahch ch s-mahch mani ab si m-tatchua.” D hab kaij g Jesus, “Am g i ha nuhkuth g ni-wohochuththam. 18 Neh, s-mahch ap map hejel s-ap an has i e wua ch am hab e junihim map has i tatchua. Nt wabshaba wo si shel m-ahgi mapt am wo i si kelit k ab haha wo uhgk i uh'ul g e-nohnhoi. T wabsh hema ab wo m-enigadath k am wo i m-bei map hebai chum pi am hu himimk.” 19 Kudki heg hab ahg matki has masma wo e muhkith g Peter. T hab wo s-mai g hemajkam g Jiosh gewkthag. Kud g Jesus hab hahawa ahg g Peter mat gm hu hasko wo oi. 20 D am wehmaj i hih g Peter. Nid ab i ha oi. Kud g Peter ab uhpam i nea k ni-neith 21 k hab kaij ab Jesus wui, “Ni-kownalig, kut haschu am hab wo e juh am tahgio ihtha John.” 22 D hab kaij g Jesus ab wui, “Neh, mantp wo tatchuithath g John mat pi wo ha muh k ab wo ai mant ep wo jiwia, k pi ab hu ha'ichu m-him heg amjed. Am apt wabsh wo ni-oithath.” 23 Kudki an i e ahgithahi am ha shahgith g Jesus wohochuththam mantsh pi wo ha muh. D eda pi hab kaij g Jesus manis pi wo ha muh ch hab kaij, “Mantp wo tatchuithath mat pi wo ha muh k ab wo ai mant ep wo jiwia, k pi ab hu ha'ichu m-him heg amjed.” 24 Ahni ani wud manid neith ch kah ch ia o'oha. Kuni si s-mahch mo d wohokam. 25 Neh, mu'i ad ha'ichu hab ep juh g Jesus. Tp hems am wo i e o'ohanahi wehs k wabsh wo shuhth g jewed.

Acts 1

1 Ni-nawoj map ab si tatchua g Jiosh: Am ant ep wo i em-o'ohani ahni Luke mant wa heki hu m-o'ohani hegai mash wa haschu hab junihim ihtha Jesus ch haschu ha mashcham eda mash am oimmelhim ha shahgith g Tutuligo hemajkam. 2 Hekia S-ap'ekam Gewkthag ash wa ab mahkch g Jesus g gewkthag. Kutsh heg am ha'i i ha chuhcha k am ha mashcha g e-chehanig. 3 Mtsh am hahawa sho'igchuth k mua. Tsh wabshaba uhpam ep e chegito k am e chehgith ha wui g e-chuhchai ch nahnko masma wohokamchuth mo d thoakam. Kush ihtham mu'ikko neith am oitham g gi'ikko wehst-mahm tash matsh eda koi im hu i e bei thahm kahchim wui. Sh g Jesus mu'i ha'ichu ha mashcham ab amjed g Jiosh kownaltalig. 4 Sh wa am hu hebai am e hemapathch. Sh hab kaij g Jesus ab ha wui, “Mat ab i em-mah g John g pahl wakona. T wabshaba g Hekia S-ap'ekam Gewkthag g si ge'e gewkthag ab wo i em-mah pi sha'i mu'i tash i'ajed. Ni am wa heki hu em-ahgith mo hab kaij g Jiosh matsh ith am hab wo em-juni. Kumt ia wabsh wo ha'ichugk Jerusalem kihhim t am k ab wo ai mat hab wo e juh.” 6 Sh am hema ep d tash. Tsh am ep i e hemapai g chuhchaij wehmaj g Jesus k ab kakke, “T-kownalig, napt ab hahawa ep wo t-mah ahchim Tutuligo hemajkam g ap'ethag matt hejel am wo i himch g t-kownaltalig?” 7 Sh hab kaij g Jesus ab ha wui, “Heki at hu i ap'ech g Jiosh mat hekith am hab wo i e juh hegai mam haschu ab ni-kakke. K pi d em-wuikam mams wo s-ap s-mahchk ia'i ithani mas hekith wo i k. 8 Kumt wabshaba am wo i ahgahith mam haschu i s-ap s-mahch ab ni-amjed. Hekia S-ap'ekam Gewkthag at ab wo i em-mah g si ge'e gewkthag mamt hab wo junihith. Kumt wehpeg am wo i ahgahi Jerusalem kihhim ch ed k amjed wehsko am Judea chekshani ch ed k amjed gm hu Samaria chekshani ch ed. T amjed gm hu wehsko wo i e ahgahi a'ai jewed thahm.” 9 Neh, bash kaij ch amjed im hu hahawa i e bei thahm kahchim wui k gm hu pi e mahsith chewagi ch ed. 10 Sh am wabsh kia gegok ch am uhgk si nenea ihtham. Tsh am haha wabsh gohk i e chehgi g anghil k si s-tohtam e enigadathch 11 ch hab kaij, “Pi g ia hu wabsh wo gegokk ch am uhgk neneath mat hebai hih g Jesus. Hema tash at wo wa uhpam jiwia hab masma mam hemuch am neith mat has i masma gm hu hih.” 12 Ith atsh hab e juh Olive U'us Kawulk t ab. Sh heg d al eda hugkam mihya ab amjed g Jerusalem. Tsh ab hahawa i huhud hegam Jesus chuhchai kawulk amjed k am hihim 13 k gn hu thatha mo an thadha k d ihtham Peter, John, James, Andrew, Philip, Thomas, Bartholomew, Matthew, ch hegai James mash g ohgaj hab chehgig Alphias, ch hegai Simon mash d hema hegam mash tatchua mat g Tutuligo hejel wo himchuthath g e-kownaltalig, ch hegai Judas mash g ohgaj hab chehgig James. 14 Sh g Jesus je'e ch wepnag ch ha'i ehp g u'uwi am ha wehm e hehemapath ch am e ho'ige'ithahun Jiosh wui. 15 Sh am he'ekia d i tash matsh am ep i e hemapath k d siant gokko wehst-mahm (120) hegam mash ab ihm g Jesus e tho'ibiakch. Kutsh am hahawa i kekiwua g Peter k ash hab kaij, 16 “Ni-wepnag, Hekia S-ap'ekam Gewkthag atsh am i tashogi g t-kownaligbad David matsh has wo e juh hegai Judasbad mo chum t-wehmaj. Kut hemho wa hab e juh mash has i kaij. Judas at am i ha wanim hegam mat am bei g Jesus, 17 chum as d ep chum kehshaj mat am wo ahgahith g s-kehg ha'ichu ahgaj.” Bash kaij g Peter. 18 Kumtsh wa chum namkith g Judasbad matsh gagda. Tsh wabshaba hema e nolawt g oithag heg hekaj namkithadaj. Kutsh g Judasbad am him k am e naggia heg eda k ab si wantsh g e-wohk. Tsh g hihij gm hu si e iawua. 19 Sh heg hekaj hab e a'aga Eh'ed Oithag. 20 Kush g Peter heg hekaj hab ep kaij, “An o hab chu'ig heg eda nen'ei o'ohana mo an hab chu'ig Jiosh heki hu o'ohana ed: Pi at am hu wo ha'ichugk e-kih ed nat pi wo muh. K an ep o'ohanas: Am at kehkud ed hema ep wo i kekiwua. 21 “Kut ith hekaj hemho wa am hema wo i kekiwua t-wehm mat hab wa'ap wo wohokamch mat uhpam e chegito g t-kownalig Jesus. T hemho wa d wo hema t-ahchimk mach ga hujed i wehmajkahim g Jesus am i amjed mat g John pahl wako am hugkam mat im hu hih thahm kahchim ch ed.” Neh, bash kaij g Peter ch am i ha'asa neo. 23 Tsh am hahawa gohk i ha wuwhas. K hema hab chehgig ihtham Mattias. K hema d ep Joseph Justus ch hab ep e chechcheg Barsabas. 24 Tsh am hahawa e ho'ige'ithahun k hab kaij, “Ge t-kownalig, t am i thagito g Judas ihtha chikpan k atki am ai g s-ko'ok e-namkithadag. Kuch ahchim pi sha'i mahch mo has e tatatk g hemajkam. Pt heg hekaj am wo si i t-tashogi mapt hedai am wo i ha kei ihtham gohk 25 mat d wo si m-kehshak ch am wo i ahgahi g ha'ichu m-ahga am kehkud ed g Judas.” 26 Tsh am hahawa i ha tashogi mat d wo Mattiask ch d wo si kehshajk.

Acts 2

1 Tsh am i e ai matsh g Tutuligo hemajkam wo e nam k am hab wo juh g hehgchulitha Jiosh wui heg hekaj ha'ichu e-bahijitha. Kutsh am wehs i e hemapai hema kih ch ed hegam mash ab ihm g Jesus. 2 Tsh haha wabsh ab thahm kahchim t amjed ha'ichu hab kaitha mo g s-gewk hewel wabsh shashawuk heg eda kih. 3 Sh hahawa ha'ichu ep neith mash hab mahs mo g mei. Tsh ith ab a'ai i e gantad k ab i thahiwuhi wehsijj ha ab. 4 Kutsh g Hekia S-ap'ekam Gewkthag ab i ha mah g si ge'e gewkthag. Tsh hekaj haha wabsh nahnko mahs ne'okikaj neneo matsh eda chum pi hebai mai. 5 Sh eda mu'ijj ab thadha Jerusalem t ab hegam mash d Tutuligo ch ab a'ai i hihi mu'ikpa jejewed amjed matsh ab wo ihm g Jiosh. 6 Tsh an wehsko i kaitha hegai mash hab kaithag mo g s-gewk hewel. Kutsh ihtham am i kah k am e chehm mash hebai i kaithag. Sh ihtham Jesus ihmtham haha wabsh am neneok g ha-ne'okikaj mash hedai haschu i ne'okikaj neok. 7 Kutsh si e totoths ihtham k hab kaij, “Hab kaitham neneok ch eda d wabsh Galilee t am o'othham. 8 Kus has masma hab chu'ig mach wehsijj s-ha amichuth g hehe'ejel t-ne'okikaj? 9 Kuch eda mu'ikpa jejewed amjed, ha'i ab Parthia t amjed ch ha'i ab Media t amjed ch ab amjed g Elam ch Mesopotamia ch Judea ch Cappadocia ch Pontus ch Asia 10 ch Phrygia ch Pamphylia ch Egypt ch Crete ch Arabia ch gm hu Cyrene kihhim wehgaj am Libya jewed ch ed ch ab Rome kihhim t amjed. K ia ha'i t-wehmaj g gawul mahs hemajkam mat ab i wahp t-himthag ed. Kuch wehsijj kah g hehe'ejel t-ne'okikaj heg amjed mat haschu si s-hasigam hab juh g Jiosh. 12 A t haschu ahgk hab ha'ichu e juh?” Bash kaij nash pi si has elith. 13 Sh wabshaba ha'ijj wabsh nahnko ha ahg ch hab kaij, “Tki wabsh nawkk ihtham.” 14 Tsh ab hahawa i gegokiwua g Jesus chuhchai. Sh g Peter am amog, “Ni-hajuni ch ahpim mam ia wabsh sha kih Jerusalem t am, ab g wo si i ni-kaiham k am wo i oithahi mant haschu wo i em-ahgi. 15 Pi ach d nawkkoi. 16 Ihtha mat haschu has i e juh o d hegai matsh g Joelbad an o'oha. Heg ash wa d Jiosh ha'ichu i tashogiththam ch an o'oha hab masma: 17 Bo kaij g Jiosh: T ab wo i e aihi g si oithchkam tash. Kunt wo cheha g Hekia S-ap'ekam Gewkthag mat am wo ha wehmajk g hemajkam ch ab wo ha mahkath g si ge'e i wehmtadag. Kut g em-wihpiopga ch g em-chetchaga wo ah g ha'ichu ni-ahga. Nt wo i ha tashogi g kekel am ha-chehchki ed mat haschu has wo e juh imhab i thahm. T ith hab wa'ap am wo e chehgi ha-nena ed g wechij o'othham. 18 Ab ant wehs wo ha mah g ni-pionag g Hekia S-ap'ekam Gewkthag, chum hems g u'uwi ni-pionag, mat am wo i ahgahi g ha'ichu ni-ahga. 19 Nt wo ha chehgi g s-hasigam ha'ichu gn hu uhgk ha thahm ch an jewed thahm. Eh'ed at wo e iawua. T g mei ch kuhbs wo i wuhsh. 20 T g tash pi wo ton k g mashath wo ge wegiumih hab masma mo g eh'ed. K ith wehs hab d ahga mo e aihim hegai si ge'e tash mant heg eda wo ha lothai g hemajkam. 21 Kut hedai ab wo i gei ni-wui k wo e tho'ibia ab amjed g pi ap e-namkithadag. Neh, bash kaij g Jiosh. 22 “Kumt ab wo i ni-kaiha, ni-hajuni. Ihtha Jesus mo ab d kihkam Nazareth t ab at hab juh g s-hasigam ha'ichu mat pi hedai hejel wo sha'i e nako mat hab wo juh. T ith hekaj am i t-tashogi g Jiosh mo ith am d si Kehshaj. Kum ihtha am wa hejel s-mahch heg hekaj mat wehs am hab e juh em-shahgith. 23 Jiosh atsh heki hu i ap'ech matsh has masma wo e muhkith g alithaj k heg hekaj am i thagito em-wui. Kumt an be k ha mah hegam mo pi mahch g Jiosh chehanig nam pi s-mu'amk. Kut ihtham mua ab kots t ab naggiak. 24 T wabshaba g Jiosh ab i wuhshath ab amjed g s-ko'ok muhkig nat pi am hab wa'ap i ap'ech mat ep wo e chegito. Kut hemho wa am hab wo e juh. 25 “T an wa o'oha g t-kownaligbad David mat hab wo chei g Jiosh si Kehsha: Chum ap hekith ni-wehmaj, ni-Jioshga! Ni heg hekaj pi sha'i ha'ichukaj ni-kudut 26 ch wabsh si s-ap ni-tahtk ch s-hehgigam ha'ichu ahg. Ab o e aihim mant wo muh. Nt wabshaba wabsh si s-ap ni-tahtk ch wo m-nenida. 27 Pi apt am hu wo sha'i ni-thagito amai mo hebai ha'ichug g ko'i k pi wo sha'i hiwigi mas wo padt g ni-chuhkug nani pi d hekia s-ap'ekam m-alithag. 28 Am apt i ni-chehgi mant has masma uhpam ep wo i wuhsh ab muhkig t amjed. Chum apt hekith wo ni-wehmajk. Nt heg hekaj wo si s-hehgigkath. 29 “Neh, ni-naipijju, batki masma an o'oha g Davidbad. K wabshaba si tasho mo pi hejel hab e ahg mat pi wo padt no pi g oh'oj am wabsh kia wehch hiha'inij ed ith i tashkaj. 30 Davidbad ash d Jiosh ha'ichu i tashogiththam ch heg hab ahg Jiosh si Kehsha matsh pi wo padt k wo uhpam i wuhsh ab muhkig amjed. Jiosh ash wa heki hu ahgith g Davidbad mat am wo hema i kei g amjedkam am kehkud ed mat d wo ge'e kownalk. 31 Davidbad oki s-mahch ihtha ch heg hab ahg ch hab kaij mat pi am hu wo sha'i thagito amai mo hebai ha'ichug g ko'i k pi wo sha'i hiwigi mat wo padt g chuhkugaj. 32 Pegih, k d hegai Jesus mat g Jiosh ab i wamigi muhkig amjed. Kuch ahchim g t-wuhpuikaj neith mach haschu ia em-ahgith. 33 Jiosh at am i wahkith k an kei si e-hugith an. Kut ab bei g ap'ethag k cheha g Hekia S-ap'ekam Gewkthag mat ab t-wui wo hih. Heki ash hu hab kaij g Jiosh mat hab wo e juh. K d ihtha mam am neith ch kah hemuch mat hab t-juni. 34 Pi o hejel hab e ahg g Davidbad ch wabshaba heg hab ahg Jiosh si Kehsha mat pi wo padt k wo uhpam hih am thahm kahchim wui nat pi an ep o'oha: Jiosh o hab kaij ab ge ni-Kownalig wui: In g thahiwua si ni-hugith an 35 k ab wo ai mant wo ha gewito g m-obga. 36 “Pegih, ihtha Jesus mamt ab naggia kots t ab o d Jiosh si Kehsha ch d wo t-tho'ibiakam kownalk. Kutt ith wo chum si s-ap s-mahchk wehsijj ahchim Tutuligo hemajkam.” Neh, bash kaij g Peter. 37 Kush si s-ko'okam pi ap e tahtk g hemajkam am i kaiok ch hab kaij ab ha wui hegam Peter, “Ih, tt has wo t-juh, t-naipijju?” 38 Sh hab kaij g Peter ab ha wui, “Hehe'ejel g gm hu wo s-ohhoth g pi ap e-chegitoi k wo e pahl-wapko ab chehchegch g Jesus Christ. Kut gm hu hab wo i juh g Jiosh g pi ap em-chu'ichig. T amjed wo si em-wehmajkath g Hekia S-ap'ekam Gewkthag 39 nash pi g Jiosh hab kaij mat ab wehsijj wo ha mah g Hekia S-ap'ekam Gewkthag hegam mat ab wo i ha wai e wui.” 40 Sh tash am neok g Peter ch am chum ha ahgith ch hab kaij, “Am g wo e tho'ibia. Si s-ko'ok namkithadag o ab ha aihim hegam t-wehm hemajkam mat pi gm hu wo ohhoth g pi ap e-chu'ichig.” 41 Kutsh waik mihl ab i s-wohoch g ha'ichu ahgaj heg i tashkaj k e pahl-wapkon k ab i e hemakoj ha wehm. 42 Sh g Jesus chuhchai am hahawa ha mashcham. Kush am ha wehm e mihshmath ch e ho'ige'ithahun ch ha wehm huhuga g chemait. 43 Kush mu'i ha'ichu s-hasigam hab junihim ihtham Jesus chuhchai g Jiosh gewkthagkaj. Tsh heg hekaj mu'ijj ehp ab si has i el mat haschu hab juh g Jiosh. 44 Sh wehsijj g Jesus ihmtham ab si e hajunit ch wehs ha'ichu ab i a'ai e mahk mash hedai haschu i pi edgith, 45 chum as hems wo gagda g ha'ichu e-eniga mat heg hekaj lial am wo i ha wehmt hegam mo ha'ichu i pi edgith. 46 Sh wehs tashkaj am e nanmek ge'e cheopi ch ed ch am ep e wehm e gegosith a'ai e-kihki ed si s-ap e tatatk ch ab wabsh i e sho'igchuthch Jiosh wui 47 ch ab si hehgchulith g Jiosh. Kush wehsijj g hemajkam si s-ha ho'ige'elith. Sh g Jiosh ab i ha wahpkith ha shahgith wehs tash ab hegam mat hab wa'ap e tho'ibia.

Acts 3

1 Kush am wa'i hebai amjed, tsh am thatha g Peter g John wehm ge'e cheopi t am. Kush d i waik ohla gm hu i juhk mo eda e a'ahe mat wo e ho'ige'ithahu. 2 Sh ab hema thaha g sho'igkam hemajkam heg bahsho kolhai kihjeg mash hab e a'aga Si S-kehg Kihjeg. Kush ihtha o'othham ga hu e-alijk amjed pi himthag. Kumsh wehs tashkaj am wabsh i bebhe ch ab thathsha ab kolhai kihjego. Kush wabsh ha'ichu ha tahni hegam mo am thaiw. 3 Tsh eda am wo i wahp ihtham Peter ch John. Sh ab ha'ichu chum ha tahni. 4 Tsh ab si i nei ihtham Peter k hab kaij, “Ab g si i t-neith.” 5 Kutsh wa woho ab si i ha nei hab e ahgch mat wo ha'ichu mah. 6 Sh oi wa hab wabsh kaij g Peter, “Neh, ni-nawoj, pi ani ha lialiga ch wabshaba ha'ichu wo m-mah mat heg ba'ich wo i m-wehmt. K d ihtha mant hab wo m-ah mapt ab wo i hiw g Jesus Christ k wo kekiwua k wo hih.” 7 Bash kaij ch ab hahawa bei g nowij k ab i wuhshath. Kutsh am wa i hekaj ab gewpka g kakhioj. 8 Tsh am si uhgk tha'a k kekiwua k am wa i hekaj s-ap hih. Kutsh ihtham Peter im hu i wahp cheopi kolhai ch ed. Tsh heg ha wehm i wah k si chehk thath'ehim ch ab si hehgchulith g Jiosh. 9 Kutsh si has i el g hemajkam am i neithok mo d hegai pi himithkam mo ab thahiwup kolhai kihjego. 11 Batsh e juh ihtha anai mash hab e a'aga Solomonbad Watto. Kush ihtha pi himithkam gn hu wabsh i si e u'ukch ab ha ab g Peter ch John mat pi wo i e gawulkai ab ha amjed. Tsh ab hahawa a'aijed i wohp g hemajkam k gn hu ha biha si has i elithk mat e thoaj. 12 Tsh am wabsh ap'et g Peter mat am ha mihshmath k hab kaij: “Ni-wehm o'othham, pi g am wo si e totothsith. Pi att g hejel t-gewpkthagkaj thoaj ihtha o'othham, 13 Jiosh si Kehsha at hab t-juni nach pi ab hiwig. K d hegai Jesus mam ahpim s-mu'amk ch ab mah g kownal Pilate. K eda g Jiosh d pionag g Jesus ch d hekia s-ap'ekam ch pi ha chu'ichig. T ha chum wo thagito g Pilate. M wabshaba ahpim hab ahg mat wo mu'a k heg wo thagito mo d ha mu'akam. K heg hekaj d em-chu'ichig mat e muhkith. K eda d hegai mo ab t-makiog g pi ha huhugetham thoakag. T wabshaba g Jiosh ab si ha'ichuchuth k uhpam i wuhshath ab amjed g muhkig k am i bei thahm kahchim wui. Hegam t-shohshonbad mash d Abraham ch Isaac ch Jacob ash ab si has i elith g Jiosh. Kum eda ab wui gegok g Jiosh si Kehsha. 17 “Pegih, ni-wepnag, mtp hems heg hekaj s-mu'am g Jesus mam pi mahch mo heg am d si Kehshaj g Jiosh mat wo t-tho'ibia. 18 T eda heki hu wa'i amjed an o'oha g kelibad Jiosh ha'ichu i tashogiththam mat g si Kehshaj wo e sho'igch. T ithani woho am hab e juh. 19 Pegih, oi g gm hu wo s-ohhoth g pi ap e-chegitoi k ab wo i e nohnogi Jiosh wui. T heg wo s-em-ho'ige'ith k gm hu hab wo i juh g pi ap em-chu'ichig k ab wo si i wechijith g em-thothakag. 20 T ab em-wui wo i hih g si Kehshaj Jesus. 21 K hab mahs mat an wo ha'ichugk ihtha Jesus thahm kahchim ch ed am hugkam mat hab wo e juh hegai mo haschu i t-tashogith g kekelibad Jiosh ha'ichu i tashogiththam. 22 “Neh, bash wa kaij g Mosesbad am t-shohshon ha wui: Em-kownalig Jiosh at ab wo hema i kei g ha'ichu i tashogiththam hab masma mat ahni am i ni-kei. Kut ihtha d wo em-wepo o'othhamk. Wehs ha'ichu amt ab wo kaiha mat haschu ab wo i em-ahgi. 23 Kut wo e ko'ij matp hedai pi ab hu wo kaihamath. Neh, bash kaij g Mosesbad. 24 K wehsijj ahgachug g kekelibad Jiosh ha'ichu i tashogiththam hegai mo haschu am hab i e junihim ithani. Samuelbad ash d hema hegam. 25 Jiosh ash wa am ha ahgith g t-shohshonbad matsh haschu hab wo t-juni. K heg d ep t-wuikam ahchim mach d ha amjedkam. “Bash kaij g Jiosh am wui g Abrahambad: Am ant wo hema i kei g m-amjedkam mant heg hekaj ab wo i s-ha ho'ige'el g wehs nahnko mahs hemajkam ith thahm jewed. 26 “Neh, t wa woho hab e juh mat am i kei g e-alithag Jesus. T heg wehpeg ab i s-t-ho'ige'el ahchim Tutuligo k ab t-wui him k ab i t-mah g ap'ethag matt ab wo i t-nohnogi ab amjed g pi ap'ekam.”

Acts 4

1 Sh am wabsh kia ha mihshmath g Peter ch John. Kutsh am haha wabsh ha'i thatha g papal ch ha-ge'ejig g ge'e cheopi nuhkuththam ch ha'i ehp mash am oith g Sajusi himthag. 2 Sh eda wa ihtham Peter ch John am ha mashcham g hemajkam mat ab i wuhsh g Jesus e-muhkig amjed. Sh ihtham Sajusi pi hohho'ith nash pi pi wohochuth mat ep wo e chegito g ko'i. 3 Sh eda e aihim mat wo s-chukk. T heg hekaj gd hu ha kuh mat wo ha lothai ba'ich tash. 4 Tsh wabshaba mu'ijj hegam matsh kah g Peter ch John ab i s-wohoch g Jiosh ha'ichu ahga. Tsh am i mu'itha hegam mash ab ihm g Jesus. Kush hegam mash d chechoj d hahawa hetasp mihl. 5 Sh am ba'ich d i tash. Tsh am e hemapai g hemajkam ha wanimedtham ch ge'eged ch chehanig ha mashchamtham. 6 Kush am ha wehmaj hegai uhgchu pahl mash hab chehgig Annas. Sh g hajunij am hab wa'ap ha'ichug mash ha'i d Caiaphas ch John ch Alexander. 7 Tsh ab hahawa i ha wuwhas ihtham Peter kukpaikud amjed k ga hu i ha chuhcha k ab ha kakke, “Shahchu am e wepogith ch hab ha'ichu wua? Thohm hab elith mamt heg ab bei g e-gewkthag k thoaj ihtha pi himithkam?” 8 Tsh ab ba'ich i gewkai g Peter g Hekia S-ap'ekam Gewkthag. Sh hab kaij: “Bamki e elith ahpim t-wanimedtham ch ge'eged 9 matt hemho wo wa bei g ap'ethag matt hab wo juh g s-ap'ekam. 10 Pegih, nt wo em-ahgi mat g Jesus Christ ab i t-mah hegai gewkthag matt hekaj thoaj ihtha o'othham. Ahpim amt hab juh hegai Jesus Christ mat ab e naggia kots t ab. T wabshaba g Jiosh ab uhpam i wuhshath muhkig amjed. 11 Ith o hab ahg Jesus g kelibad Jiosh ha'ichu i tashogiththam ch an o'oha ihtha ha'ichu wepogitha mo hab chu'ig: Kihttham at wo hema chum s-ohhotham g hothai. T wabshaba ith d wo si s-has ha'ichu hothaik am ha-kihta wehhejed. 12 Hegai wa'i Jesus at wo ha tho'ibia g hemajkam. Tho Jiosh si Kehsha mat ab wo t-mah g pi ha huhugetham thoakag. Kut pi hedai ep hab wo sha'i juh g tho'ibiathag.” 13 Sh si s-e mahch ch neneok ihtham Peter. Tsh hekaj si has i ha el ihtham haha'ichu, wahm mat am i s-mai am i ha kahkch mo d wabsh si o'othham ch pi hasko sha'i uhgk e mashchamahim. Tsh am hahawa i amich moki an wehmajkahim g Jesus. 14 Kush am ha wehm kehk hegai mamt thoaj. Sh pi e nakog hegam haha'ichu mas has wo chei nash pi g e-wuhpuikaj neith mat woho e thoaj hegai. 15 Kumtsh gm hu hahawa i ha wuwhas hegam Peter matsh g haha'ichu am wo i a'aga. 16 Kush hab kaij, “Shahtt wo ha juh. Wehsijj o s-mahch g Jerusalem t am kihkam mat thoaj g pi himithkam. K ith d si s-hasig ha'ichu. Kutt pi wo sha'i t-nako machs hab wo chei mas pi woho hab juh.” 17 Sh hab hahawa ep kaij, “Matt wo keshwua ihtha ha-ahga mat pi hekith am hu ep wo sha'i a'agath ihtha Jesus am hema i wui.” 18 Kumtsh ab hahawa ep i ha wahpki. Sh hab ha ahg, “Chum as has wo chu'igk ha'ichu, mt pi am hu wo sha'i a'agath ihtha Jesus.” 19 Sh hab hahawa si kaij hegam Peter, “Am g wo i a'amichuth machs ahpim ab wo em-wohoch aha natt g Jiosh. 20 Tt ahchim hi hemho am wo wa ahgahith mat haschu i si s-kehg hab juh k haschu i si s-kehg hab kaij g Jesus mach si neith ch kah.” 21 Kush wa eda hegai pi himithkam i ba'iwchkim g gi'ikko wehst-mahm a'ahithag. Sh g hemajkam wehs ab si i hehgchulith g Jiosh mat thoaj. Kutsh heg hekaj pi sha'i e nako g ha wanimedtham mas has masma s-ko'okam wo ha namkith k am wabsh si ha ebkiod k chum ha keshwua k hahawa ha thagito. 23 Tsh am wa i hekaj gd hu uhpam thatha e-naipijju ha wui k am ha ahgith mo has i ha ahg g u'ugchu papal ch ge'eged. 24 Tsh am i kaiok am ha hekaj e ho'ige'ithahun k hab kaij, “T-kownalig Jiosh, wehs ap u'ukch g gewkthag ch nahtokch g thahm kahchim ch jewed kahchim ch ge kahchki ch wehs ha'ichu mo haschu am i ha eda. 25 Ab aptki cheha g Hekia S-ap'ekam Gewkthag mat wo amichuthach g m-pionagbad David. K hekaj hab kaij: Sho'o wa'i si s-babga g nahnko thakam hemajkam ch am chum e nakog mat am hab wo juh hegai mo g Jiosh pi ha hiwgith. 26 T am i e nako g kokownal k am i e wehmt mat ab wui wo gegokiwua g Jiosh si Kehsha. 27 “Neh, Jiosh t-ohg, t wa woho am e hemapai g t-wehm o'othham ha wehm g gawul mahs hemajkam ch hegam kokownal mo d Herod ch Pilate. Wehsijj at ab wui gegokiwua g hekia s-ap'ekam m-Kehsha, Jesus. 28 Heki apt hu am i ap'ech mapt wo ha hiwigi mat wo mua g si m-Kehsha. Kut ihtham mat ab chum m-wui gegokiwua hab wabsh juh mapt haschu heki hu i ap'ech. 29 Pegih, t-ohg Jiosh, am g i ha neith mo ab si t-ebkioth k ab wo i t-mah g gewkthag matt s-gewkam wo a'agath g ha'ichu m-ahga ch wo ha thothaj g kok'otham ch si s-hasigam ha'ichu hab wo juh g gewkthajkaj g hekia s-ap'ekam m-Kehsha, Jesus.” 31 Tsh am i ha'asa e ho'ige'ithahu. Tsh g Hekia S-ap'ekam Gewkthag am si u'ugij hegai kih mo am e hemapathch k ab si i ha mah g gewkthag. Tsh am hahawa ba'ich i si s-gewkam ah g Jiosh ha'ichu ahga. 32 Wehsijj ash ab a'ai si e tatchua g Jesus ihmtham ch ab si i hemakoch g e-chegitoi k pi hedai sha'i s-tha'a g ha'ichu e-eniga ab a'ai e wui. 33 Sh ihtham Jesus chuhchai si s-gewkam am ahgachug mat uhpam i wuhsh g Jesus muhkig t amjed k d wehs ha-kownalig. Kush g Jiosh am si i ha wehmt. 34 Sh ha'i am ha gagda g e-o'oithag ch e-kihki ch ab i u'u g lial 35 ch ab ha mamka g Jesus chuhchai mash hekith i e tatchua. Sh am hahawa a'ai ha mamka hegam mash pi ha'ichu edgith. Sh hekaj pi hedai ha'ichu pi edgith. 36 Sh hema d Joseph ch ab Cyprus jewed t ab d kihkam ch d chum papal ha wehm chikpantham nash pi ab d Levibad amjedkam. Sh ith hab ep chechcheg g Jesus chuhchai Barnabas mo hab d ahga I ha Gewkemhuntham. 37 Ith atsh gagda g e-oithag k ab i ui g namkigaj k wehs ha mah g Jesus chuhchai.

Acts 5

1 Sh am hema d Jesus ihmtham ch hab chehgig Ananias. Kush g wehmaj kihkam hab chehgig Sapphira ch hab wa'ap d Jesus ihmtham. Kutsh ihtha Ananias epai gagda g ha'ichu e-eniga 2 k hab masma hab chum e juh mat wehs ha mah g namkigaj g Jesus chuhchai k wabshaba gd hu ha'i si toa e-wohshag ed. 3 Sh hab kaij g Peter ab wui, “Shahchu apt ahgk hiwigi g Jiawul mat am pad ha'ichu hab juh m-ihbthag ed. Pt heg hekaj iattogi g Hekia S-ap'ekam Gewkthag mapt heg wepogi mo ith d wehs g ha'ichu m-eniga namkig. 4 Hegai ha'ichu m-eniga o d m-eniga mapt koi gagda. Pt am i gagda. K hegai namkigaj d m-lialiga. Pt eda hab juh ihtha si ge'e pi ap'ekam. Pi apt ahchim wa'i chum t-iattogi mach d wabsh o'othham. Jiosh apt ep chum iattogi.” 5 T am wabsh i chum kaiok ihtha g Ananias k muhk k i gei. 6 Tsh ab hahawa i wahp g wechij o'othham k am i ap'ech g chuhkugaj k gd hu cheh. 7 Sh am ep s-mahch g wehmaj kihkam g muhki matsh hab masma wo chum ha iattogi. Sh am d i waik ohla. Kutsh eda pi koi kah mat has e juh k hekaj am jiwia mo am thaha g Peter. 8 Kush heg ab wui hab kaij, “Namt ha'akia ui g lial mamt gagda g ha'ichu e-eniga?” Sh hab kaij, “Heu'u, ha'akia att ui.” 9 Sh hab kaij g Peter, “Ms haschu ahgk hig ahpi g e-wehm kihkam wehm hab chum i e taht mamt wabsh wo pi'ich g Hekia S-ap'ekam Gewkthag? Thatha at hegam mat gd hu cheh g m-wehm kihkam. Pegih, t hab wa'ap masma hab wo m-juh.” 10 Tsh am ha hekaj muhk k i gei wecho. Tsh ab i wahp g wechij o'othham k am nei matki muh k gm hu i be k gd hu cheh hugithaj an g wehmaj kihkam. 11 Tsh wehsijj ab si s-ehbeni g Jesus ihmtham ch hegam ehp mo hedai i kah ihtha. 12 Kush s-hasig ha'ichu s-ta neithamam hab junihim g Jesus chuhchai am ha shahgith g hemajkam. Sh wehsijj si s-ap e hehemapath hegam Jesus ihmtham heg wecho Solomonbad watto. 13 Sh g hemajkam ab si has ha elith ch wabshaba si s-e gihug mat ab wo i ha wehmt. 14 Tsh oi wa mu'i ab i s-wohoch g ha'ichu ha-ahga ab amjed g Jesus k ab i ha wehmt. Ha'i d chechoj ch ha'i d u'uwi. 15 Kumtsh am i ha wuwhas g kok'otham am i neithok mo haschu has junihim g Jesus chuhchai k an kahya oithk ha wahpakusch hab elithch mat chum hems g Peter ehkathag ab hab wo e juh ha ab mat wo e thothaj. 16 Mu'ijj atsh ab a'aijed i hihi Jerusalem wui ab i ha u'uk g e-kok'othamga ch hegam mo g jijawul an ha u'ukch. Kutsh wehs ha thothaj. 17 Tsh g uhgchu pahl ch hegam mash hab wa'ap am oith g Sajusi himthag si s-ko'okam s-ha hehgam g Jesus chuhchai 18 k am i ha cheha g ge'e cheopi nuhkuththam mat wo ha kuh. Tsh wa woho am ha kuh. 19 Tsh wabshaba heg i s-chuhugam ab g anghil am si kuhpi'o g kukpaikud k ab i ha wuwhas g Jesus chuhchai k hab ha ahg, 20 “Am g wo uhpam hihim k am wo i gegokiwua ge'e cheopi ch ed k wo ha ahgi g hemajkam mat has masma wo bei ihtha pi ha huhugetham thoakag.” 21 Kutsh ab wohog elith k am hihim k am i wahp ge'e cheopi ch ed mat wabsh i chum mahsi k am ha hekaj i ha mashcha g hemajkam. Tsh eda heg wa'i si'alim g uhgchu pahl ch hegam Sajusi am i ha hemapai g e jehnigiththam. Sh ihtham pi mahch mat haschu has e juh ch atsh am ha cheha g nuhkuththam mat ab wo i ha ui g ha-lilsoga. 22 Kutsh am chum hihi g ge'e cheopi nuhkuththam mat wo ha ui. Kush pi am hu ha'ichug. Tsh ab wabsh uhpam hihim k am ha ahgith ch hab kaij, 23 “M att thatha kukpaikud am k am chum nei. K ab wabsh kia yahwidag. K g lilso ha nuhkuththam ab ep gegok kihjeg t ab. Tt wabshaba am i chum kuhpi'o g kihjeg. K pi am hu hedai ha'ichug.” 24 Tsh am i ha kaiok am wabsh i pi amich mas hebai has e juh g ha-lilsoga. 25 Tsh am hahawa hema i wahk k hab kaij, “Neh'e! Ithani o gd hu ha mashcham g hemajkam ge'e cheopi ch ed hegam mamt wa ha kuh.” 26 Tsh am hahawa hihi g ge'e cheopi nuhkuththam k ab uhpam wabsh s-ap i ha ui nat pi am hu wo ha ma'ichshul g hemajkam 27 k am ha u'apa ha wui g e jehnigiththam. Sh hab ha ahg g uhgchu pahl, 28 “Chum ach s-gewkam pi em-hiwgith mams an hu wo a'agath hegai Jesusbad. T eda g em-mashchamadag ab amjed heki hu wehsko chehmo g Jerusalem. Kum ahpim ab chum t-abchuth g muhkigaj.” 29 Sh hab kaij hegam Peter, “K wabshaba g Jiosh am t-ahgith matt am wo wa ahgahith ihtha mach haschu i si t-wuhpuikaj neith. Kutt hemho wo wa i hehgch g Jiosh, pi wabsh g o'othham. Ahpim amt bei g Jesus k hab juh mat ab e naggia kots t ab k e muhkith. T wabshaba g Jiosh ab uhpam i wuhshath muhkig amjed k am i wahki thahm kahchim ch ed k an i kei si e-hugith an k ab i mah g gewkthag mat wo t-tho'ibia k wo t-wanimedath. Kut heg ab i t-mah g ap'ethag ahchim Tutuligo hemajkam matt gm hu wo s-ohhoth g pi ap t-chegitoi. T hekaj g Jiosh gm hu hab wo i juh g pi ap t-chu'ichig. Jiosh at ab cheha g Hekia S-ap'ekam Gewkthag mat wehs wo t-wehmajk ahchim mach ab s-wohog elith ch am t-gahi wuhshanim wo wohokamch g Jesus.” Neh, bash kaij g Peter. 33 Tsh wabsh woho'i babgat hegam e jehnigiththam k wabsh chum s-ha kokthaimk. 34 Sh wabshaba am tha hegai mash d Gamaliel ch d chehanig ha mashchamtham ch am oith g Palasi himthag. Sh wehsijj ab si has elith g hemajkam. Kutsh am i kekiwua k am ha ahgi mat gm hu wo sha'i i ha wuwhas g e-lilsoga. Tsh wa woho hab ha juh. 35 Sh hab hahawa kaij ihtha ab ha wui g e jehnigiththam, “Ni-hajuni, am g wo s-e nen'oithk mamt has wo ha juh ihtham o'othham. 36 Hekith o hu i mat am hema i e maskogith k hab chehgig Theudas ch hab kaij mo d ge ha'ichu s-mahchim. Kut am hu i gi'ik siant chechoj ab i wehmt. T wabshaba e muhkith ihtha. T wehsijj e gantad hegam mat wa ab wehmt. T am wa'i huhug g ahgaj. 37 T amjed am hema ep i e maskogi eda mat g hemajkam e kuint k hab chehgig Judas ch am Galilee t am d o'othham. T ihtha hab wa'ap mu'i o'othham am i oi. T wabshaba hab wa'ap e muhkith hegai Judas. T hab wa'ap a'ai e gantad hegam mat wa ab wehmt. 38 “Pegih, k hemuch hab wa mahs ha'ichu. Pi g am hu has wo sha'i ha juhni ihtham o'othham. Ha g wo thagito. Hemu at wo huhug ihtha ha'ichu hab ha-juni matp d wabsh wo o'othham hab ha-elithak. Tp d wo sha Jiosh ha'ichu hab junik, mt pi wo sha'i e nako mams wo keshwua. 39 Mtp hems heg wabsh wo e wepogi mam g Jiosh wabsh cheggia.” Tsh oi wa ab i s-wohog el g Gamaliel ihtham e jehnigiththam 40 k hab ha ahg g ge'e cheopi nuhkuththam mat am wo i ha wahpki g lilso k wo ha gewitta. Tsh wa woho hab e juh. Kutsh ab ep si ha ahgi mat pi am hu wo sha'i a'agath g Jesus k hahawa ha thagito. 41 Kush wabsh si s-hehgig ihtham Jesus chuhchai am i wuwhak natsh pi ab si has i ha el g Jiosh k ab i ha mah g ap'ethag matsh si e sho'igch wehhejed g Jesus. 42 Pi atsh sha'i ha'asa a'aga g Jesus k wabshaba wehs tashkaj am wabsh i ha mashcham g hemajkam ge'e cheopi ch ed ch am ha-kihki ed mo g Jesus d Jiosh si Kehsha.

Acts 6

1 Kush am i mu'ithahim hegam mash am oith g Jesus himthag. Sh am ha'i neneok g Greek hemajkam ha-ne'okikaj nash pi tash gm hu kihkahim ha-jewedga ed. Kush ihtham hab kaij mash pi ap ha thagio'ith hegam hehe'ejel wi'ikam u'uwi mash d ha-hajuni. Kush heg hekaj am a'ai pi e ap'et ihtham Greek neneoktham ha wehm hegam mo g hejel e-ne'okikaj neneok. 2 Tsh am i kah g Jesus chuhchai k am wehs i ha hemapath k hab kaij, “T-wepnag, pi o ap'e machs wabsh wo thagito g mihshmetha ab amjed g Jiosh k im hu g lial wo hudawogath. 3 Ab oki ha'i ep em-mahkch g Jiosh g gewkthag ch amichuthadag mamt am hab wo junihith ihtha chikpan. Pegih, mt am wewa'ak wo i ha gawulkai hegam mam s-ha mahch mo woho hab masma. Kutt ihtham am wo i ha chuhcha mat wo nuhkuth ihtha hab mahs ha'ichu. 4 Tt ahchim Jesus chuhchai am hab wo si i juh matt wo t-ho'ige'ithahunath ch wo si ha mihshmethath g hemajkam.” Neh, bash kaij. 5 Kumtsh ab si i s-hohho'i mo has kaij k am wewa'ak i ha chuhcha. Hema ihtham ash hab chehgig Steven ch ab si s-gewkam hiwig g Jesus. Sh g Hekia S-ap'ekam Gewkthag ab si mahkch g gewkthag. Kush hegam ha'i ehp hab chechgig Philip ch Prochorus ch Nicanor ch Timon ch Parmenas ch Nicolaus. Ihtha Nicolaus ash ab d amjedkam g Antiok kihhim ch d gawul mahs o'othham ch ab i s-wohoch g Tutuligo ha-himthag eda mat koi s-mai ab amjed g Jesus. 6 Tsh ihtham ab hahawa i ha ui g hemajkam ha wui g Jesus chuhchai. Kutsh ihtham am e ho'ige'ithahun k ab ha taht mat heg hekaj wo s-e mahchk mo d si ha-chuhchai. 7 Tsh am si i ge'etha g Jiosh ha'ichu ahga Jerusalem t am. Kutsh ba'ich i mu'itha hegam mash am oith g Jesus himthag. Tsh mu'ijj ab i s-wohoch hegam mo d papal Tutuligo ha-himthag ed. 8 Ab ash si s-ho'ige'ith g Jiosh g Steven ch ab si i mahkch g e-gewkthag. Kush s-hasigam ha'ichu hab wua. 9 Tsh wabshaba ha'i ab wui gegokiwua mash am hebai e wehm e mihshmath g Tuhligo e-himthag. Ha'i ihtham ash d neneholkahim Cyrene ch Alexandria kihhim t am. Tsh am ha'i i ha wehmt ab Cilicia jewed t amjed ch ha'i ab Asia jewed t amjed. Sh ihtham ab kam'on g Steven 10 Sh wabshaba g Hekia S-ap'ekam Gewkthag ab si mahkch g Steven g amichuthadag. Kutsh pi sha'i e nako hegam mas ab uhpam wo i nodagi g ne'okij. 11 k heg hekaj am hahawa ha'i ha namkith k am ha ahgith mat hab wo chei, “Kah ach ihtha mo si has ahg hegai mo ab t-chehani g Jiosh Mosesbad o'ohana ed.” 12 Kush wa woho hab kaij ihtham ch hekaj i ha kudu g hemajkam ch ge'eged ch chehanig ha mashchamtham. Tsh ihtham wabsh woho i babgat k am hihim k an bei g Steven k gd hu u'apa ha wui g e jehnigiththam. 13 Mtsh am hahawa ha'i i ha wahpki g o'othham matsh am ha'ichu wo ha iattogi ab amjed. Sh hab kaij ihtham, “Ihtha o'othham o chum hekith has ahg g hekia s-ap'ekam ge'e cheopi ch hegai mo ab t-chehani g Jiosh Mosesbad o'ohana ed. 14 Kah ach mo hab kaij mat hegai Jesusbad wo i wua g ge'e cheopi k wo gawul juh g t-himthag mach ga hu hebai amjed hab i junihim mat g Mosesbad an o'oha.” 15 Kush wehsijj ab si neith g Steven. Sh g wuhioshaj hab haha wabsh mahs matp hems g anghil wuhiosha nash pi si tonod.

Acts 7

1 Kush hab kaij g uhgchu pahl ab wui g Steven. “No am wa woho map hab junihim hegai mo haschu ab m-abchuth?” 2 Kush hab kaij g Steven: “Ni-ge'egedga ch ni-hajuni, ab g wo si i ni-kaiham. An o o'ohadag matsh g Jiosh ab wui e chehgi g t-shohshonbad Abraham. Kush eda am wabsh kia kih Mesopotamia jewed ch ed. 3 “Sh hab kaij g Jiosh ab wui: Ia g wo ha thagito g e-hajuni ch e-jewedga k ab wo hihi heg wui jewed mant am wo m-chehgi. 4 “Tsh wa woho am thagito g Mesopotamia jewed mash am kih g Caldea hemajkam k am chihpia Haran kihhim wui. Kutsh am i muh g Abrahambad ohgbad. Tsh ab hahawa ep cheha g Jiosh mat ia wo chihpia Canaan jewed wui. Kutsh ia i chiwia mach hemuch ia kih. 5 Tsh eda koi ab hu he'es sha'i mah ihtha jewed k wabshaba am hi wa ahgith mat wo mah. T d wo ha-enigak g amjedkamaj mat he'ekiajj ab wo i oi. Kush eda pi koi ha a'aliga g Abrahambad mash eda hab ahg g Jiosh. 6 “Kush hab kaij g Jiosh ab wui: M at hu wabsh heb hu jewed ch ed wo kihk g m-amjedkam ch d wabsh wo ha-pionagk. Kumt wo ha sho'igch gi'ik siant a'ahith ab. 7 Nt wabshaba wo ha kastigal hegam hemajkam mat an wo ha u'ukchith. T ab haha wo i wuwha heg amjed jewed k ab wo si has i ni-elith k wo ni-ihm iia. Neh, bash kaij g Jiosh 8 ch ab mah g Abrahambad hegai himthag mat am wa has masma wo ha o'oha an ha hikuchk g chechoj e-a'aliga. Tsh hab masma wo s-mahchk mash hab wa'ap d ha-wuikam hegai matsh g Jiosh am ahgi g Abrahambad. Tsh wa woho hab e juh g Abrahambad k an pahl hikuch g e-alithag Isaacbad mo d i gigi'ik tash amjed mat mahsi. Tsh g Isaacbad hab wa'ap juh g e-alithag Jacobbad. Tsh g Jacobbad hab wa'ap ha juh hegam gamai gohk e-a'alithag mach ab d ha amjedkam. 9 “Tsh ihtham wa s-hehgam g e-wehnag Josephbad k ab ha'i ha wui gagda mat d wo ha neholigak am Egypt jewed ch ed. Sh wabshaba g Jiosh am nuhkuth 10 ch ab s-ap i wuhshath wehs ha'ichu sho'igthaj amjed k ab i mah g si o'othhamthag ch amichuthadag. Tsh am i nei g ha-kownalig g Egypt t am hemajkam k am i uhgkajith k am kownalch am thahm g e-kownaltalig ch ha'ichu e-eniga. 11 “Tsh wa haha wabsh gei g bihugig k ha sho'igch g hemajkam wehsko Egypt jewed thahm ch iia Canaan jewed thahm. Tsh pi sha'i e amich hegam Abrahambad mat hebai wo bei g ha'ichu hugi. 12 Kush eda am s-ha'ichu hugig Egypt jewed ch ed. Kutsh am i kah g Jacobbad k am ha cheha g e-a'alithag matsh am wo hunio. Kutsh hab e juh. 13 “Tsh am ep i huhug g ha'ichu ha-hugi. Kutsh am ep hunio. Tsh g Josephbad am hahawa ha ahgi mo d ha-wehnag nash pi pi amichuth. Tsh g ha-kownalig g Egypt t am hemajkam ab s-ha mai g Josephbad hajuni. 14 Tsh g Josephbad am hahawa wai g e-ohgbad mat wehsijj ab wo i chihpia Egypt wui. Kush eda d wewa'akko gamai hetasp (75) hemajkam. 15 Tsh wa woho am i chihpia hegam Jacobbad Egypt wui k am kihkahim ch am koi. 16 Tsh am uhpam i e ui g ha-oh'o g Abrahambad ch Josephbad Shekem kihhim wui. Abrahambad atsh wa am he'es ha nolawt g jewed hegam mash d Hamor amjedkam matsh am wo e toa g ha-ko'ithag. 17 “Sh amjed mu'i a'ahithag wehgaj. Sh e aihim matsh am hab wo juh g Jiosh mash haschu i heki hu ahgith g Abrahambad. Tsh eda am i si mu'itha g t-shohshonbad amai Egypt ch ed. 18 Kutsh am hema i wuhsh g kownal mash pi sha'i mahch matsh wa has masma am si i ha wehmt g Josephbad amai Egypt ch ed. 19 Kush ihtha nahnko ha wua hegam t-shohshon ch ha sho'igchuth ch hab ha ahg mat gm hu wo ha shul g chu'uchum e-a'aliga hab ahgch mat wo koi. 20 Kutsh eda mahsi g Mosesbad k si s-kehg d ali. Kutsh am i nuhkuth g jehjij waik mashath ab 21 k gm hu hahawa i wuhshath. T g kownal uwi alithag am chehg k ab i bei hab masma mo d madaj. 22 Kumtsh wehs ha'ichu mashcha mo haschu d i si s-hasig ha'ichu am Egypt ch ed. Tsh ab si i mai ihtha wehs k d si s-has ha'ichu am heg eda mo haschu hab i kaij ch haschu hab i junihim. 23 “Batsh wa masma am i ge'etha g Mosesbad k am i ai g gi'ikko wehst-mahm (40) a'ahithag. Tsh am hu hebai hab i e ah mat am wo i ha chehgim g e-hahajuni. 24 Kush hema g Egypt t am o'othham am hema sho'igchuth g Tuhligo. Tsh g Mosesbad am i wehmt g e-hajuni k mua ihtha Egypt t am o'othham mat wo agwua 25 k hab e ahg mat g hajunij wo chum s-mahchk mat g Jiosh wo hekaj k wo ha tho'ibia. Sh wabshaba g hajunij pi hab masma hab elith ha'ichu. 26 Sh am ba'ich d i tash, sh am ha'i e cheggia g Tutuligo. Tsh am ha neith k chum s-ha tha'ith k hab kaij, ‘Kia, ahpim! Tham e-wepngam ch eda haschu ahgch e cheggia?’ 27 “Kut hegai mo ha cheggia ab si nu'ichkwua g Mosesbad k hab kaij: Shahchu ap ahgch hab chum e wua maps am t-thahm. Pi o ab hu sha'i m-ab maps ahpi am ha'ichu wo i ap'echuthath am t-shahgith. 28 Napt hab wa'ap wo chum ni-mua mapt wa hab juh g Egypt t am o'othham tako? 29 “Tsh am i kah g Mosesbad ihtha k ha hekaj gm hu i e mehkoth ab Egypt amjed k gm hu i jiwia mash am d Midian jewed. Sh am ha'i o'othhamag. Kutsh am ha hohnt k gohk chechoj a'alitht 30 “Sh am him k am d i gi'ikko wehst-mahm a'ahithag. Sh am hu hebai ha nuhkuth g kahwal g Mosesbad am miabithch hegai tho'ag mo hab e a'aga Sinai. Tsh ab wui haha wabsh hema i e chehgi g anghil hab masma mo am meihim g sha'i ch eda pi meitto. 31 Tsh ab i miabi g Mosesbad mat ab si s-ap wo i nei nash pi pi amichuth matsh wa pi sha'i meitto g sha'i. Sh g Jiosh ab wui hab kaij am gahi wuhshanim g anghil: 32 Ahni ani d Jiosh. K wa ab has ni-elith hegam m-shohshon mo d Abraham ch Isaac ch Jacob. Tsh hahawa si gigiwuk g Mosesbad k si s-ehbeni mat am wo i nei. 33 “Sh hab ep kaij g Jiosh ab wui: Ab g has i ni-elith k wuashulig g e-kaikia shuhshk nap pi ia kehk ni-wui. 34 S-mahch ani mam has i masma ha sho'igchuth g m-hajuni amai Egypt t am. Tho ni-hemajkamga. Kuni kah g ha-shoshaki ch heg hekaj am i ni-maskogi ab m-wui mapt ahpi wo ha tho'ibia. Pt oi am wo i e nako mapt am wo hih Egypt wui. Neh, bash kaij g Jiosh. 35 Kuni hab ep s-che'imk mo ihtha Mosesbad d hegai matsh wa g hajunij pi ab hu tatchua ch hab kaij: Shahchu ap ahgch hab chum e wua maps am t-thahm? Pi o ab hu sha'i m-ab maps ahpi am ha'ichu wo i ap'echuthath am t-shahgith. Tho wa ihtha Mosesbad matsh g Jiosh am i kei ha thahm g hajunij matsh wo ha wanimed k wo ha tho'ibia. Kutsh hegai anghil mash ab neok mei ch ed am u'apa g Jiosh ne'oki Mosesbad wui. 36 Kutsh g Mosesbad am uhpam hih Egypt wui k am hab juh g s-hasig ha'ichu chehgitha k am i ha wanim g e-hajuni mat ab i wuwha Egypt amjed. Kutsh wa am i e tahp hegai mash hab e a'aga Al S-wegi Kahchki. Tsh am gahi i shul ihtham Mosesbad k am chipiahim gi'ikko wehst-mahm ahithag oitham tohono jewed ch ed. “Sh g Mosesbad heg oitham s-hasigam ha'ichu am hab junihim 37 ch am ha ahgith ch hab kaij: Jiosh atsh am hema ep wo i kei g t-hajuni hab masma mat ahni am i ni-kei. Kut heg d ep wo Jiosh ha'ichu i tashogiththamk. Neh, bash kaij g Mosesbad. 38 Tsh g Jiosh ab mah g e-ne'oki tho'ag t ab am gahi wuhshanim g anghil. K d t-himthag ihtha ne'oki matsh ab bei. 39 Tsh pi oi jiwia g Mosesbad ab tho'ag t amjed. Tsh g t-shohshonbad pi ab hu wohog elith k im hu hab wabsh i s-junimk g Mosesbad ch uhpam s-hihimimk am Egypt wui 40 Sh g ha-uhgchu pahlig d Aaronbad. Sh ihtham ab wui hab kaij: Pi ach mahch mas has e juh ihtha Moses mat ab i t-wuwhas Egypt amjed. Am g wabsh ha'i ha nahto g jijosh mat hegam am wo t-wanimedath. 41 “Kush wa am hema wisilot g ohlakaj k ab wui iagchul heg wepogithch mo d ha-jioshga k am ep piast mat heg hekaj ab wo si i ha'ichuch hegai e-jioshta. 42 Kutsh heg hekaj im hu hab i e juh g Jiosh ab ha amjed k am wabsh ha hiwigi mat wabsh g hejel hab e-elitha am hab wo junihith. Kush wabsh g huhu'u ab ha ihm mat hab masma an o'oha g Jiosh ha'ichu i tashogiththam mash hab kaij g Jiosh: Ab ani ha chehani g Tutuligo hemajkam mat wo mum'a g e-shoshoiga k ab ni-wui wo iagchul am wehhejed g pi ap e-chu'ichig. K wabshaba pi woho ab hu ni-ihm mo eda am ha'ichug tohono jewed ch ed gi'ikko wehst-mahm ahithag oitham. 43 Tho hejel ha-nahtoi jijosh mo ab ha ihm. Bo ha a'aga Molok ch Rephan ch hab ha elith mo an kih huhu'u t an. Nt heg hekaj gm hu mehk wo em-shul Babylon jewed t am. Neh, bash kaij g Jiosh. 44 “Kuni hab ep s-che'imk mash hegam an u'ahim hegai cheopi mash heg hekaj am ha tashogith g Jiosh mash am ha wehmaj. Sh heg d wabsh hogi ch hab masma e nahto matsh wa g Jiosh am chehgi g Mosesbad. 45 Sh g ha-amjedkam an ep u'ahim hegai cheopi matsh hekith g Joshuabad am i e kei matsh wo i ha wanim. Kutsh g Jiosh ia i ha wahpki ith eda jewed k am ha wehhejed gm hu i ha wuwhas hegam nahnko mahs hemajkam mo ia d chum kihkam. Kush am ha'ichugkahim ihtha cheopi ch ab ai mash eda g Davidbad d ha-kownalig. 46 Sh ihtha Davidbad d si Jiosh tatchui ch ab ahgith mat wo hiwigi mat hema wo kihch. Tsh heg eda am hab wo e junihith g ho'ige'ithahuna Jiosh wui. 47 Kutsh g Jiosh hiwigi g alithaj Solomonbad. Tsh heg am i kei g kih am wehhejed g Jiosh. 48 “K eda g Jiosh ba'ich i ge'ej mo haschu i mo an hab chu'ig t-wehgaj. T pi wo sha'i e nako g o'othham mas wo kihch. Batsh wa masma an o'oha g kelibad Jiosh ha'ichu i tashogiththam mash hab kaij g Jiosh: 49 Ahni ani d Jiosh ch ab thahm kahchim t amjed ia nuhkuth g jewed kahchim. Pi amt wo sha'i e nako mamt wo ni-kihch mamt heg eda am wo ni-thai 50 nant pi ahni wehs ha'ichu nahto. Neh, bash kaij g Jiosh. 51 “Kush wabshaba g t-shohshonbad si e sheshemachuth ch pi chechkaithag ch pi ab hu kaiham g Jiosh ha'ichu ahga. Jiosh ash am i ha wuwhasith g ha'ichu i tashogiththam. Kush wa g t-shohshonbad ha sho'igchuth ch ha'i ha koktha. Kum ahpim hab wa'ap chu'ig ch ab wabsh wui gegok g Hekia S-ap'ekam Gewkthag. Jiosh ha'ichu i tashogiththam ash am ahgachug mat wo jiwia g Jiosh si pionag k d wo si wehs s-ap'ekamk. Kut wa woho jiwia. Kumt wa gagda mat wo e muhkith. 53 Ahpim amt ab em-mah g Jiosh chehanig mat wa g anghil ia u'apa. Mt eda am wa pi wohoch.” Neh, bash kaij g Steven. 54 Tsh am i kah g e jehnigiththam mash has ha ahg g Steven k wabsh woho'i babgat k si kuhm g e-tahtami. 55 Sh wabshaba g Hekia S-ap'ekam Gewkthag ab ba'ich i si mahkch g Steven g gewkthag. Tsh am i nea thahm kahchim wui k nei mo si s-masma tonod g Jiosh gewkthag. Kush g Jesus an si hugithaj an kehk g Jiosh. 56 Kush hab kaij g Steven, “Neitho! B at e kuhpi'o g thahm kahchim. K ab kehk g Jiosh si Kehsha an si s-apko hugithaj an g Jiosh.” 57 Tsh si hihinkiath k am si kuhkp g e-nahnk k ab hahawa si wui i wohp 58 k an be k gm hu i wuhshath kihhim t amjed mat wo ma'ichkwua. Sh am hema ha wehmaj g wechij o'othham ch hab chehgig Saul. Kutsh heg nuhkuthach g e-liliwa hegam matsh wo ma'ichkwua g Steven. 59 Kush g Steven ab si ihm g e-tho'ibiakam ch hab kaij, “Ni-kownalig Jesus, ia g beh'i ni-thoakag.” Sh eda heg oithch ab ma'ikkash g s-keh'iththam. 60 Tsh am hahawa tohtonwua g Steven k si s-kaitham hab kaij, “Ni-kownalig, pi g ab hu ha abchuth ihtha chu'ichig mat ihab e juh.” Bash kaij ch am i muh.

Acts 8

1 Sh g Saul am wabsh ap'echuth mamt mua. Sh amai i amjed mamtsh ab si s-gewkam i ha sho'igch g Jesus ihmtham amai Jerusalem t am. Kutsh a'ai ahhio g e sho'igchuththam amai Judea ch Samaria chechkshani ch ed. Tsh wabshaba hegam Jesus chuhchai pi hasko ahhio. 2 Tsh ha'i hegam mo ab d si ihmtham g Jiosh gd hu cheh g Steven k si s-kaitham shoani wehhejed. 3 Kush g Saul chum s-padchuthamk g ha-mihshmetha g Jesus ihmtham ch hekaj an wahkhim ha-kihki oithch ch ab i ha chewaimed ch gd hu si ha kuhpahim, chum wa g u'uwi. 4 Kush wa an wehsko ahgahim g Jesus hegam matsh wa e gantad. 5 Hegai Philip mash wa am d ha-kehsha atsh am hih Samaria kihhim wui k am ha mihshmath ch am ha ahgith mat heki hu an i wuhsh g Jiosh si Kehsha. 6 Kush ab si kaiham hegam hemajkam mo haschu i ha ahgith ch am neith mo s-hasigam ha'ichu hab junihim g Jiosh gewkthagkaj. 7 Mu'ijj ash e thothajith hegam mash g jijawul an ha u'ukch. Kush si hihnk g jijawul gm hu hihimathch. Kush mu'ijj ha thothajith hegam mo pi hihimthag ch hegam mo pi ab hu gewpk. 8 Sh si s-hehgig g hemajkam amai. 9 Sh am hema kih g o'othham mash hab chehgig Simon ch heki hu wa'i amjed am hab junihim g s-hasigam ha'ichu ch hab chum e wua mo d ge mahkai. 10 Kush wehs g hemajkam am si neithachug ch ab si has elith, chum wa hegam mo d s-chu a'amichuththam. Kush wehsijj hab kaij, “Heg oki d ge mahkai ch ab u'ukch g e-gewkthag Jiosh t amjed.” 11 Bash kaij ch ab si kaiham nash pi heki hu wa'i amjed hab junihim g s-hasigam ha'ichu. 12 Tsh wabshaba am hahawa ha mihshmath g Philip ab amjed g Jiosh kownaltalig ch ab amjed g Jesus Christ. Kutsh ab i s-wohochuth k e pahl wapko. 13 Tsh hab wa'ap ab i s-wohoch g Simon k e pahl wakon k amjed pi hebai thagito g Philip k ab si has elith am i neithok mo hab junihim g s-hasigam ha'ichu. 14 Tsh am i ha ai hegam Jesus chuhchai ab Jerusalem t ab matsh ihtham Samaria t am o'othham ab bei g Jiosh ha'ichu ahga. Kush am ha chehani g Peter ch John matsh am wo ha mihshmetho. 15 Tsh am hihi ihtham k gd hu thatha k am ha wehm e hemapai. Kutsh eda pi koi bei g gewkthag ab amjed g Hekia S-ap'ekam Gewkthag hegam matsh e pahl wapko. Kutsh am e ho'ige'ithahun k ab tai g Jiosh mat hab wo wa e juh am ha tahgio 17 k amjed an i ha tahtamahi ab ihmch g Jiosh. Tsh g Hekia S-ap'ekam Gewkthag ab hahawa ha mah g gewkthag. 18 Tsh g Simon am i nei ihtha k chum s-ha namkitham 19 k hab kaij, “Ab g i ni-mahki ihtha gewkthag mant hedai ab wo i taht, t wo bei g gewkthag ab amjed g Hekia S-ap'ekam Gewkthag.” 20 Sh wabshaba hab kaij g Peter ab wui. “T wabsh wo huhug g s-m-kaischutha hab wa masma mapt ahpi wo huhug. Pi o hab chum chu'ig mapt hekaj wo nolawt g Jiosh mahkigdag. 21 Pi o sha'i ap'e g m-chegitoi am Jiosh tahgio. K heg hekaj pi ab hu d sha'i m-wuikam ihtha chikpan. 22 Gan o hu wabsh i si m-u'ukch g pi ap'ekam napki pi s-chu hehgamk. Pt gm hu wo s-ohhoth g pi ap e-chegitoi k ab wo i e ho'ige'ithahu Jiosh wui. Tp hems gm hu hab wo i juh g m-chu'ichig.” 24 Sh hab kaij g Simon ab ha wui. “Ab g wo si i s-ni-ho'ige'ith k am wo e ho'ige'ithahu Jiosh wui ni-wehhejed mat pi gm hu hab wo ni-juh.” 25 Tsh am hahawa ha mihshmath g Peter ch John ab amjed g Jesus k am ha ahgi mo haschu g e-wuhpuikaj neith. Tsh am hebai i cheka. Kutsh gm hu uhpam hihi Jerusalem wui am ahgachugch g s-kehg ha'ichu ahgaj g Jiosh am a'ai kihhim ch ed heg eda Samaria chekshani. 26 Kush g anghil am hema neok ch hab kaij ab Philip wui, “Am g i e nakog k gm hu hihm k am wo i ai hegai wohg m an hims tohono jewed ch ed am ha shahgith g Jerusalem ch Gaza.” 27 Tsh wa woho am i e nako g Philip k gm hu hih. Sh eda am hema med g e-kalitkaj ch d Ethiopia jewed t am o'othham. Ith ash g kownaligaj am kehshch mash d lial nuhkuththam. Kush am e mihshmethahim Jerusalem t am ch hemu am uhpam ep wo chihpia Ethiopia wui. 29 Kush hab kaij g Hekia S-ap'ekam Gewkthag ab wui g Philip, “An g i miabith hegai kalit k gn hu hugithaj an wo i hih.” 30 Tsh am hahawa si meh g Philip k an i miabi g kalit. Kush ihtha am ne'okchulith hegai matsh g Isaiabad an o'oha. Kush am kah g Philip ch ab kakke, “Nap s-amichuth hegai map an ne'okchulith?” 31 Sh hab kaij ihtha s-has ha'ichu, “Pi ant has masma wo s-amich, heg hi wa matp am hema wo i ni-tashogi,” ch amjed ab i wai g Philip mat gn hu wehmaj wo thahiwua kalit ch ed. T wa woho an i chesh. 32 Kush eda ith an ne'okchulith mo hab chu'ig an Jiosh o'ohana ed: T am hema wo i wuhsh g o'othham mat wo e wepogi g kahwal. Neh, pi at wo shosha g kahwal mamt hekith wo sho'igchuth k wo mua. Pegih, t hab wa masma pi has wo sha'i chei ihtha o'othham 33 mamt hekith pi ap wo lothait k wo mua. T hab pi hedai wo e nako mas wo ah Mamt he'es i ge'e pi ap'ekam hab juh ab wui. 34 Sh hab kaij g s-has ha'ichu ab Philip wui, “Am g ni-ahgith. Thoh'o hab ahg g Jiosh ha'ichu i tashogiththam? No hejel hab e ahg aha no wabsh hema hab ahg?” 35 Tsh g Philip amjed am i shonch ith ab mash am ne'okchulith k am ahgith g s-kehg ha'ichu ahga ab amjed g Jesus. 36 Sh am wabsh kia wohpo wohg oithch ch am hu hebai ne'ibij mash am ge shuhthagi. Sh hab kaij g s-has ha'ichu, “Neh, m ia ge shuhthagi. No am hig ha'ichu ehp manis heg hekaj pi wo ni-pahl wako?” 37 [Sh am hahawa ahgith g Philip, “Bapt wa'i masma wo e pahl wako mapt wehskaj am wo i e thagito Jesus wui.” Sh hab kaij, “Heu'u, wehskaj ant am wo i ni-thagito wui.”] 38 Sh am hahawa i ahgith hegai e-pionag mo melchuthahim g kalit mat wo keshwua. Tsh am huhud ab kalit t ab k am i huhud shuhthagi ch ed. Tsh am pahl wako g Philip ihtha o'othham. 39 Tsh g Hekia S-ap'ekam Gewkthag gm hu wa hekaj i bei g Philip. Sh amjed si s-hehgig ihtha s-has ha'ichuch gm hu uhpam meh pi hekith ep sha'i neithk g Philip. 40 Tsh g Hekia S-ap'ekam Gewkthag gm hu u'apa g Philip Ashdod kihhim t am. Tsh am i ahgahi g ha'ichu ahga ab amjed g Jesus k ga hu ai g Cesaria kihhim.

Acts 9

1 Kush eda ith oitham g Saul wabsh kia ha oith hegam mash am oith g Jesus himthag ch s-gewkam ha ebkioth ch s-ha kokthaimk. Sh am hu hebai i, sh ab si tahni g uhgchu pahl 2 matsh am wo ha o'ohani g papal am Damascus kihhim t am. Kutsh heg wo be k am wo him k wo ha chehgi. Tsh hegam wo s-mahchk mo u'ukch g e-ap'ethag. Kutsh wo ha ui hegam mo am oith g Jesus himthag k am wo uhpam i ha ui Jerusalem wui, chum wa g u'uwi. Tsh wa woho hab e juh g uhgchu pahl. 3 Tsh am hih g Saul ha'i ha wehm g chechoj k gm hu i aihim g Damascus kihhim. Tsh haha wabsh ha'ichu si ton ab thahm kahchim t amjed an wehgaj. 4 Tsh am i gei g Saul jewedo. Sh ab hema si neok ab thahm kahchim t amjed ch hab kaij, “Saul, s-wohom ap hig ni-sho'igchuth.” 5 Sh si has elith g Saul ch hab kaij, “Thohp wud ch ab neok?” Kush hab kaij hegai mo ab neok, “Thani ahni Jesus. Kup ha sho'igchuth hegam mo am oith g ni-himthag. 6 Ab g i wamig k am hihm k am wo i wah Damascus ch ed. T am haha wo hema m-ahgi mapt haschu am hab wo chum juh.” 7 Tsh hegam mo am wehmaj ab wabsh i gewpka k pi has sha'i kaij ch ash hi wa kah g ne'oki ch wabshaba pi sha'i neith mas hedai ab neok. 8 Tsh am hahawa i wami g Saul k ab chum si i nea. Tsh wabshaba pi ab hu mamsi g wuhpuij. Kumtsh am haha wabsh i wanimed k gd hu u'apa Damascus ch ed. 9 Kush waik tashkaj pi ha'ichu sha'i neith ch ep pi ha'ichu sha'i ko'a ch pi ha'ichu ih'e. 10 Kush eda am hema d Jesus ihmtham amai ch ash hab chehgig Ananias. Tsh g Jiosh am ha'ichu hab juh nenaj tahgio mash heg eda g Jesus am chehcheg. Sh g Ananias hab kaij, “Shahchu ap tatchua, ni-Jioshga?” 11 Kush hab hahawa kaij g Jesus, “Am g i e nakog k am hihm heg kih wui Judas mo am kih Shelini Kahya oithch. Amai o hema thak ch e ho'ige'ithahun ch hab chehgig Saul ch ab d kihkam Tarsus kihhim t ab. 12 Kunt am nenaj tahgio ha'ichu hab juh mapt am wo jiwia wui ahpi Ananias ch ab wo taht mat ep wo mamsi g wuhpuij.” 13 Sh hab kaij g Ananias, “Ni-kownalig, ihtha o'othham atsh mu'i ha sho'igch g m-hemajkamga am Jerusalem ch ed. Mu'ijj o hab ni-ahgith ab amjed. 14 Kutsh heg hekaj ia jiwia mash u'ukch g ap'ethag ab ha amjed g u'ugchu papal mat wo uhpam i ha ui hegam mo ab m-ihm.” 15 Kush hab kaij g Jesus ab wui, “Am apt wo wa hih nant pi ith am si i kei mat am ni-wehhejed wo chikp am i ahgahimk g ni-himthag ha wui g Tutuligo ch am ha wui g nahnko mahs hemajkam ch kokownal. 16 Nt ahni am wo wa chehgi ihtha Saul mat has i masma wo e sho'igch am ni-wehhejed.” 17 Tsh wa woho am hih g Ananias heg wui kih k ab si i s-ha ho'ige'el g kihkam. Tsh ab i wahki. Tsh ab hahawa e mahtchul g Ananias Saul wui k hab kaij, “Ni-nawoj, Saul, am apsh neith g ge'echu t-kownalig Jesus ab himathch wohg oithch. T heg ab ni-cheha mantsh ab wo i him k ab wo m-taht. Tsh ep wo mamsi g m-wuhpui. Kutsh ab wo m-mah g gewkthaj g Hekia S-ap'ekam Gewkthag.” Neh, bash kaij ch ab hahawa taht. 18 Tsh ab ha hekaj i mamsi g wuhpuij. Tsh hahawa ep s-ap ha'ichu neith k am ha hekaj i e nakog k e pahl wakon 19 k ep ha'ichu hug k ab uhpam ep i gewka. Sh g Saul am he'ekia i tash ha wehmajkahim g Jesus ihmtham amai Damascus t am. 20 Kush am ha'i chechopi g Tutuligo. Sh g Saul am ha mihshmath g e-wehm o'othham ab amjed g Jesus am ah ahgithch mo d Jiosh alithag. 21 Tsh si has i el hegam mo hedai i kah k hab kaij, “Aha no pi d ihtha mash an ha kokthahim hegam mash am oith hegai himthag Jerusalem t ab ch heg hekaj ia jiwia mat in wo i ha u'ihim k am uhpam wo i ha ui u'ugchu papal ha wui.” 22 Tsh g Saul mihshmetha am i si e gewkai. Kutsh wa wohokamch mo g Jesus d Jiosh si Kehsha. Tsh hekaj pi e nako g wehmaj o'othham mat ab hu has wo ah. 23 Sh am hu i hebai amjed, tsh g Tutuligo am i e nako matsh wo mua g Saul. K eda si uhgk kolhaitas g kihhim. Kumsh si nuhkuth g kihjegaj tash oitham ch s-chuhugam oitham. Tsh wabshaba s-mai g Saul mam s-mu'amk. 25 Tsh hegam mat ab i s-wohoch g Saul ha'ichu ahga ab amjed g Jesus am thai washomi ch ed k ab i huduni chuhug ch ed g wijinakaj ab amjed mash ab hebai ge wintani kolhai t ab. 26 Tsh amjed gm hu hahawa hih Jerusalem wui k ab chum ha shahgith i s-wahkim hegam Jesus ihmtham mat ab wo i ha wehmt. Sh wabshaba s-ehbith ch pi wohochuth mas woho pi has wo ha juh 27 Kush oi wa am wehhejed neok g Barnabas am ha wui g Jesus chuhchai. Tsh hegam hiwigi matsh am i wahki ha shahgith. Sh am ha ahgith mash g Saul am himath ch haha wabsh neith g Jesus amai wohg ch ed ch ep kah mo ab neok. Sh am ep ha ahgith matsh has masma si s-gewkam am i ha mihshmath ab amjed g Jesus amai Damascus t am. Tsh g Jesus chuhchai am hahawa s-wohoch. 28 Sh am ha wehm thakahim ch wehsko oimmed ch am si s-gewkam ha mihshmath g hemajkam ab amjed g Jesus Jerusalem ch ed. 29 Kutsh hegam Tutuligo mo neneok g Greek ne'okikaj am i chum e nako matsh wo mua nash pi ha wehm e ne'owin ab amjed g Jesus. 30 Kutsh g Jesus ihmtham am i kah ihtha k am i bei Cesaria kihhim wui k am ahgith matsh gm hu wo hih e-kihhim wui mash d Tarsus. Neh, tsh gm hu hih. 31 Tsh am hahawa thotholimat ha'ichu am ha wehhejed wehsko am Judea ch Galilee ch Samaria ch ed. Kutsh mu'i ep ab i s-wohoch g ha'ichu ha-ahga ab amjed g Jesus k ab si has elith g Jiosh. Kush ab si ha wehmaj g Hekia S-ap'ekam Gewkthag. 32 Sh eda g Peter an wehsko oimmed e-jewedga oithk ch am i ha chehgim hegam mash ab ihm g Jesus. Sh am ha'i thadha Lydda kihhim t am. Kutsh gd hu jiwia. 33 Sh am hema kih g pi himithkam ch hab chehgig Aneus ch ab wabsh i s-moik ch ash gigi'ik a'ahith ab pi sha'i e nako mas am wo i wami ab e-wo'ikud amjed. 34 Kutsh g Peter am i chehgim k hab kaij ab wui, “Aneus, Jesus Christ at wo m-thoaj. Ab g i wamig k am i holiwkath g e-wahpakus.” Tsh am ha hekaj i kekiwua k am hab e juh. 35 Kutsh mu'ijj ab i s-wohoch g s-kehg ha'ichu ahga ab amjed g Jesus hegam mo am kih Lydda ch Sharon kihhim t am nash pi neith matki thoa ihtha o'othham. 36 Sh am hema kih g uwi Joppa kihhim t am ch d e tho'ibiakam ch chum hekith s-ap ha'ichu am hab junihim ch am ha'ichukaj i ha wehmaj g sho'igkam. Sh hab chehgig ihtha Tabitha mo hab d ahga Kuhwith. 37 Kush am wabsh kia thaha g Peter Lydda t am. Tsh am wabsh si mumku ihtha uwi k am i muh. Tsh am i ap'ech g chuhkugaj k am woi mash an hema kehk g kih gn hu uhgk kih thahm. 38 K eda g Joppa pi sha'i mehk ab Lydda t amjed. Kumtsh am i kah amai Joppa t am mo am ha'ichug g Peter k am gohk ha cheha g chechoj matsh am wo wohp k ab wo wai. Kutsh wa woho am wohp k am wai matsh s-hohtam ab wo i hih Joppa wui. 39 Tsh am wa hekaj i e nako g Peter k gm hu ha oi. Kutsh gd hu thatha. Tsh g Peter gn hu i wah mash an wo'o g muhki. Tsh wehsijj gn hu biha g hehe'ejel wi'ikam u'uwi k si shoani ch ab chehgith g wehschuga matsh wa haschu hab ha juni. 40 Tsh gm hu wehs i ha wuwhas g Peter k am i tonwua k e ho'ige'ithahu ab Jiosh wui k ab hahawa si neok wui g muhki ch hab kaij, “Tabitha, ab g i wamig.” Tsh am ha hekaj i e chegito k am i nei mash am kehk g Peter k shel i thahiwua. 41 Kutsh g Peter an i wehmt. Kutsh kekiwua. Tsh ab hahawa wehs i ha waith k ab ha chehgi mo d thoakam. 42 Tsh ihtha matsh haschu has e juh am wehsko kaitha Joppa t am. Tsh mu'ijj ab i s-wohoch g s-kehg ha'ichu ahga ab amjed g Jesus. 43 Sh mu'i tashkaj am thakahim g Peter Joppa t am heg wehm mash hab chehgig Simon ch ash g hogi chikpan hab wua.

Acts 10

1 Sh am thadha g siant shonthal Cesaria kihhim t am mash ab amjed g Italy jewed. Kush g ha-uhgchuga hab chehgig Cornelius 2 ch ash si oith g Jiosh himthag ch am ep i ha wehmt g sho'igkam Tutuligo ch ab ihm g Jiosh. Kush g wehmaj kihkam wehsijj hab wa'ap ab si ihm g Jiosh. 3 Sh hema tash mash d i waik ohla im hab i juhk, tsh am nenaj ed hab e juh matsh am jiwia g anghil k am si chehch hab kaijch, “Cornelius.” 4 Sh ab hu wabsh si neith ihtha anghil ch wabsh s-ehbeni ch hab kaij, “Shahchu ap ahgahim ch ab neok?” Sh hab kaij g anghil, “Ab o kaiham g Jiosh g m-ho'ige'ithahuna ch s-hohho'ith hegai map haschu am hab junihim g sho'igkam ha wehhejed. 5 Pegih, pt hemuch ha'i wo ha cheha g chechoj mat am wo hihi Joppa wui k am wo nei hegai mo hab chehgig Simon Peter. 6 Am o tha heg kih am mo d hogi chikpantham ch hab wa'ap chehgig Simon ch am kih ge kahchki hugith an.” 7 Tsh amjed gm hu hahawa hih hegai anghil mash ab wui neok. Tsh g Cornelius am hahawa waik ha wai g e-pionag. Sh hema ihtham d shonthal ch si oith g Jiosh himthag. 8 Kutsh am ha ahgi ihtham matsh haschu has e juh k am hahawa ha cheha mat gm hu wo hihi Joppa wui. 9 Sh am ba'ich d i tash matsh am thahm i juh, sh am wabsh kia hihim ihtham ch ab hi wa aihim g kihhim. Tsh eda g Peter gm hu hejelko him k am e ho'ige'ithahun. 10 k ash am i si bihugim k chum ha'ichu s-hugimk. Tsh eda koi bai g hihithod. Kutsh am Peter nena ed hab e juh 11 matsh ab i e kuhpi'o g thahm kahchim. Kutsh ab ha'ichu i e huduni jewedo k hab mahs mo g lohna ch sha'i si ge'ej ch an a'ai e u'ukch chuhchpulij an ch ab i tadanich. 12 Sh ith eda am ha'ichug g nahnko mahs ha'ichu thoakam ch wahammad ch u'uwhig. 13 Sh hab kaij g Hekia S-ap'ekam Gewkthag, “Peter, i g wuhshani k am wabsh chum haschu wo ha mua ihtham k hekaj wo e gegos.” 14 Tsh wabshaba g Peter hab si chei, “Ih, pi ant am hu hab wo ni-juh, ni-kownalig. Pi ani hekith ko'a hegai mo g m-chehanig pi t-hiwgith machs wo ko'ath.” 15 Sh hab hahawa kaij hegai mo ab neok, “Pi g hab sha'i elith mas pi ap'e hegai mo haschu g Jiosh hemu am m-chehgith mo s-ap'e.” 16 Tsh waikko hab e juh ihtha am nenaj ed. Tsh amjed im hu hahawa uhpam i e bei ihtha ha'ichu am thahm kahchim wui. 17 Sh am wabsh kia oithahim g Peter hegai matsh haschu nei. Tsh heg i eda ihtham Cornelius pionag am i s-mai mo hebai i kih g Simon k am thatha k ab gegok kolhai kihjeg t ab 18 ch ab si s-kaitham ha kakke, “No ia hema thaha mo hab chehgig Simon Peter?” 19 Kush eda g Peter am wabsh kia chum a'amichuth mas has d ahga hegai mat am nei. Kush hab kaij g Hekia S-ap'ekam Gewkthag, “Neh, ia at ha'i thatha k s-m-neitham. 20 Pt am wo i e nakog k am wo ha nei. Pi g has sha'i ha elith mo d ge gawul mahs hemajkam k wabsh wo ha oi. Ahni o d ni-tatchui mat ab i hihi.” 21 Tsh wa woho am i hud g Peter k hab kaij ab ha wui ihtham o'othham, “Ahni ani wud mam s-ni-neithamk. Shahchu amt ahgk ia thatha?” 22 Sh hab hahawa kaij ihtham o'othham, “No pi ab t-chehani g Cornelius. Heg o d shonthal ha-uhgchuga Cesaria t ab ch si s-ap d o'othham k ch ab si ihm g Jiosh. K g Tutuligo hab wa'ap ab si has elith. Tsh g anghil ab wui i hih ab amjed g Jiosh k hab ahg mat ab wo i m-wai e-kih wui k wo m-kah mapt haschu wo i ahgi.” 23 Tsh ab i ha wahpki g Peter ihtham waik o'othham mat am wo wa'i kohk. Sh an ba'ich d i tash, tsh i e nakog k gm hu hahawa ha oi. Tsh ha'i ep ha oi hegam mash d Jesus ihmtham ch ab d kihkam Joppa t ab. 24 Am ba'ich d ep i tash. tsh gd hu hahawa thatha Cesaria t am. Tsh oi wa g Cornelius heki hu am i ha wai g e-hajuni ch e-naipijju. Kush ihtham am wehmaj ha nenida. 25 Tsh ab wabsh chum i wah g Peter. Tsh g Cornelius ab si tha'iwuni k ab si i gei wecho ab si has elithch. 26 Tsh wabshaba hab ah g Peter, “Pi g sha'i ni-wui i gehsh. Thani wabsh o'othham.” 27 Kush am e wehm neneokhim ch am i wahp. Sh am mu'i thadha g hemajkam. 28 Kush am ha neith g Peter ch hab kaij ab ha wui, “Am am wa s-mahch mach ahchim Tutuligo pi sha'i hiwgithas ab t-himthag amjed machs ab wo i s-em-hajunima ahpim mam d gawul mahs hemajkam, ni'ichs am hu wo em-chehgim em-kihki wui. T wabshaba g Jiosh am ni-chehgi mant i'ajed pi am hu has wo sha'i em-elithath. 29 Nt hekaj ab i hih pi sha'i has elithk mam d ge gawul mahs hemajkam. Pegih, m haschu ahgch am ni-waith.” 30 Sh hab kaij g Cornelius, “Am ani ni-ho'ige'ithahun ni-kih am d hu hema i tako imhab i juhk. T am haha wabsh hema jiwia g o'othham. K si tonod g wehschugaj. K ab kehk ni-wui 31 ch hab kaij, ‘Cornelius, ab o kaiham g Jiosh g m-ho'ige'ithahuna ch s-hohho'ith hegai map haschu am hab junihim g sho'igkam ha wehhejed. 32 Pt wo ha'i ha cheha mat am wo hihi Joppa wui k am wo wai hegai o'othham mo hab chehgig Simon Peter. Am wo tha heg kih am mo d hogi chikpantham ch hab chehgig Simon ch an kih ge kahchki hugith an.’ Neh, bo kaij. 33 “Kunt am hahawa ha'i ha cheha mat am hihim k ab i m-wai. Kupt s-ap e juh k ab i hih. Kuch hemuch ia thadha am nenaj ed g Jiosh ch s-kaimk hegai mat haschu g Jiosh am wo i m-ahgi mapt am hab wo chei.” 34 Tsh wa woho am hahawa ha'ichu i ahgahi g Peter k hab kaij, “Hahawa ant wa s-mai moki woho mo g Jiosh wehs ha wepo masma ha neith g nahnko mahs hemajkam. 35 K hegam d si tatchuij mo hedai ab i si has elith ch am hab junihim g s-ap'ekam, chum as pi d wo Tutuligo hemajkamk. 36 Am amki chum heki hu kah ab amjed ihtha mant haschu wo i em-ahgi nam pi ia t-shahgith thadha ahchim Tutuligo. K ahchim am t-ahgith g Jiosh mash s-ha tho'ibiamk g hemajkam am gahi wuhshanim g e-alithag Jesus Christ. Heg o wud mat g Jiosh am i kei mat wehs d wo ha-kownaligk g nahnko mahs hemajkam. 37 K wa am hema t-jehnigith ab amjed g Jesus ch am t-pahl wapkon ch hab chehgig John. T am i wuhsh g Jesus k am e pahl wako heg ab John. T g Jiosh ab mah g si ge'e gewkthag am gahi wuhshanim g Hekia S-ap'ekam Gewkthag mat hekaj hab wo junihith g e-chikpan. T g Jesus am i shonwuich g e-chikpan Galilee chekshani ch ed k am hahawa wehsko hab junihim Judea chekshani ch ed. Jiosh o am wehmaj. K hekaj wehsko i ha wehmt g e-hemajkamga ch ha thothajith hegam mo g jiawul ha sho'igchuth. 39 “Kuch ahchim am wehmajkahim ch g si t-wuhpuikaj neith hegai mo haschu hab junihim am wehsko t-jewedga ed ch am Jerusalem ch ed. Kumt an be k mua ab naggiak kots t ab. 40 T wabshaba g Jiosh ab uhpam i wuhshath muhkig amjed mo d i waik tash k am i t-chehgi. 41 K pi wabsh chum hedai neith. Ahchim ach wa'i neith mat he'ekiajj g Jiosh heki hu am i t-chuhcha. Tt wa am wehmaj t-gegos am i thahm mat g Jiosh ab i wuhshath muhkig amjed. 42 Jiosh atsh am si i kei matsh wo ha tho'ibia hegam mat ab wo hiwgath k wo ha lothai hegam mat pi wo e tho'ibia. T g Jesus ab t-mohto'i matt am wo si wohokamch ihtha k am wo ahgahith g s-kehg ha'ichu ahgaj. 43 Jiosh at gm hu hab wo i juh g pi ap ha-chu'ichig wehs hegam mat ab wo i s-wohoch g ha'ichu ahgaj ab amjed g Jesus. Ith o wehsijj wohokamchuth g kekelibad Jiosh ha'ichu i tashogiththam.” 44 Sh am wabsh kia neok g Peter. Tsh ab i hud g Hekia S-ap'ekam Gewkthag ha thahm hegam mo am kaiham k ab si i ha mah g gewkthag. 45 Tsh am gawul ne'okikaj neneo mat pi hebai mai k ab si ihm g Jiosh. Tsh am i ha kaiok ab si e totoths hegam mo wehmaj g Peter natki pi g Hekia S-ap'ekam Gewkthag ab si i ha mah g gewkthag hegam gawul mahs hemajkam. 47 Sh ab kaij g Peter. “Jiosh atki ab i ha mah g Hekia S-ap'ekam Gewkthag mat hab masma ab i t-mah. No hig pi d ha wuikam mat wo e pahl wapko?” 48 Kumtsh wa woho ha pahl wapko am chehchegch g Jesus Christ. Sh ihtham ab hahawa si ahgith g Peter mat am wo sha'i ha wehm thakahim he'ekia i tash.

Acts 11

1 Tsh am i kah g Jesus wohochuththam amai Judea jewed t am matsh hegam gawul mahs hemajkam ab bei ihtha Jiosh ha'ichu ahga. 2 Sh eda am ha'i d hegam mash hab si elith mat hemho wa hab wo juh g Tutuligo ha-himthag hegam gawul mahs hemajkam matsh ab i s-wohoch. Kutsh am hihi ihtham Peter k am thatha Jerusalem t am. Kutsh hegam am ne'owin k hab si ahg, 3 “Kah ach maptsh am ha wehm e gegos hegam mo d gawul mahs hemajkam ch pi pahl hikuchkas. P eda s-mahch mo pi t-hiwgithas machs chum hems am wo i wahp ha-kihki ed.” 4 Tsh am hahawa ha ahgi g Peter matsh haschu has e juh gd hu i shonchuthk mo wa am e ho'ige'ithahun Joppa kihhim t am ch hab kaij: 5 “Am ani thaha Joppa t am ch am hu hebai ni-ho'ige'ithahun. T am ni-nena ed hab e juh mat ab ha'ichu i e huduni thahm kahchim t amjed k hab mahs mo g lohna ch sha'i si ge'ej ch an a'ai e u'ukch chuhchpulij an ch am ni-tahgio i e ul. 6 Kunt am si i nei eda k nei g nahnko mahs ha'ichu thoakam, chum hegam ehp mo s-thothajk ch wahammad ch u'uwhig. 7 “K ab hahawa hema si neok ch hab kaij, ‘Peter, i g wuhshani k wabsh chum haschu am wo mu'a k hekaj wo e gegos.’ 8 “Kuni hab kaij, ‘Ih, pi ant am hu hab wo ni-juh, ni-kownalig. Pi ani hekith ko'a hegai mo g m-chehanig pi t-hiwgith.’ 9 “K hab ep kaij hegai mo ab neok, ‘Pi g hab sha'i elith mas pi ap'e hegai mo haschu g Jiosh hemu am m-chehgith mo s-ap'e.’ Neh, bo kaij ab ni-wui. 10 Kut ith hab e juh waikko. T amjed im hu hahawa uhpam i e bei ihtha ha'ichu am thahm kahchim wui. 11 “Kutki eda heki hu am ha'i thatha waik g o'othham. Ihtham ha-ge'ejig o hab chehgig Cornelius ch am kih Cesaria t am ch ab ha cheha matsh ab wo i ni-wai. Tki am thatha mani am tha. 12 K hab ni-ahgith g Hekia S-ap'ekam Gewkthag mant pi has wo sha'i ha el mo d ge gawul mahs hemajkam k wabsh wo ha oi. T ihtham chuhthp t-wepnag m ia gegok am ni-wehm hihi Cesaria wui k am ni-wehm i wahp Cornelius kih ed. 13 “K heg am t-ahgith matsh g anghil am jiwia kihj am k hab kaij, ‘Am g ha'i ha chehani mat am wo hihi Joppa wui k am wo wai hegai o'othham mo hab chehgig Simon Peter. 14 T heg am wo em-ahgi mamt has masma wo e tho'ibia wehsijj g e-wehm kihkam ha wehm.’ 15 “Pegih, tki wa woho hab e juh. Kunt am him k am wabsh chum ha'ichu i ha ahgith. T g Hekia S-ap'ekam Gewkthag ab i hud ha thahm mat wa hab e juh am t-wehhejed ga hu si i wehpeg. 16 Nt am hahawa i chegito mo wa hab kaij g t-kownalig Jesus, ‘Mat ab i em-mah g John g pahl wakona. T wabshaba g Hekia S-ap'ekam Gewkthag g si ge'e gewkthag ab wo i em-mah pi sha'i mu'i tash i'ajed.’ 17 Neh, t ith amjed am si i e tashogi mat g Jiosh ab ha mah hegam gawul mahs hemajkam hegai mahkigdag mat ahchim ab t-mah mat hekith ab i s-wohoch g Jiosh ha'ichu ahga ab amjed g t-kownalig Jesus Christ. Kunt pi has masma am hu wo sha'i kuh g Jiosh ith amjed.” Neh, bash kaij g Peter. 18 Tsh ihtham am i kah wehs ha'ichu k pi ab hu has hahawa ep ahg ch wabsh si s-hehgigam ab ihm g Jiosh ch hab kaij, “Pegih, boki d Jiosh hab elitha mat ihtham gawul mahs hemajkam hab wa'ap gm hu wo s-ohhoth g pi ap e-chegitoi k wo bei g pi ha huhugetham thoakag.” 19 Kutsh ha'i hegam matsh wa e gantad matsh hekith i e muhkith g Steven gm hu ahgahi g Jiosh ha'ichu ahga Phenicia ch Cyprus jejewed t am ch Antiok kihhim t am k hegam an wa'i ha mihshmath Tutuligo. 20 Tsh am hahawa ha'i thatha Antiok t am ab amjed g Cyprus ch Cyrene k am i ha mihshmath hegam ehp mo d gawul mahs hemajkam. 21 Tsh g Jiosh am i gewkai g ha'ichu ha-ahga. Kutsh mu'ijj hegam hemajkam ab i s-ha wohochuth k ab i e thagito Jesus wui. 22 Tsh am i kah hegam mash ab ihm g Jesus ch ab thadha Jerusalem t ab matsh has i e juh am Antiok t am k ab hahawa cheha g Barnabas matsh am wo him k wo i ha wehmt. 23 Tsh gd hu jiwia k am i nei si s-hehgigch matki wa woho g Jiosh ab si s-ha ho'ige'el. Sh am ha ahgith mamt wehs ab wo i e thagito Jiosh wui k pi hekith wo sha'i thagito hegai mamt haschu ab i bei. 24 Sh wa eda si s-ap d o'othham g Barnabas ch si e thagitokch Jesus wui ch ab si u'ukch g gewkthag ab amjed g Hekia S-ap'ekam Gewkthag. Tsh mu'ijj ab i s-wohoch g ha'ichu ahgaj ab amjed g Jesus. 25 Tsh hekaj hab i e ah g Barnabas matsh am wo i bei g Saul mat heg am wo i ha wehmt. Sh eda heg am kih Tarsus kihhim t am. Tsh am him 26 k am i chehg k ab uhpam i wai Antiok wui. Tsh am uhpam hihim k am thatha Antiok t am k hemako ahith ab am i ha wehmt g e wehm wohochuththam amai. Sh eda mu'ij ihtham. Amai ash Antiok t am mamtsh si wehpeg hab ha chehch Christian. 27 Tsh wa eda am ha'i thatha g Jiosh ha'ichu i tashogiththam ab Jerusalem t amjed amai Antiok t am. 28 Sh ihtham hema hab chehgig Agabus. Tsh g Jiosh am i tashogi ihtha mat g bihugig wo gei an wehsko jewed thahm. Kutsh am ha ahgi g Jesus ihmtham amai Antiok t am. Tsh amai i amjed am i e nakog k am wehsijj i shuligahi g lial am ha wehhejed hegam e-wehm wohochuththam mo am kih Judea jewed ch ed. Kutsh gei hegai bihugig mash eda g Claudius am d kownal. 30 Kumsh am ha chehani g Barnabas ch Saul matsh am wo i ui g lial. Tsh ihtham am i u'u k ab ha mah g ha wanimedtham g Jesus ihmtham amai Judea jewed ch ed.

Acts 12

1 Tsh eda am i ha sho'igch g kownal Herod hegam mash ab ihm g Jesus 2 k ab ha chehani g e-shonthalig. Tsh ihtham an bei hegai James mo d John wehnag k mua g is-pahyokaj. 3 Kush mu'i si s-hohho'ith g Tutuligo matsh hab e juh ihtha. Tsh heg hekaj wabsh ba'ich i si e gewkai g Herod k g Peter an ep bei. Kutsh eda e ai g si ge'e mihshmetha mo eda g Tutuligo pi ko'a g hegai pahn mo jewajithas wewa'ak tash oitham. 4 Tsh am ha cheha g Herod g e-shonthalig matsh wabsh wo kuh g Peter. Kumtsh am haha wo lothai am ha tahgio g hemajkam mat am wo i ha'asa e piast. Tsh gamai chuhthp i e chuhcha g shonthal matsh gi'ik e wehm wo nuhkuth tash oitham ch s-chuhugam oitham. 5 Sh wabshaba heg oitham am hahasko e hehemapath g Jesus ihmtham ch am wehhejed si e ho'ige'ithahun. 6 Kutsh am i e ai matsh ba'ich i si'alim wo e lothai g Peter. Tsh am i s-chuk. Sh am wo'o ch kohsh ha shahgith g gohk shonthal mash am nuhkuth. Kumsh gn hu si wupulshch g nohnhoij ch kakhioj g gohk e hukshchim wapainomikaj. Sh an gohk ep gegok g shonthal ch am nuhkuth g kukpaikud kihkijeg. 7 Tsh am haha wabsh jiwia g anghil k am wui i kekiwua g Peter. Tsh wabsh si ton am kukpaikud ch ed. Kutsh ihtha anghil ab si ugij g Peter k wuhan k hab kaij, “Oi g kekiwua s-hohtam.” Kutsh gm hu wa hekaj a'ai shul hegai e hukshchim wapainomi mamsh an hekaj wupulshch. Tsh am i kekiwua. 8 Sh hab hahawa kaij g anghil, “An g s-wihnam i e giwuddath k ab si i wuhpud g e-kaikia shuhshk.” Tsh wa woho hab e juh g Peter. Sh hab ep kaij g anghil, “Ab g wahki g e-lihwa k ab i ni-oith.” 9 Tsh ab wahk k gm hu i oi. Kutsh am i wuwha ab amjed mash am kuhpikahim. Kush sha pi s-wohoma mat woho ab i wuhshath g anghil nash pi hab e ahg mo wabsh chehchk. 10 Tsh am hihim k am i wuwha wehpeg kihjeg t ab. Kush am hema kehk g shonthal ch wabshaba pi am hu sha'i ha neith. Kutsh am ep hihim k gm hu ep wuwha mash am kahya wui kihjeg. Kush am hema ep kehk g shonthal ch hab wa'ap pi sha'i ha neith. Tsh wabsh hejel ab i e kuhkpi'o g kihkijeg. Tsh am wa'i hekaj pi e ha'ichuch g anghil. 11 Tsh am haha wabsh si i e taht g Peter k hab kaij, “Neh, woho atki hab e juh. Jiosh atki ab cheha g anghil mat ab ni-wui wo hih. Tki heg ab i ni-wuhshath kukpaikud amjed ch ni-tho'ibia ab amjed mat has wo i chum ni-juh g ni-wehm o'othham.” 12 Tsh amjed am hih kihj wui hegai Mary mo d John Mark je'e. Kush eda mu'ijj am e hemapathch ch e ho'ige'ithahun. 13 Kutsh ab si shontpag g pualit g Peter. Tsh am hema hih g ha-pionag k hab chehgig Rhoda. Sh hab kaij g Peter. “Gam g i kuhpi'ok.” 14 Tsh heg am i amich mo d Peter ch ab neok k si s-hehgig ch gm hu uhpam meh pi ab hu i kuhpi'ok g pualit k gd hu ha ahgith mo g Peter ab kehk jeg ed. 15 Sh hab kaij hegam ab wui, “Ptp wabsh chehch mo ab s-kehkathma.” Sh wabshaba am hab wabsh i kaij mo woho. Sh hab hahawa ep kaij, “Na'as d wabsh kok'oi namtsh pi wo mua.” 16 Kush eda ab wabsh kia shontpag. Tsh ab hahawa i kuhpi'o g pualit k nei mo ab kehk. Tsh am ha hekaj i wah k ab ha ihm k am i ha ahgith mat has masma g Jiosh i wuhshath ab amjed g kukpaikud. Kush si has i elith mat has e juh. Tsh hab hahawa ha ah, “Am g wo ha ahgith hegam James mat g Jiosh ab i ni-wuhshath,” k amjed gm hu hahawa ep hasko hih. 18 Tsh am ba'ich i mahsi. Tsh am sha'i si e kudu hegam mash am nuhkuth g kukpaikud. “T hebai hih g Peter?” bash kaij. 19 Tsh g Herod am hahawa si ha cheha mat am wo i gahghi. Tsh wabshaba pi sha'i mai mas hebai hih. Sh am si i ha chehani g Herod mat ab wo ha kakke hegam shonthal mas has e juh. Kush pi neith ch pi mahch mas has e juh. Kush oi wa am ha chehani mat wo ha koktha. Tsh amjed gm hu hahawa hih g Herod Cesaria kihhim wui ab Judea chekshani t amjed. 20 Tsh am hebai i cheka. Kutsh wabsh woho'i bagat g Herod ab ha wui hegam mash am kih Tyre ch Sidon t ab. Kutsh ab wui hihi matsh wo chum ap'ech mash haschu i pi ap'e nash pi am chum huniop. Sh am hema d kownal kehsha ch nuhkuth g kihj ch hab chehgig Blastus. Kutsh heg wehpeg ab si i s-nawojima k amjed am wui hihi g Herod k ab kakke mat wabsh ab wo i s-ha ho'ige'el. 21 Tsh hema kei g tash g Herod k ab si s-kehg e enigadath k ab thahiwua kownal thaikud ab k am si s-hasigam ha jehnigi g hemajkam. 22 Kush ab si hihnk g hemajkam ch hab kaij, “Pi oki d sha'i o'othham ch ab neok noki pi d ge hema jiosh.” 23 Kutsh pi ha shohbi g Herod k pi am hu has el g Jiosh. Tsh heg hekaj g anghil ab ab hab juh g mumkithag mat waptopad k muh. 24 Kutsh g Jiosh ha'ichu ahga i ge'etha. 25 Tsh g Barnabas ch Saul gm hu uhpam hihi ab Jerusalem t amjed mat am i ui g lial. Kutsh g John Mark am i ha oi.

Acts 13

1 Sh am ha'i ep d Jiosh ha'ichu i tashogiththam Antiok t am. Hema ihtham ash hab chehgig Simon ch wabshaba hab e a'aga S-chukchu. Kush hema d Lucius ch ab Cyrene t amjed. Kush hema d Manaen ch am wehmaj ge'etha g kownal Herod. Ihtham ash am ha mashcham am ha wehm g Barnabas ch Saul. 2 Kush am hu hebai wehsijj am he'ekia tashkaj wabsh e ho'ige'ithahun ch hab pi ha'ichu ko'a. Kush am ha tashogith g Hekia S-ap'ekam Gewkthag mash g Jiosh hab kaij ab ha wui, “Neh, ab ant ha mohto'i g Barnabas ch Saul mat gm hu mehk wo i ahgahi g ha'ichu ni-ahga. Kumt am wo i ha thagito mat hab wo wa e juh.” 3 Kush am ba'ich i himchuth hegai mash wabsh e ho'ige'ithahun ch pi ha'ichu ko'a ch ab hahawa ha taht ihtham Barnabas ch Saul matsh hekaj am chehgi mat ha thagito heg wui mat g Hekia S-ap'ekam Gewkthag am i ha tashogi. 4 Tsh gm hu hihi g Barnabas ch Saul mash wa g Hekia S-ap'ekam Gewkthag am i ha tashogith. Kutsh am ep i ha oi g John Mark matsh am wo i ha wehmt. Tsh ihtham gd hu thatha Selucia kihhim t am. K ith an hugithaj an g ge kahchki. K ab hihhim g wapalko. Kutsh ihtham Barnabas an i chehchsh wahlko ch ed k gm hu aigo i shulig k gm hu thatha Cyprus jewed ch ed. Sh am hema kihhimag ch hab e a'aga Salamis. Kush am ha'i chuhch g Tutuligo ha-chechopi. Sh ihtham Barnabas am i wahpk ch am ha jehnigith ab amjed g Jesus. 6 Sh gm hu aigo hema ep kihhimag ch hab chehgig Paphos. Kutsh gm hu hihim k am ep ha jehnigith. Sh am tha hegai mash d kownal ith eda jewed ch hab chehgig Sergius Paulus. Kush am hema wehmaj g Tuhligo ch hab chehgig Barjesus ch d s-hasigam ha'ichu hab wuatham ch ha iattogith mash d Jiosh ha'ichu i tashogiththam. Kumsh hab a'aga Elymas mo hab d ahga Ge Mahkai. Sh g kownal d si ha'ichu s-amichuththam o'othham ch ab i ha wai g Barnabas ch Saul nash pi s-kaimk g ha'ichu ha-ahga ab amjed g Jesus. Tsh wabshaba ab ha wui kekiwua hegai Elymas k am i chum e nako mat hab wo juh g kownal mat pi ab hu wo ha wohoch. 9 Saul o hab ep e a'aga Paul Greek ne'okikaj. Tsh g Hekia S-ap'ekam Gewkthag ab ep si mah g Paul g gewkthag. Sh heg ab si shel i neith g Elymas 10 ch hab kaij, “Neh, thap Jiawul pionag nap pi ab wabsh i si shuhthags g pi ap'ekamkaj. K heg hab m-wua map ab wui kehk g s-ap'ekam ch chum gawul s-junimk g Jiosh ha'ichu ahga. 11 Jiosh at hab wo m-juh mapt pi wo nehnt he'es i tash.” Neh, bash kaij g Paul. Kutsh am wa i hekaj woho hab e juh. Tsh am taht g Elymas mat ab ha'ichu si ma'ish g wuhpuij. K am wabsh i s-chuhugam wehhejed. Tsh an i thahthaghi an chum hema gahgch mat am wo i wanim. 12 Tsh ab si e toths g kownal k ab i s-wohoch neithok mash has masma g Jiosh am chehgith g e-gewkthag. 13 Tsh am hahawa gahi ep i shul hegam Paul ab Paphos t amjed k gm hu thatha Perga kihhim t am am Pamphylia jewed ch ed. Tsh wabshaba g John Mark am i ha thagito amai k gm hu uhpam hih Jerusalem wui. 14 Tsh amjed gm hu hahawa hihi ihtham Paul ch Barnabas Pisidia jewed wui. K am hema kihhimag ch hab chehgig Antiok. Kutsh am thatha. Tsh am i e ai g ha-mihshmetha tash. Kutsh gd hu i wahp ihtham Paul e wehm o'othham ha-cheopi ed k am i thadhaiwua. 15 Kumtsh am ne'okchul g Jiosh o'ohana. Sh hegam mash d ha wanimedtham hab hahawa kaij, “T-naipijju, chum ach si tatchua mamt am wo ha'ichu ha ahgi g hemajkam mat heg amjed ab wo i e gewpkai.” 16 Tsh ga hu hahawa i kekiwua g Paul ha ba'ich k hab kaij: “T-hajuni ch ahpim mam ia ha wehm ihm g Jiosh, ab g wo i ni-kaiham. 17 Jiosh atsh ab i ha gawulkai g t-shohshonbad matsh d wo hemajkamgajk. Kutsh am i mu'itha mash eda am kihkahim Egypt jewed ch ed. Tsh ab hahawa i ha tho'ibia ab ha amjed g Egypt hemajkam g si ge'e e-gewkthagkaj. 18 Kush an oiopo tohono jewed ch ed gi'ikko wehst-mahm ahith ab. Sh g Jiosh am s-hemajim ha nakogahim 19 ch am wo i ha wahpki ith eda Canaan jewed. Sh eda g wewa'ak kawod thakam hemajkam ia kih. Tsh g Jiosh ha hugio k g ha-jewedga am a'ai i ha tahpjel g t-shohshonbad mash hab masma heki hu ahgith g Abrahambad. 20 Tsh heg i thahm am hahawa i ha chuhcha g Jiosh g s-chu a'amichuththam mash am ha'ichu a'ap'echuth ha wehhejed. “Tsh ga hu e ai matsh am i thahiwua g Samuelbad k d Jiosh ha'ichu i tashogiththam. 21 Kush g t-shohshonbad ab si tahni g Jiosh matsh am hema wo i kei mat d wo ha-kownaligk. Tsh g Jiosh am i kei hegai Saul mash d Kishbad alithag ch ab d Benjaminbad amjedkam. Kush heg d ha-kownalig gi'ikko wehst-mahm ahith ab. 22 Tsh g Jiosh im hu hab hahawa i juh g Saulbad k g Davidbad am i kei matsh d wo ha-kownaligk. Sh hab kaij g Jiosh ab amjed: Ihtha David mo d Jesse alithag o am si ni-tatchui oithch hab masma ch am e tashogi mat am hab wo juh hegai mant haschu ab wo i ahgi. 23 “Sh hab ep kaij g Jiosh matsh am hema wo i kei g Davidbad amjedkam matsh d wo t-tho'ibiakamk. Kut wa woho hab e juh g Jiosh. K g Kehshaj hab chehgig Jesus. 24 T wabshaba g Jiosh ab hema wehpeg i wuhshath g t-wehm o'othham. K ith hab chehgig John ch ab i ha mihshmath ch hab ha ahg mat gm hu wo s-ohhoth g pi ap e-chegitoi k wo e pahl wapko. 25 Tsh ihtha John ith hekaj am i kuhgi g e-chikpan mo wa hab ha ahg g hemajkam, ‘Pi g hab wo sha'i ni-elithath mani ahni d hegai mam si nenida. Pi ani d ahni ch d wabsh pi ha'ichu an hugithaj an. Mt wo wa nei mat am epai wo i e maskogi hegai mo hig woho d s-has ha'ichu.’ Neh, bash kaij g Johnbad. 26 “Pegih, ni-wehm o'othham ch ahpim mam hab wa'ap ab si has elith g Jiosh, ab o wehsijj d t-wuikam ihtha s-kehg tho'ibiathag ahgaj. 27 Hegam kekelibad Jiosh ha'ichu i tashogiththam atki an o'oha matsh has wo masmak g Jiosh si Kehsha. K g ha-ne'oki e ne'okchulith t-sha'ashagith wehs mihshmetha tash. Kuki eda hegam t-hajuni mo ab kih Jerusalem t ab pi amichuth g ha'ichu ha-ahga ch hab pi amich g Jiosh si Kehsha mat hekith am jiwia k chum s-ha tho'ibiamk. Jiosh at am i kei g e-alithag Jesus mat wo t-tho'ibia. 28 K heg pi ha chu'ichig. T eda hegam ab chum chu'ichigch mat g kownal Pilate wo mua. Kumt ab naggia k mua kots t ab k ab hahawa i huduni k gm hu cheh hiha'ini ch ed. 29 Bat wa masma an o'oha g kekelibad Jiosh ha'ichu i tashogiththam mat hab wo e juh. Kut ihtham am wabsh wohokamch g ha'ichu ha-ahga. 30 T wabshaba g Jiosh ab uhpam i wuhshath muhkig amjed. 31 Tsh amjed mu'ikko am si i e chehgi ha wui hegam mash an wehmajkahim ch ab wehmaj i hihi Galilee t amjed ab Jerusalem wui. K ihtham am si s-mahch ch ahgahim am t-shahgith. “Pegih, ab g wo ni-kaiham, ni-wehm o'othham mam ab d ep Abrahambad amjedkam ch ahpim mam ia ha wehm ab ihm g Jiosh. Ahpim at em-wui gei ihtha ha'ichu ahga mamt has masma wo e-tho'ibia nat pi gm hu wabsh s-ohhoth g t-hajuni ab Jerusalem t ab. 32 Kutt hemuch ia thatha k ia u'apa ihtha s-kehg ha'ichu ahga em-wui. Heki ash hu am ha ahgith g Jiosh g t-shohshonbad matsh wo uhpam i wuhshath g si e-Kehsha ab muhkig amjed. Kutsh wa woho hab e juh. Kutki ith heki hu o'oha g Davidbad mat eda koi hab e juh. K an wa o'ohanas gohkkam ne'i ed heg eda Jiosh heki hu o'ohana mash hab kaij g Jiosh ab e-alithag wui: Ahpi ap d si ni-alithag. Hemuch ant am i m-maskogi. 34 K hab ep masma an o'ohanas mash hab kaij g Jiosh ab e-alithag wui: B ant wo m-mah hegai si hekia s-kehg ho'ige'ithadag mani wa am si ahgith g Davidbad. Neh, bash kaij g Jiosh ch heg hab ahg mat ab i wuhshath g Jesus muhkig amjed mat pi hekith wo sha'i padt g chuhkugaj. 35 K gn hu ba'ich an ep o'ohadag ch hab chu'ig: Pi at wo sha'i hiwigi g si e-Kehsha mas wo padt g chuhkugaj. 36 “Neh, pi oki hejel hab e ahg g Davidbad natsh pi muh am hab juniok hegai mat haschu g Jiosh ab mohto'i k am ha wehm e cheh g e-shohshonbad. Tsh hi padt g chuhkugaj. 37 Heg o hab ahg Jesus mat pi sha'i padt g chuhkugaj nat pi g Jiosh ab i wuhshath muhkig amjed. 38 Pegih, ni-wepnag, ith amt hekaj wo chum s-mahchk mat g Jiosh gm hu hab wo i juh g pi ap em-chu'ichig 39 mamt hedai ab wo i s-wohoch g Jesus. Heg at am wo i em-ap'ech mamt pi wo ha chu'ichigk am Jiosh nena ed. T pi ha'ichu ep wo e nako mas hab masma am wo i em-ap'ech, nih g chehanig. 40 “T an ep o'oha g kelibad Jiosh ha'ichu i tashogiththam mo hab kaij g Jiosh: S-e g wo nen'oithk k am wo si i oithahi ahpim mam wabsh has ni-ahg. Am ant ha'ichu hab wo juh em-shahgith. Kut am hema wo si s-ap i em-tashogi mani d ahni ch hab wua. Mt eda pi ab hu wo ha wohoch. Nt heg hekaj gm hu hab wo i em-juh ab ni-amjed k pi thahm ep wo pihk ni-el em-hekaj. Neh, bash kaij g Jiosh. “Pegih, si g wo s-e nen'oithk k ab wo s-wohog el g Jiosh. T hab pi ab hu wo i em-ai g s-ko'ok em-namkithadag.” 42 Tsh ab i kuhgit g ha-namki. Tsh wo chum hihi g Paul ch Barnabas. Sh wabshaba g hemajkam ab si ha waith mat am ep wo thatha ba'ich mihshmetha tash k am ba'ich ep wo i ha ahgi ihtham ha'ichu. 43 Tsh am i himto g hemajkam. Tsh ha'i ab i ha oi hegam Paul. Kutsh ab si i ha gewkemhu ab ha'ichu ep ha ahgithk mat am wo wa e nakogath Jiosh hemajimatalig ed. Sh ha'i ihtham d Tutuligo hemajkam ch ha'i d gawul mahs hemajkam ch am ha wehm e mihshmath. 44 Sh am ba'ich d i mihshmetha tash. Tsh chum alo wehsijj ab e hemapai g hemajkam matsh wo kah g Jiosh ha'ichu ahga. 45 Tsh hegam Tutuligo mash pi ab hu ha wohochuth si s-ha hehgam k hab kaij mo d wabsh s-chu iattomkam g Paul. 46 Tsh wabshaba ihtham Paul am haha wabsh si ha ahgi, “Ni-hajuni, bo chum mahs matt wehpeg ab wo em-ahgi g Jiosh ha'ichu ahga ab amjed g si Kehshaj. Kumtki wabshaba s-ohhoth k hab sha e wua mam pi tatchua g pi ha huhugetham thoakag am Jiosh kihthag ed. Kutt heg hekaj wo em-thagito k hegam ha wui wo i t-nohnogi gawul mahs hemajkam. 47 Bo wa masma am t-chehanig Jiosh. An o o'ohanas mash hab kaij: Am ant i em-gawulkai mamt am wo i ha tashogi g ha'ichu ni-ahga g nahnko mahs hemajkam wehsko jewed thahm. T ab em-amjed wo s-mai mat has masma wo e tho'ibia. Neh, bash kaij g Jiosh.” 48 Tsh am i kah ihtham gawul mahs hemajkam k si s-hehgigam ab ihm g Jiosh nash pi ab ha makiog g e-tho'ibiathag ahga. Kutsh hegam ab i s-wohoch mat hedai g Jiosh i ha ap'ech mat wo e tho'ibia. 49 Kutsh wehsko i e ahgahi g ha'ichu ha-ahga ab amjed g Jesus heg eda jewed. 50 Tsh wabshaba g Tutuligo am si i ha chu'amu hegam u'uwi mash am ha wehm e mihshmath ch hegam mash d haha'ichu heg eda kihhim. Kutsh ihtham am si i ha sho'igch g Paul ch Barnabas k gm hu si ha huhu'i ab amjed g e-jewedga. 51 Tsh ihtham gm hu hahawa si i shahmuth g jewed ab e-tahtad ab am ha chehgithch mat wo ha thagito nat pi pi ap ab hu i ha nei. Tsh gm hu hahawa hihi Iconium kihhim wui. 52 Kush hegam matsh ab i s-wohoch ab Antiok t ab si s-hehgig ch ab si u'ukch g gewkthag ab amjed g Hekia S-ap'ekam Gewkthag.

Acts 14

1 Kutsh am hab wa'ap e juh Iconium t am matsh g Tutuligo hemajkam ab ha wui gegokiwua. Paul ch Barnabas atsh am i wahp ha-cheopi ed k am si ha mihshmath. Kutsh mu'i ab i s-wohoch g Tutuligo mo g Jesus d Jiosh si Kehsha. Kutsh ha'i hegam mash am ha wehm e mihshmath hab wa'ap ab i s-wohoch g ha'ichu ha-ahga. 2 Tsh wabshaba am i wuwha hegam Tutuligo matsh pi ab hu wohoch k am si i ha kudu g gawul mahs hemajkam. Kutsh ihtham s-ha keh'el g Paul ch Barnabas ch hegam ehp matsh ab i s-ha wohoch. 3 Sh wabshaba tash am oiopo ihtham Jesus chuhchai ha shahgith ch am si tasho ha mihshmath ab amjed g Jesus pihk elithadag. Tsh heg ab i ha mah g gewkthag mat hab wo wuath g si s-hasigam ha'ichu k hab masma wohokamch g ha-ahga. 4 Tsh hegam hemajkam am i e gawulkai mat ha'i ab ha wehmt g Jesus chuhchai k ha'i g ha-obga ab ha wehmt. 5 Tsh wehsijj hegam mat ab ha wui gegokiwua g Jesus chuhchai am hahawa i e ap'ech g e-wanimedtham ha wehm mat wo ha sho'igchuth k wo ha ma'ichshul. 6 Tsh ihtham am i s-mai mamtsh wo ha sho'igch k atsh gm hu wa hekaj ba'ich hahawa ep hihi Lystra kihhim wui. Ihtha Lystra o am hab chu'ig Lyconia jewed ch ed. 7 Kutsh am thatha k am ha ahgith g s-kehg ha'ichu ahga ab amjed g Jesus. 8 Sh am ha wui hema thaha mash pi himthag ga hu i e-alijk amjed. 9 Tsh am i nei g Paul mo hab masma ab si kaiham g ahgaj mo ab si s-wohochuth mo g Jiosh woho ha thoajith. Tsh ab si shel i neith 10 k si s-kaitham hab kaij, “Oi g kekiwua.” Tsh gam si tha'iwush g pi himithkam k an has si oimmed. 11 Tsh am i nei g hemajkam matsh haschu has juh g Paul k ash am si e-ne'okikaj hihnk ch hab kaij, “Ia atki ha'i thatha g jijosh o'othham e wepogithch. 12 Ith oki d Zeus. Kuki heg d neoktham ch hab d Hermes.” Sh heg hab ahg Paul nash pi heg am neok. 13 Sh am mia kehk g ha-cheopi. Kush heg eda am kehshch g Zeus. Tsh am i ha wehmaj g ha-pahlig. Kutsh am ha u'apa g totolo ch ha'ichu heosig mat ab ha wui wo iagchul g Paul ch Barnabas. 14 Kutsh ith pi ha hohho'ithach. Tsh hab ab si wantsh g e-wehschuga k am si wohp ha shahgith g hemajkam k si hihnk ch hab kaij, 15 “Pi g hab wo t-elithath machs d jijosh. Thach wabsh o'othham hab masma mam ahpim. Ia att thatha matt am wo em-ahgi mamt wo ha'asa ihm hab masma mo d Jiosh hegai mo pi d wohokam Jiosh. Heg o d wohokam Jiosh mat nahto g thahm kahchim ch jewed kahchim ch wehs ha'ichu mo an hab chu'ig. Kumt heg wui ab wo i e thagito. 16 Heki o hu am hab wabsh junihim g hejel e-tatchui g nahnko mahs hemajkam. Kuki g Jiosh wabsh s-hemajim ha nakogahim. 17 K wabshaba chum hekith hab chu'ig mo am e chehgithahim no pi s-kehg ha'ichu hab em-junith ch ab em-mahkch g juhki ch ab bahijith g ha'ichu em-e'es mamt wo s-kokwogk ch wo si s-ap e tahtkkath.” 18 Neh, bash kaij ihtham Paul ch wabshaba chum alo pi ha shohbi nash pi chum si tatchua matsh ab ha'ichu wo iagchul ha wui. 19 Tsh am hahawa ha'i thatha hegam mash wa am ha sho'igchuth Antiok t am ch Iconium t am k am i ha nu'ichkwua g hemajkam. Kutsh ab wui gegokiwua g Paul k ma'ichkwua k am i chewaimed k gm hu i wuhshath ab kihhim t amjed k am wua hab elithch mat muh. 20 Tsh wabshaba am e chehm hegam mo ab ihm g Jesus k an wehgaj gegok g Paul. Tsh gam si i wamig k gm hu uhpam hih kihhim wui. Am ba'ich d i tash. Tsh gm hu hahawa hihi Derbe wui hegam Paul 21 k an i ha ahgithahi g Jesus ha'ichu ahga. Kutsh mu'ijj ab i s-wohoch. Tsh am hahawa hihi Lystra wui ch Iconium wui ch Antiok wui 22 k am si i ha gewkemhun mat am wo hihimath ch ab wo si hiwgath g Jesus. Ha-mashchama ash hab masma matt hemho wa mu'i ha'ichu wo nakog k am haha wo i wahp Jiosh kihthag ed. 23 Tsh am hahawa i ha chuhcha hegam mat d wo ha wanimedthamk am ha sha'ashagith mo hebai i e wehm e nanmek. Sh am hahawa wehsijj wabsh e ho'ige'ithahun ch hab he'ekkio pi e gegosith. Sh ihtham Jesus chuhchai ab hahawa i ha thathagitod Jiosh wui. 24 Neh, batsh wa masma am gahi wuwha g Pisidia jewed k gm hu thatha Pamphylia jewed ch ed 25 k am ha mihshmethahim Perga kihhim ch ed ch amjed gm hu hahawa ep hihi Attalia kihhim t am. 26 Tsh am i e nahto g ha-chikpan. Kutsh am gahi i shul ge shuhthagi ch ed an ge'e wahlko ch ed k gm hu thatha hegai Antiok t am mamtsh am i ha thagito Jiosh hemajimatalig ed. 27 Tsh am wehsijj i e hemapai hegam mash ab ihm g Jesus amai. Sh g Paul ch Barnabas am ha ahgith mat g Jiosh am si i ha wehmt k ab ha mah g nahnko mahs hemajkam g ap'ethag mat ab wo i s-wohoch g ha'ichu ha-ahga ab amjed g Jesus. 28 Tash ash am thadkkahim ha wehm hegam mash ab ihm g Jesus amai Antiok t am.

Acts 15

1 Kutsh am ha'i thatha Antiok t ab ab Judea t amjed k hab chum ha ahg hegam matsh ab i s-wohoch g ha'ichu ha-ahga ab amjed g Jesus, “Jiosh o am t-chehani Mosesbad o'ohana ed mat g chechoj hemho wa wo e o'oha an e pahl hikuchk. Kumt pi wo sha'i e tho'ibia mamtp pi hab wo e juh.” 2 Tsh wabshaba g Paul ch Barnabas pi sha'i hohho'i ihtha k am si ha ne'owi ihtham Judea t am Tutuligo. Tsh am hahawa i e ap'ech matsh g Paul ch Barnabas am wo hihi Jerusalem wui ha'i ep ha wehm k am wo s-mai mat has wo chei hegam ha'i ehp Jesus chuhchai ch ge'eged. 3 Tsh ihtham am hihim k am i ha ahgithahi hegam mash ab ihm g Jesus Phenicia jewed oithk ch Samaria jewed oithk mat g gawul mahs hemajkam ab i e nodagi Jesus wui. Kutsh wehsijj ab si s-ap i e tahtam k si s-hehgig ihtham mash hedai i kah. 4 Kutsh gd hu thatha Jerusalem t am. Tsh si s-ha ho'ige'el g Jesus chuhchai ch ge'eged ch wehsijj hegam mash ab ihm g Jesus amai. Tsh am hahawa ha ahgi mat haschu k ab am si i ha wehmt g Jiosh mat am hab juh. 5 Tsh wabshaba am ha'i ab ha wui gegokiwua hegam mash si s-gewkam oith g chehanig ch hab kaij, “Hemho wa at wo e o'oha an e pahl hikuchk g chechoj k am hab wo junihith hegai t-chehanig mo g Jiosh ab t-mahkch.” 6 Tsh am ep e nam g Jesus chuhchai ch ge'eged k tash am a'aga ihtha. 7 Tsh g Peter am i kekiwua k hab kaij: “Ni-wepnag, s-mahch am mant ga hu i wehpeg am ha ahgi g gawul mahs hemajkam g s-kehg ha'ichu ahgaj g Jiosh ab amjed g Jesus nat pi g Jiosh am i ni-gawulkai mant hab wo juh. 8 Jiosh o s-mahch g o'othham chegitoi ch ab ep ha mah g Hekia S-ap'ekam Gewkthag hab wa masma mat ahchim hab t-juh. 9 Kuch heg hekaj s-mahch mo s-ha ho'ige'elith ch gm hu hab i juh g pi ap ha-chu'ichig mat ab i s-wohoch g ha'ichu ahgaj. 10 Pegih, m haschu ahgch ha'i pi'ichuth g Jiosh ab s-wehch ha'ichu ha mohto'ithch g wechij wohochuththam? Ahchim Tutuligo att pi sha'i t-nako machs wehs am hab wo junihith g t-chehanig. T g t-shohshon hab wa'ap pi sha'i e nako. 11 Pi attki hab masma wo t-tho'ibia. Heg at wo wa'i t-tho'ibia t-kownalig Jesus. Ab att i s-wohoch g ha'ichu ahgaj. T heg ab i s-t-ho'ige'ith k t-tho'ibia. Pegih, t hab wa'i masma wo e tho'ibia ihtham gawul mahs hemajkam.” Neh, bash kaij g Peter. 12 Sh am hahawa ha ahgith g Barnabas ch Paul mat haschu s-hasigam hab juh g Jiosh gewkthagkaj am ha shahgith g gawul mahs hemajkam. Kush wehsijj ab wabsh i pi shahmuni ch am ha kaiham. 13 Tsh am i ha'asa neneo. Tsh g James am i kuhgi g ha-ahga mash hab kaij, “Ni-wepnag, ab g wo i ni-kaiham. 14 Peter o am t-ahgith matsh has masma g Jiosh am chehgi mo pihk e elith ha hekaj g nahnko mahs hemajkam ch am ha'i i ha gawulkai mat d wo hemajkamgajk. 15 K ith am wohokamchuth mat wa has i masma an o'oha g kekelibad Jiosh ha'ichu i tashogiththam mash wa hab kaij g Jiosh: 16 ‘Neh, e at padch g Davidbad kownaltalig. K wabshaba ab him g tash mant am ep wo i ap'echuth k am hema wo i kei g amjedkam am kehkud ed mant heg gahi wuhshanim wo i himch g kownaltalig. 17 T g nahnko mahs hemajkam ab wo i ni-gahghi. Hegam ani ab i ha waith mat d wo ni-hemajkamgak.’ 18 Neh, bo kaij g Jiosh ch heg am i t-tashogith heki hu wa'i amjed. 19 “Kuni hab ep s-che'imk mani hab hi elith matt pi ab hu wo ha mohto'i g t-chehanigkaj hegam gawul mahs hemajkam mat ab i e nohnogi Jiosh wui. 20 Tt hi wabsh wo ha ahgi mat has wo e junihith. T hab ab ha wui wo si s-ap e tahtkkath hegam t-wehm o'othham mo am ha wehm kihthag. Tt wabsh wo ha cheha mat wo si e nuhkuth g hejel e-wehm kihkam wehhejed ch pi ab hu wo ihm hab masma mo d Jiosh hegai mo pi d Jiosh ha'ichu ko'athch mo ab e to'ith ha wui k pi wo ko'ath g eh'ed ch hegai mo pi gm hu e iawua g eh'ed e mum'ajch. 21 Ith o wehsko si s-ap s-e mahch no pi an ahgachug wehs kihhim ch ed ch am e ne'okchulith t-wehm o'othham ha-chechopi ed.” 22 Tsh ihtham Jesus chuhchai ch ge'eged am i ap'ech am wehs ha wehm hegam mash ab ihm g Jesus amai matsh am ha'i wo i ha chuhcha. Tsh ihtham am wo i ha oi g Paul ch Barnabas am Antiok wui. Sh ihtham d ha-chuhchai Judas Barsabbas ch Silas nash pi g hemajkam ab si has ha elith. 23 Kutsh ab ha mah g o'ohana matsh wo bek am Antiok wui. Sh hab chu'ig ihtha o'ohana: “T-naipijju mam d gawul mahs hemajkam ch ab ihm g Jesus ch ab kihthag Antiok t ab ch Syria t ab ch Cilicia t ab. B ach si em-ho'ige'elith ahchim mach d Jesus chuhchai ch ge'eged ia Jerusalem t ab. 24 “Ihtham Barnabas ch Paul o ab t-ahgith mat am ha'i hihi g t-wehm o'othham k am em-kudu am ha'ichu pi ap em-ahgithk. Kuch eda wa chum pi sha'i ha ap'echuth mat hab wo e juh. 25 Kutt heg hekaj wehsijj ia t-hemapath k am i ap'ech matt has wo t-juh. B o si i s-ap e thagitokch ihtham Barnabas ch Paul am chikpanaj ed g t-kownalig Jesus Christ ch hekaj chum alo e ko'ij. 27 Kutt gohk ep i ha chuhcha mat am wo i ha oith k si s-ap wo em-ahgi mach haschu i em-o'ohanith. K d ihtham Judas ch Silas. 28 T am i t-tashogi g Hekia S-ap'ekam Gewkthag mattki pi ab hu wo i em-mohto'i g t-chehanig ahchim Tutuligo k wabsh wo em-ahgi ihtha mamt am hab hi wo wa junihith. T hab wabsh si s-ap wo e tahtkkath em-wui hegam t-wehm o'othham mo am em-wehm kihthag. 29 Neh, pi amt wo ko'ath g eh'ed ch hegai mo pi gm hu e iawua g eh'ed e mum'ajch ch pi wo ko'ath hegai mo ab e to'ith mo haschu hab chum e elith mo d jiosh. Mt wo si e nuhkuth g hejel e-wehm kihkam wehhejed. Mamtp wo si e nuhkuth ith ab k am wo wa s-ap'ek. T g Jiosh am wo wa em-wehmajk.” 30 Kutsh am hahawa gm hu hihi ihtham Barnabas ch Paul ch Judas ch Silas k gm hu thatha Antiok t am. Tsh am i e hemapai hegam mash ab ihm g Jesus. Kutsh am i ha mah g o'ohana. 31 Tsh ihtham am ne'okchulith k si s-ap i e taht natsh pi heg hekaj ab si i e gewkemhu. 32 Kush g Judas ch Silas hab wa'ap d Jiosh ha'ichu i tashogiththam ch am thadkkahim he'es i tash ch mu'i ha'ichukaj am i ha gewkemhu. 33 Kumtsh am hahawa s-ap i ha thagito mat wo uhpam hihi. 34 [Tsh wabshaba g Silas hab i e ah mat wabsh ha wehm wo thakath.] 35 Sh g Paul ch Barnabas he'es i tash am thadkkahim Antiok t am am ha jehnigithch ab amjed g Jesus. Sh mu'ijj hab wa'ap ha ahgith g ha'ichu ahga ab amjed g Jesus. 36 Sh am hu hebai amjed, sh hab kaij g Paul ab Barnabas wui, “Am att ep wo hihim k am wo i ha gewkemhu wehs kihhim ch ed mach wa hebai ahgachug g Jiosh ha'ichu ahga k am wo ha nei mas has wa'i masma.” 37 Kush g Barnabas hab chum kaij mat wo bek g John Mark. 38 Tsh wabshaba g Paul pi hohho'i mat wo bek nat pi wa am wabsh i ha thagito Pamphylia t am k pi am hu ha wehm i nahto g chikpan. 39 Kutsh ith am si pi ha ap'et. Tsh hekaj i e gawulkai. Kutsh g Barnabas bek g Mark k gn hu aigo i shul ge'e wahlkokaj Cyprus jewed t am. 40 Tsh wabshaba g Paul g Silas am epai bek mat wo oi. Kumtsh am e ho'ige'ithahun k am i ha thagito Jiosh hemajimatalig ed. 41 Tsh ihtham Paul am hihi Syria ch Cilicia jejewed oithk k am i ha gewkemhunahim hegam mash ab ihm g Jesus.

Acts 16

1 Kutsh hegam Paul am hahawa hihi Derbe kihhim wui k amjed gm hu thatha Lystra kihhim t am. Kush eda amai am hema kih g wechij o'othham ch am oith g Jesus himthag ch hab chehgig Timothy. K g je'ej hab wa'ap am oith g Jesus himthag ch d Tuhligo uwi. Sh wabshaba g ohgbadaj d Greek hemajkam. 2 Sh wehsijj g Jesus ihmtham am Lystra t am ch Iconium t am am si wehhejed neok g Timothy. 3 Tsh g Paul s-behim g Timothy e wehm. Sh eda wehs s-mahch g Tutuligo amai mat g ohgbadaj pi pahl hikuch g Timothy. Tsh heg hekaj g Paul an pahl hikuch k hahawa bek. 4 Kutsh am hihim k hebai i thaiw kihhim t am ch am ha ahgith hegam mo ab s-wohochuth g Jiosh ha'ichu ahga hegai matsh ha o'ohani g Jesus chuhchai ch ge'eged am Jerusalem t am k hab ha ahgith mat s-ap am hab wo chum junihith. 5 Tsh am i mu'itha hegam mash am e wehm e mihshmath wehs kihhim ch ed. Tsh g ha-wohochuthadag am i gewka. 6 Tsh am gahi wuwha g Phrygia jewed ch Galasia jewed ihtham Paul k am ahgahim g ha'ichu ahga ab amjed g Jesus. Tsh wabshaba pi ha hiwigi g Hekia S-ap'ekam Gewkthag mas am wo i ahgahi am Asia jewed ch ed. 7 Tsh gm hu thatha mo an i chekshani g Mysia jewed k hab chum i e ah mat imhab uhpam wo hihi Bithynia jewed wui. Tsh wabshaba ep pi ha hiwigi g Hekia S-ap'ekam Gewkthag. 8 Tsh hekaj gm hu gahi hihi Mysia jewed oithk k gm hu thatha Troas kihhim t am. Kunt am ha nam ahni Luke. 9 Tsh g Jiosh am ha'ichu hab juh nenaj ed g Paul. Sh am hema neith g Macedonia jewed t am o'othham. Kush ith ab kehk ch hab kaij, “Ab g i hihm Macedonia wui k wo i t-wehmt.” 10 T g Paul am hahawa t-ahgi ihtha. Kuch hab kaij moki tatchua g Jiosh matt am wo hihim k am wo i ha ahgithahi g ha'ichu ahgaj. Tt am ha hekaj i t-nako matt am aigo i chehchsh Macedonia jewed t am. 11 Kutt an ha hekaj gahi i shul g ge'e shuhthagi ge'e wahlko ch ed k ga hu thatha Samothrace kihhim t ab. Am ba'ich d i tash, tt am thatha Neapolis kihhim t am 12 k amjed gm hu ba'ich i wahp mo am d Philippi kihhim amai wehpeg chekshani ch ed g Macedonia jewed. Ihtha Philippi o d si s-has ha'ichu. K mu'i am thadha g si ge'e kownal shonthalig. Kuch am he'es i ha'ichugkahim ith eda kihhim. 13 Pi o am hu hema kehk g Tutuligo hemajkam ha-cheopi. Kutt heg hekaj am hihi mo an ge akimelig kihhim aigo mach hab t-ahg mo am hu hebai apchuthas mo am e ho'ige'ithahun g Tutuligo. K am hebai e hemapaithch g u'uwi. Kutt am i thadhaiwua k am ha wehm neneo. 14 K hema hegam u'uwi hab chehgig Lydia ch ab amjed g Thyatira kihhim ch d s-ihbhaimagi lohba gagdatham ch ab si ihm g Jiosh. Jiosh at ab i mah g wohochuthadag. Kut ab s-wohog el g Paul 15 k e pahl wako. T wehs hab wa'ap e juh g wehmaj kihkam. K hab hahawa kaij g Lydia, “Oi g wo t-oith k am t-wehm wo i thadhaiwua t-kih am nach pi d hahawa em-wehm wohochuththam.” Kutt wa woho hab t-juh heg hekaj mat pi t-thagito k ab ep t-waith. 16 Kuch am hu hebai am hihim matt gm hu wo hihi mo am e ho'ige'ithahun. T ab hema i t-oi g uwi. Kuki g jiawul an u'ukch ch ab mahkch g amichuthadag mo gm hu ba'ich tash ha'ichu ahg. K am ha'i si u'ukch ch mu'i lial u'u ab amjed mo am ha'ichu ha ahgith g hemajkam. 17 T ihtha uwi ab i t-oith k si hihnk ch hab kaij, “Ihtham o'othham o d piongaj g si uhgchu Jiosh ch am em-ahgithahim mamt has masma wo e tho'ibia.” 18 Neh, bo kaij ch mu'i tashkaj an t-oithahim. T am hahawa pi e nako g Paul k ab si sikol i kekiwua k hab kaij ab jiawul wui, “Jesus Christ gewkthagkaj ani ab si m-chehani mapt wo thagito ihtha chehia.” T am wa i hekaj thagito g jiawul. 19 T am i nei hegam mo an u'ukch mat hahawa pi has masma ep wo u'uth g lial heg hekaj chehia k hekaj an ha ui g Paul ch Silas k gm hu i ha chewaim haha'ichu ha wui. Ihtham o am thadha si eda g kihhim. 20 K hegam mat am i ha ui g Paul ch Silas hab ha ahg, “Ihtham o d Tutuligo. Kutt ha cheh mo ha kudut g ia kihkam 21 no pi chum t-ahgith mash hema d si ge'e kownal mattsh ab wo chum si has elithath. K eda pi hiwgithas machs hab wo t-wuath nach pi ab si wecho g Rome kownal. K pi d t-wuikam ihtha ha'ichu ha-ahga.” 22 T wehsijj hegam mat ab i e hemapai ab i ha wehmt k ab ha wui gegokiwua g Paul ch Silas. T g haha'ichu gm hu wuashul g ha-wehschuga k am ha'i ha chehani mat wo ha gewitta. 23 Kumt am i si s-ko'okam ha gewittani k gd hu ha u'apa kukpaikud wui k hab ahgith g lilso ha nuhkuththam mat si s-wihnam wo ha kuh. 24 T wa woho hab e juh k gd hu si chuhko ha kuh k an ha wahpki g ha-kakhio uhs wupulshpadag ed. 25 Kutsh am eda i huh g s-chuhugam. Sh g Paul ch Silas am si e ho'ige'ithahun ch si ne'eth ch ab si ihm g Jiosh. Sh am ha'i ep kuhkpi g lilso ch ha kaiham. 26 T am haha wabsh si s-gewkam ugij g jewed. Tsh g kukpaikud am si wehs u'ugij. Tsh gam si e kuhkpi'o g kukpaikud kuhkpadag. Tsh g ha-wupulshpadag e padch. 27 Tsh ab si i nea g ha nuhkuththam k hab e ahg mat ne'iopa g lilso k hekaj an bei g is-pahyo mat wo hejel e mua. 28 Sh wabshaba g Paul am si s-kaitham hihnk ch hab kaij, “Pi g am hejel e mua'i. Ia ach wabsh i wehs ha'ichug.” 29 Tsh am hahawa bei g lahmpa k am si med k am i wahk k si gigiwuk. Sh am wabsh kia thadha g lilso. Kutsh ab i gei ha wecho g Paul ch Silas 30 k ab i ha wuwhasith k ab ha kakke, “Shahnt masma wo ni-tho'ibia?” 31 Sh hab kaij ihtham Paul, “B apt wo i s-wohoch g ha'ichu t-ahga ab amjed g t-kownalig Jesus Christ. T heg wo m-tho'ibia. T ihtham m-wehm kihkam m ia gegok hab wa'ap wo e juh.” 32 Tsh ihtham Paul am hahawa i ha mihshmath ab amjed g Jesus. 33 Tsh am ha hekaj i ha u'u k ab i wako g eh'ed mat wa am ha gewitta. Tsh amjed am ha hekaj i e nakog k e pahl-wapko g e-wehm kihkam ha wehm 34 k gn hu hahawa i ha wahpki g Paul ch Silas e-kih ed k ha gegos. Kush si s-hehgig ihtha wehs ha wehm g e-wehm kihkam no pi ab hahawa wohochuth g Jiosh. 35 Sh am ba'ich d i si'alim. Tsh g haha'ichu am ha ahgi g chich-lilihi mat wo ha thagito ihtham Paul. 36 Sh hegai lilso ha nuhkuththam ab ahgith g Paul ch hab kaij, “Ia at gei g ahga ab ha amjed g haha'ichu matsh wo em-thagito. Mt gamai wabsh s-ap e taht k wo hihi.” 37 Kush wabshaba g Paul hab kaij ab ha wui g chich-lilihi, “Pi att hab wo t-juh. Hemho wa at ab wo i hihi hegam s-has haha'ichu k ia wo i t-wuwhas am ha tahgio g hemajkam nat pi t-gewitta am ha tahgio wa chum pi mahchch mas haschu d t-chu'ichig. K heg pi d chum t-wuikam nach pi u'ukch g t-shel hab masma mo g Rome t am hemajkam.” 38 Kush g chich-lilihi am hahawa ha ahgith g s-has haha'ichu mo has kaij. Tsh am i kah ihtha k si e totothsith k am hihim 39 k ab ha ahgi mat wabsh wo i s-ha ho'ige'el k am hahawa i ha wuwhasith k hab ha ahg mat hig gm hu wo hihi ab amjed g kihhim. 40 T g Paul ch Silas am i wuwhag k gm hu hihi Lydia kih wui. Kut am e nam hegam mat ab i s-wohoch g ha'ichu ha-ahga ab amjed g Jesus. T ihtham Paul ab si i ha gewkemhun k gm hu hahawa hihi.

Acts 17

1 Tsh ihtham Paul am wabsh gahi wuwha g Amphipolis kihhim ch Apollonia kihhim k gm hu thatha Thessalonica kihhim t am. Sh am hema kehk g Tutuligo ha-cheopi. 2 Tsh heg wui am hihi hegam Paul mo hab wa e wua chum hekith. Tsh g Paul am ha wehm a'aga ab amjed g Jiosh o'ohana k ith hekaj am chum wohokamch mat g Jiosh si Kehsha hemho wa wo e sho'igchuth k wo e mu'a k wabshaba ep wo i wuhsh ab muhkig t amjed. Sh hab ep kaij, “Ihtha Jesus mani ia mahsko wua em-shahgith d hegai Jiosh si Kehsha.” Sh waik thomig oitham am ha jehnigith mihshmetha tash ab. 4 Kutsh ha'i ab i s-wohochuth k ab i ha wehmt hegam Paul. Tsh mu'i hegam Greek hemajkam ch hegam s-has ha'ichu u'uwi mash ab ihm g Jiosh ab hab wa'ap i s-wohoch g ha'ichu ha-ahga k ha wehmt. Sh hema ihtham hab chehgig Jason. Tsh wabshaba ha'i s-ha hehgam g Tutuligo. Kush am ha'i oiopo g s-papadmakam ch am i ha wehmt hegam Tutuligo k am i ha kudut g kihkam. Kutsh wabsh woho i babgat k am hihim k am wabsh si wahp Jason kih ed mat am wo ha ui g Paul ch Silas k am wo ha u'apa hemajkam ha wui. 6 Sh wabshaba pi am hu ha'ichug. Kush heg hi wa Jason am tha. Kush ha'i ep thadha g wehmaj wohochuththam. Kumtsh ihtham ha u'u k am i ha chewaim haha'ichu ha wui k si hihnk ch hab kaij, “Ia at ha'i thatha g o'othham k ash wa wehsko ha kudut g hemajkam ch ab wui gegok g si uhgchu kownal hab kaijch mo am hema d ep kownal ch hab chehgig Jesus. K ihtha Jason ab ha to'akch e-kih ab.” 8 Neh, bash kaij ch hekaj ab si i ha kudut g hemajkam ch haha'ichu mat wabsh woho'i babgat. 9 Tsh g haha'ichu am cheha g Jason ch hegam ha'i mat wo ha namkith ha'akia mo haschu d i ha-chehanig. Kutsh am hab e juh. Tsh hahawa ha thagito. 10 Tsh am i s-chuk. Tsh hegam Jesus ihmtham am ha ahgi ihtham Paul matsh gm hu wo hihi Berea kihhim wui. Tsh gd hu thatha k am ha hekaj hihi Tutuligo ha-cheopi wui. 11 Tsh ihtham s-ap ab i ha nei. Sh am ha mihshmath. Kush si s-hohho'ith ch ab kaiham g ha'ichu ha-ahga ch wehs tashkaj am si hoan g Jiosh heki hu o'ohana mat wo s-mai mas wa woho hegai mash g Paul am ha ahgith. 12 Tsh mu'ijj ab i s-wohoch g Tutuligo. Tsh mu'ijj g gawul mahs hemajkam hab wa'ap ab i s-wohoch. Ha'i ihtham ash d s-has haha'ichu u'uwi. 13 Tsh am wabsh i chum kah g Tutuligo am Thessalonica t am mash ihtham Paul am ha mihshmath Berea t am hab wa ehp k am ha hekaj i hihim k am i ha kudu g hemajkam. 14 Kutsh heg hekaj am ahgi g Paul hegam mash ab s-wohochuth mat gm hu wo hih ge kahchki hugithgo. Tsh wabshaba g Silas am wa'i wih Berea t am g Timothy wehm. 15 Tsh hegam matsh am i bei g Paul gm hu u'apa Athens kihhim t am. Tsh am hahawa ha ahgi g Paul mat wo ha ahgi g Silas ch Timothy mamt hekith wo i e nakog k ab ha hekaj wo i hihi. Tsh amjed gm hu hahawa uhpam hihi ihtham e-kihhim wui. 16 Sh am thaha g Paul Athens t am ch am ha nenida g Silas ch Timothy. Sh eda wehsko chuhch g ha-jijoshta. Sh g Paul am ha neith ihtham ch hab si pi ap e tahtk. 17 Tsh am wabsh ap'et mat ha wehm wo si i a'aga g hemajkam am ha-cheopi ed. Kush am ha'i ha wehm e mihshmath g gawul mahs hemajkam. Sh g Paul am epai kuaya ch ed ha wehm ha'ichu i a'aga ab amjed g Jesus am ha ahgithch mat g ko'i wo i wuwha ab muhkig t amjed. Sh am ha'i d jewed t ab ha'ichu s-chu a'amichuththam ch wabsh ab uhpam i ne'owi g Paul. Sh ha'ijj hab kaij, “K haschu hab chum ahg ihtha pi ha'ichu amichuththam o'othham?” Kush ha'i hab ep kaij, “Shahag wepo mo g mehk jewed thahm jijosh am ha a'aga.” 19 Kush eda hegam kihkam ch hegam mo am wabsh sha thadha s-hohho'ith mat tash oitham wo kaihamath ch wo a'agath hegai mo haschu d si wechij ahga. (19) Kumtsh ab i bei g Paul k gd hu u'apa mo am e nanmek k hab kaij ab wui, “Shah'o d ahga ihtha wechij mashchama map ab amjed neok. (20) Pi ach am wa chum amichuth.” 22 Tsh am hahawa kekiwua g Paul k hab kaij, “Ahpim kihkam amki ab si has ha elith g jijosh. 23 Am ani neith m an chuhch g em-jijoshta kahya oithk. Kuki am hema kehk g iagchulithakud mo ith an o'ohanas, ‘Ia amt wo ha'ichu thai heg wehhejed jiosh mattp hems pi mahch.’ Pegih, ihtha pi em-machiga o d hegai mant am haha wo em-ahgi ab amjed. 24 “Tho ihtha Jiosh mat wehs ha'ichu nahto ch d kownal wehs ha'ichu thahm. Wehsko o an ha'ichug g Jiosh. K pi hab sha'i mahs mas am hebai wabsh wo e thai hab masma mam hab ha wua g e-jijoshta. 25 Jiosh o ab t-mahkch g thoakag ch wehs ha'ichu. K pi am hu ha'ichu d sha'i hegai mas ab i si tatchua ab amjed g o'othham mat ab wo mah chikpank. 26 “Jiosh at am hemako nahto g o'othham k ab amjed i wuhshath g wehs nahnko mahs hemajkam k an a'ai i ha gantad wehsko jewed oithk mat hebai heki hu i ap'ech mat an wo kihkath. 27 K hab d elithaj mat am wo i e gahgithahi g Jiosh k atp hems wo cheh. Pi o sha'i mehk ab hema i t-amjed 28 ch ab t-mahkch g thoakag ch kihthag. Ha'ijj g em-wehm o'othham o d ha'ichu a'amichuththam ch hab kaij, ‘Ahchim hemajkam ach d Jiosh a'aliga.’ 29 “Pegih neh, ith o d wohokam mach d a'aligaj g Jiosh. Tt pi hab wo ge t-ahgath mas g wohokam Jiosh hab mahs mo ihtham em-jijoshta mat wabsh g o'othham am nahto g ohlakaj o g plahthakaj o g hothaikaj. 30 Heki o hu pi mahch g hemajkam g Jiosh tatchui. K g Jiosh si s-hemajim am ha nakog. Ni wabshaba hemu em-ahgith mo hahawa ab si i ha chehani g hemajkam wehsko mat gm hu wo s-ohhoth g pi ap e-chegitoi. 31 Am at i ap'ech g tash mat wehs wo ha lothai g hemajkam k heki hu am hema si i kei mat hab wo juh g lothaita. Tsh ith ia mahsi t-shahgith k ia oimmelhim ch e muhkith. Tsh g Jiosh ab i wuhshath muhkig t amjed mat wo wohokamch mo d si Kehshaj.” Neh, bash kaij g Paul. 32 Tsh ihtham am i kah mo hab kaij matsh hema i wuhsh ab muhkig amjed. Kush ha'ijj wabsh si ash ch wabshaba ha'i hab kaij, “Am g wa ep t-jehnigith ab amjed ihtha.” 33 Tsh amjed gm hu hahawa hih g Paul. 34 Tsh ha'i ab s-wohochuth k ab i wehmt. Sh hema ihtham d Dionysius ch d hema hegam s-chu a'amichuththam. Kush am hema d ep uwi ch hab chehgig Damaris.

Acts 18

1 Tsh gm hu hahawa hih g Paul ab Athens t amjed k am him k am jiwia Corinth kihhim t am. 2 Sh am hema thaha g Tuhligo ch hab chehgig Aquila ch ab d mahsikam Pontus t ab. K g wehmaj kihkam hab chehgig Priscilla. Ihtham o d ikus kihttham. Kutsh hab wa e juh am ha tahgio matsh g ge'e kownal Claudius gm hu ha huhu'i Tutuligo ab amjed g Rome kihhim. Sh ihtham Aquila ch Priscilla am ahhio Corinth wui. 3 Tsh g Paul am i ha chehgim k am ha wehm i thahiwua k am ha wehm chikpan no pi hab d wa'ap ikus kihttham. 4 Kush wehs mihshmetha tash am hihim Tutuligo ha-cheopi wui mat am wo ha'ichu i ha tashogi ab amjed g Jesus. Kush am ha'i ep ha wehm e mihshmath hegam mo pi d Tutuligo ch am kah g ha'ichu ahgaj. 5 Kutsh am i thatha g Silas ch Timothy ab Macedonia jewed t amjed. Tsh g Paul am hahawa i thagito g e-chikpan k heg am himch matsh am hahawa si i ha mihshmath am si s-mahch ch ahg ab ha wui g Tutuligo mo g Jesus d Jiosh si Kehsha mat wo t-tho'ibia. 6 Tsh wabshaba ab wui gegokiwua ihtham k am si pi ap has ahg. Tsh oi wa g Paul ab si i shahmuth g e-wehschuga ha wui mat wo ha chehgi mat ha thagito k hab kaij, “That wo hejel em-chu'ichigk mamtp wo sha pi e tho'ibia. T ahni pi ab hu ha'ichu d wo ni-chu'ichigk. Nt ia'i amjed g gawul mahs hemajkam ab wo i ha mihshmath.” 7 Neh, tsh ia'i thagito g ha-cheopi k gd hu hahawa ha mihshmath g hemajkam hema kih am g gawul mahs o'othham. Ith ash ab ihm g Jiosh ch hab chehgig Titius Justus ch an kih hugithaj an g Tutuligo ha-cheopi. 8 Kutsh mu'i ep ab i s-wohoch am i kahk k am e pahl wapko. Hema ash d chum ha wanimedtham g Tutuligo ch hab chehgig Crispus ch ab i s-wohoch g e-wehm kihkam ha wehm. 9 Tsh am hu hebai chuhug ch ed am ha'ichu hab e juh Paul nena ed mash kah g Jesus. Kush ab wui hab kaij, “Pi g am sha'i ha'ichu ehbithath. Ia ani m-wehmaj ch pi hedai wo shai hiwigi mas wo s-ko'okam m-juh. Pi g sha'i ha'asa ha mihshmath. Mu'ijj o ia kih ith eda kihhim mat d wo ni-hemajkamgak.” 11 Sh heg hekaj hemako ahithag ch eda hugkam ehp am ha'ichugkahim ch am ha mashcham g Jiosh ha'ichu ahga. 12 Tsh am hahawa hema i thahiwua g kownal am Greek hemajkam ha-jewedga am k hab chehgig Gallio. Tsh g Tutuligo am i e hemapath k an bei g Paul k am u'apa ge'e kih t am 13 k hab kaij, “Ihtha o'othham o chum ha chehani g hemajkam mat hab masma ab wo i ihmath g Jiosh mam has masma pi t-hiwgith.” 14 Kutsh am haha wabsh wo i chum neo g Paul. Sh wabshaba Gallio hab ha ahg, “Pi oki ab wui kehk g ge'e kownal chehanig. T heg hekaj pi wo ni-ap'et mant ab wo em-kaiha. 15 Thoki wabsh ha'ichu ahga ab amjed g em-himthag ch ab hema i amjed g em-wehm o'othham. Mt heg hekaj am hejel wo i ap'ech. Pi ant am hu wo sha'i i hudaw hab mahs ha'ichu.” 16 Neh, bash kaij ch gm hu si i ha wuwhas ge'e kih amjed. 17 Kutsh ihtham an wabsh si bei hegai mash d ha wanimedtham am cheopi ch ed ch hab chehgig Sosthenes k am si gewitta ge'e kih bahsho. Tsh pi ab hu has sha'i e taht g Gallio. 18 Sh mu'i tash am ha'ichugkahim g Paul Corinth kihhim t am ha wehm hegam mash ab s-wohochuth g Jiosh ha'ichu ahga. Tsh amjed hab i e ah matsh gm hu uhpam wo hih Syria jewed wui. Sh eda gm hu hihhim g ge'eged wapalko Cenchrea kihhim t amjed. Kutsh gm hu hih g Paul. Tsh g Priscilla ch Aquila gm hu oi. Tsh koi am hu i chehchsh ge'e wahlko ch ed, tsh g Paul hih g e-mo'o matsh wa am he'es i tash pi hih mo d ha-himthag heg hekaj mat ab ha'ichu ah'ath g Jiosh. 19 Tsh am hahawa gahi i shul g ge'e wahlkokaj k ga hu thatha Ephesus kihhim t am. Kutsh am i thadhaiwua g Priscilla ch Aquila. Tsh g Paul am hih mat am wo sha i wah Tutuligo ha-cheopi ed k am ha wehm ha'ichu a'aga. 20 Sh ihtham ab ahgith mat am wabsh wo i wih ha wehm. Tsh wabshaba pi e nako 21 k ash hab wabsh ha ahg am wo i himk, “Matp g Jiosh d wo tatchuik, nt wo wa uhpam ep jiwia.” Neh, bash kaij ch amjed ab i chesh ge'e wahlko t ab. 22 Tsh heg gm hu gahi i gei Cesaria kihhim t am. Tsh amjed gm hu hahawa hih g Paul Jerusalem wui k am i ha chehgim g e-wehm wohochuththam. Am he'es i tash, tsh gm hu hahawa ep gahi i chesh Antiok t am. 23 Sh am he'es i ha'ichugkahim amai ch am hahawa ep ha thagito k atsh gm hu hahawa ep hih ha oithk g Galasia ch Phrygia jejewed k am i ha gewkemhunahim g e-wehm wohochuththam. 24 Tsh am hema jiwia g Tuhligo Ephesus kihhim t am k hab chehgig Apollos ch ab d mahsikam Alexandria kihhim t ab ch si s-e mahch ab s-neokimakam t ab ch ash si ge'e s-mahch g Jiosh o'ohana. 25 Kumtsh heki hu mashcha ab amjed g Jesus. Kush si s-hohho'ith ch am ahgahim ch si s-ap ha mashcham ch eda heg wa'i s-mahch John pahl wakona. 26 Tsh am i kah hegam Priscilla ch Aquila nash pi am si ha mihshmath Tutuligo ha-cheopi ed. Tsh ihtham am i wai e-kih wui k am s-ap ahgith mo haschu i koi s-mahch ab amjed g Jesus. 27 Kutsh hab hahawa i e ah g Apollos mat am wo hih Greece jewed wui. Tsh am i wehmt hegam mash ab s-wohochuth g s-kehg ha'ich ahgaj g Jiosh ch am kih Ephesus t am k am ha o'ohani g e-wehm wohochuththam amai Greece ch ed k ab si ha ahgith mat s-ap ab wo i nei g Apollos. Tsh gm hu jiwia k ab si ge'e i ha wehmt. 28 Sh am ha'i ne'owin g Tutuligo. Tsh wabshaba am ha gewito am ha-kaichuthch g mu'i hemajkam k am si i wohokamch heg hekaj Jiosh o'ohana mo g Jesus d Jiosh si Kehsha mat wo ha tho'ibia g hemajkam.

Acts 19

1 Tsh gm hu ba'ich ep hih g Paul k gd hu jiwia Ephesus t am mo eda g Apollos am oimmed Corinth t am. Kush am ha'i kih ch ab chum s-wohochuth g Jiosh ha'ichu ahga. 2 Sh g Paul ab ha kakke, “Namt am wa bei g gewkthag ab amjed g Hekia S-ap'ekam Gewkthag mamt hekith ab i s-wohoch g Jiosh ha'ichu ahga?” Sh hab kaij hegam, “Pi ach koi hebai sha'i kah mas am ha'ichu d Hekia S-ap'ekam Gewkthag.” 3 Sh hab hahawa kaij g Paul, “A namt koi e pahl wapko g Jesus pahl wakonakaj?” Sh hab kaij, “Pi koi. Johnbad pahl wakonakaj att t-wapko.” 4 Sh hab hahawa ep kaij g Paul, “M o wa woho mash heg am ha ahgith mat gm hu wo s-ohhoth g pi ap e-chegitoi ch wabshaba am ep ha ahgith mat ab wo i s-wohoch hegai mat am epai wo i e maskogi. K heg d Jesus.” 5 Tsh ihtham ab i s-wohochuth k e pahl wapko ab chehchegch g Jesus. 6 Tsh g Paul an i ha tahtamahim k ab ihmahim g Jiosh. Tsh ab si i bei g gewkthag ab amjed d Hekia S-ap'ekam Gewkthag k am si gawul ne'okikaj neneok mat pi hebai mai ch am ahg g Jiosh ha'ichu ahga. 7 Kush am hu d i gamai gohk ihtham chechoj. 8 Sh am wapke g Paul Tutuligo ha-cheopi ed ch am ha wehm ha'ichu si i a'aga waik mashath ab chum s-ap s-ha mahtchuthamk ab amjed g Jiosh kownaltalig. 9 Tsh wabshaba ha'i pi wohochuth k wabsh si pi ap neneok ab amjed g Jesus himthag am ha kaichuthch g hemajkam. Tsh heg hekaj am ha thagito g Paul k gm hu hih ha u'uk hegam mat ab i s-wohoch. Sh am hema d Tyrannus ch ge mashchamakud ch ith ha hiwigi. Kush heg eda g Paul am ha wehm a'aga g Jiosh kownaltalig wehs tashkaj 10 gohk ahith ab. Tsh wehsko e kah g Jesus ahga heg eda Asia jewed. 11 Kush g Jiosh am si i wehmaj g Paul mash am hab junihim g s-hasigam ha'ichu. 12 Sh g hemajkam chum hems ab u'u g Paul ha'ichu eniga ch hekaj ab tattam g kok'otham. Kush ha thothad. Tsh g jijawul im hu hab wo i e juh ab ha amjed hegam mo an ha u'ukch. 13 Sh eda an ha'i ep oiopo g Tutuligo ch hab chum e wua mo im hu hab i ha wua g jijawul ab ha amjed g hemajkam. Kush am hema g uhgchu pahl hab chehgig Sceva ch wewa'ak a'alithag. Sh ihtham hab wa'ap chum im hu hab i ha wua g jijawul ab ha amjed g hemajkam. Am hu hebai, sh ihtham am hema neith g o'othham mash g jiawul an u'ukch ch hab kaij, “Ab g i thagito ihtha o'othham, ahpi jiawul. Bani si m-ahgith heg gewkthagkaj Jesus mo g Paul ab amjed ha mihshmath.” 15 Sh wabshaba hab kaij g jiawul ab ha wui, “S-mahch ani g Jesus ch ep s-mahch mo hedai wud hegai Paul ch wabshaba ahpim pi sha'i em-mahch mams hedai wud.” 16 Kutsh ihtha cheoj mo g jiawul an si u'ukch haha wabsh ha thathge k s-ko'okam ha juh. Tsh gm hu ne'iopa ab amjed g kihj k d wabsh i eh'ed. K g ha-wehschuga wantshas. 17 Kutsh wehsijj kah ihtha amai Ephesus t am k atsh si s-ehbeni k ab si has i el g t-kownalig Jesus. 18 Tsh mu'ijj hegam matsh ab i s-wohoch s-kehg ha'ichu ahga ab amjed g Jesus am i e hemapath k mahsko wua g pi ap e-chu'ichig am wehs ha tahgio g hemajkam. 19 Tsh mu'ijj hegam mash hab chum e elith mo d mamakai am u'apa hegam e-o'ohana mo an ahgas g hihoina k am ha chehgith k ha mei. Tsh eda am i kuint g ha-namkig ihtham o'ohana mash am mei. Kutsh ai g hetaspo wehst-mahm mihl pihsh (50,000). 20 Kutsh hab masma hekaj si s-gewkam am i hih g ha'ichu ahga ab amjed g Jesus k am i e gantad. Sh g hemajkam ba'ich i s-gewkam ab u'ukch. 21 Tsh amjed hab i e ah g Paul matsh gm hu wo hih Macedonia ch Greece jejewed oithk k amjed gm hu haha wo hih Jerusalem wui k amjed am Rome wui wo hih. 22 Kush eda g Timothy ch Erastus am wehmaj. Kush am ha ahgith g Paul matsh am wo hihi Macedonia wui. Tsh g Paul am wih Asia ch ed he'es i tash. 23 Kutsh ia'i ithani am i e kudu g hemajkam ab Ephesus t ab heg hekaj Jesus himthag. 24 Amai ash am hema kehk g ge'e cheopi. Kush am eda e kehshch g uwi ha-jioshga ch hab chehgig Artemis. Kush am hema d plahtha chikpantham ch hab chehgig Demetrius. Sh ith pionag g plahthakaj ha nahto g al kihki mo heg wepogithas cheopi ch mu'i nahto g lial ha gagdathch. 25 Kutsh g Demetrius am i ha hemapai hegam mash hab wa'ap mahs chikpan hab wua k am si s-gewkam hab kaij ab ha wui, “Ni-naipijju, s-mahch am mo g s-t-kaistalig ab him ith amjed chikpan. 26 Kum eda si neith ch ep kah ihtha hab chehgi Paul mo hab kaij mo ihtham t-jijoshga pi d sha'i jijosh. T hab am gawul juh g e-chegitoi g mu'i hemajkam ab i s-wohochuthk iia Ephesus t am ch chum alo wehsko am Asia jewed oithk. 27 Kut wo e padch g t-chikpan nat pi pi ab hu hab masma wo e ihmath g Artemis mo hemuch wehsko ab si e ihm. T g cheopigaj pi ab hu wo e ha'ichuch.” 28 Tsh am i kah ihtham mat am e hemapai k atsh si babgat k si s-kaitham hihnk ch hab kaij, “B ach si has elith g t-jioshga Artemis.” 29 Sh wehsko kaithag g ha-hihinki ch wehs ha babgach g kihkam. Tsh gohk ha ui hegam mash am wehmaj g Paul k am ha u'apa chichwikud ed. Hegam mamtsh ha ui ash d Gaius ch Aristarcas. 30 Tsh g Paul am chum s-wahkim ha shahgith. Tsh wabshaba g wehmaj wohochuththam pi hiwigi. 31 Tsh ha'i hegam mash d haha'ichu ch d naipijjuj g Paul hab wa'ap ahgith matsh pi am hu wo hih mamt am i ha ui ihtham gohk. 32 Tsh eda heg oitham am i si e gewkai g kudutadag. Sh ha'ijj si hihnk has i kaitham. Sh ha'i am wa gawul ha'ichu ep hihnk heg hekaj mash mu'ijj pi sha'i mahch mas haschu ahgch ia e chehm. 33 Tsh g Tutuligo am hema i kei mat am wo him k ab wo i kekiwua ha wehhejed k am wo ha ahgi mo pi d ha-chu'ichig g Tutuligo. Ith ash hab chehgig Alexander ch am wabsh i chum ha ba'ich i kekiwua mat am wo neo. 34 Tsh am i nei g hemajkam mo d Tuhligo k pi ab hu sha'i kaiham k wabsh si hihnk e wehm am hu i gohk ohla ab hab kaijch, “B ach si has elith g t-jioshga Artemis.” 35 Tsh g s-has ha'ichu o'ohantham ha shohbi g hemajkam ash hab kaijch, “Ahpim kihkam! Wehsijj am s-mahch mo ia Ephesus t am e nuhkuth g cheopigaj g si s-has ha'ichu t-jioshga Artemis ch ia ep e nuhkuth hegai hothaigaj mat ab thahm kahchim t amjed i gei. 36 T pi hedai hab wo sha'i chei mas pi woho ihtha. Kumt ab wabsh wo i e bahbgi k pi am hu ha'ichu wabsh wo si has juh. 37 Neh, mamt i ha u'apa ihtham o'othham. T eda pi ha'ichu sha'i ha ehs ab cheopi t amjed, ni'is am hu sha'i pi ap has ahg g t-jioshga. 38 Neh, k am thadha g haha'ichu lothaita tash ch ed. Kut ihtham Demetrius am ha'ab wo ha u'apa matp ab ha'ichu wo s-ha abchutham. 39 K am ep e nanmek g kihkam ch ha'ichu i a'aga ch am i ap'echuth. Kumt am wo u'apa mamtp ha'ichu ep tatchua. 40 T hahawa pi ab hu wo t-abch g kownal machs wabsh t-cheggia heg hekaj mat haschu has i e juh ith tashkaj. Kutt pi wo sha'i t-nako machs wo ah mat haschu ahgk hab e juh ha'ichu.” 41 Neh, bash kaij ch ha thagito.

Acts 20

1 Tsh am i thotholimat ha'ichu. Tsh g Paul am i ha hemapai g e-wehm wohochuththam k am si i ha gewkemhun k am hahawa ha thagito k gm hu aigo i chesh Macedonia t am 2 k am heg oithk i ha gewkemhunahi mu'ikpa ha mihshmathk. Am he'es d i tash, t ia jiwia Greece jewed t am 3 k ia ha'ichugkahim waik mashath. T am hebai i cheka, t am hahawa i chum e nako mat am aigo i chesh Syria jewed wui. Tsh wabshaba g Tutuligo am i e nako mat wo be k wo mua. T hekaj hab i e ah mat am uhpam ep wo hih Macedonia wui. 4 Tsh ha'i oi g Paul mat gm hu hih. Hema o d Sopater ch ab Berea t amjed ch d alithaj g Pyrrus. K ha'i ep d Aristarcas ch Secundus ch ab Thessalonica t amjed. Tki hegai Gaius mo ab Derbe t amjed ch Timothy am ha oi. Tki hegam ep ha oi Tychicus ch Trophimus mo ab amjed g Asia jewed. 5 T ia thatha Philippi kihhim t am. Ni ahni Luke ia wabsh kia ha'ichug ch am hahawa oi g Paul. T wabshaba hegam ha'i i'ajed gm hu t-ba'ich i chehchsh Troas kihhim wui matsh am wo t-nenida. 6 T eda e ai mat g Tutuligo wuhshath g e-shohshon ha-tho'ibiathag k hab pi ko'a hegai pahn mo jewajithas. Kutt am hahawa gahi i shul g ge'e wahlkokaj k am ha nam Troas t am mo d hetasp tash amjed mat hegam am i t-thagito. Kuch wehsijj am ha'ichugkahim hemako thomig. 7 Am hu hebai d i shahwai hudunk. Tt am i t-hemapai mo an hebai uhgk g kih k am t-wehm t-gegos matt am wo hehgigchul g Jiosh. K an mu'i e mehmheithch g lalampa. T g Paul am neok k sha'i si tash am t-mihshmath natsh pi wo hih ba'ich tash ed. Kut eda i huh g s-chuhugam. 9 K an hema thaha g wechij o'othham wintani t an ch hab chehgig Eutycus ch atsh am i s-kohsim k kohsh k i gei ab wintani t amjed k gd hu gei jewedo. K eda waik e thahm kihki mat amjed ab i gei. T am hahawa ha'i be k am s-mai matki heki hu muh. 10 T wabshaba g Paul am i huduni k an si kohm k hab kaij, “Pi g am wo has e tahtkkath. Tho thoakam.” 11 T g hajunij gm hu hahawa i bei hegai wechij o'othham kihj wui si s-ap e tahtkch mo d thoakam. Kut gm hu hahawa uhpam ep i chehchsh mo an e mihshmath k am hab juh hegai chemait hugi mat hekaj wo s-chegitok g Jesus muhkig. T g Paul am hahawa ep ha mihshmath k gm hu hahawa hih. 13 K am hahawa t-ahgith g Paul mattsh gm hu wo nam mo am d Assos kihhim natsh pi wabsh wo i keish g wohg k am wo hih. Kutt heg hekaj gahi i shul g ge'e wahlkokaj k gm hu thatha. 14 T am hahawa t-nam k an t-wehm thahiwua. Tt am ep gahi i shulig k gm hu ai g Mitylene kihhim 15 k amjed gm hu ai g Chios kihhim. K am ba'ich d ep i tash, tt gm hu ai g Samos kihhim. K eda e aihim mat g Tutuligo gm hu wo hihi Jerusalem wui k am hab wo juh g hehgchulitha Jiosh wui mat s-ap i ha wehmt k am babhaijith g ha-e'esha. K heg wui s-himimk g Paul ch s-e hohtkith ch hekaj hab kaij matt pi am hu wo i huhud Ephesus t am. Kutt hekaj am wabsh gahi wuwha. K am ba'ich d i tash, tt gm hu thatha Miletus kihhim t am. 17 K oi wa s-ha neithamk g Paul hegam mo d ge'eged am ha shahgith g t-wehm wohochuththam ab Ephesus t ab. Kut ab i ha wai Miletus wui. 18 T am i thatha. K hab kaij ab ha wui: “Ni-wepnag, s-mahch am mani haschu am hab i junihim am em-shahgith wabsh chum hekith ga hu i amjed mant hekith ia jiwia iia Asia jewed t am. 19 Ni ab wabsh i ni-sho'igchuth ch hebai ni-oh'og iawua am hab junihithch g Jiosh chikpan nani pi si pihk ni-elith em-hekaj. Am o chum e nakog g ni-wehm o'othham mat wo ni-mua. Ni heg hekaj ab nakog g s-wihnk ha'ichu. 20 Kum s-mahch mani pi ha'ichu sha'i ehstohim ch wabshaba am wehs em-ahgith mani haschu hab elith mat d wo i em-wehmtadagk. Ni am em-mashcham g Jiosh ha'ichu ahga mam am e hehemapath ch amai ep si hehe'ejel em-kihki ed. 21 Kuni am si tasho ha ahgith g ni-wehm o'othham ch gawul mahs hemajkam mat wo s-ohhoth g pi ap e-chegitoi k ab wo i e thagito Jiosh wui k ab wo bei g t-kownalig Jesus. 22 K hemuch hab si tahhathag g ni-ihbthag mant am wo hih Jerusalem wui. Pi ani mahch mas haschu has wo mahsk am ni-wehhejed amai. 23 Ith ani hi wa s-mahch mani heg wui am him mantp hems wo ni-kuhpachuth k wo ni-sho'igch no pi heki hu am i ni-tashogith g Hekia S-ap'ekam Gewkthag mani hebai i jijiwhia. 24 Pi o d sha'i ha'ichu g ni-thoakag manis wo si s-huwithath hejel ni-wehhejed. Heg ani wa'i hab s-junimk mant wo nahto hegai mo g t-kownalig Jesus ab ni-chehani mant am hab wo juh. K d ihtha mant am wo i ahgahi g Jiosh hemajimatalig. 25 “Neh, pi amtki hekith ep wo sha'i ni-nei. Ni heg hekaj s-em-ahgithamk mani wa wehs ha'ichu em-ahgith ab amjed g Jiosh kownaltalig. 26 K pi d ni-chu'ichig mamtp hema i pi wo e tho'ibia. 27 Wehs ant em-ahgi hegai mo haschu g Jiosh am hab elith k pi haschu sha'i ehsto ab em-amjed. 28 Ab g hejel wo e nuhkuthath ch ep wo ha nuhkuthath g e-wehm wohochuththam. Hegam o g Hekia S-ap'ekam Gewkthag em-nuhkuthachuth hab masma mamt wo ha'i ha nuhkuthach g kahwal e-shoshoiga. Kumt wo s-chegitok mat g t-kownalig Jesus eh'ed e iawua mat am ha wehhejed e muhkith k ha tho'ibia. 29 Ab at ha'i wo i wahp em-shahgith mat hab masma wo s-ta ehbithamak am em-wehhejed mo g sheh'e am ha wehhejed g kahwal k wo chum s-em-u'im. 30 Kut am ha'i wo i e maskogi g chechoj em-shahgith k wo ha'ichu chum em-iattogi ahpim wohochuththam mat hab masma ha'i im hu gawul wo i em-wanim. 31 Neh, mt wo si e nuhkuthath ch wo s-chegitokath mani em-mashcham wehsijj waik ahith ab ch g ni-oh'og iawua s-chuhugam oitham ch tash oitham nani pi pihk ni-elith em-hekaj. 32 “Pegih neh, ab ant wa em-ahgi ab amjed g Jiosh ho'ige'ithadag k am haha wo em-thagito Jiosh nohnhoi ed. T g Jiosh wo wa em-nuhkuthath ch ab wo i gewkai g em-wohochuthadag k wo em-mah hegai si s-kehg ha'ichu mo ab ha makiog g e-hemajkamga. 33 Pi ani hekith hedai ha-lialigakaj o g wehschuga sha'i pihk ni-elith. 34 Ni wabsh g hejel ni-nohnhoikaj am hab junihim g chikpan ch hekaj ni-thagio'ith ch ep ha thagio'ith g ni-wehm chikpantham. 35 Ni hab wa masma am em-chehgith mamt wo i ha wehmt hegam mo pi e amichuth. T-kownalig Jesus o hab kaij, ‘T wo s-em-hehgigch hegai mat ab wo ha'ichu em-mah. Mt wabshaba ba'ich wo i s-hehgigk mamt ab wo ha'ichu ha mah.’ Kumt ith wo s-chegitok mo has i kaij.” 36 I am i ha'asa neo g Paul k am hahawa wehs ha wehm tohtonwua ihtham k am e ho'ige'ithahu. 37 K wehsijj si shoani ch an si kokme no pi si pihk e elith hekaj ch hab ahg, “Jiosh at wo wa m-wehmajk.” 38 K si pi ap e tahtk, wahm mat am i chegito mo hab kaij mat pi thahm ep wo nei. T am hahawa wehsijj hihi mo am thaha g ge'e wahlko.

Acts 21

1 Kutt am hahawa si wehs i ha ho'ige'el g t-wepnag k am ha thagito k am wabsh si shel gahi i shul g ge'e wahlkokaj k ga hu thatha Cos kihhim t ab. Am ba'ich d i tash, tt ga hu ai g Rhodes kihhim k amjed ga hu aigo i thatha Patara kihhim t ab. 2 Neh, k am hema thaha g ge'e wahlko matsh gm hu wo hih Phenicia jewed wui. Kutt heg ab an ha hekaj i chehchsh k gm hu oi. 3 Tsh ab wo i e huhuds g wahlko mohtoi Tyre kihhim t am. Kutt am bihbij hugithaj an g Cyprus jewed k am thatha amai Tyre t am. 4 K am ha'i kih g t-wehm wohochuththam. Kutt ha chehg k am ha wehm thadha hemako thomig ab. T am i ha tashogi g Hekia S-ap'ekam Gewkthag matsh am ha'ichu has wo e juh tahgio g Paul. Kum hab chum ahg mat pi am hu wo hih Jerusalem wui. 5 T wabshaba am i e ai matt wo hihi. Tt gm hu hihi. T wehsijj gm hu t-oi ha wehm g e-wehm kihkam ch e-a'aliga matt gm hu wo i wuwha ab kihhim t amjed. Tt wehsijj am i tohtonwua ge shuhthagi bahsho k am t-ho'ige'ithahun 6 k ab hahawa a'ai t-ahgith mat wo t-wehmajk g Jiosh. Tt ahchim gn hu hahawa i chehchsh ge'e wahlko ch ed. T hegam gm hu epai hihi uhpam. 7 Kutt gm hu hahawa ep gahi i shul g ge'e wahlkokaj Ptolemais kihhim wui. K am ha'i kih g t-wehm wohochuththam. Ch am ha wehmajkahim hemako tash ab. 8 Am ba'ich d i tash, tt ga hu thatha Cesaria kihhim t ab. Kuki am kih hegai Philip mo hema d hegam wewa'ak chechoj matsh wa am e chuhcha matsh am wo i ha wehmt g Jesus chuhchai Jerusalem t ab. Kutt am hihi kihj wui. T am i t-wahpki. 9 Kuch am wehmajkahim he'ekia i tash. Ihtha Philip o gi'ik u'uwi a'alithag. K ihtham pi ha kuhkun ch am ahgahim hegai mo haschu g Jiosh am ha tashogith. 10 Kut ab Judea t amjed heg ab jiwia Jiosh ha'ichu i tashogiththam mo hab chehgig Agabus. 11 Ch am t-mihshmath. T heg an bei g Paul giwud k an hekaj wuh g e-kakhio ch e-nohnhoi ch hab kaij, “Bamtsh masma hab wo m-juh maptp am wo hih Jerusalem wui. T-wehm o'othham atsh an wo si m-wud k ab wo m-thagito gawul mahs hemajkam ha wui. Ith o am ni-tashogith g Hekia S-ap'ekam Gewkthag.” 12 Kutt am i kah ihtha k ab chum si i ahgith g Paul mat pi am hu wo hih Jerusalem wui. 13 K wabshaba hab wabsh kaij, “Pi g am wo shoanith. Pi am ap ni-tahtchuth. Ni-nahtokch ani mamtp wo ni-wulsh o chum hems wo ni-mua g t-kownalig Jesus wehhejed.” 14 Kutt pi sha'i t-nako machs wo shohbi k am wabsh i thagito k hab kaij, “Pegih, ith ach wa'i tatchua mat g Jiosh ha'ichu ap'echutha am hab wo e juh.” 15 Kuch am ep ha'ichug he'es i tash ch am hahawa i t-nakog k gm hu hihi Jerusalem wui. 16 T am ha'i t-oi Jerusalem wui k am i t-ui heg kih wui matt am wehmaj wo thadhaiwua. Ith o hab chehgig Mason ch ab d si kihkam Cyprus jewed t ab ch ash heki hu wa'i s-wohochuth mo g Jesus d Jiosh si Kehsha. 17 T si s-ap i e taht g t-wehm wohochuththam ab i t-neithok. 18 Ihtham ha-uhgchuga ash d James. Kutt heg chehgio am wehmaj g Paul. K am wehsijj thadha hegam mo d ge'eged. 19 T g Paul ab wehs i ha ho'ige'ith k am hahawa si s-ap ha ahgith wehs ha'ichu mat g Jiosh s-kehg am hab juh am gahi wuhshanim am ha shahgith g gawul mahs hemajkam. 20 T am i kaiok ab si ihm g Jiosh k wabshaba hab kaij ab Paul wui, “Neh, t-wehnag, s-mahch ap mat mu'i mihl t-wehm o'othham ab i s-wohoch g Jiosh ha'ichu ahga k ab ihm g t-kownalig Jesus k eda ab wabsh kia si has elith g heki hu t-chehanig. 21 Ihtham o kah mapsh ahpi ha mashcham hegam t-wehm o'othham mo an a'ai kih nahnko mahs hemajkam ha shahgith mat wo s-ohhoth g t-chehanig k pi an hu wo ha o'oha an ha pahl hikuchk g e-a'aliga. 22 Tho wabsh si shel mat wo kah mapt ia jiwia. Pegih, k hab chum mahs 23 mapt am hab wo e juh matt has wo i m-ah. M o ha'i d chechoj ch d gi'ik mat he'es pi hih g e-mo'o nat pi ab ha'ichu ah'ath g Jiosh. 24 Pt am wo ha oith k am ha wehm wo e thagito Jiosh wui ge'e cheopi t am. Am apt ha wehhejed wo namkith mat haschu wo i chum ha namkith heg hekaj. Kumt am haha wo hih g e-mo'o. Pt hab masma wo ha chehgi g t-wehm o'othham map am hab junihim g t-himthag. T heg amjed wo s-mahchk mo pi woho hegai mam haschu ab m-abchuth. 25 P am wa s-mahch matt haschu am ha o'ohani hegam gawul mahs hemajkam mat ab i s-wohoch g Jiosh ha'ichu ahga. Bo chu'ig g t-o'ohana mat hegam pi wo ko'ath g eh'ed ch hegai mo pi gm hu e iawua g eh'ed e mum'ajch kch hegai mo ab e to'ith hegai mo haschu hab chum e elith mo d jiosh. Kut wo si e nuhkuth hab masma mat hegai wa'i si e-hohnig o g si e-kun wehm wo kihk.” 26 K wa woho am ba'ich d i tash. T g Paul am i ha ui hegam chechoj k am ha wehm i e thagito Jiosh wui k am hahawa i wah ge'e cheopi ch ed k am ha ahgith mat d wo wewa'ak tashk, t wo kuhgit hegai mat ab ah'ath. T am hab wo e juh hegai mat am hahawa ha'ichu wo iagchul Jiosh wui. 27 K am i e aihim mat wo kuhgit hegai wewa'ak tash. T am hih g Paul k am i wah ge'e cheopi ch ed. Kutsh ha'i am chehg k an bei hegam Tutuligo mo ab Asia jewed t amjed. K eda mu'i an oiopo g hemajkam. Kutsh am si i ha kudut 28 k ash si hihnk ch hab kaij, “T-hajuni, ia g wo i t-wehmt. Ihtha o'othham o an wehsko si has ahg g t-himthag ch t-chehanig ch ihtha ge'e cheopi. Pi o d ha-ap'ethag g gawul mahs hemajkam mas ia hu wo i wahp. Kutki eda ihtha ha'i i ha wahpkith k hab uamhu g ge'e cheopi.” 29 Bash kaij nash pi am hu hebai neith g Paul hema wehm g gawul mahs o'othham ch hab e ahg mat am i wahki. Hegai mo wa am wehmaj o hab chehgig Trophimus ch ab Ephesus t ab d kihkam. 30 T am wabsh wehsko chehmo g pi ha-ap'ethag amai kihhim t am. T ab a'aijed i wohp g hemajkam k an wabsh si bei g Paul k gm hu i chewaim ab amjed g ge'e cheopi. T ab ha hekaj si e kuhkp g ge'e cheopi kihkijeg. 31 K ihtham s-babgam hemajkam chum mum'a g Paul. Kumtsh am ahgi g shonthal ha-ge'ejig mash am ge e cheggia. 32 T ab ha hekaj tha'iwush mu'i ha wehm g e-shonthalig k ha'i ehp g ha-ge'ege'ejig k gd hu wo'i mat am e hemapai g hemajkam. T hegam am ha hekaj wabsh si ha'asa cheggia g Paul am i ha neithk. 33 T g shonthal am him k an bei g Paul. T g ha-ge'ejig hab ha ah mat an wo si wuh g gohk e hukshchim wainomikaj. Kut hab juh. T ab hahawa ha kakke g hemajkam, “Thoh'o wud ihtha o'othham ch haschu has juh?” 34 K ha'i g hemajkam am hu has i ahg. K ha'ijj ehp am wa gawul ep ahg. T am wabsh i ge nahnko e juh g ha'ichu ha-ahga. Kut pi sha'i amich ihtha shonthal ha-ge'ejig mat haschu has e juh k heg hekaj am wabsh ha ahgith g e-shonthalig mat gd hu wo kuh g Paul. 35 T an i bei mo an cheshajkudag. T wabshaba wabsh e nondagch g hemajkam k an chum s-behimk ch si hihnk ch hab kaij, “Mu'awo! Mu'awo!” T heg hekaj wabsh uhgk i ul g shonthal mat pi wo e muhkith. 37 T am haha wabsh i chum wahki g Paul e-kolhai ed. K hab kaij g Greek ha-ne'okikaj ab wui g shonthal ha-ge'ejig, “M ani ha'ichu chum s-m-ahgithamk.” K heg hab kaij, “A kupki neok g Greek ha-ne'okikaj. 38 Ps hemsi d hegai Egypt t am o'othham mat wa am hu hebai ia i chum shonwuich g cheggiadag. T wa am i wehmt g gi'ik mihl chechoj ch u'a g cheggiakud am tohono jewed oithk.” 39 K hab kaij g Paul, “Pi ani d hegai. Thani Tuhligo ch ab d mahsikam Tarsus kihhim t ab am Cilicia jewed ch ed ch ab u'ukch g ni-shel ab amjed g si s-has ha'ichu kihhim. Pt ab wo si i s-ni-ho'ige'ith k wo ni-hiwigi mant am wo neo ha wui g hemajkam.” 40 T wa woho am hiwigi g shonthal ha-ge'ejig. T an i kekiwua mo an cheshajkudag ab ha ba'ich g hemajkam k am neo g hejel e-ne'okikaj k hab kaij:

Acts 22

1 “Ni-hajuni ch ahpim ge'eged hemajkam, ab g wo i ni-kaiham mant am hejel ni-wehhejed wo neo.” 2 T am i kah mo g ha-ne'okikaj neok k gm hu wabsh i pi shahmuni. K hab hahawa kaij g Paul: 3 “Ahni ani d Tuhligo ch ab d mahsikam Tarsus kihhim t am am Cilicia jewed ch ed ch wabshaba ia ge'etha Jerusalem kihhim t am k ia ni-mashcham. K wa g Gamaliel d ni-mashchamtham ch ab si s-gewkam ni-mashcham g t-chehanig. Ni hab wa masma am chum si s-gewkam oith g Jiosh himthag mam ahpim hemuch ith i tashkaj. 4 Kuni wa heg hekaj ha sho'igchuth ch ha koktha hegam mo an u'ukch ihtha wechij ha'ichu ahga ch wa an ha u'u g chechoj ch u'uwi ch am ha shulig kukpaikud ch ed. 5 T g uhgchu pahl ch hegam e jehnigiththam am wo wohokamch ihtha mani em-ahgith. Bani wa ha ahg mant am wo hih Damascus kihhim wui. T hegam ab ni-mah g o'ohana am ha wui hegam mo d u'ugchu am ha eda g t-wehm o'othham amai Damascus ch ed. Nt wa am hi wa i hih mant wo ha wupulsh g e hukshchim wainomikaj hegam mo ab s-wohochuth ihtha wechij ha'ichu ahga k wo uhpam i ha ui ab Jerusalem wui mat wo bei g s-ko'ok e-namkithadag. 6 “Neh, am att wa hihim k gm hu i aihim g Damascus kihhim. K wa am hu d i thahm juhk mat haha wabsh ha'ichu si ton ab amjed g thahm kahchim an wehsko ni-wehgaj. 7 Nt wa am i gei jewedo. T wa ab hema si neo ni-wui k hab kaij, ‘Saul, s-wohom ap hig ni-sho'igchuth.’ 8 “Kuni si has elith ch hab kaij, ‘Thohp wud ch ab neok?’ “K hab hahawa ep kaij, ‘Thani ahni Jesus map ha sho'igchuth g ni-ihmtham.’ 9 K hegam mo am ni-wehmaj hi wa neith hegai ge'e tonlig ch wabshaba pi amichuth g ne'oki. 10 “Ni ab hahawa kakke, ‘Shahnt wo ni-juh, ni-kownalig?’ “K wa hab kaij, ‘Ab g i wamig k am him k am i wahki Damascus ch ed. T am hahawa hema wo m-ahgi mapt haschu am hab wo chum wuath.’ 11 “Tki eda pi ni-nenich heg hekaj mat wa am si s-masma ton. T wa am wabsh i ni-wanim hegam mo am ni-wehmaj k gd hu ni-u'apa Damascus t am. 12 “Kuki wa am hema kih g o'othham ch hab chehgig Ananias ch ab si ihm g Jiosh ch ep am si oith g chehanig. K ab si has elith g t-wehm o'othham amai Damascus t am. 13 Heg at wa am jiwia ni-wui k ab kehk ch hab kaij, ‘Ni-nawoj Saul, ab g beh'i g e-nentalig!’ Nt ha hekaj s-ap ha'ichu neith k ab si i nei. 14 “K wa hab kaij ab ni-wui, ‘Neh, am antsh wo m-ahgi matsh ahpi am i m-kei g Jiosh mapt wo s-mahchk g tatchuij ch wo nei g si s-ap'ekam Kehshaj k wo kah mat am hejel wo m-ahgi g ha'ichu e-ahga. K d wa'i ihtha Jiosh mo an u'ukch g t-shohshonbad. 15 K hab d elithaj mapt d wo hema hegamk mapt am wo si i wohokamch g Jesus k am wo i ha ahgi g hemajkam mapt haschu i neith k haschu i kah. 16 Pt ha hekaj wo i e nakog k wo e pahl wako ab ihmathch g Jesus. T heg gm hu hab wo i juh g pi ap m-chu'ichig.’ Neh, bo ni-ahg. 17 “Nt wa am hab juniok ab i hih Jerusalem wui k am hu hebai am ni-ho'ige'ithahun ge'e cheopi ch ed. T wa am haha wabsh ni-nena ed ha'ichu hab e juh 18 mani neith g Jesus. K hab kaij ab ni-wui, ‘Ia g ha hekaj thagito g Jerusalem k hihm ab amjed nat pi g m-wehm o'othham iia pi ab hu wo kaiha g ha'ichu m-ahga ab ni-amjed.’ 19 “Ni hab kaij, ‘Tp hems wo wa ni-kaiha, ni-kownalig, no pi s-ap s-mahch mani d ahni mani wa an wahkhim ha eda g ha-chechopi ch an ha u'uth ch ha gewittan hegam mo ab m-ihm. 20 Kuni wa am ha wehmaj ch am nuhkuth g ha-wehschuga hegam mat mua hegai Steven mat am si s-mahch k ah ab m-amjed.’ 21 “K wabshaba hab kaij g Jesus ab ni-wui, ‘Am g wa hihm nant pi am i m-kei mapt am mehk wo hih ha wui g nahnko mahs hemajkam.’ ” Neh, bo kaij g Paul. 22 K wa ab hi wa s-ap kaiham ihtham hemajkam. T wabshaba am hab wabsh chum chei ihtha matsh g Jesus am i kei matsh am wo hih ha wui g nahnko mahs hemajkam. T am ha hekaj i hihinkiath si s-kaitham k hab kaij, “Mu'awo! Mu'awo! Pi o an hu hab chum chu'ig mas in d wo thoakamk.” 23 K si hihnk ch ab si shahmuth g e-wepschuga ch g jewed shashkum ch am uhgk si nen'eichuth nat pi am i si babgat. 24 T g shonthal ha-ge'ejig am hahawa ha cheha g e-shonthalig mat gm hu wo i wahki g Paul shonthal ha-kih ed. T am i wahki. T am ha cheha mat wo gewitta am hugkam mat am wo ha ahgi mat has e juh mo hekaj si hihnkoith g Tutuligo. 25 T an wulsh mat wo chum gewitta. K am hema kehk g shonthal ha ge'ejig. K ab wui hab kaij g Paul, “Ab ani u'ukch g ni-shel hab masma mo g Rome t am o'othham. K heg hekaj pi hab chum mahs mams wo ni-gewitta pi koi ni-lothaithk.” 26 T heg am i kah ihtha k am wui hih g si uhgk shonthal ha-ge'ejig k ab kakke ch hab kaij, “Nap s-mahch maptki has wo chum chu'i? Ihtha o'othham oki ab u'ukch g e-shel hab masma mo g Rome t am o'othham.” 27 T am hahawa hih g si uhgchu shonthal ha-ge'ejig am Paul wui k ab kakke ch hab kaij, “Am g ni-ahgith. Nap ab u'ukch g e-shel hab masma mo g Rome t am o'othham?” Sh hab kaij g Paul, “Heu'u.” 28 K hab hahawa kaij g ha-ge'ejig, “A pt has hig masma ab bei g e-shel. Ahni ant hi ab bei mu'i lial ha namkith.” K hab kaij g Paul, “Ni wabshaba ahni ab u'ukch g ni-shel mani ab d ha amjedkam hegam mo u'ukch g e-shel.” 29 T ga hu ta'i si i gegokiwua hegam mo an wulshch g Paul mat wo chum gewitta. T g shonthal ha-ge'ejig ep si e toths nat pi ha cheha mat hab wo juh. 30 Am ba'ich d i tash, tsh g shonthal ha-ge'ejig am i ha cheha g u'ugchu papal mat am wo i ha hemapai g e jehnigiththam nash pi s-mahchimk mo haschu ab abchuth g Paul. T g shonthaligaj gam wul'o g e hukshchim wainomi ab ab g Paul k am i be k am i kei ha wui.

Acts 23

1 K g Paul ab si ha neith g e jehnitiththam ch hab kaij, “Ni-hajuni, chum ani hekith si ni-nakog mant am hab wo wa'i junihith g s-ap'ekam ch hab pi wo sha'i ha'ichukaj si has ni-elithath am tahgio g Jiosh ia i himtham tashkaj.” 2 Kut hegai uhgchu pahl mash hab chehgig Ananias am ha cheha hegam mo an miabithch gegok mat ab wo si shonihi g Paul chinij ab. T ab shonihi. 3 K hab kaij g Paul, “Jiosh at hemho ab wo wa uhpam i nodagi ihtha am m-wui ahpi map s-chu iattomk. Ab ap thak ch ni-lothait g t-chehanigkaj ch eda ep melchkwuhim g t-chehanig map ab ha chehani mat ab wo ni-shonihi.” 4 K hab kaij hegam mo an miabithch gegok g Paul, “S-ko'okam ap has ahg g uhgchu pahl.” 5 K hab kaij g Paul, “Ni-hajuni, mant hems wo s-mahchk mokis d uhgchu pahl, nt pi hab wo sha'i chei, no pi hab chu'ig g Jiosh o'ohana: Pi g am wo sha'i pi ap has ahgath g e-ge'ejig.” 6 K hegam e jehnigiththam ha'i d Sajusi ch ha'i ep d Palasi. T ith am i s-mai g Paul k am si s-kaitham neok ha wui ch hab kaij, “Ni-hajuni, ahni ani d Palasi ch d ha amjedkam g Palasi ch ha wepo s-wohochuth mat g ko'i ep wo i wuwha ab hiha'ini t amjed. Kum heg hekaj ni-lothait.” 7 T ith am i kah g e jehnigiththam k am ha hekaj a'ai e ne'owin k pi ab hu i e wehmt. 8 Hegam mo d Sajusi o pi ab hu wohochuth mat g ko'i wo i wuwha ab hiha'ini t amjed ch ep pi wohochuth mo an ha'ichug g anghil o g kok'oi. K wabshaba g Palasi wehs s-wohochuth ihtha. 9 T am hahawa i si e gewkai g ha-hihinki. T am ha'i gegokiwua hegam mo d chehanig hudawogam ch d Palasi k am si s-gewkam ha shohbith k hab kaij, “Pi att ha'ichu sha'i cheh mas pi ap hab juh ihtha o'othham. Tp hems wa woho g anghil am wehmaj neo.” 10 T am ba'ich i si e gewkai g ha-ne'owina. Kum hab e ahg mat am hu wo wantsh g Paul. K g shonthal ha-ge'ejig am hahawa ha chehani g e-shonthalig mat am wo ha wohppo'i. Kut am hihim k be k gd i bei e-kih wui. 11 Sh am ba'ich d i hudunk, tsh am i e chehgi g Jesus Paul wui k hab kaij, “Ia ap si s-mahch ch am ahgahim ha'ichu ab ni-amjed. Kuni am i m-gewkemhun mapt hab wo wa masma hab e juh am Rome t am.” 12 K am ba'ich d i tash wabsh i si'alim, tsh am ha'i e hemapai g Tutuligo k am chum Jiosh tahgio a'ai si e ahgith mat pi ha'ichu wo hug k ho'ip mua g Paul. 13 Kush i ba'iwechkim gi'ikko wehst-mahm ihtham matsh hab masma e ap'ech. 14 Tsh am hahawa hihi ha wui g u'ugchu papal ch ge'eged ch hab kaij, “Matt am Jiosh tahgio a'ai si t-ahgi matt pi ha'ichu wo hug k ho'ip mua hegai Paul. 15 Kumt ahpim g e jehnigiththam ha wehm am wo ahgi g shonthal ha-ge'ejig mat ab wo i bek g Paul em-wui. Kumt hab wo e wuath mam ba'ich ha'ichu s-mahchimk ab amjed. Kutt ahchim wo t-nahtokchith matt wo mua mat koi ia hu wo jiwia em-wui.” 16 Tsh wabshaba g Paul cheoj ma'i am i kah ihtha k am him k am i wah shonthal ha-kih ed k am ahgith g Paul. 17 Tsh heg am hema wai g shonthal ha-ge'ejig k hab kaij ab wui, “Am g beh'i ihtha wechij o'othham am si uhgchu shonthal ha-ge'ejig wui, matsh wo ha'ichu ahgi.” 18 Tsh wa woho am i bei wui k hab kaij, “Ihtha wechij o'othham at ia jiwia k am nei hegai Paul mo ia e kuhpch. T heg am ni-waith k hab ni-ahg mant ab wo i bei m-wui matsh wo ha'ichu m-ahgi.” 19 Tsh g si uhgchu ha-ge'ejig ab bei nowij an k gm hu hekelko i wanimed k ab kakke, “Shahchu apt wo ni-ahgi?” 20 K hab kaij, “Ni-wehm o'othham at am i e ap'ech matsh si'alim ab wo m-tai mamt am wo i bei g Paul e jehnigiththam ha wui hab wabsh s-e junimk mat am ba'ich ha'ichu wo i s-mai ab amjed. 21 Pt wabshaba pi ab hu wo ha kaiha. Gi'ikko wehst-mahm i ba'iwechkim chechoj atsh am wo e e'estok ch wo kihshath nat pi am chum Jiosh tahgio a'ai si e ahgi matsh pi ha'ichu wo hug k ho'ip mua g Paul. K hemuch e nahtokch mat am hab wo e juh ch wabsh nenida mapt has wo e juh.” 22 Sh hab kaij g si ha-uhgchuga, “Pi g am hedai sha'i ahgith hegai mapt haschu ia ni-ahgi.” Tsh gm hu hahawa hih g Paul ma'i. 23 Tsh g si uhgchu shonthal ha-ge'ejig gohk am ha wai g ha-ge'ege'ejig k hab kaij, “Am g wo ha'i i ha gawulkath gohk siant shonthal ch wewa'akko wehst-mahm ehp mo g kakawyu ha chehchej ch gohk siant ehp mo s-e mahch ab is-pahyo t ab. Kut hegam wo e nahtok ch wo hihi mat d wo i humukt ohlak chuhug am Cesaria kihhim wui. 24 Kumt am ha'i wo i ha ap'ech g kakawyu mat g Paul wo hekaj. Mt am s-ap wo i be k am wo u'apa heg wui ge'e kownal mo d Felix.” 25 Neh, bash kaij ch am hahawa o'ohani hegai uhgchu kownal ihtha: 26 “Ab g i s-ni-ho'ige'ith ahpi uhgchu ni-kownalig Felix. Am ant wo m-o'ohani ahni mani d Claudius Lysius 27 nat pi g ge'e ha'ichu has e juh. Tutuligo at am wabsh hema si be k chum alo mua. Kunt s-mai mo ihtha ab u'ukch g e-shel hab masma mo g Rome t am kihkam. Kutt hekaj g ni-shonthalig ha wehm am tho'ibia. 28 Nt amjed am i bei Tutuligo e jehnigiththam ha wui s-mahchimk hegai mam haschu ab abchuth. 29 Kuki wabshaba pi am hu d shai hegai mas hekaj wo e muhkith o wo e kuhpach. Heg amki ab wa'i abchuth mat g hejel ha-chehanig melchkwua. 30 Sh am hahawa ha'i e nakog ihtham Tutuligo matsh wo mua. Kunt am ha hekaj ha cheha g ni-shonthalig mat ab m-wui wo bei. Kuni hab ha ahg hegam mo ab ha'ichu abchuth mat ahpi m-wui wo gagda. Neh, ith o wud wa'i.” 31 Tsh am hab e juh g shonthal hegai mam haschu ab i ha chehani k am i bei g Paul chuhug ch ed k am u'apa Antipatris kihhim t am. 32 Sh am ba'ich d i tash, tsh hegam shonthal mo wabsh e-tahtadkaj hihim gm hu uhpam hihi Jerusalem wui. 33 Tsh hegam mo shoshoigakch am i bei Cesaria wui k am thatha k am i mah g kownal g o'ohana k ab wui hahawa i thagito g Paul. 34 Tsh g kownal am ne'okchul hegai o'ohana k ab kakke g Paul mas haschu jewed amjed. Sh heg am ahgith mo ab Cilicia jewed amjed. 35 Sh hab kaij ab wui, “M ant wo wa m-nei mat hekith wo thatha hegam mo ab ha'ichu m-abchuth.” Sh g shonthaligaj am hahawa nuhkuth kownal kih ed.

Acts 24

1 K am d i hetasp tash, t am hih hegai si uhgchu pahl mo hab chehgig Ananias. T g Tutuligo ha-ge'egedga am ha'i oi. T heg ep ha oi mo d chehanig ab s-chu amichuththam ch hab chehgig Tertullus. T wehs ihtham am i thatha kownal wui k am gagda g Paul. 2 T am wai g Paul. T ihtha s-chu amichuththam am hahawa i ahgahi hegai mam haschu ab abchuth g Paul hab kaijch: “Uhgchu kownal Felix, si ap s-e mahch ch t-wanimed ch mu'i ha'ichu am hab junihim mo d t-ap'ethag iia t-jewedga ed. Kuch heg hekaj s-thotholim kihthag 3 ch si s-ap t-tahtk chum hekith ch wabsh chum hebai ch ab si s-m-ho'ige'elith. 4 Kuni hi wa chum pi hohho'ith mant tash an wo m-u'ukch ch hekaj ab si i m-tahni mapt ab wo si s-t-ho'ige'elith k am he'es wo i kaiha ihtha al shopol ha'ichu t-ahga. 5 “Am att cheh ihtha o'othham. Kuki wa wehsko sha'i si ha kudut g t-wehm o'othham ch am i ha chu'amun mat wo cheggia g kownal ch pi apko ha wanimed mat ab wo i hema s-wohoch mo pi d wohokam ch ab Nazareth t amjed. 6 Kutt am cheh mat ep chum uamhu g ge'e cheopi ab Jerusalem t ab. Kutt hekaj an bei matt wo lothai g t-chehanigkaj. 7 T wabshaba g shonthal ha-ge'ejig Lysias am i wahk k si s-bagam am t-wohppo'ith 8 k ha cheha mat ia ha'ab wo i e bei m-wui. Kutsh hegam mo ab ha'ichu abchuth ab m-wui wo gagda. Pt hems ab wo ha'ichu kakke ihtha o'othham k wo s-mai ab amjed wehs ha'ichu mach haschu ab i abchuth.” 9 Neh, bo kaij. T wehsijj am wohokamch hegam Tutuligo mat am e nam. 10 T ab i ai g Paul. T g kownal ab ahgi mat am wo neo. K hab kaij: “Tash ap ia d kownal ch ha lothait g t-wehm o'othham. Ni heg hekaj si s-ap ni-tahtk mant am wo hejel ni-wehhejed neo m-tahgio. 11 M apt wo i hoan k wo wohokamch mo pi woho g ha'ichu ha-ahga ihtham. “Tho wabsh i gamai gohk tash mant am hih Jerusalem wui hab ahgk mant ab wo ihm g Jiosh. 12 Kunt pi woho sha'i hedai kam'o am ge'e cheopi ch ed k pi woho sha'i am ha kudu g hemajkam amai o hebai i am Jerusalem ch ed. 13 Pi at wo sha'i e nako mas wo wohokamch hegai mo haschu ab i ni-abchuth no pi pi woho. 14 “M o hi wa woho mani ab ihm g Jiosh am oithch ihtha himthag mo ihtham hab elith mo pi d wohokam. K eda d wa'i Jiosh mani ab ihm ch d ha-Jioshga g t-shohshon. Kuni wehs ab s-wohog elith g t-chehanig ch hegai mat g kekelibad Jiosh ha'ichu i tashogiththam an o'oha. 15 Ni-wehm o'othham o s-wohochuth mat g Jiosh ab wo i ha wuwhas g ko'i muhkig t amjed k ab wo i ha gawulkai g s-ap'ekam k gm hu wo i ha gawulkai g pi ap'ekam. Ni ahni hab wa'ap s-wohochuth ihtha 16 ch hekaj chum hekith am si ni-nakog mant am hab wo wa'i junihith g s-ap'ekam ch hab pi wo sha'i ha'ichukaj si ni-el am tahgio g Jiosh ch am ha tahgio g hemajkam. 17 “Tash ani gm hu oimmed am ha oithk g gawul mahs hemajkam ch pi ab hu ha'ichug Jerusalem t ab. T hegam gawul mahs hemajkam ab i to'ahi g lial k am ni-nuhkuthach mant am wo i ha u'i g ni-wehm o'othham ab Jerusalem t ab. Nt heg ab ha mah am jiwiak k am hahawa i ni-thagito Jiosh wui k ab ihm ch am hab wua g iagchulitha ge'e cheopi ch ed. 18 K pi sha'i mu'i ni-wehmaj. Kuni pi d sha'i ahni manis am i shonwua g kudutadag. 19 K wabshaba d hegam mat am ni-chehg k am i shonwua g kudutadag k d ni-wehm o'othham ch ab thatha Asia jewed t amjed. T ia wo chum u'apa m-wui hegai mo haschu ab ni-abchuth k wabshaba pi ia hu thatha. 20 T ihtham m ia gegok am wo chum ah matp woho cheh g pi ap chu'ichig ab ni-ab mant wa am i kekiwua ha wui g e jehnigiththam. 21 Ahni ant wo em-ahgi mani wa hab kaij, ‘Ia am ni-lothait ith i tashkaj heg hekaj mani ab s-wohochuth mat g ko'i uhpam wo i wuwha ab muhkig amjed.’ Na'as ith pi hohho'ith.” Neh, bo kaij g Paul. 22 Felix o si s-ap s-mahch ihtha Jesus himthag. Kut am i ha'asa neo g Paul. T g Felix am i kuhgi g ha'ichu kaihama hab kaijch, “M ant wo wa i apch ihtha mat hekith wo i jiwia g Lysias ab Jerusalem t amjed.” 23 Neh, bo kaij ch am hahawa cheha g shonthal ha-ge'ejig mat am wabsh wo i u'ukchith g Paul ch wabshaba hi wo wa hiwgithath matp hems am wo neithath g naipijjuj ch am wo ha'ichukaj i wehmtath. 24 K g felix wehm kihkam d Tuhligo ch hab chehgig Drusilla. Sh ihtham ab s-kaimk g Paul. Tsh g Felix am ha cheha mamt am wo i wahki g Paul. Sh heg am ha ahgith am jiwiak mamt ab wo i chum s-wohoch g Jesus Christ. Sh am hugkam wabsh s-ap kaiham ihtham. 25 Sh am hahawa i ha ahgithahim mat am wo i e thagito s-ap'ekam wui k pi am hu hab wo junihith g pi ap'ekam no pi e aihim mat g Jiosh gm hu wo i ha gawulkai g pi ap'ekam hemajkam. Tsh g Felix si s-ehbenith k hab kaij, “Oi g gm hu hihm. M ant wo wa ep i m-wai mat hekith am wo s-ni-ap'ek.” 26 K eda hab chum em-ahg mat g Paul wo ha'i namkith g lial mat wo thagito ch heg hekaj mu'ikko ab i wappaith mat am wo wehmaj neo. 27 Kut am i e ba'iwich g gohk ahithag. T am hema ep thahiwua g kownal Felix kehkud ed k hab chehgig Porcius Festus. T wa eda g Felix pi sha'i thagito g Paul no pi si tatchua mat si s-ap ab wo i nei g Tutuligo.

Acts 25

1 Sh am d i waik tash amjed mat am i thahiwua g Festus Cesaria t am, tsh gm hu hih Jerusalem wui. 2 Tsh ab wui i hihi g u'ugchu papal ch ge'eged hemajkam k am ahgith hegai mo haschu ab i chum abchuth g Paul ch ab si tahni mat ab wo i bei Jerusalem wui. Kush eda ihtham am heki hu e a'aga mat wo mua g Paul mat ab wo u'ath. 4 Sh hab kaij g Festus, “Am o d wabsh kia lihso Cesaria t am. Nt eda hemuch am uhpam wo hih. 5 Kumt am ha'i wo ni-oith k am wo ah mam haschu ab abchuth.” 6 K am thakahim g Festus am hu i hemako thomig k gm hu hahawa hih Cesaria wui. T hegam ge'eged hemajkam gm hu ep hihi. Ba'ich i tash at am i thahiwua g Festus lothaita kih ch ed k am ha chehani mat am wo i wahki g Paul. 7 T am i wahki. T an wehgaj gegokiwua k ab ha hekaj si pi ap ha'ichu abchuth ch wabshaba pi e nako mas wo wohokamch ihtha. 8 T g Paul am e wehhejed neok k hab kaij, “Pi ant ha'ichu sha'i pi ap hab juh manis melchkwua g t-chehanig ahchim Tutuligo k pi sha'i uamhu g ge'e cheopi k pi ab hu sha'i wui kehk g kownal.” 9 K hab kaij g Festus ab wui, “Pt hig am wo hih Jerusalem wui mant am ha'ab wo m-lothai.” Bo kaij no pi hab elith mat wo s-hohho'i g Tutuligo. 10 K hab kaij g Paul, “Ia ani kehk kownal lothaita kih ed mant ia ha'ab wo chum ni-lothaitach. Am ap wa si s-mahch mant pi ha'ichu am hu hab sha'i juh mas pi ap'e am ha wui g ni-wehm o'othham. 11 Pi ant ab hu wo em-tai mams wabsh wo ni-thagito matp hab wo sha mahsk mant mul g chehanig. M o wa s-ap'e mamt wabsh wo ni-muhkith mantp am hugkam mul. K wabshaba pi woho hegai mo ab ni-abchuth. T heg hekaj pi hedai wo e nako mas ab wo i ni-thagito ha wui. Ab ant wui wo i gei g si uhgchu kownal.” Neh, bo kaij g Paul. 12 K eda am thadha hegam mo am ha'ichu i shelamith ch am a'aga ihtha. K g Festus ab ha kahk ch hab hahawa kaij ab Paul wui, “Neh, pt hemho wa am wo e u'apa si uhgchu kownal wui napt pi ab wui i gei.” 13 K am hu hebai hema d kownal ch hab chehgig Agrippa. Sh g uwi wehngaj hab chehgig Bernice. Tsh ihtham am chehgio g Festus noki pi s-ap ab i neith. 14 Sh am he'ekia i tash amjed, sh am ha ahgith g Festus ab amjed g Paul ch hab kaij, “Ia o hema kuhpi g o'othham ch hab chehgig Paul. T g Felix pi i wuhshath. 15 Kunt wa am hih Jerusalem wui k am ha nei g Tutuligo u'ugchu papal ch ge'eged. K hegam ab ha'ichu abchuth ihtha lihso ch ab ni-chehani mant wo mua. 16 Ni wabshaba am ha ahgith mo pi hab mahs g t-kownalig chehanig. T hemho wa wehpeg am wo i e hudaw g lihso ha wehm hegam mo ab ha'ichu abchuth k am wo neo e wehhejed. T g kownal ab haha wo mah g namkithadgaj. 17 “T wa woho i thatha hegam Tutuligo ha wanimedtham. Nt am ha hekaj thahiwua kownal thaikud ed mant wo ha kaiha. Kumt ab i wahki g lihso. 18 T am gegokiwua hegam mo ab ha'ichu chum abchuth. Kuni hab ni-ahg matp hems ge'e ha'ichu ab wo abch ab t-chehanig amjed. 19 K wabshaba ab wabsh e-himthag amjed ab ha'ichu ne'owin ch heg amjed ehp o'othham mash hab chehgig Jesus ch atsh heki hu muh. K eda g Paul hab kaij mat uhpam e chegito. 20 “Nt am wabsh i pi ni-amich mant has masma si tasho ha'ichu wo s-mai ab amjed k heg hekaj ab kakke g Paul mas wo s-hohho'i mat am uhpam wo hih Jerusalem wui k ab ha'ab wo e lothaitach. 21 K wabshaba ab t-ahgith g Paul mat ab wo i gei si ge'e kownal wui mat heg am wo mamche hegai mo haschu ab i abchuth. Nt wa woho am ha cheha g shonthal mat wo si nuhkuth k ab wo ai mat am wo e u'apa si ge'e kownal wui.” 22 Kush hab kaij g Agrippa am Festus wui, “Ahni ani hab wa'ap chum s-kaimk ihtha o'othham.” Sh hab kaij g Festus, “Pt wo wa kah si'alim.” 23 K am ba'ich d i tash, t hab masma i ha wahpki g Festus mo d si s-has haha'ichu ihtham Agrippa ch Bernice. K hegam ep ha wehmaj mo d si u'ugchu shonthal ha-ge'ege'ejig ch hegam mo d si s-has haha'ichu heg eda kihhim. Kumt am i wahki g Paul. 24 K g Festus hab hahawa kaij: “Ahpi Agrippa map d kownal ch ahpim s-has haha'ichu o'othham, m ia kehk em-wui ihtha o'othham. K g Tutuligo iia kch ab Jerusalem t ab ab ha'ichu abchuth ab ni-wui ch am si e gewpkath mat hemho wa wo e mua. 25 Nt wabshaba pi sha'i cheh g chu'ichigaj mas heg hekaj wo e muhkith. “K heg wa hejel hab kaij mat ab wo i gei si ge'e kownal wui. T hekaj hemho wa am hab wo e juh. 26 Ni wabshaba pi ni-amichuth mant haschu am wo o'ohani g si ge'e kownal ab amjed. K pi hab chum mahs mas am wo e u'apa g lihso pi am hu tasho ahgk mas haschu d chu'ichigaj. Nt heg hekaj ia u'apa em-wui mamt am wo i kaiha, wahm ahpi Agrippa map d kownal. Ntp hems haha wo s-mai ab em-amjed mant haschu am wo o'oha.”

Acts 26

1 K hab kaij g Agrippa ab wui g Paul, “B ant m-mah g ap'ethag mapt am hejel e wehhejed wo neo.” T ab ha ba'ich i kekiwua g Paul k am e wehhejed neok 2 k hab kaij: “Agrippa map d kownal, ahpi ap s-mahch g t-himthag ch ha'ichu pi t-ap'ethag ahchim Tutuligo. Ni heg hekaj si s-ap ni-tahtk mant ab m-wui wo neo ith i tashkaj ab amjed hegai mo haschu ab chum ni-abchuth g ni-wehm o'othham. Kuni ab i m-kakke mapt ab wo si i ni-kaiham k ab wabsh wo i ni-bahbgi. 4 “S-mahch o g ni-wehm o'othham mani has i masma ga hu i amjed mani d wabsh kia si ali nani pi wa eda am wabsh i kih ni-jewedga ed ab Jerusalem t ab. 5 Thani Palasi wohochuththam. K g ni-wehm o'othham s-mahch mani am si s-gewkam oith g t-himthag. 6 Ia ani kehk ch wo ni-lothai nani pi ab s-wohochuth mat g Jiosh woho hab wo juh hegai mat haschu am ha ahgi g t-shohshonbad. 7 Bo ha ahg mat uhpam wo i ha wuwhas g ko'i ab muhkig t amjed. Ith o chum s-wohochuth g ni-wehm o'othham ch eda s-ni-lothaitamk nani pi s-wohochuth mat hab i juh. 9 “Bani wa wa elith mant am wo si i ni-nakog k wo shohbi g himthaj hegai Jesus mo ab Nazareth t amjed. 10 Ni wa wa woho am hab chum ni-junihim amai Jerusalem t am. T wa g u'ugchu papal ab i ni-mah g ni-ap'ethag. Kunid mu'i ha kuh hegam mo ab s-wohochuth hegai himthag k ha wehm ap'ech g e jehnigiththam mamt wo ha koktha. 11 Kunt wa mu'ikko am ap'ech mamt wo ha sho'igch an i a'ai ha-chechopi ed k am chum ha chehani mat hab wo chei mo pi ap'e hegai Jesus. Kunid wa sha'i si s-ha keh'ith ch am i ni-nako mant am i wah gawul jewed kihhim ch ed mant wo ha sho'igch amai. 12 “Kunid wa ab si ha tai g u'ugchu papal g ni-ap'ethag k am hih Damascus wui heg wa si hekaj mant wo ha kuh hegam mo s-wohochuth mo hegai Jesus d Jiosh si Kehsha. 13 “Pegih neh, ahpi si s-has ha'ichu, am achd hihim wohg ch ed am hu i thahm juhk. Kud am hab e juh mat am ba'ich i s-mahs ton mo g tash tonlig an t-wehgaj. 14 Kutt wehsijj i shul am jewedo. “Kunid ahni kah mad ab hema neok ni-wui g ni-ne'okikaj ch hab kaij, ‘Saul, s-wohom ap hig chum ni-sho'igchuth ch wabshaba hejel s-ko'okam has e wua.’ 15 “Kunid si has elith ch hab kaij, ‘Thohp wud ch ab neok?’ “Kud hab hahawa ep kaij, ‘Thani ahni Jesus map ha sho'igchuth hegam mo ab si ni-ihm. 16 Ab g i wamig k kekiwua. Ia ant i ni-chehgi m-wui mant am wo i m-kei mapt d wo ni-pionagk. Kupt am wo ha ahgi g hemajkam ihtha map neith ch kah. Kunt am ha'ichu ep wo m-chehgi imhab i ba'ich. Pt heg am ep wo ha ahgi. 17 Nt wo m-tho'ibia ab ha amjed g m-wehm o'othham. Kupt am wo ahgahith g ha'ichu ni-ahga am ha wui g gawul mahs hemajkam. Nt am ep wo m-nuhkuth k wo m-tho'ibia ab ha amjed. 18 Kupt am wo i ha tashogi mo pi am hu ni-tatchui oithch hab e junihim ch am wabsh jiawul tatchui oithch hab e junihim. T ab wo m-kaiham k ab wo i e thagito ni-wui. Nt hekaj gm hu hab wo i juh g pi ap ha-chu'ichig k hab wo ha juh mat d wo ni-hemajkamgak.’ Neh, bo kaij g Jesus ab ni-wui. 19 “Pegih neh, Agrippa map d kownal, bad wa masma am i e chehgi ni-wui hegai mo d si ge'e kownal am wehs ha'ichu thahm k hab wa masma ni-cheha. Kunt ahni ab wohog elith 20 k am ha hekaj i ahgahi Damascus t am g ha'ichu ahgaj k amjed am ahgahi Jerusalem t am ch wehsko Judea chekshani ch ed. K am hahawa ni-tashogith g Jiosh mant am ha wui wo hih g nahnko mahs hemajkam. Ni am mu'ikpa ha ahgithahim mat gm hu wo s-ohhoth g pi ap e-chegitoi k ab wo i e nohnogi Jiosh wui k amjed hab wo junihith g s-ap'ekam. 21 Neh, k d ihtha mad heg hekaj an ni-bei g ni-wehm o'othham am ge'e cheopi ch ed k chum alo ni-mua. 22 K wabshaba ia'i himtham g Jiosh am ni-wehmaj ch ni-nuhkuth. Ni heg hekaj ia kehk ch am si tasho em-ahgith ahpim mam d s-has haha'ichu mani haschu am ep ha ahgith g sho'ig hemajkam. K ihtha ha'ichu ni-ahga d wa'i hegai mo haschu g Mosesbad ch hegam kekelibad Jiosh ha'ichu i tashogiththam am heki hu ahgahim mat am hab wo e juh. 23 Sh ihtham am ahg matsh wa g Jiosh si Kehsha wo e sho'igchuth k wo e muhkith k uhpam wo i wuhsh ab muhkig t amjed k ith hekaj wo kuhpi'o g tho'ibiathag am ha wehhejed g Tutuligo ch nahnko mahs hemajkam.” 24 Neh, bo wa masma hejel e wehhejed neok g Paul. K g Festus ab si s-kaitham hab kaij, “Ahpi aptki wabsh e lohgoch, Paul. Ha'ichu m-mahchig atki wabsh m-lohgoch.” 25 K hab kaij g Paul, “Pi ant sha'i ni-lohgoch, si s-has ha'ichu Festus. Hegai mani haschu hab ahg d si wohokam 26 ch am wabsh si tasho hab e junihim t-shahgith. K g Agrippa wehs s-mahch. 27 Agrippa map d kownal, m ap wa s-ha wohochuth g Jiosh ha'ichu i tashogiththam.” 28 K hab kaij g Agrippa ab wui g Paul, “Nap hab elith mapt ha hekaj wabsh s-pehegi wo i ni-nodagi ith wui Jesus himthag?” 29 K g Paul hab kaij, “Chum anis ha hekaj o gm hu ba'ich. K wabshaba g ni-ho'ige'ithahuna am Jiosh wui d ihtha mamt wehsijj ahpim mam am ni-kaiham ith tashkaj hems ab wo s-wohochuth k hab wo chu'igk mani ahni ch wabsh hi wo wa pi e wupulshch g e hukshchim wainomikaj.” 30 T am hahawa wehs i gegokiwua 31 k ab a'ai e wui hab kaij am hihimathch, “Pi atki ha'ichu has sha'i juh ihtha o'othham mat hekaj wo e muhkith o mas wo e kuhpach.” 32 K hab kaij g Agrippa ab wui g Festus, “T wo wa chum e thagito ihtha mat hems pi ab hu wo e ah mat ab wo i gei si ge'e kownal wui.”

Acts 27

1 Mt am hahawa thagito g Paul ch ha'i ep lilso shonthal ha-ge'ejig wui mat am wo i ha ui ge'echu kownal wui. Ith o hab chehgig Julius ch d ha-ge'ejig hegam mo hab e a'aga Ge'echu Kownal Shonthalig. 2 K am hema thaha g ge'e wahlko ch atsh am gahi wo i wua Asia jewed wui. T g Julius g e-shonthalig ha wehm am ha ui g lilso k am i chehchsh heg ab wahlko. Nt ahni Luke ep ha oi. T heg ha oi Aristarcas mo ab d kihkam Thessalonica t ab am Macedonia jewed ch ed. Kutt am gahi i shul g ge shuhthagi. 3 Am ba'ich i tash, tt am thatha Sidon kihhim t am. K eda g Julius s-ho'ige'ith g Paul ch hiwigi mat am wo him k wo ha nei g e-naipijju mat hegam wo thagio'i. 4 Tt amjed am hahawa gahi ep i shul. K wabshaba g hewel ab si s-gewkam med huduni tahgio t amjed ab t-wui. Tt hekaj an bihbij Cyprus jewed wehgaj mat pi wo heb hu t-wi'ichkwua. 5 T am hebai i cheka. Tt am gahi i shul hegai ge shuhthagi mo an miabithch g Cilicia jewed ch Pamphylia jewed k ga hu thatha mash ab d Myra kihhim am Lycia jewed ch ed. 6 T amai g shonthal ha-ge'ejig am hema ep cheh g ge'e wahlko. Ith ash ab Alexandria t amjed am Egypt jewed ch ed ch atsh gm hu wo gahi i gei Italy jewed wui. Kutt heg ab i chehchsh 7 k am gahi i shul. K wabshaba ab t-wui hewed he'ekia i tash. K hekaj wabsh s-bahbagi him g wahlko ch am hu wa has masma ga hu jiwia Nidas kihhim t ab. T ab i t-shohbi g hewel. Kutt hekaj inhab sha'al i t-nohnogi wakolim tahgio ab wui hegai al jewed mo hab chehgig Crete. K an s-mu'ukam i koa g jewed. K hab e a'aga Salmon Koa. 8 Kutt heg hugith an bihbij k am hu wa has masma ga hu thatha mash hebai s-ap thadhaiwup g wapalko. K ia amjed pi sha'i mehk hegai kihhim mo d Lasia. 9 Kuttki pi oi ba'ich hihim k ab wabsh ai mat wo si hewedath s-hehpich'ed. T hekaj wo s-ta ehbithamak matt am gahi wo i shul. K g Paul am ha'ichu chum ha ahgith 10 ch hab kaij, “Neh'e! Bani masma neith matki wo s-ta ehbithamak matt am gahi wo i shul ia'i amjed. T am hu wo e padch g wahlko ch hegai mo mohto. Kuttp hems ep wo ha'i t-ko'ij.” 11 T wabshaba g shonthal ha-ge'ejig ab si s-ha wohoch g wahlko nuhkuththam ch enigakam k pi ab hu kaiha g Paul mo ab chum ha ahgith. 12 Pi o apkothag amai ha wehhejed g wapalko s-hehpich'ed. K heg hekaj mu'ijj hab kaij matt am gahi wo i shulig k wo chum si s-ahim g Phoenix kihhim am Crete t am. Am o e shohbithch g shuhthagi to'otonk. K g wapalko am wabsh s-ap thadhaiwup. 13 Kut ab s-bahbagi i meh g hewel wakolim tahgio amjed. K hab e ahg hegam mo himchuth g wahlko mat am hab wo e juh mat has masma am e a'aga ch heg hekaj am wupulshpi'o g wahlko k am himch si miabithch g jewed hugithag. 14 T wabshaba ab haha wabsh s-gewkam i meh g juhpin hewel ab jewed thahm amjed 15 k ab si s-ta ehbitham wi'ichkwua g t-wahlko. Kut am i pi e nako mas wo mo'oshk himch g wahlko ihtha hewel. Kutt am wabsh i thagito k wabsh hiwigi g hewel mat am i t-wi'ichkwuhi. 16 K am hema al jewedag ch hab chehgig Cauda. K hi wa sha e shohbith matt an wecho bihbij. K eda am wabsh kia e chewaimed g al chum wahlko shuhthagi ch ed. Kutt am hahawa s-hasigam i cheshaj. 17 T g chikpantham an hahawa si s-wihnam wupulsh g ge'e wahlko mat pi wo e padch. Am attp hems wo t-wi'ichkwua jewed wui. T g wahlko am hu wo e hiash hia ch ed. T heg hekaj g chikpantham ab i huhuds hegai lohna mo hekaj himchuth g wahlko k wabsh hiwigi mat g hewel am i t-wi'ichkwuhi. 18 T ihtha sha'i si s-gewk hewel pi sha'i ha'asa. K am ba'ich d i tash. T gm hu i shul hegai mo mohto g ge'e wahlko. 19 K am ba'ich d ep i tash. K am wabsh kia si hewed. T gm hu i nehnch g hejel e-nohnhoikaj hegai mo haschukaj chum himchuth g ge'e wahlko mat wo si i haukai. 20 Kutt mu'i tashkaj pi sha'i nei g tash tonlig o g huhu'u. K am wabsh i med g s-gewk hewel. Tt am hu hebai hab haha wabsh i t-ah mattki pi wo sha'i t-tho'ibia. 21 Kuch tash pi ha'ichu sha'i ko'a. T g Paul ab i ha waith k hab kaij, “Mamt hems ab wo ni-kaiha, kutt pi ab hu wo chum gahi i shul ab amjed matt wa ab thadhaiwua. Neh, t ithani chum pi wo e padch g wahlko. T g ha'ichu mohtoi pi wo heb hu e shul. 22 Mt wabshaba pi has wo sha'i e tahtkkath. Pi amt hedai wo sha'i e muhkith. Heg at wa'i wahlko wo e padch. 23 Ith ani s-mahch nat pi hema am i e chehgi g anghil ni-wui 24 k hab kaij, ‘Pi g sha'i ha'ichu ehbithath, Paul. Hemho wa apt am wo kekiwua si ge'e kownal wui. T g Jiosh ab i m-kaiham k wehs wo ha tho'ibia hegam mo m-wehmaj.’ Neh, bo kaij g anghil ab ni-wui. 25 “Kumt am wo si i e gewpkai. Jiosh at woho hab wo juh hegai mo haschu am ni-ahgith g anghil 26 k ab wo t-u'apa g hewelkaj mo ab hebai al jewedag shuhthagi ch ed.” 27 Am d i gohk thomig amjed mat am t-ai g s-gewk hewel, t eda i e huh g s-chuhugam. K am wabsh kia t-wi'ichkwuhim. K hegam wahlko nuhkuththam hab elith mach aihim mash ab hebai jewedag 28 ch heg hekaj am ha'ichu s-wehch i huduni g wijinakaj an wudk mat heg hekaj wo s-mai mas he'es i s-juhk. T gd hu si taht g jewed mat siant gokko wehst-mahm (120) tad wijina hekaj. Kut ab i wanchkwua ihtha s-wehch ha'ichu. K am sha'i he'es, t am ep i huduni. T gd hu ep si taht g jewed mat humukto wehst-mahm (90) tad wijina hekaj. 29 T am i s-mai moki ab aihim mo ab hema jewedag k s-ehbith mat am hu ab wo gei hohothai ch ed g wahlko. T hekaj gi'ik am shul g s-wehch wapainomi mo hekaj wulshshap g ge'e wahlko k am hahawa si e ho'ige'ithahu mat wo mahsij. 30 K ha'i hejel s-e tho'ibiamk g wahlko nuhkuththam ch am i huduni g al chum wahlko shuhthagi ch ed hab wabsh s-e junimk mat am ha'i ep wo i huhuds g wupulshpadaj g wahlko. 31 K wabshaba g Paul hab kaij ab wui g shonthal ha-ge'ejig ch hegam shonthal, “Pi amt wo sha'i e tho'ibia matp wo sha t-thagito ihtham wahlko nuhkuththam.” 32 T hekaj g shonthal an si hikkumia g wipijina mo an hekaj wulshch g al chum wahlko. T gd hu gei shuhthagi ch ed. 33 Kuki eda mahsihim. K g Paul am ha chehani mat wo ha'ichu huh hab kaijch, “Tho wa'i gohk thomig mamt amjed pi ha'ichu huh nam pi e kudut ith hekaj pi t-ap'ethag. 34 Mt ab hig wo ha'ichu hug k ab wo i e gewpkai. Hemho wa amt wehsijj wo e tho'ibia.” 35 Neh, bat che'iok am ha hekaj bei g pahn k ab si ihm g Jiosh wehs ha wehhejed k am hahawa i hahain k huh. 36 T wehsijj am i neithok ab si i e gewkemhun k am hahawa ha'ichu huh. 37 Kuch eda d gohk siant wewa'akko gamai chuhthp (276). 38 Tt am i wehsijj kokwoth. Kut am hahawa ep i chikpan k gm hu shul g pilkani ge shuhthagi ch ed mat wo si i haukai g ge'e wahlko. 39 T am i mahsi, t g wahlko nuhkuththam pi sha'i amich hegai jewed mattki ab wui i wuwha. K eda am s-tadaniko i wahks g shuhthagi ch pi hohothaig an hugidaj an. T hab i e ah mat am wo himch g wahlko. Tp hems ab s-ap wo thahiwua heg eda. 40 T hekaj am si hikkumia g wupulshpadaj. T im hu shul shuhthagi ch ed. K eda an wupulshch hegai mo hekaj s-apko e himchuth g wahlko. Kumt gam si wuhpul'o k am hahawa wabsh i cheshaj hegai lohna mo gm hu ba'ich hab chu'ig. T g hewel am t-wi'ichkwua am wui mo am i wahks g shuhthagi. 41 T wabshaba gd hu si e hiash g wahlko mo'o o'od ch ed mat koi am hu i wah. K eda sha'i si s-gewkam ab i hihhim g shuhthagi to'otonk. Kut hegai mo gm hu oithch hab chu'ig gam si e ohmi. 42 T g shonthal am i e ap'ech mat wehs wo ha koktha g lilso mat pi wo i e watchwihim k wo heb hu wohp. 43 T wabshaba pi ha hiwigi g ha-ge'ejig nat pi s-tho'ibiam g Paul k am wehsijj ha chehani mat wo i e watchwihi am jewed koa wui. Tsh hegam mo s-mahch g watchwi am wo i nehni k hehe'ejel wo i e watchwihi. 44 T heg ha'i am wo i ha oi an e u'ukch u'us t an mat ab e ohmi g wahlko. Kutt hab masma wehsijj t-tho'ibia ga hu ak mo ab i koa g jewed.

Acts 28

1 Kuki am ha'i d o'othham ch si s-ap i e taht k ab i t-neith k si s-t-nawojima. Kutt s-mai mash ihtha al jewed d Malta. K eda juhk ch s-hehpith. Kutki am ge t-nahj. 3 T g Paul am ha'i ku'a mat am wo si i mehmeth g nahtha k am toa mei ch ed. T g ko'oi ab hema si i tha'iwush tonithk k an ki'ish nowij an. 4 T g kihkam am i nei ihtha ko'oi mo an ki'ishch g Paul k hab kaij ab a'ai e wui, “Ith oki d ha mu'akam ch hi wa chum pi e muhkith am shuhthagi ch ed. Kuki am hab wa mahs matki hemho wa wo e muhkith k ab wo bei g s-ko'ok e-namkithadag.” 5 K wabshaba g Paul am si e nowigith ch gm hu wua g ko'oi mei ch ed k pi sha'i ko'okam e juh. 6 K ihtham kihkam am chum neith mat wo i tosko o wabsh chum hekith wo muhk k i gei. T wabshaba gm hu wabsh i mehko. T oi wa pi ha'ichu has sha'i juh g Paul. T am hahawa gawul ep i e ah k hab kaij moki d jiosh. 7 Ha-ge'ejig ihtham hemajkam o hab chehgig Publius ch am wa'i mia oithag. Kuch am wehmaj thadkkahim waik tash nat pi si s-ap ab i t-nei. 8 Kuki g ohgaj wo'ok ch mumku g s-tonjigkaj ch wakuithagkaj. T g Paul am i wah mo am wo'o k an tahtam k am i tai g Jiosh mat wo thoaj. T wa woho hab e juh mat thoaj. 9 T am i nei ihtha g hemajkam. T am hahawa mu'i ep thatha g kok'otham k e thothaj. 10 T hekaj ab si has i t-elith k sha'i mu'i ha'ichu t-mah. Am hu i hebai mat am i e ai matt wo hihi, t ab ep i t-mah hegai matt haschu wo i tatchuath am gahi ep i shuligk. 11 T eda hema wuhshath g s-hehpich'ed g ge'e wahlko ch hab e a'aga Kukathi Jijosh ch ab Alexandria t amjed. Am d i waik mashath, tt heg ab gm hu gahi i shul juhpin tahgio wui 12 k ga hu thatha mo am d Syracuse kihhim. Am d i waik tash, 13 tt gm hu gahi ep i shul juhpin tahgio wui k ga hu thatha mo am d Regium kihhim. Am ba'ich d i tash, t ab i meh g hewel wakolim tahgio amjed. Tt hekaj s-hohtam gm hu thatha mo d i gohk tash mash am d Putoli kihhim am gahi i shuligk. 14 Kuki am ha'i kih g t-wehm wohochuththam ch ab si t-ahgith mattsh am wo ha wehmajkahim hemako thomig ab. Kutt wa woho hab t-juh k gm hu hahawa hihi Rome wui. 15 Kutsh wa heki hu am kah hegam t-wehm wohochuththam ab Rome t ab mattsh am wo thatha k atki mehk ab i hihi mat wo t-ho'ige'el. Kut ha'i ihtham am t-nam mo am d Waik Gegosithakud. T ha'i am ep t-nam mo am d Appius Nolawtakud. Kut ab i ha nei g Paul k ab ihm g Jiosh k ab si e gewkai. 16 Kutt am thatha Rome t am. Kumt wabsh hiwigi g Paul mat wabsh hejelko wo i chiwia. K g shonthal am hi wa nuhkuth. 17 Mu'i o am kih g Tutuligo. K am d i waik tash. T g Paul am i ha wai g ha-ge'egedga e-kih wui. T am i e nam. K hab kaij ab ha wui: “Ni-hajuni, am amt ni-lihsoch Jerusalem t am k ab i ni-thagito Rome chehanig wui. K eda hab wa chum mahs mant pi has chu'i ab ha wui t-hajuni o g t-himthag. 18 T hegam Rome t ab haha'ichu ab ha'ichu ni-kakke k chum s-ni-thagitoimk nat pi pi ha'ichu sha'i cheh manis heg hekaj wo ni-muhkith. 19 T wabshaba g t-wehm o'othham ab wui gegokiwua ihtha. Kunt hekaj hab i ni-ah mantki hemho wa ab wo i gei si ge'e kownal wui mo hi wa chum pi am hu ha'ichu d hegai manis ab wo ha abch g t-wehm o'othham. 20 Ab ani hiwig hegai Jiosh si Kehsha mach wehsijj nenida ahchim Tutuligo. Ni hab elith mo hema d hegai ch heki hu am i wuhsh. K eda mu'ijj g t-wehm o'othham pi wohochuth mo d hegai ch hab s-ni-keh'ith. Nt heg hekaj ab i em-wai mant em-wehm wo a'agath.” 21 K hab kaij ab wui, “Pi at ab hu hedai sha'i t-o'ohani hegam ge'eged o'othham ab Judea t ab ab m-amjed. T pi hedai ia hu sha'i jiwia g t-hajuni ab amjed mas am hu i pi ap has m-ahg. 22 K eda wehsko g hemajkam mu'i pi ap has ahg ihtha himthag mapsh ahpi s-wohochuth. Kuch s-kaimk maps has wo chei ab amjed.” 23 Neh, bo kaij. T am hahawa a'aga k kei g tash mat wo e jehnigi. T am him k am i e ai g tash. T mu'i am thatha amai mo am thaha g Paul k am i e jehnigi ge tash oitham k gm hu si huduni. K g Paul am i ha tashogith g Jiosh kownaltalig ch am si s-gewkam ha jehnigith mo g Jesus d hegai si Kehshaj g Jiosh mat wa ab amjed an o'oha g Mosesbad ch hegam kekelibad Jiosh ha'ichu i tashogiththam. 24 T ha'i ab i s-wohoch ab kaiok. T wabshaba ha'ijj pi sha'i wohoch. 25 T am i pi sha'i e ap'et k hab e juh mat wo a'ai hihi. T hekaj ith hab ep chei g Paul, “Tho si wohokam mash wa has i kaij g Jiosh ab em-amjed ab Isaiabad wui. K an hab chu'ig Isaiabad o'ohana ed: 26 Am g hihm k am hab cheh'i ha wui ihtham hemajkam: Mt wo kah g ha'ichu ni-ahga ch wo neithath mani haschu s-kehg hab em-junith ch wabshaba pi wo amich mani d ahni ch hab wua ha'ichu. 27 Em-chegitoithag at i e mehkoth ab ni-amjed. Kum pi chechkaithag ch pi ab hu ni-wui i e nohnogithamk mant wo i kegch g pi ap em-chegitoithag ch pi ap ha'ichu hab em-juni. Neh, bo masma an o'ohadag mo ith hab kaij g Jiosh. 28 “Pegih, mtki pi ab hu wo kaiha g Jiosh ha'ichu ahga mat wo em-tho'ibia. T g Jiosh heg hekaj ab wo ha mah g gawul mahs hemajkam ihtha tho'ibiathag ahga mo ab chum s-em-mahkimk. T hegam ab hi wo kaiha.” [ 29 T am i ha'asa hab chei ihtha g Paul. T gm hu a'ai hihi hegam mo ab kah si e ne'owinahimch.] 30 K am kihkahim g Paul gohk ahith ab hema kih ed mo namkith ch am kih. K g hemajkam am chechga. 31 K g Paul si s-ap e tahtk ch ab ha neith ch am wabsh si s-mahchim ha'ichu ha ahgith ab amjed g Jiosh kownaltalig ch ha mashcham ab amjed g t-kownalig Jesus Christ. K pi hedai sha'i shohbith.

Romans 1

1 Am ant wo i em-o'ohani g s-kehg ha'ichu ahgaj g Jiosh ahni Paul mani d piongaj g Jesus Christ. Jiosh at ab i ni-waith k am i ni-kei mant ith wo ahgachugath. 2 K d ihtha ha'ichu ahgaj matki g kekelibad Jiosh ha'ichu i tashogiththam an o'oha matsh wa g Jiosh ab wo i wuhshath. 3 K ihtha ha'ichu ahgaj am t-tashogith hegai mo d alithaj ch d ge'e t-kownalig Jesus Christ. Ith atsh ia mahsi jewed thahm k ab d amjedkamaj g kownalibad David. K heg hekaj tasho mo woho d hemajkam. 4 Kutsh g Jiosh ab i wuhshath g Jesus Christ muhkig amjed am i thahm matsh e muhkith k hab masma ab t-chehgithch mo d alithaj ch d hekia s-ap'ekam 5 Kut wa ab si i s-ni-ho'ige'el g Jesus Christ k am i ni-kei am wehhejed g Jiosh mantsh am wo i ha ahgithahi g nahnko mahs hemajkam g s-kehg ha'ichu ahgaj. Kutsh mu'ijj ab wo s-wohochuth k ab wo s-wohog elithath. 6 Ni am wa kah mamtsh ha'i ahpim Rome t am hemajkam ab i s-wohoch. Jiosh o ab si em-tatchua ch ab i em-waith k am hab em-juh mamt ab i s-wohoch g Jesus Christ k d Jiosh hemajkamga. Kunt heg hekaj am wo ha'ichu i em-o'ohani. Ab o wa si s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 8 Wehsko o am e a'aga mamtsh ab i s-wohoch g Jesus Christ. Ni heg hekaj ab si ho'ige'ith g Jiosh. 9 Wehs ni-ihbthag amjed ani chikpanith g Jiosh am ahgachugch g s-kehg ha'ichu ahgaj ab amjed g alithaj. K g Jiosh s-mahch mani chum hekith ab wui ni-ho'ige'ithahun am em-wehhejed. 11 S-em-neithamk ani ch ab tahni g Jiosh matp hems am wo ap'ech mant am wo i em-chehgim k wo i em-wehmt em-wohochuthadag ed mamt hekaj am wo i e gewpkai. 12 Ab att a'ai wo i t-wehmt ab a'ai kahk g t-wohochuthadag. 13 Am g wo s-mahchk mani mu'ikko am a'ap'echuth mant am wo i em-chehgim. K wabshaba am ha'ichu has e wua mani heg hekaj pi ni-nankog. Si ani tatchua mant am wo i em-wehmt am em-ahgithch g Jiosh ha'ichu ahga hab masma mani i ha wehmaj hegam mo hahasko kihthag ch hab wa'ap pi d Tutuligo. 14 Ab o ni-chehani g Jiosh mant wo ha ahgi g wehs nahnko mahs hemajkam ihtha s-kehg ha'ichu ahgaj, chum wa hems hegam mo pi chu a'amichuth ch hegam mo d mischini. 15 Ni heg hekaj ni-nahtokch mant am epai wo i em-ahgithahi ahpim mam am kih Rome t am. 16 Wehs at wo ha tho'ibia g Jiosh hegam mat ab wo i s-wohoch ihtha s-kehg ha'ichu ahga ab amjed g Jesus Christ. Kuni heg hekaj wabsh si s-ap ni-tahtk ch am ahgachug. Tutuligo at wehpeg ab bei e-ap'ethag mat wo e tho'ibia k g gawul mahs hemajkam ab hahawa bei. 17 Jiosh ha'ichu ahga o am t-tashogithch mat hedai g Jiosh am wo i ap'ech e wehhejed. An o o'ohadag: Am at wo i ha ap'ech g Jiosh e wehhejed hegam mat ab wo i s-wohoch g ha'ichu ahgaj. Kut hegam wo wa'i bei g pi ha huhugetham thoakag. 18 Ab o t-wui i e tashogith g Jiosh. K wabshaba mu'i hemajkam gm hu hab i juhkch ch hab junihim g pi ap'ekam. K ihtha pi ap'ekam an kuhpahim mat wo s-e mai g wohokam. T g Jiosh heg hekaj s-ko'okam wo ha namkith. 20 Tt wo chum s-mahchk mo has chu'ig g Jiosh am neithch g nahtoij no pi ith am chum t-tashogith mo g Jiosh wehs ha'ichu thahm hab chu'ig ch wehs edgith g gewkthag chum hekith. Kut hemho wa ab wo moht g e-chu'ichig matp hedai pi wo mahchim. 21 Neh, wehs hemajkam o wa chum s-mahch mo an hema d Jiosh ch wabsh pi ab hu mahkch g has elithadag. Ab o s-ha ho'ige'ith. K wabshaba pi ab hu i ho'ige'elith ch wabsh pehegi ha'ichu chegito. K am wabsh i s-chuhugam g ha-chegitoithag. 22 Bo e ahg mo s-chu a'amichuth ch eda pi ha'ichu mahch. 23 Jiosh o d pi ha huhugetham ch d si ha'ichu. Kutt heg ab wo wa'i chum ihmath mo d t-Jioshga. K wabshaba ihtham im hu hab wabsh juhkch ch wabsh ha'ichu jijoshchuth ch ab ha ihm. K eda d wabsh hemajkam ha-nahtoi mo ha o'othhamt o atp hems ha ha'ichu thoakamt. T hekaj g Jiosh am wabsh i ha thagito mat hab wo juh hegai mo haschu hab s-junimk. Kuki hab wua g s-uam ha'ichu ch s-ta edam ha'ichu. U'uwi o ha'i chum hems pi ha kuhkunt ch e wehm hab wua g s-ta edam ha'ichu. 27 K g chechoj pi ha hohont ch e wehm hab wa'ap wua g s-ta edam ha'ichu. Kut heg hekaj wo si s-ko'okam ha namkith g Jiosh. 28 Pi o tatchua ihtham mas wo s-mahchk g Jiosh. T g Jiosh heg hekaj am wabsh i ha thagito pi kehg ha-chegitoithag ed. K am hab wua hegai mat haschu pi am hu hab wo chum wuath. 29 Ab at wabsh i si ha shuhth g nahnko mahs pi ap'ekam mo ha'i si pihk e elith g s-kaisthagkaj ch ha'i s-ta kek'eithama o s-chu hehgamk o s-ha mu'amk o s-chu cheggiamk o s-chu i'attomk o s-chu padhog eh'elithamk o s-chu ahgamk. 30 Ha'i o s-ko'okam has e ahg o s-ta ko'okthama o chum si e hahaschuth o si i e nakog mat am ba'ich hab wo i juh g pi ap'ekam o pi ab hu wohog ha elith g e-ge'egedga 31 o s-u'ama. Ha'i o pi hab wua hegai mo haschu hab kaij mat hab wo juh o pi hedai pihk elith o pi ab hu ha ho'ige'ith no pi s-keh'ith g Jiosh. 32 Jiosh chehanig o hab chu'ig mat hema hab wo masmak ch ab wo nako g s-ko'ok e-namkithadag. K ihtham am wa chum s-mahch ihtha ch eda am hab wa masma hab e junihim ch wabsh s-hohho'ith mo ha'ijj am hab wa'ap e junihim.

Romans 2

1 Na'ams ha'ijj ahpim hab kaij “Hah, sho'o wa'i si pi ap d hehemajkam hegam map am ha a'aga k ch hemho wa wo bei g s-ko'ok e-namkithadag,” ch amtp eda hems hab wa'ap junihim ihtha. Neh, m wabsh hejel e-ne'okikaj ab e mohto'ith g s-ko'ok e-namkithadag. 2 S-mahch ach mo d wabsh i si shel mat wo ha lothai g Jiosh hegam mo hab wua hegai mani am em-ahgith. 3 Kumt ahpim hemho wa hab wa'ap wo bei g s-ko'ok e-namkithadag mamtp am hab wo junihith ihtha. 4 Ithani o wabsh ab si s-t-bahbgi g Jiosh ch s-hemajim ab t-nenida no pi tatchua matt gm hu wo s-ohhoth g pi ap t-chegitoi. 5 K wabshaba mu'ijj pi ab hu kaimk g Jiosh ch pi sha'i pihk e elith hekaj. Ihtham o ba'ich i ge'e ab e mohto'ithahim hegai s-ko'ok namkithadag mat wo nam ge'e lothaita tash ch ed. 6 Heg at i tash ed wo t-namkith g Jiosh heg hekaj mach haschu hab i junihim. 7 Heg att wo cheh mach haschu i gahg. Am g hab wo junihith g s-ap'ekam ch wo e gahgithath g Jiosh ap'echutha. T g Jiosh am wo i em-wahpki e-kihthag ed mamt chum hekith an wo wehmajk. 8 Mu'i hemajkam o wabsh hejel e tatchua ch hab junihim g pi ap'ekam. T ihtham g Jiosh ab wo ha mah g s-ko'ok ha-namkithadag. 9 Kut ab wo tahtkkath g sho'igthag ch s-ko'ok, wahm g Tutuligo matp pi hab hu wo kaiha hegai mo haschu t-nuhkuthachuth g Jiosh. 10 T g Jiosh ab wo si t-ha'ichuch ahchim mach hab junihim g s-ap'ekam k ab wo t-mah g has elithadag ch s-ap tahhathkam. Ahchim Tutuligo att wehpeg bei ihtha s-ap'ekam. Mt wabshaba ahpim gawul mahs hemajkam ab hahawa bei. 11 Jiosh o wehs t-wepo ab t-neith ch wehs t-wepo s-t-tho'ibiamk. 12 Gawul mahs hemajkam o pi hekaj g Moses chehanig ch wabshaba s-mahch mo haschu d s-ap'ekam ch wo e lothai heg hekaj mo pi hab junihim g s-ap'ekam. K g Tutuligo s-mahch heg hekaj chehanig mo haschu d s-ap'ekam ch heg hekaj hab wa'ap wo e lothai mo pi am hu hab junihim. 13 Pi at hedai wo i ha ap'ech g Jiosh heg wabsh hekaj mo kah g chehanig k washaba heg hekaj mat heg am hab wo junihith. 14 Heki o hu pi edgith g Jiosh chehanig g gawul mahs hemajkam ch eda s-mahch mo haschu d s-ap'ekam. K g ha-mahchig d ha-chehanig. K g ha-mahchig d ha-chehanig. 15 K am wa tasho mo wa hab chu'ig no pi e kudut mo hekith hab wua g pi ap'ekam ch s-ap e tahtk mo hekith hab wua g s-ap'ekam. 16 Kut hab wa'ap wo e juh heg eda tash mat kei g Jiosh mat g Jesus Christ wo ha lothai g ha-chu'ichigkaj, chum hems g pi ap ha-chegitoithag. Neh, bo chu'ig ihtha s-kehg ha'ichu ahgaj g Jiosh mani ahgachug. 17 Mu'ijj g ni-wehm Tutuligo o hab e elith mo s-ap s-mahch g Jiosh tatchui ch am hab junihim g s-ap'ekam no pi edgith g chehanigaj. 19 Bo e elith mo d ha wanimedtham ch ab ha mahkch g tonlig hegam mo pi edgith g Jiosh chehanig. 20 Bo e elith mo wehs ab u'ukch g amichuthadag ch wohokam no pi ab u'ukch hegai chehanig. Chum o wa ha mashcham g pi ha'ichu mahchim ch a'al 21 k ch eda pi hejel am hu hab wua g e-mashchama. Ha'ijj o ha mihshmath mat pi hedai ha'ichu wo ha ehsithath 22 ch pi wo ha wehm wo'iwua hegai mo pi d ha-wehm kihhim ch eda hejel hab masma hab e wua. Si o pi hohho'ith mat ab wo ihmath g hemajkam nahtoi k ch eda wo ha ehs mo haschu an hab chu'ig ha-cheopi ed. 23 Ab o chum si e haha'ichuchuth mo edgith g Jiosh chehanig ch eda mu'ikko pi am hu hab junihim ch ab mamka g Jiosh g si edathag. 24 An o hab chu'ig Jiosh o'ohana ed: Gawul mahs hemajkam o s-ko'okam has ahg g Jiosh ha hekaj g Tutuligo. 25 Tho si ha'ichu g pahl hikuchka em-wehhejed mamtp ab wo wohog elithath g chehanig. Mtp wabshaba pi ab hu wo wohog elithath, k pi has d sha'i ahga g pahl hikuchka. 26 Matp hema ab wo sha wohog elithath g Jiosh chehanig, t g Jiosh hab masma ab wo neithath mo pahl hikuchkas, chum as pi d Tuhligo ch pi woho hikuchkas. 27 Gawul mahs hemajkam o pi pahl hikuchkas ch eda ha'i hab e junihim mo hab masma hab chu'ig g chehanig. Kut heg hekaj ab wo e chu'ichigch g Tutuligo no pi edgith g chehanig ch eda melichkwuhim. 28 Pi o d Jiosh hemajkamga hegam mat wabsh gawul juh g e-chuhkug g pahl hikuchkakaj. 29 Hegam o hi d Jiosh hemajkamga mat gawul juh g e-ihbthag. Kut pi wo e nako mas g chehanigkaj hab wo juh ihtha. Hekia S-ap'ekam Gewkthag at hemho wo wa gawul juh g t-ihbthag. Tp hems ab wo em-hehgchul g hemajkam mamt gawul wo juh g e-chuhkug. T wabshaba g Jiosh ab wo em-hehgchul mat gawul wo e juh g em-ihbthag.

Romans 3

1 Pegih, mtp hems a ha'ijj hab wo chei, “Pi oki ha'ichu d sha'i ha-ap'ethag g Tutuligo ha thahm g gawul mahs hemajkam.” 2 Nt wabshaba wo em-ahgi mo mu'i ha'ichu d t-ap'ethag. Hema o d ihtha mat g Jiosh ab t-hiwigi g ha'ichu e-ahga matt wo ha ahgi g nahnko mahs hemajkam. 3 K hi wa chum woho mo ha'ijj g ni-wehm o'othham pi ab hu wohog elith g ha'ichu ahgaj. T wabshaba g Jiosh woho am hab wo juh hegai mo has i kaij. 4 Chum o hekith ahg g wohokam, chum as wehs hemajkam g iattogi hab wua. Neh, bo chu'ig an Jiosh o'ohana ed: Jiosh ha'ichu ahga o d hekia wohokam, chum as ha'ijj hab kaij mo pi woho. 5 Ha'ijj o hab kaij, M o wa s-ap'e matt hab wo junihith g pi ap'ekam no pi heg hekaj tasho am chehgith mo g Jiosh hab wua g s-ap'ekam. T heg hekaj pi ap hab wo e juh g Jiosh matp s-ko'okam wo t-namkith heg hekaj. Neh, bo kaij. 6 Nt wabshaba wo em-ahgi mo ahg g iattogi. Jiosh o chum hekith hab wua g s-ap'ekam. Pi at has masma wo e nako mat wo t-lothai matp d wo pi ap'ekamk. 7 K hab kaij ihtham, T-iattogi o am tashogith mo g Jiosh chum hekith ahg wohokam. Kuch heg hekaj am chehgith mo he'es i ge'ej g Jiosh ha'ichu k ed. Pegih, k haschu ahgch hab kaij g Jiosh machs d pi ap chu'ijkam ch wo bei g s-ko'ok namkithadag. 8 Ha'ijj o an ha iattogith manish hab kaij matt am hab wo junihith g pi ap'ekam ch hab masma wo tashogi g s-ap'ekam. T wabshaba g Jiosh wo s-ko'okam ha namkith heg hekaj. 9 Neh, pi o sha'i ba'ich i s-ap'e g Tutuligo mo g gawul mahs hemajkam. Wehsijj ach wa ab mohtois g pi ap'ekam. K ith an t-u'ukch. Kutt pi hedai wo sha'i t-nako machs pi hab wo junihith g pi ap'ekam. 10 An o hab chu'ig Jiosh o'ohana ed: Pi o hedai o'othham d sha'i s-ap'ekam 11 ch pi hedai amichuth mo haschu d s-ap'ekam ch pi hedai mahchimk g Jiosh. 12 Wehsijj at i e mehkoth ab amjed g Jiosh k am hab junihim g pi ap'ekam. Pi o hedai hab sha'i wua g s-ap'ekam. Pi hedai. 13 S-ko'okam o neneok hab masma mo s-em-mu'amk ch g iattogi hab kaij. Pi kehg ha-ne'oki o hab masma i wuhshani mo g hialwui ab ko'oi amjed. 15 E o nahtokch mat s-ko'okam wo em-juh k wo em-mua. 16 Chum o hebai gantan g sho'igthag ch padchuth g s-ha-hehgig. 17 Pi o hekith sha'i s-ap e tahtk. 18 ch pi hekith ab has elith g Jiosh. 19 Jiosh at ab ba'ich wo i ha chu'ichigch hegam mo edgith g chehanigaj ch pi am hu heg oithch hab e junihim. K hekaj hab mahs mo g Jiosh wehs ab ha abchuth g hemajkam. 20 Pi at hedai wo e nako mas wehs am hab wo junihith g Jiosh chehanig ch hekaj wo i e ap'ech am Jiosh tahgio. Chehanigaj at am wo i t-tashogi mach haschu pi ap'ekam hab wua. 21 Ia'i ithani at am i tashogi g Jiosh mat has masma wo i ha ap'ech g hemajkam am e tahgio. Chehanig at pi wo sha'i t-ap'echuth k wabshaba heg wohokamchuth mat has masma g Jiosh wo i t-ap'ech. K g kekelibad Jiosh ha'ichu i tashogiththam ith hab wa'ap wohokamchuth. 22 Jiosh at am wo i ha ap'ech hegam matp hedai ab wo i s-wohoch g ha'ichu ahgaj k ab wo hiwgath g Jesus Christ, chum as has mahs d wo hemajkamk. 23 Wehs hemajkam at hab juh g pi ap'ekam k pi am hu ais g Jiosh hab elitha. 24 K wabshaba g Jiosh ab i s-t-ho'ige'ith. T g alithaj Jesus Christ ab moht g s-ko'ok t-namkithadag am t-wehhejed. T hekaj ab i t-ap'ech g Jiosh e wui. 25 Jiosh at am i ap'ech mat g alithaj wo e muhkith am t-wehhejed k hekaj gm hu hab wo i juh g pi ap t-chu'ichig mattp hedai ab wo i s-wohoch. Ab o wabsh s-ha ho'ige'ith hegam heki hu hemajkam mo ab s-wohochuth ch pi chegima g ha-chu'ichig 26 nat pi g alithaj wo e muhkith am wehs t-wehhejed. Bo wa masma am t-chehgithch g Jiosh mo chum hekith hab wua g s-ap'ekam ch wo e nako mat am wo i ha ap'ech g pi ap chu'ijkam mat hekith ab wo bei g Jesus nat pi heg ab moht g s-ko'ok t-namkithadag. 27 Neh, k pi ha'ichu d sha'i hegai machs hekaj wo chum si t-haschuthath. Pi att wo sha'i t-nako machs wo i t-ap'ech am Jiosh tahgio am hab junihithch g s-ap'ekam. Jiosh at am wo i t-ap'ech e wui matt hekith ab wo i s-wohoch g ha'ichu ahgaj. 29 Pi o hegam d wa'i ha-Jioshga mat ab ha mah g chehanig ch wabshaba wehs hemajkam d ha-Jioshga. 30 Ab o ha wehnath ch wepo masma ab ha neith g Tutuligo ch hegam mo pi d Tutuligo. Wehsijj at hab wa'i masma wo i e ap'ech am Jiosh tahgio mat ab wo i s-wohoch g ha'ichu ahgaj ab amjed g Jesus. 31 Ith o pi hab d ahga machs im hu hab i juh g Jiosh chehanig matt hekith ab i s-wohoch. T-wohochuthadag o am i t-gewpkath matt am hab wo junihith g tatchuij mo hab wa chum d ahga g chehanigaj.

Romans 4

1 Am ant wo i wuhshath g Abrahambad mant am wo i em-tashogi ihtha mani wa em-ahgith. Ihtha Abrahambad ash d t-shohshon ahchim Tutuligo 2 ch ab i s-wohoch g Jiosh. Tsh g Jiosh heg hekaj am i ap'ech e tahgio. Pi atsh wa hejel am i e ap'ech heg hekaj mas hab junihim g s-ap'ekam. K heg hekaj wa pi am hu ha'ichu d sha'i hegai matsh wa heg hekaj wo chum si e haschuthath g Abrahambad. 3 An o hab chu'ig Jiosh o'ohana ed: Abrahambad at ab i s-wohoch g Jiosh. T g Jiosh heg hekaj am i ap'ech e tahgio. 4 Neh, tho em-namkithadag hegai mamt wo ha gehg chikpank. 5 K wabshaba d em-mahkigdag hegai mamtp ab wo bei ab s-wohochuthk hegai mo ab em-makiog. K g Jiosh hab kaij mat am wo i ha ap'ech e tahgio k gm hu hab wo i juh g pi ap ha-chu'ichig hegam mat ab wo i s-wohoch. Ith o d Jiosh mahkigdag. 6 K ith hab ahg g Davidbad ch hab kaij mo s-ap e tahtk hegam mat ab wo i s-wohoch g Jiosh nat pi am wo i ha ap'ech e tahgio. K hab masma an o'ohadag: 7 Sho'o wa'i s-ap e tahtk hegam mat hedam g Jiosh gm hu hab i juh g pi ap ha-chu'ichig k pi ab hu wo ha mohto'i. 9 David o pi hegam hab wa'i ha ahg mo pahl hikuchkas ch wabshaba hegam hab ep ha ahg mo pi pahl hikuchkas. Heki ani hu ahg matsh g Abrahambad ab i s-wohoch g Jiosh. Sh g Jiosh heg hekaj hab kaij mo d s-ap'ekam. 10 Ith at hab e juh mat koi e pahl hikuch g Abrahambad. 11 Ab ash wa s-wohochuth g Jiosh. Sh g Jiosh heg hekaj hab kaij mo d s-ap'ekam. T heg i thahm am hahawa e pahl hikuch mat hab masma am wo wohokamch g e-wohochuthadag mat heg hekaj am i ap'ech g Jiosh. T g Jiosh hab masma wehs am wo i ha ap'ech hegam mat hab wa'ap ab wo i s-wohoch, chum hems hegam mo pi pahl hikuchkas. Heg o wa wepo mach ahchim Jiosh wohochuththam woho d Abrahambad amjedkam nach pi hab masma ap'ethag. Hemho wa att ab wo s-wohochuthath ch ab wo hiwgath hab masma mash wa g Abrahambad. 13 Jiosh ah am ha ahgith g Abrahambad ch amjedkamaj matsh am wo i ha ap'ech e tahgio k wehs ab wo ha mah g jewed kahchki matp ab wo i s-wohoch. 14 Kut pi ha'ichu wehhejed wo s-kehgajk g ha-wohochuthadag matp ith hab wo sha ha juni g Jiosh hegam mo pi ab hu wohochuth ch am hab wabsh junihim hegai mo an o'ohanas chehanig ed. T g Jiosh d wo s-iattomkamk matp am hab wo sha ha juni. 15 Pi att ab hu wo sha'i i t-ap'ech g chehanigkaj k wabshaba heg hekaj ab wo t-abch g t-chu'ichig matt ab wo bei g s-ko'ok t-namkithadag. T hegam mo pi edgith pi heg hekaj ab hu wo e abch. 16 Pi at ahchim am wa'i i t-ap'ech g Jiosh mach wa an u'ukch g heki hu chehanigaj. Ahpim at am ep i em-ap'ech mamt hab wa'ap ab i s-wohoch g ha'ichu ahgaj. Batt masma am oithk hab t-juh g Abrahambad k ab hiwig g Jiosh hemajimatalig. Ith o heg wa wepo mo g Abrahambad d t-ohg. K g Jiosh heg hekaj am t-chehgithch mat has wo chum masmak. 17 Bo masma an o'ohadag mash g Jiosh am ahgith g Abrahambad: Bant m-juh mapt d wo ha-shohshonk g mu'i nahnko mahs hemajkam. Ith at woho hab e juh. K d wohokam hegai Jiosh ne'oki mat g Abrahambad ab i s-wohoch. Jiosh oki e nakog mat ab wo i wuhshath g muhki ab muhkig amjed k am wo nahto ha'ichu hab wabsh che'ek mat am hab wo e juh. 18 Abrahambad ash wa ab s-wohochuth mat g Jiosh ab wo ha mah g ali mat eda kekelit chum as pi mahch mas has masma hab wo juh. Tsh heg hekaj hab juh g Jiosh mo d ha-shohshon g mu'i nahnko mahs hemajkam. Bo masma an hab chu'ig Jiosh o'ohana ed mo g Jiosh hab kaij: G i ha neith g huhu'u. Ha'akia at d wo k g m-amjedkam. Neh, boki kaij. 19 Tsh pi sha'i gawul juh g e-wohochuthadag g Abrahambad, chum as hems aihim g siant ahithag. Kush g Sarabad pi ha mamdat. 20 Abrahambad ash ab si ihm g Jiosh nash pi ab si s-wohochuth mat wo e nakog k woho am hab wo juh hegai mo haschu am ahgith. 22 Heg atsh hekaj am i ap'ech g Jiosh e tahgio k gm hu hab i juh g chu'ichigaj. 23 K pi heg wa'i wehhejed an o'ohanas hegai 24 ch wabshaba ahchim ep t-wehhejed. Jiosh atsh gm hu hab ep wo i juh g t-chu'ichig ahchim matt hab wa'ap ab i s-wohoch. 25 Heg atsh hekaj am i kei g t-kownalig Jesus mat wo e muhkith g t-chu'ichig wehhejed k ab ep wo i wuhsh muhkig amjed. Kutt am i t-ap'ech Jiosh tahgio ab i s-wohochuthk ihtha.

Romans 5

1 Am at i t-ap'ech g Jiosh e tahgio ahchim matt ab i s-wohoch g ha'ichu ahgaj ab amjed g t-kownalig Jesus Christ. Kuch heg hekaj ab wui si s-ap t-tahtk. 2 Sho'o wa'i si s-hemajima a t-wui. Kuch si s-hehgig ch ab nenida mat ab wo i t-wahpki e-kihthag ed k ab wo si t-ha'ichuch. 3 Chum as ha'ichu t-kudut, ch eda si s-hehgig nach pi s-mahch mo g t-kudutadag hab t-wua matt wo s-chu nakogath. 4 T g Jiosh s-ap wo i t-el mach s-chu nakog. Kutt ith hekaj am wo i t-gewpkai heg wui mach ab nenida. 5 Ab at i t-mah g Jiosh g Hekia S-ap'ekam Gewkthag. K heg ab t-mahtchulith mo si pihk e elith g Jiosh ab t-wui. Ch hekaj s-mahch mat woho am wo i t-wahpki g Jiosh e-kihthag ed. 6 Thach wa pi ap chu'ijkam ch pi ha gewkthag machs hab wo juh ha'ichu matt hekaj am wo i t-ap'ech. T wabshaba g Jiosh am i ap'ech mat g alithaj e muhkith am t-wehhejed. 7 Pi o hedai e muhkithamk hema wehhejed. Tp hems hema hi wo wa e muhkith hema wehhejed mo d si o'othham. 8 Kuch eda d wa chum pi ap chu'ijkam. T g Jiosh am t-chehgi mo he'es ab si i t-tatchua am i ap'echuthk mat g alithaj am t-wehhejed muh k gm hu hab i juh g pi ap t-chu'ichig. 9 Kuch hab s-mahch mat hahawa pi heg hekaj ab hu wo t-namkith. 10 Heki ach hu pi ab hu hajunima g Jiosh. T g alithaj muh am t-wehhejed mat hab wo t-juh matt ab haha wo hajunit g Jiosh. Pegih, ch ba'ich ab i ap'ethag am Christ tho'ibiatalig ed no pi d thoakam ab muhkig amjed ch wo e nako mat wo i t-wehmtath. 11 Kuch si s-hehgig mat g t-kownalig Jesus Christ gm hu hab i juh g pi ap t-chu'ichig k am i t-ap'ech mach ab hahawa si s-hajunima g Jiosh. 12 Ab atsh ha'ichu cheha g Jiosh hegai mo d wehpeg o'othham ch hab chehgig Adam. Tsh heg mulin k hab i shonwuich g pi ap'ekam jewed thahm. Tsh hekaj am i shonwua muhkig. Tsh g Jiosh pi hab ep juh g chehanig am hugkam matsh an i wuhsh g Mosesbad. Sh eda wehsijj hab wua g pi ap'ekam. Kush heg hekaj g muhkig wehsijj ab ha a'ahe, chum as pi mulin g chehanig hab masma matsh wa g Adambad. Jiosh oki am ha'ichu t-chehgithch ab amjed g Christ ith hekaj Adambad. 15 Wehsijj atsh ab ha'ichu i wahpki am wehs ha wehhejed g hemajkam. K wabshaba gawul mams hegai mat ab i wahpki. Tho muhkig hegai matsh g Adambad ab i wahki wehs ha wehhejed g hemajkam. K wabshaba d Jiosh hemajimatalig hegai matsh g Jesus Christ ab i wahki wehs t-wehhejed. 16 K d al hemako hegai chu'ichig mat hekaj am i wah g s-ko'ok namkithadag. K wabshaba mu'ij g pi ap t-chu'ichig. K eda g Jiosh wehs gm hu hab i junihog am t-wehhejed. Ab o d t-wuikam hegai s-ko'ok namkithadag nach pi ab d Adambad amjedkam. K wabshaba d Jiosh mahkig ihtha mat hab t-juni gm hu hab i juhk g pi ap t-chu'ichig. 17 Muhkig at ab wehsijj t-ma'ish heg hekaj. Adambad pi ap chu'ichig. K wabshaba g Jiosh si s-hemajim ab t-makiog g ho'ige'ithadag. Kutt am aigo thahm i chehchsh g muhkig ahchim matt ab bei. Ab o t-mahkch g ap'ethag am gahi wuhshanim g Christ matt s-ap wo himath g t-thoakag ith thahm jewed. 18 Pegih, ith ani em-ahgith mat g Adambad ab i wahki g s-ko'ok namkithadag am wehs t-wehhejed heg hekaj hemako pi ap e-chu'ichig. T wabshaba g Christ am hab juh g tho'ibiathag am wehs t-wehhejed heg hekaj hemako s-ap e-chu'ichig ch ab t-makiog g wechij thoakag. 19 Adambad at pi wohog el g Jiosh. K heg hekaj mu'ijj d pi ap chu'ijkam. Christ at hejel ab s-wohog el g Jiosh. Kut heg hekaj mu'ijj ab wo i e ap'ech am Jiosh tahgio. 20 Hemajkam o pi hohho'ith g chehanig ch ba'ich hab i s-junimk g pi ap'ekam wa chum s-mahchch g chehanig. K wabshaba ab t-mahks matt hekaj wo s-mahchk mo he'es i ge'ej g pi ap t-chu'ichig. K eda g Jiosh ho'ige'ithadag ba'ich i ge'ej no pi gm hu hab i junihog g t-chu'ichig. 21 Pegih, tt wo chum nei mat am t-gewito g pi ap'ekam nach pi heg hekaj ab aihim g muhkig. Heg o wa wepo mo d t-maliomig g pi ap'ekam ch am t-wanchshulig muhkig wui. Kuch wabshaba hemuch edgith g Jiosh hemajimatalig ab i s-wohochuthk g s-kehg ha'ichu ahgaj ab amjed g t-kownalig Jesus Christ.

Romans 6

1 Pegih, tp hems ha'i hab wo chei matt hig ba'ich am hab wo i junihith g pi ap'ekam. T g Jiosh ba'ich wo i s-t-ho'ige'el. 2 K eda pi hab sha'i chum mahs machs am hab wo junihith g pi ap'ekam. Am att i thagito g pi ap'ekam. K pi am hu hahawa ha gewkthag t-thahm. Ith o heg wa wepo matt heki hu muh natt pi pi hab hahawa ep wo junihith g pi ap'ekam. 3 Ab att t-chehgi g t-pahl wakonakaj matt ab i t-hemakoj Jesus Christ wehm. K heg wa wepo matt am wehmaj muh natt pi ab i t-hemakoj heg wehm mat muh. 4 T-pahl wakona o wepogithas matt wehmaj gd hu t-hiash am i muhk. T g Jiosh ab i t-mah g wechij thoakag heg hekaj si ge'e e-gewkthag mat hekaj ab i wamigi g Christ muhkig amjed. 5 Ab att i t-hemakoj heg wehm mat am t-wehhejed muh. Kut hekaj ab t-mah g wechij thoakag. Ith o wepo masma matt am wehmaj ko'o k wehmaj ep t-chechegito. 6 Am att i thagito g heki hu t-thoakag. Kut hab gm hu hab i e juh g pi ap t-tatchui. K pi an hu hahawa t-wulshch g pi ap'ekam. 7 Nat hig hab ep wo juh g pi ap'ekam hegai mat heki hu muh? Pegih, tt ahchim hab wa masma am i thagito g pi ap'ekam ab i s-wohochuthk mat g Christ am t-wehhejed muh. 8 Heg muhkig o d t-muhkig no pi d t-namkithadag. Ith att ab i s-wohoch. T g Jiosh heg hekaj ab t-mah g wechij thoakag k ab wo i t-wuwhas muhkig amjed hab masma mat hab juh g Christ. 9 Pi at hekith ep wo muh g Christ mat wa uhpam ep e chegito. Muhkig o pi am hu thahm gewkthag. 10 Hemho at muh mat wo kuhgi g pi ap'ekam gewkthag am t-thothakag ed k ep e chegito k hemuch d thoakam wehhejed g Jiosh. 11 Pegih, mt wo chum kuhgi g pi ap'ekam e-thothakag ed k d wo thothakamk wehhejed g Jiosh ab i e hemakochuthk g Jesus Christ wehm. 12 Pi g wo hiwgithath g pi ap'ekam mas am ep wo i chikp g em-thoakag mamt hekaj hab wo juh g pi ap e-tatchui. 13 Wehs amt am wo i e-thagito Jiosh wui namsh pi d e tho'ibiakam ab amjed g muhkig. T am haha wo i em-hekaj g Jiosh mamt am hab wo junihith g s-ap'ekam. Pi g wo sha'i e hiwgith mas wo em-hekaj g pi ap'ekam has i masma. 14 Heki ach hu ab wecho g chehanig ch wabshaba hemuch edgith g Jiosh hemajimatalig ch hab pi hab wo chum junihith g pi ap'ekam. 15 Pegih, t hahawa pi ab hu ha'ichu wo t-abch g chehanig nat pi g Jiosh ab s-t-ho'ige'ith k t-tho'ibia. Kutp hems heg hekaj ha'i hab wo elithath mat am hab wabsh wo i junihith g pi ap'ekam. 16 T wabshaba g pi ap'ekam an wo ha u'ukchith matp hab wo junihith. T g Jiosh s-ko'okam ab wo ha namkith. Ab amt wo s-wohog elithath g Jiosh. T heg am wo i em-ap'ech e wehhejed. 17 Pi ap'ekam o wa an em-u'ukch. Kumt wabshaba ab i s-wohoch g wohokam ab amjed g Jiosh. Kuni ith hekaj ab si ho'ige'ith g Jiosh. 18 E amt wul'o ab amjed g pi ap'ekam. K g s-ap'ekam an hahawa em-u'ukch. 19 Ni wabsh g pi hasig ne'okikaj em-tashogith nam pi pi koi si s-amichuth. Am amki wa e thagitokch si s-uam ha'ichu wui ch hab junihim g pi ap'ekam. Tsh g Jiosh em-tho'ibia. Kumt am hahawa wehs wo i e thagito s-ap'ekam wui ch hab wo junihith g Jiosh tatchui. 20 Pi am ab hu kaiham g s-ap'ekam mo hekith g pi ap'ekam an em-u'ukch. 21 Kut pi ha'ichu s-ap hab em-juni g pi ap'ekam. Si am wa e eh'elith mam wa am hab junihim. K g pi ap'ekam ab wabsh em-ahijithahim g s-ko'ok em-namkithadag. 22 Kumt wabshaba e wul'o ab amjed g pi ap'ekam. K g Jiosh d hahawa em-ahmo ch hab em-juh mam d hahawa s-ap'ekam. K ab him mamt ab wehs wo bei g pi ha huhugetham thoakag. 23 Hegam mat hab wo junihith g pi ap'ekam at ab wo ai g s-ko'ok e-namkithadag. T wabshaba hegam mat ab wo i e thagito t-kownalig Jesus Christ wui ab wo bei g pi ha huhugetham thoakag.

Romans 7

1 Neh, ni-wepnag, s-mahch amki mo has chu'ig g t-chehanig. Kuni heg hekaj hab em-elith mamt wo s-amich ihtha mant wo em-ahgi. Chehanig o an u'ukch g o'othham am hugkam mat he'es i tash d wo thoakamk. 2 Pegih, k hab chu'ig g chehanig mat g uwi pi ep wo ha kunt mat eda g kunaj d wabsh wo kia thoakamk. K wabshaba hiwgithas mat wo ha kunt matp g kunaj heki hu wo muh. Pi o ab hu hahawa shohbithch g chehanig. 4 Pegih, k hab wa'ap chu'ig am t-wehhejed ahchim matt ab i s-wohoch g s-kehg ha'ichu ahgaj g Jiosh. Am att i t-hemakoj g Christ wehm. K ith heg wepogithas matt am wehmaj muh. K pi an hu hahawa t-u'ukch g chehanig. Thach enigaj hegai mat e chegito ab muhkig amjed ch hekaj s-ap ha'ichu hab wo chum junihith am wehhejed g Jiosh. 5 Am o wabsh ha chu'amun g chehanig hegam mo pi mahch g Jiosh. K ba'ich hab i junihim g pi ap'ekam. K g s-ko'ok ha-namkithadag ab ha aihim. 6 Tt wabshaba ab i t-hemakoj g Christ wehm. T g Jiosh t-wul'o ab amjed g chehanig. Heki ach hu am chum chikpanith g Jiosh g chehanigkaj. K wabshaba hemu g Hekia S-ap'ekam Gewkthag t-wanimed. Ch hahawa woho chikpanith. 7 Ha'i o hab elith mo pi ap'e g Jiosh chehanig. K wabshaba pi woho. Chehanig o am t-tashogith g pi ap t-chu'ichig. Neh, pi att wo chum mahchk mo pi ap'e mach si pihk t-elith g ha'ichu t-enigakaj. K wabshaba g chehanig am t-tashogith mo pi ap'e. 8 Kuch wa am hahawa ba'ich i s-gewkam si pihk t-elith g ha'ichu t-enigakaj. Matp pi an hu wo ha'ichugk g chehanig, t d wabsh wo pi ha'ichuk g pi ap'ekam. 9 Neh, pi ani has sha'i ni-tahtk mani eda pi ap mahch g chehanig. Nt hahawa s-mai. T ba'ich am i si e chehgi g pi ap'ekam am ni-eda. Kunt s-mai maniki aihog g s-ko'ok ni-namkithadag. 10 Jiosh at hab juh g e-chehanig matt heg hekaj wo s-mai matt has masma wo bei g s-ap thoakag. Kunid eda heg ab am cheh maniki d pi ap chu'ijkam ch ab aihog g ni-muhkig ch s-ko'ok ni-namkithadag. 12 Tho hekia s-ap'ekam ch s-kehgaj g chehanig ch am t-tashogith matt has wo chum t-junihith. 13 Pi at g chehanig hab ni-juh mani ab aihog g ni-muhkig ch s-ko'ok ni-namkithadag. Pi ap'ekam at hab ni-juh mani wa ab aihog. Chehanig o s-kehgaj. K g Jiosh heg hekaj am t-tashogith mo haschu d pi ap'ekam ch has masma si pi ap'e. 14 Pegih, k d hekia s-ap'ekam g chehanig. Kuni wa wabshaba d wabsh o'othham. K wa g pi ap'ekam an ni-u'ukch. 15 Pi o wa ta amichuthama g ni-thoakag am ni-wehhejed mani wa eda wabsh hejel ab ni-hiwig. S-mahch ani mo haschu d s-ap'ekam ch wabshaba pi am hu hab junihim ch heg hab wa'i junihim mani haschu i pi hohho'ith. 16 Ith ani wa hekaj wohokamchuth mo g chehanig s-ap'e. 17 Pi ani wa hab chum junimk g pi ap'ekam. K wa wabshaba heg an ni-u'ukch. K wa heg hekaj heg wa wepo mani wa pi d si ahni ch am hab junihim. 18 Ni-thoakag o wa d wabsh hekia pi ap'ekam mani wa eda pi ab hu hiwig g Jiosh. Kuni wa pi sha'i ni-nakog manis am hab wo junihith g s-ap'ekam, chum anis wa hab s-junimk. 19 Heg ani hab wa'i junihim pi ap'ekam, chum anis pi hab chum junimk. 20 Heg ani wa hekaj hab kaij mani pi d si ahni ch hab junihim. Pi ap'ekam o wa an ni-u'ukch. 21 Pegih, boki chu'ig g t-thoakag mach eda pi ab hu hiwig g Jiosh. Pi att wo t-nako machs hejel am hab wo junihith g s-ap'ekam, chum achs hab s-junimk. 22 S-mahch ach mo s-ap'e g Jiosh chehanig. 23 K wabshaba g pi ap'ekam an t-u'ukch ch hab t-wua mach ab wui gegok. 24 Pegih, boki chu'ig g t-thoakag mach eda pi ab hu hiwig g Jiosh. Bach chum s-junimk g Jiosh chehanig ch wabshaba am hab wabsh junihim g pi ap'ekam. K pi in hu hedai ha'ichug mas wo t-tho'ibia. Kuch heg hekaj si pi ap t-tahtk. T wabshaba g Jiosh am i kei g e-alithag Jesus Christ. Kut heg t-tho'ibia. Ith ach hekaj ab si ho'ige'ith g Jiosh.

Romans 8

1 Pi o ab hu hahawa t-abchuth g Jiosh g ha'ichu t-chu'ichig ahchim mach ab si hiwig g Jesus Christ. 2 Hekia S-ap'ekam Gewkthag at t-wul'o ab pi ap'ekam t amjed k ab t-mah g wechij thoakag. K pi ab hu hahawa t-aihog g s-ko'ok t-namkithadag. 3 Pi att wo sha'i t-nako machs am hu hab wo junihith g chehanig ch hekaj wo t-tho'ibia nach pi d wabsh o'othham. T wabshaba g Jiosh am i kei g e-alithag mat wo t-tho'ibia. T heg ia i wuhsh jewed thahm k hab masmakahim mach ahchim ch wabshaba pi ha chu'ichig ch gm hu hab i juh g pi ap t-chu'ichig. 4 Jiosh at hab masma am i t-ap'ech e-tahgio k hab masma ab t-neith matt pi hekith sha'i mul g chehanig ahchim mach ab i t-thagitokch Hekia S-ap'ekam Gewkthag wui ch pi am hu hab junihim g hejel pi ap t-tatchui. 5 Hegam mo hab junihim g hejel e-tatchui o heg hekaj an e u'ukch. K hegam mo hab junihim g tatchuij g Hekia S-ap'ekam Gewkthag heg hekaj an epai e u'ukch. 6 Am o hihim s-ko'ok e-namkithadag wui hegam mo hab junihim g hejel e-tatchui. Ch ahchim mach hab junihim g Hekia S-ap'ekam Gewkthag tatchui am Jiosh kihthag wui hihimath ch hekaj wo si s-ap t-tahtkkath. 7 Tho obgaj g Jiosh hegai mo hedai g hejel e-tatchui hab junihim no pi pi ab hu wohog elith g Jiosh ch pi wo sha'i e nako mas am hab wo e juh. 8 Pi at wo e nako hegam mo hab wua g hejel e-tatchui mas hab wo juh g Jiosh tatchui. 9 Ch wabshaba ahchim pi g hejel t-tatchui hab wua. Hekia S-ap'ekam Gewkthag o am t-eda hab chu'ig. Kuch heg tatchui hab wua. Hegam mo pi am hu ha eda g Hekia S-ap'ekam Gewkthag o pi d Jiosh hemajkamga. 10 T ahchim am i t-ap'ech g Christ am tahgio g Jiosh k ab t-mah g Hekia S-ap'ekam Gewkthag. Kuch heg hekaj edgith g wechig thoakag, chum as hi wa g muhkig ab wehs ha aihog g hemajkam g pi ap ha-chu'ichigkaj. 11 Kut am uhpam ep wo t-chegitoich g Hekia S-ap'ekam Gewkthag hab masma mat hab juh g Christ. 12 Pegih, ni-wepnag, ab o d t-wuikam matt hab wo junihith g Jiosh tatchui. 13 Jiosh at gm hu hab wo i t-juh mattp am hab wo sha junihith g hejel t-tatchui. Hekia S-ap'ekam Gewkthag o am i em-wehmaj. Kumt gm hu wo s-ohhoth g pi ap ha'ichu hab e-juni k hab wo edgithath g wechij thoakag. 14 Ab at t-mah g Jiosh g Hekia S-ap'ekam Gewkthag. K heg am t-wanimed. Ch hab s-mahch mach d Jiosh a'aliga 15 ch ab ihm mo d t-ohg ch pi sha'i ehbith. 16 Hekia S-ap'ekam Gewkthag o am t-tashogith mach d a'aligaj g Jiosh. 17 Jiosh at ab wehs mah g e-alithag g e-ho'ige'ithalig k hab wa'ap wo t-mah nach pi hab wa'ap d a'aligaj. Kutt wabshaba wehpeg ab wo nako g sho'igthag hab masma mat heg hab e juh mo d si alithaj. 18 Si atsh ge'e ab wo has t-elithath g Jiosh. Kutt hab pi wo sha'i kuint g al t-sho'igthag ia jewed thahm. 19 Jiosh atsh wehs ha'ichu thahm wo t-mahsko wua ahchim a'aligaj. K wehs ha'ichu nahtoij heg nenida. 20 Tho Jiosh hab elitha mat wehs e padch g nahtoij mat eda g o'othham pi ap chu'i. Wehs ha'ichu o ab hahawa e wulshch g pi ap'ekamkaj. Tsh wabshaba g Jiosh wo wul'o g e-nahtoi mat hekith am wo mahsko t-wua ahchim a'aligaj. Tsh wehs ha'ichu hahawa ep si s-kehg hab wo mahsk. 22 S-mahch ach mo hemuch g ha'ichu nahtoij g Jiosh shahag wepo mo shahshani hab sha masma mat g uwi g ali wo be k ab i taht g s-ko'ok. 23 Ahchim mo g Jiosh ab t-mahkch g Hekia S-ap'ekam Gewkthag ach hab wa'ap shahshani ch ab si nenida mat am wo i nahto g t-tho'ibiathag k wo wechijith g t-chuhkug. Hekia S-ap'ekam Gewkthag o d wehpeg mahkigdaj g Jiosh ab t-wui. 24 Ab att i s-wohoch g Jiosh. Kut t-tho'ibia. K wabshaba am wabsh kia wi'is mat wo nahto g t-tho'ibiathag k am wo i t-wahpki e-kihthag ed. Kuch s-wohochuth mat ith hab wo t-juni. 25 Wohochuthadag o hab d ahga mamt s-e tahtk ch ab wo nenidath hegai mamt koi nei. 26 Pi ach ahim gewkthag. K wabshaba g Hekia S-ap'ekam Gewkthag i t-wehmaj. Pi ach mahch matt has masma wo t-ho'ige'ithahunath am Jiosh wui. K wabshaba g Hekia S-ap'ekam Gewkthag ab t-mahtchulith. Kuch hab shahshani ch shoak am Jiosh wui ch pi sha'i mahch matt has masma hab wo chei hegai mo haschu ab t-tahtchuth. 27 K wabshaba g Jiosh s-mahch g t-ihbthag ch ep s-mahch hegai mo haschu ab t-tahtchuth g Hekia S-ap'ekam Gewkthag. Heg o hab wua g t-ho'ige'ithahuna am Jiosh tatchui oithch. Kuch ab tahni g i wehmtadag am ha wehhejed g Jiosh hemajkamga. 28 Ab at i t-wai g Jiosh matt d wo hemajkamgajk. Kuch ab wui si pihk t-elith. K g Jiosh heg hekaj wehs ha'ichu am i ap'echuth mat t-wehhejed wo s-ap i wuhsh ha'ichu. 29 Heki o hu s-mahch g Jiosh mat hedai ab wo kaiha g waithaj ch am ap'ech matt wo wepo chu'igk g alithaj ch wehmaj d wo a'aligajk. T g alithaj d wo wehpeg t-si'ihegk. 30 T wa woho ab i t-waith k am i t-ap'ech e tahgio k hahawa pi ab hu ha'ichu t-chu'ichigchuth. K am ba'ich ehp mat ab t-mah g si has e-elithadag. 31 Pegih, bo masma am t-wehhejed kehk g Jiosh. T hab pi hedai wo e nako mas ab t-wui wo kekiwua. 32 Pi at sha'i t-tha'i g Jiosh g e-alithag. Kuch heg hekaj s-mahch mat pi ha'ichu ep wo sha'i t-tha'i. Alithaj at ab wui e iagchul am t-wehhejed. 33 T g Jiosh heg hekaj gm hu hab i juh g pi ap t-chu'ichig. T hab pi hedai wo e nako mas ab wo ha'ichu t-abch. 34 Jiosh alithag at ab nako g s-ko'ok t-namkithadag am t-wehhejed muhk. T hab pi wo t-ai hegai t-namkithadag. T g Jiosh ab i wuhshath muhkig amjed k an s-apko thai e-hugith an. K heg am t-wehhejed e ho'ige'ithahun ab Jiosh wui. 35 Kuch eda hi wa hebaichujj ab nakog g kudutadag ch s-hasig ha'ichu ch sho'igchuthadag nach pi d Christ wohochuththam. Bihugig ch sho'igthag ch s-ta ehbitham ha'ichu ch cheggiadag o ab ep t-aihog. 36 Bo chu'ig g Jiosh ha'ichu ahga: “Chum ach hekith ab nakog g s-ta ehbitham ha'ichu am wehhejed g Jiosh. Kum hab t-elith mach ab aihim g muhkig hab masma mo g ha-gi'ichutha kakawal.” Neh, ttp hems hebai hab wo i el mat am i ha'asa si pihk e el g Christ ab t-wui. 37 K wabshaba ith pi woho. Ab o si pihk e elith g Christ t-wui ch ab t-mahkch g gewkthag. Kuch wehs gewitoghim g t-kudutalig. 38 S-mahch ani mat pi hekith ha'ichu wo sha'i e nako hemuch o gm hu t-ba'ich mas an wo shohbi g Jiosh pihk elithadag ab t-wui mattp hebai wo i k ith thahm jewed o in t-thahm. Pi at g muhkig o g thoakag wo shohbi, ni'is g anghil o g s-ta ehbithamkam gewpkthag. Ab o t-chehgithch g t-kownalig Jesus Christ mo t-hekaj si pihk e elith g Jiosh. Kut pi hekith ha'ichu wo sha'i e nako mas an wo shohbi g pihk elithadaj.

Romans 9

1 Mu'ijj g ni-wehm Tutuligo o s-ohhothamk g Jesus pi wohochuthch mo d Jiosh si Kehsha. Kuni heg hekaj si pi ap ni-tahtk. K g ni-ihbthag sha'i si s-ko'ok. S-mahch ani mani g wohokam em-ahgith nani pi pi ni-elith ch em-ahgith. K g Hekia S-ap'ekam Gewkthag an ni-u'ukch. 3 Si ani tatchua mat wo e tho'ibia g ni-wehm o'othham, chum anis hems heg hekaj pi wo ni-tho'ibia. 4 Tho chum Jiosh hemajkamga. Jiosh at ab i ha chuhcha g t-shohshonbad k am ha ahgith mat si s-kehg ha'ichu hab wo t-juni. Ab o si has t-elith g Jiosh ch ab t-mahkch g e-chehanig. Kuch hab s-t-mahch ch hab junihim g ab si has elitha Jiosh wui. T g Jiosh si Kehsha ab t-amjed i wuhsh ia jewed thahm. Tt heg hekaj ab wo si has elithath g Jiosh chum hekith. Neh! 6 K eda mu'ijj g ni-wehm o'othham pi ab hu wohochuth g Jiosh si Kehsha. K wabshaba ith pi hab d ahga mas g Jiosh pi am hu hab wo juh hegai mo hab kaij mat hab wo juh. Pi atsh wehsijj g Tutuligo d wo Jiosh hemajkamgak. 7 Ith ant am wo em-tashogi am em-ahgithch ab amjed g Abrahambad. Pi atsh wehsijj g Abrahambad amjedkam wo enigak hegai mash wa g Jiosh ab makiog. Gohk ash wa a'alithag g Abrahambad. Sh hema hab chehgig Isaac. Kush g Jiosh hab kaij ab Abrahambad wui: Hegam wa'i Isaac amjedkam at wo enigak hegai mani ab m-makiog. 8 Ihtha Isaacbad ash d hegai matsh wa g Abrahambad wehm kihkam bei matsh eda heki hu okst natsh pi g Jiosh am i ha wehmt k hab kaij: That wo hemako ahithagk, t g Sarah wo ge cheoj madt. Ith o am chehgithch mat hegam d wo wa'i Jiosh hemajkamgak mat hedai g Jiosh am wo i ha chuhcha. 10 Neh, tsh am hema hohnt g Isaacbad am i ge'ethak. Sh ith hab chehgig Rebecca ch gohk ha mahmadt. 11 Sh hab kaij g Jiosh ab wui g Rebeccabad: Ge'echu at d wo piongajk g alichu. Tsh eda ihtham koi an hu mamsi k koi ab hu ha'ichu chu'ichig. Tsh g Jiosh ab i wai g chumchu mat hekaj wo tashok mo ab hejel ab g Jiosh mat hedai ab wo i ha wai. 13 Hegai mo d ge'echu ash hab chehgig Esau. Sh g chumchu hab chehgig Jacob. K hab chu'ig g Jiosh o'ohana mash g Jiosh hab kaij: Ab ant i wai g Jacob k g wehngaj Esau pi ab hu i wai. 14 Pegih, na'ams ha'i hab elith mat pi ap chu'i g Jiosh. K wabshaba pi hab chu'ig 15 nash pi hab kaij ab Mosesbad wui: Nt wo s-ha ho'ige'el hegam mani hab ha elith. 16 K heg hekaj tasho mo s-ha ho'ige'ith heg wabsh hekaj mo hab ha elith. Pi at hedai heg wabsh hekaj wo nei g Jiosh ho'ige'ithadag mas haschu i tatchua ch haschu am hab juni him. 17 An o o'ohanas mash hab kaij g Jiosh am wui g ha-kownalig g Egypt t am hemajkam: Am ant i m-thai mapt d wo kownalk ith si hekaj mant ab m-wui wo kekiwua k am wo ha chehgi g ni-gewkthag k am wo mahsko ni-wua wehsko jewed thahm. 18 K heg hekaj tasho mo g Jiosh s-ha ho'ige'ith mo hedai hab i elith ch hab ha wua mo hedai hab i elith mat pi ab hu wo kaihamath g ne'okij. 19 Neh, tp hems hema wo kah ihtha k hab wo chei, “Pegih, pi at ha'ichu ab hu wo chum t-abch g Jiosh matp heg hab wa masma hab t-juh map has i kaij.” 20 Nt wabshaba wo em-ahgi mo pi ab hu sha'i ab g o'othham mas ab wui wo neo g Jiosh. Thach Jiosh nahtoi ch pi edgith g ap'ethag machs ab wui hab wo chei mas haschu ahgk hab masma t-nahto. 21 Neh, nat hig pi hab wo ha juh g haha'attham g hab mams haha'a mat wo tatchuath? Hema atp hems d wo s-kehg ha'ak ch hema d wo pi kehg ha'ak. 22 Pegih, t g Jiosh wehs hab ha juh g hemajkam. K ha'i pi ap d hemajkam. K wabshaba g Jiosh s-ha bahbgi. T am wo i e ai mat am wo chehgi g e-gewkthag k wo s-ko'okam ha namkith. 23 Kuch ha'i s-ap d hemajkam no pi ab si s-t-ho'ige'ith g Jiosh. Am at i t-ap'ech matt hab masma wo nei g gewkthaj. 24 Ahpim gawul mahs hemajkam am d ep waithaj. Jiosh at ab ep i em-gawulkai. 25 Neh, bo masma an o'ohadag heg o'ohana ed mash hab chehgig Hosea mo hab kaij g Jiosh: Bant wo ha juh hegam mo pi d ni-hemajkamga mat d haha wo ni-hemajkamgak k ab wo si pihk ni-elithath ha wui. 26 Kumt hab wo ha a'agath mo d ni-hemajkamga. Neh, bash kaij g Jiosh. 27 Kush wa g Isaiabad d Jiosh ha'ichu i tashogiththam ch hab kaij: E o aihim mat g Jiosh ab wo ha mah g ha-namkithadag wehs hemajkam. T pi sha'i mu'i wo e tho'ibia g Tutuligo hemajkam, chum as wo si mu'ijk hab sha masma mo g o'od. 29 Sh wa am hu hebai hab ep kaij g Isaiabad: S-ap atsh huhug g pi ap'ekamkaj hegam kihhim mash hab chechgig Sodom ch Gomorra. Kut ahchim Tutuligo hab wa'ap s-ap wo huhug mat hems g Jiosh pi wo ha'i t-tho'ibia. Sha'i si s-gewkthag g Jiosh. 30 Pegih, pi am wa am hu e gahgith g Jiosh ap'ethag ahpim gawul mahs hemajkam ch wabshaba am i kah ab amjed g Jiosh alithag k ab i s-wohoch. T g Jiosh am i em-ap'ech e tahgio gm hu hab i juhk g pi ap em-chu'ichig. 31 K g ni-wehm o'othham am i chum e ap'echuth g chehanigkaj ch pi bei g e-ap'ethag 32 nat pi pi ab hu wohoch g Jiosh k pi ab hu bei g si Kehshaj k wabsh am hab chum s-junimk g s-ap'ekam mat hekaj wo s-ap'ek am Jiosh tahgio. Ith o heg wa wepo mat e huchwua ab hothai t ab. 33 An o hab chu'ig Jiosh o'ohana ed mo hab kaij g Jiosh: Am ant wo i maskogi g si ni-Kehsha ha shahgith g Tutuligo mat d wo chum ha-tho'ibiathagk. T pi wo e tho'ibia hegam mat pi ab hu wo wohoch. Ith at heg wo wa wepok mat ab wo e huchwua hothai t ab k wo i shul. Hegam at wo wa'i e tho'ibia mat ab wo i s-wohoch. Neh, bo chu'ig g Jiosh o'ohana.

Romans 10

1 Ni-wepnag, chum ani si tatchua mat hu wo i e tho'ibia g ni-wehm o'othham ch heg hekaj am ni-ho'ige'ithahun Jiosh wui. 2 Hegam o tatchua mat am wo i e ap'ech Jiosh tahgio ch wabshaba pi ap mahch mas has masma hab wo e juh. 3 Jiosh at am i ap'ech matt has masma wo s-ap'ek am tahgio. K g ni-wehm o'othham wabsh s-ohhothamk g apchuthaj ch wabsh hejel am chum s-e apchuthamk 4 ab s-wohog elithch g Jiosh chehanig. K wabshaba g Jiosh am t-chehgithch matt ab wabsh wo i s-wohoch g s-kehg ha'ichu ahgaj k ab wo i hiwigi g Christ. T heg am wo i t-ap'ech am tahgio. 5 An atki hi wa o'oha g Mosesbad mash hab kaij g Jiosh: Wehs amt wo himath g ni-chehanig mamt heg hekaj wo bei g pi ha huhugetham thoakag. 6 K oi wa tasho mat pi hedai wo sha'i e nako mas wehs wo himath. K eda in ha'ichug g tho'ibiathag ahga. Kush heg hekaj hab kaij g Jiosh matt ab wabsh wo i s-wohochuth k ab wo i hiwigi. Kut am wo i t-ap'ech hejel e tahgio. An o hab chu'ig Jiosh o'ohana ed: Pi g hab wo i e ahgi mat hedai am wo em-behijitham g tho'ibiathag thahm kahchim wui. Neh, bo chu'ig nat pi g Jiosh alithag ia heki hu i t-behij. 7 K an ep o'ohanas: Pi g hab ep wo i e ahgi mat hedai am wo em-behijitham jewed wecho. Jiosh alithag at heki hu ab i wuhsh muhkig amjed mat ab wo t-mah. 8 Bo hig woho chu'ig: Pi o sha'i mehk g Jiosh ha'ichu ahga ab em-amjed. Chum am hekith ne'okchulith ch si s-mahch. Neh, ith o d ihtha ha'ichu ahga ab amjed g wohochuthadag mach am ahgahim. 9 Am g wo wohokamchuth mo g Jesus d em-kownalig ch ab uhpam e chegito muhkig amjed. T g Jiosh wo em-tho'ibia. 10 Wehsijj atsh am wo i ha ap'ech g Jiosh hegam mat hedai ab wo i s-wohoch g alithaj e-ihbthag amjed. T wo e tho'ibia am i wohokamchuthk mo g Jesus d ha-kownalig. 11 Bo chu'ig g Jiosh o'ohana: Mat hedai ab wo s-wohochuth k wo e tho'ibia. 12 Pi o ahchim wa'i Tutuligo hab t-ahg. Wehs hemajkam o d ha-kownalig g Jiosh ch wehsijj s-ba'ama ab wo s-ha ho'ige'el hegam mat ab wo tahnith. 13 Bo chu'ig g Jiosh o'ohana: Matp hedai ab wo tai g Jiosh k wo e tho'ibia. 14 T wabshaba pi hedai has masma ab hu wo tai matp pi ab hu wo wohochuthath. T hab wa'ap pi hedai has masma wo kah matp pi hedai wo ha ahgithath g ha'ichu ahgaj. 15 Kut pi hedai wo e nako mat hejel wo i e ah mat an wo ahgachugath. Jiosh o wa ab t-chehani. An o hab chu'ig Jiosh o'ohana ed: Sho'o wa'i si s-kehg hab mahs mat wo thatha g s-kehg ha'ichu ahgtham. 16 Pegih, ch an ahgachug g s-kehg ha'ichu ahgaj g Jiosh ab amjed g si Kehshaj. T ha'i kah k ab i s-wohochuth k ab wui e thagito k ha'i ehp pi ab hu wohoch. An atki o'oha g Isaiabad matsh ith hab wo e juh. K an hab chu'ig o'ohanaj ed: Ni-kownalig Jiosh, pi at mu'i ab hu wohoch g ha'ichu t-ahga ahchim ha'ichu i m-tashogiththam. Neh, boki kaij. 18 K hemuch ha'i hab chech'e mo pi wehsijj kah g hemajkam g Jiosh ha'ichu ahga. Nt wabshaba wo em-ahgi mo wehsijj neith g Jiosh nahtoi. K g Jiosh o'ohana hab chu'ig: An o wehsko e tashogith g Jiosh e-nahtoi ed. 19 Tki an o'oha g Mosesbad moki hab kaij g Jiosh am ha wui g Tutuligo: Bam ha ahg g gawul mahs hemajkam mo pi d Jiosh hemajkamga ch pi ha'ichu a'amichuth. Nt wabshaba ab wo ha mah g ap'ethag. Kumt haha wo s-ha hehgam k wo babgat ab ha wui. 20 Tki g Isaiabad an o'oha mash s-gewkam hab kaij g Jiosh: Am ant ni-chehgi ha wui hegam mo pi an hu ni-gahg. T ab i s-ni-mai hegam mo pi ni-mahch. 21 T an ep o'oha g Isaiabad mo hab kaij g Jiosh ab ha amjed g Tutuligo hemajkam: Tash oitham ani ab i chum ha waith ihtham hemajkam. K wabshaba pi chechkaithag ch pi ab hu ni-wohog elith.

Romans 11

1 Pegih, na'as hab sha elithas mat gm hu s-ha ohhoth g Jiosh g Tutuligo mat pi d haha wo hemajkamgajk. K wabshaba pi hab mahs. Ahni ani hab wa'ap d Tuhligo. T g Jiosh pi gm hu ni-ohhoth. Benjaminbad o d si ni-shohshon ch heg d amjedkamaj g Abrahambad. 2 Pi at gm hu s-t-ohhoth g Jiosh. Thach chum hemajkamgaj. Heki at hu ab i ha gawulkai g t-shohshon. Batsh wa masma pi gm hu ha ohhoth wenog mash wa g Elijabad d thoakam ch d Jiosh ha'ichu i tashogiththam. M o hi wa woho mash wa am ha gagda g e-hemajkamga Jiosh wui hab kaijch: 3 Ni-kownalig Jiosh, ha at koktha g ni-wehm o'othham g ha'ichu i m-tashogiththam k i shul g iagchulithakud. Ahni ant wa'i hejel in wih. K ep chum s-ni-mu'amk. 4 Sh wabshaba hab kaij g Jiosh ab wui: Am ani wabsh kia nuhkuth g wewa'ak mihl hemajkam. K ihtham ab has ni-elith ch pi ha'ichu ep jioshga. Neh, bash wa kaij g Jiosh. 5 K ia'i ithani am hab wabsh i masma. Ab at ha'i s-t-ho'ige'el g Jiosh ahchim Tutuligo k ab i t-gawulkai. Kuch ab s-wohochuth. 6 Pi at heg hekaj ab i t-gawulkai machs haschu has i juh k wabshaba heg hekaj mo s-t-ho'ige'ith. Pi at d wo wohokam ho'ige'ithadagk matp g Jiosh heg ab wo ha himch g hemajkam mo haschu has i junihim k ab wo i ha gawulkai e wui. 7 Pegih, al he'ekia at ab i ha gawulkai g Jiosh g ni-wehm o'othham. T ihtham cheh g e-gahgi. Mu'ijj at pi cheh no pi pi chechkaithag ab Jiosh wui. 8 K hab chu'ig g Jiosh o'ohana: Jiosh at hab ha juh mo pi ha'ichu a'amichuth. K am hab wabsh i chu'ig ith i tashkaj. Shahag wepo mo pi ha'ichu neith ch pi ha'ichu kah. 9 David ash wa hab kaij ab Jiosh wui: Hegam mat gm hu s-m-ohhoth at wo hejel e sho'igch am e-pipiast ed k wo i shulig k s-ko'okam wo e namkith 10 k heg wo wa wepok mo pi ha'ichu neith. T g ha-kudutadag ab wo si i wehchi. 11 Neh, bo chu'ig. Jiosh at am ha thagito hegam ni-wehm o'othham mo pi ab hu kaiham. T heg hekaj am i e ahgahi g tho'ibiathag ahga gawul mahs hemajkam ha wui. Kutp hems ha'i g ni-wehm o'othham wo s-ha hehgam k ab haha wo kaihamath g Jiosh. Kut pi wabsh wo s-kehg ha hugio g Jiosh. 12 Pi at ap chu'i g ni-wehm o'othham k ab ai g ge'e sho'igthag T heg hekaj g ge'e ho'ige'ithalig ab hih nahnko mahs hemajkam ha wui. Ab o him g tash mat mu'i Tutuligo ab wo i e nohnogi Jiosh wui k ha'akia ab wo ai mo he'ekia hab i ha elith g Jiosh mat wo ha tho'ibia. T g nahnko mahs hemajkam ab ep wo bei g ge'e ho'ige'ithalig heg hekaj. 13 Thani kehshaj g Jesus Christ mant wo em-ahgi ahpim gawul mahs hemajkam g ha'ichu ahgaj. Kunt wo si ha'ichuch ihtha ni-chikpan. 14 Tp hems g ni-wehm o'othham wo s-em-hehgam k ha'ijj wo e tho'ibia. 15 Jiosh at ab i kuhpi'o g ap'ethag am ha wehhejed g gawul mahs hemajkam mat hekith gm hu hab i ha juh g Tutuligo. T g gawul mahs hemajkam ba'ich wo i bei g ho'ige'ithadag mat hekith am wo i e ai g tash mat g Tutuligo ab wo i e nohnogi Jiosh wui. Kut woho ab wo i e nohnogi wui. 16 Neh, ab ach mamka g Jiosh g wehpegkamaj g ha'ichu t-gehgewa ch hab masma chehgith mo wehs d enigaj hegai t-gehgewa. Pegih, t-shohshon ahchim Tutuligo o d wehpegkam. K d si shel mat g ha-amjedkam mu'i ab wo i e nohnogi Jiosh wui. Uhs mahmhadag o d Jiosh eniga mamtp ab wo mah g tatkaj. T-shohshon o d tatk. Ch ahchim d mahmhadgaj. 17 Mt wabshaba wo hikkumi'a hegam mahmhadgaj mat pi ab hu wo bahithagt k ab wo ha namki ab hegam mat wo s-kehg bahithagt. Pegih, t g Jiosh hab masma gm hu hab i ha juh hegam Tutuligo mo pi ab hu wohochuth k ahpim em-ui gawul mahs hemajkam mamt ab i s-wohoch. Kum ab hahawa wehs ap'ethag hegai mo haschu d i chum ha-ap'ethag hegam Tutuligo mo pi ab hu wohochuth. 18 Mt pi wo e haschuthath mat gm hu hab i ha juh. Jiosh at hab em-juh mamt hab haha wo masmak mam d Abrahambad amjedkam. Pi am d ha-shohshon ch wabsh heg wa wepo mam d mahmhadag. 19 Mtp hems hab wo chei mat g mahmhadgaj e hikkumi'a mat am wo em-jegel. 20 T wabshaba hab wa e juh nat pi pi ab hu wohoch g Jiosh ha'ichu ahga. Mt ahpim ab s-wohochuth k hekaj ab gi'is shonaj ab. Mt wabshaba pi wo si e haschuthath ith hekaj. 21 Gm at hu hab i ha juh g Jiosh hegam Tutuligo mo pi ab hu wohochuth. Kumt ahpim gm hu hab ep wo i e juh mamtp pi ab hu wo wohochuthath. 22 Jiosh at wo si s-hemajimak ab em-wui mamtp ab wo s-wohochuthath ch wabshaba ab em-wui wo kekiwua mamtp ab uhpam wo i e nohnogi pi ap'ekam wui. Pegih, ab g wo i oithahim ihtha k an wo u'ukchith g Jiosh hemajimatalig. 23 Jiosh at ab uhpam ep wo ha ui hegam Tutuligo mat ab wo i s-wohoch. 24 Ab at em-ui ahpim gawul mahs o'othham. Kum wa chum pi e nahtokch. Ith o wepo masma mamt wabsh chum hebai wo ha mul g i'ibhonig k ab wo namki g uhs e-e'es. Tutuligo o chum e nahtokch. T g Jiosh ab uhpam ep wo ha ui hegam mat ab wo i s-wohoch. Ith o wepo masma mamt ab uhpam ep wo ha namki g ha-i'ibhonig am i ha mulink. 25 Neh, ni-wepnag, hemu at ha'ichu mahsko wua g Jiosh. Kuni ith s-em-ahgithamk. Kumt wo s-mahchk ch hekaj pi hab wo chum ge e elithath mam si s-chu a'amichuth. Pi at chum hekith im hu hab wo i e juhkch g Tutuligo ab amjed g Jiosh. Jiosh at mahsko wua mat ab wui wo i e nohnogi am i thahm mamt ahpim gawul mahs hemajkam ha'akia ab wui wo i e nohnogi mo he'ekia hab i em-elith g Jiosh. 26 T haha wo e tho'ibia g Tutuligo. An o o'ohadag mo hab kaij g Jiosh: Ab ant wo i wuhshath g hemajkam ha-tho'ibiakam ab ha amjed g Tutuligo. T heg gm hu hab wo i juh g pi ap ha-chu'ichig. 27 Neh, bat wa masma hab wo e juh g ha'ichu ni-ahga ab ha wui g Tutuligo. 28 Ahchim Tutuligo ach d chum Jiosh hemajkamga nat pi ab i ha gawulkai g t-shohshon. T wabshaba mu'ijj g ni-wehm o'othham pi ab hu wohoch g Jiosh ha'ichu ahga k hab masma e obgach ab wui. K g Jiosh heg hekaj t-chehani matt am wo ahgachugath g s-kehg ha'ichu ahgaj em-wui ahpim gawul mahs hemajkam. 29 Pi at hekith am gawul wo juh g e-chegitoi g Jiosh. 30 Ahpim gawul mahs hemajkam am wa pi ab hu wohog elith g Jiosh. K wa g Jiosh pi ab hu em-ho'ige'ith. T g Tutuligo gm hu i e nohnogi ab amjed g Jiosh. T g Jiosh heg hekaj ab em-mah g ho'ige'ithadag. 31 K wabshaba ab him g tash mat hahawa em-wepo masma wo bei g Jiosh ho'ige'ithadag g Tutuligo. 32 Wehs hemajkam o d pi ap chu'ijkam am Jiosh nena ed. Kut g Jiosh wehs ha wepo wo s-ha ho'ige'el hegam mat ab wui wo i e nohnogi. 33 Sho'o wa'i si ge'ej g Jiosh. K g ha'ichu amichuthadaj ch ha'ichu mahchigaj sha'i si ge'ej. Pi at hedai wo sha'i e nako mas hejel wo s-mai g hab elithaj o wehs wo s-amich mo has masma hab wua ha'ichu. 34 Neh, bo chu'ig an Jiosh o'ohana ed: Pi o hedai sha'i mahch g Jiosh chegitoi ch pi hedai wo e nako mas am wo ha'ichu i shelini g Jiosh. 35 Wehs ha'ichu o d Jiosh eniga. Kut pi hedai wo e nako mas ab wo ha'ichu mah. 36 Wehs ha'ichu at an nahto. K wehs ha'ichu an hab chu'ig wehhejed. K hab mahs matt chum hekith ab wo si has elithath g Jiosh!

Romans 12

1 Pegih neh, ni-wepnag, si o s-t-ho'ige'ith g Jiosh. Tt heg hekaj wehs am wo i t-thagito wui matt am wehhejed d wo thothakamk ch am hab wo junihith g tatchuij. Batt masma s-wohom ab has wo elithath g Jiosh. 2 Pi g am hu ha oithch hab wo masmak hegam mo pi ab hu ihm g Jiosh ch wabshaba ab wo i e thagito Jiosh wui. T heg am gawul wo juh g em-chegitoithag. T hab wehs wo i e wechijith g em-thoakag. Bamt wa'i masma wo s-mahchk mo haschu d Jiosh tatchui. K heg d wa'i si hekia s-ap'ekam. 3 Jiosh o ab s-ni-ho'ige'ith ch ab ni-mah g gewkthag. Ni heg hekaj hab em-ahg wehsijj mamt pi wo chum ge e ha'ichuchuthath ch wo si s-mahchk mam haschu am chegito. Wehsijj amt am wo si i mamche mo he'es ab i em-mahkch g Jiosh g gewkthag ch haschu em-tatchuith mamt am hab wo junithath am oithch g e-wohochuthadag. 4 Neh, no hig pi woho nahnko ha'ichu hab wua g o'othham chuhchu'ithag, chum as d hemako g honshpadaj. 5 Pegih, tt hab wa masma nahnko ha'ichu wo junihith mat a'ai d wo i t-wehmtadagk ahchim mach ab t-hemakochuthch g Christ wehm. 6 Am g wo hekaj g e-gewkthag a'ai e wehhejed hab masma mo g Jiosh am ap'echuthch mamt hab wo e juh. Ha'i o ab em-mahkch g gewkthag mamt am wo ahgahith g ha'ichu ahgaj. Kumt ab wo s-wohochuthath ch wo ahgahith. 7 Ha'i o d em-mahkigdag mamt ha'ichukaj wo i ha wehmtath g e-wehm wohochuththam o wo ha'ichu ha mashchamath 8 o ha'ichukaj ab wo i ha gewkemhunath. Ha'i o d em-mahkigdag mamt ab wo ha'ichu ha ho'ithath g e-wehm wohochuththam. Am g s-ba'ama hab wo wuath ch s-ha ho'ige'ith. Ha'i o d em-mahkigdag mamt d wo ha wanimedthamk. Kumt wo si chikpanath ch s-gewkam am hab wo junihith. Ha'i o d em-mahkigdag mamt wo s-ha ho'ige'ith k wo i ha wehmt hegam mo e sho'igchuth. 9 Pi g hab wabsh wo s-e junimk mam ab pihk e elith hedai i ha wui ch wabshaba si s-wohom ab si pihk e elith ab ha wui. Pi g hab wo junihith g pi ap'ekam ab hedai i wui ch wabshaba g s-ap'ekam hab wo wa'i junihith ab ha wui. 10 Ab g wo si ha tatchuath g e-wehm wohochuththam ch ab has wo ha elithath, chum as aigo pi ab hu has wo em-elithath. 11 Mt wo si chikpanath ch pi wo papadmak. Si e-ihbthagkaj amt ab wo ihmath g Christ ch wo chikpanthath. 12 Mt wo si s-hehgigk heg hekaj mo haschu g Jiosh ab em-wuichuth. Am g wabsh wo i s-thotholimak e-kudutadag ed ch chum hekith wo e ho'ige'ithahunath. 13 Ha'i o e sho'igchuth g t-wehm wohochuththam. K ab t-ab matt am wo i ha wahpki t-kihki ed k ab wo i ha mah g i wehmta, chum as d wabsh wo ge o'othhamk. 14 Ab g wo i tahni g Jiosh mat ab wabsh wo i s-ha ho'ige'el hegam mo em-sho'igchuth. Pi g wo sha'i has ha ahgath. 15 Ab g wo si ha wehm s-hehgigk hegam mo s-hehgig ch ha wehm pi ap e tahtk hegam mo pi ap e tahtk. 16 Am g wabsh s-ap e wehm wo kihkath. Pi g am wo chum e ha'ichuchuthath ch ab wabsh wo ha tatchuath g sho'igkam ch am hab wabsh wo junihith wabsh chum has mahs chikpan. Pi amt hab wo e elithath mam d s-chu a'amichuththam. 17 Am g hab wo junihith g s-ap'ekam wehs ha wui ch pi ab hu uhpam wo i nodagi g pi ap'ekam hegam ha wui mat ab em-wui hab wo juh g pi ap'ekam. 18 Am g wo i e nakog mamt s-ap e tahtk ch ab wo ha neithath g hemajkam mamtp he'es wo i e nako. 19 Pi g am wo hejel e agwuan. Jiosh at am hab wo wa em-juni. Neh, bo chu'ig an o'ohanaj ed g Jiosh: Ahni o ab ni-ab mant em-wehhejed hab wo juh g agwuithag. 20 K hab ep chu'ig g o'ohanaj: Mt wo gegos chum hems g e-obga matp d wo bihugimkamk. Kutp d wo tonomkamk, mt wo wasibi g shuhthagi. T hab masma am hejel wo i e chegito g em-obga. 21 T wo t-gehg g pi ap'ekam mattp wo hejel t-agwua. Kutt wabshaba wo gehg g pi ap'ekam mattp ab wo namkith g s-ap'ekamkaj.

Romans 13

1 Am o ap'echuthch g Jiosh mat in wo ha'ichugk g kownaltalig ch am wo t-thahmk. Tt heg hekaj ab wo wechok g ha-chehanig g kokownal 2 ch pi wo melchkwuath. Jiosh o ab ha mahkch g gewkthag. Kut wo t-namkith matt wo sha melchkwuath. 3 Tt heg hekaj wo s-ehbithath g kownal matt hab wo sha junihith g pi ap'ekam ch wabshaba pi wo ehbithath mattp g s-ap'ekam hab wo junihith. Am g hab wo wa'i junihith g s-ap'ekam. T g haha'ichu s-ap wo em-elithath. 4 Jiosh at am i ha chuhcha g kokownal mat wo t-nuhkuthath. Kut wo s-ta ehbithamk mattp hab wo junihith g pi ap'ekam no pi g Jiosh ab ha mahkch g gewkthag mat s-ko'okam wo t-namkith. 5 Hemho wa att wo himath g chehanig nach pi s-mahch mo pi ap'e matt wo melchkwua. 6 Ab o d wuikamaj g kownal hegai mo haschu ab t-kowlant mat hekaj wo himath g e-chikpan. 7 Pegih, tt ab has wo ha elithath g haha'ichu k wo namkithath g kownal hegai mo haschu ab t-chehani. 8 Pi att hedai wui wo chum t-wulshchith ch wabsh s-ap wo ha namkithath. Ith att wa'i hekaj wo chum t-wulshchith matt ab a'ai t-hekaj wo si pihk t-elithath. Ith o d Jiosh chehanig. Kuch ab s-wohog elith g chehanigaj ab a'ai si pihk t-elithch. 9 Bo chu'ig g chehanigaj: Pi g wo ha ehsith g ha-wehm kihkam. Pi g wo ha mua'i. Pi g ha'ichu wo ha ehsithath. Pi g wo pihk e elithath g s-kaisthagkaj. Neh wehs ihtha o hab d ahga matt ab wo si pihk t-elithath wabsh chum hedai wui hab masma mach has i masma hejel pihk t-elith. 10 Pi att hekith am hab wo junihith g pi ap'ekam ab ha wui hegam mach ha hekaj si pihk t-elith. Neh, wehs ach am hab junihim g Jiosh chehanig mattp ab wo pihk t-elithath wabsh chum hedai wui. 11 Ith att hab wo wuath heg hekaj mat mehk wa'i hih g tash. E at ai matt ab wo si i t-nenenashanich no pi e aihim mat g Jiosh ab wo i t-wuwhas ith amjed jewed. 12 Pegih, tt wo thagito g pi ap'ekam k g s-ap'ekam am hab wo junihith. E o aihim matt s-ap wo t-tho'ibia. 13 Tt wo si t-elithath mattp wo ih'eth ch wo t-nondagch o attp wabsh chum hedai wehm wo wo'iwup o attp s-uam has wo t-wuath o attp wo s-ha hehgam o attp wo ha cheggia. Ab o t-ab matt am wo thagito hewai hab mahs ha'ichu k heg hab wo wa'i junihith mo d s-ap'ekam. 14 Tho si t-kownalig g Jesus Christ. Kutt ab wui wo i t-thagito matt pi am hu hab wo junihith g pi ap t-tatchui.

Romans 14

1 Ha'i atp hems am wabsh kia pi gewpkthag g em-wehm wohochuththam am e-wohochuthadag ed. Kumt wabsh wo ha tatchuath ch pi wo ne'owi heg amjed mo haschu al i s-mahch. 2 Neh, am o wa s-ap'e matt wabsh chum haschu hugi wo ko'ath matp wo s-gewkthagk g t-wohochuthadag. K wabshaba ha'i pi gewkthag e-wohochuthadag ed ch heg hekaj hab e elith mo ha'ichu pi hiwgithas mat wo e ko'ath. 3 Kutt pi a'ai has wo t-eh'el heg hekaj mach haschu i ko'a nat pi g Jiosh ab i t-ui. 4 Pi o ab hu t-ab machs wo has ahgath g t-wehm wohochuththam. Tho Jiosh pionag. Jiosh o d t-ahmo ch heg am wo i a'appe mas s-ap am hab e junihim g t-wehm wohochuththam. T wabsh wo e nako mat s-ap am hab wo junihith no pi g Jiosh am i wehmaj wehs ha'ichu k ed. 5 Ha'i o hab e elith mat am wo oithath g Tutuligo ha-pipiast tash ch ha'i hab elith mo wehs tash am wabsh i e wepothag. Ab o hejel t-ab mattp has wo i elithath. 6 Matp hedai ab wo si has elithath hema tash ch hab e wua mat heg eda ab wo si i ihm g Jiosh. Tp hedai wabsh chum haschu wo ko'ath ch ab wo si has i elithath g Jiosh nat pi ab wo si i ho'ige'el heg hekaj ha'ichu hugi. Kutp hedai pi wabsh chum haschu wo ko'ath ch hab wa'ap wo si has elithath g Jiosh nat pi ab wo chum ho'ige'el g Jiosh heg hekaj mo haschu i ko'a k ab wo si has i el. 7 Pi ach hedai wabsh hejel t-wehhejed in d thoakam ch wabshaba Christ wehhejed in d thoakam ch wo muh mat hekith hab wo i el g Jiosh. 8 Pegih, thach Christ hemajkamga mach in d thoakam ch hab wa'ap d enigaj chum achs hems wo muh. 9 Christ at muh k ab uhpam i wuhsh muhkig amjed mat d wo t-kownaligk, chum achs hems wo muh. 10 Pegih, pi att am wo chum has ahgath g t-wehm wohochuththam. Wehsijj att am wo i gegokiwua wui g Jiosh heg i eda lothaita tash. 11 Neh, an o o'ohadag mo hab kaij g Jiosh: Wehs at ab wo i shul g hemajkam ni-wui k ab wo ni-ihm mani d Jiosh. 12 Wehsijj att hemho wa hehe'ejel am wo i kekiwua ba'ich matt wo ah g hejel hab t-juni. 13 Pegih, mt hig wo ha'asa a'ai has e ahgath. Ith amt am hab wo elithath mamt pi am hu wabsh has wo e wuath. T hekaj pi wo heki hih g em-wehm wohochuththam o am wo gei pi ap'ekam ch ed. 14 Ab ach s-wohochuth g t-kownalig Jesus ch hekaj chum s-mahch mo wehs g ha'ichu hugi hiwgithas matt wo huh. Tp wabshaba hema hab wo elithath mo pi hiwgithas, pegih, k pi ap'e mas an wo bei. 15 Kutp hems wo heki him k pi wo e tho'ibia matp hema an wo hekaj hegai mo haschu hab elith mo pi hiwgithas. Pi ach tatchua g t-wehm wohochuththam mattp wo heki himch. T eda g Christ wehhejed muh chum s-tho'ibiamk. 16 Pi g am hu ha'ichu has wo juhni mamt heg hekaj wo has em-ahgath, chum ams hems hab elith mo d s-ap'ekam. 17 Pi o d si ha'ichu machs haschukaj wo t-gegosithath. K wabshaba ith d si ha'ichu matt am hab wo junihith g s-ap'ekam ch ab a'ai t-wui wo si s-ap t-tahtkk ch wo si s-hehgigk mat g Hekia S-ap'ekam Gewkthag am i t-ap'ech Jiosh wui. 18 Pegih, tt hab wa masma am hab wo t-junihith am wehhejed g Christ. T g Jiosh ab wo si s-hohho'i ihtha. T g hemajkam pi ha'ichu wo cheh mas ab wo t-abch. 19 Tt heg wui am wo i t-nako matt haschukaj ab a'ai wo i t-gewkemhunath ch ab a'ai t-wui wo s-ap t-tahtkk. 20 Tho Jiosh tho'ibiakam g t-wehm wohochuththam. Pegih, pi g ha'ichu hab wo juhni mas hekaj wo heki hihi. Wehs ha'ichu hugi o hiwgithas. K wabshaba pi ap'e machs wo ko'ath matt haschukaj wo ha heki hihimch g t-wehm wohochuththam. 21 Kutt heg hekaj wabsh wo thagito hegai mattp haschukaj wo heki himch g t-wehm wohochuththam. Chuhkug attp hems wo thagito o g nawait o wabsh chum haschu. 22 Am att wabsh wo hejel nuhkuthath mach haschu i s-wohochuth ith amjed ch heg wa'i Jiosh ab wo ahgi. Tt wo s-hehgigk mattp hab wo junihith hegai mach haschu i s-mahch mo s-ap'e. T hab pi wo heki hih g t-wehm wohochuththam. 23 Pi g am hu hab wo juhni hegai mam haschu pi mahch mas d s-ap'ekam k hab pi ab hu wo e chu'ichigch heg hekaj.

Romans 15

1 Pi att wabsh hejel am wo t-chegitoth ahchim mach ab wabsh s-ap s-wohochuth g Jiosh ch wabshaba ep wo ha chegitoth hegam mo pi am hu i si s-amichuth mo ha'ichu s-ap'e. 2 Kut heg hekaj ab wo i e gewkemhunath ch ba'ich wo i s-ap s-amich mo haschu s-ap'e. 3 Am o t-chehgithch g Christ matt pi wabsh hejel wo t-chegitok no pi pi wabsh hejel am hu e chegito mo wa in oimmed. An at o'oha g kelibad Jiosh ha'ichu i tashogiththam: Jiosh si Kehsha at ab wo nako g has e-ahgadag ab ha amjed hegam mo ab wui gegok g Jiosh. Kut wa woho hab e juh. 4 Wehs o d t-mashchamadag mat haschu an o'oha g kekelibad Jiosh ha'ichu i tashogiththam. Kutt heg ab ab wo i t-gewkemhunath ch hab s-ap t-tahtkk ch wo nenidath matt ab wo bei g t-ap'ethag ab amjed g Jiosh. 5 Tho Jiosh mo ab i t-gewkemhun matt s-ap t-tahtkk ch wo nenida g t-ap'ethag. Kuni ab tahni mat hab wo em-juh mamt am oithch hab wo e junihith g t-kownalig Jesus Christ k ch wehs e wehm ab wo ihmath g ohgaj Jiosh ch hab s-ap wo e tahtkkath ab a'ai e wui. 7 S-ap o ab t-neith g Christ. Kutt ahchim hab wa masma ab a'ai s-ap wo t-neithath ch hab ab wo has elithath g Jiosh. 8 Chum o hekith am hab junihim g Jiosh mo has i kaij. T heg hekaj ia jiwia g Christ mat am hab wo t-juni ahchim Tutuligo hegai moki haschu g Jiosh ab ha ahgith g t-shohshonbad. 9 Kumt heg hekaj ab ep wo ihm g Jiosh ahpim gawul mahs hemajkam mat ab hab wa'ap s-em ho'ige'el. Neh, bo chu'ig an Jiosh o'ohana ed mo hema hab kaij am Jiosh wui: Ab ant wo m-ho'ige'ithath am ha shahgith g gawul mahs hemajkam ch ab wo si ne'eth ch ab wo m-ihmath ha wehm. 10 K an hab ep chu'ig: Ahpim amt ep wo s-hehgigk gawul mahs hemajkam t-wehm ahchim Tutuligo. 11 K an hab ep chu'ig: Ab g wo ihmath g Jiosh wehsijj ahpim gawul mahs hemajkam ch wo si hehgchulithath. 12 K an hab ep chu'ig mo hab kaij g Isaiabad: Ab at hema wo i wuhshani k wehs d wo ha-kownaligk g nahnko mahs hemajkam. T hegam ab wo i s-wohoch. Ith at d wo amjedkamajk hegai mash d t-kokownaligbad ha-shohshon ch hab chehgig Jesse. 13 Jiosh at hab em-juh mamt wabsh wo nenidath matp haschu am hab wo i em-juni. Kuni ab tahni mat ab wo i gewkai g em-wohochuthadag mamt hekaj wo si s-hehgigk ch wo si s-ap e tahtkk ab wui. Bamt masma ba'ich i s-ap wo nenidath g e-ap'ethag. T g Hekia S-ap'ekam Gewkthag ab ba'ich wo i em-mah g wohochuthadag. 14 Ni-wepnag, s-mahch ani mamtp hu hi wa i s-ap am hab e junihim ch mu'i ha'ichu s-mahch mamt s-ap a'ai wo e mashcha. 15 Ni wabshaba ith eda o'ohana si s-gewkam ha'ichu am em-ahgith mant am wo i em-chegitoich. Jiosh at ab has ni-elith k am i ni-kei 16 mant d wo piongajk g Jesus Christ em-wehhejed ahpim gawul mahs hemajkam. Am ani wehsko ahgachug g s-kehg ha'ichu ahgaj g Jiosh am ha wui g gawul mahs hemajkam. K heg hekaj ha ap'echuthahim g Hekia S-ap'ekam Gewkthag. K ab ihm g Jiosh ihtham. 17 Kuni si s-ap ni-tahtk ch chikpanith g Jiosh ahgachugch g ha'ichu ahgaj ab amjed g Jesus Christ. 18 Heg at am hab ha juh g gawul mahs hemajkam mat ab s-wohog el g Jiosh heg hekaj mani has i kaij ch has ni-wua. Kuni heg wa'i s-em-ahgithamk mat heg has e juh. 19 Hekia S-ap'ekam Gewkthag o ab ni-mahkch hegai gewkthag mani hekaj hab wua g s-hasig ha'ichu. K ith am wohokamchuth g ha'ichu ahgaj g Jiosh. Kunt am i ahgahi Jerusalem t amjed wehs jejewed ha oithch gm hu Illyricum (Albania) jewed hugkam. 20 Chum ani hekith hab ni-elith mant am wo i ahgahi ihtha s-kehg ha'ichu ahga mo hebai pi koi sha'i kah g hemajkam ab amjed g Christ k hab si wechij am wo i shonwuich. 21 Neh, bo d ahga ihtha Jiosh o'ohana mo hab chu'ig: T wo wa kah k wo s-amich hegam mat koi sha'i kah ab amjed hegai mat wo ha tho'ibia. 22 Neh, mu'ikko o ni-shohbithch ihtha chikpan nant pi pi koi nahto. Nt hab pi koi i em-chehgim. 23 K wabshaba hemu pi am hu ha wi'is manis am hu wo ahgachugath g Jiosh ha'ichu ahga am ha oithch ihtham jejewed. Mu'i a'ahithag ani am chum s-em-chehgimelimk 24 ch antp hu'i haha wo ni-nako hemuch am himathch Spain jewed wui nani pi am s-himimk. S-mahch ani hi wa mamt am wo i ni-wehmt mant am wo him k am he'es wo i em-neithchkahim ch s-ap wo ni-tahtkk. 25 Nt wabshaba wehpeg gm hu wo hih Jerusalem wui k am ha'ichukaj wo i ha wehmt g t-wehm wohochuththam amai. 26 Si ash e sho'igchuth g t-wehm wohochuththam Jerusalem t am. T hegam t-wehm wohochuththam mo am kih Macedonia ch Greece jejewed ch ed hab i e ah mat wo i hemapai g lial k hekaj wo i ha wehmt. 27 S-ap'e o mat am aigo wo i ha wehmt nat pi ab ha amjed i hih g s-kehg ha'ichu ahgaj g Jiosh. 28 Neh, am ant ha wehm wo hih hegam mat am wo i ui g ha-mahkigdag Jerusalem t am. Heg i thahm ant am haha wo i em-chehgim am himathch mant gm hu wo hih Spain wui. 29 S-mahch ani matt ab a'ai wo si s-t-ho'ige'el mant am wo jiwia em-wui. 30 Tham ni-wehm wohochuththam g t-kownalig Jesus Christ. K g Hekia S-ap'ekam Gewkthag ab em-mahkch g gewkthag mamt wo si pihk e elithath ha hekaj g e-wehm wohochuththam. Kuni heg hekaj ab em-tahni mamt ab wo si e sho'igch Jiosh wui 31 k ab wo tai mat wo si ni-nuhkuthath. T hab pi has wo ni-juh hegam mo pi ab hu wohochuth g Christ amai Judea ch ed. Ab g ep wo tahni g Jiosh mat am hab wo ha juh g t-wehm wohochuththam mat ab wabsh s-ap wo ui g t-mahkigdag. 32 Nt heg hekaj si s-ap ni-tahtk k am wo i em-chehgim matp hab wo elithath g Jiosh. 33 Jiosh o ab t-mahkch g s-ap tahhathkam. Ni ab tahni mat ab ba'ich wo i em-wehmt.

Romans 16

1 Am atsh wo i em-chehgim ihtha t-wehm wohochuththam mo hab chehgig Phebe ch am i ha wehmt g t-wehm wohochuththam Cenchrea kihhim t am. 2 Mt s-ap ab wo i nei am wehhejed g t-kownalig Jesus. Ab o d t-wuikam matt ab wo i ha wahpki hegam mo an oiopoth ch chikpan g Jiosh ha'ichu ahga. Ge'e ha'ichu o am hab junihim ihtha Phebe mu'i t-wehhejed. Kumt am wo i wehmt heg hekaj mat haschu wo i tatchua. 3 Am g wo ha ahgith g ni-machiga amai mat ab wo i s-ni-ho'ige'el. Kah ani mash am thadha g Priscilla ch Aquila. Ihtham o wa am ni-wehm chikpanahim 4 ch chum alo e ko'ij ni-wehhejed. Kuni ab si s-ha ho'ige'ith. K hegam gawul mahs hemajkam mo ab ni-ab kah g Jiosh ha'ichu ahga hab wa'ap ab s-ha ho'ige'ith mat ni-tho'ibia. 5 Kah ani mash am ha'i e hehemapath ch e mihshmath ha-kih am ihtham Priscilla ch Aquila. Kumt am wo ha ahgi mat ab wo i s-ni-ho'ige'el. Am g ep wo ahgith g ni-nawoj Epanetus mat ab wo i s-ni-ho'ige'el. Heg o wud mat si wehpeg ab i s-wohoch g s-kehg ha'ichu ahgaj g Jiosh amai Asia jewed ch ed. 6 Sh am si i em-wehmt g ni-machiga Mary. Kumt am wo ahgi mat ab wo i s-ni-ho'ige'el. 7 Sh g ni-hajuni Andronicus ch Junia am ep em-wehmaj. Ihtham at wa wehpeg ab i s-wohoch g s-kehg ha'ichu ahgaj g Jiosh. Nt ab hahawa i s-wohoch. S-ap o ahgachug g Jiosh ha'ichu ahga mo heg hekaj ab gawulkthas. Kum wa hab wa'ap ha kuhpchkahim. Am g wo ha ahgith mat ab wo i s-ni-ho'ige'el. 8 Kush g Ampliatas am ep thak ch d si ni-nawoj am Christ himthag ed. 9 Sh am ep em-wehmaj hegai Urbanus mo wa am ni-wehm ahgachug g Jiosh ha'ichu ahga. Sh g Stacas am ep em-wehmaj ch d si ni-nawoj. 10 Sh g Apelles am ep em-wehmaj ch hab wa'ap e chehgithch mo am hab wa'ap ha'ichu hab junihim wehhejed g Christ. 11 Sh g Herodion am ep em-wehmaj ch d ni-hajuni. Ihtham g wo ha ahgith mat ab wo i s-ni-ho'ige'el. Am g wo ha ahgith hegam Aristobulus ch hegam Narcissus mat ab wo i s-ni-ho'ige'el. 12 Sh am ep em-wehmaj g Tripina ch Triposa ch am chikpan g Jiosh ha'ichu ahga. Sh g Persis am ep si chikpan. 13 Sh g Rufus g si ge'e chikpan am hab wa'ap junihim. Rufus je'e o hab masma ab ni-neith mani d madaj. Kumt wehs am wo ha ahgi ihtham mat ab wo s-ni-ho'ige'el. 14 Sh am e wehm ab ihm g Jiosh hegam Asincritas ch Plegon ch Hermes ch Patrobas ch Hermas ch ha'i ehp. Kumt am wo ha ahgi mat ab wo i s-ni-ho'ige'el. 15 Sh am e wehm ab ihm g Jiosh hegam Philologas ch Julia ch hegam Nerias g e-uwiga wehm ch Olimpas ch ha'i ehp. Kumt am wo ha ahgi mat ab wo i s-ni-ho'ige'el. 16 Ab g wo e chehgith mam a'ai s-e ho'ige'elith. Wehsijj hegam mo an a'ai e nanmek ch ab ihm g Jesus Christ o ab s-em-ho'ige'ith. 17 Neh, am ant ha'ichu wo em-ahgi, ni-wepnag. An o ha'i oiopoth ch am gawul junihim g Jiosh ha'ichu ahga ch am ha'ichu hab ahg mat hekaj wo e kudu g t-wehm wohochuththam k ab e wui wo gegokiwua. Kumt wo si s-e nen'oithk ab ha amjed k pi ab hu wo i ha miabi. 18 Ihtham o wabsh hejel e wehhejed hab wua g pi ap e-tatchui ch pi ab hu chikpanith g t-kownalig Jesus Christ. Ho o iattogith hegam mo pi ap mahch g wohokam wabsh si s-kehg neneokch ch s-ap has ha ahg. 19 Kumsh eda ahpim ab si s-wohog elith g s-kehg ha'ichu ahga ab amjed g Christ. Kuni heg hekaj ab si s-hehgig em-hekaj ch am s-em-ahgithamk mamt wo s-ap s-mahchk g s-ap'ekam ch pi wo mahchk g pi ap'ekam. 20 Jiosh o ab t-mahkch g s-ap tahhathkam ch s-hohtam wo em-mah g gewkthag mamt wo gewito g Jiawul. Ab ani tahni g t-kownalig Jesus mat wo em-wehmajk ch ba'ich ab wo i em-mah g ho'ige'ithadag. 21 Ia o ni-wehm chikpan g Timothy ch hab kaij mamtsh ab wo i s-ho'ige'el. K ihtham ab s-em-ho'ige'ith ni-wehm o'othham mo hab chechgig Lucius ch Jason ch Sosipater. 22 Ia o ni-wehhejed em-o'ohanith ihtha g Tershus ch hab ep kaij mamtsh ab wo i s-ho'ige'el. 23 Ia ani tha kihj am g Gaius. K ith ab ep s-em-ho'ige'ith. Ia kihj am o e nanmek g Christ wohochuththam. Hegai mo d lial nuhkuththam am wehhejed g kownal ith eda kihhim o hab chehgig Erastus ch ab s-wohochuth g Jiosh ch hab wa'ap am em-ho'ige'elith. K g Quartus hab wa'ap am em-ho'ige'elith. [ 24 Neh, ab at wo wa ba'ich i s-em-ho'ige'el g t-kownalig Jesus Christ.] 25 Nt am haha wo i em-thagito Jiosh wui. Heg at wo e nako mat wo i em-gewpkai. Mt hahawa s-wihnam ab wo s-wohochuthath g Jiosh ha'ichu ahga. Heg ani hekaj ahgachug ihtha s-kehg ha'ichu ahgaj ab amjed g Jesus Christ. Kekelibad Jiosh ha'ichu i tashogiththam at wa heki hu an o'oha ihtha s-kehg ha'ichu ahgaj ab amjed g Jesus Christ. 26 T g Jiosh hemu mahsko wua mo has d ahga k am tashogi mat am wo e ahgahith wehs ha wui g nahnko mahs hemajkam matp hems ab wo i s-wohochuth k ab wo s-wohog i el. Pi o hebai ha hug g Jiosh 27 ch wehs ha'ichu s-mahch ch ab i e maskogith am gahi wuhshanim g Jesus Christ. Kutt heg gahi wuhshanim ab wo si ihmath g Jiosh ch ab wo si has elithath chum hekith. Neh, ith ant am wo wa'i em-o'ohani.

1 Corinthians 1

1 Ni-wepnag mam am kih Corinth t am: Am ant wo ha'ichu i em-o'ohani ahni Paul mani d Jesus Christ kehsha mo wa am ni-tatchuith g Jiosh. K ia i ni-wehmaj ihtha t-wehnag mo hab chehgig Sosthenes. 2 Jiosh at ab i em-gawulkai mamt d wo hemajkamgajk. Kumt heg hekaj ab i e hemakoj wehsijj t-wehm ahchim mach hab wa'ap ab ihm g t-kownalig Jesus Christ. 3 Ab o wa si s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 4 Chum ani hekith ab si ho'ige'ith g Jiosh em-hekaj. Ab amt i s-wohoch g Christ. T g Jiosh ab i em-mah g ge'e i wehmtadag. 5 M heg hekaj s-mahch mo haschu s-ap'e ch s-ap ha'ichu am hab junihim ch s-ap ha'ichu k amjed neneok. 6 Am o e chehgithch mam s-wihnam an u'ukch g ha'ichu t-ahga ab amjed g Christ. 7 Kum wehs ab i neith g ho'ige'ithadgaj ch ep nenida mat ep wo jiwia. 8 Jiosh at ab i em-waith k ab i em-gawulkai mat hab masma hab t-juh. Kum hab si s-ap s-mahch g alithaj Jesus Christ. T g Jiosh pi hekith am hu gawul wo juh g hab e-elitha k an wo t-u'ukchith matt pi ab hu wo t-chu'ichigch heg eda tash mat wo ha lothai g pi ap chu'ijkam. 10 T-kownalig Jesus Christ o ab ni-mahkch g gewkthag mant wo ha'ichu em-cheha. Kunt hekaj wo em-ahgi mamt pi ab hu e wui wo gegokiwua k wabshaba ab wo i hemakoj g e-chegitoithag k wo s-ap e tahtkk ab a'ai e wui. 11 Ia at ha'i thatha g em-wehm kihkam mo d Cloe hajuni k hab kaij mamsh pi e wehm neneok. 12 Ha'i amsh hab kaij mamsh ahni am ni-oith ch amsh ha'i g Apollos am oith ch amsh ha'i g Peter am oith. Kumsh ha'i hab e elith mamsh ahpim d wa'i wohokam oiththam g Christ. 13 Neh, am amtsh a'ai i e ga'agwulkath k eda d chum hemako ab wecho g Christ. Pi att hema ahchim ab muh kots t ab em wehhejed. Heg at wa'i Christ hab e juh. Kumt heg ab wa'i s-wohochuth k e pahl wapko. 14 Pi ant heg wehhejed am hu jiwia manis wehs wo em-pahl wapko. Shahag wepo mant hegam wa'i Crispus ch Gaius ha wapko, pej hegam ehp Stephanus. Pi ant chegito manis ha'i ep ha pahl wapko. Pi ani hab ni-ahg mams ahni wo i ni-oi. Pi at heg hekaj am i ni-kei g Christ manis wo ha pahl wapkonath k wabshaba am i ni-kei mant am wo ahgachugath ihtha s-kehg ha'ichu ahga mo hab chu'ig mat ab e muhkith kots t ab t-wehhejed. Neh, ith ani wa'i ahgachug ch pi hekaj g s-hasig ne'oki mams ab wo si has ni-elith k p i am hu wo amichuth k hab pi wo e tho'ibia. 18 Hegam mo pi d e tho'ibiakam o hab elith mo d wabsh pi ha'ichu g ha'ichu t-ahga mat g Christ ab muh kots t ab t-wehhejed. Kuch wabshaba ahchim mach d t-tho'ibiakam s-mahch mo g Jiosh hab masma ab t-chehgithch g e-gewkthag. 19 Neh, an o o'ohanas mo hab kaij g Jiosh: Ha'i o hab e elith mat wo i e ap'ech heg hekaj hejel e-amichuthadag. Nt wabshaba am wabsh wo pi ha'ichuch g hab ha-elitha. 20 Pegih, am o t-chehgithch g Jiosh matt pi hedai wo sha'i t-nako machs wo hejel t-tho'ibia, chum achs hems ha'ichu wo s-amichuthath ch ha'ichu wo s-mahchkath. Pi att hedai wo sha'i t-nako machs wo ha ne'owin k wo cheh g Jiosh wohokam. 21 Jiosh at hab masma hab t-juh matt pi hedai wo sha'i t-nako machs hejel wo s-mai g Jiosh k wo t-tho'ibia. Ha'i o pi ha'ichuchuth g Jiosh ha'ichu ahga. K wabshaba hab d elithaj matt ab wo i s-wohoch g ha'ichu ahgaj k hekaj wo t-tho'ibia. 22 Ni-wehm Tutuligo o s-hohho'ith mat ho'ip nei g s-hasig ha'ichu k haha wo s-wohoch hegai mo hab junihim. K g gawul mahs hemajkam s-kaimk g hemajkam ha'ichu ha-mahchig mat hab masma wo chum s-mai g wohokam. 23 Ch wabshaba ahchim hi heg ahgachug mat g Christ ab muh kots t ab k hekaj t-tho'ibia. Tutuligo o hab elith mo ith wabsh chehgithch mo pi gewkthag. K g gawul mahs o'othham hab elith mo wabsh chehgithch mo pi ha'ichu amichuth. 24 T wabshaba g Jiosh ab ha'i i t-gawulkai ahchim Tutuligo k hab wa'ap ab ha'i i em-gawulkai ahpim gawul mahs hemajkam matt ab wo i s-wohoch g alithag k wo t-tho'ibia. Hegam mo pi d e tho'ibiakam o pi ab hu ha'ichuchuth ihtha mat g Jiosh am hab t-juni am gahi wuhshanim g e-alithag. K wabshaba g Jiosh hab masma am t-chehgithch g e-amichuthadag ch e-gewkthag. 26 Am g wo s-chegitok, ni-wepnag, mam has i masma mat eda koi ab hu i em-gawulkai g Jiosh mamt d wo hemajkamgajk, Mu'ijj am pi ha'ichu mahch ch pi ha gewkthag ch d wabsh pi ha'ichu am ha-nena ed g hemajkam. 27 T g Jiosh ab i em-gawulkai mat hekaj am wo ha chehgi hegam mo pi mahch mo d wabsh pi ha'ichu g ha'ichu ha-amichuthadag ch ha-gewkthag. 28 Pi am ab hu em-ha'ichuchuth ch wabsh s-em-uhwaith. T wabshaba g Jiosh ab i em-gawulkai mat hekaj am wo ha chehgi mo pi d sha'i ha'ichu hegam mo g hemajkam ab si has ha elith. 29 Heg o hekaj hab mahs mat pi hedai wo chum si e haschuthath am tahgio g Jiosh. 30 Heg at ab i t-wehnath g Christ matt ab i s-wohoch g s-kehg ha'ichu ahga ab amjed. T g Christ t-tho'ibia ab amjed g pi ap'ekam k am i t-ap'ech wehhejed g Jiosh matt d wo hekia s-ap'ekam hemajkamgajk, Bo masma ab t-chehgithch g Jiosh ha'ichu amichuthadag. 31 Heg o hekaj an hab chu'ig Jiosh o'ohana ed: Pi g hedai hejel ab hu wo e ha'ichuchuthath k ch heg ab wo wa'i ha'ichuchuthath mat haschu hab t-juni g Jiosh.

1 Corinthians 2

1 Kuni ahni hi pi sha'i hasigamkaj neok, ni-wepnag, mant eda am wa jiwia em-wui am ahgachugch 2 mat g Jesus Christ ab muh kots t ab am t-wehhejed. Kuni hab n-ahg mant heg am wo wa'i ahgachugath 3 ch heg hekaj si s-gihug ch gigiwuk. 4 K g ha'ichu ni-ahga pi am hu hab sha'i kaithag matp hems g si s-e mahchim o'othham ha'ichu ahga. K wabshaba g Hekia S-ap'ekam Gewkthag am wohokamchuth g ha'ichu ni-ahga. 5 Heg ani hekaj s-mahch mo g em-wohochuthadag pi ab hu shon heg ab hemajkam ha'ichu amichuthadag ch wabshaba ab Jiosh gewkthag amjed. 6 Am ani wa hi wa ha ahgith g ha'ichu amichuthadag hegam mat ge'ege'ehogat e-wohochuthadag ed. K wabshaba ith pi d hemajkam ha'ichu ha-amichuthadag, chum hems hegam mo d s-has haha'ichu. Hegam ha'ichu ha-amichuthadag at wabsh ha wehm wo huhug. 7 Ihtha ha'ichu amichuthadag mani hab ahg o d Jiosh hab elitha am t-wehhejed ch an hab chu'ig mat koi in hu nahto ihtha jewed ch wabsh s-a'agi an hab ah chu'ig. Tho Jiosh hab elitha mat g Christ wo t-tho'ibia. 8 Heg o d kownal wehs ha'ichu thahm. T eda g s-has haha'ichu ab naggia kots t ab no pi pi mahch g Jiosh hab elitha. 9 An o hab chu'ig Jiosh o'ohana ed: Pi o hedai sha'i neith o kah o chegito mat he'es i s-kehg ha'ichu am i ap'ech g Jiosh am ha wehhejed hegam mo ab si tatchua. 10 Jiosh ha'ichu hab elitha o pi ta machima am t-wehhejed. K wabshaba g Hekia S-ap'ekam Gewkthag wehs s-mahch ch am i t-tashogith. 11 Neh, no hig pi woho mo pi hedai ep s-mahch g ha'ichu t-chegitoi hab masma mach ahchim hejel s-mahch? Pegih, ch ahchim hab wa masma pi hedai ep s-mahch g Jiosh ha'ichu chegitoi. 12 T wabshaba g Jiosh ab t-mah g Hekai S-ap'ekam Gewkthag mat am t-eda wo ulinig ch am wo i t-tashogithath mo haschu ab t-makiog g Jiosh. 13 Pegih, pi att wo sha'i t-nako machs am hu wo tashogi g Jiosh wohokam heg hekaj hemajkam ha'ichu amichuthadag. K wabshaba g Hekia S-ap'ekam Gewkthag ab t-mahkch g ha'ichu amichuthadag mach hekaj am i tashogith. T hegam wo wa'i s-amich mo hedai edgith g Hekia S-ap'ekam Gewkthag. 14 T hegam mo pi edgith pi wo amichuth k pi wo bei mo haschu ab t-makiog. Heg wa'i Hekia S-ap'ekam Gewkthag o ab t-mahkch g amichuthadag matt wo s-amich g wohokam. 15 Ahchim mach edgith g Hekia S-ap'ekam Gewkthag att wo t-nako matt am s-ap wo i a'amich mo haschu am i t-tashogithch. K hegam pi t-amichuth matp hedai i pi edgith g Hekia S-ap'ekam Gewkthag. 16 Ith o hab ahg hegai mo an Jiosh t amjed o'ohanas: Pi o hedai hejel s-mahch g Jiosh chegitoithag mas ab wo ha'ichu i ahgi. Pegih, bo chu'ig. Kuch wabshaba ahchim s-mahch no pi g Christ ab t-mahkch g e-chegitoithag.

1 Corinthians 3

1 Am ani wa pi hasigam neok, ni-wepnag, mani am em-ahgith g wohokam namt pi pi koi ge'ege'ehogat ith eda t-wohochuthadag ch pi am hu si e thagitokch Hekia S-ap'ekam Gewkthag wui. Bam wa'i masma mo g a'al nam pi d wabsh wechij ith eda t-wohochuthadag. 2 Heg o wa wepo mani g wihbi em-i'ichuth ch pi g ha'ichu hugi em-gegosith ab wabsh s-bahbagi ha'ichu em-ahgithch. Chum wa ia'i ithani amt koi ge'ege'ehogat 3 k hab wabsh kia chu'ig mo hegam mo pi mahch g Jiosh. Neh, am am a'ai s-e hehgamk ch a'ai e kawani. K ith hekaj am tasho mam ha oithch hab e wua hegam mo pi mahch g Jiosh. 4 Ha'ijj amsh hab chech'e mam ahni Paul am ni-oith ch ha'ijj hab chech'e mam g Apollos am oith. K ith am wohokamchuth mam ha wepo ha'ichu chegito hegam mo pi mahch g Jiosh. 5 Pi ach d si ha'ichu ch d wabsh piongaj g Jiosh mamt ab t-ab bei g wohokam ab amjed g Christ. Tho Jiosh mo ab t-mahkch g t-chikpan. Kuch am hab wabsh junihim mo haschu ab t-mahkch hab masma mo g oithag ch ed chikpantham. 6 Heg o wa wepo mani ahni am esh g ha'ichu kai am wehpeg ahgch g Jiosh ha'ichu ahga. K g Apollos am wapga g esha am ba'ich i ahgch. K wabshaba d Jiosh ch am i wuhshath g t-esha mamt ab s-wohochuth k am he'es i oi g ha'ichu ahgaj mach am ahgachug. 7 Kuch heg hekaj pi d si ha'ichu ahchim mach am eshath ch wapga am ahgch g Jiosh ha'ichu ahga. Jiosh o d si ha'ichu no pi heg am i wuhshath g t-esha mam ab s-wohochuth ahpim mam kah g ha'ichu ahgaj. 8 Wehs ach t-wepo masma ahchim mach ahgachug g Jiosh ha'ichu ahga, chum achs hema wehpeg am wo ah, tt hema am ba'ich wo i ahgahi. T g Jiosh ab wo t-mah g t-namkithadag matt he'es hab i juh g chikpan. 9 Pegih, thach piongaj g Jiosh g Apollos wehm. Kum ahpim d Jiosh eniga mach am em-chikpan wehhejed g Jiosh. Heg o wa wepo mam d Jiosh kihta. 10 T heg ab i ni-gawulkai mant em-chikp hab masma mani d s-ni-mahchim kihttham ch am shondath g kih am ahgachugk g Jesus Christ. Kum ahpim epai himchuth g kihta ahgachugch g Jiosh ha'ichu ahga. K ab em-ab mamt si s-nen'oith k am hab wo junihith. 11 Shondaj o heki hu nahtois ch d Jesus Christ. Kumt pi haschukaj ab ep wo shondath. 12 Neh, tp hems wo e mehi matp haschu kih wabsh g sha'ikaj hab wo e juh. 13 Pegih, t hab wa masma wo i e a'appe g em-chikpan. Mt heg hekaj si s-ap hab wo juh 14 k hab wo bei g e-namkithadag mat hekith wo e mamche. 15 T hi wo wa e tho'ibia matp hedai pi kehg hab juh g e-chikpan. T wabshaba g chikpanaj wo huhug hab masma mat g sha'i wo meitto am mei ch ed. 16 Heg o wa wepo mach d Jiosh cheopiga no pi am t-eda kih g Hekia S-ap'ekam Gewkthag. Ith amt wo chum s-mahchk. 17 Jiosh at wo padch matp hedai wo i em-padch nam pi d enigaj ch d hekia s-ap'ekam. 18 Ha'i amtp hab i e ahg mam s-chu a'amichuth am ha nena ed g hemajkam. Pi g am wo hejel e iattogith. Pi at hab wo t-elithath machs s-chu a'amichuth hegam mo pi mahch g Jiosh ha'ichu amichuthadag mattp heg an wo u'ukchith. Am g wo i e nakog mamt an wo u'ukchith, chum as hab wo em-elithath mam pi ha'ichu a'amichuth. 19 Tho wabsh pi ha'ichu an Jiosh tahgio mo haschu ihtham hab elith mo d ha'ichu amichuthadag. T g Jiosh an wo ha wulsh heg hekaj ha'ichu ha-amichuthadag mo hab masma an o'ohanas wehhejed. 20 K an hab ep chu'ig mo d wabsh pi ha'ichu g ha-chegitoithag g s-chu a'amichuththam am Jiosh wehhejed. 21 Kumt hekaj pi hedai wo chum ge t-ha'ichuchuthath. Thach wabsh em-pionag g Apollos ch Peter ha wehm. Wehs ihtha jewed o d em-eniga. Hegai mo hemu in ha'ichug ch hegai mo ab hahawa him o d em-eniga. Thoakag ch muhkig d em-ap'ethag. 23 Kum d Christ hemajkamga. K heg d alithaj g Jiosh.

1 Corinthians 4

1 Thach wabsh piongaj g Christ. K heg t-nuhkuthachuth matt am wo i tashogi g s-a'agi ha'ichu ahgaj g Jiosh. Kumt hab masma wo s-t-mahchk. 2 Ha-pionag at heg am hab wo wa'i junihith mo haschu g ahmoj chehani ch s-ap wo nuhkuth g e-nuhkutha. 3 Pegih, ni heg am wa'i chikpanith Jiosh. K pi sha'i ni-kudut mamtp has i masma hab wo elithath g ni-chikpan ahpim o hedai i hemajkam. Ni'inis hejel wo ah manis has masma hab wua. 4 Pi o ha'ichu sha'i ni-kudut am ni-chegitoi ed manis pi ap am hab junihim g chikpan am Jiosh wehhejed. K wabshaba pi ith hekaj e wohokamchuth manis am wabsh i si s-ap am hab junihim. Heg o wa'i Jiosh s-mahch machs hedai s-ap am hab junihim g t-chikpan. 5 Mt heg hekaj pi ab hu wabsh si s-hohtam hema ha'ichu wo abch mat koi wo e ai g tash. Am at haha wo t-a'appe g t-kownalig mat hekith wo jiwia k wo mahsko wua mach haschu i chegito ch haschu ahgch hab junihim ha'ichu k ab haha wo i t-mahkhi g s-ap has elithadag mo he'es ab i him t-wui. 6 Neh, ith ani am em-ahgith, ni-wepnag, ab t-amjed ahni ch Apollos mant am wo i em-tashogi mamt pi am hu thahm wo i chesh hegai mo haschu an o'ohanas Jiosh o'ohana ed. Pi amt hedai Jiosh pionag ha ba'ich ab wo si has elithath ch wabshaba ab wehs wo ha kaihamath g Jiosh ha'ichu ahga. 7 Pi g wo chum si e haschuthath heg hekaj mam haschu i edgith ch haschu i s-mahch. Jiosh at wehs ab wabsh em-mah mam haschu i edgith. 8 Bamsh e elith mam heki hu wehs ha'ichu edgith ch heki hu d s-kakais ch d ge kokownal. Kuch eda ahchim Jesus Christ chuhchai pi d s-kakais ch pi d kokownal. Mamt hu'i woho d wo kokownalk. Kutt em-wehm d wo kokownalk. 9 Kuch eda wehs ha ba'ich d i sho'igkam ch attp hems wo t-ko'ij am wehhejed g Jiosh ha'ichu ahga. Shahag wepo mo g Jiosh am t-chehgithch wehs ha ba'ich hab masma mat g kownal am wo ha chehgi hegam matp ha gewito k ha lilsoch. 10 Ahpim am hab e elith mam d si ha'ichu s-mahchim ab amjed g Christ ch si s-gewpkthag ch ab d si has ha-elitha hegam mo pi mahch g Jiosh. K eda ihtham pi kehg has t-elith ahchim mach ahgachug g Jiosh ha'ichu ahga ch hab t-elith mach pi ha'ichu mahch ch pi ha gewpkthag. 11 Hebai ach bihugko'o ch ep tonkko'o ch pi edgith g eniga. K hegam t-gewichshulig. Pi ach hebai t-mahch ch kih 12 ch si chikpan ch hejel t-thagio'ith. K hegam s-ko'okam has t-ahg. Kuch ab wabsh i s-ha ho'ige'ith. T-sho'igchuth o. Kuch wabsh nakog. 13 An o ahgahim g iattogi ab t-amjed. Kuch wabsh s-hemajim ha wehm neneok. Bo wabsh t-elith mach d wabsh hegai mo g hemajkam s-ohhoth ch gm hu nehnchuth. 14 Ith ani em-ahgith mant wo ha'ichu i em-shelini hab masma mam d si ni-tatchuithch ni-a'aliga. Pi ani hab ahgch em-ahgith manis wo si em-edawua. 15 Heg o wa wepo mani d em-ohg ith eda himthag namt pi ab ni-amjed kah g s-kehg ha'ichu ahgaj g Jiosh k hekaj bei g e-wechij thoakag. T wo mu'ijk g em-mashchamtham ith eda Christ himthag. Ni eda d wa'i ahni mant wehpeg am em-wui u'apa ihtha s-kehg ha'ichu ahgaj g Jiosh mamt heg hekaj e tho'ibia. 16 Kuni ab i em-gewkemhun mamt am hab wo junihith mani wa haschu am em-chehgith. 17 Ia o thaha g t-wehnag Timothy. Kuni am ahgith mat am wo i em-chehgim ed k wo i em-chegitoich matt has masma am wo himchuthath g t-thoakag am wehhejed g Christ mani wa am em-mashchamahim ch wehs ha mashchamahim mani hebai i hihhim. S-mahch am mat heg ab ni-amjed ab i s-wohoch g Christ k heg wa wepo mo d si ni-tatchuithch ni-alithag ch am hab junihim g ha'ichu ni-ahga. 18 Kah ani mamsh ha'i si e sheshmachuth hab e ahgch mant pi am hu wo i em-chehgim. 19 Nt wabshaba s-hohtam ab wo i hih em-wui matp g Jiosh hab d wo elithak k am haha wo s-mai mams has masma himchuth g e-thoakag ahpim mam chum si e sheshmachuth ch mu'i neneok. 20 Ab ach wecho g Jiosh. K pi hab chum chu'ig machs wabsh wo neneokath ch wabshaba g s-ap ha'ichu hab wo junihith heg hekaj Jiosh gewkthag. 21 Ab o em-ab mamt ab wo i e thagito wui g Jiosh. Nt hemho wo wa s-em-keh'el am jiwiak mamtp pi ab hu wui wo i e thagito, k wabshaba si s-hemajim ab wo i em-nei mamtp ab wui wo i e thagito.

1 Corinthians 5

1 Am ash ha'ichu hab ep chu'ig em-shahgith ch d si ge'e pi ap'ekam. Msh eda si e hahaschuth. Hema ash wabsh hohnig g e-ohgbad hohnig. Eda chump g Jiosh pi wohochuththam pi hab sha'i masma. 2 Mt wo chum si pi ap e taht mat ith am hab e juh em-shahgith k wo i wuhshath hegai mat am hab juh ihtha pi ap'ekam. 3 Chum anis pi am hu ha'ichug ch eda heki hu hab i n-ah mat ihtha o'othham hemho wa gm hu wo i e wuhshath, 4 no pi hab masma t-chehani g t-kownalig Jesus matt hab masma am hab wo junihith. T heg am wo em-wehmajk. Kumt heg hekaj am wo e nam 5 k wo i wuhshath ihtha o'othham ab e amjed. Kut am wo e sho'igch ihtha o'othham ge Jiawul wecho k atp hems ith hekaj ab wo i e sho'igch Jiosh wui k d wo e tho'ibiakamk mat ep wo jiwia g t-kownalig Jesus k wo ha lothai g pi ap chu'ijkam. 6 Pi o ap'e mams hab wo chei mam wabsh si s-ap'e mo eda an ha'ichug g pi ap'ekam am em-shahgith. S-mahch am ihtha hab che'ithag, “Al chum jewajithakud o s-gewkthag ch i ko'okpothkath g wahga.” Ith o chum t-tashogith mat g al chum pi ap'ekam ge'e ha'ichu wo padch. 7 Neh, t wo wa e muhkith g kahwal mad mat wo e wuhshath g t-shohshon ha tho'ibiathag. T g jewajithakud gm hu hab wo i e juh. Pegih, k g Jesus Christ d s-wohokam ch e muhkith am t-wehhejed mat wo t-tho'ibia ab amjed g pi ap'ekam. Kum heg hekaj pi padchuthas ch gm hu hab wo i juh g pi ap'ekam mat pi wo em-padch. 8 Pegih, tt wo si s-hehgigk ith hekaj ch gm hu hab wo i juh g pi ap'ekam k hab wo wa'i junihith g s-ap'ekam ch hab wo wa'i kaijjith g wohokam. 9 Heki ant hu wa am em-o'ohanith k em-ahgith mamt pi ab hu wo ha nawojk hegam mo ha wehm wo'iwup mo hedai pi d ha-wehm kihkam ch hegam mo s-bahbanma ch hegam mo melchkwuhim g chehanig kch hegam mo heg ab ihm ch ab wui e ho'ige'ithahun mo pi d Jiosh ch d ha-nahtoi g hemajkam. Pi ani hegam hab ha ahg mo pi d t-wehm wohochuththam ch hab chu'ig. Ihtham o an wehsko hab chu'ig. Kumt pi has masma pi ab hu wo ha miabi. 11 Hegam ani wa hab ha ahg mo hab e ahg mo d t-wehm wohochuththam ch eda am hab junihim g pi ap'ekam. Pi g am chum hems wo ha wehm thadhaiwua matp hedai wo ha wehm wo'iwup mo hedai pi d ha wehm kihkam o atp wo s-bahbanmak o atp wo melchkwuhith g chehanig o atp ab wo ihmath mo haschu d wabsh o'othham ha-nahtoi ch ab wui wo e ho'ige'ithahunath o atp d wo s-i'imkamk o atp d wo s-chu ehskamk. 12 Pi o ab hu t-ab machs wo mamche g ha-chu'ichig hegam mo pi d t-wehm wohochuththam. Jiosh at hab wo ha juh. Ab o em-ab mamt gm hu wo i ha wuwhas hegam mat pi wo thagito g pi ap'ekam k eda d chum em-wehm wohochuththam. Ith o hab ahg hegai mo an Jiosh t amjed o'ohanas: “Gam g hu wo i wuhshath g pi ap'ekam hemajkam ab e amjed.”

1 Corinthians 6

1 Pi g am hu a'ai wo e lothaitath am ha tahgio hegam mo pi mahch g Jiosh ch wabshaba ab e-wehm wohochuththam ha wui wo e thagito. T am wo i ap'ech mamtp haschukaj pi e ap'et. 2 Mt wo chum s-mahchk mo hab him g tash matt d wo u'ugchuk ith thahm jewed ahchim Jiosh hemajkamga. Pegih, tt wo chum t-nako matt am wo i ap'ech g al chu'uchum ha'ichu am t-shahgith. 3 Mt ep wo chum s-mahchk matt am hu wa hebai chum hems g anghil wo ha lothai. Kutt wo chum t-nako matt wo ha'ichu i ap'ech ith thahm jewed hejel t-wehhejed. 4 Pi g am wo beh'i hegai mo pi mahch g Jiosh mas am wo i ap'ech mo haschu i pi ap'e am em-shahgith. 5 That wo s-ta edam ha'ichuk mamt a'ai wo e lothaitath. Ab amsh si has ha elith g s-chu a'amichuththam ch amtp eda pi hema cheh am e shahgith mas am wo i em-ap'ech. 6 K amsh a'ai e lothait am wabsh ha nena ed hegam mo pi mahch g Jiosh. 7 Am am e chehgithch mamt i e gehgch mam eda e kam'on. Matp pi am hu wo i em-ap'ech g em-wehm wohochuththam, mt wabsh pi am hu has wo kaijjith ch wo nako, chum ams ha'ichu em-ehs. 8 Ni eda kah mamsh wabsh hejel pi ap ha'ichu hab wua ab ha wui ch ha'ichu ha ehsith chum hems g e-wehm wohochuththam. 9 Mt wo chum s-mahchk mat g pi ap hemajkam pi am hu wo i wahp Jiosh kownaltalig ed. Pi g am wo e iattogith mams am hu wo i wahp mamtp ha wehm wo wo'iwupath mo hedai pi d em-wehm kihkam o hedai d em-wehm chechoj o g em-wehm u'uwi o amtp wo jioshgat k ab wo ihmath mo haschu d wabsh o'othham ha-nahtoi 10 o amtp wo s-chu e'eskk o wo s-bahbanmak o wo s-i'imkk o wo ha'ichu ha iattogithath ab hema amjed o wo ha'ichu ha wohppo'ithath. 11 Ha'ijj am hab chu'igkahim. T wabshaba g Hekia S-ap'ekam Gewkthag gm hu hab i juh g pi ap em-chu'ichig k am i em-ap'ech g t-kownalig Jesus Christ wehhejed. 12 Kumsh hahawa ha'i hab chech'e mo wehs ha'ichu hiwgithas matp haschu wehhejed pi an hu ha'ichug g chehanig. Nt wabshaba am wo em-ahgi mo pi wehs ha'ichu s-kehgaj am t-wehhejed. Pi att wo chum hiwigi mat haschu gn hu wabsh wo i si t-ui. 13 Ha'i amsh hab chech'e, “Ha'ichu hugi o ab d wuikamaj g t-wohk ch g wohk g ha'ichu hugi ab d wuikam,” ch hab chum ahg mo wehs s-ap'e mach haschu i tatchua am wehhejed g t-honshpadag. K wabshaba ith pi woho mamsh has chum ahg. Pi att wabsh wo huhug hab masma mat ihtham ha'ichu k heg hekaj wo si t-nuhkuth. Neh, mo g cheoj tatchua mat ab wo i miabi g uwi nat pi hab masma nahto g Jiosh. K wabshaba pi hab d ahga ihtha mas wabsh chum hedai wehm wo wo'iwua, Pi at hab ahgk t-nahto g Jiosh machs pi ap wo hekaj g t-honshpadag k wabshaba hab ahgk matt g t-kownalig Jesus wehhejed wo hekaj nat pi heg am t-wehhejed muh. 14 Jiosh at ab uhpam i wuhshath g t-kownalig Jesus ab muhkig amjed k hab wa'ap wo i t-wuwhas ahchim heg hekaj e-gewkthag mat hekaj ab i wuhshath g Jesus. 15 Mt wo chum s-mahchk mo g em-honshpadag ab gi'i ab g Christ ch d enigaj. Pegih, mt pi woho hab wo juh g e-honshpadag mat ab wo i e wehnath g chehpa'awi. 16 Aha nam pi mahch mamtp hema i wo wehmaj wo'iwua g chehpa'awi k d haha wo hemakok heg wehm. Si o shel am ahg ihtha g Jiosh o'ohana ch hab chu'ig mo d hemako am Jiosh tahgio hegam mat wo e wehm wohpiwua. 17 K pi hab chum mahs machs hab wo masmak chehpa'awi wehm ahchim matt ab i t-thagito Christ wui nach pi d hemako heg wehm. 18 Ni heg hekaj hab kaij mamt wo si e nuhkuth ith amjed mamt pi wabsh chum hedai wehm wo wo'iwupath namt pi heg hekaj wo e hemakoj ha wehm k wo uamhu g e-honshpadag k hab masma wo i e mehkoth ab amjed g Christ. 19 Mt wo chum s-mahchk mo g Jiosh ab em-mahkch g Hekia S-ap'ekam Gewkthag. K heg am em-eda kih. Pegih, k d cheopigaj g em-honshpadag ch pi d wabsh hejel em-eniga. 20 Jiosh at am i thagito g e-alithag kots wui mat wo t-tho'ibia. Kutt d haha wo hemajkamgajk ch heg hekaj ab wo si has i elith k wehhejed wo hekaj g t-honshpadag.

1 Corinthians 7

1 Ia ant haha wo em-ahgi hegai mam wa ni-kakke ia ni-o'ohanithk. Ith amt wehpeg ab ni-kakke mas s-ap'e matt pi wo ha hohnt. Kunt hab wo em-ah mo chum hi wa s-ap'e mamt pi wo ha hohnt. 2 K wabshaba ha'i g ha-tatchuithag si s-gewkthag. K ihtham ha wehhejed ba'ich i s-ap'e mat wo e hohnt mat heg hekaj pi am hu wo i shul pi ap'ekam ch ed. 3 Kumt ab a'ai e wui wo e thagito ahpim mam d e hohonikam no pi g em-honshpadag d a'ai em-eniga ch pi d wabsh hehe'ejel em-eniga. Mt hab s-ap e tahtk ch wo e wehm kihk. 5 Pi g a'ai wo e tha'ath, heg hi wa mamtp am a'ai wo e ap'ech mamt he'es i tash pi ab hu wo i e miabi mamt heg hab wo wa'i juh ho'ige'ithahuna k am hab hahawa ep wo masmak mam heki hu mat pi wo em-gehg g ge Jiawul heg hekaj em-tatchui. 6 Pi ani ab hu em-chehani mams wo ge hohont, heg hi wa mamtp wo tatchuath ch wo e hohont. 7 Mamt hu'i pi wo ha wehm kihkamk hab masma mani ahni. K wabshaba g Jiosh pi wehs hab masma em-ap'echuthch ch ha'i em-ap'echuthch mamt wo e hohont. 8 Nt wo ha'ichu em-ahgi ahpim mam pi ha wehm kihkam ch ahpim mat koi g em-wehm kihkam. Ba'ich o i s-ap'e mamt wo hehe'ejelk mani hab masma. 9 Mt wabshaba wo e hohont mamtp pi wo e nako mamt wo shohbi g e-tatchui. Ba'ich o i s-ap'e mamt wo e hohont mamt pi wo e kudutath g e-tatchuikaj. 10 Tho chehanigaj g t-kownalig Jesus mamt pi wo ohhoth g e-wehm kihkam 11 k amtp wabshaba hab wo sha e juh k hemho wa pi hema ep wo hohnt o wo kunt k wabsh wo hejelk o an uhpam ep wo i e nodagi e-wehm kihkam wui. 12 Chum as pi d wo em-wehm wohochuththamk g em-wehm kihkam, mt pi am hu wo ha ohhoth matp wo tatchuath mat an wo em-wehmajk. Jiosh at am i ap'ech em-wehhejed mat pi wo padch g em-kihthag. T g Jiosh ab wo ha ui g em-a'aliga mat d wo a'aligajk. T g em-wehm kihkam pi wo ha padch. 15 Mt wabshaba wo ha hiwigi mat wo s-em-ohhoth matp wo tatchuath nam pi pi heg hekaj e wupulshch matp wo s-em-ohhoth. Tho tatchuij g Jiosh mamt wo s-ap e tahtkkath ith thahm jewed. 16 Kum pi mahch mas em-hekaj ab wo s-wohoch g Jiosh ha'ichu ahga k wo e tho'ibia. 17 Pegih, tt am wabsh wo kia oithath mattp haschu d i wehhejedkam mat hekith ab i t-gawulkai g Christ. Ith ani wehsko ha mashcham g wohochuththam. 18 Pi o has d ahga mamtp wo pahl hikuchkask o pi wo pahl hikuchkask. Kumt pi wo chum ge gawul e juh ith hekaj. Heg o d wa'i si ha'ichu matt ab wo s-wohog elithath g Jiosh. 20 Mattp haschu d i wehhejedkam mat eda ab i t-gawulkai g Jiosh ch heg s-ap am hab wo junihith wehhejed. 21 Mamtp hedai d wo ha-neneholigak ith thahm jewed ch wabsh pi heg hekaj wo si e eh'el ab s-wohochuthk g Jiosh ha'ichu ahga. Tp wabshaba am wo sha s-em-ap'et mamt wo e wuhpul'o, mt am hab wo e juh. 22 Am g wo s-chegitok mat em-wul'o g Christ ab amjed g pi ap'ekam, chum ams d nehol. Wehsijj ach d hahawa neneholigaj g Christ, chum hems ahchim mach pi d ha-neneholiga ith thahm jewed. 23 Jiosh at ab uhpam t-u'apa e wui heg hekaj e-alithag muhkig. Pegih, pi att hegai wo sha'i hiwigi mas wo t-shohbi mach d piongaj g Jiosh. 24 Heg o chum hekith am t-wehmaj. Kutt am nenaj ed s-ap hab wo junihith g t-chikpan matp haschu wud matt eda ab i s-wohoch ihtha s-kehg ha'ichu ahgaj. 25 Neh, nt am haha wo em-ahgi mam haschu ab ni-kakke ab ha amjed hegam mo pi ha wehm kihkam. Pi o d chehanig ihtha mant wo em-ahgi. K wabshaba ab s-ni-ho'ige'ith g t-kownalig Jesus ch ab ni-mahkch g amichuthadag. Kunt heg hekaj wo em-ahgi mo haschu ba'ich i s-ap'e. 26 Sho'o wa'i si ge'ej g t-kudutalig hemu. Kuni heg hekaj hab elith mo ba'ich i s-ap'e mamt am hab wabsh wo i chu'igk mam has i masma. 27 Mamtp wo ge wehm kihkamk ch pi am wo ohhoth o pi wo ha wehm kihkamk ch pi an hu wo hema i chum gahghi. 28 K wabshaba pi d pi ap'ekam mamtp an wo bei g wehm kihkam. Hi wa g hohnta at ab ba'ich wo i wuhshath g ha'ichu pi ap'ethag. Kuni heg hi wa chum pi hab elith mams ab hu wo nam. 29 Pi o am hu ge'e wi'is g tash mat ia ep wo jiwia g Jiosh alithag jewed thahm. Kuni am i em-gewkemhun mamt wo e nahtokchith heg wehhejed. Pi g wo sha'i hiwgith mas wo em-shohbi g hohnta 30 o g chikpan o g has tahhathkam o g em-eniga. 31 Tt wo hekaj g jewed thahm ha'ichu k wabshaba pi ab hu wabsh wo si pihk t-elithath nat pi wehs wabsh wo huhug. 32 Chum ani em-tatchuichuth mamt pi ha'ichukaj wo e kudutath. Gohkpa o kahch g t-chegitoi matt wo ge hohnigk. Kutt wabshaba wo t-nako matt heg am hab wo wa'i junihith chikpan am wehhejed g t-kownalig Jesus mattp pi wo ha hohnigk. 33 Mattp hedai wo ha hohnt k hemho wa ha'ichu am hab wa'ap wo junihith wehhejed mat wo s-hohho'ithath. 34 Kumt ahpim u'uwi hab wa'ap wo e nako mamt ab wo gawulkthask ch heg am hab wo wa'i junihith chikpan am wehhejed g t-kownalig Jesus mamtp hedai pi wo ha kunk o koi wo ha kunt. Mtp wabshaba hedai wo ge kunk ch ha'ichu am hab ep wo junihith ha wehhejed mat wo s-hohho'ithath. 35 Ith ani hab kaij nani pi tatchua mant am wo i em-wehmt ch pi heg hekaj manis am ha'ichukaj em-shoshobith. Tatchua ani mamt am hab wo junihith mo haschu d s-ap'ekam ch pi wo hiwigi mas am ha'ichu wo em-shohbi mamt am wehs wo i e thagito t-kownalig Jesus wui. 36 Mt wabshaba wo ha hiwigi g u'uwi e-a'aliga mat wo ha kunt mamtp hab wo elithath mo d si tatchui nat pi s-ap ge'ege'ehogat. Am o wa s-ap'e mat am hab wo e juh. 37 K wabshaba am wa s-ap'e mamt wo ha nuhkuthath mamtp hab wo elithath mo s-ap'e no pi pi d tatchui. 38 Pegih, am o wa s-ap'e mamt wo ha hiwigi ch hi wa ba'ich i s-ap'e mat pi wo ha kunt. 39 Matp hedai wo e hohont k d wo e-wehm kihkamk am hugkam mat hekith hema wo i muh. K am hahawa s-ap'e mat ep wo bei g wehm kihkam, heg hi wa mat g e-wehm wohochuththam an wo bei. 40 Mt wabshaba ba'ich wo i s-ap'e tahtkkath mamt pi ep wo bei g wehm kihkam. Neh, ith o am ni-tashogith g Hekia S-ap'ekam Gewkthag.

1 Corinthians 8

1 Am ant haha wo em-ahgi hegai mam ab ni-kakke ab amjed hegai ha'ichu hugi mo g hemajkam an to'aw am chum iagchulithch g e-jijoshga. Ha'ijj amsh hab e elith mam si s-mahch mamt has wo chum e junihith ch si e hahaschuth g ha'ichu e-mahchigkaj. Nt wabshaba wo em-ahgi mamt am hab wabsh wo junihith mat haschu d wo i ha-wehmtadagk g em-wepnag mamtp woho ab wo ha tatchuath. 2 Pi amki koi ha'ichu s-mahch mamtp hab e elith mam s-e-mahch. 3 Jiosh o s-t-mahch ahchim mattp ab si tatchua. 4 Pegih, k pi d ha'ichu g ha-jijoshga am t-wehhejed nach pi s-mahch mo g Jiosh d hemako. 5 K eda mu'i an ha'ichug g gewpkthag an thahm kahchim ch ed ch an jewed thahm mo hab e a'aga jijosh ch kokownal. 6 Ch ahchim hi s-mahch mo d hemako g Jiosh t-ohg. K wehs ha'ichu d amjedkamaj. Kuch heg wehhejed in d thothakam. K g t-kownalig Jesus Christ d hemako ch wehs ha'ichu nahto. K heg gahi wuhshanim g Jiosh ab t-mahkch g wechij thoakag. 7 Pegih, msh ha'i hi wa s-mahch mo g ha-jijoshga pi d ha'ichu am t-wehhejed ch hekaj pi has e elith ch wabsh ko'a hegai mo an e to'aw ha wehhejed. Sh ha'i g em-wehm wohochuththam pi am hu s-ap s-mahch mo pi d ha'ichu g ha-jijoshga no pi heki hu wa'i amjed ab has ha elith. Kumsh ko'a hegai mo am e to'aw. Sh ihtham am em-neith ch am em-oithch hab e junihim ch eda hekaj e kudut no pi hab elith mo pi ap'e. 8 Kumsh ahpim hab kaij mo pi has d ahga am Jiosh nena ed mamt wo huh ihtha. Pegih, matp pi has d ahga k ch pi ha'ichu wo heki em-wua mamt wabsh wo thagito. 9 Chum as hi wa s-ap'e hejel em-wehhejed mamt wo huh ch wabshaba pi ap'e mamt wo huh matp heg hekaj wo e kudut k wo i shul hegam mo pi hab masma s-mahch ihtha. 10 Ihtham atp hems am t-oithk hab wo e juh ahchim mach ha'ichu s-mahch k am hab wo juh mo haschu hab elith mo pi ap'e. Pi att am hu wo i wahp k wo t-gegos mo hebai i e ko'a hegai mo an e to'aw ha wehhejed g ha-jijoshga 11 natt pi heg hekaj wo heki ha himch hegam mo pi gewpkthag e-wohochuthadag ed. Tsh eda g Christ ha wehhejed muh no pi s-ha tho'ibiamk. 12 Kutt wo padch mo haschu hab chum s-junimk am ha wehhejed mattp wo heki ha himch. 13 Pi att hekith wo huh matp haschukaj wo heb hu hihi g t-wepnag mat am t-oithch hab wo e junihith.

1 Corinthians 9

1 Pi ani em-ahgith mams am hab wo junihith hegai mani ahni haschu pi am hu hab wua. Ahni ani hab wa'ap pi hekaj g ha'ichu ni-ap'ethag, chum anis d uhgchu ch ge'e ap'ethag nat pi am i ni-kei g Jiosh mant wo ahgachugath g Christ. Ni heg am neith am i thahm mat e chegito k i wuhsh. Kum ahpim d e tho'ibiakam heg hekaj ha'ichu ni-ahga mani am ahgachug wehhejed g Jesus Christ. 2 Chum as ha'i pi wohochuth mani d Jesus Christ kehsha, m wabshaba ahpim s-wohochuth nat pi em-tho'ibia k hekaj am wohokamch mani d kehshaj. 3 Ith ani am ha ahgith hegam mo pi wohochuth mani d Christ kehsha. 4 Ahchim mach d Christ chuhchai ach edgith g ap'ethag matt ab wo bei g t-gegosig heg hekaj t-chikpan. 5 Christ wepnag ch Peter ch ha'i ehp g Christ chuhchai ash an uh'uthch g e-wehm kihkam mo eda hasko hihhim ch am ahgachug g Jiosh ha'ichu ahga. Kumsh am ha thagio'ith. 6 Bani wa masma ap'ethag. Kuch eda ahchim g Barnabas wehm pi hekaj g t-ap'ethag ch wabsh hejel t-thagio'ith. 7 K eda wehs nahnko mahs chikpantham ab u'u g e-gehgewi ab e-chikpan amjed. Shonthal am ha thagio'ith ch g oithag chikpantham ab ha namkith heg hekaj mo haschu i bahijith ch g ha'ichu thoakam ha nuhkuththam ha gegosith heg hekaj mo haschu ab i wuhshani. 8 Pi o d wabsh hemajkam hab ha-elitha ihtha. An o hab chu'ig heg eda Jiosh chehanig 9 mat g Mosesbad an o'oha: Pi amt an hu wo wulsh g woiwis chini mat wo kehiwia g ha'ichu bahijitha. Neh, pi o hegam hab wa'i ha ahg woiwis. 10 Ahchim o hab ep t-ahg. Hegai mo hedai i moihun ch hegai mo hihk g e'es at hemho wa ab wo ha'ichu i nei ith ab e-chikpan. 11 Heg o wa wepo matt am ei g ha'ichu kai em-shahgith, am em-ahgithch g Jiosh ha'ichu ahga. K hab chum mahs matt ab ha'ichu wo i nei em-amjed. 12 Am amsh ha'i i ha wehmaj. Kuch eda ba'ich i ap'ethag matt ab wo chum i nei ha'ichu em-amjed ch wabshaba pi hekith ab hu em-tahni ch am wabsh wehs ha'ichu nakog matt pi an hu wo shohbi g s-kehg ha'ichu ahgaj g Jiosh ab amjed g Christ. 13 Mt wo chum s-mahchk mo hegam mo am chikpan ge'e cheopi ch ed ab i neith g e-gegosig heg amjed mo g hemajkam ab mahkch g Jiosh. 14 Pegih, k hab wa'ap masma am t-chehani g t-kownalig Jesus hemu. Ahchim mach am ahgachug g s-kehg ha'ichu ahgaj g Jiosh attsh ab amjed wo i nei g t-thagio'ithadag. 15 Ni eda pi hekith sha'i hekaj ihtha ni-ap'ethag ch pi heg hekaj em-ahgith ihtha manis em-chehani mamt wo i ni-thagio'i hemu. Ba'ich i mant wo bihugim k wo muh kih hegai manis wo em-kowlant ith hekaj s-kehg ha'ichu ahga. 16 Ab o ni-chehani g Jiosh mant wo ahgachugath g ha'ichu ahgaj. Kunt wo si pi ap ni-tahtkk mantp pi am hu hab wo junihith. Jiosh ash ab ep em-chehani mamt wo t-namkith ahchim mam ab t-amjed kah g ha'ichu ahgaj. Ni wabshaba pi ab hu em-tahni heg hekaj mant ba'ich wo i s-ap ni-tahtkk ab wabsh em-mahkch. 17 Mantp ahni hab i n-ah mant am hab wo junihith ihtha chikpan ch hekaj ab wo bei g ni-gehgewi. K wabshaba g Jiosh ab ni-chehani ch ab ni-hiwig. 18 Pegih, k ith d ni-gehgewi mani si s-ap ni-tahtk heg hekaj mani ab wabsh em-mahkch g s-kehg ha'ichu ahgaj g Jiosh. Heg ani hekaj pi hekaj g ni-ap'ethag manis wo em-kowlant. 19 Pi ani hedai ha hiwig ch wabshaba wehs ha wehhejed ni-pionchuth mantp hems hab masma mu'i ab wo i ha nohnogi Christ wui. 20 Ni am ha oithch hab ni-junihim hegam mo am oith g heki hu t-himthag ahchim Tutuligo mani hekith i ha wehmaj 21 ch am ha oithch hab ni-junihim hegam mo pi am hu oith mani hekith i ha wehmaj mant hekaj ab wo i ha nohnogi Christ wui. K eda pi hab mahs manis pi ab hu wecho g Jiosh chehanig nani pi am hab junihim mo haschu ab i ni-chehani g Christ. 22 Pi ant am hab wo junihith mat haschu wo ha kudutath, chum anis s-mahch mo s-ap'e am ni-wehhejed. Tp hems heg hekaj wo ni-hiwigi mant am wo i ha wehmt. Wehs ani ha wepo masma hab ni-wua mantp hems hab masma ab wo i ha nohnogi Christ wui wabsh chum has masma. 23 Ith ani wehs hab wua mant hekaj am wo ahgachugath g s-kehg ha'ichu ahgaj g Jiosh matt t-wehm wo bei g s-ap tahhathkam. 24 S-mahch am mat g e melchuththam hab wa'i masma wo bei gehgewi mat wo si e nakogath. Tt hab wa masma am wo t-nakogath matt wehs am hab wo juh g Jiosh tatchui. 25 Hegai mo hedai i tatchua mat wo bei g gehgewi at hemho wa wo e momoisha k wo e nuhkuth wehs ha'ichu k ed. Neh, ith o wehs hab e wua heg wa'i wehhejed mamt ab wo wahki g gihko. T eda wabsh wo huhug. Ch wabshaba ahchim am hab t-junihim heg wehhejed m at pi hekith wo huhug. 26 Ni hekaj hab hi heg wa wepo mani shel med heg wui mant am wo nahto g ni-mel k ab wo bei g ni-mahkigdag. S-mahch am mo g shonikkashtham pi tatchua mas wo heki wua g e-shonihina. Ni ahni hab wa'ap pi tatchua manis wo heki wua g ni-ap'ethag wehhejed g ni-chikpan. 27 Shonikkashtham o ab si e nakog ch e momoisha. Ni ahni hab wa masma ni-nakog Jiosh chikpan ed mat pi wo ni-ohhoth heg amjed am i thahm mant ab i em-wai mamt am hab wa'ap wo junihith.

1 Corinthians 10

1 Am am wa chum s-mahch matsh wa haschu has e juh am ha tahgio g t-shohshon matsh wa g Mosesbad am i ha wanim. Jiosh ash hab masma ha nuhkuth ch ha wanimed mash wa g chewagi am ha ba'ich him. Kutsh am gahi i huhud g ge'e shuhthagi. 2 Ith atsh hab ha juni mat hekaj ab wo s-wohog elithath g Mosesbad. 3 Wehsijj ash am ko'a hegai ha'ichu hugi mash g Jiosh ab ha mahk 4 ch wehsijj ab ih'e hegai shuhthagi mash ab ge'e waw t amjed tha'iwuni ch s-wawinig. Ihtha waw o wepogithas g Christ mo g thoakgaj chum hebai ha wehmaj ch ab ha mahkch g ho'ige'ithalig. 5 Tsh wa eda mu'ijj pi ab hu wohog el g Jiosh. Tsh hekaj si pi ha hohho'i ihtham k ab ha hugio tohono jewed ch ed mash an oiopohim. Sh g ha-hohon am wabsh e thagitohim. 6 Pegih, wehs ihtha o d wabsh chehgitha mat wo t-shohbi matt pi ab hu wo i tatchua g pi ap'ekam mash wa hab e wua ihtham 7 ch pi ab hu wui wo t-ho'ige'ithahu mo haschu pi d Jiosh mash wa hab e wua ha'ijj ihtham. Bo chu'ig an Jiosh o'ohana ed matsh wa am thadhaiwua k huh mat haschu am to'i hegai mo chum jioshchuth k am i wuwhag k e waila. 8 Am hu hebai ehp, sh ha'ijj wabsh chum hedai ha wehm wo'iwup. Tsh g Jiosh am ha'i ha cheha matsh wo ha koktha. Tsh gokko gamai waik mihl (23, 00) e ko'ij hemako tash ed. 9 Am hu hebai ehp, tsh ha'ijj bagach g Jiosh. Tsh heg hekaj am ap'ech matsh wo ha ki'ikka g kohk'oi k wo ha hugio. 10 Am hu hebai ehp, sh ha'ijj pi ap has ahg g Jiosh hab kaijch mash pi ap ha thagio'ith. Tsh heg hekaj am ap'ech matsh g anghil wo ha hugio. Mt heg hekaj pi am hu ha oithch hab wo e junihith. 11 Ith ash wehs an o'ohanas mat wo t-shohbithath matt pi hab wo junihith g pi ap'ekam ahchim mach hemu in d thothakam am wehs ha oithch. 12 Ha'ijj amsh hab e elith mam s-gewpkthag am e-wohochuthadag ed. Mt wabshaba wo si s-e nen'oithk mamt pi wo i e jushathkath k pi wo i gei am pi ap'ekam ch ed no pi wehsijj t-a'appem g Jiawul. 13 Wehs hegai a'appema mo ab t-aihim o chum hedai ab a'ahe. K wabshaba g Jiosh hab kaij matsh wo t-nuhkuthath ch heg hekaj pi hiwgith mas wo t-a'appe am thahm matt he'es wo i t-nako ch ab t-mahkch g gewkthag matt wo nakog k wo t-tho'ibia heg amjed. 14 Pegih, ni-wepnag mani si em-tatchua, pi g ab hu wui wo sha'i e ho'ige'ithahunath hegai mo haschu pi d Jiosh. 15 Am g wo i a'amichuth ihtha nam pi ha'ichu s-a'amichuth. 16 Ab ach ho'ige'ith g Jiosh ch ab si ihm g alithaj mach eda hab wua g mihshmetha chemait hugi no pi hab d ahga mat am i thagito g e-hon kots t ab k am iawua g e-eh'ed mat am t-wehhejed muh. 17 Tho wa'i hemako hegai mat am t-wehhejed muh. Ch ahchim am t-chehgithch mach am wehmaj d hemako am t-wehm hab wuathch g t-mihshmetha chemait hugi. 18 Jiosh atsh am ha cheha g t-shohshon mat wo ha koktha g ha'ichu thoakam k hekaj wo iagchul g e-chu'ichig wehhejed k haha wo huh hegai chuhkug. K hegam mo ko'a ab ihm g Jiosh. 19 Pegih, k hegam mo ab ha wui iagchulith g e-jijoshta ab ha ihm ko'athch g e-iagchulitha. K eda pi d ha'ichu g ha-jijoshta. 20 Ab o wabsh ha ihm g jijawul pi e mahchch mas has e wua. Kuni pi em-tatchuith mams wo ha wehm ab ha ihm g jijawul ko'athch hegai mo ab ha to'ith. 21 T-kownalig Jesus Christ o ab t-mahkch ihtha t-mihshmetha chemait hugi. K pi sha'i hiwgithas mams wo ha wehmajk amai mo ab ha ihm g e-jijoshga ko'athch hegai mo ab ha tho'ith. 22 Shahag wepo mam tatchua mamt wo hehgamch g Jiosh ab ha ihmathch g jijawul mamtp hedai ha wehm ko'a mo haschu ab wui e to'aw g ha-jijoshga. S-e g wo nen'oithk no pi ba'ich i s-gewkthag g Jiosh mam ahpim ch wo s-ko'okam em-namkith. 23 Msh ha'i hab chech'e mo wehs ha'ichu hiwgithas matp haschu wehhejed pi an hu ha'ichug g chehanig. Nt wabshaba wo em-ahgi mo pi wehs ha'ichu s-ap'e am t-wehhejed. Wehs ha'ichu o hiwgithas ch wabshaba pi wehs d wo i t-wehmtadagk. 24 Am g wo s-chegitok g chum hedai ha-ap'ethag ch pi wabsh hejel e-tatchui. 25 Oi g am wabsh wo huhgi matp haschu am e gagda nolawtakud ch ed k pi wo e kudu mas hebai e bei. Pi o ab hu em-ab mams ab wo ha kakke mas d hegai mo ab e to'ith g ha-jijoshga. 26 An o hab chu'ig Jiosh o'ohana ed mo wehs ha'ichu d enigaj. 27 Mamtp wo tatchuath ch am wo e gegositho ha-kih am hegam mo pi d e tho'ibiakam ch ab em-waith. Kumt wabsh wo huh matp haschu ab wo i em-to'i k pi ab hu wo ha kakke mas ab e to'ith g ha-jijoshga, wabsh pi wo e kudu mas hebai be k ab em-mah. 28 T wabshaba hema ab wo sha si em-ahgi mat ab e to'i g ha-jijoshga, mt pi wo huh mat heg hekaj pi wo e kudu hegai mo em-ahgith. Pegih, mtp hems ha'i hab wo chei, “Ms haschu ahgk hig wo ge has ni-ahgath heg hekaj mani haschu i ko'a mani eda heg hekaj ab ho'ige'ith g Jiosh? 30 Kunis haschu ahgk wo ni-shohbi heg wabsh hekaj mam e kudut?” 31 Pegih, woho o wa mach ap'ethag matt wabsh chum haschu wo ko'ath. K wabshaba ab t-ab matt ab wo si ha'ichuch g Jiosh wabsh chum haschu k ed, chum hems heg hekaj mach haschu i ko'ath ch haschu i ih'e. 32 Am g wabsh s-ap wo kihkath ch pi ha'ichu am hu hab wo junihith mas heg hekaj hedai am hab wo juh g pi ap'ekam, chum hems hegam mo pi d e tho'ibiakam. 33 Bamt wo masmak mani ahni. Pi ani am hu wa'i hejel ni-chegito ch wabshaba wehs s-ha chegito g hemajkam. Bani wa ni-wua matp hems heg hekaj wo s-hohho'i mani has ni-wua k ab wo s-wohoch g ha'ichu ni-ahga k wo e tho'ibia.

1 Corinthians 11

1 Am g wo ni-oithk hab e wuath hab masma mani ahni Christ oithch hab ni-junihim. 2 Ab ani si has em-elith mamsh chum hekith s-ni-chegito ch am oithch hab e junihim ihtha himthag mant am em-wui u'apa. 3 Mt wabshaba wo chum s-mahchk mo g cheoj am thahm g uwi. K g Christ am thahm g cheoj. K g Jiosh am wehs ha'ichu thahm. 4 Ith amt wo chehgithch mam eda e mihshmath. Mt heg hekaj ahpim chechoj pi ab hu wo ha ma'ishchith g e-mohmi mam hekith i e ho'ige'ithahun ch am ep ahg g Jiosh ha'ichu ahga. That wo s-ta edam ha'ichuk mamtp ab wo ha ma'ishchith. 5 Kumt ahpim u'uwi hi ab wo ha ma'ishchith g e-mohmi mam hekith i ha kaichuthch e ho'ige'ithahun ch am ep ahg g Jiosh ha'ichu ahga. Bat wa masma wo s-ta edamak mamt wo s-wohlim hih g e-mo'o mamtp pi ab hu wo ha ma'ishchith. 6 Pegih, mt ab wo e ma'ishchith ch wo e mihshmath k heg hekaj pi wo si e el. 7 Kumt ahpim chechoj pi ab hu wo ha ma'ishchith g e-mohmi e mihshmathch no pi g Jiosh am t-eda chehgithch g e-gewkthag. Mt wabshaba ahpim u'uwi ab wo e ma'ishchith nam pi ab wecho g chechoj ch ab chehgithch g ha-gewkthag. 8 Jiosh at wehpeg nahto g cheoj k heg amjed ab i wuhshath g uwi k nahto am wehhejed g cheoj. 10 Ab o em-neith g anghil. Kumt ahpim u'uwi am wo ha chehgi ab ha ma'ishch g e-mohmi mam ab ha wecho g chechoj. 11 K eda hab d elithaj g Jiosh mat g cheoj ch uwi ab a'ai wo e hiwgath ch ab a'ai wo i e wehmajk. 12 Woho o wa mat g Jiosh ab i wuhshath g uwi ab amjed g cheoj. K wabshaba g chechoj ab hahawa uwi t amjed i wuwhag. K wehs ha'ichu ab d Jiosh amjedkam. 13 Am g wo oithahith ihtha mo pi hab chum chu'ig mas g uwi ab wo e ho'ige'ithahu Jiosh wui pi ab hu ma'ishch g e-mo'o. 14 S-mahch ach mo g che'echew mo'o s-ta edama am wehhejed g cheoj 15 ch wabshaba am wa s-ap'e g uwi wehhejed no pi ab mahkch g Jiosh mat hekaj ab wo e ma'ishchith g mo'oj. 16 Pi ani ahpim wa'i em-mashcham ihtha. Wehsko ani am ha mashcham mo hebai g t-wehm wohochuththam e hehemapath. Kush wehsijj g Christ chuhchai hab masma ha mashcham. T hab pi hedai ab hu wo chum t-ne'owi heg hekaj. 17 Msh am ha'ichu ep pi ap hab wua mam am e hehemapath. 18 Wehpeg ant ith hab wo ah mani kah mamsh ha'i ab e wui gegok am e nanmekch. Ni am wa he'es s-wohochuth ihtha. 19 Hemho wa at am wo i wuhsh g hab mahs kudutadag em-shahgith mat am wo i e tashogi mo hedai pi ap'e. 20 Na'ams hab elith mam s-ap hab wua g chemait hugi hekith i e nanmekch ch amsh eda pi ap am hab junihim. 21 Wehpeg amsh e wehm e gegosith ch eda pi a'ai e ho'ith ch ha'i wabsh s-kokwog ch ha'i nawko'o ch ha'i bihugko'o. 22 Bo wa masma tasho mam pi ab hu has ha elith g e-wehm wohochuththam ch wabsh si ha edawua hegam mo am d wa sho'igkam. Mt hemho wa ab wo e chu'ichigch ith hekaj. Ba'ich o i s-ap'e mamt wo e gegos hehe'ejel e-kihki am k am hab wo juh g chemait hugi mam am e nanmek. 23 Am ani wa em-mashcham hegai mo wa g t-kownalig Jesus am ni-tashogith ab amjed ihtha chemait hugi himthag. Am atsh i shonwua heg i hudunk ab mamtki wa wo gagda matki wo e muhkith. Hegam mash wa ab wui e thagitokch atsh am i e hemapai. Kutsh g Jesus am i bei g chemait 24 k am i hahai ab ho'ige'ithk g Jiosh k hab kaij, “Tho ni-honshpadag ihtha mamt am i em-hahaini. Ith ani hab ahgch hab kaij mant wo ni-muhkith am em-wehhejed. Ab g wo huhgi ihtha hahainig k ith chum hekith am hab wo junihith mamt hekaj wo s-ni-chegitok.” 25 Tsh wa woho hab e juh. Kutsh am hahawa bei g tahsa k hab kaij, “Tho ni-eh'ed ihtha nawait. Ith ani hab ahgch hab kaij mat g ni-eh'ed wo e iawua. T g Jiosh heg hekaj am hab wo juh hegai mo wa hab kaij matsh hab wo em-juni. Ab g wo ih'i ihtha k ith chum hekith am hab wo junihith mamt wo s-ni-chegitok.” Neh, bo kaij g t-kownalig Jesus. 26 Kuch hekith am hab i wua ihtha chemait hugi ch am tasho wohokamchuth mat t-wehhejed muh ch ab aihim mat ep wo jiwia. 27 Pegih, tt am wo si hejel i t-mamche machs wa woho ab ha'ichuchuth g t-kownalig Jesus k am hab haha wo juh g chemait hugi. Tsh ab wo moht g chu'ichig matp hedai pi ap hab wo wuath ihtha chemait hugi no pi pi ha'ichuchuth mat am thagito g e-hon kots wui k am iawua g e-eh'ed mat t-wehhejed muh. 29 Tt am wo ai g s-ko'ok t-namkithadag mattp hab wo juh g chemait hugi pi amichuthch mat am t-wehhejed muh g t-kownalig Jesus. 30 Heg am hekaj mu'ijj kok'o ch pi ab hu gewpk ch ha'ijj heki hu koi. 31 Bat wa masma hab wo t-juh g Jiosh hab ahgk matt wo thagito g pi ap t-chu'ichig k pi gm hu hab wo i t-juh ab amjed g Jiosh hab masma mat hegam mat pi ab hu wui wo i e nohnogi. Pi at hab masma s-ko'okam ab wo t-namkith g Jiosh mattp hems wehpeg am wo si hehe'ejel i t-mamche mach has masma. 33 Pegih, ni-wepnag, am amt wo a'ai e nenida k wehs e wehm hab wo juh g chemait hugi. 34 Matp hema d wo bihugimkamk ch wo e gegos ab e-kih ab mat koi wo e ai g em-namki. Mt am hahawa pi heg hekaj ab hu wo e chu'ichigch. Am ant haha wo i ap'ech mam haschu ab ep i ni-kakke hekith i em-neithk.

1 Corinthians 12

1 Ab am wa ep ni-kakke ab amjed hegai gewkthag mo g Hekia S-ap'ekam Gewkthag ab t-mahkch matt ab a'ai wo i t-wehmajk. Tatchua ani mamt wo s-mahchk g wohokam ab amjed ihtha. 2 Ithani am hahawa s-mahch mam wa ha'ichukaj am i e wanimed mam eda ab has ha elith mam haschu i chum jijoshchuth. 3 K wabshaba pi d Hekia S-ap'ekam Gewkthag ch am i em-wanimed namt wa ge e nako mams wo wohokamch mo g Jesus d Jiosh. Hegam mo pi edgith g Hekia S-ap'ekam Gewkthag o hab elith mo g Jesus am gawulkthas ab Jiosh t amjed. Kuch wabshaba ahchim mach edgith s-mahch mo g Jesus d Jiosh. 4 Ab o t-mahkch g Hekia S-ap'ekam Gewkthag g gewkthag matt hab wo junihith g nahnko mahs ha'ichu am wehhejed g Jiosh. 5 K g t-kownalig Jesus am ap'echuthch matt has masma am hab wo junihith. 6 K d nahnko mahs chikpan mach am hab junihim ch wabshaba wehs ab d amjedkamaj g Jiosh. 7 Heg o ab t-mahkch g Hekia S-ap'ekam Gewkthag. K ith am t-gewpkathch ch ab hehe'ejel t-mahkch matt has wo t-junihith ch am a'ai wo i t-wehmajk. Kuch s-mahch mo am t-e'eda g Hekia S-ap'ekam Gewkthag no pi ab t-mahkch g gewkthag. 8 Ab o ha'ijj t-mahkch matt wo s-chu a'amichuth k am wo tashogi g s-hasig ha'ichu ch ab ha'ijj t-mahkch matt wo si s-mahchk ch ahgachugath g Jiosh ha'ichu ahga. 9 Ab o ha'ijj t-mahkch g ge'e wohochuthadag ch ab ha'ijj t-mahkch matt wo ha thoaj 10 o g s-hasig ha'ichu hab ep wo junihith. Ab o ha'ijj hehe'ejel t-mahkch g ha'ichu e-ahga matt wo ahgath ch ab ha'ijj t-mahkch matt wo neneokath g pi t-machiga ne'okikaj ch ab ha'ijj t-mahkch matt wabsh wo s-amich hegam ne'oki k am wo i tashogi k ch ab ha'ijj t-mahkch matt wo s-mahchk mo haschu ahga ab amjed g Hekia S-ap'ekam Gewkthag ch haschu pi ab hu amjed. 11 Neh, wehs ihtha o ab d amjedkamaj g Hekia S-ap'ekam Gewkthag. K heg ab hehe'ejel t-mahkch mo has i mahs chikpan am hab s-junimk ab gai t-wuhshanim. 12 S-mahch ach mo g t-honshpadag mu'i nahnko chuhchu'ithag ch wabshaba d wa'i hemako. Kuch hab wa masma wehsijj d hemako ahchim matt ab i t-wehnath g Christ. 13 Mu'ijj am hi wa pi d Tutuligo. Tt wabshaba pi wo t-nako machs hab wo chei mam pi d t-wehm wohochuththam. Ha'ijj am hi wa d nenehol. K wabshaba pi has d ahga mam has i mahs ch ab i s-wohoch g Jiosh. Heg at wehsijj ab i t-hemakoch. K hahawa heg wa wepo mach d Jesus honshpadag. K g Hekia S-ap'ekam Gewkthag wehsijj an t-u'ukch. 14 Kuch eda nahnko mahs ha'ichu chikpan hab masma mo g nahnko chuhchu'ithaj g t-honshpadag. 15 T-tahtad o pi wepo ha'ichu hab wua mo g t-nohnhoi. Kuch wabshaba wehs ha tatchua. 16 K g t-nahnk gawul ha'ichu hab wua mo g t-wuhpui. 17 Kuch wabshaba wehs ha tatchua natt ge has masma ha'ichu wo kah mattp pi wo sha ha nahnkk ch pi has masma wo hewagi mattp pi wo sha ha thahkk. 18 Jiosh at am nahto g o'othham k hab masma hab juh g nahnko chuhchu'ithag ab t-honshpadag ab. 19 K wehs ab i e wehnathch g hab t-chuhchu'ithag no pi d hemako g t-honshpadag. 21 Pi ach hegam wa'i tatchua t-wuhpui ch wabshaba g t-nohnhoi ehp k ch pi heg wa'i tatchua t-mo'o ch wabshaba g t-tahtad ehp. 22 Ha'i o pi gewpkthag g hab t-chuhchu'ithag ch wabshaba hab wa masma d si t-tatchui. 23 Kuch s-ap ha nuhkuth ch ha ma'ishch mat pi wo mahsk hegam hab chuhchu'ithag mo pi ta neithagma. 24 Pi ach hab masma s-ha nen'oith hegam hab chuhchu'ithag mo pi has d ahga mat wo e neithath. 25 Wehs ach ha tatchua g hab t-chuhchu'ithag mat wehs e wehm s-ap wo chikpanath. 26 Pegih, bach wa masma chum t-wehm s-ap chikpan ch wehs t-wehm wo t-sho'igch mattp hema ha'ichukaj wo t-sho'igch. Kutt wehs t-wehm wo s-hehgigk mamtp hema ab wo si s-ap has t-ah. 27 Pegih, wehsijj ach d hemako g Jesus Christ wehm ch heg wa wepo mach d honshpadaj ch hehe'ejel d nahnko chuhchu'ithaj. 28 Jiosh at wehs ab i t-mahkhi matt haschu hab wo junithahith. K ith d si wehs ha thahm t-chikpan mach ha'i d Jesus Christ chuhchai ch am ahgachugch g ha'ichu ahga ab amjed. K ith ab oithch d t-chikpan mach ha'i d Jiosh ha'ichu ahga i tashogiththam. K ith ab oithch d ep t-chikpan mach ha'i d Jiosh ha'ichu ahga ha mashchamtham. Ha'ijj ach s-hasig ha'ichu hab wua ch ha'ijj u'ukch g gewkthag matt wo ha thoaj ch ha'ijj am i ha wehmaj ha'i ehp ch ha'ijj am ha'ichu a'ap'echuth ha shahgith g t-wehm wohochuththam ch ha'ijj g pi t-machiga ne'okikaj neneok. 29 Pi att wehsijj gm hu mehk wo ahgachugath g Jiosh ha'ichu ahga ch pi wehsijj d Jiosh ha'ichu ahga i tashogiththam ch pi wehsijj d Jiosh ha'ichu ahga ha mashchamtham ch pi wehsijj u'ukch g gewkthag matt hab wo junihith g s-hasig ha'ichu 30 o wo ha thoaj ch pi wehsijj neneok g pi t-machiga ne'okikaj ch pi wehsijj ab mahks g amichuthadag matt wo tashogi ihtham ne'oki. 31 K wabshaba ha'i ihtham mahkigdag ba'ich d i ha wehmtadag g t-wehm wohochuththam. Kutt heg hekaj ba'ich wo i tatchua matt wo hekaj hegam. K eda g pihk elithadag wehs ba'ich d i si ha'ichu.

1 Corinthians 13

1 Neh, ttp hems wo t-nako matt wo neneokath g nahnko mahs o'othham ha-ne'okikaj o chum hems g anghil ha-ne'oki. T wabshaba hegai t-ne'oki heg wo wa wepok mo g s-nakosig ha'ichu am e gew mattp pi wo edgithath g pihk elithadag. 2 Thach wabsh pi ha'ichu mattp pi wo edgithath g pihk elithadag, chum achs ab wo mahksk matt wo si s-ap i tashogi g Jiosh ha'ichu ahga o wo s-mahchk g ge'e ha'ichu ch g s-juhk ha'ichu ahga wo s-amichuthath o wo edgithath g wohochuthadag matt wo i himch g tho'ag. 3 Pi o ha'ichu t-wehhejed s-kehgaj mattp pi wo edgithath g pihk elithadag, chum achs hems wo s-chechojimak matt wehs gm hu wo ha mah g ha'ichu t-eniga, chum hems ab wo i t-thagito mamt wo t-mehith k wo t-koktha ha wehhejed. 4 Mattp wo edgithath g pihk elithadag ch wo s-hemajimak ch ab wo s-ha bahbgith ch pi wo chu hehgamk ch pi wo woikimak 5 ch pi am hu wo ha edawua ch pi wo chu tha'ath ch wo s-bamuistk. Pi att wo kuint mat hema pi ap has wo e juh 6 k pi wo hohho'i g pi ap'ekam k wabshaba si s-ap wo t-tahtkk ab kahkch g s-ap'ekam 7 ch s-ap hab wo ha elithath g hemajkam. Chum as pi ap hab wo e junihith, tt hab wo ha elithath matp hems wo wa a'ap'et ch hekaj wabsh s-ap wo nakogath matp has wo e juh. 8 Ab o hehe'ejel t-mahkch g Hekia S-ap'ekam Gewkthag g ha'ichu ahga ch pi t-machiga ne'oki ch ha'ichu mahchig mat d wabsh wo i t-wehmtadagk hemuch. Kut wabsh wo huhug ihtham mahkigdaj matt hekith am wo i ai hegai mo haschu g Jiosh wehs s-ap am ap'echuthch t-wehhejed. T wabshaba g pihk elithadag pi hekith wo huhug. 11 Neh, no hig pi g ali alikaj neok ch alikaj ha'ichu tahtk ch ha'ichu chegito? T wabshaba ab wo i e ai g ge'eligaj. T wo ge'ehogat. 12 Pegih, tt hab wa masma am gawul wo t-juh matt hekith am wo nei g t-tho'ibiakam am i ko'ok. Hemuch ach wabsh al he'es ha'ichu i s-mahch ab amjed g Jiosh. K ith heg wa wepo mach wabsh s-kohmagim neith ha'ichu. Tt wabshaba heg i tash haha wo si s-ap s-mai ha'ichu ab amjed g Jiosh ab i neithok g t-tho'ibiakam. T g t-mahchig hahawa d wo wehsk hab masma mo hab masma s-t-mahch g Jiosh. 13 Pegih, chum att hekith ab wo s-wohochuthath g Jiosh ch ab s-ap wo nenidath mat am hab wo i junihith g e-ne'oki am t-wehhejed. Chum att hekith wo si pihk t-elithath ha hekaj. K g pihk elithadag wehs ha ba'ich d i si s-has ha'ichu.

1 Corinthians 14

1 Pegih, mt am wo e nakogath mamt ab wo si pikh e elithath wehs ha hekaj ch wo i ha wehmtath heg hekaj mo haschu ab t-makiog g Hekia S-ap'ekam Gewkthag matt hab wo junihith. T ith d wo si i ha-wehmtadagk matt am wo ha ahgithath mo haschu g Jiosh am i t-tashogith. 2 Pi at hedai hejel wo s-em-amichuth k ab wo bei g i wehmtadag mamtp wabsh g pi e-machiga ne'okikaj wo neneokath. Heg o wa wepo mach heg hekaj ab wa'i Jiosh wui neneok. 3 K wabshaba hegai mo am ha ahgith mo haschu g Jiosh am i ha tashogith am i ha wehmaj ch am i ha gewkemhun ch ab ha mahk g s-ap tahhathkam. 4 Hejel o wa'i e wehhejed hab kaij hegai mo gawul kaitham nenneok. K wabshaba hegai mo am ha ahgith mo haschu g Jiosh am i ha tashogith am i ha wehmaj g e-wehm wohochuththam. 5 Mamt hu'i wehsijj wo neneokath g pi e-machiga ne'okikaj. Ni wabshaba ba'ich i tatchua mamt wo bei hegai mahkigdag mamt si s-ta amichutham wo ahgath g Jiosh ha'ichu ahga. Pi at am hu hugkam d wo i ha-wehmtadagk mamtp wo neo heg hekaj pi e-machiga ne'oki, heg hi wa matp am hema wo gagda g em-ne'oki am wehs ha wehhejed. 6 Pi ant ha'ichukaj wo sha'i i em-wehmt mantp hems am wo jiwia em-wui k heg wa'i hekaj wo neokath pi ni-machiga ne'oki. Bant wa'i masma wo i em-wehmt mant am wo tasho em-ahgi mo haschu am ni-maskogith g Jiosh o g ha'ichu mahchig ab amjed o g ha'ichu mashchamigaj. 7 Ith ant wo ha'ichu wepogi mamt wo s-amich. S-mahch am mat pi hedai wo s-mahchk mo haschu ne'i am chum a'aga matp g uhs kuikud ch ahlpa pi kehg wo kaitha. 8 T pi hedai wo s-mahchk g shonthal mat has wo e juh matp g kuhutham pi ap am hu wo kuhu g kuikud. 9 Pegih, t hab wa masma pi hedai wo em-amich mam haschu am chum a'aga mamtp wabsh gawul kaitham wo neokath. Heg o wa wepo mat an wabsh wo i huhug g em-ne'oki. 10 Mu'ij o g nahnko mahs ne'oki ith thahm jewed. 11 Mantp pi wo mahchk g ne'okij g gawul neoktham, kutt d wabsh wo ge o'othhamk ab a'ai t-wui nach ge s-t-amichuth. 12 S-ap'e o mam si tatchua g mahkigdaj g Hekia S-ap'ekam Gewkthag. Kumt ba'ich am hab wo i junihith mat haschu ba'ich d wo i ha-wehmtadagk g em-wehm wohochuththam. 13 Hegai mat hedai wo gawul kaitham nenneokath at hemho wa wo chum e ho'ige'ithahun k ab wo tai g Jiosh g amichuthadag mat s-ap wo i tashogi g gawul kaitham e-ne'oki. 14 Pi att hedai am hu wo i ha wehmtath heg hekaj ha'ichu t-amichuthadag mattp wabsh g gawul kaitham ne'okikaj wo t-ho'ige'ithahunath, chum achs si s-ap t-tahtk am hehe'ejel t-i'ibthag ed. 15 Kutt heg hekaj pi wabsh wo t-ho'ige'ithahunath g gawul kaitham ne'okikaj ch pi wabsh wo ne'eth g gawul kaitham ne'okikaj ch wabshaba s-ta amichutham hab ep wo t-juh. 16 Pi at wo e nako hegam mo pi mahch mach has t-wua mat t-wehm ab wo ho'ige'el g Jiosh mattp wabsh g gawul kaitham ne'okikaj wo t-ho'ige'ithahunath nat ge wo amich mach has kaij. 17 Ttp hems hi wa si s-ap wo t-ho'ige'ithahu Jiosh wui. T wabshaba ihtham pi ab hu wo bei g i wehmtadag. 18 Ab o ep ni-mahks ihtha mahkigdag. Kuni ab si ho'ige'ith g Jiosh mani em-ba'ich i mu'ikko nenneok g gawul kaitham ne'okikaj. 19 Nt wo ni-nako mant heg hekaj mu'i mihl ne'oki hab wo chei. K wabshaba ba'ich i s-ap'e mach eda t-mihshmath mant al hetasp ne'oki hab wo chei mat wo s-e amich mani haschu chum ha mashcham. 20 A'alkaj am hab e junihim, ni-wepnag, ab si ha'ichuchuthch ihtha al mahkigdag ch heg hekaj ab si e haschuth. Am g wabsh wo thagito ihtha pi ap'ekam. Neh, a'al o pi mahch g pi ap'ekam. Kumt hab wa'i masma hab wo masmak mo g a'al mamt pi wo mahchk g pi ap'ekam. 21 An o o'ohadag mo hab kaij g Jiosh: Bant wo ha juh g Tutuligo mat wo e gehg k hemho wa ab wo kaihamath g ha-ne'oki g gawul hemajkam. T eda wabsh kia pi ab hu wo ni-kaihamath. 22 Neh, ihtham gawul kaitham ne'oki mam ab si ha'ichuchuth o wa d chum chehgitha am ha wehhejed hegam mo pi ab hu kaimk g Jiosh ch pi t-wehhejed d chehgitha ahchim wohochuththam. Hegai mo g Jiosh am t-tashogith matt wo ha ahgi g t-wehm wohochuththam o am ha chehgith mo am t-wehmaj g Jiosh, chum as pi am hu wo ha chehgi hegam mo pi kaimk g Jiosh. 23 T hegam mo s-kaimk ch am wo i wahp t-namki ed hab wo chei matt t-loligoch mattp wabsh gawul kaitham wo nenneokath. 24 Hemho wa att am wo tasho ahgath mat has chu g Jiosh am wo t-tashogi matt wo ah. Kut wo s-t-amich g pi e tho'ibiakam k wo s-mai moki d pi ap chu'ijkam ch atki wo e lothai. 25 Wehs g ha'ichu t-ahga at ab ha wui wo tashogi g s-a'agi ha'ichu ha-chegitoi. Kut ab wo i shul Jiosh wui k ab wo ihm k wo wohokamch moki woho am t-wehmaj g Jiosh. 26 Ith ani hab ahg, ni-wepnag, mamt wehs ha'ichu s-ap am hab wo junihith e-namki ed. Mtp hems hema am wo ah g ne'i k hema g mashchama hab wo juh k hema wo ah mat haschu g Jiosh am wo i em-maskogi k hema hems g gawul kaitham ne'okikaj wo neo k hema am wo i tashogi mo has d ahga ihtha ne'oki. Wehs ha'ichu at d wo i chum em-wehmta. 27 Mamtp wo neneo g gawul kaitham ne'okikaj, mt am wa'i waik o gohkajj hab wo juh shakal e oitham. Mt hema am wo i tashogi ihtha mo am hab e kaij. 28 Kumt pi am hu hab wo chum chei g gawul kaitham ne'oki matp pi am hu hedai wo ha'ichugk mat am wo i tashogi k wabsh hejel e wehhejed ch ab Jiosh wui hab wo chei. 29 Kumt waik o gohkajj am wo ah mat haschu g Jiosh ab wo em-mah. Kumt ha'ijj am wo a'amich mo haschu am hab e kaij. 30 Kumt wabshaba wo ha'asa neo matp g Jiosh am hema ep wui wo ha'ichu i tashogi mat am hab wo chei. 31 Wehsijj am hiwgithas mamt am wo ah g Jiosh ha'ichu ahga hehemakoj. T hab wehsijj wo ha'ichu mahch k ab hekaj wo bei g i gewkemhunadag. 32 Mt wo nenida g e-ap'ethag mat hekith g Jiosh ab wo em-mah g ha'ichu e-ahga am ha wehhejed. 33 Pi o tatchua g Jiosh matt wabsh wo has hu t-wuath ch wabshaba matt wo s-thotholimak. Bamt masma hab wo e wuath e-namki ed mo wehsko hab e wua g Jiosh hemajkamga. 34 Ahpim u'uwi amt ab wabsh wo ha wechok. Bo masma hab chu'ig g heki hu t-himthag chehanig. Pi amt has wo chei ab amjed mo has i kaij g chechoj 35 k wabshaba ab wo ha kakke g e-wehm kihkam am e-kihki am mamtp wo ha'ichu s-mahchim. That wo si edathagk mamtp ab wo ha kakke mam am e mihshmath. 36 Pi g hab wo elithath mas ahpim em-gahi wuhshanim ab i wuhsh g Jiosh ha'ichu ahga o mams ahpim ab wa'i bei. 37 Mt wo chum s-mahchk mo ith d Jiosh chehanig mamtp hedai hab e elith mam d Jiosh ha'ichu ahgtham ch edgith g gewkthaj g Hekia S-ap'ekam Gewkthag. 38 Kumt pi ab hu wo ha kaiha matp hedai pi ab hu wo kaiha ihtha. 39 Pegih neh, ni-wepnag, am g wo si i e gewpkath mamt wo ah g Jiosh ha'ichu ahga k wabshaba pi wo ha tha'i hegam mat g gawul kaitham ne'okikaj wo nenneokath. 40 Wehs amt ha'ichu si s-ap am hab wo junihith e-namki ed ch pi wabsh wo has hu e wuath.

1 Corinthians 15

1 Am ant ep wo em-ahgi ihtha s-kehg ha'ichu ahgaj g Jiosh, ni-wepnag. Ab amt i s-wohoch mant eda am em-ahgi heki hu k s-wihnam gegok am e-wohochuthadag ed. 2 Tho ihtha s-kehg ha'ichu ahga mamt heg hekaj wo e tho'ibia mamtp woho an u'ukch. 3 Am ant em-ahgi mant haschu bei. K ith d si s-has ha'ichu ahgaj g Jiosh ch hab chu'ig mat g alithaj muh heg hekaj pi ap t-chu'ichig 4 k uhpam ep e chegito mo am d i waik tash mamt am woi cheo ch ed hab masma mo an o'ohadag Jiosh heki hu o'ohana ed mat am hab wo e juh. 5 Am at i e chehgi Peter wui k ab hahawa wehs ha wui g am e-chuhchai 6 k am ep i e chehgi ha wui g hetasp siant i ba'iwichkim mo ab d wohochuththam. Mu'ijj ihtham o an d wabsh kia thothakam. T ha'ijj hi wa koi. 7 Am at hahawa ep i e chehgi e-wehnag James wui k ab ep ha wui wehs g am e-chuhchai 8 k am si ha oithch hab wa'ap i e chehgi ab ni-wui. Ni eda s-ko'okam ha sho'igchuth hegam mo ab s-wohochuth. K pi ab hu d chum ni-wuikam manis d wo kehshajk. T wabshaba wa am ni-wui i e chehgith k ab i ni-waith k am i ni-kei. 10 Bat wa masma si s-ni-ho'ige'el g Jiosh. Kuni heg hekaj d kehshaj ch chum hems wehs ha ba'ich i si chikpan hegam mo am d chuhchaij. K eda d Jiosh mo hab junihim ihtha. Pi ani hejel hab junihim. 11 K g Jiosh hab wa'ap i ha wehmt hegam mo ni-wehm d piongaj g Jiosh. Wehsijj ach heg am wa ahgachug. K d ihtha ha'ichu t-ahga mam ab s-wohochuth. 12 Ith o d ha'ichu t-mashchama mat uhpam ep e chegito g Christ. Msh eda ha'i hab chech'e mat pi hedai uhpam ep wo e chegito. 13 Pegih, t g Christ hab wa'ap pi ep e chegito matp wo wohok mat pi hedai ep wo e chegito. 14 Kut pi d wo ha'ichuk machs hekaj wo em-mihshmath o mams ab wo s-wohoch. 15 T d wabsh wo iattogik mattp wo em-ahgi mat g Jiosh ab i wuhshath g e-alithag. 17 Kumt pi wo sha'i e tho'ibia. T pi ha'ichu wehhejed wo s-kehgajk g em-wohochuthadag. 18 T hab wa'ap pi wo e tho'ibia hegam mat heki hu koi ab i s-wohochuthk g ha'ichu t-ahga ab amjed g Christ. 19 Sha'att wa'i si sho'ig hab wo mahsk wehs ha ba'iwichkim ahchim wohochuththam mattp pi uhpam ep wo t-chegito. 20 T wabshaba woho ab i wuhsh g Christ muhkig amjed k am i shonwuich mat wo i wuwha g ko'i. 21 Muhkig at ab i shonwua hema amjed g o'othham. T g i wuhshanig ab muhkig amjed hab wa masma ab i shonwua hema amjed g o'othham. 22 Hegai mat g muhkig ab amjed i shonwua o d Adambad. Kuch wehsijj mukiog nach pi heg ab d amjedkam ch heg wehm d Hemako. K hegai mat g i wuhshanig ab amjed i shonwua d Christ. Kutt heg wehm ab i t-hemakoj ab i s-wohochuthk k hekaj ab wo i wuwha muhkig amjed. 23 Tho Jiosh hab elitha mat wehpeg ab i wuhsh g Christ ab muhkig amjed. Tt ahchim ab hahawa hab wa'ap wo i wuwha mach ab s-wohochuth. Ith at hab wo e juh mat hekith ep wo jiwia g Christ. 24 T am haha wo huhug g jewed. Kut ab wo thagito g Christ g e-kownaltalig e-ohg Jiosh wui. T Wabshaba g Jiosh wehpeg ab wecho wo i ul wehs ha'ichu. Hemuch at ab wo gegokkath g kokownal ch nahnko mahs gewpkthag Christ wui. 25 T wabshaba g Christ hemho wa wo himchuthath g e-kownaltalig ch ab wo ai mat wehs wo ha gewito g e-obga. 26 K g muhkig d si oithchkam ha'ichu mamt wo gewito. 27 An o hab chu'ig Jiosh o'ohana ed mat wehs ha'ichu ab wecho wo i ul g am si e-Kehsha. K oi wa pi hejel hab e ahg g Jiosh mas ab wecho wo i e ul. 28 T wabsh chum haschu ab wecho wo i ul g Christ. T heg ab hahawa wehs ha'ichu wo thagito e-ohg Jiosh wui. T g Jiosh d wo ge'e kownalk wehs ha'ichu thahm chum hekith. 29 Neh, ha'ijj at g em-tatchui ab i s-wohoch g s-kehg ha'ichu ahgaj g Jiosh k hahawa koi. Kumt ha'i hab wa'ap ab i s-wohochuth k e pahl wapko mamt wo ha wehmajk am i ko'ok. Pegih, pi g hab wo cheh'i mas pi ep wo e chegito. 30 Wehs tashkaj ach pi sha'i huwith g t-thoakag ahchim mach am ahgachug g tho'ibiathag. Kutt pi am hab wo t-junihith matp pi ab hu wo i wuwha g ko'i. 31 Neh, ni-wepnag, wehs tashkaj o am hab chu'ig g s-ni-mukimkam. Ith ani hab kaij nani pi ab si has em-elith mam d ni-wehm wohochuththam. 32 Ia at ha'i hab masma ni-cheggia mo g s-ta ehbitham ha'ichu thothakam Ephesus t am. Kunt pi ab hu ha wui wo sha'i kekiwua am ahgachugch matt ep wo t-chegito am i ko'ok matp pi d wo wohokamk. Matp hab chu'ig, nt wabsh oithk hab wo ni-junihith g hab ha-che'i mo hab chu'ig, “Tt hig wabsh wo si t-gegosithath ch wo s-hehgigk natt pi hemuch im hu hab wo i t-juh.” 33 Mt wo e iattogith k hab wa'ap wo masmak mo hegam mamtp ab wo ha kaihamath. 34 Ha'ijj amki pi mahch g Jiosh. K ith d si em-edathag. Am g wabsh wo thagito g pi ap e-chegitoi k s-ap ha'ichu wo chegito. 35 Neh, ha'ijj amsh hab chech'e, “Shaht masma ep wo i wuwha g ko'i. Kut has wo mahskath g hohon matp woho hab wo e juh?” 36 Pegih, nt wo em-tashogi. T-hohon o wepogithas mo g ha'ichu kai. Heg at am wo e ei jewed ch ed. T g elithaj wo padt. T g kai am haha wo i wuhsh. 37 Hegai mam am e'esha o d wabsh si s-wohom ha'ichu kai ch pi d wehs hegai mat ab wo i wuhsh. 38 Jiosh at hab masma am wo wuhshath mo has i masma tatchua k ab mahkch mat hab wo mahskath mo g je'ej. Wehs o gawul mahs g ha'ichu wuhshanig. 39 K g ha'ichu thoakam hab wa'ap gawul mahs. O'othham o am wa has mahs chuhkug. K g ha'ichu thoakam ch u'uwhig ch waptopi am wa hehe'ejelko gawul mahs chuhkug. 40 Tash ch mashath ch huhu'u o gawul masma mo g jewed ch gawul masma s-kehgaj. 41 K ihtham mo an t-thahm hab chu'ig pi e wepo masma s-kehgaj. Mashath o gawul masma s-kehgaj mo g tash. K g huhu'u hab wa'ap gawul masma s-kehgaj mo ihtham ch pi e wepo masma s-kehgaj. 42 Ihtha t-honshpadag o d wabsh jewed t ab ha'ichu ch wo hekit k pi wo kehgajk ch pi wo ha gewkthagk ch wo muh k gd hu wo e hiash. T g Jiosh ab wo i t-wuwhas. T g t-honshpadag d haha wo thahm kahchim ch ed ha'ichuk ch wo s-kehgajk ch wo gewkthagk ch pi hekith wo hekit k pi hekith wo muh. Jiosh at ab t-mah ihtha t-honshpadag matt ith thahm jewed wo hekaj. K hab mahs mat hemho wa am wo nahto g thahm kahchim honshpadag matt an wo hekajith thahm kahchim ch ed. 45 Neh, bo chu'ig g Jiosh o'ohana mash g wehpeg o'othham d Adambad. Tsh ith g Jiosh am nahto k ab mah g thoakag k Hekaj am i shonwuich g o'othham thoakag. K wabshaba g Christ ab hahawa t-mahkch g wechij thoakag. 46 Pi o an hu wehpeg d thahm kahchim thoakag g o'othham ch wabshaba hemho wa in jewed thahm wehpeg mahsi. 47 Jiosh atsh wabsh g jewedkaj am nahto hegai si wehpegkam. T heg i thahm ia hahawa jiwia g Christ ab thahm kahchim t amjed. 48 Wehsijj ach ab d amjedkamaj hegai mat g jewedkaj e nahto ch hab wa masma. Ch ahchim mach ab s-wohochuth hegai mat ia jiwia thahm kahchim t amjed hab wa masma mo hegai. 49 Matt wo i wuhsh ab muhkig amjed k haha wo wepo masmak. 50 Pi at an hu wo sha'i i wah thahm kahchim ch ed ihtha jewed thahm t-hon mo aihim g muhkig. 51 Neh, nt am haha wo em-ahgi g s-a'agi ha'ichu. Pi att wehsijj wo ko'o k wabshaba wehsijj wo gawul t-juh ahchim mach ab s-wohochuth g Jiosh ha'ichu ahga. 52 Kut ith si s-hohtam hab wo e juh hab masma mam si s-hohtam e wuhigith. Wehpeg at ab wo kaitha g kukuikud k g si ha oithchkam ab wo kaitha. T ab ha hekaj wo i wuwha hegam mat heki hu koi ab i s-wohochuthk g Jiosh ha'ichu ahga. Tt ahchim mattp in d wabsh wo kia thothakamk hab wa'ap wo gawul t-juh. 53 Ihtha t-hon at am gawul wo e juh mat pi hekith wo muh. 54 T hab masma wo e wohokamch ihtha mo an hab chu'ig Jiosh o'ohana ed: Muhkig at im hu hab wo i e juh. Jiosh at am s-ap wo gewito. 55 Bo wa masma g muhkig mo g si ge'e ko'oi. K g s-ko'ok t-namkithadag heg hekaj pi ap t-chu'ichig heg wa wepo mo g ke'ij. T wabshaba g t-kownalig Jesus Christ gm hu hab i juh g ke'ij ab nakogk g s-ko'ok t-namkithadag. Jiosh at am i ap'ech mat hab masma wo t-gewitojel g muhkig. Kuch heg hekaj si s-hehgigam ab ho'ige'ith. 58 Pegih neh, ni-wepnag, pi at wo sha'i heki e wua matt haschu am hab wo junihith g t-kownalig Jesus wehhejed. Kumt heg hekaj s-wihnam wo gegokkath e-wohochuthadag ed ch chum hekith wo si chikpanath wehhejed.

1 Corinthians 16

1 Ith ant hab wo ah heg amjed lial mamt am wo to'awath ha wehhejed hegam e-wehm wohochuththam mo am kih Judea jewed ch ed. Bani ha ahg hegam wohochuththam mo am mu'ikpa kih Galasia jewed ch ed mat am wo to'awath g e-lialiga. 2 Kumt ahpim hab wa masma hab wa'ap am wo ha'i to'awath wehs thomig ed mamtp he'ekia wo i e nako am a'amichuthk mam he'ekia i ha gew. 3 Kumt am wo ha'i i ha chuhcha mat am wo i ui g em-mahkigdag Jerusalem wui. Nt am wo ha o'ohani g ge'egedchu Jerusalem t am am jiwiak em-wui. T ith am wo i bei g em-chuhchai k am wo hihi. 4 Kunt ahni am epai wo ha oi matp d wo Jiosh tatchuik mant am wo hih. 5 Wehpeg ant am wo i ha neithahi g t-wehm wohochuththam ha-kihhim oithk am Macedonia ch ed k am haha wo i em-chehgimed 6 k antp hems wehs s-hehpch'ed oitham am wo em-wehmajkahim. Mt am haha wo i ni-wehmt mantp hebai ba'ich wo i hih. 7 Pi ant wo em-nei am himathch Macedonia wui nani pi tatchua mant am wo wa tash em-wehmajkahim matp d wo Jiosh tatchuik. 8 Bani ni-elith mant ia wo ha'ichugk Ephesus kihhim t am ch ab wo ai g bahijitha gegosig. 9 Ge'ej o g ni-ap'ethag mant am hab wo junihith g Jiosh chikpan iia, chum as hi wa mu'ijj ab ni-wui gegok. 10 Tp hems am wo jiwia g Timothy em-shahgith. Kumt si s-ap ab wo neithath no pi am hab wa'ap junihim g Jiosh chikpan hab masma mani ahni. 11 Pi amt wo pi ap hab elithath mo d wabsh wechij o'othham ch wabshaba am wo i wehmt. T hab s-ap e taht k ab uhpam wo i hih. Si ani nenida mat ia ep wo jiwia hegam ha wehm mat am wehmaj wo hihi em-wui. 12 Am amsh s-neithamk g Apollos. Kuni ab chum si i gewkemhun mat am wo i em-chehgim. K wabshaba pi hab elith mo d Jiosh tatchui mat am wo hih hemu ch heg hekaj pi wo ha oi ihtham mat am wo i em-chehgio k wabshaba am wo wa em-nei mat hekith am wo s-ap'ekath wehhejed. 13 Am g wo s-e nen'oithath ch s-wihnam wo gegokkath am e-wohochuthadag ed ch s-ge'ehogam am wo chikpanath 14 ch ab wo e chehgithch wehs ha'ichu k ed mam ab si pihk e elith wehs ha hekaj. 15 S-mahch am mo hegam Stephanas d si wehpegkam am em-jewedga ed mat wehs e wehm ab i s-wohoch g s-kehg ha'ichu ahgaj g Jiosh. Ihtham at am i e thagito mat ha'ichu am hab wo junihith ha wehhejed g wohochuththam. Kuni ab em-gewkemhun, ni-wepnag, 16 mamt ab wo ha kaihamath hegam mo hab masma em-wanimed mo ihtham ch hegam mo hedai ha wehm chikpan. 17 Hemu at wabsh ia thatha g Stephanas ha wehm g Fortunatus ch Acaicus. Kuni si s-ap ni-tahtk ch ha neith nani pi si s-em-neithamk. 18 Ab at si i ni-hehgchul hab masma mat hab em-juh. S-ap amt ab wo ha neithath g hab mahs o'othham. 19 Hegam mo ab ihm g Christ iia Asia jewed ch ed o am i em-ahgith mamt ab wo i s-ha ho'ige'el. Aquila ch Priscilla ch hegam mo am e nanmek ha-kih am o hab wa'ap am i em-ahgith mamt ab wo i s-ha ho'ige'el. 20 Wehsijj g wohochuththam iia Ephesus t am o hab wa'ap am i em-ahgith mamt ab wo i s-ha ho'ige'el. Ab g a'ai wo s-e ho'ige'ithath nam pi d e wehm wohochuththam. 21 Ia ant hejel wo o'oha g ni-ho'ige'ithadag am em-wui. 22 Jiosh at gm hu hab wo i ha juh matp hedai pi ab hu wo tatchuath g t-kownalig Jesus. Ia at ep wo jiwia g Jesus s-hohtam. 23 Si o s-hemajima g t-kownalig Jesus Christ ab em-wui ch ba'ich ab wo i em-mah g i wehmtadag. 24 Ab ani si pihk ni-elith wehs em-hekaj ahpim ni-wehm wohochuththam. Neh, ith ant hab wo wa'i chei am em-wui.

2 Corinthians 1

1 Ni-wepnag mam am kih Corinth t am ch am wehsko Greece jewed ch ed: Am ant ep wo ha'ichu i em-o'ohani ahni Paul g t-wehnag Timothy wehm. S-mahch am mani d kehshaj g Jesus Christ. Tho Jiosh tatchui mani heg an ahgachug. 2 Ab o wa si s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 3 T-kownalig Jesus Christ ohg o hab wa'ap d t-ohg Jiosh ch si s-hemajima ab t-wui. Wehs g i gewkemhunadag o ab amjed him. Kutt heg hekaj ab wo si i ho'ige'ithath. 4 Heg o am i t-gewkemhun wehs t-kudutadag ed. Kuch heg hekaj t-nakog matt am epai wo i ha gewkemhunath hegam mo nahnko mahs ha'ichukaj e kudut heg wa hekaj mat haschu g Jiosh hekaj i t-gewkemhu. 5 M o wa woho mach hebai t-sho'igchuth mach d Jesus Christ wohochuththam. K wabshaba g Jiosh ba'ich i t-gewkemhun heg hekaj mat haschu g Jesus Christ am hab t-juni. 6 Ahchim ach wa t-sho'igchuth am i em-wehmajch mamt wo e tho'ibia. K g Jiosh am i t-gewkemhun matt hab wa'ap am wo i em-gewkemhu. Mt hab ab wo bei g gewkthag mamt s-ap wo nako hegai hab mahs sho'igthag mach ahchim nakog. 7 Pegih, s-mahch ach mamt hemho wa hab wa'ap wo bei g i gewkemhunadag nam pi hab wa'ap nakog g sho'igchuthadag. 8 Tatchua ach matt am wo i em-chegitoich ahpim t-wepnag matt he'ekia i t-sho'igch am Asia jewed ch ed. Sha'at wa'i si s-wechima ab t-ma'ish hegai cheggiadag. Kunt wa sha'i si s-mukima ni-taht. 9 Bo wa sha tahhathag mant ni-lothaitachuth k hemho wa wo ni-mu'ij. Ith atki hab ahgk hab e juh matt pi ab hu hejel wo t-hiwgath ch wabshaba heg wa'i Jiosh ab wo si hiwgath. Heg o ab i ha wuwhasith g ko'i muhkig amjed 10 ch t-tho'ibia ab amjed hegai si s-ta ehbithamakam ha'ichu matt am chum t-ko'ij. Kuch ab si hiwig mat ep wo t-tho'ibia matt pi wo t-ko'ij. 11 Kum ahpim am i t-wehmaj am e ho'ige'ithahunch t-wehhejed. T g Jiosh am hab wo juh mam haschu ab tahni k ab wo s-t-ho'ige'el. T mu'i ab wo ho'ige'el g Jiosh t-hekaj. 12 Jiosh o si s-hemajim ab t-mahkch g gewkthag. Kuch heg hekaj si s-ap himchuth g t-thoakag ith thahm jewed ch pi ha'ichu sha'i em-iattogith ch hab pi t-kudut. Ith o ab t-mahkch g s-ap tahhathkam. 13 Heg ach am wa'i em-o'ohanith mamt haschu s-ap wo ne'okchulith k wo s-amich. Am ani hab hi wa chum em-elith mamt am hu wa hebai wehs s-ap wo s-amich 14 mam haschu wabsh he'es i s-amichuth hemu. Kumt hekaj ba'ich ab wo si has i t-el hab masma matt ahchim ab wo si has em-el mat hekith wo jiwia g t-kownalig Jesus. 15 D ant hu'i heki hu hab masma i chum ap'ech mant am wo i em-nei am himathch Macedonia wui k am ep wo i em-nei ab uhpam himathch. Mt hab gokko ab wo bei g ho'ige'ithadag k wo i ni-wehmt mant am wo hih Judea wui. 17 Nt eda pi koi am hu i em-chehgim. Kumki ha'i hab ni-elith mani wabsh pehegi neok ch pi woho am hu hab wo ni-juh mani wa has i kaij. 18 K eda pi woho ihtha. Jiosh o s-mahch mani hab chum s-junimk mani haschu hab i ahg mant hab wo juh. 19 Neh, am ach ahgachug g Silas ch Timothy wehm ab amjed g Jesus Christ. K heg d Jiosh alithag ch chum hekith hab wua mo haschu hab i ahg. 20 Wehs at am hab t-juni g Jiosh g hab e-elitha am gahi wuhshanim g Jesus Christ. Kutt heg gahi wuhshanim ab wo si hehgchulithath g Jiosh. 21 Tho Jiosh mat am i t-gewpkathch Christ himthag ed ab t-mahk g Hekia S-ap'ekam Gewkthag. K heg am wohokamchuth mach d hemajkamgaj ch wehs wo bei hegai mo ab t-makiog. 23 S-mahch o g Jiosh mani pi em-kudutamk ch heg hekaj pi koi am hu ep em-wui hih. Ba'ich o i s-ap'e mamt wehpeg am wo i ap'ech hegai mo pi ap'e am em-shahgith. 24 Pi o hab chum chu'ig machs ahchim am wo em-nu'ichkwuhith em-wohochuthadag ed. Ba'ich o i s-ap'e matt am wo i em-gewkemhu em-wohochuthadag ed. Kumt hab wo s-gegokkath heg eda.

2 Corinthians 2

1 Am ant si i ni-oithahim k hab i ni-ah mantki pi am hu wo i em-chehgim hemu manis wo ge s-em-keh'el. 2 Mt pi wo ap e taht mantp hab wo ni-juh. Nt ahni hab wa'ap pi wo ap ni-taht. 3 Heg ant hekaj am wabsh em-o'ohani. Ab amt wo chum ni-mah g s-ap tahhathkam. Kuni pi tatchua manis am wo chum jiwia em-wui k wabsh pi wo ap ni-taht em-wehhejed. S-mahch ani mamt wo s-hehgigk mant hekith ahni wo s-hehgigk. 4 Si ani pi ap ni-tahtk ch mu'i ni-oh'og iawua am em-o'ohanithk nani pi si pihk ni-elith em-hekaj. Ni eda pi tatchua manis ab wo em-mah g pi ap tahhathkam. 5 Ab at i em-mah g pi ap tahhathkam hegai mat am si pi ap has chu'i em-shahgith. Kuni pi tatchua manis ab wabsh wo si em-chehmo. 6 Am at wa ge'e ab nako g e-namkithadag ab em-amjed mamt has i masma am ap'ech. 7 Mt hahawa ab wo i s-ho'ige'ith k ab wo i gewkemhu nat pi has e juh k am hu wo si pi ap e tahtam k wabsh si s-wohom gm hu hab wo i e juh. 8 Am g thahm ep wo ahgith mam ab si pihk e elith wui. 9 S-mahchimk ani am i em-o'ohanithk mams ab wo s-ni-wohog el. Kumt wa woho am hab e juh. 10 Kunt hab wa'ap ab wo i s-ho'ige'el hegai mat pi ap has chu'i mamtp ahpim ab wo i s-ho'ige'el. 11 T hab pi wo e nako g Jiawul mas wo t-wohppo'i ihtha t-wehnag. S-mahch ach mo hab wa s-e junimk. 12 Pegih, nt wa pi am hu em-wui hih am himathch Macedonia wui k wabshaba am hih Troas wui. Tki g Jiosh am ap'ech mant am i ahgachug g ha'ichu ahgaj amai. 13 Nt am hu hebai ni-kudu nat pi pi oi jiwia g Titus am i em-chehgimedk. Kunt am i ha ho'ige'el g t-wehm wohochuththam amai k gm hu hih Macedonia wui. T am ni-nam g Titus k am ni-ahgith mamt s-ap am hab juh g ni-ne'oki. 14 Kuni heg amjed ab si ihm g Jiosh mat am i ap'ech hegai mo pi ap'e am em-shahgith. Jiosh o chum hekith ab t-mahkch g gewitoithag hekaj hegai mat g Christ am t-wehhejed hab juh. Ha'ichu t-ahga ab amjed g Christ o an wehsko e gantan hab sha masma mat g s-ap uhwchu wehsko wo e hewagi mat hebai wo e mehi. 15 Hegam mat wo e tho'ibia o ab si s-hohho'ith ch kah mo g Jiosh ab ha makiog g pi ha huhugetham thoakag. K hegam mat pi wo e tho'ibia pi hohho'ith ch kah mo am hihim pi ha huhugetham muhkig wui. Pegih, tho si s-has ha'ichu chikpan ihtha. 17 Kut pi wo e nako mat am hab wo juh hegam mo wabsh pehegichuth g Jiosh ha'ichu ahga ch wabsh s-u'imk g lial. Ahchim Christ pionag ach hi pi hab sha'i masma ch pi em-iattogith ch wabshaba s-ap am ahgachug ihtha wohokam mo g Jiosh ab t-mahkch.

2 Corinthians 3

1 Pi ani wabsh hejel ni-wohokamchuth mani d kehshaj g Christ ch pi tatchua mams ab wo ni-wohokamch g o'ohanakaj. 2 Ahpim mamt ab i s-wohoch g ha'ichu ni-ahga am heg wa wepo mam d o'ohanaj g Christ ch am wohokamchuth mani d kehshaj. K ith pi an hu o'ohanas hohothai t ab hab masma mash wa hegai heki hu wehst-mahm chehanig ch wabshaba an o'ohanas em-thothakag ed nat pi g Hekia S-ap'ekam Gewkthag gawul em-juh k am i em-ap'ech heg hekaj ha'ichu ni-ahga. Kut wehs wo nei mat has em-juni g Jiosh k wo s-mahchk mani d Christ kehsha. 4 Ith ani hab kaij nani pi ab hiwig g Jiosh heg hekaj mat g Christ hab t-juni. 5 Pi o d hejel t-gewpkthag ch wabshaba d Jiosh gewkthag mach hekaj am hab junihim g Jiosh chikpan. 6 K ihtha mach ahgachug d wechij ha'ichu ahgaj g Jiosh. K ab ha'i kaiham. K g Hekia S-ap'ekam Gewkthag ab ha mahk g wechij thoakag. Pi o hab masma hegai hekiukam ha'ichu ahgaj ch wabshaba d chehanig. K g pi ap chu'ijkam heg hekaj s-mahch mo ab ha wui him g s-ko'ok ha-namkithadag. 7 Hegai hekiukam chehanig ash an o'ohanas hohothai t ab. Tsh g Jiosh am ha chehgi g e-gewkthag ch e-tonlig matsh wa ab ha mah ihtha g Tutuligo. Mosesbad wuhiosha ash wa si tonod heg hekaj Jiosh gewkthag mash wa an wehmajkahim tho'ag t ab ch ab bei hegai chehanig. Tsh pi sha'i e nako g wehmaj o'othham mas ab wo i nei g Mosesbad. Kush eda am wa chum chukhim hegai tonlig. Neh, Jiosh atsh hab wa masma am ha chehgi g e-gewkthag mat wa ab ha mah hegai hekiukam chehanig mo ab t-namkith g muhkigkaj 8 k wabshaba ba'ich am t-chehgithch g e-gewkthag mo ab t-mahkch g Hekia S-ap'ekam Gewkthag. K heg am t-eda chikpan. 9 Tho si s-has ha'ichu hegai hekiukam chehanig mach hekaj s-mahch mo ab t-aihim g s-ko'ok t-namkithadag heg hekaj pi ap t-chu'ichig. Pegih, k ba'ich d i si ha'ichu hegai ha'ichu ahgaj g Jiosh mach hekaj s-mahch mo gm hu hab i junihog g pi ap t-chu'ichig matt d haha wo s-ap'ekamk am tahgio. 10 T wabsh pi e ha'ichuch g gewkthaj g hekiukam chehanig am t-wehhejed no pi ba'ich i s-gewkthag g Christ ha'ichu ahga. 11 Hekiukam chehanig at am i huhug. T wabshaba g Christ ha'ichu ahga pi hekith wo ha huhug. 12 Ith ach ab ab t-gewpkathch ch hekaj am si s-t-mahch ch ahgachug. 13 Mosesbad atsh wa ab ma'ish g e-wuhiosha matsh g wehmaj o'othham pi ab hu wo nei hegai tonlig mo ab ab tonod ab amjed g Jiosh gewkthag. Sh hegam pi neith mo huhughim hegai tonlig. Ch ahchim hi pi ab hu ma'ishch hegai Jiosh gewkthag mo ab t-ab e chehgithch. 14 K eda wabsh kia e ehstokch mu'i ha wehhejed g ni-wehm o'othham. K heg hekaj pi mahch mo huhughim g gewkthaj hegai hekiukam chehanig. Im at hu hab wo i e juh hegai pi ha-amichuthadag mat hekith ab wo i s-wohoch g Jiosh ha'ichu ahga ab amjed g Christ. 15 Chum wa hems ith i tashkaj o heg wa wepo mo ab ma'ishpi g ha-amichuthadag mo hekith am i ne'okchulith hegai ha'ichu ahga mat g Mosesbad an o'oha. 16 Neh, ab atsh i e ma'ishpi'o g Mosesbad matsh hekith ab ep i miabi g Jiosh. T ihtham ha-amichuthadag hab wa'ap wo i e ma'ishpi'o mat hekith ab wo i miabi g Jiosh. 17 Hekia S-ap'ekam Gewkthag o d Jiosh ch am ha'ichug t-thoakag ed am i t-ap'echuthk g Jiosh wehhejed. Kuch hab t-wul'okch mach pi chum t-ap'echuth g chehanigkaj. 18 Pi o ab hu ma'ishpi g t-amichuthadag ahchim mach ab ihm g Christ. Kuch ab wui nea ch ab chehgithch g gewkthaj ch tonligaj hab sha masma mo g neithakud. K g Hekia S-ap'ekam Gewkthag am si gawul t-junihim. Tt hekaj ba'ich wo i wepo masmak g Christ.

2 Corinthians 4

1 Ab o s-t-ho'ige'ith g Jiosh ch ab t-chehani matt am wo ahgachugath g ha'ichu ahgaj. Heg ach hekaj pi ha'ichukaj t-shohbithch ch heg am hab wua. 2 Pi ach hab wua g s-a'agi ha'ichu ch pi ha iattogith ch pi am hu gawul wua g Jiosh ha'ichu ahga. Jiosh o s-mahch mach am ahg g wohokam ch am i t-nakog matt wo s-ap'ek am hemajkam ha-nena ed. 3 Ihtha s-kehg ha'ichu ahgaj g Jiosh mach ahgachug o hegam wa'i ha wehhejed pi tasho mo pi d e tho'ibiakam. 4 Jiawul o ge'e gewkthag ith thahm jewed ch thaishch g ha-amichuthadag. K hekaj pi amichuth mo s-ha tho'ibiamk g Christ ch d si hekia s-ap'ekam ch wepo d thoakam g e-ohg Jiosh. Heg o wa wepo mo g Jiosh gewkthag d si s-mahs tonlig ch ab ab tonod g alithaj. K eda ihtham pi neith. 5 Pi ach hejel t-amjed ha'ichu ahgachug. Jesus Christ o d t-kownalig. Kuch heg amjed an ahgachug ch d wabsh em-pionag wehhejed. 6 Jiosh atsh am wa i tonlith g s-chuhugam gd hu'i si wehpeg. K heg ha wepo mat am epai i tonlith g t-thoakag nat pi t-mahtchul g Christ. K heg am t-chehgithch g Jiosh. 7 Thach wabsh chum hemajkam. K eda g Jiosh ab t-mahkch g e-gewkthag. T hab wo s-e mahchk mo d wa Jiosh gewkthag ch am t-eda. Kuch heg hekaj hab sha masma mo g bith haha'a mat hema g lai am ha eda wo to'akchith g s-e-kaisthag. 8 Mu'ikko ach ha'ichukaj t-kudut. K wabshaba pi ha'ichu t-shohbithch. Hebai ach ha'ichu pi a'amichuth ch wabshaba am wabsh ba'ich i t-gewpkath. 9 Mu'ikko am t-sho'igchuth. K wabshaba g Jiosh chum hekith t-wehmaj. Hebai am hi wa chum si s-ko'okam has t-wua. Ch wabshaba pi t-ko'ijith. 10 Chum o hekith am hab chu'ig g muhkig t-wehhejed mamt wa hab masma hab juh g Jesus. K hab masma am tasho e neith g Jesus thoakag am t-thoakag ed. 11 T-thoakag oithch o am hab chu'ig mattp hems wo t-muhkith am wehhejed g Jesus. K hab wa masma ab e chehgithch g Jesus thoakag id amjed t-chuhkug mo am him muhkig wui. 12 S-ni-mukimakam o chum hekith am hab chu'ig nani pi am hab junihim ihtha chikpan. K am wa s-ap'e namt pi ith hekaj ab bei g wechij thoakag. 13 Bo chu'ig an Jiosh heki hu o'ohana ed mash hema hab kaij: Am ant neo nani pi ab s-wohochuth g Jiosh ha'ichu ahga. Pegih, bach wa masma ab s-wohochuth g Jiosh ha'ichu ahga ch hekaj am ahgachug. 14 Jiosh at wa ab i wuhshath g t-kownalig Jesus muhkig amjed. Kuch s-mahch mat hab wa'ap ab wo i t-wuwhas ahchim wohochuththam k ab wo i t-wahpki matt am wo wehmajk kihthaj ed. 15 Pegih, ni ab nakog g sho'igthag am em-wehhejed ch am ha wehhejed hegam mat hab wa'ap wo e tho'ibia am kahk g ha'ichu ni-ahga. K heg hekaj mu'ithahim hegam mo ab ho'ige'ith ch ab si has elith g Jiosh. 16 Heg att hekaj pi hekith ha'ichukaj an hu wo t-shohbi matt am hab wo junihith ihtha chikpan. Ab o hi wa chum aihim g muhkig g t-chuhkug nach pi hekitahim. K wabshaba g t-thoakag wehs tashkaj ab i e wechijith. 17 Hebaichujj ach hab hi wa elith mo sha'i si ge'ej g t-kudutadag iia. K wabshaba heg ab wui t-u'a g woho si ge'e ap'echuthaj g Jiosh. Heg eda at g Jiosh chum hekith ab wo si has t-elithath. T pi an hu wo ha'ichugk g jewed t ab t-kudutadag. 18 Ab ach wui t-gewpkathch hegai ap'ethag, chum achs hi wa chum pi neith g t-wuhpuikaj. Hegai mach haschu i neith hemu at wabsh wo huhug. T wabshaba pi hekith wo huhug hegai mach am wui t-gewpkathch.

2 Corinthians 5

1 Ihtha t-chuhkug o heg wa wepo mo d wabsh uhksha nat pi wabsh wo e padch. Kutt wabshaba wo edgithath g ba'ich i s-kehg honshpadag an thahm kahchim ch ed. T ith g Jiosh hab wo t-juni. Kut hab wo masmak mo g si s-kehg kih ch pi hekith wo e padch. 2 Hebaichujj ach si i shahshani nach pi am chum s-hihimimk thahm kahchim wui ch s-behimk hegai s-kehg honshpadag mat g Jiosh ab wo t-mah. 4 Pi ach hab ahgch shahshani machs im hu hab i s-junimk ihtha t-honshpadag ch wabshaba hab ahgch matt oi ab wo bei hegai wechij t-honshpadag an thahm kahchim ch ed k pi d haha wo mukimkamk. 5 Jiosh at am i t-ap'ech ith wehhejed k ab t-mah g Hekia S-ap'ekam Gewkthag mat wo t-wehmajk ch am wo i wohokamch mo haschu ab t-makiog. 6 Pegih, si ach s-ap t-tahtk ch ia chewed, 7 chum achs pi neith g t-kownalig Jesus, nach pi ab s-wohochuth ch hab s-ap himchuth g t-thoakag. 8 Kuch wabshaba ba'ich i chum tatchua matt an wo i t-chihwiapath wehmaj, chum achs wo thagito ihtha t-chuhkug. 9 K wabshaba pi has d sha'i ahga machs hebai hab chu'ig. Ith o ba'ich d i si ha'ichu matt am hab wo juh g tatchuij, chum achs ia wo ha'ichugk ith thahm jewed o an wo wehmajk anai. 10 Wehsijj att hemho wa am wo i t-chehgi Christ wui mat am wo t-a'appem k ab wo i t-mahkhi g t-namkithadag mattp has i masma s-ap hab junihim o pi ap hab junihim hegai chikpan mo ab t-mahkch iia. 11 S-to'o ehbitham hab mahs g Jiosh lothaita. Kuni heg hekaj ab si i ha chehani g hemajkam mat wo hiwigi mat g Jiosh am wo i ha ap'ech e tahgio. S-mahch o g Jiosh mo ith d wohokam mani em-ahgith. Kuni hab chum em-elith mam ahpim hab wa'ap s-mahch. 12 Pi ani hejel chum ni-ha'ichuchuth. K wabshaba mu'ijj ab si has ha elith hegam mo si s-kehg hab mahs pi sha'i mahchk g ha-i'ibthag. Kuni am ha'ichu em-ahgith mamt hekaj wo e nakog k ab wo uhpam i nodagi g ha-ne'oki. 13 Ha'i ash hab ni-elith mani ge pi ni-mahch ch hab ni-junihim. Ni eda wabsh s-gewkam am hab junihim g Jiosh tatchui. Kum ahpim s-mahch mani s-ni-tahtk ch am hab ni-junihim em-wehhejed. 14 E at muhkith g Christ wehs t-wehhejed no pi ab si t-tatchua. Kuch hekaj ab aigo si tatchua ch hemho wa am hab s-junimk g tatchuij. Ith o heg wa wepo matt ahchim wehmaj koi 15 nach pi hahawa pi am hu hab junimk g hejel t-tatchui ch wabshaba heg tatchui am hab s-junimk mat e muhkith k ep e chegito k i wuhsh t-wehhejed. 16 Heki ani hu wa hab ni-elith mani s-mahch mo has chu'ig g hemajkam ch s-mahch mat has wo chum chu'igkath hegai mat d wo Jiosh si Kehshak. Ni wabshaba hemuch ith s-mahchimk ab amjed g Jiosh. 17 Tho si wechij thoakam matp hedai ab i e hemakoj g Christ wehm. Im at hu hab i e juh g hekiukam ha'ichu. T g wechij ha'ichu ab i wuhsh. 18 Jiosh at wehs ith hab juh. Heki ach hu wa d obgaj. T wabshaba g Christ am gawul t-juh mach d hahawa naipijjuj g Jiosh k ab t-chehani matt am wo i ahgahi g ha'ichu ahgaj mat ha'ijj hab wa'ap ab wo i nawojt g Jiosh. 19 Ith o d ha'ichu ni-ahga mat g Jiosh ab chum i ha nawojt g hemajkam k gm hu hab i juh g ha-chu'ichig heg hekaj mat g Christ haschu hab juh ha wehhejed. 20 Neh, kuch si s-hemajim ab em-waith am wehhejed g Christ mamt ab wo i hiwigi g Jiosh mat am gawul wo i em-juh mamt hahawa pi d wo obgajk. 21 Wehs at ab abch g e-alithag g pi ap t-chu'ichig mat heg hekaj ab wo t-abch g Christ s-ap'ekam ahchim matt ab wo i s-wohoch.

2 Corinthians 6

1 Bo chu'ig an Jiosh heki hu o'ohana ed mo hab kaij g Jiosh: Ab ant wo em-kaiham k wo em-tho'ibia mat hekith wo i e ai g tho'ibiathag tash. Pegih neh, e at ai hegai tash mamt wo e tho'ibia. Kuch si s-hemajim am em-ahgith am wehhejed g Jiosh mamt pi wo heki wua g hemajimataligaj. 3 Ch wabsh chum s-ap hab junihim g t-chikpan am wehhejed g Jiosh. Mt hab pi ab hu ha'ichu wo t-abchuth k pi ha'ichukaj an wo e kuh. 4 Kut wo tashok mach d piongaj g Jiosh nach pi ab s-bahbagi nakog g nahnko mahs kudutadag. 5 Mu'ikko am wa t-gewittan ch hebai gd hu si t-kukpa k ch hebai ep t-bibhiad chum s-t-kokthaimkch. Mu'ikko at wabsh i t-ba'iwich g chikpan. Kuch pi sha'i ha kohsh ch pi sha'i t-gegosith. 6 Si ach t-nuhkuth ch si t-mashcham ch ab si s-ha bahbgi g hemajkam ch ab ha wui si s-hemajima ch ab si ha tatchua. Chum ach hekith ahg g wohokam ch chum hekith hab wua g s-ap'ekam ch hekaj cheggia g pi ap'ekam. K g Hekia S-ap'ekam Gewkthag am t-wehmaj ch am chehgithch g Jiosh gewkthag am t-chikpan ed. 8 Ha'ijj o ab si has t-elith ch ha'ijj si t-edawua. Ha'ijj o ab si s-ap has t-ahg ch ha'ijj s-ko'okam has t-ahg. Ha'ijj o hab t-ahg mach s-chu i'attomk. Kuch eda g wohokam ahg. 9 Ha'ijj o pi ab hu t-mahchimk ch eda mu'ijj s-t-mahch. Ha'ijj o hab elith mach ko'ihim. Kum eda s-mahch mach wabsh kia thotha. Chum am hi wa s ko'okam t-sho'igchuth ch wabshaba pi sha'i t-koktha. 10 Ha'ichu o pi ap t-tahhathchuth. Kuch eda chum hekith s-hehgig. Chum achs hi wa pi ha'ichu edgith ch eda s-mahch ch ahgachug mo g Jiosh wehs ha'ichu edgith ch ab t-makiog mach haschu i tatchua. 11 Neh, ith ani wehs ahg si ni-ihbthag amjed nani pi ab si em-tatchua. 12 Pi ani d ahni manis pi ab hu em-tatchua. Tham ahpim ha'i mam pi ab hu ni-tatchua. 13 Bani masma chum em-wehm neok mam d ni-a'aliga. Am g hig wo i ni-chehgith mam ab ni-tatchua hab masma mani ahni hab masma ab em-tatchua. 14 Pi g ab hu wabsh wo si e beh'i ha ab hegam mo pi ab hu ihm g Jesus Christ. Shaht hig masma g s-ap'ekam ab wo e wehnathk g pi ap'ekam? Shaht masma g tonlig ab wo e wehnathk g s-chuhugam. 15 Jiawul o ab wui kehk g Christ. Kumt heg hekaj pi ab hu wo i e hemakoj g pi wohochuththam ha wehm. 16 Ab ach ihm g Jiosh. K pi hab chum chu'ig machs ha'ichu ab ep wo ihmath. Jiosh o am t-eda. K ith heg wa wepo mach d cheopigaj. Neh, bo kaij g Jiosh: Thant wo em-Jioshgak ch am wo em-shahgithk. Kumt d wo ni-hemajkamgak. 17 K hab ep kaij: Am amt wo i e gawulkai ab ha amjed hegam mo pi ni-mahch k pi am hu wo hudawogath hegai mo haschu d pi ap'ekam. 18 Nt ab wo i em-bei mamt d wo ni-a'aligak.

2 Corinthians 7

1 Neh, ith ash hab kaij g Jiosh, ni-wepnag, mat am hab wo t-juni. Kutt hekaj ab hig wo si i t-ap'ech heg amjed mo haschu uamhun g t-chuhkug ch t-thoakag k am wo si i t-thagito Jiosh wui ab si has elithch. 2 Ab g wo si i s-ni-ho'ige'elith. Pi ant hedai sha'i s-ko'okam has juh manis has i masma ha iattogith o manis haschukaj i ha padch o manis haschu i ha ehs. 3 Pi ani heg hekaj hab kaij ihtha manis ab ha'ichu em-abchuth. Am am wa s-mahch mani ab si em-tatchua. Kut pi ha'ichu wo sha'i i t-gawulkai, chum hems g muhkig. 4 Ab ani si has em-elith ch ab si em-hiwig ch si s-hehgig ch am si i ni-gewkaj, chum as mu'i ha'ichu t-kudut. 5 Wehsko o wa an hab chu'ig g kudutadag mant eda am jiwia Macedonia jewed ch ed. Mu'ijj o wa ni-kawhain. Kuni wa am ni-kudut nani ge s-mahch mam has masma hab e junihim. 6 K wabshaba g Jiosh chum hekith ab t-mahk g gewkemhuna mach eda t-kudut. Kunt wa ab i ni-gewkemhu mat am ni-nam g Titus. 7 Heg o si s-ap e tahtk ch am ni-ahgith mamsh chum si s-ni-neithamk ch si pi ap e tahtk heg hekaj mat haschu has e juh am em-shahgith. K hab kaij mamsh ab ha wui gegok hegam mo has ni-ahg. Kuni hekaj ba'ich i si s-hehgig hemuch. 8 Si amsh pi ap e tahtk am ne'okchulithk g ni-o'ohana. Kuni wa chum pi hohho'ith mant heg am em-o'ohani. Kumsh wabshaba pi tash pi ap e tahtk ch am wabsh i ap'ech hegai mash pi ap'e am em-shahgith. Jiosh at hekaj hegai em-sho'igchuthadag. Kuni hahawa si s-ap ni-tahtk. 10 Bo wa masma hekaj g Jiosh g pi ap tahhathkam am t-thoakag ed matt gm hu wo s-ohhoth g pi ap t-chegitoi k wo bei g s-ap tahhathkam. T wabshaba hegam mo pi ab hu e thagitokch Jiosh wui ba'ich im hu hab wo i e juh ab amjed mat ab wo ha ai g pi ap tahhathkam. 11 S-mahch am mat has em-juh g Jiosh mamt pi ap e taht. Am amt i e oithahim k si tatchua mat pi hedai ab hu wo em-abch mams pi ap chu'i. Si amt pi hohho'i hegai mo am pi ap chu'ig em-shahgith k ab si i e shohbi hegaj k si s-gewkam i tatchua mamt am wo i ap'ech hegai mo wa am pi ap'e. Am amt e chehgi moki pi d em-chu'ichig hegai matp am hab chu'ig em-shahgith. 12 Pi ant heg wa'i hekaj am wa em-o'ohani mamt am wo i ap'ech hegai mo wa am pi ap'e. Jiosh o s-mahch mant wa am em-o'ohani mat hekaj am wo e chehgi em-shahgith mam ab si ni-tatchua. 13 Kuch ab i t-gewkemhun mamtsh ab bei g i wehmta. Titus o si s-ap e tahtk mamsh wabsh si s-ap'e. Kuni heg hekaj si s-hehgig 14 nant pi si s-ap has em-ah ab wui. Kumt pi si ni-edawua. Chum ach hekith g wohokam ahg ab em-wui. Kut hab wa'ap am e wohokamch hegai mant am ahgi g Titus ab em-amjed. 15 Ba'ich o ab i si em-tatchua am i chechegitodch mamt si s-ap ab i neith k am si i e nako mamt ab wo s-wohog el. 16 Si am s-ap hab junihim hegai mani has i kaij. Kuni heg hekaj ab si em-hiwig ch si s-hehgig.

2 Corinthians 8

1 Neh, t-wepnag, am ach s-em-ahgithamk mat haschu wa hab juh g Jiosh am ha shahgith g wohochuththam amai Macedonia jewed t am. 2 Mu'i sho'igthag at nakog k wabshaba wabsh si s-hehgig ch si s-ap e tahtk ch am hab wua g mahkig mo eda d wa chum si sho'igkam. 3 Bat juh ihtha mahkig mat he'es i e nako, pej ba'ich i mo he'es i chum e nakog, wabsh hejel hab e elithk. 4 Ab at si t-tai matt wo ha hiwigi mat hab wo juh ihtha k hab masma am wo i ha wehmt hegam mo d Jiosh hemajkamga ch si e sho'igchuth amai Judea t am. 5 Kut ba'ich am hab i juh mach he'es hab i chum ha elith nat pi wehs am i e thagito chikpanaj ed g t-kownalig Jesus Christ mach has masma am ha tashogith. 6 Am at wa heki hu i chikp ihtha g Titus. Kuni am si i chehani mat am wo i em-wehmt k wo nahto ihtha s-kehg chikpan. 7 Si am ge'e ha'ichu ab ap'ethag ch ab si s-wohochuth g Jiosh ha'ichu ahga ch ha'ichu s-mahch ab amjed g Jiosh ch s-kehg neneok ch s-wapagima ch ab si t-tatchua. Kuch heg hekaj hab em-elith mamt wo i ha wehmt hegam mo e sho'igchuth am Judea ch ed. 8 Pi ani ab hu s-gewkam em-chehani mamt hab wo juh ihtha. Ni wabsh chum s-mahchimk mas he'es i ge'ej g em-pihk elithadag. Heg ani hekaj am em-ahgith mat has masma hab juh g i wehmta ihtham ha'i. 9 Am am wa s-mahch mat has masma am chehgi g e-hemajimatalig g t-kownalig Jesus Christ. Thach wabsh sho'igkam. T heg an thagito g e-kihthag ch e-ap'ethag k sho'ig ia ha'ichugkahim matt ahchim ab wo si i bei g ap'ethag. 10 Bani masma hab elith ihtha mamt am wo i nahto hegai mamt wa am hab i chum juh ha'akith. Ahpim amt wa wehpeg si s-hohho'ith k am hab i junihi ihtha i wehmta. 11 Pegih, am g wo i e gewpkath k wo nahto. Bamt wa masma s-wapagimam am wo i nahto mamt wa gd hu i wehpeg hab e juh. 12 Mt wo s-ap e taht k am hab wo juh mamt he'es wo i e nako. T g Jiosh wo wa s-hohho'i. 13 Pi ani hab ahg mams ahpim wo e sho'igch am i ha wehmajch hegam wohochuththam mo e sho'igchuth. Ithani am ha'ichu s-edgith ch hekaj wo i ha wehmt. T hegam am epai wo i em-wehmt mamtp hekith wo i tatchua g i wehmta. Bamt masma am a'ai wo i e wehmt mamt hekith wo i tatchua g i wehmta. 15 Bat masma hab wo e juh hegai mo an hab chu'ig Jiosh heki hu o'ohana ed ch hab chu'ig: Matp hedai he'es wo i edagi ha'ichu, t am wo wa ahijsk mo he'es i tatchua. 16 Titus o si pihk e elith em-hekaj hab masma mani ahni. Kuni heg hekaj ab si i ho'ige'ith g Jiosh. 17 S-ap o e tahtk mani ab ahgith mat am wo i em-wehmt ch am hejel si e nako mat am wo i em-chehgim. 18 Am ani hema ep ahgith mat wo oi g Titus. Ith o s-ap ahgachug g s-kehg ha'ichu ahgaj g Jiosh. K heg hekaj wehsko ab si has elith g t-wepnag. 19 K ith d ha-kehsha mat wo t-oi matt am wo i ui g em-mahkig ha wui hegam mach am i s-ha wehmtamk. Si ach s-t-nen'oith matt s-ap hab wo juh ihtha em-wehhejed. T hab pi hedai has wo t-ahg k wabshaba ab wo has elithath g Jiosh. 22 Pegih, t am wo oi g Titus ihtha t-wehnag. Mu'ikko att am a'appe ab tahnich mat am wo i t-wehmt. Kuki chum hekith s-t-wehmtamk, wahm hemuch no pi ab si has em-elith. 23 Kum s-mahch mo g Titus d ni-wehm chikpantham ch am wo i em-wehmt. K ihtham ha'i mat am wehmaj wo hihi am d ha-chuhchai g t-wepnag ch ab si ha'ichuchuth g Christ. 24 Ab ani si s-ap has em-ahg am ha tahgio. Kumt am wo ha chehgi mam ab si ha tatchua. T hegam mat am i ha chuhcha wo s-mahchk mani g wohokam am ha ahgith.

2 Corinthians 9

1 S-mahch ani mam tatchua mamt wo i ha wehmt g sho'igkam e-wepnag, chum anis hems pi am hu wo em-o'ohani heg amjed. Ia ani wa heki hu si s-ap has em-ahg ha wui ihtham t-wepnag am ha ahgithch mamt heki hu hab i e ah ha'akith mamt am wo i ha wehmt hegam sho'igkam. Ith at mu'ijj am si i ha gewpkai. 3 Kuni ithani am ha ahgith ihtham t-wepnag mat am wo hihi em-wui. Mt wo si e nahtokch heg hekaj e-mahkig. Kut pi wabsh wo heki e wua g s-kehg ni-ne'oki ab em-amjed. 4 Tp hems wo ha'i t-wehmajk g Macedonia t am hemajkam. Kunt wo si ni-el mamtp pi wo e nahtokch mani eda si s-ap em-ahg am ha wui. Mt ahpim hab wa'ap wo si e el. 5 Heg ani hekaj hab elith mo s-ap'e mant am wo si i ha cheha ihtham t-wepnag mat am wehpeg wo hihim k am wo i em-wehm ap'ech g em-mahkig. Bat masma heki hu wo nahtoisk mant am haha wo jiwia. Mt am wo e chehgi mam woho i s-ha wehmtamk g sho'igkam ch pi hab wabsh wua manis ab si em-chehani mamt am hab wo juh. 6 S-mahch am mat mu'i wo nei g ha'Sichu bahithag hegai mat mu'i wo ei g ha'ichu kai. T pi ab hu mu'i wo nei hegai mat pi mu'i wo ei. Pegih, mt hab wa'ap mu'i ab wo nei g ap'ethag mamtp s-ba'ama ab wo ha'ichu ha mah am Jiosh wehhejed. 7 Mt wabshaba hejel hab wo e ah mamt he'ekia ab wo i ha mah. Pi o ab hu t-chehani g Jiosh machs ab ha'ichu wo ha mah no pi s-hohho'ith matt si s-ap t-taht k am hab wo juh g t-mahkig k pi wo ge s-tha'ath. 8 Jiosh at wo e nako mat ab wo em-mah hegai mam haschu i tatchua. Kumt chum hekith wo edgithath mam haschu i tatchua hejel e wehhejed ch am thahm ep wo edgithath mamt am hab wo juh g i wehmta. 9 Neh, bo chu'ig an Jiosh heki hu o'ohana ed: Hegai mat si s-ba'ama ab ha'ichu wo ha mahkath g sho'igkam at chum hekith wo e nakogath mat am hab wo e junihith. 10 Jiosh at ab wo mahkath g ha'ichu kai hegai mat wo e'eshath. T heg amjed ab wo neithath g ha'ichu hugi. Pegih, k hab wa'ap tasho mo s-ba'ama ab t mahkch g i wehmtadag matt am epai ha'i wo i ha wehmt. 11 Chum at hekith s-ba'ama am wo i em-wehmajk mamt wo s-chechojimak. Kut mu'ijj ab wo si i ho'ige'el g Jiosh heg hekaj em-mahkig. 12 Ihtha mamt am hab wo juh at am wo i ha wehmt g Jiosh hemajkamga. T mu'i ho'ige'elig am hab wo juh Jiosh wui. 13 Em-mahkig at am wo wohokamch mam woho ab s-wohochuth g s-kehg ha'ichu ahgaj g Jesus Christ. Kut mu'ijj ab wo si i ha'ichuch g Jiosh 14 k wo e ho'ige'ithahu am em-wehhejed ab si em-tatchuathch no pi g Jiosh ab si em-mahkch g hemajimatalig. 15 Ab att wehsijj wo si i ho'ige'el g Jiosh mat ab i t-mah g pi ha huhugetham thoakag am gahi wuhshanim g e-alithag.

2 Corinthians 10

1 Ha'ijj amsh hab kaij manish s-em-keh'ith wabsh em-o'ohanithch ch antsh ep wo s-hemajimak am ep jiwiak. Pegih, bani wa masma chum si s-hemajima mo g Christ. 2 Am g wabsh wo s-thotholimak. Nt hab pi wo em-keh'el am jiwiak. Ha'ijj amsh hab kaij manish wabsh hejel ni-wehhejed am hab junihim ha'ichu. Ni eda g Jiosh wehhejed hab wua. Nt wo ni-nako mant wo si s-gewkam neo ab em-wui. 3 In ach d thothakam jewed thahm ch wabshaba pi hab masma hab t-junihim mo hegam mo pi mahch g Jiosh. 4 Hegam o ab wui gegok g Jiosh ch ha iattogith ch ab si ha'ichuchuth g hejel ha'ichu e-mahchig. K wabshaba ahchim ab t-mahkch g Jiosh g gewkthag. Kuch heg gewkthagkaj wehs gewito ihtha pi ap'ekam ch pi g hejel t-gewkthagkaj. 6 Pegih, am amt wo i e chehgi mam am wehs e thagitokch ith eda Christ himthag. Nt haha wo s-ko'okam ha namkith hegam mo am wa ha'ichukaj pi am hu wehs i e thagitokch. 7 Ha'i amki ab wabsh thahmjed ha'ichu neith ch hab chum si e elith mam d si Christ pionag. Am g wo si i e oithahim. Ahchim ach hab wa masma d Christ pionag mamtp has i masma hab e elith. 8 Pi ani sha'i si ni-elith am he'es i em-ahgithch ab amjed ihtha gewkthag mat g t-kownalig Jesus ab ni-mah. Ab o ni-mahkch mant hekaj am wo i em-gewkemhun k pi gm hu hab wo i em-juh ab amjed. 9 Pi ani hab ahgch am em-o'ohanith manis wo em-toths. 10 Tp hems hema hab wo chei, “Paul o si s-ta ke'itham kaij ab t-o'ohanithch ch wabshaba ia t-wui jijiwhia ch pi gewkthag. K g ne'okij d wabsh pi ha'ichu.” 11 T eda hegai mat hab wo wa chei wo chum s-mahchk mant hab wa masma hab wo chei hekith am em-wehmajkch mani has i kaij am ni-o'ohana ed. 12 Bamt wo s-mahchk mach pi ab hu sha'i i t-wepnath o t-wepogith hegam mo am si uhgk has e ahg. Wo o wabsh hejel e iattogith no pi hejel am e a'appem ch am hejel e ahg mo has masma. 13 Ahni ani hi am wa'i hugkam ni-a'aga mat he'es ab i ni-mah g Jiosh g chikpan. Kum ahpim d ni-nuhkutha. 14 Pi ant sha'i ba'iwich hegai mo g Jiosh ni-nuhkuthachuth mant am jiwia em-wui k am u'apa g s-kehg ha'ichu ahgaj ab amjed g Christ. 15 Ni hekaj pi sha'i ni-haschuth heg hekaj mo d ha'i ha-chikpan mani am a'aga hegai chikpan mat g Jiosh ab i ni-mah ch wabshaba heg wui am ni-gewkathch mat am wo i ge'etha g em-wohochuthadag. Mt hekaj am epai wo i ni-wehmajk 16 mamt gm hu ba'ich ep wo i ahgachugath g Jiosh ha'ichu ahga mo hebai pi koi hedai am hu ahgachug. Kunt pi hekith hab wo chum chei manis heg hab juh mat wabsh hema hab juh. 17 Bo chu'ig an Jiosh o'ohana ed: Pi at hedai ab hu wabsh wo chum si has elithath g hejel ha'ichu hab e-juni. Heg at ab wo wa'i has elithath Jiosh ha'ichu hab juni. 18 Pi o has d sha'i ahga mas has i elith g o'othham g hejel e-chikpan. Heg o wa'i Jiosh s-mahch machs has i masma hab t-junihim.

2 Corinthians 11

1 Pi o hab chum chu'ig manis hab masma hejel ni-wehhejed wo neokath. Kuni eda ab si em-tatchua am wehhejed g Christ. Kumt hekaj ab wo ni-kaiha. Bam sha masma mam d hohntaj. Kuni si s-em-tha'a hab masma mo g Jiosh mamt wo si e nuhkuth g Christ wehhejed. 3 Am g wo s-chegitok matsh wa pi wohoch g Jiosh hegai wehpeg uwi mash hab chehgig Eve. Jiawul atsh wa s-a'agi iattogi am gahi wuhshanim g wamad. Kuni s-gihug mat hab wa'ap wo em-juh am gahi ha wuhshanim hegam mash chum em-iattogith. Kumtp hems wo s-ohhoth g Christ 4 namsh pi ha hiwgith ch ab ha kaiham. Ab ani em-ahgith hegai mo haschu am i ni-tashogith g Hekia S-ap'ekam Gewkthag ab amjed g Christ. Kumsh eda ha'i ab ha kaiham hegam mash gawul ha'ichu am em-ahgith ab amjed. 5 Ihtham amsh ha'i ab si has ha elith hab masma mo d Christ chuhchai. Ni eda ahni hig woho d kehshaj. 6 M o hi wa woho mani pi am hu i si s-mahch g amogitha. Kuni wabshaba s-mahch g Jiosh ha'ichu ahga ch am em-wui i tashogith. 7 Ha'i amsh hab ni-elith mani pi ab hu ni-ha'ichuchuth pi sha'i em-hiwgithch mams ab wo ni-namkith. Ni eda am hab ni-junihim mant g s-ap'ekam am hab wo em-juni. 8 Tatchua ani g lial ch wabshaba pi tatchua manis wo em-wechhu. T hegam wohochuththam mo am a'ai kihhim Macedonia jewed ch ed ab ni-mamka mani haschu i tatchua. 10 Am ani em-ahgith wehsko Greece jewed ch ed mant pi wo em-hiwigi mams ab wo ni-namkith mani eda am ahgachug g Jiosh ha'ichu ahga em-shahgith. 11 Pi ani heg hekaj hab kaij ihtha manis pi ab hu em-tatchua. Jiosh o s-mahch mani ab si em-tatchua. 12 K wabshaba ha'i hab chum kaij mash hab masma chikpan mani ahni. Ni eda ahni pi ha'ichu em-kowlant. K ihtham hi em-kowlant ch hab em-iattogith. Am ash chum ni-wepo e wua ahni mani d Christ kehsha. Pegih, t hemho wa wo chum ahgath g Jiosh ha'ichu ahga pi ab hu ha'ichu em-kowlantch. 13 K wabshaba pi d wohokam Christ chuhchai ch ha'ichu ha iattogith ch chum t-wepo e wua ahchim mach d si s-wohom Christ chuhchai. 14 Am o wa tasho mat hab masma hab wo e wuath no pi d Jiawul pionag. Jiawul o chum e wepogith g s-ap'ekam anghil. T g piongaj hab wa'ap wo e wepogithath ahchim mach am ahgachug g s-ap'ekam. T wabshaba g Jiosh s-ko'okam wo ha namkith heg hekaj. 16 Ha'i amsh hab ni-elith mani wabsh pehegi neok. Nt eda am wo em-ahgi g wohokam ab amjed g ni-chikpan. Ab g wo kaiham mant has wo chei. 17 Pi o ab hu ni-chehani g t-kownalig Jesus mant hab kaitham wo neokath. 18 Nt wabshaba am hab wo ni-juh no pi mu'ijj wabsh hejel si e haschuth. 19 Kum ahpim hab e elith mam s-chu a'amichuth ch eda wabsh ha hiwgith hegam mo pi ha'ichu a'amichuth 20 mat am hab wo em-juh mo haschu d i ha-tatchui. Tp hems am ha'ichu wo em-wohppo'i o atp s-wihnam an wo em-ui o atp pi ab hu has wo em-elithath o atp s-ko'okam has wo em-ah. 21 Ha'i ash hab ni-elith mani pi hab masma ab em-wui mo hegam nani pi si ni-elith. Pegih, woho o wa mant wo si ni-el mantp hab wo masmak. Hegam o si e haschuth ch e wehhejed neneok. Pegih, nt ahni hab wa'ap ni-wehhejed wo neo. 22 Neh, bash e a'aga mash d Tutuligo ch d Jiosh hemajkamga ch d Abrahambad amjedkam. Pegih, ahni ehp. 23 Bo kaij mo d Christ pionag. Nt ahni hab wo chei mani ba'ich d i si piongaj mo hegam, chum ams hab wo ni-elithath mani wabsh pehegi neok. Ba'ich ani i si s-gewkam chikpan ch ba'ich i mu'ikko ni-kuhpach g Christ wehhejed. Ba'ich amt i mu'ikko ni-gewitta. Mu'ikko ant chum alo muh. 24 Hetaspo at am hugkam ab ni-chu'ichigch g ni-wehm Tutuligo mat waikko gamai humukto ni-gewitta. 25 Waikko at ni-gewitta g Rome t am haha'ichu. Hemho amt ni-ma'ichkwua. Waikko at wachum g wahlko mani an eda. Kuni hemako tash ch hemako chuhug chehmo'im am wi'inoghim shuhthagi ch ed. 26 S-to o ehbithama am ni-wehhejed mani hebai i oimmed. An o hab chu'ig g wi'inthag ch mu'ij g s-chu e'eskam. Ha'ijj o s-ta ehbitham s-ni-keh'ith g ni-wehm o'othham ch gawul mahs o'othham. Am o ha'ichug g s-ta ehbitham ha'ichu kihhim ch ed ch gm hu jegko ch an ge'e shuhthagi thahm. K hegam mo d chum t-naipijju chum s-ko'okam ni-jujju. 27 Mu'ikko ant si gewko k pi ha kohsig ch hebai d bihugimkam ch tonomkam. Mu'ikko ani pi ha ha'ichu hugi ch pi ha kih ch s-wihonagi eniga. 28 Am ba'ich ehp mani wehs tashkaj si ha chegitok hegam mo ab ihm g Christ ch an a'ai hab chu'ig. 29 Ab ani ha wehm nakog ha'ichu hegam mo pi gewpkthag. Tp hema am wo gei pi ap'ekam ch ed, ni ha wehm si ni-kudut. 30 Pi ani hejel si ni-ha'ichuchuth. Tho Jiosh mo am chehgithch g e-gewkthag am ni-eda mani eda d wabsh si sho'ig pi gewkam hemajkam. Ni heg ab wa'i ha'ichuchuth. 31 Jiosh alithag o d ni-kownalig. K g Jiosh s-mahch mo wehs woho ihtha mani em-ahgith. Kunt chum hekith ab wo si hehgchulithath. 32 Neh, hegai kownal mo ab wecho g ge'e kownal Aretas at wa am i ha chuhcha g shonthal ab Damascus kihhim kihjeg t ab mat an wo ni-be k wo ni-kuh. 33 Mt wabshaba an ni-thai washomi ch ed k ab i ni-huduni hothai kolhai amjed. Nt hab hi wa al masma ni-tho'ibia.

2 Corinthians 12

1 Pi at ha'ichu wo ni-ap'et manis wo em-ahgi hegai mani haschu am hab junihim. Heg ant wo wa'i em-ahgi mat haschu g Jiosh am ni-chehgi. 2 Heg at am uhgk i ni-bei e-kihthag wui an thahm kahchim ch ed. Ith at hab e juh gamai gi'ik a'ahithag wehgaj. Pi ani hi wa mahch manis s-wohom an jiwia, aha nat hegai ni-thoakag an jiwia. Heg o wa'i Jiosh s-mahch ihtha. Heg ani hi wa s-mahch mant an i ni-nei Jiosh kihthag ed. 4 An ant s-ta kakaim ha'ichu kah. K g Jiosh pi ni-hiwgith manis am wo ah. 5 Ith ant ab wo si has ah mat g Jiosh am ni-chehgi k pi ahni ab hu hejel has wo ni-ah. Jiosh o ab ni-chehgithch g e-gewkthag nani pi d wabsh sho'ig pi gewkam hemajkam. 6 Kuni mu'i ha'ichu hab wua heg hekaj gewkthaj ch wabshaba pi em-ahgith nani pi pi tatchua mas hedai ab hu wo si has ni-elithath heg hekaj. Heg amt wa'i hekaj ab wo si has ni-elithath mam haschu i neith mani hab wua ch haschu i kah mani hab kaij. 7 Pi o hab mahs manis wo si ni-ha'ichuchuthath heg hekaj mo haschu am ni-chehgith g Jiosh. K g t-kownalig Jesus hiwgith g Jiawul mat wo i ni-mumkichuth k wo ni-kudutath mant pi ab hu wo si ni-ha'ichuchuthath. 8 Waikko ant ab chum si ni-ho'ige'ithahu Jesus wui ab tahnich mat gm hu hab wo i juh ihtha ni-mumkithag. 9 Kut hab masma i nodagi g e-ne'oki, “Ba'ich at i s-ap wo e chehgi g ni-gewkthag ab m-ab mapt wabsh s-ap wo nakogath g e-sho'igthag napt pi pi wo e nako maps hejel wo nako. Heg wa'i ni-gewkthagkaj apt wo e nako.” Neh, kuni heg hekaj si s-hehgig ch wabsh s-ap ni-tahtk mani d wabsh si sho'ig pi gewkam hemajkam nant pi hab masma wo taht g Christ gewkthag. 10 Heg o am chehgithch g e-gewkthag am ni-wehhejed mani hekith i mukialig. Kuni heg hekaj wabsh si s-ap ni-tahtk mani mukialig ch ab nakog g s-ko'ok has ahgadag ch s-wehch ha'ichu ch sho'igchuthadag ch kudutadag wehhejed g Christ. 11 Ab o em-ab mamt ni-wehhejed wo neneokath ab ha wui hegam mash has ni-ahg am em-shahgith. Msh wabshaba pi hab e wua. Kunt hemho wa am ni-wehhejed has wo chei, chum anis pi hohho'ith manis hab wo ni-juh nani pi d wabsh pi ha'ichu. K wabshaba g t-kownalig Jesus ab ni-mahkch g gewkthag am ni-kehshch. Pegih, m haschu ahgch ba'ich ab has i ha elith hegam mash wabsh em-iattogith. 12 Bani wa junihim g s-hasig ha'ichu ch mu'i ha'ichu ab nakog mani wa eda am ahg g Jiosh ha'ichu ahga em-wui. K ith am chehgithch mani d Christ kehsha. 13 S-ap ani hab ni-junihim ab em-wui hab wa masma mani ab wehs ha wui hegam mo an a'ai d Christ ihmtham, heg hi wa mani pi em-hiwgith mams ab wo ha'ichu ni-namkith. Ab g wabsh wo s-ni-ho'ige'ith mani pi em-hiwgith. 14 Ith o d i waikkokam mant am wo i em-chehgim. Kunt pi ha'ichu ab hu wo em-tai nani pi ahpim ab em-tatchua ch pi g em-lialiga. Bam sha masma mam d chu'uchum ni-a'aliga namt pi hemu ab i s-wohoch g ha'ichu ni-ahga ab amjed g Christ k hekaj bei g wechij thoakag. K hab chum mahs mat g jehj wo ha thagio'ithath g chu'uchum e-a'aliga ch pi hab mahs mas g chu'uchum a'ai wo ha thagio'ithath g e-jehj. 15 Am o wa s-ap'e mant am wo hugio g ha'ichu ni-eniga ch ni-thoakag em-wehhejed. Ab ani ba'ich i si pihk ni-elith em-wui mo g jehj ab e-a'aliga ha wui. Kumt heg hekaj ab wo chum si ni-tatchuath. 16 S-mahch am mani pi ha'ichukaj sha'i em-wechun. Kumsh eda ha'i hab kaij manish wabsh em-iattogith 17 ch ui g em-lialiga hejel ni-wehhejed. Pi o woho ihtha. Am ant ha cheha hegam Titus mat am wo hihim k wo i hemapai g lial g sho'igkam ha wehhejed. 18 K hegam wabsh s-ap ha'ichu hab elith ch am hab e junihim mani ahni has i masma. 19 Na'ams ha'i hab ni-elith mani gm hu wabsh chum ni-oan ith hekaj mani wa hab kaij. K eda pi hab chu'ig. Am ani Jiosh tahgio hab kaij hegai mo d Christ tatchui. K wehs hegai mach haschu hab i junihim d i em-wehmtadag. 20 S-gihug ani mant wo cheh am jiwiak mamt gawul wo masmak mani hab masma chum em-tatchuith. Mt ahpim hab wa'ap wo cheh mant ahni gawul wo masmak mam has i chum ni-tatchuith. Ntp hems wo cheh mam ha'i wabsh kia e kawani ch ha'i s-e hehgamk ch ha'i pi babmuistk ch s-chu tha'a ch s-ko'okam has e ahg ch chum si e haschuth ch a'ai e cheggia. 21 T heg wo ni-mah g si edathag am Jiosh tahgio. Kunt wo shoakath mamtki koi gm hu s-ohhoth g pi ap e-chegitoi k pi ap e nuhkuth ch ha ehsith g ha-wehm kihkam ch s-tohntom has e wua ch g pi ap'ekam tatchua.

2 Corinthians 13

1 Neh, s-ko'okam ant ab wo ha namkith g pi ap chu'ijkam am i ep em-chehgimedk. K wabshaba an o'ohadag: Bat wa'i masma wo e wohokamch g ha-chu'ichig mamt gohk o waikajj am wo ah mam neith mat pi ap chu'i. 2 Pi at hedai wo e tho'ibia ab amjed g s-ko'ok e-namkithadag matp pi wo thagito g pi ap e-chu'ichig. Ith ani heki hu em-ahgith mant wa am ep jiwia. 3 Mt haha wo s-ap s-mai mo neok g Christ gahi ni-wuhshanim. Heg at s-gewkam am wo i em-chikpan k am wo chehgi g e-gewkthag em-shahgith. 4 Woho o wa mat e wepogi g sho'ig pi gewpkam o'othham k ab e muhkith kots t ab. T wabshaba g Jiosh am chehgi g e-gewkthag. K g Christ hahawa ep thoakam heg gewkthagkaj. Kunt ahni am i s-mai mani pi ha gewkthag ab i gehshk Christ wui. K wabshaba g Jiosh ab ni-mahkch g gewkthag gahi wuhshanim g Christ mant hekaj s-ap am wo i em-chikp. 5 Am g wo si e mamche k am hejel wo i e a'amich mams am hi wa s-ap hab chu'ig e-wohochuthadag oithch. Mt wo wa chum s-ap s-mahchk mam ab u'ukch g Hekia S-ap'ekam Gewkthag mamtp woho d wohochuththam 6 k hab wa masma wo s-mahchk mani ahni hab wa'ap woho d wohochuththam. 7 Ab ani si ni-ho'ige'ithahun Jiosh wui mamt pi am hu hab wo junihith g pi ap'ekam ch wabshaba g s-ap'ekam am hab wo junihith, chum as wo pi ap ni-ahgath hegam mo s-ni-keh'ith. 8 Pi att wo t-nako matt wo shohbi g wohokam. Hemho wa att am wo wohokamch. 9 Tt wo s-ap t-taht k ab wabsh wo i t-sho'igch mamtp ahpim wo i gewpka am e-wohochuthadag ed. Ab ach si t-ho'ige'ithahun mamt wehs ab wo i e thagito k am s-ap wo i e nahto. 10 T-kownalig Jesus o ab ni-mahkch g gewkthag mant wo shohbi g pi em-ap'ekam. Kunt am i em-o'ohani mamt hekaj am wo i ap'ech mant eda koi jiwia. Nt hab pi wo em-keh'el am jiwiak. Tho Jiosh hab elitha mant am wo i em-gewkemhu. Kuni hab pi em keh'ithamk. 11 Pegih, ni-wepnag, ha'as ant hab wo chei. Am g wo i e nakogi mamt wehs ab wo i e thagito Hekia S-ap'ekam Gewkthag wui. T heg wehs wo i em-ap'ech. Ab g wo i s-wohog elithath g t-mashchamadag ch ab wo i hemakoch g e-wohochuthadag k wo s-ap e tahtk ch e wehm kihkath. T g Jiosh wo em-wehmajk ch wo em-mah g pihk elithadag ch s-ap tahhathkam. 12 Ab g a'ai wo si e tatchuath. Ihtham t-wepnag mo ia kih ash s-em-ho'ige'ith. 13 Ab o si s-em-ho'ige'ith g t-kownalig Jesus Christ. K g Jiosh ab si em-tatchua. K g Hekia S-ap'ekam Gewkthag ab em-makiog g gewkthag mamt ab a'ai e wui wo si s-ap e tahtkkath. Neh, ith ant hab wo wa'i chei.

Galatians 1

1 Ni-wepnag mam am kih Galasia jewed ch ed: Am ant wo i em-o'ohani ahni Paul mat g Jesus Christ am i ni-kei g e-ohg Jiosh wehm. 2 K ia ha'i i ni-wehmt g t-wepnag ch ab s-em-ho'ige'ith. 3 Ab o wa s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 4 Jesus Christ at ab s-wohog el g e-ohg k e sho'igchuth k ab muh kots t ab mat gm hu hab wo i juh g pi ap t-chu'ichigk ab wo i t-wuwhas ab amjed g pi t-ap'ethag. T g Jiosh ab i wuhshath muhkig amjed. 5 Pegih, tt heg hekaj ab wo si has elithath g Jiosh. 6 Jiosh o ab t-mahkch g e-ho'ige'ithadag am gahi wuhshanim g e-alithag. Kunt si ni-toths mamtsh s-hohtam thagito g s-kehg ha'ichu ahgaj k ab s-wohoch g gawul ha'ichu ahga. 7 K heg pi d sha'i tho'ibiathag ahga. Hegai wa'i Jiosh ha'ichu ahga o d tho'ibiathag ahga. K eda ha'i hemajkam gawul ha'ichu am chum em-ahgith ch heg hekaj ab i chum em-ga'agwulkath ab amjed g Jiosh ha'ichu ahga. 8 T wabshaba g Jiosh am wo ha lothait k s-ko'okam wo ha namkith. Neh, mantp hems ahni o chum hems g anghil gawul ha'ichu wo em-ahgi, t g Jiosh hab wa masma wo t-lothait k s-ko'okam wo t-namkith. Heki am hu ab kaiham g Jiosh ha'ichu ahga ch am wa chum s-mahch mo has chu'ig. 10 Tp hems pi wo hohho'i g hemajkam mani has kaij. Ni eda pi hab ahgch hab kaij mas g hemajkam wo s-hohho'i. Jiosh o s-hohho'ith mani ahgachug g ha'ichu ahgaj. Thani Jiosh alithag pionag. K hab chum chu'ig mant heg ab wo s-wohog elithath, chum as has wo ni-el g hemajkam. 11 Mt wo chum s-mahchk mo pi ab hu d hemajkam ha amjedkam ihtha s-kehg ha'ichu ahga mani am em-ahgith. 12 Pi at hedai o'othham ni-ahgi o ab ni-mashcha. Tho Jiosh alithag mat ab mahsko wua ni-wui. 13 Thani Tuhligo. Kumki heki hu kah mani wa hab masma ab ihm g Jiosh mo g ni-wehm o'othham ch si ha sho'igchuth hegam mo ab ihm g Jesus ch am chum s-keshwuimk g ha-hehemaptha. 14 Thani wa si s-has ha'ichu am t-himthag ed mu'i ha ba'iwechkim g ni-wepo ge'edam nanid pi ba'ich i s-gewkam oith g t-himthag. 15 T wabshaba g Jiosh s-ni-ho'ige'ith k am heki hu i ap'ech mant eda koi mahsi mant d wo piongajk. 16 T am hebai i cheka. T am hahawa mahsko wua g e-alithag ab ni-wui mant wo ahgachugath g s-kehg ha'ichu ahgaj ab em-wui ahpim go'ol hemajkam. Kunt pi hedai i wui hih mas wo ni-tashogi g Jiosh ha'ichu ahga. 17 Ab o thadha g Jesus Christ chuhchai Jerusalem kihhim t ab am Judea jewed ch ed ch am ahgachug g ha'ichu ahgaj. Nt wabshaba pi am hu sha'i hih manis hekaj wo ha neith k wo ha wehm neo. Im ant hu hab wabsh hih Arabia jewed wui k am hahawa ep uhpam hih Damascus kihhim wui. 18 Am o d i waik a'ahithag thahm, nt am hih Jerusalem wui k ab ha'ichu wo kakke g Peter k am wehmaj thakahim gohk thomig ab. 19 M ant wa'i hemako ep nei g Jesus kehsha. K heg d James ch d wehngaj g Jesus. 20 Jiosh o s-mahch mo d wohokam ihtha mani em-ahgith. 21 Am i thahm, mant am hahawa ep hih Syria jewed wui ch Cilicia jewed wui. 22 K eda pi ni-mahch hegam mo ab ihm g Jesus ch am kih Judea jewed ch ed. 23 Ihtham wabsh kah mo ha'i hab kaij, “Hegai mo wa t-sho'igchuth o am hahawa ahgachug ihtha Jesus ha'ichu ahga mo wa heki hu chum s-keshwuimk.” 24 Neh, bash kaij ch ab si ihm g Jiosh am i kaiok mat am gawul i ni-juh.

Galatians 2

1 Am him k am d i wehst-mahm a'ahithag, nt am hih Jerusalem wui wehmaj g Barnabas. Tt am hema i bei g gawul mahs o'othham. K ith hab chehgig Titus. 2 Jiosh o wa ab ni-chehgith mant am wo him k wo ha nei hegam mo am d ha wanimedtham g Jesus ihmtham. Kutt am ha wehm t-nam. Ni am ha ahgith mani haschu i ahgachug am ha-shahgith g gawul mahs hemajkam nani pi s-gihug matp hems ha'i wo padch g ni-chikpan. 3 K am ha'i ha'ichug hegam mo chum s-em-wupulshpamk ahpim gawul mahs hemajkam hab em-elithch mant hemho wa am hab wo junihith g heki hu t-himthag ahchim Tutuligo. Ihtham o pi woho wohochuth g Jiosh ha'ichu ahga ab amjed g Jesus ch wabsh am thadhak ch chum mamche machs haschukaj pi am hu oithch hab junihim hegai heki hu t-himthag. Am o t-wehmaj g Titus. K ihtham ab si t-ahgith matt hemho wo wa pahl hikuch. Kuch wabshaba ab ha wui gegok. K hegam mo am d ha wanimedtham t-wepo hab elith. Neh, bach wa masma s-ap nuhkuth ihtha s-kehg ha'ichu ahgaj g Jiosh mach am em-wui ahgachug. 6 Tho wabsh ni-wehm wohochuththam hegam mo am d ha wanimedtham ch pi ha'ichu wechij ab hu ni-ahgith. Pi ani si has ha elith. Wehsijj ach t-wepo d haha'ichu am Jiosh tahgio. 7 K hegam hab kaij matki g Jiosh am hab wa'ap i ni-kei hab masma mat am i kei g Peter. Heg o d kehshaj ch am ahgachug g s-kehg ha'ichu ahgaj ha wui g Tutuligo. Ni ahni hab wa'ap d kehshaj ch am ahgachug ha wui g gawul mahs hemajkam. K g Jiosh wepo ab t-mahkch g gewkthag. 9 Bamki ha elith hegam James ch Peter ch John mo d ha wanimedtham. T ihtham am wohokamch mat g Jiosh ab ni-mah ihtha chikpan k t-nowi-bebhe. Kutt am i t-ap'ech ab t-wui mat hegam am wo ahgachugath g Jiosh ha'ichu ahga Tutuligo hemajkam ha wui. Nt ahni hi g Barnabas wehm gawul mahs hemajkam ha wui wo ahgachugath. 10 K hegam hab t-ahg matt wo i ha wehmajk hegam mo d sho'igkam am ha shahgith. Am ani wa heki hu hab junihim ch hekaj si chikpan. 11 Am ani wa kih Antiok kihhim t am ch am ha ahgith g Jiosh ha'ichu ahga. T am jiwia g Peter k am ha wehm oimmed hegam go'ol hemajkam mat ab i s-wohoch g s-kehg ha'ichu ahgaj g Jiosh. T am hahawa ha'i t-wui thatha g Tutuligo ab amjed g James. K heg i thahm g Peter pi an hu ha wehm oimmed g go'ol hemajkam ch pi ha wehm e gegosith no pi s-ehbith mat has wo chei hegam Tutuligo. 13 K hegam ehp mo hab wa'ap d Tutuligo hab wa'ap e wua mo g Peter, chum wa hems g Barnabas. 14 Ni am ha neith mo pi am hu sha'i ap hab junihim g e-wohochuthadag ch hab kaij ab wui g Peter am ha kaichuthch, “Neh, Peter, thap Tuhligo ch wabshaba hahawa pi am hu hab junihim hegai t-himthag mo wa g Jiosh ab t-chehani. Pegih, p haschu ahgch hab e elith mapt pi wo ha hajunimak g go'ol hemajkam, t ho'ip am hab i junihi g t-chehanig?” 15 Ahchim Tutuligo ach wa hab chum t-elith mach pi hab masma pi ap'e mo g go'ol hemajkam. 16 T wabshaba am i t-chehgi g Jiosh mat pi hedai wo e nako mas am tahgio hejel wo i e ap'ech am hab junihithch g chehanig. Bo d elithaj matt ab wo i s-wohoch g ha'ichu ahgaj k ab wo i hiwigi g Jesus Christ. T heg am tahgio wo i t-ap'ech. Pegih, tt heg am hab wa'i juh k am i t-ap'ech. 17 Am att i s-mai mach d pi ap chu'ijkam am i s-mahchk ab amjed g Christ. Pi at heg hab t-juh machs d pi ap chu'ijkam 18 k wabshaba am i t-ap'ech Jiosh tahgio. Kutt d wo pi ap chu'ijkamk mattp wo chum s-t-apchutham g chehanigkaj. 19 Chehanig o s-hasig. Kutt pi wo t-nako machs am oithk hab wo t-junihith ch am wo i t-ap'ech. Nt heg hekaj am i ni-thagito Jiosh wui mat am wo i ni-ap'ech k am hahawa d wo thoakamk wehhejed. 20 Jiosh alithag o ab si pihk e elith t-hekaj ch ab nako g s-ko'ok muhkig ab kots t ab am t-wehhejed mat heg hekaj ab wo i t-mah g wechij thoakag. Kuch heg hekaj ab hiwig ch d thothakam am nenaj ed ch am wehhejed. 21 T wabsh wo e nahnkogi g Christ muhkig matp g o'othham wo e nako mas wo s-ap'ek am Jiosh nena ed heg wabsh hekaj mo hab junihim g chehanigaj. K wabshaba pi hab chu'ig. Ab o t-wui him g Jiosh ho'ige'ithadag heg hekaj Christ muhkig. Kutt pi wo thagito g ho'ige'ithadaj ab hiwigch g Christ.

Galatians 3

1 Heki am hu kah mat ab muh g Jesus Christ kots t ab am em-wehhejed. Kum d pi ha'ichu a'amichuththam mamt ab wo ha kaihamath hegam mo em-iattogith ch hab kaij mamt hab wo junihith g t-chehanig ahchim Tutuligo. 2 Ab amt i s-wohoch g Jiosh ha'ichu ahga. T g Jiosh ab em-mah g Hekia S-ap'ekam Gewkthag. 3 Kut heg s-ap i shonwuich g em-wechij thoakag. Pegih, m haschu ahgch hahawa pi hiwig mat ba'ich wo i himath g em-thoakag. Pi amt wo e nako mamt s-ap wo nahto g e-thoakag g hejel e-gewkthagkaj. 4 Mu'i am ha'ichukaj e sho'igchuth am wehhejed g Jiosh alithag. T g em-sho'igthag wo e nahnkogi mamt wo sha thagito g Jiosh alithag. 5 Ab amt si i s-wohoch g s-kehg ha'ichu ahgaj g Jiosh. T heg hekaj ab em-mah g Hekia S-ap'ekam Gewkthag mat wo em-wehmajk k hab ep wua g s-hasig ha'ichu am em-shahgith. Pi at hab ahgk hab e juh ihtha mams am hab si junihim g Tutuligo ha-chehanig. 6 An o hab chu'ig Jiosh o'ohana ed: Abrahambad at ab i s-wohoch g Jiosh. K g Jiosh heg hekaj hab masma ab neith mo s-ap'e. 7 Kum ahpim gawul mahs hemajkam mam ab s-wohochuth g Jiosh ba'ich i wepo masma mo g Abrahambad ki hegam mo d si amjedkamaj ch pi ab hu wohochuth. Heg o wa wepo mam ahpim d Abrahambad amjedkam. 8 Kekelibad Jiosh ha'ichu i tashogiththam o heki hu s-mahch ch an o'oha mat g Jiosh am hab wo ha juh g go'ol hemajkam mat ab wo i s-wohochuth k wo i e ap'ech am tahgio. Kush hab kaij g Jiosh am wui g Abrahambad: Nt wo s-ha ho'ige'el wehs nahnko mahs hemajkam matp hedam ab wo i s-ni-wohoch hab masma mant ahpi hab m-juh. 9 Pegih, t wa woho ab wo bei g Jiosh ho'ige'ithadag hegam matp hedai ab wo i s-wohoch g Jiosh hab masma mat g Abrahambad hab e juh. 10 An o hab chu'ig Jiosh o'ohana ed: Matp hedai pi am hu wehs oithch hab wo e junihith g Jiosh chehanig ch heg amjed wo bei g s-ko'ok e-namkithadag. K hab mahs mat pi hedai wo sha'i e nako mas wehs oithch hab wo e junihith. T heg hekaj wehsijj wo bei g s-ko'ok e-namkithadag. 11 K wabshaba an o'ohanas: Jiosh at am wehs wo i ha ap'ech hegam mat ab wo i s-wohochuth k ab wo i hiw. T ihtham wo bei g pi ha huhugetham thoakag. K heg hekaj tasho mat pi hedai wo i e ap'ech am chehanig oithch hab e junihithch. 12 Pi am ab hu hiwig g Jiosh mamtp wabsh hejel wo s-e apchutham. An o o'ohanas matt hemho wa wehs oithch hab wo t-junihith g Jiosh chehanig ch hab wo bei g pi ha huhugetham thoakag. 13 Kuch wabshaba wehsijj d pi ap chu'ijkam. K ab t-wui him g s-ko'ok t-namkithadag. T g Christ ab bei t-wehhejed gm hu i e gawulkathk ab amjed g Jiosh no pi an o'ohanas: Gm at hu i e gawulkai ab amjed g Jiosh matp hedai ab e naggia uhs t ab. 14 Ith at hab t-juni g Christ. T g Jiosh heg hekaj ab wo t-mah g Hekia S-ap'ekam Gewkthag mattp hedai ab wo i s-wohochuth k ab wo i hiw. Ahpim gawul mahs hemajkam amt hab wa'ap masma wo bei hegai mash wa g Jiosh am ahgith g Abrahambad mat ab wo t-mah. 15 Tho t-himthag matp ha'i ha'ichu ab a'ai wo e ah'ath, t pi hedai wo e nako mas am hejel gawul wo juh. 16 Pegih, k ab si ah'ath g Jiosh g Abrahambad mat wo ha tho'ibia g nahnko mahs hemajkam am hema gahi wuhshanim g Abrahambad amjedkam. Kuki heg hab ahg Christ. 17 Kut pi sha'i gawul juh g ha'ichu e-ahga g Jiosh mat hekith ab i t-mah ahchim Tutuligo g t-chehanig mo ithani d wa'i gi'ik siant waikko wehst-mahm (430) ahithag amjed. 18 Jiosh at wo ha tho'ibia g hemajkam hab masma mat tho'ibia g Abrahambad mat wa hab masma ab ha ah'ath ha'ichu. Ith at wo em-tho'ibia mamtp ab wo i s-wohoch, k pi hegai chehanig. 19 K wabshaba am wa ha'ichu wehhejed s-ap'e hegai chehanig. Heg o hekaj tasho mo haschu d pi ap'ekam. K hab d elithaj g Jiosh matt an wo u'ukchith ihtha chehanig am hugkam mat in wo i wuhsh g alithaj. Am ash ha ahgith g Jiosh g chehanig am gahi wuhshanim g anghil. 20 Kush hema g o'othham am ha wehhejed neok g Jiosh ch hemajkam matsh eda am i ap'ech hegai chehanig. Sh wa eda g Jiosh si hejel am ahgith g Abrahambad g ha'ichu e-ah'atha. 21 Pi o ab hu wui kehk g Jiosh ha'ichu ah'atha g chehanigaj. Mattp wo sha t-nako machs wehs oithch am hab wo t-junihith g Jiosh chehanig, t wabsh wo t-hiwigi g Jiosh matt heg hekaj wo t-tho'ibia. K wabshaba pi hab sha'i mahs. Heg at hekaj wo t-tho'ibia g Jiosh mo has i masma ab ha'ichu t-ah'ath. 22 An o hab chu'ig Jiosh o'ohana ed mo wehs hemajkam d pi ap chu'ijkam ch pi wo sha'i e nako mas hejel wo e tho'ibia. T heg hekaj wo ha tho'ibia g Jiosh k ab wo i ha mah g pi ha huhugetham thoakag hegam mat ab wo hiwgath g alithaj. 23 An o wabsh t-shohbithch g Jiosh g e-chehanigkaj am hugkam mat ab i t-chehgi matt ab wo i s-wohoch g ha'ichu ahgaj k wo t-tho'ibia. 24 T-mashchamahim o g e-chehanigkaj matt has wo chum masmak ch ab wo ai matt ab wo i hiw g alithaj. Kut heg am wo i t-ap'ech Jiosh tahgio mattp ab hiwig. 25 K hahawa pi d ihtha chehanig ch wabshaba d Jiosh alithag mo ab i t-chehgithch matt has wo chum masmak. 26 E amt pahl wapko mamt am wo e chehgi mamt ab i s-wohoch g Jiosh ha'ichu ahga k ab bei g alithaj. Kum d hahawa a'aligaj g Jiosh ch hab wo masmak mo g si alithaj. 28 K g Jiosh wehs t-wepo masma t-neith ahchim mach ab s-wohochuth. Ahpim gawul mahs hemajkam am t-wepo d ha'ichu ahchim Tutuligo am Jiosh tahgio. K g nenehol t-wepo d ha'ichu ahchim mach pi d nenehol. K g u'uwi t-wepo d ha'ichu ahchim chechoj. Wehsijj ach ab i t-hemakochuth ahchim mach an u'ukch g Jesus Christ. 29 Kuch d hemajkamgaj ch heg hekaj hab wa'i masma mach d amjedkamaj g Abrahambad ch wo bei hegai mat haschu g Jiosh am i ap'ech wehhejed.

Galatians 4

1 Chum as wehs d wo enigajk g ali g ohgaj ha'ichu eniga, t eda pi wo bei t ho'ip am i ge'etha. 2 Mt wo nuhkuthath g ali ch ep wo nuhkuthath hegai mat haschu d wo enigajk am hugkam mat wo ai g e-ge'elig. 3 Kuch wa ahchim hab wa masma mo g a'al nat pi g Jiosh kei g e-chehanig mat hekaj wo t-nuhkuth am hugkam matt ab wo i s-wohoch g ha'ichu ahgaj. 4 T am i s-ap e ai, t g Jiosh ab i ah'ath g e-alithag. Kut ab mahsi k wepo e juh g hemajkam k am i ge'elhim k am hab junihim hegai chehanig mo g Jiosh ab ha mahkch g Tutuligo. 5 Ab ach wa t-abchuth g t-chu'ichig ab chehanig wecho. Kut ia jiwia g Jiosh alithag jewed thahm mat wo t-tho'ibia am t-wehhejed nakogk g s-ko'ok t-namkithadag matt d haha wo a'aligajk g Jiosh. 6 T g Jiosh heg hekaj ab t-mah g Hekia S-ap'ekam Gewkthag mat wo t-wehmajk. Kuch hab d a'aligaj ch ab ihm ch hab kaij, “Jiosh t-ohg” . 7 nach pi hahawa pi d wabsh piongaj. T ab wo i t-mah g Jiosh mat haschu i ap'ech am t-wehhejed mach d a'aligaj. 8 Heki am hu pi mahch g Jiosh ahpim go'ol hemajkam ch ab ha'ichu e jijoshchuth ch ab ha ihm mo eda pi d sha'i hegai thoakam Jiosh. 9 Pegih, m haschu ahgch am uhpam ha wui ep s-hihimimk mamt d ep wo ha-neneholigak hemu mam eda am wa chum s-mahch g Jiosh. Pi at wo e nako hegam mas am wo i em-wehmajk. 10 Kum haschu ahgch si has elith g ha'ichu tash mo hekith i e a'ahe ch am hab wua g piast. Pi amt heg hekaj wo i e ap'ech am Jiosh nena ed. 11 Si ani s-em-gihug ch am em-chegito mamt hu wo i s-chegitok hegai s-kehg ha'ichu ahgaj g Jiosh mani wa am em-ahgith. 12 Am g hab wo masmak mani ahni nani pi hahawa pi ab hu wecho g heki hu t-chehanig. 13 S-mahch am mo wa ha'ichu pi ni-ap'e mant wa am jiwia k am em-ahgith ab amjed g Jiosh alithag. 14 M wa eda pi sha'i s-ni-tamhog ch ab i s-ni-ho'ige'ith k i ni-wahkith k am ni-nuhkuth heg wa wepo mantp d hema anghil o d Jiosh alithag. 15 Ab o wa si ge'ej g pihk em-elithadag mamtsh chum hems g e-wuhpui wo ni-mah heg hekaj pi ni-ap'ethag. 16 Kut haschu has e juh mam heg amjed hab ni-elith manis s-em-keh'ith ahni mani am chum em-ahgith g wohokam? 17 Hegam mo hab chum em-elith mamt am oithk hab wo e junihith g chehanig ch hekaj am wo i e ap'ech Jiosh tahgio o hab wabsh e wua mo ab em-tatchua ch wabshaba em-iattogith no pi gm hu hab i s-em-junimk ab ni-amjed mamt ab wo si ha ha'ichuchuthath. 18 M o wa s-ap'e mat ab hema wo em-tatchuath ha'ichu s-ap'ekam wehhejed. Bani wa ni-tahtk chum anis pi am hu em-wehmaj. K wabshaba ihtham em-tatchua g ha'ichu pi ap'ekam wehhejed. 19 Am am wa s-mahch mo g je'e mu'i ha'ichu nakog g e-a'aliga ha wehhejed ch ab a'ahe mat wo ha ge'ege'el. Pegih, ni ahni hab wa masma mu'i ha'ichu nakog am em-wehhejed mant ab wo em-ahijithaj mamt hab wo masmak mo g Jiosh alithag. 20 Mant hu am wo i em-wehmajk hemu ch wo em-wehm a'aga ihtha ha'ichu nani pi s-em-gihug. 21 M haschu ahgch hab chum e elith mamt am wo i e ap'ech Jiosh tahgio am oithch hab e junihithch g chehanig? Pi amt wo sha'i e nako mamt am hejel wo i e ap'ech. 22 Ith ant am wo em-tashogi ab amjed g Jiosh heki hu o'ohana. An o hab chu'ig mash gohk a'alithag g Abrahambad. Hema ash d madaj g Hagarbad ch hema d Sarabad mad ch hab chehgig Isaac. Sarabad ash d Abrahambad hohnig. Kush g Hagarbad d ha-neholiga. 23 Pi atsh koi bei g e-mad d Sarabad k eda heki hu okst. Sh wabshaba g Jiosh am ha ahgith mat wo ge madt. Kush ihtha madaj d ha-aliga. Sh wabshaba g Hagarbad mad d ha-neholiga hab masma mo g je'ej. 24 Sarabad ani wepogith g s-kehg ha'ichu ahgaj g Jiosh. Ch ahchim mach ab s-wohochuth wepogithas g Sarabad mad nach pi woho d a'aligaj g Jiosh. Hagarbad ani wepogith hegai chehanig mat ab e mah Sinai tho'ag t ab am Arabia jewed ch ed. Wehs hegam mo chum s-e apchuthamk am oithch hab e wuathch g chehanig o wepogithas hegai mo d nehol mad no pi pi woho d Jiosh a'aliga. Mu'ijj o hab wa chum e wua g ni-wehm Tutuligo ch hab an e u'ukch hab masma mo g nehol. Ab Jerusalem t ab am ab si hiwig g chehanig. K wabshaba an t-thahm hab chu'ig g wechij Jerusalem. Kuch heg wui t-gewpkathch wehsijj ahchim matt ab i s-wohoch g Jiosh k am tahgio i t-ap'ech. 27 An o hab chu'ig Jiosh o'ohana ed mash hab kaij g Jiosh: Si g s-hehgigk ahpi uwi mapt pi hekith sha'i madt napt pi ba'ich i mu'i wo a'aligak mo hi hegai mat heki hu madt. 28 Pegih neh, Isaacbad ash d si ha-aliga hab masma mash am ha ahgith g Jiosh. Ch ahchim hab wa masma d a'aligaj g Jiosh. 29 Heg ash wa sho'igchuth g Isaacbad mash pi d si ha-aliga. K hemuch hab wa'ap t-sho'igchuth hegam mo pi d a'aligaj g Jiosh. 30 An o o'ohadag mash hab kaij g Jiosh ab Abrahambad wui: Gam g hu i ha wuwhasith ihtham e-neneholiga. Pi at wo enigak g m-eniga am wehmaj hegai mo d madaj g m-hohnig. 31 Pegih neh, ni-wepnag, pi ach hab masma mo g ha-neholiga mad ch wabshaba hab masma mo g si ha-aliga

Galatians 5

1 T-tho'ibia at g Christ. S-wihnam g an wo u'ukchith g e tho'ibiathag ch pi ab hu ep wo chum i hiw g chehanig mams hekaj wo e tho'ibia. 2 Mamt wo sha e pahl hikuch hab elithch mamt hekaj wo e tho'ibia am oithch hab e junihithch g chehanig, k d si shel mamtki wabsh thagito g e-wohochuthadag k pi wo e tho'ibia. 3 Nam woho hab e elith mamt am wo i e ap'ech Jiosh tahgio g pahl hikuchkakaj? Nt wo em-ahgi mamt hemho wa am wehs oithk hab wo e juh g chehanig mamtp heg hekaj am wo i chum e ap'ech. 4 Am o s-em-apchuthamk g Christ. Mt wabshaba gm hu hab wo i juh mamtp hejel chum s-e apchuthamk am oithch hab e wuathch g chehanig. 5 Ab o t-mahkch g gewkthag g Hekia S-ap'ekam Gewkthag. Kuch hekaj ab wui t-gewpkathch mat g Jiosh s-ap am wo i t-ap'ech e tahgio. 6 Pi o hi wa has chu'ig matp hema heki hu wo e pahl hikuch o pi wo e pahl hikuch. Tho wa'i ihtha mamt ab wo i s-wohoch g Jiosh ha'ichu ahga k wo chehgithch g si pihk e-elithadag am i ha wehmajch. 7 S-ap am wa chum s-wohochuth g wohokam. Tsh wabshaba am ha'i thatha em-wui k im hu hab i chum em-wanchshulig. 8 Pi o d Jiosh mo im hu hab i em-wanchshulig ab amjed g wohokam. 9 Bamtp elith mo d wabsh al chum ha'ichu ihtha. T eda wehs wo padch g em-wohochuthadag ch em-thoakag hab masma mat g jewajithakud wehs wo jewaj g wahga. 10 Bani em-elith mam d wabsh kia ni-wehm wohochuththam ch pi gm hu wo i e nohnogi ab amjed g Jiosh ho'ige'ithadag. T g Jiosh s-ko'okam wo ha namkith hegam mo hedai im hu hab i chum em-wanchshulig. 11 Ha'i o hab kaij mani ahni ahgachug mamt am hab wo junihith g t-chehanig ch hekaj wo s-ap'ek am Jiosh nena ed. T wabshaba pi wo chum ni-mu'am g ni-wehm o'othham mantp heg wo ahgachugath. Heg o hekaj s-ni-mu'amk mani ahgachug mat g Jiosh alithag ab muh kots t ab mat hekaj am wo i t-ap'ech Jiosh nena ed. 12 Mat hu wo i em-thagito hegam mo hab em-elith mamt wo e-pahl hikuchk k hekaj wo s-ap'ek am Jiosh nena ed. 13 Pi at hab ahgk ab i em-wai g Jiosh mat gd hu wabsh wo i si em-thagsh heg hekaj e-chehanig k wabshaba hab ahgk mamt d wo a'aligajk. Pegih, mt heg hekaj ab wo si pihk e elithath ab a'ai e wui ch pi wabsh g hejel e-tatchui hab wo junihith. 14 Bo chu'ig g Jiosh o'ohana: Si g wo pihk e elith wehs ha hekaj hab masma mam hejel si pihk e elith. Kumtp hab wo wuath ihtha ch heg wo wa wepok mam wehs oithk hab e wua g chehanig. 15 S-e g wo nen'oithk mamt pi a'ai wo s-e keh'ithath namt pi hab wa masma wo padch g e-nawojthag k a'ai wo e padch. 16 Pi o wepo chu'ig g o'othham tatchui ch Jiosh tatchui. Kumt ab wo e thagitokchith Hekia S-ap'ekam Gewkthag wui. T heg ab wo em-shohbithath ch wo i em-wanimedath. Mt hab pi hab wo junihith g hejel pi ap e-tatchui. 18 Pi at ab hu ha'ichu wo em-chu'ichigch g chehanig mamtp woho am wo i e thagitokchith Hekia S-ap'ekam Gewkthag wui. 19 M o tasho g wabsh o'othham tatchui. Hegam mo hab wua g hejel e-tatchui atp hems wo'iwup hema i wehm mo pi d ha-wehm kihkam o hab wua g nahnko mahs s-uam ha'ichu. 20 Hegam mo pi mahch g Jiosh o gawul ha'ichu chum jioshchuth o ha'i atp hems ha hihoin o atp hems a'ai e cheggia o a'ai s-e hehgamk o babgat o nahnko ha ahg o s-chu tha'athag o a'ai e ga'agwulkath. 21 o s-behimk g ha'ichu ha-eniga o nawkko'o o s-tohntom has e wua. Hegam mo hab masma ha'ichu hab wua at pi am hu wo i wahp Jiosh kihthag ed. 22 Kuch wabshaba pi hab mahs ahchim mo am t-eda ulinig g Hekia S-ap'ekam Gewkthag. Heg o am chikpan g t-thoakag. Kuch hab si pihk t-elith ha hekaj ch si s-ap t-tahtk ch ab wabsh i s-thotholima ch s-t-tahtk ch nenida mo haschu g Jiosh ap'echuthch t-wehhejed ch s-ha ho'ige'ith g hemajkam ch s-ap'e ch s-hemajima ch wabsh si t-shohbithch ch am hab wo juh mach has i kaij. Pi o an hu sha'i shohbithch g chehanig hegai hab mahs ha'ichu. 24 Ahchim mach d Christ hemajkamga att hab i t-ah matt pi am hu hab wo junihith g hejel t-tatchui. 25 Hekia S-ap'ekam Gewkthag at ab i t-mah g wechij thoakag. Tt heg hekaj ab wui wo t-thagitokchith mat s-ap wo t-wanimedath. 26 Pi att wo ge t-haschuthath ch pi a'ai wo t-kudutath ch pi wo chu hehgamk.

Galatians 6

1 Matp hema pi ap ha'ichu hab wo juh g em-wehm wohochuththam, mt am wo i gewkemhu mat am wo i e ap'ech ahpim mam am e thagitokch Jiosh wui. Kumt wabshaba wo e sho'igchuth k si s-hemajim am hab wo juh ihtha heg hekaj mamtp hems hema ahpim haha wabsh pi ap ha'ichu hab wo juh. 2 Nam hig woho am oithch hab s-e junimk g chehanig? Pegih, k ab t-chehani g Jiosh alithag matt am a'ai wo i t-wehmajk. 3 Pi g am wo chum si e ha'ichuchuth. Thach wabsh sho'igkam ch wabsh hejel wo t-iattogi mattp ab wo chum si t-ha'ichuch. 4 Pi att hab wo chei machs ba'ich i s-ap hab wua g t-chikpan mo hema ehp. Tho wabsh hehe'ejel t-chikpan hegai mach hab wua. Kutt heg wo wa'i a'appe hejel t-chikpan k wo si s-ap t-taht mattp s-ap hab wo wuath. 6 K ab em-ab mamt ab ha'ichu wo ha mah hegam mo am em-mashcham g Jiosh ha'ichu ahga mamt hekaj am epai wo i ha wehmt. 7 Pi amt wo e nako mamt wo iattogi g Jiosh. Hejel am e iattogith mamtp hab elith mat pi wo em-namkith g Jiosh heg hekaj mam haschu hab i junihim. Nat hig pi wo ui g eshtham hegai hab mahs kai mat haschu wo ei? Pegih, k hab wa masma am t-thoakag wehhejed. 8 Mt wo s-ko'okam e namkith am i muhk mamtp hab wo sha juh g hejel e-tatchui k wabshaba chum hekith an wehmaj wo kihkath g Jiosh mamtp wo e thagito Hekia S-ap'ekam Gewkthag wui k hab wo junihith g Jiosh tatchui. 9 Pi g sha'i ha'asa hab wo junihith g s-ap'ekam. Jiosh o am wa ap'echuthch g tash mat ab wo i em-mah g em-gehgewadag. 10 Ab g wehs wo i s-ha ho'ige'ithath ch am wo i ha wehmajk mamt he'es wo i e nako, wahm hegam mo d em-wehm wohochuththam. 11 Hemu ant hejel ha'ichu am wo i em-o'ohani. Mt wo s-mai mani d ahni an neithk mani ha'as an i o'ohan. 12 Hegam mo ahgahim mamt wo e pahl hikuch k hab wo s-ap'ekam am Jiosh tahgio o ab chum si e ha'ichuchuth mam am oithch hab e junihim g ha-chehanig. K eda hejel pi am hu ap hab junihim. Ab at muh g Christ kots t ab am t-wehhejed. K eda hegam pi ahgachug ihtha no pi s-gihug mat g ha wehm Tutuligo wo ha sho'igch. 14 Kuni eda heg wa'i ahgachug matt ab wo i s-wohoch mat g Jesus ab muh kots t ab am t-wehhejed. Tho wa'i ihtha mant hekaj ni-tho'ibia. Kut g jewed t ab ha'ichu wabsh pi e ha'ichuch am ni-wehhejed. 15 Pi o d sha'i ha'ichu g pahl hikuchka. Ith o d si ha'ichu mamt ab wo i s-wohoch g Jiosh ha'ichu ahga k hab wo bei g wechij thoakag. 16 Ith o d hahawa t-himthag. T g Jiosh ab wo s-em-ho'ige'ithath ch ab wo em-mahkath g s-ap tahhathkam ahpim mamt am oithk hab wo e junihith hab masma mo wehs hab ha wua g e-hemajkamga. 17 Pi ant hahawa ha'ichukaj wo sha'i ni-kudu nani pi ab s-babaliwuani heg amjed mat g Jiosh alithag obga mu'ikko ni-gewittan k ni-ma'ikka. Heg o wa wepo mant ni-nakpi mani d piongaj g t-kownalig Jesus. 18 Neh, ab at wo wa ba'ich i s-em-ho'ige'ithath g t-kownalig Jesus Christ.

Ephesians 1

1 Ni-wepnag mam am kih Ephesus t am: Am ant wo i em-o'ohani g Jiosh ha'ichu ahga ahni Paul. Jiosh at am i ni-kei mant wo i ahgahi ab amjed g alithaj Jesus Christ. Kuni kah mamsh ab s-wohochuth g Jesus ch s-ap himchuth g e-thoakag heg wehhejed. 2 Ab o wa si s-em-ho'ige'ith g Jiosh t-ohg g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 3 Jiosh o ab wehs t-makiog g e-ho'ige'ithadag nach pi ab s-wohochuth g alithaj. Kutt heg hekaj ab wo si ho'ige'ithath. 4 Pi at wa koi ha'ichu sha'i nahto g Jiosh k hab i e ah mat ab wo i t-gawulkai matt d wo hekia s-ap'ekamk am tahgio ch pi wo ha chu'ichigk. Si o pihk e elith t-hekaj 5 ch am i ap'ech mat g alithaj am hab wo t-juh matt hab wa'ap d wo a'aligajk. 6 Heg att hekaj ab wo si hehgchulithath g Jiosh. Si o s-ap ab t-neith nach pi d hemako g si tatchuithch alithaj wehm. 7 Heg eh'ed at am e iawua kots t ab. Kut ab nako g s-ko'ok t-namkithadag mat gm hu hab wo i juh g pi ap t-chu'ichig k wo t-tho'ibia. Si o ge'ej g Jiosh hemajimatalig ab t-wui. 8 Ab o t-mahkch g ha'ichu mahchig ch ha'ichu amichuthadag. 9 Pi o ta machima g Jiosh hab elitha. T wabshaba heki hu am i ap'ech mat ia'i ithani haha wo t-mahtchul. 10 K ith hab d elithaj matsh g Christ d wo kownalk wehs ha'ichu thahm. Am at i ap'ech g tash matsh wehs ha'ichu ab wo i hemakoj Christ wecho. Wehs hegai mo an thahm kahchim ch ed ch hegai mo in jewed thahm at ab wo wechokath. 11 Wehs at hab wo e juh g Jiosh hab elitha. K hab d elithaj gd hu i shohshon k amjed mat wehpeg ab wo i t-gawulkai ahchim Tutuligo. 12 K ab t-ab matt ab wo si has elithath g Jiosh ahchim matt wehpeg ab i s-wohoch g ha'ichu ahgaj ab amjed g alithaj. 13 Kumt ahpim gawul mahs hemajkam hab wa'ap kah k ab i s-wohoch ihtha s-kehg ha'ichu ahgaj. Kut heg hekaj hab wa'ap em-tho'ibia g Jiosh k hab wa'ap ab em-mah g Hekia S-ap'ekam Gewkthag mash hab masma heki hu hab kaij matsh hab wo em-juni. Ihtha Hekia S-ap'ekam Gewkthag o am em-chehgithch mam hab wa'ap d Jiosh hemajkamga hab sha masma mo g em-cheposig am chehgithch g em-eniga. 14 Jiosh o ab t-mahkch g Hekia S-ap'ekam Gewkthag ahchim mach d hemajkamgaj. Kuch heg hekaj s-mahch matt wehs ab wo bei hegai mo haschu ab i t-makiog. S-ap at wo t-tho'ibia ab wehs amjed g pi t-ap'ethag. Kuch heg hekaj ab si has elith. 15 Ab amtsh i s-wohoch mo g Jesus d em-kownalig k si pihk e elith wehs ha hekaj g e-wehm wohochuththam. 16 Kuni heg hekaj chum hekith ab ho'ige'ith g Jiosh. 17 Jiosh o d si ge'e s-ap'ekam ch d ohgaj g t-kownalig Jesus Christ. Kuni ab tahni mat ab wo em-mahkchith g amichuthadag ch am ba'ich wo i e tashogithath em-wui. Mt hab ba'ich wo i s-ap s-mahchk g Jiosh. 18 Ab ani tahni mat wo em-tashogi mamt has wo masmak am ep i e chechegitok ch haschu wo edgithath mam d ab waithaj ch ab gawulkthas wehhejed. 19 Mt ep wo s-mahchk mat wehs wo hekaj g e-gewkthag am t-wehhejed ahchim mach ab s-wohochuth. K g gewkthaj si ge'ej. 20 Am at wa chehgi g e-gewkthag ith hekaj matki ab i wuhshath g e-alithag muhkig amjed k ab thai s-apkojed e-hugith ab an thahm kahchim ch ed 21 mat d wo kownalk wehs ha'ichu thahm. Thahm kahchim ch ed kokownal ch jewed thahm kokownal o wehsijj ab wecho g Jiosh alithag. K d ihtha ge'e kownal mo g Jiosh ab t-mahkch mat d wo t-mo'o am himthamk ahchim mach ab s-wohochuth. 23 Ch ahchim d hemajkamgaj ch wehmaj d hemako hab sha masma mach d honshpadaj. K heg d t-mo'o. Kuch am t-wehm d hekiakam. K eda heg an wehsko ha'ichug ch wehs ha'ichu an u'ukch ch wehs ha'ichu himchuth am t-wehhejed.

Ephesians 2

1 Heki am hu pi edgith ihtha wechij thoakag nam pi d pi ap chu'ijkam ch pi ab hu kaiham g Jiosh. 2 Jijawul ha-ge'ejig o an em-u'ukch hab masma mo an wehs ha u'ukch hegam mo pi ab hu kaiham g Jiosh. Kum hegam ha oithch am hab e junihim ch ab s-wohog elith g ge Jiawul. 3 Wehsijj ach hab wa masmakahim ch am hab junihim g hejel pi ap hab t-elitha. K wa ab t-wui him g s-ko'ok t-namkithadag. 4 Pi ach wa ab hu wohog elith g Jiosh ch gm hu gawulkthas ab amjed heg hekaj pi ap t-chu'ichig. K wabshaba g Jiosh t-hekaj si pihk e elith ch si s-hemajim t-tho'ibia ab amjed g t-chu'ichig k ab t-mah g wechij thoakag. Ith o heg wa wepo mat heki hu ab i t-wuwhas muhkig t amjed 6 k am uhgk i t-u'u k an e-hugith an t-toa hab masma matsh hab juh g si e-alithag. Kuch hemu in melchuth g Jesus kownaltalig jewed thahm hab masma mattsh an hahawa hab wo junihith thahm kahchim ch ed. 7 Ith at wehs am hab t-juni g Jiosh gahi wuhshanim g e-alithag. K hab d elithaj mat hab masma wehs am wo ha chehgi imhab i amjed mo has masma si s-hemajima ch ab si t-tatchua. 8 Ab at i s-t-ho'ige'el g Jiosh k tho'ibia natt pi ab i s-wohoch. Pi att wo sha'i t-nako machs hejel wo t-tho'ibia. Chum hems g t-wohochuthadag o d mahkigdaj. 9 Pi o am hu ha'ichug machs haschukaj wo chum si t-gimaihunath no pi pi hejel hab d t-juni machs hekaj t-tho'ibia. 10 Ab at i t-mah g Jiosh ihtha wechij thoakag. Kuki hab d elithaj matt hekaj am hab wo junihith hegai s-ap chikpan mat heki hu am i ap'ech am t-wehhejed. 11 Am g wo s-chegitok ahpim gawul mahs hemajkam mam has i masma mamt eda koi ab hu i s-wohoch g Christ. Pi am wa pahl hikuchkas hab masma mach ahchim Tutuligo. 12 K g Jiosh pi ab hu em-mahkch hegai mo haschu ab t-mahkch ch pi ab hu em-mahtchulith mat ia wo i wuhshath g e-alithag mat d wo si Kehshajk. Kum wa pi ab hu wui i e gewpkath g Jiosh 13 ch pi mahch ch pi edgith g chehanigaj. Kuch wa heg hekaj s-em-keh'ith. M ahpim ab aigo hab wa'ap s-t-keh'ith. K hegai t-keh'ithadag hab sha masma mo g kolhai ch gm hu a'ai t-ga'agwulkathch. T wabshaba g Christ s-ap am oithk hab e juh ihtha chehanig k ab e muhkith kots t ab t-wehhejed k hab masma hugio g gewkthaj g chehanig. K heg pi ab hu hahawa t-chu'ichigchuth ahchim mach ab s-wohochuth g Jiosh. Jesus Christ at ab i t-hemakoj e wehm. Kuch pi hahawa a'ai s-t-keh'ith nach pi d hahawa hemako. 17 Pegih, ia at wa jiwia g Jiosh alithag jewed thahm k am ahgachug t-shahgith ihtha tho'ibiathag ahga matt am hahawa em-wui u'apa ahpim gawul mahs hemajkam mam wa pi sha'i mahch g Jiosh. 18 K g Jiosh hab wa'ap ab em-mahkch g ap'ethag ahpim mamt hab wa'ap ab i s-wohochuth k ab wui i e thagito. K hab wa'ap an em-u'ukch g Hekia S-ap'ekam Gewkthag. 19 Pi am d haha wabsh mehkjed o'othham ch wabshaba d a'aligaj g Jiosh. K g Jiosh ab em-mahkch g ap'ethag am e-kihthag ed hab masma mo ahchim ab t-mahkch. 20 Ith o heg wa wepo mam d Jiosh kihta. Kuch heg wa wepo mach d kih shon ahchim mach ha'i d Jesus si chuhchai ch ha'i d Jiosh ha'ichu i tashogiththam. K g Jesus an wehsijj t-u'ukch hab masma mach an ab kihtas. 21 Am o wabsh kia ge'ethahim ihtha kih no pi g Jiosh i ha ba'ihamahim hegam mo ab hahawa s-wohochuth. 22 Kuch wehsijj t-wehm si s-ap hab chu'ig ch d s-ap'ekam cheopi no pi g Hekia S-ap'ekam Gewkthag am t-eda.

Ephesians 3

1 Ia am ni-kuhpch nani pi ahgachug g Jiosh ha'ichu ahga am ha shahgith g nahnko mahs hemajkam. Kuni am ni-ho'ige'ithahun Jiosh wui em-wehhejed nam pi d ni-wehm wohochuththam. 2 Am amtp hu wa'i kah mo ab ni-wui si s-hemajima g Jiosh ch ab ni-mah ihtha chikpan mant hekaj wo i em-wehmajk. 3 Am at i ni-chehgi g s-a'agi e-apchutha mant ia he'es hekaj em-o'ohani. 4 Kumt wo s-mai am ne'okchulithch ihtha mant am em-o'ohani mani has masma s-amichuth ihtha s-a'agi ha'ichu ab amjed g Christ. 5 Ith o heki hu pi mahch g hemajkam. T wabshaba g Hekia S-ap'ekam Gewkthag hemuch am hahawa i t-tashogi ahchim Jesus Christ chuhchai ch Jiosh ha'ichu i tashogiththam. 6 Ihtha s-a'agi ha'ichu ahga o hab chu'ig mam ahpim gawul mahs hemajkam ab hahawa t-wehm ap'ethag ahchim Tutuligo ith eda Jiosh ho'ige'ithalig. Jiosh o ab t-mahkch g e-ap'ethag nach pi ab s-wohochuth g ha'ichu ahgaj ch ab hiwig g Jesus Christ. 7 Kuni ahni d em-pionag ch am em-ahgith ihtha s-kehg ha'ichu ahgaj g Jiosh. Heg at si s-ni-ho'ige'ith k am i ni-kehsh k ab ni-mah g gewkthag mant wo em-ahgi. 8 Shahag wepo mani ahni wehs ha ba'ich d wabsh pi ha'ichu am ha shahgith g Jiosh hemajkamga. T eda g Jiosh ab ni-mah ihtha ap'ethag mant am wo em-ahgi ahpim nahnko mahs hemajkam g s-kehg ha'ichu ahgaj ab amjed g Christ ho'ige'ithalig. Heg o ba'ich i si s-kehg s-ap hab chu'ig mo hig chumpk g si ge'e kaisthag. Kutt pi wo t-nako matt wehs wo s-amich. 9 Ith o d ni-chikpan mant am wo i ha tashogi g hemajkam mo has masma hab chu'ig ihtha s-a'agi ha'ichu apchuthaj g Jiosh. Jiosh at wehs ha'ichu nahto k wabshaba pi mahsko wua ihtha s-kehg hab e-elitha mu'i a'ahithag oitham 10 nat pi ia'i ithani wo ha chehgi g anghil kokownal g mu'i nahnko mahs ha'ichu e-amichuthadag am gai t-wuhshanim ahchim mat t-tho'ibia. 11 Jiosh at am hab juh ihtha gahi wuhshanim g t-kownalig Jesus Christ mat has i masma ap'ech ga hu i wehpeg. 12 Kuch ap'ethag matt si s-gegokim ab wo i miabi g Jiosh ab s-wohochuthch g ha'ichu ahgaj ab amjed g alithaj. 13 Ab ani shoak em-wui mamt am wabsh wo si i e gewpkath k pi has wo e tahtkkath mani ni-sho'igchuth em-wehhejed. Wehs o d wabsh em-ap'ethag ihtha ni-sho'igthag. 14 Ith ani wehs am i chechegitod ch hekaj ab i gegshshe heg wui mat wehs ha'ichu nahto. 15 Wehs nahnko thakam hemajkam ch anghil o d nahtoij. T heg ab ha mah g ha-chechgig. 16 Wehs o edgith g gewkthag g Jiosh ch ge'e ab t-makiog. Kuni ab tahni mat ba'ich ab wo i em-mah. Hekia S-ap'ekam Gewkthag o am t-eda ha'ichug ch ab t-makiog g Jiosh gewkthag. 17 Ith o heg wa wepo mo g Christ am t-eda kih. Ab ani tahni g Jiosh mamt chum hekith hab wo masmak mo g Christ ch wo si pihk e elithath ab wehs ha wui. 18 Sho'o wa'i si ge'ej g Christ tatchuithag ab t-wui. Pi at hedai wo e nako mat wabsh hejel wo s-mai mo he'es i ge'ej. Kuni ab tahni g Jiosh mat am wo tashogithath em-wui mamt wo s-ap s-mahchk. T hab wo i em-shuhthath g Jiosh gewkthag. 20 Jiosh at wo e nako mat ba'ich i ge'e ha'ichu hab wo t-juni mach hems he'es ab i chum tahni o hems he'es i chegitod. Heg o hekaj hab t-junith e-gewkthag mo am chikpan t-eda. 21 Kutt chum hekith ab wo hehgchulithath ahchim mach d hemako g t-kownalig Jesus Christ wehm.

Ephesians 4

1 Thani lihso heg hekaj mani ahgachug g ha'ichu ahga ab amjed g t-kownalig Jesus. Kuni ab si s-em-ho'ige'itham am em-ahgith mamt hab wo masmak mo has masma g Jiosh em-tatchuith ch ab i em-gawulkai. 2 Pi g am wo chum si e ha'ichuchuthath ch wabshaba wo s-hehemajimak ch chum hekith ab wo s-e bahbgik ch ab a'ai wo e tatchuath. Am g wo e chehgithath mam ab a'ai e tatchua. 3 Ab at i t-hemakoch g Hekia S-ap'ekam Gewkthag. Pegih, mt wo si s-ap e tahtkkath ab a'ai e wui mamt pi gm hu a'ai wo i e ga'agwulkai. 4 Heg o wa wepo mach d honshpadaj g Christ nach pi d hemako ab wecho. Thach hemako no pi g Hekia S-ap'ekam Gewkthag d wa'i hemako ch am wehsijj t-eda. Kuch d hemako nach pi am t-wepo t-gewpkathch heg wui mo g Jiosh am t-wehhejed ap'echuthch thahm kahchim ch ed. 5 Wehsijj ach d hemako nach pi ab wecho g hemako kownal ch t-wepo ha'ichu ab s-wohochuth ch t-wepo t-pahl wapko. 6 Thach hemako no pi g Jiosh d wa'i hemako ch wehsijj d t-ohg ch wehs t-thahm d kownal ch an wehsko hab chu'ig ch am ep wehsijj t-eda ha'ichug. 7 Christ at wehsijj ab i t-mahkhi hegai matt hekaj ab a'ai wo i t-wehmajk. 8 Bo chu'ig g Jiosh heki hu o'ohana: T wo ha gewito g e-obga k am wo hih thahm kahchim wui k ab amjed wo i ha mahkhi g e-hemajkamga g nahnko mahs mahchig ch gewkthag. 9 Pegih, bo chu'ig mat g si Kehshaj gn hu uhpam ep wo hih thahm kahchim wui. K heg hekaj tasho mat ia wo jiwia jewed thahm. 10 Hegai mat ia jiwia jewed thahm o d hegai mat am uhpam hih e-kihthag wui an thahm kahchim ch ed k ab uhpam bei g e-gewkthag k am hahawa wehsko ha'ichug e-nahtoi ed. 11 Ab at t-mah ahchim e-hemajkamga g nahnko ha'ichu mahchig ch gewkthag. Kuch heg hekaj hab wua g nahnko mahs chikpan wehhejed. Am at ha'i i t-chuhcha matt an wo i oiopo k wo ah g ha'ichu ahgaj k am ha'i i t-chuhcha matt d wo Jiosh ha'ichu i tashogiththamk ch ha'i matt ab wo i ha wanim Jiosh wui ch ha'i matt wo ha nuhkuthath g t-wehm wohochuththam ch wo ha mashchamath g Jiosh ha'ichu ahga. 12 Ab o t-mahkch g Jiosh ihtha nahnko mahs chikpan matt hekaj am wo i ha ap'ech g Jiosh hemajkamga matt wehsijj wo t-nahtokchith matt am hab wo junihith g Christ chikpan ch ab a'ai wo i t-gewkemhunath. 13 Kutt heg hekaj ab wo i t-hemakoj k ab wo i ge'ege'ehogat t-wohochuthadag ed k wehs wo s-mahchk g wohokam ab amjed g Jiosh alithag ch wehs wo wepo masmak. 14 Pi att hab haha wo masmak mo g a'al machs in has a'ai gawul wo junihith g t-wohochuthadag. T hab pi wo e nako hegam mo am nahnko masma e nakog mat wo t-iattogi. 15 Am att wo ahgath g wohokam ab pihk t-elithch ha wui ch am wo i ge'ege'ehogat matt hab wo masmak mo g Christ. Heg o wa wepo mo g Christ d t-mo'o. 16 Ch ahchim d honshpadaj mach ab wui t-thagitokch ch s-ap t-wehm chikpan hab masma mach nahnko mahs d chuhchu'ithaj. Batt wa'i masma am wo i ge'ege'ehogat t-wohochuthadag ed matt ab a'ai wo si t-tatchuath ch am wo i t-wehmajk. 17 Pi g am hu ha oithk hab wo masmak hegam mo pi mahch g Jiosh. Ith o d t-kownalig Jesus chehanig. Hegam mo pi mahch g Jiosh o wabsh pehegi ha'ichu chegito 18 ch pi ha'ichu a'amichuth ch ep pi chechkaithag. Ith o heg wa wepo mo am s-chuhugam k ed hihim. K g Jiosh heg hekaj pi ab hu ha mahkch g wechij thoakag. 19 Pi o edgith g si edathag no pi am wabsh e thagitokch pi ap'ekam wui ch hab junihim g nahnko mahs si s-uam ha'ichu. 20 Mtsh wabshaba ahpim ab kah g tho'ibiathag ahga k am i s-mai g Christ. Am amsh em-mashcham g wohokam ab amjed. Mt amjed pi hab wo chum masmak mo hegam mo pi mahch g Jiosh. 22 Im g hu hab wo i juhni g pi ap e-tatchui. Heg o wa em-iattogith ch em-padchuth. 23 T wabshaba g Jiosh am hab wo em-juh mat g em-tatchui ch em-thoakag d wo hekia s-ap'ekamk. 24 Jiosh o ab t-mahkch g wechij thoakag. K ihtha thoakag wepo masma mo g Jiosh thoakag ch am e chehgithch mo heg wa'i tatchua s-ap'ekam. Am g wo himath g e-wechij thoakag ch am wabsh wo thagito g pi ap'ekam. 25 Thach t-wehm wohochuththam ch heg wa wepo mach d Christ honshpadag. K pi hab chum mahs machs a'ai wo t-iattogithath o hedai i ehp. Am g hab wo kaijjith g wohokam. 26 Hemho wa amt wo babgat ab pi ap'ekam wui k wabshaba pi heg hekaj hab wo juh g pi ap'ekam. S-hohtam g wo thagito g e-bagatalig. 27 T hab pi wo e nako g Jiawul mas am hab wo em-juh mamt hab wo juh g pi ap'ekam. 28 T wo ha'asa ha'ichu ha ehs hegam matp hedai ha'ichu ha ehsith. Ab o hab wa'ap ha ab mat wo chikpanath ch heg amjed ab wo edgithath mat haschukaj am wo i ha wehmt g sho'igkam. 29 Pi g am wo pi kehg neneokath ch wabshaba wo s-ap neneokath ch ab a'ai wo i e gewkemhunath. T g em-ne'oki hab masma d wo i ha wehmtadagk hegam mat hedai wo i em-kahkath. 30 Pi g am wo pi ap tahtchuth g Hekia S-ap'ekam Gewkthag. Tho hegai mo am t-eda ulinig. Kuch heg hekaj s-mahch mat g Jiosh s-ap am wo i t-wahpki e-kihthag ed. 31 Im g hu hab wo i juhni g keh'ithadag ch pi amkadag ch bagatalig ch kawhaina ch has ahgadag. 32 Jiosh at im hu hab i juh g pi ap t-chu'ichig matt ab i s-wohoch g Christ. Kumt ahpim hab wa masma ab a'ai wo s-e ho'ige'ithath ch im hu hab wabsh wo i juh matp hema i chum s-ko'okam has wo em-juh.

Ephesians 5

1 Ab o si t-tatchua g Jiosh. Kutt am oithch hab wo t-junihith nach pi d a'aligaj. 2 Christ o am hab junihim g e-ohg Jiosh tatchui ch ab si t-tatchua ch am t-wehhejed e muhkith. Kutt ahchim hab wa'ap ab aigo wo si tatchuath ch ab a'ai wo si t-tatchuath. 3 Thach Jiosh hemajkamga. K pi hab chum mahs machs wo ha wehm wo'iwua matp hedai pi d t-wehm kihkam o achs wo chegito g s-uam ha'ichu o achs wo s-behim matp haschu pi ab hu d t-wuikam. 4 S-mahch am mat pi am hu wo i ha wahpki g Jiosh hegam mo hab wa masma. Hegai mat wo s-behim mo haschu pi ab hu d wuikamaj o heg jioshchuth. (4) K pi hab chum mahs machs s-bihtagim wo neneokath o achs pehegi wo neneokath. Ab g wo ho'ige'ithath g Jiosh. 6 Ha'i oki hab kaij mo am wa s-ap'e hegam mo hab masma hab e junihim. Kumt wabshaba pi ab hu wo kaiha g pehegi ha-ne'oki. Jiosh at hemho wa s-ko'okam wo ha namkith hegam mat pi ab hu wo s-wohog el. 7 An g hu wabsh wo ha neithath hegam hab mahs hemajkam ch pi am hu ha oithch hab wo e junihith. 8 Ahpim amsh hab wa'ap masma heki hu. Heg o wa wepo mam wa am s-chuhugam k ed hihimath ch am hahawa i wuwha tonlig ch ed namt pi hahawa s-mai g t-kownalig Jesus Christ. Pegih, mt am wo hihimath g e-thoakag ith eda s-ap'ekam tonlig 9 ch hab masma hab wo junihith g s-ap'ekam ch wo ahgath g wohokam. 10 T g t-kownalig Jesus wo s-hohho'ithath hegai mam haschu hab wua. 11 Pi amt am hu wo ha wehmajk hegam mo hab junihim g pi ap'ekam. That wo s-ta edam ha'ichuk mamt chum hems heg ab wo neneokath mo haschu s-a'agi hab wua ihtham. Kumt wabshaba wo ha ahgi mo pi ap hab e junihim. 13 T haha wo s-e mahchk mo has chu'ig. Bo d ahga ihtha che'ithag mo hab chu'ig: Bam wa'i masma mo g kohkshtham o g ko'i ahpim mam hedai pi mahch g Jiosh. Ab g wo i wuwhaki no pi g Christ ab em-makiog g tonlig ch wechij thoakag. 15 Am g wo si s-e nen'oithk mamt has masma wo himchuthath g e-thoakthag ch pi hab wo masmak mam d wabsh pi ha'ichu a'amichuththam. 16 Ge'ej o g pi ap'ekam hemu. K wabshaba g Jiosh ab t-mahkch g ap'ethag matt hab wo junihith g s-ap'ekam. Am g s-ap wo hekaj g e-ap'ethag. 17 Jiosh o am em-wui tashogith g e-tatchui. Am g wo si i a'amichuth k wo s-mai mo haschu wud. 18 Pi g wo nawkkath namt pi heg hekaj wo padch g e-thoakag mamt pi wo e tho'ibia. Am g wehs wo i e thagitokchith Hekia S-ap'ekam Gewkthag wui. T heg an wo em-u'ukchith ch ab wo em-mahkchith g si ge'e s-ap tahhathkam. 19 Kumt hab ab a'ai wo i e gewkemhunath ch ab wo ihmath g Jiosh g heki hu mihshmetha nen'eikaj ch wechij mihshmetha nen'ei 20 ch chum hekith ab wo ho'ige'ithath g Jiosh t-ohg wehs ha'ichukaj am chehchegch g t-kownalig Jesus Christ. 21 Ab g a'ai wo i e thagito e wui mamtp woho ab si has elith g Christ. 22 Ahpim u'uwi amt ab wo i e thagito e-kuhkun ha wui. Ith o ab d em-wuikam nam pi d Christ wohochuththam. 23 Kun o gewkthag am thahm g e-hohnig hab masma mo g Christ gewkthag am t-thahm ahchim mach ab ihm ch ab si hiwig. Ahchim ach heg wa wepo mach d honshpadaj. K heg d t-tho'ibiakam. 24 Ab att wehs wo i chum t-thagitokch wui. Kumt ahpim u'uwi hab wa masma wehs ab wo i chum e thagitokch e-kuhkun ha wui. 25 Ahpim chechoj amt hab masma ab wo si ha tatchuath g e-hohonig mo g Christ ab si t-tatchua. Heg o ha'as ge'e ab si t-tatchua mat am t-wehhejed e thagito mamt wo mua. 26 Bat wa e juh mat hekaj wo t-wapkon k gm hu hab wo i juh g pi ap t-chu'ichig ahchim mach ab s-wohochuth ch ab hiwig. Kut hab wa masma ab i t-gawulkai 27 e wehhejed matt d wo hekia s-ap'ekam enigajk. 28 Kumt ahpim chechoj ab wo si ha tatchuath g e-hohonig hab masma mam ab si hejel e tatchua no pi heg wa wepo mam d hemako e wehm. Hejel e hekaj o si pihk e elith matp hedai g e-hohnigkaj si pihk e elith no pi d wa'i hemako. 29 Pi o hekith hedai hejel s-e keh'ith ch wabshaba am i e nakog mat wo e gegosithath ch wo e nuhkuthath. Kuch ahchim wohochuththam heg wa wepo mach d honshpadaj g Christ nach pi wehmaj d hemako. K heg s-ap t-nuhkuth. 31 Kumt ahpim chechoj hab wa masma hab wo ha juhkchith g e-hohonig no pi hab chu'ig g Jiosh o'ohana: Cheoj at am wo thagito g e-ohg ch e-je'e k wo ha hohnt k d haha wo hemakok g e-hohnig wehm. 32 Neh, bo chu'ig ihtha si s-has ha'ichu wohokam ab amjed g hohnta. Kuni ith amjed am i chum em-tashogith mach d hemako g Christ wehm. 33 K wabshaba hab wa'ap tasho mat g cheoj hemho wa ab wo si tatchuath g e-wehm kihkam hab masma mo ab si hejel e tatchua. T g uwi ab wo si has elithath g e-kun.

Ephesians 6

1 Ab o em-ab ahpim a'al mamt ab wo s-ha wohog elithath g e-jehj no pi ith d Christ tatchui ch d s-ap'ekam em-wehhejed. 2 Bo chu'ig g Jiosh heki hu o'ohana: Ab g wo si has ha elithath g e-ohg ch e-je'e. T wehs wo s-ap'ek em-wehhejed. Kumt ge'eho d wo thothakamk am jewed thahm. 3 Ith o d wehpeg chehanigaj g Jiosh mo ab wehnags g ha'ichu ahgaj mat ha'ichu hab wo juni hegai mat ab wo s-wohog elithath. 4 Ahpim jehj amt pi wabsh wo si s-gewkam ha shohbithath g e-a'aliga mamt wabsh wo ha babgach. Tho Jiosh tatchui mamt am wo i ha mashcha ab amjed g Christ hab masma mam ha gegosith k ab wo i ha shohbi pi ap'ekam amjed. 5 Ahpim nenehol amt ab wo s-wohog ha elithath g e-a'amo ch ab wo si has ha elithath ch ab si e-tatchui amjed hab wo junihith g e-chikpan hab masma mamtp hems g Christ hab masma wo chikpanthath 6 ch d wo piongajk. Pi amt hab wabsh wo junihith mas heg hekaj wo em-neithath g em-ahmo ch wo s-em-hohho'ithath ch wabshaba hab wo junihith wehs g e-ihbthagkaj, chum as hems pi am hu wo em-neithath. Ith o em-tatchuithch g Jiosh. 7 Kumt s-ap e tahtk k am hab wo junihith g e-chikpan nam pi g Jiosh ep chikpanith ch pi heg wa'i o'othham. 8 Mt wo s-chegitok mat g Jiosh ab uhpam wo i nodagi g em-namkithadag mamt haschu i s-kehg chikpan hab wo juh, chum ams hems d wo neholk o pi d wo neholk. 9 Ahpim mam d a'amo amt wo s-ap i ha nuhkuthath g e-pionag ch pi wo ha ebkiothath. Am g wo s-chegitok mam e wehm ahmo an thahm kahchim ch ed. Kut ihtha ahmo wehs t-wepo masma wo t-lothai. 10 Hemako ha'ichu ant hab ep wo chei. Ab g wo i e gewpkathch Jesus t ab no pi heg ab em-mahkch g ge'e gewkthag. 11 Ab g wo i hekaj hegai mo haschu g Jiosh ab em-mahkch k hab wo e nako mamt ab wui wo gegokiwua g ge Jiawul s-a'agi cheggiadag. 12 Pi ach g hemajkam ha cheggia ch wabshaba hegam ha cheggia mo d si pi ap'ekam gewpkthag in t-thahm ch ha-kokownalig ch ha-haha'ichuga ch g jijawul. 13 Mt heg hekaj ab wo si i hekaj g Jiosh gewkthag mamt wo e nahtokch hemu ch wo e nako mamt ab wui wo gegokiwua g pi ap'ekam mat hekith ab wo i em-cheggia. Kut pi wo sha'i i em-shul. 14 Neh, mt wo si e nahtokchith wehhejed ihtha cheggiadag. An g wo u'ukchith g wohokam. T ith heg wo wa wepok mo g cheggiakud giwud. Am g hab wo wa'i junihith g s-ap'ekam. T ith heg wo wa wepok mamt ab hab juh g wainomi lihwa. 15 Mt wo e nahtokchith mamt wo i ahgahi ihtha s-kehg ha'ichu ahga mo g Jiosh s-ha tho'ibiamk. T ith heg wo wa wepok mamt ab cheka g e-shuhshk. 16 Jiawul o chum s-em-padchuthamk hab sha masma mat wo ha mehi g hahpod k hekaj wo em-mummu. Mt wabshaba s-wihnam wo u'ukchith g e-wohochuthadag hab wa masma mamt g kawad am e tahgio wo ulinichith. T hab pi has wo em-juh. 17 Ab g wo s-wohochuth mat em-tho'ibia g Jiosh k pi hekith wo em-thagito. T ihtha em-tho'ibiathag hab wo wa masmak mo g wainomi wonami. An g wo u'ukchith g Jiosh ha'ichu ahga hab sha masma mamtp hems g is-pahyo. Ith o ab em-mahkch g Hekia S-ap'ekam Gewkthag mamt hekaj wo gewito g Jiawul. 18 Kumt chum hekith wo e ho'ige'ithahunath ch ab wo tahnith g Jiosh g i wehmtadag. Hekia S-ap'ekam Gewkthag o am i t-wehmaj t-ho'ige'ithahuna ed. Kumt wo s-nenenashank ch wo e ho'ige'ithahunath ha wehhejed g Jiosh hemajkamga. 19 Ahni amt am hab wa'ap wo e ho'ige'ithahunath ni-wehhejed mat g Jiosh ab wo ni-mah g ne'oki mat hekith wo i e ai mant am wo ha jehnigi. Nt hekaj s-ni-mamachim ch s-gewkam am wo ah ihtha s-kehg ha'ichu ahgaj g Jiosh mat ia'i ithani hahawa t-tashogi. 20 Ith ani hekaj d lihso mani ith ahgachug. Kumt am wo si e ho'ige'ithahunath mant s-gewkam wo ahgath mant has wo i chum masmak. 21 Ab ani chehani g t-wehnag Tychicus mat am wo i em-chehgimed k am wo em-ahgi mani has wa'i masma ch has ni-wua. Tho si s-ap piongaj g Christ ch si s-ap am wo i em-gewkemhu em-ahigthch mach has t-wua. 23 Am ani ni-ho'ige'ithahun mat g Jiosh t-ohg ch g t-kownalig Jesus Christ ab ba'ich wo i em-mah g s-ap tahhathkam ch pihk elithadag nam pi d wohochuththam. 24 Jiosh at ba'ich ep wo i s-em-ho'ige'el wehs ahpim mam woho ab si tatchua g t-kownalig Jesus Christ.

Philippians 1

1 T-wepnag mam am kih Philippi t am: Am ant wo ha'ichu i em-o'ohani ahni Paul g Timothy wehm. S-mahch am mach d piongaj g Jesus Christ namt pi ab i s-wohoch g ha'ichu t-ahga ab amjed k d Jiosh hemajkamga. Am ach s-ha ahgithamk g em-wanimedtham ch hegam mo am i ha wehmt mat ab wo i s-t-ho'ige'el. 2 Ab o wa si s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 3 Ab ani ho'ige'ith g Jiosh ch si s-ap ni-tattam ch ni-ho'ige'ithahun mani hekith i em-chechegitod. 5 Am am chikpanith g Jiosh ch ha'ichukaj am i ni-wehmaj gd hu i amjed mani wa am em-ahgith g s-kehg ha'ichu ahgaj g Jiosh. 6 Kuni heg hekaj s-mahch mat am wo himchuthahith g Jiosh ihtha tho'ibiathag em-wehhejed. Am at i shonwuich em-thoakag ed k wo nahto mat hekith ia ep wo jiwia g Jesus Christ jewed thahm. 7 Bani wa masma hab em-elith nani pi chum hekith am i em-chegitod. Kum ahpim hab wa'ap chum hekith s-ni-chegito ch ha'ichukaj i ni-wehmt, chum hems hemu mani ia hu d lihso. 8 Ab o ni-mahkch g Jesus Christ g si ge'e pihk elithadag em-hekaj. K g Jiosh s-mahch mo ith d wohokam mani em-ahgith. 9 Kuni ab tahni mat hab wo em-juh mat ba'ich wo i ge'etha g pihk em-elithadag ch ha'ichu em-mahchig ch ha'ichu em-amichuthadag. 10 Mt heg amjed wo s-mahchk hegai mo s-ap'e mamt hab wo junihith ch pi am hu wo edak g pi ap'ekam ch pi wo ha chu'ichigk mat hekith ep wo jiwia g Jesus Christ. 11 Heg o hab em-wua mamt am wo e chehgithch mam am hab wua g s-ap'ekam ha'ichu ch heg hekaj ab ha'ichuchuth g Jiosh ch ab hehgchulith. 12 S-em-ahgithamk ani mo ba'ich i e gantan ihtha s-kehg ha'ichu ahgaj g Jiosh heg hekaj mani ia kuhpi. 13 Wehsijj o s-mahch ia ge'e kownal kih am ch an wehgaj mani d lihso heg wa'i hekaj mani d piongaj g Jesus Christ. 14 K g t-wehm wohochuththam pi ha'ichu sha'i ehbith ch ba'ich i s-gewkam ia ahg g Jiosh ha'ichu ahga neithch mani wabsh s-ap ab nakog g ni-sho'igthag. 15 Ha'i o am hi chikpan ab si hejel e-tatchui amjed mat ba'ich wo i chum wahmuth g ha'ichu pi ni-ap'ethag hemuch mani wa hu d lihso no pi s-ni-hehgamk ch wabsh ni-pip'ichuth. K wabshaba ha'i ni-hekaj si pihk e elith ch ahgachug g Jiosh ha'ichu ahga no pi s-mahch mat g Jiosh am i ni-kei mant wo wohokamch g ha'ichu ahgaj. 18 K pi has chu'ig. Ni wabsh s-ap ni-tahtk mo e ahgachug g Jiosh ha'ichu ahga, chum as ha'i pi ap ha'ichu e-tatchui ab am wo ahgahi. 19 E am ho'ige'ithahun am ni-wehhejed. K g Hekia S-ap'ekam Gewkthag i ni-wehmaj. Ni heg hekaj si s-ap ni-tahtk ch s-mahch mamt wo i ni-wuhshath. 20 Tatchua ani mant chum hekith wehs hab wo juh mo haschu i ni-tatchuith g Christ pi ha'ichu ehbithch, wahm hemuch. Bant masma ab wo si has elithath wehs ni-ihbthagkaj, chum anis hems wo ni-muhkith heg hekaj. 21 Neh, pi o has d ahga g ni-thoakag ni-wehhejed. Chum ani hi wa s-wehmjimk g Christ. K heg hekaj chum s-ap'e mant hu wo i muh. 22 Ntp wabshaba d wo thoakamk ch ba'ich wo i chikpanthath g Christ. Ni-wehhejed o hi wa ba'ich i s-ap'e mant wo muhk k wo wehmajk g Christ. 24 K wabshaba em-wehhejed hi ba'ich i s-ap'e mant d wo thoakamk. 25 Ni heg hekaj s-mahch mant d wo thoakamk ch hab am wo i em-wehmajk. Mt wo i ge'ehogat am e-wohochuthadag ed ch hab wo si s-ap e tahtkkath. 26 Am ant wo em-wehmajk. Kumt ba'ich ab wo i si has elithath g Christ ni-hekaj. 27 Bamt masma wo himath g e-thoakag mamt wo ha'ichuch g s-kehg ha'ichu ahga ab amjed g Christ. Nt haha wo kah mam am e hemakochuthch ch s-ap ahgachug mat g hemajkam ab wo s-wohoch g s-kehg ha'ichu ahgaj g Jiosh, chum anis hems pi am hu ep wo em-nei. 28 Pi g wo sha'i ha ehbithath hegam mo ab em-wui gegok. T heg amjed wo s-mahchk mat ab wo bei g s-ko'ok e-namkithadag. Mt ahpim ab wo bei g e-tho'ibiathag ab amjed g Jiosh. 29 Tho Jiosh hab elitha mamt pi ab wabsh wo s-wohochuthath g Christ ch wabshaba am wehhejed ep wo e sho'igchuthath. 30 Ab amt wui wo gegokkath g pi ap'ekam hab masma mam am wa neith mani hab ni-wua ch hemu kah mani hab wabsh kia ni-wua.

Philippians 2

1 Bani em-elith mam s-ap ab e thagitokch Jesus Christ wui. K heg ab si i em-gewkemhun. Kum si s-ap e tahtk no pi si em-tatchua. Hekia S-ap'ekam Gewkthag o am em-wehmaj. Kum a'ai e hekaj si pihk e elith. 2 Nt heg hekaj ab wo si i em-gewkemhu mamt wo i hemakoj g e-chegitoithag k ab ba'ich wo i e tatchuath ch ba'ich wo i s-ap e tahtkkath ab a'ai e wui. Nt heg amjed wo si s-ap ni-taht. 3 Pi amt wo s-chu tha'ath ch pi wo chum ge e ha'ichuchuthath. Ab amt wabsh wo i e sho'igchuthch ab a'ai e wui ch pi wa'i si hejel am wo e chegitoth. 4 Am g wo wa'i chegitoth g ha-ap'ethag ha'i ehp, pi heg wa'i hejel e-ap'ethag. 5 Bamt masma ha'ichu wo chum chegitok mash wa g Jesus Christ ch pi hejel wo chum si e ha'ichuch. 6 Jesus Christ o d Jiosh ch wabshaba pi hab e elith mat hejel wo e wepogi g e-ohg Jiosh. 7 Ga at hu hab wabsh sha'i juh g e-ap'ethag k wabsh e pionchuth k ia mahsi k wepo mahs mo g o'othham. 8 Ab o s-wohog elith g e-ohg Jiosh ch ia e sho'igchuthahim ch ab muh kots t ab heg wa wepo masma mo d wabsh pi ap hemajkam. 9 T g Jiosh ab i wamgith k am ba'ich i si uhgkaj thahm kahchim ch ed k ab mah g gewkthag wehs ha'ichu thahm. 10 T heg hekaj wehsijj ab wo si has i elith k ab wui wo i shul hegam mo an thahm kahchim ch ed ch hegam mo an jewed thahm ch hegam mo am jewed wecho 11 k am wo ah mo ihtha Jesus Christ wehs d ha-kownalig. Neh, batt masma ab wo si has elithath g Jiosh. 12 Ni-naipijju, chum am hekith s-wohog elith hegai Jiosh ha'ichu ahga mani wa am em-ahgith mani eda em-wehmaj. K ba'ich d i si ha'ichu mamt ab wo s-wohog elithath hemu mani wa chum pi am hu em-wehmaj. Am g wabsh wo chikpanath ch wo ge'ege'elhith am e-tho'ibiathag ed ch ab wo si has elithath g Jiosh. 13 Chum o hekith em-makiog g Jiosh g tatchuithag ch gewkthag mamt am hab wo junihith g hab elithaj. 14 Kumt heg am hab wo junihith pi has ahgch mamt hekith heg hekaj wo e sho'igch. 15 T hab pi wo em-chu'ichigch g Jiosh. Tham Jiosh a'aliga ch d wo chum si hekia s-ap'ekamk am ha shahgith hegam mo pi mahch g Jiosh. Ihtham o s-chu i'attomk ch totontodag. Kumt hab wo sha masmak am ha wehhejed mo g huhu'u am ha wehhejed g s-chuhugam k ed oiopotham 16 am ha ahgithch mo g Jiosh ab ha makiog g wechij thoakag. T g Jesus Christ ab wo si em-ha'ichuch mat hekith ia ep wo jiwia jewed thahm. Nt heg hekaj wo si s-hehgigk mat g ni-chikpan pi wabsh wo e nahnkogi. 17 Ab amt i s-wohoch g ha'ichu ni-ahga k am i e thagito Jiosh wui hab sha masma mo wa ab wui ha'ichu e iagchulith. Kunt hemho wa wo si s-ap ni-taht mamt am wui i e thagito, chum anis hems wo ni-muhkith nani pi ahgachug g Jiosh ha'ichu ahga. Ith at heg wo wa wepok mat g ni-eh'ed wo e iawua em-wehhejed hab sha masma mo wa g nawait e iawua ab ab g iagchulitha. 18 Pegih, ahpim g ep wo si s-ap e tahtk ni-wehm matp g Jiosh hab wa masma wo ha'ichuch g ni-chikpan. 19 Hemu ant wo cheha g Timothy mat am wo i em-chehgim matp d wo t-kownalig Jesus tatchuik. T heg ia wo u'apa g ha'ichu ahga ab em-amjed mat am wo i ni-gewkemhu. 20 Timothy o d wa'i hegai mo hab wa masma hab e tahtk ab em-amjed mani ahni ch si s-ap wo em-nuhkuth. 21 Ha'i o hi g hejel e-tatchui am hab elith ch wabsh pi ab hu ha'ichuchuth g hab elithaj g Jesus Christ. 22 Kum eda am wa s-mahch mo hab masma ni-wehm chikpan g Timothy mo g ha-alithag. 23 Hemu ant wo s-mai matp haschu has wo i mahsk am ni-wehhejed. T am haha wo hih g Timothy em-wui. 24 Bani elith mo d tatchuij g t-kownalig Jesus mant ahni am hab wa'ap wo i him k wo em-nei. 25 Ia ant wo cheha g em-kehsha Epaphroditus mat am uhpam ep wo hih em-wui. Ia o i ni-wehmaj hab masma mamsh am ahgith ch mu'i ha'ichu ni-wehm nakog. 26 Msh wabshaba kah mat wa mumku. K si s-em-neithamk ch e kudut mamsh ith kah. 27 Woho o wa mat si mumku k chum alo muh. T wabshaba g Jiosh ab si i s-ho'ige'ith k thoaj. K hab wa'ap d ni-ho'ige'ithadag mat pi muh nant pi wo si pi ap ni-taht mat hems wo sha muh. 28 Ni heg hekaj chehani mat am uhpam wo hih. Mt hab wo si s-hehgigk am neithok. Nt ahni hab wa'ap wo si s-hehgigk ch pi wo ni-kudu em-hekaj. 29 Kumt ab wo si has el nat pi pi huwi g e-thoakag mat hab wo juh g Christ tatchui k wo i ni-wehmt em-wehhejed.

Philippians 3

1 Mt wabsh wo si s-hehgigk mo d em-kownalig g Jesus Christ. Pi ani has sha'i ni-tahtk mant am ep em-o'ohani hegai mant wa heki hu em-o'ohani. Kut ith d wo i em-wehmtadagk. 2 Ha'i o hab junihim g pi ap'ekam ch eda chum ahgahim mamt hab wo junihith g chehanig ch hab wo i e ap'ech am Jiosh tahgio. Mt wo si s-e nen'oithk ab ha amjed. Bo masma pi ha'ichu amichuth mo g gogogs. 3 Pi am tatchua mamt wo e pahl hikuch hab masma mo heki hu chehanis matt ahchim Tutuligo hab wo t-juh. Jiosh at heki hu i em-ap'ech e wehhejed namt pi ab i s-wohoch g ha'ichu ahgaj k ab i hiw g Jesus Christ. K ith heg wa wepo mam pahl hikuchkas. Hekia S-ap'ekam Gewkthag o ab t-mahkch g gewkthag ahchim mach ab s-wohochuth g Jiosh ha'ichu ahga. Kuch hekaj ab si ihm g Jiosh ch ab si has elith g Jesus Christ ch pi ab hu sha'i hejel t-hiwig machs am oithk hab wo t-juh g chehanig k hekaj wo t-tho'ibia. 4 Ahni ant ba'ich wo i ni-nako mo hegam mant ab wo hiwgath g chehanig 5 nani pi d Tuhligo ch ni-pahl hikuch mani eda d gigi'ik tash hab masma mo an o'ohanas chehanig ch ed. Benjaminbad o d ni-shohshon ch d hema hegam gamai gohk t-shohshon ahchim Tutuligo. Thani wa Palasi mo hegam hab e elith mo pi ha chu'ichig ab amjed g t-chehanig. 6 Ha anid sho'igchuth hegam mo ab ihm g Jesus Christ nani pi hab ha elith mo ab wui gegok g t-chehanig. Neh, banid wa masma hab ni-wua ch hekaj hab ni-elith mani pi ha chu'ichig. 7 T wabshaba am hahawa i e tashogi g Jesus Christ ni-wui. Kuni hemuch hahawa pi ab hu ha'ichuchuth wehs ihtha nani pi g Jesus Christ ab si ha'ichuchuth. 8 Wehs ha'ichu o d wabsh pi ha'ichu hahawa no pi ba'ich i s-ap'e mant wo s-mahchk g t-kownalig Jesus Christ. Wehs ant ha'ichu s-ohhoth mant wo s-mai g Jesus Christ 9 k am wo i ni-hemakoj heg wehm. Heki anid hu g chehanig oithch hab ni-elith mani s-ap'e am Jiosh tahgio. T wabshaba am hahawa i ni-tashogi g wohokam g Jesus Christ. Kunt ab i s-wohoch. T hekaj am i ni-ap'ech g Jiosh e tahgio. 10 Ni hahawa tatchua mant wo si s-mahchk g Jesus Christ ch ab wo taht hegai gewkthaj mat hekaj i wuhsh ab muhkig amjed, chum anis hems hab wa'ap wo ni-sho'igch. 11 Neh, bant wa masma hab wa'ap wo i wuhsh ab muhkig amjed mat d wo si oithchkam tashk. 12 Pi ani hab kaij manis heki hu wehs ab i neith ihtha ch wehs ap'echuthas ch wabshaba am ni-nakog mant heg ab wo bei mo haschu ab ni-makiog g Jesus Christ ch hekaj an ni-bei. 13 Heg ant hekaj pi wo chegito mat haschu heki hu has i e juh am ni-tahgio k am wui wo ni-gewkai hegai mo haschu am ni-ba'ich. 14 Neh, mo g s-melithkam am e gewkathch mat wo ha gehg k wo bei g s-ap e-namkithadag. Kuni ahni am hab wa'ap ni-gewkathch mant wo bei g s-ap ni-namkithadag. K d ihtha mant an haha wo wehmajk g Christ an Jiosh kihthag ed. 15 Wehsijj att hab wo wa chum t-junihith ahchim mach s-gegokim hihim g t-wohochuthadag. Ha'ijj amtp hems pi hab masma hab e junihim. T wabshaba g Jiosh wo mahsko em-wuij mam haschu i pi ap hab wua. 16 Am amt wo oithath g wohokam mam ab he'es i heki hu s-mahch ch am hab junihim. 17 Am ani si s-gewkam oith g Jiosh ha'ichu ahga ch am em-chehgith mamt has wo masmak. Mt wo si ha nenashanath hegam mo am hab e wua mani has i masma em-chehgith ch am ha oithk hab wo e junihith. 18 Ab at e muhkith g Jesus Christ kots t ab mat wo t-tho'ibia. K eda mu'ijj ab wui gegok ihtha s-kehg ha'ichu ahga. Ith o si pi ap ni-tahtchuth. Kuni wa mu'ikko am em-ahgith ihtha heki hu ch hemu am ep em-ahgith. 19 Ihtham o heg wa'i ab si has elith hejel e-tatchui ch heg wa'i s-hohho'ith jewed t ab ha'ichu. T g Jiosh gm hu wo i ha shul Jiawul kih ed no pi e hahaschuth heg hekaj mat hekaj wo chum si e eh'elithath. 20 Kuch wabshaba ahchim am chegito g thahm kahchim ch ed t-kihthag. Ab at amjed wo jiwia g t-tho'ibiakam Jesus Christ. Kuch ab nenida. 21 Heg at gawul wo juh g mukialig t-hon heg hekaj si ge'e e-gewkthag mat hekaj wehs ha'ichu wo thahmkath. T g t-hon si s-kehg hab wo masmak hab masma mo g honaj si s-kehg hab mahs ab i wuhshanik muhkig amjed.

Philippians 4

1 Pegih, ab amt i s-wohoch g ha'ichu ni-ahga ab amjed g t-kownalig Jesus. M d hahawa si ni-tatchuithch ni-wepnag. Ni heg hekaj si s-ap ni-tahtk ch chum si s-em-neithamk. S-gegokim g wo gegokkath am eda g e-wohochuthadag. 2 Ab ani s-em-ahgithamk ahpim Euodia ch Syntyche mamt pi wo e ne'owinath ch am wabsh wo i e wehmajk nam pi d e wehm wohochuththam. 3 Ihtham u'uwi o am si i ni-wehmajkahim mach wa am ahgachug g Jiosh ha'ichu ahga. Ni heg hekaj am ep s-m-ahgithamk ahpi map hab e chechcheg I-ha-Wehmttham mapt woho am wo i ha wehmajk map hab masma i ni-wehmajkahim. Clement ch ha'i ehp o hab wa'ap i ni-wehmajkahim. Pi o wehs s-e mahch g ha-chechgig ch wabshaba an o'ohadag heg eda mo an e o'ohan g e tho'ibiakam ha-chechgig ch an kahch Jiosh kihthag ed. 4 Si g wo s-hehgig ab amjed g t-kownalig Jesus Christ mani hab masma chum hekith hab chech'e. 5 E o aihim mat ep wo jiwia. Kumt heg hekaj wabsh wo i s-hehemajimak ab wehs ha wui g hemajkam. 6 Pi g wo sha'i e kudut heg hekaj mam haschu i chum tatchua k ab wabsh wo i tai g Jiosh k ab wo i ho'ige'el matp haschu hab wo i t-juni. 7 T g Jiosh ab wo em-mahkath g s-ap tahhathkam. K ihtha s-ap tahhathkam pi ta amichuthama ch wabshaba wo chehmo g t-thothakag. Kutt hab pi ha'ichukaj wo t-kudutath ahchim matt ab i t-hemakoch g Jesus Christ wehm. 8 Am g wo chegitok wehs ihtha mo haschu d s-ap'ekam k ab wo hehgchulithath g Jiosh heg amjed mo haschu d wohokam ch haschu d si o'othhamthag ch haschu d s-ap'ekam ch haschu s-kehgaj. 9 Am g wo i e mashcham k hab wo junihith hegai mam haschu i kahk ch ab bei ni-amjed. Kut wo e chehgi mo am em-wehmaj hegai mat t-tho'ibia k ab t-mahkch g s-ap tahhathkam. 10 Si ge'e s-hehgig ant bei ab amjed g Jiosh mamt ab ep i e chehgi mam ab si pihk e elith ni-wui. Tash o pi am hu em-ap'e mams ab ha'ichu wo ni-mah k wo i ni-wehmt. Ni wabshaba s-mahch mam si pihk e elith ni-hekaj. 11 Ni pi hab ahgch hab kaij manis ha'ichu si tatchua nant pi s-mai mant ab wabsh wo si s-ap ni-tahtkk mani haschu i edgith, 12 chum anis hebaichujj wo bihugim k pi ha'ichu wo edgithath o hebaichujj ge'e ha'ichu wo edgithath. 13 Jesus Christ o ab ni-mahkch g gewkthag. Nt heg hekaj wo ni-nako mant s-ap am hab wo junihith g Jiosh tatchui. 14 K wabshaba si s-ap'e mamt am i ni-wehmt pi ni-ap'ethag ed. 15 S-mahch am ahpim Philippi t am wohochuththam mam d wa'i ahpim ch am i ni-wehmaj am i thahm mant am em-thagito am u'apak g s-kehg ha'ichu ahgaj g Jiosh amai Macedonia jewed ch ed. 16 Ni hebaichujj ha'ichu tatchua ab Thessalonica kihhim t ab. Kum ab ni-mamka. 17 Pi o hab mahs manis heg ab wa'i tatchua em-mahkig. Ba'ich ani i tatchua mamt ab wo bei g ho'ige'ithalig ab amjed g Jiosh. 18 Ia at u'apa g em-mahkig g Epaphroditus. Kuni hahawa pi ha'ichu sha'i tatchua. Em-mahkig o hab sha masma mo hegai s-ap uhw ha'ichu mo wa ab e iagchulith Jiosh wui. K g Jiosh ab si s-hohho'ith 19 ch hab wa'ap wo em-mahkath mam haschu i tatchua. Ab o e chehgithch ab amjed g Jesus Christ mo g Jiosh ge'e ha'ichu an to'akch am t-wehhejed. 20 Chum att hekith wo hehgchulithath g Jiosh t-ohg! Chum hekith! 21 Ab amt wo ha ahgi g t-wehm wohochuththam mat ab wo i s-ni-ho'ige'el. Ni-wehm chikpantham iia o hab wa'ap kaij mamt ab wo i s-ha ho'ige'el. 22 K wehsijj g t-wehm wohochuththam hab wa'ap kaij, wahm hegam mo ia ha'ichug ge'e kownal kih ed. 23 Neh, ab at wo wa ba'ich i s-em-ho'ige'ithath g t-kownalig Jesus Christ.

Colossians 1

1 T-wepnag mam am kih Colossai t am: Am ant wo i em-o'ohani g Jiosh ha'ichu ahga ahni Paul mat g Jiosh am i ni-kei mant wo i ahgahi ab amjed g alithaj Jesus Christ. K ia i ni-wehmt g t-wehnag Timothy. Ab o wa si s-em-ho'ige'ith g Jiosh t-ohg ch ab wo wa ba'ich i em-mahkath g i wehmtadag ch s-ap tahhathkam. 3 Chum ach hekith ab i ho'ige'ith g Jiosh em-wehhejed t-ho'ige'ithahunch. 4 Ab amtsh i s-wohoch g wohokam ab amjed g t-kownalig Jesus Christ k ab hahawa si ha tatchua g e-wehm wohochuththam. Ith ach hekaj ab i ho'ige'ith g ohgaj Jiosh. 5 Bam masma nam pi ab wui i e gewpkathch hegai s-kehg kihthag mo g Jiosh am nahtokch t-wehhejed an thahm kahchim ch ed. 6 Am at em-wui jiwia ihtha s-kehg ha'ichu ahga no pi an wehsko chehmohim g jewed ch am ha ap'echuthahim hegam mo ab kaiham hab masma mo hab em-wua. Woho amsh s-mahch g Jiosh ho'ige'ithadag 7 nash pi am em-ahgith ihtha t-wehm chikpantham Epaphras. Ith ach ab si tatchua ch hab elith mo si s-ap hab wua g e-chikpan am em-shahgith. 8 Ia at hahawa jiwia k am t-ahgith mamsh ab a'ai si e tatchua g gewkthajkaj g Hekia S-ap'ekam Gewkthag. 9 Kuch heg hekaj chum hekith t-ho'ige'ithahun em-wehhejed. Hekia S-ap'ekam Gewkthag o ab em-mahkch g amichuthadag. Kuch ab tahni g Jiosh mat hab wo em-juh mamt s-ap wo hekaj hegai amichuthadag k wo s-mahchk g tatchuij. 10 Bamt masma ab wo si ha'ichuchuthath g t-kownalig Jesus ch ab wo hehgchulithath am hab junihithch g s-ap'ekam namt pi ba'ich i s-ap wo s-mahchk g Jiosh. 11 Jiosh o wehs edgith g gewkthag. Kuch ab tahni mat ba'ich ab wo i em-mahkath g gewkthag. Mt hekaj wehs ha'ichu s-e tahtk ch wo nakogath ch wo si s-hehgigk. 12 Jiosh kownaltalig o d hekia tonlig. K g Jiosh s-kehg ha'ichu an nahtokch t-wehhejed ahchim mach d hemajkamgaj. Kumt ab wo si i ho'ige'el mat am i em-ap'ech mam d hahawa hemajkamgaj ch ab wo bei hegai mo an nahtokch. 13 Jiawul o an wehs ha u'ukch hegam mo hedai pi mahch g Jiosh. K g kownaltaligaj d hekia s-chuhugam. T wabshaba g Jiosh ab i t-wuwhas ab gewkthaj amjed k am i t-wahpki si e-tatchuithch e-alithag kownaltalig ed. 14 T heg t-tho'ibia k gm hu hab i juh g pi ap t-chu'ichig. 15 Jiosh o pi ta neithagma ch wabshaba hemu e chehgithch gahi wuhshanim g e-alithag. Kutt hab wa'i masma ab wo nei g Jiosh matt wo nei g alithaj. Heki o hu an wehmaj g e-ohg mat eda koi an hu ha'ichu e nahto ch wehs ha'ichu ba'ich d i si s-has ha'ichu. 16 Jiosh at am i kei g e-alithag mat wehs ha'ichu wo nahto. T heg wehs nahto hegai mo haschu an hab i chu'ig thahm kahchim ch ed ch in jewed thahm, hegai mach haschu i neith ch hegai mach pi neith. K wehs d chuhchaij g nahnko mahs kokownal in jewed thahm ch an thahm kahchim ch ed. K d Jiosh tatchui mat wehs ha'ichu d wo enigajk g alithaj. 17 K wehs ha'ichu in hab chu'ig g alithaj gewkthagkaj. 18 K heg d t-mo'o am himtham ahchim mach ab ihm. Kuch ab amjed bekch g t-thoakag hab masma mo g honshpadag ab mo'o t amjed bekch g e-thoakag. Jiosh alithag o wehs d t-si'ihegi ch ab i wuhsh muhkig amjed mat d wo si s-has ha'ichuk am wehs ha'ichu thahm. 19 Chum as hab masma ia jiwia g Jesus mo g o'othham k eda d Jiosh wehmaj g e-ohg ch heg hekaj wepo chu'ig. 20 Ab amt naggai kots t ab k mua. Kut eda ha hiwigi g Jiosh no pi hab d elithaj mat g alithaj wo hejel e iagchul. T heg hekaj wehs ha'ichu wo e nako mat wo chum i e ap'ech am Jiosh wui. 21 Mehk am wa ab amjed g Jiosh ch d obgaj nam pi pi ap ha'ichu chegito ch pi ap ha'ichu hab junihim. 22 T wabshaba g Jiosh gm hu hab i juh g e-obgatalig k ab wabsh i chum em-hemakoj e wehm heg hekaj e-alithag muhkig. Kumt heg hekaj d wo hekia s-ap'ekamk ch pi ab hu wo ha chu'ichigk 23 mamtp am wabsh i s-gewkam wo wohochuthath g s-kehg ha'ichu ahgaj ab amjed g alithaj ch pi gm hu hab wo i e juh ab amjed. Ihtha s-kehg ha'ichu ahga o wehsijj ab d ha wuikam g hemajkam ch heg hekaj an wehsko chehmohim g jewed. 24 Bo sha mahs mach d honshpadaj g Christ ahchim mach ab ihm. Heg atsh si e sho'igch t-wehhejed. Kuni wabsh si s-ap ni-tahtk ch am oithch ni-sho'igchuth mat s-ap wo e nahto g honshpadaj hegam ha hekaj mat hab wa'ap ab wo i s-wohoch g ha'ichu ni-ahga. 25 Am at i ni-kei g Jiosh mant wo em-ahgithahi ihtha s-kehg ha'ichu ahgaj. Ni heg hekaj d em-pionag ch am em-ahgith. 26 E o ehstokch gd hu i shohshon k amjed mat woho has wo t-juni g Christ. T wabshaba hemuch am si tashogi g Jiosh t-wui. 27 K d ihtha mat g Christ ab wo t-mah g Hekai S-ap'ekam Gewkthag. Kut heg am wo t-edak, chum hems ahpim gawul mahs hemajkam, ch hab wo t-juh matt d wo Jiosh hemajkamgak ch wehmaj ab wo si has t-elithath am kihthaj ed. 28 Kuch am chum t-nakog matt wehs wo ha ahgi g hemajkam ab amjed g Jesus Christ k wo ha shohbith k ep wo ha mashcha mat has wo masmak ha'as mach he'es i s-amichuth. T hab s-ge'ema wo hihimath e-wohochuthadag ed. Kutt am wo ha chehgi Jiosh wui mo hab masma. 29 Ab o si ge'e ni-mahkch g Christ g gewkthag. Ni heg hekaj am si ni-gewkathch mant wo nahto ihtha chikpan.

Colossians 2

1 Mamt hu wo i s-mahchk mani has i masma s-gewkam ni-ho'ige'ithahun am em-wehhejed ch am ep ha wehhejed hegam mo am kih Laodicea t am, pej wehs ha wehhejed hegam mo pi ni-mahch no ge ni-neith. 2 Jiosh o am chum wehs t-tashogith g e-amichuthadag ch e-mahchig gahi wuhshanim g e-alithag. Kuni ab tahni mat am wo si i em-gewkemhunath mamt wo s-ap s-mai hegai mo wa g Jiosh am t-tashogith k ab a'ai wo i e tatchuath hab masma mam d e-hajunim. 4 Ha'i o chum ha iattogith ch gm hu ha wanchshulig ab amjed g Christ. Kumt wabshaba pi ab hu wo ha kaiha, chum as hems hab wo e wuath mo s-ap'e. 5 Pi ani am hu ha'ichug em-wehm ch wabshaba chum hekith am em-chegito. Am amsh a'ai i e wehmt ch s-gewkam ab s-wohochuth g Jesus Christ. Kuni heg hekaj si s-ap ni-tahtk. 6 Ab amt i e thagito Jesus Christ wui mat d wo em-kownaligk. K d hahawa em-wuikam mamt ab wo wechok ch am wo himath g e-thoakag ch wehmaj d wo hemakok. 7 An g beh'i g e-gewkthag ab amjed mamt heg amjed ba'ich i s-gewkam ab wo wohochuthath mam has i masma mashchamas ch chum hekith ab wo i mahkchith g e-ho'ige'ithadag. 8 S-e g wo nen'oithk mat pi hedai wo em-iattogi. Ha'i ash chum s-em-mashchamamk hegai mo haschu d wabsh o'othham ha-mahchig ch em-ahgith mamt heg ab s-ap wo himath g e-thoakag. Tt wabshaba ab wo beihith g t-mashchamadag ab amjed g Christ 9 no pi heg d Jiosh am wehmaj g e-ohg, chum as hi wa hab masma ia jiwia mo g hemajkam. 10 Kumt am i e hemakoj g Christ wehm k wehmaj d hekiakam. K heg ab em-mahkch g wechij thoakag ch d kownal am wehs ha thahm g kokownal am jewed thahm ch an thahm kahchim ch ed. 11 Heki ach hu wa t-pahl hikuchk ahchim Tutuligo am t-chehanig oithch. K wabshaba d t-himthag ahchim matt ab ihm g Christ matt wo t-pahl wakon k hab wo t-chehgi matt ab i t-hemakoj heg wehm k ab i t-wul'o pi ap t-tatchui amjed. Gd att hu t-wachumch shuhthagi wecho t-pahl wakonch k am ep i wuhsh shuhthagi t amjed. K ith heg wa wepo matt gd hu t-hiash muhk k amjed ab uhpam i wuhsh muhkig amjed hab masma mat g Christ hab e juh. 13 Neh, ahpim mam d gawul mahs hemajkam ch pi edgith g t-chehanig am wa si gawulkthas ab Jiosh t amjed heg hekaj pi ap e-chu'ichig. T wabshaba g Jiosh ab em-wui mahtchul g e-alithag. Kumt ab i s-wohochuth k hab bei g wechij thoakag. Jiosh alithag at ab nako g s-ko'ok t-namkithadag kots t ab k gm hu hab i juh g pi ap t-chu'ichig. 15 Jiawul o chum s-wulshpamk g Jiosh alithag. T wabshaba ab i e wul'o gewkthaj amjed k gewito t-wehhejed k hab masma wehs ha gewito g jijawul. 16 Jiosh ash wa hab masma ha chehani g Tutuligo mat am wa has mahs ha'ichu hugi wo ko'ath ch am hab wo junihith g mihshmetha piast. Ihtham chehanig o am chum t-tashogithahim mat has wo masmak g Jiosh si Kehsha mat hekith wo jiwia. T wabshaba ia hahawa jiwia g Jiosh si Kehsha k am hejel i e tashogi t-wui. K hahawa pi hab mahs machs am hab wo junihith hegai hab mahs ha'ichu k ch hekaj wo chum s-mahchk g Jiosh si Kehsha. 18 Ha'i o hab e elith mo em-ba'ich i s-ap'e natsh pi ha'ichu nei am e-nena ed ch hab chum kaij mamt pi wo e tho'ibia k ho'ip ab i e sho'igchuth k ab wo i has ha elithath g anghil. Pi g wo sha'i ha wohochuth. Ho o wabsh chum si e hahaschuth g hejel e-chegitoithagkaj 19 ch pi ab hu hiwig g Jiosh si Kehsha. K eda heg d t-mo'o ch s-ap ab i t-thagio'ith ch t-ge'elith. Kuch ahchim ab ab gi'i k ch ab ep a'ai t-ab gi'i hab masma mo g hon ch hab wa'ap masma i ge'elhim. 20 Ith o heg wa wepo matt heki hu koi nach pi d hemako heg wehm mat t-wehhejed muh. Heg at ab i t-wul'o heg amjed mo d wabsh hemajkam ha-mashchama. Pi g heg hekaj am haha wo i chum e ap'echuth Jiosh tahgio. 21 Hegam mo em-kudut o ab chum em-chehani mamt pi an hu wo hudawgath ch jejkath ch tattamath ha'ichu i. 22 K wabshaba am wa s-ap'e mamt wabsh wo hekaj mo haschu i s-ap'e. T wabsh wo huhug e hekajk. Hegai mo d wabsh hemajkam ha-chehanig ch ha-mashchama 23 o pi woho d ha'ichu amichuthadag. Bo em-ahgith mamt heg oithk wo e mihshmethath ch wo e sho'igchuthath ch hab ab wo e sho'igchuthath Jiosh wui. T wabshaba ith pi wo sha'i thotholimagi g pi ap em-tatchui.

Colossians 3

1 Jiosh at ab t-mah g wechij thoakag ahchim matt ab ihm g alithaj mo d t-tho'ibiakam. K ith heg wa wepo mat ab i t-wuwhas muhkig t amjed hab masma mat ab i wuhshath g e-alithag. Hemuch o an thaha g alithaj s-apkojed hugithaj an ch am t-wehhejed ap'echuth matt wo wehmajk. Kutt heg wui am wo i t-gewpkai. 2 Pi g am hu wo chegitokath g jewed thahm ha'ichu ch wabshaba g thahm kahchim ha'ichu wo tatchuath. 3 Jiosh at am i t-wehnathk g e-alithag. T heg heki hu muh k an hab chu'ig thahm kahchim ch ed. K ith heg wa wepo matt heki hu ko'o k an wehmaj. 4 Ia at ep wo i wuhsh g Christ jewed thahm. Kutt am wehmaj wo i wuwhag k wepo masma wo si s-kehgajk. 5 Mt gm hu hab wo i juh g pi kehg e-tatchui ch pi kehg e-chegitoi k pi wo wehmaj wo'iwua matp hedai pi d em-wehm kihkam k pi wo pihk e elithath mamt ge'e ha'ichu wo bei. Hegai mat wo s-behim mo haschu pi ab hu d wuikamaj o heg jioshchuth. 6 S-ko'ok namkithadag at ab ha ab wo gei hegam mo hab masma ha'ichu hab junihim. 7 Ahpim o wa an em-u'ukch g pi kehg tatchui. Kum wa g pi ap'ekam hab junihim. 8 An o wa em-u'ukch g bagatalig ch hehgamthadag ch keh'ithadag. Mt wabshaba hemuch im hu wehs hab wo i juh ihtha pi ap'ekam ab e amjed k pi hekith pad wo neokath 9 ch pi ha'ichu wo ha iattogithath. Wehs at mukito ihtha hab mahs ha'ichu ab em-ab. 10 Ab amt i e thagito Jiosh wui. T heg ab em-mah g wechij thoakag k em-tatchuith mamt wo wepo masmak ch ab wo s-ap s-mahchk. 11 Christ o d si s-has ha'ichu am t-wehhejed ahchim mach ab ihm. Heg thoakag o am ha'ichug t-thothakag ed. Kuch heg hekaj ab i t-hemakochuthch. Pi ach hahawa t-gawulkathch ab em-amjed ahchim mach d Tutuligo. Pi o has d ahga g pahl hikuchka. Pi o t-gawulkathch g ha'ichu t-amichuthadag. Nenehol o d hemako ahchim t-wehm mach pi d nenehol. Wehsijj ach d hemako ab ihmch g Christ. 12 Jiosh o si pihk e elith t-hekaj ch ab i t-gawulkai. Kutt heg hekaj wo si pihk t-elithath ha hekaj g hemajkam ch wo s-hemajimak ch s-t-tahtk ch wo nakogath ha'ichu ch pi hab wo chum t-wuath machs d s-has haha'ichu am ha-nena ed. 13 Jiosh at ab s-t-ho'ige'ith k gm hu hab i juh g pi ap t-chu'ichig. Kutt hab wa'ap wo s-ha bahbgi hegam mat hab wo juh g pi ap'ekam ab t-wui k hab wa'ap ab wo s-ha ho'ige'el. 14 Ab o t-ab matt a'ai t-hekaj wo si pihk t-elithath ch hab s-ap d wo hemakok. 15 Christ o ab em-makiog g s-ap tahhathkam. Ab g wo i ho'ige'ithath heg hekaj ch wo si s-ap e tahtkkath ab a'ai e wui nam pi d hemako heg wehm hab sha masma mam d honshpadaj. 16 Mt am wo s-chegitok g Christ ha'ichu ahga. Jiosh o ab em-makiog g amichuthadag. Kumt ab a'ai wo i e mashchamath ch wo ahgath g Jiosh o'ohana ed nen'ei ch mihshmetha nen'ei ch wo ne'ichuthath g Jiosh ch ab wo i mahkchith g ge'e ho'ige'ithadag. 17 Wehs amt hab wo junthath g t-kownalig Jesus hegai mamt haschu hab wo junihith. Kumt ab wo ho'ige'ithath g t-ohg Jiosh am gahi wuhshanim g Jesus. 18 Ahpim u'uwi mam ab ihm g Christ amt ab wo s-wohog ha elithath g e-wehm kihkam. Bo masma em-tatchuith g Jiosh. 19 Kumt ahpim chechoj wo si pihk e elithath ha hekaj g e-wehm kihkam ch ab wabsh wo i s-ha bahbgi. 20 Ahpim a'al amt ab wo s-wohog ha elithath g e-jehj chum hekith. Ith o d tatchuij g Jiosh. 21 Kumt ahpim ha-jehj pi am wo si ha babgachuthath g e-a'aliga mat pi wo heb hu wua g e-chegitoithag. 22 Ahpim mam d ha-pionag amt ab wo s-wohog ha elithath g e-a'amo woho'i e-tatchui ab heg wabsh hekaj mam ab si has elith g Jiosh ch pi heg hekaj mas am wo em-nei g em-a'amo k wo s-hohho'i g em-chikpan. 23 Pi o d wa'i o'othham mo em-chikpnachuth ch wabshaba d t-kownalig Jesus. Ab o him g tash mamt an wo wehmajk. T heg ab wo em-namkith heg hekaj em-chikpan. Kumt heg hekaj woho'i e-tatchui ab am hab wo junihith g e-chikpan. 25 T-kownalig Jesus at ep wo namkith hegai matp hedai hab wo juh g pi ap'ekam. Heg at wo bei g s-ko'ok e-namkithag. Jiosh at wehs wo ha lothai g hemajkam k hab masma wo ha namkith matp has i masma hab e junihim.

Colossians 4

1 Ahpim a'amo amt s-ap ab wo ha neithath g e-pionag ch ep wo s-chegitok mam hab wa'ap ge ahmo. K heg an thaha thahm kahchim ch ed ch d Jiosh. 2 Ahpim wehs g chum hekith wo e ho'ige'ithahunath ch ab ep wo i ho'ige'ithath g Jiosh. 3 Chum ach s-ahgamk g Jiosh ha'ichu ahga ab amjed g alithaj. Kumt ab wo tai mat ab wo t-mah g ap'ethag matt hab wo t-juh. Thani lihso nani pi heg ahgachug. 4 Kumt ab wo tai g Jiosh mat hab wo ni-juh mant am si tasho wo ahgath. 5 Am g si s-e mamachim hab wo e junihith am ha-nena ed hegam mo pi ab hu ihm g Jiosh. Ab o em-mahkch g Jiosh g ap'ethag mamt hab wo junihith g s-ap'ekam. Am g s-ap wo hekaj g e-ap'ethag. 6 Kumt chum hekith s-hemajim wo neneokath ch wo s-ta kakaim ha'ichu ahgath. Tho em-wuikam mamt wo s-mahchk mamt has masma s-ap ab uhpam wo i nodagi g ne'oki ab wui g hemajkam ha'ichu kakkei. 7 Ia o t-wehmaj hegai mo hab chehgig Tychicus ch s-ap hab junihim g Jiosh chikpan. 8 Kuni chehani mat am wo i em-chehgimed k am wo i em-gewkemhu am em-ahgithk mach has wa'i masma. 9 T heg wo oi em-wehm kihkam Onesimus k d hahawa t-wehm wohochuththam. Ihtham at am wo i em-ahgi wehs ha'ichu mo hab e junihim iia. 10 Aristarcas o ni-wehm d ep lihso k ch am ep i em-ho'ige'elith. K hegai Mark mo d Barnabas ma'i am ep i em-ho'ige'elith. Heki ani hu em-ahgith mamt ith am wo i wahkith k wo kaiha matp am wo hih em-wui. 11 Joshua Justus o am hab wa'ap i em-ho'ige'elith. Tho wa'i ihtham waik mo d Tutuligo hemajkam ch ni-wehm chikpan am wehhejed g Jiosh. Kuni ha hekaj am si i ni-gewkemhun. 12 K ia ep thak ch am i em-ho'ige'elith hegai em-wehm kihkam mo hab chehgig Epaphras. Nt wo em-ahgi mo ith chum hekith si e ho'ige'ithahun am em-wehhejed ch am ha wehhejed hegam mo am kih Laodicea t am ch hegam mo am kih Hieropolis t am. Ab o tahni g mat Jiosh ab wo i gewkai g em-wohochuthadag. Mt hab s-ap wo s-wohog elithath g Jiosh. 14 Ihtha si t-tatchuithch t-nawoj Luke mo d mahkai o am ep i em-ho'ige'elith. K g Demas am ep i em-ho'ige'elith. 15 Am g wo ha ahgith g t-wehm wohochuththam am Laodicea t am ch hegam mo am e-mihshmath kihj am g Nymphas mat ab wo s-t-ho'ige'el. 16 Ihtha o'ohana amt am wo ne'okchulith k gm hu haha wo ha mah hegam mo am kih Laodicea t am. T am epai wo ne'okchul. T hegam ab epai wo em-mah hegai mant ha o'ohani. Kumt am epai wo ne'okchul. 17 Mt wo ahgi g Archipus mat am wo i nahto hegai Jiosh chikpan mani wa hab ahgith. 18 Hejel ant an wo o'oha ihtha wawnim ahni Paul mant am wo si em-ho'ige'el. Pi g wo sha'i pi chegito mani ia hu kuhpi. Neh, ab at wo wa ba'ich i s-em-ho'ige'el g Jiosh.

1 Thessalonians 1

1 T-wepnag mam am kih Thessalonica t am: Am ant ha'ichu wo i em-o'ohani ahni Paul. K ia ni-wehmaj g Silas ch Timothy k ch am i ni-wehmaj. Tham woho hemajkamgaj g t-ohg Jiosh ab i e thagitok t-kownalig Jesus Christ wui. Ab o wa si s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 2 Chum ach hekith ab ho'ige'ith g Jiosh em-hekaj ch em-wehhejed t-ho'ige'ithahun. 3 Ab am si s-wohochuth g t-kownalig Jesus Christ ch hekaj chum hekith hab s-junimk g s-ap'ekam. Pihk em-elithadag o hab em-wua mam si chikpanith g Jiosh. Kum si s-gewkam him g e-thoakag nam pi si nenida hegai matsh hab wo wa t-juni g Jesus. Ith ach am wa wehs s-chegito ch hekaj chum hekith ab ho'ige'ith g Jiosh. 4 Jiosh o ab si em-tatchua ch ab i em-ui mamt d wo a'aligajk. 5 Am att u'apa g s-kehg ha'ichu ahgaj em-wui. Kumt ab i s-wohoch. Pi ach wabsh neneok. Hekia S-ap'ekam Gewkthag at ab t-mah g gewkthag k am em-chehgi mo d wohokam g ha'ichu t-ahga. Am am wa s-mahch mach s-ap himchuth g t-thoakag am em-shahgith. Bach wa masma am em-chehgith mamt has wo i chum masmak. 6 Kum am t-oithch s-ap hab e junihim ch hab s-ap hab junihim g t-kownalig Jesus tatchui. Chum ams em-sho'igchuth, mt ab i s-wohoch g Jiosh ha'ichu ahga. T g Hekia S-ap'ekam Gewkthag ab em-mah g si ge'e s-hehgig. 7 An amsh e wehgaj ha chehgithch g e-wehm wohochuththam mat has wo chum masmak. Mu'ijj ash ab em-amjed ha'ichu mahchim hegam mo am kih Macedonia ch Greece jejewed ch ed. 8 T g Jiosh ha'ichu ahga gm hu a'ai ep jejewed thahm i hih ab em-amjed. Wehsko o an e a'aga mam ab s-wohochuth g Jiosh. K ab hahawa d em-wuikam mamt wo ha ahgi g Jiosh ha'ichu ahga. Kuch ab wabsh em-wui thagitokch. 9 Si amt s-ap ab i t-neith k ab i s-wohoch g s-wohokam Jiosh k gm hu ha thagito hegam mo d wabsh hemajkam ha-nahtoi. Ith o wehsko an a'aga g hemajkam. 10 Ab o wa t-aihim g s-ko'ok namkitha ab amjed g Jiosh. T wabshaba g Jiosh alithag am t-wehhejed e muhkith mat wo t-tho'ibia. T g Jiosh ab i wuhshath muhkig amjed k ab uhpam ep bei. Hemuch amsh s-ap nenida mat ia ep wo jiwia g Jiosh. Alithag ab thahm kahchim t amjed.

1 Thessalonians 2

1 Am am wa s-mahch ahpim t-wehm wohochuththam mat s-ap ha'ichu am hab e juh heg hekaj matt am thatha am ahgachugch g Jiosh ha'ichu ahga. 2 Am ach wa em-ahgith mat ha'i t-sho'igch amai Philippi kihhim t am matt eda koi am hu thatha em-wui. T wabshaba g Jiosh ab i t-mah g gewkthag. Kutt am wabsh s-chechojim ahgachug g s-kehg ha'ichu ahgaj em-wui, chum as mu'i ab t-wui gegok. 3 Ha'ichu t-chegitoithag o am wabsh si s-ap'e. Pi ach em-iattogith ch wabshaba wabsh s-chechojim ahg g Jiosh ha'ichu ahga mamt ab wui wo i e thagito. 4 Jiosh at t-a'appem k am i t-chuhcha matt wo i ahgahi g s-kehg ha'ichu ahgaj. Kuch heg hab wa'i junihim mo haschu d tatchuij ch pi wabsh g hemajkam ha-tatchui hab junimk. Jiosh o am t-mamche mach haschu ahgch hab ha'ichu junihim. 5 Am am wa s-mahch mach pi wabsh em-hehosimhun ch pi em-iattogith machs wo ha'ichu em-wohppo'i. Jiosh o s-mahch mo d wohokam ihtha. 6 Pi ach hekith am hu t-gahgith mas g o'othham ab wo ge has t-elithath ch ab wo t-hehgchulithath. 7 Bo hi wa chum mahs mamt ab wo si has t-elithath ch ha'ichukaj wo i t-wehmtath ahchim mach d Jesus chuhchai. Kuch wabshaba pi am hu t-gahgith ihtha nach pi si s-hemajim ab em-neith hab masma mat g ha-je'e ab wo ha neithath g e-a'aliga. 8 Si ach pihk t-elith ab em-wui ch hekaj am wabsh i t-thagitokch em-wehhejed mach em-ahgithahim g s-kehg ha'ichu ahgaj g Jiosh, chum achs hems heg hekaj wo t-ko'ij. 9 Am amtp hu wa'i s-chegito mach si chikpan wabsh i si'alim amjed ch mehk s-chuhugam k ed matt pi ha'ichukaj wo em-kudu. 10 Si ach wa s-ap ab em-neith ch pi hekith hab wua g pi ap'ekam ab hema i em-wui. Jiosh o s-mahch ihtha. Kum ahpim hab wa'ap s-mahch. 11 Jiosh o ab i em-waith mamt am wo ap'ethagk kihthaj ed ch ab wehmaj wo u'ukchith g ab has elithadag. Kum s-mahch mach am i em-gewkemhun wepo masma mo g ha-ohg ch ab s-ap i em-neneokith ch i em-chehani mamt am hab wo masmak mam d Jiosh a'aliga. 13 Heg ach wa'i ahgachug Jiosh ha'ichu ahga ch pi g hemajkam ha'ichu ha-ahga. Kumt hab wa'i masma hab elith k hekaj ab i s-wohoch. Jiosh o am i chikpan em-shahgith ch am wohokamchuth mo d ha'ichu ahgaj. Kuch hekaj chum hekith ab si ho'ige'elith. 14 Am am ha oithch hab e wua hegam e-wehm wohochuththam mo am a'ai kih Judea ch ed. Ha-wehm o'othham o ha sho'igchuth. K hegam wabsh s-ap ab nakog. Kum ahpim hab wa'ap wabsh s-ap ab nakog mo g em-wehm o'othham em-sho'igchuth. 15 Tho hegam ni-wehm o'othham mat wa mua g t-kownalig Jesus. Kush d t-shohshon mat wa ha koktha g Jiosh ha'ichu i tashogiththam. K hegam ni-wehm o'othham t-sho'igchuth ch gm hu i t-wuwhas ahchim mach am ahgachug g s-kehg ha'ichu ahgaj g Jiosh. K g Jiosh pi hohho'ith mo has e wua. Chum o hems ab wehs ha wui gegok g hemajkam 16 chum t-shohbithch ahchim mach ha ahgith g go'ol hemajkam hegai mat hekaj wo e tho'ibia. T ith ab wabsh ba'ich i ge'ethaj g pi ap ha-chu'ichig. Kut heg gm hu ai mat ab ha wui wo jiwia g wehs s-ko'ok ha-namkithadag. 17 Pi att sha'i pi em-chegito matt hekith am i t-gawulkai ab em-amjed. Chum ach s-em neithamk 18 ch am ha hekaj chum si i t-nako matt am uhpam wo hihi em-wui. Ahni Paul ant mu'ikko am chum uhpam s-himim. T am ni-kuh g jijawul ha-ge'ejig Satan. 19 M eda d ahpim mach am si em-hiwig ch em-hekaj wo si s-hehgigk ch ab wo si ho'ige'el g t-kownalig Jesus mat hekith ep wo jiwia.

1 Thessalonians 3

1 Am att i pi t-nako am em-chegitokch. Kum s-mahch matt am i kei g t-wehnag Timothy mat am wo him k am wo em-nei. Tt ahchim am hejel wih Athens kihhim t am. Timothy o si s-ap ahgachug g s-kehg ha'ichu ahgaj g Jiosh ab amjed g Christ. Kutt hab i t-ah mat am wo him k am wo i em-gewkemhun k am wo i gewkai g em-wohochuthadag. 3 Kumt hab pi hedai wo sha'i thagito g Jiosh ha'ichu ahga heg hekaj e-sho'igchuthadag. Am am wa s-mahch matt wo t-sho'igch ith hekaj t-wohochuthadag. 4 Ith ach wa heki hu am em-ahgith mach eda am em-wehmajkahim. Kum s-mahch mat wa woho hab e juh. 5 Kunid s-gihug mat am hu wo i em-bijim g ge Jiawul. Kut wo heki e wua g t-chikpan am em-shahgith. Nt pi ni-nako manis am ba'ich ep wo i neahi k hekaj am i kei g Timothy mat wo s-mai mams am wabsh kia ab s-wohochuth. 6 T hemuch ia ep jiwia ab em-amjed k ia u'apa g s-ta hohho'itham ahga ab amjed g em-wohochuthadag ch pihk em-elithadag. Am o t-ahgith mam chum hekith si s-ap am t-chegito ch hab wa masma chum s-t-neithamk mach ahchim has i masma chum s-em-neithamk. 7 Mu'i ach ha'ichu nakog ch mu'i t-sho'igchuth. K wabshaba g em-wohochuthadag ab t-gewkemhun. 8 S-gegokim amki ab s-wohochuth g t-kownalig Jesus. Kuch ab si t-nenenashanichuth 9 ch ab si i ho'ige'elith g Jiosh mam hab wa masma ab t-mahkch g s-hehgig. 10 Chum ach hekith ab tahni g Jiosh wehs t-ihbthagkaj matt wo wa ep em-neith k ab wo i em-wehmt mamt s-ap ab wo s-wohochuthath g Jiosh ha'ichu ahga. 11 Mat hems wo wa'i t-hiwigi g t-ohg Jiosh ch t-kownalig Jesus matt am wo wa ep em-nei. 12 Ab ach tahni g Jiosh mat ba'ich ab wo i em-mah g gewkthag mamt hekaj wo si pihk e elithath ab a'ai e wui ch ab ha wui g wehs hemajkam. 13 Kumt s-gegokim ab wo wohochuthath g Jiosh ch ab wui wo gawulkthask ab amjed g pi ap'ekam mamt pi wo ha chu'ichigk mat hekith ep wo jiwia g t-kownalig Jesus wehs ha wehm hegam mo d hemajkamgaj ch heki hu koi.

1 Thessalonians 4

1 Pegih, t-wepnag, am ach wa em-ahgith mamt has masma wo himath g e-thoakag ch hab wo hohho'ithach g Jiosh. Ab amt bei g ha'ichu t-ahga. Kuch hemuch ab si em-tahni ch ab em-chehani am wehhejed g t-kownalig Jesus mamt ba'ich am hab wo i junihith. 2 S-mahch am mach wa has masma am em-shelinith g gewkthajkaj. 3 Jiosh o em-tatchuith mamt ab wo si i e gawulkai pi ap'ekam amjed k wo si e nuhkuth g hejel e-wehm kihkam wehhejed. 4 Ahpim chechoj amt wo s-mahchk mamt wo si s-ap ha hohnt am tahgio g Jiosh ch am hemajkam ha tahgio. 5 Hegam mo pi mahch g Jiosh o wabsh hejel e-tatchui wehhejed bebhe g uwi. Mt wabshaba ahpim pi hab masma wo be 6 k hab pi ab hu hedai wui pi ap has wo chu'i. Heki ach hu am em-ahgith mat g Jiosh s-ko'okam wo ha namkith matp hedai am hab wo juh ihtha pi ap'ekam. 7 Jiosh at pi hab ahgk ab i t-gawulkai machs am hab wo junihith g s-uam ha'ichu. Tho tatchuij matt d wo hekia s-ap'ekamk. 8 K heg hekaj ab t-mahkch g Hekia S-ap'ekam Gewkthag. Hegai matp hedai wo s-ohhoth ihtha mashchama at wo s-ohhoth g Jiosh. 9 Heki atsh hu i em-tashogi g Jiosh mamt wo si pihk e elithath wehs ha hekaj g e-wehm wohochuththam. K pi hab chum mahs machs am hu ep wo ge em-o'ohani ab amjed. 10 Si amsh pihk e elith wehs ha hekaj g e-wehm wohochuththam am wehs Macedonia jewed ch ed. Kuch wabshaba ab si em-tahni mamt ba'ich am hab wo i e junihith. 11 Am g wo i e nakog mamt wo s-thotholimak ch am hab wo junihith g hejel e-chikpan ch wo ha'ichu e gahgithath. Ith ach wa heki hu hab em-ahgith. 12 Bamt masma pi hedai ab hu wo hiwgath mas ab wabsh wo em-mah hegai mam haschu i tatchua. T hegam mo pi mahch g Jiosh wo em-nei mam s-chikpnadag k ab wo si has em-elithath. 13 Si ach em-tatchuith mamt wo s-mahchk g wohokam ab ha amjed hegam mat heki hu koi. T hahawa pi wo i em-bijim g pi ap tahhathkam hab masma mat hab wo ha juh g pi wohochuththam. 14 Neh, ab at i wuhsh g Jesus muhkig amjed. Kuch s-wohochuth ihtha ch hekaj ab wui nenea mat g Jiosh ab ep wo i ha wuwhas hegam mat koi ab s-wohochuthch g ha'ichu ahgaj ab amjed g Jesus. 15 Hegam atsh wo i wuwha ab amjed g muhkig matt koi an hu wo nam g t-kownalig Jesus. 16 Wehpeg at ab wo si s-kaitham t-wai g anghil ha-ge'ejig. T g Jiosh kuikud ab haha wo kaitha. T ab haha wo i hud g t-kownalig Jesus ab thahm kahchim t amjed. T hegam mat heki hu koi ab s-wohochuthch g Jesus ab wo i wuwha. 17 T hegam mat hedai in d wo kia thothakamk heg i tash ed ab haha wo i e hemapai ha wehm chewagi ch ed k an wo nam g t-kownalig. Kutt am i amjed chum hekith wo wehmajk g t-kownalig. 18 Ab g wo si e gewkemhunath ith hekaj ha'ichu ahga.

1 Thessalonians 5

1 Pi o hab mahs manis am hu wo em-o'ohani ab amjed mas hekith hab wo i e juh ihtha ha'ichu mani am ahg. 2 Am am wa s-ap s-mahch mat chum s-a'agi wo e ai mat ep wo jiwia g t-kownalig Jesus. Neh, pi o ta machima mas hekith wo i jiwia g s-chu ehskam chuhug ch ed, o mas hekith wo i e ai mat g uwi ab wo taht g s-ko'ok k wo bei g ali. K hab wa'ap pi ta machima am ha wehhejed g pi e tho'ibiakam mas hekith ep wo jiwia g t-kownalig. 3 Ihtham at hab wo kaijjith mo wehs ha'ichu am wabsh i si s-ap'e ch s-thotholima. T am wabsh wo si e ai mat wo e ko'ijith k pi wo e tho'ibia. 4 Kum eda ahpim e tho'ibiakam s-mahch ihtha. K pi hab chum mahs mat s-a'agi wo jiwia hegai tash em-wui hab sha masma mo g s-chu ehskam. 5 Jiosh o ha'ichu t-tashogith. Kuch an u'ukch g tonlig hab masma mo hegam mo am tash ed hihim. 6 Pegih, tt wo chum s-nenenashanik ch pi hab wo masmak mo g nawkkoi. 7 Hegam mo pi nenenashanik ch nawkko'o o am eda g s-chuhugam. 8 Kutt wabshaba ahchim s-ap wo t-nahtokchith hab masma mo g shonthal. T-wohochuthadag ch pihk t-elithadag o d wainomi lihwa t-wehhejed. Kuch ab wui t-gewpkathch mat g t-tho'ibiathag s-ap wo e nahto. K ith hab sha masma mo g wainomi wonami t-wehhejed. 9 Pi at hab ahgk ab i t-gawulkai g Jiosh mas wo t-namkith heg hekaj pi ap t-chu'ichig k wabshaba hab ahgk mat g t-kownalig Jesus Christ wo t-tho'ibia. 10 Heg at muh t-wehhejed k i wuhsh matt d wo thothakamk wehmaj. K wabsh chum has masma s-ap'e chum achs wo heki hu koi o in d wabsh wo kia thothakamk mat wo jiwia. 11 Mt heg hekaj ab wabsh wo si a'ai e gewkemhunath ch ab a'ai ha'ichukaj wo i e wehmajk mam am hab wa e junihim. 12 Ab ach si em-tahni mamt s-ap ab wo ha neithath g e-wanimedtham ch hegam mo am em-mashcham ch ab shohbithch g pi ap'ekam em-shahgith. Tho Jiosh hab elitha mo hab wua. 13 Ab g wo si has ha elithath ch s-ha ho'ige'ithath no pi hab wua a Jiosh chikpan. Am g wabsh wo s-thotholim kihk e wehm. 14 Ab ach si em-tahni mamt wo ha ahgithath hegam mo s-papadma mat wo chikpanath. Ab g wo i ha gewkemhunath hegam mo pi wihnam gegok am e-wohochuthadag ed. I g wo ha wehmtath hegam mo pi ha gewpthag ch ab wehsijj wo si ha bahbgi. 15 Pi g am uhpam wo agwua mat hema s-ko'okam wo em-juh k wabshaba chum hekith am wo i e nakogath mamt s-ap ha'ichu hab wo wuath ab a'ai e wui ch ab wehs ha wui g hemajkam. 16 Chum g hekith wo s-ap e tahtkkath. 17 Chum g hekith wo e ho'ige'ithahunath. 18 Ab g wo s-ho'ige'ithath g Jiosh, chum atp haschu has wo i chu'igk. Ith o d Jiosh tatchui em-wehhejed ahpim mamt ab i e hemakoj g Jesus Christ wehm. 19 Pi g am hu wo shohbith g Hekia S-ap'ekam Gewkthag. 20 Pi g am wo s-kaihogi hegam mo g Jiosh ab ha mahkch g ha'ichu ahga 21 k wabshaba wehs ha'ichu wo i a'appemath ch g s-ap'ekam ab wo u'ukchith. 22 Im g hu wehs hab wo i juhni g pi ap'ekam. 23 Jiosh o ab t-mahkch g s-ap tahhathkam. Kuni ab tahni mat wehs gm hu hab wo i juh g pi ap'ekam ab em-amjed k wo si nuhkuthath g em-thoakag ch em-ihbthag ch em-hon mat d wo hekia s-ap'ekamk. Mt am hahawa pi wo ha chu'ichigk mat ep wo jiwia g t-kownalig Jesus Christ. 24 Jiosh at ab i em-wai e wui k chum hekith hab junihim mo has i kaij. 25 Am g wo t-wehhejed e ho'ige'ithahunath. 26 Am g wo ha ahgith g t-wehm wohochuththam mat ab wo i s-t-ho'ige'el. 27 Ni ab si em-chehani g t-kownalig Jesus gewkthagkaj mamt am wo ne'okchul ihtha o'ohana am wehs ha wui g t-wehm wohochuththam amai. 28 Neh, ab at wo wa ba'ich i s-em-ho'ige'el g t-kownalig Jesus Christ.

2 Thessalonians 1

1 T-wepnag mam am kih Thessalonica t am: Am ant ep wo i em-o'ohani ahni Paul. K ia ni-wehmaj g Silas ch Timothy k ch am i ni-wehmaj. Tham woho hemajkamgaj g t-ohg Jiosh ab i e thagitok t-kownalig Jesus Christ wui. 2 Ab o wa si s-em-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i em-mahkath g i wehmtadag ch s-ap tahhathkam. 3 Chum ach hekith ab si ho'ige'ith g Jiosh em-hekaj, t-wepnag. Am amsh si i gewkahim e-wohochuthadag ed ch ba'ich i si pihk e elith ab a'ai e wui. 4 Kuch heg hekaj si s-ap t-tahtk ch wehsko ha ahgithahim g t-wehm wohochuththam ab em-amjed. Msh am em-sho'igchuth nam pi ab s-wohochuth g Jiosh. Kumsh eda s-ap ab nakog g e-sho'igthag am wehhejed g Jiosh. 5 Ith o am wohokamchuth mat am i em-ap'ech g Jiosh e wehhejed k pi ab hu ha'ichu wo em-abch am lothaita ch ed. Am am e sho'igchuth wehhejed g Jiosh kownaltalig. K g Jiosh hab em-elith mam d s-ap'ekam ch am wo i em-wahpki e-kihthag ed. 6 Jiosh at s-ap hab wo juh g lothaita. Hegam mo em-sho'igchuth at wo e sho'igch heg hekaj. 7 Kumt ahpim wo e tho'ibia ab amjed g e-sho'igchuthadag. Jiosh at hab wo juh ihtha mat hekith ep wo jiwia g t-kownalig Jesus ab thahm kahchim t amjed. T ia wehmaj wo thatha g anghiligaj k wo si s-gewkthagk. 8 T ia wehmaj ep wo e chehgi g si ge'e mei. T wo s-ko'okam ha namkith g Jesus hegam mo pi mahch g Jiosh ch pi ab hu wohog elith g s-kehg ha'ichu ahgaj ab amjed g t-kownalig Jesus. 9 Hegam at gm hu wo si i e gawulkai ab amjed g Jiosh k pi hekith wo bei g ge'e gewkthaj k chum hekith ab wo beihith g s-ko'ok e-namkithadag. 10 Ith at hab wo e juh mat hekith ia ep wo jiwia g t-kownalig Jesus. Kut g gewkthaj am haha wo i chehgi mat t-tho'ibia k ab i t-gawulkai e wehhejed. 11 Pegih, heg ach hekaj chum hekith ab t-ho'ige'ithahun Jiosh wui am em-wehhejed. Ab at i em-wai mamt wo e tho'ibia k d wo a'aligajk. M hab hahawa s-junimk g s-ap'ekam ab s-wohochuthch. Kuch ab tahni g Jiosh mat am e-tatchui oithk hab wo em-juh k hab s-ap hab wo em-elithath. Jiosh o gewkthag mat hab wo juh ihtha mach ab tahni. 12 Kumt ab wo si ha'ichuchuthath g t-kownalig Jesus. T heg hab wa'ap ab wo si em-ha'ichuchuthath. Jiosh at si s-hemajim am i ap'ech g e-alithag wehm mat ith hab wo em-juni.

2 Thessalonians 2

1 Bach wa em-ahgith mat ep wo jiwia g t-kownalig Jesus Christ k ab e wui wo i t-ui. 2 Kush am hema em-ahgith mat heki hu hab e juh. Pi g am wo sha'i e kudut k pi sha'i ha wohochuth, chum as hems hab wabsh e wua mo heg am ha tashogith g Jiosh o atp hems em-ahgith matt ahchim hab masma ha'ichu o'oha. 3 Koi at e ai. Hemho wa at wehpeg am hab wo e juh mat mu'i ab wui wo gegokiwua g Jiosh hegam mo hab chum kaij mo ab s-wohochuth. T am hahawa hema wo i wuhsh g o'othham k wehs ha ba'iwechkim d wo pi ap'ekamk ch d wo si obgajk g Jiosh ch am wo i wah ge'e cheopi ch ed am Jerusalem t am k am wo thahiwua mat g hemajkam ab wo jiosht. Kut pi wo ha hiwigi mas ha'ichu ep wo jioshgak. T g Jiosh s-ko'okam wo namkithath chum hekith. 5 Am am wa s-chegito mani wa am wa heki hu em-ahgith ihtha mani eda am em-wehmaj. 6 S-mahch am mo g pi ap'ekam an e shohbithch hemu. T wabshaba has tash in hu hab wo i e juh hegai mo an shohbithch. 8 T am haha wo jiwia g t-kownalig Jesus k si s-masma ab wo e chehgith k ab ab wo ihbhe hegai si pi ap o'othham k hekaj wo mu'a k gm hu wo si i tha'ich mamt hebai wo ha nehnich g jijawul. 9 T g jijawul ha-ge'ejig Satan ab wo mah g gewkthag. Kut hab wo juh g nahnko mahs s-hasig ha'ichu ch s-ta neithamam ha'ichu mat wo ha iattogi g hemajkam. 10 Kut hegam ab wo i s-wohoch mo hedai d pi e tho'ibiakam. 11 Jiosh at hab wo ha juh mat wabsh g ha'ichu iattogi ab wo s-wohoch no pi ihtham s-hohho'ith g pi ap'ekam ch pi ab hu wo bei g wohokam mat hekaj wo chum e tho'ibia. 12 T hegam mo e iattogith ch ab s-wohochuth hab wa'ap ab wo bei g s-ko'ok e-namkithadag. 13 Mt wabshaba ahpim wo e tho'ibia ab amjed g s-ko'ok e-namkithadag. Si o pihk e elith g t-kownalig Jesus Christ em-hekaj. Kumt am wehmaj ab wo e ha'ichuchuthath. Gd hu i si wehpeg at am i ap'ech g Jiosh mat g Hekia S-ap'ekam Gewkthag ab wo i em-gawulkai wehhejed. Kumt ab i s-wohoch ihtha s-kehg ha'ichu ahgaj mach wa am em-ahgith. Ith ach hekaj ab i ho'ige'ith g Jiosh. 15 Pegih, am ach wa em-mashcham ihtha wohokam ch am ep em-o'ohanith ab amjed. Kumt s-wihnam wo gegokkath ch an wo u'ukchith. 16 Ab o t-wui si pihk e elith g t-kownalig Jesus Christ g Jiosh t-ohg wehm ch ab si s-t-ho'ige'el. Kuch heg hekaj ab wui t-gewpkathch. 17 Ahchim ach ab tahni mat ab wo i em-gewpkathch mamt g s-ap'ekam am hab wo junihith ch hab wo kaijjith.

2 Thessalonians 3

1 Ab g wo e ho'ige'ithahun, t-wepnag, k ab wo tai g Jiosh mat pi ab hu wo e shohbi g ha'ichu t-ahga ab amjed t-kownalig Jesus. T mu'ijj ab wo si has i elith k ab wo s-wohog el hab masma mo am hab e wua em-shahgith. 2 Pi ap hehemajkam o pi ab hu wohochuth g Jiosh ha'ichu ahga ch ab t-wui gegok. Kumt am wo si e ho'ige'ithahunath mat wo t-tho'ibia g Jiosh ab ha amjed. 3 Jiosh at hemho wa am hab wo juh mo haschu i t-ahgith. S-mahch ach mat ab wo i em-mah g gewkthag k wo em-nuhkuth mat pi wo em-gehg g Jiawul. 4 Tham t-wehm wohochuththam. Kuch heg hekaj hab em-elith mam am hab junihim hegai mach ab i em-mashcham ch am hab wabsh wo i junihith. 5 Ch ab i tahni g t-kownalig Jesus mat hab wo em-juh mamt ba'ich wo i mai g Jiosh pihk elithadag k wo s-chu nakogath hab masma mo hab masma g Jesus Christ. 6 Heki ach hu em-mashcham mamt wo s-wapagimak. K eda ha'i hegam mo d wohochuththam s-papadma ch pi am hu oithch hab e junihim g t-mashchama. Ch ab em-chehani g t-kownalig Jesus Christ gewkthagkaj mamt pi am hu wo ha wehmajk. 7 Am am wa t-neith mach wa pi sha'i papadma mach wa am em-wehmajkahim. Kum am wa s-mahch mamt am chum t-oithk hab wo wa masmak. 8 Si ach wa chikpan chum hems s-chuhugam k ed matt am wo wa ha'ichu ha namkithath hegam mach hedai i kih am thadha mamt pi ha'ichu wo heki gei t-wehhejed. 9 Bo hi wa chum mahs mach ap'ethag mamt ab ha'ichu wo i t-namkith nach pi d Jiosh pionag em-wehhejed. Ch wa wabshaba hejel t-thagio'ith matt am wo em-chehgi mamt has wo chum masmak. 10 Bach wa em-ahgith mach eda am em-wehmaj mamt pi wo ha gegos hegam mo pi tatchua mat wo chikpanath. 11 Kah ach mo am em-shahgith ha'i s-papadma ch pi chikpan ch wabsh himchuth g has ahgadag. 12 Ch ab si ha chehani g t-kownalig Jesus Christ gewkthagkaj ch ab ha gewkemhun mat am wabsh wo i e bahbgi k wo chikpanath ch hekaj wo e thagio'ithath. 13 Kumt ahpim mam wabsh s-ap am hab e junihim am hab wabsh wo i junihith g s-ap'ekam ch pi wo thagito 14 ch wabshaba wabsh wo thagito hegai matp hedai pi ab hu wo wohog elithath ihtha mani ia em-chehani. Tp hems ab wo wa bei g si edathag k am wo i e ap'ech. 15 Am g wo s-chegitok mo pi d em-obga ch wabshaba d em-wepnag mamt ab wo shohbithath ha'ichukaj. 16 Chum at hekith am wo em-wehmajk g t-kownalig Jesus. Kuch ab tahni mat chum hekith ba'ich ab wo i em-mahkath g s-ap tahhathkam. 17 Ahni Paul ant ia hahawa si hejel ha'ichu wo o'oha hab masma mani hab wa wua an wehs ni-o'ohana ed. Mt hab masma wo s-mahchk mani d ahni. 18 Neh, ab at wo ba'ich i s-em-ho'ige'el g t-kownalig Jesus Christ.

1 Timothy 1

1 Ni-wehnag Timothy: Ia ant ha'ichu wo i m-o'ohani ahni Paul mani d kehshaj g Jesus Christ. Jiosh at ni-cheha mant wo i ahgahi ab amjed g alithaj Jesus Christ. T hab ab wo hiwgath g hemajkam mat heg am wo ha u'apa Jiosh kihthag wui. 2 Ab g ni-kaiham ahpi Timothy map d ni-alithag ab i s-wohochuthk g ha'ichu ni-ahga ab amjed g Jesus Christ. Ab o wa si s-m-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i m-mahkath g i wehmtadag ch s-ap tahhathkam. 3 Ab ani wa si s-ap m-ahgith mapt am wo wih Ephesus t am mani wa am him gm hu wo himk Macedonia wui. Am g wabsh i thakath ch am wo si ha keshwua hegam mo g iattogi chum ha mashcham. 4 Ihtham o chum ha mashcham mo g hoho'oki a'agitha ab wehnags g Jiosh ha'ichu ahga ch ep chum ha mashcham mat hemho wa wo s-chegitok g e-shohshonbad ha-chechgig. T wabshaba ihtha ha-mashchama hab wo ha juh mat wo thagito g Jiosh hab elitha k ab wabsh a'ai wo e ne'owinath. Bat wa'i masma wo s-mahchk g Jiosh hab elitha mat ab wo i s-wohoch g ha'ichu ahgaj. 5 Pt wo ha ahgi mat woho ab wo s-wohochuthath g Jiosh ha'ichu ahga ch heg hab wo wa'i junihith mo haschu s-mahch mo d s-ap'ekam ch hab pi wo e kudutath. Ith at hab wo ha juh mat wo i ge'etha g ha-tatchuithag. 6 Ha'i at thagito g e-wohochuthadag k hekaj wabsh ha wehm e ne'owin. 7 Ihtham o hab chum e elith mo d chehanig ha mashchamtham ch wabshaba pi amichuth g Jiosh ha'ichu ahga chum as hab e elith mo s-e mahchk ch neneok. 8 S-ap'e o g chehanig. K wabshaba ihtham pi ap hekaj am chum ha shohbithch hegam mo hab wua g s-ap'ekam. K eda g chehanig chum e hekaj mat wo ha shohbi hegam mo g pi ap'ekam hab wua. Ihtham o pi ab hu has elith g Jiosh ch pi ab hu wohog elith. Ha'ijj o s-ha mu'amk chum hems g e-ohg o g e-je'e. 10 Ha'ijj o g s-totontom ha'ichu chegitok ch chum hems chum e u'uwichuth o e chechojchuth ch e wehm hab junihim g s-uam ha'ichu. Ha'ijj o ha lilsochuth wabsh hejel e wehhejed ch ha iattogith ch ab ha'ichu ha abchuth g s-ap'ekam o'othham. Nahnko masma o ab wui gegok g mashchamaj g Jiosh hegam mo chum ha mashcham g iattogi. 11 Jiosh o ni-nuhkuthachuth ihtha s-kehg ha'ichu e-ahga. K heg am t-tashogith ihtha mant em-ahgi. 12 T-kownalig Jesus oki hab ni-elith mant s-ap am hab wo junihith ihtha chickpan nat pi am i ni-kehsh k ab ni-mahkch g gewthag wehhejed. Kuni heg hekaj ab si ho'ige'ith. 13 Heki anid hu wa ha sho'igchuth hegam mo ab s-wohochuth g Jesus ch ab ha wui pi ap has ahg g Jesus. Kut eda heg ab si i s-ni-ho'ige'el nani pi pi ni-mahch ch hab junihim pi ab hu wohochuthch. 14 Si at s-hemajim ab ni-wui i e tashogi. Nt hab ab i s-wohochuth k ab i ni-hemakoj wehmaj k ab wui a pihk ni-elith. 15 Neh, hema hab che'ithag o hab chu'ig. “Ia at jiwia g t-kownalig Jesus jewed thahm mat wo ha tho'ibia g pi ap chu'ijkam.” K ith d si wohokam nat pi ab si s-ni-ho'ige'el. Ni eda shahag wepo mani wa wehs ha ba'iwechkim d si pi ap chu'ijkam mani wa cheggia g t-tho'ibiakam Jesus ha sho'igchuthch hegam mo ab s-wohochuth. T heg ab wabsh ni-bahbgi mat wehs am wo ha chehgi g hemajkam mat ab wabsh wo ha bahbgi. Tp hems hab wa'ap ab wo i s-wohochuth k ab wo bei g pi ha huhugetham thoakag. 17 Neh, wehs ha'ichu thahm o d kownal g Jiosh ch pi ta neithagma ch pi hekith im hu hab wo i e juh. Kutt ab wo si uhgk i ulin k ab wo hehgchulithath chum hekith. Neh, woho o wa ihtha. 18 Pegih, ni wehnag, Timothy, heki o hu am i t-tashogith g Jiosh maptki am hab wo junihith ihtha chikpan. Kuni ab ep i m-gewkemhun mapt hab wo wa junihith. Hegai Jiosh ha'ichu ahga ab m-wui at hab wo masmak mo g s-kehg cheggiakud. Pt hekaj ab wui kehkkath g ge Jiawul. 19 An g si u'ukchith g e-wohochuthadag ch heg hab wo wa'i junihith map haschu s-mahch mo d s-ap'ekam. Ha'ijj oki pi hab masma ch hekaj padch g e-wohochuthadag. 20 Hymanaeus ch Alexander oki ha'i hegam ch pi ap has ahg g Jiosh. Nt gm hu i ha thagito ge Jiawul wui mat wo e sho'igchuth k atp hems wo thagito g pi ap e-chu'ichig.

1 Timothy 2

1 Si ani s-m-ahgithamk mapt wo ha'ichu ha ahgi g t-wehm wohochuththam. Tho si ha'ichu mat ab wo e ho'ige'ithahunath Jiosh wui. Pt wo ha ahgi mat ab wo tahnith g i wehmtadag ch wo e ho'ige'ithahunath am ha wehhejed g wehs nahnko mahs hemajkam. 2 K hab ep mahs mat wo e ho'ige'ithahunath am ha wehhejed g kokownal ch u'usagakam mat ihtham s-ap hab wo junihith g e-chikpan. Kutt hab s-thotholim wo kihthagk ch wo s-ap t-tahtkkath. 3 Neh, ith at wo hohho'ithach g Jiosh no pi d t-tho'ibiakam 4 ch tatchua mat wehs nahnko mahs hemajkam wo e tho'ibia k wo s-mai g wohokam ab amjed. 5 Tho wa'i hemako g t-ohg Jiosh. K hab wa'ap d wa'i hemako g si Kehshaj ch d Jesus Christ ch d wa'i hegai mat i t-hemakoch g Jiosh wehm. Jesus Christ at t-wepo e juh mat d wo o'othhamk 6 ch ab wo bei g s-ko'ok t-namkithadag k hab wo t-tho'ibia. Ith o am t-chehgithch mo wehs hemajkam s-ha tho'ibiamk g Jiosh. 7 Kut heg hekaj am i ni-kei mant wo i ahgahi ab amjed g alithaj k wo ha mashcha g gawul mahs hemajkam g wohokam. S-mahch ap wehs ihtha. 8 Bant wo chei mat wahm g chechoj ab wo e ho'ige'ithahunath Jiosh wui ch atp hems am wo uhgk uh'ul e-nohnhoi. S-ap at ha'ichu hab wo elithath ch pi wo sha'i s-bagak ab hedai i wui. 9 Kunt hab ep wo chei mat g u'uwi wabsh s-ap ab wo e enigadathch ch ep s-ap hab wo juhkchith g e-mo'o mat pi heg hekaj wo chum si e hahaschuthath. 10 Ab o ha ab mat chum hekith am hab wo junihith g s-ap'ekam ch heg amjed wo e chehgithch mo d wohochuththam. 11 Ab o d ep ha-wuikam mat wabsh s-bahbagi ch s-thotholim ab wo kaiham k wo mahchith g Jiosh himthag. 12 Ahni ani pi sha'i ha hiwgith g u'uwi mas wo ha mashcha g chechoj o am ha thahm wo e uh'ulinchith. 13 Ab o ha ab g chechoj mat am wo i ha wanim g hemajkam ith eda himthag. Jiosh at wehpeg nahto g cheoj k am haha wabsh oithk nahto g uwi. Ihtham ash wa hab chechgig Adam ch Eve. 14 Kush pi d Adambad mat e iattogi. Hegai uwi atsh e iattogith k melchkwua g Jiosh chehanig. 15 T g Jiosh heg hekaj ab ha mah g u'uwi mat wo e sho'igch hekith am i ha mamsijith g a'al. T wabshaba ab ha amjed wo mahsi g t-tho'ibiakam. Kut wo e tho'ibia matp ab wo s-wohochuthath g Jiosh ch wo si pihk e elithath wehs ha hekaj ch wo s-ap'ek ch wo s-e neimakath.

1 Timothy 3

1 Tatchua o g si s-kehg chickpan hegam matp hedai s-ha wanimelimk g wohochuththam. Neh, ith o d hab ha che'ithag ch d wohokam. 2 Kunt am wo i em-chegitoch mat has wo chum masmak hegam mo hab s-e junimk. S-ap at d wo o'othhamk. T hab pi hedai wo e nako mas ab wo ha'ichu ha abch. Hemako at wo wa'i hohnigk ch wo si s-e tahtkk wehs ha'ichu k ed ch wo si s-ap hejel e nuhkuthath ch s-ap ha'ichu am hab wo junihith ch wo s-chechojimak hegam ha wui matp hedai am wo ha chehgio ha-kihki am. Ab o ha ab mat wo s-mahchk mat has masma wo ha mashcha. 3 Pi o hab chu'ig mas wo nawkko'oth o s-hohtam wo babgatath o wo ha kawnith o heg wa'i lial ab wo si tatchuath. 4 S-hemajim at am wo ha thahmk g e-wehm kihkam. T g a'aligaj ab wo wechok ch ab wo si has elithath. 5 Pi at has masma wo s-ap i ha wanim g e-wehm wohochuththam matp pi ap wo ha wanim g e-wehm kihkam. 6 Pi at d wo hema hegamk mat hemuch ab i s-wohoch g Jiosh ha'ichu ahga nat pi am hu wo chum si e haschuthath ch wo i gei hab masma matsh wa g ge Jiawul hab e juh. 7 Heg amt am wo i kei mo chum hems g pi wohochuththam ab si has elith. T hab pi hedai ab hu ha'ichu wo chu'ichigch mas heg hekaj wo i wua g ge Jiawul. 8 T hab wa'ap s-ap d wo o'Othhamk hegam mo am i ha wehmaj g ha wanimedtham. Pt wo ha ahgi mat pi wo chu iattomk ch pi wo nawkko'oth ch pi heg wa'i lial ab wo tatchuath. 9 Tho si ha'ichu mat am wo si wehs s-ap oithath g Jiosh ha'ichu ahga ch heg hab wo wa'i junihith mo haschu s-mahch mo d s-ap'ekam. 10 Wehpeg amt am wo i ha mamche k am haha wo i ha chuhcha matp s-ap am hab wo masmak. 11 U'uwi chikpantham at hab wa'ap s-ap d wo u'uwik ch pi wo chu ahgamk ch pi wo nawkko'oth ch pi wo chu iattomk. 12 Ihtham i ha-wehmttham at hehemako wo wehm kihkamk ch hab wa'ap s-ap wo ha thahmk g e-a'aliga ch s-ap wo himath g e-kihthag. 13 Hegam mat s-ap hab wo juh g e-chikpan at pi wo has e elith k si s-gewkam am hab wo junihith. Kumt ab wo si has ha elithath. 14 Bani chum ni-tahtk mant s-hohtam am wo i m-chehgim. Tp wabshaba hems pi wo ni-ap'et. Kunt heg hekaj am wo ha'ichu i m-o'ohani. Kumt ith ab wo s-mahchk mamt has masma hab wo e junihith mamt s-ap wo himchuthath g Jiosh himthag. Tham Jiosh hemajkamga ch d nuhkuththam g wohokam. 16 Pi o wa ta machima matt has masma wo s-ap'ekamk am Jiosh tahgio. T wabshaba ith am i t-tashogi g Jiosh. K d wohokam ihtha mo an hab chu'ig ne'i ed: T-wepo at hab e juh g Jiosh alithag k an e mahsith. T g Hekia S-ap'ekam Gewkthag am wohokamch mo d s-ap'ekam. S-ta neithamam at hab e juh, chum hems g anghil ha wehhejed. S-kehg ha'ichu ahga ab amjed o an e ahgahim nahnko mahs hemajkam ha wui. T mu'i hemajkam ab s-wohoch. Kut am uhpam ep i bei g Jiosh thahm kahchim wui. Neh, pi at hedai wo sha'i e nako mas wo pi wohokamch ihtha wohokam.

1 Timothy 4

1 Si o tasho am i ni-tashogith g Hekia S-ap'ekam Gewkthag mat ab wo i e ai g tash mat mu'i wo thagito g e-wohochuthadag. Ha'i at wo ha mashcha g iattogi nat pi g jijawul wo i ha wahmuth. T mu'i hemajkam ab wo ha wohog el. 2 Hegam mat chum hekith wo ha iattogithath at pi wo sha'i e kudutath heg hekaj nat pi gd hu wabsh wo i ha ap'et. 3 Ihtham o ha mashcham mo d pi ap'ekam mat wo e hohont ch ep pi ha hiwgith mas wo ko'ath g has mahs ha'ichu hugi. K eda wehs ihtha d Jiosh nahtoi ch am wa s-ap'e am t-wehhejed. Ahchim mach s-mahch g wohokam att hekaj ab wo ho'ige'el g Jiosh k ab wo ui g nahtoij. 4 Jiosh at wehs ha'ichu nahto. K wehs s-kehgaj. Tt hekaj ab wo i ho'ige'ith k ab wo ui. 5 Bo kaij g Jiosh mat g ho'ige'ithahuna am wo i ap'ech nenaj ed. 6 Thapt wo s-ap'ekam piongajk g Jesus Christ maptp am wo i ha ahgi g t-wehm wohochuththam ihtha ha'ichu mashchama. Kupt an wabsh s-ap wo u'ukchith g e-wohochuthadag ch wehs ha'ichu mashchama ab amjed map hab hi wa masma hab e wua. 7 Pi g am hab masma hekaj g hoho'oki a'agitha mas d Jiosh ha'ichu ahga. Pi at hab wo em-juh mamt wo s-a'ap'ek am Jiosh nena ed. Am apt wo si e mashchamath mapt am hab wo junihith s-ap'ekam himthag. 8 S-ap'e mapt wo e momoisha k wo s-gewkk. K wabshaba ab him g tash mat wo huhug ihtha. K heg hekai ba'ich i s-ap'e mapt wo i e gewkai am e-wohochuthadag ed. Ith o ab m-mahkch g s-ap'ekam thoakag ithani ch imhab i ba'ich. 9 Tho si wohokam ihtha ha'ichu ahga. K hab chu'ig mat wehs ab wo i chum s-e wohoch. 10 Jiosh at wehs wo ha tho'ibia hegam mat ab wo i s-wohoch g ha'ichu ahgaj k am wo i e gewpkai wui. Kuch ab s-wohochuth ch heg hekaj am si t-nakog ch mu'i ha'ichu ab nakog matt wo ha ahgi hemajkam ab amjed ihtha. 11 Am g i ha mashcham ihtha mani m-ahgith k ab i ha chehani mat am hab wo junihith. 12 Bapt masma s-ap hab wo e junihith ch s-ap wo neokath. T pi hedai pad has wo m-elithath map d wabsh wechij hemajkam. Ab g si pihk e elithath wehs ha wui ch wo si e nuhkuthath ch pi hab wo junihith g pi ap'ekam. T hab wo e chehgithahith g em-wohochuthadag. 13 Am g i e nakog mapt am wo wa ne'okchulithath g Jiosh ha'ichu ahga am ha-namki ed ch wo ha mashchamath ch am wo i ha gewkemhunath. 14 Neh, ha wanimedtham at was e ho'ige'ithahu m-wehhejed k ab m-taht. T wa hegam mo d Jiosh ha'ichu i tashogiththam am ah mat has mahs chikpan ab m-mah g Jiosh. Pegih, am g i e nakogath ch heg am hab wo junihith. 15 T hab ab wo i e gewkemhunath g wohochuththam an m-neithch. 16 Si g s-e nen'oith map has e junihim ch haschu ha mashcham k hekaj pi wabsh wo heki wua g e-thoakag. T hegam mat ab wo m-kaiha hab wa'ap pi wo heki wua g e-thothakag.

1 Timothy 5

1 Pi g ab wabsh si chehmoth g keli o'othham k wabshaba ab wabsh wo s-ap ha'ichu kakke hab masma mapt g hejel e-ohg hab chum masma hab wo juhkchith. Wechij o'othham apt hab masma ab wo ha neithath mo d m-wepnag. 2 ch g o'oki hab masma map g e-je'e ch g wechij u'uwi hab masma mo d m-u'uwiga. Pt wabsh si s-ap wo ha chegitokath. 3 Am g ha ahgith hegam mo am hemiap e mihshmath mat wo ha nuhkuth hegam mo d si hehe'ejel wi'ikam u'uwi. 4 K wabshaba pi ab hu ha ab mas wo ha nuhkuth hegam mo ge a'aliga. Ihtham ha-a'aliga at wo chum ha nuhkuth nat pi ha ge'egel. K d Jiosh tatchui mat aigo epai wo i ha wehmtath, 5 Hegam mo woho d si hehe'ejel wihpkam o heg ab wa'i hiwig Jiosh ch chum hekith ab tahni g i wehmtadag. Ihtham amt wo ha nuhkuthath 6 ch wabshaba wabsh wo ha thagito hegam mo wabsh e gahgith g s-tahhathkam. 7 Neh, pt wo ha ahgi hegam mo e wehm mihshmath mat hab wo juh ihtha mani m-ahgith. T hab pi hedai has wo ha ahgath. 8 Hegam mat pi wo ha nuhkuth g e-hajuni o ba'ich d i pi ap'ekam mo g mischini. 9 Pi at an hu wo ha ui g wechij u'uwi mat wo ha nuhkuth. Hegam mat wo i ha wehmtath at wo aisk g chuhthpo wehst-mahm a'ahithag ch d wo hegamk mo s-ap e nuhkuthahim g e-kunbad wehhejed 10 ch s-ap ha ge'egel g a'al ch s-ap ha nuhkuth g Jiosh wohochuththam ch wehsko s-e mahch mo ha'ichukaj i ha wehmt hegam mo tatchua g i wehmtadag, chum as hems pi d wo ha-machigak. 11 Wechij u'uwi atp hems ep wo s-kuhkuntam mo eda hab chum kaij mat pi hab wo e juh k wabsh wo chikpani g Jiosh, neh, k hab masma wo e chu'ichigchuth k gm hu hab wo i e juh ab amjed g Christ. 13 Ha'i atp hems wabsh wo s-e papadmakamch an oiopothch ha-kihki oithch, wahm ba'ich i pi ap'e mat wo mai g has ahgadag k an wo gantanath g pi kehg ha'ichu ahga. 14 Ha'i at heki hu hab masma hab e juh k am i oi g Jiawul. Ith o hekaj ba'ich i a-ap'e mat g wechij u'uwi ep wo kuhkunt k wo mahmadt k wo s-ap thagio'i g e-kihthag. T heg hekaj g t-obga pi wo e nako mas wo pi ap has t-ahgath. 16 Am g ha ahgith g u'uwi mat wo i ha thagio'i g hehe'ejel wihpkam e-hajuni k pi ab hu hedai wo mohto'i. Hegam mo am hemiap e mihshmath at hegam wo wa'i ha thagio'i mo d si hehe'ejel wihpkam 17 Am g wehs ha ahgith mat ab wo si has i ha elithath hegam mo d kekel em-wanimedtham ch s-ap am hab junihim g e-chikpan, wahm hegam mo si chikpan ch hab junihim g mashchama ch mihshmetha. 18 An o o'ohanas Jiosh heki hu o'ohana ed: Pi g an hu wo bishdath g woiwis chini mat wo kehimunath g ha'ichu em-bahithag. T am wo wa ha kamshshapath g ha'ichu em-bahithag. K hab d ahga ihtha mamt hab wa'ap wo ha namkithath hegam mo hab junihim g chickpan, chum hems g Jiosh pionag. 19 Pi g ab hu kaiham g ha'ichu abchutha ab hema i ha ab ihtham kekel, heg hi wa mat gohk o waik hab wo chei mo si s-ap s-mahch ha'ichu ab ha amjed, mt am haha wo i mamche. 20 Am apt hemajkam ha kailith k wo si s-ha keh'el hegam mat hedam pi gm hu wo thagito g pi ap'ekam. T hab masma wo s-e gihugath ha'i ehp. 21 Am g wehs wepo masma hab ha juhni ihtham mani m-shelinith k pi hedai sha'i gm hu wo i gawulkai. Ith ani si s-bahbagi ab m-chehani am ha tahgio g Jiosh ch Jesus ch am ha tahgio g hekia s-ap'ekam anghil. 22 Pi g am wabsh si s-e hohtkith mapt am wo hema i kei mat wo chikpani g Jiosh. Tp hems d pi ap chu'ijkam. Kut d wo m-chu'ichig mapt s-hohtam am i kei. 23 Ha'i o g pi ap ha-chu'ichig am tasho e neith. Kum s-ap s-mahch ch pi woho am hu wo i ha chuhcha ihtham. K wabshaba ha'ijj pi am hu tasho e neith g ha-chu'ichig. Mt heg hekaj am wo si i ha mamche mamt hedai am wo i ha chuhcha. (25) K hab wa masma g s-kehg ha-chikpan am tasho e neith. Chum as hi wa pi am hu i si tasho ch wabshaba pi wo ehsto g s-kehg ha-chikpan imhab i ba'ich. (23) Neh, s-e g nen'oithk, Timothy. Pi o kehgaj g shuhthagi amai. Kupt am wo sha'al wehnath g nawait. T hab pi wo m-mumkichuthath hegai shuhthagi.

1 Timothy 6

1 Hegam wohochuththam mo d nenehol at ab wo si has ha elithath g e-a'amo. T heg hekaj pi hedai wo has ahgath g Jiosh ch pi wo has ahgath g t-mashchama. 2 Hegam mo g ha-a'amo hab wa'ap d wohochuththam at ba'ich ab wo i si has ha elithath ch ba'ich i s-ap wo ha chikpani nat pi g ha-chikpan d wo ha-ap'ethagk g ha-wehm wohochuththam. Ith apt hemho wa wo i ha mashcham k hekaj wo ha mihshmath mani wa m-ahgith. 3 Ho o wabsh chum si e hahaschuth ch d wabsh pi ha'ichu mahchim hegam mat hedai i pi heg hekaj wo ha mashcha t-kownalig Jesus Christ mashchama. Heg o d wohokam t-mashchama ch am t-tashogith g s-ap'ekam himthag. K ihtham wabsh tatchua mat wo ha ne'owinath ch wo ha kawnith. Ith o wabsh i wahmuth g hehgamthag ch bagatalig ch pi ap has ahgadag. 5 Kut hegam wo ha kawhainath matp hedam pi ap ha'ichu chegito ch pi mahch g wohokam ch hab chum elith mat g o'othham wo s-e kaisch ith hekaj t-himthag. 6 K wabshaba ith d s-wohokam s-t-kaisthag matt wo himath g s-ap'ekam ch wo si s-ap t-tahtkkath, chum achs pi ha'ichu wo edgithath. 7 Pi ach ha'ichu sha'i u'ath ch in mahsi ith thahm jewed ch pi ha'ichu sha'i be k wo hih. 8 Heg o am wa chum s-ap'e am t-wehhejed matt ab wo wa al he'es ha'ichu ko'ath ch ab s-ap wo t-enigadathch. 9 Hegam mo s-e kaischuthamk at heg hekaj hab wo s-junim g pi ap'ekam. T g ha-tatchui gm hu hab wo i ha juh ab amjed g Jiosh. Kut ha'i ep wo ha padch. 10 Nahnko mahs pi ap'ekam o ab shohshon heg amjed mat hema heg wa'i lialkaj wo si pihk e elithath. Ha'i at heg hekaj im hu hab i e juh ab amjed g e-wohochuthadag k oi wa mu'i ha'ichu pi ap tahhathkam ab nako. 11 Pi g hab masma hab e juhni mo hegam mani am ha ahg nap pi d Jiosh chikpanthamga. Ith apt eda am wo i e nako s-ap'ekam ch e-wohochuthadag ch pihk elithadag ch ha'ichu nakogadag ch hemajimatalig mapt wo wepo chu'igk mo g Jiosh. 12 Am g si e gewkath wehhejed g Jiosh k wo s-wihnam u'ukchith g e-wohochuthadag mapt hekaj am wo i wah Jiosh kihthag ed hab masma mat g s-melithkam hab wo e juh mat wo ha gehg. Ith at hekaj ab i m-bei g Jiosh mapt wa am si s-kehg ah g e-wohochuthadag am mu'i hemajkam ha kaichuthk. 13 Bapt wabsh masma hab wo e juh matsh wa g t-kownalig Jesus natsh pi heg s-ap ah g wohokam am tahgio hegai ge'e kownal mo hab chehgig Pontius Pilate. Kupt wehs am hab wo juh ihtha mani m-ahgith k ab wo ai mat ab ep wo i hih g Jesus. T hab pi hedai ab hu ha'ichu wo m-chu'ichigch. Ith ani ab si m-chehani am tahgio g Jesus ch am tahgio g Jiosh. Jiosh o ab ha mahkch g thoakag wehs ha'ichu thothakam ch ab ep wo i m-wehmt mapt hab wo juh g ni-chehanig. 15 Jesus at ia ep wo i e chehgi heg i tash ed mo kehshch g Jiosh. Jiosh o si s-hemajima ch wehs ha'ichu nuhkuth ch d kownal wehs ha thahm g kokownal. 16 ch pi hekith ha mumkku. Pi o hedai neith ch pi hedai wo e nako mas wo nei. An o ha'ichug hab mahs tonlig ch ed mat pi hedai wo e nako mas ab wo miabi. Pi at hekith wo huhug g gewkthaj. Kutt ab wo si has elithath chum hekith. Neh, bo masma. 17 Ab g i ha chehani hegam mo d s-kakais mat pi wo si e hahaschuthath heg hekaj ha'ichu e-eniga ch pi ab hu wo hiwgath ch wabshaba ab wo hiwgath g Jiosh. Heg o wud mo s-ba'ama ab t-mahk wehs ha'ichu mach haschu i hekaj s-ap t-tahtk. 18 Ab g i ha chehani mat am hab wo i junihi g s-kehg chikpan ha wehhejed hegam mo tatchua g i wehmta k pi wo chu tha'ath ch wo ha'ichu ha ho'ithath g sho'igkam. Ith o d woho s-kaisthag. 19 Bo masma heg wa wepo mo e to'ithahim g s-namkig ha'ichu an thahm kahchim ch ed hekaj wo si s-ap tahtkkath chum hekith. 20 Si g s-ap nuhkuth hegai mamt ab m-nuhkuthach. Pi g am hu ha wehmajk hegam mo wabsh pehegi e ne'owin heg hekaj mo hab chum elith mo d ha'ichu mahchig. Ith at pi wo sha'i i t-wehmajk matt ba'ich i s-ap wo s-mai g Jiosh. 21 Ha'i o hab chum e ahg mo edgith ihtha mahchig ch oi wa wabsh heb hu wua g e-wohochuthadag. Neh, Jiosh at wo wa s-m-ho'ige'el.

2 Timothy 1

1 Ni-wehnag Timothy: Ia ant ep wo ha'ichu i m-o'ohani ahni Paul mani d kehshaj g Jesus Christ. Tho Jiosh tatchui mant wo i ahgahi ab amjed g alithaj. T hab wo bei g wechij thoakag hegam mat ab wo i s-wohoch ab amjed g alithaj hab masma mash wa heki hu hab kaij matsh hab wo e juh. 2 Ab g ni-kaiham ahpi map d ni-alithag t-wohochuthadag ed. Ab o wa si s-m-ho'ige'ith g t-ohg Jiosh g t-kownalig Jesus Christ wehm ch ab wo wa ba'ich i m-mahkath g i wehmtadag ch s-ap tahhathkam. 3 Chum ani hekith ab si ho'ige'ith g Jiosh mani hekith i ni-ho'ige'ithahun m-wehhejed. Jiosh ash wa am ha tashogith g t-shohshon matt has masma wo himath g t-thoakag ch ab wo si has elithath. Kuni hab masma hab ni-wua ch hab pi sha'i ni-kudut. 4 P ahpi hab wa'ap ab s-wohochuth g s-kehg ha'ichu ahgaj g Jiosh. Kuni s-chegito mapt si pi ap e taht mant hekith am i m-thagito. Kuni s-m-neithamk mapt ep wo si s-hehgigk. 5 Am apt ha oithk hab e juh g e-hu'ul Lois ch e-je'e Eunice mapt ab i s-wohoch g Jiosh ha'ichu ahga. 6 Pt wo s-chegito matt ab toa g t-nohnhoi m-ab k am m-wehhejed t-ho'ige'ithahu. T g Jiosh ab m-mah g gewkthag k am m-chehgi mapt has i mahs chikpan hab wo junihith wehhejed. Pegih, pt wo i e gewkath k am hab wo junihith. 7 Jiosh at ab t-mah g Hekia S-ap'ekam Gewkthag mat an wo t-u'ukchith ch ab wo t-mahkchith g gewkthag ch pihk elithadag ch thotholimadag ahchim mach d hemajkamgaj. Kutt heg hekaj pi ha'ichu wo sha'i ehbithath. 8 Pegih, pt pi has wo e elithath am wehhejed neokch g t-kownalig Jesus ch hab wa masma pi has wo e elithath ab ni-amjed mani wehhejed d lihso. Ab o t-mahkch g Jiosh g gewkthag matt am wehhejed wo t-sho'igch. Kupt wo si nako g e-sho'igthag am ahgachugch g s-kehg ha'ichu ahgaj. 9 Tho Jiosh mat t-tho'ibia ab pi ap'ekam t amjed. Pi att has masma has wo t-juh k wo t-tho'ibia. Gd hu i si wehpeg at am i ap'ech mat wo s-t-ho'ige'el am gahi wuhshanim g e-alithag Jesus Christ matt d wo Jiosh hemajkamgak. 10 Ia at jiwia g t-tho'ibiakam Jesus Christ k am i t-tashogi g Jiosh ho'ige'ithadag. Kah att g s-kehg ha'ichu ahgaj k s-mai matt has masma s-ap am wo gahi wuwha g muhkig edgithch g pi ha huhugetham thoakag. 11 Jiosh at am i ni-kei mant wo ahgachugath g s-kehg ha'ichu ahgaj ch wo ha mashchamath. 12 Kuni heg hekaj hab mu'i ni-sho'igchuth ch pi sha'i has ni-elith ith amjed nani pi s-mahch hegai mani ab s-wohochuth. T heg wo e nako mat s-ap wo ni-nuhkuthath mant wehs am hab wo juh mat haschu wehhejed ab i ni-gawulkai k ab wo ai mat ep wo jiwia. 13 Ab ani m-mashcham mo has chu'ig g Jiosh ha'ichu ahga. Kupt heg wo wa'i ahgahith nap pi heg s-wohochuth ch ab si tatchua g Christ ch d hemako heg wehm. 14 Am o t-eda g Hekia S-ap'ekam Gewkthag ch ab t-mahkch g gewkthag. Kutt hekaj am wo si s-ap nuhkuth g s-kehg ha'ichu ahgaj g Jiosh. 15 Am ap wa s-mahch mat ia wabsh i ni-thagito hegam mo ab Asia t amjed ia ni-wehmajkahim, chum wa g Phygelus ch Hermogenes. 16 K wabshaba g Onesiphorus pi has e elith mani d lihso ch an i ni-gahghi ia jiwiak Rome kihhim t am am hugkam mat ni-cheh k mu'ikko ia i ni-chehgimed k ab ni-mamka g s-ap tahhathkam. Kuni ab tahni g Jiosh mat ba'ich ab wo i s-ha ho'ige'el hegam Onesiphorus. 18 Jiosh at wo wa s-ho'ige'el g Onesiphorus heg i tash ed matt ab wo nam g Jiosh. S-mahch ap mat he'es ha'ichu s-ap am hab ni-juni g Onesiphorus amai Ephesus kihhim t am.

2 Timothy 2

1 Jiosh o si s-hemajim ab t-mahkch g gewkthag ahchim matt ab i t-hemakoch g Jesus Christ wehm. Kuni heg hekaj m-ahgith mapt s-gegokim wo himath g e-chikpan wehhejed. 2 Mu'i hemajkam ani ha mihshmath m-kaichuthch. Kupt ahpi epai wo ha mashcha hegam mat am wo i e nakog k ha'ijj epai wo ha mashcha ihtha. 3 Neh, bapt masma wo e sho'igch mat g shonthal am hab junihithch g e-chikpan am wehhejed g Jesus Christ. 4 S-mahch ap mat g shonthal wehs hab wo junihith hegai mat g uhgchugaj ab wo cheha ch pi ha'ichu wo hiwigi mas wo shohbi. Kupt ahpi hab wa'ap wo masmak am wehhejed g Jiosh. 5 S-mahch ap mat g s-melithkam pi ab hu wo bei g e-gehgewi heg hi wa mat am hab wo junihith g ha-chehanig. Kupt ahpi hab wa'i masma wo bei g e-gehgewi mapt am Jiosh tatchui oithk hab wo e junihith. 6 Hegai mo si chikpan g e-esha at wehpeg ab wo ui g e-oda mat wo bai. Kupt ahpi hab wa'ap ab ha'ichu wo i nei am chikpank g Jiosh wehhejed. 7 Am g i oithahim ihtha mani m-ahgith. T g Jiosh am wo i m-wehmt mapt wo s-amich. 8 Jesus Christ o hab wa'ap d o'othham ch ab s-ap nakog g sho'igthag. T g Jiosh ab uhpam i wuhshath heg i thahm mat muh. Tho ihtha s-kehg ha'ichu ahga mani am ahgachug. Kupt am wo oithahith mat haschu ab nako g Christ ch s-ap ab wo nako g e-sho'igthag. 9 Ni ahni hab wa'ap ni-sho'igchuth am ahgachugch ihtha s-kehg ha'ichu ahga hask mam ep ge ni-wulshch g e hukshchim wapainomikaj hab masma mantp d si pi ap hemajkam. K wabshaba g Jiosh ne'oki pi e wulshch. 10 Am ani wabsh i ni-thagitokch mantp haschu ab wo i nako ha wehhejed hegam mat g Jiosh am i ap'ech mat wo e tho'ibia. Ihtham at ab wo i s-wohoch g ha'ichu t-ahga ab amjed g Jesus Christ. T g Jiosh chum hekith ab wo si has ha elithath. 11 Tho si wohokam ihtha hab ha-che'i: Chum att hekith d wo thothakamk g Christ wehm mach hedai ab i t-thagitokch wui nat pi t-wehhejed muh. 12 T heg ab wo t-hiwigi matt wo i wehmt am eda g kownaltaligaj ahchim matt an wo u'ukchith g t-wohochuthadag am t-sho'igthag ed. T wabshaba im hu hab wo i e juh ab ha amjed hegam mat wo thagito g e-wohochuthadag. 13 Hemho wa at am hab wo juh mo has i kaij. Kut pi gm hu hab wo i e juh ab t-amjed, heg hi wa mattp wo thagito g t-wohochuthadag. 14 Am g i ha chegitochuth ihtha mani wa m-ahgith k ab ha shohbith g Jiosh gewkthagkaj mat pi wabsh pehegi wo neneokath ch pi wo e cheggiath. Ith at wo ha padch hegam mat wo kaiha. 15 Am g si i e nakog mapt d wo si s-ap piongajk g Jiosh ch si s-ap am wo ha mashchamath g Jiosh wohokam mapt pi wo sha'i si e elithath. 16 Ha'i at thagito g wohokam k ha mashcham mat heki hu ab i wuwha g ko'i muhkig amjed. Gohkajj ihtham mo ith hekaj ha iattogith o d Hymanaeus ch Phyletus. K g ha-mashchama padchuth g ha-wohochuthadag hab masma mat g pi kehg hihwthag wo em-cheawuagi. Pi g ha wehm a'agath g ha-mashchama. Gm at hu hab wo i m-juh ab amjed g Jiosh. 19 T wabshaba g Jiosh s-wihnam shondath g e-ne'oki mat pi hedai wo sha'i gawul juh. K an o'ohanas: Jiosh o s-ha mahch mo hedai woho ab s-wohochuth. K an ep o'ohanas: Matp hedai hab wo chei mo d Jiosh hemajkamga k hemho wa gm hu hab wo i e juh ab amjed g pi ap'ekam. 20 Neh, matp hems am wo ha'ichugk g nahnko mahs hohashaha'a am s-kais kih ed. Tp hems ha'i d wo ohlak ch ha'i d wo plahtak ch ha'i d wo uhsk ch ha'i d wo bithk. Kut wo e hekaj hegam mo s-namkig ha wehhejed g s-has haha'ichu. T g pi namkigchu wabsh chum has masma wo e hekaj. 21 Pegih, t g Jiosh hab wa masma si s-has ha'ichukaj wo t-hekaj mattp hedai wo t-kegchuthch ab amjed g pi ap'ekam natt pi wo t-nahtokch ch wo i t-gawulkathch wehhejed. 22 Pegih, pi g am i e thagito pi ap'ekam ch ed k am s-ap wo i e gewkathch s-ap'ekam k ed ch am hab wo junihith mapt haschu wo ha ahgi ch wo si pihk e elithath wehs ha hekaj ch wo si s-ap e tahtkkath ab ha wui g e-wehm wohochuththam. T hegam mo ab ihm g Jiosh ch s-ap ha'ichu chegito m-wehm hab wo masmak. 23 Bant ep wo chei mapt pi wo ha ne'owi hegam mat wabsh wo has hu kaijjith ch pi e mahch ch e ne'owin. S-mahch ap mat ith am wabsh wo ha u'apa kawhaina ch ed. 24 Jiosh pionag at pi wo chum ha kawhainath ch wabsh wo si s-hemajimak ab wehs ha wui ch wo si s-ap ha mashchamath 25 ch si s-hemajim wo ha shohbithath hegam mat ab wui wo gegokiwua ch wo ha mashchamath. Tp hems ab wo ha mah g Jiosh g ap'ethag mat wo s-ohhoth g pi ap e-chegitoi k ab wo s-mai g wohokam. 26 T hab masma uhpam wo bei g s-ap e-chegitoithag k wo e tho'ibia ab amjed g Jiawul.

2 Timothy 3

1 Si g s-chegitok mat wehs ha'ichu wo s-hasigk mat d wo i ha oithch tatshk. 2 Hemajkam at wo s-chu tha'ath ch wo si pihk e elithath g lialkaj ch wo chum si e hahaschuthath. Mu'i hemajkam at wo a'ai s-ko'okam has e ahgath ch pi ab hu uhpam wo i nodgithath g s-ap'ekam. Mu'i at wo has ahgath g Jiosh. T g a'al pi ab hu wo wohog ha elithath g e-ge'egedga. 3 Mu'i hemajkam at wo pi a'amdagk ch pi hedai ha hekaj wo pihk e elithath ch ha'ichu wo e iattogithath ab a'ai e amjed ch wo s-ta ehbithamak ch wo s-ta keke'ithamak. Mu'i at wo s-ohhothath g s-ap'ekam. 4 Mu'i at pi ab hu wo ha tatchuath hegam mo d chum ha-naipijju ch has am wabsh wo si e wuath ch pi ab hu wo tatchuath g Jiosh ch wabshaba g pi kehg s-tahhathkam ab wo tatchuath. 5 Hemajkam at hi wo wa e mihshmethath ch wabsh pi wo wohochuthath hegai mo haschu ab chum kah ch im hu hab wabsh wo i juh g Jiosh gewkthag. Pi g am hu ha wehmajk ihtham hab mahs hemajkam. 6 Ha'i at am wabsh ep wo si i wahpkath ha-kihki ed ch wo s-ap ha iattogi g u'uwi. T hegam mo pi gewkpthag am e-wohochuthadag ed ab wo ha kaihamath no pi tatchua g pi ap'ekam ch e kudut g e-chu'ichigkaj 7 ch pi mahch g wohokam, chum as hems hi wa chum s-mahchimk. 8 Hegam mo ha iattogith o ab wui gegok g wohokam hab masma mo wa Jannesbad ch Jambresbad ab wui gegok g Mosesbad. Ho o wabsh pi ap ha'ichu chegito ch d ep hegam mat pi e nako am Jesus wohochuthadag ed. 9 T wabshaba wehsijj wo s-mai mo pi ha'ichu a'amichuth hab masma mat wa am hab e juh ha tahgio g Jannesbad ch Jambresbad. Kut heg hekaj pi wo e nako mat ge'e ha'ichu wo padch. 10 P wabshaba ahpi hig am oith g ha'ichu ni-mashchama ch ha'ichu hab ni-juni ch ha'ichu hab ni-elitha. S-mahch ap mani haschu ab s-wohochuth ch has masma ab i s-ha bahbgi g hemajkam ch pihk ni-elith ha hekaj ch nakog ha'ichu. 11 S-mahch ap mam ni-sho'igchuth. Kuni mu'i ha'ichu s-ko'ok nakog. S-mahch ap mant mu'i ha'ichu nako am Antiok t am ch Iconium t am ch Lystra t am. T wabshaba g Jiosh ni-tho'ibia wehs amjed ihtha. 12 Kupt ahpi hab wa'ap wo e sho'igch natt pi wehs wo t-sho'igch ahchim mach tatchua matt am wo oithath g s-ap'ekam thoakag ab si i t-thagitok Jesus wui. 13 T wo i e gewpkai g pi ap'ekam ch s-chu i'attomkam k ba'ich wo i ha iattogithath g hemajkam ch hejel wo e iattogithath. 14 Tt wabshaba ab i m-mashcha g wohokam. Kupt ab si s-gewkam i s-wohochuth k wo s-wihnam u'ukchith s-mahchch matt hedai m-mashcha. 15 S-mahch ap map ga hu i e-alijk amjed ab kaiham g Jiosh o'ohana. K ith d hegai map amjed ab bekch g e-amichuthadag. Kupt hekaj ab i s-wohoch g Jesus Christ k e tho'ibia. 16 Ab o tashogith g Hekia S-ap'ekam Gewkthag hegai mo g Jiosh tatchua mat an wo e o'ohan k d wo t-mashchamak. K heg wehs d i t-wehmtadag matt hekaj a'ai wo t-mashcham k wo s-mahchk g wohokam ch wo shohbithath g pi t-ap'ekam ch am wo i t-shelinith matt has masma s-ap wo himchuthath g t-thoakag. 17 Kutt heg hekaj wo s-ap t-nahtokch ahchim mach ab ihm g Jiosh matt am hab wo juh wabsh chum has mahs s-kehg chikpan wehhejed.

2 Timothy 4

1 Jesus at am s-ap wo i nahto g e-kownaltalig ia ep jiwiak k wo ha lothai wehs hemajkam, chum hems hegam mat eda d wabsh wo kia thothakamk. Heg ani hekaj si m-chehani am tahgio g Jiosh 2 mapt am wo si ahgahi g Jiosh ha'ichu ahga k am wo si e gewkathch mapt am wo ahgath wabsh chum hekith ch pi am hu wo chum ge nenidath mat hekith am wo s-apkot mapt am wo ahgath. Ab g i ha shohbith pi ap'ekam amjed k am i ha gewkemhun mat hab wo junihith g s-ap'ekam wabsh s-bahbgim ha mashchamch. 3 Ab o him g tash mat wo i mu'itha hegam mat gawul ha'ichu wo ha mashcha. Kut mu'i hemajkam ab wo s-ha kaim 4 k g wohokam mashchama wo thagito k ab wo hiwgath g hoho'oki a'agitha. 5 Pt wabshaba ahpi wo si s-e nen'oithk ch wo s-e chegitok wehs ha'ichu k ed ch ab wo nako g sho'igthag. Am g wehs hab juhni g e-chikpan am ahgachugch g Jiosh ha'ichu ahga nap pi d piongaj g Jiosh. 6 Ahni at hi e ai g ni-tashga mant wo ni-muhkith. 7 S-ap ant nahto g ni-chikpan am s-gewkam i oithk hab masma mo g s-melithkam am si i e nakog mat wo bei g s-ap'ekam e-gehgewi. 8 K heg am wa'i wi'is mant wo bei g s-ap'ekam ni-gehgewi nani pi g s-ap'ekam am hab junihim. Jiosh alithag o d s-ap'ekam usagakam ch ab wo i ni-mah ihtha mat hekith ep wo jiwia k ab wo i t-gawulkai ge'e lothaita ch ed. Kut wehsijj hab wa'ap ab wo bei g e-gehgewi hegam mo hedai ab si pihk e elith hekaj g Jiosh alithag ch nenida mat ep wo jiwia. 9 Am g i e nakog k s-hohtam ab i ni-chehgimed 10 nant pi hejel ia wih. Crescens at gm hu hih Galasia jewed wui. T g Titus gm hu hih Dalmasia jewed wui. Demas at ab si tatchua g jewed t ab ha'ichu k ia wabsh i ni-thagito k gm hu hih Thessalonica wui. 11 Heg o wa'i Luke ia ni-chechga. Ab apt wo i bek g Mark. T am wo i ni-wehmt ith eda chikpan. 12 Ab ant cheha g Tychicus mat am wo hih Ephesus kihhim wui. 13 Ab g i ni-behith g ni-lihwa ch ni-o'ohana, wahm hegam mant hejel o'oha. Ab ant nuhkuthach g Carpus amai Troas kihhim t am. 14 S-ko'okam at wa has ni-thohththa hegai Alexander mo d hihliyo. T g Jiosh wo wa mah g s-ko'ok namkithadag. 15 Neh, pt wo si s-e nen'oithath ab amjed no pi sha'i si wui kehk g ha'ichu t-ahga. 16 Hegam mat wo chum i ni-wehmt at ia wabsh i ni-thagito mamt wa wehpeg ni-lothai. Ab ani tahni g Jiosh mat pi ab hu wo ha abch ihtha. 17 Jiosh at wa i ni-wehmt k ab i ni-mah g gewkthag. Nt hekaj hab ni-nako mant am s-ap ah g Jiosh ha'ichu ahga am ha wui hegam mo am ha'ichug nahnko mahs hemajkam. T ab i ni-tho'ibia mamt pi am hu ni-wua maipith ha wui 18 k hab wa'ap wo ni-tho'ibia ab wehs amjed g pi ap'ekam ha'ichu k an wo ni-u'apa thahm kahchim ch ed. Ab att wo si has elithath g Jiosh chum hekith. Neh, ith o wa'i si. 19 Am apt wo ha ahgi g Priscilla ch Aquila ch hegam Onesiphorus wehm kihkam mat ab wo i s-ni-ho'ige'el. 20 Ga at hu wih g Erastus Corinth kihhim t am. Nt g Trophimus ga hu wuiok Miletus kihhim t am nat pi mumku. 21 Am g i e nakog k ab wo i hih mat koi wo e ai g s-hehpich'edkam. Ihtham wehsijj o ab s-em-ho'ige'ith Eubulus ch Pudens ch Linus ch Claudia ch wehsijj g t-wehm wohochuththam iia. 22 Neh, am at wo wa em-wehmajk g t-kownalig Jesus. T g Jiosh wo wa s-em-ho'ige'el.

Titus 1

1 Ni-wehnag Titus: Am ant wo ha'ichu i m-o'ohani ahni Paul mani d Jiosh pionag ch m-ahgi g s-kehg ha'ichu ahgaj. S-mahch ap mat g Jesus Christ am i ni-kei mant ith wo ahgachugath. K hab d elithaj mant am wo i ha gewkemhunath hegam mat g Jiosh ab i ha gawulkai mat d wo hemajkamgajk. T hab wo i gewka g ha-wohochuthadag. T ba'ich wo i mai ihtha wohokam ab amjed g Jiosh. 2 Bo kaij g Jiosh mat eda pi koi ha'ichu sha'i nahto matsh ab wo ha mah g pi ha huhugetham thoakag hegam mat ab wo i s-wohoch. 3 T hemu am i e ai mat s-ap maskogi g ha'ichu e-ahga. 4 Kupt ab i s-wohoch ab ni-ab k hahawa wepogithas map d ni-alithag. Ab o wa si s-m-ho'ige'ith g t-ohg Jiosh g t-tho'ibiakam Jesus Christ wehm ch ab wo wa ba'ich i m-mahkath g i wehmtadag ch s-ap tahhathkam. 5 Am ant i m-thagito Crete jewed t am mapt am wo i ap'ech mo haschu koi ap'echuthas am ha sha'ashagith hegam mo hemiap e mihshmath. Am apt wo i ha chuhcha wehs kihhim ed hegam mat wo ha wanimedath mani wa ith heki hu m-chehani. Kunt am wo i m-chegitoch mat has wo chum masmak. 6 That wo si s-ap o'othhamk ch hemako wo hohnigk ch pi wo ha chu'ichigk. T g ha-a'aliga hemho wa d wo wohochuththamk ch ab wo ha kaihamath g e-ge'egedga. T hab pi hedai wo e nako mas ab wo ha'ichu ha abch. 7 Pi o hab chu'ig mas g ha wanimedtham wo ge e haschuthath o s-hohtam wo babgatath o wo nawkko'oth o wo ha cheggiath o mu'i ha'ichu wo si s-behimkkath. 8 K wabshaba hab chu'ig mat wo s-thotholimak ch hab wo junihith g s-ap'ekam ch chum hekith wo i ha wehmajk hegam mo tatchua g i wehmtadag. 9 Am ap ha mashcham g Jiosh ha'ichu ahga. Kut ith an wo si u'ukchith mat heg hekaj wo i ha gewkemhunath g hemajkam ch wo i ha shohbithath hegam mo ab wui gegok g Jiosh ha'ichu ahga. 10 Heki at hu mu'i i wuwha hegam mo chum s-keshwuimk g Jiosh ha'ichu ahga ch ha iattogith g hemajkam ch heg hekaj ab ha wanchkwup mat wo ui g lial, wahm hegam mo d ni-wepo Tutuligo o'othham. Kumt heg hekaj wehs e wehm am wo i ha shohbi. 12 Hema ash hab kaij g s-chu amichuththam am Crete t am, “Ahchim Crete t am o'othham ach s-chu i'attomk ch s-ta keke'ithama ch s-papadma ch wehs ha'ichu si s-behimk.” 13 Woho o wa mo has i kaij. Kupt heg hekaj si s-gewkam wo i ha shohbi. T hab ab wo m-kaiham k ab wo s-wohochuthath g wohokam. 14 Pt wo ha ahgi mat pi wo wohochuthath g Tutuligo ha-hoho'oki a'agitha ch hegai mo d wabsh ha-chehanig hegam mo pi tatchua g wohokam. 15 Wehs o s-kehgaj g Jiosh ha'ichu nahtoi am ha wehhejed hegam mo s-kehg ha'ichu chegitoithag. K wabshaba pi ha'ichu s-kehgaj am ha wehhejed hegam mo pi kehg ha'ichu chegitoithag ch pi wohochuth g wohokam no pi g pi kehg ha'ichu ha-chegitoithag wehs ha'ichu padchuth ha wehhejed. K pi has ab hu sha'i tahhathag g ha-i'ibthag mo am hab junihim g pi ap'ekam. 16 Ihtham o hab kaij mo s-mahch g Jiosh ch wabshaba hab e wua mo pi mahch no pi s-ta keke'ithama ch pi chechkaithag. K g ha-thoakag pi kehg hab mahs. K pi ab hu sha'i ha ab ulini mas hab wo juh g s-ap'ekam.

Titus 2

1 Kupt wabshaba ahpi am wo ha mashcha g wohochuththam mat has wo e junihith ch hekaj wo e chehgithath mo s-kehgaj g Jiosh mashchamadag. 2 Pt wo ha ahgi g kekel o'othham mat d wo si o'othhamk ch pi wabsh wo i e wahmuth k wabshaba wabsh wo i e bahbgi wehs ha'ichu k ed. T wabsh shelinim wo oithath g e-wohochuthadag ch wo pihk e elithath ab wehs ha wui ch s-e tahtk ch ab wo nakogath ha'ichu. 3 Kupt hab wa'ap wo ha ahgi g o'oki mat wo s-thotholimak ch wo e chehgithch mo am oithch hab e junihim g s-ap'ekam ch pi wo nawkko'oth ch pi wo pi kehg neneokath ab hedai k amjed. 4 T g wechij u'uwi ab ha amjed wo mai mat has wo chum masmak ch ab wo i ha tatchuath g e-wehm kihkam ch e-a'aliga 5 ch wo e nuhkuthath mat pi hab wo wuath g pi ap'ekam ch wo si s-wapagimak am e-kihthag ed ch ab wo ha wohog elithath g e-wehm kihkam. T hab pi hedai has wo ahgath g Jiosh ha'ichu ahga. 6 Kupt hab wa'ap wo ha ahgi g wihpiop mat d wo si o'othhamk. 7 Chum apt hekith hab wo wuath g s-ap'ekam ch hab masma wo ha chehgi mat has wo chum e junihith. 8 Kupt ab wo si has elithath g wohokam ab amjed g Jiosh ch heg wo wa'i ha mashchamath. T hab wo si e elithath hegam mo ab wui gegok g Jiosh ha'ichu ahga ch pi wo e nako mas has wo m-ahgath. 9 Ab g ha ahgith wabsh chum hedai ha-pionag mat ab wo kaihamath g e-ahmo ch pi ab hu wo ne'owinath 10 ch pi ha'ichu wo ehsithath ch wabshaba wo e chehgithahith mo s-ap d pion. Kut heg amjed am wo i e tashogi mo s-ap'e g ha'ichu ahgaj g Jiosh matt heg hekaj t-tho'ibia. 11 Jiosh o wehs s-ha ho'ige'ith g hemajkam ch hab juh g tho'ibiathag chum wehs ha wehhejed. T ith am wabsh s-ap i e chehgi. 12 Kutt heg hekaj wo s-ohhoth g pi ap'ekam k wo t-nuhkuth matt hab wo wuath g s-ap'ekam ch ab wo si ha'ichuch g Jiosh ith eda jewed. 13 Batt wo masmak nach pi nenida mach haschu s-wohochuth mat ia ep wo jiwia k si s-tondam wo e chehgi hegai mo d t-Jioshga ch d t-tho'ibiakam Jesus Christ. 14 Heg at am i e thagito mat s-ko'okam e muhkith k hekaj t-tho'ibia ab amjed g pi ap'ekam k i t-kegch mach d hahawa si hemajkamgaj k si tatchua matt hab wo junihith g s-ap'ekam. 15 Pegih, am g si ha ahgith wehs ihtha k i ha gewkemhun mat hab wo junihith g s-ap'ekam k ep i ha shohbith mat hedai hab wo i wuath g pi ap'ekam. Pi at hedai wo chum pi m-ha'ichuchuthath nap pi gewkthag mapt ith am hab wo junihith.

Titus 3

1 Pt am wo ha ahgithath g wohochuththam mat has wo chum masmak. T wo s-ha wohog elithath g e-kokownalig ch am oithk hab wo e junihith g chehanig ch chum hekith wo e nahtokchith mat wo s-ap chikpanath ch hab wo junihith g s-ap'ekam. 2 Am g ha ahgith mat pi wo pi kehg neneokath ab hedai i amjed ch wabshaba wo si s-ap e tahtkkath ch wo si s-hemajimak ab wehs ha wui. 3 Neh, heki ach hu wa hab masmakahim mo hegam mo pi ab hu wohochuth g Jiosh. Pi ach wa ab hu kaiham g Jiosh ch pi ha'ichu amichuth ch hab s-junimk g pi ap'ekam ch pi a'amdag ch s-chu hehgamk. Ha'i o s-t-keh'ith. Kuch ab epai s-ha keh'ith. 4 K wabshaba g t-tho'ibiakam Jiosh si pihk e elith t-hekaj ch ia i e chehgi jewed thahm 5 mat wo t-tho'ibia ab amjed g s-ko'ok t-namkithadag. Pi at hedai wo e nako mas wo e tho'ibia g hejel ha'ichu hab e-junikaj. T wabshaba g Jiosh ab i s-t-ho'ige'ith k gm hu wako g pi ap t-chu'ichig matt wo edagi g wechij thoakag. Heg at hekaj ia jiwia g t-tho'ibiakam Jesus Christ jewed thahm k heg hekaj ab t-mah g Hekia S-ap'ekam Gewkthag. Heg o am t-eda ch ab t-mahkch hegai wechij thoakag. 7 Jesus Christ o ab s-t-ho'ige'ith ch am i t-ap'ech matt wo s-ap'ek am Jiosh tahgio. Kuch heg hekaj edgith ihtha wechij thoakag ch hab am wehmaj wo kihkath chum hekith am i thahm matt wo koi. 8 Tho wohokam ihtha mani haschu m-ahgith. Kupt chum hekith am wo ha ahgithath g wohochuththam. T hekaj wo e nuhkuth mat wo s-wapagimak ch hab wo junihith g s-ap'ekam. Ith at d wo i ha-wehmtadagk g hemajkam. 9 Kupt pi wo ha ne'owinath hegam mo wabsh pehegi ha'ichu m-kaiam ch am chum m-pip'ichuth ab amjed g Tutuligo ha-chehanig ch chum ge e haschuth ch hab kaij mo ab d ha amjedkam g si s-has haha'ichu. 10 Gokko apt wo s-ha tha'i hegam mat hedai wo chum a'ai ha ga'agwulkai g wohochuththam. Hegam mat pi ab hu wo m-kaiha o pi ap'e. T g pi ap ha-chu'ichig am wo ha chehgi. Kumt wabsh wo ha thagito. 12 Ia o ni-wehm thadha g Artemas ch Tychicus. Kunt ihtham am hema wo i kei mat am m-wui wo jiwia. Kupt am haha wo hih Nicopolis kihhim wui mapt am wo ni-wehmajk nant pi am wo thakath s-hehpich'ed. 13 Kah ani mash am m-wehm tha hegai Zenas mo d chehanig hudawogtham ch atsh am hebai wo ha mihshmetham g Apollos wehm. Kupt he'es wo i e nakog k am wo i ha wehmt mat pi ha'ichu wo pi edagi. 14 Bat wo wa chum masmak g wohochuththam mat hab wa'ap wo i ha wehmajk hegam mo hab masma tatchua g i wehmtadag. 15 Wehsijj o am i m-ho'ige'ith ihtham t-wehm wohochuththam mo ia kih. Am g wehsijj i ha ho'ige'ith g t-wehm wohochuththam amai. Jiosh at wo wa s-em-ho'ige'el.

Philemon 1

1 Ni-wehnag, Philemon: Ia ani kuhpi ahni Paul nani pi ahgachug g Jiosh ha'ichu ahga ab amjed g Jesus Christ. K ia ni-wehmaj g Timothy ch ab s-em-ho'ige'ith. Am ant ha'ichu wo m-o'ohani, Philemon, s-chegitokch map wa s-ap i t-wehmaj ith eda chikpan. 2 Kupt ith am wo ne'okchul Aphia wui ch heg wui Archipus mo wa t-wehm ahgahim g Jiosh ha'ichu ahga, pej wehs ha wui hegam mo am em-wehm e mihshmath em-kih am. 3 Ab o si s-em-ho'ige'ith g t-ohg Jiosh ch t-kownalig Jesus Christ ch ab wo wa ba'ich i em-mahkath g i wehmtadag ch g s-ap tahhathkam. 4 Ab apsh wabsh kia si hiwig g t-kownalig Jesus ch si pihk e elith ha hekaj g e-wehm wohochuththam. (7) Sh hegam ab si i e gewkemhun ab neithch map s-ap ha'ichu hab ha junith. Ni heg hekaj si s-ap ni-tahtk (4) ch ab ho'ige'ith g Jiosh ch ab tahni mat ba'ich wo i m-wehmt hemu. (6) Pt hab ba'ich ab wo i chehgi map ge'e edgith g s-ap'ekam ab ihmch g Jesus Christ. 8 Ab o ni-mahkch g Christ g gewkthag mant ab wo ha'ichu em-cheha ahpim mam ab ihm. 9 Nt wabshaba ab wabsh wo i m-gewkemhu mapt ha'ichu hab wo ni-juni heg wabsh hekaj map si pihk e elith t-hekaj. Thani keli hemu ch ia kuhpi Jesus Christ wehhejed. Kupt ab wo si pihk e el ni-wui k hekaj hab wo juh g ni-tatchui. 10 Ia o ni-wehmaj ihtha m-neholiga mo hab chehgig Onesimus. Ni am ahgith ab amjed g t-kownalig Jesus. T ab i s-wohoch. K heg wa wepo mo d ni-alithag am t-wohochuthadag ed. 11 Heki ash hu s-padmam chikpan m-wehhejed ch wabshaba hemu s-wagimam chikpan mo hab masma hab d ahga g chehgigaj ch hab ha'ichu ni-junith am m-wehhejed. 12 Ab ani chehani mat am uhpam ep wo hih m-wui. Kupt hab masma ab wo neithath mo d ni-alithag. 13 Chum ani hi wa tatchua mat ia wo i ni-wehmt m-wehhejed mani ia kuhpi ch ahg g s-kehg ha'ichu ahgaj g Jiosh. K wabshaba pi hab chum chu'ig manis wo m-wohppo'i g m-pionag. Ba'ich o i s-ap'e mat hejel hab wo i e ah mapt has masma wo i ni-wehmt. 15 Tho heb hu himkam ihtha m-pionag al he'es i tash. Kuki wabshaba hab d elithaj g Jiosh mat hab masma wo e chehg k d haha wo m-wehm wohochuththamk chum hekith. 16 Tho si t-wehnag, wahm ahpi, no pi d m-pionag ch am i thahm d hahawa m-wehm wohochuththam. 17 Bap masma hab ni-elith mani d si m-wehnag, pegih, k ch hab wa masma hab wo elithath g Onesimus mat d wo si m-wehnagk. 18 Ab atsh m-wui pi ap chu'i. Kupt wabshaba ahni ab wo ni-mohto'i. 19 Ahni ant wo m-namkith heg hekaj, chum aps ahpi ab ni-ab e wulshch nant pi am m-wui u'apa g Jiosh ha'ichu ahga mapt hekaj e tho'ibia. 20 Pegih, pt hab masma hab wo elithath g Onesimus mat d wo m-wehnagk. Ith at ab wo si i ni-gewkemhu am wehhejed g Jiosh alithag. 21 Ith ant am i m-o'ohani s-mahchch mapt ba'ich i thahm ha'ichu hab wo ni-juni mani m-tahni. 22 Jiosh at ab wo kaiha g em-ho'ige'ithahuna k ab wo i ni-wuhshath ab amjed g kukpaikud. Nt am ep wo i em-chehgim. Kumt heg hekaj am wo i ap'ech g kih ni-wehhejed. 23 Ia o ep ni-wehm kuhpi g Epaphras ch s-m-ho'ige'ith. 24 K ia ep thadha g Mark ch Aristarcas ch Demas ch Luke ch hab wa'ap s-m-ho'ige'ith. 25 T-kownalig Jesus Christ at wo wa s-em-ho'ige'el.

Hebrews 1

1 Heki atsh hu am ha'i i ha chuhcha g Jiosh g t-shohshonbad matsh am wo amogath g ha'ichu ahgaj. Kush ihtham Jiosh ha'ichu i tashogiththam he'es am al i ha tashogith g Jiosh a'ahithag oitham. 2 Kutsh g Jiosh am hahawa i kei g e-alithag. Tsh ith ia i wuhsh jewed thahm k si s-ap t-tashogith g Jiosh. Ith o wud matsh g Jiosh gd hu i si wehpeg am i kei matsh wehs ha'ichu wo nahto. K heg hekaj wehs ha'ichu d enigaj. 3 Kutsh eda ia jiwia k e sho'igchuth k e muhkith matsh gm hu hab wo i juh g s-ko'ok t-namkithadag mach d pi ap chu'ijkam. Tsh g Jiosh ab hahawa uhpam ep i be k an thai si e-hugith an. Kush si s-kehg s-masma am e chehgithch g s-has ha'ichuthaj mash woho si wepo chu'ig g e-ohg ch wehs an u'ukch g e-nahtoi matsh an s-ap hab wo chu'igk. 4 Neh, bo wa masma am e chehgithch mo ith d alithaj g Jiosh. K heg hekaj tasho mo ba'ich d i si s-has ha'ichu mo hi g anghil. 5 Jiosh ash pi hekith hema g anghil hab ahg mo d alithaj ch wabshaba hab kaij ith wui: Ni-alithag, hemu ant am wo ha chehgi g hemajkam map ahpi d wa'i ni-alithag. Kush hab ep kaij: That wo ni-alithagk ch am wo i wuhsh jewed thahm. 6 K an ep o'ohanas mash hab kaij: Wehs g anghil at hemho wa ab wo hehgchulithath. 7 K an ep o'ohanas: Anghil o ha'ichu wehhejed s-kehgaj hab sha masma mo g hewel ch mei. 8 Kush wabshaba g Jiosh alithag am wehmaj wehs ha'ichu thahm. Kush g Jiosh ab wui hab kaij: Thap Jiosh. Kut pi hebai wo ha hugk g m-kownaltalig mani ab m-hiwgith. K g m-chehanig chum hekith s-ap'e. 9 S-hohho'ith ap g s-ap'ekam ch g pi ap'ekam pi hohho'ith Nt heg hekaj am i m-kehsh k ab m-mah g si ge'e s-hehgig wehs ha ba'iwechkim. 10 Neh, bash kaij g Jiosh ch hab ep kaij ab wui: Ni-Kehsha, am apt nahto g jewed kahchim ch thahm kahchim. 11 T heg wehs wo hekit k gm hu hab wo i e juh hab masma mat g i'ikus. Kupt eda ahpi hi wabsh chum hekith d wo thoakamk ch pi hekith am gawul wo e juh. 13 Neh, bash kaij g Jiosh ab e-alithag wui ch hab ep kaij: In g hu thahiwua si ni-hugith an k ab wo ai mant wo ha gewito g m-obga. Neh, ith ash wehs hab kaij g Jiosh ab e-alithag wui ch pi hekith ab hu anghil ha wui hab sha'i kaij. 14 Anghil ash pi wepo masma g Jiosh alithag ch d wabsh gewpkthag mash am chikpan Jiosh wehhejed. Kuch ahchim d hahawa Jiosh a'aliga t-tho'ibiak ch am wo i wahp kihthaj ed. Kush g anghil d Jiosh pionag ch atsh am wo i t-wehmajk.

Hebrews 2

1 Neh, wehs ihtha o ab t-chehgithch mo g Jiosh alithag wehs thahm g e-nahtoi. Kutt heg hekaj ab wo si t-u'ukchith ith ab s-kehg ha'ichu ahgaj matt kah ch pi gm hu hab wo i t-juh ab amjed. 2 Pi ash d Jiosh alithag ch d wabsh anghil matsh wa ia u'apa g Jiosh ha'ichu ahga heki hu. Tsh wabshaba s-ko'okam bei g e-namkithadag hegam mash pi ab hu ha kaiham. 3 Sh eda d si alithaj g Jiosh hegai matsh hemu ia u'apa g ha'ichu ahgaj. Kutt hemho wa ab wo kaihamath. Am o t-tashogith g tho'ibiathag. Kutt pi has masma wo t-tho'ibia ab amjed g s-ko'ok t-namkithadag matt pi ab hu wo kaihamath. Hegam matsh ab kah g Jiosh alithag o s-ap am t-ahgith ihtha ha'ichu ahgaj matsh ia u'apa. 4 K g Jiosh hab ha junithahim g s-hasig ha'ichu ch hekaj am wohokamchuth g ha'ichu ha ahga. K g Hekia S-ap'ekam Gewkthag ab t-mahkch g gewkthag mach hekaj hab wua g nahnko mahs i wehmtadag ch i gewkemhunadag ab a'ai t-wui. 5 Pi ash d anghil mas g Jiosh am i ha chuhcha mat am wo himchuthath g kownaltaligaj. Thach ahchim hemajkam. 6 Neh, an o hebai hab chu'ig Jiosh o'ohana ed mash hema hab kaij ab Jiosh wui: Ni-Jioshga, thach wabsh al hemajkam maptsh ia wabsh t-shul mattsh am wo ha wechokath g anghil he'es i tash. Pi oki hab chum chu'ig maps ab wo has t-elithath ch wo t-thagio'ithath. Ptsh eda ab wo si t-haha'ichuchuth k ab wo t-mah g si s-kehg s-has ha'ichuthag 8 k am wo i t-chuhcha wehs ha'ichu thahm. Neh, bo chu'ig g Jiosh o'ohana ch hab d ahga mat wehs g Jiosh nahtoi am wo ha wechokath g hemajkam. Pi o hab chu'ig ithani. 9 Kuch wabshaba s-mahch matsh heki hu i shonwua ab Jesus amjed matsh hab wo e juh. Heg atsh wa i e jumalkath k t-wepo e juh k he'es i tash ha wecho g anghil ch chum hems e thagito muhkig wui am wehs t-wehhejed. Ith o d Jiosh hab elitha no pi si s-t-ho'ige'ith. T g Jiosh heg hekaj ab si ha'ichuchuth k an thai mat d wo t-kownaligk. 10 Wehs ha'ichu o d Jiosh nahtoi ch wehhejed an hab chu'ig. T heg si s-hemajim am i ap'ech mat g Jesus wo e sho'igchuth k hekaj wo t-tho'ibia matt d wo a'aligajk ch am hahawa chum hekith wo wehmajk si s-kehg kihthaj ed. Jiosh hab elitha o wehs s-ap'e. 11 Pegih, tsh hab wa masma ab i t-gawulkai g Jiosh alithag matt hab wa'ap d wo Jiosh a'aligak ch pi wo ha chu'ichigk. Kush heg hekaj pi sha'i e elith mat hab wo t-a'agath ‘ni-wepnag.’ 12 An o hab chu'ig Jiosh o'ohana ed mash g alithaj s-t-nawojimk ch hab ahg g Jiosh: Bant wo ha a'agath mo d ni-wepnag hegam mat ab wo s-m-wohoch am i kahk g ha'ichu ni-ahga. Amt ant ha shahgith ab wo m-hehgchulithath. 13 Kush hab ep kaij: Ab ant hab wabsh masma wo s-m-wohochuthath mo g m-hemajkamga. K an ep o'ohadag matsh ia wo jiwia k wo ha wehmajk ch hab wo ah: Ihtham o d Jiosh a'aliga. Kut am ni-nuhkuthach. Neh, bash kaij ch hab t-a'aga ‘Jiosh a'aliga.’ 14 Kush eda g Jiawul edgith g gewkthag mat ab wo t-abch g t-chu'ichig matt hekaj gm hu hab wo i t-juh ab amjed g Jiosh. Tsh wabshaba g Jiosh alithag t-wepo e juh mat hekaj s-ap ab wo bei g s-ko'ok t-namkithadag k wo hugio g Jiawul gewkthag mat hahawa pi wo e nako mas gm hu hab wo i t-juh ab amjed g Jiosh. 15 Jiosh alithag atsh gewito g Jiawul am t-wehhejed. Kutt heg hekaj pi wo ehbithath g muhkig. 16 Pi ash d anghil mas g Jiosh wo ha tho'ibia. Thach ahchim hemajkam mach ab s-wohochuth. 17 Tsh heg wa hekaj am t-wepo e juh k t-wepo masma ia oimmelhim ch ha'ichu nakog. Bat wa'i masma s-ap d wo t-uhgchu pahligk ch ab wo s-t-ho'ige'ithath ch gm hu hab wo i juh g t-chu'ichig am wehhejed g Jiosh. 18 Jiawul o chum t-chehani matt hab wo juh g pi ap'ekam. K wabshaba g Jesus s-ap e nakog mat am wo i t-gewkemhunath nash pi hab wa'ap nakog mash wa g Jiawul chum chehani g pi ap'ekam.

Hebrews 3

1 Pegih, ni-wehm wohochuththam, ab at i em-gawulkai g Jiosh gahi wuhshanim g e-alithag Jesus. Heg o d Jiosh si Kehsha ch d uhgchu t-pahlig. Kumt wo oithahith mo has chu'ig. 2 Jiosh atsh heki hu am i kei g Mosesbad ha thahm g e-hemajkamga. Kush heg s-ap am hab junihim g e-chikpan. Pegih, sh g Jesus hab wa'ap s-ap am hab junihim g e-chikpan am Jiosh wehhejed. 3 Kutt wabshaba ba'ich ab wo i si has elithath g Jesus mach g Mosesbad no pi d Jiosh ch wehs ha'ichu nahto. 5 Mosesbad ash s-ap am hab junihim g e-chikpan am ha shahgith g Jiosh hemajkamga ch wabshaba d wabsh Jiosh pionag. Tsh g Jiosh am i kei matsh wo ha'ichu a'aga wehhejed matsh gm hu ba'ich hahawa s-ap wo i e tashogit. 6 Kush eda g Jesus d Jiosh alithag ch d si kehshaj matsh wehs am wo ha thahmkath g hemajkamgaj. Kuch ahchim d hemajkamgaj mattp pi wo thagito g t-wohochuthadag k wabsh s-ap t-tahtkk ch wo nenida mat hab wo t-juni mo has i kaij. 7 Neh, bash masma hab chu'ig am t-wehhejed mash wa hab chu'ig am ha wehhejed g t-shohshonbad ahchim Tutuligo. Hegam ha wui ash hab kaij g Hekia S-ap'ekam Gewkthag: Ab o em-waith g Jiosh hab masma mo wa ab ha waith g em-ge'egedga. 8 Hegam o pi chechkaithag Kumt pi hab wo chum masmak. Jiosh o wa am ha wehhejed ap'echuthch g jewed ch ab ha waith mat s-ap am wo thadhaiwua heg eda. T wabshaba wa pi am hu i wahp 9 k wabsh pip'ichuth ch am thadha gm hu jegko am wa chum neithch mo haschu am hab ha junith gi'ikko wehst-mahm (40) a'ahith ab. 10 T g Jiosh pi am hu i ha wahpki heg oitham k s-ha keh'ith k hab kaij: Chum o hekith pi ap chegito ihtham hemajkam ch pi mai g ni-himthag. 11 Kunt hab si i ni-ah mat pi hekith am hu wo i wahp k pi hekith wo s-ap thadhaiwua ihtham ge'eged mo hab masma k wabshaba ab wo bei g s-ko'ok namkithadag. 12 Neh, tsh wa woho hab e juh g Jiosh ne'oki am ha wehhejed. Kumt heg hekaj wo s-e nen'eithath mamt pi hab masma wo pi chechkaithagk. Jiosh o d thoakam ch woho gm hu hab wo i em-juh mamtp pi ab hu wo kaihamath. 13 Ab o t-waith g Jiosh hemu ch wabshaba pi chum hekith ab wo t-waithath. Mt wo e iattogi g pi ap'ekamkaj mamtp pi ab hu wo kaihamath g Jiosh. Ab g a'ai wo i e gewkemhunath mamt ab wo kaihamath. 14 Thach s-wohom Christ hemajkamga mattp an wo si u'ukchith g t-wohochuthadag wehs t-thoakag oitham. 15 Mt heg hekaj wo s-chegitok ihtha mani am em-ahgith ch pi wo pi chechkaithagk hab masma mash wa hegam mash pi ab hu wohog elith g Jiosh. 16 Jiosh atsh wa am ha tho'ibia ab ha amjed g Egypt t am hemajkam am gahi wuhshanim g Mosesbad. Kush eda hahawa pi chechkaithag. 17 Sh g Jiosh s-ha keh'ith ch hab kaij matsh pi wo ha hiwigi mas am wo i wahp amai mash hebai am chum ap'echuthch ha wehhejed k ho'ip wehs koi hegam ge'eged mash pi ab hu wohog elith. Kush heg hekaj am oiopo tohono jewed ch ed gi'ikko wehst-mahm (40) a'ahith ab. 19 Neh, ith o am t-chehgithch matki heg hekaj pi am hu ha wahpki g Jiosh heg eda jewed mash pi ab hu wohochuth.

Hebrews 4

1 Kutki heg hekaj pi am hu ha ap'et g Jiosh waitha. Kutt ahchim wo s-t-gihugath matt pi hab wo masmak mash wa hegam. Jiosh ash am t-wehhejed ap'echuthch e-kihthag ed hab sha masma mash wa am ha wehhejed chum ap'echuthch hegai jewed. 3 Ith ash am ap'echuthas gd hu i amjed matsh am e nahto g jewed. Sh wabshaba hab masma hab chu'ig am t-wehhejed mash wa hab chu'ig am ha wehhejed. Jiosh ash hab kaij matsh pi hedai am hu wo i wah pi ab hu wohochuthch k wabshaba ab wo bei g s-ko'ok e-namkithadag. Kutt heg hekaj ab wo s-wohochuthath ch hab s-ap am wo i wahp kihthaj ed am i t-pihhunk ia jewed thahm. 4 An o hab chu'ig Jiosh heki hu o'ohana ed matsh nahto g jewed ch thahm kahchim chuhthp tashkaj k am hahawa i e pihhu heg eda wewa'ak tash. 5 Pegih, sh am t-wehhejed an hab chu'ig g s-ap heubagitha wehmaj g Jiosh. Sh wabshaba mu'ijj pi ab hu wohochuth g Jiosh. Kush hab kaij matsh pi hekith am hu wo i wahp. 6 Hegam mat ab wo s-wohoch g s-kehg ha'ichu ahgaj g Jiosh atsh am wo i wahp Jiosh kihthag ed. Neh, pi atsh am hu i wahp heg eda jewed mash g Jiosh am wui ha waith hegam matsh wehpeg kah g waithaj natsh pi pi ab hu wohoch. 7 Tsh wabshaba g ha-a'aliga am i wahp. Tsh g Joshuabad am i ha wanim. Kush ab ha wui hab hahawa kaij g Hekia S-ap'ekam Gewkthag ihtha mani wa am em-ahgith: Ab o em-waith g Jiosh hab masma mo wa ab ha waith g em-ge'egedga. Kumt pi wo pi chechkaithagk hab masma mo wa hegam. Heki atsh hu am i wahp heg eda jewed. K heg hekaj tasho mo pi ab hu heg wui ha waith g Jiosh 9 ch wabshaba ha waith matsh d wo hemajkamgajk. Kut hab wo e nahtokch mat am wo i wahp heg eda si s-kehg s-hehgig mash ha wehhejed ap'echuthch. Jiosh atsh am i nahto g e-chikpan k hahawa si s-hehgig. Kutt ahchim hab wa'ap wo nahto g t-chikpan k wo si s-hehgigk mattp wo t-nahtokch. 11 Pegih, oi g am wo e nakog mamt am wo i wahp k wo si s-hehgigk am wehmaj g Jiosh. Pi atsh am hu i wahp hegam matsh pi ab hu wohog el g Jiosh. Kutt wo s-t-nen'oith k pi hab wo masmak. 12 Sho'o wa'i si s-gewkthag g Jiosh ne'oki. K g Jiosh heg hekaj am chehgithch mo has chu'ig g t-thoakag ch t-chegitoithag. Bo masma g ne'okij mo g s-mu'uk wainomi mamtp hems heg hekaj gd hu wo si hikuch g chuhkug ch oh'o k wo cheh mo haschu gd hu si eda. 13 Pi att wo sha'i t-nako machs haschu gm hu wo ehsto ab amjed g Jiosh. Wehs o ha'ichu s-mahch. Kutt hemho wa hema tash am wo gegokiwua ba'ich k wehs wo ah g t-chu'ichig. 14 Tho si uhgchu t-pahlig ch d Jiosh alithag g Jesus ch an i wah Jiosh kihthag ed am t-wehhejed. Kutt heg hekaj ab wo s-wohochuthath chum hekith. 15 Ihtha uhgchu t-pahlig o si pihk e elith t-hekaj natsh pi ab nakog k s-mahch hegai mach ahchim ab nakog. Jiawul ash hab wa'ap chum chehani mat hab wo juh hegai mo haschu pi d Jiosh tatchui hab masma mo hemu ab t-chehani. Kush wabshaba s-ap ab wui kehk ch pi hekith hab juh g pi ap'ekam. 16 Pegih, ab o t-kaiham g Jiosh no pi g alithaj d uhgchu t-pahlig ch si pihk e elith t-hekaj. Kutt heg hekaj s-ap wo t-nako matt ab wo tahnith g i wehmtadag ch pi wo ehbithath. T heg ab wo i s-t-ho'ige'ith k ab wo i t-wehmt.

Hebrews 5

1 Jiosh atsh am i ap'ech matsh hema g t-wehm o'othham d wo uhgchu t-pahligk ch ab wui hab wo junihith g iagchulitha ch ho'ige'ithahuna am t-wehhejed ch hejel e wehhejed. Kut ith hemho wo wa chum s-hemajimak ab t-wui no pi hab wa'ap d o'othham ch hebai hab wua g pi ap'ekam. 4 Pi atsh hedai am wabsh wo hejel i e kei mat d wo uhgchu pahlk. Jiosh atsh am wo i kei hab masma matsh wa hab juh g Aaronbad gd hu i heki hu matsh g amjedkamaj d wo papalk. 5 Tsh hab wa masma pi am hu wabsh hejel i e kei g Christ. Jiosh atsh wa am i kehsh k ab wui hab kaij: Ni-alithag, hemu ant am wo ha chehgi g hemajkam map ahpi d wa'i ni-alithag. 6 An o hebai hab ep chu'ig mash hab ep kaij ab wui: Thapt wo pahlk heg hekaj mant am i m-kei hab masma mant g Melkisedekbad ch pi heg hekaj maps d Aaronbad amjedkam. Kupt chum hekith d wo pahlk. Neh, bash kaij g Jiosh ab wui. 7 Kush g Jesus ab wui e ho'ige'ithahun ch shoak ch iawua g e-oh'og mash eda ia oimmed ch ab aihim g muhkig. Kush g Jiosh ab kaiham nash pi heg si s-hemajima ch ab si has elith. 8 Thash Jiosh hab elitha matsh wo e sho'igchuth k wo e muhkith am t-wehhejed. Kutsh wa woho hab e juh k hab masma s-mai g wohog elithadag, chum as d Jiosh alithag. 9 Bat wa masma am i ap'ech g Jiosh mat hab wo juh g pi ha huhugetham tho'ibiathag wehsijj t-wehhejed mattp hedai ab wo s-wohog el. 10 Kush hab kaij g Jiosh mat am i kei mat d wo uhgchu pahlk hab masma mat am i kei g Melkisedek. 11 Mu'i ani ha'ichu chum s-em-mashchamimk ab amjed g Christ ith hekaj Melkisedek. Mt wabshaba pi wo amich. 12 Ithani amki tash d Jiosh wohochuththam ch hab wo chum chu'igk mamt ha'i ep wo ha mashcha. Kumtki eda koi si s-ap s-mai g wehpeg mashchama. Bam sha masma mam d wabsh kia al haha'as a'al ch hegai wa'i wihbi ih'e 13 nam pi pi amichuth g Jiosh ne'oki ab amjed g s-ap'ekam. 14 Hegam mat wo ge'ege'ehogat e-wohochuthadag ed at wo s-amich g Jiosh ne'oki k wo s-mahchk mo haschu d s-ap'ekam ch haschu d pi ap'ekam.

Hebrews 6

1 Gd hu i si wehpeg att am em-mashcha mamt gm hu wo s-ohhoth g pi ap e-chegitoi k ab wo i s-wohoch g Jiosh 2 k wo e pahl wapko. T g Jiosh ab wo i em-wuwhas muhkig t amjed k pi wo em-lothai. Kutt heki hu em-mashcha mamt ab wo ha taht hegam mat hab wa'ap ab wo i s-wohoch g Jiosh k wo e ho'ige'ithahu am ha wehhejed. Kut ab wo bei g gewkthaj g Hekia S-ap'ekam Gewkthag hab masma mamt ahpim. 3 Ith o d hema hegam wehpeg mashchama am t-wohochuthadag ed. K wabshaba ha'ichu d ep hegai mamt ep wo s-mai. Mt heg hekaj pi heg wo wa'i a'agath mo d si shondaj g t-wohochuthadag. 4 Pi at wo e nako hegam mat wo s-mahchk g Jiosh ch wo thagito mas gm hu ep wo s-ohhoth g pi ap e-chegito k ep wo bei g wechij thoakag. Heki o hu ha tonlith g Jiosh g ha-amichuthadag. K g Hekia S-ap'ekam Gewkthag am ha eda chikpan. Kut chum bei ihtha wechij thoakag 5 k chum s-mahch mo g Jiosh ha'ichu ahga s-ap'e ch neith g Jiosh gewkthag 6 ch wabshaba wehs thagito ihtha heg hekaj pi ap'ekam. Heg o wa wepo mat ab ep sisish g Jiosh alithag kots t ab k si edawua am ep i e nohnogithk pi ap'ekam wui. Kut pi wo sha'i e nako mas gm hu ep wo s-ohhoth g pi ap e-chegitoi. 7 Neh, no hig pi woho mam hab elith g e-e'es mat chum s-kehg wo bahithagt mat hekith wo juh. Kumt wo thagito hegai oithag mat wabsh g ho'i wo i wuhshath. Pegih, t hab wa masma wo em-thagito g Jiosh mamtp pi ha'ichu wehhejed wo s-kehgajk. 9 Ni wabshaba hab em-elith mamt woho e tho'ibia k hab masma ab ba'ich wo i bei g Jiosh ho'ige'ithadag. 10 S-ap am ha'ichu hab junihim ha wehhejed g e-wehm wohochuththam ch hab wabsh kia junihim nam pi si pihk e elith ha hekaj. T g Jiosh wo s-chegito hegai mam haschu hab junihim. 11 Tatchua ani mamt hab wa masma am hab wo junihith wehs e-thoakag oitham ch ab wo ai hegai mo g Jiosh ab t-makiog hahawa. 12 Hegam mash wa heki hu ab s-wohochuth g Jiosh ash s-bahbagi ab nenida mat hab wo ha juni mash haschu hab kaij mat hab wo juh. Kumt ahpim hab wo wa masmak. 13 Jiosh ash wa am si ahg g t-shohshonbad Abraham mash haschu ab t-makiog 14 ab wui hab kaijch: Hejel ni-wehhejed ani si m-ahgith mant ab wo si s-m-ho'ige'ith k ab mu'i wo i ha wuwhas g m-amjedkam. 15 Kutsh heg am wabsh s-bahbagi nenida k am nei matsh wa g Jiosh am i shonwuich mat haschu am ahgi mat hab wo juni. 16 Neh, s-mahch ach mat am Jiosh tahgio a'ai wo i ap'ech g hemajkam mat woho hab wo juh g ha'ichu e-ahga. 17 Pegih, t g Jiosh am hejel e tahgio i ap'ech g ha'ichu e-ahga Abrahambad wui no pi pi hedai ba'ich i ge'ej mas am tahgio wo i ap'ech. Bo masma am t-chehgithch ahchim mach ab s-wohochuth mat pi hekith am gawul wo juh g hab e-elitha. 18 Kutt heg hekaj ab wo t-gewkemhunath mat s-ap wo nahto g t-tho'ibiathag. 19 Jesus atsh am heki hu i wah thahm kahchim ch ed. Kuch heg hekaj s-mahch mat am wo i t-wahpki ahchim mach ab s-wohochuth. Jiosh atsh am i kei matsh d wo uhgchu t-pahligk chum hekith. Pi ash heg hekaj d pahl mas d papal ha amjedkam. Jiosh atsh am i kei hab masma matsh wa heki hu am i kei hegai mash hab chehgig Melkisedek.

Hebrews 7

1 Nt wo ha'ichu em-ahgi ab amjed hegai Melkisedekbad mant wo em-tashogi g Jesus chikpan. Jiosh atsh am i kei g Melkisedekbad. Kush d kownal am Salem kihhim ch ed ch d ep pahl. Kutsh ihtham Abrahambad gm hu hebai githahiop k am ha'i ha koktha g pi ap'ekam kokownal k ab uhpam hihim. Kutsh g Melkisedekbad ab ha nam k ab i s-ho'ige'el g Abrahambad am wehhejed g Jiosh. 2 Tsh g Abrahambad ab mah mo haschu ab d wuikamaj g Jiosh mash d hemako tahpna mo wehst-mahm e tahpanch g gehgewathaj. Melkisedekbad chehgig o hab d ahga ‘S-ap'ekam Kownal.’ K g Salem hab d ahga ‘Thotholimathag.’ K heg hekaj d ep thotholimkam kownal. 3 Pi o an hu hebai o'ohanas mas hedai d ha-amjedkam g Melkisedekbad ch has masma mahsi k has masma heb hu hih. K ith am t-chehgithch mat has masma in wo i wuhsh g Jiosh alithag ab thahm kahchim t amjed k am uhpam ep wo him k d wo uhgchu pahlk chum hekith. 4 Melkisedekbad oki ba'ich d i si s-has ha'ichu mo g Abrahambad. Tsh heg ab mah g hemako tahpna mo wehst-mahm e tahpanch g gehgewathaj matsh am ui cheggiadag ed 5 K hab chu'ig g t-chehanig matsh hegam t-wehm o'othham mo d Levibad amjedkam ch d papal ab t-amjed wo ui hegai hemako tahpna matsh wehst-mahm wo e tahpanch g t-gehgewathag. 6 Kush ihtha Melkisedekbad pi d Levibad amjedkam. Tsh eda g Abrahambad ab namkith hegai mo d Jiosh wuikam. Tsh g Melkisedekbad ab i s-ho'ige'el. 7 Kuch s-mahch mat g ge'echu ab wo s-ho'ige'el g chumchu. K heg hekaj ba'ich i ge'ej g Melkisedekbad mo g Abrahambad. 8 Melkisedekbad o ba'ich d i si s-has ha'ichu mo g t-papalig. Hegam o wabsh ko'ihim. K wabshaba pi an hu hebai o'ohanas mat muh g Melkisedekbad. 9 K heg wa wepo mat g t-papalig ha-shohshonbad Levi am namkith g Melkisedekbad 10 nash pi ab d Abrahambad amjedkam mash heg am namkith. 11 Jiosh atsh am i ha chuhcha g Levibad amjedkam matsh d wo t-papaligk ch ab wo t-mah g chehanigaj. T wabshaba pi wo sha'i e nako g t-papalig mas am wo i t-ap'ech g Jiosh wehhejed. Tsh heg hekaj ab hema ep i wuhsh mash gawul masma mo hegam ch wepo masma g Melkisedekbad. 12 Kut hemho wa am gawul juh g Jiosh g e-chehanig mat am wo i kei g Jesus mat d wo t-pahligk. 13 Heg ash pi ab hu d Levibad amjedkam ch wabshaba ab d Judabad amjedkam matsh ihtham pi d wo chum papalk am t-chehanig ed. K heg hekaj tasho mat g Jiosh am gawul juh g e-chehanig am t-wehhejed. 15 Neh, ba'ich ant am wo i em-tashogi mo g Jesus pi ha wepo masma g t-papalig ch wabshaba wepo masma g Melkisedekbad. 16 Pi atsh e pahlch g t-chehanigkaj k wabshaba e pahlch g gewkthajkaj g e-thoakag. K g thoakaj d pi ha huhugetham. 17 Heg o hekaj ab amjed o'ohanas mash ab wui hab kaij g Jiosh: Am ant i m-kei hab masma mant wa am i kei g Melkisedekbad. Kupt chum hekith d wo uhgchu pahlk. Neh, bo kaij g Jiosh am e-alithag wui. 18 Kut heg am i t-ap'ech Jiosh tahgio mach ab hahawa s-ap miabith. Heki hu t-chehanig o pi ab hu sha'i t-mahkch g gewkthag machs hekaj am wo i t-ap'ech Jiosh wehhejed. Kut hekaj g Jiosh gm hu hab i juh. 20 Jiosh ash hab wabsh kaij matsh g Levibad amjedkam d wo papalk 21 ch wabshaba g e-gewkthagkaj hab kaij ab wui g Jesus: Ahni ani g ni-gewkthagkaj hab si kaij mapt d wo uhgchu pahlk chum hekith. Kunt pi hekith am gawul wo juh g hab ni-elitha. Neh, bash kaij g Jiosh. 22 K ith am t-chehgithch mat g Jiosh am i ap'ech g ba'ich i s-kehg ap'echutha mat hi heki hu nat pi am i kei g hejel e-alithag mat d wo uhgchu pahlk chum hekith. 23 Hegam Levibad amjedkam at pi wo e nako mas d wo papalk chum hekith no pi ko'ihim. 24 T wabshaba g Jesus chum hekith d wo thoakamk. T hab pi hedai ep am kehkud ed wo i kekiwua. 25 Kut wo e nako mat wehs wo ha tho'ibia hegam mat am gahi wuhshanim ab wo i e nohnogi Jiosh wui nat pi chum hekith d wo thoakamk ch am ha wehhejed ab wo tahnith g Jiosh mat am wo i ha wehmt. 26 Tatchua ach g si s-ap uhgchu pahl. K g Jesus woho hab masma ch d hekia s-ap'ekam ch i e gawulkathch ab ha amjed g pi ap'ekam. Ithani o an thaha Jiosh wehm an thahm kahchim ch ed. 27 Pi o wepo masma hegam mo d u'ugchu papal am heki hu t-chehanig ed. (a) Hegam o d pi ap chu'ijkam ch wehpeg ab wo ha'ichu iagchul hejel e-chu'ichig wehhejed k ab haha wo iagchul g hemajkam ha-chu'ichig wehhejed. K wabshaba g Jesus pi ha chu'ichig. (b) Hegam o chum hekith ab ha'ichu iagchulith Jiosh wui. T wabshaba g Jesus hemho hab juh. T heg wehs am i ap'ech g pi ap ha-chu'ichig. (c) Hegam o ab ha'ichu chum namkith g Jiosh. T wabshaba g Jesus hejel am i e thagito mat hekaj ab wo iagchul. 28 Hegam mo d papal ab heki hu t-chehanig wecho o pi d sha'i hekiakam ch pi ap wo nahto g e-chikpan. T wabshaba g Jiosh am hahawa i kei g e-alithag g hejel e-gewkthagkaj. K heg d uhgchu t-pahlig ch d si hekiakam. Pi at hekith wo huhug g gewkthaj. T hab s-ap wo nahto g e-chikpan.

Hebrews 8

1 Neh, bo wa masma d uhgchu pahl g Jesus mant am i em-tashogi. Kush g Jiosh ab si has elith ch am e wehm thahshch e-kownal thaikud ed. 2 Jiosh kihthag o si s-wohom d ge'e cheopi ch pi d wabsh hemajkam ha-nahtoi. K heg eda am chikpan ihtha si s-wohom uhgchu t-pahlig. 3 U'ugchu papal at ab ha'ichu wo chum iagchul Jiosh wui am wehhejed g pi ap ha-chu'ichig g hemajkam. T ith hab wa'ap wo wa juh g Jesus. 4 K eda pi hiwgithas mas hab wo juh ia jewed thahm no ge d Levibad amjedkam. Tho wa'i ihtham mo am t-himthag chehanig ed hab wua g chu'ichig iagchulitha. 5 K eda g ha-chikpan wabsh t-chehgithch g Jiosh kihthag ch hegai si s-wohom chu'ichig iagchulitha. Jiosh atsh wa am chehgi g Mosesbad mo has masma g kihthaj an thahm kahchim ch ed. Kush wa neith g Mosesbad an kehkch tho'ag thahm. Kush wa hab kaij g Jiosh ab wui: Am ani m-chehgith mo has masma g ni-kihthag. Kupt am wo ha ahgi g hemajkam mat hab masma am hema hab wo juh g ikus kih mat d wo ni-cheopigak. 6 Neh, hegam u'ugchu papal o am i chum ha wehmt g hemajkam heg hekaj heki hu hab elithaj g Jiosh. K wabshaba ihtha wechij ha'ichu hab elithaj ba'ich i s-kehgaj no pi g Jiosh ba'ich i s-kehg ha'ichu ab t-makiog. K g Jesus ba'ich i s-ap i t-wehmt heg hekaj. 7 Pi at am hu hab wo juh g wechij apchutha g Jiosh matp g hekiukam s-ap am wo i t-ap'ech wehhejed. 8 Neh, bash kaij g Jiosh: Ab o him g tash mant am wo nahto g wechij hab ni-elitha am ha wehhejed g ni-hemajkamga. 9 Kut pi hab wo masmak mo hegai mant am chum nahto am ha wehhejed g ha-ge'egedga mant eda ab i ha wuwhas Egypt jewed t amjed. Hegam o pi ap am hu hab junihim g ha'ichu ni-apchutha. Kuni heg hekaj pi ha chegima. 10 Nt wabshaba am hab wo juh g wechij ha'ichu hab ni-elitha am ha wehhejed. K d ihtha mant am wo o'oha g ni-chehanig ha-chegitoi ed ch am ha-i'ibthag ed. Kut woho d wo ni-hemajkamgak. Nt ahni d wo ha-Jioshgak. 11 Kut pi hedai wo sha'i ha mashcha g e-wehm o'othham mat wo s-ni-mahchk. Wehs at wo s-ni-mahchk, chum as hedai wud wo k. 12 Gm ant hu hab wo i juh g pi ap ha-chu'ichig k pi hekith ep wo chegitok. 13 Neh, bash kaij g Jiosh. K heg hekaj tasho mat hekit hegai heki hu t-himthag chehanig k oi gm hu hab wo i e juh.

Hebrews 9

1 Am o apchuthas heg eda heki hu chehanig mat has masma g hemajkam ab has wo elithath g Jiosh ch am ep apchuthas mat g hemajkam am wo i kei g ikus kih mat hab d wo ahgak. 2 Ith ash wa an e eda kuhpi. K hegai wehpeg kih hab e a'aga ‘Hekia S-ap'ekam Kih.’ Sh ith eda am ha'ichug g lalampa chuhchakud ch mihsa. Sh heg ab mihsa g papal am tho'aw g pahn ch hekaj ab si has elith g Jiosh. 3 Kush hegai hema ep kih hab e a'aga ‘Si Hekia S-ap'ekam Kih.’ 4 Ith ash eda am ha'ichug g ohla iagchulithakud. Kush ith ab g papal an memheith g s-ap uhw ha'ichu. Kush am ep ha'ichug hegai uhs washa mash d chehgitha mach d chum Jiosh hemajkamga ahchim Tutuligo. Ith ash wehsko e ma'ishch g ohlakaj. Am ash ith eda e thahshch g ohla ha'a. Sh ith eda ha'i nuhkuth hegai ha'ichu hugi mash hab e a'aga ‘manna.’ Kush am e chekch hegai Aaronbad usaga mash wa ab i i'iwgi. Kush wa am ep e to'akch hegai gohk ko'okmalk hohothai mo an ab o'ohanas g Jiosh chehanig. 5 An thahm ihtha uhs washa ash an nahtois g gohk anghil ch ab e wui gegok ch g e-a'ankaj am ehkchulithch matsh hebai wo e iawua g eh'edaj g ha-iagchulitha. Ith ash am e iawua matsh hekaj g Jiosh wo s-ha ho'ige'ith k gm hu hab wo i juh g ha-chu'ichig. Pi ant am hu wo kia wehs ha'ichu t tashogi ab amjed ihtha. 6 Neh, bash wa masma wehs apchuthas ihtham ha'ichu. Sh g papal am i wahpk wehpeg kih ch ed wehs tashkaj ch am hab wua g e-chikpan. 7 Kush wabshaba heg wa'i si uhgchu pahl gd hu i wapke heg eda ba'ich kih hemho ahith ab. Kush g ha'ichu thoakam eh'ed am iagchulith Jiosh wui am wehhejed g e-chu'ichig ch ha-chu'ichig g hemajkam matp hems am hab juh pi mahchch mo d pi ap chu'ichig. 8 Hegai Si Hekia S-ap'ekam Kih o wepogithas g Jiosh kihthag. K g Hekia S-ap'ekam Gewkthag am t-chehgithch mo pi koi ab hu kuhpi'oks g Jiosh kihthag am t-wehhejed mo eda wabsh kia an kuhpi hegai kih. 9 K d wabsh chehgitha mo g ha'ichu thoakam ab iagchulith Jiosh wui. Pi at woho am wo i ha ap'ech Jiosh tahgio. K heg hekaj am wabsh kia e kudut heg hekaj pi ap e-chu'ichig. 10 Ihtha heki hu chehanig o wa am ha chehgithch mat haschu wo ko'ath ch has masma wo i e ap'echuthath e lihmhunch am Jiosh wehhejed am hugkam mat hekith g Jiosh am wo i wechijith wehs ha'ichu am t-wehhejed. 11 Tsh wa ith am woho hab e juh g Christ k d si uhgchu pahl am thahm hegai s-kehg ha'ichu mash g Jiosh hab kaij matsh hab wo t-juni. Hegai apchutha mo am eda chikpan g Christ o ba'ich i ge'ej ch ba'ich i s-ap'e mo hegai ge'e cheopi mani am heki hu ahg. Pi at g o'othham am nahto. K pi d ihtha jewed thahm ha'ichu. 12 Hemho at am i wah g Christ heg eda apchutha s-ap nahtok g t-tho'ibiathag. Hegam mo d jewed thahm papal o wabsh g ha'ichu thoakam ha-eh'ed am iagchulith. T wabshaba g Jiosh alithag g hejel e-eh'edkaj ab t-behi g pi ha huhugetham thoakag. 13 Neh, mash wa g ha-eh'ed g siswat ch totolo ab e sihbanith ch g matai ab amjed g wisilo mehithag ab e nehnichuth ha thahm g hemajkam mat wo ha chehgi mat wo i ha kegch g Jiosh heg amjed matp hems pi ap am hu hab junihim g e-himthag chehanig. 14 Pegih, t ba'ich i ge'e ha'ichu hab t-juni g Christ mat am i e thagito Jiosh wui k am t-wehhejed e muhkith. Hekia S-ap'ekam Gewkthag o wa ab mahkch g gewkthag mat hab juh. K d hekia s-ap'ekam iagchulitha. Heki achd hu t-kudut heg hekaj pi ap t-chu'ichig. T wabshaba g Christ am iagchul g e-eh'ed Jiosh wui mat am wo i t-ap'ech. Kuch am hahawa g Jiosh wehhejed chikpan. 15 Bash kaij g Jiosh matsh ab wo t-mah g pi ha huhugetham thoakag k ab wo i t-wahpki e-kihthag ed. T g alithaj am i ap'ech ihtha wechij ha'ichu ahgaj t-wehhejed ahchim mo g Jiosh ab t-waith. Muhkigaj at am i t-wuwhas matt pi wo ai g t-namkithadag heg hekaj pi ap t-chu'ichig ab wecho hegai heki hu apchutha. 16 Neh, mat hema wo muh k am wo thagito g e-ahga mat hedai wo i ui g ha'ichu enigaj. T hemho wa am wo e wohokamch mat muh ihtha o'othham. Kut am hahawa hab wo e juh g ahgaj. 17 Pi at hab wo sha'i e juh g ahgaj mat wo kia thoakath. T hekith wo i muh, t hab haha wo e juh. 18 Chum hems hegai heki hu apchutha am ha shahgith g Jiosh ch hemajkam at i e ap'ech g eh'edkaj. 19 Mosesbad atsh wehpeg am wehs ha ahgi g chehanig mo has i masma an o'ohanas k am hahawa wasib g wisilo ch siswat ha-eh'ed k g shuhthagi am i wehnath k ith o'os heg ab o'ohana mo an hab chu'ig g chehanig ch ab ha thahm g hemajkam. Batsh juh ihtha am wa has mahs sha'ikaj mo hab e a'aga ‘hyssop’ ch kahwal wopo mo i wegiumthas. 20 Kush wa hab kaij g Mosesbad: Ith o d eh'ed mat hekaj i e shonwuich g apchuthaj g Jiosh mamt ab wo s-wohog elithath. 21 Bash wa kaij ch hab wa'ap masma ab o'os g eh'ed heg ab ikus kih ch wehs ha'ichu thahm mash hekaj am ihm g Jiosh. 22 Tho Jiosh chehanig am t-wehhejed ahchim Tutuligo mo wehs ha'ichu e kegchuth heg hekaj eh'ed. T g pi ap chu'ichig gm hu hab wo i e juh hab wa'i masma mat g eh'ed wo e iawua. 23 Neh, bo masma i e kegchuth ihtham mo am wabsh oithch hab chu'ig hegai mash am Jiosh kihthag ed. T wabshaba g thahm kahchim apchutha hemho wa ba'ich i s-ap'ekam iagchulithakaj wo i e kegch. 24 Hegai Si Hekia S-ap'ekam Kih ash am oithch hab junis g Jiosh kihthag. Tsh g Jiosh alithag pi am wabsh i wah heg eda k wabshaba am i wah Jiosh kihthag ed k ithani am t-wehhejed neok am tahgio g Jiosh. 25 Uhgchu t-pahlig ahchim Tutuligo o wabsh g ha'ichu thoakam t-mum'ajith ch ab Jiosh wui iagchulith. Tsh wabshaba g Jiosh alithag ba'ich i s-ap iagchulitha hab juh nat pi hejel e muhkith am t-wehhejed. Pi o hekith nahtois g ha-chikpan g u'ukchu t-papalig. K heg hekaj mu'ikko hab junihim. 26 Tsh wabshaba g Jiosh alithag wabsh hemho hab juh k pi mu'ikko e muhkith am t-wehhejed. Neh, k hab masma tasho mat s-ap nahto g e-chikpan mat gm hu hab i juh g pi ap t-chu'ichig. Kush hemu hahawa e aihim mat g jewed wo huhug. 27 Am o apchuthas mat hemho wa wo muh g o'othham hemho k heg i thahm ab wo ai g ge'e lothaita tash. 28 Bat wa masma g Christ hab wa'ap hemho am i e thagito t-wehhejed k gm hu hab i juh g pi ap t-chu'ichig. T ith pi am hahawa ep d wo chikpanajk. Tsh wabshaba ia ep wo i e maskogi mat wo t-tho'ibia ahchim mach ab si hiwig ch ab nenida mat ab ep wo jiwia.

Hebrews 10

1 Ab ash wa t-chehani g Jiosh matt ab wui wo ha iagchulithath g ha'ichu thoakam wehs a'ahith ab. Ith atki pi gm hu hab wo i juh g pi ap t-chu'ichig k wabshaba wabsh s-kohmagim t-chehgithch mat has masma g Jiosh gm hu hab haha wo i juh. 2 Pi at ep wo t-kudutath g pi ap t-chu'ichig matp gm hu s-ap hab wo i e juh heg hekaj iagchulitha. Kutt heki hu wa'i ha'asa hab wo juh. 3 Ihtha t-iagchulitha o am wabsh i t-chechegitolith g t-chu'ichig wehs ahith ab. 4 Pi at hekith wo sha'i e nako g totolo ch siswat ha-eh'ed mas gm hu hab wo i juh g t-chu'ichig. 5 Sh heg hekaj ab wui hab kaij g Jiosh g alithaj am wo jiwiak jewed thahm: Pi ap wa chum hohho'ith mat g hemajkam ab m-wui wo iagchul g ha'ichu thoakam. Ith o wabsh ha chehgith mant has masma gm hu hab wo i juh g pi ap ha-chu'ichig. Heg apt hekaj hab wo ni-juh mant d wo jewed thahm o'othhamk ch ab m-wui wo ni-iagchul. 7 Ni heg hekaj hab kaij mani ab m-wui ni-thagitokch ch am hab wo juh hegai mo an o'ohanas m-o'ohana ed map ni-tatchuith. 8 Neh, Jiosh o ab ha chehani g hemajkam mat ab wui wo ha iagchul g ha'ichu thoakam. Kumtp hems pi amichuth mas haschu ahgch hab e kaij mo chum pi hohho'ith hegai iagchulitha. 9 Pegih, bo e kaij no pi d wabsh chehgitha am hugkam mat hekith g alithaj hab wo juh g s-wohom iagchulitha am hejel e thagitok Jiosh wui. Heg ash hekaj ab wui hab kaij: Ab ani m-wui ni-thagitokch mant hab wo juh g m-tatchui. 10 Tho Jiosh hab elitha mat g alithaj wo e muhkith am t-wehhejed. Kut wa woho hab e juh k hab masma wehs gm hu hab i juh g pi ap t-chu'ichig. 11 Wehs tashkaj o am hab wua g e-chikpan g t-papalig ch mu'ikko hab wua g iagchulitha. T wabshaba ihtha iagchulitha pi hekith gm hu hab wo i juh g pi ap t-chu'ichig. 12 Jiosh alithag at hi hemako iagchulitha hab juh mat gm hu hab wo i juh. K ith chum hekith s-kehgaj heg wehhejed. T g Jiosh ab hahawa si has elith k an e wehm thahshch e-kownal thaikud ed. 13 K ithani ab thak ch ab wo ai mat g Jiosh wo ha gewitojel hegam mo ab wui gegok. 14 Pegih, t hemho am e iagchul t-wehhejed k hekaj i ha ap'ech ia'i amjed wehs hegam mat gm hu oa g pi ap'ekam ha-ihbthag ed. 15 Hekia S-ap'ekam Gewkthag o am hab wa'ap wohokamchuth ihtha hab masma: 16 Bo kaij g Jiosh: Ith o d wechij apchutha mant am hab wo juh ha wehhejed. Bant wo juh g ni-tatchuithag am ha-i'ibthag ed ch ha-chegitoi ed. 17 K hab ep kaij: Am ant hu wo pi chegito g pi ap ha-chu'ichig k pi thahm am hu ep wo sha'i i chegito. 18 Pegih, t gm hu hab i e juh g pi ap t-chu'ichig. Kutt hekaj hahawa pi heg hekaj hab wo sha'i juh g iagchulitha. 19 Ab ach hahawa si ap'ethag matt ab wo i miabi g Jiosh nat pi muh g Jesus am t-wehhejed. Ith o heg wa wepo mach ap'ethag matt am wo i wahp heg eda Si Hekia S-ap'ekam Kih. 20 E at muhkith g Christ am t-wehhejed k hab masma ab i kuhpi'o ihtha wechij himthag am t-wehhejed 21 no pi s-wohom d si uhgchu t-pahlig ahchim Jiosh hemajkamga. 22 Hekai ach hu t-kudut g pi ap t-chu'ichigkaj. T wabshaba ab i t-kegchuth k gm hu hab i juh g pi ap t-chu'ichig. Kuch heg hekai ab si hiwig ch d hekiakam ch ab wo i miabi g Jiosh. 23 Jiosh at woho ab wo t-juni mash has i kaij. Kutt heg hekaj si s-wihnam wo t-u'ukch heg ab. 24 Ab att hig a'ai wo si pihk t-elithath ch ab a'ai wo i t-wehmtath matt am wo chehgithath mach ab ha tatchua g hemajkam ch am wo i ha wehmajk. 25 Ha'i at ha'asa ha wehm e nam g e-wehm wohochuththam. Kumt wabshaba ahpim pi hab wo chum e juh k ab wo si a'ai i e gewkemhunath. E o aihim mat ep wo jiwia g t-kownalig Jesus. Kutt hekaj wahm ba'ich ab wo i t-gewkemhunath. 26 Pi at gm hu hab wo sha'i e juh g chu'ichigaj hegai mat am hab wo kia junihith g pi ap'ekam ha chum s-mahchch g wohokam. Pi o am hu hahawa ha'ichug mas haschu am wo e iagchul heg wehhejed. 27 Jiosh atsh wo ha lothait k gm hu wo ha shul s-ko'ok ha-namkithadag ed. K ith hab masma mo g pi ha huhugetham mei. Heg o am wa'i wi'is mat wo chum si s-ehbithath matsh has wo ha juh. 28 Mosesbad atki an o'ohana Jiosh heki hu o'ohana ed matsh gohk o waik wo wohokamch g chu'ichigaj hegai mat gm hu wo s-ohhoth g Jiosh chehanig. Kutsh wo e muhkith. 29 Kumt ba'ich i s-ko'ok namkithadag ab wo bei mamtp pi ab hu wo ha'ichuch g Jiosh alithag. Heg at iawua g e-eh'ed k e muhkith mat gm hu hab wo i chum juh g pi ap t-chu'ichig. Hekia S-ap'ekam Gewkthag o chum si s-hemajima ab em-wui. Kumt wabshaba wo si s-nen'oithk 30 nash pi hab kaij g Jiosh: Ani ant ab wo ha mah g ha-namkithadag. K an ep o'ohanas: Jiosh at wo ha lothai g e-hemajkamga. 31 Tho si s-ta ehbitham ha'ichu mamt wo muh pi am hu e ap'echuthch Jiosh wui. Hemho wa at gm hu wo em-shul s-ko'ok em-namkithadag ed. 32 Am g wo s-chegito mo wa has chu'ig ha'ichu am em-wehhejed. Mu'i ha'ichu amt nako amjed mamt ab s-mai g wohokam k eda pi sha'i e gehgch heg hekaj. 33 Mu'ikko am s-ko'okam has em-ahg ch em-sho'igchuth am hemajkam ha tahgio. Hebai am wa si pi ap e tahtk ha wehhejed hegam mo hab wa'ap hab masma e sho'igchuth. 34 Ab am ha wehm nakog g sho'igthag hegam mat e kuhpach. Ab am wa wabsh s-ap e tahtk mat wa chum wehs em-wohppo'i g ha'ichu em-eniga heg hekaj mam s-mahch mo ba'ich d i si ha'ichu hegai mamt ab bei mat ith pi hekith wo ha huhug. 35 Pi g am wo heb hu wua g e-wohochuthadag. Ith at wo em-u'apajel g ge'e em-mahkigdag. 36 Bamt wo junihith g Jiosh tatchui ch wo s-chu nakogath. T g Jiosh am hab wo em-juni mash haschu hab s-em-junimk. 37 Neh, bo chu'ig an Jiosh o'ohana ed mo hab kaij g Jiosh: Pi o ge'e tash am wi'is mat am wo jiwia g si ni-Kehsha. 38 Ni-hemajkamga at ab wo s-wohoch ihtha k wo e tho'ibia. Tp wabshaba hema wabsh wo sha kuhkam kekiwua, nt pi wo hohho'i ihtha. Neh, bash kaij g Jiosh. 39 Tt ahchim hi pi wo sha'i kuhkam gegokiwua machs im hu hab wo i t-juh ab amjed g Jiosh k wabshaba ab wo i s-wohochuth k wo t-tho'ibia.

Hebrews 11

1 T-wohochuthadag o hab d ahga mach s-mahch mo woho hegai mach am wui t-gewpkathch, chum achs hems pi t-wuhpuikaj neith. 2 Mu'ijj g t-shohshonbad ash ab s-wohochuth g Jiosh ha'ichu ahga. Sh hekaj ab s-ha hohho'ith g Jiosh. 3 Ab ach s-wohochuth g Jiosh ha'ichu ahga ch hekaj s-amichuth mat wehs ha'ichu nahto pi ha'ichu amjed am wabsh neokk. 4 Hema ash wa hab chehgig Abel ch ash ab s-wohochuth g Jiosh ch hekaj ab s-wohog elith k ab wui iagchul g ha'ichu thoakam e-mu'a. Tsh wabshaba g wehngajbad Cain pi hab masma hab e juh. Tsh g Jiosh ab si s-hohho'i g Abelbad natsh pi hab juh g tatchuij. Ith ach an ne'okchulith Jiosh o'ohana ed. K ith heg wa wepo mo g Abelbad am wabsh kia neok ch am ha'ichu t-ahgith. 5 Hema ash wa hab chehgig Enoc ch ash ab s-wohochuth g Jiosh. Sh g Jiosh s-hohho'ith ch gm hu i bei mash wabsh kia thoa. Kutsh pi hedai edagi. 6 Hegam at wo wa'i s-ha hohho'ithath g Jiosh mat hedai ab wo s-wohochuthath. Hegai mat ab wo i miabi g Jiosh at hemho wa wo s-wohoch mo an hema d Jiosh ch am i e tashogith ha wui hegam mo ab s-mahchimk. 7 Noahbad atsh ab i s-wohoch g Jiosh k ab si has elith. Jiosh ash wa am ahgith mat hema hab wo juh g si ge'e wahlko natsh pi wo ha wi'in. Tsh ihtham Noahbad woho hab e juh k heg eda e tho'ibia g e-wehm kihkam wehm ch e-a'aliga ha wehm. Bat masma am mahsko wua g Jiosh g hemajkam ha-chu'ichig natsh pi hegam pi ab hu wohoch. Kush hab kaij g Jiosh mash ihtham Noahbad d s-ap'ekam nash pi ab s-wohochuth. 8 Abrahambad ash ab s-wohochuth g Jiosh ch ab s-wohog el. Jiosh ash hab ahg matsh am hu hebai wo mah g mehk jewed. Kutsh ab wui wo hih. Tsh g Abrahambad woho thagito g e-kihthag k gm hu hih wa chum pi mahchch mas hebai wo hih. 9 Jiosh atsh pi oi ha mah hegai jewed. Kush am wabsh i e chiwiapadath ch am kihkahim ikus kih ch ed am ha wehm g e-amjedkam. Kush g Jiosh am hab wa'ap ha ahgith ihtham Abrahambad amjedkam matsh am hu hebai wo ha mah hegai jewed. 10 Abrahambad ash ab wui e gewkath hegai kihhim mo d Jiosh nahtoi ch pi hekith wo i gei. 11 Abrahambad ch Sarabad ash wa ab s-wohochuth g Jiosh mash wa hab ha ahgith matsh wo hema mahsith g ali matsh eda heki hu kekelit. Sh g Sarabad pi ha mamdat. 12 Neh, sh wa g Abrahambad d si keli mat pi ep wo chum e nako mas wo alitht. T eda ab amjed i hih mu'i hemajkam mo pi ta kuintama hab masma mo g huhu'u ch hab masma mo g o'od an ge kahchki babsho. 13 Wehsijj ihtham mach am ha chehcheg at ko'o k huhug koi wehs u'uk hegai mash haschu g Jiosh ab ha makiog. Heg o wa wepo wo mehkjed neith ch ab si tatchua hegai ha'ichu no pi s-mahch mo d wabsh chihpiatham ith thahm jewed. 14 Hegam mo hedai s-mahch ihtha o am tasho e gahgith g jewed mat d wo si ha-enigak. 15 Pi o am hu uhpam e chegito heg wui jewed mat am thagito. Jiosh at wo ha hiwigi mat wo uhpam hihi matp hab wo e el. 16 K wabshaba am e gewpkathch heg wui jewed mo ba'ich i s-ap'e, pej hegai thahm kahchim kihthag. Jiosh o s-hohho'ith mo hab a'aga mo d ha-Jioshga nat pi am heki hu nahto g kihhim ha wehhejed. 17 Abrahambad alithag ash hab chehgig Isaac. Tsh wa g Jiosh am wabsh a'appe g Abrahambad mash eda d thoakam mat wo mua g e-alithag k hekaj ab wui wo iagchul. Tsh g Abrahambad ab i s-wohochuth k hab chum juh, chum as g Isaacbad d si hejel alithag ch d Jiosh mahkigdag. 18 Jiosh ash wa hab ahgith mat ab Isaacbad amjed wo i hihi g amjedkamaj. 19 Abrahambad o ab s-wohochuth mat g Jiosh wo e nako mat ab uhpam wo i wuhshath g Isaacbad muhkig amjed. K heg wa wepo mat hab e juh nat pi oi wa tho'ibia. 20 Isaacbad ash wa ab s-wohochuth g Jiosh ch hekaj am ha ahgith g e-a'alithag Jacob ch Esau matsh has masma ab wo s-ha ho'ige'el g Jiosh. 21 Jacobbad ash wa ab s-wohochuth ch ab ihm g Jiosh ch am ha ahgith hegam e-wopsmad mash d Joseph a'alithag matsh has masma ab wo s-ha ho'ige'el g Jiosh. Ith at hab juh mo eda muhkhim an wabsh e-cheowikud an e gewishch. 22 Josephbad ash wa ab s-wohochuth g Jiosh ch hekaj hab kaij am i muhkhimk mat wo uhpam hihi g Tutuligo ab amjed g Egypt jewed ch am ep si shel ha ahgith mat has wo juh g oh'oj. 23 Mosesbad jehj ash wa ab s-wohochuth g Jiosh. Kownal ash chum ha chehani g Tutuligo mat wo ha koktha g chechoj e-a'aliga. Tsh eda g Mosesbad jehj pi sha'i ehbeni g kownal chehanig k e'esto g Mosesbad waik mashath amjed mat mahsi neithch mo s-ap ulini d ali. 24 Kownal alithag atsh an hahawa bei g Mosesbad k hab a'aga mo d madaj. K wabshaba g Mosesbad ab s-wohochuth g Jiosh ch pi hohho'ith am i ge'ehogatk mat hab wo e a'agath mo d madaj hegai mo pi d Jiosh hemajkamga. 25 Ba'ich i mat ab wo nako g sho'igthag ha wehm g Jiosh hemajkamga ki hegai mat am he'es wo si s-hehgigk ha wehm hegam mo pi ab hu wohochuth g Jiosh. 26 Am ash a'amichuth mat wo e sho'igch wehhejed g Jiosh si Kehsha. K wabshaba ith ba'ich d i si ha'ichu am wehhejed ki g Egypt jewed s-kaisthag no pi am wa s-chegitog mash haschu si s-kehg ha'ichu ab ha makiog g Jiosh g e-hemajkamga. 27 Kutsh heg hekaj pi sha'i ehbeni g kownal k am thagito g Egypt jewed. Heg o wa wepo mo ab neith g pi ta neithagam Jiosh nash pi ab nakog g sho'igthag am wehhejed. 28 Jiosh ash am ahgith g Mosesbad mat wo ha cheha g hemajkam mat wo ha koktha g kahwal mahmad k ab wui wo iagchul g ha-eh'ed ab e-pupualit ab. Tsh hab pi wo ha koktha g anghil g wehpeg cheoj ha-a'aliga. Tsh g Mosesbad ab i s-wohochuth k hab masma ha cheha g hemajkam. 29 Kush g Jiosh hab ha ahg g Tutuligo mat am gahi wo i huhud S-wegi Kahchki oithch. Kutsh ab i s-wohochuth k hab e juh. Kutsh am i tahp g shuhthagi. Tsh am wabsh s-gaki jewed oithk hihi. Tsh g Egypt t am shonthal am chum ha oithk heb e juh. Tsh ha ma'ish g shuhthagi k wehs ha koktha. 30 Neh, an ash wa uhgk hohothai kolhaidag g Jerico kihhim. Kutsh wa g Jiosh hab ha ah g t-shohshon matsh an wo e himtchul. Tsh ab i s-wohochuth k hab e juh. Tsh hekaj i shul g Jiosh hegai kolhai. 31 Tsh am i wahp k wehs ha koktha hegam mo pi ab hu wohog elith g Jiosh. Tsh wabshaba hema ab s-wohoch g Jiosh, chum as d chehpa'awi, k wa ha tho'ibia hegam Tutuligo mash wa am s-a'agi chechga g jewed. Kumtsh heg hekaj pi mua mamt hekith ha gewito. 32 Pi ant wo ni-nako manis wehs in wo o'oha ab ha amjed hegam kekelibad mash hab chechgig Gideon ch Barak ch Samson ch Jephtha ch David ch Samuel ch mu'i ehp g Jiosh ha'ichu i tashogiththam. 33 Jiosh ash wa hab ha ahg matsh haschu hab wo juh. Kutsh ab i s-wohochuth k hab e juh. Ha'ijj atsh g nahnko mahs jejewed ha gewito k hab wua g s-ap'ekam. Tsh g Jiosh ab ha mah mash haschu ha ahgith mat ab wo ha mah. Ha'i atsh wa e tho'ibia ab ha amjed g maipith 34 ch ab amjed mam chum s-ha kokthaimk g meikaj ch is-pahyokaj. Tho wabsh o'othham ch eda ab bei g ge'e gewkthag k am s-chechojim ha gewito g e-obga ab a'ai jejewed amjed. 35 Jiosh atsh wa ab uhpam i ha chegitoich g ha-ko'ithag ha'i u'uwi mo ab s-wohochuth. Ha'i atsh wa wabsh s-ap e taht k e ko'ij pi thagitoimk g e-wohochuthadag no pi s-mahch mat g Jiosh ba'ich i s-kehg thoakag ab wo ha mah. 36 Ha'ijj amsh wa s-ko'okam has ha ahg ch ha gewittan k ha'i ha wupulsh k gd hu si ha kuh. 37 Ha'ijj amtsh wa ha ma'ichshulig k ha'ijj an ha eda si ha hikuch k ha'ijj g is-pahyokaj am ha koktha. Mu'ijj ash sha'i si sho'ig ch wabsh g ha'ichu thoakam e'elithagkaj e e'enigadathch. Msh wa mu'i ha sho'igchuth ch pi ab hu ap ha neith. 38 Kumsh wa ha sho'igchuth no pi d si s-ap hemajkam. An o wabsh oiopo tohono jewed oithk ch ka'akwulk oithk ch am wabsh kih wahpag ch ed ch chehcho ch ed. 39 Ith o wehs d ha-ap'ethag am Jiosh wehhejed no pi ab s-wohochuth. T eda chum koi ab hu nei mo wa haschu ha ahgith g Jiosh mat hab wo ha juni. 40 Jiosh at hab masma ap'ech mat ab t-wehm wo bei g ba'ich i s-kehg ap'ethag.

Hebrews 12

1 Neh, ihtham mu'i hemajkam at e nako no pi ab s-wohochuth g Jiosh. K ith am t-chehgithch matt ahchim hab wa'ap masma wo t-nako. Mu'i o ha'ichu gd hu wabsh i chum t-wulshshap. Kutt hemho wa ab wo si i t-hawpkaj hab masma mat g e wopoichuththam. Hegam mo d e wopoichuththam at am s-gewkam wo wohp heg oithk mamt hebai wo i ha cheki. Kutt ahchim hab wa masma am s-gewkam wo i t-nako t-wohochuthadag ed. 2 Pegih, tt hig am wo i t-gewpkai Jesus wui. Heg at ab i t-mah g t-wohochuthadag k wo wa s-ap t-nahto heg eda. Pi at sha'i thagito g e-chikpan, chum as e muhkith ab kots t ab k ab nako g si edathag no pi ab behiog g s-ap tahhathkam. Tsh g Jiosh ab si has elith k an e wehm thahshch e-kownal thaikud ed. 3 Mu'i ha'ichu at ab nako g Jesus k ab ep nako g keh'ithadag ab ah amjed g pi ap hemajkam. Pegih, mt ahpim am hab wa'ap wo si e nakog k pi wo sha'i ha'asa. 4 Koi amt ha'ichu sha'i nako ab wui gegokch g pi ap'ekam. 5 Pi g am wo pi chegito mo ab si i em-gewkemhun g Jiosh ch hab masma ab em-wehm neok mam d a'aligaj mash wa hab kaij: Ni-a'aliga, s-gewkam ani em-shohbith heg hekaj pi ap em-chu'ichig nani pi si em-tatchua. Mt heg hekaj am wo si i oithahim k s-gewkam wo e nakogath. 7 Pegih, ab g wo nakogi g e-sho'igthag hab masma matp hems g em-ohg s-gewkam ha'ichukaj wo em-shohbi. Em-sho'igthag o am chehgithch mo g Jiosh hab masma hab em-juhkch mam d a'aligaj. Pi o woho d ha-alithag hegai mam pi ha'ichu i shohbith. 8 Jiosh at si s-ko'okam wo em-shohbithath. Kumt hekaj wo s-mahchk mam d a'aligaj. 9 Neh, em-jehj atp hems ab s-gewkam ha'ichu em-shohbi. Kum ab si has ha elith. Pegih, ba'ich o i matt ab wo i t-thagito t-ohg Jiosh wui k ab wo bei g pi ha huhugetham thoakag. 10 T-jehj ith thahm jewed o he'es ab ha'ichukaj s-gewkam t-shohbithahim hab elithch mo s-ap'e. K wabshaba g Jiosh ab ha'ichukaj i t-shohbith mat hab wo t-juh matt d wo hekia s-ap'ekamk mo heg hab masma. 11 Pi o ta hohho'ithama mo hekith i s-gewkam t-shohbith g Jiosh. Ch wabshaba heg amjed bebhe g si s-ap'ekam thoakag ch hahawa si s-ap t-tahtk. 12 Mt hekaj ab wo si e gewpkai Jiosh wui k wo s-gegokim gegokiwua. 13 Am g hab wo junihith g s-ap'ekam mamt am wo i gewpka e-himthag oithk. Kut am wo em-nei hegam mo pi gewpkthag k atp hems ab wo i gewpka. 14 Am g wo i e nakog k wehs s-ap ab wo ha neithath g hemajkam ch am hab wo junihith g s-ap'ekam ha'ichu namt pi hab wa'i masma am wo i wahp Jiosh kihthag ed. 15 Am at wo i wah g bagatalig em-shahgith mamtp wo thagito g Jiosh hemajimatalig. Am g a'ai wo si e nuhkuthath mat pi hab wo e juh. 16 Am g wo s-e nen'oithath mamt pi wo e uamhu g pi ap'ekamkaj wabsh pehegchuthch g Jiosh ha'ichu hab masma matsh wa hab e juh hegai mash hab chehgig Esau. Ith ash d ge'echu ha-alithag. K heg hekaj ha'ichu d chum ap'ethaj. Kush wabshaba pi ab hu has sha'i elith ch gagda mat si hemho gegosig ab i nei heg amjed. 17 S-mahch am matsh am hahawa chum gawul juh g pi ap e-chegitoi k chum shoak. Tsh wabshaba g ohgaj am hahawa pi e nako mas ab wo mah g Jiosh ho'ige'ithalig. 18 S-e g wo nen'oithk no pi d si s-has ha'ichu ihtha Jiosh ha'ichu ahga mamt ab i kaiha. Neh, t-shohshonbad atsh ab wui hihi g Sinai Tho'ag matsh ab wo kaiha g Jiosh chehanig. Kush g mehi an thahm wuhshani hegai tho'ag. K an ha wehgaj g s-chuhugam an kahch ch g s-gewk hewel an med 19 ch g kuikud ab kaitha. K ab hema g neok. Tsh am i kah g hemajkam ihtha mash ab neok k ab si shoani ch ab ahgith g Mosesbad mo pi kaimk hegai ne'oki. 20 Jiosh ash ab ha chehani ch hab kaij: Pi amt ab hu wo i chehchsh ith ab tho'ag. Kumt hemho wa wo mua matp hedai am hab wo e juh, chum as d wabsh wo ha'ichu thoakamk. Kush ith s-ehbith g hemajkam. 21 Kush sha'i si s-ta ehbitham ha'ichu hab mahs. Sh g Mosesbad hab kaij: Ih, sha'ani wa'i si s-ehbith ch si gigiwuk. 22 Pegih, ch ahchim hemuch hab wa'ap kaiham g Jiosh ha'ichu ahga. K g Jiosh kihthag d si s-wohom t-kihthag ch d thahm kahchim ch ed Jerusalem kihhim. Bach a'aga amai mo am ha'ichug Sion Tho'ag. K ith heg wa wepo mach ahchim hab wa'ap ab wui t-gewpkathch g tho'ag hab masma mash wa g t-shohshon. Mu'i mihl anghil o an ha'ichug anai Jiosh kihthag ed. 23 Kutt ahchim mach ab s-wohochuth g Jiosh ha'ichu ahga an wo i t-hemapath k an wo ha'ichugk ch wo si s-hehgigk. Heki o hu an o'ohadag g t-chechgig mach d a'aligaj g Jiosh. Kutt g si hemako alithaj wehm wo edgithath wehs ha'ichu. Jiosh o d si usagakam wehs hemajkam ha thahm. Kuch ab s-wohochuth. K heg wa wepo matt heki hu ab wui hihi. An o ha'ichug hegam mat heki hu koi am i e ap'echuthk Jiosh wui. Kutt am wo ha wehmajk. 24 Ab att i s-wohoch g Jesus nat pi heg am i ap'ech g wechij ha'ichu ahgaj g Jiosh t-wehhejed. E at iawua g Jesus eh'ed mat e muhkith k hab gm hu hab i juh g pi ap t-chu'ichig. Ith o ba'ich i s-kehg d ha'ichu mo hegai matsh wa g Abelbad hab e juh. 25 Neh, nahnko masma o ab t-wui neok g Jiosh ithani. Kumt pi gm hu wabsh wo s-ohhoth g ne'okij. Hegam mash wa pi ab hu kaiham hegai mash am ha ahgith g Jiosh ha'ichu ahga ash wa pi e tho'ibia. Kutt ba'ich wo i bei g s-ko'ok t-namkithadag mattp pi ab hu wo kaiha hegai mo ab neok thahm kahchim t amjed. 26 Ne'okij ash wa u'ugij g jewed ab Sinai Tho'ag amjed. K wabshaba ia'i ithani hab kaij: Am ant ep wo u'ugij pi heg wa'i jewed ch wabshaba g thahm kahchim ehp. 27 Neh, ith o hab d ahga mat g ha'ichu nahtoij wo e u'ugijith k im hu hab wo i e juh. Tsh heg an wo wa'i wih mat haschu pi ap wo e u'ugij. 28 Pegih, tt ab wo si i ho'ige'el g Jiosh mat ab i t-ui ith eda kownaltalig mat pi ha'ichu wo e nako mat wo u'ugij. Ab att hig wo si ihm g Jiosh am hohho'ithaj oithch ab has elithch ch ab ep s-wohog elith. 29 Jiosh atsh wehs wo hugio g pi ap'ekam hab masma mat g mehi wo hugio g s-mehithkam.

Hebrews 13

1 Neh, ab am a'ai e wui si pihk e elith hab masma mam d e-hajunim ab ihmch g Jesus Christ. Pegih, pi g wo sha'i thagito ihtha. 2 Nt ep wo em-ahgi mamt am wo i ha wahpki g sho'igkam e-kihki ed, chum ams pi ha mahch. Batsh wa e juh ha'i k hahawa chum nei moki d anghil. 3 Am g wo wa s-ha chegitok hegam mam gd hu si ha kuhpch hab sha masma mamtp hems ahpim am ha wehm kuhpi. Am g wo s-ha chegitok hegam mo e sho'igchuth hab sha masma mamtp hems ha wehm e sho'igchuth. 4 Ab amt wo si has elithath g hohnta ch wo si e nuhkuth a'ai e wehhejed. Jiosh at ab wo ha mah g s-ko'ok namkithadag hegam mat pi wo e nuhkuth ch hegam mat wo ha ehs g ha-wehm kihkam. 5 Pi g heg wa'i s-kaisthag ab wo tatchuath ch wabshaba wabsh wo s-ap e tahtkkath heg hekaj mam haschu i edgith. Jiosh ash hab kaij: Pi ant hekith wo sha'i em-thagito. Chum ant hekith wo em-wehmajk. 6 Pegih, tt ab hig wo si i t-gewpkath k hab wo chei: Jiosh o i ni-wehmaj. Kunt pi hekith ha'ichu wo sha'i ehbithath. Pi at hedai has wo ni-juh, heg hi wa mat g Jiosh wo hiwigi. 7 Am g wo s-chegitok g ha'ichu ha-ahga hegam mo wehpeg am ahgahim g Jiosh ha'ichu ahga. Am g wo i chegito mo has masma in d thothakamkahim ch has masma e ko'ij k am oithk hab wo i juh g ha-wohochuthadag. 8 Jesus Christ o am hab wabsh i masma ith i tashkaj mo wa gd hu i heki hu ch am hab wabsh wo i masmak chum hekith. 9 Kumt pi wo sha'i hiwigi mas g gawul mahs mashchama im hu hab wo i em-juh ab amjed g s-ap'ekam himthag. Ha'i o an u'ukch g heki hu t-himthag chehanig hab e elithch mat hab masma wo i gewkai g e-wohochuthadag. T wabshaba ith pi wo sha'i i ha wehmt. An att wo u'ukchith g Jiosh hemajimatalig. Bat wa masma wo i gewka g t-wohochuthadag. 10 Hegam mo an u'ukch g heki hu e-himthag chehanig o ge iagchulithakud. Pegih, ch ahchim hab wa'ap ge iagchulithakud. K d hegai kots mat g Jiosh si Kehsha ab ab e muhkith. T hegam mat hedai wabsh g chehanigkaj wo chum i e gahgithahi g e-tho'ibiathag pi wo sha'i bei ab amjed ihtha t-iagchulithakud. 11 Uhgchu pahl o am iagchulith g ha'ichu thoakam eh'ed am heg eda Si Hekia S-ap'ekam Kih mat heg hekaj im hu hab wo i juh g pi ap ha-chu'ichig g hemajkam. Kush g ha-chuhkug g ha'ichu thoakam gm hu jeg ed e memheith. 12 Pegih, t g Jesus heg hekaj gm hu jeg ed e muhkith k g e-eh'ed iawua mat im hu hab wo i juh g hemajkam pi ap ha-chu'ichig. 13 Ahchim o d t-edathag g pi ap t-chu'ichig. Kut eda heg ab moht am t-wehhejed. Pegih, tt wo si s-hehgigam a'agath mo d t-tho'ibiakam am i thagitok g heki hu t-himthag. 14 Pi ach ia hu d si kihkam ith thahm jewed. An ash hab chu'ig g s-kehg kihhim am t-wehhejed. Kuch heg wui am nenea. 15 Ab o t-ab matt chum hekith ab wo si has elithath g Jiosh. Ith o heg wa wepo mo d t-iagchulitha Jiosh wui. K g Jesus i t-wehmt mach hab wua. Chum att hekith ab wo ho'ige'ithath g Jiosh am chehchegch. 16 Pi g am ha'asa hab wo juhni g s-ap'ekam k ab wabsh a'ai wo i e wehmajk. K ith hab wa'ap heg wa wepo mo d t-iagchulitha. K g Jiosh s-hohho'ith. 17 Ab g wo s-ha wohog elithath g e-wanimedtham. Ihtham o chum hekith am nuhkuth g s-ap'ekam em-thothakag nat pi hemho wa am wo i ahgahi g e-chikpan am Jiosh wui. Kumt ab wo ha mah g s-ap tahhathkam ha-chikpan ed mamt ab wo ha wohog elithath. Pi at ha'ichu em-wehhejed wo s-kehgajk mamt ab wo ha mah g pi ap tahhathkam. 18 Am g wo wa tahnith g Jiosh mat wo i ni-wehmajkath. Bani wabsh s-junimk g s-ap'ekam ch pi sha'i ha'ichu hab wua manis hekaj ni-kudut. 19 Kumt heg hekaj ab wo i tai g Jiosh mant s-hohtam am wo i ni-thagito. Nt hab s-hohtam am uhpam wo i em-chehgim. 20 Ahni ani hab wa'ap ab ha'ichu tahni g Jiosh mat hab wo em-juni. S-mahch am mat g t-kownalig Jesus e muhkith mat wo i t-ap'ech Jiosh wehhejed. T g Jiosh ab i wuhshath muhkig t amjed s-hohho'ithch mat has e juh. Kut g hab elithaj hahawa pi hekith gawul wo e juh. Jesus at chum hekith wo t-nuhkuthath. 21 Pegih, ni ab tahni g Jiosh mat ab wo em-mahkath mam haschu i tatchua mamt hekaj am hab wo junihith g tatchuij. Jesus o ab t-makiog g gewkthag. Kutt ab wo si has elithath chum hekith. 22 Neh, pi o sha'i chewaj ihtha ni-o'ohana. Kuni ab si em-ahgith ahpim ni-wehm wohochuththam mamt wabsh si s-ap e taht k wo kaiham k ab wo bei g i wehmtadag. 23 Am ant wo em-ahgi mamt i wuhshath g Timothy mamt wa gd hu si kuh. Kunt wo bek am i em-chehgimedk matp wo sha s-hohtam jiwia. 24 Am g wo ha ahgith g e-wanimedtham ch wehs g t-wehm wohochuththam mat ab wo i s-t-ho'ige'el. T-wepnag iia Italy t am o am hab wa'ap s-em-ho'ige'ith. 25 Jiosh at wo wa s-em-ho'ige'el.

James 1

1 Am ant wo i em-o'ohani ahni James mani d piongaj g t-kownalig Jesus Christ. 2 Am g wabsh wo si s-ap e tahtkkath mat hekith ab wo em-a'ahe g sho'igthag. 3 Ith o a'appem g em-wohochuthadag ch wo i gewkai. Kumt hab s-ap wo nahtoisk ch s-ap wo nakogath g e-sho'igthag. 5 Ha'ijj amtp hems ha'ichu pi amichuth. Kuni am em-ahgith mamt ab wo tai g Jiosh g amichuthadag. T ab wo i em-mah. Jiosh o si s-ba'ama ab ha mamka g hemajkam mo haschu i tatchua ch pi ha keh'ith. 6 Mt wabshaba hemho wa wo s-wohochuthath mat hab wo em-juni g Jiosh mam haschu ab i tahni. Hegam mo pi wohochuth at wabsh ha'ichukaj wo e kudu hab sha masma mat g shuhthagi g hewelkaj wo e kudut k an a'ai has wo e wuath. 7 Ihtham at g Jiosh pi am hu hab wo ha juni mat haschu ab wo i tai 8 no pi pi am hu shelinim wawani g ha-wohochuthadag. 9 Chum achs hems ha'ijj d sho'igkam ch eda wo chum si s-ap t-tahtkkath nat pi t-tho'ibia g Jiosh. 10 Kut g s-kakais hab wa'ap wo chum si s-ap e tahtkkath e tho'ibiak. Jiosh o am wehs t-wepo t-ha'ichuchuth. S-kakais at ha'as s-hohtam gm hu hab wo i e juh mat g sho'igkam. 11 T g si s-has ha'ichu hab ha-juni wo huhug hab sha masma mat g ha'ichu wuhshanig wo huhug mat hekith wo gaksh g jewed am s-toni k ed. 12 Tt wo si s-ap t-tahtkk matt hekith s-ap ab wo nako g t-sho'igthag. Ab o t-mahkch g Jiosh g wechij thoakag ahchim mach ab si tatchua ch am wo i t-wahpki e-kihthag ed matt hekith wehs wo gahi wuwha g t-a'appemadag. 13 Pi g hab wo sha'i cheh'i mas g Jiosh hab chum em-wua mamtp wo sha pi ap nako g e-a'appemadag k hab wo juh g pi ap'ekam. Jiosh o pi hekith hab wua g pi ap'ekam ch pi hedai hab chum ha wua mas hab wo juh g pi ap'ekam. 14 O'othham o wabsh hejel e-tatchuikaj hab wua g pi ap'ekam. T g Jiosh ab wo i ha mah g s-ko'ok namkithadag heg wehhejed. 16 Ha'i o chum ha iattogith ch hab chech'e mo g pi ap'ekam ab d Jiosh amjedkam. Pi g ab hu wo sha'i ha wohochuth, ahpim ni-wehm wohochuththam. 17 Jiosh at s-kehg nahto wehs ha'ichu. K wehs s-kehgaj hegai mo ab t-mahkch. Tash ch mashath ch huhu'u hebaichuj pi ab hu t-mahkch g tonlig no pi g jewed e nodgith. K wabshaba g Jiosh pi hekith gawul e wua ch chum hekith tonlithch g t-chegitoithag g wohokamkaj. 18 Jiosh at am i t-tashogi g wohokam. Kutt ab i s-wohoch. T hekaj ab i t-gawulkath k ab i t-mah g wechij thoakag matt d wo a'aligajk. 19 Pi g wo s-e hohtkith mamt ha'ichu hab wo chei. Ba'ich o i s-ap'e mamt wo ha'ichu kaihamath. Pi g am wabsh pehegi ha'ichukaj wo babgat. 20 Pi at hab masma wo i e ap'ech g pi em-ap'ethag. Jiosh at am wo wa'i ap'ech g pi t-ap'ethag. 21 Gam g hu hab wo i juhni wehs ha'ichu mo s-bihtagi am em-chegitoi ed ch am em-thoakag ed. Ab g wabsh wo i e sho'igchuth Jiosh wui k ab wo i s-wohoch g ha'ichu ahgaj. Kut heg hekaj wo em-tho'ibia. 22 Pi g am wo hejel e iattogithath mamt wabsh wo kaihamath g Jiosh ha'ichu ahga ch eda pi am hu hab wo junihith. 23 Jiosh o'ohana o hab sha masma mo g neithakud matt heg eda ab wo i t-neith k wo cheh mo haschu pi kehg hab mahs am t-thoakag ed. 24 Pi g gm hu wabsh wo hihim pi am hu i chegitok mo has mahs g em-thoakag 25 k wabshaba am wo si oithahith g Jiosh ha'ichu ahga ch am hab wo junihith. T g Jiosh ab wo si i s-em-ho'ige'ith k ab wo i em-wehmt wehs ha'ichu hab em-juni ed. Kut g ha'ichu ahgaj ab wo i em-wuwhas pi ap'ekam t amjed. 26 Hegam mo hedai hab kaij mo d Jiosh wohochuththam ch eda wo pi ap neneokath o wabsh hejel e iattogith. K g ha-himthag pi ha'ichu wehhejed s-kehgajk. 27 Bo d elithag g Jiosh mat g t-wohochuthadag ha'ichu wehhejed wo s-kehgajk. Hemho wa att wo si t-nuhkuthath mat pi wo t-padch g jewed t ab ha'ichu. Kut hab ep wo t-juh g t-wohochuthadag matt ha'ichukaj wo i ha wehmajk hegam mo d hehe'ejel wihpkam u'uwi ch a'al. T hab pi wo e sho'igchuthath.

James 2

1 Ab am s-wohochuth g t-kownalig Jesus Christ. Pegih, k pi hab chum chu'ig mams pi ab hu wo ha ha'ichuch g sho'igkam. 2 Pi o ap'e mamtp hema wo si s-ap thai g s-kais o'othham k eda hab wo ah g sho'igkam mat gm hu wabsh wo kehkkath o wo thahiwua jewedo. 4 Pi o ap'e g em-tatchui mamtp ha ba'ich ab wo i ha'ichuch g s-kais o'othham. 5 Jiosh ash ab ha makiog g sho'ig hemajkam g ge'e wohochuthadag mat am wo ap'ethagk kihthaj ed. Kutsh wehsijj ab wo i ha wahpki hegam mo ab tatchua. 6 M eda ha'i pi ab hu has ha elith g sho'igkam ch hegam wa'i s-kakais ab si has ha elith. Am g wo i oithahim mo ha'i g s-kakais em-sho'igchuth ch am i em-wahpkith chehanig ch ed 7 ch s-ko'okam has ahg hegai mach ab ihm mo d t-tho'ibiakam. 8 Am g hab wo junihith g Jiosh chehanig mo hab masma an o'ohanas: Ab amt wo si pihk e elithath wehs ha wui g hemajkam hab masma mam has i masma hejel e wehhejed si pihk e elith. 9 Mt wo melchkwuhith g Jiosh chehanig mamtp ab a'ai wo i ha ga'agwulkathath g hemajkam ab ha neithch mo has i mahs. 10 Kumt d wo pi ap chu'ijkamk am Jiosh chehanig ed mamtp chum hems al hemako chehanig wo melchkwua. 11 An o hab chu'ig mamt wo si e nuhkuth heg wa'i wehhejed hejel e-wehm kihkam ch an hab ep chu'ig mamt pi wo mua g hemajkam. Kumtp hems s-ap wo e nuhkuth g e-wehm kihkam wehhejed k wabshaba d wo pi ap chu'ijkamk mamtp wo hema mua. 12 T wabshaba g Jiosh gm hu hab i juh g pi ap t-chu'ichig mat wo t-tho'ibia ab amjed g s-ko'ok t-namkithadag mat hekith wo t-lothai. Pegih, tt hemho wa hab masma hab wo t-junihith ch hab wo kaijjith mach d t-tho'ibiakam ch ab wo i s-ha ho'ige'ithath g hemajkam. Pi at ab hu wo i ha ho'ige'el g Jiosh hegam mat pi ab hu wo ha ho'ige'ithath g hemajkam. 14 Pi o woho d Jiosh wohochuththam hegam mat pi hab wo junihith g tatchuij. Kut pi wo ha tho'ibia. Ha'ichu hab t-juni at wo t-wohokamch machs d wohochuththam. 15 Neh, matp hems ha'i g t-wehm wohochuththam d wo sho'igkamk ch wo ha'ichu si tatchua. 16 Pi o ap'e machs pi am hu wo i ha wehmt k hab wabsh wo chei, “Jiosh at wo wa'i i em-wehmt.” 17 Pi ach woho wohochuth g Jiosh mattp pi am hu hab wo junihith g tatchuij. 18 Ha'ijj amki hab e elith mamt ab wabsh wo s-wohochuthath g Jiosh ch eda pi am hu hab wo junihith g tatchuij. K eda hab chu'ig mat g ha'ichu hab t-juni wo tashogi g t-wohochuthadag. 19 Jijawul o hab wa'ap chum s-wohochuth mo an hema d Jiosh ch sha'i si s-ehbith ch eda pi am hu hab junihim g tatchuij ch hab masma e chehgithch mo pi d sha'i e tho'ibiakam. 20 K heg hekaj tasho mo pi woho wohochuth g Jiosh hegam matp hedai pi hab wo junihith g e-wohochuthadag. Am ant ha'ichu ep wo em-ahgi mant hekaj wo si tasho em-chehgi ihtha. 21 Ab ach d amjedkam hegai mash hab chehgig Abraham. Kush heg ab s-wohochuth g Jiosh. Tsh g Jiosh am cheha matsh ab wui wo iagchul g e-alithag mu'ak. Tsh g Abrahambad am woho hab chum juh k hekaj e chehgith mo ab s-wohochuth g Jiosh ch d e tho'ibiakam. Tsh g Jiosh am hahawa pi hiwigi mas wo mua g e-alithag no pi wabsh a'appem g wohochuthadgaj. 22 Abrahambad at ab wehnath g ha'ichu hab e-juni g e-wohochuthadag. Wohochuthadgaj at s-ap i e nahto heg hekaj ha'ichu hab junij. 23 T hekaj am e wohokamch hegai mo an o'ohanas: Abraham at ab i s-wohoch g Jiosh. K heg hekaj hab kaij g Jiosh mo d e tho'ibiakam ch pi ha chu'ichig. Neh sh g Jiosh am hahawa hab masma ihm mo d nawojij. 24 Pegih, ith o am t-chehgithch mo pi d e tho'ibiakam hegam mat hab wabsh wo kaijjith mo d wohochuththam. Hemho wa att am hab wo junihith g t-wohochuthadag ch hab wa masma am wo t-chehgi mach d t-tho'ibiakam. 25 Am g wo s-chegitok mo haschu an o'ohanas ab amjed g Rahabbad. Heg atsh wa ha'i ha tho'ibia g t-shohshonbad mash eda g wehmaj o'othham s-ha kokthaimk. Ith at am wohokamch mo ab s-wohochuth g Jiosh. Kutsh g Jiosh tho'ibia. 26 Pegih, am ach t-chehgithch g ha'ichu hab t-junikaj mach haschu ab i s-wohochuth. K hegam mat pi am hu hab wo junihith g Jiosh tatchui pi ab hu wohochuth g Jiosh.

James 3

1 Pi g am wabsh wo s-e hohtkithath mamt d wo ha mashchamthamk ch wo ha ahgithath g ha-chu'ichig. Jiosh at ba'ich i s-gewkam wo hudaw mach haschu has i junihim ahchim mach d ha mashchamtham natt pi chum ba'ich wo i s-mahchk mo haschu d s-ap'ekam. 2 S-ap at d wo o'othhamk ch s-ap wo nuhkuthath g e-thoakag hegam matp hedai s-ap wo nuhkuth g e-nehni mat pi wo pi ap neo. 3 Chum as si chumaj g t-nehni ch eda d si s-has ha'ichu hab masma mo g pilin. Pilin o d al chum ha'ichu. Kutt eda wo pilindath g kawyu k hekaj wo t-nako matt wo i nodagi mattp hebai wo i s-nodgitham. 4 Nt ep wo wepogi g wahlko nodgithakud matt hekaj wo i nodagi g ge'e wahlko, chum as has masma s-gewkam wo medath g hewel. 5 Nt ep wo wepogi g al chum chuhthagi mat mu'i wo mehi g u'us. Pegih, k am wa tasho matt hab wa'ap wo t-nako matt ge'e ha'ichu wo padch g t-ne'okikaj. 6 Pi kehg ne'oki o ab d Jiawul amjedkam. Kutt hekaj wo padch g t-chegitoi ch t-thoakag hab masma neneokch. 7 T wo e nako g hemajkam mat wabsh chum has mahs ha'ichu thoakam wo mahshoch nat pi ha mahshoch g jewed t ab ha'ichu oiopotham ch ha'ichu tha'atham ch wahammad ch waptopi. 8 T wabshaba pi hedai wo e nako mas wo hejel thotholimagi g e-nehni. Chum o hekith e nahtokch mat hab wo juh g pi ap ne'oki k hekaj wo padch g t-chegitoi. 9 Hebaichujj ach i thagitokch g t-nehni am Jiosh wui ch hekaj hehgchulith ch eda hebaichujj has ha ahg g hemajkam. K eda g hemajkam d Jiosh nahtoi. T e wepo masma chum ha nahto. 10 Ith o heg wa wepo mach has ahg g Jiosh mach eda chum hehgchulith. 11 Neh, no hig ab e wehm i tha'iwuni g s-kehg shuhthagi ch s-onk shuhthagi shon k amjed? 12 No ab i wushke g suhna uhdwis wa'ug ab? Pegih, k haschu ahgch ab em-amjed e wehm i wushke g hehgchulitha ab Jiosh wui ch has ahga ab hemajkam ha wui mo eda ihtham d Jiosh nahtoi? 13 Pi g hab wabsh wo cheh'i mam s-chu amichuth. Bag wo juhnith g s-ap'ekam ch hab masma wo e chehgi mam s-chu amichuth. 14 Pi g am wo ha iattogithath ch pi wo chum ge e haschuthath mo ab em-mahkch g Jiosh g amichuthadag mamtp wo s-ta ke'ithamak ch wo s-chu hehgamkk ch ep wo s-chu tha'ath. 15 Pi o ab hu d Jiosh amjedkam hegai s-ta ke'ithamadag ch s-chu hehgamthadag ch s-chu tha'amkam. T pi hab wo chum chu'igk hegam mo e tho'ibiakch. Tho wabsh jewed thahm ha'ichu ch ab d amjedkamaj g Jiawul hegai hab mahs ha'ichu. 16 Mu'i o ha'ichu pi ap'e mo hebai hab chu'ig g s-chu hehgamthadag ch s-chu tha'amkam. Wehs nahnko mahs pi ap'ekam o am hab chu'ig. 17 Kuch wabshaba ahchim mach u'ukch g amichuthadag ab Jiosh t amjed d hekia s-ap'ekam ch s-thotholima ch ab ha o'othhamchuth g hemajkam ch s-ha ho'ige'ith ch ha wehm s-hemajim neneok ch pi ha iattogith. 18 Am g wo ha thotholimachuth g hemajkam. Kut g Jiosh am wo i ha ap'ech mat am hahawa hab wo junihith g s-ap'ekam.

James 4

1 Ha'ijj amsh am a'ai e kam'on ch e cheggia mam eda d chum e tho'ibiakam. Nt wo em-ahgi mam hab masma hab e wua nam pi ha'ichu s-behimk mo pi ab hu d em-wuikam 2 ch wo ha cheggia k wo ha mua mamt wo bei. K eda g Jiosh ab chum em-makiog mam haschu i tatchua. Ab g wabsh wo tahni. T wo em-mah. Pi am edgith nam pi pi ab hu tahni. 3 T wabshaba g Jiosh pi ab hu wo em-mah mam haschu i tahni matp g em-tatchui pi wo ap'ek. 4 Ha'ijj am tatchua g pi ap'ekam ch hekaj d obgaj g Jiosh. 5 K wabshaba an hab chu'ig Jiosh heki hu o'ohana ed mash g Hekia S-ap'ekam Gewkthag ab wui kehk g pi ap t-tatchui. 6 Bo wa masma ab t-makiog g Jiosh g gewkthag matt pi hab wo junihith g hejel t-tatchui. Bo chu'ig g o'ohanaj: Jiosh o si s-ha ho'ige'ith hegam mo e sho'igchuth ch wabshaba ab ha wui kehk hegam mo si e hahaschuth. 7 Mt heg hekaj ab wo i e thagito Jiosh wui k ab wui wo gegokkath g ge Jiawul mamt pi hab wo junihith g tatchuij. T g Jiawul s-hohtam wo i e mehkoth ab em-amjed. 8 Ab g wo i miabith g Jiosh. Kut ab aigo epai wo i em-miabi. Am g wabsh wo thagito g pi ap ha'ichu hab e-juni ahpim mam ge gohkpa chegito mamtp woho wo s-kaim g Jiosh. T g Jiosh wo i ap'ech g em-thoakag. 9 Am g wabsh wo si pi ap e tahtk k wo iawua g e-oh'og heg hekaj pi ap ha'ichu hab e-juni ch pi wabsh wo hehemath ch pi wo s-e tahhathchuthath heg hekaj. 10 Ab g wo i e sho'igchuth wui g Jiosh. T heg ab wo si em-ha'ichuch. 11 Pi g am wo a'ai has e ahgath, ahpim ni-wehm wohochuththam. Hegam mat hab wo e junihith o ab wui gegok hegai chehanig mo hab chu'ig matt ab a'ai wo si pihk t-elithath. Heg o wa wepo mo hudawk mas s-ap'e g Jiosh chehanig. K eda hab chum mahs matt hab wabsh wo junihith. 12 Heg at wo wa'i t-lothai mo hedai t-mahkch g chehanig. Ab o hejel ab g Jiosh mas wo t-tho'ibia o im hu hab wo i t-juh ab e amjed. K heg hekaj pi ab hu em-ab mams am wo has ha ahgath. Ab g wabsh wo thagito g lothaita Jiosh wui. 13 Ab g wo i ni-kaiham ahpim mam ab si e hiwig ha'ichu k ab. Tp hems hema hab wo chei mat hemu s-hohtam wo chihpia am hema kihhim wui k am wo kihkath ahith ab mat wo ha'ichu chikpan k mu'i wo nahto g lial. 14 Kum eda pi mahch mas haschu has wo e juh ba'ich tash. An amt al he'es wo i e neith k an wabsh wo i huhug hab sha masma mo g kuhbs. 15 Bamt wo chum chei, “Matp d wo Jiosh tatchuik, kutt hab wo juh ha'ichu.” 16 M eda am ge e hahaschuth mamt haschu hab wo juh. Pi o ap'e mams hab masma wo ge hahaschuthath. 17 Kut d wo pi ap chu'ijkamk matp hedai pi am hu hab wo junihith g s-ap'ekam mo eda s-mahch mat has wo chum e juh.

James 5

1 Ab g wo kaiham mant haschu wo o'oha mamtp hedai s-e kakaischuth hab wuathch g pi ap'ekam. Bamki chum e elith mamt ge'e ha'ichu wo edgithath kekeltk. T wabshaba g em-kaisthag wabsh wo huhug. Kumt wo shoanith ch ab wo ai g s-ko'ok e-namkithadag. 4 Em-kaisthag o si ge'ej ch wohokamchuth mam pi ap ha namkith g e-pionag. Hegam o d wabsh sho'igkam ch am em-ahgith g pi e-ap'ethag ch shoani. M wabshaba pi ab hu ha kaiham ch chum hems ab ha'ichu ha abchuth ch ha koktha. K ihtham pi e nakog mas wo e tho'ibia. K wabshaba g Jiosh ab ha kaiham ch wo ha tho'ibia. Ahpim mam e kakaischuth ha sho'igchuthch am ab aihim g lothaita hab masma mat g wipsilo wo e gi'ichuth k ab wo ai mamt wo ha koktha. 7 Pegih neh, ahpim ni-wehm wohochuththam, am g wabsh wo s-e tahtk ch nenida mat ep wo jiwia g t-kownalig Jesus Christ. Am g wo neith mo has masma nenida g eshtham g juhki mat wo i wuhsh g eshaj. 8 Mt hab wa'ap s-e tahtkk ch wo nenidath ch am wo si e gewkemhu no pi e aihim mat ep wo jiwia g ge'echu t-kownalig. 9 E o nahtokch mat hab wo juh g lothaita. Pi g hedai has wo ahgath. Kut hab wa masma pi hedai has wo em-ahgath. 10 Am g wo i ha chegito g Jiosh ha'ichu i tashogiththam. Hegam ash wa s-e tahtk ch nakog g e-sho'igthag. Kumt am ha oithk hab wo chum masmak 11 nam pi s-mahch mo g Jiosh ab ha mahkch g s-ap tahhathkam. Hegai kelibad mash hab chehgig Job ash hab wa'ap s-e tahtk ch nakog g e-sho'igthag. Tsh g Jiosh am hahawa wehhejed ge'e ha'ichu i ap'ech. Ith o am t-chehgithch mo si s-t-ho'ige'ith ch si pihk e elith t-hekaj. 12 Am g hab wabsh wo juhni mamt haschu hedai wo i ha ahgi mamt hab wo juh. Pi o ap'e mams wabsh chum hekith wo i gewkathch g e-ne'oki am chehchegch g Jiosh. Jiosh at wo em-lothai mamtp hab wo e juh. 13 Nam am hu ha'i ha'ichukaj i e kudut? Pegih, e g wo ho'ige'ithahun. Nam ha'i s-hehgig? Pegih, ab g wo si hehgchulith g Jiosh g nen'eikaj. 14 Nam am hu ha'i kok'o? Bo chum mahs mamt ab wo i ha wai hegam mo am d ge'eged em-shahgith. T hegam ab wo em-huhu g e ko'atham a-saithihkaj k wo e ho'ige'ithahu em-wehhejed 15 s-wohochuthch mat g Jiosh wo em-thoaj. Kut woho hab wo e juh. Mamtp g pi ap e-chu'ichigkaj kok'o, t g Jiosh gm hu hab wo i juh g em-chu'ichig. 16 Kumt heg hekaj ab a'ai wo e ahgi g pi ap e-chu'ichig k wo e ho'ige'ithahu a'ai e wehhejed. T wo em-thoaj g Jiosh. Mu'i at ha'ichu hab wo ha juni g Jiosh hegam mat ab wo tahnith ch d wo s-ap'ekam o'othhamk. 17 Heg at hekaj hab e juh mash haschu g Elijabad ab tahni g Jiosh. Heg ash d wabsh o'othham ch ab si tai g Jiosh mat hab wo juh mat pi wo ha juhkath. Kush wa woho pi ha juhk gi'ik a'ahith ab. 18 Kutsh ab hahawa tai g Jiosh mat wo juh. Kutsh hahawa juh. Tsh ab i wuhsh g ha'ichu bahithag ab amjed g jewed kahchim. 19 Neh, tp hems hema wo heb hu hih g em-wehm wohochuththam ab amjed g wohokam. Kumt am uhpam wo i nodagi ab amjed g pi ap'ekam. T g Jiosh gm hu hab wo i juh g pi ap chu'ichigaj k wo tho'ibia ab amjed g s-ko'ok namkithadgaj.

1 Peter 1

1 Ni-wepnag: Am ant ha'ichu wo i em-o'ohani ahni Peter mani d kehshaj g Jesus Christ. Heg at am i ni-kei mant wo i ahgahi ab amjed. Kuni ha'ichu s-em-ahgithamk ahpim mam am a'ai kih Pontus ch Galasia ch Cappadocia ch Asia ch Bithynia jejewed ch ed hab masma mo g ni-wehm Tutuligo. 2 Jiosh at ab i em-gawulkai mamt d wo hemajkamgajk k ab em-mah g Hekia S-ap'ekam Gewkthag mat wo em-wehmajk ch am wo i kegch g em-thothakag. Mt hekaj ab wo s-wohog elithath g Jesus Christ ab i s-wohochuthk mat iawua g e-eh'ed k e muhkith em-wehhejed. Ab o wa si s-em-ho'ige'ith g Jiosh ch ab wo wa ba'ich i em-mahkath g i wehmtadag ch s-ap tahhathkam. 3 Ab att hig wo si i ho'ige'el g Jiosh heg hekaj t-kownalig Jesus Christ. Heg ohg Jiosh at ab i wuhshath muhkig t amjed. K ith am t-chehgithch mat hab wa'ap ab wo i t-wuwhas muhkig t amjed. Tt heg hekaj ab i s-wohochuth k ab bei g wechij thoakag. 4 Jiosh o an nahtokch g si s-kehg kihthag am t-wehhejed an thahm kahchim ch ed. T ihtha ap'echuthaj chum hekith d wo hekiakamk ch pi hekith wo e padch. 5 Ab ach s-wohochuth g Jesus Christ. K heg hekaj t-nuhkuth g Jiosh g si ge'e e-gewkthagkaj. Kuch ab nenida mat s-ap wo maskogi g t-tho'ibiathag mat hekith wo huhug ihtha jewed. 6 Si g wo s-hehgigk mamt wo e tho'ibia, chum ams hems ab wo nakogath g nahnko mahs sho'igchuthadag ch pi ap tahhathkam hemu. 7 Ihtha em-sho'igchuthadag at wo a'appe g em-wohochuthadag k wo chehgi mo d wohokam hab masma mat g ohla g meikaj wo e a'appe mas d wohokam. Ia atsh ep wo i e chehgi Jesus Christ. T g Jiosh am haha wo chehgi mo ab si has em-elith. 8 Pi am hi wa chum neith ch wabshaba ab si tatchua ch ab ep si s-wohochuth. K ith hekaj si ge'ej g s-em-hehgig. Kumt pi wo sha'i e nako mams wehs s-ap wo ah. 9 Jiosh at em-tho'ibia namt pi ab i s-wohoch g Jesus Christ. 10 Hegam mash d Jiosh ha'ichu i tashogiththam oki wa an o'ohan matsh an wo em-ai ihtha tho'ibiathag ha'ichu ahga ch eda an ep chum hoanahim g e-o'ohana ch an chum mamche 11 mas hekith wo i k ch has masma hab wo e juh. Christ atsh ab ha mah g Hekia S-ap'ekam Gewkthag. Sh heg am ha tashogith matsh gm hu si ha ba'ich hab wo e juh matsh wo e sho'igch g Christ k haha wo bei g ab si has elithadag. 12 S-mahch ash mat pi wabsh hejel e wehhejed o'oha hegai mash am ha wui i e tashogith. Hemu at hab e juh hegai matsh wa an o'oha. K ahpim d em-wehhejedkam mamt wo kah. Jiosh chuhchai ash am em-ahgith ihtha s-kehg ha'ichu ahgaj. K g Hekia S-ap'ekam Gewkthag ab ha mahkch g gewkthag mat an wo ahgahith. Ihtha wohokam o sha'i si s-ta kakaima chum hems g anghil ha wehhejed. 13 Am g wo i e nakog k ab wo si i e nenenashanichuth k ab wo si i e gewpkai heg ab ho'ige'ithadag mat g Jiosh wo em-mah mat hekith ep wo jiwia g Jesus Christ. 14 Ab g wo s-wohog elithath g Jiosh ch pi wo sha'i e hiwigi mams gd hu uhpam wo shul heg eda pi ap'ekam mam wa ab tatchua mam eda pi mahch g Jiosh. 15 Jiosh at ab i t-wai matt d wo hemajkamgajk. Kutt heg hekaj d wo chum si hekia s-ap'ekamk hab masma mo g Jiosh. 16 An o o'ohanas Jiosh o'ohana ed mo hab kaij: Hemho wa amt d wo hekia s-ap'ekamk nani pi ahni d hekia s-ap'ekam. 17 Bam masma ihm g Jiosh ab e ho'ige'ithahunch wui mo d em-ohg. Kut heg wehs wo ha a'appe. Pegih, mt ab wo si has elithath chum hekith mamt he'es i tash ia d wo thothakamk. 18 Heki o hu hab elithas mat wo em-tho'ibia g heki hu em-himthag. Em-shohshonbad ash wa chum em-mashcham mamtsh ha'ichu ab wo namkith g Jiosh k hekaj am wo i e ap'ech nenaj ed. Kumtp hems chum namkith g plahtha o g ohla o wabsh chum haschu. K wabshaba ihtha hab mahs ha'ichu d wabsh pi ha'ichu am Jiosh tahgio. Kum am hahawa s-mahch mat g Jiosh ba'ich i s-namkig ha'ichukaj em-tho'ibia. 19 Am o t-tashogith g Jiosh mat has masma wo t-tho'ibia am t-chehanich mattsh wo mua g si s-kehg kahwal k ab wui wo iagchul. Pegih, k g Jesus Christ d si hekia s-ap'ekam ch hab sha masma e muhkith am t-wehhejed mat wo t-tho'ibia ab amjed g s-ko'ok t-namkithadag mach d pi ap chu'ijkam. 20 Jiosh at am i kei mat eda koi in hu nahto g jewed k hemuch hahawa in i maskogi jewed thahm mat wo t-tho'ibia 21 k ab i wuhshath am i thahm mat e muhkith k ab uhgk i be k ab thai e-hugith an k ab si has elith. Kumt heg hekaj ab i s-wohoch g Jiosh k ab si hiwig. 22 Jiosh at ab i hekiagi g em-thoakag namt pi ab s-wohog el g wohokam ab amjed. Pegih, ab g a'ai wo e tatchuath wehs e-ihbthagkaj. 23 Pi at hekith wo huhug g Jiosh ha'ichu ahga. Kutt ab i s-wohochuth k hekaj ab bei g wechij thoakag. T ith hab wa'ap pi hekith wo huhug, chum as g t-chuhkug wo huhug. 24 Neh, an o hab chu'ig Jiosh o'ohana ed: Hemho wa at wehsijj wo koi g o'othham hab masma mat g washai wo gaksh. T g ha-gewkthag wehs wo huhug hab masma mat g ha'ichu heosig. 25 T wabshaba g Jiosh ha'ichu ahga pi hekith wo ha huhug. Neh, bo chu'ig. K d hegai ha'ichu ahgaj mat am em-wui e u'apa.

1 Peter 2

1 Gam g hu hab wo i juhni g s-padhog elithadag ch iattogitha ch hehgamthadag ch has ahgadag. 2 Jiosh ha'ichu ahga o d s-kehg gegosig g em-thoakag wehhejed. Ab at em-wui chehgi g e-ho'ige'ithadag. Kumt ab wo si tatchuath hab masma mo g s-moik ali tatchua g wihbi ch hekaj wo i ge'elhith am e-tho'ibiathag ed. 4 Ab g wehs wo i e thagito t-kownalig Jesus wui. Ha'i o chum s-ohhothamk g hemajkam. T wabshaba g Jiosh am i kei mat d wo t-shonk am t-wohochuthadag ed. 5 Kumt ab wo abkath hab sha masma mat g hohothai ab wo abkath g e-shon am ha-kihta ed. Heg o wa wepo mach ab ab kihtas g Jesus ch d ge'e cheopi no pi am hahawa t-eda g Jiosh. Jiosh at wehs am i t-chuhcha ahchim Jesus wohochuththam matt d wo hekiakam papalk ch ab wui wo t-ho'ige'ithahunath ch am hab wo junihith g tatchuij. T ith heg wo wa wepok mo g s-ap iagchulitha no pi g Jiosh s-hohho'ith. 6 Ith ani hab kaij no pi an o'ohanas mo g Jiosh hab kaij: Am ant wo hema i kei mat d wo ha-shondagk g ni-hemajkamga. T hegam mat ab wo i s-wohoch pi hekith heg hekaj wo si e elithath. 7 Neh, bo kaij g Jiosh. K ihtha kehshaj woho d si t-tatchui ahchim mach ab s-wohochuth. T wabshaba hegam mo pi ab hu wohochuth wabsh s-ohhoth. Ith o hab ahgch an o'ohanas mo g Jiosh hab kaij: Ni-kehsha at d wo ha-shondagk g ni-hemajkamga, chum as g ha-wanimedtham wo chum s-ohhoth. 8 K an ep o'ohanas: Hemajkam at ab ab wo keiko hegai mat d wo chum ha-shondagk. Ith o hab d ahga mat mu'ijj pi ab hu wo wohoch g Jiosh ne'oki k pi wo mahchk g kehshaj. K d Jiosh tatchui mat ihtham pi wo e tho'ibia. 9 Kum eda ahpim ab s-wohochuth ch d Jiosh hemajkamga ch wehs d papal am wehhejed g t-kownalig Jesus. Jiosh at am i em-chuhcha mamt wo i ahgahi g s-kehg ha'ichu tatchuij. Ab at i em-wuwhas s-chuhugam k amjed k ab i em-wahpki si s-kehg tonlig ch ed no p i ab em-mahkch g amichuthadag. 10 Heki am hu pi d ha'ichu ch wabshaba hemuch d hahawa Jiosh hemajkamga ch ab hahawa u'ukch g Jiosh ho'ige'ithadag. 11 Pegih, ni-wepnag, pi am ia hu d si kihkam jewed thahm. Chum o hems g hejel em-tatchui cheggia g em-tho'ibiathag. Kunt wo si em-ahgi mamt pi ab hu wui wo i e thagito 12 k wabshaba hab wo junihith g s-ap'ekam. T hab wo nei g s-ap ha'ichu hab em-juni hegam matp hedai ab ha'ichu em-abchuth. T ab wo i e ai g ge'e lothaita tash. T ihtham hemho wa wo wohokamch mat g Jiosh si s-kehg ha'ichu hab juh am em-thoakag ed. 13 Ab g wo s-wohog elithath g kownal ch wehs hegam mo d kownal chuhchai. Ihtham o chum s-ko'okam ha namkith g pi ap chu'ijkam ch ab i ha gewkemhun g s-ap chu'ijkam. 15 K d Jiosh tatchui mamt ab wo s-ha wohog elithath ch hab wo junihith g s-ap'ekam. T hab pi wo e nako mas has wo em-ah hegam matp hems nahnko em-ahg. 16 Ab at i em-wuwhas g Jiosh heki hu em-himthag amjed. Mt hab masma am hab wo e junihith mam d e tho'ibiakam ch d si piongaj g Jiosh ch wabshaba pi wo hekaj g e-ap'ethag mams am hu hab wo juh g pi ap'ekam. 17 Ab g wo ihmath g Jiosh ch ab wo si has ha elithath g kokownal ch s-ap ab wo ha neithath g hemajkam ch ab wo si pihk e elithath ha hekaj g e-wehm wohochuththam. 18 Ahpim pion, ab g wabsh wo i e thagitokchith e-a'amo ha wui ch ab wo has ha elithath, chum as ha'ijj wo s-ta kek'eithamak. 19 Kut g Jiosh ab wo s-em-ho'ige'ithath. S-ap'e o mamt s-ap wo nako g sho'igchuthadag s-chegitokch g Jiosh. 20 Ab o d t-wuikam g s-ko'ok namkithadag mattp hab wo junihith g pi ap'ekam. Ttp wabshaba s-ap wo nako g sho'igthag am hab chum junihithch g s-ap'ekam, t g Jiosh ab wo wa s-t-ho'ige'el ith hekaj 21 no pi hab d elithaj matt s-ap ab wo nako. Ith o wa am t-chehgithch g Christ mo wa eda s-ap ab nakog g sho'igthag am t-wehhejed. 22 Neh, pi at hekith hab juh g pi ap'ekam k pi hekith sha'i ha'ichu ha iattogith. 23 Ab amt wa si s-ko'okam has ah. T wabshaba pi ab hu aigo has ha ah. Si amt sho'igch. T wabshaba pi ha ebkioth k ab wabsh i e thagitokch Jiosh wui s-mahchch mo heg d si s-ap'ekam usagakam. 24 Christ at wehs moht g t-chu'ichig k heg hekaj ab e muhkith kots t ab mat wo t-tho'ibia. Kutt hab wo thagito g pi ap'ekam k am wo i hihi s-ap'ekam oithk. Sho'igchuthadaj at thoaj g t-thoakag. 25 Thach wa heb hu hihimkam hab sha masma mat g kahwal wo heb hu hih. T g Christ ab uhpam i t-ui e wui k s-ap nuhkuth g t-thoakag hab sha masma mat g kahwal ha nuhkuththam hab wo juh g heb hu himkam kahwal.

1 Peter 3

1 Ahpim u'uwi amt ab wo e thagitokch hehe'ejel e-kuhkun ha wui k ch s-ap wo ha nuhkuthath chum hems hegam mo pi ab hu wohochuth g Jiosh. Tp hems ab wo i s-wohoch 2 am neithch g s-ap ha'ichu hab em-juni, chum ams hems pi has wo kaijjith ab amjed g e-wohochuthadag. 3 S-ap amt ulinim d wo u'uwik ch wabshaba heg pi ab hu wo hiwgath mams ab wo si has masma e ap'ech. Pi at wo em-ap'ech am Jiosh tahgio mamt has masma wo ap'ech g e-mo'o o an hab wo juh g si s-namkig a'anilo ch sisishpakud ch eniga. 4 Ba'ich i mamt wo s-hemajimak ch wo s-thotholimak. T hab wo s-ap'ek g em-thoakag am Jiosh tahgio. 5 Bo wa masma hab chu'ig g Jiosh wohochuththam u'uwi ga hu i wehpeg ch ab i e thagitokch hehe'ejel e-kuhkun ha wui. 6 Sarabad o wa hab chu'ig ch ab s-wohog elith g Abrahambad mo heg d ha-wanimedtham am ha-kihthag ed. Kumt ahpim Jiosh wohochuththam u'uwi am hab wo junihith g s-ap'ekam ch pi ha'ichukaj wo e kudutath. T heg wo wa wepok mam d Sarabad amjedkam. 7 Ahpim chechoj amt ab wo has ha elithath g e-hohonig nam pi s-mahch mo pi am hu hugkam s-gewkthag mam ahpim. Bamt masma s-ap wo e ho'ige'ithahunath g e-hohonig ha wehm. T g Jiosh ab wo em-kaihamath. Am g wo s-chegitok mam e wehm u'ukch g pi ha huhugetham thoakag no pi g Jiosh ab em-mahkch. 8 Wehsijj amt ab wo i e hemakochuth k ab a'ai wo si i e tatchuath ch wo s-e ho'ige'ithath ch ab wo i e sho'igch a'ai e wui. 9 Pi g am wo e agwua g pi ap'ekamkaj k pi ab hu wo i nodagi g pi kehg ne'oki. Ab o t-ab matt ab wabsh wo i s-ha ho'ige'el. T g Jiosh ab epai wo i s-t-ho'ige'el nat pi heg hekaj ab i t-wai. 10 An o hab chu'ig Jiosh heki hu o'ohana ed: Pi g am wo pad neneokath ch pi ha'ichu wo ha iattogithath mamtp wo tatchuath mamt s-ap e tahtk ch in d wo thothakamk ch wo s-hehgigk. 11 Hemho wa amt wo s-ohhoth g pi ap'ekam k am hab wo junihith g s-ap'ekam ch am wo i e nako mamt wo s-ap e tahtkkath ab wehs ha wui. 12 T g Jiosh wo em-nuhkuthath ch ab wo kaihamath g em-ho'ige'ithahuna. Mtp wabshaba hab wo junihith g pi ap'ekam, t g Jiosh ab em-wui wo kehkkath. Neh, bo wa masma an o'ohadag. 13 K pi hab chum mahs mas hedai wo s-ko'okam em-juh mamt am wo si e nakogath mamt am hab wo junihith g s-ap'ekam. 14 Tp hab wo mahsk mamt wo e sho'igch am hab junihithch g s-ap'ekam, mt wabsh wo s-ap e tahtkkath nat pi g Jiosh ab wo wa s-em-ho'ige'el heg hekaj. Pi g wo sha'i ha ehbithath hegam mat wo em-sho'igchuthath. 15 Ab g wo has elithath g t-kownalig Jesus Christ ch chum hekith wo e nahtokchith mamt s-ap wo ahgi mat hedai ab wo i em-kakke mam haschu wui ab e gewpkathch. 16 Kumt wabsh si s-ap e taht k wabsh s-hemajim ab wo ha ahgi. Ha'i atp hems pi ap has wo em-ahg k ab wo chum em-abch g pi ap'ekam k wabshaba wo si e el mamtp chum hekith am hab wo junihith g s-ap'ekam. 17 S-ap'e o matt wo t-sho'igch am hab junihithch g s-ap'ekam matp d wo Jiosh tatchuik. K wabshaba d si edathag mattp am hab wo junihith g pi ap'ekam ch hekaj wo t-sho'igch. 18 Jesus Christ o d hekia s-ap'ekam ch wa eda e sho'igch. Pegih, tt ahchim hab wa'ap wo t-sho'igch. E at muhkith g Jesus Christ am t-wehhejed ahchim mach d pi ap chu'ijkam mat am wo i t-ui Jiosh wui. Chuhkugaj amt hi wa chum mua. T wabshaba g Hekia S-ap'ekam Gewkthag ba'ich i mah g gewkthag. 19 Ith gahi wuhshanim Hekia S-ap'ekam Gewkthag o wa g Jesus Christ am ha mihshmath hegam mo hemu d ko'i ch gm hu si kuhpi. 20 Jiosh ash wa si s-hemajim ab ha nenida g hemajkam mash eda g Noahbad ab s-wohog elith ch nahtohim g ge'e wahlko. Tsh wabshaba g hemajkam pi ab hu wohog el. Tsh hab ha wi'in. Tsh hegam wa'i Noahbad e tho'ibia am i wahpk wahlko ch ed matsh am i ha wi'in. Sh d gigi'ik hemajkam matsh e tho'ibia. 21 Ith ani wepogith g t-pahl wakonadag. Heg att hekaj am t-chehgi mach s-wohochuth mat g Jesus Christ s-ap gahi wuhsh g muhkig am t-wehhejed. Tt ahchim hab wa'ap s-ap wo gahi wuwha. Pi o hab d ahga g pahl wakonadag machs wabsh wako g t-chuhkug. Bo d ahga matt ab i t-thagito Jiosh wui nat pi gm hu hab i juh g pi ap t-chu'ichig. Ch hahawa pi heg hekaj t-kudut. 22 Christ at gm hu hih thahm kahchim wui. Kush g Jiosh ab si has elith an e-hugith an thahshch e-kownal thaikud an. Kush g anghil ch nahnko mahs gewpkthag an thahm kahchim ch ed ab wecho.

1 Peter 4

1 E at sho'igch g Christ k hekaj am gewito g pi ap'ekam t-wehhejed. Kumt ith wo s-chegitok namt pi hab wa'ap wo e sho'igch mamt wo gewito g pi ap'ekam. 2 Hemho wa amt am wo e-thagitokchith Jiosh wui wehs e-thoakthag oitham ch pi g hejel e-tatchui hab wo junihith. 3 Tash amt am hihi pi ap'ekam ch ed mam ab jioshga ihtha jewed t ab ha'ichu ch nawkko'o ch wabsh e totontochuth ch ha wehm wo'iwup hegam mo pi d em-wehm kihkam. 4 Hemu at e ai mamt ha'asa hab juh hegai hab mahs pi ap'ekam. K g em-wehm o'othham hahawa pi em-amichuth ch ab si has em-ahg. 5 E o nahtokch g Jiosh mat wehs wo ha lothai g hemajkam, chum hems hegam mat heki hu koi. Kut wehs wo ah g pi ap e-chu'ichig hegam mat pi thagito. 6 E ash wa ahgahim g s-kehg ha'ichu ahga chum hems wa hegam ha wui mat ithani heki hu koi matp hems ab wo bei g pi ha huhugetham thoakag k an haha wo wehmajk g Jiosh. 7 E o aihim mat wo huhug g jewed. Kumt wo si e nuhkuth ch wo si s-e tahtkkath ch hab s-ap wo e ho'ige'ithahunath. 8 Ith o d i si ha'ichu mamt ab wo si ha tatchua g e-wehm wohochuththam k hekaj wabsh wo pi chegito g pi ap ha-chu'ichig. 9 S-hohho'itham amt ab a'ai wo i e hiwgithath e-kihki ed. 10 Ab o t-mahkch g Jiosh g nahnko mahs mahchig ch ap'ethag. K hab d elithaj matt am a'ai wo i t-wehmtath ith hekaj t-ap'ethag. 11 Mamtp hedai wo ha mihshmath k heg wa'i Jiosh ha'ichu ahga wo ahgath. Mtp hedai ab wo mahksk mamt wo i ha wehmtath g hemajkam, mt am hab wo juh heg hekaj gewkthag mo g Jiosh ab em-mahkch. Bamt masma ab wo si has elithath g Jiosh am gahi wuhshanim g Jesus Christ. Neh, wehs o ab d t-wuikam matt ab wo wechokath ch ab wo hehgchulithath chum hekith. 12 Ni-tatchuithch ni-wepnag, pi g am wo has elithath mam ab nakog g sho'igthag. 13 Jesus Christ o wa heg ab nakog. Kumt wo si s-hehgigk mam hab wa'ap nakog am hab junihithch g chikpanaj. Ab o him g tash mat g gewkthaj wo i e maskogi. Kumt hahawa ba'ich wo i s-hehgigk. 14 Mtp hems s-ko'okam has wo em-ahgath nam pi ab si ihm g Christ. Kumt wabshaba wo si s-ap e tahtkkath no pi am em-wehmaj g Hekia S-ap'ekam Gewkthag. 15 Pi g am hu hab wo junihith g pi ap'ekam. T wo em-ai g s-ko'ok em-namkithadag. Pi g wo ha mua'i. Pi g wo s-chu e'eskath. Pi g wo hudawogath hegai mo haschu pi ab hu em-him. 16 Mt ab wo si i ho'ige'el g Jiosh k pi has wo e el mamtp wo sha e sho'igch heg hekaj mam ab si ihm g Christ. 17 E at ai mat g Jiosh wo t-a'appe. Kutt chum hems ahchim Jiosh hemajkamga wo t-a'appe g sho'igchuthakaj. Pegih, t hemho wa ba'ich ab wo i nei g sho'igthag hegam mo pi ab hu wohochuth g Jiosh ha'ichu ahga. 18 Neh, bo chu'ig g heki hu o'ohanaj g Jiosh: S-hasigam at wo e tho'ibia hegam mo hab elithas mo d s-ap'ekam. T eda g Jiosh ba'ich i s-gewkam wo ha a'appe hegam mo pi ab hu wohochuth. 19 Neh, Jiosh o d t-nahtokam ch woho hab wo juh hegai mo hab kaij mat hab wo juh. Kumt heg hekaj ab wui wo i e thagito, chum as hems wo hiwigi mamt wo e sho'igch am hab junihithch g s-ap'ekam.

1 Peter 5

1 Ahni ani wa g ni-wuhpuikaj neith mad wa mu'i e sho'igch g Jesus Christ. Jiosh o ab si has elith ch wehmaj ab si has t-elith ch ith am wo maskogi mat hekith ia ep wo jiwia g Christ jewed thahm. K ab ni-ab mant wo ahgahith ab amjed. Thani hema ha wanimedtham g Jiosh hemajkamga ch heg hekaj am i em-gewkemhun ahpim mam hab wa'ap d ha wanimedtham. 2 Am o ha'i em-nuhkuthachuth g Jiosh g hemajkam. Kumt wo si s-ap ha nuhkuthath hab masma mat g kahwal ha nuhkuththam hab wo ha juh g e-kahwaliga. S-mahch am mo pi ha shahthahim ch wabshaba s-ap ha wanimed. Kumt ahpim hab wa'ap wo ha wanimedath g hemajkam ch am wo ha chehgi g e-thoakagkaj mat has wo chum masmak. Pi o hab chum chu'ig mams ab wo ha'ichu si i ha chehanith. K pi hab chum chu'ig mams wo si tatchuath g e-namkithadag heg hekaj chikpan. Mt wo chum si tatchuath mamt si s-ap wo ha nuhkuthath. 4 T g Jesus Christ ab wo em-mah g pi ha huhugetham si has elithadag mat hekith ia ep wo jiwia jewed thahm no pi heg wehsijj d t-nuhkuththam. 5 Ab amt wo ha kaihamath g e-wanimedtham. Wehsijj amt wabsh wo i e sho'igchuthath. Neh, bo chu'ig g Jiosh o'ohana: Jiosh at ab ha wui wo kekiwua hegam mo chum si e haschuth k wabshaba wo ha mah g ho'ige'ithalig hegam mat ab wo i e sho'igch. 6 Pegih, mt ab wabsh wo i e sho'igch Jiosh wui. Kut heg ab haha wo si em-ha'ichuch mat hekith am wo s-ap'et. 7 Ab g wehs wo i thagito g e-kudutadag Jiosh wui no pi ab si em-tatchua. 8 Si g wo s-e tahtkkath ch wehs ha'ichu wo si nenashanath. Jiawul o chum s-t-u'imk ch s-ko'okam s-t-junimk hab masma matp g mawith wo sha t-be k hab wa'ap wo s-ko'okam t-juh. 9 Wehsijj g em-wehm wohochuththam o ab nakog ihtha hab mahs sho'igthag. Kumt heg hekaj s-wihnam wo gegokkath e-wohochuthadag ed ch ab wui wo gegokkath g Jiawul. 10 Jiosh at ab i em-gawulkai mamt ab wo i s-wohoch g Jesus Christ k chum hekith wehmaj wo edgithath g si s-kehg ap'ethag. Kumt al ha'as wo i taht g sho'igthag. T g Jiosh ab wo em-mah g gewkthag k hab wo em-juh mamt wo ge'ege'ehogat k s-wihnam wo gegokkath. 11 Jiosh o d gewkthag chum hekith. Kutt chum hekith ab wo hehgchulithath. 12 Ia o ni-wehmaj g Silas ch am o'oha ihtha al ha'ichu ni-ahga k am wo i bei em-wui. Ab ani si hiwig g Silas am eda ihtha chikpan. Jiosh o si s-hemajim ab i em-wehmt. Kuni am i em-gewkemhun mamt pi hekith wo pi chegito g i wehmtadaj. 13 Ihtham t-wehm wohochuththam mo ia d kihkam Rome t am o s-em-ahgithamk mamt ab wo i s-ha ho'ige'el. Ia o ep ni-wehmaj g t-wehnag Mark ch hab wa'ap s-em-ahgithamk mamt ab wo s-ho'ige'el. 14 Ab g wo a'ai si e ihmath, ahpim e wehm wohochuththam. Ab at wo wa ba'ich i em-mah g Jiosh g s-ap tahhathkam.

2 Peter 1

1 Ni-wepnag: Ia ant ep wo i em-o'ohani g Jiosh ha'ichu ahga ahni Simon Peter. S-mahch am mani d hema piongaj ch kehshaj g Jesus Christ. Heg o d t-tho'ibiakam Jiosh ch gm hu hab i juh g pi ap t-chu'ichig. Mt ab i s-wohoch. K g em-wohochuthadag wepo masma mo g t-wohochuthadag ahchim Tutuligo matt wa ab i s-wohoch. 2 S-mahch am g Jiosh ch ep s-mahch g t-kownalig Jesus. K heg hekaj ab si s-em-ho'ige'ith ch ab ba'ich wo i em-mahkath g s-ap tahhathkam. 3 Pegih, s-mahch ach g Jiosh. K heg hekaj ab t-mahkch wehs hegai mach tatchua matt hekaj s-ap wo himchuthath g t-thoakag ch d wo s-ap'ekamk. Ab at i t-gawulkai ab t-chehgithch g si s-tondam e-gewkthag ch s-e-ap'ekam. 4 Si ge'e ha'ichu atsh hab wo t-juni g Jiosh. Kumt ab i s-wohochuth k hab wo edgithath g Jiosh thoakag ch wo e tho'ibia ab amjed hegai pi ap'ekam mo in ha'ichug heg hekaj pi ap ha-tatchui g hemajkam. 5 Pegih, ab o em-mahks g wohochuthadag. Kumt wo si e nakogath mamt wo s-ap'ek ch am wo si i mamche g s-ap'ekam 6 ch wo s-thotholimak ch s-chechojim ab wo nakogath ha'ichu ch ab wo ihmath g Jiosh. 7 Ab o em-ab mamt ab ep wo si ha tatchuath g e-wehm wohochuththam ch ab wo si pihk e elithath chum hems ha hekaj g hemajkam. 8 Neh, ith amt wehs eda am wo e nakogath ch hekaj s-wapagim am hab wo junihith g tatchuij g t-kownalig Jesus Christ. 9 Kutp hedai pi hab wo junihith ihtha ch hab wo masmak mo g pi neatham no pi pi ap neith mat gm hu hab i juh g Jiosh g pi ap chu'ichigaj. 10 Neh, mt hekaj am ba'ich wo i si e nako mamt si s-wihnam wo bei hegai mat haschu wehhejed ab i em-waith k ab i em-gawulkai g Jiosh. T hab pi hekith hab wo e juh mams wo i shul ab amjed g Jiosh. 11 Jiosh at s-ap ab wo em-mah g ap'ethag mamt am wo i wahp t-tho'ibiakam Jesus Christ kownaltalig ed. 12 Heki amki hu s-mahch ihtha mani ia em-ahgith ch s-wihnam gegok heg eda wohokam mamt ab bei. Nt wabshaba am wo i em-chechegitolithath mamt wo s-chegitok ch ab s-ap wo bei g e-ap'ethag. 13 E o aihim mant im hu hab wo i ni-juh mad hab ni-ahgith g t-kownalig Jesus Christ. Ni hekaj hab ni-ahg mant am wo si em-chechegitolithath wehs ihtha am hugkam mant hebai hugkam d wo thoakamk. 15 Am ant wo i ni-nako mant am wo o'oha wehs ihtha. Mt hab masma chum hekith wo s-chegitokath am i thahm mant hekith im hu hab wo i ni-juh. 16 Ia atsh ep wo jiwia g t-kownalig Jesus Christ jewed thahm. T g gewkthaj am ep wo e chehgi. Wohokam ach am em-ahgith ith amjed ch pi g hoho'oki a'agitha ahchim machd heki hu am neith g si s-tondam gewkthaj g si t-wuhpuikaj. 17 An achd wehmaj g Jesus. Kud g ohgaj Jiosh ab mah g si has elithadag k ab neok ch hab kaij, “Ith o d si ni-tatchuithch ni-alithag.” 18 Ith achd kah mo ab neok thahm kahchim t amjed anai machd an wehmaj tho'ag thahm. 19 Ith o am si wohokamchuth mo haschu heki hu am ahg g Jiosh ha'ichu i tashogiththam. Ha'ichu ha-ahga o wabsh he'es ab i t-mahkch g amichuthadag hab sha masma matp hems g kanjel t-tonlithch am s-chuhugam k ed. K wabshaba g Jesus am t-mahtchulith ch ba'ich i ge'e ab t-mahkch g amichuthadag hab sha masma mo g s-mahs hu'u ba'ich i t-tonlithch mat hekith ab wo i chesh mo e aihim g mahsithag. Mt heg hekaj wo s-chegitok g ha'ichu ha-ahga g Jiosh ha'ichu i tashogiththam k ab wo e thagitokch Jesus wui. 20 Ha'ichu ha-ahga o pi d wabsh hemajkam ha'ichu ha-ahga. Hekia S-ap'ekam Gewkthag o am ha tashogith g Jiosh ha'ichu ahga. T heg hekaj pi hedai wo e nako mas wabsh g hejel e-mahchigkaj wo i tashogi g ha'ichu ha-ahga.

2 Peter 2

1 An atsh wa ha'i i wuwha mash wa e wepogith g Jiosh ha'ichu i tashogiththam ch wabshaba wabsh ha iattogith g hemajkam. Kut hab wa'ap in wo i wuwha em-shahgith hegam mat wo chum em-mashcha g pi wohokam k wo padch g em-wohochuthadag. Jesus Christ o d t-tho'ibiakam. K wabshaba ihtham pi wohokamchuth. S-hohtam at im hu hab wo i ha juh g Jiosh mat hekith wo e ai g ha-tashga. 2 Mu'ijj at am ha oithch hab wo junihith g s-bihtagi ha'ichu hab ha-juni. T heg hekaj mu'i hemajkam wo pad has ahgath g Jesus himthag. 3 Hegam mo em-iattogith ab amjed g Jiosh ha'ichu ahga o wabsh s-u'imkch g em-lialiga. K wabshaba am e nahtokch g Jiosh mat wo ha lothait k im hu hab wo i ha juh. 4 Si o tasho mo e aihim g lothaita tash. Ha'i atsh am shul g anghil pi ap'ekam ch ed. Tsh g Jiosh am ha shul s-chuhugam k ed k am ha u'ukch mat haha wo ha lothai ge'e lothaita tash ed. 5 Mu'ijj g heki hu hemajkam ash wa pi ab hu wohog elith g Jiosh. Kutsh hab juh g ge'e wi'inthag matsh ha wi'in. Sh eda am wa chum ahgahim g s-ap'ekam ihtha mash hab chehgig Noah. Tsh ith tho'ibia g Jiosh ch wewa'ak ehp g wehmaj kihkam. 6 Sh gm hu ba'ich, kush sha'i si pi ap'e hegam mash am d kihkam Sodom ch Gomorra t am. Tsh g Jiosh am wabsh i ha hugio ihtham kihhim g meikaj mat wo ha chehgi g pi ap hemajkam mat has wo ha juh. 7 Kush am hema kih g s-ap'ekam o'othham ch hab chehgig Lot ch si s-wohom pi hohho'ith g pi ap ha'ichu hab ha-juni. Tsh ith g Jiosh tho'ibia matsh hekith i ha hugio hegam kihhim. 9 Wehs ihtha o am t-tashogith mo g Jiosh e nahtokch mat wo ha tho'ibia g s-ap'ekam o'othham ab amjed g ha-kudutadag k s-ko'okam ab wo ha namkith g pi ap'ekam mat wo e ai g ge'e lothaita tash. 10 Jiosh at ba'ich i si s-ko'okam wo ha namkith hegam mo d wabsh totonto ch pi ap hekaj g e-chuhkug ch pi ab hu wohog elith g t-kownalig Jesus Christ. Hegam mo ahgachug g pi wohokam o e sheshmachuth ch si e hahaschuth ch s-ta kek'eitham neneok ch s-ko'okam has ha ahg hegam mo d haha'ichu an thahm kahchim ch ed. 11 Anghil o ha ba'ich i s-gewpkthag ch eda pi sha'i ko'okam ab ha abchuth hegam haha'ichu am tahgio g Jiosh. 12 K eda hegam s-chu i'attomkam pi ha'ichu am hu chegito hab masma mo g mischini ha'ichu thoakam ch s-ko'okam has ahg hegai mo haschu pi amichuth. T g Jiosh wo ha hugio hab masma mamtp hems wo mua g ha'ichu thoakam. 13 S-ko'okam at ab wo bei g e-namkithadag heg hekaj mo am hab junihim g pi ap'ekam. Thash ha-hohho'itha mat chum hems tash ed hab wo junihith g si s-uam ha'ichu. Am ash em-wehm e gegosith. K d si edathag mo hab s-junimk g iattogitha. 14 Heg o wa'i tatchua mat g u'uwi an wo ha neithath ch pi ap ha'ichu am wo chegitoth. Shahag wepo mo pi ha huhuge g pi ap ha-tatchui. S-u'imk o hegai mo pi ab hu d ha-wuikam ch im hu hab pi apko i ha wanimed hegam mo pi gewpkthag. Jiosh o heki hu ab ha mohto'ithch g s-ko'ok namkithadag. 15 Heki at hu i e mehkoth ab amjed g s-ap'ekam hab masma matsh wa hema hab e juh mash hab chehgig Balaam. Ihtha Balaambad ash d chum Jiosh ha'ichu i tashogiththam ch wabshaba s-u'imk g lial am hab junihithch g pi ap'ekam. 16 Tsh g Jiosh shohbi g pi ap ha'ichu hab elithaj am hab juhk g wuhlu shoigaj mat haha wabsh neo. 17 No hig pi woho mo pi ha'ichu wehhejed s-kehgaj g shongam matp wo gaksh o g s-chuchk chewagi matp gm hu wabsh wo wi'ichkwua? Pegih, k hab wa'ap pi ha'ichu wehhejed s-kehgaj ihtham mo pi ahg g wohokam. Jiosh at am wo ha shul si s-chuhugam k ed. 18 Chum o si s-gimaim ch pehegi neneok ch s-uam ha'ichukaj i ha wanchshulig hegam mo chum e nakog mat wo e tho'ibia 19 no pi am ha ahgith mo wabsh chum haschu s-ap'e ch eda hejel e wupulshch g pi ap'ekamkaj. Matp haschukaj wo e gewito g o'othham k heg hekaj wo e wulshchith. 20 Hegam s-chu i'attomkam at s-mai g wohokam ab amjed g t-kownalig Jesus Christ k hekaj wo chum e tho'ibia. Kut heg hekaj ba'ich wo i pi ap'ek mat am ep wo e wupulsh g pi ap'ekamkaj. 21 Ab o ha mahkch g Jiosh g ha'ichu e-ahga. K wabshaba ba'ich i s-ap'e mat hems pi wo kah matp wabsh gm hu wo s-ohhoth. 22 T am wo e wohokamch ihtha hab ha-che'ithag: Gogs at am uhpam wo bah g e-wihos, ch ith ehp, Kohji o tatchua mat am uhpam wo gei bith ch ed, chum as wo si e kegch.

2 Peter 3

1 Pegih neh, ni-wepnag, ith o d wa'i gokkokam mant am i em-o'ohanith k am i em-chegitol ihtham ha'ichu. 2 Chum ani si em-tatchuith mamt wo s-chegitok g ha'ichu ha-ahga g Jiosh ha'ichu i tashogiththam ch ep wo s-chegitok hegai chehanigaj g t-tho'ibiakam kownal Jesus mo g am chuhchaij am wa em-ahgith. 3 Mt wo s-mahchkath mat am wo i e aihi mat ep wo jiwia g Jesus, t an ha'i wo i wuwha mo heg wa'i hejel e-tatchui am hab s-junimk. Ihtham at wo has em-ahgath 4 ch pi ab hu has wo elithath g wohokam ch hab wo kaijjith, “Mki wabsh hejel e iattogith mam hab chech'e matsh ep wo uhpam jiwia g Jesus. T eda pi jiwia. T mu'ijj heki hu wa'i koi g t-shohshon. Wehs ha'ichu o am hab wabsh i e junihim mo has i e junihim ga hu hebai i amjed mashp hekith in i e nahto g jewed.” 5 Ihtham o hab s-e junimk mo pi mahch mo ith d wohokam matsh wa g Jiosh am neok k am nahto g thahm kahchim ch jewed. Ihtha jewed atsh ab i wuhsh shuhthagi t amjed k g shuhthagikaj e nahto. 6 K am i himtham, sh d wa ep shuhthagi mat ha wi'in k ha hugio g hemajkam. 7 K hab wa masma wabsh g e-ne'okikaj an u'ukch g Jiosh g thahm kahchim ch jewed ch ab wo ai mat wo ha lothai g pi ap hemajkam k im hu hab wo i ha juh mei ch ed. 8 Ith amt ep wo s-chegitok mo g mihl a'ahithag hab wa'i masma mo g hemako tash am wehhejed g Jiosh. 9 K wabshaba am hemajkam t-wehhejed shahag wepo mo si chewaj g tash mat g Jiosh am hab wo juh hegai mash hab s-t-junithamk. K eda g Jiosh si s-ha bahbgi g hemajkam ch ab chum ha nenida no pi pi hab chum sha'i elith mas hedai wo huhug am pi ap'ekam ch e d pi gm hu s-ohhothk g pi ap e-chegitoi. 10 Neh, no hig pi woho mo pi ta machima mas hekith g s-chu ehskam am wo wah em-kih ed? Pegih, k hab wa'ap pi ta machima mas hekith ep wo jiwia g t-kownalig Jesus. S-hohtam atsh wo jiwia. Kutsh wo si s-kaitham huhug g thahm kahchim k wo meitto g tash ch huhu'u ch jewed. 11 Wehs ha'ichu atsh wo huhug. Mt heg hekaj ab wo chum si i e thagitokch Jiosh wui 12 ch ab wo nenidath hegai tash ch am wo e nakogath mat hems s-hohtam wo e ai. Tsh hi wo wa chum meitto g thahm kahchim ch jewed. 13 Sh wabshaba g Jiosh hab kaij mat heg i thahm am haha wo nahto g wechij thahm kahchim ch wechij jewed. Tsh g s-ap'ekam an hab wo wa'i e junihith anai. Neh, ith ach ab si nenida. 14 Pegih oi g wo, tt hig am wo si i t-nako matt wo si s-ap'ek am Jiosh tahgio k wo si s-ap t-tahtkkath ab a'ai t-wui. T g Jiosh s-ap ab wo t-neithath. 15 Am g wo s-amichuthath mo g Jiosh am wabsh s-t-bahbgi mattp hems wehsijj wo t-tho'ibia. Paul at wa am hab wa'ap em-o'ohani ihtha heg hekaj amichuthadag mo g Jiosh ab mahkch. 16 Bo wa masma hab chu'ig wehs o'ohanaj ed mo am ha o'ohanith g a'ai hemajkam ith amjed. Hahasko o s-hasigam hab kaithag g o'ohanaj. K pi ap am hu i tashogith hegam mo pi amichuth g e-wohochuthadag ch pi wihnam gegok heg eda mo hab wa masma hab ep wua g heki hu o'ohanaj g Jiosh. Ho o wabsh hejel ab e mohto'ith g pi ap chu'ichig. T im hu hab wo i ha juh g Jiosh. 17 Am am wa heki hu s-mahch wehs ihtha, ni-wepnag. Hegam mat pi ab hu wo wohog elithath g Jiosh at gm hu hab wo i e juh ab amjed. Kumt wo s-e nen'oithath mamt pi am hu ha oithk hab wo e junihith. 18 Am att hig wo i t-nako matt ab ba'ich wo i mahchith g t-tho'ibiakam kownal Jesus Christ ch ba'ich wo i bei g i wehmtadag ab amjed. Heg ach ab si hehgchulith ch chum hekith ab wo si ihmath.

1 John 1

1 Ni-wepnag: Am ant wo i em-o'ohani ab amjed hegai mat ia u'apa g Jiosh ha'ichu ahga jewed thahm k ab t-mahkch g wechij thoakag. Chum ash hekith wehmaj g e-ohg Jiosh an thahm kahchim ch ed ch wabshaba ia i wuhsh jewed thahm. Kuni si neith g hejel ni-wuhpuikaj ch kahk ch ab tahtk g ni-nohnhoikaj. 3 Ahchim mach wa neith g Jiosh alithag ach am em-ahgith ab amjed mamt hekaj t-wehm ab wo ihmath g Jiosh. Jesus Christ o d Jiosh alithag. 4 Kuni am em-o'ohanith ahpim mam ab s-wohochuth mamt hekaj wo si s-ap e tahtkkath. Nt ahni hab wa'ap wo si s-ap ni-tahtkkath em-wehm. 5 Jesus o am t-ahgith mash g Jiosh d hekia tonlig. 6 T wo ha iattogi matp hedai hab wo chei mo s-mahch g Jiosh k eda hab wo junihith g pi ap'ekam. Ith o am s-chuhugam k ed him. 7 Jiosh o d wohokam. Kutt wo si s-ap t-tahtkkath ab a'ai t-wui am oithch hihimathch g wohokam. Kut heg gm hu hab wo i junihith g pi ap t-chu'ichig nat pi heg hekaj t-wehhejed muh g alithaj. Heg o wa wepo mo g alithaj eh'ed gm hu wakon g pi ap t-chu'ichig. 8 Pi g hab wo sha'i cheh'i mams pi ha chu'ichig. Heg o d iattogi. 9 Tt wo mahsko wua g t-chu'ichig. T g Jiosh gm hu hab wo i juh k wo i t-kegch. Heg at hekaj ab nako g Jiosh alithag g s-ko'ok t-namkithadag ab e sho'igchuthk kots t ab. 10 Jiosh o am t-tashogith matt wehsijj hab juh g pi ap'ekam. Kut hedai hab wo chei mo pi ha chu'ichig k am wo e chehgi mo pi ab hu wohochuth g Jiosh.

1 John 2

1 Tham ni-a'aliga ab i s-wohochuthk g ha'ichu ni-ahga. Kuni ab i em-gewkemhun mamt pi am hu hab wo junihith g pi ap'ekam. Jesus Christ o d hekia s-ap'ekam ch ab e ho'ige'ithahun Jiosh wui am t-wehhejed. Kutt am wo ahgi g Jiosh g t-chu'ichig matt hekith am hab wo juh g pi ap'ekam. 2 T heg gm hu hab wo i juh g t-chu'ichig nat pi g alithaj heg hekaj nako g s-ko'ok t-namkithadag. Kut wabsh chum hedai wo chum e nako mat ab wo i e nodagi wui. 3 Tt wo s-mahchk mach woho'i s-mahch g Jiosh matt am hab wo junihith mo haschu ab i t-chehani. 4 Hegai mat pi am hu oithk hab wo e junihith g Jiosh chehanig o pi mahch g Jiosh, chum as hems hab wo chum chei mo s-mahch. 5 Ahchim mach hab wua g Jiosh tatchui ach woho'i ab si tatchua. Ith at am wo t-chehgi mach woho d a'aligaj. 6 Jiosh alithag o chum hekith am hab junihim g e-ohg tatchui. Kutt ahchim hab wo chum masmak mattp woho d a'aligaj g Jiosh. 7 Pegih, ni-tatchui, pi ani em-ahgith g wechij chehanig am em-ahgithch mamt ab a'ai wo si e tatchuath. Jiosh o wa heki hu hab masma t-chehani. Kum ith ab kaichug heki hu wa'i amjed. 8 T eda g Jiosh alithag am i wechijith t-wehhejed mat ab i t-mah g wechij thoakag. Tonlig o gm hu hab i wua g s-chuhugam am t-wehhejed. 9 Am o wabsh kia him s-chuhugam k ed matp hedai s-keh'ith g e-wehnag, chum as hab wo kaijjith mo hab wua g s-ap'ekam. 10 Tt am tonlig ch ed wo hihimath mattp woho ab wo si ha tatchuath g t-wepnag. T pi hedai wo pihk chu'i heg hekaj mach has masma. 11 K wabshaba am s-chuhugam k ed him hegai matp hedai wo s-ha keh'ithath. 12 Pi ant hab ahgk am wo em-o'ohani mams pi mahch g Jiosh. Gm at hu hab i juh g em-chu'ichig. Kum s-mahch. 13 Ahpim mam d si ge'eged am s-mahch mo g Jesus chum hekith d thoakam. Kum ahpim wechij hemajkam s-gewkthag ch am gewito g Jiawul nam pi s-gegokim ab e u'ukch Jiosh ha'ichu ahga ab. Heg ant hekaj am wo i em-o'ohanith k ab wo i em-gewkemhu. 15 Pi g wo sha'i si pihk e elithath heg ab mo d wabsh jewed t ab ha'ichu. Hegam matp hedai wo si pihk e elithath ith ab ha'ichu at pi wo sha'i pihk e elithath ab Jiosh wui. 16 Pi o d sha'i Jiosh hab elitha matt hab wo s-junim g pi ap'ekam o si s-wohom wo s-behim mach haschu i neith o machs haschukaj wo si t-haschuthath. Wehs ihtha o d wabsh jewed t ab ha'ichu 17 ch hab wa masma d wabsh huhugetham ha'ichu. T wabshaba pi hekith wo huhug hegai wechij thoakag mo g Jiosh ab t-mahkch ahchim mach am hab junihim g tatchuij. 18 Am am wa kah matsh an wo i e maskogi hegai mash d si obgaj g Jiosh alithag. Heki at hu mu'i an i wuwha t-shahgith mo d obgaj. Kuch heg hekaj s-mahch mo e aihim mat wo huhug g jewed. 19 T wo chum t-wehm wih matp d t-wehm wohochuththam k wabshaba am i t-thagito. K heg hekaj tasho mo pi woho d t-wehm wohochuththam. 20 Jiosh alithag at ab t-mah g Hekia S-ap'ekam Gewkthag. K heg am t-wehmaj ch i t-wehmt. Kuch heg hekaj s-mahch g wohokam. 21 Pi o hekith g iattogi d wohokam. Kum s-mahch ihtha nam pi s-mahch g wohokam. Nt heg hekaj am em-o'ohani ihtha. 22 Hegam mo hab kaij mo g Jesus pi d Jiosh alithag o wehs ha ba'ich d i s-chu i'attomkam ch d obgaj. Heg o hekaj e chehgith mo pi ab hu wohochuth g Jiosh. 23 Hegam mo pi ab hu ihm g Jiosh alithag o hab wa'ap pi ab hu ihm g Jiosh. Hegam o ab wa'i ihm g Jiosh mo hedai ab ihm g alithaj. 24 Mt am wabsh wo i wohochuthath ihtha s-kehg ha'ichu ahga mam ga hu i wehpeg amjed kaichug. Kut heg hekaj chum hekith am wo em-wehmajk g Jiosh g e-alithag wehm. 25 Heki o hu hab kaij g Jiosh matsh ab wo t-mah ihtha wechij thoakag matsh pi hekith wo huhug. 26 Am ant em-o'ohani ab ha amjed hegam mo em-iattogith ch im hu hab i s-em-junimk ab amjed g Jesus. Kumt pi ab hu ha'ichu wo mahchim ha ab. 27 Pi o hab chum mahs mams wabsh chum hasko amjed wo i e gahgithahi mam haschu i pi amichuth. Jiosh alithag at ab em-mah g Hekia S-ap'ekam Gewkthag. Kut heg chum hekith am wo em-wehmajk ch wehs wo em-mashchamath g wohokam. Kumt ab wo kaihamath g mashchamaj ch ab wo s-wohog elithath g Jiosh alithag 28 ch hab masma pi wo si e el mat hekith ep wo jiwia. 29 Tho hekia s-ap'ekam g Jiosh. Kumt heg hekaj wo s-mahchk mamtp hedai hab junihim g s-ap'ekam ch d a'aligaj.

1 John 3

1 Jiosh at hab t-juh mach d hahawa a'aligaj no pi si pihk e elith ab t-wui. Hegam mo pi mahch g Jiosh alithag o pi mahch mach ahchim hab wa'ap d Jiosh a'aliga. 2 Batt wo chum masmak mo g Jiosh alithag nach pi hab wa'ap d a'aligaj. K pi koi am hu i si tasho matt has wo masmak nach pi wabsh s-kohmagim neith mo has i masma g Jiosh alithag. T hekith ep wo jiwia k ab wo i e chehgi t-wui. Kutt haha wo wepo masmak natt pi wo s-mai mo has masma. 3 K eda hemu tasho mo d si hekia s-ap'ekam g Jiosh alithag. Kutt ahchim wo si t-nuhkuthath matt d wo s-ap'ekamk nach pi s-mahch mat ep wo jiwia. Kutt wo neith k wo wepo masmak. 4 That wo pi ap chu'ijkamk am Jiosh chehanig ed hegai mat hedai hab wo junihith g pi ap'ekam. 5 Pi o ha chu'ichig g Jiosh alithag ch in i wuhsh jewed thahm wepo masma g o'othham mat gm hu hab wo i juh g pi ap t-chu'ichig. 6 Pi att am hu hab wo chum junihith g pi ap'ekam mattp ab wo s-wohochuthath g Jiosh alithag. Hegai mat hedai hab wo junihith g pi ap'ekam oki pi mahch g Jiosh alithag. 7 Ha'i o hab kaij mamt d wo s-ap'ekamk, chum hems pi am hu hab junihithch g s-ap'ekam. S-e g wo nen'oithk mat pi wo em-iattogi. Jesus o am t-chehgithch g hejel e-thoakagkaj matp hedai d wo s-ap'ekamk ch am hab wo junihith g s-ap'ekam. 8 Matp hedai hab wo junihith g pi ap'ekam ch d wo Jiawul pionagk nat pi hab wo junihith g tatchuij g Jiawul. Jiawul o hab junihim g pi ap'ekam gd hu i si wehpeg amjed. T ia jiwia g Jiosh alithag jewed thahm mat wo hugio g Jiawul chikpan. 9 Pi att am hu hab wo junihith g pi ap'ekam ahchim mach d a'aligaj g Jiosh nach pi edgith g wechij thoakag. 10 K ith hekaj tasho mo hedai d a'aligaj g Jiosh ch hedai am oith g Jiawul. Pi o d sha'i a'aligaj g Jiosh hegam mat hedai pi hab wo junihith g s-ap'ekam ch pi ab hu wo pihk e elithath ab ha wui hegam mo d chum ha-wepnag. 11 Ihtha mani em-ahgith o d hegai mam kaichug gd hu i amjed mamt wehpeg kah. Ab g wo si pihk e elithath a'ai e wui. 12 Neh, hema ash wa d Cain ch hab junihim g Jiawul tatchui. Kumt pi oithk am hab wo e junihith. Cain cheoj wehnag ash wa hab junihim g s-ap'ekam. Sh g Jiosh si tatchua. Tsh g Cain heg hekaj s-hehgam k mua. 13 Pi g wo sha'i e totothsith mat hems g hemajkam hab wa masma wo s-em-keh'ithath. 14 S-mahch ach mo ab t-mahkch g Jiosh g wechij thoakag nach pi si pihk t-elith ha hekaj g t-wehm wohochuththam ch hab masma ab ha neith mo d t-wepnag. Hegam mo pi pihk e elith ha hekaj g e-wepnag o hab sha masma mo g ko'i. 15 Heg o wa wepo mo d ha mu'akam matp hedai s-ha keh'ith. Kuch s-mahch mo pi edgith g wechij thoakag hegam mat hedai d wo ha mu'akamk. 16 Jiosh alithag at ab muh kots t ab t-wehhejed no pi t-hekaj si pihk e elith. Ith o hekaj tasho mo haschu d pihk elithadag. Kutt wo si pihk t-elithath ha hekaj g t-wepnag am hugkam matt chum hems wo t-muhkith am ha wehhejed. 17 Pi o sha'i pihk e elith ab Jiosh wui hegai mat hedai ha'ichu wo s-edgithath ch pi heg hekaj ab hu wo i wehmt g e-wehnag. 18 Ab att wo ha mah g t-wepnag g i wehmtadag matp wo tatchua k pi hab wabsh wo kaijjith mach si pihk t-elith ha hekaj. Pegih, si ach pihk t-elith ha hekaj g t-wepnag. 19 K heg hekaj tasho mach edgith g wohokam. Ith att hekaj ab wo i t-gewkemhu matt ab wo i miabi g Jiosh. 20 Hebaichujj ach ab ha'ichu t-chu'ichigchuth. K wabshaba g Jiosh ba'ich i s-gewkthag mach ahchim ch wehs ha'ichu s-mahch 21 ch gm hu hab i juh hegai t-chu'ichig. Tt hab pi ha'ichu ab hu wo t-chu'ichigchuth k ab wabsh wo i miabi g Jiosh pi sha'i has t-elithch. 22 Bach junihim g Jiosh tatchui ch hegai mo haschu ab t-chehani. K g Jiosh heg hekaj am hab t-junith mach haschu ab i tahni. 23 K ith d chehanigaj g Jiosh matt ab wo s-wohochuthath g alithaj ch ab a'ai t-wui wo si pihk t-elithath mo hab masma t-chehani g alithaj. 24 Mach hedai ab s-wohog elith g Jiosh att ab si t-hemakoj heg wehm. Jiosh at ab t-mah g Hekia S-ap'ekam Gewkthag. K ith d Jiosh ch t-wehmaj. Kuch heg hekaj s-mahch mach d a'aligaj.

1 John 4

1 Mu'i at an i wuwhag k hab chum e wua mo d ha mihshmaththam. K eda pi ha wehmaj g Hekia S-ap'ekam Gewkthag. Kumt heg hekaj pi wabsh chum hedai ab wo s-ha wohochuth k ho'ip ha a'appe mas woho ha wehmaj g Hekia S-ap'ekam Gewkthag. 2 Ahchim o wa'i t-wehmaj g Hekia S-ap'ekam Gewkthag mach hedai wohokamchuth mo g Jesus d Jiosh alithag ch ia mahsi k d o'othham hab masma mach ahchim. 3 Pi o am hu ha wehmaj g Hekia S-ap'ekam Gewkthag hegam mo hedai pi ab hu wohochuth g Jiosh alithag. Am o hema ha wehmaj ch d Jesus obga. Heki am hu kah mat an wo i wuhsh g obgaj. K hemuch in ha'ichug no pi an ha wehmaj hegam mo pi ab hu wohochuth g Jiosh alithag. 4 Jiosh alithag obga o am ha wehmaj hegam mo g iattogi chum ha mihshmethahim. K wabshaba g Hekia S-ap'ekam Gewkthag in t-wehmaj. Kutt heg hekaj ha gewito no pi heg ba'ich i s-gewkthag mo hi g Jiosh alithag obga. 5 Hegam o ab wabsh jewed t ab ha'ichu k amjed neneok. K hegam ab ha kaiham mo hab wa'ap pi mahch g Jiosh. 6 Pi o ab hu t-kaiham mach chum neneok ab amjed g Jiosh no pi pi mahch g Jiosh. Hegam o ab wa'i t-kaiham mo hedai s-mahch g Jiosh. Bach masma s-mahch mo hedai edgith g Hekia S-ap'ekam Gewkthag. Heg o am ha tashogith g wohokam. 7 Ab att wo chum si pihk t-elithath a'ai t-wui no pi g Jiosh ab t-mahkch g pihk elithadag. Mamtp woho wo s-mahchk g Jiosh ch d a'aligaj ch wo si pihk e elithath. 8 Jiosh o si t-tatchua ch heg hekaj si pihk e elith ab t-wui. K hegam mo pi edgith g pihk elithadag pi d sha'i a'aligaj. 9 Jiosh at ab i wuhshath g si hemako e alithag ith thahm jewed. T heg ab nako g s-ko'ok t-namkithadag mach heg ab beihog. Kut hab masma ab t-mah g wechij thoakag. Bat wa masma am t-tashogi g Jiosh mo si pihk e elith ab t-wui. Kutt heg amjed i s-mai g pihk elithadag k hahawa si pihk t-elith ab Jiosh wui. 11 Am o wa tasho mo ab t-wui si pihk e elith g Jiosh. Pegih, ni-wepnag, ahchim att hab wa'ap wo chum si pihk t-elithath ab a'ai t-wui. 12 Pi ach hedai hekith sha'i neith g Jiosh g t-wuhpuikaj. K wabshaba heg ab t-mahkch g si ge'e pihk elithadag. Kuch heg hekaj s-mahch mo t-wehmaj. 13 Jiosh at ab t-mah g Hekia S-ap'ekam Gewkthag. K heg d Jiosh ch ab t-wehm kihthag. Kuch heg hekaj s-mahch mach d a'aligaj. 14 Heki at hu am i kei g Jiosh g e-alithag mat ab wo i hih jewed wui k wo ha tho'ibia g hemajkam. Kuni si neith ihtha ch heg amjed am em-ahgith. 15 Wehsijj ach d a'aligaj g Jiosh matt hedai ab s-wohochuth k ah mo g Jesus d si alithaj. 16 Kuch heg hekaj s-mahch mo si pihk e elith g Jiosh ab t-wui ch ab si t-hemakojithch e wehm. Jiosh o ab si t-tatchua. Kuch s-mahch mach d a'aligaj nach pi ab a'ai si t-tatchua. 17 Ab o t-mahkch g si ge'e pihk elithadag. Kuch wepo masma ab si tatchua mo g alithaj ch hab s-ap t-taht k wo ai g lothaita 18 k pi wo ehbithath. Gm at hu hab i juh g pi ap t-namkithadag g Jiosh no pi si pihk e elith ab t-wui. Kutt heg hekaj pi wo ehbithath ch wabsh aigo wo si pihk t-elithath ab wui. Pi o pihk e elith ab Jiosh wui hegai mat hedai wo s-ehbithath. 19 Wehpeg o si pihk e elith g Jiosh ab t-wui. Kuch heg hekaj edgith g pihk elithadag. 20 Pi o woho d Jiosh wohochuththam mo hedai pi ab hu pihk e elith t-wui ahchim mach d wohochuththam. Ba'ich o i s-hasig matt ab wo si tatchua hegai mach pi neith. Pi at wo e nako mat ab wo si tatchua g Jiosh matp hedai pi ab hu wo si ha tatchua g e-wepnag. 21 Ab o t-chehani g Jiosh ahchim mach ab si tatchua matt ab epai wo si ha tatchuath g t-wepnag.

1 John 5

1 Thach Jiosh a'aliga wehsijj ahchim mach s-wohochuth mo g Jesus d alithaj g Jiosh ch d si Kehshaj. Kutt ab a'ai wo si t-tatchuath nach pi d t-wepngam. K g Jiosh d t-ohg. 2 S-mahch ach mo d wohokam g t-tatchuithag ab a'ai t-wui nach pi ab si tatchua g Jiosh. 3 K am wa tasho mach ab si tatchua g Jiosh nach pi ab s-wohog elith. K g chehanigaj pi sha'i wehch am t-wehhejed. 4 Jiosh o ab t-mahkch g gewkthag matt wo gewito g pi ap'ekam. Ab ach s-wohochuth g alithaj. K heg hekaj ab t-mahkch hegai gewkthag matt heg hekaj gewito g pi ap'ekam. Pi at wo e nako g pi wohochuththam mas wo gewito g pi ap'ekam. 6 Jesus Christ at ia jiwia jewed thahm k e pahl wakon k am hab juh g e-chikpan k am hahawa e muhkith am t-wehhejed. 7 T g pahl wakonaj ch muhkigaj am wohokamch mo d Jiosh alithag ch d thoakam ith thahm jewed. K g Hekia S-ap'ekam Gewkthag hab wa'ap wohokamchuth. Ihtham waik o am wohokamchuth mo g Jesus d Jiosh alithag. 9 Neh, ab ach s-wohochuth g o'othham mat ab ha'ijj wo t-ahgi mo si s-ap s-mahch. K g Jiosh ha'ichu ahga ba'ich i s-gewkthag mat heg am wohokamch g e-alithag. 10 Kutt hedai ab wo s-wohoch g Jiosh alithag k wo si s-ap s-mahchk mo d wohokam. Hekia S-ap'ekam Gewkthag at t-wehhejed wo wohokamch. Hegam mo pi wohochuth g Jiosh oki hab elith mo t-iattogith. 11 Ab o i t-tashogith g Jiosh mo ab t-makiog g pi ha huhugetham thoakag am gahi wuhshanim g e-alithag. 12 Ahchim mach ab ihm g alithaj ach edgith hegai thoakag. K hegam mo pi ab hu ihm pi edgith. 13 Ith ant am em-o'ohani ahpim mam ab ihm g Jiosh alithag mamt hekaj wo s-mahchk mam edgith ihtha wechij thoakag. 14 Si ach s-mahch mat ab wo t-kaiha g Jiosh matt ab ha'ichu wo tai matp ith am tatchuij oithch d wo ha'ichuk. Kutt heg hekaj ab wo i t-gewkemhunath ch ab wo ha'ichu tahnith nat pi woho am hab wo t-junithahith. 16 Ab att wo tahnith g Jiosh mat gm hu hab wo i juh g ha-chu'ichig g t-wehm wohochuththam matp ab wo e shohbi. Kut hab wo juh mach haschu ab tahni. Pi ani em-ahgith mams wo e ho'ige'ithahu ha wehhejed hegam mat pi ab hu wo sha'i e shohbi. 17 Wehs o ha'ichu d pi ap'ekam mo haschu i pi d Jiosh tatchui. T wabshaba g Jiosh gm hu hab wo i juh g ha-chu'ichig hegam mat ab wo e shohbi. 18 S-mahch ach mo g Jiawul edgith g gewkthag am wehs ha thahm hegam mo pi d Jiosh a'aliga. Kuch eda ahchim d Jiosh a'aliga. Jiosh alithag o t-nuhkuth. Kut pi wo sha'i e nako g Jiawul mas gm hu hab wo i t-juh ab amjed. Pi att am hu hab wo junihith g pi ap'ekam ahchim mach d Jiosh a'aliga. 20 K g Jiosh alithag ab t-mahkch g amichuthadag matt wo s-mahchk g wohokam Jiosh ch wo edgithath g wechij thoakag. Heg at hekaj ia jiwia g Jiosh alithag jewed thahm. Heg o d wa'i t-Jioshga mo d si wohokam Jiosh. 21 Kumt pi ha'ichu ep wo jioshchuth k pi hedai ep ab hu wui wo e ho'ige'ithahunath.

2 John 1

1 Ni-tatchui ni-wepnag: Am ant wo ha'ichu i em-o'ohani ahni mani d hema ha wanimedtham wehsijj hegam mo ab si ihm g Jesus Christ. Si ani pihk ni-elith em-hekaj nach pi d t-wehm wohochuththam. Wehs g t-wehm wohochuththam o hab wa'ap si pihk e elith em-hekaj. Pi at hekith gm hu hab wo i e juh g wohokam ab t-amjed. 3 Ab o wa si s-em-ho'ige'ith g t-ohg Jiosh g e-alithag Jesus Christ wehm ch ab wo wa ba'ich i em-mah g i wehmtadag ch s-ap tahhathkam. Kumt ab wo u'ukchith g wohokam ch wo si pihk e elithath wehs ha hekaj. 4 Si ani s-ap ni-tahtk ch ia ha'i ha neith g em-wehm kihkam. K ihtham an u'ukch g wohokam hab masma mo ab t-chehani g Jiosh. 5 Kuni ab wehs i em-gewkemhun mamt ab a'ai e wui wo si pihk e elithath. Pi o d wechij chehanig ihtha mani am em-ahgith. Edgith ach ihtha gd hu i shohshon k amjed. 6 Kutt ab a'ai t-wui wo si pihk t-elithath ch hekaj am wo t-chehgithath mach ab s-wohog elith ihtha chehanigaj g Jiosh. 7 Mu'i at an i wuwha mo chum s-ha mashchamamk g hemajkam ch eda d wabsh s-chu i'attomkam ch d obgaj g Jiosh alithag no pi pi ha mashcham mat ia mahsi k d o'othham hab masma mach ahchim. 8 Kumt heg hekaj wo s-e nen'oithk mamt pi gm hu hab wo i e juh ab amjed g Jiosh ha'ichu ahga k wabshaba wehs wo bei mo haschu ab em-makiog g Jiosh. 9 Hegam matp hedai am gawul wo juh g Jiosh alithag mashchama o pi sha'i mahch g Jiosh. S-mahch ach g Jiosh ch ep s-mahch g alithaj ahchim mach am oithch hab masma g alithaj mashchama. 10 Kumt heg hekaj pi ab hu wo ha kaihamath hegai mat hedai wo chum s-em-mashchamam k eda pi wo ahgachugath g Jiosh alithag mashchama. Pi g am hu wo i ha wahpkith e-kihki ed k chum hems pi hab wo chei ab ha wui. “Jiosh at wo wa em-wehmajk,” 11 mamt pi ab hu wo i ha wehmt hegam mat am wo ahgachugath g pi wohokam. 12 Mu'i ani ha'ichu s-em-ahgithamk ch wabshaba pi ith hekaj am i em-o'ohani nani pi am s-himimk mant wo em-neith k wo em-wehm neo. Kutt am t-wehm si s-ap wo t-tahtkk. 13 Ia o ha'i kih g t-wepnag ch ash si pihk e elith em-hekaj.

3 John 1

1 Ni-tatchui ni-wehnag, Gaius: Am ant wo ha'ichu i m-o'ohanith k d hema ha wanimedtham wehsijj hegam mo ab si ihm g Jesus Christ. 2 Ia at ha'i thatha hegam mash am em-wui ahgachug g Jiosh ha'ichu ahga k ia t-ahgith mapsh si s-ap himchuth g e-thoakag am oithch g Jiosh ha'ichu ahga map has i masma chum hekith hab e junihim. Si ani s-hohho'ith ch kah mapsh am wabsh kia si s-ap e tahtk am Jiosh wui. Kuni ab tahni g Jiosh mat wehs ha'ichu wo s-ap'ek am m-wehhejed. Kupt wabsh wo si s-thoak. 4 Tho si s-ap tahhathkam am ni-wehhejed mat hegam mani ha ahgith g Jiosh ha'ichu ahga wo si s-ap u'ukchith. 5 Kupsh am s-ap ha thagio'ith hegam mash am thaiw am ahgachugch g Jiosh ha'ichu ahga, chum as pi d m-machiga. 6 Ihtham mat ia thatha o t-ahgith mapsh si pihk e elith ha hekaj. Kuni ab si i m-gewkemhun mapt ba'ich wo i ha wehmajk mat gm hu hasko ep wo i ahgachugath g Jiosh ha'ichu ahga. 7 Ihtham o t-ahgith mash pi ha hiwgith hegam mo pi ab hu wohochuth g Jesus mas ha'ichu ab wo i ha mah. 8 Ahchim o ab d t-wuikam mach ab s-wohochuth g Jiosh alithag matt wo i ha wehmtath hegam mo ahgachug g Jiosh ha'ichu ahga. 9 Ith ani chum em-tashogith heki hu ni-o'ohana ed ahpim mam am e wehm e mihshmath. Kush wabshaba g Diotrephes pi chegima g ni-o'ohana ch am em-iattogith ch pad neok ab t-amjed ahchim mach ahgachug g Jiosh ha'ichu ahga. Tatchua ash g Diotrephes mat d wo em-wanimedthamk. Am ant wo em-tashogi am jiwiak mo pi ap'e hegai mo haschu am hab junihim. Pi ash ab hu i ha wahpkith ch pi ha thagio'ith hegam mo am thaiw am ahgachugch g Jiosh ha'ichu ahga ch ash pi em-hiwgith mams ahpim hab wo chum juh ch wo chum em-wuwhas ab em-namki amjed. 11 Matp hedai hab masma hab wo junihith g pi ap'ekam ch pi mahch g Jiosh. Pi g am hu s-ha wepom k wabshaba hegam s-ha wepom mat hab wo junihith g s-ap'ekam. Ihtham o d Jiosh a'aliga. 12 Hema hegam mo hab junihim g s-ap'ekam o d Demetrius. Wehsijj am hab wa kaij. Kuni s-mahch mo d wohokam. Kum ahpim s-mahch mani chum hekith g wohokam ahg. 13 Mu'i ani ha'ichu s-m-ahgithamk ch wabshaba pi ith hekaj am i m-o'ohani 14 nani pi am s-himimk mant wo m-neith k wo m-wehm neo ab amjed. 15 Si g s-ap e tahtk am Jiosh wui mat m-tho'ibia. Ia o ha'i kih g t-wepnag ch ash si pihk e elith m-hekaj. Am g wehs ha ahgith g t-wepnag mach si pihk t-elith ha hekaj.

Jude 1

1 Ni-wepnag: Am ant wo i em-o'ohani ahni mani d Jude ch d piongaj g Jesus Christ ch d James wehnag. Jiosh o si pihk e elith em-hekaj ch ab i em-gawulkath k em-nuhkuth am wehhejed g e-alithag Jesus Christ. 2 Ab ani tahni g Jiosh mat ab ba'ich wo i s-em-ho'ige'ithath ch ab ba'ich wo i em-mahkath g s-ap thahhathkam ch pihk elithadag. 3 Ab ant ha'ichu wo i chum em-o'ohani ab amjed g t-tho'ibiathag. T wabshaba ha'i i wuwha mo d s-chu i'attomkam ch am chum gawul s-junimk g Jiosh ha'ichu ahga ab amjed g tho'ibiathag ch ab wui gegok g t-kownalig Jesus Christ. Ihtham o hab s-junimk g pi ap'ekam ch heg hekaj hab kaij mat g o'othham wabsh chum haschu has wo junihith ab i s-wohochuthk g Jiosh ha'ichu ahga. K wabshaba heki hu an o'ohanas mat s-ko'okam wo ha namkith g Jiosh hegam mat ab wui wo gegokiwua. Heki o hu t-ahgith g Jiosh matt haschu ab wo chum s-wohochuthath. Kum ahpim ab s-wohochuth g ha'ichu ahgaj. Nt heg hekaj am wo i em-o'ohanith k ab wo i em-gewkemhu mamt si s-gewkam wo u'ukchith. 5 Am g wo s-chegitok mat has ha juh g Jiosh hegam mo pi ab hu wohog elith. Chum as wehs e tho'ibia g Tutuligo ab Egypt jewed t amjed, k eda mu'ijj pi ab hu wohog elith g Jiosh ch hekaj s-ko'okam e ko'ij. 6 Am g wo s-chegitok mat has e juh g anghil. Ab o chum s-wohog elith g Jiosh ch wabshaba ha'i gm hu hab i e juh ab amjed. T hegam am i ha kuh g Jiosh k am s-wihnam ha kuhpch s-chuhugam k ed mat wo ha lothai ge'e lothaita tash ch ed. 7 Am g wo s-chegitok mat has i ha juh hegam mo am kih Sodom kihhim t am ch Gomorra kihhim t am ch gn hu ha wehgaj. Bo wa ep pi ab hu wohog elith g Jiosh ch hab junihim g pi ap'ekam am ha wehm wohpiwup hegam mo pi d ha-wehm kihkam. Chechoj o am e wehm wohpiwup ch hab wua g pi ap'ekam. T g Jiosh ab i huduni g mehi am ha thahm ihtham kihhim k am wehs ha koktha g hemajkam. Bo wa masma i t-tashogith g Jiosh mat s-ko'okam wo ha namkith hegam mat pi wo thagito g pi ap'ekam. T g s-ko'ok ha-namkithadag pi hekith wo huhug. 8 Ihtham s-chu i'attomkam mo am ha'ichu chum em-mashcham ash ha'ichu chehchk ch heg oithch am hab e junihim ch hekaj e uamhun ch pi ab hu wohog elith g Jiosh ch nahnko ha ahg g anghil. 9 Chum ash wa hems hegai anghil ha-ge'ejig mash hab chehgig Michael pi s-ko'okam ab abchuth g ge Jiawul no pi heg hab wa'ap d chum anghilkahim. Jiawul ash wa pi ap hab e wua am chum s-behimkch g Mosesbad mat am i muh. Kush ihtha Michael am s-tha'ith ch wabshaba pi s-ko'okam has ahg ch hab hi wabsh kaij, “Jiosh at wo wa'i s-m-keh'el heg hekaj.” 10 Sh wabshaba hegam s-chu i'attomkam nahnko ahg mo haschu i pi amichuth ch hab wua mo haschu i tatchua hab masma mo g mischini ha'ichu thoakam ch hab masma e uamhun. 11 Jiosh at s-ko'okam wo ha namkith no pi pi ab hu wohog elith. Heki o hu mash wa hema d Cain ch mua g e-wehnag. Kush eda g wehngaj d s-ap'ekam. K ihtham s-chu i'attomkam am hab wa'ap e wua. Hema ash wa d Balaam ch am ahgachug g Jiosh ha'ichu ahga heg wabsh hekaj mat wo ui g lial. K ihtham s-chu i'attomkam hab wa'ap e wua. Hema ash wa d Kora ch ab wui kehk g Jiosh. K ihtham s-chu i'attomkam hab wa'ap e wua. T heg hekaj g Jiosh im hu hab wo i ha juh ab e amjed. 12 Kah ani mash ihtham s-chu i'attomkam am em-wehm e gegosith ch am chum em-uamhun. Neh, pi at am hu wo i em-wehmajk g chewagi matp gm hu wabsh wo wi'ichkwua k pi wo ha juh. T hab wa masma pi am hu wo i em-wehmajk ihtham mo wabsh hejel i e chegito. Neh, t wabsh wo e huhp g ha'ichu babhetham uhs matp pi ab hu wo ha babheth mat eda wo chum e ai mat ab wo bai. Kut ihtham s-chu i'attomkam hab wa masma wabsh wo huhug no pi pi sha'i e chehgith g ha'ichu s-ap'ekam ab ha amjed. 13 S-ta edam ha'ichu ash am wabsh e chehgith ab ha amjed hab masma mo g totshagi am e chehgith an shuhthagi hugith an. Ihtham o wabsh pi thotholima ch ab aihim mat g Jiosh gm hu wo ha shul ge'e s-chuhugam k ed. 14 Tsh wabshaba g Jiosh heki hu hema tashogi mat has wo ha juh. Sh ith hab chehgig Enoc ch d wosmdaj hegai mash g woskaj wosk d si wehpeg o'othham. Sh g Jiosh hab ahg mat wo ha ahgi g hemajkam mat ab wo i hih g Jiosh mat wehs wo ha lothait k s-ko'okam wo ha namkith hegam mo pi tatchua ch has ahg ch hab wua g pi ap'ekam. T wehst-mahm mihl anghil ab wo i oi. 16 Ihtham s-chu i'attomkam o chum hekith a'aga g pi e-ap'ethag ch hab wua g pi ap e-tatchui. Ge o e hahaschuth ch hab wabsh e wua mo ab ha'i si ha haha'ichuchuth mat hekaj ab aigo wo si ha haha'ichuch. 17 Am g wo s-chegitok mo haschu i em-ahgith hegam mo d chuhchaij g t-kownalig Jesus Christ. 18 Bo wa kaij ab em-wui, “Am at ha'i wo i wuwha em-shahgith mo eda e aihim g si ha oithch tash k hab wabsh wo junihith g hejel e-tatchui ch wo nahnko em-ahgath.” 19 T am wo tashok mo ihtham pi sha'i e thagitokch am wui g Hekia S-ap'ekam Gewkthag no pi am hab junihim g hejel e-tatchui ch hab chum em-wua mamt ab a'ai e wui wo gegokiwua. 20 Tho si hekia s-ap'ekam g t-wohochuthadag. Kumt heg ab ba'ich i s-wihnam wo e u'ukchith. T g Hekia S-ap'ekam Gewkthag ab wo em-mahkchith g gewkthag mamt hekaj am wo neneokath Jiosh wui. 21 Mt wabsh chum hekith am wo edak g Jiosh pihk elithadag ch s-e tahtk ch wo nenidath mat g t-kownalig Jesus ab wo i em-wahpki Jiosh kihthag ed mamt hahawa chum hekith an wo ha'ichugk. 22 Ab g wo i s-ha ho'ige'ith hegam mo pi mahch mas haschu wo s-wohoch 23 k am wo i ha ahgi g Jiosh ha'ichu ahga. T hab wo e tho'ibia ab i s-wohochuthk. Kumt wabshaba wo s-e nen'oithk mo haschu pi ap hab wua mamt ahpim hab wa'ap pi heg hekaj wo e uamhu. 24 Ab att wo si has elithath g Jiosh nat pi g alithaj Jesus Christ t-tho'ibia k d t-kownalig. Jiosh o si s-gewkthag ch wehs ha'ichu thahm chum hekith. Ab att wo i t-thagito wui. T wo e nako mat wo t-nuhkuth. Kutt pi gm hu hab wo i t-juh ab amjed. T am wo i t-wahpki e-kihthag ed. Kutt wo si s-hehgigk ch ab wo si has elithath chum hekith.

Revelation 1

1 Hemu at am i tashogi g Jesus Christ hegai matsh haschu am hab wo e juh pi sha'i mehk i'ajed. Jiosh ash am ahgith matsh am wo t-chehgi ahchim mach d piongaj. Tki heg am hema i kei g anghil. T ith am ni-chehgi ahni John mani d piongaj g Jesus Christ. 2 Kuni ia o'ohan hegai mani haschu i neith. Ihtha ni-o'ohana o d Jiosh ha'ichu ahga ch d hegai wohokam mat am i maskogi g Jesus. 3 Jiosh at wo wa s-ha ho'ige'el hegam mat am wo i ne'okchul ch hegam mat ab wo kaihamath. E ash aihim mat am hab wo e juh wehs ihtha gm hu ba'ich ha'ichu ahga mant in wo o'oha. 4 Am ant wo i em-o'ohani ahpim wewa'ak thakam Jesus Christ ihmtham am Asia chekshani ch ed. Ab at wo wa ba'ich i s-em-ho'ige'ithath ch ab ba'ich wo i em-mahkath g i wehmtadag ch s-ap tahhathkam g t-ohg Jiosh ch Hekia S-ap'ekam Gewkthag ch Jesus Christ. T-ohg Jiosh o chum hekith an ha'ichug. K g Hekia S-ap'ekam Gewkthag am wehmaj ch wewa'ak masma e chehgithch am t-wehhejed. K g Jesus Christ si s-ap am i t-tashogith g wohokam ch d hegai mat si wehpeg ab uhpam s-ap i wuhsh ab muhkig amjed k am hahawa ha thahm g wehs kokownal ith thahm jewed. Ab o si t-tatchua ch heg hekaj e muhkith t-wehhejed k t-tho'ibia ab pi ap t-chu'ichig amjed 6 k hab t-juh mach d hahawa piongaj g t-ohg Jiosh ch am wo i ahgahith g ha'ichu ahgaj. Jesus Christ o wehs u'ukch g gewkthag. Kutt ab wo ihmath chum hekith. 7 Neh, e o aihim mat ep wo jiwia ab thahm kahchim amjed. Wehs hemajkam at wo neithath, chum wa hegam mat ab sisish kots t ab. Wehs nahnko mahs hemajkam at wo shoshani heg hekaj. 8 T-kownalig Jiosh o wehs u'ukch g gewkthag ch hab kaij, “Ahni ani d alpha ch d omega.” Ihtham o d si wehpeg ch si oithchkam o'ohana. K hab ahg g Jiosh mo si wehpeg an ha'ichug ch si ha oithch an wabsh wo kia ha'ichugk. 9 Thani em-wehm wohochuththam ahni John nach pi ab t-hemakochuthch g Jesus Christ wehm. Ni am em-wehm ap'ethag Jiosh kownaltalig ed ch hekaj em-wehm ni-sho'igchuth. An amt ni-wua heg ab al sikod jewed mo hab chehgig Patmos ch am ha'ichug shuhthagi ch ed nani wa pi si s-gewkam ahgahim g Jiosh ne'oki ch hegai wohokam mat g Jesus am i tashogi. 10 K am hu hebai d thomig tash. Ni ab ihm g Jiosh. K g Hekia S-ap'ekam Gewkthag am si i ni-wehmaj. Kuni kah mat ab hema si s-kaitham neo ab ni-wehgaj k hab sha kaithag mat g kuikud ab ku 11 k hab kaij, “An g o'ohan mapt haschu wo i nei k am haha wo ha cheha mat am wo i bei ihtha o'ohana hegam ha wui wewa'ak thakam Jesus ihmtham amai Ephesus t am ch Smyrna t am ch Pergamum t am ch Thyatira t am ch Sardis t am ch Philadelphia t am ch amai Laodicea t am.” 12 Neh, nt ab si sikol i kekiwua mant wo nei mas hedai ab ni-wui neok k haha wabsh nei mo g wewa'ak ohla lalampa an thadha chuhchakud t an. 13 K am ha shahgith hema kehk ch hab mahs mo g Jiosh si Kehsha. K g lihwaj gd hu si ais g tahtdaj. K g ohla giwud an hab juhkch e bahsho. 14 K g mo'oj si s-tohta hab masma mo g s-wihs gew. K g wuhpuij si s-masma tonod hab masma mo g s-toni nahtha. 15 K g tahtdaj si s-wegima tonod hab masma mo g kohwli hahgig. K g ne'okij hab masma hab kaithag mo g si ge'e shuhthagi an med. 16 Ith o an u'ukch g wewa'ak huhu'u s-apko e-nowi ed ch an kamshch g is-pahyo. K ith ab i wuhshanis chinij ab. K g wuhioshaj sha'i si tonod hab masma mo g tash tonlig thahm juhk. 17 Kunt am i neithok ab i gei wecho hab sha masma mo g muhki. Kut an ni-tahtam k hab kaij, “Pi g am sha'i ni-ehbenith. Thani ahni mani si wehpeg ia ha'ichug ch chum hekith ia wo ha'ichugk. 18 Am ant wa chum ni-muhkith k uhpam ep ni-chegito k chum hekith d haha wo thoakamk. Am ani thahm gewkthag g muhkig ch am thahm gewkthag amai mo am ha'ichug g ko'i. 19 “Pegih, am g o'ohan map haschu i neith mat hab wo e juh hemu ch haschu hab wo e juh imhab i thahm. 20 Am ant wo m-ahgi g s-a'agi ha'ichu ab amjed ihtham wewa'ak huhu'u mani in u'ukch ch ihtham wewa'ak lalampa. Ihtham wewa'ak lalampa o d hegam ni-ihmtham mo am kihthag hegam ha eda wewa'ak kihhim. K ihtham wewa'ak huhu'u o d ha-wanimedtham.”

Revelation 2

1 K hab ep kaij ab ni-wui, “Am g o'ohanith g ha wanimedtham hegam mo ab ni-ihm ch am kihthag Ephesus t am. Ihtha ha wanimedtham at am wo ha ahgi mani hab kaij: “Ith o d ha'ichu ni-ahga ahni mani an ha u'ukch g s-apkojed ni-nowikaj g wewa'ak huhu'u ch an oimmed ha shahgith g wewa'ak lalampa. 2 S-mahch ani mam haschu hab junihim. S-ap am chikpan ch am wabsh s-e bahbgi ch pi ab hu sha'i ha bahbgi hegam mo ab ni-wui gegok. Ha'i o hab chum kaij mo d ni-chuhchai. Kumt eda ha a'appem k s-mai mo d wabsh s-chu i'attomkam. 3 Ab amt s-bahbagi nako g sho'igthag ni-wehhejed k pi sha'i ha'asa. 4 “Neh, ith o s-ta hohho'ithama. K wabshaba ha'ichu pi ta hohho'ithama ab em-ab. Pi am ab hu ni-tatchua hemuch hab masma mam wa gd hu i heki hu. 5 Am g wo i oithahim mamt he'esko i e mehkoth ab ni-amjed k gm hu wo s-ohhoth g pi ap e-chegitoi mamt hab ep wo masmak mam wa heki hu. Mtp sha pi gawul wo i e juh, nt gm hu wo i bei g em-tonligga. 6 Ith am hi wa s-ap am hab junihim mam si pi hohho'ith mo haschu s-ta edam hab junihim hegam mo am oith g Nicolas. Ith o wa chum pi apko ha wanimed g Jiosh hemajkamga. Ahni ani hab wa'ap si pi hohho'ith ihtha. 7 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath. “Ab ant wo ha mah hegam mat gewito g pi ap'ekam g ap'ethag mat ab wo huh g bahidaj hegai uhs mo ab ha mahk g thoakag ch am kehk Jiosh oithag ed.” 8 K hab ep kaij ab ni-wui, “Am g o'ohanith g ha wanimedtham hegam mo ab si ni-hiwig ch am kihthag Smyrna t am. Ith at am wo ha ahgi mani hab kaij: “Ith o d ha'ichu ni-ahga ahni mani si wehpeg ia ha'ichug ch si ha oithch ia wabsh wo kia ha'ichugk, ahni mant muh k ep i wuhsh ab muhkig amjed. 9 S-mahch ani mam e kudut. Tham hi wa chum sho'igkam iia ch wabshaba d s-kakais am Jiosh tahgio. S-mahch ani mo ha'i si pi ap has em-ahg g Tutuligo. Ihtham o hab e elith mo d Jiosh hemajkamga ch eda wa chum pi woho no pi d wabsh Jiawul hemajkamga. 10 “Pi g am wo sha'i ehbithath mamtp haschu i s-ko'ok ab wo nako. Neh, mt wo em-kuh. K wabshaba d wabsh Jiawul chi'oitha ihtha. Kut am wa'i wehst-mahm tash hab wo mahsk ihtha em-kudutadag. Am amt wo hihimath e-wohochuthadag oithch am hugkam mamt hekith wo i koi. Kunt ab wo em-mah g pi ha huhugetham thoakag hab masma mamt g gihko wo mah hegai mat wo ha gewito. 11 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath. “Hegam mat wo gewito g pi ap'ekam at pi wo ai g gokkokam muhkig.” 12 K hab ep kaij ab ni-wui, “Am g o'ohanith g ha wanimedtham hegam mo ab si ni-hiwig ch am kihthag Pergamum t am. T ith am wo ha ahgi mani hab kaij: “Ith o d ha'ichu ni-ahga ahni mo g ni-is-pahyo ge a'aijed mu'ukasig. 13 S-mahch ani mo g Jiawul himthag si s-gewkthag amai. M eda ab wabsh kia s-ni-mahch ch e ahg. Hegai mo d Antipas ch ab si s-ni-wohokamchuth at wa e muhkith amai. Kumt eda wa pi sha'i ni-thagito. 14 “K wabshaba am ha'ichu d hegai mani pi hoho'ith am em-shahgith. Am o ha'i em-wehmaj ch am hab wua hegai mat wa haschu ha mashcha g Tutuligo ihtham Balaambad ch Balakbad. Ihtham at wa ha mashcha mat wo huh hegai ha'ichu hugi mo wa ab e to'ith g ha-jijoshchutha ch ehp mat hab wo wuath g s-tohntom ha'ichu. Ith o wehs d pi ap'ekam am ni-tahgio. 15 Am o ha'i ep em-wehmaj mo g Nicolas mashchama ab s-wohochuth. 16 Gam g hu wo s-ohhoth ihtha pi ap'ekam. Nt wo em-cheggia heg hekaj is-pahyo mo ab i wuhshanis ni-chini amjed mamtp pi am hu wo i e ap'ech. 17 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath. “Ab ant wo ha mah hegam mat wo gewito g pi ap'ekam hegai pi ta behima ha'ichu hugi mo hab e a'aga ‘manna.’ Ab ant ep wo i ha mahkhi ihtham g s-toa Hothai. T hegam ha ab an wo o'ohanask g wechij chehgig. T hegam wo wa'i hehe'ejel s-mahchk g chehgig mat hedai i bei.” 18 K hab ep kaij ab ni-wui, “Am g o'ohanith g ha wanimedtham hegam mo ab si ni-hiwig ch am kihthag Thyatira t am. T ith am wo ha ahgi mani hab kaij: “Ith o d ni-ahga ahni Jiosh alithag mo g ni-wuhpui hab masma tonod mo g nahtha. K g ni-tahtad hab masma tohonnod mo g thahpiunas kohwli. 19 S-mahch ani g s-ap'ekam em-chikpan, pihk em-elithadag, em-wohochuthadag ch em-hemajimathadag ch em-bahbgithadag. Ba'ich am hab i e junihim ia'i ithani. 20 “K wabshaba am ha'ichu d hegai mani pi hohho'ith am em-shahgith. Am am wabsh hiwgith hegai uwi mo e wepogith g Jezebelbad ch hab e a'aga mo d Jiosh ha'ichu i tashogiththam. Ith o ha mashcham g ni-ihmtham mat am hab wo junihith g pi ap'ekam ha'ichu ab a'ai e wehm ch ep wo ko'ath hegai ha'ichu hugi mo ab e to'ith g ha-jijoshchutha. 21 Ab ant wa he'es i mah g tash mat gm hu wo s-ohhoth g pi ap e-chegitoi. K wabshaba pi hohho'ith mat wo thagito g pi ap'ekam. 22 Kunt heg hekaj hab wo juh mat wo mumku k wo wo'iwua. T hegam chechoj mo am wehmaj wohppo am wehmaj ep wo e sho'igch. S-hohtam ant hab wo juh ihtha heg hi wa matp gm hu wo s-ohhoth g pi ap e-chegitoi. 23 Nt wo ha koktha g mahmdaj mat wehs g ni-ihmtham wo s-mai mani s-mahch g hemajkam ha-chegitoithag ch ha-tatchuithag. Ab ant wo em-namkith heg hekaj mam haschu has i junihim. 24 “Ha'ijj ahpim Thyatira t am hemajkam amt pi am hu i oi ihtha pi ap'ekam mashchamadag k pi mai hegai mo ha'ijj hab a'aga ‘Jiawul si s-juhk s-a'agi ha'ichu.’ Pi ant ab hu ba'ich ha'ichu s-wehch wo em-mohto'i. 25 Mt wabshaba hemho wa wo s-wihnam u'ukchith hegai mam haschu i edgith ch ab wo ai mant wo uhpam jiwia. 26 “Ni-ohg Jiosh at ab ni-mah g gewkthag mant wehs s-gewkam wo ha thahmkath g jejewed ch wo ha padch g pi ap'ekam kokownaltalig. Kunt ab wo ha mah ihtha gewkthag hegam mat wo gewito g pi ap'ekam k am hab wo junihith g ni-tatchui ch ab wo ai mant ep wo jiwia. T am ni-wehm wo ha thahmkath g jejewed. Kut am ha wehhejed wo mahsi g ho'ige'ithadag hab masma mat g s-mahs hu'u. 29 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath.”

Revelation 3

1 K hab ep kaij ab ni-wui, “Am g o'ohanith g ha wanimedtham hegam mo ab si ni-hiwig ch am kihthag Sardis t am. T heg am wo ha ahgi mani hab kaij: “Ith o d ha'ichu ni-ahga ahni mani an u'ukch g wewa'ak huhu'u ch am kehshch g Hekia S-ap'ekam Gewkthag mat wewa'ak masma wo e chehgithath em-wehhejed. S-mahch ani mam has chu'ig. Bam em-elith mam d s-ap'ekam. Mt eda e mehkoth ab ni-amjed. 2 Neh, mt ab wo i nehnen k ab wo i gewkai hegai mam haschu wabsh kia edgith mat koi wo s-ap muh. Pi o hohho'ith g Jiosh hegai mam haschu am hab junihim. 3 Am g wo s-chegitok mam wa haschu ab em-mashcham k ab wo i s-wohog elith k gm hu wo s-ohhoth g pi ap e-chegitoi. Kumtp pi wo sha nehnen, nt s-a'agi ia wo jiwia hab sha masma mo g s-chu ehskam. Kumt pi wo sha'i mahchk g ohla mant hekith wo i jiwia. 4 “Ha'ijj ahpim amai Sardis t am am hi wa si e nuhkuth mat pi ha'ichu wo em-uamhu. Ahpim mam s-ap am hab e junihim amt ni-wehm wo himath s-tohtam e enithadathch. 5 Hegam mat hedai wo gewito g pi ap'ekam at s-tohtam wo e enigadath. An o o'ohadag g ha-chechgig an thahm kahchim ch ed mo d e tho'ibiakam. Kunt pi wo sha'i oa g ha chechgig k wabshaba hab wo chei am tahgio g ni-ohg Jiosh ch am ha tahgio g anghiligaj mo d ni-hemajkamga. 6 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath.” 7 K hab ep kaij ab ni-wui, “Am g o'ohanith g ha wanimedtham hegam mo ab si ni-hiwig ch am kihthag Philadelphia t am. T heg am wo ha ahgi mani hab kaij: “Ith o d ha'ichu ni-ahga ahni mani d hekia s-ap'ekam ch d wohokam ch an u'ukch g Davidbad yahwi. Ith ani hekaj ha'ichu kukpi'ok. T pi hedai wo e nako mas ab ep wo kuh. Kuni ha'ichu kukpa. T pi hedai wo e nako mas ab ep wo kuhpi'o. 8 S-mahch ani mam pi am hu i si s-gewpkthag ch wabshaba am oithch hab e junihim g ni-mashchama ch ab si ni-hiwig. Ab ant i hema kuhpi'o g kihjeg em-wehhejed. T pi hedai wo e nako mas ab ep wo kuh. 9 “Ha'i o hab e a'aga mo d Tutuligo ch d Jiosh hemajkamga. K eda hab chu'ig mo d wabsh Jiawul hemajkamga. Bant wo ha juh mat ab wo i hihi em-wui k ab wo i shulig k ab wo si has i em-el. T wo wehsijj s-mai mani ahpim ab si em-tatchua. 10 “Am am hab junihim g ni-chehanig ch s-bahbgim ab nakog ha'ichu. Nt heg hekaj wo em-nuhkuth heg amjed kudutadag mo ab him ha wui g wehs hemajkam mat am wo ha a'appe wehs jewed shuhthgim. 11 S-hohtam ant wo jiwia. Am g wo si nuhkuth hegai mani ab em-mahkch. T hab pi hedai wo sha'i em-wohppo'i hegai mani ab em-makiog hahawa. 12 “Bant wo ha juh hegam mat wo gewito g pi ap'ekam mat d wo u'ugchuk am Jiosh kihthag ed hab sha masma mo g che-tondag am ge'e cheopi ed. Kut ihtham pi hekith wo sha'i thagito g Jiosh kihthag. An ant ha ab wo o'oha g ni-Jioshga chehgig ch g Jiosh kihhim chehgig. Jiosh kihhim o d Wechij Jerusalem ch ab wo i hud Jiosh amjed an thahm kahchim ch ed. Ab ant ha ab ep wo o'oha g ni-wechij chehgig. 13 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath.” 14 K hab ep kaij ab ni-wui, “Am g o'ohanith g ha wanimedtham hegam mo ab si ni-hiwig ch am kihthag Laodicea t am. T heg am wo ha ahgi mani hab kaij: “Ith o d ha'ichu ni-ahga ahni mani s-ap wohokamchuth g wohokam ab amjed g Jiosh ch am wehs thahm g Jiosh nahtoi. 15 S-mahch ani mam has chu'ig. Bam chum e elith mam s-ap ab ihm g Jiosh. Kum eda pi am hu woho i e thagitokch wui. 16 Nt heg hekaj gm hu hab wo i em-juh ab ni-amjed hab sha masma mamt gm hu wo wiho g wabsh s-huhk wasib. 17 Bam chech'e mo am wabsh i s-em-ap'e ha'ichu nam pi d s-kakais ch hab ep chech'e mam pi ha'ichu ep sha'i tatchua. Ni wabshaba em-ahgith mam si sho'ig ch s-ta ho'ige'ithama ch gm wabsh i s-thathpk ch pi nenea. 18 Ab g wo i e thagito ni-wui k hab masma wo edagi g s-wohom kaisthag ch s-kehg wehschuga ch kulani am wehhejed g em-wuhpui. Kumt hahawa pi wo sho'igk ch pi wo s-thathpk ch wo s-neneak. 19 Ha'ichu ani shohbith ch ha gewittan hegam mani ab si ha tatchua mat hekaj gm hu wo s-ohhoth g pi ap e-chegitoi. 20 “Neh, ab ani em-waith ni-wui. K heg wa wepo mani ab kehk em-kihjeg ab ch ab shontpag ch ab em-chehcheg. Kumt wo kah mani ab neok k wo i kuhpi'o g kihjeg. Nt ab wo i wah. Kutt ab a'ai wo t-ihmath ch t-wehm wo si s-hehgigk hab masma matt hems wo t-wehm t-gegosithath. 21 Ni-ohg Jiosh at an ni-thai e-hugith an kownal ni-thaikud an nant pi gewito g pi ap'ekam. Kunt ahni am hab wa'ap wo em-thai ni-hugith an kownal thaikud t ab mamtp hedai wo gewito g pi ap'ekam. 22 “Hekia S-ap'ekam Gewkthag o am i maskogith g ha'ichu ni-ahga am em-wui ahpim mam ab si ni-hiwig ch am kihthag ha e'eda hegam wewa'ak kihhim. Kumt wehsijj ab wo kaihamath.”

Revelation 4

1 Ab ant hahawa i nen k ha'ichu ep neith. Am ni-tahgio o hab sha mahs mo ab kuhpi'okas g thahm kahchim hab sha masma mo ab ge kihjeg. Kuni ep kah g ne'okij g Jesus. K hab sha kaithag mo g kuikud ch hab kaij ab ni-wui, “Ab g i hihm. Nt am wo m-chehgi mat haschu hemho wa am hab wo e juh i'ajed imhab.” 2 T ha hekaj ab si i ni-wehmt g Hekia S-ap'ekam Gewkthag. K shahag wepo mat g thahm kahchim am e chehgi ni-wui. Kuki g ge'e kownal thaikud ab kehk. K an hema thaha ith ab. 3 K g wuhioshaj wabsh tonod hab masma mo hegam si s-kehg hohothai mo hab e a'aga ‘jasper’ ch ‘carnelian.’ K an kownal thaikud wehgaj hab chu'ig g kiohod. K ith s-chehthagi hab masma mo hegai s-kehg hothai mo hab e a'aga ‘emerald.’ 4 Kuki an wehgaj hab ep chu'ig g gokko gamai gi'ik kownal thathaikud. Kuki an ha ab thadha g gokko gamai gi'ik ge'eged ch s-tohtakaj e enigadathch ch g ohla gigiko ab wahpkch. 5 Kuki ab ge'e kownal thaikud amjed ab si memhe g wepgi. Kuki ab toahim g tataniki. Kuki g wewa'ak kuhchki am memeihim ba'ich g ge'e kownal thaikud no pi g Hekia S-ap'ekam Gewkthag wewa'ak masma e chehgithch am t-wehhejed. 6 Am ba'ich g ge'e kownal thaikud oki sha'i si s-thahpk ch hab masma mo g mi-lihtha am tadani ch am wabsh gai tonod. An wehgaj g kownal thaikud oki an a'ai gegok g gi'ik ha'ichu thothakam ch wehsko wuhpui. 7 K hema hab sha mahs mo g mawith. K hema hab ep mahs mo g wisilo. K hema g wuhioshaj hab mahs mo g o'othham wuhiosha. K hema hab mahs mo g ba'ag ch an tha'a. 8 K wehsijj ihtham chuhthp a'an. K g ha-a'an wehsko wuhpui. K chum hekith ne'e hab masma: “Ab ach si has elith g t-kownalig Jiosh. Tho si hekia s-ap'ekam ch si s-gewkthag ch chum hekith an ha'ichug.” 9 Kuki am ne'e ihtham gi'ik ha'ichu thothakam ch ab mahk g has elitha ch ho'ige'elig hegai mo chum hekith an ha'ichug ch an tha kownal thaikud t an. 10 K heg wui ab hab wa'ap i shuhullig hegam ge'eged ch am wuashulig g e-gigiko ch am wecho shuhullig ch ab ihm ch hab chech'e: 11 “T-kownalig Jiosh, ab ap ap'ethag matt ab wo si m-hehgchulithath ch ab wo si has m-elithath nap pi wehs s-gewkthag ch wehs ha'ichu nahto. K hab d m-elitha mo in hab chu'ig.”

Revelation 5

1 Ni haha wabsh neith. Kuki an u'ukch g holiwek o'ohana s-apkojed e-nowi ed hegai mo an tha kownal thaikud t an. K wehsko o'ohanas ab ab ihtha ch wewa'akpa ab si bithshpi ch cheposithas. 2 Neith ani ehp g si s-gewk anghil. K heg si s-kaitham amog ch hab kaij, “Thoh'o am hugkam ap'ethag mat wo e nako mat wo wantsh g chechposig k ab wo i kuhpi'o ihtha o'ohana?” 3 T wabshaba pi hedai e cheh an thahm kahchim ch ed ch in jewed thahm ch am jewed wecho mat wo e nakog k wo kuhpi'o k an wo i nei eda g o'ohana. 4 Ni heg hekaj si pi ap ni-tahtk ch shoak. 5 K hab hahawa kaij hema hegam ge'eged ab ni-wui, “Pi g am shoakath. Neh, Mawith Namkam at gewito g pi ap'ekam k hab wo e nako mat wo wantsh g wewa'ak chechposig k ab wo i kuhpi'o g holiwek o'ohana. Bo masma hab chu'ig mo hab masma o'ohadag mo ith ab d Judabad amjedkam ch d ep Davidbad amjedkam.” 6 Kuni hahawa neith hegai moki hab ahg. K eda ihtha Mawith Namkam hab masma ab i e chehgithch mo g kahwal mad ch atki heki hu e muhkith k ithani am kehk si eda g kownal thaikud. K an wehgaj gegok hegam gi'ik ha'ichu thothakam ch hegam ge'eged. K hegai mo kahwalkaj ab e chehgithch wewa'ak a'ag ch wewa'ak wuhpui. Ihtham wewa'ak wuhpui o hab d ahga mat ab amjed i hih g Hekia S-ap'ekam Gewkthag k an wehsko neith ch nuhkuth g Jiosh nahtoi. 7 T am hih hegai mo kahwalkaj ab e chehgithch k am bei g holiwek o'ohana ab s-apko nowij ab hegai mo ab tha kownal thaikud t ab. 8 T ha hekaj ab wui i shul hegam gi'ik ha'ichu thoakam ch hegam gokko gamai gi'ik ge'eged. K ihtham wehsijj ge ahlipa ch ohla hohas-haha'a. K hegam ha eda hohas-haha'a s-ap uhw shuhthagi ch ith d ha-ho'ige'ithahuna g Jiosh hemajkamga. 9 K am hema a'aga g wechij ne'i. K g ha-ne'i hab chu'ig: “Ahpi ap ge'e ap'ethag mapt wo e nakog k am wo bei g holiwek o'ohana k wo wantsh g chechposigaj napt pi e muhkith k hekaj ab uhpam i ha ui g hemajkam am wehhejed g Jiosh. K g m-u'i d wehsko thakam hemajkam ch d nahnko kaitham neneoktham ab wehs jejewed ha amjed. 10 Bapt ha juh mat wehs d wo papalk ch ab wo ihmath g Jiosh ch d wo kokownalk wehsko jewed thahm.” 11 Nt am hahawa nea k ha kah mu'i mihl anghil. Ihtham o an wehgaj gegok g ge'e kownal thaikud am ha wehm hegam gi'ik ha'ichu thoakam ch hegam ge'eged 12 ch si s-kaitham ne'e hab masma: “Hegai mat kahwalkaj e muhkith o ab ab ulini mamt am wo i kei wehs ha'ichu thahm k ab wehs wo mah g s-kaisthag ch ha'ichu amichuthadag ch gewkthag ch ab has elithadag ch hehgchulithadag ch ho'ige'ithadag.” 13 Kuni ha kah g wehs ha'ichu thoakam an thahm kahchim ch ed ch an jewed thahm ch am jewed wecho ch am ge'e kahchki ch ed. Wehs ihtham o am ne'e hab masma: “Tho ha wuikam g Jiosh heg wehm mat kahwalkaj ab e chehgithch mamb ab wo si pihk e elithath ha wui ch ab wo si has ha elithath ch ab wo ha hehgchulithath ch ab ha wui wo thagitokchith g e-gewkthag chum hekith.” 14 Tki hegam gi'ik ha'ichu thoakam ab wohokamchuth k hab kaij, “Am o wa woho ihtha.” T g ge'eged ab i shul wecho k ab si ihm.

Revelation 6

1 Ni ab neith hegai mo kahwalkaj ab e chehgithch. Kutki hema gam wantsh hegam wewa'ak chechposig. K hema hab kaij hegam gi'ik ha'ichu thoakam, “Ab g i hihm.” 2 K g ne'okij hab sha kaithag mo g tataniki. Nt hahawa ep chum nei. Tki g s-toa kawyu am hema i wuhsh. Kuki ab hema cheshaj ch g gaht u'a. Mt g gihko an hab juh mo'oj an. Ge oki gewkthag ch am i wuhsh mat wo ha gewito g hemajkam. 3 Kutki am hahawa ab kuhpi'o g gokkokam cheposig hegai mo kahwalkaj ab e chehgithch. Kuni kah g gokkokam ha'ichu thoakam. K hab kaij, “Ab g i hihm.” 4 Tki ab hema ep i wuhsh g kawyu k ge s-wegi. K ab hema cheshaj. Kumt ab mah g gewkthag mat hab wo juh g cheggiadag an jewed thahm mat g hemajkam wo a'ai e koktha. Kumt g ge'e is-pahyo ab mah. 5 Tki ab hahawa i kuhpi'o g waikkokam cheposig hegai mo kahwalkaj ab e chehgithch. Kuni kah g waikkokam ha'ichu thoakam. K hab kaij, “Ab g i hihm.” Nt chum nei. T g s-chuk kawyu ab i wuhsh. K hema cheshaj ch g pisaltakud u'a. 6 K am hema neok ab ha shahgith hegam gi'ik ha'ichu thoakam ch hab kaij, “T wo si s-namkigk g ha'ichu hugi. Mt chum hems wo ha namkith g e-nahtoi am chikpank hemako tashkaj mamt wo ha nolawt g al hemako s-wehch pilkani o g waik s-wehch si-wahyo. Mt wabshaba pi wo shohbi g manjeki ch nawait.” 7 Tki gam hahawa wantsh k kuhpi'o g gi'ikkokam cheposig hegai mo kahwalkaj ab e chehgithch. Ni kah g gi'ikkokam ha'ichu thoakam. K hab kaij, “I hihm.” 8 Nt ab i chum nei. Tki g s-kohmagi kawyu ab i wuhsh. Kuki hema cheshaj ch hab chehgig Muhki. Kuki ab si mia oithch him hegai mash hab e a'aga Jiawul Kih. Mtki ihtham ab ha mah g gewkthag am thahm g hemako tahpani mo gi'ikko e tahpanch (¼) ihtha jewed. Kutki ha koktha cheggiadag ch ed ch g bihugigkaj ch mumkithagkaj. Tki g mischini ha'ichu thoakam hab wa'ap ha'i wo ha koktha. 9 Tki gam hahawa ep wantsh k kuhpi'o g hetaspokam cheposig hegai mo kahwalkaj ab e chehgithch. Kuni neith ab wecho g iagchulithakud g ha-thothakag hegam matki e ko'ij heg hekaj mo am ahgahim g Jiosh ha'ichu ahga ch pi sha'i thagito g ha'ichu e ahga. 10 Ihtham o si s-kaitham hihnk ch hab kaij, “Si s-gewkam kownal ch si s-ap'ekam ch si s-wohokam, he'es at wo i tashk mapt haha wo ha lothai g hemajkam an jewed thahm k ab wo ha mah g s-ko'ok namkithadag heg hekaj mat t-koktha?” 11 Mt ab hahawa wehsijj i ha mahkhi g s-tohta liliwa k hab ha ahg mat wo sha'al ba'ich i e uh'ulinihogith k ab wo ai mat wehs wo e ko'ij hegam ha wehm pion ch ha-wepnag mat ha wepo masma wo e ko'ij. 12 Tki gam hahawa ep wantsh k kuhpi'o g chuhthpokam cheposig hegai mo kahwalkaj ab e chehgithch. Tki am sha'i si u'ugij g jewed. Kutki g tash ge chuku hab masma mo g s-kowk s-chuk ikus. Kutki g mashath wehsko ge wegih hab masma mo g eh'ed. 13 Tki g huhu'u i shul ab thahm kahchim amjed an jewed thahm hab sha masma mat g pi bakam suhna wo i shul ab e-jehj amjed mat g s-gewk hewel wo si u'ugij. 14 Tki g thahm kahchim ab wabsh i huhug hab sha masma mat g tapial wo i e holiwkath k gd hu wo e cheh. Tki wehs g thohtha'ag ch g al si'iskod jejewed am shuhthagi ch ed gm hu gawulko i e uh'ul. 15 Ni ha neith matki wehs chum e e'esto g hemajkam, chum hems g kokownal ch si s-has haha'ichu ch shonthal ha-ge'ege'ejig ch s-gewpkkam ch hegam ehp mo d sho'igkam ch hegam mo d nenehol. Am atki chum e e'esto chehcho ch ed ch am hohothai wepcho 16 ch ab si hihnk thohtha'ag ch hohothai wui hab kaijch, “Ab g wo i shulig t-thahm mat pi wo t-neithath g Jiosh. Oi g wo t-e'esto ab amjed hegai mo kahwalkaj ab e chehgithch mat pi wo s-ko'okam t-namkith. 17 E o aihim g lothaita tash. Kutt pi wo sha'i t-nako matt ab wui wo gegokiwua.”

Revelation 7

1 Ntki haha wabsh ha nei g gi'ik anghil. K hema ab kehk si'alig tahgio ch hema ab huduni tahgio ch hema ab wakolim tahgio k ch hema ab juhpin tahgio. Kuki ihtham an u'ukch g gi'ik hewel mat pi an hu wo hewedath jewed thahm o an kahchki thahm. Kuki gm hu wabsh i pi hoini wehs ha'ichu. 2 Kuni hahawa hema ep neith g anghil. Kuki ith ab him si'al wecho amjed ch g Jiosh cheposithakud u'a. Kuki eda ab mahks hegam gi'ik mat wo padch g jewed ch kahchki. K wabshaba ihtha hema ab ha wui hab kaij. 3 “Pi g am s-ko'okam has wo juhni g jewed ch kahchki ch kukui. Kutt ab ho'ip kia ha chepos g Jiosh pionag ab ha-koka ab.” 4 Kuni kah mash d siant gi'ikko wehst-mahm gamai gi'ik mihl (144,000) hegam mamt ha chepos heg hekaj Jiosh cheposithakud. 5 Am o ha'ichug g gamai gohk mihl (12,000) ab wehsijj i ha amjed g t-shohshonbad. Ihtham o wa d gamai gohk ch wa hab chechgig Judah, Reuben, Gad, 6 Asher, Naphtali, Manasseh, 7 Simeon, Levi, Issachar, 8 Zebulun, Joseph, Benjamin. 9 Ntki hahawa ep ha nei moki am sha'i si ge'e hemapig hab chu'ig. Kuki pi ta kuintama ihtham hemajkam ch ab amjed g wehsko jejewed ch d nahnko mahs o'othham ch nahnko kaitham neneoktham. Kuki am thaha e-kownal thaikud ab hegai mo kahwalkaj ab e chehgithch. Kuki hegam mu'i hemajkam am ba'ich gegok ch s-tohtakaj e enigadathch ch g ha'ichu i'ibhonig an uh'ukch 10 ch si s-kaitham neneok ch hab kaij: “T-tho'ibiathag o ab amjed g Jiosh ch ab amjed hegai mo kahwalkaj ab e chehgithch.” 11 Kuki wehsijj g anghil an ha wehgaj gegok ch am i shulig ch ab ihm g Jiosh ch hab ep kaij: 12 “Ab ach si ho'ige'ith ch si hehgchulith g Jiosh no pi wehs edgith g amichuthadag ch gewkthag chum hekith. Amen.” 13 Tki hema hegam ge'eged ab ni-kakke k hab kaij, “Thoh'o wud ihtham hemajkam mo s-tohtam e enigadathch ch hebai amjed hihim?” 14 Ni hab kaij ab wui, “Pi ani sha'i mahch. Ahpi ap wa s-mahch.” K hab kaij ab ni-wui, “Ihtham o d hegam mat ab s-ap gahi wuwha g si ge'e sho'igchuthadag. Heg o wa wepo mat am i wapko g e-wepschuga heg hekaj eh'edaj hegai mo kahwalkaj ab e chehgithch. 15 Heg o hekaj ia gegok Jiosh ba'ich ch ab ihm wehs tashkaj ch s-chuhugam oithk. Kut g Jiosh wo ha nuhkuthath chum hekith. 16 Pi at thahm d ep wo bihugkoik o d wo tonkkoik. Pi at hekith ep wo s-tonik ha wehhejed. 17 Hegai mo kahwalkaj ab e chehgithch at wo ha nuhkuthath hab masma mo g kahwal nuhkuththam ch am wo i ha wanim heg wui s-kehg thoakag mo heg wepogithas shonkam shuhthagi. Kut g Jiosh ab wehs wo i oa g ha-oh'og.”

Revelation 8

1 Tki am hahawa wantsh k kuhpi'o g wewa'akkokam cheposig hegai mo kahwalkaj ab e chehgithch. Kuki gm hu wabsh i pi shahmuni an thahm kahchim ch ed am hu'i eda hugkam ohla. 2 Kuni haha wabsh ha neith hegam wewa'ak anghil moki am gegok Jiosh tahgio. Mtki ihtham ab i ha mahkhi g wewa'ak kukuikud. 3 Kuki am kehk g iagchulithakud kownal thaikud ba'ich. Tki heg wui am hema ep jiwia g anghil k g ohla ha'a u'a. Kumtki am eda ge'e to'i g s-ap uhwchu mat ab wo i wehnath g ha-ho'ige'ithalig g Jiosh hemajkamga k am wo iagchul Jiosh wui. 4 Kutki g anghil mehi g s-ap uhwchu. Tki g kuhbs ab amjed am uhgk i chesh wehnathk g ha-ho'ige'ithalig g hemajkam. 5 Tki am hahawa bei g mehi ab amjed g iagchulithakud heg hekaj ohla ha'a k am iawua jewed thahm. Kutki am sha'i si kop g tataniki k si s-kaithag. Kuki g wepgi an tohonnod ch g jewed si u'ugij. 6 Tki hegam wewa'ak anghil mo u'a g wewa'ak kukuikud am i e nako mat wo ku. 7 Tki g wehpeg anghil am si kuhu g e-kuikudkaj. Tki g chea ch mehi wehnathch g eh'ed ab i e iawua an thahm g jewed. Kutki hemako tahpani mei g jewed mo waik e tahpanch (⅓). Kutki g kukui hab wa'ap masma ha'as meitto. Tki g washai wehs meitto. 8 Tki g gokkokam anghil am hahawa epai kuhu g e-kuikudkaj. Tki am ha'ichu e tha'ich ge shuhthagi ch ed ch hab sha mahs mo g ge ge'e tho'ag ch meihim. Tki hemako tahpani mo waik e tahpanch g ge shuhthagi wabsh e eh'edch. 9 Tki ha'akia ep koi g ha'ichu thoakam am ge shuhthagi ch ed ch ha'akia ep wachkk g wapalko am shuhthagi ch ed. 10 Tki g waikkokam anghil am hahawa ep ku. Tki g ge'e hu'u ab i gei thahm kahchim t amjed k hab masma meihim mo g kuhchki ch ma'ish g hemako tahpani mo waik e tahpanch g a'akimel ch shohshonkam shuhthagi. 11 K hab chehgig ihtha hu'u S-siwkam. Kutki g hemako tahpani mo waik e tahpanch g shuhthagi wabsh ge siwa. Tki mu'i hemajkam koi chum i'ik ihtha shuhthagi no pi si s-siw. 12 Tki g gi'ikkokam anghil am hahawa epai kuhu g e-kuikudkaj. Kutki g hemako tahpani mo waik e tahpanch g tash ch mashath ch huhu'u ge chuku. Kutki heg hekaj ha'as huhug g ha-tonlig ch ha'as tash pi tonod tash oitham ch chuhug oitham. 13 Nt am hahawa ep i nen k kah. Kuki si s-kaitham hab kaij g ba'ag an uhgk tha'athch, “Eh, si s-ta ehbithama! That wo si s-ta ehbithamak am ha wehhejed hegam mo an kih jewed thahm mat ab wo kaitha g kuikud ab ha amjed hegam waik anghil mat am ep wo kuhk.”

Revelation 9

1 Tki am hahawa ep kuhu g hetaspokam anghil g e-kuikudkaj. Kuni neith g hu'u. Tki ith am gei jewed thahm ab thahm kahchim t amjed. Kumtki ab mah hegai yahwi mo heg d wuikam wag mo pi hebai hug. 2 Kutki ihtha hu'u am kuhpi'o hegai wag. Tki g kuhbs hab masma ab i wuhsh mo ab amjed g si ge'e nahthakud. Kutki g tash tonlig wabsh wehsko chuku heg hekaj kuhbs ab amjed g wag. 3 Tki g ge'eged shosh'o ab i huhud amjed g kuhbs an thahm g jewed. Kumtki ab ha mah g gewkthag mat s-ko'okam wo ha juh hab masma mo g nanakshel. 4 Kum hab ha ahg mat pi wo ko'okam has juh g washai ch kukui ch wehs ha'ichu wuhshanig. Hegam atsh wo wa'i s-ko'okam has ha juh hemajkam mo pi ab hu cheposithas e-koka ab heg hekaj Jiosh cheposithakud. 5 Kumtki pi ha hiwigi ihtham shosh'o mat wo ha koktha ihtham hemajkam k wabshaba wabsh wo s-ko'okam ha sho'igch hetasp mashath ab. Kuki g s-ko'ok ab amjed g ha-sho'igchutha hab masma s-ko'ok mo g nakshel ke'i. 6 Kutki heg oitham hetasp mashath ihtham hemajkam wo chum si s-ko'im k wabshaba pi wo koi. 7 Kuki ihtham shosh'o hab mams mo hegam kakawyu mo e hekaj am cheggiadag ch ed. Kuki g ha-mohmi hab mams mo g u'uwi ha-mohmi. K an ha-mohmi an wahpkch g ohla gigiko. 8 Kuki g ha-wuhpiosha sha o'othham ha-wuhpiosha mams. Kuki g ha-tahtami hab mams mo g mawith tahtami. 9 Kuki g ha-babsho ab ha'ichukaj mam'aishch mo hab sha mams mo g wainomi koktoni. K g ha-a'an hab sha kaithag mo g mu'i cheggiakud kakalit an wohpo mat wo ha cheggia. 10 Kuki g ha-bahbhai ch ha-u'ush hab mams mo g nanakshel ha-u'ush. K g e-bahbhaikaj e nakog mat wo s-ko'okam has ha juh g hemajkam hetasp mashath ab. 11 Kuki ep ge kownalig. K ith am ha wanimed ch d hegai anghil mo nuhkuth g s-juhk wag ch hab chehgig am t-ne'oki ed Abbadon k ch am Greek ha-ne'oki ed hab chehgig Apollyon. K ith hab d ahga Ha'ichu Padchuththam. 12 Tki am i huhug ihtha wehpeg si s-ta ehbitham ha'ichu. K ith i thahm matki am hab ep wo e juh g gohk si s-ta ehbitham ha'ichu. 13 Tki g chuhthpokam anghil am hahawa epai kuhu g e-kuikudkaj. Kuni kah mo ab hema neok ab chuhchpulij amjed hegai ohla iagchulithakud mo am kehk ba'ich g Jiosh. 14 K hegai mo ab neok hab kaij heg wui anghil mo d chuhthpokam ch an u'ukch g kuikud, “Ha g thagito hegam gi'ik anghil mo am e wupulshch heg bahsho akimel mo hab chehgig Euphrates.” 15 Mtki am i ha thagito ihtham gi'ik anghil. Ihtham oki wa e nahtokch ith si wehhejed ohla ith si tash ed ith si mashath ab ch ith si ahithag ed mat wo ha koktha g hemako tahpani mo waik e tahpanch wehs hemajkam. 16 Kum am ni-ahgith mash d gohk siant mi-yohn (200,000,000) ihtham mo g kakawyu ha chehchejch. 17 Kuni am ni-tahgio neith g kakawyu ch hegam mo ha chehchejch. Kuki g ha-wainomi koktoni si s-wepegi ch ep s-o'am ch hab masma s-chehethagi mo g thahm kahchim. K g kakawyu ha-mohmi hab mams mo g maipith ha-mohmi. K ab ha-chihchini amjed ab i wuhshani g mei ch kuhbs ch s-uam uhw. 18 Tki g hemako tahpani mo waik e tahpanch g hemajkam e ko'ij ith hekaj waik ha'ichu mo ab wuhshani ha-chihchini amjed. 19 Kuki ihtham kakawyu hab wa'ap s-gewpkthag am ha bahbhai am. Ha-bahbhai oki hab mams mo g kohk'oi ch ab ge mohmi. K ith hekaj s-ko'okam has ha wua. 20 Kutki wabshaba hegam hemajkam mat an wih pi gm hu s-ohhoth g pi ap e-chu'ichig k ab wabsh kia ha ihm g jijawul ch ab ep ha ihm g e-jijoshchutha. Kuki eda ihtha pi am hu ha'ichu d i ha-wehmtadag. Ha-jijoshchutha o d wabsh ha'ichu ha-nahtoi ch pi ha'ichu neith ch pi ha'ichu kah ch pi sha'i oiopo no pi d wabsh ohla ch plahtha ch kohwli ch hothai ch uhs. 21 Ihtham hemajkam atki pi sha'i thagito g e-mu'adag ch e-hihoina ch ha'ichu ehsig ch hegai mo s-tohntom ha'ichu wua a'ai e wehm.

Revelation 10

1 Ntki hahawa ab nei matki ab hema i hud g s-gewk anghil ab thahm kahchim amjed. Ith oki g chewagikaj e enigadathch ch g kiohod an hab juhkch e-mo'o an. Kuki g wuhioshaj hab mahs mo g tash. K g kakhioj hab mahs mo g mehi am wuhshanim. 2 Ith oki g s-apko e-tadkaj am keishch g ge shuhthagi ch g s-ohgig e-tadkaj am keishch g jewed. Kuki an hab chu'ig g o'ohana nowij ed ch pi holiwkas. 3 Kuki am si s-kaitham neok ch hab sha kaithag mo g mawith ab todk. Kutki g wewa'ak tataniki ab hahawa uhpam neneo todkch. 4 Nt am haha wabsh wo i chum o'oha. Tki wabshaba ab hema neo thahm kahchim t amjed k hab kaij, “Pi g am hedai sha'i ahgith mo has kaij ihtham wewa'ak tataniki. Pi g an hu sha'i o'ohan.” 5 Kutki ihtha anghil mo an thahm kehk g ge kahchki ch jewed ab si uhgk i bei g s-apkojed e-nowi ab thahm kahchim wui 6 k hab kaij, “Jiosh o chum hekith an ha'ichug ch nahto g thahm kahchim ch jewed kahchim ch ge kahchki ch wehs ha'ichu mo am ha eda ihtham k hab kaij mat am wa e ai mat ge'e ha'ichu hab wo e juh. 7 Wewa'akkokam anghil at am wo kuhu g e-kuikudkaj. T am hab haha wo juh g Jiosh g s-a'agi e-apchutha mo wa am ha ahgith hegam e-pionagbad mo d Jiosh ha'ichu i tashogiththam.” 8 Kutki hegai mo wa ab neok ni-wui ab thahm kahchim t amjed ab ep neok k hab kaij, “Neh, an o u'ukch g o'ohana hegai anghil mo an thahm kehk g kahchki ch jewed. Am g hihm k ab beh'i.” 9 Nt am hih wui hegai anghil k ab tahni mat wo ni-mah. K hab kaij ab ni-wui, “Ab g be k huhgi. T wo si s-i'owik mapt wo huh ch wabshaba wo siwa am m-wohk ed.” 10 Nt ab bei g al o'ohana nowij ab k huh. K s-wohom si s-i'owi mant huh. Nt wabshaba am i bah. T hahawa si siwa am ni-wohk ed. 11 Kum ab hahawa ep ni-ahgith ihtha, “Am apt ep wo o'oha g Jiosh ha'ichu ahga ab ha amjed mu'i nahnko mahs mehk jewed thakam hemajkam ch kokownal ch nahnko kaitham neneoktham.”

Revelation 11

1 Kumtki ab hahawa hema ni-mah g kuintakud uhs k hab ni-ahg, “I g wuhshani k an kuint g Jiosh cheopiga ch g iagchulithakud k wo ha kuint hegam mo am e ho'ige'ithahun Jiosh wui amai. 2 T wabshaba hegai mo an wehgaj kolhaitas am i e thagito ha wui g nahnko mahs hemajkam. Pt pi an hu has wo i juh. Ihtham nahnko mahs hemajkam at wo kehiwia hegai mo d chum si Hekia S-ap'ekam Kihhim am oitham g gi'ikko wehst-mahm gamai gohk (42) mashath. 3 Jiosh o hab kaij, “Gohk ant wo ha mah g ni-pionag g gewkthag. T ihtham am wo ahgahi g ha'ichu ni-ahga ab wabsh sho'ig e enigadath g thahumkaj heg oitham hemako mihl gohk siant chuhthpo wehst-mahm (1260) tash.” 4 Neh, t am hahawa ni-chehgi matki has wo masmak ihtham gohk. Kutki hab wo masmak mo hegam gohk olive u'us wuhshanig mo wa heki hu o'ohanas ab ha amjed ch hab ep wo masmak mo hegam gohk lalampa mo am chuhch ge'e cheopi ch ed. 5 Kuki g mehi ab i wushke ha-chihchini amjed ch ha koktha g ha-obga. Kut hedai wo i chum s-ko'okam has ha juh k wo e koktha. 6 Ab oki mahks g ap'ethag mat wo kuh g thahm kahchim. T pi wo ha juhkath heg oitham mat am wo ahgath g Jiosh ha'ichu ahga. Ab oki ep mahks g ap'ethag mat wo eh'edch g shohshonkam shuhthagi k an wo i wuhshath g nahnko mahs si sho'igthag ch mumkithag ia jewed thahm. 7 Tki am wo i nahto g e-chikpan. Tki ab hema wo i wuhsh g s-ta ehbithamakam o'othham ge shuhthagi t amjed k e wepogithch g mischini ha'ichu thoakam ch wo ha cheggia k wo ha gewito k wo ha koktha ihtham gohk. 8 Tki g ha-ko'ithag am wo wehchkath wohg ch ed heg eda ge'e kihhim mat wa amai g s-ap'ekam t-kownalig ab e naggia kots t ab. Ihtha kihhim at e wepodath g si pi ap'ekam k hab e a'aga Sodom ch hab ep e a'aga Egypt. 9 Wehs nahnko kaitham neneoktham an wehs jewed thahm atki wo ha neithath mat ihtham gohk am wo wehchk waik eda hugkam tash. Kumtki pi wo ha hiwigi mamt gd hu wo ha hihash. 10 Tki g hemajkam wo si s-hehgigk mat koi ch wo pipiast k ab a'ai wo e mah g ha'ichu mahkigdag noki pi ha sho'igchuth ihtham gohk. 11 Am i thahm g waik eda hugkam tash, ni am neith matki g Jiosh ab haha wo i ha mah g thoakag. Tki wo gegokiwua. Kutki wehsijj hegam mat wo nei ihtha wo si s-ehbeni. 12 Kutki ihtham gohk wo kah mo ab hema si neok ab thahm kahchim t amjed ch hab kaij, “Ab g wo i hihim.” Kutki am wo i chehchsh thahm kahchim wui am chewagi ch ed am ha-neithag ed g e-obga. 13 Tki am wa'i hekaj am si s-gewkam wo u'ugij g jewed. Kutki g hemako tahpani mo wehst-mahm e tahpanch (1 10) g kihhim wo i gei. Kutki wewa'ak mihl (7000) hemajkam wo e ko'ij heg eda jewed u'ugij. Kutki hegam ha'i matki am wo wih wo sha'i si s-ehbeni k ab wo si has el g gewkthaj g Jiosh. 14 Ith o d i gokkokam ha'ichu s-ta ehbithamakam mat ia'i kuhgi. T wabshaba g waikkokam hahawa s-hohtam hab wo e juh. 15 Kut g wewa'akkokam anghil am hahawa kuhu g e-kuikudkaj. K am ha'i si s-kaitham neneok ab thahm kahchim t amjed ch hab kaij, “Wehs g kokownaltalig ia jewed thahm at d haha wo Jiosh kownaltaligk. Kut am wo ha thahmkath g si e-kehsha wehm i'ajed ch chum hekith.” 16 Kutki hegam gokko gamai gi'ik ge'eged ab i shulig k gd hu si kokawua k ab ihm g Jiosh 17 ch hab kaij: “T-kownalig Jiosh, chum ap hekith an ha'ichug ch am hahawa wehs i chehgi g e-gewkthag k am i himch g e-kownaltalig. Kuch heg hekaj ab si m-ho'ige'elith. 18 Hegam mo pi m-mahch o si s-babga. Kut e ai mapt wo ha lothai. Wehsijj g ko'i at wo i wuwhag k wo e lothaitach. Kupt wo ha mah g ha-mahkigdag g ha'ichu i m-tashogiththam ch wehs hegam mo d m-hemajkamga ch ab s-m-wohog elith, chum as hedai d wo k. E at ai mapt gm hu hab wo i ha juh hegam mo padchuth g jewed” Neh, bo kaij hegam ge'eged. 19 Kutki g Jiosh cheopi an thahm kahchim ch ed ab i e kuhpi'o. T am e chehgi hegai uhs washa mo am eda wehch g Jiosh ha'ichu ah'athadag. Kut am si tohonno g wepgi. K an kaithag g tataniki. T g jewed u'ugij. T g chea s-gewkam gei.

Revelation 12

1 Am atki hahawa ha'ichu si ge'e e chehgi an thahm kahchim ch ed. Am aniki neith mat g uwi am hema i wuhsh. Kuki g ipudaj hab mahs mo g tash. Ihtha uwi oki an keishch g mashath ch g gihko ab wahkch e-mo'o ab. K ith ab gamai gohk huhu'u an thadha. 2 Kutki wo ge madt. Tki ab i hihhi g s-ko'ok matki wo mahmadho. K hekaj am si shoshshak. 3 Am atki hahawa ha'ichu ep i e chehgi thahm kahchim ch ed. Niki am neith matki am hema i wuhshani k e wepogith g ge'e nehbig hujud ch ge s-wegi ch ge wewa'ak mohmi ch wehst-mahm a'ag. K g gigiko an hab chuhchu'ig wehs ha ab g mohmij. 4 Kutki g e-baikaj i ha chewaim g hemako tahpani mo waik e tahpanch g huhu'u k im hu hab i ha juh ab thahm kahchim amjed ch am ha nehnich jewed thahm. Kutki wo mahmadho hegai uwi. T ihtha Nehbig Hujud e wepogiththam am wui i kekiwua mat wo huh g madaj mat wabsh wo chum mahsi. 5 Kutki am i mahmadho g uwi. Tsh g madaj am d wo kownalk wehs ha thahm g jejewed. Mtki am ha hekaj bei g ali k gm hu i bei Jiosh wui. K heg an tha kownal thaikud ed. 6 Tki hegai uwi gm hu heb hu meh am tohono jewed ch ed. Am atki i apch g Jiosh wehhejed mat am wo e nuhkuth hemako mihl gohk siant chuhthpo wehst-mahm (1260) tash. 7 Tki an haha wabsh g cheggiadag hab e juh Jiosh kihthag ed. Hegai anghil mo hab chehgig Michael g e-anghiliga ha wehm oki cheggia g Nehbig Hujud. K wehs g jijawul am i wehmt g Nehbig Hujud. Tki wabshaba hegam Michael ha gehg. Kumtki hahawa pi ha hiwigi mas an ep wo ha'ichugk Jiosh kihthag ed. 9 Ihtha Nehbig Hujud atki gm hu si e wua ab amjed g thahm kahchim. Heg oki wud mash wa ko'oi masma ch hab chehgig ge Jiawul ch hab ep chehgig Satan. Ith o ha iattogith g wehs hemajkam an jewed thahm. Ab amt i ha nehnich g piongaj wehmaj. 10 Ntki hahawa hema ep kah an thahm kahchim ch ed. Kuki ith si s-kaitham hab kaij, “Neh, chum o hekith ab kehk g ge Jiawul Jiosh ba'ich ch ab chum ha'ichu ha abchuth g Jiosh hemajkamga. T wabshaba g Jiosh gm hu i wuhshath k am i maskogi g si e-Kehsha gewkthag. Kut hab wa masma i e maskogi g ha-tho'ibiathag g Jiosh hemajkamga. 11 “Jiosh si Kehsha at am i e thagito mat g eh'edaj e iagchul ab Jiosh wui. K g hemajkamgaj heg hekaj ab si hiwig ch s-ap ahgachug g wohokam ab amjed ch hab gehg g Jiawul, chum as hems wo e muhkith. 12 T wo si s-hehgigk wehsijj hegam mo am ha'ichug Jiosh kihthag ed. T wabshaba wo si e sho'igch hegam mo am ha'ichug jewed thahm. Jiawul at si s-bagam ab wo i hud jewed thahm s-mahchch mo pi sha'i tash hiwgithas.” 13 Pegih, am amtki wa tha'ich jewed thahm ihtha Nehbig Hujud mo d Jiawul. Tki wa eda heki hu madt hegai uwi. T g Nehbig Hujud an ha hekaj i hu'ui. 14 Kumtki ab a'anch g uwi g ba'ag a'ankaj mat gm hu wo tha'a k gn hu wo e ehstokch tohono jewed ch ed. Kumtki am wo nuhkuthath waik eda hugkam a'ahithag mat g Nehbig Hujud pi wo mua. 15 Tki g Nehbig Hujud ab haha wabsh i iawua g shuhthagi e-chini amjed am oithk hegai uwi mat gm hu wo i chum moht. 16 Tki wabshaba g jewed ab i wehmt g uwi, heg wa wepo mat ab i kuhpi'o g e-chini k im hu bah hegai shuhthagi mo ab tha'iwuni Nehbig Hujud chini amjed. 17 Tki haha wabsh woho'i bagat g Nehbig Hujud ab wui g uwi k amjed am i ha cheggia hegam mo ab d amjedkamaj. Uwi amjedkam oki d hegam mo ab s-wohog elith g Jiosh chehanig ch ab s-wohochuth hegai wohokam mat am i ha tashogi g Jesus. 18 Kuki am hahawa kehk g Nehbig Hujud ge shuhthagi koa an.

Revelation 13

1 Ntki haha wabsh nei hegai s-ta Ehbithamakam o'othham mo e wepogithch g mischini ha'ichu thoakam. Ith at ab i wuhsh ge shuhthagi t amjed k ge wehst-mahm a'ag ch wewa'ak mohmi. K an a'agaj an gigiko an shahsh'ai. K an mohmij an o'ohadag g si pi ap'ekam chechgig. 2 Ihtha s-ta Ehbithamakam oki hab sha mahs mo g ohshod. K g tahtdaj hab sha mams mo g judumi tahtad. K g chinij hab mahs mo g mawith chini. T g Nehbig Hujud ab mah g gewkthag ch e-kownaltalig wehs jewed thahm. 3 Hema g mo'oj o hab sha mahs matki wa e muhkith k wabshaba ep thoa k e chegito. Kut ab si has i el g hemajkam wehsko k am i oi ihtha s-ta Ehbithamakam. T wehs hemajkam ab i ihm g Nehbig Hujud nat pi ab mah g e-gewkthag hegai s-ta Ehbithamakam 4 k ab ep ihm g s-ta Ehbithamakam ch hab kaij, “Pi oki hedai hab sha'i masma mo ihtha. Pi atki hedai wo sha'i e nako mat wo cheggia.” 5 Kum wabsh hiwgith ihtha mat wo si pi kehg neokath. Kumtki ab ep mah g gewkthag am oitham g gi'ikko wehst-mahm gamai gohk (42) mashath. 6 Kut ihtha am ha hekaj pad neo ab wui g Jiosh k pi ap hekaj g chehgigaj ch nahnko ahg g Jiosh kihthag ch hegam mo an kih kihthaj ed. 7 Ab amtki hiwigi mat wo ha cheggia g Jiosh hemajkamga k wo ha gewito. Kumt ab ep mah g gewkthag am ha thahm g wehsko thakam hemajkam mo has i kaitham d neneoktham. 8 K wabshaba g Jiosh hemajkamga ha chechgig o an o'ohadag e tho'ibiakam ha-o'ohana ed. Ihtha o'ohana o d enigaj hegai mat kahwalkaj e muhkith am ha wehhejed. Ihtham e tho'ibiakam at pi ab hu wo ihm hegai s-ta Ehbithamakam. Hegam wa'i mo pi an hu o'ohadag heg eda o'ohana at ab wo ihmath hegai s-ta Ehbithamakam. 9 Am g wo s-ap i a'amichuth ihtha. 10 Hegam mo hedai d ha wuikam mat wo e kuhpach at hemho wa wo e kuhpach. Hegam mo d ha wuikam mat wo e ko'ij at hemho wa wo e ko'ij. K eda d ha-wuikam g Jiosh hemajkamga mat wo s-chu nakogath ch wo s-gewkk am e-wohochuthadag ed. 11 Ni hahawa ep neith matki ab hema ep i wuhsh gd hu jewed wecho amjed. Ith o hab wa'ap mahs mo g s-ta ehbithamakam ha'ichu thoakam ch ge gohk a'ag hab sha masma mo g kahwal a'ag ch hab masma neok mo g nehbig hujud. 12 Hegai s-ta Ehbithamakam mat wehpeg i wuhsh oki ab mahkch g gewkthag hegai mat am hahawa i wuhsh. K heg ab wehs ha chehani g hemajkam jewed thahm mat ab wo si has elithath hegai wehpeg s-ta Ehbithamakam matki uhpam e chegito. 13 K ith hiwgith mat am hab juh g si ge'e s-hasig ha'ichu. K wehs hemajkam neith mat ab i huduni g mehi thahm kahchim t amjed in jewed thahm. Bo wa masma wehs ha iattogith g hemajkam ith thahm jewed ch d s-chu Iattomakam Ha'ichu i Tashogiththam ch ab ha chehani mat am ha'ichu wo nahto mat heg wo wepogithask s-ta Ehbithamakam mat wehpeg i wuhshani k atki e muhkith g is-pahyokaj k uhpam e chegito. 15 Hegai s-chu Iattomakam Ha'ichu i Tashogiththam atki am ihbheiwua ith eda mat am e nahto. Tki heg hekaj e nako ihtha ha'ichu ha-nahtoi mat wo neok k ep wo ha koktha wehs hegam mat pi ab hu wo i shul wui. 16 Tki ihtha s-chu Iattomakam Ha'ichu i Tashogiththam i ha huilisamath wehs hemajkam matp hedai d wo i k mat an wo e chepos heg hekaj wehpeg s-ta Ehbithamakam cheposig. Kumtki wa woho an ge ha chechpos an s-apkojed ha-nohnhoi an ch ab ha-koka ab. 17 Pi atki hedai wo e nako mas ha'ichu wo ha nolawt o ha'ichu wo gagda, heg hi wa mat ab wo cheposigk g s-ta Ehbithamakam chehgigkaj o heg hekaj nuhmilo mo d chehgigaj nuhmilo. 18 Ith oki d si s-juhk ha'ichu. Kut am wo i mamche matp hedai wo s-chu amichuthath mo has d ahga hegai s-ta Ehbithamakam nuhmilo no pi hegai nuhmilo d chehgigaj hema o'othham. K ihtha nuhmilo d chuhthp siant chuhthpo gamai chuhthp (666).

Revelation 14

1 Ntki ab ep nei Kuki hegai mo kahwalkaj ab e chehgithch an kehk Sion tho'ag t ab. K ith wehm g siant gi'ikko gamai gi'ik mihl (144,000) hemajkam am gegok. K an ha-koka an o'ohadag g chehgigaj hegai mo kahwalkaj ab e chehgithch ch heg ohg chehgig. 2 Kuni kah mo ab hema neok thahm kahchim t amjed ch hab kaithag mo g ge'e shuhthagi s-kaitham med ch hab kaithag mo g tataniki an thoahim. Hegai mani kah o hab kaithag mo mu'i a'alpa am e gew. 3 Hegam hemajkam mani wa ha neith oki am ahg g wechij ne'i ch am gegok wui hegai kownal thaikud ch hegam ha wui gi'ik ha'ichu thoakam ch hegam ge'eged. Kutki pi hedai ep wo e nako mas wo mai g ha-nei. 4 Ihtham oki d hegam mat pi sha'i ha hohont k si e nuhkuth mo pi ha wehm wohppo. Kut am ha wehhejed e muhkith hegai mo kahwalkaj ab e chehgithch k ha tho'ibia. Kuki ihtham an oithahim mo hebai i oimmed ch d wehpegkam e tho'ibiakam. 5 Pi oki hekith ha'ichu ha iattogith ch pi ha chu'ichig. 6 Ntki hahawa hema ep nei g anghil. K ith an tha'a uhgk ch ahgahim g pi ha huhugetham s-kehg ha'ichu ahgaj g Jiosh ab ha wui g nahnko kaitham neneoktham an wehsko jewed thahm. 7 Si o s-kaitham hab kaij, “Ab g wo si has elith g Jiosh ch ab ihm. E at ai mat wo ha lothai g hemajkam. Ab g wo i tohtonwua k ab wo i ihm g Jiosh. Heg at nahto g thahm kahchim ch jewed ch ge shuhthagi ch g shohshonkam shuhthagi.” 8 Tki am hahawa hema ep i oi hegai wehpeg anghil k hab kaij, “I at gei ihtha ge'e kihhim. Wehs hemajkam o am hab wua g pi ap'ekam a'ai e wehm ith hekaj kihhim. K heg hekaj hab e a'aga Babylon. Shahag wepo mo ha nawkkoichuth.” Neh, bo kaij hegai gokkokam anghil. 9 Tki g waikkokam anghil am i ha oi hegam gohk k si s-kaitham hab kaij, “T wo ha mah g Jiosh g s-ko'ok namkithadag wehs hegam mo hedai ab si has elith hegai s-ta Ehbithamakam ch ab chechposithas heg hekaj cheposigaj e-koka ab o an e-nohnhoi an. Ith o heg wa wepogithas mat g Jiosh ab wo ha mah g s-ko'ok nawait nat pi am wo s-ko'okam ha mehi g ha'ichu s-mehithagkaj am ha tahgio g s-ap'ekam anghil ch hegai mo kahwalkaj ab e chehgithch. 11 T g kuhbthaj hegai mehi mat s-ko'okam wo ha mehi am wo wuhshanith uhgk ia'i amjed ch chum hekith. Pi o am hu ha'ichug g ulinihogig ha wehhejed hegam mat ab i shul wui g s-ta Ehbithamakam ch ab wui g wepogithaj k ab e chepos heg hekaj chehgigaj.” Neh, bo kaij ihtha anghil. 12 Ith att hekaj hemho wo wa si s-chu nakogath ahchim mach d Jiosh hemajkamga ch ab s-wohog elith g Jiosh chehanig ch am s-gewkam oith g Jesus. 13 Ni hahawa hema ep kah. Kuki ith ab neok thahm kahchim t amjed ch hab kaij mantsh an wo o'oha ihtha, “T wo si s-ap e taht hegam mat wo koi, ab s-wohochuthch mo g Jesus d ha-kownalig.” K g Hekia S-ap'ekam Gewkthag hab kaij, “Tho si wohokam ihtha. T wo si s-ap e ulinihogi ihtham heg amjed s-wehch e-chikpan k ab wo bei g e-mahkigdag heg wehhejed.” 14 Ntki hahawa nei g s-toa chewagi. Kuki an ith thahm hema thak ch hab mahs mo g Jiosh si Kehsha. K g ohla gihko ab e wahkch mo'oj ab. K an u'ukch g s-mu'uk ohso. 15 T ab hema i wuhsh g anghil ab amjed g ge'e cheopi k ab si s-kaitham neok ch hab kaij heg wui mo an tha chewagi ch ed, “Heg o wa wepogithas mapt an wo hikkumia g uhdwis bahithag g e-ohsokaj am wehsko jewed thahm. E at ai g ge'e lothaita tash. Kupt am wo i ha hemapai g hemajkam heg wehhejed.” 16 Kut hegai mo an tha chewagi thahm ab si i widu g e-ohso an jewed thahm heg wa wepo mat am hab wo juh g oda. 17 Niki hahawa hema ep neith g anghil. T heg ab i wuhsh cheopi t amjed an thahm kahchim ch ed k an hab wa'ap hema u'ukch g s-mu'uk ohso. 18 K am hema ep kehk g anghil ch am nuhkuth g nahtha ab ab g iagchulithakud. Ith at am hih heg wui mo g s-mu'uk ohso an u'ukch k si s-kaitham hab kaij, “E at ai g ge'e lothaita tash. K heg wepogithas mapt an wo hikkumia g uhdwis g e-ohsokaj.” 19 Kut wa woho ab i widu g anghil g e-ohso an jewed thahm k am hikkumia g uhdwis k am ha shul kehiwinakud ch ed. Ith o am chehgithch mat g Jiosh s-ko'okam wo ha namkith. 20 Kum ha kehiwia g uhdwis gm hu jeg ed ab amjed g kihhim. T g ha-eh'ed ab i meh ab amjed g kehiwinakud hab masma mo g wi'inthag mo gohk siant mihya chewaj ch hetasp tad s-juhk.

Revelation 15

1 Ntki hahawa ep nei g si ge'e chehgitha an thahm kahchim ch ed. Wewa'ak anghil oki u'a g wewa'ak sho'igthag. Ihtham oki d si ha oithchkam sho'igthag. Jiosh atki ith hekaj am wo i kuhgi g s-gewk e-a'appemadag. 2 Neith ani mo am ha'ichu tadani ch hab sha mahs mo g mi-lihtha ch g mehi wehnags. Ha ani ep neith hegam mat gewito hegai s-ta Ehbithamakam pi ab hu has elithch g wepogithaj ch ab hu cheposig heg hekaj chehgigaj ch nuhmilo. Am oki gegok hugithaj an ihtha mo sha mi-lihtha mahs ch g a'alpa an u'ukch mat g Jiosh ab ha mah. 3 Mosesbad ch hegai mo kahwalkaj ab e chehgithch oki ab ha mahkch g ne'i. K ith am a'aga: “T-kownalig Jiosh, thap si s-gewkthagkam. K g ha'ichu hab m-juni d si ge'e ha'ichu ch sha'i si s-kehgaj. T-kownalig an wehsko jewed thahm, tho si s-ap'ekam ch wohokam g m-himthag. 4 Wehsijj att ab wo si has i m-el. Pi at hedai wo sha'i pi am hu ah map d si ha'ichu nap pi ahpi d si hekia s-ap'ekam. Wehs nahnko mahs hemajkam at ab wo i hihim k ab wo i shul m-wui no pi wehsijj neith g si s-ap'ekam ha'ichu hab m-juni.” 5 Am i thahm ani hahawa ep neith moki ab kuhpi'okas g Jiosh cheopiga an thahm kahchim ch ed. Kuki heg eda am ha'ichug hegai ikus kih mo hab d ahga mo g Jiosh am ha wehmaj g e-hemajkamga. 6 Tki ab i wuwha g wewa'ak anghil k u'a g wewa'ak si oithchkam sho'igthag ab amjed g cheopi. Ihtham anghil oki si s-kehg s-tohtam e enigadathch ch g ohla babshodag an hab juhkch e-babsho an. 7 Tki hema hegam gi'ik ha'ichu thoakam ab ha mah ihtham wewa'ak anghil g wewa'ak ohla hohas-haha'a. Kuki ihtham shuhshuthch g s-ko'ok namkithadag. 8 Hegai cheopi o ab wabsh i shuhthags g kuhbskaj no pi am ha'ichug g s-tondam gewkthaj g Jiosh. Kut pi hedai wo e nako mas an hu wo i wah cheopi ch ed am hugkam mat wo kuhgi ihtham wewa'ak sho'igthag mat u'apa hegam wewa'ak anghil.

Revelation 16

1 Kuni wa hema ep kah. K ith am s-kaitham neok ab amjed g cheopi ab ha wui ihtham wewa'ak anghil ch hab kaij, “Am g wo hihim k wo iawua g s-ko'ok namkithadag an jewed thahm ab ha amjed hegam hohas-haha'a.” 2 Tki g wehpegkam anghil am him k am iawua an thahm g jewed hegai mo wasibch e-hoas-ha'a ch ed. Kutki g si s-ko'ok ch s-ta ehbithama hihiwthag ha ai hegam mo ab ha ab hab chu'ig g s-ta Ehbithamakam cheposig ch ihtham mat i shul ab wui g wepogithaj. 3 Tki amjed g gokkokam anghil am hahawa epai iawua hegai mo wasibch an ge shuhthagi thahm. Tki g shuhthagi hab masma e eh'edch mo g muhki eh'ed. Tki wehs ha'ichu koi am ge shuhthagi ch ed. 4 Tki amjed g waikkokam anghil am epai iawua hegai mo wasibch an a'akimel ch ed ch shohshonkam shuhthagi ch ed. Kutki e eh'edch g shuhthagi. 5 Kuni kah mo hab kaij ab Jiosh wui hegai anghil mo nuhkuth g shuhthagi: “Thap si hekia s-ap'ekam Jiosh ch chum hekith an ha'ichug. K ab d ha-wuikam ihtham g s-ko'ok namkithadag. 6 Iawua at g ha-eh'ed g m-hemajkamga ch hegam ha'ichu i m-tashogiththam. Kupt heg hekaj g eh'ed ab ha mah mat wo ih. Ith o wa si e gahgith ihtham.” 7 Niki amjed hahawa hema ep kah. K ith ab neok iagchulithakud amjed ch hab kaij, “T-kownalig Jiosh, thap si s-gewkthagkam. K g m-lothaita si woho ch si s-ap'e.” 8 Tki amjed g gi'ikkokam anghil am iawua hegai mo wasibch an tash t an. Kut ha mehi g hemajkam g e-s-tonikaj. 9 T eda ihtham pi gm hu s-ohhoth g pi ap e-chegitoi. Jiosh o ha hiwgith mat wo e sho'igch. K heg hekaj ab si s-ko'okam has ahg ch pi ab hu has elith g gewkthaj. 10 Tki amjed g hetaspokam anghil am iawua hegai mo wasibch an thahm g s-ta Ehbithamakam kownal thaikud. Kutki g s-chuhugam an gei wehsko s-ta Ehbithamakam kownalitalig ed. Kuki g hemajkam si e kihk'ishch pi nakogch g s-ko'ok 11 ch si pi kehg neneok ab Jiosh wui heg hekaj e-hihiwthag ch ha'ichu s-ko'ok ch wabshaba pi gm hu s-ohhoth g pi ap e-chegitoi. 12 Tki amjed g chuhthpokam anghil am iawua hegai mo wasibch heg eda ge akimel mo hab chehgig Euphrates. Tki gaksh ihtha mat ab gahi wo i huhud g kokownal ab si'al wecho amjed. 13 Niki hahawa ep neith g waik pi kehg gewpkthag. K ihtham hab mahs mo g babath ch d jijawul ch ab i wuwha ha-chihchini amjed g Nehbig Hujud ch g s-ta Ehbithamakam ch g s-chu Iattomkam Ha'ichu i Tashogiththam ch hab wua g s-hasig ha'ichu. 14 Ihtham waik gewpkthag atki am hihi ha wui g kokownal an wehsko jewed thahm mat ab wo i ha hemapai. Kutki ihtham kokownal wo ha cheggia g Jiosh hemajkamga. 15 (Bo kaij g Jiosh alithag, “Ab g wo ni-kaiham. Bant masma s-a'agi wo jiwia mo g s-chu ehskam. T wo s-ap e tahtkkath hegam mat wo s-nenenashanik. T wabshaba hegam mat pi hab wo masmak wo si e elithath hab sha masma mo an wabsh s-thahpkam oiopo.”) 16 Tki amjed hegam waik gewpkthag am ha u'apa g kokownal amai mo g Tutuligo hab a'aga Armageddon. 17 Tki amjed g wewa'akkokam anghil am iawua hegai mo wasibch an hewel ch ed. K ab hema si s-kaitham neok ab amjed hegai kownal thaikud mo am tha cheopi ch ed hab kaij, “Am at hab e juh.” 18 Tki am si tohonno g wepgi k am si kokp g tataniki. Tki g jewed si s-gewkam u'ugij. Pi oki hekith hab sha'i masma u'ugij g jewed am i amjed mat an e nahto g o'othham. Ith oki d si ge'e jewed u'ugij mo pi hebai hab sha'i masma. 19 Tki hegai ge'e kihhim waikpa e tahp. Kutki wehsko g kihhim gn hu a'ai jewed thahm i shul. Jiosh o am wa s-chegitok hegai ge'e kihhim mo hab e a'aga Babylon ch ab mah g s-ko'ok namkithadag. Ith at heg wo wepogithask mat ab wo ih g si s-nawmthag nawait nat pi heg hekaj si s-ko'okam wo e juh. 20 Kutki wehs g si'iskod jejewed ch thohtha'ag wo heb hu hihi. 21 Tki g sha'i si ge'eged chea an wo i shul. Ihtham oki hehemako am hu i siant s-wehch ch atki ab wo i shul thahm kahchim amjed am ha thahm hegam pi ap'ekam hemajkam. Kutki ihtham ab wo si pad neneo Jiosh wui.

Revelation 17

1 T amjed hegam hema wewa'ak anghil mo an uh'ukch g wewa'ak hohas-haha'a am jiwia ni-wui k hab kaij, “Ab g i hihm k neith ihtha ge'e kihhim mo am miabithch kehk g mu'i a'akimel ch heg wepogithas mo g si pi ap'ekam chehpa'awi. Ith at wehsko wo ma'ish g jewed g pi ap'ekamkaj. 2 Kokownal wehsko jewed thahm at heg hekaj hab wo juh g pi ap'ekam. T g hemajkam wehsko jewed thahm wo noda hab juhkch g s-tohntom ha'ichu hab masma mamt wo nawkk i'ok g nawait. Neh, nt am wo m-chehgi mat has masma ab wo bei g s-ko'ok e-namkithadag ihtha pi ap'ekam kihhim.” 3 T g Hekia S-ap'ekam Gewkthag ab si i ni-wehmt. Tki g anghil am i ni-bei tohono jewed wui. Ni am g uwi neith. Kuki ith an thaichug s-wegi s-ta ehbithamakam ha'ichu thoakam ab. K ith wewa'ak mohmi ch wehst-mahm a'ag. K g pi ap'ekam chechgig an o'ohadag wehsko ab. 4 Ihtha uwi o si s-ihbhaimagim ch s-wegima e enigadathch ch g ohlakaj ch s-kehg hohothaikaj e hehosithch. K an nowij ed hab chu'ig g ohla tahsa ch shuhthags g si s-uam ha'ichu. Ith o hab d ahga mo d wabsh tohnto ihtha kihhim. 5 Ab koaj ab o o'ohadag g chehgig. K ith s-a'agi has d ahga ch hab chu'ig, “Si Ge'e Babylon kihhim o hab sha masma mo d ha-je'e g wehs chechpa'awi ch totonto ith thahm jewed.” 6 Neith ani mat sha'i si s-ap e taht ihtha uwi mat e ko'ij hegam mat pi thagito g Jesus. Heg o wa wepo mat nawm i'ok g ha-eh'ed. Kunt am i neithok wabsh woho'i si has ni-taht. 7 K ab ni-kakke g anghil ch hab kaij, “Shahchu apt ahgk si has e taht. Am ant wo m-ahgi mo has d ahga ihtha map s-neithma. 8 Ihtha s-ta Ehbithamakam mo wewa'ak mohmi ch wehst-mahm a'ag o d chum thoakamkahim ch hahawa e muhkith k wabshaba ep wo e chegito k ab wo i wuhsh s-juhk wag t amjed k hahawa ep wo e muhkith. T heg hekaj wo si has i e taht g pi e tho'ibiakam. Ihtham o g ha-chechgig pi an hu o'ohadag heg eda o'ohana mo an g ha-chechgig o'ohadag g e tho'ibiakam. 9 “K d ha-wuikam g Jiosh hemajkamga mat wo s-amich ihtha. Hegam wewa'ak mohmi o d wewa'ak ka'akwulk. K ihtham ha thahm thaha ihtha uwi. Ihtham mohmi o d ep wewa'ak kokownal. 10 Hetasp ihtham at im hu hab i e juh. K hemako d wabsh kia kownal. Kut hemako koi am hu i thahiwua k hekith am wo i thahiwua k pi sha'i tash am hu wo thakath. 11 Hegai s-ta Ehbithamakam mat e muhkith at d wo gigi'ikkokam kownalk. Ith o ha wehm chikpan hegam wehpeg wewa'ak kokownal ch gm hu wo him k wo e muhkith. 12 “Hegam wehst-mahm a'ag map neith o hab d ahga mat wehst-mahm kokownal ab ep wo i wuwha. Ihtham at he'es ab wo i wehmt hegai s-ta Ehbithamakam 13 k ab wo mah g e-gewkthag no pi wehsijj e wepo masma ha'ichu hab elith. 14 Ihtham at wo cheggia hegai mo kahwalkaj ab e chehgithch. T oi wa heg wo ha gewito no pi d ge'e kownal am ha thahm g kokownal. T hegam mo si s-gewkam am oith ihtha mo kahwalkaj ab e chehgithch am wehmaj wo ha gewito nat pi ab i ha waith k am i ha chuhcha.” 15 K hab ep kaij g anghil ab ni-wui, “Am ap neith mo ihtha uwi am mu'i ha thahm thaha g ge shuhshugi. K ith hab d ahga mat g ge'e pi ap'ekam kihhim am wo thahmkath mu'i jejewed ch mu'i nahnko mahs hemajkam. 16 Kut g Jiosh hab wo ha juh hegam wehst-mahm kokownal mat ab wo wechokath g s-ta Ehbithamakam. Kut e wehm wo si s-keh'ithath hegai ge'e kihhim mo wepogithas g pi ap'ekam uwi ch wehs ha'ichu wo wohppo'i. T heg gm wabsh wo i thahpkath. T ihtham wo huh g chuhkugaj k wo hugio g meikaj. Neh, bat wa masma am oithk hab wo e juh mo has i kaij g Jiosh. 18 Ihtha uwi map neith o d hegai ge'e kihhim mat s-gewkam an wo ha u'ukch g kokownal a'ai jewed thahm”

Revelation 18

1 Am i thahm, ni hahawa ep neith g anghil. Tki ith ab i hud thahm kahchim t amjed k ge'e u'ukch g gewkthag. K ab amjed g tonlig wabsh wehsko tonod an jewed thahm. 2 K am si s-kaitham neok ch hab kaij: “I at gei ihtha ge'e kihhim mo hab masma mo g chehpa'awi. Jijawul o ebkioth. Nahnko mahs s-u'amakam ch pi a'amkam u'uwhig o am kih eda. 3 Bat wa masma e padch g kihhim nat pi mu'i ha padch g hemajkam g pi ap'ekamkaj. Heg o wa wepo mat ha nawkkoich. T am wehmaj ab wo bei g s-ko'ok namkithadag. T g kokownal wehsko hab juh g pi ap'ekam ith hekaj kihhim mo g chehpa'awi wepogithas. T g s-kakais wehsko jewed thahm ba'ich i s-e kakaisch heg hekaj pi ap'ekam mo am hab e wua.” Neh, bo kaij g anghil. 4 Ni hahawa ep kah mo ab neok g Jiosh thahm kahchim amjed ch hab kaij: “Ab g wo i wuwhaki, ni-hemajkamga. Ab g wo i wuwhaki ab amjed ihtha kihhim mo hab sha masma mo g chehpa'awi. Pi g am hu wo wehmajk heg eda pi ap'ekam. Pi g ab hu wo wehmaj beh'i g s-ko'ok namkithadaj. 5 Pi ap chu'ichigaj o sha'i si uhgk sipulkas. Kuni s-chegito g pi ap chu'ichigaj. 6 S-ko'okam at hab em-juh. Kumt uhpam s-ko'okam hab wo juh. Ab g ba'ich wo i nodgith g chu'ichigaj wui. Heg at wo wa wepothagk mamt am wo i shuhthath g kohbaj heg hekaj i'ithag mo e thahm ba'ich i s-gewk mat wa has i masma am hab em-juh. 7 Ab g wo mahki g ha'as sho'igthag ch pi ap tahhathkam mo wa he'es hejel ab e mahkch g ab si has e-elithadag ch kaisthag. T wo si e sho'igch hab masma mo g hejel wi'ikam uwi k eda hab e elith mo d kownal ch pi hekith wo e sho'igch. 8 Kut ith hekaj g sho'igthaj wehs ab wo i shul thahm wabsh shel i e oitham. K g sho'igthaj d s-ko'ok mumkithag ch pi ap tahhathkam ch bihugig Am at wo meitto ihtha kihhim. S-gewkthag ani ch wo lothait k s-ko'okam wo namkith.” Neh, bo kaij g Jiosh. 9 Hegam kokownal mo wehmaj hab junihim g pi ap'ekam at wo si shoanith wehhejed am i neithok mamt mei. 10 Ihtham o ga hu wabsh mehk gegok no pi s-ehbith mat wo nei g sho'igthaj ch hab kaij: “Ih, sho'ig! Ihtha si ge'e s-gewk kihhim mo e wepogith g Babylon at sha'i si s-hohtam ab bei g s-ko'ok e-namkithadag.” 11 K g s-kakais ith thahm jewed hab wa'ap si shoani ch pi ap e tahtk wehhejed no pi hahawa pi hedai ha nolawt g ha-gagli. 12 Pi oki hedai ha nolawt g ha-ohlaga ch ha-plahthaga ch s-namkig hohothai ch g s-namkig ha-lohbaga ch g mamskal ch g s-namkig uhs. Nahnko ha'ichu oki hab wua g al-huanthi a'agkaj ch s-namkig uhs ch kohwli ch wainomi k ch s-namkig hothaikaj. K oi wa pi hedai ha nolawt. 13 Am o chum gagda hegai mo haschu am wehnaths g ha'ichu hugi ch nahnko mahs s-ap uhwchu ch nawait ch e ko'atham a-saithi ch chu'i ch pilkani ch haiwani ch kahwal ch kakawyu ch kakalit ch nenehol ch chum hems g o'othham thothakag. K pi hedai ha nolawt. 14 K hab kaij ihtham s-kakais ab wui hegai kihhim: “Wehs hegai map ab si tatchua at huhug. M-kaisthag ch s-m-kehgthag at im hu hab i e juh. Kupt pi thahm ep wo ha edagi.” 15 Hegam mat s-e kakaisch am ha'ichu gagdak atki ga hu wabsh mehk wo gegokk no pi s-ehbith g sho'igthaj. Ihtham at wo si shoanith ch wo pi ap e tahtkkath 16 ch hab wo kaijchith: “Ih, sha'i si sho'ig ihtha si ge'e kihhim mat wa eda ab wo si s-kehg e enigadathch g s-ihbhaimagi ch s-wegi lohbakaj k ab hab wo juhkchith g ohla hehosimhuna ch s-kehg hohothai. 17 T eda sha'i si s-hohtam wehs heb hu shul g e-kaisthag.” Wehsijj oki ga hu wabsh mehk gegok hegam mo d ha-ge'ege'ejig an wapalko ch ed ch hegam mo an thadhaichug ch hegam mo d pion an wapalko ch ed ch wehs hegam mo ab behe g e-kihthag ab ge shuhthagi t amjed. 18 Am o meihim g kihhim ch g kuhbs am wuhshani. K wehs ihtham am neith ch si hihnk ch hab kaij, “Pi o hekith hema kihhim hab sha'i masma d ge'e kihhim.” 19 T ihtham ab hahawa iawua g jewed e-mo'o ab k si s-kaitham hihnk ch si shoani ch hab kaij: “Sho'ig, sho'ig, ihtha si ge'e kihhim. Ihtha kihhim o wud mat ia s-e kakaisch hegam mo e'edgith g wapalko. Sha'i si s-hohtam at wehs ha'ichu heb hu shul ihtha kihhim.” Neh, bo kaij ihtham pi ap'ekam hemajkam. 20 Kut oi wa d wo si ge'e s-hehgigk an thahm kahchim ch ed mat i gei ihtha pi ap'ekam kihhim. Jesus chuhchai ch Jiosh ha'ichu i tashogiththam ch wehs g Jiosh hemajkamga at wo si s-hehgigk. Jiosh at ab wo abch ihtha kihhim g chu'ichig mo has ha juhkchkahim. 21 Kut am hahawa hema i e chehgi g si s-gewk anghil k am hema bei g hothai. Ihtha hothai oki ha'as ge'ej mo g si ge'e chu'ikud. T g anghil am tha'ich ge shuhthagi ch ed k hab kaij: “Bat masma am wo si e tha'ich ihtha ge'e kihhim mat pi hekith hedai ep wo neithath. 22 Hegam mumsigo mo ha gew g a'alpa ch uhs kukuikud ch kohwli kukuikud at pi hekith am hu ep wo piast amai. Pi at hekith am hu ep wo e chikp g nahnko mahs chikpan amai. Pi amt hekith am hu wo chu'ath. 23 Pi at hekith am hu ep wo e mehmheith g lalampa. Pi at hekith hedai am hu ep wo e hohont. Hegam mo d s-kakais iia o wa u'ukch g gewkthag wehsko jewed thahm. K wa ia ge has e wuihim g mamakai ch hekaj ha iattogith g hemajkam an wehs jewed thahm. T eda wehs huhug ihtha.” Neh, bo kaij hegai anghil. 24 Kumtki s-ko'okam wo namkith g kihhim nat pi ia e ko'ij g Jiosh ha'ichu i tashogiththam ch Jiosh hemajkamga. Chum o hems d chu'ichigaj hegam mat gn hu a'ai jewed thahm e ko'ij.

Revelation 19

1 Nt amjed hahawa ha'ichu kah. K ith hab kaithag mo sha'i mu'i hemajkam am neneok an thahm kahchim ch ed ch hab kaij: “Ab ach si has elith g Jiosh. Tho'ibiathag ch ab has elithadag ch gewkthag o ab d amjedkamaj g Jiosh. 2 Tho wohokam ch s-ap'ekam g Jiosh lothaita nat pi s-ko'okam ab namkith ihtha si pi ap'ekam chehpa'awi mo padchuth g jewed heg hekaj e-tohntomthadag. Jiosh at s-ko'okam ab namkith nat pi ha koktha g piongaj.” 3 K am ep Hihnk ch hab kaij: “Ab ach si has elith g Jiosh. Mei at ihtha ge'e pi ap'ekam kihhim. T g kuhbs ab amjed chum hekith am wo wuhshanith.” 4 K eda an thahm kahchim ch ed thaha g Jiosh e-kownal thaikud an. T ab wui i tohtonwua hegam gokko gamai gi'ik ge'eged k ab si has elith ch hab kaij, “Pegih neh, ab ach si has elith g Jiosh.” 5 K ab hahawa hema neok miajed g Jiosh kownal thaikud ch hab kaij: “Ab g wo si has i elith g Jiosh ch ab s-wohog elith ahpim piongaj ch ahpim wehs hemajkam mam ha'i d s-has haha'ichu ch ha'i pi d has haha'ichu.” 6 Ni hahawa ep kah mu'i hemajkam. K g ha-ne'oki hab kaithag mo g s-gewk shuhthagi an med ch hab kaithag mat g tataniki ab si s-kaitham kop. Ha ani kah mo hab kaij: “Ab ach ihm g Jiosh no pi d si uhgk t-kownalig ch u'ukch g gewkthag am wehs hemajkam ha thahm. 7 Ab att wo si i s-hehgigk ch wo s-ap t-tahtkkath ch ab wo si has i el g gewkthaj. E at ai mat ab wo i ha hemapai g e-hemajkamga hegai mo kahwalkaj ab e chehgithch. T heg wo wa wepothagk mo g si ge'e hohnta. T g hemajkamgaj ab si e nahto wehhejed 8 hab sha masma mat g wo kuntam ab si s-tohama wo e enigadath. Ihtha lohba o wepogithas g s-ap'ekam ha'ichu hab ha-juni.” 9 K hab kaij g anghil ab ni-wui, “An g o'ohan ihtha: Ab at wo i ha hemapai g e-hemajkamga hegai mo kahwalkaj ab e chehgithch. Kut wo si s-hehgigk hab masma mamt wo si s-hehgigk am ha-gegosig ed g wo ha hohntam.” K hab ep kaij g anghil, “Ith o d si s-wohokam Jiosh ne'oki.” 10 Kunt am hahawa si i gei wecho k ab si has i el. K wabshaba hab kaij ab ni-wui, “Pi g hab masma ab si has ni-elith mani d Jiosh. Ab g si ihm g Jiosh. Thani wabsh piongaj hab masma mam ahpim mam ab s-wohochuth hegai wohokam mat g Jesus am i em-tashogi.” Neh, bo kaij g anghil. K ihtha wohokam d hegai mo ab amjed an u'ukch g e-amichuthadag g Jiosh ha'ichu i tashogiththam. 11 Nt hahawa ep nei g thahm kahchim. T i e kuhpi'o. K am hab chu'ig g s-toa kawyu. K an ab tha hegai mam hab a'aga Wohokam. Heg o d hegai mo am s-ap ha lothait ch s-ap hab wua g cheggiadag. 12 Wuhpuij o hab masma s-mahs mo ab mehmheihim. K mu'i gigiko an hab chuhchu'ig mo'oj an. An o hema o'ohadag g chehgig ab ab. K heg wa'i hejel s-mahch mo haschu wud. 13 K g lihwaj d wabsh i eh'ed. Kum hab a'aga Jiosh Ne'oki no pi g Jiosh am gahi wuhshanim neok ab t-wui. 14 T g mu'i anghil am i oi hab masma mo g shonthal k g s-tohta kakawyu ha chehchejch ch s-tohtam e e'enigadathch. 15 Is-pahyo o ab i wuhshanis chinij amjed hegai Jiosh Ne'oki. T ith heg hekaj wo ha gewito g jejewed k am hahawa s-gewkam wo i ha wanim g wainomi usagakaj k s-ko'okam wo ha namkith hegam mo bagachuth g Jiosh. Ith at heg wo wa wepothagk mamt g uhdwis wo kehiwia. 16 Ab lihwaj ab ch an kahioj an o ith chehgig an o'ohadag ‘Si Ge'e Kownal am Wehs ha Thahm g Kokownal.’ 17 Ni hahawa hema ep neith g anghil. Ith o am kehk tash ch ed. K eda g u'uwhig an nen'e hewel ch ed. K ith ab ha wui si s-kaitham neok ch hab kaij, “Am g wo hihim k am wo i e hemapai mat g Jiosh am hab wo em-juni g si ge'e gegosig. 18 T wo em-gegos g pi ap hemajkam ha-chuhkugkaj. Kumt chum hems wo huh g ha-chuhkug g kokownal ch shonthal ha-ge'ege'ejig ch s-has haha'ichu ch ep wo huh g ha-chuhkug g kakawyu ch hegam mo ha chehchejch ch hegam mo d nenehol.” 19 Ni hahawa ep neith hegai s-ta Ehbithamakam mat wa heki hu in i wuhsh. Wehs g kokownal an jewed thahm at am i ha hemapai g e-shonthalig k am i wehmt g s-ta Ehbithamakam mat wo cheggia hegai mo g s-toa kawyu cheshaj. Kut ith g shonthaligaj i wehmt. 20 Kumt bei hegai s-ta Ehbithamakam ch heg ehp s-chu Iattomkam Ha'ichu i Tashogiththam. Tho ihtha mo wa ha iattogith g s-hasig ha'ichukaj hegam mo ab hab juhkch g s-ta Ehbithamakam cheposig ch hegam mat ab i shul wui g wepogithaj. Kumt ha ui hegam gohk k wabsh thoakk am ha nehnich heg eda kahchki mo chum hekith meihim. 21 Hegai mo wa g s-toa kawyu cheshaj at ha koktha g ha-shonthalig heg hekaj is-pahyo mo wa kamshch ab e-chini ed. Kut g u'uwhig am huh g ha-chuhkug k si s-kokwoth.

Revelation 20

1 Ni amjed hahawa hema ep neith g anghil. T ith ab i hud thahm kahchim amjed k an u'ukch g yahwi ith wehhejed s-juhk wag ch an u'ukch g chew e hukshchim wainomi. 2 K am thaha g Nehbig Hujud ch d ge Jiawul ch hab chehgig Satan. Tki g anghil an si wulshp 3 k am tha'ich heg eda s-juhk wag k ab si yahwidath k ab ep si bithsh. T hab pi ab hu ep wo i wuhshani k pi ep wo ha iattogi g hemajkam am hugkam mat wo e ai g hemako mihl a'ahithag. Ith at i thahm am hi wa ep wo sha'i e thagito pi sha'i tash. 4 Kuni hahawa ep neith g kokownal thathaikud ch hegam mo an thadha. Ihtham amtki ab ha mah g gewkthag mat d wo u'usagakamk. Am ani ep ha neith hegam mat e ko'ij no pi am ahgachug hegai Jiosh ha'ichu ahga mo g Jesus am ha tashogith. Ihtham at pi ab hu sha'i has i el g s-ta Ehbithamakam ni'is g cheposigajkaj ab hu e chechpos e-koka an o e-nohnhoi an. Jiosh at ab ha mah g ap'ethag mat ab wo i wuwha muhkig amjed k am wo i ha wanimedath g hemajkam wehmaj g Christ hemako mihl a'ahith ab. 5 Hegam mat wehpeg ab wo i wuwha muhkig amjed at wo si s-hehgigk ch wo si s-ap e tahtkkath ch pi am hu gahi ep wo wuwha g muhkig. Jiosh at hab wo ha juh mat d wo papalk ch d wo piongajk g alithag. Kut heg wehm am wo i ha wanim g hemajkam hemako mihl a'ahith ab. (5) T wabshaba pi koi ab hu uhpam wo i e chechegito hegam mo pi mahch g Jiosh am hugkam mat wo huhug g hemako mihl a'ahithag. 7 Am i thahm g hemako mihl a'ahithag, mtki ab wo i wuhshath g ge Jiawul amjed mam am kuhpch. 8 Kutki am wo him k am ep wo ha iattogi g hemajkam an wehsko jewed thahm. Ihtham hemajkam at ha'i hab wo e a'agath Gog O'othham ch ha'i hab wo e a'agath Magog O'othham. Kut g Jiawul am wo i ha hemapai mat hab wo juh g cheggiadag. Kutki hab sha masma wo mu'ijk mo g o'od an shuhthagi bahsho 9 ch am wehskojed wo i e hemapath k an wo e keshwua ha wehgaj hegam mo d Jiosh hemajkamga ch am kih Jerusalem ch ed. T oi wa g mehi ab wo i hud thahm kahchim t amjed k wo ha hugio. 10 Mt amjed g ge Jiawul am tha'ich heg eda kahchki mo chum hekith meihim. Tho ihtha mei kahchki mamt am eda heki hu ha nehnich g s-ta Ehbithamakam ch s-chu Iattomkam Ha'ichu i Tashogiththam. Ihtham atki ab wo nako g s-ko'ok tash oitham ch chuhug oitham am i amjed ch chum hekith. 11 Ni hahawa ep neith mo g si ge'e s-toa kownal thaikud am kehk. K ab thaha g Jiosh. T g jewed ch thahm kahchim heb hu wohp ab amjed k pi hekith ep sha'i e neith. 12 Kuni ha neith hegam mo d ko'i ch d nahnko i mahs hemajkam. Ihtham o am gegok wui g kownal thaikud. Kut i e kuhkpi'o hegam o'ohana mo an o'ohadag g pi ap ha-chu'ichig. T am ep i e kuhpi'o hegai o'ohana mo am eda o'ohadag g e tho'ibiakam ha-chechgig. T g Jiosh ha lothai g ko'i. 13 Wehsijj at i wuwha ab ge shuhthagi t amjed ch ab hiha'ini t amjed an wehsko jewed thahm. T g Jiosh ha lothai heg hekaj mo haschu i pi ap has junihim. 14 Pi o an hu o'ohanas g ha-chechgig heg eda o'ohana mo an o'ohanas g e tho'ibiakam ha-chechgig. Kumt hekaj am ha shul heg eda kahchki mo meihim. Ith at hab wo masmak mo g gokkokam muhkig. T g Jiosh am wo hugio g muhkig k am ep wo hugio amai mo am ha'ichug g ko'i.

Revelation 21

1 Ni hahawa ep neith g si wechij thahm kahchim ch si wechij jewed. Hegai wehpeg thahm kahchim ch wehpeg jewed at wa heb hu hihi. T g ge shuhthagi am wabsh i huhug. 2 K ab i hudunihim g si Hekia S-ap'ekam Kihhim thahm kahchim t amjed. Ith atki g Jiosh nahto. K hab e a'aga Wechij Jerusalem ch si e nahtokch am wehhejed g Jiosh alithag hab sha masma mat g wo kuntam wo si e nahtokch mat wo nam g wo e-kunta. 3 Ab o thaha g Jiosh e-kownal thaikud ab. Kuni kah mo hab kaij, “Ithani at g ni-kihthag ia i hud ha wui g hemajkam. Am ant ha wehm wo kihkath. Kut d wo ni-hemajkamgak. Am ant wo ha wehmajk ch d wo ha-Jioshgak 4 ch ab wo i thagi'o g ha-oh'og ab ha-wuhpui ab. Pi at hedai haha wo muh o pi ap wo e tahtkkath o wo shoakath o wo tahtkkath g s-ko'ok. Im at hu hab i e juh g hekiukam.” 5 Neh, bo kaij g Jiosh ch amjed hab ep kaij, “Ithani ant am hahawa si wechij nahto wehs ha'ichu,” ch hab ep kaij ab ni-wui, “An g o'ohan ihtha wohokam mani m-ahgith. Wehs hemajkam at ab wo chum s-wohoch,” 6 K hab ep kaij, “E at nahto wehs ha'ichu. Ahni ani d alpha ch d omega. Ith o hab d ahga mani si wehpeg ia ha'ichug ch si ha oithch ia wabsh wo kia ha'ichugk. Nt wo ha mah g pi ha huhugetham thoakag hegam matp hedai wo tatchua hab masma mamt wo ha wasibi g tonkkoi g shuhthagi. 7 Ab ant ni-wui wo i ha gawulkai mat d wo ni-a'aligak hegam mat hedai i gewito g pi ap'ekam. 8 T wabshaba wo e nehnich mei kahchki ch ed g s-chu ehbithkam ch pi wohochuththam ch hegam mo loligog ch chum e u'uwichuth o chum e chechojchuth ch ha mu'adkam ch totonto ch s-chu hihoinkam ch s-chu i'attomkam ch hegam mo wabsh g o'othham nahtoi ha jijoshchuth. Hegai mei kahchki o d gokkokam muhkig.” 9 Hema hegam wewa'ak anghil mat am u'apa g si oithchkam sho'igthag at am jiwia ni-wui k hab kaij. “Ab g i hihm. Nt am wo m-chehgi hegam mo d hohnigaj hegai mo kahwalkaj ab e chehgithch.” 10 T g Hekia S-ap'ekam Gewkthag ab si i ni-wehmt. T g anghil am i ni-be k am ni-u'apa si uhgk tho'ag thahm k ab i ni-chehgi hegai hekia s-ap'ekam kihhim mo d Wechij Jerusalem. Ith o ab hudunihim thahm kahchim t amjed ch d Jiosh nahtoi 11 ch si tonod g Jiosh tonligkaj hab masma mo hegai si s-kehg gai tondam hothai mo hab e a'aga jasper. 12 An kihhim wehgaj o hab chu'ig g uhgk kolhai. K ith eda hab chu'ig g gamai gohk kihkijeg. K g gamai gohk anghil ab ha nuhkuth g kihkijeg. An o kihkijeg t an hab chu'ig g ha-chechgig hegam gamai gohk thakam Tutuligo hemajkam. 13 Waik kihkijeg o hab chu'ig an si'alig tahgio ch waik an juhpin tahgio ch waik an wakolim tahgio ch waik an hudunig tahgio. 14 K ihtha kihhim kolhaidag o an hab junis gamai gohk hohothai thahm. K ihtham ha ab an o'ohadag g ha-chechgig hegam gamai gohk chuhchaij hegai mo kahwalkaj ab e chehgithch. 15 Hegai anghil mo ab ni-wui neok o g ohla kuintakud uhs an u'ukch mat hekaj wo kuint g kihhim ch g kolhaidaj ch g kihkijeg. 16 K ihtha kihhim si s-ap s-chuhchpul ch ha'as uhgk ch ha'as chewaj mo he'es i s-tadani. T g anghil am kuint. K d mihl hetasp siant (1500) mihya. 17 T g anghil am ep kuint g kolhaidag. K d gohk siant gamai chuhthp (216) tad uhgk. 18 K hegai kolhai heg hekaj hab junis hothai mo hab e a'aga jasper. K g kihhim d wabsh gai tondam ohla. 19 K g shondaj ith hekaj hab junis nahnko mahs si s-kehg hohothai. Wehpeg shondaj o d hegai hothai mo hab e a'aga jasper. K g gokkokam d hegai mo hab e a'aga sapphire. K g waikkokam d hegai mo hab e a'aga agate. K g gi'ikkokam d hegai mo hab e a'aga emerald. 20 K g hetaspokam d hegai mo hab e a'aga onyx. K g chuhthpokam d hegai mo hab e a'aga carnelian. K g wewa'akkokam s-oam ch d hegai mo hab e a'aga quartz. K g gigi'ikkokam d hegai mo ab e a'aga beryl. K g humuktokam d hegai mo hab e a'aga topaz. K g wehst-mahmhokam d hegai mo hab e a'aga chalcedony. K g gamai hemako d hegai mo hab e a'aga turquoise. K g gamai gokkokam d hegai mo hab e a'aga amethyst. 21 K g gamai gohk kihkijeg d hegai hothai mo hab e a'aga pearl. Wehsijj hegam kihkijeg o hab junis ab hehemako pearl amjed. K g kahya am kihhim ch ed d wabsh ohla ch am wabsh gai tonod hab masma mo g mi-lihtha. 22 Pi ani sha'i hema neith g cheopi. Wehs g kihhim o d wabsh ge cheopi no pi an eda kihthag g Jiosh ch hegai mo kahwalkaj ab e chehgithch. 23 Pi o an hu ha'ichug g tash ch mashath. Jiosh o an wehsko tonlithch g kihhim heg wehm mo kahwalkaj ab e chehgithch g si ge'e e-gewkthagkaj. 24 Hemajkam am jewed thahm at s-ap am wo hihimath ith hekaj tonlig. T g kokownal am wo u'apa g e-kakaisthag. 25 T g kihkijeg chum hekith ab wabsh wo kuhkpi'okask. Pi at hekith wo s-chuchkagath. T heg hekaj pi ab hu wo i e kuhkp g kihkijeg. 26 Si s-has haha'ichu am wehs jejewed ch ed at am wo u'apa g e-kakaisthag. 27 T wabshaba pi am hu wo hiwgithask g s-uam ha'ichu. T pi ab hu wo i wahp g s-chu i'attomkam ch hegam mo hab junihim g s-ta edam ha'ichu. Hegam at am wo wa'i wahpkath heg eda kihhim mo g ha-chechgig an o'ohadag heg eda mo g e tho'ibiakam ha-chechgig an o'ohadag. Ith o d o'ohanaj hegai mo kahwalkaj ab e chehgithch.

Revelation 22

1 T am hahawa ni-chehgi g akimel hegai anghil. K ith ab tha'iwuni heg amjed kownal thaikud mo g Jiosh an thaha heg wehm mo kahwalkaj ab e chehgithch. K hab d ahga ihtha mo g Jiosh ab t-mahkch g pi ha huhugetham thoakag. Shuhthagi o si tohonnod hab masma mo g tondam hothai 2 ch an si eda med g kahya. K g thoakag uhs ge a'aijed shohshon ch an a'ai kehk ihtha akimel ch an babhe hemho wehs mashath ab. K g hahhagaj d ha-kulaniga g nahnko mahs hemajkam wehsko jewed thahm. 3 K pi an hu ha'ichug hegai mo pi hohho'ithachuth g Jiosh. Am at wo ha'ichugk g Jiosh kownal thaikud. Kut an wo thakath hegai mo kahwalkaj ab e chehgithch. T g piongaj ab wo si has elithath 4 ch wo neithath g wuhioshaj. T g chehgigaj an wo o'ohadagk ha-koka ab. 5 Pi at thahm ep wo s-chuhugamk nat pi g tonlig a'ai wo wuhshanith ab amjed g Jiosh. Kut pi an hu wo ha'ichugk g tash. T pi wo e tatchuath g lalampa. T g Jiosh hemajkamga am d wo kokownalk chum hekith. 6 K hab hahawa ep kaij g anghil ab ni-wui, “Ihtham ha'ichu ahga o woho. Kut wehsijj ab wo chum s-wohoch. Jiosh o wa ab ha mahkch g ha'ichu i e-tashogiththam g Hekia S-ap'ekam Gewkthag mat am wo ha'ichu ha chehgi ch am ep ni-chehani mant am wo em-chehgi hegai mat haschu has wo e juh s-hohtam.” Neh, bo kaij g anghil. 7 K g Jesus hab kaij, “Ab g wo i ni-kaiham. S-hohtam ant wo jiwia. Jiosh at wo wa s-ha ho'ige'el hegam mat ab wo s-wohog el wehs ihtha gm hu ba'ich ha'ichu ahga mo in o'ohanas.” Neh, bo kaij. 8 Kuni ahni John wehs kah ch wehs neith ihtha mani in o'ohan ith eda o'ohana. Am o wa kehk hegai anghil mo ab ni-wui neok. Nt ab i gei wecho k ab chum si has elith am i neithok k kaiok ihtha wehs. 9 K wabshaba hab kaij ab ni-wui, “Pi g am hab e juhni. Thani wabsh em-wehm pion ahpim Jiosh ha'ichu i tashogiththam ch wehs hegam mo ab s-wohog elith mo haschu an o'ohadag ith eda o'ohana. Ab g has i elith g Jiosh.” 10 K hab ep kaij ab ni-wui, “E o aihim mat wehs am hab wo e juh ihtha map neith ch kah ch an o'ohan. Pi g am ehsto. 11 “Pi at hedai wo sha'i e nako mas am gawul wo e juh mat hekith wo e ai ihtha. Hegam mo d p ap'ekam at d wabsh wo pi ap'ekamk. T hegam mo d s-ap'ekam am hab wabsh wo i chu'igkath ch am hab wo wa junihith g s-ap'ekam.” 12 K g Jesus hab kaij, “Ab g wo ni-kaiham. S-hohtam ant wo jiwia k wo u'ath g ni-mahkigdag mant ab wo i ha mahkhi ha'as mat hedai he'es ha'ichu hab i juh. 13 Ahni ani d alpha ch d omega. Ith o hab d ahga ‘si wehpegkam ch si oithchkam’ ch hab d ep ahga ‘i shonkam ch i kuhgkam.’ ” 14 Neh, no hig pi woho mat wo si s-ap e tahtkk ch pi wo si e el hegai mat g wehschugaj s-kehg wo wakonask, Pegih, mt hab wa masma wo si s-ap e tahtkk matp gm hu hab wo i e juh g pi ap em-chu'ichig. Jiosh at ab wo em-mah g ap'ethag mamt ab wo ko'ath g bahithaj hegai thoakag uhs ch ab wo i wahp kolhai kihjeg t ab heg eda Wechij Jerusalem. Kumt wo si s-hehgigk. 15 K wabshaba am jeg ed hab chu'ig hegam mo s-uam ha'ichu hab wua ch hegam mo hab wua g hihoina ch s-totontomkam ch ha mu'akam ch hegam mo jijoshchuth g hemajkam ha'ichu ha-nahtoi ch hegam mo s-hohho'ith g ha'ichu iattogi ch ha'ichu ha iattogith. 16 K hab kaij g Jesus, “Ahni ant am cheha g ni-anghiliga mat am wo em-ahgi ihtha wehs ahpim mam am kawod e nanmek ch ab has ni-elith. Ahni ani d Davidbad amjedkam ch wepo masma mo g si s-mahs si'alig hu'u.” 17 Hekia S-ap'ekam Gewkthag o ab i ha waith g hemajkam am gai ha wuhshanim hegam mo ab si has elith g Jesus Christ, Ihtham o hab kaij, “Ab g wo beh'i g pi ha huhugetham thoakag.” Kut wehsijj hegam mat ab wo kah ihtha at hab wa'ap wo chei, “Ab g wo beh'i g pi ha huhugetham thoakag.” Pegih, ab g wo beh'i wehsijj ahpim mam hedai i tatchua. Bo wa masma am em-wehhejed mo g shonkam shuhthagi am ha wehhejed g tonkkoi. 18 S-e g wo nen'oithk ahpim mamt ab wo i kah mamt pi am hu gawul wo juh ihtha gm hu ba'ich ha'ichu ahga mo in hab chu'ig ith eda o'ohana. Mu'i o ha'ichu in o'ohadag g sho'igthag. Kut ith ab wo i wehnath g Jiosh g s-ko'ok em-namkithadag mamtp ab ha'ichu wo i wehnath hegai mo in o'ohadag. 19 K in o'ohadag mach ap'ethag matt am wo i wahp Si Hekia S-ap'ekam Kihhim ed k wo huh g bahithag hegai uhs mo ab t-chehgithch g pi ha huhugetham thoakag. T wabshaba g Jiosh gm hu hab wo i juh g em-ap'ethag mamtp ahpim ha'ichu gm hu hab wo i juh ith amjed o'ohana. 20 Hegai mo am s-mahch ch ahg wehs ihtha o hab kaij, “Woho o wa. S-hohtam ant ab wo i hih.” Pegih oi g. Ab g i hihm, t-kownalig Jesus. 21 T wo wa s-em-ho'ige'el g t-kownalig Jesus k am wo em-wehmajk.